📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཁུདྡཀནིཀཱཡེ

པཊིསམྦྷིདཱམགྒ-ཨཊྛཀཐཱ

(དུཏིཡོ བྷཱགོ)

༦༨. ཨིནྡྲིཡཔརོཔརིཡཏྟཉཱཎནིདྡེསཝཎྞནཱ

༡༡༡. ཨིནྡྲིཡཔརོཔརིཡཏྟཉཱཎནིདྡེསེ ཏཐཱགཏསྶཱཏི ཝཙནེ ཨུདྡེསེ སརཱུཔཏོ ཨཝིཛྫམཱནེཔི ‘‘ཚ ཉཱཎཱནི ཨསཱདྷཱརཎཱནི སཱཝཀེཧཱི’’ཏི (པཊི. མ. མཱཏིཀཱ ༡.༧༣) ཝུཏྟཏྟཱ ‘‘ཏཐཱགཏསྶཱ’’ཏི ཝུཏྟམེཝ ཧོཏི. ཏསྨཱ ཨུདྡེསེ ཨཏྠཏོ སིདྡྷསྶ ཏཐཱགཏཝཙནསྶ ནིདྡེསེ གཧཎཾ ཀཏཾ. སཏྟེ པསྶཏཱིཏི རཱུཔཱདཱིསུ ཚནྡརཱགེན སཏྟཏཱཡ ལགྒཏཱཡ སཏྟཱ, ཏེ སཏྟེ ཨིནྡྲིཡཔརོཔརིཡཏྟཉཱཎེན ཙཀྑུནཱ པསྶཏི ཨོལོཀེཏི. ཨཔྤརཛཀྑེཏི པཉྙཱམཡེ ཨཀྑིམྷི ཨཔྤཾ རཱགཱདིརཛོ ཨེཏེསནྟི ཨཔྤརཛཀྑཱ, ཨཔྤཾ རཱགཱདིརཛོ ཨེཏེསནྟི ཝཱ ཨཔྤརཛཀྑཱ. ཏེ ཨཔྤརཛཀྑེ. མཧཱརཛཀྑེཏི པཉྙཱམཡེ ཨཀྑིམྷི མཧནྟཾ རཱགཱདིརཛོ ཨེཏེསནྟི མཧཱརཛཀྑཱ, མཧནྟཾ རཱགཱདིརཛོ ཨེཏེསནྟི ཝཱ མཧཱརཛཀྑཱ. ཏིཀྑིནྡྲིཡེ མུདིནྡྲིཡེཏི ཏིཀྑཱནི སདྡྷཱདཱིནི ཨིནྡྲིཡཱནི ཨེཏེསནྟི ཏིཀྑིནྡྲིཡཱ, མུདཱུནི སདྡྷཱདཱིནི ཨིནྡྲིཡཱནི ཨེཏེསནྟི མུདིནྡྲིཡཱ. སྭཱཀཱརེ དྭཱཀཱརེཏི སུནྡརཱ སདྡྷཱདཡོ ཨཱཀཱརཱ ཀོཊྛཱསཱ ཨེཏེསནྟི སྭཱཀཱརཱ, ཀུཙྪིཏཱ གརཧིཏཱ སདྡྷཱདཡོ ཨཱཀཱརཱ ཀོཊྛཱསཱ ཨེཏེསནྟི དྭཱཀཱརཱ. སུཝིཉྙཱཔཡེ དུཝིཉྙཱཔཡེཏི ཡེ ཀཐིཏཾ ཀཱརཎཾ སལླཀྑེནྟི སུཁེན སཀྐཱ ཧོནྟི ཝིཉྙཱཔེཏུཾ, ཏེ སུཝིཉྙཱཔཡཱ, ཏབྦིཔརཱིཏཱ དུཝིཉྙཱཔཡཱ. ཨཔྤེཀཙྩེ པརལོཀཝཛྫབྷཡདསྶཱཝིནོཏི ཨཔི ཨེཀེ པརལོཀཉྩེཝ རཱགཱདིཝཛྫཉྩ བྷཡཏོ པསྶནྟེ, ཨིམསྶ པན པདསྶ ནིདྡེསེ པརལོཀསྶེཝ ན ཝུཏྟཏྟཱ ཁནྡྷཱདིལོཀེ ཙ རཱགཱདིཝཛྫེ ཙ པརཾ བཱལ༹ྷཾ བྷཡཾ པསྶནསཱིལཱཏི པརལོཀཝཛྫབྷཡདསྶཱཝིནོ. ཏེ པརལོཀཝཛྫབྷཡདསྶཱཝིནེཏི ཨེཝམཏྠོ གཧེཏབྦོ. ཨཔྤེཀཙྩེ ན པརལོཀཝཛྫབྷཡདསྶཱཝིནོཏི ཏབྦིཔརཱིཏེ. ལོཀོཏི ཙ ལུཛྫནཔལུཛྫནཊྛེན. ཝཛྫནྟི ཙ ཝཛྫནཱིཡཊྛེན. ཨེཏྟཱཝཏཱ ཨུདྡེསསྶ ནིདྡེསོ ཀཏོ ཧོཏི.

པུན ནིདྡེསསྶ པཊིནིདྡེསཾ ཀརོནྟོ ཨཔྤརཛཀྑེ མཧཱརཛཀྑེཏིཨཱདིམཱཧ. ཏཏྠ ཏཱིསུ རཏནེསུ ཨོཀཔྤནསངྑཱཏཱ སདྡྷཱ ཨསྶ ཨཏྠཱིཏི སདྡྷོ. སོ སདྡྷཱསམྤནྣོ པུགྒལོ ཨསྶདྡྷིཡརཛསྶ ཙེཝ ཨསྶདྡྷིཡམཱུལཀསྶ སེསཱཀུསལརཛསྶ ཙ ཨཔྤཀཏྟཱ ཨཔྤརཛཀྑོ. ནཏྠི ཨེཏསྶ སདྡྷཱཏི ཨསྶདྡྷོ. སོ ཝུཏྟཔྤཀཱརསྶ རཛསྶ མཧནྟཏྟཱ མཧཱརཛཀྑོ. ཨཱརདྡྷཾ ཝཱིརིཡམནེནཱཏི ཨཱརདྡྷཝཱིརིཡོ. སོ ཀོསཛྫརཛསྶ ཙེཝ ཀོསཛྫམཱུལཀསྶ སེསཱཀུསལརཛསྶ ཙ ཨཔྤཀཏྟཱ ཨཔྤརཛཀྑོ. ཧཱིནཝཱིརིཡཏྟཱ ཀུཙྪིཏེན ཨཱཀཱརེན སཱིདཏཱིཏི ཀུསཱིདོ, ཀུསཱིདོ ཨེཝ ཀུསཱིཏོ. སོ ཝུཏྟཔྤཀཱརསྶ རཛསྶ མཧནྟཏྟཱ མཧཱརཛཀྑོ. ཨཱརམྨཎཾ ཨུཔེཙྩ ཋིཏཱ སཏི ཨསྶཱཏི ཨུཔཊྛིཏསྶཏི. སོ མུཊྛསྶཙྩརཛསྶ ཙེཝ མུཊྛསྶཙྩམཱུལཀསྶ སེསཱཀུསལརཛསྶ ཙ ཨཔྤཀཏྟཱ ཨཔྤརཛཀྑོ. མུཊྛཱ ནཊྛཱ སཏི ཨསྶཱཏི མུཊྛསྶཏི. སོ ཝུཏྟཔྤཀཱརསྶ རཛསྶ མཧནྟཏྟཱ མཧཱརཛཀྑོ. ཨཔྤནཱསམཱདྷིནཱ ཨུཔཙཱརསམཱདྷིནཱ ཝཱ ཨཱརམྨཎེ སམཾ, སམྨཱ ཝཱ ཨཱཧིཏོ ཋིཏོཏི སམཱཧིཏོ, སམཱཧིཏཙིཏྟོཏི ཝཱ སམཱཧིཏོ. སོ ཨུདྡྷཙྩརཛསྶ ཙེཝ ཨུདྡྷཙྩམཱུལཀསྶ སེསཱཀུསལརཛསྶ ཙ ཨཔྤཀཏྟཱ ཨཔྤརཛཀྑོ. ན སམཱཧིཏོ ཨསམཱཧིཏོ. སོ ཝུཏྟཔྤཀཱརསྶ རཛསྶ མཧནྟཏྟཱ མཧཱརཛཀྑོ. ཨུདཡཏྠགཱམིནཱི པཉྙཱ ཨསྶ ཨཏྠཱིཏི པཉྙཝཱ. སོ མོཧརཛསྶ ཙེཝ མོཧམཱུལཀསྶ སེསཱཀུསལརཛསྶ ཙ ཨཔྤཀཏྟཱ ཨཔྤརཛཀྑོ. མོཧམཱུལ༹ྷཏྟཱ དུཊྛཱ པཉྙཱ ཨསྶཱཏི དུཔྤཉྙོ. སོ ཝུཏྟཔྤཀཱརསྶ རཛསྶ མཧནྟཏྟཱ མཧཱརཛཀྑོ. སདྡྷོ པུགྒལོ ཏིཀྑིནྡྲིཡོཏི བཧུལཾ ཨུཔྤཛྫམཱནཱཡ བལཝཏིཡཱ སདྡྷཱཡ སདྡྷོ, ཏེནེཝ སདྡྷིནྡྲིཡེན ཏིཀྑིནྡྲིཡོ. ཨསྶདྡྷོ པུགྒལོ མུདིནྡྲིཡོཏི བཧུལཾ ཨུཔྤཛྫམཱནེན ཨསྶདྡྷིཡེན ཨསྶདྡྷོ, ཨནྟརནྟརཱ ཨུཔྤཛྫམཱནེན དུབྦལེན སདྡྷིནྡྲིཡེན མུདིནྡྲིཡོ. ཨེས ནཡོ སེསེསུཔི. སདྡྷོ པུགྒལོ སྭཱཀཱརོཏི ཏཱཡ ཨེཝ སདྡྷཱཡ སོབྷནཱཀཱརོ. ཨསྶདྡྷོ པུགྒལོ དྭཱཀཱརོཏི ཏེནེཝ ཨསྶདྡྷིཡེན ཝིརཱུཔཱཀཱརོ. ཨེས ནཡོ སེསེསུཔི. སུཝིཉྙཱཔཡོཏི སུཁེན ཝིཉྙཱཔེཏུཾ སཀྐུཎེཡྻོ. དུཝིཉྙཱཔཡོཏི དུཀྑེན ཝིཉྙཱཔེཏུཾ སཀྐུཎེཡྻོ. པརལོཀཝཛྫབྷཡདསྶཱཝཱིཏི ཨེཏྠ ཡསྨཱ པཉྙཱསམྤནྣསྶེཝ སདྡྷཱདཱིནི སུཔརིསུདྡྷཱནི ཧོནྟི, ཏསྨཱ སུཔརིསུདྡྷསདྡྷཱདིསམྤནྣོ ཏཾསམྤཡུཏྟཱཡ, སུཔརིསུདྡྷསདྡྷཱདིསམྤནྣོཔི ཝཱ ཏཔྤཙྩཡཱཡ པཉྙཱཡ པརལོཀཝཛྫབྷཡདསྶཱཝཱི ཧོཏི. ཏསྨཱ ཨེཝ ཧི སདྡྷཱདཡོཔི ཙཏྟཱརོ ‘‘པརལོཀཝཛྫབྷཡདསྶཱཝཱི’’ཏི ཝུཏྟཱ.

༡༡༢. ཨིདཱནི ‘‘པརལོཀཝཛྫབྷཡདསྶཱཝཱི’’ཏི ཨེཏྠ ཝུཏྟཾ ལོཀཉྩ ཝཛྫཉྩ དསྶེཏུཾ ལོཀོཏིཨཱདིམཱཧ. ཨེཏྠ ཁནྡྷཱ ཨེཝ ལུཛྫནཔལུཛྫནཊྛེན ལོཀོཏི ཁནྡྷལོཀོ. སེསདྭཡེཔི ཨེསེཝ ནཡོ. ཝིཔཏྟིབྷཝལོཀོཏི ཨཔཱཡལོཀོ. སོ ཧི ཨནིཊྛཕལཏྟཱ ཝིརཱུཔོ ལཱབྷོཏི ཝིཔཏྟི, བྷཝཏཱིཏི བྷཝོ, ཝིཔཏྟི ཨེཝ བྷཝོ ཝིཔཏྟིབྷཝོ, ཝིཔཏྟིབྷཝོ ཨེཝ ལོཀོ ཝིཔཏྟིབྷཝལོཀོ. ཝིཔཏྟིསམྦྷཝལོཀོཏི ཨཔཱཡཱུཔགཾ ཀམྨཾ. ཏཉྷི སམྦྷཝཏི ཨེཏསྨཱ ཕལནྟི སམྦྷཝོ, ཝིཔཏྟིཡཱ སམྦྷཝོ ཝིཔཏྟིསམྦྷཝོ, ཝིཔཏྟིསམྦྷཝོ ཨེཝ ལོཀོ ཝིཔཏྟིསམྦྷཝལོཀོ. སམྤཏྟིབྷཝལོཀོཏི སུགཏིལོཀོ. སོ ཧི ཨིཊྛཕལཏྟཱ སུནྡརོ ལཱབྷོཏི སམྤཏྟི, བྷཝཏཱིཏི བྷཝོ, སམྤཏྟི ཨེཝ བྷཝོ སམྤཏྟིབྷཝོ, སམྤཏྟིབྷཝོ ཨེཝ ལོཀོ སམྤཏྟིབྷཝལོཀོ. སམྤཏྟིསམྦྷཝལོཀོཏི སུགཏཱུཔགཾ ཀམྨཾ. ཏཉྷི སམྦྷཝཏི ཨེཏསྨཱ ཕལནྟི སམྦྷཝོ, སམྤཏྟིཡཱ སམྦྷཝོ སམྤཏྟིསམྦྷཝོ, སམྤཏྟིསམྦྷཝོ ཨེཝ ལོཀོ སམྤཏྟིསམྦྷཝལོཀོ. ཨེཀོ ལོཀོཏིཨཱདཱིནི ཧེཊྛཱ ཝུཏྟཏྠཱནེཝ.

ཝཛྫནྟི ནཔུཾསཀཝཙནཾ ཨསུཀོཏི ཨནིདྡིཊྛཏྟཱ ཀཏཾ. ཀིལེསཱཏི རཱགཱདཡོ. དུཙྩརིཏཱཏི པཱཎཱཏིཔཱཏཱདཡོ. ཨབྷིསངྑཱརཱཏི པུཉྙཱབྷིསངྑཱརཱདཡོ. བྷཝགཱམིཀམྨཱཏི ཨཏྟནོ ཝིཔཱཀདཱནཝསེན བྷཝཾ གཙྪནྟཱིཏི བྷཝགཱམིནོ, ཨབྷིསངྑཱརེསུཔི ཝིཔཱཀཛནཀཱནེཝ ཀམྨཱནི ཝུཏྟཱནི. ཨིཏཱིཏི ཝུཏྟཔྤཀཱརནིདསྶནཾ. ཨིམསྨིཉྩ ལོཀེ ཨིམསྨིཉྩ ཝཛྫེཏི ཝུཏྟཔྤཀཱརེ ལོཀེ ཙ ཝཛྫེ ཙ. ཏིབྦཱ བྷཡསཉྙཱཏི བལཝཏཱི བྷཡསཉྙཱ. ཏིབྦཱཏི པརསདྡསྶ ཨཏྠོ ཝུཏྟོ, བྷཡསཉྙཱཏི བྷཡསདྡསྶ, ལོཀཝཛྫདྭཡམྤི ཧི བྷཡཝཏྠུཏྟཱ སཡཉྩ སབྷཡཏྟཱ བྷཡཾ, བྷཡམིཏི སཉྙཱ བྷཡསཉྙཱ. པཙྩུཔཊྛིཏཱ ཧོཏཱིཏི ཏཾ ཏཾ པཊིཙྩ ཨུཔེཙྩ ཋིཏཱ ཧོཏི. སེཡྻཐཱཔི ཨུཀྑིཏྟཱསིཀེ ཝདྷཀེཏི ཡཐཱ ནཱམ པཧརིཏུཾ ཨུཙྩཱརིཏཁགྒེ པཙྩཱམིཏྟེ ཏིབྦཱ བྷཡསཉྙཱ པཙྩུཔཊྛིཏཱ ཧོཏི, ཨེཝམེཝ ལོཀེ ཙ ཝཛྫེ ཙ ཏིབྦཱ བྷཡསཉྙཱ པཙྩུཔཊྛིཏཱ ཧོཏི. ཨིམེཧི པཉྙཱསཱཡ ཨཱཀཱརེཧཱིཏི ཨཔྤརཛཀྑཔཉྩཀཱདཱིསུ དསསུ པཉྩཀེསུ ཨེཀེཀསྨིཾ པཉྩནྣཾ པཉྩནྣཾ ཨཱཀཱརཱནཾ ཝསེན པཉྙཱསཱཡ ཨཱཀཱརེཧི. ཨིམཱནི པཉྩིནྡྲིཡཱནཱིཏི སདྡྷིནྡྲིཡཱདཱིནི པཉྩིནྡྲིཡཱནི. ཛཱནཱཏཱིཏི ཏཐཱགཏོ པཉྙཱཡ པཛཱནཱཏི. པསྶཏཱིཏི དིབྦཙཀྑུནཱ དིཊྛཾ ཝིཡ ཀརོཏི. ཨཉྙཱཏཱིཏི སབྦཱཀཱརམརིཡཱདཱཧི ཛཱནཱཏི. པཊིཝིཛ྄ཛྷཏཱིཏི ཨེཀདེསཾ ཨསེསེཏྭཱ ནིརཝསེསདསྶནཝསེན པཉྙཱཡ པདཱལེཏཱིཏི.

ཨིནྡྲིཡཔརོཔརིཡཏྟཉཱཎནིདྡེསཝཎྞནཱ ནིཊྛིཏཱ.

༦༩. ཨཱསཡཱནུསཡཉཱཎནིདྡེསཝཎྞནཱ

༡༡༣. ཨཱསཡཱནུསཡཉཱཎནིདྡེསེ ཨིདྷ ཏཐཱགཏོཏིཨཱདི པཉྩདྷཱ ཋཔིཏོ ནིདྡེསོ. ཏཏྠ ཨཱསཡཱནུསཡཱ ཝུཏྟཏྠཱ ཨེཝ. ཙརིཏནྟི པུབྦེ ཀཏཾ ཀུསལཱཀུསལཾ ཀམྨཾ. ཨདྷིམུཏྟིནྟི སམྤཏི ཀུསལེ ཨཀུསལེ ཝཱ ཙིཏྟཝོསགྒོ. བྷབྦཱབྷབྦེཏི བྷབྦེ ཙ ཨབྷབྦེ ཙ. ཨརིཡཱཡ ཛཱཏིཡཱ སམྦྷཝནྟི ཛཱཡནྟཱིཏི བྷབྦཱ. ཝཏྟམཱནསམཱིཔེ ཝཏྟམཱནཝཙནཾ. བྷཝིསྶནྟི ཛཱཡིསྶནྟཱིཏི ཝཱ བྷབྦཱ, བྷཱཛནབྷཱུཏཱཏི ཨཏྠོ. ཡེ ཨརིཡམགྒཔཊིཝེདྷསྶ ཨནུཙྪཝིཀཱ ཨུཔནིསྶཡསམྤནྣཱ, ཏེ བྷབྦཱ. ཝུཏྟཔཊིཔཀྑཱ ཨབྷབྦཱ.

