📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཁུདྡཀནིཀཱཡེ

པཊིསམྦྷིདཱམགྒ-ཨཊྛཀཐཱ

(པཋམོ བྷཱགོ)

གནྠཱརམྦྷཀཐཱ

ཡོ ¶ ¶ ¶ སབྦལོཀཱཏིགསབྦསོབྷཱ-

ཡུཏྟེཧི སབྦེཧི གུཎེཧི ཡུཏྟོ;

དོསེཧི སབྦེཧི སཝཱསནེཧི,

མུཏྟོ ཝིམུཏྟིཾ པརམཉྩ དཱཏཱ.

ནིཙྩཾ དཡཱཙནྡནསཱིཏཙིཏྟོ,

པཉྙཱརཝིཛྫོཏིཏསབྦནེཡྻོ;

སབྦེསུ བྷཱུཏེསུ ཏམགྒབྷཱུཏཾ,

བྷཱུཏཏྠནཱཐཾ སིརསཱ ནམིཏྭཱ.

ཡོ ¶ སབྦབྷཱུཏེསུ མུནཱིཝ ཨགྒོ, ཨནནྟསངྑེསུ ཛིནཏྟཛེསུ;

ཨཧཱུ དཡཱཉཱཎགུཎེཧི སཏྠུལཱིལཱནུཀཱརཱི ཛནཏཱཧིཏེསུ.

ཏཾ སཱརིཔུཏྟཾ མུནིརཱཛཔུཏྟཾ, ཐེརཾ ཐིརཱནེཀགུཎཱབྷིརཱམཾ;

པཉྙཱཔབྷཱཝུགྒཏཙཱརུཀིཏྟིཾ, སུསནྟཝུཏྟིཉྩ ཨཐོ ནམིཏྭཱ.

སདྡྷམྨཙཀྐཱནུཔཝཏྟཀེན ¶ , སདྡྷམྨསེནཱཔཏིསཱཝཀེན;

སུཏྟེསུ ཝུཏྟེསུ ཏཐཱགཏེན, བྷཱུཏཏྠཝེདིཏྟམུཔཱགཏེན.

ཡོ ¶ བྷཱསིཏོ བྷཱསིཏཀོཝིདེན, དྷམྨཔྤདཱིཔུཛྫལནཱཡཀེན;

པཱཋོ ཝིསིཊྛོ པཊིསམྦྷིདཱནཾ, མགྒོཏི ཏནྣཱམཝིསེསིཏོ ཙ.

ཝིཙིཏྟནཱནཏྟནཡོཔགཱུལ༹ྷོ, གམྦྷཱིརཔཉྙེཧི སདཱཝགཱལ༹ྷོ;

ཨཏྟཏྠལོཀཏྠཔརཱཡཎེཧི, སཾསེཝནཱིཡོ སུཛནེཧི ནིཙྩཾ.

ཉཱཎཔྤབྷེདཱཝཧནསྶ ཏསྶ, ཡོགཱིཧིནེཀེཧི ནིསེཝིཏསྶ;

ཨཏྠཾ ཨཔུབྦཾ ཨནུཝཎྞཡནྟོ, སུཏྟཉྩ ཡུཏྟིཉྩ ཨནུཀྐམནྟོ.

ཨཝོཀྐམནྟོ སམཡཱ སཀཱ ཙ, ཨནཱམསནྟོ སམཡཾ པརཉྩ;

པུབྦོཔདེསཊྛཀཐཱནཡཉྩ, ཡཐཱནུརཱུཔཾ ཨུཔསཾཧརནྟོ.

ཝཀྑཱམཧཾ ཨཊྛཀཐཾ ཛནསྶ, ཧིཏཱཡ སདྡྷམྨཙིརཊྛིཏཏྠཾ;

སཀྐཙྩ སདྡྷམྨཔཀཱསིནིཾ ཏཾ, སུཎཱཐ དྷཱརེཐ ཙ སཱདྷུ སནྟོཏི.

ཏཏྠ པཊིསམྦྷིདཱནཾ མགྒོཏི ཏནྣཱམཝིསེསིཏོ ཙཱཏི ཝུཏྟཏྟཱ པཊིསམྦྷིདཱམགྒསྶ པཊིསམྦྷིདཱམགྒཏཱ ཏཱཝ ཝཏྟབྦཱ. ཙཏསྶོ ཧི པཊིསམྦྷིདཱ – ཨཏྠཔཊིསམྦྷིདཱ, དྷམྨཔཊིསམྦྷིདཱ, ནིརུཏྟིཔཊིསམྦྷིདཱ, པཊིབྷཱནཔཊིསམྦྷིདཱཏི. ཏཱསཾ པཊིསམྦྷིདཱནཾ མགྒོ ཨདྷིགམཱུཔཱཡོཏི པཊིསམྦྷིདཱམགྒོ, པཊིསམྦྷིདཱཔཊིལཱབྷཧེཏཱུཏི ཝུཏྟཾ ཧོཏི. ཀཐམཡཾ ཏཱསཾ མགྒོ ཧོཏཱིཏི ཙེ? པབྷེདཏོ དེསིཏཱཡ དེསནཱཡ པཊིསམྦྷིདཱཉཱཎཱཝཧཏྟཱ. ནཱནཱབྷེདབྷིནྣཱནཉྷི ¶ ¶ དྷམྨཱནཾ ནཱནཱབྷེདབྷིནྣཱ དེསནཱ སོཏཱུནཾ ཨརིཡཔུགྒལཱནཾ པཊིསམྦྷིདཱཉཱཎཔྤབྷེདཉྩ ¶ སཉྫནེཏི, པུཐུཛྫནཱནཾ ཨཱཡཏིཾ པཊིསམྦྷིདཱཉཱཎཔྤབྷེདཱཡ ཙ པཙྩཡོ ཧོཏི. ཝུཏྟཉྩ – ‘‘པབྷེདཏོ ཧི དེསནཱ གྷནཝིནིབྦྷོགཔཊིསམྦྷིདཱཉཱཎཱཝཧཱ ཧོཏཱི’’ཏི (དྷ. ས. ཨཊྛ. ༡.ཀཱམཱཝཙརཀུསལཔདབྷཱཛནཱིཡ). ཨཡཉྩ ནཱནཱབྷེདབྷིནྣཱ དེསནཱ, ཏེནསྶཱ པཊིསམྦྷིདཱནཾ མགྒཏྟསིདྡྷི.

ཏཏྠ ཙཏསྶོཏི གཎནཔརིཙྪེདོ. པཊིསམྦྷིདཱཏི པབྷེདཱ. ‘‘ཨཏྠེ ཉཱཎཾ ཨཏྠཔཊིསམྦྷིདཱ, དྷམྨེ ཉཱཎཾ དྷམྨཔཊིསམྦྷིདཱ, ཏཏྲ དྷམྨནིརུཏྟཱབྷིལཱཔེ ཉཱཎཾ ནིརུཏྟིཔཊིསམྦྷིདཱ, ཉཱཎེསུ ཉཱཎཾ པཊིབྷཱནཔཊིསམྦྷིདཱ’’ཏི (ཝིབྷ. ༧༡༨) ཝུཏྟཏྟཱ ན ཨཉྙསྶ ཀསྶཙི པབྷེདཱ, ཉཱཎསྶེཝ པབྷེདཱ. ཏསྨཱ ‘‘ཙཏསྶོ པཊིསམྦྷིདཱ’’ཏི ཙཏྟཱརོ ཉཱཎཔྤབྷེདཱཏི ཨཏྠོ. ཨཏྠཔྤབྷེདསྶ སལླཀྑཎཝིབྷཱཝནཝཝཏྠཱནཀརཎསམཏྠཾ ཨཏྠེ པབྷེདགཏཾ ཉཱཎཾ ཨཏྠཔཊིསམྦྷིདཱ. དྷམྨཔྤབྷེདསྶ སལླཀྑཎཝིབྷཱཝནཝཝཏྠཱནཀརཎསམཏྠཾ དྷམྨེ པབྷེདགཏཾ ཉཱཎཾ དྷམྨཔཊིསམྦྷིདཱ. ནིརུཏྟིཔྤབྷེདསྶ སལླཀྑཎཝིབྷཱཝནཝཝཏྠཱནཀརཎསམཏྠཾ ནིརུཏྟཱབྷིལཱཔེ པབྷེདགཏཾ ཉཱཎཾ ནིརུཏྟིཔཊིསམྦྷིདཱ. པཊིབྷཱནཔྤབྷེདསྶ སལླཀྑཎཝིབྷཱཝནཝཝཏྠཱནཀརཎསམཏྠཾ པཊིབྷཱནེ པབྷེདགཏཾ ཉཱཎཾ པཊིབྷཱནཔཊིསམྦྷིདཱ.

ཏཏྠ ཨཏྠོཏི སངྑེཔཏོ ཧེཏུཕལཾ. ཏཉྷི ཡསྨཱ ཧེཏུཨནུསཱརེན ཨརཱིཡཏི ཨདྷིགམཱིཡཏི པཱཔུཎཱིཡཏི, ཏསྨཱ ཨཏྠོཏི ཝུཙྩཏི. པབྷེདཏོ པན ཡཾཀིཉྩི པཙྩཡསམུཔྤནྣཾ, ནིབྦཱནཾ, བྷཱསིཏཏྠོ, ཝིཔཱཀོ, ཀིརིཡཱཏི ཨིམེ པཉྩ དྷམྨཱ ཨཏྠོཏི ཝེདིཏབྦཱ. ཏཾ ཨཏྠཾ པཙྩཝེཀྑནྟསྶ ཏསྨིཾ ཨཏྠེ པབྷེདགཏཾ ཉཱཎཾ ཨཏྠཔཊིསམྦྷིདཱ.

དྷམྨོཏི སངྑེཔཏོ པཙྩཡོ. སོ ཧི ཡསྨཱ ཏཾ ཏཾ ཝིདཧཏི པཝཏྟེཏི ཙེཝ པཱཔེཏི ཙ, ཏསྨཱ དྷམྨོཏི ཝུཙྩཏི. པབྷེདཏོ པན ཡོ ཀོཙི ཕལནིབྦཏྟཀོ ཧེཏུ, ཨརིཡམགྒོ, བྷཱསིཏཾ, ཀུསལཾ, ཨཀུསལནྟི ཨིམེ པཉྩ དྷམྨཱ དྷམྨོཏི ¶ ཝེདིཏབྦཱ. ཏཾ དྷམྨཾ པཙྩཝེཀྑནྟསྶ ཏསྨིཾ དྷམྨེ པབྷེདགཏཾ ཉཱཎཾ དྷམྨཔཊིསམྦྷིདཱ. ཨཡམེཝ ཧི ཨཏྠོ ཨབྷིདྷམྨེ (ཝིབྷ. ༧༡༩-༧༢༥) –

‘‘དུཀྑེ ཉཱཎཾ ཨཏྠཔཊིསམྦྷིདཱ, དུཀྑསམུདཡེ ཉཱཎཾ དྷམྨཔཊིསམྦྷིདཱ, དུཀྑནིརོདྷེ ཉཱཎཾ ཨཏྠཔཊིསམྦྷིདཱ, དུཀྑནིརོདྷགཱམིནིཡཱ པཊིཔདཱཡ ཉཱཎཾ ¶ དྷམྨཔཊིསམྦྷིདཱ. ཧེཏུམྷི ཉཱཎཾ དྷམྨཔཊིསམྦྷིདཱ, ཧེཏུཕལེ ཉཱཎཾ ཨཏྠཔཊིསམྦྷིདཱ.

‘‘ཡེ ¶ དྷམྨཱ ཛཱཏཱ བྷཱུཏཱ སཉྫཱཏཱ ནིབྦཏྟཱ ཨབྷིནིབྦཏྟཱ པཱཏུབྷཱུཏཱ, ཨིམེསུ དྷམྨེསུ ཉཱཎཾ ཨཏྠཔཊིསམྦྷིདཱ, ཡམྷཱ དྷམྨཱ ཏེ དྷམྨཱ ཛཱཏཱ བྷཱུཏཱ སཉྫཱཏཱ ནིབྦཏྟཱ ཨབྷིནིབྦཏྟཱ པཱཏུབྷཱུཏཱ, ཏེསུ དྷམྨེསུ ཉཱཎཾ དྷམྨཔཊིསམྦྷིདཱ.

‘‘ཛརཱམརཎེ ཉཱཎཾ ཨཏྠཔཊིསམྦྷིདཱ, ཛརཱམརཎསམུདཡེ ཉཱཎཾ དྷམྨཔཊིསམྦྷིདཱ, ཛརཱམརཎནིརོདྷེ ཉཱཎཾ ཨཏྠཔཊིསམྦྷིདཱ, ཛརཱམརཎནིརོདྷགཱམིནིཡཱ པཊིཔདཱཡ ཉཱཎཾ དྷམྨཔཊིསམྦྷིདཱ.

‘‘ཛཱཏིཡཱ ཉཱཎཾ…པེ… བྷཝེ ཉཱཎཾ…པེ… ཨུཔཱདཱནེ ཉཱཎཾ…པེ… ཏཎྷཱཡ ཉཱཎཾ…པེ… ཝེདནཱཡ ཉཱཎཾ…པེ… ཕསྶེ ཉཱཎཾ….པེ… སལཱ༹ཡཏནེ ཉཱཎཾ….པེ… ནཱམརཱུཔེ ཉཱཎཾ…པེ… ཝིཉྙཱཎེ ཉཱཎཾ…པེ… སངྑཱརེསུ ཉཱཎཾ ཨཏྠཔཊིསམྦྷིདཱ, སངྑཱརསམུདཡེ ཉཱཎཾ དྷམྨཔཊིསམྦྷིདཱ, སངྑཱརནིརོདྷེ ཉཱཎཾ ཨཏྠཔཊིསམྦྷིདཱ, སངྑཱརནིརོདྷགཱམིནིཡཱ པཊིཔདཱཡ ཉཱཎཾ དྷམྨཔཊིསམྦྷིདཱ.

‘‘ཨིདྷ བྷིཀྑུ དྷམྨཾ ཛཱནཱཏི – སུཏྟཾ གེཡྻཾ ཝེཡྻཱཀརཎཾ གཱཐཾ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླཾ. ཨཡཾ ཝུཙྩཏི དྷམྨཔཊིསམྦྷིདཱ. སོ ཏསྶ ཏསྶེཝ བྷཱསིཏསྶ ཨཏྠཾ ཛཱནཱཏི ‘ཨཡཾ ཨིམསྶ བྷཱསིཏསྶ ཨཏྠོ, ཨཡཾ ཨིམསྶ བྷཱསིཏསྶ ཨཏྠོ’ཏི. ཨཡཾ ཝུཙྩཏི ཨཏྠཔཊིསམྦྷིདཱ.

‘‘ཀཏམེ དྷམྨཱ ཀུསལཱ? ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི སོམནསྶསཧགཏཾ ཉཱཎསམྤཡུཏྟཾ རཱུཔཱརམྨཎཾ ཝཱ…པེ… དྷམྨཱརམྨཎཾ ཝཱ ཡཾ ཡཾ ཝཱ པནཱརབྦྷ ཏསྨིཾ སམཡེ ཕསྶོ ཧོཏི…པེ… ཨཝིཀྑེཔོ ཧོཏི. ཨིམེ དྷམྨཱ ཀུསལཱ. ཨིམེསུ ¶ དྷམྨེསུ ཉཱཎཾ དྷམྨཔཊིསམྦྷིདཱ, ཏེསཾ ཝིཔཱཀེ ཉཱཎཾ ཨཏྠཔཊིསམྦྷིདཱ’’ཏིཨཱདིནཱ ནཡེན ཝིབྷཛིཏྭཱ ཝིབྷཛིཏྭཱ དསྶིཏོ.

ཏཏྲ དྷམྨནིརུཏྟཱབྷིལཱཔེ ཉཱཎནྟི ཏསྨིཾ ཨཏྠེ ཙ དྷམྨེ ཙ ཡཱ སབྷཱཝནིརུཏྟི ཨབྱབྷིཙཱརིཝོཧཱརོ, ཏསྶ ཨབྷིལཱཔེ བྷཱསནེ ཨུདཱིརཎེ ¶ ཏཾ ལཔིཏཾ བྷཱསིཏཾ ཨུདཱིརིཏཾ སབྷཱཝནིརུཏྟིསདྡཾ ཨཱརམྨཎཾ ཀཏྭཱ པཙྩཝེཀྑནྟསྶ ཏསྨིཾ སབྷཱཝནིརུཏྟཱབྷིལཱཔེ ‘‘ཨཡཾ སབྷཱཝནིརུཏྟི, ཨཡཾ ན སབྷཱཝནིརུཏྟཱི’’ཏི ཨེཝཾ ཏསྶཱ དྷམྨནིརུཏྟིསཉྙིཏཱཡ སབྷཱཝནིརུཏྟིཡཱ མཱགདྷིཀཱཡ སབྦསཏྟཱནཾ མཱུལབྷཱསཱཡ པབྷེདགཏཾ ཉཱཎཾ ནིརུཏྟིཔཊིསམྦྷིདཱ. ཨེཝམཡཾ ¶ ནིརུཏྟིཔཊིསམྦྷིདཱ སདྡཱརམྨཎཱ ནཱམ ཛཱཏཱ, ན པཉྙཏྟིཨཱརམྨཎཱ. ཀསྨཱ? ཡསྨཱ སདྡཾ སུཏྭཱ ‘‘ཨཡཾ སབྷཱཝནིརུཏྟི, ཨཡཾ ན སབྷཱཝནིརུཏྟཱི’’ཏི ཛཱནཱཏི. པཊིསམྦྷིདཱཔྤཏྟོ ཧི ‘‘ཕསྶོ’’ཏི ཝུཏྟེ ‘‘ཨཡཾ སབྷཱཝནིརུཏྟཱི’’ཏི ཛཱནཱཏི, ‘‘ཕསྶཱ’’ཏི ཝཱ ‘‘ཕསྶ’’ནྟི ཝཱ ཝུཏྟེ པན ‘‘ཨཡཾ ན སབྷཱཝནིརུཏྟཱི’’ཏི ཛཱནཱཏི. ཝེདནཱདཱིསུཔི ཨེསེཝ ནཡོ. ཨཉྙཾ པནེས ནཱམཱཁྱཱཏཨུཔསགྒནིཔཱཏབྱཉྫནསདྡཾ ཛཱནཱཏི ན ཛཱནཱཏཱིཏི? ཡདགྒེན སདྡཾ སུཏྭཱ ‘‘ཨཡཾ སབྷཱཝནིརུཏྟི, ཨཡཾ ན སབྷཱཝནིརུཏྟཱི’’ཏི ཛཱནཱཏི, ཏདགྒེན ཏམྤི ཛཱནིསྶཏི. ཏཾ པན ནཡིདཾ པཊིསམྦྷིདཱཀིཙྩནྟི པཊིཀྑིཔིཏྭཱ ‘‘བྷཱསཾ ནཱམ སཏྟཱ ཨུགྒཎྷནྟཱི’’ཏི ཝཏྭཱ ཨིདཾ ཀཐིཏཾ – མཱཏཱཔིཏརོ ཧི དཧརཀཱལེ ཀུམཱརཀེ མཉྩེ ཝཱ པཱིཋེ ཝཱ ནིཔཛྫཱཔེཏྭཱ ཏཾ ཏཾ ཀཐཡམཱནཱ ཏཱནི ཏཱནི ཀིཙྩཱནི ཀརོནྟི, དཱརཀཱ ཏེསཾ ཏཾ ཏཾ བྷཱསཾ ཝཝཏྠཱཔེནྟི ‘‘ཨིམིནཱ ཨིདཾ ཝུཏྟཾ, ཨིམིནཱ ཨིདཾ ཝུཏྟ’’ནྟི. གཙྪནྟེ གཙྪནྟེ ཀཱལེ སབྦམྤི བྷཱསཾ ཛཱནནྟི. མཱཏཱ དམིལཱི༹, པིཏཱ ཨནྡྷཀོ. ཏེསཾ ཛཱཏདཱརཀོ སཙེ མཱཏུ ཀཐཾ པཋམཾ སུཎཱཏི ¶ , དམིལ༹བྷཱསཾ བྷཱསིསྶཏི. སཙེ པིཏུ ཀཐཾ པཋམཾ སུཎཱཏི, ཨནྡྷཀབྷཱསཾ བྷཱསིསྶཏི. ཨུབྷིནྣམྤི པན ཀཐཾ ཨསུཎནྟོ མཱགདྷིཀབྷཱསཾ བྷཱསིསྶཏི.

ཡོཔི ཨགཱམཀེ མཧཱཨརཉྙེ ནིབྦཏྟོ, ཏཏྠ ཨཉྙོ ཀཐེནྟོ ནཱམ ནཏྠི, སོཔི ཨཏྟནོ དྷམྨཏཱཡ ཝཙནཾ སམུཊྛཱཔེནྟོ མཱགདྷིཀབྷཱསམེཝ བྷཱསིསྶཏི. ནིརཡེ ཏིརཙྪཱནཡོནིཡཾ པེཏྟིཝིསཡེ མནུསྶལོཀེ དེཝལོཀེཏི སབྦཏྠ མཱགདྷིཀབྷཱསཱཝ ཨུསྶནྣཱ. ཏཏྠ སེསཱ ཨོཊྚཀིརཱཏཨནྡྷཀཡོནཀདམིལ༹བྷཱསཱདིཀཱ བྷཱསཱ པརིཝཏྟནྟི. ཨཡམེཝེཀཱ ཡཐཱབྷུཙྩབྲཧྨཝོཧཱརཨརིཡཝོཧཱརསངྑཱཏཱ མཱགདྷིཀབྷཱསཱ ན པརིཝཏྟཏི. སམྨཱསམྦུདྡྷོཔི ཏེཔིཊཀཾ བུདྡྷཝཙནཾ ཏནྟིཾ ཨཱརོཔེནྟོ མཱགདྷིཀབྷཱསཱཡ ཨེཝ ཨཱརོཔེསི. ཀསྨཱ? ཨེཝཉྷི ཨཏྠཾ ཨཱཧརིཏུཾ སུཁཾ ཧོཏི. མཱགདྷིཀབྷཱསཱཡ ཧི ཏནྟིཾ ཨཱརུལ༹ྷསྶ བུདྡྷཝཙནསྶ པཊིསམྦྷིདཱཔྤཏྟཱནཾ སོཏཔཐཱགམནམེཝ པཔཉྩོ ¶ . སོཏེ པན སངྒྷཊྚིཏམཏྟེཡེཝ ནཡསཏེན ནཡསཧསྶེན ཨཏྠོ ཨུཔཊྛཱཏི. ཨཉྙཱཡ པན བྷཱསཱཡ ཏནྟིཾ ཨཱརུལ༹ྷཀཾ པོཐེཏྭཱ པོཐེཏྭཱ ཨུགྒཧེཏབྦཾ ཧོཏི. བཧུམྤི ཨུགྒཧེཏྭཱ པན པུཐུཛྫནསྶ པཊིསམྦྷིདཱཔྤཏྟི ནཱམ ནཏྠི, ཨརིཡསཱཝཀོ ནོ པཊིསམྦྷིདཱཔྤཏྟོ ནཱམ ནཏྠི.

ཉཱཎེསུ ཉཱཎནྟི སབྦཏྠཀཉཱཎམཱརམྨཎཾ ཀཏྭཱ པཙྩཝེཀྑནྟསྶ ཏསྨིཾ ཉཱཎེ པབྷེདགཏཾ ཉཱཎཾ, ཡཐཱཝུཏྟེསུ ཝཱ ཏེསུ ཏཱིསུ ཉཱཎེསུ གོཙརཀིཙྩཱདིཝསེན ཝིཏྠཱརགཏཾ ཉཱཎཾ པཊིབྷཱནཔཊིསམྦྷིདཱ.

ཨིམཱ པན ཙཏསྶོ པཊིསམྦྷིདཱ དྭཱིསུ ཋཱནེསུ པབྷེདཾ གཙྪནྟི, པཉྩཧི ཀཱརཎེཧི ཝིསདཱ ¶ ཧོནྟཱིཏི ཝེདིཏབྦཱ. ཀཏམེསུ དྭཱིསུ ཋཱནེསུ པབྷེདཾ གཙྪནྟི? སེཀྑབྷཱུམིཡཉྩ ཨསེཀྑབྷཱུམིཡཉྩ. ཏཏྠ སཱརིཔུཏྟཏྠེརསྶ མཧཱམོགྒལླཱནཏྠེརསྶ མཧཱཀསྶཔཏྠེརསྶ མཧཱཀཙྩཱཡནཏྠེརསྶ མཧཱཀོཊྛིཏཏྠེརསྶཱཏི ཨེཝམཱདཱིནཾ ཨསཱིཏིཡཱཔི མཧཱཐེརཱནཾ པཊིསམྦྷིདཱ ཨསེཀྑབྷཱུམིཡཾ པབྷེདཾ གཏཱ, ཨཱནནྡཏྠེརསྶ, ཙིཏྟསྶ གཧཔཏིནོ, དྷམྨིཀསྶ ཨུཔཱསཀསྶ, ཨུཔཱལིསྶ གཧཔཏིནོ, ཁུཛྫུཏྟརཱཡ ཨུཔཱསིཀཱཡཱཏིཨེཝམཱདཱིནཾ ¶ པཊིསམྦྷིདཱ སེཀྑབྷཱུམིཡཾ པབྷེདཾ གཏཱཏི ཨིམཱསུ དྭཱིསུ བྷཱུམཱིསུ པབྷེདཾ གཙྪནྟི.

ཀཏམེཧི པཉྩཧི ཀཱརཎེཧི ཝིསདཱ ཧོནྟི? ཨདྷིགམེན, པརིཡཏྟིཡཱ, སཝནེན, པརིཔུཙྪཱཡ, པུབྦཡོགེན. ཏཏྠ ཨདྷིགམོ ནཱམ ཨརཧཏྟཔྤཏྟི. ཨརཧཏྟཉྷི པཏྟསྶ པཊིསམྦྷིདཱ ཝིསདཱ ཧོནྟི. པརིཡཏྟི ནཱམ བུདྡྷཝཙནཾ. ཏཉྷི ཨུགྒཎྷནྟསྶ པཊིསམྦྷིདཱ ཝིསདཱ ཧོནྟི. སཝནཾ ནཱམ སདྡྷམྨསྶཝནཾ. སཀྐཙྩཾ ཨཊྛིཾ ཀཏྭཱ དྷམྨཾ སུཎནྟསྶ ཧི པཊིསམྦྷིདཱ ཝིསདཱ ཧོནྟི. པརིཔུཙྪཱ ནཱམ པཱལི༹ཨཊྛཀཐཱདཱིསུ གཎྛིཔདཨཏྠཔདཝིནིཙྪཡཀཐཱ. ཨུགྒཧིཏཔཱལི༹ཨཱདཱིསུ ཧི ཨཏྠཾ པརིཔུཙྪནྟསྶ པཊིསམྦྷིདཱ ཝིསདཱ ཧོནྟི. པུབྦཡོགོ ནཱམ པུབྦབུདྡྷཱནཾ སཱསནེ ཡོགཱཝཙརཏཱ གཏཔཙྩཱགཏིཀབྷཱཝེན ཡཱཝ ཨནུལོམགོཏྲབྷུསམཱིཔཾ པཏྟཝིཔསྶནཱནུཡོགོ. པུབྦཡོགཱཝཙརསྶ ཧི པཊིསམྦྷིདཱ ཝིསདཱ ཧོནྟི. ཨིམེཧི པཉྩཧི ཀཱརཎེཧི ཝིསདཱ ཧོནྟཱིཏི.

ཨེཏེསུ པན ཀཱརཎེསུ པརིཡཏྟི སཝནཾ པརིཔུཙྪཱཏི ཨིམཱནི ཏཱིཎི པབྷེདསྶེཝ བལཝཀཱརཎཱནི. པུབྦཡོགོ ཨདྷིགམསྶ བལཝཔཙྩཡོ, པབྷེདསྶ ¶ ཧོཏི ན ཧོཏཱིཏི? ཧོཏི, ན པན ཏཐཱ. པརིཡཏྟིསཝནཔརིཔུཙྪཱ ཧི པུབྦེ ཧོནྟུ ཝཱ མཱ ཝཱ, པུབྦཡོགེན པན པུབྦེ ཙེཝ ཨེཏརཧི ཙ སངྑཱརསམྨསནཾ ཝིནཱ པཊིསམྦྷིདཱ ནཱམ ནཏྠི. ཨིམེ པན དྭེཔི ཨེཀཏོ ཧུཏྭཱ པཊིསམྦྷིདཱ ཨུཔཏྠམྦྷེཏྭཱ ཝིསདཱ ཀརོནྟཱིཏི. ཨཔརེ ཨཱཧུ –

‘‘པུབྦཡོགོ བཱཧུསཙྩཾ, དེསབྷཱསཱ ཙ ཨཱགམོ;

པརིཔུཙྪཱ ཨདྷིགམོ, གརུསནྣིསྶཡོ ཏཐཱ;

མིཏྟསམྤཏྟི ཙེཝཱཏི, པཊིསམྦྷིདཔཙྩཡཱ’’ཏི.

ཏཏྠ པུབྦཡོགོ ཝུཏྟནཡོཝ. བཱཧུསཙྩཾ ནཱམ ཏེསུ ཏེསུ སཏྠེསུ ཙ སིཔྤཱཡཏནེསུ ཙ ཀུསལཏཱ. དེསབྷཱསཱ ནཱམ ¶ ཨེཀསཏཝོཧཱརཀུསལཏཱ, ཝིསེསེན པན མཱགདྷིཀེ ཀོསལླཾ. ཨཱགམོ ནཱམ ཨནྟམསོ ཨོཔམྨཝགྒམཏྟསྶཔི བུདྡྷཝཙནསྶ པརིཡཱཔུཎནཾ. པརིཔུཙྪཱ ནཱམ ཨེཀགཱཐཱཡཔི ¶ ཨཏྠཝིནིཙྪཡཔུཙྪནཾ. ཨདྷིགམོ ནཱམ སོཏཱཔནྣཏཱ ཝཱ སཀདཱགཱམིཏཱ ཝཱ ཨནཱགཱམིཏཱ ཝཱ ཨརཧཏྟཾ ཝཱ. གརུསནྣིསྶཡོ ནཱམ སུཏཔཊིབྷཱནབཧུལཱནཾ གརཱུནཾ སནྟིཀེ ཝཱསོ. མིཏྟསམྤཏྟི ནཱམ ཏཐཱརཱུཔཱནཾཡེཝ མིཏྟཱནཾ པཊིལཱབྷོཏི.

ཏཏྠ བུདྡྷཱ ཙ པཙྩེཀབུདྡྷཱ ཙ པུབྦཡོགཉྩེཝ ཨདྷིགམཉྩ ནིསྶཱཡ པཊིསམྦྷིདཱ པཱཔུཎནྟི, སཱཝཀཱ སབྦཱནིཔི ཨེཏཱནི ཀཱརཎཱནི. པཊིསམྦྷིདཱཔྤཏྟིཡཱ ཙ པཱཊིཡེཀྐོ ཀམྨཊྛཱནབྷཱཝནཱནུཡོགོ ནཱམ ནཏྠི, སེཀྑཱནཾ པན སེཀྑཕལཝིམོཀྑནྟིཀཱ, ཨསེཀྑཱནཾ ཨསེཀྑཕལཝིམོཀྑནྟིཀཱ ཙ པཊིསམྦྷིདཱཔྤཏྟི ཧོཏི. ཏཐཱགཏཱནཉྷི དས བལཱནི ཝིཡ ཨརིཡཱནཾ ཨརིཡཕལེཧེཝ པཊིསམྦྷིདཱ ཨིཛ྄ཛྷནྟཱིཏི. ཨིམཱསཾ ཙཏསྶནྣཾ པཊིསམྦྷིདཱནཾ མགྒོཏི པཊིསམྦྷིདཱམགྒོ, པཊིསམྦྷིདཱམགྒོ ཨེཝ པཀརཎཾ པཊིསམྦྷིདཱམགྒཔྤཀརཎཾ, པཀཱརེན ཀརཱིཡནྟེ ཝུཙྩནྟེ ཨེཏྠ ནཱནཱབྷེདབྷིནྣཱ གམྦྷཱིརཱ ཨཏྠཱ ཨིཏི པཀརཎཾ.

ཏདེཏཾ པཊིསམྦྷིདཱམགྒཔྤཀརཎཾ ཨཏྠསམྤནྣཾ བྱཉྫནསམྤནྣཾ གམྦྷཱིརཾ གམྦྷཱིརཏྠཾ ལོཀུཏྟརཔྤཀཱསནཾ སུཉྙཏཱཔཊིསཉྙུཏྟཾ པཊིཔཏྟིཕལཝིསེསསཱདྷནཾ པཊིཔཏྟིཔཊིཔཀྑཔཊིསེདྷནཾ ¶ ཡོགཱཝཙརཱནཾ ཉཱཎཝརརཏནཱཀརབྷཱུཏཾ དྷམྨཀཐིཀཱནཾ དྷམྨཀཐཱཝིལཱསཝིསེསཧེཏུབྷཱུཏཾ སཾསཱརབྷཱིརུཀཱནཾ དུཀྑནིསྶརཎཾ ཏདུཔཱཡདསྶནེན ཨསྶཱསཛནནཏྠཾ ཏཔྤཊིཔཀྑནཱསནཏྠཉྩ གམྦྷཱིརཏྠཱནཉྩ ཨནེཀེསཾ སུཏྟནྟཔདཱནཾ ཨཏྠཝིཝརཎེན ¶ སུཛནཧདཡཔརིཏོསཛནནཏྠཾ ཏཐཱགཏེན ཨརཧཏཱ སམྨཱསམྦུདྡྷེན སབྦཏྠ ཨཔྤཊིཧཏསབྦཉྙུཏཉྙཱཎམཧཱཔདཱིཔཱཝབྷཱསེན སཀལཛནཝིཏྠཏམཧཱཀརུཎཱསིནེཧསིནིདྡྷཧདཡེན ཝེནེཡྻཛནཧདཡགཏཀིལེསནྡྷཀཱརཝིདྷམནཏྠམུཛྫལིཏསྶ སདྡྷམྨམཧཱཔདཱིཔསྶ ཏདདྷིཔྤཱཡཝིཀཱསནསིནེཧཔརིསེཀེན པཉྩཝསྶསཧསྶམཝིརཏམུཛྫལནམིཙྪཏཱ ལོཀཱནུཀམྤཀེན སཏྠུཀཔྤེན དྷམྨརཱཛསྶ དྷམྨསེནཱཔཏིནཱ ཨཱཡསྨཏཱ སཱརིཔུཏྟཏྠེརེན བྷཱསིཏཾ སུཏྭཱ ཨཱཡསྨཏཱ ཨཱནནྡེན པཋམམཧཱསངྒཱིཏིཀཱལེ ཡཐཱསུཏམེཝ སངྒཱིཏིཾ ཨཱརོཔིཏཾ.

ཏདེཏཾ ཝིནཡཔིཊཀཾ སུཏྟནྟཔིཊཀཾ ཨབྷིདྷམྨཔིཊཀནྟི ཏཱིསུ པིཊཀེསུ སུཏྟནྟཔིཊཀཔརིཡཱཔནྣཾ. དཱིགྷནིཀཱཡོ མཛ྄ཛྷིམནིཀཱཡོ སཾཡུཏྟནིཀཱཡོ ཨངྒུཏྟརནིཀཱཡོ ཁུདྡཀནིཀཱཡོཏི པཉྩསུ མཧཱནིཀཱཡེསུ ཁུདྡཀམཧཱནིཀཱཡཔརིཡཱཔནྣཾ. སུཏྟཾ གེཡྻཾ ཝེཡྻཱཀརཎཾ གཱཐཱ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླནྟི ནཝསུ སཏྠུ སཱསནངྒེསུ ཡཐཱསམྦྷཝཾ གེཡྻཝེཡྻཱཀརཎངྒདྭཡསངྒཧིཏཾ.

‘‘དྭཱསཱིཏི ¶ བུདྡྷཏོ གཎྷིཾ, དྭེ སཧསྶཱནི བྷིཀྑུཏོ;

ཙཏུརཱསཱིཏི སཧསྶཱནི, ཡེ མེ དྷམྨཱ པཝཏྟིནོ’’ཏི. (ཐེརགཱ. ༡༠༢༧) –

དྷམྨབྷཎྜཱགཱརིཀཏྠེརེན པན པཉྩསུ ཋཱནེསུ ཨེཏདགྒཾ ཨཱརོཔིཏེན པཊིཉྙཱཏཱནཾ ཙཏུརཱསཱིཏིཡཱ དྷམྨཀྑནྡྷསཧསྶཱནཾ བྷིཀྑུཏོ གཧིཏེསུ དྭཱིསུ དྷམྨཀྑནྡྷསཧསྶེསུ ཨནེཀསཏདྷམྨཀྑནྡྷསངྒཧིཏཾ. ཏསྶ ཏཡོ ཝགྒཱ – མཧཱཝགྒོ, མཛ྄ཛྷིམཝགྒོ, ཙཱུལ༹ཝགྒོཏི. ཨེཀེཀསྨིཾ ཝགྒསྨིཾ དསདསཀཾ ཀཏྭཱ ཉཱཎཀཐཱདིཀཱ མཱཏིཀཱཀཐཱཔརིཡོསཱནཱ སམཏིཾས ཀཐཱ. ཨེཝམནེཀདྷཱ ཝཝཏྠཱཔིཏསྶ ཨིམསྶ པཊིསམྦྷིདཱམགྒཔྤཀརཎསྶ ཨནུཔུབྦཾ ཨཔུབྦཔདཏྠཝཎྞནཾ ¶ ཀརིསྶཱམ. ཨིམཉྷི པཀརཎཾ པཱཋཏོ ཨཏྠཏོ ཨུདྡིསནྟེན ཙ ནིདྡིསནྟེན ཙ སཀྐཙྩཾ ཨུདྡིསིཏབྦཾ ནིདྡིསིཏབྦཉྩ, ཨུགྒཎྷནྟེནཱཔི སཀྐཙྩཾ ¶ ཨུགྒཧེཏབྦཾ དྷཱརེཏབྦཉྩ. ཏཾ ཀིསྶཧེཏུ? གམྦྷཱིརཏྟཱ ཨིམསྶ པཀརཎསྶ ལོཀཧིཏཱཡ ལོཀེ ཙིརཊྛིཏཏྠཾ.

ཏཏྠ སམཏིཾསཱཡ ཀཐཱསུ ཉཱཎཀཐཱ ཀསྨཱ ཨཱདིཏོ ཀཐིཏཱཏི ཙེ? ཉཱཎསྶ པཊིཔཏྟིམལཝིསོདྷཀཏྟེན པཊིཔཏྟིཡཱ ཨཱདིབྷཱུཏཏྟཱ. ཝུཏྟཉྷི བྷགཝཏཱ –

‘‘ཏསྨཱཏིཧ ཏྭཾ བྷིཀྑུ, ཨཱདིམེཝ ཝིསོདྷེཧི ཀུསལཱནཾ དྷམྨཱནཾ. ཀོ ཙཱདི ཀུསལཱནཾ དྷམྨཱནཾ, སཱིལཉྩ སུཝིསུདྡྷཾ དིཊྛི ཙ ཨུཛུཀཱ’’ཏི (སཾ. ནི. ༥.༣༦༩)?

ཨུཛུཀཱ དིཊྛཱིཏི ཧི སམྨཱདིཊྛིསངྑཱཏཾ ཉཱཎཾ ཝུཏྟཾ. ཏསྨཱཔི ཉཱཎཀཐཱ ཨཱདིཏོ ཀཐིཏཱ.

ཨཔརམྤི ཝུཏྟཾ –

‘‘ཏཏྲ, བྷིཀྑཝེ, སམྨཱདིཊྛི པུབྦངྒམཱ ཧོཏི. ཀཐཉྩ, བྷིཀྑཝེ, སམྨཱདིཊྛི པུབྦངྒམཱ ཧོཏི? སམྨཱདིཊྛིཾ ‘སམྨཱདིཊྛཱི’ཏི པཛཱནཱཏི, མིཙྪཱདིཊྛིཾ ‘མིཙྪཱདིཊྛཱི’ཏི པཛཱནཱཏི. སཱསྶ ཧོཏི སམྨཱདིཊྛི. སམྨཱསངྐཔྤཾ ‘སམྨཱསངྐཔྤོ’ཏི ¶ པཛཱནཱཏི, མིཙྪཱསངྐཔྤཾ ‘མིཙྪཱསངྐཔྤོ’ཏི པཛཱནཱཏི. སམྨཱཝཱཙཾ ‘སམྨཱཝཱཙཱ’ཏི པཛཱནཱཏི, མིཙྪཱཝཱཙཾ ‘མིཙྪཱཝཱཙཱ’ཏི པཛཱནཱཏི. སམྨཱཀམྨནྟཾ ‘སམྨཱཀམྨནྟོ’ཏི པཛཱནཱཏི, མིཙྪཱཀམྨནྟཾ ‘མིཙྪཱཀམྨནྟོ’ཏི པཛཱནཱཏི. སམྨཱཨཱཛཱིཝཾ ‘སམྨཱཨཱཛཱིཝོ’ཏི པཛཱནཱཏི, མིཙྪཱཨཱཛཱིཝཾ ‘མིཙྪཱཨཱཛཱིཝོ’ཏི པཛཱནཱཏི. སམྨཱཝཱཡཱམཾ ‘སམྨཱཝཱཡཱམོ’ཏི པཛཱནཱཏི, མིཙྪཱཝཱཡཱམཾ ‘མིཙྪཱཝཱཡཱམོ’ཏི པཛཱནཱཏི. སམྨཱསཏིཾ ‘སམྨཱསཏཱི’ཏི པཛཱནཱཏི, མིཙྪཱསཏིཾ ‘མིཙྪཱསཏཱི’ཏི པཛཱནཱཏི. སམྨཱསམཱདྷིཾ ‘སམྨཱསམཱདྷཱི’ཏི པཛཱནཱཏི, མིཙྪཱསམཱདྷིཾ ‘མིཙྪཱསམཱདྷཱི’ཏི པཛཱནཱཏི. སཱསྶ ཧོཏི སམྨཱདིཊྛཱི’’ཏི (མ. ནི. ༣.༡༣༦ ཨཱདཡོ).

པུབྦངྒམབྷཱུཏཱཡ ཧི སམྨཱདིཊྛིཡཱ སིདྡྷཱཡ མིཙྪཱདིཊྛཱིནམྤི མིཙྪཱདིཊྛིབྷཱཝཾ ཛཱནིསྶཏཱིཏི སམྨཱདིཊྛིསངྑཱཏཾ ཉཱཎཾ ཏཱཝ སོདྷེཏུཾ ཉཱཎཀཐཱ ཨཱདིཏོ ཀཐིཏཱ.

‘‘ཨཔིཙུདཱཡི ¶ , ཏིཊྛཏུ པུབྦནྟོ, ཏིཊྛཏུ ཨཔརནྟོ, དྷམྨཾ ¶ ཏེ དེསེསྶཱམི – ཨིམསྨིཾ སཏི ཨིདཾ ཧོཏི, ཨིམསྶུཔྤཱདཱ ཨིདཾ ཨུཔྤཛྫཏི, ཨིམསྨིཾ ཨསཏི ཨིདཾ ན ཧོཏི, ཨིམསྶ ནིརོདྷཱ ཨིདཾ ནིརུཛ྄ཛྷཏཱི’’ཏི (མ. ནི. ༢.༢༧༡) ཙ –

པུབྦནྟཱཔརནྟདིཊྛིཡོ ཋཔེཏྭཱ ཉཱཎསྶེཝ ཝུཏྟཏྟཱ ཉཱཎཀཐཱ ཨཱདིཏོ ཀཐིཏཱ.

‘‘ཨལཾ, སུབྷདྡ, ཏིཊྛཏེཏཾ ‘སབྦེ ཏེ སཀཱཡ པཊིཉྙཱཡ ཨབྦྷཉྙིཾསུ, སབྦེཝ ན ཨབྦྷཉྙིཾསུ, ཨུདཱཧུ ཨེཀཙྩེ ཨབྦྷཉྙིཾསུ, ཨེཀཙྩེ ན ཨབྦྷཉྙིཾསཱུ’ཏི. དྷམྨཾ ཏེ, སུབྷདྡ, དེསེསྶཱམི, ཏཾ སུཎཱཧི སཱདྷུཀཾ མནསིཀརོཧི, བྷཱསིསྶཱམཱི’’ཏི (དཱི. ནི. ༢.༢༡༣) ཙ –

པུཐུསམཎབྲཱཧྨཎཔརཔྤཝཱདཱནཾ ཝཱདེ ཋཔེཏྭཱ ཨརིཡསྶ ཨཊྛངྒིཀསྶ མགྒསྶ དེསིཏཏྟཱ, ཨཊྛངྒིཀེ ཙ མགྒེ སམྨཱདིཊྛིསངྑཱཏསྶ ཉཱཎསྶ པདྷཱནཏྟཱ ཉཱཎཀཐཱ ཨཱདིཏོ ཀཐིཏཱ.

‘‘ཙཏྟཱརིམཱནི, བྷིཀྑཝེ, སོཏཱཔཏྟིཡངྒཱནི སཔྤུརིསསཾསེཝོ, སདྡྷམྨསྶཝནཾ, ཡོནིསོ མནསིཀཱརོ, དྷམྨཱནུདྷམྨཔཊིཔཏྟཱི’’ཏི (སཾ. ནི. ༥.༡༠༤༦; དཱི. ནི. ༣.༣༡༡) ཙ –

‘‘སདྡྷཱཛཱཏོ ཨུཔསངྐམཏི, ཨུཔསངྐམནྟོ པཡིརུཔཱསཏི, པཡིརུཔཱསནྟོ སོཏཾ ཨོདཧཏི, ཨོཧིཏསོཏོ དྷམྨཾ སུཎཱཏི, སུཏྭཱ དྷམྨཾ དྷཱརེཏི, དྷཱཏཱནཾ དྷམྨཱནཾ པཉྙཱཡ ཨཏྠཾ ཨུཔཔརིཀྑཏི, ཨཏྠཾ ཨུཔཔརིཀྑཏོ དྷམྨཱ ནིཛ྄ཛྷཱནཾ ཁམནྟི, དྷམྨནིཛ྄ཛྷཱནཀྑནྟིཡཱ ཚནྡོ ཛཱཡཏི, ཚནྡཛཱཏོ ཨུསྶཧཏི, ཨུསྶཧིཏྭཱ ཏུལེཏི, ཏུལཡིཏྭཱ ¶ པདཧཏི, པཧིཏཏྟོ ཀཱཡེན ཙེཝ པརམཏྠསཙྩཾ སཙྪིཀརོཏི, པཉྙཱཡ ཙ ནཾ པཊིཝིཛ྄ཛྷ པསྶཏཱི’’ཏི (མ. ནི. ༢.༡༨༣, ༤༣༢) ཙ –

‘‘ཨིདྷ ཏཐཱགཏོ ལོཀེ ཨུཔྤཛྫཏི…པེ… སོ དྷམྨཾ དེསེཏི ཨཱདིཀལྱཱཎ’’ནྟི ཨཱདཱིནི (དཱི. ནི. ༡.༡༩༠) ཙ –

ཨནེཀཱནི སུཏྟནྟཔདཱནི ཨནུལོམེནྟེན སུཏམཡེ ཉཱཎཾ ཨཱདིཾ ཀཏྭཱ ཡཐཱཀྐམེན ཉཱཎཀཐཱ ཨཱདིཏོ ཀཐིཏཱ.

སཱ ¶ ¶ པནཱཡཾ ཉཱཎཀཐཱ ཨུདྡེསནིདྡེསཝསེན དྭིདྷཱ ཋིཏཱ. ཨུདྡེསེ ‘‘སོཏཱཝདྷཱནེ པཉྙཱ སུཏམཡེ ཉཱཎ’’ནྟིཨཱདིནཱ ནཡེན ཏེསཏྟཏི ཉཱཎཱནི མཱཏིཀཱཝསེན ཨུདྡིཊྛཱནི. ནིདྡེསེ ‘‘ཀཐཾ སོཏཱཝདྷཱནེ པཉྙཱ སུཏམཡེ ཉཱཎཾ. ‘ཨིམེ དྷམྨཱ ཨབྷིཉྙེཡྻཱ’ཏི སོཏཱཝདྷཱནཾ, ཏཾཔཛཱནནཱ པཉྙཱ སུཏམཡེ ཉཱཎ’’ནྟིཨཱདིནཱ ནཡེན ཏཱནིཡེཝ ཏེསཏྟཏི ཉཱཎཱནི ཝིཏྠཱརཝསེན ནིདྡིཊྛཱནཱིཏི.

གནྠཱརམྦྷཀཐཱ ནིཊྛིཏཱ.

(༡) མཧཱཝགྒོ

༡. ཉཱཎཀཐཱ

མཱཏིཀཱཝཎྞནཱ

༡. ཏཏྠ ¶ ¶ ཨུདྡེསེ ཏཱཝ སོཏཱཝདྷཱནེ པཉྙཱ སུཏམཡེ ཉཱཎནྟི ཨེཏྠ སོཏསདྡོ ཨནེཀཏྠཔྤབྷེདོ. ཏཐཱ ཧེས –

མཾསཝིཉྙཱཎཉཱཎེསུ, ཏཎྷཱདཱིསུ ཙ དིསྶཏི;

དྷཱརཱཡཾ ཨརིཡམགྒེ, ཙིཏྟསནྟཏིཡམྤི ཙ.

‘‘སོཏཱཡཏནཾ སོཏདྷཱཏུ སོཏིནྡྲིཡ’’ནྟིཨཱདཱིསུ (ཝིབྷ. ༡༥༧) ཧི ཨཡཾ སོཏསདྡོ མཾསསོཏེ དིསྶཏི. ‘‘སོཏེན སདྡཾ སུཏྭཱ’’ཏིཨཱདཱིསུ (མ. ནི. ༡.༢༩༥) སོཏཝིཉྙཱཎེ. ‘‘དིབྦཱཡ སོཏདྷཱཏུཡཱ’’ཏིཨཱདཱིསུ (དཱི. ནི. ༣.༣༥༦) ཉཱཎསོཏེ. ‘‘ཡཱནི སོཏཱནི ལོཀསྨིནྟི ཡཱནི ཨེཏཱནི སོཏཱནི མཡཱ ཀིཏྟིཏཱནི པཀིཏྟིཏཱནི ཨཱཙིཀྑིཏཱནི དེསིཏཱནི པཉྙཔིཏཱནི པཊྛཔིཏཱནི ཝིཝརིཏཱནི ཝིབྷཏྟཱནི ཨུཏྟཱནཱིཀཏཱནི པཀཱསིཏཱནི. སེཡྻཐིདཾ – ཏཎྷཱསོཏོ དིཊྛིསོཏོ ཀིལེསསོཏོ དུཙྩརིཏསོཏོ ཨཝིཛྫཱསོཏོ’’ཏིཨཱདཱིསུ (ཙཱུལ༹ནི. ཨཛིཏམཱཎཝཔུཙྪཱནིདྡེས ༤) ཏཎྷཱདཱིསུ པཉྩསུ དྷམྨེསུ. ‘‘ཨདྡསཱ ཁོ བྷགཝཱ མཧནྟཾ དཱརུཀྑནྡྷཾ གངྒཱཡ ནདིཡཱ སོཏེན ཝུཡ྄ཧམཱན’’ནྟིཨཱདཱིསུ (སཾ. ནི. ༤.༢༤༡) ཨུདཀདྷཱརཱཡཾ. ‘‘ཨརིཡསྶེཏཾ, ཨཱཝུསོ, ཨཊྛངྒིཀསྶ མགྒསྶ ཨདྷིཝཙནཾ, ཡདིདཾ སོཏོ’’ཏིཨཱདཱིསུ ཨརིཡམགྒེ. ‘‘པུརིསསྶ ཙ ཝིཉྙཱཎསོཏཾ པཛཱནཱཏི ཨུབྷཡཏོ ཨབྦོཙྪིནྣཾ ཨིདྷ ལོཀེ པཏིཊྛིཏཉྩ པརལོཀེ པཏིཊྛིཏཉྩཱ’’ཏིཨཱདཱིསུ (དཱི. ནི. ༣.༡༤༩) ཙིཏྟསནྟཏིཡཾ ¶ . ཨིདྷ པནཱཡཾ མཾསསོཏེ དཊྛབྦོ. ཏེན སོཏེན ཧེཏུབྷཱུཏེན, ཀརཎབྷཱུཏེན ཝཱ ཨཝདྷཱིཡཏི ཨཝཏྠཱཔཱིཡཏི ཨཔྤཱིཡཏཱིཏི སོཏཱཝདྷཱནཾ. ཀིཾ ཏཾ? སུཏཾ. སུཏཉྩ ནཱམ ‘‘བཧུསྶུཏོ ཧོཏི སུཏདྷརོ སུཏསནྣིཙཡོ’’ཏིཨཱདཱིསུ (མ. ནི. ༡.༣༣༩) ཝིཡ སོཏདྭཱརཱནུསཱརེན ¶ ཝིཉྙཱཏཾ ཨཝདྷཱརིཏཾ དྷམྨཛཱཏཾ, ཏཾ ཨིདྷ སོཏཱཝདྷཱནནྟི ཝུཏྟཾ. ཏསྨིཾ སོཏཱཝདྷཱནསངྑཱཏེ སུཏེ པཝཏྟཱ པཉྙཱ སོཏཱཝདྷཱནེ པཉྙཱ. པཉྙཱཏི ཙ ཏསྶ ཏསྶ ཨཏྠསྶ པཱཀཊཀརཎསངྑཱཏེན པཉྙཱཔནཊྛེན པཉྙཱ, ཏེན ཏེན ཝཱ ཨནིཙྩཱདིནཱ པཀཱརེན དྷམྨེ ཛཱནཱཏཱིཏིཔི པཉྙཱ.

སུཏམཡེ ¶ ཉཱཎནྟི ཨེཏྠ སུཏསདྡོ ཏཱཝ སཨུཔསགྒོ ཨནུཔསགྒོ ཙ –

གམནེ ཝིསྶུཏེ ཏིནྟེནུཡོགོཔཙིཏེཔི ཙ;

སདྡེ ཙ སོཏདྭཱརཱནུསཱརཉཱཏེ ཙ དིསྶཏི.

ཏཐཱ ཧིསྶ ‘‘སེནཱཡ པསུཏོ’’ཏིཨཱདཱིསུ གཙྪནྟོཏི ཨཏྠོ. ‘‘སུཏདྷམྨསྶ པསྶཏོ’’ཏིཨཱདཱིསུ (ཨུདཱ. ༡༡; མཧཱཝ. ༥) ཝིསྶུཏདྷམྨསྶཱཏི ཨཏྠོ. ‘‘ཨཝསྶུཏཱ ཨཝསྶུཏསྶ པུརིསཔུགྒལསྶཱ’’ཏིཨཱདཱིསུ (པཱཙི. ༦༥༧) ཏིནྟཱ ཏིནྟསྶཱཏི ཨཏྠོ. ‘‘ཡེ ཛྷཱནཔསུཏཱ དྷཱིརཱ’’ཏིཨཱདཱིསུ (དྷ. པ. ༡༨༡) ཨནུཡུཏྟཱཏི ཨཏྠོ. ‘‘ཏུམྷེཧི པུཉྙཾ པསུཏཾ ཨནཔྤཀ’’ནྟིཨཱདཱིསུ (ཁུ. པཱ. ༧.༡༢; པེ. ཝ. ༢༥) ཨུཔཙིཏནྟི ཨཏྠོ. ‘‘དིཊྛཾ སུཏཾ མུཏཾ ཝིཉྙཱཏ’’ནྟིཨཱདཱིསུ (མ. ནི. ༡.༢༤༡) སདྡོཏི ཨཏྠོ. ‘‘བཧུསྶུཏོ ཧོཏི སུཏདྷརོ སུཏསནྣིཙཡོ’’ཏིཨཱདཱིསུ (མ. ནི. ༡.༣༣༩) སོཏདྭཱརཱནུསཱརཝིཉྙཱཏདྷརོཏི ཨཏྠོ. ཨིདྷ པནསྶ སོཏདྭཱརཱནུསཱརེན ཝིཉྙཱཏཾ ཨུཔདྷཱརིཏནྟི ཨཏྠོ. སུཏམཡེ ཉཱཎནྟི ཡཱ ཨེསཱ ཨེཏཾ སུཏཾ ཝིཉྙཱཏཾ ཨཝདྷཱརིཏཾ སདྡྷམྨཾ ཨཱརབྦྷ ཨཱརམྨཎཾ ཀཏྭཱ སབྦཔཋམཉྩ ཨཔརཱཔརཉྩ པཝཏྟཱ པཉྙཱ, ཏཾ ‘‘སུཏམཡེ ཉཱཎ’’ནྟི ཝུཏྟཾ ཧོཏི, སུཏམཡཾ ཉཱཎནྟི ཨཏྠོ. སུཏམཡེཏི ཙ པཙྩཏྟཝཙནམེཏཾ, ཡཐཱ ‘‘ན ཧེཝཾ ཝཏྟབྦེ’’ (ཀཐཱ. ༡, ༡༥-༡༨). ‘‘ཝནཔྤགུམྦེ ཡཐཱ ཕུསྶིཏགྒེ’’ (ཁུ. པཱ. ༦.༡༣; སུ. ནི. ༢༣༦). ‘‘ནཏྠི ཨཏྟཀཱརེ ནཏྠི པརཀཱརེ ནཏྠི པུརིསཀཱརེ’’ཏིཨཱདཱིསུ (དཱི. ནི. ༡.༡༦༨) པཙྩཏྟཝཙནཾ, ཨེཝམིདྷཱཔི དཊྛབྦཾ. ཏེན ཝུཏྟཾ – ‘‘སུཏམཡཾ ཉཱཎནྟི ཨཏྠོ’’ཏི.

ཨཐ ཝཱ སུཏེན པཀཏོ ¶ ཕསྶཱདིཀོ དྷམྨཔུཉྫོ སུཏམཡོ, ཏསྨིཾ སུཏམཡེ དྷམྨཔུཉྫེ པཝཏྟཾ ཏཾསམྤཡུཏྟཾ ཉཱཎཾ སུཏམཡེ ཉཱཎཾ. སབྷཱཝསཱམཉྙལཀྑཎཝསེན དྷམྨེ ཛཱནཱཏཱིཏི ཉཱཎཾ. ཏཾཡེཝ ཉཱཎཾ པརིཡཱཡཝཙནེན ཨདྷིཔྤཱཡཔཀཱསནཏྠཾ ཨནིཡམེན ‘‘པཉྙཱ’’ཏི ཝཏྭཱ པཙྪཱ ཨདྷིཔྤེཏཾ ‘‘ཉཱཎ’’ནྟི ནིཡམེཏྭཱ ཝུཏྟནྟི ཝེདིཏབྦཾ. ཉཱཎཉྩ ནཱམ སབྷཱཝཔཊིཝེདྷལཀྑཎཾ, ཨཀྑལིཏཔཊིཝེདྷལཀྑཎཾ ཝཱ ཀུསལིསྶཱསཁིཏྟཨུསུཔཊིཝེདྷོ ཝིཡ, ཝིསཡོབྷཱསནརསཾ པདཱིཔོ ཝིཡ, ཨསམྨོཧཔཙྩུཔཊྛཱནཾ ཨརཉྙགཏསུདེསཀོ ཝིཡ. ‘‘སམཱཧིཏོ, བྷིཀྑཝེ, བྷིཀྑུ ཡཐཱབྷཱུཏཾ པཛཱནཱཏཱི’’ཏི (སཾ. ནི. ༥.༡༠༧༡) ཝཙནཏོ སམཱདྷིཔདཊྛཱནཾ. ལཀྑཎཱདཱིསུ ཧི སབྷཱཝོ ཝཱ སཱམཉྙཾ ཝཱ ལཀྑཎཾ ¶ ¶ ནཱམ, ཀིཙྩཾ ཝཱ སམྤཏྟི ཝཱ རསོ ནཱམ, ཨུཔཊྛཱནཱཀཱརོ ཝཱ ཕལཾ ཝཱ པཙྩུཔཊྛཱནཾ ནཱམ, ཨཱསནྣཀཱརཎཾ པདཊྛཱནཾ ནཱམཱཏི ཝེདིཏབྦཾ.

༢. སུཏྭཱན སཾཝརེ པཉྙཱཏི –

པཱཏིམོཀྑོ སཏཱི ཙེཝ, ཉཱཎཾ ཁནྟི ཏཐེཝ ཙ;

ཝཱིརིཡཾ པཉྩིམེ དྷམྨཱ, སཾཝརཱཏི པཀཱསིཏཱ.

‘‘ཨིམིནཱ པཱཏིམོཀྑསཾཝརེན ཨུཔེཏོ ཧོཏི སམུཔེཏོ ཨུཔཱགཏོ སམུཔཱགཏོ ཨུཔཔནྣོ སམྤནྣོ སམནྣཱགཏོ’’ཏི (ཝིབྷ. ༥༡༡) ཨཱགཏོ པཱཏིམོཀྑསཾཝརོ. ‘‘ཙཀྑུནཱ རཱུཔཾ དིསྭཱ ན ནིམིཏྟགྒཱཧཱི ཧོཏི ནཱནུབྱཉྫནགྒཱཧཱི. ཡཏྭཱདྷིཀརཎམེནཾ ཙཀྑུནྡྲིཡཾ ཨསཾཝུཏཾ ཝིཧརནྟཾ ཨབྷིཛ྄ཛྷཱདོམནསྶཱ པཱཔཀཱ ཨཀུསལཱ དྷམྨཱ ཨནྭཱསྶཝེཡྻུཾ, ཏསྶ སཾཝརཱཡ པཊིཔཛྫཏི, རཀྑཏི ཙཀྑུནྡྲིཡཾ, ཙཀྑུནྡྲིཡེ སཾཝརཾ ཨཱཔཛྫཏཱི’’ཏིཨཱདིནཱ (དཱི. ནི. ༡.༢༡༣; མ. ནི. ༡.༢༩༥; སཾ. ནི. ༤.༢༣༩; ཨ. ནི. ༣.༡༦) ནཡེན ཨཱགཏོ སཏིསཾཝརོ.

‘‘ཡཱནི སོཏཱནི ལོཀསྨིཾ (ཨཛིཏཱཏི བྷགཝཱ),

སཏི ཏེསཾ ནིཝཱརཎཾ;

སོཏཱནཾ སཾཝརཾ བྲཱུམི, པཉྙཱཡེཏེ པིདྷཱིཡརེ’’ཏི ¶ . (ཙཱུལ༹ནི. ཨཛིཏམཱཎཝཔུཙྪཱ ༦༠; སུ. ནི. ༡༠༤༡) –

ཨཱགཏོ ཉཱཎསཾཝརོ. ‘‘ཀཏམེ ཙ, བྷིཀྑཝེ, ཨཱསཝཱ པཊིསེཝནཱ པཧཱཏབྦཱ? ཨིདྷ, བྷིཀྑཝེ, བྷིཀྑུ པཊིསངྑཱ ཡོནིསོ ཙཱིཝརཾ པཊིསེཝཏཱི’’ཏིཨཱདིནཱ (མ. ནི. ༡.༢༣; ཨ. ནི. ༦.༥༨) ནཡེན ¶ ཨཱགཏོ པཙྩཡཔཊིསེཝནཱསཾཝརོ, སོཔི ཉཱཎསཾཝརེནེཝ སངྒཧིཏོ. ‘‘ཁམོ ཧོཏི སཱིཏསྶ ཨུཎྷསྶ ཛིགྷཙྪཱཡ པིཔཱསཱཡ ཌཾསམཀསཝཱཏཱཏཔསརིསཔསམྥསྶཱནཾ དུརུཏྟཱནཾ དུརཱགཏཱནཾ ཝཙནཔཐཱནཾ ཨུཔྤནྣཱནཾ སཱརཱིརིཀཱནཾ ཝེདནཱནཾ དུཀྑཱནཾ ཏིབྦཱནཾ ཁརཱནཾ ཀཊུཀཱནཾ ཨསཱཏཱནཾ ཨམནཱཔཱནཾ པཱཎཧརཱནཾ ཨདྷིཝཱསཀཛཱཏིཀོ ཧོཏཱི’’ཏི (མ. ནི. ༡.༢༤; ཨ. ནི. ༤.༡༡༤; ༦.༥༨) ཨཱགཏོ ཁནྟིསཾཝརོ. ‘‘ཨུཔྤནྣཾ ཀཱམཝིཏཀྐཾ ནཱདྷིཝཱསེཏི པཛཧཏི ཝིནོདེཏི བྱནྟཱིཀརོཏི ཨནབྷཱཝཾ གམེཏཱི’’ཏིཨཱདིནཱ (མ. ནི. ༡.༢༦; ཨ. ནི. ༤.༡༡༤; ༦.༥༨) ནཡེན ཨཱགཏོ ཝཱིརིཡསཾཝརོ. ‘‘ཨིདྷ ཨརིཡསཱཝཀོ མིཙྪཱཨཱཛཱིཝཾ པཧཱཡ ¶ སམྨཱཨཱཛཱིཝེན ཛཱིཝིཀཾ ཀཔྤེཏཱི’’ཏི (སཾ. ནི. ༥.༨) ཨཱགཏོ ཨཱཛཱིཝཔཱརིསུདྡྷིསཾཝརོ, སོཔི ཝཱིརིཡསཾཝརེནེཝ སངྒཧིཏོ. ཏེསུ སཏྟསུ སཾཝརེསུ པཱཏིམོཀྑསཾཝརཨིནྡྲིཡསཾཝརཨཱཛཱིཝཔཱརིསུདྡྷིཔཙྩཡཔཊིསེཝནསངྑཱཏཱ ཙཏྟཱརོ སཾཝརཱ ཨིདྷཱདྷིཔྤེཏཱ, ཏེསུ ཙ ཝིསེསེན པཱཏིམོཀྑསཾཝརོ. སབྦོཔི ཙཱཡཾ སཾཝརོ ཡཐཱསཀཾ སཾཝརིཏབྦཱནཾ ཀཱཡདུཙྩརིཏཱདཱིནཾ སཾཝརཎཏོ སཾཝརོཏི ཝུཙྩཏི. སུཏམཡཉཱཎེ ཝུཏྟཾ དྷམྨཾ སུཏྭཱ སཾཝརནྟསྶ སཾཝརཾ ཀརོནྟསྶ ཏསྨིཾ སཾཝརེ པཝཏྟཱ ཏཾསམྤཡུཏྟཱ པཉྙཱ ‘‘སུཏྭཱན སཾཝརེ པཉྙཱ’’ཏི ཝུཏྟཱ. ཨཐ ཝཱ ཧེཏུཨཏྠེ སུཏྭཱཏི ཝཙནསྶ སམྦྷཝཏོ སུཏཧེཏུནཱ སཾཝརེ པཉྙཱཏིཔི ཨཏྠོ.

སཱིལམཡེ ཉཱཎནྟི ཨེཏྠ སཱིལནྟི སཱིལནཊྛེན སཱིལཾ. ཀིམིདཾ སཱིལནཾ ནཱམ? སམཱདྷཱནཾ ཝཱ, ཀཱཡཀམྨཱདཱིནཾ སུསཱིལྱཝསེན ཨཝིཔྤཀིཎྞཏཱཏི ཨཏྠོ. ཨུཔདྷཱརཎཾ ཝཱ, ཀུསལཱནཾ དྷམྨཱནཾ པཏིཊྛཱཝསེན ཨཱདྷཱརབྷཱཝོཏི ཨཏྠོ. ཨེཏདེཝ ཧི ཨེཏྠ ཨཏྠདྭཡཾ སདྡལཀྑཎཝིདཱུ ཨནུཛཱནནྟི. ཨཉྙེ པན ‘‘ཨདྷིསེཝནཊྛེན ཨཱཙཱརཊྛེན ཏསྶཱིལཊྛེན སིརཊྛེན སཱིཏལཊྛེན སིཝཊྛེན སཱིལ’’ནྟི ཝཎྞཡནྟི.

སཱིལནཾ ¶ ལཀྑཎཾ ཏསྶ, བྷིནྣསྶཱཔི ཨནེཀདྷཱ;

སནིདསྶནཏྟཾ རཱུཔསྶ, ཡཐཱ བྷིནྣསྶ ནེཀདྷཱ.

ཡཐཱ ཧི ནཱིལཔཱིཏཱདིབྷེདེན ཨནེཀདྷཱ བྷིནྣསྶཱཔི རཱུཔཱཡཏནསྶ སནིདསྶནཏྟཾ ལཀྑཎཾ ནཱིལཱདིབྷེདེན བྷིནྣསྶཱཔི སནིདསྶནབྷཱཝཱནཏིཀྐམནཏོ, ཏཐཱ སཱིལསྶ ཙེཏནཱདིབྷེདེན ཨནེཀདྷཱ བྷིནྣསྶཱཔི ཡདེཏཾ ཀཱཡཀམྨཱདཱིནཾ སམཱདྷཱནཝསེན ཀུསལཱནཉྩ དྷམྨཱནཾ པཏིཊྛཱནཝསེན ཝུཏྟཾ སཱིལནཾ, ཏདེཝ ལཀྑཎཾ ཙེཏནཱདིབྷེདེན བྷིནྣསྶཱཔི སམཱདྷཱནཔཏིཊྛཱནབྷཱཝཱནཏིཀྐམནཏོ. ཨེཝཾལཀྑཎསྶ པནསྶ –

‘‘དུསྶཱིལྱཝིདྡྷཾསནཏཱ, ཨནཝཛྫགུཎོ ཏཐཱ;

ཀིཙྩསམྤཏྟི ཨཏྠེན, རསོ ནཱམ པཝུཙྩཏི’’.

ཏསྨཱ ཨིདཾ སཱིལཾ ནཱམ ཀིཙྩཊྛེན རསེན དུསྶཱིལྱཝིདྡྷཾསནརསཾ, སམྤཏྟིཨཏྠེན རསེན ཨནཝཛྫརསནྟི ཝེདིཏབྦཾ.

སོཙེཡྻཔཙྩུཔཊྛཱནཾ ¶ ¶ , ཏཡིདཾ ཏསྶ ཝིཉྙུཧི;

ཨོཏྟཔྤཉྩ ཧིརཱི ཙེཝ, པདཊྛཱནནྟི ཝཎྞིཏཾ. –

ཏཡིདཾ སཱིལཾ ‘‘ཀཱཡསོཙེཡྻཾ ཝཙཱིསོཙེཡྻཾ མནོསོཙེཡྻ’’ནྟི (ཨིཏིཝུ. ༦༦) ཨེཝཾ ཝུཏྟསོཙེཡྻཔཙྩུཔཊྛཱནཾ, སུཙིབྷཱཝེན པཙྩུཔཊྛཱཏི གཧཎབྷཱཝཾ གཙྪཏི. ཧིརོཏྟཔྤཉྩ པན ཏསྶ ཝིཉྙཱུཧི པདཊྛཱནནྟི ཝཎྞིཏཾ, ཨཱསནྣཀཱརཎནྟི ཨཏྠོ. ཧིརོཏྟཔྤེ ཧི སཏི སཱིལཾ ཨུཔྤཛྫཏི ཙེཝ ཏིཊྛཏི ཙ, ཨསཏི ནེཝ ཨུཔྤཛྫཏི ན ཏིཊྛཏཱིཏི ཨེཝཾཝིདྷེན སཱིལེན སཧགཏཾ ཏཾསམྤཡུཏྟཾ ཉཱཎཾ སཱིལམཡེ ཉཱཎཾ. ཨཐ ཝཱ སཱིལམེཝ པཀཏཾ སཱིལམཡཾ, ཏསྨིཾ སཱིལམཡེ ཏཾསམྤཡུཏྟཾ ཉཱཎཾ. ཨསཾཝརེ ཨཱདཱིནཝཔཙྩཝེཀྑཎཱ ཙ, སཾཝརེ ཨཱནིསཾསཔཙྩཝེཀྑཎཱ ¶ ཙ, སཾཝརཔཱརིསུདྡྷིཔཙྩཝེཀྑཎཱ ཙ, སཾཝརསཾཀིལེསཝོདཱནཔཙྩཝེཀྑཎཱ ཙ སཱིལམཡཉཱཎེནེཝ སངྒཧིཏཱ.

༣. སཾཝརིཏྭཱ སམཱདཧནེ པཉྙཱཏི སཱིལམཡཉཱཎེ ཝུཏྟསཱིལསཾཝརེན སཾཝརིཏྭཱ སཾཝརཾ ཀཏྭཱ སཱིལེ པཏིཊྛཱཡ སམཱདཧནྟསྶ ཨུཔཙཱརཔྤནཱཝསེན ཙིཏྟེཀགྒཏཾ ཀརོནྟསྶ ཏསྨིཾ སམཱདཧནེ པཝཏྟཱ ཏཾསམྤཡུཏྟཱ པཉྙཱ. སམཾ སམྨཱ ཙ ཨཱདཧནཾ ཋཔནནྟི ཙ སམཱདཧནཾ, སམཱདྷིསྶེཝེཏཾ པརིཡཱཡཝཙནཾ.

སམཱདྷིབྷཱཝནཱམཡེ ཉཱཎནྟི ཨེཏྠ ཀུསལཙིཏྟེཀགྒཏཱ སམཱདྷི. ཀེནཊྛེན སམཱདྷི? སམཱདྷཱནཊྛེན སམཱདྷི. ཀིམིདཾ སམཱདྷཱནཾ ནཱམ? ཨེཀཱརམྨཎེ ཙིཏྟཙེཏསིཀཱནཾ སམཾ སམྨཱ ཙ ཨཱདྷཱནཾ, ཋཔནནྟི ཝུཏྟཾ ཧོཏི. ཏསྨཱ ཡསྶ དྷམྨསྶཱནུབྷཱཝེན ཨེཀཱརམྨཎེ ཙིཏྟཙེཏསིཀཱ སམཾ སམྨཱ ཙ ཨཝིཀྑིཔམཱནཱ ཨཝིཔྤཀིཎྞཱ ཙ ཧུཏྭཱ ཏིཊྛནྟི, ཨིདཾ སམཱདྷཱནནྟི ཝེདིཏབྦཾ. ཏསྶ ཁོ པན སམཱདྷིསྶ –

ལཀྑཎཾ ཏུ ཨཝིཀྑེཔོ, ཝིཀྑེཔཝིདྡྷཾསནཾ རསོ;

ཨཀམྤནམུཔཊྛཱནཾ, པདཊྛཱནཾ སུཁཾ པན.

བྷཱཝཱིཡཏི ཝཌྜྷཱིཡཏཱིཏི བྷཱཝནཱ, སམཱདྷི ཨེཝ བྷཱཝནཱ སམཱདྷིབྷཱཝནཱ, སམཱདྷིསྶ ཝཱ བྷཱཝནཱ ཝཌྜྷནཱ སམཱདྷིབྷཱཝནཱ. སམཱདྷིབྷཱཝནཱཝཙནེན ཨཉྙཾ བྷཱཝནཾ པཊིཀྑིཔཏི. པུབྦེ ཝིཡ ཨུཔཙཱརཔྤནཱཝསེན སམཱདྷིབྷཱཝནཱམཡེ ཉཱཎཾ.

༤. པཙྩཡཔརིགྒཧེ ¶ པཉྙཱཏི ཨེཏྠ པཊིཙྩ ཕལམེཏཱིཏི པཙྩཡོ. པཊིཙྩཱཏི ན ཝིནཱ ¶ ཏེན, ཨཔཙྩཀྑིཏྭཱཏི ཨཏྠོ. ཨེཏཱིཏི ཨུཔྤཛྫཏི ཙེཝ པཝཏྟཏི ཙཱཏི ཨཏྠོ. ཨཔིཙ ཨུཔཀཱརཀཏྠོ པཙྩཡཏྠོ, ཏསྶ པཙྩཡསྶ བཧུཝིདྷཏྟཱ པཙྩཡཱནཾ པརིགྒཧེ ཝཝཏྠཱཔནེ ཙ པཉྙཱ པཙྩཡཔརིགྒཧེ པཉྙཱ.

དྷམྨཊྛིཏིཉཱཎནྟི ¶ ཨེཏྠ དྷམྨསདྡོ ཏཱཝ སབྷཱཝཔཉྙཱཔུཉྙཔཉྙཏྟིཨཱཔཏྟིཔརིཡཏྟིནིསྶཏྟཏཱཝིཀཱརགུཎཔཙྩཡཔཙྩཡུཔྤནྣཱདཱིསུ དིསྶཏི. ཨཡཉྷི ‘‘ཀུསལཱ དྷམྨཱ ཨཀུསལཱ དྷམྨཱ ཨབྱཱཀཏཱ དྷམྨཱ’’ཏིཨཱདཱིསུ (དྷ. ས. ཏིཀམཱཏིཀཱ ༡) སབྷཱཝེ དིསྶཏི.

‘‘ཡསྶེཏེ ཙཏུརོ དྷམྨཱ, སདྡྷསྶ གྷརམེསིནོ;

སཙྩཾ དྷམྨོ དྷིཏི ཙཱགོ, ས ཝེ པེཙྩ ན སོཙཏཱི’’ཏི. (སུ. ནི. ༡༩༠) –

ཨཱདཱིསུ པཉྙཱཡཾ.

‘‘ན ཧི དྷམྨོ ཨདྷམྨོ ཙ, ཨུབྷོ སམཝིཔཱཀིནོ;

ཨདྷམྨོ ནིརཡཾ ནེཏི, དྷམྨོ པཱཔེཏི སུགྒཏི’’ནྟི. (ཐེརགཱ. ༣༠༤) –

ཨཱདཱིསུ པུཉྙེ. ‘‘པཉྙཏྟིདྷམྨཱ ནིརུཏྟིདྷམྨཱ ཨདྷིཝཙནདྷམྨཱ’’ཏིཨཱདཱིསུ (དྷ. ས. དུཀམཱཏིཀཱ ༡༠༦-༡༠༨) པཉྙཏྟིཡཾ. ‘‘པཱརཱཛིཀཱ དྷམྨཱ སངྒྷཱདིསེསཱ དྷམྨཱ’’ཏིཨཱདཱིསུ (པཱརཱ. ༢༣༣-༢༣༤) ཨཱཔཏྟིཡཾ. ‘‘ཨིདྷ བྷིཀྑུ དྷམྨཾ ཛཱནཱཏི སུཏྟཾ གེཡྻཾ ཝེཡྻཱཀརཎ’’ནྟིཨཱདཱིསུ (ཨ. ནི. ༥.༧༣) པརིཡཏྟིཡཾ. ‘‘ཏསྨིཾ ཁོ པན སམཡེ དྷམྨཱ ཧོནྟི (དྷ. ས. ༡༢༡). དྷམྨེསུ དྷམྨཱནུཔསྶཱི ཝིཧརཏཱི’’ཏིཨཱདཱིསུ (དཱི. ནི. ༢.༣༧༣; མ. ནི. ༡.༡༡༥) ནིསྶཏྟཏཱཡཾ. ‘‘ཛཱཏིདྷམྨཱ ཛརཱདྷམྨཱ མརཎདྷམྨཱ’’ཏིཨཱདཱིསུ (ཨ. ནི. ༡༠.༡༠༧) ཝིཀཱརེ. ‘‘ཚནྣཾ བུདྡྷདྷམྨཱན’’ནྟིཨཱདཱིསུ (མཧཱནི. ༥༠) གུཎེ. ‘‘ཧེཏུམྷི ཉཱཎཾ དྷམྨཔཊིསམྦྷིདཱ’’ཏིཨཱདཱིསུ (ཝིབྷ. ༧༢༠) པཙྩཡེ. ‘‘ཋིཏཱཝ སཱ དྷཱཏུ དྷམྨཊྛིཏཏཱ དྷམྨནིཡཱམཏཱ’’ཏིཨཱདཱིསུ (སཾ. ནི. ༢.༢༠; ཨ. ནི. ༣.༡༣༧) པཙྩཡུཔྤནྣེ. སྭཱཡམིདྷཱཔི པཙྩཡུཔྤནྣེ དཊྛབྦོ. ཨཏྠཏོ པན ཨཏྟནོ སབྷཱཝཾ དྷཱརེནྟཱིཏི ཝཱ, པཙྩཡེཧི དྷཱརཱིཡནྟཱིཏི ཝཱ, ཨཏྟནོ ཕལཾ དྷཱརེནྟཱིཏི ཝཱ, ཨཏྟནོ པརིཔཱུརཀཾ ཨཔཱཡེསུ ཨཔཏམཱནཾ དྷཱརེནྟཱིཏི ཝཱ, སཀསཀལཀྑཎེ དྷཱརེནྟཱིཏི ཝཱ, ཙིཏྟེན ཨཝདྷཱརཱིཡནྟཱིཏི ཝཱ ཡཐཱཡོགཾ དྷམྨཱཏི ཝུཙྩནྟི. ཨིདྷ པན ཨཏྟནོ པཙྩཡེཧི ¶ དྷཱརཱིཡནྟཱིཏི དྷམྨཱ, པཙྩཡསམུཔྤནྣཱ དྷམྨཱ ཏིཊྛནྟི ཨུཔྤཛྫནྟི ¶ ཙེཝ པཝཏྟནྟི ཙ ཨེཏཱཡཱཏི དྷམྨཊྛིཏི, པཙྩཡདྷམྨཱནམེཏཾ ཨདྷིཝཙནཾ ¶ . ཏསྶཾ དྷམྨཊྛིཏིཡཾ ཉཱཎཾ དྷམྨཊྛིཏིཉཱཎཾ. ཨིདཉྷི སམཱདྷིབྷཱཝནཱམཡཉཱཎེ ཝུཏྟསམཱདྷིནཱ སམཱཧིཏེན ཙིཏྟེན ཡཐཱབྷཱུཏཉཱཎདསྶནཏྠཱཡ ཡོགམཱརབྷིཏྭཱ ཝཝཏྠཱཔིཏནཱམརཱུཔསྶ ཏེསཾ ནཱམརཱུཔཱནཾ པཙྩཡཔརིགྒཧཔརིཡཱཡཾ དྷམྨཊྛིཏིཉཱཎཾ ཨུཔྤཛྫཏི. ‘‘ནཱམརཱུཔཝཝཏྠཱནེ ཉཱཎ’’ནྟི ཨཝཏྭཱ ཨེཝ ཀསྨཱ ‘‘དྷམྨཊྛིཏིཉཱཎ’’ནྟི ཝུཏྟནྟི ཙེ? པཙྩཡཔརིགྒཧེནེཝ པཙྩཡསམུཔྤནྣཔརིགྒཧསྶ སིདྡྷཏྟཱ. པཙྩཡསམུཔྤནྣེ ཧི ཨཔརིགྒཧིཏེ པཙྩཡཔརིགྒཧོ ན སཀྐཱ ཧོཏི ཀཱཏུཾ. ཏསྨཱ དྷམྨཊྛིཏིཉཱཎགཧཎེནེཝ ཏསྶ ཧེཏུབྷཱུཏཾ པུབྦེ སིདྡྷཾ ནཱམརཱུཔཝཝཏྠཱནཉཱཎཾ ཝུཏྟམེཝ ཧོཏཱིཏི ཝེདིཏབྦཾ. ཀསྨཱ དུཏིཡཏཏིཡཉཱཎཾ ཝིཡ ‘‘སམཱདཧིཏྭཱ པཙྩཡཔརིགྒཧེ པཉྙཱ’’ཏི ན ཝུཏྟནྟི ཙེ? སམཐཝིཔསྶནཱནཾ ཡུགནདྡྷཏྟཱ.

‘‘སམཱདཧིཏྭཱ ཡཐཱ ཙེ ཝིཔསྶཏི, ཝིཔསྶམཱནོ ཏཐཱ ཙེ སམཱདཧེ;

ཝིཔསྶནཱ ཙ སམཐོ ཏདཱ ཨཧུ, སམཱནབྷཱགཱ ཡུགནདྡྷཱ ཝཏྟརེ’’ཏི. –

ཧི ཝུཏྟཾ. ཏསྨཱ སམཱདྷིཾ ཨཝིསྶཛྫེཏྭཱ སམཱདྷིཉྩ ཉཱཎཉྩ ཡུགནདྡྷཾ ཀཏྭཱ ཡཱཝ ཨརིཡམགྒོ, ཏཱཝ ཨུསྶུཀྐཱཔེཏབྦནྟི ཉཱཔནཏྠཾ ‘‘པཙྩཡཔརིགྒཧེ པཉྙཱ དྷམྨཊྛིཏིཉཱཎ’’མིཙྩེཝ ཝུཏྟནྟི ཝེདིཏབྦཾ.

༥. ཨཏཱིཏཱནཱགཏཔཙྩུཔྤནྣཱནཾ དྷམྨཱནཾ སངྑིཔིཏྭཱ ཝཝཏྠཱནེ པཉྙཱཏི ཨེཏྠ ཨཏྟནོ སབྷཱཝཾ, ཨུཔྤཱདཱདིཀྑཎཾ ཝཱ པཏྭཱ ཨཏི ཨིཏཱ ཨཏིཀྐནྟཱཏི ཨཏཱིཏཱ, ཏདུབྷཡམྤི ན ཨཱགཏཱ ན སམྤཏྟཱཏི ཨནཱགཏཱ, ཏཾ ཏཾ ཀཱརཎཾ པཊིཙྩ ཨུཔྤཱདཱདིཨུདྡྷཾ པནྣཱ གཏཱ པཝཏྟཱཏི པཙྩུཔྤནྣཱ. ཨདྡྷཱ སནྟཏིཁཎཔཙྩུཔྤནྣེསུ སནྟཏིཔཙྩུཔྤནྣཾ ཨིདྷཱདྷིཔྤེཏཾ. ཏེསཾ ཨཏཱིཏཱནཱགཏཔཙྩུཔྤནྣཱནཾ པཉྩཀྑནྡྷདྷམྨཱནཾ ཨེཀེཀཀྑནྡྷལཀྑཎེ སངྑིཔིཏྭཱ ཀལཱཔཝསེན རཱསིཾ ཀཏྭཱ ཝཝཏྠཱནེ ནིཙྪཡནེ སནྣིཊྛཱཔནེ པཉྙཱ.

སམྨསནེ ¶ ཉཱཎནྟི སམྨཱ ཨཱམསནེ ཨནུམཛྫནེ པེཀྑཎེ ཉཱཎཾ, ཀལཱཔསམྨསནཉཱཎནྟི ཨཏྠོ. ཨིདཉྷི ནཱམརཱུཔཝཝཏྠཱནཉཱཎཱནནྟརཾ ནཱམརཱུཔཔཙྩཡཔརིགྒཧེ ¶ དྷམྨཊྛིཏིཉཱཎེ ཋིཏསྶ ‘‘ཡཾཀིཉྩི རཱུཔཾ ཨཏཱིཏཱནཱགཏཔཙྩུཔྤནྣཾ ཨཛ྄ཛྷཏྟཾ ཝཱ བཧིདྡྷཱ ཝཱ ཨོལཱ༹རིཀཾ ཝཱ སུཁུམཾ ཝཱ ཧཱིནཾ ཝཱ པཎཱིཏཾ ཝཱ ཡཾ དཱུརེ སནྟིཀེ ཝཱ, སབྦཾ ཏཾ རཱུཔཾ ཨནིཙྩཏོ ཝཝཏྠཔེཏི, ཨེཀཾ སམྨསནཾ, དུཀྑཏོ ཝཝཏྠཔེཏི, ཨེཀཾ སམྨསནཾ, ཨནཏྟཏོ ཝཝཏྠཔེཏི, ཨེཀཾ སམྨསན’’ནྟིཨཱདིནཱ (པཊི. མ. ༡.༤༨) ནཡེན ཝུཏྟསམྨསནཝསེན པུབྦེ ཝཝཏྠཱཔིཏེ ¶ ཨེཀེཀསྨིཾ ཁནྡྷེ ཏིལཀྑཎཾ ཨཱརོཔེཏྭཱ ཨནིཙྩཏོ དུཀྑཏོ ཨནཏྟཏོ ཝིཔསྶནྟསྶ ཀལཱཔསམྨསནཉཱཎཾ ཨུཔྤཛྫཏི.

༦. པཙྩུཔྤནྣཱནཾ དྷམྨཱནཾ ཝིཔརིཎཱམཱནུཔསྶནེ པཉྙཱཏི སནྟཏིཝསེན པཙྩུཔྤནྣཱནཾ ཨཛ྄ཛྷཏྟཾ པཉྩཀྑནྡྷདྷམྨཱནཾ ཝིཔརིཎཱམདསྶནེ བྷངྒདསྶནེ པཉྙཱ. ཡསྨཱ ‘‘ཨིམེ དྷམྨཱ ཨུཔྤཛྫིཏྭཱ བྷིཛྫནྟཱི’’ཏི ཨུདཡཾ གཧེཏྭཱཔི བྷེདེཡེཝ ཙིཏྟཾ ཋཔེཏི, ཏསྨཱ ཨཝུཏྟོཔི ཨུདཡོ ཝུཏྟོཡེཝ ཧོཏཱིཏི ཝེདིཏབྦོ. པཙྩུཔྤནྣཱནཾ དྷམྨཱནཾ དསྶནེན ཝཱ ཨུདཡདསྶནསྶ སིདྡྷཏྟཱ ཨུདཡོ ཝུཏྟོཡེཝ ཧོཏི. ན ཧི ཨུདཡཾ ཝིནཱ དྷམྨཱནཾ ཨུཔྤནྣཏྟཾ སིཛ྄ཛྷཏི, ཏསྨཱ ‘‘པཙྩུཔྤནྣཱནཾ དྷམྨཱནཾ ཨུཔྤཱདཝིཔརིཎཱམཱནུཔསྶནེ པཉྙཱ’’ཏི ཨཝུཏྟེཔི ཝུཏྟམེཝ ཧོཏཱིཏི ཝེདིཏབྦཾ. ‘‘ཨུདཡབྦཡཱནུཔསྶནེ ཉཱཎ’’ནྟི ནིཡམིཏཏྟཱ ཙ ཨུདཡདསྶནཾ སིདྡྷམེཝ ཧོཏཱིཏི ཨནནྟརཾ ཝུཏྟསྶ སམྨསནཉཱཎསྶ པཱརཾ གནྟྭཱ ཏཾསམྨསནེཡེཝ པཱཀཊཱིབྷཱུཏེ ཨུདཡབྦཡེ པརིགྒཎྷིཏྭཱ སངྑཱརཱནཾ པརིཙྪེདཀརཎཏྠཾ ཨུདཡབྦཡཱནུཔསྶནཾ ཨཱརབྷནྟསྶ ཨུཔྤཛྫཏི ཨུདཡབྦཡཱནུཔསྶནཱཉཱཎཾ. ཏཉྷི ཨུདཡབྦཡེ ཨནུཔསྶནཏོ ཨུདཡབྦཡཱནུཔསྶནཱཏི ཝུཙྩཏི.

༧. ཨཱརམྨཎཾ པཊིསངྑཱཏི རཱུཔཀྑནྡྷཱདིཨཱརམྨཎཾ བྷངྒཏོ པཊིསངྑཱཡ ཛཱནིཏྭཱ པསྶིཏྭཱ. བྷངྒཱནུཔསྶནེ པཉྙཱ ཝིཔསྶནེ ཉཱཎནྟི ཏསྶ ཨཱརམྨཎཾ བྷངྒཏོ པཊིསངྑཱཡ ཨུཔྤནྣསྶ ཉཱཎསྶ བྷངྒཾ ཨནུཔསྶནེ ཡཱ པཉྙཱ, ཏཾ ‘‘ཝིཔསྶནེ ཉཱཎ’’ནྟི ཝུཏྟཾ ཧོཏི. ཝིཔསྶནཱཏི ཙ ཝིཝིདྷཱ པསྶནཱ ཝིཔསྶནཱ. ཨཱརམྨཎཔཊིསངྑཱཏིཔི པཱཋོ. ཏསྶཏྠོ ¶ – ཨཱརམྨཎསྶ པཊིསངྑཱ ཛཱནནཱ པསྶནཱཏི ཝུཏྟནཡེནེཝ ཨཱརམྨཎཔཊིསངྑཱ ‘‘བྷངྒཱནུཔསྶནེ པཉྙཱ ཝིཔསྶནེ ཉཱཎ’’ནྟི ཝུཏྟཾ ཧོཏི. ཡསྨཱ པན བྷངྒཱནུཔསྶནཱཡ ཨེཝ ཝིཔསྶནཱ སིཁཾ པཱཔུཎཱཏི, ཏསྨཱ ཝིསེསེཏྭཱ ཨིདམེཝ ‘‘ཝིཔསྶནེ ¶ ཉཱཎ’’ནྟི ཝུཏྟཾ. ཡསྨཱ ཨུདཡབྦཡཱནུཔསྶནཱཡ ཋིཏསྶ མགྒཱམགྒཉཱཎདསྶནཾ ཨུཔྤཛྫཏི, ཏསྨཱ ཏསྶཱ སིདྡྷཱཡ ཏཾ སིདྡྷམེཝ ཧོཏཱིཏི ཏཾ ཨཝཏྭཱཝ བྷངྒཱནུཔསྶནཱཡ ཨེཝ ཝིཔསྶནཱསིཁཾ ཉཱཎཾ ཝུཏྟནྟི ཝེདིཏབྦཾ. ཨུདཡབྦཡཱནུཔསྶནཱཡ སུཔརིདིཊྛཨུདཡབྦཡསྶ སུཔརིཙྪིནྣེསུ སངྑཱརེསུ ལཧུཾ ལཧུཾ ཨུཔཊྛཧནྟེསུ ཉཱཎེ ཏིཀྑེ ཝཧནྟེ ཨུདཡཾ པཧཱཡ བྷངྒེ ཨེཝ སཏི སནྟིཊྛཏི, ཏསྶ ‘‘ཨེཝཾ ཨུཔྤཛྫིཏྭཱ ཨེཝཾ ནཱམ སངྑཱརཱ བྷིཛྫནྟཱི’’ཏི པསྶཏོ ཨེཏསྨིཾ ཋཱནེ བྷངྒཱནུཔསྶནཱཉཱཎཾ ཨུཔྤཛྫཏི.

༨. བྷཡཏུཔཊྛཱནེ པཉྙཱཏི ཨུཔྤཱདཔཝཏྟནིམིཏྟཨཱཡཱུཧནཱཔཊིསནྡྷཱིནཾ བྷཡཏོ ཨུཔཊྛཱནེ པཱིལཱ༹ཡོགཏོ སཔྤཊིབྷཡཝསེན གཧཎཱུཔགམནེ པཉྙཱཏི ཨཏྠོ. བྷཡཏོ ཨུཔཊྛཱཏཱིཏི བྷཡཏུཔཊྛཱནཾ ཨཱརམྨཎཾ ¶ , ཏསྨིཾ བྷཡཏུཔཊྛཱནེ. ཨཐ ཝཱ བྷཡཏོ ཨུཔཏིཊྛཏཱིཏི བྷཡཏུཔཊྛཱནཾ, པཉྙཱ, ཏཾ ‘‘བྷཡཏུཔཊྛཱན’’ནྟི ཝུཏྟཾ ཧོཏི.

ཨཱདཱིནཝེ ཉཱཎནྟི བྷུམྨཝཙནམེཝ. ‘‘ཡཱ ཙ བྷཡཏུཔཊྛཱནེ པཉྙཱ, ཡཉྩ ཨཱདཱིནཝེ ཉཱཎཾ, ཡཱ ཙ ནིབྦིདཱ, ཨིམེ དྷམྨཱ ཨེཀཊྛཱ, བྱཉྫནམེཝ ནཱན’’ནྟི (པཊི. མ. ༡.༢༢༧) ཝུཏྟཏྟཱ ཨེཀམིཝ ཝུཙྩམཱནམྤི ཨཝཏྠཱབྷེདེན མུཉྩིཏུཀམྱཏཱདི ཝིཡ ཏིཝིདྷམེཝ ཧོཏི. ཏསྨཱ བྷཡཏུཔཊྛཱནཨཱདཱིནཝཱནུཔསྶནཱསུ སིདྡྷཱསུ ནིབྦིདཱནུཔསྶནཱ སིདྡྷཱ ཧོཏཱིཏི ཀཏྭཱ ཨཝུཏྟཱཔི ཝུཏྟཱཝ ཧོཏཱིཏི ཝེདིཏབྦཱ.

སབྦསངྑཱརཱནཾ བྷངྒཱརམྨཎཾ བྷངྒཱནུཔསྶནཾ ཨཱསེཝནྟསྶ བྷཱཝེནྟསྶ བཧུལཱིཀརོནྟསྶ ཏིབྷཝཙཏུཡོནིཔཉྩགཏིསཏྟཝིཉྙཱཎཊྛིཏིནཝསཏྟཱཝཱསེསུ པབྷེདཀཱ སངྑཱརཱ སུཁེན ཛཱིཝིཏུཀཱམསྶ བྷཱིརུཀཔུརིསསྶ སཱིཧབྱགྒྷདཱིཔིཨཙྪཏརཙྪཡཀྑརཀྑསཙཎྜགོཎཙཎྜཀུཀྐུརཔབྷིནྣ- མདཙཎྜཧཏྠིགྷོརཨཱསིཝིསཨསནིཝིཙཀྐསུསཱནརཎབྷཱུམིཛལིཏཨངྒཱརཀཱསུཨཱདཡོ ཝིཡ མཧཱབྷཡཾ ཧུཏྭཱ ཨུཔཊྛཧནྟི, ཏསྶ ‘‘ཨཏཱིཏཱ སངྑཱརཱ ནིརུདྡྷཱ, པཙྩུཔྤནྣཱ ནིརུཛ྄ཛྷནྟི, ཨནཱགཏཱཔི ཨེཝམེཝ ནིརུཛ྄ཛྷིསྶནྟཱི’’ཏི པསྶཏོ ཨེཏསྨིཾ ཋཱནེ བྷཡཏུཔཊྛཱནཾ ཉཱཎཾ ¶ ཨུཔྤཛྫཏི. ཏསྶ ཏཾ བྷཡཏུཔཊྛཱནཉཱཎཾ ཨཱསེཝནྟསྶ བྷཱཝེནྟསྶ བཧུལཱིཀརོནྟསྶ སབྦབྷཝཡོནིགཏིཋིཏིསཏྟཱཝཱསེསུ ནེཝ ཏཱཎཾ ན ལེཎཾ ན གཏི ན པཊིསརཎཾ པཉྙཱཡཏི, སབྦབྷཝཡོནིགཏིཋིཏིནིཝཱསགཏེསུ སངྑཱརེསུ ཨེཀསངྑཱརེཔི པཏྠནཱ ཝཱ པརཱམཱསོ ¶ ཝཱ ན ཧོཏི, ཏཡོ བྷཝཱ ཝཱིཏཙྩིཏངྒཱརཔུཎྞཱ ཨངྒཱརཀཱསུཡོ ཝིཡ, ཙཏྟཱརོ མཧཱབྷཱུཏཱ གྷོརཝིསཱ ཨཱསིཝིསཱ ཝིཡ, པཉྩཀྑནྡྷཱ ཨུཀྑིཏྟཱསིཀཱ ཝདྷཀཱ ཝིཡ, ཚ ཨཛ྄ཛྷཏྟིཀཱཡཏནཱནི སུཉྙགཱམོ ཝིཡ, ཚ བཱཧིརཱཡཏནཱནི གཱམགྷཱཏཀཙོརཱ ཝིཡ, སཏྟཝིཉྙཱཎཊྛིཏིཡོ ནཝ ཙ སཏྟཱཝཱསཱ ཨེཀཱདསཧི ཨགྒཱིཧི ཨཱདིཏྟཱ སམྤཛྫལིཏཱ སཛོཏིབྷཱུཏཱ ཝིཡ ཙ, སབྦེ སངྑཱརཱ གཎྜབྷཱུཏཱ རོགབྷཱུཏཱ སལླབྷཱུཏཱ ཨགྷབྷཱུཏཱ ཨཱབཱདྷབྷཱུཏཱ ཝིཡ ཙ ནིརསྶཱདཱ ནིརསཱ མཧཱཨཱདཱིནཝརཱསིབྷཱུཏཱ ཧུཏྭཱ ཨུཔཊྛཧནྟི, སུཁེན ཛཱིཝིཏུཀཱམསྶ བྷཱིརུཀཔུརིསསྶ རམཎཱིཡཱཀཱརསཎྛིཏམྤི སཝཱལ༹ཀམིཝ ཝནགཧནཾ, སསདྡཱུལཱ ཝིཡ གུཧཱ, སགཱཧརཀྑསཾ ཝིཡ ཨུདཀཾ, སམུསྶིཏཁགྒཱ ཝིཡ པཙྩཏྠིཀཱ, སཝིསཾ ཝིཡ བྷོཛནཾ, སཙོརོ ཝིཡ མགྒོ, ཨཱདིཏྟམིཝ ཨགཱརཾ, ཨུཡྻུཏྟསེནཱ ཝིཡ རཎབྷཱུམི. ཡཐཱ ཧི སོ པུརིསོ ཨེཏཱནི སཝཱལ༹ཀཝནགཧནཱདཱིནི ཨཱགམྨ བྷཱིཏོ སཾཝིགྒོ ལོམཧཊྛཛཱཏོ སམནྟཏོ ཨཱདཱིནཝམེཝ པསྶཏི, ཨེཝམེཝ སོ ཡོགཱཝཙརོ བྷངྒཱནུཔསྶནཱཝསེན སབྦསངྑཱརེསུ བྷཡཏོ ཨུཔཊྛིཏེསུ སམནྟཏོ ནིརསཾ ནིརསྶཱདཾ ཨཱདཱིནཝམེཝ པསྶཏི. ཏསྶེཝཾ པསྶཏོ ཨཱདཱིནཝཱནུཔསྶནཱཉཱཎཾ ཨུཔྤཛྫཏི.

སོ ¶ ཨེཝཾ སབྦསངྑཱརེ ཨཱདཱིནཝཏོ སམྤསྶནྟོ སབྦབྷཝཡོནིགཏིཝིཉྙཱཎཊྛིཏིསཏྟཱཝཱསགཏེ སབྷེདཀེ སངྑཱརགཏེ ནིབྦིནྡཏི ཨུཀྐཎྛཏི ནཱབྷིརམཏི. སེཡྻཐཱཔི ནཱམ ཙིཏྟཀཱུཊཔབྦཏཔཱདཱབྷིརཏོ སུཝཎྞརཱཛཧཾསོ ཨསུཙིམྷི ཙཎྜཱལགཱམདྭཱརཨཱཝཱཊེ ནཱབྷིརམཏི, སཏྟསུ མཧཱསརེསུཡེཝ ཨབྷིརམཏི, ཨེཝམེཝ ཨཡཾ ཡོགཱིརཱཛཧཾསོ སུཔརིདིཊྛཱདཱིནཝེ སབྷེདཀེ སངྑཱརགཏེ ནཱབྷིརམཏི, བྷཱཝནཱརཱམཏཱཡ པན བྷཱཝནཱརཏིཡཱ སམནྣཱགཏཏྟཱ སཏྟསུ ཨནུཔསྶནཱསུཡེཝ ཨབྷིརམཏི. ཡཐཱ ཙ སུཝཎྞཔཉྫརེཔི པཀྑིཏྟོ སཱིཧོ མིགརཱཛཱ ནཱབྷིརམཏི, ཏིཡོཛནསཧསྶཝིཏྠཏེ པན ཧིམཝནྟེཡེཝ ¶ རམཏི, ཨེཝམཡམྤི ཡོགཱིསཱིཧོ ཏིཝིདྷེ སུགཏིབྷཝེཔི ནཱབྷིརམཏི, ཏཱིསུ ཨནུཔསྶནཱསུཡེཝ རམཏི. ཡཐཱ ཙ སབྦསེཏོ སཏྟཔྤཏིཊྛོ ཨིདྡྷིམཱ ཝེཧཱསངྒམོ ཚདྡནྟོ ནཱགརཱཛཱ ནགརམཛ྄ཛྷེ ནཱབྷིརམཏི, ཧིམཝཏི ཚདྡནྟརཧདེཡེཝ རམཏི, ཨེཝམཡཾ ཡོགཱིཝརཝཱརཎོ སབྦསྨིམྤི སངྑཱརགཏེ ནཱབྷིརམཏི, ‘‘ཨནུཔྤཱདོ ¶ ཁེམ’’ནྟིཨཱདིནཱ (པཊི. མ. ༡.༥༣) ནཡེན ནིདྡིཊྛེ སནྟིཔདེཡེཝ རམཏི, ཏནྣིནྣཏཔྤོཎཏཔྤབྦྷཱརམཱནསོ ཧོཏི. ཨེཏྟཱཝཏཱ ཏསྶ ནིབྦིདཱནུཔསྶནཱཉཱཎཾ ཨུཔྤནྣཾ ཧོཏཱིཏི.

༩. མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎནྟི མུཉྩིཏུཾ ཙཛིཏུཾ ཀཱམེཏི ཨིཙྪཏཱིཏི མུཉྩིཏུཀཱམོ, མུཉྩིཏུཀཱམསྶ བྷཱཝོ མུཉྩིཏུཀམྱཏཱ. པཊིསངྑཱཏི ཨུཔཔརིཀྑཏཱིཏི པཊིསངྑཱ, པཊིསངྑཱནཾ ཝཱ པཊིསངྑཱ. སནྟིཊྛཏི ཨཛ྄ཛྷུཔེཀྑཏཱིཏི སནྟིཊྛནཱ, སནྟིཊྛནཾ ཝཱ སནྟིཊྛནཱ. མུཉྩིཏུཀམྱཏཱ ཙ སཱ པཊིསངྑཱ ཙ སནྟིཊྛནཱ ཙཱཏི མུཉྩིཏུཀམྱཏཱཔཊིསངྑཱསནྟིཊྛནཱ. ཨིཏི པུབྦབྷཱགེ ནིབྦིདཱཉཱཎེན ནིབྦིནྣསྶ ཨུཔྤཱདཱདཱིནི པརིཙྩཛིཏུཀཱམཏཱ མུཉྩིཏུཀམྱཏཱ. མུཉྩནསྶ ཨུཔཱཡཀརཎཏྠཾ མཛ྄ཛྷེ པཊིསངྑཱནཾ པཊིསངྑཱ. མུཉྩིཏྭཱ ཨཝསཱནེ ཨཛ྄ཛྷུཔེཀྑནཾ སནྟིཊྛནཱ. ཨེཝཾ ཨཝཏྠཱབྷེདེན ཏིཔྤཀཱརཱ པཉྙཱ སངྑཱརཱནཾ ཨཛ྄ཛྷུཔེཀྑནཱསུ ཉཱཎཾ, མུཉྩིཏུཀམྱཏཱཔཊིསངྑཱསནྟིཊྛནཱསངྑཱཏཱནཾ ཨཝཏྠཱབྷེདེན བྷིནྣཱནཾ ཏིསྶནྣམྤི པཉྙཱནཾ སངྑཱརུཔེཀྑཏཾ ཨིཙྪནྟེན པན ‘‘པཉྙཱ’’ཏི ཙ ‘‘སངྑཱརུཔེཀྑཱསཱུ’’ཏི ཙ བཧུཝཙནཾ ཀཏཾ, ཨཝཏྠཱབྷེདེན བྷིནྣསྶཱཔི ཨེཀཏྟཱ ‘‘ཉཱཎ’’ནྟི ཨེཀཝཙནཾ ཀཏནྟི ཝེདིཏབྦཾ. ཝུཏྟཉྩ – ‘‘ཡཱ ཙ མུཉྩིཏུཀམྱཏཱ ཡཱ ཙ པཊིསངྑཱནུཔསྶནཱ ཡཱ ཙ སངྑཱརུཔེཀྑཱ, ཨིམེ དྷམྨཱ ཨེཀཊྛཱ, བྱཉྫནམེཝ ནཱན’’ནྟི (པཊི. མ. ༡.༢༢༧). ཀེཙི པན ‘‘སངྑཱརུཔེཀྑཱསཱུཏི བཧུཝཙནཾ སམཐཝིཔསྶནཱཝསེན སངྑཱརུཔེཀྑཱནཾ བཧུཏྟཱ’’ཏིཔི ཝདནྟི. སངྑཱརུཔེཀྑཱསཱུཏི ཙ ཀིརིཡཱཔེཀྑནྟི ¶ ཝེདིཏབྦཾ. ཨཝཏྠཱབྷེདེན པན ཏེན ནིབྦིདཱཉཱཎེན ནིབྦིནྡནྟསྶ ཨུཀྐཎྛནྟསྶ སབྦབྷཝཡོནིགཏིཝིཉྙཱཎཊྛིཏིསཏྟཱཝཱསགཏེསུ སབྷེདཀེསུ སངྑཱརེསུ ཙིཏྟཾ ན སཛྫཏི ན ལགྒཏི ན བཛ྄ཛྷཏི, སབྦསངྑཱརགཏཾ མུཉྩིཏུཀཱམཾ ཚཌྜེཏུཀཱམཾ ཧོཏི.

ཨཐ ¶ ཝཱ ཡཐཱ ཛཱལབྦྷནྟརགཏོ མཙྪོ, སཔྤམུཁགཏོ མཎྜཱུཀོ, པཉྫརཔཀྑིཏྟོ ཝནཀུཀྐུཊོ, དལ༹ྷཔཱསཝསཾགཏོ མིགོ, ཨཧིཏུཎྜིཀཧཏྠགཏོ སཔྤོ, མཧཱཔངྐཔཀྑནྡོ ཀུཉྫརོ, སུཔཎྞམུཁགཏོ ནཱགརཱཛཱ, རཱཧུམུཁཔཝིཊྛོ ཙནྡོ, སཔཏྟཔརིཀྑིཏྟོ པུརིསོཏིཨེཝམཱདཡོ ཏཏོ ཏཏོ མུཙྩིཏུཀཱམཱ ནིསྶརིཏུཀཱམཱཝ ཧོནྟི, ཨེཝཾ ཏསྶ ཡོགིནོ ཙིཏྟཾ སབྦསྨཱ སངྑཱརགཏཱ མུཙྩིཏུཀཱམཾ ནིསྶརིཏུཀཱམཾ ཧོཏི. ཨེཝཉྷི ཝུཙྩམཱནེ ‘‘མུཙྩིཏུཀཱམསྶ མུཙྩིཏུཀམྱཏཱ’’ཏི པཱཋོ ཡུཛྫཏི. ཨེཝཉྩ སཏི ‘‘ཨུཔྤཱདཾ ¶ མུཉྩིཏུཀམྱཏཱ’’ཏིཨཱདཱིསུ ‘‘ཨུཔྤཱདཱ མུཙྩིཏུཀམྱཏཱ’’ཏིཨཱདི ཝཏྟབྦཾ ཧོཏི, ཏསྨཱ པུརིམོ ཨེཝ ཨཏྠོ སུནྡརཏརོ. ཨཐསྶ སབྦསངྑཱརེསུ ཝིགཏཱལཡསྶ སབྦསངྑཱརགཏཾ མུཉྩིཏུཀཱམསྶ མུཉྩིཏུཀམྱཏཱཉཱཎཾ ཨུཔྤཛྫཏི. སོ ཨེཝཾ སབྦབྷཝཡོནིགཏིཝིཉྙཱཎཊྛིཏིསཏྟཱཝཱསགཏེ སབྷེདཀེ སངྑཱརེ མུཉྩིཏུཀཱམོ མུཉྩནསྶ ཨུཔཱཡསམྤཱདནཏྠཾ པུན ཏེ ཨེཝ སངྑཱརེ པཊིསངྑཱནུཔསྶནཱཉཱཎེན ཏིལཀྑཎཾ ཨཱརོཔེཏྭཱ ཝིཔསྶཏི. ཨེཝཉྷི ཝིཔསྶཏོ ཙསྶ ཨནིཙྩཝསེན ནིམིཏྟཾ པཊིསངྑཱཉཱཎཾ ཨུཔྤཛྫཏི, དུཀྑཝསེན པཝཏྟཾ པཊིསངྑཱཉཱཎཾ ཨུཔྤཛྫཏི, ཨནཏྟཝསེན ནིམིཏྟཉྩ པཝཏྟཉྩ པཊིསངྑཱཉཱཎཾ ཨུཔྤཛྫཏི. སོ པཊིསངྑཱནུཔསྶནཱཉཱཎེན ‘‘སབྦེ སངྑཱརཱ སུཉྙཱ’’ཏི དིསྭཱ ཏིལཀྑཎཾ ཨཱརོཔེཏྭཱ སངྑཱརེ པརིགྒཎྷནྟོ བྷཡཉྩ ནནྡིཉྩ ཝིཔྤཧཱཡ བྷརིཡཱཡ དོསཾ དིསྭཱ ཝིསྶཊྛབྷརིཡོ ཝིཡ པུརིསོ ཏསྶཱ བྷརིཡཱཡ སངྑཱརེསུ ཨུདཱསཱིནོ ཧོཏི མཛ྄ཛྷཏྟོ, ‘‘ཨཧ’’ནྟི ཝཱ ‘‘མམ’’ནྟི ཝཱ ན གཎྷཱཏི. ཏསྶ ཨེཝཾ ཛཱནཏོ ཨེཝཾ པསྶཏོ ཏཱིསུ བྷཝེསུ ཙིཏྟཾ པཏིལཱིཡཏི པཊིཀུཊཏི པཊིཝཏྟཏི ན སམྤསཱརིཡཏི. སེཡྻཐཱཔི ནཱམ པདུམཔལཱསེ ¶ ཨཱིསཀཾ པོཎེ ཨུདཀཕུསིཏཱནི པཏིལཱིཡནྟི པཊིཀུཊནྟི པཊིཝཏྟནྟི ན སམྤསཱརིཡནྟི. སེཡྻཐཱཔི ཝཱ པན ཀུཀྐུཊཔཏྟཾ ཝཱ ནྷཱརུདདྡུལཾ ཝཱ ཨགྒིམྷི པཀྑིཏྟཾ པཏིལཱིཡཏི པཊིཀུཊཏི པཊིཝཏྟཏི ན སམྤསཱརིཡཏི, ཨེཝཾ ཏསྶ ཏཱིསུ བྷཝེསུ ཙིཏྟཾ པཏིལཱིཡཏི པཊིཀུཊཏི པཊིཝཏྟཏི ན སམྤསཱརིཡཏི, ཨུཔེཀྑཱ སཎྛཱཏི. ཨེཝམསྶ སངྑཱརུཔེཀྑཱཉཱཎཾ ཨུཔྤནྣཾ ཧོཏི. ཨིམིནཱ སངྑཱརུཔེཀྑཱཉཱཎེན སདྡྷིཾ ཨུཔརི གོཏྲབྷུཉཱཎསྶ སཱདྷཀཾ ཨནུལོམཉཱཎཾ པུབྦཱཔརཉཱཎེཧི ཨཝུཏྟམྤི ཝུཏྟམེཝ ཧོཏཱིཏི ཝེདིཏབྦཾ. ཝུཏྟཉྷི བྷགཝཏཱ –

‘‘སོ ཝཏ, བྷིཀྑཝེ, བྷིཀྑུ ཀཉྩི སངྑཱརཾ ནིཙྩཏོ སམནུཔསྶནྟོ ཨནུལོམིཀཱཡ ཁནྟིཡཱ སམནྣཱགཏོ བྷཝིསྶཏཱིཏི ནེཏཾ ཋཱནཾ ཝིཛྫཏི, ཨནུལོམིཀཱཡ ཁནྟིཡཱ ཨསམནྣཱགཏོ སམྨཏྟནིཡཱམཾ ཨོཀྐམིསྶཏཱིཏི ནེཏཾ ཋཱནཾ ཝིཛྫཏི, སམྨཏྟནིཡཱམཾ ཨནོཀྐམམཱནོ སོཏཱཔཏྟིཕལཾ ཝཱ སཀདཱགཱམིཕལཾ ཝཱ ཨནཱགཱམིཕལཾ ཝཱ ¶ ཨརཧཏྟཕལཾ ཝཱ སཙྪིཀརིསྶཏཱིཏི ནེཏཾ ཋཱནཾ ཝིཛྫཏཱི’’ཏིཨཱདི (ཨ. ནི. ༦.༩༨; པཊི. མ. ༣.༣༦).

ཝུཏྟཉྩ དྷམྨསེནཱཔཏིནཱ –

‘‘ཀཏིཧཱཀཱརེཧི ཨནུལོམིཀཾ ཁནྟིཾ པཊིལབྷཏི? ཀཏིཧཱཀཱརེཧི སམྨཏྟནིཡཱམཾ ཨོཀྐམཏི? ཙཏྟཱལཱིསཱཡ ཨཱཀཱརེཧི ཨནུལོམིཀཾ ¶ ཁནྟིཾ པཊིལབྷཏི, ཙཏྟཱལཱིསཱཡ ཨཱཀཱརེཧི སམྨཏྟནིཡཱམཾ ཨོཀྐམཏཱི’’ཏིཨཱདི (པཊི. མ. ༣.༣༧).

པཊྛཱནེ ཙེཏཾ ཝུཏྟཾ བྷགཝཏཱ –

‘‘ཨནུལོམཾ གོཏྲབྷུསྶ ཨནནྟརཔཙྩཡེན པཙྩཡོ. ཨནུལོམཾ ཝོདཱནསྶ ཨནནྟརཔཙྩཡེན པཙྩཡོ’’ཏིཨཱདི (པཊྛཱ. ༡.༡.༤༡༧).

ཏསྶ ཧི ཏཾ སངྑཱརུཔེཀྑཱཉཱཎཾ ཨཱསེཝནྟསྶ བྷཱཝེནྟསྶ བཧུལཱིཀརོནྟསྶ ཨདྷིམོཀྑསདྡྷཱ བལཝཏརཱ ཧོཏི, ཝཱིརིཡཾ སུཔགྒཧིཏཾ, སཏི སཱུཔཊྛིཏཱ, ཙིཏྟཾ སུསམཱཧིཏཾ, སངྑཱརུཔེཀྑཱཉཱཎཾ ཏིཀྑཏརཾ པཝཏྟཏི. ཏསྶ ཨིདཱནི མགྒོ ཨུཔྤཛྫིསྶཏཱིཏི སངྑཱརུཔེཀྑཱཡ སངྑཱརེ ‘‘ཨནིཙྩཱ’’ཏི ཝཱ ‘‘དུཀྑཱ’’ཏི ཝཱ ‘‘ཨནཏྟཱ’’ཏི ཝཱ སམྨསིཏྭཱ བྷཝངྒཾ ཨོཏརཏི. བྷཝངྒཱནནྟརཾ སངྑཱརུཔེཀྑཱཡ ཀཏནཡེནེཝ སངྑཱརེ ‘‘ཨནིཙྩཱ’’ཏི ཝཱ ‘‘དུཀྑཱ’’ཏི ཝཱ ‘‘ཨནཏྟཱ’’ཏི ཝཱ ཨཱརམྨཎཾ ཀུརུམཱནཾ ཨུཔྤཛྫཏི མནོདྭཱརཱཝཛྫནཾ. ཏདནནྟརཾ ཏཐེཝ སངྑཱརེ ཨཱརམྨཎཾ ཀཏྭཱ དྭེ ཏཱིཎི ཙཏྟཱརི ཝཱ ཛཝནཙིཏྟཱནི ཨུཔྤཛྫནྟི. ཏཾསམྤཡུཏྟཾ ¶ ཉཱཎཾ ཨནུལོམཉཱཎཾ. ཏཉྷི པུརིམཱནཉྩ ཨཊྛནྣཾ ཝིཔསྶནཱཉཱཎཱནཾ ཏཐཀིཙྩཏཱཡ ཨནུལོམེཏི, ཨུཔརི ཙ པཏྟབྦཱནཾ སཏྟཏིཾསཱཡ བོདྷིཔཀྑིཡདྷམྨཱནཾ ཨནུལོམེཏི. ཡཐཱ ཧི དྷམྨིཀོ རཱཛཱ ཝིནིཙྪཡཊྛཱནེ ནིསིནྣོ ཨཊྛནྣཾ ཝོཧཱརིཀམཧཱམཏྟཱནཾ ཝིནིཙྪཡཾ སུཏྭཱ ཨགཏིགམནཾ པཧཱཡ མཛ྄ཛྷཏྟོ ཧུཏྭཱ ‘‘ཨེཝཾ ཧོཏཱུ’’ཏི ཨནུམོདམཱནོ ཏེསཉྩ ཝིནིཙྪཡསྶ ཨནུལོམེཏི, པོརཱཎསྶ ཙ རཱཛདྷམྨསྶ. ཏཏྠ རཱཛཱ ཝིཡ ཨནུལོམཉཱཎཾ, ཨཊྛ ཝོཧཱརིཀམཧཱམཏྟཱ ཝིཡ ཨཊྛ ཝིཔསྶནཱཉཱཎཱནི, པོརཱཎརཱཛདྷམྨོ ཝིཡ སཏྟཏིཾས བོདྷིཔཀྑིཡདྷམྨཱ, ཡཐཱ རཱཛཱ ‘‘ཨེཝཾ ཧོཏཱུ’’ཏི ཨནུམོདམཱནོ ཝོཧཱརིཀཱནཉྩ ཝིནིཙྪཡསྶ རཱཛདྷམྨསྶ ཙ ཨནུལོམེཏི, ཨེཝམིདཾ ཨནིཙྩཱདིཝསེན སངྑཱརེ ཨཱརབྦྷ ཨུཔྤཛྫམཱནཱནཾ ཨཊྛནྣཉྩ ཝིཔསྶནཱཉཱཎཱནཾ ཏཐཀིཙྩཏཱཡ ཨནུལོམེཏི, ཨུཔརི ཙ པཏྟབྦཱནཾ སཏྟཏིཾསཱཡ བོདྷིཔཀྑིཡདྷམྨཱནཾ. ཏསྨཱ ཨནུལོམཉཱཎནྟི ཝུཙྩཏི.

༡༠. བཧིདྡྷཱ ¶ ཝུཊྛཱནཝིཝཊྚནེ པཉྙཱ གོཏྲབྷུཉཱཎནྟི ཨེཏྠ བཧིདྡྷཱཏི སངྑཱརནིམིཏྟཾ. ཏཉྷི ཨཛ྄ཛྷཏྟཙིཏྟསནྟཱནེ ཨཀུསལཀྑནྡྷེ ཨུཔཱདཱཡ བཧིདྡྷཱཏི ཝུཏྟཾ. ཏསྨཱ བཧིདྡྷཱ སངྑཱརནིམིཏྟམྷཱ ཝུཊྛཱཏི ཝིགཏཾ ཧུཏྭཱ ཨུདྡྷཾ ¶ ཏིཊྛཏཱིཏི ཝུཊྛཱནཾ, ཝིཝཊྚཏི པརཱཝཊྚཏི པརམྨུཁཾ ཧོཏཱིཏི ཝིཝཊྚནཾ, ཝུཊྛཱནཉྩ ཏཾ ཝིཝཊྚནཉྩཱཏི ཝུཊྛཱནཝིཝཊྚནཾ. ཏེནེཝཱཧ –

‘‘གོཏྲབྷུཉཱཎཾ སམུདཡསྶ ཨསམུཙྪིནྡནཏོ པཝཏྟཱ ན ཝུཊྛཱཏི, ནིབྦཱནཱརམྨཎཏོ པན ནིམིཏྟཱ ཝུཊྛཱཏཱིཏི ཨེཀཏོ ཝུཊྛཱནཾ ཧོཏཱི’’ཏི (ཝིསུདྡྷི. ༢.༨༢༧).

པུཐུཛྫནགོཏྟཱབྷིབྷཝནཏོ ཨརིཡགོཏྟབྷཱཝནཏོ གོཏྲབྷུ. ཨིདཉྷི ཨནུལོམཉཱཎེཧི པདུམཔལཱསཏོ ཨུདཀམིཝ སབྦསངྑཱརཏོ པཏིལཱིཡམཱནཙིཏྟསྶ ཨནུལོམཉཱཎསྶ ཨཱསེཝནནྟེ ཨནིམིཏྟཾ ནིབྦཱནཾ ཨཱརམྨཎཾ ཀུརུམཱནཾ པུཐུཛྫནགོཏྟཾ པུཐུཛྫནསངྑཾ པུཐུཛྫནབྷཱུམིཾ ཨཏིཀྐམམཱནཾ ཨརིཡགོཏྟཾ ཨརིཡསངྑཾ ཨརིཡབྷཱུམིཾ ཨོཀྐམམཱནཾ ནིབྦཱནཱརམྨཎེ པཋམཱཝཏྟནཔཋམཱབྷོགཔཋམསམནྣཱཧཱརབྷཱུཏཾ མགྒསྶ ཨནནྟརསམནནྟརཱསེཝནཨུཔནིསྶཡནཏྠིཝིགཏཝསེན ཚཧི ཨཱཀཱརེཧི པཙྩཡབྷཱཝཾ ¶ སཱདྷཡམཱནཾ སིཁཱཔྤཏྟཾ ཝིཔསྶནཱཡ མུདྡྷབྷཱུཏཾ ཨཔུནརཱཝཏྟཀཾ ཨུཔྤཛྫཏི.

༡༡. དུབྷཏོ ཝུཊྛཱནཝིཝཊྚནེ པཉྙཱ མགྒེ ཉཱཎནྟི ཨེཏྠ དུབྷཏོཏི ཨུབྷཏོ, དྭཡཏོཏི ཝཱ ཝུཏྟཾ ཧོཏི. ཀིལེསཱནཾ སམུཙྪིནྡནཏོ ཀིལེསེཧི ཙ ཏདནུཝཏྟཀཀྑནྡྷེཧི ཙ ནིབྦཱནཱརམྨཎཀརཎཏོ བཧིདྡྷཱ སབྦསངྑཱརནིམིཏྟེཧི ཙ ཝུཊྛཱཏི ཝིཝཊྚཏཱིཏི དུབྷཏོ ཝུཊྛཱནཝིཝཊྚནེ པཉྙཱ. ཏེནེཝཱཧ –

‘‘ཙཏྟཱརིཔི མགྒཉཱཎཱནི ཨནིམིཏྟཱརམྨཎཏྟཱ ནིམིཏྟཏོ ཝུཊྛཧནྟི, སམུདཡསྶ སམུཙྪིནྡནཏོ པཝཏྟཱ ཝུཊྛཧནྟཱིཏི དུབྷཏོ ཝུཊྛཱནཱནི ཧོནྟཱི’’ཏི (ཝིསུདྡྷི. ༢.༨༢༧).

མགྒེ ཉཱཎནྟི ནིབྦཱནཾ མགྒཏི པེཀྑཏི, ནིབྦཱནཏྠིཀེཧི ཝཱ མགྒཱིཡཏི ཨནྭེསཱིཡཏི, ཀིལེསེ ཝཱ མཱརེནྟོ གཙྪཏི པཝཏྟཏཱིཏི མགྒོ, ཏསྨིཾ མགྒེ ཉཱཎཾ. ཛཱཏིགྒཧཎེན ཨེཀཝཙནཾ ཀཏཾ. ཏཉྷི གོཏྲབྷུཉཱཎསྶ ཨནནྟརཾ ནིབྦཱནཾ ཨཱརམྨཎཾ ཀུརུམཱནཾ སཡཾཝཛ྄ཛྷེ ཀིལེསེ ནིརཝསེསཾ སམུཙྪིནྡམཱནཾ ཨནམཏགྒསཾསཱརཝཊྚདུཀྑསམུདྡཾ སོསཡམཱནཾ སབྦཱཔཱཡདྭཱརཱནི པིདཧམཱནཾ སཏྟཨརིཡདྷནསམྨུཁཱིབྷཱཝཾ ཀུརུམཱནཾ ཨཊྛངྒིཀཾ མིཙྪཱམགྒཾ པཛཧམཱནཾ སབྦཝེརབྷཡཱནི ¶ ¶ ཝཱུཔསམཡམཱནཾ སམྨཱསམྦུདྡྷསྶ ཨོརསཔུཏྟབྷཱཝམུཔནཡམཱནཾ ཨཉྙཱནི ཙ ཨནེཀཱནི ཨཱནིསཾསསཏཱནི པཊིལཱབྷཡམཱནཾ མགྒཉཱཎཾ ཨུཔྤཛྫཏི.

ཋཱཏུཾ ཨིཙྪཾ པུརིསོ, ལངྒྷིཏྭཱ མཱཏིཀཱཡ པརཏཱིརེ;

ཝེགེནཱགམྨ ཡཐཱ, གཎྷིཏྭཱ ཨོརིམཏིརཏརུབདྡྷཾ.

རཛྫུཾ ཝཱ དཎྜཾ ཝཱ, ཨུལླངྒྷིཏྭཱན པཱརནིནྣཏནུ;

པཱརཱཔནྣོ པན ཏཾ, མུཉྩིཡ ཝེདྷཾ པཏིཊྛཧཏི པཱརེ.

ཨེཝཾ ཡོགཱཝཙརོ, སཀྐཱཡམཡམྷི ཨོརིམེ ཏཱིརེ;

དིཊྛབྷཡོ ཨབྷཡེ པན, ཋཱཏུཾ ཨིཙྪཾ ཨམཏཔཱརེ.

ཨུདཡབྦཡཱནུཔསྶ ¶ , པབྷུཏིཀཝེགེན ཨཱགཏོ རཛྫུཾ;

རཱུཔཱཝ྄ཧཾ དཎྜཾ ཝཱ, ཏདིཏརཁནྡྷཱཝ྄ཧཡཾ སམྨཱ.

གཎྷིཏྭཱ ཨཱཝཛྫན, ཙིཏྟེན ཧི པུབྦཝུཏྟནཡཏོཝ;

ཨནུལོམེཧུལླངྒྷིཡ, ནིབྦུཏིནིནྣོ ཏདཱསནོཔགཏོ.

ཏཾ མུཉྩིཡ གོཏྲབྷུནཱ, ཨལདྡྷཨཱསེཝནེན ཏུ པཝེདྷཾ;

པཏིཏོ སངྑཏཔཱརེ, ཏཏོ པཏིཊྛཱཏི མགྒཉཱཎེན.

པསྶིཏུཀཱམོ ཙནྡཾ, ཙནྡེ ཚནྣམྷི ཨབྦྷཔཊལེཧི;

ཐུལཀསུཁུམསུཁུམེསུ, ཨབྦྷེསུ ཧཊེསུ ཝཱཡུནཱ ཀམཏོ.

ཙནྡཾ པསྶེཡྻ ནརོ, ཡཐཱ ཏཐེཝཱནུལོམཉཱཎེཧི ཀམཱ;

སཙྩཙྪཱདཀམོཧེ, ཝིནཱསིཏེ པེཀྑཏེ ཧི གོཏྲབྷུ ཨམཏཾ.

ཝཱཏཱ ཝིཡ ཏེ ཙནྡཾ, ཨམཏཾ ན ཧི པེཀྑརེནུལོམཱནི;

པུརིསོ ཨབྦྷཱནི ཡཐཱ, གོཏྲབྷུ ན ཏམཾ ཝིནོདེཏི.

བྷམིཏམྷི ¶ ཙཀྐཡནྟེ, ཋིཏོ ནརོ ཨཉྙདིནྣསཉྙཱཡ;

ཨུསུཔཱཏེ ཕལཀསཏཾ, ཨཔེཀྑམཱནོ ཡཐཱ ཝིཛ྄ཛྷེ.

ཨེཝམིདྷ མགྒཉཱཎཾ, གོཏྲབྷུནཱ དིནྣསཉྙམཝིཧཱཡ;

ནིབྦཱནེ ཝཏྟནྟཾ, ལོབྷཀྑནྡྷཱདིཀེ པདཱལེཏི.

སཾསཱརདུཀྑཛལདྷིཾ ¶ ¶ , སོསཡཏི པིདཧཏི དུགྒཏིདྭཱརཾ;

ཀུརུཏེ ཙ ཨརིཡདྷནིནཾ, མིཙྪཱམགྒཉྩ པཛཧཱཏི.

ཝེརབྷཡཱནི སམཡཏེ, ཀརོཏི ནཱཐསྶ ཨོརསསུཏཏྟཾ;

ཨཉྙེ ཙ ཨནེཀསཏེ, ཨཱནཱིསཾསེ དདཱཏི ཉཱཎམིདནྟི.

༡༢. པཡོགཔྤཊིཔྤསྶདྡྷིཔཉྙཱ ཕལེ ཉཱཎནྟི ཨེཏྠ པཡོགོཏི བྷུསོ ཡོགོ, ཕལསཙྪིཀིརིཡཱཡ མགྒབྷཱཝནཱཡ ཨུབྷཏོ ཝུཊྛཱནཔཡོགོ, ཏསྶ པཡོགསྶ པཊིཔྤསྶམྦྷནཾ ནིཊྛཱནཾ པཡོགཔཊིཔྤསྶདྡྷི. ཀིཾ ཏཾ? ཙཏུམགྒཀིཙྩཔརིཡོསཱནཾ. ཏསྶཱ པཡོགཔཊིཔྤསྶདྡྷིཡཱ ཧེཏུབྷཱུཏཱཡ པཝཏྟཱ ཕལེ པཉྙཱ པཡོགཔྤཊིཔྤསྶདྡྷིཔཉྙཱ. ཕལཏི ཝིཔཙྩཏཱིཏི ཕལཾ, ཏསྨིཾ ཕལེ ཏཾསམྤཡུཏྟཾ ཉཱཎཾ. ཨེཀེཀསྶ ཧི མགྒཉཱཎསྶ ཨནནྟརཱ ཏསྶ ཏསྶེཝ ཝིཔཱཀབྷཱུཏཱནི ནིབྦཱནཱརམྨཎཱནི ཏཱིཎི ཝཱ དྭེ ཝཱ ཨེཀཾ ཝཱ ཕལཙིཏྟཱནི ཨུཔྤཛྫནྟི. ཨནནྟརཝིཔཱཀཏྟཱཡེཝ ལོཀུཏྟརཀུསལཱནཾ ‘‘སམཱདྷིམཱནནྟརིཀཉྙམཱཧཱུ’’ཏི (ཁུ. པཱ. ༦.༥; སུ. ནི. ༢༢༨) ཙ, ‘‘དནྡྷཾ ཨཱནནྟརིཀཾ པཱཔུཎཱཏི ཨཱསཝཱནཾ ཁཡཱཡཱ’’ཏི (ཨ. ནི. ༤.༡༦༢) ཙ ཨཱདི ཝུཏྟཾ. ཡསྶ དྭེ ཨནུལོམཱནི, ཏསྶ ཏཏིཡཾ གོཏྲབྷུ, ཙཏུཏྠཾ མགྒཙིཏྟཾ, ཏཱིཎི ཕལཙིཏྟཱནི ཧོནྟི. ཡསྶ ཏཱིཎི ཨནུལོམཱནི, ཏསྶ ཙཏུཏྠཾ གོཏྲབྷུ, པཉྩམཾ མགྒཙིཏྟཾ, དྭེ ཕལཙིཏྟཱནི ཧོནྟི. ཡསྶ ཙཏྟཱརི ཨནུལོམཱནི, ཏསྶ པཉྩམཾ གོཏྲབྷུ, ཚཊྛཾ མགྒཙིཏྟཾ, ཨེཀཾ ཕལཙིཏྟཾ ཧོཏི. ཨིདཾ མགྒཝཱིཐིཡཾ ཕལཾ. ཀཱལནྟརཕལཾ པན སམཱཔཏྟིཝསེན ཨུཔྤཛྫམཱནཾ ནིརོདྷཱ ཝུཊྛཧནྟསྶ ཨུཔྤཛྫམཱནཉྩ ཨེཏེནེཝ སངྒཧིཏཾ.

༡༣. ཚིནྣཝཊུམཱནུཔསྶནེ པཉྙཱཏི ཏེན ཏེན ཨརིཡམགྒེན སམུཙྪིནྣཾ ཏཾ ཏཾ ཨུཔཀྐིལེསཾ པཙྪཱ པསྶནེ པཉྙཱ. ཝིམུཏྟིཉཱཎནྟི ཝིམུཏྟིཡཱ ཉཱཎཾ. ཝིམུཏྟཱིཏི ཙ ཨུཔཀྐིལེསེཧི ཝིམུཏྟཾ པརིསུདྡྷཾ ཙིཏྟཾ, ཝིམུཏྟབྷཱཝོ ཝཱ. ཏསྶཱ ཝིམུཏྟིཡཱ ¶ ཛཱནནཾ ཉཱཎཾ ཝིམུཏྟིཉཱཎཾ. ཀིལེསེཧི ཝིམུཏྟཾ ཙིཏྟསནྟཏིམྤི ཀིལེསེཧི ཝིམུཏྟབྷཱཝམྤི པཙྩཝེཀྑནྟོ ཀིལེསེཧི ¶ ན ཝིནཱ པཙྩཝེཀྑཏཱིཏི ཨེཏེན པཧཱིནཀིལེསཔཙྩཝེཀྑཎཾ ཝུཏྟཾ ཧོཏི. ‘‘ཝིམུཏྟསྨིཾ ཝིམུཏྟམིཏི ཉཱཎཾ ཧོཏཱི’’ཏི (མཧཱཝ. ༢༣; དཱི. ནི. ༡.༢༤༨) ཧི ཨིདམེཝ སནྡྷཱཡ ཝུཏྟཾ. ཨཝསིཊྛཀིལེསཔཙྩཝེཀྑཎཾ པན ཨཝུཏྟམྤི ཨིམིནཱཝ ཝུཏྟཾ ཧོཏཱིཏི གཧེཏབྦཾ. ཝུཏྟཉྩ –

‘‘ཝུཏྟམྷི ¶ ཨེཀདྷམྨེ, ཡེ དྷམྨཱ ཨེཀལཀྑཎཱ ཏེན;

ཝུཏྟཱ བྷཝནྟི སབྦེ, ཨིཏི ཝུཏྟོ ལཀྑཎོ ཧཱརོ’’ཏི. (ནེཏྟི. ༤.༥ ནིདྡེསཝཱར);

ཨཐ ཝཱ ཨརཧཏོ ཨཝསིཊྛཀིལེསཔཙྩཝེཀྑཎཱབྷཱཝཱ ཙཏུནྣཾ ཨརིཡཱནཾ ལབྦྷམཱནཾ པཧཱིནཀིལེསཔཙྩཝེཀྑཎམེཝ ཝུཏྟནྟི ཝེདིཏབྦཾ.

༡༤. ཏདཱ སམུདཱགཏེ དྷམྨེ པསྶནེ པཉྙཱཏི ཏདཱ མགྒཀྑཎེ ཕལཀྑཎེ ཙ སམུདཱགཏེ པཊིལཱབྷཝསེན ཙ པཊིཝེདྷཝསེན ཙ སམཱགཏེ སམྤཏྟེ སམངྒིབྷཱུཏེ མགྒཕལདྷམྨེ ཙཏུསཙྩདྷམྨེ ཙ པསྶནཱ པེཀྑཎཱ པཛཱནནཱ པཉྙཱ. པཙྩཝེཀྑཎེ ཉཱཎནྟི ནིཝཏྟིཏྭཱ བྷུསཾ པསྶནཾ ཛཱནནཾ ཉཱཎཾ. ཨིམིནཱ ཙ ཉཱཎདྭཡེན པཙྩཝེཀྑཎཉཱཎཱནི ཝུཏྟཱནི ཧོནྟི. སོཏཱཔནྣསྶ ཧི མགྒཝཱིཐིཡཾ སོཏཱཔཏྟིཕལཔརིཡོསཱནེ ཙིཏྟཾ བྷཝངྒཾ ཨོཏརཏི, ཏཏོ བྷཝངྒཾ ཨུཔཙྪིནྡིཏྭཱ མགྒཔཙྩཝེཀྑཎཏྠཱཡ མནོདྭཱརཱཝཛྫནཾ ཨུཔྤཛྫཏི, ཏསྨིཾ ནིརུདྡྷེ པཊིཔཱཊིཡཱ སཏྟ མགྒཔཙྩཝེཀྑཎཛཝནཱནཱིཏི. པུན བྷཝངྒཾ ཨོཏརིཏྭཱ ཏེནེཝ ནཡེན ཕལཱདཱིནཾ པཙྩཝེཀྑཎཏྠཱཡ ཨཱཝཛྫནཱདཱིནི ཨུཔྤཛྫནྟི. ཡེསཾ ཨུཔྤཏྟིཡཱ ཨེས མགྒཾ པཙྩཝེཀྑཏི, ཕལཾ པཙྩཝེཀྑཏི, པཧཱིནཀིལེསེ པཙྩཝེཀྑཏི, ཨཝསིཊྛཀིལེསེ པཙྩཝེཀྑཏི, ནིབྦཱནཾ པཙྩཝེཀྑཏི. སོ ཧི ‘‘ཨིམིནཱ ཝཏཱཧཾ མགྒེན ཨཱགཏོ’’ཏི མགྒཾ པཙྩཝེཀྑཏི, ཏཏོ ‘‘ཨཡཾ མེ ཨཱནིསཾསོ ལདྡྷོ’’ཏི ཕལཾ པཙྩཝེཀྑཏི, ཏཏོ ‘‘ཨིམེ ནཱམ མེ ཀིལེསཱ པཧཱིནཱ’’ཏི པཧཱིནཀིལེསེ པཙྩཝེཀྑཏི, ཏཏོ ‘‘ཨིམེ ནཱམ མེ ཀིལེསཱ ཨཝསིཊྛཱ’’ཏི ཨུཔརིམགྒཝཛ྄ཛྷེ ¶ ཀིལེསེ པཙྩཝེཀྑཏི, ཨཝསཱནེ ‘‘ཨཡཾ མེ དྷམྨོ ཨཱརམྨཎཏོ པཊིལདྡྷོ’’ཏི ཨམཏཾ ནིབྦཱནཾ པཙྩཝེཀྑཏི. ཨིཏི སོཏཱཔནྣསྶ ཨརིཡསཱཝཀསྶ པཉྩ པཙྩཝེཀྑཎཱནི ཧོནྟི. ཡཐཱ ཙ སོཏཱཔནྣསྶ, ཨེཝཾ སཀདཱགཱམིཨནཱགཱམཱིནམྤི. ཨརཧཏོ པན ཨཝསིཊྛཀིལེསཔཙྩཝེཀྑཎཾ ནཱམ ནཏྠཱིཏི ཙཏྟཱརིཡེཝ པཙྩཝེཀྑཎཱནི. ཨེཝཾ སབྦཱནི ཨེཀཱུནཝཱིསཏི པཙྩཝེཀྑཎཉཱཎཱནི. ཨུཀྐཊྛཔརིཙྪེདོཡེཝ ཙེསོ. པཧཱིནཱཝསིཊྛཀིལེསཔཙྩཝེཀྑཎཾ སེཀྑཱནཾ ཧོཏི ཝཱ ན ཝཱ. ཏསྶ ཧི ཨབྷཱཝཏོཡེཝ མཧཱནཱམོ སཀྐོ བྷགཝནྟཾ ¶ པུཙྪི ‘‘ཀོསུ ནཱམ མེ དྷམྨོ ཨཛ྄ཛྷཏྟཾ ཨཔྤཧཱིནོ, ཡེན མེ ཨེཀདཱ ལོབྷདྷམྨཱཔི ཙིཏྟཾ པརིཡཱདཱཡ ཏིཊྛནྟཱི’’ཏིཨཱདི (མ. ནི. ༡.༡༧༥).

ཨེཏྠ ¶ དྷམྨཊྛིཏིཉཱཎཱདཱིནཾ ཨེཀཱདསནྣཾ ཉཱཎཱནཾ ཝིབྷཱཝནཏྠཱཡ ཨཡཾ ཨུཔམཱ ཝེདིཏབྦཱ – ཡཐཱ པུརིསོ ‘‘མཙྪེ གཧེསྶཱམཱི’’ཏི མཙྪཁིཔྤཾ གཧེཏྭཱ ཏདནུརཱུཔེ ཨུདཀེ ཨོསཱརེཏྭཱ ཁིཔྤམུཁེན ཧཏྠཾ ཨོཏཱརེཏྭཱ ཨནྟོཨུདཀེ ཀཎྷསཔྤཾ མཙྪསཉྙཱཡ གཱིཝཱཡ དལ༹ྷཾ གཧེཏྭཱ ‘‘མཧཱ ཝཏ མཡཱ མཙྪོ ལདྡྷོ’’ཏི ཏུཊྛོ ཨུཀྑིཔིཏྭཱ པསྶནྟོ སོཝཏྠིཀཏྟཡདསྶནེན ‘‘སཔྤོ’’ཏི སཉྫཱནིཏྭཱ བྷཱིཏོ ཨཱདཱིནཝཾ དིསྭཱ གཧཎེ ནིབྦིནྣོ མུཉྩིཏུཀཱམོ ཧུཏྭཱ མུཉྩནསྶ ཨུཔཱཡཾ ཀརོནྟོ ཨགྒནངྒུཊྛཏོ པཊྛཱཡ ཧཏྠཾ ནིབྦེཋེཏྭཱ བཱཧཾ ཨུཀྑིཔིཏྭཱ ཨུཔརིསཱིསེ དྭེ ཏཡོ ཝཱརེ པརིབྦྷམེཏྭཱ སཔྤཾ དུབྦལཾ ཀཏྭཱ ‘‘གཙྪ རེ དུཊྛསཔྤཱ’’ཏི ནིསྶཛྫིཏྭཱ ཝེགེན ཐལཾ ཨཱརུཡ྄ཧ ཋིཏོཝ ‘‘མཧནྟསྶ ཝཏ བྷོ སཔྤསྶ མུཁཏོ མུཏྟོམྷཱི’’ཏི ཧཊྛོ ཨཱགཏམགྒཾ ཨོལོཀེཡྻ.

ཏཏྠ ཏསྶ པུརིསསྶ མཙྪསཉྙཱཡ ཀཎྷསཔྤཾ དལ༹ྷཾ གཧེཏྭཱ ཏུསྶནཾ ཝིཡ ཨིམསྶ ཡོགིནོ ཨཱདིཏོ བཱལཔུཐུཛྫནསྶ ཨནིཙྩཏཱདིཝསེན བྷཡཱནཀཾ ཁནྡྷཔཉྩཀཾ ནིཙྩཱདིསཉྙཱཡ ‘‘ཨཧཾ མམཱ’’ཏི དིཊྛིཏཎྷཱཧི དལ༹ྷཾ གཧེཏྭཱ ཏུསྶནཾ, ཏསྶ ཁིཔྤམུཁཏོ སཔྤཾ ནཱིཧརིཏྭཱ སོཝཏྠིཀཏྟཡཾ དིསྭཱ ‘‘སཔྤོ’’ཏི སཉྫཱནནཾ ཝིཡ སཔྤཙྩཡནཱམརཱུཔཔརིགྒཧེན གྷནཝིནིབྦྷོགཾ ཀཏྭཱ ཀལཱཔསམྨསནཱདཱིཧི ཉཱཎེཧི ཁནྡྷཔཉྩཀསྶ ཨནིཙྩཏཱདིལཀྑཎཏྟཡཾ དིསྭཱ ‘‘ཨནིཙྩཾ དུཀྑམནཏྟཱ’’ཏི ཏསྶ ཝཝཏྠཱཔནཾ ¶ , ཏསྶ བྷཱཡནཾ ཝིཡ ཨིམསྶ བྷཡཏུཔཊྛཱནཉཱཎཾ, སཔྤེ ཨཱདཱིནཝདསྶནཾ ཝིཡ ཨཱདཱིནཝཱནུཔསྶནཱཉཱཎཾ, སཔྤགཧཎེ ནིབྦིནྡནཾ ཝིཡ ནིབྦིདཱནུཔསྶནཱཉཱཎཾ, སཔྤཾ མུཉྩིཏུཀཱམཏཱ ཝིཡ མུཉྩིཏུཀམྱཏཱཉཱཎཾ, མུཉྩནསྶ ཨུཔཱཡཀརཎཾ ཝིཡ པཊིསངྑཱནུཔསྶནཱཉཱཎཾ, སཔྤཾ པརིབྦྷམེཏྭཱ དུབྦལཾ ཀཏྭཱ ནིཝཏྟིཏྭཱ ཌཾསིཏུཾ ཨསམཏྠབྷཱཝཔཱཔནཾ ཝིཡ ཏིལཀྑཎཱརོཔནེན སངྑཱརུཔེཀྑཱནུལོམཉཱཎེཧི སངྑཱརེ པརིབྦྷམེཏྭཱ དུབྦལཾ ཀཏྭཱ པུན ནིཙྩསུཁཏྟཱཀཱརེན ཨུཔཊྛཱཏུཾ ཨསམཏྠཏཱཔཱཔནཾ, སཔྤཝིསྶཛྫནཾ ཝིཡ གོཏྲབྷུཉཱཎཾ, སཔྤཾ ཝིསྶཛྫེཏྭཱ ཐལཾ ཨཱརུཡ྄ཧ ཋཱནཾ ཝིཡ ནིབྦཱནཐལཾ ཨཱརུཡ྄ཧ ཋིཏཾ མགྒཕལཉཱཎཾ, ཧཊྛསྶ ཨཱགཏམགྒོལོཀནཾ ཝིཡ མགྒཱདིཔཙྩཝེཀྑཎཉཱཎནྟི.

ཨིམེསཉྩ སུཏམཡཉཱཎཱདཱིནཾ ཙུདྡསནྣཾ ཉཱཎཱནཾ ཨུཔྤཏྟིཀྐམེན པཊིཔཏྟིཀྐམེན ཙ དེསནཀྐམསྶ ཀཏཏྟཱ པཙྩཝེཀྑཎེསུ པཋམཾ ཀིལེསཔཙྩཝེཀྑཎཾ ཧོཏི, ཏཏོ མགྒཕལནིབྦཱནཔཙྩཝེཀྑཎཱནཱིཏི ཝེདིཏབྦཾ.

‘‘ལོཀུཏྟརཾ ¶ ¶ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ དིཊྛིགཏཱནཾ པཧཱནཱཡ, ཀཱམརཱགབྱཱཔཱདཱནཾ ཏནུབྷཱཝཱཡ, ཀཱམརཱགབྱཱཔཱདཱནཾ ཨནཝསེསཔྤཧཱནཱཡ, རཱུཔརཱགཨརཱུཔརཱགམཱནཨུདྡྷཙྩཨཝིཛྫཱནཾ ཨནཝསེསཔྤཧཱནཱཡཱ’’ཏི (དྷ. ས. ༢༧༧, ༣༦༡-༣༦༣) ཙ ཀིལེསཔྤཧཱནཾཡེཝ ཨདྷིཀཾ ཀཏྭཱ མགྒཔཊིཔཏྟིཡཱ ཝུཏྟཏྟཱ པཊིཔཏྟཱནུརཱུཔེནེཝ ཀིལེསཔཙྩཝེཀྑཎསྶ ཨཱདིབྷཱཝོ ཡུཛྫཏི, ཨཊྛཀཐཱཡཾ ཝུཏྟཀྐམོ པན དསྶིཏོཡེཝ. སོ པན ཀམོ པཉྩཝིདྷོ ཨུཔྤཏྟིཀྐམོ པཧཱནཀྐམོ པཊིཔཏྟིཀྐམོ བྷཱུམིཀྐམོ དེསནཀྐམོཏི.

‘‘པཋམཾ ཀལལཾ ཧོཏི, ཀལལཱ ཧོཏི ཨབྦུདཾ;

ཨབྦུདཱ ཛཱཡཏེ པེསི, པེསི ནིབྦཏྟཏཱི གྷནོ’’ཏི. (སཾ. ནི. ༡.༢༣༥) –

ཨེཝམཱདི ཨུཔྤཏྟིཀྐམོ. ‘‘དསྶནེན པཧཱཏབྦཱ དྷམྨཱ, བྷཱཝནཱཡ པཧཱཏབྦཱ དྷམྨཱ’’ཏི (དྷ. ས. ཏིཀམཱཏིཀཱ ༨) ཨེཝམཱདི པཧཱནཀྐམོ. ‘‘སཱིལཝིསུདྡྷི ཙིཏྟཝིསུདྡྷི དིཊྛིཝིསུདྡྷི ཀངྑཱཝིཏརཎཝིསུདྡྷི མགྒཱམགྒཉཱཎདསྶནཝིསུདྡྷི པཊིཔདཱཉཱཎདསྶནཝིསུདྡྷི ¶ ཉཱཎདསྶནཝིསུདྡྷཱི’’ཏི ཨེཝམཱདི པཊིཔཏྟིཀྐམོ. ‘‘ཀཱམཱཝཙརཱ དྷམྨཱ, རཱུཔཱཝཙརཱ དྷམྨཱ, ཨརཱུཔཱཝཙརཱ དྷམྨཱ’’ཏི (དྷ. ས. དུཀམཱཏིཀཱ ༩༣-༩༥) ཨེཝམཱདི བྷཱུམིཀྐམོ. ‘‘ཙཏྟཱརོ སཏིཔཊྛཱནཱ ཙཏྟཱརོ སམྨཔྤདྷཱནཱ ཙཏྟཱརོ ཨིདྡྷིཔཱདཱ པཉྩིནྡྲིཡཱནི པཉྩ བལཱནི སཏྟ བོཛ྄ཛྷངྒཱ ཨརིཡོ ཨཊྛངྒིཀོ མགྒོ’’ཏི (མ. ནི. ༣.༤༣; མཧཱནི. ༡༩༡; ཙཱུལ༹ནི. མེཏྟགཱུམཱཎཝཔུཙྪཱནིདྡེས ༢༢) ཝཱ, ‘‘ཨནུཔུབྦིཀཐཾ ཀཐེསི. སེཡྻཐིདཾ – དཱནཀཐཾ སཱིལཀཐཾ སགྒཀཐཾ ཀཱམཱནཾ ཨཱདཱིནཝཾ ཨོཀཱརཾ སཾཀིལེསཾ ནེཀྑམྨེ ཨཱནིསཾསཾ པཀཱསེསཱི’’ཏི (མཧཱཝ. ༣༡; དཱི. ནི. ༡.༢༩༨; ༢.༨༣) ཝཱ ཨེཝམཱདི དེསནཀྐམོ. ཨིདྷ པན ཙུདྡསནྣཾ ཉཱཎཱནཾ ཨུཔྤཏྟིཀྐམོ པཊིཔཏྟིཀྐམོ ཙ ཏདུབྷཡཝསེན པཊིཔཱཊིཡཱ དེསིཏཏྟཱ དེསནཀྐམོ ཙཱཏི ཏཡོ ཀམཱ ཝེདིཏབྦཱ.

༡༥. ཨིདཱནི ཡསྨཱ ཧེཊྛཱ སརཱུཔེན ནཱམརཱུཔཝཝཏྠཱནཉཱཎཾ ན ཝུཏྟཾ, ཏསྨཱ པཉྩདྷཱ ནཱམརཱུཔཔྤབྷེདཾ དསྶེཏུཾ ཨཛ྄ཛྷཏྟཝཝཏྠཱནེ པཉྙཱ ཝཏྠུནཱནཏྟེ ཉཱཎནྟིཨཱདཱིནི པཉྩ ཉཱཎཱནི ཨུདྡིཊྛཱནི. སཀལེ ཧི ནཱམརཱུཔེ ཝུཏྟེ ཡཾ པརིགྒཧེཏུཾ སཀྐཱ, ཡཉྩ པརིགྒཧེཏབྦཾ, ཏཾ པརིགྒཧེསྶཏི. ལོཀུཏྟརནཱམཉྷི པརིགྒཧེཏུཉྩ ན སཀྐཱ ཨནདྷིགཏཏྟཱ, ན ཙ པརིགྒཧེཏབྦཾ ཨཝིཔསྶནཱུཔགཏྟཱ. ཏཏྠ ཨཛ྄ཛྷཏྟཝཝཏྠཱནེཏི ‘‘ཨེཝཾ པཝཏྟམཱནཱ མཡཾ ཨཏྟཱཏི ¶ གཧཎཾ གམིསྶཱམཱ’’ཏི ཨིམིནཱ ཝིཡ ཨདྷིཔྤཱཡེན ཨཏྟཱནཾ ཨདྷིཀཱརཾ ཀཏྭཱ པཝཏྟཱཏི ཨཛ྄ཛྷཏྟཱ. ཨཛ྄ཛྷཏྟསདྡོ པནཱཡཾ གོཙརཛ྄ཛྷཏྟེ ནིཡཀཛ྄ཛྷཏྟེ ཨཛ྄ཛྷཏྟཛ྄ཛྷཏྟེ ཝིསཡཛ྄ཛྷཏྟེཏི ཙཏཱུསུ ཨཏྠེསུ དིསྶཏི ¶ . ‘‘ཏེན, ཨཱནནྡ, བྷིཀྑུནཱ ཏསྨིཾཡེཝ པུརིམསྨིཾ སམཱདྷིནིམིཏྟེ ཨཛ྄ཛྷཏྟམེཝ ཙིཏྟཾ སཎྛཔེཏབྦཾ, ཨཛ྄ཛྷཏྟརཏོ སམཱཧིཏོ’’ཏིཨཱདཱིསུ (དྷ. པ. ༣༦༢) ཧི ཨཡཾ གོཙརཛ྄ཛྷཏྟེ དིསྶཏི. ‘‘ཨཛ྄ཛྷཏྟཾ སམྤསཱདནཾ (དཱི. ནི. ༡.༢༢༨; དྷ. ས. ༡༦༡), ཨཛ྄ཛྷཏྟཾ ཝཱ དྷམྨེསུ དྷམྨཱནུཔསྶཱི ཝིཧརཏཱི’’ཏིཨཱདཱིསུ (དཱི. ནི. ༢.༣༧༣) ནིཡཀཛ྄ཛྷཏྟེ. ‘‘ཚ ཨཛ྄ཛྷཏྟིཀཱནི ཨཱཡཏནཱནི, ཨཛ྄ཛྷཏྟིཀཱ དྷམྨཱ’’ཏིཨཱདཱིསུ (དྷ. ས. ཏིཀམཱཏིཀཱ ༢༠) ཨཛ྄ཛྷཏྟཛ྄ཛྷཏྟེ. ‘‘ཨཡཾ ཁོ, པནཱནནྡ, ཝིཧཱརོ ཏཐཱགཏེན ཨབྷིསམྦུདྡྷོ ཡདིདཾ སབྦནིམིཏྟཱནཾ ཨམནསིཀཱརཱ ཨཛ྄ཛྷཏྟཾ སུཉྙཏཾ ཨུཔསམྤཛྫ ཝིཧརཏཱི’’ཏིཨཱདཱིསུ (མ. ནི. ༣.༡༨༧) ཝིསཡཛ྄ཛྷཏྟེ, ཨིསྶརིཡཊྛཱནེཏི ¶ ཨཏྠོ. ཕལསམཱཔཏྟི ཧི བུདྡྷཱནཾ ཨིསྶརིཡཊྛཱནཾ ནཱམ. ཨིདྷ པན ཨཛ྄ཛྷཏྟཛ྄ཛྷཏྟེ དཊྛབྦོ. ཏེསཾ ཨཛ྄ཛྷཏྟཱནཾ ཝཝཏྠཱནེ ཨཛ྄ཛྷཏྟཝཝཏྠཱནེ. ཝཏྠུནཱནཏྟེཏི ཝཏྠཱུནཾ ནཱནཱབྷཱཝེ, ནཱནཱཝཏྠཱུསཱུཏི ཨཏྠོ. ཨེཏྠ ཛཝནམནོཝིཉྙཱཎསྶ པཙྩཡབྷཱུཏོ བྷཝངྒམནོཔི ཙཀྑཱདིཔཉྩཀཾ ཝིཡ ཨུཔྤཏྟིཊྛཱནཏྟཱ ཝཏྠཱུཏི ཝུཏྟོ. ཨཱཝཛྫནམྤི ཏནྣིསྶིཏམེཝ ཀཱཏབྦཾ.

༡༦.

བཧིདྡྷཱཏི ཚཧི ཨཛ྄ཛྷཏྟཛ྄ཛྷཏྟེཧི བཧིབྷཱུཏེསུ ཏེསཾ ཝིསཡེསུ. གོཙརནཱནཏྟེཏི ཝིསཡནཱནཏྟེ.

༡༧. ཙརིཡཱཝཝཏྠཱནེཏི ཝིཉྙཱཎཙརིཡཱཨཉྙཱཎཙརིཡཱཉཱཎཙརིཡཱཝསེན ཙརིཡཱནཾ ཝཝཏྠཱནེ. ‘‘ཙརིཡཝཝཏྠཱནེ’’ཏི རསྶཾ ཀཏྭཱཔི པཋནྟི.

༡༨. ཙཏུདྷམྨཝཝཏྠཱནེཏི ཀཱམཱཝཙརབྷཱུམིཨཱདཱིནཾ ཙུདྡསནྣཾ ཙཏུཀྐཱནཾ ཝསེན ཙཏུནྣཾ ཙཏུནྣཾ དྷམྨཱནཾ ཝཝཏྠཱནེ. བྷཱུམཱིཏི ཙ ‘‘བྷཱུམིགཏཉྩ ཝེཧཱསཊྛཉྩཱ’’ཏིཨཱདཱིསུ (སཾ. ནི. ༡.༡༣༦) པཐཝིཡཾ ཝཏྟཏི. ‘‘ཨབྷཱུམིཾ ཏཱཏ, མཱ སེཝཱ’’ཏིཨཱདཱིསུ (ཛཱ. ༡.༦.༣༤) ཝིསཡེ. ‘‘སུཁབྷཱུམིཡཾ ཀཱམཱཝཙརེ’’ཏིཨཱདཱིསུ (དྷ. ས. ༩༨༨) ཨུཔྤཛྫནཊྛཱནེ. ཨིདྷ པན ཀོཊྛཱསེ ཝཏྟཏི. པརིཙྪེདེཏིཔི ཝདནྟི.

༡༩. ནཝདྷམྨཝཝཏྠཱནེཏི ¶ ཀཱམཱཝཙརཀུསལཱདིཝསེན པཱམོཛྫམཱུལཀཝསེན ཡོནིསོ མནསིཀཱརམཱུལཀཝསེན ཙ ནཝནྣཾ ནཝནྣཾ དྷམྨཱནཾ ཝཝཏྠཱནེ. ཨིམེསུ ཙ པཉྩསུ ཉཱཎེསུ པཋམཾ ཨཛ྄ཛྷཏྟདྷམྨཱ ཝཝཏྠཱཔེཏབྦཱཏི ཝཏྠུནཱནཏྟེ ཉཱཎཾ པཋམཾ ཝུཏྟཾ, ཏཏོ ཏེསཾ ཝིསཡཱ ཝཝཏྠཱཔེཏབྦཱཏི ཏདནནྟརཾ གོཙརནཱནཏྟེ ཉཱཎཾ ཝུཏྟཾ, ཏཏོ པརཱནི ཏཱིཎི ཉཱཎཱནི ཏིཎྞཾ ཙཏུནྣཾ ནཝནྣཾ ཝསེན གཎནཱནུལོམེན ཝུཏྟཱནི.

༢༠. ཨིདཱནི ¶ ཡསྨཱ ནཱམརཱུཔསྶེཝ པབྷེདཏོ ཝཝཏྠཱཔནཉཱཎཾ ཉཱཏཔརིཉྙཱ, ཏདནནྟརཾ ཏཱིརཎཔརིཉྙཱ, ཏདནནྟརཾ པཧཱནཔརིཉྙཱཏི ཏིསྶོ པརིཉྙཱ. ཏཾསམྦནྡྷཱ ཙ བྷཱཝནཱསཙྪིཀིརིཡཱ ཧོནྟི, ཏསྨཱ དྷམྨནཱནཏྟཉཱཎཱནནྟརཾ ཉཱཏཊྛེ ¶ ཉཱཎཱདཱིནི པཉྩ ཉཱཎཱནི ཨུདྡིཊྛཱནི. ཏིསྶོ ཧི པརིཉྙཱ ཉཱཏཔརིཉྙཱ ཏཱིརཎཔརིཉྙཱ པཧཱནཔརིཉྙཱ ཙ. ཏཏྠ ‘‘རུཔྤནལཀྑཎཾ རཱུཔཾ, ཝེདཡིཏལཀྑཎཱ ཝེདནཱ’’ཏི ཨེཝཾ ཏེསཾ ཏེསཾ དྷམྨཱནཾ པཙྩཏྟལཀྑཎསལླཀྑཎཝསེན པཝཏྟཱ པཉྙཱ ཉཱཏཔརིཉྙཱ ནཱམ. ‘‘རཱུཔཾ ཨནིཙྩཾ དུཀྑཾ ཨནཏྟཱ, ཝེདནཱ ཨནིཙྩཱ དུཀྑཱ ཨནཏྟཱ’’ཏིཨཱདིནཱ ནཡེན ཏེསཾ ཏེསཾ དྷམྨཱནཾ སཱམཉྙལཀྑཎཾ ཨཱརོཔེཏྭཱ པཝཏྟཱ ལཀྑཎཱརམྨཎིཀཝིཔསྶནཱཔཉྙཱ ཏཱིརཎཔརིཉྙཱ ནཱམ. ཏེསུཡེཝ པན དྷམྨེསུ ནིཙྩསཉྙཱདིཔཛཧནཝསེན པཝཏྟཱ ལཀྑཎཱརམྨཎིཀཝིཔསྶནཱཝ པཧཱནཔརིཉྙཱ ནཱམ.

ཏཏྠ སངྑཱརཔརིཙྪེདཏོ པཊྛཱཡ ཡཱཝ པཙྩཡཔརིགྒཧཱ ཉཱཏཔརིཉྙཱཡ བྷཱུམི. ཨེཏསྨིཉྷི ཨནྟརེ དྷམྨཱནཾ པཙྩཏྟལཀྑཎཔཊིཝེདྷསྶེཝ ཨཱདྷིཔཙྩཾ ཧོཏི. ཀལཱཔསམྨསནཏོ པཊྛཱཡ ཡཱཝ ཨུདཡབྦཡཱནུཔསྶནཱ ཏཱིརཎཔརིཉྙཱཡ བྷཱུམི. ཨེཏསྨིཉྷི ཨནྟརེ སཱམཉྙལཀྑཎཔཊིཝེདྷསྶེཝ ཨཱདྷིཔཙྩཾ ཧོཏི. བྷངྒཱནུཔསྶནཾ ཨཱདིཾ ཀཏྭཱ ཨུཔརི པཧཱནཔརིཉྙཱཡ བྷཱུམི. ཏཏོ པཊྛཱཡ ཧི ‘‘ཨནིཙྩཏོ ཨནུཔསྶནྟོ ནིཙྩསཉྙཾ པཛཧཏི, དུཀྑཏོ ཨནུཔསྶནྟོ སུཁསཉྙཾ པཛཧཏི, ཨནཏྟཏོ ཨནུཔསྶནྟོ ཨཏྟསཉྙཾ པཛཧཏི, ནིབྦིནྡནྟོ ནནྡིཾ པཛཧཏི, ཝིརཛྫནྟོ རཱགཾ པཛཧཏི, ནིརོདྷེནྟོ སམུདཡཾ པཛཧཏི, པཊིནིསྶཛྫནྟོ ཨཱདཱནཾ པཛཧཏཱི’’ཏི (པཊི. མ. ༡.༥༢) ཨེཝཾ ནིཙྩསཉྙཱདིཔཧཱནསཱདྷིཀཱནཾ སཏྟནྣཾ ཨནུཔསྶནཱནཾ ཨཱདྷིཔཙྩཾ ཧོཏི.

ཏཏྠ ¶ ཨབྷིཉྙཱཔཉྙཱཏི དྷམྨཱནཾ རུཔྤནཱདིསབྷཱཝེན ཛཱནནཔཉྙཱ. སཱ ཧི སོབྷནཊྛེན ཨབྷིསདྡེན ‘‘ཏེསཾ ཏེསཾ དྷམྨཱནཾ སབྷཱཝཛཱནནཝསེན སོབྷནཾ ཛཱནན’’ནྟི ཀཏྭཱ ཨབྷིཉྙཱཏི ཝུཙྩཏི. ཉཱཏཊྛེ ཉཱཎནྟི ཛཱནནསབྷཱཝཾ ཉཱཎཾ.

༢༡. པརིཉྙཱཔཉྙཱཏི ཛཱནནཔཉྙཱ. སཱ ཧི བྱཱཔནཊྛེན པརིསདྡེན ‘‘ཨནིཙྩཱདིསཱམཉྙལཀྑཎཝསེན སཀིཙྩསམཱཔནཝསེན ཝཱ བྱཱཔིཏཾ ཛཱནན’’ནྟི ཀཏྭཱ པརིཉྙཱཏི ཝུཙྩཏི. ཏཱིརཎཊྛེ ཉཱཎནྟི ཨུཔཔརིཀྑཎསབྷཱཝཾ, སམྨསནསབྷཱཝཾ ཝཱ ཉཱཎཾ.

༢༢. པཧཱནེ ¶ པཉྙཱཏི ནིཙྩསཉྙཱདཱིནཾ པཛཧནཱ པཉྙཱ, པཛཧཏཱིཏི ཝཱ, པཛཧནྟི ཨེཏེནཱཏི ཝཱ པཧཱནཾ. པརིཙྩཱགཊྛེ ¶ ཉཱཎནྟི པརིཙྩཛནསབྷཱཝཾ ཉཱཎཾ.

༢༣. བྷཱཝནཱཔཉྙཱཏི ཝཌྜྷནཔཉྙཱ. ཨེཀརསཊྛེ ཉཱཎནྟི ཨེཀཀིཙྩསབྷཱཝཾ ཉཱཎཾ, ཝིམུཏྟིརསེན ཝཱ ཨེཀརསསབྷཱཝཾ ཉཱཎཾ.

༢༤. སཙྪིཀིརིཡཱཔཉྙཱཏི པཊིཝེདྷཝསེན པཊིལཱབྷཝསེན ཝཱ པཙྩཀྑཀརཎཔཉྙཱ. ཕསྶནཊྛེ ཉཱཎནྟི ཏདུབྷཡཝསེནེཝ ཝིནྡནསབྷཱཝཾ ཉཱཎཾ.

༢༥-༢༨. ཨིདཱནི ཡསྨཱ པཧཱནབྷཱཝནཱསཙྪིཀིརིཡཉཱཎཱནི ཨརིཡམགྒཕལསམྤཡུཏྟཱནིཔི ཧོནྟི, ཏསྨཱ ཏདནནྟརཾ ཨརིཡཔུགྒལཱནཾཡེཝ ལབྦྷམཱནཱནི ཙཏྟཱརི པཊིསམྦྷིདཱཉཱཎཱནི ཨུདྡིཊྛཱནི. ཏཏྠཱཔི པཙྩཡུཔྤནྣོ ཨཏྠོ དུཀྑསཙྩཾ ཝིཡ པཱཀཊོ སུཝིཉྙེཡྻོ ཙཱཏི པཋམཾ ཨཏྠཔཊིསམྦྷིདཱཉཱཎཾ ཨུདྡིཊྛཾ, ཏསྶ ཨཏྠསྶ ཧེཏུདྷམྨཝིསཡཏྟཱ ཏདནནྟརཾ དྷམྨཔཊིསམྦྷིདཱཉཱཎཾ, ཏདུབྷཡསྶ ནིརུཏྟིཝིསཡཏྟཱ ཏདནནྟརཾ ནིརུཏྟིཔཊིསམྦྷིདཱཉཱཎཾ, ཏེསུ ཏཱིསུཔི ཉཱཎེསུ པཝཏྟནཏོ ཏདནནྟརཾ པཊིབྷཱནཔཊིསམྦྷིདཱཉཱཎཾ. པ-ཀཱརཾ དཱིགྷཾ ཀཏྭཱ ཙ པཋནྟི.

༢༩-༣༡. ཨིཏོ པརཱནི ཝིཧཱརཊྛེ ཉཱཎཱདཱིནི ཏཱིཎི ཉཱཎཱནི ཨརིཡཱནཾཡེཝ སམྦྷཝཏོ པཊིསམྦྷིདཱཔབྷེདཏོ ཙ པཊིསམྦྷིདཱཉཱཎཱནནྟརཾ ཨུདྡིཊྛཱནི. ཝིཧཱརཊྛེ ཉཱཎཉྷི དྷམྨཔཊིསམྦྷིདཱ ཧོཏི, སམཱཔཏྟཊྛེ ཉཱཎཾ ¶ ཨཏྠཔཊིསམྦྷིདཱ. དྷམྨསབྷཱཝེ ཉཱཎཉྷི པཊིསམྦྷིདཱཀཐཱཡཾ (པཊི. མ. ༢.༣༠) དྷམྨཔཊིསམྦྷིདཱཏི ཝུཏྟཾ. ནིབྦཱནེ ཉཱཎཾ པན ཨཏྠཔཊིསམྦྷིདཱ ཨེཝ. ཏཏྠ ཝིཧཱརནཱནཏྟེཏི ཨནིཙྩཱནུཔསྶནཱདིཝསེན ནཱནཱཝིཔསྶནཱཝིཧཱརེ. ཝིཧཱརཊྛེཏི ཝིཔསྶནཱཝིཧཱརསབྷཱཝེ. ཝིཧཱརོཏི ཙ སསམྤཡུཏྟཱ ཝིཔསྶནཱ ཨེཝ. སམཱཔཏྟིནཱནཏྟེཏི ཨནིམིཏྟཱདིཝསེན ནཱནཱཕལསམཱཔཏྟིཡཾ. སམཱཔཏྟཱིཏི ཙ ལོཀུཏྟརཕལབྷཱུཏཱ ཙིཏྟཙེཏསིཀདྷམྨཱ. ཝིཧཱརསམཱཔཏྟིནཱནཏྟེཏི ཨུབྷཡཝསེན ཝུཏྟཾ.

༣༢. ཏཏོ ཝིཧཱརསམཱཔཏྟིཉཱཎསཱདྷཀསྶ ‘‘དུབྷཏོ ཝུཊྛཱནཝིཝཊྚནེ པཉྙཱ’’ཏི པུབྦེ ཝུཏྟསྶཱཔི མགྒཉཱཎསྶ ཨཱསཝསམུཙྪེདསམཏྠཏཾ ཨནནྟརཕལདཱཡཀཏྟཉྩ ཀཱརཎེན ཝིསེསེཏྭཱ ཨཔརེནཱཀཱརེན ཝཏྟུཀཱམེན ཏདེཝ ‘‘ཨཱནནྟརིཀསམཱདྷིམྷི ཉཱཎ’’ནྟི ཨུདྡིཊྛཾ. ཏཏྠ ¶ ཨཝིཀྑེཔཔརིསུདྡྷཏྟཱཏི ཝིཀྑིཔཏི ཏེན ཙིཏྟནྟི ཝིཀྑེཔོ, ཨུདྡྷཙྩསྶེཏཾ ནཱམཾ. ན ཝིཀྑེཔོ ཨཝིཀྑེཔོ, ཨུདྡྷཙྩཔཊིཔཀྑསྶ སམཱདྷིསྶེཏཾ ནཱམཾ. པརིསུདྡྷསྶ བྷཱཝོ པརིསུདྡྷཏྟཾ, ཨཝིཀྑེཔསྶ ¶ པརིསུདྡྷཏྟཾ ཨཝིཀྑེཔཔརིསུདྡྷཏྟཾ, ཏསྨཱ ཨཝིཀྑེཔཔརིསུདྡྷཏྟཱ སམཱདྷིསྶ པརིསུདྡྷབྷཱཝེནཱཏི ཨཏྠོ. ཨིདཉྷི ཨཱསཝསམུཙྪེདསྶ ཨནནྟརཕལདཱཡཀཏྟསྶ ཙ ཀཱརཎཝཙནཾ. ཨཱསཝསམུཙྪེདེཏི ཨེཏྠ ཨཱསཝནྟཱིཏི ཨཱསཝཱ, ཙཀྑུཏོཔི…པེ… མནཏོཔི སནྡནྟི པཝཏྟནྟཱིཏི ཝུཏྟཾ ཧོཏི. དྷམྨཏོ ཡཱཝ གོཏྲབྷུཾ, ཨོཀཱསཏོ ཡཱཝ བྷཝགྒཾ སཝནྟཱིཏི ཝཱ ཨཱསཝཱ, ཨེཏཾ དྷམྨཾ ཨེཏཉྩ ཨོཀཱསཾ ཨནྟོཀརིཏྭཱ པཝཏྟནྟཱིཏི ཨཏྠོ. ཨནྟོཀརཎཏྠོ ཧི ཨཡཾ ཨཱ-ཀཱརོ. ཙིརཔཱརིཝཱསིཀཊྛེན མདིརཱདཡོ ཨཱསཝཱ ཝིཡཱཏིཔི ཨཱསཝཱ. ལོཀསྨིཉྷི ཙིརཔཱརིཝཱསིཀཱ མདིརཱདཡོ ཨཱསཝཱཏི ཝུཙྩནྟི. ཡདི ཙ ཙིརཔཱརིཝཱསིཀཊྛེན ཨཱསཝཱ, ཨེཏེཡེཝ བྷཝིཏུམརཧནྟི. ཝུཏྟཉྷེཏཾ –

‘‘པུརིམཱ, བྷིཀྑཝེ, ཀོཊི ན པཉྙཱཡཏི ཨཝིཛྫཱཡ, ཨིཏོ པུབྦེ ཨཝིཛྫཱ ནཱཧོསི, ཨཐ པཙྪཱ སམབྷཝཱི’’ཏིཨཱདི.

ཨཱཡཏཾ ཝཱ སཾསཱརདུཀྑཾ སཝནྟི པསཝནྟཱིཏིཔི ཨཱསཝཱ, སམུཙྪིཛྫཏི ཨེཏེནཱཏི སམུཙྪེདོ. པཉྙཱཏི ཀཱམཱསཝཱདཱིནཾ ཙཏུནྣཾ ཨཱསཝཱནཾ སམུཙྪེདེ པཉྙཱ.

ཨཱནནྟརིཀསམཱདྷིམྷི ¶ ཉཱཎནྟི ཨཏྟནོ པཝཏྟིསམནནྟརཾ ནིཡམེནེཝ ཕལཔྤདཱནཏོ ཨཱནནྟརིཀོཏི ལདྡྷནཱམོ མགྒསམཱདྷི. ན ཧི མགྒསམཱདྷིམྷི ཨུཔྤནྣེ ཏསྶ ཕལུཔྤཏྟིནིསེདྷཀོ ཀོཙི ཨནྟརཱཡོ ཨཏྠི. ཡཐཱཧ –

‘‘ཨཡཉྩ པུགྒལོ སོཏཱཔཏྟིཕལསཙྪིཀིརིཡཱཡ པཊིཔནྣོ ཨསྶ, ཀཔྤསྶ ཙ ཨུཌྜཡ྄ཧནཝེལཱ ཨསྶ, ནེཝ ཏཱཝ ཀཔྤོ ཨུཌྜཡ྄ཧེཡྻ, ཡཱཝཱཡཾ པུགྒལོ ན སོཏཱཔཏྟིཕལཾ སཙྪིཀརོཏི, ཨཡཾ ཝུཙྩཏི པུགྒལོ ཋིཏཀཔྤཱི. སབྦེཔི མགྒསམངྒིནོ པུགྒལཱ ཋིཏཀཔྤིནོ’’ཏི (པུ. པ. ༡༧).

ཨིདཾ ཏེན ཨཱནནྟརིཀསམཱདྷིནཱ སམྤཡུཏྟཾ ཉཱཎཾ.

༣༣. ཨིམིནཱ མགྒཉཱཎེན ཕལཔྤཏྟཱནཾ ཨརིཡཱནཾཡེཝ སམྦྷཝཏོ ཨིམསྶ ཉཱཎསྶ ཨནནྟརཾ ཨརཎཝིཧཱརཉཱཎཱདཱིནི ཙཏྟཱརི ཉཱཎཱནི ཨུདྡིཊྛཱནི. ཏཏྲཱཔི ཙ ཨརཧཏོཡེཝ སཏཏམེཝ ¶ ཙ སམྦྷཝཏོ ཨརཎཝིཧཱརེ ཉཱཎཾ པཋམཾ ཨུདྡིཊྛཾ, ཏདནནྟརཾ ནིརོདྷསྶ ཨནཱགཱམིཨརཧནྟཱནཾ སམྦྷཝེཔི བཧུསམྦྷཱརཏྟཱ ཝིསེསེན ཙ ནིརོདྷསྶ ནིབྦཱནསམྨཏཏྟཱ ཙ ནིརོདྷསམཱཔཏྟིཡཱ ¶ ཉཱཎཾ ཨུདྡིཊྛཾ, ཏདནནྟརཾ པརིནིབྦཱནསྶ ཀཱལནྟརེ པརིནིབྦཱནཀཱལཾ ཨཱཧཙྩ ཋིཏཏྟཱ དཱིགྷཀཱལིཀནྟི པརིནིབྦཱནེ ཉཱཎཾ ཨུདྡིཊྛཾ, ཏདནནྟརཾ སམསཱིསཊྛསྶ སབྦཀིལེསཁཡཱནནྟརཾ པརིནིབྦཱནཀཱལཾ ཨཱཧཙྩ ཋིཏཏྟཱ རསྶཀཱལིཀནྟི སམསཱིསཊྛེ ཉཱཎཾ ཨུདྡིཊྛཾ. ཏཏྠ སནྟོ ཙཱཏི ཙ-ཀཱརོ དསྶནཱདྷིཔཏེཡྻཉྩ སནྟོ ཝིཧཱརཱདྷིགམོ ཙ པཎཱིཏཱདྷིམུཏྟཏཱ ཙཱཏི ཏཱིཧིཔི པདེཧི སམྦནྡྷིཏབྦོ. དསྶནནྟི ཝིཔསྶནཱཉཱཎཾ, ཨདྷིཔཏིཡེཝ ཨཱདྷིཔཏེཡྻཾ, ཨདྷིཔཏིཏོ ཝཱ ཨཱགཏཏྟཱ ཨཱདྷིཔཏེཡྻཾ, དསྶནཉྩ ཏཾ ཨཱདྷིཔཏེཡྻཉྩཱཏི དསྶནཱདྷིཔཏེཡྻཾ. ཝིཧརཏཱིཏི ཝིཧཱརོ, ཝིཧརནྟི ཏེན ཝཱཏི ཝིཧཱརོ, ཨདྷིགམྨཏི པཱཔུཎཱིཡཏཱིཏི ཨདྷིགམོ, ཝིཧཱརོ ཨེཝ ཨདྷིགམོ ཝིཧཱརཱདྷིགམོ. སོ ཙ ཀིལེསཔརིལཱ༹ཧཝིརཧིཏཏྟཱ ནིབྦུཏོཏི སནྟོ. སོ ཙ ཨརཧཏྟཕལསམཱཔཏྟིཔཉྙཱ. ཨུཏྟམཊྛེན ཨཏཔྤཀཊྛེན ཙ པཎཱིཏོ, པདྷཱནབྷཱཝཾ ནཱིཏོཏི ཝཱ པཎཱིཏོ, པཎཱིཏེ ཨདྷིམུཏྟོ ཝིསཊྛཙིཏྟོ ཏཔྤརམོ པཎཱིཏཱདྷིམུཏྟོ, ཏསྶ བྷཱཝོ པཎཱིཏཱདྷིམུཏྟཏཱ. སཱ ཙ ཕལསམཱཔཏྟཱདྷིམུཏྟཱ པུབྦབྷཱགཔཉྙཱ ཨེཝ.

ཨརཎཝིཧཱརེཏི ¶ ནིཀྐིལེསཝིཧཱརེ. རཱགཱདཡོ ཧི རཎནྟི སཏྟེ ཙུཎྞེནྟི པཱིལེ༹ནྟཱིཏི རཎཱ, རཎནྟི ཨེཏེཧི སཏྟཱ ཀནྡནྟི པརིདེཝནྟཱིཏི ཝཱ རཎཱ. ཝུཏྟོ ཏིཝིདྷོཔི ཝིཧཱརོ. ནཏྠི ཨེཏསྶ རཎཱཏི ཨརཎོ. ཝིཝིདྷེ པཙྩནཱིཀདྷམྨེ ཧརནྟི ཨེཏེནཱཏི ཝིཧཱརོ. ཏསྨིཾ ཨརཎེ ཝིཧཱརེ. ནིདྡེསཝཱརེ (པཊི. མ. ༡.༨༢) ཝུཏྟཔཋམཛ྄ཛྷཱནཱདཱིནི ཙ པཎཱིཏཱདྷིམུཏྟཏཱཡ ཨེཝ སངྒཧིཏཱནི. ཕལསམཱཔཏྟིཾ སམཱཔཛྫིཏུཀཱམཏཱཡ ཧི པཋམཛ྄ཛྷཱནཱདིཾ སམཱཔཛྫིཏྭཱ ཝུཊྛཱཡ ཛྷཱནསམྤཡུཏྟདྷམྨེ ཝིཔསྶཏི, ཡཱ ཙ ཨརཎཝིབྷངྒསུཏྟནྟེ (མ. ནི. ༣.༣༢༣ ཨཱདཡོ) བྷགཝཏཱ དེསིཏཱ ཨརཎཔཊིཔདཱ, སཱཔི ཨིམིནཱཝ སངྒཧིཏཱཏི ཝེདིཏབྦཱ ¶ . ཝུཏྟཉྷི ཏཏྠ བྷགཝཏཱ –

‘‘ཨརཎཝིབྷངྒཾ ཝོ, བྷིཀྑཝེ, དེསེསྶཱམི…པེ… ན ཀཱམསུཁཾ ཨནུཡུཉྫེཡྻ ཧཱིནཾ གམྨཾ པོཐུཛྫནིཀཾ ཨནརིཡཾ ཨནཏྠསཾཧིཏཾ, ན ཙ ཨཏྟཀིལམཐཱནུཡོགཾ ཨནུཡུཉྫེཡྻ དུཀྑཾ ཨནརིཡཾ ཨནཏྠསཾཧིཏཾ. ཨེཏེ ཁོ, བྷིཀྑཝེ, ཨུབྷོ ཨནྟེ ཨནུཔགམྨ མཛ྄ཛྷིམཱ པཊིཔདཱ ཏཐཱགཏེན ཨབྷིསམྦུདྡྷཱ ཙཀྑུཀརཎཱི ཉཱཎཀརཎཱི ཨུཔསམཱཡ ཨབྷིཉྙཱཡ སམྦོདྷཱཡ ནིབྦཱནཱཡ སཾཝཏྟཏི. ཨུསྶཱདནཉྩ ཛཉྙཱ, ཨཔསཱདནཉྩ ཛཉྙཱ, ཨུསྶཱདནཉྩ ཉཏྭཱ ཨཔསཱདནཉྩ ཉཏྭཱ ནེཝུསྶཱདེཡྻ ན ཨཔསཱདེཡྻ, དྷམྨམེཝ དེསེཡྻ. སུཁཝིནིཙྪཡཾ ཛཉྙཱ, སུཁཝིནིཙྪཡཾ ཉཏྭཱ ཨཛ྄ཛྷཏྟཾ སུཁམནུཡུཉྫེཡྻ, རཧོཝཱདཾ ན བྷཱསེཡྻ, སམྨུཁཱ ན ཁཱིཎཾ བྷཎེ, ཨཏརམཱནོཝ བྷཱསེཡྻ ནོ ཏརམཱནོ, ཛནཔདནིརུཏྟིཾ ནཱབྷིནིཝེསེཡྻ, སམཉྙཾ ནཱཏིདྷཱཝེཡྻཱཏི. ཨཡམུདྡེསོ ཨརཎཝིབྷངྒསྶ ¶ …པེ… ཏཏྲ, བྷིཀྑཝེ, ཡོ ཀཱམཔཊིསནྡྷིསུཁིནོ སོམནསྶཱནུཡོགཾ ཨནནུཡོགོ ཧཱིནཾ…པེ… ཨནཏྠསཾཧིཏཾ, ཨདུཀྑོ ཨེསོ དྷམྨོ ཨཝིགྷཱཏོ ཨནུཔཱཡཱསོ ཨཔརིལཱ༹ཧོ སམྨཱཔཊིཔདཱ. ཏསྨཱ ཨེསོ དྷམྨོ ཨརཎོ…པེ… ཏཏྲ, བྷིཀྑཝེ, ཡོ ཨཏྟཀིལམཐཱནུཡོགཾ ཨནནུཡོགོ དུཀྑཾ ཨནརིཡཾ ཨནཏྠསཾཧིཏཾ. ཨདུཀྑོ ཨེསོ དྷམྨོ ¶ …པེ… ཏསྨཱ ཨེསོ དྷམྨོ ཨརཎོ. ཏཏྲ, བྷིཀྑཝེ, ཡཱཡཾ མཛ྄ཛྷིམཱ པཊིཔདཱ ཏཐཱགཏེན ཨབྷིསམྦུདྡྷཱ…པེ… ཨདུཀྑོ ཨེསོ དྷམྨོ…པེ… ཏསྨཱ ཨེསོ དྷམྨོ ཨརཎོ…པེ… ཏཏྲ, བྷིཀྑཝེ, ཡཱཡཾ ནེཝུསྶཱདནཱ ན ཨཔསཱདནཱ དྷམྨདེསནཱ ཙ, ཨདུཀྑོ ཨེསོ དྷམྨོ…པེ… ཏསྨཱ ཨེསོ དྷམྨོ ཨརཎོ…པེ… ཏཏྲ, བྷིཀྑཝེ, ཡདིདཾ ནེཀྑམྨསུཁཾ པཝིཝེཀསུཁཾ ཨུཔསམསུཁཾ སམྦོདྷིསུཁཾ, ཨདུཀྑོ ཨེསོ དྷམྨོ…པེ… ཏསྨཱ ཨེསོ དྷམྨོ ཨརཎོ…པེ… ཏཏྲ, བྷིཀྑཝེ, ཡྭཱཡཾ རཧོཝཱདོ བྷཱུཏོ ཏཙྪོ ཨཏྠསཾཧིཏོ, ཨདུཀྑོ ཨེསོ དྷམྨོ…པེ… ཏསྨཱ ཨེསོ དྷམྨོ ཨརཎོ ¶ …པེ… ཏཏྲ, བྷིཀྑཝེ, ཡྭཱཡཾ སམྨུཁཱ ཁཱིཎཝཱདོ བྷཱུཏོ ཏཙྪོ ཨཏྠསཾཧིཏོ, ཨདུཀྑོ ཨེསོ དྷམྨོ…པེ… ཏསྨཱ ཨེསོ དྷམྨོ ཨརཎོ…པེ… ཏཏྲ, བྷིཀྑཝེ, ཡདིདཾ ཨཏརམཱནསྶ བྷཱསིཏཾ, ཨདུཀྑོ ཨེསོ དྷམྨོ…པེ… ཏསྨཱ ཨེསོ དྷམྨོ ཨརཎོ…པེ… ཏཏྲ, བྷིཀྑཝེ, ཡྭཱཡཾ ཛནཔདནིརུཏྟིཡཱ ཙ ཨནབྷིནིཝེསོ སམཉྙཱཡ ཙ ཨནཏིསཱརོ, ཨདུཀྑོ ཨེསོ དྷམྨོ…པེ… ཏསྨཱ ཨེསོ དྷམྨོ ཨརཎོཏི. ཏསྨཱཏིཧ, བྷིཀྑཝེ, སརཎཉྩ དྷམྨཾ ཛཱནིསྶཱམ, ཨརཎཉྩ དྷམྨཾ ཛཱནིསྶཱམ. སརཎཉྩ དྷམྨཾ ཉཏྭཱ ཨརཎཉྩ དྷམྨཾ ཉཏྭཱ ཨརཎཾ པཊིཔདཾ པཊིཔཛྫིསྶཱམཱཏི ཨེཝཉྷི ཝོ, བྷིཀྑཝེ, སིཀྑིཏབྦཾ. སུབྷཱུཏི ཙ པན, བྷིཀྑཝེ, ཀུལཔུཏྟོ ཨརཎཔཊིཔདཾ པཊིཔནྣོ’’ཏི.

ཏཏྠ མཛ྄ཛྷིམཱ པཊིཔདཱ དསྶནཱདྷིཔཏེཡྻེན ཙ སནྟེན ཝིཧཱརཱདྷིགམེན ཙ སངྒཧིཏཱ. ཀཱམསུཁཾ ཨཏྟཀིལམཐཾ ཨནནུཡོགོ མཛ྄ཛྷིམཱ པཊིཔདཱ ཨེཝ. ཨརཧཏོ ཧི ཝིཔསྶནཱཔུབྦབྷཱགམཛ྄ཛྷིམཱ པཊིཔདཱ ཧོཏི, ཨརཧཏྟཕལསམཱཔཏྟི ཨཊྛངྒམགྒཝསེན མཛ྄ཛྷིམཱ པཊིཔདཱ ཙ. སེསཱ པན པཎཱིཏཱདྷིམུཏྟཏཱཡ ཨེཝ སངྒཧིཏཱཏི ཝེདིཏབྦཱ. ཀིཉྩཱཔི སབྦེཔི ཨརཧནྟོ ཨརཎཝིཧཱརིནོ, ཨཉྙེ ཨརཧནྟོ དྷམྨཾ དེསེནྟཱ ‘‘སམྨཱཔཊིཔནྣེ སམྨཱཔཊིཔནྣཱ’’ཏི ‘‘མིཙྪཱཔཊིཔནྣེ མིཙྪཱཔཊིཔནྣཱ’’ཏི པུགྒལཝསེནཱཔི ཨུསྶཱདནཱཔསཱདནཱནི ཀཏྭཱ དྷམྨཾ དེསེནྟི. སུབྷཱུཏིཏྠེརོ པན ‘‘ཨཡཾ མིཙྪཱཔཊིཔདཱ, ཨཡཾ སམྨཱཔཊིཔདཱ’’ཏི དྷམྨཝསེནེཝ དྷམྨཾ དེསེསི. ཏེནེཝ བྷགཝཱ ཏཾཡེཝ ཨརཎཔཊིཔདཾ པཊིཔནྣོཏི ཙ ཝཎྞེསི, ‘‘ཨེཏདགྒཾ, བྷིཀྑཝེ, མམ ¶ སཱཝཀཱནཾ བྷིཀྑཱུནཾ ཨརཎཝིཧཱརཱིནཾ ཡདིདཾ སུབྷཱུཏཱི’’ཏི (ཨ. ནི. ༡.༡༩༨, ༢༠༡) ཙ ཨརཎཝིཧཱརཱིནཾ ཨགྒཊྛཱནེ ཋཔེསཱིཏི.

༣༤. དྭཱིཧི བལེཧཱིཏི སམཐབལཝིཔསྶནཱབལེཧི. སམནྣཱགཏཏྟཱཏི ཡུཏྟཏྟཱ པརིཔུཎྞཏྟཱ ཝཱ. ཏཡོ ཙཱཏི ཝིབྷཏྟིཝིཔལླཱསོ, ཏིཎྞཉྩཱཏི ཝུཏྟཾ ¶ ཧོཏི. སངྑཱརཱནནྟི ཝཙཱིསངྑཱརཀཱཡསངྑཱརཙིཏྟསངྑཱརཱནཾ. པཊིཔྤསྶདྡྷིཡཱཏི པཊིཔྤསྶདྡྷཏྠཾ ནིརོདྷཏྠཾ, ཨཔྤཝཏྟཏྠནྟི ཝུཏྟཾ ཧོཏི. སོལ༹སཧཱིཏི ཨནིཙྩཱནུཔསྶནཱདཱིནི ཨཊྛ, མགྒཕལཱནི ¶ ཨཊྛཱཏི སོལ༹སཧི. ཉཱཎཙརིཡཱཧཱིཏི ཉཱཎཔྤཝཏྟཱིཧི. ནཝཧཱིཏི རཱུཔཱརཱུཔཱཝཙརསམཱདྷི ཏདུཔཙཱརོ ཙཱཏི ནཝཧི. ཝསིབྷཱཝཏཱ པཉྙཱཏི ལཧུཏཱ, ཡཐཱསུཁཝཏྟནཾ ཨིསྶརིཡཾ ཝསོ, སོ ཨསྶ ཨཏྠཱིཏི ཝསཱི, ཝསིནོ བྷཱཝོ ཝསིབྷཱཝོ, ཝསིབྷཱཝོ ཨེཝ ཝསིབྷཱཝཏཱ, ཡཐཱ པཱཊིཀུལྱམེཝ པཱཊིཀུལྱཏཱ. ཨེཝཾཝིདྷཱ པཉྙཱ ཝསིབྷཱཝཏཱཡ པཉྙཱཏི ཝཱ ཨཏྠོ. སི-ཀཱརཾ དཱིགྷཾ ཀཏྭཱ ཙ པཋནྟི. སམནྣཱགཏཏྟཱ ཙ པཊིཔྤསྶདྡྷིཡཱ ཙ ཉཱཎཙརིཡཱཧི ཙ སམཱདྷིཙརིཡཱཧི ཙཱཏི ཙ-ཀཱརོ སམྦནྡྷིཏབྦོ.

ནིརོདྷསམཱཔཏྟིཡཱ ཉཱཎནྟི ཨནཱགཱམིཨརཧནྟཱནཾ ནིརོདྷསམཱཔཏྟིནིམིཏྟཾ ཉཱཎཾ, ཡཐཱ ཨཛིནམྷི ཧཉྙཏེ དཱིཔཱིཏི. ནིརོདྷསམཱཔཏྟཱིཏི ཙ ནེཝསཉྙཱནཱསཉྙཱཡཏནསྶ ཨབྷཱཝམཏྟཾ, ན ཀོཙི དྷམྨོ, པཉྙཏྟིམཏྟཾ ཨབྷཱཝམཏྟཏྟཱ ནིརོདྷོཏི ཙ. སམཱཔཛྫནྟེན སམཱཔཛྫཱིཡཏི ནཱམཱཏི སམཱཔཏྟཱིཏི ཙ ཝུཙྩཏི.

༣༥. སམྤཛཱནསྶཱཏི སམྨཱ པཀཱརེཧི ཛཱནཱཏཱིཏི སམྤཛཱནོ. ཏསྶ སམྤཛཱནསྶ. པཝཏྟཔརིཡཱདཱནེཏི པཝཏྟནཾ པཝཏྟཾ, སམུདཱཙཱརོཏི ཨཏྠོ. ཀིལེསཔཝཏྟཾ ཁནྡྷཔཝཏྟཉྩ. ཏསྶ པཝཏྟསྶ པརིཡཱདཱནཾ པརིཀྑཡོ ཨཔྤཝཏྟི པཝཏྟཔརིཡཱདཱནཾ. ཏསྨིཾ པཝཏྟཔརིཡཱདཱནེ. པརིནིབྦཱནེ ཉཱཎནྟི ཨརཧཏོ ཀཱམཙྪནྡཱདཱིནཾ པརིནིབྦཱནཾ ཨཔྤཝཏྟཾ ཨནུཔཱདིསེསཔརིནིབྦཱནཉྩ པཙྩཝེཀྑནྟསྶ ཏསྨིཾ ཀིལེསཔརིནིབྦཱནེ ཁནྡྷཔརིནིབྦཱནེ ཙ པཝཏྟཾ ཉཱཎཾ.

༣༦. སབྦདྷམྨཱནནྟི སབྦེསཾ ཏེབྷཱུམཀདྷམྨཱནཾ. སམྨཱ སམུཙྪེདེཏི སནྟཏིསམུཙྪེདཝསེན སུཊྛུ ནིརོདྷེ. ནིརོདྷེ ཙ ཨནུཔཊྛཱནཏཱཏི ནིརོདྷེ གཏེ པུན ན ཨུཔཊྛཱནཏཱཡ, པུན ཨནུཔྤཏྟིཡནྟི ཨཏྠོ. སམྨཱསམུཙྪེདེ ཙ ནིརོདྷེ ཙ ཨནུཔཊྛཱནཏཱ ཙཱཏི ཙ-ཀཱརོ སམྦནྡྷིཏབྦོ.

སམསཱིསཊྛེ ཉཱཎནྟི ནེཀྑམྨཱདཱིནི སཏྟཏིཾས སམཱནི, ཏཎྷཱདཱིནི ཏེརས སཱིསཱནི. པཙྩནཱིཀདྷམྨཱནཾ སམིཏཏྟཱ སམཱནི, ཡཐཱཡོགཾ པདྷཱནཏྟཱ ཙ ཀོཊིཏྟཱ ཙ སཱིསཱནི. ཨེཀསྨིཾ ཨིརིཡཱཔཐེ ཝཱ ཨེཀསྨིཾ ¶ ¶ རོགེ ཝཱ སབྷཱགསནྟཏིཝསེན ཨེཀསྨིཾ ཛཱིཝིཏིནྡྲིཡེ ཝཱ ནེཀྑམྨཱདཱིནི སམཱནི ཙ སདྡྷཱདཱིནི སཱིསཱནི ཙ ཨསྶ སནྟཱིཏི སམསཱིསཱི, སམསཱིསིསྶ ¶ ཨཏྠོ སམསཱིསཊྛོ. ཏསྨིཾ སམསཱིསཊྛེ, སམསཱིསིབྷཱཝེཏི ཨཏྠོ. ཨེཀསྨིཾ ཨིརིཡཱཔཐེ རོགེ ཝཱ སབྷཱགསནྟཏིཝསེན ཛཱིཝིཏེ ཝཱ ཝིཔསྶནཾ ཨཱརབྷིཏྭཱ ཏསྨིཾཡེཝ ཨིརིཡཱཔཐེ རོགེ སབྷཱགཛཱིཝིཏེ ཝཱ ཙཏྟཱརི མགྒཕལཱནི པཏྭཱ, ཏསྨིཾཡེཝ པརིནིབྦཱཡནྟསྶ ཨརཧཏོཡེཝ སམསཱིསིབྷཱཝོ ཧོཏཱིཏི ཏསྨིཾ སམསཱིསིབྷཱཝེ ཉཱཎནྟི ཝུཏྟཾ ཧོཏི. ཝུཏྟཉྩ པུགྒལཔཉྙཏྟིཡཾ (པུ. པ. ༡༦), ཏསྶཱ ཙ ཨཊྛཀཐཱཡཾ (པུ. པ. ཨཊྛ. ༡༦) –

‘‘ཀཏམོ ཙ པུགྒལོ སམསཱིསཱི? ཡསྶ པུགྒལསྶ ཨཔུབྦཾ ཨཙརིམཾ ཨཱསཝཔརིཡཱདཱནཉྩ ཧོཏི ཛཱིཝིཏཔརིཡཱདཱནཉྩ. ཨཡཾ ཝུཙྩཏི པུགྒལོ སམསཱིསཱི’’ཏི (པུ. པ. ༡༦).

‘‘སམསཱིསིནིདྡེསེ ཨཔུབྦཾ ཨཙརིམནྟི ཨཔུརེ ཨཔཙྪཱ, སནྟཏིཔཙྩུཔྤནྣཝསེན ཨེཀཝཱརཾཡེཝ, ཨེཀཀཱལཾཡེཝཱཏི ཨཏྠོ. པརིཡཱདཱནནྟི པརིཀྑཡོ. ཨཡནྟི ཨཡཾ པུགྒལོ སམསཱིསཱི ནཱམ ཝུཙྩཏི. སོ པནེས ཏིཝིདྷོ ཧོཏི ཨིརིཡཱཔཐསམསཱིསཱི རོགསམསཱིསཱི ཛཱིཝིཏསམསཱིསཱིཏི. ཏཏྠ ཡོ ཙངྐམནྟོཝ ཝིཔསྶནཾ ཨཱརབྷིཏྭཱ ཨརཧཏྟཾ པཏྭཱ ཙངྐམནྟོཝ པརིནིབྦཱཏི, ཡོ ཋིཏཀོཝ ཝིཔསྶནཾ ཨཱརབྷིཏྭཱ ཨརཧཏྟཾ པཏྭཱ ཋིཏཀོཝ པརིནིབྦཱཏི, ཡོ ནིསིནྣོཝ ཝིཔསྶནཾ ཨཱརབྷིཏྭཱ ཨརཧཏྟཾ པཏྭཱ ནིསིནྣོཝ པརིནིབྦཱཏི, ཡོ ནིཔནྣོཝ ཝིཔསྶནཾ ཨཱརབྷིཏྭཱ ཨརཧཏྟཾ པཏྭཱ ནིཔནྣོཝ པརིནིབྦཱཏི, ཨཡཾ ཨིརིཡཱཔཐསམསཱིསཱི ནཱམ. ཡོ པན ཨེཀཾ རོགཾ པཏྭཱ ཨནྟོརོགེཡེཝ ཝིཔསྶནཾ ཨཱརབྷིཏྭཱ ཨརཧཏྟཾ པཏྭཱ ཏེནེཝ རོགེན པརིནིབྦཱཏི, ཨཡཾ རོགསམསཱིསཱི ནཱམ. ཀཏརོ ཛཱིཝིཏསམསཱིསཱི? ཏེརས སཱིསཱནི. ཏཏྠ ཀིལེསསཱིསཾ ཨཝིཛྫཾ ཨརཧཏྟམགྒོ པརིཡཱདིཡཏི, པཝཏྟསཱིསཾ ཛཱིཝིཏིནྡྲིཡཾ ཙུཏིཙིཏྟཾ པརིཡཱདིཡཏི, ཨཝིཛྫཱཔརིཡཱདཱཡཀཾ ཙིཏྟཾ ཛཱིཝིཏིནྡྲིཡཾ པརིཡཱདཱཏུཾ ན སཀྐོཏི, ཛཱིཝིཏིནྡྲིཡཔརིཡཱདཱཡཀཾ ཙིཏྟཾ ཨཝིཛྫཾ པརིཡཱདཱཏུཾ ན སཀྐོཏི. ཨཝིཛྫཱཔརིཡཱདཱཡཀཾ ཙིཏྟཾ ཨཉྙཾ, ཛཱིཝིཏིནྡྲིཡཔརིཡཱདཱཡཀཾ ཙིཏྟཾ ཨཉྙཾ. ཡསྶ ཙེཏཾ སཱིསདྭཡཾ སམཾ པརིཡཱདཱནཾ གཙྪཏི, སོ ཛཱིཝིཏསམསཱིསཱི ནཱམ. ཀཐམིདཾ སམཾ ཧོཏཱིཏི? ཝཱརསམཏཱཡ. ཡསྨིཉྷི ཝཱརེ ¶ མགྒཝུཊྛཱནཾ ཧོཏི. སོཏཱཔཏྟིམགྒེ པཉྩ པཙྩཝེཀྑཎཱནི, སཀདཱགཱམིམགྒེ པཉྩ, ཨནཱགཱམིམགྒེ པཉྩ, ཨརཧཏྟམགྒེ ཙཏྟཱརཱིཏི ཨེཀཱུནཝཱིསཏིམེ པཙྩཝེཀྑཎཉཱཎེ པཏིཊྛཱཡ བྷཝངྒཾ ཨོཏརིཏྭཱ པརིནིབྦཱཡཏི. ཨིམཱཡ ཝཱརསམཏཱཡ ཨེཝ ཨུབྷཡསཱིསཔརིཡཱདཱནམྤི ¶ སམཾ ཧོཏི ནཱམ. ཏེནཱཡཾ པུགྒལོ ‘ཛཱིཝིཏསམསཱིསཱི’ཏི ཝུཙྩཏི. ཨཡམེཝ ཙ ཨིདྷ ཨདྷིཔྤེཏོ’’ཏི.

༣༧. ཨིདཱནི ¶ ཡསྨཱ སུཏམཡསཱིལམཡབྷཱཝནཱམཡཉཱཎཱནི ཝཊྚཔཱདཀཱནི སལླེཁཱ ནཱམ ན ཧོནྟི, ལོཀུཏྟརཔཱདཀཱནེཝ ཨེཏཱནི ཙ ཨཉྙཱནི ཙ ཉཱཎཱནི སལླེཁཱཏི ཝུཙྩནྟི, ཏསྨཱ པཙྩནཱིཀསལླེཁནཱཀཱརེན པཝཏྟཱནི ཉཱཎཱནི དསྶེཏུཾ སམསཱིསཊྛེ ཉཱཎཱནནྟརཾ སལླེཁཊྛེ ཉཱཎཾ ཨུདྡིཊྛཾ. ཏཏྠ པུཐུནཱནཏྟཏེཛཔརིཡཱདཱནེ པཉྙཱཏི ལོཀུཏྟརེཧི ཨསམྨིསྶཊྛེན པུཐཱུནཾ རཱགཱདཱིནཉྩ ནཱནཏྟཱནཾ ནཱནཱསབྷཱཝཱནཾ ཀཱམཙྪནྡཱདཱིནཉྩ སནྟཱཔནཊྛེན ‘‘ཏེཛཱ’’ཏི ལདྡྷནཱམཱནཾ དུསྶཱིལྱཱདཱིནཉྩ པརིཡཱདཱནེ ཁེཔནེ པཉྙཱ, ནེཀྑམྨཱདིམྷི སཏྟཏིཾསབྷེདེ དྷམྨེ པཉྙཱཏི ཝུཏྟཾ ཧོཏི. ཨཐ ཝཱ པུཐུབྷཱུཏཱ ནཱནཏྟབྷཱུཏཱ ཙ ཏེཛཱ ཨེཝ ཏེསཾ པུཐུབྷཱུཏཱནཾ ནཱནཏྟབྷཱུཏཱནཾ དུསྶཱིལྱཱདཱིནཾ པཉྩནྣཾ ཏེཛཱནཾ པརིཡཱདཱནེ པཉྙཱཏི ཨཏྠོ. ཏེཛེཧིཡེཝ པུཐཱུནཾ ནཱནཏྟཱནཉྩ སངྒཧཾ ནིདྡེསཝཱརེ པཀཱསཡིསྶཱམ.

སལླེཁཊྛེ ཉཱཎནྟི པཙྩནཱིཀདྷམྨེ སལླེཁཏི སམུཙྪིནྡཏཱིཏི སལླེཁོ, ཏསྨིཾ ནེཀྑམྨཱདིཀེ སཏྟཏིཾསཔྤབྷེདེ སལླེཁསབྷཱཝེ ཉཱཎཾ. ‘‘པརེ ཝིཧིཾསཀཱ བྷཝིསྶནྟི, མཡམེཏྠ ཨཝིཧིཾསཀཱ བྷཝིསྶཱམཱཏི སལླེཁོ ཀརཎཱིཡོ’’ཏིཨཱདིནཱ (མ. ནི. ༡.༨༣) ནཡེན བྷགཝཏཱ སལླེཁསུཏྟནྟེ ཝུཏྟོ ཙཏུཙཏྟཱལཱིསབྷེདོཔི སལླེཁོ ཨིམིནཱ སངྒཧིཏོཡེཝཱཏི ཝེདིཏབྦོ.

༣༨. ཨིདཱནི སལླེཁེ ཋིཏེན ཀཏྟབྦཾ སམྨཔྤདྷཱནཝཱིརིཡཾ དསྶེཏུཾ ཏདནནྟརཾ ཝཱིརིཡཱརམྦྷེ ཉཱཎཾ ཨུདྡིཊྛཾ. ཏཏྠ ཨསལླཱིནཏྟཔཧིཏཏྟཔགྒཧཊྛེཏི ཀོསཛྫཝསེན ཨསལླཱིནོ ཨསངྐུཙིཏོ ཨཏྟཱ ཨསྶཱཏི ཨསལླཱིནཏྟོ. ཨཏྟཱཏི ཙིཏྟཾ. ཡཐཱཧ –

‘‘ཨུདཀཉྷི ནཡནྟི ནེཏྟིཀཱ, ཨུསུཀཱརཱ ནམཡནྟི ཏེཛནཾ;

དཱརུཾ ནམཡནྟི ཏཙྪཀཱ, ཨཏྟཱནཾ དམཡནྟི པཎྜིཏཱ’’ཏི. ཨཱདི (དྷ. པ. ༨༠-༨༢) –

ཀཱཡེ ¶ ཙ ཛཱིཝིཏེ ཙ ཨནཔེཀྑཏཱཡ པཧིཏོ པེསིཏོ ཝིསྶཊྛོ ཨཏྟཱ ཨེཏེནཱཏི པཧིཏཏྟོ. ཨཏྟཱཏི ཨཏྟབྷཱཝོ. ཡཐཱཧ – ‘‘ཡཱ པན བྷིཀྑུནཱི ཨཏྟཱནཾ ཝདྷིཏྭཱ ཝདྷིཏྭཱ རོདེཡྻཱ’’ཏིཨཱདི (པཱཙི. ༨༨༠) ¶ . ཨསལླཱིནཏྟོ ཙ སོ པཧིཏཏྟོ ཙཱཏི ཨསལླཱིནཏྟཔཧིཏཏྟོ. སཧཛཱཏདྷམྨེ པགྒཎྷཱཏི ཨུཔཏྠམྦྷེཏཱིཏི པགྒཧོ, པགྒཧོ ཨེཝ ཨཏྠོ པགྒཧཊྛོ, པགྒཧསབྷཱཝོཏི ཨཏྠོ. ཨསལླཱིནཏྟཔཧིཏཏྟསྶ པགྒཧཊྛོ ཨསལླཱིནཏྟཔཧིཏཏྟཔགྒཧཊྛོ. ཏསྨིཾ ཨསལླཱིནཏྟཔཧིཏཏྟཔགྒཧཊྛེ. ‘‘ཏསྨཱཏིཧ, བྷིཀྑཝེ, ཏུམྷེཔི ཨཔྤཊིཝཱནཾ པདཧེཡྻཱཐ. ཀཱམཾ ཏཙོ ཙ ནྷཱརུ ¶ ཙ ཨཊྛི ཙ ཨཝསིསྶཏུ, ཨུཔསུསྶཏུ སརཱིརེ མཾསལོཧིཏཾ. ཡཾ ཏཾ པུརིསཐཱམེན པུརིསཝཱིརིཡེན པུརིསཔརཀྐམེན པཏྟབྦཾ, ན ཏཾ ཨཔཱཔུཎིཏྭཱ ཝཱིརིཡསྶ སཎྛཱནཾ བྷཝིསྶཏཱི’’ཏི (ཨ. ནི. ༢.༥) ཝུཏྟཏྟཱ ཨསལླཱིནཏྟཔཧིཏཏྟཝཙནེན པདྷཱནསྨིཾ ཨཔྤཊིཝཱནིཏཱ ཨནིཝཏྟནཏཱ ཝུཏྟཱ. པགྒཧཊྛཝཙནེན པན ཀོསཛྫུདྡྷཙྩཝིམུཏྟཾ སམཔྤཝཏྟཾ ཝཱིརིཡཾ ཝུཏྟཾ.

ཝཱིརིཡཱརམྦྷེ ཉཱཎནྟི ཝཱིརབྷཱཝོ ཝཱིརིཡཾ, ཝཱིརཱནཾ ཝཱ ཀམྨཾ, ཝིདྷིནཱ ཝཱ ནཡེན ཨུཔཱཡེན ཨཱིརཡིཏབྦཾ པཝཏྟཡིཏབྦནྟི ཝཱིརིཡཾ. ཏདེཏཾ ཨུསྶཱཧལཀྑཎཾ, སཧཛཱཏཱནཾ དྷམྨཱནཾ ཨུཔཏྠམྦྷནརསཾ, ཨསཾསཱིདནབྷཱཝཔཙྩུཔཊྛཱནཾ, ‘‘སཾཝིགྒོ ཡོནིསོ པདཧཏཱི’’ཏི (ཨ. ནི. ༤.༡༡༣) ཝཙནཏོ སཾཝེགཔདཊྛཱནཾ, ཝཱིརིཡཱརམྦྷཝཏྠུཔདཊྛཱནཾ ཝཱ. སམྨཱ ཨཱརདྡྷཾ སབྦསམྤཏྟཱིནཾ མཱུལཾ ཧོཏཱིཏི དཊྛབྦཾ. ཝཱིརིཡསངྑཱཏོ ཨཱརམྦྷོ ཝཱིརིཡཱརམྦྷོ. ཨིམིནཱ སེསཱརམྦྷེ པཊིཀྑིཔཏི. ཨཡཉྷི ཨཱརམྦྷསདྡོ ཀམྨེ ཨཱཔཏྟིཡཾ ཀིརིཡཱཡཾ ཝཱིརིཡེ ཧིཾསཱཡཾ ཝིཀོཔནེཏི ཨནེཀེསུ ཨཏྠེསུ ཨཱགཏོ.

‘‘ཡཾཀིཉྩི དུཀྑཾ སམྦྷོཏི, སབྦཾ ཨཱརམྦྷཔཙྩཡཱ;

ཨཱརམྦྷཱནཾ ནིརོདྷེན, ནཏྠི དུཀྑསྶ སམྦྷཝོ’’ཏི. (སུ. ནི. ༧༤༩) –

ཨེཏྠ ཧི ཀམྨཾ ཨཱརམྦྷོཏི ཨཱགཏཾ. ‘‘ཨཱརམྦྷཏི ཙ ཝིཔྤཊིསཱརཱི ཙ ཧོཏཱི’’ཏི (ཨ. ནི. ༥.༡༤༢; པུ. པ. ༡༩༡) ཨེཏྠ ཨཱཔཏྟི. ‘‘མཧཱཡཉྙཱ མཧཱརམྦྷཱ, ན ཏེ ཧོནྟི མཧཔྥལཱ’’ཏི (ཨ. ནི. ༤.༣༩; སཾ. ནི. ༡.༡༢༠) ཨེཏྠ ཡཱུཔུསྶཱཔནཱདིཀིརིཡཱ. ‘‘ཨཱརམྦྷཐ ནིཀྐམཐ, ཡུཉྫཐ བུདྡྷསཱསནེ’’ཏི (སཾ. ནི. ༡.༡༨༥) ཨེཏྠ ཝཱིརིཡཾ. ‘‘སམཎཾ གོཏམཾ ཨུདྡིསྶ པཱཎཾ ཨཱརམྦྷནྟཱི’’ཏི (མ. ནི. ༢.༥༡-༥༢) ཨེཏྠ ཧིཾསཱ. ‘‘བཱིཛགཱམབྷཱུཏགཱམསམཱརམྦྷཱ ¶ པཊིཝིརཏོ ཧོཏཱི’’ཏི ¶ (དཱི. ནི. ༡.༡༠; མ. ནི. ༡.༢༩༣) ཨེཏྠ ཚེདནབྷཉྫནཱདིཀཾ ཝིཀོཔནཾ. ཨིདྷ པན ཝཱིརིཡམེཝ ཨདྷིཔྤེཏཾ. ཏེན ཝུཏྟཾ ‘‘ཝཱིརིཡསངྑཱཏོ ཨཱརམྦྷོ ཝཱིརིཡཱརམྦྷོ’’ཏི. ཝཱིརིཡཉྷི ཨཱརབྷནཀཝསེན ཨཱརམྦྷོཏི ཝུཙྩཏི. ཏསྨིཾ ཝཱིརིཡཱརམྦྷེ ཉཱཎཾ. ཨསལླཱིནཏྟཱ པཧིཏཏྟཱཏིཔི པཋནྟི, ཨསལླཱིནབྷཱཝེན པཧིཏབྷཱཝེནཱཏི ཨཏྠོ. པུརིམཔཱཋོཡེཝ སུནྡརོ. ཀེཙི པན ‘‘སཏིདྷམྨཝིཙཡཝཱིརིཡཔཱིཏིསམྦོཛ྄ཛྷངྒཱནཾ སམཏཱ ཨསལླཱིནཏྟཏཱ, སཏིསམཱདྷིཔསྶདྡྷིཨུཔེཀྑཱསམྦོཛ྄ཛྷངྒཱནཾ སམཏཱ པཧིཏཏྟཏཱ, སཏྟནྣཾ སམྦོཛ྄ཛྷངྒཱནཾ སམཏཱ པགྒཧཊྛོ’’ཏི ཝཎྞཡནྟི.

༣༩. ཨིདཱནི སམྨཱཝཱཡཱམསིདྡྷཾ མགྒཕལཾ པཏྟེན ལོཀཧིཏཏྠཾ དྷམྨདེསནཱ ཀཱཏབྦཱཏི དསྶེཏུཾ ¶ ཏདནནྟརཾ ཨཏྠསནྡསྶནེ ཉཱཎཾ ཨུདྡིཊྛཾ. ཏཏྠ ནཱནཱདྷམྨཔྤཀཱསནཏཱཏི སབྦསངྑཏཱསངྑཏཝསེན ནཱནཱདྷམྨཱནཾ པཀཱསནཏཱ དཱིཔནཏཱ དེསནཏཱ. པཀཱསནཏཱཏི ཙ པཀཱསནཱ ཨེཝ. ཨཏྠསནྡསྶནེཏི ནཱནཱཨཏྠཱནཾ པརེསཾ སནྡསྶནེ. དྷམྨཱ ཙ ཨཏྠཱ ཙ ཏེ ཨེཝ.

༤༠. ཨིདཱནི པརེསཾ དྷམྨིཡཱ ཀཐཱཡ སནྡསྶེནྟསྶ ཏསྶ ཨརིཡཔུགྒལསྶ ཡཐཱསབྷཱཝདྷམྨདེསནཱཀཱརཎཾ དསྶནཝིསུདྡྷིཾ དསྶེཏུཾ ཏདནནྟརཾ དསྶནཝིསུདྡྷིཉཱཎཾ ཨུདྡིཊྛཾ. ཏཏྠ སབྦདྷམྨཱནཾ ཨེཀསངྒཧཏཱ ནཱནཏྟེཀཏྟཔཊིཝེདྷེཏི སབྦེསཾ སངྑཏཱསངྑཏདྷམྨཱནཾ ཨེཀསངྒཧཏཱཡ ཙ ཀཱམཙྪནྡཱདཱིནཾ ནཱནཏྟསྶ ཙ ནེཀྑམྨཱདཱིནཾ ཨེཀཏྟསྶ ཙ པཊིཝེདྷོ, ཨབྷིསམཡོཏི ཨཏྠོ. སོ པན མགྒཔཉྙཱ ཕལཔཉྙཱ ཙ. མགྒཔཉྙཱ སཙྩཱབྷིསམཡཀྑཎེ སཙྩཱབྷིསམཡཝསེན པཊིཝིཛ྄ཛྷཏཱིཏི པཊིཝེདྷོ, ཕལཔཉྙཱ པཊིཝིདྡྷཏྟཱ པཊིཝེདྷོ. ཨེཀསངྒཧཏཱཏི ཨེཏྠ ཛཱཏིསངྒཧོ, སཉྫཱཏིསངྒཧོ, ཀིརིཡཱསངྒཧོ, གཎནསངྒཧོཏི ཙཏུབྦིདྷོ སངྒཧོ. ཏཏྠ ‘‘སབྦེ ཁཏྟིཡཱ ཨཱགཙྪནྟུ, སབྦེ བྲཱཧྨཎཱ, སབྦེ ཝེསྶཱ, སབྦེ སུདྡཱ ཨཱགཙྪནྟུ’’, ‘‘ཡཱ, ཙཱཝུསོ ཝིསཱཁ, སམྨཱཝཱཙཱ, ཡོ ཙ སམྨཱཀམྨནྟོ, ཡོ ཙ སམྨཱཨཱཛཱིཝོ, ཨིམེ དྷམྨཱ སཱིལཀྑནྡྷེ སངྒཧིཏཱ’’ཏི (མ. ནི. ༡.༤༦༢) ཨཡཾ ཛཱཏིསངྒཧོ ནཱམ. ‘‘ཨེཀཛཱཏིཀཱ ཨཱགཙྪནྟཱུ’’ཏི ¶ ཝུཏྟཊྛཱནེ ཝིཡ ཧི ཨིདྷ སབྦེ ཛཱཏིཡཱ ཨེཀསངྒཧིཏཱ. ‘‘སབྦེ ཀོསལཀཱ ཨཱགཙྪནྟུ, སབྦེ ¶ མཱགདྷིཀཱ, སབྦེ བྷཱརུཀཙྪཀཱ ཨཱགཙྪནྟུ’’, ‘‘ཡོ, ཙཱཝུསོ ཝིསཱཁ, སམྨཱཝཱཡཱམོ, ཡཱ ཙ སམྨཱསཏི, ཡོ ཙ སམྨཱསམཱདྷི, ཨིམེ དྷམྨཱ སམཱདྷིཀྑནྡྷེ སངྒཧིཏཱ’’ཏི (མ. ནི. ༡.༤༦༢) ཨཡཾ སཉྫཱཏིསངྒཧོ ནཱམ. ‘‘ཨེཀཊྛཱནེ ཛཱཏཱ སཾཝཌྜྷཱ ཨཱགཙྪནྟཱུ’’ཏི ཝུཏྟཊྛཱནེ ཝིཡ ཧི ཨིདྷ སབྦེ ཛཱཏིཊྛཱནེན ནིཝུཏྠོཀཱསེན ཨེཀསངྒཧིཏཱ. ‘‘སབྦེ ཧཏྠཱརོཧཱ ཨཱགཙྪནྟུ, སབྦེ ཨསྶཱརོཧཱ ཨཱགཙྪནྟུ, སབྦེ རཐིཀཱ ཨཱགཙྪནྟུ’’, ‘‘ཡཱ, ཙཱཝུསོ ཝིསཱཁ, སམྨཱདིཊྛི, ཡོ ཙ སམྨཱསངྐཔྤོ, ཨིམེ དྷམྨཱ པཉྙཱཀྑནྡྷེ སངྒཧིཏཱ’’ཏི (མ. ནི. ༡.༤༦༢) ཨཡཾ ཀིརིཡཱསངྒཧོ ནཱམ. སབྦེཝ ཧི ཏེ ཨཏྟནོ ཀིརིཡཱཀརཎེན ཨེཀསངྒཧིཏཱ. ‘‘ཙཀྑཱཡཏནཾ ཀཏམཾ ཁནྡྷགཎནཾ གཙྪཏི, ཙཀྑཱཡཏནཾ རཱུཔཀྑནྡྷགཎནཾ གཙྪཏི. ཧཉྩི ཙཀྑཱཡཏནཾ རཱུཔཀྑནྡྷགཎནཾ གཙྪཏི, ཏེན ཝཏ རེ ཝཏྟབྦེ ཙཀྑཱཡཏནཾ རཱུཔཀྑནྡྷེན སངྒཧིཏ’’ནྟི (ཀཐཱ. ༤༧༡) ཨཡཾ གཎནསངྒཧོ ནཱམ. ཨཡམིདྷ ཨདྷིཔྤེཏོ. ཏཐཊྛཱདཱིསུ དྭཱདསསུ ཨཱཀཱརེསུ ཝིསུཾ ཝིསུཾ ཨེཀེན སངྒཧོ གཎནཔརིཙྪེདོ ཨེཏེསནྟི ཨེཀསངྒཧཱ, ཨེཀསངྒཧཱནཾ བྷཱཝོ ཨེཀསངྒཧཏཱ.

དསྶནཝིསུདྡྷིཉཱཎནྟི མགྒཕལཉཱཎཾ དསྶནཾ. དསྶནམེཝ ཝིསུདྡྷི དསྶནཝིསུདྡྷི, དསྶནཝིསུདྡྷི ¶ ཨེཝ ཉཱཎཾ དསྶནཝིསུདྡྷིཉཱཎཾ. མགྒཉཱཎཾ ཝིསུཛ྄ཛྷཏཱིཏི དསྶནཝིསུདྡྷི, ཕལཉཱཎཾ ཝིསུདྡྷཏྟཱ དསྶནཝིསུདྡྷི.

༤༡. ཨིདཱནི དསྶནཝིསུདྡྷིསཱདྷཀཱནི ཝིཔསྶནཱཉཱཎཱནི དྭིདྷཱ དསྶེཏུཾ ཏདནནྟརཾ ཁནྟིཉཱཎཔརིཡོགཱཧཎཉཱཎཱནི ཨུདྡིཊྛཱནི. ཏཏྠ ཝིདིཏཏྟཱ པཉྙཱཏི རཱུཔཀྑནྡྷཱདཱིནཾ ཨནིཙྩཱདིཏོ ཝིདིཏཏྟཱ པཝཏྟཱ པཉྙཱ. ཁནྟིཉཱཎནྟི ཝིདིཏམེཝ ཁམཏཱིཏི ཁནྟི, ཁནྟི ཨེཝ ཉཱཎཾ ཁནྟིཉཱཎཾ. ཨེཏེན ཨདྷིཝཱསནཁནྟིཾ པཊིཀྑིཔཏི. ཨེཏཾ ཀལཱཔསམྨསནཱདིཝསེན པཝཏྟཾ ཏརུཎཝིཔསྶནཱཉཱཎཾ.

༤༢. ཕུཊྛཏྟཱ པཉྙཱཏི རཱུཔཀྑནྡྷཱདཱིནཾ ཨནིཙྩཱདིཝསེན ཉཱཎཕསྶེན ཕུཊྛཏྟཱ པཝཏྟཱ པཉྙཱ. པརིཡོགཱཧཎེ ཉཱཎནྟི ཕུཊྛམེཝ པརིཡོགཱཧཏི པཝིསཏཱིཏི པརིཡོགཱཧཎཾ ཉཱཎཾ. གཱ-ཀཱརཾ ¶ རསྶཾ ཀཏྭཱཔི པཋནྟི. ཨེཏཾ བྷངྒཱནུཔསྶནཱདིཝསེན པཝཏྟཾ ཏིཀྑཝིཔསྶནཱཉཱཎཾ. ཀེཙི པན ‘‘ཝིཔསྶནཱཉཱཎམེཝ སདྡྷཱཝཱཧིསྶ ཁནྟིཉཱཎཾ, པཉྙཱཝཱཧིསྶ པརིཡོགཱཧཎཉཱཎ’’ནྟི ཝདནྟི. ཨེཝཾ སནྟེ ཨེཏཱནི དྭེ ཉཱཎཱནི ཨེཀསྶ ན སམྦྷཝནྟི ¶ , ཏདསམྦྷཝེ ཨེཀསྶ སཱཝཀསྶ སཏྟསཊྛི སཱཝཀསཱདྷཱརཎཉཱཎཱནི ན སམྦྷཝནྟི, ཏསྨཱ ཏཾ ན ཡུཛྫཏི.

༤༣. ཨིདཱནི ཡསྨཱ པུཐུཛྫནཱ སེཀྑཱ ཙ ཝིཔསྶནཱུཔགེ ཁནྡྷཱདཡོ དྷམྨེ སཀལེ ཨེཝ སམྨསནྟི, ན ཏེསཾ ཨེཀདེསཾ, ཏསྨཱ ཏེསཾ པདེསཝིཧཱརོ ན ལབྦྷཏི, ཨརཧཏོཡེཝ ཡཐཱརུཙི པདེསཝིཧཱརོ ལབྦྷཏཱིཏི དསྶནཝིསུདྡྷིསཱདྷཀཱནི ཉཱཎཱནི ཝཏྭཱ ཏདནནྟརཾ ཨརཧཏོ དསྶནཝིསུདྡྷིསིདྡྷཾ པདེསཝིཧཱརཉཱཎཾ ཨུདྡིཊྛཾ. ཏཏྠ སམོདཧནེ པཉྙཱཏི ཁནྡྷཱདཱིནཾ ཨེཀདེསསྶ ཝེདནཱདྷམྨསྶ སམོདཧནཔཉྙཱ, སམྤིཎྜནཔཉྙཱ རཱསིཀརཎཔཉྙཱ. སམོདྷཱནེ པཉྙཱཏིཔི པཱཋོ, སོཡེཝ ཨཏྠོ.

པདེསཝིཧཱརེ ཉཱཎནྟི ཁནྡྷཱདཱིནཾ པདེསེན ཨེཀདེསེན ཨཝཡཝེན ཝིཧཱརོ པདེསཝིཧཱརོ, ཏསྨིཾ པདེསཝིཧཱརེ ཉཱཎཾ. ཏཏྠ པདེསོ ནཱམ ཁནྡྷཔདེསོ ཨཱཡཏནདྷཱཏུསཙྩཨིནྡྲིཡཔཙྩཡཱཀཱརསཏིཔཊྛཱནཛྷཱནནཱམརཱུཔདྷམྨཔདེསོཏི ནཱནཱཝིདྷོ. ཨེཝཾ ནཱནཱཝིདྷོ ཙེས ཝེདནཱ ཨེཝ. ཀཐཾ? པཉྩནྣཾ ཁནྡྷཱནཾ ཝེདནཱཀྑནྡྷཝསེན ཁནྡྷེཀདེསོ, དྭཱདསནྣཾ ཨཱཡཏནཱནཾ ཝེདནཱཝསེན དྷམྨཱཡཏནེཀདེསོ, ཨཊྛཱརསནྣཾ དྷཱཏཱུནཾ ཝེདནཱཝསེན དྷམྨདྷཱཏེཀདེསོ, ཙཏུནྣཾ སཙྩཱནཾ ཝེདནཱཝསེན དུཀྑསཙྩེཀདེསོ, བཱཝཱིསཏིཡཱ ཨིནྡྲིཡཱནཾ པཉྩཝེདནིནྡྲིཡཝསེན ཨིནྡྲིཡེཀདེསོ, དྭཱདསནྣཾ པཊིཙྩསམུཔྤཱདངྒཱནཾ ཕསྶཔཙྩཡཱ ཝེདནཱཝསེན པཙྩཡཱཀཱརེཀདེསོ, ཙཏུནྣཾ སཏིཔཊྛཱནཱནཾ ཝེདནཱནུཔསྶནཱཝསེན ¶ སཏིཔཊྛཱནེཀདེསོ, ཙཏུནྣཾ ཛྷཱནཱནཾ སུཁཨུཔེཀྑཱཝསེན ཛྷཱནེཀདེསོ, ནཱམརཱུཔཱནཾ ཝེདནཱཝསེན ནཱམརཱུཔེཀདེསོ, ཀུསལཱདཱིནཾ སབྦདྷམྨཱནཾ ཝེདནཱཝསེན དྷམྨེཀདེསོཏི ཨེཝཾ ཝེདནཱ ཨེཝ ཁནྡྷཱདཱིནཾ པདེསོ, ཏསྶཱ ཝེདནཱཡ ཨེཝ པཙྩཝེཀྑཎཝསེན པདེསཝིཧཱརོ.

༤༤. ཨིདཱནི ¶ ཡསྨཱ སམཱདྷིབྷཱཝནཱམཡཉཱཎཱདཱིནི བྷཱཝེནྟཱ པུཐུཛྫནཱ སེཀྑཱ ཙ ཏེ ཏེ བྷཱཝེཏབྦབྷཱཝནཱདྷམྨེ ཨདྷིཔཏཱི ཛེཊྛཀེ ཀཏྭཱ ཏེན ཏེན པཧཱཏབྦེ ཏཔྤཙྩནཱིཀེ ནཱནཱསབྷཱཝེ དྷམྨེ ཨནེཀཱདཱིནཝེ ཨཱདཱིནཝཏོ པཙྩཝེཀྑིཏྭཱ ཏསྶ ཏསྶ བྷཱཝནཱདྷམྨསྶ ཝསེན ཙིཏྟཾ པཏིཊྛཔེཏྭཱ ཏེ ཏེ པཙྩནཱིཀདྷམྨེ པཛཧནྟི. པཛཧནྟཱ ¶ ཝིཔསྶནཱཀཱལེ སབྦསངྑཱརེ སུཉྙཏོ དིསྭཱ པཙྪཱ སམུཙྪེདེན པཛཧནྟི, ཏཐཱ པཛཧནྟཱ ཙ ཨེཀཱབྷིསམཡཝསེན སཙྩཱནི པཊིཝིཛ྄ཛྷནྟཱ པཛཧནྟི. ཡཐཱཝུཏྟེཧེཝ ཨཱཀཱརེཧི སབྦེཔི ཨརིཡཱ ཡཐཱཡོགཾ པཊིཔཛྫནྟི, ཏསྨཱ པདེསཝིཧཱརཉཱཎཱནནྟརཾ སཉྙཱཝིཝཊྚཉཱཎཱདཱིནི ཚ ཉཱཎཱནི ཡཐཱཀྐམེན ཨུདྡིཊྛཱནི. ཏཏྠ ཨདྷིཔཏཏྟཱ པཉྙཱཏི ནེཀྑམྨཱདཱིནཾ ཨདྷིཔཏིབྷཱཝེན ནེཀྑམྨཱདཱིནི ཨདྷིཀཱནི ཀཏྭཱ ཏདདྷིཀབྷཱཝེན པཝཏྟཱ པཉྙཱཏི ཨཏྠོ. སཉྙཱཝིཝཊྚེ ཉཱཎནྟི སཉྙཱཡ ཝིཝཊྚནཾ པརཱཝཊྚནཾ པརམྨུཁབྷཱཝོཏི སཉྙཱཝིཝཊྚོ, ཡཱཡ སཉྙཱཡ ཏེ ཏེ བྷཱཝནཱདྷམྨེ ཨདྷིཔཏིཾ ཀརོཏི, ཏཱཡ སཉྙཱཡ ཧེཏུབྷཱུཏཱཡ, ཀརཎབྷཱུཏཱཡ ཝཱ ཏཏོ ཏཏོ ཀཱམཙྪནྡཱདིཏོ ཝིཝཊྚནེ ཉཱཎནྟི ཝུཏྟཾ ཧོཏི. ཨེཏྟོ ཝིཝཊྚོཏི ཨཝུཏྟེཔི ཡཏོ ཝིཝཊྚཏི, ཏཏོ ཨེཝ ཝིཝཊྚོཏི གཡ྄ཧཏི ཡཐཱ ཝིཝཊྚནཱནུཔསྶནཱཡ. སཱ པན སཉྙཱ སཉྫཱནནལཀྑཎཱ, ཏདེཝེཏནྟི པུན སཉྫཱནནཔཙྩཡནིམིཏྟཀརཎརསཱ དཱརུཨཱདཱིསུ ཏཙྪཀཱདཡོ ཝིཡ, ཡཐཱགཧིཏནིམིཏྟཝསེན ཨབྷིནིཝེསཀརཎཔཙྩུཔཊྛཱནཱ ཧཏྠིདསྶཀཨནྡྷཱ ཝིཡ, ཨཱརམྨཎེ ཨནོགཱལ༹ྷཝུཏྟིཏཱཡ ཨཙིརཊྛཱནཔཙྩུཔཊྛཱནཱ ཝཱ ཝིཛྫུ ཝིཡ, ཡཐཱཨུཔཊྛིཏཝིསཡཔདཊྛཱནཱ ཏིཎཔུརིསཀེསུ མིགཔོཏཀཱནཾ པུརིསཱཏི ཨུཔྤནྣསཉྙཱ ཝིཡ.

༤༥. ནཱནཏྟེ པཉྙཱཏི ནཱནཱསབྷཱཝེ བྷཱཝེཏབྦཏོ ཨཉྙསབྷཱཝེ ཀཱམཙྪནྡཱདིཀེ ཨཱདཱིནཝདསྶནེན པཝཏྟཱ པཉྙཱ. ནཱནཏྟེཏི ཙ ནིམིཏྟཏྠེ བྷུམྨཝཙནཾ. ནཱནཏྟཔྤཧཱནཾ ཝཱ ནཱནཏྟཾ, ནཱནཏྟཔྤཧཱནནིམིཏྟཾ ནཱནཏྟཔྤཧཱནཧེཏུ ནེཀྑམྨཱདཱིསུ པཉྙཱཏི ཨདྷིཔྤཱཡོ. ཙེཏོཝིཝཊྚེ ཉཱཎནྟི ཙེཏསོ ཀཱམཙྪནྡཱདིཏོ ཝིཝཊྚནཾ ནེཀྑམྨཱདཱིསུ ཉཱཎཾ. ཙེཏོཏི ཙེཏྠ ཙེཏནཱ ཨདྷིཔྤེཏཱ. སཱ ཙེཏནཱབྷཱཝལཀྑཎཱ, ཨབྷིསནྡཧནལཀྑཎཱ ཝཱ, ཨཱཡཱུཧནརསཱ, སཾཝིདཧནཔཙྩུཔཊྛཱནཱ སཀིཙྩཔརཀིཙྩསཱདྷཀཱ ཛེཊྛསིསྶམཧཱཝཌྜྷཀིཨཱདཡོ ¶ ཝིཡ. ཨཙྩཱཡིཀཀམྨཱནུསྶརཎཱདཱིསུ ཙ པནཱཡཾ སམྤཡུཏྟཱནཾ ཨུསྶཱཧནབྷཱཝེན པཱཀཊཱ ཧོཏི.

༤༦. ཨདྷིཊྛཱནེ ¶ པཉྙཱཏི ནེཀྑམྨཱདིཝསེན ཙིཏྟསྶ པཏིཊྛཱཔནེ པཉྙཱ. ཙིཏྟཝིཝཊྚེ ཉཱཎནྟི ཀཱམཙྪནྡཱདིཔཧཱནཝསེན ཙིཏྟསྶ ཝིཝཊྚནེ ཉཱཎཾ ¶ . ཙིཏྟཉྩེཏྠ ཝིཛཱནནལཀྑཎཾ, པུབྦངྒམརསཾ, སནྡྷཱནཔཙྩུཔཊྛཱནཾ, ནཱམརཱུཔཔདཊྛཱནཾ.

༤༧. སུཉྙཏེ པཉྙཱཏི ཨཏྟཏྟནིཡསུཉྙཏཱཡ ཨནཏྟཱནཏྟནིཡེ པཝཏྟཱ ཨནཏྟཱནུཔསྶནཱ པཉྙཱ. ཉཱཎཝིཝཊྚེ ཉཱཎནྟི ཉཱཎམེཝ ཨབྷིནིཝེསཏོ ཝིཝཊྚཏཱིཏི ཝིཝཊྚོ, ཏཾ ཉཱཎཝིཝཊྚབྷཱུཏཾ ཉཱཎཾ.

༤༨. ཝོསགྒེ པཉྙཱཏི ཨེཏྠ ཝོསཛྫཏཱིཏི ཝོསགྒོ, ཀཱམཙྪནྡཱདཱིནཾ ཝོསགྒོ ནེཀྑམྨཱདིམྷི པཉྙཱ. ཝིམོཀྑཝིཝཊྚེ ཉཱཎནྟི ཀཱམཙྪནྡཱདིཀེཧི ཝིམུཙྩཏཱིཏི ཝིམོཀྑོ, ཝིམོཀྑོ ཨེཝ ཝིཝཊྚོ ཝིམོཀྑཝིཝཊྚོ, སོ ཨེཝ ཉཱཎཾ.

༤༩. ཏཐཊྛེ པཉྙཱཏི ཨེཀེཀསྶ སཙྩསྶ ཙཏུབྦིདྷེ ཙཏུབྦིདྷེ ཨཝིཔརཱིཏསབྷཱཝེ ཀིཙྩཝསེན ཨསམྨོཧཏོ པཝཏྟཱ པཉྙཱ. སཙྩཝིཝཊྚེ ཉཱཎནྟི ཙཏཱུསུ སཙྩེསུ དུབྷཏོ ཝུཊྛཱནཝསེན ཝིཝཊྚཏཱིཏི སཙྩཝིཝཊྚོ, སོ ཨེཝ ཉཱཎཾ. ཨེཀམེཝ ཉཱཎཾ ཨདྷིཔཏིཀཏདྷམྨཝསེན སཉྙཱཝིཝཊྚོཏི, པཧཱཏབྦདྷམྨཝསེན ཙེཏོཝིཝཊྚོཏི, ཙིཏྟཔཏིཊྛཱཔནཝསེན ཙིཏྟཝིཝཊྚོཏི, པཙྩནཱིཀཔཧཱནཝསེན ཝིམོཀྑཝིཝཊྚོཏི ཨེཝཾ ཙཏུདྷཱ ཝུཏྟཾ. ཨནཏྟཱནུཔསྶནཱཝ སུཉྙཏཱཀཱརཝསེན ‘‘ཉཱཎཝིཝཊྚེ ཉཱཎ’’ནྟི ཝུཏྟཱ. མགྒཉཱཎམེཝ ཧེཊྛཱ ‘‘མགྒེ ཉཱཎ’’ནྟི ཙ, ‘‘ཨཱནནྟརིཀསམཱདྷིམྷི ཉཱཎ’’ནྟི ཙ དྭིདྷཱ ཝུཏྟཾ, ཝིཝཊྚནཱཀཱརཝསེན ‘‘སཙྩཝིཝཊྚེ ཉཱཎ’’ནྟི ཝུཏྟཾ.

༥༠. ཨིདཱནི ཏསྶ སཙྩཝིཝཊྚཉཱཎཝསེན པཝཏྟསྶ ཨཱསཝཱནཾ ཁཡེ ཉཱཎསྶ ཝསེན པཝཏྟཱནི ཀམཏོ ཚ ཨབྷིཉྙཱཉཱཎཱནི ཨུདྡིཊྛཱནི. ཏཏྠཱཔི ལོཀཔཱཀཊཱནུབྷཱཝཏྟཱ ཨཏིཝིམྷཱཔནནྟི པཋམཾ ཨིདྡྷིཝིདྷཉཱཎཾ ཨུདྡིཊྛཾ, ཙེཏོཔརིཡཉཱཎསྶ ཝིསཡཏོ དིབྦསོཏཉཱཎཾ ཨོལཱ༹རིཀཝིསཡནྟི དུཏིཡཾ ¶ དིབྦསོཏཉཱཎཾ ཨུདྡིཊྛཾ, སུཁུམཝིསཡཏྟཱ ཏཏིཡཾ ཙེཏོཔརིཡཉཱཎཾ ཨུདྡིཊྛཾ. ཏཱིསུ ཝིཛྫཱསུ པུབྦེནིཝཱསཙྪཱདཀཱཏཱིཏཏམཝིནོདཀཏྟཱ པཋམཾ པུབྦེནིཝཱསཱནུསྶཏིཉཱཎཾ ཨུདྡིཊྛཾ, པཙྩུཔྤནྣཱནཱགཏཏམཝིནོདཀཏྟཱ དུཏིཡཾ དིབྦཙཀྑུཉཱཎཾ ཨུདྡིཊྛཾ, སབྦཏམསམུཙྪེདཀཏྟཱ ཏཏིཡཾ ཨཱསཝཱནཾ ཁཡེ ཉཱཎཾ ཨུདྡིཊྛཾ. ཏཏྠ ཀཱཡམྤཱིཏི རཱུཔཀཱཡམྤི. ཙིཏྟམྤཱིཏི པཱདཀཛ྄ཛྷཱནཙིཏྟམྤི. ཨེཀཝཝཏྠཱནཏཱཏི ¶ པརིཀམྨཙིཏྟེན ཨེཀཏོ ཋཔནཏཱཡ ཙ དིསྶམཱནཀཱཡེན, ཨདིསྶམཱནཀཱཡེན ཝཱ གནྟུཀཱམཀཱལེ ཡཐཱཡོགཾ ཀཱཡསྶཔི ཙིཏྟསྶཔི མིསྶཱིཀརཎཏཱཡ ཙཱཏི ཝུཏྟཾ ¶ ཧོཏི. ཀཱཡོཏི ཙེཏྠ སརཱིརཾ. སརཱིརཉྷི ཨསུཙིསཉྩཡཏོ ཀུཙྪིཏཱནཾ ཀེསཱདཱིནཉྩེཝ ཙཀྑུརོགཱདཱིནཾ རོགསཏཱནཉྩ ཨཱཡབྷཱུཏཏོ ཀཱཡོཏི ཝུཙྩཏི. སུཁསཉྙཉྩ ལཧུསཉྙཉྩཱཏི ཨེཏྠ ཙཏུཏྠཛ྄ཛྷཱནསམྤཡུཏྟཾ ཨེཀཾཡེཝ སཉྙཾ ཨཱཀཱརནཱནཏྟཏོ དྭིདྷཱ ཀཏྭཱ སམུཙྩཡཏྠོ ཙ-སདྡོ པཡུཏྟོ. ཙཏུཏྠཛ྄ཛྷཱནསྨིཉྷི ཨུཔེཀྑཱ སནྟཏྟཱ སུཁནྟི ཝུཏྟཱ, ཏཾསམྤཡུཏྟཱ སཉྙཱ སུཁསཉྙཱ. སཱཡེཝ ནཱིཝརཎེཧི ཙེཝ ཝིཏཀྐཱདིཔཙྩནཱིཀེཧི ཙ ཝིམུཏྟཏྟཱ ལཧུསཉྙཱ. ཨདྷིཊྛཱནཝསེནཱཏི ཨདྷིཀཾ ཀཏྭཱ ཋཱནཝསེན, པཝིསནཝསེནཱཏི ཨདྷིཔྤཱཡོ. ཨདྷིཊྛཱནཝསེན ཙཱཏི ཙ-སདྡོ སམྦནྡྷིཏབྦོ. ཨེཏྟཱཝཏཱ སབྦཔྤཀཱརསྶ ཨིདྡྷིཝིདྷསྶ ཡཐཱཡོགཾ ཀཱརཎཾ ཝུཏྟཾ.

ཨིཛ྄ཛྷནཊྛེ པཉྙཱཏི ཨིཛ྄ཛྷནསབྷཱཝེ པཉྙཱ. ཨིདྡྷིཝིདྷེ ཉཱཎནྟི ཨིཛ྄ཛྷནཊྛེན ཨིདྡྷི, ནིཔྥཏྟིཨཏྠེན པཊིལཱབྷཊྛེན ཙཱཏི ཝུཏྟཾ ཧོཏི. ཡཉྷི ནིཔྥཛྫཏི པཊིལབྦྷཏི ཙ, ཏཾ ཨིཛ྄ཛྷཏཱིཏི ཝུཙྩཏི. ཡཐཱཧ – ‘‘ཀཱམཾ ཀཱམཡམཱནསྶ, ཏསྶ ཙེཏཾ སམིཛ྄ཛྷཏཱི’’ཏི (སུ. ནི. ༧༧༢). ཏཐཱ ‘‘ནེཀྑམྨཾ ཨིཛ྄ཛྷཏཱིཏི ཨིདྡྷི, པཊིཧརཏཱིཏི པཱཊིཧཱརིཡཾ, ཨརཧཏྟམགྒོ ཨིཛ྄ཛྷཏཱིཏི ཨིདྡྷི, པཊིཧརཏཱིཏི པཱཊིཧཱརིཡ’’ནྟི (པཊི. མ. ༣.༣༢). ཨཔརོ ནཡོ – ཨིཛ྄ཛྷནཊྛེན ཨིདྡྷི, ཨུཔཱཡསམྤདཱཡེཏཾ ཨདྷིཝཙནཾ. ཨུཔཱཡསམྤདཱ ཧི ཨིཛ྄ཛྷཏི ཨདྷིཔྤེཏཕལཔྤསཝནཏོ. ཡཐཱཧ – ‘‘ཨཡཾ ཁོ ཙིཏྟོ གཧཔཏི སཱིལཝཱ ཀལྱཱཎདྷམྨོ, སཙེ པཎིདཧིསྶཏི, ཨནཱགཏམདྡྷཱནཾ རཱཛཱ ཨསྶཾ ཙཀྐཝཏྟཱིཏི. ཨིཛ྄ཛྷིསྶཏི ཧི སཱིལཝཏོ ཙེཏོཔཎིདྷི ཝིསུདྡྷཏྟཱ’’ཏི (སཾ. ནི. ༤.༣༥༢). ཨཔརོ ནཡོ ¶ – ཨེཏཱཡ སཏྟཱ ཨིཛ྄ཛྷནྟཱིཏི ཨིདྡྷི, ཨིཛ྄ཛྷནྟཱིཏི ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏི ཝུཏྟཾ ཧོཏི. ཨིདྡྷི ཨེཝ ཝིདྷཾ ཨིདྡྷིཝིདྷཾ, ཨིདྡྷིཀོཊྛཱསོ ཨིདྡྷིཝིཀཔྤོཏི ཨཏྠོ. ཏཾ ཨིདྡྷིཝིདྷཾ ཉཱཎནྟི ཝུཏྟཾ ཧོཏི.

༥༡. ཝིཏཀྐཝིཔྥཱརཝསེནཱཏི དིབྦསོཏདྷཱཏུཨུཔྤཱདནཏྠཾ པརིཀམྨཀརཎཀཱལེ སདྡནིམིཏྟེསུ ཨཏྟནོ ཝིཏཀྐཝིཔྥཱརཝསེན ཝིཏཀྐཝེགཝསེན. ཝིཏཀྐོཏི ཙེཏྠ ཝིཏཀྐེཏཱིཏི ཝིཏཀྐོ, ཝིཏཀྐནཾ ཝཱ ཝིཏཀྐོ, ཨཱུཧནནྟི ཝུཏྟཾ ཧོཏི. སྭཱཡཾ ཨཱརམྨཎེ ཙིཏྟསྶ ཨབྷིནིརོཔནལཀྑཎོ, ཨཱཧནནཔརིཡཱཧནནརསོ ¶ . ཏཐཱ ཧི ཏེན ཡོགཱཝཙརོ ཨཱརམྨཎཾ ཝིཏཀྐཱཧཏཾ ཝིཏཀྐཔརིཡཱཧཏཾ ཀརོཏཱིཏི ཝུཙྩཏི. ཨཱརམྨཎེ ཙིཏྟསྶ ཨཱནཡནཔཙྩུཔཊྛཱནོ, ཏཛྫཱསམནྣཱཧཱརེན པན ཨིནྡྲིཡེན ཙ པརིཀྑིཏྟེ ཝིསཡེ ཨནནྟརཱཡེན ཨུཔྤཛྫནཏོ ཨཱཔཱཐགཏཝིསཡཔདཊྛཱནོཏི ཝུཙྩཏི. ནཱནཏྟེཀཏྟསདྡནིམིཏྟཱནནྟི ནཱནཱསབྷཱཝཱནཾ ཨེཀསབྷཱཝཱནཉྩ སདྡནིམིཏྟཱནཾ. སདྡཱ ཨེཝ ཙེཏྠ ཝིཏཀྐུཔྤཏྟིཀཱརཎཏྟཱ སངྑཱརནིམིཏྟཏྟཱ ཙ ནིམིཏྟཱནི. བྷེརིསདྡཱདིཝསེན ཨེཀགྒྷནཱིབྷཱུཏཱ, ཨནེཀཱ ཝཱ སདྡཱ, ནཱནཱདིསཱསུ ཝཱ སདྡཱ, ནཱནཱསཏྟཱནཾ ཝཱ སདྡཱ ནཱནཏྟསདྡཱ, ཨེཀདིསཱཡ སདྡཱ, ཨེཀསཏྟསྶ ཝཱ སདྡཱ, བྷེརིསདྡཱདིཝསེན ཨེཀེཀསདྡཱ ¶ ཝཱ ཨེཀཏྟསདྡཱ. སདྡོཏི ཙེཏྠ སཔྤཏཱིཏི སདྡོ, ཀཐཱིཡཏཱིཏི ཨཏྠོ. པརིཡོགཱཧཎེ པཉྙཱཏི པཝིསནཔཉྙཱ, པཛཱནནཔཉྙཱཏི ཨཏྠོ. སོཏདྷཱཏུཝིསུདྡྷིཉཱཎནྟི སཝནཊྛེན ཙ ནིཛྫཱིཝཊྛེན ཙ སོཏདྷཱཏུ, སོཏདྷཱཏུཀིཙྩཀརཎཝསེན ཙ སོཏདྷཱཏུ ཝིཡཱཏིཔི སོཏདྷཱཏུ, པརིསུདྡྷཏྟཱ ནིརུཔཀྐིལེསཏྟཱ ཝིསུདྡྷི, སོཏདྷཱཏུ ཨེཝ ཝིསུདྡྷི སོཏདྷཱཏུཝིསུདྡྷི, སོཏདྷཱཏུཝིསུདྡྷི ཨེཝ ཉཱཎཾ སོཏདྷཱཏུཝིསུདྡྷིཉཱཎཾ.

༥༢. ཏིཎྞནྣཾ ཙིཏྟཱནནྟི སོམནསྶསཧགཏདོམནསྶསཧགཏཨུཔེཀྑཱསཧགཏཝསེན ཏིཎྞནྣཾ ཙིཏྟཱནཾ. ཝིཔྥཱརཏྟཱཏི ཝིཔྥཱརབྷཱཝེན ཝེགེནཱཏི ཨཏྠོ. ཧེཏུཨཏྠེ ནིསྶཀྐཝཙནཾ, ཙེཏོཔརིཡཉཱཎུཔྤཱདནཏྠཾ པརིཀམྨཀརཎཀཱལེ པརེསཾ ཏིཎྞནྣཾ ཙིཏྟཱནཾ ཝིཔྥཱརཧེཏུནཱ. ཨིནྡྲིཡཱནཾ པསཱདཝསེནཱཏི ¶ ཙཀྑཱདཱིནཾ ཚནྣཾ ཨིནྡྲིཡཱནཾ པསཱདཝསེན, ཨིནྡྲིཡཱནཾ པཏིཊྛིཏོཀཱསཱ ཙེཏྠ ཕལཱུཔཙཱརེན ཨིནྡྲིཡཱནནྟི ཝུཏྟཱ ཡཐཱ ‘‘ཝིཔྤསནྣཱནི ཁོ ཏེ, ཨཱཝུསོ, ཨིནྡྲིཡཱནི པརིསུདྡྷོ ཚཝིཝཎྞོ པརིཡོདཱཏོ’’ཏི (མཧཱཝ. ༦༠). ཨིནྡྲིཡཔཏིཊྛིཏོཀཱསེསུཔི ཧདཡཝཏྠུ ཨེཝ ཨིདྷཱདྷིཔྤེཏཾ. པསཱདཝསེནཱཏི ཙ ཨནཱཝིལབྷཱཝཝསེན. ‘‘པསཱདཔྤསཱདཝསེནཱ’’ཏི ཝཏྟབྦེ ཨཔྤསཱདསདྡསྶ ལོཔོ ཀཏོཏི ཝེདིཏབྦཾ. ཨཐ ཝཱ ཨིདམཔྤསནྣནྟི གཧཎསྶ པསཱདམཔེཀྑིཏྭཱ ཨེཝ སམྦྷཝཏོ ‘‘པསཱདཝསེནཱ’’ཏི ཝཙནེནེཝ ཨཔྤསཱདོཔི ཝུཏྟོཝ ཧོཏཱིཏི ཝེདིཏབྦཾ. ནཱནཏྟེཀཏྟཝིཉྙཱཎཙརིཡཱ པརིཡོགཱཧཎེ པཉྙཱཏི ཡཐཱསམྦྷཝཾ ནཱནཱསབྷཱཝཨེཀསབྷཱཝཨེཀཱུནནཝུཏིཝིཉྙཱཎཔཝཏྟིཝིཛཱནནཔཉྙཱ. ཨེཏྠ ཨསམཱཧིཏསྶ ཝིཉྙཱཎཙརིཡཱ ནཱནཏྟཱ, སམཱཧིཏསྶ ཝིཉྙཱཎཙརིཡཱ ཨེཀཏྟཱ. སརཱགཱདིཙིཏྟཾ ¶ ཝཱ ནཱནཏྟཾ, ཝཱིཏརཱགཱདིཙིཏྟཾ ཨེཀཏྟཾ. ཙེཏོཔརིཡཉཱཎནྟི ཨེཏྠ པརིཡཱཏཱིཏི པརིཡཾ, པརིཙྪིནྡཏཱིཏི ཨཏྠོ. ཙེཏསོ པརིཡཾ ཙེཏོཔརིཡཾ, ཙེཏོཔརིཡཉྩ ཏཾ ཉཱཎཉྩཱཏི ཙེཏོཔརིཡཉཱཎཾ. ཝིཔྥཱརཏཱཏིཔི པཱཋོ, ཝིཔྥཱརཏཱཡཱཏི ཨཏྠོ.

༥༣. པཙྩཡཔྤཝཏྟཱནཾ དྷམྨཱནནྟི པཊིཙྩསམུཔྤཱདཝསེན པཙྩཡཏོ པཝཏྟཱནཾ པཙྩཡུཔྤནྣདྷམྨཱནཾ. ནཱནཏྟེཀཏྟཀམྨཝིཔྥཱརཝསེནཱཏི ཨེཏྠ ཨཀུསལཾ ཀམྨཾ ནཱནཏྟཾ, ཀུསལཾ ཀམྨཾ ཨེཀཏྟཾ. ཀཱམཱཝཙརཾ ཝཱ ཀམྨཾ ནཱནཏྟཾ, རཱུཔཱཝཙརཱརཱུཔཱཝཙརཾ ཀམྨཾ ཨེཀཏྟཾ. ནཱནཏྟེཀཏྟཀམྨཝིཔྥཱརཝསེན པཙྩཡཔཝཏྟཱནཾ དྷམྨཱནཾ པརིཡོགཱཧཎེ པཉྙཱཏི སམྦནྡྷོ. པུབྦེནིཝཱསཱནུསྶཏིཉཱཎནྟི པུབྦེ ཨཏཱིཏཛཱཏཱིསུ ནིཝུཏྠཁནྡྷཱ པུབྦེནིཝཱསོ. ནིཝུཏྠཱཏི ཨཛ྄ཛྷཱཝུཏྠཱ ཨནུབྷཱུཏཱ ཨཏྟནོ སནྟཱནེ ཨུཔྤཛྫིཏྭཱ ནིརུདྡྷཱ. པུབྦེ ཨཏཱིཏཛཱཏཱིསུ ནིཝུཏྠདྷམྨཱ ཝཱ པུབྦེནིཝཱསོ. ནིཝུཏྠཱཏི གོཙརནིཝཱསེན ནིཝུཏྠཱ ཨཏྟནོ ཝིཉྙཱཎེན ཝིཉྙཱཏཱ པརིཙྪིནྣཱ, པརཝིཉྙཱཎེན ཝིཉྙཱཏཱཔི ཝཱ. ཚིནྣཝཊུམཀཱནུསྶརཎཱདཱིསུ ཏེ བུདྡྷཱནཾཡེཝ ལབྦྷནྟི ¶ . པུབྦེནིཝཱསཱནུསྶཏཱིཏི ཡཱཡ སཏིཡཱ པུབྦེནིཝཱསཾ ཨནུསྶརཏི, སཱ པུབྦེནིཝཱསཱནུསྶཏི, ཉཱཎནྟི ཏཱཡ སཏིཡཱ སམྤཡུཏྟཾ ཉཱཎཾ.

༥༤. ཨོབྷཱསཝསེནཱཏི དིབྦེན ཙཀྑུནཱ རཱུཔདསྶནཏྠཾ པསཱརིཏསྶ ཏེཛོཀསིཎཨོདཱཏཀསིཎཨཱལོཀཀསིཎཱནཾ ཨཉྙཏརསྶ ¶ ཙཏུཏྠཛ྄ཛྷཱནཱརམྨཎསྶ ཀསིཎོབྷཱསསྶ ཝསེན. ནཱནཏྟེཀཏྟརཱུཔནིམིཏྟཱནནྟི ནཱནཱསཏྟཱནཾ རཱུཔཱནི, ནཱནཏྟཀཱཡཾ ཨུཔཔནྣཱནཾ ཝཱ སཏྟཱནཾ རཱུཔཱནི, ནཱནཱདིསཱསུ ཝཱ རཱུཔཱནི, ཨསམྨིསྶཱནི ཝཱ རཱུཔཱནི ནཱནཏྟརཱུཔཱནི, ཨེཀསཏྟསྶ རཱུཔཱནི, ཨེཀཏྟཀཱཡཾ ཨུཔཔནྣསྶ ཝཱ རཱུཔཱནི, ཨེཀདིསཱཡ ཝཱ རཱུཔཱནི, ནཱནཱདིསཱདཱིནཾ སམྨིསྶཱིབྷཱུཏཱནི ཝཱ རཱུཔཱནི ཨེཀཏྟརཱུཔཱནི. རཱུཔནྟི ཙེཏྠ ཝཎྞཱཡཏནམེཝ. ཏཉྷི རཱུཔཡཏཱིཏི རཱུཔཾ, ཝཎྞཝིཀཱརཾ ཨཱཔཛྫམཱནཾ ཧདཡངྒཏབྷཱཝཾ པཀཱསེཏཱིཏི ཨཏྠོ. རཱུཔམེཝ རཱུཔནིམིཏྟཾ. ཏེསཾ ནཱནཏྟེཀཏྟརཱུཔནིམིཏྟཱནཾ. དསྶནཊྛེ པཉྙཱཏི དསྶནསབྷཱཝེ པཉྙཱ.

དིབྦཙཀྑུཉཱཎནྟི དིབྦསདིསཏྟཱ དིབྦཾ. དེཝཱནཉྷི སུཙརིཏཀམྨནིབྦཏྟཾ པིཏྟསེམྷརུཧིརཱདཱིཧི ཨཔལིབུདྡྷཾ ཨུཔཀྐིལེསཝིམུཏྟཏཱཡ དཱུརེཔི ཨཱརམྨཎསམྤཊིཙྪནསམཏྠཾ དིབྦཾ པསཱདཙཀྑུ ཧོཏི. ཨིདཉྩཱཔི ཝཱིརིཡབྷཱཝནཱབལནིབྦཏྟཾ ཉཱཎཙཀྑུ ཏཱདིསམེཝཱཏི དིབྦསདིསཏྟཱ དིབྦཾ, དིབྦཝིཧཱརཝསེན པཊིལདྡྷཏྟཱ ¶ ཨཏྟནཱ དིབྦཝིཧཱརསནྣིསྶིཏཏྟཱཔི དིབྦཾ, ཨཱལོཀཔརིགྒཧེན མཧཱཛུཏིཀཏྟཱཔི དིབྦཾ, ཏིརོཀུཊྚཱདིགཏརཱུཔདསྶནེན མཧཱགཏིཀཏྟཱཔི དིབྦཾ. ཏཾ སབྦཾ སདྡསཏྠཱནུསཱརེན ཝེདིཏབྦཾ. དསྶནཊྛེན ཙཀྑུ, ཙཀྑུཀིཙྩཀརཎེན ཙཀྑུམིཝཱཏིཔི ཙཀྑུ, དིབྦཉྩ ཏཾ ཙཀྑུ ཙཱཏི དིབྦཙཀྑུ, དིབྦཙཀྑུ ཙ ཏཾ ཉཱཎཉྩཱཏི དིབྦཙཀྑུཉཱཎཾ.

༥༥. ཙཏུསཊྛིཡཱ ཨཱཀཱརེཧཱིཏི ཨཊྛསུ མགྒཕལེསུ ཨེཀེཀསྨིཾ ཨཊྛནྣཾ ཨཊྛནྣཾ ཨིནྡྲིཡཱནཾ ཝསེན ཙཏུསཊྛིཡཱ ཨཱཀཱརེཧི. ཏིཎྞནྣཾ ཨིནྡྲིཡཱནནྟི ཨནཉྙཱཏཉྙསྶཱམཱིཏིནྡྲིཡཾ ཨཉྙིནྡྲིཡཾ ཨཉྙཱཏཱཝིནྡྲིཡནྟི, ཨིམེསཾ ཏིཎྞནྣཾ ཨིནྡྲིཡཱནཾ. ཝསིབྷཱཝཏཱ པཉྙཱཏི ཝསིབྷཱཝཏཱཡ པཝཏྟཱ པཉྙཱ, ཨརཧཏྟཕལེ ཨཊྛནྣཾ ཨིནྡྲིཡཱནཾ ཝསེན ཨཊྛཧི ཨཱཀཱརེཧི ཨཉྙཱཏཱཝིནྡྲིཡསྶེཝ ཝསིབྷཱཝཏཱཡ ཨརཧཏྟམགྒཀྑཎེ ཨབྷཱཝེཔི ཀཱརཎསིདྡྷིཝསེན ཏདཏྠསཱདྷནཏཱཡ ཝུཏྟནྟི ཝེདིཏབྦཾ. ཨཱསཝཱནཾ ཁཡེ ཉཱཎནྟི ཨཏྟནཱ ཝཛ྄ཛྷཱནཾ ཨཱསཝཱནཾ ཁཡཀརཾ ཨརཧཏྟམགྒཉཱཎཾ.

༥༦-༥༩. ཨིདཱནི ཨཱསཝཱནཾ ཁཡཉཱཎསངྑཱཏཨརཧཏྟམགྒཉཱཎསམྦནྡྷེ ¶ ཙཏུནྣམྤི མགྒཉཱཎཱནཾ ཨེཀེཀསྶ མགྒཉཱཎསྶ ཨེཀཱབྷིསམཡཏཾ དསྶེཏུཾ ‘‘པརིཉྙཊྛེ པཉྙཱ’’ཏིཨཱདཱིནི ཙཏྟཱརི ¶ ཉཱཎཱནི ཨུདྡིཊྛཱནི. ཏཏྠཱཔི ཨོལཱ༹རིཀཏྟཱ སབྦསཏྟསཱདྷཱརཎཏྟཱ ཙ སུཝིཉྙེཡྻནྟི དུཀྑསཙྩཾ པཋམཾ ཝུཏྟཾ, ཏསྶེཝ ཧེཏུདསྶནཏྠཾ ཏདནནྟརཾ སམུདཡསཙྩཾ, ཧེཏུནིརོདྷཱ ཕལནིརོདྷོཏི ཉཱཔནཏྠཾ ཏདནནྟརཾ ནིརོདྷསཙྩཾ, ཏདདྷིགམཱུཔཱཡདསྶནཏྠཾ ཨནྟེ མགྒསཙྩཾ. བྷཝསུཁསྶཱདགདྷིཏཱནཾ ཝཱ སཏྟཱནཾ སཾཝེགཛནནཏྠཾ པཋམཾ དུཀྑམཱཧ, ཏཾ ནེཝ ཨཀཏཾ ཨཱགཙྪཏི, ན ཨིསྶརནིམྨཱནཱདིཏོ ཧོཏི, ཨིཏོ པན ཧོཏཱིཏི ཉཱཔནཏྠཾ ཏདནནྟརཾ སམུདཡསཙྩཾ, ཏཏོ སཧེཏུཀེན དུཀྑེན ཨབྷིབྷཱུཏཏྟཱ སཾཝིགྒམཱནསཱནཾ དུཀྑནིསྶརཎགཝེསཱིནཾ ནིསྶརཎདསྶནེན ཨསྶཱསཛནནཏྠཾ ནིརོདྷཾ, ཏཏོ ནིརོདྷཱདྷིགམཏྠཾ ནིརོདྷསམྤཱཔཀཾ མགྒནྟི. ཨིདཱནི ཏབྦིསཡཱནི ཉཱཎཱནི ཏེནེཝ ཀམེན ཨུདྡིཊྛཱནི. ཏཏྠ པརིཉྙཊྛེཏི དུཀྑསྶ པཱིལ༹ནཊྛཱདིཀེ ཙཏུབྦིདྷེ པརིཛཱནིཏབྦསབྷཱཝེ. པཧཱནཊྛེཏི སམུདཡསྶ ཨཱཡཱུཧནཊྛཱདིཀེ ཙཏུབྦིདྷེ པཧཱཏབྦསབྷཱཝེ. སཙྪིཀིརིཡཊྛེཏི ནིརོདྷསྶ ནིསྶརཎཊྛཱདིཀེ ཙཏུབྦིདྷེ སཙྪིཀཱཏབྦསབྷཱཝེ. བྷཱཝནཊྛེཏི མགྒསྶ ནིཡྻཱནཊྛཱདིཀེ ཙཏུབྦིདྷེ བྷཱཝེཏབྦསབྷཱཝེ.

༦༠-༦༣. ཨིདཱནི ¶ བྷཱཝིཏམགྒསྶ པཙྩཝེཀྑཎཝསེན ཝཱ ཨབྷཱཝིཏམགྒསྶ ཨནུསྶཝཝསེན ཝཱ ཝིསུཾ ཝིསུཾ སཙྩཉཱཎཱནི དསྶེཏུཾ དུཀྑེ ཉཱཎཱདཱིནི ཙཏྟཱརི ཉཱཎཱནི ཨུདྡིཊྛཱནི. ཏཏྠ དུཀྑེཏི ཨེཏྠ དུ-ཨིཏི ཨཡཾ སདྡོ ཀུཙྪིཏེ དིསྶཏི. ཀུཙྪིཏཉྷི པུཏྟཾ དུཔུཏྟོཏི ཝདནྟི. ཁཾ-སདྡོ པན ཏུཙྪེ. ཏུཙྪཉྷི ཨཱཀཱསཾ ‘ཁ’ནྟི ཝུཙྩཏི. ཨིདཉྩ པཋམསཙྩཾ ཀུཙྪིཏཾ ཨནེཀུཔདྡཝཱདྷིཊྛཱནཏོ, ཏུཙྪཾ བཱལཛནཔརིཀཔྤིཏདྷུཝསུབྷསུཁཏྟབྷཱཝཝིརཧིཏཏོ. ཏསྨཱ ཀུཙྪིཏཏྟཱ ཏུཙྪཏྟཱ ཙ ‘‘དུཀྑ’’ནྟི ཝུཙྩཏི.

དུཀྑསམུདཡེཏི ཨེཏྠ སཾ-ཨིཏི ཨཡཾ སདྡོ ‘‘སམཱགམོ སམེཏ’’ནྟིཨཱདཱིསུ (ཝིབྷ. ༡༩༩; དཱི. ནི. ༢.༣༩༦) ཝིཡ སཾཡོགཾ དཱིཔེཏི. ཨུ-ཨིཏི ཨཡཾ སདྡོ ‘‘ཨུཔྤནྣཾ ¶ ཨུདིཏ’’ནྟིཨཱདཱིསུ (པཱརཱ. ༡༧༢; ཙཱུལ༹ནི. ཁགྒཝིསཱཎསུཏྟནིདྡེས ༡༤༡) ཝིཡ ཨུཔྤཏྟིཾ. ཨཡ-སདྡོ པན ཀཱརཎཾ དཱིཔེཏི. ཨིདཉྩཱཔི དུཏིཡསཙྩཾ ཨཝསེསཔཙྩཡསམཱཡོགེ སཏི དུཀྑསྶ ཨུཔྤཏྟིཀཱརཎཾ. ཨིཏི དུཀྑསྶ སཾཡོགེ ཨུཔྤཏྟིཀཱརཎཏྟཱ ‘‘དུཀྑསམུདཡ’’ནྟི ཝུཙྩཏི.

དུཀྑནིརོདྷེཏི ཨེཏྠ ནི-སདྡོ ཨབྷཱཝཾ, རོདྷ-སདྡོ ཙ ཙཱརཀཾ དཱིཔེཏི. ཏསྨཱ ཨབྷཱཝོ ཨེཏྠ སཾསཱརཙཱརཀསངྑཱཏསྶ དུཀྑརོདྷསྶ སབྦགཏིསུཉྙཏྟཱ, སམདྷིགཏེ ཝཱ ཏསྨིཾ སཾསཱརཙཱརཀསྶ དུཀྑརོདྷསྶ ཨབྷཱཝོ ཧོཏི ཏཔྤཊིཔཀྑཏྟཱཏིཔི ‘‘དུཀྑནིརོདྷ’’ནྟི ཝུཙྩཏི. དུཀྑསྶ ཝཱ ཨནུཔྤཏྟིནིརོདྷཔཙྩཡཏྟཱ དུཀྑནིརོདྷནྟི ཝུཙྩཏི.

དུཀྑནིརོདྷགཱམིནིཡཱ ¶ པཊིཔདཱཡཱཏི ཨེཏྠ ཡསྨཱ ཨཡཾ ཨེཏཾ དུཀྑནིརོདྷཾ གཙྪཏི ཨཱརམྨཎཀརཎཝསེན ཏདབྷིམུཁཱིབྷཱུཏཏྟཱ, པཊིཔདཱ ཙ ཧོཏི དུཀྑནིརོདྷཔྤཏྟིཡཱ, ཏསྨཱ དུཀྑནིརོདྷགཱམིནིཔཊིཔདཱཏི ཝུཙྩཏི. ཙཏྟཱརི མགྒཉཱཎཱནེཝ ཧེཊྛཱ ཝུཊྛཱནཱཀཱརདཱིཔནཝསེན ‘‘མགྒེ ཉཱཎ’’ནྟི ཝུཏྟཱནི, ཨནནྟརཕལདཱཡཀཏྟསྶ ཀཱརཎཔརིདཱིཔནཝསེན ‘‘ཨཱནནྟརིཀསམཱདྷིམྷི ཉཱཎ’’ནྟི ཝུཏྟཱནི, ཝིཝཊྚནཱཀཱརདཱིཔནཝསེན ‘‘སཙྩཝིཝཊྚེ ཉཱཎ’’ནྟི ཝུཏྟཱནི, མགྒཔཊིཔཱཊིཀྐམེནེཝ ཨརཧཏྟམགྒཉཱཎུཔྤཏྟིཾ, ཏསྶ ཙ ཉཱཎསྶ ཨབྷིཉྙཱབྷཱཝཾ དཱིཔེཏུཾ ཨརཧཏྟམགྒཉཱཎམེཝ ‘‘ཨཱསཝཱནཾ ཁཡེ ཉཱཎ’’ནྟི ཝུཏྟཾ. པུན ཙཏུནྣམྤི མགྒཉཱཎཱནཾ ཨེཀཱབྷིསམཡཏཾ དཱིཔེཏུཾ ‘‘པརིཉྙཊྛེ པཉྙཱ དུཀྑེ ཉཱཎ’’ནྟིཨཱདཱིནི ཙཏྟཱརི ཉཱཎཱནི ཝུཏྟཱནི. པུན ཨེཀེཀསྨིཾ སཙྩེ ཝིསུཾ ཝིསུཾ ཨུཔྤཏྟིདཱིཔནཝསེན ‘‘དུཀྑེ ཉཱཎ’’ནྟིཨཱདཱིནི ཙཏྟཱརི ཉཱཎཱནི ཨུདྡིཊྛཱནཱིཏི ཨེཝཾ པུབྦཱཔརཝིསེསོ ཝེདིཏབྦོཏི.

༦༤-༦༧. ཨིདཱནི ¶ སབྦེསཾ ཨརིཡཔུགྒལཱནཾ ཨརིཡམགྒཱནུབྷཱཝེནེཝ པཊིསམྦྷིདཱཉཱཎཱནི སིདྡྷཱནཱིཏི དསྶེཏུཾ ཨཏྠཔཊིསམྦྷིདེ ཉཱཎནྟིཨཱདཱིནི པུན ཙཏྟཱརི པཊིསམྦྷིདཱཉཱཎཱནི ཨུདྡིཊྛཱནི. ཨིམཱནི ཧི པཊིསམྦྷིདཱཔབྷེདཱབྷཱཝེཔི སབྦཨརིཡཔུགྒལསཱདྷཱརཎཱནི སུདྡྷིཀཔཊིསམྦྷིདཱཉཱཎཱནི, ཧེཊྛཱ ཨུདྡིཊྛཱནི པན པབྷིནྣཔཊིསམྦྷིདཱནཾ པབྷེདཔྤཏྟཱནི པཊིསམྦྷིདཱཉཱཎཱནཱིཏི ཝེདིཏབྦཱནཱིཏི ཨཡམེཏེསཾ ཨུབྷཡཏྠཝཙནེ ཝིསེསོ. ཡསྨཱ ཝཱ ཨནནྟརཾ ཨུདྡིཊྛཾ དུཀྑཱརམྨཎཾ ¶ ནིརོདྷཱརམྨཎཉྩ ཉཱཎཾ ཨཏྠཔཊིསམྦྷིདཱ ཧོཏི, སམུདཡཱརམྨཎཾ མགྒཱརམྨཎཉྩ ཉཱཎཾ དྷམྨཔཊིསམྦྷིདཱ, ཏདབྷིལཱཔེ ཉཱཎཾ ནིརུཏྟིཔཊིསམྦྷིདཱ, ཏེསུ ཉཱཎེསུ ཉཱཎཾ པཊིབྷཱནཔཊིསམྦྷིདཱ, ཏསྨཱ ཏམྤི ཨཏྠཝིསེསཾ དསྶེཏུཾ སུདྡྷིཀཔཊིསམྦྷིདཱཉཱཎཱནི ཨུདྡིཊྛཱནཱིཏི ཝེདིཏབྦཱནི. ཏསྨཱཡེཝ ཙ ཧེཊྛཱ ནཱནཏྟསདྡེན ཝིསེསེཏྭཱ ཝུཏྟཱནི. ཨིདྷ ཏཐཱ ཨཝིསེསེཏྭཱ ཝུཏྟཱནཱིཏི.

༦༨. ཨེཝཾ པཊིཔཱཊིཡཱ སཏྟསཊྛི སཱཝཀསཱདྷཱརཎཉཱཎཱནི ཨུདྡིསིཏྭཱ ཨིདཱནི སཱཝཀེཧི ཨསཱདྷཱརཎཱནི ཏཐཱགཏཱནཾཡེཝ ཨཱཝེཎིཀཱནི ཉཱཎཱནི དསྶེཏུཾ ཨིནྡྲིཡཔརོཔརིཡཏྟཉཱཎཱདཱིནི ཚ ཨསཱདྷཱརཎཉཱཎཱནི ཨུདྡིཊྛཱནི. ཏཏྠཔི ཡསྨཱ ཏཐཱགཏཱ སཏྟཱནཾ དྷམྨདེསནཱཡ བྷཱཛནཱབྷཱཛནཏྟཾ ཨོལོཀེནྟཱ བུདྡྷཙཀྑུནཱ ཨོལོཀེནྟི. བུདྡྷཙཀྑུ ནཱམ ཨིནྡྲིཡཔརོཔརིཡཏྟཱསཡཱནུསཡཉཱཎདྭཡམེཝ. ཡཐཱཧ –

‘‘ཨདྡསཱ ཁོ བྷགཝཱ བུདྡྷཙཀྑུནཱ ལོཀཾ ཝོལོཀེནྟོ སཏྟེ ཨཔྤརཛཀྑེ མཧཱརཛཀྑེ ¶ ཏིཀྑིནྡྲིཡེ མུདིནྡྲིཡེ’’ཏིཨཱདི (མཧཱཝ. ༩; མ. ནི. ༡.༢༨༣; ༢.༣༣༩).

སཏྟསནྟཱནེ ཙ ཨོལོཀེནྟཱ པཋམཾ ཨིནྡྲིཡཔརིཔཱཀཱཔརིཔཱཀཾ ཨོལོཀེནྟི, ཨིནྡྲིཡཔརིཔཱཀཉྩ ཉཏྭཱ ཨཱསཡཱདཱིནཾ ཨནུརཱུཔེན དྷམྨདེསནཏྠཾ ཏཏོ ཨཱསཡཱནུསཡཙརིཏཱནི ཨོལོཀེནྟི, ཏསྨཱཔི པཋམཾ ཨིནྡྲིཡཔརོཔརིཡཏྟཉཱཎཾ ཨུདྡིཊྛཾ, ཏདནནྟརཾ ཨཱསཡཱནུསཡཉཱཎཾ. དྷམྨཾ དེསེནྟཱ ཙ ཡསྨཱ པཱཊིཧཱརིཡེན ཝིནེཏབྦཱནཾ པཱཊིཧཱརིཡཾ ཀརོནྟི, ཏསྨཱ ཨཱསཡཱནུསཡཉཱཎཱནནྟརཾ ཡམཀཔཱཊིཧཱརིཡེ ཉཱཎཾ ཨུདྡིཊྛཾ. ཨིམེསཾ ཏིཎྞཾ ཉཱཎཱནཾ ཧེཏུཔརིདཱིཔནཏྠཾ ཏདནནྟརཾ མཧཱཀརུཎཱཉཱཎཾ ཨུདྡིཊྛཾ. མཧཱཀརུཎཱཉཱཎསྶ པརིསུདྡྷབྷཱཝཔརིདཱིཔནཏྠཾ ཏདནནྟརཾ སབྦཉྙུཏཉྙཱཎཾ ཨུདྡིཊྛཾ. སབྦཉྙུསྶཱཔི སབྦདྷམྨཱནཾ ཨཱཝཛྫནཔཊིབདྡྷབྷཱཝཔརིདཱིཔནཏྠཾ སབྦཉྙུཏཉྙཱཎསྶ ¶ ཨནཱཝརིཡབྷཱཝཔརིདཱིཔནཏྠཉྩ ཏདནནྟརཾ ཨནཱཝརཎཉཱཎཾ ཨུདྡིཊྛནྟི ཝེདིཏབྦཾ.

ཨིནྡྲིཡཔརོཔརིཡཏྟཉཱཎནྟི ཨེཏྠ ཨུཔརི ‘‘སཏྟཱན’’ནྟི པདཾ ཨིདྷེཝ ཨཱཧརིཏྭཱ ‘‘སཏྟཱནཾ ཨིནྡྲིཡཔརོཔརིཡཏྟཉཱཎ’’ནྟི ཡོཛེཏབྦཾ. པརཱནི ཙ ཨཔརཱནི ཙ པརཱཔརཱནཱིཏི ཝཏྟབྦེ སནྡྷིཝསེན རོ-ཀཱརཾ ཀཏྭཱ པརོཔརཱནཱིཏི ཝུཙྩཏི. པརོཔརཱནཾ ¶ བྷཱཝོ པརོཔརིཡཾ, པརོཔརིཡམེཝ པརོཔརིཡཏྟཾ, ཝེནེཡྻསཏྟཱནཾ སདྡྷཱདཱིནཾ པཉྩནྣཾ ཨིནྡྲིཡཱནཾ པརོཔརིཡཏྟཾ ཨིནྡྲིཡཔརོཔརིཡཏྟཾ, ཨིནྡྲིཡཔརོཔརིཡཏྟསྶ ཉཱཎཾ ཨིནྡྲིཡཔརོཔརིཡཏྟཉཱཎཾ, ཨིནྡྲིཡཱནཾ ཨུཏྟམཱནུཏྟམབྷཱཝཉཱཎནྟི ཨཏྠོ. ‘‘ཨིནྡྲིཡཝརོཝརིཡཏྟཉཱཎ’’ནྟིཔི པཱཋོ. ཝརཱནི ཙ ཨཝརིཡཱནི ཙ ཝརོཝརིཡཱནི, ཝརོཝརིཡཱནཾ བྷཱཝོ ཝརོཝརིཡཏྟནྟི ཡོཛེཏབྦཾ. ཨཝརིཡཱནཱིཏི ཙ ན ཨུཏྟམཱནཱིཏི ཨཏྠོ. ཨཐ ཝཱ པརཱནི ཙ ཨོཔརཱནི ཙ པརོཔརཱནི, ཏེསཾ བྷཱཝོ པརོཔརིཡཏྟནྟི ཡོཛེཏབྦཾ. ཨོཔརཱནཱིཏི ཙ ཨོརཱནཱིཏི ཝུཏྟཾ ཧོཏི, ལཱམཀཱནཱིཏི ཨཏྠོ, ‘‘པརོཔརཱ ཡསྶ སམེཙྩ དྷམྨཱ’’ཏིཨཱདཱིསུ (སུ. ནི. ༤༧༩) ཝིཡ. ‘‘ཨིནྡྲིཡཔརོཔརིཡཏྟེ ཉཱཎ’’ནྟི བྷུམྨཝཙནེནཱཔི པཱཋོ.

༦༩. སཏྟཱནཾ ཨཱསཡཱནུསཡེ ཉཱཎནྟི ཨེཏྠ རཱུཔཱདཱིསུ ཁནྡྷེསུ ཚནྡརཱགེན སཏྟཱ ཝིསཏྟཱཏི སཏྟཱ. ཝུཏྟཉྷེཏཾ བྷགཝཏཱ –

‘‘རཱུཔེ ཁོ, རཱདྷ, ཡོ ཚནྡོ ཡོ རཱགོ ཡཱ ནནྡཱི ཡཱ ཏཎྷཱ, ཏཏྲ སཏྟོ ཏཏྲ ཝིསཏྟོ, ཏསྨཱ ‘སཏྟོ’ཏི ཝུཙྩཏི. ཝེདནཱཡ སཉྙཱཡ སངྑཱརེསུ ཝིཉྙཱཎེ ཡོ ཚནྡོ ཡོ ¶ རཱགོ ཡཱ ནནྡཱི ཡཱ ཏཎྷཱ, ཏཏྲ སཏྟོ ཏཏྲ ཝིསཏྟོ, ཏསྨཱ ‘སཏྟོ’ཏི ཝུཙྩཏཱི’’ཏི (སཾ. ནི. ༣.༡༦༡).

ཨཀྑརཙིནྟཀཱ པན ཨཏྠཾ ཨཝིཙཱརེཏྭཱ ‘‘ནཱམམཏྟམེཏ’’ནྟི ཨིཙྪནྟི. ཡེཔི ཨཏྠཾ ཝིཙཱརེནྟི, ཏེ སཏྭཡོགེན སཏྟཱཏི ཨིཙྪནྟི, ཏེསཾ སཏྟཱནཾ. ཨཱསཡནྟི ནིསྶཡནྟི ཨེཏཾ ཨིཏི ཨཱསཡོ, མིཙྪཱདིཊྛིཡཱ, སམྨཱདིཊྛིཡཱ ཝཱ ཀཱམཱདཱིཧི, ནེཀྑམྨཱདཱིཧི ཝཱ པརིབྷཱཝིཏསྶ སནྟཱནསྶེཏཾ ཨདྷིཝཙནཾ. སཏྟསནྟཱནེ ཨནུསེནྟི ཨནུཔཝཏྟནྟཱིཏི ཨནུསཡཱ, ཐཱམགཏཱནཾ ཀཱམརཱགཱདཱིནཾ ཨེཏཾ ཨདྷིཝཙནཾ. ཨཱསཡོ ཙ ཨནུསཡོ ཙ ཨཱསཡཱནུསཡོ. ཛཱཏིགྒཧཎེན ཙ དྭནྡསམཱསཝསེན ཙ ཨེཀཝཙནཾ ཝེདིཏབྦཾ. ཡསྨཱ ¶ ཙརིཏཱདྷིམུཏྟིཡོ ཨཱསཡཱནུསཡསངྒཧིཏཱ, ཏསྨཱ ཨུདྡེསེ ཙརིཏཱདྷིམུཏྟཱིསུ ཉཱཎཱནི ཨཱསཡཱནུསཡཉཱཎེནེཝ སངྒཧེཏྭཱ ‘‘ཨཱསཡཱནུསཡེ ཉཱཎ’’ནྟི ཝུཏྟཾ. ཡེནེཝ ཧི ཨདྷིཔྤཱཡེན ཨུདྡེསོ ཀཏོ, ཏེནེཝ ཨདྷིཔྤཱཡེན ནིདྡེསོ ཀཏོཏི.

༧༠. ཡམཀཔཱཊིཧཱིརེ ཉཱཎནྟི ཨེཏྠ ཨགྒིཀྑནྡྷཨུདཀདྷཱརཱདཱིནཾ ཨཔུབྦཾ ཨཙརིམཾ སཀིཾཡེཝ པཝཏྟིཏོ ཡམཀཾ, ཨསྶདྡྷིཡཱདཱིནཾ ¶ པཊིཔཀྑདྷམྨཱནཾ ཧརཎཏོ པཱཊིཧཱིརཾ, ཡམཀཉྩ ཏཾ པཱཊིཧཱིརཉྩཱཏི ཡམཀཔཱཊིཧཱིརཾ.

༧༡. མཧཱཀརུཎཱསམཱཔཏྟིཡཱ ཉཱཎནྟི ཨེཏྠ པརདུཀྑེ སཏི སཱདྷཱུནཾ ཧདཡཀམྤནཾ ཀརོཏཱིཏི ཀརུཎཱ, ཀིནཱཏི ཝཱ པརདུཀྑཾ ཧིཾསཏི ཝིནཱསེཏཱིཏི ཀརུཎཱ, ཀིརཱིཡཏི ཝཱ དུཀྑིཏེསུ ཕརཎཝསེན པསཱརཱིཡཏཱིཏི ཀརུཎཱ, ཕརཎཀམྨཝསེན ཀམྨགུཎཝསེན ཙ མཧཏཱི ཀརུཎཱ མཧཱཀརུཎཱ, སམཱཔཛྫནྟི ཨེཏཾ མཧཱཀཱརུཎིཀཱཏི སམཱཔཏྟི, མཧཱཀརུཎཱ ཙ སཱ སམཱཔཏྟི ཙཱཏི མཧཱཀརུཎཱསམཱཔཏྟི. ཏསྶཾ མཧཱཀརུཎཱསམཱཔཏྟིཡཾ, ཏཾསམྤཡུཏྟཾ ཉཱཎཾ.

༧༢-༧༣. སབྦཉྙུཏཉྙཱཎཾ ཨནཱཝརཎཉཱཎནྟི ཨེཏྠ པཉྩནེཡྻཔཐཔྤབྷེདཾ སབྦཾ ཨཉྙཱསཱིཏི སབྦཉྙཱུ, སབྦཉྙུསྶ བྷཱཝོ སབྦཉྙུཏཱ, སཱ ཨེཝ ཉཱཎཾ ‘‘སབྦཉྙུཏཱཉཱཎ’’ནྟི ཝཏྟབྦེ ‘‘སབྦཉྙུཏཉྙཱཎ’’ནྟི ཝུཏྟཾ. སངྑཏཱསངྑཏཱདིབྷེདཱ སབྦདྷམྨཱ ཧི སངྑཱརོ ཝིཀཱརོ ལཀྑཎཾ ནིབྦཱནཾ པཉྙཏྟཱིཏི པཉྩེཝ ནེཡྻཔཐཱ ཧོནྟི. སབྦཉྙཱུཏི ཙ ཀམསབྦཉྙཱུ, སཀིཾསབྦཉྙཱུ, སཏཏསབྦཉྙཱུ, སཏྟིསབྦཉྙཱུ, ཉཱཏསབྦཉྙཱུཏི པཉྩཝིདྷཱ སབྦཉྙུནོ སིཡུཾ. ཀམེན སབྦཛཱནནཀཱལཱསམྦྷཝཏོ ཀམསབྦཉྙུཏཱ ན ཧོཏི, སཀིཾ སབྦཱརམྨཎགཧཎཱབྷཱཝཏོ སཀིཾསབྦཉྙུཏཱ ན ཧོཏི, ཙཀྑུཝིཉྙཱཎཱདཱིནཾ ཡཐཱརམྨཎཙིཏྟསམྦྷཝཏོ བྷཝངྒཙིཏྟཝིརོདྷཏོ ཡུཏྟིཨབྷཱཝཏོ ཙ སཏཏསབྦཉྙུཏཱ ན ཧོཏི, པརིསེསཏོ སབྦཛཱནནསམཏྠཏྟཱ སཏྟིསབྦཉྙུཏཱ ཝཱ ¶ སིཡཱ, ཝིདིཏསབྦདྷམྨཏྟཱ ཉཱཏསབྦཉྙུཏཱ ཝཱ སིཡཱ. སཏྟིསབྦཉྙུནོ སབྦཛཱནནཏྟཾ ནཏྠཱིཏི ཏམྤི ན ཡུཛྫཏི.

‘‘ན ¶ ཏསྶ ཨདྡིཊྛམིདྷཏྠི ཀིཉྩི, ཨཐོ ཨཝིཉྙཱཏམཛཱནིཏབྦཾ;

སབྦཾ ཨབྷིཉྙཱསི ཡདཏྠི ནེཡྻཾ, ཏཐཱགཏོ ཏེན སམནྟཙཀྑཱུ’’ཏི. (མཧཱནི. ༡༥༦; ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༥; པཊི. མ. ༡.༢༠༨) –

ཝུཏྟཏྟཱ ཉཱཏསབྦཉྙུཏྟམེཝ ཡུཛྫཏི. ཨེཝཉྷི སཏི ཀིཙྩཏོ ཨསམྨོཧཏོ ཀཱརཎསིདྡྷིཏོ ཨཱཝཛྫནཔཊིབདྡྷཏོ སབྦཉྙུཏྟམེཝ ཧོཏཱིཏི. ཨཱཝཛྫནཔཊིབདྡྷཏྟཱ ཨེཝ ཧི ནཏྠི ¶ ཨེཏསྶ ཨཱཝརཎནྟི ཨནཱཝརཎཾ, ཏདེཝ ཨནཱཝརཎཉཱཎནྟི ཝུཙྩཏཱིཏི.

ཨིམཱནི ཏེསཏྟཏི ཉཱཎཱནཱིཏི སཱཝཀེཧི སཱདྷཱརཎཱསཱདྷཱརཎཝསེན ཨུདྡིཊྛཱནི ཨིམཱནི ཏེསཏྟཏི ཉཱཎཱནི. ཨིམེསཾ ཏེསཏྟཏིཡཱ ཉཱཎཱནནྟི ཨཱདིཏོ པཊྛཱཡ ཝུཏྟཱནཾ ཨིམེསཾ ཏེསཏྟཏིཉཱཎཱནཾ. ཨུབྦཱཧནཏྠེ ཙེཏཾ སཱམིཝཙནཾ. ཏེསཏྟཏཱིནནྟིཔི པཱཋོ. ‘‘ཏེསཏྟཏིཡཱ’’ཏི ཝཏྟབྦེ ཨེཀསྨིཾ བཧུཝཙནཾ ཝེདིཏབྦཾ. སཏྟསཊྛི ཉཱཎཱནཱིཏིཨཱདིཏོ པཊྛཱཡ སཏྟསཊྛི ཉཱཎཱནི. སཱཝཀསཱདྷཱརཎཱནཱིཏི སཝནནྟེ ཨརིཡཱཡ ཛཱཏིཡཱ ཛཱཏཏྟཱ སཱཝཀཱ, སམཱནཾ དྷཱརཎམེཏེསནྟི སཱདྷཱརཎཱནི, ཏཐཱགཏཱནཾ སཱཝཀེཧི སཱདྷཱརཎཱནི སཱཝཀསཱདྷཱརཎཱནི. ཚ ཉཱཎཱནཱིཏི ཨནྟེ ཨུདྡིཊྛཱནི ཚ ཉཱཎཱནི. ཨསཱདྷཱརཎཱནི སཱཝཀེཧཱིཏི སཱཝཀེཧི ཨསཱདྷཱརཎཱནི ཏཐཱགཏཱནཾཡེཝ ཉཱཎཱནཱིཏི.

སདྡྷམྨཔྤཀཱསིནིཡཱ པཊིསམྦྷིདཱམགྒ-ཨཊྛཀཐཱཡ

ཉཱཎཀཐཱམཱཏིཀུདྡེསཝཱརཝཎྞནཱ ནིཊྛིཏཱ.

༡. སུཏམཡཉཱཎནིདྡེསཝཎྞནཱ

ཝིསྶཛྫནུདྡེསཝཎྞནཱ

༡. ཨིདཱནི ¶ ¶ ཡཐཱནིཀྑིཏྟེན ཨུདྡེསེན སངྒཧིཏེ དྷམྨེ པབྷེདཏོ དསྶེཏུཾ ཀཐཾ སོཏཱཝདྷཱནེ པཉྙཱ སུཏམཡེ ཉཱཎནྟིཨཱདི ནིདྡེསཝཱརོ ཨཱརདྡྷོ. ཏཏྠ ཡཾ ཝུཏྟཾ, ‘‘སོཏཱཝདྷཱནེ པཉྙཱ སུཏམཡེ ཉཱཎ’’ནྟི ¶ , ཏཾ ཀཐཾ ཧོཏཱིཏི? ཨཡཾ ཀཐེཏུཀམྱཏཱཔུཙྪཱ. པཉྩཝིདྷཱ ཧི པུཙྪཱ – ཨདིཊྛཛོཏནཱཔུཙྪཱ, དིཊྛསཾསནྡནཱཔུཙྪཱ, ཝིམཏིཙྪེདནཱཔུཙྪཱ, ཨནུམཏིཔུཙྪཱ, ཀཐེཏུཀམྱཏཱཔུཙྪཱཏི. ཏཱསཾ ཨིདཾ ནཱནཏྟཾ –

ཀཏམཱ ཨདིཊྛཛོཏནཱཔུཙྪཱ? (མཧཱནི. ༡༥༠; ཙཱུལ༹ནི. པུཎྞཀམཱཎཝཔུཙྪཱནིདྡེས ༡༢) པཀཏིཡཱ ལཀྑཎཾ ཨཉྙཱཏཾ ཧོཏི ཨདིཊྛཾ ཨཏུལིཏཾ ཨཏཱིརིཏཾ ཨཝིབྷཱུཏཾ ཨཝིབྷཱཝིཏཾ, ཏསྶ ཉཱཎཱཡ དསྶནཱཡ ཏུལནཱཡ ཏཱིརཎཱཡ ཝིབྷཱུཏཱཡ ཝིབྷཱཝནཏྠཱཡ པཉྷཾ པུཙྪཏི, ཨཡཾ ཨདིཊྛཛོཏནཱཔུཙྪཱ.

ཀཏམཱ དིཊྛསཾསནྡནཱཔུཙྪཱ? (མཧཱནི. ༡༥༠; ཙཱུལ༹ནི. པུཎྞཀམཱཎཝཔུཙྪཱནིདྡེས ༡༢) པཀཏིཡཱ ལཀྑཎཾ ཉཱཏཾ ཧོཏི དིཊྛཾ ཏུལིཏཾ ཏཱིརིཏཾ ཝིབྷཱུཏཾ ཝིབྷཱཝིཏཾ, སོ ཨཉྙེཧི པཎྜིཏེཧི སདྡྷིཾ སཾསནྡནཏྠཱཡ པཉྷཾ པུཙྪཏི, ཨཡཾ དིཊྛསཾསནྡནཱཔུཙྪཱ.

ཀཏམཱ ཝིམཏིཙྪེདནཱཔུཙྪཱ? (མཧཱནི. ༡༥༠; ཙཱུལ༹ནི. པུཎྞཀམཱཎཝཔུཙྪཱནིདྡེས ༡༢) པཀཏིཡཱ སཾསཡཔཀྑནྡོ ཧོཏི ཝིམཏིཔཀྑནྡོ དྭེལ༹ྷཀཛཱཏོ ‘‘ཨེཝཾ ནུ ཁོ, ནནུ ཁོ, ཀིཾ ནུ ཁོ, ཀཐཾ ནུ ཁོ’’ཏི? སོ ཝིམཏིཙྪེདནཏྠཱཡ པཉྷཾ པུཙྪཏི, ཨཡཾ ཝིམཏིཙྪེདནཱཔུཙྪཱ.

ཀཏམཱ ཨནུམཏིཔུཙྪཱ? བྷགཝཱ བྷིཀྑཱུནཾ ཨནུམཏིཡཱ པཉྷཾ པུཙྪཏི – ‘‘ཏཾ ཀིཾ མཉྙཐ, བྷིཀྑཝེ, རཱུཔཾ ནིཙྩཾ ཝཱ ཨནིཙྩཾ ཝཱ’’ཏི? ‘‘ཨནིཙྩཾ, བྷནྟེ’’. ‘‘ཡཾ པནཱནིཙྩཾ, དུཀྑཾ ཝཱ ཏཾ སུཁཾ ཝཱ’’ཏི? ‘‘དུཀྑཾ, བྷནྟེ’’. ‘‘ཡཾ པནཱནིཙྩཾ དུཀྑཾ ཝིཔརིཎཱམདྷམྨཾ, ཀལླཾ ¶ ནུ ཏཾ སམནུཔསྶིཏུཾ ‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’’ཏི? ‘‘ནོ ཧེཏཾ, བྷནྟེ’’ཏི (མཧཱཝ. ༢༡), ཨཡཾ ཨནུམཏིཔུཙྪཱ.

ཀཏམཱ ཀཐེཏུཀམྱཏཱཔུཙྪཱ? བྷགཝཱ བྷིཀྑཱུནཾ ཀཐེཏུཀམྱཏཱཡ པཉྷཾ པུཙྪཏི – ‘‘ཙཏྟཱརོམེ ¶ , བྷིཀྑཝེ, སཏིཔཊྛཱནཱ. ཀཏམེ ཙཏྟཱརོ’’ཏི (སཾ. ནི. ༥.༣༩༠)? ཨཡཾ ཀཐེཏུཀམྱཏཱཔུཙྪཱཏི. ཏཱསུ ཨཡཾ ཐེརསྶ ཀཐེཏུཀམྱཏཱཔུཙྪཱཏི ཝེདིཏབྦཱ.

ཨིདཱནི སམཱཏིཀུདྡེསཱཡ ཀཐེཏུཀམྱཏཱཔུཙྪཱཡ ‘‘ཨིམེ དྷམྨཱ ཨབྷིཉྙེཡྻཱཏི སོཏཱཝདྷཱནཾ, ཏཾཔཛཱནནཱ པཉྙཱ སུཏམཡེ ཉཱཎ’’ནྟིཨཱདཡོ སོལ༹ས ཝིསྶཛྫནུདྡེསཱ. ཏཏྠ ཨིམེ དྷམྨཱ ཨབྷིཉྙེཡྻཱཏི ‘‘དེསཡནྟསྶཱ’’ཏི པཱཋསེསོ. ཨིམེ དྷམྨཱ ཨབྷིཛཱནིཏབྦཱཏི སཏྠུནོ, ཨཉྙཏརསྶ ཝཱ གརུཊྛཱནིཡསྶ སབྲཧྨཙཱརིསྶ དྷམྨཾ དེསཡནྟསྶ པུབྦེ ཝུཏྟནཡེན སོཏཱཝདྷཱནཾ སུཏཾ སོཏཱཝདྷཱནཾ ནཱམ. ཏཾཔཛཱནནཱ པཉྙཱ ¶ ཏསྶ སུཏསྶ པཛཱནནཱ པརིཡཱཡཔརིཙྪིནྡཀཔཉྙཱ སུཏམཡེ ཉཱཎཾ ནཱམཱཏི ཨཏྠོ. ཏསྶ པཛཱནནཱ ཏཾཔཛཱནནཱཏི སཱམིཝཙནསམཱསོ. ཏཾ པཛཱནནཱཏི ཝིབྷཏྟིཝིཔལླཱསཝསེན ཨུཔཡོགཝཙནཾ ཝཱ. ཨབྷིཉྙེཡྻཱཏི ཙ སབྷཱཝལཀྑཎཱཝབོདྷཝསེན སོབྷནེནཱཀཱརེན ཛཱནིཏབྦཱ. པརིཉྙེཡྻཱཏི སཱམཉྙལཀྑཎཱཝབོདྷཝསེན ཀིཙྩསམཱཔནཝསེན ཙ བྱཱཔིཏྭཱ ཛཱནིཏབྦཱ. བྷཱཝེཏབྦཱཏི ཝཌྜྷེཏབྦཱ. སཙྪིཀཱཏབྦཱཏི པཙྩཀྑཾ ཀཱཏབྦཱ. དུཝིདྷཱ ཧི སཙྪིཀིརིཡཱ པཊིལཱབྷསཙྪིཀིརིཡཱ ཨཱརམྨཎསཙྪིཀིརིཡཱ ཙ. པཙྩནཱིཀསམུདཱཙཱརཝསེན པརིཧཱནིཡསངྑཱཏཾ ཧཱནཾ བྷཛནྟཱིཏི ཧཱནབྷཱགིཡཱ. ཏདནུདྷམྨཏཱཡ སཏིཡཱ སཎྛཱནཝསེན ཋཱནསངྑཱཏཾ ཋིཏིཾ བྷཛནྟཱིཏི ཋིཏིབྷཱགིཡཱ. ཨུཔརིཝིསེསཱདྷིགམཝསེན ཝིསེསཾ བྷཛནྟཱིཏི ཝིསེསབྷཱགིཡཱ. ཨནིབྦིདྡྷཔུབྦཾ ཨཔྤདཱལིཏཔུབྦཾ ལོབྷཀྑནྡྷཾ དོསཀྑནྡྷཾ མོཧཀྑནྡྷཾ ནིབྦིཛ྄ཛྷཏི པདཱལེཏཱིཏི ཨརིཡམགྒོ ནིབྦེདྷོ ནཱམ, ནིབྦིདཱསཧགཏཱནཾ སཉྙཱམནསིཀཱརཱནཾ སམུདཱཙཱརཝསེན ཏཾ ནིབྦེདྷཾ བྷཛནྟཱིཏི ནིབྦེདྷབྷཱགིཡཱ.