ཀཏམོ སཏྟཱནཾ ཨཱསཡོཏིཨཱདི ནིདྡེསསྶ པཊིནིདྡེསོ. ཏཏྠ སསྶཏོཏི ནིཙྩོ. ལོཀོཏི ཨཏྟཱ. ཨིདྷ སརཱིརཾཡེཝ ནསྶཏི, ཨཏྟཱ པན ཨིདྷ པརཏྠ ཙ སོཡེཝཱཏི མཉྙནྟི. སོ ཧི སཡཾཡེཝ ཨཱལོཀེཏཱིཏི ཀཏྭཱ ‘‘ལོཀོ’’ཏི མཉྙནྟི. ཨསསྶཏོཏི ཨནིཙྩོ. ཨཏྟཱ སརཱིརེནེཝ སཧ ནསྶཏཱིཏི མཉྙནྟི. ཨནྟཝཱཏི པརིཏྟེ ཀསིཎེ ཛྷཱནཾ ཨུཔྤཱདེཏྭཱ ཏཾཔརིཏྟཀསིཎཱརམྨཎཾ ཙིཏྟཾ སཔརིཡནྟོ ཨཏྟཱཏི མཉྙནྟི. ཨནནྟཝཱཏི ན ཨནྟཝཱ ཨཔྤམཱཎེ ཀསིཎེ ཛྷཱནཾ ཨུཔྤཱདེཏྭཱ ཏཾཨཔྤམཱཎཀསིཎཱརམྨཎཾ ཙིཏྟཾ ཨཔརིཡནྟོ ཨཏྟཱཏི མཉྙནྟི. ཏཾ ཛཱིཝཾ ཏཾ སརཱིརནྟི ཛཱིཝོ ཙ སརཱིརཉྩ ཏཾཡེཝ. ཛཱིཝོཏི ཨཏྟཱ, ལིངྒཝིཔལླཱསེན ནཔུཾསཀཝཙནཾ ཀཏཾ. སརཱིརནྟི རཱསཊྛེན ཁནྡྷཔཉྩཀཾ. ཨཉྙཾ ཛཱིཝཾ ཨཉྙཾ སརཱིརནྟི ཨཉྙོ ཛཱིཝོ ཨཉྙཾ ཁནྡྷཔཉྩཀཾ. ཧོཏི ཏཐཱགཏོ པརཾ མརཎཱཏི ཁནྡྷཱ ཨིདྷེཝ ཝིནསྶནྟི, སཏྟོ མརཎཏོ པརཾ ཧོཏི ཝིཛྫཏི ན ནསྶཏི. ‘‘ཏཐཱགཏོ’’ཏི ཙེཏྠ སཏྟཱདྷིཝཙནནྟི ཝདནྟི. ཀེཙི པན ‘‘ཏཐཱགཏོཏི ཨརཧཱ’’ཏི ཝདནྟི. ཨིམེ ‘‘ན ཧོཏཱི’’ཏི པཀྑེ དོསཾ དིསྭཱ ཨེཝཾ གཎྷནྟི. ན ཧོཏི ཏཐཱགཏོ པརཾ མརཎཱཏི ཁནྡྷཱཔི ཨིདྷེཝ ནསྶནྟི, ཏཐཱགཏོ ཙ མརཎཏོ པརཾ ན ཧོཏི ཨུཙྪིཛྫཏི ཝིནསྶཏི. ཨིམེ ‘‘ཧོཏཱི’’ཏི པཀྑེ དོསཾ དིསྭཱ ཨེཝཾ གཎྷནྟི. ཧོཏི ཙ ན ཙ ཧོཏཱིཏི ཨིམེ ཨེཀེཀཔཀྑཔརིགྒཧེ དོསཾ དིསྭཱ ཨུབྷཡཔཀྑཾ གཎྷནྟི. ནེཝ ཧོཏི ན ན ཧོཏཱིཏི ཨིམེ ཨུབྷཡཔཀྑཔརིགྒཧེ ཨུབྷཡདོསཱཔཏྟིཾ དིསྭཱ ‘‘ཧོཏཱིཏི ཙ ན ཧོཏི, ནེཝ ཧོཏཱིཏི ཙ ན ཧོཏཱི’’ཏི ཨམརཱཝིཀྑེཔཔཀྑཾ གཎྷནྟི.

ཨཡཾ པནེཏྠ ཨཊྛཀཐཱནཡོ – ‘‘སསྶཏོ ལོཀོཏི ཝཱ’’ཏིཨཱདཱིཧི དསཧཱཀཱརེཧི དིཊྛིཔབྷེདོཝ ཝུཏྟོ. ཏཏྠ སསྶཏོ ལོཀོཏི ཙ ཁནྡྷཔཉྩཀཾ ལོཀོཏི གཧེཏྭཱ ‘‘ཨཡཾ ལོཀོ ནིཙྩོ དྷུཝོ སབྦཀཱལིཀོ’’ཏི གཎྷནྟསྶ སསྶཏནྟི གཧཎཱཀཱརཔྤཝཏྟཱ དིཊྛི. ཨསསྶཏོཏི ཏམེཝ ལོཀཾ ‘‘ཨུཙྪིཛྫཏི ཝིནསྶཏཱི’’ཏི གཎྷནྟསྶ ཨུཙྪེདགྒཧཎཱཀཱརཔྤཝཏྟཱ དིཊྛི. ཨནྟཝཱཏི པརིཏྟཀསིཎལཱབྷིནོ སུཔྤམཏྟེ ཝཱ སརཱཝམཏྟེ ཝཱ ཀསིཎེ སམཱཔནྣསྶ ཨནྟོསམཱཔཏྟིཡཾ པཝཏྟིཏརཱུཔཱརཱུཔདྷམྨེ ‘‘ལོཀོ’’ཏི ཙ ཀསིཎཔརིཙྪེདནྟེན ‘‘ཨནྟཝཱ’’ཏི ཙ གཎྷནྟསྶ ‘‘ཨནྟཝཱ ལོཀོ’’ཏི གཧཎཱཀཱརཔྤཝཏྟཱ དིཊྛི. སཱ སསྶཏདིཊྛིཔི ཧོཏི ཨུཙྪེདདིཊྛིཔི. ཝིཔུལཀསིཎལཱབྷིནོ པན ཏསྨིཾ ཀསིཎེ སམཱཔནྣསྶ ཨནྟོསམཱཔཏྟིཡཾ པཝཏྟིཏརཱུཔཱརཱུཔདྷམྨེ ‘‘ལོཀོ’’ཏི ཙ ཀསིཎཔརིཙྪེདནྟེན ‘‘ན ཨནྟཝཱ’’ཏི ཙ གཎྷནྟསྶ ‘‘ཨནནྟཝཱ ལོཀོ’’ཏི གཧཎཱཀཱརཔྤཝཏྟཱ དིཊྛི. སཱ སསྶཏདིཊྛིཔི ཧོཏི ཨུཙྪེདདིཊྛིཔི. ཏཾ ཛཱིཝཾ ཏཾ སརཱིརནྟི བྷེདནདྷམྨསྶ སརཱིརསྶེཝ ‘‘ཛཱིཝ’’ནྟི གཧིཏཏྟཱ ‘‘སརཱིརེ ཨུཙྪིཛྫམཱནེ ཛཱིཝམྤི ཨུཙྪིཛྫཏཱི’’ཏི ཨུཙྪེདགྒཧཎཱཀཱརཔྤཝཏྟཱ དིཊྛི. དུཏིཡཔདེ སརཱིརཏོ ཨཉྙསྶ ཛཱིཝསྶ གཧིཏཏྟཱ ‘‘སརཱིརེ ཨུཙྪིཛྫམཱནེཔི ཛཱིཝཾ ན ཨུཙྪིཛྫཏཱི’’ཏི སསྶཏགྒཧཎཱཀཱརཔྤཝཏྟཱ དིཊྛི. ཧོཏི ཏཐཱགཏོཏིཨཱདཱིསུ ‘‘སཏྟོ ཏཐཱགཏོ ནཱམ, སོ པརཾ མརཎཱ ཧོཏཱི’’ཏི གཎྷཏོ པཋམཱ སསྶཏདིཊྛི. ‘‘ན ཧོཏཱི’’ཏི གཎྷཏོ དུཏིཡཱ ཨུཙྪེདདིཊྛི. ‘‘ཧོཏི ཙ ན ཙ ཧོཏཱི’’ཏི གཎྷཏོ ཏཏིཡཱ ཨེཀཙྩསསྶཏདིཊྛི. ‘‘ནེཝ ཧོཏི ན ན ཧོཏཱི’’ཏི གཎྷཏོ ཙཏུཏྠཱ ཨམརཱཝིཀྑེཔདིཊྛཱིཏི.

ཨིཏཱིཏི ཝུཏྟཔྤཀཱརདིཊྛིནིསྶཡནིདསྶནཾ. བྷཝདིཊྛིསནྣིསྶིཏཱ ཝཱ སཏྟཱ ཧོནྟི ཝིབྷཝདིཊྛིསནྣིསྶིཏཱ ཝཱཏི བྷཝོ ཝུཙྩཏི སསྶཏོ, སསྶཏཝསེན ཨུཔྤཛྫམཱནདིཊྛི བྷཝདིཊྛི, བྷཝོཏི དིཊྛཱིཏི ཝུཏྟཾ ཧོཏི. ཝིབྷཝོ ཝུཙྩཏི ཨུཙྪེདོ, ཨུཙྪེདཝསེན ཨུཔྤཛྫམཱནདིཊྛི ཝིབྷཝདིཊྛི, ཝིབྷཝོཏི དིཊྛཱིཏི ཝུཏྟཾ ཧོཏི. ཝུཏྟཔྤཀཱརཱ དསཝིདྷཱ དིཊྛི བྷཝདིཊྛི ཙ ཝིབྷཝདིཊྛི ཙཱཏི དྭིདྷཱཝ ཧོཏི. ཏཱསུ དྭཱིསུ ཨེཀེཀཾ སནྣིསྶིཏཱ ཨཔསྶིཏཱ ཨལླཱིནཱ སཏྟཱ ཧོནྟི.

ཨེཏེ ཝཱ པན ཨུབྷོ ཨནྟེ ཨནུཔགམྨཱཏི ཨེཏྠ ‘‘ཨགྒིཏོ ཝཱ ཨུདཀཏོ ཝཱ མིཐུབྷེདཱ ཝཱ’’ཏིཨཱདཱིསུ (དཱི. ནི. ༢.༡༥༢) ཝིཡ ཝཱ-སདྡོ སམུཙྩཡཏྠོ. ཨེཏེ ཝུཏྟཔྤཀཱརེ སསྶཏུཙྪེདཝསེན དྭེ པཀྑེ ཙ ན ཨུཔགནྟྭཱ ཨནལླཱིཡིཏྭཱ པཧཱཡཱཏི ཨཏྠོ. ‘‘ཨནུལོམིཀཱ ཝཱ ཁནྟཱི’’ཏི ཝིཀཔྤཏྠོཝ. ཨིདཔྤཙྩཡཏཱཔཊིཙྩསམུཔྤནྣེསཱུཏི ཨིམེསཾ ཛརཱམརཎཱདཱིནཾ པཙྩཡཱ ཨིདཔྤཙྩཡཱ, ཨིདཔྤཙྩཡཱ ཨེཝ ཨིདཔྤཙྩཡཏཱ, ཨིདཔྤཙྩཡཱནཾ ཝཱ སམཱུཧོ ཨིདཔྤཙྩཡཏཱ. ལཀྑཎཾ པནེཏྠ སདྡསཏྠཏོ པརིཡེསིཏབྦཾ. ཏེ ཏེ པཙྩཡེ པཊིཙྩ སཧ སམྨཱ ཙ ཨུཔྤནྣཱ པཊིཙྩསམུཔྤནྣཱ. ཏསྶཱ ཨིདཔྤཙྩཡཏཱཡ ཙ ཏེསུ པཊིཙྩསམུཔྤནྣེསུ ཙ དྷམྨེསུ. ཨནུལོམིཀཱཏི ལོཀུཏྟརདྷམྨཱནཾ ཨནུལོམཏོ ཨནུལོམིཀཱ. ཁནྟཱིཏི ཉཱཎཾ. ཉཱཎཉྷི ཁམནཏོ ཁནྟི. པཊིལདྡྷཱ ཧོཏཱིཏི སཏྟེཧི ཨདྷིགཏཱ ཧོཏི. ཨིདཔྤཙྩཡཏཱཡ ཁནྟིཡཱ ཨུཙྪེདཏྟཱནུཔགམོ ཧོཏི པཙྩཡུཔྤནྣདྷམྨཱནཾ པཙྩཡསཱམགྒིཡཾ ཨཱཡཏྟཝུཏྟིཏྟཱ པཙྩཡཱནུཔརམདསྶནེན ཕལཱནུཔརམདསྶནཏོ. པཊིཙྩསམུཔྤནྣེསུ དྷམྨེསུ ཁནྟིཡཱ སསྶཏཏྟཱནུཔགམོ ཧོཏི པཙྩཡསཱམགྒིཡཾ ནཝནཝཱནཾ པཙྩཡུཔྤནྣདྷམྨཱནཾ ཨུཔྤཱདདསྶནཏོ. ཨེཝམེཏེ ཨུབྷོ ཨནྟེ ཨནུཔགམྨ པཊིཙྩསམུཔྤཱདཔཊིཙྩསམུཔྤནྣདྷམྨདསྶནེན ན ཨུཙྪེདོ ན སསྶཏོཏི པཝཏྟཾ སམྨཱདསྶནཾ ‘‘ཨནུལོམིཀཱ ཁནྟཱི’’ཏི ཝེདིཏབྦཾ. ཨེཝཉྷི ཏདུབྷཡདིཊྛིཔཊིཔཀྑབྷཱུཏཱ སམྨཱདིཊྛི ཝུཏྟཱ ཧོཏི. ཡཐཱབྷཱུཏཾ ཝཱ ཉཱཎནྟི ཡཐཱབྷཱུཏཾ ཡཐཱསབྷཱཝཾ ནེཡྻཾ. ཏཏྠ པཝཏྟཉཱཎམྤི ཝིསཡཝོཧཱརེན ‘‘ཡཐཱབྷཱུཏཉཱཎ’’ནྟི ཝུཏྟཾ. ཏཾ པན སངྑཱརུཔེཀྑཱཔརིཡནྟཾ ཝིཔསྶནཱཉཱཎཾ ཨིདྷཱདྷིཔྤེཏཾ. ཧེཊྛཱ པན ‘‘ཡཐཱབྷཱུཏཉཱཎདསྶན’’ནྟི བྷཡཏཱུཔཊྛཱནཉཱཎཾ ཝུཏྟཾ. ཡཐཱབྷཱུཏཾ ཝཱ ཉཱཎཾ སཏྟེཧི པཊིལདྡྷཾ ཧོཏཱིཏི སམྦནྡྷོ.

ཨིདཱནི ‘‘སསྶཏོ ལོཀོ’’ཏིཨཱདཱིཧི མིཙྪཱདིཊྛིཔརིབྷཱཝིཏཾ ‘‘ཨེཏེ ཝཱ པནཱ’’ཏིཨཱདཱིཧི སམྨཱདིཊྛིཔརིབྷཱཝིཏཾ སཏྟསནྟཱནཾ དསྶེཏྭཱ ‘‘ཀཱམཾ སེཝནྟཉྙེཝཱ’’ཏིཨཱདཱིཧི སེསཱཀུསལེཧི སེསཀུསལེཧི ཙ པརིབྷཱཝིཏཾ སཏྟསནྟཱནཾ དསྶེཏི. ཏཏྠ ཀཱམཾ སེཝནྟཾཡེཝ པུགྒལཾ ཏཐཱགཏོ ཛཱནཱཏཱིཏི ཡོཛནཱ ཀཱཏབྦཱ. སེཝནྟནྟི ཙ ཨབྷིཎྷསམུདཱཙཱརཝསེན སེཝམཱནཾ. པུབྦེ ཨཱསེཝིཏཝསེན ཀིལེསཀཱམོ གརུ ཨསྶཱཏི ཀཱམགརུཀོ. ཏཐེཝ ཀཱམོ ཨཱསཡེ སནྟཱནེ ཨསྶཱཏི ཀཱམཱསཡོ. སནྟཱནཝསེནེཝ ཀཱམེ ཨདྷིམུཏྟོ ལགྒོཏི ཀཱམཱདྷིམུཏྟོ. སེསེསུཔི ཨེསེཝ ནཡོ. ནེཀྑམྨཱདཱིནི ཝུཏྟཏྠཱནེཝ. ཀཱམཱདཱིཧི ཙ ཏཱིཧི སེསཱཀུསལཱ, ནེཀྑམྨཱདཱིཧི ཏཱིཧི སེསཀུསལཱ གཧིཏཱཝ ཧོནྟཱིཏི ཝེདིཏབྦཱ. ‘‘ཨཡཾ སཏྟཱནཾ ཨཱསཡོ’’ཏི ཏིདྷཱ ཝུཏྟཾ སནྟཱནམེཝ དསྶེཏི.

ཨཡཾ པནེཏྠ ཨཊྛཀཐཱནཡོ – ‘‘ཨིཏི བྷཝདིཊྛིསནྣིསྶིཏཱ ཝཱ’’ཏི ཨེཝཾ སསྶཏདིཊྛིཾ ཝཱ སནྣིསྶིཏཱ. སསྶཏདིཊྛི ཧི ཨེཏྠ བྷཝདིཊྛཱིཏི ཝུཏྟཱ, ཨུཙྪེདདིཊྛི ཙ ཝིབྷཝདིཊྛཱིཏི. སབྦདིཊྛཱིནཉྷི སསྶཏུཙྪེདདིཊྛཱིཧི སངྒཧིཏཏྟཱ སབྦེཔིམེ དིཊྛིགཏིཀཱ སཏྟཱ ཨིམཱཝ དྭེ དིཊྛིཡོ སནྣིསྶིཏཱ ཧོནྟི. ཝུཏྟམྤི ཙེཏཾ ‘‘དྭཡནིསྶིཏོ ཁྭཱཡཾ, ཀཙྩཱན, ལོཀོ ཡེབྷུཡྻེན ཨཏྠིཏཉྩེཝ ནཏྠིཏཉྩཱ’’ཏི (སཾ. ནི. ༢.༡༥). ཨེཏྠ ཧི ཨཏྠིཏཱཏི སསྶཏཾ. ནཏྠིཏཱཏི ཨུཙྪེདོ. ཨཡཾ ཏཱཝ ཝཊྚནིསྶིཏཱནཾ པུཐུཛྫནཱནཾ སཏྟཱནཾ ཨཱསཡོ. ཨིདཱནི ཝིཝཊྚནིསྶིཏཱནཾ སུདྡྷསཏྟཱནཾ ཨཱསཡཾ དསྶེཏུཾ ‘‘ཨེཏེ ཝཱ པན ཨུབྷོ ཨནྟེ ཨནུཔགམྨཱ’’ཏིཨཱདི ཝུཏྟཾ. ཏཏྠ ‘‘ཨེཏེ ཝཱ པནཱ’’ཏི ཨེཏེཡེཝ. ‘‘ཨུབྷོ ཨནྟེ’’ཏི སསྶཏུཙྪེདསངྑཱཏེ དྭེ ཨནྟེ. ‘‘ཨནུཔགམྨཱ’’ཏི ན ཨལླཱིཡིཏྭཱ. ‘‘ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསཱུ’’ཏི ཨིདཔྤཙྩཡཏཱཡ ཙེཝ པཊིཙྩསམུཔྤནྣདྷམྨེསུ ཙ. ‘‘ཨནུལོམིཀཱ ཁནྟཱི’’ཏི ཝིཔསྶནཱཉཱཎཾ. ‘‘ཡཐཱབྷཱུཏཾ ཉཱཎ’’ནྟི མགྒཉཱཎཾ. ཨིདཾ ཝུཏྟཾ ཧོཏི – ཡཱ པཊིཙྩསམུཔྤཱདེ ཙེཝ པཊིཙྩསམུཔྤནྣདྷམྨེསུ ཙ ཨེཏེ ཨུབྷོ སསྶཏུཙྪེདཨནྟེ ཨནུཔགནྟྭཱ ཝིཔསྶནཱ པཊིལདྡྷཱ, ཡཉྩ ཏཏོ ཨུཏྟརི མགྒཉཱཎཾ, ཨཡཾ སཏྟཱནཾ ཨཱསཡོ. ཨཡཾ ཝཊྚནིསྶིཏཱནཉྩ ཝིཝཊྚནིསྶིཏཱནཉྩ སབྦེསམྤི སཏྟཱནཾ ཨཱསཡོ ཨིདཾ ཝསནཊྛཱནནྟི. ཨཡཾ ཨཱཙརིཡཱནཾ སམཱནཊྛཀཐཱ.