སབྦེ སངྑཱརཱཏི སབྦེ སཔྤཙྩཡཱ དྷམྨཱ. ཏེ ཧི སངྑཏསངྑཱརཱ ནཱམ. པཙྩཡེཧི སངྒམྨ ཀརཱིཡནྟཱིཏི སངྑཱརཱ, ཏེ ཨེཝ པཙྩཡེཧི སངྒམྨ ཀཏཏྟཱ སངྑཏཱཏི ཝིསེསེཏྭཱ ཝུཏྟཱ. ཀམྨནིབྦཏྟཱ ཏེབྷཱུམཀརཱུཔཱརཱུཔདྷམྨཱ ཨབྷིསངྑཏསངྑཱརཱཏི ཨཊྛཀཐཱསུ (ཝིསུདྡྷི. ༢.༥༨༧; ཝིབྷ. ཨཊྛ. ༢༢༦ སངྑཱརཔདནིདྡེས) ཝུཏྟཱ. ཏེཔི ‘‘ཨནིཙྩཱ ཝ ¶ སངྑཱརཱ’’ཏིཨཱདཱིསུ (སཾ. ནི. ༡.༡༨༦; ༢.༡༤༣; དཱི. ནི. ༢.༢༢༡, ༢༧༢) སངྑཏསངྑཱརེསུ སངྒཧཾ གཙྪནྟི. ‘‘ཨཝིཛྫཱགཏོ ཨཡཾ, བྷིཀྑཝེ, པུརིསཔུགྒལོ པུཉྙཉྩེཝ སངྑཱརཾ ཨབྷིསངྑརོཏཱི’’ཏིཨཱདཱིསུ (སཾ. ནི. ༢.༥༡) ཨཝིཛྫཱཔཙྩཡཱ སངྑཱརཱཝ ཨཱགཏཱ ཏེབྷཱུམིཀཀུསལཱཀུསལཙེཏནཱ ¶ ཨབྷིསངྑརཎཀསངྑཱརཱ ནཱམ. ‘‘ཡཱཝཏིཀཱ ཨབྷིསངྑཱརསྶ གཏི, ཏཱཝཏིཀཾ གནྟྭཱ ཨཀྑཱཧཏཾ མཉྙེ ཨཊྛཱསཱི’’ཏིཨཱདཱིསུ ཨཱགཏཾ ཀཱཡིཀཾ ཙེཏསིཀཾ ཝཱིརིཡཾ པཡོགཱབྷིསངྑཱརོ ནཱམ. ‘‘སཉྙཱཝེདཡིཏནིརོདྷཾ སམཱཔནྣསྶ ཁོ, ཨཱཝུསོ ཝིསཱཁ, བྷིཀྑུནོ པཋམཾ ནིརུཛ྄ཛྷཏི ཝཙཱིསངྑཱརོ, ཏཏོ ཀཱཡསངྑཱརོ, ཏཏོ ཙིཏྟསངྑཱརོ’’ཏིཨཱདཱིསུ (མ. ནི. ༡.༤༦༤) ཨཱགཏཱ ཝིཏཀྐཝིཙཱརཱ. ཝཱཙཾ སངྑརོནྟཱིཏི ཝཙཱིསངྑཱརཱ. ཨསྶཱསཔསྶཱསཱ ཀཱཡེན སངྑརཱིཡནྟཱིཏི ¶ ཀཱཡསངྑཱརཱ. སཉྙཱ ཙ ཝེདནཱ ཙ ཙིཏྟེན སངྑརཱིཡནྟཱིཏི ཙིཏྟསངྑཱརཱ. ཨིདྷ པན སངྑཏསངྑཱརཱ ཨདྷིཔྤེཏཱ.

ཨནིཙྩཱཏི ཧུཏྭཱ ཨབྷཱཝཊྛེན. དུཀྑཱཏི པཱིལ༹ནཊྛེན. སབྦེ དྷམྨཱཏི ནིབྦཱནམྤི ཨནྟོཀཏྭཱ ཝུཏྟཱ. ཨནཏྟཱཏི ཨཝསཝཏྟནཊྛེན. ཨིདཾ དུཀྑཾ ཨརིཡསཙྩནྟིཨཱདཱིསུ ‘‘དུཀྑསམུདཡོ དུཀྑནིརོདྷོ’’ཏི ཝཏྟབྦེ ‘‘དུཀྑསམུདཡཾ དུཀྑནིརོདྷ’’ནྟི ལིངྒཝིཔལླཱསོ ཀཏོ. ཡསྨཱ པན བུདྡྷཱདཡོ ཨརིཡཱ པཊིཝིཛ྄ཛྷནྟི, ཏསྨཱ ཨརིཡསཙྩཱནཱིཏི ཝུཙྩནྟི. ཡཐཱཧ ‘‘ཙཏྟཱརིམཱནི, བྷིཀྑཝེ, ཨརིཡསཙྩཱནི…པེ… ཨིམཱནི ཁོ, བྷིཀྑཝེ, ཙཏྟཱརི ཨརིཡསཙྩཱནི. ཨརིཡཱ ཨིམཱནི པཊིཝིཛ྄ཛྷནྟི, ཏསྨཱ ཨརིཡསཙྩཱནཱིཏི ཝུཙྩནྟཱི’’ཏི. ཨརིཡསྶ སཙྩཱནཱིཏིཔི ཨརིཡསཙྩཱནི. ཡཐཱཧ ‘‘སདེཝཀེ ལོཀེ…པེ… སདེཝམནུསྶཱཡ ཏཐཱགཏོ ཨརིཡོ, ཏསྨཱ ཨརིཡསཙྩཱནཱིཏི ཝུཙྩནྟཱི’’ཏི (སཾ. ནི. ༥.༡༠༩༨). ཨེཏེསཾ ཨབྷིསམྦུདྡྷཏྟཱ ཨརིཡབྷཱཝསིདྡྷིཏོཔི ཨརིཡསཙྩཱནི. ཡཐཱཧ ‘‘ཨིམེསཾ ཁོ, བྷིཀྑཝེ, ཙཏུནྣཾ ཨརིཡསཙྩཱནཾ ཡཐཱབྷཱུཏཾ ཨབྷིསམྦུདྡྷཏྟཱ ཏཐཱགཏོ ཨརཧཾ སམྨཱསམྦུདྡྷོ ཨརིཡོཏི ཝུཙྩཏཱི’’ཏི (སཾ. ནི. ༥.༡༠༩༣). ཨརིཡཱནི སཙྩཱནཱིཏིཔི ཨརིཡསཙྩཱནི. ཨརིཡཱནཱིཏི ཨཝིཏཐཱནི, ཨཝིསཾཝཱདཀཱནཱིཏི ཨཏྠོ. ཡཐཱཧ ‘‘ཨིམཱནི ཁོ, བྷིཀྑཝེ, ཙཏྟཱརི ཨརིཡསཙྩཱནི ཏཐཱནི ཨཝིཏཐཱནི ཨནཉྙཐཱནི, ཏསྨཱ ཨརིཡསཙྩཱནཱིཏི ཝུཙྩནྟཱི’’ཏི (སཾ. ནི. ༥.༡༠༩༧). སཙྩཱནཱིཏི ཀོ སཙྩཊྛོཏི ཙེ? ཡོ པཉྙཱཙཀྑུནཱ ཨུཔཔརིཀྑམཱནཱནཾ ¶ མཱཡཱཝ ཝིཔརཱིཏོ, མརཱིཙཱིཝ ཝིསཾཝཱདཀོ, ཏིཏྠིཡཱནཾ པརིཀཔྤིཏཨཏྟཱཝ ཨནུཔལབྦྷསབྷཱཝོ ཙ ན ཧོཏི, ཨཐ ཁོ བཱདྷནཔབྷཝསནྟིནིཡྻཱནཔྤཀཱརེན ཏཙྪཱཝིཔརཱིཏབྷཱུཏབྷཱཝེན ཨརིཡཉཱཎསྶ གོཙརོ ཧོཏིཡེཝ. ཨེས ཨགྒིལཀྑཎཾ ཝིཡ ལོཀཔཀཏི ཝིཡ ཙ ཏཙྪཱཝིཔརཱིཏབྷཱུཏབྷཱཝོ སཙྩཊྛོཏི ཝེདིཏབྦོ. ཡཐཱཧ ‘‘ཨིདཾ དུཀྑནྟི, བྷིཀྑཝེ, ཏཐམེཏཾ ཨཝིཏཐམེཏཾ ཨནཉྙཐམེཏ’’ནྟི (སཾ. ནི. ༥.༡༠༩༠) ཝིཏྠཱརོ. ཨཔིཙ –

ནཱབཱདྷཀཾ ཡཏོ དུཀྑཾ, དུཀྑཱ ཨཉྙཾ ན བཱདྷཀཾ;

བཱདྷཀཏྟནིཡཱམེན, ཏཏོ སཙྩམིདཾ མཏཾ.

ཏཾ ¶ ཝིནཱ ནཱཉྙཏོ དུཀྑཾ, ན ཧོཏི ན ཙ ཏཾ ཏཏོ;

དུཀྑཧེཏུ ནིཡཱམེན, ཨིཏི སཙྩཾ ཝིསཏྟིཀཱ.

ནཱཉྙཱ ¶ ནིབྦཱནཏོ སནྟི, སནྟཾ ན ཙ ན ཏཾ ཡཏོ;

སནྟབྷཱཝནིཡཱམེན, ཏཏོ སཙྩམིདཾ མཏཾ.

མགྒཱ ཨཉྙཾ ན ནིཡྻཱནཾ, ཨནིཡྻཱནོ ན ཙཱཔི སོ;

ཏཙྪནིཡྻཱནབྷཱཝེན, ཨིཏི སོ སཙྩསམྨཏོ.

ཨིཏི ཏཙྪཱཝིཔལླཱས-བྷཱུཏབྷཱཝཾ ཙཏཱུསྭཔི;

དུཀྑཱདཱིསྭཝིསེསེན, སཙྩཊྛཾ ཨཱཧུ པཎྜིཏཱཏི.

སོ པནཱཡཾ སཙྩསདྡོ ཨནེཀེསུ ཨཏྠེསུ དིསྶཏི. སེཡྻཐིདཾ – ‘‘སཙྩཾ བྷཎེ ན ཀུཛ྄ཛྷེཡྻཱ’’ཏིཨཱདཱིསུ (དྷ. པ. ༢༢༤) ཝཱཙཱསཙྩེ. ‘‘སཙྩེ ཋིཏཱ སམཎབྲཱཧྨཎཱ ཙཱ’’ཏིཨཱདཱིསུ (ཛཱ. ༢.༢༡.༤༣༣) ཝིརཏིསཙྩེ. ‘‘ཀསྨཱ ནུ སཙྩཱནི ཝདནྟི ནཱནཱ, པཝཱདིཡཱསེ ཀུསལཱཝདཱནཱ’’ཏིཨཱདཱིསུ (སུ. ནི. ༨༩༡) དིཊྛིསཙྩེ. ‘‘ཨེཀཉྷི ¶ སཙྩཾ ན དུཏཱིཡམཏྠི, ཡསྨིཾ པཛཱ ནོ ཝིཝདེ པཛཱན’’ནྟིཨཱདཱིསུ (སུ. ནི. ༨༩༠; མཧཱནི. ༡༡༩) པརམཏྠསཙྩེ ནིབྦཱནེ ཙེཝ མགྒེ ཙ. ‘‘ཙཏུནྣཾ སཙྩཱནཾ ཀཏི ཀུསལཱ ཀཏི ཨཀུསལཱ’’ཏིཨཱདཱིསུ (ཝིབྷ. ༢༡༦) ཨརིཡསཙྩེ. སྭཱཡམིདྷཱཔི ཨརིཡསཙྩེ པཝཏྟཏཱིཏི.

ནིདྡེསཝཱརསངྒཧིཏསྶ ཝིསྶཛྫནུདྡེསསྶ

ཨཏྠཝཎྞནཱ ནིཊྛིཏཱ.

ཨབྷིཉྙེཡྻནིདྡེསཝཎྞནཱ

༢. ཨིདཱནི ¶ ཝིསྶཛྫནུདྡེསསངྒཧིཏེ དྷམྨེ པབྷེདཏོ དསྶེཏུཾ ཀཐཾ ཨིམེ དྷམྨཱ ཨབྷིཉྙེཡྻཱཏིཨཱདི ནིདྡེསཝཱརོ ཨཱརདྡྷོ. ཏཏྠ ཨབྷིཉྙེཡྻནིདྡེསཱདཱིསུ པཉྩསུ ཨཱདིཏོ ཨེཀཀཱདིཝསེན དས དས ཝིསྶཛྫནཱནི དསུཏྟརཔརིཡཱཡེན སཾསནྡེཏྭཱ ཨུདྡིཊྛཱནི. ཏེསུ ཨབྷིཉྙེཡྻནིདྡེསེ ¶ ཏཱཝ སབྦེ སཏྟཱཏི ཀཱམབྷཝཱདཱིསུ སཉྙཱབྷཝཱདཱིསུ ཨེཀཝོཀཱརབྷཝཱདཱིསུ ཙ སབྦབྷཝེསུ སབྦེ སཏྟཱ. ཨཱཧཱརཊྛིཏིཀཱཏི ཨཱཧཱརཏོ ཋིཏི ཨེཏེསནྟི ཨཱཧཱརཊྛིཏིཀཱ. ཋིཏཱིཏི ཙེཏྠ སཀཀྑཎེ ཨཏྠིཏཱ ཨདྷིཔྤེཏཱ. ཨིཏི སབྦསཏྟཱནཾ ཋིཏིཧེཏུ ཨཱཧཱརོ ནཱ ¶ ཨེཀོ དྷམྨོ ཨདྷིཀེན ཉཱཎེན ཛཱནིཏབྦོ. པཙྩཡེ ཧི ཨབྷིཉྙཱཏེ པཙྩཡུཔྤནྣཱཔི ཨབྷིཉྙཱཏཱ ཧོནྟི ཨུབྷིནྣམྤི ཨཉྙམཉྙཱཔེཀྑཏྟཱ. ཨེཏེན ཉཱཏཔརིཉྙཱ ཝུཏྟཱ ཧོཏི. ནནུ ཙ ཨེཝཾ སནྟེ ཡཾ ཝུཏྟཾ ‘‘ཨསཉྙསཏྟཱ དེཝཱ ཨཧེཏུཀཱ ཨནཱཧཱརཱ ཨཕསྶཀཱ’’ཏིཨཱདི (ཝིབྷ. ༡༠༡༧), ཏཾ ཝིརུཛ྄ཛྷཏཱིཏི. ཏཉྩ ན ཝིརུཛ྄ཛྷཏི. ཏེསཉྷི ཛྷཱནཾ ཨཱཧཱརོཏི. ཨེཝཾ སནྟེཔི ‘‘ཙཏྟཱརོམེ, བྷིཀྑཝེ, ཨཱཧཱརཱ བྷཱུཏཱནཾ ཝཱ སཏྟཱནཾ ཋིཏིཡཱ, སམྦྷཝེསཱིནཾ ཝཱ ཨནུགྒཧཱཡ. ཀཏམེ ཙཏྟཱརོ? ཀབལཱི༹ཀཱརོ ཨཱཧཱརོ ཨོལཱ༹རིཀོ ཝཱ སུཁུམོ ཝཱ, ཕསྶོ དུཏིཡོ, མནོསཉྩེཏནཱ ཏཏིཡཱ, ཝིཉྙཱཎཾ ཙཏུཏྠ’’ནྟི (སཾ. ནི. ༢.༡༡) ཨིདཾ ཝིརུཛ྄ཛྷཏཱིཏི. ཨིདམྤི ན ཝིརུཛ྄ཛྷཏི. ཨེཏསྨིཉྷི སུཏྟེ ནིཔྤརིཡཱཡེན ཨཱཧཱརལཀྑཎཱཝ དྷམྨཱ ཨཱཧཱརཱཏི ཝུཏྟཱ. ཨིདྷ པན པརིཡཱཡེན པཙྩཡོ ཨཱཧཱརོཏི ཝུཏྟོ. སབྦསངྑཏདྷམྨཱནཉྷི པཙྩཡོ ལདྡྷུཾ ཝཊྚཏི, སོ ཙ ཡཾ ཡཾ ཕལཾ ཛནེཏི, ཏཾ ཏཾ ཨཱཧརཏི ནཱམ. ཏསྨཱ ཨཱཧཱརོཏི ཝུཙྩཏི. ཏེནེཝཱཧ –

‘‘ཨཝིཛྫམྤཱཧཾ, བྷིཀྑཝེ, སཱཧཱརཾ ཝདཱམི, ནོ ཨནཱཧཱརཾ. ཀོ ཙ, བྷིཀྑཝེ, ཨཝིཛྫཱཡ ཨཱཧཱརོ? ‘པཉྩ ནཱིཝརཎཱ’ཏིསྶ ཝཙནཱིཡཾ. པཉྩ ནཱིཝརཎེཔཱཧཾ, བྷིཀྑཝེ, སཱཧཱརེ ཝདཱམི, ནོ ཨནཱཧཱརེ. ཀོ ཙ, བྷིཀྑཝེ, པཉྩནྣཾ ནཱིཝརཎཱནཾ ཨཱཧཱརོ. ‘ཨཡོནིསོ མནསིཀཱརོ’ཏིསྶ ¶ ཝཙནཱིཡ’’ནྟིཨཱདི (ཨ. ནི. ༡༠.༦༡). ཨཡཾ ཨིདྷ ཨདྷིཔྤེཏོ.

ཨེཏསྨིཉྷི པཙྩཡཱཧཱརེ གཧིཏེ པརིཡཱཡཱཧཱརོཔི ནིཔྤརིཡཱཡཱཧཱརོཔི སབྦོ གཧིཏོཝ ཧོཏི.

ཏཏྠ ཨསཉྙབྷཝེ པཙྩཡཱཧཱརོ ལབྦྷཏི. ཨནུཔྤནྣེ ཧི བུདྡྷེ ཏིཏྠཱཡཏནེ པབྦཛིཏྭཱ ཝཱཡོཀསིཎེ པརིཀམྨཾ ཀཏྭཱ ཙཏུཏྠཛ྄ཛྷཱནཾ ནིབྦཏྟེཏྭཱ ཏཏོ ཝུཊྛཱཡ ‘‘དྷཱི ཙིཏྟཾ, དྷཱི ཙིཏྟཾ, ཙིཏྟསྶ ནཱམ ཨབྷཱཝོཡེཝ སཱདྷུ. ཙིཏྟཉྷི ནིསྶཱཡ ཝདྷབནྡྷནཱདིཔཙྩཡཾ དུཀྑཾ ཨུཔྤཛྫཏི, ཙིཏྟེ ཨསཏི ནཏྠེཏ’’ནྟི ཁནྟིཾ རུཙིཾ ཨུཔྤཱདེཏྭཱ ཨཔརིཧཱིནཛ྄ཛྷཱནཱ ཀཱལཾཀཏྭཱ ཨསཉྙབྷཝེ ནིབྦཏྟནྟི. ཡོ ཡསྶ ཨིརིཡཱཔཐོ མནུསྶལོཀེ པཎིཧིཏོ ཨཧོསི, སོ ཏེན ཨིརིཡཱཔཐེན ནིབྦཏྟིཏྭཱ པཉྩ ཀཔྤསཏཱནི ཏིཊྛཏི. ཨེཏྟཀཾ ཨདྡྷཱནཾ ནིཔནྣོ ཝིཡ ནིསིནྣོ ཝིཡ ཋིཏོ ཝིཡ ཧོཏི. ཨེཝརཱུཔཱནཉྩ སཏྟཱནཾ པཙྩཡཱཧཱརོ ལབྦྷཏི. ཏེ ཧི ཡཾ ཛྷཱནཾ བྷཱཝེཏྭཱ ནིབྦཏྟཱ ¶ , ཏདེ ¶ ནེསཾ པཙྩཡོ ཧོཏི. ཡཐཱ ཛིཡཱཝེགེན ཁིཏྟསརོ ཡཱཝ ཛིཡཱཝེགོ ཨཏྠི, ཏཱཝ གཙྪཏི, ཨེཝཾ ཡཱཝ ཛྷཱནཔཙྩཡོ ཨཏྠི, ཏཱཝ ཏིཊྛནྟི. ཏསྨིཾ ནིཊྛིཏེ ཁཱིཎཝེགོ སརོ ཝིཡ པཏནྟི.

ཡེ པན ཏེ ནེརཡིཀཱ ‘‘ནེཝུཊྛཱནཕལཱུཔཛཱིཝིནོ ན པུཉྙཕལཱུཔཛཱིཝིནོ’’ཏི ཝུཏྟཱ, ཏེསཾ ཀོ ཨཱཧཱརོཏི? ཏེསཾ ཀམྨམེཝ ཨཱཧཱརོཏི. ཀིཾ པཉྩ ཨཱཧཱརཱ ཨཏྠཱིཏི? ‘‘པཉྩ, ན པཉྩཱ’’ཏི ཨིདཾ ན ཝཏྟབྦཾ. ནནུ ‘‘པཙྩཡོ ཨཱཧཱརོ’’ཏི ཝུཏྟོ, ཏསྨཱ ཡེན ཀམྨེན ཏེ ནིརཡེ ནིབྦཏྟཱ, ཏདེཝ ཏེསཾ ཋིཏིཔཙྩཡཏྟཱ ཨཱཧཱརོ. ཡཾ སནྡྷཱཡ ཨིདཾ ཝུཏྟཾ ‘‘ན ཏཱཝ ཀཱལཾ ཀརོཏི, ཡཱཝ ན ཏཾ པཱཔཀམྨཾ བྱནྟཱི ཧོཏཱི’’ཏི (ཨ. ནི. ༣.༣༦; མ. ནི. ༣.༢༥༠). ཏསྨཱ ཨཱཧཱརཊྛིཏིཀཱཏི པཙྩཡཊྛིཏིཀཱཏི ཨཏྠོ. ཀབལཱི༹ཀཱརཾ ཨཱཧཱརཾ ཨཱརབྦྷཱཏི ཙེཏྠ ཝིཝཱདོ ན ཀཱཏབྦོ. མུཁེ ཨུཔྤནྣཁེལོ༹པི ཧི ཏེསཾ ཨཱཧཱརཀིཙྩཾ སཱདྷེཏི. ཁེལོ༹ ཧི ནིརཡེ དུཀྑཝེདནཱིཡོ ཧུཏྭཱ པཙྩཡོ ཧོཏི, སགྒེ སུཁཝེདནཱིཡོ. ཨིཏི ཀཱམབྷཝེ ནིཔྤརིཡཱཡེན ཙཏྟཱརོ ཨཱཧཱརཱ, རཱུཔཱརཱུཔབྷཝེསུ ཋཔེཏྭཱ ཨསཉྙབྷཝཾ སེསཱནཾ ཏཡོ ¶ , ཨསཉྙཱནཉྩེཝ ཨཝསེསཱནཉྩ པཙྩཡཱཧཱརོཏི ཨིམིནཱ ཨཱཧཱརེན སབྦེ སཏྟཱ ཨཱཧཱརཊྛིཏིཀཱ.

སབྦེ སཏྟཱཏི ཙ པུགྒལཱདྷིཊྛཱནཱ དྷམྨདེསནཱ, སབྦེ སངྑཱརཱཏི ཨདྷིཔྤཱཡོ. བྷགཝཏོཔི ཧི དྷམྨཔུགྒལཱནཾ ཝསེན ཙཏུབྦིདྷཱ དེསནཱ – དྷམྨཱདྷིཊྛཱནཱ དྷམྨདེསནཱ, དྷམྨཱདྷིཊྛཱནཱ པུགྒལདེསནཱ, པུགྒལཱདྷིཊྛཱནཱ པུགྒལདེསནཱ, པུགྒལཱདྷིཊྛཱནཱ དྷམྨདེསནཱཏི. ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི, ཡཾ ཨེཝཾ བྷཱཝིཏཾ ཀམྨནིཡཾ ཧོཏི, ཡཐཡིདཾ ཙིཏྟཾ. ཙིཏྟཾ, བྷིཀྑཝེ, བྷཱཝིཏཾ ཀམྨནིཡཾ ཧོཏཱི’’ཏི (ཨ. ནི. ༡.༢༢) ཨེཝརཱུཔཱི དྷམྨཱདྷིཊྛཱནཱ དྷམྨདེསནཱ. ‘‘ཨཊྛཱནམེཏཾ, བྷིཀྑཝེ, ཨནཝཀཱསོ ཡཾ དིཊྛིསམྤནྣོ པུགྒལོ ཀཉྩི སངྑཱརཾ ནིཙྩཏོ ཨུཔགཙྪེཡྻ, ནེཏཾ ཋཱནཾ ཝིཛྫཏཱི’’ཏི (ཨ. ནི. ༡.༢༦༨) ཨེཝརཱུཔཱི དྷམྨཱདྷིཊྛཱནཱ པུགྒལདེསནཱ. ‘‘ཨེཀཔུགྒལོ, བྷིཀྑཝེ, ལོཀེ ཨུཔྤཛྫམཱནོ ཨུཔྤཛྫཏི བཧུཛནཧིཏཱཡ བཧུཛནསུཁཱཡ ལོཀཱནུཀམྤཱཡ ཨཏྠཱཡ ཧིཏཱཡ སུཁཱཡ དེཝམནུསྶཱན’’ནྟི (ཨ. ནི. ༡.༡༧༠, ༣༠༩), ཨེཝརཱུཔཱི པུགྒལཱདྷིཊྛཱནཱ པུགྒལདེསནཱ. ‘‘ཨེཀཔུགྒལསྶ བྷིཀྑཝེ, པཱཏུབྷཱཝཱ མཧཏོ ཙཀྑུསྶ པཱཏུབྷཱཝོ ཧོཏཱི’’ཏི (ཨ. ནི. ༡.༡༧༥-༡༨༦) ཨེཝརཱུཔཱི པུགྒལཱདྷིཊྛཱནཱ དྷམྨདེསནཱ. ཏཱསུ ཨིདྷ པུགྒལཱདྷིཊྛཱནཱ དྷམྨདེསནཱ ¶ . ཨུཔརི ཡཱཝ དསཀཱ དྷམྨཱནཾཡེཝ གཧིཏཏྟཱ སཏྟགྒཧཎེན དྷམྨགྒཧཎཾ ཀཏནྟི ཝེདིཏབྦཾ, ཝིསེསེན ཝཱ སཏྟསནྟཱནཔརིཡཱཔནྣདྷམྨཱནཾཡེཝ ཨདྷིཀེན ཉཱཎེན སབྷཱཝཏོ ཨུཔཔརིཀྑིཏབྦཏྟཱ སཏྟགྒཧཎཾ ཀཏནྟི ཝེདིཏབྦཾ, སངྑཱརེ ཨུཔཱདཱཡ སཏྟོཏི པཉྙཏྟིམཏྟསམྦྷཝཏོ ཝཱ ཕལོཔཙཱརེན སངྑཱརཱ ‘‘སཏྟཱ’’ཏི ¶ ཝུཏྟཱཏི ཝེདིཏབྦཾ. ན ཧི ཀོཙི སཏྟོ པཙྩཡཊྛིཏིཀོ ཨཏྠི ཨཉྙཏྲ སངྑཱརེཧི, ཝོཧཱརཝསེན པན ཨེཝཾ ཝུཙྩཏི. ཨེཝམེཏེན ཉཱཏཔརིཉྙཱ ཝུཏྟཱ ཧོཏི.

དྭེ དྷཱཏུཡོཏི སངྑཏཱ ཙ དྷཱཏུ ཨསངྑཏཱ ཙ དྷཱཏུ. ཏཏྠ ཨནེཀེཧི པཙྩཡེཧི སངྒམྨ ཀཏཱ པཉྩཀྑནྡྷཱ སངྑཏཱ དྷཱཏུ, ཀེཧིཙི པཙྩཡེཧི ཨཀཏཾ ནིབྦཱནཾ ཨསངྑཏཱ དྷཱཏུ.

ཏིསྶོ དྷཱཏུཡོཏི ཀཱམདྷཱཏུ རཱུཔདྷཱཏུ ཨརཱུཔདྷཱཏུ (ཝིབྷ. ༡༨༡-༡༨༢). ཏཏྠ ཀཏམཱ ཀཱམདྷཱཏུ? ཧེཊྛཏོ ཨཝཱིཙིནིརཡཾ པརིཡནྟཾ ཀརིཏྭཱ ཨུཔརིཏོ པརནིམྨིཏཝསཝཏྟཱི དེཝེ ཨནྟོཀརིཏྭཱ ¶ ཡཾ ཨེཏསྨིཾ ཨནྟརེ ཨེཏྠཱཝཙརཱ ཨེཏྠ པརིཡཱཔནྣཱ ཁནྡྷཱ དྷཱཏཱུ ཨཱཡཏནཱ རཱུཔཱ ཝེདནཱ སཉྙཱ སངྑཱརཱ ཝིཉྙཱཎཾ. ཨཡཾ ཝུཙྩཏི ཀཱམདྷཱཏུ (ཝིབྷ. ༡༨༢; དྷ. ས. ༡༢༨༧). ཏཏྠ ཀཏམཱ རཱུཔདྷཱཏུ? ཧེཊྛཏོ བྲཧྨལོཀཾ པརིཡནྟཾ ཀརིཏྭཱ ཨུཔརིཏོ ཨཀནིཊྛེ དེཝེ ཨནྟོཀརིཏྭཱ ཡཾ ཨེཏསྨིཾ ཨནྟརེ ཨེཏྠཱཝཙརཱ ཨེཏྠ པརིཡཱཔནྣཱ སམཱཔནྣསྶ ཝཱ ཨུཔཔནྣསྶ ཝཱ དིཊྛདྷམྨསུཁཝིཧཱརིསྶ ཝཱ ཙིཏྟཙེཏསིཀཱ དྷམྨཱ. ཨཡཾ ཝུཙྩཏི རཱུཔདྷཱཏུ. ཏཏྠ ཀཏམཱ ཨརཱུཔདྷཱཏུ? ཧེཊྛཏོ ཨཱཀཱསཱནཉྩཱཡཏནཱུཔགེ དེཝེ པརིཡནྟཾ ཀརིཏྭཱ ཨུཔརིཏོ ནེཝསཉྙཱནཱསཉྙཱཡཏནཱུཔགེ དེཝེ ཨནྟོཀརིཏྭཱ ཡཾ ཨེཏསྨིཾ ཨནྟརེ ཨེཏྠཱཝཙརཱ ཨེཏྠ པརིཡཱཔནྣཱ སམཱཔནྣསྶ ཝཱ ཨུཔཔནྣསྶ ཝཱ དིཊྛདྷམྨསུཁཝིཧཱརིསྶ ཝཱ ཙིཏྟཙེཏསིཀཱ དྷམྨཱ. ཨཡཾ ཝུཙྩཏི ཨརཱུཔདྷཱཏུ. ཨཊྛཀཐཱཡཾ པན ‘‘ཀཱམདྷཱཏཱུཏི ཀཱམབྷཝོ པཉྩཀྑནྡྷཱ ལབྦྷནྟི, རཱུཔདྷཱཏཱུཏི རཱུཔབྷཝོ པཉྩཀྑནྡྷཱ ལབྦྷནྟི. ཨརཱུཔདྷཱཏཱུཏི ཨརཱུཔབྷཝོ ཙཏྟཱརོ ཁནྡྷཱ ལབྦྷནྟཱི’’ཏི ཝུཏྟཾ. ཨཡཾ དསུཏྟརཔརིཡཱཡེན ཡོཛནཱ.

སངྒཱིཏིཔརིཡཱཡེན པན ‘‘ཏིསྶོ ཀུསལདྷཱཏུཡོ – ནེཀྑམྨདྷཱཏུ ཨབྱཱཔཱདདྷཱཏུ ཨཝིཧིཾསཱདྷཱཏུ. ཨཔརཱཔི ཏིསྶོ དྷཱཏུཡོ – རཱུཔདྷཱཏུ ཨརཱུཔདྷཱཏུ ནིརོདྷདྷཱཏུ. ཨཔརཱཔི ཏིསྶོ དྷཱཏུཡོ – ཧཱིནཱ དྷཱཏུ མཛ྄ཛྷིམཱ དྷཱཏུ ¶ པཎཱིཏཱ དྷཱཏཱུ’’ཏི (དཱི. ནི. ༡.༣.༣༠༥) ཝུཏྟཱ དྷཱཏུཡོཔི ཨེཏྠ ཡུཛྫནྟི (ཝིབྷ. ༡༨༡-༡༨༢). ནེཀྑམྨཔཊིསཾཡུཏྟོ ཏཀྐོ ཝིཏཀྐོ…པེ… སམྨཱསངྐཔྤོ. ཨཡཾ ཝུཙྩཏི ནེཀྑམྨདྷཱཏུ. སབྦེཔི ཀུསལཱ དྷམྨཱ ནེཀྑམྨདྷཱཏུ. ཨབྱཱཔཱདཔཊིསཾཡུཏྟོ ཏཀྐོ ཝིཏཀྐོ…པེ… སམྨཱསངྐཔྤོ ཨབྱཱཔཱདདྷཱཏུ. ཡཱ སཏྟེསུ མེཏྟི མེཏྟཱཡནཱ མེཏྟཱཡིཏཏྟཾ མེཏྟཱཙེཏོཝིམུཏྟི. ཨཡཾ ཝུཙྩཏི ཨབྱཱཔཱདདྷཱཏུ. ཨཝིཧིཾསཱཔཊིསཾཡུཏྟོ ཏཀྐོ ཝིཏཀྐོ…པེ… སམྨཱསངྐཔྤོ ཨཝིཧིཾསཱདྷཱཏུ. ཡཱ སཏྟེསུ ཀརུཎཱ ཀརུཎཱཡནཱ ཀརུཎཱཡིཏཏྟཾ ཀརུཎཱཙེཏོཝིམུཏྟི. ཨཡཾ ཝུཙྩཏི ཨཝིཧིཾསཱདྷཱཏུ (ཝིབྷ. ༡༨༢). རཱུཔཱརཱུཔདྷཱཏུཡོ ཝུཏྟཱཡེཝ. ནིརོདྷདྷཱཏུ ནིབྦཱནཾ. ཧཱིནཱ དྷཱཏུ དྭཱདསཱཀུསལཙིཏྟུཔྤཱདཱ, མཛ྄ཛྷིམཱ ¶ དྷཱཏུ ཨཝསེསཱ ཏེབྷཱུམཀདྷམྨཱ. པཎཱིཏཱ དྷཱཏུ ནཝ ལོཀུཏྟརདྷམྨཱ. སབྦཱཔི ཙ ནིཛྫཱིཝཊྛེན དྷཱཏུ.

ཙཏྟཱརི ཨརིཡསཙྩཱནཱིཏི དུཀྑཾ ཨརིཡསཙྩཾ, དུཀྑསམུདཡཾ ཨརིཡསཙྩཾ, དུཀྑནིརོདྷཾ ཨརིཡསཙྩཾ, དུཀྑནིརོདྷགཱམིནཱི ¶ པཊིཔདཱ ཨརིཡསཙྩཾ. ཨིམེསཾ ཝཎྞནཱ སཙྩཝིསྶཛྫནེསུཡེཝ བྷཝིསྶཏི.

པཉྩ ཝིམུཏྟཱཡཏནཱནཱིཏི ཨཏྟནོ ཧིཏཏྠཱཡ པརེཧི པཝཏྟིཏདྷམྨདེསནཱསཝནཾ, པརེསཾ ཧིཏཏྠཱཡ ཨཏྟནོ ཡཐཱསུཏདྷམྨདེསནཱ, ཡཐཱསུཏསྶ དྷམྨསྶ སཛ྄ཛྷཱཡཀརཎཾ, ཡཐཱསུཏསྶ དྷམྨསྶ ཙེཏསཱ ཨནུཝིཏཀྐནཾ, ཀསིཎཱསུབྷཱདཱིསུ ཨནུཀཱུལཾ ཨཱརམྨཎནྟི, ཨིམཱནི པཉྩ ཝིམུཙྩནཀཱརཎཱནི. ཡཐཱཧ –

‘‘ཨིདྷ, བྷིཀྑཝེ, བྷིཀྑུནོ སཏྠཱ དྷམྨཾ དེསེཏི ཨཉྙཏརོ ཝཱ གརུཊྛཱནིཡོ སབྲཧྨཙཱརཱི, ཡཐཱ ཡཐཱ ཁོ, བྷིཀྑཝེ, བྷིཀྑུནོ སཏྠཱ དྷམྨཾ དེསེཏི ཨཉྙཏརོ ཝཱ གརུཊྛཱནིཡོ སབྲཧྨཙཱརཱི, ཏཐཱ ཏཐཱ སོ ཏསྨིཾ དྷམྨེ ཨཏྠཔཊིསཾཝེདཱི ཙ ཧོཏི དྷམྨཔཊིསཾཝེདཱི ཙ, ཏསྶ ཨཏྠཔཊིསཾཝེདིནོ དྷམྨཔཊིསཾཝེདིནོ པཱམོཛྫཾ ཛཱཡཏི, པམུདིཏསྶ པཱིཏི ཛཱཡཏི, པཱིཏིམནསྶ ཀཱཡོ པསྶམྦྷཏི, པསྶདྡྷཀཱཡོ སུཁཾ ཝེདེཏི, སུཁིནོ ཙིཏྟཾ སམཱདྷིཡཏི, ཨིདཾ པཋམཾ ཝིམུཏྟཱཡཏནཾ.

‘‘པུན ¶ ཙཔརཾ, བྷིཀྑཝེ, བྷིཀྑུནོ ན ཧེཝ ཁོ སཏྠཱ དྷམྨཾ དེསེཏི ཨཉྙཏརོ ཝཱ གརུཊྛཱནིཡོ སབྲཧྨཙཱརཱི, ཨཔི ཙ ཁོ ཡཐཱསུཏཾ ཡཐཱཔརིཡཏྟཾ དྷམྨཾ ཝིཏྠཱརེན པརེསཾ དེསེཏི. ཡཐཱ ཡཐཱ ཁོ, བྷིཀྑཝེ, བྷིཀྑུནོ…པེ… སུཁིནོ ཙིཏྟཾ སམཱདྷིཡཏི. ཨིདཾ དུཏིཡཾ ཝིམུཏྟཱཡཏནཾ.

‘‘པུན ཙཔརཾ, བྷིཀྑཝེ, བྷིཀྑུནོ ནཧེཝ ཁོ སཏྠཱ དྷམྨཾ དེསེཏི ཨཉྙཏརོ ཝཱ གརུཊྛཱནིཡོ སབྲཧྨཙཱརཱི, ནཱཔི ཡཐཱསུཏཾ ཡཐཱཔརིཡཏྟཾ དྷམྨཾ ཝིཏྠཱརེན པརེསཾ དེསེཏི, ཨཔི ཙ ཁོ ཡཐཱསུཏཾ ཡཐཱཔརིཡཏྟཾ དྷམྨཾ ཝིཏྠཱརེན སཛ྄ཛྷཱཡཾ ཀརོཏི. ཡཐཱ ཡཐཱ ཁོ, བྷིཀྑཝེ, བྷིཀྑུནོ…པེ… སུཁིནོ ཙིཏྟཾ སམཱདྷིཡཏི. ཨིདཾ ཏཏིཡཾ ཝིམུཏྟཱཡཏནཾ.

‘‘པུན ཙཔརཾ, བྷིཀྑཝེ, བྷིཀྑུནོ ནཧེཝ ཁོ སཏྠཱ དྷམྨཾ དེསེཏི ཨཉྙཏརོ ཝཱ གརུཊྛཱནིཡོ ¶ སབྲཧྨཙཱརཱི, ནཱཔི ཡཐཱསུཏཾ ཡཐཱཔརིཡཏྟཾ དྷམྨཾ ཝིཏྠཱརེན པརེསཾ དེསེཏི, ནཱཔི ཡཐཱསུཏཾ ཡཐཱཔརིཡཏྟཾ དྷམྨཾ ཝིཏྠཱརེན སཛ྄ཛྷཱཡཾ ཀརོཏི, ཨཔི ཙ ཁོ ཡཐཱསུཏཾ ཡཐཱཔརིཡཏྟཾ དྷམྨཾ ཙེཏསཱ ཨནུཝིཏཀྐེཏི ཨནུཝིཙཱརེཏི མནསཱནུཔེཀྑཏི. ཡཐཱ ཡཐཱ ཁོ, བྷིཀྑཝེ, བྷིཀྑུནོ…པེ… སུཁིནོ ཙིཏྟཾ ¶ སམཱདྷིཡཏི. ཨིདཾ ཙཏུཏྠཾ ཝིམུཏྟཱཡཏནཾ.

‘‘པུན ཙཔརཾ, བྷིཀྑཝེ, བྷིཀྑུནོ ནཧེཝ ཁོ སཏྠཱ དྷམྨཾ དེསེཏི ཨཉྙཏརོ ཝཱ གརུཊྛཱནིཡོ སབྲཧྨཙཱརཱི, ནཱཔི ཡཐཱསུཏཾ ཡཐཱཔརིཡཏྟཾ དྷམྨཾ ཝིཏྠཱརེན པརེསཾ དེསེཏི, ནཱཔི ཡཐཱསུཏཾ ཡཐཱཔརིཡཏྟཾ དྷམྨཾ ཝིཏྠཱརེན སཛ྄ཛྷཱཡཾ ཀརོཏི, ནཱཔི ཡཐཱསུཏཾ ཡཐཱཔརིཡཏྟཾ དྷམྨཾ ཙེཏསཱ ཨནུཝིཏཀྐེཏི ཨནུཝིཙཱརེཏི མནསཱནུཔེཀྑཏི, ཨཔི ཙ ཁྭསྶ ཨཉྙཏརཾ སམཱདྷིནིམིཏྟཾ སུགྒཧིཏཾ ཧོཏི སུམནསིཀཏཾ སཱུཔདྷཱརིཏཾ སུཔྤཊིཝིདྡྷཾ པཉྙཱཡ, ཡཐཱ ཡཐཱ ཁོ, བྷིཀྑཝེ, བྷིཀྑུནོ ཨཉྙཏརཾ སམཱདྷིནིམིཏྟཾ སུགྒཧིཏཾ ཧོཏི སུམནསིཀཏཾ སཱུཔདྷཱརིཏཾ སུཔྤཊིཝིདྡྷཾ པཉྙཱཡ ཏཐཱ ཏཐཱ སོ ཏསྨིཾ དྷམྨེ ཨཏྠཔཊིསཾཝེདཱི ཙ ཧོཏི དྷམྨཔཊིསཾཝེདཱི ཙ. ཏསྶ ཨཏྠཔཊིསཾཝེདིནོ དྷམྨཔཊིསཾཝེདིནོ པཱམོཛྫཾ ཛཱཡཏི ¶ , པམུདིཏསྶ པཱིཏི ཛཱཡཏི, པཱིཏིམནསྶ ཀཱཡོ པསྶམྦྷཏི, པསྶདྡྷཀཱཡོ སུཁཾ ཝེདེཏི, སུཁིནོ ཙིཏྟཾ སམཱདྷིཡཏི. ཨིདཾ པཉྩམཾ ཝིམུཏྟཱཡཏན’’ནྟི (ཨ. ནི. ༥.༢༦; དཱི. ནི. ༣.༣༢༢).

ཚ ཨནུཏྟརིཡཱནཱིཏི ཨེཏྠ ནཏྠི ཨེཏེསཾ ཨུཏྟརནྟི ཨནུཏྟརཱནི, ཨནུཏྟརཱནི ཨེཝ ཨནུཏྟརིཡཱནི, ཛེཊྛཀཱནཱིཏི ཨཏྠོ. ཝུཏྟཉྷེཏཾ བྷགཝཏཱ –

‘‘ཚཡིམཱནི (ཨ. ནི. ༦.༨, ༣༠), བྷིཀྑཝེ, ཨནུཏྟརིཡཱནི. ཀཏམཱནི ཚ? དསྶནཱནུཏྟརིཡཾ, སཝནཱནུཏྟརིཡཾ, ལཱབྷཱནུཏྟརིཡཾ, སིཀྑཱནུཏྟརིཡཾ, པཱརིཙརིཡཱནུཏྟརིཡཾ, ཨནུསྶཏཱནུཏྟརིཡནྟི.

‘‘ཀཏམཉྩ, བྷིཀྑཝེ, དསྶནཱནུཏྟརིཡཾ? ཨིདྷ, བྷིཀྑཝེ, ཨེཀཙྩོ ཧཏྠིརཏནམྤི དསྶནཱཡ གཙྪཏི, ཨསྶརཏནམྤི དསྶནཱཡ གཙྪཏི, མཎིརཏནམྤི དསྶནཱཡ གཙྪཏི, ཨུཙྩཱཝཙཾ ཝཱ པན དསྶནཱཡ གཙྪཏི, སམཎཾ ཝཱ བྲཱཧྨཎཾ ཝཱ མིཙྪཱདིཊྛིཀཾ མིཙྪཱཔཊིཔནྣཾ དསྶནཱཡ གཙྪཏི. ཨཏྠེཏཾ, བྷིཀྑཝེ, དསྶནཾ, ནེཏཾ ནཏྠཱིཏི ཝདཱམི. ཏཉྩ ཁོ ཨེཏཾ, བྷིཀྑཝེ, དསྶནཾ ཧཱིནཾ གམྨཾ པོཐུཛྫནིཀཾ ཨནརིཡཾ ཨནཏྠསཾཧིཏཾ ན ནིབྦིདཱཡ ¶ ན ཝིརཱགཱཡ ན ནིརོདྷཱཡ ན ཨུཔསམཱཡ ན ཨབྷིཉྙཱཡ ན སམྦོདྷཱཡ ན ནིབྦཱནཱཡ སཾཝཏྟཏི. ཡོ ཙ ཁོ, བྷིཀྑཝེ, ཏཐཱགཏཾ ཝཱ ཏཐཱགཏསཱཝཀཾ ཝཱ དསྶནཱཡ གཙྪཏི ནིཝིཊྛསདྡྷོ ནིཝིཊྛཔེམོ ཨེཀནྟགཏོ ཨབྷིཔྤསནྣོ. ཨེཏདཱནུཏྟརིཡཾ, བྷིཀྑཝེ, དསྶནཱནཾ སཏྟཱནཾ ཝིསུདྡྷིཡཱ སོཀཔརིདེཝཱནཾ ¶ སམཏིཀྐམཱཡ དུཀྑདོམནསྶཱནཾ ཨཏྠངྒམཱཡ ཉཱཡསྶ ཨདྷིགམཱཡ ནིབྦཱནསྶ སཙྪིཀིརིཡཱཡ, ཡདིདཾ ཏཐཱགཏཾ ཝཱ ཏཐཱགཏསཱཝཀཾ ཝཱ དསྶནཱཡ གཙྪཏི ནིཝིཊྛསདྡྷོ ནིཝིཊྛཔེམོ ཨེཀནྟགཏོ ཨབྷིཔྤསནྣོ. ཨིདཾ ཝུཙྩཏི, བྷིཀྑཝེ, དསྶནཱནུཏྟརིཡཾ. ཨིཏི དསྶནཱནུཏྟརིཡཾ.

‘‘སཝནཱནུཏྟརིཡཉྩ ཀཐཾ ཧོཏི? ཨིདྷ, བྷིཀྑཝེ, ཨེཀཙྩོ བྷེརིསདྡམྤི སཝནཱཡ གཙྪཏི, ཝཱིཎཱསདྡམྤི སཝནཱཡ གཙྪཏི, གཱིཏསདྡམྤི སཝནཱཡ གཙྪཏི, ཨུཙྩཱཝཙཾ ཝཱ པན སཝནཱཡ གཙྪཏི, སམཎསྶ ཝཱ བྲཱཧྨཎསྶ ཝཱ མིཙྪཱདིཊྛིཀསྶ མིཙྪཱཔཊིཔནྣསྶ དྷམྨསྶཝནཱཡ གཙྪཏི. ཨཏྠེཏཾ, བྷིཀྑཝེ, སཝནཾ, ནེཏཾ ནཏྠཱིཏི ཝདཱམི ¶ . ཏཉྩ ཁོ ཨེཏཾ, བྷིཀྑཝེ, སཝནཾ ཧཱིནཾ…པེ… ན ནིབྦཱནཱཡ སཾཝཏྟཏི. ཡོ ཙ ཁོ, བྷིཀྑཝེ, ཏཐཱགཏསྶ ཝཱ ཏཐཱགཏསཱཝཀསྶ ཝཱ དྷམྨསྶཝནཱཡ གཙྪཏི ནིཝིཊྛསདྡྷོ ནིཝིཊྛཔེམོ ཨེཀནྟགཏོ ཨབྷིཔྤསནྣོ. ཨེཏདཱནུཏྟརིཡཾ, བྷིཀྑཝེ, སཝནཱནཾ སཏྟཱནཾ ཝིསུདྡྷིཡཱ…པེ… ནིབྦཱནསྶ སཙྪིཀིརིཡཱཡ, ཡདིདཾ ཏཐཱགཏསྶ ཝཱ ཏཐཱགཏསཱཝཀསྶ ཝཱ དྷམྨསྶཝནཱཡ གཙྪཏི ནིཝིཊྛསདྡྷོ ནིཝིཊྛཔེམོ ཨེཀནྟགཏོ ཨབྷིཔྤསནྣོ. ཨིདཾ ཝུཙྩཏི, བྷིཀྑཝེ, སཝནཱནུཏྟརིཡཾ. ཨིཏི དསྶནཱནུཏྟརིཡཾ, སཝནཱནུཏྟརིཡཾ.

‘‘ལཱབྷཱནུཏྟརིཡཉྩ ཀཐཾ ཧོཏི? ཨིདྷ, བྷིཀྑཝེ, ཨེཀཙྩོ པུཏྟལཱབྷམྤི ལབྷཏི, དཱརལཱབྷམྤི ལབྷཏི, དྷནལཱབྷམྤི ལབྷཏི, ཨུཙྩཱཝཙཾ ཝཱ པན ལཱབྷམྤི ལབྷཏི. སམཎེ ཝཱ བྲཱཧྨཎེ ཝཱ མིཙྪཱདིཊྛིཀེ མིཙྪཱཔཊིཔནྣེ སདྡྷཾ པཊིལབྷཏི. ཨཏྠེསོ, བྷིཀྑཝེ, ལཱབྷོ, ནེསོ ནཏྠཱིཏི ཝདཱམི. སོ ཙ ཁོ ཨེསོ, བྷིཀྑཝེ, ལཱབྷོ ཧཱིནོ…པེ… ན ནིབྦཱནཱཡ སཾཝཏྟཏི. ཡོ ཙ ཁོ, བྷིཀྑཝེ, ཏཐཱགཏེ ཝཱ ཏཐཱགཏསཱཝཀེ ཝཱ སདྡྷཾ པཊིལབྷཏི ནིཝིཊྛསདྡྷོ ནིཝིཊྛཔེམོ ཨེཀནྟགཏོ ཨབྷིཔྤསནྣོ. ཨེཏདཱནུཏྟརིཡཾ, བྷིཀྑཝེ, ལཱབྷཱནཾ སཏྟཱནཾ ཝིསུདྡྷིཡཱ…པེ… ནིབྦཱནསྶ སཙྪིཀིརིཡཱཡ, ཡདིདཾ ཏཐཱགཏེ ཝཱ ཏཐཱགཏསཱཝཀེ ཝཱ སདྡྷཾ པཊིལབྷཏི ནིཝིཊྛསདྡྷོ ནིཝིཊྛཔེམོ ཨེཀནྟགཏོ ཨབྷིཔྤསནྣོ. ཨིདཾ ཝུཙྩཏི, བྷིཀྑཝེ, ལཱབྷཱནུཏྟརིཡཾ ¶ . ཨིཏི དསྶནཱནུཏྟརིཡཾ, སཝནཱནུཏྟརིཡཾ, ལཱབྷཱནུཏྟརིཡཾ.

‘‘སིཀྑཱནུཏྟརིཡཉྩ ¶ ཀཐཾ ཧོཏི? ཨིདྷ, བྷིཀྑཝེ, ཨེཀཙྩོ ཧཏྠིསྨིམྤི སིཀྑཏི, ཨསྶསྨིམྤི སིཀྑཏི, རཐསྨིམྤི སིཀྑཏི, དྷནུསྨིམྤི སིཀྑཏི, ཐརུསྨིམྤི སིཀྑཏི, ཨུཙྩཱཝཙཾ ཝཱ པན སིཀྑཏི, སམཎསྶ ཝཱ བྲཱཧྨཎསྶ ཝཱ མིཙྪཱདིཊྛིཀསྶ མིཙྪཱཔཊིཔནྣསྶ སིཀྑཏི. ཨཏྠེསཱ, བྷིཀྑཝེ, སིཀྑཱ, ནེསཱ ནཏྠཱིཏི ཝདཱམི. སཱ ཙ ཁོ ཨེསཱ, བྷིཀྑཝེ, སིཀྑཱ ཧཱིནཱ…པེ… ན ནིབྦཱནཱཡ སཾཝཏྟཏི. ཡོ ཙ ཁོ, བྷིཀྑཝེ, ཏཐཱགཏཔྤཝེདིཏེ དྷམྨཝིནཡེ ཨདྷིསཱིལམྤི སིཀྑཏི, ཨདྷིཙིཏྟམྤི སིཀྑཏི, ཨདྷིཔཉྙམྤི སིཀྑཏི ནིཝིཊྛསདྡྷོ ནིཝིཊྛཔེམོ ཨེཀནྟགཏོ ཨབྷིཔྤསནྣོ. ཨེཏདཱནུཏྟརིཡཾ, བྷིཀྑཝེ ¶ , སིཀྑཱནཾ སཏྟཱནཾ ཝིསུདྡྷིཡཱ…པེ… ནིབྦཱནསྶ སཙྪིཀིརིཡཱཡ, ཡདིདཾ ཏཐཱགཏཔྤཝེདིཏེ དྷམྨཝིནཡེ ཨདྷིསཱིལམྤི སིཀྑཏི, ཨདྷིཙིཏྟམྤི སིཀྑཏི, ཨདྷིཔཉྙམྤི སིཀྑཏི ནིཝིཊྛསདྡྷོ ནིཝིཊྛཔེམོ ཨེཀནྟགཏོ ཨབྷིཔྤསནྣོ. ཨིདཾ ཝུཙྩཏི, བྷིཀྑཝེ, སིཀྑཱནུཏྟརིཡཾ. ཨིཏི དསྶནཱནུཏྟརིཡཾ, སཝནཱནུཏྟརིཡཾ, ལཱབྷཱནུཏྟརིཡཾ, སིཀྑཱནུཏྟརིཡཾ.

‘‘པཱརིཙརིཡཱནུཏྟརིཡཉྩ ཀཐཾ ཧོཏི? ཨིདྷ, བྷིཀྑཝེ, ཨེཀཙྩོ ཁཏྟིཡམྤི པརིཙརཏི, བྲཱཧྨཎམྤི པརིཙརཏི, གཧཔཏིམྤི པརིཙརཏི, ཨུཙྩཱཝཙཾ ཝཱ པན པརིཙརཏི, སམཎཾ ཝཱ བྲཱཧྨཎཾ ཝཱ མིཙྪཱདིཊྛིཀཾ མིཙྪཱཔཊིཔནྣཾ པརིཙརཏི. ཨཏྠེསཱ, བྷིཀྑཝེ, པཱརིཙརིཡཱ, ནེསཱ ནཏྠཱིཏི ཝདཱམི. སཱ ཙ ཁོ ཨེསཱ, བྷིཀྑཝེ, པཱརིཙརིཡཱ ཧཱིནཱ…པེ… ན ནིབྦཱནཱཡ སཾཝཏྟཏི. ཡོ ཙ ཁོ, བྷིཀྑཝེ, ཏཐཱགཏཾ ཝཱ ཏཐཱགཏསཱཝཀཾ ཝཱ པརིཙརཏི ནིཝིཊྛསདྡྷོ ནིཝིཊྛཔེམོ ཨེཀནྟགཏོ ཨབྷིཔྤསནྣོ. ཨེཏདཱནུཏྟརིཡཾ, བྷིཀྑཝེ, པཱརིཙརིཡཱནཾ སཏྟཱནཾ ཝིསུདྡྷིཡཱ…པེ… ནིབྦཱནསྶ སཙྪིཀིརིཡཱཡ, ཡདིདཾ ཏཐཱགཏཾ ཝཱ ཏཐཱགཏསཱཝཀཾ ཝཱ པརིཙརཏི ནིཝིཊྛསདྡྷོ ནིཝིཊྛཔེམོ ཨེཀནྟགཏོ ཨབྷིཔྤསནྣོ. ཨིདཾ ཝུཙྩཏི, བྷིཀྑཝེ, པཱརིཙརིཡཱནུཏྟརིཡཾ. ཨིཏི དསྶནཱནུཏྟརིཡཾ, སཝནཱནུཏྟརིཡཾ, ལཱབྷཱནུཏྟརིཡཾ, སིཀྑཱནུཏྟརིཡཾ, པཱརིཙརིཡཱནུཏྟརིཡཾ.

‘‘ཨནུསྶཏཱནུཏྟརིཡཉྩ ¶ ཀཐཾ ཧོཏི? ཨིདྷ, བྷིཀྑཝེ, ཨེཀཙྩོ པུཏྟལཱབྷམྤི ཨནུསྶརཏི, དཱརལཱབྷམྤི ཨནུསྶརཏི, དྷནལཱབྷམྤི ཨནུསྶརཏི, ཨུཙྩཱཝཙཾ ཝཱ པན ཨནུསྶརཏི, སམཎཾ ཝཱ བྲཱཧྨཎཾ ཝཱ མིཙྪཱདིཊྛིཀཾ མིཙྪཱཔཊིཔནྣཾ ཨནུསྶརཏི. ཨཏྠེསཱ, བྷིཀྑཝེ, ཨནུསྶཏི, ནེསཱ ནཏྠཱིཏི ཝདཱམི. སཱ ཙ ཁོ ཨེསཱ, བྷིཀྑཝེ, ཨནུསྶཏི ཧཱིནཱ…པེ… ན ནིབྦཱནཱཡ སཾཝཏྟཏི. ཡོ ཙ ཁོ, བྷིཀྑཝེ, ཏཐཱགཏཾ ཝཱ ¶ ཏཐཱགཏསཱཝཀཾ ཝཱ ཨནུསྶརཏི ནིཝིཊྛསདྡྷོ ནིཝིཊྛཔེམོ ཨེཀནྟགཏོ ཨབྷིཔྤསནྣོ. ཨེཏདཱནུཏྟརིཡཾ, བྷིཀྑཝེ, ཨནུསྶཏཱིནཾ སཏྟཱནཾ ཝིསུདྡྷིཡཱ…པེ… ནིབྦཱནསྶ སཙྪིཀིརིཡཱཡ, ཡདིདཾ ཏཐཱགཏཾ ཝཱ ཏཐཱགཏསཱཝཀཾ ཝཱ ཨནུསྶརཏི ནིཝིཊྛསདྡྷོ ནིཝིཊྛཔེམོ ཨེཀནྟགཏོ ཨབྷིཔྤསནྣོ. ཨིདཾ ¶ ཝུཙྩཏི, བྷིཀྑཝེ, ཨནུསྶཏཱནུཏྟརིཡཾ. ཨིམཱནི ཁོ, བྷིཀྑཝེ, ཚ ཨནུཏྟརིཡཱནཱི’’ཏི (ཨ. ནི. ༦.༣༠).

སཏྟ ནིདྡསཝཏྠཱུནཱིཏི ཨེཏྠ ནཏྠི ཨེཏསྶ དསཱཏི ནིདྡསོ. ནིདྡསསྶ ནིདྡསབྷཱཝསྶ ཝཏྠཱུནི ཀཱརཎཱནི ནིདྡསཝཏྠཱུནི. ཁཱིཎཱསཝོ ཧི དསཝསྶཀཱལེ པརིནིབྦུཏོ པུན པཊིསནྡྷིཡཱ ཨབྷཱཝཱ པུན དསཝསྶོ ན ཧོཏཱིཏི ནིདྡསོཏི ཝུཙྩཏི. ན ཀེཝལཉྩ དསཝསྶོཝ ན ཧོཏི, ནཝཝསྶོཔི…པེ… ཨེཀམུཧུཏྟིཀོཔི ན ཧོཏིཡེཝ. ན ཀེཝལཉྩ དསཝསྶཀཱལེ པརིནིབྦུཏོ, སཏྟཝསྶིཀཀཱལེ པརིནིབྦུཏོཔི ནིསྶཏྟོ ནིདྡསོ ནིམུཧུཏྟོ ཧོཏིཡེཝ. ཏིཏྠིཡསམཡེ ཨུཔྤནྣཝོཧཱརཾ པན སཱསནེ ཁཱིཎཱསཝསྶ ཨཱརོཔེཏྭཱ ཏཏྠ ཏཱདིསསྶ ཨབྷཱཝཾ, ཨིདྷ ཙ སབྦྷཱཝཾ དསྶེནྟོ བྷགཝཱ ཏཱདིསསབྷཱཝསྶ ཀཱརཎཱནི ‘‘སཏྟ ནིདྡསཝཏྠཱུནཱི’’ཏི ཨཱཧ. ཡཐཱཧ –

‘‘སཏྟིམཱནི, བྷིཀྑཝེ, ནིདྡསཝཏྠཱུནི. ཀཏམཱནི སཏྟ? ཨིདྷ, བྷིཀྑཝེ, བྷིཀྑུ སིཀྑཱསམཱདཱནེ ཏིབྦཙྪནྡོ ཧོཏི, ཨཱཡཏིཉྩ སིཀྑཱསམཱདཱནེ ཨཝིགཏཔེམོ. དྷམྨནིསནྟིཡཱ ཏིབྦཙྪནྡོ ཧོཏི, ཨཱཡཏིཉྩ དྷམྨནིསནྟིཡཱ ཨཝིགཏཔེམོ. ཨིཙྪཱཝིནཡེ ཏིབྦཙྪནྡོ ཧོཏི, ཨཱཡཏིཉྩ ཨིཙྪཱཝིནཡེ ཨཝིགཏཔེམོ. པཊིསལླཱནེ ཏིབྦཙྪནྡོ ཧོཏི, ཨཱཡཏིཉྩ པཊིསལླཱནེ ཨཝིགཏཔེམོ. ཝཱིརིཡཱརམྦྷེ ཏིབྦཙྪནྡོ ཧོཏི, ཨཱཡཏིཉྩ ཝཱིརིཡཱརམྦྷེ ཨཝིགཏཔེམོ ¶ . སཏིནེཔཀྐེ ཏིབྦཙྪནྡོ ཧོཏི, ཨཱཡཏིཉྩ སཏིནེཔཀྐེ ཨཝིགཏཔེམོ. དིཊྛིཔཊིཝེདྷེ ཏིབྦཙྪནྡོ ཧོཏི, ཨཱཡཏིཉྩ དིཊྛིཔཊིཝེདྷེ ཨཝིགཏཔེམོ. ཨིམཱནི ཁོ, བྷིཀྑཝེ, སཏྟ ནིདྡསཝཏྠཱུནཱི’’ཏི (ཨ. ནི. ༧.༢༠).

ཐེརོཔི ཏཐེཝ དེསནཾ ཨུདྡྷརིཏྭཱ ‘‘སཏྟ ནིདྡསཝཏྠཱུནཱི’’ཏི ཨཱཧ.

ཨཊྛ ཨབྷིབྷཱཡཏནཱནཱིཏི ཨེཏྠ ཨབྷིབྷུཡྻམཱནཱནི ཨཱཡཏནཱནི ཨེཏེསཾ ཛྷཱནཱནནྟི ཨབྷིབྷཱཡཏནཱནི, ཛྷཱནཱནི. ཨཱཡཏནཱནཱིཏི ཨདྷིཊྛཱནཊྛེན ཨཱཡཏནསངྑཱཏཱནི ཀསིཎཱརམྨཎཱནི. ཉཱཎུཏྟརིཀོ ཧི པུགྒལོ ཝིསདཉཱཎོ ¶ ‘‘ཀིཾ ཨེཏྠ ཨཱརམྨཎེ སམཱཔཛྫིཏབྦཾ. ན མཡ྄ཧཾ ཙིཏྟེཀགྒཏཱཀརཎེ བྷཱརོ ཨཏྠཱི’’ཏི, ཏཱནི ཨཱརམྨཎཱནི ཨབྷིབྷཝིཏྭཱ སམཱཔཛྫཏི, སཧ ནིམིཏྟུཔྤཱདེནེཝེཏྠ ¶ ཨཔྤནཾ ནིབྦཏྟེཏཱིཏི ཨཏྠོ. ཨེཝཾ ཨུཔྤཱདིཏཱནི ཛྷཱནཱནི ‘‘ཨབྷིབྷཱཡཏནཱནཱི’’ཏི ཝུཙྩནྟི.

‘‘ཀཏམཱནི (ཨ. ནི. ༨.༦༥) ཨཊྛ? ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི, ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི ཨེཝཾསཉྙཱི ཧོཏི. ཨིདཾ པཋམཾ ཨབྷིབྷཱཡཏནཾ.

‘‘ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ཨཔྤམཱཎཱནི སུཝཎྞདུབྦཎྞཱནི, ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི ཨེཝཾསཉྙཱི ཧོཏི. ཨིདཾ དུཏིཡཾ ཨབྷིབྷཱཡཏནཾ.

‘‘ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི, ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི ཨེཝཾསཉྙཱི ཧོཏི. ཨིདཾ ཏཏིཡཾ ཨབྷིབྷཱཡཏནཾ.

‘‘ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ཨཔྤམཱཎཱནི སུཝཎྞདུབྦཎྞཱནི, ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི ཨེཝཾསཉྙཱི ཧོཏི. ཨིདཾ ཙཏུཏྠཾ ཨབྷིབྷཱཡཏནཾ.

‘‘ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ནཱིལཱནི ནཱིལཝཎྞཱནི ནཱིལནིདསྶནཱནི ནཱིལནིབྷཱསཱནི. སེཡྻཐཱཔི ནཱམ ཨུམཱཔུཔྥཾ ནཱིལཾ ནཱིལཝཎྞཾ ནཱིལནིདསྶནཾ ནཱིལནིབྷཱསཾ, སེཡྻཐཱཔི ཝཱ པན ཏཾ ཝཏྠཾ བཱརཱཎསེཡྻཀཾ ཨུབྷཏོབྷཱགཝིམཊྛཾ ནཱིལཾ ནཱིལཝཎྞཾ ནཱིལནིདསྶནཾ ནཱིལནིབྷཱསཾ, ཨེཝམེཝ ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ནཱིལཱནི ནཱིལཝཎྞཱནི ནཱིལནིདསྶནཱནི ནཱིལནིབྷཱསཱནི, ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི ཨེཝཾསཉྙཱི ཧོཏི. ཨིདཾ པཉྩམཾ ཨབྷིབྷཱཡཏནཾ.

‘‘ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པཱིཏཱནི པཱིཏཝཎྞཱནི པཱིཏནིདསྶནཱནི པཱིཏནིབྷཱསཱནི. སེཡྻཐཱཔི ནཱམ ཀཎིཀཱརཔུཔྥཾ པཱིཏཾ པཱིཏཝཎྞཾ པཱིཏནིདསྶནཾ ¶ པཱིཏནིབྷཱསཾ, སེཡྻཐཱཔི ཝཱ པན ཏཾ ཝཏྠཾ བཱརཱཎསེཡྻཀཾ ཨུབྷཏོབྷཱགཝིམཊྛཾ ¶ པཱིཏཾ ¶ པཱིཏཝཎྞཾ པཱིཏནིདསྶནཾ པཱིཏནིབྷཱསཾ, ཨེཝམེཝ ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པཱིཏཱནི པཱིཏཝཎྞཱནི པཱིཏནིདསྶནཱནི པཱིཏནིབྷཱསཱནི, ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི ཨེཝཾསཉྙཱི ཧོཏི. ཨིདཾ ཚཊྛཾ ཨབྷིབྷཱཡཏནཾ.

‘‘ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ལོཧིཏཀཱནི ལོཧིཏཀཝཎྞཱནི ལོཧིཏཀནིདསྶནཱནི ལོཧིཏཀནིབྷཱསཱནི. སེཡྻཐཱཔི ནཱམ བནྡྷུཛཱིཝཀཔུཔྥཾ ལོཧིཏཀཾ ལོཧིཏཀཝཎྞཾ ལོཧིཏཀནིདསྶནཾ ལོཧིཏཀནིབྷཱསཾ, སེཡྻཐཱཔི ཝཱ པན ཏཾ ཝཏྠཾ བཱརཱཎསེཡྻཀཾ ཨུབྷཏོབྷཱགཝིམཊྛཾ ལོཧིཏཀཾ ལོཧིཏཀཝཎྞཾ ལོཧིཏཀནིདསྶནཾ ལོཧིཏཀནིབྷཱསཾ, ཨེཝམེཝ ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ལོཧིཏཀཱནི ལོཧིཏཀཝཎྞཱནི ལོཧིཏཀནིདསྶནཱནི ལོཧིཏཀནིབྷཱསཱནི, ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི ཨེཝཾསཉྙཱི ཧོཏི. ཨིདཾ སཏྟམཾ ཨབྷིབྷཱཡཏནཾ.

‘‘ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ཨོདཱཏཱནི ཨོདཱཏཝཎྞཱནི ཨོདཱཏནིདསྶནཱནི ཨོདཱཏནིབྷཱསཱནི. སེཡྻཐཱཔི ནཱམ ཨོསདྷིཏཱརཀཱ ཨོདཱཏཱ ཨོདཱཏཝཎྞཱ ཨོདཱཏནིདསྶནཱ ཨོདཱཏནིབྷཱསཱ, སེཡྻཐཱཔི ཝཱ པན ཏཾ ཝཏྠཾ བཱརཱཎསེཡྻཀཾ ཨུབྷཏོབྷཱགཝིམཊྛཾ ཨོདཱཏཾ ཨོདཱཏཝཎྞཾ ཨོདཱཏནིདསྶནཾ ཨོདཱཏནིབྷཱསཾ, ཨེཝམེཝ ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ཨོདཱཏཱནི ཨོདཱཏཝཎྞཱནི ཨོདཱཏནིདསྶནཱནི ཨོདཱཏནིབྷཱསཱནི, ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི ཨེཝཾསཉྙཱི ཧོཏི. ཨིདཾ ཨཊྛམཾ ཨབྷིབྷཱཡཏནཾ. ཨིམཱནི ཨཊྛ ཨབྷིབྷཱཡཏནཱནི (ཨ. ནི. ༨.༦༥; དཱི. ནི. ༣.༣༥༨).

ནཝ ཨནུཔུབྦཝིཧཱརཱཏི པུབྦཾ པུབྦཾ ཨནུ ཨནུཔུབྦཾ, ཨནུཔུབྦཾ ཝིཧརིཏབྦཏོ སམཱཔཛྫིཏབྦཏོ ཝིཧཱརཱ ཨནུཔུབྦཝིཧཱརཱ, ཨནུཔཊིཔཱཊིཡཱ སམཱཔཛྫིཏབྦཝིཧཱརཱཏི ཨཏྠོ.

‘‘ཀཏམེ ¶ ནཝ? ཨིདྷ, བྷིཀྑཝེ, བྷིཀྑུ ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི སཝིཏཀྐཾ སཝིཙཱརཾ ཝིཝེཀཛཾ པཱིཏིསུཁཾ པཋམཾ ཛྷཱནཾ ཨུཔསམྤཛྫ ཝིཧརཏི. ཝིཏཀྐཝིཙཱརཱནཾ ཝཱུཔསམཱ ཨཛ྄ཛྷཏྟཾ སམྤསཱདནཾ ཙེཏསོ ཨེཀོདིབྷཱཝཾ ཨཝིཏཀྐཾ ཨཝིཙཱརཾ སམཱདྷིཛཾ པཱིཏིསུཁཾ དུཏིཡཾ ཛྷཱནཾ ཨུཔསམྤཛྫ ཝིཧརཏི. པཱིཏིཡཱ ཙ ¶ ཝིརཱགཱ ཨུཔེཀྑཀོ ཙ ཝིཧརཏི སཏོ སམྤཛཱནོ, སུཁཉྩ ཀཱཡེན པཊིསཾཝེདེཏི, ཡཾ ཏཾ ཨརིཡཱ ཨཱཙིཀྑནྟི ‘ཨུཔེཀྑཀོ སཏིམཱ སུཁཝིཧཱརཱི’ཏི, ཏཏིཡཾ ཛྷཱནཾ ཨུཔསམྤཛྫ ཝིཧརཏི. སུཁསྶ ཙ པཧཱནཱ དུཀྑསྶ ཙ པཧཱནཱ པུབྦེཝ སོམནསྶདོམནསྶཱནཾ ¶ ཨཏྠངྒམཱ ཨདུཀྑམསུཁཾ ཨུཔེཀྑཱསཏིཔཱརིསུདྡྷིཾ ཙཏུཏྠཾ ཛྷཱནཾ ཨུཔསམྤཛྫ ཝིཧརཏི. སབྦསོ རཱུཔསཉྙཱནཾ སམཏིཀྐམཱ པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ ‘ཨནནྟོ ཨཱཀཱསོ’ཏི ཨཱཀཱསཱནཉྩཱཡཏནཾ ཨུཔསམྤཛྫ ཝིཧརཏི. སབྦསོ ཨཱཀཱསཱནཉྩཱཡཏནཾ སམཏིཀྐམྨ ‘ཨནནྟཾ ཝིཉྙཱཎ’ནྟི ཝིཉྙཱཎཉྩཱཡཏནཾ ཨུཔསམྤཛྫ ཝིཧརཏི. སབྦསོ ཝིཉྙཱཎཉྩཱཡཏནཾ སམཏིཀྐམྨ ‘ནཏྠི ཀིཉྩཱི’ཏི ཨཱཀིཉྩཉྙཱཡཏནཾ ཨུཔསམྤཛྫ ཝིཧརཏི. སབྦསོ ཨཱཀིཉྩཉྙཱཡཏནཾ སམཏིཀྐམྨ ནེཝསཉྙཱནཱསཉྙཱཡཏནཾ ཨུཔསམྤཛྫ ཝིཧརཏི. སབྦསོ ནེཝསཉྙཱནཱསཉྙཱཡཏནཾ སམཏིཀྐམྨ སཉྙཱཝེདཡིཏནིརོདྷཾ ཨུཔསམྤཛྫ ཝིཧརཏཱི’’ཏི (ཨ. ནི. ༩.༣༣; དཱི. ནི. ༣.༣༤༣, ༣༥༩) ཝུཏྟཱ ནཝ ཨནུཔུབྦཝིཧཱརཱཝ.

དས ནིཛྫརཝཏྠཱུནཱིཏི མིཙྪཱདིཊྛཱདཱིནི ནིཛྫརཡནྟི ནཱསཡནྟཱིཏི ནིཛྫརཱནི. ཝཏྠཱུནཱིཏི ཀཱརཎཱནི. ནིཛྫརཱནི ཙ ཏཱནི ཝཏྠཱུནི ཙཱཏི ནིཛྫརཝཏྠཱུནི. སམྨཱདིཊྛཱདཱིནཾ ཨེཏཾ ཨདྷིཝཙནཾ.

‘‘ཀཏམཱནི (ཨ. ནི. ༡༠.༡༠༦; དཱི. ནི. ༣.༣༦༠) དས? སམྨཱདིཊྛིཀསྶ, བྷིཀྑཝེ, མིཙྪཱདིཊྛི ནིཛྫིཎྞཱ ཧོཏི. ཡེ ཙ མིཙྪཱདིཊྛིཔཙྩཡཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི, ཏེ ཙསྶ ནིཛྫིཎྞཱ ཧོནྟི, སམྨཱདིཊྛིཔཙྩཡཱ ཙ ཨནེཀེ ཀུསལཱ དྷམྨཱ བྷཱཝནཱཔཱརིཔཱུརིཾ གཙྪནྟི.

‘‘སམྨཱསངྐཔྤསྶ, བྷིཀྑཝེ, མིཙྪཱསངྐཔྤོ ནིཛྫིཎྞོ ཧོཏི. ཡེ ཙ མིཙྪཱསངྐཔྤཔཙྩཡཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི ¶ , ཏེ ཙསྶ ནིཛྫིཎྞཱ ཧོནྟི, སམྨཱསངྐཔྤཔཙྩཡཱ ཙ ཨནེཀེ ཀུསལཱ དྷམྨཱ བྷཱཝནཱཔཱརིཔཱུརིཾ གཙྪནྟི.

‘‘སམྨཱཝཱཙསྶ, བྷིཀྑཝེ, མིཙྪཱཝཱཙཱ ནིཛྫིཎྞཱ ཧོཏི. ཡེ ཙ མིཙྪཱཝཱཙཱཔཙྩཡཱ ¶ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི, ཏེ ཙསྶ ནིཛྫིཎྞཱ ཧོནྟི, སམྨཱཝཱཙཱཔཙྩཡཱ ཙ ཨནེཀེ ཀུསལཱ དྷམྨཱ བྷཱཝནཱཔཱརིཔཱུརིཾ གཙྪནྟི.

‘‘སམྨཱཀམྨནྟསྶ, བྷིཀྑཝེ, མིཙྪཱཀམྨནྟོ ནིཛྫིཎྞོ ཧོཏི. ཡེ ཙ མིཙྪཱཀམྨནྟཔཙྩཡཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི, ཏེ ཙསྶ ནིཛྫིཎྞཱ ཧོནྟི, སམྨཱཀམྨནྟཔཙྩཡཱ ཙ ཨནེཀེ ཀུསལཱ དྷམྨཱ བྷཱཝནཱཔཱརིཔཱུརིཾ གཙྪནྟི.

‘‘སམྨཱཨཱཛཱིཝསྶ, བྷིཀྑཝེ, མིཙྪཱཨཱཛཱིཝོ ནིཛྫིཎྞོ ཧོཏི. ཡེ ཙ མིཙྪཱཨཱཛཱིཝཔཙྩཡཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི, ཏེ ¶ ཙསྶ ནིཛྫིཎྞཱ ཧོནྟི, སམྨཱཨཱཛཱིཝཔཙྩཡཱ ཙ ཨནེཀེ ཀུསལཱ དྷམྨཱ བྷཱཝནཱཔཱརིཔཱུརིཾ གཙྪནྟི.

‘‘སམྨཱཝཱཡཱམསྶ, བྷིཀྑཝེ, མིཙྪཱཝཱཡཱམོ ནིཛྫིཎྞོ ཧོཏི. ཡེ ཙ མིཙྪཱཝཱཡཱམཔཙྩཡཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི, ཏེ ཙསྶ ནིཛྫིཎྞཱ ཧོནྟི, སམྨཱཝཱཡཱམཔཙྩཡཱ ཙ ཨནེཀེ ཀུསལཱ དྷམྨཱ བྷཱཝནཱཔཱརིཔཱུརིཾ གཙྪནྟི.

‘‘སམྨཱསཏིསྶ, བྷིཀྑཝེ, མིཙྪཱསཏི ནིཛྫིཎྞཱ ཧོཏི. ཡེ ཙ མིཙྪཱསཏིཔཙྩཡཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི, ཏེ ཙསྶ ནིཛྫིཎྞཱ ཧོནྟི, སམྨཱསཏིཔཙྩཡཱ ཙ ཨནེཀེ ཀུསལཱ དྷམྨཱ བྷཱཝནཱཔཱརིཔཱུརིཾ གཙྪནྟི.

‘‘སམྨཱསམཱདྷིསྶ, བྷིཀྑཝེ, མིཙྪཱསམཱདྷི ནིཛྫིཎྞོ ཧོཏི. ཡེ ཙ མིཙྪཱསམཱདྷིཔཙྩཡཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི, ཏེ ཙསྶ ནིཛྫིཎྞཱ ཧོནྟི, སམྨཱསམཱདྷིཔཙྩཡཱ ཙ ཨནེཀེ ཀུསལཱ དྷམྨཱ བྷཱཝནཱཔཱརིཔཱུརིཾ གཙྪནྟི.

‘‘སམྨཱཉཱཎིསྶ, བྷིཀྑཝེ, མིཙྪཱཉཱཎཾ ནིཛྫིཎྞཾ ཧོཏི. ཡེ ཙ མིཙྪཱཉཱཎཔཙྩཡཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི, ཏེ ཙསྶ ནིཛྫིཎྞཱ ཧོནྟི, སམྨཱཉཱཎཔཙྩཡཱ ཙ ཨནེཀེ ཀུསལཱ དྷམྨཱ བྷཱཝནཱཔཱརིཔཱུརིཾ གཙྪནྟི.

‘‘སམྨཱཝིམུཏྟིསྶ ¶ , བྷིཀྑཝེ, མིཙྪཱཝིམུཏྟི ནིཛྫིཎྞཱ ཧོཏི. ཡེ ཙ མིཙྪཱཝིམུཏྟིཔཙྩཡཱ ¶ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི, ཏེ ཙསྶ ནིཛྫིཎྞཱ ཧོནྟི, སམྨཱཝིམུཏྟིཔཙྩཡཱ ཙ ཨནེཀེ ཀུསལཱ དྷམྨཱ བྷཱཝནཱཔཱརིཔཱུརིཾ གཙྪནྟཱི’’ཏི (ཨ. ནི. ༡༠.༡༠༦; དཱི. ནི. ༣.༣༦༠) ཝུཏྟཱནི དས ནིཛྫརཝཏྠཱུནི.

༣. སབྦཾ, བྷིཀྑཝེ, ཨབྷིཉྙེཡྻནྟིཨཱདི བྷགཝཏཱ ཝུཏྟཾ ཨིདྷ ཨཱཧརིཏྭཱ དསྶིཏནྟི ཝེདིཏབྦཾ. ཀིཉྩ-ཨིཏི ཙ-ཀཱརོ པདཔཱུརཎམཏྟེ ནིཔཱཏོ. ཙཀྑཱདཱིནི ཏིཾས ཝིསྶཛྫནཱནི ཚསུ དྭཱརེསུ ཨེཀེཀསྨིཾ པཉྩ པཉྩ ཀཏྭཱ དྭཱརཱརམྨཎཔཝཏྟིཀྐམེན ནིདྡིཊྛཱནི. ཏཏྠ དུཝིདྷཾ ཙཀྑུ – མཾསཙཀྑུ པཉྙཱཙཀྑུ ཙ. ཏེསུ བུདྡྷཙཀྑུ སམནྟཙཀྑུ ཉཱཎཙཀྑུ དིབྦཙཀྑུ དྷམྨཙཀྑཱུཏི པཉྩཝིདྷཾ པཉྙཱཙཀྑུ. ‘‘ཨདྡསཾ ཁོ ཨཧཾ, བྷིཀྑཝེ, བུདྡྷཙཀྑུནཱ ལོཀཾ ཝོལོཀེནྟོ’’ཏི (མ. ནི. ༡.༢༨༣; ༢.༣༣༩; མཧཱཝ. ༩) ཨིདཾ བུདྡྷཙཀྑུ ནཱམ. ‘‘སམནྟཙཀྑུ ཝུཙྩཏི སབྦཉྙུཏཉྙཱཎ’’ནྟི (ཙཱུལ༹ནི. དྷོཏཀམཱཎཝཔུཙྪཱནིདྡེས ༣༢; མོགྷརཱཛམཱཎཝཔུཙྪཱནིདྡེས ༨༥) ཨིདཾ སམནྟཙཀྑུ ནཱམ. ‘‘ཙཀྑུཾ ཨུདཔཱདི ཉཱཎཾ ཨུདཔཱདཱི’’ཏི (སཾ. ནི. ༥.༡༠༨༡; མཧཱཝ. ༡༥) ཨིདཾ ཉཱཎཙཀྑུ ནཱམ. ‘‘ཨདྡསཾ ཁོ ཨཧཾ, བྷིཀྑཝེ, དིབྦེན ཙཀྑུནཱ ཝིསུདྡྷེནཱ’’ཏི (མ. ནི. ༡.༢༨༥) ཨིདཾ དིབྦཙཀྑུ ནཱམ. ‘‘ཝིརཛཾ ཝཱིཏམལཾ དྷམྨཙཀྑུཾ ཨུདཔཱདཱི’’ཏི (མ. ནི. ༢.༣༩༥) ཨིདཾ ཧེཊྛིམམགྒཏྟཡསངྑཱཏཾ ཉཱཎཾ དྷམྨཙཀྑུ ནཱམ.

མཾསཙཀྑུཔི སསམྦྷཱརཙཀྑུ ¶ , པསཱདཙཀྑཱུཏི དུཝིདྷཾ ཧོཏི. ཡྭཱཡཾ ཨཀྑིཀཱུཔཀེ པཏིཊྛིཏོ ཧེཊྛཱ ཨཀྑིཀཱུཔཀཊྛིཀེན ཨུཔརི བྷམུཀཊྛིཀེན ཨུབྷཏོ ཨཀྑིཀཱུཊེཧི བཧིདྡྷཱ ཨཀྑིཔཁུམེཧི པརིཙྪིནྣོ ཨཀྑིཀཱུཔཀམཛ྄ཛྷཱ ནིཀྑནྟེན ནྷཱརུསུཏྟཀེན མཏྠལུངྒེ ཨཱབདྡྷོ སེཏཀཎྷཱཏིཀཎྷམཎྜལཝིཙིཏྟོ མཾསཔིཎྜོ, ཨིདཾ སསམྦྷཱརཙཀྑུ ནཱམ. ཡོ པན ཨེཏྠ སིཏོ ཨེཏྠ པཊིབདྡྷོ ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོ, ཨིདཾ པསཱདཙཀྑུ ནཱམ. ཨིདམིདྷཱདྷིཔྤེཏཾ. ཏདེཏཾ ཏསྶ སསམྦྷཱརཙཀྑུནོ སེཏམཎྜལཔརིཀྑིཏྟསྶ ཀཎྷམཎྜལསྶ མཛ྄ཛྷེ ཨབྷིམུཁེ ཋིཏཱནཾ སརཱིརསཎྛཱནུཔྤཏྟིདེསེ དིཊྛིམཎྜལེ སཏྟསུ པིཙུཔཊལེསུ ཨཱསིཏྟཏེལཾ པིཙུཔཊལཱནི ཝིཡ སཏྟ ཨཀྑིཔཊལཱནི བྱཱཔེཏྭཱ པམཱཎཏོ མུགྒཝིདལམཏྟཾ ཙཀྑུཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ ¶ སཱདྷཡམཱནཾ ཏིཊྛཏི. ཏཾ ཙཀྑཏཱིཏི ཙཀྑུ, རཱུཔཾ ཨསྶཱདེཏི ཝིབྷཱཝེཏི ཙཱཏི ཨཏྠོ. རཱུཔཡནྟཱིཏི རཱུཔཱ, ཝཎྞཝིཀཱརཾ ཨཱཔཛྫམཱནཱ ཧདཡངྒཏབྷཱཝཾ པཀཱསེནྟཱིཏི ཨཏྠོ. ཙཀྑུཏོ པཝཏྟཾ ཝིཉྙཱཎཾ, ཙཀྑུསྶ ཝཱ ཝིཉྙཱཎཾ ཙཀྑུཝིཉྙཱཎཾ. ཕུསཏཱིཏི ཕསྶོ. ཨུཔསགྒེན པདཾ མཎྜེཏྭཱ སམྥསྶོཏི ཝུཏྟཾ. ཙཀྑུཏོ པཝཏྟོ སམྥསྶོ ཙཀྑུསམྥསྶོ. ཙཀྑུསམྥསྶཔཙྩཡཱཏི ¶ ཙཀྑུཝིཉྙཱཎསམྤཡུཏྟཕསྶཔཙྩཡཱ. ཝེདཡིཏནྟི ཝིནྡནཾ, ཝེདནཱཏི ཨཏྠོ. ཏདེཝ སུཁཡཏཱིཏི སུཁཾ, ཡསྶུཔྤཛྫཏི, ཏཾ སུཁིཏཾ ཀརོཏཱིཏི ཨཏྠོ. སུཊྛུ ཝཱ ཁཱདཏི, ཁནཏི ཙ ཀཱཡཙིཏྟཱབཱདྷནྟི སུཁཾ. དུཀྑཡཏཱིཏི དུཀྑཾ, ཡསྶུཔྤཛྫཏི, ཏཾ དུཀྑིཏཾ ཀརོཏཱིཏི ཨཏྠོ. ན དུཀྑཾ ན སུཁནྟི ཨདུཀྑམསུཁཾ. མ-ཀཱརོ པདསནྡྷིཝསེན ཝུཏྟོ. སོ པན ཙཀྑུསམྥསྶོ ཨཏྟནཱ སམྤཡུཏྟཱཡ ཝེདནཱཡ སཧཛཱཏ ཨཉྙམཉྙནིསྶཡ ཝིཔཱཀཨཱཧཱརསམྤཡུཏྟཨཏྠིཨཝིགཏཝསེན ཨཊྛདྷཱ པཙྩཡོ ཧོཏི, སམྤཊིཙྪནསམྤཡུཏྟཱཡ ཨནནྟརསམནནྟརཨནནྟརཱུཔནིསྶཡནཏྠིཝིགཏཝསེནཔཉྩདྷཱ, སནྟཱིརཎཱདིསམྤཡུཏྟཱནཾ ཨུཔནིསྶཡཝསེནེཝ པཙྩཡོ ཧོཏི.

སུཎཱཏཱིཏི ¶ སོཏཾ. ཏཾ སསམྦྷཱརསོཏབིལསྶ ཨནྟོ ཏནུཏམྦལོམཱཙིཏེ ཨངྒུལིཝེདྷཀསཎྛཱནེ པདེསེ སོཏཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི. སཔྤནྟཱིཏི སདྡཱ, ཨུདཱཧརཱིཡནྟཱིཏི ཨཏྠོ. གྷཱཡཏཱིཏི གྷཱནཾ. ཏཾ སསམྦྷཱརགྷཱནབིལསྶ ཨནྟོ ཨཛཔདསཎྛཱནེ པདེསེ གྷཱནཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི. གནྡྷཡནྟཱིཏི གནྡྷཱ, ཨཏྟནོ ཝཏྠུཾ སཱུཙེནྟཱིཏི ཨཏྠོ. ཛཱིཝིཏམཝ྄ཧཱཡཏཱིཏི ཛིཝ྄ཧཱ, སཱཡནཊྛེན ཝཱ ཛིཝ྄ཧཱ. སཱ སསམྦྷཱརཛིཝ྄ཧཱཡ ཨཏིཨགྒམཱུལཔསྶཱནི ཝཛྫེཏྭཱ ཨུཔརིམཏལམཛ྄ཛྷེ བྷིནྣཨུཔྤལདལགྒསཎྛཱནེ པདེསེ ཛིཝ྄ཧཱཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཱ ཏིཊྛཏི. རསནྟི ཏེ སཏྟཱཏི རསཱ, ཨསྶཱདེནྟཱིཏི ཨཏྠོ. ཀུཙྪིཏཱནཾ སཱསཝདྷམྨཱནཾ ཨཱཡོཏི ཀཱཡོ. ཨཱཡོཏི ཨུཔྤཏྟིདེསོ. སོ ཡཱཝཏཱ ཨིམསྨིཾ ཀཱཡེ ཨུཔཱདིཎྞཔྤཝཏྟི ནཱམ ཨཏྠི, ཏཏྠ ཡེབྷུཡྻེན ཀཱཡཔསཱདོ ཀཱཡཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནོ ཏིཊྛཏི. ཕུསཱིཡནྟཱིཏི ཕོཊྛབྦཱ. མུནཱཏཱིཏི མནོ, ཝིཛཱནཱཏཱིཏི ཨཏྠོ. ཨཏྟནོ ལཀྑཎཾ དྷཱརེནྟཱིཏི དྷམྨཱ ¶ . མནོཏི སཧཱཝཛྫནཾ བྷཝངྒཾ. དྷམྨཱཏི དྭཱདསཔབྷེདཱ དྷམྨཱརམྨཎཱ དྷམྨཱ. མནོཝིཉྙཱཎནྟི ཛཝནམནོཝིཉྙཱཎཾ. མནོསམྥསྶོཏི ཏཾསམྤཡུཏྟོ ཕསྶོ. སོ སམྤཡུཏྟཱཡ ཝེདནཱཡ ཝིཔཱཀཔཙྩཡཝཛྫེཧི སེསེཧི སཏྟཧི པཙྩཡོ ཧོཏི, ཨནནྟརཱཡ ཏེཧེཝ, སེསཱནཾ ཨུཔནིསྶཡཝསེནེཝ པཙྩཡོ ཧོཏི.

རཱུཔཱདཱིནི པཉྩ ཝིསྶཛྫནཱནི ཁནྡྷཝསེན ནིདྡིཊྛཱནི. སཱིཏཱདཱིཧི རུཔྤཏི པཱིལཱི༹ཡཏཱིཏི རཱུཔཾ. ཝེདཡཏཱིཏི ཝེདནཱ. སཉྫཱནཱཏཱིཏི སཉྙཱ. སངྑརོནྟཱིཏི སངྑཱརཱ. ཝིཛཱནཱཏཱིཏི ཝིཉྙཱཎཾ. ཙཀྑཱདཱིནི དྷམྨཝིཙཱརཔརིཡནྟཱནི དས ཚཀྐཝསེན, སཊྛི ཝིསྶཛྫནཱནི པིཡརཱུཔསཱཏརཱུཔཝསེན ནིདྡིཊྛཱནི. ཙཀྑུསམྥསྶཛཱདིཀཱ ཝེདནཱ ཏཾཏཾསམྤཡུཏྟཱཝ. རཱུཔེསུ སཉྙཱ རཱུཔསཉྙཱ. སཉྩེཏཡཏཱིཏི སཉྩེཏནཱ, ཨབྷིསནྡཧཏཱིཏི ཨཏྠོ. ཏསཏཱིཏི ཏཎྷཱ, པིཔཱསཏཱིཏི ¶ ཨཏྠོ. ཝིཏཀྐེཏཱིཏི ཝིཏཀྐོ, ཝིཏཀྐནཾ ཝཱ ཝིཏཀྐོ, ཨཱུཧནནྟི ཝུཏྟཾ ཧོཏི. ཨཱརམྨཎེ ཏེན ཙིཏྟཾ ཝིཙརཏཱིཏི ¶ ཝིཙཱརོ, ཝིཙརཎཾ ཝཱ ཝིཙཱརོ, ཨནུསཉྩརཎནྟི ཝུཏྟཾ ཧོཏི.

༤. པཐཝཱིདྷཱཏཱདཱིནི ཚ ཝིསྶཛྫནཱནི སཾཁིཏྟེན ནཱམརཱུཔཝཝཏྠཱནཝསེན ནིདྡིཊྛཱནི. པཏྠཊཏྟཱ པཐཝཱི. ཨཔྤེཏི, ཨཱཔཱིཡཏི, ཨཔྤཱཡཏཱིཏི ཝཱ ཨཱཔོ. ཏེཛཡཏཱིཏི ཏེཛོ. ཝཱཡཏཱིཏི ཝཱཡོ. ན ཀསྶཏི ན ནིཀསྶཏི, ཀསིཏུཾ ཚིནྡིཏུཾ བྷིནྡིཏུཾ ཝཱ ན སཀྐཱཏི ཨཱཀཱསོ. ནིསྶཏྟཊྛེན དྷཱཏུ.

པཐཝཱིཀསིཎཱདཱིནི དས ཝིསྶཛྫནཱནི ཀསིཎབྷཱཝནཱཝསེན ནིདྡིཊྛཱནི. ཀསིཎནྟི སཀལཕརཎཝསེན ཀསིཎམཎྜལམྤི ཏསྨིཾ ཨུཔཊྛིཏནིམིཏྟམྤི ཏདཱརམྨཎཾ ཛྷཱནམྤི ཝུཙྩཏི. ཨིདྷ པན ཛྷཱནཾ ཨདྷིཔྤེཏཾ. ཨཱདིམྷི ཙཏྟཱརི མཧཱབྷཱུཏཀསིཎཱརམྨཎཱནི ཛྷཱནཱནི, ཏཏོ པརཱནི ཙཏྟཱརི ཝཎྞཀསིཎཱརམྨཎཱནི. ཨཱཀཱསཀསིཎནྟི པརིཙྪེདཱཀཱསོ, ཏདཱརམྨཎཉྩ ཛྷཱནཾ, ཀསིཎུགྒྷཱཊིམཱཀཱསོ, ཏདཱརམྨཎཉྩ ཨཱཀཱསཱནཉྩཱཡཏནཾ. ཝིཉྙཱཎཀསིཎནྟི ཨཱཀཱསཱནཉྩཱཡཏནཝིཉྙཱཎཾ, ཏདཱརམྨཎཉྩ ཝིཉྙཱཎཉྩཱཡཏནཾ.

ཀེསཱདཱིནི དྭཏྟིཾས ཝིསྶཛྫནཱནི དྭཏྟིཾསཱཀཱརཀམྨཊྛཱནཝསེན ནིདྡིཊྛཱནི. ཏེསུ པན ཀེསཱདཱིསུ པཊིཀཱུལཏོ ཨུཔཊྛིཏེསུ ཀཱཡགཏཱསཏིཝསེན ཨསུབྷཀམྨཊྛཱནཾ ¶ ཧོཏི, ཝཎྞཏོ ཨུཔཊྛིཏེསུ ཀསིཎཀམྨཊྛཱནཾ ཧོཏི, དྷཱཏུཏོ ཨུཔཊྛིཏེསུ ཙཏུདྷཱཏུཝཝཏྠཱནཀམྨཊྛཱནཾ ཧོཏི, ཀེསཱཏིཨཱདཱིནི ཙ པཊིཀཱུལཏོ ཝཎྞཏོ ཝཱ ཨུཔཊྛིཏཱནཾ ཏདཱརམྨཎཱནི ཛྷཱནཱནི, དྷཱཏུཏོ ཨུཔཊྛིཏསྶ ཏེ ཙ ཀོཊྛཱསཱ ཏདཱརམྨཎཱ ཙ དྷཱཏུབྷཱཝནཱ ཝེདིཏབྦཱ.

ཀེསཱ ཨུབྷོསུ པསྶེསུ ཀཎྞཙཱུལི༹ཀཱཧི པུརཏོ ནལཱཊནྟེན, པཙྪཏོ ཙ གལཝཱཊཀེན པརིཙྪིནྣཱ སཱིསཀཊཱཧཝེཋནཙམྨེ ཝཱིཧགྒམཏྟཾ པཝིསིཏྭཱ ཋིཏཱ ཨནེཀསཏསཧསྶསངྑཱ.

ལོམཱ ཋཔེཏྭཱ ཀེསཱདཱིནཾ པཏིཊྛིཏོཀཱསཾ ཧཏྠཏལཔཱདཏལཱནི ཙ ཡེབྷུཡྻེན སརཱིརཙམྨེ ནཝནཝུཏིཡཱ ལོམཀཱུཔསཧསྶེསུ ལིཀྑཱམཏྟཾ པཝིསིཏྭཱ ཋིཏཱ.

ནཁཱ ཨངྒུལཱིནཾ ཨགྒཔིཊྛེསུ ཋིཏཱ ཝཱིསཏི.

དནྟཱ དྭཱིསུ ཧཎུཀཊྛིཀེསུ ཋིཏཱ ཡེབྷུཡྻེན དྭཏྟིཾས.

ཏཙོ ¶ སཀལསརཱིརཾ པརིཡོནནྡྷིཏྭཱ པཱཀཊཀིལོམཀསྶ ཨུཔརི ཚཝིཡཱ ཧེཊྛཱ ཋིཏཾ ཙམྨཾ.

མཾསཾ སཱདྷིཀཱནི ¶ ཏཱིཎི ཨཊྛིསཏཱནི ཨནུལིམྤིཏྭཱ ཋིཏཱནི ནཝམཾསཔེསིསཏཱནི.

ནྷཱརཱུ སཀལསརཱིརེ ཨཊྛཱིནི ཨཱབནྡྷིཏྭཱ ཋིཏཱནི ནཝ ནྷཱརུསཏཱནི.

ཨཊྛཱི སཀལསརཱིརེ ཧེཊྛཱ ཨཊྛཱིནཾ ཨུཔརི ཋིཏཱནི སཱདྷིཀཱནི ཏཱིཎི ཨཊྛིསཏཱནི.

ཨཊྛིམིཉྫཱ ཏེསཾ ཏེསཾ ཨཊྛཱིནཾ ཨབྦྷནྟརེ ཋིཏཱ མིཉྫཱ.

ཝཀྐཾ གལཝཱཊཀཱ ནིཀྑནྟེན ཨེཀམཱུལེན ཐོཀཾ གནྟྭཱ དྭིདྷཱ བྷིནྣེན ཐཱུལནྷཱརུནཱ ཝིནིབདྡྷཱ ཧུཏྭཱ ཧདཡམཾསཾ པརིཀྑིཔིཏྭཱ ཋིཏཱ དྭེ མཾསཔིཎྜིཀཱ.

ཧདཡཾ སརཱིརབྦྷནྟརེ དྭིནྣཾ ཐནཱནཾ མཛ྄ཛྷེ ཋིཏཾ ཨནྟོ ཙིཏྟསནྣིསྶཡཾ ཨཌྜྷཔསཏམཏྟལོཧིཏཔུཎྞཾ པུནྣཱགཊྛིཔཏིཊྛཱནམཏྟཱཝཱཊཀཾ ཧདཡམཾསཾ.

ཡཀནཾ དྭིནྣཾ ཐནཱནཾ ཨབྦྷནྟརེ དཀྑིཎཔསྶཾ ནིསྶཱཡ ཋིཏཾ ཡམཀམཾསཔཊལཾ.

ཀིལོམཀཾ ཧདཡཝཀྐཱནི པཊིཙྪཱདེཏྭཱ ཋིཏཾ པཊིཙྪནྣཀིལོམཀསངྑཱཏཉྩ སཀལསརཱིརེ ཙམྨསྶ ཧེཊྛཏོ མཾསཾ པརིཡོནནྡྷིཏྭཱ ཋིཏཾ ཨཔྤཊིཙྪནྣཀིལོམཀསངྑཱཏཉྩཱཏི དུཝིདྷཾ པརིཡོནཧནམཾསཾ.

པིཧཀཾ ཧདཡསྶ ཝཱམཔསྶེ ཨུདརཔཊལསྶ མཏྠཀཔསྶཾ ནིསྶཱཡ ཋིཏཾ ཨུདརཛིཝ྄ཧཱམཾསཾ.

པཔྥཱསཾ སརཱིརབྦྷནྟརེ དྭིནྣཾ ཐནཱནཾ ཨནྟརེ ཧདཡཡཀནཱནཾ ཨུཔརི ཚཱདེཏྭཱ ཨོལམྦནྟཾ ཋིཏཾ དྭཏྟིཾསམཾསཁཎྜཔྤབྷེདཾ པཔྥཱསམཾསཾ.

ཨནྟཾ ¶ ཨུཔརི གལཝཱཊཀེ ཧེཊྛཱ ཀརཱིསམགྒེ ཝིནིབནྡྷཏྟཱ གལཝཱཊཀཀརཱིསམགྒཔརིཡནྟེ སརཱིརབྦྷནྟརེ ཋིཏཱ པུརིསསྶ དྭཏྟིཾསཧཏྠཱ ཨིཏྠིཡཱ ཨཊྛཝཱིསཏིཧཏྠཱ ཨེཀཝཱིསཏིཡཱ ཋཱནེསུ ཨོབྷགྒཱ ཨནྟཝཊྚི.

ཨནྟགུཎཾ ¶ ཨནྟབྷོགེ ཨེཀཏོ ཨགལནྟེ ཨཱབནྡྷིཏྭཱ ཨེཀཝཱིསཏིཡཱ ཨནྟབྷོགཱནཾ ཨནྟརཱ ཋིཏཾ བནྡྷནཾ.

ཨུདརིཡཾ དནྟམུསལསཉྩུཎྞིཏཾ ཛིཝ྄ཧཱཧཏྠཔརིཝཏྟིཏཾ ཁེལ༹ལཱལཱཔལིབུདྡྷཾ ཏཾཁཎཝིགཏཝཎྞགནྡྷརསཱདིསམྤདཾ ཏནྟཝཱཡཁལིསུཝཱནཝམཐུསདིསཾ ནིཔཏིཏྭཱ པིཏྟསེམྷཝཱཏཔལིཝེཋིཏཾ ¶ ཧུཏྭཱ ཨུདརགྒིསནྟཱཔཝེགཀུཐིཏཾ ཀིམིཀུལཱཀུལཾ ཨུཔརཱུཔརི ཕེཎབུབྦུལ༹ཀཱནི མུཉྩནྟཾ པརམཀསམྦུཀདུགྒནྡྷཛེགུཙྪབྷཱཝཾ ཨཱཔཛྫིཏྭཱ ཨཱམཱསཡསངྑཱཏེ ཨུཔརིནཱབྷིཨནྟཔཊལེ ཋིཏཾ ནཱནཔྤཀཱརཀཾ ཨསིཏཔཱིཏཁཱཡིཏསཱཡིཏཾ.

ཀརཱིསཾ པཀྐཱསཡསངྑཱཏེ ཧེཊྛཱ ནཱབྷིཔིཊྛིཀཎྚཀམཱུལཱནཾ ཨནྟརེ ཨུབྦེདྷེན ཨཊྛངྒུལམཏྟེ ཨནྟཱཝསཱནེ ཋིཏཾ ཝཙྩཾ.

པིཏྟཾ ཧདཡམཾསཔཔྥཱསཱནཾ ཨནྟརེ ཡཀནམཾསཾ ནིསྶཱཡ ཋིཏཾ མཧཱཀོསཱཏཀཱིཀོསཀསདིསེ པིཏྟཀོསཀེ ཋིཏཾ བདྡྷཔིཏྟསངྑཱཏཉྩ, ཀེསལོམནཁདནྟཱནཾ མཾསཝིནིམུཏྟཊྛཱནཉྩེཝ ཐདྡྷསུཀྑཙམྨཉྩ ཋཔེཏྭཱ ཨཝསེསཾ སརཱིརཾ བྱཱཔེཏྭཱ ཋིཏཾ ཨབདྡྷཔིཏྟསངྑཱཏཉྩཱཏི དུཝིདྷཾ པིཏྟཾ.

སེམྷཾ ཨུདརཔཊལེ ཋིཏཾ ཨེཀཔཏྠཔཱུརཔྤམཱཎཾ སེམྷཾ.

པུབྦོ ཁཱཎུཀཎྚཀཔཧརཎགྒིཛཱལཱདཱིཧི ཨབྷིཧཏེ ཝཱ སརཱིརཔྤདེསེ ཨབྦྷནྟརདྷཱཏུཀྑོབྷཝསེན ཝཱ ཨུཔྤནྣེསུ གཎྜཔཱིལ༹ཀཱདཱིསུ པརིཔཀྐལོཧིཏཔརིཎཱམོ. ལོཧིཏཾ ཡཀནསྶ ཧེཊྛཱབྷཱགཾ པཱུརེཏྭཱ ཧདཡཝཀྐཔཔྥཱསཱནཾ ཨུཔརི ཐོཀཾ ཐོཀཾ པགྒྷརནྟཾ ཝཀྐཧདཡཡཀནཔཔྥཱསེ ཏེམཡམཱནཾ ཋིཏཾ ཨེཀཔཏྠཔཱུརམཏྟཾ སནྣིཙིཏལོཧིཏསངྑཱཏཉྩ, ཀེསལོམནཁདནྟཱནཾ མཾསཝིནིམུཏྟཊྛཱནཉྩེཝ ཐདྡྷསུཀྑཙམྨཉྩ ཋཔེཏྭཱ དྷམནིཛཱལཱནུསཱརེན སབྦཾ ཨུཔཱདིཎྞསརཱིརཾ ཕརིཏྭཱ ཋིཏཾ སཾསརཎལོཧིཏསངྑཱཏཉྩཱཏི དུཝིདྷཾ ལོཧིཏཾ.

སེདོ ཨགྒིསནྟཱཔསཱུརིཡསནྟཱཔཨུཏུཝིཀཱརཱདཱིཧི སནྟཏྟེ སརཱིརེ སབྦཀེསལོམཀཱུཔཝིཝརེཧི པགྒྷརཎཀཨཱཔོདྷཱཏུ.

མེདོ ཐཱུལསྶ སཀལསརཱིརེ ཙམྨམཾསནྟརེ ཀིསསྶ ཛངྒྷམཾསཱདཱིནི ནིསྶཱཡ ཋིཏོ ཐིནསིནེཧོ.

ཨསྶུ ¶ སོམནསྶདོམནསྶཝིསབྷཱགཱཧཱརཨུཏཱུཧི སམུཊྛཧིཏྭཱ ཨཀྑིཀཱུཔཀེ པཱུརེཏྭཱ ཏིཊྛནྟཱི ཝཱ པགྒྷརནྟཱི ཝཱ ཨཱཔོདྷཱཏུ.

ཝསཱ ¶ ཨགྒིསནྟཱཔསཱུརིཡསནྟཱཔཨུཏུཝིསབྷཱགེཧི ཨུསྨཱཛཱཏེསུ ཡེབྷུཡྻེན ཧཏྠཏལཧཏྠཔིཊྛིཔཱདཏལཔཱདཔིཊྛིནཱསཱཔུཊནལཱཊཨཾསཀཱུཊེསུ ཋིཏོ ཝིལཱིནསིནེཧོ.

ཁེལོ༹ ¶ ཏཐཱརཱུཔཾ ཨཱཧཱརཾ པསྶནྟསྶ ཝཱ སརནྟསྶ ཝཱ མུཁེ ཝཱ ཋཔེནྟསྶ ཧདཡཾ ཝཱ ཨཱཀིལཱཡནྟསྶ ཀིསྨིཉྩིདེཝ ཝཱ ཛིགུཙྪཾ ཨུཔྤཱདེནྟསྶ བྷིཡྻོ ཨུཔྤཛྫིཏྭཱ ཨུབྷོཧི ཀཔོལཔསྶེཧི ཨོརུཡ྄ཧ ཛིཝ྄ཧཱཡ ཏིཊྛམཱནཱ ཕེཎམིསྶཱ ཨཱཔོདྷཱཏུ.

སིངྒྷཱཎིཀཱ ཝིསབྷཱགཱཧཱརཨུཏུཝསེན སཉྫཱཏདྷཱཏུཀྑོབྷསྶ ཝཱ རོདནྟསྶ ཝཱ ཨནྟོསཱིསེ མཏྠལུངྒཏོ གལིཏྭཱ ཏཱལུམཏྠཀཝིཝརེན ཨོཏརིཏྭཱ ནཱསཱཔུཊེ པཱུརེཏྭཱ ཏིཊྛནྟཾ ཝཱ པགྒྷརནྟཾ ཝཱ པཱུཏི ཨསུཙི པིཙྪིལཾ.

ལསིཀཱ ཨཊྛིསནྡྷཱིནཾ ཨབྦྷཉྫནཀིཙྩཾ སཱདྷཡམཱནཾ ཨསཱིཏིསཏསནྡྷཱིནཾ ཨབྦྷནྟརེ ཋིཏཾ པིཙྪིལཀུཎཔཾ.

མུཏྟཾ ཨཱཧཱརཨུཏུཝསེན ཝཏྠིཔུཊབྦྷནྟརེ ཋིཏཱ ཨཱཔོདྷཱཏུ.

མཏྠལུངྒཾ སཱིསཀཊཱཧབྦྷནྟརེ ཙཏྟཱརོ སིབྦིནིམགྒེ ནིསྶཱཡ ཋིཏོ ཙཏུཔིཎྜསམོདྷཱནོ མིཉྫརཱསི.

ཙཀྑཱཡཏནཱདཱིནི དྭཱདས ཝིསྶཛྫནཱནི དྭཱདསཱཡཏནཝསེན ནིདྡིཊྛཱནི. ཨཱཡཏནཏོ, ཨཱཡཱནཾ ཏནནཏོ, ཨཱཡཏསྶ ཙ ནཡནཏོ ཨཱཡཏནཾ. ཙཀྑུརཱུཔཱདཱིསུ ཧི ཏཾཏཾདྭཱརཱརམྨཎཱ ཙིཏྟཙེཏསིཀཱ དྷམྨཱ སེན སེན ཨནུབྷཝནཱདིནཱ ཀིཙྩེན ཨཱཡཏནྟི ཨུཊྛཧནྟི གྷཊནྟི, ཝཱཡམནྟཱིཏི ཝུཏྟཾ ཧོཏི. ཏེ ཙ པན ཨཱཡབྷཱུཏེ དྷམྨེ ཨེཏཱནི ཏནོནྟི, ཝིཏྠཱརེནྟཱིཏི ཝུཏྟཾ ཧོཏི. ཨིདཉྩ ཨནམཏགྒེ སཾསཱརེ པཝཏྟཾ ཨཏཱིཝ ཨཱཡཏཾ སཾསཱརདུཀྑཾ ཡཱཝ ན ནིཝཏྟཏི, ཏཱཝ ནཡནྟི, པཝཏྟཡནྟཱིཏི ཝུཏྟཾ ཧོཏི.

ཨཔིཙ ནིཝཱསཊྛཱནཊྛེན ཨཱཀརཊྛེན སམོསརཎཊྛཱནཊྛེན སཉྫཱཏིདེསཊྛེན ཀཱརཎཊྛེན ཙ ཨཱཡཏནཾ ¶ . ཏཐཱ ཧི ལོཀེ ‘‘ཨིསྶརཱཡཏནཾ ཝཱསུདེཝཱཡཏན’’ནྟིཨཱདཱིསུ ནིཝཱསཊྛཱནཾ ‘‘ཨཱཡཏན’’ནྟི ཝུཙྩཏི. ‘‘སུཝཎྞཱཡཏནཾ རཛཏཱཡཏན’’ནྟིཨཱདཱིསུ ཨཱཀརོ. སཱསནེ པན ‘‘མནོརམེ ཨཱཡཏནེ, སེཝནྟི ནཾ ཝིཧངྒམཱ’’ཏིཨཱདཱིསུ (ཨ. ནི. ༥.༣༨) སམོསརཎཊྛཱནཾ. ‘‘དཀྑིཎཱཔཐོ གུནྣཾ ཨཱཡཏན’’ནྟིཨཱདཱིསུ སཉྫཱཏིདེསོ. ‘‘ཏཏྲ ཏཏྲེཝ སཀྑིབྷབྦཏཾ པཱཔུཎཱཏི སཏི སཏིཨཱཡཏནེ’’ཏིཨཱདཱིསུ (ཨ. ནི. ༣.༡༠༢; ༥.༢༣) ཀཱརཎཾ. ཙཀྑུཨཱདཱིསུ ཙཱཔི ཏེ ཏེ ཙིཏྟཙེཏསིཀཱ དྷམྨཱ ནིཝསནྟི ཏདཱཡཏྟཝུཏྟིཏཱཡཱཏི ཙཀྑཱདཡོ ནེསཾ ནིཝཱསཊྛཱནཾ ¶ , ཙཀྑཱདཱིསུ ཙ ཏེ ཨཱཀིཎྞཱ ཏནྣིསྶཡཏྟཱ ཏདཱརམྨཎཏྟཱ ཙཱཏི ཙཀྑཱདཡོ ཙ ནེསཾ ཨཱཀརོ, ཏཏྠ ཏཏྠ ¶ ཝཏྠུདྭཱརཱརམྨཎཝསེན སམོསརཎཏོ ཙཀྑཱདཡོ ཙ ནེསཾ སམོསརཎཊྛཱནཾ, ཏཾནིསྶཡཱརམྨཎབྷཱཝེན ཏཏྠེཝ ཨུཔྤཏྟིཏོ ཙཀྑཱདཡོ ཙ ནེསཾ སཉྫཱཏིདེསོ, ཙཀྑཱདཱིནཾ ཨབྷཱཝེ ཨབྷཱཝཏོ ཙཀྑཱདཡོ ཙ ནེསཾ ཀཱརཎནྟི ཡཐཱཝུཏྟེནཏྠེན ཙཀྑུ ཙ ཏཾ ཨཱཡཏནཉྩཱཏི ཙཀྑཱཡཏནཾ. ཨེཝཾ སེསཱནིཔི.

ཙཀྑུདྷཱཏཱདཱིནི ཨཊྛཱརས ཝིསྶཛྫནཱནི ཨཊྛཱརསདྷཱཏུཝསེན ནིདྡིཊྛཱནི. ཙཀྑཱདཱིསུ ཨེཀེཀོ དྷམྨོ ཡཐཱསམྦྷཝཾ ཝིདཧཏི, དྷཱིཡཏེ, ཝིདྷཱནཾ ཝིདྷཱིཡཏེ, ཨེཏཱཡ, ཨེཏྠ ཝཱ དྷཱིཡཏཱིཏི དྷཱཏུ. ལོཀིཡཱ ཧི དྷཱཏུཡོ ཀཱརཎབྷཱཝེན ཝཝཏྠིཏཱ ཧུཏྭཱ སུཝཎྞརཛཏཱདིདྷཱཏུཡོ ཝིཡ སུཝཎྞརཛཏཱདིཾ, ཨནེཀཔྤཀཱརཾ སཾསཱརདུཀྑཾ ཝིདཧནྟི. བྷཱརཧཱརེཧི ཙ བྷཱརོ ཝིཡ སཏྟེཧི དྷཱིཡནྟེ, དྷཱརཱིཡནྟཱིཏི ཨཏྠོ. དུཀྑཝིདྷཱནམཏྟམེཝ ཙེཏཱ ཨཝསཝཏྟནཏོ. ཨེཏཱཧི ཙ ཀརཎབྷཱུཏཱཧི སཾསཱརདུཀྑཾ སཏྟེཧི ཨནུཝིདྷཱིཡཏི. ཏཐཱཝིཧིཏཉྩེཏཾ ཨེཏཱསྭེཝ དྷཱིཡཏི, ཋཔཱིཡཏཱིཏི ཨཏྠོ. ཨཔིཙ ཡཐཱ ཏིཏྠིཡཱནཾ ཨཏྟཱ ནཱམ སབྷཱཝཏོ ནཏྠི, ན ཨེཝམེཏཱ. ཨེཏཱ པན ཨཏྟནོ སབྷཱཝཾ དྷཱརེནྟཱིཏི དྷཱཏུཡོ. ཡཐཱ ཙ ལོཀེ ཝིཙིཏྟཱ ཧརིཏཱལམནོསིལཱདཡོ སེལཱཝཡཝཱ དྷཱཏུཡོཏི ཝུཙྩནྟི, ཨེཝམེཏཱཔི དྷཱཏུཡོ ཝིཡཱཏི དྷཱཏུཡོ. ཝིཙིཏྟཱ ཧེཏཱ ཉཱཎནེཡྻཱཝཡཝཱཏི. ཡཐཱ ཝཱ སརཱིརསངྑཱཏསྶ སམུདཱཡསྶ ཨཝཡཝབྷཱུཏེསུ རསསོཎིཏཱདཱིསུ ཨཉྙམཉྙཝིསབྷཱགལཀྑཎཔརིཙྪིནྣེསུ དྷཱཏུསམཉྙཱ, ཨེཝམེཝེཏེསུཔི པཉྩཀྑནྡྷསངྑཱཏསྶ ཨཏྟབྷཱཝསྶ ཨཝཡཝེསུ དྷཱཏུསམཉྙཱ ཝེདིཏབྦཱ. ཨཉྙམཉྙཝིསབྷཱགལཀྑཎཔརིཙྪིནྣཱ ཧེཏེ ཙཀྑཱདཡོཏི. ཨཔིཙ དྷཱཏཱུཏི ནིཛྫཱིཝམཏྟསྶེཏཾ ཨདྷིཝཙནཾ. ཏཐཱ ཧི བྷགཝཱ ‘‘ཚདྷཱཏུརོ ཨཡཾ བྷིཀྑུ པུརིསོ’’ཏིཨཱདཱིསུ (མ. ནི. ༣.༣༤༣-༣༤༤) ཛཱིཝསཉྙཱསམཱུཧནནཏྠཾ དྷཱཏུདེསནཾ ཨཀཱསཱིཏི. ཡཐཱཝུཏྟེནཏྠེན ཙཀྑུ ཙ ཏཾ དྷཱཏུ ཙཱཏི ཙཀྑུདྷཱཏུ. ཨེཝཾ སེསཱཔི. མནོདྷཱཏཱུཏི ཙ ཏིསྶོ མནོདྷཱཏུཡོ. དྷམྨདྷཱཏཱུཏི ཝེདནཱསཉྙཱསངྑཱརཀྑནྡྷཱ སོལ༹ས སུཁུམརཱུཔཱནི ནིབྦཱནཉྩ. མནོཝིཉྙཱཎདྷཱཏཱུཏི ཚསཏྟཏི མནོཝིཉྙཱཎདྷཱཏུཡོ.

ཙཀྑུནྡྲིཡཱདཱིནི ¶ ¶ བཱཝཱིསཏི ཝིསྶཛྫནཱནི བཱཝཱིསཏིནྡྲིཡཝསེན ནིདྡིཊྛཱནི. ཙཀྑུམེཝ དསྶནལཀྑཎེ ཨིནྡཊྛཾ ¶ ཀཱརེཏཱིཏི ཙཀྑུནྡྲིཡཾ. སོཏམེཝ སཝནལཀྑཎེ ཨིནྡཊྛཾ ཀཱརེཏཱིཏི སོཏིནྡྲིཡཾ. གྷཱནམེཝ གྷཱཡནལཀྑཎེ ཨིནྡཊྛཾ ཀཱརེཏཱིཏི གྷཱནིནྡྲིཡཾ. ཛིཝ྄ཧཱ ཨེཝ སཱཡནལཀྑཎེ ཨིནྡཊྛཾ ཀཱརེཏཱིཏི ཛིཝ྄ཧིནྡྲིཡཾ. ཀཱཡོ ཨེཝ ཕུསནལཀྑཎེ ཨིནྡཊྛཾ ཀཱརེཏཱིཏི ཀཱཡིནྡྲིཡཾ. མནཏེ ཨིཏི མནོ, ཝིཛཱནཱཏཱིཏི ཨཏྠོ. ཨཊྛཀཐཱཙརིཡཱ པནཱཧུ – ནཱལིཡཱ མིནམཱནོ ཝིཡ མཧཱཏུལཱཡ དྷཱརཡམཱནོ ཝིཡ ཙ ཨཱརམྨཎཾ མནཏི ཛཱནཱཏཱིཏི མནོ, ཏདེཝ མནནལཀྑཎེ ཨིནྡཊྛཾ ཀཱརེཏཱིཏི མནིནྡྲིཡཾ.

ཛཱིཝནྟི ཏེན ཏཾསཧཛཱཏཱ དྷམྨཱཏི ཛཱིཝིཏཾ, ཏདེཝ ཨནུཔཱལནལཀྑཎེ ཨིནྡཊྛཾ ཀཱརེཏཱིཏི ཛཱིཝིཏིནྡྲིཡཾ. ཏཾ རཱུཔཛཱིཝིཏིནྡྲིཡཾ ཨརཱུཔཛཱིཝིཏིནྡྲིཡནྟི དུཝིདྷཾ. སབྦཀམྨཛརཱུཔསཧཛཾ སཧཛརཱུཔཱནུཔཱལནཾ རཱུཔཛཱིཝིཏིནྡྲིཡཾ, སབྦཙིཏྟསཧཛཾ སཧཛཨརཱུཔཱནུཔཱལནཾ ཨརཱུཔཛཱིཝིཏིནྡྲིཡཾ.

ཐཱིཡཏི སངྒྷཱཏཾ གཙྪཏི ཨེཏིསྶཱ གབྦྷོཏི ཨིཏྠཱི, ཨིཏྠིལིངྒཱདཱིསུ ཨིནྡཊྛཾ ཀཱརེཏཱིཏི ཨིནྡྲིཡཾ, ནིཡམཏོ ཨིཏྠིཡཱ ཨེཝ ཨིནྡྲིཡཾ ཨིཏྠིནྡྲིཡཾ.

པུཾ-ཝུཙྩཏི ནིརཡོ, པུཾ སངྑཱཏེ ནིརཡེ རིསཱིཡཏི ཧིཾསཱིཡཏཱིཏི པུརིསོ, པུརིསལིངྒཱདཱིསུ ཨིནྡཊྛཾ ཀཱརེཏཱིཏི ཨིནྡྲིཡཾ, ནིཡམཏོ པུརིསསྶེཝ ཨིནྡྲིཡཾ པུརིསིནྡྲིཡཾ. དྭཱིསུཔེཏེསུ ཨེཀེཀཾ སབྷཱཝཀསྶ ཨེཀེཀསྶ ཀམྨཛརཱུཔསཧཛཾ ཧོཏི.

ཀུསལཝིཔཱཀཀཱཡཝིཉྙཱཎསམྤཡུཏྟཾ སུཁཾ, ཀཱཡིཀསཱཏལཀྑཎེ ཨིནྡཊྛཾ ཀཱརེཏཱིཏི ཨིནྡྲིཡཾ, སུཁམེཝ ཨིནྡྲིཡཾ སུཁིནྡྲིཡཾ.

ཨཀུསལཝིཔཱཀཀཱཡཝིཉྙཱཎསམྤཡུཏྟཾ དུཀྑཾ, ཀཱཡིཀཨསཱཏལཀྑཎེ ཨིནྡཊྛཾ ཀཱརེཏཱིཏི ཨིནྡྲིཡཾ, དུཀྑམེཝ ཨིནྡྲིཡཾ དུཀྑིནྡྲིཡཾ.

པཱིཏིསོམནསྶཡོགཏོ སོབྷནཾ མནོ ཨསྶཱཏི སུམནོ, སུམནསྶ བྷཱཝོ སོམནསྶཾ, ཙེཏསིཀསཱཏལཀྑཎེ ཨིནྡཊྛཾ ཀཱརེཏཱིཏི ཨིནྡྲིཡཾ, སོམནསྶམེཝ ཨིནྡྲིཡཾ སོམནསྶིནྡྲིཡཾ.

དོམནསྶཡོགཏོ དུཊྛུ མནོ ཨསྶཱཏི, ཧཱིནཝེདནཏྟཱ ཝཱ ཀུཙྪིཏཾ མནོ ཨསྶཱཏི དུམྨནོ, དུམྨནསྶ བྷཱཝོ དོམནསྶཾ, ཙེཏསིཀཨསཱཏལཀྑཎེ ཨིནྡཊྛཾ ཀཱརེཏཱིཏི ཨིནྡྲིཡཾ, དོམནསྶམེཝ ¶ ཨིནྡྲིཡཾ དོམནསྶིནྡྲིཡཾ. སུཁདུཀྑཱཀཱརཔཝཏྟིཾ ཨུཔེཀྑཏི མཛ྄ཛྷཏྟཱཀཱརསཎྛིཏཏྟཱ ཏེནཱཀཱརེན པཝཏྟཏཱིཏི ཨུཔེཀྑཱ, མཛ྄ཛྷཏྟལཀྑཎེ ¶ ཨིནྡཊྛཾ ཀཱརེཏཱིཏི ཨིནྡྲིཡཾ, ཨུཔེཀྑཱ ཨེཝ ཨིནྡྲིཡཾ ཨུཔེཀྑིནྡྲིཡཾ.

སདྡཧནྟི ¶ ཨེཏཱཡ, སཡཾ ཝཱ སདྡཧཏི, སདྡཧནམཏྟམེཝ ཝཱ ཨེསཱཏི སདྡྷཱ, ཨསྶདྡྷིཡསྶ ཨབྷིབྷཝནཏོ ཨདྷིཔཏིཨཏྠེན ཨིནྡྲིཡཾ, ཨདྷིམོཀྑལཀྑཎེ ཝཱ ཨིནྡཊྛཾ ཀཱརེཏཱིཏི ཨིནྡྲིཡཾ, སདྡྷཱཡེཝ ཨིནྡྲིཡཾ སདྡྷིནྡྲིཡཾ.

ཝཱིརབྷཱཝོ ཝཱིརིཡཾ, ཝཱིརཱནཾ ཝཱ ཀམྨཾ, ཝིདྷིནཱ ཝཱ ནཡེན ཨཱིརཡིཏབྦཾ པཝཏྟཡིཏབྦནྟི ཝཱིརིཡཾ, ཀོསཛྫསྶ ཨབྷིབྷཝནཏོ ཨདྷིཔཏིཨཏྠེན ཨིནྡྲིཡཾ, པགྒཧཎལཀྑཎེ ཝཱ ཨིནྡཊྛཾ ཀཱརེཏཱིཏི ཨིནྡྲིཡཾ, ཝཱིརིཡམེཝ ཨིནྡྲིཡཾ ཝཱིརིཡིནྡྲིཡཾ.

སརནྟི ཏཱཡ, སཡཾ ཝཱ སརཏི, སརཎམཏྟམེཝ ཝཱ ཨེསཱཏི སཏི, མུཊྛསཙྩསྶ ཨབྷིབྷཝནཏོ ཨདྷིཔཏིཨཏྠེན ཨིནྡྲིཡཾ, ཨུཔཊྛཱནལཀྑཎེ ཝཱ ཨིནྡཊྛཾ ཀཱརེཏཱིཏི ཨིནྡྲིཡཾ, སཏི ཨེཝ ཨིནྡྲིཡཾ སཏིནྡྲིཡཾ.

ཨཱརམྨཎེ ཙིཏྟཾ སམྨཱ ཨཱདྷིཡཏི ཋཔེཏཱིཏི སམཱདྷི, ཝིཀྑེཔསྶ ཨབྷིབྷཝནཏོ ཨདྷིཔཏིཨཏྠེན ཨིནྡྲིཡཾ, ཨཝིཀྑེཔལཀྑཎེ ཝཱ ཨིནྡཊྛཾ ཀཱརེཏཱིཏི ཨིནྡྲིཡཾ, སམཱདྷི ཨེཝ ཨིནྡྲིཡཾ སམཱདྷིནྡྲིཡཾ.

‘‘ཨིདཾ དུཀྑ’’ནྟིཨཱདིནཱ ནཡེན ཨརིཡསཙྩཱནི པཛཱནཱཏཱིཏི པཉྙཱ. ཨཊྛཀཐཱཡཾ པན ‘‘ཨནིཙྩཾ དུཀྑམནཏྟཱཏི པཉྙཱཔནཝསེན པཉྙཱ’’ཏི ཝུཏྟཾ. ཨཝིཛྫཱཡ ཨབྷིབྷཝནཏོ ཨདྷིཔཏིཨཏྠེན ཨིནྡྲིཡཾ, དསྶནལཀྑཎེ ཝཱ ཨིནྡཊྛཾ ཀཱརེཏཱིཏི ཨིནྡྲིཡཾ, པཉྙཱ ཨེཝ ཨིནྡྲིཡཾ པཉྙིནྡྲིཡཾ.

ཨནམཏགྒེ སཾསཱརཝཊྚེ ཨནཉྙཱཏཾ ཨམཏཾ པདཾ ཙཏུསཙྩདྷམྨམེཝ ཝཱ ཛཱནིསྶཱམཱིཏི པཊིཔནྣསྶ ཨུཔྤཛྫནཏོ ཨིནྡྲིཡཊྛསམྦྷཝཏོ ཙ ཨནཉྙཱཏཉྙསྶཱམཱིཏིནྡྲིཡཾ. སོཏཱཔཏྟིམགྒཉཱཎསྶེཏཾ ནཱམཾ.

པཋམམགྒེན ཉཱཏཾ མརིཡཱདཾ ཨནཏིཀྐམིཏྭཱ ཏེསཾཡེཝ ཏེན མགྒེན ཉཱཏཱནཾ ཙཏུསཙྩདྷམྨཱནམེཝ ¶ ཛཱནནཏོ ཨིནྡྲིཡཊྛསམྦྷཝཏོ ཙ ཨཱཛཱནནཀཾ ཨིནྡྲིཡཾ ཨཉྙིནྡྲིཡཾ. སོཏཱཔཏྟིཕལཱདཱིསུ ཚསུ ཋཱནེསུ ཉཱཎསྶེཏཾ ནཱམཾ.

ཨཉྙཱཏཱཝིནོ ཙཏུསཙྩེསུ ནིཊྛིཏཉཱཎཀིཙྩསྶ ཁཱིཎཱསཝསྶ ཨུཔྤཛྫནཏོ ཨིནྡྲིཡཊྛསམྦྷཝཏོ ཙ ཨཉྙཱཏཱཝིནྡྲིཡཾ, ཨཉྙཱཏཱཝཱིནཾ ཝཱ ཙཏཱུསུ སཙྩེསུ ནིཊྛིཏཀིཙྩཱནཾ ཙཏྟཱརི སཙྩཱནི པཊིཝིཛ྄ཛྷིཏྭཱ ཋིཏཱནཾ དྷམྨཱནཾ ཨབྦྷནྟརེ ཨིནྡཊྛསཱདྷནེན ཨཉྙཱཏཱཝིནྡྲིཡཾ. ཨརཧཏྟཕལཉཱཎསྶེཏཾ ནཱམཾ. སབྦཱནིཔེཏཱནི ¶ ཡཐཱཡོགཾ ཨིནྡལིངྒཊྛེན ཨིནྡདེསིཏཊྛེན ཨིནྡདིཊྛཊྛེན ཨིནྡསིཊྛཊྛེན ཨིནྡཛུཊྛཊྛེན ཙ ཨིནྡྲིཡཱནི. བྷགཝཱ ཧི སམྨཱསམྦུདྡྷོ པརམིསྶརིཡབྷཱཝཏོ ཨིནྡོ, ཀུསལཱཀུསལཉྩ ཀམྨཾ ཀམྨེསུ ཀསྶཙི ཨིསྶརིཡཱབྷཱཝཏོ. ཏེནེཝེཏྠ ཀམྨཛནིཏཱནི ཨིནྡྲིཡཱནི ཀུསལཱཀུསལཀམྨཾ ཨུལླིངྒེནྟི ¶ , ཏེན ཙ སིཊྛཱནཱིཏི ཨིནྡལིངྒཊྛེན ཨིནྡསིཊྛཊྛེན ཙ ཨིནྡྲིཡཱནི. སབྦཱནེཝ པནེཏཱནི བྷགཝཏཱ མུནིནྡེན ཡཐཱབྷཱུཏཏོ པཀཱསིཏཱནི ཨབྷིསམྦུདྡྷཱནི ཙཱཏི ཨིནྡདེསིཏཊྛེན ཨིནྡདིཊྛཊྛེན ཙ ཨིནྡྲིཡཱནི. ཏེནེཝ ཙ བྷགཝཏཱ མུནིནྡེན ཀཱནིཙི གོཙརཱསེཝནཱཡ, ཀཱནིཙི བྷཱཝནཱསེཝནཱཡ སེཝིཏཱནཱིཏི ཨིནྡཛུཊྛཊྛེནཔི ཨིནྡྲིཡཱནི. ཨཔི ཙ ཨཱདྷིཔཙྩསངྑཱཏེན ཨིསྶརིཡཊྛེནཔི ཨེཏཱནི ཨིནྡྲིཡཱནི. ཙཀྑུཝིཉྙཱཎཱདིཔཝཏྟིཡཉྷི ཙཀྑཱདཱིནཾ སིདྡྷམཱདྷིཔཙྩཾ ཏསྨིཾ ཏིཀྑེ ཏིཀྑཏྟཱ མནྡེ ཙ མནྡཏྟཱཏི.

༥.

ཀཱམདྷཱཏུཨཱདཱིནི དྭཱདས ཝིསྶཛྫནཱནི བྷཝཔྤབྷེདཝསེན ནིདྡིཊྛཱནི. ཀཱམརཱགསངྑཱཏེན ཀཱམེན ཡུཏྟཱ དྷཱཏུ ཀཱམདྷཱཏུ, ཀཱམསངྑཱཏཱ ཝཱ དྷཱཏུ ཀཱམདྷཱཏུ.

ཀཱམཾ པཧཱཡ རཱུཔེན ཡུཏྟཱ དྷཱཏུ རཱུཔདྷཱཏུ, རཱུཔསངྑཱཏཱ ཝཱ དྷཱཏུ རཱུཔདྷཱཏུ.

ཀཱམཉྩ རཱུཔཉྩ པཧཱཡ ཨརཱུཔེན ཡུཏྟཱ དྷཱཏུ ཨརཱུཔདྷཱཏུ, ཨརཱུཔསངྑཱཏཱ ཝཱ དྷཱཏུ ཨརཱུཔདྷཱཏུ.

ཏཱ ཨེཝ དྷཱཏུཡོ པུན བྷཝཔརིཡཱཡེན ཝུཏྟཱ. བྷཝཏཱིཏི ཧི བྷཝོཏི ཝུཙྩཏི. སཉྙཱཡ ཡུཏྟོ བྷཝོ སཉྙཱབྷཝོ, སཉྙཱསཧགཏོ ཝཱ བྷཝོ སཉྙཱབྷཝོ, སཉྙཱ ཝཱ ཨེཏྠ བྷཝེ ཨཏྠཱིཏི སཉྙཱབྷཝོ. སོ ཀཱམབྷཝོ ཙ ཨསཉྙཱབྷཝམུཏྟོ རཱུཔབྷཝོ ཙ ནེཝསཉྙཱནཱསཉྙཱབྷཝམུཏྟོ ཨརཱུཔབྷཝོ ཙ ཧོཏི.

ན སཉྙཱབྷཝོ ཨསཉྙཱབྷཝོ, སོ རཱུཔབྷཝེཀདེསོ.

ཨོལཱ༹རིཀཏྟཱབྷཱཝཏོ ¶ ནེཝསཉྙཱ, སུཁུམཏྟེན སམྦྷཝཏོ ནཱསཉྙཱཏི ནེཝསཉྙཱནཱསཉྙཱ, ཏཱཡ ཡུཏྟོ བྷཝོ ནེཝསཉྙཱནཱསཉྙཱབྷཝོ. ཨཐ ཝཱ ཨོལཱ༹རིཀཱཡ སཉྙཱཡ ཨབྷཱཝཱ, སུཁུམཱཡ ཙ བྷཱཝཱ ནེཝསཉྙཱནཱསཉྙཱ ཨསྨིཾ བྷཝེཏི ནེཝསཉྙཱནཱསཉྙཱབྷཝོ, སོ ཨརཱུཔབྷཝེཀདེསོ.

ཨེཀེན རཱུཔཀྑནྡྷེན ཝོཀིཎྞོ བྷཝོ ཨེཀེན ཝོཀཱརོ ཨསྶ བྷཝསྶཱཏི ཨེཀཝོཀཱརབྷཝོ, སོ ཨསཉྙབྷཝོཝ.

ཙཏཱུཧི ཨརཱུཔཀྑནྡྷེཧི ཝོཀིཎྞོ བྷཝོ ཙཏཱུཧི ཝོཀཱརོ ཨསྶ བྷཝསྶཱཏི ཙཏུཝོཀཱརབྷཝོ ¶ , སོ ཨརཱུཔབྷཝོ ཨེཝ.

པཉྩཧི ཁནྡྷེཧི ཝོཀིཎྞོ བྷཝོ པཉྩཧི ཝོཀཱརོ ཨསྶ བྷཝསྶཱཏི པཉྩཝོཀཱརབྷཝོ, སོ ཀཱམབྷཝོ ཙ རཱུཔབྷཝེཀདེསོ ཙ ཧོཏི.

༦. པཋམཛ྄ཛྷཱནཱདཱིནི དྭཱདས ཝིསྶཛྫནཱནི ཛྷཱནསམཱཔཏྟིཝསེན ནིདྡིཊྛཱནི. ཛྷཱནནྟི ཨིདྷ བྲཧྨཝིཧཱརམཏྟཾ ཨདྷིཔྤེཏཾ. ཝིཏཀྐཝིཙཱརཔཱིཏིསུཁཙིཏྟེཀགྒཏཱསམྤཡུཏྟཾ པཋམཾ ཛྷཱནཾ. པཱིཏིསུཁཙིཏྟེཀགྒཏཱསམྤཡུཏྟཾ དུཏིཡཾ ཛྷཱནཾ. སུཁཙིཏྟེཀགྒཏཱསམྤཡུཏྟཾ ¶ ཏཏིཡཾ ཛྷཱནཾ. ཨུཔེཀྑཱཙིཏྟེཀགྒཏཱསམྤཡུཏྟཾ ཙཏུཏྠཾ ཛྷཱནཾ.

མེདཏི མེཛྫཏཱིཏི མེཏྟཱ, སིནིཡ྄ཧཏཱིཏི ཨཏྠོ. མིཏྟེ ཝཱ བྷཝཱ, མིཏྟསྶ ཝཱ ཨེསཱ པཝཏྟཱིཏི མེཏྟཱ, པཙྩནཱིཀདྷམྨེཧི མུཏྟཏྟཱ ཨཱརམྨཎེ ཙཱདྷིམུཏྟཏྟཱ ཝིམུཏྟི, ཙེཏསོ ཝིམུཏྟི ཙེཏོཝིམུཏྟི, མེཏྟཱ ཨེཝ ཙེཏོཝིམུཏྟི མེཏྟཱཙེཏོཝིམུཏྟི.

ཀརུཎཱ ཝུཏྟཏྠཱ ཨེཝ.

མོདནྟི ཏཱཡ ཏཾསམངྒིནོ, སཡཾ ཝཱ མོདཏི, མོདནམཏྟམེཝ ཝཱ ཏནྟི མུདིཏཱ. ‘‘ཨཝེརཱ ཧོནྟཱུ’’ཏིཨཱདིབྱཱཔཱརཔྤཧཱནེན མཛ྄ཛྷཏྟབྷཱཝཱུཔགམནེན ཙ ཨུཔེཀྑཏཱིཏི ཨུཔེཀྑཱ. མེཏྟཱདཡོ ཏཡོ བྲཧྨཝིཧཱརཱ པཋམཱདཱིཧི ཏཱིཧི ཛྷཱནེཧི ཡུཏྟཱ. ཨུཔེཀྑཱབྲཧྨཝིཧཱརོ ཙཏུཏྠཛ྄ཛྷཱནེན ཡུཏྟོ.

ཕརཎཝསེན ནཏྠི ཨེཏསྶ ཨནྟོཏི ཨནནྟོ. ཨཱཀཱསོ ཨནནྟོ ཨཱཀཱསཱནནྟོ, ཀསིཎུགྒྷཱཊིམཱཀཱསོ ¶ . ཨཱཀཱསཱནནྟོཡེཝ ཨཱཀཱསཱནཉྩཾ, ཏཾ ཨཱཀཱསཱནཉྩཾ ཨདྷིཊྛཱནཊྛེན ཨཱཡཏནམསྶ སསམྤཡུཏྟདྷམྨསྶ ཛྷཱནསྶ ‘‘དེཝཱནཾ དེཝཱཡཏནམིཝཱ’’ཏི ཨཱཀཱསཱནཉྩཱཡཏནཾ. ཨཱཀཱསཱནཉྩཱཡཏནམེཝ སམཱཔཏྟི ཨཱཀཱསཱནཉྩཱཡཏནསམཱཔཏྟི. ཕརཎཝསེན ཙ ནཏྠི ཨེཏསྶ ཨནྟོཏི ཨནནྟཾ, ཏཾ ཨཱཀཱསཱརམྨཎཾ ཝིཉྙཱཎཾ. ཨནནྟམེཝ ཨཱནཉྩཾ, ཝིཉྙཱཎཾ ཨཱནཉྩཾ ‘‘ཝིཉྙཱཎཱནཉྩ’’ནྟི ཨཝཏྭཱ ‘‘ཝིཉྙཱཎཉྩ’’ནྟི ཝུཏྟཾ. ཨཡཉྷེཏྠ རུལ༹ྷིསདྡོ. ཏཾ ཝིཉྙཱཎཉྩཾ ཨདྷིཊྛཱནཊྛེན ཨཱཡཏནམསྶ སསམྤཡུཏྟདྷམྨསྶ ཛྷཱནསྶ ‘‘དེཝཱནཾ དེཝཱཡཏནམིཝཱ’’ཏི ཝིཉྙཱཎཉྩཱཡཏནཾ. ནཏྠི ཨེཏསྶ ཀིཉྩནནྟི ཨཀིཉྩནཾ, ཨནྟམསོ བྷངྒམཏྟམྤི ཨསྶ ཨཝསིཊྛཾ ནཏྠཱིཏི ཝུཏྟཾ ཧོཏི. ཨཀིཉྩནསྶ བྷཱཝོ ཨཱཀིཉྩཉྙཾ. ཨཱཀཱསཱནཉྩཱཡཏནཝིཉྙཱཎཱབྷཱཝསྶེཏཾ ཨདྷིཝཙནཾ. ཏཾ ཨཱཀིཉྩཉྙཾ. ཨདྷིཊྛཱནཊྛེན ཨཱཡཏནམསྶ སསམྤཡུཏྟདྷམྨསྶ ¶ ཛྷཱནསྶ ‘‘དེཝཱནཾ དེཝཱཡཏནམིཝཱ’’ཏི ཨཱཀིཉྩཉྙཱཡཏནཾ. ཨོལཱ༹རིཀཱཡ སཉྙཱཡ ཨབྷཱཝཏོ, སུཁུམཱཡ ཙ བྷཱཝཏོ ནེཝསྶ སསམྤཡུཏྟདྷམྨསྶ ཛྷཱནསྶ སཉྙཱ ནཱསཉྙཱཏི ནེཝསཉྙཱནཱསཉྙཾ. ནེཝསཉྙཱནཱསཉྙཉྩ ཏཾ མནཱཡཏནདྷམྨཱཡཏནཔརིཡཱཔནྣཏྟཱ ཨཱཡཏནཉྩཱཏི ནེཝསཉྙཱནཱསཉྙཱཡཏནཾ. ཨཐ ཝཱ ཡཱཡམེཏྠ སཉྙཱ སཱ པཊུསཉྙཱཀིཙྩཾ ཀཱཏུཾ ཨསམཏྠཏཱཡ ནེཝསཉྙཱ, སངྑཱརཱཝསེསསུཁུམབྷཱཝེན ཝིཛྫམཱནཏྟཱ ནཱསཉྙཱཏི ནེཝསཉྙཱནཱསཉྙཱ, ནེཝསཉྙཱནཱསཉྙཱ ཙ སཱ སེསདྷམྨཱནཾ ཨདྷིཊྛཱནཊྛེན ཨཱཡཏནཉྩཱཏི ནེཝསཉྙཱནཱསཉྙཱཡཏནཾ. ཨཱཀིཉྩཉྙཱཡཏནཱརམྨཎཱཡ སམཱཔཏྟིཡཱ ཨེཏཾ ཨདྷིཝཙནཾ. ན ཀེཝལཾ ཨེཏྠ སཉྙཱ ¶ ཨེདིསཱི, ཨཐ ཁོ ཝེདནཱཔི ནེཝཝེདནཱ ནཱཝེདནཱ. ཙིཏྟམྤི ནེཝཙིཏྟཾ ནཱཙིཏྟཾ. ཕསྶོཔི ནེཝཕསྶོ ནཱཕསྶོ. ཨེས ནཡོ སེསསམྤཡུཏྟདྷམྨེསུ. སཉྙཱསཱིསེན པནཱཡཾ དེསནཱ ཀཏཱཏི.

ཨཝིཛྫཱདཱིནི དྭཱདས ཝིསྶཛྫནཱནི པཊིཙྩསམུཔྤཱདངྒཝསེན ནིདྡིཊྛཱནི. པཱུརེཏུཾ ཨཡུཏྟཊྛེན ཀཱཡདུཙྩརིཏཱདི ཨཝིནྡིཡཾ ནཱམ, ཨལདྡྷབྦནྟི ཨཏྠོ. ཏཾ ཨཝིནྡིཡཾ ཝིནྡཏཱིཏི ཨཝིཛྫཱ. ཏབྦིཔརཱིཏཏོ ཀཱཡསུཙརིཏཱདི ཝིནྡིཡཾ ནཱམ, ཏཾ ཝིནྡིཡཾ ན ཝིནྡཏཱིཏི ཨཝིཛྫཱ. ཁནྡྷཱནཾ རཱསཊྛཾ, ཨཱཡཏནཱནཾ ཨཱཡཏནཊྛཾ, དྷཱཏཱུནཾ སུཉྙཊྛཾ, ཨིནྡྲིཡཱནཾ ཨདྷིཔཏིཡཊྛཾ, སཙྩཱནཾ ཏཐཊྛཾ ཨཝིདིཏཾ ཀརོཏཱིཏི ཨཝིཛྫཱ. དུཀྑཱདཱིནཾ པཱིལ༹ནཱདིཝསེན ཝུཏྟཾ ཙཏུབྦིདྷཾ ཙཏུབྦིདྷཾ ཨཏྠཾ ཨཝིདིཏཾ ཀརོཏཱིཏིཔི ཨཝིཛྫཱ, ཨནྟཝིརཧིཏེ སཾསཱརེ སབྦཡོནིགཏིབྷཝཝིཉྙཱཎཊྛིཏིསཏྟཱཝཱསེསུ སཏྟེ ཛཝཱཔེཏཱིཏི ཨཝིཛྫཱ, པརམཏྠཏོ ཨཝིཛྫམཱནེསུ ཨིཏྠིཔུརིསཱདཱིསུ ཛཝཏི, ཝིཛྫམཱནེསུཔི ཁནྡྷཱདཱིསུ ན ཛཝཏཱིཏི ཨཝིཛྫཱ, ཨཔི ཙ ཙཀྑུཝིཉྙཱཎཱདཱིནཾ ཝཏྠཱརམྨཎཱནཾ པཊིཙྩསམུཔྤཱདཔཊིཙྩསམུཔྤནྣཱནཉྩ དྷམྨཱནཾ ཚཱདནཏོཔི ཨཝིཛྫཱ. སངྑཏམབྷིསངྑརོནྟཱིཏི སངྑཱརཱ. ཝིཛཱནཱཏཱིཏི ཝིཉྙཱཎཾ. ནམཏཱིཏི ནཱམཾ, ནཱམཡཏཱིཏི ཝཱ ནཱམཾ. རུཔྤཏཱིཏི རཱུཔཾ. ཨཱཡེ ཏནོཏི ¶ , ཨཱཡཏཉྩ ནཡཏཱིཏི ཨཱཡཏནཾ. ཕུསཏཱིཏི ཕསྶོ. ཝེདཡཏཱིཏི ཝེདནཱ. པརིཏསྶཏཱིཏི ཏཎྷཱ. ཨུཔཱདིཡཏི བྷུསཾ གཎྷཱཏཱིཏི ཨུཔཱདཱནཾ. བྷཝཏི, བྷཱཝཡཏཱིཏི ཝཱ བྷཝོ. ཛནནཾ ཛཱཏི. ཛཱིརཎཾ ¶ ཛརཱ. མརནྟི ཨེཏེནཱཏི མརཎཾ.

༧. དུཀྑཱདཱིནི ཨཊྛསཏཱནི ཨཊྛ ཙ ཝིསྶཛྫནཱནི ཙཏུསཙྩཡོཛནཱཝསེན ནིདྡིཊྛཱནི. ‘‘དུཀྑཾ ཨབྷིཉྙེཡྻ’’ནྟིཨཱདཱིསུ ཧི ཚནྣཾ ཙཏུཀྐཱནཾ ཝསེན ཙཏུཝཱིསཏི ཝིསྶཛྫནཱནི ‘‘ཙཀྑུ ཛརཱམརཎ’’ནྟི པེཡྻཱལེ ‘‘ཙཀྑུ ཨབྷིཉྙེཡྻཾ སོཏཾ ཨབྷིཉྙེཡྻ’’ནྟིཨཱདིནཱ ‘‘ཛཱཏི ཨབྷིཉྙེཡྻཱ’’ཏི པརིཡོསཱནེན པཉྩནཝུཏཱདྷིཀེན ཝིསྶཛྫནསཏེན ཡོཛེཏྭཱ ཝུཏྟཱནི. པཉྩནཝུཏཱདྷིཀཾ ཙཏུཀྐསཏཾ ཧོཏི, ཏེསཾ ཙཏུཀྐཱནཾ ཝསེན ཨསཱིཏིཨདྷིཀཱནི སཏྟ ཝིསྶཛྫནསཏཱནི. ‘‘ཛརཱམརཎཾ ཨབྷིཉྙེཡྻ’’ནྟིཨཱདིཀེ ཙཏུཀྐེ ‘‘ཙཏྟཱརི ཝིསྶཛྫནཱནཱི’’ཏི ཨེཝཾ སབྦཱནི ཨཊྛ ཙ སཏཱནི ཨཊྛ ཙ ཝིསྶཛྫནཱནི ཧོནྟི. ཨེཏྠ ཙ ཏསྶ ཏསྶ དྷམྨསྶ པདྷཱནབྷཱུཏོ པཙྩཡོ སམུདཡོཏི ཝེདིཏབྦོ. སབྦསངྑཱརེཧི སུཉྙཾ ནིབྦཱནཾ ནིརོདྷོཏི ཝེདིཏབྦཾ. ཨནཉྙཱཏཉྙསྶཱམཱིཏིནྡྲིཡཱདཱིནཾ ཏིཎྞམྤི ཧི ལོཀུཏྟརིནྡྲིཡཱནཾ ཨེཏྠ ཨབྷཱཝཾ སནྡྷཱཡ ཨནཉྙཱཏཉྙསྶཱམཱིཏིནྡྲིཡནིརོདྷོཏིཨཱདི ཡུཛྫཏི ¶ . ནིརོདྷགཱམིནིཔཊིཔདཱཏི ཙ སབྦཏྠ ཨརིཡམགྒོ ཨེཝ. ཨེཝཉྷི ཝུཙྩམཱནེ ཕལེཔི མགྒཝོཧཱརསམྦྷཝཏོ ཨཉྙིནྡྲིཡཨཉྙཱཏཱཝིནྡྲིཡཱནམྤི ཡུཛྫཏི. པུན དུཀྑཱདཱིནཾ པརིཉྙཊྛཱདིཝསེན ཨཊྛསཏཱནི ཨཊྛ ཙ ཝིསྶཛྫནཱནི ནིདྡིཊྛཱནི, པུན དུཀྑཱདཱིནཾ པརིཉྙཱཔཊིཝེདྷཊྛཱདིཝསེན ཨཊྛསཏཱནི ཨཊྛ ཙ ཝིསྶཛྫནཱནི ནིདྡིཊྛཱནི. པརིཉྙཱ ཙ སཱ པཊིཝིཛ྄ཛྷིཏབྦཊྛེན པཊིཝེདྷོ ཙཱཏི པརིཉྙཱཔཊིཝེདྷོ. པརིཉྙཱཔཊིཝེདྷོཝ ཨཏྠོ པརིཉྙཱཔཊིཝེདྷཊྛོ.

༨. པུན ཏཱནེཝ དུཀྑཱདཱིནི ཛརཱམརཎཔརིཡནྟཱནི དྭིཨདྷིཀཱནི དྭེ པདསཏཱནི སམུདཡཱདཱིཧི སཏྟཧི སཏྟཧི པདེཧི ཡོཛེཏྭཱ དྭིཨདྷིཀཱནཾ དྭིནྣཾ ཨཊྛཀསཏཱནཾ ཝསེན སཧསྶཉྩ ཚ ཙ སཏཱནི སོལ༹ས ཙ ཝིསྶཛྫནཱནི ནིདྡིཊྛཱནི. ཏཏྠ པདྷཱནབྷཱུཏོ པཙྩཡོ སམུདཡོ, ཏསྶ ནིརོདྷོ སམུདཡནིརོདྷོ. ཚནྡོ ཨེཝ རཱགོ ཚནྡརཱགོ, དུཀྑེ སུཁསཉྙཱཡ དུཀྑསྶ ཚནྡརཱགོ, ཏསྶ ནིརོདྷོ ཚནྡརཱགནིརོདྷོ. དུཀྑཾ པཊིཙྩ ཨུཔྤཛྫམཱནཾ སུཁཾ སོམནསྶཾ དུཀྑསྶ ཨསྶཱདོ. དུཀྑསྶ ཨནིཙྩཏཱ དུཀྑསྶ ཝིཔརིཎཱམདྷམྨཏཱ དུཀྑསྶ ཨཱདཱིནཝོ. དུཀྑེ ཚནྡརཱགཝིནཡོ ཚནྡརཱགཔྤཧཱནཾ དུཀྑསྶ ནིསྶརཎཾ. ‘‘ཡཾ ཁོ པན ཀིཉྩི བྷཱུཏཾ སངྑཏཾ པཊིཙྩསམུཔྤནྣཾ ནིརོདྷོ ཏསྶ ནིསྶརཎ’’ནྟི ¶ (པཊི. མ. ༡.༢༤) ཝཙནཏོ ནིབྦཱནམེཝ དུཀྑསྶ ནིསྶརཎཾ. ‘‘དུཀྑནིརོདྷོ སམུདཡནིརོདྷོ ཚནྡརཱགནིརོདྷོ དུཀྑསྶ ནིསྶརཎ’’ནྟི ནཱནཱསངྑཏཔཊིཔཀྑཝསེན ནཱནཱཔརིཡཱཡཝཙནེཧི ཙཏཱུསུ ཋཱནེསུ ནིབྦཱནམེཝ ཝུཏྟནྟི ¶ ཝེདིཏབྦཾ. ཀེཙི པན ‘‘ཨཱཧཱརསམུདཡཱ དུཀྑསམུདཡོ ཨཱཧཱརནིརོདྷཱ དུཀྑནིརོདྷོ སརསཝསེན སམུདཡནིརོདྷོ, ཨཐ ཝཱ ཨུདཡབྦཡདསྶནེན སམུདཡནིརོདྷོ སཧ ཝིཔསྶནཱཡ མགྒོ ཚནྡརཱགནིརོདྷོ’’ཏི ཝདནྟི. ཨེཝཉྩ ཝུཙྩམཱནེ ལོཀུཏྟརིནྡྲིཡཱནཾ ཨཝིཔསྶནཱུཔགཏྟཱ ན སབྦསཱདྷཱརཎཾ ཧོཏཱིཏི པཋམཾ ཝུཏྟནཡོཝ གཧེཏབྦོ. ལོཀུཏྟརིནྡྲིཡེསུ ཧི ཚནྡརཱགཱབྷཱཝཏོཡེཝ ཚནྡརཱགནིརོདྷོཏི ཡུཛྫཏི. སརཱིརེ ཚནྡརཱགེནེཝ སརཱིརེཀདེསེསུ ཀེསཱདཱིསུཔི ཚནྡརཱགོ ཀཏོཝ ཧོཏི, ཛརཱམརཎཝནྟེསུ ཚནྡརཱགེནེཝ ཛརཱམརཎེསུཔི ཚནྡརཱགོ ཀཏོཝ ཧོཏི. ཨེཝཾ ཨསྶཱདཱདཱིནཝཱཔི ཡོཛེཏབྦཱ. པུན དུཀྑཱདཱིནི ཛརཱམརཎཔརིཡནྟཱནི དྭིཨདྷིཀཱནི དྭེ པདསཏཱནི སམུདཡཱདཱིཧི ཚཧི ཚཧི ¶ པདེཧི ཡོཛེཏྭཱ དྭིཨདྷིཀཱནཾ དྭིནྣཾ སཏྟཀསཏཱནཾ ཝསེན ནཡསཧསྶཉྩ ཙཏྟཱརི ཙ སཏཱནི ཙུདྡས ཙ ཝིསྶཛྫནཱནི ནིདྡིཊྛཱནི.

༩. ཨིདཱནི རཱུཔཱདཱིནི ཛརཱམརཎཔརིཡནྟཱནི ཨེཀཱདྷིཀཱནི དྭེ པདསཏཱནི སཏྟཧི ཨནུཔསྶནཱཧི ཡོཛེཏྭཱ ནིདྡིསིཏུཾ པཋམཾ ཏཱཝ ཨནིཙྩཱནུཔསྶནཱདཡོ སཏྟ ཨནུཔསྶནཱ ནིདྡིཊྛཱ. ཏཱནི སབྦཱནི སཏྟཧི སུདྡྷིཀཨནུཔསྶནཱཝིསྶཛྫནེཧི སདྡྷིཾ སཧསྶཉྩ ཙཏྟཱརི ཙ སཏཱནི ཙུདྡས ཙ ཝིསྶཛྫནཱནི ཧོནྟི. ཨནིཙྩནྟི ཨནུཔསྶནཱ ཨནིཙྩཱནུཔསྶནཱ. སཱ ནིཙྩསཉྙཱཔཊིཔཀྑཱ. དུཀྑནྟི ཨནུཔསྶནཱ དུཀྑཱནུཔསྶནཱ. སཱ སུཁསཉྙཱཔཊིཔཀྑཱ. ཨནཏྟཱཏི ཨནུཔསྶནཱ ཨནཏྟཱནུཔསྶནཱ. སཱ ཨཏྟསཉྙཱཔཊིཔཀྑཱ. ཏིསྶནྣཾ ཨནུཔསྶནཱནཾ པརིཔཱུརཏྟཱ ནིབྦིནྡཏཱིཏི ནིབྦིདཱ, ནིབྦིདཱ ཙ སཱ ཨནུཔསྶནཱ ཙཱཏི ནིབྦིདཱནུཔསྶནཱ. སཱ ནནྡིཔཊིཔཀྑཱ. ཙཏསྶནྣཾ ཨནུཔསྶནཱནཾ པརིཔཱུརཏྟཱ ཝིརཛྫཏཱིཏི ཝིརཱགོ, ཝིརཱགོ ཙ སོ ཨནུཔསྶནཱ ཙཱཏི ཝིརཱགཱནུཔསྶནཱ. སཱ རཱགཔཊིཔཀྑཱ. པཉྩནྣཾ ཨནུཔསྶནཱནཾ པརིཔཱུརཏྟཱ རཱགཾ ནིརོདྷེཏཱིཏི ནིརོདྷོ, ནིརོདྷོ ཙ སོ ཨནུཔསྶནཱ ཙཱཏི ནིརོདྷཱནུཔསྶནཱ. སཱ སམུདཡཔཊིཔཀྑཱ. ཚནྣཾ ཨནུཔསྶནཱནཾ པརིཔཱུརཏྟཱ པཊིནིསྶཛྫཏཱིཏི ¶ པཊིནིསྶགྒོ, པཊིནིསྶགྒོ ཙ སོ ཨནུཔསྶནཱ ཙཱཏི པཊིནིསྶགྒཱནུཔསྶནཱ. སཱ ཨཱདཱནཔཊིཔཀྑཱ. ལོཀུཏྟརིནྡྲིཡཱནཾ ཨསཏིཔི ཝིཔསྶནཱུཔགཏྟེ ‘‘སབྦེ སངྑཱརཱ ཨནིཙྩཱ, སབྦེ སངྑཱརཱ དུཀྑཱ, སབྦེ དྷམྨཱ ཨནཏྟཱ’’ཏི (དྷ. པ. ༢༧༧-༢༧༩; པཊི. མ. ༡.༣༡) ཝཙནཏོ ཏེསམྤི ཨནིཙྩདུཀྑཱནཏྟཏྟཱ ཏཏྠ ནིཙྩསུཁཏྟསཉྙཱནཾ ནནྡིཡཱ རཱགསྶ ཙ ཨབྷཱཝཱ ནིརོདྷཝནྟཱནཱིཏི ཨནུཔསྶནཏོ པརིཙྩཱགཔཊིནིསྶགྒཔཀྑནྡནཔཊིནིསྶགྒསམྦྷཝཏོ ཙ ཏེཧིཔི སཏྟ ཨནུཔསྶནཱ ཡོཛིཏཱཏི ཝེདིཏབྦཱ. ཛརཱམརཎཝནྟེསུ ཨནིཙྩཱདིཏོ དིཊྛེསུ ཛརཱམརཎམྤི ཨནིཙྩཱདིཏོ དིཊྛཾ ནཱམ ཧོཏི, ཛརཱམརཎཝནྟེསུ ནིབྦིནྡནྟོ ཝིརཛྫནྟོ ཛརཱམརཎེ ནིབྦིནྣོ ཙ ཝིརཏྟོ ཙ ཧོཏི, ཛརཱམརཎཝནྟེསུ ནིརོདྷཏོ དིཊྛེསུ ཛརཱམརཎམྤི ནིརོདྷཏོ དིཊྛཾ ¶ ནཱམ ཧོཏི, ཛརཱམརཎཝནྟེསུ པཊིནིསྶཛྫནྟོ ཛརཱམརཎཾ པཊིནིསྶཛྫནྟོཝ ཧོཏཱིཏི ཛརཱམརཎེཧི སཏྟ ཨནུཔསྶནཱ ཡོཛིཏཱཏི ཝེདིཏབྦཱ.

༡༠. ཨིདཱནི ཨཱདཱིནཝཉཱཎསྶ ཝཏྠུབྷཱུཏཱནཾ ཨུཔྤཱདཱདཱིནཾ པཉྩནྣཾ ཨཱརམྨཎཱནཾ ཝསེན ཨུཔྤཱདཱདཱིནི ཏེསཾ ཝེཝཙནཱནི པཉྩདས ཝིསྶཛྫནཱནི ནིདྡིཊྛཱནི, སནྟིཔདཉཱཎསྶ ¶ ཏཔྤཊིཔཀྑཱརམྨཎཝསེན ཨནུཔྤཱདཱདཱིནི པཉྩདས ཝིསྶཛྫནཱནི ནིདྡིཊྛཱནི, པུན ཏཱནེཝ ཨུཔྤཱདཱནུཔྤཱདཱདཱིནི པདཱནི ཡུགལ༹ཀཝསེན ཡོཛེཏྭཱ ཏིཾས ཝིསྶཛྫནཱནི ནིདྡིཊྛཱནི. ཨེཝཾ ཨིམསྨིཾ ནཡེཝ སཊྛི ཝིསྶཛྫནཱནི ཧོནྟི. ཏཏྠ ཨུཔྤཱདོཏི པུརིམཀམྨཔཙྩཡཱ ཨིདྷ ཨུཔྤཏྟི. པཝཏྟནྟི ཏཐཱཨུཔྤནྣསྶ པཝཏྟི. ནིམིཏྟནྟི སབྦམྤི སངྑཱརནིམིཏྟཾ. ཡོགཱཝཙརསྶ ཧི སངྑཱརཱ སསཎྛཱནཱ ཝིཡ ཨུཔཊྛཧནྟི, ཏསྨཱ ནིམིཏྟནྟི ཝུཙྩནྟི. ཨཱཡཱུཧནཱཏི ཨཱཡཏིཾ པཊིསནྡྷིཧེཏུབྷཱུཏཾ ཀམྨཾ. ཏཉྷི ཨབྷིསངྑརཎཊྛེན ཨཱཡཱུཧནཱཏི ཝུཙྩཏི.

པཊིསནྡྷཱིཏི ཨཱཡཏིཾ ཨུཔྤཏྟི. སཱ ཧི བྷཝནྟརཔཊིསནྡྷཱནཏོ པཊིསནྡྷཱིཏི ཝུཙྩཏི. གཏཱིཏི ཡཱཡ གཏིཡཱ སཱ པཊིསནྡྷི ཧོཏི. སཱ ཧི གནྟབྦཏོ གཏཱིཏི ཝུཙྩཏི. ནིབྦཏྟཱིཏི ཁནྡྷཱནཾ ནིབྦཏྟནཾ. ཨུཔཔཏྟཱིཏི ‘‘སམཱཔནྣསྶ ཝཱ ཨུཔཔནྣསྶ ཝཱ’’ཏི (པཊི. མ. ༡.༧༢) ཨེཝཾ ཝུཏྟཱ ཝིཔཱཀཔཝཏྟི. ཛཱཏཱིཏི ཛནནཾ. ཏཏྠ ཏཏྠ ནིབྦཏྟམཱནཱནཾ སཏྟཱནཾ ཡེ ཡེ ཁནྡྷཱ པཱཏུབྷཝནྟི, ཏེསཾ ཏེསཾ པཋམཾ ¶ པཱཏུབྷཱཝོ. ཛརཱཏི ཛཱིརཎཾ. སཱ དུཝིདྷཱ ཋིཏཉྙཐཏྟལཀྑཎསངྑཱཏཾ སངྑཏལཀྑཎཉྩ ཁཎྜིཙྩཱདིསམྨཏོ སནྟཏིཡཾ ཨེཀབྷཝཔརིཡཱཔནྣཁནྡྷཱནཾ པུརཱཎབྷཱཝོ ཙ. སཱ ཨིདྷ ཨདྷིཔྤེཏཱ. བྱཱདྷཱིཏི དྷཱཏུཀྑོབྷཔཙྩཡསམུཊྛིཏོ པིཏྟསེམྷཝཱཏསནྣིཔཱཏཨུཏུཝིཔརིཎཱམཝིསམཔརིཧཱརཨུཔཀྐམཀམྨཝིཔཱཀཝསེན ཨཊྛཝིདྷོ ཨཱབཱདྷོ. ཝིཝིདྷཾ དུཀྑཾ ཨཱདཧཏི ཝིདཧཏཱིཏི བྱཱདྷི, བྱཱདྷཡཏི ཏཱཔེཏི, ཀམྤཡཏཱིཏི ཝཱ བྱཱདྷི. མརཎནྟི མརནྟི ཨེཏེནཱཏི མརཎཾ. ཏཾ དུཝིདྷཾ ཝཡལཀྑཎསངྑཱཏཾ སངྑཏལཀྑཎཉྩ ཨེཀབྷཝཔརིཡཱཔནྣཛཱིཝིཏིནྡྲིཡཔྤབནྡྷཝིཙྪེདོ ཙ. ཏཾ ཨིདྷ ཨདྷིཔྤེཏཾ.

སོཀོཏི སོཙནཾ. ཉཱཏིབྷོགརོགསཱིལདིཊྛིབྱསནེཧི ཕུཊྛསྶ ཙིཏྟསནྟཱཔོ. པརིདེཝོཏི པརིདེཝནཾ. ཉཱཏིབྱསནཱདཱིཧིཡེཝ ཕུཊྛསྶ ཝཙཱིཔལཱཔོ. ཨུཔཱཡཱསོཏི བྷུསོ ཨཱཡཱསོ. ཉཱཏིབྱསནཱདཱིཧིཡེཝ ཕུཊྛསྶ ཨདྷིམཏྟཙེཏོདུཀྑཔྤབྷཱཝིཏོ དོསོཡེཝ. ཨེཏྠ ཙ ཨུཔྤཱདཱདཡོ པཉྩེཝ ཨཱདཱིནཝཉཱཎསྶ ཝཏྠུཝསེན ཝུཏྟཱ, སེསཱ ཏེསཾ ཝེཝཙནཝསེན. ‘‘ནིབྦཏྟཱི’’ཏི ཧི ཨུཔྤཱདསྶ, ‘‘ཛཱཏཱི’’ཏི པཊིསནྡྷིཡཱ ཝེཝཙནཾ, ‘‘གཏི ཨུཔཔཏྟཱི’’ཏི ཨིདཾ དྭཡཾ པཝཏྟསྶ, ཛརཱདཡོ ནིམིཏྟསྶཱཏི. ཨནུཔྤཱདཱདིཝཙནེཧི པན ནིབྦཱནམེཝ ཝུཏྟཾ.

པུན ¶ ཏཱནེཝ ཨུཔྤཱདཱནུཔྤཱདཱདཱིནི སཊྛི པདཱནི དུཀྑསུཁཔདེཧི ཡོཛེཏྭཱ སཊྛི ཝིསྶཛྫནཱནི, བྷཡཁེམཔདེཧི ཡོཛེཏྭཱ སཊྛི ཝིསྶཛྫནཱནི, སཱམིསནིརཱམིསཔདེཧི ¶ ཡོཛེཏྭཱ སཊྛི ཝིསྶཛྫནཱནི, སངྑཱརནིབྦཱནཔདེཧི ཡོཛེཏྭཱ སཊྛི ཝིསྶཛྫནཱནི ནིདྡིཊྛཱནི. ཏཏྠ དུཀྑནྟི ཨནིཙྩཏྟཱ དུཀྑཾ. དུཀྑཔཊིཔཀྑཏོ སུཁཾ. ཡཾ དུཀྑཾ, ཏཾ བྷཡཾ. བྷཡཔཊིཔཀྑཏོ ཁེམཾ. ཡཾ བྷཡཾ, ཏཾ ཝཊྚཱམིསལོཀཱམིསེཧི ཨཝིཔྤམུཏྟཏྟཱ སཱམིསཾ. སཱམིསཔཊིཔཀྑཏོ ནིརཱམིསཾ. ཡཾ སཱམིསཾ, ཏཾ སངྑཱརམཏྟམེཝ. སངྑཱརཔཊིཔཀྑཏོ སནྟཏྟཱ ནིབྦཱནཾ. སངྑཱརཱ ཧི ཨཱདིཏྟཱ, ནིབྦཱནཾ སནྟནྟི. དུཀྑཱཀཱརེན བྷཡཱཀཱརེན སཱམིསཱཀཱརེན སངྑཱརཱཀཱརེནཱཏི ཨེཝཾ ཏེན ཏེན ཨཱཀཱརེན པཝཏྟིཾ སནྡྷཱཡ ཏཐཱ ཏཐཱ ཝུཏྟནྟི ཝེདིཏབྦནྟི.

༡༡. པརིགྒཧཊྛཱདཱིནི ཨེཀཏིཾས ཝིསྶཛྫནཱནི ཨརིཡམགྒཀྑཎཝསེན ནིདྡིཊྛཱནི. ཨརིཡམགྒསམྤཡུཏྟཱ ཧི དྷམྨཱ ¶ ཨཱདིཏོ པབྷུཏི ཨུཔྤཱདནཏྠཾ པརིགྒཡ྄ཧནྟེ ཨིཏི པརིགྒཧཱ, ཏེསཾ སབྷཱཝོ པརིགྒཧཊྛོ. ཏེསཾཡེཝ ཨཉྙམཉྙཔརིཝཱརབྷཱཝེན པརིཝཱརཊྛོ. བྷཱཝནཱཔཱརིཔཱུརིཝསེན པརིཔཱུརཊྛོ. ཏེསཾཡེཝ སམཱདྷིཝསེན ཨེཀཱརམྨཎཔརིགྒཧམཔེཀྑིཏྭཱ ཨེཀགྒཊྛོ. ནཱནཱརམྨཎཝིཀྑེཔཱབྷཱཝམཔེཀྑིཏྭཱ ཨཝིཀྑེཔཊྛོ. ཝཱིརིཡཝསེན པགྒཧཊྛོ. སམཱདྷིཝསེན ཨུདཀེན ནྷཱནཱིཡཙུཎྞཱནཾ ཝིཡ ཨཝིཔྤཀིཎྞཏཱ ཨཝིསཱརཊྛོ. སམཱདྷིཡོགེན ཨལུལིཏཏྟཱ ཨནཱཝིལཊྛོ. ཨཝིཀམྤིཏཏྟཱ ཨནིཉྫནཊྛོ. ཨེཀཏྟུཔཊྛཱནཝསེནཱཏི སམཱདྷིཡོགེན ཙ ཨེཀཱརམྨཎེ བྷུསཾ པཏིཊྛཱནཝསེན ཙ. ཋིཏཊྛོཏི ཨཱརམྨཎེ ནིཙྩལབྷཱཝེན པཏིཊྛིཏཊྛོ. ཏསྶ ནིབྦཱནཱརམྨཎསྶ ཨཱལམྦནབྷཱཝེན ཨཱརམྨཎཊྛོ. ཏཏྠེཝ ནིཀཱམཙཱརབྷཱཝེན གོཙརཊྛོ. ནིསྶརཎཔཧཱནབྷཱཝེན ནིབྦཱནསྶ པཧཱནཊྛོ. ཀིལེསཔརིཙྩཱགཝསེན ཨརིཡམགྒསྶ པརིཙྩཱགཊྛོ. དུབྷཏོ ཝུཊྛཱནཝསེན ཝུཊྛཱནཊྛོ. ནིམིཏྟཔཝཏྟེཧི ནིཝཏྟནཝསེན ནིཝཏྟནཊྛོ. ནིབྦུཏཏྟཱ སནྟཊྛོ. ཨཏཔྤཀཏྟཱ ཨུཏྟམཏྟཱ ཙ པཎཱིཏཊྛོ. ཀིལེསེཧི ཝིམུཏྟཏྟཱ, ཨཱརམྨཎེ ཙ ཨདྷིམུཏྟཏྟཱ ཝིམུཏྟཊྛོ. ཨཱསཝཱནཾ ཨཝིསཡབྷཱཝེན པརིསུདྡྷཏྟཱ ཨནཱསཝཊྛོ. ཀིལེསཀནྟཱརསཾསཱརཀནྟཱརཱཏིཀྐམནེན ཏརཎཊྛོ. སངྑཱརནིམིཏྟཱབྷཱཝེན ཨནིམིཏྟཊྛོ. ཏཎྷཱཔཎིདྷིཨབྷཱཝེན ཨཔྤཎིཧིཏཊྛོ. ཨཏྟསཱརཱབྷཱཝེན སུཉྙཏཊྛོ. ཝིམུཏྟིརསེན ཨེཀརསཏཱཡ, སམཐཝིཔསྶནཱནཾ ཨེཀརསཏཱཡ ཝཱ ཨེཀརསཊྛོ. སམཐཝིཔསྶནཱནཾ ཨཉྙམཉྙཾ ཨནཏིཝཏྟནཊྛོ. ཏེསཾཡེཝ ཡུགནདྡྷཊྛོ. ཨརིཡམགྒསྶ སངྑཱརཏོ ནིགྒམནེ ¶ ནིཡྻཱནཊྛོ. ནིབྦཱནསམྤཱཔནེན ཧེཏུཊྛོ. ནིབྦཱནཔཙྩཀྑཀརཎེན དསྶནཊྛོ. ཨདྷིཔཏིབྷཱཝེན ཨཱདྷིཔཏེཡྻཊྛོཏི.

༡༢. སམཐཱདཱིནི ཙཏྟཱརི ཝིསྶཛྫནཱནི སམཐཝིཔསྶནཱཝསེན ནིདྡིཊྛཱནི. ཨནིཙྩཱདིཝསེན ཨནུ ཨནུ པསྶནཏོ ཨནུཔསྶནཊྛོ. ཡུགནདྡྷསྶ སམཐཝིཔསྶནཱདྭཡསྶ ཨེཀརསབྷཱཝེན ¶ ཨནཏིཝཏྟནཊྛོ. སིཀྑཱདཱིནི ནཝ ཝིསྶཛྫནཱནི ཨརིཡམགྒསྶ ཨཱདིམཛ྄ཛྷཔརིཡོསཱནཝསེན ནིདྡིཊྛཱནི. སིཀྑིཏབྦཏྟཱ སིཀྑཱ ¶ . ཏསྶཱ སམཱདཱཏབྦཏོ སམཱདཱནཊྛོ. སཱིལེ པཏིཊྛཱཡ ཀམྨཊྛཱནཝསེན གཧིཏསྶ ཨཱརམྨཎསྶ བྷཱཝནཱཔཝཏྟིཊྛཱནཏྟཱ གོཙརཊྛཱནཏྟཱ ཙ གོཙརཊྛོ. སམཐཀཱལེ ཝིཔསྶནཱཀཱལེ ཝཱ ཀོསཛྫཝསེན ལཱིནསྶ ཙིཏྟསྶ དྷམྨཝིཙཡཝཱིརིཡཔཱིཏིསམྦོཛ྄ཛྷངྒབྷཱཝནཱཝསེན ཨུསྶཱཧནཊྛོ པགྒཧཊྛོ. ཨུདྡྷཙྩཝསེན ཨུདྡྷཏསྶ ཙིཏྟསྶ པསྶདྡྷིསམཱདྷིཨུཔེཀྑཱསམྦོཛ྄ཛྷངྒབྷཱཝནཱཝསེན སནྣིསཱིདཱཔནཊྛོ ནིགྒཧཊྛོ. ཨུབྷོ ཝིསུདྡྷཱནནྟི ཨུབྷཏོ ཝིསུདྡྷཱནཾ, ལཱིནུདྡྷཏཔཀྑཏོ ནིཝཱརེཏྭཱ ཝིསུདྡྷཱནཾ ཙིཏྟཱནནྟི ཨཏྠོ. མཛ྄ཛྷིམབྷཱཝེ ཋིཏཱནཾ སནྟཏིཝསེན པཝཏྟམཱནཱནཾ ཙིཏྟཱནཾ ཝསེན བཧུཝཙནཾ ཀཏནྟི ཝེདིཏབྦཾ. ཨུསྶཱཧནསནྣིསཱིདཱཔནེསུ སབྱཱཔཱརཱབྷཱཝོ ཨཛ྄ཛྷུཔེཀྑནཊྛོ. སམཔྤཝཏྟསྶ ཙིཏྟསྶ ཝསེན བྷཱཝནཱ ཝིསེསཱདྷིགམཊྛོ. ཨརིཡམགྒཔཱཏུབྷཱཝཝསེན ཨུཏྟརིཔཊིཝེདྷཊྛོ. ཨརིཡམགྒསིདྡྷཙཏུསཙྩཔཊིཝེདྷཝསེན སཙྩཱབྷིསམཡཊྛོ. ཕལསམཱཔཏྟིཝསེན ནིརོདྷེ པཏིཊྛཱཔཀཊྛོ. སཱ ཧི ཏཾསམངྒིཔུགྒལཾ ནིརོདྷསངྑཱཏེ ནིབྦཱནེ པཏིཊྛཱཔེཏི.

སདྡྷིནྡྲིཡཱདཱིནི པཉྩ ཝིསྶཛྫནཱནི ཨིནྡྲིཡཊྛཝསེན ཝུཏྟཱནི. ཨདྷིམོཀྑཊྛོཏི ཨདྷིམུཙྩནཊྛོ. ཨུཔཊྛཱནཊྛོཏི ཨཱརམྨཎཾ ཨུཔེཙྩ པཏིཊྛཱནཊྛོ. དསྶནཊྛོཏི སབྷཱཝཔེཀྑནཊྛོ. སདྡྷཱབལཱདཱིནི པཉྩ ཝིསྶཛྫནཱནི བལཊྛཝསེན ནིདྡིཊྛཱནི. ཨཀམྤིཡཊྛེན སདྡྷཱཝ བལནྟི སདྡྷཱབལཾ. ཨསྶདྡྷིཡེཏི ཨསྶདྡྷིཡེན. ཨསྶདྡྷིཡནྟི ཙ སདྡྷཱཔཊིཔཀྑབྷཱུཏོ ཙིཏྟུཔྤཱདོ. ཨཀམྤིཡཊྛོཏི ཨཀམྤེཏབྦཊྛོ, ཀམྤེཏུཾ ན སཀྐཱཏི ཨཏྠོ. ཀོསཛྫེཏི ཀུསཱིཏབྷཱཝསངྑཱཏེན ཐིནམིདྡྷེན. པམཱདེཏི སཏིཔཊིཔཀྑེན ཙིཏྟུཔྤཱདེན. ཨུདྡྷཙྩེཏི ཨཝཱུཔསམསངྑཱཏེན ཨུདྡྷཙྩེན. ཨཝིཛྫཱཡཱཏི མོཧེན. སཏིསམྦོཛ྄ཛྷངྒཱདཱིནི སཏྟ ཝིསྶཛྫནཱནི བོཛ྄ཛྷངྒཊྛཝསེན ནིདྡིཊྛཱནི. བུཛ྄ཛྷནཀསྶ ཨངྒོ ¶ བོཛ྄ཛྷངྒོ. པསཏྠོ སུནྡརོ ཙ བོཛ྄ཛྷངྒོ སམྦོཛ྄ཛྷངྒོ, སཏིཡེཝ སམྦོཛ྄ཛྷངྒོ སཏིསམྦོཛ྄ཛྷངྒོ. དྷམྨེ ཝིཙིནཱཏཱིཏི དྷམྨཝིཙཡོ. པཉྙཱཡེཏཾ ནཱམཾ. པཝིཙཡཊྛོཏི ཝིཙཱརཊྛོ. པཱིནཡཏཱིཏི པཱིཏི. ཕརཎཊྛོཏི ཝིསརཎཊྛོ. པསྶམྦྷནཾ པསྶདྡྷི ¶ . ཨུཔསམཊྛོཏི ནིདྡརཐཊྛོ. ཨུཔཔཏྟིཏོ ཨིཀྑཏཱིཏི ཨུཔེཀྑཱ, སམཾ པེཀྑཏི ཨཔཀྑཔཏིཏཱཝ ཧུཏྭཱ པེཀྑཏཱིཏི ཨཏྠོ. སཱ ཨིདྷ ཏཏྲམཛ྄ཛྷཏྟུཔེཀྑཱ, བོཛ྄ཛྷངྒུཔེཀྑཱཏིཔི ཏསྶཱ ནཱམཾ. སམཝཱཧིཏལཀྑཎཏྟཱ པཊིསངྑཱནཊྛོ.

སམྨཱདིཊྛཱདཱིནི ཨཊྛ ཝིསྶཛྫནཱནི མགྒཝསེན ནིདྡིཊྛཱནི. སམྨཱ པསྶཏི, སམྨཱ ཝཱ ཏཱཡ པསྶནྟི, པསཏྠཱ སུནྡརཱ ཝཱ དིཊྛཱིཏི སམྨཱདིཊྛི. ཏསྶཱ སམྨཱདིཊྛིཡཱ. སམྨཱ སངྐཔྤེཏི, སམྨཱ ཝཱ ཏེན སངྐཔྤེནྟི, པསཏྠོ སུནྡརོ ཝཱ སངྐཔྤོཏི སམྨཱསངྐཔྤོ. ཨབྷིརོཔནཊྛོཏི ཙིཏྟསྶ ཨཱརམྨཎཱརོཔནཊྛོ. ཨཱརམྨཎཱབྷིནིརོཔནཊྛོཏིཔི པཱཋོ. སམྨཱ ཝདཏི ¶ , སམྨཱ ཝཱ ཏཱཡ ཝདནྟི, པསཏྠཱ སུནྡརཱ ཝཱ ཝཱཙཱཏི སམྨཱཝཱཙཱ. མིཙྪཱཝཱཙཱཝིརཏིཡཱ ཨེཏཾ ནཱམཾ. པརིགྒཧཊྛོཏི ཙཏུབྦིདྷཝཙཱིསཾཝརཔརིགྒཧཊྛོ. སམྨཱ ཀརོཏི, སམྨཱ ཝཱ ཏེན ཀརོནྟི, པསཏྠཾ སུནྡརཾ ཝཱ ཀམྨནྟི སམྨཱཀམྨཾ, སམྨཱཀམྨམེཝ སམྨཱཀམྨནྟོ. མིཙྪཱཀམྨནྟཝིརཏིཡཱ ཨེཏཾ ནཱམཾ. སམུཊྛཱནཊྛོཏི ཏིཝིདྷཀཱཡསཾཝརསམུཊྛཱནཊྛོ. སམྨཱ ཨཱཛཱིཝཏི, སམྨཱ ཝཱ ཏེན ཨཱཛཱིཝནྟི, པསཏྠོ སུནྡརོ ཝཱ ཨཱཛཱིཝོཏི སམྨཱཨཱཛཱིཝོ. མིཙྪཱཛཱིཝཝིརཏིཡཱ ཨེཏཾ ནཱམཾ. ཝོདཱནཊྛོཏི པརིསུདྡྷཊྛོ. སམྨཱ ཝཱཡམཏི, སམྨཱ ཝཱ ཏེན ཝཱཡམནྟི, པསཏྠོ སུནྡརོ ཝཱ ཝཱཡཱམོཏི སམྨཱཝཱཡཱམོ. སམྨཱ སརཏི, སམྨཱ ཝཱ ཏཱཡ སརནྟི, པསཏྠཱ སུནྡརཱ ཝཱ སཏཱིཏི སམྨཱསཏི. སམྨཱ སམཱདྷིཡཏི, སམྨཱ ཝཱ ཏེན སམཱདྷིཡནྟི, པསཏྠོ སུནྡརོ ཝཱ སམཱདྷཱིཏི སམྨཱསམཱདྷི.

༡༣. ཨིནྡྲིཡཱདཱིནི དས ཝིསྶཛྫནཱནི རཱསིཀཏྭཱ ཨནུཔུབྦཔཊིཔཱཊིཝསེན ནིདྡིཊྛཱནི. ཨཱདྷིཔཏེཡྻཊྛོཏི ཨིནྡཊྛཀརཎཝསེན ཨདྷིཔཏིཨཏྠོ. ཨཀམྤིཡཊྛོཏི པཊིཔཀྑེཧི ཀམྤེཏུཾ ཨསཀྐུཎེཡྻཊྛོ. ནིཡྻཱནཊྛོཏི ལོཀིཡལོཀུཏྟརཱནམྤི པཊིཔཀྑཏོ ནིགྒམནཊྛོ. ཧེཏུཊྛོཏི མིཙྪཱདིཊྛཱདཱིནཾ པཧཱནཱཡ སམྨཱདིཊྛཱདཡོ ཧེཏཱུཏི ཝཱ སབྦེཔི སམྨཱདིཊྛཱདཡོ ནིབྦཱནསམྤཱཔཀཧེཏཱུཏི ཝཱ ཧེཏུཊྛོ. སཏིཔཊྛཱནེསུ ཨཱརམྨཎེསུ ¶ ཨོཀྑནྡིཏྭཱ པཀྑནྡིཏྭཱ ཨུཔཊྛཱནཏོ ཨུཔཊྛཱནཾ, སཏིཡེཝ ཨུཔཊྛཱནཾ སཏིཔཊྛཱནཾ. ཀཱཡཝེདནཱཙིཏྟདྷམྨེསུ པནསྶཱ ཨསུབྷདུཀྑཱནིཙྩཱནཏྟཱཀཱརགཧཎཝསེ ¶ སུབྷསུཁནིཙྩཏྟསཉྙཱཔཧཱནཀིཙྩསཱདྷནཝསེན ཙ པཝཏྟིཏོ ཙཏུདྷཱ བྷེདོ ཧོཏི. ཨེཏཱནི པུབྦབྷཱགེ ནཱནཱཙིཏྟེསུ ལབྦྷནྟི, མགྒཀྑཎེ པན ཨེཀཱཡེཝ སཏི ཙཏྟཱརི ནཱམཱནི ལབྷཏི.

སམྨཔྤདྷཱནེསུ པདཧནྟི ཨེཏེནཱཏི པདྷཱནཾ, སོབྷནཾ པདྷཱནཾ སམྨཔྤདྷཱནཾ. སམྨཱ ཝཱ པདཧནྟི ཨེཏེནཱཏི སམྨཔྤདྷཱནཾ, སོབྷནཾ ཝཱ ཏཾ ཀིལེསཝིརཱུཔཏྟཝིརཧཏོ པདྷཱནཉྩ ཧིཏསུཁནིཔྥཱདཀཏྟེན སེཊྛབྷཱཝཱཝཧནཏོ པདྷཱནབྷཱཝཀརཎཏོ ཝཱ སམྨཔྤདྷཱནཾ. ཝཱིརིཡསྶེཏཾ ཨདྷིཝཙནཾ. ཨུཔྤནྣཱནུཔྤནྣཱནཾ ཨནུཔྤནྣུཔྤནྣཱནཉྩ ཨཀུསལཀུསལཱནཾ དྷམྨཱནཾ པཧཱནཱནུཔྤཏྟིཨུཔྤཱདཊྛིཏིཀིཙྩསཱདྷནཝསེན པཝཏྟིཏོ པནསྶ ཙཏུདྷཱ བྷེདོ ཧོཏི. ཨེཏཱནིཔི པུབྦབྷཱགེ ནཱནཱཙིཏྟེསུ ལབྦྷནྟི, མགྒཀྑཎེ པན ཨེཀམེཝ ཝཱིརིཡཾ ཙཏྟཱརི ནཱམཱནི ལབྷཏི. པདཧནཊྛོཏི ཨུསྶཱཧནཊྛོ. པདྷཱནཊྛོཏིཔི པཱཋོ, སོཡེཝཏྠོ.

ཨིདྡྷིཔཱདཱནནྟི ཨེཏྠ ཚནྡཝཱིརིཡཙིཏྟཝཱིམཾསཱསུ ཨེཀེཀོ ཨིཛ྄ཛྷཏཱིཏི ཨིདྡྷི, སམིཛ྄ཛྷཏི ནིཔྥཛྫཏཱིཏི ཨཏྠོ. ཨིཛ྄ཛྷནྟི ཝཱ ཨེཏཱཡ སཏྟཱ ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏི ཨིདྡྷི, པཋམེནཏྠེན ¶ ཨིདྡྷི ཨེཝ པཱདོ ཨིདྡྷིཔཱདོ, ཨིདྡྷིཀོཊྛཱསོཏི ཨཏྠོ. དུཏིཡེནཏྠེན ཨིདྡྷིཡཱ པཱདོཏི ཨིདྡྷིཔཱདོ. པཱདོཏི པཏིཊྛཱ, ཨདྷིགམཱུཔཱཡོཏི ཨཏྠོ. ཏེན ཧི ཡསྨཱ ཨུཔརཱུཔརི ཝིསེསསངྑཱཏཾ ཨིདྡྷིཾ པཛྫནྟི པཱཔུཎནྟི, ཏསྨཱ པཱདོཏི ཝུཙྩཏི. ཨེཏེ ཚནྡཱདཡོ པུབྦབྷཱགེ ཨདྷིཔཏིཝསེན ནཱནཱཙིཏྟེསུ ལབྦྷནྟི, མགྒཀྑཎེ པན སཧེཝ ལབྦྷནྟི. ཨིཛ྄ཛྷནཊྛོཏི ནིཔྥཛྫནཊྛོ པཏིཊྛཱནཊྛོ ཝཱ. སཙྩཱནནྟི ཙཏུནྣཾ ཨརིཡསཙྩཱནཾ. ཏཐཊྛོཏི ཡཐཱསབྷཱཝཊྛོ. ཨིམཱནི ཨཊྛ ཝིསྶཛྫནཱནི ལོཀིཡལོཀུཏྟརམིསྶཀཱནི. པཡོགཱནནྟི ཙཏུནྣཾ ཨརིཡམགྒཔཡོགཱནཾ. པཊིཔྤསྶདྡྷཊྛོཏི ཙཏུནྣཾ ཨརིཡཕལཱནཾ པཊིཔྤསྶདྡྷཊྛོ. མགྒཔཡོགོ ཧི ཕལཀྑཎེ པཊིཔྤསྶདྡྷོ ཧོཏི ནིཊྛིཏཀིཙྩཏྟཱ. མགྒཔཡོགཱནཾ ཕལོདཡེན པཊིཔྤསྶདྡྷབྷཱཝོ ཝཱ. ཕལཱནཾ སཙྪིཀིརིཡཊྛོཏི ཨརིཡཕལཱནཾ པཙྩཝེཀྑཎཝསེན པཙྩཀྑཀརཎཊྛོ. ཨཱརམྨཎསཙྪིཀིརིཡཱ ¶ ཝུཏྟཱ ཧོཏི, ཕལཀྑཎེ པཊིལཱབྷསཙྪིཀིརིཡཱ ཝཱ. ཝིཏཀྐཱདཱིནི པཉྩ ཝིསྶཛྫནཱནི ཛྷཱནངྒཝསེན ནིདྡིཊྛཱནི. ཝིཏཀྐནཾ ཝིཏཀྐོ, ཨཱུཧནནྟི ¶ ཝུཏྟཾ ཧོཏི. ཝིཙརཎཾ ཝིཙཱརོ, ཨནུསཉྩརཎནྟི ཝུཏྟཾ ཧོཏི. ཨུཔཝིཙཱརཊྛོཏི ཨནུམཛྫནཊྛོ. ཨབྷིསནྡནཊྛོཏི ཏེམནཊྛོ སམཱདྷིཝསེན ཙིཏྟསྶ ཨེཀགྒཊྛོ.

ཨཱཝཛྫནཱདཱིནི པཉྩདས ཝིསྶཛྫནཱནི པཀིཎྞཀཝསེན ནིདྡིཊྛཱནི. པཉྩདྭཱརམནོདྭཱརེསུ བྷཝངྒཱརམྨཎཏོ ཨཉྙཱརམྨཎེ ཙིཏྟསནྟཱནཾ ནམེནྟཱནཾ དྭིནྣཾ ཙིཏྟཱནཾ ཨཱཝཛྫནཊྛོ. ཝིཉྙཱཎསྶ ཝིཛཱནནཊྛོ. པཉྙཱཡ པཛཱནནཊྛོ. སཉྙཱཡ སཉྫཱནནཊྛོ. སམཱདྷིསྶ ཨེཀོདཊྛོ. དུཏིཡཛ྄ཛྷཱནསྨིཉྷི སམཱདྷི ཨེཀོ ཨུདེཏཱིཏི ཨེཀོདཱིཏི ཝུཙྩཏི, ཝིཏཀྐཝིཙཱརེཧི ཨནཛ྄ཛྷཱརུལ༹ྷཏྟཱ ཨགྒོ སེཊྛོ ཧུཏྭཱ ཨུཔྤཛྫཏཱིཏི ཨཏྠོ. སེཊྛོཔི ཧི ལོཀེ ཨེཀོཏི ཝུཙྩཏི. ཝིཏཀྐཝིཙཱརཝིརཧིཏོ ཝཱ ཨེཀོ ཨསཧཱཡོ ཧུཏྭཱ ཨུདེཏཱིཏིཔི ཝཊྚཏི. སབྦོཔི ཝཱ ཀུསལསམཱདྷི ནཱིཝརཎཱདཱིནཾ ཨུདྡྷཙྩསྶེཝ ཝཱ པཊིཔཀྑཏྟཱ ཏེཧི ཨནཛ྄ཛྷཱརུལ༹ྷོཏི ཨགྒོ ཧུཏྭཱ ཨུདེཏཱིཏི ཝཱ ཏེཧི ཝིརཧིཏོཏི ཨསཧཱཡོ ཧུཏྭཱ ཨུདེཏཱིཏི ཝཱ ཨེཀོདཱིཏི ཡུཛྫཏི. ཨབྷིཉྙཱཡ ཉཱཏཊྛོཏི ཉཱཏཔརིཉྙཱཡ སབྷཱཝཛཱནནཊྛོ. པརིཉྙཱཡ ཏཱིརཎཊྛོཏི ཏཱིརཎཔརིཉྙཱཡ ཨནིཙྩཱདིཏོ ཨུཔཔརིཀྑཎཊྛོ. པཧཱནསྶ པརིཙྩཱགཊྛོཏི པཧཱནཔརིཉྙཱཡ པཊིཔཀྑཔཛཧནཊྛོ. སམཔྤཝཏྟཱཡ བྷཱཝནཱཡ ཨེཀརསཊྛོ. ཕསྶནཊྛོཏི ཕུསནཊྛོ ཝིནྡནཊྛོ. པཱིལཱ༹བྷཱརཝཧནཱདིནཱ ཁནྡྷཊྛོ. སུཉྙཱདིནཱ དྷཱཏུཊྛོ. སཀསཀམརིཡཱདཱཡཏནཱདིནཱ ཨཱཡཏནཊྛོ. པཙྩཡེཧི སངྒམྨ ཀཏཝསེན སངྑཏཊྛོ. ཏབྦིཔརཱིཏེན ཨསངྑཏཊྛོ.

༡༤. ཙིཏྟཊྛཱདཱིནི པཉྩདས ཝིསྶཛྫནཱནི ཙིཏྟསམྦནྡྷེན ནིདྡིཊྛཱནི. ཙིཏྟཊྛོཏི ཨེཏྠ ཨཱརམྨཎཾ ཙིནྟེཏཱིཏི ཙིཏྟཾ, ཝིཛཱནཱཏཱིཏི ཨཏྠོ. ཡཾ པནེཏྠ ཛཝནཾ ཧོཏི, ཏཾ ཛཝནཝཱིཐིཝསེན ¶ ཨཏྟནོ སནྟཱནཾ ཙིནོཏཱིཏིཔི ཙིཏྟཾ, ཡཾ ཝིཔཱཀཾ ཧོཏི, ཏཾ ཀམྨཀིལེསེཧི ཙིཏནྟིཔི ཙིཏྟཾ, སབྦམྤི ཡཐཱནུརཱུཔཾ ཙིཏྟཏཱཡ ཙིཏྟཾ, ཙིཏྟཀརཎཏཱཡ ཙིཏྟཾ, ཡཾ ཝཊྚསྶ པཙྩཡོ ཧོཏི, ཏཾ སཾསཱརདུཀྑཾ ཙིནོཏཱིཏིཔི ཙིཏྟཾ. ཨེཝཾ ཨཱརམྨཎེ ¶ ཙིཏྟཏཱདིཏོ ཙིཏྟཊྛོ. ཙིཏྟུཔྤཱདནེ ཕལུཔྤཱདནེ ཝཱ ནཱསྶ ཨནྟརམཏྠཱིཏི ཨནནྟརཾ, ཨནནྟརསྶ བྷཱཝོ ཨཱནནྟརིཡཾ, ཙིཏྟསྶ ཨཱནནྟརིཡཾ ཙིཏྟཱནནྟརིཡཾ, སོ ཙིཏྟཱནནྟརིཡཊྛོ. ཨརཧཏོ ཙུཏིཙིཏྟཾ ཝཛྫེཏྭཱ ཡསྶ ཀསྶཙི སམནནྟརནིརུདྡྷསྶ ཙིཏྟསྶ ཨནནྟརཙིཏྟུཔྤཱདནེ སམཏྠབྷཱཝོ མགྒཙིཏྟསྶ ཨནནྟརཾ ཕལུཔྤཱདནེ སམཏྠབྷཱཝོཏི ཨདྷིཔྤཱཡོ. ཙིཏྟསྶ ཝུཊྛཱནཊྛོཏི གོཏྲབྷུཙིཏྟསྶ ¶ ནིམིཏྟཏོ, མགྒཙིཏྟསྶ ནིམིཏྟཔཝཏྟཏོ ཝུཊྛཱནཊྛོ. ཙིཏྟསྶ ཝིཝཊྚནཊྛོཏི ཏསྶེཝ ཙིཏྟདྭཡསྶ ཡཐཱཝུཏྟཏོ ཝུཊྛིཏསྶ ནིབྦཱནེ ཝིཝཊྚནཊྛོ. ཙིཏྟསྶ ཧེཏུཊྛོཏི ཙིཏྟསྶ ཧེཏུཔཙྩཡབྷཱུཏཱནཾ ནཝནྣཾ ཧེཏཱུནཾ ཧེཏུཊྛོ. ཙིཏྟསྶ པཙྩཡཊྛོཏི ཙིཏྟསྶ ཝཏྠཱརམྨཎཱདཱིནཾ ཨནེཀེསཾ པཙྩཡཱནཾ པཙྩཡཊྛོ. ཙིཏྟསྶ ཝཏྠུཊྛོཏི ཙིཏྟསྶ ཝཏྠུབྷཱུཏཱནཾ ཙཀྑུསོཏགྷཱནཛིཝ྄ཧཱཀཱཡཧདཡཝཏྠཱུནཾ ཝཏྠུཊྛོ. ཙིཏྟསྶ བྷཱུམཊྛོཏི ཙིཏྟསྶ ཨུཔྤཏྟིདེསཝསེན ཀཱམཱཝཙརཱདིབྷཱུམིཨཏྠོ. ཙིཏྟསྶ ཨཱརམྨཎཊྛོཏི རཱུཔཱདིཨཱརམྨཎཊྛོ. པརིཙིཏསྶཱརམྨཎསྶ སཉྩརཎཊྛཱནཊྛེན གོཙརཊྛོ. ཨུཔརི ཝུཏྟཝིཉྙཱཎཙརིཡཱཝསེན ཙརིཡཊྛོ. ཨཐ ཝཱ པཡོགསམུདཱཙཱརཊྛོ ཙརིཡཊྛོ. ཙིཏྟསྶ གམནཱབྷཱཝེཔི དཱུརསནྟིཀཱརམྨཎགཧཎཝསེན གཏཊྛོ. ཨབྷིནཱིཧཱརཊྛོཏི གཧིཏཱརམྨཎཏོ ཨཉྙཱརམྨཎམནསིཀཱརཏྠཾ ཙིཏྟསྶ ཨབྷིནཱིཧརཎཊྛོ. ཙིཏྟསྶ ནིཡྻཱནཊྛོཏི མགྒཙིཏྟསྶ ཝཊྚཏོ ནིཡྻཱནཊྛོ. ‘‘ནེཀྑམྨཾ པཊིལདྡྷསྶ ཀཱམཙྪནྡཏོ ཙིཏྟཾ ནིསྶཊཾ ཧོཏཱི’’ཏིཨཱདིནཱ (པཊི. མ. ༡.༢༤, ༡༩༡ ཐོཀཾ ཝིསདིསཾ) ནཡེན ཙིཏྟསྶ ནིསྶརཎཊྛོ.

༡༥. ཨེཀཏྟཱདཱིནི དྭཱཙཏྟཱལཱིས ཝིསྶཛྫནཱནི ཨེཀཏྟསམྦནྡྷེན ནིདྡིཊྛཱནི. ཨེཀཏྟེཏི ཨཱརམྨཎེཀཏྟེ, ཨེཀཱརམྨཎེཏི ཨཏྠོ. པཋམཛ྄ཛྷཱནཝསེན པཀྑནྡནཊྛོ. དུཏིཡཛ྄ཛྷཱནཝསེན པསཱིདནཊྛོ. ཏཏིཡཛ྄ཛྷཱནཝསེན སནྟིཊྛནཊྛོ. ཙཏུཏྠཛ྄ཛྷཱནཝསེན མུཙྩནཊྛོ. པཙྩཝེཀྑཎཝསེན ཨེཏཾ སནྟནྟི པསྶནཊྛོ. ཡཱནཱིཀཏཊྛཱདཡོ པཉྩ སམཱདྷིསྶ ཝསཱིབྷཱཝཝིསེསཱ. ཡཱནཱིཀཏཊྛོཏི ཡུཏྟཡཱནསདིསཀཏཊྛོ. ཝཏྠུཀཏཊྛོཏི པཏིཊྛཊྛེན ཝཏྠུ ཝིཡ ཀཏཊྛོ. ཨནུཊྛིཏཊྛོཏི པཙྩུཔཊྛིཏཊྛོ. པརིཙིཏཊྛོཏི སམནྟཏོ ཙིཏཊྛོ. སུསམཱརདྡྷཊྛོཏི སུཊྛུ སམཱརདྡྷཊྛོ ¶ , སུཀཏཊྛོཏི ཨཏྠོ. ཨཱཝཛྫནསམཱཔཛྫནཨདྷིཊྛཱནཝུཊྛཱནཔཙྩཝེཀྑཎཝསིཏཱཝསེན ཝཱ པཊིཔཱཊིཡཱ པཉྩ པདཱནི ཡོཛེཏབྦཱནི. ཀསིཎཱདིཨཱརམྨཎབྷཱཝནཱཡ སིཁཱཔྤཏྟཀཱལེ ཙིཏྟཙེཏསིཀཱནཾ པརིགྒཧཔརིཝཱརཔརིཔཱུརཊྛོ. ཏེསཾཡེཝ སམྨཱ སམཱཧིཏཏྟཱ ཨེཀཱརམྨཎེ སམོསརཎེན སམོདྷཱནཊྛོ. ཏེསཾཡེཝ བལཔྤཏྟིཡཱ ཨཱརམྨཎཾ ཨབྷིབྷཝིཏྭཱ པཏིཊྛཱནཝསེན ཨདྷིཊྛཱནཊྛོ. སམཐསྶ ཝིཔསྶནཱཡ ཝཱ ཨཱདིཏོ, ཨཱདརེན ཝཱ སེཝནཝསེན ཨཱསེཝནཊྛོ. ཝཌྜྷནཝསེན བྷཱཝནཊྛོ ¶ . པུནཔྤུནཾ ¶ ཀརཎཝསེན བཧུལཱིཀམྨཊྛོ. བཧུལཱིཀཏསྶ སུཊྛུ སམུཊྛིཏཝསེན སུསམུགྒཏཊྛོ. སུསམུགྒཏསྶ པཙྩནཱིཀེཧི སུཊྛུ ཝིམུཏྟིཝསེན ཨཱརམྨཎེ ཙ སུཊྛུ ཨདྷིམུཏྟིཝསེན སུཝིམུཏྟཊྛོ.

བུཛ྄ཛྷནཊྛཱདཱིནི ཙཏྟཱརི པདཱནི བོཛ྄ཛྷངྒཝསེན ཝུཏྟཱནི. སོཏཱཔཏྟིམགྒབོཛ྄ཛྷངྒཱནཾ བུཛ྄ཛྷནཊྛོ. སཀདཱགཱམིམགྒབོཛ྄ཛྷངྒཱནཾ ཨནུབུཛ྄ཛྷནཊྛོ. ཨནཱགཱམིམགྒབོཛ྄ཛྷངྒཱནཾ པཊིབུཛ྄ཛྷནཊྛོ. ཨརཧཏྟམགྒབོཛ྄ཛྷངྒཱནཾ སམྦུཛ྄ཛྷནཊྛོ. ཝིཔསྶནཱབོཛ྄ཛྷངྒཱནཾ ཝཱ བུཛ྄ཛྷནཊྛོ. དསྶནམགྒབོཛ྄ཛྷངྒཱནཾ ཨནུབུཛ྄ཛྷནཊྛོ. བྷཱཝནཱམགྒབོཛ྄ཛྷངྒཱནཾ པཊིབུཛ྄ཛྷནཊྛོ. ཕལབོཛ྄ཛྷངྒཱནཾ སམྦུཛ྄ཛྷནཊྛོ. ཡཐཱཝུཏྟནཡེནེཝ བོཛ྄ཛྷངྒཱནཾ ཏསྶ ཏསྶ པུགྒལསྶ བོདྷནཱདིཀརཎེན བོདྷནཊྛཱདཡོ ཙཏྟཱརོ ཨཏྠཱ ཝེདིཏབྦཱ. ཡཐཱཝུཏྟཱནཾཡེཝ བོཛ྄ཛྷངྒཱནཾ བུཛ྄ཛྷནཊྛེན ‘‘བོདྷོ’’ཏི ལདྡྷནཱམསྶ པུགྒལསྶ པཀྑེ བྷཝཏྟཱ བོདྷིཔཀྑིཡཱ ནཱམ. ཏེསཾ ཡཐཱཝུཏྟཱནཾཡེཝ བོདྷིཔཀྑིཡཊྛཱདཡོ ཙཏྟཱརོ ཨཏྠཱ ཝེདིཏབྦཱ. ཝིཔསྶནཱཔཉྙཱཝསེན ཛོཏནཊྛོ. ཀམཏོ ཙཏུམགྒཔཉྙཱཝསེན ཨུཛྫོཏནཱནུཛྫོཏནཔཊིཛྫོཏནསཉྫོཏནཊྛོ. ཀམཏོ ཙཏུམགྒཔཉྙཱཝསེན ཝཱ ཛོཏནཊྛཱདཡོ, ཕལཔཉྙཱཝསེན སཉྫོཏནཊྛོ ཝེདིཏབྦོ.

༡༦. པཏཱཔནཊྛཱདཱིནི ཨཊྛཱརས ཝིསྶཛྫནཱནི ཨརིཡམགྒཝསེན ནིདྡིཊྛཱནི. ཨརིཡམགྒོ ཧི ཡསྶུཔྤཛྫཏི, ཏཾ པཏཱཔེཏི པབྷཱསེཏི ཝིརོཙཱཔེཏཱིཏི པཏཱཔནོ, ཏསྶ པཏཱཔནཊྛོ. ཏསྶེཝ ཨཏིཔབྷསྶརབྷཱཝེན སཡཾ ཝིརོཙནཊྛོ. ཀིལེསཱནཾ ཝིསོསནེན སནྟཱཔནཊྛོ. ཨམལནིབྦཱནཱརམྨཎཏྟཱ ཨམལཊྛོ. སམྤཡུཏྟམལཱབྷཱཝེན ཝིམལཊྛོ. ཨཱརམྨཎཀརཎམལཱབྷཱཝེ ¶ ནིམྨལཊྛོ. ཨཐ ཝཱ སོཏཱཔཏྟིམགྒསྶ ཨམལཊྛོ. སཀདཱགཱམིཨནཱགཱམིམགྒཱནཾ ཝིམལཊྛོ. ཨརཧཏྟམགྒསྶ ནིམྨལཊྛོ. ཨཐ ཝཱ སཱཝཀམགྒསྶ ཨམལཊྛོ. པཙྩེཀབུདྡྷམགྒསྶ ཝིམལཊྛོ. སམྨཱསམྦུདྡྷམགྒསྶ ནིམྨལཊྛོ. ཀིལེསཝིསམཱབྷཱཝེན སམཊྛོ. ‘‘སམྨཱ མཱནཱབྷིསམཡཱ’’ཏིཨཱདཱིསུ (མ. ནི. ༡.༢༨; ཨ. ནི. ༣.༣༣; ༥.༢༠༠) ཝིཡ ཀིལེསཔྤཧཱནཊྛེན སམཡཊྛོ. ཝིཀྑམྦྷནཏདངྒསམུཙྪེདཔཊིཔྤསྶདྡྷིནིསྶརཎསངྑཱཏེསུ པཉྩསུ ཝིཝེཀེསུ སམུཙྪེདཝིཝེཀཏྟཱ ཝིཝེཀཊྛོ, ཝིནཱབྷཱཝཊྛོ. ནིསྶརཎཝིཝེཀེ ནིབྦཱནེ ཙརཎཏོ ཝིཝེཀཙརིཡཊྛོ. པཉྩསུ ཝིརཱགེསུ སམུཙྪེདཝིརཱགཏྟཱ ¶ ཝིརཱགཊྛོ, ཝིརཛྫནཊྛོ. ནིསྶརཎཝིརཱགེ ནིབྦཱནེ ཙརཎཏོ ཝིརཱགཙརིཡཊྛོ. པཉྩསུ ནིརོདྷེསུ སམུཙྪེདནིརོདྷཏྟཱ ནིརོདྷཊྛོ. དུཀྑནིརོདྷེ ནིབྦཱནེ ཙརཎཏོ ནིརོདྷཙརིཡཊྛོ. པརིཙྩཱགཔཀྑནྡནཝོསགྒཏྟཱ ཝོསགྒཊྛོ. ཨརིཡམགྒོ ཧི སམུཙྪེདཝསེན ཀིལེསཔྤཧཱནཏོ པརིཙྩཱགཝོསགྒོ, ཨཱརམྨཎཀརཎེན ནིབྦཱནཔཀྑནྡནཏོ པཀྑནྡནཝོསགྒོ ཙ. ཝིཔསྶནཱ པན ཏདངྒཝསེན ཀིལེསཔྤཧཱནཏོ པརིཙྩཱགཝོསགྒོ, ཏནྣིནྣབྷཱཝེན ནིབྦཱནཔཀྑནྡནཏོ པཀྑནྡནཝོསགྒོ. ན སོ ཨིདྷ ཨདྷིཔྤེཏོ. ཝོསགྒབྷཱཝེན ཙརཎཏོ ¶ ཝོསགྒཙརིཡཊྛོ. པཉྩསུ ཝིམུཏྟཱིསུ སམུཙྪེདཝིམུཏྟིཏྟཱ ཝིམུཏྟཊྛོ. ནིསྶརཎཝིམུཏྟིཡཾ ཙརཎཏོ ཝིམུཏྟིཙརིཡཊྛོ.

ཚནྡཝཱིརིཡཙིཏྟཝཱིམཾསཱསངྑཱཏེསུ ཙཏཱུསུ ཨིདྡྷིཔཱདེསུ ཨེཀེཀཨིདྡྷིཔཱདཝསེན དས དས ཀཏྭཱ ཙཏུརིདྡྷིཔཱདཝསེན ཚནྡཊྛཱདཱིནི ཙཏྟཱལཱིས ཝིསྶཛྫནཱནི ནིདྡིཊྛཱནི. ཀཏྟུཀམྱཏཊྛོ ཚནྡཊྛོ. ཚནྡཾ སཱིསཾ ཀཏྭཱ བྷཱཝནཱརམྦྷཀཱལེ མཱུལཊྛོ. སཧཛཱཏཱནཾ པཏིཊྛཱབྷཱཝེན པཱདཊྛོ. པདཊྛོཏི ཝཱ པཱཋོ. ཨིདྡྷིཔཱདཏྟཱ ཨདྷིཔཏིབྷཱཝེན པདྷཱནཊྛོ. པཡོགཀཱལེ ཨིཛ྄ཛྷནཊྛོ. སདྡྷཱསམྤཡོགེན ཨདྷིམོཀྑཊྛོ. ཝཱིརིཡསམྤཡོགེན པགྒཧཊྛོ. སཏིསམྤཡོགེན ཨུཔཊྛཱནཊྛོ. སམཱདྷིསམྤཡོགེན ཨཝིཀྑེཔཊྛོ. པཉྙཱསམྤཡོགེན དསྶནཊྛོ. པགྒཧཊྛོ ཝཱིརིཡཊྛོ. ཝཱིརིཡཾ སཱིསཾ ཀཏྭཱ བྷཱཝནཱརམྦྷཀཱལེ མཱུལཊྛོ. སཡཾ ¶ ཝཱིརིཡཏྟཱ པགྒཧཊྛོ. ཙིནྟནཊྛཱདིཀོ ཙིཏྟཊྛོ. ཙིཏྟཾ སཱིསཾ ཀཏྭཱ བྷཱཝནཱརམྦྷཀཱལེ མཱུལཊྛོ. ཨུཔཔརིཀྑནཊྛོ ཝཱིམཾསཊྛོ. ཝཱིམཾསཾ སཱིསཾ ཀཏྭཱ བྷཱཝནཱརམྦྷཀཱལེ མཱུལཊྛོ. སཡཾ ཝཱིམཾསཏྟཱ དསྶནཊྛོ.

༡༧. དུཀྑསྶ པཱིལ༹ནཊྛོཏིཨཱདཱིནི སོལ༹ས ཝིསྶཛྫནཱནི སཙྩཱནཾ ཏཐལཀྑཎཝསེན ནིདྡིཊྛཱནི. དུཀྑདསྶནེནེཝ པཱིལ༹ནཊྛོ. དུཀྑཱཡཱུཧནསམུདཡདསྶནེན སངྑཏཊྛོ. སབྦཀིལེསསནྟཱཔཧརསུསཱིཏལམགྒདསྶནེན སནྟཱཔཊྛོ. ཨཝིཔརིཎཱམདྷམྨནིརོདྷདསྶནེན ཝིཔརིཎཱམཊྛོ. སམུདཡདསྶནེནེཝ ཨཱཡཱུཧནཊྛོ. སམུདཡཱཡཱུཧིཏདུཀྑདསྶནེན ནིདཱནཊྛོ. ཝིསཉྙོགབྷཱུཏནིརོདྷདསྶནེན སཉྙོགཊྛོ. ནིཡྻཱནབྷཱུཏམགྒདསྶནེན པལིབོདྷཊྛོ. ནིརོདྷདསྶནེནེཝ ནིསྶརཎཊྛོ. ཨཝིཝེཀབྷཱུཏསམུདཡདསྶནེན ཝིཝེཀཊྛོ. སངྑཏབྷཱུཏམགྒདསྶནེན ཨསངྑཏཊྛོ. ཝིསབྷཱུཏདུཀྑདསྶནེན ཨམཏཊྛོ. མགྒདསྶནེནེཝ ¶ ནིཡྻཱནཊྛོ. ནིབྦཱནསམྤཏྟིཡཱ ཨཧེཏུབྷཱུཏསམུདཡདསྶནེན ཧེཏུཊྛོ. སུདུདྡསནིརོདྷདསྶནེན དསྶནཊྛོ. ཀཔཎཛནསདིསདུཀྑདསྶནེན ཨུལཱ༹རཀུལསདིསོ ཨཱདྷིཔཏེཡྻཊྛོ པཱཏུབྷཝཏཱིཏི. ཨེཝཾ ཏཾཏཾསཙྩདསྶནེན ཏདཉྙསཙྩདསྶནེན ཙ ཨེཀེཀསྶ སཙྩསྶ ཙཏྟཱརོ ཙཏྟཱརོ ལཀྑཎཊྛཱ ཝུཏྟཱ.

ཏཐཊྛཱདཱིནི དྭཱདས ཝིསྶཛྫནཱནི སབྦདྷམྨསངྒཱཧཀདྭཱདསཔདཝསེན ནིདྡིཊྛཱནི. ཏཐཊྛོཏི ཡཐཱསབྷཱཝཊྛོ. ཨནཏྟཊྛོཏི ཨཏྟཝིརཧིཏཊྛོ. སཙྩཊྛོཏི ཨཝིསཾཝཱདནཊྛོ. པཊིཝེདྷཊྛོཏི པཊིཝིཛ྄ཛྷིཏབྦཊྛོ. ཨབྷིཛཱནནཊྛོཏི ཨབྷིཛཱནིཏབྦཊྛོ. པརིཛཱནནཊྛོཏི ཉཱཏཏཱིརཎཔརིཉྙཱཡ པརིཛཱནིཏབྦཊྛོ. དྷམྨཊྛོཏི སབྷཱཝདྷཱརཎཱདིཨཏྠོ. དྷཱཏུཊྛོཏི སུཉྙཱདིཨཏྠོ. ཉཱཏཊྛོཏི ཛཱནིཏུཾ སཀྐུཎེཡྻཊྛོ. སཙྪིཀིརིཡཊྛོཏི སཙྪིཀཱཏབྦཊྛོ. ཕསྶནཊྛོཏི ཉཱཎེན ཕུསིཏབྦཊྛོ. ཨབྷིསམཡཊྛོཏི པཙྩཝེཀྑཎཉཱཎེན ཨབྷིསམྨཱགནྟབྦཊྛོ, ཉཱཎེན པཊིལབྷིཏབྦཊྛོ ཝཱ. པཊིལཱབྷོཔི ¶ ཧི ‘‘ཨཏྠཱབྷིསམཡཱ དྷཱིརོ’’ཏིཨཱདཱིསུ (སཾ. ནི. ༡.༡༣༠) ཝིཡ ཨབྷིསམཡོཏི ཝུཙྩཏི.

༡༨. ནེཀྑམྨཱདཱིནི ¶ སཏྟ ཝིསྶཛྫནཱནི ཨུཔཙཱརཛ྄ཛྷཱནཝསེན ནིདྡིཊྛཱནི. ནེཀྑམྨནྟི ཀཱམཙྪནྡསྶ པཊིཔཀྑོ ཨལོབྷོ. ཨཱལོཀསཉྙཱཏི ཐིནམིདྡྷསྶ པཊིཔཀྑེ ཨཱལོཀནིམིཏྟེ སཉྙཱ. ཨཝིཀྑེཔོཏི ཨུདྡྷཙྩསྶ པཊིཔཀྑོ སམཱདྷི. དྷམྨཝཝཏྠཱནནྟི ཝིཙིཀིཙྪཱཡ པཊིཔཀྑཾ ཉཱཎཾ. ཉཱཎནྟི ཨཝིཛྫཱཡ པཊིཔཀྑཾ ཉཱཎཾ. པཱམོཛྫནྟི ཨརཏིཔཊིཔཀྑཱ པཱིཏི. པཋམཛ྄ཛྷཱནཱདཱིནི ཨཊྛ ཝིསྶཛྫནཱནི རཱུཔཱརཱུཔསམཱཔཏྟིཝསེན ནིདྡིཊྛཱནི. ཧེཊྛཱ པན རཱུཔསམཱཔཏྟིཨནནྟརཾ རཱུཔཛ྄ཛྷཱནསམྦནྡྷེན ཙཏྟཱརོ བྲཧྨཝིཧཱརཱ ནིདྡིཊྛཱ.

ཨནིཙྩཱནུཔསྶནཱདཱིནི ལོཀུཏྟརམགྒསྶ པུབྦབྷཱགེ ཨཊྛཱརསམཧཱཝིཔསྶནཱཝསེན ནིདྡིཊྛཱནི. ཧེཊྛཱ པན རཱུཔཱདཱིཧི ཡོཛནཱུཔགཱ སཏྟ ཨནུཔསྶནཱ ཨེཝ ཝུཏྟཱ, ཨིདྷ པན སབྦཱཔི ཝུཏྟཱ. ཀལཱཔསམྨསནཨུདཡབྦཡཱནུཔསྶནཱ ཀསྨཱ ན ཝུཏྟཱཏི ཙེ? ཏཱསཾ དྭིནྣཾ ཝསེན ཨནིཙྩཱནུཔསྶནཱདཱིནཾ སིཛ྄ཛྷནཏོ ཨིམཱསུ ཝུཏྟཱསུ ཏཱ དྭེཔི ཝུཏྟཱཝ ཧོནྟི, ཨནིཙྩཱནུཔསྶནཱདཱིཧི ཝཱ ཝིནཱ ཏཱསཾ དྭིནྣཾ ཨཔྤཝཏྟིཏོ ཨིམཱསུ ཝུཏྟཱསུ ཏཱ དྭེཔི ཝུཏྟཱཝ ཧོནྟི. ཁཡཱནུཔསྶནཱཏི པཙྩུཔྤནྣཱནཾ རཱུཔཀྑནྡྷཱདཱིནཾ བྷངྒདསྶནཉཱཎཉྩ ¶ ཏཾཏཾཁནྡྷབྷངྒདསྶནཱནནྟརཾ ཏདཱརམྨཎཙིཏྟཙེཏསིཀབྷངྒདསྶནཉཱཎཉྩ. ཝཡཱནུཔསྶནཱཏི པཙྩུཔྤནྣཱནཾ ཁནྡྷཱནཾ བྷངྒདསྶནཱནནྟརཾ ཏདནྭཡེནེཝ ཨཏཱིཏཱནཱགཏཁནྡྷཱནཾ བྷངྒདསྶནཉཱཎཾ. ཝིཔརིཎཱམཱནུཔསྶནཱཏི ཏསྨིཾ བྷངྒསངྑཱཏེ ནིརོདྷེ ཨདྷིམུཏྟཏྟཱ, ཨཐ སབྦེཔི ཨཏཱིཏཱནཱགཏཔཙྩུཔྤནྣཱ ཁནྡྷཱ ཝིཔརིཎཱམཝནྟོཏི སབྦེསཾ ཝིཔརིཎཱམདསྶནཉཱཎཾ. ཨནིམིཏྟཱནུཔསྶནཱཏི ཨེཝཾ སབྦསངྑཱརཱནཾ ཝིཔརིཎཱམཾ དིསྭཱ ཨནིཙྩཏོ ཝིཔསྶནྟསྶ ཨནིཙྩཱནུཔསྶནཱཝ ནིཙྩནིམིཏྟཔཛཧནཝསེན ནིཙྩནིམིཏྟཱབྷཱཝཱ ཨནིམིཏྟཱནུཔསྶནཱ ནཱམ ཧོཏི. ཨཔྤཎིཧིཏཱནུཔསྶནཱཏི ཨནིཙྩཱནུཔསྶནཱནནྟརཾ པཝཏྟཱ དུཀྑཱནུཔསྶནཱཝ སུཁཔཏྠནཱཔཛཧནཝསེན པཎིདྷིཨབྷཱཝཱ ཨཔྤཎིཧིཏཱནུཔསྶནཱ ནཱམ ཧོཏི.

སུཉྙཏཱནུཔསྶནཱཏི དུཀྑཱནུཔསྶནཱནནྟརཾ པཝཏྟཱ ཨནཏྟཱནུཔསྶནཱཝ ཨཏྟཱབྷིནིཝེསཔཛཧནཝསེན ཨཏྟསུཉྙཏཱདསྶནཏོ སུཉྙཏཱནུཔསྶནཱ ནཱམ ཧོཏི. ཨདྷིཔཉྙཱདྷམྨཝིཔསྶནཱཏི ཨེཝཾ སངྑཱརཱནཾ བྷངྒཾ པསྶིཏྭཱ ¶ པསྶིཏྭཱ ཨནིཙྩཱདིཏོ ཝིཔསྶནྟསྶ སངྑཱརཱཝ བྷིཛྫནྟི, སངྑཱརཱནཾ མརཎཾ ན ཨཉྙོ ཀོཙི ཨཏྠཱིཏི བྷངྒཝསེན སུཉྙཏཾ གཧེཏྭཱ པཝཏྟཱ ཝིཔསྶནཱ. སཱ ཧི ཨདྷིཔཉྙཱ ཙ དྷམྨེསུ ཙ ཝིཔསྶནཱཏི ཀཏྭཱ ཨདྷིཔཉྙཱདྷམྨཝིཔསྶནཱཏི ཝུཙྩཏི. ཡཐཱབྷཱུཏཉཱཎདསྶནནྟི ¶ བྷངྒཾ དིསྭཱ དིསྭཱ ‘‘སབྷཡཱ སངྑཱརཱ’’ཏི པཝཏྟཾ བྷཡཏུཔཊྛཱནཉཱཎཾ. ཨཱདཱིནཝཱནུཔསྶནཱཏི བྷཡཏུཔཊྛཱནཝསེན ཨུཔྤནྣཾ སབྦབྷཝཱདཱིསུ ཨཱདཱིནཝདསྶནཉཱཎཾ. ‘‘ཡཱ ཙ བྷཡཏུཔཊྛཱནེ པཉྙཱ ཡཉྩ ཨཱདཱིནཝེ ཉཱཎཾ ཡཱ ཙ ནིབྦིདཱ, ཨིམེ དྷམྨཱ ཨེཀཏྠཱ, བྱཉྫནམེཝ ནཱན’’ནྟི (པཊི. མ. ༡.༢༢༧) ཝཙནཏོ བྷཡཏུཔཊྛཱནཱདཱིནཝཱནུཔསྶནཱསུ ཝུཏྟཱསུ ནིབྦིདཱནུཔསྶནཱ ཨིདྷཱཔི ཝུཏྟཱཝ ཧོཏི. ཨཱདིཏོ ཙཏུཏྠཾ ཀཏྭཱ ཝུཏྟཏྟཱ པནིདྷ ན ཝུཏྟཱ. པཊིསངྑཱནུཔསྶནཱཏི མུཉྩིཏུཀམྱཏཱཉཱཎཝསེན ཨུཔྤནྣཾ མུཉྩནསྶ ཨུཔཱཡཀརཎཾ པཊིསངྑཱནུཔསྶནཱསཉྙིཏཾ ཨནིཙྩདུཀྑཱནཏྟཱནུཔསྶནཱཉཱཎཾ. ‘‘ཡཱ ཙ མུཉྩིཏུཀམྱཏཱ ཡཱ ཙ པཊིསངྑཱནུཔསྶནཱ ཡཱ ཙ སངྑཱརུཔེཀྑཱ, ཨིམེ དྷམྨཱ ཨེཀཏྠཱ, བྱཉྫནམེཝ ནཱན’’ནྟི (པཊི. མ. ༡.༢༢༧) ཝཙནཏོ པཊིསངྑཱནུཔསྶནཱཡ ཝུཏྟཱཡ མུཉྩིཏུཀམྱཏཱསངྑཱརུཔེཀྑཱཉཱཎཱནི ཝུཏྟཱནེཝ ཧོནྟི. ཝིཝཊྚནཱནུཔསྶནཱཏི ཨནུལོམཉཱཎཝསེན ཨུཔྤནྣཾ གོཏྲབྷུཉཱཎཾ. ཨནུལོམཉཱཎེན གོཏྲབྷུཉཱཎསྶ སིཛ྄ཛྷནཏོ གོཏྲབྷུཉཱཎེ ཝུཏྟེ ཨནུལོམཉཱཎཾ ཝུཏྟམེཝ ཧོཏི. ཨེཝཉྷི ཨཊྛཱརསནྣཾ ¶ མཧཱཝིཔསྶནཱནཾ པཊིཔཱཊི ཝུཙྩམཱནཱ པཱལི༹ཡཱ སམེཏི. ཝུཏྟཉྷི ཨིནྡྲིཡཀཐཱཡཾ –

‘‘པུབྦབྷཱགེ པཉྩཧིནྡྲིཡེཧི པཋམཛ྄ཛྷཱནཝསེན པཉྩིནྡྲིཡཱནི ནིསྶཊཱནི ཧོནྟི, པཋམེ ཛྷཱནེ པཉྩཧིནྡྲིཡེཧི དུཏིཡཛ྄ཛྷཱནཝསེན པཉྩིནྡྲིཡཱནི ནིསྶཊཱནི ཧོནྟཱི’’ཏི (པཊི. མ. ༡.༡༩༢) –

ཨཱདིནཱ ནཡེན ཡཱཝ ཨརཧཏྟཕལཱ ཨུཏྟརུཏྟརིཔཊིཔཱཊིཡཱ ཨིནྡྲིཡཱནི ཝུཏྟཱནི. ཏསྨཱ ཨཊྛཱརས མཧཱཝིཔསྶནཱ ཡཐཱཝུཏྟཀྐམེན པཱལི༹ཡཱ ཡུཛྫནྟི. ཝིསུདྡྷིམགྒེ པན –

‘‘ཁཡཱནུཔསྶནཱཏི གྷནཝིནིབྦྷོགཾ ཀཏྭཱ ཨནིཙྩཾ ཁཡཊྛེནཱཏི ཨེཝཾ ཁཡཾ པསྶཏོ ཉཱཎཾ. ཝིཔརིཎཱམཱནུཔསྶནཱཏི རཱུཔསཏྟཀཨརཱུཔསཏྟཀཱདིཝསེན ཏཾ ཏཾ པརིཙྪེདཾ ཨཏིཀྐམྨ ཨཉྙཐཱ པཝཏྟིདསྶནཾ. ཨུཔྤནྣསྶ ཝཱ ཛརཱཡ ཙེཝ མརཎེན ཙ དྭཱིཧཱཀཱརེཧི ¶ ཝིཔརིཎཱམདསྶནཾ. ཡཐཱབྷཱུཏཉཱཎདསྶནནྟི སཔཙྩཡནཱམརཱུཔཔརིགྒཧོ’’ཏི (ཝིསུདྡྷི. ༢.༨༥༠) –

ཝུཏྟཾ. ཏཾ ཏཱཡ པཱལི༹ཡཱ ཝིརུདྡྷཾ ཝིཡ དིསྶཏི. ཝིཝཊྚནཱནུཔསྶནཱཏི སངྑཱརུཔེཀྑཱ ཙེཝ ཨནུལོམཉྩཱཏི ཝུཏྟཾ. ཏཉྩ པཱལི༹ཡཱ ཝིརུདྡྷཾ ཝིཡ དིསྶཏི. ཙརིཡཱཀཐཱཡཉྷི –

‘‘ཨནིཙྩཱནུཔསྶནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ. ཨནིཙྩཱནུཔསྶནཱ ¶ ཉཱཎཙརིཡཱ…པེ… པཊིསངྑཱནུཔསྶནཏྠཱཡ ཨཱཝཛྫནཀིརིཡཱབྱཱཀཏཱ ཝིཉྙཱཎཙརིཡཱ. པཊིསངྑཱནུཔསྶནཱ ཉཱཎཙརིཡཱ’’ཏི (པཊི. མ. ༡.༧༡) –

ཡསྶ ཡསྶ ཉཱཎསྶ ཝིསུཾ ཝིསུཾ ཨཱཝཛྫནཾ ལབྦྷཏི, ཏསྶ ཏསྶ ཝིསུཾ ཝིསུཾ ཨཱཝཛྫནཾ ཝུཏྟཾ. ཝིཝཊྚནཱནུཔསྶནཱཡ པན ཨཱཝཛྫནཾ ཨཝཏྭཱཝ ‘‘ཝིཝཊྚནཱནུཔསྶནཱ ཉཱཎཙརིཡཱ’’ཏི ཝུཏྟཾ. ཡདི སངྑཱརུཔེཀྑཱནུལོམཉཱཎཱནི ཝིཝཊྚནཱནུཔསྶནཱ ནཱམ སིཡུཾ, ཏདཱཝཛྫནསམྦྷཝཱ ཏདཏྠཱཡ ཙ ཨཱཝཛྫནཾ ཝདེཡྻ, ན ཙ ཏདཏྠཱཡ ཨཱཝཛྫནཾ ཝུཏྟཾ. གོཏྲབྷུཉཱཎསྶ པན ཝིསུཾ ཨཱཝཛྫནཾ ¶ ནཏྠི ཨནུལོམཱཝཛྫནཝཱིཐིཡཾཡེཝ ཨུཔྤཏྟིཏོ. ཏསྨཱ ཝིཝཊྚནཱནུཔསྶནཏྠཱཡ ཨཱཝཛྫནསྶ ཨཝུཏྟཏྟཱ གོཏྲབྷུཉཱཎམེཝ ‘‘ཝིཝཊྚནཱནུཔསྶནཱ’’ཏི ཡུཛྫཏི.

༡༩. སོཏཱཔཏྟིམགྒཱདཱིནི ཨཊྛ ཝིསྶཛྫནཱནི ལོཀུཏྟརམགྒཕལཝསེན ནིདྡིཊྛཱནི. སོཏསྶ ཨཱཔཛྫནཾ སོཏཱཔཏྟི, སོཏཱཔཏྟི ཨེཝ མགྒོ སོཏཱཔཏྟིམགྒོ. སོཏཱཔཏྟིཡཱ ཕལཾ སོཏཱཔཏྟིཕལཾ, སམཱཔཛྫཱིཡཏཱིཏི སམཱཔཏྟི, སོཏཱཔཏྟིཕལམེཝ སམཱཔཏྟི སོཏཱཔཏྟིཕལསམཱཔཏྟི. པཊིསནྡྷིཝསེན སཀིཾཡེཝ ཨིམཾ ལོཀཾ ཨཱགཙྪཏཱིཏི སཀདཱགཱམཱི, ཏསྶ མགྒོ སཀདཱགཱམིམགྒོ. སཀདཱགཱམིསྶ ཕལཾ སཀདཱགཱམིཕལཾ. པཊིསནྡྷིཝསེནེཝ ཀཱམབྷཝཾ ན ཨཱགཙྪཏཱིཏི ཨནཱགཱམཱི, ཏསྶ མགྒོ ཨནཱགཱམིམགྒོ. ཨནཱགཱམིསྶ ཕལཾ ཨནཱགཱམིཕལཾ. ཀིལེསེཧི ཨཱརཀཏྟཱ, ཀིལེསཱརཱིནཾ ཧཏཏྟཱ, སཾསཱརཙཀྐསྶ ཨརཱནཾ ཧཏཏྟཱ, པཱཔཀརཎེ རཧཱབྷཱཝཱ, པཙྩཡཱདཱིནཾ ཨརཧཏྟཱ ཨརཧཾ, ཨརཧཏོ བྷཱཝོ ཨརཧཏྟཾ. ཀིཾ ཏཾ? ཨརཧཏྟཕལཾ. ཨརཧཏྟསྶ མགྒོ ཨརཧཏྟམགྒོ. ཨརཧཏྟམེཝ ཕལཾ ཨརཧཏྟཕལཾ.

‘‘ཨདྷིམོཀྑཊྛེན སདྡྷིནྡྲིཡ’’ནྟིཨཱདཱིནི ‘‘ཏཐཊྛེན ¶ སཙྩཱ’’ཏིཔརིཡནྟཱནི ཏེཏྟིཾས ཝིསྶཛྫནཱནི ནིདྡིཊྛཱནི. ཧེཊྛཱ ‘‘སདྡྷིནྡྲིཡསྶ ཨདྷིམོཀྑཊྛོ’’ཏིཨཱདཱིཧི ཏེཏྟིཾསཱཡ ཝིསྶཛྫནེཧི སམཱནཱནི. ཀེཝལཉྷི ཏཏྠ དྷམྨེཧི ཨཏྠཱ ནིདྡིཊྛཱ, ཨིདྷ ཨཏྠེཧི དྷམྨཱ ནིདྡིཊྛཱཏི ཨཡཾ ཝིསེསོ. ‘‘ཨཝིཀྑེཔཊྛེན སམཐོ’’ཏིཨཱདཱིནཉྩ ཙཏུནྣཾ ཝིསྶཛྫནཱནཾ ཧེཊྛཱ ‘‘སམཐསྶ ཨཝིཀྑེཔཊྛོ’’ཏིཨཱདཱིནཉྩ ཙཏུནྣཾ ཝིསྶཛྫནཱནཾ ཝིསེསོ ཝུཏྟནཡེནེཝ ཝེདིཏབྦོ.

སཾཝརཊྛེནཱཏིཨཱདཱིནི ཨཊྛ ཝིསྶཛྫནཱནི སཱིལཱདིབལཔརིཡོསཱནདྷམྨཝསེན ནིདྡིཊྛཱནི. སཱིལཝིསུདྡྷཱིཏི སུཔརིསུདྡྷཔཱཏིམོཀྑསཾཝརཱདིཙཏུབྦིདྷཾ སཱིལཾ དུསྶཱིལྱམལཝིསོདྷནཏོ. ཙིཏྟཝིསུདྡྷཱིཏི སཨུཔཙཱརཱ ཨཊྛ སམཱཔཏྟིཡོ. ཙིཏྟསཱིསེན ཧེཏྠ སམཱདྷི ཝུཏྟོ. སོ ཙིཏྟམལཝིསོདྷནཏོ ཙིཏྟཝིསུདྡྷི. དིཊྛིཝིསུདྡྷཱིཏི ནཱམརཱུཔཱནཾ ཡཐཱསབྷཱཝདསྶནཾ སཏྟདིཊྛིམལཝིསོདྷནཏོ ¶ དིཊྛིཝིསུདྡྷི. མུཏྟཊྛེནཱཏི ཏདངྒཝསེན ཨུཔཀྐིལེསཏོ ཝིམུཏྟཊྛེན ཨཱརམྨཎེ ཙ ཨདྷིམུཏྟཊྛེན. ཝིམོཀྑོཏི ཏདངྒཝིམོཀྑོ. པཊིཝེདྷཊྛེན ཝིཛྫཱཏི པུབྦེནིཝཱསཱནུསྶཏིཉཱཎཾ པུརིམབྷཝཔཊིཝེདྷཊྛེན ཝིཛྫཱ, དིབྦཙཀྑུཉཱཎཾ ¶ སཏྟཱནཾ ཙུཏཱུཔཔཱཏཔཊིཝེདྷཊྛེན ཝིཛྫཱ, ཨཱསཝཱནཾ ཁཡེ ཉཱཎཾ སཙྩཔཊིཝེདྷཊྛེན ཝིཛྫཱ. པཊིཝེདྷཊྛེནཱཏི ཛཱནནཊྛེན. པརིཙྩཱགཊྛེན ཝིམུཏྟཱིཏི ཡཾ ཡཾ པརིཙྩཏྟཾ, ཏཏོ ཏཏོ ཝིམུཏྟཏྟཱ ཕལཝིམུཏྟི. སམུཙྪེདཊྛེན ཁཡེ ཉཱཎནྟི ཀིལེསསམུཙྪིནྡནཏྠེན ཀིལེསཀྑཡཀརེ ཨརིཡམགྒེ ཉཱཎཾ. པཊིཔྤསྶདྡྷཊྛེན ཨནུཔྤཱདེ ཉཱཎནྟི མགྒཀིཙྩསངྑཱཏཔཡོགཔཊིཔྤསྶདྡྷཏྟཱ པཊིསནྡྷིཝསེན ཨནུཔྤཱདབྷཱུཏེ ཏཾཏཾམགྒཝཛ྄ཛྷཀིལེསཱནཾ ཨནུཔྤཱདཔརིཡོསཱནེ ཨུཔྤནྣེ ཨརིཡཕལེ ཉཱཎཾ.

༢༠. ཚནྡོ མཱུལཊྛེནཱཏིཨཱདཱིནི ནཝ ཝིསྶཛྫནཱནི ཨརིཡམགྒསྶ ཨཱདིམཛ྄ཛྷཔརིཡོསཱནཝསེན ནིདྡིཊྛཱནི. ཚནྡོ མཱུལཊྛེནཱཏི ཀུསལཱནཾ དྷམྨཱནཾ ཀཏྟུཀམྱཏཱཚནྡོ པཊིཔཏྟིཡཱ ཙ ནིཔྥཏྟིཡཱ ཙ མཱུལཏྟཱ མཱུལཊྛེན. མནསིཀཱརོ སམུཊྛཱནཊྛེནཱཏི ཡོནིསོམནསིཀཱརོ སབྦཀུསལདྷམྨེ སམུཊྛཱཔེཏཱིཏི སམུཊྛཱནཊྛེན. ཕསྶོ སམོདྷཱནཊྛེནཱཏི ¶ ཡསྨཱ ཏཎྷཱཡ ཝིསེསེན ཝེདནཱ པདྷཱནཀཱརཎཾ, ཏཎྷཱ ཙ པཧཱིཡམཱནཱ ཝིསེསེན ཝེདནཱཡ པརིཉྙཱཏཱཡ པཧཱིཡཏི, ཏསྶཱ ཙ ཝེདནཱཡ ཕསྶོཝ པདྷཱནཀཱརཎཾ, ཏསྨིཾ པརིཉྙཱཏེ ཝེདནཱ པརིཉྙཱཏཱ ཧོཏི, ཏསྨཱ སཏྟསུ ཨབྷིཉྙེཡྻཝཏྠཱུསུ ཕསྶོ པཋམཾ ཝུཏྟོ. སོ ཙ ཏིཀསནྣིཔཱཏསངྑཱཏསྶ ཨཏྟནོ ཀཱརཎསྶ ཝསེན པཝེདིཏཏྟཱ ‘‘ཏིཀསནྣིཔཱཏཔཙྩུཔཊྛཱནོ’’ཏི ཝུཏྟཏྟཱ སམོདྷཱནཊྛེན ཨབྷིཉྙེཡྻོ. ཀེཙི པན ‘‘ཉཱཎཕསྶོ ཕསྶོ’’ཏི ཝདནྟི.

ཡསྨཱ པན ཝེདནཱ ཙིཏྟཙེཏསིཀེ ཨཏྟནོ ཝསེ ཝཏྟཱཔཡམཱནཱ ཏཏྠ སམོསརཏི པཝིསཏི, ཙིཏྟསནྟཱནམེཝ ཝཱ པཝིསཏི, ཏསྨཱ སམོསརཎཊྛེན ཨབྷིཉྙེཡྻཱཏི ཝུཏྟཱ. ཀེཙི པན ‘‘སབྦཱནིཔི པརིཉྙེཡྻཱནི ཝེདནཱསུ སམོསརནྟི, ཝེདནཱསུ པརིཉྙཱཏཱསུ སབྦཾ ཏཎྷཱཝཏྠུ པརིཉྙཱཏཾ ཧོཏི. ཏཾ ཀིསྶ ཧེཏུ? ཝེདནཱཔཙྩཡཱ ཧི སབྦཱཔི ཏཎྷཱ. ཏསྨཱ ཝེདནཱ སམོསརཎཊྛེན ཨབྷིཉྙེཡྻཱ’’ཏི ཝདནྟི. ཡསྨཱ སབྦགོཔཱནསཱིནཾ ཨཱབནྡྷནཏོ ཀཱུཊཱགཱརཀཎྞིཀཱ ཝིཡ ཙིཏྟཙེཏསིཀཱནཾ སམྤིཎྜནཏོ སམཱདྷི ཀུསལཱནཾ དྷམྨཱནཾ པམུཁོ ཧོཏི ཛེཊྛཀོ, ཏསྨཱ སམཱདྷི པམུཁཊྛེནཱཏི ཝུཏྟཾ. པཱམུཁཊྛེནཱཏིཔི པཱཋོ. ཡསྨཱ སམཐཝིཔསྶནཾ བྷཱཝེནྟསྶ ཨཱརམྨཎཱུཔཊྛཱནཱདྷིཔཏི ཧོཏི སཏི, སཏིཡཱ ¶ ཨུཔཊྛིཏེ ཨཱརམྨཎེ སབྦེཔི ཀུསལཱ དྷམྨཱ སཀཾ སཀཾ ཀིཙྩཾ སཱདྷེནྟི, ཏསྨཱ སཏི ཨཱདྷིཔཏེཡྻཊྛེནཱཏི ཝུཏྟཾ. པཉྙཱ ཏདུཏྟརཊྛེནཱཏི ཨརིཡམགྒཔཉྙཱ ཏེསཾ ཀུསལཱནཾ དྷམྨཱནཾ ཨུཏྟརཊྛེན སེཊྛཊྛེན ཨབྷིཉྙེཡྻཱ. ཨཐ ཝཱ ཏཏོ ཀིལེསེཧི, སཾསཱརཝཊྚཏོ ཝཱ ཨུཏྟརཏི སམཏིཀྐམཏཱིཏི ཏདུཏྟརཱ, ཏསྶཱ ཨཏྠོ ཏདུཏྟརཊྛོ. ཏེན ¶ ཏདུཏྟརཊྛེན. ཏཏུཏྟརཊྛེནཱཏིཔི པཱཋོ, ཏཏོ ཨུཏྟརཊྛེནཱཏི ཨཏྠོ. ཝིམུཏྟི སཱརཊྛེནཱཏི ཕལཝིམུཏྟི ཨཔརིཧཱནིཝསེན ཐིརཏྟཱ སཱརོ, ཏཾ ཨཏིཀྐམིཏྭཱ ཨཉྙསྶ པརིཡེསིཏབྦསྶ ཨབྷཱཝཏོཔི སཱརོ. སཱ ཝིམུཏྟི ཏེན སཱརཊྛེན ཨབྷིཉྙེཡྻཱ. ཨམཏོགདྷཾ ནིབྦཱནནྟི ནཏྠི ཨེཏསྶ མརཎསངྑཱཏཾ མཏནྟི ཨམཏཾ, ཀིལེསཝིསཔཊིཔཀྑཏྟཱ ཨགདནྟིཔི ཨམཏཾ ¶ , སཙྪིཀིརིཡཱཡ སཏྟཱནཾ པཏིཊྛཱབྷཱུཏནྟི ཨོགདྷཾ, སཾསཱརདུཀྑསནྟིབྷཱུཏཏྟཱ ནིབྦུཏནྟི ནིབྦཱནཾ, ནཏྠེཏྠ ཏཎྷཱསངྑཱཏཾ ཝཱནནྟིཔི ནིབྦཱནཾ. ཏཾ སཱསནསྶ ནིཊྛཱབྷཱུཏཏྟཱ པརིཡོསཱནཊྛེན ཨབྷིཉྙེཡྻཾ. ཨེཝཾ ཨིམསྨིཾ ཨབྷིཉྙེཡྻནིདྡེསེ སཏྟསཧསྶཱནི སཏྟསཏཱནི ཙཏྟཱལཱིསཉྩ ཝིསྶཛྫནཱནི ཧོནྟི.

ཨིདཱནི ཏེསཾ ཨེཝཾ ནིདྡིཊྛཱནཾ དྷམྨཱནཾ ‘‘ཡེ ཡེ དྷམྨཱ ཨབྷིཉྙཱཏཱ, ཏེ ཏེ དྷམྨཱ ཉཱཏཱ ཧོནྟཱི’’ཏི ནིགམནཾ ཀརོཏི, ཏསྶ ཨབྷིམུཁཾ ཀཏྭཱ ཉཱཏཱ ཧོནྟཱིཏི ཨདྷིཔྤཱཡོ. ཏཾཉཱཏཊྛེན ཉཱཎནྟི ཏེསཾ ཝུཏྟཔྤཀཱརཱནཾ དྷམྨཱནཾ ཛཱནནཊྛེན ཉཱཎཾ. པཛཱནནཊྛེན པཉྙཱཏི པཀཱརཏོ ཛཱནནཊྛེན པཉྙཱ. ཏེན ཝུཙྩཏཱིཏིཨཱདིཏོ པུཙྪིཏཔུཙྪཱ ནིགམེཏྭཱ དསྶིཏཱ. ཏེན ཀཱརཎེན ‘‘ཨིམེ དྷམྨཱ ཨབྷིཉྙེཡྻཱཏི སོཏཱཝདྷཱནཾ, ཏཾཔཛཱནནཱ པཉྙཱ སུཏམཡེ ཉཱཎ’’ནྟི ཝུཙྩཏཱིཏི ཨཏྠོཏི.

སདྡྷམྨཔྤཀཱསིནིཡཱ པཊིསམྦྷིདཱམགྒཊྛཀཐཱཡ

ཨབྷིཉྙེཡྻནིདྡེསཝཎྞནཱ ནིཊྛིཏཱ.

པརིཉྙེཡྻནིདྡེསཝཎྞནཱ

༢༡. པརིཉྙེཡྻནིདྡེསེ ¶ ཀིཉྩཱཔི པརིཉྙཱསདྡེན ཉཱཏཔརིཉྙཱ, ཏཱིརཎཔརིཉྙཱ, པཧཱནཔརིཉྙཱཏི ཏིསྶོ པརིཉྙཱ སངྒཧིཏཱ. ཧེཊྛཱ ‘‘ཨབྷིཉྙེཡྻཱ’’ཏི ཉཱཏཔརིཉྙཱཡ ཝུཏྟཏྟཱ ཨུཔརི ‘‘པཧཱཏབྦཱ’’ཏི པཧཱནཔརིཉྙཱཡ ཝུཏྟཏྟཱ ཏཱིརཎཔརིཉྙཱཝ ཨིདྷ ཨདྷིཔྤེཏཱ. ཕསྶོ སཱསཝོ ཨུཔཱདཱནིཡོཏི ¶ ཨཱསཝཱནཉྩེཝ ཨུཔཱདཱནཱནཉྩ པཙྩཡབྷཱུཏོ ཏེབྷཱུམཀཕསྶོ. སོཔི ཧི ཨཏྟཱནཾ ཨཱརམྨཎཾ ཀཏྭཱ པཝཏྟམཱནེཧི སཧ ཨཱསཝེཧཱིཏི སཱསཝོ, ཨཱརམྨཎབྷཱཝཾ ཨུཔགནྟྭཱ ཨུཔཱདཱནསམྦནྡྷནེན ཨུཔཱདཱནཱནཾ ཧིཏོཏི ཨུཔཱདཱནིཡོ. ཡསྨཱ ཕསྶེ ཏཱིརཎཔརིཉྙཱཡ པརིཉྙཱཏེ ཕསྶམུཁེན སེསཱཔི ཨརཱུཔདྷམྨཱ ཏདནུསཱརེན ཙ རཱུཔདྷམྨཱ པརིཉྙཱཡནྟི, ཏསྨཱ ཨེཀོཝ ཕསྶོ ཝུཏྟོ. ཨེཝཾ སེསེསུཔི ཡཐཱཡོགཾ ཡོཛེཏབྦཾ.

ནཱམནྟི ¶ ཙཏྟཱརོ ཁནྡྷཱ ཨརཱུཔིནོ ནིབྦཱནཉྩ. རཱུཔནྟི ཙཏྟཱརི ཙ མཧཱབྷཱུཏཱནི ཙཏུནྣཉྩ མཧཱབྷཱུཏཱནཾ ཨུཔཱདཱཡརཱུཔཱནི ཙཏུཝཱིསཏི. ཙཏྟཱརོ ཁནྡྷཱ ནམནཊྛེན ནཱམཾ. ཏེ ཧི ཨཱརམྨཎཱབྷིམུཁཱ ནམནྟི. སབྦམྤི ནཱམནཊྛེན ནཱམཾ. ཙཏྟཱརོ ཧི ཁནྡྷཱ ཨཱརམྨཎེ ཨཉྙམཉྙཾ ནཱམེནྟི, ནིབྦཱནཾ ཨཱརམྨཎཱདྷིཔཏིཔཙྩཡཏཱཡ ཨཏྟནི ཨནཝཛྫདྷམྨེ ནཱམེཏི. སནྟཏིཝསེན སཱིཏཱདཱིཧི རུཔྤནཊྛེན རཱུཔཾ. རུཔྤནཊྛེནཱཏི ཀུཔྤནཊྛེན. སནྟཏིཝིཔརིཎཱམཝསེན ཧི སཱིཏཱདཱིཧི གྷཊྚནཱིཡཾ དྷམྨཛཱཏཾ རཱུཔནྟི ཝུཙྩཏི. ཨིདྷ པན ནཱམནྟི ལོཀིཀམེཝ ཨདྷིཔྤེཏཾ, རཱུཔཾ པན ཨེཀནྟེན ལོཀིཀམེཝ.

ཏིསྶོ ཝེདནཱཏི སུཁཱ ཝེདནཱ, དུཀྑཱ ཝེདནཱ, ཨདུཀྑམསུཁཱ ཝེདནཱ. ཏཱ ལོཀིཀཱ ཨེཝ. ཨཱཧཱརཱཏི པཙྩཡཱ. པཙྩཡཱ ཧི ཨཏྟནོ ཕལཾ ཨཱཧརནྟཱིཏི ཨཱཧཱརཱ. ཀབལཱི༹ཀཱརོ ཨཱཧཱརོ ཕསྶཱཧཱརོ མནོསཉྩེཏནཱཧཱརོ ཝིཉྙཱཎཱཧཱརོཏི ཙཏྟཱརོ. ཝཏྠུཝསེན ཀབལཱི༹ཀཱཏབྦཏྟཱ ཀབལཱི༹ཀཱརོ ¶ , ཨཛ྄ཛྷོཧརིཏབྦཏྟཱ ཨཱཧཱརོ. ཨོདནཀུམྨཱསཱདིཝཏྠུཀཱཡ ཨོཛཱཡེཏཾ ནཱམཾ. སཱ ཧི ཨོཛཊྛམཀརཱུཔཱནི ཨཱཧརཏཱིཏི ཨཱཧཱརོ. ཙཀྑུསམྥསྶཱདིཀོ ཚབྦིདྷོ ཕསྶོ ཏིསྶོ ཝེདནཱ ཨཱཧརཏཱིཏི ཨཱཧཱརོ. མནསོ སཉྩེཏནཱ, ན སཏྟསྶཱཏི མནོསཉྩེཏནཱ ཡཐཱ ཙིཏྟེཀགྒཏཱ. མནསཱ ཝཱ སམྤཡུཏྟཱ སཉྩེཏནཱ མནོསཉྩེཏནཱ ཡཐཱ ཨཱཛཉྙརཐོ. ཏེབྷཱུམཀཀུསལཱཀུསལཙེཏནཱ. སཱ ཧི ཏཡོ བྷཝེ ཨཱཧརཏཱིཏི ཨཱཧཱརོ. ཝིཉྙཱཎནྟི ཨེཀཱུནཝཱིསཏིབྷེདཾ པཊིསནྡྷིཝིཉྙཱཎཾ. ཏཉྷི པཊིསནྡྷིནཱམརཱུཔཾ ཨཱཧརཏཱིཏི ཨཱཧཱརོ. ཨུཔཱདཱནཀྑནྡྷཱཏི ཨུཔཱདཱནགོཙརཱ ཁནྡྷཱ, མཛ྄ཛྷཔདལོཔོ དཊྛབྦོ. ཨུཔཱདཱནསམྦྷཱུཏཱ ཝཱ ཁནྡྷཱ ཨུཔཱདཱནཀྑནྡྷཱ ཡཐཱ ཏིཎགྒི ¶ ཐུསགྒི. ཨུཔཱདཱནཝིདྷེཡྻཱ ཝཱ ཁནྡྷཱ ཨུཔཱདཱནཀྑནྡྷཱ ཡཐཱ རཱཛཔུརིསོ. ཨུཔཱདཱནཔྤབྷཝཱ ཝཱ ཁནྡྷཱ ཨུཔཱདཱནཀྑནྡྷཱ ཡཐཱ པུཔྥརུཀྑོ ཕལརུཀྑོ. ཨུཔཱདཱནཱནི པན ཀཱམུཔཱདཱནཾ དིཊྛུཔཱདཱནཾ སཱིལབྦཏུཔཱདཱནཾ ཨཏྟཝཱདུཔཱདཱནནྟི ཙཏྟཱརི. ཨཏྠཏོ པན བྷུསཾ ཨཱདཱནནྟི ཨུཔཱདཱནཾ. རཱུཔུཔཱདཱནཀྑནྡྷོ, ཝེདནུཔཱདཱནཀྑནྡྷོ, སཉྙུཔཱདཱནཀྑནྡྷོ, སངྑཱརུཔཱདཱནཀྑནྡྷོ, ཝིཉྙཱཎུཔཱདཱནཀྑནྡྷོཏི པཉྩ.

ཚ ཨཛ྄ཛྷཏྟིཀཱནི ཨཱཡཏནཱནཱིཏི ཙཀྑཱཡཏནཾ, སོཏཱཡཏནཾ, གྷཱནཱཡཏནཾ, ཛིཝ྄ཧཱཡཏནཾ, ཀཱཡཱཡཏནཾ, མནཱཡཏནཾ.

སཏྟ ཝིཉྙཱཎཊྛིཏིཡོཏི ཀཏམཱ སཏྟ? ཝུཏྟཉྷེཏཾ བྷགཝཏཱ –

‘‘སནྟི, བྷིཀྑཝེ (ཨ. ནི. ༧.༤༤; དཱི. ནི. ༣.༣༣༢), སཏྟཱ ནཱནཏྟཀཱཡཱ ¶ ནཱནཏྟསཉྙིནོ. སེཡྻཐཱཔི མནུསྶཱ ཨེཀཙྩེ ཙ དེཝཱ ཨེཀཙྩེ ཙ ཝིནིཔཱཏིཀཱ. ཨཡཾ པཋམཱ ཝིཉྙཱཎཊྛིཏི.

‘‘སནྟི, བྷིཀྑཝེ, སཏྟཱ ནཱནཏྟཀཱཡཱ ཨེཀཏྟསཉྙིནོ. སེཡྻཐཱཔི དེཝཱ བྲཧྨཀཱཡིཀཱ པཋམཱབྷིནིབྦཏྟཱ. ཨཡཾ དུཏིཡཱ ཝིཉྙཱཎཊྛིཏི.

‘‘སནྟི, བྷིཀྑཝེ, སཏྟཱ ཨེཀཏྟཀཱཡཱ ནཱནཏྟསཉྙིནོ. སེཡྻཐཱཔི དེཝཱ ཨཱབྷསྶརཱ. ཨཡཾ ཏཏིཡཱ ཝིཉྙཱཎཊྛིཏི.

‘‘སནྟི, བྷིཀྑཝེ, སཏྟཱ ཨེཀཏྟཀཱཡཱ ཨེཀཏྟསཉྙིནོ. སེཡྻཐཱཔི དེཝཱ སུབྷཀིཎྷཱ. ཨཡཾ ཙཏུཏྠཱ ཝིཉྙཱཎཊྛིཏི.

‘‘སནྟི, བྷིཀྑཝེ, སཏྟཱ སབྦསོ རཱུཔསཉྙཱནཾ སམཏིཀྐམཱ པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ ‘ཨནནྟོ ཨཱཀཱསོ’ཏི ཨཱཀཱསཱནཉྩཱཡཏནཱུཔགཱ. ཨཡཾ པཉྩམཱི ཝིཉྙཱཎཊྛིཏི.

‘‘སནྟི, བྷིཀྑཝེ, སཏྟཱ སབྦསོ ཨཱཀཱསཱནཉྩཱཡཏནཾ སམཏིཀྐམྨ ‘ཨནནྟཾ ཝིཉྙཱཎ’ནྟི ཝིཉྙཱཎཉྩཱཡཏནཱུཔགཱ. ཨཡཾ ¶ ཚཊྛཱ ཝིཉྙཱཎཊྛིཏི.

‘‘སནྟི ¶ , བྷིཀྑཝེ, སཏྟཱ སབྦསོ ཝིཉྙཱཎཉྩཱཡཏནཾ སམཏིཀྐམྨ ‘ནཏྠི ཀིཉྩཱི’ཏི ཨཱཀིཉྩཉྙཱཡཏནཱུཔགཱ. ཨཡཾ སཏྟམཱི ཝིཉྙཱཎཊྛིཏི. ཨིམཱ ཁོ, བྷིཀྑཝེ, སཏྟ ཝིཉྙཱཎཊྛིཏིཡོ’’ཏི (ཨ. ནི. ༧.༤༤; དཱི. ནི. ༣.༣༣༢).

ཝིཉྙཱཎཊྛིཏིཡོཏི པཊིསནྡྷིཝིཉྙཱཎསྶ ཋཱནཱནི སཝིཉྙཱཎཀཱ ཁནྡྷཱ ཨེཝ. ཏཏྠ སེཡྻཐཱཔཱིཏི ནིདསྶནཏྠེ ནིཔཱཏོ. མནུསྶཱཏི ཨཔརིམཱཎེསུཔི ཙཀྐཝཱལེ༹སུ ཨཔརིམཱཎཱནཾ མནུསྶཱནཾ ཝཎྞསཎྛཱནཱདིཝསེན དྭེཔི ཨེཀསདིསཱ ནཏྠི. ཡེཔི ཝཎྞེན ཝཱ སཎྛཱནེན ཝཱ སདིསཱ ཧོནྟི, ཏེཔི ཨཱལོཀིཏཝིལོཀིཏཱདཱིཧི ཝིསདིསཱཝ ཧོནྟི, ཏསྨཱ ནཱནཏྟཀཱཡཱཏི ཝུཏྟཱ. པཊིསནྡྷིསཉྙཱ པན ནེསཾ ཏིཧེཏུཀཱཔི དུཧེཏུཀཱཔི ཨཧེཏུཀཱཔི ཧོཏི, ཏསྨཱ ནཱནཏྟསཉྙིནོཏི ཝུཏྟཱ. ཨེཀཙྩེ ཙ དེཝཱཏི ཚ ཀཱམཱཝཙརདེཝཱ. ཏེསུ ཧི ཀེསཉྩི ཀཱཡོ ནཱིལོ ཧོཏི, ཀེསཉྩི པཱིཏཀཱདིཝཎྞོ, སཉྙཱ པན ནེསཾ ཏིཧེཏུཀཱཔི དུཧེཏུཀཱཔི ཧོཏི, ཨཧེཏུཀཱ ན ཧོཏི. ཨེཀཙྩེ ཙ ཝིནིཔཱཏིཀཱཏི ¶ ཙཏུཨཔཱཡཝིནིམུཏྟཱ པུནབྦསུམཱཏཱ ཡཀྑིནཱི, པིཡངྐརམཱཏཱ, ཕུསྶམིཏྟཱ, དྷམྨགུཏྟཱཏི ཨེཝམཱདཡོ ཨཉྙེ ཙ ཝེམཱནིཀཱ པེཏཱ. ཨེཏེསཉྷི ཨོདཱཏཀཱལ༹མངྒུརཙྪཝིསཱམཝཎྞཱདིཝསེན ཙེཝ ཀིསཐཱུལརསྶདཱིགྷཝསེན ཙ ཀཱཡོ ནཱནཱ ཧོཏི, མནུསྶཱནཾ ཝིཡ ཏིཧེཏུཀདྭིཧེཏུཀཱཧེཏུཀཝསེན སཉྙཱཔི. ཏེ པན དེཝཱ ཝིཡ ན མཧེསཀྑཱ, ཀཔཎམནུསྶཱ ཝིཡ ཨཔྤེསཀྑཱ དུལླབྷགྷཱསཙྪཱདནཱ དུཀྑཔཱིལི༹ཏཱ ཝིཧརནྟི. ཨེཀཙྩེ ཀཱལ༹པཀྑེ དུཀྑིཏཱ ཛུཎྷཔཀྑེ སུཁིཏཱ ཧོནྟི, ཏསྨཱ སུཁསམུསྶཡཏོ ཝིནིཔཏིཏཏྟཱ ཝིནིཔཱཏིཀཱཏི ཝུཏྟཱ. ཡེ པནེཏྠ ཏིཧེཏུཀཱ, ཏེསཾ དྷམྨཱབྷིསམཡོཔི ཧོཏི པིཡངྐརམཱཏཱདཱིནཾ ཝིཡ.

བྲཧྨཀཱཡིཀཱཏི བྲཧྨཔཱརིསཛྫབྲཧྨཔུརོཧིཏམཧཱབྲཧྨཱནོ. པཋམཱབྷིནིབྦཏྟཱཏི ཏེ སབྦེཔི པཋམཛ྄ཛྷཱནེན ནིབྦཏྟཱ. བྲཧྨཔཱརིསཛྫཱ པན པརིཏྟེན, བྲཧྨཔུརོཧིཏཱ མཛ྄ཛྷིམེན, ཀཱཡོ ཙ ཏེསཾ ཝིཔྥཱརིཀཏརོ ཧོཏི. མཧཱབྲཧྨཱནོ པཎཱིཏེན, ཀཱཡོ པན ནེསཾ ཨཏིཝིཔྥཱརིཀཏརོ ཧོཏི. ཨིཏི ཏེ ཀཱཡསྶ ནཱནཏྟཱ, པཋམཛ྄ཛྷཱནཝསེན སཉྙཱཡ ཨེཀཏྟཱ ནཱནཏྟཀཱཡཱ ཨེཀཏྟསཉྙིནོཏི ¶ ཝུཏྟཱ. ཡཐཱ ཙ ཏེ, ཨེཝཾ ཙཏཱུསུ ཨཔཱཡེསུ སཏྟཱ. ནིརཡེསུ ཧི ཀེསཉྩི གཱཝུཏཾ, ཀེསཉྩི ཨཌྜྷཡོཛནཾ ¶ , ཀེསཉྩི ཏིགཱཝུཏཾ ཨཏྟབྷཱཝོ ཧོཏི, དེཝདཏྟསྶ པན ཡོཛནསཏིཀོ ཛཱཏོ. ཏིརཙྪཱནེསུཔི ཀེཙི ཁུདྡཀཱ ཧོནྟི, ཀེཙི མཧནྟཱ. པེཏྟིཝིསཡེསུཔི ཀེཙི སཊྛིཧཏྠཱ ཀེཙི ཨསཱིཏིཧཏྠཱ ཧོནྟི ཀེཙི སུཝཎྞཱ ཀེཙི དུབྦཎྞཱ. ཏཐཱ ཀཱལཀཉྩིཀཱ ཨསུརཱ. ཨཔིཙེཏྠ དཱིགྷཔིཊྛིཀཱ པེཏཱ ནཱམ སཊྛིཡོཛནིཀཱཔི ཧོནྟི, སཉྙཱ པན སབྦེསམྤི ཨཀུསལཝིཔཱཀཱཧེཏུཀཱཝ ཧོཏི. ཨིཏི ཨཔཱཡིཀཱཔི ‘‘ནཱནཏྟཀཱཡཱ ཨེཀཏྟསཉྙིནོ’’ཏི སངྑཾ གཙྪནྟི.

ཨཱབྷསྶརཱཏི དཎྜཨུཀྐཱཡ ཨཙྩི ཝིཡ ཨེཏེསཾ སརཱིརཏོ ཨཱབྷཱ ཚིཛྫིཏྭཱ ཚིཛྫིཏྭཱ པཏནྟཱི ཝིཡ སརཏི ཝིསརཏཱིཏི ཨཱབྷསྶརཱ. ཏེསུ པཉྩཀནཡེ དུཏིཡཏཏིཡཛ྄ཛྷཱནདྭཡཾ པརིཏྟཾ བྷཱཝེཏྭཱ ཨུཔྤནྣཱ པརིཏྟཱབྷཱ ནཱམ ཧོནྟི, མཛ྄ཛྷིམཾ བྷཱཝེཏྭཱ ཨུཔྤནྣཱ ཨཔྤམཱཎཱབྷཱ ནཱམ ཧོནྟི, པཎཱིཏཾ བྷཱཝེཏྭཱ ཨུཔྤནྣཱ ཨཱབྷསྶརཱ ནཱམ ཧོནྟི. ཨིདྷ པན ཨུཀྐཊྛཔརིཙྪེདཝསེན སབྦེཝ ཏེ གཧིཏཱ. སབྦེསཉྷི ཏེསཾ ཀཱཡོ ཨེཀཝིཔྥཱརོཝ ཧོཏི, སཉྙཱ པན ཨཝིཏཀྐཝིཙཱརམཏྟཱ ཙ ཨཝིཏཀྐཨཝིཙཱརཱ ཙཱཏི ནཱནཱ.

སུབྷཀིཎྷཱཏི སུབྷེན ཝོཀིཎྞཱ ཝིཀིཎྞཱ, སུབྷེན སརཱིརཔྤབྷཱཝཎྞེན ཨེཀགྒྷནཱཏི ཨཏྠོ. ཨེཏེསཉྷི ན ཨཱབྷསྶརཱནཾ ཝིཡ ཚིཛྫིཏྭཱ ཚིཛྫིཏྭཱ པབྷཱ གཙྪཏཱིཏི. ཙཏུཀྐནཡེ ཏཏིཡསྶ, པཉྩཀནཡེ ཙཏུཏྠསྶ པརིཏྟམཛ྄ཛྷིམཔཎཱིཏསྶ ཛྷཱནསྶཝསེན པརིཏྟསུབྷཨཔྤམཱཎསུབྷསུབྷཀིཎྷཱ ནཱམ ཧུཏྭཱ ནིབྦཏྟནྟི. ཨིཏི སབྦེཔི ཏེ ཨེཀཏྟཀཱཡཱ ཙེཝ ཙཏུཏྠཛ྄ཛྷཱནསཉྙཱཡ ¶ ཨེཀཏྟསཉྙིནོ ཙཱཏི ཝེདིཏབྦཱ. ཝེཧཔྥལཱཔི ཙཏུཏྠཝིཉྙཱཎཊྛིཏིམེཝ བྷཛནྟི. ཨསཉྙསཏྟཱ ཝིཉྙཱཎཱབྷཱཝཱ ཨེཏྠ སངྒཧཾ ན གཙྪནྟི, སཏྟཱཝཱསེསུ གཙྪནྟི.

སུདྡྷཱཝཱསཱ ཝིཝཊྚཔཀྑེ ཋིཏཱ ན སབྦཀཱལིཀཱ, ཀཔྤསཏསཧསྶམྤི ཨསངྑྱེཡམྤི བུདྡྷསུཉྙེ ལོཀེ ན ཨུཔྤཛྫནྟི, སོལ༹སཀཔྤསཧསྶབྦྷནྟརེ བུདྡྷེསུ ཨུཔྤནྣེསུཡེཝ ཨུཔྤཛྫནྟི, དྷམྨཙཀྐཔྤཝཏྟསྶ བྷགཝཏོ ཁནྡྷཱཝཱརསདིསཱ ཧོནྟི, ཏསྨཱ ནེཝ ཝིཉྙཱཎཊྛིཏིཾ, ན ཙ སཏྟཱཝཱསཾ བྷཛནྟི. མཧཱསཱིཝཏྠེརོ པན – ‘‘ན ཁོ པན སོ, སཱརིཔུཏྟ, སཏྟཱཝཱསོ སུལབྷརཱུཔོ, ཡོ མཡཱ ཨནཱཝུཏྠཔུབྦོ ཨིམིནཱ དཱིགྷེན ཨདྡྷུནཱ ཨཉྙཏྲ སུདྡྷཱཝཱསེཧི དེཝེཧཱི’’ཏི (མ. ནི. ༡.༡༦༠) ཨིམིནཱ སུཏྟེན སུདྡྷཱཝཱསཱཔི ཙཏུཏྠཾ ¶ ¶ ཝིཉྙཱཎཊྛིཏིཾ ཙཏུཏྠཾ སཏྟཱཝཱསཉྩ བྷཛནྟཱིཏི ཝདཏི, ཏཾ ཨཔྤཊིབཱཧིཏཏྟཱ སུཏྟསྶ ཨནུཉྙཱཏཾ.

ནེཝསཉྙཱནཱསཉྙཱཡཏནཾ ཡཐེཝ སཉྙཱཡ, ཨེཝཾ ཝིཉྙཱཎསྶཱཔི སུཁུམཏྟཱ ནེཝཝིཉྙཱཎཾ ནཱཝིཉྙཱཎཾ, ཏསྨཱ ཝིཉྙཱཎཊྛིཏཱིསུ ན ཝུཏྟཾ.

ཨཊྛ ལོཀདྷམྨཱཏི ལཱབྷོ, ཨལཱབྷོ, ཡསོ, ཨཡསོ, ནིནྡཱ, པསཾསཱ, སུཁཾ, དུཀྑནྟི ཨིམེ ཨཊྛ ལོཀཔྤཝཏྟིཡཱ སཏི ཨནུཔརམདྷམྨཀཏྟཱ ལོཀསྶ དྷམྨཱཏི ལོཀདྷམྨཱ. ཨེཏེཧི མུཏྟོ སཏྟོ ནཱམ ནཏྠི, བུདྡྷཱནམྤི ཧོནྟིཡེཝ. ཡཐཱཧ –

‘‘ཨཊྛིམེ, བྷིཀྑཝེ, ལོཀདྷམྨཱ ལོཀཾ ཨནུཔརིཝཏྟནྟི, ལོཀོ ཙ ཨཊྛ ལོཀདྷམྨེ ཨནུཔརིཝཏྟཏི. ཀཏམེ ཨཊྛ? ལཱབྷོ ཙ ཨལཱབྷོ ཙ ཡསོ ཙ ཨཡསོ ཙ ནིནྡཱ ཙ པསཾསཱ ཙ སུཁཉྩ དུཀྑཉྩ. ཨིམེ ཁོ, བྷིཀྑཝེ, ཨཊྛ ལོཀདྷམྨཱ ལོཀཾ ཨནུཔརིཝཏྟནྟི, ལོཀོ ཙ ཨིམེ ཨཊྛ ལོཀདྷམྨེ ཨནུཔརིཝཏྟཏཱི’’ཏི (ཨ. ནི. ༨.༦).

ཏཏྠ ཨནུཔརིཝཏྟནྟཱིཏི ཨནུབནྡྷནྟི ནཔྤཛཧནྟི, ལོཀཏོ ན ནིཝཏྟནྟཱིཏི ཨཏྠོ. ལཱབྷོཏི པབྦཛིཏསྶ ཙཱིཝརཱདི, གཧཊྛསྶ དྷནདྷཉྙཱདི ལཱབྷོ. སོཡེཝ ཨལབྦྷམཱནོ ལཱབྷོ ཨལཱབྷོ. ན ལཱབྷོ ཨལཱབྷོཏི ཝུཙྩམཱནེ ཨཏྠཱབྷཱཝཱཔཏྟིཏོ པརིཉྙེཡྻོ ན སིཡཱ. ཡསོཏི པརིཝཱརོ. སོཡེཝ ཨལབྦྷམཱནཱ ཡསོ ཨཡསོ. ནིནྡཱཏི ཨཝཎྞབྷཎནཾ. པསཾསཱཏི ཝཎྞབྷཎནཾ. སུཁནྟི ཀཱམཱཝཙརཱནཾ ཀཱཡིཀཙེཏསིཀཾ. དུཀྑནྟི པུཐུཛྫནསོཏཱཔནྣསཀདཱགཱམཱིནཾ ཀཱཡིཀཙེཏསིཀཾ, ཨནཱགཱམིཨརཧནྟཱནཾ ཀཱཡིཀམེཝ.

ནཝ ¶ སཏྟཱཝཱསཱཏི སཏྟཱནཾ ཨཱཝཱསཱ, ཝསནཊྛཱནཱནཱིཏི ཨཏྠོ. ཏཱནི པན ཏཐཱཔཀཱསིཏཱ ཁནྡྷཱ ཨེཝ. ཀཏམེ ནཝ? ཝུཏྟཉྷེཏཾ བྷགཝཏཱ –

‘‘ནཝཡིམེ, བྷིཀྑཝེ (ཨ. ནི. ༩.༢༤; དཱི. ནི. ༣.༣༤༡), སཏྟཱཝཱསཱ. ཀཏམེ ནཝ? སནྟི, བྷིཀྑཝེ, སཏྟཱ ནཱནཏྟཀཱཡཱ ནཱནཏྟསཉྙིནོ, སེཡྻཐཱཔི མནུསྶཱ ཨེཀཙྩེ ¶ ཙ དེཝཱ ཨེཀཙྩེ ཙ ཝིནིཔཱཏིཀཱ. ཨཡཾ པཋམོ སཏྟཱཝཱསོ.

‘‘སནྟི, བྷིཀྑཝེ, སཏྟཱ ནཱནཏྟཀཱཡཱ ཨེཀཏྟསཉྙིནོ, སེཡྻཐཱཔི དེཝཱ བྲཧྨཀཱཡིཀཱ པཋམཱབྷིནིབྦཏྟཱ. ཨཡཾ དུཏིཡོ སཏྟཱཝཱསོ.

‘‘སནྟི, བྷིཀྑཝེ, སཏྟཱ ཨེཀཏྟཀཱཡཱ ནཱནཏྟསཉྙིནོ, སེཡྻཐཱཔི དེཝཱ ཨཱབྷསྶརཱ. ཨཡཾ ཏཏིཡོ སཏྟཱཝཱསོ.

‘‘སནྟི, བྷིཀྑཝེ, སཏྟཱ ཨེཀཏྟཀཱཡཱ ཨེཀཏྟསཉྙིནོ, སེཡྻཐཱཔི དེཝཱ ¶ སུབྷཀིཎྷཱ. ཨཡཾ ཙཏུཏྠོ སཏྟཱཝཱསོ.

‘‘སནྟི, བྷིཀྑཝེ, སཏྟཱ ཨསཉྙིནོ ཨཔྤཊིསཾཝེདིནོ, སེཡྻཐཱཔི དེཝཱ ཨསཉྙསཏྟཱ. ཨཡཾ པཉྩམོ སཏྟཱཝཱསོ.

‘‘སནྟི, བྷིཀྑཝེ, སཏྟཱ སབྦསོ རཱུཔསཉྙཱནཾ སམཏིཀྐམཱ པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ ‘ཨནནྟོ ཨཱཀཱསོ’ཏི ཨཱཀཱསཱནཉྩཱཡཏནཱུཔགཱ. ཨཡཾ ཚཊྛོ སཏྟཱཝཱསོ.

‘‘སནྟི, བྷིཀྑཝེ, སཏྟཱ སབྦསོ ཨཱཀཱསཱནཉྩཱཡཏནཾ སམཏིཀྐམྨ ‘ཨནནྟཾ ཝིཉྙཱཎ’ནྟི ཝིཉྙཱཎཉྩཱཡཏནཱུཔགཱ. ཨཡཾ སཏྟམོ སཏྟཱཝཱསོ.

‘‘སནྟི, བྷིཀྑཝེ, སཏྟཱ སབྦསོ ཝིཉྙཱཎཉྩཱཡཏནཾ སམཏིཀྐམྨ ‘ནཏྠི ཀིཉྩཱི’ཏི ཨཱཀིཉྩཉྙཱཡཏནཱུཔགཱ. ཨཡཾ ཨཊྛམོ སཏྟཱཝཱསོ.

‘‘སནྟི, བྷིཀྑཝེ, སཏྟཱ སབྦསོ ཨཱཀིཉྩཉྙཱཡཏནཾ སམཏིཀྐམྨ ནེཝསཉྙཱནཱསཉྙཱཡཏནཱུཔགཱ ¶ . ཨཡཾ ནཝམོ སཏྟཱཝཱསོ. ཨིམེ ཁོ, བྷིཀྑཝེ, ནཝ སཏྟཱཝཱསཱ’’ཏི (ཨ. ནི. ༩.༢༤; དཱི. ནི. ༣.༣༤༡).

དསཱཡཏནཱནཱིཏི ཙཀྑཱཡཏནཾ རཱུཔཱཡཏནཾ སོཏཱཡཏནཾ སདྡཱཡཏནཾ གྷཱནཱཡཏནཾ གནྡྷཱཡཏནཾ ཛིཝ྄ཧཱཡཏནཾ རསཱཡཏནཾ ཀཱཡཱཡཏནཾ ཕོཊྛབྦཱཡཏནནྟི ཨེཝཾ དས. མནཱཡཏནདྷམྨཱཡཏནཱནི པན ལོཀུཏྟརམིསྶཀཏྟཱ ན གཧིཏཱནི. ཨིམེསུ དསསུ ཝིསྶཛྫནེསུ ཝིཔསྶནཱཝསེན ཏཱིརཎཔརིཉྙཱ ¶ ཝུཏྟཱ, ‘‘སབྦཾ, བྷིཀྑཝེ, པརིཉྙེཡྻ’’ནྟིཨཱདཱིསུ པན ཨནཉྙཱཏཉྙསྶཱམཱིཏིནྡྲིཡཱདཱིནཾ ཏིཎྞཾ, ནིརོདྷཔཊིཔདཱནཾ སཙྪིཀིརིཡཱབྷཱཝནཊྛཱནཾ ཏེསཾཡེཝ པཊིཝེདྷཊྛཱནཾ དུཀྑཱདཱིནཾ ནིསྶརཎསྶ ཨནུཔྤཱདཱདཱིནཾ པཉྩདསནྣཾ, པརིགྒཧཊྛཱདཱིནཾ ཨེཀཏིཾསཱཡ, ཨུཏྟརིཔཊིཝེདྷཊྛཱདཱིནཾ ཏིཎྞཾ, མགྒངྒཱནཾ ཨཊྛནྣཾ, ‘‘པཡོགཱནཾ པཊིཔྤསྶདྡྷཊྛོ’’ཏིཨཱདཱིནཾ དྭིནྣཾ, ཨསངྑཏཊྛསྶ ཝུཊྛཱནཊྛཱདཱིནཾ དྭིནྣཾ, ནིཡྻཱནཊྛསྶ ཨནུབུཛ྄ཛྷནཊྛཱདཱིནཾ ཏིཎྞཾ, ཨནུབོདྷནཊྛཱདཱིནཾ ཏིཎྞཾ, ཨནུབོདྷཔཀྑིཡཱདཱིནཾ ཏིཎྞཾ, ཨུཛྫོཏནཊྛཱདཱིནཾ ཙཏུནྣཾ, པཏཱཔནཊྛཱདཱིནཾ ཨཊྛཱརསནྣཾ, ཝིཝཊྚནཱནུཔསྶནཱདཱིནཾ ནཝནྣཾ, ཁཡེཉཱཎཨནུཔྤཱདེཉཱཎཱནཾ པཉྙཱཝིམུཏྟིནིབྦཱནཱནནྟི ཨིམེསཾ དྷམྨཱནཾ པཊིལཱབྷཝསེན ཏཱིརཎཔརིཉྙཱ ཝུཏྟཱ, སེསཱནཾ ཡཐཱཡོགཾ ¶ ཝིཔསྶནཱཝསེན ཙ པཊིལཱབྷཝསེན ཙ ཏཱིརཎཔརིཉྙཱ ཝུཏྟཱཏི ཝེདིཏབྦཱ.

ཡེསཾ ཡེསཾ དྷམྨཱནཾ པཊིལཱབྷཏྠཱཡ ཝཱཡམནྟསྶ, ཏེ ཏེ དྷམྨཱ པཊིལདྡྷཱ ཧོནྟི. ཨེཝཾ ཏེ དྷམྨཱ པརིཉྙཱཏཱ ཙེཝ ཧོནྟི ཏཱིརིཏཱ ཙཱཏི ཧི ཀིཙྩསམཱཔནཊྛེན ཏཱིརཎཔརིཉྙཱ ཝུཏྟཱ. ཀིཙྩེ ཧི སམཱཔིཏེ ཏེ དྷམྨཱ པཊིལདྡྷཱ ཧོནྟཱིཏི. ཀེཙི པན ‘‘ཨཝིཔསྶནཱུཔགཱནཾ ཉཱཏཔརིཉྙཱ’’ཏི ཝདནྟི. ཨབྷིཉྙེཡྻེན ཉཱཏཔརིཉྙཱཡ ཝུཏྟཏྟཱ ཏཾ ན སུནྡརཾ. པརིཉྙཱཏཱ ཙེཝ ཧོནྟི ཏཱིརིཏཱ ཙཱཏི ཏེ པཊིལདྡྷཱ ཨེཝ དྷམྨཱ པརིཉྙཱཏཱ ཙ ནཱམ ཧོནྟི, ཏཱིརིཏཱ ཙ ནཱམཱཏི ཨཏྠོ. ཨེཝཾ ཀིཙྩསམཱཔནཏྠཝསེན པརིཉྙཱཏཏྠོ ཝུཏྟོ ཧོཏི.

༢༢. ཨིདཱནི ཏམེཝཏྠཾ ཨེཀེཀདྷམྨེ པཊིལཱབྷཝསེན ཡོཛེཏྭཱ ཨནྟེ ཙ ནིགམེཏྭཱ དསྶེཏུཾ ནེཀྑམྨནྟིཨཱདིམཱཧ. ཏཾ སབྦཾ པུབྦེ ཝུཏྟཱནུསཱརེནེཝ ཝེདིཏབྦནྟི.

པརིཉྙེཡྻནིདྡེསཝཎྞནཱ ནིཊྛིཏཱ.

པཧཱཏབྦནིདྡེསཝཎྞནཱ

༢༣. པཧཱཏབྦནིདྡེསེ ¶ ¶ ཨསྨིམཱནོཏི རཱུཔཱདཱིསུ པཉྩསུ ཨུཔཱདཱནཀྑནྡྷེསུ ཨསྨཱིཏི མཱནོ. ཏསྨིཉྷི པཧཱིནེ ཨརཧཏྟཾ པཏྟཾ ཧོཏི. རཱུཔརཱགཱདཱིསུ ¶ ཝིཛྫམཱནེསུཔི སེསཱནི ཨཝཏྭཱ ཨསྨིམཱནསྶེཝ ཝཙནཾ དིཊྛིཔཏིརཱུཔཀཏྟེན ཏསྶ ཨོལཱ༹རིཀཏྟཱཏི ཝེདིཏབྦཾ. ཨཝིཛྫཱཏི སུཏྟནྟཔརིཡཱཡེན དུཀྑཱདཱིསུ ཙཏཱུསུ ཋཱནེསུ ཨཉྙཱཎཾ, ཨབྷིདྷམྨཔརིཡཱཡེན པུབྦནྟཱདཱིཧི སདྡྷིཾ ཨཊྛསུ. ཝུཏྟཉྷེཏཾ –

‘‘ཏཏྠ ཀཏམཱ ཨཝིཛྫཱ? དུཀྑེ ཨཉྙཱཎཾ, དུཀྑསམུདཡེ ཨཉྙཱཎཾ, དུཀྑནིརོདྷེ ཨཉྙཱཎཾ, དུཀྑནིརོདྷགཱམིནིཡཱ པཊིཔདཱཡ ཨཉྙཱཎཾ, པུབྦནྟེ ཨཉྙཱཎཾ, ཨཔརནྟེ ཨཉྙཱཎཾ, པུབྦནྟཱཔརནྟེ ཨཉྙཱཎཾ, ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཨཉྙཱཎ’’ནྟི (དྷ. ས. ༡༡༠༦; ཝིབྷ. ༢༢༦).

བྷཝཏཎྷཱཏི ཀཱམབྷཝཱདཱིསུ བྷཝེསུ པཏྠནཱ. ཡཐཱཧ –

‘‘ཏཏྠ ཀཏམཱ བྷཝཏཎྷཱ? ཡོ བྷཝེསུ བྷཝཙྪནྡོ བྷཝརཱགོ བྷཝནནྡཱི བྷཝཏཎྷཱ བྷཝསིནེཧོ བྷཝཔརིལཱ༹ཧོ བྷཝམུཙྪཱ བྷཝཛ྄ཛྷོསཱན’’ནྟི (ཝིབྷ. ༨༩༥).

ཏིསྶོ ཏཎྷཱཏི ཀཱམཏཎྷཱ, བྷཝཏཎྷཱ, ཝིབྷཝཏཎྷཱ. ཏཱསཾ ཨབྷིདྷམྨེ ཨེཝཾ ནིདྡེསོ ཀཏོ – ཏཏྠ ཀཏམཱ བྷཝཏཎྷཱ? བྷཝདིཊྛིསཧགཏོ རཱགོ…པེ… ཙིཏྟསྶ སཱརཱགོ, ཨཡཾ ཝུཙྩཏི བྷཝཏཎྷཱ. ཏཏྠ ཀཏམཱ ཝིབྷཝཏཎྷཱ? ཨུཙྪེདདིཊྛིསཧགཏོ རཱགོ…པེ… ཙིཏྟསྶ སཱརཱགོ, ཨཡཾ ཝུཙྩཏི ཝིབྷཝཏཎྷཱ. ཨཝསེསཱ ཏཎྷཱ ཀཱམཏཎྷཱ. ཏཏྠ ཀཏམཱ ཀཱམཏཎྷཱ? ཀཱམདྷཱཏུཔཊིསཾཡུཏྟོ རཱགོ…པེ… ཙིཏྟསྶ སཱརཱགོ, ཨཡཾ ཝུཙྩཏི ཀཱམཏཎྷཱ. ཏཏྠ ཀཏམཱ བྷཝཏཎྷཱ? རཱུཔདྷཱཏུཨརཱུཔདྷཱཏུཔཊིསཾཡུཏྟོ རཱགོ…པེ… ཏཏྠ ཀཏམཱ ཝིབྷཝཏཎྷཱ? ཨུཙྪེདདིཊྛིསཧགཏོ རཱགོ…པེ… (ཝིབྷ. ༩༡༦).

ཨཊྛཀཐཱཡཾ པན ‘‘པཉྩཀཱམགུཎིཀོ རཱགོ ཀཱམཏཎྷཱ, རཱུཔཱརཱུཔབྷཝེསུ རཱགོ ཛྷཱནནིཀནྟིསསྶཏདིཊྛིསཧགཏོ རཱགོ ¶ བྷཝཝསེན པཏྠནཱ བྷཝཏཎྷཱ, ཨུཙྪེདདིཊྛིསཧགཏོ རཱགོ ཝིབྷཝཏཎྷཱ’’ཏི ཝུཏྟཾ. ཨཡཾ དསུཏྟརསུཏྟཔརིཡཱཡེན ཡོཛནཱ. སངྒཱིཏིཔརིཡཱཡེན པན ཨབྷིདྷམྨཔརིཡཱཡེན ཙ ‘‘ཨཔརཱཔི ཏིསྶོ ¶ ཏཎྷཱ ཀཱམཏཎྷཱ རཱུཔཏཎྷཱ ཨརཱུཔཏཎྷཱ. ཨཔརཱཔི ཏིསྶོ ཏཎྷཱ རཱུཔཏཎྷཱ ཨརཱུཔཏཎྷཱ ནིརོདྷཏཎྷཱ’’ཏི ¶ (དཱི. ནི. ༣.༣༠༥; ཝིབྷ. ༩༡༧-༩༡༨) ཝུཏྟཱ ཏཎྷཱཔི ཨེཏྠ ཡུཛྫནྟི. ཏཱསུ པཉྩ ཀཱམདྷཱཏུརཱུཔདྷཱཏུཨརཱུཔདྷཱཏུཔཊིསཾཡུཏྟཱ, ཨནྟིམཱ ཨུཙྪེདདིཊྛིསཧགཏཱ.

ཙཏྟཱརོ ཨོགྷཱཏི ཀཱམོགྷོ, བྷཝོགྷོ, དིཊྛོགྷོ, ཨཝིཛྫོགྷོ. ཡསྶ སཾཝིཛྫནྟི, ཏཾ ཝཊྚསྨིཾ ཨོཧནནྟི ཨོསཱིདཱཔེནྟཱིཏི ཨོགྷཱ. བལཝཀིལེསཱ ཨེཏེ. ཀཱམགུཎསངྑཱཏེ ཀཱམེ ཨོགྷོ ཀཱམོགྷོ. ཀཱམཏཎྷཱཡེཏཾ ནཱམཾ. རཱུཔཱརཱུཔསངྑཱཏེ ཀམྨཏོ ཙ ཨུཔཔཏྟིཏོ ཙ དུཝིདྷེཔི བྷཝེ ཨོགྷོ བྷཝོགྷོ. བྷཝཏཎྷཱཡེཏཾ ནཱམཾ. དིཊྛི ཨེཝ ཨོགྷོ དིཊྛོགྷོ. ‘‘སསྶཏོ ལོཀོ’’ཏིཨཱདིཀཱཡ དིཊྛིཡཱ ཨེཏཾ ནཱམཾ. ཨཝིཛྫཱ ཨེཝ ཨོགྷོ ཨཝིཛྫོགྷོ, དུཀྑཱདཱིསུ ཨཉྙཱཎསྶེཏཾ ནཱམཾ.

པཉྩ ནཱིཝརཎཱནཱིཏི ཀཱམཙྪནྡནཱིཝརཎཾ བྱཱཔཱདནཱིཝརཎཾ ཐིནམིདྡྷནཱིཝརཎཾ ཨུདྡྷཙྩཀུཀྐུཙྩནཱིཝརཎཾ ཝིཙིཀིཙྪཱནཱིཝརཎཾ. ཙིཏྟཾ ནཱིཝརནྟི པརིཡོནནྡྷནྟཱིཏི ནཱིཝརཎཱནི. ཀཱམཱིཡནྟཱིཏི ཀཱམཱ. པཉྩ ཀཱམགུཎཱ. ཀཱམེསུ ཚནྡོ ཀཱམཙྪནྡོ. ཀཱམཡཏཱིཏི ཝཱ ཀཱམོ, ཀཱམོ ཨེཝ ཚནྡོ, ན ཀཏྟུཀམྱཏཱཚནྡོ ན དྷམྨཙྪནྡོཏི ཀཱམཙྪནྡོ. ཀཱམཏཎྷཱཡེཏཾ ནཱམཾ. བྱཱཔཛྫཏི ཏེན ཙིཏྟཾ པཱུཏིབྷཱཝཾ གཙྪཏི, བྱཱཔཱདཡཏི ཝཱ ཝིནཡཱཙཱརརཱུཔསམྤཏྟིཧིཏསུཁཱནཱིཏི བྱཱཔཱདོ. དོསསྶེཏཾ ནཱམཾ. ཐིནནཏཱ ཐིནཾ, མིདྡྷནཏཱ མིདྡྷཾ, ཨནུསྶཱཧསཾཧནནཏཱ ཨསཏྟིཝིགྷཱཏོ ཙཱཏི ཨཏྠོ. ཙིཏྟསྶ ཨནུསྶཱཧོ ཐིནཾ, ཙེཏསིཀཱནཾ ཨཀམྨཉྙཏཱ མིདྡྷཾ, ཐིནཉྩ མིདྡྷཉྩ ཐིནམིདྡྷཾ. ཨུདྡྷཏསྶ བྷཱཝོ ཨུདྡྷཙྩཾ, ཨཝཱུཔསམོཏི ཨཏྠོ. ཝིཀྑེཔསྶེཏཾ ནཱམཾ. ཀུཙྪིཏཾ ཀཏཾ ཀུཀཏཾ, ཀུཀཏསྶ བྷཱཝོ ཀུཀྐུཙྩཾ, གརཧིཏཀིརིཡབྷཱཝོཏི ཨཏྠོ. པཙྪཱནུཏཱཔསྶེཏཾ ནཱམཾ. ཝིགཏཱ ཙིཀིཙྪཱཏི ཝིཙིཀིཙྪཱ, ཝིགཏཔཉྙཱཏི ཨཏྠོ. སབྷཱཝཾ ཝཱ ཝིཙིནནྟོ ཨེཏཱཡ ཀིཙྪཏི ཀིལམཏཱིཏི ཝིཙིཀིཙྪཱ. བུདྡྷཱདཱིསུ སཾསཡསྶེཏཾ ¶ ནཱམཾ. ཀཱམཙྪནྡོ ཨེཝ ནཱིཝརཎཾ ཀཱམཙྪནྡནཱིཝརཎཾ. ཨེཝཾ སེསེསུཔི.

ཚ དྷམྨཱ, ཚདྡྷམྨཱཏི ཝཱ པཱཋོ. ཚ ཏཎྷཱཀཱཡཱཏི རཱུཔཏཎྷཱ སདྡཏཎྷཱ གནྡྷཏཎྷཱ རསཏཎྷཱ ཕོཊྛབྦཏཎྷཱ དྷམྨཏཎྷཱ. རཱུཔེ ཏཎྷཱ རཱུཔཏཎྷཱ. སཱ ཨེཝ ཀཱམཏཎྷཱདིབྷེདེན ཨནེཀབྷེདཏྟཱ རཱསཊྛེན ཀཱཡོཏི ཝུཏྟཱ. ཨེཝཾ སེསེསུཔི.

སཏྟཱནུསཡཱཏི ¶ ¶ ཀཱམརཱགཱནུསཡོ པཊིགྷཱནུསཡོ མཱནཱནུསཡོ དིཊྛཱནུསཡོ ཝིཙིཀིཙྪཱནུསཡོ བྷཝརཱགཱནུསཡོ ཨཝིཛྫཱནུསཡོ. ཨཔྤཧཱིནཊྛེན ཨནུསེནྟཱིཏི ཨནུསཡཱ. ཀཱམེསུ རཱགོ ཀཱམརཱགོ, ཀཱམོ ཨེཝ ཝཱ རཱགོཏི ཀཱམརཱགོ. ཨཱརམྨཎསྨིཾ པཊིཧཉྙཏཱིཏི པཊིགྷཾ. ཨཡཱཐཱཝདསྶནཊྛེན དིཊྛི. སེཡྻཱདིཝསེན མཉྙཏཱིཏི མཱནོ. བྷཝེསུ རཱགོ བྷཝརཱགོ. ཐཱམགཏོ ཀཱམརཱགོ ཀཱམརཱགཱནུསཡོ. ཨེཝཾ སེསེསུཔི.

ཨཊྛ མིཙྪཏྟཱཏི མིཙྪཱདིཊྛི མིཙྪཱསངྐཔྤོ མིཙྪཱཝཱཙཱ མིཙྪཱཀམྨནྟོ མིཙྪཱཨཱཛཱིཝོ མིཙྪཱཝཱཡཱམོ མིཙྪཱསཏི མིཙྪཱསམཱདྷི. ‘‘ཧིཏསུཁཱཝཧཱ མེ བྷཝིསྶནྟཱི’’ཏི ཨེཝཾ ཨཱསཱིསིཏཱཔི ཏཐཱཨབྷཱཝཏོ ཨསུབྷཱདཱིསུཡེཝ སུབྷནྟིཨཱདིཝིཔརཱིཏཔྤཝཏྟིཏོ ཙ མིཙྪཱསབྷཱཝཱཏི མིཙྪཏྟཱ. མིཙྪཱ པསྶཏི, མིཙྪཱ ཝཱ ཨེཏཱཡ པསྶནྟཱིཏི མིཙྪཱདིཊྛི. ཨཐ ཝཱ ཝིཔརཱིཏཱ དིཊྛཱིཏི མིཙྪཱདིཊྛི, ཨཡཱཐཱཝདིཊྛཱིཏི ཝཱ མིཙྪཱདིཊྛི, ཝིརཛ྄ཛྷིཏྭཱ གཧཎཏོ ཝཱ ཝིཏཐཱ དིཊྛཱིཏི མིཙྪཱདིཊྛི, ཨནཏྟཱཝཧཏྟཱ པཎྜིཏེཧི ཀུཙྪིཏཱ དིཊྛཱིཏི ཝཱམིཙྪཱདིཊྛི. མིཙྪཱསངྐཔྤཱདཱིསུཔི ཨེསེཝ ནཡོ. མིཙྪཱདིཊྛཱིཏི སསྶཏུཙྪེདཱབྷིནིཝེསོ. མིཙྪཱསངྐཔྤོཏི ཀཱམཝིཏཀྐཱདིཏིཝིདྷོ ཝིཏཀྐོ. མིཙྪཱཝཱཙཱཏི མུསཱཝཱདཱདིཙཏུབྦིདྷཱ ཙེཏནཱ. མིཙྪཱཀམྨནྟོཏི པཱཎཱཏིཔཱཏཱདིཏིཝིདྷཱ ཙེཏནཱ. མིཙྪཱཨཱཛཱིཝོཏི མིཙྪཱཛཱིཝཔཡོགསམུཊྛཱཔིཀཱ ཙེཏནཱ. མིཙྪཱཝཱཡཱམོཏི ཨཀུསལཙིཏྟསམྤཡུཏྟཾ ཝཱིརིཡཾ. མིཙྪཱསཏཱིཏི སཏིཔཊིཔཀྑབྷཱུཏོ ཨཀུསལཙིཏྟུཔྤཱདོ. མིཙྪཱསམཱདྷཱིཏི ཨཀུསལསམཱདྷི.

ནཝ ཏཎྷཱམཱུལཀཱཏི (དཱི. ནི. ༢.༡༠༣; ༣.༣༥༩) ཏཎྷཾ པཊིཙྩ པརིཡེསནཱ, པརིཡེསནཾ ¶ པཊིཙྩ ལཱབྷོ, ལཱབྷཾ པཊིཙྩ ཝིནིཙྪཡོ, ཝིནིཙྪཡཾ པཊིཙྩ ཚནྡརཱགོ, ཚནྡརཱགཾ པཊིཙྩ ཨཛ྄ཛྷོསཱནཾ, ཨཛ྄ཛྷོསཱནཾ པཊིཙྩ པརིགྒཧོ, པརིགྒཧཾ པཊིཙྩ མཙྪརིཡཾ, མཙྪརིཡཾ པཊིཙྩ ཨཱརཀྑོ, ཨཱརཀྑཱདྷིཀརཎཾ དཎྜཱདཱནསཏྠཱདཱནཀལཧཝིགྒཧཝིཝཱདཏུཝཾཏུཝཾཔེསུཉྙམུསཱཝཱདཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི (དཱི. ནི. ༢.༡༠༤; ༣.༣༥༩). ཨིམེ ནཝ ཏཎྷཱམཱུལཀཱ དྷམྨཱ. ཏཎྷཱ མཱུལཾ ཨེཏེསནྟི ཏཎྷཱམཱུལཀཱ. པརིཡེསནཱདཡོ ཨཀུསལཱ ཨེཝ. ཏཎྷཾ, པཊིཙྩཱཏི ཏཎྷཾ ནིསྶཱཡ. པརིཡེསནཱཏི རཱུཔཱདིཨཱརམྨཎཔརིཡེསནཱ. སཱ ¶ ཧི ཏཎྷཱཡ སཏི ཧོཏི. ལཱབྷོཏི རཱུཔཱདིཨཱརམྨཎཔཊིལཱབྷོ, སོ ཧི པརིཡེསནཱཡ སཏི ཧོཏི. ཝིནིཙྪཡོ པན ཉཱཎཏཎྷཱདིཊྛིཝིཏཀྐཝསེན ཙཏུབྦིདྷོ. ཏཏྠ ‘‘སུཁཝིནིཙྪཡཾ ཛཉྙཱ, སུཁཝིནིཙྪཡཾ ཉཏྭཱ ཨཛ྄ཛྷཏྟཾ སུཁམནུཡུཉྫེཡྻཱ’’ཏི (མ. ནི. ༣.༣༢༣) ཨཡཾ ཉཱཎཝིནིཙྪཡོ. ‘‘ཝིནིཙྪཡོཏི དྭེ ཝིནིཙྪཡཱ ཏཎྷཱཝིནིཙྪཡོ ཙ དིཊྛིཝིནིཙྪཡོ ཙཱ’’ཏི (མཧཱནི. ༡༠༢) ཨེཝཾ ཨཱགཏཱནི ཨཊྛསཏཏཎྷཱཝིཙརིཏཱནི ཏཎྷཱཝིནིཙྪཡོ ¶ . དྭཱསཊྛི དིཊྛིཡོ དིཊྛིཝིནིཙྪཡོ. ‘‘ཚནྡོ ཁོ, དེཝཱནམིནྡ, ཝིཏཀྐནིདཱནོ’’ཏི (དཱི. ནི. ༢.༣༥༨) ཨིམསྨིཾ པན སུཏྟེ ཨིདྷ ཝིནིཙྪཡོཏི ཝུཏྟོ ཝིཏཀྐོཡེཝ ཨཱགཏོ. ལཱབྷཾ ལབྷིཏྭཱ ཧི ཨིཊྛཱནིཊྛཾ སུནྡརཱསུནྡརཉྩ ཝིཏཀྐེནེཝ ཝིནིཙྪིནཱཏི ‘‘ཨེཏྟཀཾ མེ རཱུཔཱརམྨཎཏྠཱཡ བྷཝིསྶཏི, ཨེཏྟཀཾ སདྡཱདིཨཱརམྨཎཏྠཱཡ, ཨེཏྟཀཾ མཡ྄ཧཾ བྷཝིསྶཏི, ཨེཏྟཀཾ པརསྶ, ཨེཏྟཀཾ པརིབྷུཉྫིསྶཱམི, ཨེཏྟཀཾ ནིདཧིསྶཱམཱི’’ཏི. ཏེན ཝུཏྟཾ – ‘‘ལཱབྷཾ པཊིཙྩ ཝིནིཙྪཡོ’’ཏི. ཚནྡརཱགོཏི ཨེཝཾ ཨཀུསལཝིཏཀྐེན ཝིཏཀྐིཏེ ཝཏྠུསྨིཾ དུབྦལརཱགོ ཙ བལཝརཱགོ ཙ ཨུཔྤཛྫཏི. ཚནྡོཏི ཨེཏྠ དུབྦལརཱགསྶཱདྷིཝཙནཾ, རཱགོཏི བལཝརཱགསྶ. ཨཛ྄ཛྷོསཱནནྟི ཨཧཾ མམཱཏི བལཝསནྣིཊྛཱནཾ. པརིགྒཧོཏི ཏཎྷཱདིཊྛིཝསེན པརིགྒཧཀརཎཾ. མཙྪརིཡནྟི པརེཧི སཱདྷཱརཎབྷཱཝསྶ ཨསཧནཏཱ. ཏེནེཝསྶ པོརཱཎཱ ཨེཝཾ ཝཙནཏྠཾ ཝདནྟི ‘‘ཨིདཾ ཨཙྪརིཡཾ མཡ྄ཧམེཝ ཧོཏུ, མཱ ཨཉྙསྶ ཨཙྪརིཡཾ ཧོཏཱུཏི པཝཏྟཏྟཱ མཙྪརིཡནྟི ཝུཙྩཏཱི’’ཏི. ཨཱརཀྑོཏི དྭཱརཔིདཧནམཉྫཱུསགོཔནཱདིཝསེན སུཊྛུ རཀྑཎཾ. ཨདྷིཀརོཏཱིཏི ཨདྷིཀརཎཾ. ཀཱརཎསྶེཏཾ ¶ ནཱམཾ. ཨཱརཀྑཱདྷིཀརཎནྟི བྷཱཝནཔུཾསཀཾ, ཨཱརཀྑཧེཏཱུཏི ཨཏྠོ. དཎྜཱདཱནཱདཱིསུ པརནིསེདྷནཏྠཾ དཎྜསྶ ཨཱདཱནཾ དཎྜཱདཱནཾ. ཨེཀཏོདྷཱརཱདིནཱ སཏྠསྶ ཨཱདཱནཾ སཏྠཱདཱནཾ. ཀཱཡཀལཧོཔི ཝཱཙཱཀལཧོཔི ཀལཧོ. པུརིམོ པུརིམོ ཝིརོདྷོ ཝིགྒཧོ. པཙྪིམོ པཙྪིམོ ཝིཝཱདོ. ཏུཝཾཏུཝནྟི ཨགཱརཝཝསེན ཏུཝཾཏུཝཾཝཙནཾ.

དས མིཙྪཏྟཱཏི མིཙྪཱདིཊྛི…པེ… མིཙྪཱསམཱདྷི མིཙྪཱཉཱཎཾ མིཙྪཱཝིམུཏྟི. ཏཏྠ མིཙྪཱཉཱཎནྟི པཱཔཀིརིཡཱསུ ཨུཔཱཡཙིནྟཱཝསེན པཱཔཾ ཀཏྭཱ སུཀཏཾ མཡཱཏི པཙྩཝེཀྑཎཱཀཱརེན ཙ ཨུཔྤནྣོ མོཧོ. མིཙྪཱཝིམུཏྟཱིཏི ཨཝིམུཏྟསྶེཝ སཏོ ཝིམུཏྟིསཉྙིཏཱ.

༢༤.

ཨིདཱནི ¶ ཨནེཀབྷེདེན པཧཱནེན པཧཱཏབྦེ དསྶེཏུཾ དྭེ པཧཱནཱནཱིཏིཨཱདི ཨཱརདྡྷཾ. པཧཱནེསུ ཧི ཝིཉྙཱཏེསུ ཏེན ཏེན པཧཱཏབྦཱ དྷམྨཱ སུཝིཉྙེཡྻཱ ཧོནྟི. པཉྩསུ པཧཱནེསུ ལོཀིཀཱནི ཙ དྭེ པཧཱནཱནི ཨཔྤཡོགཾ ནིསྶརཎཔྤཧཱནཉྩ ཋཔེཏྭཱ ཨཔྤཡོགཱནེཝ དྭེ ལོཀུཏྟརཔཧཱནཱནི པཋམཾ ཝུཏྟཱནི. སམྨཱ ཨུཙྪིཛྫནྟི ཨེཏེན ཀིལེསཱཏི སམུཙྪེདོ, པཧཱིཡནྟི ཨེཏེན ཀིལེསཱཏི པཧཱནཾ. སམུཙྪེདསངྑཱཏཾ པཧཱནཾ, ན སེསཔྤཧཱནནྟི སམུཙྪེདཔྤཧཱནཾ. ཀིལེསཱནཾ པཊིཔྤསྶདྡྷཏྟཱ པཊིཔྤསྶདྡྷི, པཧཱིནཏྟཱ པཧཱནཾ, པཊིཔྤསྶདྡྷིསངྑཱཏཾ པཧཱནཾ པཊིཔྤསྶདྡྷིཔྤཧཱནཾ. ལོཀཾ ཨུཏྟརཏཱིཏི ལོཀུཏྟརོ. ནིབྦཱནསངྑཱཏཾ ཁཡཾ གཙྪཏཱིཏི ཁཡགཱམཱི, ཁཡགཱམཱི ཙ སོ མགྒོ ཙཱཏི ཁཡགཱམིམགྒོ, ཏཾ བྷཱཝཡཏོ སོ མགྒོ སམུཙྪེདཔྤཧཱནནྟི ཨཏྠོ. ཏཐཱ ཕལཀྑཎེ ལོཀུཏྟརཕལམེཝ པཊིཔྤསྶདྡྷིཔྤཧཱནཾ.

ཀཱམཱནམེཏཾ ¶ ནིསྶརཎནྟིཨཱདཱིསུ ཀཱམཏོ རཱུཔཏོ སངྑཏཏོ ནིསྶརནྟི ཨེཏེནཱཏི ནིསྶརཎཾ, ཏེཧི ཝཱ ནིསྶཊཏྟཱ ནིསྶརཎཾ. ཨསུབྷཛ྄ཛྷཱནཾ. ཀཱམེཧི ནིཀྑནྟཏྟཱ ནེཀྑམྨཾ. ཨནཱགཱམིམགྒོ ཝཱ. ཨསུབྷཛ྄ཛྷཱནཉྷི ཝིཀྑམྦྷནཏོ ཀཱམཱནཾ ནིསྶརཎཾ, ཏཾ ཛྷཱནཾ པཱདཀཾ ཀཏྭཱ ཨུཔྤཱདིཏཨནཱགཱམིམགྒོ པན སམུཙྪེདཏོ སབྦསོ ཀཱམཱནཾ ཨཙྩནྟནིསྶརཎཾ. རུཔྤཏཱིཏི རཱུཔཾ, ན རཱུཔཾ ཨརཱུཔཾ མིཏྟཔཊིཔཀྑཱ ཨམིཏྟཱ ཝིཡ, ལོབྷཱདིཔཊིཔཀྑཱ ཨལོབྷཱདཡོ ¶ ཝིཡ ཙ རཱུཔཔཊིཔཀྑོཏི ཨཏྠོ. ཕལཝསེན ཝཱ ནཏྠེཏྠ རཱུཔནྟི ཨརཱུཔཾ, ཨརཱུཔམེཝ ཨཱརུཔྤཾ. ཨརཱུཔཛ྄ཛྷཱནཱནི. ཏཱནི རཱུཔཱནཾ ནིསྶརཎཾ ནཱམ. ཨརཱུཔེཧིཔི ཨརཧཏྟམགྒོ པུན ཨུཔྤཏྟིནིཝཱརཎཏོ སབྦསོ རཱུཔཱནཾ ནིསྶརཎཾ ནཱམ. བྷཱུཏནྟི ཛཱཏཾ. སངྑཏནྟི པཙྩཡེཧི སངྒམྨ ཀཏཾ. པཊིཙྩསམུཔྤནྣནྟི ཏེ ཏེ པཙྩཡེ པཊིཙྩ སམྨཱ སཧ ཙ ཨུཔྤནྣཾ. པཋམེན སཉྫཱཏཏྟདཱིཔནེན ཨནིཙྩཏཱ, དུཏིཡེན ཨནིཙྩསྶཱཔི སཏོ པཙྩཡཱནུབྷཱཝདཱིཔནེན པརཱཡཏྟཏཱ, ཏཏིཡེན པརཱཡཏྟསྶཱཔི སཏོ པཙྩཡཱནཾ ཨབྱཱཔཱརཏྟདཱིཔནེན ཨེཝཾདྷམྨཏཱ དཱིཔིཏཱ ཧོཏི. ནིརོདྷོཏི ནིབྦཱནཾ. ནིབྦཱནཉྷི ཨཱགམྨ དུཀྑཾ ནིརུཛ྄ཛྷཏཱིཏི ནིརོདྷོཏི ཝུཙྩཏི. སོ ཨེཝ ཙ སབྦསངྑཏཏོ ནིསྶཊཏྟཱ ཏསྶ སངྑཏསྶ ནིསྶརཎཾ ནཱམ. ཨཊྛཀཐཱཡཾ པན –

‘‘ནིརོདྷོ ¶ ཏསྶ ནིསྶརཎནྟི ཨིདྷ ཨརཧཏྟཕལཾ ནིརོདྷོཏི ཨདྷིཔྤེཏཾ. ཨརཧཏྟཕལེན ཧི ནིབྦཱནེ དིཊྛེ པུན ཨཱཡཏིཾ སབྦསངྑཱརཱ ན ཧོནྟཱིཏི ཨརཧཏྟསངྑཱཏསྶ ནིརོདྷསྶ པཙྩཡཏྟཱ ནིརོདྷོཏི ཝུཏྟ’’ནྟི ཝུཏྟཾ.

ནེཀྑམྨཾ པཊིལདྡྷསྶཱཏིཨཱདཱིསུ ཨསུབྷཛ྄ཛྷཱནསྶ ནིསྶརཎཏྟེ ཝིཀྑམྦྷནཔྤཧཱནེན, ཨནཱགཱམིམགྒསྶ ནིསྶརཎཏྟེ སམུཙྪེདཔྤཧཱནེན ཀཱམཱ པཧཱིནཱ ཙེཝ ཧོནྟི པརིཙྩཏྟཱ ཙ. ཨརཱུཔཛ྄ཛྷཱནཱནཾ ནིསྶརཎཏྟེ ཙ ཨརཧཏྟམགྒསྶ ནིསྶརཎཏྟེ ཙ ཨེཝམེཝ རཱུཔཱ ཡོཛེཏབྦཱ. རཱུཔེསུ ཧི ཚནྡརཱགཔྤཧཱནེན རཱུཔཱནཾ སམུཙྪེདོ ཧོཏི. རཱུཔཱཏི ཙེཏྠ ལིངྒཝིཔལླཱསོ ཀཏོ. ནིབྦཱནསྶ ནིསྶརཎཏྟེ ནིསྶརཎཔྤཧཱནེན, ཨརཧཏྟཕལསྶ ནིསྶརཎཏྟེ པཊིཔྤསྶདྡྷིཔྤཧཱནེན སངྑཱརཱ པཧཱིནཱ ཙེཝ ཧོནྟི པརིཙྩཏྟཱ ཙ. ནིབྦཱནསྶ ཙ ནིསྶརཎཏྟེ ཨཱརམྨཎཀརཎཝསེན པཊིལཱབྷོ ཝེདིཏབྦོ.

དུཀྑསཙྩནྟིཨཱདཱིསུ པརིཉྙཱཔཊིཝེདྷནྟིཨཱདི བྷཱཝནཔུཾསཀཝཙནཾ. པརིཉྙཱཡ པཊིཝེདྷོ པརིཉྙཱཔཊིཝེདྷོ. ཏཾ པརིཉྙཱཔཊིཝེདྷཾ. ཨེས ནཡོ སེསེསུཔི. པཛཧཱཏཱིཏི ཏཐཱ ཏཐཱ པཊིཝིཛ྄ཛྷནྟོ པཧཱཏབྦེ ཀིལེསེ པཛཧཏཱིཏི ཨཏྠོ གཧེཏབྦོ. ལོཀིཡལོཀུཏྟརེསུཔི ཚནྡརཱགཔྤཧཱནེན ཝཱ ཏཱནི པཛཧཏཱིཏི ཨཏྠོ. པཛཧཏཱིཏིཔི པཱཋོ. ཡཐཱ ནཱཝཱ ཨཔུབྦཾ ཨཙརིམཾ ཨེཀཀྑཎེ ¶ ཙཏྟཱརི ཀིཙྩཱནི ཀརོཏི, ཨོརིམཾ ཏཱིརཾ ¶ པཛཧཏི, སོཏཾ ཚིནྡཏི, བྷཎྜཾ ཝཧཏི, པཱརིམཾ ཏཱིརཾ ཨཔྤེཏི, ཨེཝམེཝཾ མགྒཉཱཎཾ ཨཔུབྦཾ ཨཙརིམཾ ཨེཀཀྑཎེ ཙཏྟཱརི སཙྩཱནི ཨབྷིསམེཏི, དུཀྑཾ པརིཉྙཱབྷིསམཡེན ཨབྷིསམེཏི, སམུདཡཾ པཧཱནཱབྷིསམཡེན ཨབྷིསམེཏི, མགྒཾ བྷཱཝནཱབྷིསམཡེན ཨབྷིསམེཏི, ནིརོདྷཾ སཙྪིཀིརིཡཱབྷིསམཡེན ཨབྷིསམེཏི. ཀིཾ ཝུཏྟཾ ཧོཏི? ‘‘ནིརོདྷཾ ཨཱརམྨཎཾ ཀཏྭཱ ཙཏྟཱརི སཙྩཱནི པཱཔུཎཱཏི པསྶཏི པཊིཝིཛ྄ཛྷཏཱི’’ཏི (ཝིསུདྡྷི. ༢.༨༣༩) ཝུཏྟཏྟཱ ཨེཀཀྑཎེཔི ཝིསུཾ ཝིསུཾ ཝིཡ པཧཱནཱནི ཝུཏྟཱནཱིཏི ཝེདིཏབྦཱནི.

པཉྩསུ པཧཱནེསུ ཡཾ སསེཝཱལེ ཨུདཀེ པཀྑིཏྟེན གྷཊེན སེཝཱལསྶ ཝིཡ ཏེན ཏེན ལོཀིཡསམཱདྷིནཱ ནཱིཝརཎཱདཱིནཾ པཙྩནཱིཀདྷམྨཱནཾ ཝིཀྑམྦྷནཾ དཱུརཱིཀརཎཾ, ཨིདཾ ཝིཀྑམྦྷནཔྤཧཱནཾ ནཱམ. ཝིཀྑམྦྷནཔྤཧཱནཉྩ ནཱིཝརཎཱནཾ པཋམཾ ¶ ཛྷཱནཾ བྷཱཝཡཏོཏི ནཱིཝརཎཱནཾཡེཝ པཧཱནཾ པཱཀཊཏྟཱ ཝུཏྟནྟི ཝེདིཏབྦཾ. ནཱིཝརཎཱནི ཧི ཛྷཱནསྶ པུབྦབྷཱགེཔི པཙྪཱབྷཱགེཔི ན སཧསཱ ཙིཏྟཾ ཨཛ྄ཛྷོཏྠརནྟི, ཨཛ྄ཛྷོཏྠཊེསུ ཙ ཏེསུ ཛྷཱནཾ པརིཧཱཡཏི, ཝིཏཀྐཱདཡོ པན དུཏིཡཛ྄ཛྷཱནཱདིཏོ པུབྦེ པཙྪཱ ཙ ཨཔྤཊིཔཀྑཱ ཧུཏྭཱ པཝཏྟནྟི. ཏསྨཱ ནཱིཝརཎཱནཾ ཝིཀྑམྦྷནཾ པཱཀཊཾ. ཡཾ པན རཏྟིབྷཱགེ སམུཛྫལིཏེན པདཱིཔེན ཨནྡྷཀཱརསྶ ཝིཡ ཏེན ཏེན ཝིཔསྶནཱཡ ཨཝཡཝབྷཱུཏེན ཛྷཱནངྒེན པཊིཔཀྑཝསེནེཝ ཏསྶ ཏསྶ ཙ པཧཱཏབྦདྷམྨསྶ པཧཱནཾ, ཨིདཾ ཏདངྒཔྤཧཱནཾ ནཱམ. ཏདངྒཔྤཧཱནཉྩ དིཊྛིགཏཱནཾ ནིབྦེདྷབྷཱགིཡཾ སམཱདྷིཾ བྷཱཝཡཏོཏི དིཊྛིགཏཱནཾཡེཝ པཧཱནཾ ཨོལཱ༹རིཀཝསེན ཝུཏྟནྟི ཝེདིཏབྦཾ. དིཊྛིགཏཉྷི ཨོལཱ༹རིཀཾ, ནིཙྩསཉྙཱདཡོ སུཁུམཱ. ཏཏྠ དིཊྛིགཏཱནནྟི དིཊྛིཡེཝ དིཊྛིགཏཾ ‘‘གཱུཐགཏཾ མུཏྟགཏ’’ནྟིཨཱདཱིནི (ཨ. ནི. ༩.༡༡) ཝིཡ. གནྟབྦཱབྷཱཝཏོ ཙ དིཊྛིཡཱ གཏམཏྟམེཝེཏནྟིཔི དིཊྛིགཏཾ, དྭཱསཊྛིདིཊྛཱིསུ ཨནྟོགདྷཏྟཱ དིཊྛཱིསུ གཏནྟིཔི དིཊྛིགཏཾ. བཧུཝཙནེན ཏེསཾ དིཊྛིགཏཱནཾ. ནིབྦེདྷབྷཱགིཡཾ སམཱདྷིནྟི ཝིཔསྶནཱསམྤཡུཏྟཾ སམཱདྷིཾ. ཡཾ པན ཨསནིཝིཙཀྐཱབྷིཧཏསྶ (ཝིསུདྡྷི. ༢.༨༥༡) རུཀྑསྶ ཝིཡ ཨརིཡམགྒཉཱཎེན ¶ སཾཡོཛནཱནཾ དྷམྨཱནཾ ཡཐཱ ན པུན པཝཏྟཏི, ཨེཝཾ པཧཱནཾ, ཨིདཾ སམུཙྪེདཔྤཧཱནཾ ནཱམ. ནིརོདྷོ ནིབྦཱནནྟི ནིརོདྷསངྑཱཏཾ ནིབྦཱནཾ.

ཨེཝཾ པཧཱནཝསེན པཧཱཏབྦེ དྷམྨེ དསྶེཏྭཱ ཨིདཱནི སརཱུཔེནེཝ པུན པཧཱཏབྦེ དྷམྨེ དསྶེཏུཾ སབྦཾ, བྷིཀྑཝེ, པཧཱཏབྦནྟིཨཱདིམཱཧ. ཏཏྠ ཙཀྑཱདཱིནི ཚནྡརཱགཔྤཧཱནེན པཧཱཏབྦཱནི. རཱུཔཾ པསྶནྟོ པཛཧཱཏཱིཏིཨཱདཱིསུ རཱུཔཾ ཨནིཙྩཱདིཏོ པསྶནྟོ པཧཱཏབྦེ ཀིལེསེ པཛཧཱཏི. ཙཀྑུཾ…པེ… ཛརཱམརཎཾ…པེ… ཨམཏོགདྷཾ ནིབྦཱནནྟི པེཡྻཱལདྭཡེ ཨནཉྙཱཏཉྙསྶཱམཱིཏིནྡྲིཡཾ ¶ ‘‘པསྶནྟོ པཛཧཱཏཱི’’ཏིཨཱདཱིསུ ཏེསུ ལོཀུཏྟརེསུ ཨནཉྙཱཏཉྙསྶཱམཱིཏིནྡྲིཡཾ པསྶནྟོ ཨུདིཀྑནྟོ ཨཔེཀྑམཱནོ ཨིཙྪམཱནོ ཝིཔསྶནཱཀྑཎེསུ པཧཱཏབྦེ ཀིལེསེ པཛཧཱཏཱིཏི ཏཾཏཾདྷམྨཱནུརཱུཔེན ཡོཛེཏབྦཾ.

པཧཱཏབྦནིདྡེསཝཎྞནཱ ནིཊྛིཏཱ.

བྷཱཝེཏབྦནིདྡེསཝཎྞནཱ

༢༥. བྷཱཝེཏབྦནིདྡེསེ ¶ ¶ ཀཱཡགཏཱསཏཱིཏི ཀཱཡགཏཱསཏིསུཏྟནྟེ (མ. ནི. ༣.༡༥༣ ཨཱདཡོ) ཝུཏྟཱ ཨཱནཱཔཱནཙཏུཨིརིཡཱཔཐཁུདྡཀཨིརིཡཱཔཐདྭཏྟིཾསཱཀཱརཙཏུདྷཱཏུནཝསིཝཐིཀཱཔཊིཀཱུལ- ཝཝཏྠཱཔཀམནསིཀཱརསམྤཡུཏྟཱ ཡཐཱནུརཱུཔཾ རཱུཔཛ྄ཛྷཱནསམྤཡུཏྟཱ ཙ སཏི. སཱ ཧི ཏེསུ ཀཱཡེསུ གཏཱ པཝཏྟཱཏི ཀཱཡགཏཱཏི ཝུཙྩཏི. སཱཏསཧགཏཱཏི མདྷུརསུཁཝེདཡིཏསངྑཱཏེན སཱཏེན སཧ ཨེཀུཔྤཱདཱདིབྷཱཝཾ གཏཱ. ཏབྦྷཱཝེ ཝོཀིཎྞེ ཨཱརམྨཎེ ནིསྶཡེ སཾསཊྛེ དིསྶཏི སཧགཏསདྡོ པཉྩསུ ཨཏྠེསུ ཛིནཝཙནེ. ‘‘ཡཱཡཾ ཏཎྷཱ པོནོབྦྷཝིཀཱ ནནྡིརཱགསཧགཏཱ’’ཏི (ཝིབྷ. ༢༠༣) ཨེཏྠ ཏབྦྷཱཝེ, ནནྡིརཱགབྷཱུཏཱཏི ཨཏྠོ. ‘‘ཡཱ, བྷིཀྑཝེ, ཝཱིམཾསཱ ཀོསཛྫསཧགཏཱ ཀོསཛྫསམྤཡུཏྟཱ’’ཏི (སཾ. ནི. ༥.༨༣༢) ཨེཏྠ ཝོཀིཎྞེ, ཨནྟརནྟརཱ ཨུཔྤཛྫམཱནེན ཀོསཛྫེན ཝོཀིཎྞཱཏི ཨཏྠོ. ‘‘ལཱབྷཱི ཧོཏི རཱུཔསཧགཏཱནཾ ཝཱ སམཱཔཏྟཱིནཾ ཨརཱུཔསཧགཏཱནཾ ཝཱ སམཱཔཏྟཱིན’’ནྟི (པུ. པ. ༣-༨) ཨེཏྠ ཨཱརམྨཎེ, རཱུཔཱརཱུཔཱརམྨཎཱནནྟི ཨཏྠོ. ‘‘ཨཊྛིཀསཉྙཱསཧགཏཾ སཏིསམྦོཛ྄ཛྷངྒཾ བྷཱཝེཏཱི’’ཏི (སཾ. ནི. ༥.༢༣༨) ཨེཏྠ ནིསྶཡེ, ཨཊྛིཀསཉྙཱནིསྶཡཾ ཨཊྛིཀསཉྙཾ བྷཱཝེཏྭཱ པཊིལདྡྷནྟི ཨཏྠོ. ‘‘ཨིདཾ སུཁཾ ཨིམཱཡ པཱིཏིཡཱ སཧགཏཾ ཧོཏི སཧཛཱཏཾ སམྤཡུཏྟ’’ནྟི (ཝིབྷ. ༥༧༨) ཨེཏྠ སཾསཊྛེ, སམྨིསྶནྟི ཨཏྠོ. ཨིམསྨིམྤི པདེ སཾསཊྛོ ཨདྷིཔྤེཏོ. སཱཏསཾསཊྛཱ ཧི སཱཏསཧགཏཱཏི ཝུཏྟཱ. སཱ ཧི ཋཔེཏྭཱ ཙཏུཏྠཾ ཛྷཱནཾ སེསེསུ སཱཏསཧགཏཱ ཧོཏི, སཏིཔི ཙ ཨུཔེཀྑཱསཧགཏཏྟེ ཡེབྷུཡྻཝསེན སཱཏསཧགཏཱཏི ཝུཏྟཱ, པུརིམཛ྄ཛྷཱནམཱུལཀཏྟཱ ཝཱ ཙཏུཏྠཛ྄ཛྷཱནསྶ སཱཏསཧགཏཱཡ ཨུཔེཀྑཱསཧགཏཱཔི ཝུཏྟཱཝ ཧོཏི ¶ , ཨུཔེཀྑཱཡ པན སནྟེ སུཁེ ཝུཏྟཏྟཱ བྷགཝཏཱ སཱཏསཧགཏཱཏི ཙཏུཏྠཛ྄ཛྷཱནསམྤཡུཏྟཱཔི ཝུཏྟཱཝ ཧོཏི.

སམཐོ ཙ ཝིཔསྶནཱ ཙཱཏི ཀཱམཙྪནྡཱདཡོ པཙྩནཱིཀདྷམྨེ སམེཏི ཝིནཱསེཏཱིཏི སམཐོ. སམཱདྷིསྶེཏཾ ནཱམཾ. ཨནིཙྩཏཱདིཝསེན ཝིཝིདྷེཧི ཨཱཀཱརེཧི དྷམྨེ པསྶཏཱིཏི ཝིཔསྶནཱ. པཉྙཱཡེཏཾ ནཱམཾ. ཨིམེ པན དྭེ དསུཏྟརཔརིཡཱཡེ པུབྦབྷཱགཱཏི ཝུཏྟཱ, སངྒཱིཏིཔརིཡཱཡེ ཙ ལོཀིཡལོཀུཏྟརམིསྶཀཱཏི. ཏཡོ སམཱདྷཱིཏི སཝིཏཀྐོ སཝིཙཱརོ སམཱདྷི ¶ , ཨཝིཏཀྐོ ཝིཙཱརམཏྟོ ¶ སམཱདྷི, ཨཝིཏཀྐོ ཨཝིཙཱརོ སམཱདྷི. སམྤཡོགཝསེན ཝཏྟམཱནེན སཧ ཝིཏཀྐེན སཝིཏཀྐོ, སཧ ཝིཙཱརེན སཝིཙཱརོ. སོ ཁཎིཀསམཱདྷི, ཝིཔསྶནཱསམཱདྷི, ཨུཔཙཱརསམཱདྷི, པཋམཛ྄ཛྷཱནསམཱདྷི. ནཏྠི ཨེཏསྶ ཝིཏཀྐོཏི ཨཝིཏཀྐོ. ཝིཏཀྐཝིཙཱརེསུ ཝིཙཱརོ མཏྟཱ པརམཱ པམཱཎཾ ཨེཏསྶཱཏི ཝིཙཱརམཏྟོ, ཝིཙཱརཏོ ཨུཏྟརི ཝིཏཀྐེན སམྤཡོགཾ ན གཙྪཏཱིཏི ཨཏྠོ. སོ པཉྩཀནཡེ དུཏིཡཛ྄ཛྷཱནསམཱདྷི, ཏདུབྷཡཝིརཧིཏོ ཨཝིཏཀྐོ ཨཝིཙཱརོ སམཱདྷི. སོ ཙཏུཀྐནཡེ དུཏིཡཛ྄ཛྷཱནཱདི, པཉྩཀནཡེ ཏཏིཡཛ྄ཛྷཱནཱདི རཱུཔཱཝཙརསམཱདྷི. ཨིམེ ཏཡོཔི ལོཀིཡཱ ཨེཝ. སངྒཱིཏིཔརིཡཱཡེ ཨཔརེཔི ཏཡོ སམཱདྷཱི ཝུཏྟཱ – ‘‘སུཉྙཏོ སམཱདྷི, ཨནིམིཏྟོ སམཱདྷི, ཨཔྤཎིཧིཏོ སམཱདྷཱི’’ཏི (དཱི. ནི. ༣.༣༠༥). ན ཏེ ཨིདྷ ཨདྷིཔྤེཏཱ.

ཙཏྟཱརོ སཏིཔཊྛཱནཱཏི ཀཱཡཱནུཔསྶནཱསཏིཔཊྛཱནཾ, ཝེདནཱནུཔསྶནཱསཏིཔཊྛཱནཾ, ཙིཏྟཱནུཔསྶནཱསཏིཔཊྛཱནཾ, དྷམྨཱནུཔསྶནཱསཏིཔཊྛཱནཾ. པུབྦབྷཱགེ ཙུདྡསཝིདྷེན ཀཱཡཾ པརིགྒཎྷཏོ ཀཱཡཱནུཔསྶནཱསཏིཔཊྛཱནཾ, ནཝཝིདྷེན ཝེདནཾ པརིགྒཎྷཏོ ཝེདནཱནུཔསྶནཱསཏིཔཊྛཱནཾ, སོལ༹སཝིདྷེན ཙིཏྟཾ པརིགྒཎྷཏོ ཙིཏྟཱནུཔསྶནཱསཏིཔཊྛཱནཾ, པཉྩཝིདྷེན དྷམྨེ པརིགྒཎྷཏོ དྷམྨཱནུཔསྶནཱསཏིཔཊྛཱནཾ ཝེདིཏབྦཾ. ལོཀུཏྟརཾ པན ཨིདྷ ན ཨདྷིཔྤེཏཾ. པཉྩངྒིཀོ སམཱདྷཱིཏི པཉྩ ཨངྒཱནི ཨསྶ སནྟཱིཏི པཉྩངྒིཀོ, ཙཏུཏྠཛ྄ཛྷཱནསམཱདྷི. པཱིཏིཕརཎཏཱ, སུཁཕརཎཏཱ, ཙེཏོཕརཎཏཱ, ཨཱལོཀཕརཎཏཱ, པཙྩཝེཀྑཎནིམིཏྟནྟི ¶ པཉྩ ཨངྒཱནི. པཱིཏིཾ ཕརམཱནཱ ཨུཔྤཛྫཏཱིཏི དྭཱིསུ ཛྷཱནེསུ པཉྙཱ པཱིཏིཕརཎཏཱ ནཱམ. སུཁཾ ཕརམཱནཱ ཨུཔྤཛྫཏཱིཏི ཏཱིསུ ཛྷཱནེསུ པཉྙཱ སུཁཕརཎཏཱ ནཱམ. པརེསཾ ཙེཏོ ཕརམཱནཱ ཨུཔྤཛྫཏཱིཏི ཙེཏོཔརིཡཔཉྙཱ ཙེཏོཕརཎཏཱ ནཱམ. ཨཱལོཀཾ ཕརམཱནཱ ཨུཔྤཛྫཏཱིཏི དིབྦཙཀྑུཔཉྙཱ ཨཱལོཀཕརཎཏཱ ནཱམ. པཙྩཝེཀྑཎཉཱཎཾ པཙྩཝེཀྑཎནིམིཏྟཾ ནཱམ. ཝུཏྟམྤི ཙེཏཾ –

‘‘དྭཱིསུ ཛྷཱནེསུ པཉྙཱ པཱིཏིཕརཎཏཱ, ཏཱིསུ ཛྷཱནེསུ པཉྙཱ སུཁཕརཎཏཱ, པརཙིཏྟཔཉྙཱ ཙེཏོཕརཎཏཱ, དིབྦཙཀྑུཔཉྙཱ ཨཱལོཀཕརཎཏཱ, ཏམྷཱ ཏམྷཱ སམཱདྷིམྷཱ ཝུཊྛིཏསྶ པཙྩཝེཀྑཎཉཱཎཾ པཙྩཝེཀྑཎནིམིཏྟ’’ནྟི (ཝིབྷ. ༨༠༤).

ཏཉྷི ¶ ཝུཊྛིཏསམཱདྷིསྶ པཝཏྟཱཀཱརགཧཎཏོ ནིམིཏྟནྟི ཝུཏྟཾ. ཏཏྠ ཙ པཱིཏིཕརཎཏཱ སུཁཕརཎཏཱ དྭེ པཱདཱ ཝིཡ, ཙེཏོཕརཎཏཱ ཨཱལོཀཕརཎཏཱ དྭེ ཧཏྠཱ ཝིཡ, ཨབྷིཉྙཱཔཱདཀཾ ཙཏུཏྠཛ྄ཛྷཱནཾ མཛ྄ཛྷིམཀཱཡོ ཝིཡ, པཙྩཝེཀྑཎནིམིཏྟཾ སཱིསཾ ཝིཡ. ཨིཏི ཨཱཡསྨཱ དྷམྨསེནཱཔཏི ¶ སཱརིཔུཏྟཏྠེརོ པཉྩངྒིཀཾ སམྨཱསམཱདྷིཾ ཨངྒཔཙྩངྒསམྤནྣཾ པུརིསཾ ཝིཡ ཀཏྭཱ དསྶེསི.

ཚ ཨནུསྶཏིཊྛཱནཱནཱིཏི པུནཔྤུནཾ ཨུཔྤཛྫནཏོ སཏིཡོ ཨེཝ ཨནུསྶཏིཡོ, པཝཏྟིཏབྦཊྛཱནསྨིཾཡེཝ པཝཏྟཏྟཱ སདྡྷཱཔབྦཛིཏསྶ ཀུལཔུཏྟསྶ ཨནུརཱུཔཱ སཏིཡོཏིཔི ཨནུསྶཏིཡོ, ཨནུསྶཏིཡོ ཨེཝ པཱིཏིཨཱདཱིནཾ ཋཱནཏྟཱ ཨནུསྶཏིཊྛཱནཱནི. ཀཏམཱནི ཚ? བུདྡྷཱནུསྶཏི དྷམྨཱནུསྶཏི སངྒྷཱནུསྶཏི སཱིལཱནུསྶཏི ཙཱགཱནུསྶཏི དེཝཏཱནུསྶཏི (དཱི. ནི. ༣.༣༢༧). བོཛ྄ཛྷངྒཱཏི བོདྷིཡཱ, བོདྷིསྶ ཝཱ ཨངྒཱ. ཨིདཾ ཝུཏྟཾ ཧོཏི – ཡཱ ཨེསཱ དྷམྨསཱམགྒཱི ཡཱཡ ལོཀུཏྟརམགྒཀྑཎེ ཨུཔྤཛྫམཱནཱཡ ལཱིནུདྡྷཙྩཔཏིཊྛཱནཱཡཱུཧནཀཱམསུཁཏྟཀིལམཐཱནུཡོགཨུཙྪེདསསྶཏཱབྷིནིཝེསཱདཱིནཾ ཨནེཀེསཾ ཨུཔདྡཝཱནཾ པཊིཔཀྑབྷཱུཏཱཡ སཏིདྷམྨཝིཙཡཝཱིརིཡཔཱིཏིཔསྶདྡྷིསམཱདྷིཨུཔེཀྑཱསངྑཱཏཱཡ དྷམྨསཱམགྒིཡཱ ཨརིཡསཱཝཀོ བུཛ྄ཛྷཏཱིཏི ཀཏྭཱ བོདྷཱིཏི ཝུཙྩཏི. བུཛ྄ཛྷཏཱིཏི ཀིལེསསནྟཱནནིདྡཱཡ ཝུཊྛཧཏི, ཙཏྟཱརི ཝཱ ཨརིཡསཙྩཱནི པཊིཝིཛ྄ཛྷཏི, ནིབྦཱནམེཝ ཝཱ སཙྪིཀརོཏི, ཏསྶཱ དྷམྨསཱམགྒིསངྑཱཏཱཡ བོདྷིཡཱ ཨངྒཱཏིཔི བོཛ྄ཛྷངྒཱ ཛྷཱནངྒམགྒངྒཱདཡོ ¶ ཝིཡ. ཡོ པནེས ཡཐཱཝུཏྟཔྤཀཱརཱཡ ཨེཏཱཡ དྷམྨསཱམགྒིཡཱ བུཛ྄ཛྷཏཱིཏི ཀཏྭཱ ཨརིཡསཱཝཀོ བོདྷཱིཏི ཝུཙྩཏི, ཏསྶ བོདྷིསྶ ཨངྒཱཏིཔི བོཛ྄ཛྷངྒཱ སེནངྒརཐངྒཱདཡོ ཝིཡ. ཏེནཱཧུ ཨཊྛཀཐཱཙརིཡཱ ‘‘བུཛ྄ཛྷནཀསྶ པུགྒལསྶ ཨངྒཱཏི ཝཱ བོཛ྄ཛྷངྒཱ’’ཏི. ཨཔིཙ ‘‘བོཛ྄ཛྷངྒཱཏི ཀེནཊྛེན བོཛ྄ཛྷངྒཱ, བོདྷཱཡ སཾཝཏྟནྟཱིཏི བོཛ྄ཛྷངྒཱ’’ཏིཨཱདིནཱ (པཊི. མ. ༢.༡༧) ནཡེན བོཛ྄ཛྷངྒཊྛོ ཝེདིཏབྦོ. ཨརིཡོ ཨཊྛངྒིཀོ མགྒོཏི ཏཾཏཾམགྒཝཛ྄ཛྷཀིལེསེཧི ཨཱརཀཏྟཱ ཨརིཡབྷཱཝཀརཏྟཱ ཨརིཡཕལཔཊིལཱབྷཀརཏྟཱ ཙ ཨརིཡོ. ཨཊྛ ཨངྒཱནི ཨསྶཱཏི ཨཊྛངྒིཀོ. སོཡཾ ཙཏུརངྒིཀཱ ཝིཡ སེནཱ, པཉྩངྒིཀཾ ཝིཡ ཙ ཏཱུརིཡཾ ཨངྒམཏྟམེཝ ཧོཏི, ཨངྒཝིནིམུཏྟོ ནཏྠི. བོཛ྄ཛྷངྒམགྒངྒཱ ལོཀུཏྟརཱ, དསུཏྟརཔརིཡཱཡེན པུབྦབྷཱགཱཔི ལབྦྷནྟི.

ནཝ ¶ པཱརིསུདྡྷིཔདྷཱནིཡངྒཱནཱིཏི སཱིལཝིསུདྡྷི པཱརིསུདྡྷིཔདྷཱནིཡངྒཾ, ཙིཏྟཝིསུདྡྷི པཱརིསུདྡྷིཔདྷཱནིཡངྒཾ, དིཊྛིཝིསུདྡྷི པཱརིསུདྡྷིཔདྷཱནིཡངྒཾ, ཀངྑཱཝིཏརཎཝིསུདྡྷི པཱརིསུདྡྷིཔདྷཱནིཡངྒཾ, མགྒཱམགྒཉཱཎདསྶནཝིསུདྡྷི པཱརིསུདྡྷིཔདྷཱནིཡངྒཾ, པཊིཔདཱཉཱཎདསྶནཝིསུདྡྷི པཱརིསུདྡྷིཔདྷཱནིཡངྒཾ, ཉཱཎདསྶནཝིསུདྡྷི པཱརིསུདྡྷིཔདྷཱནིཡངྒཾ, པཉྙཱ པཱརིསུདྡྷིཔདྷཱནིཡངྒཾ, ཝིམུཏྟི པཱརིསུདྡྷིཔདྷཱནིཡངྒཾ (དཱི. ནི. ༣.༣༥༩). སཱིལཝིསུདྡྷཱིཏི ཝིསུདྡྷིཾ པཱཔེཏུཾ སམཏྠཾ ཙཏུཔཱརིསུདྡྷིསཱིལཾ. ཏཉྷི དུསྶཱིལྱམལཾ ཝིསོདྷེཏི. པཱརིསུདྡྷིཔདྷཱནིཡངྒནྟི པརིསུདྡྷབྷཱཝསྶ པདྷཱནཾ ཨུཏྟམཾ ཨངྒཾ. ཙིཏྟཝིསུདྡྷཱིཏི ཝིཔསྶནཱཡ པདཊྛཱནབྷཱུཏཱ པགུཎཱ ¶ ཨཊྛ སམཱཔཏྟིཡོ. ཏཱ ཧི ཀཱམཙྪནྡཱདིཙིཏྟམལཾ ཝིསོདྷེནྟི. དིཊྛིཝིསུདྡྷཱིཏི སཔྤཙྩཡནཱམརཱུཔདསྶནཾ. ཏཉྷི སཏྟདིཊྛིམལཾ ཝིསོདྷེཏི. ཀངྑཱཝིཏརཎཝིསུདྡྷཱིཏི པཙྩཡཱཀཱརཉཱཎཾ. ཏེན ཧི ཏཱིསུ ཨདྡྷཱསུ པཙྩཡཝསེན དྷམྨཱ པཝཏྟནྟཱིཏི པསྶནྟོ ཏཱིསུཔི ཨདྡྷཱསུ སཏྟཀངྑཱམལཾ ཝིཏརནྟོ ཝིསུཛ྄ཛྷཏི. མགྒཱམགྒཉཱཎདསྶནཝིསུདྡྷཱིཏི ཨུདཡབྦཡཱནུཔསྶནཀྑཎེ ཨུཔྤནྣཱ ཨོབྷཱསཉཱཎཔཱིཏིཔསྶདྡྷིསུཁཨདྷིམོཀྑཔགྒཧཨུཔཊྛཱནཨུཔེཀྑཱནིཀནྟཱིཏི ¶ དས ཝིཔསྶནུཔཀྐིལེསཱ, ན མགྒོ, ཝཱིཐིཔཊིཔནྣཾ ཨུདཡབྦཡཉཱཎཾ མགྒོཏི ཨེཝཾ མགྒཱམགྒེ ཉཱཎཾ ནཱམ. ཏེན ཧི ཨམགྒམལཾ ཝིསོདྷེཏི. པཊིཔདཱཉཱཎདསྶནཝིསུདྡྷཱིཏི ཝཱིཐིཔཊིཔནྣཾ ཨུདཡབྦཡཱནུཔསྶནཱཉཱཎཾ བྷངྒཱནུཔསྶནཱཉཱཎཾ བྷཡཏུཔཊྛཱནཱནུཔསྶནཱཉཱཎཾ ཨཱདཱིནཝཱནུཔསྶནཱཉཱཎཾ ནིབྦིདཱནུཔསྶནཱཉཱཎཾ མུཉྩིཏུཀམྱཏཱཉཱཎཾ པཊིསངྑཱནུཔསྶནཱཉཱཎཾ སངྑཱརུཔེཀྑཱཉཱཎཾ ཨནུལོམཉཱཎནྟི ཨིམཱནི ནཝ ཝིཔསྶནཱཉཱཎཱནི. ཏཱནི ཧི ནིཙྩསཉྙཱདིམལཾ ཝིསོདྷེནྟི. ཉཱཎདསྶནཝིསུདྡྷཱིཏི ཙཏུཨརིཡམགྒཔཉྙཱ. སཱ ཧི སམུཙྪེདཏོ སཀསཀམགྒཝཛ྄ཛྷཀིལེསམལཾ ཝིསོདྷེཏི. པཉྙཱཏི ཨརཧཏྟཕལཔཉྙཱ. ཝིམུཏྟཱིཏི ཨརཧཏྟཕལཝིམུཏྟི.

དས ཀསིཎཱཡཏནཱནཱིཏི ‘‘པཐཝཱིཀསིཎམེཀོ སཉྫཱནཱཏི ཨུདྡྷཾ ཨདྷོ ཏིརིཡཾ ཨདྭཡཾ ཨཔྤམཱཎཾ, ཨཱཔོཀསིཎམེཀོ སཉྫཱནཱཏི…པེ… ཏེཛོཀསིཎམེཀོ སཉྫཱནཱཏི…པེ… ཝཱཡོཀསིཎམེཀོ སཉྫཱནཱཏི…པེ… ནཱིལཀསིཎམེཀོ སཉྫཱནཱཏི…པེ… པཱིཏཀསིཎམེཀོ སཉྫཱནཱཏི…པེ… ལོཧིཏཀསིཎམེཀོ སཉྫཱནཱཏི…པེ… ཨོདཱཏཀསིཎམེཀོ སཉྫཱནཱཏི…པེ… ཨཱཀཱསཀསིཎམེཀོ སཉྫཱནཱཏི…པེ… ཝིཉྙཱཎཀསིཎམེཀོ སཉྫཱནཱཏི ཨུདྡྷཾ ཨདྷོ ཏིརིཡཾ ཨདྭཡཾ ཨཔྤམཱཎ’’ནྟི (ཨ. ནི. ༡༠.༢༥; དཱི. ནི. ༣.༣༦༠) ཨེཝཾ ཝུཏྟཱནི དས. ཨེཏཱནི ¶ ཧི སཀལཕརཎཊྛེན ཀསིཎཱནི, ཏདཱརམྨཎཱནཾ དྷམྨཱནཾ ཁེཏྟཊྛེན ཨདྷིཊྛཱནཊྛེན ཝཱ ཨཱཡཏནཱནི. ཨུདྡྷནྟི ཨུཔརིགགནཏལཱབྷིམུཁཾ. ཨདྷོཏི ཧེཊྛཱབྷཱུམིཏལཱབྷིམུཁཾ. ཏིརིཡནྟི ཁེཏྟམཎྜལམིཝ སམནྟཱ པརིཙྪིནྣཾ. ཨེཀཙྩོ ཧི ཨུདྡྷམེཝ ཀསིཎཾ ཝཌྜྷེཏི ཨེཀཙྩོ ཨདྷོ, ཨེཀཙྩོ སམནྟཏོ. ཨེཀོཔི ཏེན ཏེན ཝཱ ཀཱརཎེན ཨེཝཾ པསཱརེཏི ཨཱལོཀམིཝ རཱུཔདསྶནཀཱམོ. ཏེན ཝུཏྟཾ – ‘‘པཐཝཱིཀསིཎམེཀོ སཉྫཱནཱཏི ཨུདྡྷཾ ཨདྷོ ཏིརིཡ’’ནྟི (ཨ. ནི. ༡༠.༢༥; དཱི. ནི. ༣.༣༦༠). ཨདྭཡནྟི ཨིདཾ པན ཨེཀསྶ ཨཉྙབྷཱཝཱནུཔགམནཏྠཾ ཝུཏྟཾ. ཡཐཱ ཧི ཨུདཀཾ པཝིཊྛསྶ སབྦདིསཱསུ ཨུདཀམེཝ ཧོཏི ན ཨཉྙཾ, ཨེཝམེཝ པཐཝཱིཀསིཎཾ པཐཝཱིཀསིཎམེཝ ཧོཏི, ནཏྠི ཏསྶ ཨཉྙཀསིཎསམྦྷེདོཏི. ཨེས ནཡོ སབྦཏྠ. ཨཔྤམཱཎནྟི ཨིདཾ ཏསྶ ཏསྶ ཕརཎཨཔྤམཱཎཝསེན ¶ ཝུཏྟཾ. ཏཉྷི མནསཱ ཕརནྟོ སཀལམེཝ ཕརཏི, ན ‘‘ཨཡམསྶ ཨཱདི ཨིདཾ མཛ྄ཛྷ’’ནྟི པམཱཎཾ གཎྷཱཏཱིཏི. ཨཱཀཱསཀསིཎནྟི ཀསིཎུགྒྷཱཊིམཱཀཱསོ པརིཙྪེདཱཀཱསཀསིཎཉྩ. ཝིཉྙཱཎཀསིཎནྟི ཀསིཎུགྒྷཱཊིམཱཀཱསེ ¶ པཝཏྟཝིཉྙཱཎཾ. ཏཏྠ ཀསིཎཝསེན ཀསིཎུགྒྷཱཊིམཱཀཱསེ, ཀསིཎུགྒྷཱཊིམཱཀཱསཝསེན ཏཏྠ པཝཏྟཝིཉྙཱཎེ ཨུདྡྷཾཨདྷོཏིརིཡཏཱ ཝེདིཏབྦཱ, པརིཙྪེདཱཀཱསཀསིཎསྶཔི ཝཌྜྷནཱིཡཏྟཱ ཏསྶ ཝསེནཔཱིཏི.

༢༦. ཨིདཱནི བྷཱཝནཱཔབྷེདཾ དསྶེནྟོ དྭེ བྷཱཝནཱཏིཨཱདིམཱཧ. ཏཏྠ ལོཀིཡཱཏིཨཱདཱིསུ ལོཀོ ཝུཙྩཏི ལུཛྫནཔལུཛྫནཊྛེན ཝཊྚཾ, ཏསྨིཾ པརིཡཱཔནྣབྷཱཝེན ལོཀེ ནིཡུཏྟཱཏི ལོཀིཡཱ, ལོཀིཡཱནཾ དྷམྨཱནཾ བྷཱཝནཱ ལོཀིཡཱ. ཀིཉྩཱཔི དྷམྨཱནཾ བྷཱཝནཱཏི ཝོཧཱརཝསེན ཝུཙྩཏི, ཏེཧི པན ཝིསུཾ བྷཱཝནཱ ནཏྠི. ཏེ ཨེཝ ཧི དྷམྨཱ བྷཱཝིཡམཱནཱ བྷཱཝནཱཏི ཝུཙྩནྟི. ཨུཏྟིཎྞཱཏི ཨུཏྟརཱ, ལོཀེ ཨཔརིཡཱཔནྣབྷཱཝེན ལོཀཏོ ཨུཏྟརཱཏི ལོཀུཏྟརཱ.

རཱུཔབྷཝསངྑཱཏེ རཱུཔེ ཨཝཙརནྟཱིཏི རཱུཔཱཝཙརཱ. ཀུསལསདྡོ པནེཏྠ ཨཱརོགྱཨནཝཛྫཚེཀསུཁཝིཔཱཀེསུ དིསྶཏི. ‘‘ཀཙྩི ནུ བྷོཏོ ཀུསལཾ? ཀཙྩི བྷོཏོ ཨནཱམཡ’’ནྟིཨཱདཱིསུ (ཛཱ. ༡.༡༥.༡༤༦; ༢.༢༠.༡༢༩) ཨཱརོགྱེ. ‘‘ཀཏམོ པན, བྷནྟེ, ཀཱཡསམཱཙཱརོ ཀུསལོ? ཡོ ཁོ, མཧཱརཱཛ, ཀཱཡསམཱཙཱརོ ཨནཝཛྫོ’’ཏི (མ. ནི. ༢.༣༦༡) ཙ ‘‘པུན ཙཔརཾ, བྷནྟེ, ཨེཏདཱནུཏྟརིཡཾ, ཡཐཱ བྷགཝཱ དྷམྨཾ དེསེཏི ཀུསལེསུ དྷམྨེསཱུ’’ཏི (དཱི. ནི. ༣.༡༤༥) ཙ ཨེཝམཱདཱིསུ ཨནཝཛྫེ. ‘‘ཏཾ ¶ ཀིཾ མཉྙསི, རཱཛཀུམཱར, ཀུསལོ ཏྭཾ རཐསྶ ཨངྒཔཙྩངྒཱན’’ནྟི? (མ. ནི. ༢.༨༧) ‘‘ཀུསལཱ ནཙྩགཱིཏསྶ སིཀྑིཏཱ ཙཱཏུརིཏྠིཡོ’’ཏི (ཛཱ. ༢.༢༢.༩༤) ཙ ཨཱདཱིསུ ཚེཀེ. ‘‘ཀུསལཱནཾ དྷམྨཱནཾ སམཱདཱནཧེཏུ ཨེཝམིདཾ པུཉྙཾ པཝཌྜྷཏཱི’’ཏི (དཱི. ནི. ༣.༨༠) ‘‘ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ’’ཏི (དྷ. ས. ༤༣༡) ཙ ཨཱདཱིསུ སུཁཝིཔཱཀེ. སྭཱཡམིདྷ ཨཱརོགྱེཔི ཨནཝཛྫེཔི སུཁཝིཔཱཀེཔི ཝཊྚཏི. ཝཙནཏྠོ པནེཏྠ ཀུཙྪིཏེ པཱཔཀེ དྷམྨེ སལཡནྟི ཙལཡནྟི ཀམྤེནྟི ཝིདྡྷཾསེནྟཱིཏི ཀུསལཱ, ཀུཙྪིཏེན ཝཱ ཨཱཀཱརེན སཡནྟི ¶ པཝཏྟནྟཱིཏི ཀུསཱ, ཏེ ཨཀུསལསངྑཱཏེ ཀུསེ ལུནནྟི ཚིནྡནྟཱིཏི ཀུསལཱ, ཀུཙྪིཏཱནཾ ཝཱ སཱནཏོ ཏནུཀརཎཏོ ཀུསཾ, ཉཱཎཾ. ཏེན ཀུསེན ལཱཏབྦཱ གཧེཏབྦཱ པཝཏྟེཏབྦཱཏི ཀུསལཱ, ཡཐཱ ཝཱ ཀུསཱ ཨུབྷཡབྷཱགགཏཾ ཧཏྠཔྤདེསཾ ལུནནྟི, ཨེཝམིམེཔི ཨུཔྤནྣཱནུཔྤནྣབྷཱཝེན ཨུབྷཡབྷཱགགཏཾ སཾཀིལེསཔཀྑཾ ལུནནྟི, ཏསྨཱ ཀུསཱ ཝིཡ ལུནནྟཱིཏི ཀུསལཱ. ཏེསཾ རཱུཔཱཝཙརཀུསལཱནཾ བྷཱཝནཱ. ཨརཱུཔབྷཝསངྑཱཏེ ཨརཱུཔེ ཨཝཙརནྟཱིཏི ཨརཱུཔཱཝཙརཱ. ཏེབྷཱུམཀཝཊྚེ པརིཡཱཔནྣཱ ཨནྟོགདྷཱཏི པརིཡཱཔནྣཱ, ཏསྨིཾ ན པརིཡཱཔནྣཱཏི ཨཔརིཡཱཔནྣཱ, ལོཀུཏྟརཱ.

ཀཱམཱཝཙརཀུསལཱནཾ ¶ དྷམྨཱནཾ བྷཱཝནཱ ཀསྨཱ ན ཝུཏྟཱཏི ཙེ? ཨཔྤནཱཔྤཏྟཱཡ ཨེཝ བྷཱཝནཱཡ ཨབྷིདྷམྨེ བྷཱཝནཱཏི ཨདྷིཔྤེཏཏྟཱ. ཝུཏྟཉྷི ཏཏྠ –

‘‘ཡོགཝིཧིཏེསུ ཝཱ ཀམྨཱཡཏནེསུ ཡོགཝིཧིཏེསུ ཝཱ སིཔྤཱཡཏནེསུ ཡོགཝིཧིཏེསུ ཝཱ ཝིཛྫཱཊྛཱནེསུ ཀམྨསྶཀཏཾ ཝཱ སཙྩཱནུལོམིཀཾ ཝཱ རཱུཔཾ ཨནིཙྩནྟི ཝཱ, ཝེདནཱ ཨནིཙྩཱཏི ཝཱ, སཉྙཱ ཨནིཙྩཱཏི ཝཱ, སངྑཱརཱ ཨནིཙྩཱཏི ཝཱ, ཝིཉྙཱཎཾ ཨནིཙྩནྟི ཝཱ ཡཾ ཨེཝརཱུཔཾ ཨནུལོམིཀཾ ཁནྟིཾ དིཊྛིཾ རུཙིཾ མུདིཾ པེཀྑཾ དྷམྨནིཛ྄ཛྷཱནཀྑནྟིཾ པརཏོ ཨསུཏྭཱ པཊིལབྷཏི, ཨཡཾ ཝུཙྩཏི ཙིནྟཱམཡཱ པཉྙཱ. ཡོགཝིཧིཏེསུ ཝཱ ཀམྨཱཡཏནེསུ…པེ… དྷམྨནིཛ྄ཛྷཱནཀྑནྟིཾ པརཏོ སུཏྭཱ པཊིལབྷཏི, ཨཡཾ ཝུཙྩཏི སུཏམཡཱ པཉྙཱ. སབྦཱཔི སམཱཔནྣསྶ པཉྙཱ བྷཱཝནཱམཡཱ པཉྙཱ’’ཏི (ཝིབྷ. ༧༦༨).

སཱ ¶ པན ཀཱམཱཝཙརབྷཱཝནཱ ཨཱཝཛྫནབྷཝངྒཔཱཏེཧི ཨནྟརིཏཏྟཱ བྷཱཝནཱཏི ན ཝུཏྟཱཏི ཝེདིཏབྦཱ. སབྦེསཾ པན པུཉྙཱནཾ ཏིཝིདྷཔུཉྙཀིརིཡཝཏྠཱུནཾ ཨནྟོགདྷཏྟཱ ཨུཔཙཱརསམཱདྷིཝིཔསྶནཱསམཱདྷཱིནཾ བྷཱཝནཱམཡཔུཉྙཏཱ སིདྡྷཱ. ཨིདྷ པན ལོཀིཡབྷཱཝནཱཡ ཨེཝ སངྒཧིཏཱ. རཱུཔཱརཱུཔཱཝཙརཱནཾ ཏིཝིདྷབྷཱཝེ ཧཱིནཱཏི ལཱམཀཱ. ཧཱིནུཏྟམཱནཾ མཛ྄ཛྷེ བྷཝཱ མཛ྄ཛྷཱ, མཛ྄ཛྷིམཱཏིཔི པཱཋོ. པདྷཱནབྷཱཝཾ ནཱིཏཱཏི པཎཱིཏཱ, ཨུཏྟམཱཏི ཨཏྠོ. ཨཱཡཱུཧནཝསེན ཨཡཾ ཧཱིནམཛ྄ཛྷིམཔཎཱིཏཏཱ ཝེདིཏབྦཱ. ཡསྶཱ ཧི ཨཱཡཱུཧནཀྑཎེ ¶ ཚནྡོ ཝཱ ཧཱིནོ ཧོཏི ཝཱིརིཡཾ ཝཱ ཙིཏྟཾ ཝཱ ཝཱིམཾསཱ ཝཱ, སཱ ཧཱིནཱ ནཱམ. ཡསྶཱ ཏེ དྷམྨཱ མཛ྄ཛྷིམཱ, སཱ མཛ྄ཛྷིམཱ ནཱམ. ཡསྶཱ ཏེ དྷམྨཱ པཎཱིཏཱ, སཱ པཎཱིཏཱ ནཱམ. མུདུཀེཧི ཝཱ ཨིནྡྲིཡེཧི སམྤཡུཏྟཱ ཧཱིནཱ ནཱམ, མཛ྄ཛྷིམེཧི ཨིནྡྲིཡེཧི སམྤཡུཏྟཱ མཛ྄ཛྷིམཱ, ཨདྷིམཏྟེཧི ཨིནྡྲིཡེཧི སམྤཡུཏྟཱ པཎཱིཏཱ ནཱམ. ཨཔརིཡཱཔནྣཱཡ ཧཱིནམཛ྄ཛྷིམཏྟཱབྷཱཝཱ པཎཱིཏཏཱ ཨེཝ ཝུཏྟཱ. སཱ ཧི ཨུཏྟམཊྛེན ཨཏཔྤཀཊྛེན ཙ པཎཱིཏཱ.

༢༧. པཋམབྷཱཝནཱཙཏུཀྐེ བྷཱཝེཏཱིཏི ཨེཀསྨིཾཡེཝ ཁཎེ ཏཐཱ ཏཐཱ པཊིཝིཛ྄ཛྷནྟོ ཨརིཡམགྒཾ བྷཱཝེཏི. དུཏིཡབྷཱཝནཱཙཏུཀྐེ ཨེསནཱབྷཱཝནཱཏི ཨཔྤནཱཔུབྦབྷཱགེ བྷཱཝནཱ. སཱ ཧི ཨཔྤནཾ ཨེསནྟི ཨེཏཱཡཱཏི ཨེསནཱཏི ཝུཏྟཱ. པཊིལཱབྷབྷཱཝནཱཏི ཨཔྤནཱབྷཱཝནཱ. སཱ ཧི ཏཱཡ ཨེསནཱཡ པཊིལབྦྷཏཱིཏི པཊིལཱབྷོཏི ཝུཏྟཱ. ཨེཀརསཱབྷཱཝནཱཏི པཊིལཱབྷེ ཝསཱིབྷཱཝཾ པཏྟུཀཱམསྶ པཡོགཀཱལེ བྷཱཝནཱ. སཱ ཧི ཏེན ཏེན པཧཱནེན ཏེཧི ཏེཧི ཀིལེསེཧི ཝིམུཏྟཏྟཱ ཝིམུཏྟིརསེན ཨེཀརསཱཏི ཀཏྭཱ ཨེཀརསཱཏི ཝུཏྟཱ. ཨཱསེཝནཱབྷཱཝནཱཏི པཊིལཱབྷེ ཝསིཔྤཏྟསྶ ཡཐཱརུཙི ¶ པརིབྷོགཀཱལེ བྷཱཝནཱ. སཱ ཧི བྷུསཾ སེཝཱིཡཏཱིཏི ཨཱསེཝནཱཏི ཝུཏྟཱ. ཀེཙི པན ‘‘ཨཱསེཝནཱབྷཱཝནཱ ཝསཱིཀམྨཾ, ཨེཀརསཱབྷཱཝནཱ སབྦཏྠིཀཱ’’ཏི ཝཎྞཡནྟི. ཙཏུཀྐཝིབྷཱགེ སམཱདྷིཾ སམཱཔཛྫནྟཱནནྟི ཝཏྟམཱནསམཱིཔེ ཝཏྟམཱནཝཙནཾ. ཏཏྠ ཛཱཏཱཏི ཏསྨིཾ པུབྦབྷཱགེ ཛཱཏཱ. ཨེཀརསཱ ཧོནྟཱིཏི ཨཔྤནུཔྤཱདནེ སམཱནཀིཙྩཱ ཧོནྟི. སམཱདྷིཾ སམཱཔནྣཱནནྟི ཨཔྤིཏཔྤནཱནཾ. ཏཏྠ ཛཱཏཱཏི ཏསྶཱ ཨཔྤནཱཡ ཛཱཏཱ. ཨཉྙམཉྙཾ ནཱཏིཝཏྟནྟཱིཏི སམཔྤཝཏྟིཡཱ ཨཉྙམཉྙཾ ནཱཏིཀྐམནྟི. ཨདྷིམོཀྑཊྛེན སདྡྷིནྡྲིཡཾ ¶ བྷཱཝཡཏོཏིཨཱདཱིསུ ཨེཀཀྑཎེཔི ཨེཀེཀསྶ ཨིནྡྲིཡསྶ སཀསཀཀིཙྩཀརཎེ ཏཾཏཾནིསྶཡཝསེན སཀསཀཀིཙྩཀཱརཀཱནི སེསཱནིཔི ཨིནྡྲིཡཱནི ཝིམུཏྟིརསེན ཨེཀརསཱ ཧོནྟཱིཏི ཝིམུཏྟིརསེནེཝ ཨེཀརསཊྛེན བྷཱཝནཱ. བལབོཛ྄ཛྷངྒམགྒངྒེསུཔི ཨེསེཝ ནཡོ. ཨེཀརསཱཏི ཙ ལིངྒཝིཔལླཱསོ ཀཏོ.

ཨིདྷ བྷིཀྑཱུཏི ཨིམསྨིཾ སཱསནེ བྷིཀྑུ. སཾསཱརེ བྷཡཾ ཨིཀྑཏཱིཏི བྷིཀྑུ. པུབྦཎྷསམཡནྟིཨཱདཱིསུ ཨཙྩནྟསཾཡོགཏྠེ ཨུཔཡོགཝཙནཾ, ཨཏྠཏོ པན བྷུམྨམེཝ ¶ , དིཝསསྶ པུབྦཀཱལེཏི ཨཏྠོ. ཨཱསེཝཏཱིཏི ཝསིཔྤཏྟཾ སམཱདྷིཾ བྷུསཾ སེཝཏི. མཛ྄ཛྷནྷིཀསམཡནྟི དིཝསསྶ མཛ྄ཛྷཀཱལེ. སཱཡནྷསམཡནྟི དིཝསསྶ སཱཡནྷཀཱལེ. པུརེབྷཏྟནྟི དིཝཱབྷཏྟཏོ པུརེཀཱལེ. པཙྪཱབྷཏྟནྟི དིཝཱབྷཏྟཏོ པཙྪཱཀཱལེ. པུརིམེཔི ཡཱམེཏི རཏྟིཡཱ པཋམེ ཀོཊྛཱསེ. ཀཱལེ༹ཏི ཀཱལ༹པཀྑེ. ཛུཎྷེཏི སུཀྐཔཀྑེ. པུརིམེཔི ཝཡོཁནྡྷེཏི པཋམེ ཝཡོཀོཊྛཱསེ, པཋམཝཡེཏི ཨཏྠོ. ཏཱིསུ ཙ ཝཡེསུ ཝསྶསཏཱཡུཀསྶ པུརིསསྶ ཨེཀེཀསྨིཾ ཝཡེ ཙཏུམཱསཱདྷིཀཱནི ཏེཏྟིཾས ཝསྶཱནི ཧོནྟི.

༢༨. ཏཏིཡབྷཱཝནཱཙཏུཀྐེ ཏཏྠ ཛཱཏཱནཾ དྷམྨཱནཾ ཨནཏིཝཏྟནཊྛེནཱཏི ཏཏྠ ནེཀྑམྨཱདཱིསུ བྷཱཝནཱཝིསེསེསུ ཛཱཏཱནཾ སམཱདྷིཔཉྙཱསངྑཱཏཱནཾ ཡུགནདྡྷདྷམྨཱནཾ ཨཉྙམཉྙཾ ཨནཏིཀྐམནབྷཱཝེན. ཨིནྡྲིཡཱནཾ ཨེཀརསཊྛེནཱཏི ཏཏྠེཝ སདྡྷཱདཱིནཾ ཨིནྡྲིཡཱནཾ ནཱནཱཀིལེསེཧི ཝིམུཏྟཏྟཱ ཝིམུཏྟིརསེན ཨེཀརསབྷཱཝེན. ཏདུཔགཝཱིརིཡཝཱཧནཊྛེནཱཏི ཏེསཾ ཨནཏིཝཏྟནཨེཀརསབྷཱཝཱནཾ ཨནུཙྪཝིཀསྶ ཝཱིརིཡསྶ ཝཱཧནབྷཱཝེན. ཨཱསེཝནཊྛེནཱཏི ཡཱ ཏསྶ ཏསྨིཾ སམཡེ པཝཏྟཱ ཨཱསེཝནཱ. ཏསྶཱ ཨཱསེཝནཱཡ ཨཱསེཝནབྷཱཝེན.

རཱུཔསཉྙནྟི ཀུསལཝིཔཱཀཀིརིཡཝསེན པཉྩདསཝིདྷཾ རཱུཔཱཝཙརཛ྄ཛྷཱནསངྑཱཏཾ རཱུཔསཉྙཾ. རཱུཔཱཝཙརཛ྄ཛྷཱནམྤི ཧི རཱུཔནྟི ཝུཙྩཏི ‘‘རཱུཔཱི རཱུཔཱནི པསྶཏཱི’’ཏིཨཱདཱིསུ (དཱི. ནི. ༢.༡༧༤; ཨ. ནི. ༨.༦༦; དྷ. ས. ༢༤༨), ཏསྶ ཛྷཱནསྶ ཨཱརམྨཎམྤི ‘‘བཧིདྡྷཱ རཱུཔཱནི པསྶཏི སུཝཎྞདུབྦཎྞཱནཱི’’ཏིཨཱདཱིསུ (དཱི. ནི. ༢.༡༧༣; ཨ. ནི. ༨.༦༥-༦༦; དྷ. ས. ༢༤༧, ༢༤༩). རཱུཔཱཝཙརཛ྄ཛྷཱནཉྷི ¶ སཉྙཱསཱིསེན རཱུཔེ སཉྙཱཏི ཀཏྭཱ རཱུཔསཉྙཱཏི ཝུཙྩཏི. པཊིགྷསཉྙནྟི ཀུསལཝིཔཱཀཱ པཉྩ, ཨཀུསལཝིཔཱཀཱ པཉྩཱཏི ཨེཝཾ དསཝིདྷཾ པཊིགྷསཉྙཾ. དྭིཔཉྩཝིཉྙཱཎསམྤཡུཏྟཱ ཧི སཉྙཱ ¶ ཙཀྑཱདཱིནཾ ཝཏྠཱུནཾ རཱུཔཱདཱིནཾ ཨཱརམྨཎཱནཉྩ པཊིགྷཱཏེན ཨུཔྤནྣཏྟཱ པཊིགྷསཉྙཱཏི ཝུཙྩཏི. རཱུཔསཉྙཱ སདྡསཉྙཱ གནྡྷསཉྙཱ རསསཉྙཱ ཕོཊྛབྦསཉྙཱཏིཔི ཨེཏིསྶཱ ཨེཝ ནཱམཾ. ནཱནཏྟསཉྙནྟི ཨཊྛ ཀཱམཱཝཙརཀུསལསཉྙཱ, དྭཱདས ཨཀུསལསཉྙཱ ¶ , ཨེཀཱདས ཀཱམཱཝཙརཀུསལཝིཔཱཀསཉྙཱ, དྭེ ཨཀུསལཝིཔཱཀསཉྙཱ, ཨེཀཱདས ཀཱམཱཝཙརཀིརིཡསཉྙཱཏི ཨེཝཾ ཙཏུཙཏྟཱལཱིསཝིདྷཾ ནཱནཏྟསཉྙཾ. སཱ ཧི ནཱནཏྟེ ནཱནཱསབྷཱཝེ རཱུཔསདྡཱདིབྷེདེ གོཙརེ པཝཏྟཱ སཉྙཱཏི ནཱནཏྟསཉྙཱ, ཙཏུཙཏྟཱལཱིསབྷེདཏོ ནཱནཏྟཱ ནཱནཱསབྷཱཝཱ ཨཉྙམཉྙཾ ཨསདིསཱ སཉྙཱཏི ཝཱ ནཱནཏྟསཉྙཱཏི ཝུཙྩཏི. སཉྙཱབཧུཀཏྟེཔི ཛཱཏིགྒཧཎེན ཨེཀཝཙནཾ ཀཏཾ.

ནིཙྩསཉྙནྟི ནིཙྩནྟི སཉྙཾ ནིཙྩསཉྙཾ. ཨེཝཾ སུཁསཉྙཾ ཨཏྟསཉྙཾ. ནནྡིནྟི སཔྤཱིཏིཀཾ ཏཎྷཾ. རཱགནྟི ནིཔྤཱིཏིཀཾ ཏཎྷཾ. སམུདཡནྟི རཱགསྶ སམུདཡཾ. ཨཐ ཝཱ བྷངྒཱནུཔསྶནཱཡ བྷངྒསྶེཝ དསྶནཏོ སངྑཱརཱནཾ ཨུདཡཾ. ཨཱདཱནནྟི ནིབྦཏྟནཝསེན ཀིལེསཱནཾ, ཨདོསདསྶཱཝིཏཱཡ སངྑཏཱརམྨཎསྶ ཝཱ ཨཱདཱནཾ. གྷནསཉྙནྟི སནྟཏིཝསེན གྷནནྟི སཉྙཾ. ཨཱཡཱུཧནནྟི སངྑཱརཱནཾ ཨཏྠཱཡ པཡོགཀརཎཾ. དྷུཝསཉྙནྟི ཐིརནྟི སཉྙཾ. ནིམིཏྟནྟི ནིཙྩནིམིཏྟཾ. པཎིདྷིནྟི སུཁཔཏྠནཾ. ཨབྷིནིཝེསནྟི ཨཏྠི ཨཏྟཱཏི ཨབྷིནིཝེསཾ. སཱརཱདཱནཱབྷིནིཝེསནྟི ནིཙྩསཱརཏྟསཱརགཧཎཱབྷིནིཝེསཾ. སམྨོཧཱབྷིནིཝེསནྟི ‘‘ཨཧོསིཾ ནུ ཁོ ཨཧཾ ཨཏཱིཏམདྡྷཱན’’ནྟིཨཱདིཝསེན (སཾ. ནི. ༢.༢༠) ‘‘ཨིསྶརཏོ ལོཀོ སམྦྷོཏཱི’’ཏིཨཱདིཝསེན ཙ སམྨོཧཱབྷིནིཝེསཾ. ཨཱལཡཱབྷིནིཝེསནྟི ཨཱདཱིནཝཱདསྶནེན ཨལླཱིཡིཏབྦམིདནྟི ཨབྷིནིཝེསཾ. ཨཔྤཊིསངྑནྟི ཨནུཔཱཡགཧཎཾ. སཉྙོགཱབྷིནིཝེསནྟི ཀཱམཡོགཱདིཀཾ ཀིལེསཔྤཝཏྟིཾ.

དིཊྛེཀཊྛེཏི དིཊྛཱིཧི སཧ ཨེཀསྨིཾ ཋིཏཱཏི དིཊྛེཀཊྛཱ. ཏེ དིཊྛེཀཊྛེ. ཀིལེསེནྟི ཨུཔཏཱཔེནྟི, ཝིབཱདྷེནྟི ཝཱཏི ཀིལེསཱ. ཏེ ཀིལེསེ. དུཝིདྷཉྷི ཨེཀཊྛཾ པཧཱནེཀཊྛཾ སཧཛེཀཊྛཉྩ. པཧཱནེཀཊྛཾ སཀྐཱཡདིཊྛིཔམུཁཱཧི ཏེསཊྛིཡཱ དིཊྛཱིཧི སཧ (པཊི. མ. ཨཊྛ. ༢.༡.༡༡༨) ཡཱཝ སོཏཱཔཏྟིམགྒེན པཧཱནཱ, ཏཱཝ ཨེཀསྨིཾ པུགྒལེ ཋིཏཱཏི ཨཏྠོ. ཨིདམིདྷཱདྷིཔྤེཏཾ. དསསུ ཧི ཀིལེསེསུ ཨིདྷ དིཊྛིཀིལེསོཡེཝ ཨཱགཏོ. སེསེསུ པན ཨཔཱཡགམནཱིཡོ ལོབྷོ དོསོ མོཧོ མཱནོ ཝིཙིཀིཙྪཱ ཐིནཾ ¶ ཨུདྡྷཙྩཾ ¶ ཨཧིརིཀཾ ཨནོཏྟཔྤནྟི ནཝ ཀིལེསཱ དིཊྛིཡཱ སཧ པཧཱནེཀཊྛཱ ཧུཏྭཱ སོཏཱཔཏྟིམགྒེན པཧཱིཡནྟི, རཱགདོསམོཧཔམུཁེསུ ¶ ཝཱ དིཡཌྜྷེསུ ཀིལེསསཧསྶེསུ སོཏཱཔཏྟིམགྒེན དིཊྛིཡཱ པཧཱིཡམཱནཱཡ དིཊྛིཡཱ སཧ ཨཔཱཡགམནཱིཡཱ སབྦཀིལེསཱ པཧཱནེཀཊྛཝསེན པཧཱིཡནྟི, སཧཛེཀཊྛེ དིཊྛིཡཱ སཧ ཨེཀསྨིཾ ཙིཏྟེ ཋིཏཱཏི ཨཏྠོ. སོཏཱཔཏྟིམགྒེན ཧི དྭཱིསུ དིཊྛིསམྤཡུཏྟཨསངྑཱརིཀཙིཏྟེསུ པཧཱིཡམཱནེསུ ཏེཧི སཧཛཱཏོ ལོབྷོ མོཧོ ཨུདྡྷཙྩཾ ཨཧིརིཀཾ ཨནོཏྟཔྤནྟི ཨིམེ ཀིལེསཱ སཧཛེཀཊྛཝསེན པཧཱིཡནྟི, དྭཱིསུ དིཊྛིསམྤཡུཏྟསསངྑཱརིཀཙིཏྟེསུ པཧཱིཡམཱནེསུ ཏེཧི སཧཛཱཏོ ལོབྷོ མོཧོ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤནྟི ཨིམེ ཀིལེསཱ སཧཛེཀཊྛཝསེན པཧཱིཡནྟི. ཨོལཱ༹རིཀེ ཀིལེསེཏི ཨོལཱ༹རིཀབྷཱུཏེ ཀཱམརཱགབྱཱཔཱདེ. ཨནུསཧགཏེ ཀིལེསེཏི སུཁུམབྷཱུཏེ ཀཱམརཱགབྱཱཔཱདེ. སབྦཀིལེསེཏི མགྒཏྟཡེན པཧཱིནཱཝསེསེ.

ཝཱིརིཡཾ ཝཱཧེཏཱིཏི ཡོགཱཝཙརོ ཝཱིརིཡཾ པཝཏྟེཏི. ཧེཊྛཱ ཨེསནཱཔཊིལཱབྷཨེཀརསཨཱསེཝནཝཙནཱནི བྷཱཝནཱནཾ ཝིསེསདསྶནཏྠཾ ཝུཏྟཱནི ‘‘ཨེཝཾབྷཱུཏཱ ཙ བྷཱཝནཱ’’ཏི. ཨིདྷ ‘‘ཏཏྠ ཛཱཏཱནཾ དྷམྨཱནཾ ཨནཏིཝཏྟནཊྛེན ཨིནྡྲིཡཱནཾ ཨེཀརསཊྛེན ཏདུཔགཝཱིརིཡཝཱཧནཊྛེན ཨཱསེཝནཊྛེནཱ’’ཏི ཝཙནཱནི བྷཱཝནཱཧེཏུདསྶནཏྠཾ ཝུཏྟཱནི ‘‘ཨིམིནཱ ཙ ཨིམིནཱ ཙ ཧེཏུནཱ བྷཱཝནཱ’’ཏི. ཧེཊྛཱ ཨཱསེཝནཱབྷཱཝནཱཏི ནཱནཱཀྑཎཝསེན ཝུཏྟཱ, ཨིདྷ ཨཱསེཝནཊྛེན བྷཱཝནཱཏི ཨེཀཀྑཎཝསེནཱཏི ཝིསེསོ. རཱུཔཾ པསྶནྟོ བྷཱཝེཏཱིཏིཨཱདཱིསུ རཱུཔཱདཱིནི པསྶིཏབྦཱཀཱརེན པསྶནྟོ བྷཱཝེཏབྦཾ བྷཱཝནཾ བྷཱཝེཏཱིཏི ཨཏྠོ. ཨེཀརསཱ ཧོནྟཱིཏི ཝིམུཏྟིརསེན, ཀིཙྩརསེན ཝཱ ཨེཀརསཱ ཧོནྟི. ཝིམུཏྟིརསོཏི སམྤཏྟིརསོ. ཀིཙྩསམྤཏྟིཨཏྠེན རསོ ནཱམ པཝུཙྩཏཱིཏི ཧི ཝུཏྟནྟི.

བྷཱཝེཏབྦནིདྡེསཝཎྞནཱ ནིཊྛིཏཱ.

སཙྪིཀཱཏབྦནིདྡེསཝཎྞནཱ

༢༩. སཙྪིཀཱཏབྦནིདྡེསེ ¶ དས ཨེཀུཏྟརཝིསྶཛྫནཱནི པཊིལཱབྷསཙྪིཀིརིཡཱཝསེན ཝུཏྟཱནི. ཏཏྠ ཨཀུཔྤཱ ཙེཏོཝིམུཏྟཱིཏི ཨརཧཏྟཕལཝིམུཏྟི. སཱ ཧི ན ཀུཔྤཏི ན ཙལཏི ན པརིཧཱཡཏཱིཏི ཨཀུཔྤཱ, སབྦཀིལེསེཧི ཙིཏྟསྶ ¶ ཝིམུཏྟཏྟཱ ཙེཏོཝིམུཏྟཱིཏི ཝུཙྩཏི. ཝིཛྫཱཏི ཏིསྶོ ཝིཛྫཱ. ཝིམུཏྟཱིཏི དསུཏྟརཔརིཡཱཡེན ཨརཧཏྟཕལཾ ཝུཏྟཾ, སངྒཱིཏིཔརིཡཱཡེན པན ‘‘ཝིམུཏྟཱིཏི དྭེ ཝིམུཏྟིཡོ ཙིཏྟསྶ ཙ ཨདྷིམུཏྟི ནིབྦཱནཉྩཱ’’ཏི (དཱི. ནི. ཨཊྛ. ༣.༣༠༤) ཝུཏྟཾ. ཨེཏྠ ཙ ཨཊྛ སམཱཔཏྟིཡོ ནཱིཝརཎཱདཱིཧི སུཊྛུ ཝིམུཏྟཏྟཱ ཝིམུཏྟི ནཱམ, ནིབྦཱནཾ ¶ སབྦསངྑཏཏོ ཝིམུཏྟཏྟཱ ཝིམུཏྟི ནཱམ. ཏིསྶོ ཝིཛྫཱཏི པུབྦེནིཝཱསཱནུསྶཏིཉཱཎཾ ཝིཛྫཱ སཏྟཱནཾ ཙུཏཱུཔཔཱཏེ ཉཱཎཾ ཝིཛྫཱ ཨཱསཝཱནཾ ཁཡེ ཉཱཎཾ ཝིཛྫཱ. ཏམཝིཛ྄ཛྷནཊྛེན ཝིཛྫཱ, ཝིདིཏཀརཎཊྛེནཱཔི ཝིཛྫཱ. པུབྦེནིཝཱསཱནུསྶཏིཉཱཎཉྷི ཨུཔྤཛྫམཱནཾ པུབྦེནིཝཱསཾ ཚཱདེཏྭཱ ཋིཏཾ ཏམཾ ཝིཛ྄ཛྷཏི, པུབྦེནིཝཱསཉྩ ཝིདིཏཾ ཀརོཏཱིཏི ཝིཛྫཱ. ཙུཏཱུཔཔཱཏེ ཉཱཎཾ ཙུཏིཔཊིསནྡྷིཙྪཱདཀཾ ཏམཾ ཝིཛ྄ཛྷཏི, ཙུཏཱུཔཔཱཏཉྩ ཝིདིཏཾ ཀརོཏཱིཏི ཝིཛྫཱ. ཨཱསཝཱནཾ ཁཡེ ཉཱཎཾ ཙཏུསཙྩཙྪཱདཀཾ ཏམཾ ཝིཛ྄ཛྷཏི, ཙཏུསཙྩདྷམྨེ ཙ ཝིདིཏཾ ཀརོཏཱིཏི ཝིཛྫཱ. ཙཏྟཱརི སཱམཉྙཕལཱནཱིཏི སོཏཱཔཏྟིཕལཾ, སཀདཱགཱམིཕལཾ, ཨནཱགཱམིཕལཾ, ཨརཧཏྟཕལཾ. པཱཔདྷམྨེ སམེཏི ཝིནཱསེཏཱིཏི སམཎོ, སམཎསྶ བྷཱཝོ སཱམཉྙཾ. ཙཏུནྣཾ ཨརིཡམགྒཱནམེཏཾ ནཱམཾ. སཱམཉྙསྶ ཕལཱནི སཱམཉྙཕལཱནི.

པཉྩ དྷམྨཀྑནྡྷཱཏི སཱིལཀྑནྡྷོ, སམཱདྷིཀྑནྡྷོ, པཉྙཱཀྑནྡྷོ, ཝིམུཏྟིཀྑནྡྷོ, ཝིམུཏྟིཉཱཎདསྶནཀྑནྡྷོ. དྷམྨཀྑནྡྷཱཏི དྷམྨཝིབྷཱགཱ དྷམྨཀོཊྛཱསཱ. སཱིལཀྑནྡྷཱདཱིསུཔི ཨེསེཝ ནཡོ. ལོཀིཡལོཀུཏྟརཱ སཱིལསམཱདྷིཔཉྙཱ ཨེཝ སཱིལསམཱདྷིཔཉྙཱཀྑནྡྷཱ ¶ . སམུཙྪེདཔཊིཔྤསྶདྡྷིནིསྶརཎཝིམུཏྟིཡོ ཨེཝ ཝིམུཏྟིཀྑནྡྷོ. ཏིཝིདྷཱ ཝིམུཏྟིཔཙྩཝེཀྑཎཱ ཨེཝ ཝིམུཏྟིཉཱཎདསྶནཀྑནྡྷོ. སོ ལོཀིཡོ ཨེཝ. ཛཱནནཊྛེན ཉཱཎམེཝ དསྶནཊྛེན དསྶནནྟི ཉཱཎདསྶནཾ, ཝིམུཏྟཱིནཾ ཉཱཎདསྶནཾ ཝིམུཏྟིཉཱཎདསྶནནྟི ཝུཙྩཏི. ཝིཀྑམྦྷནཏདངྒཝིམུཏྟིཡོ པན སམཱདྷིཔཉྙཱཀྑནྡྷེཧེཝ སངྒཧིཏཱ. ཨིམེ པཉྩ དྷམྨཀྑནྡྷཱ སེཀྑཱནཾ སེཀྑཱ, ཨསེཀྑཱནཾ ཨསེཀྑཱཏི ཝུཏྟཱ. ཨེཏེསུ ཧི ལོཀིཡཱ ཙ ནིསྶརཎཝིམུཏྟི ཙ ནེཝསེཀྑཱནཱསེཀྑཱ. སེཀྑཱ ཧོནྟཱཔི སེཀྑཱནཾ ཨིམེ ཨིཏི སེཀྑཱ, ཨསེཀྑཱནཾ ཨིམེ ཨིཏི ཨསེཀྑཱཏི ཝུཙྩནྟི. ‘‘སེཀྑེན ཝིམུཏྟིཀྑནྡྷེན སམནྣཱགཏོ ཧོཏཱི’’ཏི ཨེཏྠ པན ནིསྶརཎཝིམུཏྟིཡཱ ཨཱརམྨཎཀརཎཝསེན སམནྣཱགཏོཏི ཝེདིཏབྦོ. ཚ ཨབྷིཉྙཱཏི ཚ ཨདྷིཀཱནི ཉཱཎཱནི. ཀཏམཱ ཚ? ཨིདྡྷིཝིདྷཉཱཎཾ ¶ , དིབྦསོཏདྷཱཏུཉཱཎཾ, པུབྦེནིཝཱསཱནུསྶཏིཉཱཎཾ, ཙེཏོཔརིཡཉཱཎཾ, དིབྦཙཀྑུཉཱཎཾ, ཨཱསཝཱནཾ ཁཡེ ཉཱཎནྟི ཨིམཱ ཚ.

སཏྟ ཁཱིཎཱསཝབལཱནཱིཏི ཁཱིཎཱ ཨཱསཝཱ ཨསྶཱཏི ཁཱིཎཱསཝོ, ཁཱིཎཱསཝསྶ བལཱནི ཁཱིཎཱསཝབལཱནི. ཀཏམཱནི སཏྟ? ཝུཏྟཱནི བྷགཝཏཱ –

‘‘ཨིདྷ, བྷིཀྑཝེ, ཁཱིཎཱསཝསྶ བྷིཀྑུནོ ཨནིཙྩཏོ སབྦེ སངྑཱརཱ ཡཐཱབྷཱུཏཾ སམྨཔྤཉྙཱཡ སུདིཊྛཱ ཧོནྟི. ཡམྤི, བྷིཀྑཝེ, ཁཱིཎཱསཝསྶ བྷིཀྑུནོ ཨནིཙྩཏོ སབྦེ སངྑཱརཱ ཡཐཱབྷཱུཏཾ སམྨཔྤཉྙཱཡ སུདིཊྛཱ ཧོནྟི, ཨིདམྤི, བྷིཀྑཝེ, ཁཱིཎཱསཝསྶ བྷིཀྑུནོ ¶ བལཾ ཧོཏི, ཡཾ བལཾ ཨཱགམྨ ཁཱིཎཱསཝོ བྷིཀྑུ ཨཱསཝཱནཾ ཁཡཾ པཊིཛཱནཱཏི ‘ཁཱིཎཱ མེ ཨཱསཝཱ’ཏི.

‘‘པུན ཙཔརཾ, བྷིཀྑཝེ, ཁཱིཎཱསཝསྶ བྷིཀྑུནོ ཨངྒཱརཀཱསཱུཔམཱ ཀཱམཱཏི ཡཐཱབྷཱུཏཾ སམྨཔྤཉྙཱཡ སུདིཊྛཱ ཧོནྟི. ཡམྤི, བྷིཀྑཝེ…པེ… ཨིདམྤི ཁཱིཎཱསཝསྶ བྷིཀྑུནོ བལཾ ཧོཏི…པེ….

‘‘པུན ཙཔརཾ, བྷིཀྑཝེ, ཁཱིཎཱསཝསྶ བྷིཀྑུནོ ཝིཝེཀནིནྣཾ ཙིཏྟཾ ཧོཏི ཝིཝེཀཔོཎཾ ཝིཝེཀཔབྦྷཱརཾ ཝིཝེཀཊྛཾ ནེཀྑམྨཱབྷིརཏཾ བྱནྟཱིབྷཱུཏཾ སབྦསོ ཨཱསཝཊྛཱནིཡེཧི དྷམྨེཧི. ཡམྤི, བྷིཀྑཝེ…པེ… ཨིདམྤི ཁཱིཎཱསཝསྶ བྷིཀྑུནོ བལཾ ཧོཏི…པེ….

‘‘པུན ཙཔརཾ, བྷིཀྑཝེ, ཁཱིཎཱསཝསྶ བྷིཀྑུནོ ཙཏྟཱརོ སཏིཔཊྛཱནཱ བྷཱཝིཏཱ ཧོནྟི སུབྷཱཝིཏཱ. པཉྩིནྡྲིཡཱནི བྷཱཝིཏཱནི ཧོནྟི ¶ སུབྷཱཝིཏཱནི. སཏྟ བོཛ྄ཛྷངྒཱ བྷཱཝིཏཱ ཧོནྟི སུབྷཱཝིཏཱ. ཨརིཡོ ཨཊྛངྒིཀོ མགྒོ བྷཱཝིཏོ ཧོཏི སུབྷཱཝིཏོ. ཡམྤི, བྷིཀྑཝེ, ཁཱིཎཱསཝསྶ བྷིཀྑུནོ ཨརིཡོ ཨཊྛངྒིཀོ མགྒོ བྷཱཝིཏོ ཧོཏི སུབྷཱཝིཏོ, ཨིདམྤི ཁཱིཎཱསཝསྶ བྷིཀྑུནོ བལཾ ཧོཏི, ཡཾ བལཾ ཨཱགམྨ ཁཱིཎཱསཝོ བྷིཀྑུ ཨཱསཝཱནཾ ཁཡཾ པཊིཛཱནཱཏི ‘ཁཱིཎཱ མེ ཨཱསཝཱ’’’ཏི (ཨ. ནི. ༡༠.༩༠; དཱི. ནི. ༣.༣༥༧; པཊི. མ. ༢.༤༤).

ཏཏྠ ¶ པཋམེན བལེན དུཀྑསཙྩཔཊིཝེདྷོ, དུཏིཡེན སམུདཡསཙྩཔཊིཝེདྷོ, ཏཏིཡེན ནིརོདྷསཙྩཔཊིཝེདྷོ, ཙཏཱུཧི མགྒསཙྩཔཊིཝེདྷོ པཀཱསིཏོ ཧོཏི.

ཨཊྛ ཝིམོཀྑཱཏི ཨཱརམྨཎེ ཨདྷིམུཙྩནཊྛེན པཙྩནཱིཀདྷམྨེཧི ཙ སུཊྛུ མུཙྩནཊྛེན ཝིམོཀྑཱ. ‘‘ཀཏམེ ཨཊྛ? རཱུཔཱི རཱུཔཱནི པསྶཏི, ཨཡཾ པཋམོ ཝིམོཀྑོ. ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི, ཨཡཾ དུཏིཡོ ཝིམོཀྑོ. ‘སུབྷ’ནྟེཝ ཨདྷིམུཏྟོ ཧོཏི, ཨཡཾ ཏཏིཡོ ཝིམོཀྑོ. སབྦསོ རཱུཔསཉྙཱནཾ སམཏིཀྐམཱ པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ ‘ཨནནྟོ ཨཱཀཱསོ’ཏི ཨཱཀཱསཱནཉྩཱཡཏནཾ ཨུཔསམྤཛྫ ཝིཧརཏི, ཨཡཾ ཙཏུཏྠོ ཝིམོཀྑོ. སབྦསོ ཨཱཀཱསཱནཉྩཱཡཏནཾ སམཏིཀྐམྨ ‘ཨནནྟཾ ཝིཉྙཱཎ’ནྟི ཝིཉྙཱཎཉྩཱཡཏནཾ ཨུཔསམྤཛྫ ཝིཧརཏི, ཨཡཾ པཉྩམོ ཝིམོཀྑོ. སབྦསོ ཝིཉྙཱཎཉྩཱཡཏནཾ ¶ སམཏིཀྐམྨ ‘ནཏྠི ཀིཉྩཱི’ཏི ཨཱཀིཉྩཉྙཱཡཏནཾ ཨུཔསམྤཛྫ ཝིཧརཏི, ཨཡཾ ཚཊྛོ ཝིམོཀྑོ. སབྦསོ ཨཱཀིཉྩཉྙཱཡཏནཾ སམཏིཀྐམྨ ནེཝསཉྙཱནཱསཉྙཱཡཏནཾ ཨུཔསམྤཛྫ ཝིཧརཏི, ཨཡཾ སཏྟམོ ཝིམོཀྑོ. སབྦསོ ནེཝསཉྙཱནཱསཉྙཱཡཏནཾ སམཏིཀྐམྨ སཉྙཱཝེདཡིཏནིརོདྷཾ ཨུཔསམྤཛྫ ཝིཧརཏི, ཨཡཾ ཨཊྛམོ ཝིམོཀྑོ’’ཏི (དཱི. ནི. ༢.༡༧༤; ༣.༣༥༨; ཨ. ནི. ༨.༦༦).

ནཝ ཨནུཔུབྦནིརོདྷཱཏི ནཝ ཨནུཔཊིཔཱཊིཡཱ ནིརོདྷཱ. ‘‘ཀཏམེ ནཝ? པཋམཾ ཛྷཱནཾ སམཱཔནྣསྶ ཀཱམསཉྙཱ ནིརུདྡྷཱ ཧོཏི, དུཏིཡཾ ཛྷཱནཾ སམཱཔནྣསྶ ཝིཏཀྐཝིཙཱརཱ ནིརུདྡྷཱ ཧོནྟི, ཏཏིཡཾ ཛྷཱནཾ སམཱཔནྣསྶ པཱིཏི ནིརུདྡྷཱ ཧོཏི, ཙཏུཏྠཾ ཛྷཱནཾ སམཱཔནྣསྶ ཨསྶཱསཔསྶཱསཱ ནིརུདྡྷཱ ཧོནྟི, ཨཱཀཱསཱནཉྩཱཡཏནཾ སམཱཔནྣསྶ རཱུཔསཉྙཱ ནིརུདྡྷཱ ཧོཏི, ཝིཉྙཱཎཉྩཱཡཏནཾ སམཱཔནྣསྶ ཨཱཀཱསཱནཉྩཱཡཏནསཉྙཱ ནིརུདྡྷཱ ཧོཏི, ཨཱཀིཉྩཉྙཱཡཏནཾ སམཱཔནྣསྶ ཝིཉྙཱཎཉྩཱཡཏནསཉྙཱ ནིརུདྡྷཱ ཧོཏི, ནེཝསཉྙཱནཱསཉྙཱཡཏནཾ ¶ སམཱཔནྣསྶ ཨཱཀིཉྩཉྙཱཡཏནསཉྙཱ ནིརུདྡྷཱ ཧོཏི, སཉྙཱཝེདཡིཏནིརོདྷཾ སམཱཔནྣསྶ སཉྙཱ ཙ ཝེདནཱ ཙ ནིརུདྡྷཱ ཧོནྟཱི’’ཏི (ཨ. ནི. ༩.༣༡; དཱི. ནི. ༣.༣༤༤, ༣༥༩).

དས ཨསེཀྑཱ དྷམྨཱཏི ཨུཔརི སིཀྑིཏབྦཱབྷཱཝཏོ ན སིཀྑནྟཱིཏི ཨསེཀྑཱ. ཨཐ ཝཱ ཏཱིསུ སིཀྑཱསུ སིཀྑནྟཱིཏི སེཀྑཱ, ཝུདྡྷིཔྤཏྟཱ སེཀྑཱཏི ¶ ཨསེཀྑཱ, ཨརཧནྟོ. ཨསེཀྑཱནཾ ཨིམེ ཨིཏི ཨསེཀྑཱ. ‘‘ཀཏམེ དས? ཨསེཀྑཱ སམྨཱདིཊྛི, ཨསེཀྑོ སམྨཱསངྐཔྤོ, ཨསེཀྑཱ སམྨཱཝཱཙཱ, ཨསེཀྑོ སམྨཱཀམྨནྟོ, ཨསེཀྑོ སམྨཱཨཱཛཱིཝོ, ཨསེཀྑོ སམྨཱཝཱཡཱམོ, ཨསེཀྑཱ སམྨཱསཏི, ཨསེཀྑོ སམྨཱསམཱདྷི, ཨསེཀྑཾ སམྨཱཉཱཎཾ, ཨསེཀྑཱ སམྨཱཝིམུཏྟཱི’’ཏི (དཱི. ནི. ༣.༣༤༨, ༣༦༠). ཨསེཀྑཾ སམྨཱཉཱཎནྟི ཨརཧཏྟཕལཔཉྙཾ ཋཔེཏྭཱ སེསལོཀིཡཔཉྙཱ. སམྨཱཝིམུཏྟཱིཏི ཨརཧཏྟཕལཝིམུཏྟི. ཨཊྛཀཐཱཡཾ (དཱི. ནི. ཨཊྛ. ༣.༣༤༨) པན ཝུཏྟཾ –

‘‘ཨསེཀྑཱ སམྨཱདིཊྛཱིཏིཨཱདཡོ སབྦེཔི ཕལསམྤཡུཏྟདྷམྨཱ ཨེཝ. ཨེཏྠ ཙ སམྨཱདིཊྛི སམྨཱཉཱཎནྟི དྭཱིསུ ཋཱནེསུ པཉྙཱཝ ཀཐིཏཱ. སམྨཱཝིམུཏྟཱིཏི ཨིམིནཱ པན པདེན ཝུཏྟཱཝསེསཱ ཕལསམཱཔཏྟིདྷམྨཱ སངྒཧིཏཱ’’ཏི.

སབྦཾ, བྷིཀྑཝེ, སཙྪིཀཱཏབྦནྟིཨཱདཱིསུ ཨཱརམྨཎསཙྪིཀིརིཡཱ ཝེདིཏབྦཱ. རཱུཔཾ པསྶནྟོ སཙྪིཀརོཏཱིཏིཨཱདཱིསུ རཱུཔཱདཱིནི ལོཀིཡཱནི པསྶིཏབྦཱཀཱརེན པསྶནྟོ ཏཱནེཝ རཱུཔཱདཱིནི ¶ ཨཱརམྨཎསཙྪིཀིརིཡཱཡ སཙྪིཀརོཏི, རཱུཔཱདཱིནི ཝཱ པསྶིཏབྦཱཀཱརེན པསྶནྟོ ཏེན ཧེཏུནཱ སཙྪིཀཱཏབྦཾ ནིབྦཱནཾ སཙྪིཀརོཏི. པསྶནྟོཏི ཧི པདཾ ཧེཏུཨཏྠེཔི ཨཀྑརཙིནྟཀཱ ཨིཙྪནྟི. ཨནཉྙཱཏཉྙསྶཱམཱིཏིནྡྲིཡཱདཱིནི པན ལོཀུཏྟརཱནི པཙྩཝེཀྑཎཝསེན པསྶནྟོ ཏཱནེཝ ཨཱརམྨཎསཙྪིཀིརིཡཱཡ སཙྪིཀརོཏི. ‘‘ཨམཏོགདྷཾ ནིབྦཱནཾ པརིཡོསཱནཊྛེན སཙྪིཀརོཏཱི’’ཏི ཨིདཾ པརིཉྙེཡྻཔཧཱཏབྦསཙྪིཀཱཏབྦབྷཱཝེཏབྦེསུ སཙྪིཀཱཏབྦཏྟཱ ཨུཛུཀམེཝ. ཡེ ཡེ དྷམྨཱ སཙྪིཀཏཱ ཧོནྟི, ཏེ ཏེ དྷམྨཱ ཕསྶིཏཱ ཧོནྟཱིཏི ཨཱརམྨཎསཙྪིཀིརིཡཱཡ སཙྪིཀཏཱ ཨཱརམྨཎཕསྶེན ཕུཊྛཱ ཧོནྟི, པཊིལཱབྷསཙྪིཀིརིཡཱཡ སཙྪིཀཏཱ པཊིལཱབྷཕསྶེན ཕུཊྛཱ ཧོནྟཱིཏི.

སཙྪིཀཱཏབྦནིདྡེསཝཎྞནཱ ནིཊྛིཏཱ.

ཧཱནབྷཱགིཡཙཏུཀྐནིདྡེསཝཎྞནཱ

༣༠. ཨིདཱནི ¶ ཡསྨཱ ཧཱནབྷཱགིཡཱདིཏཱ ཨེཀེཀསྶེཝ སམཱདྷིསྶ ཨཝཏྠཱབྷེདེན ཧོཏི, ཏསྨཱ ཧཱནབྷཱགིཡཙཏུཀྐཾ ཨེཀཏོཡེཝ ནིདྡིཊྛཾ. ཏཏྠ པཋམསྶ ཛྷཱནསྶ ལཱབྷིནྟི པཋམསྶ ཛྷཱནསྶ ལཱབྷིནོ ¶ . སཱམིཨཏྠེ ཨུཔཡོགཝཙནཾ. ལཱབྷོ སཙྪིཀིརིཡཱ ཨསྶ ཨཏྠཱིཏི ལཱབྷཱིཏི ཝུཙྩཏི. ཀཱམསཧགཏཱཏི ཨེཏྠ སཧགཏསདྡསྶ ཨཱརམྨཎཏྠོ ཨདྷིཔྤེཏོ, ཝཏྠུཀཱམཀིལེསཀཱམཱརམྨཎཱཏི ཨཏྠོ. སཉྙཱམནསིཀཱརཱཏི ཛཝནསཉྙཱ ཙ ཏདཱཝཛྫནམནསིཀཱརོ ཙ, སཉྙཱསམྤཡུཏྟམནསིཀཱརོཔི ཝཊྚཏི. སམུདཱཙརནྟཱིཏི པཝཏྟནྟི. དྷམྨོཏི པཋམཛ྄ཛྷཱནདྷམྨོ. ཛྷཱནཱ པརིཧཱཡནྟོ ཏཱིཧི ཀཱརཎེཧི པརིཧཱཡཏི ཀིལེསསམུདཱཙཱརེན ཝཱ ཨསཔྤཱཡཀིརིཡཱཡ ཝཱ ཨནནུཡོགེན ཝཱ. ཀིལེསསམུདཱཙཱརེན པརིཧཱཡནྟོ སཱིགྷཾ པརིཧཱཡཏི, ཀམྨཱརཱམཏཱབྷསྶཱརཱམཏཱནིདྡཱརཱམཏཱསངྒཎིཀཱརཱམཏཱནུཡོགཝསེན ཨསཔྤཱཡཀིརིཡཱཡ པརིཧཱཡནྟོ དནྡྷཾ པརིཧཱཡཏི, གེལཉྙཔཙྩཡཝེཀལླཱདིནཱ པལིབོདྷེན ཨབྷིཀྑཎཾ ཨསམཱཔཛྫནྟོ ཨནནུཡོགེན པརིཧཱཡནྟོཔི དནྡྷཾ པརིཧཱཡཏི. ཨིདྷ པན བལཝཀཱརཎམེཝ དསྶེནྟོ ཀིལེསསམུདཱཙཱརམེཝཱཧ. དུཏིཡཛ྄ཛྷཱནཱདཱིཧི པན པརིཧཱཡནྟོ ཧེཊྛིམཧེཊྛིམཛ྄ཛྷཱནནིཀནྟིསམུདཱཙཱརེནཔི པརིཧཱཡཏི. ཀིཏྟཱཝཏཱ པརིཧཱིནོ ཧོཏཱིཏི? ཡདཱ ན སཀྐོཏི སམཱཔཛྫིཏུཾ, ཨེཏྟཱཝཏཱ པརིཧཱིནོ ཧོཏཱིཏི. ཏདནུདྷམྨཏཱཏི ཨནུཔཝཏྟོ དྷམྨོ ཨནུདྷམྨོ, ཛྷཱནཾ ཨདྷིཀཾ ཀཏྭཱ པཝཏྟསྶ ནིཀནྟིདྷམྨསྶེཏཾ ཨདྷིཝཙནཾ. ཨནུདྷམྨོ ཨེཝ ཨནུདྷམྨཏཱ, ཏསྶ ཛྷཱནསྶ ཨནུདྷམྨཏཱ ཏདནུདྷམྨཏཱ. སཏཱིཏི ནིཀནྟི. སནྟིཊྛཏཱིཏི པཏིཊྛཱཏི ¶ . ཏཾ པཋམཛ྄ཛྷཱནཾ ཨནུཝཏྟམཱནཱ ནིཀནྟི ¶ པཝཏྟཏཱིཏི ཝུཏྟཾ ཧོཏི. ཨཝིཏཀྐསཧགཏཱཏི དུཏིཡཛ྄ཛྷཱནཱརམྨཎཱ. ཏཉྷི ནཏྠེཏྠ ཝིཏཀྐོཏི ཨཝིཏཀྐནྟི ཝུཙྩཏི. ནིབྦིདཱསཧགཏཱཏི ཝིཔསྶནཱརམྨཎཱ. སཱ ཧི སངྑཱརེསུ ནིབྦིནྡནཏོ ནིབྦིདཱཏི ཝུཙྩཏི. ‘‘ནིབྦིནྡཾ ཝིརཛྫཏཱི’’ཏི (མཧཱཝ. ༢༣; སཾ. ནི. ༣.༦༡) ཧི ཝུཏྟཾ. ཝིརཱགཱུཔསཾཧིཏཱཏི ཨརིཡམགྒཔཊིསཉྙུཏྟཱ ཝིཔསྶནཱ. ཝིཔསྶནཱ ཧི སིཁཱཔྤཏྟཱ མགྒཝུཊྛཱནཾ པཱཔེཏི. ཏསྨཱ ཝིཔསྶནཱརམྨཎཱ སཉྙཱམནསིཀཱརཱ ‘‘ཝིརཱགཱུཔསཾཧིཏཱ’’ཏི ཝུཙྩནྟི, ‘‘ཝིརཱགཱ ཝིམུཙྩཏཱི’’ཏི ཧི ཝུཏྟཾ.

ཝིཏཀྐསཧགཏཱཏི ཝིཏཀྐཝསེན པཋམཛ྄ཛྷཱནཱརམྨཎཱ. ཨུཔེཀྑཱསུཁསཧགཏཱཏི ཏཏྲམཛ྄ཛྷཏྟུཔེཀྑཱཡ ཙ སུཁཝེདནཱཡ ཙ ཝསེན ཏཏིཡཛ྄ཛྷཱནཱརམྨཎཱ. པཱིཏིསུཁསཧགཏཱཏི པཱིཏིཡཱ ཙ སུཁཝེདནཱཡ ཙ ཝསེན དུཏིཡཛ྄ཛྷཱནཱརམྨཎཱ. ཨདུཀྑམསུཁསཧགཏཱཏི ཨུཔེཀྑཱཝེདནཱཝསེན ཙཏུཏྠཛ྄ཛྷཱནཱརམྨཎཱ. སཱ ཧི ཝེདནཱ ན དུཀྑཱ ན སུཁཱཏི ཨདུཀྑམསུཁཱཏི ཝུཙྩཏི ¶ , མ-ཀཱརོ པནེཏྠ པདསནྡྷིཝསེན ཝུཏྟོ. རཱུཔསཧགཏཱཏི རཱུཔཛ྄ཛྷཱནཱརམྨཎཱ. ནེཝསཉྙཱནཱསཉྙཱཡཏནེ ཋིཏསྶ ཧཱནབྷཱགིཡཋིཏིབྷཱགིཡནིབྦེདྷབྷཱགིཡཏྟེསུ ཝིཛྫམཱནེསུཔི ཝིསེསབྷཱགིཡཏྟཱབྷཱཝཱ ནེཝསཉྙཱནཱསཉྙཱཡཏནཾ ན ནིདྡིཊྛཾ. སབྦོཔི ཙེས ལོཀིཡོ སམཱདྷི པམཱདཝིཧཱརིསྶ མུདིནྡྲིཡསྶ ཧཱནབྷཱགིཡོ ཧོཏི, ཨཔྤམཱདཝིཧཱརིསྶ མུདིནྡྲིཡསྶ ཋིཏིབྷཱགིཡོ ཧོཏི, ཏཎྷཱཙརིཏསྶ ཏིཀྑིནྡྲིཡསྶ ཝིསེསབྷཱགིཡོ ཧོཏི, དིཊྛིཙརིཏསྶ ཏིཀྑིནྡྲིཡསྶ ནིབྦེདྷབྷཱགིཡོ ཧོཏཱིཏི ཝུཙྩཏི.

ཧཱནབྷཱགིཡཙཏུཀྐནིདྡེསཝཎྞནཱ ནིཊྛིཏཱ.

ལཀྑཎཏྟིཀནིདྡེསཝཎྞནཱ

༣༡. ཨིདཱནི ¶ ཡསྨཱ ཨེཀེཀོཔི ལོཀིཡདྷམྨོ ཏིལཀྑཎབྦྷཱཧཏོ, ཏསྨཱ ལཀྑཎཏྟིཀཾ ཨེཀཏོ ནིདྡིཊྛཾ. ཏཏྠ ཨནིཙྩཾ ཁཡཊྛེནཱཏི ཏཏྠ ཏཏྠེཝ ཁཱིཡནབྷཱཝེན ཨནིཙྩཾ. ‘‘ཁཡདྷམྨཏྟཱ, ཝཡདྷམྨཏྟཱ, ཝིརཱགདྷམྨཏྟཱ, ནིརོདྷདྷམྨཏྟཱ ཨནིཙྩ’’ནྟི ཨེཀེ. དུཀྑཾ བྷཡཊྛེནཱཏི སཔྤཊིབྷཡཏཱཡ དུཀྑཾ. ཡཉྷི ཨནིཙྩཾ, ཏཾ བྷཡཱཝཧཾ ཧོཏི སཱིཧོཔམསུཏྟེ (སཾ. ནི. ༣.༧༨) དེཝཱནཾ ཝིཡ. ‘‘ཛཱཏིཛརཱབྱཱདྷིམརཎབྷཡཊྛེན དུཀྑ’’ནྟི ཨེཀེ. ཨནཏྟཱ ཨསཱརཀཊྛེནཱཏི ‘‘ཨཏྟཱ ནིཝཱསཱི ཀཱརཀོ ཝེདཀོ སཡཾཝསཱི’’ཏི ཨེཝཾ པརིཀཔྤིཏསྶ ཨཏྟསཱརསྶ ཨབྷཱཝེན ཨནཏྟཱ. ཡཉྷི ཨནིཙྩཾ དུཀྑཾ, ཏཾ ཨཏྟནོཔི ཨནིཙྩཏཾ ཝཱ ཨུདཡབྦཡཔཱིལ༹ནཾ ¶ ཝཱ དྷཱརེཏུཾ ན སཀྐོཏི, ཀུཏོ ཏསྶ ཀཱརཀཱདིབྷཱཝོ. ཝུཏྟཉྩ ‘‘རཱུཔཉྩ ཧིདཾ, བྷིཀྑཝེ, ཨཏྟཱ ཨབྷཝིསྶ, ནཡིདཾ རཱུཔཾ ཨཱབཱདྷཱཡ སཾཝཏྟེཡྻཱ’’ཏིཨཱདི (མཧཱཝ. ༢༠). ‘‘ཨཏྟསཱརནིཙྩསཱརཝིརཧིཏཏྟཱ ཨནཏྟཱ’’ཏི ཨེཀེ.

ལཀྑཎཏྟིཀནིདྡེསཝཎྞནཱ ནིཊྛིཏཱ.

དུཀྑསཙྩནིདྡེསཝཎྞནཱ

༣༢-༣༣ .

ཨརིཡསཙྩཙཏུཀྐམྤི ¶ ཏཐཊྛེན སཙྩཱནཾ ཨེཀསམྦནྡྷཏྟཱ ཨེཀཏོ ཨེཝ ནིདྡིཊྛཾ. ཏཏྠ ཏཏྠཱཏི ཏེསུ ཙཏཱུསུ ཨརིཡསཙྩེསུ. ཀཏམནྟི ཀཐེཏུཀམྱཏཱཔུཙྪཱ ¶ . དུཀྑཾ ཨརིཡསཙྩནྟི པུཙྪིཏདྷམྨནིདསྶནཾ. ཏཏྠ ཛཱཏིཔི དུཀྑཱཏིཨཱདཱིསུ ཛཱཏིསདྡསྶ ཏཱཝ ཨནེཀེ ཨཏྠཱ པཝེདིཏཱ. ཡཐཱཧ –

‘‘བྷཝོ ཀུལཾ ནིཀཱཡོ ཙ, སཱིལཾ པཉྙཏྟི ལཀྑཎཾ;

པསཱུཏི སནྡྷི ཙེཝཱཏི, ཛཱཏིཨཏྠཱ པཝེདིཏཱ’’.

ཏཐཱ ཧིསྶ ‘‘ཨེཀམྤི ཛཱཏིཾ དྭེཔི ཛཱཏིཡོ’’ཏིཨཱདཱིསུ (པཱརཱ. ༡༢) བྷཝོ ཨཏྠོ. ‘‘ཨཀྑིཏྟོ ཨནུཔཀྐུཊྛོ ཛཱཏིཝཱདེནཱ’’ཏི (དཱི. ནི. ༡.༣༣༡) ཨེཏྠ ཀུལཾ. ‘‘ཨཏྠི, ཝིསཱཁེ, ནིགཎྛཱ ནཱམ སམཎཛཱཏཱི’’ཏི (ཨ. ནི. ༣.༧༡) ཨེཏྠ ནིཀཱཡོ. ‘‘ཡཏོཧཾ, བྷགིནི, ཨརིཡཱཡ ཛཱཏིཡཱ ཛཱཏོ ནཱབྷིཛཱནཱམཱི’’ཏི (མ. ནི. ༢.༣༥༡) ཨེཏྠ ཨརིཡསཱིལཾ. ‘‘ཏིརིཡཱ ནཱམ ཏིཎཛཱཏི ནཱབྷིཡཱ ཨུགྒནྟྭཱ ནབྷཾ ཨཱཧཙྩ ཋིཏཱ ཨཧོསཱི’’ཏི (ཨ. ནི. ༥.༡༩༦) ཨེཏྠ པཉྙཏྟི. ‘‘ཛཱཏི དྭཱིཧི ཁནྡྷེཧི སངྒཧིཏཱ’’ཏི (དྷཱཏུ. ༧༡) ཨེཏྠ སངྑཏལཀྑཎཾ. ‘‘སམྤཏིཛཱཏོ, ཨཱནནྡ, བོདྷིསཏྟོ’’ཏི (མ. ནི. ༣.༢༠༧) ཨེཏྠ པསཱུཏི. ‘‘བྷཝཔཙྩཡཱ ཛཱཏཱི’’ཏི (ཝིབྷ. ༣༥༤) ཙ ‘‘ཛཱཏིཔི དུཀྑཱ’’ཏི (པཊི. མ. ༡.༣༣; ཝིབྷ. ༡༩༠) ཙ ཨེཏྠ པརིཡཱཡཏོ པཊིསནྡྷིཁནྡྷཱ. ནིཔྤརིཡཱཡཏོ པན ཏཏྠ ཏཏྠ ནིབྦཏྟམཱནཱནཾ སཏྟཱནཾ ཡེ ཡེ ཁནྡྷཱ པཱཏུབྷཝནྟི, ཏེསཾ ཏེསཾ པཋམཾ པཱཏུབྷཱཝོ.

ཀསྨཱ པནེསཱ ཛཱཏི དུཀྑཱཏི ཙེ? ཨནེཀེསཾ དུཀྑཱནཾ ཝཏྠུབྷཱཝཏོ. ཨནེཀཱནི ཧི དུཀྑཱནི. སེཡྻཐིདཾ – དུཀྑདུཀྑཾ, ཝིཔརིཎཱམདུཀྑཾ, སངྑཱརདུཀྑཾ, པཊིཙྪནྣདུཀྑཾ, ཨཔྤཊིཙྪནྣདུཀྑཾ ¶ , པརིཡཱཡདུཀྑཾ, ནིཔྤརིཡཱཡདུཀྑནྟི. ཨེཏྠ ཀཱཡིཀཙེཏསིཀཱ དུཀྑཱ ཝེདནཱསབྷཱཝཏོ ཙ ནཱམཏོ ཙ དུཀྑཏྟཱ དུཀྑདུཀྑནྟི ¶ ཝུཙྩཏི. སུཁཱ ཝེདནཱ ཝིཔརིཎཱམེན དུཀྑུཔྤཏྟིཧེཏུཏོ ཝིཔརིཎཱམདུཀྑཾ. ཨུཔེཀྑཱཝེདནཱ ཙེཝ ཨཝསེསཱ ཙ ཏེབྷཱུམཀསངྑཱརཱ ཨུདཡབྦཡཔཊིཔཱིལི༹ཏཏྟཱ སངྑཱརདུཀྑཾ. ཀཎྞསཱུལདནྟསཱུལརཱགཛཔརིལཱ༹ཧདོསཛཔརིལཱ༹ཧཱདི ཀཱཡིཀཙེཏསིཀོ ཨཱབཱདྷོ པུཙྪིཏྭཱ ཛཱནིཏབྦཏོ ཨུཔཀྐམསྶ ཙ ཨཔཱཀཊབྷཱཝཏོ པཊིཙྪནྣདུཀྑཾ. དྭཏྟིཾསཀམྨཀཱརཎཱདིསམུཊྛཱནོ ཨཱབཱདྷོ ཨཔུཙྪིཏྭཱཝ ཛཱནིཏབྦཏོ ཨུཔཀྐམསྶ ཙ པཱཀཊབྷཱཝཏོ ཨཔྤཊིཙྪནྣདུཀྑཾ. ཋཔེཏྭཱ དུཀྑདུཀྑཾ སེསཾ དུཀྑསཙྩཝིབྷངྒེ ¶ (ཝིབྷ. ༡༩༠ ཨཱདཡོ) ཨཱགཏཾ ཛཱཏིཨཱདི སབྦམྤི ཏསྶ ཏསྶ དུཀྑསྶ ཝཏྠུབྷཱཝཏོ པརིཡཱཡདུཀྑཾ. དུཀྑདུཀྑཾ པན ནིཔྤརིཡཱཡདུཀྑནྟི ཝུཙྩཏི.

ཏཏྲཱཡཾ ཛཱཏི ཡཾ ཏཾ བཱལཔཎྜིཏསུཏྟཱདཱིསུ (མ. ནི. ༣.༢༤༦ ཨཱདཡོ) བྷགཝཏཱཔི ཨུཔམཱཝསེན པཀཱསིཏཾ ཨཱཔཱཡིཀཾ དུཀྑཾ, ཡཉྩ སུགཏིཡམྤི མནུསྶལོཀེ གབྦྷོཀྐནྟིམཱུལཀཱདིབྷེདཾ དུཀྑཾ ཨུཔྤཛྫཏི, ཏསྶ ཝཏྠུབྷཱཝཏོ དུཀྑཱ. ཏཏྲིདཾ གབྦྷོཀྐནྟིམཱུལཀཱདིབྷེདཾ དུཀྑཾ – ཨཡཉྷི སཏྟོ མཱཏུཀུཙྪིམྷི ནིབྦཏྟམཱནོ ན ཨུཔྤལཔདུམཔུཎྜརཱིཀཱདཱིསུ ནིབྦཏྟཏི, ཨཐ ཁོ ཧེཊྛཱ ཨཱམཱསཡསྶ ཨུཔརི པཀྐཱསཡསྶ ཨུདརཔཊལཔིཊྛིཀཎྚཀཱནཾ ཝེམཛ྄ཛྷེ པརམསམྦཱདྷེ ཏིབྦནྡྷཀཱརེ ནཱནཱཀུཎཔགནྡྷཔརིབྷཱཝིཏཔརམདུགྒནྡྷཔཝནཝིཙརིཏེ ཨདྷིམཏྟཛེགུཙྪེ ཀུཙྪིཔྤདེསེ པཱུཏིམཙྪཔཱུཏིཀུམྨཱསཙནྡནིཀཱདཱིསུ ཀིམི ཝིཡ ནིབྦཏྟཏི. སོ ཏཏྠ ནིབྦཏྟོ དས མཱསེ མཱཏུཀུཙྪིསམྦྷཝེན ཨུསྨནཱ པུཊཔཱཀཾ ཝིཡ པཙྩམཱནོ པིཊྛཔིཎྜི ཝིཡ སེདིཡམཱནོ སམིཉྫནཔསཱརཎཱདིཝིརཧིཏོ ཨདྷིམཏྟཾ དུཀྑཾ པཙྩནུབྷོཏཱིཏི. ཨིདཾ ཏཱཝ གབྦྷོཀྐནྟིམཱུལཀཾ དུཀྑཾ.

ཡཾ པན སོ མཱཏུ སཧསཱ ཨུཔཀྑལནགམནནིསཱིདནཨུཊྛཱནཔརིཝཏྟནཱདཱིསུ སུརཱདྷུཏྟཧཏྠགཏོ ཨེལ༹ཀོ ཝིཡ ཨཧིཏུཎྜིཀཧཏྠགཏོ སཔྤཔོཏཀོ ཝིཡ ཙ ཨཱཀཌྜྷནཔརིཀཌྜྷནཨོདྷུནནནིདྡྷུནནཱདིནཱ ཨུཔཀྐམེན ཨདྷིམཏྟཾ དུཀྑམནུབྷོཏི, ཡཉྩ མཱཏུ སཱིཏུདཀཔཱནཀཱལེ སཱིཏནརཀཱུཔཔནྣོ ¶ ཝིཡ ཨུཎྷཡཱགུབྷཏྟཱདིཨཛ྄ཛྷོཧརཎཀཱལེ ཨངྒཱརཝུཊྛིསམྤརིཀིཎྞོ ཝིཡ ལོཎམྦིལཱདིཨཛ྄ཛྷོཧརཎཀཱལེ ཁཱརཱཔཏཙྪིཀཱདིཀམྨཀཱརཎཔྤཏྟོ ཝིཡ ཨདྷིམཏྟཾ དུཀྑམནུབྷོཏི. ཨིདཾ གབྦྷཔརིཧརཎམཱུལཀཾ དུཀྑཾ.

ཡཾ པནསྶ མཱུལ༹ྷགབྦྷཱཡ མཱཏུཡཱ མིཏྟཱམཙྩསུཧཛྫཱདཱིཧིཔི ཨདསྶནཱརཧེ དུཀྑུཔྤཏྟིཊྛཱནེ ཚེདནཕཱལནཱདཱིཧི དུཀྑམནུབྷཝཏི. ཨིདཾ གབྦྷཝིཔཏྟིམཱུལཀཾ དུཀྑཾ.

ཡཾ ¶ ཝིཛཱཡམཱནཱཡ མཱཏུཡཱ ཀམྨཛེཧི ཝཱཏེཧི པརིཝཏྟེཏྭཱ ནརཀཔྤཔཱཏཾ ཝིཡ ཨཏིབྷཡཱནཀཾ ཡོནིམགྒཾ པཊིཔཱདིཡམཱནསྶ པརམསམྦཱདྷེན ཙ ཡོནིམུཁེན ཏཱལ༹ཙྪིགྒལེ༹ན ཝིཡ ནིཀཌྜྷིཡམཱནསྶ མཧཱནཱགསྶ ནརཀསཏྟསྶ ཝིཡ ཙ སངྒྷཱཏཔབྦཏེཧི ཝིཙུཎྞིཡམཱནསྶ དུཀྑམུཔྤཛྫཏི. ཨིདཾ ཝིཛཱཡནམཱུལཀཾ དུཀྑཾ.

ཡཾ ¶ པན ཛཱཏསྶ ཏརུཎཝཎསདིསསྶ སུཀུམཱརསརཱིརསྶ ཧཏྠགཧཎནྷཱཔནདྷོཝནཙོལ༹པརིམཛྫནཱདིཀཱལེ སཱུཙིམུཁཁུརདྷཱརཱཝིཛ྄ཛྷནཕཱལནསདིསཾ དུཀྑམུཔྤཛྫཏི. ཨིདཾ མཱཏུཀུཙྪིཏོ བཧི ནིཀྑམནམཱུལཀཾ དུཀྑཾ.

ཡཾ ཏཏོ པརཾ པཝཏྟིཡཾ ཨཏྟནཱཝ ཨཏྟཱནཾ ཝདྷེནྟསྶ ཨཙེལཀཝཏཱདིཝསེན ཨཱཏཱཔནཔརིཏཱཔནཱནུཡོགམནུཡུཏྟསྶ ཀོདྷཝསེན ཨབྷུཉྫནྟསྶ ཨུབྦནྡྷནྟསྶ ཙ དུཀྑཾ ཧོཏི. ཨིདཾ ཨཏྟུཔཀྐམམཱུལཀཾ དུཀྑཾ.

ཡཾ པན པརཏོ ཝདྷབནྡྷནཱདཱིནི ཨནུབྷཝནྟསྶ ཨུཔྤཛྫཏི. ཨིདཾ པརཱུཔཀྐམམཱུལཀཾདུཀྑནྟི. ཨིཏི ཨིམསྶ སབྦསྶཱཔི དུཀྑསྶ ཨཡཾ ཛཱཏི ཝཏྠུམེཝ ཧོཏི. ཏེནེཏཾ ཝུཙྩཏི –

‘‘ཛཱཡེཐ ནོ ཙེ ནརཀེསུ སཏྟོ, ཏཏྠགྒིདཱཧཱདིཀམཔྤསཡ྄ཧཾ;

ལབྷེཐ དུཀྑཾ ནུ ཀུཧིཾ པཏིཊྛཾ, ཨིཙྩཱཧ དུཀྑཱཏི མུནཱིདྷ ཛཱཏིཾ.

‘‘དུཀྑཾ ཏིརཙྪེསུ ཀསཱཔཏོད-

དཎྜཱབྷིགྷཱཏཱདིབྷཝཾ ཨནེཀཾ;

ཡཾ ཏཾ ཀཐཾ ཏཏྠ བྷཝེཡྻ ཛཱཏིཾ,

ཝིནཱ ཏཧིཾ ཛཱཏི ཏཏོཔི དུཀྑཱ.

‘‘པེཏེསུ ¶ དུཀྑཾ པན ཁུཔྤིཔཱསཱ-

ཝཱཏཱཏཔཱདིཔྤབྷཝཾ ཝིཙིཏྟཾ;

ཡསྨཱ ཨཛཱཏསྶ ན ཏཏྠ ཨཏྠི,

ཏསྨཱཔི དུཀྑཾ མུནི ཛཱཏིམཱཧ.

‘‘ཏིབྦནྡྷཀཱརེ ¶ ཙ ཨསཡ྄ཧསཱིཏེ,

ལོཀནྟརེ ཡཾ ཨསུརེསུ དུཀྑཾ;

ན ཏཾ བྷཝེ ཏཏྠ ན ཙསྶ ཛཱཏི,

ཡཏོ ཨཡཾ ཛཱཏི ཏཏོཔི དུཀྑཱ.

‘‘ཡཉྩཱཔི ¶ གཱུཐནརཀེ ཝིཡ མཱཏུགབྦྷེ,

སཏྟོ ཝསཾ ཙིརམཏོ བཧི ནིཀྑམཉྩ;

པཔྤོཏི དུཀྑམཏིགྷོརམིདམྤི ནཏྠི,

ཛཱཏིཾ ཝིནཱ ཨིཏིཔི ཛཱཏི ཨཡཉྷི དུཀྑཱ.

‘‘ཀིཾ བྷཱསིཏེན བཧུནཱ ནནུ ཡཾ ཀུཧིཉྩི,

ཨཏྠཱིདྷ ཀིཉྩིདཔི དུཀྑམིདཾ ཀདཱཙི;

ནེཝཏྠི ཛཱཏིཝིརཧེ ཡདཏོ མཧེསཱི,

དུཀྑཱཏི སབྦཔཋམཾ ཨིམམཱཧ ཛཱཏི’’ནྟི.

ཛརཱཔི དུཀྑཱཏི ཨེཏྠ དུཝིདྷཱ ཛརཱ སངྑཏལཀྑཎཉྩ, ཁཎྜིཙྩཱདིསམྨཏོ སནྟཏིཡཾ ཨེཀབྷཝཔརིཡཱཔནྣཁནྡྷཔུརཱཎབྷཱཝོ ཙ. སཱ ཨིདྷ ཨདྷིཔྤེཏཱ. སཱ པནེསཱ དུཀྑཱ སངྑཱརདུཀྑབྷཱཝཏོ ཙེཝ དུཀྑཝཏྠུཏོ ཙ. ཡཾ ཧིདཾ ཨངྒཔཙྩངྒསིཐིལཱིབྷཱཝཨིནྡྲིཡཝིཀཱརཝིརཱུཔཏཱ ཡོབྦནཝིནཱསབལཱུཔགྷཱཏསཏིམཏིཝིཔྤཝཱསཔརཔརིབྷཝཱདིཨནེཀཔྤཙྩཡཾ ཀཱཡིཀཙེཏསིཀཾ དུཀྑམུཔྤཛྫཏི, ཛརཱ ཏསྶ ཝཏྠུ. ཏེནེཏཾ ཝུཙྩཏི –

‘‘ཨངྒཱནཾ སིཐིལཱིབྷཱཝཱ, ཨིནྡྲིཡཱནཾ ཝིཀཱརཏོ;

ཡོབྦནསྶ ཝིནཱསེན, བལསྶ ཨུཔགྷཱཏཏོ.

‘‘ཝིཔྤཝཱསཱ སཏཱདཱིནཾ, པུཏྟདཱརེཧི ཨཏྟནོ;

ཨཔྤསཱདནཱིཡཏོ ཙེཝ, བྷིཡྻོ བཱལཏྟཔཏྟིཡཱ.

‘‘པཔྤོཏི ¶ དུཀྑཾ ཡཾ མཙྩོ, ཀཱཡིཀཾ མཱནསཾ ཏཐཱ;

སབྦམེཏཾ ཛརཱཧེཏུ, ཡསྨཱ ཏསྨཱ ཛརཱ དུཁཱ’’ཏི.

ཛརཱདུཀྑཱནནྟརཾ ¶ བྱཱདྷིདུཀྑེ ཝཏྟབྦེཔི ཀཱཡིཀདུཀྑགཧཎེནེཝ བྱཱདྷིདུཀྑཾ གཧིཏཾ ཧོཏཱིཏི ན ཝུཏྟནྟི ཝེདིཏབྦཾ.

མརཎམྤི དུཀྑནྟི ཨེཏྠཱཔི དུཝིདྷཾ མརཎཾ – སངྑཏལཀྑཎཉྩ, ཡཾ སནྡྷཱཡ ཝུཏྟཾ – ‘‘ཛརཱམརཎཾ དྭཱིཧི ཁནྡྷེཧི སངྒཧིཏ’’ནྟི (དྷཱཏུ. ༧༡). ཨེཀབྷཝཔརིཡཱཔནྣཛཱིཝིཏིནྡྲིཡཔྤབནྡྷཝིཙྪེདོ ཙ, ཡཾ སནྡྷཱཡ ཝུཏྟཾ – ‘‘ནིཙྩཾ མརཎཏོ བྷཡ’’ནྟི (སུ. ནི. ༥༨༡). ཏཾ ཨིདྷ ཨདྷིཔྤེཏཾ. ཛཱཏིཔཙྩཡམརཎཾ ཨུཔཀྐམམརཎཾ སརསམརཎཾ ཨཱཡུཀྑཡམརཎཾ པུཉྙཀྑཡམརཎནྟིཔི ཏསྶེཝ ནཱམཾ. པུན ཁཎིཀམརཎཾ སམྨུཏིམརཎཾ སམུཙྪེདམརཎནྟི ཨཡམྤེཏྠ བྷེདོ ཝེདིཏབྦོ. པཝཏྟེ རཱུཔཱརཱུཔདྷམྨཱནཾ བྷེདོ ¶ ཁཎིཀམརཎཾ ནཱམ. ‘‘ཏིསྶོ མཏོ, ཕུསྶོ མཏོ’’ཏི ཨིདཾ པརམཏྠཏོ སཏྟསྶ ཨབྷཱཝཱ, ‘‘སསྶཾ མཏཾ, རུཀྑོ མཏོ’’ཏི ཨིདཾ ཛཱིཝིཏིནྡྲིཡསྶ ཨབྷཱཝཱ སམྨུཏིམརཎཾ ནཱམ. ཁཱིཎཱསཝསྶ ཨཔྤཊིསནྡྷིཀཱ ཀཱལཀིརིཡཱ སམུཙྪེདམརཎཾ ནཱམ. བཱཧིརཀཾ སམྨུཏིམརཎཾ ཋཔེཏྭཱ ཨིཏརཾ སམྨུཏིམརཎཉྩ སམུཙྪེདམརཎཉྩ ཡཐཱཝུཏྟཔབནྡྷཝིཙྪེདེནེཝ སངྒཧིཏཾ. དུཀྑསྶ པན ཝཏྠུབྷཱཝཏོ དུཀྑཾ. ཏེནེཏཾ ཝུཙྩཏི –

‘‘པཱཔསྶ པཱཔཀམྨཱདིནིམིཏྟམནུཔསྶཏོ;

བྷདྡསྶཱཔསཧནྟསྶ, ཝིཡོགཾ པིཡཝཏྠུཀཾ;

མཱིཡམཱནསྶ ཡཾ དུཀྑཾ, མཱནསཾ ཨཝིསེསཏོ.

‘‘སབྦེསཉྩཱཔི ཡཾ སནྡྷིབནྡྷནཙྪེདནཱདིཀཾ;

ཝིཏུཛྫམཱནམམྨཱནཾ ¶ , ཧོཏི དུཀྑཾ སརཱིརཛཾ.

‘‘ཨསཡ྄ཧམཔྤཊིཀཱརཾ, དུཀྑསྶེཏསྶིདཾ ཡཏོ;

མརཎཾ ཝཏྠུ ཏེནེཏཾ, དུཀྑམིཙྩེཝ བྷཱསིཏ’’ནྟི.

སོཀཱདཱིསུ སོཀོ ནཱམ ཉཱཏིབྱསནཱདཱིཧི ཕུཊྛསྶ ཨནྟོནིཛ྄ཛྷཱནལཀྑཎོ ཙིཏྟསནྟཱཔོ. དུཀྑོ པན དུཀྑདུཀྑཏོ དུཀྑཝཏྠུཏོ ཙ. ཏེནེཏཾ ཝུཙྩཏི –

‘‘སཏྟཱནཾ ཧདཡཾ སོཀོ, ཝིསསལླཾཝ ཏུཛྫཏི;

ཨགྒིཏཏྟོཝ ནཱརཱཙོ, བྷུསཾཝ དཧཏེ པུན.

‘‘སམཱཝཧཏི ¶ བྱཱདྷིཉྩ, ཛརཱམརཎབྷེདནཾ;

དུཀྑམྤི ཝིཝིདྷཾ ཡསྨཱ, ཏསྨཱ དུཀྑོཏི ཝུཙྩཏཱི’’ཏི.

པརིདེཝོ ནཱམ ཉཱཏིབྱསནཱདཱིཧི ཕུཊྛསྶ ཝཙཱིཔལཱཔོ. དུཀྑོ པན སངྑཱརདུཀྑབྷཱཝཏོ དུཀྑཝཏྠུཏོ ཙ. ཏེནེཏཾ ཝུཙྩཏི –

‘‘ཡཾ སོཀསལླཝིཧཏོ པརིདེཝམཱནོ, ཀཎྛོཊྛཏཱལུཏལསོསཛམཔྤསཡ྄ཧཾ;

བྷིཡྻོདྷིམཏྟམདྷིགཙྪཏིཡེཝ དུཀྑཾ, དུཀྑོཏི ཏེན བྷགཝཱ པརིདེཝམཱཧཱ’’ཏི.

དུཀྑཾ ནཱམ ཀཱཡཔཱིལ༹ནལཀྑཎཾ ཀཱཡིཀདུཀྑཾ. དུཀྑཾ པན དུཀྑདུཀྑཏོ མཱནསདུཀྑཱཝཧནཏོ ཙ. ཏེནེཏཾ ཝུཙྩཏི –

‘‘པཱིལེ༹ཏི ¶ ཀཱཡིཀམིདཾ, དུཀྑཾ དུཀྑཉྩ མཱནསཾ བྷིཡྻོ;

ཛནཡཏི ཡསྨཱ ཏསྨཱ, དུཀྑནྟི ཝིསེསཏོ ཝུཏྟ’’ནྟི.

དོམནསྶཾ ནཱམ ཙིཏྟཔཱིལ༹ནལཀྑཎཾ མཱནསཾ དུཀྑཾ. དུཀྑཾ པན དུཀྑདུཀྑཏོ ཀཱཡིཀདུཀྑཱཝཧནཏོ ཙ. ཙེཏོདུཀྑསམཔྤིཏཱ ¶ ཧི ཀེསེ པཀིརིཡ ཀནྡནྟི, ཨུརཱནི པཊིཔིསནྟི, ཨཱཝཊྚནྟི, ཝིཝཊྚནྟི, ཨུདྡྷཾཔཱདཾ པཔཏནྟི, སཏྠཾ ཨཱཧརནྟི, ཝིསཾ ཁཱདནྟི, རཛྫུཡཱ ཨུབྦནྡྷནྟི, ཨགྒིཾ པཝིསནྟཱིཏི ནཱནཔྤཀཱརཀཾ དུཀྑམནུབྷཝནྟི. ཏེནེཏཾ ཝུཙྩཏི –

‘‘པཱིལེ༹ཏི ཡཏོ ཙིཏྟཾ, ཀཱཡསྶ ཙ པཱིལ༹ནཾ སམཱཝཧཏི;

དུཀྑནྟི དོམནསྶཾ, ཝིདོམནསྶཱ ཏཏོ ཨཱཧཱུ’’ཏི.

ཨུཔཱཡཱསོ ནཱམ ཉཱཏིབྱསནཱདཱིཧི ཕུཊྛསྶ ཨདྷིམཏྟཙེཏོདུཀྑཔྤབྷཱཝིཏོ དོསོཡེཝ. ‘‘སངྑཱརཀྑནྡྷཔརིཡཱཔནྣོ ཨེཀོ དྷམྨོ’’ཏི ཨེཀེ. དུཀྑོ པན སངྑཱརདུཀྑབྷཱཝཏོ ཙིཏྟཔརིདཧནཏོ ཀཱཡཝིསཱདནཏོ ཙ. ཏེནེཏཾ ཝུཙྩཏི –

‘‘ཙིཏྟསྶ ཙ པརིདཧནཱ, ཀཱཡསྶ ཝིསཱདནཱ ཙ ཨདྷིམཏྟཾ;

ཡཾ དུཀྑམུཔཱཡཱསོ, ཛནེཏི དུཀྑོ ཏཏོ ཝུཏྟོ’’ཏི.

ཨེཏྠ ¶ ཙ མནྡགྒིནཱ ཨནྟོབྷཱཛནེ པཱཀོ ཝིཡ སོཀོ, ཏིཀྑགྒིནཱ པཙྩམཱནསྶ བྷཱཛནཏོ བཧིནིཀྑམནཾ ཝིཡ པརིདེཝོ, བཧིནིཀྑནྟཱཝསེསསྶ ནིཀྑམིཏུམྤི ཨཔྤཧོནྟསྶ ཨནྟོབྷཱཛནེཡེཝ ཡཱཝ པརིཀྑཡཱ པཱཀོ ཝིཡ ཨུཔཱཡཱསོ དཊྛབྦོ.

ཨཔྤིཡསམྤཡོགོ ནཱམ ཨཔྤིཡེཧི སཏྟསངྑཱརེཧི སམོདྷཱནཾ. དུཀྑོ པན དུཀྑཝཏྠུཏོ. ཏེནེཏཾ ཝུཙྩཏི –

‘‘དིསྭཱཝ ཨཔྤིཡེ དུཀྑཾ, པཋམཾ ཧོཏི ཙེཏསི;

ཏདུཔཀྐམསམྦྷཱུཏམཐ ཀཱཡེ ཡཏོ ཨིདྷ.

‘‘ཏཏོ ¶ དུཀྑདྭཡསྶཱཔི, ཝཏྠུཏོ སོ མཧེསིནཱ;

དུཀྑོ ཝུཏྟོཏི ཝིཉྙེཡྻོ, ཨཔྤིཡེཧི སམཱགམོ’’ཏི.

པིཡཝིཔྤཡོགོ ནཱམ པིཡེཧི སཏྟསངྑཱརེཧི ཝིནཱབྷཱཝོ. དུཀྑོ པན དུཀྑཝཏྠུཏོ. ཏེནེཏཾ ཝུཙྩཏི –

‘‘ཉཱཏིདྷནཱདིཝིཡོགཱ ¶ , སོཀསརསམཔྤིཏཱ ཝིཏུཛྫནྟི;

བཱལཱ ཡཏོ ཏཏོཡཾ, དུཀྑོཏི མཏོ པིཡཝིཡོགོ’’ཏི.

ཨིཙྪིཏཱལཱབྷེ ཨལབྦྷནེཡྻཝཏྠཱུསུ ཨིཙྪཱཝ ཡམྤིཙྪཾ ན ལབྷཏི, ཏམྤི དུཀྑནྟི ཝུཏྟཱ. ཡེནཔི དྷམྨེན ཨལབྦྷནེཡྻཾ ཝཏྠུཾ ཨིཙྪནྟོ ན ལབྷཏི, ཏམྤི ཨལབྦྷནེཡྻཝཏྠུམྷི ཨིཙྪནཾ དུཀྑནྟི ཨཏྠོ. དུཀྑཾ པན དུཀྑཝཏྠུཏོ. ཏེནེཏཾ ཝུཙྩཏི –

‘‘ཏཾ ཏཾ པཏྠཡམཱནཱནཾ, ཏསྶ ཏསྶ ཨལཱབྷཏོ;

ཡཾ ཝིགྷཱཏམཡཾ དུཀྑཾ, སཏྟཱནཾ ཨིདྷ ཛཱཡཏི.

‘‘ཨལབྦྷནེཡྻཝཏྠཱུནཾ, པཏྠནཱ ཏསྶ ཀཱརཎཾ;

ཡསྨཱ ཏསྨཱ ཛིནོ དུཀྑཾ, ཨིཙྪིཏཱལཱབྷམབྲཝཱི’’ཏི.

སངྑིཏྟེན པཉྩུཔཱདཱནཀྑནྡྷཱཏི ཨེཏྠ པན སངྑིཏྟེནཱཏི དེསནཾ སནྡྷཱཡ ཝུཏྟཾ. དུཀྑཉྷི ཨེཏྟཀཱནི ¶ དུཀྑསཏཱནཱིཏི ཝཱ ཨེཏྟཀཱནི དུཀྑསཧསྶཱནཱིཏི ཝཱ སངྑིཔིཏུཾ ན སཀྐཱ, དེསནཱ པན སཀྐཱ. ཏསྨཱ ‘‘དུཀྑཾ ནཱམ ན ཨཉྙཾ ཀིཉྩི, སཾཁིཏྟེན པཉྩུཔཱདཱནཀྑནྡྷཱ དུཀྑཱ’’ཏི དེསནཾ སངྑིཔནྟོ ཨེཝམཱཧ. པཉྩཱཏི གཎནཔརིཙྪེདོ. ཨུཔཱདཱནཀྑནྡྷཱཏི ཨུཔཱདཱནགོཙརཱ ཁནྡྷཱ.

ཛཱཏིཔྤབྷུཏིཀཾ ¶ དུཀྑཾ, ཡཾ ཝུཏྟམིདྷ ཏཱདིནཱ;

ཨཝུཏྟཾ ཡཉྩ ཏཾ སབྦཾ, ཝིནཱ ཨེཏེན ཝིཛྫཏི.

ཡསྨཱ ཏསྨཱ ཨུཔཱདཱནཀྑནྡྷཱ སངྑེཔཏོ ཨིམེ;

དུཀྑཱཏི ཝུཏྟཱ དུཀྑནྟ-དེསཀེན མཧེསིནཱ.

ཏཐཱ ཧི ཨིནྡྷནམིཝ པཱཝཀོ, ལཀྑམིཝ པཧརཎཱནི, གོརཱུཔཾ ཝིཡ ཌཾསམཀསཱདཡོ, ཁེཏྟམིཝ ལཱཡཀཱ, གཱམཾ ཝིཡ གཱམགྷཱཏཀཱ, ཨུཔཱདཱནཀྑནྡྷཔཉྩཀམེཝ ཛཱཏིཨཱདཡོ ནཱནཔྤཀཱརེཧི ཝིབཱདྷེནྟཱ ཏིཎལཏཱདཱིནི ཝིཡ བྷཱུམིཡཾ, པུཔྥཕལཔལླཝཱནི ཝིཡ རུཀྑེསུ ཨུཔཱདཱནཀྑནྡྷེསུཡེཝ ནིབྦཏྟནྟི. ཨུཔཱདཱནཀྑནྡྷཱནཉྩ ཨཱདིདུཀྑཾ ཛཱཏི, མཛ྄ཛྷེདུཀྑཾ ཛརཱ, པརིཡོསཱནདུཀྑཾ མརཎཾ, མཱརཎནྟིཀདུཀྑཱབྷིགྷཱཏེན པརིཌཡ྄ཧནདུཀྑཾ སོཀོ ¶ , ཏདསཧནཏོ ལཱལཔྤནདུཀྑཾ པརིདེཝོ, ཏཏོ དྷཱཏུཀྑོབྷསངྑཱཏཨནིཊྛཕོཊྛབྦསམཱཡོགཏོ ཀཱཡསྶ ཨཱབཱདྷནདུཀྑཾ དུཀྑཾ, ཏེན ཨཱབཱདྷིཡམཱནཱནཾ པུཐུཛྫནཱནཾ ཏཏྠ པཊིགྷུཔྤཏྟིཏོ ཙེཏོབཱདྷནདུཀྑཾ དོམནསྶཾ, སོཀཱདིཝུདྡྷིཡཱ ཛནིཏཝིསཱདཱནཾ ཨནུཏྠུནནདུཀྑཾ ཨུཔཱཡཱསོ, མནོརཐཝིགྷཱཏཔྤཏྟཱནཾ ཨིཙྪཱཝིགྷཱཏདུཀྑཾ ཨིཙྪིཏཱལཱབྷོཏི ཨེཝཾ ནཱནཔྤཀཱརཏོ ཨུཔཔརིཀྑིཡམཱནཱ ཨུཔཱདཱནཀྑནྡྷཱཝ དུཀྑཱཏི ཡདེཏཾ ཨེཀམེཀཾ དསྶེཏྭཱ ཝུཙྩམཱནཾ ཨནེཀེཧིཔི ཀཔྤེཧི ན སཀྐཱ ཨནཝསེསཏོ ཝཏྟུཾ, ཏཾ སབྦམྤི དུཀྑཾ ཨེཀཛལབིནྡུམྷི སཀལསམུདྡཛལརསཾ ཝིཡ ཡེསུ ཀེསུཙི པཉྩསུ ཨུཔཱདཱནཀྑནྡྷེསུ སངྑིཔིཏྭཱ དསྶེཏུཾ ‘‘སངྑིཏྟེན པཉྩུཔཱདཱནཀྑནྡྷཱ དུཀྑཱ’’ཏི བྷགཝཏཱ ཝུཏྟམེཝ ཐེརོ ཨཝོཙཱཏི.

ཏཏྠ ཀཏམཱ ཛཱཏཱིཏིཨཱདཱིསུ པདབྷཱཛནཱིཡེསུ ཏཏྠཱཏི དུཀྑསཙྩནིདྡེསེ ཝུཏྟེསུ ཛཱཏིཨཱདཱིསུ. ཡཱ ཏེསཾ ཏེསཾ སཏྟཱནནྟི སངྑེཔཏོ ཨནེཀེསཾ སཏྟཱནཾ སཱདྷཱརཎནིདྡེསོ. ཡཱ དེཝདཏྟསྶ ཛཱཏི, ཡཱ སོམདཏྟསྶ ཛཱཏཱིཏི ཨེཝཉྷི དིཝསམྤི ཀཐིཡམཱནེ ནེཝ སཏྟཱ པརིཡཱདཱནཾ གཙྪནྟི, ན སབྦཾ ཨཔརཏྠདཱིཔནཾ སིཛ྄ཛྷཏི, ཨིམེཧི པན དྭཱིཧི པདེཧི ¶ ན ཀོཙི སཏྟོ ཨཔརིཡཱདིནྣོ ཧོཏི, ན ཀིཉྩི ཨཔརཏྠདཱིཔནཾ ན སིཛ྄ཛྷཏི. ཏམྷི ཏམྷཱིཏི ཨཡཾ གཏིཛཱཏིཝསེན ¶ ཨནེཀེསཾ སཏྟནིཀཱཡཱནཾ སཱདྷཱརཎནིདྡེསོ. སཏྟནིཀཱཡེཏི སཏྟཱནཾ ནིཀཱཡེ, སཏྟགྷཊཱཡཾ སཏྟསམཱུཧེཏི ཨཏྠོ. ཛཱཏཱིཏི ཛཱཡནཝསེན. ཨིདམེཏྠ སབྷཱཝཔཙྩཏྟཾ. སཉྫཱཏཱིཏི སཉྫཱཡནཝསེན. ཨུཔསགྒེན པདཾ ཝཌྜྷིཏཾ. ཨོཀྐནྟཱིཏི ཨོཀྐམནཝསེན. ཛཱཡནཊྛེན ཝཱ ཛཱཏི, སཱ ཨཔརིཔུཎྞཱཡཏནཝསེན ཝུཏྟཱ. སཉྫཱཡནཊྛེན སཉྫཱཏི, སཱ པརིཔུཎྞཱཡཏནཝསེན ཝུཏྟཱ. ཨོཀྐམནཊྛེན ཨོཀྐནྟི, སཱ ཨཎྜཛཛལཱབུཛཝསེན ཝུཏྟཱ. ཏེ ཧི ཨཎྜཀོསཾ ཝཏྠིཀོསཉྩ ཨོཀྐམནྟི, ཨོཀྐམནྟཱ པཝིསནྟཱ ཝིཡ པཊིསནྡྷིཾ གཎྷནྟི. ཨབྷིནིབྦཏྟནཊྛེན ཨབྷིནིབྦཏྟི, སཱ སཾསེདཛཨོཔཔཱཏིཀཝསེན ཝུཏྟཱ. ཏེ ཧི པཱཀཊཱ ཨེཝ ཧུཏྭཱ ནིབྦཏྟནྟི, ཨཡཾ ཏཱཝ སམྨུཏིཀཐཱ.

ཨིདཱནི ཁནྡྷཱནཾ པཱཏུབྷཱཝོ, ཨཱཡཏནཱནཾ པཊིལཱབྷོཏི པརམཏྠཀཐཱ ཧོཏི. ཁནྡྷཱ ཨེཝ ཧི པརམཏྠཏོ པཱཏུབྷཝནྟི, ན སཏྟཱ. ཨེཏྠ ཙ ཁནྡྷཱནནྟི ཨེཀཝོཀཱརབྷཝེ ཨེཀསྶ, ཙཏུཝོཀཱརབྷཝེ ཙཏུནྣཾ, པཉྩཝོཀཱརབྷཝེ པཉྩནྣམྤི གཧཎཾ ཝེདིཏབྦཾ. པཱཏུབྷཱཝོཏི ཨུཔྤཏྟི. ཨཱཡཏནཱནནྟི ¶ ཏཏྲ ཏཏྲ ཨུཔྤཛྫམཱནཱཡཏནཝསེན སངྒཧོ ཝེདིཏབྦོ. པཊིལཱབྷོཏི སནྟཏིཡཾ པཱཏུབྷཱཝོཡེཝ. པཱཏུབྷཝནྟཱནེཝ ཧི ཏཱནི པཊིལདྡྷཱནི ནཱམ ཧོནྟི. ཨཡཾ ཝུཙྩཏི ཛཱཏཱིཏི ཨཡཾ ཛཱཏི ནཱམ ཀཐཱིཡཏི.

ཛརཱནིདྡེསེ ཛརཱཏི སབྷཱཝཔཙྩཏྟཾ. ཛཱིརཎཏཱཏི ཨཱཀཱརནིདྡེསོ. ཁཎྜིཙྩནྟིཨཱདཡོ ཏཡོ ཀཱལཱཏིཀྐམེ ཀིཙྩནིདྡེསཱ, པཙྪིམཱ དྭེ པཀཏིནིདྡེསཱ. ཨཡཉྷི ཛརཱཏི ཨིམིནཱ པདེན སབྷཱཝཏོ དཱིཔིཏཱ, ཏེནསྶཱ ཨིདཾ སབྷཱཝཔཙྩཏྟཾ. ཛཱིརཎཏཱཏི ཨིམིནཱ ཨཱཀཱརཏོ, ཏེནསྶཱཡཾ ཨཱཀཱརནིདྡེསོ. ཁཎྜིཙྩནྟི ཨིམིནཱ ཀཱལཱཏིཀྐམེ དནྟནཁཱནཾ ཁཎྜིཏབྷཱཝཀརཎཀིཙྩཏོ. པཱལིཙྩནྟི ཨིམིནཱ ཀེསལོམཱནཾ པལིཏབྷཱཝཀརཎཀིཙྩཏོ. ཝལིཏྟཙཏཱཏི ཨིམིནཱ མཾསཾ མིལཱཔེཏྭཱ ཏཙེ ཝལིབྷཱཝཀརཎཀིཙྩཏོ དཱིཔིཏཱ. ཏེནསྶཱ ཨིམེ ཏཡོ ཀཱལཱཏིཀྐམེ ཀིཙྩནིདྡེསཱ. ཏེཧི ཨིམེསཾ ཝིཀཱརཱནཾ དསྶནཝསེན པཱཀཊཱིབྷཱུཏཱ པཱཀཊཛརཱ དསྶིཏཱ. ཡཐེཝ ཧི ཨུདཀསྶ ¶ ཝཱ ཝཱཏསྶ ཝཱ ཨགྒིནོ ཝཱ ཏིཎརུཀྑཱདཱིནཾ སམྦྷགྒཔལིབྷགྒཏཱཡ ཝཱ ཛྷཱམཏཱཡ ཝཱ གཏམགྒོ པཱཀཊོ ཧོཏི, ན ཙ སོ གཏམགྒོ ཏཱནེཝ ཨུདཀཱདཱིནི, ཨེཝམེཝ ཛརཱཡ དནྟཱདཱིསུ ཁཎྜིཙྩཱདིཝསེན གཏམགྒོ པཱཀཊོ ཙཀྑུཾ ཨུམྨཱིལེཏྭཱཔི གཡ྄ཧཏི, ན ཙ ཁཎྜིཙྩཱདཱིནེཝ ཛརཱ. ན ཧི ཛརཱ ཙཀྑུཝིཉྙེཡྻཱ ཧོཏི.

ཨཱཡུནོ སཾཧཱནི ཨིནྡྲིཡཱནཾ པརིཔཱཀོཏི ཨིམེཧི པན པདེཧི ཀཱལཱཏིཀྐམེཡེཝ ཨབྷིབྱཏྟཱཡ ཨཱཡུཀྑཡཙཀྑཱདིཨིནྡྲིཡཔརིཔཱཀསངྑཱཏཱཡ པཀཏིཡཱ དཱིཔིཏཱ, ཏེནསྶིམེ དྭེ པཀཏིནིདྡེསཱཏི ¶ ཝེདིཏབྦཱ. ཏཏྠ ཡསྨཱ ཛརཾ པཏྟསྶ ཨཱཡུ ཧཱཡཏི, ཏསྨཱ ཛརཱ ‘‘ཨཱཡུནོ སཾཧཱནཱི’’ཏི ཕལཱུཔཙཱརེན ཝུཏྟཱ. ཡསྨཱ ཙ དཧརཀཱལེ སུཔྤསནྣཱནི སུཁུམམྤི ཨཏྟནོ ཝིསཡཾ སུཁེནེཝ གཎྷནསམཏྠཱནི ཙཀྑཱདཱིནི ཨིནྡྲིཡཱནི ཛརཾ པཏྟསྶ པརིཔཀྐཱནི ཨཱལུལི༹ཏཱནི ཨཝིསདཱནི ཨོལཱ༹རིཀམྤི ཨཏྟནོ ཝིསཡཾ གཧེཏུཾ ཨསམཏྠཱནི ཧོནྟི, ཏསྨཱ ‘‘ཨིནྡྲིཡཱནཾ པརིཔཱཀོ’’ཏི ཕལཱུཔཙཱརེནེཝ ཝུཏྟཱ.

སཱ པནེསཱ ཨེཝཾ ནིདྡིཊྛཱ སབྦཱཔི ཛརཱ པཱཀཊཱ པཊིཙྪནྣཱཏི དུཝིདྷཱ ཧོཏི. ཏཏྠ དནྟཱདཱིསུ ཁཎྜཱདིབྷཱཝདསྶནཏོ རཱུཔདྷམྨེསུ ཛརཱ པཱཀཊཛརཱ ནཱམ. ཨརཱུཔདྷམྨེསུ པན ཛརཱ ཏཱདིསསྶ ཝིཀཱརསྶ ཨདསྶནཏོ ¶ པཊིཙྪནྣཛརཱ ནཱམ. ཏཏྲ ཡྭཱཡཾ ཁཎྜཱདིབྷཱཝོ དིསྶཏི, སོ ཏཱདིསཱནཾ དནྟཱདཱིནཾ ཝཎྞོཡེཝ. ཏཾ ཙཀྑུནཱ དིསྭཱ མནོདྭཱརེན ཙིནྟེཏྭཱ ‘‘ཨིམེ དནྟཱ ཛརཱཡ པཧཊཱ’’ཏི ཛརཾ ཛཱནཱཏི, ཨུདཀཊྛཱནེ བདྡྷཱནི གོསིངྒཱདཱིནི ཨོལོཀེཏྭཱ ཧེཊྛཱ ཨུདཀསྶ ཨཏྠིབྷཱཝཛཱནནཾ ཝིཡ. པུན ཨཡཾ ཛརཱ སཝཱིཙི ཨཝཱིཙཱིཏི ཨེཝམྤི དུཝིདྷཱ ཧོཏི. ཏཏྠ མཎིཀནཀརཛཏཔཝཱལ༹ཙནྡསཱུརིཡཱདཱིནཾ མནྡདསཀཱདཱིསུ པཱཎཱིནཾ ཝིཡ, པུཔྥཕལཔལླཝཱདཱིསུ ཨཔཱཎཱིནཾ ཝིཡ ཙ ཨནྟརནྟརཱ ཝཎྞཝིསེསཱདཱིནཾ དུབྦིཉྙེཡྻཏྟཱ ཛརཱ ཨཝཱིཙིཛརཱ ནཱམ, ནིརནྟརཛརཱཏི ཨཏྠོ. ཏཏོ ཨཉྙེསུ པན ཡཐཱཝུཏྟེསུ ཨནྟརནྟརཱ ཝཎྞཝིསེསཱདཱིནཾ སུཝིཉྙེཡྻཏྟཱ ཛརཱ སཝཱིཙིཛརཱ ནཱམ.

ཏཏྠ སཝཱིཙིཛརཱ ཨུཔཱདིཎྞཀཨནུཔཱདིཎྞཀཝསེན ཨེཝཾ ཝེདིཏབྦཱ – དཧརཀུམཱརཀཱནཉྷི པཋམམེཝ ཁཱིརདནྟཱ ནཱམ ཨུཊྛཧནྟི, ན ཏེ ཐིརཱ. ཏེསུ པན པཏིཏེསུ པུན ¶ དནྟཱ ཨུཊྛཧནྟི. ཏེ པཋམམེཝ སེཏཱ ཧོནྟི, ཛརཱཝཱཏེན པཧཊཀཱལེ ཀཱལ༹ཀཱ ཧོནྟི. ཀེསཱ པཋམམེཝ ཏམྦཱ ཧོནྟི, ཏཏོ ཀཱལ༹ཀཱ, ཏཏོ སེཏཱ. ཚཝི པན སལོཧིཏིཀཱ ཧོཏི. ཝཌྜྷནྟཱནཾ ཝཌྜྷནྟཱནཾ ཨོདཱཏཱནཾ ཨོདཱཏབྷཱཝོ, ཀཱལ༹ཀཱནཾ ཀཱལ༹ཀབྷཱཝོ པཉྙཱཡཏི. ཛརཱཝཱཏེན པན པཧཊཀཱལེ ཝལིཾ གཎྷཱཏི. སབྦམྤི སསྶཾ ཝཔིཏཀཱལེ སེཏཾ ཧོཏི, པཙྪཱ ནཱིལཾ. ཛརཱཝཱཏེན པན པཧཊཀཱལེ པཎྜུཀཾ ཧོཏི. ཨམྦངྐུརེནཱཔི དཱིཔེཏུཾ ཝཊྚཏི.

མརཎནིདྡེསེ ཙུཏཱིཏི ཙཝནཝསེན ཝུཏྟཾ. ཨེཀཙཏུཔཉྩཀྑནྡྷཱནཾ སཱམཉྙཝཙནམེཏཾ. ཙཝནཏཱཏི བྷཱཝཝཙནེན ལཀྑཎནིདསྶནཾ. བྷེདོཏི ཙུཏིཁནྡྷཱནཾ བྷངྒུཔྤཏྟིཔརིདཱིཔནཾ. ཨནྟརདྷཱནནྟི གྷཊསྶ ཝིཡ བྷིནྣསྶ བྷིནྣཱནཾ ཙུཏིཁནྡྷཱནཾ ཡེན ཀེནཙི པརིཡཱཡེན ཋཱནཱབྷཱཝཔརིདཱིཔནཾ. མཙྩུ མརཎནྟི མཙྩུསངྑཱཏཾ མརཎཾ, ན ཁཎིཀམརཎཾ. ཀཱལོ ནཱམ ཨནྟཀོ, ཏསྶ ཀིརིཡཱཏི ཀཱལཀིརིཡཱ. ཨེཏྟཱཝཏཱ ཙ སམྨུཏིཡཱ མརཎཾ དཱིཔིཏཾ.

ཨིདཱནི ¶ པརམཏྠེན དཱིཔེཏུཾ ཁནྡྷཱནཾ བྷེདོཏིཨཱདིམཱཧ. པརམཏྠེན ཧི ཁནྡྷཱཡེཝ བྷིཛྫནྟི, ན སཏྟོ ནཱམ ཀོཙི མརཏི. ཁནྡྷེསུ པན བྷིཛྫམཱནེསུ སཏྟོ མརཏི, བྷིནྣེསུ མཏོཏི ཝོཧཱརོ ཧོཏི. ཨེཏྠ ཙ ཙཏུཝོཀཱརཔཉྩཝོཀཱརཝསེན ཁནྡྷཱནཾ བྷེདོ, ཨེཀཝོཀཱརཝསེན ཀལེ༹ཝརསྶ ནིཀྑེཔོ, ཙཏུཝོཀཱརཝསེན ཝཱ ཁནྡྷཱནཾ བྷེདོ, སེསདྭཡཝསེན ཀལེ༹ཝརསྶ ནིཀྑེཔོ ཝེདིཏབྦོ. ཀསྨཱ? བྷཝདྭཡེཔི རཱུཔཀཱཡསངྑཱཏསྶ ¶ ཀལེ༹ཝརསྶ སམྦྷཝཏོ. ཡསྨཱ ཝཱ ཙཱཏུམཧཱརཱཛིཀཱདཱིསུཔི ཁནྡྷཱ བྷིཛྫནྟེཝ, ན ཀིཉྩི ནིཀྑིཔཏི, ཏསྨཱ ཏེསཾ ཝསེན ཁནྡྷཱནཾ བྷེདོ, མནུསྶཱདཱིསུ ཀལེ༹ཝརསྶ ནིཀྑེཔོ. ཨེཏྠ ཙ ཀལེ༹ཝརསྶ ནིཀྑེཔཀརཎཏོ མརཎཾ ‘‘ཀལེ༹ཝརསྶ ནིཀྑེཔོ’’ཏི ཝུཏྟཾ.

ཛཱིཝིཏིནྡྲིཡསྶུཔཙྪེདོཏི ཨིམིནཱ ཨིནྡྲིཡབདྡྷསྶེཝ མརཎཾ ནཱམ ཧོཏི, ཨནིནྡྲིཡབདྡྷསྶ མརཎཾ ནཱམ ནཏྠཱིཏི དསྶེཏི. ‘‘སསྶཾ མཏཾ, རུཀྑོ མཏོ’’ཏི ཨིདཾ པན ཝོཧཱརམཏྟམེཝ, ཨཏྠཏོ པན ཨེཝརཱུཔཱནི ཝཙནཱནི སསྶཱདཱིནཾ ཁཡཝཡབྷཱཝམེཝ དཱིཔེནྟི.

ཨཔིཙ ¶ ཨིམཱནི ཛཱཏིཛརཱམརཎཱནི ནཱམ ཨིམེསཾ སཏྟཱནཾ ཝདྷཀཔཙྩཱམིཏྟཱ ཝིཡ ཨོཏཱརཾ གཝེསནྟཱནི ཝིཙརནྟི. ཡཐཱ ཧི པུརིསསྶ ཏཱིསུ པཙྩཱམིཏྟེསུ ཨོཏཱརཱཔེཀྑེསུ ཝིཙརནྟེསུ ཨེཀོ ཝདེཡྻ ‘‘ཨཧཾ ཨསུཀཨརཉྙསྶ ནཱམ ཝཎྞཾ ཀཐེཏྭཱ ཨེཏཾ ཨཱདཱཡ ཏཏྠ གམིསྶཱམི, ཨེཏྠ མཡ྄ཧཾ དུཀྐརཾ ནཏྠཱི’’ཏི. དུཏིཡོ ཝདེཡྻ ‘‘ཨཧཾ ཏཝ ཨེཏཾ གཧེཏྭཱ གཏཀཱལེ པོཐེཏྭཱ དུབྦལཾ ཀརིསྶཱམི, ཨེཏྠ མཡ྄ཧཾ དུཀྐརཾ ནཏྠཱི’’ཏི. ཏཏིཡོ ཝདེཡྻ ‘‘ཏཡཱ ཨེཏསྨིཾ པོཐེཏྭཱ དུབྦལེ ཀཏེ ཏིཎྷེན ཨསིནཱ སཱིསཙྪེདནཾ ནཱམ མཡ྄ཧཾ བྷཱརོ ཧོཏཱུ’’ཏི ཏེ ཨེཝཾ ཝཏྭཱ ཏཐཱ ཀརེཡྻུཾ. ཏཏྠ པཋམཔཙྩཱམིཏྟསྶ ཨརཉྙཝཎྞཾ ཀཐེཏྭཱ ཏཾ ཨཱདཱཡ ཏཏྠ གཏཀཱལོ ཝིཡ སུཧཛྫཉཱཏིམཎྜལཏོ ནིཀྐཌྜྷིཏྭཱ ཡཏྠ ཀཏྠཙི ནིབྦཏྟཱཔནཾ ནཱམ ཛཱཏིཡཱ ཀིཙྩཾ, དུཏིཡསྶ པོཐེཏྭཱ དུབྦལཀརཎཾ ཝིཡ ནིབྦཏྟཀྑནྡྷེསུ ནིཔཏིཏྭཱ པརཱདྷཱིནམཉྩཔརཱཡཎབྷཱཝཀརཎཾ ཛརཱཡ ཀིཙྩཾ, ཏཏིཡསྶ ཏིཎྷེན ཨསིནཱ སཱིསཙྪེདནཾ ཝིཡ ཛཱིཝིཏཀྑཡཔཱཔནཾ མརཎསྶ ཀིཙྩནྟི ཝེདིཏབྦཾ.

ཨཔིཙེཏྠ ཛཱཏིདུཀྑཾ སཱདཱིནཝམཧཱཀནྟཱརཔྤཝེསོ ཝིཡ དཊྛབྦཾ, ཛརཱདུཀྑཾ ཏཏྠ ཨནྣཔཱནརཧིཏསྶ དུབྦལཾ ཝིཡ, མརཎདུཀྑཾ དུབྦལསྶ ཨིརིཡཱཔཐཔཝཏྟནེ ཝིཧཏཔརཀྐམསྶ ཝཱལཱ༹དཱིཧི ཨནཡབྱསནཱཔཱདནཾ ཝིཡ དཊྛབྦནྟི.

སོཀནིདྡེསེ ཝིཡསཏཱིཏི བྱསནཾ, ཧིཏསུཁཾ ཁིཔཏི ཝིདྡྷཾསེཏཱིཏི ཨཏྠོ. ཉཱཏཱིནཾ བྱསནཾ ¶ ཉཱཏིབྱསནཾ, ཙོརརོགབྷཡཱདཱིཧི ཉཱཏིཀྑཡོ ཉཱཏིཝིནཱསོཏི ¶ ཨཏྠོ. ཏེན ཉཱཏིབྱསནེན. ཕུཊྛསྶཱཏི ཨཛ྄ཛྷོཏྠཊསྶ ཨབྷིབྷཱུཏསྶ, སམནྣཱགཏསྶཱཏི ཨཏྠོ. སེསེསུཔི ཨེསེཝ ནཡོ. ཨཡཾ པན ཝིསེསོ – བྷོགཱནཾ བྱསནཾ བྷོགབྱསནཾ, རཱཛཙོརཱདིཝསེན བྷོགཀྑཡོ བྷོགཝིནཱསོཏི ཨཏྠོ. རོགོཡེཝ བྱསནཾ རོགབྱསནཾ. རོགོ ཧི ཨཱརོགྱཾ ཝིཡསཏི ཝིནཱསེཏཱིཏི བྱསནཾ. སཱིལསྶ བྱསནཾ སཱིལབྱསནཾ. དུསྶཱིལྱསྶེཏཾ ནཱམཾ. སམྨཱདིཊྛིཾ ཝིནཱསཡམཱནཱ ཨུཔྤནྣཱ དིཊྛི ཨེཝ བྱསནཾ དིཊྛིབྱསནཾ. ཨེཏྠ ཙ པུརིམཱནི དྭེ ཨནིཔྥནྣཱནི, པཙྪིམཱནི ཏཱིཎི ནིཔྥནྣཱནི ཏིལཀྑཎབྦྷཱཧཏཱནི. པུརིམཱནི ཙ ཏཱིཎི ནེཝ ཀུསལཱནི ན ཨཀུསལཱནི, སཱིལདིཊྛིབྱསནདྭཡཾ ¶ ཨཀུསལཾ.

ཨཉྙཏརཉྙཏརེནཱཏི གཧིཏེསུ ཝཱ ཡེན ཀེནཙི ཨགྒཧིཏེསུ ཝཱ མིཏྟཱམཙྩབྱསནཱདཱིསུ ཡེན ཀེནཙི. སམནྣཱགཏསྶཱཏི སམནུབནྡྷསྶ ཨཔརིམུཙྩམཱནསྶ. ཨཉྙཏརཉྙཏརེན དུཀྑདྷམྨེནཱཏི ཡེན ཀེནཙི སོཀདུཀྑསྶ ཨུཔྤཏྟིཧེཏུནཱ. སོཀོཏི སོཙནཀཝསེན སོཀོ. ཨིདཾ ཏེཧི ཀཱརཎེཧི ཨུཔྤཛྫནཀསོཀསྶ སབྷཱཝཔཙྩཏྟཾ. སོཙནཱཏི སོཙནཱཀཱརོ. སོཙིཏཏྟནྟི སོཙིཏབྷཱཝོ. ཨནྟོསོཀོཏི ཨབྦྷནྟརསོཀོ. དུཏིཡཔདཾ ཨུཔསགྒེན ཝཌྜྷིཏཾ. སོ ཧི ཨབྦྷནྟརཾ སུཀྑཱཔེནྟོ ཝིཡ པརིསུཀྑཱཔེནྟོ ཝིཡ ཨུཔྤཛྫཏཱིཏི ‘‘ཨནྟོསོཀོ ཨནྟོཔརིསོཀོ’’ཏི ཝུཙྩཏི. ཙེཏསོ པརིཛ྄ཛྷཱཡནཱཏི ཙིཏྟསྶ པརིཛ྄ཛྷཱཡནཱཀཱརོ. སོཀོ ཧི ཨུཔྤཛྫམཱནོ ཨགྒི ཝིཡ ཙིཏྟཾ ཛྷཱཔེཏི དཧཏི, ‘‘ཙིཏྟཾ མེ ཛྷཱམཾ, ན མེ ཀིཉྩི པཊིབྷཱཏཱི’’ཏི ཝདཱཔེཏི. དུཀྑིཏོ མནོ དུམྨནོ, ཏསྶ བྷཱཝོ དོམནསྶཾ. ཨནུཔཝིཊྛཊྛེན སོཀོཝ སལླནྟི སོཀསལླཾ.

པརིདེཝནིདྡེསེ ‘‘མཡ྄ཧཾ དྷཱིཏཱ, མཡ྄ཧཾ པུཏྟོ’’ཏི ཨེཝཾ ཨཱདིསྶ ཨཱདིསྶ དེཝནྟི རོདནྟི ཨེཏེནཱཏི ཨཱདེཝོ. ཏཾ ཏཾ ཝཎྞཾ པརིཀིཏྟེཏྭཱ པརིཀིཏྟེཏྭཱ དེཝནྟི ཨེཏེནཱཏི པརིདེཝོ. ཏཏོ པརཱནི དྭེ དྭེ པདཱནི པུརིམདྭཡསྶེཝ ཨཱཀཱརབྷཱཝནིདྡེསཝསེན ཝུཏྟཱནི. ཝཱཙཱཏི ཝཙནཾ. པལཱཔོཏི ཏུཙྪཾ ནིརཏྠཀཝཙནཾ. ཨུཔཌྜྷབྷཎིཏཨཉྙབྷཎིཏཱདིཝསེན ཝིརཱུཔོ པལཱཔོཏི ཝིཔྤལཱཔོ. ལཱལཔྤོཏི པུནཔྤུནཾ ལཔནཾ. ལཱལཔྤནཱཀཱརོ ལཱལཔྤནཱ. ལཱལཔྤིཏསྶ བྷཱཝོ ལཱལཔྤིཏཏྟཾ.

དུཀྑནིདྡེསེ ¶ ཀཱཡནིསྶིཏཏྟཱ ཀཱཡིཀཾ. ཨམདྷུརཊྛེན ཨསཱཏཾ. ཀཱཡིཀཔདེན ཙེཏསིཀཨསཱཏཾ པཊིཀྑིཔཏི, ཨསཱཏཔདེན ཀཱཡིཀསཱཏཾ. ཏདེཝ དུཀྑཡཏཱིཏི དུཀྑཾ, ཡསྶུཔྤཛྫཏི, ཏཾ དུཀྑིཏཾ ཀརོཏཱིཏི ཨཏྠོ. དུཀྑམཏྟཱ ཝཱ དུཀྑཾ. ཀཱཡསམྥསྶཛནྟི ཀཱཡསམྥསྶེ ¶ ཛཱཏཾ. ཨསཱཏཾ དུཀྑཾ ཝེདཡིཏནྟི ཨསཱཏཾ ཝེདཡིཏཾ ན སཱཏཾ, དུཀྑཾ ཝེདཡིཏཾ ན སུཁཾ. པརཏོ ཏཱིཎི པདཱནི ཨིཏྠིལིངྒཝསེན ཝུཏྟཱནི. ཨསཱཏཱ ཝེདནཱ ན སཱཏཱ, དུཀྑཱ ཝེདནཱ ན སུཁཱཏི ཨཡམེཝ པནེཏྠ ཨཏྠོ. ཡཾ ཀཱཡིཀཾ ཨསཱཏཾ དུཀྑཾ ཝེདཡིཏཾ, ཡཱ ཀཱཡསམྥསྶཛཱ ཨསཱཏཱ དུཀྑཱ ཝེདནཱ, ཨིདཾ ཝུཙྩཏི དུཀྑནྟི ཨེཝཾ ཡོཛནཱ ཝེདིཏབྦཱ.

དོམནསྶནིདྡེསེ དུཊྛུ མནོཏི དུམྨནོ, ཧཱིནཝེདནཏྟཱ ¶ ཝཱ ཀུཙྪིཏཾ མནོཏི དུམྨནོ, དུམྨནསྶ བྷཱཝོ དོམནསྶཾ. ཙིཏྟནིསྶིཏཏྟཱ ཙེཏསིཀཾ. ཙེཏོསམྥསྶཛནྟི ཙིཏྟསམྥསྶེ ཛཱཏཾ.

ཨུཔཱཡཱསནིདྡེསེ ཨཱཡཱསནཊྛེན ཨཱཡཱསོ. སཾསཱིདནཝིསཱིདནཱཀཱརཔྤཝཏྟསྶ ཙིཏྟཀིལམཐསྶེཏཾ ནཱམཾ. བལཝཨཱཡཱསོ ཨུཔཱཡཱསོ. ཨཱཡཱསིཏབྷཱཝོ ཨཱཡཱསིཏཏྟཾ. ཨུཔཱཡཱསིཏབྷཱཝོ ཨུཔཱཡཱསིཏཏྟཾ.

ཨཔྤིཡསམྤཡོགནིདྡེསེ ཨིདྷཱཏི ཨིམསྨིཾ ལོཀེ. ཡསྶཱཏི ཡེ ཨསྶ. ཨནིཊྛཱཏི ཨཔརིཡེསིཏཱ. པརིཡེསིཏཱ ཝཱ ཧོནྟུ ཨཔརིཡེསིཏཱ ཝཱ, ནཱམམེཝེཏཾ ཨམནཱཔཱརམྨཎཱནཾ. མནསྨིཾ ན ཀམནྟི ན པཝིསནྟཱིཏི ཨཀནྟཱ. མནསྨིཾ ན ཨཔྤིཡནྟི, ན ཝཱ མནཾ ཝཌྜྷེནྟཱིཏི ཨམནཱཔཱ. རཱུཔཱཏིཨཱདི ཏེསཾ སབྷཱཝནིདསྶནཾ. ཨནཏྠཾ ཀཱམེནྟི ཨིཙྪནྟཱིཏི ཨནཏྠཀཱམཱ. ཨཧིཏཾ ཀཱམེནྟི ཨིཙྪནྟཱིཏི ཨཧིཏཀཱམཱ. ཨཕཱསུཾ དུཀྑཝིཧཱརཾ ཀཱམེནྟི ཨིཙྪནྟཱིཏི ཨཕཱསུཀཱམཱ. ཙཏཱུཧི ཡོགེཧི ཁེམཾ ནིབྦྷཡཾ ཝིཝཊྚཾ ན ཀཱམེནྟི, སབྷཡཾ ཝཊྚམེཝ ནེསཾ ཀཱམེནྟི ཨིཙྪནྟཱིཏི ཨཡོགཀྑེམཀཱམཱ. ཨཔིཙ སདྡྷཱདཱིནཾ ཝུདྡྷིསངྑཱཏསྶ ཨཏྠསྶ ཨཀཱམནཏོ, ཏེསཾཡེཝ ཧཱནིསངྑཱཏསྶ ཨནཏྠསྶ ཙ ཀཱམནཏོ ཨནཏྠཀཱམཱ. སདྡྷཱདཱིནཾཡེཝ ཨུཔཱཡབྷཱུཏསྶ ཧིཏསྶ ཨཀཱམནཏོ, སདྡྷཱཧཱནིཨཱདཱིནཾ ཨུཔཱཡབྷཱུཏསྶ ཨཧིཏསྶ ཙ ཀཱམནཏོ ཨཧིཏཀཱམཱ. ཕཱསུཝིཧཱརསྶ ¶ ཨཀཱམནཏོ, ཨཕཱསུཝིཧཱརསྶ ཙ ཀཱམནཏོ ཨཕཱསུཀཱམཱ. ཡསྶ ཀསྶཙི ནིབྦྷཡསྶ ཨཀཱམནཏོ, བྷཡསྶ ཙ ཀཱམནཏོ ཨཡོགཀྑེམཀཱམཱཏི ཨེཝམེཏྠ ཨཏྠོ དཊྛབྦོ.

སངྒཏཱིཏི གནྟྭཱ སཾཡོགོ. སམཱགམོཏི ཨཱགཏེཧི སཾཡོགོ. སམོདྷཱནནྟི ཋཱནནིསཛྫཱདཱིསུ སཧབྷཱཝོ. མིསྶཱིབྷཱཝོཏི སབྦཀིཙྩཱནཾ སཧཀརཎཾ. ཨཡཾ སཏྟཝསེན ཡོཛནཱ. སངྑཱརཝསེན པན ཡཾ ལབྦྷཏི, ཏཾ གཧེཏབྦཾ. སོ པན ཨཔྤིཡསམྤཡོགོ ཨཏྠཏོ ཨེཀོ དྷམྨོ ནཱམ ནཏྠི, ཀེཝལཾ ཨཔྤིཡསམྤཡུཏྟཱནཾ དུཝིདྷསྶཱཔི དུཀྑསྶ ཝཏྠུབྷཱཝཏོ དུཀྑོཏི ཝུཏྟོ.

པིཡཝིཔྤཡོགནིདྡེསོ ¶ ཝུཏྟཔཊིཔཀྑནཡེན ཝེདིཏབྦོ. མཱཏཱ ཝཱཏིཨཱདི པནེཏྠ ཨཏྠཀཱམེ སརཱུཔེན དསྶེཏུཾ ཝུཏྟཾ. ཏཏྠ མམཱཡཏཱིཏི མཱཏཱ, པིཡཱཡཏཱིཏི པིཏཱ. བྷཛཏཱིཏི ¶ བྷཱཏཱ, ཏཐཱ བྷགིནཱི. མེཏྟཱཡནྟཱིཏི མིཏྟཱ, མིནནྟི ཝཱ སབྦགུཡ྄ཧེསུ ཨནྟོ པཀྑིཔནྟཱིཏི མིཏྟཱ. ཀིཙྩཀརཎཱིཡེསུ སཧབྷཱཝཊྛེན ཨམཱ ཧོནྟཱིཏི ཨམཙྩཱ. ‘‘ཨཡཾ ཨམྷཱཀཾ ཨཛ྄ཛྷཏྟིཀོ’’ཏི ཨེཝཾ ཛཱནནྟི, ཉཱཡནྟཱིཏི ཝཱ ཉཱཏཱི. ལོཧིཏེན སམྦནྡྷཱཏི སཱལོཧིཏཱ. པིཏུཔཀྑིཀཱ ཉཱཏཱི, མཱཏུཔཀྑིཀཱ སཱལོཧིཏཱ. མཱཏཱཔིཏུཔཀྑིཀཱ ཝཱ ཉཱཏཱི, སསྶུསསུརཔཀྑིཀཱ སཱལོཧིཏཱ. ཨཡམྤི པིཡཝིཔྤཡོགོ ཨཏྠཏོ ཨེཀོ དྷམྨོ ནཱམ ནཏྠི, ཀེཝལཾ པིཡཝིཔྤཡུཏྟཱནཾ དུཝིདྷསྶཱཔི དུཀྑསྶ ཝཏྠུབྷཱཝཏོ དུཀྑོཏི ཝུཏྟོ. ཨིདམེཏྠ སབྦཨཊྛཀཐཱཝཙནཾ. སཙྩཱནཾ པན ཏཐལཀྑཎཏྟཱ སམྤཡོགཝིཔྤཡོགཝཙནེཧི ཨཔྤིཡཔིཡཝཏྠཱུནིཡེཝ ཝིསེསིཏཱནཱིཏི ཝཏྟུཾ ཡུཛྫཏཱིཏི.

ཨིཙྪིཏཱལཱབྷནིདྡེསེ ཛཱཏིདྷམྨཱནནྟི ཛཱཏིསབྷཱཝཱནཾ ཛཱཏིཔཀཏིཀཱནཾ. ཨིཙྪཱ ཨུཔྤཛྫཏཱིཏི ཏཎྷཱ ཨུཔྤཛྫཏི. ཨཧོ ཝཏཱཏི པཏྠནཱ. ཨསྶཱམཱཏི བྷཝེཡྻཱམ. ན ཁོ པནེཏཾ ཨིཙྪཱཡ པཏྟབྦནྟི ཡཾ ཨེཏཾ ‘‘ཨཧོ ཝཏ མཡཾ ན ཛཱཏིདྷམྨཱ ཨསྶཱམ, ན ཙ ཝཏ ནོ ཛཱཏི ཨཱགཙྪེཡྻཱ’’ཏི ཨེཝཾ པཧཱིནསམུདཡེསུ སཱདྷཱུསུ ཝིཛྫམཱནཾ ཨཛཱཏིདྷམྨཏྟཾ པརིནིབྦུཏེསུ ཙ ཝིཛྫམཱནཾ ཛཱཏིཡཱ ཨནཱགམནཾ ཨིཙྪིཏཾ, ཏཾ ཨིཙྪནྟསྶཱཔི མགྒབྷཱཝནཱཡ ཝིནཱ ཨཔྤཏྟབྦཏོ, ཨནིཙྪནྟསྶཱཔི ཙ བྷཱཝནཱཡ པཏྟབྦཏོ ན ཨིཙྪཱཡ པཏྟབྦཾ ནཱམ ཧོཏི. ཨིདམྤཱིཏི ཨེཏམྤི. ཨུཔརི སེསཱནི ཨུཔཱདཱཡ ཨཔིསདྡོ.

ཨུཔཱདཱནཀྑནྡྷནིདྡེསེ ¶ སེཡྻཐིདནྟི ནིཔཱཏོ, ཏསྶ ཏེ ཀཏམེ ཨིཏི ཙེཏི ཨཏྠོ. རཱུཔམེཝ ཨུཔཱདཱནཀྑནྡྷོཏི རཱུཔུཔཱདཱནཀྑནྡྷོ. ཨེསེཝ ནཡོ སེསེསུཔི.

དུཀྑསཙྩནིདྡེསཝཎྞནཱ ནིཊྛིཏཱ.

སམུདཡསཙྩནིདྡེསཝཎྞནཱ

༣༤. སམུདཡསཙྩནིདྡེསེ ¶ ¶ ཡཱཡཾ ཏཎྷཱཏི ཡཱ ཨཡཾ ཏཎྷཱ. པོནོབྷཝིཀཱཏི པུནབྦྷཝཀརཎཾ པུནོབྷཝོ, པུནོབྷཝོ སཱིལམསྶཱཏི པོནོབྷཝིཀཱ. ཨཔིཙ པུནབྦྷཝཾ དེཏི, པུནབྦྷཝཱཡ སཾཝཏྟཏི, པུནཔྤུནཾ བྷཝེ ནིབྦཏྟེཏཱིཏི པོནོབྷཝིཀཱ. སཱ པནེསཱ པུནབྦྷཝསྶ དཱཡིཀཱཔི ཨཏྠི ཨདཱཡིཀཱཔི, པུནབྦྷཝཱཡ སཾཝཏྟནིཀཱཔི ཨཏྠི ཨསཾཝཏྟནིཀཱཔི, དིནྣཱཡ པཊིསནྡྷིཡཱ ཨུཔདྷིཝེཔཀྐམཏྟཱཔི. སཱ ཏིཔྤཀཱརཱཔི པོནོབྷཝིཀཱཏི ནཱམཾ ལབྷཏི. པོནབྦྷཝིཀཱཏིཔི པཱཋོ, སོཡེཝཏྠོ. ཨབྷིནནྡནསངྑཱཏེན ནནྡིརཱགེན སཧ གཏཱཏི ནནྡིརཱགསཧགཏཱ. ནནྡིརཱགེན སདྡྷིཾ ཨཏྠཏོ ཨེཀཏྟམེཝ གཏཱཏི ཝུཏྟཾ ཧོཏི. ཏཏྲ ཏཏྲཱབྷིནནྡིནཱིཏི ཡཏྲ ཡཏྲ ཨཏྟབྷཱཝོ ནིབྦཏྟཏི, ཏཏྲ ཏཏྲ ཨབྷིནནྡིནཱི. རཱུཔཱདཱིསུ ཝཱ ཨཱརམྨཎེསུ ཏཏྲ ཏཏྲཱབྷིནནྡིནཱི, རཱུཔཱབྷིནནྡིནཱི སདྡགནྡྷརསཕོཊྛབྦདྷམྨཱབྷིནནྡིནཱིཏི ཨཏྠོ. ཏཏྲ ཏཏྲཱབྷིནནྡཱིཏིཔི པཱཋོ, ཏཏྲ ཏཏྲ ཨབྷིནནྡཡཏཱིཏི ཨཏྠོ. སེཡྻཐིདནྟི ནིཔཱཏོ, ཏསྶ སཱ ཀཏམཱ ཨིཏི ཙེཏི ཨཏྠོ. ཀཱམཏཎྷཱཏི ཀཱམེ ཏཎྷཱ, པཉྩཀཱམགུཎིཀརཱགསྶེཏཾ ཨདྷིཝཙནཾ. བྷཝཏཎྷཱཏི བྷཝེ ཏཎྷཱ. བྷཝཔཏྠནཱཝསེན ཨུཔྤནྣསྶ སསྶཏདིཊྛིསཧགཏསྶ རཱགསྶ རཱུཔཱརཱུཔབྷཝརཱགསྶ ཙ ཛྷཱནནིཀནྟིཡཱ ཙ ཨེཏཾ ཨདྷིཝཙནཾ. ཝིབྷཝཏཎྷཱཏི ཝིབྷཝེ ཏཎྷཱ. ཨུཙྪེདདིཊྛིསཧགཏརཱགསྶེཏཾ ཨདྷིཝཙནཾ.

ཨིདཱནི ཏསྶཱ ཏཎྷཱཡ ཝཏྠུཾ ཝིཏྠཱརཏོ དསྶེཏུཾ སཱ ཁོ པནེསཱཏིཨཱདིམཱཧ. ཏཏྠ ཨུཔྤཛྫཏཱིཏི ཛཱཡཏི. ནིཝིསཏཱིཏི པུནཔྤུནཾ པཝཏྟིཝསེན པཏིཊྛཱཏི. ཨུཔྤཛྫམཱནཱ ཀཏྠ ཨུཔྤཛྫཏི, ནིཝིསམཱནཱ ཀཏྠ ནིཝིསཏཱིཏི ¶ སམྦནྡྷོ. ཡཾ ལོཀེ པིཡརཱུཔཾ སཱཏརཱུཔནྟི ཡཾ ལོཀསྨིཾ པིཡསབྷཱཝཉྩེཝ ¶ མདྷུརསབྷཱཝཉྩ. ཙཀྑུ ལོཀེཏིཨཱདཱིསུ ལོཀསྨིཉྷི ཙཀྑུཨཱདཱིསུ མམཏྟེན ཨབྷིནིཝིཊྛཱ སཏྟཱ སམྤཏྟིཡཾ པཏིཊྛིཏཱ ཨཏྟནོ ཙཀྑུཾ ཨཱདཱསཱདཱིསུ ནིམིཏྟགྒཧཎཱནུསཱརེན ཝིཔྤསནྣཾ པཉྩཔསཱདཾ སུཝཎྞཝིམཱནེ ཨུགྒྷཱཊིཏམཎིསཱིཧཔཉྫརཾ ཝིཡ མཉྙནྟི, སོཏཾ རཛཏཔནཱལི༹ཀཾ ཝིཡ པཱམངྒསུཏྟཀཾ ཝིཡ ཙ མཉྙནྟི, ཏུངྒནཱསཱཏི ལདྡྷཝོཧཱརཾ གྷཱནཾ ཝཊྚེཏྭཱ ཋཔིཏཧརིཏཱལཝཊྚིཾ ཝིཡ མཉྙནྟི, ཛིཝ྄ཧཾ རཏྟཀམྦལཔཊལཾ ཝིཡ མུདུསིནིདྡྷམདྷུརརསདཾ མཉྙནྟི, ཀཱཡཾ སཱལལཊྛིཾ ཝིཡ སུཝཎྞཏོརཎཾ ཝིཡ ཙ མཉྙནྟི, མནཾ ཨཉྙེསཾ མནེན ཨསདིསཾ ཨུལཱ༹རཾ མཉྙནྟི, རཱུཔཾ སུཝཎྞཀཎིཀཱརཔུཔྥཱདིཝཎྞཾ ཝིཡ, སདྡཾ མཏྟཀརཝཱིཀཀོཀིལམནྡདྷམིཏམཎིཝཾསནིགྒྷོསཾ ཝིཡ, ཨཏྟནཱ པཊིལདྡྷཱནི ཙཏུསམུཊྛཱནིཀགནྡྷཱརམྨཎཱདཱིནི ‘‘ཀསྶཉྙསྶ ཨེཝརཱུཔཱནི ཨཏྠཱི’’ཏི མཉྙནྟི, ཏེསཾ ཨེཝཾ མཉྙམཱནཱནཾ ཏཱནི ཙཀྑཱདཱིནི པིཡརཱུཔཱནི ཙེཝ སཱཏརཱུཔཱནི ཙ ཧོནྟི. ཨཐ ནེསཾ ཏཏྠ ཨནུཔྤནྣཱ ཙེཝ ཏཎྷཱ ཨུཔྤཛྫཏི ¶ , ཨུཔྤནྣཱ ཙ པུནཔྤུནཾ པཝཏྟིཝསེན ནིཝིསཏི. ཏསྨཱ ཐེརོ ‘‘ཙཀྑུ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏཱི’’ཏིཨཱདིམཱཧ. ཏཏྠ ཨུཔྤཛྫམཱནཱཏི ཡདཱ ཨུཔྤཛྫཏི, ཏདཱ ཨེཏྠ ཨུཔྤཛྫཏཱིཏི ཨཏྠོ.

སམུདཡསཙྩནིདྡེསཝཎྞནཱ ནིཊྛིཏཱ.

ནིརོདྷསཙྩནིདྡེསཝཎྞནཱ

༣༥.

ནིརོདྷསཙྩནིདྡེསེ ¶ ཡོ ཏསྶཱཡེཝ ཏཎྷཱཡཱཏི ཨེཏྠ ‘‘ཡོ ཏསྶེཝ དུཀྑསྶཱ’’ཏི ཝཏྟབྦེ ཡསྨཱ སམུདཡནིརོདྷེནེཝ དུཀྑཾ ནིརུཛ྄ཛྷཏི, ནོ ཨཉྙཐཱ. ཡཐཱཧ –

‘‘ཡཐཱཔི མཱུལེ ཨནུཔདྡཝེ དལ༹ྷེ, ཚིནྣོཔི རུཀྑོ པུནརེཝ རཱུཧཏི;

ཨེཝམྤི ཏཎྷཱནུསཡེ ཨནཱུཧཏེ, ནིབྦཏྟཏཱི དུཀྑམིདཾ པུནཔྤུན’’ནྟི. (དྷ. པ. ༣༣༨);

ཏསྨཱ ཏཾ དུཀྑནིརོདྷཾ དསྶེནྟོ སམུདཡནིརོདྷེན དསྶེཏུཾ ཨེཝམཱཧ. སཱིཧསམཱནཝུཏྟིནོ ཧི ཏཐཱགཏཱ, ཏེ དུཀྑཾ ནིརོདྷེནྟཱ དུཀྑནིརོདྷཉྩ དསྶེནྟཱ ཧེཏུམྷི པཊིཔཛྫནྟི, ན ཕལེ. སུཝཱནཝུཏྟིནོ པན ཨཉྙཏིཏྠིཡཱ ¶ , ཏེ དུཀྑཾ ནིརོདྷེནྟཱ དུཀྑནིརོདྷཉྩ དསྶེནྟཱ ཨཏྟཀིལམཐཱནུཡོགེན ཙེཝ ཏསྶེཝ ཙ དེསནཱཡ ཕལེ པཊིཔཛྫནྟི, ན ཧེཏུམྷཱིཏི. སཱིཧསམཱནཝུཏྟིཏཱཡ སཏྠཱ ཧེཏུམྷི པཊིཔཛྫནྟོ ‘‘ཡོ ཏསྶཱཡེཝཱ’’ཏིཨཱདིམཱཧ. དྷམྨསེནཱཔཏིཔི སཏྠཱརཱ ཝུཏྟཀྐམེནེཝཱཧ.

ཏཏྠ ཏསྶཱཡེཝ ཏཎྷཱཡཱཏི ཡཱ སཱ ཏཎྷཱ ‘‘པོནོབྷཝིཀཱ’’ཏི ཝཏྭཱ ཀཱམཏཎྷཱདིཝསེན ཝིབྷཏྟཱ ཨུཔྤཏྟིནིཝེསནཝསེན ཙ ཧེཊྛཱ པཀཱསིཏཱ, ཏསྶཱཡེཝ ཏཎྷཱཡ. ཨསེསཝིརཱགནིརོདྷོཏི ཝིརཱགོ ཝུཙྩཏི མགྒོ, ‘‘ཝིརཱགཱ ཝིམུཙྩཏཱི’’ཏི (མ. ནི. ༡.༢༤༥; སཾ. ནི. ༣.༡༢; མཧཱཝ. ༢༣) ཧི ཝུཏྟཾ. ཝིརཱགེན ནིརོདྷོ ཝིརཱགནིརོདྷོ, ཨནུསཡསམུགྒྷཱཏཏོ ཨསེསོ ཝིརཱགནིརོདྷོ ཨསེསཝིརཱགནིརོདྷོ. ཨཐ ཝཱ ཝིརཱགོཏི ཧི པཧཱནཾ ཝུཙྩཏི, ཏསྨཱ ཨསེསོ ཝིརཱགོ ཨསེསོ ནིརོདྷོཏི ཨེཝམྤེཏྠ ཡོཛནཱ དཊྛབྦཱ. ཨཏྠཏོ པན སབྦཱནེཝ པནེཏཱནི ཨསེསཝིརཱགནིརོདྷོཏིཨཱདཱིནི ནིབྦཱནསྶེཝ ཝེཝཙནཱནི. པརམཏྠཏོ ཧི དུཀྑནིརོདྷཾ ཨརིཡསཙྩནྟི ¶ ནིབྦཱནཾ ཝུཙྩཏི. ཡསྨཱ པན ཏཾ ཨཱགམྨ ཏཎྷཱ ཨསེསཱ ཝིརཛྫཏི ནིརུཛ྄ཛྷཏི, ཏསྨཱ ཏཾ ‘‘ཏསྶཱཡེཝ ཏཎྷཱཡ ཨསེསཝིརཱགནིརོདྷོ’’ཏི ཝུཙྩཏི. ནིབྦཱནཉྩ ཨཱགམྨ ཏཎྷཱ ཙཛཱིཡཏི པཊིནིསྶཛྫཱིཡཏི ¶ མུཙྩཏི ན ཨལླཱིཡཏི, ཀཱམགུཎཱལཡེསུ ཙེཏྠ ཨེཀོཔི ཨཱལཡོ ནཏྠི, ཏསྨཱ ནིབྦཱནཾ ཙཱགོ པཊིནིསྶགྒོ མུཏྟི ཨནཱལཡོཏི ཝུཙྩཏི. ཨེཀམེཝ ཧི ནིབྦཱནཾ, ནཱམཱནི པནསྶ སབྦསངྑཏཱནཾ ནཱམཔཊིཔཀྑཝསེན ཨནེཀཱནི ཧོནྟི. སེཡྻཐིདཾ – ཨསེསཝིརཱགོ ཨསེསནིརོདྷོ ཙཱགོ པཊིནིསྶགྒོ མུཏྟི ཨནཱལཡོ རཱགཀྑཡོ དོསཀྑཡོ མོཧཀྑཡོ ཏཎྷཱཀྑཡོ ཨནུཔྤཱདོ ཨཔྤཝཏྟཾ ཨནིམིཏྟཾ ཨཔྤཎིཧིཏཾ ཨནཱཡཱུཧནཾ ཨཔྤཊིསནྡྷི ཨནུཔཔཏྟི ཨགཏི ཨཛཱཏཾ ཨཛརཾ ཨབྱཱདྷི ཨམཏཾ ཨསོཀཾ ཨཔརིདེཝཾ ཨནུཔཱཡཱསཾ ཨསཾཀིལིཊྛནྟིཨཱདཱིནི.

ཨིདཱནི མགྒེན ཚིནྣཱཡ ནིབྦཱནཾ ཨཱགམྨ ཨཔྤཝཏྟིཔྤཏྟཱཡཔི ཙ ཏཎྷཱཡ ཡེསུ ཝཏྠཱུསུ ཏསྶཱ ཨུཔྤཏྟི དསྶིཏཱ, ཏཏྠེཝ ཨབྷཱཝཾ དསྶེཏུཾ སཱ ཁོ པནེསཱཏིཨཱདིམཱཧ. ཏཏྠ ཡཐཱ པུརིསོ ཁེཏྟེ ཛཱཏཾ ཏིཏྟཀཱལཱབུཝལླིཾ དིསྭཱ ཨགྒཏོ པཊྛཱཡ མཱུལཾ པརིཡེསིཏྭཱ ཚིནྡེཡྻ, སཱ ཨནུཔུབྦེན མིལཱཡིཏྭཱ ཨཔྤཉྙཏྟིཾ གཙྪེཡྻ, ཏཏོ ཏསྨིཾ ཁེཏྟེ ཏིཏྟཀཱལཱབུ ནིརུདྡྷཱ པཧཱིནཱཏི ཝུཙྩེཡྻ, ཨེཝམེཝ ཁེཏྟེ ཏིཏྟཀཱལཱབུ ¶ ཝིཡ ཙཀྑཱདཱིསུ ཏཎྷཱ. སཱ ཨརིཡམགྒེན མཱུལཙྪིནྣཱ ནིབྦཱནཾ ཨཱགམྨ ཨཔྤཝཏྟིཾ གཙྪཏི. ཨེཝཾ གཏཱ པན ཏེསུ ཝཏྠཱུསུ ཁེཏྟེ ཏིཏྟཀཱལཱབུ ཝིཡ ན པཉྙཱཡཏི. ཡཐཱ ཙ ཨཊཝིཏོ ཙོརེ ཨཱནེཏྭཱ ནགརསྶ དཀྑིཎདྭཱརེ གྷཱཏེཡྻུཾ, ཏཏོ ཨཊཝིཡཾ ཙོརཱ མཏཱཏི ཝཱ མཱརིཏཱཏི ཝཱ ཝུཙྩེཡྻུཾ, ཨེཝམེཝ ཨཊཝིཡཾ ཙོརཱ ཝིཡ ཡཱ ཙཀྑཱདཱིསུ ཏཎྷཱ, སཱ དཀྑིཎདྭཱརེ ཙོརཱ ཝིཡ ནིབྦཱནཾ ཨཱགམྨ ནིརུདྡྷཏྟཱ ནིབྦཱནེ ནིརུདྡྷཱ. ཨེཝཾ ནིརུདྡྷཱ པན ཏེསུ ཝཏྠཱུསུ ཨཊཝིཡཾ ཙོརཱ ཝིཡ ན པཉྙཱཡཏི. ཏེནསྶཱ ཏཏྠེཝ ནིརོདྷཾ དསྶེནྟོ ‘‘ཙཀྑུ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏཱི’’ཏིཨཱདིམཱཧ. ཨཐ ཝཱ ཏཎྷུཔྤཱདཝཏྠུསྶ པརིཉྙཱཏཏྟཱ པརིཉྙཱཏཝཏྠུསྨིཾ པུན ན ཨུཔྤཛྫནཏོ ཨནུཔྤཱདནིརོདྷཝསེན ཏཎྷུཔྤཱདཝཏྠུསྨིཾཡེཝ ནིརུཛ྄ཛྷཏཱིཏི ཝུཙྩཏི. ཨེཏྠ ཙ ཨུཔྤཛྫནཔཊིཔཀྑཝསེན པཧཱིཡཏཱིཏི ཝུཏྟཾ, ནིཝིསནཔཊིཔཀྑཝསེན ནིརུཛ྄ཛྷཏཱིཏི.

ནིརོདྷསཙྩནིདྡེསཝཎྞནཱ ནིཊྛིཏཱ.

མགྒསཙྩནིདྡེསཝཎྞནཱ

༣༦.

མགྒསཙྩནིདྡེསེ ¶ ¶ ཨཡམེཝཱཏི ཨཉྙམགྒཔཊིཀྑེཔནཏྠཾ ནིཡམནཾ (ཝིབྷ. ཨཊྛ. ༢༠༥). ཨརིཡོཏི ཏཾཏཾམགྒཝཛ྄ཛྷཀིལེསེཧི ཨཱརཀཏྟཱ, ཨརིཡབྷཱཝཀརཏྟཱ, ཨརིཡཕལཔཊིལཱབྷཀརཏྟཱ ཙ ཨརིཡོ. ཨཊྛ ཨངྒཱནི ཨསྶཱཏི ཨཊྛངྒིཀོ. སྭཱཡཾ ཙཏུརངྒིཀཱ ཝིཡ སེནཱ, པཉྩངྒིཀཾ ཝིཡ ཏཱུརིཡཾ ཨངྒམཏྟམེཝ ཧོཏི, ཨངྒཝིནིམུཏྟོ ནཏྠི.

ཨིདཱནི ཨངྒམཏྟམེཝ མགྒོ ཨངྒཝིནིམུཏྟོ ནཏྠཱིཏི དསྶེནྟོ སམྨཱདིཊྛི…པེ… སམྨཱསམཱདྷཱིཏིཨཱདིམཱཧ. ཏཏྠ སམྨཱ དསྶནལཀྑཎཱ སམྨཱདིཊྛི. སམྨཱ ཨབྷིནིརོཔནལཀྑཎོ སམྨཱསངྐཔྤོ. སམྨཱ པརིགྒཧལཀྑཎཱ སམྨཱཝཱཙཱ. སམྨཱ སམུཊྛཱཔནལཀྑཎོ སམྨཱཀམྨནྟོ. སམྨཱ ཝོདཱཔནལཀྑཎོ སམྨཱཨཱཛཱིཝོ. སམྨཱ པགྒཧལཀྑཎོ སམྨཱཝཱཡཱམོ. སམྨཱ ཨུཔཊྛཱནལཀྑཎཱ སམྨཱསཏི. སམྨཱ སམཱདྷཱནལཀྑཎོ སམྨཱསམཱདྷི. ཏེསུ ཨེཀེཀསྶ ཏཱིཎི ཏཱིཎི ཀིཙྩཱནི ཧོནྟི. སེཡྻཐིདཾ – སམྨཱདིཊྛི ¶ ཏཱཝ ཨཉྙེཧིཔི ཨཏྟནོ པཙྩནཱིཀཀིལེསེཧི སདྡྷིཾ མིཙྪཱདིཊྛིཾ པཛཧཏི, ནིརོདྷཉྩ ཨཱརམྨཎཾ ཀརོཏི, སམྤཡུཏྟདྷམྨེ ཙ པསྶཏི ཏཔྤཊིཙྪཱདཀམོཧཝིདྷམནཝསེན ཨསམྨོཧཏོ. སམྨཱསངྐཔྤཱདཡོཔི ཏཐེཝ མིཙྪཱསངྐཔྤཱདཱིནི ཙ པཛཧནྟི, ནིབྦཱནཉྩ ཨཱརམྨཎཾ ཀརོནྟི. ཝིསེསཏོ པནེཏྠ སམྨཱསངྐཔྤོ སཧཛཱཏདྷམྨེ སམྨཱ ཨབྷིནིརོཔེཏི, སམྨཱཝཱཙཱ སམྨཱ པརིགྒཎྷཱཏི, སམྨཱཀམྨནྟོ སམྨཱ སམུཊྛཱཔེཏི, སམྨཱཨཱཛཱིཝོ སམྨཱ ཝོདཱཔེཏི, སམྨཱཝཱཡཱམོ སམྨཱ པགྒཎྷཱཏི, སམྨཱསཏི སམྨཱ ཨུཔཊྛཱཔེཏི, སམྨཱསམཱདྷི སམྨཱ སམཱདཧཏི.

ཨཔིཙེསཱ སམྨཱདིཊྛི ནཱམ པུབྦབྷཱགེ ནཱནཱཀྑཎཱ ནཱནཱརམྨཎཱ ཧོཏི, མགྒཀཱལེ ཨེཀཀྑཎཱ ཨེཀཱརམྨཎཱ. ཀིཙྩཏོ པན ‘‘དུཀྑེ ཉཱཎ’’ནྟིཨཱདཱིནི ཙཏྟཱརི ནཱམཱནི ལབྷཏི ¶ . སམྨཱསངྐཔྤཱདཡོཔི པུབྦབྷཱགེ ནཱནཱཀྑཎཱ ནཱནཱརམྨཎཱ ཧོནྟི, མགྒཀཱལེ ཨེཀཀྑཎཱ ཨེཀཱརམྨཎཱ. ཏེསུ སམྨཱསངྐཔྤོ ཀིཙྩཏོ ནེཀྑམྨསངྐཔྤོཏིཨཱདཱིནི ཏཱིཎི ནཱམཱནི ལབྷཏི. སམྨཱཝཱཙཱདཡོ ཏཡོ པུབྦབྷཱགེ ཝིརཏིཡོཔི ཧོནྟི ཙེཏནཱཡོཔི, མགྒཀྑཎེ པན ཝིརཏིཡོཡེཝ. སམྨཱཝཱཡཱམོ སམྨཱསཏཱིཏི ཨིདམྤི དྭཡཾ ཀིཙྩཏོ སམྨཔྤདྷཱནསཏིཔཊྛཱནཝསེན ཙཏྟཱརི ནཱམཱནི ལབྷཏི. སམྨཱསམཱདྷི པན པུབྦབྷཱགེཔི མགྒཀྑཎེཔི སམྨཱསམཱདྷིཡེཝ.

ཨིཏི ཨིམེསུ ཨཊྛསུ དྷམྨེསུ བྷགཝཏཱ ནིབྦཱནཱདྷིགམཱཡ པཊིཔནྣསྶ ཡོགིནོ བཧཱུཔཀཱརཏྟཱ པཋམཾ ¶ སམྨཱདིཊྛི དེསིཏཱ. ཨཡཉྷི ‘‘པཉྙཱཔཛྫོཏོ པཉྙཱསཏྠ’’ནྟི (དྷ. ས. ༡༦, ༢༠, ༢༩) ཙ ཝུཏྟཱ. ཏསྨཱ ཨེཏཱཡ པུབྦབྷཱགེ ཝིཔསྶནཱཉཱཎསངྑཱཏཱཡ སམྨཱདིཊྛིཡཱ ཨཝིཛྫནྡྷཀཱརཾ ཝིདྷམིཏྭཱ ཀིལེསཙོརེ གྷཱཏེནྟོ ཁེམེན ཡོགཱཝཙརོ ནིབྦཱནཾ པཱཔུཎཱཏི. ཏསྨཱ པཋམཾ སམྨཱདིཊྛི དེསིཏཱ.

སམྨཱསངྐཔྤོ པན ཏསྶཱ བཧཱུཔཀཱརོ. ཏསྨཱ ཏདནནྟརཾ ཝུཏྟོ. ཡཐཱ ཧི ཧེརཉྙིཀོ ཧཏྠེན པརིཝཏྟེཏྭཱ པརིཝཏྟེཏྭཱ ཙཀྑུནཱ ཀཧཱཔཎཾ ཨོལོཀེནྟོ ‘‘ཨཡཾ ཀཱུཊོ ཨཡཾ ཚེཀོ’’ཏི ཛཱནཱཏི, ཨེཝཾ ཡོགཱཝཙརོཔི པུབྦབྷཱགེ ཝིཏཀྐེན ཝིཏཀྐེཏྭཱ ཝིཏཀྐེཏྭཱ ཝིཔསྶནཱཔཉྙཱཡ ཨོལོཀཡམཱནོ ‘‘ཨིམེ དྷམྨཱ ཀཱམཱཝཙརཱ, ཨིམེ རཱུཔཱཝཙརཱདཡོ’’ཏི ཛཱནཱཏི. ཡཐཱ ཝཱ པན པུརིསེན ཀོཊིཡཾ གཧེཏྭཱ པརིཝཏྟེཏྭཱ པརིཝཏྟེཏྭཱ དིནྣཾ མཧཱརུཀྑཾ ཏཙྪཀོ ཝཱསིཡཱ ཏཙྪེཏྭཱ ཀམྨེ ¶ ཨུཔནེཏི, ཨེཝཾ ཝིཏཀྐེན ཝིཏཀྐེཏྭཱ ཝིཏཀྐེཏྭཱ དིནྣདྷམྨེ ཡོགཱཝཙརོ པཉྙཱཡ ‘‘ཨིམེ དྷམྨཱ ཀཱམཱཝཙརཱ, ཨིམེ རཱུཔཱཝཙརཱ’’ཏིཨཱདིནཱ ནཡེན པརིཙྪིནྡིཏྭཱ ཀམྨེ ཨུཔནེཏི. ཏསྨཱ སམྨཱསངྐཔྤོ སམྨཱདིཊྛཱནནྟརཾ ཝུཏྟོ.

སྭཱཡཾ ཡཐཱ སམྨཱདིཊྛིཡཱ, ཨེཝཾ སམྨཱཝཱཙཱཡཔི ཨུཔཀཱརཀོ. ཡཐཱཧ – ‘‘པུབྦེ ཁོ, གཧཔཏི, ཝིཏཀྐེཏྭཱ ཝིཙཱརེཏྭཱ པཙྪཱ ཝཱཙཾ བྷིནྡཏཱི’’ཏི (མ. ནི. ༡.༤༦༣). ཏསྨཱ ཏདནནྟརཾ སམྨཱཝཱཙཱ ཝུཏྟཱ.

ཡསྨཱ པན ‘‘ཨིདཉྩིདཉྩ ཀརིསྶཱམཱ’’ཏི པཋམཾ ཝཱཙཱཡ སཾཝིདཧིཏྭཱ ལོཀེ ཀམྨནྟེ པཡོཛེནྟི, ཏསྨཱ ཝཱཙཱ ཀཱཡཀམྨསྶ ཨུཔཀཱརིཀཱཏི སམྨཱཝཱཙཱཡ ཨནནྟརཾ སམྨཱཀམྨནྟོ ཝུཏྟོ.

ཙཏུབྦིདྷཾ པན ཝཙཱིདུཙྩརིཏཾ, ཏིཝིདྷཾ ཀཱཡདུཙྩརིཏཾ པཧཱཡ ཨུབྷཡཾ སུཙརིཏཾ པཱུརེནྟསྶེཝ ཡསྨཱ ཨཱཛཱིཝཊྛམཀསཱིལཾ པཱུརཏི, ན ཨིཏརསྶ ¶ , ཏསྨཱ ཏདུབྷཡཱནནྟརཾ སམྨཱཨཱཛཱིཝོ ཝུཏྟོ.

ཨེཝཾ ཝིསུདྡྷཱཛཱིཝེན པན ‘‘པརིསུདྡྷོ མེ ཨཱཛཱིཝོ’’ཏི ཨེཏྟཱཝཏཱ པརིཏོསཾ ཀཏྭཱ སུཏྟཔྤམཏྟེན ཝིཧརིཏུཾ ན ཡུཏྟཾ, ཨཐ ཁོ སབྦཨིརིཡཱཔཐེསུ ཨིདཾ ཝཱིརིཡམཱརབྷིཏབྦནྟི དསྶེཏུཾ ཏདནནྟརཾ སམྨཱཝཱཡཱམོ ཝུཏྟོ.

ཏཏོ ¶ ཨཱརདྡྷཝཱིརིཡེནཱཔི ཀཱཡཱདཱིསུ ཙཏཱུསུ ཝཏྠཱུསུ སཏི སཱུཔཊྛིཏཱ ཀཱཏབྦཱཏི དསྶེཏུཾ ཏདནནྟརཾ སམྨཱསཏི ཝུཏྟཱ.

ཡསྨཱ པན ཨེཝཾ སཱུཔཊྛིཏཱཡ སཏིཡཱ སམཱདྷིསྶ ཨུཔཀཱརཱནུཔཀཱརཱནཾ དྷམྨཱནཾ གཏིཡོ སམནྭེསིཏྭཱ པཧོཏི ཨེཀཏྟཱརམྨཎེ ཙིཏྟཾ སམཱདྷཱཏུཾ, ཏསྨཱ སམྨཱསཏིཨནནྟརཾ སམྨཱསམཱདྷི ཝུཏྟོཏི ཝེདིཏབྦོཏི.

སམྨཱདིཊྛིནིདྡེསེ ‘‘དུཀྑེ ཉཱཎ’’ནྟིཨཱདིནཱ ཙཏུསཙྩཀམྨཊྛཱནཾ དསྶིཏཾ. ཏཏྠ པུརིམཱནི དྭེ སཙྩཱནི ཝཊྚཾ, པཙྪིམཱནི དྭེ ཝིཝཊྚཾ. ཏེསུ བྷིཀྑུནོ ཝཊྚེ ཀམྨཊྛཱནཱབྷིནིཝེསོ ཧོཏི, ཝིཝཊྚེ ནཏྠི ཨབྷིནིཝེསོ. པུརིམཱནི ཧི དྭེ སཙྩཱནི ‘‘པཉྩཀྑནྡྷཱ དུཀྑཾ, ཏཎྷཱ སམུདཡོ’’ཏི ཨེཝཾ སངྑེཔེན ཙ, ‘‘ཀཏམེ ¶ པཉྩཀྑནྡྷཱ? རཱུཔཀྑནྡྷོ’’ཏིཨཱདིནཱ ནཡེན ཝིཏྠཱརེན ཙ ཨཱཙརིཡསནྟིཀེ ཨུགྒཎྷིཏྭཱ ཝཱཙཱཡ པུནཔྤུནཾ པརིཝཏྟེནྟོ ཡོགཱཝཙརོ ཀམྨཾ ཀརོཏི. ཨིཏརེསུ པན དྭཱིསུ སཙྩེསུ ‘‘ནིརོདྷསཙྩཾ ཨིཊྛཾ ཀནྟཾ མནཱཔཾ, མགྒསཙྩཾ ཨིཊྛཾ ཀནྟཾ མནཱཔ’’ནྟི ཨེཝཾ སཝནེནེཝ ཀམྨཾ ཀརོཏི. སོ ཨེཝཾ ཀམྨཾ ཀརོནྟོ ཙཏྟཱརི སཙྩཱནི ཨེཀཔཊིཝེདྷེན པཊིཝིཛ྄ཛྷཏི, ཨེཀཱབྷིསམཡེན ཨབྷིསམེཏི. དུཀྑཾ པརིཉྙཱཔཊིཝེདྷེན པཊིཝིཛ྄ཛྷཏི, སམུདཡཾ པཧཱནཔཊིཝེདྷེན པཊིཝིཛ྄ཛྷཏི. ནིརོདྷཾ སཙྪིཀིརིཡཱཔཊིཝེདྷེན པཊིཝིཛ྄ཛྷཏི, མགྒཾ བྷཱཝནཱཔཊིཝེདྷེན པཊིཝིཛ྄ཛྷཏི. དུཀྑཾ པརིཉྙཱབྷིསམཡེན…པེ… མགྒཾ བྷཱཝནཱབྷིསམཡེན ཨབྷིསམེཏི.

ཨེཝམསྶ པུབྦབྷཱགེ དྭཱིསུ སཙྩེསུ ཨུགྒཧཔརིཔུཙྪཱསཝནདྷཱརཎསམྨསནཔཊིཝེདྷོ ཧོཏི, དྭཱིསུ སཝནཔཊིཝེདྷོཡེཝ. ཨཔརབྷཱགེ ཏཱིསུ ཀིཙྩཏོ པཊིཝེདྷོ ཧོཏི ནིརོདྷེ ཨཱརམྨཎཔཊིཝེདྷོ. ཏཏྠ སབྦམྤི པཊིཝེདྷཉཱཎཾ ལོཀུཏྟརཾ, སཝནདྷཱརཎསམྨསནཉཱཎཾ ལོཀིཡཾ ཀཱམཱཝཙརཾ. པཙྩཝེཀྑཎཱ པན པཏྟསཙྩསྶ ཧོཏི, ཨཡཉྩ ཨཱདིཀམྨིཀོ. ཏསྨཱ སཱ ཨིདྷ ན ཝུཏྟཱ. ཨིམསྶ ཙ ¶ བྷིཀྑུནོ པུབྦེ པརིགྒཧཏོ ‘‘དུཀྑཾ པརིཛཱནཱམི, སམུདཡཾ པཛཧཱམི, ནིརོདྷཾ སཙྪིཀརོམི, མགྒཾ བྷཱཝེམཱི’’ཏི ཨཱབྷོགསམནྣཱཧཱརམནསིཀཱརཔཙྩཝེཀྑཎཱ ནཏྠི, པརིགྒཧཏོ པཊྛཱཡ ཧོཏི. ཨཔརབྷཱགེ པན དུཀྑཾ པརིཉྙཱཏམེཝ ཧོཏི…པེ… མགྒོ བྷཱཝིཏོཝ ཧོཏི.

ཏཏྠ དྭེ སཙྩཱནི དུདྡསཏྟཱ གམྦྷཱིརཱནི, དྭེ གམྦྷཱིརཏྟཱ དུདྡསཱནི. དུཀྑསཙྩཉྷི ཨུཔྤཏྟིཏོ པཱཀཊཾ, ཁཱཎུཀཎྚཀཔྤཧཱརཱདཱིསུ ‘‘ཨཧོ དུཀྑ’’ནྟི ཝཏྟབྦཏམྤི ཨཱཔཛྫཏི. སམུདཡསཙྩཾ ཁཱདིཏུཀཱམཏཱབྷུཉྫིཏུཀཱམཏཱདིཝསེན ཨུཔྤཏྟིཏོ པཱཀཊཾ. ལཀྑཎཔཊིཝེདྷཏོ པན ཨུབྷཡམྤི ¶ གམྦྷཱིརཾ. ཨིཏི ཏཱནི དུདྡསཏྟཱ གམྦྷཱིརཱནི. ཨིཏརེསཾ པན དྭིནྣཾ དསྶནཏྠཱཡ པཡོགོ བྷཝགྒགྒཧཎཏྠཾ ཧཏྠཔསཱརཎཾ ཝིཡ, ཨཝཱིཙིཕུསནཏྠཾ པཱདཔསཱརཎཾ ཝིཡ, སཏདྷཱ བྷིནྣསྶ ཝཱལསྶ ཀོཊིཡཱ ཀོཊིཔཊིཔཱདནཾ ཝིཡ ཙ ཧོཏི. ཨིཏི ཏཱནི གམྦྷཱིརཏྟཱ དུདྡསཱནི. ཨེཝཾ དུདྡསཏྟཱ གམྦྷཱིརེསུ གམྦྷཱིརཏྟཱ ཙ དུདྡསེསུ ཙཏཱུསུ སཙྩེསུ ཨུགྒཧཱདིཝསེན པུབྦབྷཱགཉཱཎུཔྤཏྟིཾ སནྡྷཱཡ ཨིདཾ ‘‘དུཀྑེ ཉཱཎ’’ནྟིཨཱདི ཝུཏྟཾ. པཊིཝེདྷཀྑཎེ པན ཨེཀམེཝ ཏཾ ཉཱཎཾ ཧོཏི.

ཨཔརེ ¶ པནཱཧུ – ཙཏུབྦིདྷཾ སཙྩེསུ ཉཱཎཾ སུཏམཡཉཱཎཾ ཝཝཏྠཱནཉཱཎཾ སམྨསནཉཱཎཾ ཨབྷིསམཡཉཱཎནྟི. ཏཏྠ ཀཏམཾ སུཏམཡཉཱཎཾ? སཾཁིཏྟེན ཝཱ ཝིཏྠཱརེན ཝཱ ཙཏྟཱརི སཙྩཱནི སུཏྭཱ ཛཱནཱཏི ‘‘ཨིདཾ དུཀྑཾ, ཨཡཾ སམུདཡོ, ཨཡཾ ནིརོདྷོ, ཨཡཾ མགྒོ’’ཏི. ཨིདཾ སུཏམཡཉཱཎཾ. ཀཏམཾ ཝཝཏྠཱནཉཱཎཾ? སོ སུཏཱནཾ ཨཏྠཾ ཨུཔཔརིཀྑཏི དྷམྨཏོ ཙ ལཀྑཎཏོ ཙ, ‘‘ཨིམེ དྷམྨཱ ཨིམསྨིཾ སཙྩེ པརིཡཱཔནྣཱ, ཨིམསྶ སཙྩསྶ ཨིདཾ ལཀྑཎ’’ནྟི སནྣིཊྛཱནཾ ཀརོཏི. ཨིདཾ ཝཝཏྠཱནཉཱཎཾ. ཀཏམཾ སམྨསནཉཱཎཾ? སོ ཨེཝཾ ཡཐཱནུཔུབྦཾ ཙཏྟཱརི སཙྩཱནི ཝཝཏྠཔེཏྭཱ ཨཐ དུཀྑམེཝ གཧེཏྭཱ ཡཱཝ གོཏྲབྷུཉཱཎཾ ཨནིཙྩཏོ དུཀྑཏོ ཨནཏྟཏོ སམྨསཏི. ཨིདཾ སམྨསནཉཱཎཾ. ཀཏམཾ ཨབྷིསམཡཉཱཎཾ? ལོཀུཏྟརམགྒཀྑཎེ ཨེཀེན ཉཱཎེན ཙཏྟཱརི སཙྩཱནི ཨཔུབྦཾ ཨཙརིམཾ ཨབྷིསམེཏི ‘‘དུཀྑཾ པརིཉྙཱབྷིསམཡེན, སམུདཡཾ པཧཱནཱབྷིསམཡེན, ནིརོདྷཾ སཙྪིཀིརིཡཱབྷིསམཡེན ¶ མགྒཾ བྷཱཝནཱབྷིསམཡེན ཨབྷིསམེཏཱི’’ཏི. ཨིདཾ ཨབྷིསམཡཉཱཎནྟི.

སམྨཱསངྐཔྤནིདྡེསེ ཀཱམཏོ ནིསྶཊོཏི ནེཀྑམྨསངྐཔྤོ. བྱཱཔཱདཏོ ནིསྶཊོཏི ཨབྱཱཔཱདསངྐཔྤོ. ཝིཧིཾསཱཡ ནིསྶཊོཏི ཨཝིཧིཾསཱསངྐཔྤོ. ཏཏྠ ནེཀྑམྨཝིཏཀྐོ ཀཱམཝིཏཀྐསྶ པདགྷཱཏཾ པདཙྪེདཾ ཀརོནྟོ ཨུཔྤཛྫཏི, ཨབྱཱཔཱདཝིཏཀྐོ བྱཱཔཱདཝིཏཀྐསྶ, ཨཝིཧིཾསཱཝིཏཀྐོ ཝིཧིཾསཱཝིཏཀྐསྶ. ཏཐཱ ནེཀྑམྨཨབྱཱཔཱདཨཝིཧིཾསཱཝིཏཀྐཱ ཀཱམབྱཱཔཱདཝིཧིཾསཱཝིཏཀྐཱནཾ པཙྩནཱིཀཱ ཧུཏྭཱ ཨུཔྤཛྫནྟི.

ཏཏྠ ཡོགཱཝཙརོ ཀཱམཝིཏཀྐསྶ པདགྷཱཏནཏྠཾ ཀཱམཝིཏཀྐཾ ཝཱ སམྨསཏི ཨཉྙཾ ཝཱ པན ཀིཉྩི སངྑཱརཾ. ཨཐསྶ ཝིཔསྶནཱཀྑཎེ ཝིཔསྶནཱསམྤཡུཏྟོ སངྐཔྤོ ཏདངྒཝསེན ཀཱམཝིཏཀྐསྶ པདགྷཱཏཾ པདཙྪེདཾ ཀརོནྟོ ཨུཔྤཛྫཏི, ཝིཔསྶནཾ ཨུསྶུཀྐཱཔེཏྭཱ མགྒཾ པཱཔེཏི. ཨཐསྶ མགྒཀྑཎེ མགྒསམྤཡུཏྟོ སངྐཔྤོ སམུཙྪེདཝསེན ཀཱམཝིཏཀྐསྶ པདགྷཱཏཾ པདཙྪེདཾ ཀརོནྟོ ཨུཔྤཛྫཏི. བྱཱཔཱདཝིཏཀྐསྶཔི པདགྷཱཏནཏྠཾ བྱཱཔཱདཝིཏཀྐཾ ཝཱ ཨཉྙཾ ཝཱ ¶ སངྑཱརཾ, ཝིཧིཾསཱཝིཏཀྐསྶ པདགྷཱཏནཏྠཾ ཝིཧིཾསཱཝིཏཀྐཾ ཝཱ ཨཉྙཾ ཝཱ སངྑཱརཾ སམྨསཏི. ཨཐསྶ ཝིཔསྶནཱཀྑཎེཏི སབྦཾ པུརིམནཡེནེཝ ཡོཛེཏབྦཾ.

ཀཱམཝིཏཀྐཱདཱིནཾ ¶ པན ཏིཎྞམྤི པཱལི༹ཡཾ ཝིབྷཏྟེསུ ཨཊྛཏིཾསཱརམྨཎེསུ ཨེཀཀམྨཊྛཱནམྤི ཨཔཙྩནཱིཀཾ ནཱམ ནཏྠི. ཨེཀནྟཏོ པན ཀཱམཝིཏཀྐསྶ ཏཱཝ ཨསུབྷེསུ པཋམཛ྄ཛྷཱནམེཝ པཙྩནཱིཀཾ, བྱཱཔཱདཝིཏཀྐསྶ མེཏྟཱཡ ཏིཀཙཏུཀྐཛ྄ཛྷཱནཱནི, ཝིཧིཾསཨཱཝིཏཀྐསྶ ཀརུཎཱཡ ཏིཀཙཏུཀྐཛ྄ཛྷཱནཱནི. ཏསྨཱ ཨསུབྷཔརིཀམྨཾ ཀཏྭཱ ཛྷཱནཾ སམཱཔནྣསྶ སམཱཔཏྟིཀྑཎེ ཛྷཱནསམྤཡུཏྟོ ཝིཏཀྐོ ཝིཀྑམྦྷནཝསེན ཀཱམཝིཏཀྐསྶ པཙྩནཱིཀོ ཧུཏྭཱ ཨུཔྤཛྫཏི, ཛྷཱནཾ པཱདཀཾ ཀཏྭཱ ཝིཔསྶནཾ པཊྛཔེནྟསྶ ཝིཔསྶནཱཀྑཎེ ཝིཔསྶནཱསམྤཡུཏྟོ སངྐཔྤོ ཏདངྒཝསེན ཀཱམཝིཏཀྐསྶ པཙྩནཱིཀོ ཧུཏྭཱ ཨུཔྤཛྫཏི, ཝིཔསྶནཾ ཨུསྶུཀྐཱཔེཏྭཱ མགྒཾ པཱཔེནྟསྶ མགྒཀྑཎེ མགྒསམྤཡུཏྟོ སངྐཔྤོ སམུཙྪེདཝསེན ཀཱམཝིཏཀྐསྶ པཙྩནཱིཀོ ཧུཏྭཱ ཨུཔྤཛྫཏི. ཨེཝཾ ཨུཔྤནྣོ ནེཀྑམྨསངྐཔྤོཏི ཝུཙྩཏཱིཏི ཝེདིཏབྦོ.

མེཏྟཱཡ ¶ པན པརིཀམྨཾ ཀཏྭཱ, ཀརུཎཱཡ པརིཀམྨཾ ཀཏྭཱ ཛྷཱནཾ སམཱཔནྣསྶཱཏི སབྦཾ པུརིམནཡེནེཝ ཡོཛེཏབྦཾ. ཨེཝཾ ཨུཔྤནྣོ ཨབྱཱཔཱདསངྐཔྤོཏི ཝུཙྩཏི, ཨཝིཧིཾསཱསངྐཔྤོཏི ཝུཙྩཏཱིཏི ཝེདིཏབྦོ. ཨེཝམེཏེ ནེཀྑམྨསངྐཔྤཱདཡོ ཝིཔསྶནཱཛྷཱནཝསེན ཨུཔྤཏྟཱིནཾ ནཱནཏྟཱ པུབྦབྷཱགེ ནཱནཱ, མགྒཀྑཎེ པན ཨིམེསུ ཏཱིསུ ཋཱནེསུ ཨུཔྤནྣསྶ ཨཀུསལསངྐཔྤསྶ པདཙྪེདཏོ ཨནུཔྤཏྟིསཱདྷནཝསེན མགྒངྒཾ པཱུརཡམཱནོ ཨེཀོཝ ཀུསལསངྐཔྤོ ཨུཔྤཛྫཏི. ཨཡཾ སམྨཱསངྐཔྤོ ནཱམ.

སམྨཱཝཱཙཱནིདྡེསེཔི ཡསྨཱ ཨཉྙེནེཝ ཙིཏྟེན མུསཱཝཱདཱ ཝིརམཏི, ཨཉྙེན ཨཉྙེན པིསུཎཱཝཱཙཱདཱིཧི, ཏསྨཱ ཙཏསྶོཔེཏཱ ཝེརམཎིཡོ པུབྦབྷཱགེ ནཱནཱ, མགྒཀྑཎེ པན མིཙྪཱཝཱཙཱསངྑཱཏཱཡ ཙཏུབྦིདྷཱཡ ཨཀུསལདུསྶཱིལྱཙེཏནཱཡ པདཙྪེདཏོ ཨནུཔྤཏྟིསཱདྷནཝསེན མགྒངྒཾ པཱུརཡམཱནཱ ཨེཀཱཝ སམྨཱཝཱཙཱསངྑཱཏཱ ཀུསལཝེརམཎི ཨུཔྤཛྫཏི. ཨཡཾ སམྨཱཝཱཙཱ ནཱམ.

སམྨཱཀམྨནྟནིདྡེསེཔི ཡསྨཱ ཨཉྙེནེཝ ཙིཏྟེན པཱཎཱཏིཔཱཏཱ ཝིརམཏི, ཨཉྙེན ཨདིནྣཱདཱནཱ, ཨཉྙེན མིཙྪཱཙཱརཱ, ཏསྨཱ ཏིསྶོཔེཏཱ ཝེརམཎིཡོ པུབྦབྷཱགེ ནཱནཱ, མགྒཀྑཎེ པན མིཙྪཱཀམྨནྟསངྑཱཏཱཡ ཏིཝིདྷཱཡ ཨཀུསལདུསྶཱིལྱཙེཏནཱཡ པདཙྪེདཏོ ཨནུཔྤཏྟིསཱདྷནཝསེན མགྒངྒཾ པཱུརཡམཱནཱ ཨེཀཱཝ སམྨཱཀམྨནྟསངྑཱཏཱ ཀུསལཝེརམཎི ཨུཔྤཛྫཏི. ཨཡཾ སམྨཱཀམྨནྟོ ནཱམ.

སམྨཱཨཱཛཱིཝནིདྡེསེ ¶ ¶ ཨིདྷཱཏི ཨིམསྨིཾ སཱསནེ. ཨརིཡསཱཝཀོཏི ཨརིཡསྶ བུདྡྷསྶ སཱཝཀོ. མིཙྪཱཨཱཛཱིཝཾ པཧཱཡཱཏི པཱཔཀཾ ཨཱཛཱིཝཾ པཛཧིཏྭཱ. སམྨཱཨཱཛཱིཝེནཱཏི བུདྡྷཔྤསཏྠེན ཀུསལཨཱཛཱིཝེན. ཛཱིཝིཀཾ ཀཔྤེཏཱིཏི ཛཱིཝིཏཔྤཝཏྟིཾ པཝཏྟེཏི. ཨིདྷཱཔི ཡསྨཱ ཨཉྙེནེཝ ཙིཏྟེན ཀཱཡདྭཱརཝཱིཏིཀྐམཱ ཝིརམཏི, ཨཉྙེནེཝ ཝཙཱིདྭཱརཝཱིཏིཀྐམཱ, ཏསྨཱ པུབྦབྷཱགེ ནཱནཱཀྑཎེསུ ཨུཔྤཛྫཏི, མགྒཀྑཎེ པན དྭཱིསུ དྭཱརེསུ སཏྟནྣཾ ཀམྨཔཐཱནཾ ཝསེན ཨུཔྤནྣཱཡ མིཙྪཱཨཱཛཱིཝདུསྶཱིལྱཙེཏནཱཡ པདཙྪེདཏོ ཨནུཔྤཏྟིསཱདྷནཝསེན མགྒངྒཾ པཱུརཡམཱནཱ ཨེཀཱཝ སམྨཱཨཱཛཱིཝསངྑཱཏཱ ཀུསལཝེརམཎི ཨུཔྤཛྫཏི. ཨཡཾ སམྨཱཨཱཛཱིཝོ ནཱམ.

སམྨཱཝཱཡཱམནིདྡེསེ ཨིདྷ བྷིཀྑཱུཏི ཨིམསྨིཾ སཱསནེ པཊིཔནྣཀོ ¶ བྷིཀྑུ. ཨནུཔྤནྣཱནནྟི ཨནིབྦཏྟཱནཾ. པཱཔཀཱནནྟི ལཱམཀཱནཾ. ཨཀུསལཱནཾ དྷམྨཱནནྟི ཨཀོསལླསམྦྷཱུཏཱནཾ དྷམྨཱནཾ. ཨནུཔྤཱདཱཡཱཏི ན ཨུཔྤཱདནཏྠཱཡ. ཚནྡཾ ཛནེཏཱིཏི ཀཏྟུཀམྱཏཱསངྑཱཏཾ ཀུསལཙྪནྡཾ ཛནེཏི ཨུཔྤཱདེཏི. ཝཱཡམཏཱིཏི པཡོགཾ ཛནེཏི པརཀྐམཾ ཀརོཏི. ཝཱིརིཡཾ ཨཱརབྷཏཱིཏི ཀཱཡིཀཾ ཙེཏསིཀཾ ཝཱིརིཡཾ ཀརོཏི. ཙིཏྟཾ པགྒཎྷཱཏཱིཏི ཏེནེཝ སཧཛཱཏཝཱིརིཡེན ཙིཏྟཾ ཨུཀྑིཔཏི. པདཧཏཱིཏི པདྷཱནཝཱིརིཡཾ ཀརོཏི. པཊིཔཱཊིཡཱ པནེཏཱནི ཙཏྟཱརིཔི པདཱནི ཨཱསེཝནཱབྷཱཝནཱབཧུལཱིཀམྨསཱཏཙྩཀིརིཡཱཧི ཡོཛེཏབྦཱནི.

ཨུཔྤནྣཱནནྟི ཨནུཔྤནྣཱནནྟི ཨཝཏྟབྦཏཾ ཨཱཔནྣཱནཾ. པཧཱནཱཡཱཏི པཛཧནཏྠཱཡ. ཨནུཔྤནྣཱནཾ ཀུསལཱནཾ དྷམྨཱནནྟི ཨནིབྦཏྟཱནཾ ཀོསལླསམྦྷཱུཏཱནཾ དྷམྨཱནཾ. ཨུཔྤཱདཱཡཱཏི ཨུཔྤཱདནཏྠཱཡ. ཨུཔྤནྣཱནནྟི ནིབྦཏྟཱནཾ. ཋིཏིཡཱཏི ཋིཏཏྠཱཡ. ཨསམྨོསཱཡཱཏི ཨནསྶནཏྠཾ. བྷིཡྻོབྷཱཝཱཡཱཏི པུནཔྤུནཾ བྷཱཝཱཡ. ཝེཔུལླཱཡཱཏི ཝིཔུལབྷཱཝཱཡ. བྷཱཝནཱཡཱཏི ཝཌྜྷིཡཱ. པཱརིཔཱུརིཡཱཏི པརིཔཱུརཎཏྠཱཡ.

ཨེཏེ པན སམྨཱཝཱཡཱམསངྑཱཏཱ ཙཏྟཱརོ སམྨཔྤདྷཱནཱ པུབྦབྷཱགེ ལོཀིཡཱ, མགྒཀྑཎེ ལོཀུཏྟརཱ. མགྒཀྑཎེ པན ཨེཀམེཝ ཝཱིརིཡཾ ཙཏུཀིཙྩསཱདྷནཝསེན ཙཏྟཱརི ནཱམཱནི ལབྷཏི. ཏཏྠ ལོཀིཡཱ ཀསྶཔསཾཡུཏྟེ ཝུཏྟནཡེནེཝ ཝེདིཏབྦཱ. ཝུཏྟཉྷི ཏཏྠ –

‘‘ཙཏྟཱརོམེ ¶ , ཨཱཝུསོ, སམྨཔྤདྷཱནཱ; ཀཏམེ ཙཏྟཱརོ? ཨིདྷཱཝུསོ, བྷིཀྑུ ‘ཨནུཔྤནྣཱ མེ པཱཔཀཱ ཨཀུསལཱ དྷམྨཱ ཨུཔྤཛྫམཱནཱ ཨནཏྠཱཡ ¶ སཾཝཏྟེཡྻུ’ནྟི ཨཱཏཔྤཾ ཀརོཏི, ‘ཨུཔྤནྣཱ མེ པཱཔཀཱ ཨཀུསལཱ དྷམྨཱ ཨཔྤཧཱིཡམཱནཱ ཨནཏྠཱཡ སཾཝཏྟེཡྻུ’ནྟི ཨཱཏཔྤཾ ཀརོཏི, ‘ཨནུཔྤནྣཱ མེ ཀུསལཱ དྷམྨཱ ཨནུཔྤཛྫམཱནཱ ཨནཏྠཱཡ སཾཝཏྟེཡྻུ’ནྟི ཨཱཏཔྤཾ ཀརོཏི, ‘ཨུཔྤནྣཱ མེ ཀུསལཱ དྷམྨཱ ནིརུཛ྄ཛྷམཱནཱ ཨནཏྠཱཡ སཾཝཏྟེཡྻུ’ནྟི ཨཱཏཔྤཾ ཀརོཏཱི’’ཏི (སཾ. ནི. ༢.༡༤༥);

ཏཏྠ ཙ ཨནུཔྤནྣཱཏི ཨསམུདཱཙཱརཝསེན ཝཱ ཨནནུབྷཱུཏཱརམྨཎཝསེན ཝཱ ཨནུཔྤནྣཱ. ཨཉྙཐཱ ཧི ཨནམཏགྒེ སཾསཱརེ ཨནུཔྤནྣཱ པཱཔཀཱ ཨཀུསལཱ དྷམྨཱ ནཱམ ནཏྠི, ཨནུཔྤནྣཱ པན ཨུཔྤཛྫམཱནཱཔི ཨེཏེཡེཝ ཨུཔྤཛྫནྟི, པཧཱིཡམཱནཱཔི ཨེཏེཡེཝ པཧཱིཡནྟི.

ཏཏྠ ཨེཀཙྩསྶ ཝཏྟགནྠདྷུཏངྒསམཱདྷིཝིཔསྶནཱནཝཀམྨབྷཝཱནཾ ¶ ཨཉྙཏརཝསེན ཀིལེསཱ ན སམུདཱཙརནྟི. ཀཐཾ? ཨེཀཙྩོ ཧི ཝཏྟསམྤནྣོ ཧོཏི, ཨསཱིཏི ཁནྡྷཀཝཏྟཱནི ཙུདྡས མཧཱཝཏྟཱནི ཙེཏིཡངྒཎབོདྷིཡངྒཎཔཱནཱིཡམཱལ༹ཀཨུཔོསཐཱགཱརཨཱགནྟུཀགམིཀཝཏྟཱནི ཙ ཀརོནྟསྶེཝ ཀིལེསཱ ཨོཀཱསཾ ན ལབྷནྟི. ཨཔརབྷཱགེ པནསྶ ཝཏྟཱནི ཝིསྶཛྫེཏྭཱ བྷིནྣཝཏྟསྶ ཙརཏོ ཨཡོནིསོམནསིཀཱརཾ སཏིཝོསྶགྒཉྩ ཨཱགམྨ ཨུཔྤཛྫནྟི. ཨེཝམྤི ཨསམུདཱཙཱརཝསེན ཨནུཔྤནྣཱ ཨུཔྤཛྫནྟི ནཱམ.

ཨེཀཙྩོ གནྠཡུཏྟོ ཧོཏི, ཨེཀམྤི ནིཀཱཡཾ གཎྷཱཏི དྭེཔི ཏཡོཔི ཙཏྟཱརོཔི པཉྩཔི. ཏསྶ ཏེཔིཊཀཾ བུདྡྷཝཙནཾ ཨཏྠཝསེན པཱལི༹ཝསེན ཨནུསནྡྷིཝསེན པུབྦཱཔརཝསེན གཎྷནྟསྶ སཛ྄ཛྷཱཡནྟསྶ ཙིནྟེནྟསྶ ཝཱཙེནྟསྶ དེསེནྟསྶ པཀཱསེནྟསྶ ཀིལེསཱ ཨོཀཱསཾ ན ལབྷནྟི. ཨཔརབྷཱགེ པནསྶ གནྠཀམྨཾ པཧཱཡ ཀུསཱིཏསྶ ཙརཏོ ཨཡོནིསོམནསིཀཱརསཏིཝོསྶགྒེ ཨཱགམྨ ཨུཔྤཛྫནྟི. ཨེཝམྤི ཨསམུདཱཙཱརཝསེན ཨནུཔྤནྣཱ ཨུཔྤཛྫནྟི ནཱམ.

ཨེཀཙྩོ པན དྷུཏངྒདྷརོ ཧོཏི, ཏེརས དྷུཏངྒགུཎེ སམཱདཱཡ ཝཏྟཏི, ཏསྶ དྷུཏངྒགུཎེ པརིཧརནྟསྶ ཀིལེསཱ ཨོཀཱསཾ ན ལབྷནྟི. ཨཔརབྷཱགེ ¶ པནསྶ དྷུཏངྒཱནི ཝིསྶཛྫེཏྭཱ བཱཧུལླཱཡ ཨཱཝཏྟསྶ ཙརཏོ ཨཡོནིསོམནསིཀཱརསཏིཝོསྶགྒེ ཨཱགམྨ ཨུཔྤཛྫནྟི. ཨེཝམྤི ཨསམུདཱཙཱརཝསེན ཨནུཔྤནྣཱ ཨུཔྤཛྫནྟི ནཱམ.

ཨེཀཙྩོ ཨཊྛསུ སམཱཔཏྟཱིསུ ཙིཎྞཝསཱི ཧོཏི, ཏསྶ པཋམཛ྄ཛྷཱནཱདཱིསུ ཨཱཝཛྫནཝསཱིཨཱདཱིནཾ ཝསེན ཝིཧརནྟསྶ ཀིལེསཱ ཨོཀཱསཾ ན ལབྷནྟི. ཨཔརབྷཱགེ པནསྶ པརིཧཱིནཛ྄ཛྷཱནསྶ ཝཱ ཝིསྶཊྛཛ྄ཛྷཱནསྶ ཝཱ བྷསྶཱདཱིསུ ཨནུཡུཏྟསྶ ཝིཧརཏོ ཨཡོནིསོམནསིཀཱརསཏིཝོསྶགྒེ ཨཱགམྨ ཨུཔྤཛྫནྟི. ཨེཝམྤི ཨསམུདཱཙཱརཝསེན ཨནུཔྤནྣཱ ཨུཔྤཛྫནྟི ནཱམ.

ཨེཀཙྩོ ¶ པན ཝིཔསྶཀོ ཧོཏི, སཏྟསུ ཝཱ ཨནུཔསྶནཱསུ (པཊི. མ. ༣.༣༥) ཨཊྛཱརསསུ ཝཱ མཧཱཝིཔསྶནཱསུ (པཊི. མ. ༡.༢༢) ཀམྨཾ ཀརོནྟོ ཝིཧརཏི, ཏསྶ ཨེཝཾ ཝིཧརཏོ ཀིལེསཱ ཨོཀཱསཾ ན ལབྷནྟི. ཨཔརབྷཱགེ པནསྶ ཝིཔསྶནཱཀམྨཾ པཧཱཡ ཀཱཡདལ༹ྷཱིབཧུལསྶ ཝིཧརཏོ ཨཡོནིསོམནསིཀཱརསཏིཝོསྶགྒེ ཨཱགམྨ ཨུཔྤཛྫནྟི. ཨེཝམྤི ཨསམུདཱཙཱརཝསེན ཨནུཔྤནྣཱ ཨུཔྤཛྫནྟི ནཱམ.

ཨེཀཙྩོ ནཝཀམྨིཀོ ཧོཏི, ཨུཔོསཐཱགཱརབྷོཛནསཱལཱདཱིནི ཀརོཏི ¶ , ཏསྶ ཏེསཾ ཨུཔཀརཎཱནི ཙིནྟེནྟསྶ ཀིལེསཱ ཨོཀཱསཾ ན ལབྷནྟི. ཨཔརབྷཱགེ པནསྶ ནཝཀམྨེ ནིཊྛིཏེ ཝཱ ཝིསྶཊྛེ ཝཱ ཨཡོནིསོམནསིཀཱརསཏིཝོསྶགྒེ ཨཱགམྨ ཨུཔྤཛྫནྟི. ཨེཝམྤི ཨསམུདཱཙཱརཝསེན ཨནུཔྤནྣཱ ཨུཔྤཛྫནྟི ནཱམ.

ཨེཀཙྩོ པན བྲཧྨལོཀཏོ ཨཱགཏོ སུདྡྷསཏྟོ ཧོཏི, ཏསྶ ཨནཱསེཝནཱཡ ཀིལེསཱ ཨོཀཱསཾ ན ལབྷནྟི. ཨཔརབྷཱགེ པནསྶ ལདྡྷཱསེཝནསྶ ཨཡོནིསོམནསིཀཱརསཏིཝོསྶགྒེ ཨཱགམྨ ཨུཔྤཛྫནྟི. ཨེཝམྤི ཨསམུདཱཙཱརཝསེན ཨནུཔྤནྣཱ ཨུཔྤཛྫནྟི ནཱམ. ཨེཝཾ ཏཱཝ ཨསམུདཱཙཱརཝསེན ཨནུཔྤནྣཏཱ ཝེདིཏབྦཱ.

ཀཐཾ ཨནནུབྷཱུཏཱརམྨཎཝསེན? ཨིདྷེཀཙྩོ ཨནནུབྷཱུཏཔུབྦཾ མནཱཔིཀཱདིབྷེདཾ ཨཱརམྨཎཾ ལབྷཏི, ཏསྶ ཏཏྠ ཨཡོནིསོམནསིཀཱརསཏིཝོསྶགྒེ ཨཱགམྨ རཱགཱདཡོ ཀིལེསཱ ཨུཔྤཛྫནྟི. ཨེཝཾ ཨནནུབྷཱུཏཱརམྨཎཝསེན ཨནུཔྤནྣཱ ཨུཔྤཛྫནྟི ནཱམ. ཨེཝཾ ཨནུཔྤནྣཱནཾ ཨཀུསལཱནཾ ཨུཔྤཱདེ སཏི ཨཏྟནོ ¶ ཨནཏྠཾ པསྶིཏྭཱ ཏེསཾ ཨནུཔྤཱདཱཡ སཏིཔཊྛཱནབྷཱཝནཱནུཡོགེན པཋམཾ སམྨཔྤདྷཱནཾ བྷཱཝེཏི, ཨུཔྤནྣེསུ པན ཏེསུ ཏེསཾ ཨཔྤཧཱནཏོ ཨཏྟནོ ཨནཏྠཾ པསྶིཏྭཱ ཏེསཾ པཧཱནཱཡ དུཏིཡཾ ཏཐེཝ སམྨཔྤདྷཱནཾ བྷཱཝེཏི.

ཨནུཔྤནྣཱ ཀུསལཱ དྷམྨཱཏི སམཐཝིཔསྶནཱ ཙེཝ མགྒོ ཙ. ཏེསཾ ཨནུཔྤཱདེ ཨཏྟནོ ཨནཏྠཾ པསྶིཏྭཱ ཏེསཾ ཨུཔྤཱདནཏྠཱཡ ཏཐེཝ ཏཏིཡཾ སམྨཔྤདྷཱནཾ བྷཱཝེཏི. ཨུཔྤནྣཱ ཀུསལཱ དྷམྨཱཏི སམཐཝིཔསྶནཱཝ. མགྒོ པན སཀིཾ ཨུཔྤཛྫིཏྭཱ ནིརུཛ྄ཛྷམཱནོ ཨནཏྠཱཡ སཾཝཏྟནཀོ ནཱམ ནཏྠི. སོ ཧི ཕལསྶ པཙྩཡཾ དཏྭཱཝ ནིརུཛ྄ཛྷཏི. ཏཱསཾ སམཐཝིཔསྶནཱནཾ ནིརོདྷཏོ ཨཏྟནོ ཨནཏྠཾ པསྶིཏྭཱ ཏཱསཾ ཋིཏིཡཱ ཏཐེཝ ཙཏུཏྠཾ སམྨཔྤདྷཱནཾ བྷཱཝེཏི. ལོཀུཏྟརམགྒཀྑཎེ པན ཨེཀམེཝ ཝཱིརིཡཾ.

ཡེ ¶ ཨེཝཾ ཨནུཔྤནྣཱ ཨུཔྤཛྫེཡྻུཾ, ཏེ ཡཐཱ ནེཝ ཨུཔྤཛྫནྟི, ཨེཝཾ ཏེསཾ ཨནུཔྤནྣཱནཾ ཨནུཔྤཱདཀིཙྩཾ, ཨུཔྤནྣཱནཉྩ པཧཱནཀིཙྩཾ སཱདྷེཏི. ཨུཔྤནྣཱཏི ཙེཏྠ ཙཏུབྦིདྷཾ ཨུཔྤནྣཾ ཝཏྟམཱནུཔྤནྣཾ བྷཱུཏཱཔགཏུཔྤནྣཾ ཨོཀཱསཀཏུཔྤནྣཾ བྷཱུམིལདྡྷུཔྤནྣནྟི. ཏཏྠ སབྦམྤི ཨུཔྤཱདཛརཱབྷངྒསམངྒིསངྑཱཏཾ ¶ ཝཏྟམཱནུཔྤནྣཾ ནཱམ. ཨཱརམྨཎརསཾ ཨནུབྷཝིཏྭཱ ནིརུདྡྷཾ ཨནུབྷཱུཏཱཔགཏསངྑཱཏཾ ཀུསལཱཀུསལཾ ཨུཔྤཱདཱདིཏྟཡམནུཔྤཏྭཱ ནིརུདྡྷཾ བྷུཏྭཱཔགཏསངྑཱཏཾ སེསསངྑཏཉྩ བྷཱུཏཱཔགཏུཔྤནྣཾ ནཱམ. ‘‘ཡཱནིསྶ ཏཱནི པུབྦེ ཀཏཱནི ཀམྨཱནཱི’’ཏི ཨེཝམཱདིནཱ (མ. ནི. ༣.༢༤༨) ནཡེན ཝུཏྟཾ ཀམྨཾ ཨཏཱིཏམྤི སམཱནཾ ཨཉྙཾ ཝིཔཱཀཾ པཊིབཱཧིཏྭཱ ཨཏྟནོ ཝིཔཱཀསྶ ཨོཀཱསཾ ཀཏྭཱ ཋིཏཏྟཱ ཏཐཱ ཀཏོཀཱསཉྩ ཝིཔཱཀཾ ཨནུཔྤནྣམྤི སམཱནཾ ཨེཝཾ ཀཏེ ཨོཀཱསེ ཨེཀནྟེན ཨུཔྤཛྫནཏོ ཨོཀཱསཀཏུཔྤནྣཾ ནཱམ. ཏཱསུ ཏཱསུ བྷཱུམཱིསུ ཨསམཱུཧཏཾ ཨཀུསལཾ བྷཱུམིལདྡྷུཔྤནྣཾ ནཱམ.

ཨེཏྠ ཙ བྷཱུམིཡཱ བྷཱུམིལདྡྷསྶ ཙ ནཱནཏྟཾ ཝེདིཏབྦཾ – བྷཱུམཱིཏི ཧི ཝིཔསྶནཱཡ ཨཱརམྨཎབྷཱུཏཱ ཏེབྷཱུམཀཱ པཉྩཀྑནྡྷཱ. བྷཱུམིལདྡྷཾ ནཱམ ཏེསུ ཁནྡྷེསུ ཨུཔྤཏྟིརཧཾ ཀིལེསཛཱཏཾ. ཏེན ཧི སཱ བྷཱུམིལདྡྷཱ ནཱམ ཧོཏཱིཏི ཏསྨཱ བྷཱུམིལདྡྷནྟི ཝུཙྩཏི. སཱ ཙ ཁོ ན ཨཱརམྨཎཝསེན. ཨཱརམྨཎཝསེན ཧི སབྦེཔི ཨཏཱིཏཱནཱགཏེ པརིཉྙཱཏེཔི ཙ ཁཱིཎཱསཝཱནཾ ཁནྡྷེ ཨཱརབྦྷ ཀིལེསཱ ཨུཔྤཛྫནྟི. ཡདི ཙ ཏཾ བྷཱུམིལདྡྷཾ ནཱམ སིཡཱ, ཏསྶ ཨཔྤཧེཡྻཏོ ན ཀོཙི བྷཝམཱུལཾ པཛཧེཡྻ. ཝཏྠུཝསེན པན བྷཱུམིལདྡྷཾ ཝེདིཏབྦཾ. ཡཏྠ ཡཏྠ ¶ ཧི ཝིཔསྶནཱཡ ཨཔརིཉྙཱཏཱ ཁནྡྷཱ ཨུཔྤཛྫནྟི, ཏཏྠ ཏཏྠ ཨུཔྤཱདཏོ པབྷུཏི ཏེསུ ཝཊྚམཱུལཾ ཀིལེསཛཱཏཾ ཨནུསེཏི. ཏཾ ཨཔྤཧཱིནཊྛེན བྷཱུམིལདྡྷནྟི ཝེདིཏབྦཾ.

ཏཏྠ ཙ ཡསྶ ཡེསུ ཁནྡྷེསུ ཨཔྤཧཱིནཊྛེན ཨནུསཡིཏཱ ཀིལེསཱ, ཏསྶ ཏེ ཨེཝ ཁནྡྷཱ ཏེསཾ ཀིལེསཱནཾ ཝཏྠུ, ན ཨཉྙེསཾ སནྟཀཱ ཁནྡྷཱ. ཨཏཱིཏཀྑནྡྷེསུ ཙ ཨཔྤཧཱིནཱནུསཡིཏཱནཾ ཀིལེསཱནཾ ཨཏཱིཏཀྑནྡྷཱཝ ཝཏྠུ, ན ཨིཏརེ. ཨེས ནཡོ ཨནཱགཏཱདཱིསུ. ཏཐཱ ཀཱམཱཝཙརཀྑནྡྷེསུ ཨཔྤཧཱིནཱནུསཡིཏཱནཾ ཀིལེསཱནཾ ཀཱམཱཝཙརཀྑནྡྷཱ ཨེཝ ཝཏྠུ, ན ཨིཏརེ. ཨེས ནཡོ རཱུཔཱརཱུཔཱཝཙརེསུ. སོཏཱཔནྣཱདཱིསུ པན ཡསྶ ཡསྶ ཨརིཡཔུགྒལསྶ ཁནྡྷེསུ ཏཾ ཏཾ ཝཊྚམཱུལཾ ཀིལེསཛཱཏཾ ཏེན ཏེན མགྒེན པཧཱིནཾ, ཏསྶ ཏསྶ ¶ ཏེ ཏེ ཁནྡྷཱ པཧཱིནཱནཾ ཏེསཾ ཏེསཾ ཝཊྚམཱུལཀཱནཾ ཀིལེསཱནཾ ཨཝཏྠུཏོ བྷཱུམཱིཏི སངྑཾ ན ལབྷནྟི. པུཐུཛྫནསྶ སབྦསོ ཝཊྚམཱུལཀིལེསཱནཾ ཨཔྤཧཱིནཏྟཱ ཡཾཀིཉྩི ཀརིཡམཱནཾ ཀམྨཾ ཀུསལམཀུསལཾ ཝཱ ཧོཏི, ཨིཙྩསྶ ཀམྨཀིལེསཔཙྩཡཱཝ ཝཊྚཾ ཝཊྚཏི, ཏསྶ ཏསྶེཝ ཏཾ ཝཊྚམཱུལཾ རཱུཔཀྑནྡྷེཡེཝ, ན ཝེདནཱདཱིསུ. ཝིཉྙཱཎཀྑནྡྷེཡེཝ ཝཱ, ན རཱུཔཀྑནྡྷཱདཱིསཱུཏི ན ཝཏྟབྦཾ. ཀསྨཱ? ཨཝིསེསེན པཉྩསུཔི ཁནྡྷེསུ ¶ ཨནུསཡིཏཏྟཱ. ཀཐཾ? པཐཝཱིརསཱདི ཝིཡ རུཀྑེ. ཡཐཱ ཧི མཧཱརུཀྑེ པཐཝཱིཏལཾ ཨདྷིཊྛཱཡ པཐཝཱིརསཉྩ ཨཱཔོརསཉྩ ནིསྶཱཡ ཏཔྤཙྩཡཱ མཱུལཁནྡྷསཱཁཱཔསཱཁཱཔལླཝཔལཱསཔུཔྥཕལེཧི ཝཌྜྷིཏྭཱ ནབྷཾ པཱུརེཏྭཱ ཡཱཝ ཀཔྤཱཝསཱནཱ བཱིཛཔརམྤརཱཡ རུཀྑཔཝེཎིཾ སནྟཱནཡམཱནེ ཋིཏེ ཏཾ པཐཝཱིརསཱདིམཱུལེཡེཝ, ན ཁནྡྷཱདཱིསུ. ཕལེཡེཝ ཝཱ, ན མཱུལཱདཱིསཱུཏི ན ཝཏྟབྦཾ. ཀསྨཱ? ཨཝིསེསེན སབྦེསུ མཱུལཱདཱིསུ ཨནུགཏཏྟཱཏི. ཡཐཱ པན ཏསྶེཝ རུཀྑསྶ པུཔྥཕལཱདཱིསུ ནིབྦིནྣོ ཀོཙི པུརིསོ ཙཏཱུསུ དིསཱསུ མཎྜཱུཀཀཎྚཀཾ ནཱམ ཝིསཀཎྚཀཾ ཨཱཀོཊེཡྻ, ཨཐ སོ རུཀྑོ ཏེན ཝིསསམྥསྶེན ཕུཊྛོ པཐཝཱིརསཨཱཔོརསཱནཾ པརིཡཱདིནྣཏྟཱ ཨཔྤསཝདྷམྨཏཾ ཨཱགམྨ པུན སནྟཱནཾ ནིབྦཏྟེཏུཾ ན སཀྐུཎེཡྻ, ཨེཝམེཝ ཁནྡྷཔྤཝཏྟིཡཾ ནིབྦིནྣོ ཀུལཔུཏྟོ ཏསྶ པུརིསསྶ ཙཏཱུསུ དིསཱསུ རུཀྑེ ཝིསཡོཛནཾ ཝིཡ ཨཏྟནོ སནྟཱནེ ཙཏུམགྒབྷཱཝནཾ ཨཱརབྷཏི. ཨཐསྶ སོ ཁནྡྷསནྟཱནོ ཏེན ཙཏུམགྒཝིསསམྥསྶེན སབྦསོ ཝཊྚམཱུལཀིལེསཱནཾ པརིཡཱདིནྣཏྟཱ ཀིརིཡསབྷཱཝམཏྟཾ ¶ ཨུཔགཏཀཱཡཀམྨཱདིསབྦཀམྨཔྤབྷེདོ ཧུཏྭཱ ཨཱཡཏིཾ པུནབྦྷཝཱནབྷིནིབྦཏྟནདྷམྨཏཾ ཨཱགམྨ བྷཝནྟརསནྟཱནཾ ནིབྦཏྟེཏུཾ ན སཀྐོཏི, ཀེཝལཾ ཙརིམཝིཉྙཱཎནིརོདྷེན ནིརིནྡྷནོ ཝིཡ ཛཱཏཝེདོ ཨནུཔཱདཱནོ པརིནིབྦཱཡཏི. ཨེཝཾ བྷཱུམིཡཱ བྷཱུམིལདྡྷསྶ ཙ ནཱནཏྟཾ ཝེདིཏབྦཾ.

ཨཔརམྤི ཙཏུབྦིདྷཾ ཨུཔྤནྣཾ སམུདཱཙཱརུཔྤནྣཾ ཨཱརམྨཎཱདྷིགྒཧིཏུཔྤནྣཾ ¶ ཨཝིཀྑམྦྷིཏུཔྤནྣཾ ཨསམཱུཧཏུཔྤནྣནྟི. ཏཏྠ ཝཏྟམཱནུཔྤནྣམེཝ སམུདཱཙཱརུཔྤནྣཾ. ཙཀྑཱདཱིནཾ པན ཨཱཔཱཐགཏེ ཨཱརམྨཎེ པུབྦབྷཱགེ ཨནུཔྤཛྫམཱནམྤི ཀིལེསཛཱཏཾ ཨཱརམྨཎསྶ ཨདྷིགྒཧིཏཏྟཱ ཨེཝ ཨཔརབྷཱགེ ཨེཀནྟེན ཨུཔྤཏྟིཏོ ཨཱརམྨཎཱདྷིགྒཧིཏུཔྤནྣནྟི ཝུཙྩཏི. སམཐཝིཔསྶནཱནཾ ཨཉྙཏརཝསེན ཨཝིཀྑམྦྷིཏཾ ཀིལེསཛཱཏཾ ཙིཏྟསནྟཏིམནཱརཱུལ༹ྷམྤི ཨུཔྤཏྟིནིཝཱརཀསྶ ཧེཏུནོ ཨབྷཱཝཱ ཨཝིཀྑམྦྷིཏུཔྤནྣཾ ནཱམ. སམཐཝིཔསྶནཱཝསེན པན ཝིཀྑམྦྷིཏམྤི ཨརིཡམགྒེན ཨསམཱུཧཏཏྟཱ ཨུཔྤཏྟིདྷམྨཏཾ ཨནཏཱིཏཏྟཱ ཨསམཱུཧཏུཔྤནྣནྟི ཝུཙྩཏི. ཏིཝིདྷམྤི ཙེཏཾ ཨཱརམྨཎཱདྷིགྒཧིཏཱཝིཀྑམྦྷིཏཱསམཱུཧཏུཔྤནྣཾ བྷཱུམིལདྡྷེནེཝ སངྒཧཾ གཙྪཏཱིཏི ཝེདིཏབྦཾ.

ཨིཙྩེཏསྨིཾ ཝུཏྟཔྤབྷེདེ ཨུཔྤནྣེ ཡདེཏཾ ཝཏྟམཱནབྷཱུཏཱཔགཏོཀཱསཀཏསམུདཱཙཱརསངྑཱཏཾ ཨུཔྤནྣཾ, ཏཾ ཨམགྒཝཛ྄ཛྷཏྟཱ ཀེནཙི མགྒཉཱཎེན པཧཱཏབྦཾ ན ཧོཏི. ཡཾ པནེཏཾ བྷཱུམིལདྡྷཱརམྨཎཱདྷིགྒཧིཏཱཝིཀྑམྦྷིཏཱསམཱུཧཏསངྑཱཏཾ ཨུཔྤནྣཾ, ཏསྶ ཏཾ ཨུཔྤནྣབྷཱཝཾ ནཱསཡམཱནཾ ཡསྨཱ ཏཾ ཏཾ ལོཀིཡལོཀུཏྟརཉཱཎཾ ཨུཔྤཛྫཏི, ཏསྨཱ ཏཾ སབྦམྤི པཧཱཏབྦཾ ཧོཏཱིཏི. ཨེཝཾ ཡེ མགྒོ ཀིལེསེ པཛཧཏི, ཏེ སནྡྷཱཡ ‘‘ཨུཔྤནྣཱན’’ནྟིཨཱདི ཝུཏྟཾ.

ཨཐ ¶ མགྒཀྑཎེ ཀཐཾ ཨནུཔྤནྣཱནཾ ཀུསལཱནཾ ཨུཔྤཱདཱཡ བྷཱཝནཱ ཧོཏི, ཀཐཉྩ ཨུཔྤནྣཱནཾ ཋིཏིཡཱཏི? མགྒཔྤཝཏྟིཡཱ ཨེཝ. མགྒོ ཧི པཝཏྟམཱནོ པུབྦེ ཨནུཔྤནྣཔུབྦཏྟཱ ཨནུཔྤནྣོ ནཱམ ཝུཙྩཏི. ཨནཱགཏཔུབྦཉྷི ཋཱནཾ ཨཱགནྟྭཱ ཨནནུབྷཱུཏཔུབྦཾ ཝཱ ཨཱརམྨཎཾ ཨནུབྷཝིཏྭཱ ཝཏྟཱརོ བྷཝནྟི ‘‘ཨནཱགཏཊྛཱནཾ ཨཱགཏམྷ, ཨནནུབྷཱུཏཾ ཨཱརམྨཎཾ ཨནུབྷཝཱམཱ’’ཏི. ཡཱཝསྶ པཝཏྟི, ཨཡམེཝ ཋིཏི ནཱམཱཏི ཋིཏིཡཱ བྷཱཝེཏཱིཏིཔི ཝཏྟུཾ ཝཊྚཏི. ཨེཝམེཏསྶ བྷིཀྑུནོ ཨིདཾ ལོཀུཏྟརམགྒཀྑཎེ ཨེཀམེཝ ཝཱིརིཡཾ ‘‘ཨནུཔྤནྣཱནཾ ¶ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡཱ’’ཏིཨཱདཱིནི ཙཏྟཱརི ནཱམཱནི ལབྷཏི. ཨཡཾ ལོཀུཏྟརམགྒཀྑཎེ སམྨཔྤདྷཱནཀཐཱ. ཨེཝམེཏྠ ལོཀིཡལོཀུཏྟརམིསྶཀཱ སམྨཔྤདྷཱནཱ ནིདྡིཊྛཱཏི.

སམྨཱསཏིནིདྡེསེ ¶ ཀཱཡེཏི རཱུཔཀཱཡེ. རཱུཔཀཱཡོ ཧི ཨིདྷ ཨངྒཔཙྩངྒཱནཾ ཀེསཱདཱིནཉྩ དྷམྨཱནཾ སམཱུཧཊྛེན ཧཏྠིཀཱཡརཐཀཱཡཱདཡོ ཝིཡ ཀཱཡོཏི ཨདྷིཔྤེཏོ. ཡཐཱ ཙ སམཱུཧཊྛེན, ཨེཝཾ ཀུཙྪིཏཱནཾ ཨཱཡཊྛེན. ཀུཙྪིཏཱནཉྷི པརམཛེགུཙྪཱནཾ སོ ཨཱཡོཏིཔི ཀཱཡོ. ཨཱཡོཏི ཨུཔྤཏྟིདེསོ. ཏཏྲཱཡཾ ཝཙནཏྠོ – ཨཱཡནྟི ཏཏོཏི ཨཱཡོ. ཀེ ཨཱཡནྟི? ཀུཙྪིཏཱ ཀེསཱདཡོ. ཨིཏི ཀུཙྪིཏཱནཾ ཨཱཡོཏི ཀཱཡོ.

ཀཱཡཱནུཔསྶཱིཏི ཀཱཡཾ ཨནུཔསྶནསཱིལོ, ཀཱཡཾ ཝཱ ཨནུཔསྶམཱནོ. ཀཱཡེཏི ཙ ཝཏྭཱཔི པུན ཀཱཡཱནུཔསྶཱིཏི དུཏིཡཾ ཀཱཡགྒཧཎཾ ཨསམྨིསྶཏོ ཝཝཏྠཱནགྷནཝིནིབྦྷོགཱདིདསྶནཏྠཾ ཀཏནྟི ཝེདིཏབྦཾ. ཏེན ན ཀཱཡེ ཝེདནཱནུཔསྶཱི ཙིཏྟདྷམྨཱནུཔསྶཱི ཝཱ, ཨཐ ཁོ ཀཱཡཱནུཔསྶཱིཡེཝཱཏི ཀཱཡསངྑཱཏེ ཝཏྠུསྨིཾ ཀཱཡཱནུཔསྶནཱཀཱརསྶེཝ དསྶནེན ཨསམྨིསྶཏོ ཝཝཏྠཱནཾ དསྶིཏཾ ཧོཏི. ཏཐཱ ན ཀཱཡེ ཨངྒཔཙྩངྒཝིནིམུཏྟཨེཀདྷམྨཱནུཔསྶཱི, ནཱཔི ཀེསལོམཱདིཝིནིམུཏྟཨིཏྠིཔུརིསཱནུཔསྶཱི. ཡོཔི ཙེཏྠ ཀེསལོམཱདིཀོ བྷཱུཏུཔཱདཱཡསམཱུཧསངྑཱཏོ ཀཱཡོ, ཏཏྠཱཔི ན བྷཱུཏུཔཱདཱཡཝིནིམུཏྟཨེཀདྷམྨཱནུཔསྶཱི, ཨཐ ཁོ རཐསམྦྷཱརཱནུཔསྶཀོ ཝིཡ ཨངྒཔཙྩངྒསམཱུཧཱནུཔསྶཱི, ནགརཱཝཡཝཱནུཔསྶཀོ ཝིཡ ཀེསལོམཱདིསམཱུཧཱནུཔསྶཱི, ཀདལིཀྑནྡྷཔཏྟཝཊྚིཝིནིབྷུཛྫཀོ ཝིཡ རིཏྟམུཊྛིཝིནིཝེཋཀོ ཝིཡ ཙ བྷཱུཏུཔཱདཱཡསམཱུཧཱནུཔསྶཱིཡེཝཱཏི སམཱུཧཝསེནེཝ ཀཱཡསངྑཱཏསྶ ཝཏྠུནོ ནཱནཔྤཀཱརཏོ དསྶནེན གྷནཝིནིབྦྷོགོ དསྶིཏོ ཧོཏི. ན ཧེཏྠ ཡཐཱཝུཏྟསམཱུཧཝིནིམུཏྟོ ཀཱཡོ ཝཱ ཨིཏྠཱི ཝཱ པུརིསོ ཝཱ ཨཉྙོ ཝཱ ཀོཙི དྷམྨོ དིསྶཏི, ཡཐཱཝུཏྟདྷམྨསམཱུཧམཏྟེཡེཝ པན ཏཐཱ ཏཐཱ སཏྟཱ མིཙྪཱབྷིནིཝེསཾ ཀརོནྟི. ཏེནཱཧུ པོརཱཎཱ –

‘‘ཡཾ ¶ པསྶཏི ན ཏཾ དིཊྛཾ, ཡཾ དིཊྛཾ ཏཾ ན པསྶཏི;

ཨཔསྶཾ བཛ྄ཛྷཏེ མཱུལ༹ྷོ, བཛ྄ཛྷམཱནོ ན མུཙྩཏཱི’’ཏི.

གྷནཝིནིབྦྷོགཱདིདསྶནཏྠནྟི ¶ ཝུཏྟཾ. ཨཱདིསདྡེན ཙེཏྠ ཨཡམྤི ཨཏྠོ ཝེདིཏབྦོ – ཨཡཉྷི ཨེཏསྨིཾ ཀཱཡེ ཀཱཡཱནུཔསྶཱིཡེཝ, ན ཨཉྙདྷམྨཱནུཔསྶཱི. ཀིཾ ཝུཏྟཾ ཧོཏི? ཡཐཱ ཨནུདཀབྷཱུཏཱཡཔི མརཱིཙིཡཱ ཨུདཀཱནུཔསྶིནོ ཧོནྟི, ན ཨེཝཾ ཨནིཙྩདུཀྑཱནཏྟཱསུབྷབྷཱུཏེཡེཝ ཨིམསྨིཾ ཀཱཡེ ནིཙྩསུཁཏྟསུབྷབྷཱཝཱནུཔསྶཱི, ཨཐ ཁོ ཀཱཡཱནུཔསྶཱི ¶

ཨནིཙྩདུཀྑཱནཏྟཱསུབྷཱཀཱརསམཱུཧཱནུཔསྶཱིཡེཝཱཏི ཝུཏྟཾ ཧོཏི. ཨཐ ཝཱ ཡྭཱཡཾ མཧཱསཏིཔཊྛཱནེ ‘‘ཨིདྷ, བྷིཀྑཝེ, བྷིཀྑུ ཨརཉྙགཏོ ཝཱ རུཀྑམཱུལགཏོ ཝཱ…པེ… སོ སཏོཝ ཨསྶསཏཱི’’ཏིཨཱདིནཱ (དཱི. ནི. ༢.༣༧༤; མ. ནི. ༡.༡༠༧) ནཡེན ཨསྶཱསཔསྶཱསཱདི ཙུཎྞཀཛཱཏཨཊྛིཀཔརིཡོསཱནོ ཀཱཡོ ཝུཏྟོ, ཡོ ཙ པརཏོ སཏིཔཊྛཱནཀཐཱཡཾ ‘‘ཨིདྷེཀཙྩོ པཐཝཱིཀཱཡཾ ཨནིཙྩཏོ ཨནུཔསྶཏི, ཨཱཔོཀཱཡཾ, ཏེཛོཀཱཡཾ, ཝཱཡོཀཱཡཾ, ཀེསཀཱཡཾ, ལོམཀཱཡཾ, ཚཝིཀཱཡཾ, ཙམྨཀཱཡཾ, མཾསཀཱཡཾ, རུཧིརཀཱཡཾ, ནྷཱརུཀཱཡཾ, ཨཊྛིཀཱཡཾ, ཨཊྛིམིཉྫཀཱཡ’’ནྟི (པཊི. མ. ༣.༣༥) ཀཱཡོ ཝུཏྟོ, ཏསྶ སབྦསྶ ཨིམསྨིཾཡེཝ ཀཱཡེ ཨནུཔསྶནཏོ ཀཱཡེ ཀཱཡཱནུཔསྶཱིཏི ཨེཝམྤི ཨཏྠོ དཊྛབྦོ.

ཨཐ ཝཱ ཀཱཡེ ཨཧནྟི ཝཱ མམནྟི ཝཱ ཨེཝཾ གཧེཏབྦསྶ ཀསྶཙི ཨནནུཔསྶནཏོ ཏསྶ ཏསྶེཝ པན ཀེསལོམཱདིཀསྶ ནཱནཱདྷམྨསམཱུཧསྶ ཨནུཔསྶནཏོ ཀཱཡེ ཀེསཱདིདྷམྨསམཱུཧསངྑཱཏཀཱཡཱནུཔསྶཱིཏི ཨེཝམཏྠོ དཊྛབྦོ. ཨཔིཙ ‘‘ཨིམསྨིཾ ཀཱཡེ ཨནིཙྩཏོ ཨནུཔསྶཏི, ནོ ནིཙྩཏོ’’ཏིཨཱདིནཱ ཨནུཀྐམེན པརཏོ ཨཱགཏནཡསྶ སབྦསྶེཝ ཨནིཙྩལཀྑཎཱདིནོ ཨཱཀཱརསམཱུཧསངྑཱཏསྶ ཀཱཡསྶ ཨནུཔསྶནཏོཔི ཀཱཡེ ཀཱཡཱནུཔསྶཱིཏི ཨེཝམྤི ཨཏྠོ དཊྛབྦོ. ཨཡཾ པན ཙཏུསཏིཔཊྛཱནསཱདྷཱརཎོ ཨཏྠོ.

ཀཱཡེ ཀཱཡཱནུཔསྶཱིཏི ཨསྶཱསཔསྶཱསཀཱཡཱདིཀེ བཧུདྷཱ ཝུཏྟེ ཀཱཡེ ཨེཀེཀཀཱཡཱནུཔསྶཱི. ཝིཧརཏཱིཏི ཙཏཱུསུ ཨིརིཡཱཔཐཝིཧཱརེསུ ཨཉྙཏརཝིཧཱརསམཱཡོགཔརིདཱིཔནམེཏཾ, ཨེཀཾ ཨིརིཡཱཔཐབཱདྷནཾ ཨཉྙེན ཨིརིཡཱཔཐེན ཝིཙྪིནྡིཏྭཱ ཨཔཏམཱནཾ ཨཏྟཱནཾ ཧརཏི པཝཏྟེཏཱིཏི ཨཏྠོ. ཨཱཏཱཔཱིཏི ཀཱཡཔརིགྒཱཧཀཝཱིརིཡསམཱཡོགཔརིདཱིཔནམེཏཾ. སོ ཧི ཡསྨཱ ཏསྨིཾ སམཡེ ཡཾ ཏཾ ཝཱིརིཡཾ ཏཱིསུ བྷཝེསུ ཀིལེསཱནཾ ཨཱཏཱཔནཏོ ཨཱཏཱཔོཏི ཝུཙྩཏི, ཏེན སམནྣཱགཏོ ཧོཏི ¶ , ཏསྨཱ ‘‘ཨཱཏཱཔཱི’’ཏི ཝུཙྩཏི. སམྤཛཱནོཏི ཀཱཡཔརིགྒཱཧཀེན སམྤཛཉྙསངྑཱཏེན ཉཱཎེན སམནྣཱགཏོ. སཏིམཱཏི ཀཱཡཔརིགྒཱཧིཀཱཡ སཏིཡཱ སམནྣཱགཏོ. ཨཡཾ པན ཡསྨཱ སཏིཡཱ ཨཱརམྨཎཾ པརིགྒཧེཏྭཱ ¶ པཉྙཱཡ ཨནུཔསྶཏི ¶ . ན ཧི སཏིཝིརཧིཏསྶ ཨནུཔསྶནཱ ནཱམ ཨཏྠི. ཏེནེཝཱཧ – ‘‘སཏིཉྩ ཁྭཱཧཾ, བྷིཀྑཝེ, སབྦཏྠིཀཾ ཝདཱམཱི’’ཏི (སཾ. ནི. ༥.༢༣༤). ཏསྨཱ ཨེཏྠ ‘‘ཀཱཡེ ཀཱཡཱནུཔསྶཱི ཝིཧརཏཱི’’ཏི ཨེཏྟཱཝཏཱ ཀཱཡཱནུཔསྶནཱསཏིཔཊྛཱནཀམྨཊྛཱནཾ ཝུཏྟཾ ཧོཏི. ཨཐ ཝཱ ཡསྨཱ ཨནཱཏཱཔིནོ ཨནྟོསངྑེཔོ ཨནྟརཱཡཀརོ ཧོཏི, ཨསམྤཛཱནོ ཨུཔཱཡཔརིགྒཧེ ཨནུཔཱཡཔརིཝཛྫནེ ཙ སམྨུཡ྄ཧཏི, མུཊྛསྶཏི ཨུཔཱཡཱཔརིཙྩཱགེ ཨནུཔཱཡཱཔརིགྒཧེ ཙ ཨསམཏྠོ ཧོཏི, ཏེནསྶ ཏཾ ཀམྨཊྛཱནཾ ན སམྤཛྫཏི, ཏསྨཱ ཡེསཾ དྷམྨཱནཾ ཨཱནུབྷཱཝེན ཏཾ སམྤཛྫཏི, ཏེསཾ དསྶནཏྠཾ ‘‘ཨཱཏཱཔཱི སམྤཛཱནོ སཏིམཱ’’ཏི ཨིདཾ ཝུཏྟནྟི ཝེདིཏབྦཾ.

ཨིཏི ཀཱཡཱནུཔསྶནཱསཏིཔཊྛཱནཾ སམྤཡོགངྒཉྩ དསྶེཏྭཱ ཨིདཱནི པཧཱནངྒཾ དསྶེཏུཾ ཝིནེཡྻ ལོཀེ ཨབྷིཛ྄ཛྷཱདོམནསྶནྟི ཝུཏྟཾ. ཏཏྠ ཝིནེཡྻཱཏི ཏདངྒཝིནཡེན ཝཱ ཝིཀྑམྦྷནཝིནཡེན ཝཱ ཝིནཡིཏྭཱ. ལོཀེཏི ཡྭཱཡཾ ཀཱཡོ པུབྦེ པརིགྒཧིཏོ, སྭེཝ ཨིདྷ ལུཛྫནཔལུཛྫནཊྛེན ལོཀོ ནཱམ. ཏསྨིཾ ལོཀེ ཨབྷིཛ྄ཛྷཾ དོམནསྶཉྩ པཛཧིཏྭཱཏི ཨཏྠོ. ཡསྨཱ པནསྶ ན ཀཱཡམཏྟེཡེཝ ཨབྷིཛ྄ཛྷཱདོམནསྶཾ པཧཱིཡཏི, ཝེདནཱདཱིསུཔི པཧཱིཡཏིཡེཝ, ཏསྨཱ ‘‘པཉྩཔི ཨུཔཱདཱནཀྑནྡྷཱ ལོཀོ’’ཏི (ཝིབྷ. ༣༦༢) ཝིབྷངྒེ ཝུཏྟཾ. ལོཀསངྑཱཏཏྟཱཡེཝ ཏེསཾ དྷམྨཱནཾ ཨཏྠུདྡྷཱརཝསེནེཏཾ ཝུཏྟནྟི ཝེདིཏབྦཾ. ཡཾ པནཱཧ – ‘‘ཏཏྠ ཀཏམོ ལོཀོ (ཝིབྷ. ༥༣༨), སྭེཝ ཀཱཡོ ལོཀོ’’ཏི ཨཡམེཝེཏྠ ཨཏྠོ. ཨབྷིཛ྄ཛྷཱདོམནསྶནྟི ཙ སམཱསེཏྭཱ ཝུཏྟཾ. སཾཡུཏྟངྒུཏྟརཔཱཋནྟརེསུ པན ཝིསུཾ ཀཏྭཱ པཋནྟི. སཱ པན ཨབྷིཛ྄ཛྷཱཡནྟི པཏྠཡནྟི ཨེཏཱཡ, སཡཾ ཝཱ ཨབྷིཛ྄ཛྷཱཡཏི, ཨབྷིཛ྄ཛྷཱཡནམཏྟམེཝ ཝཱ ཨེསཱཏི ཨབྷིཛ྄ཛྷཱ. ཡསྨཱ པནེཏྠ ཨབྷིཛ྄ཛྷཱགཧཎེན ཀཱམཙྪནྡོ, དོམནསྶགཧཎེན བྱཱཔཱདོ སངྒཧཾ གཙྪཏི, ཏསྨཱ ནཱིཝརཎཔརིཡཱཔནྣབལཝདྷམྨདྭཡདསྶནེན ནཱིཝརཎཔྤཧཱནཾ ཝུཏྟཾ ཧོཏཱིཏི ཝེདིཏབྦཾ.

ཝིསེསེན ¶ པནེཏྠ ཨབྷིཛ྄ཛྷཱཝིནཡེན ཀཱཡསམྤཏྟིམཱུལཀསྶ ཨནུརོདྷསྶ, དོམནསྶཝིནཡེན ཀཱཡཝིཔཏྟིམཱུལཀསྶ ཝིརོདྷསྶ, ཨབྷིཛ྄ཛྷཱཝིནཡེན ཙ ཀཱཡེ ཨབྷིརཏིཡཱ, དོམནསྶཝིནཡེན ཀཱཡབྷཱཝནཱཡ ¶ ཨནབྷིརཏིཡཱ, ཨབྷིཛ྄ཛྷཱཝིནཡེན ཀཱཡེ ཨབྷཱུཏཱནཾ སུབྷསུཁབྷཱཝཱདཱིནཾ པཀྑེཔསྶ, དོམནསྶཝིནཡེན ཀཱཡེ བྷཱུཏཱནཾ ཨསུབྷཱསུཁབྷཱཝཱདཱིནཾ ཨཔནཡནསྶ པཧཱནཾ ཝུཏྟཾ. ཏེན ཡོགཱཝཙརསྶ ཡོགཱནུབྷཱཝོ ཡོགསམཏྠཏཱ ཙ དཱིཔིཏཱ ཧོཏི. ཡོགཱནུབྷཱཝོ ཧི ཨེས, ཡདཡཾ ཨནུརོདྷཝིརོདྷཝིཔྤམུཏྟོ ཨརཏིརཏིསཧོ ཨབྷཱུཏཔཀྑེཔབྷཱུཏཱཔནཡནཝིརཧིཏོ ཙ ཧོཏི. ཨནུརོདྷཝིརོདྷཝིཔྤམུཏྟོ ཙེས ཨརཏིརཏིསཧོ ཨབྷཱུཏཾ ཨཔཀྑིཔནྟོ བྷཱུཏཉྩ ཨནཔནེནྟོ ཡོགསམཏྠོ ཧོཏཱིཏི.

ཨཔརོ ¶ ནཡོ – ‘‘ཀཱཡེ ཀཱཡཱནུཔསྶཱི’’ཏི ཨེཏྠ ཨནུཔསྶནཱཡ ཀམྨཊྛཱནཾ ཝུཏྟཾ. ‘‘ཝིཧརཏཱི’’ཏི ཨེཏྠ ཝུཏྟཝིཧཱརེན ཀམྨཊྛཱནིཀསྶ ཀཱཡཔརིཧརཎཾ. ‘‘ཨཱཏཱཔཱི’’ཏིཨཱདཱིསུ ཨཱཏཱཔེན སམྨཔྤདྷཱནཾ, སཏིསམྤཛཉྙེན སབྦཏྠཀཀམྨཊྛཱནཾ, ཀམྨཊྛཱནཔརིཧརཎཱུཔཱཡོ ཝཱ. སཏིཡཱ ཝཱ ཀཱཡཱནུཔསྶནཱཝསེན པཊིལདྡྷསམཐོ, སམྤཛཉྙེན ཝིཔསྶནཱ, ཨབྷིཛ྄ཛྷཱདོམནསྶཝིནཡེན བྷཱཝནཱཕལཾ ཝུཏྟནྟི ཝེདིཏབྦཾ.

ཝེདནཱསུ ཝེདནཱནུཔསྶཱིཏིཨཱདཱིསུ ཙ ཝེདནཱདཱིནཾ པུན ཝཙནེ པཡོཛནཾ ཀཱཡཱནུཔསྶནཱཡཾ ཝུཏྟནཡེནེཝ ཡཐཱཡོགཾ ཡོཛེཏྭཱ ཝེདིཏབྦཾ. ཨཡཾ པན ཨསཱདྷཱརཎཏྠོ – སུཁཱདཱིསུ ཨནེཀཔྤབྷེདཱསུ ཝེདནཱསུ ཝིསུཾ ཝིསུཾ ཨནིཙྩཱདིཏོ ཨེཀེཀཝེདནཱནུཔསྶཱིཏི, སརཱགཱདིཀེ སོལ༹སཔྤབྷེདེ ཙིཏྟེ ཝིསུཾ ཝིསུཾ ཨནིཙྩཱདིཏོ ཨེཀེཀཙིཏྟཱནུཔསྶཱིཏི, ཀཱཡཝེདནཱཙིཏྟཱནི ཋཔེཏྭཱ སེསཏེབྷཱུམཀདྷམྨེསུ ཝིསུཾ ཝིསུཾ ཨནིཙྩཱདིཏོ ཨེཀེཀདྷམྨཱནུཔསྶཱིཏི, སཏིཔཊྛཱནསུཏྟནྟེ (དཱི. ནི. ༢.༣༨༢; མ. ནི. ༡.༡༡༥) ཝུཏྟནཡེན ནཱིཝརཎཱདིདྷམྨཱནུཔསྶཱིཏི ཝཱ. ཨེཏྠ ཙ ‘‘ཀཱཡེ’’ཏི ཨེཀཝཙནཾ སརཱིརསྶ ཨེཀཏྟཱ, ‘‘ཙིཏྟེ’’ཏི ཨེཀཝཙནཾ ཙིཏྟསྶ སབྷཱཝབྷེདཱབྷཱཝཏོ ཛཱཏིགྒཧཎེན ཀཏནྟི ཝེདིཏབྦཾ. ཡཐཱ ཙ ཝེདནཱདཡོ ཨནུཔསྶིཏབྦཱ, ཏཐཱ ཨནུཔསྶནྟོ ཝེདནཱསུ ཝེདནཱནུཔསྶཱི, ཙིཏྟེ ཙིཏྟཱནུཔསྶཱི, དྷམྨེསུ དྷམྨཱནུཔསྶཱིཏི ཝེདིཏབྦོ. ཀཐཾ ཏཱཝ ཝེདནཱ ཨནུཔསྶིཏབྦཱ? སུཁཱ ¶ ཏཱཝ ཝེདནཱ དུཀྑཏོ, དུཀྑཱ ཝེདནཱ སལླཏོ, ཨདུཀྑམསུཁཱ ཝེདནཱ ཨནིཙྩཏོ ཨནུཔསྶིཏབྦཱ. ཡཐཱཧ –

‘‘ཡོ ¶ སུཁཾ དུཀྑཏོ ཨདྡ, དུཀྑམདྡཀྑི སལླཏོ;

ཨདུཀྑམསུཁཾ སནྟཾ, ཨདྡཀྑི ནཾ ཨནིཙྩཏོ;

ས ཝེ སམྨདྡསོ བྷིཀྑུ, པརིཛཱནཱཏི ཝེདནཱ’’ཏི. (སཾ. ནི. ༤.༢༥༣);

སབྦཱ ཨེཝ ཙེཏཱ དུཀྑཏོཔི ཨནུཔསྶིཏབྦཱ. ཝུཏྟཉྷེཏཾ ‘‘ཡཾཀིཉྩི ཝེདཡིཏཾ, སབྦཾ ཏཾ དུཀྑསྨིནྟི ཝདཱམཱི’’ཏི (སཾ. ནི. ༤.༢༥༩). སུཁདུཀྑཏོཔི ཙ ཨནུཔསྶིཏབྦཱ. ཡཐཱཧ – ‘‘སུཁཱ ཝེདནཱ ཋིཏིསུཁཱ ཝིཔརིཎཱམདུཀྑཱ. དུཀྑཱ ཝེདནཱ ཋིཏིདུཀྑཱ ཝིཔརིཎཱམསུཁཱ. ཨདུཀྑམསུཁཱ ཝེདནཱ ཉཱཎསུཁཱ ཨཉྙཱཎདུཀྑཱ’’ཏི (མ. ནི. ༡.༤༦༥). ཨཔིཙ ཨནིཙྩཱདིསཏྟཨནུཔསྶནཱཝསེནཱཔི ཨནུཔསྶིཏབྦཱ.

ཙིཏྟདྷམྨེསུཔི ཙིཏྟཾ ཏཱཝ ཨཱརམྨཎཱདྷིཔཏིསཧཛཱཏབྷཱུམིཀམྨཝིཔཱཀཀིརིཡཱདིནཱནཏྟབྷེདཱནཾ ཨནིཙྩཱདིསཏྟཨནུཔསྶནཱནཾ ¶ སརཱགཱདིསོལ༹སབྷེདཱནཉྩ ཝསེན ཨནུཔསྶིཏབྦཾ, དྷམྨཱ སལཀྑཎསཱམཉྙལཀྑཎཱནཾ སུཉྙཏཱདྷམྨསྶ ཨནིཙྩཱདིསཏྟཨནུཔསྶནཱནཾ སནྟཱསནྟཱདཱིནཉྩ ཝསེན ཨནུཔསྶིཏབྦཱ. ཀཱམཉྩེཏྠ ཡསྶ ཀཱཡསངྑཱཏེ ལོཀེ ཨབྷིཛ྄ཛྷཱདོམནསྶཾ པཧཱིནཾ, ཏསྶ ཝེདནཱདིལོཀེསུཔི ཏཾ པཧཱིནམེཝ, ནཱནཱཔུགྒལཝསེན པན ནཱནཱཀྑཎིཀསཏིཔཊྛཱནབྷཱཝནཱཝསེན ཙ སབྦཏྠ ཝུཏྟཾ. ཡཏོ ཝཱ ཨེཀཏྠ པཧཱིནཾ, སེསེསུཔི པཧཱིནཾ ཧོཏི. ཏེནེཝསྶ ཏཏྠ པཧཱནདསྶནཏྠམྤི ཨེཝཾ ཝུཏྟནྟི ཝེདིཏབྦཾ.

ཨིཏི ཨིམེ ཙཏྟཱརོ སཏིཔཊྛཱནཱ པུབྦབྷཱགེ ནཱནཱཙིཏྟེསུ ལབྦྷནྟི. ཨཉྙེནེཝ ཧི ཙིཏྟེན ཀཱཡཾ པརིགྒཎྷཱཏི, ཨཉྙེན ཝེདནཾ, ཨཉྙེན ཙིཏྟཾ, ཨཉྙེན དྷམྨེ པརིགྒཎྷཱཏི. ལོཀུཏྟརམགྒཀྑཎེ པན ཨེཀཙིཏྟེཡེཝ ལབྦྷནྟི. ཨཱདིཏོ ཧི ཀཱཡཾ པརིགྒཎྷིཏྭཱ ཨཱགཏསྶ ཝིཔསྶནཱསམྤཡུཏྟཱ སཏི ཀཱཡཱནུཔསྶནཱ ནཱམ, ཏཱཡ སཏིཡཱ སམནྣཱགཏོ པུགྒལོ ཀཱཡཱནུཔསྶཱི ནཱམ. ཝིཔསྶནཾ ཨུསྶུཀྐཱཔེཏྭཱ ཨརིཡམགྒཾ པཏྟསྶ མགྒཀྑཎེ མགྒསམྤཡུཏྟཱ སཏི ཀཱཡཱནུཔསྶནཱ ནཱམ, ཏཱཡ སཏིཡཱ སམནྣཱགཏོ པུགྒལོ ཀཱཡཱནུཔསྶཱི ནཱམ. ཝེདནཾ པརིགྒཎྷིཏྭཱ ཙིཏྟཾ པརིགྒཎྷིཏྭཱ དྷམྨེ པརིགྒཎྷིཏྭཱ ཨཱགཏསྶ ཝིཔསྶནཱསམྤཡུཏྟཱ སཏི ¶ དྷམྨཱནུཔསྶནཱ ¶ ནཱམ, ཏཱཡ སཏིཡཱ སམནྣཱགཏོ པུགྒལོ དྷམྨཱནུཔསྶཱི ནཱམ. ཝིཔསྶནཾ ཨུསྶུཀྐཱཔེཏྭཱ ཨརིཡམགྒཾ པཏྟསྶ མགྒཀྑཎེ མགྒསམྤཡུཏྟཱ སཏི དྷམྨཱནུཔསྶནཱ ནཱམ, ཏཱཡ སཏིཡཱ སམནྣཱགཏོ པུགྒལོ དྷམྨཱནུཔསྶཱི ནཱམ. ཨེཝཾ ཏཱཝ དེསནཱ པུགྒལེ ཏིཊྛཏི. ཀཱཡེ པན ‘‘སུབྷ’’ནྟི ཝིཔལླཱསཔྤཧཱནཱ ཀཱཡཔརིགྒཱཧིཀཱ སཏི མགྒེན སམིཛ྄ཛྷཏཱིཏི ཀཱཡཱནུཔསྶནཱ ནཱམ. ཝེདནཱཡ ‘‘སུཁཱ’’ཏི ཝིཔལླཱསཔྤཧཱནཱ ཝེདནཱཔརིགྒཱཧིཀཱ སཏི མགྒེན སམིཛ྄ཛྷཏཱིཏི ཝེདནཱནུཔསྶནཱ ནཱམ. ཙིཏྟེ ‘‘ནིཙྩ’’ནྟི ཝིཔལླཱསཔྤཧཱནཱ ཙིཏྟཔརིགྒཱཧིཀཱ སཏི མགྒེན སམིཛ྄ཛྷཏཱིཏི ཙིཏྟཱནུཔསྶནཱ ནཱམ. དྷམྨེསུ ‘‘ཨཏྟཱ’’ཏི ཝིཔལླཱསཔྤཧཱནཱ དྷམྨཔརིགྒཱཧིཀཱ སཏི མགྒེན སམིཛ྄ཛྷཏཱིཏི དྷམྨཱནུཔསྶནཱ ནཱམ. ཨིཏི ཨེཀཱཝ མགྒསམྤཡུཏྟཱ སཏི ཙཏུཀིཙྩསཱདྷཀཏྟེན ཙཏྟཱརི ནཱམཱནི ལབྷཏི. ཏེན ཝུཏྟཾ ‘‘ལོཀུཏྟརམགྒཀྑཎེ པན ཨེཀཙིཏྟེཡེཝ ལབྦྷནྟཱི’’ཏི.

སམྨཱསམཱདྷིནིདྡེསེ ཝིཝིཙྩེཝ ཀཱམེཧཱིཏི ཀཱམེཧི ཝིཝིཙྩིཏྭཱ ཝིནཱ ཧུཏྭཱ ཨཔཀྐམིཏྭཱ. ཡོ པནཱཡམེཏྠ ཨེཝཀཱརོ, སོ ནིཡམཏྠོཏི ཝེདིཏབྦོ. ཡསྨཱ ཙ ནིཡམཏྠོ, ཏསྨཱ པཋམཛ྄ཛྷཱནཾ ཨུཔསམྤཛྫ ཝིཧརཎསམཡེ ཨཝིཛྫམཱནཱནམྤི ཀཱམཱནཾ ཏསྶ པཋམཛ྄ཛྷཱནསྶ པཊིཔཀྑབྷཱཝཾ ཀཱམཔརིཙྩཱགེནེཝ ཙསྶ ཨདྷིགམཾ དཱིཔེཏི. ཀཐཾ? ‘‘ཝིཝིཙྩེཝ ཀཱམེཧཱི’’ཏི ཨེཝཉྷི ནིཡམེ ཀཡིརམཱནེ ཨིདཾ པཉྙཱཡཏི – ནཱུནིམསྶ ཛྷཱནསྶ ཀཱམཱ པཊིཔཀྑབྷཱུཏཱ, ཡེསུ སཏི ¶ ཨིདཾ ན པཝཏྟཏི, ཨནྡྷཀཱརེ སཏི པདཱིཔོབྷཱསོ ཝིཡ, ཏེསཾ པརིཙྩཱགེནེཝ ཙསྶ ཨདྷིགམོ ཧོཏི ཨོརིམཏཱིརཔརིཙྩཱགེན པཱརིམཏཱིརསྶ ཝིཡ. ཏསྨཱ ནིཡམཾ ཀརོཏཱིཏི.

ཏཏྠ སིཡཱ, ཀསྨཱ པནེས པུབྦཔདེཡེཝ ཝུཏྟོ, ན ཨུཏྟརཔདེ, ཀིཾ ཨཀུསལེཧི དྷམྨེཧི ཨཝིཝིཙྩཱཔི ཛྷཱནཾ ཨུཔསམྤཛྫ ཝིཧརེཡྻཱཏི? ན ཁོ པནེཏཾ ཨེཝཾ དཊྛབྦཾ. ཏཾནིསྶརཎཏོ ཧི པུབྦཔདེ ཨེས ཝུཏྟོ. ཀཱམདྷཱཏུསམཏིཀྐམནཏོ ཧི ཀཱམརཱགཔཊིཔཀྑཏོ ཙ ཨིདཾ ཛྷཱནཾ ཀཱམཱནམེཝ ནིསྶརཎཾ. ཡཐཱཧ – ‘‘ཀཱམཱནམེཏཾ ནིསྶརཎཾ ཡདིདཾ ནེཀྑམྨ’’ནྟི ¶ (ཨིཏིཝུ. ༧༢). ཨུཏྟརཔདེཔི པན ཡཐཱ ‘‘ཨིདྷེཝ, བྷིཀྑཝེ, སམཎོ, ཨིདྷ དུཏིཡོ སམཎོ’’ཏི (མ. ནི. ༡.༡༣༩; ཨ. ནི. ༤.༢༤༡) ཨེཏྠ ཨེཝཀཱརོ ཨཱནེཏྭཱ ཝུཙྩཏི, ཨེཝཾ ཝཏྟབྦོ. ན ཧི སཀྐཱ ཨིཏོ ཨཉྙེཧིཔི ནཱིཝརཎསངྑཱཏེཧི ཨཀུསལེཧི དྷམྨེཧི ཨཝིཝིཙྩ ཛྷཱནཾ ཨུཔསམྤཛྫ ཝིཧརིཏུཾ. ཏསྨཱ ‘‘ཝིཝིཙྩེཝ ཀཱམེཧི ཝིཝིཙྩེཝ ཨཀུསལེཧི ¶ དྷམྨེཧཱི’’ཏི ཨེཝཾ པདདྭཡེཔི ཨེས དཊྛབྦོ. པདདྭཡེཔི ཙ ཀིཉྩཱཔི ཝིཝིཙྩཱཏི ཨིམིནཱ སཱདྷཱརཎཝཙནེན ཏདངྒཝིཀྑམྦྷནསམུཙྪེདཔཊིཔྤསྶདྡྷིནིསྶརཎཝིཝེཀཱ ཙིཏྟཀཱཡཨུཔདྷིཝིཝེཀཱ ཙ སངྒཧཾ གཙྪནྟི, ཏཐཱཔི པུབྦབྷཱགེ ཀཱཡཝིཝེཀཙིཏྟཝིཝེཀཝིཀྑམྦྷནཝིཝེཀཱ དཊྛབྦཱ, ལོཀུཏྟརམགྒཀྑཎེ ཀཱཡཝིཝེཀཙིཏྟཝིཝེཀསམུཙྪེདཝིཝེཀཔཊིཔྤསྶདྡྷིཝིཝེཀནིསྶརཎཝིཝེཀཱ.

ཀཱམེཧཱིཏི ཨིམིནཱ པན པདེན ཡེ ཙ མཧཱནིདྡེསེ ‘‘ཀཏམེ ཝཏྠུཀཱམཱ མནཱཔིཀཱ རཱུཔཱ’’ཏིཨཱདིནཱ (མཧཱནི. ༡) ནཡེན ཝཏྠུཀཱམཱ ཝུཏྟཱ, ཡེ ཙ ཏཏྠེཝ ཝིབྷངྒེ ཙ ‘‘ཚནྡོ ཀཱམོ, རཱགོ ཀཱམོ, ཚནྡརཱགོ ཀཱམོ, སངྐཔྤོ ཀཱམོ, རཱགོ ཀཱམོ, སངྐཔྤརཱགོ ཀཱམོ’’ཏི (མཧཱནི. ༡; ཝིབྷ. ༥༦༤) ཨེཝཾ ཀིལེསཀཱམཱ ཝུཏྟཱ, ཏེ སབྦེཔི སངྒཧིཏཱ ཨིཙྩེཝ དཊྛབྦཱ. ཨེཝཉྷི སཏི ཝིཝིཙྩེཝ ཀཱམེཧཱིཏི ཝཏྠུཀཱམེཧིཔི ཝིཝིཙྩེཝཱཏི ཨཏྠོ ཡུཛྫཏི. ཏེན ཀཱཡཝིཝེཀོ ཝུཏྟོ ཧོཏི.

ཝིཝིཙྩ ཨཀུསལེཧི དྷམྨེཧཱིཏི ཀིལེསཀཱམེཧི སབྦཱཀུསལེཧི ཝཱ ཝིཝིཙྩཱཏི ཨཏྠོ ཡུཛྫཏི. ཏེན ཙིཏྟཝིཝེཀོ ཝུཏྟོ ཧོཏི. པུརིམེན ཙེཏྠ ཝཏྠུཀཱམེཧི ཝིཝེཀཝཙནཏོ ཨེཝ ཀཱམསུཁཔརིཙྩཱགོ, དུཏིཡེན ཀིལེསཀཱམེཧི ཝིཝེཀཝཙནཏོ ནེཀྑམྨསུཁཔརིགྒཧོ ཝིབྷཱཝིཏོ ཧོཏི. ཨེཝཾ ཝཏྠུཀཱམཀིལེསཀཱམཝིཝེཀཝཙནཏོཡེཝ ཙ ཨེཏེསཾ པཋམེན སཾཀིལེསཝཏྠུཔྤཧཱནཾ, དུཏིཡེན སཾཀིལེསཔྤཧཱནཾ. པཋམེན ལོལབྷཱཝསྶ ཧེཏུཔརིཙྩཱགོ, དུཏིཡེན བཱལབྷཱཝསྶ. པཋམེན ཙ པཡོགསུདྡྷི, དུཏིཡེན ཨཱསཡཔོསནཾ ཝིབྷཱཝིཏཾ ཧོཏཱིཏི ཝིཉྙཱཏབྦཾ. ཨེས ཏཱཝ ནཡོ ཀཱམེཧཱིཏི ཨེཏྠ ཝུཏྟཀཱམེསུ ཝཏྠུཀཱམཔཀྑེ.