ཝིཏཎྜཝཱདཱི པནཱཧ ‘‘མགྒོ ནཱམ ཝཱསཾ ཝིདྡྷཾསེནྟོ གཙྪཏི, ཏྭཾ མགྒོ ཝཱསོཏི ཝདེསཱི’’ཏི? སོ ཝཏྟབྦོ ‘‘ཏྭཾ ཨརིཡཝཱསབྷཱཎཀོ ཧོསི ན ཧོསཱི’’ཏི? སཙེ ‘‘ན ཧོམཱི’’ཏི ཝདཏི, ‘‘ཏྭཾ ཨབྷཱཎཀཏཱཡ ན ཛཱནཱསཱི’’ཏི ཝཏྟབྦོ. སཙེ ‘‘བྷཱཎཀོསྨཱི’’ཏི ཝདཏི, ‘‘སུཏྟཾ ཨཱཧརཱ’’ཏི ཝཏྟབྦོ. སཙེ ཨཱཧརཏི, ཨིཙྩེཏཾ ཀུསལཾ. ནོ ཙེ ཨཱཧརཏི, སཡཾ ཨཱཧརིཏབྦཾ ‘‘དསཡིམེ, བྷིཀྑཝེ, ཨརིཡཱཝཱསཱ, ཡདརིཡཱ ཨཱཝསིཾསུ ཝཱ ཨཱཝསནྟི ཝཱ ཨཱཝསིསྶནྟི ཝཱ’’ཏི (ཨ. ནི. ༡༠.༡༩). ཨེཏཉྷི སུཏྟཾ མགྒསྶ ཝཱསབྷཱཝཾ དཱིཔེཏི. ཏསྨཱ སུཀཐིཏམེཝེཏནྟི. ཨིམཾ པན བྷགཝཱ སཏྟཱནཾ ཨཱསཡཾ ཛཱནནྟོ ཨིམེསཉྩ དིཊྛིགཏཱནཾ ཨིམེསཉྩ ཝིཔསྶནཱཉཱཎམགྒཉཱཎཱནཾ ཨཔྤཝཏྟིཀྑཎེཔི ཛཱནཱཏི ཨེཝ. ཏསྨཱཡེཝ ཙ ‘‘ཀཱམཾ སེཝནྟཾཡེཝ ཛཱནཱཏཱི’’ཏིཨཱདི ཝུཏྟནྟི.

ཨནུསཡནིདྡེསེ ཨནུསཡཱཏི ཀེནཊྛེན ཨནུསཡཱ? ཨནུསཡནཊྛེན. ཀོ ཨེས ཨནུསཡནཊྛོ ནཱམཱཏི? ཨཔྤཧཱིནཊྛོ. ཨེཏེ ཧི ཨཔྤཧཱིནཊྛེན ཏསྶ ཏསྶ སནྟཱནེ ཨནུསེནྟི ནཱམ. ཏསྨཱ ‘‘ཨནུསཡཱ’’ཏི ཝུཙྩནྟི. ཨནུསེནྟཱིཏི ཨནུརཱུཔཾ ཀཱརཎཾ ལབྷིཏྭཱ ཨུཔྤཛྫནྟཱིཏི ཨཏྠོ. ཨཐཱཔི སིཡཱ – ཨནུསཡནཊྛོ ནཱམ ཨཔྤཧཱིནཱཀཱརོ, སོ ཙ ཨུཔྤཛྫཏཱིཏི ཝཏྟུཾ ན ཡུཛྫཏི, ཏསྨཱ ན ཨནུསཡཱ ཨུཔྤཛྫནྟཱིཏི. ཏཏྲིདཾ པཊིཝཙནཾ – ན ཨཔྤཧཱིནཱཀཱརོ, ཨནུསཡོཏི པན ཨཔྤཧཱིནཊྛེན ཐཱམགཏཀིལེསོ ཝུཙྩཏི. སོ ཙིཏྟསམྤཡུཏྟོ སཱརམྨཎོ སཔྤཙྩཡཊྛེན སཧེཏུཀོ ཨེཀནྟཱཀུསལོ ཨཏཱིཏོཔི ཧོཏི ཨནཱགཏོཔི པཙྩུཔྤནྣོཔི, ཏསྨཱ ཨུཔྤཛྫཏཱིཏི ཝཏྟུཾ ཡུཛྫཏཱིཏི. ཏཏྲིདཾ པམཱཎཾ – ཨིདྷེཝ ཏཱཝ ཨབྷིསམཡཀཐཱཡ (པཊི. མ. ༣.༢༡) ‘‘པཙྩུཔྤནྣེ ཀིལེསེ པཛཧཏཱི’’ཏི པུཙྪཾ ཀཏྭཱ ཨནུསཡཱནཾ པཙྩུཔྤནྣབྷཱཝསྶ ཨཏྠིཏཱཡ ‘‘ཐཱམགཏོ ཨནུསཡཾ པཛཧཏཱི’’ཏི ཝུཏྟཾ. དྷམྨསངྒཎིཡཾ མོཧསྶ པདབྷཱཛནེ ‘‘ཨཝིཛྫཱནུསཡོ ཨཝིཛྫཱཔརིཡུཊྛཱནཾ ཨཝིཛྫཱལངྒཱི མོཧོ ཨཀུསལམཱུལཾ, ཨཡཾ ཏསྨིཾ སམཡེ མོཧོ ཧོཏཱི’’ཏི (དྷ. ས. ༣༩༠) ཨཀུསལཙིཏྟེན སདྡྷིཾ མོཧསྶ ཨུཔྤནྣབྷཱཝོ ཝུཏྟོ. ཀཐཱཝཏྠུསྨིཾ ‘‘ཨནུསཡཱ ཨབྱཱཀཏཱ ཨནུསཡཱ ཨཧེཏུཀཱ ཨནུསཡཱ ཙིཏྟཝིཔྤཡུཏྟཱ’’ཏི སབྦེ ཝཱདཱ པཊིསེདྷིཏཱ. ཨནུསཡཡམཀེ སཏྟནྣཾ མཧཱཝཱརཱནཾ ཨཉྙཏརསྨིཾ ཨུཔྤཛྫནཝཱརེ ‘‘ཡསྶ ཀཱམརཱགཱནུསཡོ ཨུཔྤཛྫཏི, ཏསྶ པཊིགྷཱནུསཡོ ཨུཔྤཛྫཏཱི’’ཏིཨཱདི (ཡམ. ༢.ཨནུསཡཡམཀ.༣༠༠) ཝུཏྟཾ. ཏསྨཱ ‘‘ཨནུསེནྟཱིཏི ཨནུརཱུཔཾ ཀཱརཎཾ ལབྷིཏྭཱ ཨུཔྤཛྫནྟཱི’’ཏི ཡཾ ཝུཏྟཾ, ཏཾ ཨིམིནཱ ཏནྟིཔྤམཱཎེན ཡུཏྟནྟི ཝེདིཏབྦཾ. ཡམྤི ‘‘ཙིཏྟསམྤཡུཏྟོ སཱརམྨཎོ’’ཏིཨཱདི ཝུཏྟཾ, ཏམྤི སུཝུཏྟམེཝ. ཨནུསཡོ ཧི ནཱམེས པརིནིཔྥནྣོ ཙིཏྟསམྤཡུཏྟོ ཨཀུསལདྷམྨོཏི ནིཊྛམེཏྠ གནྟབྦཾ.

ཀཱམརཱགཱནུསཡོཏིཨཱདཱིསུ ཀཱམརཱགོ ཙ སོ ཨཔྤཧཱིནཊྛེན ཨནུསཡོ ཙཱཏི ཀཱམརཱགཱནུསཡོ. སེསཔདེསུཔི ཨེསེཝ ནཡོ. ཀཱམརཱགཱནུསཡོ ཙེཏྠ ལོབྷསཧགཏཙིཏྟེསུ སཧཛཱཏཝསེན ཨཱརམྨཎཝསེན ཙ མནཱཔེསུ ཨཝསེསཀཱམཱཝཙརདྷམྨེསུ ཨཱརམྨཎཝསེནེཝ ཨུཔྤཛྫམཱནོ ལོབྷོ. པཊིགྷཱནུསཡོ ཙ དོམནསྶསཧགཏཙིཏྟེསུ སཧཛཱཏཝསེན ཨཱརམྨཎཝསེན ཙ ཨམནཱཔེསུ ཨཝསེསཀཱམཱཝཙརདྷམྨེསུ ཨཱརམྨཎཝསེནེཝ ཨུཔྤཛྫམཱནོ དོསོ. མཱནཱནུསཡོ དིཊྛིགཏཝིཔྤཡུཏྟལོབྷསཧགཏཙིཏྟེསུ སཧཛཱཏཝསེན ཨཱརམྨཎཝསེན ཙ དུཀྑཝེདནཱཝཛྫེསུ ཨཝསེསཀཱམཱཝཙརདྷམྨེསུ རཱུཔཱརཱུཔཱཝཙརདྷམྨེསུ ཙ ཨཱརམྨཎཝསེནེཝ ཨུཔྤཛྫམཱནོ མཱནོ. དིཊྛཱནུསཡོ ཙཏཱུསུ དིཊྛིགཏསམྤཡུཏྟེསུ. ཝིཙིཀིཙྪཱནུསཡོ ཝིཙིཀིཙྪཱསཧགཏེ. ཨཝིཛྫཱནུསཡོ དྭཱདསསུ ཨཀུསལཙིཏྟེསུ སཧཛཱཏཝསེན ཨཱརམྨཎཝསེན ཙ. ཏཡོཔི ཨཝསེསཏེབྷཱུམཀདྷམྨེསུ ཨཱརམྨཎཝསེནེཝ ཨུཔྤཛྫམཱནཱ དིཊྛིཝིཙིཀིཙྪཱམོཧཱ. བྷཝརཱགཱནུསཡོ ཙཏཱུསུ དིཊྛིགཏཝིཔྤཡུཏྟེསུ ཨུཔྤཛྫམཱནོཔི སཧཛཱཏཝསེན ན ཝུཏྟོ, ཨཱརམྨཎཝསེནེཝ པན རཱུཔཱརཱུཔཱཝཙརདྷམྨེསུ ཨུཔྤཛྫམཱནོ ལོབྷོ ཝུཏྟོ.

༡༡༤. ཨིདཱནི ཡཐཱཝུཏྟཱནཾ ཨནུསཡཱནཾ ཨནུསཡནཊྛཱནཾ དསྶེནྟོ ཡཾ ལོཀེཏིཨཱདིམཱཧ. ཏཏྠ ཡཾ ལོཀེ པིཡརཱུཔནྟི ཡཾ ཨིམསྨིཾ ལོཀེ པིཡཛཱཏིཀཾ པིཡསབྷཱཝཾ. སཱཏརཱུཔནྟི སཱཏཛཱཏིཀཾ ཨསྶཱདཔདཊྛཱནཾ ཨིཊྛཱརམྨཎཾ. ཨེཏྠ སཏྟཱནཾ ཀཱམརཱགཱནུསཡོ ཨནུསེཏཱིཏི ཨེཏསྨིཾ ཨིཊྛཱརམྨཎེ སཏྟཱནཾ ཨཔྤཧཱིནཊྛེན ཀཱམརཱགཱནུསཡོ ཨནུསེཏི. ‘‘པིཡརཱུཔཾ སཱཏརཱུཔ’’ནྟི ཙ ཨིདྷ ཀཱམཱཝཙརདྷམྨོཡེཝ ཨདྷིཔྤེཏོ. ཡཐཱ ནཱམ ཨུདཀེ ནིམུགྒསྶ ཧེཊྛཱ ཙ ཨུཔརི ཙ སམནྟཱ ཙ ཨུདཀམེཝ ཧོཏི, ཨེཝམེཝ ཨིཊྛཱརམྨཎེ རཱགུཔྤཏྟི ནཱམ སཏྟཱནཾ ཨཱཙིཎྞསམཱཙིཎྞཱ. ཏཐཱ ཨནིཊྛཱརམྨཎེ པཊིགྷུཔྤཏྟི. ཨིཏི ཨིམེསུ དྭཱིསུ དྷམྨེསཱུཏི ཨེཝཾ ཨིམེསུ དྭཱིསུ ཨིཊྛཱནིཊྛཱརམྨཎདྷམྨེསུ. ཨཝིཛྫཱནུཔཏིཏཱཏི ཀཱམརཱགཔཊིགྷསམྤཡུཏྟཱ ཧུཏྭཱ ཨཱརམྨཎཀརཎཝསེན ཨཝིཛྫཱ ཨནུཔཏིཏཱ ཨནུགཏཱ. ཝིཙྪེདཾ ཀཏྭཱཔི པཱཋོ. ཏདེཀཊྛོཏི ཏཱཡ ཨཝིཛྫཱཡ སཧཛེཀཊྛཝསེན ཨེཀཏོ ཋིཏོ. མཱནོ ཙ དིཊྛི ཙ ཝིཙིཀིཙྪཱ ཙཱཏི ནཝཝིདྷམཱནོ, དྭཱསཊྛིཝིདྷཱ དིཊྛི, ཨཊྛཝཏྠུཀཱ ཝིཙིཀིཙྪཱ, ཏདེཀཊྛོ མཱནོ ཙ ཏདེཀཊྛཱ དིཊྛི ཙ ཏདེཀཊྛཱ ཝིཙིཀིཙྪཱ ཙཱཏི ཡོཛནཱ. དཊྛབྦཱཏི པསྶིཏབྦཱ ཨཝགནྟབྦཱ. ཏཡོ ཨེཀཏོ ཀཏྭཱ བཧུཝཙནཾ ཀཏཾ. བྷཝརཱགཱནུསཡོ པནེཏྠ ཀཱམརཱགཱནུསཡེནེཝ སངྒཧིཏོཏི ཝེདིཏབྦོ.

ཙརིཏནིདྡེསེ ཏེརས ཙེཏནཱ པུཉྙཱབྷིསངྑཱརོ. དྭཱདས ཨཔུཉྙཱབྷིསངྑཱརོ. ཙཏསྶོ ཨཱནེཉྫཱབྷིསངྑཱརོ. ཏཏྠ ཀཱམཱཝཙརོ པརིཏྟབྷཱུམཀོ. ཨིཏརོ མཧཱབྷཱུམཀོ. ཏཱིསུཔི ཝཱ ཨེཏེསུ ཡོ ཀོཙི ཨཔྤཝིཔཱཀོ པརིཏྟབྷཱུམཀོ, མཧཱཝིཔཱཀོ མཧཱབྷཱུམཀོཏི ཝེདིཏབྦོ.

༡༡༥. ཨདྷིམུཏྟིནིདྡེསེ སནྟཱིཏི སཾཝིཛྫནྟི. ཧཱིནཱདྷིམུཏྟིཀཱཏི ལཱམཀཛ྄ཛྷཱསཡཱ. པཎཱིཏཱདྷིམུཏྟིཀཱཏི ཀལྱཱཎཛ྄ཛྷཱསཡཱ. སེཝནྟཱིཏི ནིསྶཡནྟི ཨལླཱིཡནྟི. བྷཛནྟཱིཏི ཨུཔསངྐམནྟི. པཡིརུཔཱསནྟཱིཏི པུནཔྤུནཾ ཨུཔསངྐམནྟི. སཙེ ཧི ཨཱཙརིཡུཔཛ྄ཛྷཱཡཱ ན སཱིལཝནྟོ ཧོནྟི, ཨནྟེཝཱསིཀསདྡྷིཝིཧཱརིཀཱ སཱིལཝནྟོ, ཏེ ཨཏྟནོ ཨཱཙརིཡུཔཛ྄ཛྷཱཡེཔི ན ཨུཔསངྐམནྟི, ཨཏྟནོ སདིསེ སཱརུཔྤེ བྷིཀྑཱུཡེཝ ཨུཔསངྐམནྟི. སཙེཔི ཨཱཙརིཡུཔཛ྄ཛྷཱཡཱ སཱརུཔྤཱ བྷིཀྑཱུ, ཨིཏརེ ཨསཱརུཔྤཱ, ཏེཔི ན ཨཱཙརིཡུཔཛ྄ཛྷཱཡེ ཨུཔསངྐམནྟི, ཨཏྟནོ སདིསེ ཧཱིནཱདྷིམུཏྟིཀེཡེཝ ཨུཔསངྐམནྟི. ཨེཝཾ ཨུཔསངྐམནཾ པན ན ཀེཝལཾ ཨེཏརཧིཡེཝ, ཨཏཱིཏཱནཱགཏེཔཱིཏི དསྶེཏུཾ ཨཏཱིཏམྤི ཨདྡྷཱནནྟིཨཱདིམཱཧ. ཏཏྠ ཨཏཱིཏམྤི ཨདྡྷཱནནྟི ཨཏཱིཏསྨིཾ ཀཱལེ, ཨཙྩནྟསཾཡོགཏྠེ ཝཱ ཨུཔཡོགཝཙནཾ. སེསཾ ཨུཏྟཱནཏྠམེཝ. ཨིདཾ པན དུསྶཱིལཱནཾ དུསྶཱིལསེཝནམེཝ, སཱིལཝནྟཱནཾ སཱིལཝནྟསེཝནམེཝ, དུཔྤཉྙཱནཾ དུཔྤཉྙསེཝནམེཝ, པཉྙཝནྟཱནཾ པཉྙཝནྟསེཝནམེཝ ཀོ ནིཡམེཏཱིཏི? ཨཛ྄ཛྷཱསཡདྷཱཏུ ནིཡམེཏཱིཏི.

བྷབྦཱབྷབྦནིདྡེསེ ཚཌྜེཏབྦེ པཋམཾ ནིདྡིསིཏྭཱ གཧེཏབྦེ པཙྪཱ ནིདྡིསིཏུཾ ཨུདྡེསསྶ ཨུཔྤཊིཔཱཊིཡཱ པཋམཾ ཨབྷབྦཱ ནིདྡིཊྛཱ. ཨུདྡེསེ པན དྭནྡསམཱསེ ཨཙྩིཏསྶ ཙ མནྡཀྑརསྶ ཙ པདསྶ པུབྦནིཔཱཏལཀྑཎཝསེན བྷབྦསདྡོ པུབྦཾ པཡུཏྟོ. ཀམྨཱཝརཎེནཱཏི པཉྩཝིདྷེན ཨཱནནྟརིཡཀམྨེན. སམནྣཱགཏཱཏི སམངྒཱིབྷཱུཏཱ. ཀིལེསཱཝརཎེནཱཏི ནིཡཏམིཙྪཱདིཊྛིཡཱ. ཨིམཱནི དྭེ སགྒམགྒཱནཾ ཨཱཝརཎཏོ ཨཱཝརཎཱནི. བྷིཀྑུནཱིདཱུསཀཱདཱིནི ཀམྨཱནིཔི ཀམྨཱཝརཎེནེཝ སངྒཧིཏཱནི. ཝིཔཱཀཱཝརཎེནཱཏི ཨཧེཏུཀཔཊིསནྡྷིཡཱ. ཡསྨཱ པན དུཧེཏུཀཱནམྤི ཨརིཡམགྒཔཊིཝེདྷོ ནཏྠི, ཏསྨཱ དུཧེཏུཀཱ པཊིསནྡྷིཔི ཝིཔཱཀཱཝརཎམེཝཱཏི ཝེདིཏབྦཱ, ཨསྶདྡྷཱཏི བུདྡྷཱདཱིསུ སདྡྷཱརཧིཏཱ. ཨཙྪནྡིཀཱཏི ཀཏྟུཀམྱཏཱཀུསལཙྪནྡརཧིཏཱ. ཨུཏྟརཀུརུཀཱ མནུསྶཱ ཨཙྪནྡིཀཊྛཱནཾ པཝིཊྛཱ. དུཔྤཉྙཱཏི བྷཝངྒཔཉྙཱཡ པརིཧཱིནཱ. བྷཝངྒཔཉྙཱཡ པན པརིཔུཎྞཱཡཔི ཡསྶ བྷཝངྒཾ ལོཀུཏྟརསྶ པཱདཀཾ ན ཧོཏི, སོཔི དུཔྤཉྙོཡེཝ ནཱམ. ཨབྷབྦཱ ནིཡཱམཾ ཨོཀྐམིཏུཾ ཀུསལེསུ དྷམྨེསུ སམྨཏྟནྟི ཀུསལེསུ དྷམྨེསུ སམྨཏྟནིཡཱམསངྑཱཏཾ ཨརིཡམགྒཾ ཨོཀྐམིཏུཾ ཨབྷབྦཱ. ཨརིཡམགྒོ ཧི སམྨཱ སབྷཱཝོཏི སམྨཏྟཾ, སོཡེཝ ཨནནྟརཕལདཱནེ, སཡམེཝ ཝཱ ཨཙལབྷཱཝཏོ ནིཡཱམོ, ཏཾ ཨོཀྐམིཏུཾ པཝིསིཏུཾ ཨབྷབྦཱ. ན ཀམྨཱཝརཎེནཱཏིཨཱདཱིནི ཝུཏྟཝིཔརིཡཱཡེནེཝ ཝེདིཏབྦཱནཱིཏི.

ཨཱསཡཱནུསཡཉཱཎནིདྡེསཝཎྞནཱ ནིཊྛིཏཱ.

༧༠. ཡམཀཔཱཊིཧཱིརཉཱཎནིདྡེསཝཎྞནཱ

༡༡༦. ཡམཀཔཱཊིཧཱིརཉཱཎནིདྡེསེ ཨསཱདྷཱརཎཾ སཱཝཀེཧཱིཏི སེསཱསཱདྷཱརཎཉཱཎནིདྡེསེ ཨཉྙཝཙནེཧི ཨོཀཱསཱབྷཱཝཏོ ན ཝུཏྟཾ, ཨིདྷ པན ཨཉྙཝཙནཱབྷཱཝཏོ ཝུཏྟནྟི ཝེདིཏབྦཾ. ཨུཔརིམཀཱཡཏོཏི ནཱབྷིཡཱ ཨུདྡྷཾ སརཱིརཏོ. ཨགྒིཀྑནྡྷོ པཝཏྟཏཱིཏི ཏེཛོཀསིཎཱརམྨཎཾ པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ‘‘ཨུཔརིམཀཱཡཏོ ཨགྒིཛཱལཱ ཝུཊྛཱཏཱུ’’ཏི ཨཱཝཛྫིཏྭཱ པརིཀམྨཾ ཀཏྭཱ ཨནནྟརཾ ཨབྷིཉྙཱཉཱཎེན ‘‘ཨུཔརིམཀཱཡཏོ ཨགྒིཛཱལཱ ཝུཊྛཱཏཱུ’’ཏི ཨདྷིཊྛིཏེ སཧ ཨདྷིཊྛཱནཱ ཨུཔརིམཀཱཡཏོ ཨགྒིཛཱལཱ ཝུཊྛཱཏི. སཱ ཧི ཨིདྷ རཱསཊྛེན ཁནྡྷོཏི ཝུཏྟཱ. ཧེཊྛིམཀཱཡཏོཏི ནཱབྷིཏོ ཧེཊྛཱ སརཱིརཏོ. ཨུདཀདྷཱརཱ པཝཏྟཏཱིཏི ཨཱཔོཀསིཎཱརམྨཎཾ པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ‘‘ཧེཊྛིམཀཱཡཏོ ཨུདཀདྷཱརཱ ཝུཊྛཱཏཱུ’’ཏི ཨཱཝཛྫིཏྭཱ པརིཀམྨཾ ཀཏྭཱ ཨནནྟརཾ ཨབྷིཉྙཱཉཱཎེན ‘‘ཧེཊྛིམཀཱཡཏོ ཨུདཀདྷཱརཱ ཝུཊྛཱཏཱུ’’ཏི ཨདྷིཊྛིཏེ སཧ ཨདྷིཊྛཱནཱ ཧེཊྛིམཀཱཡཏོ ཨུདཀདྷཱརཱ ཝུཊྛཱཏི. ཨུབྷཡཏྠཱཔི ཨབྦོཙྪེདཝསེན པཝཏྟཏཱིཏི ཝུཏྟཾ. ཨདྷིཊྛཱནསྶ ཨཱཝཛྫནསྶ ཙ ཨནྟརེ དྭེ བྷཝངྒཙིཏྟཱནི ཝཏྟནྟི. ཏསྨཱཡེཝ ཡུགལཱ ཧུཏྭཱ ཨགྒིཀྑནྡྷཨུདཀདྷཱརཱ པཝཏྟནྟི, ཨནྟརཾ ན པཉྙཱཡཏི. ཨཉྙེསཾ པན བྷཝངྒཔརིཙྪེདོ ནཏྠི. པུརཏྠིམཀཱཡཏོཏི ཨབྷིམུཁཔསྶཏོ. པཙྪིམཀཱཡཏོཏི པིཊྛིཔསྶཏོ. དཀྑིཎཨཀྑིཏོ ཝཱམཨཀྑིཏོཏིཨཱདི སམཱསཔཱཋོཡེཝ, ན ཨཉྙོ. དཀྑིཎནཱསིཀཱསོཏཏོ ཝཱམནཱསིཀཱསོཏཏོཏི པཱཋོ སུནྡརོ. རསྶཾ ཀཏྭཱཔི པཋནྟི. ཨཾསཀཱུཊཏོཏི ཨེཏྠ ཨབྦྷུགྒཏཊྛེན ཀཱུཊོ ཝིཡཱཏི ཀཱུཊོ, ཨཾསོཡེཝ ཀཱུཊོ ཨཾསཀཱུཊོ. ཨངྒུལངྒུལེཧཱིཏི ཨངྒུལཱིཧི ཨངྒུལཱིཧི. ཨངྒུལནྟརིཀཱཧཱིཏི ཨངྒུལཱིནཾ ཨནྟརིཀཱཧི. ཨེཀེཀལོམཏོ ཨགྒིཀྑནྡྷོ པཝཏྟཏི, ཨེཀེཀལོམཏོ ཨུདཀདྷཱརཱ པཝཏྟཏཱིཏི ཨུབྷཡཏྠཱཔི ཨཱམེཌིཏཝཙནེན སབྦལོམཱནཾ པརིཡཱདིནྣཏྟཱ ཨེཀེཀལོམཏོཝ ཨགྒིཀྑནྡྷཨུདཀདྷཱརཱ ཡུགལཱ ཡུགལཱ ཧུཏྭཱ པཝཏྟནྟཱིཏི ཝུཏྟཾ ཧོཏི. ལོམཀཱུཔཏོ ལོམཀཱུཔཏོ ཨགྒིཀྑནྡྷོ པཝཏྟཏི, ལོམཀཱུཔཏོ ལོམཀཱུཔཏོ ཨུདཀདྷཱརཱ པཝཏྟཏཱིཏི ཨེཏྠཱཔི ཨེསེཝ ནཡོ. ཀེསུཙི པོཏྠཀེསུ ‘‘ཨེཀེཀལོམཏོ ཨགྒིཀྑནྡྷོ པཝཏྟཏི. ལོམཀཱུཔཏོ ལོམཀཱུཔཏོ ཨུདཀདྷཱརཱ པཝཏྟཏི, ལོམཀཱུཔཏོ ལོམཀཱུཔཏོ ཨགྒིཀྑནྡྷོ པཝཏྟཏི, ཨེཀེཀལོམཏོ ཨུདཀདྷཱརཱ པཝཏྟཏཱི’’ཏི ལིཁིཏཾ. ཏམྤི ཡུཛྫཏིཡེཝ. པཱཊིཧཱིརསྶ ཨཏིསུཁུམཏྟདཱིཔནཏོ པན པུརིམཔཱཋོཡེཝ སུནྡརཏརོ.

ཨིདཱནི ཚནྣཾ ཝཎྞཱནནྟི ཀོ སམྦནྡྷོ? ཧེཊྛཱ ‘‘ཨུཔརིམཀཱཡཏོ’’ཏིཨཱདཱིཧི ཨནེཀེཧི སརཱིརཱཝཡཝཱ ཝུཏྟཱ. ཏེན སརཱིརཱཝཡཝསམྦནྡྷོ པཝཏྟཏཱིཏི ཝཙནསམྦནྡྷེན ཙ ཡམཀཔཱཊིཧཱིརཱདྷིཀཱརེན ཙ ཚནྣཾ ཝཎྞཱནཾ སརཱིརཱཝཡཝབྷཱུཏཱནཾ རསྨིཡོ ཡམཀཱ ཧུཏྭཱ པཝཏྟནྟཱིཏི ཝུཏྟཾ ཧོཏི. སཱམིཝཙནསམྦནྡྷེན ཙ ཨཝསྶཾ ‘‘རསྨིཡོ’’ཏི པཱཋསེསོ ཨིཙྪིཏབྦོཡེཝ. ནཱིལཱནནྟི ཨུམཱཔུཔྥཝཎྞཱནཾ. པཱིཏཀཱནནྟི ཀཎིཀཱརཔུཔྥཝཎྞཱནཾ. ལོཧིཏཀཱནནྟི ཨིནྡགོཔཀཝཎྞཱནཾ. ཨོདཱཏཱནནྟི ཨོསདྷིཏཱརཀཝཎྞཱནཾ. མཉྫིཊྛཱནནྟི མནྡརཏྟཝཎྞཱནཾ. པབྷསྶརཱནནྟི པབྷཱསནཔཀཏིཀཱནཾ པབྷསྶརཝཎྞཱནཾ. པབྷསྶརཝཎྞེ ཝིསུཾ ཨཝིཛྫམཱནེཔི ཝུཏྟེསུ པཉྩསུ ཝཎྞེསུ ཡེ ཡེ པབྷཱ སམུཛྫལཱ, ཏེ ཏེ པབྷསྶརཱ. ཏཐཱ ཧི ཏཐཱགཏསྶ ཡམཀཔཱཊིཧཱིརཾ ཀརོནྟསྶ ཡམཀཔཱཊིཧཱིརཉཱཎབལེནེཝ ཀེསམསྶཱུནཉྩེཝ ཨཀྑཱིནཉྩ ནཱིལཊྛཱནེཧི ནཱིལརསྨིཡོ ནིཀྑམནྟི, ཡཱསཾ ཝསེན གགནཏལཾ ཨཉྫནཙུཎྞསམོཀིཎྞཾ ཝིཡ ཨུམཱཔུཔྥནཱིལུཔྤལདལསཉྪནྣཾ ཝིཡ ཝཱིཏིཔཏནྟམཎིཏཱལཝཎྚཾ ཝིཡ པསཱརིཏམེཙཀཔཊཾ ཝིཡ ཙ ཧོཏི. ཚཝིཏོ ཙེཝ ཨཀྑཱིནཉྩ པཱིཏཀཊྛཱནེཧི པཱིཏརསྨིཡོ ནིཀྑམནྟི, ཡཱསཾ ཝསེན དིསཱབྷཱགཱ སུཝཎྞརསནིསིཉྩམཱནཱ ཝིཡ སུཝཎྞཔཊཔསཱརིཏཱ ཝིཡ ཀུངྐུམཙུཎྞཀཎིཀཱརཔུཔྥསམྤརིཀིཎྞཱ ཝིཡ ཙ ཝིརོཙནྟི. མཾསལོཧིཏེཧི ཙེཝ ཨཀྑཱིནཉྩ རཏྟཊྛཱནེཧི ལོཧིཏརསྨིཡོ ནིཀྑམནྟི, ཡཱསཾ ཝསེན དིསཱབྷཱགཱ ཙིནཔིཊྛཙུཎྞརཉྫིཏཱ ཝིཡ སུཔཀྐལཱཁཱརསནིསིཉྩམཱནཱ ཝིཡ རཏྟཀམྦལཔརིཀྑིཏྟཱ ཝིཡ ཛཡསུམནཔཱལིབྷདྡཀབནྡྷུཛཱིཝཀཀུསུམསམྤརིཀིཎྞཱ ཝིཡ ཙ ཝིརོཙནྟི. ཨཊྛཱིཧི ཙེཝ དནྟེཧི ཙ ཨཀྑཱིནཉྩ སེཏཊྛཱནེཧི ཨོདཱཏརསྨིཡོ ནིཀྑམནྟི, ཡཱསཾ ཝསེན དིསཱབྷཱགཱ རཛཏཀུཊེཧི ཨཱསིཉྩམཱནཁཱིརདྷཱརཱསམྤརིཀིཎྞཱ ཝིཡ པསཱརིཏརཛཏཔཊྚཝིཏཱནཱ ཝིཡ ཝཱིཏིཔཏནྟརཛཏཏཱལཝཎྚཱ ཝིཡ ཀུནྡཀུམུདསིནྡུཝཱརསུམནམལླིཀཱདིཀུསུམསཉྪནྣཱ ཝིཡ ཙ ཝིརོཙནྟི. ཧཏྠཏལཔཱདཏལཱདཱིཧི མནྡརཏྟཊྛཱནེཧི མཉྫིཊྛརསྨིཡོ ནིཀྑམནྟི, ཡཱསཾ ཝསེན དིསཱབྷཱགཱ པཝཱལ༹ཛཱལཔརིཀྑིཏྟཱ ཝིཡ རཏྟཀུརཝཀཀུསུམསམོཀིཎྞཱ ཝིཡ ཙ ཝིརོཙནྟི. ཨུཎྞཱནཁཱདཱིཧི པབྷསྶརཊྛཱནེཧི པབྷསྶརརསྨིཡོ ནིཀྑམནྟི, ཡཱསཾ ཝསེན དིསཱབྷཱགཱ ཨོསདྷིཏཱརཀཔུཉྫཔུཎྞཱ ཝིཡ ཝིཛྫུཔཊལཱདིཔརིཔུཎྞཱ ཝིཡ ཙ ཝིརོཙནྟི.

བྷགཝཱ ཙངྐམཏཱིཏིཨཱདི ‘‘བྷགཝཏོ ཙ ནིམྨིཏཱནཉྩ ནཱནཱཨིརིཡཱཔཐཀརཎཾ ཡམཀཔཱཊིཧཱིརེནེཝ ཧོཏཱི’’ཏི དསྶནཏྠཾ ཝུཏྟཾ. ཏེསཉྷི ནིམྨིཏཱནཾ ཨིརིཡཱཔཐཱ ཡུགལཱཝ ཧུཏྭཱ ཝཏྟནྟི. ཡདི ནིམྨིཏཱ བཧུཀཱ ཧོནྟི, ‘‘ནིམྨིཏོ’’ཏིཨཱདི ཀསྨཱ ཨེཀཝཙནཾ ཀཏནྟི ཙེ? ནིམྨིཏེསུཔི ཨེཀེཀསྶ ནཱནཱཨིརིཡཱཔཐབྷཱཝདསྶནཏྠཾ. བཧུཝཙནེན ཧི ཝུཏྟེ སབྦེཔི ནིམྨིཏཱ སཀིཾ ཨེཀེཀཨིརིཡཱཔཐིཀཱ ཝིཡ ཧོནྟི. ཨེཀཝཙནེན པན ཝུཏྟེ ནིམྨིཏེསུ ཨེཀེཀོ ནཱནཱཨིརིཡཱཔཐིཀོཏི ཉཱཡཏི. ཏསྨཱ ཨེཀཝཙནནིདྡེསོ ཀཏོ. ཙཱུལ༹པནྠཀཏྠེརོཔི ཏཱཝ ནཱནཱཨིརིཡཱཔཐིཀབྷིཀྑཱུནཾ སཧསྶཾ མཱཔེསི, ཀིཾ པན བྷགཝཱ ཡམཀཔཱཊིཧཱིརེ བཧཱུ ནིམྨིཏེ ན ཀརིསྶཏི. ཙཱུལ༹པནྠཀཏྠེརཾ མུཉྩིཏྭཱ ཨཉྙེསཾ སཱཝཀཱནཾ ཨེཀཱཝཛྫནེན ནཱནཱཨིརིཡཔཐིཀཱནཾ ནཱནཱརཱུཔཱནཉྩ ནིམྨཱནཾ ན ཨིཛ྄ཛྷཏི. ཨནིཡམེཏྭཱ ཧི ནིམྨིཏཱ ཨིདྡྷིམཏཱ སདིསཱཝ ཧོནྟི. ཋཱནནིསཛྫཱདཱིསུ ཝཱ བྷཱསིཏཏུཎྷཱིབྷཱཝཱདཱིསུ ཝཱ ཡཾ ཡཾ ཨིདྡྷིམཱ ཀརོཏི, ཏཾ ཏདེཝ ཀརོནྟི, ཝིསདིསཀརཎཾ ནཱནཱཀིརིཡཱཀརཎཉྩ ‘‘ཨེཏྟཀཱ ཨཱིདིསཱ ཧོནྟུ, ཨེཏྟཀཱ ཨིམཾ ནཱམ ཀརོནྟཱུ’’ཏི ཝིསུཾ ཝིསུཾ ཨཱཝཛྫིཏྭཱ ཨདྷིཊྛཱནེན ཨིཛ྄ཛྷཏི. ཏཐཱགཏསྶ པན ཨེཀཱཝཛྫནཱདྷིཊྛཱནེནེཝ ནཱནཔྤཀཱརནིམྨཱནཾ ཨིཛ྄ཛྷཏི. ཨེཝམེཝ ཨགྒིཀྑནྡྷཨུདཀདྷཱརཱནིམྨཱནེ ཙ ནཱནཱཝཎྞནིམྨཱནེ ཙ ཝེདིཏབྦཾ. ཏཏྠ བྷགཝཱ ཙངྐམཏཱིཏི ཨཱཀཱསེ ཝཱ པཐཝིཡཾ ཝཱ ཙངྐམཏི. ནིམྨིཏོཏི ཨིདྡྷིཡཱ མཱཔིཏབུདྡྷརཱུཔཾ. ཏིཊྛཏི ཝཱཏིཨཱདཱིནིཔི ཨཱཀཱསེ ཝཱ པཐཝིཡཾ ཝཱ. ཀཔྤེཏཱིཏི ཀརོཏི. བྷགཝཱ ཏིཊྛཏཱིཏིཨཱདཱིསུཔི ཨེསེཝ ནཡོཏི.