ཀིལེསཀཱམཔཀྑེ ¶ པན ཚནྡོཏི ཙ རཱགོཏི ཙ ཨེཝམཱདཱིཧི ཨནེཀབྷེདོ ཀཱམཙྪནྡོཝ ཀཱམོཏི ཨདྷིཔྤེཏོ. སོ ཙ ཨཀུསལཔརིཡཱཔནྣོཔི སམཱནོ ‘‘ཏཏྠ ཀཏམེ ཀཱམཱ, ཚནྡོ ཀཱམོ’’ཏིཨཱདིནཱ (ཝིབྷ. ༥༦༤) ནཡེན ཝིབྷངྒེ ཨུཔརི ཛྷཱནངྒཔཊིཔཀྑཏོ ¶ ཝིསུཾ ཝུཏྟོ, ཀིལེསཀཱམཏྟཱ ཝཱ པུརིམཔདེ ཝུཏྟོ, ཨཀུསལཔརིཡཱཔནྣཏྟཱ དུཏིཡཔདེ. ཨནེཀབྷེདཏོ ཙསྶ ཀཱམཏོཏི ཨཝཏྭཱ ཀཱམེཧཱིཏི ཝུཏྟཾ. ཨཉྙེསམྤི ¶ ཙ དྷམྨཱནཾ ཨཀུསལབྷཱཝེ ཝིཛྫམཱནེ ‘‘ཏཏྠ ཀཏམེ ཨཀུསལཱ དྷམྨཱ, ཀཱམཙྪནྡོ’’ཏིཨཱདིནཱ (ཝིབྷ. ༥༦༤) ནཡེན ཝིབྷངྒེ ཨུཔརི ཛྷཱནངྒཔཙྩནཱིཀཔཊིཔཀྑབྷཱཝདསྶནཏོ ནཱིཝརཎཱནེཝ ཝུཏྟཱནི. ནཱིཝརཎཱནི ཧི ཛྷཱནངྒཔཙྩནཱིཀཱནི, ཏེསཾ ཛྷཱནངྒཱནེཝ པཊིཔཀྑཱནི ཝིདྡྷཾསཀཱནི ཝིནཱསཀཱནཱིཏི ཝུཏྟཾ ཧོཏི. ཏཐཱ ཧི ‘‘སམཱདྷི ཀཱམཙྪནྡསྶ པཊིཔཀྑོ, པཱིཏི བྱཱཔཱདསྶ, ཝིཏཀྐོ ཐིནམིདྡྷསྶ, སུཁཾ ཨུདྡྷཙྩཀུཀྐུཙྩསྶ, ཝིཙཱརོ ཝིཙིཀིཙྪཱཡཱ’’ཏི པེཊཀེ ཝུཏྟཾ.

ཨེཝམེཏྠ ‘‘ཝིཝིཙྩེཝ ཀཱམེཧཱི’’ཏི ཨིམིནཱ ཀཱམཙྪནྡསྶ ཝིཀྑམྦྷནཝིཝེཀོ ཝུཏྟོ ཧོཏི. ‘‘ཝིཝིཙྩ ཨཀུསལེཧི དྷམྨེཧཱི’’ཏི ཨིམིནཱ པཉྩནྣམྤི ནཱིཝརཎཱནཾ. ཨགཧིཏགྒཧཎེན པན པཋམེན ཀཱམཙྪནྡསྶ, དུཏིཡེན སེསནཱིཝརཎཱནཾ. ཏཐཱ པཋམེན ཏཱིསུ ཨཀུསལམཱུལེསུ པཉྩཀཱམགུཎབྷེདཝིསཡསྶ ལོབྷསྶ, དུཏིཡེན ཨཱགྷཱཏཝཏྠུབྷེདཱདིཝིསཡཱནཾ དོསམོཧཱནཾ. ཨོགྷཱདཱིསུ ཝཱ དྷམྨེསུ པཋམེན ཀཱམོགྷཀཱམཡོགཀཱམཱསཝཀཱམུཔཱདཱནཨབྷིཛ྄ཛྷཱཀཱཡགནྠ ཀཱམརཱགསཉྙོཛནཱནཾ, དུཏིཡེན ཨཝསེསཨོགྷཡོགཱསཝཨུཔཱདཱནགནྠསཾཡོཛནཱནཾ. པཋམེན ཏཎྷཱཡ ཏཾསམྤཡུཏྟཀཱནཉྩ, དུཏིཡེན ཨཝིཛྫཱཡ ཏཾསམྤཡུཏྟཀཱནཉྩ. ཨཔིཙ པཋམེན ལོབྷསམྤཡུཏྟཨཊྛཙིཏྟུཔྤཱདཱནཾ, དུཏིཡེན སེསཱནཾ ཙཏུནྣཾ ཨཀུསལཙིཏྟུཔྤཱདཱནཾ ཝིཀྑམྦྷནཝིཝེཀོ ཝུཏྟོ ཧོཏཱིཏི ཝེདིཏབྦོ.

ཨེཏྟཱཝཏཱ ཙ པཋམསྶ ཛྷཱནསྶ པཧཱནངྒཾ དསྶེཏྭཱ ཨིདཱནི སམྤཡོགངྒཾ དསྶེཏུཾ སཝིཏཀྐཾ སཝིཙཱརནྟིཨཱདི ཝུཏྟཾ. ཏཏྠ ཨཱརམྨཎེ ཙིཏྟསྶ ཨབྷིནིརོཔནལཀྑཎོ ཝིཏཀྐོ. ཨཱརམྨཎཱནུམཛྫནལཀྑཎོ ཝིཙཱརོ. སནྟེཔི ཙ ནེསཾ ཀཏྠཙི ཨཝིཔྤཡོགེ ཨོལཱ༹རིཀཊྛེན པུབྦངྒམཊྛེན ཙ གྷཎྜཱབྷིགྷཱཏོ ཝིཡ ཙེཏསོ པཋམཱབྷིནིཔཱཏོ ཝིཏཀྐོ, སུཁུམཊྛེན ཨནུམཛྫནསབྷཱཝེན ཙ གྷཎྜཱནུརཝོ ཝིཡ ཨནུཔྤབནྡྷོ ཝིཙཱརོ. ཝིཔྥཱརཝཱ ཙེཏྠ ཝིཏཀྐོ པཋམུཔྤཏྟིཀཱལེ པརིཔྥནྡནབྷཱུཏོ ཙིཏྟསྶ, ཨཱཀཱསེ ཨུཔྤཏིཏུཀཱམསྶ པཀྑིནོ པཀྑཝིཀྑེཔོ ཝིཡ, པདུམཱབྷིམུཁཔཱཏོ ཝིཡ ཙ གནྡྷཱནུབནྡྷཙེཏསོ བྷམརསྶ. སནྟཝུཏྟི ཝིཙཱརོ ¶ ནཱཏིཔརིཔྥནྡནབྷཱུཏོ ཙིཏྟསྶ, ཨཱཀཱསེ ཨུཔྤཏིཏསྶ པཀྑིནོ པཀྑཔྤསཱརཎཾ ཝིཡ, པརིབྦྷམནཾ ཝིཡ ཙ པདུམཱབྷིམུཁཔཏིཏསྶ བྷམརསྶ པདུམསྶ ཨུཔརིབྷཱགེ.

དུཀནིཔཱཏཊྛཀཐཱཡཾ ¶ ¶ པན ‘‘ཨཱཀཱསེ གཙྪཏོ མཧཱསཀུཎསྶ ཨུབྷོཧི པཀྑེཧི ཝཱཏཾ གཧེཏྭཱ པཀྑེ སནྣིསཱིདཱཔེཏྭཱ གམནཾ ཝིཡ ཨཱརམྨཎེ ཙེཏསོ ཨབྷིནིརོཔནབྷཱཝེན པཝཏྟོ ཝིཏཀྐོ, ཝཱཏགྒཧཎཏྠཾ པཀྑེ ཕནྡཱཔཡམཱནསྶ གམནཾ ཝིཡ ཨནུམཛྫནབྷཱཝེན པཝཏྟོ ཝིཙཱརོ’’ཏི ཝུཏྟཾ. ཏཾ ཨནུཔྤབནྡྷེན པཝཏྟིཡཾ ཡུཛྫཏི. སོ པན ཏེསཾ ཝིསེསོ པཋམདུཏིཡཛ྄ཛྷཱནེསུ པཱཀཊོ ཧོཏི. ཨཔིཙ མལགྒཧིཏཾ ཀཾསབྷཱཛནཾ ཨེཀེན ཧཏྠེན དལ༹ྷཾ གཧེཏྭཱ ཨིཏརེན ཧཏྠེན ཙུཎྞཏེལཝཱལཎྜུཔཀེན པརིམཛྫནྟསྶ དལ༹ྷགྒཧཎཧཏྠོ ཝིཡ ཝིཏཀྐོ, པརིམཛྫནཧཏྠོ ཝིཡ ཝིཙཱརོ. ཏཐཱ ཀུམྦྷཀཱརསྶ དཎྜཔྤཧཱརེན ཙཀྐཾ བྷམཡིཏྭཱ བྷཱཛནཾ ཀརོནྟསྶ ཨུཔྤཱིལ༹ནཧཏྠོ ཝིཡ ཝིཏཀྐོ, ཨིཏོ ཙིཏོ ཙ སཾསརཎཧཏྠོ ཝིཡ ཝིཙཱརོ. ཏཐཱ མཎྜལཾ ཀརོནྟསྶ མཛ྄ཛྷེ སནྣིརུཛ྄ཛྷིཏྭཱ ཋིཏཀཎྚཀོ ཝིཡ ཨབྷིནིརོཔནོ ཝིཏཀྐོ, བཧི པརིབྦྷམནཀཎྚཀོ ཝིཡ ཨནུམཛྫནོ ཝིཙཱརོ. ཨིཏི ཨིམིནཱ ཙ ཝིཏཀྐེན ཨིམིནཱ ཙ ཝིཙཱརེན སཧ ཝཏྟཏི རུཀྑོ ཝིཡ པུཔྥེན ཕལེན ཙཱཏི ཨིདཾ ཛྷཱནཾ ‘‘སཝིཏཀྐཾ སཝིཙཱར’’ནྟི ཝུཙྩཏི.

ཝིཝེཀཛནྟི ཨེཏྠ ཝིཝིཏྟི ཝིཝེཀོ, ནཱིཝརཎཝིགམོཏི ཨཏྠོ. ཝིཝིཏྟོཏི ཝཱ ཝིཝེཀོ, ནཱིཝརཎཝིཝིཏྟོ ཛྷཱནསམྤཡུཏྟདྷམྨརཱསཱིཏི ཨཏྠོ. ཏསྨཱ ཝིཝེཀཱ, ཏསྨིཾ ཝཱ ཝིཝེཀེ ཛཱཏནྟི ཝིཝེཀཛཾ. པཱིཏིསུཁནྟི ཨེཏྠ པཱིཎཡཏཱིཏི པཱིཏི, སཱ སམྤིཡཱཡནལཀྑཎཱ. སཱ པནེསཱ ཁུདྡིཀཱ པཱིཏི, ཁཎིཀཱ པཱིཏི, ཨོཀྐནྟིཀཱ པཱིཏི, ཨུབྦེགཱ པཱིཏི, ཕརཎཱ པཱིཏཱིཏི པཉྩཝིདྷཱ ཧོཏི.

ཏཏྠ ཁུདྡིཀཱ པཱིཏི སརཱིརེ ལོམཧཾསནམཏྟམེཝ ཀཱཏུཾ སཀྐོཏི. ཁཎིཀཱ པཱིཏི ཁཎེ ཁཎེ ཝིཛྫུཔྤཱདསདིསཱ ཧོཏི. ཨོཀྐནྟིཀཱ པཱིཏི སམུདྡཏཱིརཾ ཝཱིཙི ཝིཡ ཀཱཡཾ ཨོཀྐམིཏྭཱ ཨོཀྐམིཏྭཱ བྷིཛྫཏི. ཨུབྦེགཱ པཱིཏི བལཝཏཱི ཧོཏི ཀཱཡཾ ཨུདྡྷགྒཾ ཀཏྭཱ ཨཱཀཱསེ ལངྒྷཱཔནཔྤམཱཎཔྤཏྟཱ. ཕརཎཱ པཱིཏི ཨཏིབལཝཏཱི ཧོཏི. ཏཱཡ ཧི ཨུཔྤནྣཱཡ སཀལསརཱིརཾ དྷམིཏྭཱ པཱུརིཏཝཏྠི ཝིཡ ¶ མཧཏཱ ཨུདཀོགྷེན པཀྑནྡཔབྦཏཀུཙྪི ཝིཡ ཙ ཨནུཔརིཕུཊཾ ཧོཏི. སཱ པནེསཱ པཉྩཝིདྷཱ པཱིཏི གབྦྷཾ གཎྷནྟཱི པརིཔཱཀཾ གཙྪནྟཱི དུཝིདྷཾ པསྶདྡྷིཾ པརིཔཱུརེཏི ཀཱཡཔསྶདྡྷིཉྩ ཙིཏྟཔསྶདྡྷིཉྩ. པསྶདྡྷི གབྦྷཾ གཎྷནྟཱི པརིཔཱཀཾ གཙྪནྟཱི དུཝིདྷམྤི སུཁཾ པརིཔཱུརེཏི ཀཱཡིཀཉྩ ཙེཏསིཀཉྩ. སུཁཾ ¶ གབྦྷཾ གཎྷནྟཾ པརིཔཱཀཾ གཙྪནྟཾ ཏིཝིདྷཾ སམཱདྷིཾ པརིཔཱུརེཏི – ཁཎིཀསམཱདྷིཾ, ཨུཔཙཱརསམཱདྷིཾ, ཨཔྤནཱསམཱདྷིཉྩཱཏི. ཏཱསུ ཙ ཡཱ ཨཔྤནཱསམཱདྷིསྶ མཱུལཾ ཧུཏྭཱ ཝཌྜྷམཱནཱ སམཱདྷིསམྤཡོགཾ གཏཱ ཕརཎཱ པཱིཏི, ཨཡཾ ཨིམསྨིཾ ཨཏྠེ ཨདྷིཔྤེཏཱ པཱིཏཱིཏི.

ཨིཏརཾ ¶ པན སུཁཡཏཱིཏི སུཁཾ, ཡསྶུཔྤཛྫཏི, ཏཾ སུཁིཏཾ ཀརོཏཱིཏི ཨཏྠོ. སུཁནཾ ཝཱ སུཁཾ, སུཊྛུ ཝཱ ཁཱདཏི, ཁཎཏི ཙ ཀཱཡཙིཏྟཱབཱདྷནྟི སུཁཾ, སོམནསྶཝེདནཱཡེཏཾ ནཱམཾ. ཏཾ སཱཏལཀྑཎཾ. སནྟེཔི ཙ ནེསཾ ཀཏྠཙི ཨཝིཔྤཡོགེ ཨིཊྛཱརམྨཎཔཊིལཱབྷཏུཊྛི པཱིཏི, པཊིལདྡྷརསཱནུབྷཝནཾ སུཁཾ. ཡཏྠ པཱིཏི, ཏཏྠ སུཁཾ. ཡཏྠ སུཁཾ, ཏཏྠ ན ནིཡམཏོ པཱིཏི. སངྑཱརཀྑནྡྷསངྒཧིཏཱ པཱིཏི, ཝེདནཱཀྑནྡྷསངྒཧིཏཾ སུཁཾ. ཀནྟཱརཁིནྣསྶ ཝནནྟུདཀདསྶནསཝནེསུ ཝིཡ པཱིཏི, ཝནཙྪཱཡཱཔཝེསནཨུདཀཔརིབྷོགེསུ ཝིཡ སུཁཾ. ཏསྨིཾ ཏསྨིཾ སམཡེ པཱཀཊབྷཱཝཏོ ཙེཏཾ ཝུཏྟནྟི ཝེདིཏབྦཾ. ཨིཏི ཨཡཉྩ པཱིཏི ཨིདཉྩ སུཁཾ ཨསྶ ཛྷཱནསྶ, ཨསྨིཾ ཝཱ ཛྷཱནེ ཨཏྠཱིཏི ཨིདཾ ཛྷཱནཾ ‘‘པཱིཏིསུཁ’’ནྟི ཝུཙྩཏི. ཨཐ ཝཱ པཱིཏི ཙ སུཁཉྩ པཱིཏིསུཁཾ དྷམྨཝིནཡཱདཡོ ཝིཡ. ཝིཝེཀཛཾ པཱིཏིསུཁཾ ཨསྶ ཛྷཱནསྶ, ཨསྨིཾ ཝཱ ཛྷཱནེ ཨཏྠཱིཏི ཨེཝམྤི ཝིཝེཀཛཾ པཱིཏིསུཁཾ. ཡཐེཝ ཧི ཛྷཱནཾ, ཨེཝཾ པཱིཏིསུཁམྤེཏྠ ཝིཝེཀཛམེཝ ཧོཏི. ཏཉྩསྶ ཨཏྠཱིཏི ཏསྨཱ ཨལོཔསམཱསཾ ཀཏྭཱ ཨེཀཔདེནེཝ ‘‘ཝིཝེཀཛཾཔཱིཏིསུཁ’’ནྟིཔི ཝཏྟུཾ ཡུཛྫཏི.

པཋམནྟི གཎནཱནུཔུབྦཏཱ པཋམཾ, པཋམཾ ཨུཔྤནྣནྟིཔི པཋམཾ. ཛྷཱནནྟི དུཝིདྷཾ ཛྷཱནཾ ཨཱརམྨཎཱུཔནིཛ྄ཛྷཱནཉྩ ལཀྑཎཱུཔནིཛ྄ཛྷཱནཉྩ. ཏཏྠ ཨཊྛ སམཱཔཏྟིཡོ པཐཝཱིཀསིཎཱདིཨཱརམྨཎཾ ཨུཔནིཛ྄ཛྷཱཡནྟཱིཏི ‘‘ཨཱརམྨཎཱུཔནིཛ྄ཛྷཱན’’ནྟི སངྑྱཾ གཏཱ. ཝིཔསྶནཱམགྒཕལཱནི པན ལཀྑཎཱུཔནིཛ྄ཛྷཱནཾ ¶ ནཱམ. ཏཏྠ ཝིཔསྶནཱ ཨནིཙྩཱདིལཀྑཎསྶ ཨུཔནིཛ྄ཛྷཱནཏོ ལཀྑཎཱུཔནིཛ྄ཛྷཱནཾ, ཝིཔསྶནཱཡ ཀཏཀིཙྩསྶ མགྒེན ཨིཛ྄ཛྷནཏོ མགྒོ ལཀྑཎཱུཔནིཛ྄ཛྷཱནཾ, ཕལཾ པན ནིརོདྷསཙྩཾ ཏཐལཀྑཎཾ ཨུཔནིཛ྄ཛྷཱཡཏཱིཏི ལཀྑཎཱུཔནིཛ྄ཛྷཱནཾ. ཏེསུ ཨིདྷ པུབྦབྷཱགེ ཨཱརམྨཎཱུཔནིཛ྄ཛྷཱནཾ, ལོཀུཏྟརམགྒཀྑཎེ ལཀྑཎཱུཔནིཛ྄ཛྷཱནཾ ཨདྷིཔྤེཏཾ, ཏསྨཱ ཨཱརམྨཎཱུཔནིཛ྄ཛྷཱནཏོ ལཀྑཎཱུཔནིཛ྄ཛྷཱནཏོ པཙྩནཱིཀཛ྄ཛྷཱཔནཏོ ཙ ‘‘ཛྷཱན’’ནྟི ཝེདིཏབྦཾ. ཨུཔསམྤཛྫཱཏི ཨུཔགནྟྭཱ, པཱཔུཎིཏྭཱཏི ཝུཏྟཾ ཧོཏི. ཨུཔསམྤཱདཡིཏྭཱ ཝཱ, ནིཔྥཱདེཏྭཱཏི ཝུཏྟཾ ཧོཏི. ཝིཧརཏཱིཏི ཏདནུརཱུཔེན ཨིརིཡཱཔཐཝིཧཱརེན ཨིརིཡཏི, ཝུཏྟཔྤཀཱརཛྷཱནསམངྒཱི ཧུཏྭཱ ཨཏྟབྷཱཝསྶ ཝུཏྟིཾ ཨབྷིནིཔྥཱདེཏི.

ཝིཏཀྐཝིཙཱརཱནཾ ¶ ཝཱུཔསམཱཏི ཨེཏྠ ཝིཏཀྐསྶ ཙ ཝིཙཱརསྶ ཙཱཏི ཨིམེསཾ དྭིནྣཾ ཝཱུཔསམཱ སམཏིཀྐམཱ, དུཏིཡཛ྄ཛྷཱནཀྑཎེ ཨཔཱཏུབྷཱཝཱཏི ཝུཏྟཾ ཧོཏི. ཏཏྠ ཀིཉྩཱཔི དུཏིཡཛ྄ཛྷཱནེ སབྦེཔི པཋམཛ྄ཛྷཱནདྷམྨཱ ན སནྟི, ཨཉྙེཡེཝ ཧི པཋམཛ྄ཛྷཱནེ ཕསྶཱདཡོ, ཨཉྙེ ཨིདྷཱཏི. ཨོལཱ༹རིཀསྶ པན ཨོལཱ༹རིཀསྶ ཨངྒསྶ སམཏིཀྐམཱ པཋམཛ྄ཛྷཱནཏོ པརེསཾ དུཏིཡཛ྄ཛྷཱནཱདཱིནཾ ཨདྷིགམོ ཧོཏཱིཏི དསྶནཏྠཾ ‘‘ཝིཏཀྐཝིཙཱརཱནཾ ཝཱུཔསམཱ’’ཏི ཨེཝཾ ཝུཏྟནྟི ཝེདིཏབྦཾ ¶ . ཨཛ྄ཛྷཏྟནྟི ཨིདྷ ནིཡཀཛ྄ཛྷཏྟཾ ཨདྷིཔྤེཏཾ, ཏསྨཱ ཨཏྟནི ཛཱཏཾ, ཨཏྟསནྟཱནེ ནིབྦཏྟནྟི ཨཏྠོ.

སམྤསཱདནནྟི སམྤསཱདནཾ ཝུཙྩཏི སདྡྷཱ. སམྤསཱདནཡོགཏོ ཛྷཱནམྤི སམྤསཱདནཾ ནཱིལཝཎྞཡོགཏོ ནཱིལཝཏྠཾ ཝིཡ. ཡསྨཱ ཝཱ ཏཾ ཛྷཱནཾ སམྤསཱདནསམནྣཱགཏཏྟཱ ཝིཏཀྐཝིཙཱརཀྑོབྷཝཱུཔསམནེན ཙ ཙེཏོ སམྤསཱདཡཏི, ཏསྨཱཔི སམྤསཱདནནྟི ཝུཏྟཾ. ཨིམསྨིཉྩ ཨཏྠཝིཀཔྤེ སམྤསཱདནཾ ཙེཏསོཏི ཨེཝཾ པདསམྦནྡྷོ ཝེདིཏབྦོ, པུརིམསྨིཾ པན ཨཏྠཝིཀཔྤེ ཙེཏསོཏི ཨེཏཾ ཨེཀོདིབྷཱཝེན སདྡྷིཾ ཡོཛེཏབྦཾ.

ཏཏྲཱཡཾ ཨཏྠཡོཛནཱ – ཨེཀོ ཨུདེཏཱིཏི ཨེཀོདི, ཝིཏཀྐཝིཙཱརེཧི ཨནཛ྄ཛྷཱརཱུལ༹ྷཏྟཱ ཨགྒོ སེཊྛོ ཧུཏྭཱ ཨུདེཏཱིཏི ཨཏྠོ. སེཊྛོཔི ཧི ལོཀེ ཨེཀོཏི ཝུཙྩཏི. ཝིཏཀྐཝིཙཱརཝིརཧིཏོ ཝཱ ཨེཀོ ཨསཧཱཡོ ཧུཏྭཱ ཨིཏིཔི ཝཏྟུཾ ཝཊྚཏི. ཨཐ ཝཱ སམྤཡུཏྟདྷམྨེ ཨུདཱཡཏཱིཏི ཨུདི, ཨུཊྛཔེཏཱིཏི ཨཏྠོ. སེཊྛཊྛེན ཨེཀོ ཙ སོ ¶ ཨུདི ཙཱཏི ཨེཀོདི. སམཱདྷིསྶེཏཾ ཨདྷིཝཙནཾ. ཨིཏི ཨིམཾ ཨེཀོདིཾ བྷཱཝེཏི ཝཌྜྷེཏཱིཏི ཨིདཾ དུཏིཡཾ ཛྷཱནཾ ཨེཀོདིབྷཱཝཾ. སོ པནཱཡཾ ཨེཀོདི ཡསྨཱ ཙེཏསོ, ན སཏྟསྶ ན ཛཱིཝསྶ. ཏསྨཱ ཨེཏཾ ‘‘ཙེཏསོ ཨེཀོདིབྷཱཝ’’ནྟི ཝུཏྟཾ.

ནནུ ཙཱཡཾ སདྡྷཱ པཋམཛ྄ཛྷཱནེཔི ཨཏྠི, ཨཡཉྩ ཨེཀོདིནཱམཀོ སམཱདྷི. ཨཐ ཀསྨཱ ཨིདམེཝ ‘‘སམྤསཱདནཾ ཙེཏསོ ཨེཀོདིབྷཱཝ’’ནྟི ཙ ཝུཏྟནྟི? ཝུཙྩཏེ – ཨདུཉྷི པཋམཛ྄ཛྷཱནཾ ཝིཏཀྐཝིཙཱརཀྑོབྷེན ཝཱིཙིཏརངྒསམཱཀུལམིཝ ཛལཾ ན སུཔྤསནྣཾ ཧོཏི, ཏསྨཱ སཏིཡཱཔི སདྡྷཱཡ ‘‘སམྤསཱདན’’ནྟི ན ཝུཏྟཾ. ན སུཔྤསནྣཏྟཱཡེཝ ཙེཏྠ སམཱདྷིཔི ན སུཊྛུ པཱཀཊོ. ཏསྨཱ ‘‘ཨེཀོདིབྷཱཝ’’ནྟིཔི ན ཝུཏྟཾ. ཨིམསྨིཾ པན ཛྷཱནེ ཝིཏཀྐཝིཙཱརཔལིབོདྷཱབྷཱཝེན ལདྡྷོཀཱསཱ བལཝཏཱི སདྡྷཱ, བལཝསདྡྷཱསཧཱཡཔཊིལཱབྷེནེཝ ཙ སམཱདྷིཔི པཱཀཊོ, ཏསྨཱ ཨིདམེཝ ཨེཝཾ ཝུཏྟནྟི ཝེདིཏབྦཾ.

ཨཝིཏཀྐཾ ¶ ཨཝིཙཱརནྟི བྷཱཝནཱཡ པཧཱིནཏྟཱ ཨེཏསྨིཾ, ཨེཏསྶ ཝཱ ཝིཏཀྐོ ནཏྠཱིཏི ཨཝིཏཀྐཾ. ཨིམིནཱཝ ནཡེན ཨཝིཙཱརཾ. ཨེཏྠཱཧ – ‘‘ནནུ ཙ ‘ཝིཏཀྐཝིཙཱརཱནཾ ཝཱུཔསམཱ’ཏི ཨིམིནཱཔི ཨཡམཏྠོ སིདྡྷོ. ཨཐ ཀསྨཱ པུན ཝུཏྟཾ ‘ཨཝིཏཀྐཾ ཨཝིཙཱར’ནྟི’’? ཝུཙྩཏེ – ཨེཝམེཏཾ, སིདྡྷོཝཱཡམཏྠོ, ན པནེཏཾ ཏདཏྠདཱིཔཀཾ, ནནུ ཨཝོཙུམྷ ‘‘ཨོལཱ༹རིཀསྶ ¶ པན ཨོལཱ༹རིཀསྶ ཨངྒསྶ སམཏིཀྐམཱ པཋམཛ྄ཛྷཱནཏོ པརེསཾ དུཏིཡཛ྄ཛྷཱནཱདཱིནཾ སམདྷིགམོ ཧོཏཱིཏི དསྶནཏྠཾ ཝིཏཀྐཝིཙཱརཱནཾ ཝཱུཔསམཱཏི ཨེཝཾ ཝུཏྟ’’ནྟི.

ཨཔིཙ ཝིཏཀྐཝིཙཱརཱནཾ ཝཱུཔསམཱ ཨིདཾ སམྤསཱདནཾ, ན ཀིལེསཀཱལུསྶིཡསྶ. ཝིཏཀྐཝིཙཱརཱནཉྩ ཝཱུཔསམཱ ཨེཀོདིབྷཱཝཾ, ན ཨུཔཙཱརཛ྄ཛྷཱནམིཝ ནཱིཝརཎཔྤཧཱནཱ, ན པཋམཛ྄ཛྷཱནམིཝ ཙ ཨངྒཔཱཏུབྷཱཝཱཏི ཨེཝཾ སམྤསཱདནཨེཀོདིབྷཱཝཱནཾ ཧེཏུཔརིདཱིཔཀམིདཾ ཝཙནཾ. ཏཐཱ ཝིཏཀྐཝིཙཱརཱནཾ ཝཱུཔསམཱ ཨིདཾ ཨཝིཏཀྐཨཝིཙཱརཾ, ན ཏཏིཡཙཏུཏྠཛ྄ཛྷཱནཱནི ཝིཡ ཙཀྑུཝིཉྙཱཎཱདཱིནི ཝིཡ ཙ ཨབྷཱཝཱཏི ཨེཝཾ ཨཝིཏཀྐཨཝིཙཱརབྷཱཝསྶ ཧེཏུཔརིདཱིཔཀཉྩ. ན ཝིཏཀྐཝིཙཱརཱབྷཱཝམཏྟཔརིདཱིཔཀཾ, ཝིཏཀྐཝིཙཱརཱབྷཱཝམཏྟཔརིདཱིཔཀམེཝ ¶ པན ‘‘ཨཝིཏཀྐཾ ཨཝིཙཱར’’ནྟི ཨིདཾ ཝཙནཾ. ཏསྨཱ པུརིམཾ ཝཏྭཱཔི པུན ཝཏྟབྦམེཝཱཏི.

སམཱདྷིཛནྟི པཋམཛ྄ཛྷཱནསམཱདྷིཏོ, སམྤཡུཏྟསམཱདྷིཏོ ཝཱ ཛཱཏནྟི ཨཏྠོ. ཏཏྠ ཀིཉྩཱཔི པཋམཛ྄ཛྷཱནམྤི སམྤཡུཏྟསམཱདྷིཏོ ཛཱཏཾ, ཨཐ ཁོ ཨཡམེཝ སམཱདྷི ‘‘སམཱདྷཱི’’ཏི ཝཏྟབྦཏཾ ཨརཧཏི ཝིཏཀྐཝིཙཱརཀྑོབྷཝིརཧེན ཨཏིཝིཡ ཨཙལཏྟཱ སུཔྤསནྣཏྟཱ ཙ. ཏསྨཱ ཨིམསྶ ཝཎྞབྷཎནཏྠཾ ཨིདམེཝ ‘‘སམཱདྷིཛ’’ནྟི ཝུཏྟཾ. པཱིཏིསུཁནྟི ཨིདཾ ཝུཏྟནཡམེཝ. དུཏིཡནྟི གཎནཱནུཔུབྦཏཱ དུཏིཡཾ, ཨིདཾ དུཏིཡཾ ཨུཔྤནྣནྟིཔི དུཏིཡཾ.

པཱིཏིཡཱ ཙ ཝིརཱགཱཏི ཝིརཱགོ ནཱམ ཝུཏྟཔྤཀཱརཱཡ པཱིཏིཡཱ ཛིགུཙྪནཾ ཝཱ སམཏིཀྐམོ ཝཱ, ཨུབྷིནྣཾ པན ཨནྟརཱ ཙསདྡོ སམྤིཎྜནཏྠོ, སོ ཝཱུཔསམཾ ཝཱ སམྤིཎྜེཏི ཝིཏཀྐཝིཙཱརཝཱུཔསམཾ ཝཱ. ཏཏྠ ཡདཱ ཝཱུཔསམམེཝ སམྤིཎྜེཏི, ཏདཱ པཱིཏིཡཱ ཝིརཱགཱ ཙ, ཀིཉྩ བྷིཡྻོ ཝཱུཔསམཱ ཙཱཏི ཨེཝཾ ཡོཛནཱ ཝེདིཏབྦཱ. ཨིམིསྶཱ ཙ ཡོཛནཱཡ ཝིརཱགོ ཛིགུཙྪནཏྠོ ཧོཏི, ཏསྨཱ པཱིཏིཡཱ ཛིགུཙྪནཱ ཙ སམཏིཀྐམཱ ཙཱཏི ཨཡམཏྠོ དཊྛབྦོ. ཡདཱ པན ཝིཏཀྐཝིཙཱརཝཱུཔསམཾ སམྤིཎྜེཏི, ཏདཱ པཱིཏིཡཱ ཙ ཝིརཱགཱ, ཀིཉྩ བྷིཡྻོ ཝིཏཀྐཝིཙཱརཱནཉྩ ཝཱུཔསམཱཏི ཨེཝཾ ཡོཛནཱ ཝེདིཏབྦཱ. ཨིམིསྶཱ ཙ ཡོཛནཱཡ ཝིརཱགོ སམཏིཀྐམནཏྠོ ཧོཏི, ཏསྨཱ པཱིཏིཡཱ ཙ སམཏིཀྐམཱ, ཝིཏཀྐཝིཙཱརཱནཉྩ ཝཱུཔསམཱཏི ཨཡམཏྠོ དཊྛབྦོ.

ཀཱམཉྩེཏེ ¶ ཝིཏཀྐཝིཙཱརཱ དུཏིཡཛ྄ཛྷཱནེཡེཝ ཝཱུཔསནྟཱ, ཨིམསྶ པན ཛྷཱནསྶ མགྒཔརིདཱིཔནཏྠཾ ཝཎྞབྷཎནཏྠཉྩེཏཾ ཝུཏྟཾ. ཝིཏཀྐཝིཙཱརཱནཾ ཝཱུཔསམཱཏི ཧི ཝུཏྟེ ཨིདཾ པཉྙཱཡཏི ‘‘ནཱུན ཝིཏཀྐཝིཙཱརཝཱུཔསམོ མགྒོ ཨིམསྶ ཛྷཱནསྶཱ’’ཏི. ཡཐཱ ཙ ཏཏིཡེ ཨརིཡམགྒེ ¶ ཨཔྤཧཱིནཱནམྤི སཀྐཱཡདིཊྛཱདཱིནཾ ‘‘པཉྩནྣཾ ཨོརམྦྷཱགིཡཱནཾ སཾཡོཛནཱནཾ པཧཱནཱ’’ཏི (དཱི. ནི. ༡.༣༧༣; མ. ནི. ༢.༡༣༣; སཾ. ནི. ༥.༡༨༤; ཨ. ནི. ༣.༨༨) ཨེཝཾ པཧཱནཾ ཝུཙྩམཱནཾ ཝཎྞབྷཎནཾ ཧོཏི, ཏདདྷིགམཱཡ ཨུསྶུཀྐཱནཾ ཨུསྶཱཧཛནཀཾ, ཨེཝམེཝ ཨིདྷ ཨཝཱུཔསནྟཱནམྤི ཝིཏཀྐཝིཙཱརཱནཾ ཝཱུཔསམོ ཝུཙྩམཱནོ ཝཎྞབྷཎནཾ ཧོཏི. ཏེནཱཡམཏྠོ ཝུཏྟོ ‘‘པཱིཏིཡཱ ཙ སམཏིཀྐམཱ ཝིཏཀྐཝིཙཱརཱནཉྩ ཝཱུཔསམཱ’’ཏི.

ཨུཔེཀྑཀོ ཙ ཝིཧརཏཱིཏི ཨེཏྠ ཨུཔཔཏྟིཏོ ཨིཀྑཏཱིཏི ཨུཔེཀྑཱ ¶ , སམཾ པསྶཏི ཨཔཀྑཔཏིཏཱ ཧུཏྭཱ པསྶཏཱིཏི ཨཏྠོ. ཏཱཡ ཝིསདཱཡ ཝིཔུལཱཡ ཐཱམགཏཱཡ སམནྣཱགཏཏྟཱ ཏཏིཡཛ྄ཛྷཱནསམངྒཱི ‘‘ཨུཔེཀྑཀོ’’ཏི ཝུཙྩཏི.

ཨུཔེཀྑཱ པན དསཝིདྷཱ ཧོཏི ཚལ༹ངྒུཔེཀྑཱ བྲཧྨཝིཧཱརུཔེཀྑཱ བོཛ྄ཛྷངྒུཔེཀྑཱ ཝཱིརིཡུཔེཀྑཱ སངྑཱརུཔེཀྑཱ ཝེདནུཔེཀྑཱ ཝིཔསྶནུཔེཀྑཱ ཏཏྲམཛ྄ཛྷཏྟུཔེཀྑཱ ཛྷཱནུཔེཀྑཱ པཱརིསུདྡྷུཔེཀྑཱཏི.

ཏཏྠ ཡཱ ‘‘ཨིདྷ, བྷིཀྑཝེ, ཁཱིཎཱསཝོ བྷིཀྑུ ཙཀྑུནཱ རཱུཔཾ དིསྭཱ ནེཝ སུམནོ ཧོཏི ན དུམྨནོ, ཨུཔེཀྑཀོ ཙ ཝིཧརཏི སཏོ སམྤཛཱནོ’’ཏི (ཨ. ནི. ༦.༡) ཨེཝམཱགཏཱ ཁཱིཎཱསཝསྶ ཚསུ དྭཱརེསུ ཨིཊྛཱནིཊྛཚལཱ༹རམྨཎཱཔཱཐེ པརིསུདྡྷཔཀཏིབྷཱཝཱཝིཛཧནཱཀཱརབྷཱུཏཱ ཨུཔེཀྑཱ, ཨཡཾ ཚལ༹ངྒུཔེཀྑཱ ནཱམ.

ཡཱ པན ‘‘ཨུཔེཀྑཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏཱི’’ཏི (དཱི. ནི. ༡.༥༥༦; མ. ནི. ༡.༧༧) ཨེཝམཱགཏཱ སཏྟེསུ མཛ྄ཛྷཏྟཱཀཱརབྷཱུཏཱ ཨུཔེཀྑཱ, ཨཡཾ བྲཧྨཝིཧཱརུཔེཀྑཱ ནཱམ.

ཡཱ པན ‘‘ཨུཔེཀྑཱསམྦོཛ྄ཛྷངྒཾ བྷཱཝེཏི ཝིཝེཀནིསྶིཏ’’ནྟི (མ. ནི. ༢.༢༤༧) ཨེཝམཱགཏཱ སཧཛཱཏདྷམྨཱནཾ མཛ྄ཛྷཏྟཱཀཱརབྷཱུཏཱ ཨུཔེཀྑཱ, ཨཡཾ བོཛ྄ཛྷངྒུཔེཀྑཱ ནཱམ.

ཡཱ ¶ པན ‘‘ཀཱལེན ཀཱལཾ ཨུཔེཀྑཱནིམིཏྟཾ མནསིཀརོཏཱི’’ཏི (ཨ. ནི. ༣.༡༠༣) ཨེཝམཱགཏཱ ཨནཙྩཱརདྡྷནཱཏིསིཐིལཝཱིརིཡསངྑཱཏཱ ཨུཔེཀྑཱ, ཨཡཾ ཝཱིརིཡུཔེཀྑཱ ནཱམ.

ཡཱ པན ‘‘ཀཏི སངྑཱརུཔེཀྑཱ སམཐཝསེན ཨུཔྤཛྫནྟི, ཀཏི སངྑཱརུཔེཀྑཱ ཝིཔསྶནཱཝསེན ¶ ཨུཔྤཛྫནྟི? ཨཊྛ སངྑཱརུཔེཀྑཱ སམཐཝསེན ཨུཔྤཛྫནྟི, དས སངྑཱརུཔེཀྑཱ ཝིཔསྶནཱཝསེན ཨུཔྤཛྫནྟཱི’’ཏི (པཊི. མ. ༡.༥༧) ཨེཝམཱགཏཱ ནཱིཝརཎཱདིཔཊིསངྑཱསནྟིཊྛནཱགཧཎེ མཛ྄ཛྷཏྟབྷཱུཏཱ ཨུཔེཀྑཱ, ཨཡཾ སངྑཱརུཔེཀྑཱ ནཱམ.

ཡཱ པན ‘‘ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི ཨུཔེཀྑཱསཧགཏ’’ནྟི (དྷ. ས. ༡༥༠) ཨེཝམཱགཏཱ ཨདུཀྑམསུཁསཉྙིཏཱ ཨུཔེཀྑཱ, ཨཡཾ ཝེདནུཔེཀྑཱ ནཱམ.

ཡཱ ‘‘ཡདཏྠི ཡཾ བྷཱུཏཾ, ཏཾ པཛཧཏི, ཨུཔེཀྑཾ པཊིལབྷཏཱི’’ཏི (མ. ནི. ༣.༧༡; ཨ. ནི. ༧.༥༥) ཨེཝམཱགཏཱ ཝིཙིནནེ མཛ྄ཛྷཏྟབྷཱུཏཱ ཨུཔེཀྑཱ, ཨཡཾ ཝིཔསྶནུཔེཀྑཱ ནཱམ.

ཡཱ པན ཚནྡཱདཱིསུ ཡེཝཱཔནཀེསུ ཨཱགཏཱ སཧཛཱཏཱནཾ སམཝཱཧིཏབྷཱུཏཱ ཨུཔེཀྑཱ, ཨཡཾ ཏཏྲམཛ྄ཛྷཏྟུཔེཀྑཱ ནཱམ.

ཡཱ པན ‘‘ཨུཔེཀྑཀོ ཙ ཝིཧརཏཱི’’ཏི (དྷ. ས. ༡༦༣; དཱི. ནི. ༡.༢༣༠) ཨེཝམཱགཏཱ ཨགྒསུཁེཔི ཏསྨིཾ ཨཔཀྑཔཱཏཛནནཱི ཨུཔེཀྑཱ, ཨཡཾ ཛྷཱནུཔེཀྑཱ ནཱམ.

ཡཱ པན ‘‘ཨུཔེཀྑཱསཏིཔཱརིསུདྡྷིཾ ཙཏུཏྠཾ ཛྷཱན’’ནྟི (དྷ. ས. ༡༦༥; དཱི. ནི. ༡.༢༣༢) ཨེཝམཱགཏཱ སབྦཔཙྩནཱིཀཔརིསུདྡྷཱ པཙྩནཱིཀཝཱུཔསམནེཔི ཨབྱཱཔཱརབྷཱུཏཱ ཨུཔེཀྑཱ, ཨཡཾ པཱརིསུདྡྷུཔེཀྑཱ ནཱམ.

ཏཏྠ ¶ ཚལ༹ངྒུཔེཀྑཱ ཙ བྲཧྨཝིཧཱརུཔེཀྑཱ ཙ བོཛ྄ཛྷངྒུཔེཀྑཱ ཙ ཏཏྲམཛ྄ཛྷཏྟུཔེཀྑཱ ཙ ཛྷཱནུཔེཀྑཱ ཙ པཱརིསུདྡྷུཔེཀྑཱ ཙ ཨཏྠཏོ ཨེཀཱ, ཏཏྲམཛ྄ཛྷཏྟུཔེཀྑཱཝ ཧོཏི. ཏེན ཏེན ཨཝཏྠཱབྷེདེན པནསྶཱཡཾ བྷེདོ. ཨེཀསྶཱཔི སཏོ སཏྟསྶ ཀུམཱརཡུཝཏྠེརསེནཱཔཏིརཱཛཱདིཝསེན བྷེདོ ཝིཡ, ཏསྨཱ ཏཱསུ ཡཏྠ ཚལ༹ངྒུཔེཀྑཱ, ན ཏཏྠ བོཛ྄ཛྷངྒུཔེཀྑཱདཡོ. ཡཏྠ ཝཱ པན བོཛ྄ཛྷངྒུཔེཀྑཱ, ན ཏཏྠ ཚལ༹ངྒུཔེཀྑཱདཡོ ཧོནྟཱིཏི ཝེདིཏབྦཱ.

ཡཐཱ ¶ ཙེཏཱསཾ ཨཏྠཏོ ཨེཀཱིབྷཱཝོ, ཨེཝཾ སངྑཱརུཔེཀྑཱཝིཔསྶནུཔེཀྑཱནམྤི. པཉྙཱ ཨེཝ ཧི སཱ, ཀིཙྩཝསེན དྭིདྷཱ བྷིནྣཱ. ཡཐཱ ཧི པུརིསསྶ སཱཡཾ གེཧཾ པཝིཊྛཾ སཔྤཾ ཨཛཔདདཎྜཾ གཧེཏྭཱ པརིཡེསམཱནསྶ ཏཾ ཐུསཀོཊྛཀེ ནིཔནྣཾ དིསྭཱ ‘‘སཔྤོ ནུ ཁོ, ནོ’’ཏི ཨཝལོཀེནྟསྶ སོཝཏྠིཀཏྟཡཾ ¶ དིསྭཱ ནིབྦེམཏིཀསྶ ‘‘སཔྤོ, ན སཔྤོ’’ཏི ཝིཙིནནེ མཛ྄ཛྷཏྟཏཱ ཨུཔྤཛྫཏི, ཨེཝམེཝ ཡཱ ཨཱརདྡྷཝིཔསྶཀསྶ ཝིཔསྶནཱཉཱཎེན ལཀྑཎཏྟཡེ དིཊྛེ སངྑཱརཱནཾ ཨནིཙྩབྷཱཝཱདིཝིཙིནནེ མཛ྄ཛྷཏྟཏཱ ཨུཔྤཛྫཏི, ཨཡཾ ཝིཔསྶནུཔེཀྑཱ. ཡཐཱ པན ཏསྶ པུརིསསྶ ཨཛཔདདཎྜེན གཱལ༹ྷཾ སཔྤཾ གཧེཏྭཱ ‘‘ཀིནྟཱཧཾ ཨིམཾ སཔྤཾ ཨཝིཧེཋེནྟོ ཨཏྟཱནཉྩ ཨིམིནཱ ཨཌཾསཱཔེནྟོ མུཉྩེཡྻ’’ནྟི མུཉྩནཱཀཱརམེཝ པརིཡེསཏོ གཧཎེ མཛ྄ཛྷཏྟཏཱ ཧོཏི, ཨེཝམེཝ ཡཱ ལཀྑཎཏྟཡསྶ དིཊྛཏྟཱ ཨཱདིཏྟེ ཝིཡ ཏཡོ བྷཝེ པསྶཏོ སངྑཱརགཧཎེ མཛ྄ཛྷཏྟཏཱ, ཨཡཾ སངྑཱརུཔེཀྑཱ. ཨིཏི ཝིཔསྶནུཔེཀྑཱཡ སིདྡྷཱཡ སངྑཱརུཔེཀྑཱཔི སིདྡྷཱཝ ཧོཏི. ཨིམིནཱ པནེསཱ ཝིཙིནནགཧཎེསུ མཛ྄ཛྷཏྟསངྑཱཏེན ཀིཙྩེན དྭིདྷཱ བྷིནྣཱཏི. ཝཱིརིཡུཔེཀྑཱ པན ཝེདནུཔེཀྑཱ ཙ ཨཉྙམཉྙཉྩ ཨཝསེསཱཧི ཙ ཨཏྠཏོ བྷིནྣཱ ཨེཝཱཏི. ཨཱཧ ཙེཏྠ –

‘‘མཛ྄ཛྷཏྟབྲཧྨབོཛ྄ཛྷངྒཚལ༹ངྒཛྷཱནསུདྡྷིཡོ;

ཝིཔསྶནཱ ཙ སངྑཱརཝེདནཱ ཝཱིརིཡཾ ཨིཏི.

ཝིཏྠཱརཏོ དསོཔེཀྑཱ, ཚ མཛ྄ཛྷཏྟཱདིཏོ ཏཏོ;

དུཝེ པཉྙཱ ཏཏོ དྭཱིཧི, ཙཏསྶོཝ བྷཝནྟིམཱ’’ཏི.

ཨིཏི ¶ ཨིམཱསུ ཨུཔེཀྑཱསུ ཛྷཱནུཔེཀྑཱ ཨིདྷ ཨདྷིཔྤེཏཱ. སཱ མཛ྄ཛྷཏྟལཀྑཎཱ. ཨེཏྠཱཧ – ‘‘ནནུ ཙཱཡཾ ཨཏྠཏོ ཏཏྲམཛ྄ཛྷཏྟུཔེཀྑཱཝ ཧོཏི, སཱ ཙ པཋམདུཏིཡཛ྄ཛྷཱནེསུཔི ཨཏྠི, ཏསྨཱ ཏཏྲཔི ‘ཨུཔེཀྑཀོ ཙ ཝིཧརཏཱི’ཏི ཨེཝམཡཾ ཝཏྟབྦཱ སིཡཱ, སཱ ཀསྨཱ ན ཝུཏྟཱ’’ཏི? ཨཔརིབྱཏྟཀིཙྩཏོ. ཨཔརིབྱཏྟཉྷི ཏསྶ ཏཏྠ ཀིཙྩཾ ཝིཏཀྐཱདཱིཧི ཨབྷིབྷཱུཏཏྟཱ, ཨིདྷ པནཱཡཾ ཝིཏཀྐཝིཙཱརཔཱིཏཱིཧི ཨནབྷིབྷཱུཏཏྟཱ ཨུཀྑིཏྟསིརཱ ཝིཡ ཧུཏྭཱ པརིབྱཏྟཀིཙྩཱ ཛཱཏཱ, ཏསྨཱ ཝུཏྟཱཏི.

ཨིདཱནི སཏོ ཙ སམྤཛཱནོཏི ཨེཏྠ སརཏཱིཏི སཏོ. སམྤཛཱནཱཏཱིཏི སམྤཛཱནོ. ཨིཏི པུགྒལེན སཏི ཙ སམྤཛཉྙཉྩ ཝུཏྟཾ. ཏཏྠ སརཎལཀྑཎཱ ¶ སཏི. ཨསམྨོཧལཀྑཎཾ སམྤཛཉྙཾ. ཏཏྠ ཀིཉྩཱཔི ཨིདཾ སཏིསམྤཛཉྙཾ པུརིམཛ྄ཛྷཱནེསུཔི ཨཏྠི, མུཊྛསྶཏིསྶ ཧི ཨསམྤཛཱནསྶ ཨུཔཙཱརམཏྟམྤི ན སམྤཛྫཏི, པགེཝ ཨཔྤནཱ. ཨོལཱ༹རིཀཏྟཱ པན ཏེསཾ ཛྷཱནཱནཾ བྷཱུམིཡཾ ཝིཡ པུརིསསྶ ཙིཏྟསྶ གཏི སུཁཱ ཧོཏི, ཨབྱཏྟཾ ཏཏྠ སཏིསམྤཛཉྙཀིཙྩཾ. ཨོལཱ༹རིཀངྒཔྤཧཱནེན པན སུཁུམཏྟཱ ཨིམསྶ ཛྷཱནསྶ པུརིསསྶ ཁུརདྷཱརཱཡཾ ཝིཡ སཏིསམྤཛཉྙཀིཙྩཔརིགྒཧིཏཱ ¶ ཨེཝ ཙིཏྟསྶ གཏི ཨིཙྪིཏབྦཱཏི ཨིདྷེཝ ཝུཏྟཾ. ཀིཉྩ བྷིཡྻོ – ཡཐཱ དྷེནུཔགོ ཝཙྪོ དྷེནུཏོ ཨཔནཱིཏོ ཨརཀྑིཡམཱནོ པུནདེཝ དྷེནུཾ ཨུཔགཙྪཏི, ཨེཝམིདཾ ཏཏིཡཛ྄ཛྷཱནསུཁཾ པཱིཏིཏོ ཨཔནཱིཏམྤི སཏིསམྤཛཉྙཱརཀྑེན ཨརཀྑིཡམཱནཾ པུནདེཝ པཱིཏིཾ ཨུཔགཙྪེཡྻ, པཱིཏིསམྤཡུཏྟམེཝ སིཡཱ. སུཁེ ཝཱཔི སཏྟཱ སཱརཛྫནྟི, ཨིདཉྩ ཨཏིམདྷུརཾ སུཁཾ ཏཏོ པརཾ སུཁཱབྷཱཝཱ. སཏིསམྤཛཉྙཱནུབྷཱཝེན པནེཏྠ སུཁེ ཨསཱརཛྫནཱ ཧོཏི, ནོ ཨཉྙཐཱཏི ཨིམམྤི ཨཏྠཝིསེསཾ དསྶེཏུཾ ཨིདཾ ཨིདྷེཝ ཝུཏྟནྟི ཝེདིཏབྦཾ.

ཨིདཱནི སུཁཉྩ ཀཱཡེན པཊིསཾཝེདེཏཱིཏི ཨེཏྠ ཀིཉྩཱཔི ཏཏིཡཛ྄ཛྷཱནསམངྒིནོ སུཁཔཊིསཾཝེདནཱབྷོགོ ནཏྠི, ཨེཝཾ སནྟེཔི ཡསྨཱ ཏསྶ ནཱམཀཱཡེན སམྤཡུཏྟཾ སུཁཾ, ཡཾ ཝཱ ཏཾ ནཱམཀཱཡསམྤཡུཏྟཾ སུཁཾ, ཏཾསམུཊྛཱནེནསྶ ཡསྨཱ ཨཏིཔཎཱིཏེན རཱུཔེན རཱུཔཀཱཡོ ཕུཊྛོ, ཡསྶ ཕུཊྛཏྟཱ ¶ ཛྷཱནཱ ཝུཊྛིཏོཔི སུཁཾ པཊིསཾཝེདེཡྻ, ཏསྨཱ ཨེཏམཏྠཾ དསྶེནྟོ ‘‘སུཁཉྩ ཀཱཡེན པཊིསཾཝེདེཧཱི’’ཏི ཨཱཧ.

ཨིདཱནི ཡཾ ཏཾ ཨརིཡཱ ཨཱཙིཀྑནྟི ཨུཔེཀྑཀོ སཏིམཱ སུཁཝིཧཱརཱིཏི ཨེཏྠ ཡཾཛྷཱནཧེཏུ ཡཾཛྷཱནཀཱརཎཱ ཏཾ ཏཏིཡཛ྄ཛྷཱནསམངྒིཔུགྒལཾ བུདྡྷཱདཡོ ཨརིཡཱ ཨཱཙིཀྑནྟི དེསེནྟི པཉྙཔེནྟི པཊྛཔེནྟི ཝིཝརནྟི ཝིབྷཛནྟི ཨུཏྟཱནཱིཀརོནྟི པཀཱསེནྟི, པསཾསནྟཱིཏི ཨདྷིཔྤཱཡོ. ཀིནྟི? ཨུཔེཀྑཀོ སཏིམཱ སུཁཝིཧཱརཱིཏི. ཏཾ ཏཏིཡཾ ཛྷཱནཾ ཨུཔསམྤཛྫ ཝིཧརཏཱིཏི ཨེཝམེཏྠ ཡོཛནཱ ཝེདིཏབྦཱ.

ཀསྨཱ པན ཏཾ ཏེ ཨེཝཾ པསཾསནྟཱིཏི? པསཾསཱརཧཏོ. ཨཡཉྷི ཡསྨཱ ཨཏིམདྷུརསུཁེ སུཁཔཱརམིཔྤཏྟེཔི ཏཏིཡཛ྄ཛྷཱནེ ཨུཔེཀྑཀོ, ན ཏཏྠ སུཁཱབྷིསངྒེན ཨཱཀཌྜྷཱིཡཏི. ཡཐཱ ཙ པཱིཏི ན ཨུཔྤཛྫཏི, ཨེཝཾ ཨུཔཊྛིཏསྶཏིཏཱཡ ¶ སཏིམཱ. ཡསྨཱ ཙ ཨརིཡཀནྟཾ ཨརིཡཛནསེཝིཏམེཝ ཙ ཨསཾཀིལིཊྛཾ སུཁཾ ནཱམཀཱཡེན པཊིསཾཝེདེཏི, ཏསྨཱ པསཾསཱརཧོ ཧོཏི. ཨིཏི པསཾསཱརཧཏོ ནཾ ཨརིཡཱ ཏེ ཨེཝཾ པསཾསཱརཧཧེཏུབྷཱུཏེ གུཎེ པཀཱསེནྟཱ ‘‘ཨུཔེཀྑཀོ སཏིམཱ སུཁཝིཧཱརཱི’’ཏི ཨེཝཾ པསཾསནྟཱིཏི ཝེདིཏབྦཾ. ཏཏིཡནྟི གཎནཱནུཔུབྦཏཱ ཏཏིཡཾ, ཏཏིཡཾ ཨུཔྤནྣནྟིཔི ཏཏིཡཾ.

སུཁསྶ ཙ པཧཱནཱ དུཀྑསྶ ཙ པཧཱནཱཏི ཀཱཡིཀསུཁསྶ ཙ ཀཱཡིཀདུཀྑསྶ ཙ པཧཱནཱ. པུབྦེཝཱཏི ཏཉྩ ཁོ པུབྦེཝ, ན ཙཏུཏྠཛ྄ཛྷཱནཀྑཎེ. སོམནསྶདོམནསྶཱནཾ ཨཏྠངྒམཱཏི ཙེཏསིཀསུཁསྶ ཙེཏསིཀདུཀྑསྶ ཙཱཏི ཨིམེསམྤི དྭིནྣཾ པུབྦེཝ ཨཏྠངྒམཱ, པཧཱནཱ ¶ ཨིཙྩེཝ ཝུཏྟཾ ཧོཏི. ཀདཱ པན ནེསཾ པཧཱནཾ ཧོཏི? ཙཏུནྣཾ ཛྷཱནཱནཾ ཨུཔཙཱརཀྑཎེ. སོམནསྶཉྷི ཙཏུཏྠསྶ ཛྷཱནསྶ ཨུཔཙཱརཀྑཎེཡེཝ པཧཱིཡཏི, དུཀྑདོམནསྶསུཁཱནི པཋམདུཏིཡཏཏིཡཱནཾ ཨུཔཙཱརཀྑཎེསུ. ཨེཝམེཏེསཾ པཧཱནཀྐམེན ཨཝུཏྟཱནཾ ཨིནྡྲིཡཝིབྷངྒེ (ཝིབྷ. ༢༡༩ ཨཱདཡོ) པན ཨིནྡྲིཡཱནཾ ཨུདྡེསཀྐམེནེཝ ཨིདྷཱཔི ཝུཏྟཱནཾ སུཁདུཀྑསོམནསྶདོམནསྶཱནཾ པཧཱནཾ ཝེདིཏབྦཾ.

ཡདི པནེཏཱནི ཏསྶ ཏསྶ ཛྷཱནསྶ ཨུཔཙཱརཀྑཎེཡེཝ པཧཱིཡནྟི ¶ , ཨཐ ཀསྨཱ ‘‘ཀཏྠ ཙུཔྤནྣཾ དུཀྑིནྡྲིཡཾ ཨཔརིསེསཾ ནིརུཛ྄ཛྷཏི? ཨིདྷ, བྷིཀྑཝེ, བྷིཀྑུ ཝིཝིཙྩེཝ ཀཱམེཧི…པེ… པཋམཛ྄ཛྷཱནཾ ཨུཔསམྤཛྫ ཝིཧརཏི. ཨེཏྠ ཙུཔྤནྣཾ དུཀྑིནྡྲིཡཾ ཨཔརིསེསཾ ནིརུཛ྄ཛྷཏི. ཀཏྠ ཙུཔྤནྣཾ དོམནསྶིནྡྲིཡཾ, སུཁིནྡྲིཡཾ, སོམནསྶིནྡྲིཡཾ ཨཔརིསེསཾ ནིརུཛ྄ཛྷཏི? ཨིདྷ, བྷིཀྑཝེ, བྷིཀྑུ སུཁསྶ ཙ པཧཱནཱ…པེ… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི. ཨེཏྠ ཙུཔྤནྣཾ སོམནསྶིནྡྲིཡཾ ཨཔརིསེསཾ ནིརུཛ྄ཛྷཏཱི’’ཏི (སཾ. ནི. ༥.༥༡༠) ཨེཝཾ ཛྷཱནེསྭེཝ ནིརོདྷོ ཝུཏྟོཏི? ཨཏིསཡནིརོདྷཏྟཱ. ཨཏིསཡནིརོདྷོ ཧི ཏེསཾ པཋམཛ྄ཛྷཱནཱདཱིསུ, ན ནིརོདྷོཡེཝ. ནིརོདྷོཡེཝ པན ཨུཔཙཱརཀྑཎེ, ནཱཏིསཡནིརོདྷོ. ཏཐཱ ཧི ནཱནཱཝཛྫནེ པཋམཛ྄ཛྷཱནཱུཔཙཱརེ ནིརུདྡྷསྶཱཔི དུཀྑིནྡྲིཡསྶ ཌཾསམཀསཱདིསམྥསྶེན ཝཱ ཝིསམཱསནཱུཔཏཱཔེན ཝཱ སིཡཱ ཨུཔྤཏྟི, ན ཏྭེཝ ཨནྟོཨཔྤནཱཡཾ. ཨུཔཙཱརེ ཝཱ ནིརུདྡྷམྤེཏཾ ན སུཊྛུ ¶ ནིརུདྡྷཾ ཧོཏི པཊིཔཀྑེན ཨཝིཧཏཏྟཱ. ཨནྟོཨཔྤནཱཡཾ པན པཱིཏིཕརཎེན སབྦོ ཀཱཡོ སུཁོཀྐནྟོ ཧོཏི, སུཁོཀྐནྟཀཱཡསྶ ཙ སུཊྛུ ནིརུདྡྷཾ ཧོཏི དུཀྑིནྡྲིཡཾ པཊིཔཀྑེན ཝིཧཏཏྟཱ. ནཱནཱཝཛྫནེཡེཝ ཙ དུཏིཡཛ྄ཛྷཱནཱུཔཙཱརེ པཧཱིནསྶཱཔི དོམནསྶིནྡྲིཡསྶ, ཡསྨཱ ཨེཏཾ ཝིཏཀྐཝིཙཱརཔཙྩཡེཔི ཀཱཡཀིལམཐེ ཙིཏྟཱུཔགྷཱཏེ ཙ སཏི ཨུཔྤཛྫཏི, ཝིཏཀྐཝིཙཱརཱབྷཱཝེ ནེཝ ཨུཔྤཛྫཏི. ཡཏྠ པན ཨུཔྤཛྫཏི, ཏཏྠ ཝིཏཀྐཝིཙཱརབྷཱཝེ. ཨཔྤཧཱིནཱཡེཝ ཙ དུཏིཡཛ྄ཛྷཱནཱུཔཙཱརེ ཝིཏཀྐཝིཙཱརཱཏི ཏཏྠསྶ སིཡཱ ཨུཔྤཏྟི, ནཏྭེཝ དུཏིཡཛ྄ཛྷཱནེ པཧཱིནཔཙྩཡཏྟཱ. ཏཐཱ ཏཏིཡཛ྄ཛྷཱནཱུཔཙཱརེ པཧཱིནསྶཱཔི སུཁིནྡྲིཡསྶ པཱིཏིསམུཊྛཱནཔཎཱིཏརཱུཔཕུཊྛཀཱཡསྶ སིཡཱ ཨུཔྤཏྟི, ནཏྭེཝ ཏཏིཡཛ྄ཛྷཱནེ. ཏཏིཡཛ྄ཛྷཱནེ ཧི སུཁསྶ པཙྩཡབྷཱུཏཱ པཱིཏི སབྦསོ ནིརུདྡྷཱ ཧོཏི. ཏཐཱ ཙཏུཏྠཛ྄ཛྷཱནཱུཔཙཱརེ པཧཱིནསྶཱཔི སོམནསྶིནྡྲིཡསྶ ཨཱསནྣཏྟཱ, ཨཔྤནཱཔྤཏྟཱཡ ཨུཔེཀྑཱཡ ཨབྷཱཝེན སམྨཱ ཨནཏིཀྐནྟཏྟཱ ཙ སིཡཱ ཨུཔྤཏྟི, ནཏྭེཝ ཙཏུཏྠཛ྄ཛྷཱནེ. ཏསྨཱ ཨེཝ ཙ ‘‘ཨེཏྠུཔྤནྣཾ དུཀྑིནྡྲིཡཾ ཨཔརིསེསཾ ནིརུཛ྄ཛྷཏཱི’’ཏི ཏཏྠ ཏཏྠ ཨཔརིསེསགྒཧཎཾ ཀཏནྟི.

ཨེཏྠཱཧ – ‘‘ཨཐེཝཾ ཏསྶ ཏསྶ ཛྷཱནསྶཱུཔཙཱརེ པཧཱིནཱཔི ཨེཏཱ ཝེདནཱ ཨིདྷ ཀསྨཱ སམཱཧརཱི’’ཏི ¶ ? སུཁགྒཧཎཏྠཾ ¶ . ཡཱ ཧི ཨཡཾ ‘‘ཨདུཀྑམསུཁ’’ནྟི ཨེཏྠ ཨདུཀྑམསུཁཱ ཝེདནཱ ཝུཏྟཱ, སཱ སུཁུམཱ དུབྦིཉྙེཡྻཱ ན སཀྐཱ སུཁེན གཧེཏུཾ, ཏསྨཱ ཡཐཱ ནཱམ དུཊྛསྶ ཡཐཱ ཏཐཱ ཝཱ ཨུཔསངྐམིཏྭཱ གཧེཏུཾ ཨསཀྐུཎེཡྻསྶ གོཎསྶ གཧཎཏྠཾ གོཔོ ཨེཀསྨིཾ ཝཛེ སབྦཱ གཱཝོ སམཱཧརཏི, ཨཐེཀེཀཾ ནཱིཧརནྟོ པཊིཔཱཊིཡཱ ཨཱགཏཾ ‘‘ཨཡཾ སོ གཎྷཐ ན’’ནྟི ཏམྤི གཱཧཱཔེཏི, ཨེཝམེཝཾ སུཁགྒཧཎཏྠཾ སབྦཱཔི ཨེཏཱ སམཱཧརི. ཨེཝཉྷི སམཱཧཊཱ ཨེཏཱ དསྶེཏྭཱ ‘‘ཡཾ ནེཝ སུཁཾ, ན དུཀྑཾ, ན སོམནསྶཾ, ན དོམནསྶཾ, ཨཡཾ ཨདུཀྑམསུཁཱཝེདནཱ’’ཏི སཀྐཱ ཧོཏི ཨེསཱ གཱཧཡིཏུཾ.

ཨཔིཙ ཨདུཀྑམསུཁཱཡ ཙེཏོཝིམུཏྟིཡཱ པཙྩཡདསྶནཏྠཉྩཱཔི ཨེཏཱ ཝུཏྟཱཏི ཝེདིཏབྦཱ. སུཁདུཀྑཔྤཧཱནཱདཡོ ཧི ཏསྶཱ པཙྩཡཱ. ཡཐཱཧ – ‘‘ཙཏྟཱརོ ཁོ, ཨཱཝུསོ, པཙྩཡཱ ཨདུཀྑམསུཁཱཡ ཙེཏོཝིམུཏྟིཡཱ སམཱཔཏྟིཡཱ. ཨིདྷཱཝུསོ, བྷིཀྑུ སུཁསྶ ཙ པཧཱནཱ…པེ… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི. ཨིམེ ཁོ ཨཱཝུསོ, ཙཏྟཱརོ པཙྩཡཱ ཨདུཀྑམསུཁཱཡ ཙེཏོཝིམུཏྟིཡཱ སམཱཔཏྟིཡཱ’’ཏི (མ. ནི. ༡.༤༥༨). ཡཐཱ ཝཱ ཨཉྙཏྠ པཧཱིནཱཔི སཀྐཱཡདིཊྛིཨཱདཡོ ཏཏིཡམགྒསྶ ཝཎྞབྷཎནཏྠཾ ཏཏྠ པཧཱིནཱཏི ཝུཏྟཱ ¶ , ཨེཝཾ ཝཎྞབྷཎནཏྠམྤེཏསྶ ཛྷཱནསྶེཏཱ ཨིདྷ ཝུཏྟཱཏིཔི ཝེདིཏབྦཱ. པཙྩཡགྷཱཏེན ཝཱ ཨེཏྠ རཱགདོསཱནཾ ཨཏིདཱུརབྷཱཝཾ དསྶེཏུམྤེཏཱ ཝུཏྟཱཏི ཝེདིཏབྦཱ. ཨེཏཱསུ ཧི སུཁཾ སོམནསྶསྶ པཙྩཡོ, སོམནསྶཾ རཱགསྶ, དུཀྑཾ དོམནསྶསྶ, དོམནསྶཾ དོསསྶ. སུཁཱདིགྷཱཏེན ཙ སཔྤཙྩཡཱ རཱགདོསཱ ཧཏཱཏི ཨཏིདཱུརེ ཧོནྟཱིཏི.

ཨདུཀྑམསུཁནྟི དུཀྑཱབྷཱཝེན ཨདུཀྑཾ. སུཁཱབྷཱཝེན ཨསུཁཾ. ཨེཏེནེཏྠ དུཀྑསུཁཔཊིཔཀྑབྷཱུཏཾ ཏཏིཡཝེདནཾ དཱིཔེཏི, ན དུཀྑསུཁཱབྷཱཝམཏྟཾ. ཏཏིཡཝེདནཱ ནཱམ ཨདུཀྑམསུཁཱ, ཨུཔེཀྑཱཏིཔི ཝུཙྩཏི. སཱ ཨིཊྛཱནིཊྛཝིཔརཱིཏཱནུབྷཝནལཀྑཎཱ. ཨུཔེཀྑཱསཏིཔཱརིསུདྡྷིནྟི ཨུཔེཀྑཱཡ ཛནིཏསཏིཔཱརིསུདྡྷིཾ. ཨིམསྨིཉྷི ཛྷཱནེ སུཔརིསུདྡྷཱ སཏི, ཡཱ ཙ ཏསྶཱ སཏིཡཱ པཱརིསུདྡྷི, སཱ ཨུཔེཀྑཱཡ ཀཏཱ, ན ཨཉྙེན. ཏསྨཱ ཨེཏཾ ‘‘ཨུཔེཀྑཱསཏིཔཱརིསུདྡྷི’’ནྟི ཝུཙྩཏི. ཡཱཡ ཙ ཨུཔེཀྑཱཡ ཨེཏྠ ¶ སཏིཡཱ པཱརིསུདྡྷི ཧོཏི, སཱ ཨཏྠཏོ ཏཏྲམཛ྄ཛྷཏྟཏཱཏི ཝེདིཏབྦཱ. ན ཀེཝལཉྩེཏྠ ཏཱཡ སཏིཡེཝ པརིསུདྡྷཱ, ཨཔིཙ ཁོ སབྦེཔི སམྤཡུཏྟདྷམྨཱ, སཏིསཱིསེན པན དེསནཱ ཝུཏྟཱ.

ཏཏྠ ཀིཉྩཱཔི ཨཡཾ ཨུཔེཀྑཱ ཧེཊྛཱཔི ཏཱིསུ ཛྷཱནེསུ ཝིཛྫཏི, ཡཐཱ པན དིཝཱ སཱུརིཡཔྤབྷཱབྷིབྷཝཱ སོམྨབྷཱཝེན ཙ ཨཏྟནོ ཨུཔཀཱརཀཏྟེན ཝཱ སབྷཱགཱཡ རཏྟིཡཱ ཨལཱབྷཱ དིཝཱ ¶ ཝིཛྫམཱནཱཔི ཙནྡལེཁཱ ཨཔརིསུདྡྷཱ ཧོཏི ཨཔརིཡོདཱཏཱ, ཨེཝམཡམྤི ཏཏྲམཛ྄ཛྷཏྟུཔེཀྑཱཙནྡལེཁཱ ཝིཏཀྐཱདིཔཙྩནཱིཀདྷམྨཏེཛཱབྷིབྷཝཱ སབྷཱགཱཡ ཙ ཨུཔེཀྑཱཝེདནཱརཏྟིཡཱ ཨལཱབྷཱ ཝིཛྫམཱནཱཔི པཋམཛ྄ཛྷཱནཱདིབྷེདེ ཨཔརིསུདྡྷཱ ཧོཏི. ཏསྶཱ ཙ ཨཔརིསུདྡྷཱཡ དིཝཱ ཨཔརིསུདྡྷཙནྡལེཁཱཡ པབྷཱ ཝིཡ སཧཛཱཏཱཔི སཏིཨཱདཡོ ཨཔརིསུདྡྷཱཝ ཧོནྟི. ཏསྨཱ ཏེསུ ཨེཀམྤི ‘‘ཨུཔེཀྑཱསཏིཔཱརིསུདྡྷི’’ནྟི ན ཝུཏྟཾ. ཨིདྷ པན ཝིཏཀྐཱདིཔཙྩནཱིཀཏེཛཱབྷིབྷཝཱབྷཱཝཱ སབྷཱགཱཡ ཙ ཨུཔེཀྑཱཝེདནཱརཏྟིཡཱ པཊིལཱབྷཱ ཨཡཾ ཏཏྲམཛ྄ཛྷཏྟུཔེཀྑཱཙནྡལེཁཱ ཨཏིཝིཡ པརིསུདྡྷཱ. ཏསྶཱ པརིསུདྡྷཏྟཱ པརིསུདྡྷཙནྡལེཁཱཡ པབྷཱ ཝིཡ སཧཛཱཏཱཔི སཏིཨཱདཡོ པརིསུདྡྷཱ ཧོནྟི པརིཡོདཱཏཱ. ཏསྨཱ ཨིདམེཝ ‘‘ཨུཔེཀྑཱསཏིཔཱརིསུདྡྷི’’ནྟི ཝུཏྟནྟི ཝེདིཏབྦཾ. ཙཏུཏྠནྟི གཎནཱནུཔུབྦཏཱ ཙཏུཏྠཾ, ཙཏུཏྠཾ ཨུཔྤནྣནྟིཔི ཙཏུཏྠཾ.

ཨིམཱནི ཙཏྟཱརི ཛྷཱནཱནི པུབྦབྷཱགེཔི ནཱནཱ, མགྒཀྑཎེཔི. པུབྦབྷཱགེ སམཱཔཏྟིཝསེན ནཱནཱ, མགྒཀྑཎེ ནཱནཱམགྒཝསེན. ཨེཀསྶ ཧི པཋམམགྒོ པཋམཛ྄ཛྷཱནིཀོ ¶ ཧོཏི, དུཏིཡམགྒཱདཡོཔི པཋམཛ྄ཛྷཱནིཀཱ ཝཱ དུཏིཡཱདཱིསུ ཨཉྙཏརཛ྄ཛྷཱནིཀཱ ཝཱ. ཨེཀསྶ པཋམམགྒོ དུཏིཡཱདཱིནཾ ཨཉྙཏརཛ྄ཛྷཱནིཀོ ཧོཏི, དུཏིཡཱདཡོཔི དུཏིཡཱདཱིནཾ ཨཉྙཏརཛ྄ཛྷཱནིཀཱ ཝཱ པཋམཛ྄ཛྷཱནིཀཱ ཝཱ. ཨེཝཾ ཙཏྟཱརོཔི མགྒཱ ཛྷཱནཝསེན སདིསཱ ཝཱ ཨསདིསཱ ཝཱ ཨེཀཙྩསདིསཱ ཝཱ ཧོནྟི. ཨཡཾ པནསྶ ཝིསེསོ པཱདཀཛ྄ཛྷཱནནིཡམེན ཧོཏི. པཋམཛ྄ཛྷཱནལཱབྷིནོ ཧི པཋམཛ྄ཛྷཱནཱ ཝུཊྛཱཡ ཝིཔསྶནྟསྶ ཨུཔྤནྣམགྒོ པཋམཛ྄ཛྷཱནིཀོ ཧོཏི, མགྒངྒབོཛ྄ཛྷངྒཱནི པནེཏྠ པརིཔུཎྞཱནེཝ ཧོནྟི. དུཏིཡཛ྄ཛྷཱནཏོ ཝུཊྛཱཡ ཝིཔསྶནྟསྶ ཨུཔྤནྣོ དུཏིཡཛ྄ཛྷཱནིཀོ ཧོཏི, མགྒངྒཱནི ¶ པནེཏྠ སཏྟ ཧོནྟི. ཏཏིཡཛ྄ཛྷཱནཏོ ཝུཊྛཱཡ ཝིཔསྶནྟསྶ ཨུཔྤནྣོ ཏཏིཡཛ྄ཛྷཱནིཀོ, མགྒངྒཱནི པནེཏྠ སཏྟ, བོཛ྄ཛྷངྒཱནི ཚ ཧོནྟི. ཨེས ནཡོ ཙཏུཏྠཛ྄ཛྷཱནཏོ པཊྛཱཡ ཡཱཝ ནེཝསཉྙཱནཱསཉྙཱཡཏནཱ. ཨཱརུཔྤེ ཙཏུཀྐཔཉྩཀཛ྄ཛྷཱནཾ ཨུཔྤཛྫཏི, ཏཉྩ ཁོ ལོཀུཏྟརཾ, ན ལོཀིཡནྟི ཝུཏྟཾ. ཨེཏྠ ཀཐནྟི? ཨེཏྠཔི པཋམཛ྄ཛྷཱནཱདཱིསུ ཡཏོ ཝུཊྛཱཡ སོཏཱཔཏྟིམགྒཾ པཊིལབྷིཏྭཱ ཨརཱུཔསམཱཔཏྟིཾ བྷཱཝེཏྭཱ ཡོ ཨཱརུཔྤེ ཨུཔྤནྣོ, ཏཾཛྷཱནིཀཱཝ ཏསྶ ཏཏྠ ཏཡོ མགྒཱ ཨུཔྤཛྫནྟི. ཨེཝཾ པཱདཀཛ྄ཛྷཱནམེཝ ནིཡམེཏི. ཀེཙི པན ཐེརཱ ‘‘ཝིཔསྶནཱཡ ཨཱརམྨཎབྷཱུཏཱ ཁནྡྷཱ ནིཡམེནྟཱི’’ཏི ཝདནྟི. ཀེཙི ‘‘པུགྒལཛ྄ཛྷཱསཡོ ནིཡམེཏཱི’’ཏི ཝདནྟི. ཀེཙི ‘‘ཝུཊྛཱནགཱམིནཱི ཝིཔསྶནཱ ནིཡམེཏཱི’’ཏི ཝདནྟི.

ཏཏྲཱཡཾ ཨནུཔུབྦིཀཐཱ – ཝིཔསྶནཱནིཡམེན ཧི སུཀྑཝིཔསྶཀསྶ ཨུཔྤནྣམགྒོཔི, སམཱཔཏྟིལཱབྷིནོ ཛྷཱནཾ པཱདཀཾ ཨཀཏྭཱ ཨུཔྤནྣམགྒོཔི, པཋམཛ྄ཛྷཱནཾ པཱདཀཾ ཀཏྭཱ པཀིཎྞཀསངྑཱརེ སམྨསིཏྭཱ ཨུཔྤཱདིཏམགྒོཔི པཋམཛ྄ཛྷཱནིཀོཝ ཧོཏི, སབྦེསུ སཏྟ བོཛ྄ཛྷངྒཱནི ¶ ཨཊྛ མགྒངྒཱནི པཉྩ ཛྷཱནངྒཱནི ཧོནྟི. ཏེསཉྷི པུབྦབྷཱགཝིཔསྶནཱ སོམནསྶསཧགཏཱཔི ཨུཔེཀྑཱསཧགཏཱཔི ཧུཏྭཱ ཝུཊྛཱནཀཱལེ སངྑཱརུཔེཀྑཱབྷཱཝཾ པཏྟཱ སོམནསྶསཧགཏཱཝ ཧོཏི.

པཉྩཀནཡེ དུཏིཡཏཏིཡཙཏུཏྠཛ྄ཛྷཱནཱནི པཱདཀཱནི ཀཏྭཱ ཨུཔྤཱདིཏམགྒེསུ ཡཐཱཀྐམེནེཝ ཛྷཱནཾ ཙཏུརངྒིཀཾ ཏིཝངྒིཀཾ དུཝངྒིཀཉྩ ཧོཏི, སབྦེསུ པན སཏྟ མགྒངྒཱནི ཧོནྟི, ཙཏུཏྠེ ཚ བོཛ྄ཛྷངྒཱནི. ཨཡཾ ཝིསེསོ པཱདཀཛ྄ཛྷཱནནིཡམེན ཙེཝ ཝིཔསྶནཱནིཡམེན ཙ ཧོཏི. ཏེསམྤི ¶ ཧི པུབྦབྷཱགཝིཔསྶནཱ སོམནསྶསཧགཏཱཔི ཨུཔེཀྑཱསཧགཏཱཔི ཧོཏི, ཝུཊྛཱནགཱམིནཱི སོམནསྶསཧགཏཱཝ.

པཉྩམཛ྄ཛྷཱནཾ པཱདཀཾ ཀཏྭཱ ནིབྦཏྟིཏམགྒེ པན ཨུཔེཀྑཱཙིཏྟེཀགྒཏཱཝསེན དྭེ ཛྷཱནངྒཱནི, བོཛ྄ཛྷངྒམགྒངྒཱནི ཚ སཏྟ ཙེཝ. ཨཡམྤི ཝིསེསོ ཨུབྷཡནིཡམཝསེན ཧོཏི. ཨིམསྨིཉྷི ནཡེ པུབྦབྷཱགཝིཔསྶནཱ སོམནསྶསཧགཏཱ ཝཱ ཨུཔེཀྑཱསཧགཏཱ ཝཱ ཧོཏི, ཝུཊྛཱནགཱམིནཱི ཨུཔེཀྑཱསཧགཏཱཝ ཧོཏི. ཨརཱུཔཛ྄ཛྷཱནཱནི ¶ པཱདཀཱནི ཀཏྭཱ ཨུཔྤཱདིཏམགྒེཔི ཨེསེཝ ནཡོ. ཨིདྷ པན ཙཏུཀྐནཡེ ཨཝིཏཀྐཝིཙཱརམཏྟསྶ དུཏིཡཛ྄ཛྷཱནསྶ ཨབྷཱཝཱ ཏཾ ཨཔནེཏྭཱ སེསཱནཾ ཝསེན ཡོཛེཏབྦཾ. ཨེཝཾ པཱདཀཛ྄ཛྷཱནཏོ ཝུཊྛཱཡ ཡེ ཀེཙི སངྑཱརེ སམྨསིཏྭཱ ནིབྦཏྟིཏམགྒསྶ ཨཱསནྣཔདེསེ ཝུཊྛིཏསམཱཔཏྟི ཨཏྟནཱ སདིསབྷཱཝཾ ཀརོཏི བྷཱུམིཝཎྞོ ཝིཡ གོདྷཱཝཎྞསྶ.

དུཏིཡཏྠེརཝཱདེ པན ཡཏོ ཡཏོ སམཱཔཏྟིཏོ ཝུཊྛཱཡ ཡེ ཡེ སམཱཔཏྟིདྷམྨེ སམྨསིཏྭཱ མགྒོ ནིབྦཏྟིཏོ ཧོཏི, ཏཾཏཾསམཱཔཏྟིསདིསོཝ ཧོཏི. ཏཏྲཱཔི ཙ ཝིཔསྶནཱནིཡམོ ཝུཏྟནཡེནེཝ ཝེདིཏབྦོ.

ཏཏིཡཏྠེརཝཱདེ ཨཏྟནོ ཨཛ྄ཛྷཱསཡཱནུརཱུཔེན ཡཾ ཡཾ ཛྷཱནཾ པཱདཀཾ ཀཏྭཱ ཡེ ཡེ ཛྷཱནདྷམྨེ སམྨསིཏྭཱ མགྒོ ནིབྦཏྟིཏོ, ཏཾཏཾཛྷཱནསདིསོཝ ཧོཏི. པཱདཀཛ྄ཛྷཱནཾ པན སམྨསིཏཛ྄ཛྷཱནཾ ཝཱ ཝིནཱ ཨཛ྄ཛྷཱསཡམཏྟེནེཝ ཏཾ ན ཨིཛ྄ཛྷཏི. ཨེཏྠཱཔི ཙ ཝིཔསྶནཱནིཡམོ ཝུཏྟནཡེནེཝ ཝེདིཏབྦོ.

ཨཡཾ ཝུཙྩཏི སམྨཱསམཱདྷཱིཏི ཡཱ ཨིམེསུ ཙཏཱུསུ ཛྷཱནེསུ ཨེཀགྒཏཱ, ཨཡཾ པུབྦབྷཱགེ ལོཀིཡོ, ཨཔརབྷཱགེ ལོཀུཏྟརོ སམྨཱསམཱདྷི ནཱམ ཝུཙྩཏི. ཨེཝཾ ལོཀིཡལོཀུཏྟརཝསེན དྷམྨསེནཱཔཏི ¶ མགྒསཙྩཾ དེསེཏི. ཏཏྠ ལོཀིཡམགྒེ སབྦཱནེཝ མགྒངྒཱནི ཡཐཱནུརཱུཔཾ ཚསུ ཨཱརམྨཎེསུ ཨཉྙཏརཱརམྨཎཱནི ཧོནྟི. ལོཀུཏྟརམགྒེ པན ཙཏུསཙྩཔྤཊིཝེདྷཱཡ པཝཏྟསྶ ཨརིཡསཱཝཀསྶ ནིབྦཱནཱརམྨཎཾ ཨཝིཛྫཱནུསཡསམུགྒྷཱཏཀཾ པཉྙཱཙཀྑུ སམྨཱདིཊྛི, ཏཐཱ སམྤནྣདིཊྛིསྶ ཏཾསམྤཡུཏྟོ ཏིཝིདྷམིཙྪཱསངྐཔྤསམུགྒྷཱཏཀོ ཙེཏསོ ནིབྦཱནཔདཱབྷིནིརོཔནོ སམྨཱསངྐཔྤོ, ཏཐཱ པསྶནྟསྶ ཝིཏཀྐེནྟསྶ ཙ ཏཾསམྤཡུཏྟཱཝ ཙཏུབྦིདྷཝཙཱིདུཙྩརིཏསམུགྒྷཱཏིཀཱ མིཙྪཱཝཱཙཱཡ ཝིརཏི སམྨཱཝཱཙཱ, ཏཐཱ ཝིརམནྟསྶ ཏཾསམྤཡུཏྟཱཝ ཏིཝིདྷམིཙྪཱཀམྨནྟསམུཙྪེདིཀཱ མིཙྪཱཀམྨནྟཱ ཝིརཏི ¶ སམྨཱཀམྨནྟོ, ཏེསཾཡེཝ ཙསྶ ཝཱཙཱཀམྨནྟཱནཾ ཝོདཱནབྷཱུཏཱ ཏཾསམྤཡུཏྟཱཝ ཀུཧནཱདིསམུཙྪེདིཀཱ མིཙྪཱཨཱཛཱིཝཱ ཝིརཏི སམྨཱཨཱཛཱིཝོ, ཏསྶཱཡེཝསྶ སམྨཱཝཱཙཱཀམྨནྟཱཛཱིཝསངྑཱཏཱཡ སཱིལབྷཱུམིཡཾ པཏིཊྛམཱནསྶ ཏདནུརཱུཔོ ཏཾསམྤཡུཏྟོཝ ཀོསཛྫསམུཙྪེདཀོ, ཨནུཔྤནྣུཔྤནྣཱནཾ ཨཀུསལཀུསལཱནཾ ¶ ཨནུཔྤཱདཔྤཧཱནུཔྤཱདཊྛིཏིསཱདྷཀོ ཙ ཝཱིརིཡཱརམྦྷོ སམྨཱཝཱཡཱམོ, ཨེཝཾ ཝཱཡམནྟསྶ ཏཾསམྤཡུཏྟོཝ མིཙྪཱསཏིཝིནིདྡྷུནཀོ, ཀཱཡཱདཱིསུ ཀཱཡཱནུཔསྶནཱདིསཱདྷཀོ ཙ ཙེཏསོ ཨསམྨོསོ སམྨཱསཏི. ཨེཝཾ ཨནུཏྟརཱཡ སཏིཡཱ སུཝིཧིཏཙིཏྟཱརཀྑསྶ ཏཾསམྤཡུཏྟཱཝ མིཙྪཱསམཱདྷིཝིདྡྷཾསིཀཱ ཙིཏྟེཀགྒཏཱ སམྨཱསམཱདྷི. ཨེས ལོཀུཏྟརོ ཨརིཡོ ཨཊྛངྒིཀོ མགྒོ.

ཡོ སཧ ལོཀིཡེན མགྒེན དུཀྑནིརོདྷགཱམིནིཔཊིཔདཱཏི སངྑྱཾ གཏོ, སོ ཁོ པནེས མགྒོ སམྨཱདིཊྛིསངྐཔྤཱནཾ ཝིཛྫཱཡ སེསདྷམྨཱནཾ ཙརཎེན སངྒཧིཏཏྟཱ ཝིཛྫཱ ཙེཝ ཙརཎཉྩ. ཏཐཱ ཏེསཾ དྭིནྣཾ ཝིཔསྶནཱཡཱནེན ཨིཏརེསཾ སམཐཡཱནེན སངྒཧིཏཏྟཱ སམཐོ ཙེཝ ཝིཔསྶནཱ ཙ. ཏེསཾ དྭིནྣཾ པཉྙཱཀྑནྡྷེན ཏདནནྟརཱནཾ ཏིཎྞཾ སཱིལཀྑནྡྷེན ཨཝསེསཱནཾ ཏིཎྞཾ སམཱདྷིཀྑནྡྷེན ཨདྷིཔཉྙཱཨདྷིསཱིལཨདྷིཙིཏྟསིཀྑཱཧི ཙ སངྒཧིཏཏྟཱ ཁནྡྷཏྟཡཉྩེཝ སིཀྑཏྟཡཉྩ ཧོཏི. ཡེན སམནྣཱགཏོ ཨརིཡསཱཝཀོ དསྶནསམཏྠེཧི ཙཀྑཱུཧི གམནསམཏྠེཧི ཙ པཱདེཧི སམནྣཱགཏོ ཨདྡྷིཀོ ཝིཡ ཝིཛྫཱཙརཎསམྤནྣོ ཧུཏྭཱ ཝིཔསྶནཱཡཱནེན ཀཱམསུཁལླིཀཱནུཡོགཾ སམཐཡཱནེན ཨཏྟཀིལམཐཱནུཡོགནྟི ཨནྟདྭཡཾ པརིཝཛྫེཏྭཱ མཛ྄ཛྷིམཔཊིཔདཾ པཊིཔནྣོ པཉྙཱཀྑནྡྷེན མོཧཀྑནྡྷཾ, སཱིལཀྑནྡྷེན དོསཀྑནྡྷཾ, སམཱདྷིཀྑནྡྷེན ཙ ལོབྷཀྑནྡྷཾ པདཱལེནྟོ ཨདྷིཔཉྙཱསིཀྑཱཡ པཉྙཱསམྤདཾ, ཨདྷིསཱིལསིཀྑཱཡ སཱིལསམྤདཾ, ཨདྷིཙིཏྟསིཀྑཱཡ སམཱདྷིསམྤདནྟི ཏིསྶོ སམྤཏྟིཡོ པཏྭཱ ཨམཏཾ ནིབྦཱནཾ སཙྪིཀརོཏི. ཨཱདིམཛ྄ཛྷཔརིཡོསཱནཀལྱཱཎཾ སཏྟཏིཾསབོདྷིཔཀྑིཡདྷམྨརཏནཝིཙིཏྟཾ སམྨཏྟནིཡཱམསངྑཱཏཾ ཨརིཡབྷཱུམིཾ ཨོཀྐནྟོ ཧོཏཱིཏི.

མགྒསཙྩནིདྡེསཝཎྞནཱ ནིཊྛིཏཱ.

སཙྩཔཀིཎྞཀཝཎྞནཱ

ཙཏཱུསུ ¶ ¶ ¶ པན སཙྩེསུ བཱདྷནལཀྑཎཾ དུཀྑསཙྩཾ, པབྷཝལཀྑཎཾ སམུདཡསཙྩཾ, སནྟིལཀྑཎཾ ནིརོདྷསཙྩཾ, ནིཡྻཱནལཀྑཎཾ མགྒསཙྩཾ, ཨཔིཙ པཝཏྟིཔཝཏྟཀནིཝཏྟིནིཝཏྟཀལཀྑཎཱནི པཊིཔཱཊིཡཱ. ཏཐཱ སངྑཏཏཎྷཱཨསངྑཏདསྶནལཀྑཎཱནི ཙ.

ཀསྨཱ པན ཙཏྟཱརེཝ ཨརིཡསཙྩཱནི ཝུཏྟཱནི ཨནཱུནཱནི ཨནདྷིཀཱནཱིཏི ཙེ? ཨཉྙསྶ ཨསམྦྷཝཏོ ཨཉྙཏརསྶ ཙ ཨནཔནེཡྻབྷཱཝཏོ. ན ཧི ཨེཏེཧི ཨཉྙཾ ཨདྷིཀཾ ཝཱ, ཨེཏེསཾ ཝཱ ཨེཀམྤི ཨཔནེཏབྦཾ སམྦྷོཏི. ཡཐཱཧ –

‘‘ཨིདྷ, བྷིཀྑཝེ, ཨཱགཙྪེཡྻ སམཎོ ཝཱ བྲཱཧྨཎོ ཝཱ ‘ནེཏཾ དུཀྑཾ ཨརིཡསཙྩཾ, ཨཉྙཾ དུཀྑཾ ཨརིཡསཙྩཾ. ཡཾ སམཎེན གོཏམེན དེསིཏཾ, ཨཧམེཏཾ དུཀྑཾ ཨརིཡསཙྩཾ ཋཔེཏྭཱ ཨཉྙཾ དུཀྑཾ ཨརིཡསཙྩཾ པཉྙཔེསྶཱམཱི’ཏི ནེཏཾ ཋཱནཾ ཝིཛྫཏཱི’’ཏིཨཱདི.

ཡཐཱ ཙཱཧ –

‘‘ཡོ ཧི ཀོཙི, བྷིཀྑཝེ, སམཎོ ཝཱ བྲཱཧྨཎོ ཝཱ ཨེཝཾ ཝདེཡྻ ‘ནེཏཾ དུཀྑཾ པཋམཾ ཨརིཡསཙྩཾ, ཡཾ སམཎེན གོཏམེན དེསིཏཾ, ཨཧམེཏཾ དུཀྑཾ པཋམཾ ཨརིཡསཙྩཾ པཙྩཀྑཱཡ ཨཉྙཾ དུཀྑཾ པཋམཾ ཨརིཡསཙྩཾ པཉྙཔེསྶཱམཱི’ཏི ནེཏཾ ཋཱནཾ ཝིཛྫཏཱི’’ཏིཨཱདི (སཾ. ནི. ༥.༡༠༨༦).

ཨཔིཙ པཝཏྟིམཱཙིཀྑནྟོ བྷགཝཱ སཧེཏུཀཾ ཨཱཙིཀྑི, ནིཝཏྟིཉྩ སཨུཔཱཡཾ. ཨིཏི པཝཏྟིནིཝཏྟིཏདུབྷཡཧེཏཱུནཾ ཨེཏཔྤརམཏོ ཙཏྟཱརེཝ ཝུཏྟཱནི. ཏཐཱ པརིཉྙེཡྻཔཧཱཏབྦསཙྪིཀཱཏབྦབྷཱཝེཏབྦཱནཾ, ཏཎྷཱཝཏྠུཏཎྷཱཏཎྷཱནིརོདྷཏཎྷཱནིརོདྷཱུཔཱཡཱནཾ, ཨཱལཡཨཱལཡརཱམཏཱཨཱལཡསམུགྒྷཱཏཨཱལཡསམུགྒྷཱཏཱུཔཱཡཱནཉྩ ཝསེནཱཔི ཙཏྟཱརེཝ ཝུཏྟཱནཱིཏི.

ཨེཏྠ ཙ ཨོལཱ༹རིཀཏྟཱ སབྦསཏྟསཱདྷཱརཎཏྟཱ ཙ སུཝིཉྙེཡྻནྟི དུཀྑསཙྩཾ པཋམཾ ཝུཏྟཾ. ཏསྶེཝ ཧེཏུདསྶནཏྠཾ ཏདནནྟརཾ སམུདཡསཙྩཾ, ཧེཏུནིརོདྷཱ ¶ ཕལནིརོདྷོཏི ¶ ཉཱཔནཏྠཾ ཏཏོ ནིརོདྷསཙྩཾ, ཏདདྷིགམཱུཔཱཡདསྶནཏྠཾ ཨནྟེ མགྒསཙྩཾ. བྷཝསུཁསྶཱདགདྷིཏཱནཾ ཝཱ སཏྟཱནཾ སཾཝེགཛནནཏྠཾ ¶ པཋམཾ དུཀྑམཱཧ. ཏཾ ནེཝ ཨཀཏཾ ཨཱགཙྪཏི, ན ཨིསྶརནིམྨཱནཱདིཏོ ཧོཏི, ཨིཏོ པན ཧོཏཱིཏི ཉཱཔནཏྠཾ ཏདནནྟརཾ སམུདཡཾ. ཏཏོ སཧེཏུཀེན དུཀྑེན ཨབྷིབྷཱུཏཏྟཱ སཾཝིགྒམཱནསཱནཾ དུཀྑནིསྶརཎགཝེསཱིནཾ ནིསྶརཎདསྶནེན ཨསྶཱསཛནནཏྠཾ ནིརོདྷཾ. ཏཏོ ནིརོདྷཱདྷིགམནཏྠཾ ནིརོདྷསམྤཱཔཀཾ མགྒནྟི ཨཡམེཏེསཾ ཀམོ.

ཨེཏེསུ པན བྷཱརོ ཝིཡ དུཀྑསཙྩཾ དཊྛབྦཾ, བྷཱརཱདཱནམིཝ སམུདཡསཙྩཾ, བྷཱརནིཀྑེཔནམིཝ ནིརོདྷསཙྩཾ, བྷཱརནིཀྑེཔནཱུཔཱཡོ ཝིཡ མགྒསཙྩཾ. རོགོ ཝིཡ ཝཱ དུཀྑསཙྩཾ, རོགནིདཱནམིཝ སམུདཡསཙྩཾ, རོགཝཱུཔསམོ ཝིཡ ནིརོདྷསཙྩཾ, བྷེསཛྫམིཝ མགྒསཙྩཾ. དུབྦྷིཀྑམིཝ ཝཱ དུཀྑསཙྩཾ, དུབྦུཊྛི ཝིཡ སམུདཡསཙྩཾ, སུབྷིཀྑམིཝ ནིརོདྷསཙྩཾ, སུཝུཊྛི ཝིཡ མགྒསཙྩཾ. ཨཔིཙ ཝེརཱིཝེརམཱུལཝེརསམུགྒྷཱཏཝེརསམུགྒྷཱཏཱུཔཱཡེཧི, ཝིསརུཀྑརུཀྑམཱུལམཱུལཱུཔཙྪེདཏདུཔཙྪེདཱུཔཱཡེཧི, བྷཡབྷཡམཱུལནིབྦྷཡཏདདྷིགམཱུཔཱཡེཧི, ཨོརིམཏཱིརམཧོགྷཔཱརིམཏཱིརཏཾསམྤཱཔཀཝཱཡཱམེཧི ཙ ཡོཛེཏྭཱཔེཏཱནི ཨུཔམཱཏོ ཝེདིཏབྦཱནཱིཏི.

སབྦཱནེཝ པནེཏཱནི སཙྩཱནི པརམཏྠེན ཝེདཀཀཱརཀནིབྦུཏགམཀཱབྷཱཝཏོ སུཉྙཱནཱིཏི ཝེདིཏབྦཱནི. ཏེནེཏཾ ཝུཙྩཏི –

‘‘དུཀྑམེཝ ཧི ན ཀོཙི དུཀྑིཏོ, ཀཱརཀོ ན ཀིརིཡཱཝ ཝིཛྫཏི;

ཨཏྠི ནིབྦུཏི ན ནིབྦུཏོ པུམཱ, མགྒམཏྠི གམཀོ ན ཝིཛྫཏཱི’’ཏི.

ཨཐ ཝཱ –

དྷུཝསུབྷསུཁཏྟསུཉྙཾ, པུརིམདྭཡམཏྟསུཉྙམམཏཔདཾ;

དྷུཝསུཁཨཏྟཝིརཧིཏོ, མགྒོ ཨིཏི སུཉྙཏཱ ཏེསུ.

ནིརོདྷསུཉྙཱནི ¶ ཝཱ ཏཱིཎི, ནིརོདྷོ ཙ སེསཏྟཡསུཉྙོ. ཕལསུཉྙོ ཝཱ ཨེཏྠ ཧེཏུ སམུདཡེ དུཀྑསྶ ཨབྷཱཝཏོ, མགྒེ ཙ ནིརོདྷསྶ, ན ཕལེན སགབྦྷོ པཀཏིཝཱདཱིནཾ པཀཏི ཝིཡ. ཧེཏུསུཉྙཉྩ ཕལཾ དུཀྑསམུདཡཱནཾ ནིརོདྷམགྒཱནཉྩ ཨསམཝཱཡཱ, ན ཧེཏུསམཝེཏཾ ཧེཏུཕལཾ སམཝཱཡཝཱདཱིནཾ དྭིཨཎུཀཱདི ཝིཡ. ཏེནེཏཾ ཝུཙྩཏི –

‘‘ཏཡམིདྷ ¶ ¶ ནིརོདྷསུཉྙཾ, ཏཡེན ཏེནཱཔི ནིབྦུཏཱི སུཉྙཱ;

སུཉྙོ ཕལེན ཧེཏུ, ཕལམྤི ཏཾཧེཏུནཱ སུཉྙ’’ནྟི.

སབྦཱནེཝ སཙྩཱནི ཨཉྙམཉྙསབྷཱགཱནི ཨཝིཏཐཏོ ཨཏྟསུཉྙཏོ དུཀྐརཔཊིཝེདྷཏོ ཙ. ཡཐཱཧ –

‘‘ཏཾ ཀིཾ མཉྙསི, ཨཱནནྡ, ཀཏམཾ ནུ ཁོ དུཀྐརཏརཾ ཝཱ དུརབྷིསམྦྷཝཏརཾ ཝཱ, ཡོ དཱུརཏོཝ སུཁུམེན ཏཱལ༹ཙྪིགྒལེ༹ན ཨསནཾ ཨཏིཔཱཏེཡྻ པོངྑཱནུཔོངྑཾ ཨཝིརཱདྷིཏཾ, ཡོ ཝཱ སཏྟདྷཱ བྷིནྣསྶ ཝཱལསྶ ཀོཊིཡཱ ཀོཊིཾ པཊིཝིཛ྄ཛྷེཡྻཱཏི? ཨེཏདེཝ, བྷནྟེ, དུཀྐརཏརཉྩེཝ དུརབྷིསམྦྷཝཏརཉྩ; ཡོ ཝཱ སཏྟདྷཱ བྷིནྣསྶ ཝཱལསྶ ཀོཊིཡཱ ཀོཊིཾ པཊིཝིཛ྄ཛྷེཡྻཱཏི; ཨཐ ཁོ ཏེ, ཨཱནནྡ, དུཔྤཊིཝིཛ྄ཛྷཏརཾ པཊིཝིཛ྄ཛྷནྟི, ཡེ ‘ཨིདཾ དུཀྑ’ནྟི ཡཐཱབྷཱུཏཾ པཊིཝིཛ྄ཛྷནྟི…པེ… ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡཐཱབྷཱུཏཾ པཊིཝིཛ྄ཛྷནྟཱི’’ཏི (སཾ. ནི. ༥.༡༡༡༥);

ཝིསབྷཱགཱནི སལཀྑཎཝཝཏྠཱནཏོ. པུརིམཱནི ཙ དྭེ སབྷཱགཱནི དུརཝགཱཧཏྠེན གམྦྷཱིརཏྟཱ ལོཀིཡཏྟཱ སཱསཝཏྟཱ ཙ, ཝིསབྷཱགཱནི ཕལཧེཏུབྷེདཏོ པརིཉྙེཡྻཔཧཱཏབྦཏོ ཙ. པཙྪིམཱནིཔི དྭེ སབྷཱགཱནི གམྦྷཱིརཏྟེན དུརཝགཱཧཏྟཱ ལོཀུཏྟརཏྟཱ ཨནཱསཝཏྟཱ ཙ, ཝིསབྷཱགཱནི ཝིསཡཝིསཡཱིབྷེདཏོ སཙྪིཀཱཏབྦབྷཱཝེཏབྦཏོ ཙ. པཋམཏཏིཡཱནི ཙཱཔི སབྷཱགཱནི ཕལཱཔདེསཏོ, ཝིསབྷཱགཱནི སངྑཏཱསངྑཏཏོ ¶ . དུཏིཡཙཏུཏྠཱནི ཙཱཔི སབྷཱགཱནི ཧེཏུཨཔདེསཏོ, ཝིསབྷཱགཱནི ཨེཀནྟཀུསལཱཀུསལཏོ. པཋམཙཏུཏྠཱནི ཙཱཔི སབྷཱགཱནི སངྑཏཏོ, ཝིསབྷཱགཱནི ལོཀིཡལོཀུཏྟརཏོ. དུཏིཡཏཏིཡཱནི ཙཱཔི སབྷཱགཱནི ནེཝསེཀྑནཱསེཀྑབྷཱཝཏོ, ཝིསབྷཱགཱནི སཱརམྨཎཱནཱརམྨཎཏོ.

‘‘ཨིཏི ཨེཝཾ པཀཱརེཧི, ནཡེཧི ཙ ཝིཙཀྑཎོ;

ཝིཛཉྙཱ ཨརིཡསཙྩཱནཾ, སབྷཱགཝིསབྷཱགཏ’’ནྟི.

སབྦམེཝ ¶ ཙེཏྠ དུཀྑཾ ཨེཀཝིདྷཾ པཝཏྟིབྷཱཝཏོ, དུཝིདྷཾ ནཱམརཱུཔཏོ, ཏིཝིདྷཾ ཀཱམརཱུཔཱརཱུཔཱུཔཔཏྟིབྷཝབྷེདཏོ, ཙཏུབྦིདྷཾ ཙཏུཨཱཧཱརབྷེདཏོ, པཉྩཝིདྷཾ ¶ པཉྩུཔཱདཱནཀྑནྡྷབྷེདཏོ. སམུདཡོཔི ཨེཀཝིདྷོ པཝཏྟཀབྷཱཝཏོ, དུཝིདྷོ དིཊྛིསམྤཡུཏྟཱསམྤཡུཏྟཏོ, ཏིཝིདྷོ ཀཱམབྷཝཝིབྷཝཏཎྷཱབྷེདཏོ, ཙཏུབྦིདྷོ ཙཏུམགྒཔྤཧེཡྻཏོ, པཉྩཝིདྷོ རཱུཔཱབྷིནནྡནཱདིབྷེདཏོ, ཚབྦིདྷོ ཚཏཎྷཱཀཱཡབྷེདཏོ. ནིརོདྷོཔི ཨེཀཝིདྷོ ཨསངྑཏདྷཱཏུབྷཱཝཏོ, པརིཡཱཡཏོ པན དུཝིདྷོ སཨུཔཱདིསེསཨནུཔཱདིསེསཏོ, ཏིཝིདྷོ བྷཝཏྟཡཝཱུཔསམཏོ, ཙཏུབྦིདྷོ ཙཏུམགྒཱདྷིགམནཱིཡཏོ, པཉྩཝིདྷོ པཉྩཱབྷིནནྡནཝཱུཔསམཏོ, ཚབྦིདྷོ ཚཏཎྷཱཀཱཡཀྑཡབྷེདཏོ. མགྒོཔི ཨེཀཝིདྷོ བྷཱཝེཏབྦཏོ, དུཝིདྷོ སམཐཝིཔསྶནཱབྷེདཏོ, དསྶནབྷཱཝནཱབྷེདཏོ ཝཱ, ཏིཝིདྷོ ཁནྡྷཏྟཡབྷེདཏོ. ཨཡཉྷི སཔྤདེསཏྟཱ ནགརཾ ཝིཡ རཛྫེན ནིཔྤདེསེཧི ཏཱིཧི ཁནྡྷེཧི སངྒཧིཏོ. ཡཐཱཧ –

‘‘ན ཁོ, ཨཱཝུསོ ཝིསཱཁ, ཨརིཡེན ཨཊྛངྒིཀེན མགྒེན ཏཡོ ཁནྡྷཱ སངྒཧིཏཱ, ཏཱིཧི ཙ ཁོ, ཨཱཝུསོ ཝིསཱཁ, ཁནྡྷེཧི ཨརིཡོ ཨཊྛངྒིཀོ མགྒོ སངྒཧིཏོ. ཡཱ, ཙཱཝུསོ ཝིསཱཁ, སམྨཱཝཱཙཱ ཡོ ཙ སམྨཱཀམྨནྟོ ཡོ ཙ སམྨཱཨཱཛཱིཝོ, ཨིམེ དྷམྨཱ སཱིལཀྑནྡྷེ སངྒཧིཏཱ. ཡོ ཙ སམྨཱཝཱཡཱམོ ཡཱ ཙ སམྨཱསཏི ཡོ ཙ སམྨཱསམཱདྷི, ཨིམེ དྷམྨཱ སམཱདྷིཀྑནྡྷེ སངྒཧིཏཱ. ཡཱ ཙ སམྨཱདིཊྛི ཡོ ཙ སམྨཱསངྐཔྤོ, ཨིམེ དྷམྨཱ པཉྙཱཀྑནྡྷེ སངྒཧིཏཱ’’ཏི (མ. ནི. ༡.༤༦༢).

ཙཏུབྦིདྷོ སོཏཱཔཏྟིམགྒཱདིཝསེན.

ཨཔིཙ སབྦཱནེཝ སཙྩཱནི ཨེཀཝིདྷཱནི ཨཝིཏཐཏྟཱ, ཨབྷིཉྙེཡྻཏྟཱ ཝཱ. དུཝིདྷཱནི ལོཀིཡལོཀུཏྟརཏོ, སངྑཏཱསངྑཏཏོ ¶ ཝཱ. ཏིཝིདྷཱནི དསྶནབྷཱཝནཱཧི པཧཱཏབྦཏོ ཨཔྤཧཱཏབྦཏོ ནེཝཔཧཱཏབྦནཱཔཧཱཏབྦཏོ ཙ. ཙཏུབྦིདྷཱནི པརིཉྙེཡྻཔཧཱཏབྦསཙྪིཀཱཏབྦབྷཱཝེཏབྦཏོཏི.

‘‘ཨེཝཾ ཨརིཡསཙྩཱནཾ, དུབྦོདྷཱནཾ བུདྷོ ཝིདྷིཾ;

ཨནེཀབྷེདཏོ ཛཉྙཱ, ཧིཏཱཡ ཙ སུཁཱཡ ཙཱ’’ཏི.

སཙྩཔཀིཎྞཀཝཎྞནཱ ནིཊྛིཏཱ.

ཨིདཱནི ¶ ¶ དྷམྨསེནཱཔཏི བྷགཝཏཱ དེསིཏཀྐམེནེཝ ཨནྟེ སཙྩཙཏུཀྐཾ ནིདྡིསིཏྭཱ ‘‘ཏཾ ཉཱཏཊྛེན ¶ ཉཱཎ’’ནྟིཨཱདིནཱ སཙྩཙཏུཀྐཝསེན སུཏམཡེ ཉཱཎཾ ནིགམེཏྭཱ དསྶེཏི. ཨེཝཾ ‘‘སོཏཱཝདྷཱནེ པཉྙཱ སུཏམཡེ ཉཱཎ’’ནྟི པུབྦེ ཝུཏྟཾ སབྦཾ ནིགམེཏྭཱ དསྶེཏཱིཏི.

སདྡྷམྨཔྤཀཱསིནིཡཱ པཊིསམྦྷིདཱམགྒཊྛཀཐཱཡ

སུཏམཡཉཱཎནིདྡེསཝཎྞནཱ ནིཊྛིཏཱ.

༢. སཱིལམཡཉཱཎནིདྡེསཝཎྞནཱ

༣༧. སཱིལམཡཉཱཎནིདྡེསེ ¶ པཉྩཱཏི གཎནཔརིཙྪེདོ. སཱིལཱནཱིཏི པརིཙྪིནྣདྷམྨནིདསྶནཾ. པརིཡནྟཔཱརིསུདྡྷིསཱིལནྟིཨཱདི པཉྩནྣཾ སརཱུཔཏོ དསྶནཾ. པརིཡནྟཔཱརིསུདྡྷཱིཏིཨཱདཱིསུ ཡཐཱ ནཱིལཝཎྞཡོགཏོ ཝཏྠམྤི ནཱིལམསྶ ཨཏྠཱིཏི ནཱིལནྟི ཝུཙྩཏི, ཨེཝཾ གཎནཝསེན པརིཡནྟོ པརིཙྪེདོ ཨསྶཱ ཨཏྠཱིཏི པརིཡནྟཱ, ཨུཔསམྤནྣསཱིལེ པཏྟོ ཨནུཔསམྤནྣསཱིལསྶ ཨཝསཱནསབྦྷཱཝཏོ ཝཱ པརིཡནྟོ ཨཝསཱནཾ ཨསྶཱ ཨཏྠཱིཏི པརིཡནྟཱ. སཔརིཡནྟཱཏི ཝཱ ཝཏྟབྦེ སཀཱརལོཔོ ཀཏོཏི ཝེདིཏབྦོ ‘‘དཀཾ དཀཱསཡཱ པཝིསནྟཱི’’ཏི (སཾ. ནི. ༣.༧༨; ཨ. ནི. ༤.༣༣) ཨེཏྠ ཨུཀཱརལོཔོ ཝིཡ. པརིསུདྡྷབྷཱཝོ པཱརིསུདྡྷི, པརིཡནྟཱ ཙ སཱ པཱརིསུདྡྷི ཙཱཏི པརིཡནྟཔཱརིསུདྡྷི, པརིཡནྟཔཱརིསུདྡྷིསངྑཱཏཾ སཱིལཾ པརིཡནྟཔཱརིསུདྡྷིསཱིལཾ. ཝུཏྟཔཊིཔཀྑེན ན པརིཡནྟཱཏི ཨཔརིཡནྟཱ, ནཏྠི ཨེཏིསྶཱ པརིཡནྟོཏིཔི ཨཔརིཡནྟཱ, ཝུདྡྷོ ཨེཏིསྶཱ པརིཡནྟོཏིཔི ཨཔརིཡནྟཱ. སམཱདཱནཏོ པབྷུཏི ཨཁཎྜིཏཏྟཱ ཁཎྜིཏཱཔི ཀཏཔཊིཀམྨཏྟཱ ཙིཏྟུཔྤཱདམཏྟཀེནཱཔི མལེན ཝིརཧིཏཏྟཱ ཙ པརིསུདྡྷཛཱཏིམཎི ཝིཡ སུདྷནྟསུཔརིཀམྨཀཏསུཝཎྞཾ ཝིཡ ཙ པརིསུདྡྷཏྟཱ ཨརིཡམགྒསྶ པདཊྛཱནབྷཱུཏཱ ཨནཱུནཊྛེན པརིཔཱུཎྞཱ. དིཊྛིཡཱ པཧཱིནཏྟཱ དིཊྛིཔརཱམཱསེན ཨགྒཧིཏཏྟཱ ཨཔརཱམཊྛཱ.ཨཡཾ ཏེ སཱིལེ དོསོཏི ཀེནཙི ཙོདཀེན པརཱམསིཏུཾ ཨསཀྐུཎེཡྻཏྟཱ ཝཱ ཨཔརཱམཊྛཱ. ཨརཧཏྟཕལཀྑཎེ སབྦདརཐཔཊིཔྤསྶདྡྷིཡཱ པཊིཔྤསྶདྡྷི. ཨནུཔསམྤནྣཱནནྟི ཨནཝསེསསམཱདཱནཝསེན སཱིལསམྤདཱཡ བྷུསཾ སམྤནྣཱཏི ཨུཔསམྤནྣཱ, ན ཨུཔསམྤནྣཱ ཨནུཔསམྤནྣཱ. ཏེསཾ ཨནུཔསམྤནྣཱནཾ.

པརིཡནྟསིཀྑཱཔདཱནནྟི ¶ ཨེཏྠ སིཀྑིཏབྦཊྛེན སིཀྑཱ, ཀོཊྛཱསཊྛེན པདཱནི, སིཀྑིཏབྦཀོཊྛཱསཱནཱིཏི ཨཏྠོ. ཨཔིཙ སཱིལེ པཏིཊྛིཏེན ཨུཔརིཔཏྟབྦཏྟཱ སབྦེ ཀུསལཱ དྷམྨཱ ¶ སིཀྑཱ, སཱིལཱནི ཏཱསཾ སིཀྑཱནཾ པཏིཊྛཊྛེན པདཱནཱིཏི སིཀྑཱནཾ པདཏྟཱ སིཀྑཱཔདཱནི ¶ , པརིཡནྟཱནི སིཀྑཱཔདཱནི ཨེཏེསནྟི པརིཡནྟསིཀྑཱཔདཱ. ཏེསཾ པརིཡནྟསིཀྑཱཔདཱནཾ. ཨེཏྠ ཙ དྭེ པརིཡནྟཱ སིཀྑཱཔདཔརིཡནྟོ ཙ ཀཱལཔརིཡནྟོ ཙ. ཀཏམོ སིཀྑཱཔདཔརིཡནྟོ? ཨུཔཱསཀོཔཱསིཀཱནཾ ཡཐཱསམཱདཱནཝསེན ཨེཀཾ ཝཱ དྭེ ཝཱ ཏཱིཎི ཝཱ ཙཏྟཱརི ཝཱ པཉྩ ཝཱ ཨཊྛ ཝཱ དས ཝཱ སིཀྑཱཔདཱནི ཧོནྟི, སིཀྑམཱནསཱམཎེརསཱམཎེརཱིནཾ དས སིཀྑཱཔདཱནི. ཨཡཾ སིཀྑཱཔདཔརིཡནྟོ. ཀཏམོ ཀཱལཔརིཡནྟོ? ཨུཔཱསཀོཔཱསིཀཱ དཱནཾ དདམཱནཱ པརིཝེསནཔརིཡནྟཾ སཱིལཾ སམཱདིཡནྟི, ཝིཧཱརགཏཱ ཝིཧཱརཔརིཡནྟཾ སཱིལཾ སམཱདིཡནྟི, ཨེཀཾ ཝཱ དྭེ ཝཱ ཏཡོ ཝཱ བྷིཡྻོ ཝཱ རཏྟིནྡིཝཱནི པརིཙྪེདཾ ཀཏྭཱ སཱིལཾ སམཱདིཡནྟི. ཨཡཾ ཀཱལཔརིཡནྟོ. ཨིམེསུ དྭཱིསུ པརིཡནྟེསུ སིཀྑཱཔདཾ པརིཡནྟཾ ཀཏྭཱ སམཱདིནྣཾ སཱིལཾ ཝཱིཏིཀྐམནེན ཝཱ མརཎེན ཝཱ པཊིཔྤསྶམྦྷཏི, ཀཱལཾ པརིཡནྟཾ ཀཏྭཱ སམཱདིནྣཾ ཏཾཏཾཀཱལཱཏིཀྐམེན པཊིཔྤསྶམྦྷཏི.

ཨཔརིཡནྟསིཀྑཱཔདཱནནྟི –

‘‘ནཝ ཀོཊིསཧསྶཱནི, ཨསཱིཏི སཏཀོཊིཡོ;

པཉྙཱས སཏསཧསྶཱནི, ཚཏྟིཾས ཙ པུནཱཔརེ.

‘‘ཨེཏེ སཾཝརཝིནཡཱ, སམྦུདྡྷེན པཀཱསིཏཱ;

པེཡྻཱལམུཁེན ནིདྡིཊྛཱ, སིཀྑཱ ཝིནཡསཾཝརེ’’ཏི. –

ཨེཝཾ གཎནཝསེན པརིཡནྟཱནམྤི སིཀྑཱཔདཱནཾ ཨནཝསེསསམཱདཱནབྷཱཝཝསེན ལཱབྷཡསཉཱཏིཨངྒཛཱིཝིཏཧེཏུ ཨདིཊྛཔརིཡནྟབྷཱཝཝསེན ཨུཔརི རཀྑིཏབྦསཱིལཔརིཙྪེདཱབྷཱཝཝསེན ཙ ནཏྠི ཨེཏེསཾ པརིཡནྟོཏི ཨཔརིཡནྟཱནི. ཨཔརིཡནྟཱནི སིཀྑཱཔདཱནི ཨེཏེསནྟི ཨཔརིཡནྟསིཀྑཱཔདཱ. ཏེསཾ ཨཔརིཡནྟསིཀྑཱཔདཱནཾ, ཝུདྡྷཔརིཡནྟསིཀྑཱཔདཱནནྟི ཝཱ ཨཏྠོ.

པུཐུཛྫནཀལྱཱཎཀཱནནྟིཨཱདཱིསུ ¶ –

‘‘པུཐཱུནཾ ཛནནཱདཱིཧི, ཀཱརཎེཧི པུཐུཛྫནོ;

པུཐུཛྫནནྟོགདྷཏྟཱ, པུཐུཝཱཡཾ ཛནོ ཨིཏི’’. –

ཝུཏྟཔུཐུཛྫནལཀྑཎཱནཏིཀྐམེཔི –

‘‘དུཝེ ¶ ¶ པུཐུཛྫནཱ ཝུཏྟཱ, བུདྡྷེནཱདིཙྩབནྡྷུནཱ;

ཨནྡྷོ པུཐུཛྫནོ ཨེཀོ, ཀལྱཱཎེཀོ པུཐུཛྫནོ’’ཏི. –

ཝུཏྟཔུཐུཛྫནདྭཡེ ཀལྱཱཎདྷམྨསམཱགམེན ཨནྡྷཔུཐུཛྫནབྷཱཝཾ ཨཏིཀྐམྨ ཀལྱཱཎཔུཐུཛྫནབྷཱཝེ ཋིཏཱནཾ པུཐུཛྫནཀལྱཱཎཀཱནཾ ཀལྱཱཎཔུཐུཛྫནཱནནྟི ཝུཏྟཾ ཧོཏི. པུཐུཛྫནེསུ ཝཱ ཀལྱཱཎཀཱནཾ པུཐུཛྫནཀལྱཱཎཀཱནཾ.

ཀུསལདྷམྨེ ཡུཏྟཱནནྟི ཨེཏྠ ཀུསལསདྡོ ཏཱཝ ཨཱརོགྱཱནཝཛྫཚེཀསུཁཝིཔཱཀེསུ དིསྶཏི. ཨཡཉྷི ‘‘ཀཙྩི ནུ བྷོཏོ ཀུསལཾ, ཀཙྩི བྷོཏོ ཨནཱམཡ’’ནྟིཨཱདཱིསུ (ཛཱ. ༡.༡༥.༡༤༦; ༢.༢༠.༡༢༩) ཨཱརོགྱེ དིསྶཏི. ‘‘ཀཏམོ པན, བྷནྟེ, ཀཱཡསམཱཙཱརོ ཀུསལོ? ཡོ ཁོ, མཧཱརཱཛ, ཀཱཡསམཱཙཱརོ ཨནཝཛྫོ’’ཏི (མ. ནི. ༢.༣༦༡) ཙ ‘‘པུན ཙཔརཾ, བྷནྟེ, ཨེཏདཱནུཏྟརིཡཾ ཡཐཱ བྷགཝཱ དྷམྨཾ དེསེཏི ཀུསལེསུ དྷམྨེསཱུ’’ཏི ཙ (དཱི. ནི. ༣.༡༤༥) ཨེཝམཱདཱིསུ ཨནཝཛྫེ. ‘‘ཀུསལོ ཏྭཾ རཐསྶ ཨངྒཔཙྩངྒཱནཾ (མ. ནི. ༢.༨༧), ཀུསལཱ ནཙྩགཱིཏསྶ སིཀྑིཏཱ ཙཱཏུརིཏྠིཡོ’’ཏིཨཱདཱིསུ (ཛཱ. ༢.༢༢.༩༤) ཚེཀེ. ‘‘ཀུསལཱནཾ, བྷིཀྑཝེ, དྷམྨཱནཾ སམཱདཱནཧེཏུ (དཱི. ནི. ༣.༨༠). ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ’’ཏིཨཱདཱིསུ (དྷ. ས. ༤༣༡) སུཁཝིཔཱཀེ. སྭཱཡམིདྷ ཨཱརོགྱེཔི ཨནཝཛྫེཔི སུཁཝིཔཱཀེཔི ཝཊྚཏི.

ཝཙནཏྠོ པནེཏྠ ཀུཙྪིཏེ པཱཔཀེ དྷམྨེ སལཡནྟི ཙལཡནྟི ཀམྤེནྟི ཝིདྡྷཾསེནྟཱིཏི ཀུསལཱ. ཀུཙྪིཏེན ཝཱ ཨཱཀཱརེན སཡནྟི པཝཏྟནྟཱིཏི ཀུསཱ, ཏེ ཀུསེ ལུནནྟི ཚིནྡནྟཱིཏི ཀུསལཱ. ཀུཙྪིཏཱནཾ ཝཱ སཱནཏོ ཏནུཀརཎཏོ ཀུསཾ ཉཱཎཾ. ཏེན ཀུསེན ལཱཏབྦཱ གཧེཏབྦཱ ¶ པཝཏྟེཏབྦཱཏི ཀུསལཱ, ཡཐཱ ཝཱ ཀུསཱ ཨུབྷཡབྷཱགགཏཾ ཧཏྠཔྤདེསཾ ལུནནྟི, ཨེཝམིམེཔི ཨུཔྤནྣཱནུཔྤནྣབྷཱཝེན ཨུབྷཡབྷཱགགཏཾ སཾཀིལེསཔཀྑཾ ལུནནྟི, ཏསྨཱ ཀུསཱ ཝིཡ ལུནནྟཱིཏི ཀུསལཱ. ཨཔིཙ ཨཱརོགྱཊྛེན ཨནཝཛྫཊྛེན ཀོསལླསམྦྷཱུཏཊྛེན ཝཱ ཀུསལཱ. ཨིདྷ པན ཡསྨཱ ཝིཔསྶནཱཀུསལམེཝ ཨདྷིཔྤེཏཾ, ཏསྨཱ སེསེ ཝིཧཱཡ ཏསྶེཝ དསྶནཏྠཾ ‘‘ཀུསལདྷམྨེ’’ཏི ཨེཀཝཙནཾ ཀཏནྟི ཝེདིཏབྦཾ. ཝིཔསྶནཱཀུསལདྷམྨེ སཱཏཙྩཀིརིཡཏཱཡ སཀྐཙྩཀཱརིཏཱཡ ཙ ཡུཏྟཱནནྟི ཨཏྠོ.

སེཀྑཔརིཡནྟེ པརིཔཱུརཀཱརཱིནནྟི ཨེཏྠ ཏཱིསུ སིཀྑཱསུ ཛཱཏཱཏིཔི སེཀྑཱ, སཏྟནྣཾ སེཀྑཱནཾ ཨེཏེཏིཔི སེཀྑཱ, སཡམེཝ སིཀྑནྟཱིཏིཔི སེཀྑཱ ¶ . སོཏཱཔཏྟིམགྒཕལསཀདཱགཱམིམགྒཕལཨནཱགཱམིམགྒཕལཨརཧཏྟམགྒདྷམྨཱ ¶ . ཏེ སེཀྑཱ དྷམྨཱ པརིཡནྟེ ཨཝསཱནེ ཨེཏསྶ, ཏེ ཝཱ སེཀྑཱ དྷམྨཱ པརིཡནྟོ པརིཙྪེདོ ཨེཏསྶཱཏི སེཀྑཔརིཡནྟོ. ཏསྨིཾ སེཀྑཔརིཡནྟེ དྷམྨེཏི སམྦནྡྷོ. པརིཔཱུརཾ པརིཔུཎྞཏཾ ཀརོནྟཱིཏི པརིཔཱུརཀཱརིནོ, པརིཔཱུརཀཱརོ པརིཔཱུརཀིརིཡཱ ཨེཏེསཾ ཨཏྠཱིཏི ཝཱ པརིཔཱུརཀཱརིནོ. ཏེསཾ སོཏཱཔཏྟིམགྒསྶ པུབྦབྷཱགབྷཱུཏེ སེཀྑཔརིཡནྟེ པཊིཔདཱདྷམྨེ ཝིཔསྶནཱཔཱརིཔཱུརིཡཱ པརིཔཱུརཀཱརཱིནཾ. ཀཱཡེ ཙ ཛཱིཝིཏེ ཙ ཨནཔེཀྑཱནནྟི ཨེཏྠ ཀཱཡེཏི སརཱིརེ. སརཱིརཉྷི ཨསུཙིསཉྩཡཏོ ཀུཙྪིཏཱནཉྩ ཀེསཱདཱིནཾ ཙཀྑུརོགཱདཱིནཉྩ རོགསཏཱནཾ ཨཱཡབྷཱུཏཏྟཱ ཀཱཡོཏི ཝུཙྩཏི. ཛཱིཝིཏེཏི ཛཱིཝིཏིནྡྲིཡེ. ཏཉྷི ཛཱིཝནྟི ཏེནཱཏི ཛཱིཝིཏནྟི ཝུཙྩཏི. ནཏྠི ཨེཏེསཾ ཨཔེཀྑཱཏི ཨནཔེཀྑཱ, ནིསྶིནེཧཱཏི ཨཏྠོ. ཏེསཾ ཏསྨིཾ ཀཱཡེ ཙ ཛཱིཝིཏེ ཙ ཨནཔེཀྑཱནཾ.

ཨིདཱནི ཏེསཾ ཏེསུ ཨནཔེཀྑཏྟསྶ ཀཱརཎཾ དསྶེནྟོ པརིཙྩཏྟཛཱིཝིཏཱནནྟི ཨཱཧ. བྷགཝཏོ ཨཱཙརིཡསྶ ཝཱ སཀཛཱིཝིཏཔརིཙྩཱགེནེཝ ཧི ཏེ ཀིལམམཱནེཔི ཀཱཡེ ཝིནསྶམཱནེཔི ཛཱིཝིཏེ ཨནཔེཀྑཱ ཧོནྟཱིཏི. སཏྟནྣཾ སེཀྑཱནནྟི སིཀྑནྟཱིཏི སེཀྑཱཏི ལདྡྷནཱམཱནཾ སོཏཱཔཏྟིམགྒཊྛཱདཱིནཾ སཏྟནྣཾ ཨརིཡཔུགྒལཱནཾ. ཏཐཱགཏསཱཝཀཱནནྟི ཏཐཱགཏསྶ སཱཝཀཱནཾ. ཨཊྛཔི ཧི ཨརིཡཔུགྒལཱ སཝནནྟེ ཨརིཡཱཡ ཛཱཏིཡཱ ཛཱཏཏྟཱ བྷགཝཏོ དེསནཾ ཨནུསིཊྛིཾ ཨཝེཙྩཔྤསཱདཡོགེན སཀྐཙྩཾ སུཎནྟཱིཏི སཱཝཀཱ. ཏེསུཔི ཨརཧཏྟཕལཊྛེཡེཝ ཝིསེསེཏྭཱ ¶ དསྶེནྟོ ཁཱིཎཱསཝཱནནྟི ཨཱཧ, ཨརཧཏྟམགྒཉཱཎེན པརིཀྑཱིཎསབྦཱསཝཱནནྟི ཨཏྠོ. པཙྩེཀབུདྡྷཱནནྟི ཏཾ ཏཾ ཀཱརཎཾ པཊིཙྩ ཨེཀོཝ ཨནཱཙརིཡཀོ ཙཏུསཙྩཾ བུཛ྄ཛྷིཏཝཱཏི པཙྩེཀབུདྡྷོ. ཏཱདིསཱནཾ པཙྩེཀབུདྡྷཱནཾ.

ཏཐཱགཏཱནནྟི ཨེཏྠ ཨཊྛཧི ཀཱརཎེཧི བྷགཝཱ ཏཐཱགཏོ – ཏཐཱ ཨཱགཏོཏི ཏཐཱགཏོ, ཏཐཱ གཏོཏི ཏཐཱགཏོ, ཏཐལཀྑཎཾ ཨཱགཏོཏི ཏཐཱགཏོ, ཏཐདྷམྨེ ཡཱཐཱཝཏོ ཨབྷིསམྦུདྡྷོཏི ཏཐཱགཏོ, ཏཐདསྶིཏཱཡ ཏཐཱགཏོ, ཏཐཝཱདིཏཱཡ ཏཐཱགཏོ, ཏཐཱ ཀཱརིཏཱཡ ཏཐཱགཏོ, ཨབྷིབྷཝནཊྛེན ཏཐཱགཏོ.

ཀཐཾ ¶ བྷགཝཱ ཏཐཱ ཨཱགཏོཏི ཏཐཱགཏོ? ཡཐཱ སབྦལོཀཧིཏཱཡ ཨུསྶུཀྐམཱཔནྣཱ པུརིམཀཱ སམྨཱསམྦུདྡྷཱ ཨཱགཏཱ. ཀིཾ ཝུཏྟཾ ཧོཏི? ཡེནཱབྷིནཱིཧཱརེན པུརིམཀཱ བྷགཝནྟོ ཨཱགཏཱ, ཏེནེཝ ཨམྷཱཀམྤི བྷགཝཱ ཨཱགཏོ. ཨཐ ཝཱ ཡཐཱ པུརིམཀཱ བྷགཝནྟོ དཱནསཱིལནེཀྑམྨཔཉྙཱཝཱིརིཡཁནྟིསཙྩཱདྷིཊྛཱནམེཏྟུཔེཀྑཱསངྑཱཏཱ དས པཱརམིཡོ, དས ཨུཔཔཱརམིཡོ, དས པརམཏྠཔཱརམིཡོཏི སམཏིཾས པཱརམིཡོ པཱུརེཏྭཱ ཨངྒཔརིཙྩཱགཾ ནཡནདྷནརཛྫཔུཏྟདཱརཔརིཙྩཱགནྟི ¶ ཨིམེ པཉྩ མཧཱཔརིཙྩཱགེ པརིཙྩཛིཏྭཱ, པུབྦཡོགཔུབྦཙརིཡདྷམྨཀྑཱནཉཱཏཏྠཙརིཡཱདཡོ པཱུརེཏྭཱ བུདྡྷིཙརིཡཱཡ ཀོཊིཾ པཏྭཱ ཨཱགཏཱ, ཏཐཱ ཨམྷཱཀམྤི བྷགཝཱ ཨཱགཏོ. ཡཐཱ ཙ པུརིམཀཱ བྷགཝནྟོ ཙཏྟཱརོ སཏིཔཊྛཱནེ ཙཏྟཱརོ སམྨཔྤདྷཱནེ ཙཏྟཱརོ ཨིདྡྷིཔཱདེ པཉྩིནྡྲིཡཱནི པཉྩ བལཱནི སཏྟ བོཛ྄ཛྷངྒེ ཨརིཡཾ ཨཊྛངྒིཀཾ མགྒཾ བྷཱཝེཏྭཱ བྲཱུཧེཏྭཱ ཨཱགཏཱ, ཏཐཱ ཨམྷཱཀམྤི བྷགཝཱ ཨཱགཏོཏི ཏཐཱགཏོ.

‘‘ཡཐེཝ དཱིཔངྐརབུདྡྷཨཱདཡོ, སབྦཉྙུབྷཱཝཾ མུནཡོ ཨིདྷཱགཏཱ;

ཏཐཱ ཨཡཾ སཀྱམུནཱིཔི ཨཱགཏོ, ཏཐཱགཏོ ཝུཙྩཏི ཏེན ཙཀྑུམཱ’’ཏི.

ཀཐཾ ཏཐཱ གཏོཏི ཏཐཱགཏོ? ཡཐཱ སམྤཏིཛཱཏཱ པུརིམཀཱ བྷགཝནྟོ གཏཱ. ཀཐཉྩ ཏེ གཏཱ? ཏེ ཧི སམྤཏིཛཱཏཱ སམེཧི པཱདེཧི པཐཝིཡཾ པཏིཊྛཱཡ ཨུཏྟརེནམུཁཱ སཏྟཔདཝཱིཏིཧཱརེན གཏཱ. ཡཐཱཧ ‘‘སམྤཏིཛཱཏོ, ཨཱནནྡ, བོདྷིསཏྟོ སམེཧི པཱདེཧི པཐཝིཡཾ པཏིཊྛཧིཏྭཱ ¶ ཨུཏྟརཱབྷིམུཁོ སཏྟཔདཝཱིཏིཧཱརེན གཙྪཏི སེཏམྷི ཚཏྟེ ཨནུདྷཱརཡམཱནེ, སབྦཱ ཙ དིསཱ ཨནུཝིལོཀེཏི, ཨཱསབྷིཉྩ ཝཱཙཾ བྷཱསཏི ‘ཨགྒོཧམསྨི ལོཀསྶ, ཛེཊྛོཧམསྨི ལོཀསྶ, སེཊྛོཧམསྨི ལོཀསྶ, ཨཡམནྟིམཱ ཛཱཏི, ནཏྠི དཱནི པུནབྦྷཝོ’’’ཏི (མ. ནི. ༣.༢༠༧; དཱི. ནི. ༢.༣༡). ཏཉྩསྶ གམནཾ ཏཐཾ ཨཧོསི ཨཝིཏཐཾ ཨནེཀེསཾ ཝིསེསཱདྷིགམཱནཾ པུབྦནིམིཏྟབྷཱཝེན. ཡཉྷི སོ སམྤཏིཛཱཏོ སམེཧི པཱདེཧི པཏིཊྛཧི, ཨིདམསྶ ཙཏུརིདྡྷིཔཱདཔཊིལཱབྷསྶ པུབྦནིམིཏྟཾ, ཨུཏྟརམུཁབྷཱཝོ པནསྶ སབྦལོཀུཏྟརབྷཱཝསྶ པུབྦནིམིཏྟཾ, སཏྟཔདཝཱིཏིཧཱརོ སཏྟབོཛ྄ཛྷངྒརཏནཔཊིལཱབྷསྶ པུབྦནིམིཏྟཾ, ‘‘སུཝཎྞདཎྜཱ ཝཱིཏིཔཏནྟི ཙཱམརཱ’’ཏི (སུ. ནི. ༦༩༣) ཨེཏྠ ¶ ཝུཏྟཙཱམརུཀྑེཔོ པན སབྦཏིཏྠིཡནིམྨཐནསྶ པུབྦནིམིཏྟཾ, སེཏཙྪཏྟདྷཱརཎཾ ཨརཧཏྟཕལཝིམུཏྟིཝརཝིམལསེཏཙྪཏྟཔཊིལཱབྷསྶ པུབྦནིམིཏྟཾ, སབྦཱདིསཱནུཝིལོཀནཾ སབྦཉྙུཏཱནཱཝརཎཉཱཎཔཊིལཱབྷསྶ པུབྦནིམིཏྟཾ, ཨཱསབྷིཝཱཙཱབྷཱསནཾ པན ཨཔྤཊིཝཏྟིཡཝརདྷམྨཙཀྐཔྤཝཏྟནསྶ པུབྦནིམིཏྟཾ. ཏཐཱཡཾ བྷགཝཱཔི གཏོ. ཏཉྩསྶ གམནཾ ཏཐཾ ཨཧོསི ཨཝིཏཐཾ ཏེསཾཡེཝ ཝིསེསཱདྷིགམཱནཾ པུབྦནིམིཏྟབྷཱཝེན. ཏེནཱཧུ པོརཱཎཱ –

‘‘མུཧུཏྟཛཱཏོཝ གཝཾཔཏཱི ཡཐཱ, སམེཧི པཱདེཧི ཕུསཱི ཝསུནྡྷརཾ;

སོ ཝིཀྐམཱི སཏྟ པདཱནི གོཏམོ, སེཏཉྩ ཚཏྟཾ ཨནུདྷཱརཡུཾ མརཱུ.

‘‘གནྟྭཱན ¶ སོ སཏྟ པདཱནི གོཏམོ, དིསཱ ཝིལོཀེསི སམཱ སམནྟཏོ;

ཨཊྛངྒུཔེཏཾ གིརམབྦྷུདཱིརཡི, སཱིཧོ ཡཐཱ པབྦཏམུདྡྷནིཊྛིཏོ’’ཏི.

ཨེཝཾ ཏཐཱ གཏོཏི ཏཐཱགཏོ.

ཨཐ ཝཱ ཡཐཱ པུརིམཀཱ བྷགཝནྟོ, ཨཡམྤི བྷགཝཱ ཏཐེཝ ནེཀྑམྨེན ཀཱམཙྪནྡཾ…པེ… པཋམཛ྄ཛྷཱནེན ནཱིཝརཎེ…པེ… ཨནིཙྩཱནུཔསྶནཱཡ ནིཙྩསཉྙཾ…པེ… ཨརཧཏྟམགྒེན སབྦཀིལེསེ པཧཱཡ གཏོ. ཨེཝམྤི ཏཐཱ གཏོཏི ཏཐཱགཏོ.

ཀཐཾ ¶ ཏཐལཀྑཎཾ ཨཱགཏོཏི ཏཐཱགཏོ? པཐཝཱིདྷཱཏུཡཱ ཀཀྑལ༹ཏྟལཀྑཎཾ ཏཐཾ ཨཝིཏཐཾ, ཨཱཔོདྷཱཏུཡཱ པགྒྷརཎལཀྑཎཾ, ཏེཛོདྷཱཏུཡཱ ཨུཎྷཏྟལཀྑཎཾ, ཝཱཡོདྷཱཏུཡཱ ཝིཏྠམྦྷནལཀྑཎཾ, ཨཱཀཱསདྷཱཏུཡཱ ཨསམྥུཊྛལཀྑཎཾ, ཝིཉྙཱཎདྷཱཏུཡཱ ཝིཛཱནནལཀྑཎཾ.

རཱུཔསྶ རུཔྤནལཀྑཎཾ, ཝེདནཱཡ ཝེདཡིཏལཀྑཎཾ, སཉྙཱཡ སཉྫཱནནལཀྑཎཾ, སངྑཱརཱནཾ ཨབྷིསངྑརཎལཀྑཎཾ, ཝིཉྙཱཎསྶ ཝིཛཱནནལཀྑཎཾ.

ཝིཏཀྐསྶ ཨབྷིནིརོཔནལཀྑཎཾ, ཝིཙཱརསྶ ཨནུམཛྫནལཀྑཎཾ, པཱིཏིཡཱ ཕརཎལཀྑཎཾ, སུཁསྶ སཱཏལཀྑཎཾ, ཙིཏྟེཀགྒཏཱཡ ཨཝིཀྑེཔལཀྑཎཾ, ཕསྶསྶ ཕུསནལཀྑཎཾ.

སདྡྷིནྡྲིཡསྶ ¶ ཨདྷིམོཀྑལཀྑཎཾ, ཝཱིརིཡིནྡྲིཡསྶ པགྒཧལཀྑཎཾ, སཏིནྡྲིཡསྶ ཨུཔཊྛཱནལཀྑཎཾ, སམཱདྷིནྡྲིཡསྶ ཨཝིཀྑེཔལཀྑཎཾ, པཉྙིནྡྲིཡསྶ པཛཱནནལཀྑཎཾ.

སདྡྷཱབལསྶ ཨསྶདྡྷིཡེ ཨཀམྤིཡལཀྑཎཾ, ཝཱིརིཡབལསྶ ཀོསཛྫེ, སཏིབལསྶ མུཊྛསྶཙྩེ, སམཱདྷིབལསྶ ཨུདྡྷཙྩེ, པཉྙཱབལསྶ ཨཝིཛྫཱཡ ཨཀམྤིཡལཀྑཎཾ.

སཏིསམྦོཛ྄ཛྷངྒསྶ ཨུཔཊྛཱནལཀྑཎཾ, དྷམྨཝིཙཡསམྦོཛ྄ཛྷངྒསྶ པཝིཙཡལཀྑཎཾ, ཝཱིརིཡསམྦོཛ྄ཛྷངྒསྶ པགྒཧལཀྑཎཾ, པཱིཏིསམྦོཛ྄ཛྷངྒསྶ ཕརཎལཀྑཎཾ, པསྶདྡྷིསམྦོཛ྄ཛྷངྒསྶ ཨུཔསམལཀྑཎཾ, སམཱདྷིསམྦོཛ྄ཛྷངྒསྶ ཨཝིཀྑེཔལཀྑཎཾ, ཨུཔེཀྑཱསམྦོཛ྄ཛྷངྒསྶ པཊིསངྑཱནལཀྑཎཾ.

སམྨཱདིཊྛིཡཱ ¶ དསྶནལཀྑཎཾ, སམྨཱསངྐཔྤསྶ ཨབྷིནིརོཔནལཀྑཎཾ, སམྨཱཝཱཙཱཡ པརིགྒཧལཀྑཎཾ, སམྨཱཀམྨནྟསྶ སམུཊྛཱནལཀྑཎཾ, སམྨཱཨཱཛཱིཝསྶ ཝོདཱནལཀྑཎཾ, སམྨཱཝཱཡཱམསྶ པགྒཧལཀྑཎཾ, སམྨཱསཏིཡཱ ཨུཔཊྛཱནལཀྑཎཾ, སམྨཱསམཱདྷིསྶ ཨཝིཀྑེཔལཀྑཎཾ.

ཨཝིཛྫཱཡ ཨཉྙཱཎལཀྑཎཾ, སངྑཱརཱནཾ ཙེཏནཱལཀྑཎཾ, ཝིཉྙཱཎསྶ ཝིཛཱནནལཀྑཎཾ, ནཱམསྶ ནམནལཀྑཎཾ, རཱུཔསྶ རུཔྤནལཀྑཎཾ, སལཱ༹ཡཏནསྶ ཨཱཡཏནལཀྑཎཾ, ཕསྶསྶ ཕུསནལཀྑཎཾ, ཝེདནཱཡ ཝེདཡིཏལཀྑཎཾ, ཏཎྷཱཡ ཧེཏུལཀྑཎཾ, ཨུཔཱདཱནསྶ ¶ གཧཎལཀྑཎཾ, བྷཝསྶ ཨཱཡཱུཧནལཀྑཎཾ, ཛཱཏིཡཱ ནིབྦཏྟིལཀྑཎཾ, ཛརཱཡ ཛཱིརཎལཀྑཎཾ, མརཎསྶ ཙུཏིལཀྑཎཾ.

དྷཱཏཱུནཾ སུཉྙཏཱལཀྑཎཾ, ཨཱཡཏནཱནཾ ཨཱཡཏནལཀྑཎཾ, སཏིཔཊྛཱནཱནཾ ཨུཔཊྛཱནལཀྑཎཾ, སམྨཔྤདྷཱནཱནཾ པདཧནལཀྑཎཾ, ཨིདྡྷིཔཱདཱནཾ ཨིཛ྄ཛྷནལཀྑཎཾ, ཨིནྡྲིཡཱནཾ ཨདྷིཔཏིལཀྑཎཾ, བལཱནཾ ཨཀམྤིཡལཀྑཎཾ, བོཛ྄ཛྷངྒཱནཾ ནིཡྻཱནལཀྑཎཾ, མགྒསྶ ཧེཏུལཀྑཎཾ.

སཙྩཱནཾ ཏཐལཀྑཎཾ, སམཐསྶ ཨཝིཀྑེཔལཀྑཎཾ, ཝིཔསྶནཱཡ ཨནུཔསྶནཱལཀྑཎཾ, སམཐཝིཔསྶནཱནཾ ཨེཀརསལཀྑཎཾ, ཡུགནདྡྷཱནཾ ཨནཏིཝཏྟནལཀྑཎཾ.

སཱིལཝིསུདྡྷིཡཱ སཾཝརལཀྑཎཾ, ཙིཏྟཝིསུདྡྷིཡཱ ཨཝིཀྑེཔལཀྑཎཾ, དིཊྛིཝིསུདྡྷིཡཱ དསྶནལཀྑཎཾ.

ཁཡེ ¶ ཉཱཎསྶ སམུཙྪེདལཀྑཎཾ, ཨནུཔྤཱདེ ཉཱཎསྶ པསྶདྡྷིལཀྑཎཾ.

ཚནྡསྶ མཱུལལཀྑཎཾ, མནསིཀཱརསྶ སམུཊྛཱནལཀྑཎཾ, ཕསྶསྶ སམོདྷཱནལཀྑཎཾ, ཝེདནཱཡ སམོསརཎལཀྑཎཾ, སམཱདྷིསྶ པམུཁལཀྑཎཾ, སཏིཡཱ ཨཱདྷིཔཏེཡྻལཀྑཎཾ, པཉྙཱཡ ཏཏུཏྟརིལཀྑཎཾ, ཝིམུཏྟིཡཱ སཱརལཀྑཎཾ, ཨམཏོགདྷསྶ ནིབྦཱནསྶ པརིཡོསཱནལཀྑཎཾ ཏཐཾ ཨཝིཏཐཾ. ཨེཏཾ ཏཐལཀྑཎཾ ཉཱཎགཏིཡཱ ཨཱགཏོ ཨཝིརཛ྄ཛྷིཏྭཱ པཏྟོ ཨནུཔྤཏྟོཏི ཏཐཱགཏོ. ཨེཝཾ ཏཐལཀྑཎཾ ཨཱགཏོཏི ཏཐཱགཏོ.

ཀཐཾ ¶ ཏཐདྷམྨེ ཡཱཐཱཝཏོ ཨབྷིསམྦུདྡྷོཏི ཏཐཱགཏོ? ཏཐདྷམྨཱ ནཱམ ཙཏྟཱརི ཨརིཡསཙྩཱནི. ཡཐཱཧ – ‘‘ཙཏྟཱརིམཱནི, བྷིཀྑཝེ, ཏཐཱནི ཨཝིཏཐཱནི ཨནཉྙཐཱནི. ཀཏམཱནི ཙཏྟཱརི? ‘ཨིདཾ དུཀྑ’ནྟི, བྷིཀྑཝེ, ཏཐམེཏཾ ཨཝིཏཐམེཏཾ ཨནཉྙཐམེཏ’’ནྟི (སཾ. ནི. ༥.༡༠༩༠) ཝིཏྠཱརོ. ཏཱནི ཙ བྷགཝཱ ཨབྷིསམྦུདྡྷོཏི ཏཐཱནཾ ཨབྷིསམྦུདྡྷཏྟཱ ཏཐཱགཏོཏི ཝུཙྩཏི. ཨབྷིསམྦོདྷཏྠོ ཧི ཨེཏྠ གཏསདྡོ.

ཨཔིཙ ཛརཱམརཎསྶ ཛཱཏིཔཙྩཡསམྦྷཱུཏསམུདཱགཏཊྛོ ཏཐོ ཨཝིཏཐོ ཨནཉྙཐོ…པེ… སངྑཱརཱནཾ ཨཝིཛྫཱཔཙྩཡསམྦྷཱུཏསམུདཱགཏཊྛོ ཏཐོ ཨཝིཏཐོ ཨནཉྙཐོ. ཏཐཱ ཨཝིཛྫཱཡ སངྑཱརཱནཾ པཙྩཡཊྛོ ཏཐོ ཨཝིཏཐོ ཨནཉྙཐོ…པེ… ཛཱཏིཡཱ ཛརཱམརཎསྶ ¶ པཙྩཡཊྛོ ཏཐོ ཨཝིཏཐོ ཨནཉྙཐོ. ཏཾ སབྦཾ བྷགཝཱ ཨབྷིསམྦུདྡྷོ. ཏསྨཱཔི ཏཐཱནཾ ཨབྷིསམྦུདྡྷཏྟཱ ཏཐཱགཏོ. ཨེཝཾ ཏཐདྷམྨེ ཡཱཐཱཝཏོ ཨབྷིསམྦུདྡྷོཏི ཏཐཱགཏོ.

ཀཐཾ ཏཐདསྶིཏཱཡ ཏཐཱགཏོ? བྷགཝཱ ཡཾ སདེཝཀེ ལོཀེ…པེ… སདེཝམནུསྶཱཡ ཨཔརིམཱཎཱསུ ལོཀདྷཱཏཱུསུ ཨཔརིམཱཎཱནཾ སཏྟཱནཾ ཙཀྑུདྭཱརེ ཨཱཔཱཐཾ ཨཱགཙྪནྟཾ རཱུཔཱརམྨཎཾ ནཱམ ཨཏྠི, ཏཾ སབྦཱཀཱརེན ཛཱནཱཏི པསྶཏི. ཨེཝཾ ཛཱནཏཱ པསྶཏཱ ཙ ཏེན ཏཾ ཨིཊྛཱནིཊྛཱདིཝསེན ཝཱ དིཊྛསུཏམུཏཝིཉྙཱཏེསུ ལབྦྷམཱནཀཔདཝསེན ཝཱ ‘‘ཀཏམཾ ཏཾ རཱུཔཾ རཱུཔཱཡཏནཾ? ཡཾ རཱུཔཾ ཙཏུནྣཾ མཧཱབྷཱུཏཱནཾ ཨུཔཱདཱཡ ཝཎྞནིབྷཱ སནིདསྶནཾ སཔྤཊིགྷཾ ནཱིལཾ པཱིཏཀ’’ནྟིཨཱདིནཱ (དྷ. ས. ༦༡༦) ནཡེན ཨནེཀེཧི ནཱམེཧི ཏེརསཧི ཝཱརེཧི དྭིཔཉྙཱསཱཡ ནཡེཧི ཝིབྷཛྫམཱནཾ ཏཐམེཝ ཧོཏི, ཝིཏཐཾ ནཏྠི ¶ . ཨེས ནཡོ སོཏདྭཱརཱདཱིསུཔི ཨཱཔཱཐམཱགཙྪནྟེསུ སདྡཱདཱིསུ. ཝུཏྟམྤི ཙེཏཾ བྷགཝཏཱ ‘‘ཡཾ, བྷིཀྑཝེ, སདེཝཀསྶ ལོཀསྶ…པེ… སདེཝམནུསྶཱཡ དིཊྛཾ སུཏཾ མུཏཾ ཝིཉྙཱཏཾ པཏྟཾ པརིཡེསིཏཾ ཨནུཝིཙརིཏཾ མནསཱ, ཏམཧཾ ཛཱནཱམི, ཏམཧཾ ཨབྦྷཉྙཱསིཾ, ཏཾ ཏཐཱགཏསྶ ཝིདིཏཾ, ཏཾ ཏཐཱགཏོ ན ཨུཔཊྛཱསཱི’’ཏི (ཨ. ནི. ༤.༢༤). ཨེཝཾ ཏཐདསྶིཏཱཡ ཏཐཱགཏོ. ཏཏྠ ཏཐདསྶཱིཨཏྠེ ཏཐཱགཏོཏི པདསམྦྷཝོ ཝེདིཏབྦོ.

ཀཐཾ ཏཐཝཱདིཏཱཡ ཏཐཱགཏོ? ཡཾ རཏྟིཾ བྷགཝཱ བོདྷིམཎྜེ ཨཔརཱཛིཏཔལླངྐེ ནིསིནྣོ ཙཏུནྣཾ མཱརཱནཾ མཏྠཀཾ མདྡིཏྭཱ ཨནུཏྟརཾ སམྨཱསམྦོདྷིཾ ཨབྷིསམྦུདྡྷོ, ཡཉྩ རཏྟིཾ ཡམཀསཱལཱནམནྟརེ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡི, ཨེཏྠནྟརེ པཉྩཙཏྟཱལཱིསཝསྶཔརིམཱཎེ ཀཱལེ པཋམབོདྷིཡཱཔི མཛ྄ཛྷིམབོདྷིཡཱཔི པཙྪིམབོདྷིཡཱཔི ཡཾ བྷགཝཏཱ བྷཱསིཏཾ སུཏྟཾ གེཡྻཾ…པེ… ཝེདལླཾ, ཏཾ སབྦཾ ཨཏྠཏོ ཙ བྱཉྫནཏོ ཙ ཨནཝཛྫཾ ཨནུཔཝཛྫཾ ¶ ཨནཱུནམནདྷིཀཾ སབྦཱཀཱརཔརིཔུཎྞཾ རཱགམདནིམྨདནཾ དོསམོཧམདནིམྨདནཾ, ནཏྠི ཏཏྠ ཝཱལགྒམཏྟམྤི པཀྑལིཏཾ, སབྦཾ ཏཾ ཨེཀམུདྡིཀཱཡ ལཉྪིཏཾ ཝིཡ, ཨེཀནཱལི༹ཀཱཡ ¶ མིཏཾ ཝིཡ, ཨེཀཏུལཱཡ ཏུལིཏཾ ཝིཡ, ཙ ཏཐམེཝ ཧོཏི. ཡཐཱཧ ‘‘ཡཉྩ, ཙུནྡ, རཏྟིཾ ཏཐཱགཏོ ཨནུཏྟརཾ སམྨཱསམྦོདྷིཾ ཨབྷིསམྦུཛ྄ཛྷཏི, ཡཉྩ རཏྟིཾ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡཏི, ཡཾ ཨེཏསྨིཾ ཨནྟརེ བྷཱསཏི ལཔཏི ནིདྡིསཏི, སབྦཾ ཏཾ ཏཐམེཝ ཧོཏི, ནོ ཨཉྙཐཱ. ཏསྨཱ ‘ཏཐཱགཏོ’ཏི ཝུཙྩཏཱི’’ཏི (དཱི. ནི. ༣.༡༨༨). གདཨཏྠོ ཧི ཨེཏྠ གཏསདྡོ. ཨེཝཾ ཏཐཝཱདིཏཱཡ ཏཐཱགཏོ.

ཨཔིཙ ཨཱགདནཾ ཨཱགདོ, ཝཙནནྟི ཨཏྠོ. ཏཐོ ཨཝིཔརཱིཏོ ཨཱགདོ ཨསྶཱཏི དཀཱརསྶ ཏཀཱརཾ ཀཏྭཱ ཏཐཱགཏོཏི ཨེཝམེཏསྨིཾ ཨཏྠེ པདསིདྡྷི ཝེདིཏབྦཱ.

ཀཐཾ ཏཐཱཀཱརིཏཱཡ ཏཐཱགཏོ? བྷགཝཏོ ཧི ཝཱཙཱཡ ཀཱཡོ ཨནུལོམེཏི, ཀཱཡསྶཱཔི ཝཱཙཱ, ཏསྨཱ ཡཐཱཝཱདཱི ཏཐཱཀཱརཱི ཡཐཱཀཱརཱི ཏཐཱཝཱདཱི ཙ ཧོཏི. ཨེཝཾབྷཱུཏསྶ ཙསྶ ཡཐཱ ཝཱཙཱ, ཀཱཡོཔི ཏཐཱ གཏོ པཝཏྟོཏི ཨཏྠོ. ཡཐཱ ཙ ཀཱཡོ, ཝཱཙཱཔི ཏཐཱ ¶ གཏཱ པཝཏྟཱཏི ཏཐཱགཏོ. ཏེནེཝཱཧ – ‘‘ཡཐཱཝཱདཱི, བྷིཀྑཝེ, ཏཐཱགཏོ ཏཐཱཀཱརཱི, ཡཐཱཀཱརཱི ཏཐཱཝཱདཱི. ཨིཏི ཡཐཱཝཱདཱི ཏཐཱཀཱརཱི, ཡཐཱཀཱརཱི ཏཐཱཝཱདཱི. ཏསྨཱ ‘ཏཐཱགཏོ’ཏི ཝུཙྩཏཱི’’ཏི. ཨེཝཾ ཏཐཱཀཱརིཏཱཡ ཏཐཱགཏོ.

ཀཐཾ ཨབྷིབྷཝནཊྛེན ཏཐཱགཏོ? ཨུཔརི བྷཝགྒཾ ཧེཊྛཱ ཨཝཱིཙིཾ པརིཡནྟཾ ཀཏྭཱ ཏིརིཡཾ ཨཔརིམཱཎཱསུ ལོཀདྷཱཏཱུསུ སབྦསཏྟེ ཨབྷིབྷཝཏི སཱིལེན སམཱདྷིནཱ པཉྙཱཡ ཝིམུཏྟིཡཱ ཝིམུཏྟིཉཱཎདསྶནེན, ན ཏསྶ ཏུལཱ ཝཱ པམཱཎཾ ཝཱ ཨཏྠི, ཨཏུལོ ཨཔྤམེཡྻོ ཨནུཏྟརོ རཱཛཱདྷིརཱཛཱ དེཝཱནཾ ཨཏིདེཝོ སཀྐཱནཾ ཨཏིསཀྐོ བྲཧྨཱནཾ ཨཏིབྲཧྨཱ. ཏེནཱཧ – ‘‘སདེཝཀེ, བྷིཀྑཝེ, ལོཀེ…པེ… སདེཝམནུསྶཱཡ ཏཐཱགཏོ ཨབྷིབྷཱུ ཨནབྷིབྷཱུཏོ ཨཉྙདཏྠུ དསོ ཝསཝཏྟཱི. ཏསྨཱ ‘ཏཐཱགཏོ’ཏི ཝུཙྩཏཱི’’ཏི (ཨ. ནི. ༤.༢༣).

ཏཏྠེཝཾ པདསིདྡྷི ཝེདིཏབྦཱ – ཨགདོ ཝིཡ ཨགདོ. ཀོ པནེས? དེསནཱཝིལཱསོ ཙེཝ པུཉྙུསྶཡོ ཙ. ཏེན ཧེས མཧཱནུབྷཱཝོ བྷིསཀྐོ དིབྦཱགདེན སཔྤེ ཝིཡ སབྦཔརཔྤཝཱདིནོ སདེཝཀཉྩ ལོཀཾ ཨབྷིབྷཝཏི. ཨིཏི སབྦལོཀཱབྷིབྷཝནེ ཏཐོ ཨཝིཔརཱིཏོ དེསནཱཝིལཱསམཡོ ཙེཝ པུཉྙམཡོ ཙ ཨགདོ ཨསྶཱཏི དཀཱརསྶ ཏཀཱརཾ ཀཏྭཱ ཏཐཱགཏོཏི ཝེདིཏབྦོ. ཨེཝཾ ཨབྷིབྷཝནཊྛེན ཏཐཱགཏོ.

ཨཔིཙ ¶ ཏཐཱཡ གཏོཏིཔི ཏཐཱགཏོ, ཏཐཾ གཏོཏིཔི ཏཐཱགཏོཏི. གཏོཏི ཨཝགཏོ ཨཏཱིཏོ པཏྟོ པཊིཔནྣོཏི ཨཏྠོ ¶ . ཏཏྠ སཀལཾ ལོཀཾ ཏཱིརཎཔརིཉྙཱཡ ཏཐཱཡ གཏོ ཨཝགཏོཏི ཏཐཱགཏོ, ལོཀསམུདཡཾ པཧཱནཔརིཉྙཱཡ ཏཐཱཡ གཏོ ཨཏཱིཏོཏི ཏཐཱགཏོ, ལོཀནིརོདྷཾ སཙྪིཀིརིཡཱཡ ཏཐཱཡ གཏོ པཏྟོཏི ཏཐཱགཏོ, ལོཀནིརོདྷགཱམིནིཔཊིཔདཾ ཏཐཾ གཏོ པཊིཔནྣོཏི ཏཐཱགཏོ. ཏེན ཡཾ ཝུཏྟཾ བྷགཝཏཱ – ‘‘ལོཀོ, བྷིཀྑཝེ, ཏཐཱགཏེན ཨབྷིསམྦུདྡྷོ, ལོཀསྨཱ ཏཐཱགཏོ ཝིསཾཡུཏྟོ. ལོཀསམུདཡོ, བྷིཀྑཝེ, ཏཐཱགཏེན ཨབྷིསམྦུདྡྷོ, ལོཀསམུདཡོ ཏཐཱགཏསྶ པཧཱིནོ. ལོཀནིརོདྷོ, བྷིཀྑཝེ ¶ , ཏཐཱགཏེན ཨབྷིསམྦུདྡྷོ ལོཀནིརོདྷོ ཏཐཱགཏསྶ སཙྪིཀཏོ. ལོཀནིརོདྷགཱམིནཱི པཊིཔདཱ, བྷིཀྑཝེ, ཏཐཱགཏེན ཨབྷིསམྦུདྡྷཱ, ལོཀནིརོདྷགཱམིནཱིཔཊིཔདཱ ཏཐཱགཏསྶ བྷཱཝིཏཱ. ཡཾ, བྷིཀྑཝེ, སདེཝཀསྶ ལོཀསྶ…པེ… ཨནུཝིཙརིཏཾ མནསཱ, སབྦཾ ཏཾ ཏཐཱགཏེན ཨབྷིསམྦུདྡྷཾ. ཏསྨཱ ‘ཏཐཱགཏོ’ཏི ཝུཙྩཏཱི’’ཏི (ཨ. ནི. ༤.༢༣). ཏསྶ ཨེཝམྤི ཨཏྠོ ཝེདིཏབྦོ. ཨིདམྤི ཙ ཏཐཱགཏསྶ ཏཐཱགཏབྷཱཝདཱིཔནེ མུཁམཏྟམེཝ. སབྦཱཀཱརེན པན ཏཐཱགཏོཝ ཏཐཱགཏསྶ ཏཐཱགཏབྷཱཝཾ ཝཎྞེཡྻ. ཡསྨཱ པན སབྦབུདྡྷཱ ཏཐཱགཏགུཎེནཱཔི སམསམཱ, ཏསྨཱ སབྦེསཾ ཝསེན ཏཐཱགཏཱནནྟི ཨཱཧ.

ཨརཧནྟཱནནྟི ཀིལེསེཧི ཨཱརཀཏྟཱ, ཨརཱིནཾ ཨརཱནཉྩ ཧཏཏྟཱ, པཙྩཡཱདཱིནཾ ཨརཧཏྟཱ, པཱཔཀརཎེ རཧཱབྷཱཝཱ ཏཐཱགཏོ ཨརཧཾ. ཨཱརཀཱ ཧི སོ སབྦཀིལེསེཧི སུཝིདཱུརཝིདཱུརེ ཋིཏོ མགྒེན སཝཱསནཱནཾ ཀིལེསཱནཾ པཧཱིནཏྟཱཏི ཨརཧཾ.

སོ ཏཏོ ཨཱརཀཱ ནཱམ, ཡསྶ ཡེནཱསམངྒིཏཱ;

ཨསམངྒཱི ཙ དོསེཧི, ནཱཐོ ཏེནཱརཧཾ མཏོ.

ཏེ ཙཱནེན ཀིལེསཱརཡོ མགྒེན ཧཏཱཏི ཨརཱིནཾ ཧཏཏྟཱཔི ཨརཧཾ.

ཡསྨཱ རཱགཱདིསངྑཱཏཱ, སབྦེཔི ཨརཡོ ཧཏཱ;

པཉྙཱསཏྠེན ནཱཐེན, ཏསྨཱཔི ཨརཧཾ མཏོ.

ཡཉྩེཏཾ ¶ ཨཝིཛྫཱབྷཝཏཎྷཱམཡནཱབྷིཔུཉྙཱདིཨབྷིསངྑཱརཱནཾ ཛརཱམརཎནེམི ཨཱསཝསམུདཡམཡེན ཨཀྑེན ཝིཛ྄ཛྷིཏྭཱ ¶ ཏིབྷཝརཐེ སམཱཡོཛིཏཾ ཨནཱདིཀཱལཔྤཝཏྟཾ སཾསཱརཙཀྐཾ, ཏསྶཱནེན བོདྷིམཎྜེ ཝཱིརིཡཔཱདེཧི སཱིལཔཐཝིཡཾ པཏིཊྛཱཡ སདྡྷཱཧཏྠེན ཀམྨཀྑཡཀརཾ ཉཱཎཕརསུཾ གཧེཏྭཱ སབྦེ ཨརཱ ཧཏཱཏི ཨརཱནཾ ཧཏཏྟཱཔི ཨརཧཾ.

ཨརཱ སཾསཱརཙཀྐསྶ, ཧཏཱ ཉཱཎཱསིནཱ ཡཏོ;

ལོཀནཱཐེན ཏེནེས, ཨརཧནྟི པཝུཙྩཏི.

ཨགྒདཀྑིཎེཡྻཏྟཱ ཙ ཙཱིཝརཱདིཔཙྩཡེ ཨརཧཏི པཱུཛཱཝིསེསཉྩ. ཏེནེཝ ཙ ཨུཔྤནྣེ ཏཐཱགཏེ ཡེ ཀེཙི མཧེསཀྑཱ དེཝམནུསྶཱ, ན ཏེ ¶ ཨཉྙཏྠ པཱུཛཾ ཀརོནྟི. ཏཐཱ ཧི བྲཧྨཱ སཧམྤཏི སིནེརུམཏྟེན རཏནདཱམེན ཏཐཱགཏཾ པཱུཛེསི, ཡཐཱབལཉྩ ཨཉྙེ དེཝཱ མནུསྶཱ ཙ བིམྦིསཱརཀོསལརཱཛཱདཡོ. པརིནིབྦུཏམྤི ཙ བྷགཝནྟཾ ཨུདྡིསྶ ཚནྣཝུཏིཀོཊིདྷནཾ ཝིསྶཛྫེཏྭཱ ཨསོཀམཧཱརཱཛཱ སཀལཛམྦུདཱིཔེ ཙཏུརཱསཱིཏི ཝིཧཱརསཧསྶཱནི པཏིཊྛཱཔེསི, ཀོ པན ཝཱདོ ཨཉྙེསཾ པཱུཛཱཝིསེསཱནནྟི པཙྩཡཱདཱིནཾ ཨརཧཏྟཱཔི ཨརཧཾ.

པཱུཛཱཝིསེསཾ སཧ པཙྩཡེཧི, ཡསྨཱ ཨཡཾ ཨརཧཏི ལོཀནཱཐོ;

ཨཏྠཱནུརཱུཔཾ ཨརཧནྟི ལོཀེ, ཏསྨཱ ཛིནོ ཨརཧཏི ནཱམམེཏཾ.

ཡཐཱ ཙ ལོཀེ ཡེ ཀེཙི པཎྜིཏམཱནིནོ བཱལཱ ཨསིལོཀབྷཡེན རཧོ པཱཔཾ ཀརོནྟི, ཨེཝམེས ན ཀདཱཙི ཀརོཏཱིཏི པཱཔཀརཎེ རཧཱབྷཱཝཏོཔི ཨརཧཾ.

ཡསྨཱ ནཏྠི རཧོ ནཱམ, པཱཔཀམྨེསུ ཏཱདིནོ;

རཧཱབྷཱཝེན ཏེནེས, ཨརཧཾ ཨིཏི ཝིསྶུཏོ.

ཨེཝཾ སབྦཐཱཔི –

ཨཱརཀཏྟཱ ཧཏཏྟཱ ཙ, ཀིལེསཱརཱིན སོ མུནི;

ཧཏསཾསཱརཙཀྐཱརོ, པཙྩཡཱདཱིན ཙཱརཧོ;

ན རཧོ ཀརོཏི པཱཔཱནི, ཨརཧཾ ཏེན ཝུཙྩཏཱིཏི.

ཡསྨཱ ¶ ¶ པན སབྦབུདྡྷཱ ཨརཧཏྟགུཎེནཱཔི སམསམཱ, ཏསྨཱ སབྦེསཾ ཝསེན ‘‘ཨརཧནྟཱན’’ནྟི ཨཱཧ.

སམྨཱསམྦུདྡྷཱནནྟི སམྨཱ སཱམཉྩ སབྦདྷམྨཱནཾ བུདྡྷཏྟཱ སམྨཱསམྦུདྡྷོ. ཏཐཱ ཧེས སབྦདྷམྨེ སམྨཱ སམྦུདྡྷོ, ཨབྷིཉྙེཡྻེ དྷམྨེ ཨབྷིཉྙེཡྻཏོ བུདྡྷོ, པརིཉྙེཡྻེ དྷམྨེ པརིཉྙེཡྻཏོ, པཧཱཏབྦེ དྷམྨེ པཧཱཏབྦཏོ, སཙྪིཀཱཏབྦེ དྷམྨེ སཙྪིཀཱཏབྦཏོ, བྷཱཝེཏབྦེ དྷམྨེ བྷཱཝེཏབྦཏོ. ཏེནེཝཱཧ –

‘‘ཨབྷིཉྙེཡྻཾ ཨབྷིཉྙཱཏཾ, བྷཱཝེཏབྦཉྩ བྷཱཝིཏཾ;

པཧཱཏབྦཾ པཧཱིནཾ མེ, ཏསྨཱ བུདྡྷོསྨི བྲཱཧྨཎཱ’’ཏི. (མ. ནི. ༢.༣༩༩; སུ. ནི. ༥༦༣);

ཨཐ ¶ ཝཱ ཙཀྑུ དུཀྑསཙྩཾ, ཏསྶ མཱུལཀཱརཎབྷཱཝེན སམུཊྛཱཔིཀཱ པུརིམཏཎྷཱ སམུདཡསཙྩཾ, ཨུབྷིནྣཾ ཨཔྤཝཏྟི ནིརོདྷསཙྩཾ, ནིརོདྷཔྤཛཱནནཱ པཊིཔདཱ མགྒསཙྩནྟི ཨེཝཾ ཨེཀེཀཔདུདྡྷཱརེནཱཔི སབྦདྷམྨེ སམྨཱ སཱམཉྩ བུདྡྷོ. ཨེས ནཡོ སོཏགྷཱནཛིཝ྄ཧཱཀཱཡམནེསུ. ཨེཏེནེཝ ནཡེན རཱུཔཱདཱིནི ཚ ཨཱཡཏནཱནི, ཙཀྑུཝིཉྙཱཎཱདཡོ ཚ ཝིཉྙཱཎཀཱཡཱ, ཙཀྑུསམྥསྶཱདཡོ ཚ ཕསྶཱ, ཙཀྑུསམྥསྶཛཱདཡོ ཚ ཝེདནཱ, རཱུཔསཉྙཱདཡོ ཚ སཉྙཱ, རཱུཔསཉྩེཏནཱདཡོ ཚ ཙེཏནཱ, རཱུཔཏཎྷཱདཡོ ཚ ཏཎྷཱཀཱཡཱ, རཱུཔཝིཏཀྐཱདཡོ ཚ ཝིཏཀྐཱ, རཱུཔཝིཙཱརཱདཡོ ཚ ཝིཙཱརཱ, རཱུཔཀྑནྡྷཱདཡོ པཉྩཀྑནྡྷཱ, དས ཀསིཎཱནི, དས ཨནུསྶཏིཡོ, ཨུདྡྷུམཱཏཀསཉྙཱདིཝསེན དས སཉྙཱ, ཀེསཱདཡོ དྭཏྟིཾསཱཀཱརཱ, དྭཱདསཱཡཏནཱནི, ཨཊྛཱརས དྷཱཏུཡོ, ཀཱམབྷཝཱདཡོ ནཝ བྷཝཱ, པཋམཱདཱིནི ཙཏྟཱརི ཛྷཱནཱནི, མེཏྟཱབྷཱཝནཱདཡོ ཙཏསྶོ ཨཔྤམཉྙཱ, ཙཏསྶོ ཨརཱུཔསམཱཔཏྟིཡོ, པཊིལོམཏོ ཛརཱམརཎཱདཱིནི, ཨནུལོམཏོ ཨཝིཛྫཱདཱིནི པཊིཙྩསམུཔྤཱདངྒཱནི ཙ ཡོཛེཏབྦཱནི. ཏཏྲཱཡཾ ཨེཀཔདཡོཛནཱ – ཛརཱམརཎཾ དུཀྑསཙྩཾ, ཛཱཏི སམུདཡསཙྩཾ, ཨུབྷིནྣཾ ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ པཊིཔདཱ མགྒསཙྩནྟི ཨེཝཾ ཨེཀེཀཔདུདྡྷཱརེན སབྦདྷམྨེ སམྨཱ སཱམཉྩ བུདྡྷོ ཨནུབུདྡྷོ པཊིཝིདྡྷོ. ཡཾ ཝཱ པན ཀིཉྩི ཨཏྠི ནེཡྻཾ ནཱམ, སབྦསྶ སམྨཱ སམྦུདྡྷཏྟཱ ཝིམོཀྑནྟིཀཉཱཎཝསེན སམྨཱསམྦུདྡྷོ. ཏསྶ པན ཝིབྷཱགོ ཨུཔརི ཨཱཝི བྷཝིསྶཏཱིཏི. ཡསྨཱ པན སབྦབུདྡྷཱ སམྨཱསམྦུདྡྷགུཎེནཱཔི སམསམཱ, ཏསྨཱ སབྦེསཾ ཝསེན ‘‘སམྨཱསམྦུདྡྷཱན’’ནྟི ཨཱཧ.

༣༨. ཨིདཱནི ¶ ¶ པརིཡནྟཔཱརིསུདྡྷིཨཔརིཡནྟཔཱརིསུདྡྷིསཱིལདྭཡེ ཨེཀེཀམེཝ སཱིལཾ པཉྩདྷཱ བྷིནྡིཏྭཱ དསྶེཏུཾ ཨཏྠི སཱིལཾ པརིཡནྟཾ, ཨཏྠི སཱིལཾ ཨཔརིཡནྟནྟིཨཱདིམཱཧ. ཨིཏརེསུ པན ཏཱིསུ སཱིལེསུ ཏཐཱཝིདྷོ བྷེདོ ནཏྠཱིཏི. ཏཏྠ ལཱབྷཔརིཡནྟནྟི ལཱབྷེན པརིཡནྟོ བྷེདོ ཨེཏསྶཱཏི ལཱབྷཔརིཡནྟཾ. ཨེཝཾ སེསཱནིཔི. ཡསོཏི པནེཏྠ པརིཝཱརོ. ཨིདྷཱཏི ཨིམསྨིཾ ལོཀེ. ཨེཀཙྩོཏི ཨེཀོ. ལཱབྷཧེཏཱུཏི ལཱབྷོཡེཝ ཧེཏུ ལཱབྷཧེཏུ, ཏསྨཱ ལཱབྷཧེཏུཏོཏི ཝུཏྟཾ ཧོཏི. ཧེཏྭཏྠེ ནིསྶཀྐཝཙནཾ. ‘‘ལཱབྷཔཙྩཡཱ ལཱབྷཀཱརཎཱ’’ཏི ཏསྶེཝ ཝེཝཙནཾ. ཧེཏུམེཝ ཧི པཊིཙྩ ཨེཏཾ ཕལམེཏཱིཏི པཙྩཡོཏི ཙ, ཕལུཔྤཏྟིཾ ཀཱརཡཏཱིཏི ཀཱརཎནྟི ཙ ཝུཙྩཏི.

ཡཐཱསམཱདིནྣནྟི ¶ ཡཾ ཡཾ སམཱདིནྣཾ གཧིཏཾ. ཝཱིཏིཀྐམཏཱིཏི ཨཛ྄ཛྷཱཙརཏི. ཨེཝརཱུཔཱནཱིཏི ཨེཝཾསབྷཱཝཱནི, ཝུཏྟཔྤཀཱརཱནཱིཏི ཨདྷིཔྤཱཡོ. སཱིལཱནཱིཏི གཧཊྛསཱིལཱནི ཝཱ ཧོནྟུ པབྦཛིཏསཱིལཱནི ཝཱ, ཡེསཾ ཨཱདིམྷི ཝཱ ཨནྟེ ཝཱ ཨེཀཾ བྷིནྣཾ, ཏཱནི པརིཡནྟེ ཚིནྣསཱཊཀོ ཝིཡ ཁཎྜཱནི. ཡེསཾ ཝེམཛ྄ཛྷེ ཨེཀཾ བྷིནྣཾ, ཏཱནི མཛ྄ཛྷེ ཝིནིཝིདྡྷསཱཊཀོ ཝིཡ ཚིདྡཱནི. ཡེསཾ པཊིཔཱཊིཡཱ དྭེ ཝཱ ཏཱིཎི ཝཱ བྷིནྣཱནི, ཏཱནི པིཊྛིཡཱ ཝཱ ཀུཙྪིཡཱ ཝཱ ཨུཊྛིཏེན དཱིགྷཝཊྚཱདིསཎྛཱནེན ཝིསབྷཱགཝཎྞེན ཀཱལ༹རཏྟཱདཱིནཾ ཨཉྙཏརསརཱིརཝཎྞཱ གཱཝཱི ཝིཡ སབལཱནི. ཡེསཾ ཨནྟརནྟརཱ ཨེཀེཀཱནི བྷིནྣཱནི, ཏཱནི ཨནྟརནྟརཱ ཝིསབྷཱགཝཎྞབིནྡུཝིཙིཏྲཱ གཱཝཱི ཝིཡ ཀམྨཱསཱནི. ཨཝིསེསེན ཝཱ སབྦཱནིཔི སཏྟཝིདྷེན མེཐུནསཾཡོགེན ཀོདྷཱུཔནཱཧཱདཱིཧི ཙ པཱཔདྷམྨེཧི ཨུཔཧཏཏྟཱ ཁཎྜཱནི ཚིདྡཱནི སབལཱནི ཀམྨཱསཱནཱིཏི. ཏཱནིཡེཝ ཏཎྷཱདཱསབྱཏོ མོཙེཏྭཱ བྷུཛིསྶབྷཱཝཱཀརཎེན ན བྷུཛིསྶཱནི. བུདྡྷཱདཱིཧི ཝིཉྙཱུཧི ན པསཏྠཏྟཱ ན ཝིཉྙུཔྤསཏྠཱནི. ཏཎྷཱདིཊྛཱིཧི པརཱམཊྛཏྟཱ, ཀེནཙི ཝཱ ‘‘ཨཡཾ ཏེ སཱིལེསུ དོསོ’’ཏི པརཱམཊྛུཾ སཀྐུཎེཡྻཏཱཡ པརཱམཊྛཱནི. ཨུཔཙཱརསམཱདྷིཾ ཨཔྤནཱསམཱདྷིཾ ཝཱ, ཨཐ ཝཱ མགྒསམཱདྷིཾ ཕལསམཱདྷིཾ ཝཱ ན སཾཝཏྟཡནྟཱིཏི ཨསམཱདྷིསཾཝཏྟནིཀཱནི. ན སམཱདྷིསཾཝཏྟནིཀཱནཱིཏིཔི པཱཋོ.

ཀེཙི པན ‘‘ཁཎྜཱནཱིཏི ཀུསལཱནཾ དྷམྨཱནཾ ཨཔྤཏིཊྛཱབྷཱུཏཏྟཱ, ཚིདྡཱནཱིཏིཔི ཨེཝཾ. སབལཱནཱིཏི ཝིཝཎྞཀརཎཏྟཱ, ཀམྨཱསཱནཱིཏིཔི ¶ ཨེཝཾ. ན བྷུཛིསྶཱནཱིཏི ཏཎྷཱདཱསབྱཾ གཏཏྟཱ. ན ཝིཉྙུཔྤསཏྠཱནཱིཏི ཀུསལེཧི གརཧིཏཏྟཱ. པརཱམཊྛཱནཱིཏི ཏཎྷཱཡ གཧིཏཏྟཱ. ཨསམཱདྷིསཾཝཏྟནིཀཱནཱིཏི ཝིཔྤཊིསཱརཝཏྠུབྷཱུཏཏྟཱ’’ཏི ཨེཝམཏྠཾ ཝཎྞཡནྟི.

ན ཨཝིཔྤཊིསཱརཝཏྠུཀཱནཱིཏི ཝིཔྤཊིསཱརཱཝཧཏྟཱ ཨཝིཔྤཊིསཱརསྶ པཏིཊྛཱ ན ཧོནྟཱིཏི ཨཏྠོ. ན པཱམོཛྫཝཏྠུཀཱནཱིཏི ཨཝིཔྤཊིསཱརཛཱཡ དུབྦལཔཱིཏིཡཱ ན ཝཏྠུབྷཱུཏཱནི ཏསྶཱ ཨནཱཝཧཏྟཱ ¶ . ཨེཝཾ སེསེསུཔི ཡོཛནཱ ཀཱཏབྦཱ. ན པཱིཏིཝཏྠུཀཱནཱིཏི དུབྦལཔཱིཏིཛཱཡ བལཝཔཱིཏིཡཱ ན ཝཏྠུབྷཱུཏཱནི. ན པསྶདྡྷིཝཏྠུཀཱནཱིཏི བལཝཔཱིཏིཛཱཡ ཀཱཡཙིཏྟཔསྶདྡྷིཡཱ ན ཝཏྠུབྷཱུཏཱནི. ན སུཁཝཏྠུཀཱནཱིཏི པསྶདྡྷིཛསྶ ཀཱཡིཀཙེཏསིཀསུཁསྶ ན ཝཏྠུབྷཱུཏཱནི. ན སམཱདྷིཝཏྠུཀཱནཱིཏི སུཁཛསྶ སམཱདྷིསྶ ¶ ན ཝཏྠུབྷཱུཏཱནི. ན ཡཐཱབྷཱུཏཉཱཎདསྶནཝཏྠུཀཱནཱིཏི སམཱདྷིཔདཊྛཱནསྶ ཡཐཱབྷཱུཏཉཱཎདསྶནསྶ ན ཝཏྠུབྷཱུཏཱནི.

ན ཨེཀནྟནིབྦིདཱཡཱཏིཨཱདཱིསུ ན-ཀཱརམེཝ ཨཱཧརིཏྭཱ ‘‘ན ཝིརཱགཱཡཱ’’ཏིཨཱདིནཱ ནཡེན སེསཔདེཧིཔི ཡོཛེཏབྦཾ. ན ཝིརཱགཱཡཱཏིཨཱདཱིསུ སནཀཱརོ ཝཱ པཱཋོ. ཏཏྠ ཨེཀནྟནིབྦིདཱཡཱཏི ཨེཀནྟེན ཝཊྚེ ནིབྦིནྡནཏྠཱཡ ན སཾཝཏྟནྟཱིཏི སམྦནྡྷོ. ཨེཝཾ སེསེསུཔི ཡོཛེཏབྦཾ. ཝིརཱགཱཡཱཏི ཝཊྚེ ཝིརཛྫནཏྠཱཡ. ནིརོདྷཱཡཱཏི ཝཊྚསྶ ནིརོདྷནཏྠཱཡ. ཨུཔསམཱཡཱཏི ནིརོདྷིཏསྶ པུན ཨནུཔྤཏྟིཝསེན ཝཊྚསྶ ཨུཔསམནཏྠཱཡ. ཨབྷིཉྙཱཡཱཏི ཝཊྚསྶ ཨབྷིཛཱནནཏྠཱཡ. སམྦོདྷཱཡཱཏི ཀིལེསནིདྡཱཝིགམེན ཝཊྚཏོ པབུཛ྄ཛྷནཏྠཱཡ. ནིབྦཱནཱཡཱཏི ཨམཏནིབྦཱནཏྠཱཡ.

ཡཐཱསམཱདིནྣཾ སིཀྑཱཔདཾ ཝཱིཏིཀྐམཱཡཱཏི ཡཐཱསམཱདིནྣསྶ སིཀྑཱཔདསྶ ཝཱིཏིཀྐམནཏྠཱཡ. ཝིབྷཏྟིཝིཔལླཱསཝསེན པནེཏྠ ཨུཔཡོགཝཙནཾ ཀཏཾ. ཙིཏྟམྤི ན ཨུཔྤཱདེཏཱིཏི ཙིཏྟུཔྤཱདསུདྡྷིཡཱ སཱིལསྶ ཨཏིཝིསུདྡྷབྷཱཝདསྶནཏྠཾ ཝུཏྟཾ, ན པན ཙིཏྟུཔྤཱདམཏྟེན སཱིལཾ བྷིཛྫཏི. ཀིཾ སོ ཝཱིཏིཀྐམིསྶཏཱིཏི ཀིམཏྠཾ ཝཱིཏིཀྐམཾ ཀརིསྶཏི, ནེཝ ཝཱིཏིཀྐམཾ ཀརིསྶཏཱིཏི ཨཏྠོ. ཨཁཎྜཱནཱིཏིཨཱདཱིནི ཧེཊྛཱ ཝུཏྟཔཊིཔཀྑནཡེན ཝེདིཏབྦཱནི. ན ཁཎྜཱནཱིཏིཔི པཱཋོ. ‘‘ཨེཀནྟནིབྦིདཱཡཱ’’ཏིཨཱདཱིསུ ཨེཀནྟེན ཝཊྚེ ནིབྦིནྡནཏྠཱཡཱཏིཨཱདིནཱ ནཡེན ཡོཛེཏབྦཾ ¶ . ཨེཏྠ པན ནིབྦིདཱཡཱཏི ཝིཔསྶནཱ. ཝིརཱགཱཡཱཏི མགྒོ. ནིརོདྷཱཡ ཨུཔསམཱཡཱཏི ནིབྦཱནཾ. ཨབྷིཉྙཱཡ སམྦོདྷཱཡཱཏི མགྒོ. ནིབྦཱནཱཡཱཏི ནིབྦཱནམེཝ. ཨེཀསྨིཾ ཋཱནེ ཝིཔསྶནཱ, དྭཱིསུ མགྒོ, ཏཱིསུ ནིབྦཱནཾ ཝུཏྟནྟི ཨེཝཾ ཨཝཏྠཱནཀཐཱ ཝེདིཏབྦཱ. པརིཡཱཡེན པན སབྦཱནིཔེཏཱནི མགྒཝེཝཙནཱནིཔི ནིབྦཱནཝེཝཙནཱནིཔི ཧོནྟིཡེཝ.

༣༩. ཨིདཱནི པརིཡནྟཱཔརིཡནྟཝསེན ཝིཛྫམཱནཔབྷེདཾ དསྶེཏྭཱ པུན དྷམྨཝསེན ཛཱཏིཝསེན པཙྩཡཝསེན སམྤཡུཏྟཝསེན སཱིལསྶ པབྷེདཾ དསྶེཏུཾ ཀིཾ སཱིལནྟིཨཱདིམཱཧ. ཏཏྠ སམུཊྛཱཏི ཨེཏེནཱཏི སམུཊྛཱནཾ. པཙྩཡསྶེཏཾ ནཱམཾ. ཀིཾ སམུཊྛཱནམསྶཱཏི ཀིཾསམུཊྛཱནཾ. ཀཏིནཾ དྷམྨཱནཾ སམོདྷཱནཾ སམཝཱཡོ ཨསྶཱཏི ཀཏིདྷམྨསམོདྷཱནཾ.

ཙེཏནཱ ¶ སཱིལནྟི པཱཎཱཏིཔཱཏཱདཱིཧི ཝིརམནྟསྶ, ཝཏྟཔཊིཔཏྟིཾ ཝཱ པཱུརེནྟསྶ ཙེཏནཱ. ཙེཏསིཀཾ སཱིལནྟི པཱཎཱཏིཔཱཏཱདཱིཧི ཝིརམནྟསྶ ཝིརཏི. ཨཔིཙ ཙེཏནཱ སཱིལཾ ནཱམ པཱཎཱཏིཔཱཏཱདཱིནི པཛཧནྟསྶ སཏྟཀམྨཔཐཙེཏནཱ ¶ . ཙེཏསིཀཾ སཱིལཾ ནཱམ ‘‘ཨབྷིཛ྄ཛྷཾ ལོཀེ པཧཱཡ ཝིགཏཱབྷིཛ྄ཛྷེན ཙེཏསཱ ཝིཧརཏཱི’’ཏིཨཱདིནཱ (དཱི. ནི. ༡.༢༡༧) ནཡེན ཝུཏྟཱ ཨནབྷིཛ྄ཛྷཱཨབྱཱཔཱདསམྨཱདིཊྛིདྷམྨཱ. སཾཝརོ སཱིལནྟི ཨེཏྠ པཉྩཝིདྷོ སཾཝརོ ཝེདིཏབྦོ – པཱཏིམོཀྑསཾཝརོ, སཏིསཾཝརོ, ཉཱཎསཾཝརོ, ཁནྟིསཾཝརོ, ཝཱིརིཡསཾཝརོཏི. ཏཏྠ ‘‘ཨིམིནཱ པཱཏིམོཀྑསཾཝརེན ཨུཔེཏོ ཧོཏི སམུཔེཏོ’’ཏི (ཝིབྷ. ༥༡༡) ཨཡཾ པཱཏིམོཀྑསཾཝརོ. ‘‘རཀྑཏི ཙཀྑུནྡྲིཡཾ, ཙཀྑུནྡྲིཡེ སཾཝརཾ ཨཱཔཛྫཏཱི’’ཏི (དཱི. ནི. ༡.༢༡༣; མ. ནི. ༡.༢༩༥; སཾ. ནི. ༤.༢༣༩; ཨ. ནི. ༣.༡༦) ཨཡཾ སཏིསཾཝརོ.

‘‘ཡཱནི སོཏཱནི ལོཀསྨིཾ, (ཨཛིཏཱཏི བྷགཝཱ;)

སཏི ཏེསཾ ནིཝཱརཎཾ;

སོཏཱནཾ སཾཝརཾ བྲཱུམི, པཉྙཱཡེཏེ པིདྷཱིཡརེ’’ཏི. (སུ. ནི. ༡༠༤༡) –

ཨཡཾ ཉཱཎསཾཝརོ. པཙྩཡཔཊིསེཝནམྤི ཨེཏྠེཝ སམོདྷཱནཾ གཙྪཏི. ཡོ པནཱཡཾ ‘‘ཁམོ ཧོཏི སཱིཏསྶ ཨུཎྷསྶཱ’’ཏིཨཱདིནཱ (མ. ནི. ༡.༢༤; ཨ. ནི. ༤.༡༡༤; ༦.༥༨) ནཡེན ཨཱགཏོ, ཨཡཾ ཁནྟིསཾཝརོ ནཱམ. ཡོ ཙཱཡཾ ‘‘ཨུཔྤནྣཾ ཀཱམཝིཏཀྐཾ ནཱདྷིཝཱསེཏཱི’’ཏིཨཱདིནཱ (མ. ནི. ༡.༢༦; ཨ. ནི. ༤.༡༡༤; ༦.༥༨) ནཡེན ཨཱགཏོ, ཨཡཾ ཝཱིརིཡསཾཝརོ ནཱམ. ཨཱཛཱིཝཔཱརིསུདྡྷིཔི ¶ ཨེཏྠེཝ སམོདྷཱནཾ གཙྪཏི. ཨིཏི ཨཡཾ པཉྩཝིདྷོཔི སཾཝརོ, ཡཱ ཙ པཱཔབྷཱིརུཀཱནཾ ཀུལཔུཏྟཱནཾ སམྤཏྟཝཏྠུཏོ ཝིརཏི, སབྦམེཏཾ སཾཝརསཱིལནྟི ཝེདིཏབྦཾ. ཨཝཱིཏིཀྐམོ སཱིལནྟི སམཱདིནྣསཱིལསྶ ཀཱཡིཀཝཱཙསིཀོ ཨཝཱིཏིཀྐམོ. ཨིདཾ ཏཱཝ ཀིཾ སཱིལནྟི པཉྷསྶ ཝིསྶཛྫནཾ.

ཀཏི སཱིལཱནཱིཏི པཉྷསྶ ཝིསྶཛྫནེ ཀུསལསཱིལཾ ཨཀུསལསཱིལཾ ཨབྱཱཀཏསཱིལནྟི ཨེཏྠ ཡསྨཱ ལོཀེ ཏེསཾ ཏེསཾ སཏྟཱནཾ པཀཏི སཱིལནྟི ཝུཙྩཏི, ཡཾ སནྡྷཱཡ ‘‘ཨཡཾ སུཁསཱིལོ, ཨཡཾ དུཀྑསཱིལོ, ཨཡཾ ཀལཧསཱིལོ, ཨཡཾ མཎྜནསཱིལོ’’ཏི བྷཎནྟི. ཏསྨཱ ཏེན པརིཡཱཡེན ཨཏྠུདྡྷཱརཝསེན ཨཀུསལསཱིལམཔི སཱིལནྟི ཝུཏྟཾ. ཏཾ པན ‘‘སུཏྭཱན སཾཝརེ པཉྙཱ’’ཏི (པཊི. མ. ༡.༣༧) ཝཙནཏོ ཨིདྷཱདྷིཔྤེཏསཱིལཾ ན ཧོཏཱིཏི.

ཡསྨཱ ¶ ¶ པན ཙེཏནཱདིབྷེདསྶ སཱིལསྶ སམྤཡུཏྟཙིཏྟཾ སམུཊྛཱནཾ, ཏསྨཱ ཀུསལཙིཏྟསམུཊྛཱནཾ ཀུསལསཱིལནྟིཨཱདིམཱཧ.

སཾཝརསམོདྷཱནཾ སཱིལནྟི སཾཝརསམྤཡུཏྟཁནྡྷཱ. ཏེ ཧི སཾཝརེན སམཱགཏཱ མིསྶཱིབྷཱུཏཱཏི སཾཝརསམོདྷཱནནྟི ཝུཏྟཱ. ཨེཝཾ ཨཝཱིཏིཀྐམསམོདྷཱནཾ སཱིལམྤི ཝེདིཏབྦཾ. ཏཐཱབྷཱཝེ ཛཱཏཙེཏནཱ སམོདྷཱནཾ སཱིལནྟི སཾཝརབྷཱཝེ ཨཝཱིཏིཀྐམབྷཱཝེ ཛཱཏཙེཏནཱསམྤཡུཏྟཱ ཁནྡྷཱ. ཡསྨཱ ཙ ཏཱིསུཔི ཙེཏེསུ ཏཾསམྤཡུཏྟཱ དྷམྨཱ ཨདྷིཔྤེཏཱ, ཏསྨཱ ཙེཏནཱསམོདྷཱནེན ཙེཏསིཀཱནམྤི སངྒཧིཏཏྟཱ ཙེཏསིཀསམོདྷཱནསཱིལཾ ཝིསུཾ ན ནིདྡིཊྛནྟི ཝེདིཏབྦཾ. ཧེཊྛཱ ཙེཏནཱདཡོ དྷམྨཱ ‘‘སཱིལ’’ནྟི ཝུཏྟཱ. ན ཀེཝལཾ ཏེ ཨེཝ སཱིལཾ, ཏཾསམྤཡུཏྟཱ དྷམྨཱཔི སཱིལམེཝཱཏི དསྶནཏྠཾ ཨཡཾ ཏིཀོ ཝུཏྟོཏི ཝེདིཏབྦོ.

༤༠. ཨིདཱནི ཡསྨཱ ཙེཏནཱཙེཏསིཀཱ སཾཝརཱཝཱིཏིཀྐམཱཡེཝ ཧོནྟི ན ཝིསུཾ, ཏསྨཱ སཾཝརཱཝཱིཏིཀྐམེཡེཝ ཡཱཝ ཨརཧཏྟམགྒཱ སཱདྷཱརཎཀྐམེན ཡོཛེནྟོ པཱཎཱཏིཔཱཏཾ སཾཝརཊྛེན སཱིལཾ, ཨཝཱིཏིཀྐམཊྛེན སཱིལནྟིཨཱདིམཱཧ. པཱཎཱཏིཔཱཏཱ ཝེརམཎིཨཱདཡོ ཧི ཡསྨཱ ཨཏྟནོ ཨཏྟནོ པཙྩནཱིཀཾ སཾཝརནྟི, ཏཾ ན ཝཱིཏིཀྐམནྟི ཙ, ཏསྨཱ སཾཝརཎཏོ ཨཝཱིཏིཀྐམནཏོ ཙ སཾཝརཊྛེན སཱིལཾ ཨཝཱིཏིཀྐམཊྛེན སཱིལཾ ནཱམ ཧོཏི. ཏཏྠ པཱཎཱཏིཔཱཏཾ སཾཝརཊྛེནཱཏི པཱཎཱཏིཔཱཏསྶ པིདཧནཊྛེན སཱིལཾ. ཀིཾ ཏཾ? པཱཎཱཏིཔཱཏཱ ཝེརམཎཱི. སཱ ཙ ཏཾ སཾཝརནྟཱིཡེཝ ཏཾ ན ཝཱིཏིཀྐམཏཱིཏི ཨཝཱིཏིཀྐམཊྛེན སཱིལཾ. ཨེཝམེཝ ཨདིནྣཱདཱནཱ ཝེརམཎིཨཱདཡོ ཨནབྷིཛ྄ཛྷཱཨབྱཱཔཱདསམྨཱདིཊྛིཡོ ཡོཛེཏབྦཱ.

པཱཎཱཏིཔཱཏནྟིཨཱདཱིསུ ¶ པན དསསུ ཨཀུསལཀམྨཔཐེསུ པཱཎསྶ ཨཏིཔཱཏོ པཱཎཱཏིཔཱཏོ. པཱཎཝདྷོ པཱཎགྷཱཏོཏི ཝུཏྟཾ ཧོཏི. པཱཎོཏི ཙེཏྠ ཝོཧཱརཏོ སཏྟོ, པརམཏྠཏོ ཛཱིཝིཏིནྡྲིཡཾ. ཏསྨིཾ པན པཱཎེ པཱཎསཉྙིནོ ཛཱིཝིཏིནྡྲིཡུཔཙྪེདཀཨུཔཀྐམསམུཊྛཱཔིཀཱ ཀཱཡཝཙཱིདྭཱརཱནཾ ཨཉྙཏརདྭཱརཔྤཝཏྟཱ ཝདྷཀཙེཏནཱ པཱཎཱཏིཔཱཏོ. སོ གུཎཝིརཧིཏེསུ ཏིརཙྪཱནགཏཱདཱིསུ པཱཎེསུ ཁུདྡཀེ པཱཎེ ཨཔྤསཱཝཛྫོ, མཧཱསརཱིརེ མཧཱསཱཝཛྫོ. ཀསྨཱ? པཡོགམཧནྟཏཱཡ. པཡོགསམཏྟེཔི ཝཏྠུམཧནྟཏཱཡ. གུཎཝནྟེསུ མནུསྶཱདཱིསུ ཨཔྤགུཎེ པཱཎེ ཨཔྤསཱཝཛྫོ, མཧཱགུཎེ མཧཱསཱཝཛྫོ. སརཱིརགུཎཱནཾ ¶ པན སམབྷཱཝེ སཏི ཀིལེསཱནཾ ཨུཔཀྐམཱནཉྩ མུདུཏཱཡ ཨཔྤསཱཝཛྫོ, ཏིབྦཏཱཡ མཧཱསཱཝཛྫོཏི ཝེདིཏབྦོ. ཏསྶ པཉྩ སམྦྷཱརཱ – པཱཎོ, པཱཎསཉྙིཏཱ, ཝདྷཀཙིཏྟཾ, ཨུཔཀྐམོ, ཏེན མརཎནྟི.

ཨདིནྣསྶ ¶ ཨཱདཱནཾ ཨདིནྣཱདཱནཾ, པརསཾཧརཎཾ, ཐེཡྻཾ, ཙོརིཀཱཏི ཝུཏྟཾ ཧོཏི. ཏཏྠ ཨདིནྣནྟི པརཔརིགྒཧིཏཾ, ཡཏྠ པརོ ཡཐཱཀཱམཀཱརིཏཾ ཨཱཔཛྫནྟོ ཨདཎྜཱརཧོ ཨནུཔཝཛྫོ ཙ ཧོཏི, ཏསྨིཾ པརཔརིགྒཧིཏེ པརཔརིགྒཧིཏསཉྙིནོ ཏདཱདཱཡཀཨུཔཀྐམསམུཊྛཱཔིཀཱ ཀཱཡཝཙཱིདྭཱརཱནཾ ཨཉྙཏརདྭཱརཔྤཝཏྟཱ ཐེཡྻཙེཏནཱ ཨདིནྣཱདཱནཾ. ཏཾ ཧཱིནེ པརསནྟཀེ ཨཔྤསཱཝཛྫཾ, པཎཱིཏེ མཧཱསཱཝཛྫཾ. ཀསྨཱ? ཝཏྠུཔཎཱིཏཏཱཡ. ཝཏྠུསམཏྟེ སཏི གུཎཱདྷིཀཱནཾ སནྟཀེ ཝཏྠུསྨིཾ མཧཱསཱཝཛྫཾ, ཏཾ ཏཾ གུཎཱདྷིཀཾ ཨུཔཱདཱཡ ཏཏོ ཏཏོ ཧཱིནགུཎསྶ སནྟཀེ ཝཏྠུསྨིཾ ཨཔྤསཱཝཛྫཾ. ཏསྶ པཉྩ སམྦྷཱརཱ – པརཔརིགྒཧིཏཾ, པརཔརིགྒཧིཏསཉྙིཏཱ ཐེཡྻཙིཏྟཾ, ཨུཔཀྐམོ, ཏེན ཧརཎནྟི.

ཀཱམེསཱུཏི མེཐུནསམཱཙཱརེསུ. མིཙྪཱཙཱརོཏི ཨེཀནྟནིནྡིཏོ ལཱམཀཱཙཱརོ. ལཀྑཎཏོ པན ཨསདྡྷམྨཱདྷིཔྤཱཡེན ཀཱཡདྭཱརཔྤཝཏྟཱ ཨགམནཱིཡཊྛཱནཝཱིཏིཀྐམཙེཏནཱ ཀཱམེསུ མིཙྪཱཙཱརོ.

ཏཏྠ ཨགམནཱིཡཊྛཱནཾ ནཱམ པུརིསཱནཾ ཏཱཝ མཱཏུརཀྑིཏཱ, པིཏུརཀྑིཏཱ, མཱཏཱཔིཏུརཀྑིཏཱ, བྷཱཏུརཀྑིཏཱ, བྷགིནིརཀྑིཏཱ, ཉཱཏིརཀྑིཏཱ, གོཏྟརཀྑིཏཱ, དྷམྨརཀྑིཏཱ, སཱརཀྑཱ, སཔརིདཎྜཱཏི མཱཏུརཀྑིཏཱདཡོ དས, དྷནཀྐཱིཏཱ, ཚནྡཝཱསིནཱི, བྷོགཝཱསིནཱི, པཊཝཱསིནཱི, ཨོདཔཏྟཀིནཱི, ཨོབྷཏཙུམྦཊཱ, དཱསཱི ཙ, བྷརིཡཱ ཙ, ཀམྨཀཱརཱི ཙ བྷརིཡཱ ཙ, དྷཛཱཧཊཱ མུཧུཏྟིཀཱཏི དྷནཀྐཱིཏཱདཡོ དསཱཏི ¶ ཝཱིསཏི ཨིཏྠིཡོ. ཨིཏྠཱིསུ པན དྭིནྣཾ སཱརཀྑསཔརིདཎྜཱནཾ དསནྣཉྩ དྷནཀྐཱིཏཱདཱིནནྟི དྭཱདསནྣཾ ཨིཏྠཱིནཾ ཨཉྙེ པུརིསཱ, ཨིདཾ ཨགམནཱིཡཊྛཱནཾ ནཱམ.

སོ པནེས མིཙྪཱཙཱརོ སཱིལཱདིགུཎརཧིཏེ ཨགམནཱིཡཊྛཱནེ ཨཔྤསཱཝཛྫོ, སཱིལཱདིགུཎསམྤནྣེ མཧཱསཱཝཛྫོ. ཏསྶ ཙཏྟཱརོ སམྦྷཱརཱ – ཨགམནཱིཡཝཏྠུ, ཏསྨིཾ སེཝནཙིཏྟཾ, སེཝནཔཡོགོ, མགྒེནམགྒཔཊིཔཏྟིཨདྷིཝཱསནནྟི.

མུསཱཏི ¶ ཝིསཾཝཱདནཔུརེཀྑཱརསྶ ཨཏྠབྷཉྫཀོ ཝཙཱིཔཡོགོ, ཀཱཡཔཡོགོ ཝཱ. ཝིསཾཝཱདནཱདྷིཔྤཱཡེན པནསྶ པརཝིསཾཝཱདཀཀཱཡཝཙཱིཔཡོགསམུཊྛཱཔིཀཱ ཙེཏནཱ མུསཱཝཱདོ. ཨཔརོ ནཡོ – མུསཱཏི ཨབྷཱུཏཾ ཨཏཙྪཾ ཝཏྠུ. ཝཱདོཏི ཏསྶ བྷཱུཏཏོ ཏཙྪཏོ ཝིཉྙཱཔནཾ. ལཀྑཎཏོ པན ཨཏཐཾ ཝཏྠུཾ ཏཐཏོ པརཾ ཝིཉྙཱཔེཏུཀཱམསྶ ཏཐཱཝིཉྙཏྟིསམུཊྛཱཔིཀཱ ཙེཏནཱ མུསཱཝཱདོ. སོ ཡམཏྠཾ བྷཉྫཏི, ཏསྶ ཨཔྤཏཱཡ ཨཔྤསཱཝཛྫོ, མཧནྟཏཱཡ མཧཱསཱཝཛྫོ. ཨཔིཙ གཧཊྛཱནཾ ཨཏྟནོ སནྟཀཾ ཨདཱཏུཀཱམཏཱཡ ནཏྠཱིཏིཨཱདིནཡཔྤཝཏྟོ ཨཔྤསཱཝཛྫོ, སཀྑིནཱ ¶ ཧུཏྭཱ ཨཏྠབྷཉྫནཏྠཾ ཝུཏྟོ མཧཱསཱཝཛྫོ. པབྦཛིཏཱནཾ ཨཔྤཀམྤི ཏེལཾ ཝཱ སཔྤིཾ ཝཱ ལབྷིཏྭཱ ཧསཱདྷིཔྤཱཡེན ‘‘ཨཛྫ གཱམེ ཏེལཾ ནདཱི མཉྙེ སནྡཏཱི’’ཏི པཱུརཎཀཐཱནཡེན པཝཏྟོ ཨཔྤསཱཝཛྫོ, ཨདིཊྛཾཡེཝ པན དིཊྛནྟིཨཱདིནཱ ནཡེན ཝདནྟཱནཾ མཧཱསཱཝཛྫོ. ཏསྶ ཙཏྟཱརོ སམྦྷཱརཱ – ཨཏཐཾ ཝཏྠུ, ཝིསཾཝཱདནཙིཏྟཾ, ཏཛྫོ ཝཱཡཱམོ, པརསྶ ཏདཏྠཝིཛཱནནནྟི.

ཡཱཡ ཝཱཙཱཡ ཡསྶ ཏཾ ཝཱཙཾ བྷཱསཏི, ཏསྶ ཧདཡེ ཨཏྟནོ པིཡབྷཱཝཾ, པརསྶ ཙ སུཉྙབྷཱཝཾ ཀརོཏི, སཱ པིསུཎཱ ཝཱཙཱ. ཡཱཡ པན ཨཏྟཱནམྤི པརམྤི ཕརུསཾ ཀརོཏི, ཡཱ ཝཱཙཱ སཡམྤི ཕརུསཱ ནེཝ ཀཎྞསུཁཱ ན ཧདཡསུཁཱ ཝཱ, ཨཡཾ ཕརུསཱ ཝཱཙཱ. ཡེན སམྥཾ པལཔཏི ནིརཏྠཀཾ, སོ སམྥཔྤལཱཔོ. ཏེསཾ མཱུལབྷཱུཏཱ ཙེཏནཱཔི པིསུཎཱཝཱཙཱདིནཱམམེཝ ལབྷཏི. སཱ ཨེཝ ཙ ཨིདྷ ཨདྷིཔྤེཏཱཏི.

ཏཏྠ སཾཀིལིཊྛཙིཏྟསྶ པརེསཾ ཝཱ བྷེདཱཡ ཨཏྟནོ པིཡཀམྱཏཱཡ ཝཱ ཀཱཡཝཙཱིཔཡོགསམུཊྛཱཔིཀཱ ཙེཏནཱ པིསུཎཱ ཝཱཙཱ. སཱ ཡསྶ བྷེདཾ ཀརོཏི, ཏསྶ ཨཔྤགུཎཏཱཡ ཨཔྤསཱཝཛྫཱ, མཧཱགུཎཏཱཡ མཧཱསཱཝཛྫཱ. ཏསྶཱ ཙཏྟཱརོ སམྦྷཱརཱ ¶ – བྷིནྡིཏབྦོ པརོ, ‘‘ཨིཏི ཨིམེ ནཱནཱ བྷཝིསྶནྟཱི’’ཏི བྷེདཔུརེཀྑཱརཏཱ ཝཱ ‘‘ཨིཏི ཨཧཾ པིཡོ བྷཝིསྶཱམི ཝིསྶཱསིཀོ’’ཏི པིཡཀམྱཏཱ ཝཱ, ཏཛྫོ ཝཱཡཱམོ, ཏསྶ ཏདཏྠཝིཛཱནནནྟི. པརེ པན ཨབྷིནྣེ ཀམྨཔཐབྷེདོ ནཏྠི, བྷིནྣེཡེཝ ཧོཏི.

པརསྶ མམྨཙྪེདཀཀཱཡཝཙཱིཔཡོགསམུཊྛཱཔིཀཱ ཨེཀནྟཕརུསཙེཏནཱ ཕརུསཱ ཝཱཙཱ. མམྨཙྪེདཀོཔི པན པཡོགོ ཙིཏྟསཎྷཏཱཡ ཕརུསཱ ཝཱཙཱ ན ཧོཏི. མཱཏཱཔིཏརོ ཧི ཀདཱཙི པུཏྟཀེ ཨེཝམྤི ཝདནྟི ‘‘ཙོརཱ ཝོ ཁཎྜཱཁཎྜིཀཾ ཀརོནྟཱུ’’ཏི. ཨུཔྤལཔཏྟམྤི ཙ ནེསཾ ཨུཔརི པཏནྟཾ ¶ ན ཨིཙྪནྟི. ཨཱཙརིཡུཔཛ྄ཛྷཱཡཱ ཙ ཀདཱཙི ནིསྶིཏཀེ ཨེཝཾ ཝདནྟི ‘‘ཀིཾ ཨིམེ ཨཧིརིཀཱ ཨནོཏྟཔྤིནོ, ནིདྡྷམཐ ནེ’’ཏི. ཨཐ ཙ ནེསཾ ཨཱགམཱདྷིགམསམྤཏྟིཾ ཨིཙྪནྟི. ཡཐཱ ཙ ཙིཏྟསཎྷཏཱཡ ཕརུསཱ ཝཱཙཱ ན ཧོཏི, ཨེཝཾ ཝཙནསཎྷཏཱཡ ཨཕརུསཱ ཝཱཙཱཔི ན ཧོཏི. ན ཧི མཱརཱཔེཏུཀཱམསྶ ‘‘ཨིམཾ སུཁཾ སཡཱཔེཐཱ’’ཏི ཝཙནཾ ཨཕརུསཱ ཝཱཙཱ ཧོཏི, ཙིཏྟཕརུསཏཱཡ པནེསཱ ཕརུསཱ ཝཱཙཱཝ. སཱ ཡཾ སནྡྷཱཡ པཝཏྟིཏཱ, ཏསྶ ཨཔྤགུཎཏཱཡ ཨཔྤསཱཝཛྫཱ, མཧཱགུཎཏཱཡ མཧཱསཱཝཛྫཱ. ཏསྶཱ ཏཡོ སམྦྷཱརཱ – ཨཀྐོསིཏབྦོ པརོ, ཀུཔིཏཙིཏྟཾ, ཨཀྐོསནཱཏི.

ཨནཏྠཝིཉྙཱཔིཀཱ ¶ ཀཱཡཝཙཱིཔཡོགསམུཊྛཱཔིཀཱ ཨཀུསལཙེཏནཱ སམྥཔྤལཱཔོ. སོ ཨཱསེཝནམནྡཏཱཡ ཨཔྤསཱཝཛྫོ, ཨཱསེཝནམཧནྟཏཱཡ མཧཱསཱཝཛྫོ. ཏསྶ དྭེ སམྦྷཱརཱ – བྷཱརཏཡུདྡྷསཱིཏཱཧརཎཱདིནིརཏྠཀཀཐཱཔུརེཀྑཱརཏཱ, ཏཐཱརཱུཔིཀཐཱཀཐནཉྩཱཏི. པརེ པན ཏཾ ཀཐཾ ཨགཎྷནྟེ ཀམྨཔཐབྷེདོ ནཏྠི, པརེན སམྥཔྤལཱཔེ གཧིཏེཡེཝ ཧོཏི.

ཨབྷིཛ྄ཛྷཱཡཏཱིཏི ཨབྷིཛ྄ཛྷཱ, པརབྷཎྜཱབྷིམུཁཱི ཧུཏྭཱ ཏནྣིནྣཏཱཡ པཝཏྟཏཱིཏི ཨཏྠོ. སཱ ‘‘ཨཧོ ཝཏ ཨིདཾ མམསྶཱ’’ཏི ཨེཝཾ པརབྷཎྜཱབྷིཛ྄ཛྷཱཡནལཀྑཎཱ, ཨདིནྣཱདཱནཾ ཝིཡ ཨཔྤསཱཝཛྫཱ མཧཱསཱཝཛྫཱ ཙ. ཏསྶ དྭེ སམྦྷཱརཱ – པརབྷཎྜཾ, ཨཏྟནོ པརིཎཱམནཉྩཱཏི. པརབྷཎྜཝཏྠུཀེ ཧི ལོབྷེ ཨུཔྤནྣེཔི ན ཏཱཝ ཀམྨཔཐབྷེདོ ཧོཏི, ཡཱཝ ‘‘ཨཧོ ཝཏ ཨིདཾ མམསྶཱ’’ཏི ཨཏྟནོ ན པརིཎཱམེཏི.

ཧིཏསུཁཾ བྱཱཔཱདཡཏཱིཏི བྱཱཔཱདོ. སོ པརཝིནཱསཱཡ མནོཔདོསལཀྑཎོ, ཕརུསཱ ཝཱཙཱ ཝིཡ ཨཔྤསཱཝཛྫོ མཧཱསཱཝཛྫོ ཙ. ཏསྶ དྭེ སམྦྷཱརཱ – པརསཏྟོ ཙ, ཏསྶ ཙ ཝིནཱསཙིནྟཱཏི. པརསཏྟཝཏྠུཀེ ཧི ཀོདྷེ ཨུཔྤནྣེཔི ན ཏཱཝ ¶ ཀམྨཔཐབྷེདོ ཧོཏི, ཡཱཝ ‘‘ཨཧོ ཝཏཱཡཾ ཨུཙྪིཛྫེཡྻ ཝིནསྶེཡྻཱ’’ཏི ཏསྶ ཝིནཱསཾ ན ཙིནྟེཏི.

ཡཐཱབྷུཙྩགཧཎཱབྷཱཝེན ¶ མིཙྪཱ པསྶཏཱིཏི མིཙྪཱདིཊྛི. སཱ ‘‘ནཏྠི དིནྣ’’ནྟིཨཱདིནཱ ནཡེན ཝིཔརཱིཏདསྶནལཀྑཎཱ, སམྥཔྤལཱཔོ ཝིཡ ཨཔྤསཱཝཛྫཱ, མཧཱསཱཝཛྫཱ ཙ. ཨཔིཙ ཨནིཡཏཱ ཨཔྤསཱཝཛྫཱ, ནིཡཏཱ མཧཱསཱཝཛྫཱ. ཏསྶཱ དྭེ སམྦྷཱརཱ – ཝཏྠུནོ ཙ གཧིཏཱཀཱརཝིཔརཱིཏཏཱ, ཡཐཱ ཙ ཏཾ གཎྷཱཏི, ཏཐཱབྷཱཝེན ཏསྶཱུཔཊྛཱནནྟི. ཏཏྠ ནཏྠིཀཱཧེཏུཀཨཀིརིཡདིཊྛཱིཧི ཨེཝ ཀམྨཔཐབྷེདོ ཧོཏི, ན ཨཉྙདིཊྛཱིཧི.

ཨིམེསཾ པན དསནྣཾ ཨཀུསལཀམྨཔཐཱནཾ དྷམྨཏོ, ཀོཊྛཱསཏོ, ཨཱརམྨཎཏོ, ཝེདནཱཏོ, མཱུལཏོཏི པཉྩཧཱཀཱརེཧི ཝིནིཙྪཡོ ཝེདིཏབྦོ.

ཏཏྠ དྷམྨཏོཏི ཨེཏེསུ ཧི སཏྟ པཊིཔཱཊིཡཱ ཙེཏནཱདྷམྨཱཝ ཧོནྟི, ཨབྷིཛ྄ཛྷཱདཡོ ཏཡོ ཙེཏནཱསམྤཡུཏྟཱ.

ཀོཊྛཱསཏོཏི པཊིཔཱཊིཡཱ སཏྟ, མིཙྪཱདིཊྛི ཙཱཏི ཨིམེ ཨཊྛ ཀམྨཔཐཱ ཨེཝ ཧོནྟི, ནོ ¶ མཱུལཱནི. ཨབྷིཛ྄ཛྷཱབྱཱཔཱདཱ ཀམྨཔཐཱ ཙེཝ མཱུལཱནི ཙ. ཨབྷིཛ྄ཛྷཱ ཧི མཱུལཾ པཏྭཱ ལོབྷོ ཨཀུསལམཱུལཾ ཧོཏི, བྱཱཔཱདོ དོསོ ཨཀུསལམཱུལཾ.

ཨཱརམྨཎཏོཏི པཱཎཱཏིཔཱཏོ ཛཱིཝིཏིནྡྲིཡཱརམྨཎཏོ སངྑཱརཱརམྨཎོ. ཨདིནྣཱདཱནཾ སཏྟཱརམྨཎཾ ཝཱ སངྑཱརཱརམྨཎཾ ཝཱ. མིཙྪཱཙཱརོ ཕོཊྛབྦཝསེན སངྑཱརཱརམྨཎོ, སཏྟཱརམྨཎོཏིཔི ཨེཀེ. མུསཱཝཱདོ སཏྟཱརམྨཎོ ཝཱ སངྑཱརཱརམྨཎོ ཝཱ. ཏཐཱ པིསུཎཱ ཝཱཙཱ. ཕརུསཱ ཝཱཙཱ སཏྟཱརམྨཎཱཝ སམྥཔྤལཱཔོ དིཊྛསུཏམུཏཝིཉྙཱཏཝསེན སཏྟཱརམྨཎོ ཝཱ སངྑཱརཱརམྨཎོ ཝཱ. ཏཐཱ ཨབྷིཛ྄ཛྷཱ. བྱཱཔཱདོ སཏྟཱརམྨཎོཝ. མིཙྪཱདིཊྛི ཏེབྷཱུམཀདྷམྨཝསེན སངྑཱརཱརམྨཎཱཝ.

ཝེདནཱཏོཏི པཱཎཱཏིཔཱཏོ དུཀྑཝེདནོ ཧོཏི. ཀིཉྩཱཔི ཧི རཱཛཱནོ ཙོརཾ དིསྭཱ ཧསམཱནཱཔི ‘‘གཙྪཐ བྷཎེ, མཱརེཐ ན’’ནྟི ཝདནྟི, སནྣིཊྛཱཔཀཙེཏནཱ པན ནེསཾ དུཀྑསམྤཡུཏྟཱཝ ཧོཏི. ཨདིནྣཱདཱནཾ ཏིཝེདནཾ. ཏཉྷི པརབྷཎྜཾ དིསྭཱ ཧཊྛཏུཊྛསྶ གཎྷཏོ སུཁཝེདནཾ ཧོཏི, བྷཱིཏཏསིཏསྶ གཎྷཏོ དུཀྑཝེདནཾ, ཏཐཱ ཝིཔཱཀནིསྶནྡཕལཱནི པཙྩཝེཀྑནྟསྶ. གཧཎཀཱལེ མཛ྄ཛྷཏྟབྷཱཝེ ཋིཏསྶ ¶ པན གཎྷཏོ ཨདུཀྑམསུཁཝེདནཾ ཧོཏི. མིཙྪཱཙཱརོ སུཁམཛ྄ཛྷཏྟཝསེན དྭིཝེདནོ, སནྣིཊྛཱཔཀཙིཏྟེ ¶ པན མཛ྄ཛྷཏྟཝེདནོ ན ཧོཏི. མུསཱཝཱདོ ཨདིནྣཱདཱནེ ཝུཏྟནཡེནེཝ ཏིཝེདནོ, ཏཐཱ པིསུཎཱ ཝཱཙཱ. ཕརུསཱ ཝཱཙཱ དུཀྑཝེདནཱ. སམྥཔྤལཱཔོ ཏིཝེདནོ. པརེསུ ཧི སཱདྷུཀཱརཾ དེནྟེསུ ཙེལཱདཱིནི ཨུཀྑིཔནྟེསུ ཧཊྛཏུཊྛསྶ སཱིཏཱཧརཎབྷཱརཏཡུདྡྷཱདཱིནི ཀཐནཀཱལེ སོ སུཁཝེདནོ ཧོཏི, པཋམཾ དིནྣཝེཏནེན ཨེཀེན པཙྪཱ ཨཱགནྟྭཱ ‘‘ཨཱདིཏོ པཊྛཱཡ ཀཐེཧཱི’’ཏི ཝུཏྟེ ‘‘ནིརཝསེསཾ ཡཐཱནུསནྡྷིཀཾ པཀིཎྞཀཀཐཾ ཀཐེསྶཱམི ནུ ཁོ, ནོ’’ཏི དོམནསྶིཏསྶ ཀཐནཀཱལེ དུཀྑཝེདནོ ཧོཏི, མཛ྄ཛྷཏྟསྶ ཀཐཡཏོ ཨདུཀྑམསུཁཝེདནོ ཧོཏི. ཨབྷིཛ྄ཛྷཱ སུཁམཛ྄ཛྷཏྟཝསེན དྭིཝེདནཱ, ཏཐཱ མིཙྪཱདིཊྛི. བྱཱཔཱདོ དུཀྑཝེདནོ.

མཱུལཏོཏི པཱཎཱཏིཔཱཏོ དོསམོཧཝསེན དྭིམཱུལཀོ ཧོཏི, ཨདིནྣཱདཱནཾ དོསམོཧཝསེན ཝཱ ལོབྷམོཧཝསེན ཝཱ, མིཙྪཱཙཱརོ ལོབྷམོཧཝསེན, མུསཱཝཱདོ དོསམོཧཝསེན ཝཱ ལོབྷམོཧཝསེན ཝཱ. ཏཐཱ པིསུཎཱ ཝཱཙཱ སམྥཔྤལཱཔོ ཙ. ཕརུསཱ ཝཱཙཱ དོསམོཧཝསེན, ཨབྷིཛ྄ཛྷཱ མོཧཝསེན ཨེཀམཱུལཱ, ཏཐཱ བྱཱཔཱདོ. མིཙྪཱདིཊྛི ལོབྷམོཧཝསེན དྭིམཱུལཱཏི.

ཨཀུསལཀམྨཔཐཀཐཱ ནིཊྛིཏཱ.

པཱཎཱཏིཔཱཏཱདཱིཧི ¶ པན ཝིརཏིཡོ, ཨནབྷིཛ྄ཛྷཱཨབྱཱཔཱདསམྨཱདིཊྛིཡོ ཙཱཏི ཨིམེ དས ཀུསལཀམྨཔཐཱ ནཱམ. པཱཎཱཏིཔཱཏཱདཱིཧི ཨེཏཱཡ ཝིརམནྟི, སཡཾ ཝཱ ཝིརམཏི, ཝིརམཎམཏྟམེཝ ཝཱ ཨེཏནྟི ཝིརཏི. ཡཱ པཱཎཱཏིཔཱཏཱདཱིཧི ཝིརམནྟསྶ ཀུསལཙིཏྟསམྤཡུཏྟཱ ཝིརཏི, སཱ པབྷེདཏོ ཏིཝིདྷཱ ཧོཏི སམྤཏྟཝིརཏི སམཱདཱནཝིརཏི སམུཙྪེདཝིརཏཱིཏི. ཏཏྠ ཨསམཱདིནྣསིཀྑཱཔདཱནཾ ཨཏྟནོ ཛཱཏིཝཡབཱཧུསཙྩཱདཱིནི པཙྩཝེཀྑིཏྭཱ ‘‘ཨཡུཏྟཾ ཨམྷཱཀཾ ཨེཝརཱུཔཾ པཱཔཾ ཀཱཏུ’’ནྟི སམྤཏྟཝཏྠུཾ ཨཝཱིཏིཀྐམནྟཱནཾ ཨུཔྤཛྫམཱནཱ ཝིརཏི སམྤཏྟཝིརཏི ནཱམ. སམཱདིནྣསིཀྑཱཔདཱནཾ པན སིཀྑཱཔདསམཱདཱནེ ཙ ཏཏུཏྟརི ཙ ཨཏྟནོ ཛཱིཝིཏམྤི ¶ པརིཙྩཛིཏྭཱ ཝཏྠུཾ ཨཝཱིཏིཀྐམནྟཱནཾ ཨུཔྤཛྫམཱནཱ ཝིརཏི སམཱདཱནཝིརཏི ནཱམ. ཨརིཡམགྒསམྤཡུཏྟཱ པན ཝིརཏི སམུཙྪེདཝིརཏི ནཱམ, ཡསྶཱ ཨུཔྤཏྟིཏོ པབྷུཏི ཨརིཡཔུགྒལཱནཾ ‘‘པཱཎཾ གྷཱཏེསྶཱམཱ’’ཏིཨཱདིཙིཏྟམྤི ན ཨུཔྤཛྫཏཱིཏི.

ཨིདཱནི ¶ ཨཀུསལཀམྨཔཐཱནཾ ཝིཡ ཨིམེསཾ ཀུསལཀམྨཔཐཱནཾ དྷམྨཏོ, ཀོཊྛཱསཏོ, ཨཱརམྨཎཏོ, ཝེདནཱཏོ, མཱུལཏོཏི པཉྩཧཱཀཱརེཧི ཝིནིཙྪཡོ ཝེདིཏབྦོ.

ཏཏྠ དྷམྨཏོཏི ཨེཏེསུཔི པཊིཔཱཊིཡཱ སཏྟ ཙེཏནཱཔི ཝཊྚནྟི ཝིརཏིཡོཔི, ཨནྟེ ཏཡོ ཙེཏནཱསམྤཡུཏྟཱཝ.

ཀོཊྛཱསཏོཏི པཊིཔཱཊིཡཱ སཏྟ ཀམྨཔཐཱ ཨེཝ, ནོ མཱུལཱནི, ཨནྟེ ཏཡོ ཀམྨཔཐཱ ཙེཝ མཱུལཱནི ཙ. ཨནབྷིཛ྄ཛྷཱ ཧི མཱུལཾ པཏྭཱ ཨལོབྷོ ཀུསལམཱུལཾ ཧོཏི, ཨབྱཱཔཱདོ ཨདོསོ ཀུསལམཱུལཾ, སམྨཱདིཊྛི ཨམོཧོ ཀུསལམཱུལཾ.

ཨཱརམྨཎཏོཏི པཱཎཱཏིཔཱཏཱདཱིནཾ ཨཱརམྨཎཱནེཝ ཨེཏེསཾ ཨཱརམྨཎཱནི. ཝཱིཏིཀྐམིཏབྦཏོཡེཝ ཧི ཝེརམཎཱི ནཱམ ཧོཏི. ཡཐཱ པན ནིབྦཱནཱརམྨཎོ ཨརིཡམགྒོ ཀིལེསེ པཛཧཏི, ཨེཝཾ ཛཱིཝིཏིནྡྲིཡཱདིཨཱརམྨཎཱཔེཏེ ཀམྨཔཐཱ པཱཎཱཏིཔཱཏཱདཱིནི དུསྶཱིལྱཱནི པཛཧནྟཱིཏི.

ཝེདནཱཏོཏི སབྦེ སུཁཝེདནཱ ཝཱ ཧོནྟི མཛ྄ཛྷཏྟཝེདནཱ ཝཱ. ཀུསལཾ པཏྭཱ ཧི དུཀྑཱ ཝེདནཱ ནཱམ ནཏྠི.

མཱུལཏོཏི པཊིཔཱཊིཡཱ སཏྟ ཉཱཎསམྤཡུཏྟཙིཏྟེན ཝིརམནྟསྶ ཨལོབྷཨདོསཨམོཧཝསེན ཏིམཱུལཱ ¶ ཧོནྟི. ཉཱཎཝིཔྤཡུཏྟཙིཏྟེན ཝིརམནྟསྶ ཨལོབྷཱདོསཝསེན དྭིམཱུལཱ. ཨནབྷིཛ྄ཛྷཱ ཉཱཎསམྤཡུཏྟཙིཏྟེན ཝིརམནྟསྶ ཨདོསཨམོཧཝསེན དྭིམཱུལཱ. ཉཱཎཝིཔྤཡུཏྟཙིཏྟེན ཝིརམནྟསྶ ཨདོསཝསེན ཨེཀམཱུལཱ. ཨལོབྷོ པན ཨཏྟནཱཝ ཨཏྟནོ མཱུལཾ ན ཧོཏི. ཨབྱཱཔཱདེཔི ཨེསེཝ ནཡོ. སམྨཱདིཊྛི ཨལོབྷཱདོསཝསེན དྭིམཱུལཱཝཱཏི.

ཀུསལཀམྨཔཐཀཐཱ ནིཊྛིཏཱ.

༤༡.

ཨེཝཾ དསཀུསལཀམྨཔཐཝསེན སཱིལཾ དསྶེཏྭཱ ཨིདཱནི ནེཀྑམྨཱདཱིནཾ ཨརཧཏྟམགྒཔརིཡོསཱནཱནཾ སཏྟཏིཾསདྷམྨཱནཾ ཝསེན དསྶེཏུཾ ནེཀྑམྨེན ཀཱམཙྪནྡཾ སཾཝརཊྛེན སཱིལཾ, ཨཝཱིཏིཀྐམཊྛེན སཱིལནྟིཨཱདིམཱཧ. ཏཏྠ ཡསྨཱ ནེཀྑམྨེན ཀཱམཙྪནྡཾ སཾཝརཏི ན ཝཱིཏིཀྐམཏི, ཏསྨཱ ནེཀྑམྨཾ སཱིལནྟི ཨདྷིཔྤཱཡོ. པཙྩཏྟཏྠེ ཝཱ ཀརཎཝཙནཾ, ནེཀྑམྨནྟི ཨཏྠོ. ཨེས ¶ ནཡོ ¶ སེསེསུ. པཱལི༹ཡཾ པན ནེཀྑམྨཨབྱཱཔཱདེ དསྶེཏྭཱ ཧེཊྛཱ ཝུཏྟནཡཏྟཱ སེསཾ སངྑིཔིཏྭཱ ཨནྟེ ཨརཧཏྟམགྒོཡེཝ དསྶིཏོ.

ཨེཝཾ སཾཝརཨཝཱིཏིཀྐམཝསེན སཱིལཾ དསྶེཏྭཱ ཨིདཱནི ཏེསཾཡེཝ དྭིནྣཾ པབྷེདདསྶནཏྠཾ པཉྩ སཱིལཱནི པཱཎཱཏིཔཱཏསྶ པཧཱནཾ སཱིལནྟིཨཱདིམཱཧ. ཨེཏྠ ཙ པཱཎཱཏིཔཱཏསྶ པཧཱནཾ སཱིལཾ, པཱཎཱཏིཔཱཏཱ ཝེརམཎཱི སཱིལཾ, པཱཎཱཏིཔཱཏསྶ པཊིཔཀྑཙེཏནཱ སཱིལཾ, པཱཎཱཏིཔཱཏསྶ སཾཝརོ སཱིལཾ, པཱཎཱཏིཔཱཏསྶ ཨཝཱིཏིཀྐམོ སཱིལནྟི ཡོཛནཱ ཀཱཏབྦཱ. པཧཱནནྟི ཙ ཀོཙི དྷམྨོ ནཱམ ནཏྠི ཨཉྙཏྲ ཝུཏྟཔྤཀཱརཱནཾ པཱཎཱཏིཔཱཏཱདཱིནཾ ཨནུཔྤཱདམཏྟཏོ. ཡསྨཱ པན ཏཾ ཏཾ པཧཱནཾ ཏསྶ ཏསྶ ཀུསལསྶ དྷམྨསྶ པཏིཊྛཱནཊྛེན ཨུཔདྷཱརཎཾ ཧོཏི, ཝིཔྤཀིཎྞསབྷཱཝཱཀརཎེན ཙ སམོདྷཱནཾ, ཏསྨཱ པུབྦེ ཝུཏྟེནེཝ ཨུཔདྷཱརཎསམོདྷཱནསངྑཱཏེན སཱིལནཊྛེན སཱིལནྟི ཝུཏྟཾ. ཨིཏརེ ཙཏྟཱརོ དྷམྨཱ ཏཏོ ཏཏོ ཝེརམཎིཝསེན ཏསྶ ཏསྶ སཾཝརཝསེན ཏདུབྷཡསམྤཡུཏྟཙེཏནཱཝསེན ཏཾ ཏཾ ཨཝཱིཏིཀྐམནྟསྶ ཨཝཱིཏིཀྐམཝསེན ཙ ཙེཏསོ པཝཏྟིསབྷཱཝཾ སནྡྷཱཡ ཝུཏྟཱ.

ཨཐ ཝཱ པཧཱནམྤི དྷམྨཏོ ཨཏྠིཡེཝ. ཀཐཾ? པཧཱིཡཏེ ཨནེན པཱཎཱཏིཔཱཏཱདིཔཊིཔཀྑོ, པཛཧཏི ཝཱ ཏཾ པཊིཔཀྑནྟི པཧཱནཾ. ཀིཾ ཏཾ? སབྦེཔི ཀུསལཱ ཁནྡྷཱ. ཨཉྙེ པན ཨཱཙརིཡཱ ‘‘ནེཀྑམྨཱདཱིསུཔི ‘ཝེརམཎཱི སཱིལ’ནྟི ཝཙནམཏྟཾ གཧེཏྭཱ སབྦཀུསལེསུཔི ནིཡཏཡེཝཱཔནཀབྷཱུཏཱ ཝིརཏི ནཱམ ཨཏྠཱི’’ཏི ཝདནྟི, ན ཏཐཱ ཨིདྷཱཏི. ཨེཝམིམེཧི པཧཱནཱདཱིཧི པཉྩཧི པདེཧི ཝིསེསེཏྭཱ པརིཡནྟཱཔརིཡནྟསཱིལདྭཡེ ཨཔརིཡནྟསཱིལམེཝ ¶ ཝུཏྟཾ. ཏསྨཱ ཨེཝ ཧི ཨེཝརཱུཔཱནི སཱིལཱནི ཙིཏྟསྶ ཨཝིཔྤཊིསཱརཱཡ སཾཝཏྟནྟི…པེ… སཙྪིཀཱཏབྦཾ སཙྪིཀརོནྟོ སིཀྑཏཱིཏི ཝུཏྟཾ.

ཏཏྠ ཨཝིཔྤཊིསཱརཱཡ སཾཝཏྟནྟཱིཏི ‘‘སཾཝརོ ཨཝིཔྤཊིསཱརཏྠཱཡཱ’’ཏི (པརི. ༣༦༦) ཙ ‘‘ཨཝིཔྤཊིསཱརཏྠཱནི ཁོ, ཨཱནནྡ, ཀུསལཱནི སཱིལཱནི ཨཝིཔྤཊིསཱརཱནིསཾསཱནཱི’’ཏི (ཨ. ནི. ༡༠.༡; ༡༡.༡) ཙ ཝཙནཏོ ཨཝིཔྤཊིསཱརཏྠཱཡ སཾཝཏྟནྟི. ‘‘ཨཝིཔྤཊིསཱརོ པཱམོཛྫཏྠཱཡཱ’’ཏི (པརི. ༣༦༦) ཙ ‘‘ཡོནིསོ མནསིཀརོཏོ པཱམོཛྫཾ ཛཱཡཏཱི’’ཏི (པཊི. མ. ༡.༧༤) ཙ ཝཙནཏོ པཱམོཛྫཱཡ སཾཝཏྟནྟི. ‘‘པཱམོཛྫཾ པཱིཏཏྠཱཡཱ’’ཏི ¶ (པརི. ༣༦༦) ཙ ‘‘པམུདིཏསྶ པཱིཏི ཛཱཡཏཱི’’ཏི (ཨ. ནི. ༥.༢༦; སཾ. ནི. ༥.༣༧༦; དཱི. ནི. ༣.༣༢༢) ཙ ཝཙནཏོ པཱིཏིཡཱ ¶ སཾཝཏྟནྟི. ‘‘པཱིཏི པསྶདྡྷཏྠཱཡཱ’’ཏི (པརི. ༣༦༦) ཙ ‘‘པཱིཏིམནསྶ ཀཱཡོ པསྶམྦྷཏཱི’’ཏི (ཨ. ནི. ༥.༢༦; སཾ. ནི. ༥.༣༧༦; དཱི. ནི. ༣.༣༢༢) ཙ ཝཙནཏོ པསྶདྡྷིཡཱ སཾཝཏྟནྟི. ‘‘པསྶདྡྷི སུཁཏྠཱཡཱ’’ཏི (པརི. ༣༦༦) ཙ ‘‘པསྶདྡྷཀཱཡོ སུཁཾ ཝེདེཏཱི’’ཏི (ཨ. ནི. ༥.༢༦; སཾ. ནི. ༥.༣༧༦; དཱི. ནི. ༣.༣༢༢) ཙ ཝཙནཏོ སོམནསྶཱཡ སཾཝཏྟནྟི. ཙེཏསིཀཾ སུཁཉྷི སོམནསྶནྟི ཝུཙྩཏི. ཨཱསེཝནཱཡཱཏི བྷུསཱ སེཝནཱ ཨཱསེཝནཱ. ཀསྶ ཨཱསེཝནཱ? ཨནནྟརཾ སོམནསྶཝཙནེན སུཁསྶ ཝུཏྟཏྟཱ སུཁཾ སིདྡྷཾ. ‘‘སུཁིནོ ཙིཏྟཾ སམཱདྷིཡཏཱི’’ཏི (ཨ. ནི. ༥.༢༦; སཾ. ནི. ༥.༣༧༦; དཱི. ནི. ༣.༣༢༢) ཙ ཝཙནཏོ ཏེན སུཁེན སམཱདྷི སིདྡྷོ ཧོཏི. ཨེཝཾ སིདྡྷསྶ སམཱདྷིསྶ ཨཱསེཝནཱ. ཏསྶ སམཱདྷིསྶ ཨཱསེཝནཱཡ སཾཝཏྟནྟི, པགུཎབལཝབྷཱཝཱཡ སཾཝཏྟནྟཱིཏི ཨཏྠོ. བྷཱཝནཱཡཱཏི ཏསྶེཝ སམཱདྷིསྶ ཝུདྡྷིཡཱ. བཧུལཱིཀམྨཱཡཱཏི ཏསྶེཝ སམཱདྷིསྶ པུནཔྤུནཾ ཀིརིཡཱཡ. ཨཝིཔྤཊིསཱརཱདིཔཝཏྟིཡཱ མཱུལཀཱརཎཾ ཧུཏྭཱ སམཱདྷིསྶ སདྡྷིནྡྲིཡཱདིཨལངྐཱརསཱདྷནེན ཨལངྐཱརཱཡ སཾཝཏྟནྟི. ཨཝིཔྤཊིསཱརཱདིཀསྶ སམཱདྷིསམྦྷཱརསྶ སཱདྷནེན པརིཀྑཱརཱཡ སཾཝཏྟནྟི. ‘‘ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ’’ཏིཨཱདཱིསུ (མ. ནི. ༡.༡༩༢) ཝིཡ ཧི ཨེཏྠ སམྦྷཱརཏྠོ པརིཀྑཱརསདྡོ. ‘‘རཐོ སཱིལཔརིཀྑཱརོ, ཛྷཱནཀྑོ ཙཀྐཝཱིརིཡོ’’ཏིཨཱདཱིསུ (སཾ. ནི. ༣.༥༤) པན ཨལངྐཱརཏྠོ. ‘‘སཏྟཧི ནགརཔརིཀྑཱརེཧི སུཔརིཀྑཏཾ ཧོཏཱི’’ཏིཨཱདཱིསུ (ཨ. ནི. ༧.༦༧) པརིཝཱརཏྠོ. ཨིདྷ པན ཨལངྐཱརཔརིཝཱརཱནཾ ཝིསུཾ ཨཱགཏཏྟཱ སམྦྷཱརཏྠོཏི ཝུཏྟཾ. སམྦྷཱརཏྠོ ཙ པཙྩཡཏྠོཏི. མཱུལཀཱརཎབྷཱཝེནེཝ སམཱདྷིསམྤཡུཏྟཕསྶཱདིདྷམྨསམྤཏྟིསཱདྷནེན པརིཝཱརཱཡ སཾཝཏྟནྟི. སམཱདྷིསྶ ཝིཔསྶནཱཡ ཙ པདཊྛཱནབྷཱཝཔཱཔནེན ཝསཱིབྷཱཝཔཱཔནེན ཙ པརིཔུཎྞབྷཱཝསཱདྷནཏོ པཱརིཔཱུརིཡཱ སཾཝཏྟནྟི.

ཨེཝཾ ¶ སཱིལཱུཔནིསྶཡེན སབྦཱཀཱརཔརིཔཱུརཾ སམཱདྷིཾ དསྶེཏྭཱ ཨིདཱནི ‘‘སམཱཧིཏེ ཙིཏྟེ ཡཐཱབྷཱུཏཾ ཛཱནཱཏི པསྶཏི, ཡཐཱབྷཱུཏཾ ཛཱནཾ པསྶཾ ནིབྦིནྡཏི, ནིབྦིནྡཾ ཝིརཛྫཏི, ཝིརཱགཱ ཝིམུཙྩཏཱི’’ཏི (པཊི. མ. ༡.༧༣; དཱི. ནི. ༣.༣༥༩) ཝཙནཏོ སཱིལམཱུལཀཱནི སམཱདྷིཔདཊྛཱནཱནི ཡཐཱབྷཱུཏཉཱཎདསྶནཱདཱིནི དསྶེནྟོ ཨེཀནྟནིབྦིདཱཡཱཏིཨཱདིམཱཧ. ནིབྦིདཱཡ ཧི དསྶིཏཱཡ ཏསྶཱ པདཊྛཱནབྷཱུཏཾ ¶ ཡཐཱབྷཱུཏཉཱཎདསྶནཾ ¶ དསྶིཏམེཝ ཧོཏི. ཏསྨིཉྷི ཨསིདྡྷེ ནིབྦིདཱ ན སིཛ྄ཛྷཏཱིཏི. ཏཱནི པན ཝུཏྟཏྠཱནེཝ. ཡཐཱབྷཱུཏཉཱཎདསྶནཾ པནེཏྠ སཔྤཙྩཡནཱམརཱུཔཔརིགྒཧོ.

ཨེཝཾ ཨམཏམཧཱནིབྦཱནཔརིཡོསཱནཾ སཱིལཔྤཡོཛནཾ དསྶེཏྭཱ ཨིདཱནི ཏསྶ སཱིལསྶ ཨདྷིསཱིལསིཀྑཱབྷཱཝཾ ཏམྨཱུལཀཱ ཙ ཨདྷིཙིཏྟཨདྷིཔཉྙཱསིཀྑཱ དསྶེཏུཀཱམོ ཨེཝརཱུཔཱནཾ སཱིལཱནཾ སཾཝརཔཱརིསུདྡྷི ཨདྷིསཱིལནྟིཨཱདིམཱཧ. ཏཏྠ སཾཝརོཡེཝ པཱརིསུདྡྷི སཾཝརཔཱརིསུདྡྷི. ཨེཝརཱུཔཱནཾ ཨཔརིཡནྟབྷཱུཏཱནཾ ཝིཝཊྚནིསྶིཏཱནཾ སཱིལཱནཾ སཾཝརཔཱརིསུདྡྷི ཝིཝཊྚནིསྶིཏཏྟཱ སེསསཱིལཏོ ཨདྷིཀཾ སཱིལནྟི ཨདྷིསཱིལནྟི ཝུཙྩཏི. སཾཝརཔཱརིསུདྡྷིཡཱ ཋིཏཾ ཙིཏྟནྟི ཨེདིསཱཡ སཱིལསཾཝརཔཱརིསུདྡྷིཡཱ པཏིཊྛིཏཾ ཙིཏྟཾ སུཊྛུ ཨཝིཔྤཊིསཱརཱདཱིནཾ ཨཱཝཧནཏོ ན ཝིཀྑེཔཾ གཙྪཏི, སམཱདྷིསྨིཾ པཏིཊྛཱཏཱིཏི ཨཏྠོ. ཨཝིཀྑེཔོཡེཝ པཱརིསུདྡྷི ཨཝིཀྑེཔཔཱརིསུདྡྷི. སོ སབྦམལཝིརཧིཏོ ནིབྦེདྷབྷཱགིཡོ སམཱདྷི སེསསམཱདྷིཏོ ཨདྷིཀཏྟཱ ཨདྷིཙིཏྟནྟི ཝུཙྩཏི. ཙིཏྟསཱིསེན ཧེཏྠ སམཱདྷི ནིདྡིཊྛོ. སཾཝརཔཱརིསུདྡྷིཾ སམྨཱ པསྶཏཱིཏི པརིསུདྡྷཾ སཱིལསཾཝརཾ ཉཱཏཔརིཉྙཱཝསེན ཏཱིརཎཔརིཉྙཱཝསེན ཙ སམྨཱ པསྶཏི, ཨེཝམེཝ ཨཝིཀྑེཔཔཱརིསུདྡྷིསངྑཱཏཾ པརིསུདྡྷཾ སམཱདྷིཾ སམྨཱ པསྶཏི. ཨེཝཾ པསྶཏོ ཙསྶ དསྶནསངྑཱཏཱ པཱརིསུདྡྷི དསྶནཔཱརིསུདྡྷི. སཱཡེཝ སེསཔཉྙཱཡ ཨདྷིཀཏྟཱ ཨདྷིཔཉྙཱཏི ཝུཙྩཏི. ཡོ ཏཏྠཱཏི ཡོ ཏཏྠ སཾཝརཨཝིཀྑེཔདསྶནེསུ. སཾཝརཊྛོཏི སཾཝརབྷཱཝོ. ཨེཝམེཝ ཨཝིཀྑེཔཊྛདསྶནཊྛཱ ཙ ཝེདིཏབྦཱ. ཨདྷིསཱིལམེཝ སིཀྑཱ ཨདྷིསཱིལསིཀྑཱ. ཨེཝཾ ཨིཏརཱཔི ཝེདིཏབྦཱ.

ཨེཝཾ ཏིསྶོ སིཀྑཱཡོ དསྶེཏྭཱ ཨིདཱནི ཏཱསཾ པཱརིཔཱུརིཀྐམཾ དསྶེཏུཾ ཨིམཱ ཏིསྶོ སིཀྑཱཡོ ཨཱཝཛྫནྟོ སིཀྑཏཱིཏིཨཱདིམཱཧ. ཏསྶཏྠོ – པཙྩེཀཾ པརིཔཱུརེཏུཾ ཨཱཝཛྫནྟོཔི སིཀྑཏི ནཱམ, ཨཱཝཛྫེཏྭཱ ‘‘ཨཡཾ ནཱམ སིཀྑཱ’’ཏི ཛཱནནྟོཔི སིཀྑཏི ནཱམ, ཛཱནིཏྭཱ པུནཔྤུནཾ པསྶནྟོཔི སིཀྑཏི ནཱམ, པསྶིཏྭཱ ཡཐཱདིཊྛཾ པཙྩཝེཀྑནྟོཔི སིཀྑཏི ནཱམ, པཙྩཝེཀྑིཏྭཱ ཏཏྠེཝ ཙིཏྟཾ ཨཙལཾ ཀཏྭཱ པཏིཊྛཔེནྟོཔི སིཀྑཏི ནཱམ, ཏཾཏཾསིཀྑཱསམྤཡུཏྟསདྡྷཱཝཱིརིཡསཏིསམཱདྷིཔཉྙཱཧི སཀསཀཀིཙྩཾ ཀརོནྟོཔི སིཀྑཏི ནཱམ, ཨབྷིཉྙེཡྻཱབྷིཛཱནནཱདིཀཱལེཔི ཏཾ ཏཾ ཀིཙྩཾ ཀརོནྟོ ཏིསྶོཔི སིཀྑཱཡོ སིཀྑཏི ནཱམཱཏི ¶ . པུན ¶ པཉྩ སཱིལཱནཱིཏིཨཱདཱིནི ཝུཏྟཏྠཱནེཝ. ཨརཧཏྟམགྒེན སབྦཀིལེསཱནནྟིཨཱདཱིསུ པན ¶ ཨརཧནྟཱནཾ སུཊྛུ ཝིཔྤཊིསཱརཱདིཨབྷཱཝཏོ ཨཱསེཝནཱདིབྷཱཝཏོ ཙ ཏཱནི པདཱནི ཡུཛྫནྟེཝ. ཨེཀནྟནིབྦིདཱཡཱཏིཨཱདཱིནི པན སཏིཔཊྛཱནསམྨཔྤདྷཱནཱནི ཝིཡ མགྒཀྑཎེཡེཝ ཡོཛེཏབྦཱནི.

༤༢.

སཾཝརཔཱརིསུདྡྷིཾ སམྨཱ པསྶཏི, ཨཝིཀྑེཔཔཱརིསུདྡྷིཾ སམྨཱ པསྶཏཱིཏི ཨིདཾ པན ཝཙནདྭཡཾ ཕལསམཱཔཏྟཏྠཱཡ ཝིཔསྶནཱཝསེན ཡོཛེཏབྦཾ, དུཏིཡཝཙནཾ པན ནིརོདྷསམཱཔཏྟཏྠཱཡ ཝིཔསྶནཱཝསེནཱཔི ཡུཛྫཏི. ཨཱཝཛྫནྟོ སིཀྑཏཱིཏིཨཱདཱིསུ པཉྩསུ ཝཙནེསུ ཨརཧཏོ སིཀྑིཏབྦཱབྷཱཝེཔི ཨསེཀྑསཱིལཀྑནྡྷཱདིསབྷཱཝཏོ ‘‘སིཀྑཏཱི’’ཏི ཝུཏྟནྟི ཝེདིཏབྦཾ. སདྡྷཱཡ ཨདྷིམུཙྩནྟོ སིཀྑཏཱིཏིཨཱདཱིནི པན མགྒཀྑཎཉྙེཝ སནྡྷཱཡ ཝུཏྟཱནི. ཨཉྙཱནིཔི ཨུཔཙཱརཔྤནཱཝིཔསྶནཱམགྒཝསེན ཝུཏྟཱནི ཝཙནཱནི ཡཐཱཡོགཾ ཡོཛེཏབྦཱནཱིཏི.

སཱིལམཡཉཱཎནིདྡེསཝཎྞནཱ ནིཊྛིཏཱ.

༣. སམཱདྷིབྷཱཝནཱམཡཉཱཎནིདྡེསཝཎྞནཱ

༤༣. སམཱདྷིབྷཱཝནཱམཡཉཱཎནིདྡེསེ ¶ ཨཱདིཏོ ཏཱཝ ཨེཀཀཏོ པཊྛཱཡ ཡཱཝ དསཀཱ སམཱདྷིཔྤབྷེདཾ དསྶེནྟོ ཨེཀོ སམཱདྷཱིཏིཨཱདིམཱཧ. ཏཏྠ ཙིཏྟསྶ ཨེཀགྒཏཱཏི ནཱནཱརམྨཎཝིཀྑེཔཱབྷཱཝཏོ ཨེཀཾ ཨཱརམྨཎཾ ཨགྒཾ ཨུཏྟམཾ ཨསྶཱཏི ཨེཀགྒོ, ཨེཀགྒསྶ བྷཱཝོ ཨེཀགྒཏཱ. སཱ པན ཨེཀགྒཏཱ ཙིཏྟསྶ, ན སཏྟསྶཱཏི དསྶནཏྠཾ ‘‘ཙིཏྟསྶཱ’’ཏི ཝུཏྟཾ. དུཀེ ལོཀིཡོཏི ལོཀོ ཝུཙྩཏི ལུཛྫནཔལུཛྫནཊྛེན ཝཊྚཾ, ཏསྨིཾ པརིཡཱཔནྣབྷཱཝེན ལོཀེ ནིཡུཏྟོཏི ལོཀིཡོ. ལོཀུཏྟརོཏི ཨུཏྟིཎྞོཏི ཨུཏྟརོ, ལོཀེ ཨཔརིཡཱཔནྣབྷཱཝེན ལོཀཏོ ཨུཏྟརོཏི ལོཀུཏྟརོ. ཏིཀེ སཝིཏཀྐོ ཙ སོ སཝིཙཱརོ ཙཱཏི སཝིཏཀྐསཝིཙཱརོ. ཨེཝཾ ཨཝིཏཀྐཨཝིཙཱརོ. ཝིཏཀྐཝིཙཱརེསུ ཝིཙཱརོཝ མཏྟཱ པམཱཎཾ ཨེཏསྶཱཏི ཝིཙཱརམཏྟོ, ཝིཙཱརཏོ ཨུཏྠརི ཝིཏཀྐེན སདྡྷིཾ སམྤཡོགཾ ན གཙྪཏཱིཏི ཨཏྠོ. ཨཝིཏཀྐོ ཙ སོ ཝིཙཱརམཏྟོ ཙཱཏི ཨཝིཏཀྐཝིཙཱརམཏྟོ. ཏཱིསུཔི ཝིཙྪེདཾ ཀཏྭཱཔི པཋནྟི. ཙཏུཀྐཔཉྩཀཱ ཝུཏྟཏྠཱ ¶ . ཚཀྐེ པུནཔྤུནཾ ཨུཔྤཛྫནཏོ སཏིཡེཝ ཨནུསྶཏི, པཝཏྟིཏབྦཊྛཱནམྷིཡེཝ ཝཱ པཝཏྟཏྟཱ སདྡྷཱཔབྦཛིཏསྶ ཀུལཔུཏྟསྶ ཨནུརཱུཔཱ སཏཱིཏིཔི ཨནུསྶཏི, བུདྡྷཾ ཨཱརབྦྷ ཨུཔྤནྣཱ ཨནུསྶཏི བཨུདྡྷཱནུསྶཏི. ཨརཧཏཱདིབུདྡྷགུཎཱརམྨཎཱཡ སཏིཡཱ ཨེཏཾ ཨདྷིཝཙནཾ. ཏསྶཱ བུདྡྷཱནུསྶཏིཡཱ ¶ ཝསེན ཙིཏྟསྶ ཨེཀགྒཏཱཡེཝ ཨུདྡྷཙྩསངྑཱཏསྶ ཝིཀྑེཔསྶ པཊིཔཀྑབྷཱཝཏོ ན ཝིཀྑེཔོཏི ཨཝིཀྑེཔོ. དྷམྨཾ ཨཱརབྦྷ ཨུཔྤནྣཱ ཨནུསྶཏི དྷམྨཱནུསྶཏི. སྭཱཀྑཱཏཏཱདིདྷམྨགུཎཱརམྨཎཱཡ སཏིཡཱ ཨེཏཾ ཨདྷིཝཙནཾ. སངྒྷཾ ཨཱརབྦྷ ཨུཔྤནྣཱ ཨནུསྶཏི སངྒྷཱནུསྶཏི. སུཔྤཊིཔནྣཏཱདིསངྒྷགུཎཱརམྨཎཱཡ སཏིཡཱ ཨེཏཾ ཨདྷིཝཙནཾ ¶ . སཱིལཾ ཨཱརབྦྷ ཨུཔྤནྣཱ ཨནུསྶཏི སཱིལཱནུསྶཏི. ཨཏྟནོ ཨཁཎྜཏཱདིསཱིལགུཎཱརམྨཎཱཡ སཏིཡཱ ཨེཏཾ ཨདྷིཝཙནཾ. ཙཱགཾ ཨཱརབྦྷ ཨུཔྤནྣཱ ཨནུསྶཏི ཙཱགཱནུསྶཏི. ཨཏྟནོ མུཏྟཙཱགཏཱདིཙཱགགུཎཱརམྨཎཱཡ སཏིཡཱ ཨེཏཾ ཨདྷིཝཙནཾ. དེཝཏཱ ཨཱརབྦྷ ཨུཔྤནྣཱ ཨནུསྶཏི དེཝཏཱནུསྶཏི. དེཝཏཱ སཀྑིཊྛཱནེ ཋཔེཏྭཱ ཨཏྟནོ སདྡྷཱདིགུཎཱརམྨཎཱཡ སཏིཡཱ ཨེཏཾ ཨདྷིཝཙནཾ.

སཏྟཀེ སམཱདྷིཀུསལཏཱཏི ཨེཀཝིདྷཱདིབྷེདེན ཨནེཀབྷེདེ སམཱདྷིམྷི ‘‘ཨཡམེཝཾཝིདྷོ སམཱདྷི, ཨཡམེཝཾཝིདྷོ སམཱདྷཱི’’ཏི ཚེཀབྷཱཝོ. སམཱདྷིཔརིཙྪེདཀཔཉྙཱཡེཏཾ ཨདྷིཝཙནཾ. སམཱདྷིཨུཔྤཱདནཝིདྷཱནེཔི ཚེཀབྷཱཝོ སམཱདྷིཀུསལཏཱ.

སམཱདྷིསྶ སམཱཔཏྟིཀུསལཏཱཏི ཨུཔྤཱདིཏསྶ སམཱདྷིསྶ སམཱཔཛྫནེ ཚེཀབྷཱཝོ. ཨེཏེན སམཱཔཛྫནཝསིཏཱ ཝུཏྟཱ ཧོཏི.

སམཱདྷིསྶ ཋིཏིཀུསལཏཱཏི སམཱཔནྣསྶ སམཱདྷིསྶ སནྟཏིཝསེན ཡཐཱརུཙི ཋཔནེ ཚེཀབྷཱཝོ. ཨེཏེན ཨདྷིཊྛཱནཝསིཏཱ ཝུཏྟཱ ཧོཏི. ཨཐ ཝཱ ནིམིཏྟགྒཧཎེན ཙསྶ པུན ཏེ ཨཱཀཱརེ སམྤཱདཡཏོ ཨཔྤནཱམཏྟམེཝ ཨིཛ྄ཛྷཏི, ན ཙིརཊྛཱནཾ. ཙིརཊྛཱནཾ པན སམཱདྷིཔརིཔནྠཱནཾ དྷམྨཱནཾ སུཝིསོདྷིཏཏྟཱ ཧོཏི. ཡོ ཧི བྷིཀྑུ ཀཱམཱདཱིནཝཔཙྩཝེཀྑཎཱདཱིཧི ཀཱམཙྪནྡཾ ན སུཊྛུ ཝིཀྑམྦྷེཏྭཱ, ཀཱཡཔསྶདྡྷིཝསེན ཀཱཡདུཊྛུལླཾ ན སུཔྤཊིཔྤསྶདྡྷཾ ཀཏྭཱ, ཨཱརམྦྷདྷཱཏུམནསིཀཱརཱདིཝསེན ཐིནམིདྡྷཾ ན སུཊྛུ པཊིཝིནོདེཏྭཱ, སམཐནིམིཏྟམནསིཀཱརཱདིཝསེན ཨུདྡྷཙྩཀུཀྐུཙྩཾ ན སུཊྛུ སམཱུཧཏཾ ཀཏྭཱ, ཨཉྙེཔི སམཱདྷིཔརིཔནྠེ དྷམྨེ ན སུཊྛུ ཝིསོདྷེཏྭཱ ཛྷཱནཾ སམཱཔཛྫཏི, སོ ཨཝིསོདྷིཏཾ ཨཱསཡཾ པཝིཊྛབྷམརོ ཝིཡ, ཨསུདྡྷཾ ཨུཡྻཱནཾ པཝིཊྛརཱཛཱ ཝིཡ ཙ ཁིཔྤམེཝ ནིཀྑམཏི. ཡོ པན སམཱདྷིཔརིཔནྠེ ¶ དྷམྨེ སུཊྛུ ཝིསོདྷེཏྭཱ ཛྷཱནཾ སམཱཔཛྫཏི, སོ སུཝིསོདྷིཏཾ ཨཱསཡཾ པཝིཊྛབྷམརོ ཝིཡ, སུཔརིསུདྡྷཾ ཨུཡྻཱནཾ པཝིཊྛརཱཛཱ ཝིཡ ཙ སཀལམྤི དིཝསབྷཱགཾ ཨནྟོསམཱཔཏྟིཡཾཡེཝ ཧོཏི. ཏེནཱཧུ པོརཱཎཱ –

‘‘ཀཱམེསུ ཚནྡཾ པཊིགྷཾ ཝིནོདཡེ, ཨུདྡྷཙྩཐཱིནཾ ཝིཙིཀིཙྪཔཉྩམཾ;

ཝིཝེཀཔཱམོཛྫཀརེན ཙེཏསཱ, རཱཛཱཝ སུདྡྷནྟགཏོ ཏཧིཾ རམེ’’ཏི ¶ .

ཏསྨཱ ¶ ‘‘ཙིརཊྛིཏིཀཱམེན པཱརིཔནྠིཀདྷམྨེ སོདྷེཏྭཱ ཛྷཱནཾ སམཱཔཛྫིཏབྦ’’ནྟི ཝུཏྟཏྟཱ ཏཾ ཝིདྷིཾ སམྤཱདེཏྭཱ སམཱདྷིསྶ ཙིརཊྛིཏིཀརཎེ ཚེཀབྷཱཝོཏི ཝུཏྟཾ ཧོཏི.

སམཱདྷིསྶ ཝུཊྛཱནཀུསལཏཱཏི སནྟཏིཝསེན ཡཐཱརུཙི པཝཏྟསྶ སམཱདྷིསྶ ཡཐཱཔརིཙྪིནྣཀཱལེཡེཝ ཝུཊྛཱནེན སམཱདྷིསྶ ཝུཊྛཱནེ ཚེཀབྷཱཝོ. ‘‘ཡསྶ ཧི དྷམྨཾ པུརིསོ ཝིཛཉྙཱ’’ཏིཨཱདཱིསུ (ཛཱ. ༡.༡༠.༡༥༢) ཝིཡ ནིསྶཀྐཏྠེ ཝཱ སཱམིཝཙནཾ ཀཏནྟི ཝེདིཏབྦནྟི. ཨེཏེན ཝུཊྛཱནཝསིཏཱ ཝུཏྟཱ ཧོཏི.

སམཱདྷིསྶ ཀལླཏཱཀུསལཏཱཏི ཨགིལཱནབྷཱཝོ ཨརོགབྷཱཝོ ཀལླཏཱ. གིལཱནོ ཧི ཨཀལླཀོཏི ཝུཙྩཏི. ཝིནཡེཔི ཝུཏྟཾ ‘‘ནཱཧཾ, བྷནྟེ, ཨཀལླཀོ’’ཏི (པཱརཱ. ༡༥༡). ཨནངྒཎསུཏྟཝཏྠསུཏྟེསུ (མ. ནི. ༡.༥༧ ཨཱདཡོ, ༧༠ ཨཱདཡོ) ཝུཏྟཱནཾ ཛྷཱནཔཊིལཱབྷཔཙྩནཱིཀཱནཾ པཱཔཀཱནཾ ཨིཙྪཱཝཙརཱནཾ ཨབྷཱཝེན ཙ ཨབྷིཛ྄ཛྷཱདཱིནཾ ཙིཏྟསྶ ཨུཔཀྐིལེསཱནཾ ཝིགམེན ཙ སམཱདྷིསྶ ཨགིལཱནབྷཱཝཀརཎེ ཚེཀབྷཱཝོ སམཱདྷིསྶ ཀལླཏཱཀུསལཏཱ, ཀིལེསགེལཉྙརཧིཏབྷཱཝེ ཀུསལཏཱཏི ཝུཏྟཾ ཧོཏི. ཨཐ ཝཱ ཀལླཏཱཏི ཀམྨཉྙཏཱ ཀམྨཉྙཏཱཔརིཡཱཡཏྟཱ ཀལླཝཙནསྶ. ‘‘ཡཱ ཙིཏྟསྶ ཨཀལླཏཱ ཨཀམྨཉྙཏཱ’’ཏི (དྷ. ས. ༡༡༦༢) ཧི ཝུཏྟཾ ‘‘ཀལླཙིཏྟཾ མུདུཙིཏྟཾ ཝིནཱིཝརཎཙིཏྟ’’ནྟི (དཱི. ནི. ༡.༢༩༨; མ. ནི. ༢.༣༩༥; མཧཱཝ. ༢༦) ཙ. ཨེཏྠ ཀལླསདྡོ ཀམྨཉྙཏྠོ. ཏསྨཱ ཀསིཎཱནུལོམཏོ ཀསིཎཔཊིལོམཏོ ཀསིཎཱནུལོམཔཊིལོམཏོ ཛྷཱནཱནུལོམཏོ ཛྷཱནཔཊིལོམཏོ ¶ ཛྷཱནཱནུལོམཔཊིལོམཏོ ཛྷཱནུཀྐནྟིཀཏོ ཀསིཎུཀྐནྟིཀཏོ ཛྷཱནཀསིཎུཀྐནྟིཀཏོ ཨངྒསངྐནྟིཏོ ཨཱརམྨཎསངྐནྟིཏོ ཨངྒཱརམྨཎསངྐནྟིཏོ ཨངྒཝཝཏྠཱནཏོ ཨཱརམྨཎཝཝཏྠཱནཏོཏི ཨིམེཧི ཙུདྡསཧི ཨཱཀཱརེཧི, ཨངྒཱརམྨཎཝཝཏྠཱནཏོཏི ཨིམིནཱ སཧ པཉྩདསཧི ཝཱ ཨཱཀཱརེཧི ཙིཏྟཔརིདམནེན སམཱདྷིསྶ ཀམྨཉྙབྷཱཝཀརཎེ ཀུསལབྷཱཝོཏི ཝུཏྟཾ ཧོཏི.

སམཱདྷིསྶ གོཙརཀུསལཏཱཏི སམཱདྷིསྶ གོཙརེསུ ཀསིཎཱདཱིསུ ཨཱརམྨཎེསུ ཏཾ ཏཾ ཛྷཱནཾ སམཱཔཛྫིཏུཀཱམཏཱཡ ཡཐཱརུཙི ཨཱཝཛྫནཀརཎཝསེན ཏེསུ ཨཱརམྨཎེསུ ཚེཀབྷཱཝོ. ཨེཏེན ཀསིཎཱཝཛྫནཝསེན ཨཱཝཛྫནཝསིཏཱ ཝུཏྟཱ ཧོཏི. ཨཐ ཝཱ ཏསྨིཾ ཏསྨིཾ དིསཱབྷཱགེ ཀསིཎཕརཎཝསེན ཨེཝཾ ¶ ཕུཊྛསྶ ཀསིཎསྶ ཙིརཊྛཱནཝསེན ཙ སམཱདྷིསྶ གོཙརེསུ ཚེཀབྷཱཝོ.

སམཱདྷིསྶ ཨབྷིནཱིཧཱརཀུསལཏཱཏི ཨེཀཏྟནཡེན ཧེཊྛཱཧེཊྛཱསམཱདྷིཾ ཨུཔརཱུཔརིསམཱདྷིབྷཱཝཱུཔནཡནེན ¶ ཨབྷིནཱིཧརཎེ ཨབྷིནིནྣཱམནེ ཚེཀབྷཱཝོ. ཨུཔཙཱརཛ྄ཛྷཱནཉྷི ཝསིཔྤཏྟཾ པཋམཛ྄ཛྷཱནཏྠཱཡ ཝིཔསྶནཏྠཱཡ ཝཱ ཨབྷིནཱིཧརཏི, ཨེཝཾ པཋམཛ྄ཛྷཱནཱདཱིནི དུཏིཡཛ྄ཛྷཱནཱདིཨཏྠཱཡ ཝིཔསྶནཏྠཱཡ ཝཱ, ཙཏུཏྠཛ྄ཛྷཱནཾ ཨརཱུཔསམཱཔཏྟཏྠཱཡ ཨབྷིཉྙཏྠཱཡ ཝིཔསྶནཏྠཱཡ ཝཱ, ཨཱཀཱསཱནཉྩཱཡཏནཱདཡོ ཝིཉྙཱཎཉྩཱཡཏནཱདིཨཏྠཱཡ ཝིཔསྶནཏྠཱཡ ཝཱ ཨབྷིནཱིཧརཏཱིཏི ཨེཝཾ སམཱདྷིསྶ ཏཏྠ ཏཏྠ ཨབྷིནཱིཧཱརཀུསལཏཱ. ཡསྨཱ པན ཀུསལཏཱ ནཱམ པཉྙཱ, སཱ སམཱདྷི ན ཧོཏི, ཏསྨཱ སམཱདྷིཔརིཎཱཡཀཔཉྙཱཝསེན སཏྟཝིདྷོ སམཱདྷི ཝུཏྟོཏི ཝེདིཏབྦོ.

ཀེཙི པན ཨཱཙརིཡཱ ‘‘སམཱདྷིཀུསལཏཱཏི ཡེན མནསིཀཱརེན ཙིཏྟཾ ན ཝིཀྑིཔཏི, ཏཏྠ ཀུསལཏཱ. སམཱཔཏྟིཀུསལཏཱཏི ཡེན མནསིཀཱརེན སམཱཔཛྫནྟསྶ ཛྷཱནངྒཱནི པཱཏུབྷཝནྟི, ཏཏྠ ཀུསལཏཱ. ཋིཏིཀུསལཏཱཏི ཡེན མནསིཀཱརེན ཨཔྤིཏོ སམཱདྷི ན ཝིཀྑིཔཏི, ཏཏྠ ཀུསལཏཱ. ཝུཊྛཱནཀུསལཏཱཏི ནཱིཝརཎཝུཊྛཱནཾ ཛཱནཱཏི པཋམཛ྄ཛྷཱནེ, ཨངྒཝུཊྛཱནཾ ཛཱནཱཏི ཏཱིསུ ཛྷཱནེསུ, ཨཱརམྨཎཝུཊྛཱནཾ ཛཱནཱཏི ཨརཱུཔསམཱཔཏྟཱིསུ, ཝིཀྑེཔཝུཊྛཱནཾ ཛཱནཱཏི ཝིསཡཱདྷིམཏྟེསུ, སཙྪནྡཝུཊྛཱནཾ ཛཱནཱཏི པརིཡནྟཀཱལེ ཙ ཨཝསཱནཀརཎཱིཡཀཱལེ ཙ. ཀལླཏཱཀུསལཏཱཏི ཙིཏྟཕཱསུཏཱཡ ¶ སརཱིརཕཱསུཏཱཡ ཨཱཧཱརཕཱསུཏཱཡ སེནཱསནཕཱསུཏཱཡ པུགྒལཕཱསུཏཱཡ ཙ སམཱདྷིསྶ ཀལླཏཱ ཧོཏཱིཏི ཛཱནཱཏི. གོཙརཀུསལཏཱཏི ཨཱརམྨཎསྶ པརིཙྪེདཾ ཀཱཏུཾ ཛཱནཱཏི, དིསཱཕརཎཾ ཀཱཏུཾ ཛཱནཱཏི, ཝཌྜྷེཏུཾ ཛཱནཱཏི. ཨབྷིནཱིཧཱརཀུསལཏཱཏི ཏཏྠ ཏཏྠ སམྨཱ མནསིཀཱརེན ཙིཏྟཾ ཨབྷིནཱིཧརཏི ཨབྷིནིནྣཱམེཏི, ཨུཔཙཱརེ ཝསིཔྤཏྟེ པཋམཛ྄ཛྷཱནེ ཨབྷིནཱིཧརཏི, ཨེཝཾ ཨུཔརཱུཔརིཛྷཱནེསུ ཨབྷིཉྙཱསུ ཨརཱུཔསམཱཔཏྟཱིསུ ཝིཔསྶནཱསུ ཙ ཨབྷིནཱིཧརཏི. ཨེཝཾ ཏཏྠ ཏཏྠ ཨབྷིནཱིཧཱརཀུསལཏཱ’’ཏི ཨེཝམེཏེསཾ པདཱནཾ ཨཏྠཾ ཝཎྞཡནྟི.

ཨཊྛཀཾ ཝུཏྟཏྠམེཝ. ནཝཀེ རཱུཔཱཝཙརོཏི ‘‘ཀཏམེ དྷམྨཱ རཱུཔཱཝཙརཱ? ཧེཊྛཏོ ¶ བྲཧྨཔཱརིསཛྫཾ པརིཡནྟཾ ཀརིཏྭཱ ཨུཔརིཏོ ཨཀནིཊྛེ དེཝེ ཨནྟོཀརིཏྭཱ’’ཏིཨཱདིནཱ (དྷ. ས. ༡༢༨༩) ནཡེན ཝུཏྟེསུ རཱུཔཱཝཙརདྷམྨེསུ པརིཡཱཔནྣོ. ཏཏྲཱཡཾ ཝཙནཏྠོ – རཱུཔཀྑནྡྷསངྑཱཏཾ རཱུཔཾ ཨེཏྠ ཨཝཙརཏི, ན ཀཱམོཏི རཱུཔཱཝཙརོ. རཱུཔཀྑནྡྷོཔི ཧི རཱུཔནྟི ཝུཙྩཏི ‘‘རཱུཔཀྑནྡྷོ རཱུཔ’’ནྟིཨཱདཱིསུ (ཡམ. ༡.ཁནྡྷཡམཀ.༢) ཝིཡ. སོ པན བྲཧྨཔཱརིསཛྫབྲཧྨཔུརོཧིཏམཧཱབྲཧྨཱནཾ པརིཏྟཱབྷཨཔྤམཱཎཱབྷཨཱབྷསྶརཱནཾ པརིཏྟསུབྷཨཔྤམཱཎསུབྷསུབྷཀིཎྷཱནཾ ཨསཉྙསཏྟཝེཧཔྥལཱནཾ ཨཝིཧཱཏཔྤསུདསྶསུདསྶཱིཨཀནིཊྛཱནཉྩ ཝསེན སོལ༹སཝིདྷོ པདེསོ. སོ རཱུཔཱཝཙརསངྑཱཏོ པདེསོ ཨུཏྟརཔདལོཔཾ ཀཏྭཱ ‘‘རཱུཔ’’ནྟི ཝུཙྩཏི, ཏསྨིཾ རཱུཔེ ཨཝཙརཏཱིཏི རཱུཔཱཝཙརོ. རཱུཔབྷཝོ ཝཱ རཱུཔཾ, ཏསྨིཾ ཨཝཙརཏཱིཏི རཱུཔཱཝཙརཾ. ཀིཉྩཱཔི ཧི ཨེསོ སམཱདྷི ཀཱམབྷཝེཔི ཨཝཙརཏི, ཡཐཱ པན སངྒཱམེ ཨཝཙརཎཏོ སངྒཱམཱཝཙརོཏི ལདྡྷནཱམོ ནཱགོ ནགརེ ཙརནྟོཔི ¶ སངྒཱམཱཝཙརོཏི ཝུཙྩཏི, ཐལཙརཱ ཛལཙརཱ ཙ པཱཎིནོ ཨཐལེ ཨཛལེ ཙ ཋིཏཱཔི ཐལཙརཱ ཛལཙརཱཏི ཝུཙྩནྟི, ཨེཝམཡཾ ཨཉྙཏྠ ཨཝཙརནྟོཔི རཱུཔཱཝཙརོཏི ཝུཏྟོ. ཨཔིཙ རཱུཔབྷཝསངྑཱཏེ རཱུཔེ པཊིསནྡྷིཾ ཨཝཙཱརེཏཱིཏིཔི རཱུཔཱཝཙརོ. ཧཱིནོཏི ལཱམཀོ. ཧཱིནུཏྟམཱནཾ མཛ྄ཛྷེ བྷཝོ མཛ྄ཛྷོ. མཛ྄ཛྷིམོཏིཔི པཱཋོ, སོཡེཝཏྠོ. པདྷཱནབྷཱཝཾ ནཱིཏོ པཎཱིཏོ, ཨུཏྟམོཏི ཨཏྠོ. ཨེཏེ པན ཨཱཡཱུཧནཝསེན ཝེདིཏབྦཱ. ཡསྶ ཧི ཨཱཡཱུཧནཀྑཎེ ཚནྡོ ཝཱ ཧཱིནོ ཧོཏི ཝཱིརིཡཾ ཝཱ ཙིཏྟཾ ཝཱ ཝཱིམཾསཱ ཝཱ, སོ ཧཱིནོ ནཱམ. ཡསྶ ཏེ དྷམྨཱ མཛ྄ཛྷིམཱ, སོ མཛ྄ཛྷིམོ. ཡསྶ ¶ པཎཱིཏཱ, སོ པཎཱིཏོ. ཨུཔྤཱདིཏམཏྟོ ཝཱ ཧཱིནོ, ནཱཏིསུབྷཱཝིཏོ མཛ྄ཛྷིམོ, ཨཏིསུབྷཱཝིཏོ ཝསིཔྤཏྟོ པཎཱིཏོ. ཨརཱུཔཱཝཙརོ རཱུཔཱཝཙརེ ཝུཏྟནཡཱནུསཱརེན ཝེདིཏབྦོ.

སུཉྙཏོ སམཱདྷཱིཏིཨཱདཱིསུ ‘‘སབྦེ སངྑཱརཱ ཨནིཙྩཱ དུཀྑཱ ཨནཏྟཱ’’ཏི ཝིཔསྶནཱཔཊིཔཱཊིཡཱ ཝིཔསྶནྟསྶ ཨནཏྟཱནུཔསྶནཱཡ མགྒཝུཊྛཱནེ ཛཱཏེ ཡསྨཱ སཱ ཝིཔསྶནཱ ཨཏྟཝིརཧིཏེསུ སངྑཱརེསུ སུཉྙཏོ པཝཏྟཱ, ཏསྨཱ སུཉྙཏཱ ནཱམ ཧོཏི. ཏཱཡ སིདྡྷོ ཨརིཡམགྒསམཱདྷི སུཉྙཏོ སམཱདྷི ནཱམ ཧོཏི, སུཉྙཏཝསེན པཝཏྟསམཱདྷཱིཏི ཨཏྠོ. ཝིཔསྶནཱཡ པཝཏྟཱཀཱརེན ཧི སོ པཝཏྟཏི. ཨནིཙྩཱནུཔསྶནཱཡ མགྒཝུཊྛཱནེ ཛཱཏེ ཡསྨཱ སཱ ཝིཔསྶནཱ ནིཙྩནིམིཏྟཔཊིཔཀྑཝསེན ¶ པཝཏྟཱ, ཏསྨཱ ཨནིམིཏྟཱ ནཱམ ཧོཏི. ཏཱཡ སིདྡྷོ ཨརིཡམགྒསམཱདྷི ཨནིམིཏྟོ སམཱདྷི ནཱམ ཧོཏི, ནིཙྩནིམིཏྟཝིརཧིཏོ སམཱདྷཱིཏི ཨཏྠོ. ཝིཔསྶནཱཡ པཝཏྟཱཀཱརེན ཧི སོ པཝཏྟཏི. དུཀྑཱནུཔསྶནཱཡ མགྒཝུཊྛཱནེ ཛཱཏེ ཡསྨཱ སཱ ཝིཔསྶནཱ པཎིདྷིཔཊིཔཀྑཝསེན པཝཏྟཱ, ཏསྨཱ ཨཔྤཎིཧིཏཱ ནཱམ ཧོཏི. ཏཱཡ སིདྡྷོ ཨརིཡམགྒསམཱདྷི ཨཔྤཎིཧིཏོ སམཱདྷི ནཱམ ཧོཏི, པཎིདྷིཝིརཧིཏོ སམཱདྷཱིཏི ཨཏྠོ. ཝིཔསྶནཱཡ པཝཏྟཱཀཱརེན ཧི སོ པཝཏྟཏི. ཏཱདིསཱ ཨེཝ ཏཡོ ཕལསམཱདྷཡོཔི ཨེཏེཧིཡེཝ ཏཱིཧི སམཱདྷཱིཧི གཧིཏཱ ཧོནྟཱིཏི ཝེདིཏབྦཱ. ལོཀུཏྟརསམཱདྷཱིནཾ པན པཎཱིཏཏྟཱ ཧཱིནཱདིབྷེདོ ན ཨུདྡྷཊོ.

དསཀེ ཨུདྡྷུམཱཏཀསཉྙཱཝསེནཱཏིཨཱདཱིསུ བྷསྟཱ ཝིཡ ཝཱཡུནཱ ཨུདྡྷཾ ཛཱིཝིཏཔརིཡཱདཱནཱ ཡཐཱནུཀྐམཾ སམུགྒཏེན སཱུནབྷཱཝེན ཨུདྡྷུམཱཏཏྟཱ ཨུདྡྷུམཱཏཾ, ཨུདྡྷུམཱཏམེཝ ཨུདྡྷུམཱཏཀཾ, པཊིཀཱུལཏྟཱ ཝཱ ཀུཙྪིཏཾ ཨུདྡྷུམཱཏནྟི ཨུདྡྷུམཱཏཀཾ. ཏཐཱརཱུཔསྶ ཚཝསརཱིརསྶེཏཾ ཨདྷིཝཙནཾ. ཝིནཱིལཾ ཝུཙྩཏི ཝིཔརིབྷིནྣཝཎྞཾ, ཝིནཱིལམེཝ ཝིནཱིལཀཾ, པཊིཀཱུལཏྟཱ ཝཱ ཀུཙྪིཏཾ ཝིནཱིལནྟི ཝིནཱིལཀཾ. མཾསུསྶདཊྛཱནེསུ རཏྟཝཎྞསྶ, པུབྦསནྣིཙཡཊྛཱནེསུ སེཏཝཎྞསྶ, ཡེབྷུཡྻེན ཙ ནཱིལཝཎྞསྶ ནཱིལཊྛཱནེ ནཱིལསཱཊཀཔཱརུཏསྶེཝ ཚཝསརཱིརསྶེཏཾ ཨདྷིཝཙནཾ. པརིབྷིནྣཊྛཱནེསུ ཝིསྶནྡམཱནཔུབྦཾ ¶ ཝིཔུབྦཾ, ཝིཔུབྦམེཝ ཝིཔུབྦཀཾ, པཊིཀཱུལཏྟཱ ཝཱ ཀུཙྪིཏཾ ཝིཔུབྦནྟི ཝིཔུབྦཀཾ. ཏཐཱརཱུཔསྶ ཚཝསརཱིརསྶེཏཾ ཨདྷིཝཙནཾ. ཝིཙྪིདྡཾ ཝུཙྩཏི དྭིདྷཱ ཚིནྡནེན ཨཔདྷཱརིཏཾ, ཝིཙྪིདྡམེཝ ཝིཙྪིདྡཀཾ, པཊིཀཱུལཏྟཱ ཝཱ ཀུཙྪིཏཾ ཝིཙྪིདྡནྟི ¶ ཝིཙྪིདྡཀཾ. ཝེམཛ྄ཛྷེ ཚིནྣསྶ ཚཝསརཱིརསྶེཏཾ ཨདྷིཝཙནཾ. ཨིཏོ ཙ ཨེཏྟོ ཙ ཝིཝིདྷཱཀཱརེན སོཎསིངྒཱལཱདཱིཧི ཁཱཡིཏནྟི ཝིཀྑཱཡིཏཾ, ཝིཁཱཡིཏནྟི ཝཏྟབྦེ ཝིཀྑཱཡིཏནྟི ཝུཏྟཾ. ཝིཀྑཱཡིཏམེཝ ཝིཀྑཱཡིཏཀཾ, པཊིཀཱུལཏྟཱ ཝཱ ཀུཙྪིཏཾ ཝིཀྑཱཡིཏནྟི ཝིཀྑཱཡིཏཀཾ. ཏཐཱརཱུཔསྶ ཚཝསརཱིརསྶེཏཾ ཨདྷིཝཙནཾ. ཝིཝིདྷཾ ཁིཏྟཾ ཝིཀྑིཏྟཾ, ཝིཀྑིཏྟམེཝ ཝིཀྑིཏྟཀཾ, པཊིཀཱུལཏྟཱ ཝཱ ཀུཙྪིཏཾ ཝིཀྑིཏྟནྟི ཝིཀྑིཏྟཀཾ. ཨཉྙེན ཧཏྠཾ ཨཉྙེན པཱདཾ ཨཉྙེན སཱིསནྟི ཨེཝཾ ཏཏོ ཏཏོ ཁིཏྟསྶ ཚཝསརཱིརསྶེཏཾ ཨདྷིཝཙནཾ. ཧཏཉྩ ཏཾ པུརིམནཡེནེཝ ¶ ཝིཀྑིཏྟཀཉྩཱཏི ཧཏཝིཀྑིཏྟཀཾ. ཀཱཀཔདཱཀཱརེན ཨངྒཔཙྩངྒེསུ སཏྠེན ཧནིཏྭཱ ཝུཏྟནཡེན ཝིཀྑིཏྟསྶ ཚཝསརཱིརསྶེཏཾ ཨདྷིཝཙནཾ. ལོཧིཏཾ ཀིརཏི ཝིཀྑིཔཏི ཨིཏོ ཙིཏོ ཙ པགྒྷརཏཱིཏི ལོཧིཏཀཾ. པགྒྷརིཏལོཧིཏམཀྑིཏསྶ ཚཝསརཱིརསྶེཏཾ ཨདྷིཝཙནཾ. པུལ༹ཝཱ ཝུཙྩནྟི ཀིམཡོ, པུལ༹ཝེ ཀིརཏཱིཏི པུལ༹ཝཀཾ. ཀིམིཔརིཔུཎྞསྶ ཚཝསརཱིརསྶེཏཾ ཨདྷིཝཙནཾ. ཨཊྛིཡེཝ ཨཊྛིཀཾ, པཊིཀཱུལཏྟཱ ཝཱ ཀུཙྪིཏཾ ཨཊྛཱིཏི ཨཊྛིཀཾ. ཨཊྛིསངྑལིཀཱཡཔི ཨེཀཊྛིཀསྶཔི ཨེཏཾ ཨདྷིཝཙནཾ. ཨིམཱནི ཙ པན ཨུདྡྷུམཱཏཀཱདཱིནི ནིསྶཱཡ ཨུཔྤནྣནིམིཏྟཱནམྤི ནིམིཏྟེསུ པཊིལདྡྷཛ྄ཛྷཱནཱནམྤི ཨེཏཱནེཝ ནཱམཱནི. ཨིདྷ པན ཨུདྡྷུམཱཏཀནིམིཏྟེ པཊིཀཱུལཱཀཱརགཱཧིཀཱ ཨཔྤནཱཝསེན ཨུཔྤནྣཱ སཉྙཱ ཨུདྡྷུམཱཏཀསཉྙཱ, ཏསྶཱ ཨུདྡྷུམཱཏཀསཉྙཱཡ ཝསེན ཨུདྡྷུམཱཏཀསཉྙཱཝསེན. སེསེསུཔི ཨེསེཝ ནཡོ. པཉྩཔཉྙཱས སམཱདྷཱིཏི ཨེཀཀཱདིཝསེན ཝུཏྟཱ.

༤༤. ཨེཝཾ ཨེཀཀཱདིཝསེན སམཱདྷིཔྤབྷེདཾ དསྶེཏྭཱ ཨིདཱནི ཨཉྙེནཔི པརིཡཱཡེན སམཱདྷིཾ དསྶེཏུཀཱམོ ཨཔིཙཱཏི ཨཉྙཾ པརིཡཱཡཱརམྦྷཾ དསྶེཏྭཱ པཉྩཝཱིསཏཱིཏིཨཱདིམཱཧ. ཏཏྠ སམཱདྷིསྶ སམཱདྷིཊྛཱཏི སམཱདྷིསྶ སམཱདྷིབྷཱཝེ སབྷཱཝཱ, ཡེཧི སབྷཱཝེཧི སོ སམཱདྷི ཧོཏི, ཏེ ཏསྨིཾ ཨཏྠཱ ནཱམ. པརིགྒཧཊྛེན སམཱདྷཱིཏི སདྡྷཱདཱིཧི ཨིནྡྲིཡེཧི པརིགྒཧིཏཏྟཱ ཏསྨཱ པརིགྒཧིཏསབྷཱཝེན སམཱདྷི. ཏཱནེཝ ཙ ཨིནྡྲིཡཱནི ཨཉྙམཉྙཔརིཝཱརཱནི ཧོནྟི, བྷཱཝནཱཔཱརིཔཱུརིཡཱ པརིཔུཎྞཱནི ཙ ཧོནྟི. ཏསྨཱ པརིཝཱརཊྛེན པརིཔཱུརཊྛེན སམཱདྷི. ཏེསཾཡེཝ སམཱདྷིཝསེན ཨེཀཱརམྨཎམཔེཀྑིཏྭཱ ཨེཀགྒཊྛེན, ནཱནཱརམྨཎཝིཀྑེཔཱབྷཱཝམཔེཀྑིཏྭཱ ཨཝིཀྑེཔཊྛེན, ལོཀུཏྟརསྶེཝ མཧཏཱ ཝཱིརིཡབལཔགྒཧེན ¶ པཏྟབྦཏྟཱ ལོཀུཏྟརམགྒསྶེཝ ཙ པརིཧཱནིཝསེན ཝིསཱརཱབྷཱཝཏོ ཧེཊྛཱ གཧིཏཔགྒཧཊྛཨཝིསཱརཊྛཱ ཨིདྷ ན གཧིཏཱཏི ཝེདིཏབྦཱ. ཀིལེསཀཱལུསྶིཡསྶཱབྷཱཝེན ཨནཱཝིལཊྛེན སམཱདྷི. ཨཝིཀམྤཏྟཱ ཨནིཉྫནཊྛེན སམཱདྷི. ཝིཀྑམྦྷནཝསེན སམུཙྪེདཝསེན ཝཱ ཀིལེསེཧི ཝིམུཏྟཏྟཱ ཨཱརམྨཎེ ཙ ཨདྷིམུཏྟཏྟཱ ཝིམུཏྟཊྛེན སམཱདྷི.

ཨེཀཏྟུཔཊྛཱནཝསེན ¶ ཙིཏྟསྶ ཋིཏཏྟཱཏི སམཱདྷིཡོགེནེཝ ཨེཀཱརམྨཎེ བྷུསཾ པཏིཊྛཱནཝསེན ཙིཏྟསྶ ཨཱརམྨཎེ ནིཙྩལབྷཱཝེན པཏིཊྛིཏཏྟཱ. ཨཊྛསུ ¶ ཡུགལེསུ ཨེསཏི ནེསཏི, ཨཱདིཡཏི ནཱདིཡཏི, པཊིཔཛྫཏི ན པཊིཔཛྫཏཱིཏི ཨིམཱནི ཏཱིཎི ཡུགལཱནི ཨཔྤནཱཝཱིཐིཏོ པུབྦབྷཱགེ ཨུཔཙཱརསྶ མུདུམཛ྄ཛྷཱདྷིམཏྟཏཱཝསེན ཝུཏྟཱནཱིཏི ཝེདིཏབྦཱནི, ཛྷཱཡཏི ཛྷཱཔེཏཱིཏི ཨིདཾ ཨཔྤནཱཝཱིཐིཡཾ ཨུཔཙཱརཝསེན ཝེདིཏབྦཾ. ཨེསིཏཏྟཱ ནེསིཏཏྟཱ, ཨཱདིནྣཏྟཱ ཨནཱདིནྣཏྟཱ, པཊིཔནྣཏྟཱ ནཔྤཊིཔནྣཏྟཱ, ཛྷཱཏཏྟཱ ན ཛྷཱཔིཏཏྟཱཏི ཨིམཱནི ཙཏྟཱརི ཡུགལཱནི ཨཔྤནཱཝསེན ཝུཏྟཱནཱིཏི ཝེདིཏབྦཱནི.

ཏཏྠ སམཾ ཨེསཏཱིཏི སམཱདྷཱིཏིཨཱདཱིསུ སམནྟི ཨཔྤནཾ. སཱ ཧི པཙྩནཱིཀདྷམྨེ སམེཏི ནཱསེཏཱིཏི སམཱ, པཙྩནཱིཀཝིསམཱབྷཱཝཏོ ཝཱ སམབྷཱུཏཱཏི སམཱ. ཏཾ སམཾ ཨེསཏི ཨཛ྄ཛྷཱསཡཝསེན གཝེསཏི. ཨིཏིསདྡོ ཀཱརཎཏྠོ, ཡསྨཱ སམཾ ཨེསཏི, ཏསྨཱ སམཱདྷཱིཏི ཨཏྠོ. ཝིསམཾ ནེསཏཱིཏི ཏཾ ཏཾ ཛྷཱནཔཙྩནཱིཀསངྑཱཏཾ ཝིསམཾ ན ཨེསཏི. མུདུབྷཱུཏོ ཧི པུབྦབྷཱགསམཱདྷི ཨཱདིབྷཱུཏཏྟཱ སམཾ ཨེསཏི, ཝིསམཾ ནེསཏི ནཱམ. མཛ྄ཛྷིམབྷཱུཏོ ཐིརབྷཱུཏཏྟཱ སམཾ ཨཱདིཡཏི, ཝིསམཾ ནཱདིཡཏི ནཱམ. ཨདྷིམཏྟབྷཱུཏོ ཨཔྤནཱཝཱིཐིཡཱ ཨཱསནྣབྷཱུཏཏྟཱ སམཾ པཊིཔཛྫཏི, ཝིསམཾ ནཔྤཊིཔཛྫཏི ནཱམ. སམཾ ཛྷཱཡཏཱིཏི བྷཱཝནཔུཾསཀཝཙནཾ, སམཾ ཧུཏྭཱ ཛྷཱཡཏི, སམེན ཝཱ ཨཱཀཱརེན ཛྷཱཡཏཱིཏི ཨཏྠོ. ཨཔྤནཱཝཱིཐིཡཉྷི སམཱདྷི པཙྩནཱིཀདྷམྨཝིགམེན སནྟཏྟཱ, སནྟཱཡ ཨཔྤནཱཡ ཨནུཀཱུལབྷཱཝེན ཙ ཋིཏཏྟཱ སམེནཱཀཱརེན པཝཏྟཏི. ཛྷཱཡཏཱིཏི ཙ པཛྫལཏཱིཏི ཨཏྠོ ‘‘ཨེཏེ མཎྜལམཱལེ༹ དཱིཔཱ ཛྷཱཡནྟི (དཱི. ནི. ༡.༡༥༩) སབྦརཏྟིཾ, སབྦརཏྟིཡོ ཙ ཏེལཔྤདཱིཔོ ཛྷཱཡཏི, ཏེལཔྤདཱིཔོ ཙེཏྠ ཛྷཱཡེཡྻཱ’’ཏིཨཱདཱིསུ (སཾ. ནི. ༤.༢༥༥-༢༥༦) ཝིཡ. སམཾ ཛཱཡཏཱིཏིཔི པཱཋོ ¶ , སམེནཱཀཱརེན ཨུཔྤཛྫཏཱིཏི ཨཏྠོ. ཛྷཱཡཏི ཛྷཱཔེཏཱིཏི ཡུགལཏྟཱ པན པུརིམཔཱཋོཝ སུནྡརཏརོ. ཛྷཱཔེཏཱིཏི ཙ དཧཏཱིཏི ཨཏྠོ. སོ ཧི སམཱདྷིཔཙྩནཱིཀདྷམྨེ དཱུརཏརཀརཎེན དཧཏི ནཱམ. ཨེསནཱནེསནཱདཱིནཾ པན ཨཔྤནཱཡ སིདྡྷཏྟཱ ‘‘ཨེསིཏཏྟཱ ནེསིཏཏྟཱ’’ཏིཨཱདཱིཧི ཨཔྤནཱསམཱདྷི ཝུཏྟོ. སམཾ ཛྷཱཏཏྟཱཏི སམཾ ཛལིཏཏྟཱ. སམཾ ཛཱཏཏྟཱཏིཔི པཱཋོ. ཨིཏི ཨིམེསཾ ཨཊྛནྣཾ ཡུགལཱནཾ ཝསེན སོལ༹ས, པུརིམཱ ཙ ནཝཱཏི ཨིམེ པཉྩཝཱིསཏི སམཱདྷིསྶ སམཱདྷིཊྛཱ.

སམོ ¶ ཙ ཧིཏོ ཙ སུཁོ ཙཱཏི སམཱདྷཱིཏི ཨིདཾ པན པཉྩཝཱིསཏིཡཱ ཨཱཀཱརེཧི སཱདྷིཏསྶ སམཱདྷིསྶ ཨཏྠསཱདྷནཏྠཾ ཝུཏྟཾ. ཏཏྠ སམོཏི སམསདྡསྶ, སཾསདྡསྶ ཝཱ ཨཏྠོ. སོ ཧི པཙྩནཱིཀཀྑོབྷཝིསམཝིརཧིཏཏྟཱ སམོ. ཧིཏོཏི ཨཱདྷིསདྡསྶ ཨཏྠོ, ཨཱརམྨཎེ ཨཱཧིཏོ ནིཙྩལབྷཱཝཀརཎེན པཏིཊྛཱཔིཏོཏི ཨདྷིཔྤཱཡོ. ཨུབྷཡེན སམོ ཙ ཨཱཧིཏོ ཙཱཏི སམཱདྷཱིཏི ¶ ཝུཏྟཾ ཧོཏི. སུཁོཏི སནྟཊྛེན སུཁོ. ‘‘ཡཱཡཾ, བྷནྟེ, ཨདུཀྑམསུཁཱ ཝེདནཱ, སནྟསྨིཾ ཨེསཱ པཎཱིཏེ སུཁེ ཝུཏྟཱ བྷགཝཏཱ’’ཏི (མ. ནི. ༢.༨༨) ཙ ‘‘ཨུཔེཀྑཱ པན སནྟཏྟཱ, སུཁམིཙྩེཝ བྷཱསིཏཱ’’ཏི ཙ ཝུཏྟཏྟཱ ཏེན སནྟཏྠེན སུཁསདྡེན ཨུཔེཀྑཱསཧགཏསམཱདྷིཔི གཧིཏོ ཧོཏི. ཨནིཡཱམེན ཧི སབྦསམཱདྷཡོ ཨིདྷ ཝུཙྩནྟི. ཏེན ཙ སུཁསདྡེན ཨཱཧིཏབྷཱཝསྶ ཀཱརཎཾ ཝུཏྟཾ ཧོཏི. ཡསྨཱ སནྟོ, ཏསྨཱ ཨེཀཱརམྨཎེ ཨཱཧིཏོཏི ཨདྷིཔྤཱཡོ ཝེདིཏབྦོཏི.

སམཱདྷིབྷཱཝནཱམཡཉཱཎནིདྡེསཝཎྞནཱ ནིཊྛིཏཱ.

༤. དྷམྨཊྛིཏིཉཱཎནིདྡེསཝཎྞནཱ

༤༥. དྷམྨཊྛིཏིཉཱཎནིདྡེསེ ¶ ཨཝིཛྫཱསངྑཱརཱནཾ ཨུཔྤཱདཊྛིཏཱིཏིཨཱདཱིསུ ཏིཊྛནྟི ཨེཏཱཡ སངྑཱརཱཏི ཋིཏི. ཀཱ སཱ? ཨཝིཛྫཱ. སཱ ཧི སངྑཱརཱནཾ ཨུཔྤཱདཱཡ ནིབྦཏྟིཡཱ ཋིཏི ཀཱརཎནྟི ཨུཔྤཱདཊྛིཏི. ཨུཔྤནྣཱནཾ པཝཏྟིཡཱཔི ཀཱརཎནྟི པཝཏྟཊྛིཏི. ཀིཉྩཱཔི ཧི ཛནཀཔཙྩཡསྶ ཛནནཀྑཎེཡེཝ ཀིཙྩཱནུབྷཱཝོ ཧོཏི, ཏེན པན ཛནིཏཱནཾཡེཝ པཝཏྟཏྟཱ སཀཀྑཎེ པཝཏྟིཡཱཔི ཀཱརཎཾ ནཱམ ཧོཏི, སནྟཏིཝསེན ཝཱ པཝཏྟིཡཱ ཀཱརཎནྟི ཨཏྠོ ¶ . པཝཏྟནྟི ཙ ནཔུཾསཀེ བྷཱཝཝཙནམེཏཾ, ཏསྨཱ པཝཏྟཾ པཝཏྟཱིཏི ཨཏྠཏོ ཨེཀཾ. པཝཏྟིསདྡསྶ པན པཱཀཊཏྟཱ ཏེན ཡོཛེཏྭཱ ཨཏྠོ ཝུཏྟོ. བྷཱཝེཔི ཋིཏིསདྡསྶ སིཛ྄ཛྷནཏོ ན ཨིདྷ བྷཱཝེ ཋིཏིསདྡོ, ཀཱརཎེ ཋིཏིསདྡོཏི དསྶནཏྟཾ ནིམིཏྟཊྛིཏཱིཏི ཝུཏྟཾ, ནིམིཏྟབྷཱུཏཱ ཋིཏཱིཏི ཨཏྠོ, ཀཱརཎབྷཱུཏཱཏི ཝུཏྟཾ ཧོཏི. ན ཀེཝལཾ ནིམིཏྟམཏྟཾ ཧོཏི, ཨཐ ཁོ སངྑཱརཛནནེ སབྱཱཔཱརཱ ཝིཡ ཧུཏྭཱ ཨཱཡཱུཧཏི ཝཱཡམཏཱིཏི པཙྩཡསམཏྠཏཾ དསྶེནྟོ ཨཱཡཱུཧནཊྛིཏཱིཏི ཨཱཧ, ཨཱཡཱུཧནབྷཱུཏཱ ཋིཏཱིཏི ཨཏྠོ. ཡསྨཱ ཨཝིཛྫཱ སངྑཱརེ ཨུཔྤཱདཡམཱནཱ ཨུཔྤཱདེ སཾཡོཛེཏི ནཱམ, གྷཊེཏཱིཏི ཨཏྠོ. སངྑཱརེ པཝཏྟཡམཱནཱ པཝཏྟིཡཾ པལིབུནྡྷཏི ནཱམ, བནྡྷཏཱིཏི ཨཏྠོ. ཏསྨཱ སཉྙོགཊྛིཏི པལིབོདྷཊྛིཏཱིཏི ཝུཏྟཱ. སཉྙོགབྷཱུཏཱ ཋིཏི, པལིབོདྷབྷཱུཏཱ ཋིཏཱིཏི ཨཏྠོ. ཡསྨཱ ཨཝིཛྫཱཝ སངྑཱརེ ཨུཔྤཱདཡམཱནཱ ཨུཔྤཱདཱཡ པཝཏྟིཡཱ ཙ མཱུལཀཱརཎཊྛེན སམུདཡོ ནཱམ, སམུདཡབྷཱུཏཱ ཋིཏཱིཏི སམུདཡཊྛིཏི, མཱུལཀཱརཎབྷཱུཏཱ ཋིཏཱིཏི ཨཏྠོ. ཨཝིཛྫཱཝ སངྑཱརཱནཾ ཨུཔྤཱདེ ཛནཀཔཙྩཡཏྟཱ, པཝཏྟིཡཾ ཨུཔཏྠམྦྷཀཔཙྩཡཏྟཱ ཧེཏུཊྛིཏི པཙྩཡཊྛིཏཱིཏི ཝུཏྟཱ, ཧེཏུབྷཱུཏཱ ཋིཏི, པཙྩཡབྷཱུཏཱ ཋིཏཱིཏི ཨཏྠོ. ཛནཀཔཙྩཡོ ཧི ¶ ཧེཏཱུཏི, ཨུཔཏྠམྦྷཀོ པཙྩཡོཏི ཝུཙྩཏི. ཨེཝཾ སེསེསུཔི ཡོཛེཏབྦཾ.

བྷཝོ ¶ ཛཱཏིཡཱ, ཛཱཏི ཛརཱམརཎསྶཱཏི ཨེཏྠ པན ཨུཔྤཱདཊྛིཏི སཉྙོགཊྛིཏི ཧེཏུཊྛིཏཱིཏི ཨུཔྤཱདཝསེན ཡོཛིཏཱནི པདཱནི ཛཱཏིཛརཱམརཎཝནྟཱནཾ ཁནྡྷཱནཾ ཝསེན པརིཡཱཡེན ཝུཏྟཱནཱིཏི ཝེདིཏབྦཱནི. ཀེཙི པན ‘‘ཨུཔྤཱདཱཡ ཋིཏི ཨུཔྤཱདཊྛིཏཱི’’ཏི ཨེཝམཱདིནཱ ནཡེནེཏྠ ཨཏྠཾ ཝཎྞཡནྟི. ཨཝིཛྫཱ པཙྩཡོཏི ཨཝིཛྫཱཡ སངྑཱརཱནཾ པཙྩཡབྷཱཝཾ ཨཔེཀྑིཏྭཱ ཝུཏྟཾ. ཨཝིཛྫཱཡཔི པཙྩཡསམྦྷཱུཏཏྟཱ ཏསྶཱ ཨཔི པཙྩཡཔརིགྒཧཎདསྶནཏྠཾ ཨུབྷོཔེཏེ དྷམྨཱ པཙྩཡསམུཔྤནྣཱཏི པཙྩཡཔརིགྒཧེ པཉྙཱཏི ཝུཏྟཾ. ཨེཝཾ སེསེསུཔི ཡོཛེཏབྦཾ. ཛཱཏི པཙྩཡོ, ཛརཱམརཎཾ པཙྩཡསམུཔྤནྣནྟི པན པརིཡཱཡེན ཝུཏྟཾ. ཨཏཱིཏམྤི ཨདྡྷཱནནྟི ཨཏིཀྐནྟམྤི ཀཱལཾ. ཨནཱགཏམྤི ཨདྡྷཱནནྟི ཨཔྤཏྟམྤི ཀཱལཾ. ཨུབྷཡཏྠཱཔི ཨཙྩནྟསཾཡོགཏྠེ ཨུཔཡོགཝཙནཾ.

༤༦. ཨིདཱནི ནཝཱཀཱརཝཱརཱནནྟརཾ ཏེ ནཝཱཀཱརེ ཝིཧཱཡ ཧེཏུཔཊིཙྩཔཙྩཡཔདེཧེཝ ཡོཛེཏྭཱ ཨཝིཛྫཱ ཧེཏུ, སངྑཱརཱ ཧེཏུསམུཔྤནྣཱཏིཨཱདཡོ ¶ ཏཡོ ཝཱརཱ ནིདྡིཊྛཱ. ནཝཱཀཱརཝཱརེ ཛནཀཨུཔཏྠམྦྷཀཝསེན པཙྩཡོ ཝུཏྟོ. ཨིདྷ པན ཧེཏུཝཱརསྶ པཙྩཡཝཱརསྶ ཙ ཝིསུཾ ཨཱགཏཏྟཱ ཧེཏཱུཏི ཛནཀཔཙྩཡཏྟཾ, པཙྩཡོཏི ཨུཔཏྠམྦྷཀཔཙྩཡཏྟཾ ཝེདིཏབྦཾ ཨེཀེཀསྶཱཔི ཨཝིཛྫཱདིཀསྶ པཙྩཡསྶ ཨུབྷཡཐཱ སམྦྷཝཏོ. པཊིཙྩཝཱརེ ཨཝིཛྫཱ པཊིཙྩཱཏི ཨཏྟནོ ཨུཔྤཱདེ སངྑཱརཱནཾ ཨཝིཛྫཱཔེཀྑཏྟཱ སངྑཱརེཧི ཨཝིཛྫཱ པཊིམུཁཾ ཨེཏབྦཱ གནྟབྦཱཏི པཊིཙྩཱ. ཨེཏེན ཨཝིཛྫཱཡ སངྑཱརུཔྤཱདནསམཏྠཏཱ ཝུཏྟཱ ཧོཏི. སངྑཱརཱ པཊིཙྩསམུཔྤནྣཱཏི སངྑཱརཱ ཨཝིཛྫཾ པཊིཙྩ ཏདབྷིམུཁཾ པཝཏྟནཏོ པཊིམུཁཾ ཀཏྭཱ ན ཝིཧཱཡ སམཾ ཨུཔྤནྣཱ. ཨེཝཾ སེསེསུཔི ལིངྒཱནུརཱུཔེན ཡོཛེཏབྦཾ. ཨཝིཛྫཱ པཊིཙྩཱཏི ཨུསྶུཀྐཝསེན ཝཱ པཱཋོ, ཨཏྠོ པནེཏྠ ཨཝིཛྫཱ ཨཏྟནོ པཙྩཡེ པཊིཙྩ པཝཏྟཱཏི པཱཋསེསཝསེན ཡོཛེཏབྦོ. ཨེཝཾ སེསེསུཔི. ཙཏཱུསུཔི ཙ ཨེཏེསུ ཝཱརེསུ དྭཱདསནྣཾ པཊིཙྩསམུཔྤཱདངྒཱནཾ པཙྩཡསྶེཝ ཝསེན དྷམྨཊྛིཏིཉཱཎསྶ ནིདྡིསིཏབྦཏྟཱ ཨཝིཛྫཱདཱིནཾ ཨེཀཱདསནྣཾཡེཝ ཨངྒཱནཾ ཝསེན དྷམྨཊྛིཏིཉཱཎཾ ནིདྡིཊྛཾ, ཛརཱམརཎསྶ པན ཨནྟེ ¶ ཋིཏཏྟཱ ཏསྶ ཝསེན ན ནིདྡིཊྛཾ. ཛརཱམརཎསྶཱཔི སོཀཔརིདེཝདུཀྑདོམནསྶུཔཱཡཱསཱནཾ པཙྩཡཏྟཱ ཛརཱམརཎཾ ཏེསཾ པཙྩཡཾ ཀཏྭཱ ཨུཔཔརིཀྑམཱནསྶ ཏསྶཱཔི ཛརཱམརཎསྶ ཝསེན དྷམྨཊྛིཏིཉཱཎཾ ཡུཛྫཏེཝ.

༤༧. ཨིདཱནི ཏཱནེཝ དྭཱདས པཊིཙྩསམུཔྤཱདངྒཱནི ཝཱིསཏིཨཱཀཱརཝསེན ཝིབྷཛིཏྭཱ ཙཏུསངྑེཔཏིཡདྡྷཏིསནྡྷིཡོ དསྶེཏྭཱ དྷམྨཊྛིཏིཉཱཎཾ ནིདྡིསིཏུཀཱམོ པུརིམཀམྨབྷཝསྨིནྟིཨཱདིམཱཧ. ཏཏྠ པུརིམཀམྨབྷཝསྨིནྟི པུརིམེ ཀམྨབྷཝེ, ཨཏཱིཏཛཱཏིཡཾ ཀམྨབྷཝེ ཀརིཡམཱནེཏི ཨཏྠོ. མོཧོ ཨཝིཛྫཱཏི ཡོ ཏདཱ དུཀྑཱདཱིསུ མོཧོ, ཡེན མཱུལ༹ྷོ ཀམྨཾ ཀརོཏི, སཱ ཨཝིཛྫཱ. ཨཱཡཱུཧནཱ སངྑཱརཱཏི ཏཾ ཀམྨཾ ཀརོནྟསྶ པུརིམཙེཏནཱཡོ, ཡཐཱ ‘‘དཱནཾ དསྶཱམཱི’’ཏི ཙིཏྟཾ ¶ ཨུཔྤཱདེཏྭཱ མཱསམྤི སཾཝཙྪརམྤི དཱནཱུཔཀརཎཱནི སཛྫེནྟསྶ ཨུཔྤནྣཱ པུརིམཙེཏནཱཡོ. པཊིགྒཱཧཀཱནཾ པན ཧཏྠེ དཀྑིཎཾ པཏིཊྛཱཔཡཏོ ཙེཏནཱ བྷཝོཏི ཝུཙྩཏི. ཨེཀཱཝཛྫནེསུ ཝཱ ཚསུ ཛཝནེསུ ཙེཏནཱ ཨཱཡཱུཧནཱ སངྑཱརཱ ནཱམ, སཏྟམཛཝནེ ཙེཏནཱ བྷཝོ. ཡཱ ཀཱཙི ཝཱ པན ཙེཏནཱ བྷཝོ, ཏཾསམྤཡུཏྟཱ ཨཱཡཱུཧནཱ སངྑཱརཱ ནཱམ.

ནིཀནྟི ཏཎྷཱཏི ཡཱ ཀམྨཾ ཀརོནྟསྶ ཏསྶ ཕལེ ཨུཔཔཏྟིབྷཝེ ནིཀཱམནཱ པཏྠནཱ, སཱ ཏཎྷཱ ནཱམ. ཨུཔགམནཾ ཨུཔཱདཱནནྟི ཡཾ ཀམྨབྷཝསྶ པཙྩཡབྷཱུཏཾ ‘‘ཨིམསྨིཾ ནཱམ ཀམྨེ ཀཏེ ཀཱམཱ ¶ སམྤཛྫནྟཱི’’ཏི ཝཱ ‘‘ཨིདཾ ཀཏྭཱ ཨསུཀསྨིཾ ནཱམ ཋཱནེ ཀཱམེ སེཝིསྶཱམཱི’’ཏི ཝཱ ‘‘ཨཏྟཱ ཨུཙྪིནྣོ སུཨུཙྪིནྣོ ཧོཏཱི’’ཏི ཝཱ ‘‘སུཁཱི ཧོཏིཾ ཝིགཏཔརིལཱ༹ཧོ’’ཏི ཝཱ ‘‘སཱིལབྦཏཾ སུཁེན པརིཔཱུརཏཱི’’ཏི ཝཱ པཝཏྟཾ ཨུཔགམནཾ དལ༹ྷགཧཎཾ, ཨིདཾ ཨུཔཱདཱནཾ ནཱམ. ཙེཏནཱ བྷཝོཏི ཨཱཡཱུཧནཱཝསཱནེ ཝུཏྟཱ ཙེཏནཱ བྷཝོ ནཱམ. པུརིམཀམྨབྷཝསྨིནྟི ཨཏཱིཏཛཱཏིཡཱ ཀམྨབྷཝེ ཀརིཡམཱནེ པཝཏྟཱ. ཨིདྷ པཊིསནྡྷིཡཱ པཙྩཡཱཏི པཙྩུཔྤནྣཔཊིསནྡྷིཡཱ པཙྩཡབྷཱུཏཱ.

ཨིདྷ པཊིསནྡྷི ཝིཉྙཱཎནྟི ཡཾ པཙྩུཔྤནྣབྷཝསྶ བྷཝནྟརཔཊིསནྡྷཱནཝསེན ཨུཔྤནྣཏྟཱ པཊིསནྡྷཱིཏི ཝུཙྩཏི, ཏཾ ཝིཉྙཱཎཾ. ཨོཀྐནྟི ནཱམརཱུཔནྟི ཡཱ གབྦྷེ རཱུཔཱརཱུཔདྷམྨཱནཾ ཨོཀྐནྟི ཨཱགནྟྭཱ པཝིསནཾ ཝིཡ, ཨིདཾ ནཱམརཱུཔཾ. པསཱདོ ཨཱཡཏནནྟི ཡོ པསནྣབྷཱཝོ, ཨིདཾ ཨཱཡཏནཾ. ཛཱཏིགྒཧཎེན ¶ ཨེཀཝཙནཾ ཀཏཾ. ཨེཏེན ཙཀྑཱདཱིནི པཉྩཱཡཏནཱནི ཝུཏྟཱནི. ‘‘པབྷསྶརམིདཾ, བྷིཀྑཝེ, ཙིཏྟཾ, ཏཉྩ ཁོ ཨཱགནྟུཀེཧི ཨུཔཀྐིལེསེཧི ཨུཔཀྐིལིཊྛ’’ནྟི (ཨ. ནི. ༡.༤༩) ཨེཏྠ བྷཝངྒཙིཏྟཾ ཨདྷིཔྤེཏནྟི ཝཙནཏོ ཨིདྷཱཔི མནཱཡཏནསྶ ཝིཔཱཀབྷཱུཏཏྟཱ, ཏསྶ ཙ ཀིལེསཀཱལུསྶིཡཱབྷཱཝེན པསནྣཏྟཱ པསཱདཝཙནེན མནཱཡཏནམྤི ཝུཏྟནྟི ཝེདིཏབྦཾ. ཕུཊྛོ ཕསྶོཏི ཡོ ཨཱརམྨཎཾ ཕུཊྛོ ཕུསནྟོ ཨུཔྤནྣོ, ཨཡཾ ཕསྶོ. ཝེདཡིཏཾ ཝེདནཱཏི ཡཾ པཊིསནྡྷིཝིཉྙཱཎེན ཝཱ སལཱ༹ཡཏནཔཙྩཡེན ཝཱ ཕསྶེན སཧ ཨུཔྤནྣཾ ཝིཔཱཀཝེདཡིཏཾ, ཨཡཾ ཝེདནཱ. ཨིདྷུཔཔཏྟིབྷཝསྨིཾ པུརེཀཏསྶ ཀམྨསྶ པཙྩཡཱཏི པཙྩུཔྤནྣེ ཝིཔཱཀབྷཝེ ཨཏཱིཏཛཱཏིཡཾ ཀཏསྶ ཀམྨསྶ པཙྩཡེན པཝཏྟནྟཱིཏི ཨཏྠོ.

ཨིདྷ པརིཔཀྐཏྟཱ ཨཱཡཏནཱནནྟི པརིཔཀྐཱཡཏནསྶ ཀམྨཀརཎཀཱལེ མོཧཱདཡོ དསྶིཏཱ. ཨཱཡཏིཾ པཊིསནྡྷིཡཱཏི ཨནཱགཏེ པཊིསནྡྷིཡཱ. ཨཱཡཏིཾ པཊིསནྡྷི ཝིཉྙཱཎནྟིཨཱདཱིནི ཝུཏྟཏྠཱནི.

ཀཐཾ པན དྭཱདསཧི པཊིཙྩསམུཔྤཱདངྒེཧི ཨིམེ ཝཱིསཏི ཨཱཀཱརཱ གཧིཏཱ ཧོནྟཱིཏི? ཨཝིཛྫཱ ¶ སངྑཱརཱཏི ཨིམེ དྭེ ཨཏཱིཏཧེཏུཡོ སརཱུཔཏོ ཝུཏྟཱ. ཡསྨཱ པན ཨཝིདྭཱ པརིཏསྶཏི, པརིཏསྶིཏོ ཨུཔཱདིཡཏི, ཏསྶུཔཱདཱནཔཙྩཡཱ བྷཝོ, ཏསྨཱ ཏེཧི དྭཱིཧི གཧིཏེཧི ཏཎྷུཔཱདཱནབྷཝཱཔི གཧིཏཱཝ ཧོནྟི. པཙྩུཔྤནྣེ ཝིཉྙཱཎནཱམརཱུཔསལཱ༹ཡཏནཕསྶཝེདནཱ སརཱུཔཏོ ཝུཏྟཱཡེཝ. ཏཎྷུཔཱདཱནབྷཝཱ པཙྩུཔྤནྣཧེཏུཡོ སརཱུཔཏོ ཝུཏྟཱ ¶ . བྷཝེ པན གཧིཏེ ཏསྶ པུབྦབྷཱགཱ ཏཾསམྤཡུཏྟཱ ཝཱ སངྑཱརཱ གཧིཏཱཝ ཧོནྟི, ཏཎྷུཔཱདཱནགྒཧཎེན ཙ ཏཾསམྤཡུཏྟཱ. ཡཱཡ ཝཱ མཱུལ༹ྷོ ཀམྨཾ ཀརོཏི, སཱ ཨཝིཛྫཱ གཧིཏཱཝ ཧོཏི. ཨནཱགཏེ ཛཱཏི ཛརཱམརཎནྟི དྭེ སརཱུཔེན ཝུཏྟཱནི, ཛཱཏིཛརཱམརཎགྒཧཎེནེཝ པན ཝིཉྙཱཎཱདཱིནི པཉྩ ཨནཱགཏཕལཱནི གཧིཏཱནེཝ ཧོནྟི. ཏེསཾཡེཝ ཧི ཛཱཏིཛརཱམརཎཱནཱིཏི ཨེཝཾ དྭཱདསཧི ཨངྒེཧི ཝཱིསཏི ཨཱཀཱརཱ གཧིཏཱ ཧོནྟི.

‘‘ཨཏཱིཏེ ཧེཏཝོ པཉྩ, ཨིདཱནི ཕལཔཉྩཀཾ;

ཨིདཱནི ཧེཏཝོ པཉྩ, ཨཱཡཏིཾ ཕལཔཉྩཀ’’ནྟི. –

གཱཐཱཡ ཨཡམེཝཏྠོ ཝུཏྟོ. ཨིཏིམེཏི ¶ ཨིཏི ཨིམེ. ཨིཏི ཨིམེཏི ཝཱ པཱཋོ.

ཙཏུསངྑེཔེཏི ཙཏུརོ རཱསཱི. ཨཏཱིཏེ པཉྩ ཧེཏུདྷམྨཱ ཨེཀོ ཧེཏུསངྑེཔོ, པཙྩུཔྤནྣེ པཉྩ ཕལདྷམྨཱ ཨེཀོ ཕལསངྑེཔོ, པཙྩུཔྤནྣེ པཉྩ ཧེཏུདྷམྨཱ ཨེཀོ ཧེཏུསངྑེཔོ, ཨནཱགཏེ པཉྩ ཕལདྷམྨཱ ཨེཀོ ཕལསངྑེཔོ.

ཏཡོ ཨདྡྷེཏི ཏཡོ ཀཱལེ. པཋམཔཉྩཀཝསེན ཨཏཱིཏཀཱལོ, དུཏིཡཏཏིཡཔཉྩཀཝསེན པཙྩུཔྤནྣཀཱལོ, ཙཏུཏྠཔཉྩཀཝསེན ཨནཱགཏཀཱལོ ཝེདིཏབྦོ.

ཏིསནྡྷིནྟི ཏཡོ སནྡྷཡོ ཨསྶཱཏི ཏིསནྡྷི, ཏཾ ཏིསནྡྷིཾ. ཨཏཱིཏཧེཏུཔཙྩུཔྤནྣཕལཱནམནྟརཱ ཨེཀོ ཧེཏུཕལསནྡྷི, པཙྩུཔྤནྣཕལཨནཱགཏཧེཏཱུནམནྟརཱ ཨེཀོ ཕལཧེཏུསནྡྷི, པཙྩུཔྤནྣཧེཏུཨནཱགཏཕལཱནམནྟརཱ ཨེཀོ ཧེཏུཕལསནྡྷི.

པཊིཙྩསམུཔྤཱདཔཱལི༹ཡཾ སརཱུཔཏོ ཨཱགཏཝསེན པན ཨཝིཛྫཱསངྑཱརཱ ཨེཀོ སངྑེཔོ, ཝིཉྙཱཎནཱམརཱུཔསལཱ༹ཡཏནཕསྶཝེདནཱ དུཏིཡོ, ཏཎྷུཔཱདཱནབྷཝཱ ཏཏིཡོ, ཛཱཏིཛརཱམརཎཾ ཙཏུཏྠོ. ཨཝིཛྫཱསངྑཱརཱཏི དྭེ ཨངྒཱནི ཨཏཱིཏཀཱལཱནི, ཝིཉྙཱཎཱདཱིནི བྷཝཱཝསཱནཱནི ཨཊྛ པཙྩུཔྤནྣཀཱལཱནི ¶ , ཛཱཏིཛརཱམརཎནྟི དྭེ ཨནཱགཏཀཱལཱནི. སངྑཱརཝིཉྙཱཎཱནཾ ཨནྟརཱ ཨེཀོ ཧེཏུཕལསནྡྷི, ཝེདནཱཏཎྷཱནམནྟརཱ ཨེཀོ ཕལཧེཏུསནྡྷི, བྷཝཛཱཏཱིནམནྟརཱ ཨེཀོ ཧེཏུཕལསནྡྷི.

ཝཱིསཏིཡཱ ¶ ཨཱཀཱརེཧཱིཏི ཝཱིསཏིཡཱ ཀོཊྛཱསེཧི. ཙཏུསངྑེཔེ ཙ ཏཡོ ཨདྡྷེ ཙ ཏིསནྡྷིཾ པཊིཙྩསམུཔྤཱདཉྩ ཝཱིསཏིཡཱ ཨཱཀཱརེཧི ཛཱནཱཏཱིཏི སམྦནྡྷོ.

ཛཱནཱཏཱིཏི སུཏཱནུསཱརེན བྷཱཝནཱརམྦྷཉཱཎེན ཛཱནཱཏི. པསྶཏཱིཏི ཉཱཏམེཝ ཙཀྑུནཱ དིཊྛཾ ཝིཡ ཧཏྠཏལེ ཨཱམལཀཾ ཝིཡ ཙ ཕུཊཾ ཀཏྭཱ ཉཱཎེནེཝ པསྶཏི. ཨཉྙཱཏཱིཏི དིཊྛམརིཡཱདེནེཝ ཨཱསེཝནཾ ཀརོནྟོ ཉཱཎེནེཝ ཛཱནཱཏི. མརིཡཱདཏྠོ ཧི ཨེཏྠ ཨཱཀཱརོ. པཊིཝིཛ྄ཛྷཏཱིཏི བྷཱཝནཱཔཱརིཔཱུརིཡཱ ནིཊྛཾ པཱཔེནྟོ ཉཱཎེནེཝ པཊིཝེདྷཾ ཀརོཏི. སལཀྑཎཝསེན ཝཱ ཛཱནཱཏི, སརསཝསེན པསྶཏི, པཙྩུཔཊྛཱནཝསེན ཨཉྙཱཏི, པདཊྛཱནཝསེན པཊིཝིཛ྄ཛྷཏི.

ཏཏྠ པཊིཙྩསམུཔྤཱདོཏི པཙྩཡདྷམྨཱ ཝེདིཏབྦཱ. པཊིཙྩསམུཔྤནྣཱ དྷམྨཱཏི ཏེཧི ཏེཧི པཙྩཡེཧི ནིབྦཏྟདྷམྨཱ. ཀཐམིདཾ ཛཱནིཏབྦནྟི ཙེ? བྷགཝཏོ ཝཙནེན. བྷགཝཏཱ ཧི པཊིཙྩསམུཔྤཱདཔཊིཙྩསམུཔྤནྣདྷམྨདེསནཱསུཏྟེ ¶ –

‘‘ཀཏམོ ཙ, བྷིཀྑཝེ, པཊིཙྩསམུཔྤཱདོ, ཛཱཏིཔཙྩཡཱ, བྷིཀྑཝེ, ཛརཱམརཎཾ, ཨུཔྤཱདཱ ཝཱ ཏཐཱགཏཱནཾ ཨནུཔྤཱདཱ ཝཱ ཏཐཱགཏཱནཾ ཋིཏཱཝ སཱ དྷཱཏུ དྷམྨཊྛིཏཏཱ དྷམྨནིཡཱམཏཱ ཨིདཔྤཙྩཡཏཱ, ཏཾ ཏཐཱགཏོ ཨབྷིསམྦུཛ྄ཛྷཏི ཨབྷིསམེཏི, ཨབྷིསམྦུཛ྄ཛྷིཏྭཱ ཨབྷིསམེཏྭཱ ཨཱཙིཀྑཏི དེསེཏི པཉྙཱཔེཏི པཊྛཔེཏི ཝིཝརཏི ཝིབྷཛཏི ཨུཏྟཱནཱིཀརོཏི ‘པསྶཐཱ’ཏི ཙཱཧ. ཛཱཏིཔཙྩཡཱ, བྷིཀྑཝེ, ཛརཱམརཎཾ, བྷཝཔཙྩཡཱ, བྷིཀྑཝེ, ཛཱཏི…པེ… ཨཝིཛྫཱཔཙྩཡཱ, བྷིཀྑཝེ, སངྑཱརཱ. ཨུཔྤཱདཱ ཝཱ ཏཐཱགཏཱནཾ…པེ… ཨུཏྟཱནཱིཀརོཏི ‘པསྶཐཱ’ཏི ཙཱཧ. ཨཝིཛྫཱཔཙྩཡཱ, བྷིཀྑཝེ, སངྑཱརཱ. ཨིཏི ཁོ, བྷིཀྑཝེ, ཡཱ ཏཏྲཏ ཐཏཱ ཨཝིཏཐཏཱ ཨནཉྙཐཏཱ ཨིདཔྤཙྩཡཏཱ. ཨཡཾ ཝུཙྩཏི, བྷིཀྑཝེ, པཊིཙྩསམུཔྤཱདོ’’ཏི (སཾ. ནི. ༢.༢༠) –

ཨེཝཾ པཊིཙྩསམུཔྤཱདཾ དེསེནྟེན ཏཐཏཱདཱིཧི ཝེཝཙནེཧི པཙྩཡདྷམྨཱཝ པཊིཙྩསམུཔྤཱདོཏི ཝུཏྟཱ. ཏསྨཱ ཛརཱམརཎཱདཱིནཾ པཙྩཡལཀྑཎོ པཊིཙྩསམུཔྤཱདོ, དུཀྑཱནུབནྡྷནརསོ ཀུམྨགྒཔཙྩུཔཊྛཱནོ, ཨཡམྤི སཔཙྩཡཏྟཱ ཨཏྟནོ ཝིསེསཔཙྩཡཔདཊྛཱནོ.

ཨུཔྤཱདཱ ¶ ¶ ཝཱ ཨནུཔྤཱདཱ ཝཱཏི ཨུཔྤཱདེ ཝཱ ཨནུཔྤཱདེ ཝཱ, ཏཐཱགཏེསུ ཨུཔྤནྣེསུཔི ཨནུཔྤནྣེསུཔཱིཏི ཨཏྠོ. ཋིཏཱཝ སཱ དྷཱཏཱུཏི ཋིཏོཝ སོ པཙྩཡསབྷཱཝོ, ན ཀདཱཙི ཛཱཏིཛརཱམརཎསྶ པཙྩཡོ ན ཧོཏཱིཏི ཨཏྠོ. དྷམྨཊྛིཏཏཱ དྷམྨནིཡཱམཏཱ ཨིདཔྤཙྩཡཏཱཏི ཛཱཏིཔཙྩཡོཡེཝ. ཛཱཏིཔཙྩཡེན ཧི ཛརཱམརཎསངྑཱཏོ པཙྩཡསམུཔྤནྣདྷམྨོ ཏདཱཡཏྟཏཱཡ ཏིཊྛཏི, ཛཱཏིཔཙྩཡོཝ ཛརཱམརཎདྷམྨཾ ནིཡམེཏི, ཏསྨཱ ཛཱཏི ‘‘དྷམྨཊྛིཏཏཱ དྷམྨནིཡཱམཏཱ’’ཏི ཝུཙྩཏི. ཛཱཏིཡེཝ ཨིམསྶ ཛརཱམརཎསྶ པཙྩཡོཏི ཨིདཔྤཙྩཡོ, ཨིདཔྤཙྩཡོཝ ཨིདཔྤཙྩཡཏཱ. ཏནྟི ཏཾ པཙྩཡཾ. ཨབྷིསམྦུཛ྄ཛྷཏཱིཏི ཉཱཎེན ཨབྷིསམྦུཛ྄ཛྷཏི. ཨབྷིསམེཏཱིཏི ཉཱཎེན ཨབྷིསམཱགཙྪཏི. ཨཱཙིཀྑཏཱིཏི ཀཐེཏི. དེསེཏཱིཏི དསྶེཏི. པཉྙཱཔེཏཱིཏི ཛཱནཱཔེཏི. པཊྛཔེཏཱིཏི ཉཱཎམུཁེ ཋཔེཏི. ཝིཝརཏཱིཏི ཝིཝརིཏྭཱ དསྶེཏི. ཝིབྷཛཏཱིཏི ཝིབྷཱགཏོ དསྶེཏི. ཨུཏྟཱནཱིཀརོཏཱིཏི པཱཀཊཾ ཀརོཏི. ཨིཏི ཁོཏི ཨེཝཾ ཁོ. ཡཱ ཏཏྲཱཏི ཡཱ ཏེསུ ‘‘ཛཱཏིཔཙྩཡཱ ཛརཱམརཎ’’ནྟིཨཱདཱིསུ ¶ . སོ པནཱཡཾ པཊིཙྩསམུཔྤཱདོ ཏེཧི ཏེཧི པཙྩཡེཧི ཨནཱུནཱདྷིཀེཧེཝ ཏསྶ ཏསྶ དྷམྨསྶ སམྦྷཝཏོ ཏཐཏཱཏི, སཱམགྒིཾ ཨུཔགཏེསུ པཙྩཡེསུ མུཧུཏྟམྤི ཏཏོ ནིབྦཏྟནདྷམྨཱནཾ ཨསམྦྷཝཱབྷཱཝཏོ ཨཝིཏཐཏཱཏི, ཨཉྙདྷམྨཔཙྩཡེཧི ཨཉྙདྷམྨཱནུཔྤཏྟིཏོ ཨནཉྙཐཏཱཏི, ཡཐཱཝུཏྟཱནཾ ཨེཏེསཾ ཛརཱམརཎཱདཱིནཾ པཙྩཡཏོ ཝཱ པཙྩཡསམཱུཧཏོ ཝཱ ཨིདཔྤཙྩཡཏཱཏི ཝུཏྟོ. ཏཏྲཱཡཾ ཝཙནཏྠོ – ཨིམེསཾ པཙྩཡཱ ཨིདཔྤཙྩཡཱ, ཨིདཔྤཙྩཡཱ ཨེཝ ཨིདཔྤཙྩཡཏཱ, ཨིདཔྤཙྩཡཱནཾ ཝཱ སམཱུཧོ ཨིདཔྤཙྩཡཏཱ. ལཀྑཎཾ པནེཏྠ སདྡསཏྠཏོ ཝེདིཏབྦནྟི.

དྷམྨཊྛིཏིཉཱཎནིདྡེསཝཎྞནཱ ནིཊྛིཏཱ.

༥. སམྨསནཉཱཎནིདྡེསཝཎྞནཱ

༤༨. སམྨསནཉཱཎནིདྡེསེ ¶ ཡཾ ཀིཉྩཱིཏི ཨནཝསེསཔརིཡཱདཱནཾ. རཱུཔནྟི ཨཏིཔྤསངྒནིཡམནཾ. ཨེཝཾ པདདྭཡེནཱཔི རཱུཔསྶ ཨསེསཔརིགྒཧོ ཀཏོ ཧོཏི. ཨཐསྶ ཨཏཱིཏཱདིནཱ ཝིབྷཱགཾ ཨཱརབྷཏི. ཏཉྷི ཀིཉྩི ཨཏཱིཏཾ ཀིཉྩི ཨནཱགཏཱདིབྷེདནྟི. ཨེས ནཡོ ཝེདནཱདཱིསུཔི. ཏཏྠ རཱུཔཾ ཏཱཝ ཨདྡྷཱསནྟཏིསམཡཁཎཝསེན ཙཏུདྷཱ ཨཏཱིཏཾ ནཱམ ཧོཏི, ཏཐཱ ཨནཱགཏཔཙྩུཔྤནྣཾ. ཏཏྠ ཨདྡྷཱཝསེན ཏཱཝ ཨེཀསྶ ཨེཀསྨིཾ ¶ བྷཝེ པཊིསནྡྷིཏོ པུབྦེ ཨཏཱིཏཾ, ཙུཏིཏོ ཨུདྡྷཾ ཨནཱགཏཾ, ཨུབྷིནྣམནྟརེ པཙྩུཔྤནྣཾ. སནྟཏིཝསེན སབྷཱགཨེཀཨུཏུསམུཊྛཱནཾ ¶ ཨེཀཱཧཱརསམུཊྛཱནཉྩ པུབྦཱཔརིཡབྷཱཝེན ཝཏྟམཱནམྤི པཙྩུཔྤནྣཾ, ཏཏོ པུབྦེ ཝིསབྷཱགཨུཏུཨཱཧཱརསམུཊྛཱནཾ ཨཏཱིཏཾ, པཙྪཱ ཨནཱགཏཾ. ཙིཏྟཛཾ ཨེཀཝཱིཐིཨེཀཛཝནཨེཀསམཱཔཏྟིསམུཊྛཱནཾ པཙྩུཔྤནྣཾ, ཏཏོ པུབྦེ ཨཏཱིཏཾ, པཙྪཱ ཨནཱགཏཾ, ཀམྨསམུཊྛཱནསྶ པཱཊིཡེཀྐཾ སནྟཏིཝསེན ཨཏཱིཏཱདིབྷེདོ ནཏྠི, ཏེསཉྙེཝ པན ཨུཏུཨཱཧཱརཙིཏྟསམུཊྛཱནཱནཾ ཨུཔཏྠམྦྷནཝསེན ཏསྶ ཨཏཱིཏཱདིབྷཱཝོ ཝེདིཏབྦོ. སམཡཝསེན ཨེཀམུཧུཏྟཔུབྦཎྷསཱཡནྷརཏྟིནྡིཝཱདཱིསུ སམཡེསུ སནྟཱནཝསེན པཝཏྟམཱནཾ ཏཾ ཏཾ སམཡཾ པཙྩུཔྤནྣཾ ནཱམ, ཏཏོ པུབྦེ ཨཏཱིཏཾ, པཙྪཱ ཨནཱགཏཾ. ཁཎཝསེན ཨུཔྤཱདཱདིཁཎཏྟཡཔརིཡཱཔནྣཾ པཙྩུཔྤནྣཾ, ཏཏོ པུབྦེ ཨནཱགཏཾ, པཙྪཱ ཨཏཱིཏཾ. ཨཔིཙ ཨཏིཀྐནྟཧེཏུཔཙྩཡཀིཙྩཾ ཨཏཱིཏཾ, ནིཊྛིཏཧེཏུཀིཙྩམནིཊྛིཏཔཙྩཡཀིཙྩཾ པཙྩུཔྤནྣཾ, ཨུབྷཡཀིཙྩམསམྤཏྟཾ ཨནཱགཏཾ. སཀིཙྩཀྑཎེ ཝཱ པཙྩུཔྤནྣཾ, ཏཏོ པུབྦེ ཨནཱགཏཾ, པཙྪཱ ཨཏཱིཏཾ. ཨེཏྠ ཙ ཁཎཱདིཀཐཱཝ ནིཔྤརིཡཱཡཱ སེསཱ སཔརིཡཱཡཱ.

ཨཛ྄ཛྷཏྟནྟི པཉྩསུཔི ཁནྡྷེསུ ཨིདྷ ནིཡཀཛ྄ཛྷཏྟཾ ཨདྷིཔྤེཏཾ, ཏསྨཱ ཨཏྟནོ སནྟཱནེ པཝཏྟཾ པཱཊིཔུགྒལིཀཾ རཱུཔཾ ཨཛ྄ཛྷཏྟནྟི ཝེདིཏབྦཾ. ཏཏོ བཧིབྷཱུཏཾ པན ¶ ཨིནྡྲིཡབདྡྷཾ ཝཱ ཨནིནྡྲིཡབདྡྷཾ ཝཱ རཱུཔཾ བཧིདྡྷཱ ནཱམ. ཨོལཱ༹རིཀནྟི ཙཀྑུསོཏགྷཱནཛིཝ྄ཧཱཀཱཡརཱུཔསདྡགནྡྷརསཕོཊྛབྦསངྑཱཏཱ པཐཝཱིཏེཛོཝཱཡོ ཙཱཏི དྭཱདསཝིདྷཾ རཱུཔཾ གྷཊྚནཝསེན གཧེཏབྦཏོ ཨོལཱ༹རིཀཾ. སེསཾ པན ཨཱཔོདྷཱཏུ ཨིཏྠིནྡྲིཡཾ པུརིསིནྡྲིཡཾ ཛཱིཝིཏིནྡྲིཡཾ ཧདཡཝཏྠུ ཨོཛཱ ཨཱཀཱསདྷཱཏུ ཀཱཡཝིཉྙཏྟི ཝཙཱིཝིཉྙཏྟི རཱུཔསྶ ལཧུཏཱ མུདུཏཱ ཀམྨཉྙཏཱ ཨུཔཙཡོ སནྟཏི ཛརཏཱ ཨནིཙྩཏཱཏི སོལ༹སཝིདྷཾ རཱུཔཾ གྷཊྚནཝསེན ཨགཧེཏབྦཏོ སུཁུམཾ. ཧཱིནཾ ཝཱ པཎཱིཏཾ ཝཱཏི ཨེཏྠ ཧཱིནཔཎཱིཏབྷཱཝོ པརིཡཱཡཏོ ནིཔྤརིཡཱཡཏོ ཙ. ཏཏྠ ཨཀནིཊྛཱནཾ རཱུཔཏོ སུདསྶཱིནཾ རཱུཔཾ ཧཱིནཾ, ཏདེཝ སུདསྶཱནཾ རཱུཔཏོ པཎཱིཏཾ. ཨེཝཾ ཡཱཝ ནརཀསཏྟཱནཾ རཱུཔཾ, ཏཱཝ པརིཡཱཡཏོ ཧཱིནཔཎཱིཏཏཱ ཝེདིཏབྦཱ. ནིཔྤརིཡཱཡཏོ པན ཡཏྠ ཨཀུསལཝིཔཱཀཾ ཨུཔྤཛྫཏི, ཏཾ ཧཱིནཾ. ཡཏྠ ཀུསལཝིཔཱཀཾ, ཏཾ པཎཱིཏཾ. ཡཾ དཱུརེ སནྟིཀེ ཝཱཏི ཨེཏྠ ཡཾ སུཁུམཾ, ཏདེཝ དུཔྤཊིཝིཛ྄ཛྷསབྷཱཝཏྟཱ དཱུརེ. ཡཾ ཨོལཱ༹རིཀཾ, ཏདེཝ སུཔྤཊིཝིཛ྄ཛྷསབྷཱཝཏྟཱ སནྟིཀེ.

སབྦཾ ¶ རཱུཔཾ ཨནིཙྩཏོ ཝཝཏྠེཏི ཨེཀཾ སམྨསནཾ, དུཀྑཏོ ཝཝཏྠེཏི ཨེཀཾ སམྨསནཾ, ཨནཏྟཏོ ཝཝཏྠེཏི ཨེཀཾ སམྨསནནྟི ཨེཏྠ ཨཡཾ བྷིཀྑུ ‘‘ཡཾ ཀིཉྩི རཱུཔ’’ནྟི ཨེཝཾ ཨནིཡམནིདྡིཊྛཾ སབྦམྤི རཱུཔཾ ཨཏཱིཏཏྟིཀེན ཙེཝ ཙཏཱུཧི ཨཛ྄ཛྷཏྟཱདིདུཀེཧི ཙཱཏི ཨེཀཱདསཧི ཨོཀཱསེཧི པརིཙྪིནྡིཏྭཱ སབྦཾ རཱུཔཾ ཨནིཙྩཏོ ཝཝཏྠེཏི ཨནིཙྩནྟི སམྨསཏི. ཀཐཾ? པརཏོ ཝུཏྟནཡེན. ཝུཏྟཉྷེཏཾ – ‘‘རཱུཔཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ ཁཡཊྛེནཱ’’ཏི (པཊི. མ. ༡.༤༨). ཏསྨཱ ¶ ཨེས ཡཾ ཨཏཱིཏཾ རཱུཔཾ, ཏཾ ཡསྨཱ ཨཏཱིཏེཡེཝ ཁཱིཎཾ, ནཡིམཾ བྷཝཾ སམྤཏྟནྟི ཨནིཙྩཾ ཁཡཊྛེན, ཡཾ ཨནཱགཏཾ རཱུཔཾ ཨནནྟརབྷཝེ ནིབྦཏྟིསྶཏི, ཏམྤི ཏཏྠེཝ ཁཱིཡིསྶཏི, ན ཏཏོ པརཾ བྷཝཾ གམིསྶཏཱིཏི ཨནིཙྩཾ ཁཡཊྛེན, ཡཾ པཙྩུཔྤནྣཾ རཱུཔཾ, ཏཾ ཨིདྷེཝ ཁཱིཡཏི, ན ཨིཏོ གཙྪཏཱིཏི ཨནིཙྩཾ ཁཡཊྛེན, ཡཾ ཨཛ྄ཛྷཏྟཾ རཱུཔཾ, ཏམྤི ཨཛ྄ཛྷཏྟམེཝ ཁཱིཡཏི, ན བཧིདྡྷཱབྷཱཝཾ གཙྪཏཱིཏི ཨནིཙྩཾ ཁཡཊྛེན, ཡཾ བཧིདྡྷཱ ཨོལཱ༹རིཀཾ སུཁུམཾ ཧཱིནཾ པཎཱིཏཾ དཱུརེ སནྟིཀེ, ཏམྤི ཨེཏྠེཝ ཁཱིཡཏི, ན དཱུརབྷཱཝཾ ¶ གཙྪཏཱིཏི ཨནིཙྩཾ ཁཡཊྛེནཱཏི སམྨསཏི. ཨིདཾ སབྦམྤི ‘‘ཨནིཙྩཾ ཁཡཊྛེནཱ’’ཏི ཨེཏསྶ ཝསེན ཨེཀཾ སམྨསནཾ, པབྷེདཏོ པན ཨེཀཱདསཝིདྷཾ ཧོཏི.

སབྦམེཝ ཙེཏཾ དུཀྑཾ བྷཡཊྛེནཱཏི སམྨསཏི. བྷཡཊྛེནཱཏི སཔྤཊིབྷཡཏཱཡ. ཡཉྷི ཨནིཙྩཾ, ཏཾ བྷཡཱཝཧཾ ཧོཏི སཱིཧོཔམསུཏྟེ (ཨ. ནི. ༤.༣༣; སཾ. ནི. ༣.༧༨) དེཝཱནཾ ཝིཡ. ཨིཏི ཨིདམྤི ‘‘དུཀྑཾ བྷཡཊྛེནཱ’’ཏི ཨེཏསྶ ཝསེན ཨེཀཾ སམྨསནཾ, པབྷེདཏོ པན ཨེཀཱདསཝིདྷཾ ཧོཏི.

ཡཐཱ ཙ དུཀྑཾ, ཨེཝཾ སབྦམྤི ཏཾ ཨནཏྟཱ ཨསཱརཀཊྛེནཱཏི སམྨསཏི. ཨསཱརཀཊྛེནཱཏི ‘‘ཨཏྟཱ ནིཝཱསཱི ཀཱརཀོ ཝེདཀོ སཡཾཝསཱི’’ཏི ཨེཝཾ པརིཀཔྤིཏསྶ ཨཏྟསཱརསྶ ཨབྷཱཝེན. ཡཉྷི ཨནིཙྩཾ དུཀྑཾ, ཨཏྟནོཔི ཨནིཙྩཏཾ ཝཱ ཨུདཡབྦཡཔཱིལ༹ནཾ ཝཱ ཝཱརེཏུཾ ན སཀྐོཏི, ཀུཏོ ཏསྶ ཀཱརཀཱདིབྷཱཝོ. ཏེནཱཧ – ‘‘རཱུཔཉྩ ཧིདཾ, བྷིཀྑཝེ, ཨཏྟཱ ཨབྷཝིསྶ, ནཡིདཾ རཱུཔཾ ཨཱབཱདྷཱཡ སཾཝཏྟེཡྻཱ’’ཏིཨཱདི (སཾ. ནི. ༣.༥༩). ཨིཏི ཨིདཾ ‘‘ཨནཏྟཱ ཨསཱརཀཊྛེནཱ’’ཏི ཨེཏསྶ ཝསེན ཨེཀཾ སམྨསནཾ, པབྷེདཏོ པན ཨེཀཱདསཝིདྷཾ ཧོཏི. ཨེསེཝ ནཡོ ཝེདནཱདཱིསུ. ཨིཏི ཨེཀེཀསྨིཾ ཁནྡྷེ ཨེཀཱདས ཨེཀཱདས ཀཏྭཱ པཉྩསུ ཁནྡྷེསུ པཉྩཔཉྙཱས སམྨསནཱནི ཧོནྟི, ཨནིཙྩཏོ པཉྩཔཉྙཱས ¶ , དུཀྑཏོ པཉྩཔཉྙཱས, ཨནཏྟཏོ པཉྩཔཉྙཱསཱཏི ཏིཝིདྷཱནུཔསྶནཱཝསེན སབྦཱནི པཉྩསཊྛིསཏསམྨསནཱནི ཧོནྟི.

ཀེཙི པན ‘‘སབྦཾ རཱུཔཾ, སབྦཾ ཝེདནཾ, སབྦཾ སཉྙཾ, སབྦེ སངྑཱརེ, སབྦཾ ཝིཉྙཱཎནྟི པདམྤི པཀྑིཔིཏྭཱ ཨེཀེཀསྨིཾ ཁནྡྷེ དྭཱདས དྭཱདས ཀཏྭཱ པཉྩསུ སཊྛི, ཨནུཔསྶནཱཏོ ཨསཱིཏིསཏསམྨསནཱནཱི’’ཏི ཝདནྟི.

ཨཏཱིཏཱདིཝིབྷཱགེ ¶ པནེཏྠ སནྟཏིཝསེན ཁཎཱདིཝསེན ཙ ཝེདནཱཡ ཨཏཱིཏཱནཱགཏཔཙྩུཔྤནྣབྷཱཝོ ཝེདིཏབྦོ. ཏཏྠ སནྟཏིཝསེན ཨེཀཝཱིཐིཨེཀཛཝནཨེཀསམཱཔཏྟིཔརིཡཱཔནྣཱ ཨེཀཝིདྷཝིསཡསམཱཡོགཔྤཝཏྟཱ ཙ པཙྩུཔྤནྣཱ, ཏཏོ པུབྦེ ཨཏཱིཏཱ, པཙྪཱ ཨནཱགཏཱ. ཁཎཱདིཝསེན ཁཎཏྟཡཔརིཡཱཔནྣཱ པུབྦནྟཱཔརནྟམཛ྄ཛྷགཏཱ སཀིཙྩཉྩ ཀུརུམཱནཱ ཝེདནཱ པཙྩུཔྤནྣཱ, ཏཏོ པུབྦེ ཨཏཱིཏཱ, པཙྪཱ ཨནཱགཏཱ. ཨཛ྄ཛྷཏྟབཧིདྡྷཱབྷེདོ ནིཡཀཛ྄ཛྷཏྟཝསེནེཝ ཝེདིཏབྦོ.

ཨོལཱ༹རིཀསུཁུམབྷཱཝོ ‘‘ཨཀུསལཱ ཝེདནཱ ཨོལཱ༹རིཀཱ, ཀུསལཱབྱཱཀཏཱ ཝེདནཱ སུཁུམཱ’’ཏིཨཱདིནཱ (ཝིབྷ. ༤) ནཡེན ཝིབྷངྒེ ཝུཏྟེན ཛཱཏིསབྷཱཝཔུགྒལལོཀིཡལོཀུཏྟརཝསེན ཝེདིཏབྦོ. ཛཱཏིཝསེན ¶ ཏཱཝ ཨཀུསལཱ ཝེདནཱ སཱཝཛྫཀིརིཡཧེཏུཏོ, ཀིལེསསནྟཱཔབྷཱཝཏོ ཙ ཨཝཱུཔསནྟཝུཏྟཱིཏི ཀུསལཝེདནཱཡ ཨོལཱ༹རིཀཱ, སབྱཱཔཱརཏོ སཨུསྶཱཧཏོ སཝིཔཱཀཏོ ཀིལེསསནྟཱཔབྷཱཝཏོ སཱཝཛྫཏོ ཙ ཝིཔཱཀཱབྱཱཀཏཱཡ ཨོལཱ༹རིཀཱ, སཝིཔཱཀཏོ ཀིལེསསནྟཱཔབྷཱཝཏོ སབྱཱབཛ྄ཛྷཏོ སཱཝཛྫཏོ ཙ ཀིརིཡཱབྱཱཀཏཱཡ ཨོལཱ༹རིཀཱ. ཀུསལཱབྱཱཀཏཱ པན ཝུཏྟཝིཔརིཡཱཡཏོ ཨཀུསལཱཡ ཝེདནཱཡ སུཁུམཱ. དྭེཔི ཀུསལཱཀུསལཱ ཝེདནཱ སབྱཱཔཱརཏོ སཨུསྶཱཧཏོ སཝིཔཱཀཏོ ཙ ཡཐཱཡོགཾ དུཝིདྷཱཡཔི ཨབྱཱཀཏཱཡ ཨོལཱ༹རིཀཱ, ཝུཏྟཝིཔརིཡཱཡེན དུཝིདྷཱཔི ཨབྱཱཀཏཱ ཏཱཧི སུཁུམཱ. ཨེཝཾ ཏཱཝ ཛཱཏིཝསེན ཨོལཱ༹རིཀསུཁུམཏཱ ཝེདིཏབྦཱ.

སབྷཱཝཝསེན པན དུཀྑཱ ཝེདནཱ ནིརསྶཱདཏོ སཝིཔྥཱརཏོ ཁོབྷཀརཎཏོ ཨུབྦེཛནཱིཡཏོ ཨབྷིབྷཝནཏོ ཙ ཨིཏརཱཧི དྭཱིཧི ཨོལཱ༹རིཀཱ, ཨིཏརཱ པན དྭེ སཱཏཏོ སནྟཏོ པཎཱིཏཏོ མནཱཔཏོ ¶ མཛ྄ཛྷཏྟཏོ ཙ ཡཐཱཡོགཾ དུཀྑཱཡ སུཁུམཱ. ཨུབྷོ པན སུཁདུཀྑཱ སཝིཔྥཱརཏོ ཨུབྦེཛནཱིཡཏོ ཁོབྷཀརཎཏོ པཱཀཊཏོ ཙ ཨདུཀྑམསུཁཱཡ ཨོལཱ༹རིཀཱ, སཱ ཝུཏྟཝིཔརིཡཱཡེན ཏདུབྷཡཏོ སུཁུམཱ. ཨེཝཾ སབྷཱཝཝསེན ཨོལཱ༹རིཀསུཁུམཏཱ ཝེདིཏབྦཱ.

པུགྒལཝསེན པན ཨསམཱཔནྣསྶ ཝེདནཱ ནཱནཱརམྨཎེ ཝིཀྑིཏྟབྷཱཝཏོ སམཱཔནྣསྶ ཝེདནཱཡ ཨོལཱ༹རིཀཱ, ཝིཔརིཡཱཡེན ཨིཏརཱ སུཁུམཱ. ཨེཝཾ པུགྒལཝསེན ཨོལཱ༹རིཀསུཁུམཏཱ ཝེདིཏབྦཱ.

ལོཀིཡལོཀུཏྟརཝསེན པན སཱསཝཱ ཝེདནཱ ལོཀིཡཱ, སཱ ཨཱསཝུཔྤཏྟིཧེཏུཏོ ཨོགྷནིཡཏོ ཡོགནིཡཏོ གནྠནིཡཏོ ནཱིཝརཎིཡཏོ ཨུཔཱདཱནིཡཏོ སཾཀིལེསིཀཏོ པུཐུཛྫནསཱདྷཱརཎཏོ ཙ ཨནཱསཝཱཡ ¶ ཨོལཱ༹རིཀཱ, ཨནཱསཝཱ ཙ ཝིཔརིཡཱཡེན སཱསཝཱཡ སུཁུམཱ. ཨེཝཾ ལོཀིཡལོཀུཏྟརཝསེན ཨོལཱ༹རིཀསུཁུམཏཱ ཝེདིཏབྦཱ.

ཏཏྠ ཛཱཏིཨཱདིཝསེན སམྦྷེདོ པརིཧརིཏབྦོ. ཨཀུསལཝིཔཱཀཀཱཡཝིཉྙཱཎསམྤཡུཏྟཱ ཧི ཝེདནཱ ཛཱཏིཝསེན ཨབྱཱཀཏཏྟཱ སུཁུམཱཔི སམཱནཱ སབྷཱཝཱདིཝསེན ཨོལཱ༹རིཀཱ ཧོཏི. ཝུཏྟཉྷེཏཾ –

‘‘ཨབྱཱཀཏཱ ཝེདནཱ སུཁུམཱ, དུཀྑཱ ཝེདནཱ ཨོལཱ༹རིཀཱ. སམཱཔནྣསྶ ཝེདནཱ སུཁུམཱ, ཨསམཱཔནྣསྶ ཝེདནཱ ཨོལཱ༹རིཀཱ. ཨནཱསཝཱ ཝེདནཱ སུཁུམཱ, སཱསཝཱ ཝེདནཱ ཨོལཱ༹རིཀཱ’’ཏི (ཝིབྷ. ༡༡).

ཡཐཱ ཙ དུཀྑཱ ཝེདནཱ, ཨེཝཾ སུཁཱདཡོཔི. ཏཱཔི ཧི ཛཱཏིཝསེན ཨོལཱ༹རིཀཱ, སབྷཱཝཱདིཝསེན སུཁུམཱ ཧོནྟི. ཏསྨཱ ཡཐཱ ཛཱཏིཨཱདིཝསེན སམྦྷེདོ ན ཧོཏི, ཏཐཱ ཝེདནཱནཾ ¶ ཨོལཱ༹རིཀསུཁུམཏཱ ཝེདིཏབྦཱ. སེཡྻཐིདཾ, ཨབྱཱཀཏཱ ཛཱཏིཝསེན ཀུསལཱཀུསལཱཧི སུཁུམཱ. ཏཏྠ ཀཏམཱ ཨབྱཱཀཏཱ? ཀིཾ དུཀྑཱ? ཀིཾ སུཁཱ? ཀིཾ སམཱཔནྣསྶ? ཀིཾ ཨསམཱཔནྣསྶ? ཀིཾ སཱསཝཱ? ཀིཾ ཨནཱསཝཱཏི? ཨེཝཾ སབྷཱཝཱདིབྷེདོ ན པརཱམསིཏབྦོ. ཨེས ནཡོ སབྦཏྠ.

ཨཔིཙ ‘‘ཏཾ ཏཾ ཝཱ པན ཝེདནཾ ཨུཔཱདཱཡུཔཱདཱཡ ཝེདནཱ ཨོལཱ༹རིཀཱ སུཁུམཱ དཊྛབྦཱ’’ཏི ཝཙནཏོ ཨཀུསལཱདཱིསུཔི ལོབྷསཧགཏཱཡ དོསསཧགཏཱ ¶ ཝེདནཱ ཨགྒི ཝིཡ ནིསྶཡདཧནཏོ ཨོལཱ༹རིཀཱ, ལོབྷསཧགཏཱ སུཁུམཱ. དོསསཧགཏཱཔི ནིཡཏཱ ཨོལཱ༹རིཀཱ, ཨནིཡཏཱ སུཁུམཱ. ནིཡཏཱཔི ཀཔྤཊྛིཏིཀཱ ཨོལཱ༹རིཀཱ, ཨིཏརཱ སུཁུམཱ. ཀཔྤཊྛིཏིཀཱསུཔི ཨསངྑཱརིཀཱ ཨོལཱ༹རིཀཱ, ཨིཏརཱ སུཁུམཱ. ལོབྷསཧགཏཱ པན དིཊྛིསམྤཡུཏྟཱ ཨོལཱ༹རིཀཱ, ཨིཏརཱ སུཁུམཱ. སཱཔི ནིཡཏཱ ཀཔྤཊྛིཏིཀཱ ཨསངྑཱརིཀཱ ཨོལཱ༹རིཀཱ, ཨིཏརཱ སུཁུམཱ. ཨཝིསེསེན ཙ ཨཀུསལཱ བཧུཝིཔཱཀཱ ཨོལཱ༹རིཀཱ, ཨཔྤཝིཔཱཀཱ སུཁུམཱ. ཀུསལཱ པན ཨཔྤཝིཔཱཀཱ ཨོལཱ༹རིཀཱ, བཧུཝིཔཱཀཱ སུཁུམཱ.

ཨཔིཙ ཀཱམཱཝཙརཀུསལཱ ཨོལཱ༹རིཀཱ, རཱུཔཱཝཙརཱ སུཁུམཱ, ཏཏོ ཨརཱུཔཱཝཙརཱ, ཏཏོ ལོཀུཏྟརཱ. ཀཱམཱཝཙརཱ ཙ དཱནམཡཱ ཨོལཱ༹རིཀཱ, སཱིལམཡཱ སུཁུམཱ. སཱིལམཡཱཔི ཨོལཱ༹རིཀཱ, ཏཏོ བྷཱཝནཱམཡཱ སུཁུམཱ. བྷཱཝནཱམཡཱཔི དུཧེཏུཀཱ ཨོལཱ༹རིཀཱ, ཏིཧེཏུཀཱ སུཁུམཱ. ཏིཧེཏུཀཱཔི སསངྑཱརིཀཱ ཨོལཱ༹རིཀཱ, ཨསངྑཱརིཀཱ སུཁུམཱ ¶ . རཱུཔཱཝཙརཱ ཙ པཋམཛ྄ཛྷཱནིཀཱ ཨོལཱ༹རིཀཱ…པེ… པཉྩམཛ྄ཛྷཱནིཀཱ སུཁུམཱཝ. ཨརཱུཔཱཝཙརཱ ཙ ཨཱཀཱསཱནཉྩཱཡཏནསམྤཡུཏྟཱ ཨོལཱ༹རིཀཱ…པེ… ནེཝསཉྙཱནཱསཉྙཱཡཏནསམྤཡུཏྟཱ སུཁུམཱཝ. ལོཀུཏྟརཱ ཙ སོཏཱཔཏྟིམགྒསམྤཡུཏྟཱ ཨོལཱ༹རིཀཱ…པེ… ཨརཧཏྟམགྒསམྤཡུཏྟཱ སུཁུམཱཝ. ཨེས ནཡོ ཏཾཏཾབྷཱུམིཝིཔཱཀཀིརིཡཱཝེདནཱསུ དུཀྑཱདིཨསམཱཔནྣཱདིསཱསཝཱདིཝསེན ཝུཏྟཝེདནཱསུ ཙ. ཨོཀཱསཝསེན ཝཱཔི ནིརཡེ དུཀྑཱ ཨོལཱ༹རིཀཱ, ཏིརཙྪཱནཡོནིཡཾ སུཁུམཱ…པེ… པརནིམྨིཏཝསཝཏྟཱིསུ སུཁུམཱཝ. ཡཐཱ ཙ དུཀྑཱ, ཨེཝཾ སུཁཱཔི སབྦཏྠ ཡཐཱནུརཱུཔཾ ཡོཛེཏབྦཱ. ཝཏྠུཝསེན ཙཱཔི ཧཱིནཝཏྠུཀཱ ཡཱ ཀཱཙི ཝེདནཱ ཨོལཱ༹རིཀཱ, པཎཱིཏཝཏྠུཀཱ སུཁུམཱ. ཧཱིནཔཎཱིཏབྷེདེ ཡཱ ཨོལཱ༹རིཀཱ, སཱ ཧཱིནཱ. ཡཱ ཙ སུཁུམཱ, སཱ པཎཱིཏཱཏི དཊྛབྦཱ.

དཱུརསནྟིཀཔདེ པན ¶ ‘‘ཨཀུསལཱ ཝེདནཱ ཀུསལཱབྱཱཀཏཱཧི ཝེདནཱཧི དཱུརེ, ཨཀུསལཱ ཝེདནཱ ཨཀུསལཱཡ ཝེདནཱཡ སནྟིཀེ’’ཏིཨཱདིནཱ (ཝིབྷ. ༡༣) ནཡེན ཝིབྷངྒེ ཝིབྷཏྟཱ. ཏསྨཱ ཨཀུསལཱ ཝེདནཱ ཝིསབྷཱགཏོ ཨསཾསཊྛཏོ ཨསརིཀྑཏོ ཙ ཀུསལཱབྱཱཀཏཱཧི དཱུརེ, ཏཐཱ ཀུསལཱབྱཱཀཏཱ ཨཀུསལཱཡ. ཨེས ནཡོ སབྦཝཱརེསུ. ཨཀུསལཱ ¶ པན ཝེདནཱ སབྷཱགཏོ སཾསཊྛཏོ སརིཀྑཏོ ཙ ཨཀུསལཱཡ སནྟིཀེཏི ཨིདཾ ཝེདནཱཡ ཨཏཱིཏཱདིཝིབྷཱགེ ཝིཏྠཱརཀཐཱམུཁཾ. ཏཾཏཾཝེདནཱསམྤཡུཏྟཱནཾ པན སཉྙཱདཱིནམྤི ཨེཏཾ ཨེཝམེཝ ཝེདིཏབྦཾ.

ཡེ པནེཏྠ ཝེདནཱདཱིསུ ཙཀྑུ…པེ… ཛརཱམརཎནྟི པེཡྻཱལེན སཾཁིཏྟེསུ ཙ དྷམྨེསུ ལོཀུཏྟརདྷམྨཱ ཨཱགཏཱ, ཏེ ཨསམྨསནཱུཔགཏྟཱ ཨིམསྨིཾ ཨདྷིཀཱརེ ན གཧེཏབྦཱ. ཏེ པན ཀེཝལཾ ཏེན ཏེན པདེན སངྒཧིཏདྷམྨདསྶནཝསེན ཙ ཨབྷིཉྙེཡྻནིདྡེསེ ཨཱགཏནཡེན ཙ ཝུཏྟཱ. ཡེཔི ཙ སམྨསནཱུཔགཱ, ཏེསུ ཡེ ཡསྶ པཱཀཊཱ ཧོནྟི, སུཁེན པརིགྒཧཾ གཙྪནྟི, ཏེསུ ཏེན སམྨསནཾ ཨཱརབྷིཏབྦཾ. ཛཱཏིཛརཱམརཎཝསེན ཝིསུཾ སམྨསནཱབྷཱཝེཔི ཛཱཏིཛརཱམརཎཝནྟེསུཡེཝ པན སམྨསིཏེསུ ཏཱནིཔི སམྨསིཏཱནི ཧོནྟཱིཏི པརིཡཱཡེན ཏེསམྤི ཝསེན སམྨསནཾ ཝུཏྟནྟི ཝེདིཏབྦཾ. ཨཏཱིཏཱནཱགཏཔཙྩུཔྤནྣཾ ཨནིཙྩཏོ ཝཝཏྠེཏཱིཏིཨཱདིནཱ ནཡེན ཨཏཱིཏཏྟིཀསྶེཝ ཙ ཝསེན སམྨསནསྶ ཝུཏྟཏྟཱ ཨཛ྄ཛྷཏྟཱདིབྷེདཾ ཨནཱམསིཏྭཱཔི ཨཏཱིཏཏྟིཀསྶེཝ ཝསེན པརིཙྪིནྡིཏྭཱཔི ཨནིཙྩཱདིཏོ སམྨསནཾ ཀཱཏབྦམེཝ.

ཡཾ པན ཨནིཙྩཾ, ཏཾ ཡསྨཱ ནིཡམཏོ སངྑཏཱདིབྷེདཾ ཧོཏི, ཏེནསྶ པརིཡཱཡདསྶནཏྠཾ, ནཱནཱཀཱརེཧི ཝཱ མནསིཀཱརཔྤཝཏྟིདསྶནཏྠཾ རཱུཔཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ སངྑཏནྟིཨཱདིམཱཧ ¶ . ཏཉྷི ཧུཏྭཱ ཨབྷཱཝཊྛེན ཨནིཙྩཾ, ཨནིཙྩནྟིཀཏཱཡ ཨཱདིཨནྟཝནྟཏཱཡ ཝཱ ཨནིཙྩཾ. པཙྩཡེཧི སམཱགནྟྭཱ ཀཏཏྟཱ སངྑཏཾ. པཙྩཡེ པཊིཙྩ ནིསྶཱཡ སམཾ, སཧ ཝཱ ཨུཔྤནྣཏྟཱ པཊིཙྩསམུཔྤནྣཾ. ཨེཏེན པཙྩཡེཧི ཀཏེཔི པཙྩཡཱནཾ ཨབྱཱཔཱརཏཾ དསྶེཏི. ཁཡདྷམྨནྟི ཁཱིཡནདྷམྨཾ ཁཱིཡནཔཀཏིཀཾ. ཝཡདྷམྨནྟི ནསྶནདྷམྨཾ. ནཡིདཾ མནྡཱིབྷཱཝཀྑཡཝསེན ¶ ཁཡདྷམྨཾ, ཀེཝལཾ ཝིགམནཔཀཏིཀཾ. པཧཱུཏསྶ མནྡཱིབྷཱཝོཔི ཧི ལོཀེ ཁཡོཏི ཝུཙྩཏི. ཝིརཱགདྷམྨནྟི ནཡིདཾ ཀུཧིཉྩི གམནཝསེན ཝཡདྷམྨཾ, ཀེཝལཾ སབྷཱཝཱཏིཀྐམནཔཀཏིཀཾ. ‘‘ཝིརཱགོ ནཱམ ཛིགུཙྪནཾ ཝཱ སམཏིཀྐམོ ཝཱ’’ཏི ཧི ཝུཏྟཾ. ནིརོདྷདྷམྨནྟི ནཡིདཾ སབྷཱཝཱཏིཀྐམེན པུནརཱཝཏྟིདྷམྨཾ, ཀེཝལཾ ཨཔུནརཱཝཏྟིནིརོདྷེན ནིརུཛ྄ཛྷནཔཀཏིཀནྟི པུརིམཔུརིམཔདསྶ ཨཏྠཝིཝརཎཝསེན པཙྪིམཔཙྪིམཔདཾ ཝུཏྟནྟི ཝེདིཏབྦཾ.

ཨཐ ¶ ཝཱ ཨེཀབྷཝཔརིཡཱཔནྣརཱུཔབྷངྒཝསེན ཁཡདྷམྨཾ, ཨེཀསནྟཏིཔརིཡཱཔནྣརཱུཔཀྑཡཝསེན ཝཡདྷམྨཾ, རཱུཔསྶ ཁཎབྷངྒཝསེན ཝིརཱགདྷམྨཾ, ཏིཎྞམྤི ཨཔུནཔྤཝཏྟིཝསེན ནིརོདྷདྷམྨནྟིཔི ཡོཛེཏབྦཾ.

ཛརཱམརཎཾ ཨནིཙྩནྟིཨཱདཱིསུ ཛརཱམརཎཾ ན ཨནིཙྩཾ, ཨནིཙྩསབྷཱཝཱནཾ པན ཁནྡྷཱནཾ ཛརཱམརཎཏྟཱ ཨནིཙྩཾ ནཱམ ཛཱཏཾ. སངྑཏཱདཱིསུཔི ཨེསེཝ ནཡོ. ཨནྟརཔེཡྻཱལེ ཛཱཏིཡཱཔི ཨནིཙྩཱདིཏཱཡ ཨེསེཝ ནཡོ.

ཛཱཏིཔཙྩཡཱ ཛརཱམརཎནྟིཨཱདི ན ཝིཔསྶནཱཝསེན ཝུཏྟཾ, ཀེཝལཾ པཊིཙྩསམུཔྤཱདསྶ ཨེཀེཀཨངྒཝསེན སངྑིཔིཏྭཱ ཝཝཏྠཱནཏོ སམྨསནཉཱཎཾ ནཱམ ཧོཏཱིཏི པརིཡཱཡེན ཝུཏྟཾ. ན པནེཏཾ ཀལཱཔསམྨསནཉཱཎཾ དྷམྨཊྛིཏིཉཱཎམེཝ ཏཾ ཧོཏཱིཏི. ཨསཏི ཛཱཏིཡཱཏི ལིངྒཝིཔལླཱསོ ཀཏོ, ཨསཏིཡཱ ཛཱཏིཡཱཏི ཝུཏྟཾ ཧོཏི. ཨསཏི སངྑཱརེསཱུཏི ཝཙནཝིཔལླཱསོ ཀཏོ, ཨསནྟེསུ སངྑཱརེསཱུཏི ཝུཏྟཾ ཧོཏི. བྷཝཔཙྩཡཱ ཛཱཏི, ཨསཏཱིཏིཨཱདི ‘‘བྷཝཔཙྩཡཱ ཛཱཏི, ཨསཏི བྷཝེ ནཏྠི ཛཱཏཱི’’ཏིཨཱདིནཱ ནཡེན ཡོཛེཏབྦཾ.

སམྨསནཉཱཎནིདྡེསཝཎྞནཱ ནིཊྛིཏཱ.

༦. ཨུདཡབྦཡཉཱཎནིདྡེསཝཎྞནཱ

༤༩. ཨིདཱནི ¶ ¶ ཨནནྟརཾ ཝུཏྟསྶ སམྨསནཉཱཎསྶ ནཱནཱནཡེཧི བྷཱཝནཱཐིརཀརཎེན པཱརཾ གནྟྭཱ ཋིཏེན ཨནིཙྩཱདིཏོ དིཊྛེ སངྑཱརེ ཨུདཡབྦཡེན པརིཙྪིནྡིཏྭཱ ཨནིཙྩཱདིཏོ ཝིཔསྶནཏྠཾ ཝུཏྟསྶ ཨུདཡབྦཡཱནུཔསྶནཱཉཱཎསྶ ནིདྡེསེ ཛཱཏཾ རཱུཔནྟིཨཱདཱིསུ སནྟཏིཝསེན ཡཐཱསཀཾ པཙྩཡེཧི ནིབྦཏྟཾ རཱུཔཾ. ཏསྶ ཛཱཏསྶ རཱུཔསྶ ནིབྦཏྟིལཀྑཎཾ ཛཱཏིཾ ཨུཔྤཱདཾ ཨབྷིནཝཱཀཱརཾ ཨུདཡོཏི, ཝིཔརིཎཱམལཀྑཎཾ ཁཡཾ བྷངྒཾ ཝཡོཏི, ཨནུཔསྶནཱ པུནཔྤུནཾ ནིསཱམནཱ, ཨུདཡབྦཡ ཨནུཔསྶནཱཉཱཎནྟི ཨཏྠོ. ཝེདནཱདཱིསུཔི ཨེསེཝ ནཡོ. ཛཱཏིཛརཱམརཎཝནྟཱནཾཡེཝ ཨུདཡབྦཡསྶ པརིགྒཧེཏབྦཏྟཱ ཛཱཏིཛརཱམརཎཱནཾ ཨུདཡབྦཡཱབྷཱཝཏོ ཛཱཏིཛརཱམརཎཾ ཨནཱམསིཏྭཱ ཛཱཏཾ ཙཀྑུ…པེ… ཛཱཏོ བྷཝོཏི པེཡྻཱལཾ ཀཏཾ. སོ ཨེཝཾ པཉྩནྣཾ ཁནྡྷཱནཾ ཨུདཡབྦཡཾ ¶ པསྶནྟོ ཨེཝཾ ཛཱནཱཏི ‘‘ཨིམེསཾ ཁནྡྷཱནཾ ཨུཔྤཏྟིཏོ པུབྦེ ཨནུཔྤནྣཱནཾ རཱསི ཝཱ ནིཙཡོ ཝཱ ནཏྠི, ཨུཔྤཛྫམཱནཱནམྤི རཱསིཏོ ཝཱ ནིཙཡཏོ ཝཱ ཨཱགམནཾ ནཱམ ནཏྠི, ནིརུཛ྄ཛྷམཱནཱནམྤི དིསཱཝིདིསཱགམནཾ ནཱམ ནཏྠི, ནིརུདྡྷཱནམྤི ཨེཀསྨིཾ ཋཱནེ རཱསིཏོ ནིཙཡཏོ ནིདྷཱནཏོ ཨཝཊྛཱནཾ ནཱམ ནཏྠི. ཡཐཱ པན ཝཱིཎཱཡ ཝཱདིཡམཱནཱཡ ཨུཔྤནྣསྶ སདྡསྶ ནེཝ ཨུཔྤཏྟིཏོ པུབྦེ སནྣིཙཡོ ཨཏྠི, ན ཨུཔྤཛྫམཱནོ སནྣིཙཡཏོ ཨཱགཏོ, ན ནིརུཛ྄ཛྷམཱནསྶ དིསཱཝིདིསཱགམནཾ ཨཏྠི, ན ནིརུདྡྷོ ཀཏྠཙི སནྣིཙིཏོ ཏིཊྛཏི, ཨཐ ཁོ ཝཱིཎཉྩ ཨུཔཝཱིཎཉྩ པུརིསསྶ ཙ ཏཛྫཾ ཝཱཡཱམཾ པཊིཙྩ ཨཧུཏྭཱ སམྦྷོཏི, ཧུཏྭཱ པཊིཝེཏི, ཨེཝཾ སབྦེཔི རཱུཔཱརཱུཔིནོ དྷམྨཱ ཨཧུཏྭཱ སམྦྷོནྟི, ཧུཏྭཱ པཊིཝེནྟཱི’’ཏི.

༥༠. ཨེཝཾ སངྑེཔཏོ ཨུདཡབྦཡདསྶནཾ དསྶེཏྭཱ ཨིདཱནི ཝིཏྠཱརཏོ དསྶེཏུཾ པཉྩནྣཾ ཁནྡྷཱནཾ ཨུདཡཾ པསྶནྟོ ཀཏི ལཀྑཎཱནི པསྶཏཱིཏིཨཱདཱིཧི རཱསིཏོ གཎནཾ པུཙྪིཏྭཱ, པཉྩནྣཾ ཁནྡྷཱནཾ ཨུདཡཾ པསྶནྟོ པཉྩཝཱིསཏི ལཀྑཎཱནི པསྶཏཱིཏིཨཱདཱིཧི ¶ རཱསིཏོཝ གཎནཾ ཝིསྶཛྫེཏྭཱ, པུན རཱུཔཀྑནྡྷསྶ ཨུདཡཾ པསྶནྟོ ཀཏི ལཀྑཎཱནི པསྶཏཱིཏིཨཱདཱིཧི ཝིབྷཱགཏོ གཎནཾ པུཙྪིཏྭཱ རཱུཔཀྑནྡྷསྶ ཨུདཡཾ པསྶནྟོ པཉྩ ལཀྑཎཱནི པསྶཏཱིཏིཨཱདཱིཧི ཝིབྷཱགཏོ གཎནཾ ཝིསྶཛྫེཏྭཱ, པུན རཱུཔཀྑནྡྷསྶ ཨུདཡཾ པསྶནྟོ ཀཏམཱནི པཉྩ ལཀྑཎཱནི པསྶཏཱིཏིཨཱདཱིཧི ལཀྑཎཝིབྷཱགཾ པུཙྪིཏྭཱ ཝིསྶཛྫནཾ ཀཏཾ.

ཏཏྠ ཨཝིཛྫཱསམུདཡཱ རཱུཔསམུདཡོཏི ‘‘པུརིམཀམྨབྷཝསྨིཾ མོཧོ ཨཝིཛྫཱ’’ཏི ཝུཏྟཱཡ ཨཝིཛྫཱཡ སཏི ཨིམསྨིཾ བྷཝེ རཱུཔསྶ ཨུཔྤཱདོ ཧོཏཱིཏི ཨཏྠོ. པཙྩཡསམུདཡཊྛེནཱཏི པཙྩཡསྶ ཨུཔྤནྣབྷཱཝེནཱཏི ཨཏྠོ. ཨཝིཛྫཱཏཎྷཱཀམྨཱནི ཙེཏྠ ཨིདྷ པཊིསནྡྷིཧེཏུབྷཱུཏཱ ཨཏཱིཏཔཙྩཡཱ ¶ . ཨིམེསུ ཙ ཏཱིསུ གཧིཏེསུ སངྑཱརུཔཱདཱནཱནི གཧིཏཱནེཝ ཧོནྟི. ཨཱཧཱརསམུདཡཱཏི པཝཏྟིཔཙྩཡེསུ ཀབལཱི༹ཀཱརཱཧཱརསྶ བལཝཏྟཱ སོཡེཝ གཧིཏོ. ཏསྨིཾ པན གཧིཏེ པཝཏྟིཧེཏུབྷཱུཏཱནི ཨུཏུཙིཏྟཱནིཔི གཧིཏཱནེཝ ཧོནྟི. ནིབྦཏྟིལཀྑཎནྟི ཨདྡྷཱསནྟཏིཁཎཝསེན རཱུཔསྶ ཨུཔྤཱདཾ, ཨུཔྤཱདོཡེཝ སངྑཏལཀྑཎཏྟཱ ལཀྑཎནྟི ཙ ཝུཏྟོ. པཉྩ ལཀྑཎཱནཱིཏི ཨཝིཛྫཱ ཏཎྷཱ ཀམྨཱཧཱརཱ ནིབྦཏྟི ཙཱཏི ཨིམཱནི པཉྩ ¶ ལཀྑཎཱནི. ཨཝིཛྫཱདཡོཔི ཧི རཱུཔསྶ ཨུདཡོ ལཀྑཱིཡཏི ཨེཏེཧཱིཏི ལཀྑཎཱནི. ནིབྦཏྟི པན སངྑཏལཀྑཎམེཝ, ཏམྤི སངྑཏནྟི ལཀྑཱིཡཏི ཨེཏེནཱཏི ལཀྑཎཾ.

ཨཝིཛྫཱནིརོདྷཱ རཱུཔནིརོདྷོཏི ཨནཱགཏབྷཝསྶ པཙྩཡབྷཱུཏཱཡ ཨིམསྨིཾ བྷཝེ ཨཝིཛྫཱཡ ཨརཧཏྟམགྒཉཱཎེན ནིརོདྷེ ཀཏེ པཙྩཡཱབྷཱཝཱ ཨནཱགཏསྶ རཱུཔསྶ ཨནུཔྤཱདོ ནིརོདྷོ ཧོཏཱིཏི ཨཏྠོ. པཙྩཡནིརོདྷཊྛེནཱཏི པཙྩཡསྶ ནིརུདྡྷབྷཱཝེནཱཏི ཨཏྠོ. ནིརོདྷོ ཙེཏྠ ཨནཱགཏཔཊིསནྡྷིཔཙྩཡཱནཾ ཨིདྷ ཨཝིཛྫཱཏཎྷཱཀམྨཱནཾཡེཝ ནིརོདྷོ. ཨཱཧཱརནིརོདྷཱ རཱུཔནིརོདྷོཏི པཝཏྟིཔཙྩཡསྶ ཀབལཱི༹ཀཱརཱཧཱརསྶ ཨབྷཱཝེ ཏཾསམུཊྛཱནརཱུཔཱབྷཱཝོ ཧོཏི. ཝིཔརིཎཱམལཀྑཎནྟི ཨདྡྷཱསནྟཏིཁཎཝསེན རཱུཔསྶ བྷངྒཾ, བྷངྒོཡེཝ སངྑཏལཀྑཎཏྟཱ ལཀྑཎནྟི ཝུཏྟོ. ཨིདྷ པཉྩ ལཀྑཎཱནཱིཏི ཨཝིཛྫཱཏཎྷཱཀམྨཱཧཱརཱནཾ ཨབྷཱཝནིརོདྷཱ ཙཏྟཱརི, ཝིཔརིཎཱམོ ཨེཀནྟི པཉྩ. ཨེས ནཡོ ཝེདནཱཀྑནྠཱདཱིསུ. ཨཡཾ པན ཝིསེསོ – ཨརཱུཔཀྑནྡྷཱནཾ ཨུདཡབྦཡདསྶནཾ ཨདྡྷཱསནྟཏིཝསེན, ན ཁཎཝསེན. ཕསྶོ ཝེདནཱསཉྙཱསངྑཱརཀྑནྡྷཱནཾ པཝཏྟིཔཙྩཡོ, ཏཾནིརོདྷཱ ཙ ཏེསཾ ནིརོདྷོ. ནཱམརཱུཔཾ ¶ ཝིཉྙཱཎཀྑནྡྷསྶ པཝཏྟིཔཙྩཡོ, ཏཾནིརོདྷཱ ཙ ཏསྶ ནིརོདྷོཏི.

ཀེཙི པནཱཧུ – ‘‘ཙཏུདྷཱ པཙྩཡཏོ ཨུདཡབྦཡདསྶནེ ཨཏཱིཏཱདིཝིབྷཱགཾ ཨནཱམསིཏྭཱཝ སབྦསཱམཉྙཝསེན ཨཝིཛྫཱདཱིཧི ཨུདེཏཱིཏི ཨུཔྤཛྫམཱནབྷཱཝམཏྟཾ གཎྷཱཏི, ན ཨུཔྤཱདཾ. ཨཝིཛྫཱདིནིརོདྷཱ ནིརུཛྫཏཱིཏི ཨནུཔྤཛྫམཱནབྷཱཝམཏྟཾ གཎྷཱཏི, ན བྷངྒཾ. ཁཎཏོ ཨུདཡབྦཡདསྶནེ པཙྩུཔྤནྣཱནཾ ཨུཔྤཱདཾ བྷངྒཾ གཎྷཱཏཱི’’ཏི.

ཝིཔསྶམཱནོ པན ཝིཔསྶཀོ པཋམཾ པཙྩཡཏོ ཨུདཡབྦཡཾ མནསིཀརིཏྭཱ ཝིཔསྶནཱཀཱལེ ཨཝིཛྫཱདིཀེ ཙཏུརོ དྷམྨེ ཝིསྶཛྫེཏྭཱ ཨུདཡབྦཡཝནྟེཡེཝ ཁནྡྷེ གཧེཏྭཱ ཏེསཾ ཨུདཡབྦཡཾ པསྶཏི, ཨེཝཉྩ ཏསྶ ཝིཔསྶཀསྶ ‘‘ཨེཝཾ རཱུཔཱདཱིནཾ ཨུདཡོ, ཨེཝཾ ཝཡོ, ཨེཝཾ རཱུཔཱདཡོ ཨུདེནྟི, ཨེཝཾ ཝེནྟཱི’’ཏི པཙྩཡཏོ ཙ ཁཎཏོ ཙ ཝིཏྠཱརེན ཨུདཡབྦཡཾ པསྶཏོ ‘‘ཨིཏི ཀིར ཨིམེ དྷམྨཱ ཨཧུཏྭཱ སམྦྷོནྟི, ཧུཏྭཱ པཊིཝེནྟཱི’’ཏི ཉཱཎཾ ཝིསདཏརཾ ཧོཏི, སཙྩཔཊིཙྩསམུཔྤཱདནཡལཀྑཎབྷེདཱ པཱཀཊཱ ཧོནྟི ¶ . ཡཉྷི སོ ཨཝིཛྫཱདིསམུདཡཱ ཁནྡྷཱནཾ སམུདཡཾ ཨཝིཛྫཱདིནིརོདྷཱ ¶ ཙ ཁནྡྷཱནཾ ནིརོདྷཾ པསྶཏི, ཨིདམསྶ པཙྩཡཏོ ཨུདཡབྦཡདསྶནཾ. ཡཾ པན ནིབྦཏྟིལཀྑཎཝིཔརིཎཱམལཀྑཎཱནི པསྶནྟོ ཁནྡྷཱནཾ ཨུདཡབྦཡཾ པསྶཏི, ཨིདམསྶ ཁཎཏོ ཨུདཡབྦཡདསྶནཾ. ཨུཔྤཏྟིཀྑཎེཡེཝ ཧི ནིབྦཏྟིལཀྑཎཾ, བྷངྒཀྑཎེ ཙ ཝིཔརིཎཱམལཀྑཎཾ.

ཨིཙྩསྶེཝཾ པཙྩཡཏོ ཙེཝ ཁཎཏོ ཙ དྭེདྷཱ ཨུདཡབྦཡཾ པསྶཏོ པཙྩཡཏོ ཨུདཡདསྶནེན སམུདཡསཙྩཾ པཱཀཊཾ ཧོཏི ཛནཀཱཝབོདྷཏོ. ཁཎཏོ ཨུདཡདསྶནེན དུཀྑསཙྩཾ པཱཀཊཾ ཧོཏི ཛཱཏིདུཀྑཱཝབོདྷཏོ. པཙྩཡཏོ ཝཡདསྶནེན ནིརོདྷསཙྩཾ པཱཀཊཾ ཧོཏི པཙྩཡཱནུཔྤཱདེན པཙྩཡཝཏཾ ཨནུཔྤཱདཱཝབོདྷཏོ. ཁཎཏོ ཝཡདསྶནེན དུཀྑསཙྩམེཝ པཱཀཊཾ ཧོཏི མརཎདུཀྑཱཝབོདྷཏོ. ཡཉྩསྶ ཨུདཡབྦཡདསྶནཾ, མགྒོཝཱཡཾ ལོཀིཀོཏི མགྒསཙྩཾ པཱཀཊཾ ཧོཏི ཏཏྲ སམྨོཧཝིགྷཱཏཏོ.

པཙྩཡཏོ ཙསྶ ཨུདཡདསྶནེན ཨནུལོམོ པཊིཙྩསམུཔྤཱདོ པཱཀཊོ ཧོཏི ‘‘ཨིམསྨིཾ སཏི ཨིདཾ ཧོཏཱི’’ཏི (མ. ནི. ༡.༤༠༤; སཾ. ནི. ༢.༢༡; ཨུདཱ. ༡) ཨཝབོདྷཏོ. པཙྩཡཏོ ཝཡདསྶནེན པཊིལོམོ པཊིཙྩསམུཔྤཱདོ པཱཀཊོ ཧོཏི ‘‘ཨིམསྶ ནིརོདྷཱ ཨིདཾ ནིརུཛ྄ཛྷཏཱི’’ཏི (མ. ནི. ༡.༤༠༦; སཾ. ནི. ༢.༢༡; ཨུདཱ. ༢) ཨཝབོདྷཏོ. ཁཎཏོ པན ཨུདཡབྦཡདསྶནེན པཊིཙྩསམུཔྤནྣཱ དྷམྨཱ པཱཀཊཱ ཧོནྟི ¶ སངྑཏལཀྑཎཱཝབོདྷཏོ. ཨུདཡབྦཡཝནྟོ ཧི སངྑཏཱ, ཏེ ཙ པཊིཙྩསམུཔྤནྣཱཏི.

པཙྩཡཏོ ཙསྶ ཨུདཡདསྶནེན ཨེཀཏྟནཡོ པཱཀཊོ ཧོཏི ཧེཏུཕལསམྦནྡྷེན སནྟཱནསྶ ཨནུཔཙྪེདཱཝབོདྷཏོ. ཨཐ སུཊྛུཏརཾ ཨུཙྪེདདིཊྛིཾ པཛཧཏི. ཁཎཏོ ཨུདཡདསྶནེན ནཱནཏྟནཡོ པཱཀཊོ ཧོཏི ནཝནཝཱནཾ ཨུཔྤཱདཱཝབོདྷཏོ. ཨཐ སུཊྛུཏརཾ སསྶཏདིཊྛིཾ པཛཧཏི. པཙྩཡཏོ ཙསྶ ཨུདཡབྦཡདསྶནེན ཨབྱཱཔཱརནཡོ པཱཀཊོ ཧོཏི དྷམྨཱནཾ ཨཝསཝཏྟིབྷཱཝཱཝབོདྷཏོ. ཨཐ སུཊྛུཏརཾ ཨཏྟདིཊྛིཾ པཛཧཏི. པཙྩཡཏོ པན ཨུདཡདསྶནེན ཨེཝཾདྷམྨཏཱནཡོ པཱཀཊོ ཧོཏི པཙྩཡཱནུརཱུཔེན ཕལསྶུཔྤཱདཱཝབོདྷཏོ. ཨཐ སུཊྛུཏརཾ ཨཀིརིཡདིཊྛིཾ པཛཧཏི.

པཙྩཡཏོ ¶ ཙསྶ ཨུདཡདསྶནེན ཨནཏྟལཀྑཎཾ པཱཀཊཾ ཧོཏི དྷམྨཱནཾ ནིརཱིཧཀཏྟཔཙྩཡཔཊིབདྡྷཝུཏྟིཏཱཝབོདྷཏོ. ཁཎཏོ ཨུདཡབྦཡདསྶནེན ཨནིཙྩལཀྑཎཾ པཱཀཊཾ ཧོཏི ཧུཏྭཱ ཨབྷཱཝཱཝབོདྷཏོ, པུབྦནྟཱཔརནྟཝིཝེཀཱཝབོདྷཏོ ཙ. དུཀྑལཀྑཎམྤི པཱཀཊཾ ཧོཏི ཨུདཡབྦཡེཧི པཊིཔཱིལ༹ནཱཝབོདྷཏོ. སབྷཱཝལཀྑཎམྤི པཱཀཊཾ ཧོཏི ཨུདཡབྦཡཔརིཙྪིནྣཱཝབོདྷཏོ ¶ . སབྷཱཝལཀྑཎེ སངྑཏལཀྑཎསྶ ཏཱཝཀཱལིཀཏྟམྤི པཱཀཊཾ ཧོཏི, ཨུདཡཀྑཎེ ཝཡསྶ, ཝཡཀྑཎེ ཙ ཨུདཡསྶ ཨབྷཱཝཱཝབོདྷཏོཏི.

ཏསྶེཝཾ པཱཀཊཱིབྷཱུཏསཙྩཔཊིཙྩསམུཔྤཱདནཡལཀྑཎབྷེདསྶ ‘‘ཨེཝཾ ཀིར ནཱམིམེ དྷམྨཱ ཨནུཔྤནྣཔུབྦཱ ཨུཔྤཛྫནྟི, ཨུཔྤནྣཱ ནིརུཛ྄ཛྷནྟཱི’’ཏི ནིཙྩནཝཱཝ ཧུཏྭཱ སངྑཱརཱ ཨུཔཊྛཧནྟི. ན ཀེཝལཉྩ ནིཙྩནཝཱཝ, སཱུརིཡུགྒམནེ ཨུསྶཱཝབིནྡུ ཝིཡ ཨུདཀཔུབྦུལོ༹ ཝིཡ ཨུདཀེ དཎྜརཱཛི ཝིཡ ཨཱརགྒེ སཱསཔོ ཝིཡ ཝིཛྫུཔྤཱདོ ཝིཡ ཙ པརིཏྟཊྛཱཡིནོ མཱཡཱམརཱིཙིསུཔིནནྟཨལཱཏཙཀྐགནྡྷབྦནགརཕེཎཀདལིཨཱདཡོ ཝིཡ ཨསཱརཱ ནིསྶཱརཱཏི ཙཱཔི ཨུཔཊྛཧནྟི. ཨེཏྟཱཝཏཱ ཏེན ‘‘ཝཡདྷམྨམེཝ ཨུཔྤཛྫཏི, ཨུཔྤནྣཉྩ ཝཡཾ ཨུཔེཏཱི’’ཏི ཨིམིནཱ ཨཱཀཱརེན སམཔཉྙཱས ལཀྑཎཱནི པཊིཝིཛ྄ཛྷིཏྭཱ ཋིཏཾ ཨུདཡབྦཡཱནུཔསྶནཱ ནཱམ པཋམཾ ཏརུཎཝིཔསྶནཱཉཱཎཾ ཨདྷིགཏཾ ཧོཏི, ཡསྶཱདྷིགམཱ ‘‘ཨཱརདྡྷཝིཔསྶཀོ’’ཏི སངྑཾ གཙྪཏི. ཨིམསྨིཾ ཉཱཎེ ཋིཏསྶ ཨོབྷཱསཱདཡོ ¶ དས ཝིཔསྶནཱུཔཀྐིལེསཱ ཨུཔྤཛྫནྟི, ཡེསཾ ཨུཔྤཏྟིཡཱ ཨཀུསལོ ཡོགཱཝཙརོ ཏེསུ མགྒཉཱཎསཉྙཱི ཧུཏྭཱ ཨམགྒམེཝ ‘‘མགྒོ’’ཏི གཎྷཱཏི, ཨུཔཀྐིལེསཛཊཱཛཊིཏོ ཙ ཧོཏི. ཀུསལོ པན ཡོགཱཝཙརོ ཏེསུ ཝིཔསྶནཾ ཨཱརོཔེནྟོ ཨུཔཀྐིལེསཛཊཾ ཝིཛཊེཏྭཱ ‘‘ཨེཏེ དྷམྨཱ ན མགྒོ, ཨུཔཀྐིལེསཝིམུཏྟཾ པན ཝཱིཐིཔཊིཔནྣཾ ཝིཔསྶནཱཉཱཎཾ མགྒོ’’ཏི མགྒཉྩ ཨམགྒཉྩ ཝཝཏྠཔེཏི. ཏསྶེཝཾ མགྒཉྩ ཨམགྒཉྩ ཉཏྭཱ ཋིཏཾ ཉཱཎཾ མགྒཱམགྒཉཱཎདསྶནཝིསུདྡྷི ནཱམ.

ཨེཏྟཱཝཏཱ ཙ པན ཏེན ཙཏུནྣཾ སཙྩཱནཾ ཝཝཏྠཱནཾ ཀཏཾ ཧོཏི. ཀཐཾ? ནཱམརཱུཔཔརིགྒཧེ སཏི པཙྩཡཔརིགྒཧསམྦྷཝཏོ དྷམྨཊྛིཏིཉཱཎཝཙནེནེཝ ཝུཏྟེན དིཊྛིཝིསུདྡྷིསངྑཱཏེན ནཱམརཱུཔཝཝཏྠཱཔནེན དུཀྑསཙྩསྶ ཝཝཏྠཱནཾ ཀཏཾ ཧོཏི, ཀངྑཱཝིཏརཎཝིསུདྡྷིསངྑཱཏེན པཙྩཡཔརིགྒཧཎེན སམུདཡསཙྩསྶ ཝཝཏྠཱནཾ, ཨུདཡབྦཡཱནུཔསྶནེན ཙ ཁཎཏོ ཨུདཡབྦཡདསྶནེན དུཀྑསཙྩསྶ ¶ ཝཝཏྠཱནཾ ཀཏཾ, པཙྩཡཏོ ཨུདཡདསྶནེན སམུདཡསཙྩསྶ ཝཝཏྠཱནཾ, པཙྩཡཏོ ཝཡདསྶནེན ནིརོདྷསཙྩསྶ ཝཝཏྠཱནཾ, ཡཉྩསྶ ཨུདཡབྦཡདསྶནཾ, མགྒོཝཱཡཾ ལོཀིཀོཏི ཏཏྲ སམྨོཧཝིགྷཱཏཏོ ཨིམིསྶཉྩ མགྒཱམགྒཉཱཎདསྶནཝིསུདྡྷིཡཾ ཝིཔསྶཏོ སམྨཱ མགྒསྶ ཨཝདྷཱརཎེན མགྒསཙྩསྶ ཝཝཏྠཱནཾ ཀཏཾ. ཨེཝཾ ལོཀིཡེན ཏཱཝ ཉཱཎེན ཙཏུནྣཾ སཙྩཱནཾ ཝཝཏྠཱནཾ ཀཏཾ ཧོཏཱིཏི.

ཨུདཡབྦཡཉཱཎནིདྡེསཝཎྞནཱ ནིཊྛིཏཱ.

༧. བྷངྒཱནུཔསྶནཱཉཱཎནིདྡེསཝཎྞནཱ

༥༡. སོ ¶ ¶ ཨུདཡབྦཡཱནུཔསྶནཱཡཾ ཋིཏོ ཡོགཱཝཙརོ མགྒཱམགྒཝཝཏྠཱཔནེན ཨུཔཀྐིལེསཝིམུཏྟཾ ཝཱིཐིཔཊིཔནྣཾ ཨུདཡབྦཡཱནུཔསྶནཱཉཱཎཾ ‘‘མགྒོ’’ཏི ཉཏྭཱ ཏིལཀྑཎསལླཀྑཎེན ཏསྶེཝ མགྒསྶ སུཝིསདཀརཎཏྠཾ པུན ཨུདཡབྦཡཱནུཔསྶནཾ ཨཱརབྷིཏྭཱ ཨུདཡབྦཡེན པརིཙྪིནྣེ སངྑཱརེ ཨནིཙྩཱདིཏོ ཝིཔསྶཏི. ཨེཝཾ ཏསྶ ཏཾ ཉཱཎཾ ཏིཀྑཾ ཧུཏྭཱ ཝཧཏི, སངྑཱརཱ ལཧུཾ ཨུཔཊྛཧནྟི, ཉཱཎེ ཏིཀྑེ ཝཧནྟེ སངྑཱརེསུ ལཧུཾ ཨུཔཊྛཧནྟེསུ ཨུཔྤཱདཾ ཨཏིཀྐམིཏྭཱ བྷངྒེ ཨེཝ སཏི སནྟིཊྛཏི. ནིརོདྷཱདྷིམུཏྟཏྟཱ ཝཱ ཨུདཡཾ པཧཱཡ བྷངྒེཡེཝ སཏིཾ ཨུཔཊྛཔེཏི. ཨེཏསྨིཾ ཋཱནེ བྷངྒཱནུཔསྶནཱཉཱཎཾ ཨུཔྤཛྫཏི. ཨིདཱནི ཏསྶ ཉཱཎསྶ ནིདྡེསེ རཱུཔཱརམྨཎཏཱ ཙིཏྟཾ ཨུཔྤཛྫིཏྭཱ བྷིཛྫཏཱིཏི རཱུཔཱརམྨཎཾ ཙིཏྟཾ ཨུཔྤཛྫིཏྭཱ བྷིཛྫཏི. ཨཐ ཝཱ རཱུཔཱརམྨཎབྷཱཝེ ཙིཏྟཾ ཨུཔྤཛྫིཏྭཱ བྷིཛྫཏཱིཏི ཨཏྠོ. ཏཾ ཨཱརམྨཎཾ པཊིསངྑཱཏི ཏཾ རཱུཔཱརམྨཎཾ པཊིསངྑཱཡ ཛཱནིཏྭཱ, ཁཡཏོ ཝཡཏོ དིསྭཱཏི ཨཏྠོ. ཏསྶ ཙིཏྟསྶ བྷངྒཾ ཨནུཔསྶཏཱིཏི ཡེན ཙིཏྟེན ཏཾ རཱུཔཱརམྨཎཾ ཁཡཏོ ཝཡཏོ དིཊྛཾ, ཏསྶ ཙིཏྟསྶ ཨཔརེན ཙིཏྟེན བྷངྒཾ ཨནུཔསྶཏཱིཏི ཨཏྠོ. ཏེནཱཧུ པོརཱཎཱ – ‘‘ཉཱཏཉྩ ཉཱཎཉྩ ཨུབྷོ ཝིཔསྶཏཱི’’ཏི. ཙིཏྟནྟི ཙེཏྠ སསམྤཡུཏྟཙིཏྟཾ ཨདྷིཔྤེཏཾ.

ཨནུཔསྶཏཱིཏི ཨནུ ཨནུ པསྶཏི, ཨནེཀེཧི ཨཱཀཱརེཧི པུནཔྤུནཾ པསྶཏཱིཏི ཨཏྠོ. ཏེནཱཧ ཨནུཔསྶཏཱིཏི ཀཐཾ ཨནུཔསྶཏི, ཨནིཙྩཏོ ཨནུཔསྶཏཱིཏིཨཱདི ¶ . ཏཏྠ ཡསྨཱ བྷངྒོ ནཱམ ཨནིཙྩཏཱཡ པརམཱ ཀོཊི, ཏསྨཱ བྷངྒཱནུཔསྶཀོ ཡོགཱཝཙརོ སབྦཾ རཱུཔགཏཾ ཨནིཙྩཏོ ཨནུཔསྶཏི, ནོ ནིཙྩཏོ. ཏཏོ ཨནིཙྩསྶ དུཀྑཏྟཱ, དུཀྑསྶ ཙ ཨནཏྟཏྟཱ, ཏདེཝ དུཀྑཏོ ཨནུཔསྶཏི, ནོ སུཁཏོ. ཨནཏྟཏོ ཨནུཔསྶཏི, ནོ ཨཏྟཏོ ¶ . ཡསྨཱ པན ཡཾ ཨནིཙྩཾ དུཀྑམནཏྟཱ, ན ཏཾ ཨབྷིནནྡིཏབྦཾ. ཡཉྩ ན ཨབྷིནནྡིཏབྦཾ, ན ཏཏྠ རཛྫིཏབྦཾ. ཏསྨཱ ཨེས ཏསྨིཾ བྷངྒཱནུཔསྶནཱནུསཱརེན ‘‘ཨནིཙྩཾ དུཀྑམནཏྟཱ’’ཏི དིཊྛེ རཱུཔགཏེ ནིབྦིནྡཏི, ནོ ནནྡཏི. ཝིརཛྫཏི, ནོ རཛྫཏི. སོ ཨེཝཾ ཝིརཛྫནྟོ ལོཀིཀེནེཝ ཏཱཝ ཉཱཎེན རཱགཾ ནིརོདྷེཏི, ནོ སམུདེཏི, སམུདཡཾ ན ཀརོཏཱིཏི ཨཏྠོ. ཨཐ ཝཱ སོ ཨེཝཾ ཝིརཏྟོ ཡཐཱ དིཊྛཾ རཱུཔགཏཾ, ཏཐཱ ཨདིཊྛམྤི ཨནྭཡཉཱཎཝསེན ནིརོདྷེཏི, ནོ སམུདེཏི. ནིརོདྷཏོཝ མནསི ཀརོཏི, ནིརོདྷམེཝསྶ པསྶཏི, ནོ སམུདཡནྟི ཨཏྠོ. སོ ཨེཝཾ པཊིཔནྣོ པཊིནིསྶཛྫཏི, ནོ ཨཱདིཡཏི. ཀིཾ ཝུཏྟཾ ཧོཏི? ཨཡམྤི ཧི ཨནིཙྩཱདིཨནུཔསྶནཱ ཏདངྒཝསེན སདྡྷིཾ ཁནྡྷཱབྷིསངྑཱརེཧི ཀིལེསཱནཾ པརིཙྩཛནཏོ, སངྑཏདོསདསྶནེན ཙ ཏབྦིཔརཱིཏེ ནིབྦཱནེ ཏནྣིནྣཏཱཡ པཀྑནྡནཏོ པརིཙྩཱགཔཊིནིསྶགྒོ ཙེཝ པཀྑནྡནཔཊིནིསྶགྒོ ¶ ཙཱཏི ཝུཙྩཏི. ཏསྨཱ ཏཱཡ སམནྣཱགཏོ བྷིཀྑུ ཡཐཱཝུཏྟེན ནཡེན ཀིལེསེ ཙ པརིཙྩཛཏི, ནིབྦཱནེ ཙ པཀྑནྡཏི. ནཱཔི ནིབྦཏྟནཝསེན ཀིལེསེ ཨཱདིཡཏི, ན ཨདོསདསྶིཏཱཝསེན སངྑཏཱརམྨཎཾ. ཏེན ཝུཙྩཏི པཊིནིསྶཛྫཏི, ནོ ཨཱདིཡཏཱིཏི.

༥༢. ཨིདཱནིསྶ ཏེཧི ཉཱཎེཧི ཡེསཾ དྷམྨཱནཾ པཧཱནཾ ཧོཏི, ཏཾ དསྶེཏུཾ ཨནིཙྩཏོ ཨནུཔསྶནྟོ ནིཙྩསཉྙཾ པཛཧཏཱིཏིཨཱདི ཝུཏྟཾ. ཏཏྠ ནནྡིནྟི སཔྤཱིཏིཀཾ ཏཎྷཾ. རཱགནྟི སེསཾ ཏཎྷཾ. སམུདཡནྟི རཱགསྶ ཨུཔྤཏྟིཾ. ཨཐ ཝཱ རཱུཔགཏསྶ ཨུདཡཾ. ཨཱདཱནནྟི ནིབྦཏྟནཝསེན ཀིལེསཱནཾ ཨཱདཱནཾ. ཝེདནཱརམྨཎཏཱཏིཨཱདཱིནི ཨིདྷ ཙ ཧེཊྛཱ ཙ ཝུཏྟནཡེནེཝ ཝེདིཏབྦཱནི.

གཱཐཱསུ པན ཝཏྠུསངྐམནཱཏི རཱུཔཱདཱིསུ ཨེཀེཀསྶ བྷངྒཾ དིསྭཱ པུན ཡེན ཙིཏྟེན བྷངྒོ དིཊྛོ, ཏསྶཱཔི བྷངྒདསྶནཝསེན པུརིམཝཏྠུཏོ ཨཉྙཝཏྠུསངྐམནཱ. པཉྙཱཡ ཙ ཝིཝཊྚནཱཏི ཨུདཡཾ པཧཱཡ ཝཡེ སནྟིཊྛནཱ. ཨཱཝཛྫནཱ བལཉྩེཝཱཏི རཱུཔཱདཱིསུ ཨེཀེཀསྶ བྷངྒཾ དིསྭཱ པུན བྷངྒཱརམྨཎསྶ ཙིཏྟསྶ བྷངྒདསྶནཏྠཾ ཨནནྟརམེཝ ཨཱཝཛྫནསམཏྠཏཱ. པཊིསངྑཱ ཝིཔསྶནཱཏི ¶ ཨེསཱ ཨཱརམྨཎཔཊིསངྑཱ བྷངྒཱནུཔསྶནཱ ནཱམ. ཨཱརམྨཎཨནྭཡེན ¶ ཨུབྷོ ཨེཀཝཝཏྠནཱཏི པཙྩཀྑཏོ དིཊྛསྶ ཨཱརམྨཎསྶ ཨནྭཡེན ཨནུགམནེན ཡཐཱ ཨིདཾ, ཏཐཱ ཨཏཱིཏེཔི སངྑཱརགཏཾ བྷིཛྫི, ཨནཱགཏེཔི བྷིཛྫིསྶཏཱིཏི ཨེཝཾ ཨུབྷིནྣཾ ཨེཀསབྷཱཝེནེཝ ཝཝཏྠཱཔནནྟི ཨཏྠོ. ཝུཏྟམྤི ཙེཏཾ པོརཱཎེཧི –

‘‘སཾཝིཛྫམཱནམྷི ཝིསུདྡྷདསྶནོ, ཏདནྭཡཾ ནེཏི ཨཏཱིཏནཱགཏེ;

སབྦེཔི སངྑཱརགཏཱ པལོཀིནོ, ཨུསྶཱཝབིནྡཱུ སཱུརིཡེཝ ཨུགྒཏེ’’ཏི.

ནིརོདྷེ ཨདྷིམུཏྟཏཱཏི ཨེཝཾ ཨུབྷིནྣཾ བྷངྒཝསེན ཨེཀཝཝཏྠཱནཾ ཀཏྭཱ ཏསྨིཾཡེཝ བྷངྒསངྑཱཏེ ནིརོདྷེ ཨདྷིམུཏྟཏཱ ཏགྒརུཏཱ ཏནྣིནྣཏཱ ཏཔྤོཎཏཱ ཏཔྤབྦྷཱརཏཱཏི ཨཏྠོ. ཝཡལཀྑཎཝིཔསྶནཱཏི ཨེསཱ ཝཡལཀྑཎཝིཔསྶནཱ ནཱམཱཏི ཝུཏྟཾ ཧོཏི. ཨཱརམྨཎཉྩ པཊིསངྑཱཏི པུརིམཉྩ རཱུཔཱདིཨཱརམྨཎཾ ཛཱནིཏྭཱ. བྷངྒཉྩ ཨནུཔསྶཏཱིཏི ཏསྶཱརམྨཎསྶ བྷངྒཾ དིསྭཱ ཏདཱརམྨཎསྶ ཙིཏྟསྶ ཙ བྷངྒཾ ཨནུཔསྶཏི. སུཉྙཏོ ཙ ཨུཔཊྛཱནནྟི ཏསྶེཝཾ བྷངྒམནུཔསྶཏོ ‘‘སངྑཱརཱཝ བྷིཛྫནྟི, ཏེསཾ བྷེདོ མརཎཾ, ན ཨཉྙོ ཀོཙི ཨཏྠཱི’’ཏི སུཉྙཏོ ཨུཔཊྛཱནཾ ཨིཛ྄ཛྷཏི. ཏེནཱཧུ པོརཱཎཱ –

‘‘ཁནྡྷཱ ¶ ནིརུཛ྄ཛྷནྟི ན ཙཏྠི ཨཉྙོ, ཁནྡྷཱན བྷེདོ མརཎནྟི ཝུཙྩཏི;

ཏེསཾ ཁཡཾ པསྶཏི ཨཔྤམཏྟོ, མཎིཾཝ ཝིཛ྄ཛྷཾ ཝཛིརེན ཡོནིསོ’’ཏི.

ཨདྷིཔཉྙཱ ཝིཔསྶནཱཏི ཡཱ ཙ ཨཱརམྨཎཔཊིསངྑཱ, ཡཱ ཙ བྷངྒཱནུཔསྶནཱ, ཡཉྩ སུཉྙཏོ ཨུཔཊྛཱནཾ, ཨཡཾ ཨདྷིཔཉྙཱ ཝིཔསྶནཱ ནཱམཱཏི ཝུཏྟཾ ཧོཏི. ཀུསལོ ཏཱིསུ ཨནུཔསྶནཱསཱུཏི ཨནིཙྩཱནུཔསྶནཱདཱིསུ ཏཱིསུ ཚེཀོ བྷིཀྑུ. ཙཏསྶོ ཙ ཝིཔསྶནཱསཱུཏི ནིབྦིདཱདཱིསུ ཙ ཙཏཱུསུ ཝིཔསྶནཱསུ. ཏཡོ ཨུཔཊྛཱནེ ཀུསལཏཱཏི ཁཡཏོ ཝཡཏོ སུཉྙཏོཏི ཨིམསྨིཉྩ ཏིཝིདྷེ ཨུཔཊྛཱནེ ཀུསལཏཱཡ. ནཱནཱདིཊྛཱིསུ ན ཀམྤཏཱིཏི སསྶཏདིཊྛིཨཱདཱིསུ ¶ ནཱནཔྤཀཱརཱསུ དིཊྛཱིསུ ན ཝེདྷཏི. སོ ཨེཝཾ ཨཝེདྷམཱནོ ‘‘ཨནིརུདྡྷམེཝ ནིརུཛ྄ཛྷཏི, ཨབྷིནྣམེཝ བྷིཛྫཏཱི’’ཏི པཝཏྟམནསིཀཱརོ དུབྦལབྷཱཛནསྶ ¶ ཝིཡ བྷིཛྫམཱནསྶ, སུཁུམརཛསྶེཝ ཝིཔྤཀིརིཡམཱནསྶ, ཏིལཱནཾ ཝིཡ བྷཛྫིཡམཱནཱནཾ སབྦསངྑཱརཱནཾ ཨུཔྤཱདཊྛིཏིཔཝཏྟནིམིཏྟཾ ཝིསྶཛྫེཏྭཱ བྷེདམེཝ པསྶཏི. སོ ཡཐཱ ནཱམ ཙཀྑུམཱ པུརིསོ པོཀྑརཎཱིཏཱིརེ ཝཱ ནདཱིཏཱིརེ ཝཱ ཋིཏོ ཐཱུལཕུསིཏཀེ དེཝེ ཝསྶནྟེ ཨུདཀཔིཊྛེ མཧནྟམཧནྟཱནི ཨུདཀཔུབྦུལཱ༹ནི ཨུཔྤཛྫིཏྭཱ ཨུཔྤཛྫིཏྭཱ སཱིགྷཾ སཱིགྷཾ བྷིཛྫམཱནཱནི པསྶེཡྻ, ཨེཝམེཝ སབྦེ སངྑཱརཱ བྷིཛྫནྟི བྷིཛྫནྟཱིཏི པསྶཏི. ཨེཝརཱུཔཉྷི ཡོགཱཝཙརཾ སནྡྷཱཡ ཝུཏྟཾ བྷགཝཏཱ –

‘‘ཡཐཱ པུབྦུལ༹ཀཾ པསྶེ, ཡཐཱ པསྶེ མརཱིཙིཀཾ;

ཨེཝཾ ལོཀཾ ཨཝེཀྑནྟཾ, མཙྩུརཱཛཱ ན པསྶཏཱི’’ཏི. (དྷ. པ. ༡༧༠);

ཏསྶེཝཾ ‘‘སབྦེ སངྑཱརཱ བྷིཛྫནྟི བྷིཛྫནྟཱི’’ཏི ཨབྷིཎྷཾ པསྶཏོ ཨཊྛཱནིསཾསཔརིཝཱརཾ བྷངྒཱནུཔསྶནཱཉཱཎཾ བལཔྤཏྟཾ ཧོཏི. ཏཏྲིམེ ཨཊྛཱནིསཾསཱ – བྷཝདིཊྛིཔྤཧཱནཾ, ཛཱིཝིཏནིཀནྟིཔརིཙྩཱགོ, སདཱཡུཏྟཔཡུཏྟཏཱ, ཝིསུདྡྷཱཛཱིཝིཏཱ, ཨུསྶུཀྐཔྤཧཱནཾ, ཝིགཏབྷཡཏཱ, ཁནྟིསོརཙྩཔཊིལཱབྷོ, ཨརཏིརཏིསཧནཏཱཏི. ཏེནཱཧུ པོརཱཎཱ –

‘‘ཨིམཱནི ཨཊྛགྒུཎམུཏྟམཱནི, དིསྭཱ ཏཧིཾ སམྨསཏཱི པུནཔྤུནཾ;

ཨཱདིཏྟཙེལསྶིརསཱུཔམོ མུནི, བྷངྒཱནུཔསྶཱི ཨམཏསྶ པཏྟིཡཱ’’ཏི.

བྷངྒཱནུཔསྶནཱཉཱཎནིདྡེསཝཎྞནཱ ནིཊྛིཏཱ.

༨. ཨཱདཱིནཝཉཱཎནིདྡེསཝཎྞནཱ

༥༣. ཨཱདཱིནཝཉཱཎནིདྡེསེ ¶ ¶ ཨུཔྤཱདོཏི པུརིམཀམྨཔཙྩཡཱ ཨིདྷ ཨུཔྤཏྟི. པཝཏྟནྟི ཏཐཱཨུཔྤནྣསྶ པཝཏྟི. ནིམིཏྟནྟི སབྦམྤི སངྑཱརནིམིཏྟཾ. ཨཱཡཱུཧནཱཏི ཨཱཡཏིཾ པཊིསནྡྷིཧེཏུབྷཱུཏཾ ཀམྨཾ. པཊིསནྡྷཱིཏི ཨཱཡཏིཾ ཨུཔྤཏྟི. གཏཱིཏི ཡཱཡ གཏིཡཱ སཱ པཊིསནྡྷི ཧོཏི. ནིབྦཏྟཱིཏི ཁནྡྷཱནཾ ནིབྦཏྟནཾ. ཨུཔཔཏྟཱིཏི ‘‘སམཱཔནྣསྶ ཝཱ ཨུཔཔནྣསྶ ཝཱ’’ཏི (དྷ. ས. ༡༢༨༩) ཨེཝཾ ཝུཏྟཱ ཝིཔཱཀཔྤཝཏྟི ¶ . ཛཱཏཱིཏི ཛརཱདཱིནཾ པཙྩཡབྷཱུཏཱ བྷཝཔཙྩཡཱ ཛཱཏི. ནིཔྤརིཡཱཡཏོ ཏཏྠ ཏཏྠ ནིབྦཏྟམཱནཱནཾ སཏྟཱནཾ ཡེ ཡེ ཁནྡྷཱ པཱཏུབྷཝནྟི, ཏེསཾ པཋམཔཱཏུབྷཱཝོ ཛཱཏི. ཛརཱཏི ཁཎྜིཙྩཱདིསམྨཏོ སནྟཏིཡཾ ཨེཀབྷཝཔརིཡཱཔནྣཁནྡྷསནྟཱནསྶ པུརཱཎབྷཱཝོ. སོཀོཏི ཉཱཏིབྱསནཱདཱིཧི ཕུཊྛསྶ ཙིཏྟསནྟཱཔོ. པརིདེཝོཏི ཉཱཏིབྱསནཱདཱིཧི ཕུཊྛསྶ ཝཙཱིཔལཱཔོ. ཨུཔཱཡཱསོཏི བྷུསོ ཨཱཡཱསོ, ཉཱཏིབྱསནཱདཱིཧི ཕུཊྛསྶ ཨདྷིམཏྟཙེཏོདུཀྑཔྤབྷཱཝིཏོ དོསོཡེཝ. ཨེཏྠ ཙ ཨུཔྤཱདཱདཡོ པཉྩེཝ ཨཱདཱིནཝཉཱཎསྶ ཝཏྠུཝསེན ཝུཏྟཱ, སེསཱ ཏེསཾ ཝེཝཙནཝསེན. ‘‘ནིབྦཏྟི ཛཱཏཱི’’ཏི ཨིདཉྷི དྭཡཾ ཨུཔྤཱདསྶ ཙེཝ པཊིསནྡྷིཡཱ ཙ ཝེཝཙནཾ, ‘‘གཏི ཨུཔཔཏྟཱི’’ཏི ཨིདཾ དྭཡཾ པཝཏྟསྶ, ཛརཱདཡོ ནིམིཏྟསྶཱཏི. ཏེནཱཧ –

‘‘ཨུཔྤཱདཉྩ པཝཏྟཉྩ, ནིམིཏྟཾ དུཀྑནྟི པསྶཏི;

ཨཱཡཱུཧནཾ པཊིསནྡྷིཾ, ཉཱཎཾ ཨཱདཱིནཝེ ཨིད’’ནྟི. ཙ

‘‘ཨིདཾ ཨཱདཱིནཝེ ཉཱཎཾ, པཉྩཋཱནེསུ ཛཱཡཏཱི’’ཏི. ཙ

སབྦཔདེསུ ཙ བྷཡནྟི ཨིཙྩེཏསྶ ཝཙནསྶ བྷཡཾ ཨིཏཱིཏི པདཙྪེདོ ¶ . བྷཡནྟི པཱིལཱ༹ཡོགཏོ སཔྤཊིབྷཡཏཱཡ བྷཡཾ. ཨིཏཱིཏི བྷཡཏུཔཊྛཱནསྶ ཀཱརཎནིདྡེསོ.

ཨནུཔྤཱདོ ཁེམནྟི སནྟིཔདེ ཉཱཎནྟིཨཱདི པན ཨཱདཱིནཝཉཱཎསྶ པཊིཔཀྑཉཱཎདསྶནཏྠཾ ཝུཏྟཾ. བྷཡཏུཔཊྛཱནེན ཝཱ ཨཱདཱིནཝཾ དིསྭཱ ཨུབྦིགྒཧདཡཱནཾ ཨབྷཡམྤི ཨཏྠི ཁེམཾ ནིརཱདཱིནཝནྟི ཨསྶཱསཛནནཏྠམྤི ཨེཏཾ ཝུཏྟཾ. ཡསྨཱ ཝཱ ཡསྶ ཨུཔྤཱདཱདཡོ བྷཡཏོ སཱུཔཊྛིཏཱ ཧོནྟི, ཏསྶ ཏཔྤཊིཔཀྑནིནྣཾ ཙིཏྟཾ ཧོཏི, ཏསྨཱ བྷཡཏུཔཊྛཱནཝསེན སིདྡྷསྶ ཨཱདཱིནཝཉཱཎསྶ ཨཱནིསཾསདསྶནཏྠམྤེཏཾ ཝུཏྟནྟི ཝེདིཏབྦཾ. ཨནུཔྤཱདོ ཨཔྤཝཏྟནྟིཨཱདི ནིབྦཱནམེཝ. སནྟིཔདེཏི སནྟིཀོཊྛཱསེ, ནིབྦཱནེཏི ཨཏྠོ. ཨནུསྶཝཝསེནཱཔི ཧི སནྟིཔདནྟི ནཱམམཏྟཾ གཧེཏྭཱ ཨུཔྤནྣཾ ཉཱཎམྤི ‘‘སནྟིཔདེ ཉཱཎ’’ནྟི ཝུཏྟཾ.

ཨུཔྤཱདོ ¶ བྷཡཾ, ཨནུཔྤཱདོ ཁེམནྟིཨཱདི ཝིཔཀྑཔཊིཔཀྑཝསེན ཨུབྷཡཾ སམཱསེཏྭཱ ཨུཔྤཛྫམཱནཾ ཉཱཎཾ གཧེཏྭཱ ཝུཏྟཾ. ཨེཏྠ ཙ ཡཾ བྷཡཾ, ཏཾ ཡསྨཱ ནིཡམཏོ དུཀྑཾ. ཡཉྩ དུཀྑཾ, ཏཾ ཝཊྚཱམིསལོཀཱམིསཀིལེསཱམིསེཧི ཨཝིཔྤམུཏྟཏྟཱ སཱམིསམེཝ. ཡཉྩ སཱམིསཾ, ཏཾ སངྑཱརམཏྟམེཝ. ཏསྨཱ ¶ ཨུཔྤཱདོ དུཀྑནྟི བྷཡཏུཔཊྛཱནེ པཉྙཱ ཨཱདཱིནཝེ ཉཱཎནྟིཨཱདི ཝུཏྟཾ. ཨེཝཾ སནྟེཔི བྷཡཱཀཱརེན དུཀྑཱཀཱརེན སཱམིསཱཀཱརེན སངྑཱརཱཀཱརེནཱཏི ཨེཝཾ ཨཱཀཱརནཱནཏྟཏོ པཝཏྟིཝསེནེཏྠ ནཱནཏྟཾ ཝེདིཏབྦཾ. ཨུཔྤཱདོ བྷཡཾ, དུཀྑཾ, སཱམིསཾ, སངྑཱརཱ ཙཱཏི ཨུཔྤཱདཱདིལིངྒམནཔེཀྑིཏྭཱ ‘‘ནེཏཾ ཁོ སརཎཾ ཁེམཾ, ནེཏཾ སརཎམུཏྟམ’’ནྟིཨཱདཱིསུ (དྷ. པ. ༡༨༩) ཝིཡ ཨཏྟནོ ལིངྒཱཔེཀྑམེཝ ཝུཏྟཾ. སངྑཱརཱཏི ཙ ཨེཀཏྟམནཔེཀྑིཏྭཱ ‘‘ཨཔྤཙྩཡཱ དྷམྨཱ, ཨསངྑཏཱ དྷམྨཱ’’ཏིཨཱདཱིསུ (དྷ. ས. དུཀམཱཏིཀཱ ༧-༨) ཝིཡ བཧུཝཙནཾ ཀཏཾ, ཨུཔྤཱདཱདཱིནཾ ཝཱ སངྑཱརེཀདེསཏྟཱ ‘‘ཨུཏྟརེ པཉྩཱལཱ, དཀྑིཎེ པཉྩཱལཱ’’ཏིཨཱདཱིསུ ཝིཡ བཧུནྣཾ ཨེཀདེསེཔི བཧུཝཙནཾ ཀཏནྟི ཝེདིཏབྦཾ. ཁེམཾ སུཁཾ ནིརཱམིསཾ ནིབྦཱནནྟི ནིབྦཱནམེཝ ཝུཏྟཱཀཱརཱནཾ པཊིཔཀྑཝསེན ཙཏུདྷཱ ཝུཏྟཾ. དས ཉཱཎེ པཛཱནཱཏཱིཏི ཨཱདཱིནཝེ ཉཱཎཾ པཛཱནནྟོ ཨུཔྤཱདཱདིཝཏྠུཀཱནི ¶ པཉྩ, ཨནུཔྤཱདཱདིཝཏྠུཀཱནི པཉྩཱཏི དས ཉཱཎེ པཛཱནཱཏི པཊིཝིཛ྄ཛྷཏི སཙྪིཀརོཏི. དྭིནྣཾ ཉཱཎཱནཾ ཀུསལཏཱཏི ཨཱདཱིནཝཉཱཎསྶ ཙེཝ སནྟིཔདཉཱཎསྶ ཙཱཏི ཨིམེསཾ དྭིནྣཾ ཉཱཎཱནཾ ཀུསལཏཱཡ. ནཱནཱདིཊྛཱིསུ ན ཀམྤཏཱིཏི པརམདིཊྛདྷམྨནིབྦཱནཱདིཝསེན པཝཏྟཱསུ དིཊྛཱིསུ ན ཝེདྷཏཱིཏི.

ཨཱདཱིནཝཉཱཎནིདྡེསཝཎྞནཱ ནིཊྛིཏཱ.

༩. སངྑཱརུཔེཀྑཱཉཱཎནིདྡེསཝཎྞནཱ

༥༤. སངྑཱརུཔེཀྑཱཉཱཎནིདྡེསེ ¶ ཨུཔྤཱདཱདཱིནི ཝུཏྟཏྠཱནེཝ. དུཀྑནྟི བྷཡནྟི སཱམིསནྟི སངྑཱརཱཏི ཨུཔྤཱདཱདིམུཉྩནཉཱཎསྶ ཀཱརཎཝཙནཱནི. ཨེཝཉྩ ལཀྑཎཏོ སངྑཱརུཔེཀྑཾ དསྶེཏྭཱ ཨིདཱནི ཨཏྠཏོ དསྶེཏུཾ ཨུཔྤཱདོ སངྑཱརཱ, ཏེ སངྑཱརེ ཨཛ྄ཛྷུཔེཀྑཏཱིཏི སངྑཱརུཔེཀྑཱཏིཨཱདིམཱཧ. ཏཏྠ སངྑཱརེ ཨཛ྄ཛྷུཔེཀྑཏཱིཏི ཏསྶ ཨཱརདྡྷཝིཔསྶཀསྶ ཝིཔསྶནཱཉཱཎེན ལཀྑཎཏྟཡསྶ དིཊྛཏྟཱ ལཀྑཎཝིཙིནནེ པཧཱིནབྱཱཔཱརསྶ ཨཱདིཏྟེ ཝིཡ ཏཡོ བྷཝེ པསྶཏོ སངྑཱརགྒཧཎེ མཛ྄ཛྷཏྟསྶ ཏཾ ཝིཔསྶནཱཉཱཎཾ ཏེ སངྑཱརེ ཝིསེསེན ཙ ཨིཀྑཏི, གཧཎེན ཝཛྫིཏཉྩ ཧུཏྭཱ ཨིཀྑཏི ཨོལོཀེཏཱིཏི སངྑཱརུཔེཀྑཱ ནཱམཱཏི ཨཏྠོ. ཡཐཱ ལོཀེ ཝིསེསེན ཛཡནྟོ ཨདྷིཛཡཏཱིཏི, ཨནྣེན ཝཛྫིཏོ ཝསནྟོ ཨུཔཝསཏཱིཏི ཝུཙྩཏི. པུན ¶ སངྑཱརེ ཨནིཙྩཱདིཏོ ཝིཔསྶིཏྭཱ གཧཎེ མཛ྄ཛྷཏྟབྷཱཝསཎྛིཏཾ ¶ སངྑཱརུཔེཀྑམྤི ཨནིཙྩཱདིཏོ ཝིཔསྶིཏྭཱ ཏསྶཱཔི སངྑཱརུཔེཀྑཱཡ གཧཎེ མཛ྄ཛྷཏྟཱཀཱརསཎྛིཏཱཡ སངྑཱརུཔེཀྑཱཡ སབྦྷཱཝཏོ ཡེ ཙ སངྑཱརཱ ཡཱ ཙ ཨུཔེཀྑཱཏིཨཱདི ཝུཏྟཾ.

༥༥. ཨིདཱནི སངྑཱརུཔེཀྑཱཡ ཙིཏྟཱབྷིནཱིཧཱརབྷེདཾ དསྶེཏུཾ ཀཏིཧཱཀཱརེཧཱིཏིཨཱདིམཱཧ. ཏཏྠ སངྑཱརུཔེཀྑཱཡཱཏི བྷུམྨཝཙནཾ. ཙིཏྟསྶ ཨབྷིནཱིཧཱརོཏི སངྑཱརུཔེཀྑཱལཱབྷིནོ ཏཏོ ཨཉྙསྶ ཙིཏྟསྶ སངྑཱརུཔེཀྑཱབྷིམུཁཾ ཀཏྭཱ བྷུསཾ ཧརཎཾ. ཨབྷིམུཁཏྠོ ཧི ཨེཏྠ ཨབྷིསདྡོ, བྷུསཏྠོ ནཱིསདྡོ. ཀཏིཧཱཀཱརེཧཱིཏི པུཙྪིཏཾ པུཙྪཾ ཨཊྛཧཱཀཱརེཧཱིཏི ཝིསྶཛྫེཏྭཱ དུཏིཡཔུཙྪཱཝིསྶཛྫནེནེཝ ཏེ ཨཊྛཱཀཱརེ དསྶེཏུཀཱམོ ཏེ ཨདསྶེཏྭཱཝ པུཐུཛྫནསྶ ཀཏིཧཱཀཱརེཧཱིཏིཨཱདི ¶ པུཙྪཾ ཨཀཱསི. པུཐུཛྫནསྶཱཏི ཨེཏྠ པན –

དུཝེ པུཐུཛྫནཱ ཝུཏྟཱ, བུདྡྷེནཱདིཙྩབནྡྷུནཱ;

ཨནྡྷོ པུཐུཛྫནོ ཨེཀོ, ཀལྱཱཎེཀོ པུཐུཛྫནོཏི.

ཏཏྠ ཡསྶ ཁནྡྷདྷཱཏུཨཱཡཏནཱདཱིསུ ཨུགྒཧཔརིཔུཙྪཱསཝནདྷཱརཎཔཙྩཝེཀྑཎཱདཱིནི ནཏྠི, ཨཡཾ ཨནྡྷཔུཐུཛྫནོ. ཡསྶ ཏཱནི ཨཏྠི, སོ ཀལྱཱཎཔུཐུཛྫནོ. དུཝིདྷོཔི པནེས –

པུཐཱུནཾ ཛནནཱདཱིཧི, ཀཱརཎེཧི པུཐུཛྫནོ;

པུཐུཛྫནནྟོགདྷཏྟཱ, པུཐུཝཱཡཾ ཛནོ ཨིཏི.

སོ ཧི པུཐཱུནཾ ནཱནཔྤཀཱརཱནཾ ཀིལེསཱདཱིནཾ ཛནནཱདཱིཧི ཀཱརཎེཧི པུཐུཛྫནོ. ཡཐཱཧ – ‘‘པུཐུ ཀིལེསེ ཛནེནྟཱིཏི པུཐུཛྫནཱ, པུཐུ ཨཝིཧཏསཀྐཱཡདིཊྛིཀཱཏི པུཐུཛྫནཱ, པུཐུ སཏྠཱརཱནཾ མུཁུལློཀིཀཱཏི པུཐུཛྫནཱ, པུཐུ སབྦགཏཱིཧི ཨཝུཊྛིཏཱཏི པུཐུཛྫནཱ, པུཐུ ནཱནཱབྷིསངྑཱརེ ཨབྷིསངྑརོནྟཱིཏི པུཐུཛྫནཱ, པུཐུ ནཱནཱཨོགྷེཧི ཝུཡ྄ཧནྟཱིཏི པུཐུཛྫནཱ, པུཐུ ནཱནཱསནྟཱཔེཧི སནྟཔྤེནྟཱིཏི པུཐུཛྫནཱ, པུཐུ ནཱནཱཔརིལཱ༹ཧེཧི པརིཌཡ྄ཧནྟཱིཏི པུཐུཛྫནཱ, པུཐུ པཉྩསུ ཀཱམགུཎེསུ རཏྟཱ གིདྡྷཱ གདྷིཏཱ མུཙྪིཏཱ ཨཛ྄ཛྷོསནྣཱ ལགྒཱ ལགྒིཏཱ པལིབུདྡྷཱཏི པུཐུཛྫནཱ, པུཐུ པཉྩཧི ནཱིཝརཎེཧི ཨཱཝུཏཱ ནིཝུཏཱ ཨོཝུཏཱ པིཧིཏཱ པཊིཙྪནྣཱ པཊིཀུཛྫིཏཱཏི པུཐུཛྫནཱ’’ཏི ¶ (མཧཱནི. ༩༤). པུཐཱུནཾ ཝཱ གཎནཔཐཱཏཱིཏཱནཾ ཨརིཡདྷམྨཔརམྨུཁཱནཾ ནཱིཙདྷམྨསམཱཙཱརཱནཾ ཛནཱནཾ ཨནྟོགདྷཏྟཱཔི པུཐུཛྫནཱ, པུཐུ ཝཱ ཨཡཾ ཝིསུཾཡེཝ སངྑཾ གཏོ, ཝིསཾསཊྛོ ¶ སཱིལསུཏཱདིགུཎཡུཏྟེཧི ཨརིཡེཧི ཛནོཏིཔི པུཐུཛྫནོ. ཏེསུ ཀལྱཱཎཔུཐུཛྫནོ ཨིདྷཱདྷིཔྤེཏོ ཨིཏརསྶ བྷཱཝནཱཡ ཨེཝ ཨབྷཱཝཱ.

སེཀྑསྶཱཏི ཨེཏྠ སཏྟ སེཀྑཱ སོཏཱཔཏྟིམགྒཕལསཀདཱགཱམིམགྒཕལཨནཱགཱམིམགྒཕལཨརཧཏྟམགྒཊྛཱ. ཏེ ཧི ཏིསྶོ སིཀྑཱ སིཀྑནྟཱིཏི སེཀྑཱ. ཏེསུ སོཏཱཔཏྟིསཀདཱགཱམིཨནཱགཱམིཕལཊྛཱ ¶ ཏཡོ ཨིདྷཱདྷིཔྤེཏཱ མགྒཊྛཱནཾ སངྑཱརུཔེཀྑཱཡ ཙིཏྟཱབྷིནཱིཧཱརཱབྷཱཝཱ.

ཝཱིཏརཱགསྶཱཏི ཨེཏྠ སམུཙྪེདཝིགམེན ཝིགཏོ རཱགོ ཨསྶཱཏི ཝཱིཏརཱགོ. ཨརཧཏོ ཨེཏཾ ཨདྷིཝཙནཾ. ཏཱིསུཔི པདེསུ ཛཱཏིགྒཧཎེན ཨེཀཝཙནཾ ཀཏཾ.

སངྑཱརུཔེཀྑཾ ཨབྷིནནྡཏཱིཏི ཏསྨིཾ ཨུཔེཀྑཱཝིཧཱརེ ཕཱསུཝིཧཱརསཉྙཾ པཊིལབྷིཏྭཱ ཕཱསུཝིཧཱརནིཀནྟིཡཱ སངྑཱརུཔེཀྑཱབྷིམུཁོ ཧུཏྭཱ ནནྡཏི, སཔྤཱིཏིཀཾ ཏཎྷཾ ཨུཔྤཱདེཏཱིཏི ཨཏྠོ. ཝིཔསྶཏཱིཏི སོཏཱཔཏྟིམགྒཔཊིལཱབྷཏྠཾ ཨནིཙྩཱདིཝསེན ཝིཝིདྷཱ པསྶཏི, སེཀྑོ ཨུཔརིམགྒཏྠཾ, ཝཱིཏརཱགོ དིཊྛདྷམྨསུཁཝིཧཱརཏྠཾ ཝིཔསྶཏི. པཊིསངྑཱཡཱཏི ཨནིཙྩཱདིཝསེནེཝ ཨུཔཔརིཀྑིཏྭཱ. ཡསྨཱ པན སོཏཱཔནྣཱདཡོ ཨརིཡཱ སཀཾ སཀཾ ཕལསམཱཔཏྟིཾ སམཱཔཛྫམཱནཱ ཨུདཡབྦཡཉཱཎཱདཱིཧི ནཝཧི ཝིཔསྶནཱཉཱཎེཧི ཨཝིཔསྶིཏྭཱ སམཱཔཛྫིཏུཾ ན སཀྐོནྟི, ཏསྨཱ པཊིསངྑཱཡ ཝཱ ཕལསམཱཔཏྟིཾ སམཱཔཛྫཏཱིཏི ཝུཏྟཾ.

ཕལསམཱཔཏྟིཡཱ པཝཏྟིདསྶནཏྠཾ པན ཏེསཾ ཨིདཾ པཉྷཀམྨཾ – ཀཱ ཕལསམཱཔཏྟི? ཀེ ཏཾ སམཱཔཛྫནྟི? ཀེ ན སམཱཔཛྫནྟི? ཀསྨཱ སམཱཔཛྫནྟི? ཀཐཉྩསྶཱ སམཱཔཛྫནཾ ཧོཏི? ཀཐཾ ཋཱནཾ? ཀཐཾ ཝུཊྛཱནཾ? ཀིཾ ཕལསྶ ཨནནྟརཾ? ཀསྶ ཙ ཕལཾ ཨནནྟརནྟི?

ཏཏྠ ཀཱ ཕལསམཱཔཏྟཱིཏི? ཡཱ ཨརིཡཕལསྶ ནིརོདྷེ ཨཔྤནཱ.

ཀེ ཏཾ སམཱཔཛྫནྟི? ཀེ ན སམཱཔཛྫནྟཱིཏི? སབྦེཔི པུཐུཛྫནཱ ན སམཱཔཛྫནྟི. ཀསྨཱ? ཨནདྷིགཏཏྟཱ. ཨརིཡཱ པན སབྦེཔི སམཱཔཛྫནྟི. ཀསྨཱ ¶ ? ཨདྷིགཏཏྟཱ. ཨུཔརིམཱ པན ཧེཊྛིམཾ ན སམཱཔཛྫནྟི པུགྒལནྟརབྷཱཝཱུཔགམནེན པཊིཔྤསྶདྡྷཏྟཱ, ཧེཊྛིམཱ ཙ ཨུཔརིམཾ ཨནདྷིགཏཏྟཱ. ཨཏྟནོ ཨཏྟནོཡེཝ པན ཕལཾ སབྦེཔི སམཱཔཛྫནྟཱིཏི ཨིདམེཏྠ སནྣིཊྛཱནཾ.

ཀེཙི ¶ པན ‘‘སོཏཱཔནྣསཀདཱགཱམིནོཔི ན སམཱཔཛྫནྟི, ཨུཔརིམཱ དྭེཡེཝ སམཱཔཛྫནྟཱི’’ཏི ཝདནྟི. ཨིདཉྩ ནེསཾ ཀཱརཎཾ – ཨེཏེ ཧི སམཱདྷིསྨིཾ པརིཔཱུརཀཱརིནོཏི. ཏཾ པུཐུཛྫནསྶཱཔི ཨཏྟནཱ པཊིལདྡྷཾ ལོཀིཡསམཱདྷིཾ སམཱཔཛྫནཏོ ཨཀཱརཎམེཝ. ཀིཉྩེཏྠ ཀཱརཎཱཀཱརཎཙིནྟཱཡ. ནནུ ཨིདྷེཝ པཱལི༹ཡཾ ‘‘ཀཏམེ དས སངྑཱརུཔེཀྑཱ ཝིཔསྶནཱཝསེན ¶ ཨུཔྤཛྫནྟི, ཀཏམེ དས གོཏྲབྷུདྷམྨཱ ཝིཔསྶནཱཝསེན ཨུཔྤཛྫནྟཱི’’ཏི (པཊི. མ. ༡.༦༠) ཨིམེསཾ པཉྷཱནཾ ཝིསྶཛྫནེ ‘‘སོཏཱཔཏྟིཕལསམཱཔཏྟཏྠཱཡ སཀདཱགཱམིཕལསམཱཔཏྟཏྠཱཡཱ’’ཏི (པཊི. མ. ༡.༦༠) ཝིསུཾ ཝིསུཾ ཝུཏྟཱ. ཏསྨཱ སབྦེཔི ཨརིཡཱ ཨཏྟནོ ཨཏྟནོ ཕལཾ སམཱཔཛྫནྟཱིཏི ནིཊྛམེཏྠ གནྟབྦཾ.

ཀསྨཱ སམཱཔཛྫནྟཱིཏི? དིཊྛདྷམྨསུཁཝིཧཱརཏྠཾ. ཡཐཱ ཧི རཱཛཱནོ རཛྫསུཁཾ, དེཝཏཱ དིབྦསུཁམནུབྷཝནྟི, ཨེཝཾ ཨརིཡཱ ‘‘ལོཀུཏྟརསུཁཾ ཨནུབྷཝིསྶཱམཱ’’ཏི ཨདྡྷཱནཔརིཙྪེདཾ ཀཏྭཱ ཨིཙྪིཏིཙྪིཏཀྑཎེ ཕལསམཱཔཏྟིཾ སམཱཔཛྫནྟི.

ཀཐཉྩསྶཱ སམཱཔཛྫནཾ ཧོཏི, ཀཐཾ ཋཱནཾ, ཀཐཾ ཝུཊྛཱནནྟི? དྭཱིཧི ཏཱཝ ཨཱཀཱརེཧི ཨསྶཱ སམཱཔཛྫནཾ ཧོཏི ནིབྦཱནཏོ ཨཉྙསྶ ཨཱརམྨཎསྶ ཨམནསིཀཱརཱ, ནིབྦཱནསྶ ཙ མནསིཀཱརཱ. ཡཐཱཧ – ‘‘དྭེ ཁོ, ཨཱཝུསོ, པཙྩཡཱ ཨནིམིཏྟཱཡ ཙེཏོཝིམུཏྟིཡཱ སམཱཔཏྟིཡཱ སབྦནིམིཏྟཱནཉྩ ཨམནསིཀཱརོ, ཨནིམིཏྟཱཡ ཙ དྷཱཏུཡཱ མནསིཀཱརོ’’ཏི (མ. ནི. ༡.༤༥༨). ཨཡཾ པནེཏྠ སམཱཔཛྫནཀྐམོ – ཕལསམཱཔཏྟཏྠིཀེན ཧི ཨརིཡསཱཝཀེན རཧོགཏེན པཊིསལླཱིནེན ཨུདཡབྦཡཱདིཝསེན སངྑཱརཱ ཝིཔསྶིཏབྦཱ. ཏསྶ པཝཏྟཱནུཔུབྦཝིཔསྶནསྶ སངྑཱརཱརམྨཎགོཏྲབྷུཉཱཎཱནནྟརཾ ཕལསམཱཔཏྟིཝསེན ནིརོདྷེ ཙིཏྟཾ ཨཔྤེཏི. ཕལསམཱཔཏྟིནིནྣཏཱཡ ཙེཏྠ སེཀྑསྶཱཔི ཕལམེཝ ཨུཔྤཛྫཏི, ན མགྒོ. ཡེ པན ཝདནྟི ‘‘སོཏཱཔནྣོ ‘ཕལསམཱཔཏྟིཾ སམཱཔཛྫིསྶཱམཱི’ཏི ཝིཔསྶནཾ པཊྛཔེཏྭཱ སཀདཱགཱམཱི ཧོཏི, སཀདཱགཱམཱི ཙ ཨནཱགཱམཱི’’ཏི. ཏེ ཝཏྟབྦཱ ‘‘ཨེཝཾ སཏི ཨནཱགཱམཱི ཨརཧཱ བྷཝིསྶཏི, ཨརཧཱ པཙྩེཀབུདྡྷོ, པཙྩེཀབུདྡྷོ ཙ བུདྡྷོ’’ཏི.

ཏསྨཱ ¶ ན ཀིཉྩི ཨེཏཾ, པཱལི༹ཝསེནེཝ ཙ པཊིཀྑིཏྟནྟིཔི ན གཧེཏབྦཾ. ཨིདམེཝ པན གཧེཏབྦཾ. སེཀྑསྶཱཔི ཕལམེཝ ཨུཔྤཛྫཏི, ན མགྒོ. ཕལཉྩསྶ སཙེ ཨནེན པཋམཛ྄ཛྷཱནིཀོ མགྒོ ཨདྷིགཏོ ཧོཏི, པཋམཛ྄ཛྷཱནིཀམེཝ ཨུཔྤཛྫཏི, སཙེ དུཏིཡཱདཱིསུ ཨཉྙཏརཛ྄ཛྷཱནིཀོ, དུཏིཡཱདཱིསུ ཨཉྙཏརཛ྄ཛྷཱནིཀམེཝཱཏི ཨེཝཾ ཏཱཝསྶཱ སམཱཔཛྫནཾ ཧོཏི.

‘‘ཏཡོ ¶ ཁོ, ཨཱཝུསོ, པཙྩཡཱ ཨནིམིཏྟཱཡ ཙེཏོཝིམུཏྟིཡཱ ཋིཏིཡཱ ¶ སབྦནིམིཏྟཱནཉྩ ཨམནསིཀཱརོ, ཨནིམིཏྟཱཡ ཙ དྷཱཏུཡཱ མནསིཀཱརོ, པུབྦེ ཙ ཨབྷིསངྑཱརོ’’ཏི (མ. ནི. ༡.༤༥༨) ཝཙནཏོ པནསྶཱ ཏཱིཧཱཀཱརེཧི ཋཱནཾ ཧོཏི. ཏཏྠ པུབྦེ ཙ ཨབྷིསངྑཱརོཏི སམཱཔཏྟིཏོ པུབྦེ ཀཱལཔརིཙྪེདོ. ‘‘ཨསུཀསྨིཾ ནཱམ ཀཱལེ ཝུཊྛཧིསྶཱམཱི’’ཏི པརིཙྪིནྣཏྟཱ ཧིསྶཱ ཡཱཝ སོ ཀཱལོ ནཱགཙྪཏི, ཏཱཝ ཋཱནཾ ཧོཏི. ཨེཝམསྶ ཋཱནཾ ཧོཏི.

‘‘དྭེ ཁོ, ཨཱཝུསོ, པཙྩཡཱ ཨནིམིཏྟཱཡ ཙེཏོཝིམུཏྟིཡཱ ཝུཊྛཱནཱཡ སབྦནིམིཏྟཱནཉྩ མནསིཀཱརོ, ཨནིམིཏྟཱཡ ཙ དྷཱཏུཡཱ ཨམནསིཀཱརོ’’ཏི (མ. ནི. ༡.༤༥༨) ཝཙནཏོ པནསྶཱ དྭཱིཧཱཀཱརེཧི ཝུཊྛཱནཾ ཧོཏི. ཏཏྠ སབྦནིམིཏྟཱནནྟི རཱུཔནིམིཏྟཝེདནཱསཉྙཱསངྑཱརཝིཉྙཱཎནིམིཏྟཱནཾ. ཀཱམཉྩ ན སབྦཱནེཝེཏཱནི ཨེཀཏོ མནསི ཀརོཏི, སབྦསངྒཱཧིཀཝསེན པནེཏཾ ཝུཏྟཾ. ཏསྨཱ ཡཾ བྷཝངྒསྶ ཨཱརམྨཎཾ ཧོཏི, ཏཾ མནསིཀརོཏོ ཕལསམཱཔཏྟིཏོ ཝུཊྛཱནཾ ཧོཏཱིཏི ཨེཝམསྶཱ ཝུཊྛཱནཾ ཝེདིཏབྦཾ.

ཀིཾ ཕལསྶ ཨནནྟརཾ, ཀསྶ ཙ ཕལཾ ཨནནྟརནྟི? ཕལསྶ ཏཱཝ ཕལམེཝ ཝཱ ཨནནྟརཾ ཧོཏི བྷཝངྒཾ ཝཱ. ཕལཾ པན ཨཏྠི མགྒཱནནྟརཾ, ཨཏྠི ཕལཱནནྟརཾ, ཨཏྠི གོཏྲབྷུཨནནྟརཾ, ཨཏྠི ནེཝསཉྙཱནཱསཉྙཱཡཏནཱནནྟརནྟི. ཏཏྠ མགྒཝཱིཐིཡཾ མགྒཱནནྟརཾ, པུརིམསྶ པུརིམསྶ པཙྪིམཾ པཙྪིམཾ ཕལཱནནྟརཾ, ཕལསམཱཔཏྟཱིསུ པུརིམཾ པུརིམཾ གོཏྲབྷུཨནནྟརཾ. གོཏྲབྷཱུཏི ཙེཏྠ ཨནུལོམཾ ཝེདིཏབྦཾ. ཝུཏྟཉྷེཏཾ པཊྛཱནེ ‘‘ཨརཧཏོ ཨནུལོམཾ ཕལསམཱཔཏྟིཡཱ ཨནནྟརཔཙྩཡེན པཙྩཡོ. སེཀྑཱནཾ ཨནུལོམཾ ཕལསམཱཔཏྟིཡཱ ཨནནྟརཔཙྩཡེན པཙྩཡོ’’ཏི (པཊྛཱ. ༡.༡.༤༡༧). ཡེན ཕལེན ནིརོདྷཱ ཝུཊྛཱནཾ ཧོཏི, ཏཾ ནེཝསཉྙཱནཱསཉྙཱཡཏནཱནནྟརནྟི. ཏཏྠ ཋཔེཏྭཱ མགྒཝཱིཐིཡཾ ཨུཔྤནྣཕལཾ ཨཝསེསཾ ¶ སབྦཾ ཕལསམཱཔཏྟིཝསེན པཝཏྟཾ ནཱམ. ཨེཝམེཏཾ མགྒཝཱིཐིཡཾ ཝཱ ཕལསམཱཔཏྟིཡཾ ཝཱ ཨུཔྤཛྫནཝསེན –

‘‘པཊིཔྤསྶདྡྷདརཐཾ, ཨམཏཱརམྨཎཾ སུབྷཾ;

ཝནྟལོཀཱམིསཾ སནྟཾ, སཱམཉྙཕལམུཏྟམ’’ནྟི.

ཨཡམེཏྠ ཕལསམཱཔཏྟིཀཐཱ.

ཏདཛ྄ཛྷུཔེཀྑིཏྭཱཏི ¶ ¶ ཏཾ སངྑཱརུཔེཀྑཾ ཨཉྙེན ཏཱདིསེནེཝ ཝིཔསྶནཱཉཱཎེན ཨཛ྄ཛྷུཔེཀྑིཏྭཱ. སུཉྙཏཝིཧཱརེན ཝཱཏིཨཱདཱིསུ ཕལསམཱཔཏྟིཾ ཝིནཱ ཝིཔསྶནཱཝིཧཱརེནེཝ ཝིཧརིཏུཀཱམསྶ ཨརཧཏོ ཨཏྟཱབྷིནིཝེསཾ བྷཡཏོ དིསྭཱ སུཉྙཏཱདྷིམུཏྟསྶ སངྑཱརུཔེཀྑཱཡ ཝཡཾ པསྶནྟསྶ ཝིཔསྶནཏྟཡཝིཧཱརོ སུཉྙཏཝིཧཱརོ ནཱམ, སངྑཱརནིམིཏྟཾ བྷཡཏོ དིསྭཱ ཨནིམིཏྟཱདྷིམུཏྟསྶ སངྑཱརུཔེཀྑཱཡ ཝཡཾ པསྶནྟསྶ ཝིཔསྶནཏྟཡཝིཧཱརོ ཨནིམིཏྟཝིཧཱརོ ནཱམ, ཏཎྷཱཔཎིདྷིཾ བྷཡཏོ དིསྭཱ ཨཔྤཎིཧིཏཱདྷིམུཏྟསྶ སངྑཱརུཔེཀྑཱཡ ཝཡཾ པསྶནྟསྶ ཝིཔསྶནཏྟཡཝིཧཱརོ ཨཔྤཎིཧིཏཝིཧཱརོ ནཱམ. ཏཐཱ ཧི པརཏོ ཝུཏྟཾ –

‘‘ཨབྷིནིཝེསཾ བྷཡཏོ སམྤསྶམཱནོ སུཉྙཏེ ཨདྷིམུཏྟཏྟཱ ཕུསྶ ཕུསྶ ཝཡཾ པསྶཏི, སུཉྙཏོ ཝིཧཱརོ. ནིམིཏྟཾ བྷཡཏོ སམྤསྶམཱནོ ཨནིམིཏྟེ ཨདྷིམུཏྟཏྟཱ ཕུསྶ ཕུསྶ ཝཡཾ པསྶཏི, ཨནིམིཏྟོ ཝིཧཱརོ. པཎིདྷིཾ བྷཡཏོ སམྤསྶམཱནོ ཨཔྤཎིཧིཏེ ཨདྷིམུཏྟཏྟཱ ཕུསྶ ཕུསྶ ཝཡཾ པསྶཏི, ཨཔྤཎིཧིཏོ ཝིཧཱརོ’’ཏི (པཊི. མ. ༡.༧༨).

ཚལ༹ངྒུཔེཀྑཱསབྦྷཱཝེན ཙ པཊིཀཱུལེ ཨཔྤཊིཀཱུལསཉྙཱདིཝིཧཱརསབྦྷཱཝེན ཙ ཨརཧཏོཡེཝ སབྦཱཀཱརེན ཙིཏྟཾ ཝསེ ཝཏྟཏི, ཏཏོ ཨཡཾ ཝིཔསྶནཱཝིཧཱརོ ཨརཧཏོཡེཝ ཨིཛ྄ཛྷཏཱིཏི ཝུཏྟཾ ཧོཏི. ཝཱིཏརཱགོ སངྑཱརུཔེཀྑཾ ཝིཔསྶཏི ཝཱཏི ཨེཏྠ པན ཏིདྷཱ ཙ བྷཡཾ, ཏིདྷཱ ཙ ཨདྷིམུཏྟིཾ ཨནཱཔཛྫིཏྭཱ ཀེཝལཾ ཝིཔསྶནཱཏི ཝེདིཏབྦཱ. ཨེཝཉྷི སཏི པུབྦཱཔརཝིསེསོ ཧོཏི.

༥༦. ཨིདཱནི དྭིནྣཾ ཏིཎྞཾ པུགྒལཱནཾ ཝསེན སངྑཱརུཔེཀྑཱཡ ཨེཀཏྟནཱནཏྟབྷེདཾ དསྶེཏུཀཱམོ ཀཐཾ པུཐུཛྫནསྶ ཙ སེཀྑསྶ ཙཱཏིཨཱདིམཱཧ. ཏཏྠ ¶ ཙིཏྟསྶ ཨབྷིནཱིཧཱརོ ཨེཀཏྟཾ ཧོཏཱིཏི ཨེཀོ ཧོཏི, སཀཏྠེ བྷཱཝཝཙནནྟི ཝེདིཏབྦཾ. ཡཐཱ ཨིདཔྤཙྩཡཱ ཨེཝ ཨིདཔྤཙྩཡཏཱཏི ཝུཏྟཾ, ཏཐཱ ཨེཀོཝ ཨེཀཏྟཾ. ཨབྷིནཱིཧཱརོཏི སཱམིཨཏྠེ པཙྩཏྟཝཙནཾ ཝཱ, ཨབྷིནཱིཧཱརསྶཱཏི ཨཏྠོ. ‘‘སོ དེསོ སམྨཛྫིཏྭཱ’’ཏིཨཱདཱིསུ (མཧཱཝ. ༡༦༨) ཝིཡ ཝིབྷཏྟིཝིཔལླཱསོ ཀཏོཏི ཝེདིཏབྦོ. ཙིཏྟཾ ཀིལིསྶཏཱིཏི ཝིཔསྶནཱནིཀནྟིསངྑཱཏེན ལོབྷཀིལེསེན ཙིཏྟཾ ཀིལིསྶཏི, ཏཱཔཱིཡཏི བཱདྷཱིཡཏཱིཏི ཨཏྠོ. བྷཱཝནཱཡ པརིཔནྠོ ཧོཏཱིཏི པཊིལདྡྷཱཡ ཝིཔསྶནཱབྷཱཝནཱཡ ¶ ཨུཔགྷཱཏོ ཧོཏི. པཊིཝེདྷསྶ ཨནྟརཱཡོ ཧོཏཱིཏི ཝིཔསྶནཱབྷཱཝནཱཡ པཊིལབྷིཏབྦསྶ སཙྩཔྤཊིཝེདྷསྶ པཊིལཱབྷནྟརཱཡོ ཧོཏི. ཨཱཡཏིཾ པཊིསནྡྷིཡཱ པཙྩཡོ ཧོཏཱིཏི སངྑཱརུཔེཀྑཱསམྤཡུཏྟཀམྨསྶ བལཝཏྟཱ ཏེནེཝ སུགཏིཔཊིསནྡྷིཡཱ དཱིཡམཱནཱཡ ཨཏིནནྡནསངྑཱཏོ ལོབྷཀིལེསོ ཨནཱགཏེ ཀཱམཱཝཙརསུགཏིཔཊིསནྡྷིཡཱ པཙྩཡོ ཧོཏི ¶ . ཡསྨཱ ཀིལེསསཧཱཡཾ ཀམྨཾ ཝིཔཱཀཾ ཛནེཏི, ཏསྨཱ ཀམྨཾ ཛནཀཔཙྩཡོ ཧོཏི, ཀིལེསོ ཨུཔཏྠམྦྷཀཔཙྩཡོ. སེཀྑསྶ པན ཨུཏྟརིཔཊིཝེདྷསྶཱཏི སཀདཱགཱམིམགྒཱདིཝསེན སཙྩཔྤཊིཝེདྷསྶ. ཨཱཡཏིཾ པཊིསནྡྷིཡཱ པཙྩཡོ ཧོཏཱིཏི སེཀྑེསུ སོཏཱཔནྣསཀདཱགཱམཱིནཾ ཨནདྷིགཏཛ྄ཛྷཱནཱནཾ སངྑཱརུཔེཀྑཱཀམྨེན དཱིཡམཱནཱཡ ཀཱམཱཝཙརསུགཏིཔཊིསནྡྷིཡཱ ཨབྷིནནྡནཀིལེསོ པཙྩཡོ ཧོཏི, ཛྷཱནལཱབྷཱིནཾ པན ཨནཱགཱམིསྶ ཙ བྲཧྨལོཀེཡེཝ པཊིསནྡྷཱནཏོ པཙྩཡོ ན ཧོཏི, ཨནུལོམགོཏྲབྷཱུཧི ཙ དཱིཡམཱནཱཡ པཊིསནྡྷིཡཱ ཨཡམེཝ ཀིལེསོ པཙྩཡོ ཧོཏཱིཏི ཝེདིཏབྦོ.

ཨནིཙྩཏོཏི ཧུཏྭཱ ཨབྷཱཝཊྛེན ཨནིཙྩནྟིཀཏཱཡ ཨཱདིཨནྟཝནྟཏཱཡ ཙ ཨནིཙྩཏོ. དུཀྑཏོཏི ཨབྷིཎྷཾ པཊིཔཱིལ༹ནཊྛེན ཨུཔྤཱདཝཡཔཊིཔཱིལ༹ནཏཱཡ དུཀྑཝཏྠུཏཱཡ ཙ དུཀྑཏོ. ཨནཏྟཏོཏི ཨཝསཝཏྟནཊྛེན པཙྩཡཱཡཏྟཝུཏྟིཏཱཡ སཱམིནིཝཱསཱིཀཱརཀཝེདཀཱབྷཱཝེན ཙ ཨནཏྟཏོ. ཨནུཔསྶནཊྛེནཱཏི ཨནུ ཨནུ ཨནིཙྩཱདིཏོ པསྶནཊྛེན. ཨབྷིནཱིཧཱརོ ནཱནཏྟཾ ཧོཏཱིཏི ཨབྷིནཱིཧཱརོ ནཱནཱ ཧོཏཱིཏི ཝཱ ཨབྷིནཱིཧཱརསྶ ནཱནཱབྷཱཝོ ཧོཏཱིཏི ཝཱ ཝེདིཏབྦཾ.

ཀུསལཱཏི ཨཱརོགྱཊྛེན ཨནཝཛྫཊྛེན ཀོསལླསམྦྷཱུཏཊྛེན ཙ. ཨབྱཱཀཏཱཏི ཀུསལཱཀུསལབྷཱཝེན ན བྱཱཀཏཱ. ཀིཉྩིཀཱལེ སུཝིདིཏཱཏི ¶ ཝིཔསྶནཱཀཱལེ སུཊྛུ ཝིདིཏཱ. ཀིཉྩིཀཱལེ ན སུཝིདིཏཱཏི ཨབྷིནནྡནཀཱལེ ན སུཊྛུ ཝིདིཏཱ. ཨཙྩནྟཾ སུཝིདིཏཱཏི ཨབྷིནནྡནཱཡ པཧཱིནཏྟཱ ཨེཀནྟེན སུཝིདིཏཱ. ཝིདིཏཊྛེན ཙ ཨཝིདིཏཊྛེན ཙཱཏི ཨེཏྠ པུཐུཛྫནསེཀྑཱནཾ སུཝིདིཏཊྛོཔི ཝཱིཏརཱགསྶ ཨཙྩནྟསུཝིདིཏཊྛོཔི ཝིདིཏཊྛོཝ ཧོཏི, དྭིནྣམྤི ན སུཝིདིཏཊྛོ ཨཝིདིཏཊྛོཝ.

ཨཏིཏྟཏྟཱཏི ཝིཔསྶནཱཡ ཀརཎཱིཡསྶ ཨཔརིཡོསིཏཏྟཱ ཨཔྤཎཱིཏབྷཱཝེན. ཏབྦིཔརཱིཏེན ཏིཏྟཏྟཱ. ཏིཎྞཾ སཉྙོཛནཱནཾ པཧཱནཱཡཱཏི སཀྐཱཡདིཊྛིཝིཙིཀིཙྪཱསཱིལབྦཏཔརཱམཱསཱནཾ ¶ པཧཱནཏྠཾ. པཙྪིམབྷཝིཀཱཔི བོདྷིསཏྟཱ ཨེཏྠེཝ སངྒཧཾ གཙྪནྟི. ཨཔཙྪིམབྷཝིཀཱ པན ཝིཔསྶནཾ སངྑཱརུཔེཀྑཾ པཱཔེཏྭཱ ཋཔེནྟི. སོཏཱཔཏྟིམགྒཾ པཊིལཱབྷཏྠཱཡཱཏི ཨསམཱསེཏྭཱ པཋནྟི, སམཱསེཏྭཱ པཱཋོ སུནྡརཏརོ. སེཀྑོ ཏིཎྞཾ སཉྙོཛནཱནཾ པཧཱིནཏྟཱཏི སོཏཱཔནྣསཀདཱགཱམིཨནཱགཱམཱིནཾ སཱམཉྙེན ཝུཏྟཾ. སཀདཱགཱམིཨནཱགཱམཱིནམྤི ཧི ཏཱནི པཧཱིནཱནེཝ. ཨུཏྟརིཔཊིལཱབྷཏྠཱཡཱཏི ཨུཔརཱུཔརིམགྒཔཊིལཱབྷཏྠཾ. དིཊྛདྷམྨསུཁཝིཧཱརཏྠཱཡཱཏི དིཊྛེཝ དྷམྨེ པཙྩཀྑེ ཨཏྟབྷཱཝེ ཡོ སུཁོ ཝིཧཱརོ, ཏདཏྠཱཡ. ཝིཧཱརསམཱཔཏྟཊྛེནཱཏི སེཀྑསྶ ཕལསམཱཔཏྟཊྛེན, ཝཱིཏརཱགསྶ ཝིཔསྶནཱཝིཧཱརཕལསམཱཔཏྟཊྛེན.

༥༧. ཨིདཱནི ¶ སངྑཱརུཔེཀྑཱནཾ གཎནཔརིཙྪེདཾ དསྶེཏུཾ ཀཏི སངྑཱརུཔེཀྑཱཏིཨཱདིམཱཧ. ཏཏྠ སམཐཝསེནཱཏི སམཱདྷིཝསེན. ཨཡམེཝ ཝཱ པཱཋོ. ནཱིཝརཎེ པཊིསངྑཱཏི པཉྩ ནཱིཝརཎཱནི པཧཱཏབྦབྷཱཝེན པརིགྒཧེཏྭཱ. སནྟིཊྛནཱཏི ནཱིཝརཎཱནཾ པཧཱནཱབྷིམུཁཱིབྷཱུཏཏྟཱ ཏེསཾ པཧཱནེཔི ཨབྱཱཔཱརབྷཱཝཱུཔགམནེན མཛ྄ཛྷཏྟཏཱཡ སནྟིཊྛནཱ. སངྑཱརུཔེཀྑཱསཱུཏི ནཱིཝརཎཔྤཧཱནེ བྱཱཔཱརཱཀརཎེན ནཱིཝརཎསངྑཱཏཱནཾ སངྑཱརཱནཾ ཨུཔེཀྑནཱསུ. ཨེས ནཡོ ཝིཏཀྐཝིཙཱརཱདཱིསུ ཙ. སམཐེ སངྑཱརུཔེཀྑཱ ནཱམ ཨཔྤནཱཝཱིཐིཡཱ ཨཱསནྣཔུབྦབྷཱགེ བལཔྤཏྟབྷཱཝནཱམཡཉཱཎཾ. སོཏཱཔཏྟིམགྒཾ པཊིལཱབྷཏྠཱཡཱཏིཨཱདཱིསུ ཙཏཱུསུ མགྒཝཱརེསུ སུཉྙཏཱནིམིཏྟཨཔྤཎིཧིཏམགྒཱནཾ ཨཉྙཏརཉྙཏརོ མགྒོ ལབྦྷཏི. སོཏཱཔཏྟིཕལསམཱཔཏྟཏྠཱཡཱཏིཨཱདཱིསུ ཙཏཱུསུ ཕལཝཱརེསུ པན ཨཔྤཎིཧིཏཱ ཕལསམཱཔཏྟི ཝེདིཏབྦཱ. ཀསྨཱ? ‘‘སུཉྙཏཝིཧཱརསམཱཔཏྟཏྠཱཡ ཨནིམིཏྟཝིཧཱརསམཱཔཏྟཏྠཱཡཱ’’ཏི ¶ ཨིཏརཱསཾ དྭིནྣཾ ཕལསམཱཔཏྟཱིནཾ ཝིསུཾ ཝུཏྟཏྟཱ. ཨནིཙྩཱནུཔསྶནཱཝུཊྛཱནཝསེན ཧི ཨནིམིཏྟམགྒོ, ཏཐེཝ ཕལསམཱཔཏྟིཀཱལེ ཨནིམིཏྟཕལསམཱཔཏྟི, དུཀྑཱནུཔསྶནཱཝུཊྛཱནཝསེན ཨཔྤཎིཧིཏམགྒཕལསམཱཔཏྟིཡོ, ཨནཏྟཱནུཔསྶནཱཝུཊྛཱནཝསེན སུཉྙཏམགྒཕལསམཱཔཏྟིཡོ སུཏྟནྟནཡེནེཝ ཝེདིཏབྦཱ.

ཨེཏྠ ཙ ཙཏཱུསུ མགྒཝཱརེསུ ཨུཔྤཱདནྟིཨཱདཱིནི པཉྩ ¶ མཱུལཔདཱནི, གཏིནྟིཨཱདཱིནི དས ཝེཝཙནཔདཱནཱིཏི པནྣརས པདཱནི ཝུཏྟཱནི. ཚསུ པན ཕལསམཱཔཏྟིཝཱརེསུ པཉྩ མཱུལཔདཱནེཝ ཝུཏྟཱནི. ཏཾ ཀསྨཱ ཨིཏི ཙེ? སངྑཱརུཔེཀྑཱཡ ཏིཀྑབྷཱཝེ སཏི ཀིལེསཔྤཧཱནེ སམཏྠསྶ མགྒསྶ སམྦྷཝཏོ ཏསྶཱ ཏིཀྑབྷཱཝདསྶནཏྠཾ ཝེཝཙནཔདེཧི སཧ དལ༹ྷཾ ཀཏྭཱ མཱུལཔདཱནི ཝུཏྟཱནི. ཕལསྶ ནིརུསྶཱཧབྷཱཝེན སནྟསབྷཱཝཏྟཱ མགྒཱཡཏྟཏྟཱ ཙ མནྡབྷཱུཏཱཔི སངྑཱརུཔེཀྑཱ ཕལསྶ པཙྩཡོ ཧོཏཱིཏི དསྶནཏྠཾ མཱུལཔདཱནེཝ ཝུཏྟཱནཱིཏི ཝེདིཏབྦཱནི.

༥༨. ཨིདཱནི ཛཱཏིཝསེན པུཙྪིཏྭཱ ལབྦྷམཱནཝསེན ཝིསྶཛྫེཏུཾ ཀཏི སངྑཱརུཔེཀྑཱ ཀུསལཱཏིཨཱདིམཱཧ. ཏཏྠ པནྣརས སངྑཱརུཔེཀྑཱཏི སམཐཝསེན ཨཊྛ, ཙཏུནྣཾ མགྒཱནཾ ཏིཎྞཾ ཕལཱནཾ ཝསེན སཏྟཱཏི པནྣརས. སམཐཝསེན ཨཊྛ སངྑཱརུཔེཀྑཱ ཨརཧཏོ ནཱིཝརཎཔཊིསངྑཱཨབྷཱཝཏོ, ཝིཏཀྐཝིཙཱརཱདཱིནཾ པཧཱནབྱཱཔཱརཾ ཝིནཱ སུཁེན པཧཱནཏོ ཙ སངྑཱརུཔེཀྑཱནཱམསྶ ཨནནུརཱུཔཱཏི ཀཏྭཱ ཏཱསཾ ཨབྱཱཀཏཏཱ ན ཝུཏྟཱཏི ཝེདིཏབྦཱ. ཨརཧཏཱ པན ཕལསམཱཔཏྟིཾ སམཱཔཛྫནྟེན སངྑཱརུཔེཀྑཾ ཝིནཱ སམཱཔཛྫིཏུཾ ན སཀྐཱཏི ཏིསྶོ སངྑཱརུཔེཀྑཱ ཨབྱཱཀཏཱཏི ཝུཏྟཱ. ཨཔྤཎིཧིཏསུཉྙཏཱནིམིཏྟཝསེན ཧི ཨརཧཏོ ཏིསྶོ སངྑཱརུཔེཀྑཱ.

ཨིདཱནི སངྑཱརུཔེཀྑཱནཾ སཾཝཎྞནཱཝསེན ཝུཏྟཱསུ ཏཱིསུ གཱཐཱསུ པཊིསངྑཱསནྟིཊྛནཱ པཉྙཱཏི སངྑཱརུཔེཀྑཱ ¶ . ཨཊྛ ཙིཏྟསྶ གོཙརཱཏི སམཐཝསེན ཝུཏྟཱ ཨཊྛ སངྑཱརུཔེཀྑཱ སམཱདྷིསྶ ཝིསཡཱ, བྷཱུམིཡོཏི ཨཏྠོ. ‘‘ཙིཏྟཾ པཉྙཉྩ བྷཱཝཡ’’ནྟིཨཱདཱིསུ (སཾ. ནི. ༡.༢༣, ༡༩༢) ཝིཡ ཙིཏྟསཱིསེན སམཱདྷི ནིདྡིཊྛོ, ‘‘གོཙརེ, བྷིཀྑཝེ, ཙརཐ སཀེ པེཏྟིཀེ ཝིསཡེ’’ཏིཨཱདཱིསུ (སཾ. ནི. ༥.༣༧༢) ཝིཡ གོཙརསདྡེན ཝིསཡོ. ཡཉྷི ཡདཱཡཏྟཾ, ཏསྶེསོ ཝིསཡོཏི ཝུཙྩཏི. པུཐུཛྫནསྶ དྭེཏི སམཐཝསེན ཝིཔསྶནཱཝསེན ཙ. ཏཡོ སེཀྑསྶཱཏི ¶ སམཐཝིཔསྶནཱསམཱཔཏྟིཝསེན. ཏཡོ ཙ ཝཱིཏརཱགསྶཱཏི ཨཔྤཎིཧིཏསུཉྙཏཱནིམིཏྟཕལསམཱཔཏྟིཝསེན. ‘‘ཏིསྶོ’’ཏི ཝཏྟབྦེ ‘‘ཏཡོ’’ཏི ཙ ལིངྒཝིཔལླཱསོ ཀཏོ. ཏཡོ སངྑཱརུཔེཀྑཱ དྷམྨཱཏི ཝཱ ཡོཛེཏབྦཾ. ཡེཧི ཙིཏྟཾ ཝིཝཊྚཏཱིཏི ཡེཧི སངྑཱརུཔེཀྑཱདྷམྨེཧི ཝིཏཀྐཝིཙཱརཱདིཏོ, ཨུཔྤཱདཱདིཏོ ཝཱ ཙིཏྟཾ ཨཔགཙྪཏི. ཝཱིཏརཱགསྶཱཔི ཧི སངྑཱརུཔེཀྑཱསབྦྷཱཝཏོ ¶ ཙ སངྑཱརཏོ ཙིཏྟཾ ཝིཝཊྚིཏྭཱ ནིབྦཱནཾ པཀྑནྡཏཱིཏི ཝུཏྟཾ ཧོཏི. ཨཊྛ སམཱདྷིསྶ པཙྩཡཱཏི སམཐཝསེན ཝུཏྟཱ ཨཊྛ ཨཔྤནཱསམྤཱཔཀཏྟཱ ཨཔྤནཱསམཱདྷིསྶ པཙྩཡཱ. དས ཉཱཎསྶ གོཙརཱཏི ཝིཔསྶནཱཝསེན ཝུཏྟཱ དས མགྒཉཱཎསྶ ཕལཉཱཎསྶ ཙ བྷཱུམིཡོ. ཏིཎྞཾ ཝིམོཀྑཱན པཙྩཡཱཏི སུཉྙཏཱནིམིཏྟཨཔྤཎིཧིཏཝིམོཀྑཱནཾ ཨུཔནིསྶཡཔཙྩཡཱ. ནཱནཱདིཊྛཱིསུ ན ཀམྤཏཱིཏི བྷངྒཾ ཨཝིསྶཛྫིཏྭཱཝ སངྑཱརེ ཨནིཙྩཱདིཝསེན ཝིཔསྶནྟོ སསྶཏདིཊྛིཨཱདཱིསུ ནཱནཔྤཀཱརཱསུ དིཊྛཱིསུ ན ཝེདྷཏཱིཏི.

སངྑཱརུཔེཀྑཱཉཱཎནིདྡེསཝཎྞནཱ ནིཊྛིཏཱ.

༡༠. གོཏྲབྷུཉཱཎནིདྡེསཝཎྞནཱ

༥༩. གོཏྲབྷུཉཱཎནིདྡེསེ ¶ ཨབྷིབྷུཡྻཏཱིཏི ཨབྷིབྷཝཏི ཨཏིཀྐམཏི. བཧིདྡྷཱ སངྑཱརནིམིཏྟནྟི སཀསནྟཱནཔྤཝཏྟཨཀུསལཀྑནྡྷཏོ བཧིདྡྷཱབྷཱུཏཾ སངྑཱརནིམིཏྟཾ. ལོཀིཀསངྑཱརཱ ཧི ཀིལེསཱནཾ ནིམིཏྟཏྟཱ, ནིམིཏྟཱཀཱརེན ཨུཔཊྛཱནཏོ ཝཱ ནིམིཏྟནྟི ཝུཙྩནྟི. ཨབྷིབྷུཡྻཏཱིཏི གོཏྲབྷཱུཏི ཙ པུཐུཛྫནགོཏྟཱབྷིབྷཝནཏོ ¶ གོཏྲབྷུབྷཱཝོ ཝུཏྟོ. པཀྑནྡཏཱིཏི གོཏྲབྷཱུཏི ཨརིཡགོཏྟབྷཱཝནཏོ གོཏྲབྷུབྷཱཝོ ཝུཏྟོ. ཨབྷིབྷུཡྻིཏྭཱ པཀྑནྡཏཱིཏི གོཏྲབྷཱུཏི ཨུབྷོ ཨཏྠེ སམཱསེཏྭཱ ཝུཏྟཾ. ཝུཊྛཱཏཱིཏི གོཏྲབྷཱུཏི ཙ ཝིཝཊྚཏཱིཏི གོཏྲབྷཱུཏི ཙ མཱཏིཀཱཡ ཝུཊྛཱནཝིཝཊྚནཔདཱནུརཱུཔེན པུཐུཛྫནགོཏྟཱབྷིབྷཝནཏྠོཡེཝ ཝུཏྟོ. སམཐཝསེན ཝུཏྟགོཏྲབྷཱུནཾ པན ནཱིཝརཎཱདིགོཏྟཱབྷིབྷཝནཏོ གོཏྲབྷཱུཏི, ‘‘སོཏཱཔཏྟིཕལསམཱཔཏྟཏྠཱཡཱ’’ཏིཨཱདཱིསུ ཚསུ སམཱཔཏྟིཝཱརེསུ ཨུཔྤཱདཱདིགོཏྟཱབྷིབྷཝནཏོ གོཏྲབྷཱུཏི, ‘‘སཀདཱགཱམིམགྒཾ པཊིལཱབྷཏྠཱཡཱ’’ཏིཨཱདཱིསུ ཏཱིསུ མགྒཝཱརེསུ སོཏཱཔནྣཱདིགོཏྟཱབྷིབྷཝནཏོ གོཏྲབྷཱུཏི ¶ ཨཏྠོ ཝེདིཏབྦོ. གོཏྟཏྠོ ཙེཏྠ བཱིཛཏྠོ. ཝཏྟནིཔཀརཎེ ཀིར ཝུཏྟཾ – གོཏྟཾ ཝུཙྩཏི ནིབྦཱནཾ སབྦཔརིཔནྠེཧི གུཏྟཏྟཱ, ཏཾ པཊིཔཛྫཏཱིཏི གོཏྲབྷཱུཏི, ཨཊྛ སམཱཔཏྟིཡོཔི གོཏྟཾ གོཏྲབྷུཔརིཔནྠེཧི གུཏྟཏྟཱ, ཏཾ གོཏྟཾ པཊིཔཛྫཏཱིཏི གོཏྲབྷཱུཏི ཝུཏྟཾ. ‘‘ཙཏུནྣཾ མགྒཱནཾཡེཝ གོཏྲབྷུ ནིབྦཱནཱརམྨཎཾ, ཙཏསྶནྣཾ ཕལསམཱཔཏྟཱིནཾ གོཏྲབྷུ སངྑཱརཱརམྨཎཾ ཕལསམཱཔཏྟིནིནྣཏྟཱ’’ཏི ཝདནྟི. ཝུཏྟཉྷེཏཾ ཝིསུདྡྷིམགྒེ – ‘‘ཏསྶ པཝཏྟཱནུཔུབྦཝིཔསྶནསྶ སངྑཱརཱརམྨཎགོཏྲབྷུཉཱཎཱནནྟརཾ ¶ ཕལསམཱཔཏྟིཝསེན ནིརོདྷེ ཙིཏྟཾ ཨཔྤེཏཱི’’ཏི (ཝིསུདྡྷི. ༢.༨༦༣). ཏེནེཝེཏྠ མགྒཝཱརེསུ སོལ༹སམཾ ཀཏྭཱ གཧིཏསྶ བཧིདྡྷཱསངྑཱརནིམིཏྟཔདསྶ སམཱཔཏྟིཝཱརེསུ ཚཊྛཾ ཀཏྭཱ གཧཎཾ ན ཀཏནྟི ཝེདིཏབྦཾ. ཨིཏརཐཱ ཧི མཱུལཔདགཧཎེན གཧེཏབྦཾ བྷཝེཡྻ.

ཨཉྙེ པན ‘‘ཡོ ནིབྦཱནེ པཋམཱབྷོགོ པཋམསམནྣཱཧཱརོ, ཨཡཾ ཝུཙྩཏི གོཏྲབྷཱུ’’ཏི ཝདནྟི. ཏཾ ཕལཾ སནྡྷཱཡ ན ཡུཛྫཏི. པནྣརས གོཏྲབྷུདྷམྨཱ ཀུསལཱཏི ཨེཏྠ ཨརཧཏོ ཨབྷིབྷཝིཏབྦནཱིཝརཎཱབྷཱཝཏོ ཝིཏཀྐཝིཙཱརཱདཱིནཾ སུཁེནེཝ པཧཱཏབྦབྷཱཝཏོ ཙ ཨབྷིབྷཝནཊྛེན གོཏྲབྷུནཱམཾ ནཱརཧནྟཱིཏི ཀཏྭཱ གོཏྲབྷཱུནཾ ཨབྱཱཀཏཏཱ ན ཝུཏྟཱཏི ཝེདིཏབྦཱ. ཨརཧཏཱ པན ཕལསམཱཔཏྟིཾ སམཱཔཛྫནྟེན སངྑཱརེ ཨནབྷིབྷུཡྻ སམཱཔཛྫིཏུཾ ན སཀྐཱཏི ‘‘ཏཡོ གོཏྲབྷུདྷམྨཱ ཨབྱཱཀཏཱ’’ཏི ཝུཏྟཱ. ཀེཙི པན ‘‘ཨཊྛ སམཱཔཏྟིཡོ ནིབྦེདྷབྷཱགིཡཱ ཨེཝ ཨིདྷ ནིདྡིཊྛཱ, ཏསྨཱ ཨཊྛ སམཱཔཏྟིགོཏྲབྷཱུ ཀུསལཱ ཧོནྟཱི’’ཏི ཝདནྟི. ཏཐཱ སངྑཱརུཔེཀྑཱཡཔི ཝེདིཏབྦཾ.

༦༠. སཱམིསཉྩཱཏིཨཱདཱིསུ ཝཊྚཱམིསལོཀཱམིསཀིལེསཱམིསཱནཾ ཀིལེསཱམིསེན སཱམིསཾ སནིཀནྟིཀཏྟཱ. ཀིཾ ཏཾ? ཨཊྛཝིདྷཾ སམཐགོཏྲབྷུཉཱཎཾ. ཝཊྚཱམིསནྟི ཙེཏྠ ཏེབྷཱུམཀཝཊྚམེཝ. ལོཀཱམིསནྟི པཉྩ ཀཱམགུཎཱ. ཀིལེསཱམིསནྟི ཀིལེསཱ ཨེཝ. ནིརཱམིསནྟི དསཝིདྷཾ ཝིཔསྶནཱགོཏྲབྷུཉཱཎཾ ཨནིཀནྟིཀཏྟཱ. ན ཧི ཨརིཡཱ གོཏྲབྷུསྨིཾ ནིཀནྟིཾ ཀརོནྟི. པོཏྠཀེ ‘‘སཱམིསཉྩེ’’ཏི ལིཁནྟི, ཏཾ ན སུནྡརཏརཾ. ཨེཝམེཝ པཎིཧིཏཉྩ ཨཔྤཎིཧིཏཾ སཉྙུཏྟཉྩ ཝིསཉྙུཏྟཾ ཝུཊྛིཏཉྩ ཨཝུཊྛིཏཾ ཝེདིཏབྦཾ. ནིཀནྟིཔཎིདྷིཡཱ ཧི པཎིཧིཏཾ པཏྠིཏནྟི ཨཏྠོ. ཏདབྷཱཝེན ཨཔྤཎིཧིཏཾ ¶ . ནིཀནྟིསཉྙོགེནེཝ སཉྙུཏྟཾ. ཏདབྷཱཝེན ཝིསཉྙུཏྟཾ. ཝུཊྛིཏནྟི ཝིཔསྶནཱགོཏྲབྷུཉཱཎམེཝ. ཏཉྷི ནིཀནྟིཙྪེདཀཏྟཱ ཝུཊྛིཏཾ ནཱམ. ཨིཏརཾ ཨཝུཊྛིཏཾ. བཧིདྡྷཱ ཝུཊྛཱནཏྟཱ ཝཱ ཝུཊྛིཏཾ. ཕལགོཏྲབྷུཔི ཧི ནིབྦཱནཛ྄ཛྷཱསཡཝསེན ནིབྦཱནཱབྷིམུཁཱིབྷཱུཏཏྟཱ ¶ བཧིདྡྷཱསངྑཱརནིམིཏྟཱ ཝུཊྛིཏཾ ནཱམཱཏི ཝེདིཏབྦཾ. ཧེཊྛཱབྷིབྷཝནཝུཊྛཱནཝིཝཊྚནཝཱརེསུཔི ཕལགོཏྲབྷུ ¶ ཨཛ྄ཛྷཱསཡཝསེན ནིབྦཱནཱབྷིམུཁཱིབྷཱུཏཏྟཱ ཨབྷིབྷུཡྻཏི ཝུཊྛཱཏི ཝིཝཊྚཏཱིཏི ཝེདིཏབྦཾ. ཏིཎྞཾ ཝིམོཀྑཱན པཙྩཡཱཏི ཏིཎྞཾ ལོཀུཏྟརཝིམོཀྑཱནཾ སམཐགོཏྲབྷུ པཀཏཱུཔནིསྶཡཔཙྩཡཱ ཧོནྟི, ཝིཔསྶནཱགོཏྲབྷུ ཨནནྟརསམནནྟརཱུཔནིསྶཡཔཙྩཡཱ ཧོནྟི. པཉྙཱ ཡསྶ པརིཙྩིཏཱཏི པུབྦབྷཱགཔཉྙཱ ཡསྶ པརིཙིཏཱ པརིཙིཎྞཱ. ཀུསལོ ཝིཝཊྚེ ཝུཊྛཱནེཏི ཨསམྨོཧཝསེནེཝ ཝིཝཊྚསངྑཱཏེ གོཏྲབྷུཉཱཎེ ཀུསལོ ཚེཀོ, པུབྦབྷཱགཉཱཎེན ཝཱ ཀུསལོ. ནཱནཱདིཊྛཱིསུ ན ཀམྤཏཱིཏི སམུཙྪེདེན པཧཱིནཱསུ ནཱནཔྤཀཱརཱསུ དིཊྛཱིསུ ན ཝེདྷཏཱིཏི.

གོཏྲབྷུཉཱཎནིདྡེསཝཎྞནཱ ནིཊྛིཏཱ.

༡༡. མགྒཉཱཎནིདྡེསཝཎྞནཱ

༦༡. མགྒཉཱཎནིདྡེསེ ¶ མིཙྪཱདིཊྛིཡཱ ཝུཊྛཱཏཱིཏི དིཊྛཱནུསཡཔྤཧཱནེན སམུཙྪེདཝསེན དྭཱསཊྛིབྷེདཏོ མིཙྪཱདིཊྛིཏོ ཝུཊྛཱཏི. ཏདནུཝཏྟཀཀིལེསེཧཱིཏི མིཙྪཱདིཊྛིསམྤཡོགཝསེན ཙ མིཙྪཱདིཊྛིཨུཔནིསྶཡེན ཙ ཨུཔྤཛྫམཱནེཧི མིཙྪཱདིཊྛིཨནུཝཏྟམཱནེཧི ནཱནཱཝིདྷེཧི ཀིལེསེཧི. ཏེན ཏདེཀཊྛཀིལེསཔྤཧཱནཾ ཝུཏྟཾ ཧོཏི. དུཝིདྷཉྷི ཨེཀཊྛཾ སཧཛེཀཊྛཾ པཧཱནེཀཊྛཉྩ. ཏཱཡ དིཊྛིཡཱ སཧ ཨེཀསྨིཾ ཙིཏྟེ, ཨེཀསྨིཾ པུགྒལེ ཝཱ ཡཱཝ པཧཱནཱ ཋིཏཱཏི ཏདེཀཊྛཱ. དིཊྛིཡཱ ཧི པཧཱིཡམཱནཱཡ དིཊྛིསམྤཡུཏྟེསུ དྭཱིསུ ཨསངྑཱརིཀཙིཏྟེསུ ཏཱཡ དིཊྛིཡཱ སཧཛཱཏཱ ལོབྷོ མོཧོ ཨུདྡྷཙྩཾ ཨཧིརིཀཾ ཨནོཏྟཔྤནྟི ཨིམེ ཀིལེསཱ, དྭཱིསུ སསངྑཱརིཀཙིཏྟེསུ ཏཱཡ དིཊྛིཡཱ སཧཛཱཏཱ ལོབྷོ མོཧོ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤནྟི ཨིམེ ཀིལེསཱ སཧཛེཀཊྛཝསེན པཧཱིཡནྟི. དིཊྛིཀིལེསེཡེཝ པཧཱིཡམཱནེ ཏེན སཧ ཨེཀསྨིཾ པུགྒལེ ཋིཏཱ ཨཔཱཡགམནཱིཡཱ ལོབྷོ དོསོ མོཧོ མཱནོ ཝིཙིཀིཙྪཱ ཐིནཾ ¶ ཨུདྡྷཙྩཾ ཨཧིརིཀཾ ཨནོཏྟཔྤནྟི ཨིམེ ཀིལེསཱ པཧཱནེཀཊྛཝསེན པཧཱིཡནྟི. ཁནྡྷེཧཱིཏི ཏདནུཝཏྟཀེཧེཝ ཁནྡྷེཧི, ཏཾ དིཊྛིཾ ཨནུཝཏྟམཱནེཧི སཧཛེཀཊྛེཧི ཙ པཧཱནེཀཊྛེཧི ཙ ཙཏཱུཧི ཨརཱུཔཀྑནྡྷེཧི, ཏཾསམུཊྛཱནརཱུཔེཧི ཝཱ སཧ པཉྩཧི ཁནྡྷེཧི མིཙྪཱདིཊྛིཨཱདིཀིལེསཔཙྩཡཱ ཨནཱགཏེ ཨུཔྤཛྫིཏབྦེཧི ཝིཔཱཀཀྑནྡྷེཧི. བཧིདྡྷཱ ཙ སབྦནིམིཏྟེཧཱིཏི ཡཐཱཝུཏྟཀིལེསཀྑནྡྷཏོ བཧིབྷཱུཏེཧི སབྦསངྑཱརནིམིཏྟེཧི. མིཙྪཱསངྐཔྤཱ ཝུཊྛཱཏཱིཏི སོཏཱཔཏྟིམགྒེན པཧཱཏབྦེསུ ཙཏཱུསུ དིཊྛིསམྤཡུཏྟེསུ, ཝིཙིཀིཙྪཱསཧགཏེ ཙཱཏི པཉྩསུ ཙིཏྟེསུ ཨཔཱཡགམནཱིཡསེསཱཀུསལཙིཏྟེསུ ཙ མིཙྪཱསངྐཔྤཱ ཝུཊྛཱཏི.

མིཙྪཱཝཱཙཱཡ ཝུཊྛཱཏཱིཏི མུསཱཝཱདཏོ ཙེཝ ཨཔཱཡགམནཱིཡཔིསུཎཕརུསསམྥཔྤལཱཔེཧི ཙ ཝུཊྛཱཏི ¶ . མིཙྪཱཀམྨནྟཱ ཝུཊྛཱཏཱིཏི པཱཎཱཏིཔཱཏཱདིནྣཱདཱནམིཙྪཱཙཱརེཧི ཝུཊྛཱཏི. མིཙྪཱཨཱཛཱིཝཱ ¶ ཝུཊྛཱཏཱིཏི ཀུཧནཱ ལཔནཱ ནེམིཏྟིཀཏཱ ནིཔྤེསིཀཏཱ ལཱབྷེནལཱབྷཾནིཛིགཱིསནཏཱ, ཨཱཛཱིཝཧེཏུཀེཧི ཝཱ སཏྟཧིཔི ཀཱཡཝཙཱིཀམྨེཧི ཝུཊྛཱཏི. མིཙྪཱཝཱཡཱམམིཙྪཱསཏིམིཙྪཱསམཱདྷཱིཧི ཝུཊྛཱནཾ མིཙྪཱསངྐཔྤཝུཊྛཱནེ ཝུཏྟནཡེནེཝ ཝེདིཏབྦཾ. མིཙྪཱསཏཱིཏི ཙ སཏིཡཱ པཊིཔཀྑཱཀཱརེན ཨུཔྤཛྫམཱནཱ ཨཀུསལཙིཏྟུཔྤཱདམཏྟམེཝ. ཨུཔརིམགྒཏྟཡེ ‘‘དསྶནཊྛེན སམྨཱདིཊྛཱི’’ཏིཨཱདཱིནི ཨཊྛ མགྒངྒཱནི ཡཐཱ པཋམཛ྄ཛྷཱནིཀེ པཋམམགྒེ ལབྦྷནྟི, ཏཐེཝ ལབྦྷནྟི. ཏཏྠ པཋམམགྒེ སམྨཱདིཊྛི མིཙྪཱདིཊྛིཾ པཛཧཏཱིཏི སམྨཱདིཊྛི. སམྨཱསངྐཔྤཱདཡོཔི མིཙྪཱསངྐཔྤཱདཱིནཾ པཛཧནཊྛེནེཝ ཝེདིཏབྦཱ. ཨེཝཾ སནྟེ པཋམམགྒེནེཝ དྭཱསཊྛིཡཱ དིཊྛིགཏཱནཾ པཧཱིནཏྟཱ ཨུཔརིམགྒཏྟཡེན པཧཱཏབྦཱ དིཊྛི ནཱམ ནཏྠི.

ཏཏྠ སམྨཱདིཊྛཱིཏི ནཱམཾ ཀཐཾ ཧོཏཱིཏི? ཡཐཱ ཝིསཾ ཨཏྠི ཝཱ ཧོཏུ མཱ ཝཱ, ཨགདོ ཨགདོཏྭེཝ ཝུཙྩཏི, ཨེཝཾ མིཙྪཱདིཊྛི ཨཏྠི ཝཱ ཧོཏུ མཱ ཝཱ, ཨཡཾ སམྨཱདིཊྛི ཨེཝ ནཱམ. ཡདི ཨེཝཾ ནཱམམཏྟམེཝེཏཾ ཧོཏི, ཨུཔརིམགྒཏྟཡེ པན སམྨཱདིཊྛིཡཱ ཀིཙྩཱབྷཱཝོ ཨཱཔཛྫཏི, མགྒངྒཱནི ན པརིཔཱུརེནྟི. ཏསྨཱ སམྨཱདིཊྛི སཀིཙྩཀཱ ཀཱཏབྦཱ, མགྒངྒཱནི པརིཔཱུརེཏབྦཱནཱིཏི. སཀིཙྩཀཱ ཙེཏྠ སམྨཱདིཊྛི ཡཐཱལཱབྷནིཡམེན དཱིཔེཏབྦཱ. ཨུཔརིམགྒཏྟཡཝཛ྄ཛྷོ ཧི ཨེཀོ མཱནོ ཨཏྠི, སོ དིཊྛིཊྛཱནེ ཏིཊྛཏི, སཱ ཏཾ མཱནཾ པཛཧཏཱིཏི སམྨཱདིཊྛི. སོཏཱཔཏྟིམགྒསྨིཉྷི སམྨཱདིཊྛི མིཙྪཱདིཊྛིཾ ¶ པཛཧཏི. སོཏཱཔནྣསྶ པན སཀདཱགཱམིམགྒཝཛ྄ཛྷོ མཱནོ ཨཏྠི, ཏཾ མཱནཾ པཛཧཏཱིཏི སམྨཱདིཊྛི. ཏསྶེཝ སཏྟཨཀུསལཙིཏྟསཧཛཱཏོ སངྐཔྤོ ཨཏྠི, ཏེཧེཝ ཙིཏྟེཧི ཝཱཙངྒཙོཔནཾ ཨཏྠི, ཀཱཡངྒཙོཔནཾ ཨཏྠི, པཙྩཡཔརིབྷོགོ ཨཏྠི, སཧཛཱཏཝཱཡཱམོ ཨཏྠི, ཨསྶཏིཡབྷཱཝོ ཨཏྠི, སཧཛཱཏཙིཏྟེཀགྒཏཱ ཨཏྠི, ཨེཏེ མིཙྪཱསངྐཔྤཱདཡོ ནཱམ. སཀདཱགཱམིམགྒེ སམྨཱསངྐཔྤཱདཡོ ཏེསཾ པཧཱནེན སམྨཱསངྐཔྤཱདཡོཏི ཝེདིཏབྦཱ. ཨེཝཾ སཀདཱགཱམིམགྒེ ¶ ཨཊྛངྒཱནི སཀིཙྩཀཱནི ཧོནྟི. སཀདཱགཱམིསྶ ཨནཱགཱམིམགྒཝཛ྄ཛྷོ མཱནོ ཨཏྠི, སོ དིཊྛིཊྛཱནེ ཏིཊྛཏི. ཏསྶེཝ སཏྟཧི ཙིཏྟེཧི སཧཛཱཏཱ སངྐཔྤཱདཡོ ཨཏྠི. ཏེསཾ པཧཱནེན ཨནཱགཱམིམགྒེ ཨཊྛནྣཾ ཨངྒཱནཾ སཀིཙྩཀཏཱ ཝེདིཏབྦཱ. ཨནཱགཱམིསྶ ཨརཧཏྟམགྒཝཛ྄ཛྷོ མཱནོ ཨཏྠི, སོ དིཊྛིཊྛཱནེ ཏིཊྛཏི. ཡཱནི པནསྶ པཉྩ ཨཀུསལཙིཏྟཱནི, ཏེཧི སཧཛཱཏཱ སངྐཔྤཱདཡོ ཨཏྠི. ཏེསཾ པཧཱནེན ཨརཧཏྟམགྒེ ཨཊྛནྣཾ ཨངྒཱནཾ སཀིཙྩཀཏཱ ཝེདིཏབྦཱ.

ཨོལཱ༹རིཀཱཏི ཀཱཡཝཙཱིདྭཱརེ ཝཱིཏིཀྐམསྶ པཙྩཡབྷཱཝེན ཐཱུལབྷཱུཏམྷཱ. ཀཱམརཱགསཉྙོཛནཱཏི མེཐུནརཱགསངྑཱཏཱ སཉྙོཛནཱ. སོ ཧི ཀཱམབྷཝེ སཉྙོཛེཏཱིཏི སཉྙོཛནནྟི ¶ ཝུཙྩཏི. པཊིགྷསཉྙོཛནཱཏི བྱཱཔཱདསཉྙོཛནཱ. སོ ཧི ཨཱརམྨཎེ པཊིཧཉྙཏཱིཏི པཊིགྷནྟི ཝུཙྩཏི. ཏེ ཨེཝ ཐཱམགཏཊྛེན སནྟཱནེ ཨནུསེནྟཱིཏི ཨནུསཡཱ. ཨཎུསཧགཏཱཏི ཨཎུབྷཱུཏཱ, སུཁུམབྷཱུཏཱཏི ཨཏྠོ. ཏབྦྷཱཝེ ཧི ཨེཏྠ སཧགཏསདྡོ. སཀདཱགཱམིསྶ ཧི ཀཱམརཱགབྱཱཔཱདཱ དྭཱིཧི ཀཱརཎེཧི ཨཎུབྷཱུཏཱ ཨདྷིཙྩུཔྤཏྟིཡཱ ཙ པརིཡུཊྛཱནམནྡཏཱཡ ཙ. ཏསྶ ཧི བཱལཔུཐུཛྫནསྶ ཝིཡ ཀིལེསཱ ཨབྷིཎྷཾ ན ཨུཔྤཛྫནྟི, ཀདཱཙི ཀརཧཙི ཨུཔྤཛྫནྟི. ཨུཔྤཛྫམཱནཱ ཙ བཱལཔུཐུཛྫནསྶ ཝིཡ མདྡནྟཱ ཕརནྟཱ ཚཱདེནྟཱ ཨནྡྷཨནྡྷཾ ཀརོནྟཱ ན ཨུཔྤཛྫནྟི, དྭཱིཧི པན མགྒེཧི པཧཱིནཏྟཱ མནྡམནྡཱ ཏནུཀཱཀཱརཱ ཧུཏྭཱ ཨུཔྤཛྫནྟི, ཝཱིཏིཀྐམཾ པཱཔེཏུཾ སམཏྠཱ ན ཧོནྟི. ཨེཝཾ ཏནུབྷཱུཏཱ ཨནཱགཱམིམགྒེན པཧཱིཡནྟི རཱུཔརཱགཱཏི རཱུཔབྷཝེ ཚནྡརཱགཱ. ཨརཱུཔརཱགཱཏི ཨརཱུཔབྷཝེ ཚནྡརཱགཱ. མཱནཱཏི ཨུནྣཏིལཀྑཎཱ. ཨུདྡྷཙྩཱཏི ཨཝཱུཔསམལཀྑཎཱ. ཨཝིཛྫཱཡཱཏི ཨནྡྷལཀྑཎཱཡ. བྷཝརཱགཱནུསཡཱཏི རཱུཔརཱགཱརཱུཔརཱགཝསེན པཝཏྟབྷཝརཱགཱནུསཡཱ.

༦༢. ཨིདཱནི མགྒཉཱཎསཾཝཎྞནཾ ཀརོནྟོ ཨཛཱཏཾ ཛྷཱཔེཏཱིཏིཨཱདིམཱཧ. ཏཏྠ ཙ ཨཛཱཏཾ ཛྷཱཔེཏི ཛཱཏེན, ཛྷཱནཾ ཏེན པཝུཙྩཏཱིཏི ཨཏྟནོ ¶ སནྟཱནེ པཱཏུབྷཱུཏེན ཏེན ཏེན ལོཀུཏྟརཛ྄ཛྷཱནེན ཏཾསམངྒཱིཔུགྒལོ ཨཛཱཏམེཝ ཏཾ ཏཾ ཀིལེསཾ ཛྷཱཔེཏི དཧཏི སམུཙྪིནྡཏི, ཏེན ཀཱརཎེན ཏཾ ལོཀུཏྟརཾ ཛྷཱནནྟི པཝུཙྩཏཱིཏི ཨཏྠོ. ཛྷཱནཝིམོཀྑེ ཀུསལཏཱཏི ¶ ཏསྨིཾ ཨརིཡམགྒསམྤཡུཏྟེ ཝིཏཀྐཱདིཀེ ཛྷཱནེ ཙ ཝིམོཀྑསངྑཱཏེ ཨརིཡམགྒེ ཙ ཨསམྨོཧཝསེན ཀུསལཏཱཡ པཋམམགྒེནེཝ པཧཱིནཱསུ ནཱནཱདིཊྛཱིསུ ན ཀམྤཏི. ཛྷཱནཾ ནཱམ དུཝིདྷཾ ཨཱརམྨཎཱུཔནིཛ྄ཛྷཱནཉྩ ལཀྑཎཱུཔནིཛ྄ཛྷཱནཉྩ. ལོཀིཡཔཋམཛ྄ཛྷཱནཱདིཀཾ ཀསིཎཱདིཨཱརམྨཎཱུཔནིཛ྄ཛྷཱནཊྛེན ཛྷཱནཾ, ཝིཔསྶནཱསངྑཱརཱནཾ སབྷཱཝསཱམཉྙལཀྑཎཱུཔནིཛ྄ཛྷཱནཊྛེན ཛྷཱནཾ, ལོཀུཏྟརཾ ནིབྦཱནེ ཏཐལཀྑཎཱུཔནིཛ྄ཛྷཱནཊྛེན ཛྷཱནཾ. ཨིདྷ པན གོཏྲབྷུནཱཔི སཱདྷཱརཎཾ ལཀྑཎཱུཔནིཛ྄ཛྷཱནཊྛཾ ཨནཱམསིཏྭཱ ཨསཱདྷཱརཎེན ཀིལེསཛྷཱཔནཊྛེན ཛྷཱནཾ ཝུཏྟཾ. ཝིམོཀྑཊྛོ པནེཏྠ ནིབྦཱནཱརམྨཎེ སུཊྛུ ཨདྷིམུཙྩནཊྛོ ཀིལེསེཧི ཙ སུཊྛུ མུཙྩནཊྛོ.

སམཱདཧིཏྭཱ ཡཐཱ ཙེ ཝིཔསྶཏཱིཏི ཨཔྤནཱུཔཙཱརཁཎིཀསམཱདྷཱིནཾ ཨཉྙཏརེན སམཱདྷིནཱ པཋམཾ ཙིཏྟསམཱདྷཱནཾ ཀཏྭཱ པཙྪཱ ཡཐཱ ཝིཔསྶཏི ཙ. སམུཙྩཡཏྠོ ཙེ-སདྡོ ཝིཔསྶནཾ སམུཙྩིནོཏི. ཝིཔསྶམཱནོ ཏཐཱ ཙེ སམཱདཧེཏི ཝིཔསྶནཱ ནཱམེསཱ ལཱུཁབྷཱུཏཱ ནིརསྶཱདཱ, སམཐོ ཙ ནཱམ སིནིདྡྷབྷཱུཏོ སཨསྶཱདོ. ཏསྨཱ ཏཱཡ ལཱུཁབྷཱུཏཾ ཙིཏྟཾ སིནེཧེཏུཾ ཝིཔསྶམཱནོ ཏཐཱ ཙ སམཱདཧེ. ཝིཔསྶམཱནོ པུན སམཱདྷིཾ པཝིསིཏྭཱ ཙིཏྟསམཱདྷཱནཉྩ ཏཐེཝ ཀརེཡྻ, ཡཐེཝ ཝིཔསྶནནྟི ཨཏྠོ. ཨིདྷ ཙེ-སདྡོ སམཱདཧནཾ སམུཙྩིནོཏི. ཨུབྷཡཏྠཱཔི གཱཐཱབནྡྷཱནུཝཏྟནེན ¶ ཙེ-ཀཱརོ ཀཏོ, ཨཏྠོ པན ཙ-ཀཱརཏྠོ ཨེཝ. ཝིཔསྶནཱ ཙ སམཐོ ཏདཱ ཨཧཱུཏི ཡསྨཱ སམཐཝིཔསྶནཱནཾ ཡུགནདྡྷབྷཱཝེ སཏི ཨརིཡམགྒཔཱཏུབྷཱཝོ ཧོཏི, ཏསྨཱ ཨརིཡམགྒཛནནསམཏྠཏྟཱ ཡདཱ ཏདུབྷཡསམཱཡོགོ ཧོཏི, ཏདཱ ཝིཔསྶནཱ ཙ སམཐོ ཙ ཨཧུ, སམཐཝིཔསྶནཱ བྷཱུཏཱ ནཱམ ཧོཏཱིཏི ཨཏྠོ. ཏཱ ཙ སམཐཝིཔསྶནཱ ཨརིཡམགྒཱབྷིམུཁཱིཀཱལེ ཙ མགྒཀྑཎེ ཙ སམཱནབྷཱགཱ ཡུགནདྡྷཱ ཝཏྟརེ སམཱནོ སམོ བྷཱགོ ཀོཊྛཱསོ ཨེཏེསནྟི སམཱནབྷཱགཱ, ཡུགེ ནདྡྷཱ ཝིཡཱཏི ཡུགནདྡྷཱ, ཨཉྙམཉྙཾ ཨནཏིཝཏྟནཊྛེན སམདྷུརཱ སམབལཱཏི ཨཏྠོ. ཝིཏྠཱརོ པནསྶ ཡུགནདྡྷཀཐཱཡཾ ཨཱཝིབྷཝིསྶཏི.

དུཀྑཱ སངྑཱརཱ སུཁོ, ནིརོདྷོ ཨིཏི དསྶནཾ. དུབྷཏོ ཝུཊྛིཏཱ ¶ པཉྙཱ, ཕསྶེཏི ཨམཏཾ པདནྟི དུཀྑཱ སངྑཱརཱ, སུཁོ ནིརོདྷོ ནིབྦཱནནྟི པཊིཔནྣསྶ ¶ ཏཏོ ནིབྦཱནདསྶནཾ ཨརིཡམགྒཉཱཎཾ དུབྷཏོ ཝུཊྛིཏཱ པཉྙཱ ནཱམ. སཱ ཨེཝ ཙ པཉྙཱ ཨམཏཾ པདཾ ནིབྦཱནཾ ཨཱརམྨཎཕུསནེན ཕུསཏི, པཊིལབྷཏཱིཏི ཨཏྠོ. ནིབྦཱནཉྷི ཨཏཔྤཀཊྛེན ཨམཏསདིསནྟི ཨམཏཾ, ནཱསྶ མཏཾ མརཎཾ ཝཡོ ཨཏྠཱིཏིཔི ཨམཏཾ, པུབྦབྷཱགཏོ པཊྛཱཡ མཧཏཱ ཨུསྶཱཧེན མཧཏིཡཱ པཊིཔདཱཡ པཛྫཏི པཊིཔཛྫཱིཡཏཱིཏི པདནྟི ཝུཙྩཏི.

ཝིམོཀྑཙརིཡཾ ཛཱནཱཏཱིཏི ཝིམོཀྑཔཝཏྟིཾ ཨསམྨོཧཝསེན ཛཱནཱཏི, པཙྩཝེཀྑཎཝསེན ཛཱནཱཏི. ‘‘དུབྷཏོ ཝུཊྛཱནོ ཝིམོཀྑོ, དུབྷཏོ ཝུཊྛཱནཱ ཙཏྟཱརོ ཝིམོཀྑཱ, དུབྷཏོ ཝུཊྛཱནཱནཾ ཨནུལོམཱ ཙཏྟཱརོ ཝིམོཀྑཱ, དུབྷཏོ ཝུཊྛཱནཔཊིཔྤསྶདྡྷི ཙཏྟཱརོ ཝིམོཀྑཱ’’ཏི ཧི ཨུཔརི ཝིམོཀྑཀཐཱཡཾཡེཝ (པཊི. མ. ༡.༢༠༩ ཨཱདཡོ) ཨཱགཏཱ ཝིམོཀྑཙརིཡཱ ཝེདིཏབྦཱ. ཏེསཾ ཝིཏྠཱརོ ཏཏྠེཝ ཨཱགཏོ. ནཱནཏྟེཀཏྟཀོཝིདོཏི ཏེསཾ ཝིམོཀྑཱནཾ ནཱནཱབྷཱཝེ ཨེཀབྷཱཝེ ཙ ཀུསལོ. དུབྷཏོ ཝུཊྛཱནཝིམོཀྑཝསེན ཧི ཏེསཾ ཨེཀཏྟཾ, ཙཏུཨརིཡམགྒཝསེན ནཱནཏྟཾ, ཨེཀེཀསྶཱཔི ཝཱ ཨརིཡམགྒསྶ ཨནུཔསྶནཱབྷེདེན ནཱནཏྟཾ, ཨརིཡམགྒབྷཱཝེན ཨེཀཏྟཾ ཝེདིཏབྦཾ. དྭིནྣཾ ཉཱཎཱནཾ ཀུསལཏཱཏི དསྶནསངྑཱཏསྶ ཙ བྷཱཝནཱསངྑཱཏསྶ ཙཱཏི ཨིམེསཾ དྭིནྣཾ ཉཱཎཱནཾ ཀུསལཏཱཡ. དསྶནནྟི ཧི སོཏཱཔཏྟིམགྒོ. སོ ཧི པཋམཾ ནིབྦཱནདསྶནཏོ དསྶནནྟི ཝུཏྟོ. གོཏྲབྷུ པན ཀིཉྩཱཔི པཋམཏརཾ ནིབྦཱནཾ པསྶཏི, ཡཐཱ པན རཉྙོ སནྟིཀཾ ཀེནཙིདེཝ ཀརཎཱིཡེན ཨཱགཏོ པུརིསོ དཱུརཏོཝ རཐིཀཱཡ ཙརནྟཾ ཧཏྠིཀྑནྡྷགཏཾ རཱཛཱནཾ དིསྭཱཔི ‘‘དིཊྛོ ཏེ རཱཛཱ’’ཏི པུཊྛོ དིསྭཱ ཀཏྟབྦཀིཙྩསྶ ཨཀཏཏྟཱ ‘‘ན པསྶཱམཱི’’ཏི ཨཱཧ, ཨེཝམེཝ ནིབྦཱནཾ དིསྭཱ ཀཏྟབྦསྶ ཀིལེསཔྤཧཱནསྶཱབྷཱཝཱ ན ‘‘དསྶན’’ནྟི ཝུཙྩཏི. ཏཉྷི ཉཱཎཾ མགྒསྶ ཨཱཝཛྫནཊྛཱནེ ཏིཊྛཏི. བྷཱཝནཱཏི སེསམགྒཏྟཡཾ. ཏཉྷི པཋམམགྒེན དིཊྛསྨིཾཡེཝ དྷམྨེ བྷཱཝནཱཝསེན ཨུཔྤཛྫཏི, ན ཨདིཊྛཔུབྦཾ ཀིཉྩི ¶ པསྶཏི, ཏསྨཱ ‘‘བྷཱཝནཱ’’ཏི ཝུཙྩཏི. ཧེཊྛཱ པན བྷཱཝནཱམགྒསྶ ¶ ཨཔརིནིཊྛིཏཏྟཱ ‘‘དྭིནྣཾ ཉཱཎཱན’’ནྟི ཨཝཏྭཱ སོཏཱཔཏྟིསཀདཱགཱམིཨནཱགཱམིམགྒལཱབྷིནོ སནྡྷཱཡ ‘‘ཛྷཱནཝིམོཀྑེ ཀུསལཏཱ’’ཏི ཝུཏྟཾ, ཨརཧཏྟམགྒལཱབྷིནོ པན བྷཱཝནཱམགྒསྶ པརིནིཊྛིཏཏྟཱ ‘‘དྭིནྣཾ ཉཱཎཱནཾ ཀུསལཏཱ’’ཏི ཝུཏྟནྟི ཝེདིཏབྦཾ.

མགྒཉཱཎནིདྡེསཝཎྞནཱ ནིཊྛིཏཱ.

༡༢. ཕལཉཱཎནིདྡེསཝཎྞནཱ

༦༣. ཕལཉཱཎནིདྡེསེ ¶ ¶ ཏཾཔཡོགཔྤཊིཔྤསྶདྡྷཏྟཱཏི ཏསྶ ཨཛ྄ཛྷཏྟབཧིདྡྷཱ ཝུཊྛཱནཔཡོགསྶ པཊིཔྤསྶདྡྷཏྟཱ. མགྒོ ཧི སཀཀྑཎེ ཀིལེསཔྤཧཱནེན ཨུབྷཏོ ཝུཊྛཱནཔཡོགཾ ཀརོཏི ནཱམ, ཕལཀྑཎེ ཀིལེསཱནཾ པཧཱིནཏྟཱ མགྒསྶ ཨུབྷཏོ ཝུཊྛཱནཔཡོགོ པཊིཔྤསྶདྡྷོ ཝཱུཔསནྟོ ནཱམ ཧོཏི. ཨུཔྤཛྫཏཱིཏི མགྒཱནནྟརཾ སཀིཾ ཝཱ དྭིཀྑཏྟུཾ ཝཱ ཨུཔྤཛྫཏི, ཕལསམཱཔཏྟིཀཱལེ པན བཧུཀྑཏྟུཾ, ནིརོདྷཱ ཝུཊྛཧནྟསྶ དྭིཀྑཏྟུཾ ཨུཔྤཛྫཏི, སབྦམྤི ཧི ཏཾ པཡོགཔྤཊིཔྤསྶདྡྷཏྟཱ ཨུཔྤཛྫཏི. མགྒསྶེཏཾ ཕལནྟི ཕལཾ ཨཔེཀྑིཏྭཱ ནཔུཾསཀཝཙནཾ ཀཏཾ. སཀདཱགཱམིམགྒཀྑཎཱདཱིསུཔི ཨེཀེཀམགྒངྒཝསེནེཝ ཝུཊྛཱནཡོཛནཱ ཝེདིཏབྦཱ.

ཕལཉཱཎནིདྡེསཝཎྞནཱ ནིཊྛིཏཱ.

༡༣. ཝིམུཏྟིཉཱཎནིདྡེསཝཎྞནཱ

༦༤. ཝིམུཏྟིཉཱཎནིདྡེསེ ¶ སཀྐཱཡདིཊྛཱིཏི ཝིཛྫམཱནཊྛེན སཏི ཁནྡྷཔཉྩཀསངྑཱཏེ ཀཱཡེ, སཡཾ ཝཱ སཏཱི ཏསྨིཾ ཀཱཡེ དིཊྛཱིཏི སཀྐཱཡདིཊྛི. ཝིཙིཀིཙྪཱཏི ཝིགཏཱ ཙིཀིཙྪཱ, སབྷཱཝཾ ཝཱ ཝིཙིནནྟོ ཨེཏཱཡ ཀིཙྪཏི ཀིལམཏཱིཏི ཝིཙིཀིཙྪཱ. སཱིལབྦཏཔརཱམཱསོཏི སཱིལེན སུདྡྷི ཝཏེན སུདྡྷི སཱིལབྦཏེན སུདྡྷཱིཏི གཧིཏཨབྷིནིཝེསོ. སོ ཧི སབྷཱཝཾ ཨཏིཀྐམིཏྭཱ པརཏོ ཨཱམསཏཱིཏི སཱིལབྦཏཔརཱམཱསོ. ཨུབྷིནྣཾ སམཱནེཔི དིཊྛིབྷཱཝེ ཏཀྐཉྩ པརཱུཔདེསཉྩ ཝིནཱ པཀཏིཡཱ ཨེཝ སཀྐཱཡདིཊྛིགཧཎཏོ པཀཏིབྷཱུཏཱཡ ཝཱིསཏིཝཏྠུཀཱཡ སཀྐཱཡདིཊྛིཡཱ པཧཱནེནེཝ སབྦདིཊྛིཔྤཧཱནདསྶནཏྠཾ སཀྐཱཡདིཊྛི ཝུཏྟཱ. སཱིལབྦཏཔརཱམཱསོ པན ¶ ‘‘སུདྡྷིཔཊིཔདཾ པཊིཔཛྫཱམཱ’’ཏི པཊིཔནྣཱནཾ པཊིཔདཱཡ མིཙྪཱབྷཱཝདསྶནཏྠཾ ཝིསུཾ ཝུཏྟོཏི ཝེདིཏབྦོ. ཏིཎྞམྤི ཨནུསཡཔྤཧཱནེནེཝ པཧཱནཾ དསྶེཏུཾ དིཊྛཱནུསཡོ ཝིཙིཀིཙྪཱནུསཡོཏི ཝུཏྟཾ, ན ཝིསུཾ ཀིལེསཏྟཱ. ཨུཔཀྐིལེསཱཏི ཀིལེསེནྟི ཨུཔཏཱཔེནྟི ཝིབཱདྷེནྟཱིཏི ཀིལེསཱ, ཐཱམགཏཊྛེན བྷུསཱ ཀིལེསཱཏི ཨུཔཀྐིལེསཱ. སམྨཱ སམུཙྪིནྣཱ ཧོནྟཱིཏི སམུཙྪེདཔྤཧཱནེན ཨནུཔྤཱདནིརོདྷེན སམྨཱ སམུཙྪིནྣཱ ཧོནྟི. སཔརིཡུཊྛཱནེཧཱིཏི ཙིཏྟཾ པརིཡོནནྡྷནྟཱནི ¶ ཨུཊྛེནྟི ཨུཔྤཛྫནྟཱིཏི པརིཡུཊྛཱནཱནི, སམུདཱཙཱརཔྤཏྟཱནཾ ཀིལེསཱནམེཏཾ ཨདྷིཝཙནཾ. སཧ པརིཡུཊྛཱནེཧཱིཏི སཔརིཡུཊྛཱནཱནི. ཏེཧི སཔརིཡུཊྛཱནེཧི ཨནུསཡིཏཨུཔཀྐིལེསེཧི. ཙིཏྟཾ ཝིམུཏྟཾ ཧོཏཱིཏི ཏེསཾ ཨབྷབྦུཔྤཏྟིཀབྷཱུཏཏྟཱ སནྟཏིཝསེན པཝཏྟམཱནཾ ཙིཏྟཾ ཏཏོ ཝིམུཏྟཾ ནཱམ ཧོཏི. ཏདེཝ སུཊྛུ ཝིམུཏྟཏྟཱ སུཝིམུཏྟཾ. ཏཾཝིམུཏྟིཉཱཏཊྛེནཱཏི ཏསྶཱ ཝིམུཏྟིཡཱ ཛཱནནཊྛེན.

ཝིམུཏྟིཉཱཎནིདྡེསཝཎྞནཱ ནིཊྛིཏཱ.

༡༤. པཙྩཝེཀྑཎཉཱཎནིདྡེསཝཎྞནཱ

༦༥. པཙྩཝེཀྑཎཉཱཎནིདྡེསེ ¶ མགྒཀྑཎེཡེཝ ཧེཏུཊྛེན པཋམཾ མགྒངྒཱནི ཝིསུཾ ཝིསུཾ ཝཏྭཱ པུན མགྒངྒབྷཱུཏེ ཙ ཨམགྒངྒབྷཱུཏེ ཙ དྷམྨེ ‘‘བུཛ྄ཛྷནཊྛེན བོདྷཱི’’ཏི ལདྡྷནཱམསྶ ཨརིཡསྶ ཨངྒབྷཱཝེན བོཛ྄ཛྷངྒེ ཝིསུཾ དསྶེསི. སཏིདྷམྨཝིཙཡཝཱིརིཡསམཱདྷིསམྦོཛ྄ཛྷངྒཱ ཧི མགྒངྒཱནེཝ, པཱིཏིཔསྶདྡྷིཨུཔེཀྑཱསམྦོཛ྄ཛྷངྒཱ ཨམགྒངྒཱནི. པུན བལཝསེན ཨིནྡྲིཡཝསེན ཙ ཝིསུཾ ནིདྡིཊྛེསུ སདྡྷཱ ཨེཝ ཨམགྒངྒབྷཱུཏཱ. པུན མགྒཀྑཎེ ཛཱཏེཡེཝ དྷམྨེ རཱསིཝསེན དསྶེནྟོ ཨཱདྷིཔཏེཡྻཊྛེནཱཏིཨཱདིམཱཧ. ཏཏྠ ཨུཔཊྛཱནཊྛེན སཏིཔཊྛཱནཱཏི ཨེཀཱཝ ནིབྦཱནཱརམྨཎཱ སཏི ཀཱཡཝེདནཱཙིཏྟདྷམྨེསུ སུབྷསུཁནིཙྩཨཏྟསཉྙཱཔཧཱནཀིཙྩསཱདྷནཝསེན ཙཏྟཱརོ སཏིཔཊྛཱནཱ ནཱམ. ནིབྦཱནཱརམྨཎཾ ཨེཀམེཝ ཝཱིརིཡཾ ཨུཔྤནྣཱནུཔྤནྣཱནཾ ཨཀུསལཱནཾ པཧཱནཱནུཔྤཏྟིཀིཙྩསྶ, ཨནུཔྤནྣུཔྤནྣཱནཾ ཀུསལཱནཾ ཨུཔྤཱདཊྛིཏིཀིཙྩསྶ སཱདྷནཝསེན ཙཏྟཱརོ སམྨཔྤདྷཱནཱ ནཱམ.

ཏཐཊྛེན སཙྩཱཏི དུཀྑབྷཱཝཱདཱིསུ ཨཝིསཾཝཱདཀཊྛེན ཙཏྟཱརི ཨརིཡསཙྩཱནི. ཨེཏཱནེཝ ཙེཏྠ པཊིཝེདྷཊྛེན ཏདཱ སམུདཱགཏཱནི, ‘‘ཨམཏོགདྷཾ ནིབྦཱན’’ནྟི ཝིསུཾ ཝུཏྟཾ ནིབྦཱནཉྩ, སེསཱ པན དྷམྨཱ པཊིལཱབྷཊྛེན ཏདཱ སམུདཱགཏཱ. ‘‘ཏཐཊྛེན སཙྩཱ ཏདཱ སམུདཱགཏཱ’’ཏི ཝཙནཏོ མགྒཕལཔརིཡོསཱནེ ཨཝསྶཾ ཙཏྟཱརི སཙྩཱནི པཙྩཝེཀྑཏཱིཏི ནིཊྛམེཏྠ གནྟབྦཾ. ‘‘ཀཏཾ ཀརཎཱིཡཾ ནཱཔརཾ ཨིཏྠཏྟཱཡཱཏི པཛཱནཱཏཱི’’ཏི (དཱི. ནི. ༡.༢༤༨) ཝཙནཏོ ཙ ‘‘དུཀྑཾ མེ པརིཉྙཱཏཾ, སམུདཡོ མེ པཧཱིནོ, ནིརོདྷོ ¶ མེ སཙྪིཀཏོ, མགྒོ ¶ ཙ མེ བྷཱཝིཏོ’’ཏི པཙྩཝེཀྑཎཾ ཝུཏྟམེཝ ཧོཏི. ཏཐཱ པཙྩཝེཀྑཎཾ ཡུཛྫཏི ཙ. སམུདཡོཏི ཙེཏྠ ཏཾཏཾམགྒཝཛ྄ཛྷོཡེཝ ཝེདིཏབྦོ. ཨེཏྠ ཝུཏྟསམུདཡཔཙྩཝེཀྑཎཝསེནེཝ ཨཊྛཀཐཱཡཾ ¶ དུཝིདྷཾ ཀིལེསཔཙྩཝེཀྑཎཾ མགྒཕལནིབྦཱནཔཙྩཝེཀྑཎཱནི ཨིདྷ སརཱུཔེནེཝ ཨཱགཏཱནཱིཏི ཝུཏྟཱནི. ཀེཝལཾ དུཀྑཔཙྩཝེཀྑཎམེཝ ན ཝུཏྟཾ. ཀིཉྩཱཔི ན ཝུཏྟཾ, ཨཐ ཁོ པཱཋསབྦྷཱཝཏོ ཡུཏྟིསབྦྷཱཝཏོ ཙ གཧེཏབྦམེཝ. སཙྩཔཊིཝེདྷཏྠཉྷི པཊིཔནྣསྶ ནིཊྛིཏེ སཙྩཔཊིཝེདྷེ སཡཾ ཀཏཀིཙྩཔཙྩཝེཀྑཎཾ ཡུཏྟམེཝཱཏི. ཨཝིཀྑེཔཊྛེན སམཐོཏིཨཱདི མགྒསམྤཡུཏྟེ ཨེཝ སམཐཝིཔསྶནཱདྷམྨེ ཨེཀརསཊྛེན ཨནཏིཝཏྟནཊྛེན ཙ དསྶེཏུཾ ཝུཏྟཾ. སཾཝརཊྛེན སཱིལཝིསུདྡྷཱིཏི སམྨཱཝཱཙཱཀམྨནྟཱཛཱིཝཱ ཨེཝ. ཨཝིཀྑེཔཊྛེན ཙིཏྟཝིསུདྡྷཱིཏི སམྨཱསམཱདྷི ཨེཝ. དསྶནཊྛེན དིཊྛིཝིསུདྡྷཱིཏི སམྨཱདིཊྛིཡེཝ. ཝིམུཏྟཊྛེནཱཏི སམུཙྪེདཝསེན མགྒཝཛ྄ཛྷཀིལེསེཧི མུཙྩནཊྛེན, ནིབྦཱནཱརམྨཎེ ཝཱ ཨདྷིམུཙྩནཊྛེན. ཝིམོཀྑོཏི སམུཙྪེདཝིམོཀྑོ, ཨརིཡམགྒོཡེཝ. པཊིཝེདྷཊྛེན ཝིཛྫཱཏི སཙྩཔཊིཝེདྷཊྛེན ཝིཛྫཱ, སམྨཱདིཊྛིཡེཝ. པརིཙྩཱགཊྛེན ཝིམུཏྟཱིཏི མགྒཝཛ྄ཛྷཀིལེསཱནཾ པཛཧནཊྛེན ཏཏོ མུཙྩནཏོ ཝིམུཏྟི, ཨརིཡམགྒོཡེཝ. སམུཙྪེདཊྛེན ཁཡེ ཉཱཎནྟི ཀིལེསསམུཙྪིནྡནཊྛེན ཀིལེསཀྑཡཀརེ ཨརིཡམགྒེ ཉཱཎཾ, སམྨཱདིཊྛིཡེཝ.

ཚནྡཱདཡོ ཧེཊྛཱ ཝུཏྟནཡེནེཝ ཝེདིཏབྦཱ. ཀེཝལཉྷེཏྠ མགྒཀྑཎེཡེཝ མགྒསྶ ཨཱདིམཛ྄ཛྷཔརིཡོསཱནཱཀཱརེན དསྶིཏཱ. ཝིམུཏྟཱིཏི ཙེཏྠ མགྒཝིམུཏྟིཡེཝ. ‘‘ཏཐཊྛེན སཙྩཱ’’ཏི ཨེཏྠ གཧིཏམྤི ཙ ནིབྦཱནཾ ཨིདྷ པརིཡོསཱནབྷཱཝདསྶནཏྠཾ པུན ཝུཏྟནྟི ཝེདིཏབྦཾ. ཕལཀྑཎེཔི ཨེསེཝ ནཡོ. ཨེཏྠ པན ཧེཏུཊྛེན མགྒོཏི ཕལམགྒབྷཱཝེནེཝ. སམྨཔྤདྷཱནཱཏི མགྒཀྑཎེ ཙཏུཀིཙྩསཱདྷཀསྶ ཝཱིརིཡཀིཙྩསྶ ཕལསྶ ཨུཔྤཱདཀྑཎེ སིདྡྷཏྟཱ ཝུཏྟནྟི ཝེདིཏབྦཾ. ཨཉྙཐཱ ཧི ཕལཀྑཎེ སམྨཔྤདྷཱནཱ ཨེཝ ན ལབྦྷནྟི. ཝུཏྟཉྷི མགྒཀྑཎེ སཏྟཏིཾས བོདྷིཔཀྑིཡདྷམྨེ ཨུདྡྷརནྟེན ཐེརེན ‘‘ཕལཀྑཎེ ཋཔེཏྭཱ ཙཏྟཱརོ སམྨཔྤདྷཱནེ ཨཝསེསཱ ཏེཏྟིཾས དྷམྨཱ ལབྦྷནྟཱི’’ཏི. ཨེཝམེཝ ¶ པཊིཝེདྷཀིཙྩཱདིསིདྡྷིཝསེན སཙྩཱདཱིནིཔི ཡཐཱཡོགཾ ཝེདིཏབྦཱནི. ཝིམོཀྑོཏི ཙ ཕལཝིམོཀྑོ. ཝིམུཏྟཱིཏི ཕལཝིམུཏྟི. པཊིཔྤསྶདྡྷཊྛེན ཨནུཔྤཱདེ ཉཱཎཾ ཝུཏྟཏྠམེཝ. ཝུཊྛཧིཏྭཱཏི ཨནྟརཱ ཝུཊྛཱནཱབྷཱཝཱ ཕལཱཝསཱནེན ཨེཝཾ ཝུཏྟཾ. ཨིམེ དྷམྨཱ ཏདཱ སམུདཱགཏཱཏི ཨིམེ ཝུཏྟཔྤཀཱརཱ ¶ དྷམྨཱ མགྒཀྑཎེ ཕལཀྑཎེ ཙ སམུདཱགཏཱཏི པཙྩཝེཀྑཏཱིཏི ཨིཏི-སདྡཾ པཱཋསེསཾ ཀཏྭཱ སམྦནྡྷོ ཝེདིཏབྦོ.

པཙྩཝེཀྑཎཉཱཎནིདྡེསཝཎྞནཱ ནིཊྛིཏཱ.

༡༥. ཝཏྠུནཱནཏྟཉཱཎནིདྡེསཝཎྞནཱ

༦༦. ཝཏྠུནཱནཏྟཉཱཎནིདྡེསེ ¶ ¶ ཙཀྑུཾ ཨཛ྄ཛྷཏྟཾ ཝཝཏྠེཏཱིཏི ཨཛ྄ཛྷཏྟབྷཱུཏཾ ཙཀྑུཾ ཝཝཏྠཔེཏི. ཡཐཱ སོ ཙཀྑུཾ ཝཝཏྠཔེཏི, ཏཐཱ ཝཏྟུཀཱམོ ཀཐཾ ཙཀྑུཾ ཨཛ྄ཛྷཏྟཾ ཝཝཏྠེཏཱིཏི པུཙྪིཏྭཱ པུན ཙཀྑུ ཨཝིཛྫཱསམྦྷཱུཏནྟི ཝཝཏྠེཏཱིཏིཨཱདིནཱ ཝཝཏྠཱཔནཱཀཱརཾ དསྶེཏི. ཏཏྠ ཨཝིཛྫཱཏཎྷཱ ཨཏཱིཏཱ ཨུཔཏྠམྦྷཀཧེཏུཡོ, ཀམྨཾ ཨཏཱིཏཾ ཛནཀཧེཏུ, ཨཱཧཱརོ ཨིདཱནི ཨུཔཏྠམྦྷཀཧེཏུ. ཨེཏེན ཙཀྑཱུཔཏྠམྦྷཀཱནི ཨུཏུཙིཏྟཱནི གཧིཏཱནེཝ ཧོནྟི. ཙཏུནྣཾ མཧཱབྷཱུཏཱནཾ ཨུཔཱདཱཡཱཏི ཨུཔཡོགཏྠེ སཱམིཝཙནཾ, ཙཏྟཱརི མཧཱབྷཱུཏཱནི ཨུཔཱདིཡིཏྭཱ པཝཏྟནྟི ཨཏྠོ. ཨེཏེན པསཱདཙཀྑུབྷཱཝོ དསྶིཏོ ཧོཏི, སསམྦྷཱརབྷཱཝོ པཊིཀྑིཏྟོ. ཨུཔྤནྣནྟི ཨདྡྷཱཝསེན, སནྟཏིཁཎཝསེན ཝཱ པཙྩུཔྤནྣཾ. སམུདཱགཏནྟི ཧེཏུཏོ སམུཊྛིཏཾ. ཨེཏྟཱཝཏཱ ཝིཔསྶནཱཔུབྦབྷཱགེ ཙཀྑུཝཝཏྠཱནཾ དསྶིཏཾ. ཨཧུཏྭཱ སམྦྷཱུཏནྟིཨཱདཱིཧི ཨནིཙྩཱནུཔསྶནཱ. པུབྦེ ཨུདཡཱ ཨཝིཛྫམཱནཏོ ཨཧུཏྭཱ སམྦྷཱུཏཾ, ཨུདྡྷཾ ཝཡཱ ཨབྷཱཝཏོ ཧུཏྭཱ ན བྷཝིསྶཏི. ཨནྟཝནྟཏོཏི ཨནྟོ ཨསྶ ཨཏྠཱིཏི ཨནྟཝཱ, ཨནྟཝཱ ཨེཝ ཨནྟཝནྟོ ཡཐཱ ‘‘སཏིམནྟོ, གཏིམནྟོ, དྷིཏིམནྟོ ཙ ཡོ ཨིསཱི’’ཏི (ཐེརགཱ. ༡༠༥༢). ཏཏོ ཨནྟཝནྟཏོ, བྷངྒཝིཛྫམཱནཏོཏི ཨཏྠོ. ཨདྡྷུཝནྟི སབྦཱཝཏྠཱནིཔཱཏིཏཱཡ, ཐིརབྷཱཝསྶ ཙ ཨབྷཱཝཏཱཡ ན ཐིརཾ. ཨསསྶཏནྟི ན ནིཙྩཾ. ཝིཔརིཎཱམདྷམྨནྟི ཛརཱཡ ཙེཝ མརཎེན ཙཱཏི དྭེདྷཱ ཝིཔརིཎཱམཔཀཏིཀཾ. ཙཀྑུ ཨནིཙྩནྟིཨཱདཱིནི ཙཀྑུཾ ཨནིཙྩཏོཏིཨཱདཱིནི ཙ ཝུཏྟཏྠཱནི. མནོཏི ཨིདྷ བྷཝངྒམནསྶ ཨདྷིཔྤེཏཏྟཱ ཨཝིཛྫཱསམྦྷཱུཏོཏིཨཱདི ཡུཛྫཏིཡེཝ. ཨཱཧཱརསམྦྷཱུཏོཏི ཨེཏྠ སམྤཡུཏྟཕསྶཱཧཱརམནོསཉྩེཏནཱཧཱརཝསེན ཝེདིཏབྦཾ. ཨུཔྤནྣོཏི ཙ ཨདྡྷཱསནྟཏིཝསེན.

ཝཏྠུནཱནཏྟཉཱཎནིདྡེསཝཎྞནཱ ནིཊྛིཏཱ.

༡༦. གོཙརནཱནཏྟཉཱཎནིདྡེསཝཎྞནཱ

༦༧. གོཙརནཱནཏྟཉཱཎནིདྡེསེ ¶ ¶ རཱུཔེ བཧིདྡྷཱ ཝཝཏྠེཏཱིཏི ཨཛ྄ཛྷཏྟཏོ བཧིདྡྷཱབྷཱུཏེ རཱུཔཱཡཏནདྷམྨེ ཝཝཏྠཔེཏཱིཏི ཨཏྠོ. ཨཝིཛྫཱསམྦྷཱུཏཱཏིཨཱདི ཨཏྟབྷཱཝཔརིཡཱཔནྣཀམྨཛརཱུཔཏྟཱ ཝུཏྟཾ. ཨཱཧཱརོཔི ཧི ཀམྨཛརཱུཔསྶ ཨུཔཏྠམྦྷཀཔཙྩཡོ ཧོཏི. སདྡསྶ པན ཨུཏུཙིཏྟསམུཊྛཱནཏྟཱ ཨཝིཛྫཱསམྦྷཱུཏཱདིཙཏུཀྐཾ ན ཝུཏྟཾ. ཕོཊྛབྦཱནཾ སཡཾ མཧཱབྷཱུཏཏྟཱ ‘‘ཙཏུནྣཾ མཧཱབྷཱུཏཱནཾ ཨུཔཱདཱཡཱ’’ཏི ན ཝུཏྟཾ. དྷམྨཱཏི ཙེཏྠ བྷཝངྒམནོསམྤཡུཏྟཱ ཏཡོ ཨརཱུཔིནོ ཁནྡྷཱ, དྷམྨཱཡཏནཔརིཡཱཔནྣཱནི ¶ སུཁུམརཱུཔཱནི ཙ ཀམྨསམུཊྛཱནཱནི, སབྦཱནིཔི རཱུཔཱདཱིནི ཙ. ཨཔིཙ ཡཱནི ཡཱནི ཡེན ཡེན སམུཊྛཧནྟི, ཏཱནི ཏཱནི ཏེན ཏེན ཝེདིཏབྦཱནི. ཨིཏརཐཱ ཧི སཀསནྟཱནཔརིཡཱཔནྣཱཔི རཱུཔཱདཡོ དྷམྨཱ སབྦེ ན སངྒཎྷེཡྻུཾ. ཡསྨཱ ཨནིནྡྲིཡབདྡྷརཱུཔཱདཡོཔི ཝིཔསྶནཱུཔགཱ, ཏསྨཱ ཏེསཾ ཀམྨསམྦྷཱུཏཔདེན སངྒཧོ ཝེདིཏབྦོ. ཏེཔི ཧི སབྦསཏྟསཱདྷཱརཎཀམྨཔཙྩཡཨུཏུསམུཊྛཱནཱ. ཨཉྙེ པན ‘‘ཨནིནྡྲིཡབདྡྷཱ རཱུཔཱདཡོ ཨཝིཔསྶནཱུཔགཱ’’ཏི ཝདནྟི. ཏཾ པན –

‘‘སབྦེ སངྑཱརཱ ཨནིཙྩཱཏི, ཡདཱ པཉྙཱཡ པསྶཏི;

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ’’ཏི. (དྷ. པ. ༢༧༧) –

ཨཱདིཀཱཡ པཱལི༹ཡཱ ཝིརུཛ྄ཛྷཏི. ཝུཏྟཉྩ ཝིསུདྡྷིམགྒེ – ‘‘ཨིདྷེཀཙྩོ ཨཱདིཏོཝ ཨཛ྄ཛྷཏྟསངྑཱརེ ཨབྷིནིཝིསིཏྭཱ ཝིཔསྶཏི, ཡསྨཱ པན ན སུདྡྷཨཛ྄ཛྷཏྟདསྶནམཏྟེནེཝ མགྒཝུཊྛཱནཾ ཧོཏི, བཧིདྡྷཱཔི དཊྛབྦམེཝ, ཏསྨཱ པརསྶ ¶ ཁནྡྷེཔི ཨནུཔཱདིནྣསངྑཱརེཔི ཨནིཙྩཾ དུཀྑམནཏྟཱཏི ཝིཔསྶཏཱི’’ཏི (ཝིསུདྡྷི. ༢.༧༨༤). ཏསྨཱ པརེསཾ ཙཀྑཱདིཝཝཏྠཱནམྤི ཨནིནྡྲིཡབདྡྷརཱུཔཱདིཝཝཏྠཱནམྤི ཨིཙྪིཏབྦམེཝ, ཏསྨཱ ཏེབྷཱུམཀསངྑཱརཱ ཨཝིཔསྶནཱུཔགཱ ནཱམ ནཏྠི.

གོཙརནཱནཏྟཉཱཎནིདྡེསཝཎྞནཱ ནིཊྛིཏཱ.

༡༧. ཙརིཡཱནཱནཏྟཉཱཎནིདྡེསཝཎྞནཱ

༦༨. ཙརིཡཱནཱནཏྟཉཱཎནིདྡེསེ ¶ ཝིཉྙཱཎཙརིཡཱཏིཨཱདཱིསུ ཨཱརམྨཎེ ཙརཏཱིཏི ཙརིཡཱ, ཝིཉྙཱཎམེཝ ཙརིཡཱ ཝིཉྙཱཎཙརིཡཱ. ཨཉྙཱཎེན ཙརཎཾ ¶ , ཨཉྙཱཎེན ཝཱ ཙརཏི, ཨཉྙཱཏེ ཝཱ ཙརཏི, ཨཉྙཱཎསྶ ཝཱ ཙརཎནྟི ཨཉྙཱཎཙརིཡཱ. ཉཱཎམེཝ ཙརིཡཱ, ཉཱཎེན ཝཱ ཙརིཡཱ, ཉཱཎེན ཝཱ ཙརཏི, ཉཱཏེ ཝཱ ཙརཏི, ཉཱཎསྶ ཝཱ ཙརཎནྟི ཉཱཎཙརིཡཱ. དསྶནཏྠཱཡཱཏི རཱུཔདསྶནཏྠཱཡ པཝཏྟཱ. ཨཱཝཛྫནཀིརིཡཱབྱཱཀཏཱཏི བྷཝངྒསནྟཱནཏོ ཨཔནེཏྭཱ རཱུཔཱརམྨཎེ ཙིཏྟསནྟཱནཾ ཨཱཝཛྫེཏི ནཱམེཏཱིཏི ཨཱཝཛྫནཾ, ཝིཔཱཀཱབྷཱཝཏོ ཀརཎམཏྟནྟི ཀིརིཡཱ, ཀུསལཱཀུསལཝསེན ན བྱཱཀཏཱཏི ཨབྱཱཀཏཱ. དསྶནཊྛོཏི པསྶནྟི ཏེན, སཡཾ ཝཱ པསྶཏི, དསྶནམཏྟམེཝ ཝཱ ཏནྟི དསྶནཾ, དསྶནམེཝ ཨཏྠོ དསྶནཊྛོ. ཙཀྑུཝིཉྙཱཎནྟི ཀུསལཝིཔཱཀཾ ¶ ཝཱ ཨཀུསལཝིཔཱཀཾ ཝཱ. དིཊྛཏྟཱཏི ཨདིཊྛེ སམྤཊིཙྪནསྶ ཨབྷཱཝཏོ ཙཀྑུཝིཉྙཱཎེན རཱུཔཱརམྨཎསྶ དིཊྛཏྟཱ. ཨབྷིནིརོཔནཱ ཝིཔཱཀམནོདྷཱཏཱུཏི དིཊྛཱརམྨཎམེཝ ཨཱརོཧཏཱིཏི ཨཏིནིརོཔནཱ, ཨུབྷཡཝིཔཱཀཱ སམྤཊིཙྪནམནོདྷཱཏུ. ཨབྷིནིརོཔིཏཏྟཱཏི རཱུཔཱརམྨཎཾ ཨབྷིརུལ༹ྷཏྟཱ. ཝིཔཱཀམནོཝིཉྙཱཎདྷཱཏཱུཏི ཨུབྷཡཝིཔཱཀཱ སནྟཱིརཎམནོཝིཉྙཱཎདྷཱཏུ. ཨེས ནཡོ སོཏདྭཱརཱདཱིསུཔི. སནྟཱིརཎཱནནྟརཾ ཝོཊྛབྦནེ ཨཝུཏྟེཔི ཨཊྛཀཐཱཙརིཡེཧི ཝུཏྟཏྟཱ ལབྦྷཏཱིཏི གཧེཏབྦཾ. ཝིཛཱནནཏྠཱཡཱཏི དྷམྨཱརམྨཎསྶ ཙེཝ རཱུཔཱདིཨཱརམྨཎསྶ ཙ ཝིཛཱནནཏྠཱཡ. ཨཱཝཛྫནཀིརིཡཱབྱཱཀཏཱཏི མནོདྭཱརཱཝཛྫནཙིཏྟཾ. ཝིཛཱནནཊྛོཏི ཏདནནྟརཛཝནཝསེན ཨཱརམྨཎསྶ ཝིཛཱནནམེཝ ཨཏྠོ, ན ཨཉྙོ. ཨུཔརི ཨཀུསལཛཝནཱནཾ ཝིཔསྶནཱམགྒཕལཛཝནཱནཉྩ ཝིསུཾ ཝུཏྟཏྟཱ སེསཛཝནཱནི ཨིདྷ གཧེཏབྦཱནི སིཡུཾ. ‘‘ཀུསལེཧི ཀམྨེཧི ཝིཔྤཡུཏྟཱ ཙརཏཱིཏི ཝིཉྙཱཎཙརིཡཱ’’ཏིཨཱདིཝཙནཏོ (པཊི. མ. ༡.༧༠) པན ཧསིཏུཔྤཱདཙིཏྟཛཝནམེཝ གཧེཏབྦཾ. ཚསུ དྭཱརེསུ ཨཧེཏུཀཱནཾཡེཝ ¶ ཙིཏྟཱནཾ ཝུཏྟཏྟཱ དྭེ ཨཱཝཛྫནཱནི དྭེ པཉྩཝིཉྙཱཎཱནི དྭེ སམྤཊིཙྪནཱནི ཏཱིཎི སནྟཱིརཎཱནི ཨེཀཾ ཧསིཏུཔྤཱདཙིཏྟནྟི ཨཊྛཱརས ཨཧེཏུཀཙིཏྟཱནིཡེཝ ཝིཉྙཱཎཙརིཡཱཏི ཝེདིཏབྦཱནི.

༦༩. ཨིདཱནི ཝིསཡཝིཛཱནནམཏྟཊྛེན ཝིཉྙཱཎཙརིཡཱཏི དསྶེཏུཾ ནཱིརཱགཱ ཙརཏཱིཏིཨཱདིམཱཧ, ཝིཉྙཱཎཉྷི རཱགཱདིསམྤཡོགེ སདྡྷཱདིསམྤཡོགེ ཙ ཨཝཏྠནྟརཾ པཱཔུཎཱཏི, ཏེསུ ཨསཏི སཀཱཝཏྠཱཡམེཝ ཏིཊྛཏི. ཏསྨཱ ནཱིརཱགཱདིཝཙནེན ཏེསཾ ཝུཏྟཝིཉྙཱཎཱནཾ ཝིཉྙཱཎཀིཙྩམཏྟཾ དསྶེཏི. ནཏྠི ཨེཏིསྶཱ རཱགོཏི ནཱིརཱགཱ. ནིརཱགཱཏི རསྶཾ ཀཏྭཱཔི པཋནྟི ¶ . སོ པན རཛྫནཝསེན རཱགོ. ཨིཏརེསུ དུསྶནཝསེན དོསོ. མུཡ྄ཧནཝསེན མོཧོ. མཉྙནཝསེན མཱནོ. ཝིཔརཱིཏདསྶནཝསེན དིཊྛི. ཨུདྡྷཏབྷཱཝོ, ཨཝཱུཔསནྟབྷཱཝོ ཝཱ ཨུདྡྷཙྩཾ. ཝིཙིཀིཙྪཱ ཝུཏྟཏྠཱ. ཨནུསེནྟཱིཏི ཨནུསཡཱ. ‘‘ནིརནུསཡཱ’’ཏི ཝཏྟབྦེ ནཱནུསཡཱཏི ཝུཏྟཾ, སོཡེཝཏྠོ. པརིཡུཊྛཱནཔྤཏྟཱནམེཝེཏྠ ཨབྷཱཝོ ཝེདིཏབྦོ. ན ཧི ཝིཉྙཱཎཙརིཡཱ པཧཱིནཱནུསཡཱནཾཡེཝ ཝུཏྟཱ. ཡཱ ཙ ནཱིརཱགཱདིནཱམཱ, སཱ རཱགཱདཱིཧི ཝིཔྤཡུཏྟཱཝ ནཱམ ཧོཏཱིཏི པརིཡཱཡནྟརདསྶནཏྠཾ རཱགཝིཔྤཡུཏྟཱཏིཨཱདིམཱཧ. པུན ཨཉྙེཧི ཙ ཝིཔྤཡུཏྟཏཾ དསྶེཏུཾ ཀུསལེཧི ཀམྨེཧཱིཏིཨཱདིམཱཧ. ཀུསལཱནིཡེཝ རཱགཱདིཝཛྫཱབྷཱཝཱ ཨནཝཛྫཱནི. པརིསུདྡྷབྷཱཝཀརེཧི ཧིརིཨོཏྟཔྤེཧི ཡུཏྟཏྟཱ སུཀྐཱནི. པཝཏྟིསུཁཏྟཱ སུཁོ ཨུདཡོ ཨུཔྤཏྟི ཨེཏེསནྟི སུཁུདྲཡཱནི, སུཁཝིཔཱཀཏྟཱ ཝཱ སུཁོ ཨུདཡོ ཝཌྜྷི ཨེཏེསནྟི སུཁུདྲཡཱནི. ཝུཏྟཝིཔཀྑེན ཨཀུསལཱནི ཡོཛེཏབྦཱནི. ཝིཉྙཱཏེ ཙརཏཱིཏི ཝིཉྙཱཎེན ཝིཉྙཱཡམཱནཾ ཨཱརམྨཎཾ ཝིཉྙཱཏཾ ནཱམ, ཏསྨིཾ ཝིཉྙཱཏེ ཨཱརམྨཎེ. ཀིཾ ཝུཏྟཾ ཧོཏི? ནཱིལཝཎྞཡོགཏོ ནཱིལཝཏྠཾ ཝིཡ ཝིཉྙཱཎཡོགཏོ ཝིཉྙཱཏཾ ཝིཉྙཱཎཾ ནཱམ ཧོཏི, ཏསྨིཾ ཝིཉྙཱཎེ ཙརཏཱིཏི ཝིཉྙཱཎཙརིཡཱཏི ཝུཏྟཾ ཧོཏི. ཝིཉྙཱཎསྶ ¶ ཨེཝརཱུཔཱ ཙརིཡཱ ཧོཏཱིཏི ཝུཏྟཔྤཀཱརསྶ ཝིཉྙཱཎསྶ ཝུཏྟཔྤཀཱརཱ ཙརིཡཱ ཧོཏཱིཏི ཨཏྠོ. ‘‘ཝིཉྙཱཎསྶ ཙརིཡཱ’’ཏི ཙ ཝོཧཱརཝསེན ཝུཙྩཏི, ཝིཉྙཱཎཏོ པན ཝིསུཾ ཙརིཡཱ ནཏྠི. པཀཏིཔརིསུདྡྷམིདཾ ཙིཏྟཾ ནིཀྐིལེསཊྛེནཱཏི ཨིདཾ ཝུཏྟཔྤཀཱརཾ ཙིཏྟཾ རཱགཱདིཀིལེསཱབྷཱཝེན ¶ པཀཏིཡཱ ཨེཝ པརིསུདྡྷཾ. ཏསྨཱ ཝིཛཱནནམཏྟམེཝ ཙརིཡཱཏི ཝིཉྙཱཎཙརིཡཱཏི ཝུཏྟཾ ཧོཏི. ནིཀླེསཊྛེནཱཏིཔི པཱཋོ.

ཨཉྙཱཎཙརིཡཱཡ མནཱཔིཡེསཱུཏི མནསི ཨཔྤེནྟི པསཱིདནྟི, མནཾ ཝཱ ཨཔྤཱཡནྟི ཝཌྜྷེནྟཱིཏི མནཱཔཱནི, མནཱཔཱནིཡེཝ མནཱཔིཡཱནི. ཏེསུ མནཱཔིཡེསུ. ཏཱནི པན ཨིཊྛཱནི ཝཱ ཧོནྟུ ཨནིཊྛཱནི ཝཱ, གཧཎཝསེན མནཱཔིཡཱནི. ན ཧི ཨིཊྛསྨིཾཡེཝ རཱགོ ཨནིཊྛསྨིཾཡེཝ དོསོ ཨུཔྤཛྫཏི. རཱགསྶ ཛཝནཏྠཱཡཱཏི སནྟཏིཝསེན རཱགསྶ ཛཝནཏྠཱཡ པཝཏྟཱ. ཨཱཝཛྫནཀིརིཡཱབྱཱཀཏཱཏི ཙཀྑུདྭཱརེ ཨཡོནིསོ མནསིཀཱརབྷཱུཏཱ ཨཱཝཛྫནཀིརིཡཱབྱཱཀཏཱ མནོདྷཱཏུ. རཱགསྶ ཛཝནཱཏི ཡེབྷུཡྻེན སཏྟཀྑཏྟུཾ ¶ རཱགསྶ པཝཏྟི, པུནཔྤུནཾ པཝཏྟོ རཱགོཡེཝ. ཨཉྙཱཎཙརིཡཱཏི ཨཉྙཱཎེན རཱགསྶ སམྦྷཝཏོ ཨཉྙཱཎེན རཱགསྶ ཙརིཡཱཏི ཝུཏྟཾ ཧོཏི. སེསེསུཔི ཨེསེཝ ནཡོ. ཏདུབྷཡེན ཨསམཔེཀྑནསྨིཾ ཝཏྠུསྨིནྟི རཱགདོསཝསེན སམཔེཀྑནཝིརཧིཏེ རཱུཔཱརམྨཎསངྑཱཏེ ཝཏྠུསྨིཾ. མོཧསྶ ཛཝནཏྠཱཡཱཏི ཝིཙིཀིཙྪཱཨུདྡྷཙྩཝསེན མོཧསྶ ཛཝནཏྠཱཡ. ཨཉྙཱཎཙརིཡཱཏི ཨཉྙཱཎསྶེཝ ཙརིཡཱ, ན ཨཉྙསྶ. ཝིནིབནྡྷསྶཱཏིཨཱདཱིནི མཱནཱདཱིནཾ སབྷཱཝཝཙནཱནི. ཏཏྠ ཝིནིབནྡྷསྶཱཏི ཨུནྣཏིཝསེན ཝིནིབནྡྷིཏྭཱ ཋིཏསྶ. པརཱམཊྛཱཡཱཏི རཱུཔསྶ ཨནིཙྩབྷཱཝཱདིཾ ཨཏིཀྐམིཏྭཱ པརཏོ ནིཙྩབྷཱཝཱདིཾ ཨཱམཊྛཱཡ གཧིཏཱཡ. ཝིཀྑེཔགཏསྶཱཏི རཱུཔཱརམྨཎེ ཝིཀྑིཏྟབྷཱཝཾ གཏསྶ. ཨནིཊྛངྒཏཱཡཱཏི ཨསནྣིཊྛཱནབྷཱཝཾ གཏཱཡ. ཐཱམགཏསྶཱཏི བལཔྤཏྟསྶ. དྷམྨེསཱུཏི རཱུཔཱདཱིསུ ཝཱ དྷམྨཱརམྨཎབྷཱུཏེསུ ཝཱ དྷམྨེསུ.

༧༠. ཡསྨཱ རཱགཱདཡོ ཨཉྙཱཎེན ཧོནྟི, ཏསྨཱ རཱགཱདིསམྤཡོགེན ཨཉྙཱཎཾ ཝིསེསེནྟོ སརཱགཱ ཙརཏཱིཏིཨཱདིམཱཧ. ཏཏྠ སརཱགཱ ཙརཏཱིཏི མོཧམཱནདིཊྛིམཱནཱནུསཡདིཊྛཱནུསཡཨཝིཛྫཱནུསཡཛཝནཝསེན ཙརིཡཱ ཝེདིཏབྦཱ. སདོསཱ ཙརཏཱིཏི མོཧཨཝིཛྫཱནུསཡཛཝནཝསེན. སམོཧཱ ཙརཏཱིཏི རཱགདོསམཱནདིཊྛིཨུདྡྷཙྩཝིཙིཀིཙྪཱནུསཡཛཝནཝསེན. སམཱནཱ ཙརཏཱིཏི རཱགམོཧཀཱམརཱགབྷཝརཱགཱཝིཛྫཱནུསཡཛཝནཝསེན. སདིཊྛི ཙརཏཱིཏི རཱགམོཧཀཱམརཱགཱཝིཛྫཱནུསཡཛཝནཝསེན. སཨུདྡྷཙྩཱ ཙརཏི སཝིཙིཀིཙྪཱ ཙརཏཱིཏི ¶ མོཧཨཝིཛྫཱནུསཡཛཝནཝསེན. སཱནུསཡཱ ཙརཏཱིཏི ཨེཏྠཱཔི ཝུཏྟནཡེནེཝ ཨེཀེཀཾ ཨནུསཡཾ མཱུལཾ ཀཏྭཱ ཏསྨིཾ ཙིཏྟེ ལབྦྷམཱནཀསེསཱནུསཡཝསེན སཱནུསཡཏཱ ཡོཛེཏབྦཱ. རཱགསམྤཡུཏྟཱཏིཨཱདི སརཱགཱདིཝེཝཙནམེཝ. སཱ ཨེཝ ¶ ཧི ཙརིཡཱ སམྤཡོགཝསེན སཧ རཱགཱདཱིཧི ཝཏྟཏཱིཏི སརཱགཱདིཨཱདཱིནི ནཱམཱནི ལབྷཏི. རཱགཱདཱིཧི སམཾ ཨེཀུཔྤཱདེཀནིརོདྷེཀཝཏྠེཀཱརམྨཎཱདཱིཧི པཀཱརེཧི ཡུཏྟཱཏི རཱགསམྤཡུཏྟཱནཱིཏིཨཱདཱིནི ནཱམཱནི ལབྷཏི. སཱཡེཝ ཙ ཡསྨཱ ཀུསལཱདཱིཧི ཀམྨེཧི ཝིཔྤཡུཏྟཱ, ཨཀུསལཱདཱིཧི ཀམྨེཧི སམྤཡུཏྟཱ, ཏསྨཱཔི ཨཉྙཱཎཙརིཡཱཏི དསྶེཏུཾ ཀུསལེཧི ཀམྨེཧཱིཏིཨཱདིམཱཧ. ཏཏྠ ཨཉྙཱཏེཏི མོཧསྶ ཨཉྙཱཎལཀྑཎཏྟཱ ཡཐཱསབྷཱཝེན ཨཉྙཱཏེ ཨཱརམྨཎེ. སེསཾ ཝུཏྟཏྠམེཝ.

༧༡. ཉཱཎཙརིཡཱཡཾ ¶ ཡསྨཱ ཝིཝཊྚནཱནུཔསྶནཱདཱིནཾ ཨནནྟརཔཙྩཡབྷཱུཏཱ ཨཱཝཛྫནཀིརིཡཱབྱཱཀཏཱ ནཏྠི, ཏསྨཱ ཏེསཾ ཨཏྠཱཡ ཨཱཝཛྫནཀིརིཡཱབྱཱཀཏཾ ཨཝཏྭཱ ཝིཝཊྚནཱནུཔསྶནཱདཡོཝ ཝུཏྟཱ. ཨནུལོམཉཱཎཏྠཱཡ ཨེཝ ཧི ཨཱཝཛྫནཱ ཧོཏི, ཏཏོ ཝིཝཊྚནཱནུཔསྶནཱམགྒཕལཱནི. ཕལསམཱཔཏྟཱིཏི ཙེཏྠ མགྒཱནནྟརཛཱ ཝཱ ཧོཏུ ཀཱལནྟརཛཱ ཝཱ, ཨུབྷོཔི ཨདྷིཔྤེཏཱ. ནཱིརཱགཱ ཙརཏཱིཏིཨཱདཱིསུ རཱགཱདཱིནཾ པཊིཔཀྑཝསེན ནཱིརཱགཱདིཏཱ ཝེདིཏབྦཱ, ཝིཉྙཱཎཙརིཡཱཡཾ རཱགཱདཱིནཾ ཨབྷཱཝམཏྟཊྛེན. ཉཱཏེཏི ཡཐཱསབྷཱཝཏོ ཉཱཏེ. ཨཉྙཱ ཝིཉྙཱཎཙརིཡཱཏིཨཱདཱིཧི ཏིསྶནྣཾ ཙརིཡཱནཾ ཨཉྙམཉྙམསམྨིསྶཏཾ དསྶེཏི. ཝིཉྙཱཎཀིཙྩམཏྟཝསེན ཧི ཨཧེཏུཀཙིཏྟུཔྤཱདཱ ཝིཉྙཱཎཙརིཡཱ, ཨཉྙཱཎཀིཙྩཝཏཾ དྭཱདསནྣཾ ཨཀུསལཙིཏྟུཔྤཱདཱནཾ ཝསེནེཝ ཨཉྙཱཎཙརིཡཱ, ཝིསེསེན ཉཱཎཀིཙྩཀཱརཱིནཾ ཝིཔསྶནཱམགྒཕལཱནཾ ཝསེན ཉཱཎཙརིཡཱ. ཨེཝམིམཱ ཨཉྙམཉྙམསམྨིསྶཱ ཙ, ཝིཔསྶནཾ ཋཔེཏྭཱ སཧེཏུཀཀཱམཱཝཙརཀིརིཡཱཀུསལཱ ཙ, སཧེཏུཀཀཱམཱཝཙརཝིཔཱཀཱ ཙ, རཱུཔཱཝཙརཱརཱུཔཱཝཙརཀུསལཱབྱཱཀཏཱ ཙ ཏཱིཧི ཙརིཡཱཧི ཝིནིམུཏྟཱཏི ཝེདིཏབྦཱ. ནིབྦཱནཱརམྨཎཱཡ ཝིཝཊྚནཱནུཔསྶནཱཡ ཉཱཎཙརིཡཱཡ ནིདྡིཊྛཏྟཱ ནིབྦཱནམགྒཕལཔཙྩཝེཀྑཎབྷཱུཏཱནི སེཀྑཱསེཀྑཱནཾ པཙྩཝེཀྑཎཉཱཎཱནི ཉཱཎཙརིཡཱཡ སངྒཧིཏཱནཱིཏི ཝེདིཏབྦཱནི. ཏཱནིཔི ཧི ཝིསེསེན ཉཱཎཀིཙྩཀརཱནེཝཱཏི.

ཙརིཡཱནཱནཏྟཉཱཎནིདྡེསཝཎྞནཱ ནིཊྛིཏཱ.

༡༨. བྷཱུམིནཱནཏྟཉཱཎནིདྡེསཝཎྞནཱ

༧༢. བྷཱུམིནཱནཏྟཉཱཎནིདྡེསེ ¶ བྷཱུམིཡོཏི བྷཱགཱ པརིཙྪེདཱ ཝཱ. ཀཱམཱཝཙརཱཏི ཨེཏྠ དུཝིདྷོ ཀཱམོ ཀིལེསཀཱམོ ཝཏྠུཀཱམོ ཙ. ཀིལེསཀཱམོ ཚནྡརཱགོ, ཝཏྠུཀཱམོ ཏེབྷཱུམཀཝཊྚཾ. ཀིལེསཀཱམོ ཀཱམེཏཱིཏི ཀཱམོ, ཝཏྠུཀཱམོ ཀཱམཱིཡཏཱིཏི ཀཱམོ. སོ དུཝིདྷོ ཀཱམོ པཝཏྟིཝསེན ¶ ཡསྨིཾ པདེསེ ཨཝཙརཏི, སོ པདེསོ ཀཱམོ ཨེཏྠ ཨཝཙརཏཱིཏི ཀཱམཱཝཙརོ. སོ པན པདེསོ ཙཏུནྣཾ ཨཔཱཡཱནཾ, མནུསྶལོཀསྶ, ཚནྣཉྩ དེཝལོཀཱནཾ ཝསེན ཨེཀཱདསཝིདྷོ ¶ . ཡཐཱ ཧི ཡསྨིཾ པདེསེ སསཏྠཱ པུརིསཱ ཨཝཙརནྟི, སོ ཝིཛྫམཱནེསུཔི ཨཉྙེསུ དྭིཔདཙཏུཔྤདེསུ ཨཝཙརནྟེསུ ཏེསཾ ཨབྷིལཀྑིཏཏྟཱ ‘‘སསཏྠཱཝཙརོ’’ཏི ཝུཙྩཏི, ཨེཝཾ ཝིཛྫམཱནེསུཔི ཨཉྙེསུ རཱུཔཱཝཙརཱདཱིསུ ཏཏྠ ཨཝཙརནྟེསུ ཏེསཾ ཨབྷིལཀྑིཏཏྟཱ ཨཡཾ པདེསོ ‘‘ཀཱམཱཝཙརོ’’ཏྭེཝ ཝུཙྩཏི. སྭཱཡཾ ཡཐཱ རཱུཔབྷཝོ རཱུཔཾ, ཨེཝཾ ཨུཏྟརཔདལོཔཾ ཀཏྭཱ ‘‘ཀཱམོ’’ཏྭེཝ ཝུཙྩཏི. ཏཔྤཊིབདྡྷོ ཨེཀེཀོ དྷམྨོ ཨིམསྨིཾ ཨེཀཱདསཝིདྷཔདེསསངྑཱཏེ ཀཱམེ ཨཝཙརཏཱིཏི ཀཱམཱཝཙརོ. ཀིཉྩཱཔི ཧི ཨེཏྠ ཀེཙི དྷམྨཱ རཱུཔཱརཱུཔབྷཝེསུཔི ཨཝཙརནྟི, ཡཐཱ པན སངྒཱམེ ཨཝཙརཎཏོ ‘‘སངྒཱམཱཝཙརོ’’ཏི ལདྡྷནཱམོ ནཱགོ ནགརེ ཙརནྟོཔི ‘‘སངྒཱམཱཝཙརོ’’ཏྭེཝ ཝུཙྩཏི, ཐལཛལཙརཱ ཙ པཱཎིནོ ཨཐལེ ཨཛལེ ཙ ཋིཏཱཔི ‘‘ཐལཙརཱ ཛལཙརཱ’’ཏྭེཝ ཝུཙྩནྟི, ཨེཝཾ ཏེ ཨཉྙཏྠ ཨཝཙརནྟཱཔི ཀཱམཱཝཙརཱཡེཝཱཏི ཝེདིཏབྦཱ. ཨཱརམྨཎཀརཎཝསེན ཝཱ ཨེཏེསུ ཝུཏྟཔྤཀཱརེསུ དྷམྨེསུ ཀཱམོ ཨཝཙརཏཱིཏི ཀཱམཱཝཙརཱ. ཀཱམཉྩེས རཱུཔཱརཱུཔཱཝཙརདྷམྨེསུཔི ཨཝཙརཏི, ཡཐཱ པན ‘‘ཝདཏཱིཏི ཝཙྪོ, མཧིཡཾ སེཏཱིཏི མཧིཾསོ’’ཏི ཝུཏྟེ ན ཡཏྟཀཱ ཝདནྟི, མཧིཡཾ ཝཱ སེནྟི, སབྦེསཾ ཏཾ ནཱམཾ ཧོཏི. ཨེཝཾསམྤདམིདཾ ཝེདིཏབྦཾ. ཨེཏྠ སབྦེ ཏེ དྷམྨེ ཨེཀརཱསིཾ ཀཏྭཱ ཝུཏྟབྷཱུམིསདྡམཔེཀྑིཏྭཱ ཀཱམཱཝཙརཱཏི ཨིཏྠིལིངྒཝཙནཾ ཀཏཾ. རཱུཔཱཝཙརཱཏིཨཱདཱིསུ རཱུཔབྷཝོ རཱུཔཾ, ཏསྨིཾ རཱུཔེ ཨཝཙརནྟཱིཏི རཱུཔཱཝཙརཱ. ཨརཱུཔབྷཝོ ཨརཱུཔཾ, ཏསྨིཾ ཨརཱུཔེ ¶ ཨཝཙརནྟཱིཏི ཨརཱུཔཱཝཙརཱ. ཏེབྷཱུམཀཝཊྚེ པརིཡཱཔནྣཱ ཨནྟོགདྷཱཏི པརིཡཱཔནྣཱ, ཏསྨིཾ ན པརིཡཱཔནྣཱཏི ཨཔརིཡཱཔནྣཱ.

ཀཱམཱཝཙརཱདིབྷཱུམིནིདྡེསེསུ ཧེཊྛཏོཏི ཧེཊྛཱབྷཱགེན. ཨཝཱིཙིནིརཡནྟི ཛཱལཱནཾ ཝཱ སཏྟཱནཾ ཝཱ ཝེདནཱནཾ ཝཱ ཝཱིཙི ཨནྟརཾ ཚིདྡཾ ཨེཏྠ ནཏྠཱིཏི ཨཝཱིཙི. སུཁསངྑཱཏོ ཨཡོ ཨེཏྠ ནཏྠཱིཏི ནིརཡོ, ནིརཏིཨཏྠེནཔི ནིརཡོ. པརིཡནྟཾ ཀརིཏྭཱཏི ཏཾ ཨཝཱིཙིསངྑཱཏཾ ནིརཡཾ ཨནྟཾ ཀཏྭཱ. ཨུཔརིཏོཏི ཨུཔརིབྷཱགེན. པརནིམྨིཏཝསཝཏྟཱི དེཝེཏི པརནིམྨིཏེསུ ཀཱམེསུ ཝསཾ ཝཏྟནཏོ ཨེཝཾལདྡྷཝོཧཱརེ དེཝེ. ཨནྟོ ཀརིཏྭཱཏི ཨནྟོ པཀྑིཔིཏྭཱ. ཡཾ ཨེཏསྨིཾ ཨནྟརེཏི ཡེ ཨེཏསྨིཾ ཨོཀཱསེ. ཡནྟི ཙ ལིངྒཝཙནཝིཔལླཱསོ ཀཏོ. ཨེཏྠཱཝཙརཱཏི ཨིམིནཱ ཡསྨཱ ཏསྨིཾ ཨནྟརེ ཨཉྙེཔི ཙརནྟི ཀདཱཙི ཀཏྠཙི སམྦྷཝཏོ, ཏསྨཱ ཏེསཾ ཨསངྒཎྷནཏྠཾ ཨཝཙརཱཏི ཝུཏྟཾ. ཏེན ཡེ ཨེཀསྨིཾ ཨནྟརེ ཨོགཱལ༹ྷཱ ཧུཏྭཱ ཙརནྟི, སབྦཏྠ སདཱ ¶ ཙ སམྦྷཝཏོ, ཨདྷོབྷཱགེ ཙ ཙརནྟི ཨཝཱིཙིནིརཡསྶ ཧེཊྛཱ བྷཱུཏཱུཔཱདཱཡ པཝཏྟིབྷཱཝེན, ཏེསཾ སངྒཧོ ཀཏོ ཧོཏི. ཏེ ཧི ཨོགཱལ༹ྷཱ ཙརནྟི, ཨདྷོབྷཱགེ ཙ ཙརནྟཱིཏི ཨཝཙརཱ. ཨེཏྠ པརིཡཱཔནྣཱཏི ཨིམིནཱ པན ཡསྨཱ ¶ ཨེཏེ ཨེཏྠཱཝཙརཱ ཨཉྙཏྠཱཔི ཨཝཙརནྟི, ན པན ཏཏྠ པརིཡཱཔནྣཱ ཧོནྟི, ཏསྨཱ ཏེསཾ ཨཉྙཏྠཱཔི ཨཝཙརནྟཱནཾ པརིགྒཧོ ཀཏོ ཧོཏི.

ཨིདཱནི ཏེ ཨེཏྠ པརིཡཱཔནྣེ དྷམྨེ རཱསིསུཉྙཏཱཔཙྩཡབྷཱཝཏོ ཙེཝ སབྷཱཝཏོ ཙ དསྶེནྟོ ཁནྡྷདྷཱཏུཨཱཡཏནཱཏིཨཱདིམཱཧ. བྲཧྨལོཀནྟི པཋམཛ྄ཛྷཱནབྷཱུམིསངྑཱཏཾ བྲཧྨཊྛཱནཾ. ཨཀནིཊྛེཏི ཨུཏྟམཊྛེན ན ཀནིཊྛེ. སམཱཔནྣསྶཱཏི སམཱཔཏྟིཾ སམཱཔནྣསྶ. ཨེཏེན ཀུསལཛ྄ཛྷཱནཾ ཝུཏྟཾ. ཨུཔཔནྣསྶཱཏི ཝིཔཱཀཝསེན བྲཧྨལོཀེ ཨུཔཔནྣསྶ. ཨེཏེན ཝིཔཱཀཛ྄ཛྷཱནཾ ཝུཏྟཾ. དིཊྛདྷམྨསུཁཝིཧཱརིསྶཱཏི དིཊྛེཝ དྷམྨེ པཙྩཀྑེ ཨཏྟབྷཱཝེ སུཁོ ཝིཧཱརོ དིཊྛདྷམྨསུཁཝིཧཱརོ, སོ ཨསྶ ཨཏྠཱིཏི དིཊྛདྷམྨསུཁཝིཧཱརཱི, ཨརཧཱ. ཏསྶ དིཊྛདྷམྨསུཁཝིཧཱརིསྶ. ཨེཏེན ཀིརིཡཛ྄ཛྷཱནཾ ཝུཏྟཾ. ཙེཏསིཀཱཏི ཙེཏསི བྷཝཱ ཙེཏསིཀཱ, ཙིཏྟསམྤཡུཏྟཱཏི ཨཏྠོ. ཨཱཀཱསཱནཉྩཱཡཏནཱུཔགེཏི ཨཱཀཱསཱནཉྩཱཡཏནསངྑཱཏཾ བྷཝཾ ཨུཔགཏེ. དུཏིཡཔདེཔི ཨེསེཝ ནཡོ. མགྒཱཏི ¶ ཙཏྟཱརོ ཨརིཡམགྒཱ. མགྒཕལཱནཱིཏི ཙཏྟཱརི ཨརིཡམགྒཕལཱནི. ཨསངྑཏཱ ཙ དྷཱཏཱུཏི པཙྩཡེཧི ཨཀཏཱ ནིབྦཱནདྷཱཏུ.

ཨཔརཱཔི ཙཏསྶོ བྷཱུམིཡོཏི ཨེཀེཀཙཏུཀྐཝསེན ཝེདིཏབྦཱ. ཙཏྟཱརོ སཏིཔཊྛཱནཱཏི ཀཱཡཱནུཔསྶནཱསཏིཔཊྛཱནཾ ཝེདནཱནུཔསྶནཱསཏིཔཊྛཱནཾ ཙིཏྟཱནུཔསྶནཱསཏིཔཊྛཱནཾ དྷམྨཱནུཔསྶནཱསཏིཔཊྛཱནཾ. ཏསྶཏྠོ – པཏིཊྛཱཏཱིཏི པཊྛཱནཾ, ཨུཔཊྛཱཏི ཨོཀྐནྡིཏྭཱ པཀྑནྡིཏྭཱ པཝཏྟཏཱིཏི ཨཏྠོ. སཏིཡེཝ པཊྛཱནཾ སཏིཔཊྛཱནཾ. ཨཐ ཝཱ སརཎཊྛེན སཏི, ཨུཔཊྛཱནཊྛེན པཊྛཱནཾ, སཏི ཙ སཱ པཊྛཱནཉྩཱཏིཔི སཏིཔཊྛཱནཾ. ཨཱརམྨཎཝསེན བཧུཀཱ ཏཱ སཏིཡོཏི སཏིཔཊྛཱནཱ. ཙཏྟཱརོ སམྨཔྤདྷཱནཱཏི ཨནུཔྤནྣཱནཾ ཨཀུསལཱནཾ ཨནུཔྤཱདཱཡ སམྨཔྤདྷཱནཾ, ཨུཔྤནྣཱནཾ ཨཀུསལཱནཾ པཧཱནཱཡ སམྨཔྤདྷཱནཾ, ཨནུཔྤནྣཱནཾ ཀུསལཱནཾ ཨུཔྤཱདཱཡ སམྨཔྤདྷཱནཾ, ཨུཔྤནྣཱནཾ ཀུསལཱནཾ ཋིཏིཡཱ སམྨཔྤདྷཱནཾ. པདཧནྟི ཝཱཡམནྟི ཨེཏེནཱཏི པདྷཱནཾ, ཝཱིརིཡསྶེཏཾ ནཱམཾ ¶ . སམྨཔྤདྷཱནནྟི ཨཝིཔརཱིཏཔྤདྷཱནཾ ཀཱརཎཔྤདྷཱནཾ ཨུཔཱཡཔྤདྷཱནཾ ཡོནིསོཔདྷཱནཾ. ཨེཀམེཝ ཝཱིརིཡཾ ཀིཙྩཝསེན ཙཏུདྷཱ ཀཏྭཱ སམྨཔྤདྷཱནཱཏི ཝུཏྟཾ. ཙཏྟཱརོ ཨིདྡྷིཔཱདཱཏི ཚནྡིདྡྷིཔཱདོ, ཙིཏྟིདྡྷིཔཱདོ, ཝཱིརིཡིདྡྷིཔཱདོ, ཝཱིམཾསིདྡྷིཔཱདོ. ཏསྶཏྠོ ཝུཏྟོཡེཝ. ཙཏྟཱརི ཛྷཱནཱནཱིཏི ཝིཏཀྐཝིཙཱརཔཱིཏིསུཁཙིཏྟེཀགྒཏཱཝསེན པཉྩངྒིཀཾ པཋམཛ྄ཛྷཱནཾ. པཱིཏིསུཁཙིཏྟེཀགྒཏཱཝསེན ཏིཝངྒིཀཾ དུཏིཡཛ྄ཛྷཱནཾ, སུཁཙིཏྟཀགྒཏཱཝསེན དུཝངྒིཀཾ ཏཏིཡཛ྄ཛྷཱནཾ, ཨུཔེཀྑཱཙིཏྟེཀགྒཏཱཝསེན དུཝངྒིཀཾ ཙཏུཏྠཛ྄ཛྷཱནཾ. ཨིམཱནི ཧི ཨངྒཱནི ཨཱརམྨཎཱུཔནིཛ྄ཛྷཱནཊྛེན ཛྷཱནནྟི ཝུཙྩནྟི. ཙཏསྶོ ཨཔྤམཉྙཱཡོཏི མེཏྟཱ, ཀརུཎཱ, མུདིཏཱ, ཨུཔེཀྑཱ. ཕརཎཨཔྤམཱཎཝསེན ཨཔྤམཉྙཱཡོ. ཨེཏཱཡོ ཧི ཨཱརམྨཎཝསེན ཨཔྤམཱཎེ ཝཱ སཏྟེ ཕརནྟི, ཨེཀཾ སཏྟམྤི ཝཱ ཨནཝསེསཕརཎཝསེན ¶ ཕརནྟཱིཏི ཕརཎཨཔྤམཱཎཝསེན ཨཔྤམཉྙཱཡོཏི ཝུཙྩནྟི. ཙཏསྶོ ཨརཱུཔསམཱཔཏྟིཡོཏི ཨཱཀཱསཱནཉྩཱཡཏནསམཱཔཏྟི, ཝིཉྙཱཎཉྩཱཡཏནསམཱཔཏྟི, ཨཱཀིཉྩཉྙཱཡཏནསམཱཔཏྟི, ནེཝསཉྙཱནཱསཉྙཱཡཏནསམཱཔཏྟི. ཙཏསྶོ པཊིསམྦྷིདཱ ཝུཏྟཏྠཱ ཨེཝ.

ཙཏསྶོ ¶ པཊིཔདཱཏི ‘‘དུཀྑཱ པཊིཔདཱ དནྡྷཱབྷིཉྙཱ, དུཀྑཱ པཊིཔདཱ ཁིཔྤཱབྷིཉྙཱ, སུཁཱ པཊིཔདཱ དནྡྷཱབྷིཉྙཱ, སུཁཱ པཊིཔདཱ ཁིཔྤཱབྷིཉྙཱ’’ཏི (དཱི. ནི. ༣.༣༡༡) ཝུཏྟཱ ཙཏསྶོ པཊིཔདཱ. ཙཏྟཱརི ཨཱརམྨཎཱནཱིཏི པརིཏྟཾ པརིཏྟཱརམྨཎཾ, པརིཏྟཾ ཨཔྤམཱཎཱརམྨཎཾ, ཨཔྤམཱཎཾ པརིཏྟཱརམྨཎཾ, ཨཔྤམཱཎཾ ཨཔྤམཱཎཱརམྨཎནྟི (དྷ. ས. ༡༨༡ ཨཱདཡོ) ཝུཏྟཱནི ཙཏྟཱརི ཨཱརམྨཎཱནི. ཀསིཎཱདིཨཱརམྨཎཱནཾ ཨཝཝཏྠཱཔེཏབྦཏོ ཨཱརམྨཎཝནྟཱནི ཛྷཱནཱནི ཝུཏྟཱནཱིཏི ཝེདིཏབྦཱནི. ཙཏྟཱརོ ཨརིཡཝཾསཱཏི ཨརིཡཱ ཝུཙྩནྟི བུདྡྷཱ ཙ པཙྩེཀབུདྡྷཱ ཙ ཏཐཱགཏསཱཝཀཱ ཙ, ཏེསཾ ཨརིཡཱནཾ ཝཾསཱ ཏནྟིཡོ པཝེཎིཡོཏི ཨརིཡཝཾསཱ. ཀེ པན ཏེ? ཙཱིཝརསནྟོསོ པིཎྜཔཱཏསནྟོསོ སེནཱསནསནྟོསོ བྷཱཝནཱརཱམཏཱཏི ཨིམེ ཙཏྟཱརོ. གིལཱནཔཙྩཡསནྟོསོ པིཎྜཔཱཏསནྟོསེ ཝུཏྟེ ཝུཏྟོཡེཝ ཧོཏི. ཡོ ཧི པིཎྜཔཱཏེ སནྟུཊྛོ, སོ ཀཐཾ གིལཱནཔཙྩཡེ ཨསནྟུཊྛོ བྷཝིསྶཏི.

ཙཏྟཱརི སངྒཧཝཏྠཱུནཱིཏི ཙཏྟཱརི ཛནསངྒཎྷནཀཱརཎཱནི – དཱནཉྩ པེཡྻཝཛྫཉྩ ཨཏྠཙརིཡཱ ཙ སམཱནཏྟཏཱ ཙཱཏི ཨིམཱནི ཙཏྟཱརི. དཱནནྟི ཡཐཱརཧཾ དཱནཾ. པེཡྻཝཛྫནྟི ཡཐཱརཧཾ པིཡཝཙནཾ. ཨཏྠཙརིཡཱཏི ཏཏྠ ཏཏྠ ཀཏྟབྦསྶ ཀརཎཝསེན ཀཏྟབྦཱཀཏྟབྦཱནུསཱསནཝསེན ཙ ཝུདྡྷིཀིརིཡཱ. སམཱནཏྟཏཱཏི ¶ སཧ མཱནེན སམཱནོ, སཔརིམཱཎོ སཔརིགཎནོཏི ཨཏྠོ. སམཱནོ པརསྶ ཨཏྟཱ ཨེཏེནཱཏི སམཱནཏྟོ, སམཱནཏྟསྶ བྷཱཝོ སམཱནཏྟཏཱ, ‘‘ཨཡཾ མཡཱ ཧཱིནོ, ཨཡཾ མཡཱ སདིསོ, ཨཡཾ མཡཱ ཨདྷིཀོ’’ཏི པརིགཎེཏྭཱ ཏདནུརཱུཔེན ཨུཔཙརཎཾ ཀརཎནྟི ཨཏྠོ. ‘‘སམཱནསུཁདུཀྑཏཱ སམཱནཏྟཏཱ’’ཏི ཙ ཝདནྟི.

ཙཏྟཱརི ཙཀྐཱནཱིཏི ཨེཏྠ ཙཀྐཾ ནཱམ དཱརུཙཀྐཾ, རཏནཙཀྐཾ, དྷམྨཙཀྐཾ, ཨིརིཡཱཔཐཙཀྐཾ, སམྤཏྟིཙཀྐནྟི པཉྩཝིདྷཾ. ཏཏྠ ‘‘ཡཾ པན ཏཾ, དེཝ, ཙཀྐཾ ཚཧི མཱསེཧི ནིཊྛིཏཾ ཚཱརཏྟཱུནེཧཱི’’ཏི (ཨ. ནི. ༣.༡༥) ཨིདཾ དཱརུཙཀྐཾ. ‘‘ཙཀྐཾ ཝཏྟཡཏོ པརིགྒཧེཏྭཱ’’ཏི (ཛཱ. ༡.༡༣.༦༨) ཨིདཾ རཏནཙཀྐཾ. ‘‘མཡཱ པཝཏྟིཏཾ ཙཀྐ’’ནྟི (སུ. ནི. ༥༦༢) ཨིདཾ དྷམྨཙཀྐཾ. ‘‘ཙཏུཙཀྐཾ ནཝདྭཱར’’ནྟི (སཾ. ནི. ༡.༢༩) ཨིདཾ ཨིརིཡཱཔཐཙཀྐཾ. ‘‘ཙཏྟཱརིམཱནི ¶ , བྷིཀྑཝེ, ཙཀྐཱནི, ཡེཧི སམནྣཱགཏཱནཾ དེཝམནུསྶཱནཾ ཙཏུཙཀྐཾ ཝཏྟཏི. ཀཏམཱནི ཙཏྟཱརི? པཏིརཱུཔདེསཝཱསོ, སཔྤུརིསཱཝསྶཡོ, ཨཏྟསམྨཱཔཎིདྷི, པུབྦེ ཙ ཀཏཔུཉྙཏཱ’’ཏི ¶ (ཨ. ནི. ༤.༣༡) ཨིདཾ སམྤཏྟིཙཀྐཾ. ཨིདྷཱཔི ཨེཏདེཝ ཨདྷིཔྤེཏཾ. ཏཏྠ པཏིརཱུཔདེསཝཱསོཏི ཡཏྠ ཙཏསྶོ པརིསཱ སནྡིསྶནྟི, ཨེཝརཱུཔེ ཨནུཙྪཝིཀེ དེསེ ཝཱསོ. སཔྤུརིསཱཝསྶཡོཏི བུདྡྷཱདཱིནཾ སཔྤུརིསཱནཾ ཨཝསྶཡནཾ སེཝནཾ བྷཛནཾ. ཨཏྟསམྨཱཔཎིདྷཱིཏི ཨཏྟནོ སམྨཱ པཏིཊྛཱཔནཾ. སཙེ པུབྦེ ཨསྶདྡྷཱདཱིཧི སམནྣཱགཏོ ཧོཏི, ཏཱནི པཧཱཡ སདྡྷཱདཱིསུ པཏིཊྛཱཔནཾ. པུབྦེ ཙ ཀཏཔུཉྙཏཱཏི པུབྦེ ཨུཔཙིཏཀུསལཏཱ. ཨིདམེཝ ཙེཏྠ པམཱཎཾ. ཡེན ཧི ཉཱཎསམྤཡུཏྟཙིཏྟེན ཀུསལཀམྨཾ ཀཏཾ ཧོཏི, ཏདེཝ ཀུསལཾ ཏཾ པུརིསཾ པཏིརཱུཔདེསེ ཨུཔནེཏི, སཔྤུརིསེ བྷཛཱཔེཏི, སོ ཨེཝ པུགྒལོ ཨཏྟཱནཾ སམྨཱ ཋཔེཏཱིཏི.

ཙཏྟཱརི དྷམྨཔདཱནཱིཏི ཙཏྟཱརོ དྷམྨཀོཊྛཱསཱ. ཀཏམཱནི ཙཏྟཱརི? ཨནབྷིཛ྄ཛྷཱ དྷམྨཔདཾ, ཨབྱཱཔཱདོ དྷམྨཔདཾ, སམྨཱསཏི དྷམྨཔདཾ, སམྨཱསམཱདྷི དྷམྨཔདཾ. ཨནབྷིཛ྄ཛྷཱ དྷམྨཔདཾ ནཱམ ཨལོབྷོ ཝཱ ཨནབྷིཛ྄ཛྷཱཝསེན ཨདྷིགཏཛ྄ཛྷཱནཝིཔསྶནཱམགྒཕལནིབྦཱནཱནི ཝཱ. ཨབྱཱཔཱདོ དྷམྨཔདཾ ནཱམ ཨཀོཔོ ཝཱ མེཏྟཱསཱིསེན ཨདྷིགཏཛ྄ཛྷཱནཱདཱིནི ཝཱ. སམྨཱསཏི དྷམྨཔདཾ ནཱམ སཱུཔཊྛིཏསྶཏི ཝཱ སཏིསཱིསེན ཨདྷིགཏཛ྄ཛྷཱནཱདཱིནི ཝཱ. སམྨཱསམཱདྷི དྷམྨཔདཾ ནཱམ ཨཊྛསམཱཔཏྟི ཝཱ ཨཊྛསམཱཔཏྟིསཱིསེན ཨདྷིགཏཛ྄ཛྷཱནཱདཱིནི ཝཱ. དསཨསུབྷཝསེན ཝཱ ཨདྷིགཏཛ྄ཛྷཱནཱདཱིནི ཨནབྷིཛ྄ཛྷཱ དྷམྨཔདཾ, ཙཏུབྲཧྨཝིཧཱརཝསེན ཨདྷིགཏཱནི ¶ ཨབྱཱཔཱདོ དྷམྨཔདཾ, དསཱནུསྶཏིཨཱཧཱརེཔཊིཀཱུལསཉྙཱཝསེན ཨདྷིགཏཱནི སམྨཱསཏི དྷམྨཔདཾ, དསཀསིཎཨཱནཱཔཱནཝསེན ཨདྷིགཏཱནི སམྨཱསམཱདྷི དྷམྨཔདནྟི. ཨིམཱ ཙཏསྶོ བྷཱུམིཡོཏི ཨེཀེཀཾ ཙཏུཀྐཝསེནེཝ ཡོཛེཏབྦཾ.

བྷཱུམིནཱནཏྟཉཱཎནིདྡེསཝཎྞནཱ ནིཊྛིཏཱ.

༡༩. དྷམྨནཱནཏྟཉཱཎནིདྡེསཝཎྞནཱ

༧༣. དྷམྨནཱནཏྟཉཱཎནིདྡེསེ ¶ ཀམྨཔཐེཏི ཀམྨཱནི ཙ ཏཱནི པཐཱ ཙ ཨཔཱཡགམནཱཡཱཏི ཀམྨཔཐཱ, ཏེ ཀམྨཔཐེ. དས ཀུསལཀམྨཔཐཱ ནཱམ པཱཎཱཏིཔཱཏཱ ཨདིནྣཱདཱནཱ ཀཱམེསུམིཙྪཱཙཱརཱ ཝེརམཎཱིཏི ཏཱིཎི ཀཱཡསུཙརིཏཱནི, མུསཱཝཱདཱ པིསུཎཱཡ ཝཱཙཱཡ ཕརུསཱཡ ཝཱཙཱཡ སམྥཔྤལཱཔཱ ཝེརམཎཱིཏི ཙཏྟཱརི ཝཙཱིསུཙརིཏཱནི, ཨནབྷིཛ྄ཛྷཱ ཨབྱཱཔཱདོ སམྨཱདིཊྛཱིཏི ཏཱིཎི མནོསུཙརིཏཱནི. དས ཨཀུསལཀམྨཔཐཱ ནཱམ པཱཎཱཏིཔཱཏོ ཨདིནྣཱདཱནཾ ཀཱམེསུམིཙྪཱཙཱརོཏི ཏཱིཎི ཀཱཡདུཙྩརིཏཱནི, མུསཱཝཱདོ པིསུཎཱ ཝཱཙཱ ཕརུསཱ ཝཱཙཱ ¶ སམྥཔྤལཱཔོཏི ཙཏྟཱརི ཝཙཱིདུཙྩརིཏཱནི, ཨབྷིཛ྄ཛྷཱ བྱཱཔཱདོ མིཙྪཱདིཊྛཱིཏི ཏཱིཎི མནོདུཙྩརིཏཱནི. ཀུསལཱཀུསལཱཔི ཙ པཊིསནྡྷིཛནཀཱཡེཝ ཀམྨཔཐཱཏི ཝུཏྟཱ, ཝུཏྟཱཝསེསཱ པཊིསནྡྷིཛནནེ ཨནེཀནྟི ཀཏྟཱ ཀམྨཔཐཱཏི ན ཝུཏྟཱ. ཨོལཱ༹རིཀཀུསལཱཀུསལགཧཎེནེཝ སེསཀུསལཱཀུསལཱཔི གཧིཏཱཏི ཝེདིཏབྦཱ. རཱུཔནྟི བྷཱུཏོཔཱདཱཡབྷེདཏོ ཨཊྛཝཱིསཏིཝིདྷཾ རཱུཔཾ. ཝིཔཱཀནྟི ཀཱམཱཝཙརཀུསལཝིཔཱཀཱནཾ སོལ༹སནྣཾ, ཨཀུསལཝིཔཱཀཱནཾ སཏྟནྣཉྩ ཝསེན ཏེཝཱིསཏིཝིདྷཾ ཝིཔཱཀཾ. ཀིརིཡནྟི ཏིཎྞམཧེཏུཀཀིརིཡཱནཾ, ཨཊྛནྣཾ སཧེཏུཀཀིརིཡཱནཉྩ ཝསེན ཨེཀཱདསཝིདྷཾ ཀཱམཱཝཙརཀིརིཡཾ. ཝིཔཱཀཱབྷཱཝཏོ ཀིརིཡཱམཏྟཱཏི ཀིརིཡཱ. ཨེཏྟཱཝཏཱ ཀཱམཱཝཙརམེཝ རཱུཔཱབྱཱཀཏཝིཔཱཀཱབྱཱཀཏཀིརིཡཱབྱཱཀཏཝསེན ཝུཏྟཾ.

ཨིདྷཊྛསྶཱཏི ཨིམསྨིཾ ལོཀེ ཋིཏསྶ. ཡེབྷུཡྻེན མནུསྶལོཀེ ཛྷཱནབྷཱཝནཱསབྦྷཱཝཏོ མནུསྶལོཀཝསེན ཝུཏྟཾ, ཛྷཱནཱནི པན ཀདཱཙི ཀརཧཙི དེཝལོཀེཔི ལབྦྷནྟི, རཱུཔཱིབྲཧྨལོཀེཔི ཏཏྲཱུཔཔཏྟིཀཧེཊྛཱུཔཔཏྟིཀཨུཔརཱུཔཔཏྟིཀཱནཾ ཝསེན ལབྦྷནྟི. སུདྡྷཱཝཱསེ པན ཨརཱུཔཱཝཙརེ ཙ ཧེཊྛཱུཔཔཏྟིཀཱ ¶ ནཏྠི. རཱུཔཱརཱུཔཱཝཙརེསུ ཨབྷཱཝིཏཛ྄ཛྷཱནཱ ¶ ཧེཊྛཱ ནིབྦཏྟམཱནཱ ཀཱམཱཝཙརསུགཏིཡཾཡེཝ ནིབྦཏྟནྟི, ན དུགྒཏིཡཾ. ཏཏྲཱུཔཔནྣསྶཱཏི ཝིཔཱཀཝསེན བྲཧྨལོཀེ ཨུཔཔནྣསྶ པཊིསནྡྷིབྷཝངྒཙུཏིཝསེན ཝཏྟམཱནཱནི ཙཏྟཱརི ཝིཔཱཀཛ྄ཛྷཱནཱནི. རཱུཔཱརཱུཔཱཝཙརཛ྄ཛྷཱནསམཱཔཏྟཱིསུ ཀིརིཡཱབྱཱཀཏཱནི ན ཝུཏྟཱནི. ཀིཉྩཱཔི ན ཝུཏྟཱནི, ཨཐ ཁོ ཀུསལེཧི སམཱནཔཝཏྟིཏྟཱ ཀུསལེསུ ཝུཏྟེསུ ཝུཏྟཱནེཝ ཧོནྟཱིཏི ཝེདིཏབྦཱནི. ཡཐཱ པཊྛཱནེ ‘‘ཀུསལཱཀུསལེ ནིརུདྡྷེ ཝིཔཱཀོ ཏདཱརམྨཎཏཱ ཨུཔྤཛྫཏཱི’’ཏི (པཊྛཱ. ༡.༡.༤༠༦, ༤༠༩) ཀུསལཛཝནགྒཧཎེནེཝ ཀིརིཡཛཝནཾ སངྒཧིཏཾ, ཨེཝམིདྷཱཔི དཊྛབྦཾ. སཱམཉྙཕལཱནཱིཏི ཙཏྟཱརི སཱམཉྙཕལཱནི. ཨེཏེན ལོཀུཏྟརཝིཔཱཀཱབྱཱཀཏཾ ཝུཏྟཾ. ནིབྦཱནནྟི ནིབྦཱནཱབྱཱཀཏཾ.

པཱམོཛྫམཱུལཀཱཏི པཱམོཛྫཾ མཱུལཾ ཨཱདི ཨེཏེསནྟི པཱམོཛྫམཱུལཀཱ, པཱམོཛྫཱདིཀཱཏི ཨཏྠོ. པཱམོཛྫེན ཧི སམཱགཏཱནེཝ ཧོནྟི. ཨནིཙྩཏོ མནསིཀརོཏོ པཱམོཛྫཾ ཛཱཡཏཱིཏི ཨེཏྠ ཡོནིསོམནསིཀརོཏོཡེཝ པཱམོཛྫཾ ཛཱཡཏི, ན ཨཡོནིསོམནསིཀརོཏོ. ཨཡོནིསོམནསིཀརོཏོ ཀུསལུཔྤཏྟིཡེཝ ནཏྠི, པགེཝ ཝིཔསྶནཱ. ཀསྨཱ སརཱུཔེན ཝུཏྟནྟི ཙེ? པཱམོཛྫསྶ བལཝབྷཱཝདསྶནཏྠཾ. པཱམོཛྫེ ཧི ཨསཏི པནྟེསུ ཙ སེནཱསནེསུ ཨདྷིཀུསལེསུ ཙ དྷམྨེསུ ཨརཏི ཨུཀྐཎྛིཏཱ ཨུཔྤཛྫཏི. ཨེཝཾ སཏི བྷཱཝནཱཡེཝ ཨུཀྐམཏི. པཱམོཛྫེ པན སཏི ཨརཏིཨབྷཱཝཏོ བྷཱཝནཱཔཱརིཔཱུརིཾ གཙྪཏི. ཡོནིསོམནསིཀཱརསྶ པན མཱུལབྷཱཝེན བྷཱཝནཱཡ བཧཱུཔཀཱརཏྟཾ དསྶེཏུཾ ཨུཔརི ནཝཀཾ ཝཀྑཏི.

‘‘ཡཏོ ¶ ཡཏོ སམྨསཏི, ཁནྡྷཱནཾ ཨུདཡབྦཡཾ;

ལབྷཏཱི པཱིཏིཔཱམོཛྫཾ, ཨམཏཾ ཏཾ ཝིཛཱནཏ’’ནྟི. (དྷ. པ. ༣༧༤) –

ཝཙནཏོ ཝིཔསྶཀསྶ ཝིཔསྶནཱཔཙྩཡཱ པཱམོཛྫཾ ཨུཔྤཛྫཏི. ཨིདྷ པན ཀལཱཔསམྨསནཔཙྩཡཱ པཱམོཛྫཾ གཧེཏབྦཾ. པམུདིཏསྶ བྷཱཝོ པཱམོཛྫཾ, དུབྦལཱ པཱིཏི. ཨཱདིཀམྨཏྠེ པ-ཀཱརོ དཊྛབྦོ. པམུདིཏསྶཱཏི ཏེན པཱམོཛྫེན པམུདིཏསྶ ཏུཊྛསྶ. པམོདིཏསྶཱཏིཔི པཱཋོ. སོཡེཝཏྠོ. པཱིཏཱིཏི བལཝཔཱིཏི. པཱིཏིམནསྶཱཏི པཱིཏིཡུཏྟམནསྶ. ཡུཏྟསདྡསྶ ལོཔོ དཊྛབྦོ ཡཐཱ ཨསྶརཐོཏི ¶ . ཀཱཡོཏི ནཱམཀཱཡོ, རཱུཔཀཱཡེན སཧ ཝཱ. པསྶམྦྷཏཱིཏི ཝཱུཔསནྟདརཐོ ཧོཏི. པསྶདྡྷཀཱཡོཏི ¶ ཨུབྷཡཔསྶདྡྷིཡོགེན ནིབྦུཏཀཱཡོ. སུཁཾ ཝེདེཏཱིཏི ཙེཏསིཀཾ སུཁཾ ཝིནྡཏི, ཀཱཡིཀསུཁེན སཧ ཝཱ. སུཁིནོཏི སུཁསམངྒིསྶ. ཙིཏྟཾ སམཱདྷིཡཏཱིཏི ཙིཏྟཾ སམཾ ཨཱདྷིཡཏི, ཨེཀགྒཾ ཧོཏི. སམཱཧིཏེ ཙིཏྟེཏི བྷཱཝེནབྷཱཝལཀྑཎཏྠེ བྷུམྨཝཙནཾ. ཙིཏྟསམཱཧིཏབྷཱཝེན ཧི ཡཐཱབྷཱུཏཛཱནནཾ ལཀྑཱིཡཏི. ཡཐཱབྷཱུཏཾ པཛཱནཱཏཱིཏི ཨུདཡབྦཡཉཱཎཱདིཝསེན སངྑཱརཾ ཡཐཱསབྷཱཝཾ ཛཱནཱཏི. པསྶཏཱིཏི ཏཾཡེཝ ཙཀྑུནཱ དིཊྛཾ ཝིཡ ཕུཊཾ ཀཏྭཱ པཉྙཱཙཀྑུནཱ པསྶཏི. ནིབྦིནྡཏཱིཏི ནཝཝིདྷཝིཔསྶནཱཉཱཎཡོགེན སངྑཱརེསུ ཨུཀྐཎྛཏི. ནིབྦིནྡཾ ཝིརཛྫཏཱིཏི ཏཾ ཝིཔསྶནཾ སིཁཾ པཱཔེནྟོ མགྒཉཱཎཡོགེན སངྑཱརེཧི ཝིརཏྟོ ཧོཏི. ཝིརཱགཱ ཝིམུཙྩཏཱིཏི ཝིརཱགསངྑཱཏམགྒཧེཏུ ཕལཝིམུཏྟིཡཱ ནིབྦཱནེ ཨདྷིམོཀྑེན ཝིམུཙྩཏི. ཀེསུཙི པན པོཏྠཀེསུ ཨིམསྨིཾ ཝཱརེ ‘‘སམཱཧིཏེན ཙིཏྟེན ཨིདཾ དུཀྑནྟི ཡཐཱབྷཱུཏཾ པཛཱནཱཏཱི’’ཏིཨཱདི སཙྩནཡོ ལིཁིཏོ, སོཔི ཙ ཀེསུཙི པོཏྠཀེསུ ‘‘ཨིདཾ དུཀྑནྟི ཡོནིསོ མནསི ཀརོཏཱི’’ཏིཨཱདིནཱ ནཡེན ལིཁིཏོ. ཝཱརདྭཡེཔི བྱཉྫནཏོཡེཝ ཝིསེསོ, ན ཨཏྠཏོ. ‘‘ནིབྦིནྡཾ ཝིརཛྫཏཱི’’ཏི ཧི མགྒཉཱཎསྶ ཝུཏྟཏྟཱ མགྒཉཱཎེ ཙ སིདྡྷེ ཙཏུསཙྩཱབྷིསམཡཀིཙྩཾ སིདྡྷམེཝ ཧོཏི. ཏསྨཱ ཙཏུསཙྩནཡེན ཝུཏྟཝཱརོཔི ཨིམིནཱ ཝཱརེན ཨཏྠཏོ ཨཝིསིཊྛོཡེཝ.

༧༤. ཨིདཱནི ཨནིཙྩཏོཏིཨཱདཱིཧི ཨཱརམྨཎསྶ ཨཝིསེསེཏྭཱ ཝུཏྟཏྟཱ ཨཱརམྨཎཾ ཝིསེསེནྟོ རཱུཔཾ ཨནིཙྩཏོ མནསི ཀརོཏཱིཏིཨཱདིམཱཧ. ཡོནིསོམནསིཀཱརམཱུལཀཱཏི ཡོནིསོམནསིཀཱརོ མཱུལཾ པཏིཊྛཱ ཨེཏེསནྟི ཡོནིསོམནསིཀཱརམཱུལཀཱ. ཡོནིསོམནསིཀཱརཾ མུཉྩིཏྭཱཡེཝ ཧི པཱམོཛྫཱདཡོ ནཝ ན ཧོནྟི. སམཱཧིཏེན ཙིཏྟེནཱཏི ཀཱརཎབྷཱུཏེན ཙིཏྟེན. ཡཐཱབྷཱུཏཾ པཛཱནཱཏཱིཏི པཉྙཱཡ པཛཱནཱཏི. ‘‘ཨིདཾ དུཀྑནྟི ཡོནིསོ མནསི ཀརོཏཱི’’ཏི ཝུཙྩམཱནེ ཨནུསྶཝཝསེན པུབྦབྷཱགསཙྩཱནུབོདྷོཔི སངྒཡ྄ཧཏི. ཡོནིསོམནསིཀཱརོཏི ཙ ཨུཔཱཡེན མནསིཀཱརོ.

དྷཱཏུནཱནཏྟཾ ¶ པཊིཙྩ ཨུཔྤཛྫཏི ཕསྶནཱནཏྟནྟི ཙཀྑཱདིདྷཱཏུནཱནཏྟཾ པཊིཙྩ ཙཀྑུསམྥསྶཱདིནཱནཏྟཾ ཨུཔྤཛྫཏཱིཏི ཨཏྠོ. ཕསྶནཱནཏྟཾ པཊིཙྩཱཏི ཙཀྑུསམྥསྶཱདིནཱནཏྟཾ པཊིཙྩ. ཝེདནཱནཱནཏྟནྟི ཙཀྑུསམྥསྶཛཱདིཝེདནཱནཱནཏྟཾ ¶ . སཉྙཱནཱནཏྟནྟི ཀཱམསཉྙཱདིནཱནཏྟཾ. སངྐཔྤནཱནཏྟནྟི ཀཱམསངྐཔྤཱདིནཱནཏྟཾ. ཚནྡནཱནཏྟནྟི སངྐཔྤནཱནཏྟཏཱཡ རཱུཔེ ཚནྡོ སདྡེ ཚནྡོཏི ཨེཝཾ ¶ ཚནྡནཱནཏྟཾ ཨུཔྤཛྫཏི. པརིལཱ༹ཧནཱནཏྟནྟི ཚནྡནཱནཏྟཏཱཡ རཱུཔཔརིལཱ༹ཧོ སདྡཔརིལཱ༹ཧོཏི ཨེཝཾ པརིལཱ༹ཧནཱནཏྟཾ ཨུཔྤཛྫཏི. པརིཡེསནཱནཱནཏྟནྟི པརིལཱ༹ཧནཱནཏྟཏཱཡ རཱུཔཔརིཡེསནཱདིནཱནཏྟཾ ཨུཔྤཛྫཏི. ལཱབྷནཱནཏྟནྟི པརིཡེསནཱནཱནཏྟཏཱཡ རཱུཔཔཊིལཱབྷཱདིནཱནཏྟཾ ཨུཔྤཛྫཏཱིཏི.

དྷམྨནཱནཏྟཉཱཎནིདྡེསཝཎྞནཱ ནིཊྛིཏཱ.

༢༠-༢༤. ཉཱཎཔཉྩཀནིདྡེསཝཎྞནཱ

༧༥. ཉཱཎཔཉྩཀནིདྡེསེ ¶ ཏེསཾ པཉྩནྣཾ ཉཱཎཱནཾ ཨནུཔུབྦསམྦནྡྷསབྦྷཱཝཏོ ཨེཀཏོཝ པུཙྪཱཝིསྶཛྫནཱནི ཀཏཱནི. ཨབྷིཉྙཱཏཱ ཧོནྟཱིཏི དྷམྨསབྷཱཝལཀྑཎཛཱནནཝསེན སུཊྛུ ཉཱཏཱ ཧོནྟི. ཉཱཏཱ ཧོནྟཱིཏི ཉཱཏཔརིཉྙཱཝསེན སབྷཱཝཏོ ཉཱཏཏྟཱ ཉཱཏཱ ནཱམ ཧོནྟི. ཡེན ཉཱཎེན ཏེ དྷམྨཱ ཉཱཏཱ ཧོནྟི, ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱཏི སམྦནྡྷོ. ཨིམིནཱཝ ནཡེན སེསཉཱཎཱནིཔི ཡོཛེཏབྦཱནི. པརིཉྙཱཏཱ ཧོནྟཱིཏི སཱམཉྙལཀྑཎཝསེན སམནྟཏོ ཉཱཏཱ ཧོནྟི. ཏཱིརིཏཱ ཧོནྟཱིཏི ཏཱིརཎཔརིཉྙཱཝསེན ཨནིཙྩཱདིཏོ ཨུཔཔརིཀྑིཏཱ སམཱཔིཏཱ ནཱམ ཧོནྟི. པཧཱིནཱ ཧོནྟཱིཏི ཨནིཙྩཱནུཔསྶནཱདིནཱ ཉཱཎེན ནིཙྩསཉྙཱདཡོ བྷངྒཱནུཔསྶནཏོ པཊྛཱཡ པཧཱིནཱ ཧོནྟི. པརིཙྩཏྟཱ ཧོནྟཱིཏི པཧཱནཝསེནེཝ ཚཌྜིཏཱ ནཱམ ཧོནྟི. བྷཱཝིཏཱ ཧོནྟཱིཏི ཝཌྜྷིཏཱ པརིབྷཱཝིཏཱ ཙ ཧོནྟི. ཨེཀརསཱ ཧོནྟཱིཏི སཀིཙྩསཱདྷནཔཊིཔཀྑཔཧཱནེན ཨེཀཀིཙྩཱ ཧོནྟི, པཙྩནཱིཀཏོ ཝཱ ཝིམུཏྟིཝསེན ཝིམུཏྟིརསེན ཨེཀརསཱ ཧོནྟི. སཙྪིཀཏཱ ཧོནྟཱིཏི པཊིལཱབྷཝསེན ཕལདྷམྨོ པཊིཝེདྷཝསེན ནིབྦཱནདྷམྨོཏི པཙྩཀྑཀཏཱ ཧོནྟི. ཕསྶིཏཱ ཧོནྟཱིཏི པཊིལཱབྷཕུསནེན པཊིཝེདྷཕུསནེན ཙ ཕསྶིཏཱ ཨནུབྷཱུཏཱ ཧོནྟི. ཨིམཱནི པཉྩ ཉཱཎཱནི ཧེཊྛཱ སུཏམཡཉཱཎཝསེན ཝུཏྟཱནི, ཨིདྷ སཀིཙྩསཱདྷནཝསེན.

ཉཱཎཔཉྩཀནིདྡེསཝཎྞནཱ ནིཊྛིཏཱ.