ཡམཀཔཱཊིཧཱིརཉཱཎནིདྡེསཝཎྞནཱ ནིཊྛིཏཱ.

༧༡. མཧཱཀརུཎཱཉཱཎནིདྡེསཝཎྞནཱ

༡༡༧. མཧཱཀརུཎཱཉཱཎནིདྡེསེ བཧུཀེཧི ཨཱཀཱརེཧཱིཏི ཨིདཱནི ཝུཙྩམཱནེཧི ཨེཀཱུནནཝུཏིཡཱ པཀཱརེཧི. པསྶནྟཱནནྟི ཉཱཎཙཀྑུནཱ ཙ བུདྡྷཙཀྑུནཱ ཙ ཨོལོཀེནྟཱནཾ. ཨོཀྐམཏཱིཏི ཨོཏརཏི པཝིསཏི. ཨཱདིཏྟོཏི དུཀྑལཀྑཎཝསེན པཱིལཱ༹ཡོགཏོ སནྟཱཔནཊྛེན ཨཱདཱིཔིཏོ. ‘‘ཡདནིཙྩཾ, ཏཾ དུཀྑ’’ནྟི (སཾ. ནི. ༣.༡༥) ཝུཏྟཏྟཱ སབྦསངྑཏསྶ ཙེཝ དུཀྑལཀྑཎཝསེན པཱིལི༹ཏཏྟཱ དུཀྑསྶ ཙ ཀརུཎཱཡ མཱུལབྷཱུཏཏྟཱ པཋམཾ དུཀྑལཀྑཎཝསེན ‘‘ཨཱདིཏྟོ’’ཏི ཝུཏྟནྟི ཝེདིཏབྦཾ. རཱགཱདཱིཧི ཨཱདིཏྟཏཾ པན ཨུཔརི ཝཀྑཏི. ཨཐ ཝཱ ཨཱདིཏྟོཏི རཱགཱདཱིཧིཡེཝ ཨཱདིཏྟོ. ཨུཔརི པན ‘‘ཏསྶ ནཏྠཉྙོ ཀོཙི ནིབྦཱཔེཏཱ’’ཏི ཨཏྠཱཔེཀྑནཝསེན པུན ཝུཏྟནྟི ཝེདིཏབྦཾ. ལོཀསནྣིཝཱསོཏི པཉྩཀྑནྡྷཱ ལུཛྫནཔལུཛྫནཊྛེན ལོཀོ, ཏཎྷཱདིཊྛིཝསེན སནྣིཝསནྟི ཨེཏྠ སཏྟཱཏི སནྣིཝཱསོ, ལོཀོཝ སནྣིཝཱསོ ལོཀསནྣིཝཱསོ. དུཀྑིཏཾ ཁནྡྷསནྟཱནཾ ཨུཔཱདཱཡ སཏྟཝོཧཱརསབྦྷཱཝཏོ ལོཀསནྣིཝཱསཡོགཏོ སཏྟསམཱུཧོཔི ལོཀསནྣིཝཱསོ. སོཔི ཙ སཧཁནྡྷཀོཡེཝ. ཨུཡྻུཏྟོཏི ཨནེཀེསུ ཀིཙྩེསུ ནིཙྩབྱཱཔཱརཏཱཡ ཀཏཡོགོ ཀཏཨུསྶཱཧོ, སཏཏཀིཙྩེསུ སཨུསྶུཀྐོཏི ཨཏྠོ. གྷཊྚནཡུཏྟོཏི ཝཱ ཨུཡྻུཏྟོ. པཡཱཏོཏི པབྦཏེཡྻཱ ནདཱི ཝིཡ ཨནཝཊྛིཏགམནེན མརཎཱཡ ཡཱཏུཾ ཨཱརདྡྷོ. ཀུམྨགྒཔྤཊིཔནྣོཏི ཀུཙྪིཏཾ མིཙྪཱམགྒཾ པཊིཔནྣོ. ཨུཔརི པན ‘‘ཝིཔཐཔཀྑནྡོ’’ཏི ནཱནཱཔདེཧི ཝིསེསེཏྭཱ ཝུཏྟཾ.

ཨུཔནཱིཡཏཱིཏི ཛརཱཝསེན མརཎཱཡ ཨུཔནཱིཡཏི ཧརཱིཡཏི. ཛརཱ ཧི ‘‘ཨཱཡུནོ སཾཧཱནཱི’’ཏི (སཾ. ནི. ༢.༢) ཝུཏྟཱ. ཨདྡྷུཝོཏི ན ཐིརོ, སདཱ ཏཐེཝ ན ཧོཏི. ཡསྨཱ ཨདྡྷུཝོ, ཏསྨཱ ཨུཔནཱིཡཏཱིཏི པུརིམསྶ ཀཱརཎཝཙནམེཏཾ. ཨེཏེན སཀཱརཎཾ ཛརཱདུཀྑཾ ཝུཏྟཾ. ཏཾ ཛརཱདུཀྑཾ དིསྭཱ ཛརཱཔཱརིཛུཉྙརཧིཏཱཔི ཝིཉྙཱུ པབྦཛནྟི. ཨཏཱཎོཏི ཏཱཡིཏུཾ རཀྑིཏུཾ སམཏྠེན རཧིཏོ, ཨནཱརཀྑོཏི ཝུཏྟཾ ཧོཏི. ཨནབྷིསྶརོཏི ཨབྷིསརིཏྭཱ ཨབྷིགནྟྭཱ བྱཱཧརཎེན ཨསྶཱསེཏུཾ སམཏྠེན རཧིཏོ, ཨསཧཱཡོཏི ཝཱ ཨཏྠོ. ཡསྨཱ ཨནབྷིསྶརོ, ཏསྨཱ ཨཏཱཎོཏི པུརིམསྶ ཀཱརཎཝཙནམེཏཾ. ཨེཏེན སཀཱརཎཾ པིཡཝིཔྤཡོགདུཀྑཾ ཝུཏྟཾ. ཏཾ པིཡཝིཔྤཡོགདུཀྑཾ དིསྭཱ ཉཱཏིཔཱརིཛུཉྙརཧིཏཱཔི ཝིཉྙཱུ པབྦཛནྟི. ཨསྶཀོཏི སཀབྷཎྜརཧིཏོ. སབྦཾ པཧཱཡ གམནཱིཡནྟི སཀབྷཎྜནྟི སལླཀྑིཏཾ སབྦཾ པཧཱཡ ལོཀེན གནྟབྦཾ. ཡསྨཱ སབྦཾ པཧཱཡ གམནཱིཡཾ, ཏསྨཱ ཨསྶཀོཏི པུརིམསྶ ཀཱརཎཝཙནམེཏཾ. ཨེཏེན སཀཱརཎཾ མརཎདུཀྑཾ ཝུཏྟཾ. ཏཾ དིསྭཱ བྷོགཔཱརིཛུཉྙརཧིཏཱཔི ཝིཉྙཱུ པབྦཛནྟི. ཨཉྙཏྠ ‘‘ཀམྨསྶཀཱ མཱཎཝསཏྟཱ’’ཏི (མ. ནི. ༣.༢༨༩) ཝུཏྟཾ, ཨིདྷ ཙ རཊྛཔཱལསུཏྟེ ཙ ‘‘ཨསྶཀོ ལོཀོ’’ཏི (མ. ནི. ༢.༣༠༥) ཝུཏྟཾ, ཏཾ ཀཐཾ ཡུཛྫཏཱིཏི ཙེ? པཧཱཡ གམནཱིཡཾ སནྡྷཱཡ ‘‘ཨསྶཀོ’’ཏི ཝུཏྟཾ, ཀམྨཾ པན ན པཧཱཡ གམནཱིཡཾ. ཏསྨཱ ‘‘ཀམྨསྶཀཱ’’ཏི ཝུཏྟཾ. རཊྛཔཱལསུཏྟེཡེཝ ཙ ཨེཝམེཏཾ ཝུཏྟཾ ‘‘ཏྭཾ པན ཡཐཱཀམྨཾ གམིསྶསཱི’’ཏི (མ. ནི. ༢.༣༠༦). ཨཱུནོཏི པཱརིཔཱུརིརཧིཏོ. ཨཏིཏྟོཏི བྷིཡྻོ བྷིཡྻོ པཏྠནཱཡཔི ན སུཧིཏོ. ཨིདཾ ཨཱུནབྷཱཝསྶ ཀཱརཎཝཙནཾ. ཏཎྷཱདཱསོཏི ཏཎྷཱཡ ཝསེ ཝཏྟནཏོ ཏཎྷཱཡ དཱསབྷཱུཏོ. ཨིདཾ ཨཏིཏྟབྷཱཝསྶ ཀཱརཎཝཙནཾ. ཨེཏེན ཨིཙྪཱརོགཱཔདེསེན སཀཱརཎཾ བྱཱདྷིདུཀྑཾ ཝུཏྟཾ. ཏཾ བྱཱདྷིདུཀྑཾ དིསྭཱ བྱཱདྷིཔཱརིཛུཉྙརཧིཏཱཔི ཝིཉྙཱུ པབྦཛནྟི. ཨཏཱཡནོཏི པུཏྟཱདཱིཧིཔི ཏཱཡནསྶ ཨབྷཱཝཏོ ཨཏཱཡནོ ཨནཱརཀྑོ, ཨལབྦྷནེཡྻཁེམོ ཝཱ. ཨལེཎོཏི ཨལླཱིཡིཏུཾ ནིསྶིཏུཾ ཨནརཧོ ཨལླཱིནཱནམྤི ཙ ལེཎཀིཙྩཱཀཱརཀོ. ཨསརཎོཏི ནིསྶིཏཱནཾ ན བྷཡསཱརཀོ ན བྷཡཝིནཱསཀོ. ཨསརཎཱིབྷཱུཏོཏི པུརེ ཨུཔྤཏྟིཡཱ ཨཏྟནོ ཨབྷཱཝེནེཝ ཨསརཎོ, ཨུཔྤཏྟིསམཀཱལམེཝ ཨསརཎཱིབྷཱུཏོཏི ཨཏྠོ.

ཨུདྡྷཏོཏི སབྦཱཀུསལེསུ ཨུདྡྷཙྩསྶ ཨུཔྤཛྫནཏོ སཏྟསནྟཱནེ ཙ ཨཀུསལུཔྤཏྟིབཱཧུལླཏོ ཨཀུསལསམངྒཱིལོཀོ ཏེན ཨུདྡྷཙྩེན ཨུདྡྷཏོ. ཨཝཱུཔསནྟོཏི ཨཝཱུཔསམནལཀྑཎསྶ ཨུདྡྷཙྩསྶེཝ ཡོགེན ཨཝཱུཔསནྟོ བྷནྟམིགཔཊིབྷཱགོ. ‘‘ཨུཔནཱིཡཏི ལོཀོ’’ཏིཨཱདཱིསུ ཙཏཱུསུ ཙ ‘‘ཨུདྡྷཏོ ལོཀོ’’ཏི ཙ པཉྩསུ ཋཱནེསུ ལོཀོཏི ཨཱགཏཾ, སེསེསུ ལོཀསནྣིཝཱསོཏི. ཨུབྷཡཐཱཔི ལོཀོཡེཝ. སསལློཏི པཱིལཱ༹ཛནཀཏཱཡ ཨནྟོཏུདནཏཱཡ དུནྣཱིཧརཎཱིཡཏཱཡ ཙ སལླཱཏི སངྑཾ གཏེཧི རཱགཱདཱིཧི སལླེཧི སཧཝཏྟནཀོ. ཝིདྡྷོཏི མིགཱདཡོ ཀདཱཙི པརེཧི ཝིདྡྷཱ ཧོནྟི, ཨཡཾ པན ལོཀོ ནིཙྩཾ ཨཏྟནཱཝ ཝིདྡྷོ. པུཐུསལླེཧཱིཏི ‘‘སཏྟ སལླཱནི – རཱགསལླཾ, དོསསལླཾ, མོཧསལླཾ, མཱནསལླཾ, དིཊྛིསལླཾ, ཀིལེསསལླཾ, དུཙྩརིཏསལླ’’ནྟི (མཧཱནི. ༡༧༤) ཝུཏྟེཧི སཏྟཧི སལླེཧི. ཏསྶཱཏི ཏསྶ ལོཀསནྣིཝཱསསྶ. སལླཱནཾ ཨུདྡྷཏཱཏི ཏེསཾ སལླཱནཾ སཏྟསནྟཱནཏོ ཨུདྡྷརིཏཱ པུགྒལོ. ཨཉྙཏྲ མཡཱཏི མཾ ཋཔེཏྭཱ. ཡེཔི བྷགཝཏོ སཱཝཀཱ སལླཱནི ཨུདྡྷརནྟི, ཏེསཾ བྷགཝཏོ ཝཙནེནེཝ ཨུདྡྷརཎཏོ བྷགཝཱཝ ཨུདྡྷརཏི ནཱམ. ཨཝིཛྫནྡྷཀཱརཱཝརཎོཏི ཨཝིཛྫཱ ཨེཝ སབྷཱཝདསྶནཙྪཱདནེན ཨནྡྷཾ ཝིཡ ཀརོཏཱིཏི ཨཝིཛྫནྡྷཀཱརོ, སོཝ སབྷཱཝཱཝགམནནིཝཱརཎེན ཨཱཝརཎཾ ཨེཏསྶཱཏི ཨཝིཛྫནྡྷཀཱརཱཝརཎོ. ཀིལེསཔཉྫརཔཀྑིཏྟོཏི ཀིལེསཱ ཨེཝ ཀུསལགམནསནྣིརུཛ྄ཛྷནཊྛེན པཉྫརོཏི ཀིལེསཔཉྫརོ, ཨཝིཛྫཱཔབྷཝེ ཀིལེསཔཉྫརེ པཀྑིཏྟོ པཱཏིཏོ. ཨཱལོཀཾ དསྶེཏཱཏི པཉྙཱལོཀཾ དསྶནསཱིལོ, པཉྙཱལོཀསྶ དསྶེཏཱཏི ཝཱ ཨཏྠོ. ཨཝིཛྫཱགཏོཏི ཨཝིཛྫཾ གཏོ པཝིཊྛོ. ན ཀེཝལཾ ཨཝིཛྫཱཡ ཨཱཝརཎམཏྟམེཝ, ཨཐ ཁོ གཧནགཏོ ཝིཡ ཨཝིཛྫཱཀོསསྶ ཨནྟོ པཝིཊྛོཏི པུརིམཏོ ཝིསེསོ. ཨཎྜབྷཱུཏོཏིཨཱདཡོ ཙ ཝིསེསཱཡེཝ. ཨཎྜབྷཱུཏོཏི ཨཎྜེ བྷཱུཏོ ནིབྦཏྟོ. ཡཐཱ ཧི ཨཎྜེ ནིབྦཏྟཱ ཨེཀཙྩེ སཏྟཱ ‘‘ཨཎྜབྷཱུཏཱ’’ཏི ཝུཙྩནྟི, ཨེཝམཡཾ ལོཀོ ཨཝིཛྫཎྜཀོསེ ནིབྦཏྟཏྟཱ ‘‘ཨཎྜབྷཱུཏོ’’ཏི ཝུཙྩཏི. པརིཡོནདྡྷོཏི ཏེན ཨཝིཛྫཎྜཀོསེན སམནྟཏོ ཨོནདྡྷོ བདྡྷོ ཝེཋིཏོ.

ཏནྟཱཀུལཀཛཱཏོཏི ཏནྟཾ ཝིཡ ཨཱཀུལབྷཱུཏོ. ཡཐཱ ནཱམ དུནྣིཀྑིཏྟཾ མཱུསིཀཙྪིནྣཾ པེསཀཱརཱནཾ ཏནྟཾ ཏཧིཾ ཏཧིཾ ཨཱཀུལཾ ཧོཏི, ཨིདཾ ཨགྒཾ ཨིདཾ མཱུལནྟི ཨགྒེན ཝཱ ཨགྒཾ, མཱུལེན ཝཱ མཱུལཾ སམཱནེཏུཾ དུཀྐརཾ ཧོཏི, ཨེཝམེཝ སཏྟཱ པཙྩཡཱཀཱརེ ཁལིཏཱ ཨཱཀུལཱ བྱཱཀུལཱ ཧོནྟི, ན སཀྐོནྟི པཙྩཡཱཀཱརཾ ཨུཛུཾ ཀཱཏུཾ. ཏཏྠ ཏནྟཾ པཙྩཏྟཔུརིསཀཱརེ ཋཏྭཱ སཀྐཱཔི བྷཝེཡྻ ཨུཛུཾ ཀཱཏུཾ, ཋཔེཏྭཱ པན དྭེ བོདྷིསཏྟེ ཨཉྙོ སཏྟོ ཨཏྟནོ དྷམྨཏཱཡ པཙྩཡཱཀཱརཾ ཨུཛུཾ ཀཱཏུཾ སམཏྠོ ནཱམ ནཏྠི. ཡཐཱ པན ཨཱཀུལཾ ཏནྟཾ ཀཉྫིཀཾ དཏྭཱ ཀོཙྪེན པཧཊཾ ཏཏྠ ཏཏྠ ཀུལཀཛཱཏཾ ཧོཏི གཎྛིབདྡྷཾ, ཨེཝམཡཾ ལོཀོ པཙྩཡེསུ པཀྑལིཏྭཱ པཙྩཡེ ཨུཛུཾ ཀཱཏུཾ ཨསཀྐོནྟོ དྭཱསཊྛིདིཊྛིགཏཝསེན ཀུལཀཛཱཏོ ཧོཏི གཎྛིབདྡྷོ. ཡེ ཧི ཀེཙི དིཊྛིཡོ ནིསྶིཏཱ, སབྦེ ཏེ པཙྩཡཾ ཨུཛུཾ ཀཱཏུཾ ན སཀྐོནྟིཡེཝ. ཀུལཱགཎྛིཀཛཱཏོཏི ཀུལཱགཎྛིཀཾ ཝིཡ བྷཱུཏོ. ཀུལཱགཎྛིཀཾ ཝུཙྩཏི པེསཀཱརཀཉྫིཀསུཏྟཾ. ‘‘ཀུལཱ ནཱམ སཀུཎིཀཱ, ཏསྶཱ ཀུལཱཝཀོ’’ཏིཔི ཨེཀེ. ཡཐཱ ཏདུབྷཡམྤི ཨཱཀུལཾ ཨགྒེན ཝཱ ཨགྒཾ, མཱུལེན ཝཱ མཱུལཾ སམཱནེཏུཾ དུཀྐརནྟི པུརིམནཡེནེཝ ཡོཛེཏབྦཾ. མུཉྫཔབྦཛབྷཱུཏོཏི མུཉྫཏིཎཾ ཝིཡ པབྦཛཏིཎཾ ཝིཡ ཙ བྷཱུཏོ མུཉྫཏིཎཔབྦཛཏིཎསདིསོ ཛཱཏོ. ཡཐཱ ཏཱནི ཏིཎཱནི ཀོཊྚེཏྭཱ ཀོཊྚེཏྭཱ ཀཏརཛྫུ ཛིཎྞཀཱལེ ཀཏྠཙི པཏིཏཾ གཧེཏྭཱ ཏེསཾ ཏིཎཱནཾ ‘‘ཨིདཾ ཨགྒཾ ཨིདཾ མཱུལ’’ནྟི ཨགྒེན ཝཱ ཨགྒཾ, མཱུལེན ཝཱ མཱུལཾ སམཱནེཏུཾ དུཀྐརཾ, ཏམྤི པཙྩཏྟཔུརིསཀཱརེ ཋཏྭཱ སཀྐཱ བྷཝེཡྻ ཨུཛུཾ ཀཱཏུཾ, ཋཔེཏྭཱ པན དྭེ བོདྷིསཏྟེ ཨཉྙོ སཏྟོ ཨཏྟནོ དྷམྨཏཱཡ པཙྩཡཱཀཱརཾ ཨུཛུཾ ཀཱཏུཾ སམཏྠོ ནཱམ ནཏྠི. ཨེཝམཡཾ ལོཀོ པཙྩཡཱཀཱརཾ ཨུཛུཾ ཀཱཏུཾ ཨསཀྐོནྟོ དྭཱསཊྛིདིཊྛིགཏཝསེན གཎྛིཛཱཏོ ཧུཏྭཱ ཨཔཱཡཾ དུགྒཏིཾ ཝིནིཔཱཏཾ སཾསཱརཾ ནཱཏིཝཏྟཏི.