༢༥-༢༨. པཊིསམྦྷིདཱཉཱཎནིདྡེསཝཎྞནཱ

༧༦. པཊིསམྦྷིདཱཉཱཎནིདྡེསེ ¶ ¶ ཡསྨཱ དྷམྨེ ཨཝུཏྟེ ཏསྶ ཀིཙྩཾ ན སཀྐཱ ཝཏྟུཾ, ཏསྨཱ ཨུདྡིཊྛཱནཾ པཊིཔཱཊིཾ ཨནཱདིཡིཏྭཱ པཋམཾ དྷམྨཱ ནིདྡིཊྛཱ. དྷམྨཱདཱིནཾ ¶ ཨཏྠཱ ཝུཏྟཱཡེཝ. སདྡྷིནྡྲིཡཾ དྷམྨོཏིཨཱདཱིཧི དྷམྨསདྡཔརིཡཱཔནྣེ དྷམྨེ ཝཏྭཱ ནཱནཏྟསདྡསྶ ཨཏྠཾ དསྶེནྟོ ཨཉྙོ སདྡྷིནྡྲིཡཾ དྷམྨོཏིཨཱདིམཱཧ. ‘‘ཨཉྙོ དྷམྨོ’’ཏི ཧི ཝུཏྟེ དྷམྨཱནཾ ནཱནཏྟཾ དསྶིཏཾ ཧོཏི. པཊིཝིདིཏཱཏི ཨབྷིམུཁབྷཱཝེན ཝིདིཏཱ པཱཀཊཱ ནཱམ ཧོནྟི. ཏེན པཊིསམྦྷིདཱཔདསྶ ཨཏྠོ ཝུཏྟོ. ཨདྷིམོཀྑཊྛོ ཨཏྠོཏིཨཱདཱིཧི ཏེསཾ སདྡྷཱདཱིནཾ ཨདྷིམུཙྩནཱདིཀིཙྩཾ ཨཏྠོ ནཱམཱཏི དསྶེཏི. སནྡསྶེཏུནྟི པརཾ ཉཱཔེཏུཀཱམསྶ པརཾ སནྡསྶེཏུཾ. པརསྶ པན ཝཙནཾ སུཎནྟསྶཱཔི ལབྦྷཏིཡེཝ. བྱཉྫནནིརུཏྟཱབྷིལཱཔཱཏི ནཱམབྱཉྫནཾ ནཱམནིརུཏྟི ནཱམཱབྷིལཱཔོ. ནཱམཉྷི ཨཏྠཾ བྱཉྫཡཏཱིཏི བྱཉྫནཾ, ‘‘སངྑཏམབྷིསངྑརོནྟཱིཏི ཁོ, བྷིཀྑཝེ, ཏསྨཱ སངྑཱརཱཏི ཝུཙྩནྟཱི’’ཏི (སཾ. ནི. ༣.༧༩) ཨེཝཾ ནིདྡྷཱརེཏྭཱ སཧེཏུཀཾ ཀཏྭཱ ཝུཙྩམཱནཏྟཱ ནིརུཏྟི, ཨབྷིལཔཱིཡཏི ཨེཏེན ཨཏྠོཏི ཨབྷིལཱཔོཏི ཝུཙྩཏི.

ནཱམཉྩ ནཱམེཏཾ ཙཏུབྦིདྷཾ – སཱམཉྙནཱམཾ, གུཎནཱམཾ, ཀིཏྟིམནཱམཾ, ཨོཔཔཱཏིཀནཱམནྟི. ཏཏྠ པཋམཀཔྤིཀེསུ མཧཱཛནེན སམྨནྣིཏྭཱ ཋཔིཏཏྟཱ ‘‘མཧཱསམྨཏོ’’ཏི རཉྙོ ནཱམཾ སཱམཉྙནཱམཾ. ཡཾ སནྡྷཱཡ ཝུཏྟཾ ‘‘མཧཱཛནསམྨཏོཏི ཁོ, ཝཱསེཊྛ, ‘མཧཱསམྨཏོ མཧཱསམྨཏོ’ཏྭེཝ པཋམཾ ཨཀྑརཾ ཨུཔནིབྦཏྟ’’ནྟི (དཱི. ནི. ༣.༡༣༡). ‘‘དྷམྨཀཐིཀོ པཾསུཀཱུལིཀོ ཝིནཡདྷརོ ཏིཔིཊཀདྷརོ སདྡྷོ སཏོ’’ཏི ཨེཝརཱུཔཾ གུཎཏོ ཨཱགཏནཱམཾ གུཎནཱམཾ. ‘‘བྷགཝཱ ¶ ཨརཧཾ སམྨཱསམྦུདྡྷོ’’ཏིཨཱདཱིནིཔི ཏཐཱགཏསྶ ཨནེཀཱནི ནཱམསཏཱནི གུཎནཱམཱནེཝ. ཏེན ཝུཏྟཾ –

‘‘ཨསངྑྱེཡྻཱནི ནཱམཱནི, སགུཎེན མཧེསིནོ;

གུཎེཧི ནཱམམུདྡྷེཡྻཾ, ཨཔི ནཱམསཧསྶཏོ’’ཏི.

ཡཾ པན ཛཱཏསྶ ཀུམཱརཀསྶ ནཱམགྒཧཎདིཝསེ དཀྑིཎེཡྻཱནཾ སཀྐཱརཾ ཀཏྭཱ སམཱིཔེ ཋིཏཱ ཉཱཏཀཱ ཀཔྤེཏྭཱ པཀཔྤེཏྭཱ ‘‘ཨཡཾ ཨསུཀོ ནཱམཱ’’ཏི ནཱམཾ ཀརོནྟི, ཨིདཾ ཀིཏྟིམནཱམཾ. ཡཱ པན པུརིམཔཉྙཏྟི ཨཔརཔཉྙཏྟིཡཾ པཏཏི, པུརིམཝོཧཱརོ པཙྪིམཝོཧཱརེ པཏཏི. སེཡྻཐིདཾ, པུརིམཀཔྤེཔི ཙནྡོ ཙནྡོཡེཝ ནཱམ, ཨེཏརཧིཔི ཙནྡོཡེཝ. ཨཏཱིཏེ སཱུརིཡོ, སམུདྡོ, པཐཝཱི, པབྦཏོ པབྦཏོཡེཝ ནཱམ, ཨེཏརཧིཔི པབྦཏོཡེཝཱཏི, ཨིདཾ ཨོཔཔཱཏིཀནཱམཾ. ཨིདཾ ཙཏུབྦིདྷམྤི ནཱམཾ ཨེཀཾ ནཱམམེཝ ¶ ཧོཏི ¶ , ཏཾ ལོཀསངྐེཏམཏྟསིདྡྷཾ པརམཏྠཏོ ཨཝིཛྫམཱནཾ. ཨཉྙེ པན ‘‘ནཱམཾ ནཱམ ཨཏྠཛོཏཀོ སདྡོ’’ཏི ཝདནྟི. བལབོཛ྄ཛྷངྒམགྒངྒཱནཾ ཝུཏྟནཡཱནུསཱརེནེཝ ཨཏྠོ ཝེདིཏབྦོ.

པཊིསམྦྷིདཱཉཱཎནིདྡེསཝཎྞནཱ ནིཊྛིཏཱ.

༢༩-༣༡. ཉཱཎཏྟཡནིདྡེསཝཎྞནཱ

༧༨. ཉཱཎཏྟཡནིདྡེསེ ¶ ནིམིཏྟནྟི སངྑཱརནིམིཏྟཾ. ཨནིམིཏྟེཏི སངྑཱརནིམིཏྟཔཊིཔཀྑེ ནིབྦཱནེ. ཨདྷིམུཏྟཏྟཱཏི ཏནྣིནྣབྷཱཝེན ཙིཏྟསྶ ཝིསྶཊྛཏྟཱ. ཕུསྶ ཕུསྶ ཝཡཾ པསྶཏཱིཏི སངྑཱརནིམིཏྟཾ ཉཱཎེན ཕུསིཏྭཱ ཕུསིཏྭཱ ཏསྶ བྷངྒཾ ཝིཔསྶནཱཉཱཎེནེཝ པསྶཏི. ཨེཏེན བྷངྒཱནུཔསྶནཱ སིདྡྷཱ. སཱ ཨནིཙྩཱནུཔསྶནཾ སཱདྷེཏི, ཨནིཙྩསྶ དུཀྑཏྟཱ སཱ དུཀྑཱནུཔསྶནཾ, དུཀྑསྶ ཨནཏྟཏྟཱ སཱ ཨནཏྟཱནུཔསྶནནྟི ཨེཝམེཏྠ ཏིསྶོ ཨནུཔསྶནཱ ཝུཏྟཱ ཧོནྟི. ཨནིམིཏྟོ ཝིཧཱརོཏི ནིམིཏྟཾ བྷཡཏོ དིཊྛཏྟཱ སོ ཝིཔསྶནཏྟཡཝིཧཱརོ ཨནིམིཏྟཝིཧཱརོ ནཱམ ཧོཏི. པཎིདྷིནྟི ཏཎྷཾ. ཨཔྤཎིཧིཏེཏི ཏཎྷཱཔཊིཔཀྑེ ནིབྦཱནེ. ཨབྷིནིཝེསནྟི ཨཏྟཱབྷིནིཝེསཾ. སུཉྙཏེཏི ཨཏྟཝིརཧིཏེ ནིབྦཱནེ. སུཉྙཏོཏི སུཉྙཾཡེཝ སུཉྙཏོ. པཝཏྟཾ ཨཛ྄ཛྷུཔེཀྑིཏྭཱཏི ཝིཔཱཀཔྤཝཏྟཾ སངྑཱརུཔེཀྑཱཡ ཨཛ྄ཛྷུཔེཀྑིཏྭཱ. སུགཏིསངྑཱཏཝིཔཱཀཔྤཝཏྟཱབྷིནནྡིནོ ཧི སཏྟཱ. ཨཡཾ པན ཕལསམཱཔཏྟིཾ སམཱཔཛྫིཏུཀཱམོ ཏཾ པཝཏྟཾ, སབྦཉྩ སངྑཱརགཏཾ ཨནིཙྩཱདིཏོ པསྶིཏྭཱ ཨཛ྄ཛྷུཔེཀྑཏིཡེཝ. ཨེཝཉྷི དིཊྛེ ཕལསམཱཔཏྟིཾ སམཱཔཛྫིཏུཾ སཀྐོཏི, ན ཨཉྙཐཱ. ཨཱཝཛྫིཏྭཱཏི ཨཱཝཛྫནེན ཨཱཝཛྫིཏྭཱ. སམཱཔཛྫཏཱིཏི ཕལསམཱཔཏྟིཾ པཊིཔཛྫཏི. ཨནིམིཏྟཱ སམཱཔཏྟཱིཏི ནིམིཏྟཾ བྷཡཏོ དིསྭཱ སམཱཔནྣཏྟཱ ཨནིམིཏྟཱ སམཱཔཏྟི ནཱམ. ཨནིམིཏྟཝིཧཱརསམཱཔཏྟཱིཏི ཝིཔསྶནཱཝིཧཱརཝསེན ཙ ཕལསམཱཔཏྟིཝསེན ཙ ཏདུབྷཡཾ ནཱམ ཧོཏི.

༧༩. ཨིདཱནི སངྑཱརནིམིཏྟམེཝ ཝིབྷཛིཏྭཱ དསྶེནྟོ རཱུཔནིམིཏྟནྟིཨཱདིམཱཧ. ཛརཱམརཎགྒཧཎེ ཝཏྟབྦཾ པུབྦེ ཝུཏྟམེཝ. ‘‘ཨཉྙོ ཨནིམིཏྟཝིཧཱརོ’’ཏིཨཱདཱིཧི ཝུཏྟེཡེཝ ནིགམེཏྭཱ དསྶེཏི. སངྑེཔེན ཝིཧཱརཊྛེ ཉཱཎཾ ནཱམ ཕལསམཱཔཏྟིཡཱ པུབྦབྷཱགེ སངྑཱརུཔེཀྑཱཉཱཎེ ཋིཏསྶ ཝིཔསྶནཱཝིཧཱརནཱནཏྟེ ཉཱཎཾ ¶ སམཱཔཏྟཊྛེ ཉཱཎཾ ནཱམ ཕལསམཱཔཏྟིནཱནཏྟེ ཉཱཎཾ. ཝིཧཱརསམཱཔཏྟཊྛེ ཉཱཎཾ ནཱམ ཏདུབྷཡནཱནཏྟེ ཉཱཎཾ. ཝིཔསྶནཱཝིཧཱརེནེཝ ¶ ཝཱིཏིནཱམེཏུཀཱམོ ཝིཔསྶནཱཝིཧཱརམེཝ པཝཏྟེཏི, ཕལསམཱཔཏྟིཝིཧཱརེནེཝ ཝཱིཏིནཱམེཏུཀཱམོ ཝིཔསྶནཱཔཊིཔཱཊིཡཱ ཨུསྶཀྐིཏྭཱ ¶ ཕལསམཱཔཏྟིཝིཧཱརམེཝ པཝཏྟེཏི, ཏདུབྷཡེན ཝཱིཏིནཱམེཏུཀཱམོ ཏདུབྷཡཾ པཝཏྟེཏི. ཨེཝཾ པུགྒལཱདྷིཔྤཱཡཝསེན ཏིཝིདྷཾ ཛཱཏཾ. སེསམེཏྠ ཝཏྟབྦཾ སངྑཱརུཔེཀྑཱཉཱཎཝཎྞནཱཡཾ ཝུཏྟམེཝ.

ཉཱཎཏྟཡནིདྡེསཝཎྞནཱ ནིཊྛིཏཱ.

༣༢. ཨཱནནྟརིཀསམཱདྷིཉཱཎནིདྡེསཝཎྞནཱ

༨༠. ཨཱནནྟརིཀསམཱདྷིཉཱཎནིདྡེསེ ¶ ནེཀྑམྨཝསེནཱཏིཨཱདཱིསུ ནེཀྑམྨཨབྱཱཔཱདཨཱལོཀསཉྙཱཨཝིཀྑེཔདྷམྨཝཝཏྠཱནཉཱཎཔཱམོཛྫཱནི སུཀྑཝིཔསྶཀསྶ ཨུཔཙཱརཛ྄ཛྷཱནསམྤཡུཏྟཱ ཏསྶ ཏསྶ ཀིལེསསྶ ཝིཔཀྑབྷཱུཏཱ སཏྟ དྷམྨཱ ཨེཀཙིཏྟསམྤཡུཏྟཱ ཨེཝ. ཙིཏྟསྶ ཨེཀགྒཏཱ ཨཝིཀྑེཔོཏི ཨེཀགྒསྶ བྷཱཝོ ཨེཀགྒཏཱ, ནཱནཱརམྨཎེ ན ཝིཀྑིཔཏི ཏེན ཙིཏྟནྟི ཨཝིཀྑེཔོ, ཙིཏྟསྶ ཨེཀགྒཏཱསངྑཱཏོ ཨཝིཀྑེཔོཏི ཨཏྠོ. སམཱདྷཱིཏི ཨེཀཱརམྨཎེ སམཾ ཨཱདྷཱིཡཏི ཏེན ཙིཏྟནྟི སམཱདྷི ནཱམཱཏི ཨཏྠོ. ཏསྶ སམཱདྷིསྶ ཝསེནཱཏི ཨུཔཙཱརསམཱདྷིནཱཔི སམཱཧིཏཙིཏྟསྶ ཡཐཱབྷཱུཏཱཝབོདྷཏོ ཝུཏྟཔྤཀཱརསྶ སམཱདྷིསྶ ཝསེན. ཨུཔྤཛྫཏི ཉཱཎནྟི མགྒཉཱཎཾ ཡཐཱཀྐམེན ཨུཔྤཛྫཏི. ཁཱིཡནྟཱིཏི སམུཙྪེདཝསེན ཁཱིཡནྟི. ཨིཏཱིཏི ཝུཏྟཔྤཀཱརསྶ ཨཏྠསྶ ནིགམནཾ. པཋམཾ སམཐོཏི པུབྦབྷཱགེ སམཱདྷི ཧོཏི. པཙྪཱ ཉཱཎནྟི ཨཔརབྷཱགེ མགྒཀྑཎེ ཉཱཎཾ ཧོཏི.

ཀཱམཱསཝོཏི པཉྩཀཱམགུཎིཀརཱགོ. བྷཝཱསཝོཏི རཱུཔཱརཱུཔབྷཝེསུ ཚནྡརཱགོ ཛྷཱནནིཀནྟི སསྶཏདིཊྛིསཧཛཱཏོ རཱགོ བྷཝཝསེན པཏྠནཱ. དིཊྛཱསཝོཏི དྭཱསཊྛི དིཊྛིཡོ. ཨཝིཛྫཱསཝོཏི དུཀྑཱདཱིསུ ཨཊྛསུ ཋཱནེསུ ཨཉྙཱཎཾ. བྷུམྨཝཙནེན ཨོཀཱསཔུཙྪཾ ཀཏྭཱ ‘‘སོཏཱཔཏྟིམགྒེནཱ’’ཏིཨཱདིནཱ ཨཱསཝཀྑཡཀརེན མགྒེན ཨཱསཝཀྑཡཾ དསྶེཏྭཱ ‘‘ཨེཏྠཱ’’ཏི ཨོཀཱསཝིསྶཛྫནཾ ཀཏཾ, མགྒཀྑཎེཏི ཝུཏྟཾ ཧོཏི. ཨནཝསེསོཏི ནཏྠི ཨེཏསྶ ཨཝསེསོཏི ཨནཝསེསོ. ཨཔཱཡགམནཱིཡོཏི ནིརཡཏིརཙྪཱནཡོནིཔེཏྟིཝིསཡཱསུརཀཱཡཱ ཙཏྟཱརོ སུཁསངྑཱཏཱ ཨཡཱ ཨཔེཏཏྟཱ ཨཔཱཡཱ, ཡསྶ སཾཝིཛྫཏི ¶ , ཏཾ པུགྒལཾ ཨཔཱཡེ གམེཏཱིཏི ཨཔཱཡགམནཱིཡོ. ཨཱསཝཀྑཡཀཐཱ དུབྷཏོཝུཊྛཱནཀཐཱཡཾ ཝུཏྟཱ.

ཨཝིཀྑེཔཝསེནཱཏི པཝཏྟམཱནསྶ སམཱདྷིསྶ ¶ ཨུཔནིསྶཡབྷཱུཏསམཱདྷིཝསེན. པཐཝཱིཀསིཎཝསེནཱཏིཨཱདཱིསུ དས ཀསིཎཱནི ཏདཱརམྨཎིཀཨཔྤནཱསམཱདྷིཝསེན ཝུཏྟཱནི, བུདྡྷཱནུསྶཏིཨཱདཡོ ¶ མརཎསྶཏི ཨུཔསམཱནུསྶཏི ཙ ཨུཔཙཱརཛ྄ཛྷཱནཝསེན ཝུཏྟཱ, ཨཱནཱཔཱནསྶཏི ཀཱཡགཏཱསཏི ཙ ཨཔྤནཱསམཱདྷིཝསེན ཝུཏྟཱ, དས ཨསུབྷཱ པཋམཛ྄ཛྷཱནཝསེན ཝུཏྟཱ.

བུདྡྷཾ ཨཱརབྦྷ ཨུཔྤནྣཱ ཨནུསྶཏི བུདྡྷཱནུསྶཏི. ‘‘ཨིཏིཔི སོ བྷགཝཱ ཨརཧ’’ནྟིཨཱདིབུདྡྷགུཎཱརམྨཎཱཡ (མ. ནི. ༡.༧༤; ཨ. ནི. ༣.༧༡; ༩.༢༧) སཏིཡཱ ཨེཏཾ ཨདྷིཝཙནཾ, ཏསྶཱ བུདྡྷཱནུསྶཏིཡཱ ཝསེན. ཏཐཱ དྷམྨཾ ཨཱརབྦྷ ཨུཔྤནྣཱ ཨནུསྶཏི དྷམྨཱནུསྶཏི. ‘‘སྭཱཀྑཱཏོ བྷགཝཏཱ དྷམྨོ’’ཏིཨཱདིདྷམྨགུཎཱརམྨཎཱཡ སཏིཡཱ ཨེཏཾ ཨདྷིཝཙནཾ. སངྒྷཾ ཨཱརབྦྷ ཨུཔྤནྣཱ ཨནུསྶཏི སངྒྷཱནུསྶཏི. ‘‘སུཔྤཊིཔནྣོ བྷགཝཏོ སཱཝཀསངྒྷོ’’ཏིཨཱདིསངྒྷགུཎཱརམྨཎཱཡ སཏིཡཱ ཨེཏཾ ཨདྷིཝཙནཾ. སཱིལཾ ཨཱརབྦྷ ཨུཔྤནྣཱ ཨནུསྶཏི སཱིལཱནུསྶཏི. ཨཏྟནོ ཨཁཎྜཏཱདིསཱིལགུཎཱརམྨཎཱཡ སཏིཡཱ ཨེཏཾ ཨདྷིཝཙནཾ. ཙཱགཾ ཨཱརབྦྷ ཨུཔྤནྣཱ ཨནུསྶཏི ཙཱགཱནུསྶཏི. ཨཏྟནོ མུཏྟཙཱགཏཱདིཙཱགགུཎཱརམྨཎཱཡ སཏིཡཱ ཨེཏཾ ཨདྷིཝཙནཾ. དེཝཏཱ ཨཱརབྦྷ ཨུཔྤནྣཱ ཨནུསྶཏི དེཝཏཱནུསྶཏི. དེཝཏཱ སཀྑིཊྛཱནེ ཋཔེཏྭཱ ཨཏྟནོ སདྡྷཱདིགུཎཱརམྨཎཱཡ སཏིཡཱ ཨེཏཾ ཨདྷིཝཙནཾ. ཨཱནཱཔཱནེ ཨཱརབྦྷ ཨུཔྤནྣཱ སཏི ཨཱནཱཔཱནསྶཏི. ཨཱནཱཔཱནནིམིཏྟཱརམྨཎཱཡ སཏིཡཱ ཨེཏཾ ཨདྷིཝཙནཾ. མརཎཾ ཨཱརབྦྷ ཨུཔྤནྣཱ སཏི མརཎསྶཏི. ཨེཀབྷཝཔརིཡཱཔནྣཛཱིཝིཏིནྡྲིཡུཔཙྪེདསངྑཱཏམརཎཱརམྨཎཱཡ སཏིཡཱ ཨེཏཾ ཨདྷིཝཙནཾ. ཀུཙྪིཏཱནཾ ཀེསཱདཱིནཾ པཊིཀཱུལཱནཾ ཨཱཡཏྟཱ ཨཱཀརཏྟཱ ཀཱཡོཏིསངྑཱཏེ སརཱིརེ གཏཱ པཝཏྟཱ, ཏཱདིསཾ ཝཱ ཀཱཡཾ གཏཱ སཏི ཀཱཡགཏཱསཏི. ‘‘ཀཱཡགཏསཏཱི’’ཏི ཝཏྟབྦེ རསྶཾ ཨཀཏྭཱ ‘‘ཀཱཡགཏཱསཏཱི’’ཏི ཝུཏྟཱ. ཏཐེཝ ཨིདྷཱཔི ཀཱཡགཏཱསཏིཝསེནཱཏི ཝུཏྟཾ. ཀེསཱདིཀེསུ ཀཱཡཀོཊྛཱསེསུ པཊིཀཱུལནིམིཏྟཱརམྨཎཱཡ སཏིཡཱ ཨེཏཾ ཨདྷིཝཙནཾ. ཨུཔསམཾ ཨཱརབྦྷ ཨུཔྤནྣཱ ཨནུསྶཏི ཨུཔསམཱནུསྶཏི. སབྦདུཀྑཱུཔསམཱརམྨཎཱཡ སཏིཡཱ ཨེཏཾ ཨདྷིཝཙནཾ. དས ཨསུབྷཱ ཧེཊྛཱ ཝུཏྟཏྠཱ.

༨༡. དཱིགྷཾ ¶ ཨསྶཱསཝསེནཱཏིཨཱདཱིནི ཨཔྤནཱུཔཙཱརསམཱདྷིབྷེདཾཡེཝ དསྶེཏུཾ ཝུཏྟཱནི. དཱིགྷཾ ཨསྶཱསཝསེནཱཏི དཱིགྷནྟི ཝུཏྟཨསྶཱསཝསེན. ‘‘དཱིགྷཾ ཝཱ ཨསྶསནྟོ དཱིགྷཾ ཨསྶསཱམཱིཏི པཛཱནཱཏཱི’’ཏི (དཱི. ནི. ༢.༣༧༤; མ. ནི. ༡.༡༠༧; ༣.༡༤༨) ཧི ཝུཏྟཾ. ཨེས ནཡོ སེསེསུཔི. སབྦཀཱཡཔཊིསཾཝེདཱིཏི སབྦསྶ ཨསྶཱསཔསྶཱསཀཱཡསྶ ¶ པཊིསཾཝེདཱི. པསྶམྦྷཡཾ ཀཱཡསངྑཱརནྟི ཨོལཱ༹རིཀཾ ཨསྶཱསཔསྶཱསངྑཱཏཾ ཀཱཡསངྑཱརཾ པསྶམྦྷེནྟོ ཝཱུཔསམེནྟོ. ‘‘དཱིགྷཾ རསྶཾ སབྦཀཱཡཔཊིསཾཝེདཱི པསྶམྦྷཡཾ ཀཱཡསངྑཱར’’ནྟི ཨིམིནཱཝ ཙཏུཀྐེན ཨཔྤནཱསམཱདྷི ཝུཏྟོ. པཱིཏིཔཊིསཾཝེདཱིཏི པཱིཏིཾ པཱཀཊཾ ཀརོནྟོ. ཙིཏྟསངྑཱརཔཊིསཾཝེདཱིཏི སཉྙཱཝེདནཱསངྑཱཏཾ ཙིཏྟསངྑཱརཾ པཱཀཊཾ ཀརོནྟོ. ཨབྷིཔྤམོདཡཾ ཙིཏྟནྟི ཙིཏྟཾ མོདེནྟོ. སམཱདཧཾ ཙིཏྟནྟི ཨཱརམྨཎེ ¶ ཙིཏྟཾ སམཾ ཋཔེནྟོ. ཝིམོཙཡཾ ཙིཏྟནྟི ཙིཏྟཾ ནཱིཝརཎཱདཱིཧི ཝིམོཙེནྟོ. པཱིཏིཔཊིསཾཝེདཱི སུཁཔཊིསཾཝེདཱི ཙིཏྟསངྑཱརཔཊིསཾཝེདཱི པསྶམྦྷཡཾ ཙིཏྟསངྑཱརནྟི ཙཏུཀྐཉྩ ཙིཏྟཔཊིསཾཝེདཱི ཨབྷིཔྤམོདཡཾ ཙིཏྟཾ སམཱདཧཾ ཙིཏྟཾ ཝིམོཙཡཾ ཙིཏྟནྟི ཙཏུཀྐཉྩ ཨཔྤནཱསམཱདྷིཝསེན ཝིཔསྶནཱསམྤཡུཏྟསམཱདྷིཝསེན ཙ ཝུཏྟཱནི. ཨནིཙྩཱནུཔསྶཱིཏི ཨནིཙྩཱནུཔསྶནཱཝསེན. ཝིརཱགཱནུཔསྶཱིཏི ནིབྦིདཱནུཔསནཱཝསེན. ནིརོདྷཱནུཔསྶཱིཏི བྷངྒཱནུཔསྶནཱཝསེན. པཊིནིསྶགྒཱནུཔསྶཱིཏི ཝུཊྛཱནགཱམིནཱིཝིཔསྶནཱཝསེན. སཱ ཧི ཏདངྒཝསེན སདྡྷིཾ ཁནྡྷཱབྷིསངྑཱརེཧི ཀིལེསེ པརིཙྩཛཏི. སངྑཏདོསདསྶནེན ཙ ཏབྦིཔརཱིཏེ ནིབྦཱནེ ཏནྣིནྣཏཱཡ པཀྑནྡཏི. ཨིདཾ ཙཏུཀྐཾ ཝིཔསྶནཱསམྤཡུཏྟསམཱདྷིཝསེནེཝ ཝུཏྟཾ. ཨསྶཱསཝསེན པསྶཱསཝསེནཱཏི ཙེཏྠ ཨསྶཱསཔསྶཱསཔཝཏྟིམཏྟཾ གཧེཏྭཱ ཝུཏྟཾ, ན ཏདཱརམྨཎཀརཎཝསེན. ཝིཏྠཱརོ པནེཏྠ ཨཱནཱཔཱནཀཐཱཡཾ ཨཱཝིབྷཝིསྶཏི.

ཨཱནནྟརིཀསམཱདྷིཉཱཎནིདྡེསཝཎྞནཱ ནིཊྛིཏཱ.

༣༣. ཨརཎཝིཧཱརཉཱཎནིདྡེསཝཎྞནཱ

༨༢. ཨརཎཝིཧཱརཉཱཎནིདྡེསེ ¶ ཨནིཙྩཱནུཔསྶནཱདཡོ ཝུཏྟཏྠཱ. སུཉྙཏོ ཝིཧཱརོཏི ཨནཏྟཱནུཔསྶནཱཡ ཝུཊྛིཏསྶ སུཉྙཏཱཀཱརེནེཝ པཝཏྟཱ ཨརཧཏྟཕལསམཱཔཏྟི. ཨནིམིཏྟོ ཝིཧཱརོཏི ཨནིཙྩཱནུཔསྶནཱཡ ཝུཊྛིཏསྶ ཨནིམིཏྟཱཀཱརེན པཝཏྟཱ ཨརཧཏྟཕལསམཱཔཏྟི. ཨཔྤཎིཧིཏོ ¶ ཝིཧཱརོཏི དུཀྑཱནུཔསྶནཱཡ ཝུཊྛིཏསྶ ཨཔྤཎིཧིཏཱཀཱརེན པཝཏྟཱ ཨརཧཏྟཕལསམཱཔཏྟི. སུཉྙཏེ ཨདྷིམུཏྟཏཱཏི སུཉྙཏེ ཕལསམཱཔཏྟིཡཱ པུབྦབྷཱགཔཉྙཱཝསེན ཨདྷིམུཏྟཏཱ. སེསདྭཡེཔི ཨེསེཝ ནཡོ. པཋམཾ ཛྷཱནནྟིཨཱདཱིཧི ཨརཧཏྟཕལསམཱཔཏྟིཾ སམཱཔཛྫིཏུཀཱམསྶ ཝིཔསྶནཱཡ ཨཱརམྨཎབྷཱུཏཱ ཛྷཱནསམཱཔཏྟིཡོ ཝུཏྟཱ. ཨརཧཏོཡེཝ ཧི ཝིཔསྶནཱཕལསམཱཔཏྟིཔཎཱིཏཱདྷིམུཏྟིཛྷཱནསམཱཔཏྟིཡོ སབྦཀིལེསཱནཾ པཧཱིནཏྟཱ ‘‘ཨརཎཝིཧཱརོ’’ཏི ཝཏྟུཾ ཨརཧནྟི.

པཋམེན ཛྷཱནེན ནཱིཝརཎེ ཧརཏཱིཏི ཨརཎཝིཧཱརོཏི པཋམཛ྄ཛྷཱནསམངྒཱི པཋམེན ཛྷཱནེན ནཱིཝརཎེ ཧརཏཱིཏི ཏཾ པཋམཾ ཛྷཱནཾ ཨརཎཝིཧཱརོཏི ཨཏྠོ. སེསེསུཔི ཨེསེཝ ནཡོ. ཨརཧཏོ ནཱིཝརཎཱབྷཱཝེཔི ནཱིཝརཎཝིཔཀྑཏྟཱ པཋམསྶ ཛྷཱནསྶ ནཱིཝརཎེ ཧརཏཱིཏི ཝུཏྟནྟི ཝེདིཏབྦཾ. ཝིཔསྶནཱཕལསམཱཔཏྟིཔཎཱིཏཱདྷིམུཏྟིཝསེན ཏིདྷཱ ཨརཎཝིཧཱརཉཱཎཾ ཨུདྡིསིཏྭཱ ཀསྨཱ ཛྷཱནསམཱཔཏྟིཡོཝ ¶ ཨརཎཝིཧཱརོཏི ནིདྡིཊྛཱཏི ཙེ? ཨུདྡེསཝསེནེཝ ཏཱསཾ ཏིསྶནྣཾ ཨརཎཝིཧཱརཏཱཡ སིདྡྷཏྟཱ. ཕལསམཱཔཏྟིཝིཔསྶནཱཡ པན བྷཱུམིབྷཱུཏཱནཾ ཛྷཱནསམཱཔཏྟཱིནཾ ཨརཎཝིཧཱརཏཱ ཨཝུཏྟེ ན སིཛ྄ཛྷཏི, ཏསྨཱ ཨསིདྡྷམེཝ སཱདྷེཏུཾ ‘‘པཋམཾ ཛྷཱནཾ ཨརཎཝིཧཱརོ’’ཏིཨཱདི ཝུཏྟནྟི ཝེདིཏབྦཾ. ཏཱསཉྷི ཨརཎཝིཧཱརཏཱ ཨུདྡེསཝསེན ཨསིདྡྷཱཔི ནིདྡེསེ ཝུཏྟཏྟཱ སིདྡྷཱཏི. ཏེསཾ ཝཱ ཡོཛིཏནཡེནེཝ ¶ ‘‘ཨནིཙྩཱནུཔསྶནཱ ནིཙྩསཉྙཾ ཧརཏཱིཏི ཨརཎཝིཧཱརོ, དུཀྑཱནུཔསྶནཱ སུཁསཉྙཾ ཧརཏཱིཏི ཨརཎཝིཧཱརོ, ཨནཏྟཱནུཔསྶནཱ ཨཏྟསཉྙཾ ཧརཏཱིཏི ཨརཎཝིཧཱརོ, སུཉྙཏོ ཝིཧཱརོ ཨསུཉྙཏཾ ཧརཏཱིཏི ཨརཎཝིཧཱརོ, ཨནིམིཏྟོ ཝིཧཱརོ ནིམིཏྟཾ ཧརཏཱིཏི ཨརཎཝིཧཱརོ, ཨཔྤཎིཧིཏོ ཝིཧཱརོ པཎིདྷིཾ ཧརཏཱིཏི ཨརཎཝིཧཱརོ, སུཉྙཏཱདྷིམུཏྟཏཱ ཨསུཉྙཏཱདྷིམུཏྟིཾ ཧརཏཱིཏི ཨརཎཝིཧཱརོ, ཨནིམིཏྟཱདྷིམུཏྟཏཱ ནིམིཏྟཱདྷིམུཏྟིཾ ཧརཏཱིཏི ཨརཎཝིཧཱརོ, ཨཔྤཎིཧིཏཱདྷིམུཏྟཏཱ པཎིཧིཏཱདྷིམུཏྟིཾ ཧརཏཱིཏི ཨརཎཝིཧཱརོ’’ཏི ཡོཛེཏྭཱ གཧེཏབྦཾ.

ཨརཎཝིཧཱརཉཱཎནིདྡེསཝཎྞནཱ ནིཊྛིཏཱ.

༣༤. ནིརོདྷསམཱཔཏྟིཉཱཎནིདྡེསཝཎྞནཱ

༨༣. ནིརོདྷསམཱཔཏྟིཉཱཎནིདྡེསེ ¶ ¶ སམཐབལནྟི ཀཱམཙྪནྡཱདཡོ པཙྩནཱིཀདྷམྨེ སམེཏཱིཏི སམཐོ, སོཡེཝ ཨཀམྤནཱིཡཊྛེན བལཾ. ཨནཱགཱམིཨརཧནྟཱནཾཡེཝ སམཱདྷིཔཊིཔཀྑསྶ ཀཱམཙྪནྡསྶ པཧཱནེན སམཱདྷིསྨིཾ པརིཔཱུརཀཱརིབྷཱཝཔྤཏྟཏྟཱ ཏེསཾཡེཝ སམཱདྷི བལཔྤཏྟོཏི ཀཏྭཱ ‘‘སམཐབལ’’ནྟི ཝུཙྩཏི, ན ཨཉྙེསཾ. སམཱདྷིབལནྟིཔི པཱཋོ. ཝིཔསྶནཱབལནྟི ཨནིཙྩཱདིཝསེན ཝིཝིདྷེཧི ཨཱཀཱརེཧི དྷམྨེ པསྶཏཱིཏི ཝིཔསྶནཱ, སཱཡེཝ ཨཀམྤནཱིཡཊྛེན བལཾ. ཏེསཾཡེཝ ཨུབྷིནྣཾ བལཔྤཏྟཾ ཝིཔསྶནཱཉཱཎཾ. ཏཏྠ སམཐབལཾ ཨནུཔུབྦེན ཙིཏྟསནྟཱནཝཱུཔསམནཏྠཾ ནིརོདྷེ ཙ པཊིཔཱདནཏྠཾ, ཝིཔསྶནཱབལཾ པཝཏྟེ ཨཱདཱིནཝདསྶནཏྠཾ ནིརོདྷེ ཙ ཨཱནིསཾསདསྶནཏྠཾ.

ནཱིཝརཎེཏི ནིམིཏྟཏྠེ བྷུམྨཝཙནཾ, ནཱིཝརཎནིམིཏྟཾ ནཱིཝརཎཔཙྩཡཱཏི ཨཏྠོ. ཀརཎཏྠེ ཝཱ བྷུམྨཝཙནཾ, ནཱིཝརཎེནཱཏི ཨཏྠོ. ན ཀམྤཏཱིཏི ཛྷཱནསམངྒཱིཔུགྒལོ. ཨཐ ཝཱ ཛྷཱནནྟི ཛྷཱནངྒཱནཾ ཨདྷིཔྤེཏཏྟཱ པཋམེན ཛྷཱནེན ཏཾསམྤཡུཏྟསམཱདྷི ནཱིཝརཎེ ན ཀམྤཏི. ཨཡམེཝ ཙེཏྠ ཡོཛནཱ གཧེཏབྦཱ. ཨུདྡྷཙྩེ ཙཱཏི ཨུདྡྷཙྩསཧགཏཙིཏྟུཔྤཱདེ ཨུདྡྷཙྩེ ཙ. ཨུདྡྷཙྩནྟི ཙ ཨུདྡྷཏབྷཱཝོ ¶ , ཏཾ ཨཝཱུཔསམལཀྑཎཾ. ཨུདྡྷཙྩསཧགཏཀིལེསེ ཙཱཏི ཨུདྡྷཙྩེན སཧགཏེ ཨེཀུཔྤཱདཱདིབྷཱཝཾ གཏེ ཨུདྡྷཙྩསམྤཡུཏྟེ མོཧཨཧིརིཀཨནོཏྟཔྤཀིལེསེ ཙ. ཁནྡྷེ ཙཱཏི ཨུདྡྷཙྩསམྤཡུཏྟཙཏུཀྑནྡྷེ ཙ. ན ཀམྤཏི ན ཙལཏི ན ཝེདྷཏཱིཏི ཨཉྙམཉྙཝེཝཙནཱནི. ཨུདྡྷཙྩེ ན ཀམྤཏི, ཨུདྡྷཙྩསཧགཏཀིལེསེ ན ཙལཏི, ཨུདྡྷཙྩསཧགཏཀྑནྡྷེ ན ཝེདྷཏཱིཏི ཡོཛེཏབྦཾ. ཝིཔསྶནཱབལཾ སཏྟནྣཾཡེཝ ཨནུཔསྶནཱནཾ ཝུཏྟཏྟཱ ¶ ཏཱསཾཡེཝ ཝསེན ཝིཔསྶནཱབལཾ པརིཔུཎྞཾ ཧོཏཱིཏི ཝེདིཏབྦཾ. ཨཝིཛྫཱཡ ཙཱཏི དྭཱདསསུཔི ཨཀུསལཙིཏྟུཔྤཱདེསུ ཨཝིཛྫཱཡ ཙ. ཨཝིཛྫཱསཧགཏཀིལེསེ ཙཱཏི ཡཐཱཡོགཾ ཨཝིཛྫཱཡ སམྤཡུཏྟལོབྷདོསམཱནདིཊྛིཝིཙིཀིཙྪཱཐིནཨུདྡྷཙྩཨཧིརིཀཨནོཏྟཔྤཀིལེསེ ཙ.

ཝཙཱིསངྑཱརཱཏི ཝིཏཀྐཝིཙཱརཱ. ‘‘པུབྦེ ཁོ, ཨཱཝུསོ ཝིསཱཁ, ཝིཏཀྐེཏྭཱ ཝིཙཱརེཏྭཱ པཙྪཱ ཝཱཙཾ བྷིནྡཏི, ཏསྨཱ ཝིཏཀྐཝིཙཱརཱ ཝཙཱིསངྑཱརོ’’ཏི (མ. ནི. ༡.༤༦༣) ཝཙནཏོ ¶ ཝཱཙཾ སངྑརོནྟི ཨུཔྤཱདེནྟཱིཏི ཝཙཱིསངྑཱརཱ. ཀཱཡསངྑཱརཱཏི ཨསྶཱསཔསྶཱསཱ. ‘‘ཨསྶཱསཔསྶཱསཱ ཁོ, ཨཱཝུསོ ཝིསཱཁ, ཀཱཡིཀཱ ཨེཏེ དྷམྨཱ ཀཱཡཔཊིབདྡྷཱ, ཏསྨཱ ཨསྶཱསཔསྶཱསཱ ཀཱཡསངྑཱརོ’’ཏི (མ. ནི. ༡.༤༦༣) ཝཙནཏོ ཀཱཡེན སངྑརཱིཡནྟཱིཏི ཀཱཡསངྑཱརཱ. སཉྙཱཝེདཡིཏནིརོདྷནྟི སཉྙཱཡ ཝེདནཱཡ ཙ ནིརོདྷཾ. ཙིཏྟསངྑཱརཱཏི སཉྙཱ ཙ ཝེདནཱ ཙ. ‘‘ཙེཏསིཀཱ ཨེཏེ དྷམྨཱ ཙིཏྟཔཊིབདྡྷཱ, ཏསྨཱ སཉྙཱ ཙ ཝེདནཱ ཙ ཙིཏྟསངྑཱརོ’’ཏི (མ. ནི. ༡.༤༦༣) ཝཙནཏོ ཙིཏྟེན སངྑརཱིཡནྟཱིཏི ཙིཏྟསངྑཱརཱ.

༨༤. ཉཱཎཙརིཡཱསུ ཨནུཔསྶནཱཝསཱནེ, ཝིཝཊྚནཱནུཔསྶནཱགཧཎེན ཝཱ ཏསྶཱ ཨཱདིབྷཱུཏཱ ཙརིཡཱཀཐཱཡ ཉཱཎཙརིཡཱཏི ཝུཏྟཱ སེསཱནུཔསྶནཱཔི གཧིཏཱ ཧོནྟཱིཏི ཝེདིཏབྦཾ. སོལ༹སཧི ཉཱཎཙརིཡཱཧཱིཏི ཙ ཨུཀྐཊྛཔརིཙྪེདོ, ཨནཱགཱམིསྶ པན ཨརཧཏྟམགྒཕལཝཛྫཱཧི ཙུདྡསཧིཔི ཧོཏི པརིཔུཎྞབལཏྟཱ.

༨༥. ནཝཧི སམཱདྷིཙརིཡཱཧཱིཏི ཨེཏྠ པཋམཛ྄ཛྷཱནཱདཱིཧི ཨཊྛ, པཋམཛ྄ཛྷཱནཱདཱིནཾ པཊིལཱབྷཏྠཱཡ སབྦཏྠ ཨུཔཙཱརཛ྄ཛྷཱནཝསེན ཨེཀཱཏི ནཝ སམཱདྷིཙརིཡཱ. བལཙརིཡཱནཾ ཀིཾ ནཱནཏྟཾ? སམཐབལེནཔི ཧི ‘‘ནེཀྑམྨཝསེནཱ’’ཏིཨཱདཱིཧི སཏྟཧི པརིཡཱཡེཧི ཨུཔཙཱརསམཱདྷི ཝུཏྟོ, པེཡྻཱལཝིཏྠཱརཏོ ‘‘པཋམཛ྄ཛྷཱནཝསེནཱ’’ཏིཨཱདཱིཧི སམསཏྟཏིཡཱ ཝཱརེཧི ཡཐཱཡོགཾ ཨཔྤནཱུཔཙཱརསམཱདྷི ཝུཏྟོ, སམཱདྷིཙརིཡཱཡཔི ‘‘པཋམཾ ཛྷཱན’’ནྟིཨཱདཱིཧི ཨཊྛཧི པརིཡཱཡེཧི ཨཔྤནཱསམཱདྷི ཝུཏྟོ. པཋམཾ ཛྷཱནཾ པཊིལཱབྷཏྠཱཡཱཏིཨཱདཱིཧི ཨཊྛཧི པརིཡཱཡེཧི ཨུཔཙཱརསམཱདྷི ཝུཏྟོཏི ཨུབྷཡཏྠཱཔི ཨཔྤནཱུཔཙཱརསམཱདྷིཡེཝ ཝུཏྟོ. ཨེཝཾ སནྟེཔི ཨཀམྤིཡཊྛེན བལཱནི ཝསཱིབྷཱཝཊྛེན ¶ ཙརིཡཱཏི ཝེདིཏབྦཱ. ཝིཔསྶནཱབལེ པན སཏྟ ཨནུཔསྶནཱཝ ‘‘ཝིཔསྶནཱབལ’’ནྟི ཝུཏྟཱ, ཉཱཎཙརིཡཱཡ སཏྟ ཙ ཨནུཔསྶནཱ ཝུཏྟཱ, ཝིཝཊྚནཱནུཔསྶནཱདཡོ ནཝ ཙ ཝིསེསེཏྭཱ ¶ ཝུཏྟཱ. ཨིདཾ ནེསཾ ནཱནཏྟཾ. སཏྟ ཨནུཔསྶནཱ པན ཨཀམྤིཡཊྛེན བལཱནི ཝསཱིབྷཱཝཊྛེན ཙརིཡཱཏི ཝེདིཏབྦཱ.

‘‘ཝསཱིབྷཱཝཏཱ པཉྙཱ’’ཏི (པཊི. མ. ༡.༣༤ མཱཏིཀཱ) ཨེཏྠ ཝུཏྟཝསིཡོ ཝིསྶཛྫེཏུཾ ཝསཱིཏི པཉྩ ཝསིཡོཏི ཨིཏྠིལིངྒཝོཧཱརེན ཝུཏྟཾ. ཝསོ ཨེཝ ཝསཱིཏི ཝུཏྟཾ ཧོཏི. པུན ¶ པུགྒལཱདྷིཊྛཱནཱཡ དེསནཱཡ ཏཱ ཝསིཡོ ཝིསྶཛྫེནྟོ ཨཱཝཛྫནཝསཱིཏིཨཱདིམཱཧ. ཨཱཝཛྫནཱཡ ཝསོ ཨཱཝཛྫནཝསོ, སོ ཨསྶ ཨཏྠཱིཏི ཨཱཝཛྫནཝསཱི. ཨེསེཝ ནཡོ སེསེསུ. པཋམཾ ཛྷཱནཾ ཡཏྠིཙྪཀནྟི ཡཏྠ ཡཏྠ པདེསེ ཨིཙྪཏི གཱམེ ཝཱ ཨརཉྙེ ཝཱ, ཏཏྠ ཏཏྠ ཨཱཝཛྫཏི. ཡདིཙྪཀནྟི ཡདཱ ཡདཱ ཀཱལེ སཱིཏཀཱལེ ཝཱ ཨུཎྷཀཱལེ ཝཱ, ཏདཱ ཏདཱ ཨཱཝཛྫཏི. ཨཐ ཝཱ ཡཾ ཡཾ པཋམཾ ཛྷཱནཾ ཨིཙྪཏི པཐཝཱིཀསིཎཱརམྨཎཾ ཝཱ སེསཱརམྨཎཾ ཝཱ, ཏཾ ཏཾ ཨཱཝཛྫཏི. ཨེཀེཀཀསིཎཱརམྨཎསྶཱཔི ཛྷཱནསྶ ཝསིཏཱནཾ ཝུཏྟཏྟཱ པུརིམཡོཛནཱཡེཝ སུནྡརཏརཱ. ཡཱཝཏིཙྪཀནྟི ཡཱཝཏཀཾ ཀཱལཾ ཨིཙྪཏི ཨཙྪརཱསངྒྷཱཏམཏྟཾ སཏྟཱཧཾ ཝཱ, ཏཱཝཏཀཾ ཀཱལཾ ཨཱཝཛྫཏི. ཨཱཝཛྫནཱཡཱཏི མནོདྭཱརཱཝཛྫནཱཡ. དནྡྷཱཡིཏཏྟནྟི ཨཝསཝཏྟིབྷཱཝོ, ཨལསབྷཱཝོ ཝཱ. སམཱཔཛྫཏཱིཏི པཊིཔཛྫཏི, ཨཔྤེཏཱིཏི ཨཏྠོ. ཨདྷིཊྛཱཏཱིཏི ཨནྟོསམཱཔཏྟིཡཾ ཨདྷིཀཾ ཀཏྭཱ ཏིཊྛཏི. ཝུཊྛཱནཝསིཡཾཔཋམཾ ཛྷཱནནྟི ནིསྶཀྐཏྠེ ཨུཔཡོགཝཙནཾ, པཋམཛ྄ཛྷཱནཱཏི ཨཏྠོ. པཙྩཝེཀྑཏཱིཏི པཙྩཝེཀྑཎཛཝནེཧི ནིཝཏྟིཏྭཱ པསྶཏི. ཨཡམེཏྠ པཱལི༹ཝཎྞནཱ.

ཨཡཾ པན ཨཏྠཔྤཀཱསནཱ – པཋམཛ྄ཛྷཱནཏོ ཝུཊྛཱཡ ཝིཏཀྐཾ ཨཱཝཛྫཡཏོ བྷཝངྒཾ ཨུཔཙྪིནྡིཏྭཱ པཝཏྟཱཝཛྫནཱནནྟརཾ ཝིཏཀྐཱརམྨཎཱནེཝ ཙཏྟཱརི པཉྩ ཝཱ ཛཝནཱནི ཛཝནྟི, ཏཏོ དྭེ བྷཝངྒཱནི, ཏཏོ པུན ཝིཙཱརཱརམྨཎཾ ཨཱཝཛྫནཾ ཝུཏྟནཡེནེཝ ཛཝནཱནཱིཏི ཨེཝཾ པཉྩསུ ཛྷཱནངྒེསུ ཡདཱ ནིརནྟརཾ ཙིཏྟཾ པེསེཏུཾ སཀྐོཏི, ཨཐསྶ ཨཱཝཛྫནཝསཱི སིདྡྷཱཝ ཧོཏི. ཨཡཾ པན མཏྠཀཔྤཏྟཱ ཝསཱི བྷགཝཏོ ཡམཀཔཱཊིཧཱརིཡེཝ ལབྦྷཏི. ཨིཏོ པརཾ སཱིགྷཏརཱ ཨཱཝཛྫནཝསཱི ནཱམ ནཏྠི. ཨཉྙེསཾ པན ཨནྟརནྟརཱ བྷཝངྒཝཱརེ གཎནཱ ནཏྠི. མཧཱམོགྒལླཱནཏྠེརསྶ ནནྡོཔནནྡདམནེ ཝིཡ སཱིགྷཾ སམཱཔཏྟིསམཱཔཛྫནསམཏྠཏཱ སམཱཔཛྫནཝསཱི ནཱམ. ཨཙྪརཱམཏྟཾ ཝཱ དསཙྪརཱམཏྟཾ ཝཱ ཁཎཾ སམཱཔཏྟིཾ ཋཔེཏུཾ སམཏྠཏཱ ཨདྷིཊྛཱནཝསཱི ¶ ནཱམ. ཏཐེཝ ཏཏོ ལཧུཾ ཝུཊྛཱནསམཏྠཏཱ ཝུཊྛཱནཝསཱི ནཱམ. པཙྩཝེཀྑཎཝསཱི པན ཨཱཝཛྫནཝསིཡཱ ཨེཝ ཝུཏྟཱ. པཙྩཝེཀྑཎཛཝནཱནེཝ ཧི ཏཏྠ ཨཱཝཛྫནཱནནྟརཱནཱིཏི. ཨིཏི ¶ ཨཱཝཛྫནཝསིཡཱ སིདྡྷཱཡ པཙྩཝེཀྑཎཝསཱི སིདྡྷཱ ཧོཏི, ཨདྷིཊྛཱནཝསིཡཱ ཙ སིདྡྷཱཡ ཝུཊྛཱནཝསཱི སིདྡྷཱ ཧོཏི. ཨེཝཾ སནྟེཔི ‘‘ཨཡཾ པན མཏྠཀཔྤཏྟཱ ཝསཱི བྷགཝཏོ ཡམཀཔཱཊིཧཱརིཡེཝ ལབྦྷཏཱི’’ཏི ཝུཏྟཏྟཱ པཱཊིཧཱརིཡཀཱལེ ཛྷཱནངྒཔཙྩཝེཀྑཎཱནཾ ཨབྷཱཝཏོ ¶ ནཱནཱཝིདྷཝཎྞཱདིནིམྨཱནསྶ ནཱནཱཀསིཎཝསེན ཨིཛ྄ཛྷནཏོ ཏཾཏཾཀསིཎཱརམྨཎཾ ཛྷཱནཾ སམཱཔཛྫིཏུཀཱམསྶ ཡཐཱརུཙི ལཧུཾ ཏསྨིཾ ཀསིཎེ ཝུཏྟནཡེན ཨཱཝཛྫནཔཝཏྟནསམཏྠཏཱ ཨཱཝཛྫནཝསཱི, ཏདཱཝཛྫནཝཱིཐིཡཾཡེཝ ཏསྶ ཛྷཱནསྶ ཨཔྤནཱསམཏྠཏཱསམཱཔཛྫནསམཏྠཏཱ སམཱཔཛྫནཝསཱི. ཨེཝཉྷི ཝུཙྩམཱནེ ཡུཏྟི ཙ ན ཝིརུཛ྄ཛྷཏི, ཝསཱིཔཊིཔཱཊི ཙ ཡཐཱཀྐམེནེཝ ཡུཛྫཏི. ཛྷཱནངྒཔཙྩཝེཀྑཎཱཡཾ པན ‘‘མཏྠཀཔྤཏྟཱཡེཝ པཉྩ ཛཝནཱནཱི’’ཏི ཝུཏྟཏྟཱ ཝུཏྟནཡེན སཏྟསུཔི ཛཝནེསུ ཛཝནྟེསུ པཙྩཝེཀྑཎཝསཱིཡེཝ ཧོཏི. ཨེཝཾ སནྟེ ‘‘པཋམཛ྄ཛྷཱནཾ ཨཱཝཛྫཏཱི’’ཏི ཝཙནཾ ན ཡུཛྫཏཱིཏི ཙེ? ཡཐཱ ཀསིཎེ པཝཏྟཾ ཛྷཱནཾ ཀཱརཎོཔཙཱརེན ཀསིཎནྟི ཝུཏྟཾ, ཏཐཱ ཛྷཱནཔཙྩཡཾ ཀསིཎཾ ‘‘སུཁོ བུདྡྷཱནམུཔྤཱདོ’’ཏིཨཱདཱིསུ (དྷ. པ. ༡༩༤) ཝིཡ ཕལོཔཙཱརེན ཛྷཱནནྟི ཝུཏྟཾ. ཡཐཱཔརིཙྪིནྣེ ཀཱལེ ཋཏྭཱ ཝུཊྛིཏསྶ ནིདྡཱཡ པབུདྡྷསྶ པུན ནིདྡོཀྐམནེ ཝིཡ པུན ཛྷཱནོཀྐམནེ སཏིཔི ཨདྷིཊྛཱནཝསཱིཡེཝ ནཱམ, ཡཐཱཔརིཙྪེདེན ཝུཊྛིཏསྶ པན ཝུཊྛཱནེཡེཝ ཨདྷིཊྛཱནེ སཏིཔི ཝུཊྛཱནཝསཱི ནཱམ ཧོཏཱིཏི ཨཡཾ ཏེསཾ ཝིསེསོ.

ནིརོདྷསམཱཔཏྟིཡཱ ཝིབྷཱཝནཏྠཾ པན ཨིདཾ པཉྷཀམྨཾ – ཀཱ ནིརོདྷསམཱཔཏྟི, ཀེ ཏཾ སམཱཔཛྫནྟི, ཀེ ན སམཱཔཛྫནྟི, ཀཏྠ སམཱཔཛྫནྟི, ཀསྨཱ སམཱཔཛྫནྟི, ཀཐཉྩསྶཱ སམཱཔཛྫནཾ ཧོཏི, ཀཐཾ ཋཱནཾ, ཀཐཾ ཝུཊྛཱནཾ, ཝུཊྛིཏསྶ ཀིནྣིནྣཾ ཙིཏྟཾ ཧོཏི, མཏསྶ ཙ སམཱཔནྣསྶ ཙ ཀོ ཝིསེསོ, ནིརོདྷསམཱཔཏྟི ¶ ཀིཾ སངྑཏཱ ཨསངྑཏཱ ལོཀིཡཱ ལོཀུཏྟརཱ ནིཔྥནྣཱ ཨནིཔྥནྣཱཏི?

ཏཏྠ ཀཱ ནིརོདྷསམཱཔཏྟཱིཏི? ཡཱ ཨནུཔུབྦནིརོདྷཝསེན ཙིཏྟཙེཏསིཀཱནཾ དྷམྨཱནཾ ཨཔྤཝཏྟི.

ཀེ ཏཾ སམཱཔཛྫནྟི, ཀེ ན སམཱཔཛྫནྟཱིཏི? སབྦེཔི པུཐུཛྫནཱ སོཏཱཔནྣཱ སཀདཱགཱམིནོ སུཀྑཝིཔསྶཀཱ ཙ ཨནཱགཱམཱི ཨརཧནྟོ ན སམཱཔཛྫནྟི, ཨཊྛསམཱཔཏྟིལཱབྷིནོ པན ཨནཱགཱམིནོ ཙ ཁཱིཎཱསཝཱ ཙ སམཱཔཛྫནྟི.

ཀཏྠ ¶ ¶ སམཱཔཛྫནྟཱིཏི? པཉྩཝོཀཱརབྷཝེ. ཀསྨཱ? ཨནུཔུབྦསམཱཔཏྟིསབྦྷཱཝཏོ. ཙཏུཝོཀཱརབྷཝེ པན པཋམཛ྄ཛྷཱནཱདཱིནཾ ཨུཔྤཏྟིཡེཝ ནཏྠི, ཏསྨཱ ན སཀྐཱ ཏཏྠ སམཱཔཛྫིཏུཾ.

ཀསྨཱ སམཱཔཛྫནྟཱིཏི? སངྑཱརཱནཾ པཝཏྟིབྷེདེ ཨུཀྐཎྛིཏྭཱ དིཊྛེཝ དྷམྨེ ཨཙིཏྟཀཱ ཧུཏྭཱ ‘‘ནིརོདྷཾ ནིབྦཱནཾ པཏྭཱ སུཁཾ ཝིཧརིསྶཱམཱ’’ཏི སམཱཔཛྫནྟི.

ཀཐཾ ཙསྶཱ སམཱཔཛྫནཾ ཧོཏཱིཏི? སམཐཝིཔསྶནཱཝསེན ཨུསྶཀྐིཏྭཱ ཀཏཔུབྦཀིཙྩསྶ ནེཝསཉྙཱནཱསཉྙཱཡཏནཾ ནིརོདྷཡཏོ ཨེཝམསྶཱ སམཱཔཛྫནཾ ཧོཏི. ཡོ ཧི སམཐཝསེནེཝ ཨུསྶཀྐཏི, སོ ནེཝསཉྙཱནཱསཉྙཱཡཏནསམཱཔཏྟིཾ པཏྭཱ ཏིཊྛཏི. ཡོ ཝིཔསྶནཱཝསེནེཝ ཨུསྶཀྐཏི, སོ ཕལསམཱཔཏྟིཾ པཏྭཱ ཏིཊྛཏི. ཡོ པན ཨུབྷཡཝསེན ཨུསྶཀྐིཏྭཱ ནེཝསཉྙཱནཱསཉྙཱཡཏནཾ ནིརོདྷེཏི, སོ ཏཾ སམཱཔཛྫཏཱིཏི ཨཡམེཏྠ སངྑེཔོ.

ཨཡཾ པན ཝིཏྠཱརོ – ཨིདྷ བྷིཀྑུ ནིརོདྷཾ སམཱཔཛྫིཏུཀཱམོ ཀཏབྷཏྟཀིཙྩོ སུདྷོཏཧཏྠཔཱདོ ཝིཝིཏྟེ ཨོཀཱསེ སུཔཉྙཏྟེ ཨཱསནེ ནིསཱིདཏི པལླངྐཾ ཨཱབྷུཛིཏྭཱ ཨུཛུཾ ཀཱཡཾ པཎིདྷཱཡ པརིམུཁཾ སཏིཾ ཨུཔཊྛཔེཏྭཱ. སོ པཋམཛ྄ཛྷཱནཾ སམཱཔཛྫིཏྭཱ ཝུཊྛཱཡ ཏཏྠ སངྑཱརེ ཨནིཙྩཏོ དུཀྑཏོ ཨནཏྟཏོ ཝིཔསྶཏི. ཝིཔསྶནཱ པནེསཱ ཏིཝིདྷཱ ཧོཏི – སངྑཱརཔརིགྒཎྷནཀཝིཔསྶནཱ, ཕལསམཱཔཏྟིཝིཔསྶནཱ, ནིརོདྷསམཱཔཏྟིཝིཔསྶནཱཏི. ཏཏྠ སངྑཱརཔརིགྒཎྷནཀཝིཔསྶནཱ མནྡཱ ཝཱ ཧོཏུ ཏིཀྑཱ ཝཱ, མགྒསྶ པདཊྛཱནཾ ཧོཏིཡེཝ. ཕལསམཱཔཏྟིཝིཔསྶནཱ ཏིཀྑཱཝ ཝཊྚཏི མགྒབྷཱཝནཱསདིསཱ. ནིརོདྷསམཱཔཏྟིཝིཔསྶནཱ པན ནཱཏིམནྡཱ ནཱཏིཏིཀྑཱ ཝཊྚཏི. ཏསྨཱ ཨེས ནཱཏིམནྡཱཡ ནཱཏིཏིཀྑཱཡ ཝིཔསྶནཱཡ ཏེ སངྑཱརེ ཝིཔསྶཏི. ཏཏོ དུཏིཡཛ྄ཛྷཱནཾ སམཱཔཛྫིཏྭཱ ¶ ཝུཊྛཱཡ ཏཏྠ སངྑཱརེ ཏཐེཝ ཝིཔསྶཏི. ཏཏོ ཏཏིཡཛ྄ཛྷཱནཾ…པེ… ཏཏོ ཝིཉྙཱཎཉྩཱཡཏནཾ སམཱཔཛྫིཏྭཱ ཝུཊྛཱཡ ཏཏྠ སངྑཱརེ ཏཐེཝ ཝིཔསྶཏི. ཨཐ ཨཱཀིཉྩཉྙཱཡཏནཾ སམཱཔཛྫིཏྭཱ ཝུཊྛཱཡ ཙཏུབྦིདྷཾ པུབྦཀིཙྩཾ ཀརོཏི – ནཱནཱབདྡྷཨཝིཀོཔནཾ, སངྒྷཔཊིམཱནནཾ, སཏྠུཔཀྐོསནཾ, ཨདྡྷཱནཔརིཙྪེདནྟི.

ཏཏྠ ནཱནཱབདྡྷཨཝིཀོཔནནྟི ཡཾ ཨིམིནཱ བྷིཀྑུནཱ སདྡྷིཾ ཨེཀཱབདྡྷཾ ན ཧོཏི, ནཱནཱབདྡྷཾ ཧུཏྭཱ ཋིཏཾ པཏྟཙཱིཝརཾ ཝཱ མཉྩཔཱིཋཾ ཝཱ ནིཝཱསགེཧཾ ཝཱ ཨཉྙཾ ¶ ཝཱ པན ཀིཉྩི པརིཀྑཱརཛཱཏཾ, ཏཾ ཡཐཱ ན ཝིཀུཔྤཏི, ཨགྒིཨུདཀཝཱཏཙོརཨུནྡཱུརཱདཱིནཾ ཝསེན ན ཝིནསྶཏི, ཨེཝཾ ཨདྷིཊྛཱཏབྦཾ. ཏཏྲིདཾ ཨདྷིཊྛཱནཝིདྷཱནཾ – ‘‘ཨིདཉྩིདཉྩ ཨིམསྨིཾ སཏྟཱཧབྦྷནྟརེ མཱ ཨགྒིནཱ ཛྷཱཡཏུ, མཱ ཨུདཀེན ཝུཡ྄ཧཏུ, མཱ ཝཱཏེན ཝིདྡྷཾསཏུ, མཱ ཙོརེཧི ཧརཱིཡཏུ, མཱ ཨུནྡཱུརཱདཱིཧི ¶ ཁཛྫཏཱུ’’ཏི. ཨེཝཾ ཨདྷིཊྛིཏེ ཏཾ སཏྟཱཧཾ ཏསྶ ན ཀོཙི པརིསྶཡོ ཧོཏི, ཨནདྷིཊྛཧཏོ པན ཨགྒིཨཱདཱིཧི ཝིནསྶཏི. ཨིདཾ ནཱནཱབདྡྷཨཝིཀོཔནཾ ནཱམ. ཡཾ པན ཨེཀཱབདྡྷཾ ཧོཏི ནིཝཱསནཔཱརུཔནཾ ཝཱ ནིསིནྣཱསནཾ ཝཱ, ཏཏྠ ཝིསུཾ ཨདྷིཊྛཱནཀིཙྩཾ ནཏྠི, སམཱཔཏྟིཡེཝ ནཾ རཀྑཏི.

སངྒྷཔཊིམཱནནནྟི བྷིཀྑུསངྒྷསྶ པཊིམཱནནཾ ཨུདིཀྑནཾ. ཡཱཝ ཨེསོ བྷིཀྑུ ཨཱགཙྪཏི, ཏཱཝ སངྒྷཀམྨསྶ ཨཀརཎནྟི ཨཏྠོ. ཨེཏྠ ཙ ན པཊིམཱནནཾ ཨེཏསྶ པུབྦཀིཙྩཾ, པཊིམཱནནཱཝཛྫནཾ པན པུབྦཀིཙྩཾ. ཏསྨཱ ཨེཝཾ ཨཱཝཛྫིཏབྦཾ – ‘‘སཙེ མཡི སཏྟཱཧཾ ནིརོདྷཾ སམཱཔཛྫིཏྭཱ ནིསིནྣེ སངྒྷོ ཨཔལོཀནཀམྨཱདཱིསུ ཀིཉྩིདེཝ ཀམྨཾ ཀཏྟུཀཱམོ ཧོཏི, ཡཱཝ མཾ ཀོཙི བྷིཀྑུ ཨཱགནྟྭཱ ན པཀྐོསཏི, ཏཱཝདེཝ ཝུཊྛཧིསྶཱམཱི’’ཏི. ཨེཝཾ ཀཏྭཱ སམཱཔནྣོ ཧི ཏསྨིཾ སམཡེ ཝུཊྛཱཏིཡེཝ. ཡོ པན ཨེཝཾ ན ཀརོཏི, སངྒྷོ ཙ སནྣིཔཏིཏྭཱ ཏཾ ཨཔསྶནྟོ ‘‘ཨསུཀོ བྷིཀྑུ ཀུཧི’’ནྟི པུཙྪིཏྭཱ ‘‘ནིརོདྷཾ སམཱཔནྣོ’’ཏི ཝུཏྟེ ཀཉྩི བྷིཀྑུཾ པེསེཏི ‘‘གཙྪ ཏཾ སངྒྷསྶ ཝཙནེན པཀྐོསཱ’’ཏི. ཨཐསྶ ཏེན བྷིཀྑུནཱ སཝནཱུཔཙཱརེ ཋཏྭཱ ‘‘སངྒྷོ ཏཾ ཨཱཝུསོ པཊིམཱནེཏཱི’’ཏི ཝུཏྟམཏྟེཡེཝ ཝུཊྛཱནཾ ཧོཏི. ཨེཝཾགརུཀཱ ཧི སངྒྷསྶ ཨཱཎཱ ¶ ནཱམ. ཏསྨཱ ཏཾ ཨཱཝཛྫིཏྭཱ ཡཐཱ སཡམེཝ ཝུཊྛཱཏི, ཨེཝཾ སམཱཔཛྫིཏབྦཾ.

སཏྠུཔཀྐོསནནྟི ཨིདྷཱཔི སཏྠུཔཀྐོསནཱཝཛྫནམེཝ ཨིམསྶ པུབྦཀིཙྩཾ. ཏསྨཱ ཏམྤི ཨེཝཾ ཨཱཝཛྫིཏབྦཾ – ‘‘སཙེ མཡི སཏྟཱཧཾ ནིརོདྷཾ སམཱཔཛྫིཏྭཱ ནིསིནྣེ སཏྠཱ ཨོཏིཎྞེ ཝཏྠུསྨིཾ སིཀྑཱཔདཾ ཝཱ པཉྙཔེཏི, ཏཐཱརཱུཔཱཡ ཝཱ ཨཊྛུཔྤཏྟིཡཱ དྷམྨཾ དེསེཏི. ཡཱཝ མཾ ཀོཙི ཨཱགནྟྭཱ ན པཀྐོསཏི, ཏཱཝདེཝ ཝུཊྛཧིསྶཱམཱི’’ཏི. ཨེཝཾ ཀཏྭཱ ནིསིནྣོ ཧི ཏསྨིཾ སམཡེ ཝུཊྛཱཏིཡེཝ. ཡོ པན ཨེཝཾ ན ཀརོཏི, སཏྠཱ ཙ སངྒྷེ སནྣིཔཏིཏེ ཏཾ ཨཔསྶནྟོ ‘‘ཨསུཀོ བྷིཀྑུ ཀུཧི’’ནྟི པུཙྪིཏྭཱ ‘‘ནིརོདྷཾ སམཱཔནྣོ’’ཏི ཝུཏྟེ ཀཉྩི བྷིཀྑུཾ པེསེཏི ‘‘གཙྪ ཏཾ མམ ཝཙནེན པཀྐོསཱ’’ཏི. ཨཐསྶ ¶ ཏེན བྷིཀྑུནཱ སཝནཱུཔཙཱརེ ཋཏྭཱ སཏྠཱ ཨཱཡསྨནྟཾ ཨཱམནྟེཏཱི’’ཏི ཝུཏྟམཏྟེཡེཝ ཝུཊྛཱནཾ ཧོཏི. ཨེཝཾགརུཀཉྷི སཏྠུཔཀྐོསནཾ. ཏསྨཱ ཏཾ ཨཱཝཛྫིཏྭཱ ཡཐཱ སཡམེཝ ཝུཊྛཱཏི, ཨེཝཾ སམཱཔཛྫིཏབྦཾ.

ཨདྡྷཱནཔརིཙྪེདོཏི ཛཱིཝིཏདྡྷཱནསྶ པརིཙྪེདོ. ཨིམིནཱ ཧི བྷིཀྑུནཱ ཨདྡྷཱནཔརིཙྪེདེ ཀུསལེན བྷཝིཏབྦཾ. ‘‘ཨཏྟནོ ཨཱཡུསངྑཱརཱ སཏྟཱཧཾ པཝཏྟིསྶནྟི, ན པཝཏྟིསྶནྟཱི’’ཏི ཨཱཝཛྫིཏྭཱཝ སམཱཔཛྫིཏབྦཾ. སཙེ ཧི སཏྟཱཧབྦྷནྟརེ ནིརུཛ྄ཛྷནཀེ ཨཱཡུསངྑཱརེ ཨནཱཝཛྫིཏྭཱཝ ¶ སམཱཔཛྫཏི, ཏསྶ ནིརོདྷསམཱཔཏྟི མརཎཾ པཊིབཱཧིཏུཾ ན སཀྐོཏི. ཨནྟོནིརོདྷེ མརཎསྶ ནཏྠིཏཱཡ ཨནྟརཱཝ སམཱཔཏྟིཏོ ཝུཊྛཱཏི, ཏསྨཱ ཨེཏཾ ཨཱཝཛྫིཏྭཱཝ སམཱཔཛྫིཏབྦཾ. ཨཝསེསཉྷི ཨནཱཝཛྫིཏུམྤི ཝཊྚཏི, ཨིདཾ པན ཨཱཝཛྫིཏབྦམེཝཱཏི ཝུཏྟཾ. སོ ཨེཝཾ ཨཱཀིཉྩཉྙཱཡཏནཾ སམཱཔཛྫིཏྭཱ ཝུཊྛཱཡ ཨིམཾ པུབྦཀིཙྩཾ ཀཏྭཱ ནེཝསཉྙཱནཱསཉྙཱཡཏནཾ སམཱཔཛྫཏི. ཨཐེཀཾ ཝཱ དྭེ ཝཱ ཙིཏྟཝཱརེ ཨཏིཀྐམིཏྭཱ ཨཙིཏྟཀོ ཧོཏི, ནིརོདྷཾ ཕུསཏི. ཀསྨཱ པནསྶ དྭིནྣཾ ཙིཏྟཱནཾ ཨུཔརི ཙིཏྟཱནི ནཔྤཝཏྟནྟཱིཏི? ནིརོདྷསྶ པཡོགཏྟཱ. ཨིདཉྷི ཨིམསྶ བྷིཀྑུནོ དྭེ སམཐཝིཔསྶནཱདྷམྨེ ཡུགནདྡྷེ ཀཏྭཱ ཨཊྛསམཱཔཏྟིཨཱརོཧནཾ ཨནུཔུབྦནིརོདྷསྶ པཡོགོ, ན ནེཝསཉྙཱནཱསཉྙཱཡཏནསམཱཔཏྟིཡཱཏི ¶ ནིརོདྷསྶ པཡོགཏྟཱ དྭིནྣཾ ཙིཏྟཱནཾ ཨུཔརི ནཔྤཝཏྟནྟི.

ཀཐཾ ཋཱནནྟི? ཨེཝཾ སམཱཔནྣཱཡ པནསྶཱ ཀཱལཔརིཙྪེདཝསེན ཙེཝ ཨནྟརཱ ཨཱཡུཀྑཡསངྒྷཔཊིམཱནནསཏྠུཔཀྐོསནཱབྷཱཝེན ཙ ཋཱནཾ ཧོཏི.

ཀཐཾ ཝུཊྛཱནནྟི? ཨནཱགཱམིསྶ ཨནཱགཱམིཕལསམཱཔཏྟིཡཱ ཨརཧཏོ ཨརཧཏྟཕལསམཱཔཏྟིཡཱཏི ཨེཝཾ དྭེདྷཱ ཝུཊྛཱནཾ ཧོཏི.

ཝུཊྛིཏསྶ ཀིནྣིནྣཾ ཙིཏྟཾ ཧོཏཱིཏི? ནིབྦཱནནིནྣཾ. ཝུཏྟཉྷེཏཾ – ‘‘སཉྙཱཝེདཡིཏནིརོདྷསམཱཔཏྟིཡཱ ཝུཊྛིཏསྶ ཁོ, ཨཱཝུསོ ཝིསཱཁ, བྷིཀྑུནོ ཝིཝེཀནིནྣཾ ཙིཏྟཾ ཧོཏི ཝིཝེཀཔོཎཾ ཝིཝེཀཔབྦྷཱར’’ནྟི (མ. ནི. ༡.༤༦༤).

མཏསྶ ཙ སམཱཔནྣསྶ ཙ ཀོ ཝིསེསོཏི? ཨཡམྤི ཨཏྠོ སུཏྟེ ཝུཏྟོཡེཝ. ཡཐཱཧ – ‘‘ཡོ ཙཱཡཾ, ཨཱཝུསོ, མཏོ ཀཱལངྐཏོ, ཏསྶ ¶ ཀཱཡསངྑཱརཱ ནིརུདྡྷཱ པཊིཔྤསྶདྡྷཱ, ཝཙཱིསངྑཱརཱ, ཙིཏྟསངྑཱརཱ ནིརུདྡྷཱ པཊིཔྤསྶདྡྷཱ, ཨཱཡུ པརིཀྑཱིཎོ, ཨུསྨཱ ཝཱུཔསནྟཱ, ཨིནྡྲིཡཱནི པརིབྷིནྣཱནི. ཡྭཱཡཾ བྷིཀྑུ སཉྙཱཝེདཡིཏནིརོདྷཾ སམཱཔནྣོ, ཏསྶཔི ཀཱཡསངྑཱརཱ ནིརུདྡྷཱ པཊིཔྤསྶདྡྷཱ, ཝཙཱིསངྑཱརཱ, ཙིཏྟསངྑཱརཱ ནིརུདྡྷཱ པཊིཔྤསྶདྡྷཱ, ཨཱཡུ ཨཔརིཀྑཱིཎོ, ཨུསྨཱ ཨཝཱུཔསནྟཱ, ཨིནྡྲིཡཱནི ཨཔརིབྷིནྣཱནཱི’’ཏི (མ. ནི. ༡.༤༥༧).

ནིརོདྷསམཱཔཏྟི ཀིཾ སངྑཏཱཏིཨཱདིཔུཙྪཱཡཾ པན ‘‘སངྑཏཱ’’ཏིཔི ‘‘ཨསངྑཏཱ’’ཏིཔི ‘‘ལོཀིཡཱ’’ཏིཔི ‘‘ལོཀུཏྟརཱ’’ཏིཔི ན ཝཏྟབྦཱ. ཀསྨཱ? སབྷཱཝཏོ ནཏྠིཏཱཡ. ཡསྨཱ པན སམཱཔཛྫནྟསྶ ¶ ཝསེན སམཱཔནྣོ ནཱམ ཧོཏི, ཏསྨཱ ནིཔྥནྣཱཏི ཝཏྟུཾ ཝཊྚཏི, ནོ ཨནིཔྥནྣཱཏི.

‘‘ཨིཏི སནྟཱ སམཱཔཏྟི, ཨཡཾ ཨརིཡནིསེཝིཏཱ;

དིཊྛེཝ དྷམྨེ ནིབྦཱནམིཏི སངྑམུཔཱགཏཱ’’ཏི.

ནིརོདྷསམཱཔཏྟིཉཱཎནིདྡེསཝཎྞནཱ ནིཊྛིཏཱ.

༣༥. པརིནིབྦཱནཉཱཎནིདྡེསཝཎྞནཱ

༨༦. པརིནིབྦཱནཉཱཎནིདྡེསེ ¶ ཨིདྷཱཏི ཨིམསྨིཾ སཱསནེ. སམྤཛཱནོཏི སཱཏྠཀསམྤཛཉྙཾ, སཔྤཱཡསམྤཛཉྙཾ, གོཙརསམྤཛཉྙཾ, ཨསམྨོཧསམྤཛཉྙནྟི ཨིམེཧི ཙཏཱུཧི སམྤཛཉྙེཧི སམྤཛཱནོ. པཝཏྟནྟི སབྦཏྠ ཡཐཱནུརཱུཔཾ པརིཡུཊྛཱནཔཝཏྟཉྩ ཨནུསཡཔྤཝཏྟཉྩ. པརིཡཱདིཡཏཱིཏི ཨུཔཙཱརཔྤནཱཝསེན ཝུཏྟེསུ ཝིཀྑམྦྷནཝསེན, ཝིཔསྶནཱཝསེན ཝུཏྟེསུ ཏདངྒཝསེན, མགྒཝསེན ཝུཏྟེསུ སམུཙྪེདཝསེན ཁེཔེཏི ཨཔྤཝཏྟཾ ཀརོཏི. པེཡྻཱལམུཁེན ཧི དུཏིཡཱདིཛྷཱནསམཱཔཏྟིམཧཱཝིཔསྶནཱམགྒཱ སཾཁིཏྟཱ. ཡསྨཱ ཨེཏཾ པཙྩཝེཀྑནྟསྶ པཝཏྟཾ ཉཱཎཾ པརིནིབྦཱནེ ཉཱཎཾ ནཱམ ཧོཏི, ཏསྨཱ ཝིཀྑམྦྷནཔརིནིབྦཱནཾ ཏདངྒཔརིནིབྦཱནཾ སམུཙྪེདཔརིནིབྦཱནནྟིཔི ཝུཏྟམེཝ ཧོཏི. ཨེཏེཧི ཀིལེསཔརིནིབྦཱནཔཙྩཝེཀྑཎཉཱཎཾ ཝུཏྟཾ. ཨཐ ཝཱ པནཱཏིཨཱདཱིཧི ཁནྡྷཔརིནིབྦཱནཔཙྩཝེཀྑཎཉཱཎཾ ནིདྡིསཏི. ཨནུཔཱདིསེསཱཡ ནིབྦཱནདྷཱཏུཡཱཏི དུཝིདྷཱ ཧི ནིབྦཱནདྷཱཏུ སཨུཔཱདིསེསཱ ཙ ཨནུཔཱདིསེསཱ ཙ. ཏཏྠ ཨུཔཱདཱིཡཏེ ‘‘ཨཧཾ མམཱ’’ཏི བྷུསཾ གཎྷཱིཡཏཱིཏི ཨུཔཱདི, ཁནྡྷཔཉྩཀསྶེཏཾ ¶ ཨདྷིཝཙནཾ. ཨུཔཱདིཡེཝ སེསོ ཨཝསིཊྛོཏི ཨུཔཱདིསེསོ, སཧ ཨུཔཱདིསེསེན ཝཏྟཏཱིཏི སཨུཔཱདིསེསཱ. ནཏྠེཏྠ ཨུཔཱདིསེསོཏི ཨནུཔཱདིསེསཱ. སཨུཔཱདིསེསཱ པཋམཾ ཝུཏྟཱ. ཨཡཾ པན ཨནུཔཱདིསེསཱ. ཏཱཡ ཨནུཔཱདིསེསཱཡ ནིབྦཱནདྷཱཏུཡཱ. ཙཀྑུཔཝཏྟནྟི ཙཀྑུཔཝཏྟི ཙཀྑུསམུདཱཙཱརོ. པརིཡཱདིཡཏཱིཏི ཁེཔཱིཡཏི མདྡཱིཡཏཱིཏི. ཨེས ནཡོ སེསེསུ.

པརིནིབྦཱནཉཱཎནིདྡེསཝཎྞནཱ ནིཊྛིཏཱ.

༣༦. སམསཱིསཊྛཉཱཎནིདྡེསཝཎྞནཱ

༨༧. སམསཱིསཊྛཉཱཎནིདྡེསེ ¶ ¶ པཉྩཀྑནྡྷཱཏིཨཱདཱིཧི དསཧི རཱསཱིཧི སབྦདྷམྨསངྒཧོ ཝེདིཏབྦོ. ན ཧི ཨེཀེཀསྶ ཝསེན ཨཱཡཏནདྷཱཏུརཱསིཝཛྫེཧི སེསེཧི ཨཊྛཧི རཱསཱིཧི ཝིསུཾ ཝིསུཾ སབྦདྷམྨོ སངྒཡ྄ཧཏཱིཏི. ཡསྨཱ པན ལོཀུཏྟརདྷམྨཱ ཧེཏུསམུཙྪེདེན སམུཙྪིནྡིཏབྦཱ ན ཧོནྟི, ཏསྨཱ སབྦདྷམྨསདྡེན སངྒཧིཏཱཔི ལོཀུཏྟརདྷམྨཱ སམུཙྪེདཝསེན སམྦྷཝཏོ ཨིདྷ ན གཧེཏབྦཱ, ཧེཏུསམུཙྪེདེན སམུཙྪིནྡིཏབྦཱ ཨེཝ ཏེབྷཱུམཀདྷམྨཱ གཧེཏབྦཱ. སམྨཱ སམུཙྪིནྡཏཱིཏི ཡཐཱཡོགཾ ཝིཀྑམྦྷནཏདངྒསམུཙྪེདཔཧཱནཝསེན པརིཡུཊྛཱནཾ ཨནུསཡཉྩ ནིརོདྷེནྟོ སམྨཱ སམུཙྪིནྡཏི. ཨེཝཾ པུགྒལཱདྷིཊྛཱནཱཡ དེསནཱཡ སམྨཱ སམུཙྪེདོ ནིདྡིཊྛོ. ནིརོདྷེཏཱིཏི ཨནུཔྤཱདནིརོདྷེན ནིརོདྷེཏི. ཨིམིནཱ སམུཙྪེདཏྠོ ཝུཏྟོ. ན ཨུཔཊྛཱཏཱིཏི ཨེཝཾ ནིརོདྷེ ཀཏེ སོ སོ དྷམྨོ པུན ན ཨུཔཏིཊྛཏི, ན ཨུཔྤཛྫཏཱིཏི ཨཏྠོ. ཨིམིནཱ ནིརོདྷཏྠོ ཝུཏྟོ. ཨེཝཾ ཨནུཔཊྛཧནདྷམྨཝསེན ཨནུཔཊྛཱནབྷཱཝོ ནིདྡིཊྛོ. སམནྟི ཀཱམཙྪནྡཱདཱིནཾ སམིཏཏྟཱ སམཾ. ཏཱནི པན ནེཀྑམྨཱདཱིནི སཏྟ, རཱུཔཱརཱུཔཛ྄ཛྷཱནཱནི ཨཊྛ, མཧཱཝིཔསྶནཱ ཨཊྛཱརས, ཨརིཡམགྒཱ ཙཏྟཱརོཏི སཏྟཏིཾས ཧོནྟི.

ཏེརས སཱིསཱནི སཱིསབྷཱུཏཱནཾ སབྦེསཾ སངྒཧཝསེན ཝུཏྟཱནི. ཨིདྷ པན སདྡྷཱདཱིནི ཨཊྛེཝ སཱིསཱནི ཡུཛྫནྟི. ན ཧི ཨརཧཏོ ཏཎྷཱདཱིནི པཉྩ སཱིསཱནི སནྟི. པལིབོདྷསཱིསནྟི པལིབུནྡྷནཾ པལིབོདྷོ, ནིབྦཱནམགྒཱཝརཎནྟི ཨཏྠོ. སཱིསནྟི པདྷཱནཾ, ཨདྷིཀནྟི ཨཏྠོ. པལིབོདྷོཡེཝ སཱིསཾ, ཏཾསམྤཡུཏྟཱདིསབྦཔལིབོདྷེསུ ¶ ¶ ཝཱ སཱིསནྟི པལིབོདྷསཱིསཾ. ཨེས ནཡོ སེསེསུ. ཝིསེསཏོ པན ཝིནིབནྡྷནནྟི ཨུནྣཏིཝསེན སཾསཱརེ བནྡྷནཾ. པརཱམཱསོཏི ཨབྷིནིཝེསོ. ཝིཀྑེཔོཏི ཝིཔྤཀིཎྞཏཱ. ཀིལེསོཏི ཀིལིསྶནཾ. ཨདྷིམོཀྑོཏི ཨདྷིམུཙྩནཾ. པགྒཧོཏི ཨུསྶཱཧནཾ. ཨུཔཊྛཱནནྟི ཨཔིལཱཔནཾ. ཨཝིཀྑེཔོཏི ཨཝིཔྤཀིཎྞཏཱ. དསྶནནྟི ཡཐཱསབྷཱཝཔཊིཝེདྷོ. པཝཏྟནྟི ཨུཔཱདིནྣཀྑནྡྷཔཝཏྟཾ. གོཙརོཏི ཨཱརམྨཎཾ. ཨིམེསུ དྭཱདསསུཔི ཝཱརེསུ པདྷཱནཊྛོ སཱིསཊྛོ. ཝིམོཀྑོཏི ཝིཀྑམྦྷནཏདངྒསམུཙྪེདཔཊིཔྤསྶདྡྷིནིསྶརཎཝིམུཏྟཱིསུ པཉྩསུ ནིསྶརཎཝིམུཏྟི ནིབྦཱནཾ. སངྑཱརསཱིསནྟི སབྦསངྑཏསངྑཱརཱནཾ སཱིསཾ, ཀོཊི ཨཝསཱནནྟི ཨཏྠོ. ཨེཏེན ཨནུཔཱདིསེསཔརིནིབྦཱནཾ ཝུཏྟཾ. སངྑཱརཱབྷཱཝམཏྟཝསེན ཝཱ ཁནྡྷཔརིནིབྦཱནམེཝ ཝུཏྟཾ ཧོཏི. ནེཀྑམྨཱདིཀཾ སམཉྩ སདྡྷཱདིཀཾ སཱིསཉྩ, སམསཱིསཾ ཝཱ ཨསྶ ཨཏྠཱིཏི སམསཱིསཱིཏི. ཨཐ ཝཱ ཏེརསནྣཾ སཱིསཱནཾ ཏཎྷཱདཱིནི པཉྩ སཱིསཱནི སམུདཡསཙྩཾ, སདྡྷཱདཱིནི པཉྩ མགྒསཙྩཾ, པཝཏྟསཱིསཾ ཛཱིཝིཏིནྡྲིཡཾ དུཀྑསཙྩཾ, གོཙརསཱིསཉྩ སངྑཱརསཱིསཉྩ ནིརོདྷསཙྩནྟི ཨིམེསཾ ཙཏུནྣཾ ཨརིཡསཙྩཱནཾ ཨེཀསྨིཾ རོགེ ཝཱ ཨེཀསྨིཾ ¶ ཨིརིཡཱཔཐེ ཝཱ ཨེཀསྨིཾ སབྷཱགཛཱིཝིཏིནྡྲིཡེ ཝཱ ཨབྷིསམཡོ ཙ ཨནུཔཱདིསེསཔརིནིབྦཱནཉྩ ཡསྶ ཧོཏི, སོ པུབྦེ ཝུཏྟསམཱནཉྩ ཨིམེསཉྩ སཱིསཱནཾ ཨཏྠིཏཱཡ སམསཱིསཱིཏི ཝུཙྩཏི.

སམསཱིསཊྛཉཱཎནིདྡེསཝཎྞནཱ ནིཊྛིཏཱ.

༣༧. སལླེཁཊྛཉཱཎནིདྡེསཝཎྞནཱ

༨༨. སལླེཁཊྛཉཱཎནིདྡེསེ ¶ རཱགོ པུཐཱུཏི རཱགོ ཝིསུཾ, ལོཀུཏྟརེཧི ཨསམྨིསྶོཏི ཨཏྠོ. ཨེས ནཡོ སེསེསུ. རཱགོཏི རཉྫནཊྛེན. དོསོཏི དུསྶནཊྛེན. མོཧོཏི མུཡ྄ཧནཊྛེན. རཉྫནལཀྑཎོ རཱགོ, དུསྶནལཀྑཎོ དོསོ, མུཡ྄ཧནལཀྑཎོ མོཧོཏི ཨིམེ ཏཡོ སཱིསཀིལེསེ ཝཏྭཱ ཨིདཱནི པབྷེདཏོ དསྶེནྟོ ཀོདྷོཏིཨཱདིམཱཧ. ཏཏྠ ཀུཛ྄ཛྷནལཀྑཎོ ཀོདྷོཏི ཨིདྷ སཏྟཝཏྠུཀོ ཨདྷིཔྤེཏོ. ཨུཔནནྡྷནལཀྑཎོ ཨུཔནཱཧོ, དལ༹ྷབྷཱཝཔྤཏྟོ ཀོདྷོཡེཝ. པརགུཎམཀྑནལཀྑཎོ མཀྑོ, པརགུཎཔུཉྪནནྟི ཨཏྠོ. ཡུགགྒཱཧལཀྑཎོ པལཱ༹སོ, ཡུགགྒཱཧཝསེན པརགུཎདསྶནནྟི ཨཏྠོ. པརསམྤཏྟིཁཱིཡནལཀྑཎཱ ཨིསྶཱ, ཨུསཱུཡནཱཏི ཨཏྠོ ¶ . ཨཏྟསམྤཏྟིནིགཱུཧནལཀྑཎཾ མཙྪརིཡཾ, ‘‘མཡ྄ཧཾ ཨཙྪརིཡཾ མཱ པརསྶ ཧོཏཱུ’’ཏི ཨཏྠོ. ཨཏྟནཱ ཀཏཔཱཔཔཊིཙྪཱདནལཀྑཎཱ མཱཡཱ, པཊིཙྪཱདནཊྛེན མཱཡཱ ཝིཡཱཏི ཨཏྠོ. ཨཏྟནོ ཨཝིཛྫམཱནགུཎཔྤཀཱསནལཀྑཎཾ སཱཋེཡྻཾ, སཋབྷཱཝོཏི ཨཏྠོ. ཙིཏྟསྶ ཨུདྡྷུམཱཏབྷཱཝལཀྑཎོ ཐམྦྷོ, ཐདྡྷབྷཱཝོཏི ཨཏྠོ. ཀརཎུཏྟརིཡལཀྑཎོ སཱརམྦྷོ. ཨུནྣཏིལཀྑཎོ མཱནོ. ཨབྦྷུནྣཏིལཀྑཎོ ཨཏིམཱནོ. མཏྟབྷཱཝལཀྑཎོ མདོ. པཉྩསུ ཀཱམགུཎེསུ ཙིཏྟཝོསགྒལཀྑཎོ པམཱདོ.

ཨེཝཾ ཝིསུཾ ཝིསུཾ ཀིལེསཝསེན པུཐཱུ དསྶེཏྭཱ ཝུཏྟཀིལེསེ ཙ ཨཝུཏྟེ ཙ ཨཉྙེ སབྦསངྒཱཧིཀཝསེན དསྶེཏུཾ སབྦེ ཀིལེསཱཏིཨཱདིམཱཧ. ཏཏྠ དིཊྛདྷམྨསམྤརཱཡེསུ སཏྟེ ཀིལེསེནྟི ཨུཔཏཱཔེནྟི ཝིབཱདྷེནྟཱིཏི ཀིལེསཱ. ཨཀུསལཀམྨཔཐསངྒཧིཏཱ ཙ ཨསངྒཧིཏཱ ཙ. དུཊྛུ ཙརིཏཱ, དུཊྛཱ ཝཱ ཙརིཏཱཏི དུཙྩརིཏཱ. ཏེ པན ཀཱཡདུཙྩརིཏཾ ཝཙཱིདུཙྩརིཏཾ མནོདུཙྩརིཏནྟི ཏིཔྤཀཱརཱ. ཝིཔཱཀཾ ཨབྷིསངྑརོནྟཱིཏི ཨབྷིསངྑཱརཱ. ཏེཔི པུཉྙཱབྷིསངྑཱརོ ཨཔུཉྙཱབྷིསངྑཱརོ ¶ ཨཱནེཉྫཱབྷིསངྑཱརོཏི ཏིཔྤཀཱརཱ. ཝིཔཱཀཝསེན བྷཝཾ གཙྪནྟཱིཏིབྷཝགཱམིནོ ¶ , བྷཝགཱམིནོ ཀམྨཱ བྷཝགཱམིཀམྨཱ. ཨིམིནཱ ཨབྷིསངྑཱརབྷཱཝེཔི སཏི ཨཝེདནཱིཡཱནི ཀམྨཱནི པཊིཀྑིཏྟཱནི ཧོནྟཱིཏི ཨཡཾ ཝིསེསོ. ‘‘དུཙྩརིཏཱ’’ཏི ཙ ‘‘ཀམྨཱ’’ཏི ཙ ལིངྒཝིཔལླཱསོ ཀཏོ. ནཱནཏྟེཀཏྟནྟི ཨེཏྠ ཨུདྡེསེ ཨེཀཏྟསདྡསྶ ཨབྷཱཝེཔི ནཱནཏྟེཀཏྟཱནཾ ཨཉྙམཉྙཱཔེཀྑཏྟཱ ཨེཀཏྟམྤི ནིདྡིསིཏུཀཱམེན ‘‘ནཱནཏྟེཀཏྟ’’ནྟི ཨུདྡེསོ ཀཏོ. ནཱནཏྟསལླེཁཀེ ཨེཀཏྟེ དསྶིཏེ སལླེཁཉཱཎཾ སུཁེན དསྶཱིཡཏཱིཏི. ནཱནཏྟནྟི ཨནཝཊྛིཏཏྟཱ སཔརིཔྥནྡཏྟཱ ཙ ནཱནཱསབྷཱཝོ. ཨེཀཏྟནྟི ཨཝཊྛིཏཏྟཱ ཨཔརིཔྥནྡཏྟཱ ཙ ཨེཀསབྷཱཝོ.

ཙརཎཏེཛོཏི ཙརནྟི ཏེན ཨགཏཾ དིསཾ ནིབྦཱནཾ གཙྪནྟཱིཏི ཙརཎཾ. ཀིཾ ཏཾ? སཱིལཾ. ཏདེཝ པཊིཔཀྑཏཱཔནཊྛེན ཏེཛོ. གུཎཏེཛོཏི སཱིལེན ལདྡྷཔཏིཊྛོ སམཱདྷིཏེཛོ. པཉྙཱཏེཛོཏི སམཱདྷིནཱ ལདྡྷཔཏིཊྛོ ཝིཔསྶནཱཏེཛོ. པུཉྙཏེཛོཏི ཝིཔསྶནཱཧི ལདྡྷཔཏིཊྛོ ཨརིཡམགྒཀུསལཏེཛོ. དྷམྨཏེཛོཏི ཙཏུནྣཾ ཏེཛཱནཾ པཏིཊྛཱབྷཱུཏོ བུདྡྷཝཙནཏེཛོ. ཙརཎཏེཛེན ཏེཛིཏཏྟཱཏི སཱིལཏེཛེན ཏིཁིཎཱིཀཏཏྟཱ. དུསྶཱིལྱཏེཛནྟི དུསྶཱིལབྷཱཝསངྑཱཏཾ ཏེཛཾ. ཏམྤི ཧི སནྟཱནཾ ཏཱཔནཏོ ཏེཛོ ནཱམ. པརིཡཱདིཡཏཱིཏི ཁེཔེཏི. ཨགུཎཏེཛནྟི སམཱདྷིསྶ ¶ པཊིཔཀྑཾ ཝིཀྑེཔཏེཛཾ. དུཔྤཉྙཏེཛནྟི ཝིཔསྶནཱཉཱཎཔཊིཔཀྑཾ མོཧཏེཛཾ. ཨཔུཉྙཏེཛནྟི ཏཾཏཾམགྒཝཛ྄ཛྷཀིལེསཔྤཧཱནེན ཀིལེསསཧཱཡཾ ཨཀུསལཀམྨཏེཛཾ. ན ཀེཝལཉྷེཏཾ ཨཔུཉྙམེཝ ཁེཔེཏི, ‘‘ཨཏྠི, བྷིཀྑཝེ, ཀམྨཾ ཨཀཎྷཾ ཨསུཀྐཾ ཨཀཎྷཨསུཀྐཝིཔཱཀཾ ཀམྨཾ ཀམྨཀྑཡཱཡ སཾཝཏྟཏཱི’’ཏི (ཨ. ནི. ༤.༢༣༣; དཱི. ནི. ༣.༣༡༢; མ. ནི. ༢.༡༨) ཝཙནཏོ ཀུསལཀམྨམྤི ཁེཔེཏིཡེཝ. པུཉྙཏེཛཔཊིཔཀྑཝསེན ཨཔུཉྙཏེཛམེཝ ཝུཏྟཾ. ཨདྷམྨཏེཛནྟི ནཱནཱཏིཏྠིཡཱནཾ སམཡཝཙནཏེཛཾ. ཨིམསྶ ཉཱཎསྶ ཨུདྡེསཝཎྞནཱཡཾ ཝུཏྟེ དུཏིཡེ ཨཏྠཝིཀཔྤེ རཱགཱདཡོ ཨེཀཱུནཝཱིསཏི པུཐུ དུསྶཱིལྱཏེཛཱ ཧོནྟི. ‘‘ཨབྷིསངྑཱརཱ, བྷཝགཱམིཀམྨཱ’’ཏི ཨེཏྠ ཨཔུཉྙཱབྷིསངྑཱརཱ ཨཀུསལཀམྨཉྩ ཨཔུཉྙཏེཛཱ ཧོནྟི, ཨཱནེཉྫཱབྷིསངྑཱརཱནི ¶ ལོཀིཡཀུསལཀམྨཱནི པུཉྙཏེཛེནེཝ ཁེཔནཱིཡཏོ ཨཔུཉྙཏེཛཔཀྑིཀཱཝ ཧོནྟི. ཀཱམཙྪནྡཱདཡོ པཉྩདས ནཱནཏྟཱ ཨགུཎཏེཛཱ ཧོནྟི, ནིཙྩསཉྙཱདཡོ ཨཊྛཱརས ནཱནཏྟཱ དུཔྤཉྙཏེཛཱ ཧོནྟི, ཙཏུམགྒཝཛ྄ཛྷཱ ཙཏྟཱརོ ནཱནཏྟཱ ཨཔུཉྙཏེཛཱ ཧོནྟི. སོཏཱཔཏྟིམགྒཝཛ྄ཛྷནཱནཏྟེན ཨདྷམྨཏེཛོ སངྒཧེཏབྦོ.

ནིདྡེསེ སལླེཁཔཊིཔཀྑེན ཨསལླེཁེན སལླེཁཾ དསྶེཏུཀཱམེན ཨསལླེཁཔུབྦཀོ སལླེཁོ ནིདྡིཊྛོ. ནེཀྑམྨཱདཡོ སཏྟཏིཾས ཨེཀཏྟདྷམྨཱཝ པཙྩནཱིཀཱནཾ སལླིཁནཏོ ‘‘སལླེཁོ’’ཏི ¶ ཝུཏྟཱ. ཏསྨིཾ ནེཀྑམྨཱདིཀེ སཏྟཏིཾསཔབྷེདེ སལླེཁེ ཉཱཎཾ སལླེཁཊྛེ ཉཱཎནྟི.

སལླེཁཊྛཉཱཎནིདྡེསཝཎྞནཱ ནིཊྛིཏཱ.

༣༨. ཝཱིརིཡཱརམྦྷཉཱཎནིདྡེསཝཎྞནཱ

༨༩. ཝཱིརིཡཱརམྦྷཉཱཎནིདྡེསེ ¶ ཨནུཔྤནྣཱནནྟི ཨེཀསྨིཾ ཨཏྟབྷཱཝེ, ཨེཀསྨིཾ ཝཱ ཨཱརམྨཎེ ཨནིབྦཏྟཱནཾ. ཨནམཏགྒེ ཧི སཾསཱརེ ཨནུཔྤནྣཱ ཨཀུསལཱ ནཱམ ནཏྠི, ཀུསལཱ པན ཨཏྠི. པཱཔཀཱནནྟི ལཱམཀཱནཾ. ཨཀུསལཱནཾ དྷམྨཱནནྟི ཨཀོསལླསམྦྷཱུཏཱནཾ དྷམྨཱནཾ. ཨནུཔྤཱདཱཡཱཏི ན ཨུཔྤཱདནཏྠཱཡ. ཨུཔྤནྣཱནནྟི ཨིམསྨིཾ ཨཏྟབྷཱཝེ ནིབྦཏྟཱནཾ. པཧཱནཱཡཱཏི པཛཧནཏྠཱཡ. ཨནུཔྤནྣཱནཾ ཀུསལཱནཾ དྷམྨཱནནྟི ཨིམསྨིཾ ཨཏྟབྷཱཝེ ཨནིབྦཏྟཔུབྦཱནཾ ¶ ཀོསལླསམྦྷཱུཏཱནཾ དྷམྨཱནཾ. ཨུཔྤཱདཱཡཱཏི ཨུཔྤཱདནཏྠཱཡ. ཨུཔྤནྣཱནནྟི ཨིམསྨིཾ ཨཏྟབྷཱཝེ ནིབྦཏྟཱནཾ. ཋིཏིཡཱཏི ཋིཏཏྠཱཡ. ཨསམྨོསཱཡཱཏི ཨཝིནཱསཏྠཱཡ. བྷིཡྻོབྷཱཝཱཡཱཏི པུནཔྤུནབྷཱཝཱཡ. ཝེཔུལླཱཡཱཏི ཝིཔུལབྷཱཝཱཡ. བྷཱཝནཱཡཱཏི ཝཌྜྷིཡཱ. པཱརིཔཱུརིཡཱཏི པརིཔཱུརཎཏྠཱཡ.

ཨིདཱནི ཨཀུསལེསུ ཀཱམཙྪནྡཾ, ཀུསལེསུ ནེཀྑམྨཾ ཝིསེསེཏྭཱ དསྶེཏུཾ ཨནུཔྤནྣསྶ ཀཱམཙྪནྡསྶཱཏིཨཱདིམཱཧ. ཏཏྠ ཀཱམཙྪནྡོཏི སམཱདྷིཔཊིཔཀྑོ ཀཱམརཱགོ. ནེཀྑམྨནྟི པཋམཛ྄ཛྷཱནསམཱདྷི, པཋམཛ྄ཛྷཱནཾ ཝཱ, སབྦེ ཨེཝ ཝཱ ཀུསལཱ དྷམྨཱ ནེཀྑམྨཾ.

ཨིདཱནི སབྦཀིལེསཱནཾ སབྦཀིལེསཔཊིཔཀྑསྶ ཨརཧཏྟམགྒསྶ ཙ ཝསེན ཡོཛེཏྭཱ དསྶེཏུཾ ཨནུཔྤནྣཱནཾ སབྦཀིལེསཱནནྟིཨཱདིམཱཧ. ཏཏྠ ཨུཔྤནྣསྶ ཨརཧཏྟམགྒསྶ ཋིཏིཡཱཏིཨཱདཱིསུ ཨུཔྤཱདཀྑཎེ ཨུཔྤནྣསྶ ཨརཧཏྟམགྒསྶ ཋིཏིཀྑཎབྷངྒཀྑཎཝསེན ‘‘ཋིཏིཡཱ’’ཏིཨཱདིཡོཛནཱ ཝེདིཏབྦཱ. ཝིབྷངྒཊྛཀཐཱཡམྤི ‘‘ཡཱ ཙསྶ པཝཏྟི, ཨཡམེཝ ཋིཏི ནཱམཱ’’ཏི (ཝིབྷ. ཨཊྛ. ༤༠༦) ཝུཏྟཾ. ཀེཙི པན ‘‘ཨརཧཏྟམགྒསྶ པུབྦབྷཱགམགྒོ དཊྛབྦོ’’ཏི ཝདནྟི.

ཝཱིརིཡཱརམྦྷཉཱཎནིདྡེསཝཎྞནཱ ནིཊྛིཏཱ.

༣༩. ཨཏྠསནྡསྶནཉཱཎནིདྡེསཝཎྞནཱ

༩༠. ཨཏྠསནྡསྶནཉཱཎནིདྡེསེ ¶ ¶ པཉྩཀྑནྡྷཱཏིཨཱདཱིནི ཝུཏྟཏྠཱནེཝ. པཀཱསེཏཱིཏི པཱཀཊཾ ཀརོཏི, སོཏཱུནཾ ཉཱཎཙཀྑུནཱ དསྶནཾ སམྤཱདེཏཱིཏི ཨཏྠོ. ནཱནཱདྷམྨཱཏི ལོཀིཡལོཀུཏྟརཱ སབྦདྷམྨཱ ཝུཏྟཱ. ཀསྨཱ པཀཱསནཱནིདྡེསེ ལོཀིཡཱ ཨེཝ ཝུཏྟཱཏི ཙེ? ཨནིཙྩཱདིཝསེན པཀཱསནཱཡ ཨཱརདྡྷཏྟཱ. ལོཀུཏྟརཱནཉྩ ཨསམྨསནཱུཔགཏྟཱ ལོཀུཏྟརཱ ན ཝུཏྟཱ. ནཱནཱདྷམྨནིདྡེསེན པན ཨཏྠསནྡསྶནནིདྡེསེན ཙ ཏེསཾ སངྒཧིཏཏྟཱ ཡཐཱ ཏེ པཀཱསེཏབྦཱ, ཏཐཱ པཀཱསནཱ པཀཱསནཱཡེཝ. པཛཧནྟོཏི སོཏཱརཾ པཛཧཱཔེནྟོཏི ཨཏྠོ. སནྡསྶེཏཱིཏི སོཏཱུནཾ སམྨཱ དསྶེཏི. ཀེཙི པན ‘‘ཀཱམཙྪནྡསྶ པཧཱིནཏྟཱ ནེཀྑམྨཏྠཾ ¶ སནྡསྶེཏཱི’’ཏིཨཱདིནཱ ནཡེན པཋནྟི. ཏེསཾ ཨུཛུཀམེཝ སོཏཱུནཾ དོསཔྤཧཱནེ གུཎཔཊིལཱབྷེ ཙ ཀཏེ སིཁཱཔྤཏྟཾ དེསནཱཉཱཎཾ ཧོཏཱིཏི དསྶནཏྠཾ ཨཡཾ ནཡོ ཝུཏྟོཏི ཝེདིཏབྦོ.

ཨཏྠསནྡསྶནཉཱཎནིདྡེསཝཎྞནཱ ནིཊྛིཏཱ.

༤༠. དསྶནཝིསུདྡྷིཉཱཎནིདྡེསཝཎྞནཱ

༩༡. དསྶནཝིསུདྡྷིཉཱཎནིདྡེསེ ¶ སབྦེ དྷམྨཱ ཨེཀསངྒཧིཏཱཏི སབྦེ སངྑཏཱསངྑཏཱ དྷམྨཱ ཨེཀེན སངྒཧིཏཱ པརིཙྪིནྣཱ. ཏཐཊྛེནཱཏི བྷཱུཏཊྛེན, ཨཏྟནོ ཨཏྟནོ སབྷཱཝཝསེན ཝིཛྫམཱནཏྠེནཱཏི ཨཏྠོ. ཨནཏྟཊྛེནཱཏི ཀཱརཀཝེདཀསངྑཱཏེན ཨཏྟནཱ རཧིཏཊྛེན. སཙྩཊྛེནཱཏི ཨཝིསཾཝཱདཀཊྛེན, ཨཏྟནོ སབྷཱཝཉྙཐཏྟཱབྷཱཝེནཱཏི ཨཏྠོ. པཊིཝེདྷཊྛེནཱཏི སབྷཱཝཏོ ཉཱཎེན པཊིཝིཛ྄ཛྷིཏབྦཊྛེན. ཨིདྷ ལོཀུཏྟརཉཱཎེན ཨསམྨོཧཏོ ཨཱརམྨཎཏོ ཙ པཊིཝེདྷོ ཝེདིཏབྦོ. ཨབྷིཛཱནནཊྛེནཱཏི ལོཀིཀེན ཉཱཎེན ཨཱརམྨཎཏོ, ལོཀུཏྟརེན ཉཱཎེན ཨསམྨོཧཏོ ཨཱརམྨཎཏོ ཙ ཏེསཾ ཏེསཾ དྷམྨཱནཾ སབྷཱཝཏོ ཨབྷིཛཱནིཏབྦཊྛེན. ‘‘སབྦཾ, བྷིཀྑཝེ, ཨབྷིཉྙེཡྻ’’ནྟི (སཾ. ནི. ༤.༤༦) ཧི ཝུཏྟཾ. པརིཛཱནནཊྛེནཱཏི ཝུཏྟནཡེནེཝ ལོཀིཡལོཀུཏྟརེཧི ཉཱཎེཧི སབྷཱཝཏོ ཨབྷིཉྙཱཏཱནཾ དྷམྨཱནཾ ཨནིཙྩཱདིཏོ ནིཡྻཱནཱདིཏོ ཙ པརིཙྪིནྡིཏྭཱ ཛཱནིཏབྦཊྛེན. ‘‘སབྦཾ, བྷིཀྑཝེ, པརིཉྙེཡྻ’’ནྟི ཧི ཝུཏྟཾ. དྷམྨཊྛེནཱཏི སབྷཱཝདྷཱརཎཱདིནཱ དྷམྨཊྛེན. དྷཱཏུཊྛེནཱཏི ནིཛྫཱིཝཏཱདིནཱ དྷཱཏུཊྛེན. ཉཱཏཊྛེནཱཏི ལོཀིཡལོཀུཏྟརེཧི ཉཱཎེཧི ཉཱཏུཾ སཀྐུཎེཡྻཊྛེན. ཡཐཱ དཊྛུཾ སཀྐུཎེཡྻཱདིནཱ ཨཏྠེན ‘‘དིཊྛཾ སུཏཾ མུཏཾ ཝིཉྙཱཏཾ རཱུཔ’’ནྟི ཝུཏྟཾ, ཨེཝམིདྷཱཔི ཉཱཏུཾ སཀྐུཎེཡྻཊྛོ ཉཱཏཊྛོཏི ཝེདིཏབྦོ. སཙྪིཀིརིཡཊྛེནཱཏི ¶ ཨཱརམྨཎཏོ པཙྩཀྑཀཱཏབྦཊྛེན. ཕུསནཊྛེནཱཏི པཙྩཀྑཀཏསྶ ཨཱརམྨཎཏོ པུནཔྤུནཾ ཕུསིཏབྦཊྛེན. ཨབྷིསམཡཊྛེནཱཏི ལོཀིཀེན ཉཱཎེན ཨབྷིསམཱགནྟབྦཊྛེན. ཀིཉྩཱཔི ཧི ‘‘ཏཐཊྛེ པཉྙཱ སཙྩཝིཝཊྚེ ཉཱཎཾ, ཨབྷིཉྙཱཔཉྙཱ ཉཱཏཊྛེ ཉཱཎཾ, སཙྪིཀིརིཡཱཔཉྙཱ ཕསྶནཊྛེ ཉཱཎ’’ནྟི ཨེཀེཀམེཝ ཉཱཎཾ ཝུཏྟཾ. ཨཊྛཀཐཱཡཉྩ –

‘‘སམཝཱཡེ ¶ ཁཎེ ཀཱལེ, སམཱུཧེ ཧེཏུདིཊྛིསུ;

པཊིལཱབྷེ པཧཱནེ ཙ, པཊིཝེདྷེ ཙ དིསྶཏཱི’’ཏི ¶ . –

གཱཐཱཝཎྞནཱཡཾ ཨབྷིསམཡསདྡསྶ པཊིཝེདྷཏྠོ ཝུཏྟོ, ཨིདྷ པན ཡཐཱཝུཏྟེན ཨཏྠེན ཏེསཾ ནཱནཏྟཾ ཝེདིཏབྦཾ. ཨཊྛཀཐཱཡམེཝ ཧི སོ ལོཀིཡཉཱཎཝསེན དྷམྨཱབྷིསམཡོ ཝུཏྟོཏི.

ཀཱམཙྪནྡོ ནཱནཏྟནྟི ཝིཀྑེཔསབྦྷཱཝཏོ ནཱནཱརམྨཎཏྟཱ ཙ ནཱནཱསབྷཱཝོཏི ཨཏྠོ. ཨེཝཾ སབྦཀིལེསཱ ཝེདིཏབྦཱ. ནེཀྑམྨཾ ཨེཀཏྟནྟི ཙིཏྟེཀགྒཏཱསབྦྷཱཝཏོ ནཱནཱརམྨཎཝིཀྑེཔཱབྷཱཝཏོ ཙ ཨེཀསབྷཱཝནྟི ཨཏྠོ. ཨེཝཾ སབྦཀུསལཱ ཝེདིཏབྦཱ. ཨིདྷ པེཡྻཱལེན སཾཁིཏྟཱནཾ བྱཱཔཱདཱདཱིནཾ ཨཀུསལཱནཾ ཡཐཱཝུཏྟེན ཨཏྠེན ནཱནཏྟཾ ཝེདིཏབྦཾ. ཝིཏཀྐཝིཙཱརཱདཱིནཾ པན ཧེཊྛིམཱནཾ ཧེཊྛིམཱནཾ ཨུཔརིམཏོ ཨུཔརིམཏོ ཨོལཱ༹རིཀཊྛེན ནཱནཏྟཾ ཝེདིཏབྦཾ. ཡསྨཱ ཨེཀསངྒཧིཏནཱནཏྟེཀཏྟཱནཾ པཊིཝེདྷོ མགྒཀྑཎེ སཙྩཔཊིཝེདྷེན སིཛ྄ཛྷཏི, ཏསྨཱ ‘‘པཊིཝེདྷོ’’ཏི པདཾ ཨུདྡྷརིཏྭཱ སཙྩཱབྷིསམཡཾ དསྶེསི.

པརིཉྙཱ པཊིཝེདྷཾ པཊིཝིཛ྄ཛྷཏཱིཏི པརིཉྙཱབྷིསམཡེན ཨབྷིསམེཏི. ཨེས ནཡོ སེསེསུ. སཙྩཱབྷིསམཡཀཱལསྨིཉྷི མགྒཉཱཎསྶ ཨེཀཀྑཎེ པརིཉྙཱ, པཧཱནཾ, སཙྪིཀིརིཡཱ, བྷཱཝནཱཏི ཙཏྟཱརི ཀིཙྩཱནི ཧོནྟི. ཡཐཱ ནཱཝཱ ཨཔུབྦཾ ཨཙརིམཾ ཨེཀཀྑཎེ ཙཏྟཱརི ཀིཙྩཱནི ཀརོཏི, ཨོརིམཾ ཏཱིརཾ པཛཧཏི, སོཏཾ ཚིནྡཏི, བྷཎྜཾ ཝཧཏི, པཱརིམཾ ཏཱིརཾ ཨཔྤེཏི, ཨེཝམེཝ མགྒཉཱཎཾ ཨཔུབྦཾ ཨཙརིམཾ ཨེཀཀྑཎེ ཙཏྟཱརི སཙྩཱནི ཨབྷིསམེཏི, དུཀྑཾ པརིཉྙཱབྷིསམཡེན ཨབྷིསམེཏི, སམུདཡཾ པཧཱནཱབྷིསམཡེན ཨབྷིསམེཏི, མགྒཾ བྷཱཝནཱབྷིསམཡེན ཨབྷིསམེཏི, ནིརོདྷཾ སཙྪིཀིརིཡཱབྷིསམཡེན ཨབྷིསམེཏི. ཀིཾ ཝུཏྟཾ ཧོཏི? ནིརོདྷཾ ཨཱརམྨཎཾ ཀཏྭཱ ཀིཙྩཝསེན ཙཏྟཱརིཔི སཙྩཱནི པཱཔུཎཱཏི པསྶཏི པཊིཝིཛ྄ཛྷཏཱིཏི. ཡཐཱ ཨོརིམཾ ཏཱིརཾ པཛཧཏི, ཨེཝཾ མགྒཉཱཎཾ དུཀྑཾ པརིཛཱནཱཏི. ཡཐཱ སོཏཾ ཚིནྡཏི, ཨེཝཾ སམུདཡཾ པཛཧཏི. ཡཐཱ བྷཎྜཾ ཝཧཏི, ཨེཝཾ སཧཛཱཏཱདིཔཙྩཡཏཱཡ མགྒཾ བྷཱཝེཏི. ཡཐཱ པཱརིམཾ ཏཱིརཾ ཨཔྤེཏི, ཨེཝཾ པཱརིམཏཱིརབྷཱུཏཾ ནིརོདྷཾ སཙྪིཀརོཏཱིཏི ཨེཝཾ ཨུཔམཱསཾསནྡནཾ ཝེདིཏབྦཾ.

དསྶནཾ ¶ ཝིསུཛ྄ཛྷཏཱིཏི ཏཾཏཾམགྒཝཛ྄ཛྷཀིལེསཏམཔྤཧཱནེན ཉཱཎདསྶནཾ ཝིསུདྡྷིབྷཱཝཾ པཱཔུཎཱཏི. དསྶནཾ ཝིསུདྡྷནྟི ཏསྶ ཏསྶ ཕལསྶ ཨུཔྤཱདཀྑཎེ ¶ ཏསྶ ཏསྶ ¶ མགྒཉཱཎསྶ ཀིཙྩསིདྡྷིཔྤཏྟིཏོ ཉཱཎདསྶནཾ ཝིསུདྡྷིབྷཱཝཾ པཏྟཾ ཧོཏི. སབྦདྷམྨཱནཾ ཨེཀསངྒཧིཏཱཡ ནཱནཏྟེཀཏྟཔཊིཝེདྷཔཉྙཱཡ མགྒཕལཉཱཎེཧི སིདྡྷིཏོ ཨནྟེ མགྒཕལཉཱཎཱནི ཝུཏྟཱནི.

དསྶནཝིསུདྡྷིཉཱཎནིདྡེསཝཎྞནཱ ནིཊྛིཏཱ.

༤༡-༤༢. ཁནྟིཉཱཎཔརིཡོགཱཧཎཉཱཎནིདྡེསཝཎྞནཱ

༩༢-༩༣. ཁནྟིཉཱཎཔརིཡོགཱཧཎཉཱཎནིདྡེསེསུ ¶ རཱུཔཾ ཨནིཙྩཏོ ཝིདིཏནྟི ཨནིཙྩཱནུཔསྶནཱཡ ཨནིཙྩནྟི ཉཱཏཾ. རཱུཔཾ དུཀྑཏོ ཝིདིཏནྟི དུཀྑཱནུཔསྶནཱཡ དུཀྑནྟི ཉཱཏཾ. རཱུཔཾ ཨནཏྟཏོ ཝིདིཏནྟི ཨནཏྟཱནུཔསྶནཱཡ ཨནཏྟཱཏི ཉཱཏཾ. ཡཾ ཡཾ ཝིདིཏཾ, ཏཾ ཏཾ ཁམཏཱིཏི ཡཾ ཡཾ རཱུཔཾ ཨནིཙྩཱདིཏོ ཝིདིཏཾ, ཏཾ ཏཾ རཱུཔཾ ཨནིཙྩཱདིཏོ ཁམཏི རུཙྩཏི. ‘‘རཱུཔཾ ཨནིཙྩཏོ ཝིདིཏཾ, ཡཾ ཡཾ ཝིདིཏཾ, ཏཾ ཏཾ ཁམཏཱི’’ཏི ཝིསུཾ ཝིསུཉྩ ཀཏྭཱ ཀེསུཙི པོཏྠཀེསུ ལིཁིཏཾ. ‘‘ཝེདནཱ སཉྙཱ སངྑཱརཱ ཨནིཙྩཏོ ཝིདིཏཱ’’ཏིཨཱདིནཱ ལིངྒཝཙནཱནི པརིཝཏྟེཏྭཱ ཡོཛེཏབྦཱནི. ཕུསཏཱིཏི ཝིཔསྶནཱཉཱཎཕུསནེན ཕུསཏི ཕརཏི. པརིཡོགཧཏཱིཏི ཝིཔསྶནཱཉཱཎེན པཝིསཏི. པརིཡོགཱཧཏཱིཏིཔི པཱཋོ.

ཁནྟིཉཱཎཔརིཡོགཱཧཎཉཱཎནིདྡེསཝཎྞནཱ ནིཊྛིཏཱ.

༤༣. པདེསཝིཧཱརཉཱཎནིདྡེསཝཎྞནཱ

༩༤. པདེསཝིཧཱརཉཱཎནིདྡེསེ ¶ ཡེནཱཀཱརེན མཱཏིཀཱཡ ཨུདྡིཊྛོ པདེསོ པཙྩཝེཀྑིཏབྦོ, ཏཾ དསྶེནྟོ མིཙྪཱདིཊྛིཔཙྩཡཱཔི ཝེདཡིཏནྟིཨཱདིམཱཧ. ཏཏྠ མིཙྪཱདིཊྛིཔཙྩཡཱཏི དིཊྛིསམྤཡུཏྟཝེདནཱཔི ཝཊྚཏི དིཊྛིཾ ཨུཔནིསྶཡཾ ཀཏྭཱ ཨུཔྤནྣཱ ཀུསལཱཀུསལཝེདནཱཔི ཝིཔཱཀཝེདནཱཔི. ཏཏྠ མིཙྪཱདིཊྛིསམྤཡུཏྟཱ ཨཀུསལཱཝ ཧོཏི, དིཊྛིཾ པན ཨུཔནིསྶཱཡ ཀུསལཱཔི ཨུཔྤཛྫནྟི ཨཀུསལཱཔི. མིཙྪཱདིཊྛིཀཱ ཧི དིཊྛིཾ ཨུཔནིསྶཱཡ པཀྑདིཝསེསུ ཡཱགུབྷཏྟཱདཱིནི ¶ དེནྟི, ཨནྡྷཀུཊྛིཨཱདཱིནཾ ཝཏྟཾ པཊྛཔེནྟི, ཙཏུམཧཱཔཐེ སཱལཾ ཀརོནྟི, པོཀྑརཎིཾ ཁཎཱཔེནྟི, པུཔྥཱརཱམཾ ཕལཱརཱམཾ རོཔེནྟི, ནདཱིཝིདུགྒེསུ སེཏུཾ ཨཏྠརནྟི, ཝིསམཾ སམཾ ཀརོནྟི. ཨིཏི ཏེསཾ ཀུསལཱ ཝེདནཱ ¶ ཨུཔྤཛྫཏི. མིཙྪཱདིཊྛིཾ པན ནིསྶཱཡ སམྨཱདིཊྛིཀེ ཨཀྐོསནྟི པརིབྷཱསནྟི ཝདྷབནྡྷཱདཱིནི ཀརོནྟི, པཱཎཾ ཝདྷིཏྭཱ དེཝཏཱནཾ ཨུཔཧརནྟི. ཨིཏི ནེསཾ ཨཀུསལཱ ཝེདནཱ ཨུཔྤཛྫཏི. ཝིཔཱཀཝེདནཱ པན བྷཝནྟརགཏཱནཾ ཧོཏི. སཱ པན མིཙྪཱདིཊྛི སཧཛཱཏཱཡ ཝེདནཱཡ སཧཛཱཏཨཉྙམཉྙནིསྶཡསམྤཡུཏྟཨཏྠིཨཝིགཏཔཙྩཡེཧི པཙྩཡོ ཧོཏི, སམནནྟརནིརུདྡྷཱ མིཙྪཱདིཊྛི པཙྩུཔྤནྣམིཙྪཱདིཊྛིསམྤཡུཏྟཱཡ ཝེདནཱཡ ཨནནྟརསམནནྟརཱུཔནིསྶཡཨཱསེཝནནཏྠིཝིགཏཔཙྩཡེཧི པཙྩཡོ ཧོཏི, མིཙྪཱདིཊྛིཾ གརུཾ ཀཏྭཱ ཨབྷིནནྡནྟསྶ ལོབྷསཧགཏཝེདནཱཡ ཨཱརམྨཎཨཱརམྨཎཱདྷིཔཏིཨཱརམྨཎཱུཔནིསྶཡཔཙྩཡེཧི པཙྩཡོ ཧོཏི, སབྦཱཀུསལེཧི མིཙྪཱདིཊྛིཾ ཨཱརམྨཎམཏྟཾ ཀརོནྟསྶ སབྦཱཀུསལཝེདནཱཡ མིཙྪཱདིཊྛིཾ པཙྩཝེཀྑནྟསྶ ཝིཔསྶནྟསྶ ཀུསལཱབྱཱཀཏཝེདནཱཡ ཨཱརམྨཎཔཙྩཡེན པཙྩཡོ ཧོཏི, མིཙྪཱདིཊྛིཔཙྩཡེན ཨུཔྤཛྫམཱནཱནཾ ཀུསལཱཀུསལཝེདནཱནཾ བྷཝནྟརེ ཝིཔཱཀཝེདནཱནཉྩ ཨུཔནིསྶཡཔཙྩཡེན པཙྩཡོ ཧོཏི.

མིཙྪཱདིཊྛིཝཱུཔསམཔཙྩཡཱཏི ¶ མིཙྪཱདིཊྛིཝཱུཔསམོ ནཱམ སམྨཱདིཊྛི, ཏསྨཱ ཡཾ སམྨཱདིཊྛིཔཙྩཡཱ ཝེདཡིཏཾ ཝུཏྟཾ, ཏདེཝ ‘‘མིཙྪཱདིཊྛིཝཱུཔསམཔཙྩཡཱ’’ཏི ཝེདིཏབྦཾ. ཀེཙི པན ‘‘མིཙྪཱདིཊྛིཝཱུཔསམོ ནཱམ ཝིཔསྶནཱཀྑཎེ སོཏཱཔཏྟིམགྒཀྑཎེ ཙཱ’’ཏི ཝདནྟི.

སམྨཱདིཊྛིཔཙྩཡཱཔི ཝེདཡིཏནྟི ཨེཏྠཱཔི སམྨཱདིཊྛིསམྤཡུཏྟཝེདནཱཔི ཝཊྚཏི སམྨཱདིཊྛིཾ ཨུཔནིསྶཡཾ ཀཏྭཱ ཨུཔྤནྣཱ ཀུསལཱཀུསལཝེདནཱཔི ཝིཔཱཀཝེདནཱཔི. ཏཏྠ སམྨཱདིཊྛིསམྤཡུཏྟཱ ཀུསལཱཝ ཧོཏི, སམྨཱདིཊྛིཾ པན ཨུཔནིསྶཱཡ བུདྡྷཔཱུཛཱ དཱིཔམཱལཱརོཔནཾ མཧཱདྷམྨསྶཝནཾ ཨཔྤཏིཊྛིཏེ དིསཱབྷཱགེ ཙེཏིཡཔཏིཊྛཱཔནནྟི ཨེཝམཱདཱིནི པུཉྙཱནི ཀརོནྟི. ཨིཏི ནེསཾ ཀུསལཱ ཝེདནཱ ཨུཔྤཛྫཏི. སམྨཱདིཊྛིམེཝ ནིསྶཱཡ མིཙྪཱདིཊྛིཀེ ཨཀྐོསནྟི པརིབྷཱསནྟི, ཨཏྟཱནཾ ཨུཀྐཾསནྟི, པརཾ ཝམྦྷེནྟི. ཨིཏི ནེསཾ ཨཀུསལཱ ཝེདནཱ ཨུཔྤཛྫཏི. ཝིཔཱཀཝེདནཱ པན བྷཝནྟརགཏཱནཾཡེཝ ཧོཏི. སཱ པན སམྨཱདིཊྛི སཧཛཱཏཱཡ སམནནྟརནིརུདྡྷཱཡ པཙྩུཔྤནྣཱཡ ཝེདནཱཡ མིཙྪཱདིཊྛིཡཱ ཝུཏྟཔཙྩཡེཧེཝ པཙྩཡོ ཧོཏི, ལོཀིཀསམྨཱདིཊྛི པཙྩཝེཀྑཎསམྤཡུཏྟཱཡ ཝིཔསྶནཱསམྤཡུཏྟཱཡ ནིཀནྟིསམྤཡུཏྟཱཡ ཙ ཝེདནཱཡ ཨཱརམྨཎཔཙྩཡེན པཙྩཡོ ཧོཏི, མིཙྪཱདིཊྛིཡཱ ཝུཏྟནཡེནེཝ ཨུཔནིསྶཡཔཙྩཡེན པཙྩཡོ ཧོཏི, མགྒཕལསམྨཱདིཊྛི པཙྩཝེཀྑཎསམྤཡུཏྟཱཡ ¶ ཝེདནཱཡ ཨཱརམྨཎཨཱརམྨཎཱདྷིཔཏིཨཱརམྨཎཱུཔནིསྶཡཔཙྩཡཝསེན པཙྩཡོ ཧོཏི.

སམྨཱདིཊྛིཝཱུཔསམཔཙྩཡཱཔི ¶ ཝེདཡིཏནྟི སམྨཱདིཊྛིཝཱུཔསམོ ནཱམ མིཙྪཱདིཊྛི, ཏསྨཱ ཡཾ མིཙྪཱདིཊྛིཔཙྩཡཱ ཝེདཡིཏཾ ཝུཏྟཾ, ཏདེཝ ‘‘སམྨཱདིཊྛིཝཱུཔསམཔཙྩཡཱ’’ཏི ཝེདིཏབྦཾ. མིཙྪཱསངྐཔྤཔཙྩཡཱ མིཙྪཱསངྐཔྤཝཱུཔསམཔཙྩཡཱཏིཨཱདཱིསུཔི ཨེསེཝ ནཡོ. ཡསྶ ཡསྶ ཧི ‘‘ཝཱུཔསམཔཙྩཡཱ’’ཏི ཝུཙྩཏི, ཏསྶ ཏསྶ པཊིཔཀྑདྷམྨཔཙྩཡཱཝ ཏཾ ཏཾ ཝེདཡིཏཾ ཨདྷིཔྤེཏཾ. མིཙྪཱཉཱཎཱདཱིསུ པན མིཙྪཱཉཱཎཾ ནཱམ པཱཔཀིརིཡཱསུ ཨུཔཱཡཙིནྟཱ. ཨཐ ཝཱ མིཙྪཱཉཱཎཾ མིཙྪཱཔཙྩཝེཀྑཎཉཱཎཾ. སམྨཱཉཱཎཾ ནཱམ ཝིཔསྶནཱསམྨཱདིཊྛིཾ ¶ ལོཀུཏྟརསམྨཱདིཊྛིཉྩ ཋཔེཏྭཱ ཨཝསེསཀུསལཱབྱཱཀཏཾ ཉཱཎཾ. མིཙྪཱཝིམུཏྟི ནཱམ པཱཔཱདྷིམུཏྟིཏཱ. ཨཐ ཝཱ ཨཡཱཐཱཝཝིམུཏྟི ཨནིཡྻཱནིཀཝིམུཏྟི ཨཝིམུཏྟསྶེཝ སཏོ ཝིམུཏྟིསཉྙཱིཏི. སམྨཱཝིམུཏྟི ནཱམ ཀལྱཱཎཱདྷིམུཏྟིཏཱ ཕལཝིམུཏྟི ཙ. སམྨཱདིཊྛིཨཱདཡོ ཧེཊྛཱ ཝུཏྟཏྠཱཡེཝ.

ཚནྡཔཙྩཡཱཔཱིཏིཨཱདཱིསུ པན ཚནྡོ ནཱམ ལོབྷོ, ཚནྡཔཙྩཡཱ ཨཊྛལོབྷསཧགཏཙིཏྟསམྤཡུཏྟཝེདནཱ ཝེདིཏབྦཱ. ཚནྡཝཱུཔསམཔཙྩཡཱ པཋམཛ྄ཛྷཱནཝེདནཱཝ. ཝིཏཀྐཔཙྩཡཱ པཋམཛ྄ཛྷཱནཝེདནཱ. ཝིཏཀྐཝཱུཔསམཔཙྩཡཱ དུཏིཡཛ྄ཛྷཱནཝེདནཱ. སཉྙཱཔཙྩཡཱ ཋཔེཏྭཱ པཋམཛ྄ཛྷཱནཾ སེསཱ ཚ སམཱཔཏྟིཝེདནཱ. སཉྙཱཝཱུཔསམཔཙྩཡཱ ནེཝསཉྙཱནཱསཉྙཱཡཏནཝེདནཱ.

ཚནྡོ ཙ ཨཝཱུཔསནྟོ ཧོཏཱིཏིཨཱདཱིསུ སཙེ ཚནྡཝིཏཀྐསཉྙཱ ཨཝཱུཔསནྟཱ ཧོནྟཱིཏི ཨཏྠོ. ཏཔྤཙྩཡཱཏི སོ ཚནྡཝིཏཀྐསཉྙཱནཾ ཨཝཱུཔསམོ ཨེཝ པཙྩཡོ ཏཔྤཙྩཡོ, ཏསྨཱ ཏཔྤཙྩཡཱ. ཚནྡཝིཏཀྐསཉྙཱཨཝཱུཔསམཔཙྩཡཱ ཝེདནཱ ཧོཏཱིཏི ཨཏྠོ. སཱ ཨཊྛལོབྷསཧགཏཙིཏྟསམྤཡུཏྟཝེདནཱ ཧོཏི. སཙེ ཚནྡོ ཝཱུཔསནྟོ ཝིཏཀྐསཉྙཱ ཨཝཱུཔསནྟཱ. ཏཔྤཙྩཡཱཏི སོ ཚནྡསྶ ཝཱུཔསམོ ཝིཏཀྐསཉྙཱནཾ ཨཝཱུཔསམོ ཨེཝ པཙྩཡོ ཏཔྤཙྩཡོ, ཏསྨཱ ཏཔྤཙྩཡཱ. སཱ པཋམཛ྄ཛྷཱནཝེདནཱཝ. སཙེ ཚནྡཝིཏཀྐཱ ཝཱུཔསནྟཱ སཉྙཱ ཨཝཱུཔསནྟཱ. ཏཔྤཙྩཡཱཏི སོ ཚནྡཝིཏཀྐཱནཾ ཝཱུཔསམོ སཉྙཱཡ ཨཝཱུཔསམོ ཨེཝ པཙྩཡོ ཏཔྤཙྩཡོ, ཏསྨཱ ཏཔྤཙྩཡཱ. སཱ དུཏིཡཛ྄ཛྷཱནཝེདནཱཝ. སཙེ ཚནྡཝིཏཀྐསཉྙཱ ཝཱུཔསནྟཱ. ཏཔྤཙྩཡཱཏི སོ ཚནྡཝིཏཀྐསཉྙཱནཾ ཝཱུཔསམོ ཨེཝ པཙྩཡོ ཏཔྤཙྩཡོ, ཏསྨཱ ཏཔྤཙྩཡཱ. སཱ ནེཝསཉྙཱནཱསཉྙཱཡཏནཝེདནཱཝ. ཀེཙི པན ‘‘ཚནྡོ ནཱམ ཨཔྤནཾ པཱཔུཎིསྶཱམཱིཏི པུབྦབྷཱགེ ¶ དྷམྨཙྪནྡོ, ཨཔྤནཱཔྤཏྟསྶ སོ ཚནྡོ ཝཱུཔསནྟོ ཧོཏི. པཋམཛ྄ཛྷཱནེ ཝིཏཀྐོ ཧོཏི, དུཏིཡཛ྄ཛྷཱནཔྤཏྟསྶ ཝིཏཀྐོ ཝཱུཔསནྟོ ཧོཏི. སཏྟསུ སམཱཔཏྟཱིསུ སཉྙཱ ཧོཏི, ནེཝསཉྙཱནཱསཉྙཱཡཏནཾ སམཱཔནྣསྶ ཙ ནིརོདྷཾ སམཱཔནྣསྶ ཙ སཉྙཱ ཝཱུཔསནྟཱ ཧོཏཱི’’ཏི ཨེཝཾ ཝཎྞཡནྟི. ཨིདྷ པན ནིརོདྷསམཱཔཏྟི ན ཡུཛྫཏི. ཨཔྤཏྟསྶ ¶ པཏྟིཡཱཏི ཨརཧཏྟཕལསྶ པཏྟཏྠཱཡ. ཨཏྠི ཨཱཡཝནྟི ཨཏྠི ཝཱིརིཡཾ. ཨཱཡཱཝནྟིཔི པཱཋོ. ཏསྨིམྤི ཋཱནེ ཨནུཔྤཏྟེཏི ཏསྶ ཝཱིརིཡཱརམྦྷསྶ ཝསེན ཏསྨིཾ ཨརཧཏྟཕལསྶ ཀཱརཎེ ཨརིཡམགྒེ ཨནུཔྤཏྟེ ¶ . ཏཔྤཙྩཡཱཔི ཝེདཡིཏནྟི ཨརཧཏྟསྶ ཋཱནཔཙྩཡཱ ཝེདཡིཏཾ. ཨེཏེན ཙཏུམགྒསཧཛཱཏཱ ནིབྦཏྟིཏལོཀུཏྟརཝེདནཱ གཧིཏཱ. ཀེཙི པན ‘‘ཨཱཡཝནྟི པཊིཔཏྟི. ཏསྨིམྤི ཋཱནེ ཨནུཔྤཏྟེཏི ཏསྶཱ བྷཱུམིཡཱ པཏྟིཡཱ’’ཏི ཝཎྞཡནྟི.

པདེསཝིཧཱརཉཱཎནིདྡེསཝཎྞནཱ ནིཊྛིཏཱ.

༤༤-༤༩. ཝིཝཊྚཉཱཎཚཀྐནིདྡེསཝཎྞནཱ

༩༥. ཝིཝཊྚཉཱཎཚཀྐནིདྡེསེ ¶ ནེཀྑམྨཱདྷིཔཏཏྟཱ པཉྙཱཏི ནེཀྑམྨཾ ཨདྷིཀཾ ཀཏྭཱ ནེཀྑམྨཱདྷིཀབྷཱཝེན པཝཏྟཱ པཉྙཱ. ཀཱམཙྪནྡཏོ སཉྙཱཡ ཝིཝཊྚཏཱིཏི ནེཀྑམྨཱདྷིཔཏིཀཏཔཉྙཱསམྤཡུཏྟསཉྙཱཡ ཧེཏུབྷཱུཏཱཡ, ཀརཎབྷཱུཏཱཡ ཝཱ ཀཱམཙྪནྡཏོ ཝིཝཊྚཏི པརཱཝཏྟཏི, པརམྨུཁཱི ཧོཏཱིཏི ཨཏྠོ. ཨེས ནཡོ སེསེསུ.

༩༦. ཀཱམཙྪནྡོ ནཱནཏྟནྟི ཀཱམཙྪནྡོ སནྟཝུཏྟིཏཱཡ ཨབྷཱཝཏོ ན ཨེཀསབྷཱཝོ. ནེཀྑམྨཾ ཨེཀཏྟནྟི ནེཀྑམྨཾ སནྟཝུཏྟིབྷཱཝཏོ ཨེཀསབྷཱཝོ. ནེཀྑམྨེཀཏྟཾ ཙེཏཡཏོཏི ཀཱམཙྪནྡེ ཨཱདཱིནཝདསྶནེན ནེཀྑམྨཾ པཝཏྟཡཏོ. ཀཱམཙྪནྡཏོ ཙིཏྟཾ ཝིཝཊྚཏཱིཏི དིཊྛཱདཱིནཝཏོ ཀཱམཙྪནྡཏོ ནེཀྑམྨཀྑཎེ ཙིཏྟཾ ཝིཝཊྚཏི. ཨེས ནཡོ སེསེསུ.

༩༧. ཀཱམཙྪནྡཾ པཛཧནྟོཏི ནེཀྑམྨཔཝཏྟིཀྑཎེ ཀཱམཙྪནྡཾ ཝིཀྑམྦྷནཔྤཧཱནེན པཛཧནྟོ. ནེཀྑམྨཝསེན ཙིཏྟཾ ཨདྷིཊྛཱཏཱིཏི པཊིལདྡྷསྶ ནེཀྑམྨསྶ ¶ ཝསེན ཏཾསམྤཡུཏྟཙིཏྟཾ ཨདྷིཏིཊྛཏི ཨདྷིཀཾ ཀརོནྟོ ཏིཊྛཏི, པཝཏྟེཏཱིཏི ཨཏྠོ. ཨེས ནཡོ སེསེསུ.

༩༨. ཙཀྑུ སུཉྙཾ ཨཏྟེན ཝཱཏི བཱལཛནཔརིཀཔྤིཏསྶ ཀཱརཀཝེདཀསངྑཱཏསྶ ཨཏྟནོ ཨབྷཱཝཱ ཙཀྑུ ཨཏྟེན ཙ སུཉྙཾ. ཡཉྷི ཡཏྠ ན ཧོཏི, ཏེན ཏཾ སུཉྙཾ ནཱམ ཧོཏི. ཨཏྟནིཡེན ཝཱཏི ཨཏྟནོ ཨབྷཱཝེནེཝ ཨཏྟནོ སནྟཀསྶཔི ཨབྷཱཝཱ ཨཏྟནོ སནྟཀེན ཙ སུཉྙཾ. ལོཀསྶ ཨཏྟཱཏི ཙ ཨཏྟནིཡནྟི ཙ ཨུབྷཡཐཱ གཱཧསམྦྷཝཏོ ཏདུབྷཡགཱཧཔཊིསེདྷནཏྠཾ ཨཏྟཱབྷཱཝོ ཙ ཨཏྟནིཡཱབྷཱཝོ ཙ ཝུཏྟོ. ནིཙྩེན ཝཱཏི བྷངྒཾ ཨཏིཀྐམིཏྭཱ ཏིཊྛནྟསྶ ཀསྶཙི ཨབྷཱཝཏོ ནིཙྩེན ཙ སུཉྙཾ. དྷུཝེན ཝཱཏི པཝཏྟིཀྑཎེཔི ཐིརསྶ ཀསྶཙི ཨབྷཱཝཏོ དྷུཝེན ཙ སུཉྙཾ. སསྶཏེན ཝཱཏི སབྦཀཱལེཔི ཝིཛྫམཱནསྶ ཀསྶཙི ཨབྷཱཝཏོ སསྶཏེན ¶ ¶ ཙ སུཉྙཾ. ཨཝིཔརིཎཱམདྷམྨེན ཝཱཏི ཛརཱབྷངྒཝསེན དྭིདྷཱ ཨཔརིཝཏྟམཱནཔཀཏིཀསྶ ཀསྶཙི ཨབྷཱཝཏོ ཨཝིཔརིཎཱམདྷམྨེན ཙ སུཉྙཾ. ཨཐ ཝཱ ནིཙྩབྷཱཝེན ཙ དྷུཝབྷཱཝེན ཙ སསྶཏབྷཱཝེན ཙ ཨཝིཔརིཎཱམདྷམྨབྷཱཝེན ཙ སུཉྙནྟི ཨཏྠོ. སམུཙྩཡཏྠོ ཝཱ-སདྡོ. ཡཐཱབྷཱུཏཾ ཛཱནཏོ པསྶཏོཏི ཨིཙྩེཝཾ ཨནཏྟཱནུཔསྶནཱཉཱཎེན ཡཐཱསབྷཱཝེན ཛཱནནྟསྶ ཙཀྑུནཱ ཝིཡ ཙ པསྶནྟསྶ. ཙཀྑཱབྷིནིཝེསཏོ ཉཱཎཾ ཝིཝཊྚཏཱིཏི ཙཀྑུ ཨཏྟཱཏི ཝཱ ཨཏྟནིཡནྟི ཝཱ པཝཏྟམཱནཏོ དིཊྛཱབྷིནིཝེསཏོ ཏདངྒཔྤཧཱནཝསེན ཉཱཎཾ ཝིཝཊྚཏི. ཨེས ནཡོ སེསེསུ.

༩༩. ནེཀྑམྨེན ཀཱམཙྪནྡཾ ཝོསཛྫཏཱིཏི ནེཀྑམྨལཱབྷཱི པུགྒལོ ནེཀྑམྨེན ཏཔྤཊིཔཀྑཾ ཀཱམཙྪནྡཾ པརིཙྩཛཏི. ཝོསགྒེ པཉྙཱཏི ཀཱམཙྪནྡསྶ ཝོསགྒབྷཱུཏེ ནེཀྑམྨེ ཏཾསམྤཡུཏྟཱ པཉྙཱ. ཨེས ནཡོ སེསེསུ. པཱིལ༹ནཊྛཱདཡོ ཧེཊྛཱ ཝུཏྟཏྠཱ ཨེཝ. པརིཛཱནནྟོ ཝིཝཊྚཏཱིཏི པུགྒལཱདྷིཊྛཱནཱ དེསནཱ, མགྒསམངྒཱིཔུགྒལོ དུཀྑསྶ ཙཏུབྦིདྷཾ ཨཏྠཾ ཀིཙྩཝསེན པརིཛཱནནྟོ དུབྷཏོ ཝུཊྛཱནཝསེན ཝིཝཊྚཏི, ཉཱཎཝིཝཊྚནེཔི ཉཱཎསམངྒཱི ཝིཝཊྚཏཱིཏི ཝུཏྟོ.

༡༠༠. ཏཐཊྛེ ¶ པཉྙཱཏི ཨེཏསྶ པུགྒལསྶེཝ ཏཐཊྛེ ཝིཝཊྚནཱ པཉྙཱ. ཨེས ནཡོ སེསེསུ. ཨིདཱནི མགྒཀྑཎེ ཨེཝ ཀིཙྩཝསེན ཨཱཀཱརནཱནཏྟཏོ ཚ ཝིཝཊྚཉཱཎཱནི དསྶེཏུཾ སཉྙཱཝིཝཊྚོཏིཨཱདིམཱཏིཀཾ ཋཔེཏྭཱ ཏཾ ཨཏྠཏོ ཝིབྷཛནྟོ སཉྫཱནནྟོ ཝིཝཊྚཏཱིཏིཨཱདིམཱཧ. ཏཏྠ སཉྫཱནནྟོ ཝིཝཊྚཏཱིཏི སཉྙཱཝིཝཊྚོཏི ཡསྨཱ པུབྦབྷཱགེ ནེཀྑམྨཱདིཾ ཨདྷིཔཏིཏོ སཉྫཱནནྟོ ཡོགཱི པཙྪཱ ནེཀྑམྨསམྤཡུཏྟཉཱཎེན ཀཱམཙྪནྡཱདིཏོ ཝིཝཊྚཏི, ཏསྨཱ ཏཾ ཉཱཎཾ སཉྙཱཝིཝཊྚོ ནཱམཱཏི ཨཏྠོ. ཙེཏཡནྟོ ཝིཝཊྚཏཱིཏི ཙེཏོཝིཝཊྚོཏི ཡསྨཱ ཡོགཱི ནེཀྑམྨེཀཏྟཱདཱིནི ཙེཏཡནྟོ སམྤཡུཏྟཉཱཎེན ཀཱམཙྪནྡཱདིཏོ ཝིཝཊྚཏི, ཏསྨཱ ཏཾ ཉཱཎཾ ཙེཏོཝིཝཊྚོ ནཱམཱཏི ཨཏྠོ. ཝིཛཱནནྟོ ཝིཝཊྚཏཱིཏི ཙིཏྟཝིཝཊྚོཏི ཡསྨཱ ཡོགཱི ནེཀྑམྨཱདིཝསེན ཙིཏྟཱདྷིཊྛཱནེན ཝིཛཱནནྟོ ཏཾསམྤཡུཏྟཉཱཎེན ཀཱམཙྪནྡཱདིཏོ ཝིཝཊྚཏི, ཏསྨཱ ཏཾ ཉཱཎཾ ཙིཏྟཝིཝཊྚོ ནཱམཱཏི ཨཏྠོ. ཉཱཎཾ ཀརོནྟོ ཝིཝཊྚཏཱིཏི ཉཱཎཝིཝཊྚོཏི ཡསྨཱ ཡོགཱི ཚབྦིདྷཾ ཨཛ྄ཛྷཏྟིཀཱཡཏནཾ ཨནཏྟཱནུཔསྶནཱཉཱཎེན སུཉྙཏོ ཝིདིཏཾ ¶ ཀརོནྟོ ཏེནེཝ ཉཱཎེན དིཊྛཱབྷིནིཝེསཏོ ཝིཝཊྚཏི, ཏསྨཱ ཏཾ ཉཱཎཾ ཉཱཎཝིཝཊྚོ ནཱམཱཏི ཨཏྠོ. ཝོསཛྫནྟོ ཝིཝཊྚཏཱིཏི ཝིམོཀྑཝིཝཊྚོཏི ཡསྨཱ ཡོགཱི ནེཀྑམྨཱདཱིཧི ཀཱམཙྪནྡཱདཱིནི ཝོསཛྫནྟོ ཏཾསམྤཡུཏྟཉཱཎེན ཀཱམཙྪནྡཱདིཏོ ཝིཝཊྚཏི, ཏསྨཱ ཏཾ ཉཱཎཾ ཝིམོཀྑཝིཝཊྚོ ནཱམཱཏི ཨཏྠོ. ཏཐཊྛེ ཝིཝཊྚཏཱིཏི སཙྩཝིཝཊྚོཏི ཡསྨཱ ཡོགཱི ཙཏུབྦིདྷེ ཏཐཊྛེ དུབྷཏོ ཝུཊྛཱནཝསེན ཝིཝཊྚཏི, ཏསྨཱ མགྒཉཱཎཾ སཙྩཝིཝཊྚོ ནཱམཱཏི ཨཏྠོ. མགྒཉཱཎམེཝ ཝཱ ཏཐཊྛེ དུབྷཏོ ཝུཊྛཱནབྷཱཝེན ཝིཝཊྚཏཱིཏི སཙྩཝིཝཊྚོཏི ཨཏྠོ.

ཡཏྠ ¶ སཉྙཱཝིཝཊྚོཏིཨཱདི སཙྩཝིཝཊྚཉཱཎནིདྡེསེ ཝུཏྟཏྟཱ སཙྩཝིཝཊྚཉཱཎཀྑཎམེཝ སནྡྷཱཡ ཝུཏྟནྟི ཝེདིཏབྦཾ. མགྒཀྑཎེཡེཝ ཧི སབྦཱནི ཡུཛྫནྟི. ཀཐཾ? ཉཱཎཝིཝཊྚེ ཉཱཎཉྷི ཝཛྫེཏྭཱ སེསེསུ ཨརིཡམགྒོ སརཱུཔེནེཝ ཨཱགཏོ. ཝིཔསྶནཱཀིཙྩསྶ པན མགྒེནེཝ སིཛ྄ཛྷནཏོ ཝིཔསྶནཱཀིཙྩསིདྡྷིཝསེན ཉཱཎཝིཝཊྚཉཱཎམྤི མགྒཀྑཎེ ཡུཛྫཏི. མགྒཉཱཎེནེཝ ཝཱ ‘‘ཙཀྑུ སུཉྙ’’ནྟིཨཱདི ཀིཙྩཝསེན པཊིཝིདྡྷམེཝ ཧོཏཱིཏི མགྒཀྑཎེ ཏཾ ཉཱཎཾ ཝཏྟུཾ ཡུཛྫཏིཡེཝ. ཨཏྠཡོཛནཱ པནེཏྠ ‘‘ཡཏྠ མགྒཀྑཎེ སཉྙཱཝིཝཊྚོ, ཏཏྠ ཙེཏོཝིཝཊྚོ. ཡཏྠ མགྒཀྑཎེ ཙེཏོཝིཝཊྚོ ¶ , ཏཏྠ སཉྙཱཝིཝཊྚོ’’ཏི ཨེཝམཱདིནཱ ནཡེན སབྦསཾསནྡནེསུ ཡོཛནཱ ཀཱཏབྦཱ. ཨཐ ཝཱ སཉྙཱཝིཝཊྚཙེཏོཝིཝཊྚཙིཏྟཝིཝཊྚཝིམོཀྑཝིཝཊྚེསུ ཙཏུནྣཾ ཨརིཡམགྒཱནཾ ཨཱགཏཏྟཱ སཙྩཝིཝཊྚོ ཨཱགཏོཡེཝ ཧོཏི. ཉཱཎཝིཝཊྚོ ཙ སཙྩཝིཝཊྚེནེཝ ཀིཙྩཝསེན སིདྡྷོ ཧོཏི. སཉྙཱཙེཏོཙིཏྟཝིམོཀྑཝིཝཊྚེསྭེཝ ཙ པེཡྻཱལེ ཝིཏྠཱརིཡམཱནེ ‘‘ཨནཏྟཱནུཔསྶནཱདྷིཔཏཏྟཱ པཉྙཱ ཨབྷིནིཝེསཏོ སཉྙཱཡ ཝིཝཊྚཏཱིཏི ཨདྷིཔཏཏྟཱ པཉྙཱ སཉྙཱཝིཝཊྚེ ཉཱཎ’’ནྟི ཙ, ‘‘ཨབྷིནིཝེསོ ནཱནཏྟཾ, ཨནཏྟཱནུཔསྶནཱ ཨེཀཏྟཾ. ཨནཏྟཱནུཔསྶནེཀཏྟཾ ཙེཏཡཏོ ཨབྷིནིཝེསཏོ ཙིཏྟཾ ཝིཝཊྚཏཱིཏི ནཱནཏྟེ པཉྙཱ ཙེཏོཝིཝཊྚེ ཉཱཎ’’ནྟི ཙ, ‘‘ཨབྷིནིཝེསཾ པཛཧནྟོ ཨནཏྟཱནུཔསྶནཱཝསེན ཙིཏྟཾ ཨདྷིཊྛཱཏཱིཏི ཨདྷིཊྛཱནེ པཉྙཱ ཙིཏྟཝིཝཊྚེ ཉཱཎ’’ནྟི ཙ, ‘‘ཨནཏྟཱནུཔསྶནཱཡ ཨབྷིནིཝེསཾ ཝོསཛྫཏཱིཏི ཝོསགྒེ པཉྙཱ ཝིམོཀྑཝིཝཊྚེ ཉཱཎ’’ནྟི ཙ པཱཋསམྦྷཝཏོ ཉཱཎཝིཝཊྚེ ཉཱཎམྤི ཏེསུ ¶ ཨཱགཏམེཝ ཧོཏི. ཉཱཎཝིཝཊྚེ ཙ ཨནཏྟཱནུཔསྶནཱཡ ཝུཊྛཱཡ ཨརིཡམགྒཾ པཊིལདྡྷསྶ ཀིཙྩཝསེན ‘‘ཙཀྑུ སུཉྙཾ ཨཏྟེན ཝཱ ཨཏྟནིཡེན ཝཱ’’ཏིཨཱདིཡུཛྫནཏོ སཙྩཝིཝཊྚོ ལབྦྷཏི, ཏསྨཱ ཨེཀེཀསྨིཾ ཝིཝཊྚེ སེསཱ པཉྩ པཉྩ ཝིཝཊྚཱ ལབྦྷནྟི. ཏསྨཱ ཨེཝཾ ‘‘ཡཏྠ སཉྙཱཝིཝཊྚོ, ཏཏྠ ཙེཏོཝིཝཊྚོ’’ཏིཨཱདིཀཱནི སཾསནྡནཱནི ཝུཏྟཱནཱིཏི ཝེདིཏབྦཾ.

ཝིཝཊྚཉཱཎཚཀྐནིདྡེསཝཎྞནཱ ནིཊྛིཏཱ.

༥༠. ཨིདྡྷིཝིདྷཉཱཎནིདྡེསཝཎྞནཱ

༡༠༡. ཨིདྡྷིཝིདྷཉཱཎནིདྡེསཾ ¶ ཨིདྷ བྷིཀྑཱུཏི ཨིམསྨིཾ སཱསནེ བྷིཀྑུ. ཚནྡསམཱདྷིཔདྷཱནསངྑཱརསམནྣཱགཏནྟི ཨེཏྠ ཚནྡཧེཏུཀོ སམཱདྷི, ཚནྡཱདྷིཀོ ཝཱ སམཱདྷི ཚནྡསམཱདྷི, ཀཏྟུཀམྱཏཱཚནྡཾ ཨདྷིཔཏིཾ ཀརིཏྭཱ པཊིལདྡྷསམཱདྷིསྶེཏཾ ཨདྷིཝཙནཾ. པདྷཱནབྷཱུཏཱ སངྑཱརཱ པདྷཱནསངྑཱརཱ, ཙཏུཀིཙྩསཱདྷཀསྶ སམྨཔྤདྷཱནཝཱིརིཡསྶེཏཾ ཨདྷིཝཙནཾ. ཙཏུཀིཙྩསཱདྷནཝསེན ¶ བཧུཝཙནཾ ཀཏཾ. སམནྣཱགཏནྟི ཚནྡསམཱདྷིནཱ ཙ པདྷཱནསངྑཱརེཧི ཙ ཨུཔེཏཾ. ཨིདྡྷིཔཱདནྟི ནིཔྥཏྟིཔརིཡཱཡེན ཝཱ ཨིཛ྄ཛྷནཊྛེན, ཨིཛ྄ཛྷནྟི ཨེཏཱཡ སཏྟཱ ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏི ཨིམིནཱ ཝཱ པརིཡཱཡེན ཨིདྡྷཱིཏི ¶ སངྑཾ གཏཱནཾ ཨུཔཙཱརཛ྄ཛྷཱནཱདིཀུསལཙིཏྟསམྤཡུཏྟཱནཾ ཚནྡསམཱདྷིཔདྷཱནསངྑཱརཱནཾ ཨདྷིཊྛཱནཊྛེན པཱདབྷཱུཏཾ སེསཙིཏྟཙེཏསིཀརཱསིནྟི ཨཏྠོ. ཝུཏྟཉྷི ཨིདྡྷིཔཱདཝིབྷངྒེ སུཏྟནྟབྷཱཛནཱིཡེ ‘‘ཨིདྡྷིཔཱདོཏི ཏཐཱབྷཱུཏསྶ ཝེདནཱཀྑནྡྷོ…པེ… ཝིཉྙཱཎཀྑནྡྷོ’’ཏི (ཝིབྷ. ༤༣༤). ཨབྷིདྷམྨབྷཱཛནཱིཡེ ཙ ‘‘ཨིདྡྷིཔཱདོཏི ཏཐཱབྷཱུཏསྶ ཕསྶོ ཝེདནཱ…པེ… པགྒཱཧོ ཨཝིཀྑེཔོ’’ཏི (ཝིབྷ. ༤༤༧) ཝུཏྟཾ. ཏསྨཱ ‘‘སེསཙིཏྟཙེཏསིཀརཱསི’’ནྟི ཨེཏྠ? ཚནྡསམཱདྷིཔདྷཱནསངྑཱརེསུ ཨེཀེཀཾ ཨིདྡྷིཾ ཀཏྭཱ དྭཱིཧི དྭཱིཧི སཧ སེསཝཙནཾ ཀཏནྟི ཝེདིཏབྦཾ. ཨེཝཉྷི ཙཏྟཱརོ ཁནྡྷཱ སབྦེ ཙ ཕསྶཱདཡོ དྷམྨཱ སངྒཧིཏཱ ཧོནྟི. ཨིམིནཱ ནཡེན སེསེསུཔི ཨཏྠོ ཝེདིཏབྦོ. ཡཐེཝ ཧི ཚནྡཾ ཨདྷིཔཏིཾ ཀརིཏྭཱ པཊིལདྡྷསམཱདྷི ཚནྡསམཱདྷཱིཏི ཝུཏྟོ, ཨེཝཾ ཝཱིརིཡཾ ཙིཏྟཾ ཝཱིམཾསཾ ཨདྷིཔཏིཾ ཀརིཏྭཱ པཊིལདྡྷསམཱདྷི ཝཱིམཾསཱསམཱདྷཱིཏི ཝུཙྩཏི. ཨེཝམེཀེཀསྨིཾ ཨིདྡྷིཔཱདེ ཚནྡཱདཡོ ཝཱིརིཡཱདཡོ ཙིཏྟཱདཡོ ཝཱིམཾསཱདཡོཏི ཏཡོ ཏཡོ དྷམྨཱ ཨིདྡྷཱིཔི ཧོནྟི ཨིདྡྷིཔཱདཱཔི, སེསཱ པན སམྤཡུཏྟཀཱ ཙཏྟཱརོ ཁནྡྷཱ ཨིདྡྷིཔཱདཱཡེཝ ¶ . ཡསྨཱ ཝཱ ཨིམེ ཏཡོ ཏཡོ དྷམྨཱ སམྤཡུཏྟཀེཧི ཙཏཱུཧི ཁནྡྷེཧི སདྡྷིཾཡེཝ ཨིཛ྄ཛྷནྟི, ན ཝིནཱ ཏེཧི, ཏསྨཱ ཏེན པརིཡཱཡེན སབྦེ ཙཏྟཱརོཔི ཁནྡྷཱ ཨིཛ྄ཛྷནཊྛེན ཨིདྡྷི ནཱམ ཧོནྟི, པཏིཊྛཊྛེན པཱདཱ ནཱམཱཏིཔི ཝེདིཏབྦཾ.

ཝཱིརིཡསམཱདྷིཔདྷཱནསངྑཱརསམནྣཱགཏནྟི ཨེཏྠ པན ཝཱིརིཡནྟི ཙ པདྷཱནསངྑཱརོཏི ཙ ཨེཀོཡེཝ. ཀསྨཱ དྭིདྷཱ ཝུཏྟནྟི ཙེ? ཝཱིརིཡསྶ ཨདྷིཔཏིབྷཱཝདསྶནཝསེནེཏྠ པཋམཾ ཝཱིརིཡགྒཧཎཾ ཀཏཾ, ཏསྶེཝ ཙཏུཀིཙྩསཱདྷཀཏྟདསྶནཏྠཾ པདྷཱནསངྑཱརཝཙནཾ ཀཏཾ. ཨེཝཾ དྭིདྷཱ ཝུཏྟཏྟཱ ཨེཝ ཙེཏྠཱཔི ཏཡོ ཏཡོ དྷམྨཱཏི ཝུཏྟཾ. ཀེཙི པན ‘‘ཝིབྷངྒེ ‘ཨིདྡྷཱིཏི ཡཱ ཏེསཾ ཏེསཾ དྷམྨཱནཾ ཨིདྡྷི སམིདྡྷི ཨིཛ྄ཛྷནཱ སམིཛ྄ཛྷནཱ’ཏི (ཝིབྷ. ༤༣༤) ཝུཏྟཏྟཱ ཨིདྡྷི ནཱམ ཨནིཔྥནྣཱ, ཨིདྡྷིཔཱདོ ནིཔྥནྣོ’’ཏི ཝདནྟི. ཨིདྷ པན ཨིདྡྷིཔི ཨིདྡྷིཔཱདོཔི ནིཔྥནྣོ ལཀྑཎབྦྷཱཧཏོཏི སནྣིཊྛཱནཾ ཀཏཾ. ཨིདྡྷི སམིདྡྷཱིཏིཨཱདཱིཧི ཨིཛ྄ཛྷནཱཀཱརེན དྷམྨཱ ཨེཝ ཝུཏྟཱཏི ཝེདིཏབྦཾ.

བྷཱཝེཏཱིཏི ཨཱསེཝཏི. སུཏྟནྟབྷཱཛནཱིཡེ (ཝིབྷ. ༤༣༡ ཨཱདཡོ) ཝིཡ ཨིདྷཱཔི ཨིདྡྷིཔཱདབྷཱཝནཱ ལོཀིཡཱ ཨེཝ. ཏསྨཱ ཨིདྡྷིཝིདྷཾ ཏཱཝ སམྤཱདེཏུཀཱམོ ལོཀིཡཾ ¶ ཨིདྡྷིཔཱདཾ བྷཱཝེནྟོ པཐཝཱིཀསིཎཱདཱིསུ ཨཊྛསུ ཀསིཎེསུ ཨདྷིཀཏཝསིཔྤཏྟཨཊྛསམཱཔཏྟིཀོ ཀསིཎཱནུལོམཏོ ¶ ཀསིཎཔཊིལོམཏོ ཀསིཎཱནུལོམཔཊིལོམཏོ ཛྷཱནཱནུལོམཏོ ཛྷཱནཔཊིལོམཏོ ཛྷཱནཱནུལོམཔཊིལོམཏོ ཛྷཱནུཀྐནྟིཀཏོ ཀསིཎུཀྐནྟིཀཏོ ཛྷཱནཀསིཎུཀྐནྟིཀཏོ ཨངྒསངྐནྟིཀཏོ ཨཱརམྨཎསངྐནྟིཀཏོ ཨངྒཱརམྨཎསངྐནྟིཀཏོ ཨངྒཝཝཏྠཱནཏོ ཨཱརམྨཎཝཝཏྠཱནཏོཏི ཨིམེཧི ཙུདྡསཧི ཨཱཀཱརེཧི ཙིཏྟཾ པརིདམེཏྭཱ ཚནྡསཱིསཝཱིརིཡསཱིསཙིཏྟསཱིསཝཱིམཾསཱསཱིསཝསེན པུནཔྤུནཾ ཛྷཱནཾ སམཱཔཛྫཏི. ཨངྒཱརམྨཎཝཝཏྠཱནམྤི ཀེཙི ཨིཙྪནྟི. པུབྦཧེཏུསམྤནྣེན པན ཀསིཎེསུ ཙཏུཀྐཛ྄ཛྷཱནམཏྟེ ཙིཎྞཝསིནཱཔི ཀཱཏུཾ ཝཊྚཏཱིཏི ཏཾ ཏཾ ཨིདྡྷིཔཱདཾ སམཱདྷིཾ བྷཱཝེནྟོ ‘‘ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡཱ’’ཏིཨཱདིཀཾ (ཝིབྷ. ༤༣༢) ཙཏུཔྤཀཱརཾ ཝཱིརིཡཾ ཨདྷིཊྛཱཏི, ཏསྶ ཙ ཧཱནིཝུདྡྷིཡོ ཉཏྭཱ ཝཱིརིཡསམཏཾ ཨདྷིཊྛཱཏི. སོ ཨེཝཾ ཙཏཱུསུ ཨིདྡྷིཔཱདེསུ ཙིཏྟཾ པརིབྷཱཝེཏྭཱ ཨིདྡྷིཝིདྷཾ སམྤཱདེཏི.

སོ ¶ ཨིམེསུ ཙཏཱུསུ ཨིདྡྷིཔཱདེསཱུཏིཨཱདཱིསུ སོཏི སོ བྷཱཝིཏཙཏུརིདྡྷིཔཱདོ བྷིཀྑུ. ཙཏཱུསུ ཨིདྡྷིཔཱདེསུ ཙིཏྟཾ པརིབྷཱཝེཏཱིཏི པུནཔྤུནཾ ཚནྡཱདཱིསུ ཨེཀེཀཾ ཨདྷིཔཏིཾ ཀཏྭཱ ཛྷཱནསམཱཔཛྫནཝསེན ཏེསུ ཙིཏྟཾ པརིབྷཱཝེཏི ནཱམ, ཚནྡཱདིཝཱསནཾ གཱཧཱཔེཏཱིཏི ཨཏྠོ. པརིདམེཏཱིཏི ནིབྦིསེཝནཾ ཀརོཏི. པུརིམཾ པཙྪིམསྶ ཀཱརཎཝཙནཾ. པརིབྷཱཝིཏཉྷི ཙིཏྟཾ པརིདམིཏཾ ཧོཏཱིཏི. མུདུཾ ཀརོཏཱིཏི ཏཐཱ དནྟཾ ཙིཏྟཾ ཝསིཔྤཏྟཾ ཀརོཏི. ཝསེ ཝཏྟམཱནཉྷི ཙིཏྟཾ ‘‘མུདཱུ’’ཏི ཝུཙྩཏི. ཀམྨནིཡནྟི ཀམྨཀྑམཾ ཀམྨཡོགྒཾ ཀརོཏི. མུདུ ཧི ཙིཏྟཾ ཀམྨནིཡཾ ཧོཏི སུདྷནྟམིཝ སུཝཎྞཾ, ཨིདྷ པན ཨིདྡྷིཝིདྷཀམྨཀྑམཾ. སོཏི སོ པརིབྷཱཝིཏཙིཏྟོ བྷིཀྑུ. ཀཱཡམྤི ཙིཏྟེ སམོདཧཏཱིཏིཨཱདི ཨིདྡྷིཀརཎཀཱལེ ཡཐཱསུཁཾ ཙིཏྟཙཱརསྶ ཨིཛ྄ཛྷནཏྠཾ ཡོགཝིདྷཱནཾ དསྶེཏུཾ ཝུཏྟཾ. ཏཏྠ ཀཱཡམྤི ཙིཏྟེ སམོདཧཏཱིཏི ཨཏྟནོ ཀརཛཀཱཡམྤི པཱདཀཛ྄ཛྷཱནཙིཏྟེ སམོདཧཏི པཝེསེཏི ཨཱརོཔེཏི, ཀཱཡཾ ཙིཏྟཱནུགཏིཀཾ ཀརོཏཱིཏི ཨཏྠོ. ཨེཝཾ ཀརཎཾ ཨདིསྶམཱནེན ཀཱཡེན གམནསྶ ཨུཔཀཱརཱཡ ཧོཏི. ཙིཏྟམྤི ཀཱཡེ སམོདཧཏཱིཏི པཱདཀཛ྄ཛྷཱནཙིཏྟཾ ཨཏྟནོ ཀརཛཀཱཡེ སམོདཧཏི ཨཱརོཔེཏི ¶ , ཙིཏྟམྤི ཀཱཡཱནུགཏིཀཾ ཀརོཏཱིཏི ཨཏྠོ. ཨེཝཾ ཀརཎཾ དིསྶམཱནེན ཀཱཡེན གམནསྶ ཨུཔཀཱརཱཡ ཧོཏི. སམཱདཧཏཱིཏིཔི པཱཋོ, པཏིཊྛཱཔེཏཱིཏི ཨཏྠོ. ཀཱཡཝསེན ཙིཏྟཾ པརིཎཱམེཏཱིཏི པཱདཀཛ྄ཛྷཱནཙིཏྟཾ གཧེཏྭཱ ཀརཛཀཱཡེ ཨཱརོཔེཏི ཀཱཡཱནུགཏིཀཾ ཀརོཏི, ཨིདཾ ཙིཏྟཾ ཀཱཡེ སམོདཧནསྶ ཝེཝཙནཾ. ཙིཏྟཝསེན ཀཱཡཾ པརིཎཱམེཏཱིཏི ཀརཛཀཱཡཾ གཧེཏྭཱ པཱདཀཛ྄ཛྷཱནཙིཏྟེ ཨཱརོཔེཏི, ཙིཏྟཱནུགཏིཀཾ ཀརོཏི, ཨིདཾ ཀཱཡཾ ཙིཏྟེ སམོདཧནསྶ ཝེཝཙནཾ. ཨདྷིཊྛཱཏཱིཏི ‘‘ཨེཝཾ ཧོཏཱུ’’ཏི ཨདྷིཊྛཱཏི. སམོདཧནསྶ ཨཏྠཝིཝརཎཏྠཾ པརིཎཱམོ ཝུཏྟོ, པརིཎཱམསྶ ཨཏྠཝིཝརཎཏྠཾ ཨདྷིཊྛཱནཾ ཝུཏྟཾ. ཡསྨཱ སམོདཧཏཱིཏི མཱུལཔདཾ, པརིཎཱམེཏི ཨདྷིཊྛཱཏཱིཏི ཏསྶ ཨཏྠནིདྡེསཔདཱནི ¶ , ཏསྨཱ ཏེསཾ དྭིནྣཾཡེཝ པདཱནཾ ཝསེན པརིཎཱམེཏྭཱཏི ཨདྷིཊྛཧིཏྭཱཏི ཝུཏྟཾ, ན ཝུཏྟཾ སམོདཧིཏྭཱཏི.

སུཁསཉྙཉྩ ལཧུསཉྙཉྩ ཀཱཡེ ཨོཀྐམིཏྭཱ ཝིཧརཏཱིཏི ཙཏུཏྠཛ྄ཛྷཱནེན སཧཛཱཏསུཁསཉྙཉྩ ལཧུསཉྙཉྩ སམཱཔཛྫནཝསེན ¶ ཀརཛཀཱཡེ ཨོཀྐམིཏྭཱ པཝེསེཏྭཱ ཝིཧརཏི. ཏཱཡ སཉྙཱཡ ཨོཀྐནྟཀཱཡསྶ པནསྶ ཀརཛཀཱཡོཔི ཏཱུལཔིཙུ ཝིཡ ལཧུཀོ ཧོཏི. སོཏི སོ ཀཏཡོགཝིདྷཱནོ བྷིཀྑུ. ཏཐཱབྷཱཝིཏེན ཙིཏྟེནཱཏི ཨིཏྠམྦྷཱུཏལཀྑཎེ ཀརཎཝཙནཾ, ཧེཏུཨཏྠེ ཝཱ, ཏཐཱབྷཱཝིཏེན ཙིཏྟེན ཧེཏུབྷཱུཏེནཱཏི ཨཏྠོ. པརིསུདྡྷེནཱཏི ཨུཔེཀྑཱསཏིཔཱརིསུདྡྷིབྷཱཝཏོ པརིསུདྡྷེན. པརིསུདྡྷཏྟཱཡེཝ པརིཡོདཱཏེན, པབྷསྶརེནཱཏི ཨཏྠོ. ཨིདྡྷིཝིདྷཉཱཎཱཡཱཏི ཨིདྡྷིཀོཊྛཱསེ, ཨིདྡྷིཝིཀཔྤེ ཝཱ ཉཱཎཏྠཱཡ. ཙིཏྟཾ ཨབྷིནཱིཧརཏཱིཏི སོ བྷིཀྑུ ཝུཏྟཔྤཀཱརཝསེན ཏསྨིཾ ཙིཏྟེ ཨབྷིཉྙཱཔཱདཀེ ཛཱཏེ ཨིདྡྷིཝིདྷཉཱཎཱདྷིགམཏྠཱཡ པརིཀམྨཙིཏྟཾ ཨབྷིནཱིཧརཏི, ཀསིཎཱརམྨཎཏོ ཨཔནེཏྭཱ ཨིདྡྷིཝིདྷཱབྷིམུཁཾ པེསེཏི. ཨབྷིནིནྣཱམེཏཱིཏི ཨདྷིགནྟབྦཨིདྡྷིཔོཎཾ ཨིདྡྷིཔབྦྷཱརཾ ཀརོཏི. སོཏི སོ ཨེཝཾ ཀཏཙིཏྟཱབྷིནཱིཧཱརོ བྷིཀྑུ. ཨནེཀཝིཧིཏནྟི ཨནེཀཝིདྷཾ ནཱནཔྤཀཱརཀཾ. ཨིདྡྷིཝིདྷནྟི ཨིདྡྷིཀོཊྛཱསཾ, ཨིདྡྷིཝིཀཔྤཾ ཝཱ. པཙྩནུབྷོཏཱིཏི པཙྩནུབྷཝཏི, ཕསྶེཏི སཙྪིཀརོཏི པཱཔུཎཱཏཱིཏི ཨཏྠོ.

༡༠༢. ཨིདཱནིསྶ ཨནེཀཝིཧིཏབྷཱཝཾ དསྶེནྟོ ཨེཀོཔི ཧུཏྭཱཏིཨཱདིམཱཧ. ཏཏྠ ཨེཀོཔི ཧུཏྭཱཏི ཨིདྡྷིཀརཎཏོ པུབྦེ པཀཏིཡཱ ཨེཀོཔི ཧུཏྭཱ. བཧུདྷཱ ཧོཏཱིཏི བཧུནྣཾ སནྟིཀེ ཙངྐམིཏུཀཱམོ ཝཱ, སཛ྄ཛྷཱཡཾ ¶ ཝཱ ཀཏྟུཀཱམོ, པཉྷཾ ཝཱ པུཙྪིཏུཀཱམོ ཧུཏྭཱ སཏམྤི སཧསྶམྤི ཧོཏི. ཀཐཾ པནཱཡམེཝཾ ཧོཏི? ཨིདྡྷིཡཱ བྷཱུམིཔཱདཔདམཱུལབྷཱུཏེ དྷམྨེ སམྤཱདེཏྭཱ ཨབྷིཉྙཱཔཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ སཙེ སཏཾ ཨིཙྪཏི, ‘‘སཏཾ ཧོམི སཏཾ ཧོམཱི’’ཏི པརིཀམྨཾ ཀཏྭཱ པུན པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ཨདྷིཊྛཱཏི. ཨདྷིཊྛཱནཙིཏྟེན སཧེཝ སཏཾ ཧོཏི. སཧསྶཱདཱིསུཔི ཨེསེཝ ནཡོ. སཙེ ཨེཝཾ ན ཨིཛ྄ཛྷཏི, པུན པརིཀམྨཾ ཀཏྭཱ དུཏིཡམྤི སམཱཔཛྫིཏྭཱ ཝུཊྛཱཡ ཨདྷིཊྛཱཏབྦཾ. སཾཡུཏྟཊྛཀཐཱཡཉྷི ‘‘ཨེཀཝཱརཾ དྭེཝཱརཾ སམཱཔཛྫིཏུཾ ཝཊྚཏཱི’’ཏི ཝུཏྟཾ. ཏཏྠ པཱདཀཛ྄ཛྷཱནཙིཏྟཾ ནིམིཏྟཱརམྨཎཾ, པརིཀམྨཙིཏྟཱནི སཏཱརམྨཎཱནི ཝཱ སཧསྶཱརམྨཎཱནི ཝཱ. ཏཱནི ཙ ཁོ ཝཎྞཝསེནེཝ, ནོ པཎྞཏྟིཝསེན. ཨདྷིཊྛཱནཙིཏྟམྤི ཏཐེཝ སཏཱརམྨཎཾ ཝཱ སཧསྶཱརམྨཎཾ ཝཱ, ཏཾ པཋམཔྤནཱཙིཏྟམིཝ གོཏྲབྷུཨནནྟརཾ ཨེཀམེཝ ཨུཔྤཛྫཏི རཱུཔཱཝཙརཙཏུཏྠཛ྄ཛྷཱནིཀཾ ¶ . ཏཏྠ ཡེ ཏེ བཧཱུ ནིམྨིཏཱ, ཏེ ཨནིཡམེཏྭཱ ནིམྨིཏཏྟཱ ཨིདྡྷིམཏཱ སདིསཱཝ ཧོནྟི. ཋཱནནིསཛྫཱདཱིསུ ཝཱ བྷཱསིཏཏུཎྷཱིབྷཱཝཱདཱིསུ ཝཱ ཡཾ ཡཾ ཨིདྡྷིམཱ ཀརོཏི, ཏཾཏདེཝ ཀརོནྟི. སཙེ པན ནཱནཱཝཎྞེ ཀཱཏུཀཱམོ ¶ ཧོཏི, ཀེཙི པཋམཝཡེ ཀེཙི མཛ྄ཛྷིམཝཡེ ཀེཙི པཙྪིམཝཡེ, ཏཐཱ དཱིགྷཀེསེ ཨུཔཌྜྷམུཎྜམུཎྜེ མིསྶཀཀེསེ ཨུཔཌྜྷརཏྟཙཱིཝརེ པཎྜུཀཙཱིཝརེ པདབྷཱཎདྷམྨཀཐཱསརབྷཉྙཔཉྷཔུཙྪནཔཉྷཝིསྶཛྫནརཛནཔཙནཙཱིཝརསིབྦནདྷོཝནཱདཱིནི ཀརོནྟེ, ཨཔརེཔི ཝཱ ནཱནཔྤཀཱརཀེ ཀཱཏུཀཱམོ ཧོཏི, ཏེན པཱདཀཛ྄ཛྷཱནཏོ ཝུཊྛཱཡ ‘‘ཨེཏྟཀཱ བྷིཀྑཱུ པཋམཝཡཱ ཧོནྟཱུ’’ཏིཨཱདིནཱ ནཡེན པརིཀམྨཾ ཀཏྭཱ པུན སམཱཔཛྫིཏྭཱ ཝུཊྛཱཡ ཨདྷིཊྛཱཏབྦཾ. ཨདྷིཊྛཱནཙིཏྟེན སདྡྷིཾ ཨིཙྪིཏཔྤཀཱརཱཡེཝ ཧོནྟཱིཏི. ཨེས ནཡོ ‘‘བཧུདྷཱཔི ཧུཏྭཱ ཨེཀོ ཧོཏཱི’’ཏིཨཱདཱིསུ. ཨཡཾ པན ཝིསེསོ – ཨིམིནཱ ཧི བྷིཀྑུནཱ ཨེཝཾ བཧུབྷཱཝཾ ནིམྨིནིཏྭཱ པུན ‘‘ཨེཀོཝ ཧུཏྭཱ ཙངྐམིསྶཱམི, སཛ྄ཛྷཱཡཾ ཀརིསྶཱམི, པཉྷཾ པུཙྪིསྶཱམཱི’’ཏི ཙིནྟེཏྭཱ ཝཱ ‘‘ཨཡཾ ཝིཧཱརོ ཨཔྤབྷིཀྑུཀོ, སཙེ ཀེཙི ཨཱགམིསྶནྟི, ཀུཏོ ཨིམེ ཨེཏྟཀཱ ཨེཀསདིསཱ བྷིཀྑཱུ ཨདྡྷཱ ཐེརསྶ ཨེསཱནུབྷཱཝོཏི མཾ ཛཱནིསྶནྟཱི’’ཏི ཨཔྤིཙྪཏཱཡ ཝཱ ཨནྟརཱཝ ‘‘ཨེཀོ ཧོམཱི’’ཏི ཨིཙྪནྟེན པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ‘‘ཨེཀོ ཧོམཱི’’ཏི པརིཀམྨཾ ཀཏྭཱ པུན སམཱཔཛྫིཏྭཱ ཝུཊྛཱཡ ‘‘ཨེཀོ ཧོམཱི’’ཏི ཨདྷིཊྛཱཏབྦཾ ¶ . ཨདྷིཊྛཱནཙིཏྟེན སདྡྷིཾཡེཝ ཨེཀོ ཧོཏི. ཨེཝཾ ཨཀརོནྟོ པན ཡཐཱཔརིཙྪིནྣཀཱལཝསེན སཡམེཝ ཨེཀོ ཧོཏི.

ཨཱཝིབྷཱཝནྟི པཱཀཊབྷཱཝཾ ཀརོཏཱིཏི ཨཏྠོ. ཏིརོབྷཱཝནྟི པཊིཙྪནྣབྷཱཝཾ ཀརོཏཱིཏི ཨཏྠོ. ཨཱཝིབྷཱཝཾ པཙྩནུབྷོཏི, ཏིརོབྷཱཝཾ པཙྩནུབྷོཏཱིཏི པུརིམེན ཝཱ སམྦནྡྷོ. ཏཏྲཱཡཾ ཨིདྡྷིམཱ ཨཱཝིབྷཱཝཾ ཀཏྟུཀཱམོ ཨནྡྷཀཱརཾ ཝཱ ཨཱལོཀཾ ཀརོཏི, པཊིཙྪནྣཾ ཝཱ ཝིཝཊཾ ཀརོཏི, ཨནཱཔཱཐཾ ཝཱ ཨཱཔཱཐཾ ཀརོཏི. ཀཐཾ? ཨཡཉྷི ཡཐཱ པཊིཙྪནྣོཔི དཱུརེ ཋིཏོཔི ཝཱ དིསྶཏི, ཨེཝཾ ཨཏྟཱནཾ ཝཱ པརཾ ཝཱ ཀཏྟུཀཱམོ པཱདཀཛ྄ཛྷཱནཏོ ཝུཊྛཱཡ ‘‘ཨིདཾ ཨནྡྷཀཱརཾ ཨཱལོཀཛཱཏཾ ཧོཏཱུ’’ཏི ཝཱ, ‘‘ཨིདཾ པཊིཙྪནྣཾ ཝིཝཊཾ ཧོཏཱུ’’ཏི ཝཱ, ‘‘ཨིདཾ ཨནཱཔཱཐཾ ཨཱཔཱཐཾ ཧོཏཱུ’’ཏི ཝཱ ཨཱཝཛྫིཏྭཱ པརིཀམྨཾ ཀཏྭཱ ཝུཏྟནཡེནེཝ ཨདྷིཊྛཱཏི. སཧ ཨདྷིཊྛཱནཱ ¶ ཡཐཱདྷིཊྛིཏམེཝ ཧོཏི. པརེ དཱུརེ ཋིཏཱཔི པསྶནྟི, སཡམྤི པསྶིཏུཀཱམོ པསྶཏི. ཏིརོབྷཱཝཾ ཀཏྟུཀཱམོ པན ཨཱལོཀཾ ཝཱ ཨནྡྷཀཱརཾ ཀརོཏི, ཨཔྤཊིཙྪནྣཾ ཝཱ པཊིཙྪནྣཾ, ཨཱཔཱཐཾ ཝཱ ཨནཱཔཱཐཾ ཀརོཏི. ཀཐཾ? ཨཡཉྷི ཡཐཱ ཨཔྤཊིཙྪནྣོཔི སམཱིཔེ ཋིཏོཔི ཝཱ ན དིསྶཏི, ཨེཝཾ ཨཏྟཱནཾ ཝཱ པརཾ ཝཱ ཀཏྟུཀཱམོ པཱདཀཛ྄ཛྷཱནཱ ཝུཊྛཧིཏྭཱ ‘‘ཨིདཾ ཨཱལོཀཊྛཱནཾ ཨནྡྷཀཱརཾ ཧོཏཱུ’’ཏི ཝཱ, ‘‘ཨིདཾ ཨཔྤཊིཙྪནྣཾ པཊིཙྪནྣཾ ཧོཏཱུ’’ཏི ཝཱ, ‘‘ཨིདཾ ཨཱཔཱཐཾ ཨནཱཔཱཐཾ ཧོཏཱུ’’ཏི ཝཱ ཨཱཝཛྫིཏྭཱ པརིཀམྨཾ ཀཏྭཱ ཝུཏྟནཡེནེཝ ཨདྷིཊྛཱཏི. སཧ ཨདྷིཊྛཱནཱ ཡཐཱདྷིཊྛིཏམེཝ ཧོཏི. པརེ སམཱིཔེ ཋིཏཱཔི ན པསྶནྟི, སཡམྤི ཨཔསྶིཏུཀཱམོ ན པསྶཏི. ཨཔིཙ སབྦམྤི པཱཀཊཔཱཊིཧཱརིཡཾ ཨཱཝིབྷཱཝོ ནཱམ, ཨཔཱཀཊཔཱཊིཧཱརིཡཾ ཏིརོབྷཱཝོ ནཱམ. ཏཏྠ པཱཀཊཔཱཊིཧཱརིཡེ ཨིདྡྷིཔི པཉྙཱཡཏི ཨིདྡྷིམཱཔི. ཏཾ ཡམཀཔཱཊིཧཱརིཡེན དཱིཔེཏབྦཾ. ཨཔཱཀཊཔཱཊིཧཱརིཡེ ¶ ཨིདྡྷིཡེཝ པཉྙཱཡཏི, ན ཨིདྡྷིམཱ. ཏཾ མཧཀསུཏྟེན (སཾ. ནི. ༤.༣༤༦) ཙ བྲཧྨནིམནྟནིཀསུཏྟེན (མ. ནི. ༡.༥༠༡ ཨཱདཡོ) ཙ དཱིཔེཏབྦཾ.

ཏིརོཀུཊྚནྟི པརཀུཊྚཾ, ཀུཊྚསྶ པརབྷཱགནྟི ཝུཏྟཾ ཧོཏི. ཨེས ནཡོ ཏིརོཔཱཀཱརཏིརོཔབྦཏེསུ. ཀུཊྚོཏི ཙ གེཧབྷིཏྟི. པཱཀཱརོཏི གེཧཝིཧཱརགཱམཱདཱིནཾ པརིཀྑེཔཔཱཀཱརོ. པབྦཏོཏི པཾསུཔབྦཏོ ཝཱ པཱསཱཎཔབྦཏོ ཝཱ. ཨསཛྫམཱནོཏི ཨལགྒམཱནོ. སེཡྻཐཱཔི ཨཱཀཱསེཏི ¶ ཨཱཀཱསེ ཝིཡ. ཨེཝཾ གནྟུཀཱམེན པན ཨཱཀཱསཀསིཎཾ སམཱཔཛྫིཏྭཱ ཝུཊྛཱཡ ཀུཊྚཾ ཝཱ པཱཀཱརཾ ཝཱ པབྦཏཾ ཝཱ ཨཱཝཛྫིཏྭཱ ཀཏཔརིཀམྨེན ‘‘ཨཱཀཱསོ ཧོཏཱུ’’ཏི ཨདྷིཊྛཱཏབྦོ, ཨཱཀཱསོཝ ཧོཏི. ཨདྷོ ཨོཏརིཏུཀཱམསྶ, ཨུདྡྷཾ ཝཱ ཨཱརོཧིཏུཀཱམསྶ སུསིརོ ཧོཏི, ཝིནིཝིཛ྄ཛྷིཏྭཱ གནྟུཀཱམསྶ ཚིདྡོ. སོ ཏཏྠ ཨསཛྫམཱནོ གཙྪཏི. སཙེ པནསྶ བྷིཀྑུནོ ཨདྷིཊྛཧིཏྭཱ གཙྪནྟསྶ ཨནྟརཱ པབྦཏོ ཝཱ རུཀྑོ ཝཱ ཨུཊྛེཏི, ཀིཾ པུན སམཱཔཛྫིཏྭཱ ཨདྷིཊྛཱཏབྦནྟི? དོསོ ནཏྠི. པུན སམཱཔཛྫིཏྭཱ ཨདྷིཊྛཱནཉྷི ཨུཔཛ྄ཛྷཱཡསྶ སནྟིཀེ ནིསྶཡགྒཧཎསདིསཾ ཧོཏི. ཨིམིནཱ པན བྷིཀྑུནཱ ‘‘ཨཱཀཱསོ ཧོཏཱུ’’ཏི ཨདྷིཊྛིཏཏྟཱ ཨཱཀཱསོ ཧོཏིཡེཝ. པུརིམཱདྷིཊྛཱནབལེནེཝ ཙསྶ ཨནྟརཱ ཨཉྙོ པབྦཏོ ཝཱ རུཀྑོ ཝཱ ཨུཏུམཡོ ཨུཊྛཧིསྶཏཱིཏི ཨཊྛཱནམེཏཾ. ཨཉྙེན ཨིདྡྷིམཏཱ ¶ ནིམྨིཏེ པན པཋམཾ ནིམྨཱནཾ བལཝཾ ཧོཏི. ཨིཏརེན ཏསྶ ཨུདྡྷཾ ཝཱ ཨདྷོ ཝཱ གནྟབྦཾ.

པཐཝིཡཱཔི ཨུམྨུཛྫནིམུཛྫནྟི ཨེཏྠ ཨུམྨུཛྫནྟི ཨུཊྛཱནཾ, ནིམུཛྫནྟི སཾསཱིདནཾ, ཨུམྨུཛྫཉྩ ནིམུཛྫཉྩ ཨུམྨུཛྫནིམུཛྫཾ. ཨེཝཾ ཀཏྟུཀཱམེན པན ཨཱཔོཀསིཎཾ སམཱཔཛྫིཏྭཱ ཨུཊྛཱཡ ‘‘ཨེཏྟཀེ ཋཱནེ པཐཝཱི ཨུདཀཾ ཧོཏཱུ’’ཏི པརིཙྪིནྡིཏྭཱ པརིཀམྨཾ ཀཏྭཱ ཝུཏྟནཡེནེཝ ཨདྷིཊྛཱཏབྦཾ. སཧ ཨདྷིཊྛཱནཱ ཡཐཱཔརིཙྪིནྣེ ཋཱནེ པཐཝཱི ཨུདཀམེཝ ཧོཏི. སོ ཏཏྠ ཨུམྨུཛྫནིམུཛྫཾ ཀརོཏི སེཡྻཐཱཔི ཨུདཀེ. ན ཀེཝལཉྩ ཨུམྨུཛྫནིམུཛྫམེཝ, ནྷཱནཔཱནམུཁདྷོཝནབྷཎྜཀདྷོཝནཱདཱིསུ ཡཾ ཡཾ ཨིཙྪཏི, ཏཾ ཏཾ ཀརོཏི. ན ཀེཝལཉྩ ཨུདཀམེཝ ཀརོཏི, སཔྤིཏེལམདྷུཕཱཎིཏཱདཱིསུཔི ཡཾ ཡཾ ཨིཙྪཏི, ཏཾ ཏཾ ‘‘ཨིདཉྩིདཉྩ ཨེཏྟཀཾ ཧོཏཱུ’’ཏི ཨཱཝཛྫིཏྭཱ པརིཀམྨཾ ཀཏྭཱ ཨདྷིཊྛཧནྟསྶ ཡཐཱདྷིཊྛིཏམེཝ ཧོཏི. ཨུདྡྷརིཏྭཱ བྷཱཛནགཏཾ ཀརོནྟསྶ སཔྤི སཔྤིཡེཝ ཧོཏི, ཏེལཱདཱིནི ཏེལཱདཱིནིཡེཝ, ཨུདཀཾ ཨུདཀམེཝ. སོ ཏཏྠ ཏེམིཏུཀཱམོཝ ཏེམེཏི, ན ཏེམིཏུཀཱམོ ན ཏེམེཏི. ཏསྶེཝ ཙ སཱ པཐཝཱི ཨུདཀཾ ཧོཏི, སེསཛནསྶ པཐཝཱིཡེཝ. ཏཏྠ མནུསྶཱ པཏྟིཀཱཔི གཙྪནྟི, ཡཱནཱདཱིཧིཔི གཙྪནྟི, ཀསིཀམྨཱདཱིནིཔི ཀརོནྟིཡེཝ. སཙེ པནཱཡཾ ‘‘ཏེསམྤི ཨུདཀཾ ཧོཏཱུ’’ཏི ཨིཙྪཏི, ཧོཏིཡེཝ. པརིཙྪིནྣཀཱལཾ ¶ པན ཨཏིཀྐམིཏྭཱ ཡཾ པཀཏིཡཱ གྷཊཏལཱ༹ཀཱདཱིསུ ཨུདཀཾ, ཏཾ ཋཔེཏྭཱ ཨཝསེསཾ པརིཙྪིནྣཊྛཱནཾ པཐཝཱིཡེཝ ཧོཏི.

ཨུདཀེཔི ཨབྷིཛྫམཱནེ གཙྪཏཱིཏི ཨེཏྠ ཡཾ ཨུདཀཾ ཨཀྐམིཏྭཱ སཾསཱིདཏི, ཏཾ བྷིཛྫམཱནནྟི ཝུཙྩཏི, ཝིཔརཱིཏཾ ཨབྷིཛྫམཱནཾ. ཨེཝཾ གནྟུཀཱམེན པན པཐཝཱིཀསིཎཾ ¶ སམཱཔཛྫིཏྭཱ ཝུཊྛཱཡ ‘‘ཨེཏྟཀེ ཋཱནེ ཨུདཀཾ པཐཝཱི ཧོཏཱུ’’ཏི པརིཙྪིནྡིཏྭཱ པརིཀམྨཾ ཀཏྭཱ ཝུཏྟནཡེནེཝ ཨདྷིཊྛཱཏབྦཾ. སཧ ཨདྷིཊྛཱནཱ ཡཐཱཔརིཙྪིནྣཊྛཱནེ ཨུདཀཾ པཐཝཱིཡེཝ ཧོཏི. སོ ཏཏྠ གཙྪཏི སེཡྻཐཱཔི པཐཝིཡཾ. ན ཀེཝལཉྩ གཙྪཏི, ཡཾ ཡཾ ཨིརིཡཱཔཐཾ ཨིཙྪཏི, ཏཾ ཏཾ ཀཔྤེཏི. ན ཀེཝལཉྩ པཐཝིམེཝ ཀརོཏི, མཎིསུཝཎྞཔབྦཏརུཀྑཱདཱིསུཔི ཡཾ ཡཾ ཨིཙྪཏི, ཏཾ ཏཾ ཝུཏྟནཡེནེཝ ཨཱཝཛྫིཏྭཱ ཨདྷིཊྛཱཏི, ཡཐཱདྷིཊྛིཏམེཝ ཧོཏི. ཏསྶེཝ ཙ ཏཾ ཨུདཀཾ པཐཝཱི ཧོཏི, སེསཛནསྶ ཨུདཀམེཝ ¶ . མཙྪཀཙྪཔཱ ཙ ཨུདཀཀཱཀཱདཡོ ཙ ཡཐཱརུཙི ཝིཙརནྟི. སཙེ པནཱཡཾ ཨཉྙེསམྤི མནུསྶཱནཾ ཏཾ པཐཝིཾ ཀཱཏུཾ ཨིཙྪཏི, ཀརོཏིཡེཝ. ཡཐཱཔརིཙྪིནྣཀཱལཱཏིཀྐམེན པན ཨུདཀམེཝ ཧོཏི.

ཨཱཀཱསེཔི པལླངྐེན ཀམཏཱིཏི ཨནྟལིཀྑེ སམནྟཏོ ཨཱུརུབདྡྷཱསནེན གཙྪཏི. པཀྑཱི སཀུཎོཏི པཀྑེཧི ཡུཏྟོ སཀུཎོ, ན ཨཔརིཔུཎྞཔཀྑོ ལཱུནཔཀྑོ ཝཱ. ཏཱདིསོ ཧི ཨཱཀཱསེ གནྟུཾ ན སཀྐོཏི. ཨེཝམཱཀཱསེ གནྟུཀཱམེན པན པཐཝཱིཀསིཎཾ སམཱཔཛྫིཏྭཱ ཝུཊྛཱཡ སཙེ ནིསིནྣོ གནྟུམིཙྪཏི, པལླངྐཔྤམཱཎཾ ཋཱནཾ པརིཙྪིནྡིཏྭཱ པརིཀམྨཾ ཀཏྭཱ ཝུཏྟནཡེནེཝ ཨདྷིཊྛཱཏབྦཾ. སཙེ ནིཔནྣོ གནྟུཀཱམོ ཧོཏི, མཉྩཔྤམཱཎཾ, སཙེ པདསཱ གནྟུཀཱམོ ཧོཏི, མགྒཔྤམཱཎནྟི ཨེཝཾ ཡཐཱནུརཱུཔཾ ཋཱནཾ པརིཙྪིནྡིཏྭཱ ཝུཏྟནཡེནེཝ ‘‘པཐཝཱི ཧོཏཱུ’’ཏི ཨདྷིཊྛཱཏབྦཾ. སཧ ཨདྷིཊྛཱནཱ པཐཝཱིཡེཝ ཧོཏི. ཨཱཀཱསེ གནྟུཀཱམེན ཙ བྷིཀྑུནཱ དིབྦཙཀྑུལཱབྷིནཱཔི བྷཝིཏབྦཾ. ཀསྨཱ? ཡསྨཱ ཨནྟརཱ ཨུཏུསམུཊྛཱནཱ ཝཱ པབྦཏརུཀྑཱདཡོ ཧོནྟི, ནཱགསུཔཎྞཱདཡོ ཝཱ ཨུསཱུཡནྟཱ མཱཔེནྟི, ཏེསཾ དསྶནཏྠཾ. ཏེ པན དིསྭཱ ཀིཾ ཀཱཏབྦནྟི? པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ‘‘ཨཱཀཱསོ ཧོཏཱུ’’ཏི པརིཀམྨཾ ཀཏྭཱ ཨདྷིཊྛཱཏབྦཾ. ཨཔིཙ ཨོཀཱསེ ཨོརོཧཎཏྠམྤི ཨིམིནཱ དིབྦཙཀྑུལཱབྷིནཱ བྷཝིཏབྦཾ. ཨཡཉྷི སཙེ ཨནོཀཱསེ ནྷཱནཏིཏྠེ ཝཱ གཱམདྭཱརེ ཝཱ ཨོརོཧཏི, མཧཱཛནསྶ པཱཀཊོ ཧོཏི, ཏསྨཱ དིབྦཙཀྑུནཱ པསྶིཏྭཱ ཨནོཀཱསཾ ཝཛྫེཏྭཱ ཨོཀཱསེ ཨོཏརཏཱིཏི.

ཨིམེཔི ཙནྡིམསཱུརིཡེ ཨེཝཾམཧིདྡྷིཀེ ཨེཝཾམཧཱནུབྷཱཝེཏི ཨེཏྠ ཙནྡིམསཱུརིཡཱནཾ དྭཱཙཏྟཱལཱིསཡོཛནསཧསྶོཔརིཙརཎེན མཧིདྡྷིཀཏཱ, ཏཱིསུ དཱིཔེསུ ཨེཀཀྑཎེ ཨཱལོཀཀརཎེན མཧཱནུབྷཱཝཏཱ ¶ ཝེདིཏབྦཱ, ཨེཝཾ ཨུཔརིཙརཎཨཱལོཀཕརཎེཧི ཝཱ མཧིདྡྷིཀེ, ཏེནེཝ མཧིདྡྷིཀཏྟེན མཧཱནུབྷཱཝེ ¶ . པརཱམསཏཱིཏི པརིགྒཎྷཱཏི, ཨེཀདེསེ ཝཱ ཕུསཏི. པརིམཛྫཏཱིཏི སམནྟཏོ ཨཱདཱསཏལཾ ཝིཡ པརིམཛྫཏི. ཨཡཾ པནསྶ ཨིདྡྷི ཨབྷིཉྙཱཔཱདཀཛ྄ཛྷཱནཝསེནེཝ ཨིཛ྄ཛྷཏི, ནཏྠེཏྠ ཀསིཎསམཱཔཏྟིནིཡམོ. སྭཱཡཾ ཡདི ཨིཙྪཏི གནྟྭཱ པརཱམསིཏུཾ, གནྟྭཱ པརཱམསཏི. སཙེ པན ཨིདྷེཝ ནིསིནྣཀོ ཝཱ ནིཔནྣཀོ ཝཱ པརཱམསིཏུཀཱམོ ཧོཏི, ‘‘ཧཏྠཔཱསེ ཧོཏཱུ’’ཏི ཨདྷིཊྛཱཏི. ཨདྷིཊྛཱནབལེན ཝཎྚཱ མུཏྟཏཱལཕལཾ ཝིཡ ཨཱགནྟྭཱ ¶ ཧཏྠཔཱསེ ཋིཏེ ཝཱ པརཱམསཏི, ཧཏྠཾ ཝཱ ཝཌྜྷེཏྭཱ པརཱམསཏི. ཧཏྠཾ ཝཌྜྷེནྟསྶ པན ཀིཾ ཨུཔཱདིནྣཀཾ ཝཌྜྷཏི ཨནུཔཱདིནྣཀཾ ཝཱཏི? ཨུཔཱདིནྣཀཾ ནིསྶཱཡ ཨནུཔཱདིནྣཀཾ ཝཌྜྷཏི. ཡོ ཨེཝཾ ཀཏྭཱ ན ཀེཝལཾ ཙནྡིམསཱུརིཡེ པརཱམསཏི, སཙེ ཨིཙྪཏི, པཱདཀཐལིཀཾ ཀཏྭཱ པཱདེ ཋཔེཏི, པཱིཋཾ ཀཏྭཱ ནིསཱིདཏི, མཉྩཾ ཀཏྭཱ ནིཔཛྫཏི, ཨཔསྶེནཕལཀཾ ཀཏྭཱ ཨཔསྶཡཏི. ཡཐཱ ཨེཀོ, ཨེཝཾ ཨཔརོཔི. ཨནེཀེསུཔི ཧི བྷིཀྑུསཏསཧསྶེསུ ཨེཝཾ ཀརོནྟེསུ ཏེསཉྩ ཨེཀམེཀསྶ ཏཐེཝ ཨིཛ྄ཛྷཏི. ཙནྡིམསཱུརིཡཱནཉྩ གམནམྤི ཨཱལོཀཀརཎམྤི ཏཐེཝ ཧོཏི. ཡཐཱ ཧི པཱཏིསཧསྶེསུ ཨུདཀཔཱུརེསུ སབྦཔཱཏཱིསུ ཙནྡམཎྜལཱནི དིསྶནྟི, པཱཀཏིཀམེཝ ཙནྡསྶ གམནཾ ཨཱལོཀཀརཎཉྩ ཧོཏི, ཏཐཱུཔམམེཏཾ པཱཊིཧཱརིཡཾ. ཡཱཝ བྲཧྨལོཀཱཔི ཀཱཡེན ཝསཾ ཝཏྟེཏཱིཏི བྲཧྨལོཀཾ པརིཙྪེདཾ ཀཏྭཱ ཨེཏྠནྟརེ ཨནེཀཝིདྷཾ ཨབྷིཉྙཾ ཀརོནྟོ ཨཏྟནོ ཀཱཡེན ཝསཾ ཨིསྶརིཡཾ ཝཏྟེཏི. ཝིཏྠཱརོ པནེཏྠ ཨིདྡྷིཀཐཱཡཾ ཨཱཝིབྷཝིསྶཏཱིཏི.

ཨིདྡྷིཝིདྷཉཱཎནིདྡེསཝཎྞནཱ ནིཊྛིཏཱ.

༥༡. སོཏདྷཱཏུཝིསུདྡྷིཉཱཎནིདྡེསཝཎྞནཱ

༡༠༣. སོཏདྷཱཏུཝིསུདྡྷིཉཱཎནིདྡེསེ ¶ དཱུརེཔི སདྡཱནནྟིཨཱདི དིབྦསོཏཾ ཨུཔྤཱདེཏུཀཱམསྶ ཨཱདིཀམྨིཀསྶ བྷིཀྑུནོ ཨུཔཱཡསནྡསྶནཏྠཾ ཝུཏྟཾ. ཏཏྠ དཱུརེཔི སདྡཱནཾ སདྡནིམིཏྟནྟི དཱུརེ སདྡཱནཾ ཨནྟརེ སདྡཾ. སདྡོཡེཝ ཧི ནིམིཏྟཀརཎཝསེན སདྡནིམིཏྟཾ. ‘‘དཱུརེ’’ཏི ཝུཏྟེཔི པཀཏིསོཏསྶ ཨཱཔཱཐཊྛཱནེཡེཝ. ཨོལཱ༹རིཀཱནནྟི ཐཱུལཱནཾ. སུཁུམཱནནྟི ཨཎཱུནཾ. སཎྷསཎྷཱནནྟི སཎྷཏོཔི སཎྷཱནཾ, ཨཏིསཎྷཱནནྟི ཨཏྠོ. ཨེཏེན པརམསུཁུམཱ སདྡཱ ཝུཏྟཱ ཧོནྟི. ཨིམཾ ཉཱཎཾ ཨུཔྤཱདེཏུཀཱམེན ཨཱདིཀམྨིཀེན ཛྷཱཡིནཱ ཨབྷིཉྙཱཔཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ པརིཀམྨསམཱདྷིཙིཏྟེན ¶ པཋམཏརཾ པཀཏིསོཏཔཐེ དཱུརེ ཨོལཱ༹རིཀོ ཨརཉྙེ སཱིཧཱདཱིནཾ སདྡོ ཨཱཝཛྫིཏབྦོ. ཝིཧཱརེ གྷཎྜིསདྡོ བྷེརིསདྡོ སངྑསདྡོ སཱམཎེརདཧརབྷིཀྑཱུནཾ སབྦཐཱམེན སཛ྄ཛྷཱཡནྟཱནཾ ¶ སཛ྄ཛྷཱཡནསདྡོ པཀཏིཀཐཾ ཀཐེནྟཱནཾ ‘‘ཀིཾ, བྷནྟེ, ཀིཾ, ཨཱཝུསོ’’ཏིཨཱདིསདྡོ སཀུཎསདྡོ ཝཱཏསདྡོ པདསདྡོ པཀྐུཐིཏཨུདཀསྶ ཙིཙྩིཊཱཡནསདྡོ ཨཱཏཔེ སུསྶམཱནཏཱལཔཎྞསདྡོ ཀུནྠཀིཔིལླིཀཱདིསདྡོཏི ཨེཝཾ སབྦོལཱ༹རིཀཏོ པབྷུཏི ཡཐཱཀྐམེན སུཁུམསུཁུམསདྡཱ ཨཱཝཛྫིཏབྦཱ.

ཨེཝཾ ཀརོནྟེན ཙ པུརཏྠིམཱདཱིསུ དསསུ དིསཱསུ ཀམེན ཨེཀེཀིསྶཱ དིསཱཡ སདྡནིམིཏྟཾ ཝུཏྟནཡེན མནསི ཀཱཏབྦཾ. མནསི ཀརོནྟེན ཙ ཡེ སདྡཱ པཀཏིསོཏསྶ སུཡྻནྟི, ཏེསུ པཀཏིསོཏམོདྷཱཡ མནོདྭཱརིཀེན ཙིཏྟེན མནསི ཀཱཏབྦཾ. ཏསྶ ཏེ སདྡཱ པཀཏིཙིཏྟསྶཱཔི པཱཀཊཱ ཧོནྟི, པརིཀམྨསམཱདྷིཙིཏྟསྶ པན ཨཏིཝིཡ པཱཀཊཱ ཧོནྟི. ཏསྶེཝཾ སདྡནིམིཏྟཾ མནསིཀརོཏོ ཨིདཱནི དིབྦསོཏདྷཱཏུ ཨུཔྤཛྫིསྶཏཱིཏི ཏེསུ སདྡེསུ ཨཉྙཏརཾ ཨཱརམྨཎཾ ཀཏྭཱ མནོདྭཱརཱཝཛྫནཾ ཨུཔྤཛྫཏི, ཏསྨིཾ ནིརུདྡྷེ ཙཏྟཱརི པཉྩ ཝཱ ཛཝནཱནི ཛཝནྟི. ཡེསཾ པུརིམཱནི ཏཱིཎི ཙཏྟཱརི ཝཱ པརིཀམྨོཔཙཱརཱནུལོམགོཏྲབྷུནཱམཀཱནི ཀཱམཱཝཙརཱནི, ཙཏུཏྠཾ པཉྩམཾ ¶ ཝཱ ཨཔྤནཱཙིཏྟཾ རཱུཔཱཝཙརཙཏུཏྠཛ྄ཛྷཱནིཀཾ. ཏཏྠ ཡཾ ཏེན ཨཔྤནཱཙིཏྟེན སདྡྷིཾ ཨུཔྤནྣཾ ཉཱཎཾ, ཨཡཾ དིབྦསོཏདྷཱཏུ. ཏཾ ཐཱམགཏཾ ཀརོནྟེན ‘‘ཨེཏྠནྟརེ སདྡཾ སུཎཱམཱི’’ཏི ཨེཀངྒུལམཏྟཾ པརིཙྪིནྡིཏྭཱ ཝཌྜྷེཏབྦཾ, ཏཏོ དྭངྒུལཙཏུརངྒུལཨཊྛངྒུལཝིདཏྠིརཏནཨནྟོགབྦྷཔམུཁ- པཱསཱདཔརིཝེཎསངྒྷཱརཱམགོཙརགཱམཛནཔདཱདིཝསེན ཡཱཝ ཙཀྐཝཱལ༹ཾ, ཏཏོ ཝཱ བྷིཡྻོཔི པརིཙྪིནྡིཏྭཱ པརིཙྪིནྡིཏྭཱ ཝཌྜྷེཏབྦཾ. ཨེཝཾ ཨདྷིགཏཱབྷིཉྙོ ཨེས པཱདཀཛ྄ཛྷཱནཱརམྨཎེན ཕུཊྛོཀཱསབྦྷནྟརགཏེ སདྡེ པུན པཱདཀཛ྄ཛྷཱནཾ ཨསམཱཔཛྫིཏྭཱཔི ཨབྷིཉྙཱཉཱཎེན སུཎཱཏིཡེཝ. ཨེཝཾ སུཎནྟོ ཙ སཙེཔི ཡཱཝབྲཧྨལོཀཱ སངྑབྷེརིཔཎཝཱདིསདྡེཧི ཨེཀཀོལཱཧལཾ ཧོཏི, པཱཊིཡེཀྐཾ ཝཝཏྠཱཔེཏུཀཱམཏཱཡ སཏི ‘‘ཨཡཾ སངྑསདྡོ, ཨཡཾ བྷེརིསདྡོ’’ཏི ཝཝཏྠཱཔེཏུཾ སཀྐོཏིཡེཝ. ཨབྷིཉྙཱཉཱཎེན སུཏེ སཱཏྠཀེ སདྡེ པཙྪཱ ཀཱམཱཝཙརཙིཏྟེན ཨཏྠཾ ཛཱནཱཏི. དིབྦསོཏཾ ¶ པཀཏིསོཏཝཏོཡེཝ ཨུཔྤཛྫཏི, ནོ བདྷིརསྶ. པཙྪཱ པཀཏིསོཏེ ཝིནཊྛེཔི དིབྦསོཏཾ ན ཝིནསྶཏཱིཏི ཝདནྟི.

སོ དིབྦཱཡ སོཏདྷཱཏུཡཱཏི ཨེཏྠ དིབྦསདིསཏྟཱ དིབྦཱ. དེཝཱནཉྷི སུཙརིཏཀམྨཱབྷིནིབྦཏྟཱ པིཏྟསེམྷརུདྷིརཱདཱིཧི ཨཔལིབུདྡྷཱ ཨུཔཀྐིལེསཝིམུཏྟཏཱཡ དཱུརེཔི ཨཱརམྨཎསམྤཊིཙྪནསམཏྠཱ དིབྦཱ པསཱདསོཏདྷཱཏུ ཧོཏི. ཨཡཉྩཱཔི ཨིམསྶ བྷིཀྑུནོ ཝཱིརིཡབྷཱཝནཱབལནིབྦཏྟཱ ཉཱཎསོཏདྷཱཏུ ཏཱདིསཱཡེཝཱཏི དིབྦསདིསཏྟཱ དིབྦཱ. ཨཔིཙ དིབྦཝིཧཱརཝསེན པཊིལདྡྷཏྟཱ, ཨཏྟནཱ ཙ དིབྦཝིཧཱརསནྣིསྶིཏཏྟཱཔི དིབྦཱ, སཝནཊྛེན ནིཛྫཱིཝཊྛེན ཙ སོཏདྷཱཏུ, སོཏདྷཱཏུཀིཙྩཀརཎེན ཙ སོཏདྷཱཏུ ཝིཡཱཏིཔི སོཏདྷཱཏུ. ཏཱཡ དིབྦཱཡ ¶ སོཏདྷཱཏུཡཱ. ཝིསུདྡྷཱཡཱཏི པརིསུདྡྷཱཡ ནིརུཔཀྐིལེསཱཡ. ཨཏིཀྐནྟམཱནུསིཀཱཡཱཏི མནུསྶཱུཔཙཱརཾ ཨཏིཀྐམིཏྭཱ སདྡསཝནེན མཱནུསིཀཾ མཾསསོཏདྷཱཏུཾ ཨཏིཀྐནྟཱཡ ཝཱིཏིཝཏྟིཏྭཱ ཋིཏཱཡ. ཨུབྷོ སདྡེ སུཎཱཏཱིཏི དྭེ སདྡེ སུཎཱཏི. ཀཏམེ དྭེ? དིབྦེ ཙ མཱནུསེ ཙ, དེཝཱནཉྩ མནུསྶཱནཉྩ སདྡེཏི ཝུཏྟཾ ཧོཏི. ཨེཏེན པདེསཔརིཡཱདཱནཾ ཝེདིཏབྦཾ. ཡེ དཱུརེ སནྟིཀེ ཙཱཏི ཡེ སདྡཱ དཱུརེ པརཙཀྐཝཱལེ༹པི, ཡེ ཙ སནྟིཀེ ཨནྟམསོ སདེཧསནྣིསྶིཏཔཱཎཀསདྡཱཔི, ཏེ སུཎཱཏཱིཏི ཝུཏྟཾ ཧོཏི. ཨེཏེན ནིཔྤདེསཔརིཡཱདཱནཾ ཝེདིཏབྦནྟི.

སོཏདྷཱཏུཝིསུདྡྷིཉཱཎནིདྡེསཝཎྞནཱ ནིཊྛིཏཱ.

༥༢. ཙེཏོཔརིཡཉཱཎནིདྡེསཝཎྞནཱ

༡༠༤. ཙེཏོཔརིཡཉཱཎནིདྡེསེ ¶ སོ ཨེཝཾ པཛཱནཱཏཱིཏི ཨིདཱནི ཝཏྟབྦཾ ཝིདྷཱནཾ ཨུཔདིསཏི. ཨིདཾ རཱུཔཾ སོམནསྶིནྡྲིཡསམུཊྛིཏནྟིཨཱདི ཨཱདིཀམྨིཀེན ཛྷཱཡིནཱ པཊིཔཛྫིཏབྦཾ ཝིདྷཱནཾ. ཀཐཾ? ཨེཏཉྷི ཉཱཎཾ ཨུཔྤཱདེཏུཀཱམེན ཛྷཱཡིནཱ པཋམཾ ཏཱཝ དིབྦཙཀྑུཉཱཎཾ ཨུཔྤཱདེཏབྦཾ. ཨེཏཉྷི དིབྦཙཀྑུཝསེན ཨིཛ྄ཛྷཏི, ཏཾ ཨེཏསྶ པརིཀམྨཾ. ཏསྨཱ ཏེན བྷིཀྑུནཱ ཨཱལོཀཾ ཝཌྜྷེཏྭཱ དིབྦེན ཙཀྑུནཱ པརསྶ ཧདཡརཱུཔཾ ནིསྶཱཡ ཝཏྟམཱནསྶ ལོཧིཏསྶ ཝཎྞཾ པསྶིཏྭཱ པསྶིཏྭཱ ཙིཏྟཾ པརིཡེསིཏབྦཾ. ཏཉྷི ལོཧིཏཾ ཀུསལསོམནསྶེ ཝཏྟམཱནེ རཏྟཾ ཧོཏི ནིགྲོདྷཔཀྐཝཎྞཾ, ཨཀུསལསོམནསྶེ ཝཏྟམཱནེ ཏདེཝ ལུལི༹ཏཾ ཧོཏི, དོམནསྶེ ཝཏྟམཱནེ ཀཱལ༹ཀཾ ¶ ཧོཏི ཛམྦུཔཀྐཝཎྞཾ ལུལི༹ཏཾ. ཀུསལཱུཔེཀྑཱཡ ཝཏྟམཱནཱཡ པསནྣཾ ཧོཏི ཏིལཏེལཝཎྞཾ. ཨཀུསལཱུཔེཀྑཱཡ ཝཏྟམཱནཱཡ ཏདེཝ ལུལི༹ཏཾ ཧོཏི. ཏསྨཱ ཏེན ‘‘ཨིདཾ རཱུཔཾ སོམནསྶིནྡྲིཡསམུཊྛིཏཾ, ཨིདཾ རཱུཔཾ དོམནསྶིནྡྲིཡསམུཊྛིཏཾ, ཨིདཾ རཱུཔཾ ཨུཔེཀྑིནྡྲིཡསམུཊྛིཏ’’ནྟི པརསྶ ཧདཡལོཧིཏཝཎྞཾ པསྶིཏྭཱ པསྶིཏྭཱ ཙིཏྟཾ པརིཡེསནྟེན ཙེཏོཔརིཡཉཱཎཾ ཐཱམགཏཾ ཀཱཏབྦཾ. ཨེཝཾ ཐཱམགཏེ ཧི ཏསྨིཾ ཨནུཀྐམེན སབྦམྤི ཀཱམཱཝཙརཱདིབྷེདཾ ཙིཏྟཾ པཛཱནཱཏི ཙིཏྟཱ ཙིཏྟམེཝ སངྐམནྟོ ཝིནཱ ཧདཡརཱུཔདསྶནེན. ཝུཏྟམྤི ཙེཏཾ ཨཊྛཀཐཱཡཾ –

‘‘ཨཱརུཔྤེ པརསྶ ཙིཏྟཾ ཛཱནིཏུཀཱམོ ཀསྶ ཧདཡརཱུཔཾ པསྶཏི, ཀསྶིནྡྲིཡཝིཀཱརཾ ཨོལོཀེཏཱིཏི? ན ཀསྶཙི. ཨིདྡྷིམཏོ ཝིསཡོ ཨེས, ཡདིདཾ ཡཏྠ ཀཏྠཙི ཙིཏྟཾ ཨཱཝཛྫནྟོ སོལ༹སཔྤབྷེདཾ ཙིཏྟཾ ཛཱནཱཏི. ཨཀཏཱབྷིནིཝེསསྶ པན ཝསེན ཨཡཾ ཀཐཱ’’ཏི (ཝིསུདྡྷི. ༢.༤༠༡).

པརསཏྟཱནནྟི ¶ ཨཏྟཱནཾ ཋཔེཏྭཱ སེསསཏྟཱནཾ. པརཔུགྒལཱནནྟི ཨིདམྤི ཨིམིནཱ ཨེཀཏྠམེཝ, ཝེནེཡྻཝསེན པན ¶ དེསནཱཝིལཱསེན ཙ བྱཉྫནེན ནཱནཏྟཾ ཀཏཾ. ཙེཏསཱ ཙེཏོ པརིཙྩ པཛཱནཱཏཱིཏི ཨཏྟནོ ཙིཏྟེན ཏེསཾ ཙིཏྟཾ པརིཙྪིནྡིཏྭཱ སརཱགཱདིཝསེན ནཱནཔྤཀཱརཏོ ཛཱནཱཏི. སརཱགཾ ཝཱཏིཨཱདཱིསུ ཝཱ-སདྡོ སམུཙྩཡཏྠོ. ཏཏྠ ཨཊྛཝིདྷཾ ལོབྷསཧགཏཙིཏྟཾ སརཱགཾ ཙིཏྟཾ ནཱམ, ཨཝསེསཾ ཙཏུབྷཱུམཀཀུསལཱབྱཱཀཏཙིཏྟཾ ཝཱིཏརཱགཾ ནཱམ. དྭེ དོམནསྶཙིཏྟཱནི, དྭེ ཝིཙིཀིཙྪཱཨུདྡྷཙྩཙིཏྟཱནཱིཏི ཨིམཱནི པན ཙཏྟཱརི ཙིཏྟཱནི ཨིམསྨིཾ དུཀེ སངྒཧཾ ན གཙྪནྟི. ཀེཙི པན ཐེརཱ ཏཱནིཔི ཝཱིཏརཱགཔདེན སངྒཎྷནྟི. དུཝིདྷཾ པན དོམནསྶསཧགཏཾ ཙིཏྟཾ སདོསཾ ཙིཏྟཾ ནཱམ, སབྦམྤི ཙཏུབྷཱུམཀཾ ཀུསལཱབྱཱཀཏཾ ཝཱིཏདོསཾ ནཱམ. སེསཱནི དས ཨཀུསལཙིཏྟཱནི ཨིམསྨིཾ དུཀེ སངྒཧཾ ན གཙྪནྟི. ཀེཙི པན ཐེརཱ ཏཱནིཔི ཝཱིཏདོསཔདེན སངྒཎྷནྟི. སམོཧཾ ཝཱིཏམོཧནྟི ཨེཏྠ པན མོཧེཀཧེཏུཀཝསེན ཝིཙིཀིཙྪཱཨུདྡྷཙྩསཧགཏདྭཡམེཝ སམོཧཾ. མོཧསྶ པན སབྦཱཀུསལེསུ སམྦྷཝཏོ དྭཱདསཝིདྷམྤི ཨཀུསལཾ ཙིཏྟཾ ‘‘སམོཧ’’ནྟི ཝེདིཏབྦཾ. ཨཝསེསཾ ཀུསལཱབྱཱཀཏཾ ཝཱིཏམོཧཾ. ཐིནམིདྡྷཱནུགཏཾ པན སཾཁིཏྟཾ, ཨུདྡྷཙྩཱནུགཏཾ ཝིཀྑིཏྟཾ. རཱུཔཱཝཙརཱརཱུཔཱཝཙརཾ མཧགྒཏཾ, ཨཝསེསཾ ཨམཧགྒཏཾ. སབྦམྤི ཏེབྷཱུམཀཾ སཨུཏྟརཾ, ལོཀུཏྟརཾ ¶ ཨནུཏྟརཾ. ཨུཔཙཱརཔྤཏྟཾ ཨཔྤནཱཔྤཏྟཉྩ སམཱཧིཏཾ, ཏདུབྷཡམསམྤཏྟཾ ཨསམཱཧིཏཾ. ཏདངྒཝིཀྑམྦྷནསམུཙྪེདཔཊིཔྤསྶདྡྷིནིསྶརཎཝིམུཏྟིཔྤཏྟཾ ཝིམུཏྟཾ, པཉྩཝིདྷམྤི ཨེཏཾ ཝིམུཏྟིམཔྤཏྟཾ ཨཝིམུཏྟནྟི ཝེདིཏབྦཾ. ཨིཏི ཙེཏོཔརིཡཉཱཎལཱབྷཱི བྷིཀྑུ སོལ༹སཔྤབྷེདམྤི ཙིཏྟཾ པཛཱནཱཏི. པུཐུཛྫནཱ པན ཨརིཡཱནཾ མགྒཕལཙིཏྟཾ ན ཛཱནནྟི, ཨརིཡཱཔི ཙ ཧེཊྛིམཱ ཧེཊྛིམཱ ཨུཔརིམཱནཾ ཨུཔརིམཱནཾ མགྒཕལཙིཏྟཾ ན ཛཱནནྟི, ཨུཔརིམཱ ཨུཔརིམཱ པན ཧེཊྛིམཱནཾ ཧེཊྛིམཱནཾ ཙིཏྟཾ ཛཱནནྟཱིཏི.

ཙེཏོཔརིཡཉཱཎནིདྡེསཝཎྞནཱ ནིཊྛིཏཱ.

༥༣. པུབྦེནིཝཱསཱནུསྶཏིཉཱཎནིདྡེསཝཎྞནཱ

༡༠༥. པུབྦེནིཝཱསཱནུསྶཏིཉཱཎནིདྡེསེ ¶ ཨེཝཾ པཛཱནཱཏཱིཏིཨཱདི ཙཏཱུསུ ཨིདྡྷིཔཱདེསུ པརིབྷཱཝིཏཙིཏྟསྶ པུབྦེནིཝཱསཱནུསྶཏིཉཱཎཾ ཨུཔྤཱདེཏུཀཱམསྶ ཏདུཔྤཱདནཝིདྷཱནདསྶནཏྠཾ ཝུཏྟཾ. ཀམཏོ ཧི པཊིཙྩསམུཔྤཱདཾ པསྶིཏྭཱ ཝིཉྙཱཎནཱམརཱུཔསལཱ༹ཡཏནཕསྶཝེདནཱསངྑཱཏཾ པཙྩུཔྤནྣཾ ཕལསངྑེཔཾ པསྶཏི, ཏསྶ པཙྩཡཾ པུརིམབྷཝེ ཀམྨཀིལེསསངྑཱཏཾ ཧེཏུསངྑེཔཾ པསྶཏི, ཏསྶ པཙྩཡཾ པུརིམབྷཝེཡེཝ ཕལསངྑེཔཾ པསྶཏི, ཏསྶ པཙྩཡཾ ཏཏིཡབྷཝེ ཧེཏུསངྑེཔཾ པསྶཏི. ཨེཝཾ པཊིཙྩསམུཔྤཱདདསྶནེན ཛཱཏིཔརམྤརཾ པསྶཏི. ཨེཝཾ བཧཱུཔཀཱརོ པུབྦེནིཝཱསཱནུསྶཏིཉཱཎསྶ པཊིཙྩསམུཔྤཱདམནསིཀཱརོ ¶ . ཏཏྠ ‘‘ཨིམསྨིཾ སཏི ཨིདཾ ཧོཏི, ཨིམསྶུཔྤཱདཱ ཨིདཾ ཨུཔྤཛྫཏཱི’’ཏི ཨིདཾ པཊིཙྩསམུཔྤཱདནིདྡེསསྶ ཨུདྡེསཝཙནཾ. ཨེཝཾ ཏེསཾ ཨཉྙཏརཝཙནེནེཝ ཨཏྠེ སིདྡྷེ དྭིདྷཱ ཝཙནཾ ཀསྨཱཏི ཙེ? ཨཏྠནཱནཏྟསབྦྷཱཝཏོ. ཀཐཾ? ཨིམསྨིཾ སཏཱིཏི ཨིམསྨིཾ པཙྩཡེ ཝིཛྫམཱནེ. ཨིདཾ སབྦཔཙྩཡཱནཾ སཱདྷཱརཎཝཙནཾ. ཨིདཾ ཧོཏཱིཏི ཨིདཾ པཙྩཡུཔྤནྣཾ བྷཝཏི. ཨིདཾ སབྦཔཙྩཡུཔྤནྣཱནཾ སཱདྷཱརཎཝཙནཾ. ཨིམིནཱ སཀལེན ཝཙནེན ཨཧེཏུཀཝཱདོ པཊིསིདྡྷོ ཧོཏི. ཡེ ཧི དྷམྨཱ པཙྩཡསམྦྷཝཱ ཧོནྟི, ན པཙྩཡཱབྷཱཝཱ, ཏེ ཨཧེཏུཀཱ ནཱམ ན ཧོནྟཱིཏི. ཨིམསྶུཔྤཱདཱཏི ཨིམསྶ པཙྩཡསྶ ཨུཔྤཱདཧེཏུ. ཨིདཾ སབྦཔཙྩཡཱནཾ ཨུཔྤཱདཝནྟཏཱདཱིཔནཝཙནཾ. ཨིདཾ ཨུཔྤཛྫཏཱིཏི ཨིདཾ པཙྩཡུཔྤནྣཾ ཨུཔྤཛྫཏི. ཨིདཾ སབྦཔཙྩཡུཔྤནྣཱནཾ ཏཏོ ཨུཔྤཛྫམཱནཏཱདཱིཔནཝཙནཾ. ཨིམིནཱ སཀལེན ཝཙནེན སསྶཏཱཧེཏུཀཝཱདོ པཊིསིདྡྷོ ཧོཏི. ཡེ ཧི ཨུཔྤཱདཝནྟོ དྷམྨཱ, ཏེ ཨནིཙྩཱ. ཏསྨཱ སཏིཔི སཧེཏུཀཏྟེ ཨནིཙྩཧེཏུཀཱ ཨེཏེ དྷམྨཱ ན ¶ ལོཀེ ནིཙྩསམྨཏཔཀཏིཔུརིསཱདིཧེཏུཀཱཏི ཝུཏྟཾ ཧོཏི.

ཡདིདནྟི ¶ ནིདྡིསིཏབྦཏྠསནྡསྶནཾ. ཨཝིཛྫཱཔཙྩཡཱ སངྑཱརཱཏི ཨེཏྠ ཡཾ པཊིཙྩ ཕལམེཏི, སོ པཙྩཡོ. པཊིཙྩཱཏི ན ཝིནཱ, ཨཔཙྩཀྑིཏྭཱཏི ཨཏྠོ. ཨེཏཱིཏི ཨུཔྤཛྫཏི ཙེཝ པཝཏྟཏི ཙཱཏི ཨཏྠོ. ཨཔིཙ ཨུཔཀཱརཀཊྛོ པཙྩཡཊྛོ, ཨཝིཛྫཱ ཙ སཱ པཙྩཡོ ཙཱཏི ཨཝིཛྫཱཔཙྩཡོ. ཏསྨཱ ཨཝིཛྫཱཔཙྩཡཱ སངྑཱརཱ སམྦྷཝནྟཱིཏི ཡོཛནཱ. ཨེཝཾ སམྦྷཝནྟི-སདྡསྶ སེསཔདེཧིཔི ཡོཛནཱ ཀཱཏབྦཱ. སོཀཱདཱིསུ ཙ སོཙནཾ སོཀོ. པརིདེཝནཾ པརིདེཝོ. དུཀྑཏཱིཏི དུཀྑཾ. ཨུཔྤཱདཊྛིཏིཝསེན ཝཱ དྭེདྷཱ ཁནཏཱིཏིཔི དུཀྑཾ. དུམྨནསྶ བྷཱཝོ དོམནསྶཾ. བྷུསོ ཨཱཡཱསོ ཨུཔཱཡཱསོ. སམྦྷཝནྟཱིཏི ནིབྦཏྟནྟི. ཨེཝནྟི ནིདྡིཊྛནཡནིདསྶནཾ. ཏེན ཨཝིཛྫཱདཱིཧེཝ ཀཱརཎེཧི, ན ཨིསྶརནིམྨཱནཱདཱིཧཱིཏི དསྶེཏི. ཨེཏསྶཱཏི ཡཐཱཝུཏྟསྶ. ཀེཝལསྶཱཏི ཨསམྨིསྶསྶ, སཀལསྶ ཝཱ. དུཀྑཀྑནྡྷསྶཱཏི དུཀྑསམཱུཧསྶ, ན སཏྟསྶ ན སུཁསུབྷཱདཱིནཾ. སམུདཡོཏི ནིབྦཏྟི. ཧོཏཱིཏི སམྦྷཝཏི.

ཏཏྠ ཀཏམཱ ཨཝིཛྫཱ? དུཀྑེ ཨཉྙཱཎཾ, དུཀྑསམུདཡེ ཨཉྙཱཎཾ, དུཀྑནིརོདྷེ ཨཉྙཱཎཾ, དུཀྑནིརོདྷགཱམིནིཡཱ པཊིཔདཱཡ ཨཉྙཱཎཾ, པུབྦནྟེ ཨཉྙཱཎཾ, ཨཔརནྟེ ཨཉྙཱཎཾ, པུབྦནྟཱཔརནྟེ ཨཉྙཱཎཾ, ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཨཉྙཱཎཾ. ཀཏམེ སངྑཱརཱ? པུཉྙཱབྷིསངྑཱརོ, ཨཔུཉྙཱབྷིསངྑཱརོ, ཨཱནེཉྫཱབྷིསངྑཱརོ, ཀཱཡསངྑཱརོ, ཝཙཱིསངྑཱརོ, ཙིཏྟསངྑཱརོ. ཨཊྛ ཀཱམཱཝཙརཀུསལཙེཏནཱ པཉྩ རཱུཔཱཝཙརཀུསལཙེཏནཱ པུཉྙཱབྷིསངྑཱརོ, དྭཱདས ཨཀུསལཙེཏནཱ ཨཔུཉྙཱབྷིསངྑཱརོ, ཙཏསྶོ ཨརཱུཔཱཝཙརཀུསལཙེཏནཱ ཨཱནེཉྫཱབྷིསངྑཱརོ. ཀཱཡསཉྩེཏནཱ ཀཱཡསངྑཱརོ, ཝཙཱིསཉྩེཏནཱ ཝཙཱིསངྑཱརོ, མནོསཉྩེཏནཱ ཙིཏྟསངྑཱརོ.

ཏཏྠ ¶ སིཡཱ – ཀཐཾ པནེཏཾ ཛཱནིཏབྦཾ ‘‘ཨིམེ སངྑཱརཱ ཨཝིཛྫཱཔཙྩཡཱ ཧོནྟཱི’’ཏི? ཨཝིཛྫཱབྷཱཝེ བྷཱཝཏོ. ཡསྶ ཧི དུཀྑཱདཱིསུ ཨཝིཛྫཱསངྑཱཏཾ ཨཉྙཱཎཾ ཨཔྤཧཱིནཾ ཧོཏི. སོ དུཀྑེ ཏཱཝ པུབྦནྟཱདཱིསུ ཙ ཨཉྙཱཎེན སཾསཱརདུཀྑཾ སུཁསཉྙཱཡ གཧེཏྭཱ ཏསྶེཝ ཧེཏུབྷཱུཏེ ཏིཝིདྷེཔི སངྑཱརེ ཨཱརབྷཏི. སམུདཡེ ཨཉྙཱཎེན དུཀྑཧེཏུབྷཱུཏེཔི ཏཎྷཱཔརིཀྑཱརེ སངྑཱརེ སུཁཧེཏུཏོ མཉྙམཱནོ ཨཱརབྷཏི. ནིརོདྷེ ¶ པན མགྒེ ཙ ཨཉྙཱཎེན དུཀྑསྶ ཨནིརོདྷབྷཱུཏེཔི གཏིཝིསེསེ དུཀྑནིརོདྷསཉྙཱི ཧུཏྭཱ ནིརོདྷསྶ ཙ ཨམགྒབྷཱུཏེསུཔི ཡཉྙཱམརཏཔཱདཱིསུ ནིརོདྷམགྒསཉྙཱི ¶ ཧུཏྭཱ དུཀྑནིརོདྷཾ པཏྠཡམཱནོ ཡཉྙཱམརཏཔཱདིམུཁེན ཏིཝིདྷེཔི སངྑཱརེ ཨཱརབྷཏི.

ཨཔིཙ སོ ཏཱཡ ཙཏཱུསུ སཙྩེསུ ཨཔྤཧཱིནཱཝིཛྫཏཱཡ ཝིསེསཏོ ཛཱཏིཛརཱརོགམརཎཱདིཨནེཀཱདཱིནཝཝོཀིཎྞམྤི པུཉྙཕལསངྑཱཏཾ དུཀྑཾ དུཀྑཏོ ཨཛཱནནྟོ ཏསྶ ཨདྷིགམཱཡ ཀཱཡཝཙཱིཙིཏྟསངྑཱརབྷེདཾ པུཉྙཱབྷིསངྑཱརཾ ཨཱརབྷཏི དེཝཙྪརཀཱམཀོ ཝིཡ མརུཔཔཱཏཾ. སུཁསམྨཏསྶཱཔི ཙ ཏསྶ པུཉྙཕལསྶ ཨནྟེ མཧཱཔརིལཱ༹ཧཛནིཀཾ ཝིཔརིཎཱམདུཀྑཏཾ ཨཔྤསྶཱདཏཉྩ ཨཔསྶནྟོཔི ཏཔྤཙྩཡཾ ཝུཏྟཔྤཀཱརམེཝ པུཉྙཱབྷིསངྑཱརཾ ཨཱརབྷཏི སལབྷོ ཝིཡ དཱིཔསིཁཱབྷིནིཔཱཏཾ, མདྷུབིནྡུགིདྡྷོ ཝིཡ ཙ མདྷུལིཏྟསཏྠདྷཱརཱལེཧནཾ. ཀཱམཱུཔསེཝནཱདཱིསུ ཙ སཝིཔཱཀེསུ ཨཱདཱིནཝཾ ཨཔསྶནྟོ སུཁསཉྙཱཡ ཙེཝ ཀིལེསཱབྷིབྷཱུཏཏཱཡ ཙ དྭཱརཏྟཡཔྤཝཏྟམྤི ཨཔུཉྙཱབྷིསངྑཱརཾ ཨཱརབྷཏི བཱལོ ཝིཡ གཱུཐཀཱིལ༹ནཾ, མརིཏུཀཱམོ ཝིཡ ཙ ཝིསཁཱདནཾ. ཨཱརུཔྤཝིཔཱཀེསུ ཙཱཔི སངྑཱརཝིཔརིཎཱམདུཀྑཏཾ ཨནཝབུཛ྄ཛྷམཱནོ སསྶཏཱདིཝིཔལླཱསེན ཙིཏྟསངྑཱརབྷཱུཏཾ ཨཱནེཉྫཱབྷིསངྑཱརཾ ཨཱརབྷཏི དིསཱམཱུལ༹ྷོ ཝིཡ པིསཱཙནགརཱབྷིམུཁམགྒགམནཾ. ཨེཝཾ ཡསྨཱ ཨཝིཛྫཱབྷཱཝཏོཝ སངྑཱརབྷཱཝོ, ན ཨབྷཱཝཏོ, ཏསྨཱ ཛཱནིཏབྦམེཏཾ ‘‘ཨིམེ སངྑཱརཱ ཨཝིཛྫཱཔཙྩཡཱ ཧོནྟཱི’’ཏི.

ཨེཏྠཱཧ – གཎྷཱམ ཏཱཝ ཨེཏཾ ‘‘ཨཝིཛྫཱ སངྑཱརཱནཾ པཙྩཡོ’’ཏི. ཀིཾ པནཱཡམེཀཱཝ ཨཝིཛྫཱ སངྑཱརཱནཾ པཙྩཡོ, ཨུདཱཧུ ཨཉྙེཔི པཙྩཡཱ སནྟཱིཏི? ཀིཾ པནེཏྠ ཡདི ཏཱཝ ཨེཀཱཝ, ཨེཀཀཱརཎཝཱདོ ཨཱཔཛྫཏི. ཨཐ ཨཉྙེཔི སནྟི, ‘‘ཨཝིཛྫཱཔཙྩཡཱ སངྑཱརཱ’’ཏི ཨེཀཀཱརཎནིདྡེསོ ནུཔཔཛྫཏཱིཏི? ན ནུཔཔཛྫཏི. ཀསྨཱ? ཡསྨཱ –

‘‘ཨེཀཾ ¶ ན ཨེཀཏོ ཨིདྷ, ནཱནེཀམནེཀཏོཔི ནོ ཨེཀཾ;

ཕལམཏྠི ཨཏྠི པན ཨེཀ-ཧེཏུཕལདཱིཔནེ ཨཏྠོ’’.

བྷགཝཱ ¶ ཧི ཀཏྠཙི པདྷཱནཏྟཱ ཀཏྠཙི པཱཀཊཏྟཱ ཀཏྠཙི ཨསཱདྷཱརཎཏྟཱ དེསནཱཝིལཱསསྶ ཙ ཝེནེཡྻཱནཉྩ ཨནུརཱུཔཏོ ཨེཀམེཝ ཧེཏུཉྩ ཕལཉྩ དཱིཔེཏི. ཏསྨཱ ཨཡམིདྷ ཨཝིཛྫཱ ཝིཛྫམཱནེསུཔི ཨཉྙེསུ ཝཏྠཱརམྨཎསཧཛཱཏདྷམྨཱདཱིསུ སངྑཱརཀཱརཎེསུ ‘‘ཨསྶཱདཱནུཔསྶིནོ ཏཎྷཱ ¶ པཝཌྜྷཏཱི’’ཏི (སཾ. ནི. ༢.༥༢) ཙ, ‘‘ཨཝིཛྫཱསམུདཡཱ ཨཱསཝསམུདཡོ’’ཏི (མ. ནི. ༡.༡༠༤) ཙ ཝཙནཏོ ཨཉྙེསམྤི ཏཎྷཱདཱིནཾ སངྑཱརཧེཏཱུནཾ ཧེཏཱུཏི པདྷཱནཏྟཱ, ‘‘ཨཝིདྭཱ, བྷིཀྑཝེ, ཨཝིཛྫཱགཏོ པུཉྙཱབྷིསངྑཱརམྤི ཨབྷིསངྑརོཏཱི’’ཏི པཱཀཊཏྟཱ, ཨསཱདྷཱརཎཏྟཱ ཙ སངྑཱརཱནཾ ཧེཏུབྷཱཝེན དཱིཔིཏཱཏི ཝེདིཏབྦཱ. ཨེཏེནེཝ ཙ ཨེཀེཀཧེཏུཕལདཱིཔནཔརིཧཱརཝཙནེན སབྦཏྠ ཨེཀེཀཧེཏུཕལདཱིཔནེ པཡོཛནཾ ཝེདིཏབྦནྟི.

ཨེཏྠཱཧ – ཨེཝཾ སནྟེཔི ཨེཀནྟཱནིཊྛཕལཱཡ སཱཝཛྫཱཡ ཨཝིཛྫཱཡ ཀཐཾ པུཉྙཱནེཉྫཱབྷིསངྑཱརཔཙྩཡཏྟཾ ཡུཛྫཏི? ན ཧི ནིམྦབཱིཛཏོ ཨུཙྪུ ཨུཔྤཛྫཏཱིཏི. ཀཐཾ ན ཡུཛྫིསྶཏི? ལོཀསྨིཉྷི –

‘‘ཝིརུདྡྷོ ཙཱཝིརུདྡྷོ ཙ, སདིསཱསདིསོ ཏཐཱ;

དྷམྨཱནཾ པཙྩཡོ སིདྡྷོ, ཝིཔཱཀཱ ཨེཝ ཏེ ཙ ན’’.

ཨིཏི ཨཡཾ ཨཝིཛྫཱ ཝིཔཱཀཝསེན ཨེཀནྟཱནིཊྛཕལཱ, སབྷཱཝཝསེན ཙ སཱཝཛྫཱཔི སམཱནཱ སབྦེསམྤི ཨེཏེསཾ པུཉྙཱབྷིསངྑཱརཱདཱིནཾ ཡཐཱནུརཱུཔཾ ཋཱནཀིཙྩསབྷཱཝཝིརུདྡྷཱཝིརུདྡྷཔཙྩཡཝསེན སདིསཱསདིསཔཙྩཡཝསེན ཙ པཙྩཡོ ཧོཏཱིཏི ཝེདིཏབྦཱ.

ཨཔིཙ –

‘‘ཙུཏཱུཔཔཱཏེ སཾསཱརེ, སངྑཱརཱནཉྩ ལཀྑཎེ;

ཡོ པཊིཙྩསམུཔྤནྣ-དྷམྨེསུ ཙ ཝིམུཡ྄ཧཏི.

‘‘ཨབྷིསངྑརོཏི སོ ཨེཏེ, སངྑཱརེ ཏིཝིདྷེ ཡཏོ;

ཨཝིཛྫཱ པཙྩཡོ ཏེསཾ, ཏིཝིདྷཱནཾ ཨཡཾ ཏཏོ.

‘‘ཡཐཱཔི ¶ ནཱམ ཛཙྩནྡྷོ, ནརོ ཨཔརིཎཱཡཀོ;

ཨེཀདཱ ཡཱཏི མགྒེན, ཨུམྨགྒེནཱཔི ཨེཀདཱ.

‘‘སཾསཱརེ ¶ སཾསརཾ བཱལོ, ཏཐཱ ཨཔརིཎཱཡཀོ;

ཀརོཏི ཨེཀདཱ པུཉྙཾ, ཨཔུཉྙམཔི ཨེཀདཱ.

‘‘ཡདཱ ཙ ཉཏྭཱ སོ དྷམྨཾ, སཙྩཱནི ཨབྷིསམེསྶཏི;

ཏདཱ ཨཝིཛྫཱུཔསམཱ, ཨུཔསནྟོ ཙརིསྶཏཱི’’ཏི.

སངྑཱརཔཙྩཡཱ ¶ ཝིཉྙཱཎནྟི ཚ ཝིཉྙཱཎཀཱཡཱ ཙཀྑུཝིཉྙཱཎཾ སོཏཝིཉྙཱཎཾ གྷཱནཝིཉྙཱཎཾ ཛིཝ྄ཧཱཝིཉྙཱཎཾ ཀཱཡཝིཉྙཱཎཾ མནོཝིཉྙཱཎཾ. ཏཏྠ ཙཀྑུཝིཉྙཱཎཾ ཀུསལཝིཔཱཀཾ ཨཀུསལཝིཔཱཀནྟི དུཝིདྷཾ. ཏཐཱ སོཏགྷཱནཛིཝ྄ཧཱཀཱཡཝིཉྙཱཎཱནི. མནོཝིཉྙཱཎཾ དྭེ ཝིཔཱཀམནོདྷཱཏུཡོ, ཏིསྶོ ཨཧེཏུཀམནོཝིཉྙཱཎདྷཱཏུཡོ, ཨཊྛ སཧེཏུཀཝིཔཱཀཙིཏྟཱནི, པཉྩ རཱུཔཱཝཙརཱནི, ཙཏྟཱརི ཨརཱུཔཱཝཙརཱནཱིཏི བཱཝཱིསཏིཝིདྷཾ. ཨིཏི སབྦཱནི བཱཏྟིཾས ལོཀིཡཝིཔཱཀཝིཉྙཱཎཱནི.

ཏཏྠ སིཡཱ – ཀཐཾ པནེཏཾ ཛཱནིཏབྦཾ ‘‘ཨིདཾ ཝུཏྟཔྤཀཱརཾ ཝིཉྙཱཎཾ སངྑཱརཔཙྩཡཱ ཧོཏཱི’’ཏི? ཨུཔཙིཏཀམྨཱབྷཱཝེ ཝིཔཱཀཱབྷཱཝཏོ. ཝིཔཱཀཉྷེཏཾ, ཝིཔཱཀཉྩ ན ཨུཔཙིཏཀམྨཱབྷཱཝེ ཨུཔྤཛྫཏི. ཡདི ཨུཔྤཛྫེཡྻ, སབྦེསཾ སབྦཝིཔཱཀཱནི ཨུཔྤཛྫེཡྻུཾ, ན ཙ ཨུཔྤཛྫནྟཱིཏི ཛཱནིཏབྦམེཏཾ ‘‘སངྑཱརཔཙྩཡཱ ཨིདཾ ཝིཉྙཱཎཾ ཧོཏཱི’’ཏི. སབྦམེཝ ཧི ཨིདཾ པཝཏྟིཔཊིསནྡྷིཝསེན དྭེདྷཱ པཝཏྟཏི. ཏཏྠ དྭེ པཉྩཝིཉྙཱཎཱནི དྭེ མནོདྷཱཏུཡོ སོམནསྶསཧགཏཱཧེཏུཀམནོཝིཉྙཱཎདྷཱཏཱུཏི ཨིམཱནི ཏེརས པཉྩཝོཀཱརབྷཝེ པཝཏྟིཡཾཡེཝ པཝཏྟནྟི, སེསཱནི ཨེཀཱུནཝཱིསཏི ཏཱིསུ བྷཝེསུ ཡཐཱནུརཱུཔཾ པཝཏྟིཡམྤི པཊིསནྡྷིཡམྤི པཝཏྟནྟི.

‘‘ལདྡྷཔྤཙྩཡམིཏི ¶ དྷམྨམཏྟམེཏཾ བྷཝནྟརམུཔེཏི;

ནཱསྶ ཏཏོ སངྐནྟི, ན ཏཏོ ཧེཏུཾ ཝིནཱ ཧོཏི’’.

ཨིཏི ཧེཏཾ ལདྡྷཔྤཙྩཡཾ རཱུཔཱརཱུཔདྷམྨམཏྟཾ ཨུཔྤཛྫམཱནཾ བྷཝནྟརམུཔེཏཱིཏི ཝུཙྩཏི, ན སཏྟོ, ན ཛཱིཝོ. ཏསྶ ཙ ནཱཔི ཨཏཱིཏབྷཝཏོ ཨིདྷ སངྐནྟི ཨཏྠི, ནཱཔི ཏཏོ ཧེཏུཾ ཝིནཱ ཨིདྷ པཱཏུབྷཱཝོ. ཨེཏྠ ཙ པུརིམཾ ཙཝནཏོ ཙུཏི, པཙྪིམཾ བྷཝནྟརཱདིཔཊིསནྡྷཱནཏོ པཊིསནྡྷཱིཏི ཝུཙྩཏི.

ཨེཏྠཱཧ – ནནུ ཨེཝཾ ཨསངྐནྟིཔཱཏུབྷཱཝེ སཏི ཡེ ཨིམསྨིཾ མནུསྶཏྟབྷཱཝེ ཁནྡྷཱ, ཏེསཾ ནིརུདྡྷཏྟཱ, ཕལཔྤཙྩཡསྶ ཙ ཀམྨསྶ ཏཏྠ ཨགམནཏོ, ཨཉྙསྶ ཨཉྙཏོ ཙ ཏཾ ཕལཾ སིཡཱ ¶ . ཨུཔབྷུཉྫཀེ ཙ ཨསཏི ཀསྶ ཏཾ ཕལཾ སིཡཱ. ཏསྨཱ ན སུནྡརམིདཾ ཝིདྷཱནནྟི. ཏཏྲིདཾ ཝུཙྩཏི –

‘‘སནྟཱནེ ཡཾ ཕལཾ ཨེཏཾ, ནཱཉྙསྶ ན ཙ ཨཉྙཏོ;

བཱིཛཱནཾ ཨབྷིསངྑཱརོ, ཨེཏསྶཏྠསྶ སཱདྷཀོ.

‘‘ཕལསྶུཔྤཏྟིཡཱ ཨེཝ, སིདྡྷཱ བྷུཉྫཀསམྨུཏི;

ཕལུཔྤཱདེན རུཀྑསྶ, ཡཐཱ ཕལཏི སམྨུཏཱི’’ཏི.

ཡོཔི ¶ ཝདེཡྻ ‘‘ཨེཝཾ སནྟེཔི ཨེཏེ སངྑཱརཱ ཝིཛྫམཱནཱ ཝཱ ཕལསྶ པཙྩཡཱ སིཡུཾ ཨཝིཛྫམཱནཱ ཝཱ. ཡདི ཙ ཝིཛྫམཱནཱ, པཝཏྟིཀྑཎེཡེཝ ནེསཾ ཝིཔཱཀེན བྷཝིཏབྦཾ. ཨཐཱཔི ཨཝིཛྫམཱནཱ, པཝཏྟིཏོ པུབྦེ པཙྪཱ ཙ ནིཙྩཾ ཕལཱཝཧཱ སིཡུ’’ནྟི. སོ ཨེཝཾ ཝཏྟབྦོ –

‘‘ཀཏཏྟཱ པཙྩཡཱ ཨེཏེ, ན ཙ ནིཙྩཾ ཕལཱཝཧཱ;

པཱཊིབྷོགཱདིཀཾ ཏཏྠ, ཝེདིཏབྦཾ ནིདསྶན’’ནྟི.

ཝིཉྙཱཎཔཙྩཡཱ ¶ ནཱམརཱུཔནྟི ཨིདྷ ཝེདནཱ སཉྙཱ སངྑཱརཀྑནྡྷཱ ནཱམཾ, ཙཏྟཱརི ཙ མཧཱབྷཱུཏཱནི ཙཏུནྣཉྩ མཧཱབྷཱུཏཱནཾ ཨུཔཱདཱཡརཱུཔཾ རཱུཔཾ. ཨབྷཱཝཀགབྦྷསེཡྻཀཱནཾ ཨཎྜཛཱནཉྩ པཊིསནྡྷིཀྑཎེ ཝཏྠུདསཀཾ ཀཱཡདསཀནྟི ཝཱིསཏི རཱུཔཱནི, ཏཡོ ཙ ཨརཱུཔིནོ ཁནྡྷཱཏི ཨེཏེ ཏེཝཱིསཏི དྷམྨཱ ཝིཉྙཱཎཔཙྩཡཱ ནཱམརཱུཔནྟི ཝེདིཏབྦཱ. སབྷཱཝཀཱནཾ བྷཱཝདསཀཾ པཀྑིཔིཏྭཱ ཏེཏྟིཾས, ཨོཔཔཱཏིཀསཏྟེསུ བྲཧྨཀཱཡིཀཱདཱིནཾ པཊིསནྡྷིཀྑཎེ ཙཀྑུསོཏཝཏྠུདསཀཱནི ཛཱིཝིཏིནྡྲིཡནཝཀཉྩཱཏི ཨེཀཱུནཙཏྟཱལཱིས རཱུཔཱནི, ཏཡོ ཙ ཨརཱུཔིནོ ཁནྡྷཱཏི ཨེཏེ དྭཱཙཏྟཱལཱིས དྷམྨཱ ཝིཉྙཱཎཔཙྩཡཱ ནཱམརཱུཔཾ. ཀཱམབྷཝེ པན སེསཨོཔཔཱཏིཀཱནཾ སཾསེདཛཱནཾ ཝཱ སབྷཱཝཀཔརིཔུཎྞཱཡཏནཱནཾ པཊིསནྡྷིཀྑཎེ ཙཀྑུསོཏགྷཱནཛིཝ྄ཧཱཀཱཡཝཏྠུབྷཱཝདསཀཱནཱིཏི སཏྟཏི རཱུཔཱནི, ཏཡོ ཙ ཨརཱུཔིནོ ཁནྡྷཱཏི ཨེཏེ ཏེསཏྟཏི དྷམྨཱ ཝིཉྙཱཎཔཙྩཡཱ ནཱམརཱུཔཾ. ཨེས ཨུཀྐཾསོ. ཨཝཀཾསེན པན ཏཾཏཾདསཀཝིཀལཱནཾ ཏསྶ ཏསྶ ཝསེན ཧཱཔེཏྭཱ ཧཱཔེཏྭཱ པཊིསནྡྷིཡཾ ཝིཉྙཱཎཔཙྩཡཱ ནཱམརཱུཔསངྑཱ ཝེདིཏབྦཱ. ཨརཱུཔཱིནཾ པན ཏཡོཝ ཨརཱུཔིནོ ཁནྡྷཱ, ཨསཉྙཱནཾ རཱུཔཏོ ཛཱིཝིཏིནྡྲིཡནཝཀམེཝཱཏི. ཨེས ཏཱཝ པཊིསནྡྷིཡཾ ནཡོ.

ཏཏྠ སིཡཱ – ཀཐཾ པནེཏཾ ཛཱནིཏབྦཾ ‘‘པཊིསནྡྷིནཱམརཱུཔཾ ཝིཉྙཱཎཔཙྩཡཱ ཧོཏཱི’’ཏི? སུཏྟཏོ ¶ ཡུཏྟིཏོ ཙ. སུཏྟེ ཧི ‘‘ཙིཏྟཱནུཔརིཝཏྟིནོ དྷམྨཱ’’ཏིཨཱདིནཱ (དྷ. ས. དུཀམཱཏིཀཱ ༦༢) ནཡེན བཧུདྷཱ ཝེདནཱདཱིནཾ ཝིཉྙཱཎཔཙྩཡཏཱ སིདྡྷཱ. ཡུཏྟིཏོ པན –

ཙིཏྟཛེན ཧི རཱུཔེན, ཨིདྷ དིཊྛེན སིཛ྄ཛྷཏི;

ཨདིཊྛསྶཱཔི རཱུཔསྶ, ཝིཉྙཱཎཾ པཙྩཡོ ཨིཏི.

ནཱམརཱུཔཔཙྩཡཱ ¶ སལཱ༹ཡཏནནྟི ནཱམཾ ཝུཏྟམེཝ. ཨིདྷ པན རཱུཔཾ ནིཡམཏོ ཙཏྟཱརི བྷཱུཏཱནི ཚ ཝཏྠཱུནི ཛཱིཝིཏིནྡྲིཡནྟི ཨེཀཱདསཝིདྷཾ. སལཱ༹ཡཏནཾ – ཙཀྑཱཡཏནཾ, སོཏཱཡཏནཾ, གྷཱནཱཡཏནཾ, ཛིཝ྄ཧཱཡཏནཾ, ཀཱཡཱཡཏནཾ, མནཱཡཏནཾ.

ཏཏྠ སིཡཱ – ཀཐཾ པནེཏཾ ཛཱནིཏབྦཾ ‘‘ནཱམརཱུཔཾ སལཱ༹ཡཏནསྶ པཙྩཡོ’’ཏི? ནཱམརཱུཔབྷཱཝེ ¶ བྷཱཝཏོ. ཏསྶ ཏསྶ ཧི ནཱམསྶ རཱུཔསྶ ཙ བྷཱཝེ ཏཾ ཏཾ ཨཱཡཏནཾ ཧོཏི, ན ཨཉྙཐཱཏི.

སལཱ༹ཡཏནཔཙྩཡཱ ཕསྶོཏི –

‘‘ཚལེ༹ཝ ཕསྶཱ སངྑེཔཱ, ཙཀྑུསམྥསྶཨཱདཡོ;

ཝིཉྙཱཎམིཝ བཱཏྟིཾས, ཝིཏྠཱརེན བྷཝནྟི ཏེ’’.

ཕསྶཔཙྩཡཱ ཝེདནཱཏི –

‘‘དྭཱརཏོ ཝེདནཱ ཝུཏྟཱ, ཙཀྑུསམྥསྶཛཱདིཀཱ;

ཚལེ༹ཝ ཏཱ པབྷེདེན, ཨིདྷ བཱཏྟིཾས ཝེདནཱ’’.

ཝེདནཱཔཙྩཡཱ ཏཎྷཱཏི –

‘‘རཱུཔཏཎྷཱདིབྷེདེན, ཚ ཏཎྷཱ ཨིདྷ དཱིཔིཏཱ;

ཨེཀེཀཱ ཏིཝིདྷཱ ཏཏྠ, པཝཏྟཱཀཱརཏོ མཏཱ.

‘‘དུཀྑཱི ¶ སུཁཾ པཏྠཡཏི, སུཁཱི བྷིཡྻོཔི ཨིཙྪཏི;

ཨུཔེཀྑཱ པན སནྟཏྟཱ, སུཁམིཙྩེཝ བྷཱསིཏཱ.

‘‘ཏཎྷཱཡ པཙྩཡཱ ཏསྨཱ, ཧོནྟི ཏིསྶོཔི ཝེདནཱ;

ཝེདནཱཔཙྩཡཱ ཏཎྷཱ, ཨིཏི ཝུཏྟཱ མཧེསིནཱ’’.

ཏཎྷཱཔཙྩཡཱ ཨུཔཱདཱནནྟི ཙཏྟཱརི ཨུཔཱདཱནཱནི – ཀཱམུཔཱདཱནཾ, དིཊྛུཔཱདཱནཾ, སཱིལབྦཏུཔཱདཱནཾ, ཨཏྟཝཱདུཔཱདཱནཾ. ཨུཔཱདཱནཔཙྩཡཱ བྷཝོཏི ཨིདྷ ཀམྨབྷཝོ ཨདྷིཔྤེཏོ. ཨུཔཔཏྟིབྷཝོ པན པདུདྡྷཱརཝསེན ཝུཏྟོ. བྷཝཔཙྩཡཱ ཛཱཏཱིཏི ཀམྨབྷཝཔཙྩཡཱ པཊིསནྡྷིཁནྡྷཱནཾ པཱཏུབྷཱཝོ.

ཏཏྠ སིཡཱ – ཀཐཾ པནེཏཾ ཛཱནིཏབྦཾ ‘‘བྷཝོ ཛཱཏིཡཱ པཙྩཡོ’’ཏི ཙེ? བཱཧིརཔཙྩཡསམཏྟེཔི ཧཱིནཔཎཱིཏཱདིཝིསེསདསྶནཏོ. བཱཧིརཱནཉྷི ཛནཀཛནནིསུཀྐསོཎིཏཱཧཱརཱདཱིནཾ ¶ པཙྩཡཱནཾ སམཏྟེཔི སཏྟཱནཾ ཡམཀཱནམྤི སཏཾ ཧཱིནཔྤཎཱིཏཏཱདིཝིསེསོ དིསྶཏི. སོ ཙ ན ཨཧེཏུཀོ སབྦདཱ ¶ ཙ སབྦེསཉྩ ཨབྷཱཝཏོ, ན ཀམྨབྷཝཏོ ཨཉྙཧེཏུཀོ ཏདབྷིནིབྦཏྟཀསཏྟཱནཾ ཨཛ྄ཛྷཏྟསནྟཱནེ ཨཉྙསྶ ཀཱརཎསྶ ཨབྷཱཝཏོཏི ཀམྨབྷཝཧེཏུཀོཡེཝ. ཀམྨཉྷི སཏྟཱནཾ ཧཱིནཔྤཎཱིཏཏཱདིཝིསེསསྶ ཧེཏུ. ཏེནཱཧ བྷགཝཱ – ‘‘ཀམྨཾ སཏྟེ ཝིབྷཛཏི, ཡདིདཾ ཧཱིནཔྤཎཱིཏཏཱཡཱ’’ཏི (མ. ནི. ༣.༢༨༩).

ཛཱཏིཔཙྩཡཱ ཛརཱམརཎནྟིཨཱདཱིསུ ཡསྨཱ ཨསཏི ཛཱཏིཡཱ ཛརཱམརཎཾ ནཱམ སོཀཱདཡོ ཝཱ དྷམྨཱ ན ཧོནྟི, ཛཱཏིཡཱ པན སཏི ཛརཱམརཎཉྩེཝ ཛརཱམརཎསངྑཱཏདུཀྑདྷམྨཕུཊྛསྶ ཙ བཱལསྶ ཛརཱམརཎཱབྷིསམྦནྡྷཱ ཝཱ ཏེན ཏེན དུཀྑདྷམྨེན ཕུཊྛསྶ ཨནབྷིསམྦནྡྷཱ ཝཱ སོཀཱདཡོ ཙ དྷམྨཱ ཧོནྟི, ཏསྨཱ ཨཡཾ ཛཱཏི ཛརཱམརཎསྶ ཙེཝ སོཀཱདཱིནཉྩ པཙྩཡོ ཧོཏཱིཏི ཝེདིཏབྦཱ.

སོ ཏཐཱབྷཱཝིཏེན ཙིཏྟེནཱཏིཨཱདཱིསུ པུབྦེནིཝཱསཱནུསྶཏིཉཱཎཱཡཱཏི ཨེཏསྶ ཉཱཎསྶ ཨདྷིགམཱཡ, པཏྟིཡཱཏི ཝུཏྟཾ ཧོཏི. ཨནེཀཝིཧིཏནྟི ཨནེཀཝིདྷཾ ནཱནཔྤཀཱརཾ, ཨནེཀེཧི ཝཱ པཀཱརེཧི པཝཏྟིཏཾ, སཾཝཎྞིཏནྟི ཨཏྠོ. པུབྦེནིཝཱསནྟི སམནནྟརཱཏཱིཏཾ བྷཝཾ ཨཱདིཾ ཀཏྭཱ ཏཏྠ ཏཏྠ ནིཝུཏྠསནྟཱནཾ. ཨནུསྶརཏཱིཏི ཁནྡྷཔཊིཔཱཊིཝསེན ཙུཏིཔཊིསནྡྷིཝསེན ཝཱ ཨནུགནྟྭཱ ཨནུགནྟྭཱ སརཏི. ཨིམཉྷི པུབྦེནིཝཱསཾ ཚ ཛནཱ ཨནུསྶརནྟི ཏིཏྠིཡཱ པཀཏིསཱཝཀཱ མཧཱསཱཝཀཱ ཨགྒསཱཝཀཱ པཙྩེཀབུདྡྷཱ བུདྡྷཱཏི. ཏཏྠ ཏིཏྠིཡཱ ཙཏྟཱལཱིསཾཡེཝ ཀཔྤེ ཨནུསྶརནྟི ¶ , ན ཏཏོ པརཾ. ཀསྨཱ? དུབྦལཔཉྙཏྟཱ. ཏེསཉྷི ནཱམརཱུཔཔརིཙྪེདཝིརཧིཏཏྟཱ དུབྦལཱ པཉྙཱ ཧོཏི. པཀཏིསཱཝཀཱ ཀཔྤསཏམྤི ཀཔྤསཧསྶམྤི ཨནུསྶརནྟིཡེཝ བལཝཔཉྙཏྟཱ. ཨསཱིཏི མཧཱསཱཝཀཱ སཏསཧསྶཀཔྤེ ཨནུསྶརནྟི. དྭེ ཨགྒསཱཝཀཱ ཨེཀམསངྑེཡྻཾ ཀཔྤསཏསཧསྶཉྩ. པཙྩེཀབུདྡྷཱ དྭེ ཨསངྑེཡྻཱནི སཏསཧསྶཉྩ. ཨེཏྟཀོ ཧི ཏེསཾ ཨབྷིནཱིཧཱརོ. བུདྡྷཱནཾ པན པརིཙྪེདོ ནཱམ ནཏྠི. ཏིཏྠིཡཱ ཙ ཁནྡྷཔཊིཔཱཊིམེཝ སརནྟི, པཊིཔཱཊིཾ མུཉྩིཏྭཱ ཙུཏིཔཊིསནྡྷིཝསེན སརིཏུཾ ན སཀྐོནྟི. ཡཐཱ ཨནྡྷཱ ཡཊྛིཾ ཨམུཉྩིཏྭཱཝ གཙྪནྟི, ཨེཝཾ ཏེ ཁནྡྷཔཊིཔཱཊིཾ ཨམུཉྩིཏྭཱཝ སརནྟི. པཀཏིསཱཝཀཱ ཁནྡྷཔཊིཔཱཊིཡཱཔི ¶ ཨནུསྶརནྟི, ཙུཏིཔཊིསནྡྷིཝསེནཱཔི སངྐམནྟི, ཏཐཱ ཨསཱིཏི མཧཱསཱཝཀཱ. དྭིནྣཾ པན ཨགྒསཱཝཀཱནཾ ཁནྡྷཔཊིཔཱཊིཀིཙྩཾ ནཏྠི. ཨེཀསྶ ཨཏྟབྷཱཝསྶ ཙུཏིཾ དིསྭཱ པཊིསནྡྷིཾ པསྶནྟི, པུན ཨཔརསྶ ཙུཏིཾ ¶ དིསྭཱ པཊིསནྡྷིནྟི ཨེཝཾ ཙུཏིཔཊིསནྡྷིཝསེནེཝ སངྐམནྟཱ གཙྪནྟི, ཏཐཱ པཙྩེཀབུདྡྷཱ. བུདྡྷཱནཾ པན ནེཝ ཁནྡྷཔཊིཔཱཊིཀིཙྩཾ, ན ཙུཏིཔཊིསནྡྷིཝསེན སངྐམནཀིཙྩཾ ཨཏྠི. ཏེསཉྷི ཨནེཀཱསུ ཀཔྤཀོཊཱིསུ ཧེཊྛཱ ཝཱ ཨུཔརི ཝཱ ཡཾ ཡཾ ཋཱནཾ ཨིཙྪནྟི, ཏཾ ཏཾ པཱཀཊམེཝ ཧོཏི. ཏསྨཱ ཨནེཀཱཔི ཀཔྤཀོཊིཡོ སངྑིཔིཏྭཱ ཡཾ ཡཾ ཨིཙྪནྟི, ཏཏྠ ཏཏྠེཝ ཨོཀྐམནྟཱ སཱིཧོཀྐནྟཝསེན གཙྪནྟི. ཨེཝཾ གཙྪནྟཱནཉྩ ནེསཾ ཉཱཎཾ ཨནྟརནྟརཱསུ ཛཱཏཱིསུ ཨསཛྫམཱནཾ ཨིཙྪིཏིཙྪིཏཊྛཱནམེཝ གཎྷཱཏི.

ཨིམེསུ པན ཚསུ པུབྦེནིཝཱསཾ ཨནུསྶརནྟེསུ ཏིཏྠིཡཱནཾ པུབྦེནིཝཱསདསྶནཾ ཁཛྫོཔནཀཔྤབྷཱསདིསཾ ཧུཏྭཱ ཨུཔཊྛཱཏི, པཀཏིསཱཝཀཱནཾ དཱིཔཔྤབྷཱསདིསཾ, མཧཱསཱཝཀཱནཾ ཨུཀྐཱཔབྷཱསདིསཾ, ཨགྒསཱཝཀཱནཾ ཨོསདྷིཏཱརཀཱཔབྷཱསདིསཾ, པཙྩེཀབུདྡྷཱནཾ ཙནྡཔྤབྷཱསདིསཾ. བུདྡྷཱནཾ རསྨིསཧསྶཔཊིམཎྜིཏསརདསཱུརིཡམཎྜལསདིསཾ ཧུཏྭཱ ཨུཔཊྛཱཏི. ཏིཏྠིཡཱནཾ པུབྦེནིཝཱསཱནུསྶརཎཾ ཨནྡྷཱནཾ ཡཊྛིཀོཊིགམནཾ ཝིཡ ཧོཏི. པཀཏིསཱཝཀཱནཾ དཎྜཀསེཏུགམནཾ ཝིཡ, མཧཱསཱཝཀཱནཾ ཛངྒྷསེཏུགམནཾ ཝིཡ, ཨགྒསཱཝཀཱནཾ སཀཊསེཏུགམནཾ ཝིཡ, པཙྩེཀབུདྡྷཱནཾ ཛངྒྷམགྒགམནཾ ཝིཡ, བུདྡྷཱནཾ མཧཱསཀཊམགྒགམནཾ ཝིཡ ཧོཏི. ཨིམསྨིཾ པན ཨདྷིཀཱརེ སཱཝཀཱནཾ པུབྦེནིཝཱསཱནུསྶརཎཾ ཨདྷིཔྤེཏཾ.

ཏསྨཱ ཨེཝཾ ཨནུསྶརིཏུཀཱམེན ཨཱདིཀམྨིཀེན བྷིཀྑུནཱ པཙྪཱབྷཏྟཾ པིཎྜཔཱཏཔཊིཀྐནྟེན རཧོགཏེན པཊིསལླཱིནེན པཊིཔཱཊིཡཱ ཙཏྟཱརི ཛྷཱནཱནི སམཱཔཛྫིཏྭཱ ཨབྷིཉྙཱཔཱདཀཛ྄ཛྷཱནཏོ ཝུཊྛཱཡ ཝུཏྟནཡེན པཊིཙྩསམུཔྤཱདཾ པཙྩཝེཀྑིཏྭཱ སབྦཔཙྪིམཱ ནིསཛྫཱ ཨཱཝཛྫིཏབྦཱ. ཏཏོ ཨཱསནཔཉྙཱཔནཾ སེནཱསནཔྤཝེསནཾ པཏྟཙཱིཝརཔཊིསཱམནཾ བྷོཛནཀཱལོ ¶ གཱམཏོ ཨཱགམནཀཱལོ གཱམེ པིཎྜཱཡ ཙརིཏཀཱལོ གཱམཾ པིཎྜཱཡ པཝིཊྛཀཱལོ ཝིཧཱརཏོ ནིཀྑམནཀཱལོ ཙེཏིཡབོདྷིཝནྡནཀཱལོ པཏྟདྷོཝནཀཱལོ པཏྟཔཊིགྒཧཎཀཱལོ པཏྟཔཊིགྒཧཎཏོ ཡཱཝ མུཁདྷོཝནཱ ཀཏཀིཙྩཾ ¶ པཙྩཱུསཀཱལེ ཀཏཀིཙྩཾ, མཛ྄ཛྷིམཡཱམེ པཋམཡཱམེ ཀཏཀིཙྩནྟི ཨེཝཾ པཊིལོམཀྐམེན སཀལཾ རཏྟིནྡིཝཾ ཀཏཀིཙྩཾ ཨཱཝཛྫིཏབྦཾ. ཨེཏྟཀཾ པན པཀཏིཙིཏྟསྶཔི པཱཀཊཾ ཧོཏི, པརིཀམྨསམཱདྷིཙིཏྟསྶ པན ཨཏིཔཱཀཊམེཝ. སཙེ པནེཏྠ ཀིཉྩི ན པཱཀཊཾ ཧོཏི, པུན པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ཨཱཝཛྫིཏབྦཾ. ཨེཏྟཀེན དཱིཔེ ཛལིཏེ ཝིཡ པཱཀཊཾ ཧོཏི ¶ . ཨེཝཾ པཊིལོམཀྐམེནེཝ དུཏིཡདིཝསེཔི ཏཏིཡཙཏུཏྠཔཉྩམདིཝསེསུཔི དསཱཧེཔི ཨདྡྷམཱསེཔི མཱསེཔི སཾཝཙྪརེཔི ཀཏཀིཙྩཾ ཨཱཝཛྫིཏབྦཾ. ཨེཏེནེཝ ཨུཔཱཡེན དས ཝསྶཱནི ཝཱིསཏི ཝསྶཱནཱིཏི ཡཱཝ ཨིམསྨིཾ བྷཝེ ཨཏྟནོ པཊིསནྡྷི, ཏཱཝ ཨཱཝཛྫནྟེན པུརིམབྷཝེ ཙུཏིཀྑཎེ པཝཏྟཾ ནཱམརཱུཔཾ ཨཱཝཛྫིཏབྦཾ. པཧོཏི ཧི པཎྜིཏོ བྷིཀྑུ པཋམཝཱརེནེཝ པཊིསནྡྷིཾ ཨུགྒྷཱཊེཏྭཱ ཙུཏིཀྑཎེ ནཱམརཱུཔཾ ཨཱརམྨཎཾ ཀཱཏུཾ. ཡསྨཱ པན པུརིམབྷཝེ ནཱམརཱུཔཾ ཨསེསཾ ནིརུདྡྷཾ, ཨིདྷ ཨཉྙཾ ཨུཔྤནྣཾ, ཏསྨཱ ཏཾ ཋཱནཾ ཨཱཧུནྡརིཀཾ ཨནྡྷཏམམིཝ ཧོཏི སུདུདྡསཾ དུཔྤཉྙེན. ཏེནཱཔི ‘‘ན སཀྐོམཧཾ པཊིསནྡྷིཾ ཨུགྒྷཱཊེཏྭཱ ཙུཏིཀྑཎེ ནཱམརཱུཔཱརམྨཎཾ ཀཱཏུ’’ནྟི དྷུརནིཀྑེཔོ ན ཀཱཏབྦོ. ཏདེཝ པན པཱདཀཛ྄ཛྷཱནཾ པུནཔྤུནཾ སམཱཔཛྫིཏྭཱ ཝུཊྛཱཡ ཝུཊྛཱཡ ཏཾ ཋཱནཾ ཨཱཝཛྫིཏབྦཾ.

ཨེཝཾ ཀརོནྟོ ཧི སེཡྻཐཱཔི ནཱམ བལཝཱ པུརིསོ ཀཱུཊཱགཱརཀཎྞིཀཏྠཱཡ མཧཱརུཀྑཾ ཚིནྡནྟོ སཱཁཱཔལཱསཙྪེདནམཏྟེནེཝ ཕརསུདྷཱརཱཡ ཝིཔནྣཱཡ མཧཱརུཀྑཾ ཚིནྡིཏུཾ ཨསཀྐོནྟོཔི དྷུརནིཀྑེཔཾ ཨཀཏྭཱཝ ཀམྨཱརསཱལཾ གནྟྭཱ ཏིཁིཎཾ ཕརསུཾ ཀཱརཱཔེཏྭཱ པུན ཨཱགནྟྭཱ ཚིནྡེཡྻ, པུན ཝིཔནྣཱཡ ཙ པུནཔི ཏཐེཝ ཀཱརེཏྭཱ ཚིནྡེཡྻ, སོ ཨེཝཾ ཚིནྡནྟོ ཚིནྣསྶ ཚིནྣསྶ པུན ཚེཏྟབྦཱབྷཱཝཏོ ཨཚིནྣསྶ ཙ ཚེདནཏོ ནཙིརསྶེཝ མཧཱརུཀྑཾ པཱཏེཡྻ, ཨེཝམེཝ པཱདཀཛ྄ཛྷཱནཱ ཝུཊྛཱཡ པུབྦེ ཨཱཝཛྫིཏཾ ཨནཱཝཛྫིཏྭཱ པཊིསནྡྷིམེཝ ཨཱཝཛྫནྟོ ཏཾ ནཙིརསྶེཝ པཊིསནྡྷིཾ ཨུགྒྷཱཊེཏྭཱ ཙུཏིཀྑཎེ ནཱམརཱུཔཾ ཨཱརམྨཎཾ ཀརེཡྻཱཏི. ཏཏྠ པཙྪིམནིསཛྫཏོ པབྷུཏི ཡཱཝ པཊིསནྡྷིཏོ ཨཱརམྨཎཾ ཀཏྭཱ པཝཏྟཾ ཉཱཎཾ པུབྦེནིཝཱསཉཱཎཾ ནཱམ ན ཧོཏི, ཏཾ པན པརིཀམྨསམཱདྷིཉཱཎཾ ནཱམ ཧོཏི. ‘‘ཨཏཱིཏཾསཉཱཎ’’ནྟི པེཏཾ ཨེཀེ ཝདནྟི ¶ . ཏཾ ཨཏཱིཏཾསཉཱཎསྶ རཱུཔཱཝཙརཏྟཱ རཱུཔཱཝཙརཾ སནྡྷཱཡ ཝཙནཾ ན ཡུཛྫཏི. ཡདཱ པནསྶ བྷིཀྑུནོ པཊིསནྡྷིཾ ཨཏིཀྐམྨ ཙུཏིཀྑཎེ པཝཏྟཾ ནཱམརཱུཔཾ ཨཱརམྨཎཾ ཀཏྭཱ མནོདྭཱརཱཝཛྫནཾ ཨུཔྤཛྫིཏྭཱ པུབྦེ ཝུཏྟནཡེན ཨཔྤནཱཙིཏྟཾ ཨུཔྤཛྫཏི, ཏདཱསྶ ཏེན ཙིཏྟེན སམྤཡུཏྟཾ ཉཱཎཾ པུབྦེནིཝཱསཱནུསྶཏིཉཱཎཾ ནཱམ. ཏེན ཉཱཎེན སམྤཡུཏྟཱཡ སཏིཡཱ པུབྦེནིཝཱསཾ ཨནུསྶརཏི.

ཏཏྠ ¶ སེཡྻཐིདནྟི ཨཱརདྡྷཔྤཀཱརདསྶནཏྠེ ནིཔཱཏོ. ཏེནེཝ ཡྭཱཡཾ པུབྦེནིཝཱསོ ཨཱརདྡྷོ, ཏསྶ པཀཱརཔྤབྷེདཾ དསྶེནྟོ ཨེཀམྤི ཛཱཏིནྟིཨཱདིམཱཧ. ཏཏྠ ཨེཀམྤི ཛཱཏིནྟི ཨེཀམྤི པཊིསནྡྷིམཱུལཾ ཙུཏིཔརིཡོསཱནཾ ¶ ཨེཀབྷཝཔརིཡཱཔནྣཾ ཁནྡྷསནྟཱནཾ. ཨེས ནཡོ དྭེཔི ཛཱཏིཡོཏིཨཱདཱིསུ. ཨནེཀེཔི སཾཝཊྚཀཔྤེཏིཨཱདཱིསུ པན པརིཧཱཡམཱནོ ཀཔྤོ སཾཝཊྚཀཔྤོ ཏདཱ སབྦེསཾ བྲཧྨལོཀེ སནྣིཔཏནཏོ. ཝཌྜྷམཱནོ ཀཔྤོ ཝིཝཊྚཀཔྤོ ཏདཱ བྲཧྨལོཀཏོ སཏྟཱནཾ ཝིཝཊྚནཏོ. ཏཏྠ སཾཝཊྚེན སཾཝཊྚཊྛཱཡཱི གཧིཏོ ཧོཏི ཏཾམཱུལཀཏྟཱ. ཝིཝཊྚེན ཙ ཝིཝཊྚཊྛཱཡཱི. ཨེཝཉྷི སཏི ‘‘ཙཏྟཱརིམཱནི, བྷིཀྑཝེ, ཀཔྤསྶ ཨསངྑྱེཡྻཱནི. ཀཏམཱནི ཙཏྟཱརི? ཡདཱ, བྷིཀྑཝེ, ཀཔྤོ སཾཝཊྚཏི, ཏཾ ན སུཀརཾ སངྑཱཏུཾ. ཡདཱ, བྷིཀྑཝེ, ཀཔྤོ སཾཝཊྚོ ཏིཊྛཏི…པེ… ཡདཱ, བྷིཀྑཝེ, ཀཔྤོ ཝིཝཊྚཏི…པེ… ཡདཱ, བྷིཀྑཝེ, ཀཔྤོ ཝིཝཊྚོ ཏིཊྛཏི, ཏཾ ན སུཀརཾ སངྑཱཏུ’’ནྟི (ཨ. ནི. ༤.༡༥༦) ཝུཏྟཱནི ཙཏྟཱརི ཨསངྑེཡྻཱནི པརིགྒཧིཏཱནི ཧོནྟི.

ཏཏྠ ཏཡོ སཾཝཊྚཱ – ཏེཛོསཾཝཊྚོ, ཨཱཔོསཾཝཊྚོ, ཝཱཡོསཾཝཊྚོཏི. ཏིསྶོ སཾཝཊྚསཱིམཱ – ཨཱབྷསྶརཱ, སུབྷཀིཎྷཱ, ཝེཧཔྥལཱཏི. ཡདཱ ཀཔྤོ ཏེཛེན སཾཝཊྚཏི, ཨཱབྷསྶརཏོ ཧེཊྛཱ ཨགྒིནཱ ཌཡ྄ཧཏི. ཡདཱ ཨཱཔེན སཾཝཊྚཏི, སུབྷཀིཎྷཏོ ཧེཊྛཱ ཨུདཀེན ཝིལཱིཡཏི. ཡདཱ ཝཱཡུནཱ སཾཝཊྚཏི, ཝེཧཔྥལཏོ ཧེཊྛཱ ཝཱཏེན ཝིདྡྷཾསཱིཡཏི. ཝིཏྠཱརཏོ པན སདཱཔི ཨེཀཾ བུདྡྷཀྑེཏྟཾ ཝིནསྶཏི. བུདྡྷཀྑེཏྟཾ ནཱམ ཏིཝིདྷཾ ཧོཏི – ཛཱཏིཀྑེཏྟཾ, ཨཱཎཱཀྑེཏྟཾ, ཝིསཡཀྑེཏྟཉྩ. ཏཏྠ ཛཱཏིཀྑེཏྟཾ དསསཧསྶཙཀྐཝཱལ༹པརིཡནྟཾ ཧོཏི, ཡཾ ཏཐཱགཏསྶ པཊིསནྡྷིགཧཎཱདཱིསུ ཀམྤཏི. ཨཱཎཱཀྑེཏྟཾ ཀོཊིསཏསཧསྶཙཀྐཝཱལ༹པརིཡནྟཾ, ཡཏྠ རཏནཔརིཏྟཾ, ཁནྡྷཔརིཏྟཾ, དྷཛགྒཔརིཏྟཾ, ཨཱཊཱནཱཊིཡཔརིཏྟཾ ¶ , མོརཔརིཏྟནྟི ཨིམེསཾ པརིཏྟཱནཾ ཨཱནུབྷཱཝོ ཝཏྟཏི. ཝིསཡཀྑེཏྟཾ ཨནནྟམཔརིམཱཎཾ, ཡཾ ‘‘ཡཱཝཏཱ ཝཱ པན ཨཱཀངྑེཡྻཱ’’ཏི (ཨ. ནི. ༣.༨༡) ཝུཏྟཾ. ཏཏྠ ཡཾ ཡཾ ཏཐཱགཏོ ཨཱཀངྑཏི, ཏཾ ཏཾ ཛཱནཱཏི. ཨེཝམེཏེསུ ཏཱིསུ བུདྡྷཀྑེཏྟེསུ ཨེཀཾ ཨཱཎཱཀྑེཏྟཾ ཝིནསྶཏི, ཏསྨིཾ པན ཝིནསྶནྟེ ཛཱཏིཀྑེཏྟཾ ཝིནཊྛམེཝ ཧོཏི, ཝིནསྶནྟཉྩ ཨེཀཏོཝ ཝིནསྶཏི, སཎྛཧནྟཉྩ ཨེཀཏོཝ སཎྛཧཏི.

ཏསྶེཝཾ ཝིནཱསོ ཙ སཎྛཧནཉྩ ཝེདིཏབྦཾ – ཡསྨིཾ སམཡེ ཀཔྤོ ཨགྒིནཱ ནསྶཏི, ཨཱདིཏོཝ ཀཔྤཝིནཱསཀམཧཱམེགྷོ ཝུཊྛཧིཏྭཱ ཀོཊིསཏསཧསྶཙཀྐཝཱལེ༹ ཨེཀཾ མཧཱཝསྶཾ ཝསྶཏི. མནུསྶཱ ཏུཊྛཱ སབྦབཱིཛཱནི ནཱིཧརིཏྭཱ ཝཔནྟི. སསྶེསུ པན གོཁཱཡིཏཀམཏྟེསུ ཛཱཏེསུ གདྲབྷརཝཾ ¶ རཝནྟོ ཨེཀབིནྡུམཏྟམྤི ན ཝསྶཏི, ཏདཱ པཙྪིནྣཾ པཙྪིནྣམེཝ ཝསྶཾ ཧོཏི. ཝསྶཱུཔཛཱིཝིནོ སཏྟཱ ཀམེན བྲཧྨལོཀེ ནིབྦཏྟནྟི, པུཔྥཕལཱུཔཛཱིཝིནིཡོ ཙ དེཝཏཱ. ཨེཝཾ ¶ དཱིགྷེ ཨདྡྷཱནེ ཝཱིཏིཝཏྟེ ཏཏྠ ཏཏྠ ཨུདཀཾ པརིཀྑཡཾ གཙྪཏི. ཨཐཱནུཀྐམེན མཙྪཀཙྪཔཱཔི ཀཱལཾ ཀཏྭཱ བྲཧྨལོཀེ ནིབྦཏྟནྟི, ནེརཡིཀསཏྟཱཔི. ཏཏྠ ‘‘ནེརཡིཀཱ སཏྟམསཱུརིཡཔཱཏུབྷཱཝེ ཝིནསྶནྟཱི’’ཏི ཨེཀེ. ཛྷཱནཾ ཝིནཱ ནཏྠི བྲཧྨལོཀེ ནིབྦཏྟི, ཨེཏེསཉྩ ཀེཙི དུབྦྷིཀྑཔཱིལི༹ཏཱ, ཀེཙི ཨབྷབྦཱ ཛྷཱནཱདྷིགམཱཡ, ཏེ ཀཐཾ ཏཏྠ ནིབྦཏྟནྟཱིཏི? དེཝལོཀེ པཊིལདྡྷཛ྄ཛྷཱནཝསེན. ཏདཱ ཧི ‘‘ཝསྶསཏསཧསྶསྶ ཨཙྩཡེན ཀཔྤཝུཊྛཱནཾ བྷཝིསྶཏཱི’’ཏི ལོཀབྱཱུཧཱ ནཱམ ཀཱམཱཝཙརདེཝཱ མུཏྟསིརཱ ཝིཀིཎྞཀེསཱ རུདམུཁཱ ཨསྶཱུནི ཧཏྠེཧི པུཉྪམཱནཱ རཏྟཝཏྠནིཝཏྠཱ ཨཏིཝིཡ ཝིརཱུཔཝེསདྷཱརིནོ ཧུཏྭཱ མནུསྶཔཐེ ཝིཙརནྟཱ ཨེཝཾ ཨཱརོཙེནྟི – ‘‘མཱརིསཱ, མཱརིསཱ, ཨིཏོ ཝསྶསཏསཧསྶསྶ ཨཙྩཡེན ཀཔྤཝུཊྛཱནཾ བྷཝིསྶཏི, ཨཡཾ ལོཀོ ཝིནསྶིསྶཏི, མཧཱསམུདྡོཔི ཨུསྶུསྶིསྶཏི, ཨཡཉྩ མཧཱཔཐཝཱི སིནེརུ ཙ པབྦཏརཱཛཱ ཨུདྡཡ྄ཧིསྶནྟི ཝིནསྶིསྶནྟི, ཡཱཝ བྲཧྨལོཀཱ ལོཀཝིནཱསོ བྷཝིསྶཏི. མེཏྟཾ, མཱརིསཱ, བྷཱཝེཐ. ཀརུཎཾ… མུདིཏཾ… ཨུཔེཀྑཾ, མཱརིསཱ, བྷཱཝེཐ. མཱཏརཾ ཨུཔཊྛཧཐ, པིཏརཾ ཨུཔཊྛཧཐ, ཀུལེ ཛེཊྛཱཔཙཱཡིནོ ཧོཐཱ’’ཏི. ཏེསཾ ཝཙནཾ སུཏྭཱ ཡེབྷུཡྻེན མནུསྶཱ ཙ བྷུམྨཱ དེཝཱ ཙ སཾཝེགཛཱཏཱ ཨཉྙམཉྙཾ མུདུཙིཏྟཱ ཧུཏྭཱ མེཏྟཱདཱིནི པུཉྙཱནི ¶ ཀརིཏྭཱ དེཝལོཀེ ནིབྦཏྟནྟི. ཏཏྠ དིབྦསུདྷཱབྷོཛནཾ བྷུཉྫིཏྭཱ ཝཱཡོཀསིཎེ པརིཀམྨཾ ཀཏྭཱ ཛྷཱནཾ པཊིལབྷནྟི. ཏདཉྙེ པན ཨཔརཔརིཡཝེདནཱིཡེན ཀམྨེན དེཝལོཀེ ནིབྦཏྟནྟི. ཨཔརཔརིཡཝེདནཱིཡཀམྨརཧིཏོ ཧི སཾསཱརེ སཾསརནྟོ ནཱམ སཏྟོ ནཏྠི. ཏེཔི ཏཏྠ ཏཐེཝ ཛྷཱནཾ པཊིལབྷནྟི. ཨེཝཾ དེཝལོཀེ པཊིལདྡྷཛ྄ཛྷཱནཝསེན སབྦེཔི བྲཧྨལོཀེ ནིབྦཏྟནྟཱིཏི.

ཝསྶཱུཔཙྪེདཏོ པན ཨུདྡྷཾ དཱིགྷསྶ ཨདྡྷུནོ ཨཙྩཡེན དུཏིཡོ སཱུརིཡོ པཱཏུབྷཝཏི, ཏསྨིཾ པཱཏུབྷཱུཏེ ནེཝ རཏྟིཔརིཙྪེདོ, ན དིཝཱཔརིཙྪེདོ པཉྙཱཡཏི. ཨེཀོ སཱུརིཡོ ཨུདེཏི, ཨེཀོ ཨཏྠཾ གཙྪཏི, ཨཝིཙྪིནྣསཱུརིཡསནྟཱཔོཝ ལོཀོ ཧོཏི. ཡཐཱ ཙ པཀཏིསཱུརིཡེ སཱུརིཡདེཝཔུཏྟོ ¶ ཧོཏི, ཨེཝཾ ཀཔྤཝིནཱསཀསཱུརིཡེ ནཏྠི. ཏཏྠ པཀཏིསཱུརིཡེ ཝཏྟམཱནེ ཨཱཀཱསེ ཝལཱཧཀཱཔི དྷཱུམསིཁཱཔི ཙརནྟི. ཀཔྤཝིནཱསཀསཱུརིཡེ ཝཏྟམཱནེ ཝིགཏདྷཱུམཝལཱཧཀཾ ཨཱདཱསམཎྜལཾ ཝིཡ ནིམྨལཾ ནབྷཾ ཧོཏི. ཋཔེཏྭཱ པཉྩ མཧཱནདིཡོ སེསཀུནྣདཱིཨཱདཱིསུ ཨུདཀཾ སུསྶཏི.

ཏཏོཔི དཱིགྷསྶ ཨདྡྷུནོ ཨཙྩཡེན ཏཏིཡོ སཱུརིཡོ པཱཏུབྷཝཏི, ཡསྶ པཱཏུབྷཱཝཱ མཧཱནདིཡོཔི སུསྶནྟི.

ཏཏོཔི དཱིགྷསྶ ཨདྡྷུནོ ཨཙྩཡེན ཙཏུཏྠོ སཱུརིཡོ པཱཏུབྷཝཏི, ཡསྶ པཱཏུབྷཱཝཱ ཧིམཝཏི ¶ མཧཱནདཱིནཾ པབྷཝཱ – ‘‘སཱིཧཔཔཱཏནོ, ཧཾསཔཱཏནོ, ཀཎྞམུཎྜཀོ, རཐཀཱརདཧོ, ཨནོཏཏྟདཧོ, ཚདྡནྟདཧོ, ཀུཎཱལདཧོ’’ཏི ཨིམེ སཏྟ མཧཱསརཱ སུསྶནྟི.

ཏཏོཔི དཱིགྷསྶ ཨདྡྷུནོ ཨཙྩཡེན པཉྩམོ སཱུརིཡོ པཱཏུབྷཝཏི, ཡསྶ པཱཏུབྷཱཝཱ ཨནུཔུབྦེན མཧཱསམུདྡེ ཨངྒུལིཔབྦཏེམནམཏྟམྤི ཨུདཀཾ ན སཎྛཱཏི.

ཏཏོཔི དཱིགྷསྶ ཨདྡྷུནོ ཨཙྩཡེན ཚཊྛོ སཱུརིཡོ པཱཏུབྷཝཏི, ཡསྶ པཱཏུབྷཱཝཱ སཀལཙཀྐཝཱལ༹ཾ ཨེཀདྷཱུམཾ ཧོཏི པརིཡཱདིནྣསིནེཧཾ དྷཱུམེན. ཡཐཱ ཙིདཾ, ཨེཝཾ ཀོཊིསཏསཧསྶཙཀྐཝཱལཱ༹ནིཔི.

ཏཏོཔི དཱིགྷསྶ ཨདྡྷུནོ ཨཙྩཡེན སཏྟམོ སཱུརིཡོ པཱཏུབྷཝཏི, ཡསྶ པཱཏུབྷཱཝཱ སཀལཙཀྐཝཱལ༹ཾ ཨེཀཛཱལཾ ཧོཏི སདྡྷིཾ ཀོཊིསཏསཧསྶཙཀྐཝཱལེ༹ཧི. ཡོཛནསཏིཀཱདིབྷེདཱནི སིནེརུཀཱུཊཱནིཔི པལུཛྫིཏྭཱ ཨཱཀཱསེཡེཝ ཨནྟརདྷཱཡནྟི. སཱ ཨགྒིཛཱལཱ ཨུཊྛཧིཏྭཱ ཙཱཏུམཧཱརཱཛིཀེ གཎྷཱཏི. ཏཏྠ ཀནཀཝིམཱནརཏནཝིམཱནམཎིཝིམཱནཱནི ཛྷཱཔེཏྭཱ ཏཱཝཏིཾསབྷཝནཾ གཎྷཱཏི. ཨེཏེནེཝ ཨུཔཱཡེན ཡཱཝ པཋམཛ྄ཛྷཱནབྷཱུམིཾ ¶ གཎྷཱཏི. ཏཏྠ ཏཡོཔི. བྲཧྨལོཀེ ཛྷཱཔེཏྭཱ ཨཱབྷསྶརེ ཨཱཧཙྩ ཏིཊྛཏི. སཱ ཡཱཝ ཨཎུམཏྟམྤི སངྑཱརགཏཾ ཨཏྠི, ཏཱཝ ན ནིབྦཱཡཏི. སབྦསངྑཱརཔརིཀྑཡཱ པན སཔྤིཏེལཛྷཱཔནགྒིསིཁཱ ཝིཡ ཚཱརིཀམྤི ཨནཝསེསེཏྭཱ ནིབྦཱཡཏི. ཧེཊྛཱཨཱཀཱསེན སཧ ཨུཔརིཨཱཀཱསོ ཨེཀོ ཧོཏི མཧནྡྷཀཱརོ.

ཨཐ དཱིགྷསྶ ཨདྡྷུནོ ཨཙྩཡེན མཧཱམེགྷོ ཨུཊྛཧིཏྭཱ པཋམཾ སུཁུམཾ སུཁུམཾ ཝསྶཏི. ཨནུཔུབྦེན ཀུམུདནཱལ༹ཡཊྛིམུསལཏཱལཀྑནྡྷཱདིཔྤམཱཎཱཧི དྷཱརཱཧི ¶ ཝསྶནྟོ ཀོཊིསཏསཧསྶཙཀྐཝཱལེ༹སུ སབྦཾ དཌྜྷཊྛཱནཾ པཱུརེཏྭཱ ཨནྟརདྷཱཡཏི. ཏཾ ཨུདཀཾ ཧེཊྛཱ ཙ ཏིརིཡཉྩ ཝཱཏོ སམུཊྛཧིཏྭཱ གྷནཾ ཀརོཏི པརིཝཊུམཾ པདུམིནིཔཏྟེ ཨུདཀབིནྡུསདིསཾ. ཀཐཾ ཏཱཝ མཧནྟཾ ཨུདཀརཱསིཾ གྷནཾ ཀརོཏཱིཏི ཙེ? ཝིཝརསམྤདཱནཏོ. ཏཾ ཧིསྶ ཏཧིཾ ཏཧིཾ ཝིཝརཾ དེཏི. ཏཾ ཨེཝཾ ཝཱཏེན སམྤིཎྜིཡམཱནཾ གྷནཾ ཀརིཡམཱནཾ པརིཀྑཡམཱནཾ ཨནུཔུབྦེན ཧེཊྛཱ ཨོཏརཏི. ཨོཏིཎྞེ ཨོཏིཎྞེ ཨུདཀེ བྲཧྨལོཀཊྛཱནེ བྲཧྨལོཀཱ, ཨུཔརི ཙཏུཀཱམཱཝཙརདེཝལོཀཊྛཱནེ ཙ དེཝལོཀཱ པཱཏུབྷཝནྟི. པུརིམཔཐཝིཊྛཱནཾ ཨོཏིཎྞེ པན བལཝཝཱཏཱ ཨུཔྤཛྫནྟི. ཏེ ཏཾ པིཧིཏདྭཱརེ དྷམཀརཎེ ཋིཏཨུདཀམིཝ ནིརུསྶཱསཾ ཀཏྭཱ རུམྦྷནྟི. མདྷུརོདཀཾ པརིཀྑཡཾ གཙྪམཱནཾ ཨུཔརི རསཔཐཝིཾ སམུཊྛཱཔེཏི. སཱ ཝཎྞསམྤནྣཱ ཙེཝ ཧོཏི གནྡྷརསསམྤནྣཱ ཙ ནིརུདཀཔཱཡཱསསྶ ཨུཔརི པཊལཾ ཝིཡ. ཏདཱ ཙ ཨཱབྷསྶརབྲཧྨལོཀེ པཋམཏརཱབྷིནིབྦཏྟཱ ¶ སཏྟཱ ཨཱཡུཀྑཡཱ ཝཱ པུཉྙཀྑཡཱ ཝཱ ཏཏོ ཙཝིཏྭཱ ཨིདྷཱུཔཔཛྫནྟི. ཏེ ཧོནྟི སཡཾཔབྷཱ ཨནྟལིཀྑཙརཱ. ཏེ ཨགྒཉྙསུཏྟེ (དཱི. ནི. ༣.༡༢༠) ཝུཏྟནཡེན ཏཾ རསཔཐཝིཾ སཱཡིཏྭཱ ཏཎྷཱབྷིབྷཱུཏཱ ཨཱལུཔྤཀཱརཀཾ པརིབྷུཉྫིཏུཾ ཨུཔཀྐམནྟི.

ཨཐ ཏེསཾ སཡཾཔབྷཱ ཨནྟརདྷཱཡཏི, ཨནྡྷཀཱརོ ཧོཏི. ཏེ ཨནྡྷཀཱརཾ དིསྭཱ བྷཱཡནྟི. ཏཏོ ནེསཾ བྷཡཾ ནཱསེཏྭཱ སཱུརབྷཱཝཾ ཛནཡནྟཾ པརིཔུཎྞཔཉྙཱསཡོཛནཾ སཱུརིཡམཎྜལཾ པཱཏུབྷཝཏི. ཏེ ཏཾ དིསྭཱ ‘‘ཨཱལོཀཾ པཊིལབྷིམྷཱ’’ཏི ཧཊྛཏུཊྛཱ ཧུཏྭཱ ‘‘ཨམྷཱཀཾ བྷཱིཏཱནཾ བྷཡཾ ནཱསེཏྭཱ སཱུརབྷཱཝཾ ཛནཡནྟོ ཨུཊྛིཏོ, ཏསྨཱ སཱུརིཡོ ཧོཏཱུ’’ཏི སཱུརིཡོཏྭེཝསྶ ¶ ནཱམཾ ཀརོནྟི. ཨཐ སཱུརིཡེ དིཝསཾ ཨཱལོཀཾ ཀཏྭཱ ཨཏྠངྒཏེ ‘‘ཡམྤི ཨཱལོཀཾ ལབྷིམྷ, སོཔི ནོ ནཊྛོ’’ཏི པུན བྷཱིཏཱ ཧོནྟི, ཏེསཾ ཨེཝཾ ཧོཏི ‘‘སཱདྷུ ཝཏསྶ སཙེ ཨཉྙཾ ཨཱལོཀཾ ལབྷེཡྻཱམཱ’’ཏི. ཏེསཾ ཙིཏྟཾ ཉཏྭཱ ཝིཡ ཨེཀཱུནཔཉྙཱསཡོཛནཾ ཙནྡམཎྜལཾ པཱཏུབྷཝཏི. ཏེ ཏཾ དིསྭཱ བྷིཡྻོསོམཏྟཱཡ ཧཊྛཏུཊྛཱ ཧུཏྭཱ ‘‘ཨམྷཱཀཾ ཚནྡཾ ཉཏྭཱ ཝིཡ ཨུཊྛིཏོ, ཏསྨཱ ཙནྡོ ཧོཏཱུ’’ཏི ཙནྡོཏྭེཝསྶ ནཱམཾ ཀརོནྟི.

ཨེཝཾ ཙནྡིམསཱུརིཡེསུ པཱཏུབྷཱུཏེསུ ནཀྑཏྟཱནི ཏཱརཀརཱུཔཱནི པཱཏུབྷཝནྟི. ཏཏོ པབྷུཏི རཏྟིནྡིཝཱ པཉྙཱཡནྟི ཨནུཀྐམེན ཙ མཱསདྡྷམཱསཨུཏུསཾཝཙྪརཱ. ཙནྡིམསཱུརིཡཱནཾ པན པཱཏུབྷཱུཏདིཝསེཡེཝ སིནེརུཙཀྐཝཱལ༹ཧིམཝནྟཔབྦཏཱ པཱཏུབྷཝནྟི ¶ . ཏེ ཙ ཁོ ཨཔུབྦཾ ཨཙརིམཾ ཕགྒུཎཔུཎྞམདིཝསེཡེཝ པཱཏུབྷཝནྟི. ཀཐཾ? ཡཐཱ ནཱམ ཀངྒུབྷཏྟེ པཙྩམཱནེ ཨེཀཔྤཧཱརེནེཝ པུབྦུལ༹ཀཱ ཨུཊྛཧནྟི, ཨེཀེ པདེསཱ ཐཱུཔཐཱུཔཱ ཧོནྟི, ཨེཀེ ནིནྣནིནྣཱ ཨེཀེ སམསམཱ, ཨེཝམེཝཾ ཐཱུཔཐཱུཔཊྛཱནེ པབྦཏཱ ཧོནྟི ནིནྣནིནྣཊྛཱནེ སམུདྡཱ སམསམཊྛཱནེ དཱིཔཱཏི.