ཏཏྠ ཨཔཱཡོཏི ནིརཡོ ཏིརཙྪཱནཡོནི པེཏྟིཝིསཡོ ཨསུརཀཱཡོ. སབྦེཔི ཧི ཏེ ཝཌྜྷིསངྑཱཏསྶ ཨཱཡསྶ ཨབྷཱཝཏོ ‘‘ཨཔཱཡོ’’ཏི ཝུཙྩནྟི. ཏཐཱ དུཀྑསྶ གཏིབྷཱཝཏོ དུགྒཏི. སུཁསམུསྶཡཏོ ཝིནིཔཏིཏཏྟཱ ཝིནིཔཱཏོ. ཨིཏརོ པན –

‘‘ཁནྡྷཱནཉྩ པཊིཔཱཊི, དྷཱཏུཨཱཡཏནཱན ཙ;

ཨབྦོཙྪིནྣཾ ཝཏྟམཱནཱ, སཾསཱརོཏི པཝུཙྩཏི’’.

ཏཾ སབྦམྤི ནཱཏིཝཏྟཏི ནཱཏིཀྐམཏི. ཨཐ ཁོ ཙུཏིཏོ པཊིསནྡྷིཾ, པཊིསནྡྷིཏོ ཙུཏིནྟི ཨེཝཾ པུནཔྤུནཾ ཙུཏིཔཊིསནྡྷིཡོ གཎྷམཱནོ ཏཱིསུ བྷཝེསུ ཙཏཱུསུ ཡོནཱིསུ པཉྩསུ གཏཱིསུ སཏྟསུ ཝིཉྙཱཎཊྛིཏཱིསུ ནཝསུ སཏྟཱཝཱསེསུ མཧཱསམུདྡེ ཝཱཏུཀྑིཏྟནཱཝཱ ཝིཡ ཡནྟགོཎོ ཝིཡ ཙ པརིབྦྷམཏིཡེཝ. ཨཝིཛྫཱཝིསདོསསལླིཏྟོཏི ཨཝིཛྫཱཡེཝ ཨཀུསལུཔྤཱདནེན ཀུསལཛཱིཝིཏནཱསནཏོ ཝིསནྟི ཨཝིཛྫཱཝིསཾ, ཏདེཝ སནྟཱནདཱུསནཏོ ཨཝིཛྫཱཝིསདོསོ, ཏེན ཨནུསཡཔརིཡུཊྛཱནདུཙྩརིཏབྷཱུཏེན བྷུསཾ ལིཏྟོ མཀྑིཏོཏི ཨཝིཛྫཱཝིསདོསསལླིཏྟོ. ཀིལེསཀལལཱིབྷཱུཏོཏི ཨཝིཛྫཱདིམཱུལཀཱ ཀིལེསཱ ཨེཝ ཨོསཱིདནཊྛེན ཀལལཾ ཀདྡམོཏི ཀིལེསཀལལཾ, ཏདསྶ ཨཏྠཱིཏི ཀིལེསཀལལཱི, ཨེཝཾབྷཱུཏོ. རཱགདོསམོཧཛཊཱཛཊིཏོཏི ལོབྷཔཊིགྷཱཝིཛྫཱསངྑཱཏཱ རཱགདོསམོཧཱ ཨེཝ རཱུཔཱདཱིསུ ཨཱརམྨཎེསུ ཧེཊྛུཔརིཡཝསེན པུནཔྤུནཾ ཨུཔྤཛྫནཏོ སཾསིབྦནཊྛེན ཝེལུ༹གུམྦཱདཱིནཾ སཱཁཱཛཱལསངྑཱཏཱ ཛཊཱ ཝིཡཱཏི ཛཊཱ, ཏཱཡ རཱགདོསམོཧཛཊཱཡ ཛཊིཏོ. ཡཐཱ ནཱམ ཝེལུ༹ཛཊཱདཱིཧི ཝེལུ༹ཨཱདཡོ, ཨེཝཾ ཏཱཡ ཛཊཱཡ ཨཡཾ ལོཀོ ཛཊིཏོ ཝིནདྡྷོ སཾསིབྦིཏོཏི ཨཏྠོ. ཛཊཾ ཝིཛཊེཏཱཏི ཨིམཾ ཨེཝཾ ཏེདྷཱཏུཀཾ ལོཀཾ ཛཊེཏྭཱ ཋིཏཾ ཛཊཾ ཝིཛཊེཏཱ སཾཚིནྡིཏཱ སམྤདཱལཡིཏཱ.

ཏཎྷཱསངྒྷཱཊཔཊིམུཀྐོཏི ཏཎྷཱ ཨེཝ ཨབྦོཙྪིནྣཾ པཝཏྟིཏོ སངྒྷཊིཏཊྛེན སངྒྷཱཊོཏི ཏཎྷཱསངྒྷཱཊོ, ཏསྨིཾ ཏཎྷཱསངྒྷཱཊེ པཊིམུཀྐོ ཨནུཔཝིཊྛོ ཨནྟོགཏོཏི ཏཎྷཱསངྒྷཱཊཔཊིམུཀྐོ. ཏཎྷཱཛཱལེན ཨོཏྠཊོཏི ཏཎྷཱ ཨེཝ པུབྦེ ཝུཏྟནཡེན སཾསིབྦནཊྛེན ཛཱལནྟི ཏཎྷཱཛཱལཾ, ཏེན ཏཎྷཱཛཱལེན ཨོཏྠཊོ སམནྟཏོ ཚཱདིཏོ པལིཝེཋིཏོ. ཏཎྷཱསོཏེན ཝུཡ྄ཧཏཱིཏི ཏཎྷཱ ཨེཝ སཾསཱརེ ཨཱཀཌྜྷནཊྛེན སོཏོཏི ཏཎྷཱསོཏོ, ཏེན ཏཎྷཱསོཏེན ཝུཡ྄ཧཏི ཨཱཀཌྜྷཱིཡཏི. ཏཎྷཱསཉྙོཛནེན སཉྙུཏྟོཏི ཏཎྷཱ ཨེཝ ལོཀཾ ཝཊྚསྨིཾ སཾཡོཛནཏོ བནྡྷནཏོ སཾཡོཛནནྟི ཏཎྷཱསཾཡོཛནཾ, ཏེན ཏཎྷཱསཾཡོཛནེན སཉྙུཏྟོ བདྡྷོ. ཏཎྷཱནུསཡེན ཨནུསཊོཏི ཏཎྷཱ ཨེཝ ཨནུསཡནཊྛེན ཨནུསཡོཏི ཏཎྷཱནུསཡོ, ཏེན ཏཎྷཱནུསཡེན ཨནུསཊོ ཨནུགཏོ ཐཱམགཏོ. ཏཎྷཱསནྟཱཔེན སནྟཔྤཏཱིཏི ཏཎྷཱ ཨེཝ པཝཏྟིཀཱལེ ཕལཀཱལེ ཙ ལོཀཾ སནྟཱཔེཏཱིཏི སནྟཱཔོ, ཏེན ཏཎྷཱསནྟཱཔེན སནྟཔྤཏི སནྟཱཔཱིཡཏི. ཏཎྷཱཔརིལཱ༹ཧེན པརིཌཡ྄ཧཏཱིཏི ཏཎྷཱ ཨེཝ བལཝབྷཱུཏཱ པཝཏྟིཀཱལེ ཕལཀཱལེ ཙ སམནྟཏོ དཧནཊྛེན མཧཱཔརིལཱ༹ཧོཏི ཏཎྷཱཔརིལཱ༹ཧོ, ཏེན ཏཎྷཱཔརིལཱ༹ཧེན པརིཌཡ྄ཧཏི སམནྟཏོ ཌཧཱིཡཏི. དིཊྛིསངྒྷཱཊཱདཡོ ཨིམིནཱཝ ནཡེན ཡོཛེཏབྦཱ.

ཨནུགཏོཏི ཨནུཔཝིཊྛོ. ཨནུསཊོཏི ཨནུདྷཱཝིཏོ. ཨབྷིབྷཱུཏོཏི པཱིལི༹ཏོ. ཨབྦྷཱཧཏོཏི ཨབྷིཨཱཧཏོ ཨབྷིམུཁཾ བྷུསཾ པཧཏོ. དུཀྑེ པཏིཊྛིཏོཏི དུཀྑེ ཁནྡྷཔཉྩཀེ སུཁཝིཔལླཱསེན པཏིཊྛིཏོ ཨབྷིནིཝིཊྛོ.

ཏཎྷཱཡ ཨུཌྜིཏོཏི ཏཎྷཱཡ ཨུལླངྒྷིཏོ. ཙཀྑུ ཧི ཏཎྷཱརཛྫུནཱ ཨཱཝུནིཏྭཱ རཱུཔནཱགདནྟེ ཨུཌྜིཏཾ, སོཏཱདཱིནི ཏཎྷཱརཛྫུནཱ ཨཱཝུནིཏྭཱ སདྡཱདིནཱགདནྟེསུ ཨུཌྜིཏཱནི. ཏཾསམངྒཱིལོཀོཔི ཨུཌྜིཏོཡེཝ ནཱམ. ཛརཱཔཱཀཱརཔརིཀྑིཏྟོཏི ཨནཏིཀྐམནཱིཡཊྛེན པཱཀཱརབྷཱུཏཱཡ ཛརཱཡ པརིཝཱརིཏོ. མཙྩུཔཱསེན པརིཀྑིཏྟོཏི དུམྨོཙནཱིཡཊྛེན པཱསབྷཱུཏེན མརཎེན བདྡྷོ. མཧཱབནྡྷནབདྡྷོཏི དལ༹ྷཏྟཱ དུཙྪེདཏྟཱ ཙ མཧནྟེཧི བནྡྷནེཧི བདྡྷོ. རཱགབནྡྷནེནཱཏི རཱགོ ཨེཝ བནྡྷཏི སཾསཱརཏོ ཙལིཏུཾ ན དེཏཱིཏི རཱགབནྡྷནཾ. ཏེན རཱགབནྡྷནེན. སེསེསུཔི ཨེསེཝ ནཡོ. ཀིལེསབནྡྷནེནཱཏི ཝུཏྟཱཝསེསེན ཀིལེསབནྡྷནེན. དུཙྩརིཏབནྡྷནེནཱཏི ཏིཝིདྷེན. སུཙརིཏཾ པན བནྡྷནམོཀྑསྶ ཧེཏུབྷཱུཏཾ བནྡྷནམོཀྑབྷཱུཏཉྩ ཨཏྠི. ཏསྨཱ ཏཾ ན གཧེཏབྦཾ.

བནྡྷནཾ མོཙེཏཱཏི ཏསྶ བནྡྷནཾ མོཙེཏཱ. བནྡྷནཱ མོཙེཏཱཏིཔི པཱཋོ, བནྡྷནཏོ ཏཾ མོཙེཏཱཏི ཨཏྠོ. མཧཱསམྦཱདྷཔྤཊིཔནྣོཏི ཀུསལསཉྩཱརཔཱིལ༹ནེན མཧཱསམྦཱདྷསངྑཱཏཾ རཱགདོསམོཧམཱནདིཊྛིཀིལེསདུཙྩརིཏགཧནཾ པཊིཔནྣོ. ཨོཀཱསཾ དསྶེཏཱཏི ལོཀིཡལོཀུཏྟརསམཱདྷིཔཉྙཱཨོཀཱསཾ དསྶེཏཱ. མཧཱཔལིབོདྷེན པལིབུདྡྷོཏི མཧཱནིཝཱརཎེན ནིཝུཏོ. མཧཱལེཔེན ཝཱ ལིཏྟོ. པལིབོདྷོཏི ཙ རཱགཱདིསཏྟཝིདྷོ ཨེཝ. ‘‘ཏཎྷཱདིཊྛིཔལིབོདྷོ’’ཏི ཨེཀེ. པལིབོདྷཾ ཚེཏཱཏི ཏཾ པལིབོདྷཾ ཚིནྡིཏཱ. མཧཱཔཔཱཏེཏི པཉྩགཏིཔཔཱཏེ, ཛཱཏིཛརཱམརཎཔཔཱཏེ ཝཱ. ཏཾ སབྦམྤི དུརུཏྟརཎཊྛེན པཔཱཏོ. པཔཱཏཱ ཨུདྡྷཏཱཏི ཏམྷཱ པཔཱཏཏོ ཨུདྡྷརིཏཱ. མཧཱཀནྟཱརཔྤཊིཔནྣོཏི ཛཱཏིཛརཱབྱཱདྷིམརཎསོཀཔརིདེཝདུཀྑདོམནསྶུཔཱཡཱསཀནྟཱརཾ པཊིཔནྣོ. སབྦམྤི ཏཾ དུརཏིཀྐམནཊྛེན ཀནྟཱརོ, ཏཾ ཀནྟཱརཾ ཏཱརེཏཱ. ཀནྟཱརཱ ཏཱརེཏཱཏི ཝཱ པཱཋོ. མཧཱསཾསཱརཔྤཊིཔནྣོཏི ཨབྦོཙྪིནྣཾ ཁནྡྷསནྟཱནཾ པཊིཔནྣོ. སཾསཱརཱ མོཙེཏཱཏི སཾསཱརཏོ མོཙེཏཱ. སཾསཱརཾ མོཙེཏཱཏི ཝཱ པཱཋོ. མཧཱཝིདུགྒེཏི སཾསཱརཝིདུགྒེ. སཾསཱརོཡེཝ ཧི དུགྒམནཊྛེན ཝིདུགྒོ. སམྤརིཝཏྟཏཱིཏི བྷུསཾ ནིཝཏྟིཏྭཱ ཙརཏི. མཧཱཔལིཔེཏི མཧནྟེ ཀཱམཀདྡམེ. ཀཱམོ ཧི ཨོསཱིདནཊྛེན པལིཔོ. པལིཔནྣོཏི ལགྒོ. མཧཱཔལིཔཔལིཔནྣོཏིཔི པཱཋོ.

ཨབྦྷཱཧཏོཏི སབྦོཔདྡཝེཧི ཨབྦྷཱཧཏོ. རཱགགྒིནཱཏི རཱགཱདཡོཡེཝ ཨནུདཧནཊྛེན ཨགྒི, ཏེན རཱགགྒིནཱ. སེསེསུཔི ཨེསེཝ ནཡོ. ཨུནྣཱིཏཀོཏི ཨུགྒཧེཏྭཱ ནཱིཏོ, ཛཱཏིཡཱ ཨུགྒཧེཏྭཱ ཛརཱདིཨུཔདྡཝཱཡ ནཱིཏོཏི ཨཏྠོ. ཀ-ཀཱརོ པནེཏྠ ཨནུཀམྤཱཡ དཊྛབྦོ. ཧཉྙཏི ནིཙྩམཏཱཎོཏི པརིཏྟཱཡཀེན རཧིཏོ སཏཏཾ པཱིལཱི༹ཡཏི. པཏྟདཎྜོཏི རཱཛཱདཱིཧི ལདྡྷཨཱཎོ. ཏཀྐརོཏི ཙོརོ. ཝཛྫབནྡྷནབདྡྷོཏི རཱགཱདིཝཛྫབནྡྷནེཧི བདྡྷོ. ཨཱགྷཱཏནཔཙྩུཔཊྛིཏོཏི མརཎདྷམྨགཎྛིཀཊྛཱནཾ ཨུཔེཙྩ ཋིཏོ. ཀོཙི བནྡྷནཱ མོཙེཏཱ. ཀོཙི བནྡྷནཾ མོཙེཏཱཏིཔི པཱཋོ. ཨནཱཐོཏི ནཏྠི ཨེཏསྶ ནཱཐོ ཨིསྶརོ, སཡཾ ཝཱ ན ནཱཐོ ན ཨིསྶརོཏི ཨནཱཐོ, ཨསརཎོཏི ཝཱ ཨཏྠོ. པརམཀཱཔཉྙཔྤཏྟོཏི ཛརཱདིཔཊིབཱཧནེ ཨཔྤཧུཏཱཡ ཨཏཱིཝ ཀཔཎབྷཱཝཾ པཏྟོ. ཏཱཡེཏཱཏི རཀྑིཏཱ. ཏཱཡིཏཱཏི ཝཱ པཱཋོ སུནྡརོ. དུཀྑཱབྷིཏུནྣོཏི ཛཱཏིདུཀྑཱདཱིཧི ཨནེཀེཧི དུཀྑེཧི ཨབྷིཏུནྣོ ཨཏིབྱཱདྷིཏོ ཨཏིཀམྤིཏོ ཙ. ཙིརརཏྟཾ པཱིལི༹ཏོཏི དུཀྑེཧེཝ དཱིགྷམདྡྷཱནཾ པཱིལི༹ཏོ གྷཊྚིཏོ. གདྷིཏོཏི གེདྷེན གིདྡྷོ, ཨབྷིཛ྄ཛྷཱཀཱཡགནྠེན ཝཱ གནྠིཏོ. ནིཙྩཾ པིཔཱསིཏོཏི པཱཏུཾ བྷུཉྫིཏུཾ ཨིཙྪཱ པིཔཱསཱ, སཱ ཏཎྷཱ ཨེཝ, ཏཎྷཱཔིཔཱསཱཡ ནིརནྟརཾ པིཔཱསིཏོ.

ཨནྡྷོཏི དསྶནཊྛེན ཙཀྑཱུཏི སངྑཾ གཏཱཡ པཉྙཱཡ ཨབྷཱཝཏོ ཀཱཎོ. པཉྙཱ ཧི དྷམྨསབྷཱཝཾ པསྶཏི. ཨཙཀྑུཀོཏི ཏཾ པན ཨནྡྷཏྟཾ ན པཙྪཱ སམྦྷཱུཏཾ, པཀཏིཡཱ ཨེཝ ཨཝིཛྫམཱནཙཀྑུཀོཏི ཏམེཝ ཨནྡྷཏྟཾ ཝིསེསེཏི. ཧཏནེཏྟོཏི ནཡནཊྛེན ནེཏྟནྟི སངྑཾ གཏཱཡ པཉྙཱཡ ཨབྷཱཝཏོཡེཝ ཝིནཊྛནེཏྟཀོ. སམཝིསམཾ དསྶེནྟཾ ཨཏྟབྷཱཝཾ ནེཏཱིཏི ནེཏྟནྟི ཧི ཝུཏྟཾ. པཉྙཱཡ སུགཏིཉྩ ཨགཏིཉྩ ནཡཏི. ཧཏནེཏྟཏྟཱཡེཝསྶ ནེཏུཨབྷཱཝཾ དསྶེནྟོ ཨཔརིཎཱཡཀོཏི ཨཱཧ, ཨཝིཛྫམཱནནེཏྟཀོཏི ཨཏྠོ. ཨཉྙོཔིསྶ ནེཏཱ ན ཝིཛྫཏཱིཏི ཝུཏྟཾ ཧོཏི. ཝིཔཐཔཀྑནྡོཏི ཝིཔརཱིཏོ, ཝིསམོ ཝཱ པཐོ ཝིཔཐོ, ཏཾ ཝིཔཐཾ པཀྑནྡོ པཝིཊྛོ པཊིཔནྣོཏི ཝིཔཐཔཀྑནྡོ, མིཙྪཱཔཐསངྑཱཏཾ མིཙྪཱདིཊྛིཾ པཊིཔནྣོཏི ཨཏྠོ. ཨཉྫསཱཔརདྡྷོཏི ཨཉྫསེ ཨུཛུམགྒསྨིཾ མཛ྄ཛྷིམཔཊིཔདཱཡ ཨཔརདྡྷོ ཝིརདྡྷོ. ཨརིཡཔཐཾ ཨཱནེཏཱཏི ཨརིཡཾ ཨཊྛངྒིཀཾ མགྒཾ ཨུཔནེཏཱ པཊིཔཱདཡིཏཱ. མཧོགྷཔཀྑནྡོཏི ཡསྶ སཾཝིཛྫནྟི, ཏཾ ཝཊྚསྨིཾ ཨོཧནནྟི ཨོསཱིདཱཔེནྟཱིཏི ཨོགྷཱ, པཀཏིཨོགྷཏོ མཧནྟཱ ཨོགྷཱཏི མཧོགྷཱ. ཏེ ཀཱམོགྷོ བྷཝོགྷོ དིཊྛོགྷོ ཨཝིཛྫོགྷོཏི ཙཏུཔྤབྷེདཱ. ཏེ མཧོགྷེ པཀྑནྡོ པཝིཊྛོཏི མཧོགྷཔཀྑནྡོ, སཾསཱརསངྑཱཏཾ མཧོགྷཾ ཝཱ པཀྑནྡོཏི.

༡༡༨. ཨིདཱནི ཨེཀུཏྟརིཀནཡོ. ཏཏྠ དྭཱིཧི དིཊྛིགཏེཧཱིཏི སསྶཏུཙྪེདདིཊྛཱིཧི. ཏཏྠ དིཊྛིཡེཝ དིཊྛིགཏཾ ‘‘གཱུཐགཏཾ མུཏྟགཏ’’ནྟིཨཱདཱིནི (ཨ. ནི. ༩.༡༡) ཝིཡ. གནྟབྦཱབྷཱཝཏོ ཝཱ དིཊྛིཡཱ གཏམཏྟམེཝེཏནྟི དིཊྛིགཏཾ, དིཊྛཱིསུ གཏཾ ཨིདཾ དསྶནཾ དྭཱསཊྛིདིཊྛིཨནྟོགདྷཏྟཱཏིཔི དིཊྛིགཏཾ. དྭཱསཊྛིཏེསཊྛིདིཊྛིཡོཔི ཧི སསྶཏདིཊྛི ཨུཙྪེདདིཊྛཱིཏི དྭེཝ དིཊྛིཡོ ཧོནྟི. ཏསྨཱ སངྑེཔེན སབྦཱ དིཊྛིཡོ ཨནྟོ ཀརོནྟོ ‘‘དྭཱིཧི དིཊྛིགཏེཧཱི’’ཏི ཝུཏྟཾ. པརིཡུཊྛིཏོཏི པརིཡུཊྛཱནཾ པཏྟོ སམུདཱཙཱརཾ པཏྟོ, ཨུཔྤཛྫིཏུཾ ཨཔྤདཱནེན ཀུསལཙཱརསྶ གཧཎཾ པཏྟོཏི ཨཏྠོ. ཝུཏྟཉྷེཏཾ བྷགཝཏཱ – ‘‘དྭཱིཧི, བྷིཀྑཝེ, དིཊྛིགཏེཧི པརིཡུཊྛིཏཱ དེཝམནུསྶཱ ཨོལཱིཡནྟི ཨེཀེ, ཨཏིདྷཱཝནྟི ཨེཀེ, ཙཀྑུམནྟོ ཙ པསྶནྟཱི’’ཏིཨཱདི (ཨིཏིཝུ. ༤༩).

ཏཱིཧི དུཙྩརིཏེཧཱིཏི ཏིཝིདྷཀཱཡདུཙྩརིཏེན ཙཏུབྦིདྷཝཙཱིདུཙྩརིཏེན ཏིཝིདྷམནོདུཙྩརིཏེན. ཝིཔྤཊིཔནྣོཏི ཝིརཱུཔཾ པཊིཔནྣོ, མིཙྪཱཔཊིཔནྣོཏི ཨཏྠོ. ཡོགེཧི ཡུཏྟོཏི ཝཊྚསྨིཾ ཡོཛེནྟཱིཏི ཡོགཱ, ཨཱིཏིཨཏྠེན ཝཱ ཡོགཱ, ཏེཧི ཡོགེཧི ཡུཏྟོ སམཔྤིཏོ. ཙཏུཡོགཡོཛིཏོཏི ཀཱམཡོགོ, བྷཝཡོགོ, དིཊྛིཡོགོ, ཨཝིཛྫཱཡོགོཏི ཨིམེཧི ཙཏཱུཧི ཡོགེཧི སཀཊསྨིཾ ཡོགོ ཝིཡ ཝཊྚསྨིཾ ཡོཛིཏོ. པཉྩཀཱམགུཎིཀོ རཱགོ ཀཱམཡོགོ. རཱུཔཱརཱུཔབྷཝེསུ ཚནྡརཱགོ, ཛྷཱནནིཀནྟི ཙ, སསྶཏདིཊྛིསཧཛཱཏོ རཱགོ བྷཝཝསེན པཏྠནཱ བྷཝཡོགོ. དྭཱསཊྛི དིཊྛིཡོ དིཊྛིཡོགོ. ཨཊྛསུ ཋཱནེསུ ཨཉྙཱཎཾ ཨཝིཛྫཱཡོགོ. ཏེ ཨེཝ ཙཏྟཱརོ བལཝབྷཱུཏཱ ཨོགྷཱ, དུབྦལབྷཱུཏཱ ཡོགཱ.

ཙཏཱུཧི གནྠེཧཱིཏི ཡསྶ སཾཝིཛྫནྟི, ཏཾ ཙུཏིཔཊིསནྡྷིཝསེན ཝཊྚསྨིཾ གནྠེནྟི གྷཊེནྟཱིཏི གནྠཱ. ཏེ ཨབྷིཛ྄ཛྷཱ ཀཱཡགནྠོ, བྱཱཔཱདོ ཀཱཡགནྠོ, སཱིལབྦཏཔརཱམཱསོ ཀཱཡགནྠོ, ཨིདཾསཙྩཱབྷིནིཝེསོ ཀཱཡགནྠོཏི ཙཏུཔྤབྷེདཱ. ཨབྷིཛ྄ཛྷཱཡནྟི ཨེཏཱཡ, སཡཾ ཝཱ ཨབྷིཛ྄ཛྷཱཡཏི, ཨབྷིཛ྄ཛྷཱཡནམཏྟམེཝ ཝཱ ཨེསཱཏི ཨབྷིཛ྄ཛྷཱ, ལོབྷོཡེཝ. ནཱམཀཱཡཾ གནྠེཏི ཙུཏིཔཊིསནྡྷིཝསེན ཝཊྚསྨིཾ གྷཊེཏཱིཏི ཀཱཡགནྠོ. བྱཱཔཛྫཏི ཏེན ཙིཏྟཾ པཱུཏིབྷཱཝཾ གཙྪཏི, བྱཱཔཱདཡཏི ཝཱ ཝིནཡཱཙཱརརཱུཔསམྤཏྟིཧིཏསུཁཱདཱིནཱིཏི བྱཱཔཱདོ. ཨིཏོ བཧིདྡྷཱ སམཎབྲཱཧྨཎཱནཾ སཱིལེན སུདྡྷི ཝཏེན སུདྡྷི སཱིལཝཏེན སུདྡྷཱིཏི པརཱམསནཾ སཱིལབྦཏཔརཱམཱསོ. སབྦཉྙུབྷཱསིཏམྤི པཊིཀྑིཔིཏྭཱ ‘‘སསྶཏོ ལོཀོ, ཨིདམེཝ སཙྩཾ མོགྷམཉྙ’’ནྟིཨཱདིནཱ ཨཱཀཱརེན ཨབྷིནིཝིསཏཱིཏི ཨིདཾསཙྩཱབྷིནིཝེསོ. ཏེཧི ཙཏཱུཧི གནྠེཧི གནྠིཏོ, བདྡྷོཏི ཨཏྠོ.

ཙཏཱུཧི ཨུཔཱདཱནེཧཱིཏི བྷུསཾ ཨཱདིཡནྟི དལ༹ྷགྒཱཧཾ གཎྷནྟཱིཏི ཨུཔཱདཱནཱ. ཏེ ཀཱམུཔཱདཱནཾ དིཊྛུཔཱདཱནཾ སཱིལབྦཏུཔཱདཱནཾ ཨཏྟཝཱདུཔཱདཱནནྟི ཙཏུཔྤབྷེདཱ. ཝཏྠུསངྑཱཏཾ ཀཱམཾ ཨུཔཱདིཡཏཱིཏི ཀཱམུཔཱདཱནཾ, ཀཱམོ ཙ སོ ཨུཔཱདཱནཉྩཱཏིཔི ཀཱམུཔཱདཱནཾ. དིཊྛི ཙ སཱ ཨུཔཱདཱནཉྩཱཏི དིཊྛུཔཱདཱནཾ, དིཊྛིཾ ཨུཔཱདིཡཏཱིཏིཔི དིཊྛུཔཱདཱནཾ. ‘‘སསྶཏོ ཨཏྟཱ ཙ ལོཀོ ཙཱ’’ཏིཨཱདཱིསུ (པཊི. མ. ༡.༡༤༧) ཧི པུརིམདིཊྛིཾ ཨུཏྟརདིཊྛི ཨུཔཱདིཡཏི. སཱིལབྦཏཾ ཨུཔཱདིཡཏཱིཏི སཱིལབྦཏུཔཱདཱནཾ, སཱིལབྦཏཉྩ ཏཾ ཨུཔཱདཱནཉྩཱཏིཔི སཱིལབྦཏུཔཱདཱནཾ. གོསཱིལགོཝཏཱདཱིནི ཧི ཨེཝཾ ཝིསུདྡྷཱིཏི ཨབྷིནིཝེསཏོ སཡམེཝ ཨུཔཱདཱནཱནི. ཝདནྟི ཨེཏེནཱཏི ཝཱདོ, ཨུཔཱདིཡནྟི ཨེཏེནཱཏི ཨུཔཱདཱནཾ. ཀིཾ ཝདནྟི, ཨུཔཱདིཡནྟི ཝཱ? ཨཏྟཱནཾ. ཨཏྟནོ ཝཱདུཔཱདཱནཾ ཨཏྟཝཱདུཔཱདཱནཾ, ཨཏྟཝཱདམཏྟམེཝ ཝཱ ཨཏྟཱཏི ཨུཔཱདིཡནྟི ཨེཏེནཱཏི ཨཏྟཝཱདུཔཱདཱནཾ. ཋཔེཏྭཱ ཨིམཱ དྭེ དིཊྛིཡོ སབྦཱཔི དིཊྛཱི དིཊྛུཔཱདཱནཾ. ཏེཧི ཙཏཱུཧི ཨུཔཱདཱནེཧི. ཨུཔཱདཱིཡཏཱིཏི བྷུསཾ གཎྷཱིཡཏི. ཨུཔཱདིཡཏཱིཏི ཝཱ པཱཋོ, ལོཀོ ཨུཔཱདཱནེཧི ཏཾ ཏཾ ཨཱརམྨཎཾ བྷུསཾ གཎྷཱཏཱིཏི ཨཏྠོ.

པཉྩགཏིསམཱརུལ༹ྷོཏི སུཀཏདུཀྐཊཀཱརཎེཧི གམྨཏི ཨུཔསངྐམཱིཡཏཱིཏི གཏི, སཧོཀཱསཀཱ ཁནྡྷཱ. ནིརཡོ ཏིརཙྪཱནཡོནི པེཏྟིཝིསཡོ མནུསྶཱ དེཝཱཏི ཨིམཱ པཉྩ གཏིཡོ ཝོཀྐམནབྷཱཝེན བྷུསཾ ཨཱརུལ༹ྷོ. པཉྩཧི ཀཱམགུཎེཧཱིཏི རཱུཔསདྡགནྡྷརསཕོཊྛབྦསངྑཱཏེཧི པཉྩཧི ཝཏྠུཀཱམཀོཊྛཱསེཧི. རཛྫཏཱིཏི ཨཡོནིསོམནསིཀཱརཾ པཊིཙྩ རཱགུཔྤཱདནེན ཏེཧི རཉྫཱིཡཏི, སཱརཏྟོ ཀརཱིཡཏཱིཏི ཨཏྠོ. པཉྩཧི ནཱིཝརཎེཧཱིཏི ཙིཏྟཾ ནཱིཝརནྟི པརིཡོནནྡྷནྟཱིཏི ནཱིཝརཎཱ. ཀཱམཙྪནྡབྱཱཔཱདཐིནམིདྡྷཨུདྡྷཙྩཀུཀྐུཙྩཝིཙིཀིཙྪཱསངྑཱཏེཧི པཉྩཧི ནཱིཝརཎེཧི. ཨོཏྠཊོཏི ཨུཔརིཏོ པིཧིཏོ.

ཚཧི ཝིཝཱདམཱུལེཧཱིཏི ཚཧི ཝིཝཱདསྶ མཱུལེཧི. ཡཐཱཧ –

‘‘ཚཡིམཱནི, བྷིཀྑཝེ, ཝིཝཱདམཱུལཱནི. ཀཏམཱནི ཚ? ཨིདྷ, བྷིཀྑཝེ, བྷིཀྑུ ཀོདྷནོ ཧོཏི ཨུཔནཱཧཱི. ཡོ སོ, བྷིཀྑཝེ, བྷིཀྑུ ཀོདྷནོ ཧོཏི ཨུཔནཱཧཱི. སོ སཏྠརིཔི ཨགཱརཝོ ཝིཧརཏི ཨཔྤཏིསྶོ, དྷམྨེཔི, སངྒྷེཔི, སིཀྑཱཡཔི ན པརིཔཱུརཀཱརཱི. ཡོ སོ, བྷིཀྑཝེ, བྷིཀྑུ སཏྠརི ཨགཱརཝོ ཝིཧརཏི ཨཔྤཏིསྶོ, དྷམྨེཔི, སངྒྷེཔི, སིཀྑཱཡཔི ན པརིཔཱུརཀཱརཱི, སོ སངྒྷེ ཝིཝཱདཾ ཛནེཏི. ཡོ ཧོཏི ཝིཝཱདོ བཧུཛནཱཧིཏཱཡ བཧུཛནཱསུཁཱཡ བཧུནོ ཛནསྶ ཨནཏྠཱཡ ཨཧིཏཱཡ དུཀྑཱཡ དེཝམནུསྶཱནཾ. ཨེཝརཱུཔཾ ཙེ ཏུམྷེ, བྷིཀྑཝེ, ཝིཝཱདམཱུལཾ ཨཛ྄ཛྷཏྟཾ ཝཱ བཧིདྡྷཱ ཝཱ སམནུཔསྶེཡྻཱཐ, ཏཏྲ ཏུམྷེ, བྷིཀྑཝེ, ཏསྶེཝ པཱཔཀསྶ ཝིཝཱདམཱུལསྶ པཧཱནཱཡ ཝཱཡམེཡྻཱཐ. ཨེཝརཱུཔཾ ཙེ ཏུམྷེ, བྷིཀྑཝེ, ཝིཝཱདམཱུལཾ ཨཛ྄ཛྷཏྟཾ ཝཱ བཧིདྡྷཱ ཝཱ ན སམནུཔསྶེཡྻཱཐ. ཏཏྲ ཏུམྷེ, བྷིཀྑཝེ, ཏསྶེཝ པཱཔཀསྶ ཝིཝཱདམཱུལསྶ ཨཱཡཏིཾ ཨནཝསྶཝཱཡ པཊིཔཛྫེཡྻཱཐ. ཨེཝམེཏསྶ པཱཔཀསྶ ཝིཝཱདམཱུལསྶ པཧཱནཾ ཧོཏི. ཨེཝམེཏསྶ པཱཔཀསྶ ཝིཝཱདམཱུལསྶ ཨཱཡཏིཾ ཨནཝསྶཝོ ཧོཏི.

‘‘པུན ཙཔརཾ, བྷིཀྑཝེ, བྷིཀྑུ མཀྑཱི ཧོཏི པལཱ༹སཱི. ཨིསྶུཀཱི ཧོཏི མཙྪརཱི. སཋོ ཧོཏི མཱཡཱཝཱི. པཱཔིཙྪོ ཧོཏི མིཙྪཱདིཊྛི. སནྡིཊྛིཔརཱམཱསཱི ཧོཏི ཨཱདྷཱནགྒཱཧཱི དུཔྤཊིནིསྶགྒཱི. ཡོ སོ, བྷིཀྑཝེ, བྷིཀྑུ སནྡིཊྛིཔརཱམཱསཱི ཧོཏི ཨཱདྷཱནགྒཱཧཱི དུཔྤཊིནིསྶགྒཱི, སོ སཏྠརིཔི…པེ… ཨཱཡཏིཾ ཨནཝསྶཝོ ཧོཏཱི’’ཏི (པརི. ༢༧༢; ཨ. ནི. ༦.༣༦).