ཨཐ ཏེསཾ སཏྟཱནཾ རསཔཐཝིཾ པརིབྷུཉྫནྟཱནཾ ཀམེན ཨེཀཙྩེ ཝཎྞཝནྟོ, ཨེཀཙྩེ དུབྦཎྞཱ ཧོནྟི. ཏཏྠ ཝཎྞཝནྟོ དུབྦཎྞེ ཨཏིམཉྙནྟི. ཏེསཾ ཨཏིམཱནཔཙྩཡཱ སཱ རསཔཐཝཱི ཨནྟརདྷཱཡཏི, བྷཱུམིཔཔྤཊཀོ པཱཏུབྷཝཏི. ཨཐ ཏེསཾ ཏེནེཝ ནཡེན སོཔི ཨནྟརདྷཱཡཏི, པདཱལཏཱ པཱཏུབྷཝཏི. ཏེནེཝ ནཡེན སཱཔི ཨནྟརདྷཱཡཏི, ཨཀཊྛཔཱཀོ སཱལི པཱཏུབྷཝཏི ཨཀཎོ ཨཐུསོ སུདྡྷོ སུགནྡྷཱ ཏཎྜུལཔྥལོ. ཏཏོ ནེསཾ བྷཱཛནཱནི ཨུཔྤཛྫནྟི. ཏེ སཱལིཾ བྷཱཛནེ ཋཔེཏྭཱ པཱསཱཎཔིཊྛིཡཾ ཋཔེནྟི. སཡམེཝ ཛཱལཱསིཁཱ ཨུཊྛཧིཏྭཱ ཏཾ པཙཏི. སོ ཧོཏི ཨོདནོ སུམནཛཱཏིཔུཔྥསདིསོ. ན ཏསྶ སཱུཔེན ཝཱ བྱཉྫནེན ཝཱ ཀརཎཱིཡཾ ཨཏྠི, ཡཾ ཡཾ རསཾ བྷུཉྫིཏུཀཱམཱ ཧོནྟི, ཏཾ ཏཾ རསོཝ ཧོཏི. ཏེསཾ ཏཾ ཨོལཱ༹རིཀཾ ཨཱཧཱརཾ ཨཱཧརཡཏཾ ཏཏོ པབྷུཏི མུཏྟཀརཱིསཾ སཉྫཱཡཏི. ཨཐ ནེསཾ ཏསྶ ནིཀྑམནཏྠཱཡ ཝཎམུཁཱནི པབྷིཛྫནྟི ¶ . པུརིསསྶ པུརིསབྷཱཝོ, ཨིཏྠིཡཱ ཨིཏྠིབྷཱཝོ པཱཏུབྷཝཏི. ཏཏྲ སུདཾ ཨིཏྠཱི པུརིསཾ, པུརིསོ ཙ ཨིཏྠིཾ ཨཏིཝེལཾ ཨུཔནིཛ྄ཛྷཱཡཏི. ཏེསཾ ཨཏིཝེལཾ ཨུཔནིཛ྄ཛྷཱཡནཔཙྩཡཱ ཀཱམཔརིལཱ༹ཧོ ཨུཔྤཛྫཏི. ཏཏོ མེཐུནཾ དྷམྨཾ ¶ པཊིསེཝནྟི. ཏེ ཨསདྡྷམྨཔཊིསེཝནཔཙྩཡཱ ཝིཉྙཱུཧི གརཧིཡམཱནཱ ཝིཧེཋིཡམཱནཱ ཏསྶ ཨསདྡྷམྨསྶ པཊིཙྪཱདནཧེཏུ ཨགཱརཱནི ཀརོནྟི. ཏེ ཨགཱརཾ ཨཛ྄ཛྷཱཝསམཱནཱ ཨནུཀྐམེན ཨཉྙཏརསྶ ཨལསཛཱཏིཀསྶ སཏྟསྶ དིཊྛཱནུགཏིཾ ཨཱཔཛྫནྟཱ སནྣིདྷིཾ ཀརོནྟི. ཏཏོ པབྷུཏི ཀཎོཔི ཐུསོཔི ཏཎྜུལཾ པརིཡོནནྡྷཏི, ལཱཡིཏཊྛཱནམྤི ན པཊིཝིརཱུཧཏི. ཏེ སནྣིཔཏིཏྭཱ ཨནུཏྠུནནྟི ‘‘པཱཔཀཱ ཝཏ བྷོ དྷམྨཱ སཏྟེསུ པཱཏུབྷཱུཏཱ, མཡཉྷི པུབྦེ མནོམཡཱ ཨཧུམྷཱ’’ཏི ཨགྒཉྙསུཏྟེ (དཱི. ནི. ༣.༡༢༨) ཝུཏྟནཡེན ཝིཏྠཱརེཏབྦཾ. ཏཏོ མརིཡཱདཾ ཋཔེནྟི.

ཨཐ ཨཉྙཏརོ སཏྟོ ཨཉྙསྶ བྷཱགཾ ཨདིནྣཾ ཨཱདིཡཏི. ཏཾ དྭིཀྑཏྟུཾ པརིབྷཱསིཏྭཱ ཏཏིཡཝཱརེ པཱཎིལེཌྜུདཎྜེཧི པཧརནྟི. ཏེ ཨེཝཾ ཨདིནྣཱདཱནགརཧམུསཱཝཱདདཎྜཱདཱནེསུ ¶ ཨུཔྤནྣེསུ སནྣིཔཏིཏྭཱ ཙིནྟཡནྟི ‘‘ཡཾནཱུན མཡཾ ཨེཀཾ སཏྟཾ སམྨནྣེཡྻཱམ, ཡོ ནོ སམྨཱ ཁཱིཡིཏབྦཾ ཁཱིཡེཡྻ, གརཧིཏབྦཾ གརཧེཡྻ, པབྦཱཛེཏབྦཾ པབྦཱཛེཡྻ. མཡཾ པནསྶ སཱལཱིནཾ བྷཱགཾ ཨནུཔདསྶཱམཱ’’ཏི. ཨེཝཾ ཀཏསནྣིཊྛཱནེསུ པན སཏྟེསུ ཨིམསྨིཾ ཏཱཝ ཀཔྤེ ཨཡམེཝ བྷགཝཱ བོདྷིསཏྟབྷཱུཏོ ཏེན སམཡེན ཏེསུ སཏྟེསུ ཨབྷིརཱུཔཏརོ ཙ དསྶནཱིཡཏརོ ཙ མཧེསཀྑཏརོ ཙ བུདྡྷིསམྤནྣོ པཊིབལོ ནིགྒཧཔགྒཧཾ ཀཱཏུཾ. ཏེ ཏཾ ཨུཔསངྐམིཏྭཱ ཡཱཙིཏྭཱ སམྨནྣིཾསུ. སོ ‘‘ཏེན མཧཱཛནེན སམྨཏོཏི མཧཱསམྨཏོ, ཁེཏྟཱནཾ ཨདྷིཔཏཱིཏི ཁཏྟིཡོ, དྷམྨེན སམེན པརེ རཉྫེཏཱིཏི རཱཛཱ’’ཏི ཏཱིཧི ནཱམེཧི པཉྙཱཡིཏྠ. ཡཉྷི ལོཀེ ཨཙྪརིཡཊྛཱནཾ, བོདྷིསཏྟོཝ ཏཏྠ ཨཱདིཔུརིསོཏི. ཨེཝཾ བོདྷིསཏྟཾ ཨཱདིཾ ཀཏྭཱ ཁཏྟིཡམཎྜལེ སཎྛིཏེ ཨནུཔུབྦེན བྲཱཧྨཎཱདཡོཔི ཝཎྞཱ སཎྛཧིཾསུ. ཏཏྠ ཀཔྤཝིནཱསཀམཧཱམེགྷཏོ ཡཱཝ ཛཱལཱུཔཙྪེདོ, ཨིདམེཀམསངྑེཡྻཾ སཾཝཊྚོཏི ཝུཙྩཏི. ཀཔྤཝིནཱསཀཛཱལཱུཔཙྪེདཏོ ཡཱཝ ཀོཊིསཏསཧསྶཙཀྐཝཱལ༹པརིཔཱུརཀོ སམྤཏྟིམཧཱམེགྷོ, ཨིདཾ དུཏིཡམསངྑེཡྻཾ སཾཝཊྚཊྛཱཡཱིཏི ཝུཙྩཏི. སམྤཏྟིམཧཱམེགྷཏོ ཡཱཝ ཙནྡིམསཱུརིཡཔཱཏུབྷཱཝོ, ཨིདཾ ཏཏིཡམསངྑེཡྻཾ ཝིཝཊྚོཏི ཝུཙྩཏི. ཙནྡིམསཱུརིཡཔཱཏུབྷཱཝཏོ ཡཱཝ པུན ཀཔྤཝིནཱསཀམཧཱམེགྷོ, ཨིདཾ ཙཏུཏྠམསངྑེཡྻཾ ཝིཝཊྚཊྛཱཡཱིཏི ¶ ཝུཙྩཏི. ཨིམཱནི ཙཏྟཱརི ཨསངྑེཡྻཱནི ཨེཀོ མཧཱཀཔྤོ ཧོཏི. ཨེཝཾ ཏཱཝ ཨགྒིནཱ ཝིནཱསོ ཙ སཎྛཧནཉྩ ཝེདིཏབྦཾ.

ཡསྨིཾ པན སམཡེ ཀཔྤོ ཨུདཀེན ནསྶཏི, ཨཱདིཏོཝ ཀཔྤཝིནཱསཀམཧཱམེགྷོ ཨུཊྛཧིཏྭཱཏི པུབྦེ ཝུཏྟནཡེནེཝ ཝིཏྠཱརེཏབྦཾ. ཨཡཾ པན ཝིསེསོ – ཡཐཱ ཏཏྠ དུཏིཡོ སཱུརིཡོ, ཨེཝམིདྷ ¶ ཀཔྤཝིནཱསཀོ ཁཱརཱུདཀམཧཱམེགྷོ ཨུཊྛཱཏི. སོ ཨཱདིཏོ སུཁུམཾ སུཁུམཾ ཝསྶནྟོ ཨནུཀྐམེན མཧཱདྷཱརཱཧི ཀོཊིསཏསཧསྶཙཀྐཝཱལཱ༹ནཾ པཱུརེནྟོ ཝསྶཏི. ཁཱརཱུདཀེན ཕུཊྛཕུཊྛཱ པཐཝཱིཔབྦཏཱདཡོ ཝིལཱིཡནྟི. ཨུདཀཾ སམནྟཏོ ཝཱཏེཧི དྷཱརཱིཡཏི. པཐཝིཏོ ཡཱཝ དུཏིཡཛ྄ཛྷཱནབྷཱུམིཾ ཨུདཀཾ གཎྷཱཏི, ཏཏྠ ཏཡོཔི བྲཧྨལོཀེ ཝིལཱིཡཱཔེཏྭཱ སུབྷཀིཎྷེ ཨཱཧཙྩ ཏིཊྛཏི. ཏཾ ཡཱཝ ཨཎུམཏྟམྤི སངྑཱརགཏཾ ཨཏྠི, ཏཱཝ ན ཝཱུཔསམྨཏི.

ཨུདཀཱནུགཏཾ ¶ པན སབྦསངྑཱརགཏཾ ཨབྷིབྷཝིཏྭཱ སཧསཱ ཝཱུཔསམྨཏི, ཨནྟརདྷཱནཾ གཙྪཏི. ཧེཊྛཱཨཱཀཱསེན སཧ ཨུཔརིཨཱཀཱསོ ཨེཀོ ཧོཏི མཧནྡྷཀཱརོཏི སབྦཾ ཝུཏྟསདིསཾ. ཀེཝལཾ པནིདྷ ཨཱབྷསྶརབྲཧྨལོཀཾ ཨཱདིཾ ཀཏྭཱ ལོཀོ པཱཏུབྷཝཏི. སུབྷཀིཎྷཏོ ཙ ཙཝིཏྭཱ ཨཱབྷསྶརཊྛཱནཱདཱིསུ སཏྟཱ ནིབྦཏྟནྟི. ཏཏྠ ཀཔྤཝིནཱསཀམཧཱམེགྷཏོ ཡཱཝ ཀཔྤཝིནཱསཀཁཱརཱུདཀཱུཔཙྪེདོ, ཨིདམེཀཾ ཨསངྑེཡྻཾ. ཨུདཀཱུཔཙྪེདཏོ ཡཱཝ སམྤཏྟིམཧཱམེགྷོ, ཨིདཾ དུཏིཡམསངྑེཡྻཾ. སམྤཏྟིམཧཱམེགྷཏོ…པེ… ཨིམཱནི ཙཏྟཱརི ཨསངྑེཡྻཱནི ཨེཀོ མཧཱཀཔྤོ ཧོཏི. ཨེཝཾ ཨུདཀེན ཝིནཱསོ ཙ སཎྛཧནཉྩ ཝེདིཏབྦཾ.

ཡསྨིཾ པན སམཡེ ཀཔྤོ ཝཱཏེན ཝིནསྶཏི, ཨཱདིཏོཝ ཀཔྤཝིནཱསཀམཧཱམེགྷོ ཝུཊྛཧིཏྭཱཏི པུབྦེ ཝུཏྟནཡེནེཝ ཝིཏྠཱརེཏབྦཾ. ཨཡཾ པན ཝིསེསོ – ཡཐཱ ཏཏྠ དུཏིཡསཱུརིཡོ, ཨེཝམིདྷ ཀཔྤཝིནཱསནཏྠཾ ཝཱཏོ སམུཊྛཱཏི. སོ པཋམཾ ཐཱུལརཛཾ ཨུཊྛཱཔེཏི, ཏཏོ སཎྷརཛཾ སུཁུམཝཱལིཀཾ ཐཱུལཝཱལིཀཾ སཀྑརཔཱསཱཎཱདཡོཏི ཡཱཝ ཀཱུཊཱགཱརམཏྟེ པཱསཱཎེ ཝིསམཊྛཱནེ ཋིཏམཧཱརུཀྑེ ཙ ཨུཊྛཱཔེཏི. ཏེ པཐཝིཏོ ནབྷམུགྒཏཱ ན པུན པཏནྟི, ཏཏྠེཝ ཙུཎྞཝིཙུཎྞཱ ཧུཏྭཱ ཨབྷཱཝཾ གཙྪནྟི. ཨཐཱནུཀྐམེན ཧེཊྛཱམཧཱཔཐཝིཡཱ ཝཱཏོ སམུཊྛཧིཏྭཱ པཐཝིཾ པརིཝཏྟེཏྭཱ ཨུདྡྷཾ མཱུལཾ ཀཏྭཱ ཨཱཀཱསེ ཁིཔཏི. ཡོཛནསཏཔྤམཱཎཱ ¶ པཐཝིཔྤདེསཱ དྭིཡོཛནཏིཡོཛནཙཏུཡོཛནཔཉྩཡོཛནསཏཔྤམཱཎཱཔི བྷིཛྫིཏྭཱ ཝཱཏཝེགུཀྑིཏྟཱ ཨཱཀཱསེཡེཝ ཙུཎྞཝིཙུཎྞཱ ཧུཏྭཱ ཨབྷཱཝཾ གཙྪནྟི. ཙཀྐཝཱལ༹པབྦཏམྤི སིནེརུཔབྦཏམྤི ཝཱཏོ ཨུཀྑིཔིཏྭཱ ཨཱཀཱསེ ཁིཔཏི. ཏེ ཨཉྙམཉྙཾ ཨབྷིཧནྟྭཱ ཙུཎྞཝིཙུཎྞཱ ཧུཏྭཱ ཝིནསྶནྟི. ཨེཏེནེཝ ཨུཔཱཡེན བྷཱུམཊྛཀཝིམཱནཱནི ཙ ཨཱཀཱསཊྛཀཝིམཱནཱནི ཙ ཝིནཱསེནྟོ ཚ ཀཱམཱཝཙརདེཝལོཀེ ཝིནཱསེཏྭཱ ཀོཊིསཏསཧསྶཙཀྐཝཱལཱ༹ནི ཝིནཱསེཏི. ཏཏྠ ཙཀྐཝཱལཱ༹ ཙཀྐཝཱལེ༹ཧི, ཧིམཝནྟཱ ཧིམཝནྟེཧི, སིནེརཱུ སིནེརཱུཧི ཨཉྙམཉྙཾ སམཱགནྟྭཱ ཙུཎྞཝིཙུཎྞཱ ཧུཏྭཱ ཝིནསྶནྟི. པཐཝིཏོ ཡཱཝ ཏཏིཡཛ྄ཛྷཱནབྷཱུམིཾ ཝཱཏོ གཎྷཱཏི, ཏཏྠ ཏཡོ བྲཧྨལོཀེ ཝིནཱསེཏྭཱ ཝེཧཔྥལེ ཨཱཧཙྩ ཏིཊྛཏི. ཨེཝཾ སབྦསངྑཱརགཏཾ ཝིནཱསེཏྭཱ སཡམྤི ཝིནསྶཏི. ཧེཊྛཱཨཱཀཱསེན སཧ ཨུཔརིཨཱཀཱསོ ཨེཀོ ཧོཏི མཧནྡྷཀཱརོཏི སབྦཾ ཝུཏྟསདིསཾ. ཨིདྷ པན ¶ སུབྷཀིཎྷབྲཧྨལོཀཾ ཨཱདིཾ ¶ ཀཏྭཱ ལོཀོ པཱཏུབྷཝཏི. ཝེཧཔྥལཏོ ཙ ཙཝིཏྭཱ སུབྷཀིཎྷཊྛཱནཱདཱིསུ སཏྟཱ ནིབྦཏྟནྟི. ཏཏྠ ཀཔྤཝིནཱསཀམཧཱམེགྷཏོ ཡཱཝ ཀཔྤཝིནཱསཀཝཱཏཱུཔཙྪེདོ, ཨིདམེཀཾ ཨསངྑེཡྻཾ. ཝཱཏཱུཔཙྪེདཏོ ཡཱཝ སམྤཏྟིམཧཱམེགྷོ, ཨིདཾ དུཏིཡམསངྑེཡྻཾ…པེ… ཨིམཱནི ཙཏྟཱརི ཨསངྑེཡྻཱནི ཨེཀོ མཧཱཀཔྤོ ཧོཏི. ཨེཝཾ ཝཱཏེན ཝིནཱསོ ཙ སཎྛཧནཉྩ ཝེདིཏབྦཾ.

ཀིཾ ཀཱརཎཱ ཨེཝཾ ལོཀོ ཝིནསྶཏི? ཨཀུསལམཱུལཀཱརཎཱ. ཨཀུསལམཱུལེསུ ཧི ཨུསྶནྣེསུ ཨེཝཾ ལོཀོ ཝིནསྶཏི. སོ ཙ ཁོ རཱགེ ཨུསྶནྣཏརེ ཨགྒིནཱ ཝིནསྶཏི, དོསེ ཨུསྶནྣཏརེ ཨུདཀེན ཝིནསྶཏི. ཀེཙི པན ‘‘དོསེ ཨུསྶནྣཏརེ ཨགྒིནཱ, རཱགེ ཨུདཀེནཱ’’ཏི ཝདནྟི. མོཧེ ཨུསྶནྣཏརེ ཝཱཏེན ཝིནསྶཏི. ཨེཝཾ ཝིནསྶནྟོཔི ཙ ནིརནྟརམེཝ སཏྟ ཝཱརེ ཨགྒིནཱ ནསྶཏི, ཨཊྛམེ ཝཱརེ ཨུདཀེན. པུན སཏྟ ཝཱརེ ཨགྒིནཱ, ཨཊྛམེ ཝཱརེ ཨུདཀེནཱཏི ཨེཝཾ ཨཊྛམེ ཨཊྛམེ ཝཱརེ ཝིནསྶནྟོ སཏྟཀྑཏྟུཾ ཨུདཀེན ཝིནསྶིཏྭཱ པུན སཏྟ ཝཱརེ ཨགྒིནཱ ནསྶཏི. ཨེཏྟཱཝཏཱ ཏེསཊྛི ཀཔྤཱ ཨཏཱིཏཱ ཧོནྟི. ཨེཏྠནྟརེ ཨུདཀེན ནསྶནཝཱརཾ སམྤཏྟམྤི པཊིབཱཧིཏྭཱ ལདྡྷོཀཱསོ ཝཱཏོ པརིཔུཎྞཙཏུསཊྛིཀཔྤཱཡུཀེ སུབྷཀིཎྷེ ཝིདྡྷཾསེནྟོ ལོཀཾ ཝིནཱསེཏི.

པུབྦེནིཝཱསཾ ཨནུསྶརནྟོཔི ཙ ཀཔྤཱནུསྶརཎཀོ བྷིཀྑུ ཨེཏེསུ ཀཔྤེསུ ཨནེཀེཔི སཾཝཊྚཀཔྤེ ཨནེཀེཔི ཝིཝཊྚཀཔྤེ ཨནེཀེཔི ¶ སཾཝཊྚཝིཝཊྚཀཔྤེ ཨནུསྶརཏི. སཾཝཊྚཀཔྤེ ཝིཝཊྚཀཔྤེཏི ཙ ཀཔྤསྶ ཨཌྜྷཾ གཧེཏྭཱ ཝུཏྟཾ. སཾཝཊྚཝིཝཊྚཀཔྤེཏི སཀལཀཔྤཾ གཧེཏྭཱ ཝུཏྟཾ. ཀཐཾ ཨནུསྶརཏཱིཏི ཙེ? ཨམུཏྲཱསིནྟིཨཱདིནཱ ནཡེན. ཏཏྠ ཨམུཏྲཱསིནྟི ཨམུམྷི སཾཝཊྚཀཔྤེ ཨཧཾ ཨམུམྷི བྷཝེ ཝཱ ཡོནིཡཱ ཝཱ གཏིཡཱ ཝཱ ཝིཉྙཱཎཊྛིཏིཡཱ ཝཱ སཏྟཱཝཱསེ ཝཱ སཏྟནིཀཱཡེ ཝཱ ཨཱསིཾ. ཨེཝཾནཱམོཏི ཏིསྶོ ཝཱ ཕུསྶོ ཝཱ. ཨེཝཾགོཏྟོཏི ཀཙྩཱནོ ཝཱ ཀསྶཔོ ཝཱ. ཨིདམསྶ ཨཏཱིཏབྷཝེ ཨཏྟནོ ནཱམགོཏྟཱནུསྶརཎཝསེན ཝུཏྟཾ. སཙེ པན ཏསྨིཾ ཀཱལེ ཨཏྟནོ ཝཎྞསམྤཏྟིཾ ཝཱ ལཱུཁཔཎཱིཏཛཱིཝིཀབྷཱཝཾ ཝཱ སུཁདུཀྑབཧུལཏཾ ཝཱ ཨཔྤཱཡུཀདཱིགྷཱཡུཀབྷཱཝཾ ཝཱ ཨནུསྶརིཏུཀཱམོ ཧོཏི, ཏམྤི ཨནུསྶརཏིཡེཝ. ཏེནཱཧ ‘‘ཨེཝཾཝཎྞོ…པེ… ཨེཝམཱཡུཔརིཡནྟོ’’ཏི. ཏཏྠ ཨེཝཾཝཎྞོཏི ཨོདཱཏོ ཝཱ སཱམོ ཝཱ. ཨེཝམཱཧཱརོཏི སཱལིམཾསོདནཱཧཱརོ ཝཱ པཝཏྟཕལབྷོཛནོ ཝཱ. ཨེཝཾསུཁདུཀྑཔྤཊིསཾཝེདཱིཏི ཨནེཀཔྤཀཱརེན ¶ ཀཱཡིཀཙེཏསིཀཱནཾ སཱམིསནིརཱམིསཱདིཔྤབྷེདཱནཾ ཝཱ སུཁདུཀྑཱནཾ པཊིསཾཝེདཱི. ཨེཝམཱཡུཔརིཡནྟོཏི ཨེཝཾ ཝསྶསཏཔརིམཱཎཱཡུཔརིཡནྟོ ཝཱ ཙཏུརཱསཱིཏིཀཔྤསཏསཧསྶཱཡུཔརིཡནྟོ ཝཱ.

སོ ¶ ཏཏོ ཙུཏོ ཨམུཏྲ ཨུདཔཱདིནྟི སོ ཨཧཾ ཏཏོ བྷཝཏོ ཡོནིཏོ གཏིཏོ ཝིཉྙཱཎཊྛིཏིཏོ སཏྟཱཝཱསཏོ སཏྟནིཀཱཡཏོ ཝཱ ཙུཏོ པུན ཨམུཀསྨིཾ ནཱམ བྷཝེ ཡོནིཡཱ གཏིཡཱ ཝིཉྙཱཎཊྛིཏིཡཱ སཏྟཱཝཱསེ སཏྟནིཀཱཡེ ཝཱ ཨུདཔཱདིཾ. ཏཏྲཱཔཱསིནྟི ཨཐ ཏཏྲཱཔི བྷཝེ ཡོནིཡཱ གཏིཡཱ ཝིཉྙཱཎཊྛིཏིཡཱ སཏྟཱཝཱསེ སཏྟནིཀཱཡེ ཝཱ པུན ཨཧོསིཾ. ཨེཝཾནཱམོཏིཨཱདི ཝུཏྟནཡམེཝ. ཨཔིཙ ཡསྨཱ ཨམུཏྲཱསིནྟི ཨིདཾ ཨནུཔུབྦེན ཨཱརོཧནྟསྶ ཡཱཝཏིཙྪཀཾ (ཝིསུདྡྷི. ༢.༤༡༠) ཨནུསྶརཎཾ, སོ ཏཏོ ཙུཏོཏི པཊིནིཝཏྟནྟསྶ པཙྩཝེཀྑཎཾ, ཏསྨཱ ཨིདྷཱུཔཔནྣོཏི ཨིམིསྶཱ ཨིདྷཱུཔཔཏྟིཡཱ ཨནནྟརམེཝསྶ ཨུཔཔཏྟིཊྛཱནཾ སནྡྷཱཡ ཨམུཏྲ ཨུདཔཱདིནྟི ཨིདཾ ཝུཏྟནྟི ཝེདིཏབྦཾ. ཏཏྲཱཔཱསིནྟི ཨེཝམཱདི པནསྶ ཏཏྲ ཨིམིསྶཱ ཨུཔཔཏྟིཡཱ ཨནནྟརེ ཨུཔཔཏྟིཊྛཱནེ ནཱམགོཏྟཱདཱིནཾ ཨནུསྶརཎདསྶནཏྠཾ ཝུཏྟཾ. སོ ཏཏོ ཙུཏོ ཨིདྷཱུཔཔནྣོཏི སྭཱཧཾ ཏཏོ ཨནནྟརཱུཔཔཏྟིཊྛཱནཏོ ཙུཏོ ཨིདྷ ཨམུཀསྨིཾ ནཱམ ཁཏྟིཡཀུལེ ཝཱ བྲཱཧྨཎཀུལེ ཝཱ ནིབྦཏྟོཏི. ཨིཏཱིཏི ¶ ཨེཝཾ. སཱཀཱརཾ སཨུདྡེསནྟི ནཱམགོཏྟཝསེན སཨུདྡེསཾ, ཝཎྞཱདིཝསེན སཱཀཱརཾ. ནཱམགོཏྟེན ཧི སཏྟོ ཏིསྶོ ཕུསྶོ ཀསྶཔོཏི ཨུདྡིསཱིཡཏི, ཝཎྞཱདཱིཧི སཱམོ ཨོདཱཏོཏི ནཱནཏྟཏོ པཉྙཱཡཏི. ཏསྨཱ ནཱམགོཏྟཾ ཨུདྡེསོ, ཨིཏརེ ཨཱཀཱརཱཏི.

པུབྦེནིཝཱསཱནུསྶཏིཉཱཎནིདྡེསཝཎྞནཱ ནིཊྛིཏཱ.

༥༤. དིབྦཙཀྑུཉཱཎནིདྡེསཝཎྞནཱ

༡༠༦. དིབྦཙཀྑུཉཱཎནིདྡེསེ ¶ ཨཱལོཀསཉྙཾ མནསི ཀརོཏཱིཏི དིཝཱ ཝཱ རཏྟིཾ ཝཱ སཱུརིཡཛོཏིཙནྡམཎིཨཱལོཀཾ ཨཱལོཀོཏི མནསི ཀརོཏི. ཨེཝཾ མནསིཀརོནྟོ ཙ ཨཱལོཀོཏི སཉྙཾ མནསི པཝཏྟནཏོ ‘‘ཨཱལོཀསཉྙཾ མནསི ཀརོཏཱི’’ཏི ཝུཙྩཏི. དིཝཱསཉྙཾ ཨདྷིཊྛཱཏཱིཏི ཨེཝཾ ཨཱལོཀསཉྙཾ མནསིཀརིཏྭཱ དིཝཱཏི སཉྙཾ ཋཔེཏི. ཡཐཱ ¶ དིཝཱ ཏཐཱ རཏྟིནྟི ཡཐཱ དིཝཱ ཨཱལོཀོ དིཊྛོ, ཏཐེཝ རཏྟིམྤི མནསི ཀརོཏི. ཡཐཱ རཏྟིཾ ཏཐཱ དིཝཱཏི ཡཐཱ རཏྟིཾ ཨཱལོཀོ དིཊྛོ, ཏཐེཝ དིཝཱཔི མནསི ཀརོཏི. ཨིཏི ཝིཝཊེན ཙེཏསཱཏི ཨེཝཾ ཨཔིཧིཏེན ཙིཏྟེན. ཨཔརིཡོནདྡྷེནཱཏི སམནྟཏོ ཨནདྡྷེན. སཔྤབྷཱསཾ ཙིཏྟཾ བྷཱཝེཏཱིཏི སཨོབྷཱསཾ ཙིཏྟཾ ཝཌྜྷེཏི. ཨེཏེན དིབྦཙཀྑུསྶ པརིཀམྨཱལོཀཱརམྨཎཾ ཙིཏྟཾ ཀཐིཏཾ. ཨཱལོཀཀསིཎཱརམྨཎཾ ཙཏུཏྠཛ྄ཛྷཱནམེཝ ཝཱ སནྡྷཱཡ ཝུཏྟཾ. ཏསྶེཝཾ བྷཱཝཡཏོ ཨོབྷཱསཛཱཏཾ ཙིཏྟཾ ཧོཏི ཝིགཏནྡྷཀཱརཱཝརཎཾ. ཏེན ཧི དིབྦཙཀྑུཾ ཨུཔྤཱདེཏུཀཱམེན ཨཱདིཀམྨིཀེན ཀུལཔུཏྟེན ཨིམིསྶཱཡེཝ པཱལི༹ཡཱ ཨནུསཱརེན ཀསིཎཱརམྨཎཾ ཨབྷིཉྙཱཔཱདཀཛ྄ཛྷཱནཾ སབྦཱཀཱརེན ཨབྷིནཱིཧཱརཀྑམཾ ¶ ཀཏྭཱ ‘‘ཏེཛོཀསིཎཾ ཨོདཱཏཀསིཎཾ ཨཱལོཀཀསིཎ’’ནྟི ཨིམེསུ ཏཱིསུ ཀསིཎེསུ ཨཉྙཏརཾ ཨཱསནྣཾ ཀཱཏབྦཾ, ཨུཔཙཱརཛ྄ཛྷཱནགོཙརཾ ཀཏྭཱ ཝཌྜྷེཏྭཱ ཋཔེཏབྦཾ, ན ཏཏྠ ཨཔྤནཱ ཨུཔྤཱདེཏབྦཱཏི ཨདྷིཔྤཱཡོ. སཙེ ཧི ཨུཔྤཱདེཏི, པཱདཀཛ྄ཛྷཱནནིསྶཡཾ ཧོཏི, ན པརིཀམྨནིསྶཡཾ. ཨིམེསུ ཙ པན ཏཱིསུ ཨཱལོཀཀསིཎཾཡེཝ སེཊྛཏརཾ, ཏདནུལོམེན པན ཨིཏརཾ ཀསིཎདྭཡམྤི ཝུཏྟཾ. ཏསྨཱ ཨཱལོཀཀསིཎཾ ཨིཏརེསཾ ཝཱ ཨཉྙཏརཾ ཨཱརམྨཎཾ ཀཏྭཱ ཙཏྟཱརི ཛྷཱནཱནི ཨུཔྤཱདེཏྭཱ པུན ཨུཔཙཱརབྷཱུམིཡཾཡེཝ ཋཏྭཱ ཀསིཎཾ ཝཌྜྷེཏབྦཾ. ཝཌྜྷིཏཝཌྜྷིཏཊྛཱནསྶ ཨནྟོཡེཝ རཱུཔགཏཾ པསྶིཏབྦཾ. རཱུཔགཏཾ པསྶཏོ པནསྶ ཏེན བྱཱཔཱརེན པརིཀམྨཙིཏྟེན ཨཱལོཀཕརཎཾ ཨཀུབྦཏོ ¶ པརིཀམྨསྶ ཝཱརོ ཨཏིཀྐམཏི, ཏཏོ ཨཱལོཀོ ཨནྟརདྷཱཡཏི, ཏསྨིཾ ཨནྟརཧིཏེ རཱུཔགཏམྤི ན དིསྶཏི. ཨཐཱནེན པུནཔྤུནཾ པཱདཀཛ྄ཛྷཱནམེཝ པཝིསིཏྭཱ ཏཏོ ཝུཊྛཱཡ ཨཱལོཀོ ཕརིཏབྦོ. ཨེཝཾ ཨནུཀྐམེན ཨཱལོཀོ ཐཱམགཏོ ཧོཏཱིཏི. ‘‘ཨེཏྠ ཨཱལོཀོ ཧོཏཱུ’’ཏི ཡཏྟཀཾ ཋཱནཾ པརིཙྪིནྡཏི, ཏཏྠ ཨཱལོཀོ ཏིཊྛཏིཡེཝ. དིཝསམྤི ནིསཱིདིཏྭཱ པསྶཏོ རཱུཔདསྶནཾ ཧོཏི. ཏཏྠ ཡདཱ ཏསྶ བྷིཀྑུནོ མཾསཙཀྑུསྶ ཨནཱཔཱཐགཏཾ ཨནྟོཀུཙྪིགཏཾ ཧདཡཝཏྠུནིསྶིཏཾ ཧེཊྛཱཔཐཝཱིཏལནིསྶིཏཾ ཏིརོཀུཊྚཔབྦཏཔཱཀཱརགཏཾ པརཙཀྐཝཱལ༹གཏནྟི ཨིདཾ རཱུཔཾ ཉཱཎཙཀྑུསྶ ཨཱཔཱཐཾ ཨཱགཙྪཏི, མཾསཙཀྑུནཱ དིསྶམཱནཾ ཝིཡ ཧོཏི, ཏདཱ དིབྦཙཀྑུ ཨུཔྤནྣཾ ཧོཏི. ཏདེཝ ཙེཏྠ རཱུཔདསྶནསམཏྠཾ, ན པུབྦབྷཱགཙིཏྟཱནི.

ཏཏྲཱཡཾ ¶ དིབྦཙཀྑུནོ ཨུཔྤཏྟིཀྐམོ – ཝུཏྟཔྤཀཱརམེཏཾ རཱུཔམཱརམྨཎཾ ཀཏྭཱ མནོདྭཱརཱཝཛྫནེ ཨུཔྤཛྫིཏྭཱ ནིརུདྡྷེ ཏདེཝ རཱུཔམཱརམྨཎཾ ཀཏྭཱ ཙཏྟཱརི པཉྩ ཝཱ ཛཝནཱནི ཨུཔྤཛྫནྟཱིཏི པུབྦེ ཝུཏྟནཡེནེཝ ཝེདིཏབྦཾ. ཨིདཾ པན ཉཱཎཾ ‘‘སཏྟཱནཾ ཙུཏཱུཔཔཱཏེ ཉཱཎ’’ནྟིཔི ‘‘དིབྦཙཀྑུཉཱཎ’’ནྟིཔི ཝུཙྩཏི. ཏཾ པནེཏཾ པུཐུཛྫནསྶ པརིཔནྠོ ཧོཏི. སོ ཧི ‘‘ཡཏྠ ཡཏྠ ཨཱལོཀོ ཧོཏཱུ’’ཏི ཨདྷིཊྛཱཏི, ཏཾ ཏཾ པཐཝཱིསམུདྡཔབྦཏེ ཝིནིཝིཛ྄ཛྷིཏྭཱཔི ཨེཀཱལོཀཾ ཧོཏི. ཨཐསྶ ཏཏྠ བྷཡཱནཀཱནི ཡཀྑརཀྑསཱདིརཱུཔཱནི པསྶཏོ བྷཡཾ ཨུཔྤཛྫཏི. ཏེན ཙིཏྟཝིཀྑེཔཾ པཏྭཱ ཛྷཱནཝིབྦྷནྟཀོ ཧོཏི. ཏསྨཱ རཱུཔདསྶནེ ཨཔྤམཏྟེན བྷཝིཏབྦཾ.

སཏྟཱནཾ ཙུཏཱུཔཔཱཏཉཱཎཱཡཱཏི སཏྟཱནཾ ཙུཏིཡཱ ཙ ཨུཔཔཱཏེ ཙ ཉཱཎཱཡ. ཡེན ཉཱཎེན སཏྟཱནཾ ཙུཏི ཙ ཨུཔཔཱཏོ ཙ ཉཱཡཏི, ཏདཏྠཾ དིབྦཙཀྑུཉཱཎཏྠནྟི ཝུཏྟཾ ཧོཏི. དིབྦེན ཙཀྑུནཱཏི ཝུཏྟཏྠམེཝ. ཝིསུདྡྷེནཱཏི ཙུཏཱུཔཔཱཏདསྶནེན དིཊྛིཝིསུདྡྷིཧེཏུཏྟཱ ཝིསུདྡྷཾ. ཡོ ཧི ཙུཏིམཏྟམེཝ པསྶཏི, ན ཨུཔཔཱཏཾ, སོ ཨུཙྪེདདིཊྛིཾ གཎྷཱཏི. ཡོ ཨུཔཔཱཏམེཝ པསྶཏི, ན ཙུཏིཾ, སོ ནཝསཏྟཔཱཏུབྷཱཝདིཊྛིཾ གཎྷཱཏི. ཡོ པན ཏདུབྷཡཾ པསྶཏི, སོ ཡསྨཱ དུཝིདྷམྤི ཏཾ དིཊྛིགཏམཏིཝཏྟཏི, ཏསྨཱསྶ ཏཾ དསྶནཾ དིཊྛིཝིསུདྡྷིཧེཏུ ཧོཏི. ཨུབྷཡཉྩེཏཾ བུདྡྷཔུཏྟཱ པསྶནྟི ¶ . ཏེན ཝུཏྟཾ – ‘‘ཙུཏཱུཔཔཱཏདསྶནེན དིཊྛིཝིསུདྡྷིཧེཏུཏྟཱ ¶ ཝིསུདྡྷ’’ནྟི. མནུསྶཱུཔཙཱརཾ ཨཏིཀྐམིཏྭཱ རཱུཔདསྶནེན ཨཏིཀྐནྟམཱནུསཀཾ, མཱནུསཀཾ ཝཱ མཾསཙཀྑུཾ ཨཏིཀྐནྟཏྟཱ ཨཏིཀྐནྟམཱནུསཀཾ. ཏེན དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན.

སཏྟེ པསྶཏཱིཏི མནུསྶཱནཾ མཾསཙཀྑུནཱ ཝིཡ སཏྟེ ཨོལོཀེཏི. ཙཝམཱནེ ཨུཔཔཛྫམཱནེཏི ཨེཏྠ ཙུཏིཀྑཎེ ཨུཔཔཏྟིཀྑཎེ ཝཱ དིབྦཙཀྑུནཱ དཊྛུཾ ན སཀྐཱ, ཡེ པན ཨཱསནྣཙུཏིཀཱ ཨིདཱནི ཙཝིསྶནྟི. ཏེ ཙཝམཱནཱ. ཡེ ཙ གཧིཏཔཊིསནྡྷིཀཱ སམྤཏིནིབྦཏྟཱ ཝཱ, ཏེ ཨུཔཔཛྫམཱནཱཏི ཨདྷིཔྤེཏཱ. ཏེ ཨེཝརཱུཔེ ཙཝམཱནེ ཙ ཨུཔཔཛྫམཱནེ ཙ པསྶཏཱིཏི དསྶེཏི. ཧཱིནེཏི མོཧནིསྶནྡཡུཏྟཏྟཱ ཧཱིནཱནཾ ཛཱཏིཀུལབྷོགཱདཱིནཾ ཝསེན ཧཱིལི༹ཏེ ཨོཧཱིལི༹ཏེ ཨོཉྙཱཏེ ཨཝཉྙཱཏེ. པཎཱིཏེཏི ཨམོཧནིསྶནྡཡུཏྟཏྟཱ ཏབྦིཔརཱིཏེ. སུཝཎྞེཏི ཨདོསནིསྶནྡཡུཏྟཏྟཱ ཨིཊྛཀནྟམནཱཔཝཎྞཡུཏྟེ. དུབྦཎྞེཏི དོསནིསྶནྡཡུཏྟཏྟཱ ཨནིཊྛཱཀནྟཱམནཱཔཝཎྞཡུཏྟེ, ཨནབྷིརཱུཔེ ¶ ཝིརཱུཔེཏིཔི ཨཏྠོ. སུགཏེཏི སུགཏིགཏེ, ཨལོབྷནིསྶནྡཡུཏྟཏྟཱ ཝཱ ཨཌྜྷེ མཧདྡྷནེ. དུགྒཏེཏི དུགྒཏིགཏེ, ལོབྷནིསྶནྡཡུཏྟཏྟཱ ཝཱ དལིདྡེ ཨཔྤནྣཔཱནེ. ཡཐཱཀམྨཱུཔགེཏི ཡཾ ཡཾ ཀམྨཾ ཨུཔཙིཏཾ, ཏེན ཏེན ཨུཔགཏེ. ཏཏྠ པུརིམེཧི ‘‘ཙཝམཱནེ’’ཏིཨཱདཱིཧི དིབྦཙཀྑུཀིཙྩཾ ཝུཏྟཾ, ཨིམིནཱ པན པདེན ཡཐཱཀམྨཱུཔགཉཱཎཀིཙྩཾ.

ཏསྶ ཙ ཉཱཎསྶ ཨཡམུཔྤཏྟིཀྐམོ – ཨིདྷ བྷིཀྑུ ཧེཊྛཱནིརཡཱབྷིམུཁཾ ཨཱལོཀཾ ཝཌྜྷེཏྭཱ ནེརཡིཀེ སཏྟེ པསྶཏི མཧཱདུཀྑམནུབྷཝམཱནེ, ཏཾ དསྶནཾ དིབྦཙཀྑུཀིཙྩམེཝ. སོ ཨེཝཾ མནསི ཀརོཏི ‘‘ཀིཾ ནུ ཁོ ཀམྨཾ ཀཏྭཱ ཨིམེ སཏྟཱ ཨེཏཾ དུཀྑམནུབྷཝནྟཱི’’ཏི. ཨཐསྶ ‘‘ཨིདཾ ནཱམ ཀཏྭཱ’’ཏི ཏཾཀམྨཱརམྨཎཾ ཉཱཎམུཔྤཛྫཏི. ཏཐཱ ཨུཔརིདེཝལོཀཱབྷིམུཁཾ ཨཱལོཀཾ ཝཌྜྷེཏྭཱ ནནྡནཝནམིསྶཀཝནཕཱརུསཀཝནཱདཱིསུ སཏྟེ པསྶཏི མཧཱསམྤཏྟིཾ ཨནུབྷཝམཱནེ, ཏམྤི དསྶནཾ དིབྦཙཀྑུཀིཙྩམེཝ. སོ ཨེཝཾ མནསི ཀརོཏི ‘‘ཀིཾ ནུ ཁོ ཀམྨཾ ཀཏྭཱ ཨིམེ སཏྟཱ ཨེཏཾ སམྤཏྟིཾ ཨནུབྷཝནྟཱི’’ཏི. ཨཐསྶ ‘‘ཨིདཾ ནཱམ ཀཏྭཱ’’ཏི ཏཾཀམྨཱརམྨཎཾ ཉཱཎམུཔྤཛྫཏི. ཨིདཾ ཡཐཱཀམྨཱུཔགཉཱཎཾ ནཱམ. ཨིམསྶ ཝིསུཾ པརིཀམྨཾ ནཱམ ནཏྠི. ཡཐཱ ཙིམསྶ, ཨེཝཾ ཨནཱགཏཾསཉཱཎསྶཱཔི. དིབྦཙཀྑུཔཱདཀཱནེཝ ¶ ཧི ཨིམཱནི དིབྦཙཀྑུནཱ སཧེཝ ཨིཛ྄ཛྷནྟི.

ཨིམེ ཝཏ བྷོནྟོཏིཨཱདཱིསུ ཨིམེཏི དིབྦཙཀྑུནཱ དིཊྛཱནཾ ནིདསྶནཝཙནཾ. ཝཏཱཏི ཨནུལོམཝཙནཏྠེ ནིཔཱཏོ. བྷོནྟོཏི བྷཝནྟོ. དུཊྛུ ཙརིཏཾ, དུཊྛཾ ཝཱ ཙརིཏཾ ཀིལེསཔཱུཏིཀཏྟཱཏི དུཙྩརིཏཾ, ཀཱཡེན དུཙྩརིཏཾ, ཀཱཡཏོ ཝཱ ཨུཔྤནྣཾ དུཙྩརིཏནྟི ཀཱཡདུཙྩརིཏཾ ¶ . ཨིཏརེསུཔི ཨེསེཝ ནཡོ. སམནྣཱགཏཱཏི སམངྒཱིབྷཱུཏཱ. ཨརིཡཱནཾ ཨུཔཝཱདཀཱཏི བུདྡྷཔཙྩེཀབུདྡྷསཱཝཀཱནཾ ཨརིཡཱནཾ ཨནྟམསོ གིཧིསོཏཱཔནྣཱནམྤི ཨནཏྠཀཱམཱ ཧུཏྭཱ ཨནྟིམཝཏྠུནཱ ཝཱ གུཎཔརིདྷཾསནེན ཝཱ ཨུཔཝཱདཀཱ, ཨཀྐོསཀཱ གརཧཀཱཏི ཝུཏྟཾ ཧོཏི. ཏཏྠ ‘‘ནཏྠི ཨིམེསཾ སམཎདྷམྨོ, ཨསྶམཎཱ ཨེཏེ’’ཏི ཝདནྟོ ཨནྟིམཝཏྠུནཱ ཨུཔཝདཏི, ‘‘ནཏྠི ཨིམེསཾ ཛྷཱནཾ ཝཱ ཝིམོཀྑོ ཝཱ མགྒོ ཝཱ ཕལཾ ཝཱ’’ཏིཨཱདཱིནི ཝདནྟོ གུཎཔརིདྷཾསནེན ཨུཔཝདཏཱིཏི ཝེདིཏབྦོ. སོ ཙ ཛཱནཾ ཝཱ ཨུཔཝདེཡྻ ཨཛཱནཾ ཝཱ, ཨུབྷཡཐཱཔི ཨརིཡཱུཔཝཱདོཝ ཧོཏི. བྷཱརིཡཾ ཀམྨཾ ཨཱནནྟརིཡསདིསཾ སགྒཱཝརཎཾ མགྒཱཝརཎཉྩ, སཏེཀིཙྪཾ པན ཧོཏི. ཏསྨཱ ཡོ ཨརིཡཾ ཨུཔཝདཏི, ཏེན གནྟྭཱ སཙེ ཨཏྟནཱ ཝུཌྜྷཏརོ ཧོཏི, ཨུཀྐུཊིཀཾ ནིསཱིདིཏྭཱ ‘‘ཨཧཾ ཨཱཡསྨནྟཾ ¶ ཨིདཉྩིདཉྩ ཨཝཙཾ, ཏཾ མེ ཁམཱཧཱི’’ཏི ཁམཱཔེཏབྦོ. སཙེ ནཝཀཏརོ ཧོཏི, ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ‘‘ཨཧཾ, བྷནྟེ, ཏུམྷེ ཨིདཉྩིདཉྩ ཨཝཙཾ, ཏཾ མེ ཁམཐཱ’’ཏི ཁམཱཔེཏབྦོ. སཙེ དིསཱཔཀྐནྟོ ཧོཏི, སཡཾ ཝཱ གནྟྭཱ སདྡྷིཝིཧཱརིཀཱདིཀེ ཝཱ པེསེཏྭཱ ཁམཱཔེཏབྦོ. སཙེ ནཱཔི གནྟུཾ ན པེསེཏུཾ སཀྐཱ ཧོཏི, ཡེ ཏསྨིཾ ཝིཧཱརེ བྷིཀྑཱུ ཝསནྟི, ཏེསཾ སནྟིཀཾ གནྟྭཱ སཙེ ནཝཀཏརཱ ཧོནྟི, ཨུཀྐུཊིཀཾ ནིསཱིདིཏྭཱ, སཙེ ཝུཌྜྷཏརཱ, ཝུཌྜྷེ ཝུཏྟནཡེནེཝ པཊིཔཛྫིཏྭཱ ‘‘ཨཧཾ, བྷནྟེ, ཨསུཀཾ ནཱམ ཨཱཡསྨནྟཾ ཨིདཉྩིདཉྩ ཨཝཙཾ, ཁམཏུ མེ སོ ཨཱཡསྨཱ’’ཏི ཝཏྭཱ ཁམཱཔེཏབྦོ. སམྨུཁཱ ཨཀྑམནྟེཔི ཨེཏདེཝ ཀཱཏབྦཾ. སཙེ ཨེཀཙཱརིཀབྷིཀྑུ ཧོཏི, ནེཝ ཏསྶ ཝསནཊྛཱནཾ, ན གཏཊྛཱནཾ པཉྙཱཡཏི, ཨེཀསྶ པཎྜིཏསྶ བྷིཀྑུནོ སནྟིཀཾ གནྟྭཱ ‘‘ཨཧཾ, བྷནྟེ, ཨསུཀཾ ནཱམ ཨཱཡསྨནྟཾ ཨིདཉྩིདཉྩ ཨཝཙཾ, ཏཾ མེ ཨནུསྶརཏོ ཝིཔྤཊིསཱརོ ཧོཏི, ཀིཾ ཀརོམཱི’’ཏི ¶ ཝཏྟབྦཾ. སོ ཝཀྑཏི ‘‘ཏུམྷེ མཱ ཙིནྟཡིཏྠ, ཐེརོ ཏུམྷཱཀཾ ཁམཏི, ཙིཏྟཾ ཝཱུཔསམེཐཱ’’ཏི. ཏེནཱཔི ཨརིཡསྶ གཏདིསཱབྷིམུཁེན ཨཉྫལིཾ པགྒཧེཏྭཱ ‘‘ཁམཐཱ’’ཏི ཝཏྟབྦཾ. ཡདི སོ པརིནིབྦུཏོ ཧོཏི, པརིནིབྦུཏམཉྩཊྛཱནཾ གནྟྭཱ ཡཱཝ སིཝཐིཀཾ གནྟྭཱཔི ཁམཱཔེཏབྦཾ. ཨེཝཾ ཀཏེ ནེཝ སགྒཱཝརཎཾ, ན མགྒཱཝརཎཾ ཧོཏི, པཱཀཏིཀམེཝ ཧོཏཱིཏི.

མིཙྪཱདིཊྛིཀཱཏི ཝིཔརཱིཏདསྶནཱ. མིཙྪཱདིཊྛིཀམྨསམཱདཱནཱཏི མིཙྪཱདིཊྛིཝསེན སམཱདིནྣནཱནཱཝིདྷཀམྨཱ, ཡེ ཙ མིཙྪཱདིཊྛིམཱུལཀེསུ ཀཱཡཀམྨཱདཱིསུ ཨཉྙེཔི སམཱདཔེནྟི. ཨེཏྠ ཙ ཝཙཱིདུཙྩརིཏགྒཧཎེནེཝ ཨརིཡཱུཔཝཱདེ, མནོདུཙྩརིཏགྒཧཎེན ཙ མིཙྪཱདིཊྛིཡཱ སངྒཧིཏཱཡཔི ཨིམེསཾ དྭིནྣཾ པུན ཝཙནཾ མཧཱསཱཝཛྫབྷཱཝདསྶནཏྠནྟི ཝེདིཏབྦཾ. མཧཱསཱཝཛྫོ ཧི ཨརིཡཱུཔཝཱདོ ཨཱནནྟརིཡསདིསཏྟཱ. ཝུཏྟམྤི ཙེཏཾ ‘‘སེཡྻཐཱཔི, སཱརིཔུཏྟ, བྷིཀྑུ སཱིལསམྤནྣོ སམཱདྷིསམྤནྣོ པཉྙཱསམྤནྣོ དིཊྛེཝ དྷམྨེ ཨཉྙཾ ཨཱརཱདྷེཡྻ, ཨེཝཾསམྤདམིདཾ སཱརིཔུཏྟ ཝདཱམི ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ ཡཐཱབྷཏཾ ¶ ནིཀྑིཏྟོ, ཨེཝཾ ནིརཡེ’’ཏི (མ. ནི. ༡.༡༤༩). མིཙྪཱདིཊྛིཏོ ཙ མཧཱསཱཝཛྫཏརཾ ནཱམ ཨཉྙཾ ནཏྠི. ཡཐཱཧ – ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི, ཡཾ ཨེཝཾ མཧཱསཱཝཛྫཾ, ཡཐཡིདཾ, བྷིཀྑཝེ, མིཙྪཱདིཊྛི, མིཙྪཱདིཊྛིཔརམཱནི, བྷིཀྑཝེ, ཝཛྫཱནཱི’’ཏི (ཨ. ནི. ༡.༣༡༠).

ཀཱཡསྶ ¶ བྷེདཱཏི ཨུཔཱདིནྣཀྑནྡྷཔརིཙྩཱགཱ. པརཾ མརཎཱཏི ཏདནནྟརཾ ཨབྷིནིབྦཏྟིཀྑནྡྷགྒཧཎེ. ཨཐ ཝཱ ཀཱཡསྶ བྷེདཱཏི ཛཱིཝིཏིནྡྲིཡསྶུཔཙྪེདཱ. པརཾ མརཎཱཏི ཙུཏིཙིཏྟཏོ ཨུདྡྷཾ. ཨཔཱཡནྟི ཨེཝམཱདི སབྦཾ ནིརཡཝེཝཙནམེཝ. ནིརཡོ ཧི སགྒམོཀྑཧེཏུབྷཱུཏཱ པུཉྙསམྨཏཱ ཨཡཱ ཨཔེཏཏྟཱ, སུཁཱནཾ ཝཱ ཨཱཡསྶ ཨབྷཱཝཱ ཨཔཱཡོ. དུཀྑསྶ གཏི པཊིསརཎནྟི དུགྒཏི, དོསབཧུལཏཱཡ ཝཱ དུཊྛེན ཀམྨུནཱ ནིབྦཏྟཱ གཏི དུགྒཏི. ཝིཝསཱ ནིཔཏནྟི ཏཏྠ དུཀྐཊཀཱརིནོཏི ཝིནིཔཱཏོ, ཝིནསྶནྟཱ ཝཱ ཨེཏྠ པཏནྟི སམྦྷིཛྫམཱནངྒཔཙྩངྒཱཏིཔི ཝིནིཔཱཏོ. ནཏྠི ཨེཏྠ ཨསྶཱདསཉྙིཏོ ཨཡོཏི ནིརཡོ.

ཨཐ ཝཱ ཨཔཱཡགྒཧཎེན ¶ ཏིརཙྪཱནཡོནིཾ དཱིཔེཏི. ཏིརཙྪཱནཡོནི ཧི ཨཔཱཡོ སུགཏིཏོ ཨཔེཏཏྟཱ, ན དུགྒཏི མཧེསཀྑཱནཾ ནཱགརཱཛཱདཱིནཾ སམྦྷཝཏོ. དུགྒཏིགྒཧཎེན པེཏྟིཝིསཡཾ. སོ ཧི ཨཔཱཡོ ཙེཝ དུགྒཏི ཙ སུགཏིཏོ ཨཔེཏཏྟཱ དུཀྑསྶ ཙ གཏིབྷཱུཏཏྟཱ, ན ཏུ ཝིནིཔཱཏོ ཨསུརསདིསཾ ཨཝིནིཔཏིཏཏྟཱ. ཝིནིཔཱཏགྒཧཎེན ཨསུརཀཱཡཾ. སོ ཧི ཡཐཱཝུཏྟེན ཨཏྠེན ཨཔཱཡོ ཙེཝ དུགྒཏི ཙ སབྦསམུསྶཡེཧི ཙ ཝིནིཔཏིཏཏྟཱ ཝིནིཔཱཏོཏི ཝུཙྩཏི. ནིརཡགྒཧཎེན ཨཝཱིཙིཨཱདིམནེཀཔྤཀཱརཾ ནིརཡམེཝཱཏི. ཨུཔཔནྣཱཏི ཨུཔགཏཱ, ཏཏྠ ཨབྷིནིབྦཏྟཱཏི ཨདྷིཔྤཱཡོ. ཝུཏྟཝིཔརིཡཱཡེན སུཀྐཔཀྑོ ཝེདིཏབྦོ.

ཨཡཾ པན ཝིསེསོ – ཏཏྠ སུགཏིགྒཧཎེན མནུསྶགཏིཔི སངྒཡ྄ཧཏི, སགྒགྒཧཎེན དེཝགཏིཡེཝ. ཏཏྠ སུནྡརཱ གཏཱིཏི སུགཏི. རཱུཔཱདཱིཧི ཝིསཡེཧི སུཊྛུ ཨགྒོཏི སགྒོ. སོ སབྦོཔི ལུཛྫནཔལུཛྫནཊྛེན ལོཀོཏི ཨཡཾ ཝཙནཏྠོ. ཨིཏི ‘‘དིབྦེན ཙཀྑུནཱ’’ཏིཨཱདི སབྦཾ ནིགམནཝཙནཾ. ཨེཝཾ དིབྦེན ཙཀྑུནཱ པསྶཏཱིཏི ཨཡམེཏྠ སངྑེཔཏྠོཏི.

དིབྦཙཀྑུཉཱཎནིདྡེསཝཎྞནཱ ནིཊྛིཏཱ.

པཉྩཉཱཎཔཀིཎྞཀཾ

ཨིམེསུ ¶ ¶ པཉྩསུ ཉཱཎེསུ ཨིདྡྷིཝིདྷཉཱཎཾ པརིཏྟམཧགྒཏཨཏཱིཏཱནཱགཏཔཙྩུཔྤནྣཨཛ྄ཛྷཏྟབཧིདྡྷཱརམྨཎཝསེན སཏྟསུ ཨཱརམྨཎེསུ པཝཏྟཏི. སོཏདྷཱཏུཝིསུདྡྷིཉཱཎཾ པརིཏྟཔཙྩུཔྤནྣཨཛ྄ཛྷཏྟབཧིདྡྷཱརམྨཎཝསེན ཙཏཱུསུ ཨཱརམྨཎེསུ པཝཏྟཏི. ཙེཏོཔརིཡཉཱཎཾ པརིཏྟམཧགྒཏཨཔྤམཱཎམགྒཨཏཱིཏཱནཱགཏཔཙྩུཔྤནྣབཧིདྡྷཱརམྨཎཝསེན ཨཊྛསུ ཨཱརམྨཎེསུ པཝཏྟཏི. པུབྦེནིཝཱསཱནུསྶཏིཉཱཎཾ ¶

པརིཏྟམཧགྒཏཨཔྤམཱཎམགྒཨཏཱིཏཨཛ྄ཛྷཏྟབཧིདྡྷཱནཝཏྟབྦཱརམྨཎཝསེན ཨཊྛསུ ཨཱརམྨཎེསུ པཝཏྟཏི. དིབྦཙཀྑུཉཱཎཾ པརིཏྟཔཙྩུཔྤནྣཨཛ྄ཛྷཏྟབཧིདྡྷཱརམྨཎཝསེན ཙཏཱུསུ ཨཱརམྨཎེསུ པཝཏྟཏི. ཡཐཱཀམྨཱུཔགཉཱཎཾ པརིཏྟམཧགྒཏཨཏཱིཏཨཛ྄ཛྷཏྟབཧིདྡྷཱརམྨཎཝསེན པཉྩསུ ཨཱརམྨཎེསུ པཝཏྟཏི. ཨནཱགཏཾསཉཱཎཾ པརིཏྟམཧགྒཏཨཔྤམཱཎམགྒཨནཱགཏཨཛ྄ཛྷཏྟབཧིདྡྷཱནཝཏྟབྦཱརམྨཎཝསེན ཨཊྛསུ ཨཱརམྨཎེསུ པཝཏྟཏཱིཏི.

པཉྩཉཱཎཔཀིཎྞཀཾ ནིཊྛིཏཾ.

༥༥. ཨཱསཝཀྑཡཉཱཎནིདྡེསཝཎྞནཱ

༡༠༧. ཨཱསཝཀྑཡཉཱཎནིདྡེསེ ¶ ཨནཉྙཱཏཉྙསྶཱམཱིཏིནྡྲིཡཱདཱིནི ཝུཏྟཏྠཱནི. ཀཏི ཋཱནཱནི གཙྪཏཱིཏི ཨེཀེཀསྶ ཨུཔྤཏྟིཊྛཱནནིཡམནཏྠཾ པུཙྪཱ. ཨེཀཾ ཋཱནཾ གཙྪཏཱིཏི ཨེཀསྨིཾ ཋཱནེ ཨུཔྤཛྫཏཱིཏི ཝུཏྟཾ ཧོཏི. ཨུཔྤཏྟིཨོཀཱསཊྛཱནཉྷི ཏིཊྛཏི ཨེཏྠཱཏི ཋཱནནྟི ཝུཙྩཏི. ཚ ཋཱནཱནཱིཏི ཚ མགྒཕལཀྑཎེ. ཨིནྡྲིཡཱནཾ ཨནཉྙཱཏཉྙསྶཱམཱིཏིནྡྲིཡཱདཱིསུ ཏཱིསུ ཨེཀེཀམེཝ ཨདྷིཀཾ ཧོཏཱིཏི དསྶནཏྠཾ སདྡྷིནྡྲིཡཾ ཨདྷིམོཀྑཔརིཝཱརཾ ཧོཏཱིཏིཨཱདི ཝུཏྟཾ. ཡཐཱ ‘‘སདྡྷིནྡྲིཡསྶ ཨདྷིམོཀྑཊྛོ’’ཏིཨཱདཱིསུ (པཊི. མ. ༡.༡༢) ཨདྷིམོཀྑཱདཡོ སདྡྷིནྡྲིཡཱདཱིནཾ ཀིཙྩཝསེན ཝུཏྟཱ, ཨེཝམིདྷཱཔི ‘‘ཨདྷིམོཀྑཔརིཝཱརཾ ཧོཏཱི’’ཏི སདྡྷིནྡྲིཡཾ ཨདྷིམོཀྑཏྠེན པརིཝཱརཾ ཧོཏཱིཏི ཝུཏྟཾ ཧོཏི. ཨེས ནཡོ སེསེསུཔི. པརིཝཱརནྟི ཙ ལིངྒཝིཔལླཱསོ ཀཏོ. པཉྙིནྡྲིཡནྟི ཨནཉྙཱཏཉྙསྶཱམཱིཏིནྡྲིཡམེཝ པཛཱནནསབྷཱཝདསྶནཏྠཾ ཝིསུཾ ཀཏྭཱ ཝུཏྟཾ. ཨབྷིདྷམྨེཔི (ཝིབྷ. ༢༡༩) ཧི པཉྙཱཡ ཀིཙྩཝིསེསདསྶནཏྠཾ མགྒཀྑཎེ ཙ ཕལཀྑཎེ ཙ ཨེཀཱཝ པཉྙཱ ཨཊྛདྷཱ ཝིབྷཏྟཱ. ཨབྷིསནྡནཔརིཝཱརནྟི ནྷཱནིཡཙུཎྞཱནཾ ཨུདཀཾ ཝིཡ ཙིཏྟཙེཏསིཀཱནཾ སིནེཧནཀིཙྩེན པརིཝཱརཾ ཧོཏི. ཨིདཾ སོམནསྶསམྤཡུཏྟམགྒཝསེནེཝ ཝུཏྟཾ. ཨུཔེཀྑཱསམྤཡུཏྟམགྒེ པན སོམནསྶིནྡྲིཡཊྛཱནེ ཨུཔེཀྑིནྡྲིཡཾ ¶ དཊྛབྦཾ. ཏཾ པན སམྤཡུཏྟཱནཾ ནཱཏིཨུཔབྲཱུཧནཔརིཝཱརནྟི གཧེཏབྦཾ. པཝཏྟསནྟཏཱདྷིཔཏེཡྻཔརིཝཱརནྟི པཝཏྟཱ སནྟཏི པཝཏྟསནྟཏི, ཝཏྟམཱནསནྟཱནནྟི ཨཏྠོ. ཨདྷིཔཏིབྷཱཝོ ཨཱདྷིཔཏེཡྻཾ, པཝཏྟསནྟཏིཡཱ ཨཱདྷིཔཏེཡྻཾ པཝཏྟསནྟཏཱདྷིཔཏེཡྻཾ. ཝཏྟམཱནཛཱིཝིཏིནྡྲིཡསྶ ཨུཔརིཔཝཏྟིཡཱ ཙ པཙྩཡཏྟཱ པུབྦཱཔརཝསེན པཝཏྟསནྟཏིཡཱ ¶ ཨདྷིཔཏིབྷཱཝེན ཨནཉྙཱཏཉྙསྶཱམཱིཏིནྡྲིཡསྶ པརིཝཱརཾ ཧོཏི.

སོཏཱཔཏྟིམགྒཀྑཎེ ¶ ཛཱཏཱ དྷམྨཱཏིཨཱདི སབྦེསཾ མགྒསམྤཡུཏྟཀཱནཾ ཝཎྞབྷཎནཏྠཾ ཝུཏྟཾ. ཏཏྠ མགྒཀྑཎེ ཛཱཏཱཏི མགྒསམུཊྛིཏཱ ཨེཝ, ན ཨཉྙེ. ཡསྨཱ པན མགྒསམུཊྛིཏམྤི རཱུཔཾ ཀུསལཱདིནཱམཾ ན ལབྷཏི, ཏསྨཱ ཏཾ ཨཔནེནྟོ ཋཔེཏྭཱ ཙིཏྟསམུཊྛཱནཾ རཱུཔནྟི ཨཱཧ. སབྦེཝ ཧི ཏེ དྷམྨཱ ཀུཙྪིཏཱནཾ སལནཱདཱིཧི ཨཏྠེཧི ཀུསལཱ. ཏེ ཨཱརམྨཎཾ ཀཏྭཱ པཝཏྟམཱནཱ ནཏྠི ཨེཏེསཾ ཨཱསཝཱཏི ཨནཱསཝཱ. ཝཊྚམཱུལཾ ཚིནྡནྟཱ ནིབྦཱནཾ ཨཱརམྨཎཾ ཀཏྭཱ ཝཊྚཏོ ནིཡྻནྟཱིཏི ནིཡྻཱནིཀཱ. ཀུསལཱཀུསལསངྑཱཏཱ ཙཡཱ ཨཔེཏཏྟཱ ཨཔཙཡསངྑཱཏཾ ནིབྦཱནཾ ཨཱརམྨཎཾ ཀཏྭཱ པཝཏྟནཏོ ཨཔཙཡཾ གཙྪནྟཱིཏི ཨཔཙཡགཱམིནོ, པཝཏྟཾ ཨཔཙིནནྟཱ ཝིདྡྷཾསེནྟཱ གཙྪནྟཱིཏིཔི ཨཔཙཡགཱམིནོ. ལོཀེ ཨཔརིཡཱཔནྣབྷཱཝེན ལོཀཏོ ཨུཏྟརཱ ཨུཏྟིཎྞཱཏི ལོཀུཏྟརཱ. ནིབྦཱནཾ ཨཱརམྨཎཾ ཨེཏེསནྟི ནིབྦཱནཱརམྨཎཱ.

ཨིམཱནི ཨཊྛིནྡྲིཡཱནཱིཏིཨཱདི པུབྦེ ཝུཏྟཔརིཝཱརབྷཱཝསྶ ཙ ཏེན སཧགཏཱདིབྷཱཝསྶ ཙ ཨཱདིཝུཏྟཨཱཀཱརཱནཉྩ དཱིཔནཏྠཾ ཝུཏྟཾ. ཏཏྠ ཨཊྛིནྡྲིཡཱནཱིཏི པུབྦེ ཝུཏྟནཡེན པཉྙིནྡྲིཡེན སཧ ཨཊྛ. སཧཛཱཏཔརིཝཱརཱཏི ཨཊྛསུ ཨེཀེཀེན སཧ ཨིཏརེ ཨིཏརེ སཏྟ སཧཛཱཏཱ ཧུཏྭཱ ཏསྶ སཧཛཱཏཔརིཝཱརཱ ཧོནྟི. ཏཐེཝ ཨཉྙཾ ཨཉྙསྶ ཨཉྙཾ ཨཉྙསྶཱཏི ཨེཝཾ ཨཉྙམཉྙཔརིཝཱརཱ ཧོནྟི. ཏཐེཝ ཨཉྙམཉྙཾ ནིསྶཡཔརིཝཱརཱ སམྤཡུཏྟཔརིཝཱརཱ ཙ ཧོནྟི. སཧགཏཱཏི ཏེན ཨནཉྙཱཏཉྙསྶཱམཱིཏིནྡྲིཡེན སཧ ཨེཀུཔྤཱདཱདིབྷཱཝཾ གཏཱ. སཧཛཱཏཱཏི ཏེནེཝ སཧ ཛཱཏཱ. སཾསཊྛཱཏི ཏེནེཝ སཧ མིསྶིཏཱ. སམྤཡུཏྟཱཏི ཏེནེཝ སམཾ ཨེཀུཔྤཱདཱདིཔཀཱརེཧི ཡུཏྟཱ. ཏེཝཱཏི ཏེ ཨེཝ ཨཊྛ ཨིནྡྲིཡདྷམྨཱ. ཏསྶཱཏི ཨནཉྙཱཏཉྙསྶཱམཱིཏིནྡྲིཡསྶ. ཨཱཀཱརཱཏི པརིཝཱརཀོཊྛཱསཱ.

ཕལཀྑཎེ ཛཱཏཱ དྷམྨཱ སབྦེཝ ཨབྱཱཀཏཱ ཧོནྟཱིཏི རཱུཔསྶཔི ཨབྱཱཀཏཏྟཱ ཙིཏྟསམུཊྛཱནརཱུཔེན སཧ ཝུཏྟཱ. མགྒསྶེཝ ཀུསལཏྟཱ ནིཡྻཱནིཀཏྟཱ ཨཔཙཡགཱམིཏྟཱ ཙ ཕལཀྑཎེ ‘‘ཀུསལཱ’’ཏི ཙ ‘‘ནིཡྻཱནིཀཱ’’ཏི ཙ ‘‘ཨཔཙཡགཱམིནོ’’ཏི ཙ ན ཝུཏྟཾ. ཨིཏཱིཏིཨཱདི ཝུཏྟཔྤཀཱརནིགམནཾ. ཏཏྠ ཨཊྛཊྛཀཱནཱིཏི ¶ ཨཊྛསུ མགྒཕལེསུ ཨེཀེཀསྶ ཨཊྛཀསྶ ཝསེན ཨཊྛ ཨིནྡྲིཡཨཊྛཀཱནི. ཙཏུསཊྛི ཧོནྟཱིཏི ཙཏུསཊྛི ཨཱཀཱརཱ ཧོནྟི. ཨཱསཝཱཏིཨཱདི ཧེཊྛཱ ཝུཏྟཏྠམེཝ ¶ . ཨིདྷ ཨརཧཏྟམགྒཝཛ྄ཛྷེཡེཝ ¶ ཨཱསཝེ ཨཝཏྭཱ སེསམགྒཏྟཡཝཛ྄ཛྷཱནམྤི ཝཙནཾ ཨཱསཝཀྑཡཝཙནསཱམཉྙམཏྟེན ཝུཏྟནྟི ཝེདིཏབྦཾ. ཨརཧཏྟམགྒཉཱཎམེཝ ཧི ཀེཙི ཨཱསཝེ ཨསེསེཏྭཱ ཨཱསཝཱནཾ ཁེཔནཏོ ‘‘ཁཡེ ཉཱཎ’’ནྟི ཝུཙྩཏི. ཏསྨཱཡེཝ ཙ ཨརཧཱཡེཝ ཁཱིཎཱསཝོཏི ཝུཙྩཏཱིཏི.

ཨཱསཝཀྑཡཉཱཎནིདྡེསཝཎྞནཱ ནིཊྛིཏཱ.

༥༦-༦༣. སཙྩཉཱཎཙཏུཀྐདྭཡནིདྡེསཝཎྞནཱ

༡༠༨-༩. སཙྩཉཱཎཙཏུཀྐདྭཡནིདྡེསེ ¶ དུཀྑསྶ པཱིལ༹ནཊྛོཏིཨཱདཱིནི ཝུཏྟཏྠཱནེཝ. མགྒསམངྒིསྶ ཉཱཎཾ དུཀྑེཔེཏཾ ཉཱཎནྟིཨཱདི ཨནནྟརཙཏུཀྐེ ཝིཡ ཨེཀཱབྷིསམཡཝསེན ཝུཏྟཾ. དུཝིདྷཉྷི སཙྩཉཱཎཾ ལོཀིཡཾ ལོཀུཏྟརཉྩ. ལོཀིཀཾ དུཝིདྷཾ ཨནུབོདྷཉཱཎཾ པཙྩཝེཀྑཎཉཱཎཉྩ. ཨནུབོདྷཉཱཎཾ ཨཱདིཀམྨིཀསྶ ཨནུསྶཝཱདིཝསེན ནིརོདྷེ མགྒེ ཙ པཝཏྟཏི, དུཀྑེ སམུདཡེ ཙ ཨཱརམྨཎཀརཎཝསེན. པཙྩཝེཀྑཎཉཱཎཾ པཊིཝིདྡྷསཙྩསྶ ཙཏཱུསུཔི སཙྩེསུ ཨཱརམྨཎཀརཎཝསེན. ལོཀུཏྟརཾ པཊིཝེདྷཉཱཎཾ ནིརོདྷམཱརམྨཎཾ ཀཏྭཱ ཀིཙྩཏོ ཙཏྟཱརི སཙྩཱནི པཊིཝིཛ྄ཛྷཏི. ཡཐཱཧ – ‘‘ཡོ, བྷིཀྑཝེ, དུཀྑཾ པསྶཏི, དུཀྑསམུདཡམྤི སོ པསྶཏི, དུཀྑནིརོདྷམྤི པསྶཏི, དུཀྑནིརོདྷགཱམིནིཾ པཊིཔདམྤི པསྶཏཱི’’ཏི (སཾ. ནི. ༥.༡༡༠༠) སབྦཾ ཝཏྟབྦཾ. ཨིདྷཱཔི ཨིམིནཱ ཝཱརེན ཨིདམེཝ ཝུཏྟཾ. ཏཾ པན ལོཀུཏྟརམྤི ‘‘དུཀྑེ ཉཱཎ’’ནྟིཨཱདཱིནི ནཱམཱནི ལབྷཏཱིཏི དསྶནཏྠཾ ཝུཏྟཾ. ཨིདྷ པན ལོཀིཀཉཱཎམེཝ ཨདྷིཔྤེཏཾ. ཏསྨཱཡེཝ ཙ ཏཏྠ ཀཏམཾ དུཀྑེ ཉཱཎནྟིཨཱདིམཱཧ.

ཏཏྠ དུཀྑཾ ཨཱརབྦྷཱཏི དུཀྑསཙྩཾ ཨཱལམྦིཏྭཱ, ཨཱརམྨཎཾ ཀཏྭཱཏི ཨཏྠོ. པཉྙཱཏིཨཱདཱིསུ ཏསྶ ཏསྶ ཨཏྠསྶ པཱཀཊཀརཎསངྑཱཏེན པཉྙཱཔནཊྛེན པཉྙཱ, ཏེན ཏེན ཝཱ ཨནིཙྩཱདིནཱ པཀཱརེན དྷམྨེ ཛཱནཱཏཱིཏིཔི པཉྙཱ. ཨིདམསྶཱ སབྷཱཝཔདཾ. པཛཱནནཱཀཱརོ པཛཱནནཱ. ཨནིཙྩཱདཱིནི ཝིཙིནཱཏཱིཏི ཝིཙཡོ. པཝིཙཡོཏི ཨུཔསགྒེན པདཾ ཝཌྜྷིཏཾ, པཀཱརེན ཝིཙཡོཏི ཨཏྠོ. ཙཏུསཙྩདྷམྨཾ ཝིཙིནཱཏཱིཏི དྷམྨཝིཙཡོ. ཨནིཙྩཱདཱིནཾ སམྨཱ ¶ ལཀྑཎཝསེན སལླཀྑཎཱ. སཱ ཨེཝ ཨུཔསགྒནཱནཏྟེན ཨུཔལཀྑཎཱ ¶ པཙྩུཔལཀྑཎཱཏི ཝུཏྟཱ. བྷུསཾ ལཀྑཎཱ ཏེ ཏེ ཨནིཙྩཱདིདྷམྨེ པཊིཙྩ ཨུཔལཀྑཎཱཏི ཨཏྠོ. པཎྜིཏབྷཱཝོ པཎྜིཙྩཾ. ཀུསལབྷཱཝོ ཀོསལླཾ. ནིཔུཎབྷཱཝོ ནེཔུཉྙཾ. ཨནིཙྩཱདཱིནཾ ཝིབྷཱཝནཝསེན ཝེབྷབྱཱ. ཨནིཙྩཱདཱིནཾ ཙིནྟནཀཝསེན ཙིནྟཱ, ཡསྶ ཨུཔྤཛྫཏི, ཏཾ ཨནིཙྩཱདཱིནི ཙིནྟཱཔེཏཱིཏིཔི ཙིནྟཱ. ཨནིཙྩཱདཱིནི ཨུཔཔརིཀྑཏཱིཏི ¶ ཨུཔཔརིཀྑཱ. བྷཱུརཱིཏི པཐཝཱི. ཨཡམྤི སཎྷཊྛེན ཝིཏྠཏཊྛེན ཙ བྷཱུརཱི ཝིཡཱཏི བྷཱུརཱི. ཨཐ ཝཱ པཉྙཱཡེཝ བྷཱུཏེ ཨཏྠེ རམཏཱིཏི བྷཱུརཱིཏི ཝུཙྩཏི. ཨསནི ཝིཡ སིལུཙྩཡེ ཀིལེསེ མེདྷཏི ཧིཾསཏཱིཏི མེདྷཱ, ཁིཔྤཾ གཧཎདྷཱརཎཊྛེན ཝཱ མེདྷཱ. ཡསྶ ཨུཔྤཛྫཏི, ཏཾ ཨཏྟཧིཏཔཊིཔཏྟིཡཾ སམྤཡུཏྟདྷམྨེ ཙ ཡཱཐཱཝལཀྑཎཔཊིཝེདྷེ པརིནེཏཱིཏི པརིཎཱཡིཀཱ. དྷམྨེ ཨནིཙྩཱདིཝསེན ཝིཝིདྷཱ པསྶཏཱིཏི ཝིཔསྶནཱ. སམྨཱ པཀཱརེཧི ཨནིཙྩཱདཱིནི ཛཱནཱཏཱིཏི སམྤཛཱནོ, ཏསྶ བྷཱཝོ སམྤཛཉྙཾ. ཨུཔྤཐཔཊིཔནྣེ སིནྡྷཝེ ཝཱིཐིཨཱརོཔནཏྠཾ པཏོདོ ཝིཡ ཨུཔྤཐེ དྷཱཝནཀཾ ཀཱུཊཙིཏྟཾ ཝཱིཐིཨཱརོཔནཏྠཾ ཝིཛ྄ཛྷཏཱིཏི པཏོདོ ཝིཡ པཏོདོ.

དསྶནལཀྑཎེ ཨིནྡཊྛཾ ཀརོཏཱིཏི ཨིནྡྲིཡཾ, པཉྙཱསངྑཱཏཾ ཨིནྡྲིཡཾ པཉྙིནྡྲིཡཾ. ཀིཾ ཝུཏྟཾ ཧོཏི? ནཡིདཾ ‘‘པུརིསསྶ ཨིནྡྲིཡཾ པུརིསིནྡྲིཡ’’ནྟིཨཱདི ཝིཡ པཉྙཱཡ ཨིནྡྲིཡཾ པཉྙིནྡྲིཡཾ. ཨཐ ཁོ པཉྙཱ ཨེཝ ཨིནྡྲིཡཾ པཉྙིནྡྲིཡནྟི ཝུཏྟཾ ཧོཏི. ཨཝིཛྫཱཡ ན ཀམྤཏཱིཏི པཉྙཱབལཾ. ཀིལེསཙྪེདནཊྛེན པཉྙཱཝ སཏྠཾ པཉྙཱསཏྠཾ. ཨཙྩུགྒཏཊྛེན པཉྙཱཝ པཱསཱདོ པཉྙཱཔཱསཱདོ. ཨཱལོཀནཊྛེན པཉྙཱཝ ཨཱལོཀོ པཉྙཱཨཱལོཀོ. ཨོབྷཱསནཊྛེན པཉྙཱཝ ཨོབྷཱསོ པཉྙཱཨོབྷཱསོ. པཛྫོཏནཊྛེན པཉྙཱཝ པཛྫོཏོ པཉྙཱཔཛྫོཏོ. པཉྙཝཏོ ཧི ཨེཀཔལླངྐེན ནིསིནྣསྶ དསསཧསྶིལོཀདྷཱཏུ ཨེཀཱལོཀཱ ཨེཀོབྷཱསཱ ཨེཀཔཛྫོཏཱ ཧོཏི. ཏེནེཏཾ ཝུཏྟཾ. ཨིམེསུ པན ཏཱིསུ པདེསུ ཨེཀཔདེནཱཔི ཨེཏསྨིཾ ཨཏྠེ སིདྡྷེ ཡཱནི པནེཏཱནི བྷགཝཏཱ ‘‘ཙཏྟཱརོམེ, བྷིཀྑཝེ, ཨཱལོཀཱ. ཀཏམེ ཙཏྟཱརོ? ཙནྡཱལོཀོ, སཱུརིཡཱལོཀོ, ཨགྒཱལོཀོ, པཉྙཱལོཀོ. ཨིམེ ཁོ, བྷིཀྑཝེ, ཙཏྟཱརོ ཨཱལོཀཱ. ཨེཏདགྒཾ, བྷིཀྑཝེ, ཨིམེསཾ ཙཏུནྣཾ ཨཱལོཀཱནཾ ཡདིདཾ པཉྙཱལོཀོ’’. ཏཐཱ ¶ ‘‘ཙཏྟཱརོམེ ¶ , བྷིཀྑཝེ, ཨོབྷཱསཱ. ཙཏྟཱརོམེ, བྷིཀྑཝེ, པཛྫོཏཱ’’ཏི (ཨ. ནི. ༤.༡༤༤-༡༤༥) སཏྟཱནཾ ཨཛ྄ཛྷཱསཡཝསེན སུཏྟཱནི དེསིཏཱནི. ཏདནུརཱུཔེནེཝ ཨིདྷཱཔི ཐེརེན དེསནཱ ཀཏཱ. ཨཏྠོ ཧི ཨནེཀེཧི ཨཱཀཱརེཧི ཝིབྷཛྫམཱནོ སུཝིབྷཏྟོ ཧོཏི, ཨཉྙཐཱ ཙ ཨཉྙོ བུཛ྄ཛྷཏི, ཨཉྙཐཱ ཨཉྙོཏི. རཏིཀརཎཊྛེན པན རཏིདཱཡཀཊྛེན རཏིཛནཀཊྛེན ཙིཏྟཱིཀཏཊྛེན དུལླབྷཔཱཏུབྷཱཝཊྛེན ཨཏུལཊྛེན ཨནོམསཏྟཔརིབྷོགཊྛེན ཙ པཉྙཱཝ རཏནཾ པཉྙཱརཏནཾ.

ན ཏེན སཏྟཱ མུཡ྄ཧནྟི, སཡཾ ཝཱ ཨཱརམྨཎེ ན མུཡ྄ཧཏཱིཏི ཨམོཧོ. དྷམྨཝིཙཡཔདཾ ཝུཏྟཏྠམེཝ. ཀསྨཱ པནེཏཾ པུན ཝུཏྟནྟི? ཨམོཧསྶ མོཧཔཊིཔཀྑབྷཱཝདཱིཔནཏྠཾ. ཏེནེཏཾ དཱིཔེཏི ‘‘ཡྭཱཡཾ ཨམོཧོ, སོ ན ཀེཝལཾ མོཧཏོ ཨཉྙོ དྷམྨོ, མོཧསྶ པན པཊིཔཀྑོ དྷམྨཝིཙཡསངྑཱཏོ ཨམོཧོ ནཱམ ཨིདྷ ཨདྷིཔྤེཏོ’’ཏི. སམྨཱདིཊྛཱིཏི ཡཱཐཱཝནིཡྻཱནིཀཀུསལདིཊྛི ¶ . ‘‘ཏཏྠ ཀཏམཾ དུཀྑསམུདཡེ ཉཱཎཾ, ཏཏྠ ཀཏམཾ དུཀྑནིརོདྷེ ཉཱཎཾ, ཏཏྠ ཀཏམཾ དུཀྑནིརོདྷགཱམིནིཡཱ པཊིཔདཱཡ ཉཱཎ’’ནྟི པུཙྪཱཝཙནཱནི སངྑེཔཝསེན ཝུཏྟཱནཱིཏི.

སཙྩཉཱཎཙཏུཀྐདྭཡནིདྡེསཝཎྞནཱ ནིཊྛིཏཱ.

༦༤-༦༧. སུདྡྷིཀཔཊིསམྦྷིདཱཉཱཎནིདྡེསཝཎྞནཱ

༡༡༠. སུདྡྷིཀཔཊིསམྦྷིདཱཉཱཎནིདྡེསེ ¶ ཨིམེསཾ ཉཱཎཱནཾ པབྷེདཱབྷཱཝཏོཡེཝ ཧེཊྛཱ ཝིཡ པབྷེདཾ ཨདསྶེཏྭཱཡེཝ ཨཏྠེསུ ཉཱཎཾ ཨཏྠཔཊིསམྦྷིདཱཏིཨཱདི ཝུཏྟཾ. པཉྙཱཔབྷེདཱབྷཱཝེཔི ཨཏྟནཱ པཊིཝིདྡྷཙཏུསཙྩདྷམྨམཏྟཝསེན ནཱནཏྟསབྦྷཱཝཏོ ཨཏྠནཱནཏྟེ པཉྙཱ ཨཏྠཔཊིསམྦྷིདེ ཉཱཎནྟིཨཱདི ཝུཏྟཾ. ཏཏྠ ནཱནཏྟེཏི ཨཏྠཱདཱིནཾ ཨནེཀབྷཱཝེ. ཝཝཏྠཱནེཏི ཨཏྠཱདཱིནཾ ནིཙྪཡནེ. སལླཀྑཎེཏི ཨཏྠཱདཱིནཾ སམྨཱདསྶནེ. ཨུཔལཀྑཎེཏི ཨཏྠཱདཱིནཾ བྷུསཾདསྶནེ. པབྷེདེཏི ཨཏྠཱདཱིནཾ ནཱནཱབྷེདེ. པབྷཱཝནེཏི ཨཏྠཱདཱིནཾ པཱཀཊཱིཀརཎེན ཨུཔྤཱདནེ. ཛོཏནེཏི ཨཏྠཱདཱིནཾ དཱིཔནེ. ཝིརོཙནེཏི ཨཏྠཱདཱིནཾ ཝིཝིདྷཱ དཱིཔནེ. པཀཱསནེཏི ཨཏྠཱདཱིནཾ པབྷཱསནེ ¶ . ‘‘ནཱནཏྟེ’’ཏི མཱུལཔདཾ ཀཏྭཱ སབྦསཱདྷཱརཎཝསེན ཝུཏྟཾ. ‘‘ཝཝཏྠཱནེ’’ཏི སོཏཱཔནྣསྶ ཝསེན, ‘‘སལླཀྑཎེ ཨུཔལཀྑཎེ’’ཏི སཀདཱགཱམིསྶ ཝསེན, ‘‘པབྷེདེ པབྷཱཝནེ’’ཏི ཨནཱགཱམིསྶ ཝསེན, ‘‘ཛོཏནེ ཝིརོཙནེ པཀཱསནེ’’ཏི ཨརཧཏོ ཝསེན ཝུཏྟནྟི ཨེཝམྤེཏྠ ཡོཛནཱ ཀཱཏབྦཱཏི.

སུདྡྷིཀཔཊིསམྦྷིདཱཉཱཎནིདྡེསཝཎྞནཱ ནིཊྛིཏཱ.

ཨིཏི སདྡྷམྨཔྤཀཱསིནིཡཱ པཊིསམྦྷིདཱམགྒ-ཨཊྛཀཐཱཡ

པཋམོ བྷཱགོ ནིཊྛིཏོ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཁུདྡཀནིཀཱཡེ

པཊིསམྦྷིདཱམགྒ-ཨཊྛཀཐཱ

(དུཏིཡོ བྷཱགོ)

༦༨. ཨིནྡྲིཡཔརོཔརིཡཏྟཉཱཎནིདྡེསཝཎྞནཱ

༡༡༡. ཨིནྡྲིཡཔརོཔརིཡཏྟཉཱཎནིདྡེསེ ¶ ¶ ¶ ཏཐཱགཏསྶཱཏི ཝཙནེ ཨུདྡེསེ སརཱུཔཏོ ཨཝིཛྫམཱནེཔི ‘‘ཚ ཉཱཎཱནི ཨསཱདྷཱརཎཱནི སཱཝཀེཧཱི’’ཏི (པཊི. མ. མཱཏིཀཱ ༡.༧༣) ཝུཏྟཏྟཱ ‘‘ཏཐཱགཏསྶཱ’’ཏི ཝུཏྟམེཝ ཧོཏི. ཏསྨཱ ཨུདྡེསེ ཨཏྠཏོ སིདྡྷསྶ ཏཐཱགཏཝཙནསྶ ནིདྡེསེ གཧཎཾ ཀཏཾ. སཏྟེ པསྶཏཱིཏི རཱུཔཱདཱིསུ ཚནྡརཱགེན སཏྟཏཱཡ ལགྒཏཱཡ སཏྟཱ, ཏེ སཏྟེ ཨིནྡྲིཡཔརོཔརིཡཏྟཉཱཎེན ཙཀྑུནཱ པསྶཏི ཨོལོཀེཏི. ཨཔྤརཛཀྑེཏི པཉྙཱམཡེ ཨཀྑིམྷི ཨཔྤཾ རཱགཱདིརཛོ ཨེཏེསནྟི ཨཔྤརཛཀྑཱ, ཨཔྤཾ རཱགཱདིརཛོ ཨེཏེསནྟི ཝཱ ཨཔྤརཛཀྑཱ. ཏེ ཨཔྤརཛཀྑེ. མཧཱརཛཀྑེཏི པཉྙཱམཡེ ཨཀྑིམྷི མཧནྟཾ རཱགཱདིརཛོ ཨེཏེསནྟི མཧཱརཛཀྑཱ, མཧནྟཾ རཱགཱདིརཛོ ཨེཏེསནྟི ཝཱ མཧཱརཛཀྑཱ. ཏིཀྑིནྡྲིཡེ མུདིནྡྲིཡེཏི ཏིཀྑཱནི ¶ སདྡྷཱདཱིནི ཨིནྡྲིཡཱནི ཨེཏེསནྟི ཏིཀྑིནྡྲིཡཱ, མུདཱུནི སདྡྷཱདཱིནི ཨིནྡྲིཡཱནི ཨེཏེསནྟི མུདིནྡྲིཡཱ. སྭཱཀཱརེ དྭཱཀཱརེཏི སུནྡརཱ སདྡྷཱདཡོ ཨཱཀཱརཱ ཀོཊྛཱསཱ ཨེཏེསནྟི སྭཱཀཱརཱ, ཀུཙྪིཏཱ གརཧིཏཱ སདྡྷཱདཡོ ཨཱཀཱརཱ ཀོཊྛཱསཱ ཨེཏེསནྟི དྭཱཀཱརཱ. སུཝིཉྙཱཔཡེ དུཝིཉྙཱཔཡེཏི ཡེ ཀཐིཏཾ ཀཱརཎཾ སལླཀྑེནྟི སུཁེན སཀྐཱ ཧོནྟི ཝིཉྙཱཔེཏུཾ, ཏེ སུཝིཉྙཱཔཡཱ, ཏབྦིཔརཱིཏཱ དུཝིཉྙཱཔཡཱ. ཨཔྤེཀཙྩེ ¶ པརལོཀཝཛྫབྷཡདསྶཱཝིནོཏི ཨཔི ཨེཀེ པརལོཀཉྩེཝ རཱགཱདིཝཛྫཉྩ བྷཡཏོ པསྶནྟེ, ཨིམསྶ པན པདསྶ ནིདྡེསེ པརལོཀསྶེཝ ན ཝུཏྟཏྟཱ ཁནྡྷཱདིལོཀེ ཙ རཱགཱདིཝཛྫེ ཙ པརཾ བཱལ༹ྷཾ བྷཡཾ པསྶནསཱིལཱཏི པརལོཀཝཛྫབྷཡདསྶཱཝིནོ. ཏེ པརལོཀཝཛྫབྷཡདསྶཱཝིནེཏི ཨེཝམཏྠོ གཧེཏབྦོ. ཨཔྤེཀཙྩེ ན པརལོཀཝཛྫབྷཡདསྶཱཝིནོཏི ཏབྦིཔརཱིཏེ. ལོཀོཏི ཙ ལུཛྫནཔལུཛྫནཊྛེན. ཝཛྫནྟི ཙ ཝཛྫནཱིཡཊྛེན. ཨེཏྟཱཝཏཱ ཨུདྡེསསྶ ནིདྡེསོ ཀཏོ ཧོཏི.

པུན ¶ ནིདྡེསསྶ པཊིནིདྡེསཾ ཀརོནྟོ ཨཔྤརཛཀྑེ མཧཱརཛཀྑེཏིཨཱདིམཱཧ. ཏཏྠ ཏཱིསུ རཏནེསུ ཨོཀཔྤནསངྑཱཏཱ སདྡྷཱ ཨསྶ ཨཏྠཱིཏི སདྡྷོ. སོ སདྡྷཱསམྤནྣོ པུགྒལོ ཨསྶདྡྷིཡརཛསྶ ཙེཝ ཨསྶདྡྷིཡམཱུལཀསྶ སེསཱཀུསལརཛསྶ ཙ ཨཔྤཀཏྟཱ ཨཔྤརཛཀྑོ. ནཏྠི ཨེཏསྶ སདྡྷཱཏི ཨསྶདྡྷོ. སོ ཝུཏྟཔྤཀཱརསྶ རཛསྶ མཧནྟཏྟཱ མཧཱརཛཀྑོ. ཨཱརདྡྷཾ ཝཱིརིཡམནེནཱཏི ཨཱརདྡྷཝཱིརིཡོ. སོ ཀོསཛྫརཛསྶ ཙེཝ ཀོསཛྫམཱུལཀསྶ སེསཱཀུསལརཛསྶ ཙ ཨཔྤཀཏྟཱ ཨཔྤརཛཀྑོ. ཧཱིནཝཱིརིཡཏྟཱ ཀུཙྪིཏེན ཨཱཀཱརེན སཱིདཏཱིཏི ཀུསཱིདོ, ཀུསཱིདོ ཨེཝ ཀུསཱིཏོ. སོ ཝུཏྟཔྤཀཱརསྶ རཛསྶ མཧནྟཏྟཱ མཧཱརཛཀྑོ. ཨཱརམྨཎཾ ཨུཔེཙྩ ཋིཏཱ སཏི ཨསྶཱཏི ཨུཔཊྛིཏསྶཏི. སོ མུཊྛསྶཙྩརཛསྶ ཙེཝ མུཊྛསྶཙྩམཱུལཀསྶ སེསཱཀུསལརཛསྶ ཙ ཨཔྤཀཏྟཱ ཨཔྤརཛཀྑོ. མུཊྛཱ ནཊྛཱ སཏི ཨསྶཱཏི མུཊྛསྶཏི. སོ ཝུཏྟཔྤཀཱརསྶ རཛསྶ མཧནྟཏྟཱ མཧཱརཛཀྑོ. ཨཔྤནཱསམཱདྷིནཱ ཨུཔཙཱརསམཱདྷིནཱ ཝཱ ཨཱརམྨཎེ སམཾ, སམྨཱ ཝཱ ཨཱཧིཏོ ཋིཏོཏི སམཱཧིཏོ, སམཱཧིཏཙིཏྟོཏི ཝཱ སམཱཧིཏོ. སོ ཨུདྡྷཙྩརཛསྶ ཙེཝ ཨུདྡྷཙྩམཱུལཀསྶ སེསཱཀུསལརཛསྶ ཙ ཨཔྤཀཏྟཱ ཨཔྤརཛཀྑོ. ན སམཱཧིཏོ ཨསམཱཧིཏོ. སོ ཝུཏྟཔྤཀཱརསྶ རཛསྶ མཧནྟཏྟཱ མཧཱརཛཀྑོ. ཨུདཡཏྠགཱམིནཱི པཉྙཱ ཨསྶ ཨཏྠཱིཏི པཉྙཝཱ. སོ མོཧརཛསྶ ཙེཝ མོཧམཱུལཀསྶ སེསཱཀུསལརཛསྶ ཙ ཨཔྤཀཏྟཱ ཨཔྤརཛཀྑོ. མོཧམཱུལ༹ྷཏྟཱ དུཊྛཱ པཉྙཱ ཨསྶཱཏི དུཔྤཉྙོ. སོ ཝུཏྟཔྤཀཱརསྶ རཛསྶ མཧནྟཏྟཱ མཧཱརཛཀྑོ. སདྡྷོ པུགྒལོ ཏིཀྑིནྡྲིཡོཏི བཧུལཾ ཨུཔྤཛྫམཱནཱཡ བལཝཏིཡཱ སདྡྷཱཡ སདྡྷོ, ཏེནེཝ སདྡྷིནྡྲིཡེན ཏིཀྑིནྡྲིཡོ. ཨསྶདྡྷོ པུགྒལོ མུདིནྡྲིཡོཏི བཧུལཾ ཨུཔྤཛྫམཱནེན ¶ ཨསྶདྡྷིཡེན ཨསྶདྡྷོ, ཨནྟརནྟརཱ ཨུཔྤཛྫམཱནེན དུབྦལེན སདྡྷིནྡྲིཡེན མུདིནྡྲིཡོ. ཨེས ནཡོ སེསེསུཔི. སདྡྷོ པུགྒལོ སྭཱཀཱརོཏི ཏཱཡ ཨེཝ སདྡྷཱཡ སོབྷནཱཀཱརོ. ཨསྶདྡྷོ པུགྒལོ དྭཱཀཱརོཏི ¶ ཏེནེཝ ཨསྶདྡྷིཡེན ཝིརཱུཔཱཀཱརོ. ཨེས ནཡོ སེསེསུཔི. སུཝིཉྙཱཔཡོཏི ¶ སུཁེན ཝིཉྙཱཔེཏུཾ སཀྐུཎེཡྻོ. དུཝིཉྙཱཔཡོཏི དུཀྑེན ཝིཉྙཱཔེཏུཾ སཀྐུཎེཡྻོ. པརལོཀཝཛྫབྷཡདསྶཱཝཱིཏི ཨེཏྠ ཡསྨཱ པཉྙཱསམྤནྣསྶེཝ སདྡྷཱདཱིནི སུཔརིསུདྡྷཱནི ཧོནྟི, ཏསྨཱ སུཔརིསུདྡྷསདྡྷཱདིསམྤནྣོ ཏཾསམྤཡུཏྟཱཡ, སུཔརིསུདྡྷསདྡྷཱདིསམྤནྣོཔི ཝཱ ཏཔྤཙྩཡཱཡ པཉྙཱཡ པརལོཀཝཛྫབྷཡདསྶཱཝཱི ཧོཏི. ཏསྨཱ ཨེཝ ཧི སདྡྷཱདཡོཔི ཙཏྟཱརོ ‘‘པརལོཀཝཛྫབྷཡདསྶཱཝཱི’’ཏི ཝུཏྟཱ.

༡༡༢. ཨིདཱནི ‘‘པརལོཀཝཛྫབྷཡདསྶཱཝཱི’’ཏི ཨེཏྠ ཝུཏྟཾ ལོཀཉྩ ཝཛྫཉྩ དསྶེཏུཾ ལོཀོཏིཨཱདིམཱཧ. ཨེཏྠ ཁནྡྷཱ ཨེཝ ལུཛྫནཔལུཛྫནཊྛེན ལོཀོཏི ཁནྡྷལོཀོ. སེསདྭཡེཔི ཨེསེཝ ནཡོ. ཝིཔཏྟིབྷཝལོཀོཏི ཨཔཱཡལོཀོ. སོ ཧི ཨནིཊྛཕལཏྟཱ ཝིརཱུཔོ ལཱབྷོཏི ཝིཔཏྟི, བྷཝཏཱིཏི བྷཝོ, ཝིཔཏྟི ཨེཝ བྷཝོ ཝིཔཏྟིབྷཝོ, ཝིཔཏྟིབྷཝོ ཨེཝ ལོཀོ ཝིཔཏྟིབྷཝལོཀོ. ཝིཔཏྟིསམྦྷཝལོཀོཏི ཨཔཱཡཱུཔགཾ ཀམྨཾ. ཏཉྷི སམྦྷཝཏི ཨེཏསྨཱ ཕལནྟི སམྦྷཝོ, ཝིཔཏྟིཡཱ སམྦྷཝོ ཝིཔཏྟིསམྦྷཝོ, ཝིཔཏྟིསམྦྷཝོ ཨེཝ ལོཀོ ཝིཔཏྟིསམྦྷཝལོཀོ. སམྤཏྟིབྷཝལོཀོཏི སུགཏིལོཀོ. སོ ཧི ཨིཊྛཕལཏྟཱ སུནྡརོ ལཱབྷོཏི སམྤཏྟི, བྷཝཏཱིཏི བྷཝོ, སམྤཏྟི ཨེཝ བྷཝོ སམྤཏྟིབྷཝོ, སམྤཏྟིབྷཝོ ཨེཝ ལོཀོ སམྤཏྟིབྷཝལོཀོ. སམྤཏྟིསམྦྷཝལོཀོཏི སུགཏཱུཔགཾ ཀམྨཾ. ཏཉྷི སམྦྷཝཏི ཨེཏསྨཱ ཕལནྟི སམྦྷཝོ, སམྤཏྟིཡཱ སམྦྷཝོ སམྤཏྟིསམྦྷཝོ, སམྤཏྟིསམྦྷཝོ ཨེཝ ལོཀོ སམྤཏྟིསམྦྷཝལོཀོ. ཨེཀོ ལོཀོཏིཨཱདཱིནི ཧེཊྛཱ ཝུཏྟཏྠཱནེཝ.

ཝཛྫནྟི ནཔུཾསཀཝཙནཾ ཨསུཀོཏི ཨནིདྡིཊྛཏྟཱ ཀཏཾ. ཀིལེསཱཏི རཱགཱདཡོ. དུཙྩརིཏཱཏི པཱཎཱཏིཔཱཏཱདཡོ. ཨབྷིསངྑཱརཱཏི པུཉྙཱབྷིསངྑཱརཱདཡོ. བྷཝགཱམིཀམྨཱཏི ཨཏྟནོ ཝིཔཱཀདཱནཝསེན བྷཝཾ གཙྪནྟཱིཏི བྷཝགཱམིནོ, ཨབྷིསངྑཱརེསུཔི ཝིཔཱཀཛནཀཱནེཝ ཀམྨཱནི ཝུཏྟཱནི. ཨིཏཱིཏི ཝུཏྟཔྤཀཱརནིདསྶནཾ. ཨིམསྨིཉྩ ལོཀེ ཨིམསྨིཉྩ ཝཛྫེཏི ཝུཏྟཔྤཀཱརེ ¶ ལོཀེ ཙ ཝཛྫེ ཙ. ཏིབྦཱ བྷཡསཉྙཱཏི ¶ བལཝཏཱི བྷཡསཉྙཱ. ཏིབྦཱཏི པརསདྡསྶ ཨཏྠོ ཝུཏྟོ, བྷཡསཉྙཱཏི བྷཡསདྡསྶ, ལོཀཝཛྫདྭཡམྤི ཧི བྷཡཝཏྠུཏྟཱ སཡཉྩ སབྷཡཏྟཱ བྷཡཾ, བྷཡམིཏི སཉྙཱ བྷཡསཉྙཱ. པཙྩུཔཊྛིཏཱ ཧོཏཱིཏི ཏཾ ཏཾ པཊིཙྩ ཨུཔེཙྩ ཋིཏཱ ཧོཏི. སེཡྻཐཱཔི ཨུཀྑིཏྟཱསིཀེ ཝདྷཀེཏི ཡཐཱ ནཱམ པཧརིཏུཾ ཨུཙྩཱརིཏཁགྒེ པཙྩཱམིཏྟེ ཏིབྦཱ བྷཡསཉྙཱ པཙྩུཔཊྛིཏཱ ཧོཏི, ཨེཝམེཝ ལོཀེ ཙ ཝཛྫེ ཙ ཏིབྦཱ བྷཡསཉྙཱ པཙྩུཔཊྛིཏཱ ཧོཏི. ཨིམེཧི པཉྙཱསཱཡ ཨཱཀཱརེཧཱིཏི ཨཔྤརཛཀྑཔཉྩཀཱདཱིསུ དསསུ པཉྩཀེསུ ཨེཀེཀསྨིཾ པཉྩནྣཾ པཉྩནྣཾ ཨཱཀཱརཱནཾ ཝསེན པཉྙཱསཱཡ ཨཱཀཱརེཧི. ཨིམཱནི པཉྩིནྡྲིཡཱནཱིཏི སདྡྷིནྡྲིཡཱདཱིནི པཉྩིནྡྲིཡཱནི ¶ . ཛཱནཱཏཱིཏི ཏཐཱགཏོ པཉྙཱཡ པཛཱནཱཏི. པསྶཏཱིཏི དིབྦཙཀྑུནཱ དིཊྛཾ ཝིཡ ཀརོཏི. ཨཉྙཱཏཱིཏི སབྦཱཀཱརམརིཡཱདཱཧི ཛཱནཱཏི. པཊིཝིཛ྄ཛྷཏཱིཏི ཨེཀདེསཾ ཨསེསེཏྭཱ ནིརཝསེསདསྶནཝསེན པཉྙཱཡ པདཱལེཏཱིཏི.

ཨིནྡྲིཡཔརོཔརིཡཏྟཉཱཎནིདྡེསཝཎྞནཱ ནིཊྛིཏཱ.

༦༩. ཨཱསཡཱནུསཡཉཱཎནིདྡེསཝཎྞནཱ

༡༡༣. ཨཱསཡཱནུསཡཉཱཎནིདྡེསེ ¶ ཨིདྷ ཏཐཱགཏོཏིཨཱདི པཉྩདྷཱ ཋཔིཏོ ནིདྡེསོ. ཏཏྠ ཨཱསཡཱནུསཡཱ ཝུཏྟཏྠཱ ཨེཝ. ཙརིཏནྟི པུབྦེ ཀཏཾ ཀུསལཱཀུསལཾ ཀམྨཾ. ཨདྷིམུཏྟིནྟི སམྤཏི ཀུསལེ ཨཀུསལེ ཝཱ ཙིཏྟཝོསགྒོ. བྷབྦཱབྷབྦེཏི བྷབྦེ ཙ ཨབྷབྦེ ཙ. ཨརིཡཱཡ ཛཱཏིཡཱ སམྦྷཝནྟི ཛཱཡནྟཱིཏི བྷབྦཱ. ཝཏྟམཱནསམཱིཔེ ཝཏྟམཱནཝཙནཾ. བྷཝིསྶནྟི ཛཱཡིསྶནྟཱིཏི ཝཱ བྷབྦཱ, བྷཱཛནབྷཱུཏཱཏི ཨཏྠོ. ཡེ ཨརིཡམགྒཔཊིཝེདྷསྶ ཨནུཙྪཝིཀཱ ཨུཔནིསྶཡསམྤནྣཱ, ཏེ བྷབྦཱ. ཝུཏྟཔཊིཔཀྑཱ ཨབྷབྦཱ.

ཀཏམོ སཏྟཱནཾ ཨཱསཡོཏིཨཱདི ནིདྡེསསྶ པཊིནིདྡེསོ. ཏཏྠ སསྶཏོཏི ནིཙྩོ. ལོཀོཏི ཨཏྟཱ. ཨིདྷ སརཱིརཾཡེཝ ནསྶཏི, ཨཏྟཱ པན ཨིདྷ པརཏྠ ཙ སོཡེཝཱཏི མཉྙནྟི. སོ ཧི སཡཾཡེཝ ཨཱལོཀེཏཱིཏི ཀཏྭཱ ‘‘ལོཀོ’’ཏི མཉྙནྟི. ཨསསྶཏོཏི ཨནིཙྩོ. ཨཏྟཱ སརཱིརེནེཝ སཧ ནསྶཏཱིཏི མཉྙནྟི. ཨནྟཝཱཏི པརིཏྟེ ཀསིཎེ ཛྷཱནཾ ཨུཔྤཱདེཏྭཱ ཏཾཔརིཏྟཀསིཎཱརམྨཎཾ ཙིཏྟཾ སཔརིཡནྟོ ¶ ཨཏྟཱཏི མཉྙནྟི. ཨནནྟཝཱཏི ན ཨནྟཝཱ ཨཔྤམཱཎེ ཀསིཎེ ཛྷཱནཾ ཨུཔྤཱདེཏྭཱ ཏཾཨཔྤམཱཎཀསིཎཱརམྨཎཾ ཙིཏྟཾ ཨཔརིཡནྟོ ཨཏྟཱཏི མཉྙནྟི. ཏཾ ཛཱིཝཾ ཏཾ སརཱིརནྟི ཛཱིཝོ ཙ སརཱིརཉྩ ཏཾཡེཝ. ཛཱིཝོཏི ཨཏྟཱ, ལིངྒཝིཔལླཱསེན ནཔུཾསཀཝཙནཾ ཀཏཾ. སརཱིརནྟི རཱསཊྛེན ཁནྡྷཔཉྩཀཾ. ཨཉྙཾ ཛཱིཝཾ ཨཉྙཾ སརཱིརནྟི ཨཉྙོ ཛཱིཝོ ཨཉྙཾ ཁནྡྷཔཉྩཀཾ. ཧོཏི ཏཐཱགཏོ པརཾ མརཎཱཏི ཁནྡྷཱ ཨིདྷེཝ ཝིནསྶནྟི, སཏྟོ མརཎཏོ པརཾ ཧོཏི ཝིཛྫཏི ན ནསྶཏི. ‘‘ཏཐཱགཏོ’’ཏི ཙེཏྠ སཏྟཱདྷིཝཙནནྟི ཝདནྟི. ཀེཙི པན ‘‘ཏཐཱགཏོཏི ཨརཧཱ’’ཏི ཝདནྟི. ཨིམེ ‘‘ན ཧོཏཱི’’ཏི པཀྑེ དོསཾ དིསྭཱ ཨེཝཾ གཎྷནྟི. ན ཧོཏི ཏཐཱགཏོ པརཾ མརཎཱཏི ཁནྡྷཱཔི ཨིདྷེཝ ནསྶནྟི, ཏཐཱགཏོ ཙ མརཎཏོ པརཾ ན ཧོཏི ཨུཙྪིཛྫཏི ཝིནསྶཏི. ཨིམེ ‘‘ཧོཏཱི’’ཏི པཀྑེ དོསཾ དིསྭཱ ཨེཝཾ ¶ གཎྷནྟི. ཧོཏི ཙ ན ཙ ཧོཏཱིཏི ཨིམེ ཨེཀེཀཔཀྑཔརིགྒཧེ དོསཾ དིསྭཱ ཨུབྷཡཔཀྑཾ ¶ གཎྷནྟི. ནེཝ ཧོཏི ན ན ཧོཏཱིཏི ཨིམེ ཨུབྷཡཔཀྑཔརིགྒཧེ ཨུབྷཡདོསཱཔཏྟིཾ དིསྭཱ ‘‘ཧོཏཱིཏི ཙ ན ཧོཏི, ནེཝ ཧོཏཱིཏི ཙ ན ཧོཏཱི’’ཏི ཨམརཱཝིཀྑེཔཔཀྑཾ གཎྷནྟི.

ཨཡཾ པནེཏྠ ཨཊྛཀཐཱནཡོ – ‘‘སསྶཏོ ལོཀོཏི ཝཱ’’ཏིཨཱདཱིཧི དསཧཱཀཱརེཧི དིཊྛིཔབྷེདོཝ ཝུཏྟོ. ཏཏྠ སསྶཏོ ལོཀོཏི ཙ ཁནྡྷཔཉྩཀཾ ལོཀོཏི གཧེཏྭཱ ‘‘ཨཡཾ ལོཀོ ནིཙྩོ དྷུཝོ སབྦཀཱལིཀོ’’ཏི གཎྷནྟསྶ སསྶཏནྟི གཧཎཱཀཱརཔྤཝཏྟཱ དིཊྛི. ཨསསྶཏོཏི ཏམེཝ ལོཀཾ ‘‘ཨུཙྪིཛྫཏི ཝིནསྶཏཱི’’ཏི གཎྷནྟསྶ ཨུཙྪེདགྒཧཎཱཀཱརཔྤཝཏྟཱ དིཊྛི. ཨནྟཝཱཏི པརིཏྟཀསིཎལཱབྷིནོ སུཔྤམཏྟེ ཝཱ སརཱཝམཏྟེ ཝཱ ཀསིཎེ སམཱཔནྣསྶ ཨནྟོསམཱཔཏྟིཡཾ པཝཏྟིཏརཱུཔཱརཱུཔདྷམྨེ ‘‘ལོཀོ’’ཏི ཙ ཀསིཎཔརིཙྪེདནྟེན ‘‘ཨནྟཝཱ’’ཏི ཙ གཎྷནྟསྶ ‘‘ཨནྟཝཱ ལོཀོ’’ཏི གཧཎཱཀཱརཔྤཝཏྟཱ དིཊྛི. སཱ སསྶཏདིཊྛིཔི ཧོཏི ཨུཙྪེདདིཊྛིཔི. ཝིཔུལཀསིཎལཱབྷིནོ པན ཏསྨིཾ ཀསིཎེ སམཱཔནྣསྶ ཨནྟོསམཱཔཏྟིཡཾ པཝཏྟིཏརཱུཔཱརཱུཔདྷམྨེ ‘‘ལོཀོ’’ཏི ཙ ཀསིཎཔརིཙྪེདནྟེན ‘‘ན ཨནྟཝཱ’’ཏི ཙ གཎྷནྟསྶ ‘‘ཨནནྟཝཱ ལོཀོ’’ཏི གཧཎཱཀཱརཔྤཝཏྟཱ དིཊྛི. སཱ སསྶཏདིཊྛིཔི ཧོཏི ཨུཙྪེདདིཊྛིཔི. ཏཾ ཛཱིཝཾ ཏཾ སརཱིརནྟི བྷེདནདྷམྨསྶ སརཱིརསྶེཝ ‘‘ཛཱིཝ’’ནྟི གཧིཏཏྟཱ ‘‘སརཱིརེ ཨུཙྪིཛྫམཱནེ ཛཱིཝམྤི ཨུཙྪིཛྫཏཱི’’ཏི ཨུཙྪེདགྒཧཎཱཀཱརཔྤཝཏྟཱ དིཊྛི. དུཏིཡཔདེ སརཱིརཏོ ཨཉྙསྶ ཛཱིཝསྶ གཧིཏཏྟཱ ‘‘སརཱིརེ ཨུཙྪིཛྫམཱནེཔི ¶ ཛཱིཝཾ ན ཨུཙྪིཛྫཏཱི’’ཏི སསྶཏགྒཧཎཱཀཱརཔྤཝཏྟཱ དིཊྛི. ཧོཏི ཏཐཱགཏོཏིཨཱདཱིསུ ‘‘སཏྟོ ཏཐཱགཏོ ནཱམ, སོ པརཾ མརཎཱ ཧོཏཱི’’ཏི གཎྷཏོ པཋམཱ སསྶཏདིཊྛི. ‘‘ན ཧོཏཱི’’ཏི གཎྷཏོ དུཏིཡཱ ཨུཙྪེདདིཊྛི. ‘‘ཧོཏི ཙ ན ཙ ཧོཏཱི’’ཏི གཎྷཏོ ཏཏིཡཱ ཨེཀཙྩསསྶཏདིཊྛི. ‘‘ནེཝ ཧོཏི ན ན ཧོཏཱི’’ཏི གཎྷཏོ ཙཏུཏྠཱ ཨམརཱཝིཀྑེཔདིཊྛཱིཏི.

ཨིཏཱིཏི ཝུཏྟཔྤཀཱརདིཊྛིནིསྶཡནིདསྶནཾ. བྷཝདིཊྛིསནྣིསྶིཏཱ ཝཱ སཏྟཱ ཧོནྟི ཝིབྷཝདིཊྛིསནྣིསྶིཏཱ ཝཱཏི བྷཝོ ཝུཙྩཏི སསྶཏོ, སསྶཏཝསེན ཨུཔྤཛྫམཱནདིཊྛི བྷཝདིཊྛི, བྷཝོཏི དིཊྛཱིཏི ཝུཏྟཾ ཧོཏི. ཝིབྷཝོ ཝུཙྩཏི ཨུཙྪེདོ ¶ , ཨུཙྪེདཝསེན ཨུཔྤཛྫམཱནདིཊྛི ཝིབྷཝདིཊྛི, ཝིབྷཝོཏི དིཊྛཱིཏི ཝུཏྟཾ ཧོཏི. ཝུཏྟཔྤཀཱརཱ དསཝིདྷཱ དིཊྛི བྷཝདིཊྛི ཙ ཝིབྷཝདིཊྛི ཙཱཏི དྭིདྷཱཝ ཧོཏི. ཏཱསུ དྭཱིསུ ཨེཀེཀཾ སནྣིསྶིཏཱ ཨཔསྶིཏཱ ཨལླཱིནཱ སཏྟཱ ཧོནྟི.

ཨེཏེ ཝཱ པན ཨུབྷོ ཨནྟེ ཨནུཔགམྨཱཏི ཨེཏྠ ‘‘ཨགྒིཏོ ཝཱ ཨུདཀཏོ ཝཱ མིཐུབྷེདཱ ཝཱ’’ཏིཨཱདཱིསུ ¶ (དཱི. ནི. ༢.༡༥༢) ཝིཡ ཝཱ-སདྡོ སམུཙྩཡཏྠོ. ཨེཏེ ཝུཏྟཔྤཀཱརེ སསྶཏུཙྪེདཝསེན དྭེ པཀྑེ ཙ ན ཨུཔགནྟྭཱ ཨནལླཱིཡིཏྭཱ པཧཱཡཱཏི ཨཏྠོ. ‘‘ཨནུལོམིཀཱ ཝཱ ཁནྟཱི’’ཏི ཝིཀཔྤཏྠོཝ. ཨིདཔྤཙྩཡཏཱཔཊིཙྩསམུཔྤནྣེསཱུཏི ཨིམེསཾ ཛརཱམརཎཱདཱིནཾ པཙྩཡཱ ཨིདཔྤཙྩཡཱ, ཨིདཔྤཙྩཡཱ ཨེཝ ཨིདཔྤཙྩཡཏཱ, ཨིདཔྤཙྩཡཱནཾ ཝཱ སམཱུཧོ ཨིདཔྤཙྩཡཏཱ. ལཀྑཎཾ པནེཏྠ སདྡསཏྠཏོ པརིཡེསིཏབྦཾ. ཏེ ཏེ པཙྩཡེ པཊིཙྩ སཧ སམྨཱ ཙ ཨུཔྤནྣཱ པཊིཙྩསམུཔྤནྣཱ. ཏསྶཱ ཨིདཔྤཙྩཡཏཱཡ ཙ ཏེསུ པཊིཙྩསམུཔྤནྣེསུ ཙ དྷམྨེསུ. ཨནུལོམིཀཱཏི ལོཀུཏྟརདྷམྨཱནཾ ཨནུལོམཏོ ཨནུལོམིཀཱ. ཁནྟཱིཏི ཉཱཎཾ. ཉཱཎཉྷི ཁམནཏོ ཁནྟི. པཊིལདྡྷཱ ཧོཏཱིཏི སཏྟེཧི ཨདྷིགཏཱ ཧོཏི. ཨིདཔྤཙྩཡཏཱཡ ཁནྟིཡཱ ཨུཙྪེདཏྟཱནུཔགམོ ཧོཏི པཙྩཡུཔྤནྣདྷམྨཱནཾ པཙྩཡསཱམགྒིཡཾ ཨཱཡཏྟཝུཏྟིཏྟཱ པཙྩཡཱནུཔརམདསྶནེན ཕལཱནུཔརམདསྶནཏོ. པཊིཙྩསམུཔྤནྣེསུ དྷམྨེསུ ཁནྟིཡཱ སསྶཏཏྟཱནུཔགམོ ཧོཏི པཙྩཡསཱམགྒིཡཾ ནཝནཝཱནཾ པཙྩཡུཔྤནྣདྷམྨཱནཾ ཨུཔྤཱདདསྶནཏོ. ཨེཝམེཏེ ཨུབྷོ ཨནྟེ ཨནུཔགམྨ པཊིཙྩསམུཔྤཱདཔཊིཙྩསམུཔྤནྣདྷམྨདསྶནེན ན ཨུཙྪེདོ ན སསྶཏོཏི པཝཏྟཾ སམྨཱདསྶནཾ ‘‘ཨནུལོམིཀཱ ཁནྟཱི’’ཏི ཝེདིཏབྦཾ. ཨེཝཉྷི ཏདུབྷཡདིཊྛིཔཊིཔཀྑབྷཱུཏཱ ¶ སམྨཱདིཊྛི ཝུཏྟཱ ཧོཏི. ཡཐཱབྷཱུཏཾ ཝཱ ཉཱཎནྟི ཡཐཱབྷཱུཏཾ ཡཐཱསབྷཱཝཾ ནེཡྻཾ. ཏཏྠ པཝཏྟཉཱཎམྤི ཝིསཡཝོཧཱརེན ‘‘ཡཐཱབྷཱུཏཉཱཎ’’ནྟི ཝུཏྟཾ. ཏཾ པན སངྑཱརུཔེཀྑཱཔརིཡནྟཾ ཝིཔསྶནཱཉཱཎཾ ཨིདྷཱདྷིཔྤེཏཾ. ཧེཊྛཱ པན ‘‘ཡཐཱབྷཱུཏཉཱཎདསྶན’’ནྟི བྷཡཏཱུཔཊྛཱནཉཱཎཾ ཝུཏྟཾ. ཡཐཱབྷཱུཏཾ ཝཱ ཉཱཎཾ སཏྟེཧི པཊིལདྡྷཾ ཧོཏཱིཏི སམྦནྡྷོ.

ཨིདཱནི ¶ ‘‘སསྶཏོ ལོཀོ’’ཏིཨཱདཱིཧི མིཙྪཱདིཊྛིཔརིབྷཱཝིཏཾ ‘‘ཨེཏེ ཝཱ པནཱ’’ཏིཨཱདཱིཧི སམྨཱདིཊྛིཔརིབྷཱཝིཏཾ སཏྟསནྟཱནཾ དསྶེཏྭཱ ‘‘ཀཱམཾ སེཝནྟཉྙེཝཱ’’ཏིཨཱདཱིཧི སེསཱཀུསལེཧི སེསཀུསལེཧི ཙ པརིབྷཱཝིཏཾ སཏྟསནྟཱནཾ དསྶེཏི. ཏཏྠ ཀཱམཾ སེཝནྟཾཡེཝ པུགྒལཾ ཏཐཱགཏོ ཛཱནཱཏཱིཏི ཡོཛནཱ ཀཱཏབྦཱ. སེཝནྟནྟི ཙ ཨབྷིཎྷསམུདཱཙཱརཝསེན སེཝམཱནཾ. པུབྦེ ཨཱསེཝིཏཝསེན ཀིལེསཀཱམོ གརུ ཨསྶཱཏི ཀཱམགརུཀོ. ཏཐེཝ ཀཱམོ ཨཱསཡེ སནྟཱནེ ཨསྶཱཏི ཀཱམཱསཡོ. སནྟཱནཝསེནེཝ ཀཱམེ ཨདྷིམུཏྟོ ལགྒོཏི ཀཱམཱདྷིམུཏྟོ. སེསེསུཔི ཨེསེཝ ནཡོ. ནེཀྑམྨཱདཱིནི ཝུཏྟཏྠཱནེཝ. ཀཱམཱདཱིཧི ཙ ཏཱིཧི སེསཱཀུསལཱ, ནེཀྑམྨཱདཱིཧི ཏཱིཧི སེསཀུསལཱ གཧིཏཱཝ ཧོནྟཱིཏི ཝེདིཏབྦཱ. ‘‘ཨཡཾ སཏྟཱནཾ ཨཱསཡོ’’ཏི ཏིདྷཱ ཝུཏྟཾ སནྟཱནམེཝ དསྶེཏི.

ཨཡཾ ¶ པནེཏྠ ཨཊྛཀཐཱནཡོ – ‘‘ཨིཏི བྷཝདིཊྛིསནྣིསྶིཏཱ ཝཱ’’ཏི ཨེཝཾ སསྶཏདིཊྛིཾ ཝཱ སནྣིསྶིཏཱ. སསྶཏདིཊྛི ཧི ཨེཏྠ བྷཝདིཊྛཱིཏི ཝུཏྟཱ, ཨུཙྪེདདིཊྛི ཙ ཝིབྷཝདིཊྛཱིཏི. སབྦདིཊྛཱིནཉྷི སསྶཏུཙྪེདདིཊྛཱིཧི སངྒཧིཏཏྟཱ སབྦེཔིམེ དིཊྛིགཏིཀཱ སཏྟཱ ཨིམཱཝ དྭེ དིཊྛིཡོ སནྣིསྶིཏཱ ཧོནྟི. ཝུཏྟམྤི ཙེཏཾ ‘‘དྭཡནིསྶིཏོ ཁྭཱཡཾ, ཀཙྩཱན, ལོཀོ ཡེབྷུཡྻེན ཨཏྠིཏཉྩེཝ ནཏྠིཏཉྩཱ’’ཏི (སཾ. ནི. ༢.༡༥). ཨེཏྠ ཧི ཨཏྠིཏཱཏི སསྶཏཾ. ནཏྠིཏཱཏི ཨུཙྪེདོ. ཨཡཾ ཏཱཝ ཝཊྚནིསྶིཏཱནཾ པུཐུཛྫནཱནཾ སཏྟཱནཾ ཨཱསཡོ. ཨིདཱནི ཝིཝཊྚནིསྶིཏཱནཾ སུདྡྷསཏྟཱནཾ ཨཱསཡཾ དསྶེཏུཾ ‘‘ཨེཏེ ཝཱ པན ཨུབྷོ ཨནྟེ ཨནུཔགམྨཱ’’ཏིཨཱདི ཝུཏྟཾ. ཏཏྠ ‘‘ཨེཏེ ཝཱ པནཱ’’ཏི ཨེཏེཡེཝ. ‘‘ཨུབྷོ ཨནྟེ’’ཏི སསྶཏུཙྪེདསངྑཱཏེ དྭེ ཨནྟེ. ‘‘ཨནུཔགམྨཱ’’ཏི ན ཨལླཱིཡིཏྭཱ. ‘‘ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསཱུ’’ཏི ཨིདཔྤཙྩཡཏཱཡ ཙེཝ པཊིཙྩསམུཔྤནྣདྷམྨེསུ ཙ. ‘‘ཨནུལོམིཀཱ ཁནྟཱི’’ཏི ཝིཔསྶནཱཉཱཎཾ. ‘‘ཡཐཱབྷཱུཏཾ ཉཱཎ’’ནྟི མགྒཉཱཎཾ. ཨིདཾ ཝུཏྟཾ ཧོཏི – ཡཱ པཊིཙྩསམུཔྤཱདེ ཙེཝ པཊིཙྩསམུཔྤནྣདྷམྨེསུ ¶ ཙ ཨེཏེ ཨུབྷོ སསྶཏུཙྪེདཨནྟེ ཨནུཔགནྟྭཱ ཝིཔསྶནཱ པཊིལདྡྷཱ, ཡཉྩ ཏཏོ ཨུཏྟརི མགྒཉཱཎཾ, ཨཡཾ སཏྟཱནཾ ཨཱསཡོ. ཨཡཾ ཝཊྚནིསྶིཏཱནཉྩ ཝིཝཊྚནིསྶིཏཱནཉྩ སབྦེསམྤི སཏྟཱནཾ ཨཱསཡོ ཨིདཾ ཝསནཊྛཱནནྟི. ཨཡཾ ཨཱཙརིཡཱནཾ སམཱནཊྛཀཐཱ.

ཝིཏཎྜཝཱདཱི ¶ པནཱཧ ‘‘མགྒོ ནཱམ ཝཱསཾ ཝིདྡྷཾསེནྟོ གཙྪཏི, ཏྭཾ མགྒོ ཝཱསོཏི ཝདེསཱི’’ཏི? སོ ཝཏྟབྦོ ‘‘ཏྭཾ ཨརིཡཝཱསབྷཱཎཀོ ཧོསི ན ཧོསཱི’’ཏི? སཙེ ‘‘ན ཧོམཱི’’ཏི ཝདཏི, ‘‘ཏྭཾ ཨབྷཱཎཀཏཱཡ ན ཛཱནཱསཱི’’ཏི ཝཏྟབྦོ. སཙེ ‘‘བྷཱཎཀོསྨཱི’’ཏི ཝདཏི, ‘‘སུཏྟཾ ཨཱཧརཱ’’ཏི ཝཏྟབྦོ. སཙེ ཨཱཧརཏི, ཨིཙྩེཏཾ ཀུསལཾ. ནོ ཙེ ཨཱཧརཏི, སཡཾ ཨཱཧརིཏབྦཾ ‘‘དསཡིམེ, བྷིཀྑཝེ, ཨརིཡཱཝཱསཱ, ཡདརིཡཱ ཨཱཝསིཾསུ ཝཱ ཨཱཝསནྟི ཝཱ ཨཱཝསིསྶནྟི ཝཱ’’ཏི (ཨ. ནི. ༡༠.༡༩). ཨེཏཉྷི སུཏྟཾ མགྒསྶ ཝཱསབྷཱཝཾ དཱིཔེཏི. ཏསྨཱ སུཀཐིཏམེཝེཏནྟི. ཨིམཾ པན བྷགཝཱ སཏྟཱནཾ ཨཱསཡཾ ཛཱནནྟོ ཨིམེསཉྩ དིཊྛིགཏཱནཾ ཨིམེསཉྩ ཝིཔསྶནཱཉཱཎམགྒཉཱཎཱནཾ ཨཔྤཝཏྟིཀྑཎེཔི ཛཱནཱཏི ཨེཝ. ཏསྨཱཡེཝ ཙ ‘‘ཀཱམཾ སེཝནྟཾཡེཝ ཛཱནཱཏཱི’’ཏིཨཱདི ཝུཏྟནྟི.

ཨནུསཡནིདྡེསེ ཨནུསཡཱཏི ཀེནཊྛེན ཨནུསཡཱ? ཨནུསཡནཊྛེན. ཀོ ཨེས ཨནུསཡནཊྛོ ནཱམཱཏི? ཨཔྤཧཱིནཊྛོ. ཨེཏེ ཧི ཨཔྤཧཱིནཊྛེན ཏསྶ ཏསྶ སནྟཱནེ ཨནུསེནྟི ནཱམ. ཏསྨཱ ‘‘ཨནུསཡཱ’’ཏི ཝུཙྩནྟི. ཨནུསེནྟཱིཏི ཨནུརཱུཔཾ ཀཱརཎཾ ལབྷིཏྭཱ ཨུཔྤཛྫནྟཱིཏི ཨཏྠོ. ཨཐཱཔི སིཡཱ – ཨནུསཡནཊྛོ ནཱམ ཨཔྤཧཱིནཱཀཱརོ, སོ ཙ ཨུཔྤཛྫཏཱིཏི ཝཏྟུཾ ན ཡུཛྫཏི, ཏསྨཱ ¶ ན ཨནུསཡཱ ཨུཔྤཛྫནྟཱིཏི. ཏཏྲིདཾ པཊིཝཙནཾ – ན ཨཔྤཧཱིནཱཀཱརོ, ཨནུསཡོཏི པན ཨཔྤཧཱིནཊྛེན ཐཱམགཏཀིལེསོ ཝུཙྩཏི. སོ ཙིཏྟསམྤཡུཏྟོ སཱརམྨཎོ སཔྤཙྩཡཊྛེན སཧེཏུཀོ ཨེཀནྟཱཀུསལོ ཨཏཱིཏོཔི ཧོཏི ཨནཱགཏོཔི པཙྩུཔྤནྣོཔི, ཏསྨཱ ཨུཔྤཛྫཏཱིཏི ཝཏྟུཾ ཡུཛྫཏཱིཏི. ཏཏྲིདཾ པམཱཎཾ – ཨིདྷེཝ ཏཱཝ ཨབྷིསམཡཀཐཱཡ (པཊི. མ. ༣.༢༡) ‘‘པཙྩུཔྤནྣེ ཀིལེསེ པཛཧཏཱི’’ཏི པུཙྪཾ ཀཏྭཱ ཨནུསཡཱནཾ པཙྩུཔྤནྣབྷཱཝསྶ ཨཏྠིཏཱཡ ‘‘ཐཱམགཏོ ཨནུསཡཾ པཛཧཏཱི’’ཏི ཝུཏྟཾ. དྷམྨསངྒཎིཡཾ མོཧསྶ པདབྷཱཛནེ ‘‘ཨཝིཛྫཱནུསཡོ ཨཝིཛྫཱཔརིཡུཊྛཱནཾ ¶ ཨཝིཛྫཱལངྒཱི མོཧོ ཨཀུསལམཱུལཾ, ཨཡཾ ཏསྨིཾ སམཡེ མོཧོ ཧོཏཱི’’ཏི (དྷ. ས. ༣༩༠) ཨཀུསལཙིཏྟེན སདྡྷིཾ མོཧསྶ ཨུཔྤནྣབྷཱཝོ ཝུཏྟོ ¶ . ཀཐཱཝཏྠུསྨིཾ ‘‘ཨནུསཡཱ ཨབྱཱཀཏཱ ཨནུསཡཱ ཨཧེཏུཀཱ ཨནུསཡཱ ཙིཏྟཝིཔྤཡུཏྟཱ’’ཏི སབྦེ ཝཱདཱ པཊིསེདྷིཏཱ. ཨནུསཡཡམཀེ སཏྟནྣཾ མཧཱཝཱརཱནཾ ཨཉྙཏརསྨིཾ ཨུཔྤཛྫནཝཱརེ ‘‘ཡསྶ ཀཱམརཱགཱནུསཡོ ཨུཔྤཛྫཏི, ཏསྶ པཊིགྷཱནུསཡོ ཨུཔྤཛྫཏཱི’’ཏིཨཱདི (ཡམ. ༢.ཨནུསཡཡམཀ.༣༠༠) ཝུཏྟཾ. ཏསྨཱ ‘‘ཨནུསེནྟཱིཏི ཨནུརཱུཔཾ ཀཱརཎཾ ལབྷིཏྭཱ ཨུཔྤཛྫནྟཱི’’ཏི ཡཾ ཝུཏྟཾ, ཏཾ ཨིམིནཱ ཏནྟིཔྤམཱཎེན ཡུཏྟནྟི ཝེདིཏབྦཾ. ཡམྤི ‘‘ཙིཏྟསམྤཡུཏྟོ སཱརམྨཎོ’’ཏིཨཱདི ཝུཏྟཾ, ཏམྤི སུཝུཏྟམེཝ. ཨནུསཡོ ཧི ནཱམེས པརིནིཔྥནྣོ ཙིཏྟསམྤཡུཏྟོ ཨཀུསལདྷམྨོཏི ནིཊྛམེཏྠ གནྟབྦཾ.

ཀཱམརཱགཱནུསཡོཏིཨཱདཱིསུ ཀཱམརཱགོ ཙ སོ ཨཔྤཧཱིནཊྛེན ཨནུསཡོ ཙཱཏི ཀཱམརཱགཱནུསཡོ. སེསཔདེསུཔི ཨེསེཝ ནཡོ. ཀཱམརཱགཱནུསཡོ ཙེཏྠ ལོབྷསཧགཏཙིཏྟེསུ སཧཛཱཏཝསེན ཨཱརམྨཎཝསེན ཙ མནཱཔེསུ ཨཝསེསཀཱམཱཝཙརདྷམྨེསུ ཨཱརམྨཎཝསེནེཝ ཨུཔྤཛྫམཱནོ ལོབྷོ. པཊིགྷཱནུསཡོ ཙ དོམནསྶསཧགཏཙིཏྟེསུ སཧཛཱཏཝསེན ཨཱརམྨཎཝསེན ཙ ཨམནཱཔེསུ ཨཝསེསཀཱམཱཝཙརདྷམྨེསུ ཨཱརམྨཎཝསེནེཝ ཨུཔྤཛྫམཱནོ དོསོ. མཱནཱནུསཡོ དིཊྛིགཏཝིཔྤཡུཏྟལོབྷསཧགཏཙིཏྟེསུ སཧཛཱཏཝསེན ཨཱརམྨཎཝསེན ཙ དུཀྑཝེདནཱཝཛྫེསུ ཨཝསེསཀཱམཱཝཙརདྷམྨེསུ རཱུཔཱརཱུཔཱཝཙརདྷམྨེསུ ཙ ཨཱརམྨཎཝསེནེཝ ཨུཔྤཛྫམཱནོ མཱནོ. དིཊྛཱནུསཡོ ཙཏཱུསུ དིཊྛིགཏསམྤཡུཏྟེསུ. ཝིཙིཀིཙྪཱནུསཡོ ཝིཙིཀིཙྪཱསཧགཏེ. ཨཝིཛྫཱནུསཡོ དྭཱདསསུ ཨཀུསལཙིཏྟེསུ སཧཛཱཏཝསེན ཨཱརམྨཎཝསེན ཙ. ཏཡོཔི ཨཝསེསཏེབྷཱུམཀདྷམྨེསུ ཨཱརམྨཎཝསེནེཝ ཨུཔྤཛྫམཱནཱ དིཊྛིཝིཙིཀིཙྪཱམོཧཱ. བྷཝརཱགཱནུསཡོ ཙཏཱུསུ དིཊྛིགཏཝིཔྤཡུཏྟེསུ ཨུཔྤཛྫམཱནོཔི སཧཛཱཏཝསེན ན ཝུཏྟོ, ཨཱརམྨཎཝསེནེཝ པན རཱུཔཱརཱུཔཱཝཙརདྷམྨེསུ ཨུཔྤཛྫམཱནོ ལོབྷོ ཝུཏྟོ.

༡༡༤. ཨིདཱནི ཡཐཱཝུཏྟཱནཾ ཨནུསཡཱནཾ ཨནུསཡནཊྛཱནཾ དསྶེནྟོ ཡཾ ལོཀེཏིཨཱདིམཱཧ. ཏཏྠ ཡཾ ལོཀེ པིཡརཱུཔནྟི ¶ ཡཾ ཨིམསྨིཾ ལོཀེ པིཡཛཱཏིཀཾ པིཡསབྷཱཝཾ. སཱཏརཱུཔནྟི སཱཏཛཱཏིཀཾ ¶ ཨསྶཱདཔདཊྛཱནཾ ཨིཊྛཱརམྨཎཾ. ཨེཏྠ སཏྟཱནཾ ཀཱམརཱགཱནུསཡོ ཨནུསེཏཱིཏི ཨེཏསྨིཾ ¶ ཨིཊྛཱརམྨཎེ སཏྟཱནཾ ཨཔྤཧཱིནཊྛེན ཀཱམརཱགཱནུསཡོ ཨནུསེཏི. ‘‘པིཡརཱུཔཾ སཱཏརཱུཔ’’ནྟི ཙ ཨིདྷ ཀཱམཱཝཙརདྷམྨོཡེཝ ཨདྷིཔྤེཏོ. ཡཐཱ ནཱམ ཨུདཀེ ནིམུགྒསྶ ཧེཊྛཱ ཙ ཨུཔརི ཙ སམནྟཱ ཙ ཨུདཀམེཝ ཧོཏི, ཨེཝམེཝ ཨིཊྛཱརམྨཎེ རཱགུཔྤཏྟི ནཱམ སཏྟཱནཾ ཨཱཙིཎྞསམཱཙིཎྞཱ. ཏཐཱ ཨནིཊྛཱརམྨཎེ པཊིགྷུཔྤཏྟི. ཨིཏི ཨིམེསུ དྭཱིསུ དྷམྨེསཱུཏི ཨེཝཾ ཨིམེསུ དྭཱིསུ ཨིཊྛཱནིཊྛཱརམྨཎདྷམྨེསུ. ཨཝིཛྫཱནུཔཏིཏཱཏི ཀཱམརཱགཔཊིགྷསམྤཡུཏྟཱ ཧུཏྭཱ ཨཱརམྨཎཀརཎཝསེན ཨཝིཛྫཱ ཨནུཔཏིཏཱ ཨནུགཏཱ. ཝིཙྪེདཾ ཀཏྭཱཔི པཱཋོ. ཏདེཀཊྛོཏི ཏཱཡ ཨཝིཛྫཱཡ སཧཛེཀཊྛཝསེན ཨེཀཏོ ཋིཏོ. མཱནོ ཙ དིཊྛི ཙ ཝིཙིཀིཙྪཱ ཙཱཏི ནཝཝིདྷམཱནོ, དྭཱསཊྛིཝིདྷཱ དིཊྛི, ཨཊྛཝཏྠུཀཱ ཝིཙིཀིཙྪཱ, ཏདེཀཊྛོ མཱནོ ཙ ཏདེཀཊྛཱ དིཊྛི ཙ ཏདེཀཊྛཱ ཝིཙིཀིཙྪཱ ཙཱཏི ཡོཛནཱ. དཊྛབྦཱཏི པསྶིཏབྦཱ ཨཝགནྟབྦཱ. ཏཡོ ཨེཀཏོ ཀཏྭཱ བཧུཝཙནཾ ཀཏཾ. བྷཝརཱགཱནུསཡོ པནེཏྠ ཀཱམརཱགཱནུསཡེནེཝ སངྒཧིཏོཏི ཝེདིཏབྦོ.

ཙརིཏནིདྡེསེ ཏེརས ཙེཏནཱ པུཉྙཱབྷིསངྑཱརོ. དྭཱདས ཨཔུཉྙཱབྷིསངྑཱརོ. ཙཏསྶོ ཨཱནེཉྫཱབྷིསངྑཱརོ. ཏཏྠ ཀཱམཱཝཙརོ པརིཏྟབྷཱུམཀོ. ཨིཏརོ མཧཱབྷཱུམཀོ. ཏཱིསུཔི ཝཱ ཨེཏེསུ ཡོ ཀོཙི ཨཔྤཝིཔཱཀོ པརིཏྟབྷཱུམཀོ, མཧཱཝིཔཱཀོ མཧཱབྷཱུམཀོཏི ཝེདིཏབྦོ.

༡༡༥. ཨདྷིམུཏྟིནིདྡེསེ སནྟཱིཏི སཾཝིཛྫནྟི. ཧཱིནཱདྷིམུཏྟིཀཱཏི ལཱམཀཛ྄ཛྷཱསཡཱ. པཎཱིཏཱདྷིམུཏྟིཀཱཏི ཀལྱཱཎཛ྄ཛྷཱསཡཱ. སེཝནྟཱིཏི ནིསྶཡནྟི ཨལླཱིཡནྟི. བྷཛནྟཱིཏི ཨུཔསངྐམནྟི. པཡིརུཔཱསནྟཱིཏི པུནཔྤུནཾ ཨུཔསངྐམནྟི. སཙེ ཧི ཨཱཙརིཡུཔཛ྄ཛྷཱཡཱ ན སཱིལཝནྟོ ཧོནྟི, ཨནྟེཝཱསིཀསདྡྷིཝིཧཱརིཀཱ སཱིལཝནྟོ, ཏེ ཨཏྟནོ ཨཱཙརིཡུཔཛ྄ཛྷཱཡེཔི ན ཨུཔསངྐམནྟི, ཨཏྟནོ སདིསེ སཱརུཔྤེ བྷིཀྑཱུཡེཝ ཨུཔསངྐམནྟི. སཙེཔི ཨཱཙརིཡུཔཛ྄ཛྷཱཡཱ སཱརུཔྤཱ བྷིཀྑཱུ, ཨིཏརེ ཨསཱརུཔྤཱ, ཏེཔི ན ཨཱཙརིཡུཔཛ྄ཛྷཱཡེ ཨུཔསངྐམནྟི, ཨཏྟནོ སདིསེ ¶ ཧཱིནཱདྷིམུཏྟིཀེཡེཝ ཨུཔསངྐམནྟི. ཨེཝཾ ཨུཔསངྐམནཾ པན ན ཀེཝལཾ ཨེཏརཧིཡེཝ, ཨཏཱིཏཱནཱགཏེཔཱིཏི དསྶེཏུཾ ཨཏཱིཏམྤི ཨདྡྷཱནནྟིཨཱདིམཱཧ. ཏཏྠ ཨཏཱིཏམྤི ཨདྡྷཱནནྟི ཨཏཱིཏསྨིཾ ཀཱལེ, ཨཙྩནྟསཾཡོགཏྠེ ཝཱ ཨུཔཡོགཝཙནཾ. སེསཾ ¶ ཨུཏྟཱནཏྠམེཝ. ཨིདཾ པན དུསྶཱིལཱནཾ དུསྶཱིལསེཝནམེཝ, སཱིལཝནྟཱནཾ སཱིལཝནྟསེཝནམེཝ, དུཔྤཉྙཱནཾ དུཔྤཉྙསེཝནམེཝ, པཉྙཝནྟཱནཾ པཉྙཝནྟསེཝནམེཝ ཀོ ནིཡམེཏཱིཏི? ཨཛ྄ཛྷཱསཡདྷཱཏུ ནིཡམེཏཱིཏི.

བྷབྦཱབྷབྦནིདྡེསེ ཚཌྜེཏབྦེ པཋམཾ ནིདྡིསིཏྭཱ གཧེཏབྦེ པཙྪཱ ནིདྡིསིཏུཾ ཨུདྡེསསྶ ཨུཔྤཊིཔཱཊིཡཱ པཋམཾ ཨབྷབྦཱ ནིདྡིཊྛཱ. ཨུདྡེསེ པན དྭནྡསམཱསེ ཨཙྩིཏསྶ ཙ མནྡཀྑརསྶ ཙ ¶ པདསྶ པུབྦནིཔཱཏལཀྑཎཝསེན བྷབྦསདྡོ པུབྦཾ པཡུཏྟོ. ཀམྨཱཝརཎེནཱཏི པཉྩཝིདྷེན ཨཱནནྟརིཡཀམྨེན. སམནྣཱགཏཱཏི སམངྒཱིབྷཱུཏཱ. ཀིལེསཱཝརཎེནཱཏི ནིཡཏམིཙྪཱདིཊྛིཡཱ. ཨིམཱནི དྭེ སགྒམགྒཱནཾ ཨཱཝརཎཏོ ཨཱཝརཎཱནི. བྷིཀྑུནཱིདཱུསཀཱདཱིནི ཀམྨཱནིཔི ཀམྨཱཝརཎེནེཝ སངྒཧིཏཱནི. ཝིཔཱཀཱཝརཎེནཱཏི ཨཧེཏུཀཔཊིསནྡྷིཡཱ. ཡསྨཱ པན དུཧེཏུཀཱནམྤི ཨརིཡམགྒཔཊིཝེདྷོ ནཏྠི, ཏསྨཱ དུཧེཏུཀཱ པཊིསནྡྷིཔི ཝིཔཱཀཱཝརཎམེཝཱཏི ཝེདིཏབྦཱ, ཨསྶདྡྷཱཏི བུདྡྷཱདཱིསུ སདྡྷཱརཧིཏཱ. ཨཙྪནྡིཀཱཏི ཀཏྟུཀམྱཏཱཀུསལཙྪནྡརཧིཏཱ. ཨུཏྟརཀུརུཀཱ མནུསྶཱ ཨཙྪནྡིཀཊྛཱནཾ པཝིཊྛཱ. དུཔྤཉྙཱཏི བྷཝངྒཔཉྙཱཡ པརིཧཱིནཱ. བྷཝངྒཔཉྙཱཡ པན པརིཔུཎྞཱཡཔི ཡསྶ བྷཝངྒཾ ལོཀུཏྟརསྶ པཱདཀཾ ན ཧོཏི, སོཔི དུཔྤཉྙོཡེཝ ནཱམ. ཨབྷབྦཱ ནིཡཱམཾ ཨོཀྐམིཏུཾ ཀུསལེསུ དྷམྨེསུ སམྨཏྟནྟི ཀུསལེསུ དྷམྨེསུ སམྨཏྟནིཡཱམསངྑཱཏཾ ཨརིཡམགྒཾ ཨོཀྐམིཏུཾ ཨབྷབྦཱ. ཨརིཡམགྒོ ཧི སམྨཱ སབྷཱཝོཏི སམྨཏྟཾ, སོཡེཝ ཨནནྟརཕལདཱནེ, སཡམེཝ ཝཱ ཨཙལབྷཱཝཏོ ནིཡཱམོ, ཏཾ ཨོཀྐམིཏུཾ པཝིསིཏུཾ ཨབྷབྦཱ. ན ཀམྨཱཝརཎེནཱཏིཨཱདཱིནི ཝུཏྟཝིཔརིཡཱཡེནེཝ ཝེདིཏབྦཱནཱིཏི.

ཨཱསཡཱནུསཡཉཱཎནིདྡེསཝཎྞནཱ ནིཊྛིཏཱ.

༧༠. ཡམཀཔཱཊིཧཱིརཉཱཎནིདྡེསཝཎྞནཱ

༡༡༦. ཡམཀཔཱཊིཧཱིརཉཱཎནིདྡེསེ ¶ ཨསཱདྷཱརཎཾ སཱཝཀེཧཱིཏི སེསཱསཱདྷཱརཎཉཱཎནིདྡེསེ ཨཉྙཝཙནེཧི ཨོཀཱསཱབྷཱཝཏོ ན ཝུཏྟཾ, ཨིདྷ པན ཨཉྙཝཙནཱབྷཱཝཏོ ཝུཏྟནྟི ཝེདིཏབྦཾ. ཨུཔརིམཀཱཡཏོཏི ནཱབྷིཡཱ ཨུདྡྷཾ སརཱིརཏོ. ཨགྒིཀྑནྡྷོ པཝཏྟཏཱིཏི ཏེཛོཀསིཎཱརམྨཎཾ པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ‘‘ཨུཔརིམཀཱཡཏོ ཨགྒིཛཱལཱ ཝུཊྛཱཏཱུ’’ཏི ཨཱཝཛྫིཏྭཱ པརིཀམྨཾ ཀཏྭཱ ཨནནྟརཾ ཨབྷིཉྙཱཉཱཎེན ‘‘ཨུཔརིམཀཱཡཏོ ¶ ཨགྒིཛཱལཱ ཝུཊྛཱཏཱུ’’ཏི ཨདྷིཊྛིཏེ སཧ ཨདྷིཊྛཱནཱ ཨུཔརིམཀཱཡཏོ ཨགྒིཛཱལཱ ཝུཊྛཱཏི. སཱ ཧི ཨིདྷ རཱསཊྛེན ཁནྡྷོཏི ཝུཏྟཱ. ཧེཊྛིམཀཱཡཏོཏི ནཱབྷིཏོ ཧེཊྛཱ སརཱིརཏོ. ཨུདཀདྷཱརཱ པཝཏྟཏཱིཏི ཨཱཔོཀསིཎཱརམྨཎཾ པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ‘‘ཧེཊྛིམཀཱཡཏོ ཨུདཀདྷཱརཱ ཝུཊྛཱཏཱུ’’ཏི ཨཱཝཛྫིཏྭཱ པརིཀམྨཾ ཀཏྭཱ ཨནནྟརཾ ཨབྷིཉྙཱཉཱཎེན ‘‘ཧེཊྛིམཀཱཡཏོ ཨུདཀདྷཱརཱ ཝུཊྛཱཏཱུ’’ཏི ཨདྷིཊྛིཏེ སཧ ཨདྷིཊྛཱནཱ ཧེཊྛིམཀཱཡཏོ ཨུདཀདྷཱརཱ ཝུཊྛཱཏི. ཨུབྷཡཏྠཱཔི ཨབྦོཙྪེདཝསེན པཝཏྟཏཱིཏི ཝུཏྟཾ. ཨདྷིཊྛཱནསྶ ཨཱཝཛྫནསྶ ཙ ཨནྟརེ དྭེ བྷཝངྒཙིཏྟཱནི ཝཏྟནྟི. ཏསྨཱཡེཝ ཡུགལཱ ཧུཏྭཱ ཨགྒིཀྑནྡྷཨུདཀདྷཱརཱ པཝཏྟནྟི, ཨནྟརཾ ན པཉྙཱཡཏི. ཨཉྙེསཾ པན བྷཝངྒཔརིཙྪེདོ ནཏྠི ¶ . པུརཏྠིམཀཱཡཏོཏི ཨབྷིམུཁཔསྶཏོ. པཙྪིམཀཱཡཏོཏི པིཊྛིཔསྶཏོ. དཀྑིཎཨཀྑིཏོ ཝཱམཨཀྑིཏོཏིཨཱདི སམཱསཔཱཋོཡེཝ, ན ཨཉྙོ. དཀྑིཎནཱསིཀཱསོཏཏོ ཝཱམནཱསིཀཱསོཏཏོཏི པཱཋོ སུནྡརོ. རསྶཾ ཀཏྭཱཔི པཋནྟི. ཨཾསཀཱུཊཏོཏི ཨེཏྠ ཨབྦྷུགྒཏཊྛེན ཀཱུཊོ ཝིཡཱཏི ཀཱུཊོ, ཨཾསོཡེཝ ཀཱུཊོ ཨཾསཀཱུཊོ. ཨངྒུལངྒུལེཧཱིཏི ཨངྒུལཱིཧི ཨངྒུལཱིཧི. ཨངྒུལནྟརིཀཱཧཱིཏི ཨངྒུལཱིནཾ ཨནྟརིཀཱཧི. ཨེཀེཀལོམཏོ ཨགྒིཀྑནྡྷོ པཝཏྟཏི, ཨེཀེཀལོམཏོ ཨུདཀདྷཱརཱ པཝཏྟཏཱིཏི ཨུབྷཡཏྠཱཔི ཨཱམེཌིཏཝཙནེན སབྦལོམཱནཾ པརིཡཱདིནྣཏྟཱ ¶ ཨེཀེཀལོམཏོཝ ཨགྒིཀྑནྡྷཨུདཀདྷཱརཱ ཡུགལཱ ཡུགལཱ ཧུཏྭཱ པཝཏྟནྟཱིཏི ཝུཏྟཾ ཧོཏི. ལོམཀཱུཔཏོ ལོམཀཱུཔཏོ ཨགྒིཀྑནྡྷོ པཝཏྟཏི, ལོམཀཱུཔཏོ ལོམཀཱུཔཏོ ཨུདཀདྷཱརཱ པཝཏྟཏཱིཏི ཨེཏྠཱཔི ཨེསེཝ ནཡོ. ཀེསུཙི པོཏྠཀེསུ ‘‘ཨེཀེཀལོམཏོ ཨགྒིཀྑནྡྷོ པཝཏྟཏི. ལོམཀཱུཔཏོ ལོམཀཱུཔཏོ ཨུདཀདྷཱརཱ པཝཏྟཏི, ལོམཀཱུཔཏོ ལོམཀཱུཔཏོ ཨགྒིཀྑནྡྷོ པཝཏྟཏི, ཨེཀེཀལོམཏོ ཨུདཀདྷཱརཱ པཝཏྟཏཱི’’ཏི ལིཁིཏཾ. ཏམྤི ཡུཛྫཏིཡེཝ. པཱཊིཧཱིརསྶ ཨཏིསུཁུམཏྟདཱིཔནཏོ པན པུརིམཔཱཋོཡེཝ སུནྡརཏརོ.

ཨིདཱནི ཚནྣཾ ཝཎྞཱནནྟི ཀོ སམྦནྡྷོ? ཧེཊྛཱ ‘‘ཨུཔརིམཀཱཡཏོ’’ཏིཨཱདཱིཧི ཨནེཀེཧི སརཱིརཱཝཡཝཱ ཝུཏྟཱ. ཏེན སརཱིརཱཝཡཝསམྦནྡྷོ པཝཏྟཏཱིཏི ཝཙནསམྦནྡྷེན ཙ ཡམཀཔཱཊིཧཱིརཱདྷིཀཱརེན ཙ ཚནྣཾ ཝཎྞཱནཾ སརཱིརཱཝཡཝབྷཱུཏཱནཾ ¶ རསྨིཡོ ཡམཀཱ ཧུཏྭཱ པཝཏྟནྟཱིཏི ཝུཏྟཾ ཧོཏི. སཱམིཝཙནསམྦནྡྷེན ཙ ཨཝསྶཾ ‘‘རསྨིཡོ’’ཏི པཱཋསེསོ ཨིཙྪིཏབྦོཡེཝ. ནཱིལཱནནྟི ཨུམཱཔུཔྥཝཎྞཱནཾ. པཱིཏཀཱནནྟི ཀཎིཀཱརཔུཔྥཝཎྞཱནཾ. ལོཧིཏཀཱནནྟི ཨིནྡགོཔཀཝཎྞཱནཾ. ཨོདཱཏཱནནྟི ཨོསདྷིཏཱརཀཝཎྞཱནཾ. མཉྫིཊྛཱནནྟི མནྡརཏྟཝཎྞཱནཾ. པབྷསྶརཱནནྟི པབྷཱསནཔཀཏིཀཱནཾ པབྷསྶརཝཎྞཱནཾ. པབྷསྶརཝཎྞེ ཝིསུཾ ཨཝིཛྫམཱནེཔི ཝུཏྟེསུ པཉྩསུ ཝཎྞེསུ ཡེ ཡེ པབྷཱ སམུཛྫལཱ, ཏེ ཏེ པབྷསྶརཱ. ཏཐཱ ཧི ཏཐཱགཏསྶ ཡམཀཔཱཊིཧཱིརཾ ཀརོནྟསྶ ཡམཀཔཱཊིཧཱིརཉཱཎབལེནེཝ ཀེསམསྶཱུནཉྩེཝ ཨཀྑཱིནཉྩ ནཱིལཊྛཱནེཧི ནཱིལརསྨིཡོ ནིཀྑམནྟི, ཡཱསཾ ཝསེན གགནཏལཾ ཨཉྫནཙུཎྞསམོཀིཎྞཾ ཝིཡ ཨུམཱཔུཔྥནཱིལུཔྤལདལསཉྪནྣཾ ཝིཡ ཝཱིཏིཔཏནྟམཎིཏཱལཝཎྚཾ ཝིཡ པསཱརིཏམེཙཀཔཊཾ ཝིཡ ཙ ཧོཏི. ཚཝིཏོ ཙེཝ ཨཀྑཱིནཉྩ པཱིཏཀཊྛཱནེཧི པཱིཏརསྨིཡོ ནིཀྑམནྟི, ཡཱསཾ ཝསེན དིསཱབྷཱགཱ སུཝཎྞརསནིསིཉྩམཱནཱ ཝིཡ སུཝཎྞཔཊཔསཱརིཏཱ ཝིཡ ཀུངྐུམཙུཎྞཀཎིཀཱརཔུཔྥསམྤརིཀིཎྞཱ ཝིཡ ཙ ཝིརོཙནྟི. མཾསལོཧིཏེཧི ཙེཝ ཨཀྑཱིནཉྩ རཏྟཊྛཱནེཧི ལོཧིཏརསྨིཡོ ¶ ནིཀྑམནྟི, ཡཱསཾ ཝསེན དིསཱབྷཱགཱ ཙིནཔིཊྛཙུཎྞརཉྫིཏཱ ཝིཡ སུཔཀྐལཱཁཱརསནིསིཉྩམཱནཱ ཝིཡ རཏྟཀམྦལཔརིཀྑིཏྟཱ ཝིཡ ཛཡསུམནཔཱལིབྷདྡཀབནྡྷུཛཱིཝཀཀུསུམསམྤརིཀིཎྞཱ ཝིཡ ཙ ཝིརོཙནྟི. ཨཊྛཱིཧི ཙེཝ དནྟེཧི ཙ ¶ ཨཀྑཱིནཉྩ སེཏཊྛཱནེཧི ཨོདཱཏརསྨིཡོ ནིཀྑམནྟི, ཡཱསཾ ཝསེན དིསཱབྷཱགཱ རཛཏཀུཊེཧི ཨཱསིཉྩམཱནཁཱིརདྷཱརཱསམྤརིཀིཎྞཱ ཝིཡ པསཱརིཏརཛཏཔཊྚཝིཏཱནཱ ཝིཡ ཝཱིཏིཔཏནྟརཛཏཏཱལཝཎྚཱ ཝིཡ ཀུནྡཀུམུདསིནྡུཝཱརསུམནམལླིཀཱདིཀུསུམསཉྪནྣཱ ཝིཡ ཙ ཝིརོཙནྟི. ཧཏྠཏལཔཱདཏལཱདཱིཧི མནྡརཏྟཊྛཱནེཧི མཉྫིཊྛརསྨིཡོ ནིཀྑམནྟི, ཡཱསཾ ཝསེན དིསཱབྷཱགཱ པཝཱལ༹ཛཱལཔརིཀྑིཏྟཱ ཝིཡ རཏྟཀུརཝཀཀུསུམསམོཀིཎྞཱ ཝིཡ ཙ ཝིརོཙནྟི. ཨུཎྞཱནཁཱདཱིཧི པབྷསྶརཊྛཱནེཧི པབྷསྶརརསྨིཡོ ནིཀྑམནྟི, ཡཱསཾ ཝསེན དིསཱབྷཱགཱ ཨོསདྷིཏཱརཀཔུཉྫཔུཎྞཱ ཝིཡ ཝིཛྫུཔཊལཱདིཔརིཔུཎྞཱ ཝིཡ ཙ ཝིརོཙནྟི.

བྷགཝཱ ཙངྐམཏཱིཏིཨཱདི ‘‘བྷགཝཏོ ཙ ནིམྨིཏཱནཉྩ ནཱནཱཨིརིཡཱཔཐཀརཎཾ ཡམཀཔཱཊིཧཱིརེནེཝ ཧོཏཱི’’ཏི དསྶནཏྠཾ ཝུཏྟཾ. ཏེསཉྷི ནིམྨིཏཱནཾ ཨིརིཡཱཔཐཱ ཡུགལཱཝ ཧུཏྭཱ ཝཏྟནྟི. ཡདི ནིམྨིཏཱ བཧུཀཱ ཧོནྟི, ‘‘ནིམྨིཏོ’’ཏིཨཱདི ཀསྨཱ ཨེཀཝཙནཾ ཀཏནྟི ཙེ? ནིམྨིཏེསུཔི ཨེཀེཀསྶ ¶ ནཱནཱཨིརིཡཱཔཐབྷཱཝདསྶནཏྠཾ. བཧུཝཙནེན ཧི ཝུཏྟེ སབྦེཔི ནིམྨིཏཱ སཀིཾ ཨེཀེཀཨིརིཡཱཔཐིཀཱ ཝིཡ ཧོནྟི. ཨེཀཝཙནེན པན ཝུཏྟེ ནིམྨིཏེསུ ཨེཀེཀོ ནཱནཱཨིརིཡཱཔཐིཀོཏི ཉཱཡཏི. ཏསྨཱ ཨེཀཝཙནནིདྡེསོ ཀཏོ. ཙཱུལ༹པནྠཀཏྠེརོཔི ཏཱཝ ནཱནཱཨིརིཡཱཔཐིཀབྷིཀྑཱུནཾ སཧསྶཾ མཱཔེསི, ཀིཾ པན བྷགཝཱ ཡམཀཔཱཊིཧཱིརེ བཧཱུ ནིམྨིཏེ ན ཀརིསྶཏི. ཙཱུལ༹པནྠཀཏྠེརཾ མུཉྩིཏྭཱ ཨཉྙེསཾ སཱཝཀཱནཾ ཨེཀཱཝཛྫནེན ནཱནཱཨིརིཡཔཐིཀཱནཾ ནཱནཱརཱུཔཱནཉྩ ནིམྨཱནཾ ན ཨིཛ྄ཛྷཏི. ཨནིཡམེཏྭཱ ཧི ནིམྨིཏཱ ཨིདྡྷིམཏཱ སདིསཱཝ ཧོནྟི. ཋཱནནིསཛྫཱདཱིསུ ཝཱ བྷཱསིཏཏུཎྷཱིབྷཱཝཱདཱིསུ ཝཱ ཡཾ ཡཾ ཨིདྡྷིམཱ ཀརོཏི, ཏཾ ཏདེཝ ཀརོནྟི, ཝིསདིསཀརཎཾ ¶ ནཱནཱཀིརིཡཱཀརཎཉྩ ‘‘ཨེཏྟཀཱ ཨཱིདིསཱ ཧོནྟུ, ཨེཏྟཀཱ ཨིམཾ ནཱམ ཀརོནྟཱུ’’ཏི ཝིསུཾ ཝིསུཾ ཨཱཝཛྫིཏྭཱ ཨདྷིཊྛཱནེན ཨིཛ྄ཛྷཏི. ཏཐཱགཏསྶ པན ཨེཀཱཝཛྫནཱདྷིཊྛཱནེནེཝ ནཱནཔྤཀཱརནིམྨཱནཾ ཨིཛ྄ཛྷཏི. ཨེཝམེཝ ཨགྒིཀྑནྡྷཨུདཀདྷཱརཱནིམྨཱནེ ཙ ནཱནཱཝཎྞནིམྨཱནེ ཙ ཝེདིཏབྦཾ. ཏཏྠ བྷགཝཱ ཙངྐམཏཱིཏི ཨཱཀཱསེ ཝཱ པཐཝིཡཾ ཝཱ ཙངྐམཏི. ནིམྨིཏོཏི ཨིདྡྷིཡཱ མཱཔིཏབུདྡྷརཱུཔཾ. ཏིཊྛཏི ཝཱཏིཨཱདཱིནིཔི ཨཱཀཱསེ ཝཱ པཐཝིཡཾ ཝཱ. ཀཔྤེཏཱིཏི ཀརོཏི. བྷགཝཱ ཏིཊྛཏཱིཏིཨཱདཱིསུཔི ཨེསེཝ ནཡོཏི.

ཡམཀཔཱཊིཧཱིརཉཱཎནིདྡེསཝཎྞནཱ ནིཊྛིཏཱ.

༧༡. མཧཱཀརུཎཱཉཱཎནིདྡེསཝཎྞནཱ

༡༡༧. མཧཱཀརུཎཱཉཱཎནིདྡེསེ ¶ ¶ བཧུཀེཧི ཨཱཀཱརེཧཱིཏི ཨིདཱནི ཝུཙྩམཱནེཧི ཨེཀཱུནནཝུཏིཡཱ པཀཱརེཧི. པསྶནྟཱནནྟི ཉཱཎཙཀྑུནཱ ཙ བུདྡྷཙཀྑུནཱ ཙ ཨོལོཀེནྟཱནཾ. ཨོཀྐམཏཱིཏི ཨོཏརཏི པཝིསཏི. ཨཱདིཏྟོཏི དུཀྑལཀྑཎཝསེན པཱིལཱ༹ཡོགཏོ སནྟཱཔནཊྛེན ཨཱདཱིཔིཏོ. ‘‘ཡདནིཙྩཾ, ཏཾ དུཀྑ’’ནྟི (སཾ. ནི. ༣.༡༥) ཝུཏྟཏྟཱ སབྦསངྑཏསྶ ཙེཝ དུཀྑལཀྑཎཝསེན པཱིལི༹ཏཏྟཱ དུཀྑསྶ ཙ ཀརུཎཱཡ མཱུལབྷཱུཏཏྟཱ པཋམཾ དུཀྑལཀྑཎཝསེན ‘‘ཨཱདིཏྟོ’’ཏི ཝུཏྟནྟི ཝེདིཏབྦཾ. རཱགཱདཱིཧི ཨཱདིཏྟཏཾ པན ཨུཔརི ཝཀྑཏི. ཨཐ ཝཱ ཨཱདིཏྟོཏི རཱགཱདཱིཧིཡེཝ ཨཱདིཏྟོ. ཨུཔརི པན ‘‘ཏསྶ ནཏྠཉྙོ ཀོཙི ནིབྦཱཔེཏཱ’’ཏི ཨཏྠཱཔེཀྑནཝསེན པུན ཝུཏྟནྟི ཝེདིཏབྦཾ ¶ . ལོཀསནྣིཝཱསོཏི པཉྩཀྑནྡྷཱ ལུཛྫནཔལུཛྫནཊྛེན ལོཀོ, ཏཎྷཱདིཊྛིཝསེན སནྣིཝསནྟི ཨེཏྠ སཏྟཱཏི སནྣིཝཱསོ, ལོཀོཝ སནྣིཝཱསོ ལོཀསནྣིཝཱསོ. དུཀྑིཏཾ ཁནྡྷསནྟཱནཾ ཨུཔཱདཱཡ སཏྟཝོཧཱརསབྦྷཱཝཏོ ལོཀསནྣིཝཱསཡོགཏོ སཏྟསམཱུཧོཔི ལོཀསནྣིཝཱསོ. སོཔི ཙ སཧཁནྡྷཀོཡེཝ. ཨུཡྻུཏྟོཏི ཨནེཀེསུ ཀིཙྩེསུ ནིཙྩབྱཱཔཱརཏཱཡ ཀཏཡོགོ ཀཏཨུསྶཱཧོ, སཏཏཀིཙྩེསུ སཨུསྶུཀྐོཏི ཨཏྠོ. གྷཊྚནཡུཏྟོཏི ཝཱ ཨུཡྻུཏྟོ. པཡཱཏོཏི པབྦཏེཡྻཱ ནདཱི ཝིཡ ཨནཝཊྛིཏགམནེན མརཎཱཡ ཡཱཏུཾ ཨཱརདྡྷོ. ཀུམྨགྒཔྤཊིཔནྣོཏི ¶ ཀུཙྪིཏཾ མིཙྪཱམགྒཾ པཊིཔནྣོ. ཨུཔརི པན ‘‘ཝིཔཐཔཀྑནྡོ’’ཏི ནཱནཱཔདེཧི ཝིསེསེཏྭཱ ཝུཏྟཾ.

ཨུཔནཱིཡཏཱིཏི ཛརཱཝསེན མརཎཱཡ ཨུཔནཱིཡཏི ཧརཱིཡཏི. ཛརཱ ཧི ‘‘ཨཱཡུནོ སཾཧཱནཱི’’ཏི (སཾ. ནི. ༢.༢) ཝུཏྟཱ. ཨདྡྷུཝོཏི ན ཐིརོ, སདཱ ཏཐེཝ ན ཧོཏི. ཡསྨཱ ཨདྡྷུཝོ, ཏསྨཱ ཨུཔནཱིཡཏཱིཏི པུརིམསྶ ཀཱརཎཝཙནམེཏཾ. ཨེཏེན སཀཱརཎཾ ཛརཱདུཀྑཾ ཝུཏྟཾ. ཏཾ ཛརཱདུཀྑཾ དིསྭཱ ཛརཱཔཱརིཛུཉྙརཧིཏཱཔི ཝིཉྙཱུ པབྦཛནྟི. ཨཏཱཎོཏི ཏཱཡིཏུཾ རཀྑིཏུཾ སམཏྠེན རཧིཏོ, ཨནཱརཀྑོཏི ཝུཏྟཾ ཧོཏི. ཨནབྷིསྶརོཏི ཨབྷིསརིཏྭཱ ཨབྷིགནྟྭཱ བྱཱཧརཎེན ཨསྶཱསེཏུཾ སམཏྠེན རཧིཏོ, ཨསཧཱཡོཏི ཝཱ ཨཏྠོ. ཡསྨཱ ཨནབྷིསྶརོ, ཏསྨཱ ཨཏཱཎོཏི པུརིམསྶ ཀཱརཎཝཙནམེཏཾ. ཨེཏེན སཀཱརཎཾ པིཡཝིཔྤཡོགདུཀྑཾ ཝུཏྟཾ. ཏཾ པིཡཝིཔྤཡོགདུཀྑཾ དིསྭཱ ཉཱཏིཔཱརིཛུཉྙརཧིཏཱཔི ཝིཉྙཱུ པབྦཛནྟི. ཨསྶཀོཏི སཀབྷཎྜརཧིཏོ. སབྦཾ པཧཱཡ གམནཱིཡནྟི སཀབྷཎྜནྟི སལླཀྑིཏཾ སབྦཾ པཧཱཡ ལོཀེན གནྟབྦཾ. ཡསྨཱ སབྦཾ པཧཱཡ གམནཱིཡཾ, ཏསྨཱ ཨསྶཀོཏི པུརིམསྶ ཀཱརཎཝཙནམེཏཾ. ཨེཏེན སཀཱརཎཾ མརཎདུཀྑཾ ཝུཏྟཾ. ཏཾ དིསྭཱ བྷོགཔཱརིཛུཉྙརཧིཏཱཔི ཝིཉྙཱུ པབྦཛནྟི. ཨཉྙཏྠ ‘‘ཀམྨསྶཀཱ ¶ མཱཎཝསཏྟཱ’’ཏི (མ. ནི. ༣.༢༨༩) ཝུཏྟཾ, ཨིདྷ ཙ རཊྛཔཱལསུཏྟེ ཙ ‘‘ཨསྶཀོ ལོཀོ’’ཏི (མ. ནི. ༢.༣༠༥) ཝུཏྟཾ, ཏཾ ཀཐཾ ཡུཛྫཏཱིཏི ཙེ? པཧཱཡ གམནཱིཡཾ སནྡྷཱཡ ‘‘ཨསྶཀོ’’ཏི ཝུཏྟཾ, ཀམྨཾ པན ན པཧཱཡ གམནཱིཡཾ. ཏསྨཱ ‘‘ཀམྨསྶཀཱ’’ཏི ཝུཏྟཾ. རཊྛཔཱལསུཏྟེཡེཝ ཙ ཨེཝམེཏཾ ཝུཏྟཾ ‘‘ཏྭཾ པན ཡཐཱཀམྨཾ གམིསྶསཱི’’ཏི (མ. ནི. ༢.༣༠༦). ཨཱུནོཏི པཱརིཔཱུརིརཧིཏོ. ཨཏིཏྟོཏི བྷིཡྻོ བྷིཡྻོ པཏྠནཱཡཔི ན སུཧིཏོ ¶ . ཨིདཾ ཨཱུནབྷཱཝསྶ ཀཱརཎཝཙནཾ. ཏཎྷཱདཱསོཏི ཏཎྷཱཡ ཝསེ ཝཏྟནཏོ ཏཎྷཱཡ དཱསབྷཱུཏོ. ཨིདཾ ཨཏིཏྟབྷཱཝསྶ ཀཱརཎཝཙནཾ. ཨེཏེན ཨིཙྪཱརོགཱཔདེསེན ¶ སཀཱརཎཾ བྱཱདྷིདུཀྑཾ ཝུཏྟཾ. ཏཾ བྱཱདྷིདུཀྑཾ དིསྭཱ བྱཱདྷིཔཱརིཛུཉྙརཧིཏཱཔི ཝིཉྙཱུ པབྦཛནྟི. ཨཏཱཡནོཏི པུཏྟཱདཱིཧིཔི ཏཱཡནསྶ ཨབྷཱཝཏོ ཨཏཱཡནོ ཨནཱརཀྑོ, ཨལབྦྷནེཡྻཁེམོ ཝཱ. ཨལེཎོཏི ཨལླཱིཡིཏུཾ ནིསྶིཏུཾ ཨནརཧོ ཨལླཱིནཱནམྤི ཙ ལེཎཀིཙྩཱཀཱརཀོ. ཨསརཎོཏི ནིསྶིཏཱནཾ ན བྷཡསཱརཀོ ན བྷཡཝིནཱསཀོ. ཨསརཎཱིབྷཱུཏོཏི པུརེ ཨུཔྤཏྟིཡཱ ཨཏྟནོ ཨབྷཱཝེནེཝ ཨསརཎོ, ཨུཔྤཏྟིསམཀཱལམེཝ ཨསརཎཱིབྷཱུཏོཏི ཨཏྠོ.

ཨུདྡྷཏོཏི སབྦཱཀུསལེསུ ཨུདྡྷཙྩསྶ ཨུཔྤཛྫནཏོ སཏྟསནྟཱནེ ཙ ཨཀུསལུཔྤཏྟིབཱཧུལླཏོ ཨཀུསལསམངྒཱིལོཀོ ཏེན ཨུདྡྷཙྩེན ཨུདྡྷཏོ. ཨཝཱུཔསནྟོཏི ཨཝཱུཔསམནལཀྑཎསྶ ཨུདྡྷཙྩསྶེཝ ཡོགེན ཨཝཱུཔསནྟོ བྷནྟམིགཔཊིབྷཱགོ. ‘‘ཨུཔནཱིཡཏི ལོཀོ’’ཏིཨཱདཱིསུ ཙཏཱུསུ ཙ ‘‘ཨུདྡྷཏོ ལོཀོ’’ཏི ཙ པཉྩསུ ཋཱནེསུ ལོཀོཏི ཨཱགཏཾ, སེསེསུ ལོཀསནྣིཝཱསོཏི. ཨུབྷཡཐཱཔི ལོཀོཡེཝ. སསལློཏི པཱིལཱ༹ཛནཀཏཱཡ ཨནྟོཏུདནཏཱཡ དུནྣཱིཧརཎཱིཡཏཱཡ ཙ སལླཱཏི སངྑཾ གཏེཧི རཱགཱདཱིཧི སལླེཧི སཧཝཏྟནཀོ. ཝིདྡྷོཏི མིགཱདཡོ ཀདཱཙི པརེཧི ཝིདྡྷཱ ཧོནྟི, ཨཡཾ པན ལོཀོ ནིཙྩཾ ཨཏྟནཱཝ ཝིདྡྷོ. པུཐུསལླེཧཱིཏི ‘‘སཏྟ སལླཱནི – རཱགསལླཾ, དོསསལླཾ, མོཧསལླཾ, མཱནསལླཾ, དིཊྛིསལླཾ, ཀིལེསསལླཾ, དུཙྩརིཏསལླ’’ནྟི (མཧཱནི. ༡༧༤) ཝུཏྟེཧི སཏྟཧི སལླེཧི. ཏསྶཱཏི ཏསྶ ལོཀསནྣིཝཱསསྶ. སལླཱནཾ ཨུདྡྷཏཱཏི ཏེསཾ སལླཱནཾ སཏྟསནྟཱནཏོ ཨུདྡྷརིཏཱ པུགྒལོ. ཨཉྙཏྲ མཡཱཏི མཾ ཋཔེཏྭཱ. ཡེཔི བྷགཝཏོ སཱཝཀཱ སལླཱནི ཨུདྡྷརནྟི, ཏེསཾ བྷགཝཏོ ཝཙནེནེཝ ཨུདྡྷརཎཏོ བྷགཝཱཝ ཨུདྡྷརཏི ནཱམ. ཨཝིཛྫནྡྷཀཱརཱཝརཎོཏི ཨཝིཛྫཱ ཨེཝ སབྷཱཝདསྶནཙྪཱདནེན ཨནྡྷཾ ཝིཡ ཀརོཏཱིཏི ཨཝིཛྫནྡྷཀཱརོ, སོཝ སབྷཱཝཱཝགམནནིཝཱརཎེན ཨཱཝརཎཾ ཨེཏསྶཱཏི ཨཝིཛྫནྡྷཀཱརཱཝརཎོ. ཀིལེསཔཉྫརཔཀྑིཏྟོཏི ཀིལེསཱ ཨེཝ ཀུསལགམནསནྣིརུཛ྄ཛྷནཊྛེན པཉྫརོཏི ཀིལེསཔཉྫརོ, ཨཝིཛྫཱཔབྷཝེ ¶ ཀིལེསཔཉྫརེ པཀྑིཏྟོ པཱཏིཏོ. ཨཱལོཀཾ དསྶེཏཱཏི པཉྙཱལོཀཾ ¶ དསྶནསཱིལོ, པཉྙཱལོཀསྶ དསྶེཏཱཏི ཝཱ ཨཏྠོ. ཨཝིཛྫཱགཏོཏི ཨཝིཛྫཾ གཏོ པཝིཊྛོ. ན ཀེཝལཾ ཨཝིཛྫཱཡ ཨཱཝརཎམཏྟམེཝ, ཨཐ ཁོ གཧནགཏོ ཝིཡ ཨཝིཛྫཱཀོསསྶ ཨནྟོ པཝིཊྛོཏི ¶ པུརིམཏོ ཝིསེསོ. ཨཎྜབྷཱུཏོཏིཨཱདཡོ ཙ ཝིསེསཱཡེཝ. ཨཎྜབྷཱུཏོཏི ཨཎྜེ བྷཱུཏོ ནིབྦཏྟོ. ཡཐཱ ཧི ཨཎྜེ ནིབྦཏྟཱ ཨེཀཙྩེ སཏྟཱ ‘‘ཨཎྜབྷཱུཏཱ’’ཏི ཝུཙྩནྟི, ཨེཝམཡཾ ལོཀོ ཨཝིཛྫཎྜཀོསེ ནིབྦཏྟཏྟཱ ‘‘ཨཎྜབྷཱུཏོ’’ཏི ཝུཙྩཏི. པརིཡོནདྡྷོཏི ཏེན ཨཝིཛྫཎྜཀོསེན སམནྟཏོ ཨོནདྡྷོ བདྡྷོ ཝེཋིཏོ.

ཏནྟཱཀུལཀཛཱཏོཏི ཏནྟཾ ཝིཡ ཨཱཀུལབྷཱུཏོ. ཡཐཱ ནཱམ དུནྣིཀྑིཏྟཾ མཱུསིཀཙྪིནྣཾ པེསཀཱརཱནཾ ཏནྟཾ ཏཧིཾ ཏཧིཾ ཨཱཀུལཾ ཧོཏི, ཨིདཾ ཨགྒཾ ཨིདཾ མཱུལནྟི ཨགྒེན ཝཱ ཨགྒཾ, མཱུལེན ཝཱ མཱུལཾ སམཱནེཏུཾ དུཀྐརཾ ཧོཏི, ཨེཝམེཝ སཏྟཱ པཙྩཡཱཀཱརེ ཁལིཏཱ ཨཱཀུལཱ བྱཱཀུལཱ ཧོནྟི, ན སཀྐོནྟི པཙྩཡཱཀཱརཾ ཨུཛུཾ ཀཱཏུཾ. ཏཏྠ ཏནྟཾ པཙྩཏྟཔུརིསཀཱརེ ཋཏྭཱ སཀྐཱཔི བྷཝེཡྻ ཨུཛུཾ ཀཱཏུཾ, ཋཔེཏྭཱ པན དྭེ བོདྷིསཏྟེ ཨཉྙོ སཏྟོ ཨཏྟནོ དྷམྨཏཱཡ པཙྩཡཱཀཱརཾ ཨུཛུཾ ཀཱཏུཾ སམཏྠོ ནཱམ ནཏྠི. ཡཐཱ པན ཨཱཀུལཾ ཏནྟཾ ཀཉྫིཀཾ དཏྭཱ ཀོཙྪེན པཧཊཾ ཏཏྠ ཏཏྠ ཀུལཀཛཱཏཾ ཧོཏི གཎྛིབདྡྷཾ, ཨེཝམཡཾ ལོཀོ པཙྩཡེསུ པཀྑལིཏྭཱ པཙྩཡེ ཨུཛུཾ ཀཱཏུཾ ཨསཀྐོནྟོ དྭཱསཊྛིདིཊྛིགཏཝསེན ཀུལཀཛཱཏོ ཧོཏི གཎྛིབདྡྷོ. ཡེ ཧི ཀེཙི དིཊྛིཡོ ནིསྶིཏཱ, སབྦེ ཏེ པཙྩཡཾ ཨུཛུཾ ཀཱཏུཾ ན སཀྐོནྟིཡེཝ. ཀུལཱགཎྛིཀཛཱཏོཏི ཀུལཱགཎྛིཀཾ ཝིཡ བྷཱུཏོ. ཀུལཱགཎྛིཀཾ ཝུཙྩཏི པེསཀཱརཀཉྫིཀསུཏྟཾ. ‘‘ཀུལཱ ནཱམ སཀུཎིཀཱ, ཏསྶཱ ཀུལཱཝཀོ’’ཏིཔི ཨེཀེ. ཡཐཱ ཏདུབྷཡམྤི ཨཱཀུལཾ ཨགྒེན ཝཱ ཨགྒཾ, མཱུལེན ཝཱ མཱུལཾ སམཱནེཏུཾ དུཀྐརནྟི པུརིམནཡེནེཝ ཡོཛེཏབྦཾ. མུཉྫཔབྦཛབྷཱུཏོཏི མུཉྫཏིཎཾ ཝིཡ པབྦཛཏིཎཾ ཝིཡ ཙ བྷཱུཏོ མུཉྫཏིཎཔབྦཛཏིཎསདིསོ ཛཱཏོ. ཡཐཱ ཏཱནི ཏིཎཱནི ཀོཊྚེཏྭཱ ཀོཊྚེཏྭཱ ཀཏརཛྫུ ཛིཎྞཀཱལེ ཀཏྠཙི པཏིཏཾ གཧེཏྭཱ ཏེསཾ ཏིཎཱནཾ ‘‘ཨིདཾ ཨགྒཾ ཨིདཾ མཱུལ’’ནྟི ཨགྒེན ཝཱ ཨགྒཾ, མཱུལེན ཝཱ མཱུལཾ སམཱནེཏུཾ དུཀྐརཾ, ཏམྤི པཙྩཏྟཔུརིསཀཱརེ ¶ ཋཏྭཱ སཀྐཱ བྷཝེཡྻ ཨུཛུཾ ¶ ཀཱཏུཾ, ཋཔེཏྭཱ པན དྭེ བོདྷིསཏྟེ ཨཉྙོ སཏྟོ ཨཏྟནོ དྷམྨཏཱཡ པཙྩཡཱཀཱརཾ ཨུཛུཾ ཀཱཏུཾ སམཏྠོ ནཱམ ནཏྠི. ཨེཝམཡཾ ལོཀོ པཙྩཡཱཀཱརཾ ཨུཛུཾ ཀཱཏུཾ ཨསཀྐོནྟོ དྭཱསཊྛིདིཊྛིགཏཝསེན གཎྛིཛཱཏོ ཧུཏྭཱ ཨཔཱཡཾ དུགྒཏིཾ ཝིནིཔཱཏཾ སཾསཱརཾ ནཱཏིཝཏྟཏི.

ཏཏྠ ཨཔཱཡོཏི ནིརཡོ ཏིརཙྪཱནཡོནི པེཏྟིཝིསཡོ ཨསུརཀཱཡོ. སབྦེཔི ཧི ཏེ ཝཌྜྷིསངྑཱཏསྶ ཨཱཡསྶ ཨབྷཱཝཏོ ‘‘ཨཔཱཡོ’’ཏི ཝུཙྩནྟི. ཏཐཱ དུཀྑསྶ གཏིབྷཱཝཏོ དུགྒཏི. སུཁསམུསྶཡཏོ ཝིནིཔཏིཏཏྟཱ ཝིནིཔཱཏོ. ཨིཏརོ པན –

‘‘ཁནྡྷཱནཉྩ ¶ པཊིཔཱཊི, དྷཱཏུཨཱཡཏནཱན ཙ;

ཨབྦོཙྪིནྣཾ ཝཏྟམཱནཱ, སཾསཱརོཏི པཝུཙྩཏི’’.

ཏཾ སབྦམྤི ནཱཏིཝཏྟཏི ནཱཏིཀྐམཏི. ཨཐ ཁོ ཙུཏིཏོ པཊིསནྡྷིཾ, པཊིསནྡྷིཏོ ཙུཏིནྟི ཨེཝཾ པུནཔྤུནཾ ཙུཏིཔཊིསནྡྷིཡོ གཎྷམཱནོ ཏཱིསུ བྷཝེསུ ཙཏཱུསུ ཡོནཱིསུ པཉྩསུ གཏཱིསུ སཏྟསུ ཝིཉྙཱཎཊྛིཏཱིསུ ནཝསུ སཏྟཱཝཱསེསུ མཧཱསམུདྡེ ཝཱཏུཀྑིཏྟནཱཝཱ ཝིཡ ཡནྟགོཎོ ཝིཡ ཙ པརིབྦྷམཏིཡེཝ. ཨཝིཛྫཱཝིསདོསསལླིཏྟོཏི ཨཝིཛྫཱཡེཝ ཨཀུསལུཔྤཱདནེན ཀུསལཛཱིཝིཏནཱསནཏོ ཝིསནྟི ཨཝིཛྫཱཝིསཾ, ཏདེཝ སནྟཱནདཱུསནཏོ ཨཝིཛྫཱཝིསདོསོ, ཏེན ཨནུསཡཔརིཡུཊྛཱནདུཙྩརིཏབྷཱུཏེན བྷུསཾ ལིཏྟོ མཀྑིཏོཏི ཨཝིཛྫཱཝིསདོསསལླིཏྟོ. ཀིལེསཀལལཱིབྷཱུཏོཏི ཨཝིཛྫཱདིམཱུལཀཱ ཀིལེསཱ ཨེཝ ཨོསཱིདནཊྛེན ཀལལཾ ཀདྡམོཏི ཀིལེསཀལལཾ, ཏདསྶ ཨཏྠཱིཏི ཀིལེསཀལལཱི, ཨེཝཾབྷཱུཏོ. རཱགདོསམོཧཛཊཱཛཊིཏོཏི ལོབྷཔཊིགྷཱཝིཛྫཱསངྑཱཏཱ རཱགདོསམོཧཱ ཨེཝ རཱུཔཱདཱིསུ ཨཱརམྨཎེསུ ཧེཊྛུཔརིཡཝསེན པུནཔྤུནཾ ཨུཔྤཛྫནཏོ སཾསིབྦནཊྛེན ཝེལུ༹གུམྦཱདཱིནཾ སཱཁཱཛཱལསངྑཱཏཱ ཛཊཱ ཝིཡཱཏི ཛཊཱ, ཏཱཡ རཱགདོསམོཧཛཊཱཡ ཛཊིཏོ. ཡཐཱ ནཱམ ཝེལུ༹ཛཊཱདཱིཧི ཝེལུ༹ཨཱདཡོ, ཨེཝཾ ཏཱཡ ཛཊཱཡ ཨཡཾ ལོཀོ ཛཊིཏོ ཝིནདྡྷོ སཾསིབྦིཏོཏི ཨཏྠོ. ཛཊཾ ཝིཛཊེཏཱཏི ཨིམཾ ཨེཝཾ ཏེདྷཱཏུཀཾ ¶ ལོཀཾ ཛཊེཏྭཱ ཋིཏཾ ཛཊཾ ཝིཛཊེཏཱ སཾཚིནྡིཏཱ སམྤདཱལཡིཏཱ.

ཏཎྷཱསངྒྷཱཊཔཊིམུཀྐོཏི ཏཎྷཱ ཨེཝ ཨབྦོཙྪིནྣཾ པཝཏྟིཏོ སངྒྷཊིཏཊྛེན སངྒྷཱཊོཏི ཏཎྷཱསངྒྷཱཊོ, ཏསྨིཾ ཏཎྷཱསངྒྷཱཊེ པཊིམུཀྐོ ཨནུཔཝིཊྛོ ཨནྟོགཏོཏི ཏཎྷཱསངྒྷཱཊཔཊིམུཀྐོ. ཏཎྷཱཛཱལེན ཨོཏྠཊོཏི ¶ ཏཎྷཱ ཨེཝ པུབྦེ ཝུཏྟནཡེན སཾསིབྦནཊྛེན ཛཱལནྟི ཏཎྷཱཛཱལཾ, ཏེན ཏཎྷཱཛཱལེན ཨོཏྠཊོ སམནྟཏོ ཚཱདིཏོ པལིཝེཋིཏོ. ཏཎྷཱསོཏེན ཝུཡ྄ཧཏཱིཏི ཏཎྷཱ ཨེཝ སཾསཱརེ ཨཱཀཌྜྷནཊྛེན སོཏོཏི ཏཎྷཱསོཏོ, ཏེན ཏཎྷཱསོཏེན ཝུཡ྄ཧཏི ཨཱཀཌྜྷཱིཡཏི. ཏཎྷཱསཉྙོཛནེན སཉྙུཏྟོཏི ཏཎྷཱ ཨེཝ ལོཀཾ ཝཊྚསྨིཾ སཾཡོཛནཏོ བནྡྷནཏོ སཾཡོཛནནྟི ཏཎྷཱསཾཡོཛནཾ, ཏེན ཏཎྷཱསཾཡོཛནེན སཉྙུཏྟོ བདྡྷོ. ཏཎྷཱནུསཡེན ཨནུསཊོཏི ཏཎྷཱ ཨེཝ ཨནུསཡནཊྛེན ཨནུསཡོཏི ཏཎྷཱནུསཡོ, ཏེན ཏཎྷཱནུསཡེན ཨནུསཊོ ཨནུགཏོ ཐཱམགཏོ. ཏཎྷཱསནྟཱཔེན སནྟཔྤཏཱིཏི ཏཎྷཱ ཨེཝ པཝཏྟིཀཱལེ ཕལཀཱལེ ཙ ལོཀཾ སནྟཱཔེཏཱིཏི སནྟཱཔོ, ཏེན ཏཎྷཱསནྟཱཔེན སནྟཔྤཏི སནྟཱཔཱིཡཏི. ཏཎྷཱཔརིལཱ༹ཧེན པརིཌཡ྄ཧཏཱིཏི ཏཎྷཱ ཨེཝ བལཝབྷཱུཏཱ པཝཏྟིཀཱལེ ཕལཀཱལེ ཙ སམནྟཏོ དཧནཊྛེན མཧཱཔརིལཱ༹ཧོཏི ཏཎྷཱཔརིལཱ༹ཧོ, ཏེན ཏཎྷཱཔརིལཱ༹ཧེན པརིཌཡ྄ཧཏི སམནྟཏོ ཌཧཱིཡཏི. དིཊྛིསངྒྷཱཊཱདཡོ ཨིམིནཱཝ ནཡེན ཡོཛེཏབྦཱ.

ཨནུགཏོཏི ¶ ཨནུཔཝིཊྛོ. ཨནུསཊོཏི ཨནུདྷཱཝིཏོ. ཨབྷིབྷཱུཏོཏི པཱིལི༹ཏོ. ཨབྦྷཱཧཏོཏི ཨབྷིཨཱཧཏོ ཨབྷིམུཁཾ བྷུསཾ པཧཏོ. དུཀྑེ པཏིཊྛིཏོཏི དུཀྑེ ཁནྡྷཔཉྩཀེ སུཁཝིཔལླཱསེན པཏིཊྛིཏོ ཨབྷིནིཝིཊྛོ.

ཏཎྷཱཡ ཨུཌྜིཏོཏི ཏཎྷཱཡ ཨུལླངྒྷིཏོ. ཙཀྑུ ཧི ཏཎྷཱརཛྫུནཱ ཨཱཝུནིཏྭཱ རཱུཔནཱགདནྟེ ཨུཌྜིཏཾ, སོཏཱདཱིནི ཏཎྷཱརཛྫུནཱ ཨཱཝུནིཏྭཱ སདྡཱདིནཱགདནྟེསུ ཨུཌྜིཏཱནི. ཏཾསམངྒཱིལོཀོཔི ཨུཌྜིཏོཡེཝ ནཱམ. ཛརཱཔཱཀཱརཔརིཀྑིཏྟོཏི ཨནཏིཀྐམནཱིཡཊྛེན པཱཀཱརབྷཱུཏཱཡ ཛརཱཡ པརིཝཱརིཏོ. མཙྩུཔཱསེན པརིཀྑིཏྟོཏི དུམྨོཙནཱིཡཊྛེན པཱསབྷཱུཏེན མརཎེན བདྡྷོ. མཧཱབནྡྷནབདྡྷོཏི དལ༹ྷཏྟཱ དུཙྪེདཏྟཱ ཙ མཧནྟེཧི བནྡྷནེཧི བདྡྷོ. རཱགབནྡྷནེནཱཏི རཱགོ ཨེཝ བནྡྷཏི སཾསཱརཏོ ཙལིཏུཾ ན དེཏཱིཏི རཱགབནྡྷནཾ. ཏེན རཱགབནྡྷནེན. སེསེསུཔི ཨེསེཝ ནཡོ. ཀིལེསབནྡྷནེནཱཏི ཝུཏྟཱཝསེསེན ¶ ཀིལེསབནྡྷནེན. དུཙྩརིཏབནྡྷནེནཱཏི ཏིཝིདྷེན. སུཙརིཏཾ པན བནྡྷནམོཀྑསྶ ཧེཏུབྷཱུཏཾ བནྡྷནམོཀྑབྷཱུཏཉྩ ཨཏྠི. ཏསྨཱ ཏཾ ན གཧེཏབྦཾ.

བནྡྷནཾ ¶ མོཙེཏཱཏི ཏསྶ བནྡྷནཾ མོཙེཏཱ. བནྡྷནཱ མོཙེཏཱཏིཔི པཱཋོ, བནྡྷནཏོ ཏཾ མོཙེཏཱཏི ཨཏྠོ. མཧཱསམྦཱདྷཔྤཊིཔནྣོཏི ཀུསལསཉྩཱརཔཱིལ༹ནེན མཧཱསམྦཱདྷསངྑཱཏཾ རཱགདོསམོཧམཱནདིཊྛིཀིལེསདུཙྩརིཏགཧནཾ པཊིཔནྣོ. ཨོཀཱསཾ དསྶེཏཱཏི ལོཀིཡལོཀུཏྟརསམཱདྷིཔཉྙཱཨོཀཱསཾ དསྶེཏཱ. མཧཱཔལིབོདྷེན པལིབུདྡྷོཏི མཧཱནིཝཱརཎེན ནིཝུཏོ. མཧཱལེཔེན ཝཱ ལིཏྟོ. པལིབོདྷོཏི ཙ རཱགཱདིསཏྟཝིདྷོ ཨེཝ. ‘‘ཏཎྷཱདིཊྛིཔལིབོདྷོ’’ཏི ཨེཀེ. པལིབོདྷཾ ཚེཏཱཏི ཏཾ པལིབོདྷཾ ཚིནྡིཏཱ. མཧཱཔཔཱཏེཏི པཉྩགཏིཔཔཱཏེ, ཛཱཏིཛརཱམརཎཔཔཱཏེ ཝཱ. ཏཾ སབྦམྤི དུརུཏྟརཎཊྛེན པཔཱཏོ. པཔཱཏཱ ཨུདྡྷཏཱཏི ཏམྷཱ པཔཱཏཏོ ཨུདྡྷརིཏཱ. མཧཱཀནྟཱརཔྤཊིཔནྣོཏི ཛཱཏིཛརཱབྱཱདྷིམརཎསོཀཔརིདེཝདུཀྑདོམནསྶུཔཱཡཱསཀནྟཱརཾ པཊིཔནྣོ. སབྦམྤི ཏཾ དུརཏིཀྐམནཊྛེན ཀནྟཱརོ, ཏཾ ཀནྟཱརཾ ཏཱརེཏཱ. ཀནྟཱརཱ ཏཱརེཏཱཏི ཝཱ པཱཋོ. མཧཱསཾསཱརཔྤཊིཔནྣོཏི ཨབྦོཙྪིནྣཾ ཁནྡྷསནྟཱནཾ པཊིཔནྣོ. སཾསཱརཱ མོཙེཏཱཏི སཾསཱརཏོ མོཙེཏཱ. སཾསཱརཾ མོཙེཏཱཏི ཝཱ པཱཋོ. མཧཱཝིདུགྒེཏི སཾསཱརཝིདུགྒེ. སཾསཱརོཡེཝ ཧི དུགྒམནཊྛེན ཝིདུགྒོ. སམྤརིཝཏྟཏཱིཏི བྷུསཾ ནིཝཏྟིཏྭཱ ཙརཏི. མཧཱཔལིཔེཏི མཧནྟེ ཀཱམཀདྡམེ. ཀཱམོ ཧི ཨོསཱིདནཊྛེན པལིཔོ. པལིཔནྣོཏི ལགྒོ. མཧཱཔལིཔཔལིཔནྣོཏིཔི པཱཋོ.

ཨབྦྷཱཧཏོཏི སབྦོཔདྡཝེཧི ཨབྦྷཱཧཏོ. རཱགགྒིནཱཏི རཱགཱདཡོཡེཝ ཨནུདཧནཊྛེན ཨགྒི, ཏེན རཱགགྒིནཱ. སེསེསུཔི ཨེསེཝ ནཡོ. ཨུནྣཱིཏཀོཏི ཨུགྒཧེཏྭཱ ནཱིཏོ, ཛཱཏིཡཱ ཨུགྒཧེཏྭཱ ཛརཱདིཨུཔདྡཝཱཡ ནཱིཏོཏི ཨཏྠོ. ཀ-ཀཱརོ པནེཏྠ ཨནུཀམྤཱཡ དཊྛབྦོ. ཧཉྙཏི ནིཙྩམཏཱཎོཏི ¶ པརིཏྟཱཡཀེན རཧིཏོ སཏཏཾ པཱིལཱི༹ཡཏི. པཏྟདཎྜོཏི རཱཛཱདཱིཧི ལདྡྷཨཱཎོ. ཏཀྐརོཏི ཙོརོ. ཝཛྫབནྡྷནབདྡྷོཏི ¶ རཱགཱདིཝཛྫབནྡྷནེཧི བདྡྷོ. ཨཱགྷཱཏནཔཙྩུཔཊྛིཏོཏི མརཎདྷམྨགཎྛིཀཊྛཱནཾ ཨུཔེཙྩ ཋིཏོ. ཀོཙི བནྡྷནཱ མོཙེཏཱ. ཀོཙི བནྡྷནཾ མོཙེཏཱཏིཔི པཱཋོ. ཨནཱཐོཏི ནཏྠི ཨེཏསྶ ནཱཐོ ཨིསྶརོ, སཡཾ ཝཱ ན ནཱཐོ ན ཨིསྶརོཏི ཨནཱཐོ, ཨསརཎོཏི ཝཱ ཨཏྠོ. པརམཀཱཔཉྙཔྤཏྟོཏི ཛརཱདིཔཊིབཱཧནེ ཨཔྤཧུཏཱཡ ཨཏཱིཝ ཀཔཎབྷཱཝཾ པཏྟོ. ཏཱཡེཏཱཏི རཀྑིཏཱ. ཏཱཡིཏཱཏི ཝཱ པཱཋོ སུནྡརོ ¶ . དུཀྑཱབྷིཏུནྣོཏི ཛཱཏིདུཀྑཱདཱིཧི ཨནེཀེཧི དུཀྑེཧི ཨབྷིཏུནྣོ ཨཏིབྱཱདྷིཏོ ཨཏིཀམྤིཏོ ཙ. ཙིརརཏྟཾ པཱིལི༹ཏོཏི དུཀྑེཧེཝ དཱིགྷམདྡྷཱནཾ པཱིལི༹ཏོ གྷཊྚིཏོ. གདྷིཏོཏི གེདྷེན གིདྡྷོ, ཨབྷིཛ྄ཛྷཱཀཱཡགནྠེན ཝཱ གནྠིཏོ. ནིཙྩཾ པིཔཱསིཏོཏི པཱཏུཾ བྷུཉྫིཏུཾ ཨིཙྪཱ པིཔཱསཱ, སཱ ཏཎྷཱ ཨེཝ, ཏཎྷཱཔིཔཱསཱཡ ནིརནྟརཾ པིཔཱསིཏོ.

ཨནྡྷོཏི དསྶནཊྛེན ཙཀྑཱུཏི སངྑཾ གཏཱཡ པཉྙཱཡ ཨབྷཱཝཏོ ཀཱཎོ. པཉྙཱ ཧི དྷམྨསབྷཱཝཾ པསྶཏི. ཨཙཀྑུཀོཏི ཏཾ པན ཨནྡྷཏྟཾ ན པཙྪཱ སམྦྷཱུཏཾ, པཀཏིཡཱ ཨེཝ ཨཝིཛྫམཱནཙཀྑུཀོཏི ཏམེཝ ཨནྡྷཏྟཾ ཝིསེསེཏི. ཧཏནེཏྟོཏི ནཡནཊྛེན ནེཏྟནྟི སངྑཾ གཏཱཡ པཉྙཱཡ ཨབྷཱཝཏོཡེཝ ཝིནཊྛནེཏྟཀོ. སམཝིསམཾ དསྶེནྟཾ ཨཏྟབྷཱཝཾ ནེཏཱིཏི ནེཏྟནྟི ཧི ཝུཏྟཾ. པཉྙཱཡ སུགཏིཉྩ ཨགཏིཉྩ ནཡཏི. ཧཏནེཏྟཏྟཱཡེཝསྶ ནེཏུཨབྷཱཝཾ དསྶེནྟོ ཨཔརིཎཱཡཀོཏི ཨཱཧ, ཨཝིཛྫམཱནནེཏྟཀོཏི ཨཏྠོ. ཨཉྙོཔིསྶ ནེཏཱ ན ཝིཛྫཏཱིཏི ཝུཏྟཾ ཧོཏི. ཝིཔཐཔཀྑནྡོཏི ཝིཔརཱིཏོ, ཝིསམོ ཝཱ པཐོ ཝིཔཐོ, ཏཾ ཝིཔཐཾ པཀྑནྡོ པཝིཊྛོ པཊིཔནྣོཏི ཝིཔཐཔཀྑནྡོ, མིཙྪཱཔཐསངྑཱཏཾ མིཙྪཱདིཊྛིཾ པཊིཔནྣོཏི ཨཏྠོ. ཨཉྫསཱཔརདྡྷོཏི ཨཉྫསེ ཨུཛུམགྒསྨིཾ མཛ྄ཛྷིམཔཊིཔདཱཡ ཨཔརདྡྷོ ཝིརདྡྷོ. ཨརིཡཔཐཾ ཨཱནེཏཱཏི ཨརིཡཾ ཨཊྛངྒིཀཾ མགྒཾ ཨུཔནེཏཱ པཊིཔཱདཡིཏཱ. མཧོགྷཔཀྑནྡོཏི ཡསྶ སཾཝིཛྫནྟི, ཏཾ ཝཊྚསྨིཾ ཨོཧནནྟི ཨོསཱིདཱཔེནྟཱིཏི ཨོགྷཱ, པཀཏིཨོགྷཏོ མཧནྟཱ ཨོགྷཱཏི མཧོགྷཱ. ཏེ ཀཱམོགྷོ བྷཝོགྷོ དིཊྛོགྷོ ཨཝིཛྫོགྷོཏི ཙཏུཔྤབྷེདཱ. ཏེ མཧོགྷེ པཀྑནྡོ པཝིཊྛོཏི མཧོགྷཔཀྑནྡོ, སཾསཱརསངྑཱཏཾ མཧོགྷཾ ཝཱ པཀྑནྡོཏི.

༡༡༨. ཨིདཱནི ¶ ཨེཀུཏྟརིཀནཡོ. ཏཏྠ དྭཱིཧི དིཊྛིགཏེཧཱིཏི སསྶཏུཙྪེདདིཊྛཱིཧི. ཏཏྠ དིཊྛིཡེཝ དིཊྛིགཏཾ ‘‘གཱུཐགཏཾ མུཏྟགཏ’’ནྟིཨཱདཱིནི (ཨ. ནི. ༩.༡༡) ཝིཡ. གནྟབྦཱབྷཱཝཏོ ཝཱ དིཊྛིཡཱ གཏམཏྟམེཝེཏནྟི དིཊྛིགཏཾ, དིཊྛཱིསུ གཏཾ ཨིདཾ དསྶནཾ དྭཱསཊྛིདིཊྛིཨནྟོགདྷཏྟཱཏིཔི དིཊྛིགཏཾ. དྭཱསཊྛིཏེསཊྛིདིཊྛིཡོཔི ཧི སསྶཏདིཊྛི ཨུཙྪེདདིཊྛཱིཏི དྭེཝ དིཊྛིཡོ ཧོནྟི. ཏསྨཱ སངྑེཔེན སབྦཱ དིཊྛིཡོ ཨནྟོ ཀརོནྟོ ‘‘དྭཱིཧི དིཊྛིགཏེཧཱི’’ཏི ཝུཏྟཾ ¶ . པརིཡུཊྛིཏོཏི པརིཡུཊྛཱནཾ པཏྟོ སམུདཱཙཱརཾ པཏྟོ, ཨུཔྤཛྫིཏུཾ ཨཔྤདཱནེན ཀུསལཙཱརསྶ གཧཎཾ ¶ པཏྟོཏི ཨཏྠོ. ཝུཏྟཉྷེཏཾ བྷགཝཏཱ – ‘‘དྭཱིཧི, བྷིཀྑཝེ, དིཊྛིགཏེཧི པརིཡུཊྛིཏཱ དེཝམནུསྶཱ ཨོལཱིཡནྟི ཨེཀེ, ཨཏིདྷཱཝནྟི ཨེཀེ, ཙཀྑུམནྟོ ཙ པསྶནྟཱི’’ཏིཨཱདི (ཨིཏིཝུ. ༤༩).

ཏཱིཧི དུཙྩརིཏེཧཱིཏི ཏིཝིདྷཀཱཡདུཙྩརིཏེན ཙཏུབྦིདྷཝཙཱིདུཙྩརིཏེན ཏིཝིདྷམནོདུཙྩརིཏེན. ཝིཔྤཊིཔནྣོཏི ཝིརཱུཔཾ པཊིཔནྣོ, མིཙྪཱཔཊིཔནྣོཏི ཨཏྠོ. ཡོགེཧི ཡུཏྟོཏི ཝཊྚསྨིཾ ཡོཛེནྟཱིཏི ཡོགཱ, ཨཱིཏིཨཏྠེན ཝཱ ཡོགཱ, ཏེཧི ཡོགེཧི ཡུཏྟོ སམཔྤིཏོ. ཙཏུཡོགཡོཛིཏོཏི ཀཱམཡོགོ, བྷཝཡོགོ, དིཊྛིཡོགོ, ཨཝིཛྫཱཡོགོཏི ཨིམེཧི ཙཏཱུཧི ཡོགེཧི སཀཊསྨིཾ ཡོགོ ཝིཡ ཝཊྚསྨིཾ ཡོཛིཏོ. པཉྩཀཱམགུཎིཀོ རཱགོ ཀཱམཡོགོ. རཱུཔཱརཱུཔབྷཝེསུ ཚནྡརཱགོ, ཛྷཱནནིཀནྟི ཙ, སསྶཏདིཊྛིསཧཛཱཏོ རཱགོ བྷཝཝསེན པཏྠནཱ བྷཝཡོགོ. དྭཱསཊྛི དིཊྛིཡོ དིཊྛིཡོགོ. ཨཊྛསུ ཋཱནེསུ ཨཉྙཱཎཾ ཨཝིཛྫཱཡོགོ. ཏེ ཨེཝ ཙཏྟཱརོ བལཝབྷཱུཏཱ ཨོགྷཱ, དུབྦལབྷཱུཏཱ ཡོགཱ.

ཙཏཱུཧི གནྠེཧཱིཏི ཡསྶ སཾཝིཛྫནྟི, ཏཾ ཙུཏིཔཊིསནྡྷིཝསེན ཝཊྚསྨིཾ གནྠེནྟི གྷཊེནྟཱིཏི གནྠཱ. ཏེ ཨབྷིཛ྄ཛྷཱ ཀཱཡགནྠོ, བྱཱཔཱདོ ཀཱཡགནྠོ, སཱིལབྦཏཔརཱམཱསོ ཀཱཡགནྠོ, ཨིདཾསཙྩཱབྷིནིཝེསོ ཀཱཡགནྠོཏི ཙཏུཔྤབྷེདཱ. ཨབྷིཛ྄ཛྷཱཡནྟི ཨེཏཱཡ, སཡཾ ཝཱ ཨབྷིཛ྄ཛྷཱཡཏི, ཨབྷིཛ྄ཛྷཱཡནམཏྟམེཝ ཝཱ ཨེསཱཏི ཨབྷིཛ྄ཛྷཱ, ལོབྷོཡེཝ. ནཱམཀཱཡཾ གནྠེཏི ཙུཏིཔཊིསནྡྷིཝསེན ཝཊྚསྨིཾ གྷཊེཏཱིཏི ཀཱཡགནྠོ. བྱཱཔཛྫཏི ཏེན ཙིཏྟཾ པཱུཏིབྷཱཝཾ གཙྪཏི, བྱཱཔཱདཡཏི ཝཱ ཝིནཡཱཙཱརརཱུཔསམྤཏྟིཧིཏསུཁཱདཱིནཱིཏི བྱཱཔཱདོ. ཨིཏོ བཧིདྡྷཱ སམཎབྲཱཧྨཎཱནཾ སཱིལེན སུདྡྷི ཝཏེན སུདྡྷི སཱིལཝཏེན སུདྡྷཱིཏི པརཱམསནཾ སཱིལབྦཏཔརཱམཱསོ. སབྦཉྙུབྷཱསིཏམྤི པཊིཀྑིཔིཏྭཱ ‘‘སསྶཏོ ལོཀོ ¶ , ཨིདམེཝ སཙྩཾ མོགྷམཉྙ’’ནྟིཨཱདིནཱ ཨཱཀཱརེན ཨབྷིནིཝིསཏཱིཏི ཨིདཾསཙྩཱབྷིནིཝེསོ. ཏེཧི ཙཏཱུཧི གནྠེཧི གནྠིཏོ, བདྡྷོཏི ཨཏྠོ.

ཙཏཱུཧི ཨུཔཱདཱནེཧཱིཏི བྷུསཾ ཨཱདིཡནྟི དལ༹ྷགྒཱཧཾ གཎྷནྟཱིཏི ཨུཔཱདཱནཱ. ཏེ ཀཱམུཔཱདཱནཾ དིཊྛུཔཱདཱནཾ སཱིལབྦཏུཔཱདཱནཾ ཨཏྟཝཱདུཔཱདཱནནྟི ཙཏུཔྤབྷེདཱ. ཝཏྠུསངྑཱཏཾ ཀཱམཾ ཨུཔཱདིཡཏཱིཏི ཀཱམུཔཱདཱནཾ, ཀཱམོ ཙ སོ ཨུཔཱདཱནཉྩཱཏིཔི ¶ ཀཱམུཔཱདཱནཾ. དིཊྛི ཙ སཱ ཨུཔཱདཱནཉྩཱཏི དིཊྛུཔཱདཱནཾ, དིཊྛིཾ ཨུཔཱདིཡཏཱིཏིཔི དིཊྛུཔཱདཱནཾ. ‘‘སསྶཏོ ཨཏྟཱ ཙ ལོཀོ ཙཱ’’ཏིཨཱདཱིསུ (པཊི. མ. ༡.༡༤༧) ཧི པུརིམདིཊྛིཾ ཨུཏྟརདིཊྛི ཨུཔཱདིཡཏི. སཱིལབྦཏཾ ཨུཔཱདིཡཏཱིཏི སཱིལབྦཏུཔཱདཱནཾ, སཱིལབྦཏཉྩ ཏཾ ཨུཔཱདཱནཉྩཱཏིཔི སཱིལབྦཏུཔཱདཱནཾ. གོསཱིལགོཝཏཱདཱིནི ¶ ཧི ཨེཝཾ ཝིསུདྡྷཱིཏི ཨབྷིནིཝེསཏོ སཡམེཝ ཨུཔཱདཱནཱནི. ཝདནྟི ཨེཏེནཱཏི ཝཱདོ, ཨུཔཱདིཡནྟི ཨེཏེནཱཏི ཨུཔཱདཱནཾ. ཀིཾ ཝདནྟི, ཨུཔཱདིཡནྟི ཝཱ? ཨཏྟཱནཾ. ཨཏྟནོ ཝཱདུཔཱདཱནཾ ཨཏྟཝཱདུཔཱདཱནཾ, ཨཏྟཝཱདམཏྟམེཝ ཝཱ ཨཏྟཱཏི ཨུཔཱདིཡནྟི ཨེཏེནཱཏི ཨཏྟཝཱདུཔཱདཱནཾ. ཋཔེཏྭཱ ཨིམཱ དྭེ དིཊྛིཡོ སབྦཱཔི དིཊྛཱི དིཊྛུཔཱདཱནཾ. ཏེཧི ཙཏཱུཧི ཨུཔཱདཱནེཧི. ཨུཔཱདཱིཡཏཱིཏི བྷུསཾ གཎྷཱིཡཏི. ཨུཔཱདིཡཏཱིཏི ཝཱ པཱཋོ, ལོཀོ ཨུཔཱདཱནེཧི ཏཾ ཏཾ ཨཱརམྨཎཾ བྷུསཾ གཎྷཱཏཱིཏི ཨཏྠོ.

པཉྩགཏིསམཱརུལ༹ྷོཏི སུཀཏདུཀྐཊཀཱརཎེཧི གམྨཏི ཨུཔསངྐམཱིཡཏཱིཏི གཏི, སཧོཀཱསཀཱ ཁནྡྷཱ. ནིརཡོ ཏིརཙྪཱནཡོནི པེཏྟིཝིསཡོ མནུསྶཱ དེཝཱཏི ཨིམཱ པཉྩ གཏིཡོ ཝོཀྐམནབྷཱཝེན བྷུསཾ ཨཱརུལ༹ྷོ. པཉྩཧི ཀཱམགུཎེཧཱིཏི རཱུཔསདྡགནྡྷརསཕོཊྛབྦསངྑཱཏེཧི པཉྩཧི ཝཏྠུཀཱམཀོཊྛཱསེཧི. རཛྫཏཱིཏི ཨཡོནིསོམནསིཀཱརཾ པཊིཙྩ རཱགུཔྤཱདནེན ཏེཧི རཉྫཱིཡཏི, སཱརཏྟོ ཀརཱིཡཏཱིཏི ཨཏྠོ. པཉྩཧི ནཱིཝརཎེཧཱིཏི ཙིཏྟཾ ནཱིཝརནྟི པརིཡོནནྡྷནྟཱིཏི ནཱིཝརཎཱ. ཀཱམཙྪནྡབྱཱཔཱདཐིནམིདྡྷཨུདྡྷཙྩཀུཀྐུཙྩཝིཙིཀིཙྪཱསངྑཱཏེཧི པཉྩཧི ནཱིཝརཎེཧི. ཨོཏྠཊོཏི ཨུཔརིཏོ པིཧིཏོ.

ཚཧི ཝིཝཱདམཱུལེཧཱིཏི ཚཧི ཝིཝཱདསྶ མཱུལེཧི. ཡཐཱཧ –

‘‘ཚཡིམཱནི, བྷིཀྑཝེ, ཝིཝཱདམཱུལཱནི. ཀཏམཱནི ཚ? ཨིདྷ, བྷིཀྑཝེ, བྷིཀྑུ ཀོདྷནོ ཧོཏི ཨུཔནཱཧཱི. ཡོ སོ, བྷིཀྑཝེ, བྷིཀྑུ ཀོདྷནོ ¶ ཧོཏི ཨུཔནཱཧཱི. སོ སཏྠརིཔི ཨགཱརཝོ ཝིཧརཏི ཨཔྤཏིསྶོ, དྷམྨེཔི, སངྒྷེཔི, སིཀྑཱཡཔི ན པརིཔཱུརཀཱརཱི. ཡོ སོ, བྷིཀྑཝེ, བྷིཀྑུ སཏྠརི ཨགཱརཝོ ཝིཧརཏི ཨཔྤཏིསྶོ, དྷམྨེཔི, སངྒྷེཔི, སིཀྑཱཡཔི ན པརིཔཱུརཀཱརཱི, སོ སངྒྷེ ཝིཝཱདཾ ཛནེཏི. ཡོ ཧོཏི ཝིཝཱདོ བཧུཛནཱཧིཏཱཡ བཧུཛནཱསུཁཱཡ བཧུནོ ཛནསྶ ཨནཏྠཱཡ ¶ ཨཧིཏཱཡ དུཀྑཱཡ དེཝམནུསྶཱནཾ. ཨེཝརཱུཔཾ ཙེ ཏུམྷེ, བྷིཀྑཝེ, ཝིཝཱདམཱུལཾ ཨཛ྄ཛྷཏྟཾ ཝཱ བཧིདྡྷཱ ཝཱ སམནུཔསྶེཡྻཱཐ, ཏཏྲ ཏུམྷེ, བྷིཀྑཝེ, ཏསྶེཝ པཱཔཀསྶ ཝིཝཱདམཱུལསྶ པཧཱནཱཡ ཝཱཡམེཡྻཱཐ. ཨེཝརཱུཔཾ ཙེ ཏུམྷེ, བྷིཀྑཝེ, ཝིཝཱདམཱུལཾ ཨཛ྄ཛྷཏྟཾ ཝཱ བཧིདྡྷཱ ཝཱ ན སམནུཔསྶེཡྻཱཐ. ཏཏྲ ཏུམྷེ, བྷིཀྑཝེ, ཏསྶེཝ པཱཔཀསྶ ཝིཝཱདམཱུལསྶ ཨཱཡཏིཾ ཨནཝསྶཝཱཡ པཊིཔཛྫེཡྻཱཐ. ཨེཝམེཏསྶ པཱཔཀསྶ ཝིཝཱདམཱུལསྶ པཧཱནཾ ཧོཏི. ཨེཝམེཏསྶ པཱཔཀསྶ ཝིཝཱདམཱུལསྶ ཨཱཡཏིཾ ཨནཝསྶཝོ ཧོཏི.

‘‘པུན ¶ ཙཔརཾ, བྷིཀྑཝེ, བྷིཀྑུ མཀྑཱི ཧོཏི པལཱ༹སཱི. ཨིསྶུཀཱི ཧོཏི མཙྪརཱི. སཋོ ཧོཏི མཱཡཱཝཱི. པཱཔིཙྪོ ཧོཏི མིཙྪཱདིཊྛི. སནྡིཊྛིཔརཱམཱསཱི ཧོཏི ཨཱདྷཱནགྒཱཧཱི དུཔྤཊིནིསྶགྒཱི. ཡོ སོ, བྷིཀྑཝེ, བྷིཀྑུ སནྡིཊྛིཔརཱམཱསཱི ཧོཏི ཨཱདྷཱནགྒཱཧཱི དུཔྤཊིནིསྶགྒཱི, སོ སཏྠརིཔི…པེ… ཨཱཡཏིཾ ཨནཝསྶཝོ ཧོཏཱི’’ཏི (པརི. ༢༧༢; ཨ. ནི. ༦.༣༦).

ཏཏྠ ཀོདྷནོཏི ཀུཛ྄ཛྷནལཀྑཎེན ཀོདྷེན སམནྣཱགཏོ. ཨུཔནཱཧཱིཏི ཝེརཨཔྤཊིནིསྶཛྫནལཀྑཎེན ཨུཔནཱཧེན སམནྣཱགཏོ. ཨཧིཏཱཡ དུཀྑཱཡ དེཝམནུསྶཱནནྟི དྭིནྣཾ བྷིཀྑཱུནཾ ཝིཝཱདོ ཀཐཾ དེཝམནུསྶཱནཾ ཨཧིཏཱཡ དུཀྑཱཡ སཾཝཏྟཏཱིཏི? ཀོསམྦཀཀྑནྡྷཀེ (མཧཱཝ. ༤༥༡ ཨཱདཡོ) ཝིཡ དྭཱིསུ བྷིཀྑཱུསུ ཝིཝཱདཾ ཨཱཔནྣེསུ ཏསྨིཾ ཝིཧཱརེ ཏེསཾ ཨནྟེཝཱསིཀཱ ཝིཝདནྟི, ཏེསཾ ཨོཝཱདཾ གཎྷནྟོ བྷིཀྑུནིསངྒྷོ ཝིཝདཏི, ཏཏོ ཏེསཾ ཨུཔཊྛཱཀཱཔི ཝིཝདནྟི. ཨཐ མནུསྶཱནཾ ཨཱརཀྑདེཝཏཱ དྭེ ཀོཊྛཱསཱ ཧོནྟི. དྷམྨཝཱདཱིནཾ ཨཱརཀྑདེཝཏཱ དྷམྨཝཱདིནིཡོ ཧོནྟི ཨདྷམྨཝཱདཱིནཾ ཨདྷམྨཝཱདིནིཡོ. ཏཏོ ཨཱརཀྑདེཝཏཱནཾ མིཏྟཱ བྷུམྨཊྛདེཝཏཱ བྷིཛྫནྟི. ཨེཝཾ པརམྤརཱཡ ཡཱཝ བྲཧྨལོཀཱ ཋཔེཏྭཱ ཨརིཡསཱཝཀེ སབྦེ དེཝམནུསྶཱ དྭེ ཀོཊྛཱསཱ ཧོནྟི. དྷམྨཝཱདཱིཧི པན ཨདྷམྨཝཱདིནོཝ ¶ བཧུཏརཱ ཧོནྟི. ཏཏོ ཡཾ བཧུཀེཧི གཧིཏཾ, སབྦཾ ཏཾ སཙྩནྟི དྷམྨཾ ཝིསྶཛྫེཏྭཱ བཧུཏརཱཝ ཨདྷམྨཾ གཎྷནྟི. ཏེ ཨདྷམྨཾ པུརཀྑཏྭཱ ཝིཧརནྟཱ ཨཔཱཡེསུ ནིབྦཏྟནྟི. ཨེཝཾ དྭིནྣཾ བྷིཀྑཱུནཾ ཝིཝཱདོ དེཝམནུསྶཱནཾ ཨཧིཏཱཡ དུཀྑཱཡ ཧོཏི. ཨཛ྄ཛྷཏྟཾ ཝཱཏི ¶ ཏུམྷཱཀཾ ཨབྦྷནྟརཔརིསཱཡ ཝཱ. བཧིདྡྷཱ ཝཱཏི པརེསཾ པརིསཱཡ ཝཱ. མཀྑཱིཏི པརེསཾ གུཎམཀྑཎལཀྑཎེན མཀྑེན སམནྣཱགཏོ. པལཱ༹སཱིཏི ཡུགགྒཱཧལཀྑཎེན པལཱ༹སེན སམནྣཱགཏོ. ཨིསྶུཀཱིཏི པརེསཾ སཀྐཱརཱདིཨིསྶཱཡནལཀྑཎཱཡ ཨིསྶཱཡ སམནྣཱགཏོ. མཙྪརཱིཏི ཨཱཝཱསམཙྪརིཡཱདཱིཧི པཉྩཧི མཙྪརིཡེཧི སམནྣཱགཏོ. སཋོཏི ཀེརཱཊིཀོ. མཱཡཱཝཱིཏི ཀཏཔཱཔཔཊིཙྪཱདཀོ. པཱཔིཙྪོཏི ཨསནྟསམྦྷཱཝནིཙྪཀོ དུསྶཱིལོ. མིཙྪཱདིཊྛཱིཏི ནཏྠིཀཝཱདཱི ཨཧེཏུཀཝཱདཱི ཨཀིརིཡཝཱདཱི. སནྡིཊྛིཔརཱམཱསཱིཏི སཡཾ དིཊྛིམེཝ པརཱམསཏི. ཨཱདྷཱནགྒཱཧཱིཏི དལ༹ྷགྒཱཧཱི. དུཔྤཊིནིསྶགྒཱིཏི ན སཀྐཱ ཧོཏི གཧིཏཾ ཝིསྶཛྫཱཔེཏུཾ. ཁུདྡཀཝཏྠུཝིབྷངྒེ པན ‘‘ཏཏྠ ཀཏམཱནི ཚ ཝིཝཱདམཱུལཱནི? ཀོདྷོ མཀྑོ ཨིསྶཱ སཱཋེཡྻཾ པཱཔིཙྪཏཱ སནྡིཊྛིཔརཱམཱསིཏཱ, ཨིམཱནི ཚ ཝིཝཱདམཱུལཱནཱི’’ཏི (ཝིབྷ. ༩༤༤) པདྷཱནཝསེན ཨེཀེཀོཡེཝ དྷམྨོ ཝུཏྟོ.

ཚཧི ཏཎྷཱཀཱཡེཧཱིཏི ‘‘རཱུཔཏཎྷཱ, སདྡཏཎྷཱ, གནྡྷཏཎྷཱ, རསཏཎྷཱ, ཕོཊྛབྦཏཎྷཱ, དྷམྨཏཎྷཱ’’ཏི (ཝིབྷ. ༩༤༤) ཝུཏྟཱཧི ཚཧི ཏཎྷཱཧི. ཏཏྠ ཡསྨཱ ཨེཀེཀཱཡེཝ ཏཎྷཱ ཨནེཀཝིསཡཏྟཱ ¶ ཨེཀེཀསྨིམྤི ཝིསཡེ པུནཔྤུནཾ ཨུཔྤཏྟིཏོ ཨནེཀཱ ཧོནྟི, ཏསྨཱ སམཱུཧཊྛེན ཀཱཡསདྡེན ཡོཛེཏྭཱ ཏཎྷཱཀཱཡཱཏི ཝུཏྟཾ. ཏཎྷཱཀཱཡཱཏི ཝུཏྟེཔི ཏཎྷཱ ཨེཝ. རཛྫཏཱིཏི སཡཾ ཨཱརམྨཎེ རཛྫཏི, སཱརཏྟོ ཧོཏི.

ཚཧི དིཊྛིགཏེཧཱིཏི སབྦཱསཝསུཏྟེ ཝུཏྟེཧི. ཝུཏྟཉྷི ཏཏྠ –

‘‘ཏསྶ ཨེཝཾ ཨཡོནིསོ མནསིཀརོཏོ ཚནྣཾ དིཊྛཱིནཾ ཨཉྙཏརཱ དིཊྛི ཨུཔྤཛྫཏི. ‘ཨཏྠི མེ ཨཏྟཱ’ཏི ཝཱ ཨསྶ སཙྩཏོ ཐེཏཏོ དིཊྛི ཨུཔྤཛྫཏི, ‘ནཏྠི མེ ཨཏྟཱ’ཏི ཝཱ ཨསྶ སཙྩཏོ ཐེཏཏོ དིཊྛི ཨུཔྤཛྫཏི, ‘ཨཏྟནཱཝ ཨཏྟཱནཾ སཉྫཱནཱམཱི’ཏི ཝཱ ཨསྶ སཙྩཏོ ཐེཏཏོ དིཊྛི ཨུཔྤཛྫཏི, ‘ཨཏྟནཱཝ ཨནཏྟཱནཾ སཉྫཱནཱམཱི’ཏི ཝཱ ཨསྶ སཙྩཏོ ཐེཏཏོ དིཊྛི ཨུཔྤཛྫཏི, ‘ཨནཏྟནཱཝ ཨཏྟཱནཾ སཉྫཱནཱམཱི’ཏི ཝཱ ཨསྶ སཙྩཏོ ཐེཏཏོ དིཊྛི ཨུཔྤཛྫཏི. ཨཐ ཝཱ པནསྶ ཨེཝཾ དིཊྛི ཧོཏི ‘ཡོ མེ ཨཡཾ ཨཏྟཱ ¶ ཝདོ ཝེདེཡྻོ ¶ ཏཏྲ ཏཏྲ ཀལྱཱཎཔཱཔཀཱནཾ ཀམྨཱནཾ ཝིཔཱཀཾ པཊིསཾཝེདེཏི, སོ ཙ ཁོ པན མེ ཨཡཾ ཨཏྟཱ ནིཙྩོ དྷུཝོ སསྶཏོ ཨཝིཔརིཎཱམདྷམྨོ སསྶཏིསམཾ ཏཐེཝ ཋསྶཏཱི’’’ཏི (མ. ནི. ༡.༡༩).

ཏཏྠ ཨཏྠི མེ ཨཏྟཱཏི སསྶཏདིཊྛི སབྦཀཱལེསུ ཨཏྟནོ ཨཏྠིཏཾ གཎྷཱཏི. སཙྩཏོ ཐེཏཏོཏི བྷཱུཏཏོ ཙ ཐིརཏོ ཙ, ‘‘ཨིདཾ སཙྩ’’ནྟི སུཊྛུ དལ༹ྷབྷཱཝེནཱཏི ཝུཏྟཾ ཧོཏི. ནཏྠི མེ ཨཏྟཱཏི ཨུཙྪེདདིཊྛི སཏོ སཏྟསྶ ཏཏྠ ཏཏྠ ཝིབྷཝགྒཧཎཏོ. ཨཐ ཝཱ པུརིམཱཔི ཏཱིསུ ཀཱལེསུ ཨཏྠཱིཏི གཧཎཏོ སསྶཏདིཊྛི, པཙྩུཔྤནྣམེཝ ཨཏྠཱིཏི གཎྷནྟཱི ཨུཙྪེདདིཊྛི, པཙྪིམཱཔི ཨཏཱིཏཱནཱགཏེསུ ནཏྠཱིཏི གཧཎཏོ ‘‘བྷསྶནྟཱ ཨཱཧུཏིཡོ’’ཏི གཧིཏདིཊྛིགཏིཀཱནཾ ཝིཡ ཨུཙྪེདདིཊྛི. ཨཏཱིཏེ ཨེཝ ནཏྠཱིཏི གཎྷནྟཱི ཨདྷིཙྩསམུཔྤནྣཀསྶ ཝིཡ སསྶཏདིཊྛི. ཨཏྟནཱཝ ཨཏྟཱནཾ སཉྫཱནཱམཱིཏི སཉྙཱཀྑནྡྷསཱིསེན ཁནྡྷེ ཨཏྟཱཏི གཧེཏྭཱ སཉྙཱཡ ཨཝསེསཀྑནྡྷེ སཉྫཱནཏོ ཨིམིནཱ ཨཏྟནཱ ཨིམཾ ཨཏྟཱནཾ སཉྫཱནཱམཱིཏི ཧོཏི. ཨཏྟནཱཝ ཨནཏྟཱནནྟི སཉྙཱཀྑནྡྷཾཡེཝ ཨཏྟཱཏི གཧེཏྭཱ, ཨིཏརེ ཙཏྟཱརོཔི ཨནཏྟཱཏི གཧེཏྭཱ སཉྙཱཡ ཏེ སཉྫཱནཏོ ཨེཝཾ ཧོཏི. ཨནཏྟནཱཝ ཨཏྟཱནནྟི སཉྙཱཀྑནྡྷཾ ཨནཏྟཱཏི གཧེཏྭཱ, ཨིཏརེ ཙཏྟཱརོཔི ཨཏྟཱཏི གཧེཏྭཱ སཉྙཱཡ ཏེ སཉྫཱནཏོ ཨེཝཾ ཧོཏི. སབྦཱཔི སསྶཏུཙྪེདདིཊྛིཡོཝ. ཝདོ ཝེདེཡྻོཏིཨཱདཡོ པན སསྶཏདིཊྛིཡཱ ཨེཝ ཨབྷིནིཝེསཱཀཱརཱ. ཏཏྠ ཝདཏཱིཏི ཝདོ, ཝཙཱིཀམྨསྶ ཀཱརཀོཏི ཝུཏྟཾ ཧོཏི. ཝེདཡཏཱིཏི ཝེདེཡྻོ, ཛཱནཱཏི ཨནུབྷཝཏི ཙཱཏི ཝུཏྟཾ ཧོཏི. ཀིཾ ཝེདེཏཱིཏི? ཏཏྲ ཏཏྲ ཀལྱཱཎཔཱཔཀཱནཾ ཀམྨཱནཾ ཝིཔཱཀཾ པཊིསཾཝེདེཏི ¶ . ཏཏྲ ཏཏྲཱཏི ཏེསུ ཏེསུ ཡོནིགཏིཋིཏིནིཝཱསནིཀཱཡེསུ ཨཱརམྨཎེསུ ཝཱ. ནིཙྩོཏི ཨུཔྤཱདཝཡརཧིཏོ. དྷུཝོཏི ཐིརོ སཱརབྷཱུཏོ. སསྶཏོཏི སབྦཀཱལིཀོ. ཨཝིཔརིཎཱམདྷམྨོཏི ཨཏྟནོ པཀཏིབྷཱཝཾ ཨཝིཛཧནདྷམྨོ, ཀཀཎྚཀོ ཝིཡ ནཱནཔྤཀཱརཏཾ ནཱཔཛྫཏི. སསྶཏིསམནྟི ཙནྡསཱུརིཡསམུདྡམཧཱཔཐཝཱིཔབྦཏཱ ལོཀཝོཧཱརེན སསྶཏིཡོཏི ཝུཙྩནྟི. སསྶཏཱིཧི སམཾ སསྶཏིསམཾ. ཡཱཝ སསྶཏིཡོ ཏིཊྛནྟི, ཏཱཝ ཏཐེཝ ཋསྶཏཱིཏི གཎྷཏོ ཨེཝཾ དིཊྛི ཧོཏི.

ཁུདྡཀཝཏྠུཝིབྷངྒེ ¶ ¶ པན ‘‘ཏཏྲ ཏཏྲ དཱིགྷརཏྟཾ ཀལྱཱཎཔཱཔཀཱནཾ ཀམྨཱནཾ ཝིཔཱཀཾ པཙྩནུབྷོཏི, ན སོ ཛཱཏོ ནཱཧོསི, ན སོ ཛཱཏོ ན བྷཝིསྶཏི, ནིཙྩོ དྷུཝོ སསྶཏོ ཨཝིཔརིཎཱམདྷམྨོཏི ཝཱ པནསྶ སཙྩཏོ ཐེཏཏོ དིཊྛི ཨུཔྤཛྫཏཱི’’ཏི (ཝིབྷ. ༩༤༨) ཚ དིཊྛཱི ཨེཝཾ ཝིསེསེཏྭཱ ཝུཏྟཱ.

ཏཏྠ ན སོ ཛཱཏོ ནཱཧོསཱིཏི སོ ཨཏྟཱ ཨཛཱཏིདྷམྨཏོ ན ཛཱཏོ ནཱམ, སདཱ ཝིཛྫམཱནོཡེཝཱཏི ཨཏྠོ. ཏེནེཝ ཨཏཱིཏེ ནཱཧོསི, ཨནཱགཏེ ན བྷཝིསྶཏི. ཡོ ཧི ཛཱཏོ, སོ ཨཧོསི. ཡོ ཙ ཛཱཡིསྶཏི, སོ བྷཝིསྶཏཱིཏི ཝུཙྩཏི. ཨཐ ཝཱ ན སོ ཛཱཏོ ནཱཧོསཱིཏི སོ སདཱ ཝིཛྫམཱནཏྟཱ ཨཏཱིཏེཔི ན ཛཱཏུ ན ཨཧོསི, ཨནཱགཏེཔི ན ཛཱཏུ ན བྷཝིསྶཏི. ཨནུསཡཱ ཝུཏྟཏྠཱ.

སཏྟཧི སཉྙོཛནེཧཱིཏི སཏྟཀནིཔཱཏེ ཝུཏྟེཧི. ཝུཏྟཉྷི ཏཏྠ –

‘‘སཏྟིམཱནི, བྷིཀྑཝེ, སཾཡོཛནཱནི. ཀཏམཱནི སཏྟ? ཨནུནཡསཾཡོཛནཾ, པཊིགྷསཾཡོཛནཾ, དིཊྛིསཾཡོཛནཾ, ཝིཙིཀིཙྪཱསཾཡོཛནཾ, མཱནསཾཡོཛནཾ, བྷཝརཱགསཾཡོཛནཾ, ཨཝིཛྫཱསཾཡོཛནཾ. ཨིམཱནི ཁོ, བྷིཀྑཝེ, སཏྟ སཾཡོཛནཱནཱི’’ཏི (ཨ. ནི. ༧.༨).

ཏཏྠ ཨནུནཡསཾཡོཛནནྟི ཀཱམརཱགསཾཡོཛནཾ. སབྦཱནེཝེཏཱནི བནྡྷནཊྛེན སཾཡོཛནཱནི.

སཏྟཧི མཱནེཧཱིཏི ཁུདྡཀཝཏྠུཝིབྷངྒེ ཝུཏྟེཧི. ཝུཏྟཉྷི ཏཏྠ –

‘‘མཱནོ ¶ , ཨཏིམཱནོ, མཱནཱཏིམཱནོ, ཨོམཱནོ, ཨདྷིམཱནོ, ཨསྨིམཱནོ, མིཙྪཱམཱནོ’’ཏི (ཝིབྷ. ༩༥༠).

ཏཏྠ མཱནོཏི སེཡྻཱདིཝསེན པུགྒལཾ ཨནཱམསིཏྭཱ ཛཱཏིཨཱདཱིསུ ཝཏྠུཝསེནེཝ ཨུནྣཏི. ཨཏིམཱནོཏི ཛཱཏིཨཱདཱིཧི ‘‘མཡཱ སདིསོ ནཏྠཱི’’ཏི ཨཏིཀྐམིཏྭཱ ཨུནྣཏི. མཱནཱཏིམཱནོཏི ‘‘ཨཡཾ པུབྦེ མཡཱ སདིསོ, ཨིདཱནི ཨཧཾ སེཊྛོ, ཨཡཾ ཧཱིནཏརོ’’ཏི ཨུཔྤནྣམཱནོ. ཨོམཱནོཏི ཛཱཏིཨཱདཱིཧི ཨཏྟཱནཾ ཧེཊྛཱ ཀཏྭཱ པཝཏྟམཱནོ, ཧཱིནོཧམསྨཱིཏི མཱནོཡེཝ. ཨདྷིམཱནོཏི ཨནདྷིགཏེཡེཝ ཙཏུསཙྩདྷམྨེ ཨདྷིགཏོཏི མཱནོ. ཨཡཾ པན ཨདྷིམཱནོ པརིསུདྡྷསཱིལསྶ ཀམྨཊྛཱནེ ཨཔྤམཏྟསྶ ནཱམརཱུཔཾ ཝཝཏྠཔེཏྭཱ པཙྩཡཔརིགྒཧེན ཝིཏིཎྞཀངྑསྶ ཏིལཀྑཎཾ ¶ ཨཱརོཔེཏྭཱ སངྑཱརེ སམྨསནྟསྶ ཨཱརདྡྷཝིཔསྶཀསྶ ¶ པུཐུཛྫནསྶ ཨུཔྤཛྫཏི, ན ཨཉྙེསཾ. ཨསྨིམཱནོཏི རཱུཔཱདཱིསུ ཁནྡྷེསུ ཨསྨཱིཏི མཱནོ, ‘‘ཨཧཾ རཱུཔ’’ནྟིཨཱདིཝསེན ཨུཔྤནྣམཱནོཏི ཝུཏྟཾ ཧོཏི. མིཙྪཱམཱནོཏི པཱཔཀེན ཀམྨཱཡཏནཱདིནཱ ཨུཔྤནྣམཱནོ.

ལོཀདྷམྨཱ ཝུཏྟཏྠཱ. སམྤརིཝཏྟཏཱིཏི ལོཀདྷམྨེཧི ཧེཏུབྷཱུཏེཧི ལཱབྷཱདཱིསུ ཙཏཱུསུ ཨནུརོདྷཝསེན, ཨལཱབྷཱདཱིསུ ཙཏཱུསུ པཊིཝིརོདྷཝསེན བྷུསཾ ནིཝཏྟཏི, པཀཏིབྷཱཝཾ ཛཧཱཏཱིཏི ཨཏྠོ. མིཙྪཏྟཱཔི ཝུཏྟཏྠཱ. ནིཡྻཱཏོཏི གཏོ པཀྑནྡོ, ཨབྷིབྷཱུཏོཏི ཨཏྠོ.

ཨཊྛཧི པུརིསདོསེཧཱིཏི ཨཊྛཀནིཔཱཏེ ཨུཔམཱཧི སཧ, ཁུདྡཀཝཏྠུཝིབྷངྒེ ཨུཔམཾ ཝིནཱ ཝུཏྟེཧི. ཝུཏྟཉྷི ཏཏྠ –

‘‘ཀཏམེ ཨཊྛ པུརིསདོསཱ? ཨིདྷ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ‘ན སརཱམི ན སརཱམཱི’ཏི ཨསྶཏིཡཱཝ ནིབྦེཋེཏི. ཨཡཾ པཋམོ པུརིསདོསོ.

‘‘པུན ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ཙོདཀཾཡེཝ པཊིཔྥརཏི ‘ཀིཾ ནུ ཁོ ཏུཡ྄ཧཾ བཱལསྶ ཨབྱཏྟསྶ བྷཎིཏེན, ཏྭམྤི ནཱམ མཾ བྷཎིཏབྦཾ མཉྙསཱི’ཏི? ཨཡཾ དུཏིཡོ པུརིསདོསོ.

‘‘པུན ¶ ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ཙོདཀཾཡེཝ པཙྩཱརོཔེཏི ‘ཏྭམྤི ཁོསི ཨིཏྠནྣཱམཾ ཨཱཔཏྟིཾ ཨཱཔནྣོ, ཏྭཾ ཏཱཝ པཋམཾ པཊིཀརོཧཱི’ཏི. ཨཡཾ ཏཏིཡོ པུརིསདོསོ.

‘‘པུན ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ཨཉྙེནཉྙཾ པཊིཙརཏི, བཧིདྡྷཱ ཀཐཾ ཨཔནཱམེཏི, ཀོཔཉྩ དོསཉྩ ཨཔྤཙྩཡཉྩ པཱཏུཀརོཏི. ཨཡཾ ཙཏུཏྠོ པུརིསདོསོ.

‘‘པུན ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ སངྒྷམཛ྄ཛྷེ བཱཧཱཝིཀྑེཔཀཾ བྷཎཏི. ཨཡཾ པཉྩམོ པུརིསདོསོ.

‘‘པུན ¶ ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ཨནཱདིཡིཏྭཱ སངྒྷཾ ཨནཱདིཡིཏྭཱ ཙོདཀཾ སཱཔཏྟིཀོཝ ཡེན ཀཱམཾ པཀྐམཏི. ཨཡཾ ཚཊྛོ པུརིསདོསོ.

‘‘པུན ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ‘ནེཝཱཧཾ ཨཱཔནྣོམྷི, ན པནཱཧཾ ཨནཱཔནྣོམྷཱི’ཏི སོ ཏུཎྷཱིབྷཱུཏོ སངྒྷཾ ཝིཧེསེཏི. ཨཡཾ སཏྟམོ པུརིསདོསོ.

‘‘པུན ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ཨེཝམཱཧ – ‘ཀིཾ ནུ ཁོ ཏུམྷེ ཨཱཡསྨནྟོ ཨཏིབཱལ༹ྷཾ མཡི བྱཱཝཊཱ? ཨིདཱནཱཧཾ ¶ སིཀྑཾ པཙྩཀྑཱཡ ཧཱིནཱཡཱཝཏྟིསྶཱམཱི’ཏི. སོ སིཀྑཾ པཙྩཀྑཱཡ ཧཱིནཱཡཱཝཏྟིཏྭཱ ཨེཝམཱཧ ‘ཨིདཱནི ཁོ ཏུམྷེ ཨཱཡསྨནྟོ ཨཏྟམནཱ ཧོཐཱ’ཏི. ཨཡཾ ཨཊྛམོ པུརིསདོསོ. ཨིམེ ཨཊྛ པུརིསདོསཱ’’ཏི (ཝིབྷ. ༩༥༧; ཨ. ནི. ༨.༡༤).

ཏཏྠ པུརིསདོསཱཏི པུརིསཱནཾ དོསཱ, ཏེ པན པུརིསསནྟཱནཾ དཱུསེནྟཱིཏི དོསཱ. ན སརཱམི ན སརཱམཱིཏི ‘‘མཡཱ ཨེཏསྶ ཀམྨསྶ ཀཏཊྛཱནཾ ནསྶརཱམི ན སལླཀྑེམཱི’’ཏི ཨེཝཾ ཨསྶཏིབྷཱཝེན ནིབྦེཋེཏི མོཙེཏི. ཙོདཀཾཡེཝ པཊིཔྥརཏཱིཏི པཊིཝིརུདྡྷོ ཧུཏྭཱ ཕརཏི, པཊིཨཱཎིབྷཱཝེན ¶ ཏིཊྛཏི. ཀིཾ ནུ ཁོ ཏུཡ྄ཧནྟི ཏུཡ྄ཧཾ བཱལསྶ ཨབྱཏྟསྶ བྷཎིཏེན ནཱམ ཀིཾ, ཡོ ཏྭཾ ནེཝ ཝཏྠུཾ, ན ཨཱཔཏྟིཾ, ན ཙོདནཾ ཛཱནཱསཱིཏི དཱིཔེཏི. ཏྭམྤི ནཱམ ཨེཝཾ ཀིཉྩི ཨཛཱནནྟོ བྷཎིཏབྦཾ མཉྙསཱིཏི ཨཛ྄ཛྷོཏྠརཏི. པཙྩཱརོཔེཏཱིཏི ‘‘ཏྭམྤི ཁོསཱི’’ཏིཨཱདཱིནི ཝདནྟོ པཏིཨཱརོཔེཏི. པཊིཀརོཧཱིཏི དེསནཱགཱམིནིཾ དེསེཧི, ཝུཊྛཱནགཱམིནིཏོ ཝུཊྛཱཧི, ཏཏོ སུདྡྷནྟེ པཏིཊྛིཏོ ཨཉྙཾ ཙོདེསྶསཱིཏི དཱིཔེཏི. ཨཉྙེནཉྙཾ པཊིཙརཏཱིཏི ཨཉྙེན ཀཱརཎེན, ཝཙནེན ཝཱ ཨཉྙཾ ཀཱརཎཾ, ཝཙནཾ ཝཱ པཊིཙྪཱདེཏི. ‘‘ཨཱཔཏྟིཾ ཨཱཔནྣོསཱི’’ཏི ཝུཏྟོ ‘‘ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣོ, ཀཐཾ ཨཱཔནྣོ, ཀཾ བྷཎཐ, ཀིཾ བྷཎཐཱ’’ཏི བྷཎཏི. ‘‘ཨེཝརཱུཔཾ ཀིཉྩི ཏཡཱ དིཊྛ’’ནྟི ཝུཏྟེ ¶ ‘‘ན སུཎཱམཱི’’ཏི སོཏཾ ཨུཔནེཏི. བཧིདྡྷཱ ཀཐཾ ཨཔནཱམེཏཱིཏི ‘‘ཨིཏྠནྣཱམཾ ཨཱཔཏྟིཾ ཨཱཔནྣོསཱི’’ཏི པུཊྛོ ‘‘པཱཊལིཔུཏྟཾ གཏོམྷཱི’’ཏི ཝཏྭཱ པུན ‘‘ན ཏཝ པཱཊལིཔུཏྟགམནཾ པུཙྪཱམཱ’’ཏི ཝུཏྟེ ཏཏོ རཱཛགཧཾ གཏོམྷཱིཏི. ‘‘རཱཛགཧཾ ཝཱ ཡཱཧི བྲཱཧྨཎགེཧཾ ཝཱ, ཨཱཔཏྟིཾ ཨཱཔནྣོསཱི’’ཏི. ‘‘ཏཏྠ མེ སཱུཀརམཾསཾ ལདྡྷ’’ནྟིཨཱདཱིནི ཝདནྟོ ཀཐཾ བཧིདྡྷཱ ཝིཀྑིཔཏི. ཀོཔནྟི ཀུཔིཏབྷཱཝཾ, དོསནྟི དུཊྛབྷཱཝཾ. ཨུབྷཡམྤེཏཾ ཀོདྷསྶེཝ ནཱམཾ. ཨཔྤཙྩཡནྟི ཨསནྟུཊྛཱཀཱརཾ, དོམནསྶསྶེཏཾ ནཱམཾ. པཱཏུཀརོཏཱིཏི དསྶེཏི པཀཱསེཏི. བཱཧཱཝིཀྑེཔཀཾ བྷཎཏཱིཏི བཱཧཾ ཝིཀྑིཔིཏྭཱ ཝིཀྑིཔིཏྭཱ ཨལཛྫིཝཙནཾ ཝདཏི. ཨནཱདིཡིཏྭཱཏི ཙིཏྟཱིཀཱརེན ཨགྒཧེཏྭཱ ཨཝཛཱནིཏྭཱ, ཨནཱདརོ ཧུཏྭཱཏི ཨཏྠོ. ཝིཧེསེཏཱིཏི ¶ ཝིཧེཋེཏི བཱདྷཏི. ཨཏིབཱལ༹ྷནྟི ཨཏིདལ༹ྷཾ ཨཏིཔྤམཱཎཾ. མཡི བྱཱཝཊཱཏི མཡི བྱཱཔཱརཾ ཨཱཔནྣཱ. ཧཱིནཱཡཱཝཏྟིཏྭཱཏི ཧཱིནསྶ གིཧིབྷཱཝསྶ ཨཏྠཱཡ ཨཱཝཏྟིཏྭཱ, གིཧཱི ཧུཏྭཱཏི ཨཏྠོ. ཨཏྟམནཱ ཧོཐཱཏི ཏུཊྛཙིཏྟཱ ཧོཐ, ‘‘མཡཱ ལབྷིཏབྦཾ ལབྷཐ, མཡཱ ཝསིཏབྦཊྛཱནེ ཝསཐ, ཕཱསུཝིཧཱརོ ཝོ མཡཱ ཀཏོ’’ཏི ཨདྷིཔྤཱཡེན ཝདཏི. དུསྶཏཱིཏི དུཊྛོ ཧོཏི.

ནཝཧི ཨཱགྷཱཏཝཏྠཱུཧཱིཏི སཏྟེསུ ཨུཔྤཏྟིཝསེནེཝ ཀཐིཏཱནི. ཡཐཱཧ –

‘‘ནཝཡིམཱནི, བྷིཀྑཝེ, ཨཱགྷཱཏཝཏྠཱུནི. ཀཏམཱནི ནཝ? ‘ཨནཏྠཾ མེ ཨཙརཱི’ཏི ཨཱགྷཱཏཾ བནྡྷཏི, ‘ཨནཏྠཾ མེ ཙརཏཱི’ཏི ཨཱགྷཱཏཾ བནྡྷཏི, ‘ཨནཏྠཾ མེ ཙརིསྶཏཱི’ཏི ཨཱགྷཱཏཾ བནྡྷཏི, ‘པིཡསྶ མེ མནཱཔསྶ ཨནཏྠཾ ཨཙརི, ཨནཏྠཾ ཙརཏི, ཨནཏྠཾ ཙརིསྶཏཱི’ཏི ཨཱགྷཱཏཾ བནྡྷཏི, ‘ཨཔྤིཡསྶ མེ ཨམནཱཔསྶ ཨཏྠཾ ཨཙརི, ཨཏྠཾ ཙརཏི, ཨཏྠཾ ཙརིསྶཏཱི’ཏི ཨཱགྷཱཏཾ བནྡྷཏི. ཨིམཱནི ཁོ, བྷིཀྑཝེ, ནཝ ཨཱགྷཱཏཝཏྠཱུནཱི’’ཏི (ཨ. ནི. ༩.༢༩).

ཏཏྠ ¶ ཨཱགྷཱཏཝཏྠཱུནཱིཏི ཨཱགྷཱཏཀཱརཎཱནི. ཨཱགྷཱཏནྟི ཙེཏྠ ཀོཔོ, སོཡེཝ ཨུཔརཱུཔརི ཀོཔསྶ ཝཏྠུཏྟཱ ཨཱགྷཱཏཝཏྠུ. ཨཱགྷཱཏཾ བནྡྷཏཱིཏི ཀོཔཾ བནྡྷཏི ཀརོཏི ཨུཔྤཱདེཏི. ‘‘ཨཏྠཾ མེ ནཱཙརི, ན ཙརཏི, ན ཙརིསྶཏི. པིཡསྶ མེ མནཱཔསྶ ཨཏྠཾ ནཱཙརི, ན ཙརཏི, ན ཙརིསྶཏི. ཨཔྤིཡསྶ མེ ཨམནཱཔསྶ ཨནཏྠཾ ནཱཙརི, ན ཙརཏི, ན ¶ ཙརིསྶཏཱི’’ཏི (མཧཱནི. ༨༥; ཝིབྷ. ༩༦༠; དྷ. ས. ༡༠༦༦) ནིདྡེསེ ཝུཏྟཱནི ཨཔརཱནིཔི ནཝ ཨཱགྷཱཏཝཏྠཱུནི ཨིམེཧེཝ ནཝཧི སངྒཧིཏཱནི. ཨཱགྷཱཏིཏོཏི གྷཊྚིཏོ.

ནཝཝིདྷམཱནེཧཱིཏི ཀཏམེ ནཝཝིདྷམཱནཱ? སེཡྻསྶ སེཡྻོཧམསྨཱིཏི མཱནོ, སེཡྻསྶ སདིསོཧམསྨཱིཏི མཱནོ, སེཡྻསྶ ཧཱིནོཧམསྨཱིཏི མཱནོ. སདིསསྶ སེཡྻོཧམསྨཱིཏི མཱནོ, སདིསསྶ སདིསོཧམསྨཱིཏི མཱནོ, སདིསསྶ ཧཱིནོཧམསྨཱིཏི མཱནོ. ཧཱིནསྶ སེཡྻོཧམསྨཱིཏི མཱནོ, ཧཱིནསྶ སདིསོཧམསྨཱིཏི མཱནོ, ཧཱིནསྶ ཧཱིནོཧམསྨཱིཏི མཱནོ. ཨིམེ ནཝཝིདྷམཱནཱ (ཝིབྷ. ༩༦༢).

ཨེཏྠ པན སེཡྻསྶ སེཡྻོཧམསྨཱིཏི མཱནོ རཱཛཱུནཉྩེཝ པབྦཛིཏཱནཉྩ ཨུཔྤཛྫཏི. རཱཛཱ ཧི ‘‘རཊྛེན ཝཱ དྷནེན ཝཱ ཝཱཧནེཧི ཝཱ ཀོ མཡཱ སདིསོ ཨཏྠཱི’’ཏི ཨེཏཾ མཱནཾ ཀརོཏི, པབྦཛིཏོཔི ‘‘སཱིལདྷུཏངྒཱདཱིཧི ཀོ མཡཱ སདིསོ ཨཏྠཱི’’ཏི ཨེཏཾ མཱནཾ ཀརོཏི.

སེཡྻསྶ སདིསོཧམསྨཱིཏི མཱནོཔི ཨེཏེསཾཡེཝ ཨུཔྤཛྫཏི. རཱཛཱ ཧི ‘‘རཊྛེན ¶ ཝཱ དྷནེན ཝཱ ཝཱཧནེཧི ཝཱ ཨཉྙརཱཛཱུཧི སདྡྷིཾ མཡ྄ཧཾ ཀིཾ ནཱནཱཀརཎ’’ནྟི ཨེཏཾ མཱནཾ ཀརོཏི, པབྦཛིཏོཔི ‘‘སཱིལདྷུཏངྒཱདཱིཧི ཨཉྙེན བྷིཀྑུནཱ མཡ྄ཧཾ ཀིཾ ནཱནཱཀརཎ’’ནྟི ཨེཏཾ མཱནཾ ཀརོཏི.

སེཡྻསྶ ཧཱིནོཧམསྨཱིཏི མཱནོཔི ཨེཏེསཾཡེཝ ཨུཔྤཛྫཏི. ཡསྶ ཧི རཉྙོ རཊྛཾ ཝཱ དྷནཾ ཝཱ ཝཱཧནཱདཱིནི ཝཱ ནཱཏིསམྤནྣཱནི ཧོནྟི, སོ ‘‘མཡ྄ཧཾ རཱཛཱཏི ཝོཧཱརསུཁམཏྟཀམེཝ, ཀིཾ རཱཛཱ ནཱམ ཨཧ’’ནྟི ཨེཏཾ མཱནཾ ཀརོཏི, པབྦཛིཏོཔི ཨཔྤལཱབྷསཀྐཱརོ ‘‘ཨཧཾ དྷམྨཀཐིཀོ བཧུསྶུཏོ མཧཱཐེརོཏི ཀཐཱམཏྟམེཝ, ཀིཾ དྷམྨཀཐིཀོ ནཱམཱཧཾ, ཀིཾ བཧུསྶུཏོ ནཱམཱཧཾ, ཀིཾ མཧཱཐེརོ ནཱམཱཧཾ, ཡསྶ མེ ལཱབྷསཀྐཱརོ ནཏྠཱི’’ཏི ཨེཏཾ མཱནཾ ཀརོཏི.

སདིསསྶ ¶ སེཡྻོཧམསྨཱིཏི མཱནཱདཡོ ཨམཙྩཱདཱིནཾ ཨུཔྤཛྫནྟི. ཨམཙྩོ ཝཱ ཧི རཊྛིཡོ ཝཱ ‘‘བྷོགཡཱནཝཱཧནཱདཱིཧི ཀོ མཡཱ སདིསོ ཨཉྙོ རཱཛཔུརིསོ ཨཏྠཱི’’ཏི ཝཱ, ‘‘མཡ྄ཧཾ ཨཉྙེཧི སདྡྷིཾ ཀིཾ ནཱནཱཀརཎ’’ནྟི ཝཱ, ‘‘ཨམཙྩོཏི ནཱམམེཝ མཡ྄ཧཾ, གྷཱསཙྪཱདནམཏྟམྤི མེ ནཏྠི, ཀིཾ ཨམཙྩོ ནཱམཱཧ’’ནྟི ཝཱ ཨེཏཾ མཱནཾ ཀརོཏི.

ཧཱིནསྶ ¶ སེཡྻོཧམསྨཱིཏི མཱནཱདཡོ དཱསཱདཱིནཾ ཨུཔྤཛྫནྟི. དཱསོ ཧི ‘‘མཱཏིཏོ ཝཱ པིཏིཏོ ཝཱ ཀོ མཡཱ སདིསོ ཨཉྙོ དཱསོ ནཱམ ཨཏྠི, ཨཉྙེ ཛཱིཝིཏུཾ ཨསཀྐོནྟཱ ཀུཙྪིཧེཏུ དཱསཱ ནཱམ ཛཱཏཱ, ཨཧཾ པན པཝེཎིཨཱགཏཏྟཱ སེཡྻོ’’ཏི ཝཱ, ‘‘པཝེཎིཨཱགཏབྷཱཝེན ཨུབྷཏོསུདྡྷིཀདཱསཏྟེན ཨསུཀདཱསེན ནཱམ སདྡྷིཾ མཡ྄ཧཾ ཀིཾ ནཱནཱཀརཎ’’ནྟི ཝཱ, ‘‘ཀུཙྪིཝསེནཱཧཾ དཱསབྱཾ ཨུཔགཏོ, མཱཏཱཔིཏུཀོཊིཡཱ པན མེ དཱསཊྛཱནཾ ནཏྠི, ཀིཾ དཱསོ ནཱམ ཨཧ’’ནྟི ཝཱ ཨེཏཾ མཱནཾ ཀརོཏི. ཡཐཱ ཙ དཱསོ, ཨེཝཾ པུཀྐུསཙཎྜཱལཱདཡོཔི ཨེཏཾ མཱནཾ ཀརོནྟིཡེཝ. ཨེཏྠ ཙ སེཡྻསྶ སེཡྻོཧམསྨཱིཏི ཨུཔྤནྣམཱནོཝ ཡཱཐཱཝམཱནོ, ཨིཏརེ དྭེ ཨཡཱཐཱཝམཱནཱ. ཏཐཱ སདིསསྶ སདིསོཧམསྨཱིཏི ཧཱིནསྶ ཧཱིནོཧམསྨཱིཏི ཨུཔྤནྣམཱནོཝ ཡཱཐཱཝམཱནོ, ཨིཏརེ དྭེ ཨཡཱཐཱཝམཱནཱ. ཏཏྠ ཡཱཐཱཝམཱནཱ ཨརཧཏྟམགྒཝཛ྄ཛྷཱ, ཨཡཱཐཱཝམཱནཱ སོཏཱཔཏྟིམགྒཝཛ྄ཛྷཱཏི.

ཏཎྷཱམཱུལཀཱ ཝུཏྟཱཡེཝ. རཛྫཏཱིཏི ན ཀེཝལཾ རཱགེནེཝ རཛྫཏི, ཨཐ ཁོ ཏཎྷཱམཱུལཀཱནཾ པརིཡེསནཱདཱིནམྤི སམྦྷཝཏོ ཏཎྷཱམཱུལཀེཧི སབྦེཧི ཨཀུསལདྷམྨེཧི རཛྫཏི, ཡུཛྫཏི བཛ྄ཛྷཏཱིཏི ཨདྷིཔྤཱཡོ.

དསཧི ¶ ཀིལེསཝཏྠཱུཧཱིཏི ཀཏམཱནི དས ཀིལེསཝཏྠཱུནི? ལོབྷོ, དོསོ, མོཧོ, མཱནོ, དིཊྛི, ཝིཙིཀིཙྪཱ, ཐིནཾ, ཨུདྡྷཙྩཾ, ཨཧིརིཀཾ, ཨནོཏྟཔྤནྟི ཨིམཱནི དས ཀིལེསཝཏྠཱུནི (ཝིབྷ. ༩༦༦).

ཏཏྠ ཀིལེསཱ ཨེཝ ཀིལེསཝཏྠཱུནི, ཝསནྟི ཝཱ ཨེཏྠ ཨཁཱིཎཱསཝཱ སཏྟཱ ལོབྷཱདཱིསུ པཏིཊྛིཏཏྟཱཏི ཝཏྠཱུནི, ཀིལེསཱ ཙ ཏེ ཏཔྤཏིཊྛཱནཾ སཏྟཱནཾ ཝཏྠཱུནི ཙཱཏི ཀིལེསཝཏྠཱུནི. ཡསྨཱ ཙེཏྠ ཨནནྟརཔཙྩཡཱདིབྷཱཝེན ཨུཔྤཛྫམཱནཱཔི ཀིལེསཱ ཝསནྟི ཨེཝ ནཱམ, ཏསྨཱ ཀིལེསཱནཾ ཝཏྠཱུནཱིཏིཔི ཀིལེསཝཏྠཱུནི. ལུབྦྷནྟི ཏེན, སཡཾ ཝཱ ལུབྦྷཏི, ལུབྦྷནམཏྟམེཝ ཝཱ ཏནྟི ལོབྷོ. དུསྶནྟི ཏེན, སཡཾ ཝཱ དུསྶཏི, དུསྶནམཏྟམེཝ ཝཱ ཏནྟི དོསོ. མུཡ྄ཧནྟི ཏེན, སཡཾ ཝཱ མུཡ྄ཧཏི, མུཡ྄ཧནམཏྟམེཝ ཝཱ ཏནྟི མོཧོ. མཉྙཏཱིཏི མཱནོ. དིཊྛིཨཱདཡོ ཝུཏྟཏྠཱཝ ¶ . ན ཧིརཱིཡཏཱིཏི ཨཧིརིཀོ, ཏསྶ བྷཱཝོ ཨཧིརིཀཾ. ན ¶ ཨོཏྟཔྤཏཱིཏི ཨནོཏྟཔྤཱི, ཏསྶ བྷཱཝོ ཨནོཏྟཔྤཾ. ཏེསུ ཨཧིརིཀཾ ཀཱཡདུཙྩརིཏཱདཱིཧི ཨཛིགུཙྪནལཀྑཎཾ, ཨནོཏྟཔྤཾ ཏེཧེཝ ཨསཱརཛྫནལཀྑཎཾ, ཀིལིསྶཏཱིཏི ཨུཔཏཱཔཱིཡཏི ཝིབཱདྷཱིཡཏི.

དསཧི ཨཱགྷཱཏཝཏྠཱུཧཱིཏི པུབྦེ ཝུཏྟེཧི ནཝཧི ཙ ‘‘ཨཊྛཱནེ ཝཱ པནཱགྷཱཏོ ཛཱཡཏཱི’’ཏི (དྷ. ས. ༡༠༦༦) ཝུཏྟེན ཙཱཏི དསཧི. ཨནཏྠཾ མེ ཨཙརཱིཏིཨཱདཱིནིཔི ཧི ཨཝིཀཔྤེཏྭཱ ཁཱཎུཀཎྚཀཱདིམྷིཔི ཨཊྛཱནེ ཨཱགྷཱཏོ ཨུཔྤཛྫཏི.

དསཧི ཨཀུསལཀམྨཔཐེཧཱིཏི ཀཏམེ དས ཨཀུསལཀམྨཔཐཱ (དཱི. ནི. ༣.༣༦༠)? པཱཎཱཏིཔཱཏོ, ཨདིནྣཱདཱནཾ, ཀཱམེསུམིཙྪཱཙཱརོ, མུསཱཝཱདོ, པིསུཎཱ ཝཱཙཱ, ཕརུསཱ ཝཱཙཱ, སམྥཔྤལཱཔོ, ཨབྷིཛ྄ཛྷཱ, བྱཱཔཱདོ, མིཙྪཱདིཊྛི. ཨིམེ དས ཨཀུསལཀམྨཔཐཱ. ཏཏྠ ཨཀུསལཀམྨཱནི ཙ ཏཱནི པཐཱ ཙ དུགྒཏིཡཱཏི ཨཀུསལཀམྨཔཐཱ. སམནྣཱགཏོཏི སམངྒཱིབྷཱུཏོ.

དསཧི སཉྙོཛནེཧཱིཏི ཀཏམཱནི དས སཾཡོཛནཱནི (དྷ. ས. ༡༡༡༨)? ཀཱམརཱགསཾཡོཛནཾ, པཊིགྷསཾཡོཛནཾ, མཱནསཾཡོཛནཾ, དིཊྛིསཾཡོཛནཾ, ཝིཙིཀིཙྪཱསཾཡོཛནཾ, སཱིལབྦཏཔརཱམཱསསཾཡོཛནཾ, བྷཝརཱགསཾཡོཛནཾ, ཨིསྶཱསཾཡོཛནཾ, མཙྪརིཡསཾཡོཛནཾ, ཨཝིཛྫཱསཾཡོཛནཾ, ཨིམཱནི དས སཾཡོཛནཱནི. མིཙྪཏྟཱ ¶ ཝུཏྟཱཡེཝ.

དསཝཏྠུཀཱཡ མིཙྪཱདིཊྛིཡཱཏི ཀཏམཱ དསཝཏྠུཀཱ མིཙྪཱདིཊྛི (ཝིབྷ. ༩༧༡)? ནཏྠི དིནྣཾ, ནཏྠི ཡིཊྛཾ, ནཏྠི ཧུཏཾ, ནཏྠི སུཀཏདུཀྐཊཱནཾ ཀམྨཱནཾ ཕལཾ ཝིཔཱཀོ, ནཏྠི ཨཡཾ ལོཀོ, ནཏྠི པརོ ལོཀོ, ནཏྠི མཱཏཱ, ནཏྠི པིཏཱ, ནཏྠི སཏྟཱ ཨོཔཔཱཏིཀཱ, ནཏྠི ལོཀེ སམཎབྲཱཧྨཎཱ སམྨགྒཏཱ སམྨཱཔཊིཔནྣཱ ཡེ ཨིམཉྩ ལོཀཾ པརཉྩ ལོཀཾ སཡཾ ཨབྷིཉྙཱ སཙྪིཀཏྭཱ པཝེདེནྟི. ཨཡཾ དསཝཏྠུཀཱ མིཙྪཱདིཊྛི.

ཏཏྠ དསཝཏྠུཀཱཏི དས ཝཏྠཱུནི ཨེཏིསྶཱཏི དསཝཏྠུཀཱ. ནཏྠི དིནྣནྟི དིནྣཾ ནཱམ ཨཏྠི, སཀྐཱ ཀསྶཙི ཀིཉྩི དཱཏུནྟི ཛཱནཱཏི. དིནྣསྶ པན ཕལཾ ཝིཔཱཀོ ནཏྠཱིཏི གཎྷཱཏི. ནཏྠི ཡིཊྛནྟི ཡིཊྛཾ ཝུཙྩཏི མཧཱཡཱགོ, ཏཾ ཡཛིཏུཾ སཀྐཱཏི ཛཱནཱཏི. ཡིཊྛསྶ པན ཕལཾ ཝིཔཱཀོ ནཏྠཱིཏི གཎྷཱཏི. ཧུཏནྟི ཨཱཧུནཔཱཧུནམངྒལཀིརིཡཱ, ཏཾ ཀཱཏུཾ སཀྐཱཏི ཛཱནཱཏི. ཏསྶ པན ¶ ཕལཾ ཝིཔཱཀོ ནཏྠཱིཏི གཎྷཱཏི. སུཀཏདུཀྐཊཱནནྟི ཨེཏྠ དས ཀུསལཀམྨཔཐཱ ¶ སུཀཏཀམྨཱནི ནཱམ, དས ཨཀུསལཀམྨཔཐཱ དུཀྐཊཀམྨཱནི ནཱམ. ཏེསཾ ཨཏྠིབྷཱཝཾ ཛཱནཱཏི. ཕལཾ ཝིཔཱཀོ པན ནཏྠཱིཏི གཎྷཱཏི. ནཏྠི ཨཡཾ ལོཀོཏི པརལོཀེ ཋིཏོ ཨིམཾ ལོཀཾ ནཏྠཱིཏི གཎྷཱཏི. ནཏྠི པརོ ལོཀོཏི ཨིདྷལོཀེ ཋིཏོ པརལོཀཾ ནཏྠཱིཏི གཎྷཱཏི. ནཏྠི མཱཏཱ ནཏྠི པིཏཱཏི མཱཏཱཔིཏཱུནཾ ཨཏྠིབྷཱཝཾ ཛཱནཱཏི. ཏེསུ ཀཏཔྤཙྩཡེན ཀོཙི ཕལཾ ཝིཔཱཀོ ནཏྠཱིཏི གཎྷཱཏི. ནཏྠི སཏྟཱ ཨོཔཔཱཏིཀཱཏི ཙཝནཀཨུཔཔཛྫནཀསཏྟཱ ནཏྠཱིཏི གཎྷཱཏི. སམྨགྒཏཱ སམྨཱཔཊིཔནྣཱཏི ཨནུལོམཔཊིཔདཾ པཊིཔནྣཱ དྷམྨིཀསམཎབྲཱཧྨཎཱ ལོཀསྨིཾ ནཏྠཱིཏི གཎྷཱཏི. ཡེ ཨིམཉྩ ལོཀཾ…པེ… པཝེདེནྟཱིཏི ཨིམཉྩ པརཉྩ ལོཀཾ ཨཏྟནཱཝ ཨབྷིཝིསིཊྛེན ཉཱཎེན ཉཏྭཱ པཝེདནསམཏྠོ སབྦཉྙཱུ བུདྡྷོ ནཏྠཱིཏི གཎྷཱཏི.

ཨནྟགྒཱཧིཀཱཡ དིཊྛིཡཱཏི ‘‘སསྶཏོ ལོཀོ’’ཏིཨཱདིཀཾ ཨེཀེཀཾ ཨནྟཾ བྷཱགཾ གཎྷཱཏཱིཏི ཨནྟགྒཱཧིཀཱ. ཨཐ ཝཱ ཨནྟསྶ གཱཧོ ཨནྟགྒཱཧོ, ཨནྟགྒཱཧོ ཨསྶཱ ཨཏྠཱིཏི ཨནྟགྒཱཧིཀཱ. ཏཱཡ ཨནྟགྒཱཧིཀཱཡ. སཱ པན ཝུཏྟཱཡེཝ.

ཨཊྛསཏཏཎྷཱཔཔཉྩསཏེཧཱིཏི ¶ ཨཊྛུཏྟརཾ སཏཾ ཨཊྛསཏཾ. སཾསཱརེ པཔཉྩེཏི ཙིརཾ ཝསཱཔེཏཱིཏི པཔཉྩོ, ཏཎྷཱ ཨེཝ པཔཉྩོ ཏཎྷཱཔཔཉྩོ, ཨཱརམྨཎབྷེདེན པུནཔྤུནཾ ཨུཔྤཏྟིཝསེན ཙ ཏཎྷཱནཾ བཧུཀཏྟཱ བཧུཝཙནཾ ཀཏྭཱ ཏཎྷཱཔཔཉྩཱནཾ སཏཾ ཏཎྷཱཔཔཉྩསཏཾ. ཏེན ‘‘ཏཎྷཱཔཔཉྩསཏེནཱ’’ཏི ཝཏྟབྦེ ཝཙནཝིཔལླཱསཝསེན ‘‘ཏཎྷཱཔཔཉྩསཏེཧཱི’’ཏི བཧུཝཙནནིདྡེསོ ཀཏོ. ཨཊྛསཏནྟི སངྑཱཏེན ཏཎྷཱཔཔཉྩསཏེནཱཏི ཨཏྠོ དཊྛབྦོ. ཨཊྛ ཨབྦོཧཱརིཀཱནི ཀཏྭཱ སཏམེཝ གཧིཏནྟི ཝེདིཏབྦཾ. ཁུདྡཀཝཏྠུཝིབྷངྒེ པན ཏཎྷཱཝིཙརིཏཱནཱིཏི ཨཱགཏཾ. ཡཐཱཧ –

‘‘ཨཊྛཱརས ཏཎྷཱཝིཙརིཏཱནི ཨཛ྄ཛྷཏྟིཀསྶ ཨུཔཱདཱཡ, ཨཊྛཱརས ཏཎྷཱཝིཙརིཏཱནི བཱཧིརསྶ ཨུཔཱདཱཡ, ཏདེཀཛ྄ཛྷཾ ཨབྷིསཉྙུཧིཏྭཱ ཨབྷིསངྑིཔིཏྭཱ ཚཏྟིཾས ཏཎྷཱཝིཙརིཏཱནི ཧོནྟི. ཨིཏི ཨཏཱིཏཱནི ཚཏྟིཾས ཏཎྷཱཝིཙརིཏཱནི, ཨནཱགཏཱནི ཚཏྟིཾས ཏཎྷཱཝིཙརིཏཱནི, པཙྩུཔྤནྣཱནི ཚཏྟིཾས ཏཎྷཱཝིཙརིཏཱནི ཏདེཀཛ྄ཛྷཾ ¶ ཨབྷིསཉྙུཧིཏྭཱ ཨབྷིསངྑིཔིཏྭཱ ཨཊྛཏཎྷཱཝིཙརིཏསཏཾ ཧོཏཱི’’ཏི (ཝིབྷ. ༨༤༢).

ཏཎྷཱཔཔཉྩཱཡེཝ པནེཏྠ ཏཎྷཱཝིཙརིཏཱནཱིཏི ཝུཏྟཱ. ཏཎྷཱསམུདཱཙཱརཱ ཏཎྷཱཔཝཏྟིཡོཏི ཨཏྠོ. ཨཛ྄ཛྷཏྟིཀསྶ ཨུཔཱདཱཡཱཏི ཨཛ྄ཛྷཏྟིཀཾ ཁནྡྷཔཉྩཀཾ ཨུཔཱདཱཡ. ཨིདཉྷི ཨུཔཡོགཏྠེ སཱམིཝཙནཾ. ཝིཏྠཱརོ པནསྶ ཏསྶ ནིདྡེསེ (ཝིབྷ. ༩༧༣) ཝུཏྟནཡེནེཝ ཝེདིཏབྦོ. ཨཡཾ པན ¶ ཨཔརོ ནཡོ – རཱུཔཱརམྨཎཱཡེཝ ཀཱམཏཎྷཱ, བྷཝཏཎྷཱ, ཝིབྷཝཏཎྷཱཏི ཏིསྶོ ཏཎྷཱ ཧོནྟི, ཏཐཱ སདྡཱདིཨཱརམྨཎཱཏི ཚསུ ཨཱརམྨཎེསུ ཨཊྛཱརས ཏཎྷཱ ཧོནྟི, ཨཛ྄ཛྷཏྟཱརམྨཎཱ ཨཊྛཱརས, བཧིདྡྷཱརམྨཎཱ ཨཊྛཱརསཱཏི ཚཏྟིཾས ཧོནྟི. ཏཱ ཨེཝ ཨཏཱིཏཱརམྨཎཱ ཚཏྟིཾས, ཨནཱགཏཱརམྨཎཱ ཚཏྟིཾས, པཙྩུཔྤནྣཱརམྨཎཱ ཚཏྟིཾསཱཏི ཨཊྛཏཎྷཱཝིཙརིཏསཏཾ ཧོཏི. པཔཉྩིཏོཏི ཨཱརམྨཎེ, སཾསཱརེ ཝཱ པཔཉྩིཏོ ཙིརཝཱསིཏོ.

དྭཱསཊྛིཡཱ དིཊྛིགཏེཧཱིཏི ‘‘ཀཏམཱནི དྭཱསཊྛི དིཊྛིགཏཱནི བྲཧྨཛཱལེ ཝེཡྻཱཀརཎེ ཝུཏྟཱནི བྷགཝཏཱ? ཙཏྟཱརོ སསྶཏཝཱདཱ, ཙཏྟཱརོ ཨེཀཙྩསསྶཏཝཱདཱ, ཙཏྟཱརོ ཨནྟཱནནྟིཀཱ ¶ , ཙཏྟཱརོ ཨམརཱཝིཀྑེཔིཀཱ, དྭེ ཨདྷིཙྩསམུཔྤནྣིཀཱ, སོལ༹ས སཉྙཱིཝཱདཱ, ཨཊྛ ཨསཉྙཱིཝཱདཱ, ཨཊྛ ནེཝསཉྙཱིནཱསཉྙཱིཝཱདཱ, སཏྟ ཨུཙྪེདཝཱདཱ, པཉྩ དིཊྛདྷམྨནིབྦཱནཝཱདཱཏི ཨིམཱནི དྭཱསཊྛི དིཊྛིགཏཱནི བྲཧྨཛཱལེ ཝེཡྻཱཀརཎེ ཝུཏྟཱནི བྷགཝཏཱ’’ཏི (ཝིབྷ. ༩༧༧). ཝིཏྠཱརོ པནེཏྠ བྲཧྨཛཱལསུཏྟེ ཝུཏྟནཡེནེཝ ཝེདིཏབྦོ.

ཨཧཉྩམྷི ཏིཎྞོཏི ཨཧཉྩ ཙཏུརོགྷཾ, སཾསཱརསམུདྡཾ ཝཱ ཏིཎྞོ ཨམྷི བྷཝཱམི. མུཏྟོཏི རཱགཱདིབནྡྷནེཧི མུཏྟོ. དནྟོཏི ནིབྦིསེཝནོ ནིཔྤརིཔྥནྡོ. སནྟོཏི སཱིཏཱིབྷཱུཏོ. ཨསྶཏྠོཏི ནིབྦཱནདསྶནེ ལདྡྷསྶཱསོ. པརིནིབྦུཏོཏི ཀིལེསཔརིནིབྦཱནེན པརིནིབྦུཏོ. པཧོམཱིཏི སམཏྠོམྷི. ཁོཨིཏི ཨེཀཾསཏྠེ ནིཔཱཏོ. པརེ ཙ པརིནིབྦཱཔེཏུནྟི ཨེཏྠ པརེ ཙ-སདྡོ ‘‘པརེ ཙ ཏཱརེཏུ’’ནྟིཨཱདཱིཧིཔི ཡོཛེཏབྦོཏི.

མཧཱཀརུཎཱཉཱཎནིདྡེསཝཎྞནཱ ནིཊྛིཏཱ.

༧༢-༧༣. སབྦཉྙུཏཉྙཱཎནིདྡེསཝཎྞནཱ

༡༡༩. སབྦཉྙུཏཉྙཱཎནིདྡེསེ ¶ ¶ ཀཏམཾ ཏཐཱགཏསྶ སབྦཉྙུཏཉྙཱཎནྟི པུཙྪིཏྭཱ ཏེན སམགཏིཀཏྟཱ ཏེནེཝ སཧ ཨནཱཝརཎཉཱཎཾ ནིདྡིཊྛཾ. ན ཧི ཨནཱཝརཎཉཱཎཾ དྷམྨཏོ ཝིསུཾ ཨཏྠི, ཨེཀམེཝ ཧེཏཾ ཉཱཎཾ ཨཱཀཱརབྷེདཏོ དྭེདྷཱ ཝུཙྩཏི སདྡྷིནྡྲིཡསདྡྷཱབལཱདཱིནི ཝིཡ. སབྦཉྙུཏཉྙཱཎམེཝ ཧི ནཏྠི ཨེཏསྶ ཨཱཝརཎནྟི, ཀེནཙི དྷམྨེན, པུགྒལེན ཝཱ ཨཱཝརཎཾ ཀཱཏུཾ ཨསཀྐུཎེཡྻཏཱཡ ཨནཱཝརཎནྟི ཝུཙྩཏི ཨཱཝཛྫནཔཊིབདྡྷཏྟཱ སབྦདྷམྨཱནཾ. ཨཉྙེ པན ཨཱཝཛྫིཏྭཱཔི ན ཛཱནནྟི. ཀེཙི པནཱཧུ ‘‘མནོཝིཉྙཱཎཾ ཝིཡ སབྦཱརམྨཎིཀཏྟཱ སབྦཉྙུཏཉྙཱཎཾ ¶ . ཏཾཡེཝ ཉཱཎཾ ཨིནྡཝཛིརཾ ཝིཡ ཝིསཡེསུ ཨཔྤཊིཧཏཏྟཱ ཨནཱཝརཎཉཱཎཾ. ཨནུཔུབྦསབྦཉྙུཏཱཔཊིཀྑེཔོ སབྦཉྙུཏཉྙཱཎཾ, སཀིཾསབྦཉྙུཏཱཔཊིཀྑེཔོ ཨནཱཝརཎཉཱཎཾ, བྷགཝཱ སབྦཉྙུཏཉྙཱཎཔཊིལཱབྷེནཔི སབྦཉྙཱུཏི ཝུཙྩཏི, ན ཙ ཨནུཔུབྦསབྦཉྙཱུ. ཨནཱཝརཎཉཱཎཔཊིལཱབྷེནཔི སབྦཉྙཱུཏི ཝུཙྩཏི, ན ཙ སཀིཾསབྦཉྙཱུ’’ཏི.

སབྦཾ སངྑཏམསངྑཏཾ ཨནཝསེསཾ ཛཱནཱཏཱིཏི ཨེཏྠ སབྦནྟི ཛཱཏིཝསེན སབྦདྷམྨཱནཾ ནིསྶེསཔརིཡཱདཱནཾ. ཨནཝསེསནྟི ཨེཀེཀསྶེཝ དྷམྨསྶ སབྦཱཀཱརཝསེན ནིསྶེསཔརིཡཱདཱནཾ. སངྑཏམསངྑཏནྟི དྭིདྷཱ པབྷེདདསྶནཾ. སངྑཏཉྷི ཨེཀོ པབྷེདོ, ཨསངྑཏཾ ཨེཀོ པབྷེདོ. པཙྩཡེཧི སངྒམྨ ཀཏནྟི སངྑཏཾ. ཁནྡྷཔཉྩཀཾ. ཏཐཱ ན སངྑཏནྟི ཨསངྑཏཾ. ནིབྦཱནཾ. སངྑཏཾ ཨནིཙྩདུཀྑཱནཏྟཱདཱིཧི ཨཱཀཱརེཧི ཨནཝསེསཾ ཛཱནཱཏི, ཨསངྑཏཾ སུཉྙཏཱནིམིཏྟཨཔྤཎིཧིཏཱདཱིཧི ཨཱཀཱརེཧི ཨནཝསེསཾ ཛཱནཱཏི. ནཏྠི ཨེཏསྶ སངྑཏསྶ ཨསངྑཏསྶ ཙ ཨཝསེསོཏི ཨནཝསེསཾ. སངྑཏཾ ཨསངྑཏཉྩ. ཨནེཀབྷེདཱཔི པཉྙཏྟི པཙྩཡེཧི ཨཀཏཏྟཱ ཨསངྑཏཔཀྑཾ བྷཛཏི. སབྦཉྙུཏཉྙཱཎཉྷི ¶ སབྦཱཔི པཉྙཏྟིཡོ ཨནེཀབྷེདཏོ ཛཱནཱཏི. ཨཐ ཝཱ སབྦནྟི སབྦདྷམྨགྒཧཎཾ. ཨནཝསེསནྟི ནིཔྤདེསགྒཧཎཾ. ཏཏྠ ཨཱཝརཎཾ ནཏྠཱིཏི ཏཏྠ ཏསྨིཾ ཨནཝསེསེ སངྑཏཱསངྑཏེ ནིསྶངྒཏྟཱ སབྦཉྙུཏཉྙཱཎསྶ ཨཱཝརཎཾ ནཏྠཱིཏི ཏདེཝ སབྦཉྙུཏཉྙཱཎཾ ཨནཱཝརཎཉཱཎཾ ནཱམཱཏི ཨཏྠོ.

༡༢༠. ཨིདཱནི ¶ ཨནེཀཝིསཡབྷེདཏོ དསྶེཏུཾ ཨཏཱིཏནྟིཨཱདིམཱཧ. ཏཏྠ ཨཏཱིཏཾ ཨནཱགཏཾ པཙྩུཔྤནྣནྟི ཀཱལབྷེདཏོ དསྶིཏཾ, ཙཀྑུ ཙེཝ རཱུཔཱ ཙཱཏིཨཱདི ཝཏྠཱརམྨཎབྷེདཏོ. ཨེཝཾ ཏཾ སབྦནྟི ཏེསཾ ཙཀྑུརཱུཔཱནཾ ཨནཝསེསཔརིཡཱདཱནཾ. ཨེཝཾ སེསེསུ. ཡཱཝཏཱཏི ཨནཝསེསཔརིཡཱདཱནཾ. ཨནིཙྩཊྛནྟིཨཱདི སཱམཉྙལཀྑཎབྷེདཏོ དསྶིཏཾ. ཨནིཙྩཊྛནྟི ཙ ཨནིཙྩཱཀཱརཾ. པཙྩཏྟཏྠེ ཝཱ ཨུཔཡོགཝཙནཾ. ཨེས ནཡོ ཨེདིསེསུ. རཱུཔསྶཱཏིཨཱདི ཁནྡྷབྷེདཏོ དསྶིཏཾ. ཙཀྑུསྶ…པེ… ཛརཱམརཎསྶཱཏི ཧེཊྛཱ ཝུཏྟཔེཡྻཱལནཡེན ཡོཛེཏབྦཾ. ཨབྷིཉྙཱཡཱཏིཨཱདཱིསུ ཧེཊྛཱ ཝུཏྟཉཱཎཱནེཝ. ཨབྷིཉྙཊྛནྟི ཨབྷིཛཱནནསབྷཱཝཾ. ཨེས ནཡོ ཨེདིསེསུ. ཁནྡྷཱནཾ ཁནྡྷཊྛནྟིཨཱདི ཧེཊྛཱ ཝུཏྟནཡེནེཝ ཝེདིཏབྦཾ. ཀུསལེ དྷམྨེཏིཨཱདི ཀུསལཏྟིཀཝསེན བྷེདོ. ཀཱམཱཝཙརེ དྷམྨེཏིཨཱདི ཙཏུབྷཱུམཀཝསེན. ཨུབྷཡཏྠཱཔི ‘‘སབྦེ ཛཱནཱཏཱི’’ཏི བཧུཝཙནཔཱཋོ སུནྡརོ. ཨེཀཝཙནསོཏེ པཏིཏཏྟཱ པན པོཏྠཀེསུ ཨེཀཝཙནེན ལིཁིཏཾ. དུཀྑསྶཱཏིཨཱདི ཙུདྡསནྣཾ བུདྡྷཉཱཎཱནཾ ཝིསཡབྷེདོ. ཨིནྡྲིཡཔརོཔརིཡཏྟེ ཉཱཎནྟིཨཱདཱིནི ཙཏྟཱརི ཉཱཎཱནི ཝཏྭཱ སབྦཉྙུཏཉྙཱཎཾ ཀསྨཱ ན ཝུཏྟནྟི ཙེ? ཝུཙྩམཱནསྶ ¶ སབྦཉྙུཏཉྙཱཎཏྟཱ. ཝིསཡབྷེདཏོ ཧི སབྦཉྙུཏཉྙཱཎེ ཝུཙྩམཱནེ ཏཾ ཉཱཎཾ ན ཝཏྟབྦཾ ཧོཏི, སབྦཉྙུཏཉྙཱཎཾ པན སབྦཉྙུཏཉྙཱཎསྶ ཝིསཡོ ཧོཏིཡེཝ.

པུན ཀཱལ༹ཀཱརཱམསུཏྟནྟཱདཱིསུ (ཨ. ནི. ༤.༢༤) ཝུཏྟནཡེན སབྦཉྙུཏཉྙཱཎབྷཱུམིཾ དསྶེནྟོ ཡཱཝཏཱ སདེཝཀསྶ ལོཀསྶཱཏིཨཱདིམཱཧ. ཏཏྠ སཧ དེཝེཧི སདེཝཀསྶ. སཧ མཱརེན སམཱརཀསྶ ¶ . སཧ བྲཧྨུནཱ སབྲཧྨཀསྶ ལོཀསྶ. སཧ སམཎབྲཱཧྨཎེཧི སསྶམཎབྲཱཧྨཎིཡཱ. སཧ དེཝམནུསྶེཧི སདེཝམནུསྶཱཡ པཛཱཡ. པཛཱཏཏྟཱ པཛཱཏི སཏྟལོཀསྶ པརིཡཱཡཝཙནམེཏཾ. ཏཏྠ སདེཝཀཝཙནེན པཉྩཀཱམཱཝཙརདེཝགྒཧཎཾ, སམཱརཀཝཙནེན ཚཊྛཀཱམཱཝཙརདེཝགྒཧཎཾ, སབྲཧྨཀཝཙནེན བྲཧྨཀཱཡིཀཱདིབྲཧྨགྒཧཎཾ, སསྶམཎབྲཱཧྨཎིཝཙནེན སཱསནསྶ པཙྩཏྠིཀཔཙྩཱམིཏྟསམཎབྲཱཧྨཎགྒཧཎཾ སམིཏཔཱཔབཱཧིཏཔཱཔསམཎབྲཱཧྨཎགྒཧཎཉྩ, པཛཱཝཙནེན སཏྟལོཀགྒཧཎཾ, སདེཝམནུསྶཝཙནེན སམྨུཏིདེཝསེསམནུསྶགྒཧཎཾ ཝེདིཏབྦཾ. ཨེཝམེཏྠ ཏཱིཧི པདེཧི ཨོཀཱསལོཀོ, དྭཱིཧི པཛཱཝསེན སཏྟལོཀོ གཧིཏོཏི ཝེདིཏབྦོ.

ཨཔརོ ¶ ནཡོ – སདེཝཀགྒཧཎེན ཨརཱུཔཱཝཙརལོཀོ གཧིཏོ, སམཱརཀགྒཧཎེན ཚཀཱམཱཝཙརདེཝལོཀོ, སབྲཧྨཀགྒཧཎེན རཱུཔཱཝཙརབྲཧྨལོཀོ, སསྶམཎབྲཱཧྨཎཱདིགྒཧཎེན ཙཏུཔརིསཝསེན, སམྨུཏིདེཝེཧི ཝཱ སཧ མནུསྶལོཀོ, ཨཝསེསསཏྟལོཀོ ཝཱ.

ཨཔིཙེཏྠ སདེཝཀཝཙནེན ཨུཀྐཊྛཔརིཙྪེདཏོ སབྦསྶཔི ལོཀསྶ དིཊྛཱདིཛཱནནབྷཱཝཾ སཱདྷེཏི. ཏཏོ ཡེསཾ སིཡཱ ‘‘མཱརོ མཧཱནུབྷཱཝོ ཚཀཱམཱཝཙརིསྶརོ ཝསཝཏྟཱི, ཀིཾ ཏསྶཱཔི དིཊྛཱདིཾ ཛཱནཱཏཱི’’ཏི, ཏེསཾ ཝིམཏིཾ ཝིདྷམནྟོ ‘‘སམཱརཀསྶཱ’’ཏི ཨཱཧ. ཡེསཾ པན སིཡཱ ‘‘བྲཧྨཱ མཧཱནུབྷཱཝོ ཨེཀངྒུལིཡཱ ཨེཀསྨིཾ ཙཀྐཝཱལ༹སཧསྶེ ཨཱལོཀཾ ཕརཏི, དྭཱིཧི…པེ… དསཧི ཨངྒུལཱིཧི དསསུ ཙཀྐཝཱལ༹སཧསྶེསུ ཨཱལོཀཾ ཕརཏི, ཨནུཏྟརཉྩ ཛྷཱནསམཱཔཏྟིསུཁཾ པཊིསཾཝེདེཏི, ཀིཾ ཏསྶཱཔི དིཊྛཱདིཾ ཛཱནཱཏཱི’’ཏི, ཏེསཾ ཝིམཏིཾ ཝིདྷམནྟོ ‘‘སབྲཧྨཀསྶཱ’’ཏི ཨཱཧ. ཏཏོ ཡེསཾ སིཡཱ ‘‘པུཐཱུ སམཎབྲཱཧྨཎཱ སཱསནསྶ པཙྩཏྠིཀཱ, ཀིཾ ཏེསམྤི དིཊྛཱདིཾ ཛཱནཱཏཱི’’ཏི, ཏེསཾ ཝིམཏིཾ ཝིདྷམནྟོ ‘‘སསྶམཎབྲཱཧྨཎིཡཱ པཛཱཡཱ’’ཏི ཨཱཧ. ཨེཝཾ ཨུཀྐཊྛཱནཾ དིཊྛཱདིཛཱནནབྷཱཝཾ པཀཱསེཏྭཱ ཨཐ སམྨུཏིདེཝེ ཨཝསེསམནུསྶེ ཙ ཨུཔཱདཱཡ ཨུཀྐཊྛཔརིཙྪེདཝསེན སེསསཏྟལོཀསྶ དིཊྛཱདིཛཱནནབྷཱཝཾ པཀཱསེཏི. ཨཡམེཏྠ ཨནུསནྡྷིཀྐམོ. པོརཱཎཱ པནཱཧུ – སདེཝཀསྶཱཏི དེཝཏཱཧི སདྡྷིཾ ཨཝསེསལོཀསྶ ¶ . སམཱརཀསྶཱཏི མཱརེན སདྡྷིཾ ཨཝསེསལོཀསྶ. སབྲཧྨཀསྶཱཏི བྲཧྨེཧི སདྡྷིཾ ཨཝསེསལོཀསྶ. ཨེཝཾ སབྦེཔི ཏིབྷཝཱུཔགེ སཏྟེ ཏཱིཧཱཀཱརེཧི ཏཱིསུ པདེསུ པཀྑིཔིཏྭཱ པུན དྭཱིཧཱཀཱརེཧི པརིཡཱདཱཏུཾ ¶ སསྶམཎབྲཱཧྨཎིཡཱ པཛཱཡ སདེཝམནུསྶཱཡཱཏི ཝུཏྟཾ. ཨེཝཾ པཉྩཧི པདེཧི ཏེན ཏེན ཨཱཀཱརེན ཏེདྷཱཏུཀམེཝ པརིཡཱདིནྣཾ ཧོཏཱིཏི.

དིཊྛནྟི རཱུཔཱཡཏནཾ. སུཏནྟི སདྡཱཡཏནཾ. མུཏནྟི པཏྭཱ གཧེཏབྦཏོ གནྡྷཱཡཏནཾ, རསཱཡཏནཾ, ཕོཊྛབྦཱཡཏནཾ. ཝིཉྙཱཏནྟི སུཁདུཀྑཱདིདྷམྨཱརམྨཎཾ. པཏྟནྟི པརིཡེསིཏྭཱ ཝཱ ཨཔརིཡེསིཏྭཱ ཝཱ པཏྟཾ. པརིཡེསིཏནྟི པཏྟཾ ཝཱ ཨཔྤཏྟཾ ཝཱ པརིཡེསིཏཾ. ཨནུཝིཙརིཏཾ མནསཱཏི ཙིཏྟེན ཨནུསཉྩརིཏཾ. སབྦཾ ཛཱནཱཏཱིཏི ཨིམིནཱ ཨེཏཾ དསྶེཏི – ཡཾ ཨཔརིམཱནཱསུ ལོཀདྷཱཏཱུསུ ཨིམསྶ ¶ སདེཝཀསྶ ལོཀསྶ ‘‘ནཱིལཾ པཱིཏ’’ནྟིཨཱདི (དྷ. ས. ༦༡༩) རཱུཔཱརམྨཎཾ ཙཀྑུདྭཱརེ ཨཱཔཱཐཾ ཨཱགཙྪཏི, ཨཡཾ སཏྟོ ཨིམསྨིཾ ཁཎེ ཨིམཾ ནཱམ རཱུཔཱརམྨཎཾ དིསྭཱ སུམནོ ཝཱ དུམྨནོ ཝཱ མཛ྄ཛྷཏྟོ ཝཱ ཛཱཏོཏི ཏཾ སབྦཾ ཏཐཱགཏསྶ སབྦཉྙུཏཉྙཱཎཾ ཛཱནཱཏི. ཏཐཱ ཡཾ ཨཔརིམཱཎཱསུ ལོཀདྷཱཏཱུསུ ཨིམསྶ སདེཝཀསྶ ལོཀསྶ ‘‘བྷེརིསདྡོ, མུདིངྒསདྡོ’’ཏིཨཱདི སདྡཱརམྨཎཾ སོཏདྭཱརེ ཨཱཔཱཐཾ ཨཱགཙྪཏི, ‘‘མཱུལགནྡྷོ ཏཙགནྡྷོ’’ཏིཨཱདི (དྷ. ས. ༦༢༤-༦༢༧) གནྡྷཱརམྨཎཾ གྷཱནདྭཱརེ ཨཱཔཱཐཾ ཨཱགཙྪཏི, ‘‘མཱུལརསོ, ཁནྡྷརསོ’’ཏིཨཱདི (དྷ. ས. ༦༢༨-༦༣༡) རསཱརམྨཎཾ ཛིཝ྄ཧཱདྭཱརེ ཨཱཔཱཐཾ ཨཱགཙྪཏི, ‘‘ཀཀྑལ༹ཾ, མུདུཀ’’ནྟིཨཱདི (དྷ. ས. ༦༤༧-༦༥༠) པཐཝཱིདྷཱཏུཏེཛོདྷཱཏུཝཱཡོདྷཱཏུབྷེདཾ ཕོཊྛབྦཱརམྨཎཾ ཀཱཡདྭཱརེ ཨཱཔཱཐཾ ཨཱགཙྪཏི, ཨཡཾ སཏྟོ ཨིམསྨིཾ ཁཎེ ཨིམཾ ནཱམ ཕོཊྛབྦཱརམྨཎཾ ཕུསིཏྭཱ སུམནོ ཝཱ དུམྨནོ ཝཱ མཛ྄ཛྷཏྟོ ཝཱ ཛཱཏོཏི ཏཾ སབྦཾ ཏཐཱགཏསྶ སབྦཉྙུཏཉྙཱཎཾ ཛཱནཱཏི. ཏཐཱ ཡཾ ཨཔརིམཱཎཱསུ ལོཀདྷཱཏཱུསུ ཨིམསྶ སདེཝཀསྶ ལོཀསྶ སུཁདུཀྑཱདིབྷེདཾ དྷམྨཱརམྨཎཾ མནོདྭཱརེ ཨཱཔཱཐཾ ཨཱགཙྪཏི, ཨཡཾ སཏྟོ ཨིམསྨིཾ ཁཎེ ཨིམཾ ནཱམ དྷམྨཱརམྨཎཾ ཝིཛཱནིཏྭཱ སུམནོ ཝཱ དུམྨནོ ཝཱ མཛ྄ཛྷཏྟོ ཝཱ ཛཱཏོཏི ཏཾ སབྦཾ ཏཐཱགཏསྶ སབྦཉྙུཏཉྙཱཎཾ ཛཱནཱཏི. ཨིམསྶ པན མཧཱཛནསྶ པརིཡེསིཏྭཱ ཨཔྤཏྟམྤི ཨཏྠི, པརིཡེསིཏྭཱ པཏྟམྤི ཨཏྠི. ཨཔརིཡེསིཏྭཱ ཨཔྤཏྟམྤི ཨཏྠི, ཨཔརིཡེསིཏྭཱ ¶ པཏྟམྤི ཨཏྠི. སབྦཾ ཏཐཱགཏསྶ སབྦཉྙུཏཉྙཱཎེན ཨཔྤཏྟཾ ནཱམ ནཏྠཱིཏི.

༡༢༡. པུན ཨཔརེན པརིཡཱཡེན སབྦཉྙུཏཉྙཱཎབྷཱཝསཱདྷནཏྠཾ ན ཏསྶཱཏི གཱཐམཱཧ. ཏཏྠ ན ཏསྶ ཨདྡིཊྛམིདྷཏྠི ཀིཉྩཱིཏི ཏསྶ ཏཐཱགཏསྶ ཨིདྷ ཨིམསྨིཾ ཏེདྷཱཏུཀེ ལོཀེ, ཨིམསྨིཾ པཙྩུཔྤནྣཀཱལེ ཝཱ པཉྙཱཙཀྑུནཱ ཨདྡིཊྛཾ ནཱམ ཀིཉྩི ཨཔྤམཏྟཀམྤི ན ཨཏྠི ན སཾཝིཛྫཏི. ཨཏྠཱིཏི ཨིདཾ ཝཏྟམཱནཀཱལིཀཾ ཨཱཁྱཱཏཔདཾ. ཨིམིནཱ པཙྩུཔྤནྣཀཱལིཀསྶ སབྦདྷམྨསྶ ཉཱཏབྷཱཝཾ དསྶེཏི. གཱཐཱབནྡྷསུཁཏྠཾ པནེཏྠ ད-ཀཱརོ སཾཡུཏྟོ. ཨཐོ ཨཝིཉྙཱཏནྟི ཨེཏྠ ཨཐོཨིཏི ཝཙནོཔཱདཱནེ ནིཔཱཏོ. ཨཝིཉྙཱཏནྟི ཨཏཱིཏཀཱལིཀཾ ཨཝིཉྙཱཏཾ ནཱམ ཀིཉྩི ¶ དྷམྨཛཱཏཾ. ནཱཧོསཱིཏི པཱཋསེསོ. ཨབྱཡབྷཱུཏསྶ ཨཏྠིསདྡསྶ གཧཎེ པཱཋསེསཾ ཝིནཱཔི ཡུཛྫཏིཡེཝ. ཨིམིནཱ ཨཏཱིཏཀཱལིཀསྶ སབྦདྷམྨསྶ ཉཱཏབྷཱཝཾ དསྶེཏི ¶ . ཨཛཱནིཏབྦནྟི ཨནཱགཏཀཱལིཀཾ ཨཛཱནིཏབྦཾ ནཱམ དྷམྨཛཱཏཾ ན བྷཝིསྶཏི, ནཏྠི ཝཱ. ཨིམིནཱ ཨནཱགཏཀཱལིཀསྶ སབྦདྷམྨསྶ ཉཱཏབྷཱཝཾ དསྶེཏི. ཛཱནནཀིརིཡཱཝིསེསནམཏྟམེཝ ཝཱ ཨེཏྠ ཨ-ཀཱརོ. སབྦཾ ཨབྷིཉྙཱསི ཡདཏྠི ནེཡྻནྟི ཨེཏྠ ཡཾ ཏེཀཱལིཀཾ ཝཱ ཀཱལཝིམུཏྟཾ ཝཱ ནེཡྻཾ ཛཱནིཏབྦཾ ཀིཉྩི དྷམྨཛཱཏཾ ཨཏྠི, ཏཾ སབྦཾ ཏཐཱགཏོ ཨབྷིཉྙཱསི ཨདྷིཀེན སབྦཉྙུཏཉྙཱཎེན ཛཱནི པཊིཝིཛ྄ཛྷི. ཨེཏྠ ཨཏྠིསདྡེན ཏེཀཱལིཀསྶ ཀཱལཝིམུཏྟསྶ ཙ གཧཎཱ ཨཏྠི-སདྡོ ཨབྱཡབྷཱུཏོཡེཝ དཊྛབྦོ. ཏཐཱགཏོ ཏེན སམནྟཙཀྑཱུཏི ཀཱལཝསེན ཨོཀཱསཝསེན ཙ ནིཔྤདེསཏྟཱ སམནྟཱ སབྦཏོ པཝཏྟཾ ཉཱཎཙཀྑུ ཨསྶཱཏི སམནྟཙཀྑུ. ཏེན ཡཐཱཝུཏྟེན ཀཱརཎེན ཏཐཱགཏོ སམནྟཙཀྑུ, སབྦཉྙཱུཏི ཝུཏྟཾ ཧོཏི. ཨིམིསྶཱ གཱཐཱཡ པུགྒལཱདྷིཊྛཱནཱཡ དེསནཱཡ སབྦཉྙུཏཉྙཱཎཾ སཱདྷིཏཾ.

པུན བུདྡྷཉཱཎཱནཾ ཝིསཡཝསེན སབྦཉྙུཏཉྙཱཎཾ དསྶེཏུཀཱམོ སམནྟཙཀྑཱུཏི ཀེནཊྛེན སམནྟཙཀྑཱུཏིཨཱདིམཱཧ. ཏཏྠ གཱཐཱཡ སམནྟཙཀྑཱུཏི ཝུཏྟཔདེ ཡཾ ཏཾ སམནྟཙཀྑུ, ཏཾ ཀེནཊྛེན སམནྟཙཀྑཱུཏི ཨཏྠོ. ཨཏྠོ པནསྶ ཡཱཝཏཱ ¶ དུཀྑསྶ དུཀྑཊྛོཏིཨཱདཱིཧི ཝུཏྟོཡེཝ ཧོཏི. སབྦཉྙུཏཉྙཱཎཉྷི སམནྟཙཀྑུ. ཡཐཱཧ – ‘‘སམནྟཙཀྑུ ཝུཙྩཏི སབྦཉྙུཏཉྙཱཎ’’ནྟི (ཙཱུལ༹ནི. དྷོཏཀམཱཎཝཔུཙྪཱནིདྡེས ༣༢). ཏསྨིཾ སབྦཉྙུཏཉྙཱཎཊྛེ ཝུཏྟེ སམནྟཙཀྑུཊྛོ ཝུཏྟོཡེཝ ཧོཏཱིཏི. བུདྡྷསྶེཝ ཉཱཎཱནཱིཏི བུདྡྷཉཱཎཱནི. དུཀྑེ ཉཱཎཱདཱིནིཔི ཧི སབྦཱཀཱརེན བུདྡྷསྶེཝ བྷགཝཏོ པཝཏྟནྟི, ཨིཏརེསཾ པན ཨེཀདེསམཏྟེནེཝ པཝཏྟནྟི. སཱཝཀསཱདྷཱརཎཱནཱིཏི པན ཨེཀདེསེནཱཔི ཨཏྠིཏཾ སནྡྷཱཡ ཝུཏྟཾ. སབྦོ ཉཱཏོཏི སབྦོ ཉཱཎེན ཉཱཏོ. ཨཉྙཱཏོ དུཀྑཊྛོ ནཏྠཱིཏི ཝུཏྟམེཝ ཨཏྠཾ པཊིསེདྷེན ཝིབྷཱཝེཏི. སབྦོ དིཊྛོཏི ན ཀེཝལཾ ཉཱཏམཏྟོཡེཝ, ཨཐ ཁོ ཙཀྑུནཱ དིཊྛོ ཝིཡ ཀཏོ. སབྦོ ཝིདིཏོཏི ན ཀེཝལཾ དིཊྛམཏྟོཡེཝ, ཨཐ ཁོ པཱཀཊོ. སབྦོ སཙྪིཀཏོཏི ན ཀེཝལཾ ཝིདིཏོཡེཝ, ཨཐ ཁོ ཏཏྠ ཉཱཎཔཊིལཱབྷཝསེན པཙྩཀྑཱིཀཏོ. སབྦོ ཕསྶིཏོཏི ན ཀེཝལཾ སཙྪིཀཏོཡེཝ, ཨཐ ཁོ པུནཔྤུནཾ ཡཐཱརུཙི སམུདཱཙཱརཝསེན ཕུཊྛོཏི. ཨཐ ཝཱ ཉཱཏོ སབྷཱཝལཀྑཎཝསེན. དིཊྛོ སཱམཉྙལཀྑཎཝསེན. ཝིདིཏོ རསཝསེན. སཙྪིཀཏོ པཙྩུཔཊྛཱནཝསེན ¶ . ཕསྶིཏོ པདཊྛཱནཝསེན. ཨཐ ཝཱ ཉཱཏོ ཉཱཎུཔྤཱདཝསེན. དིཊྛོ ཙཀྑུཔྤཱདཝསེན. ཝིདིཏོ པཉྙུཔྤཱདཝསེན. སཙྪིཀཏོ ཝིཛྫུཔྤཱདཝསེན. ཕསྶིཏོ ཨཱལོཀུཔྤཱདཝསེན. ‘‘ཡཱཝཏཱ དུཀྑསྶ དུཀྑཊྛོ, སབྦོ དིཊྛོ, ཨདིཊྛོ དུཀྑཊྛོ ནཏྠཱི’’ཏིཨཱདིནཱ ནཡེན ཙ ‘‘ཡཱཝཏཱ སདེཝཀསྶ ལོཀསྶ…པེ… ཨནུཝིཙརིཏཾ མནསཱ, སབྦཾ ཉཱཏཾ, ཨཉྙཱཏཾ ནཏྠཱི’’ཏིཨཱདིནཱ ནཡེན ¶ ཙ ཝིཏྠཱརོ ཝེདིཏབྦོ. པཋམཾ ཝུཏྟགཱཐཱ ནིགམནཝསེན པུན ཝུཏྟཱ. ཏཾནིགམནེཡེཝ ཧི ཀཏེ ཉཱཎནིགམནམྤི ཀཏམེཝ ཧོཏཱིཏི.

སབྦཉྙུཏཉྙཱཎནིདྡེསཝཎྞནཱ ནིཊྛིཏཱ.

སདྡྷམྨཔྤཀཱསིནིཡཱ པཊིསམྦྷིདཱམགྒ-ཨཊྛཀཐཱཡ

ཉཱཎཀཐཱཝཎྞནཱ ནིཊྛིཏཱ.

༢. དིཊྛིཀཐཱ

༡. ཨསྶཱདདིཊྛིནིདྡེསཝཎྞནཱ

༡༢༢. ཨིདཱནི ¶ ¶ ཉཱཎཀཐཱནནྟརཾ ཀཐིཏཱཡ དིཊྛིཀཐཱཡ ཨནུཔུབྦཨནུཝཎྞནཱ ཨནུཔྤཏྟཱ. ཨཡཉྷི དིཊྛིཀཐཱ ཉཱཎཀཐཱཡ ཀཏཉཱཎཔརིཙཡསྶ སམདྷིགཏསམྨཱདིཊྛིསྶ མིཙྪཱདིཊྛིམལཝིསོདྷནཱ སུཀརཱ ཧོཏི, སམྨཱདིཊྛི ཙ སུཔརིསུདྡྷཱ ཧོཏཱིཏི ཉཱཎཀཐཱནནྟརཾ ཀཐིཏཱ. ཏཏྠ ཀཱ དིཊྛཱིཏིཨཱདིཀཱ པུཙྪཱ. ཀཱ དིཊྛཱིཏི ཨབྷིནིཝེསཔརཱམཱསོ དིཊྛཱིཏིཨཱདིཀཾ པུཙྪིཏཔུཙྪཱཡ ཝིསྶཛྫནཾ. ཀཐཾ ཨབྷིནིཝེསཔརཱམཱསོ དིཊྛཱིཏིཨཱདིཀོ ཝིསྶཛྫིཏཝིསྶཛྫནསྶ ཝིཏྠཱརནིདྡེསོ, སབྦཱཝ ཏཱ དིཊྛིཡོ ཨསྶཱདདིཊྛིཡོཏིཨཱདིཀཱ དིཊྛིསུཏྟསཾསནྡནཱཏི ཨེཝམིམེ ཙཏྟཱརོ པརིཙྪེདཱ. ཏཏྠ པུཙྪཱཔརིཙྪེདེ ཏཱཝ ཀཱ དིཊྛཱིཏི དྷམྨཔུཙྪཱ, སབྷཱཝཔུཙྪཱ. ཀཏི དིཊྛིཊྛཱནཱནཱིཏི ཧེཏུཔུཙྪཱ པཙྩཡཔུཙྪཱ, ཀིཏྟཀཱནི དིཊྛཱིནཾ ཀཱརཎཱནཱིཏི ཨཏྠོ. ཀཏི དིཊྛིཔརིཡུཊྛཱནཱནཱིཏི སམུདཱཙཱརཔུཙྪཱ ཝིཀཱརཔུཙྪཱ. དིཊྛིཡོ ཨེཝ ཧི སམུདཱཙཱརཝསེན ཙིཏྟཾ པརིཡོནནྡྷནྟིཡོ ཨུཊྛཧནྟཱིཏི དིཊྛིཔརིཡུཊྛཱནཱནི ¶ ནཱམ ཧོནྟི. ཀཏི དིཊྛིཡོཏི དིཊྛཱིནཾ སངྑཱཔུཙྪཱ གཎནཱཔུཙྪཱ. ཀཏི དིཊྛཱབྷིནིཝེསཱཏི ཝཏྠུཔྤབྷེདཝསེན ཨཱརམྨཎནཱནཏྟཝསེན དིཊྛིཔྤབྷེདཔུཙྪཱ. དིཊྛིཡོ ཨེཝ ཧི ཏཾ ཏཾ ཝཏྠུཾ ཏཾ ཏཾ ཨཱརམྨཎཾ ཨབྷིནིཝིསནྟི པརཱམསནྟཱིཏི དིཊྛིཔརཱམཱསཱཏི ཝུཙྩནྟི. ཀཏམོ དིཊྛིཊྛཱནསམུགྒྷཱཏོཏི དིཊྛཱིནཾ པཊིཔཀྑཔུཙྪཱ པཧཱནཱུཔཱཡཔུཙྪཱ. དིཊྛིཀཱརཎཱནི ཧི ཁནྡྷཱདཱིནི དིཊྛིསམུགྒྷཱཏེན ཏཱསཾ ཀཱརཎཱནི ན ཧོནྟཱིཏི ཏཱནི ཙ ཀཱརཎཱནི སམུགྒྷཱཏིཏཱནི ནཱམ ཧོནྟི. ཏསྨཱ དིཊྛིཊྛཱནཱནི སམྨཱ བྷུསཾ ཧཉྙནྟི ཨེཏེནཱཏི དིཊྛིཊྛཱནསམུགྒྷཱཏོཏི ཝུཙྩཏི.

ཨིདཱནི ཨེཏཱསཾ ཚནྣཾ པུཙྪཱནཾ ཀཱ དིཊྛཱིཏིཨཱདཱིནི ཚ ཝིསྶཛྫནཱནི. ཏཏྠ ཀཱ དིཊྛཱིཏི ཝིསྶཛྫེཏབྦཔུཙྪཱ. ཨབྷིནིཝེསཔརཱམཱསོ དིཊྛཱིཏི ཝིསྶཛྫནཾ. སཱ པན ཨནིཙྩཱདིཀེ ¶ ཝཏྠུསྨིཾ ནིཙྩཱདིཝསེན ཨབྷིནིཝིསཏི པཏིཊྛཧཏི དལ༹ྷཾ གཎྷཱཏཱིཏི ཨབྷིནིཝེསོ. ཨནིཙྩཱདིཨཱཀཱརཾ ཨཏིཀྐམིཏྭཱ ནིཙྩནྟིཨཱདིཝསེན ཝཏྟམཱནོ པརཏོ ཨཱམསཏི གཎྷཱཏཱིཏི པརཱམཱསོ. ཨཐ ཝཱ ནིཙྩནྟིཨཱདིཀཾ པརཾ ཨུཏྟམཾ སཙྩནྟི ཨཱམསཏི གཎྷཱཏཱིཏི པརཱམཱསོ, ཨབྷིནིཝེསོ ¶ ཙ སོ པརཱམཱསོ ཙཱཏི ཨབྷིནིཝེསཔརཱམཱསོ. ཨེཝཾཔཀཱརོ དིཊྛཱིཏི ཀིཙྩཏོ དིཊྛིསབྷཱཝཾ ཝིསྶཛྫེཏི. ཏཱིཎི སཏནྟི ཏཱིཎི སཏཱནི, ཝཙནཝིཔལླཱསོ ཀཏོ. ཀཏམོ དིཊྛིཊྛཱནསམུགྒྷཱཏོཏི པུཙྪཾ ཨནུདྡྷརིཏྭཱཝ སོཏཱཔཏྟིམགྒོ དིཊྛིཊྛཱནསམུགྒྷཱཏོཏི ཝིསྶཛྫནཾ ཀཏཾ.

༡༢༣. ཨིདཱནི ཀཐཾ ཨབྷིནིཝེསཔརཱམཱསོཏིཨཱདི ཝིཏྠཱརནིདྡེསོ. ཏཏྠ རཱུཔནྟི ཨུཔཡོགཝཙནཾ. རཱུཔཾ ཨབྷིནིཝེསཔརཱམཱསོཏི སམྦནྡྷོ. རཱུཔནྟི ཙེཏྠ རཱུཔུཔཱདཱནཀྑནྡྷོ ཀསིཎརཱུཔཉྩ. ‘‘ཨེཏཾ མམཱ’’ཏི ཨབྷིནིཝེསཔརཱམཱསོ དིཊྛི, ‘‘ཨེསོཧམསྨཱི’’ཏི ཨབྷིནིཝེསཔརཱམཱསོ དིཊྛི, ‘‘ཨེསོ མེ ཨཏྟཱ’’ཏི ཨབྷིནིཝེསཔརཱམཱསོ དིཊྛཱིཏི པཙྩེཀཾ ཡོཛེཏབྦཾ. ཨེཏནྟི སཱམཉྙཝཙནཾ. ཏེནེཝ ‘‘ཝེདནཾ ཨེཏཾ མམ, སངྑཱརེ ཨེཏཾ མམཱ’’ཏི ནཔུཾསཀཝཙནཾ ཨེཀཝཙནཉྩ ཀཏཾ. ཨེསོཏི པན ཝཏྟབྦམཔེཀྑིཏྭཱ པུལླིངྒེཀཝཙནཾ ཀཏཾ. ཨེཏཾ མམཱཏི ཏཎྷཱམཉྙནཱམཱུལིཀཱ དིཊྛི. ཨེསོཧམསྨཱིཏི མཱནམཉྙནཱམཱུལིཀཱ དིཊྛི. ཨེསོ མེ ཨཏྟཱཏི དིཊྛིམཉྙནཱ ཨེཝ. ཀེཙི པན ‘‘ཨེཏཾ མམཱཏི མམཾཀཱརཀཔྤནཱ, ཨེསོཧམསྨཱིཏི ཨཧཾཀཱརཀཔྤནཱ, ཨེསོ མེ ཨཏྟཱཏི ¶ ཨཧཾཀཱརམམཾཀཱརཀཔྤིཏོ ཨཏྟཱབྷིནིཝེསོཏི ཙ, ཏཐཱ ཡཐཱཀྐམེནེཝ ཏཎྷཱམཱུལནིཝེསོ མཱནཔགྒཱཧོ, ཏཎྷཱམཱུལནིཝིཊྛོ མཱནཔགྒཧིཏོ, ཨཏྟཱབྷིནིཝེསོཏི ཙ, སངྑཱརཱནཾ དུཀྑལཀྑཎཱདསྶནཾ, སངྑཱརཱནཾ ཨནིཙྩལཀྑཎཱདསྶནཾ, སངྑཱརཱནཾ ཏིལཀྑཎཱདསྶནཧེཏུཀོ ཨཏྟཱབྷིནིཝེསོཏི ཙ, དུཀྑེ ཨསུབྷེ ཙ སུཁཾ སུབྷནྟི ཝིཔལླཱསགཏསྶ, ཨནིཙྩེ ནིཙྩནྟི ཝིཔལླཱསགཏསྶ, ཙཏུབྦིདྷཝིཔལླཱསགཏསྶ ཙ ཨཏྟཱབྷིནིཝེསོཏི ཙ, པུབྦེནིཝཱསཉཱཎསྶ ཨཱཀཱརཀཔྤནཱ, དིབྦཙཀྑུཉཱཎསྶ ཨནཱགཏཔཊིལཱབྷཀཔྤནཱ, པུབྦནྟཱཔརནྟཨིདཔྤཙྩཡཏཱཔཊིཙྩསམུཔྤནྣེསུ ¶ དྷམྨེསུ ཀཔྤནིསྶིཏསྶ ཨཏྟཱབྷིནིཝེསོཏི ཙ, ནནྡིཡཱ ཨཏཱིཏམནྭཱགམེཏི, ནནྡིཡཱ ཨནཱགཏཾ པཊིཀངྑཏི, པཙྩུཔྤནྣེསུ དྷམྨེསུ སཾཧཱིརཏི ཨཏྟཱབྷིནིཝེསོཏི ཙ, པུབྦནྟེ ཨཉྙཱཎཧེཏུཀཱ དིཊྛི, ཨཔརནྟེ ཨཉྙཱཎཧེཏུཀཱ དིཊྛི, པུབྦནྟཱཔརནྟེ ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཨཉྙཱཎཧེཏུཀོ ཨཏྟཱབྷིནིཝེསོ’’ཏི ཙ ཨེཏེསཾ ཏིཎྞཾ ཝཙནཱནཾ ཨཏྠཾ ཝཎྞཡནྟི.

དིཊྛིཡོ པནེཏྠ པཋམཾ པཉྩཀྑནྡྷཝཏྠུཀཱ. ཏཏོ ཚཨཛ྄ཛྷཏྟིཀབཱཧིརཱཡཏནཝིཉྙཱཎ- ཀཱཡསམྥསྶཀཱཡཝེདནཱཀཱཡསཉྙཱཀཱཡཙེཏནཱཀཱཡཏཎྷཱཀཱཡཝིཏཀྐཝིཙཱརདྷཱཏུདསཀསིཎ- དྭཏྟིཾསཱཀཱརཝཏྠུཀཱ དིཊྛིཡོ ཝུཏྟཱ. དྭཏྟིཾསཱཀཱརེསུ ཙ ཡཏྠ ཝིསུཾ ཨབྷིནིཝེསོ ན ཡུཛྫཏི, ཏཏྠ སཀལསརཱིརཱབྷིནིཝེསཝསེནེཝ ཝིསུཾ ཨབྷིནིཝེསོ ཝིཡ ཀཏོཏི ཝེདིཏབྦཾ. ཏཏོ དྭཱདསཱཡཏནཨཊྛཱརསདྷཱཏུཨེཀཱུནཝཱིསཏིཨིནྡྲིཡཝསེན ཡོཛནཱ ཀཏཱ. ཏཱིཎི ཨེཀནྟལོཀུཏྟརིནྡྲིཡཱནི ན ¶ ཡོཛིཏཱནི. ན ཧི ལོཀུཏྟརཝཏྠུཀཱ དིཊྛིཡོ ཧོནྟི. སབྦཏྠཱཔི ཙ ལོཀིཡལོཀུཏྟརམིསྶེསུ དྷམྨེསུ ལོཀུཏྟརེ ཋཔེཏྭཱ ལོཀིཡཱ ཨེཝ གཧེཏབྦཱ. ཨནིནྡྲིཡབདྡྷརཱུཔཉྩ ན གཧེཏབྦམེཝ. ཏཏོ ཏེདྷཱཏུཀཝསེན ནཝཝིདྷབྷཝཝསེན ཛྷཱནབྲཧྨཝིཧཱརསམཱཔཏྟིཝསེན པཊིཙྩསམུཔྤཱདངྒཝསེན ཙ ཡོཛནཱ ཀཏཱ. ཛཱཏིཛརཱམརཎཱནཾ ཝིསུཾ གཧཎེ པརིཧཱརོ ཝུཏྟནཡོ ཨེཝ. སབྦཱནི ཙེཏཱནི རཱུཔཱདིཀཱནི ཛརཱམརཎནྟཱནི ཨཊྛནཝུཏིསཏཾ པདཱནི བྷཝནྟི.

༡༢༤. དིཊྛིཊྛཱནེསུ ཁནྡྷཱཔི དིཊྛིཊྛཱནནྟི ཝཱིསཏིཝཏྠུཀཱཡཔི སཀྐཱཡདིཊྛིཡཱ པཉྩནྣཾ ཁནྡྷཱནཾཡེཝ ཝཏྠུཏྟཱ ‘‘ཡེ ཧི ཀེཙི, བྷིཀྑཝེ, སམཎཱ ཝཱ བྲཱཧྨཎཱ ཝཱ ཨཏྟཱནཾ སམནུཔསྶམཱནཱ སམནུཔསྶནྟི, སབྦེ ཏེ པཉྩུཔཱདཱནཀྑནྡྷེསུཡེཝ ¶ སམནུཔསྶནྟི, ཨེཏེསཾ ཝཱ ཨཉྙཏར’’ནྟི (སཾ. ནི. ༣.༤༧) ཝུཏྟཏྟཱ ཙ པཉྩུཔཱདཱནཀྑནྡྷཱ དིཊྛཱིནཾ ཀཱརཎཾ. ཨཝིཛྫཱཔི དིཊྛིཊྛཱནནྟི ཨཝིཛྫཱཡ ཨནྡྷཱིཀཏཱནཾ དིཊྛིཨུཔྤཏྟིཏོ ‘‘ཡཱཡཾ, བྷནྟེ, དིཊྛི ‘ཨསམྨཱསམྦུདྡྷེསུ ¶ སམྨཱསམྦུདྡྷཱ’ཏི, ཨཡཾ ནུ ཁོ, བྷནྟེ, དིཊྛི ཀིཾ པཊིཙྩ པཉྙཱཡཏཱིཏི? མཧཏཱི ཁོ ཨེསཱ, ཀཙྩཱན, དྷཱཏུ, ཡདིདཾ ཨཝིཛྫཱདྷཱཏུ. ཧཱིནཾ, ཀཙྩཱན, དྷཱཏུཾ པཊིཙྩ ཨུཔྤཛྫཏི ཧཱིནཱ སཉྙཱ ཧཱིནཱ དིཊྛཱི’’ཏི (སཾ. ནི. ༢.༩༧) ཝཙནཏོ ཙ ཨཝིཛྫཱ དིཊྛཱིནཾ ཀཱརཎཾ. ཕསྶོཔི དིཊྛིཊྛཱནནྟི ཏེན ཕསྶེན ཕུཊྛསྶ དིཊྛིཨུཔྤཏྟིཏོ ‘‘ཡེ ཏེ, བྷིཀྑཝེ, སམཎབྲཱཧྨཎཱ པུབྦནྟཀཔྤིཀཱ པུབྦནྟཱནུདིཊྛིནོ པུབྦནྟཾ ཨཱརབྦྷ ཨནེཀཝིཧིཏཱནི ཨདྷིཝུཏྟིཔདཱནི ཨབྷིཝདནྟི, ཏདཔི ཕསྶཔཙྩཡཱ’’ཏི (དཱི. ནི. ༡.༡༢༣) ཝཙནཏོ ཙ ཕསྶོ དིཊྛཱིནཾ ཀཱརཎཾ. སཉྙཱཔི དིཊྛིཊྛཱནནྟི ཨཱཀཱརམཏྟགྒཧཎེན ཨཡཱཐཱཝསབྷཱཝགཱཧཧེཏུཏྟཱ སཉྙཱཡ –

‘‘ཡཱནི ཙ ཏཱིཎི ཡཱནི ཙ སཊྛི, སམཎཔྤཝཱདསིཏཱནི བྷཱུརིཔཉྙ;

སཉྙཀྑརསཉྙནིསྶིཏཱནི, ཨོསརཎཱནི ཝིནེཡྻ ཨོགྷཏམགཱ’’ཏི. (སུ. ནི. ༥༤༣) –

ཝཙནཏོ ‘‘སཉྙཱནིདཱནཱ ཧི པཔཉྩསངྑཱ’’ཏི (སུ. ནི. ༨༨༠; མཧཱནི. ༡༠༩) ཝཙནཏོ ཙ སཉྙཱ དིཊྛཱིནཾ ཀཱརཎཾ. ཝིཏཀྐོཔི དིཊྛིཊྛཱནནྟི ཨཱཀཱརཔརིཝིཏཀྐེན དིཊྛིཨུཔྤཏྟིཏོ –

‘‘ནཧེཝ ¶ སཙྩཱནི བཧཱུནི ནཱནཱ, ཨཉྙཏྲ སཉྙཱཡ ནིཙྩཱནི ལོཀེ;

ཏཀྐཉྩ དིཊྛཱིསུ པཀཔྤཡིཏྭཱ, སཙྩཾ མུསཱཏི དྭཡདྷམྨམཱཧཱུ’’ཏི. (སུ. ནི. ༨༩༢) –

ཝཙནཏོ ཙ ཝིཏཀྐོ དིཊྛཱིནཾ ཀཱརཎཾ. ཨཡོནིསོམནསིཀཱརོཔི དིཊྛིཊྛཱནནྟི ཨཡོནིསོ མནསིཀཱརསྶ ཨཀུསལཱནཾ ཨསཱདྷཱརཎཧེཏུཏྟཱ ‘‘ཏསྶེཝཾ ཨཡོནིསོ མནསིཀརོཏོ ཚནྣཾ དིཊྛཱིནཾ ཨཉྙཏརཱ དིཊྛི ཨུཔྤཛྫཏཱི’’ཏི (མ. ནི. ༡.༡༩) ཝཙནཏོ ཙ ཨཡོནིསོ མནསིཀཱརོ དིཊྛཱིནཾ ཀཱརཎཾ ¶ . པཱཔམིཏྟོཔི དིཊྛིཊྛཱནནྟི པཱཔམིཏྟསྶ དིཊྛཱནུགཏིཨཱཔཛྫནེན དིཊྛིཨུཔྤཏྟིཏོ ‘‘བཱཧིརཾ, བྷིཀྑཝེ, ཨངྒནྟི ཀརིཏྭཱ ན ཨཉྙཾ ཨེཀངྒམྤི སམནུཔསྶཱམི, ཡཾ ཨེཝཾ མཧཏོ ཨནཏྠཱཡ སཾཝཏྟཏི. ཡཐཡིདཾ, བྷིཀྑཝེ, པཱཔམིཏྟཏཱ’’ཏི ¶ (ཨ. ནི. ༡.༡༡༠) ཝཙནཏོ ཙ པཱཔམིཏྟོ དིཊྛཱིནཾ ཀཱརཎཾ. པརཏོཔི གྷོསོ དིཊྛིཊྛཱནནྟི དུརཀྑཱཏདྷམྨསྶཝནེན དིཊྛིཨུཔྤཏྟིཏོ ‘‘དྭེམེ, བྷིཀྑཝེ, ཧེཏཱུ དྭེ པཙྩཡཱ མིཙྪཱདིཊྛིཡཱ ཨུཔྤཱདཱཡ པརཏོ ཙ གྷོསོ ཨཡོནིསོ ཙ མནསིཀཱརོ’’ཏི (ཨ. ནི. ༢.༡༢༦) ཝཙནཏོ ཙ པརཏོ གྷོསོ མིཙྪཱདིཊྛིཀཏོ མིཙྪཱདིཊྛིཔཊིསཉྙུཏྟཀཐཱ དིཊྛཱིནཾ ཀཱརཎཾ.

ཨིདཱནི དིཊྛིཊྛཱནནྟི པདསྶ ཨཏྠཾ ཝིཝརནྟོ ཁནྡྷཱ ཧེཏུ ཁནྡྷཱ པཙྩཡོཏིཨཱདིམཱཧ. ཁནྡྷཱ ཨེཝ དིཊྛཱིནཾ ཨུཔཱདཱཡ, ཛནཀཧེཏུ ཙེཝ ཨུཔཏྠམྦྷཀཔཙྩཡོ ཙཱཏི ཨཏྠོ. སམུཊྛཱནཊྛེནཱཏི སམུཊྛཧནྟི ཨུཔྤཛྫནྟི ཨེཏེནཱཏི སམུཊྛཱནཾ, ཀཱརཎནྟི ཨཏྠོ. ཏེན སམུཊྛཱནཊྛེན, དིཊྛིཀཱརཎབྷཱཝེནཱཏི ཨཏྠོ.

༡༢༥. ཨིདཱནི ཀིཙྩབྷེདེན དིཊྛིབྷེདཾ དསྶེནྟོ ཀཏམཱནི ཨཊྛཱརས དིཊྛིཔརིཡུཊྛཱནཱནཱིཏིཨཱདིམཱཧ. ཏཏྠ ཡཱ དིཊྛཱིཏི ཨིདཱནི ཝུཙྩམཱནཱནཾ ཨཊྛཱརསནྣཾ པདཱནཾ སཱདྷཱརཎཾ མཱུལཔདཾ. ཡཱ དིཊྛི, ཏདེཝ དིཊྛིགཏཾ, ཡཱ དིཊྛི, ཏདེཝ དིཊྛིགཧནནྟི སབྦེཧི སམྦནྡྷོ ཀཱཏབྦོ. ཨཡཱཐཱཝདསྶནཊྛེན དིཊྛི, ཏདེཝ དིཊྛཱིསུ གཏཾ དསྶནཾ དྭཱསཊྛིདིཊྛིཨནྟོགདྷཏྟཱཏི དིཊྛིགཏཾ. ཧེཊྛཱཔིསྶ ཨཏྠོ ཝུཏྟོཡེཝ. དྭིནྣཾ ཨནྟཱནཾ ཨེཀནྟགཏཏྟཱཔི དིཊྛིགཏཾ. སཱ ཨེཝ དིཊྛི དུརཏིཀྐམནཊྛེན དིཊྛིགཧནཾ ཏིཎགཧནཝནགཧནཔབྦཏགཧནཱནི ཝིཡ. སཱསངྐསཔྤཊིབྷཡཊྛེན དིཊྛིཀནྟཱརཾ ཙོརཀནྟཱརཝཱལ༹ཀནྟཱརནིརུདཀཀནྟཱརདུབྦྷིཀྑཀནྟཱརཱ ཝིཡ. དྷམྨསངྒཎིཡཾ ‘‘དིཊྛིཀནྟཱརོ’’ཏི སཀལིངྒེནེཝ ཨཱགཏཾ. སམྨཱདིཊྛིཡཱ ཝིནིཝིཛ྄ཛྷནཊྛེན པཊིལོམཊྛེན ཙ དིཊྛིཝིསཱུཀཾ. མིཙྪཱདསྶནཉྷི ཨུཔྤཛྫམཱནཾ སམྨཱདསྶནཾ ཝིནིཝིཛ྄ཛྷཏི ཙེཝ ཝིལོམེཏི ཙ. དྷམྨསངྒཎིཡཾ (དྷ. ས. ༣༩༢, ༡༡༠༥) ‘‘དིཊྛིཝིསཱུཀཱཡིཀ’’ནྟི ¶ ཨཱགཏཾ. ཀདཱཙི སསྶཏསྶ, ཀདཱཙི ཨུཙྪེདསྶ གཧཎཏོ དིཊྛིཡཱ ཝིརཱུཔཾ ཕནྡིཏནྟི དིཊྛིཝིཔྥནྡིཏཾ. དིཊྛིགཏིཀོ ཧི ཨེཀསྨིཾ པཏིཊྛཱཏུཾ ན སཀྐོཏི, ཀདཱཙི སསྶཏཾ ཨནུསྶརཏི, ཀདཱཙི ཨུཙྪེདཾ. དིཊྛིཡེཝ ཨནཏྠེ སཾཡོཛེཏཱིཏི དིཊྛིསཉྙོཛནཾ. དིཊྛིཡེཝ ཨནྟོཏུདནཊྛེན དུནྣཱིཧརཎཱིཡཊྛེན ཙ སལླནྟི དིཊྛིསལླཾ ¶ ¶ . དིཊྛིཡེཝ པཱིལཱ༹ཀརཎཊྛེན སམྦཱདྷོཏི དིཊྛིསམྦཱདྷོ. དིཊྛིཡེཝ མོཀྑཱཝརཎཊྛེན པལིབོདྷོཏི དིཊྛིཔལིབོདྷོ. དིཊྛིཡེཝ དུམྨོཙནཱིཡཊྛེན བནྡྷནནྟི དིཊྛིབནྡྷནཾ. དིཊྛིཡེཝ དུརུཏྟརཊྛེན པཔཱཏོཏི དིཊྛིཔཔཱཏོ. དིཊྛིཡེཝ ཐཱམགཏཊྛེན ཨནུསཡོཏི དིཊྛཱནུསཡོ. དིཊྛིཡེཝ ཨཏྟཱནཾ སནྟཱཔེཏཱིཏི དིཊྛིསནྟཱཔོ. དིཊྛིཡེཝ ཨཏྟཱནཾ ཨནུདཧཏཱིཏི དིཊྛིཔརིལཱ༹ཧོ. དིཊྛིཡེཝ ཀིལེསཀཱཡཾ གནྠེཏཱིཏི དིཊྛིགནྠོ. དིཊྛིཡེཝ བྷུསཾ ཨཱདིཡཏཱིཏི དིཊྛུཔཱདཱནཾ. དིཊྛིཡེཝ ‘‘སཙྩ’’ནྟིཨཱདིཝསེན ཨབྷིནིཝིསཏཱིཏི དིཊྛཱབྷིནིཝེསོ. དིཊྛིཡེཝ ཨིདཾ པརནྟི ཨཱམསཏི, པརཏོ ཝཱ ཨཱམསཏཱིཏི དིཊྛིཔརཱམཱསོ.

༡༢༦. ཨིདཱནི རཱསིཝསེན སོལ༹ས དིཊྛིཡོ ཨུདྡིསནྟོ ཀཏམཱ སོལ༹ས དིཊྛིཡོཏིཨཱདིམཱཧ. ཏཏྠ སུཁསོམནསྶསངྑཱཏེ ཨསྶཱདེ དིཊྛི ཨསྶཱདདིཊྛི. ཨཏྟཱནཾ ཨནུགཏཱ དིཊྛི ཨཏྟཱནུདིཊྛི. ནཏྠཱིཏི པཝཏྟཏྟཱ ཝིཔརཱིཏཱ དིཊྛི མིཙྪཱདིཊྛི. སཏི ཀཱཡེ དིཊྛི, སནྟཱི ཝཱ ཀཱཡེ དིཊྛི སཀྐཱཡདིཊྛི. ཀཱཡོཏི ཙེཏྠ ཁནྡྷཔཉྩཀཾ, ཁནྡྷཔཉྩཀསངྑཱཏོ སཀྐཱཡོ ཝཏྠུ པཏིཊྛཱ ཨེཏིསྶཱཏི སཀྐཱཡཝཏྠུཀཱ. སསྶཏནྟི པཝཏྟཱ དིཊྛི སསྶཏདིཊྛི. ཨུཙྪེདོཏི པཝཏྟཱ དིཊྛི ཨུཙྪེདདིཊྛི. སསྶཏཱདིཨནྟཾ གཎྷཱཏཱིཏི ཨནྟགྒཱཧིཀཱ, ཨནྟགྒཱཧོ ཝཱ ཨསྶཱ ཨཏྠཱིཏི ཨནྟགྒཱཧིཀཱ. ཨཏཱིཏསངྑཱཏཾ པུབྦནྟཾ ཨནུགཏཱ དིཊྛི པུབྦནྟཱནུདིཊྛི. ཨནཱགཏསངྑཱཏཾ ཨཔརནྟཾ ཨནུགཏཱ དིཊྛི ཨཔརནྟཱནུདིཊྛི. ཨནཏྠེ སཾཡོཛེཏཱིཏི སཉྙོཛནིཀཱ. ཨཧངྐཱརཝསེན ཨཧནྟི ཨུཔྤནྣེན མཱནེན དིཊྛིཡཱ མཱུལབྷཱུཏེན ཝིནིབནྡྷཱ གྷཊིཏཱ ཨུཔྤཱདིཏཱ དིཊྛི ཨཧནྟི མཱནཝིནིབནྡྷཱ དིཊྛི. ཏཐཱ མམངྐཱརཝསེན མམནྟི ཨུཔྤནྣེན མཱནེན ཝིནིབནྡྷཱ དིཊྛི མམནྟི མཱནཝིནིབནྡྷཱ དིཊྛི. ཨཏྟནོ ཝདནཾ ཀཐནཾ ཨཏྟཝཱདོ, ཏེན པཊིསཉྙུཏྟཱ བདྡྷཱ དིཊྛི ཨཏྟཝཱདཔཊིསཾཡུཏྟཱ དིཊྛི. ཨཏྟཱནཾ ལོཀོཏི ཝདནཾ ཀཐནཾ ལོཀཝཱདོ, ཏེན པཊིསཉྙུཏྟཱ དིཊྛི ལོཀཝཱདཔཊིསཾཡུཏྟཱ དིཊྛི. བྷཝོ ཝུཙྩཏི སསྶཏཾ, སསྶཏཝསེན ཨུཔྤཛྫནདིཊྛི བྷཝདིཊྛི. ཝིབྷཝོ ཝུཙྩཏི ཨུཙྪེདོ, ཨུཙྪེདཝསེན ཨུཔྤཛྫནདིཊྛི ཝིབྷཝདིཊྛི.

༡༢༧-༡༢༨. ཨིདཱནི ¶ ཏཱིཎི སཏཾ དིཊྛཱབྷིནིཝེསེ ནིདྡིསིཏུཀཱམོ ཀཏམེ ཏཱིཎི སཏཾ དིཊྛཱབྷིནིཝེསཱཏི པུཙྪིཏྭཱ ཏེ ཨཝིསྶཛྫེཏྭཱཝ ཝིསུཾ ཝིསུཾ ཨབྷིནིཝེསཝིསྶཛྫནེནེཝ ཏེ ཝིསྶཛྫེཏུཀཱམོ ཨསྶཱདདིཊྛིཡཱ, ཀཏིཧཱཀཱརེཧི ¶ ཨབྷིནིཝེསོ ཧོཏཱིཏིཨཱདིནཱ ནཡེན སོལ༹སནྣཾ དིཊྛཱིནཾ ཨབྷིནིཝེསཱཀཱརགཎནཾ པུཙྪིཏྭཱ པུན ཨསྶཱདདིཊྛིཡཱ པཉྩཏིཾསཱཡ ཨཱཀཱརེཧི ཨབྷིནིཝེསོ ཧོཏཱིཏི ཏཱསཾ སོལ༹སནྣཾ དིཊྛཱིནཾ ཨབྷིནིཝེསཱཀཱརགཎནཾ ཝིསྶཛྫེཏྭཱ པུན ཏཱནི གཎནཱནི ཝིསྶཛྫེནྟོ ཨསྶཱདདིཊྛིཡཱ ཀཏམེཧི པཉྩཏིཾསཱཡ ཨཱཀཱརེཧི ཨབྷིནིཝེསོ ¶ ཧོཏཱིཏིཨཱདིམཱཧ. ཏཏྠ རཱུཔཾ པཊིཙྩཱཏི རཱུཔཀྑནྡྷཾ པཊིཙྩ. ཨུཔྤཛྫཏི སུཁཾ སོམནསྶནྟི ‘‘ཨཡཾ མེ ཀཱཡོ ཨཱིདིསོ’’ཏི རཱུཔསམྤདཾ ནིསྶཱཡ གེཧསིཏཾ རཱགསམྤཡུཏྟཾ སུཁཾ སོམནསྶཾ ཨུཔྤཛྫཏི. ཧེཊྛཱ ཝུཏྟེནཊྛེན སུཁཉྩ སོམནསྶཉྩ. ཏཾཡེཝ རཱུཔསྶ ཨསྶཱདོཏི རཱུཔནིསྶཡོ ཨསྶཱདོ. ཏཉྷི སུཁཾ ཏཎྷཱཝསེན ཨསྶཱདཱིཡཏི ཨུཔབྷུཉྫཱིཡཏཱིཏི ཨསྶཱདོ. ཨབྷིནིཝེསཔརཱམཱསོ དིཊྛཱིཏི སོ ཨསྶཱདོ སསྶཏོཏི ཝཱ ཨུཙྪིཛྫིསྶཏཱིཏི ཝཱ སསྶཏཾ ཝཱ ཨུཙྪིཛྫམཱནཾ ཝཱ ཨཏྟཱནཾ སུཁིཏཾ ཀརོཏཱིཏི ཝཱ ཨབྷིནིཝེསཔརཱམཱསོ ཧོཏི. ཏསྨཱ ཡཱ ཙ དིཊྛི ཡོ ཙ ཨསྶཱདོཏི ཨསྶཱདསྶ དིཊྛིབྷཱཝཱབྷཱཝེཔི ཨསྶཱདཾ ཝིནཱ སཱ དིཊྛི ན ཧོཏཱིཏི ཀཏྭཱ ཨུབྷཡམྤི སམུཙྩིཏཾ. ཨསྶཱདདིཊྛཱིཏི ཨསྶཱདེ པཝཏྟཱ དིཊྛཱིཏི ཝུཏྟཾ ཧོཏི.

ཨིདཱནི ནཱནཱསུཏྟེཧི སཾསནྡེཏྭཱ མིཙྪཱདིཊྛིཾ མིཙྪཱདིཊྛིཀཉྩ གརཧིཏུཀཱམོ ཨསྶཱདདིཊྛི མིཙྪཱདིཊྛཱིཏིཨཱདིམཱཧ. ཏཏྠ དིཊྛིཝིཔཏྟཱིཏི སམྨཱདིཊྛིཝིནཱསཀམིཙྪཱདིཊྛིསངྑཱཏདིཊྛིཡཱ ཝིཔཏྟི. དིཊྛིཝིཔནྣོཏི ཝིཔནྣཱ ཝིནཊྛཱ སམྨཱདིཊྛི ཨསྶཱཏི དིཊྛིཝིཔནྣོ, ཝིཔནྣདིཊྛཱིཏི ཝུཏྟཾ ཧོཏི. མིཙྪཱདིཊྛིཡཱ ཝཱ ཝིཔནྣོ ཝིནཊྛོཏི དིཊྛིཝིཔནྣོ. ན སེཝིཏབྦོ ཨུཔསངྐམནེན. ན བྷཛིཏབྦོ ཙིཏྟེན. ན པཡིརུཔཱསིཏབྦོ ཨུཔསངྐམིཏྭཱ ནིསཱིདནེན. ཏཾ ཀིསྶ ཧེཏཱུཏི ‘‘ཏཾ སེཝནཱདིཀཾ ཀེན ཀཱརཎེན ན ཀཱཏབྦ’’ནྟི ཏསྶ ཀཱརཎཔུཙྪཱ. དིཊྛི ཧིསྶ པཱཔིཀཱཏི ཀཱརཎཝིསྶཛྫནཾ. ཡསྨཱ ཨསྶ པུགྒལསྶ དིཊྛི པཱཔིཀཱ, ཏསྨཱ ཏཾ སེཝནཱདིཀཾ ན ཀཱཏབྦནྟི ཨཏྠོ. དིཊྛིཡཱ རཱགོཏི ‘‘སུནྡརཱ མེ དིཊྛཱི’’ཏི དིཊྛིཾ ཨཱརབྦྷ དིཊྛིཡཱ ཨུཔྤཛྫནརཱགོ ¶ . དིཊྛིརཱགརཏྟོཏི ཏེན དིཊྛིརཱགེན རངྒེན རཏྟཾ ཝཏྠཾ ཝིཡ རཏྟོ. ན མཧཔྥལནྟི ཝིཔཱཀཕལེན. ན མཧཱནིསཾསནྟི ནིསྶནྡཕལེན.

པུརིསཔུགྒལསྶཱཏི པུརིསསངྑཱཏསྶ པུགྒལསྶ. ལོཀིཡཝོཧཱརེན ཧི པུརི ཝུཙྩཏི སརཱིརཾ, ཏསྨིཾ པུརིསྨིཾ སེཏི པཝཏྟཏཱིཏི པུརིསོ, པུཾ ཝུཙྩཏི ¶ ནིརཡོ, ཏཾ པུཾ གལཏི གཙྪཏཱིཏི པུགྒལོ. ཡེབྷུཡྻེན ཧི སཏྟཱ སུགཏིཏོ ཙུཏཱ དུགྒཏིཡཾཡེཝ ནིབྦཏྟནྟི. ཏཾ ཀིསྶ ཧེཏཱུཏི ཏཾ ན མཧཔྥལཏྟཾ ཀེན ཀཱརཎེན ཧོཏི. དིཊྛི ཧིསྶ པཱཔིཀཱཏི ཡསྨཱ ཨསྶ པུགྒལསྶ དིཊྛི པཱཔིཀཱ, ཏསྨཱ ན མཧཔྥལཾ ཧོཏཱིཏི ཨཏྠོ. དྭེཝ གཏིཡོཏི པཉྩསུ གཏཱིསུ དྭེཝ གཏིཡོ. ཝིཔཛྫམཱནཱཡ དིཊྛིཡཱ ནིརཡོ. སམྤཛྫམཱནཱཡ ཏིརཙྪཱནཡོནི. ཡཉྩེཝ ཀཱཡཀམྨནྟི སཀལིངྒདྷཱརཎཔཊིཔདཱནུཡོགཨབྷིཝཱདནཔཙྩུཊྛཱནཨཉྫལིཀམྨཱདི ཀཱཡཀམྨཾ. ཡཉྩ ཝཙཱིཀམྨནྟི སཀསམཡཔརིཡཱཔུཎནསཛ྄ཛྷཱཡནདེསནཱསམཱདཔནཱདི ཝཙཱིཀམྨཾ. ཡཉྩ མནོཀམྨནྟི ཨིདྷལོཀཙིནྟཱཔཊིསཾཡུཏྟཉྩ ¶ པརལོཀཙིནྟཱཔཊིསཾཡུཏྟཉྩ ཀཏཱཀཏཙིནྟཱཔཊིསཾཡུཏྟཉྩ མནོཀམྨཾ. ཏིཎཀཊྛདྷཉྙབཱིཛེསུ སཏྟདིཊྛིསྶ དཱནཱནུཔྤདཱནཔཊིགྒཧཎཔརིབྷོགེསུ ཙ ཀཱཡཝཙཱིམནོཀམྨཱནི. ཡཐཱདིཊྛཱིཏི ཡཱ ཨཡཾ དིཊྛི, ཏསྶཱནུརཱུཔཾ. སམཏྟནྟི པརིཔུཎྞཾ. སམཱདིནྣནྟི གཧིཏཾ.

ཨཊྛཀཐཱཡཾ པན ཝུཏྟཾ – ཏདེཏཾ ཡཐཱདིཊྛིཡཾ ཋིཏཀཱཡཀམྨཾ, དིཊྛིསཧཛཱཏཀཱཡཀམྨཾ, དིཊྛཱནུལོམིཀཀཱཡཀམྨནྟི ཏིཝིདྷཾ ཧོཏི. ཏཏྠ ‘‘པཱཎཾ ཧནཏོ ཨདིནྣཾ ཨཱདིཡཏོ མིཙྪཱཙརཏོ ནཏྠི ཏཏོནིདཱནཾ པཱཔཾ, ནཏྠི པཱཔསྶ ཨཱགམོ’’ཏི ཡཾ ཨེཝཾ དིཊྛིཀསྶ སཏོ པཱཎཱཏིཔཱཏཨདིནྣཱདཱནམིཙྪཱཙཱརསངྑཱཏཾ ཀཱཡཀམྨཾ, ཨིདཾ ཡཐཱདིཊྛིཡཾ ཋིཏཀཱཡཀམྨཾ ནཱམ. ‘‘པཱཎཾ ཧནཏོ ཨདིནྣཾ ཨཱདིཡཏོ མིཙྪཱཙརཏོ ནཏྠི ཏཏོནིདཱནཾ པཱཔཾ, ནཏྠི པཱཔསྶ ཨཱགམོ’’ཏི ཡཾ ཨིམཱཡ དིཊྛིཡཱ ཨིམིནཱ དསྶནེན སཧཛཱཏཾ ཀཱཡཀམྨཾ, ཨིདཾ དིཊྛིསཧཛཱཏཀཱཡཀམྨཾ ནཱམ. ཏདེཝ པན སམཏྟཾ སམཱདིནྣཾ གཧིཏཾ པརཱམཊྛཾ དིཊྛཱནུལོམིཀཀཱཡཀམྨཾ ནཱམ. ཝཙཱིཀམྨམནོཀམྨེསུཔི ¶ ཨེསེཝ ནཡོ. ཨེཏྠ པན མུསཱ བྷཎཏོ པིསུཎཾ བྷཎཏོ ཕརུསཾ བྷཎཏོ སམྥཾ པལཔཏོ ཨབྷིཛ྄ཛྷཱལུནོ བྱཱཔནྣཙིཏྟསྶ མིཙྪཱདིཊྛིཀསྶ སཏོ ནཏྠི ཏཏོནིདཱནཾ པཱཔཾ, ནཏྠི པཱཔསྶ ཨཱགམོཏི ཡོཛནཱ ཀཱཏབྦཱ. ལིངྒདྷཱརཎཱདིཔརིཡཱཔུཎནཱདིལོཀཙིནྟཱདིཝསེན ཝུཏྟནཡོ ཙེཏྠ སུནྡརོ.

ཙེཏནཱདཱིསུ དིཊྛིསཧཛཱཏཱ ཙེཏནཱ ཙེཏནཱ ནཱམ. དིཊྛིསཧཛཱཏཱ པཏྠནཱ པཏྠནཱ ནཱམ. ཙེཏནཱཔཏྠནཱནཾ ཝསེན ཙིཏྟཊྛཔནཱ པཎིདྷི ནཱམ. ཏེཧི པན ཙེཏནཱདཱིཧི སམྤཡུཏྟཱ ཕསྶཱདཡོ སངྑཱརཀྑནྡྷཔརིཡཱཔནྣཱ དྷམྨཱ ¶ སངྑཱརཱ ནཱམ. ཨནིཊྛཱཡཱཏིཨཱདཱིཧི དུཀྑམེཝ ཝུཏྟཾ. དུཀྑཉྷི སུཁཀཱམེཧི སཏྟེཧི ན ཨེསིཏཏྟཱ ཨནིཊྛཾ. ཨཔྤིཡཏྟཱ ཨཀནྟཾ. མནསྶ ཨཝཌྜྷནཏོ, མནསི ཨཝིསཔྤནཏོ ཙ ཨམནཱཔཾ. ཨཱཡཏིཾ ཨབྷདྡཏཱཡ ཨཧིཏཾ. པཱིལ༹ནཏོ དུཀྑནྟི. ཏཾ ཀིསྶ ཧེཏཱུཏི ཏཾ ཨེཝཾ སཾཝཏྟནཾ ཀེན ཀཱརཎེན ཧོཏཱིཏི ཨཏྠོ. ཨིདཱནིསྶ ཀཱརཎཾ དིཊྛི ཧིསྶ པཱཔིཀཱཏི. ཡསྨཱ ཏསྶ པུགྒལསྶ དིཊྛི པཱཔིཀཱ ལཱམཀཱ, ཏསྨཱ ཨེཝཾ སཾཝཏྟཏཱིཏི ཨཏྠོ. ཨལླཱཡ པཐཝིཡཱ ནིཀྑིཏྟནྟི ཨུདཀེན ཏིནྟཱཡ བྷཱུམིཡཱ རོཔིཏཾ. པཐཝཱིརསཾ ཨཱཔོརསནྟི ཏསྨིཾ ཏསྨིཾ ཋཱནེ པཐཝིཡཱ ཙ སམྤདཾ ཨཱཔསྶ ཙ སམྤདཾ. བཱིཛནིཀྑིཏྟཊྛཱནེ ཧི ན སབྦཱ པཐཝཱི ན སབྦོ ཨཱཔོ ཙ བཱིཛཾ ཕལཾ གཎྷཱཔེཏི. ཡོ པན ཏེསཾ པདེསོ བཱིཛཾ ཕུསཏི, སོཡེཝ བཱིཛཾ ཕལཾ གཎྷཱཔེཏི. ཏསྨཱ བཱིཛཔོསནཱཡ པཙྩཡབྷཱུཏོཡེཝ སོ པདེསོ པཐཝཱིརསོ ཨཱཔོརསོཏི ཝེདིཏབྦོ. རསསདྡསྶ ཧི སམྤཏྟི ཙ ཨཏྠོ. ཡཐཱཧ ‘‘ཀིཙྩསམྤཏྟིཨཏྠེན རསོ ནཱམ པཝུཙྩཏཱི’’ཏི. ལོཀེ ཙ ‘‘སུརསོ གནྡྷབྦོ’’ཏི ཝུཏྟེ སུསམྤནྣོ གནྡྷབྦོཏི ཨཏྠོ ཉཱཡཏི. ཨུཔཱདིཡཏཱིཏི གཎྷཱཏི. ཡོ ཧི པདེསོ པཙྩཡོ ཧོཏི, ཏཾ པཙྩཡཾ ལབྷམཱནཾ བཱིཛཾ ཏཾ ¶ གཎྷཱཏི ནཱམ. སབྦཾ ཏནྟི སབྦཾ ཏཾ རསཛཱཏཾ. ཏིཏྟཀཏྟཱཡཱཏི སོ པཐཝཱིརསོ ཨཱཔོརསོ ཙ ཨཏིཏྟཀོ སམཱནོཔི ཏིཏྟཀཾ བཱིཛཾ ནིསྶཱཡ ¶ ནིམྦརུཀྑཱདཱིནཾ ཏེསཾ ཕལཱནཉྩ ཏིཏྟཀབྷཱཝཱཡ སཾཝཏྟཏི. ཀཊུཀཏྟཱཡཱཏི ཨིདཾ པུརིམསྶེཝ ཝེཝཙནཾ.

‘‘ཝཎྞགནྡྷརསཱུཔེཏོ, ཨམྦོཡཾ ཨཧུཝཱ པུརེ;

ཏམེཝ པཱུཛཾ ལབྷམཱནོ, ཀེནམྦོ ཀཊུཀཔྥལོ’’ཏི. (ཛཱ. ༡.༢.༧༡) –

ཨཱགཏཊྛཱནེ ཝིཡ ཧི ཨིདྷཱཔི ཏིཏྟཀམེཝ ཨཔྤིཡཊྛེན ཀཊུཀནྟི ཝེདིཏབྦཾ. ཨསཱཏཏྟཱཡཱཏི ཨམདྷུརབྷཱཝཱཡ. ཨསཱདུཏྟཱཡཱཏིཔི པཱཋོ, ཨསཱདུབྷཱཝཱཡཱཏི ཨཏྠོ. སཱདཱུཏི ཧི མདྷུརཾ. བཱིཛཾ ཧིསྶཱཏི ཨསྶ ནིམྦཱདིཀསྶ བཱིཛཾ. ཨེཝམེཝནྟི ཨེཝཾ ཨེཝཾ. ཡསྨཱ སུཁཱ ཝེདནཱ པརམོ ཨསྶཱདོ, ཏསྨཱ མིཙྪཱདིཊྛིཡཱ དུཀྑཝེདནཱཝསེན ཨཱདཱིནཝོ དསྶིཏོཏི. པུན ཨཊྛཱརསབྷེདེན དིཊྛིཡཱ ཨཱདཱིནཝཾ དསྶེཏུཾ ཨསྶཱདདིཊྛི མིཙྪཱདིཊྛཱིཏིཨཱདིམཱཧ. ཏཾ ཝུཏྟཏྠམེཝ. ཨིམེཧི ཨཊྛཱརསཧི ཨཱཀཱརེཧི པརིཡུཊྛིཏཙིཏྟསྶ སཉྙོགོཏི དིཊྛིཡཱ ཨེཝ སཾསཱརེ བནྡྷནཾ དསྶེཏི.

༡༢༩. ཡསྨཱ ¶ པན དིཊྛིབྷཱུཏཱནིཔི སཉྙོཛནཱནི ཨཏྠི ཨདིཊྛིབྷཱུཏཱནིཔི, ཏསྨཱ ཏཾ པབྷེདཾ དསྶེནྟོ ཨཏྠི སཉྙོཛནཱནི ཙེཝཱཏིཨཱདིམཱཧ. ཏཏྠ ཡསྨཱ ཀཱམརཱགསཉྙོཛནསྶེཝ ཨནུནཡསཉྙོཛནནྟི ཨཱགཏཊྛཱནམྤི ཨཏྠི, ཏསྨཱ ཨནུནཡསཉྙོཛནནྟི ཝུཏྟཾ. ཀཱམརཱགབྷཱཝཾ ཨཔྤཏྭཱ པཝཏྟཾ ལོབྷཾ སནྡྷཱཡ ཨེཏཾ ཝུཏྟནྟི ཝེདིཏབྦཾ. སེསཁནྡྷཱཡཏནཱདིམཱུལཀེསུཔི ཝཱརེསུ ཨིམིནཱཝ ནཡེན ཨཏྠོ ཝེདིཏབྦོ. ཝེདནཱཔརམཏྟཱ ཙ ཨསྶཱདསྶ ཝེདནཱཔརིཡོསཱནཱ ཨེཝ དེསནཱ ཀཏཱ. སཉྙཱདཡོ ན གཧིཏཱ. ཨིམེཧི པཉྩཏིཾསཱཡ ཨཱཀཱརེཧཱིཏི པཉྩཀྑནྡྷཱ ཨཛ྄ཛྷཏྟིཀཱཡཏནཱདཱིནི པཉྩ ཚཀྐཱནི ཙཱཏི ཨིམཱནི པཉྩཏིཾས ཝཏྠཱུནི ནིསྶཱཡ ཨུཔྤནྣཨསྶཱདཱརམྨཎཝསེན པཉྩཏིཾསཱཡ ཨཱཀཱརེཧི.

ཨསྶཱདདིཊྛིནིདྡེསཝཎྞནཱ ནིཊྛིཏཱ.

༢. ཨཏྟཱནུདིཊྛིནིདྡེསཝཎྞནཱ

༡༣༠. ཨཏྟཱནུདིཊྛིཡཾ ¶ ¶ ཨསྶུཏཝཱ པུཐུཛྫནོཏི ཨཱགམཱདྷིགམཱབྷཱཝཱ ཉེཡྻོ ཨསྶུཏཝཱ ཨིཏི. ཡསྶ ཧི ཁནྡྷདྷཱཏུཨཱཡཏནསཙྩཔཙྩཡཱཀཱརསཏིཔཊྛཱནཱདཱིསུ ཨུགྒཧཔརིཔུཙྪཱཝིནིཙྪཡཝིརཧིཏཏྟཱ ཨཏྟཱནུདིཊྛིཔཊིསེདྷཀརོ ནེཝ ཨཱགམོ, པཊིཔཏྟིཡཱ ཨདྷིགནྟབྦསྶ ཨནདྷིགཏཏྟཱ ན ཙ ཨདྷིགམོ ཨཏྠི, སོ ཨཱགམཱདྷིགམཱནཾ ཨབྷཱཝཱ ཉེཡྻོ ཨསྶུཏཝཱ ཨིཏི. སུཏནྟི ཧི བུདྡྷཝཙནཱགམོ ཙ སུཏཕལཏྟཱ ཧེཏུཝོཧཱརཝསེན ཨདྷིགམོ ཙ, ཏཾ སུཏཾ ཨསྶ ཨཏྠཱིཏི སུཏཝཱ, ན སུཏཝཱ ཨསྶུཏཝཱ. སྭཱཡཾ –

པུཐཱུནཾ ཛནནཱདཱིཧི, ཀཱརཎེཧི པུཐུཛྫནོ;

པུཐུཛྫནནྟོགདྷཏྟཱ, པུཐུཝཱཡཾ ཛནོ ཨིཏི.

སོ ཧི པུཐཱུནཾ ནཱནཔྤཀཱརཱནཾ ཀིལེསཱདཱིནཾ ཛནནཱདཱིཧི ཀཱརཎེཧི པུཐུཛྫནོ. ཡཐཱཧ – ‘‘པུཐུ ཀིལེསེ ཛནེནྟཱིཏི པུཐུཛྫནཱ, པུཐུ ཨཝིཧཏསཀྐཱཡདིཊྛིཀཱཏི པུཐུཛྫནཱ, པུཐུ སཏྠཱརཱནཾ མུཁུལློཀིཀཱཏི པུཐུཛྫནཱ, པུཐུ སབྦགཏཱིཧི ཨཝུཊྛིཏཱཏི པུཐུཛྫནཱ, པུཐུ ནཱནཱབྷིསངྑཱརེ ཨབྷིསངྑརོནྟཱིཏི པུཐུཛྫནཱ, པུཐུ ནཱནཱཨོགྷེཧི ཝུཡ྄ཧནྟཱིཏི པུཐུཛྫནཱ, པུཐུ ¶ ནཱནཱསནྟཱཔེཧི སནྟཔྤེནྟཱིཏི པུཐུཛྫནཱ, པུཐུ ནཱནཱཔརིལཱ༹ཧེཧི པརིདཡ྄ཧནྟཱིཏི པུཐུཛྫནཱ, པུཐུ པཉྩསུ ཀཱམགུཎེསུ རཏྟཱ གིདྡྷཱ གདྷིཏཱ མུཙྪིཏཱ ཨཛ྄ཛྷོསནྣཱ ལགྒཱ ལགྒིཏཱ པལིབུདྡྷཱཏི པུཐུཛྫནཱ, པུཐུ པཉྩཧི ནཱིཝརཎེཧི ཨཱཝུཏཱ ནིཝུཏཱ ཨོཝུཏཱ པིཧིཏཱ པཊིཙྪནྣཱ པཊིཀུཛྫིཏཱཏི པུཐུཛྫནཱ’’ཏི (མཧཱནི. ༩༤). པུཐཱུནཾ ཝཱ གཎནཔཐམཏཱིཏཱནཾ ཨརིཡདྷམྨཔརམྨུཁཱནཾ ནཱིཙདྷམྨསམུདཱཙཱརཱནཾ ཛནཱནཾ ཨནྟོགདྷཏྟཱཔི པུཐུཛྫནཱ, པུཐུ ཝཱ ཨཡཾ, ཝིསུཾཡེཝ སངྑཾ ¶ གཏོ ཝིསཾསཊྛོ སཱིལསུཏཱདིགུཎཡུཏྟེཧི ཨརིཡེཧི ཛནོཏིཔི པུཐུཛྫནོ. ཨེཝམེཏེཧི ‘‘ཨསྶུཏཝཱ པུཐུཛྫནོ’’ཏི དྭཱིཧི པདེཧི ཡེ ཏེ –

‘‘དུཝེ པུཐུཛྫནཱ ཝུཏྟཱ, བུདྡྷེནཱདིཙྩབནྡྷུནཱ;

ཨནྡྷོ པུཐུཛྫནོ ཨེཀོ, ཀལྱཱཎེཀོ པུཐུཛྫནོ’’ཏི. –

དྭེ པུཐུཛྫནཱ ཝུཏྟཱ, ཏེསུ ཨནྡྷཔུཐུཛྫནོ ཝུཏྟོ ཧོཏཱིཏི ཝེདིཏབྦོ.

ཨརིཡཱནཾ ¶ ཨདསྶཱཝཱིཏིཨཱདཱིསུ ཨརིཡཱཏི ཨཱརཀཏྟཱ ཀིལེསེཧི, ཨནཡེ ན ཨིརིཡནཏོ, ཨཡེ ཙ ཨིརིཡནཏོ, སདེཝཀེན ཙ ལོཀེན ཨརཎཱིཡཏོ བུདྡྷཱ ཙ པཙྩེཀབུདྡྷཱ ཙ བུདྡྷསཱཝཀཱ ཙ ཝུཙྩནྟི, བུདྡྷཱ ཨེཝ ཝཱ ཨིདྷ ཨརིཡཱ. ཡཐཱཧ – ‘‘སདེཝཀེ, བྷིཀྑཝེ, ལོཀེ…པེ… ཏཐཱགཏོ ཨརིཡོཏི ཝུཙྩཏཱི’’ཏི (སཾ. ནི. ༥.༡༠༩༨).

སཔྤུརིསཱཏི ཨེཏྠ པན པཙྩེཀབུདྡྷཱ ཏཐཱགཏསཱཝཀཱ ཙ ‘‘སཔྤུརིསཱ’’ཏི ཝེདིཏབྦཱ. ཏེ ཧི ལོཀུཏྟརགུཎཡོགེན སོབྷནཱ པུརིསཱཏི སཔྤུརིསཱ. སབྦེཡེཝ ཝཱ ཨེཏེ དྭེདྷཱཔི ཝུཏྟཱ. བུདྡྷཱཔི ཧི ཨརིཡཱ ཙ སཔྤུརིསཱ ཙ པཙྩེཀབུདྡྷཱ བུདྡྷསཱཝཀཱཔི. ཡཐཱཧ –

‘‘ཡོ ཝེ ཀཏཉྙཱུ ཀཏཝེདི དྷཱིརོ, ཀལྱཱཎམིཏྟོ དལ༹ྷབྷཏྟི ཙ ཧོཏི;

དུཁིཏསྶ སཀྐཙྩ ཀརོཏི ཀིཙྩཾ, ཏཐཱཝིདྷཾ སཔྤུརིསཾ ཝདནྟཱི’’ཏི. (ཛཱ. ༢.༡༧.༧༨);

ཨེཏྠ ཧི ‘‘ཀཏཉྙཱུ ཀཏཝེདི དྷཱིརོ’’ཏི པཙྩེཀསམྦུདྡྷོ ཝུཏྟོ, ‘‘ཀལྱཱཎམིཏྟོ དལ༹ྷབྷཏྟི ཙཱ’’ཏི བུདྡྷསཱཝཀོ, ‘‘དུཁིཏསྶ སཀྐཙྩ ཀརོཏི ཀིཙྩ’’ནྟི སམྨཱསམྦུདྡྷོཏི. ཨིདཱནི ཡོ ཏེསཾ ཨརིཡཱནཾ ཨདསྶནསཱིལོ ¶ , ན ཙ དསྶནེ སཱདྷུཀཱརཱི, སོ ‘‘ཨརིཡཱནཾ ཨདསྶཱཝཱི’’ཏི ཝེདིཏབྦོ. སོ ཙ ཙཀྑུནཱ ཨདསྶཱཝཱི ཉཱཎེན ཨདསྶཱཝཱིཏི དུཝིདྷོ. ཏེསུ ཉཱཎེན ཨདསྶཱཝཱི ¶ ཨིདྷཱདྷིཔྤེཏོ. མཾསཙཀྑུནཱ ཧི དིབྦཙཀྑུནཱ ཝཱ ཨརིཡཱ དིཊྛཱཔི ཨདིཊྛཱཝ ཧོནྟི ཏེསཾ ཙཀྑཱུནཾ ཝཎྞམཏྟགཧཎཏོ ན ཨརིཡབྷཱཝགོཙརཏོ. སོཎསིངྒཱལཱདཡོཔི ཧི ཙཀྑུནཱ ཨརིཡེ པསྶནྟི, ན ཙ ཏེ ཨརིཡཱནཾ དསྶཱཝིནོ, ཏསྨཱ ཙཀྑུནཱ དསྶནཾ ན དསྶནཾ, ཉཱཎེན དསྶནམེཝ དསྶནཾ. ཡཐཱཧ – ‘‘ཀིཾ ཏེ, ཝཀྐལི, ཨིམིནཱ པཱུཏིཀཱཡེན དིཊྛེན, ཡོ ཁོ, ཝཀྐལི, དྷམྨཾ པསྶཏི, སོ མཾ པསྶཏཱི’’ཏི (སཾ. ནི. ༣.༨༧). ཏསྨཱ ཙཀྑུནཱ པསྶནྟོཔི ཉཱཎེན ཨརིཡེཧི དིཊྛཾ ཨནིཙྩཱདིལཀྑཎཾ ཨཔསྶནྟོ ཨརིཡཱདྷིགཏཉྩ དྷམྨཾ ཨནདྷིགཙྪནྟོ ཨརིཡཀརདྷམྨཱནཾ ཨརིཡབྷཱཝསྶ ཙ ཨདིཊྛཏྟཱ ‘‘ཨརིཡཱནཾ ཨདསྶཱཝཱི’’ཏི ཝེདིཏབྦོ.

ཨརིཡདྷམྨསྶ ཨཀོཝིདོཏི སཏིཔཊྛཱནཱདིབྷེདེ ཨརིཡདྷམྨེ ཨཀུསལོ. ཨརིཡདྷམྨེ ཨཝིནཱིཏོཏི ཨེཏྠ པན –

དུཝིདྷོ ¶ ཝིནཡོ ནཱམ, ཨེཀམེཀེཏྠ པཉྩདྷཱ;

ཨབྷཱཝཏོ ཏསྶ ཨཡཾ, ‘‘ཨཝིནཱིཏོ’’ཏི ཝུཙྩཏི.

ཨཡཉྷི སཾཝརཝིནཡོ པཧཱནཝིནཡོཏི དུཝིདྷོ ཝིནཡོ. ཨེཏྠ ཙ དུཝིདྷེཔི ཝིནཡེ ཨེཀམེཀོ ཝིནཡོ པཉྩདྷཱ བྷིཛྫཏི. སཾཝརཝིནཡོཔི ཧི སཱིལསཾཝརོ, སཏིསཾཝརོ, ཉཱཎསཾཝརོ, ཁནྟིསཾཝརོ, ཝཱིརིཡསཾཝརོཏི པཉྩཝིདྷོ. པཧཱནཝིནཡོཔི ཏདངྒཔྤཧཱནཾ, ཝིཀྑམྦྷནཔྤཧཱནཾ, སམུཙྪེདཔྤཧཱནཾ, པཊིཔྤསྶདྡྷིཔྤཧཱནཾ, ནིསྶརཎཔྤཧཱནནྟི པཉྩཝིདྷོ.

ཏཏྠ ‘‘ཨིམིནཱ པཱཏིམོཀྑསཾཝརེན ཨུཔེཏོ ཧོཏི སམུཔེཏོ’’ཏི (ཝིབྷ. ༥༡༡) ཨཡཾ སཱིལསཾཝརོ. ‘‘རཀྑཏི ཙཀྑུནྡྲིཡཾ ཙཀྑུནྡྲིཡེ སཾཝརཾ ཨཱཔཛྫཏཱི’’ཏི (དཱི. ནི. ༡.༢༡༣; མ. ནི. ༡.༢༩༥; སཾ. ནི. ༤.༢༣༩; ཨ. ནི. ༣.༡༦) ཨཡཾ སཏིསཾཝརོ.

‘‘ཡཱནི སོཏཱནི ལོཀསྨིཾ, (ཨཛིཏཱཏི བྷགཝཱ)

སཏི ཏེསཾ ནིཝཱརཎཾ;

སོཏཱནཾ སཾཝརཾ བྲཱུམི, པཉྙཱཡེཏེ པིདྷཱིཡརེ’’ཏི. (སུ. ནི. ༡༠༤༡; ཙཱུལ༹ནི. ཨཛིཏམཱཎཝཔུཙྪཱནིདྡེས ༤) –

ཨཡཾ ¶ ཉཱཎསཾཝརོ. ‘‘ཁམོ ཧོཏི སཱིཏསྶ ཨུཎྷསྶཱ’’ཏི (མ. ནི. ༡.༢༤; ཨ. ནི. ༤.༡༡༤; ༦.༥༨) ཨཡཾ ཁནྟིསཾཝརོ. ‘‘ཨུཔྤནྣཾ ཀཱམཝིཏཀྐཾ ནཱདྷིཝཱསེཏཱི’’ཏི (མ. ནི. ༡.༢༦; ཨ. ནི. ༤.༡༡༤; ༦.༥༨) ཨཡཾ ཝཱིརིཡསཾཝརོ. སབྦོཔི ཙཱཡཾ སཾཝརོ ཡཐཱསཀཾ སཾཝརིཏབྦཱནཾ ཝིནེཏབྦཱནཉྩ ¶ ཀཱཡདུཙྩརིཏཱདཱིནཾ སཾཝརཎཏོ ‘‘སཾཝརོ’’, ཝིནཡནཏོ ‘‘ཝིནཡོ’’ཏི ཝུཙྩཏི. ཨེཝཾ ཏཱཝ སཾཝརཝིནཡོ པཉྩདྷཱ བྷིཛྫཏཱིཏི ཝེདིཏབྦོ.

ཏཐཱ ཡཾ ནཱམརཱུཔཔརིཙྪེདཱདཱིསུ ཝིཔསྶནཱཉཱཎེསུ པཊིཔཀྑབྷཱཝཏོ དཱིཔཱལོཀེན ཝིཡ ཏམསྶ ཏེན ཏེན ཝིཔསྶནཱཉཱཎེན ཏསྶ ཏསྶ ཨནཏྠསྶ པཧཱནཾ, སེཡྻཐིདཾ – ནཱམརཱུཔཝཝཏྠཱནེན སཀྐཱཡདིཊྛིཡཱ, པཙྩཡཔརིགྒཧེན ཨཧེཏུཝིསམཧེཏུདིཊྛཱིནཾ, ཀངྑཱཝིཏརཎེན ཀཐཾཀཐཱིབྷཱཝསྶ, ཀལཱཔསམྨསནེན ‘‘ཨཧཾ མམཱ’’ཏི གཱཧསྶ, མགྒཱམགྒཝཝཏྠཱནེན ཨམགྒེ མགྒསཉྙཱཡ, ཨུདཡདསྶནེན ཨུཙྪེདདིཊྛིཡཱ, ཝཡདསྶནེན སསྶཏདིཊྛིཡཱ, བྷཡདསྶནེན སབྷཡེ ཨབྷཡསཉྙཱཡ, ཨཱདཱིནཝདསྶནེན ཨསྶཱདསཉྙཱཡ, ནིབྦིདཱནུཔསྶནེན ཨབྷིརཏིསཉྙཱཡ, མུཉྩིཏུཀམྱཏཱཉཱཎེན ཨམུཉྩིཏུཀམྱཏཱཡ, ཨུཔེཀྑཱཉཱཎེན ཨནུཔེཀྑཱཡ, ཨནུལོམཉཱཎེན དྷམྨཊྛིཏིཡཾ ¶ ནིབྦཱནེ ཙ པཊིལོམབྷཱཝསྶ, གོཏྲབྷུནཱ སངྑཱརནིམིཏྟགཱཧསྶ པཧཱནཾ, ཨེཏཾ ཏདངྒཔྤཧཱནཾ ནཱམ.

ཡཾ པན ཨུཔཙཱརཔྤནཱབྷེདེན སམཱདྷིནཱ པཝཏྟིབྷཱཝནིཝཱརཎཏོ གྷཊཔྤཧཱརེན ཝིཡ ཨུདཀཔིཊྛེ སེཝཱལསྶ ཏེསཾ ཏེསཾ ནཱིཝརཎཱདིདྷམྨཱནཾ པཧཱནཾ, ཨིདཾ ཝིཀྑམྦྷནཔྤཧཱནཾ ནཱམ. ཡཾ ཙཏུནྣཾ ཨརིཡམགྒཱནཾ བྷཱཝིཏཏྟཱ ཏཾཏཾམགྒཝཏོ ཨཏྟནོ སནྟཱནེ ‘‘དིཊྛིགཏཱནཾ པཧཱནཱཡཱ’’ཏིཨཱདིནཱ (དྷ. ས. ༢༧༧; ཝིབྷ. ༦༢༨) ནཡེན ཝུཏྟསྶ སམུདཡཔཀྑིཀསྶ ཀིལེསགྒཎསྶ ཨཙྩནྟཨཔྤཝཏྟིབྷཱཝེན པཧཱནཾ, ཨིདཾ སམུཙྪེདཔྤཧཱནཾ ནཱམ. ཡཾ པན ཕལཀྑཎེ པཊིཔྤསྶདྡྷཏྟཾ ཀིལེསཱནཾ, ཨིདཾ པཊིཔྤསྶདྡྷིཔྤཧཱནཾ ནཱམ. ཡཾ སབྦསངྑཏནིསྶཊཏྟཱ པཧཱིནསབྦསངྑཏཾ ནིབྦཱནཾ, ཨིདཾ ནིསྶརཎཔྤཧཱནཾ ནཱམ. སབྦམྤི ཙེཏཾ པཧཱནཾ ཡསྨཱ ཙཱགཊྛེན པཧཱནཾ, ཝིནཡནཊྛེན ཝིནཡོ, ཏསྨཱ ‘‘པཧཱནཝིནཡོ’’ཏི ཝུཙྩཏི, ཏཾཏཾཔཧཱནཝཏོ ཝཱ ཏསྶ ཏསྶ ཝིནཡསྶ སམྦྷཝཏོཔེཏཾ ‘‘པཧཱནཝིནཡོ’’ཏི ཝུཙྩཏི. ཨེཝཾ པཧཱནཝིནཡོཔི པཉྩདྷཱ བྷིཛྫཏཱིཏི ཝེདིཏབྦོ.

ཨེཝམཡཾ ¶ ¶ སངྑེཔཏོ དུཝིདྷོ, པབྷེདཏོ ཙ དསཝིདྷོ ཝིནཡོ བྷིནྣསཾཝརཏྟཱ པཧཱཏབྦསྶ ཙ ཨཔྤཧཱིནཏྟཱ ཡསྨཱ ཨེཏསྶ ཨསྶུཏཝཏོ པུཐུཛྫནསྶ ནཏྠི, ཏསྨཱ ཨབྷཱཝཏོ ཏསྶ ཨཡཾ ‘‘ཨཝིནཱིཏོ’’ཏི ཝུཙྩཏཱིཏི. ཨེས ནཡོ སཔྤུརིསཱནཾ ཨདསྶཱཝཱི སཔྤུརིསདྷམྨསྶ ཨཀོཝིདོ སཔྤུརིསདྷམྨེ ཨཝིནཱིཏོཏི ཨེཏྠཱཔི. ནིནྣཱནཱཀཱརཎཉྷི ཨེཏཾ ཨཏྠཏོ. ཡཐཱཧ – ‘‘ཡེཝ ཏེ ཨརིཡཱ, ཏེཝ ཏེ སཔྤུརིསཱ. ཡེཝ ཏེ སཔྤུརིསཱ, ཏེཝ ཏེ ཨརིཡཱ. ཡོཝ སོ ཨརིཡཱནཾ དྷམྨོ, སོཝ སོ སཔྤུརིསཱནཾ དྷམྨོ. ཡོཝ སོ སཔྤུརིསཱནཾ དྷམྨོ, སོཝ སོ ཨརིཡཱནཾ དྷམྨོ. ཡེཝ ཏེ ཨརིཡཝིནཡཱ, ཏེཝ ཏེ སཔྤུརིསཝིནཡཱ. ཡེཝ ཏེ སཔྤུརིསཝིནཡཱ, ཏེཝ ཏེ ཨརིཡཝིནཡཱ. ཨརིཡེཏི ཝཱ སཔྤུརིསེཏི ཝཱ, ཨརིཡདྷམྨེཏི ཝཱ སཔྤུརིསདྷམྨེཏི ཝཱ, ཨརིཡཝིནཡེཏི ཝཱ སཔྤུརིསཝིནཡེཏི ཝཱ ཨེསེསེ ཨེཀེ ཨེཀཊྛེ སམེ སམབྷཱགེ ཏཛྫཱཏེ ཏཉྙེཝཱ’’ཏི.

ཀསྨཱ པན ཐེརོ ཨཏྟཱནུདིཊྛིཡཱ ཀཏམེཧི ཝཱིསཏིཡཱ ཨཱཀཱརེཧི ཨབྷིནིཝེསོ ཧོཏཱིཏི པུཙྪིཏྭཱ ཏཾ ཨཝིསྶཛྫེཏྭཱཝ ‘‘ཨིདྷ ཨསྶུཏཝཱ པུཐུཛྫནོ’’ཏི ཨེཝཾ པུཐུཛྫནཾ ནིདྡིསཱིཏི? པུགྒལཱདྷིཊྛཱནཱཡ དེསནཱཡ ཏཾ ཨཏྠཾ ཨཱཝིཀཱཏུཾ པཋམཾ པུཐུཛྫནཾ ནིདྡིསཱིཏི ཝེདིཏབྦཾ.

༡༣༡. ཨེཝཾ པུཐུཛྫནཾ ནིདྡིསིཏྭཱ ཨིདཱནི ཨབྷིནིཝེསུདྡེསཾ དསྶེནྟོ རཱུཔཾ ཨཏྟཏོ སམནུཔསྶཏཱིཏིཨཱདིམཱཧ ¶ . ཏཏྠ རཱུཔཾ ཨཏྟཏོ སམནུཔསྶཏཱིཏི རཱུཔཀྑནྡྷཾ ཀསིཎརཱུཔཉྩ ‘‘ཨཏྟཱ’’ཏི དིཊྛིཔསྶནཱཡ སམནུཔསྶཏི. ནིདྡེསེ པནསྶ རཱུཔཀྑནྡྷེ ཨབྷིནིཝེསོ པཉྩཀྑནྡྷཱདྷིཀཱརཏྟཱ པཱཀཊོཏི ཏཾ ཨཝཏྭཱ ཀསིཎརཱུཔམེཝ ‘‘རཱུཔ’’ནྟི སཱམཉྙཝསེན ཝུཏྟནྟི ཝེདིཏབྦཾ. རཱུཔཝནྟཾ ཝཱ ཨཏྟཱནནྟི ཨརཱུཔཾ ‘‘ཨཏྟཱ’’ཏི གཧེཏྭཱ ཏཾ ཨཏྟཱནཾ རཱུཔཝནྟཾ སམནུཔསྶཏི. ཨཏྟནི ཝཱ རཱུཔནྟི ཨརཱུཔམེཝ ‘‘ཨཏྟཱ’’ཏི གཧེཏྭཱ ཏསྨིཾ ཨཏྟནི རཱུཔཾ སམནུཔསྶཏི. རཱུཔསྨིཾ ཝཱ ཨཏྟཱནནྟི ཨརཱུཔམེཝ ‘‘ཨཏྟཱ’’ཏི གཧེཏྭཱ ཏཾ ཨཏྟཱནཾ རཱུཔསྨིཾ སམནུཔསྶཏི.

ཏཏྠ ¶ རཱུཔཾ ཨཏྟཏོ སམནུཔསྶཏཱིཏི སུདྡྷརཱུཔམེཝ ‘‘ཨཏྟཱ’’ཏི ཀཐིཏཾ. རཱུཔཝནྟཾ ཝཱ ཨཏྟཱནཾ, ཨཏྟནི ཝཱ རཱུཔཾ, རཱུཔསྨིཾ ཝཱ ཨཏྟཱནཾ, ཝེདནཾ ཨཏྟཏོ སམནུཔསྶཏི, སཉྙཾ, སངྑཱརེ, ཝིཉྙཱཎཾ ཨཏྟཏོ སམནུཔསྶཏཱིཏི ཨིམེསུ སཏྟསུ ཋཱནེསུ ཨརཱུཔཾ ‘‘ཨཏྟཱ’’ཏི ཀཐིཏཾ. ཝེདནཱཝནྟཾ ཝཱ ཨཏྟཱནཾ, ཨཏྟནི ཝཱ ཝེདནཾ, ཝེདནཱཡ ཝཱ ཨཏྟཱནནྟི ཨེཝཾ ཙཏཱུསུ ཁནྡྷེསུ ཏིཎྞཾ ཏིཎྞཾ ¶ ཝསེན དྭཱདསསུ ཋཱནེསུ རཱུཔཱརཱུཔམིསྶཀོ ཨཏྟཱ ཀཐིཏོ. ཏཱ པན ཝཱིསཏིཔི དིཊྛིཡོ མགྒཱཝརཎཱ, ན སགྒཱཝརཎཱ, སོཏཱཔཏྟིམགྒཝཛ྄ཛྷཱ.

ཨིདཱནི ཏཾ ནིདྡིསནྟོ ཀཐཾ རཱུཔནྟིཨཱདིམཱཧ. ཏཏྠ པཐཝཱིཀསིཎནྟི པཐཝཱིམཎྜལཾ ནིསྶཱཡ ཨུཔྤཱདིཏཾ པཊིབྷཱགནིམིཏྟསངྑཱཏཾ སཀལཕརཎཝསེན པཐཝཱིཀསིཎཾ. ཨཧནྟི ཨཏྟཱནམེཝ སནྡྷཱཡ གཎྷཱཏི. ཨཏྟནྟི ཨཏྟཱནཾ. ཨདྭཡནྟི ཨེཀམེཝ. ཏེལཔྤདཱིཔསྶཱཏི ཏེལཡུཏྟསྶ པདཱིཔསྶ. ཛྷཱཡཏོཏི ཛལཏོ. ཡཱ ཨཙྩི, སོ ཝཎྞོཏིཨཱདི ཨཙྩིཾ མུཉྩིཏྭཱ ཝཎྞསྶ ཨབྷཱཝཏོ ཝུཏྟཾ. ཡཱ ཙ དིཊྛི ཡཉྩ ཝཏྠཱུཏི ཏདུབྷཡཾ ཨེཀཏོ ཀཏྭཱ རཱུཔཝཏྠུཀཱ ཨཏྟཱནུདིཊྛི ཝུཙྩཏཱིཏི ཨཏྠོ.

ཨཱཔོཀསིཎཱདཱིནི ཨཱཔཱདཱིནི ནིསྶཱཡ ཨུཔྤཱདིཏཀསིཎནིམིཏྟཱནེཝ. པརིཙྪིནྣཱཀཱསཀསིཎཾ པན རཱུཔཛ྄ཛྷཱནསྶ ཨཱརམྨཎཾ ཧོནྟམྤི ཨཱཀཱསཀསིཎནྟི ཝུཙྩམཱནེ ཨརཱུཔཛ྄ཛྷཱནཱརམྨཎེན ཀསིཎུགྒྷཱཊིམཱཀཱསེན སཾཀིཎྞཾ ཧོཏཱིཏི ན གཧིཏནྟི ཝེདིཏབྦཾ. རཱུཔཱདྷིཀཱརཏྟཱ ཝིཉྙཱཎཀསིཎཾ ན གཧེཏབྦམེཝཱཏི. ཨིདྷེཀཙྩོ ཝེདནཾ སཉྙཾ སངྑཱརེ ཝིཉྙཱཎཾ ཨཏྟཏོ སམནུཔསྶཏཱིཏི ཙཏྟཱརོ ཁནྡྷེ ཨབྷིནྡིཏྭཱ ཨེཀཏོ གཧཎཝསེན ཝུཏྟཾ. སོ ཧི ཙིཏྟཙེཏསིཀཱནཾ ཝིསུཾ ཝིསུཾ ཀརཎེ ཨསམཏྠཏྟཱ སབྦེ ཨེཀཏོ ཀཏྭཱ ‘‘ཨཏྟཱ’’ཏི གཎྷཱཏི. ཨིམིནཱ རཱུཔེན རཱུཔཝཱཏི ཨེཏྠ སརཱིརརཱུཔམྤི ཀསིཎརཱུཔམྤི ལབྦྷཏི. ཚཱཡཱསམྤནྣོཏི ཚཱཡཱཡ སམྤནྣོ ཨཝིརལོ༹. ཏམེནཱཏི ཨེཏྠ ཨེན-སདྡོ ནིཔཱཏམཏྟཾ, ཏམེཏནྟི ཝཱ ཨཏྠོ. ཚཱཡཱཝཱཏི ཝིཛྫམཱནཙྪཱཡོ ¶ . རཱུཔཾ ཨཏྟཱཏི ¶ ཨགྒཧིཏེཔི རཱུཔཾ ཨམུཉྩིཏྭཱ དིཊྛིཡཱ ཨུཔྤནྣཏྟཱ རཱུཔཝཏྠུཀཱཏི ཝུཏྟཾ.

ཨཏྟནི རཱུཔཾ སམནུཔསྶཏཱིཏི སརཱིརརཱུཔསྶ ཀསིཎརཱུཔསྶ ཙ ཙིཏྟནིསྶིཏཏྟཱ ཏསྨིཾ ཨརཱུཔསམུདཱཡེ ཨཏྟནི ཏཾ རཱུཔཾ སམནུཔསྶཏི. ཨཡཾ གནྡྷོཏི གྷཱཡིཏགནྡྷཾ ཨཱཧ. ཨིམསྨིཾ པུཔྥེཏི པུཔྥནིསྶིཏཏྟཱ གནྡྷསྶ ཨེཝམཱཧ.

རཱུཔསྨིཾ ཨཏྟཱནཾ སམནུཔསྶཏཱིཏི ཡཏྠ རཱུཔཾ གཙྪཏི, ཏཏྠ ཙིཏྟཾ གཙྪཏི. ཏསྨཱ རཱུཔནིསྶིཏཾ ཙིཏྟཾ གཧེཏྭཱ ཏཾ ཨརཱུཔསམུདཱཡཾ ཨཏྟཱནཾ ཏསྨིཾ རཱུཔེ སམནུཔསྶཏི. ཨོལཱ༹རིཀཏྟཱ རཱུཔསྶ ཨོལཱ༹རིཀཱདྷཱརཾ ཀརཎྜཀམཱཧ.

༡༣༢. ཨིདྷེཀཙྩོ ¶ ཙཀྑུསམྥསྶཛཾ ཝེདནནྟིཨཱདཱིསུ ཝིསུཾ ཝིསུཾ ཝེདནཱཡ དིཊྛིགཧཎེ ཨསཏིཔི ཝེདནཱཏི ཨེཀགྒཧཎེན གཧིཏེ སབྦཱསཾ ཝེདནཱནཾ ཨནྟོགདྷཏྟཱ ཝིསུཾ ཝིསུཾ གཧིཏཱ ཨེཝ ཧོནྟཱིཏི ཝིསུཾ ཝིསུཾ ཡོཛནཱ ཀཏཱཏི ཝེདིཏབྦཱ. སོ ཧི ཨནུབྷཝནཝསེན ཝེདནཱཡ ཨོལཱ༹རིཀཏྟཱ ཝེདནཾཡེཝ ‘‘ཨཏྟཱ’’ཏི གཎྷཱཏི. སཉྙཾ སངྑཱརེ ཝིཉྙཱཎཾ རཱུཔཾ ཨཏྟཏོ སམནུཔསྶཏཱིཏི སཉྙཱདཡོ ཨརཱུཔདྷམྨེ རཱུཔཉྩ ཨེཀཏོ ཀཏྭཱ ‘‘ཨཏྟཱ’’ཏི སམནུཔསྶཏི. ཨུམྨཏྟཀོ ཝིཡ ཧི པུཐུཛྫནོ ཡཐཱ ཡཐཱ ཨུཔཊྛཱཏི, ཏཐཱ ཏཐཱ གཎྷཱཏི.

༡༣༣. ཙཀྑུསམྥསྶཛཾ སཉྙནྟིཨཱདཱིསུ སཉྫཱནནཝསེན སཉྙཱཡ པཱཀཊཏྟཱ སཉྙཾ ‘‘ཨཏྟཱ’ཏི གཎྷཱཏི. སེསཾ ཝེདནཱཡ ཝུཏྟནཡེན ཝེདིཏབྦཾ.

༡༣༤. ཙཀྑུསམྥསྶཛཾ ཙེཏནནྟིཨཱདཱིསུ སངྑཱརཀྑནྡྷཔརིཡཱཔནྣེསུ དྷམྨེསུ ཙེཏནཱཡ པདྷཱནཏྟཱ པཱཀཊཏྟཱ ཙ ཙེཏནཱ ཨེཝ ནིདྡིཊྛཱ. ཏཱཡ ཨིཏརེཔི ནིདྡིཊྛཱཝ ཧོནྟི. སོ པན ཙེཏསིཀབྷཱཝཝསེན པཱཀཊཏྟཱ ཙེཏནཾ ‘‘ཨཏྟཱ’’ཏི གཎྷཱཏི. སེསཾ ཝུཏྟནཡམེཝ.

༡༣༥. ཙཀྑུཝིཉྙཱཎནྟིཨཱདཱིསུ ཝིཛཱནནཝསེན ཙིཏྟསྶ པཱཀཊཏྟཱ ཙིཏྟཾ ‘‘ཨཏྟཱ’’ཏི གཎྷཱཏི. སེསམེཏྠཱཔི ཝུཏྟནཡམེཝ.

ཨཏྟཱནུདིཊྛིནིདྡེསཝཎྞནཱ ནིཊྛིཏཱ.

༣. མིཙྪཱདིཊྛིནིདྡེསཝཎྞནཱ

༡༣༦. མིཙྪཱདིཊྛི ¶ ¶ ཧེཊྛཱ ཝུཏྟཏྠཱཡེཝ. ཨཡཾ པན ཨཔརོ ནཡོ – ནཏྠི དིནྣནྟི ཨུཙྪེདདིཊྛིཀཏྟཱ དཱནཕལཾ པཊིཀྑིཔཏི. ནཏྠི ཡིཊྛནྟི ཨེཏྠ ཡིཊྛནྟི ཁུདྡཀཡཉྙོ. ཧུཏནྟི མཧཱཡཉྙོ. དྭིནྣམྤི ཕལཾ པཊིཀྑིཔཏི. ནཏྠི སུཀཏདུཀྐཊཱནཾ ཀམྨཱནཾ ཕལཾ ཝིཔཱཀོཏི དཱནཕལསྶ པཊིཀྑིཏྟཏྟཱ སཱིལཱདཱིནཾ པུཉྙཀམྨཱནཾ, པཱཎཱཏིཔཱཏཱདཱིནཾ པཱཔཀམྨཱནཾ ཕལཾ པཊིཀྑིཔཏི. ནཏྠི ཨཡཾ ལོཀོཏི པུརེ ཀཏེན ཀམྨུནཱ. ནཏྠི པརོ ལོཀོཏི ཨིདྷ ཀཏེན ཀམྨུནཱ. ནཏྠི མཱཏཱ, ནཏྠི པིཏཱཏི ཏེསུ ཀཏཀམྨཱནཾ ཕལཾ པཊིཀྑིཔཏི. ནཏྠི སཏྟཱ ཨོཔཔཱཏིཀཱཏི ཀམྨཧེཏུཀཾ ཨུཔཔཏྟིཾ པཊིཀྑིཔཏི. ནཏྠི ལོཀེ སམཎབྲཱཧྨཎཱ…པེ… པཝེདེནྟཱིཏི ཨིདྷལོཀཔརལོཀེ པསྶིཏུཾ ཨབྷིཉྙཱཔཊིལཱབྷཱཡ པཊིཔདཾ པཊིཀྑིཔཏི. ཨིདྷ པཱལི༹ཡཾ པན ནཏྠི དིནྣནྟི ཝཏྠཱུཏི ནཏྠི དིནྣནྟི ཝུཙྩམཱནཾ དཱནཾ, ཏསྶཱ དིཊྛིཡཱ ཝཏྠཱུཏི ཨཏྠོ ¶ . ཨེཝཾཝཱདོ མིཙྪཱཏི ཨེཝཾ ནཏྠི དིནྣནྟི ཝཱདོ ཝཙནཾ མིཙྪཱ ཝིཔརཱིཏོཏི ཨཏྠོ.

མིཙྪཱདིཊྛིནིདྡེསཝཎྞནཱ ནིཊྛིཏཱ.

༤. སཀྐཱཡདིཊྛིནིདྡེསཝཎྞནཱ

༡༣༧. སཀྐཱཡདིཊྛི པན ཨཏྟཱནུདིཊྛིཡེཝ, ཨཉྙཏྠ ཨཱགཏཔརིཡཱཡཝཙནདསྶནཏྠཾ ཝུཏྟཱཏི ཝེདིཏབྦཱ.

སཀྐཱཡདིཊྛིནིདྡེསཝཎྞནཱ ནིཊྛིཏཱ.

༥. སསྶཏདིཊྛིནིདྡེསཝཎྞནཱ

༡༣༨. སཀྐཱཡཝཏྠུཀཱཡ སསྶཏདིཊྛིཡཱཏི ཀམྨདྷཱརཡསམཱསོ. རཱུཔཝནྟཾ ཝཱ ཨཏྟཱནནྟིཨཱདཱིནཾ པནྣརསནྣཾ ཝཙནཱནཾ ཨནྟེ སམནུཔསྶཏཱིཏི སམྦནྡྷོ ཀཱཏབྦོ, པཱཋོ ཝཱ. ཨཉྙཐཱ ཧི ན གྷཊཱིཡཏཱིཏི. ཨེཝཾ ‘‘རཱུཔཝནྟཾ ཝཱ ཨཏྟཱནཾ སམནུཔསྶཏཱི’’ཏི ཨེཀམེཝ དསྶེཏྭཱ སེསཱ ཙུདྡས སཾཁིཏྟཱ.

སསྶཏདིཊྛིནིདྡེསཝཎྞནཱ ནིཊྛིཏཱ.

༦. ཨུཙྪེདདིཊྛིནིདྡེསཝཎྞནཱ

༡༣༩. སཀྐཱཡཝཏྠུཀཱཡ ¶ ཨུཙྪེདདིཊྛིཡཱ ཨེཝཾ ‘‘རཱུཔཾ ཨཏྟཏོ སམནུཔསྶཏཱི’’ཏི ཨེཀམེཝ དསྶེཏྭཱ སེསཱ ཙཏསྶོ སཾཁིཏྟཱ.

ཨུཙྪེདདིཊྛིནིདྡེསཝཎྞནཱ ནིཊྛིཏཱ.

༧. ཨནྟགྒཱཧིཀཱདིཊྛིནིདྡེསཝཎྞནཱ

༡༤༠. ཨནྟགྒཱཧིཀཱཡ དིཊྛིཡཱ པཋམཝཱརེ ཨཱཀཱརཔུཙྪཱ. དུཏིཡེ ཨཱཀཱརགཧཎཾ. ཏཏིཡེ ཨཱཀཱརཝིསྶཛྫནཾ. ཏཏྠ ལོཀོཏི ཨཏྟཱ. སོ ཨནྟོཏི ཨཉྙམཉྙཔཊིཔཀྑེསུ སསྶཏུཙྪེདནྟེསུ ¶ སསྶཏགྒཱཧེ སསྶཏནྟོ, ཨསསྶཏགྒཱཧེ ཨུཙྪེདནྟོ. པརིཏྟཾ ཨོཀཱསནྟི སུཔྤམཏྟཾ ཝཱ སརཱཝམཏྟཾ ཝཱ ཁུདྡཀཾ ཋཱནཾ. ནཱིལཀཏོ ཕརཏཱིཏི ནཱིལནྟི ཨཱརམྨཎཾ ཀརོཏི. ཨཡཾ ལོཀོཏི ཨཏྟཱནཾ སནྡྷཱཡ ཝུཏྟཾ. པརིཝཊུམོཏི སམནྟཏོ པརིཙྪེདཝཱ. ཨནྟསཉྙཱིཏི ཨནྟཝཱཏིསཉྙཱི. ཨནྟོ ཨསྶ ཨཏྠཱིཏི ཨནྟོཏི གཧེཏབྦཾ. ཡཾ ཕརཏཱིཏི ཡཾ ཀསིཎརཱུཔཾ ཕརཏི. ཏཾ ཝཏྠུ ཙེཝ ལོཀོ ཙཱཏི ཏཾ ཀསིཎརཱུཔཾ ཨཱརམྨཎཉྩེཝ ཨཱལོཀིཡཊྛེན ལོཀོ ཙ. ཡེན ཕརཏཱིཏི ཡེན ཙིཏྟེན ཕརཏི. སོ ཨཏྟཱ ཙེཝ ལོཀོ ཙཱཏི ཨཏྟཱནམཔེཀྑིཏྭཱ པུལླིངྒཾ ཀཏཾ, ཏཾ ཙིཏྟཾ ཨཏྟཱ ཙེཝ ཨཱལོཀནཊྛེན ལོཀོ ཙཱཏི ཝུཏྟཾ ཧོཏི. ཨནྟཝཱཏི ཨནྟོ. ཨོཀཱསཀཏོ ཕརཏཱིཏི ཨཱལོཀཀསིཎཝསེན ཏེཛོཀསིཎཝསེན ¶ ཨོདཱཏཀསིཎཝསེན ཝཱ ཨོབྷཱསོཏི ཕརཏི. ནཱིལཱདཱིནཾ པཉྩནྣཾ པབྷསྶརཀསིཎཱནཾཡེཝ གཧིཏཏྟཱ པཐཝཱིཨཱཔོཝཱཡོཀསིཎཝསེན ཨཏྟཱབྷིནིཝེསོ ན ཧོཏཱིཏི གཧེཏབྦཾ.

ཝིཔུལཾ ཨོཀཱསནྟི ཁལམཎྜལམཏྟཱདིཝསེན མཧནྟཾ ཋཱནཾ. ཨནནྟཝཱཏི ཝུདྡྷཨནནྟཝཱ. ཨཔརིཡནྟོཏི ཝུདྡྷཨཔརིཡནྟོ. ཨནནྟསཉྙཱིཏི ཨནནྟོཏིསཉྙཱི. ཏཾ ཛཱིཝནྟི སོ ཛཱིཝོ. ལིངྒཝིཔལླཱསོ ཀཏོ. ཛཱིཝོཏི ཙ ཨཏྟཱ ཨེཝ. རཱུཔཱདཱིནི པཉྩཔི པརིཝཊུམཊྛེན སརཱིརཾ. ཛཱིཝཾ ན སརཱིརནྟི ཨཏྟསངྑཱཏོ ཛཱིཝོ རཱུཔསངྑཱཏཾ སརཱིརཾ ན ཧོཏི. ཨེས ནཡོ ཝེདནཱདཱིསུ. ཏཐཱགཏོཏི སཏྟོ. ཨརཧནྟི ཨེཀེ. པརཾ མརཎཱཏི མརཎཏོ ཨུདྡྷཾ, པརལོཀེཏི ཨཏྠོ. རཱུཔཾ ཨིདྷེཝ མརཎདྷམྨནྟི ཨཏྟནོ པཱཀཊཀྑནྡྷསཱིསེན པཉྩཀྑནྡྷགྒཧཎཾ, ཏཾ ཨིམསྨིཾཡེཝ ལོཀེ ནསྶནཔཀཏིཀནྟི ཨཏྠོ. སེསཀྑནྡྷེསུཔི ཨེསེཝ ནཡོ. ཀཱཡསྶ བྷེདཱཏི ཁནྡྷཔཉྩཀསངྑཱཏསྶ ཀཱཡསྶ ¶ བྷེདཏོ པརཾ. ཨིམིནཱ ཝཙནེན ‘‘པརཾ མརཎཱ’’ཏི ཨེཏསྶ ཨུདྡེསསྶ ཨཏྠོ ཝུཏྟོ. ཧོཏིཔཱིཏིཨཱདཱིསུ ཧོཏཱིཏི མཱུལཔདཾ. ཙཏཱུསུཔི ཨཔི-སདྡོ སམུཙྩཡཏྠོ. ཏིཊྛཏཱིཏི སསྶཏཏྟཱ ཏིཊྛཏི, ན ཙཝཏཱིཏི ཨཏྠོ. ‘‘ཧོཏཱི’’ཏི པདསྶ ཝཱ ཨཏྠཝིསེསནཏྠཾ ‘‘ཏིཊྛཏཱི’’ཏི ¶ པདཾ ཝུཏྟནྟི ཝེདིཏབྦཾ. ཨུཔྤཛྫཏཱིཏི ཨཎྜཛཛལཱབུཛཡོནིཔཝེསཝསེན ཨུཔྤཛྫཏི ནཱམ, ནིབྦཏྟཏཱིཏི སཾསེདཛཨོཔཔཱཏིཀཡོནིཔཝེསཝསེན ནིབྦཏྟཏི ནཱམཱཏི ཨཏྠཡོཛནཱ ཝེདིཏབྦཱ. ཨུཙྪིཛྫཏཱིཏི པབནྡྷཱབྷཱཝཝསེན. ཝིནསྶཏཱིཏི བྷངྒཝསེན. ན ཧོཏི པརཾ མརཎཱཏི པུརིམཔདཱནཾ ཨཏྠཝིཝརཎཾ, ཙུཏིཏོ ཨུདྡྷཾ ན ཝིཛྫཏཱིཏི ཨཏྠོ. ཧོཏི ཙ ན ཙ ཧོཏཱིཏི ཨེཀཙྩསསྶཏིཀཱནཾ དིཊྛི, ཨེཀེན པརིཡཱཡེན ཧོཏི, ཨེཀེན པརིཡཱཡེན ན ཧོཏཱིཏི ཨཏྠོ. ཛཱིཝབྷཱཝེན ཧོཏི, པུབྦཛཱིཝསྶ ཨབྷཱཝེན ན ཧོཏཱིཏི ཝུཏྟཾ ཧོཏི. ནེཝ ཧོཏི ན ན ཧོཏཱིཏི ཨམརཱཝིཀྑེཔིཀཱནཾ དིཊྛི, ཧོཏཱིཏི ཙ ནེཝ ཧོཏི, ན ཧོཏཱིཏི ཙ ན ཧོཏཱིཏི ཨཏྠོ. ཨནུཝཱདབྷཡཱ མུསཱཝཱདབྷཡཱ ཙ མནྡཏྟཱ མོམཱུཧཏྟཱ ཙ པུབྦཝུཏྟནཡསྶ པཊིཀྑེཔམཏྟཾ ཀརོཏི. ཨིམེཧི པཉྙཱསཱཡ ཨཱཀཱརེཧཱིཏི ཡཐཱཝུཏྟཱནཾ དསནྣཾ པཉྩཀཱནཾ ཝསེན པཉྙཱསཱཡ ཨཱཀཱརེཧཱིཏི.

ཨནྟགྒཱཧིཀཱདིཊྛིནིདྡེསཝཎྞནཱ ནིཊྛིཏཱ.

༨. པུབྦནྟཱནུདིཊྛིནིདྡེསཝཎྞནཱ

༡༤༡. པུབྦནྟཱཔརནྟཱནུདིཊྛཱིསུ ¶ སསྶཏཾ ཝདནྟཱིཏི སསྶཏཝཱདཱ. ཨཐ ཝཱ ཝདནྟི ཨེཏེནཱཏི ཝཱདོ, དིཊྛིགཏསྶེཏཾ ཨདྷིཝཙནཾ. སསྶཏནྟི ཝཱདོཔི སསྶཏཡོགེན སསྶཏོ, སསྶཏོ ཝཱདོ ཨེཏེསནྟི སསྶཏཝཱདཱ. ཏཐཱ ཨེཀཙྩཾ སསྶཏནྟི ཝཱདོ ཨེཀཙྩསསྶཏོ, སོ ཨེཏེསཾ ཨཏྠཱིཏི ཨེཀཙྩསསྶཏིཀཱ. ཏཐཱ ཨནྟཝཱ, ཨནནྟཝཱ, ཨནྟཝཱ ཙ ཨནནྟཝཱ ཙ, ནེཝནྟཝཱ ནཱནནྟཝཱཏི པཝཏྟོ ཝཱདོ ཨནྟཱནནྟོ, སོ ཨེཏེསཾ ཨཏྠཱིཏི ཨནྟཱནནྟིཀཱ. ན མརཏཱིཏི ཨམརཱ. ཀཱ སཱ? ‘‘ཨེཝམྤི མེ ནོ’’ཏིཨཱདིནཱ (དཱི. ནི. ༡.༦༢-༦༣) ནཡེན པརིཡནྟརཧིཏསྶ དིཊྛིགཏིཀསྶ དིཊྛི ཙེཝ ཝཱཙཱ ཙ. ཝིཝིདྷོ ཁེཔོ ཝིཀྑེཔོ, ཨམརཱཡ དིཊྛིཡཱ, ཝཱཙཱཡ ཝཱ ཝིཀྑེཔོ ཨམརཱཝིཀྑེཔོ, སོ ཨེཏེསཾ ཨཏྠཱིཏི ཨམརཱཝིཀྑེཔིཀཱ. ཨཔརོ ནཡོ – ཨམརཱ ནཱམ མཙྪཛཱཏི ¶ , སཱ ཨུམྨུཛྫནནིམུཛྫནཱདིཝསེན ཨུདཀེ སནྡྷཱཝམཱནཱ གཧེཏུཾ ན སཀྐཱ ཧོཏི, ཨེཝམེཝཾ ཨཡམྤི ཝཱདོ ཨིཏོ ཙིཏོ ཙ སནྡྷཱཝཏི, གཱཧཾ ན ཨུཔགཙྪཏཱིཏི ཨམརཱཝིཀྑེཔོཏི ཝུཙྩཏི, སོ ཨེཏེསཾ ཨཏྠཱིཏི ཨམརཱཝིཀྑེཔིཀཱ. ཨདྷིཙྩསམུཔྤནྣོཏི ¶ ཨཀཱརཎསམུཔྤནྣོ ཨཏྟཱ ཙ ལོཀོ ཙཱཏི དསྶནཾ ཨདྷིཙྩསམུཔྤནྣཾ, ཏཾ ཨེཏེསཾ ཨཏྠཱིཏི ཨདྷིཙྩསམུཔྤནྣིཀཱ.

པུབྦནྟཱནུདིཊྛིནིདྡེསཝཎྞནཱ ནིཊྛིཏཱ.

༩. ཨཔརནྟཱནུདིཊྛིནིདྡེསཝཎྞནཱ

༡༤༢. སཉྙིཾ ཝདནྟཱིཏི སཉྙཱིཝཱདཱ. ཨསཉྙིཾ ཝདནྟཱིཏི ཨསཉྙཱིཝཱདཱ. ནེཝསཉྙཱིནཱསཉྙིཾ ཝདནྟཱིཏི ནེཝསཉྙཱིནཱསཉྙཱིཝཱདཱ. ཨཐ ཝཱ སཉྙཱིཏི པཝཏྟོ ཝཱདོ སཉྙཱིཝཱདོ, སོ ཡེསཾ ཨཏྠཱིཏི ཏེ སཉྙཱིཝཱདཱ, ཏཐཱ ཨསཉྙཱིཝཱདཱ, ནེཝསཉྙཱིནཱསཉྙཱིཝཱདཱ ཙ. ཨུཙྪེདཾ ཝདནྟཱིཏི ཨུཙྪེདཝཱདཱ. དིཊྛདྷམྨོཏི པཙྩཀྑདྷམྨོ, ཏཏྠ ཏཏྠ པཊིལདྡྷཨཏྟབྷཱཝསྶེཏཾ ཨདྷིཝཙནཾ. དིཊྛདྷམྨེ ནིབྦཱནཾ དིཊྛདྷམྨནིབྦཱནཾ, ཨིམསྨིཾཡེཝ ཨཏྟབྷཱཝེ དུཀྑཝཱུཔསམོཏི ཨཏྠོ, ཏཾ ཝདནྟཱིཏི དིཊྛདྷམྨནིབྦཱནཝཱདཱ. ཨིམསྨིཾ པནཏྠེ ཝིཏྠཱརིཡམཱནེ སཱཊྛཀཐཾ སཀལཾ བྲཧྨཛཱལསུཏྟཾ ཝཏྟབྦཾ ཧོཏི. ཨེཝཉྩ སཏི ཨཏིཔཔཉྩོ ཧོཏཱིཏི ན ཝིཏྠཱརིཏོ. ཏདཏྠིཀེཧི ཏཾ ཨཔེཀྑིཏྭཱ གཧེཏབྦོ.

ཨཔརནྟཱནུདིཊྛིནིདྡེསཝཎྞནཱ ནིཊྛིཏཱ.

༡༠-༡༢. སཉྙོཛནིཀཱདིདིཊྛིནིདྡེསཝཎྞནཱ

༡༤༣. ཡསྨཱ ¶ སཉྙོཛནིཀཱ དིཊྛི སབྦདིཊྛིསཱདྷཱརཎཱ, ཏསྨཱ ཏསྶཱ སབྦདིཊྛིསཉྙོཛནཏྟཱ སབྦདིཊྛིསཱདྷཱརཎོ ཨཏྠོ ནིདྡིཊྛོ. སོ ཧེཊྛཱ ཝུཏྟདིཊྛིཔརིཡུཊྛཱནཱནེཝ.

༡༤༤. མཱནཝིནིབནྡྷདིཊྛཱིསུ ཙཀྑུ ཨཧནྟི ཨབྷིནིཝེསཔརཱམཱསོཏི མཱནཔུབྦཀོ ཨབྷིནིཝེསཔརཱམཱསོ. ན ཧི དིཊྛི མཱནསམྤཡུཏྟཱ ཧོཏི. ཏེནེཝ ཙ མཱནཝིནིབནྡྷཱཏི ཝུཏྟཾ, མཱནཔཊིབནྡྷཱ མཱནམཱུལཀཱཏི ཨཏྠོ.

༡༤༥. ཙཀྑུ མམནྟི ཨབྷིནིཝེསཔརཱམཱསོཏི ཨེཏྠཱཔི ཨེསེཝ ནཡོ. ཨེཏྠ པན ‘‘མམཱ’’ཏི ཝཏྟབྦེ ‘‘མམ’’ནྟི ཨནུནཱསིཀཱགམོ ཝེདིཏབྦོ. ‘‘ཨཧ’’ནྟི མཱནཝིནིབནྡྷཱཡ ¶ ¶ རཱུཔཱདཱིནིཔི ཨཛ྄ཛྷཏྟིཀཱནེཝ. ན ཧི ཀསིཎརཱུཔཾ ཝིནཱ བཱཧིརཱནི ‘‘ཨཧ’’ནྟི གཎྷཱཏི. ‘‘མམ’’ནྟི མཱནཝིནིབནྡྷཱཡ པན བཱཧིརཱནིཔི ལབྦྷནྟི. བཱཧིརཱནིཔི ཧི ‘‘མམ’’ནྟི གཎྷཱཏི. ཡསྨཱ པན དུཀྑཱ ཝེདནཱ ཨནིཊྛཏྟཱ མཱནཝཏྠུ ན ཧོཏི, ཏསྨཱ ཚ ཝེདནཱ ཏཱསཾ མཱུལཔཙྩཡཱ ཚ ཕསྶཱ ཙ ན གཧིཏཱ. སཉྙཱདཡོ པན ཨིདྷ པཙྪིནྣཏྟཱ ན གཧིཏཱཏི ཝེདིཏབྦཱ.

སཾཡོཛནིཀཱདིདིཊྛིནིདྡེསཝཎྞནཱ ནིཊྛིཏཱ.

༡༣. ཨཏྟཝཱདཔཊིསཾཡུཏྟདིཊྛིནིདྡེསཝཎྞནཱ

༡༤༦. ཨཏྟཝཱདཔཊིསཾཡུཏྟཱ དིཊྛི ཨཏྟཱནུདིཊྛིཡེཝ. ཨཏྟཱཏི ཝཱདེན པཊིསཾཡུཏྟཏྟཱ པུན ཨེཝཾ ཝུཏྟཱ.

ཨཏྟཝཱདཔཊིསཾཡུཏྟདིཊྛིནིདྡེསཝཎྞནཱ ནིཊྛིཏཱ.

༡༤. ལོཀཝཱདཔཊིསཾཡུཏྟདིཊྛིནིདྡེསཝཎྞནཱ

༡༤༧. ཨཏྟཱ ཙ ལོཀོ ཙཱཏི སོ ཨེཝ ཨཏྟཱ ཙ ཨཱལོཀནཊྛེན ལོཀོ ཙཱཏི ཨཏྠོ. སསྶཏོཏི སསྶཏཝཱདཱནཾ དིཊྛི. ཨསསྶཏོཏི ཨུཙྪེདཝཱདཱནཾ. སསྶཏོ ཙ ཨསསྶཏོ ཙཱཏི ཨེཀཙྩསསྶཏིཀཱནཾ. ནེཝ སསྶཏོ ནཱསསྶཏོཏི ཨམརཱཝིཀྑེཔིཀཱནཾ. ཨནྟཝཱཏི པརིཏྟཀསིཎལཱབྷཱིནཾ ཏཀྐིཀཱནཉྩ ནིགཎྛཱཛཱིཝིཀཱནཉྩ. ཨཐ ཝཱ ཨུཙྪེདཝཱདིནོ ‘‘སཏྟོ ཛཱཏིཡཱ པུབྦནྟཝཱ, མརཎེན ཨཔརནྟཝཱ’’ཏི ཝདནྟི. ཨདྷིཙྩསམུཔྤནྣིཀཱ ‘‘སཏྟོ ཛཱཏིཡཱ པུབྦནྟཝཱ’’ཏི ཝདནྟི. ཨནནྟཝཱཏི ཨཔྤམཱཎཀསིཎལཱབྷཱིནཾ. སསྶཏཝཱདིནོ པན ‘‘པུབྦནྟཱཔརནྟཱ ནཏྠི, ཏེན ཨནནྟཝཱ’’ཏི ཝདནྟི. ཨདྷིཙྩསམུཔྤནྣིཀཱ ‘‘ཨཔརནྟེན ཨནནྟཝཱ’’ཏི ཝདནྟི.

ཨནྟཝཱ ¶ ཙ ཨནནྟཝཱ ཙཱཏི ཨུདྡྷམདྷོ ཨཝཌྜྷིཏྭཱ ཏིརིཡཾ ཝཌྜྷིཏཀསིཎཱནཾ. ནེཝ ཨནྟཝཱ ན ཨནནྟཝཱཏི ཨམརཱཝིཀྑེཔིཀཱནཾ.

ལོཀཝཱདཔཊིསཾཡུཏྟདིཊྛིནིདྡེསཝཎྞནཱ ནིཊྛིཏཱ.

༡༥-༡༦. བྷཝཝིབྷཝདིཊྛིནིདྡེསཝཎྞནཱ

༡༤༨. བྷཝཝིབྷཝདིཊྛཱིནཾ ¶ ཡཐཱཝུཏྟདིཊྛིཏོ ཝིསུཾ ཨབྷིནིཝེསཱབྷཱཝཏོ ཝིསུཾ ནིདྡེསཾ ཨཀཏྭཱ ཡཐཱཝུཏྟདིཊྛཱིནཾཡེཝ ཝསེན ‘‘ཨོལཱིཡནཾ ཨཏིདྷཱཝན’’ནྟི ཨེཀེཀཾ ཨཱཀཱརཾ ནིདྡིསིཏུཾ པུཙྪཾ ཨཀཏྭཱ ཙ ཨོལཱིཡནཱབྷིནིཝེསོ བྷཝདིཊྛི, ཨཏིདྷཱཝནཱབྷིནིཝེསོ ཝིབྷཝདིཊྛཱིཏི ཨཱཧ. ཏཏྠ ‘‘བྷཝནིརོདྷཱཡ དྷམྨེ དེསིཡམཱནེ ཙིཏྟཾ ན པཀྑནྡཏཱི’’ཏི (ཨིཏིཝུ. ༤༩) ཝུཏྟཨོལཱིཡནཱབྷིནིཝེསོ, སསྶཏསཉྙཱཡ ནིབྦཱནཏོ སངྐོཙནཱབྷིནིཝེསོཏི ཨཏྠོ. ‘‘བྷཝེནེཝ ཁོ པནེཀེ ཨཊྚཱིཡམཱནཱ ཧརཱཡམཱནཱ ¶ ཛིགུཙྪམཱནཱ ཝིབྷཝཾ ཨབྷིནནྡནྟཱི’’ཏི ཝུཏྟཨཏིདྷཱཝནཱབྷིནིཝེསོ, ཨུཙྪེདསཉྙཱཡ ནིརོདྷགཱམིནིཔཊིཔདཱཏིཀྐམནཱབྷིནིཝེསོཏི ཨཏྠོ.

ཨིདཱནི ཏཱཝ བྷཝཝིབྷཝདིཊྛིཡོ སབྦདིཊྛཱིསུ ཡོཛེཏྭཱ དསྶེཏུཾ ཨསྶཱདདིཊྛིཡཱཏིཨཱདིམཱཧ. ཏཏྠ ཡསྨཱ ཨསྶཱདདིཊྛིཀཱ སསྶཏཾ ཝཱ ཨུཙྪེདཾ ཝཱ ནིསྶཱཡ ‘‘ནཏྠི ཀཱམེསུ དོསོ’’ཏི གཎྷནྟི, ཏསྨཱ པཉྩཏིཾསཱཀཱརཱཔི ཨསྶཱདདིཊྛིཡོ སིཡཱ བྷཝདིཊྛིཡོ, སིཡཱ ཝིབྷཝདིཊྛིཡོཏི ཝུཏྟཱ. ཏཏྠ ཡསྨཱ ཨེཀེཀཱཔི དིཊྛིཡོ སསྶཏགྒཱཧཝསེན བྷཝདིཊྛིཡོ བྷཝེཡྻུཾ, ཨུཙྪེདགྒཱཧཝསེན ཝིབྷཝདིཊྛིཡོ བྷཝེཡྻུནྟི ཨཏྠོ. ཨཏྟཱནུདིཊྛིཡཱ རཱུཔཾ ཨཏྟཏོ སམནུཔསྶཏི, ཝེདནཾ… སཉྙཾ… སངྑཱརེ… ཝིཉྙཱཎཾ ཨཏྟཏོ སམནུཔསྶཏཱིཏི པཉྩསུ རཱུཔཱདིཏོ ཨཏྟནོ ཨནཉྙཏྟཱ ཏེསུ ཨུཙྪིནྣེསུ ཨཏྟཱ ཨུཙྪིནྣོཏི གཧཎཏོ པཉྩ ཝིབྷཝདིཊྛིཡོཏི ཝུཏྟཾ. སེསེསུ པཉྩདསསུ ཋཱནེསུ རཱུཔཱདིཏོ ཨཏྟནོ ཨཉྙཏྟཱ ཏེསུ ཨུཙྪིནྣེསུཔི ‘‘ཨཏྟཱ སསྶཏོཏི གཧཎཏོ པནྣརས བྷཝདིཊྛིཡོཏི ཝུཏྟཾ.

མིཙྪཱདིཊྛིཡཱ ‘‘སབྦཱཝ ཏཱ ཝིབྷཝདིཊྛིཡོ’’ཏི ཨུཙྪེདཝསེན པཝཏྟཏྟཱ ཨནྟཝཱནནྟཝཱདིཊྛཱིསུ པརིཏྟཱརམྨཎཨཔྤམཱཎཱརམྨཎཛྷཱནལཱབྷིནོ དིབྦཙཀྑུནཱ རཱུཔདྷཱཏུཡཱ ཙཝིཏྭཱ སཏྟེ ཨཉྙཏྠ ཨུཔཔནྣེ པསྶིཏྭཱ བྷཝདིཊྛིཾ ཨཔསྶིཏྭཱ ཝིབྷཝདིཊྛིཾ གཎྷནྟི. ཏསྨཱ ཏཏྠ སིཡཱ བྷཝདིཊྛིཡོ, སིཡཱ ཝིབྷཝདིཊྛིཡོཏི ¶ ཝུཏྟཾ. ཧོཏི ཙ ན ཙ ཧོཏཱིཏི ཨེཏྠ ཧོཏི ཙཱཏི བྷཝདིཊྛི, ན ཙ ཧོཏཱིཏི ཝིབྷཝདིཊྛི. ནེཝ ཧོཏི ན ན ཧོཏཱིཏི ཨེཏྠ ནེཝ ཧོཏཱིཏི ཝིབྷཝདིཊྛི, ན ན ཧོཏཱིཏི བྷཝདིཊྛི. ཏསྨཱ ཏཏྠ ‘‘སིཡཱ’’ཏི ཝུཏྟཾ.

པུབྦནྟཱནུདིཊྛིཡཱ ཨེཀཙྩསསྶཏིཀཱ སསྶཏཉྩ པཉྙཔེནྟི, ཨསསྶཏཉྩ པཉྙཔེནྟི. ཏསྨཱ སཱ བྷཝདིཊྛི ཙ ཝིབྷཝདིཊྛི ཙ ཧོཏི. ཙཏྟཱརོ ཨནྟཱནནྟིཀཱ ཨནྟཱནནྟཾ ཨཏྟཱནཾ པཉྙཔེནྟི ¶ . ཏསྨཱ སཱ ཨཏྟཱནུདིཊྛིསདིསཱ བྷཝདིཊྛི ཙ ཝིབྷཝདིཊྛི ཙ. ཙཏྟཱརོ ཨམརཱཝིཀྑེཔིཀཱ བྷཝདིཊྛིཾ ཝཱ ཝིབྷཝདིཊྛིཾ ཝཱ ནིསྶཱཡ ཝཱཙཱཝིཀྑེཔཾ ཨཱཔཛྫནྟི, ཨཝསེསཱ པན བྷཝདིཊྛིཡོཝ. ཏསྨཱ ཏེ ཏེ སནྡྷཱཡ ¶ ‘‘སིཡཱ’’ཏི ཝུཏྟཾ. ཨཔརནྟཱནུདིཊྛིཡཱ སཏྟ ཨུཙྪེདཝཱདཱ ཝིབྷཝདིཊྛིཡོ, ཨཝསེསཱ བྷཝདིཊྛིཡོ. ཏསྨཱ ཏེ ཏེ སནྡྷཱཡ ‘‘སིཡཱ’’ཏི ཝུཏྟཾ. སཉྙོཛནིཀདིཊྛིཡཱ སབྦདིཊྛཱིནཾ ཝསེན ‘‘སིཡཱ’’ཏི ཝུཏྟཾ. ཨཧནྟི མཱནཝིནིབནྡྷཱཡ དིཊྛིཡཱ ཙཀྑཱདཱིནཾ ཨཧནྟི གཧིཏཏྟཱ ཏེསཾ ཝིནཱསེ ཨཏྟཱ ཝིནཊྛོ ཧོཏཱིཏི སབྦཱཝ ཏཱ ཝིབྷཝདིཊྛིཡོཏི ཝུཏྟཾ. ཨཏྟཱནུདིཊྛིཡོ ཝིཡ མམནྟི མཱནཝིནིབནྡྷཱཡ དིཊྛིཡཱ ཙཀྑཱདིཏོ ཨཏྟནོ ཨཉྙཏྟཱ ཏེསཾ ཝིནཱསེཔི ཨཏྟཱ ན ཝིནསྶཏཱིཏི སབྦཱཝ ཏཱ བྷཝདིཊྛིཡོཏི ཝུཏྟཾ. ལོཀཝཱདཔཊིསཾཡུཏྟཱཡ དིཊྛིཡཱ ‘‘སསྶཏོ ཨཏྟཱ ཙ ལོཀོ ཙཱ’’ཏིཨཱདིནཱ (པཊི. མ. ༡.༡༤༧) ནཡེན ཝུཏྟཏྟཱ བྷཝཝིབྷཝདིཊྛི པཱཀཊཱཡེཝ. ཨེཏྟཱཝཏཱ ཨསྶཱདདིཊྛཱདིཀཱ ཝིབྷཝདིཊྛིཔརིཡོསཱནཱ སོལ༹ས དིཊྛིཡོ ཏཱིཎིསཏཉྩ དིཊྛཱབྷིནིཝེསཱ ནིདྡིཊྛཱ ཧོནྟི. ཨཏྟཱནུདིཊྛི ཙ སཀྐཱཡདིཊྛི ཙ ཨཏྟཝཱདཔཊིསཉྙུཏྟཱ དིཊྛི ཙ ཨཏྠཏོ ཨེཀཱ པརིཡཱཡེན ཏིཝིདྷཱ ཝུཏྟཱ. སཉྙོཛནིཀཱ པན དིཊྛི ཨཝཏྠཱབྷེདེན སབྦཱཔི དིཊྛིཡོ ཧོནྟི.

ཨིདཱནི སབྦཱཝ ཏཱ དིཊྛིཡོ ཨསྶཱདདིཊྛིཡོཏིཨཱདི ཨཉྙེན པརིཡཱཡེན ཡཐཱཡོགཾ དིཊྛིསཾསནྡནཱ. ཏཏྠ སབྦཱཝ ཏཱ དིཊྛིཡོཏི ཡཐཱཝུཏྟཱ ཨནཝསེསཱ དིཊྛིཡོ. དིཊྛིརཱགརཏྟཏྟཱ ཏཎྷཱསྶཱདནིསྶིཏཏྟཱ ཙ ཨསྶཱདདིཊྛིཡོ, ཨཏྟསིནེཧཱནུགཏཏྟཱ ཨཏྟཱནུདིཊྛིཡོ, ཝིཔརཱིཏདསྶནཏྟཱ མིཙྪཱདིཊྛིཡོ, ཁནྡྷཝཏྠུཀཏྟཱ སཀྐཱཡདིཊྛིཡོ, ཨེཀེཀསྶ ཨནྟསྶ གཧིཏཏྟཱ ཨནྟགྒཱཧིཀཱ དིཊྛིཡོ, ཨནཏྠསཾཡོཛནིཀཏྟཱ སཉྙོཛནིཀཱ དིཊྛིཡོ, ཨཏྟཝཱདེན ཡུཏྟཏྟཱ ཨཏྟཝཱདཔཊིསཾཡུཏྟཱ ¶ དིཊྛིཡོཏི ཨིམཱ སཏྟ དིཊྛིཡོ སབྦདིཊྛིསངྒཱཧིཀཱ, སེསཱ པན ནཝ དིཊྛིཡོ ན སབྦདིཊྛིསངྒཱཧིཀཱ.

ཨིདཱནི ཝིཏྠཱརཏོ ཝུཏྟཱ སབྦཱཝ ཏཱ དིཊྛིཡོ དྭཱིསུཡེཝ དིཊྛཱིསུ སངྑིཔིཏྭཱ སཏྟཱནཾ དིཊྛིདྭཡནིསྶཡཾ དསྶེནྟོ བྷཝཉྩ དིཊྛིནྟིགཱཐམཱཧ. སབྦཱཔི ཧི ཏཱ དིཊྛིཡོ བྷཝདིཊྛཱི ¶ ཝཱ ཧོནྟི ཝིབྷཝདིཊྛཱི ཝཱ. བྷཝཉྩ དིཊྛིཾ ཝིབྷཝཉྩ དིཊྛིནྟི ཨེཏྠ པན ཙ-སདྡོ དིཊྛིམེཝ སམུཙྩིནོཏི, ན ནིསྶཡཾ. ན ཧི ཨེཀོ བྷཝཝིབྷཝདིཊྛིདྭཡཾ ནིསྶཡཏི. ཡཐཱཧ – ‘‘ཨིཏི བྷཝདིཊྛིསནྣིསྶིཏཱ ཝཱ སཏྟཱ ཧོནྟི ཝིབྷཝདིཊྛིསནྣིསྶིཏཱ ཝཱ’’ཏི (པཊི. མ. ༡.༡༡༣). ཏཀྐིཀཱཏི ཏཀྐེན ཝདནྟཱིཏི ཏཀྐིཀཱ. ཏེ ཧི དིཊྛིགཏིཀཱ སབྷཱཝཔཊིཝེདྷཔཉྙཱཡ ཨབྷཱཝཱ ཀེཝལཾ ཏཀྐེན ཝཏྟནྟི. ཡེཔི ཙ ཛྷཱནལཱབྷིནོ ཨབྷིཉྙཱལཱབྷིནོ ཝཱ དིཊྛིཾ གཎྷནྟི, ཏེཔི ཏཀྐེཏྭཱ གཧཎཏོ ཏཀྐིཀཱ ཨེཝ. ནིསྶིཏཱསེཏི ནིསྶིཏཱཏི ཨཏྠོ. ཨེཀམེཝ པདཾ, ‘‘སེ’’ཏི ¶ ནིཔཱཏམཏྟཾ ཝཱ. ཏེསཾ ནིརོདྷམྷི ན ཧཏྠི ཉཱཎནྟི དིཊྛིནིསྶཡསྶ ཀཱརཎཝཙནམེཏཾ. སཀྐཱཡདིཊྛིནིརོདྷེ ནིབྦཱནེ ཡསྨཱ ཏེསཾ ཉཱཎཾ ནཏྠི, ཏསྨཱ ཨེཏཾ དིཊྛིདྭཡཾ ནིསྶིཏཱཏི ཨཏྠོ. ‘‘ན ཧི ཨཏྠི ཉཱཎ’’ནྟི ཨེཏྠ ཧི-ཀཱརོ ཀཱརཎོཔདེསེ ནིཔཱཏོ. ཡཏྠཱཡཾ ལོཀོ ཝིཔརཱིཏསཉྙཱིཏི ཡཏྠ སུཁེ ནིརོདྷམྷི ཨཡཾ སདེཝཀོ ལོཀོ ‘‘དུཀྑ’’མིཏི ཝིཔརཱིཏསཉྙཱི ཧོཏི, ཏསྨིཾ ནིརོདྷམྷི ན ཧཏྠི ཉཱཎནྟི སམྦནྡྷོ. དུཀྑམིཏི ཝིཔརཱིཏསཉྙིཏཱཡ ཨིདཾ སུཏྟཾ –

‘‘རཱུཔཱ སདྡཱ རསཱ གནྡྷཱ, ཕསྶཱ དྷམྨཱ ཙ ཀེཝལཱ;

ཨིཊྛཱ ཀནྟཱ མནཱཔཱ ཙ, ཡཱཝཏཏྠཱིཏི ཝུཙྩཏི.

‘‘སདེཝཀསྶ ལོཀསྶ, ཨེཏེ ཝོ སུཁསམྨཏཱ;

ཡཏྠ ཙེཏེ ནིརུཛ྄ཛྷནྟི, ཏཾ ནེསཾ དུཀྑསམྨཏཾ.

‘‘སུཁནྟི དིཊྛམརིཡེཧི, སཀྐཱཡསྶུཔརོདྷནཾ;

པཙྩནཱིཀམིདཾ ཧོཏི, སབྦལོཀེན པསྶཏཾ.

‘‘ཡཾ ¶ པརེ སུཁཏོ ཨཱཧུ, ཏདརིཡཱ ཨཱཧུ དུཀྑཏོ;

ཡཾ པརེ དུཀྑཏོ ཨཱཧུ, ཏདརིཡཱ སུཁཏོ ཝིདཱུ.

‘‘པསྶ དྷམྨཾ དུརཱཛཱནཾ, སམྤམཱུལ༹ྷེཏྠཝིདྡསུ;

ནིཝུཏཱནཾ ཏམོ ཧོཏི, ཨནྡྷཀཱརོ ཨཔསྶཏཾ.

‘‘སཏཉྩ ¶ ཝིཝཊཾ ཧོཏི, ཨཱལོཀོ པསྶཏཱམིཝ;

སནྟིཀེ ན ཝིཛཱནནྟི, མགཱ དྷམྨསྶཀོཝིདཱ.

‘‘བྷཝརཱགཔརེཏེཧི, བྷཝསོཏཱནུསཱརིབྷི;

མཱརདྷེཡྻཱནུཔནྣེཧི, ནཱཡཾ དྷམྨོ སུསམྦུདྷོ.

‘‘ཀོ ¶ ནུ ཨཉྙཏྲ ཨརིཡེབྷི, པདཾ སམྦུདྡྷུམརཧཏི;

ཡཾ པདཾ སམྨདཉྙཱཡ, པརིནིབྦནྟི ཨནཱསཝཱ’’ཏི. (སུ. ནི. ༧༦༤-༧༧༡);

༡༤༩. ཨིདཱནི སབྦཱསཾ དིཊྛཱིནཾ དིཊྛིདྭཡབྷཱཝཾ དིཊྛིསམུགྒྷཱཏཀཉྩ སམྨཱདིཊྛིཾ སུཏྟཏོ དསྶེཏུཀཱམོ, དྭཱིཧི བྷིཀྑཝེཏི སུཏྟཾ ཨཱཧརི. ཏཏྠ དེཝཱཏི བྲཧྨཱནོཔི ཝུཙྩནྟི. ཨོལཱིཡནྟཱིཏི སངྐུཙནྟི. ཨཏིདྷཱཝནྟཱིཏི ཨཏིཀྐམིཏྭཱ གཙྪནྟི. ཙཀྑུམནྟོཏི པཉྙཝནྟོ. ཙ-སདྡོ ཨཏིརེཀཏྠོ. བྷཝཱརཱམཱཏི བྷཝོ ཨཱརཱམོ ཨབྷིརམཊྛཱནཾ ཨེཏེསནྟི བྷཝཱརཱམཱ. བྷཝརཏཱཏི བྷཝེ ཨབྷིརཏཱ. བྷཝསམྨུདིཏཱཏི བྷཝེན སནྟུཊྛཱ. དེསིཡམཱནེཏི ཏཐཱགཏེན ཝཱ ཏཐཱགཏསཱཝཀེན ཝཱ དེསིཡམཱནེ. ན པཀྑནྡཏཱིཏི དྷམྨདེསནཾ ཝཱ བྷཝནིརོདྷཾ ཝཱ ན པཝིསཏི. ན པསཱིདཏཱིཏི ཏཏྠ པསཱདཾ ན པཱཔུཎཱཏི. ན སནྟིཊྛཏཱིཏི ¶ ཏཏྠ ན པཏིཊྛཱཏི. ནཱདྷིམུཙྩཏཱིཏི ཏཏྠ གྷནབྷཱཝཾ ན པཱཔུཎཱཏི. ཨེཏྟཱཝཏཱ སསྶཏདིཊྛི ཝུཏྟཱ.

ཨཊྚཱིཡམཱནཱཏི དུཀྑཾ པཱཔུཎམཱནཱ. ཧརཱཡམཱནཱཏི ལཛྫཾ པཱཔུཎམཱནཱ. ཛིགུཙྪམཱནཱཏི ཛིགུཙྪཾ པཱཔུཎམཱནཱ. ཝིབྷཝཾ ཨབྷིནནྡནྟཱིཏི ཨུཙྪེདཾ པཊིཙྩ ཏུསྶནྟི, ཨུཙྪེདཾ པཏྠཡནྟཱིཏི ཝཱ ཨཏྠོ. ཀིརཱཏི ཨནུསྶཝནཏྠེ ནིཔཱཏོ. བྷོཏི ཨཱལཔནམེཏཾ. སནྟནྟི ནིབྦུཏཾ. པཎཱིཏནྟི དུཀྑཱབྷཱཝཏོ པཎཱིཏཾ, པདྷཱནབྷཱཝཾ ནཱིཏནྟི ཝཱ པཎཱིཏཾ. ཡཱཐཱཝནྟི ཡཐཱསབྷཱཝཾ. ཨེཏྟཱཝཏཱ ཨུཙྪེདདིཊྛི ཝུཏྟཱ.

ཨིདྷཱཏི ཨིམསྨིཾ སཱསནེ. བྷཱུཏནྟི ཧེཏུཏོ སཉྫཱཏཾ ཁནྡྷཔཉྩཀསངྑཱཏཾ དུཀྑཾ. བྷཱུཏཏོ པསྶཏཱིཏི ཨིདཾ བྷཱུཏཾ དུཀྑནྟི པསྶཏི. ནིབྦིདཱཡཱཏི ཝིཔསྶནཏྠཱཡ. ཝིརཱགཱཡཱཏི ཨརིཡམགྒཏྠཱཡ. ནིརོདྷཱཡཱཏི ནིབྦཱནཏྠཱཡ. པཊིཔནྣོ ཧོཏཱིཏི ཏདནུརཱུཔཾ པཊིཔདཾ པཊིཔནྣོ ཧོཏི. ཨེཝཾ པསྶནྟཱིཏི ཨིམིནཱ པཀཱརེན པུབྦབྷཱགེ ལོཀིཡཉཱཎེན, པཊིཝེདྷཀཱལེ ལོཀུཏྟརཉཱཎེན པསྶནྟི. ཨེཏྟཱཝཏཱ སམྨཱདིཊྛི ཝུཏྟཱ.

ཨིདཱནི ¶ དྭཱིཧི གཱཐཱཧི ཏསྶཱ སམྨཱདིཊྛིཡཱ ཨཱནིསཾསཾ དསྶེཏི. ཏཏྠ ཡོ བྷཱུཏཾ བྷཱུཏཏོ དིསྭཱཏི དུཀྑཾ པརིཉྙཱབྷིསམཡེན ཨབྷིསམེཏྭཱཏི ཨཏྠོ. བྷཱུཏསྶ ཙ ཨཏིཀྐམནྟི ནིརོདྷཾ སཙྪིཀིརིཡཱབྷིསམཡེན ཨབྷིསམེཏྭཱཏི ཨཏྠོ. ཡཐཱབྷཱུཏེདྷིམུཙྩཏཱིཏི མགྒབྷཱཝནཱབྷིསམཡཝསེན ཡཐཱསབྷཱཝེ ནིརོདྷེ ‘‘ཨེཏཾ སནྟཾ, ཨེཏཾ པཎཱིཏ’’ནྟི ཨདྷིམུཙྩཏི. བྷཝཏཎྷཱ པརིཀྑཡཱཏི སམུདཡསྶ པཧཱནེནཱཏི ཨཏྠོ. ཨསཏིཔི ཙེཏྠ སཙྩཱནཾ ནཱནཱབྷིསམཡཏྟེ ‘‘དིསྭཱ’’ཏི པུབྦཀཱལིཀཝཙནཾ ¶ སདྡྷིཾ པུབྦབྷཱགཔཊིཔདཱཡ ཝོཧཱརཝསེན ཝུཏྟནྟི ཝེདིཏབྦཾ. ན ཧི པུབྦཾ པསྶིཏྭཱ པཙྪཱ ཨདྷིམུཙྩཏི. ཙཏུསཙྩཱབྷིསམཡོ སམཱནཀཱལམེཝ ཧོཏི. སམཱནཀཱལེཔི ཝཱ པུབྦཀཱལིཀཱནི པདཱནི བྷཝནྟཱིཏི ན དོསོ. ས ¶ ཝེཏི ཨེཀཾསེན སོ ཨརཧཾ. བྷཱུཏཔརིཉྙཱཏོཏི དུཀྑཾ པརིཉྙཱཏཝཱ. ཝཱིཏཏཎྷོཏི ཝིགཏཏཎྷོ. བྷཝཱབྷཝེཏི ཁུདྡཀེ ཙ མཧནྟེ ཙ བྷཝེ. ཝུདྡྷིཨཏྠེཔི ཧི ཨ-ཀཱརསྶ སམྦྷཝཏོ ཨབྷཝོཏི མཧཱབྷཝོ. སོ པན ཁུདྡཀམཧནྟབྷཱཝོ ཨུཔཱདཱཡུཔཱདཱཡ ཝེདིཏབྦོ. ཨཐ ཝཱ བྷཝེཏི སསྶཏེ. ཨབྷཝེཏི ཨུཙྪེདེ. ཏདུབྷཡེཔི དིཊྛིརཱགཱབྷཱཝེན ཝཱིཏཏཎྷོ. བྷཱུཏསྶ ཝིབྷཝཱཏི ཝཊྚདུཀྑསྶ སམུཙྪེདཱ. ནཱགཙྪཏི པུནབྦྷཝནྟི ཨརཧཏོ པརིནིབྦཱནཾ ཝུཏྟཾ.

༡༥༠. ཏཡོ པུགྒལཱཏིཨཱདི མིཙྪཱདིཊྛིཀགརཧཎཏྠཾ སམྨཱདིཊྛིཀཔསཾསནཏྠཾ ཝུཏྟཾ. ཏཏྠ ཝིརཱུཔབྷཱཝཾ པནྣཱ གཏཱ དིཊྛི ཨེཏེསནྟི ཝིཔནྣདིཊྛཱི. སུནྡརབྷཱཝཾ པནྣཱ གཏཱ དིཊྛི ཨེཏེསནྟི སམྤནྣདིཊྛཱི. ཏིཏྠིཡོཏི ཏིཏྠཾ ཝུཙྩཏི དིཊྛི, ཏཾ པཊིཔནྣཏྟཱ ཏིཏྠེ སཱདྷུ, ཏིཏྠཾ ཡསྶ ཨཏྠཱིཏི ཝཱ ཏིཏྠིཡོ. ཨིཏོ བཧིདྡྷཱ པབྦཛྫཱུཔགཏོ. ཏིཏྠིཡསཱཝཀོཏི ཏེསཾ དིཊྛཱནུགཏིམཱཔནྣོ གཧཊྛོ. ཡོ ཙ མིཙྪཱདིཊྛིཀོཏི ཏདུབྷཡབྷཱཝཾ ཨནུཔགནྟྭཱ ཡཱཡ ཀཱཡཙི དིཊྛིཡཱ མིཙྪཱདིཊྛིཀོ.

ཏཐཱགཏོཏི སམྨཱསམྦུདྡྷོ. པཙྩེཀབུདྡྷོཔི ཨེཏྠེཝ སངྒཧིཏོ. ཏཐཱགཏསཱཝཀོཏི མགྒཔྤཏྟོ ཕལཔྤཏྟོ ཙ. ཡོ ཙ སམྨཱདིཊྛིཀོཏི ཏདུབྷཡཝིནིམུཏྟོ ལོཀིཡསམྨཱདིཊྛིཡཱ སམྨཱདིཊྛིཀོ.

གཱཐཱསུ ཀོདྷནོཏི ཡོ ཨབྷིཎྷཾ ཀུཛ྄ཛྷཏི, སོ. ཨུཔནཱཧཱིཏི ཏམེཝ ཀོདྷཾ ཝཌྜྷེཏྭཱ ཨུཔནནྡྷནསཱིལོ. པཱཔམཀྑཱིཏི ལཱམཀབྷཱུཏམཀྑཝཱ. མཱཡཱཝཱིཏི ཀཏཔཱཔཔཊིཙྪཱདནཝཱ. ཝསལོཏི ཧཱིནཛཙྩོ. ཝིསུདྡྷོཏི ཉཱཎདསྶནཝིསུདྡྷིཡཱ ¶ ཝིསུདྡྷོ. སུདྡྷཏཾ གཏོཏི མགྒཕལསངྑཱཏཾ སུདྡྷབྷཱཝཾ གཏོ. མེདྷཱཝཱིཏི པཉྙཝཱ. ཨིམཱཡ གཱཐཱཡ ལོཀུཏྟརསམྨཱདིཊྛིསམྤནྣོ ཨེཝ ཐོམིཏོ.

ཝིཔནྣདིཊྛིཡོ སམྤནྣདིཊྛིཡོཏི པུགྒལཝོཧཱརཾ པཧཱཡ དྷམྨམེཝ གརཧནྟོ ཐོམེནྟོ ཙ ཨཱཧ. ཨེཏཾ མམཱཏི ཏཎྷཱམཉྙནཝསེན དིཊྛི. ཨེསོཧམསྨཱིཏི མཱནམཉྙནམཱུལིཀཱ ¶ དིཊྛི. ཨེསོ མེ ཨཏྟཱཏི དིཊྛིམཉྙནམེཝ.

ཨེཏཾ ¶ མམཱཏི ཀཱ དིཊྛཱིཏིཨཱདཱིཧི ཏིསྶནྣཾ ཝིཔནྣདིཊྛཱིནཾ ཝིབྷཱགཉྩ གཎནཉྩ ཀཱལསངྒཧཉྩ པུཙྪིཏྭཱ ཝིསྶཛྫནཾ ཀཏཾ. ཏཏྠ ཀཱ དིཊྛཱིཏི ཨནེཀཱསུ དིཊྛཱིསུ ཀཏམཱ དིཊྛཱིཏི ཨཏྠོ. ཀཏམནྟཱནུགྒཧིཏཱཏི པུབྦནྟཱཔརནྟསངྑཱཏཀཱལདྭཡེ ཀཏམེན ཀཱལེན ཨནུགྒཧིཏཱ, ཨནུབདྡྷཱཏི ཨཏྠོ. ཡསྨཱ ‘‘ཨེཏཾ མམཱ’’ཏི པརཱམསནྟོ ‘‘ཨེཏཾ མམ ཨཧོསི, ཨེཝཾ མམ ཨཧོསི, ཨེཏྟཀཾ མམ ཨཧོསཱི’’ཏི ཨཏཱིཏཾ ཝཏྠུཾ ཨཔདིསིཏྭཱ པརཱམསཏི, ཏསྨཱ པུབྦནྟཱནུདིཊྛི ཧོཏི. པུབྦནྟཱནུགྒཧིཏཱ ཙ ཏཱ དིཊྛིཡོ ཧོནྟི. ཡསྨཱ ‘‘ཨེསོཧམསྨཱི’’ཏི པརཱམསནྟོ ‘‘ཨིམིནཱཧཾ སཱིལེན ཝཱ ཝཏེན ཝཱ ཏཔེན ཝཱ བྲཧྨཙརིཡེན ཝཱ ཨེསོསྨི ཝིསུཛ྄ཛྷིསྶཱམཱི’’ཏི ཨནཱགཏཕལཾ ཨུཔཱདཱཡ པརཱམསཏི, ཏསྨཱ ཨཔརནྟཱནུདིཊྛི ཧོཏི. ཨཔརནྟཱནུགྒཧིཏཱ ཙ ཏཱ དིཊྛིཡོ ཧོནྟི. ཡསྨཱ ‘‘ཨེསོ མེ ཨཏྟཱ’’ཏི པརཱམསནྟོ ཨཏཱིཏཱནཱགཏཾ ཨུཔཱདིནྣསནྟཏིཾ ཨུཔཱདཱཡ ‘‘ཨེསོ མེ ཨཏྟཱ’’ཏི པརཱམསཏི, སཀྐཱཡདིཊྛིཝསེན ཙ པརཱམསཏི, ཏསྨཱ སཀྐཱཡདིཊྛི ཧོཏི. པུབྦནྟཱཔརནྟཱནུགྒཧིཏཱ ཙ ཏཱ དིཊྛིཡོ ཧོནྟི. ཡསྨཱ པན སཀྐཱཡདིཊྛིཔྤམུཁཱཡེཝ དྭཱསཊྛི དིཊྛིཡོ ཧོནྟི, སཀྐཱཡདིཊྛིསམུགྒྷཱཏེནེཝ ཙ དྭཱསཊྛི དིཊྛིཡོ སམུགྒྷཱཏཾ གཙྪནྟི, ཏསྨཱ སཀྐཱཡདིཊྛིཔྤམུཁེན དྭཱསཊྛི དིཊྛིགཏཱནཱིཏི ཝུཏྟཱ, སཀྐཱཡདིཊྛིཔྤམུཁེན སཀྐཱཡདིཊྛིདྭཱརེན དྭཱསཊྛི དིཊྛིགཏཱནི ཧོནྟཱིཏི ཨཏྠོ. སཀྐཱཡདིཊྛིཔྤམུཁཱནཱིཏི པཱཋོ སུནྡརཏརོ. སཀྐཱཡདིཊྛི པམུཁཱ ཨཱདི ཨེཏེསནྟི སཀྐཱཡདིཊྛིཔྤམུཁཱནི. ཀཱནི ཏཱནི? དྭཱསཊྛི དིཊྛིགཏཱནི.

‘‘ཀཱ དིཊྛཱི’’ཏི པུཙྪཱཡ ཝཱིསཏིཝཏྠུཀཱ ཨཏྟཱནུདིཊྛི, ཝཱིསཏིཝཏྠུཀཱ སཀྐཱཡདིཊྛཱིཏི ཝིསྶཛྫནཾ. ‘‘ཀཏི དིཊྛིཡོ’’ཏི པུཙྪཱཡ ¶ སཀྐཱཡདིཊྛིཔྤམུཁཱནི དྭཱསཊྛི དིཊྛིགཏཱནཱིཏི ཝིསྶཛྫནཾ. སཱཡེཝ པན སཀྐཱཡདིཊྛི ‘‘ཨེསོ མེ ཨཏྟཱ’’ཏི ¶ ཝཙནསཱམཉྙེན ཨཏྟཱནུདིཊྛཱིཏི ཝུཏྟཱ. ཏསྶཱ ཝུཏྟཱཡ ཨཏྟཝཱདཔཊིསཉྙུཏྟཱ དིཊྛིཔི ཝུཏྟཱཡེཝ ཧོཏི.

༡༥༡. ཡེ ཀེཙི, བྷིཀྑཝེཏིཨཱདིསུཏྟཱཧརཎཾ སམྤནྣདིཊྛིཔུགྒལསམྦནྡྷེན སམྤནྣདིཊྛིཔུགྒལཝིབྷཱགདསྶནཏྠཾ ཀཏཾ. ཏཏྠ ནིཊྛཾ གཏཱཏི མགྒཉཱཎཝསེན སམྨཱསམྦུདྡྷོ བྷགཝཱཏི ནིཙྪཡཾ གཏཱ, ནིབྦེམཏིཀཱཏི ཨཏྠོ. ནིཊྛཱགཏཱཏི པཱཋོ སམཱསཔདཾ ཧོཏི, ཨཏྠོ པན སོཡེཝ. དིཊྛིསམྤནྣཱཏི དིཊྛིཡཱ སུནྡརབྷཱཝཾ གཏཱ. ཨིདྷ ནིཊྛཱཏི ཨིམིསྶཱ ཀཱམདྷཱཏུཡཱ པརིནིབྦཱནཾ. ཨིདྷ ཝིཧཱཡ ནིཊྛཱཏི ཨིམཾ ཀཱམབྷཝཾ ཝིཛཧིཏྭཱ སུདྡྷཱཝཱསབྲཧྨལོཀེ པརིནིབྦཱནཾ. སཏྟཀྑཏྟུཔརམསྶཱཏི སཏྟཀྑཏྟུཾཔརམཱ སཏྟཝཱརཔརམཱ བྷཝཱུཔཔཏྟི ཨཏྟབྷཱཝགྒཧཎཾ ཨསྶ, ཏཏོ པརཾ ཨཊྛམཾ བྷཝཾ ནཱདིཡཏཱིཏི སཏྟཀྑཏྟུཔརམོ. ཏསྶ སཏྟཀྑཏྟུཔརམསྶ སོཏཱཔནྣསྶ. ཀོལཾཀོལསྶཱཏི ཀུལཏོ ཀུལཾ གཙྪཏཱིཏི ཀོལཾཀོལོ. སོཏཱཔཏྟིཕལསཙྪིཀིརིཡཏོ ཧི པཊྛཱཡ ནཱིཙེ ¶ ཀུལེ ཨུཔཔཏྟི ནཱམ ནཏྠི, མཧཱབྷོགཀུལེསུཡེཝ ནིབྦཏྟཏཱིཏི ཨཏྠོ. ཏསྶ ཀོལཾཀོལསྶ སོཏཱཔནྣསྶ. ཨེཀབཱིཛིསྶཱཏི ཁནྡྷབཱིཛཾ ནཱམ ཀཐིཏཾ. ཡསྶ ཧི སོཏཱཔནྣསྶ ཨེཀཾཡེཝ ཁནྡྷབཱིཛཾ ཨཏྠི, ཨེཀཾ ཨཏྟབྷཱཝགྒཧཎཾ, སོ ཨེཀབཱིཛཱི ནཱམ. ཏསྶ ཨེཀབཱིཛིསྶ སོཏཱཔནྣསྶ. བྷགཝཏཱ གཧིཏནཱམཝསེནེཝེཏཱནི ཨེཏེསཾ ནཱམཱནི. ཨེཏྟཀཉྷི ཋཱནཾ གཏོ སཏྟཀྑཏྟུཔརམོ ནཱམ ཧོཏི, ཨེཏྟཀཾ ཀོལཾཀོལོ, ཨེཏྟཀཾ ཨེཀབཱིཛཱིཏི བྷགཝཏཱ ཨེཏེསཾ ནཱམཾ གཧིཏཾ. བྷགཝཱ ཧི ‘‘ཨཡཾ ཨེཏྟཀཾ ཋཱནཾ གམིསྶཏི, ཨཡཾ ཨེཏྟཀཾ ཋཱནཾ གམིསྶཏཱི’’ཏི ཉཏྭཱ ཏེསཾ ཏཱནི ཏཱནི ནཱམཱནི ཨགྒཧེསི. མུདུཔཉྙོ ཧི སོཏཱཔནྣོ སཏྟ བྷཝེ ནིབྦཏྟེནྟོ སཏྟཀྑཏྟུཔརམོ ནཱམ, མཛ྄ཛྷིམཔཉྙོ པརཾ ཚཊྛཾ བྷཝཾ ནིབྦཏྟེནྟོ ཀོལཾཀོལོ ནཱམ ¶ , ཏིཀྑཔཉྙོ ཨེཀཾ བྷཝཾ ནིབྦཏྟེནྟོ ཨེཀབཱིཛཱི ནཱམ. ཏཾ པནེཏཾ ཏེསཾ མུདུམཛ྄ཛྷིམཏིཀྑཔཉྙཏཾ པུབྦཧེཏུ ནིཡམེཏི. ཨིམེ ཏཡོཔི སོཏཱཔནྣཱ ཀཱམབྷཝཝསེན ཝུཏྟཱ, རཱུཔཱརཱུཔབྷཝེ པན བཧུཀཱཔི པཊིསནྡྷིཡོ གཎྷནྟི. སཀདཱགཱམིསྶཱཏི པཊིསནྡྷིཝསེན སཀིཾ ཀཱམབྷཝཾ ཨཱགཙྪཏཱིཏི སཀདཱགཱམཱི. ཏསྶ སཀདཱགཱམིསྶ. དིཊྛེཝ དྷམྨེ ཨརཧཱཏི ཨིམསྨིཾཡེཝ ཨཏྟབྷཱཝེ ཨརཧཱ. ཨརཧནྟིཔི པཱཋོ. ཨིདྷ ནིཊྛཱཏི ཀཱམབྷཝཾ ¶ སཾསརནྟེཡེཝ སནྡྷཱཡ ཝུཏྟཾ. རཱུཔཱརཱུཔབྷཝེ ཨུཔྤནྣཱ པན ཨརིཡཱ ཀཱམབྷཝེ ན ཨུཔྤཛྫནྟི, ཏཏྠེཝ པརིནིབྦཱཡནྟི.

ཨནྟརཱཔརིནིབྦཱཡིསྶཱཏི ཨཱཡུཝེམཛ྄ཛྷསྶ ཨནྟརཱཡེཝ ཀིལེསཔརིནིབྦཱནེན པརིནིབྦཱཡནཏོ ཨནྟརཱཔརིནིབྦཱཡཱི. སོ པན ཨུཔྤནྣསམནནྟརཱ པརིནིབྦཱཡཱི, ཨཱཡུཝེམཛ྄ཛྷཾ ཨཔྤཏྭཱ པརིནིབྦཱཡཱི, ཨཱཡུཝེམཛ྄ཛྷཾ པཏྭཱ པརིནིབྦཱཡཱིཏི ཏིཝིདྷོ ཧོཏི. ཏསྶ ཨནྟརཱཔརིནིབྦཱཡིསྶ ཨནཱགཱམིནོ. ཨུཔཧཙྩཔརིནིབྦཱཡིསྶཱཏི ཨཱཡུཝེམཛ྄ཛྷཾ ཨཏིཀྐམིཏྭཱ ཝཱ ཀཱལཀིརིཡཾ ཨུཔགནྟྭཱ ཝཱ ཀིལེསཔརིནིབྦཱནེན པརིནིབྦཱཡནྟསྶ ཨནཱགཱམིནོ. ཨསངྑཱརཔརིནིབྦཱཡིསྶཱཏི ཨསངྑཱརེན ཨཔྤཡོགེན ཨདྷིམཏྟཔྤཡོགཾ ཨཀཏྭཱཝ ཀིལེསཔརིནིབྦཱནེན པརིནིབྦཱཡནདྷམྨསྶ ཨནཱགཱམིནོ. སསངྑཱརཔརིནིབྦཱཡིསྶཱཏི སསངྑཱརེན དུཀྑེན ཀསིརེན ཨདྷིམཏྟཔྤཡོགཾ ཀཏྭཱཝ ཀིལེསཔརིནིབྦཱནེན པརིནིབྦཱཡནདྷམྨསྶ ཨནཱགཱམིནོ. ཨུདྡྷཾསོཏསྶ ཨཀནིཊྛགཱམིནོཏི ཨུདྡྷཾཝཱཧིབྷཱཝེན ཨུདྡྷམསྶ ཏཎྷཱསོཏཾ ཝཊྚསོཏཾ ཝཱཏི ཨུདྡྷཾསོཏོ, ཨུདྡྷཾ ཝཱ གནྟྭཱ པཊིལབྷིཏབྦཏོ ཨུདྡྷམསྶ མགྒསོཏནྟི ཨུདྡྷཾསོཏོ, ཨཀནིཊྛཾ གཙྪཏཱིཏི ཨཀནིཊྛགཱམཱི. ཏསྶ ཨུདྡྷཾསོཏསྶ ཨཀནིཊྛགཱམིནོ ཨནཱགཱམིསྶ. ཨཡཾ པན ཨནཱགཱམཱི ཙཏུཔྤབྷེདོ – ཡོ ཨཝིཧཏོ པཊྛཱཡ ཙཏྟཱརོ བྲཧྨལོཀེ སོདྷེཏྭཱ ཨཀནིཊྛཾ གནྟྭཱ པརིནིབྦཱཡཏི, ཨཡཾ ཨུདྡྷཾསོཏོ ཨཀནིཊྛགཱམཱི ནཱམ. ཡོ ཧེཊྛཱ ཏཡོ བྲཧྨལོཀེ སོདྷེཏྭཱ སུདསྶཱིབྲཧྨལོཀེ ཋཏྭཱ པརིནིབྦཱཡཏི, ཨཡཾ ཨུདྡྷཾསོཏོ ན ཨཀནིཊྛགཱམཱི ནཱམ. ཡོ ཨིཏོ ཨཀནིཊྛམེཝ གནྟྭཱ པརིནིབྦཱཡཏི, ཨཡཾ ན ཨུདྡྷཾསོཏོ ཨཀནིཊྛགཱམཱི ནཱམ. ཡོ ཧེཊྛཱ ཙཏཱུསུ ¶ བྲཧྨལོཀེསུ ཏཏྠ ¶ ཏཏྠེཝ པརིནིབྦཱཡཏི, ཨཡཾ ན ཨུདྡྷཾསོཏོ ན ཨཀནིཊྛགཱམཱི ནཱམཱཏི. ཨིམེ པཉྩ ཨནཱགཱམིནོ སུདྡྷཱཝཱསཾ གཧེཏྭཱ ཝུཏྟཱ. ཨནཱགཱམིནོ པན རཱུཔརཱགཱརཱུཔརཱགཱནཾ ཨཔྤཧཱིནཏྟཱ ཨཱཀངྑམཱནཱ སེསརཱུཔཱརཱུཔབྷཝེསུཔི ནིབྦཏྟནྟི. སུདྡྷཱཝཱསེ ནིབྦཏྟཱ པན ཨཉྙཏྠ ན ནིབྦཏྟནྟི. ཨཝེཙྩཔྤསནྣཱཏི ཨརིཡམགྒཝསེན ཛཱནིཏྭཱ བུཛ྄ཛྷིཏྭཱ ཨཙལཔྤསཱདེན པསནྣཱ. སོཏཱཔནྣཱཏི ཨརིཡམགྒསོཏཾ ཨཱཔནྣཱ. ཨིམིནཱ སབྦེཔི ཨརིཡཕལཊྛཱ པུགྒལཱ གཧིཏཱཏི.

བྷཝཝིབྷཝདིཊྛིནིདྡེསཝཎྞནཱ ནིཊྛིཏཱ.

སདྡྷམྨཔྤཀཱསིནིཡཱ པཊིསམྦྷིདཱམགྒཊྛཀཐཱཡ

དིཊྛིཀཐཱཝཎྞནཱ ནིཊྛིཏཱ.

༣. ཨཱནཱཔཱནསྶཏིཀཐཱ

༡. གཎནཝཱརཝཎྞནཱ

༡༥༢. ཨིདཱནི ¶ ¶ ¶ དིཊྛིཀཐཱནནྟརཾ ཀཐིཏཱཡ ཨཱནཱཔཱནསྶཏིཀཐཱཡ ཨཔུབྦཏྠཱནུཝཎྞནཱ ཨནུཔྤཏྟཱ. ཨཡཉྷི ཨཱནཱཔཱནསྶཏིཀཐཱ དིཊྛིཀཐཱཡ སུཝིདིཏདིཊྛཱདཱིནཝསྶ མིཙྪཱདིཊྛིམལཝིསོདྷནེན སུཝིསུདྡྷཙིཏྟསྶ ཡཐཱབྷཱུཏཱཝབོདྷཱཡ སམཱདྷིབྷཱཝནཱ སུཀརཱ ཧོཏི, སབྦསམཱདྷིབྷཱཝནཱསུ ཙ སབྦསབྦཉྙུབོདྷིསཏྟཱནཾ བོདྷིམཱུལེ ཨིམིནཱཝ སམཱདྷིནཱ སམཱཧིཏཙིཏྟཱནཾ ཡཐཱབྷཱུཏཱཝབོདྷཏོ ཨཡམེཝ སམཱདྷིབྷཱཝནཱ པདྷཱནཱཏི ཙ དིཊྛིཀཐཱནནྟརཾ ཀཐིཏཱ. ཏཏྠ སོལ༹སཝཏྠུཀཾ ཨཱནཱཔཱནསྶཏིསམཱདྷིཾ བྷཱཝཡཏོ སམདྷིཀཱནི དྭེ ཉཱཎསཏཱནི ཨུཔྤཛྫནྟཱིཏི ཉཱཎགཎནུདྡེསོ, ཨཊྛ པརིཔནྠེ ཉཱཎཱནཱིཏིཨཱདི ཉཱཎགཎནནིདྡེསོ, ཀཏམཱནི ཨཊྛ པརིཔནྠེ ཉཱཎཱནཱིཏིཨཱདི. ཨིམཱནི ཨེཀཝཱིསཏི ཝིམུཏྟིསུཁེ ཉཱཎཱནཱིཏིཔརིཡནྟཾ སབྦཉཱཎཱནཾ ཝིཏྠཱརནིདྡེསོ, ཨནྟེ སོལ༹སཝཏྠུཀཾ ཨཱནཱཔཱནསྶཏིསམཱདྷིཾ བྷཱཝཡཏོཏིཨཱདི ནིགམནནྟི ཨེཝཾ ཏཱཝ པཱལི༹ཝཝཏྠཱནཾ ཝེདིཏབྦཾ.

ཏཏྠ གཎནུདྡེསེ གཎནཝཱརེ ཏཱཝ སོལ༹སཝཏྠུཀནྟི དཱིགྷཾ རསྶཾ སབྦཀཱཡཔཊིསཾཝེདཱི པསྶམྦྷཡཾ ཀཱཡསངྑཱརནྟི ཀཱཡཱནུཔསྶནཱཙཏུཀྐཾ, པཱིཏིཔཊིསཾཝེདཱི སུཁཔཊིསཾཝེདཱི ཙིཏྟསངྑཱརཔཊིསཾཝེདཱི པསྶམྦྷཡཾ ཙིཏྟསངྑཱརནྟི ཝེདནཱནུཔསྶནཱཙཏུཀྐཾ, ཙིཏྟཔཊིསཾཝེདཱི ཨབྷིཔྤམོདཡཾ ཙིཏྟཾ སམཱདཧཾ ཙིཏྟཾ ཝིམོཙཡཾ ཙིཏྟནྟི ཙིཏྟཱནུཔསྶནཱཙཏུཀྐཾ, ཨནིཙྩཱནུཔསྶཱི ཝིརཱགཱནུཔསྶཱི ནིརོདྷཱནུཔསྶཱི པཊིནིསྶགྒཱནུཔསྶཱིཏི དྷམྨཱནུཔསྶནཱཙཏུཀྐནྟི ཨིམེསཾ ཙཏུནྣཾ ཙཏུཀྐཱནཾ ཝསེན སོལ༹ས ཝཏྠཱུནི པཏིཊྛཱ ཨཱརམྨཎཱནི ཨསྶཱཏི སོལ༹སཝཏྠུཀོ. ཏཾ སོལ༹སཝཏྠུཀཾ. སམཱསཝསེན པནེཏྠ ཝིབྷཏྟིལོཔོ ཀཏོ. ཨཱནནྟི ཨབྦྷནྟརཾ པཝིསནཝཱཏོ. ཨཔཱནནྟི བཧིནིཀྑམནཝཱཏོ. ཀེཙི པན ཝིཔརིཡཱཡེན ཝདནྟི. ཨཔཱནཉྷི ¶ ཨཔེཏཾ ཨཱནཏོཏི ཨཔཱནནྟི ཝུཙྩཏི, ནིདྡེསེ (པཊི. མ. ༡.༡༦༠) པན ནཱ-ཀཱརསྶ དཱིགྷཏྟམཛ྄ཛྷུཔེཀྑིཏྭཱ ཨཱཔཱནནྟི. ཏསྨིཾ ཨཱནཱཔཱནེ སཏི ཨཱནཱཔཱནསྶཏི, ཨསྶཱསཔསྶཱསཔརིགྒཱཧིཀཱཡ སཏིཡཱ ཨེཏཾ ཨདྷིཝཙནཾ. ཨཱནཱཔཱནསྶཏིཡཱ ཡུཏྟོ ¶ སམཱདྷི, ཨཱནཱཔཱནསྶཏིཡཾ ཝཱ ¶ སམཱདྷི ཨཱནཱཔཱནསྶཏིསམཱདྷི. བྷཱཝཡཏོཏི ནིབྦེདྷབྷཱགིཡཾ བྷཱཝེནྟསྶ. སམདྷིཀཱནཱིཏི སཧ ཨདྷིཀེན ཝཏྟནྟཱིཏི སམདྷིཀཱནི, སཱཏིརེཀཱནཱིཏི ཨཏྠོ. མ-ཀཱརོ པནེཏྠ པདསནྡྷིཀརོ. ཀེཙི པན ‘‘སཾཨདྷིཀཱནཱི’’ཏི ཝདནྟི. ཨེཝཾ སཏི དྭེ ཉཱཎསཏཱནིཡེཝ ཨདྷིཀཱནཱིཏི ཨཱཔཛྫཏི, ཏཾ ན ཡུཛྫཏི. ཨིམཱནི ཧི ཝཱིསཏིཨདྷིཀཱནི དྭེ ཉཱཎསཏཱནི ཧོནྟཱིཏི.

པརིཔནྠེ ཉཱཎཱནཱིཏི པརིཔནྠཾ ཨཱརམྨཎཾ ཀཏྭཱ པཝཏྟཉཱཎཱནི. ཏཐཱ ཨུཔཀཱརེ ཨུཔཀྐིལེསེ ཉཱཎཱནི. ཝོདཱནེ ཉཱཎཱནཱིཏི ཝོདཱཡཏི, ཏེན ཙིཏྟཾ པརིསུདྡྷཾ ཧོཏཱིཏི ཝོདཱནཾ. ཀིཾ ཏཾ? ཉཱཎཾ. ‘‘ཝོདཱནཉཱཎཱནཱི’’ཏི ཝཏྟབྦེ ‘‘སུཏམཡེ ཉཱཎ’’ནྟིཨཱདཱིསུ (པཊི. མ. མཱཏིཀཱ ༡.༡; པཊི. མ. ༡.༡) ཝིཡ ‘‘ཝོདཱནེ ཉཱཎཱནཱི’’ཏི ཝུཏྟཾ. སཏོ སམྤཛཱནོ ཧུཏྭཱ ཀརོཏཱིཏི སཏོཀཱརཱི, ཏསྶ སཏོཀཱརིསྶ ཉཱཎཱནི. ནིབྦིདཱཉཱཎཱནཱིཏི ནིབྦིདཱབྷཱུཏཱནི ཉཱཎཱནི. ནིབྦིདཱནུལོམཉཱཎཱནཱིཏི ནིབྦིདཱཡ ཨནུཀཱུལཱནི ཉཱཎཱནི. ནིབྦིདཱནུལོམིཉཱཎཱནཱིཏིཔི པཱཋོ, ནིབྦིདཱནུལོམོ ཨེཏེསཾ ཨཏྠཱིཏི ནིབྦིདཱནུལོམཱིཏི ཨཏྠོ. ནིབྦིདཱཔཊིཔྤསྶདྡྷིཉཱཎཱནཱིཏི ནིབྦིདཱཡ པཊིཔྤསྶདྡྷིཡཾ ཉཱཎཱནི. ཝིམུཏྟིསུཁེ ཉཱཎཱནཱིཏི ཝིམུཏྟིསུཁེན སམྤཡུཏྟཱནི ཉཱཎཱནི.

ཀཏམཱནི ཨཊྛཱཏིཨཱདཱིཧི པརིཔནྠཨུཔཀཱརཱནཾ པཊིཔཀྑཝིཔཀྑཡུགལཏྟཱ ཏེསུ ཉཱཎཱནི སཧེཝ ནིདྡིཊྛཱནི. ཀཱམཙྪནྡནེཀྑམྨཱདཱིནི ཧེཊྛཱ ཝུཏྟཏྠཱནི. ཨུཔཀཱརནྟི ཙ ལིངྒཝིཔལླཱསཝསེན ནཔུཾསཀཝཙནཾ ཀཏཾ. སབྦེཔི ཨཀུསལཱ དྷམྨཱཏི ཝུཏྟཱཝསེསཱ ཡེ ཀེཙི ཨཀུསལཱ དྷམྨཱ. ཏཐཱ ¶ སབྦེཔི ནིབྦེདྷབྷཱགིཡཱ ཀུསལཱ དྷམྨཱ. ‘‘པརིཔནྠོ ཨུཔཀཱར’’ནྟི ཙ ཏཾ ཏདེཝ ཨཔེཀྑིཏྭཱ ཨེཀཝཙནཾ ཀཏཾ. ཨེཏྠ ཙ པརིཔནྠེ ཉཱཎཱནི ཙ ཨུཔཀཱརེ ཉཱཎཱནི ཙ པུཙྪིཏྭཱ ཏེསཾ ཨཱརམྨཎཱནེཝ ཝིསྶཛྫིཏྭཱ ཏེཧེཝ ཏཱནི ཝིསྶཛྫིཏཱནི ཧོནྟཱིཏི ཏདཱརམྨཎཱནི ཉཱཎཱནི ནིགམེཏྭཱ དསྶེསི. ཨུཔཀྐིལེསེ ཉཱཎཱདཱིསུཔི ཨེསེཝ ནཡོ.

གཎནཝཱརཝཎྞནཱ ནིཊྛིཏཱ.

༢. སོལ༹སཉཱཎནིདྡེསཝཎྞནཱ

༡༥༣. སོལ༹སཧི ¶ ཨཱཀཱརེཧཱིཏི ཨུབྷཡཔཀྑཝསེན ཝུཏྟེཧི སོལ༹སཧི ཉཱཎཀོཊྛཱསེཧི. ཨུདུཙིཏཾ ཙིཏྟཾ སམུདུཙིཏནྟི ཨུཔཙཱརབྷཱུམིཡཾ ཙིཏྟཾ ཨུདྡྷཾ ཨུཙིཏཾ, སམྨཱ ཨུདྡྷཾ ཨུཙིཏཾ, ཨུཔརཱུཔརི ཀཏཔརིཙཡཾ སམྨཱ ཨུཔརཱུཔརི ཀཏཔརིཙཡནྟི ཨཏྠོ. ཨུདུཛིཏཾ ཙིཏྟཾ སམུདུཛིཏནྟིཔི པཱཋོ. ཨུཔརིབྷཱཝཱཡ ¶ ཛིཏཾ, ཨུཔརིབྷཱཝཀརེཧི ཝཱ ཉཱཎེཧི ཛིཏཾ ཨུདུཛིཏཾ. སམུདུཛིཏནྟི སམཱ ཨུཔརིབྷཱཝཱཡ, ཨུཔརིབྷཱཝཀརེཧི ཝཱ ཉཱཎེཧི ཛིཏཾ. སམཱཏི ཙེཏྠ ཝིསམབྷཱཝཔཊིཀྑེཔོ. ཨིམསྨིཾ པཱཋེ ཨུ, དུ-ཨིཏི དྭེ དྭེ ཨུཔསགྒཱ ཧོནྟི. ཨུརཱུཛིཏཾ ཙིཏྟཾ སམྨཱརཱུཛིཏནྟིཔི པཱཋོ. ཨེཏྠཱཔི ཛིཏཏྠོཡེཝ. ཨུརཱུ ཨརཱུཏི ཨིདཾ པན ནིཔཱཏམཏྟམེཝཱཏི ཝདནྟི. ཝཱིཎོཔམཊྛཀཐཱཡ ཏཛྫིཏཾ སུཏཛྫིཏནྟི ཙ ཨཏྠོ ཝུཏྟོ, སོ ཨིདྷ ན ཡུཛྫཏི. ཨེཀཏྟེ སནྟིཊྛཏཱིཏི ཨུཔཙཱརབྷཱུམིཡཾ ཏཱཝ ནཱནཱརམྨཎཝིཀྑེཔཱབྷཱཝེན ཨེཀཏྟེ པཏིཊྛཱཏི. ནིཡྻཱནཱཝརཎཊྛེན ནཱིཝརཎཱཏི ཨེཏྠ ཨརཏིཔི སབྦེཔི ཨཀུསལཱ ཨཱཝརཎཊྛེན ནཱིཝརཎཱཏི ཝུཏྟཱ. ནིཡྻཱནཱཝརཎཊྛེནཱཏི ནིཡྻཱནཱནཾ ཨཱགམནམགྒཔིདཧནཊྛེན. ནིཡྻཱནཝཱརཎཊྛེནཱཏིཔི པཱཋོ, ནིཡྻཱནཱནཾ པཊིཀྑེཔནཊྛེནཱཏི ཨཏྠོ. ནེཀྑམྨཾ ཨརིཡཱནཾ ནིཡྻཱནནྟི མགྒཊྛཱནཾ ཨརིཡཱནཾ ནིཡྻཱནསངྑཱཏསྶ ཨརིཡམགྒསྶ ཧེཏུཏྟཱ ཕལཱུཔཙཱརེན ཨརིཡཱནཾ ནིཡྻཱནཾ. ཏེན ཙ ཧེཏུབྷཱུཏེན མགྒཀྑཎེ ཨརིཡཱ ནིཡྻནྟི ནིགཙྪནྟི. ཀེཙི པན ‘‘ནིཡྻཱནནྟི མགྒོ’’ཏི ཝདནྟི. ཨིདྷ ཨུཔཙཱརསྶ ཨདྷིཔྤེཏཏྟཱ མགྒཀྑཎེ ཙ ཨཱལོཀསཉྙཱཡ སབྦཀུསལདྷམྨཱནཉྩ ¶ ཨབྷཱཝཱ ཏཾ ན ཡུཛྫཏི. ནིཝུཏཏྟཱཏི པཊིཙྪནྣཏྟཱ. ནཔྤཛཱནཱཏཱིཏི པུགྒལཝསེན ཝུཏྟཾ.

ཝིསུདྡྷཙིཏྟསྶཱཏི ཨུཔཙཱརབྷཱུམིཡཾཡེཝ. ཁཎིཀསམོདྷཱནཱཏི ཙིཏྟཀྑཎེ ཙིཏྟཀྑཎེ ཨུཔྤཛྫནཏོ ཁཎོ ཨེཏེསཾ ཨཏྠཱིཏི ཁཎིཀཱ, ཨུཔཀྐིལེསཱ, ཁཎིཀཱནཾ སམོདྷཱནོ སམཱགམོ པབནྡྷོ ཁཎིཀསམོདྷཱནོ. ཏསྨཱ ཁཎིཀསམོདྷཱནཱ, ཨུཔྤཛྫམཱནཱ ཨུཔཀྐིལེསཱ ཁཎིཀཔྤབནྡྷཝསེན ཁཎིཀཔརམྤརཱཝསེན ཨུཔྤཛྫནྟི, ན ཨེཀཙིཏྟཀྑཎཝསེནཱཏི ཝུཏྟཾ ཧོཏི.

སོལ༹སཉཱཎནིདྡེསཝཎྞནཱ ནིཊྛིཏཱ.

༣. ཨུཔཀྐིལེསཉཱཎནིདྡེསཝཎྞནཱ

པཋམཙྪཀྐཾ

༡༥༤. པཋམཙྪཀྐེ ¶ ཨསྶཱསཱདིམཛ྄ཛྷཔརིཡོསཱནནྟི ཨབྦྷནྟརཔཝིསནཝཱཏསྶ ནཱསིཀགྒཾ ཝཱ མུཁནིམིཏྟཾ ཝཱ ཨཱདི, ཧདཡཾ མཛ྄ཛྷཾ, ནཱབྷི པརིཡོསཱནཾ. ཏཾ ཏསྶ ཨཱདིམཛ྄ཛྷཔརིཡོསཱནཾ སཏིཡཱ ཨནུགཙྪཏོ ཡོགིསྶ ཋཱནནཱནཏྟཱནུགམནེན ཙིཏྟཾ ཨཛ྄ཛྷཏྟཾ ཝིཀྑེཔཾ གཙྪཏི, ཏཾ ཨཛ྄ཛྷཏྟཝིཀྑེཔགཏཾ ཙིཏྟཾ ཨེཀཏྟེ ཨསཎྛཧནཏོ སམཱདྷིསྶ པརིཔནྠོ. པསྶཱསཱདིམཛ྄ཛྷཔརིཡོསཱནནྟི ¶ བཧིནིཀྑམནཝཱཏསྶ ནཱབྷི ཨཱདི, ཧདཡཾ མཛ྄ཛྷཾ, ནཱསིཀགྒཾ ཝཱ མུཁནིམིཏྟཾ ཝཱ བཧིཨཱཀཱསོ ཝཱ པརིཡོསཱནཾ. ཡོཛནཱ པནེཏྠ ཝུཏྟནཡེནེཝ ཝེདིཏབྦཱ. ཨསྶཱསཔཊིཀངྑནཱ ནིཀནྟིཏཎྷཱཙརིཡཱཏི ‘‘ནཱསིཀཱཝཱཏཱཡཏྟམིདཾ ཀམྨཊྛཱན’’ནྟི སལླཀྑེཏྭཱ ཨོལཱ༹རིཀོལཱ༹རིཀསྶ ཨསྶཱསསྶ པཏྠནཱསངྑཱཏཱ ནིཀཱམནཱ ཨེཝ ཏཎྷཱཔཝཏྟི. ཏཎྷཱཔཝཏྟིཡཱ སཏི ཨེཀཏྟེ ཨསཎྛཧནཏོ སམཱདྷིསྶ པརིཔནྠོ. པསྶཱསཔཊིཀངྑནཱ ནིཀནྟཱིཏི པུན ཨསྶཱསཔུབྦཀསྶ པསྶཱསསྶ པཏྠནཱསངྑཱཏཱ ནིཀནྟི. སེསཾ ཝུཏྟནཡེནེཝ ཡོཛེཏབྦཾ. ཨསྶཱསེནཱབྷིཏུནྣསྶཱཏི ཨཏིདཱིགྷཾ ཨཏིརསྶཾ ཝཱ ཨསྶཱསཾ ཀརོནྟསྶ ཨསྶཱསམཱུལཀསྶ ཀཱཡཙིཏྟཀིལམཐསྶ སབྦྷཱཝཏོ ཏེན ཨསྶཱསེན ཝིདྡྷསྶ པཱིལི༹ཏསྶ. པསྶཱསཔཊིལཱབྷེ མུཙྪནཱཏི ཨསྶཱསེན པཱིལི༹ཏཏྟཱཡེཝ པསྶཱསེ ཨསྶཱདསཉྙིནོ པསྶཱསཾ པཏྠཡཏོ ཏསྨིཾ པསྶཱསཔཊིལཱབྷེ རཛྫནཱ. པསྶཱསམཱུལཀེཔི ཨེསེཝ ནཡོ.

ཝུཏྟསྶེཝ ¶ ཨཏྠསྶ ཨནུཝཎྞནཏྠཾ ཝུཏྟེསུ གཱཐཱབནྡྷེསུ ཨནུགཙྪནཱཏི ཨནུགཙྪམཱནཱ. སཏཱིཏི ཨཛ྄ཛྷཏྟབཧིདྡྷཱཝིཀྑེཔཧེཏུབྷཱུཏཱ སཏི. ཝིཀྑིཔཏི ཨནེན ཙིཏྟནྟི ཝིཀྑེཔོ. ཀོ སོ? ཨསྶཱསོ. ཨཛ྄ཛྷཏྟཾ ཝིཀྑེཔོ ཨཛ྄ཛྷཏྟཝིཀྑེཔོ, ཏསྶ ཨཱཀངྑནཱ ཨཛ྄ཛྷཏྟཝིཀྑེཔཱཀངྑནཱ, ཨསམྨཱམནསིཀཱརཝསེན ཨཛ྄ཛྷཏྟཝིཀྑེཔཀསྶ ཨསྶཱསསྶ ཨཱཀངྑནཱཏི ཝུཏྟཾ ཧོཏི. ཨེཏེནེཝ ནཡེན བཧིདྡྷཱཝིཀྑེཔཔཏྠནཱ ཝེདིཏབྦཱ. ཡེཧཱིཏི ཡེཧི ཨུཔཀྐིལེསེཧི. ཝིཀྑིཔྤམཱནསྶཱཏི ཝིཀྑིཔིཡམཱནསྶ ཝིཀྑེཔཾ ཨཱཔཱདིཡམཱནསྶ. ནོ ཙ ཙིཏྟཾ ཝིམུཙྩཏཱིཏི ཙིཏྟཾ ཨསྶཱསཔསྶཱསཱརམྨཎེ ཙ ནཱདྷིམུཙྩཏི, པཙྩནཱིཀདྷམྨེཧི ཙ ན ཝིམུཙྩཏི. ཙིཏྟཾ ནོ ཙ ཝིམུཙྩཏི པརཔཏྟིཡཱ ཙ ཧོནྟཱིཏི སམྦནྡྷོ. ཝིམོཀྑཾ ཨཔྤཛཱནནྟཱཏི སོ ཝཱ ཨཉྙོ ཝཱ ཨཱརམྨཎཱདྷིམུཏྟིཝིམོཀྑཉྩ ¶ པཙྩནཱིཀཝིམུཏྟིཝིམོཀྑཉྩ ཨེཝཾ ཨཔྤཛཱནནྟཱ. པརཔཏྟིཡཱཏི པརཔཙྩཡཾ པརསདྡཧནཾ ཨརཧནྟི, ན ཨཏྟཔཙྩཀྑཾ ཉཱཎནྟི ‘‘པརཔཙྩཡིཀཱ’’ཏི ཝཏྟབྦེ ‘‘པརཔཏྟིཡཱ’’ཏི ཝུཏྟཾ. ཨཏྠོ པན སོཡེཝ.

དུཏིཡཙྪཀྐཾ

༡༥༥. དུཏིཡཙྪཀྐེ ནིམིཏྟནྟི ཨསྶཱསཔསྶཱསཱནཾ ཕུསནཊྛཱནཾ. ཨསྶཱསཔསྶཱསཱ ཧི དཱིགྷནཱསིཀསྶ ནཱསཱཔུཊཾ གྷཊྚེནྟཱ པཝཏྟནྟི, རསྶནཱསིཀསྶ ཨུཏྟརོཊྛཾ. ཡདི ཧི ཨཡཾ ཡོགཱི ཏཾ ནིམིཏྟམེཝ ཨཱཝཛྫཏི, ཏསྶ ནིམིཏྟམེཝ ཨཱཝཛྫམཱནསྶ ཨསྶཱསེ ཙིཏྟཾ ཝིཀམྤཏི, ན པཏིཊྛཱཏཱིཏི ཨཏྠོ. ཏསྶ ཏསྨིཾ ཙིཏྟེ ཨཔྤཏིཊྛིཏེ སམཱདྷིསྶ ཨབྷཱཝཏོ ཏཾ ཝིཀམྤནཾ སམཱདྷིསྶ ¶ པརིཔནྠོ. ཡདི ཨསྶཱསམེཝ ཨཱཝཛྫཏི, ཏསྶ ཙིཏྟཾ ཨབྦྷནྟརཔཝེསནཝསེན ཝིཀྑེཔཾ ཨཱཝཧཏི, ནིམིཏྟེ ན པཏིཊྛཱཏི, ཏསྨཱ ནིམིཏྟེ ཝིཀམྤཏི. ཨིམིནཱ ནཡེན སེསེསུཔི ཡོཛནཱ ཀཱཏབྦཱ. གཱཐཱསུ ཝིཀྑིཔྤཏེཏི ཝིཀྑིཔཱིཡཏི ཝིཀྑེཔཾ ཨཱཔཱདཱིཡཏི.

ཏཏིཡཙྪཀྐཾ

༡༥༦. ཏཏིཡཙྪཀྐེ ¶ ཨཏཱིཏཱནུདྷཱཝནཾ ཙིཏྟནྟི ཕུསནཊྛཱནཾ ཨཏིཀྐམིཏྭཱ གཏཾ ཨསྶཱསཾ ཝཱ པསྶཱསཾ ཝཱ ཨནུགཙྪམཱནཾ ཙིཏྟཾ. ཝིཀྑེཔཱནུཔཏིཏནྟི ཝིཀྑེཔེན ཨནུགཏཾ, ཝིཀྑེཔཾ ཝཱ སཡཾ ཨནུཔཏིཏཾ ཨནུགཏཾ. ཨནཱགཏཔཊིཀངྑནཾ ཙིཏྟནྟི ཕུསནཊྛཱནཾ ཨཔྤཏྟཾ ཨསྶཱསཾ ཝཱ པསྶཱསཾ ཝཱ པཊིཀངྑམཱནཾ པཙྩཱསཱིསམཱནཾ ཙིཏྟཾ. ཝིཀམྤིཏནྟི ཏསྨིཾ ཨཔྤཏིཊྛཱནེནེཝ ཝིཀྑེཔེན ཝིཀམྤིཏཾ. ལཱིནནྟི ཨཏིསིཐིལཝཱིརིཡཏཱདཱིཧི སངྐུཙིཏཾ. ཀོསཛྫཱནུཔཏིཏནྟི ཀུསཱིཏབྷཱཝཱནུགཏཾ. ཨཏིཔགྒཧིཏནྟི ཨཙྩཱརདྡྷཝཱིརིཡཏཱདཱིཧི ཨཏིཨུསྶཱཧིཏཾ. ཨུདྡྷཙྩཱནུཔཏིཏནྟི ཝིཀྑེཔཱནུགཏཾ. ཨབྷིནཏནྟི ཨསྶཱདཝཏྠཱུསུ བྷུསཾ ནཏཾ ཨལླཱིནཾ. ཨཔནཏནྟི ནིརསྶཱདཝཏྠཱུསུ པཏིཧཏཾ, ཏཏོ ཨཔགཏཾ ཝཱ, ཨཔགཏནཏཾ ཝཱ, ན ཏཏོ ཨཔགཏནྟི ཨཏྠོ. རཱགཱནུཔཏིཏནྟི ཨེཏྠ ཨསྶཱསཔསྶཱསནིམིཏྟཾ མནསིཀརོཏོ ཨུཔྤནྣཔཱིཏིསུཁེ ཝཱ པུབྦེ ཧསིཏལཔིཏཀཱིལི༹ཏཝཏྠཱུསུ ཝཱ རཱགོ ཨནུཔཏཏི. བྱཱཔཱདཱནུཔཏིཏནྟི ཨེཏྠ མནསིཀཱརེ ནིརསྶཱདགཏཙིཏྟསྶ ཨུཔྤནྣདོམནསྶཝསེན ཝཱ པུབྦེ སམུདཱཙིཎྞེསུ ཨཱགྷཱཏཝཏྠཱུསུ ཝཱ བྱཱཔཱདོ ཨནུཔཏཏི. གཱཐཱསུ ན སམཱདྷིཡཏཱིཏི ན སམཱཧིཏཾ ཧོཏི. ཨདྷིཙིཏྟནྟི ཙིཏྟསཱིསེན ནིདྡིཊྛོ ཨདྷིཀོ སམཱདྷི.

༡༥༧. ཨེཏྟཱཝཏཱ ¶ ཏཱིཧི ཚཀྐེཧི ཨཊྛཱརས ཨུཔཀྐིལེསེ ནིདྡིསིཏྭཱ ཨིདཱནི ཏེསཾ ཨུཔཀྐིལེསཱནཾ སམཱདྷིསྶ པརིཔནྠབྷཱཝསཱདྷནེན ཨཱདཱིནཝཾ དསྶེནྟོ པུན ཨསྶཱསཱདིམཛ྄ཛྷཔརིཡོསཱནནྟིཨཱདིམཱཧ. ཏཏྠ ཀཱཡོཔི ཙིཏྟམྤི སཱརདྡྷཱ ཙ ཧོནྟཱིཏི ཝིཀྑེཔསམུཊྛཱནརཱུཔཱནཾ ཝསེན རཱུཔཀཱཡོཔི, ཝིཀྑེཔསནྟཏིཝསེན ཙིཏྟམྤི མཧཏཱ ཁོབྷེན ཁུབྷིཏཱ སདརཐཱ ཙ ཧོནྟི. ཏཏོ མནྡཏརེན ཨིཉྫིཏཱ ཀམྤིཏཱ, ཏཏོ མནྡཏརེན ཕནྡིཏཱ ཙལིཏཱ ཧོནྟི. བལཝཱཔི མཛ྄ཛྷིམོཔི མནྡོཔི ཁོབྷོ ཧོཏིཡེཝ, ན སཀྐཱ ཁོབྷེན ན བྷཝིཏུནྟི ཝུཏྟཾ ཧོཏི. ཙིཏྟཾ ཝིཀམྤིཏཏྟཱཏི ཙིཏྟསྶ ཝིཀམྤིཏཏྟཱ. གཱཐཱསུ ¶ པརིཔུཎྞཱ ཨབྷཱཝིཏཱཏི ཡཐཱ པརིཔུཎྞཱ ཧོཏི, ཏཐཱ ཨབྷཱཝིཏཱ. ཨིཉྫིཏོཏི ཀམྤིཏོ. ཕནྡིཏོཏི མནྡཀམྤིཏོ. ཧེཊྛཱ ནཱིཝརཎཱནཾ ཨནནྟརཏྟཱ ‘‘ཨིམེཧི ཙ པན ནཱིཝརཎེཧཱི’’ཏི (པཊི. མ. ༡.༡༥༣) ཨཙྩནྟསམཱིཔནིདསྶནཝཙནཾ ¶ ཀཏཾ. ཨིདྷ པན ནིགམནེ ནཱིཝརཎཱནཾ སནྟརཏྟཱ ཏེཧི ཙ པན ནཱིཝརཎེཧཱིཏི པརམྨུཁནིདསྶནཝཙནཾ ཀཏཾ.

ཨུཔཀྐིལེསཉཱཎནིདྡེསཝཎྞནཱ ནིཊྛིཏཱ.

༤. ཝོདཱནཉཱཎནིདྡེསཝཎྞནཱ

༡༥༨. ཝོདཱནེ ཉཱཎཱནཱིཏི ཝིསུདྡྷཉཱཎཱནི. ཏཾ ཝིཝཛྫཡིཏྭཱཏི ཡཾ པུབྦེ ཝུཏྟཾ ཨཏཱིཏཱནུདྷཱཝནཾ ཙིཏྟཾ ཝིཀྑེཔཱནུཔཏིཏཾ, ཏཾ ཝིཝཛྫཡིཏྭཱཏི སམྦནྡྷིཏབྦཾ. ཨེཀཊྛཱནེ སམཱདཧཏཱིཏི ཨསྶཱསཔསྶཱསཱནཾ ཕུསནཊྛཱནེ སམཾ ཨཱདཧཏི པཏིཊྛཱཔེཏི. ཏཏྠེཝ ཨདྷིམོཙེཏཱིཏི ཨེཀཊྛཱནེཏི ཝུཏྟེ ཨསྶཱསཔསྶཱསཱནཾ ཕུསནཊྛཱནེཡེཝ སནྣིཊྛཔེཏི སནྣིཊྛཱནཾ ཀརོཏི. པགྒཎྷིཏྭཱཏི དྷམྨཝིཙཡཔཱིཏིསམྦོཛ྄ཛྷངྒབྷཱཝནཱཡ པགྒཧེཏྭཱ. ཝིནིགྒཎྷིཏྭཱཏི པསྶདྡྷིསམཱདྷིཨུཔེཀྑཱསམྦོཛ྄ཛྷངྒབྷཱཝནཱཡ ཝིནིགྒཎྷིཏྭཱ. ‘‘སཏིནྡྲིཡཝཱིརིཡིནྡྲིཡེཧི པགྒཧེཏྭཱ, སཏིནྡྲིཡསམཱདྷིནྡྲིཡེཧི ཝིནིགྒཧེཏྭཱ’’ཏིཔི ཝདནྟི. སམྤཛཱནོ ཧུཏྭཱཏི ཨསུབྷབྷཱཝནཱདཱིཧི. པུན སམྤཛཱནོ ཧུཏྭཱཏི མེཏྟཱབྷཱཝནཱདཱིཧི. ཡེན རཱགེན ཨནུཔཏིཏཾ, ཡེན བྱཱཔཱདེན ཨནུཔཏིཏཾ, ཏཾ པཛཧཏཱིཏི སམྦནྡྷོ. ཏཾ ཙིཏྟཾ ཨཱིདིསནྟི སམྤཛཱནནྟོ ཏཔྤཊིཔཀྑེན རཱགཾ ¶ པཛཧཏི, བྱཱཔཱདཾ པཛཧཏཱིཏི ཝཱ ཨཏྠོ. པརིསུདྡྷནྟི ནིརུཔཀྐིལེསཾ. པརིཡོདཱཏནྟི པབྷསྶརཾ. ཨེཀཏྟགཏཾ ཧོཏཱིཏི ཏཾ ཏཾ ཝིསེསཾ པཏྟསྶ ཏཾ ཏཾ ཨེཀཏྟཾ གཏཾ ཧོཏི.

ཀཏམེ ཏེ ཨེཀཏྟཱཏི ཨིདྷ ཡུཛྫམཱནཱཡུཛྫམཱནེཔི ཨེཀཏྟེ ཨེཀཏོ ཀཏྭཱ པུཙྪཏི. དཱནཱུཔསགྒུཔཊྛཱནེཀཏྟནྟི དཱནཝཏྠུསངྑཱཏསྶ དཱནསྶ ཨུཔསགྒོ ཝོསཛྫནཾ དཱནཱུཔསགྒོ, དཱནཝཏྠུཔརིཙྩཱགཙེཏནཱ. ཏསྶ ཨུཔཊྛཱནཾ ཨཱརམྨཎཀརཎཝསེན ཨུཔགནྟྭཱ ཋཱནཾ དཱནཱུཔསགྒུཔཊྛཱནཾ, ཏདེཝ ཨེཀཏྟཾ, ཏེན ཝཱ ཨེཀཏྟཾ ཨེཀགྒབྷཱཝོ དཱནཱུཔསགྒུཔཊྛཱནེཀཏྟཾ. དཱནཝོསགྒུཔཊྛཱནེཀཏྟནྟི པཱཋོ ¶ སུནྡརཏརོ, སོ ཨེཝཏྠོ. ཨེཏེན པདུདྡྷཱརཝསེན ཙཱགཱནུསྶཏིསམཱདྷི ཝུཏྟོ. པདུདྡྷཱརཝསེན ཝུཏྟོཔི ཙེས ཨིཏརེསཾ ཏིཎྞམྤི ཨེཀཏྟཱནཾ ཨུཔནིསྶཡཔཙྩཡོ ཧོཏི, ཏསྨཱ ཨིདྷ ནིདྡིཊྛནྟི ཝདནྟི. ཝིསཱཁཱཔི ཧི མཧཱཨུཔཱསིཀཱ ཨཱཧ – ‘‘ཨིདྷ, བྷནྟེ, དིསཱསུ ཝསྶཾཝུཊྛཱ བྷིཀྑཱུ སཱཝཏྠིཾ ཨཱགཙྪིསྶནྟི བྷགཝནྟཾ དསྶནཱཡ, ཏེ བྷགཝནྟཾ ཨུཔསངྐམིཏྭཱ པུཙྪིསྶནྟི ‘ཨིཏྠནྣཱམོ, བྷནྟེ, བྷིཀྑུ ཀཱལངྐཏོ, ཏསྶ ཀཱ གཏི, ཀོ ཨབྷིསམྤརཱཡོ’ཏི? ཏཾ བྷགཝཱ བྱཱཀརིསྶཏི སོཏཱཔཏྟིཕལེ ཝཱ སཀདཱགཱམིཕལེ ཝཱ ¶ ཨནཱགཱམིཕལེ ཝཱ ཨརཧཏྟེ ཝཱ. ཏྱཱཧཾ ཨུཔསངྐམིཏྭཱ པུཙྪིསྶཱམི ‘ཨཱགཏཔུབྦཱ ནུ ཁོ, བྷནྟེ, ཏེན ཨཡྻེན སཱཝཏྠཱི’ཏི? སཙེ མེ ཝཀྑནྟི ‘ཨཱགཏཔུབྦཱ ཏེན བྷིཀྑུནཱ སཱཝཏྠཱི’ཏི. ནིཊྛམེཏྠ གཙྪིསྶཱམི ནིསྶཾསཡཾ པརིབྷུཏྟཾ ཏེན ཨཡྻེན ཝསྶིཀསཱཊིཀཱ ཝཱ ཨཱགནྟུཀབྷཏྟཾ ཝཱ གམིཀབྷཏྟཾ ཝཱ གིལཱནབྷཏྟཾ ཝཱ གིལཱནུཔཊྛཱཀབྷཏྟཾ ཝཱ གིལཱནབྷེསཛྫཾ ཝཱ དྷུཝཡཱགུ ཝཱཏི. ཏསྶཱ མེ ཏདནུསྶརནྟིཡཱ པཱམོཛྫཾ ཛཱཡིསྶཏི, པམུདིཏཱཡ པཱིཏི ཛཱཡིསྶཏི, པཱིཏིམནཱཡ ཀཱཡོ པསྶམྦྷིསྶཏི, པསྶདྡྷཀཱཡཱ སུཁཾ ཝེདཡིསྶཱམི, སུཁིནིཡཱ ཙིཏྟཾ སམཱདྷིཡིསྶཏི, སཱ མེ བྷཝིསྶཏི ཨིནྡྲིཡབྷཱཝནཱ བལབྷཱཝནཱ བོཛ྄ཛྷངྒབྷཱཝནཱ’’ཏི (མཧཱཝ. ༣༥༡). ཨཐ ཝཱ ཨེཀཏྟེསུ པཋམཾ ཨུཔཙཱརསམཱདྷིཝསེན ཝུཏྟཾ, དུཏིཡཾ ཨཔྤནཱསམཱདྷིཝསེན, ཏཏིཡཾ ཝིཔསྶནཱཝསེན, ཙཏུཏྠཾ མགྒཕལཝསེནཱཏི ཝེདིཏབྦཾ. སམཐསྶ ནིམིཏྟཾ སམཐནིམིཏྟཾ. ཝཡོ བྷངྒོ ཨེཝ ལཀྑཎཾ ཝཡལཀྑཎཾ. ནིརོདྷོ ནིབྦཱནཾ. སེསམེཏེསུ ཏཱིསུ ཝུཏྟནཡེནེཝ ཡོཛེཏབྦཾ.

ཙཱགཱདྷིམུཏྟཱནནྟི ¶ དཱནེ ཨདྷིམུཏྟཱནཾ. ཨདྷིཙིཏྟནྟི ཝིཔསྶནཱཔཱདཀསམཱདྷི. ཝིཔསྶཀཱནནྟི བྷངྒཱནུཔསྶནཏོ པཊྛཱཡ ཏཱིཧི ཨནུཔསྶནཱཧི སངྑཱརེ ཝིཔསྶནྟཱནཾ. ཨརིཡཔུགྒལཱནནྟི ཨཊྛནྣཾ. དུཏིཡཱདཱིནི ཏཱིཎི ཨེཀཏྟཱནི ཨཱནཱཔཱནསྶཏིཝསེན སེསཀམྨཊྛཱནཝསེན ཙ ཡུཛྫནྟི. ཙཏཱུཧི ཋཱནེཧཱིཏི ཙཏཱུཧི ཀཱརཎེཧི. སམཱདྷིཝིཔསྶནཱམགྒཕལཱནཾ ཝསེན ‘‘ཨེཀཏྟགཏཾ ¶ ཙིཏྟཾ པཊིཔདཱཝིསུདྡྷིཔཀྑནྡཉྩེཝ ཧོཏི ཨུཔེཀྑཱནུབྲཱུཧིཏཉྩ ཉཱཎེན ཙ སམྤཧཾསིཏ’’ནྟི ཨུདྡེསཔདཱནི. ‘‘པཋམསྶ ཛྷཱནསྶ ཀོ ཨཱདཱི’’ཏིཨཱདཱིནི ཏེསཾ ཨུདྡེསཔདཱནཾ ཝིཏྠཱརེཏུཀམྱཏཱཔུཙྪཱཔུབྦངྒམཱནི ནིདྡེསཔདཱནི. ཏཏྠ པཊིཔདཱཝིསུདྡྷིཔཀྑནྡནྟི པཊིཔདཱ ཨེཝ ནཱིཝརཎམལཝིསོདྷནཏོ ཝིསུདྡྷི, ཏཾ པཊིཔདཱཝིསུདྡྷིཾ པཀྑནྡཾ པཝིཊྛཾ. ཨུཔེཀྑཱནུབྲཱུཧིཏནྟི ཏཏྲམཛ྄ཛྷཏྟུཔེཀྑཱཡ བྲཱུཧིཏཾ ཝཌྜྷིཏཾ. ཉཱཎེན ཙ སམྤཧཾསིཏནྟི པརིཡོདཱཔཀེན ཉཱཎེན སམྤཧཾསིཏཾ པརིཡོདཱཔིཏཾ ཝིསོདྷིཏཾ. པཊིཔདཱཝིསུདྡྷི ནཱམ སསམྦྷཱརིཀོ ཨུཔཙཱརོ, ཨུཔེཀྑཱནུབྲཱུཧནཱ ནཱམ ཨཔྤནཱ, སམྤཧཾསནཱ ནཱམ པཙྩཝེཀྑཎཱཏི ཨེཝམེཀེ ཝཎྞཡནྟི. ཡསྨཱ པན ‘‘ཨེཀཏྟགཏཾ ཙིཏྟཾ པཊིཔདཱཝིསུདྡྷིཔཀྑནྡཉྩེཝ ཧོཏཱི’’ཏིཨཱདི ཝུཏྟཾ, ཏསྨཱ ཨནྟོཨཔྤནཱཡམེཝ ཨཱགམནཝསེན པཊིཔདཱཝིསུདྡྷི, ཏཏྲམཛ྄ཛྷཏྟུཔེཀྑཱཡ ཀིཙྩཝསེན ཨུཔེཀྑཱནུབྲཱུཧནཱ, དྷམྨཱནཾ ཨནཏིཝཏྟནཱདིབྷཱཝསཱདྷནེན པརིཡོདཱཔཀསྶ ཉཱཎསྶ ཀིཙྩནིཔྥཏྟིཝསེན སམྤཧཾསནཱ ཝེདིཏབྦཱ. ཀཐཾ? ཡསྨིཉྷི ཝཱརེ ཨཔྤནཱ ཨུཔྤཛྫཏི, ཏསྨིཾ ཡོ ནཱིཝརཎསངྑཱཏོ ཀིལེསགཎོ ཏསྶ ཛྷཱནསྶ པརིཔནྠོ, ཏཏོ ཙིཏྟཾ ཝིསུཛ྄ཛྷཏི, ཝིསུདྡྷཏྟཱ ཨཱཝརཎཝིརཧིཏཾ ཧུཏྭཱ མཛ྄ཛྷིམཾ སམཐནིམིཏྟཾ པཊིཔཛྫཏི. མཛ྄ཛྷིམཾ སམཐནིམིཏྟཾ ནཱམ སམཔྤཝཏྟོ ཨཔྤནཱསམཱདྷིཡེཝ. ཏདནནྟརཾ པན པུརིམཙིཏྟཾ ཨེཀསནྟཏིཔརིཎཱམནཡེན ¶ ཏཐཏྟཾ ཨུཔགཙྪམཱནཾ མཛ྄ཛྷིམཾ སམཐནིམིཏྟཾ པཊིཔཛྫཏི ནཱམ. ཨེཝཾ པཊིཔནྣཏྟཱ ཏཐཏྟུཔགམནེན ཏཏྠ པཀྑནྡཏི ནཱམ. ཨེཝཾ ཏཱཝ པུརིམཙིཏྟེ ཝིཛྫམཱནཱཀཱརནིཔྥཱདིཀཱ པཋམསྶ ཛྷཱནསྶ ཨུཔྤཱདཀྑཎེཡེཝ ཨཱགམནཝསེན པཊིཔདཱཝིསུདྡྷི ¶ ཝེདིཏབྦཱ. ཨེཝཾ ཝིསུདྡྷསྶ པན ཏསྶ པུན ཝིསོདྷེཏབྦཱབྷཱཝཏོ ཝིསོདྷནེ བྱཱཔཱརཾ ཨཀརོནྟོ ཝིསུདྡྷཾ ཙིཏྟཾ ཨཛ྄ཛྷུཔེཀྑཏི ནཱམ. སམཐབྷཱཝཱུཔགམནེན སམཐཔཊིཔནྣསྶ པུན སམཱདཱནེ བྱཱཔཱརཾ ཨཀརོནྟོ སམཐཔཊིཔནྣཾ ཨཛ྄ཛྷུཔེཀྑཏི ནཱམ. སམཐཔཊིཔནྣབྷཱཝཏོ ཨེཝ ཙསྶ ཀིལེསསཾསགྒཾ པཧཱཡ ཨེཀཏྟེན ཨུཔཊྛིཏསྶ པུན ཨེཀཏྟུཔཊྛཱནེ བྱཱཔཱརཾ ཨཀརོནྟོ ཨེཀཏྟུཔཊྛཱནཾ ཨཛ྄ཛྷུཔེཀྑཏི ནཱམ. ཨེཝཾ ཏཏྲམཛ྄ཛྷཏྟུཔེཀྑཱཡ ཀིཙྩཝསེན ཨུཔེཀྑཱནུབྲཱུཧནཱ ཝེདིཏབྦཱ.

ཡེ ¶ པནེཏེ ཨེཝཾ ཨུཔེཀྑཱནུབྲཱུཧིཏེ ཏཏྠ ཛཱཏཱ སམཱདྷིཔཉྙཱསངྑཱཏཱ ཡུགནདྡྷདྷམྨཱ ཨཉྙམཉྙཾ ཨནཏིཝཏྟམཱནཱ ཧུཏྭཱ པཝཏྟཱ, ཡཱནི ཙ སདྡྷཱདཱིནི ཨིནྡྲིཡཱནི ནཱནཱཀིལེསེཧི ཝིམུཏྟཏྟཱ ཝིམུཏྟིརསེན ཨེཀརསཱནི ཧུཏྭཱ པཝཏྟཱནི, ཡཾ ཙེས ཏདུཔགཾ ཏེསཾ ཨནཏིཝཏྟནཨེཀརསབྷཱཝཱནཾ ཨནུཙྪཝིཀཾ ཝཱིརིཡཾ ཝཱཧཡཏི, ཡཱ ཙསྶ ཏསྨིཾ ཁཎེ པཝཏྟཱ ཨཱསེཝནཱ, སབྦེཔི ཏེ ཨཱཀཱརཱ ཡསྨཱ ཉཱཎེན སཾཀིལེསཝོདཱནེསུ ཏཾ ཏཾ ཨཱདཱིནཝཉྩ ཨཱནིསཾསཉྩ དིསྭཱ ཏཐཱ ཏཐཱ སམྤཧཾསིཏཏྟཱ ཝིསོདྷིཏཏྟཱ པརིཡོདཱཔིཏཏྟཱ ནིཔྥནྣཱ, ཏསྨཱ དྷམྨཱནཾ ཨནཏིཝཏྟནཱདིབྷཱཝསཱདྷནེན པརིཡོདཱཔཀསྶ ཉཱཎསྶ ཀིཙྩནིཔྥཏྟིཝསེན སམྤཧཾསནཱ ཝེདིཏབྦཱཏི ཝུཏྟཾ. ཏཏྠ ཡསྨཱ ཨུཔེཀྑཱཝསེན ཉཱཎཾ པཱཀཊཾ ཧོཏི, ཡཐཱཧ – ‘‘ཏཐཱཔགྒཧིཏཾ ཙིཏྟཾ སཱདྷུཀཾ ཨཛ྄ཛྷུཔེཀྑཏི, ཨུཔེཀྑཱཝསེན པཉྙཱཝསེན པཉྙིནྡྲིཡཾ ཨདྷིམཏྟཾ ཧོཏི. ཨུཔེཀྑཱཝསེན ནཱནཏྟཀིལེསེཧི ཙིཏྟཾ ཝིམུཙྩཏི, ཝིམོཀྑཝསེན པཉྙཱཝསེན པཉྙིནྡྲིཡཾ ཨདྷིམཏྟཾ ཧོཏི. ཝིམུཏྟཏྟཱ ཏེ དྷམྨཱ ཨེཀརསཱ ཧོནྟི, ཨེཀརསཊྛེན བྷཱཝནཱ’’ཏི (པཊི. མ. ༡.༢༠༡). ཏསྨཱ ཉཱཎཀིཙྩབྷཱུཏཱ སམྤཧཾསནཱ པརིཡོསཱནནྟི ཝུཏྟཱ.

ཨེཝཾ ཏིཝཏྟགཏནྟིཨཱདཱིནི ཏསྶེཝ ཙིཏྟསྶ ཐོམནཝཙནཱནི. ཏཏྠ ཨེཝཾ ཏིཝཏྟགཏནྟི ཨེཝཾ ཡཐཱཝུཏྟེན ཝིདྷིནཱ པཊིཔདཱཝིསུདྡྷིཔཀྑནྡནཨུཔེཀྑཱནུབྲཱུཧནཱཉཱཎསམྤཧཾསནཱཝསེན ཏིཝིདྷབྷཱཝཾ གཏཾ. ཝིཏཀྐསམྤནྣནྟི ¶ ཀིལེསཀྑོབྷཝིརཧིཏཏྟཱ ཝིཏཀྐེན སུནྡརབྷཱཝཾ པནྣཾ གཏཾ. ཙིཏྟསྶ ཨདྷིཊྛཱནསམྤནྣནྟི ཏསྨིཾཡེཝ ཨཱརམྨཎེ ཙིཏྟསྶ ནིརནྟརཔྤཝཏྟིསངྑཱཏེན ཨདྷིཊྛཱནེན སམྤནྣཾ ཨནཱུནཾ. ཡཐཱ ཨདྷིཊྛཱནཝསིཡཾ ཨདྷིཊྛཱནནྟི ཛྷཱནཔྤཝཏྟི, ཏཐཱ ཨིདྷཱཔི ཙིཏྟསྶ ཨདྷིཊྛཱནནྟི ཙིཏྟེཀགྒཏཱཔི ཡུཛྫཏི. ཏེན ཧི ཨེཀསྨིཾཡེཝ ཨཱརམྨཎེ ཙིཏྟཾ ཨདྷིཊྛཱཏི, ན ཨེཏྠ ཝིཀྑིཔཏཱིཏི. ‘‘སམཱདྷིསམྤནྣ’’ནྟི ཝིསུཾ ཝུཏྟཏྟཱ པན ཝུཏྟནཡེནེཝ གཧེཏབྦཾ. ཨཐ ཝཱ སམཱདྷིསྶེཝ ¶ ཛྷཱནསངྒཧིཏཏྟཱ ཙིཏྟསྶ ཨདྷིཊྛཱནསམྤནྣནྟི ཛྷཱནངྒཔཉྩཀཝསེན ཝུཏྟཾ. སམཱདྷིསམྤནྣནྟི ཨིནྡྲིཡསངྒཧིཏཏྟཱ ཨིནྡྲིཡཔཉྩཀཝསེན, དུཏིཡཛ྄ཛྷཱནཱདཱིསུ པན ཨལབྦྷམཱནཱནི པདཱནི པཧཱཡ ལབྦྷམཱནཀཝསེན པཱིཏིསམྤནྣནྟིཨཱདི ཝུཏྟཾ.

ཨནིཙྩཱནུཔསྶནཱདཱིསུ ཨཊྛཱརསསུ མཧཱཝིཔསྶནཱསུ ཝིཏཀྐཱདཡོ པརིཔུཎྞཱཡེཝ ཏཱསཾ ཀཱམཱཝཙརཏྟཱ. ཨེཏཱསུ ཙ ཨཔྤནཱཡ ཨབྷཱཝཏོ པཊིཔདཱཝིསུདྡྷིཨཱདཡོ ཁཎིཀསམཱདྷིཝསེན ཡོཛེཏབྦཱ. ཙཏཱུསུ མགྒེསུ ¶ པཋམཛ྄ཛྷཱནིཀཝསེན ཝིཏཀྐཱདཱིནཾ ལབྦྷནཏོ ལབྦྷམཱནཀཝསེནེཝ ཝིཏཀྐཱདཡོ པརིཔུཎྞཱ ཝུཏྟཱ. དུཏིཡཛ྄ཛྷཱནིཀཱདཱིསུ ཧི མགྒེསུ ཝིཏཀྐཱདཡོ ཛྷཱནེསུ ཝིཡ པརིཧཱཡནྟཱིཏི. ཨེཏྟཱཝཏཱ ཏེརས ཝོདཱནཉཱཎཱནི ཝིཏྠཱརཏོ ནིདྡིཊྛཱནི ཧོནྟི. ཀཐཾ? ཨེཀཊྛཱནེ སམཱདཧནེན ཏཏྠེཝ ཨདྷིམུཙྩནེན ཀོསཛྫཔྤཛཧནེན ཨུདྡྷཙྩཔྤཛཧནེན རཱགཔྤཛཧནེན བྱཱཔཱདཔྤཛཧནེན སམྤཡུཏྟཱནི ཚ ཉཱཎཱནི, ཙཏཱུཧི ཨེཀཏྟེཧི སམྤཡུཏྟཱནི ཙཏྟཱརི ཉཱཎཱནི, པཊིཔདཱཝིསུདྡྷིཨུཔེཀྑཱནུབྲཱུཧནཱསམྤཧཾསནཱཧི སམྤཡུཏྟཱནི ཏཱིཎི ཉཱཎཱནཱིཏི ཨེཝཾ ཏེརས ཉཱཎཱནི ནིདྡིཊྛཱནི.

༡༥༩. ཨེཝཾ སནྟེཔི ཨཱནཱཔཱནསྶཏིསམཱདྷིབྷཱཝནཱཝསེན ཏེསཾ ནིཔྥཏྟིཾ དསྶེཏུཀཱམོ ཏཱནི ཉཱཎཱནི ཨནིགམེཏྭཱཝ ནིམིཏྟཾ ཨསྶཱསཔསྶཱསཱཏིཨཱདིནཱ ནཡེན ཙོདནཱཔུབྦངྒམཾ ཨཱནཱཔཱནསྶཏིསམཱདྷིབྷཱཝནཱཝིདྷིཾ དསྶེཏྭཱ ཨནྟེ ཏཱནི ཉཱཎཱནི ནིགམེཏྭཱ དསྶེསི. ཏཏྠ ནིམིཏྟཾ ཝུཏྟམེཝ. ཨནཱརམྨཎཱམེཀཙིཏྟསྶཱཏི ཨནཱརམྨཎཱ ཨེཀཙིཏྟསྶ. མ-ཀཱརོ ¶ པནེཏྠ པདསནྡྷིཀརོ. ཨནཱརམྨཎམེཀཙིཏྟསྶཱཏིཔི པཱཋོ, ཨེཀསྶ ཙིཏྟསྶ ཨཱརམྨཎཾ ན བྷཝནྟཱིཏི ཨཏྠོ. ཏཡོ དྷམྨེཏི ནིམིཏྟཱདཡོ ཏཡོ དྷམྨེ. བྷཱཝནཱཏི ཨཱནཱཔཱནསྶཏིསམཱདྷིབྷཱཝནཱ. ཀཐནྟི པཋམཾ ཝུཏྟཱཡ ཙོདནཱགཱཐཱཡ ཨནནྟརཾ ཝུཏྟཱཡ པརིཧཱརགཱཐཱཡ ཨཏྠཾ ཀཐེཏུཀམྱཏཱཔུཙྪཱ. ན ཙིམེཏི ན ཙ ཨིམེ. ན ཙམེཏིཔི པཱཋོ, སོཡེཝ པདཙྪེདོ. ཀཐཾ ན ཙ ཨཝིདིཏཱ ཧོནྟི, ཀཐཾ ན ཙ ཙིཏྟཾ ཝིཀྑེཔཾ གཙྪཏཱིཏི ཨེཝཾ ཀཐཾ སདྡོ སེསེཧི པཉྩཧི ཡོཛེཏབྦོ. པདྷཱནཉྩ པཉྙཱཡཏཱིཏི ཨཱནཱཔཱནསྶཏིསམཱདྷིབྷཱཝནཱརམྦྷཀཾ ཝཱིརིཡཾ སནྡིསྶཏི. ཝཱིརིཡཉྷི པདཧནྟི ཏེནཱཏི པདྷཱནནྟི ཝུཙྩཏི. པཡོགཉྩ སཱདྷེཏཱིཏི ནཱིཝརཎཝིཀྑམྦྷཀཾ ཛྷཱནཉྩ ཡོགཱི ནིཔྥཱདེཏི. ཛྷཱནཉྷི ནཱིཝརཎཝིཀྑམྦྷནཱཡ པཡུཉྫཱིཡཏཱིཏི པཡོགོཏི ཝུཏྟཾ. ཝིསེསམདྷིགཙྪཏཱིཏི སཾཡོཛནཔྤཧཱནཀརཾ མགྒཉྩ པཊིལབྷཏི. མགྒོ ¶ ཧི སམཐཝིཔསྶནཱནཾ ཨཱནིསཾསཏྟཱ ཝིསེསོཏི ཝུཏྟོ. ཝིསེསསྶ ཙ པམུཁབྷཱུཏཏྟཱ ཙ-ཀཱརེན སམུཙྩཡོ ན ཀཏོ.

ཨིདཱནི ཏཾ པུཙྪིཏམཏྠཾ ཨུཔམཱཡ སཱདྷེནྟོ སེཡྻཐཱཔི རུཀྑོཏིཨཱདིམཱཧ. ཏསྶཏྠོ – ཡཐཱ ནཱམ ཀཀཙེན ཕཱལནཏྠཾ ཝཱསིཡཱ ཏཙྪིཏྭཱ རུཀྑོ ཕཱལནཀཱལེ ནིཙྩལབྷཱཝཏྠཾ སམེ བྷཱུམིཔདེསེ པཡོགཀྑམཾ ཀཏྭཱ ཋཔིཏོ. ཀཀཙེནཱཏི ཧཏྠཀཀཙེན. ཨཱགཏེཏི རུཀྑཾ ¶ ཕུསིཏྭཱ ཨཏྟནོ སམཱིཔབྷཱགཾ ཨཱགཏེ. གཏེཏི རུཀྑཾ ཕུསིཏྭཱ པརབྷཱགཾ གཏེ. ཝཱ-སདྡོ སམུཙྩཡཏྠོ. ན ཨཝིདིཏཱ ཧོནྟཱིཏི རུཀྑེ ཀཀཙདནྟེཧི ཕུཊྛཾ པུརིསེན པེཀྑམཱནཾ ཋཱནཾ ཨཔྤཏྭཱ ཏེསཾ ཨཱགམནགམནཱབྷཱཝཏོ སབྦེཔི ཀཀཙདནྟཱ ཝིདིཏཱཝ ཧོནྟི. པདྷཱནནྟི རུཀྑཙྪེདནཝཱིརིཡཾ. པཡོགནྟི རུཀྑཙྪེདནཀིརིཡཾ. ‘‘ཝིསེསམདྷིགཙྪཏཱི’’ཏི ཝཙནཾ ཨུཔམཱཡ ནཏྠི. ཨུཔནིབནྡྷནཱ ནིམིཏྟནྟི ཨུཔནིབནྡྷནཱཡ སཏིཡཱ ནིམིཏྟབྷཱུཏཾ ཀཱརཎབྷཱུཏཾ ནཱསིཀགྒཾ ཝཱ མུཁནིམིཏྟཾ ཝཱ. ཨུཔནིབནྡྷཏི ཨེཏཱཡ ཨཱརམྨཎེ ཙིཏྟནྟི ¶ ཨུཔནིབནྡྷནཱ ནཱམ སཏི. ནཱསིཀགྒེ ཝཱཏི དཱིགྷནཱསིཀོ ནཱསིཀགྒེ. མུཁནིམིཏྟེ ཝཱཏི རསྶནཱསིཀོ ཨུཏྟརོཊྛེ. ཨུཏྟརོཊྛོ ཧི མུཁེ སཏིཡཱ ནིམིཏྟནྟི མུཁནིམིཏྟནྟི ཝུཏྟོ. ཨཱགཏེཏི ཕུཊྛཊྛཱནཏོ ཨབྦྷནྟརཾ ཨཱགཏེ. གཏེཏི ཕུཊྛཊྛཱནཏོ བཧིདྡྷཱ གཏེ. ན ཨཝིདིཏཱ ཧོནྟཱིཏི ཕུསནཊྛཱནཾ ཨཔྤཏྭཱ ཨསྶཱསཔསྶཱསཱནཾ ཨཱགམནགམནཱབྷཱཝཏོ སབྦེཔི ཏེ ཝིདིཏཱ ཨེཝ ཧོནྟི. ཀམྨནིཡཾ ཧོཏཱིཏི ཡེན ཝཱིརིཡེན ཀཱཡོཔི ཙིཏྟམྤི ཀམྨནིཡཾ བྷཱཝནཱཀམྨཀྑམཾ བྷཱཝནཱཀམྨཡོགྒཾ ཧོཏི. ཨིདཾ ཝཱིརིཡཾ པདྷཱནཾ ནཱམཱཏི ཕལེན ཀཱརཎཾ ཝུཏྟཾ ཧོཏི. ཨུཔཀྐིལེསཱ པཧཱིཡནྟཱིཏི ཝིཀྑམྦྷནཝསེན ནཱིཝརཎཱནི པཧཱིཡནྟི. ཝིཏཀྐཱ ཝཱུཔསམྨནྟཱིཏི ནཱནཱརམྨཎཙཱརིནོ ཨནཝཊྛིཏཱ ཝིཏཀྐཱ ཨུཔསམཾ གཙྪནྟི. ཡེན ཛྷཱནེན ཨུཔཀྐིལེསཱ པཧཱིཡནྟི, ཝིཏཀྐཱ ཝཱུཔསམྨནྟི. ཨཡཾ པཡོགོཏི པཡོགམཔེཀྑིཏྭཱ པུལླིངྒནིདྡེསོ ཀཏོ. སཉྙོཛནཱ པཧཱིཡནྟཱིཏི ཏཾཏཾམགྒཝཛ྄ཛྷཱ སཉྙོཛནཱ སམུཙྪེདཔྤཧཱནེན པཧཱིཡནྟི. ཨནུསཡཱ བྱནྟཱིཧོནྟཱིཏི པཧཱིནཱནཾ པུན ཨནུཔྤཏྟིདྷམྨཀཏྟཱ ཝིགཏོ ཨུཔྤཱདནྟོ ཝཱ ཝཡནྟོ ཝཱ ཨེཏེསནྟི བྱནྟཱ, པུབྦེ ཨབྱནྟཱ བྱནྟཱ ཧོནྟཱིཏི བྱནྟཱིཧོནྟི, ཝིནསྶནྟཱིཏི ཨཏྠོ. སཉྙོཛནཔྤཧཱནཾ ཨནུསཡཔྤཧཱནེན ཧོཏི, ན ཨཉྙཐཱཏི དསྶནཏྠཾ ཨནུསཡཔྤཧཱནམཱཧ. ཡེན མགྒེན སཉྙོཛནཱ པཧཱིཡནྟི ཨནུསཡཱ བྱནྟཱིཧོནྟི, ཨཡཾ ཝིསེསོཏི ཨཏྠོ. ཙཏུཏྠཙཏུཀྐེ ཨརིཡམགྒསྶཱཔི ནིདྡིཊྛཏྟཱ ཨིདྷ ཨརིཡམགྒོ ཝུཏྟོ. ཨེཀཙིཏྟསྶ ཨཱརམྨཎདྭཡཱབྷཱཝསྶ ཨཝུཏྟེཔི སིདྡྷཏྟཱ ཏཾ ཨཝིསྶཛྫེཏྭཱཝ ཨེཝཾ ཨིམེ ཏཡོ དྷམྨཱ ཨེཀཙིཏྟསྶ ཨཱརམྨཎཱ ན ཧོནྟཱིཏི ནིགམནཾ ཀཏཾ.

༡༦༠. ཨིདཱནི ཏཾ བྷཱཝནཱསིདྡྷིསཱདྷཀཾ ཡོགཱཝཙརཾ ཐུནནྟོ ཨཱནཱཔཱནསྶཏི ཡསྶཱཏི གཱཐཾ ¶ ཝཏྭཱ ཏསྶཱ ནིདྡེསམཱཧ. ཏཏྠ ཨཱནཱཔཱནསྶཏིཡོ ¶ ཡཐཱ བུདྡྷེན དེསིཏཱ, ཏཐཱ པརིཔུཎྞཱ སུབྷཱཝིཏཱ ཨནུཔུབྦཾ པརིཙིཏཱ ཡསྶ ཨཏྠི སཾཝིཛྫནྟི. སོ ཨིམཾ ལོཀཾ པབྷཱསེཏི. ཀིཾ ཝིཡ? ཨབྦྷཱ མུཏྟོཝ ཙནྡིམཱ ཡཐཱ ཨབྦྷཱདཱིཧི མུཏྟོ ཙནྡིམཱ ཨིམཾ ཨོཀཱསལོཀཾ པབྷཱསེཏི, ཏཐཱ སོ ཡོགཱཝཙརོ ཨིམཾ ཁནྡྷཱདིལོཀཾ པབྷཱསེཏཱིཏི ¶ གཱཐཱཡ སམྦནྡྷོ. ‘‘ཨབྦྷཱ མུཏྟོཝ ཙནྡིམཱ’’ཏི ཙ པདསྶ ནིདྡེསེ མཧིཀཱདཱིནམྤི ཝུཏྟཏྟཱ ཨེཏྠ ཨཱདིསདྡལོཔོ ཀཏོཏི ཝེདིཏབྦོ. གཱཐཱནིདྡེསེ ནོ པསྶཱསོ ནོ ཨསྶཱསོཏི སོ སོཡེཝ ཨཏྠོ པཊིསེདྷེན ཝིསེསེཏྭཱ ཝུཏྟོ. ཨུཔཊྛཱནཾ སཏཱིཏི ཨསམྨུསྶནཏཱཡ ཏམེཝ ཨསྶཱསཾ ཨུཔགནྟྭཱ ཋཱནཾ སཏི ནཱམཱཏི ཨཏྠོ. ཏཐཱ པསྶཱསཾ. ཨེཏྟཱཝཏཱ ཨཱནཱཔཱནེསུ སཏི ཨཱནཱཔཱནསྶཏཱིཏི ཨཏྠོ ཝུཏྟོ ཧོཏི.

ཨིདཱནི སཏིཝསེནེཝ ‘‘ཡསྶཱ’’ཏི ཝུཏྟཾ པུགྒལཾ ནིདྡིསིཏུཀཱམོ ཡོ ཨསྶསཏི, ཏསྶུཔཊྛཱཏི. ཡོ པསྶསཏི, ཏསྶུཔཊྛཱཏཱིཏི ཝུཏྟཾ. ཡོ ཨསྶསཏི, ཏསྶ སཏི ཨསྶཱསཾ ཨུཔགནྟྭཱ ཏིཊྛཏི. ཡོ པསྶསཏི, ཏསྶ སཏི པསྶཱསཾ ཨུཔགནྟྭཱ ཏིཊྛཏཱིཏི ཨཏྠོ. པརིཔུཎྞཱཏི ཛྷཱནཝིཔསྶནཱམགྒཔརམྤརཱཡ ཨརཧཏྟམགྒཔྤཏྟིཡཱ པརིཔུཎྞཱ. ཏེཡེཝ ཧི ཛྷཱནཝིཔསྶནཱམགྒདྷམྨེ སནྡྷཱཡ པརིགྒཧཊྛེནཱཏིཨཱདིམཱཧ. ཏེ ཧི དྷམྨཱ ཨིམིནཱ ཡོགིནཱ པརིགྒཡ྄ཧམཱནཏྟཱ པརིགྒཧཱ, ཏེན པརིགྒཧཊྛེན པརིཔུཎྞཱ. ཏཏྠ སབྦེསཾ ཙིཏྟཙེཏསིཀཱནཾ ཨཉྙམཉྙཔརིཝཱརཏྟཱ པརིཝཱརཊྛེན པརིཔུཎྞཱ. བྷཱཝནཱཔཱརིཔཱུརིཝསེན པརིཔཱུརཊྛེན པརིཔུཎྞཱ. ཙཏསྶོ བྷཱཝནཱཏིཨཱདཱིནི སུབྷཱཝིཏཱཏི ཝུཏྟཔདསྶ ཨཏྠཝསེན ཝུཏྟཱནི. ཙཏསྶོ བྷཱཝནཱ ཧེཊྛཱ ཝུཏྟཱཡེཝ. ཡཱནཱིཀཏཱཏི ཡུཏྟཡཱནསདིསཱ ཀཏཱ. ཝཏྠུཀཏཱཏི པཏིཊྛཊྛེན ཝཏྠུསདིསཱ ཀཏཱ. ཨནུཊྛིཏཱཏི པཙྩུཔཊྛིཏཱ. པརིཙིཏཱཏི སམནྟཏོ ཙིཏཱ ཨུཔཙིཏཱ. སུསམཱརདྡྷཱཏི སུཊྛུ སམཱརདྡྷཱ སུཀཏཱ. ཡཏྠ ཡཏྠ ཨཱཀངྑཏཱིཏི ཡེསུ ཡེསུ ཛྷཱནེསུ ཡཱསུ ཡཱསུ ཝིཔསྶནཱསུ སཙེ ཨིཙྪཏི. ཏཏྠ ཏཏྠཱཏི ཏེསུ ཏེསུ ཛྷཱནེསུ ཏཱསུ ཏཱསུ ཝིཔསྶནཱསུ. ཝསིཔྤཏྟོཏི ཝསཱིབྷཱཝཾ བཧུབྷཱཝཾ པཏྟོ. བལཔྤཏྟོཏི སམཐཝིཔསྶནཱབལཔྤཏྟོ. ཝེསཱརཛྫཔྤཏྟོཏི ཝིསཱརདབྷཱཝཾ པཊུབྷཱཝཾ པཏྟོ. ཏེ དྷམྨཱཏི སམཐཝིཔསྶནཱ དྷམྨཱ. ཨཱཝཛྫནཔཊིབདྡྷཱཏི ཨཱཝཛྫནཱཡཏྟཱ, ཨཱཝཛྫིཏམཏྟེཡེཝ ཏསྶ སནྟཱནེན, ཉཱཎེན ཝཱ སམྤཡོགཾ གཙྪནྟཱིཏི ¶ ཨཏྠོ. ཨཱཀངྑཔཊིབདྡྷཱཏི ¶ རུཙིཨཱཡཏྟཱ, རོཙིཏམཏྟེཡེཝ ཝུཏྟནཡེན སམྤཡོགཾ གཙྪནྟཱིཏི ཨཏྠོ. མནསིཀཱརོ པནེཏྠ ཨཱཝཛྫནཱཡ ཙིཏྟུཔྤཱདོ. ཨཱཀངྑནཱཡ ཝེཝཙནཝསེན ཨཏྠཝིཝརཎཏྠཾ ཝུཏྟོ. ཏེན ཝུཙྩཏི ཡཱནཱིཀཏཱཏི ཨེཝཾ ཀཏཏྟཱཡེཝ ཏེ ཡུཏྟཡཱནསདིསཱ ཀཏཱ ཧོནྟཱིཏི ཝུཏྟཾ ཧོཏི.

ཡསྨིཾ ཡསྨིཾ ཝཏྠུསྨིནྟི སོལ༹སསུ ཝཏྠཱུསུ ཨེཀེཀསྨིཾ. སྭཱདྷིཊྛིཏནྟི སུཔྤཏིཊྛིཏཾ. སཱུཔཊྛིཏཱཏི སུཊྛུ ཨུཔཊྛིཏཱ. སམྤཡུཏྟཙིཏྟསཏཱིནཾ སཧེཝ སཀསཀཀིཙྩཀརཎཏོ ཨནུལོམཔཊིལོམཝསེན ¶ ཡོཛེཏྭཱ ཏེ དྭེ དྷམྨཱ དསྶིཏཱ. ཏེན ཝུཙྩཏི ཝཏྠུཀཏཱཏི ཨེཝཾ བྷཱུཏཏྟཱཡེཝ ཀཏཔཏིཊྛཱ ཧོནྟཱིཏི ཝུཏྟཾ ཧོཏི. ཡེན ཡེན ཙིཏྟཾ ཨབྷིནཱིཧརཏཱིཏི པུབྦཔྤཝཏྟིཏོ ཨཔནེཏྭཱ ཡཏྠ ཡཏྠ བྷཱཝནཱཝིསེསེ ཙིཏྟཾ ཨུཔནེཏི. ཏེན ཏེན སཏི ཨནུཔརིཝཏྟཏཱིཏི ཏསྨིཾ ཏསྨིཾཡེཝ བྷཱཝནཱཝིསེསེ སཏི ཨནུཀཱུལཱ ཧུཏྭཱ པུབྦཔྤཝཏྟིཏོ ནིཝཏྟིཏྭཱ པཝཏྟཏི. ‘‘ཡེན, ཏེནཱ’’ཏི ཙེཏྠ ‘‘ཡེན བྷགཝཱ ཏེནུཔསངྐམཱི’’ཏིཨཱདཱིསུ (ཁུ. པཱ. ༥.༡; སུ. ནི. མངྒལསུཏྟ) ཝིཡ བྷུམྨཏྠོ ཝེདིཏབྦོ. ཏེན ཝུཙྩཏི ཨནུཊྛིཏཱཏི ཨེཝཾ ཀརཎཏོཡེཝ ཏཾ ཏཾ བྷཱཝནཾ ཨནུགནྟྭཱ ཋིཏཱ ཧོནྟཱིཏི ཝུཏྟཾ ཧོཏི. ཨཱནཱཔཱནསྶཏིཡཱ སཏིཔདྷཱནཏྟཱ ཝཏྠུཀཏཱནུཊྛིཏཔདེསུ སཏིཡཱ སཧ ཡོཛནཱ ཀཏཱཏི ཝེདིཏབྦཱ.

ཡསྨཱ པན པརིཔུཎྞཱཡེཝ པརིཙིཏཱ ཧོནྟི ཝཌྜྷིཏཱ ལདྡྷཱསེཝནཱ, ཏསྨཱ ‘‘པརིཔུཎྞཱ’’ཏིཔདེ ཝུཏྟཱ ཏཡོ ཨཏྠཱ ‘‘པརིཙིཏཱ’’ཏིཔདེཔི ཝུཏྟཱ, ཙཏུཏྠོ ཝིསེསཏྠོཔི ཝུཏྟོ. ཏཏྠ སཏིཡཱ པརིགྒཎྷནྟོཏི སམྤཡུཏྟཱཡ, པུབྦབྷཱགཱཡ ཝཱ སཏིཡཱ པརིགྒཧེཏབྦེ པརིགྒཎྷནྟོ ཡོགཱི. ཛིནཱཏི པཱཔཀེ ཨཀུསལེ དྷམྨེཏི སམུཙྪེདཝསེན ལཱམཀེ ཀིལེསེ ཛིནཱཏི ཨབྷིབྷཝཏི. ཨཡཉྩ པུགྒལཱདྷིཊྛཱནཱ དྷམྨདེསནཱ. དྷམྨེསུ ཧི ཛིནནྟེསུ ཏཾདྷམྨསམངྒཱིཔུགྒལོཔི ཛིནཱཏི ནཱམ. ཏེ ཙ དྷམྨཱ སཏིཾ ཨཝིཧཱཡ ཨཏྟནོ པཝཏྟིཀྑཎེ ཛིནིཏུམཱརདྡྷཱ ཛིཏཱཏི ཝུཙྩནྟི ཡཐཱ ‘‘བྷུཉྫིཏུམཱརདྡྷོ བྷུཏྟོ’’ཏི ཝུཙྩཏི. ལཀྑཎཾ པནེཏྠ སདྡསཏྠཏོ ཝེདིཏབྦཾ. ཨེཝཾ སནྟེཔི ‘‘པརིཛིཏཱ’’ཏི ཝཏྟབྦེ ཛ-ཀཱརསྶ ཙ-ཀཱརཾ ཀཏྭཱ ¶ ‘‘པརིཙིཏཱ’’ཏི ¶ ཝུཏྟཾ, ཡཐཱ སམྨཱ གདོ ཨསྶཱཏི སུགཏོཏི ཨཏྠཝིཀཔྤེ ད-ཀཱརསྶ ཏ-ཀཱརོ ནིརུཏྟིལཀྑཎེན ཀཏོ, ཨེཝམིདྷཱཔི ཝེདིཏབྦོ. ཨིམསྨིཾ ཨཏྠཝིཀཔྤེ པརིཙིཏཱཏི པདཾ ཀཏྟུསཱདྷནཾ, པུརིམཱནི ཏཱིཎི ཀམྨསཱདྷནཱནི.

ཙཏྟཱརོ སུསམཱརདྡྷཱཏི ཙཏྟཱརོ སུསམཱརདྡྷཏྠཱཏི ཝུཏྟཾ ཧོཏི, ཨཏྠསདྡསྶ ལོཔོ དཊྛབྦོ. སུསམཱརདྡྷཱཏི པདསྶ ཨཏྠཱཔི ཧི ཨིདྷ སུསམཱརདྡྷཱཏི ཝུཏྟཱཏི ཝེདིཏབྦཱ, སུསམཱརདྡྷདྷམྨཱ ཝཱ. ཙཏུརཏྠབྷེདཏོ ཙཏྟཱརོཏི ཝུཏྟཱཏི ཝེདིཏབྦཱ, ན དྷམྨབྷེདཏོ. ཡསྨཱ པན སུབྷཱཝིཏཱཡེཝ སུསམཱརདྡྷཱ ཧོནྟི, ན ཨཉྙེ, ཏསྨཱ ཏཡོ བྷཱཝནཏྠཱ ཨིདྷཱཔི ཝུཏྟཱ. ཨཱསེཝནཏྠོཔི ཏཱིསུ ཝུཏྟེསུ ཝུཏྟོཡེཝ ཧོཏི, ཏསྨཱ ཏཾ ཨཝཏྭཱ ཏཔྤཙྩནཱིཀཱནཾ སུསམཱུཧཏཏྠོ ཝུཏྟོ. པཙྩནཱིཀསམུགྒྷཱཏེན ཧི ཨཱརདྡྷཔརིཡོསཱནཾ པཉྙཱཡཏི, ཏེན སུསམཱརདྡྷསྶ སིཁཱཔྤཏྟོ ཨཏྠོ ཝུཏྟོ ཧོཏི. ཏཏྠ ཏཔྤཙྩནཱིཀཱནནྟི ཏེསཾ ཛྷཱནཝིཔསྶནཱམགྒཱནཾ པཊིཔཀྑབྷཱུཏཱནཾ. ཀིལེསཱནནྟི ཀཱམཙྪནྡཱདཱིནཾ ནིཙྩསཉྙཱདིསམྤཡུཏྟཱནཾ སཀྐཱཡདིཊྛཱདཱིནཉྩ. སུསམཱུཧཏཏྟཱཏི ཝིཀྑམྦྷནཏདངྒསམུཙྪེདཝསེན ¶ སུཊྛུ སམཱུཧཏཏྟཱ ནཱསིཏཏྟཱ. པོཏྠཀེསུ པན ‘‘སུསམུགྒྷཱཏཏྟཱ’’ཏི ལིཁནྟི, ཏཾ ན སུནྡརཾ.

༡༦༡. པུན ཏསྶེཝ པདསྶ ཨཉྙམྤི ཨཏྠཝིཀཔྤཾ དསྶེནྟོ སུསམནྟིཨཱདིམཱཧ. ཏཏྠ ཏཏྠ ཛཱཏཱཏི ཏསྨིཾ སིཁཱཔྤཏྟབྷཱཝནཱཝིསེསེ ཛཱཏཱ. ཨནཝཛྫཱཏི ཀིལེསཱནཾ ཨཱརམྨཎབྷཱཝཱནུཔགམནེན ཀིལེསདོསཝིརཧིཏཱ. ཀུསལཱཏི ཛཱཏིཝསེན ཀུསལཱ. བོདྷིཔཀྑིཡཱཏི བུཛ྄ཛྷནཊྛེན བོདྷཱིཏི ལདྡྷནཱམསྶ ཨརིཡསྶ པཀྑེ བྷཝཏྟཱ བོདྷིཔཀྑིཡཱ. པཀྑེ བྷཝཏྟཱཏི ཧི ཨུཔཀཱརབྷཱཝེ ཋིཏཏྟཱ. ཏེ ཙ ‘‘ཙཏྟཱརོ སཏིཔཊྛཱནཱ, ཙཏྟཱརོ སམྨཔྤདྷཱནཱ, ཙཏྟཱརོ ཨིདྡྷིཔཱདཱ, པཉྩིནྡྲིཡཱནི, པཉྩ བལཱནི, སཏྟ བོཛ྄ཛྷངྒཱ, ཨརིཡོ ཨཊྛངྒིཀོ མགྒོ’’ཏི (མ. ནི. ༣.༣༥; ཙཱུལ༹ནི. མེཏྟགཱུམཱཎཝཔུཙྪཱནིདྡེས ༢༢; མི. པ. ༥.༤.༡) སཏྟཏིཾས དྷམྨཱ. ཨིདཾ སམནྟི ཨིདཾ མགྒཀྑཎེ དྷམྨཛཱཏཾ སམུཙྪེདཝསེན ཀིལེསེ སམེཏི ཝིནཱསེཏཱིཏི སམཾ ནཱམ. ནིརོདྷོ ¶ ནིབྦཱནནྟི དུཀྑནིརོདྷཏྟཱ ནིརོདྷོ, ཝཱནསངྑཱཏཱཡ ཏཎྷཱཡ ཨབྷཱཝཱ ནིབྦཱནཾ. ཨིདཾ སུསམནྟི ཨིདཾ ནིབྦཱནཾ སབྦསངྑཏཝིསམཱཔགཏཏྟཱ སུཊྛུ སམནྟི སུསམཾ ནཱམ. ཉཱཏནྟི བོདྷིཔཀྑིཡསངྑཱཏཾ སམཾ ཨསམྨོཧཏོ ¶ ཉཱཎེན ཉཱཏཾ, ནིབྦཱནསངྑཱཏཾ སུསམཾ ཨཱརམྨཎཏོ ཉཱཎེན ཉཱཏཾ. ཏདེཝ དྭཡཾ ཏེནེཝ ཙཀྑུནཱ ཝིཡ དིཊྛཾ. ཝིདིཏནྟི ཏདེཝ དྭཡཾ སནྟཱནེ ཨུཔྤཱདནེན ཨཱརམྨཎཀརཎེན ཙ པཊིལདྡྷཾ. ཉཱཏཾ ཝིཡ པཉྙཱཡ སཙྪིཀཏཾ ཕསྶིཏཉྩ. ‘‘ཨསལླཱིནཾ ཨསམྨུཊྛཱ ཨསཱརདྡྷོ ཨེཀགྒ’’ནྟི པུརིམསྶ པུརིམསྶ པདསྶ ཨཏྠཔྤཀཱསནཾ. ཏཏྠ ཨཱརདྡྷནྟི པཊྛཔིཏཾ. ཨསལླཱིནནྟི ཨསངྐུཙིཏཾ. ཨུཔཊྛིཏཱཏི ཨུཔགནྟྭཱ ཋིཏཱ. ཨསམྨུཊྛཱཏི ཨཝིནཊྛཱ. པསྶདྡྷོཏི ནིབྦུཏོ. ཨསཱརདྡྷོཏི ནིདྡརཐོ. སམཱཧིཏནྟི སམཾ ཋཔིཏཾ. ཨེཀགྒནྟི ཨཝིཀྑིཏྟཾ.

‘‘ཙཏྟཱརོ སུསམཱརདྡྷཱ’’ཏིཨཱདི སཀལསྶ སུསམཱརདྡྷཝཙནསྶ མཱུལཏྠོ. ‘‘ཨཏྠི སམ’’ནྟིཨཱདི པན སུསམཝཙནསྶ, ‘‘ཉཱཏ’’ནྟིཨཱདི ཨཱརདྡྷཝཙནསྶ ཝིཀཔྤཏྠཱ. ཏཏྠཱཡཾ པདཏྠསཾསནྡནཱ – ‘‘སམཱ ཙ སུསམཱ ཙ སམསུསམཱ’’ཏི ཝཏྟབྦེ ཨེཀདེསསརཱུཔེཀསེསཾ ཀཏྭཱ ‘‘སུསམཱ’’ ཨིཙྩེཝ ཝུཏྟཱ ཡཐཱ ནཱམཉྩ རཱུཔཉྩ ནཱམརཱུཔཉྩ ནཱམརཱུཔནྟི. ‘‘ཨིདཾ སམཾ, ཨིདཾ སུསམ’’ནྟི པན ཨནཉྙཱཔེཀྑཾ ཀཏྭཱ ནཔུཾསཀཝཙནཾ ཀཏཾ. ཡསྨཱ པན ཉཱཏམྤི དིཊྛནྟི ཝུཙྩཏི, དིཊྛཉྩ ཨཱརདྡྷཉྩ ཨཏྠཏོ ཨེཀཾ. ཝིདིཏསཙྪིཀཏཕསྶིཏཱནི པན ཉཱཏཝེཝཙནཱནི, ཏསྨཱ ཉཱཏནྟི ཨཱརདྡྷཏྠོཡེཝ ཝུཏྟོ ཧོཏི.

ཨཱརདྡྷཾ ཧོཏི ཝཱིརིཡཾ ཨསལླཱིནནྟི ཨཡཾ པན ཨཱརདྡྷཝཙནསྶ ཨུཛུཀཏྠོཡེཝ. ཨུཔཊྛིཏཱ སཏཱིཏིཨཱདཱིནི ¶ པན སམྤཡུཏྟཝཱིརིཡསྶ ཨུཔཀཱརཀདྷམྨདསྶནཏྠཾ ཝུཏྟཱནི, ན ཨཱརདྡྷཝཙནསྶ ཨཏྠདསྶནཏྠཾ. པུརིམེན ཨཏྠེན སུཊྛུ སམཱརདྡྷཱཏི སུསམཱརདྡྷཱ ཙ, ཨིམིནཱ ཨཏྠེན སུསམཱ ཨཱརདྡྷཱཏི སུསམཱརདྡྷཱ ཙ ཨེཀསེསེ ཀཏེ ‘‘སུསམཱརདྡྷཱ’’ཏི ཝུཙྩནྟི. ཨིམམཏྠཾ པརིགྒཧེཏྭཱ ‘‘ཏེན ཝུཙྩཏི སུསམཱརདྡྷཱ’’ཏི ཝུཏྟཾ.

ཨནུཔུབྦནྟི ¶ ཡཐཱནུཀྐམེནཱཏི ཨཏྠོ, པུབྦཾ པུབྦཾ ཨནཱུཏི ཝུཏྟཾ ཧོཏི. དཱིགྷཾ ཨསྶཱསཝསེནཱཏི དཱིགྷནྟི ཝུཏྟཨསྶཱསཝསེན. པུརིམཱ པུརིམཱཏི པུརིམཱ པུརིམཱ སཏི. ཨེཏེན པུབྦནྟིཔདསྶ ཨཏྠོ ཝུཏྟོ ཧོཏི. པཙྪིམཱ པཙྪིམཱཏི སཏིཡེཝ. ཨེཏེན ཨནཱུཏིཔདསྶ ཨཏྠོ ཝུཏྟོ ཧོཏི. ཨུབྷཡེན པུབྦཉྩ ཨནུ ཙ པརིཙིཏཱཏི ཨཏྠོ ཝུཏྟོ ཧོཏི. ཨུཔརི སོལ༹ས ཝཏྠཱུནི ཝིཏྠཱརེཏྭཱ ཝཙནཏོ ཨིདྷ སངྑིཔིཏྭཱ ‘‘པཊིནིསྶགྒཱནུཔསྶཱི’’ཏི ཨནྟིམམེཝ དསྶིཏཾ. ཡསྨཱ སིཁཱཔྤཏྟབྷཱཝནསྶ སབྦཱཔི ཨཱནཱཔཱནསྶཏིཡོ ¶ པུནཔྤུནཾ ཡཐཱརུཙི པཝཏྟནཏོ ཨནུཔརིཙིཏཱཔི ཧོནྟི. ཏེན ཝུཏྟཾ – ‘‘ཨཉྙམཉྙཾ པརིཙིཏཱ ཙེཝ ཧོནྟི ཨནུཔརིཙིཏཱ ཙཱ’’ཏི.

ཡཐཏྠཱཏི ཡཐཱསབྷཱཝཏྠཱ. ཨཏྟདམཐཏྠོཏི ཨརཧཏྟམགྒཀྑཎེ ཨཏྟནོ ནིབྦིསེཝནཏྠོ. སམཐཏྠོཏི སཱིཏིབྷཱཝཏྠོ. པརིནིབྦཱཔནཏྠོཏི ཀིལེསཔརིནིབྦཱནེན. ཨབྷིཉྙཏྠོཏི སབྦདྷམྨཝསེན. པརིཉྙཏྠཱདཡོ མགྒཉཱཎཀིཙྩཝསེན. སཙྩཱབྷིསམཡཏྠོ ཙཏུནྣཾ སཙྩཱནཾ ཨེཀཔཊིཝེདྷདསྶནཝསེན. ནིརོདྷེ པཏིཊྛཱཔཀཏྠོ ཨཱརམྨཎཀརཎཝསེན.

བུདྡྷོཏིཔདསྶ ཨབྷཱཝེཔི བུདྡྷེནཱཏིཔདེ ཡོ སོ བུདྡྷོ, ཏཾ ནིདྡིསིཏུཀཱམེན བུདྡྷོཏི ཝུཏྟཾ. སཡམྦྷཱུཏི ཨུཔདེསཾ ཝིནཱ སཡམེཝ བྷཱུཏོ. ཨནཱཙརིཡཀོཏི སཡམྦྷཱུཔདསྶ ཨཏྠཝིཝརཎཾ. ཡོ ཧི ཨཱཙརིཡཾ ཝིནཱ སཙྩཱནི པཊིཝིཛ྄ཛྷཏི, སོ སཡམྦྷཱུ ནཱམ ཧོཏི. པུབྦེ ཨནནུསྶུཏེསཱུཏིཨཱདི ཨནཱཙརིཡཀབྷཱཝསྶ ཨཏྠཔྤཀཱསནཾ. ཨནནུསྶུཏེསཱུཏི ཨཱཙརིཡཾ ཨནནུསྶུཏེསུ. སཱམནྟི སཡམེཝ. ཨབྷིསམྦུཛ྄ཛྷཱིཏི བྷུསཾ སམྨཱ པཊིཝིཛ྄ཛྷི. ཏཏྠ ཙ སབྦཉྙུཏཾ པཱཔུཎཱིཏི ཏེསུ ཙ སཙྩེསུ སབྦཉྙུབྷཱཝཾ པཱཔུཎི. ཡཐཱ སཙྩཱནི པཊིཝིཛ྄ཛྷནྟཱ སབྦཉྙུནོ ཧོནྟི, ཏཐཱ སཙྩཱནཾ པཊིཝིདྡྷཏྟཱ ཨེཝཾ ཝུཏྟཾ. སབྦཉྙུཏཾ པཏྟོཏིཔི པཱཋོ. བལེསུ ཙ ཝསཱིབྷཱཝནྟི དསསུ ཙ ཏཐཱགཏབལེསུ ཨིསྶརབྷཱཝཾ པཱཔུཎི. ཡོ སོ ཨེཝཾ བྷཱུཏོ, སོ བུདྡྷོཏི ཝུཏྟཾ ཧོཏི. ཏཏྠ སབྦེསུ དྷམྨེསུ ཨཔྤཊིཧཏཉཱཎནིམིཏྟཱནུཏྟརཝིམོཀྑཱདྷིགམཔརིབྷཱཝིཏཾ ཁནྡྷསནྟཱནཾ ¶ ཨུཔཱདཱཡ པཎྞཏྟིཀོ, སབྦཉྙུཏཔདཊྛཱནཾ ¶ ཝཱ སཙྩཱབྷིསམྦོདྷིམུཔཱདཱཡ པཎྞཏྟིཀོ སཏྟཝིསེསོ བུདྡྷོ. ཨེཏྟཱཝཏཱ ཨཏྠཏོ བུདྡྷཝིབྷཱཝནཱ ཀཏཱ ཧོཏི.

༡༦༢. ཨིདཱནི བྱཉྫནཏོ ཝིབྷཱཝེནྟོ བུདྡྷོཏི ཀེནཊྛེན བུདྡྷོཏིཨཱདིམཱཧ. ཏཏྠ ཡཐཱ ལོཀེ ཨཝགནྟཱ ཨཝགཏོཏི ཝུཙྩཏི, ཨེཝཾ བུཛ྄ཛྷིཏཱ སཙྩཱནཱིཏི བུདྡྷོ. ཡཐཱ པཎྞསོསཱ ཝཱཏཱ པཎྞསུསཱཏི ཝུཙྩནྟི, ཨེཝཾ བོདྷེཏཱ པཛཱཡཱཏི བུདྡྷོ. སབྦཉྙུཏཱཡ བུདྡྷོཏི སབྦདྷམྨབུཛ྄ཛྷནསམཏྠཱཡ བུདྡྷིཡཱ བུདྡྷོཏི ཝུཏྟཾ ཧོཏི. སབྦདསྶཱཝིཏཱཡ བུདྡྷོཏི སབྦདྷམྨཱནཾ ཉཱཎཙཀྑུནཱ དིཊྛཏྟཱ བུདྡྷོཏི ཝུཏྟཾ ཧོཏི. ཨནཉྙནེཡྻཏཱཡ ¶ བུདྡྷོཏི ཨཉྙེན ཨབོདྷནཱིཡཏོ སཡམེཝ བུདྡྷཏྟཱ བུདྡྷོཏི ཝུཏྟཾ ཧོཏི. ཝིསཝིཏཱཡ བུདྡྷོཏི ནཱནཱགུཎཝིསཝནཏོ པདུམམིཝ ཝིཀསནཊྛེན བུདྡྷོཏི ཝུཏྟཾ ཧོཏི. ཁཱིཎཱསཝསངྑཱཏེན བུདྡྷོཏིཨཱདཱིཧི ཚཧི པརིཡཱཡེཧི ཙིཏྟསངྐོཙཀརདྷམྨཔྤཧཱནེན ནིདྡཀྑཡཝིབུདྡྷོ པུརིསོ ཝིཡ སབྦཀིལེསནིདྡཀྑཡཝིབུདྡྷཏྟཱ བུདྡྷོཏི ཝུཏྟཾ ཧོཏི. སངྑཱ སངྑཱཏནྟི ཨཏྠཏོ ཨེཀཏྟཱ སངྑཱཏེནཱཏི ཝཙནསྶ ཀོཊྛཱསེནཱཏི ཨཏྠོ. ཏཎྷཱལེཔདིཊྛིལེཔཱབྷཱཝེན ནིརུཔལེཔསངྑཱཏེན. སཝཱསནཱནཾ སབྦཀིལེསཱནཾ པཧཱིནཏྟཱ ཨེཀནྟཝཙནེན ཝིསེསེཏྭཱ ཨེཀནྟཝཱིཏརཱགོཏིཨཱདི ཝུཏྟཾ. ཨེཀནྟནིཀྐིལེསོཏི རཱགདོསམོཧཱཝསེསེཧི སབྦཀིལེསེཧི ནིཀྐིལེསོ. ཨེཀཱཡནམགྒཾ གཏོཏི བུདྡྷོཏི གམནཏྠཱནཾ དྷཱཏཱུནཾ བུཛ྄ཛྷནཏྠཏྟཱ བུཛ྄ཛྷནཏྠཱཔི དྷཱཏུཡོ གམནཏྠཱ ཧོནྟི, ཏསྨཱ ཨེཀཱཡནམགྒཾ གཏཏྟཱ བུདྡྷོཏི ཝུཏྟཾ ཧོཏི. ཨེཀཱཡནམགྒོཏི ཙེཏྠ –

‘‘མགྒོ པནྠོ པཐོ པཛྫོ, ཨཉྫསཾ ཝཊུམཱཡནཾ;

ནཱཝཱ ཨུཏྟརསེཏུ ཙ, ཀུལློ ཙ བྷིསི སངྐམོ’’ཏི ¶ . (ཙཱུལ༹ནི. པཱརཱཡནཏྠུཏིགཱཐཱནིདྡེས ༡༠༡) –

མགྒསྶ བཧཱུསུ ནཱམེསུ ཨཡནནཱམེན ཝུཏྟོ. ཏསྨཱ ཨེཀམགྒབྷཱུཏོ མགྒོ, ན དྭེདྷཱཔཐབྷཱུཏོཏི ཨཏྠོ. ཨཐ ཝཱ ཨེཀེན ཨཡིཏབྦོ མགྒོཏི ཨེཀཱཡནམགྒོ. ཨེཀེནཱཏི གཎསངྒཎིཀཾ པཧཱཡ པཝིཝེཀེན ཙིཏྟེན. ཨཡིཏབྦོཏི པཊིཔཛྫིཏབྦོ. ཨཡནྟི ཝཱ ཨེཏེནཱཏི ཨཡནོ, སཾསཱརཏོ ནིབྦཱནཾ གཙྪནྟཱིཏི ཨཏྠོ. ཨེཀེསཾ ཨཡནོ ཨེཀཱཡནོ. ཨེཀེཏི སེཊྛཱ, སབྦསཏྟསེཊྛཱ ཙ སམྨཱསམྦུདྡྷཱ, ཏསྨཱ ཨེཀཱཡནམགྒོཏི སམྨཱསམྦུདྡྷཱནཾ ཨཡནབྷཱུཏོ མགྒོཏི ཝུཏྟཾ ཧོཏི. ཨཡཏཱིཏི ཝཱ ཨཡནོ, གཙྪཏི པཝཏྟཏཱིཏི ཨཏྠོ. ཨེཀསྨིཾ ཨཡནོ མགྒོཏི ཨེཀཱཡནམགྒོ, ཨེཀསྨིཾཡེཝ བུདྡྷསཱསནེ པཝཏྟམཱནོ མགྒོ, ན ཨཉྙཏྠཱཏི ཝུཏྟཾ ཧོཏི. ཨཔི ཙ ཨེཀཾ ཨཡཏཱིཏི ཨེཀཱཡནོ, པུབྦབྷཱགེ ནཱནཱམུཁབྷཱཝནཱནཡཔྤཝཏྟོཔི ཨཔརབྷཱགེ ཨེཀཾ ནིབྦཱནམེཝ གཙྪཏཱིཏི ¶ ཝུཏྟཾ ཧོཏི, ཏསྨཱ ཨེཀཱཡནམགྒོཏི ཨེཀནིབྦཱནགམནམགྒོཏི ཨཏྠོ. ཨེཀོ ཨནུཏྟརཾ སམྨཱསམྦོདྷིཾ ཨབྷིསམྦུདྡྷོཏི བུདྡྷོཏི ན པརེཧི བུདྡྷཏྟཱ བུདྡྷོ, ཀིཾ པན སཡམེཝ ཨནུཏྟརཾ སམྨཱསམྦོདྷིཾ ཨབྷིསམྦུདྡྷཏྟཱ བུདྡྷོཏི ཝུཏྟཾ ཧོཏི. ཨབུདྡྷིཝིཧཏཏྟཱ བུདྡྷིཔཊིལཱབྷཱ བུདྡྷོཏི བུདྡྷི བུདྡྷཾ ¶ བོདྷོཏི པརིཡཱཡཝཙནམེཏཾ. ཏཏྠ ཡཐཱ ནཱིལརཏྟགུཎཡོགཱ ནཱིལོ པཊོ རཏྟོ པཊོཏི ཝུཙྩཏི, ཨེཝཾ བུདྡྷགུཎཡོགཱ བུདྡྷོཏི ཉཱཔེཏུཾ ཝུཏྟཾ.

ཏཏོ པརཾ བུདྡྷོཏི ནེཏཾ ནཱམནྟིཨཱདི ‘‘ཨཏྠམནུགཏཱ ཨཡཾ པཉྙཏྟཱི’’ཏི ཉཱཔནཏྠཾ ཝུཏྟཾ. ཏཏྠ མིཏྟཱ སཧཱཡཱ. ཨམཙྩཱ བྷཙྩཱ. ཉཱཏཱི པིཏུཔཀྑིཀཱ. སཱལོཧིཏཱ མཱཏུཔཀྑིཀཱ. སམཎཱ པབྦཛྫཱུཔགཏཱ. བྲཱཧྨཎཱ བྷོཝཱདིནོ, སམིཏཔཱཔབཱཧིཏཔཱཔཱ ཝཱ. དེཝཏཱ སཀྐཱདཡོ བྲཧྨཱནོ ཙ. ཝིམོཀྑནྟིཀནྟི ཝིམོཀྑོ ཨརཧཏྟམགྒོ, ཝིམོཀྑསྶ ཨནྟོ ཨརཧཏྟཕལཾ, ཏསྨིཾ ཝིམོཀྑནྟེ བྷཝཾ ཝིམོཀྑནྟིཀཾ ནཱམ. སབྦཉྙུབྷཱཝོ ཧི ཨརཧཏྟམགྒེན སིཛ྄ཛྷཏི, ཨརཧཏྟཕལོདཡེ སིདྡྷོ ཧོཏི, ཏསྨཱ སབྦཉྙུབྷཱཝོ ཝིམོཀྑནྟེ བྷཝོ ཧོཏི. ཏཾ ནེམིཏྟིཀམྤི ནཱམཾ ཝིམོཀྑནྟེ བྷཝཾ ནཱམ ཧོཏི. ཏེན ཝུཏྟཾ ¶ – ‘‘ཝིམོཀྑནྟིཀམེཏཾ བུདྡྷཱནཾ བྷགཝནྟཱན’’ནྟི. བོདྷིཡཱ མཱུལེ སཧ སབྦཉྙུཏཉྙཱཎསྶ པཊིལཱབྷཱཏི མཧཱབོདྷིརུཀྑམཱུལེ ཡཐཱཝུཏྟཀྑཎེ སབྦཉྙུཏཉྙཱཎསྶ པཊིལཱབྷེན སཧ. སཙྪིཀཱ པཉྙཏྟཱིཏི ཨརཧཏྟཕལསཙྪིཀིརིཡཱཡ, སབྦདྷམྨསཙྪིཀིརིཡཱཡ ཝཱ ཛཱཏཱ པཉྙཏྟི. ཡདིདཾ བུདྡྷོཏི ཡཱ ཨཡཾ བུདྡྷོཏི པཉྙཏྟི, ཨཡཾ བྱཉྫནཏོ བུདྡྷཝིབྷཱཝནཱ.

‘‘ཡཐཱ བུདྡྷེན དེསིཏཱ’’ཏིགཱཐཱཔཱདསྶ པན ཨིམིནཱ པདབྷཱཛནཱིཡེ ཝུཏྟཏྠེན ཨཡཾ སཾསནྡནཱ – ཨཱནཱཔཱནསྶཏིཡོ ཙ ཡཐཱ བུདྡྷེན དེསིཏཱ, ཡེན པཀཱརེན དེསིཏཱ. ཡཐཱསདྡེན སངྒཧིཏཱ དས ཡཐཏྠཱ ཙ ཡཐཱ བུདྡྷེན དེསིཏཱ, ཡེན པཀཱརེན དེསིཏཱཏི པཀཱརཏྠསྶ ཙ ཡཐཱསདྡསྶ, སབྷཱཝཏྠསྶ ཙ ཡཐཱསདྡསྶ སརཱུཔེཀསེསཝསེན ཨེཀསེསཾ ཀཏྭཱ ‘‘ཡཐཱ’’ཏི ཝུཏྟནྟི ཝེདིཏབྦཾ. པདབྷཱཛནཱིཡེ པནསྶ ཡཐཏྠེསུ ཨེཀེཀསྶ ཡོཛནཱཝསེན ‘‘དེསིཏོ’’ཏི ཨེཀཝཙནཾ ཀཏཾ.

‘‘སོཏི གཧཊྛོ ཝཱ ཧོཏི པབྦཛིཏོ ཝཱ’’ཏི ཝུཏྟཏྟཱ ཨཱདིཔདེཔི ཡསྶ གཧཊྛསྶ ཝཱ པབྦཛིཏསྶ ཝཱཏི ཝུཏྟམེཝ ཧོཏི. ལོཀཏྠོ ཝུཏྟོཡེཝ. པབྷཱསེཏཱིཏི ཨཏྟནོ ཉཱཎསྶ པཱཀཊཾ ཀརོཏཱིཏི ཨཏྠོ ¶ . ཨབྷིསམྦུདྡྷཏྟཱཏི སཱཝཀཔཱརམིཉཱཎེནཔི པཊིཝིདྡྷབྷཱཝེན. ཨོབྷཱསེཏཱིཏི ཀཱམཱཝཙརབྷཱུཏཾ ལོཀཾ. བྷཱསེཏཱིཏི རཱུཔཱཝཙརབྷཱུཏཾ ལོཀཾ. པབྷཱསེཏཱིཏི ཨརཱུཔཱཝཙརབྷཱུཏཾ ལོཀཾ.

ཨརིཡཉཱཎནྟི ¶ ཨརཧཏྟམགྒཉཱཎཾ. མཧིཀཱ མུཏྟོཏི མཧིཀཱཡ མུཏྟོ. མཧིཀཱཏི ནཱིཧཱརོ ཝུཙྩཏི. མཧིཡཱ མུཏྟོཏིཔི པཱཋོ. དྷཱུམརཛཱ མུཏྟོཏི དྷཱུམཏོ ཙ རཛཏོ ཙ མུཏྟོ. རཱཧུགཧཎཱ ཝིཔྤམུཏྟོཏི རཱཧུནོ ཙནྡསྶ ཨཱསནྣུཔཀྐིལེསཏྟཱ དྭཱིཧི ཨུཔསགྒེཧི ཝིསེསེཏྭཱ ཝུཏྟཾ. བྷཱསཏེ ཨིཏི སཨོབྷཱསཊྛེན. ཏཔཏེ ཨིཏི སཏེཛཊྛེན. ཝིརོཙཏེ ཨིཏི རུཙིརཊྛེན. ཨེཝམེཝནྟི ཨེཝཾ ཨེཝཾ. ཡསྨཱ པན ཙནྡོཔི སཡཾ བྷཱསནྟོ ཏཔནྟོ ཝིརོཙནྟོ ཨིམཾ ཨོཀཱསལོཀཾ ཨོབྷཱསེཏི, བྷིཀྑུ ཙ པཉྙཱཡ བྷཱསནྟོ ཏཔནྟོ ཝིརོཙནྟོ ཨིམཾ ཁནྡྷཱདིལོཀཾ པཉྙཱཡ ཨོབྷཱསེཏི, ཏསྨཱ ཨུབྷཡཏྲཱཔི ‘‘བྷཱསེཏཱི’’ཏི ཨཝཏྭཱ ‘‘བྷཱསཏེ’’ ཨིཙྩེཝ ཝུཏྟཾ. ཨེཝཉྷི ཝུཏྟེ ཧེཏུཨཏྠོཔི ཝུཏྟོ ཧོཏི. ཨཏིཝིསདཏརཱབྷསཱུརིཡོཔམཾ ¶ ཨགྒཧེཏྭཱ ཀསྨཱ ཙནྡོཔམཱ གཧིཏཱཏི ཙེ? སབྦཀིལེསཔརིལཱ༹ཧཝཱུཔསམེན སནྟསྶ བྷིཀྑུནོ སནྟགུཎཡུཏྟཙནྡོཔམཱ ཨནུཙྪཝིཀཱཏི གཧིཏཱཏི ཝེདིཏབྦཾ. ཨེཝཾ ཨཱནཱཔཱནསྶཏིབྷཱཝནཱསིདྡྷིསཱདྷཀཾ ཡོགཱཝཙརཾ ཐུནིཏྭཱ ཨིམཱནི ཏེརས ཝོདཱནེ ཉཱཎཱནཱིཏི ཏཱནི ཉཱཎཱནི ནིགམེཏྭཱ དསྶེཏཱིཏི.

ཝོདཱནཉཱཎནིདྡེསཝཎྞནཱ ནིཊྛིཏཱ.

༥. སཏོཀཱརིཉཱཎནིདྡེསཝཎྞནཱ

༡༦༣. སཏོཀཱརིཉཱཎནིདྡེསེ མཱཏིཀཱཡཾ ཨིདྷ བྷིཀྑཱུཏི ཨིམསྨིཾ སཱསནེ བྷིཀྑུ. ཨཡཉྷི ཨེཏྠ ཨིདྷ-སདྡོ སབྦཔྤཀཱརཨཱནཱཔཱནསྶཏིསམཱདྷིནིབྦཏྟཀསྶ པུགྒལསྶ སནྣིསྶཡབྷཱུཏསཱསནཔརིདཱིཔནོ, ཨཉྙསཱསནསྶ ཏཐཱབྷཱཝཔཊིསེདྷནོ ཙ. ཝུཏྟཉྷེཏཾ – ‘‘ཨིདྷེཝ, བྷིཀྑཝེ, སམཎོ…པེ… སུཉྙཱ པརཔྤཝཱདཱ སམཎེབྷི ཨཉྙེཧཱི’’ཏི (མ. ནི. ༡.༡༣༩; ཨ. ནི. ༤.༢༤༡).

ཨརཉྙགཏོ ཝཱ རུཀྑམཱུལགཏོ ཝཱ སུཉྙཱགཱརགཏོ ཝཱཏི ཨིདམསྶ ཨཱནཱཔཱནསྶཏིསམཱདྷི བྷཱཝནཱནུརཱུཔསེནཱསནཔརིགྒཧཔརིདཱིཔནཾ. ཨིམསྶ ¶ ཧི བྷིཀྑུནོ དཱིགྷརཏྟཾ རཱུཔཱདཱིསུ ཨཱརམྨཎེསུ ཨནུཝིསཊཾ ཙིཏྟཾ ཨཱནཱཔཱནསྶཏིསམཱདྷིཨཱརམྨཎཾ ཨབྷིརུཧིཏུཾ ན ཨིཙྪཏི, ཀཱུཊགོཎཡུཏྟརཐོ ཝིཡ ཨུཔྤཐམེཝ དྷཱཝཏི. ཏསྨཱ སེཡྻཐཱཔི ནཱམ གོཔོ ཀཱུཊདྷེནུཡཱ སབྦཾ ཁཱིརཾ པིཝིཏྭཱ ཝཌྜྷིཏཾ ཀཱུཊཝཙྪཾ དམེཏུཀཱམོ དྷེནུཏོ ཨཔནེཏྭཱ ཨེཀམནྟེ མཧནྟཾ ཐམྦྷཾ ནིཁཎིཏྭཱ ཏཏྠ ཡོཏྟེན བནྡྷེཡྻ, ཨཐསྶ སོ ཝཙྪོ ཨིཏོ ཙིཏོ ཙ ཝིཔྥནྡིཏྭཱ པལཱཡིཏུཾ ཨསཀྐོནྟོ ཏམེཝ ཐམྦྷཾ ཨུཔནིསཱིདེཡྻ ཝཱ ཨུཔནིཔཛྫེཡྻ ཝཱ, ཨེཝམེཝ ཨིམིནཱཔི བྷིཀྑུནཱ དཱིགྷརཏྟཾ རཱུཔཱརམྨཎཱདིརསཔཱནཝཌྜྷིཏཾ ¶ དུཊྛཙིཏྟཾ དམེཏུཀཱམེན རཱུཔཱདིཨཱརམྨཎཏོ ཨཔནེཏྭཱ ཨརཉྙཾ ཝཱ རུཀྑམཱུལཾ ཝཱ སུཉྙཱགཱརཾ ཝཱ པཝེསེཏྭཱ ཏཏྠ ཨསྶཱསཔསྶཱསཐམྦྷེ སཏིཡོཏྟེན བནྡྷིཏབྦཾ. ཨེཝམསྶ ཏཾ ཙིཏྟཾ ཨིཏོ ཙིཏོ ཙ ཝིཔྥནྡིཏྭཱཔི པུབྦེ ཨཱཙིཎྞཱརམྨཎཾ ཨལབྷམཱནཾ སཏིཡོཏྟཾ ཚིནྡིཏྭཱ པལཱཡིཏུཾ ¶ ཨསཀྐོནྟཾ ཏམེཝཱརམྨཎཾ ཨུཔཙཱརཔྤནཱཝསེན ཨུཔནིསཱིདཏི ཙེཝ ཨུཔནིཔཛྫཏི ཙ. ཏེནཱཧུ པོརཱཎཱ –

‘‘ཡཐཱ ཐམྦྷེ ནིབནྡྷེཡྻ, ཝཙྪཾ དམཾ ནརོ ཨིདྷ;

བནྡྷེཡྻེཝཾ སཀཾ ཙིཏྟཾ, སཏིཡཱརམྨཎེ དལ༹ྷ’’ནྟི. (ཝིསུདྡྷི. ༡.༢༡༧; པཱརཱ. ཨཊྛ. ༢.༡༦༥; དཱི. ནི. ཨཊྛ. ༢.༣༧༤; མ. ནི. ཨཊྛ. ༡.༡༠༧) –

ཨེཝམསྶ ཏཾ སེནཱསནཾ བྷཱཝནཱནུརཱུཔཾ ཧོཏི. ཨཐ ཝཱ ཡསྨཱ ཨིདཾ ཀམྨཊྛཱནཔྤབྷེདེ མུདྡྷབྷཱུཏཾ སབྦབུདྡྷཔཙྩེཀབུདྡྷབུདྡྷསཱཝཀཱནཾ ཝིསེསཱདྷིགམདིཊྛདྷམྨསུཁཝིཧཱརཔདཊྛཱནཾ ཨཱནཱཔཱནསྶཏིཀམྨཊྛཱནཾ ཨིཏྠིཔུརིསཧཏྠིཨསྶཱདིསདྡསམཱཀུལཾ གཱམནྟཾ ཨཔརིཙྩཛིཏྭཱ ན སུཀརཾ བྷཱཝེཏུཾ སདྡཀཎྚཀཏྟཱ ཛྷཱནསྶ. ཨགཱམཀེ པན ཨརཉྙེ སུཀརཾ ཡོགཱཝཙརེན ཨིདཾ ཀམྨཊྛཱནཾ པརིགྒཧེཏྭཱ ཨཱནཱཔཱནཙཏུཀྐཛ྄ཛྷཱནཾ ནིབྦཏྟེཏྭཱ ཏདེཝ པཱདཀཾ ཀཏྭཱ སངྑཱརེ སམྨསིཏྭཱ ཨགྒཕལཾ ཨརཧཏྟཾ པཱཔུཎིཏུཾ. ཏསྨཱ ཏསྶ ཨནུརཱུཔཾ སེནཱསནཾ ཨུཔདིསནྟོ བྷགཝཱ ‘‘ཨརཉྙགཏོ ཝཱ’’ཏིཨཱདིམཱཧ, ཏཐེཝ ཐེརོ.

ཝཏྠུཝིཛྫཱཙརིཡོ ཝིཡ ཧི བྷགཝཱ, སོ ཡཐཱ ཝཏྠུཝིཛྫཱཙརིཡོ ནགརབྷཱུམིཾ པསྶིཏྭཱ སུཊྛུ ཨུཔཔརིཀྑིཏྭཱ ‘‘ཨེཏྠ ནགརཾ མཱཔེཐཱ’’ཏི ཨུཔདིསཏི, སོཏྠིནཱ ཙ ནགརེ ནིཊྛིཏེ རཱཛཀུལཏོ མཧཱསཀྐཱརཾ ལབྷཏི, ཨེཝམེཝཾ ཡོགཱཝཙརསྶ ཨནུརཱུཔཾ སེནཱསནཾ ཨུཔཔརིཀྑིཏྭཱ ‘‘ཨེཏྠ ཀམྨཊྛཱནཾ ཨནུཡུཉྫིཏབྦ’’ནྟི ཨུཔདིསཏི, ཏཏོ ཏཏྠ ཀམྨཊྛཱནམནུཡུཏྟེན ཡོགིནཱ ཀམེན ¶ ཨརཧཏྟེ པཏྟེ ‘‘སམྨཱསམྦུདྡྷོ ཝཏ སོ བྷགཝཱ’’ཏི མཧནྟཾ སཀྐཱརཾ ལབྷཏི. ཨཡཾ པན བྷིཀྑུ ‘‘དཱིཔིསདིསོ’’ཏི ཝུཙྩཏི. ཡཐཱ ཧི མཧཱདཱིཔིརཱཛཱ ཨརཉྙེ ཏིཎགཧནཾ ཝཱ ཝནགཧནཾ ཝཱ པབྦཏགཧནཾ ཝཱ ནིསྶཱཡ ནིལཱིཡིཏྭཱ ཝནམཧིཾསགོཀཎྞསཱུཀརཱདཡོ མིགེ གཎྷཱཏི, ཨེཝམེཝཾ ཨཡཾ ཨརཉྙཱདཱིསུ ཀམྨཊྛཱནམནུཡུཉྫནྟོ བྷིཀྑུ ཡཐཱཀྐམེན སོཏཱཔཏྟིསཀདཱགཱམིཨནཱགཱམིཨརཧཏྟམགྒེ ཙེཝ ཨརིཡཕལཱནི ཙ གཎྷཱཏཱིཏི ཝེདིཏབྦོ. ཏེནཱཧུ པོརཱཎཱ –

‘‘ཡཐཱཔི ¶ ¶ དཱིཔིཀོ ནཱམ, ནིལཱིཡིཏྭཱ གཎྷཏེ མིགེ;

ཏཐེཝཱཡཾ བུདྡྷཔུཏྟོ, ཡུཏྟཡོགོ ཝིཔསྶཀོ;

ཨརཉྙཾ པཝིསིཏྭཱན, གཎྷཱཏི ཕལམུཏྟམ’’ནྟི. (མི. པ. ༦.༡.༥);

ཏེནསྶ པརཀྐམཛཝཡོགྒབྷཱུམིཾ ཨརཉྙསེནཱསནཾ དསྶེནྟོ ‘‘ཨརཉྙགཏོ ཝཱ’’ཏིཨཱདིམཱཧ.

ཏཏྠ ཨརཉྙགཏོཏི ཨུཔརི ཝུཏྟལཀྑཎཾ ཡཾཀིཉྩི པཝིཝེཀསུཁཾ ཨརཉྙཾ གཏོ. རུཀྑམཱུལགཏོཏི རུཀྑསམཱིཔཾ གཏོ. སུཉྙཱགཱརགཏོཏི སུཉྙཾ ཝིཝིཏྟོཀཱསཾ གཏོ. ཨེཏྠ ཙ ཋཔེཏྭཱ ཨརཉྙཉྩ རུཀྑམཱུལཉྩ ཨཝསེསསཏྟཝིདྷསེནཱསནཾ གཏོཔི ‘‘སུཉྙཱགཱརགཏོ’’ཏི ཝཏྟུཾ ཝཊྚཏི. ནཝཝིདྷཉྷི སེནཱསནཾ. ཡཐཱཧ – ‘‘སོ ཝིཝིཏྟཾ སེནཱསནཾ བྷཛཏི ཨརཉྙཾ རུཀྑམཱུལཾ པབྦཏཾ ཀནྡརཾ གིརིགུཧཾ སུསཱནཾ ཝནཔཏྠཾ ཨབྦྷོཀཱསཾ པལཱལཔུཉྫ’’ནྟི (ཝིབྷ. ༥༠༨). ཨེཝམསྶ ཨུཏུཏྟཡཱནུཀཱུལཾ དྷཱཏུཙརིཡཱནུཀཱུལཉྩ ཨཱནཱཔཱནསྶཏིབྷཱཝནཱནུརཱུཔཾ སེནཱསནཾ ཨུཔདིསིཏྭཱ ཨལཱིནཱནུདྡྷཙྩཔཀྑིཀཾ སནྟམིརིཡཱཔཐཾ ཨུཔདིསནྟོ ནིསཱིདཏཱིཏི ཨཱཧ. ཨཐསྶ ནིསཛྫཱཡ དལ༹ྷབྷཱཝཾ ཨསྶཱསཔསྶཱསཱནཾ པཝཏྟནསམཏྠཏཾ ཨཱརམྨཎཔརིགྒཧཱུཔཱཡཉྩ དསྶེནྟོ པལླངྐཾ ཨཱབྷུཛིཏྭཱཏིཨཱདིམཱཧ. ཏཏྠ པལླངྐནྟི སམནྟཏོ ཨཱུརུབདྡྷཱསནཾ. ཨཱབྷུཛིཏྭཱཏི བནྡྷིཏྭཱ. ཨུཛུཾ ཀཱཡཾ པཎིདྷཱཡཱཏི ཨུཔརིམསརཱིརཾ ཨུཛུཀཾ ཋཔེཏྭཱ ཨཊྛཱརས པིཊྛིཀཎྚཀེ ཀོཊིཡཱ ཀོཊིཾ པཊིཔཱདེཏྭཱ. ཨེཝཉྷི ནིསིནྣསྶ དྷམྨམཾསནྷཱརཱུནི ན པཎམནྟི. ཨཐསྶ ཡཱ ཏེསཾ པཎམནཔཙྩཡཱ ཁཎེ ཁཎེ ཝེདནཱ ཨུཔྤཛྫེཡྻུཾ, ཏཱ ན ཨུཔྤཛྫནྟི. ཏཱསུ ཨནུཔྤཛྫམཱནཱསུ ཙིཏྟཾ ཨེཀགྒཾ ཧོཏི, ཀམྨཊྛཱནཾ ན པརིཔཏཏི, ཝུདྡྷིཾ ཕཱཏིཾ ཨུཔགཙྪཏི.

པརིམུཁཾ ¶ སཏིཾ ཨུཔཊྛཔེཏྭཱཏི ཀམྨཊྛཱནཱབྷིམུཁཾ སཏིཾ ཋཔཡིཏྭཱ. སོ སཏོཝ ཨསྶསཏི སཏོ པསྶསཏཱིཏི སོ བྷིཀྑུ ཨེཝཾ ནིསཱིདིཏྭཱ ཨེཝཉྩ སཏིཾ ཨུཔཊྛཔེཏྭཱ ཏཾ སཏིཾ ཨཝིཛཧནྟོ སཏོ ཨེཝ ཨསྶསཏི སཏོ པསྶསཏི, སཏོཀཱརཱི ཧོཏཱིཏི ཝུཏྟཾ ཧོཏི.

ཨིདཱནི ¶ ཡེཧི པཀཱརེཧི སཏོཀཱརཱི ཧོཏི, ཏེ པཀཱརེ དསྶེཏུཾ དཱིགྷཾ ཝཱ ཨསྶསནྟོཏིཨཱདིམཱཧ. ཏཏྠ དཱིགྷཾ ཝཱ ཨསྶསནྟོཏི དཱིགྷཾ ཝཱ ཨསྶཱསཾ པཝཏྟཡནྟོ. ཏཐཱ རསྶཾ. ཡཱ པན ནེསཾ དཱིགྷརསྶཏཱ, སཱ ཀཱལཝསེན ཝེདིཏབྦཱ. ཀདཱཙི ཧི མནུསྶཱ ཧཏྠིཨཧིཨཱདཡོ ཝིཡ ཀཱལཝསེན དཱིགྷཾ ཨསྶསནྟི ཙ པསྶསནྟི ཙ, ཀདཱཙི སུནཁསསཱདཡོ ཝིཡ རསྶཾ. ཨཉྙཐཱ ཧི ཙུཎྞཝིཙུཎྞཱ ཨསྶཱསཔསྶཱསཱ དཱིགྷརསྶཱ ནཱམ ན ཧོནྟི ¶ . ཏསྨཱ ཏེ དཱིགྷཾ ཀཱལཾ པཝིསནྟཱ ཙ ནིཀྑམནྟཱ ཙ དཱིགྷཱ, རསྶཾ ཀཱལཾ པཝིསནྟཱ ཙ ནིཀྑམནྟཱ ཙ རསྶཱཏི ཝེདིཏབྦཱ. ཏཏྲཱཡཾ བྷིཀྑུ ཨུཔརི ཝུཏྟེཧི ནཝཧཱཀཱརེཧི དཱིགྷཾ ཨསྶསནྟོ ཙ པསྶསནྟོ ཙ དཱིགྷཾ ཨསྶསཱམི, པསྶསཱམཱིཏི པཛཱནཱཏི, ཏཐཱ རསྶཾ.

ཨེཝཾ པཛཱནཏོ ཙ –

‘‘དཱིགྷོ རསྶོ ཙ ཨསྶཱསོ, པསྶཱསོཔི ཙ ཏཱདིསོ;

ཙཏྟཱརོ ཝཎྞཱ ཝཏྟནྟི, ནཱསིཀགྒེཝ བྷིཀྑུནོ’’ཏི. (ཝིསུདྡྷི. ༡.༢༡༩; པཱརཱ. ཨཊྛ. ༢.༡༦༥);

ནཝནྣཉྩསྶ ཨཱཀཱརཱནཾ ཨེཀེནཱཀཱརེན ཀཱཡཱནུཔསྶནཱསཏིཔཊྛཱནབྷཱཝནཱ སམྤཛྫཏཱིཏི ཝེདིཏབྦཱ. སབྦཀཱཡཔཊིསཾཝེདཱི ཨསྶསིསྶཱམཱིཏི སིཀྑཏི. སབྦཀཱཡཔཊིསཾཝེདཱི པསྶསིསྶཱམཱིཏི སིཀྑཏཱིཏི སཀལསྶ ཨསྶཱསཀཱཡསྶཱདིམཛ྄ཛྷཔརིཡོསཱནཾ ཝིདིཏཾ ཀརོནྟོ པཱཀཊཾ ཀརོནྟོ ཨསྶསིསྶཱམཱིཏི སིཀྑཏི. སཀལསྶ པསྶཱསཀཱཡསྶཱདིམཛ྄ཛྷཔརིཡོསཱནཾ ཝིདིཏཾ ཀརོནྟོ པཱཀཊཾ ཀརོནྟོ པསྶསིསྶཱམཱིཏི སིཀྑཏི. ཨེཝཾ ཝིདིཏཾ ཀརོནྟོ པཱཀཊཾ ཀརོནྟོ ཉཱཎསམྤཡུཏྟཙིཏྟེན ཨསྶསཏི ཙེཝ པསྶསཏི ཙ. ཏསྨཱ ‘‘ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི ¶ ཝུཙྩཏི. ཨེཀསྶ ཧི བྷིཀྑུནོ ཙུཎྞཝིཙུཎྞཝིསཊེ (ཝིསུདྡྷི. ༡.༢༡༩; པཱརཱ. ༢.༡༦༥) ཨསྶཱསཀཱཡེ, པསྶཱསཀཱཡེ ཝཱ ཨཱདི པཱཀཊོ ཧོཏི, ན མཛ྄ཛྷཔརིཡོསཱནཾ. སོ ཨཱདིམེཝ པརིགྒཧེཏུཾ སཀྐོཏི, མཛ྄ཛྷཔརིཡོསཱནེ ཀིལམཏི. ཨེཀསྶ མཛ྄ཛྷཾ པཱཀཊཾ ཧོཏི, ན ཨཱདིཔརིཡོསཱནཾ. སོ མཛ྄ཛྷམེཝ པརིགྒཧེཏུཾ སཀྐོཏི, ཨཱདིཔརིཡོསཱནེ ཀིལམཏི. ཨེཀསྶ པརིཡོསཱནཾ པཱཀཊཾ ཧོཏི, ན ཨཱདིམཛ྄ཛྷཾ. སོ པརིཡོསཱནཾཡེཝ པརིགྒཧེཏུཾ སཀྐོཏི, ཨཱདིམཛ྄ཛྷེ ཀིལམཏི. ཨེཀསྶ སབྦཾ པཱཀཊཾ ཧོཏི, སོ སབྦམྤི པརིགྒཧེཏུཾ སཀྐོཏི ¶ , ན ཀཏྠཙི ཀིལམཏི. ཏཱདིསེན བྷཝིཏབྦནྟི དསྶེནྟོ ཨཱཧ – ‘‘སབྦཀཱཡཔཊིསཾཝེདཱི’’ཏིཨཱདི.

ཏཏྠ སིཀྑཏཱིཏི ཨེཝཾ གྷཊཏི ཝཱཡམཏི. ཡོ ཝཱ ཏཐཱབྷཱུཏསྶ སཾཝརོ, ཨཡམེཏྠ ཨདྷིསཱིལསིཀྑཱ. ཡོ ཏཐཱབྷཱུཏསྶ སམཱདྷི, ཨཡཾ ཨདྷིཙིཏྟསིཀྑཱ. ཡཱ ཏཐཱབྷཱུཏསྶ པཉྙཱ, ཨཡཾ ཨདྷིཔཉྙཱསིཀྑཱཏི ཨིམཱ ཏིསྶོ སིཀྑཱཡོ ཏསྨིཾ ཨཱརམྨཎེ ཏཱཡ སཏིཡཱ ཏེན མནསིཀཱརེན སིཀྑཏི ཨཱསེཝཏི བྷཱཝེཏི བཧུལཱིཀརོཏཱིཏི ཨེཝམེཏྠ ཨཏྠོ དཊྛབྦོ. ཏཏྠ ཡསྨཱ པུརིམནཡེན ཀེཝལཾ ཨསྶསིཏབྦཾ པསྶསིཏབྦམེཝ ཙ, ན ཨཉྙཾ ཀིཉྩི ཀཱཏབྦཾ, ཨིཏོ ¶ པཊྛཱཡ པན ཉཱཎུཔྤཱདནཱདཱིསུ ཡོགོ ཀརཎཱིཡོ. ཏསྨཱ ཏཏྠ ‘‘ཨསྶསཱམཱིཏི པཛཱནཱཏི པསྶསཱམཱིཏི པཛཱནཱཏི’’ཙྩེཝ ཝཏྟམཱནཀཱལཝསེན པཱལི༹ཾ ཝཏྭཱ ཨིཏོ པཊྛཱཡ ཀཏྟབྦསྶ ཉཱཎུཔྤཱདནཱདིནོ ཨཱ-ཀཱརསྶ དསྶནཏྠཾ ‘‘སབྦཀཱཡཔཊིསཾཝེདཱི ཨསྶསིསྶཱམཱི’’ཏིཨཱདིནཱ ནཡེན ཨནཱགཏཀཱལཝསེན པཱལི༹ ཨཱརོཔིཏཱཏི ཝེདིཏབྦཱ.

པསྶམྦྷཡཾ ཀཱཡསངྑཱརཾ…པེ… སིཀྑཏཱིཏི ཨོལཱ༹རིཀཾ ཨསྶཱསཔསྶཱསསངྑཱཏཾ ཀཱཡསངྑཱརཾ པསྶམྦྷེནྟོ པཊིཔྤསྶམྦྷེནྟོ ནིརོདྷེནྟོ ཝཱུཔསམེནྟོ ཨསྶསིསྶཱམི པསྶསིསྶཱམཱིཏི སིཀྑཏི.

ཏཏྲེཝཾ ཨོལཱ༹རིཀསུཁུམཏཱ ཙ པསྶདྡྷི ཙ ཝེདིཏབྦཱ – ཨིམསྶ ཧི བྷིཀྑུནོ པུབྦེ ཨཔརིགྒཧིཏཀཱལེ ཀཱཡོ ཙ ཙིཏྟཉྩ སདརཐཱ ཧོནྟི ཨོལཱ༹རིཀཱ. ཀཱཡཙིཏྟཱནཾ ཨོལཱ༹རིཀཏྟེ ཨཝཱུཔསནྟེ ཨསྶཱསཔསྶཱསཱཔི ཨོལཱ༹རིཀཱ ཧོནྟི, བལཝཏརཱ ཧུཏྭཱ པཝཏྟནྟི, ནཱསིཀཱ ནཔྤཧོཏི, མུཁེན ཨསྶསནྟོཔི པསྶསནྟོཔི ཏིཊྛཏི. ཡདཱ པནསྶ ཀཱཡོཔི ¶ ཙིཏྟམྤི པརིགྒཧིཏཱ ཧོནྟི, ཏདཱ ཏེ སནྟཱ ཧོནྟི ཝཱུཔསནྟཱ. ཏེསུ ཝཱུཔསནྟེསུ ཨསྶཱསཔསྶཱསཱ སུཁུམཱ ཧུཏྭཱ པཝཏྟནྟི, ‘‘ཨཏྠི ནུ ཁོ, ནཏྠཱི’’ཏི ཝིཙེཏབྦཱཀཱརཔྤཏྟཱ ཧོནྟི. སེཡྻཐཱཔི པུརིསསྶ དྷཱཝིཏྭཱ པབྦཏཱ ཝཱ ཨོརོཧིཏྭཱ མཧཱབྷཱརཾ ཝཱ སཱིསཏོ ཨོརོཔེཏྭཱ ཋིཏསྶ ཨོལཱ༹རིཀཱ ཨསྶཱསཔསྶཱསཱ ཧོནྟི, ནཱསིཀཱ ནཔྤཧོཏི, མུཁེན ཨསྶསནྟོཔི པསྶསནྟོཔི ཏིཊྛཏི. ཡདཱ པནེས ཏཾ པརིསྶམཾ ཝིནོདེཏྭཱ ནྷཏྭཱ ཙ པིཝིཏྭཱ ཙ ཨལླསཱཊཀཾ ཧདཡེ ཀཏྭཱ སཱིཏཱཡ ཚཱཡཱཡ ནིཔནྣོ ཧོཏི, ཨཐསྶ ཏེ ཨསྶཱསཔསྶཱསཱ སུཁུམཱ ཧོནྟི ‘‘ཨཏྠི ནུ ཁོ, ནཏྠཱི’’ཏི ཝིཙེཏབྦཱཀཱརཔྤཏྟཱ, ཨེཝམེཝཾ ཨིམསྶ བྷིཀྑུནོ ཨཔརིགྒཧིཏཀཱལེཏི ¶ ཝིཏྠཱརེཏབྦཾ. ཏཐཱ ཧིསྶ པུབྦེ ཨཔརིགྒཧིཏཀཱལེ ‘‘ཨོལཱ༹རིཀོལཱ༹རིཀེ ཀཱཡསངྑཱརེ པསྶམྦྷེམཱི’’ཏི ཨཱབྷོགསམནྣཱཧཱརམནསིཀཱརོ ནཏྠི, པརིགྒཧིཏཀཱལེ པན ཨཏྠི. ཏེནསྶ ཨཔརིགྒཧིཏཀཱལཏོ པརིགྒཧིཏཀཱལེ ཀཱཡསངྑཱརོ སུཁུམོ ཧོཏི. ཏེནཱཧུ པོརཱཎཱ –

‘‘སཱརདྡྷེ ཀཱཡེ ཙིཏྟེ ཙ, ཨདྷིམཏྟཾ པཝཏྟཏི;

ཨསཱརདྡྷམྷི ཀཱཡམྷི, སུཁུམཾ སམྤཝཏྟཏཱི’’ཏི. (ཝིསུདྡྷི. ༡.༢༢༠; པཱརཱ. ཨཊྛ. ༢.༡༦༥);

པརིགྒཧེཔི ཨོལཱ༹རིཀོ, པཋམཛ྄ཛྷཱནཱུཔཙཱརེ སུཁུམོ. ཏསྨིམྤི ཨོལཱ༹རིཀོ, པཋམཛ྄ཛྷཱནེ སུཁུམོ. པཋམཛ྄ཛྷཱནེ ཙ དུཏིཡཛ྄ཛྷཱནཱུཔཙཱརེ ཙ ཨོལཱ༹རིཀོ, དུཏིཡཛ྄ཛྷཱནེ སུཁུམོ. དུཏིཡཛ྄ཛྷཱནེ ¶ ཙ ཏཏིཡཛ྄ཛྷཱནཱུཔཙཱརེ ཙ ཨོལཱ༹རིཀོ, ཏཏིཡཛ྄ཛྷཱནེ སུཁུམོ. ཏཏིཡཛ྄ཛྷཱནེ ཙ ཙཏུཏྠཛ྄ཛྷཱནཱུཔཙཱརེ ཙ ཨོལཱ༹རིཀོ, ཙཏུཏྠཛ྄ཛྷཱནེ ཨཏིསུཁུམོ ཨཔྤཝཏྟིམེཝ པཱཔུཎཱཏི. ཨིདཾ ཏཱཝ དཱིགྷབྷཱཎཀསཾཡུཏྟབྷཱཎཀཱནཾ མཏཾ.

མཛ྄ཛྷིམབྷཱཎཀཱ པན ‘‘པཋམཛ྄ཛྷཱནེ ཨོལཱ༹རིཀོ, དུཏིཡཛ྄ཛྷཱནཱུཔཙཱརེ སུཁུམོ’’ཏི ཨེཝཾ ཧེཊྛིམཧེཊྛིམཛ྄ཛྷཱནཏོ ཨུཔརཱུཔརིཛ྄ཛྷཱནཱུཔཙཱརེཔི སུཁུམཏརཾ ཨིཙྪནྟི. སབྦེསཾཡེཝ པན མཏེན ཨཔརིགྒཧིཏཀཱལེ པཝཏྟཀཱཡསངྑཱརོ པརིགྒཧིཏཀཱལེ པཊིཔྤསྶམྦྷཏི, པརིགྒཧིཏཀཱལེ པཝཏྟཀཱཡསངྑཱརོ པཋམཛ྄ཛྷཱནཱུཔཙཱརེ…པེ… ཙཏུཏྠཛ྄ཛྷཱནཱུཔཙཱརེ པཝཏྟཀཱཡསངྑཱརོ ཙཏུཏྠཛ྄ཛྷཱནེ པཊིཔྤསྶམྦྷཏི. ཨཡཾ ཏཱཝ སམཐེ ནཡོ.

ཝིཔསྶནཱཡཾ ¶ པན ཨཔརིགྒཧིཏཀཱལེ པཝཏྟཀཱཡསངྑཱརོ ཨོལཱ༹རིཀོ, མཧཱབྷཱུཏཔརིགྒཧེ སུཁུམོ. སོཔི ཨོལཱ༹རིཀོ, ཨུཔཱདཱརཱུཔཔརིགྒཧེ སུཁུམོ. སོཔི ཨོལཱ༹རིཀོ, སཀལརཱུཔཔརིགྒཧེ སུཁུམོ. སོཔི ཨོལཱ༹རིཀོ, ཨརཱུཔཔརིགྒཧེ སུཁུམོ. སོཔི ཨོལཱ༹རིཀོ, རཱུཔཱརཱུཔཔརིགྒཧེ སུཁུམོ. སོཔི ཨོལཱ༹རིཀོ, པཙྩཡཔརིགྒཧེ སུཁུམོ. སོཔི ཨོལཱ༹རིཀོ, སཔྤཙྩཡནཱམརཱུཔདསྶནེ སུཁུམོ. སོཔི ཨོལཱ༹རིཀོ, ལཀྑཎཱརམྨཎིཀ ཝིཔསྶནཱཡ སུཁུམོ. སོཔི དུབྦལཝིཔསྶནཱཡ ཨོལཱ༹རིཀོ, བལཝཝིཔསྶནཱཡ སུཁུམོ. ཏཏྠ པུབྦེ ཝུཏྟནཡེནེཝ པུརིམསྶ པུརིམསྶ པཙྪིམེན པཙྪིམེན པཊིཔྤསྶདྡྷི ཝེདིཏབྦཱ. ཨེཝམེཏྠ ཨོལཱ༹རིཀསུཁུམཏཱ པཊིཔྤསྶདྡྷི ཙ ¶ ཝེདིཏབྦཱ. ཨཡཾ ཏཱཝེཏྠ ཀཱཡཱནུཔསྶནཱཝསེན ཝུཏྟསྶ པཋམཙཏུཀྐསྶ ཨནུཔུབྦཔདཝཎྞནཱ.

ཡསྨཱ པནེཏྠ ཨིདམེཝ ཙཏུཀྐཾ ཨཱདིཀམྨིཀསྶ ཀམྨཊྛཱནཝསེན ཝུཏྟཾ, ཨིཏརཱནི པན ཏཱིཎི ཙཏུཀྐཱནི ཨེཏྠ པཏྟཛ྄ཛྷཱནསྶ ཝེདནཱཙིཏྟདྷམྨཱནུཔསྶནཱཝསེན, ཏསྨཱ ཨིམཾ ཀམྨཊྛཱནཾ བྷཱཝེཏྭཱ ཨཱནཱཔཱནཙཏུཀྐཛ྄ཛྷཱནཔདཊྛཱནཱཡ ཝིཔསྶནཱཡ སཧ པཊིསམྦྷིདཱཧི ཨརཧཏྟཾ པཱཔུཎིཏུཀཱམེན ཨཱདིཀམྨིཀེན ཀུལཔུཏྟེན ཝིསུདྡྷིམགྒེ ཝུཏྟནཡེན སཱིལཔརིསོདྷནཱདཱིནི སབྦཀིཙྩཱནི ཀཏྭཱ སཏྟངྒསམནྣཱགཏསྶ ཨཱཙརིཡསྶ སནྟིཀེ པཉྩསནྡྷིཀཾ ཀམྨཊྛཱནཾ ཨུགྒཧེཏབྦཾ. ཏཏྲིམེ པཉྩ སནྡྷཡོ ཨུགྒཧོ པརིཔུཙྪཱ ཨུཔཊྛཱནཾ ཨཔྤནཱ ལཀྑཎནྟི. ཏཏྠ ཨུགྒཧོ ནཱམ ཀམྨཊྛཱནསྶ ཨུགྒཎྷནཾ. པརིཔུཙྪཱ ནཱམ ཀམྨཊྛཱནསྶ པརིཔུཙྪནཾ. ཨུཔཊྛཱནཾ ནཱམ ཀམྨཊྛཱནསྶ ཨུཔཊྛཱནཾ. ཨཔྤནཱ ནཱམ ཀམྨཊྛཱནསྶ ཨཔྤནཱ. ལཀྑཎཾ ནཱམ ཀམྨཊྛཱནསྶ ལཀྑཎཾ, ‘‘ཨེཝཾ ལཀྑཎམིདཾ ཀམྨཊྛཱན’’ནྟི ཀམྨཊྛཱནསབྷཱཝཱུཔདྷཱརཎནྟི ཝུཏྟཾ ཧོཏི.

ཨེཝཾ ¶ པཉྩསནྡྷིཀཾ ཀམྨཊྛཱནཾ ཨུགྒཎྷནྟོ ཨཏྟནཱཔི ན ཀིལམཏི, ཨཱཙརིཡམྤི ན ཝིཧེསེཏི. ཏསྨཱ ཐོཀཾ ཨུདྡིསཱཔེཏྭཱ བཧུཾ ཀཱལཾ སཛ྄ཛྷཱཡིཏྭཱ ཨེཝཾ པཉྩསནྡྷིཀཾ ཀམྨཊྛཱནཾ ཨུགྒཧེཏྭཱ ཨཱཙརིཡསྶ སནྟིཀེ ཝཱ ཨཉྙཏྠ ཝཱ ཨཊྛཱརས དོསཡུཏྟེ ཝིཧཱརེ ཝཛྫེཏྭཱ པཉྩངྒསམནྣཱགཏེ སེནཱསནེ ཝསནྟེན ཨུཔཙྪིནྣཁུདྡཀཔལིབོདྷེན ཀཏབྷཏྟཀིཙྩེན བྷཏྟསམྨདཾ པཊིཝིནོདེཏྭཱ སུཁནིསིནྣེན རཏནཏྟཡགུཎཱནུསྶརཎེན ཙིཏྟཾ སམྤཧཾསེཏྭཱ ཨཱཙརིཡུགྒཧཏོ ¶ ཨེཀཔདམྤི ཨཔརིཧཱཔེནྟེན ཨིདཾ ཨཱནཱཔཱནསྶཏིཀམྨཊྛཱནཾ མནསི ཀཱཏབྦཾ. ཏཏྲཱཡཾ མནསིཀཱརཝིདྷི –

‘‘གཎནཱ ཨནུབནྡྷནཱ, ཕུསནཱ ཋཔནཱ སལླཀྑཎཱ;

ཝིཝཊྚནཱ པཱརིསུདྡྷི, ཏེསཉྩ པཊིཔསྶནཱ’’ཏི.

ཏཏྠ ¶ གཎནཱཏི གཎནཱཡེཝ. ཨནུབནྡྷནཱཏི ཨནུགམནཱ. ཕུསནཱཏི ཕུཊྛཊྛཱནཾ. ཋཔནཱཏི ཨཔྤནཱ. སལླཀྑཎཱཏི ཝིཔསྶནཱ. ཝིཝཊྚནཱཏི མགྒོ. པཱརིསུདྡྷཱིཏི ཕལཾ. ཏེསཉྩ པཊིཔསྶནཱཏི པཙྩཝེཀྑཎཱ. ཏཏྠ ཨིམིནཱ ཨཱདིཀམྨིཀེན ཀུལཔུཏྟེན པཋམཾ གཎནཱཡ ཨིདཾ ཀམྨཊྛཱནཾ མནསི ཀཱཏབྦཾ. གཎེནྟེན པན པཉྩནྣཾ ཧེཊྛཱ ན ཋཔེཏབྦཾ, དསནྣཾ ཨུཔརི ན ནེཏབྦཾ, ཨནྟརཱ ཁཎྜཾ ན དསྶེཏབྦཾ. པཉྩནྣཾ ཧེཊྛཱ ཋཔེནྟསྶ ཧི སམྦཱདྷེ ཨོཀཱསེ ཙིཏྟུཔྤཱདོ ཝིཔྥནྡཏི སམྦཱདྷེ ཝཛེ སནྣིརུདྡྷགོགཎོ ཝིཡ. དསནྣཾ ཨུཔརི ནེནྟསྶ གཎནནིསྶིཏོཝ ཙིཏྟུཔྤཱདོ ཧོཏི. ཨནྟརཱ ཁཎྜཾ དསྶེནྟསྶ ‘‘སིཁཱཔྤཏྟཾ ནུ ཁོ མེ ཀམྨཊྛཱནཾ, ནོ’’ཏི ཙིཏྟཾ ཝིཀམྤཏི, ཏསྨཱ ཨེཏེ དོསེ ཝཛྫེཏྭཱ གཎེཏབྦཾ.