ཏཏྠ ཀོདྷནོཏི ཀུཛ྄ཛྷནལཀྑཎེན ཀོདྷེན སམནྣཱགཏོ. ཨུཔནཱཧཱིཏི ཝེརཨཔྤཊིནིསྶཛྫནལཀྑཎེན ཨུཔནཱཧེན སམནྣཱགཏོ. ཨཧིཏཱཡ དུཀྑཱཡ དེཝམནུསྶཱནནྟི དྭིནྣཾ བྷིཀྑཱུནཾ ཝིཝཱདོ ཀཐཾ དེཝམནུསྶཱནཾ ཨཧིཏཱཡ དུཀྑཱཡ སཾཝཏྟཏཱིཏི? ཀོསམྦཀཀྑནྡྷཀེ (མཧཱཝ. ༤༥༡ ཨཱདཡོ) ཝིཡ དྭཱིསུ བྷིཀྑཱུསུ ཝིཝཱདཾ ཨཱཔནྣེསུ ཏསྨིཾ ཝིཧཱརེ ཏེསཾ ཨནྟེཝཱསིཀཱ ཝིཝདནྟི, ཏེསཾ ཨོཝཱདཾ གཎྷནྟོ བྷིཀྑུནིསངྒྷོ ཝིཝདཏི, ཏཏོ ཏེསཾ ཨུཔཊྛཱཀཱཔི ཝིཝདནྟི. ཨཐ མནུསྶཱནཾ ཨཱརཀྑདེཝཏཱ དྭེ ཀོཊྛཱསཱ ཧོནྟི. དྷམྨཝཱདཱིནཾ ཨཱརཀྑདེཝཏཱ དྷམྨཝཱདིནིཡོ ཧོནྟི ཨདྷམྨཝཱདཱིནཾ ཨདྷམྨཝཱདིནིཡོ. ཏཏོ ཨཱརཀྑདེཝཏཱནཾ མིཏྟཱ བྷུམྨཊྛདེཝཏཱ བྷིཛྫནྟི. ཨེཝཾ པརམྤརཱཡ ཡཱཝ བྲཧྨལོཀཱ ཋཔེཏྭཱ ཨརིཡསཱཝཀེ སབྦེ དེཝམནུསྶཱ དྭེ ཀོཊྛཱསཱ ཧོནྟི. དྷམྨཝཱདཱིཧི པན ཨདྷམྨཝཱདིནོཝ བཧུཏརཱ ཧོནྟི. ཏཏོ ཡཾ བཧུཀེཧི གཧིཏཾ, སབྦཾ ཏཾ སཙྩནྟི དྷམྨཾ ཝིསྶཛྫེཏྭཱ བཧུཏརཱཝ ཨདྷམྨཾ གཎྷནྟི. ཏེ ཨདྷམྨཾ པུརཀྑཏྭཱ ཝིཧརནྟཱ ཨཔཱཡེསུ ནིབྦཏྟནྟི. ཨེཝཾ དྭིནྣཾ བྷིཀྑཱུནཾ ཝིཝཱདོ དེཝམནུསྶཱནཾ ཨཧིཏཱཡ དུཀྑཱཡ ཧོཏི. ཨཛ྄ཛྷཏྟཾ ཝཱཏི ཏུམྷཱཀཾ ཨབྦྷནྟརཔརིསཱཡ ཝཱ. བཧིདྡྷཱ ཝཱཏི པརེསཾ པརིསཱཡ ཝཱ. མཀྑཱིཏི པརེསཾ གུཎམཀྑཎལཀྑཎེན མཀྑེན སམནྣཱགཏོ. པལཱ༹སཱིཏི ཡུགགྒཱཧལཀྑཎེན པལཱ༹སེན སམནྣཱགཏོ. ཨིསྶུཀཱིཏི པརེསཾ སཀྐཱརཱདིཨིསྶཱཡནལཀྑཎཱཡ ཨིསྶཱཡ སམནྣཱགཏོ. མཙྪརཱིཏི ཨཱཝཱསམཙྪརིཡཱདཱིཧི པཉྩཧི མཙྪརིཡེཧི སམནྣཱགཏོ. སཋོཏི ཀེརཱཊིཀོ. མཱཡཱཝཱིཏི ཀཏཔཱཔཔཊིཙྪཱདཀོ. པཱཔིཙྪོཏི ཨསནྟསམྦྷཱཝནིཙྪཀོ དུསྶཱིལོ. མིཙྪཱདིཊྛཱིཏི ནཏྠིཀཝཱདཱི ཨཧེཏུཀཝཱདཱི ཨཀིརིཡཝཱདཱི. སནྡིཊྛིཔརཱམཱསཱིཏི སཡཾ དིཊྛིམེཝ པརཱམསཏི. ཨཱདྷཱནགྒཱཧཱིཏི དལ༹ྷགྒཱཧཱི. དུཔྤཊིནིསྶགྒཱིཏི ན སཀྐཱ ཧོཏི གཧིཏཾ ཝིསྶཛྫཱཔེཏུཾ. ཁུདྡཀཝཏྠུཝིབྷངྒེ པན ‘‘ཏཏྠ ཀཏམཱནི ཚ ཝིཝཱདམཱུལཱནི? ཀོདྷོ མཀྑོ ཨིསྶཱ སཱཋེཡྻཾ པཱཔིཙྪཏཱ སནྡིཊྛིཔརཱམཱསིཏཱ, ཨིམཱནི ཚ ཝིཝཱདམཱུལཱནཱི’’ཏི (ཝིབྷ. ༩༤༤) པདྷཱནཝསེན ཨེཀེཀོཡེཝ དྷམྨོ ཝུཏྟོ.

ཚཧི ཏཎྷཱཀཱཡེཧཱིཏི ‘‘རཱུཔཏཎྷཱ, སདྡཏཎྷཱ, གནྡྷཏཎྷཱ, རསཏཎྷཱ, ཕོཊྛབྦཏཎྷཱ, དྷམྨཏཎྷཱ’’ཏི (ཝིབྷ. ༩༤༤) ཝུཏྟཱཧི ཚཧི ཏཎྷཱཧི. ཏཏྠ ཡསྨཱ ཨེཀེཀཱཡེཝ ཏཎྷཱ ཨནེཀཝིསཡཏྟཱ ཨེཀེཀསྨིམྤི ཝིསཡེ པུནཔྤུནཾ ཨུཔྤཏྟིཏོ ཨནེཀཱ ཧོནྟི, ཏསྨཱ སམཱུཧཊྛེན ཀཱཡསདྡེན ཡོཛེཏྭཱ ཏཎྷཱཀཱཡཱཏི ཝུཏྟཾ. ཏཎྷཱཀཱཡཱཏི ཝུཏྟེཔི ཏཎྷཱ ཨེཝ. རཛྫཏཱིཏི སཡཾ ཨཱརམྨཎེ རཛྫཏི, སཱརཏྟོ ཧོཏི.

ཚཧི དིཊྛིགཏེཧཱིཏི སབྦཱསཝསུཏྟེ ཝུཏྟེཧི. ཝུཏྟཉྷི ཏཏྠ –

‘‘ཏསྶ ཨེཝཾ ཨཡོནིསོ མནསིཀརོཏོ ཚནྣཾ དིཊྛཱིནཾ ཨཉྙཏརཱ དིཊྛི ཨུཔྤཛྫཏི. ‘ཨཏྠི མེ ཨཏྟཱ’ཏི ཝཱ ཨསྶ སཙྩཏོ ཐེཏཏོ དིཊྛི ཨུཔྤཛྫཏི, ‘ནཏྠི མེ ཨཏྟཱ’ཏི ཝཱ ཨསྶ སཙྩཏོ ཐེཏཏོ དིཊྛི ཨུཔྤཛྫཏི, ‘ཨཏྟནཱཝ ཨཏྟཱནཾ སཉྫཱནཱམཱི’ཏི ཝཱ ཨསྶ སཙྩཏོ ཐེཏཏོ དིཊྛི ཨུཔྤཛྫཏི, ‘ཨཏྟནཱཝ ཨནཏྟཱནཾ སཉྫཱནཱམཱི’ཏི ཝཱ ཨསྶ སཙྩཏོ ཐེཏཏོ དིཊྛི ཨུཔྤཛྫཏི, ‘ཨནཏྟནཱཝ ཨཏྟཱནཾ སཉྫཱནཱམཱི’ཏི ཝཱ ཨསྶ སཙྩཏོ ཐེཏཏོ དིཊྛི ཨུཔྤཛྫཏི. ཨཐ ཝཱ པནསྶ ཨེཝཾ དིཊྛི ཧོཏི ‘ཡོ མེ ཨཡཾ ཨཏྟཱ ཝདོ ཝེདེཡྻོ ཏཏྲ ཏཏྲ ཀལྱཱཎཔཱཔཀཱནཾ ཀམྨཱནཾ ཝིཔཱཀཾ པཊིསཾཝེདེཏི, སོ ཙ ཁོ པན མེ ཨཡཾ ཨཏྟཱ ནིཙྩོ དྷུཝོ སསྶཏོ ཨཝིཔརིཎཱམདྷམྨོ སསྶཏིསམཾ ཏཐེཝ ཋསྶཏཱི’’’ཏི (མ. ནི. ༡.༡༩).

ཏཏྠ ཨཏྠི མེ ཨཏྟཱཏི སསྶཏདིཊྛི སབྦཀཱལེསུ ཨཏྟནོ ཨཏྠིཏཾ གཎྷཱཏི. སཙྩཏོ ཐེཏཏོཏི བྷཱུཏཏོ ཙ ཐིརཏོ ཙ, ‘‘ཨིདཾ སཙྩ’’ནྟི སུཊྛུ དལ༹ྷབྷཱཝེནཱཏི ཝུཏྟཾ ཧོཏི. ནཏྠི མེ ཨཏྟཱཏི ཨུཙྪེདདིཊྛི སཏོ སཏྟསྶ ཏཏྠ ཏཏྠ ཝིབྷཝགྒཧཎཏོ. ཨཐ ཝཱ པུརིམཱཔི ཏཱིསུ ཀཱལེསུ ཨཏྠཱིཏི གཧཎཏོ སསྶཏདིཊྛི, པཙྩུཔྤནྣམེཝ ཨཏྠཱིཏི གཎྷནྟཱི ཨུཙྪེདདིཊྛི, པཙྪིམཱཔི ཨཏཱིཏཱནཱགཏེསུ ནཏྠཱིཏི གཧཎཏོ ‘‘བྷསྶནྟཱ ཨཱཧུཏིཡོ’’ཏི གཧིཏདིཊྛིགཏིཀཱནཾ ཝིཡ ཨུཙྪེདདིཊྛི. ཨཏཱིཏེ ཨེཝ ནཏྠཱིཏི གཎྷནྟཱི ཨདྷིཙྩསམུཔྤནྣཀསྶ ཝིཡ སསྶཏདིཊྛི. ཨཏྟནཱཝ ཨཏྟཱནཾ སཉྫཱནཱམཱིཏི སཉྙཱཀྑནྡྷསཱིསེན ཁནྡྷེ ཨཏྟཱཏི གཧེཏྭཱ སཉྙཱཡ ཨཝསེསཀྑནྡྷེ སཉྫཱནཏོ ཨིམིནཱ ཨཏྟནཱ ཨིམཾ ཨཏྟཱནཾ སཉྫཱནཱམཱིཏི ཧོཏི. ཨཏྟནཱཝ ཨནཏྟཱནནྟི སཉྙཱཀྑནྡྷཾཡེཝ ཨཏྟཱཏི གཧེཏྭཱ, ཨིཏརེ ཙཏྟཱརོཔི ཨནཏྟཱཏི གཧེཏྭཱ སཉྙཱཡ ཏེ སཉྫཱནཏོ ཨེཝཾ ཧོཏི. ཨནཏྟནཱཝ ཨཏྟཱནནྟི སཉྙཱཀྑནྡྷཾ ཨནཏྟཱཏི གཧེཏྭཱ, ཨིཏརེ ཙཏྟཱརོཔི ཨཏྟཱཏི གཧེཏྭཱ སཉྙཱཡ ཏེ སཉྫཱནཏོ ཨེཝཾ ཧོཏི. སབྦཱཔི སསྶཏུཙྪེདདིཊྛིཡོཝ. ཝདོ ཝེདེཡྻོཏིཨཱདཡོ པན སསྶཏདིཊྛིཡཱ ཨེཝ ཨབྷིནིཝེསཱཀཱརཱ. ཏཏྠ ཝདཏཱིཏི ཝདོ, ཝཙཱིཀམྨསྶ ཀཱརཀོཏི ཝུཏྟཾ ཧོཏི. ཝེདཡཏཱིཏི ཝེདེཡྻོ, ཛཱནཱཏི ཨནུབྷཝཏི ཙཱཏི ཝུཏྟཾ ཧོཏི. ཀིཾ ཝེདེཏཱིཏི? ཏཏྲ ཏཏྲ ཀལྱཱཎཔཱཔཀཱནཾ ཀམྨཱནཾ ཝིཔཱཀཾ པཊིསཾཝེདེཏི. ཏཏྲ ཏཏྲཱཏི ཏེསུ ཏེསུ ཡོནིགཏིཋིཏིནིཝཱསནིཀཱཡེསུ ཨཱརམྨཎེསུ ཝཱ. ནིཙྩོཏི ཨུཔྤཱདཝཡརཧིཏོ. དྷུཝོཏི ཐིརོ སཱརབྷཱུཏོ. སསྶཏོཏི སབྦཀཱལིཀོ. ཨཝིཔརིཎཱམདྷམྨོཏི ཨཏྟནོ པཀཏིབྷཱཝཾ ཨཝིཛཧནདྷམྨོ, ཀཀཎྚཀོ ཝིཡ ནཱནཔྤཀཱརཏཾ ནཱཔཛྫཏི. སསྶཏིསམནྟི ཙནྡསཱུརིཡསམུདྡམཧཱཔཐཝཱིཔབྦཏཱ ལོཀཝོཧཱརེན སསྶཏིཡོཏི ཝུཙྩནྟི. སསྶཏཱིཧི སམཾ སསྶཏིསམཾ. ཡཱཝ སསྶཏིཡོ ཏིཊྛནྟི, ཏཱཝ ཏཐེཝ ཋསྶཏཱིཏི གཎྷཏོ ཨེཝཾ དིཊྛི ཧོཏི.

ཁུདྡཀཝཏྠུཝིབྷངྒེ པན ‘‘ཏཏྲ ཏཏྲ དཱིགྷརཏྟཾ ཀལྱཱཎཔཱཔཀཱནཾ ཀམྨཱནཾ ཝིཔཱཀཾ པཙྩནུབྷོཏི, ན སོ ཛཱཏོ ནཱཧོསི, ན སོ ཛཱཏོ ན བྷཝིསྶཏི, ནིཙྩོ དྷུཝོ སསྶཏོ ཨཝིཔརིཎཱམདྷམྨོཏི ཝཱ པནསྶ སཙྩཏོ ཐེཏཏོ དིཊྛི ཨུཔྤཛྫཏཱི’’ཏི (ཝིབྷ. ༩༤༨) ཚ དིཊྛཱི ཨེཝཾ ཝིསེསེཏྭཱ ཝུཏྟཱ.

ཏཏྠ ན སོ ཛཱཏོ ནཱཧོསཱིཏི སོ ཨཏྟཱ ཨཛཱཏིདྷམྨཏོ ན ཛཱཏོ ནཱམ, སདཱ ཝིཛྫམཱནོཡེཝཱཏི ཨཏྠོ. ཏེནེཝ ཨཏཱིཏེ ནཱཧོསི, ཨནཱགཏེ ན བྷཝིསྶཏི. ཡོ ཧི ཛཱཏོ, སོ ཨཧོསི. ཡོ ཙ ཛཱཡིསྶཏི, སོ བྷཝིསྶཏཱིཏི ཝུཙྩཏི. ཨཐ ཝཱ ན སོ ཛཱཏོ ནཱཧོསཱིཏི སོ སདཱ ཝིཛྫམཱནཏྟཱ ཨཏཱིཏེཔི ན ཛཱཏུ ན ཨཧོསི, ཨནཱགཏེཔི ན ཛཱཏུ ན བྷཝིསྶཏི. ཨནུསཡཱ ཝུཏྟཏྠཱ.

སཏྟཧི སཉྙོཛནེཧཱིཏི སཏྟཀནིཔཱཏེ ཝུཏྟེཧི. ཝུཏྟཉྷི ཏཏྠ –

‘‘སཏྟིམཱནི, བྷིཀྑཝེ, སཾཡོཛནཱནི. ཀཏམཱནི སཏྟ? ཨནུནཡསཾཡོཛནཾ, པཊིགྷསཾཡོཛནཾ, དིཊྛིསཾཡོཛནཾ, ཝིཙིཀིཙྪཱསཾཡོཛནཾ, མཱནསཾཡོཛནཾ, བྷཝརཱགསཾཡོཛནཾ, ཨཝིཛྫཱསཾཡོཛནཾ. ཨིམཱནི ཁོ, བྷིཀྑཝེ, སཏྟ སཾཡོཛནཱནཱི’’ཏི (ཨ. ནི. ༧.༨).

ཏཏྠ ཨནུནཡསཾཡོཛནནྟི ཀཱམརཱགསཾཡོཛནཾ. སབྦཱནེཝེཏཱནི བནྡྷནཊྛེན སཾཡོཛནཱནི.

སཏྟཧི མཱནེཧཱིཏི ཁུདྡཀཝཏྠུཝིབྷངྒེ ཝུཏྟེཧི. ཝུཏྟཉྷི ཏཏྠ –

‘‘མཱནོ, ཨཏིམཱནོ, མཱནཱཏིམཱནོ, ཨོམཱནོ, ཨདྷིམཱནོ, ཨསྨིམཱནོ, མིཙྪཱམཱནོ’’ཏི (ཝིབྷ. ༩༥༠).

ཏཏྠ མཱནོཏི སེཡྻཱདིཝསེན པུགྒལཾ ཨནཱམསིཏྭཱ ཛཱཏིཨཱདཱིསུ ཝཏྠུཝསེནེཝ ཨུནྣཏི. ཨཏིམཱནོཏི ཛཱཏིཨཱདཱིཧི ‘‘མཡཱ སདིསོ ནཏྠཱི’’ཏི ཨཏིཀྐམིཏྭཱ ཨུནྣཏི. མཱནཱཏིམཱནོཏི ‘‘ཨཡཾ པུབྦེ མཡཱ སདིསོ, ཨིདཱནི ཨཧཾ སེཊྛོ, ཨཡཾ ཧཱིནཏརོ’’ཏི ཨུཔྤནྣམཱནོ. ཨོམཱནོཏི ཛཱཏིཨཱདཱིཧི ཨཏྟཱནཾ ཧེཊྛཱ ཀཏྭཱ པཝཏྟམཱནོ, ཧཱིནོཧམསྨཱིཏི མཱནོཡེཝ. ཨདྷིམཱནོཏི ཨནདྷིགཏེཡེཝ ཙཏུསཙྩདྷམྨེ ཨདྷིགཏོཏི མཱནོ. ཨཡཾ པན ཨདྷིམཱནོ པརིསུདྡྷསཱིལསྶ ཀམྨཊྛཱནེ ཨཔྤམཏྟསྶ ནཱམརཱུཔཾ ཝཝཏྠཔེཏྭཱ པཙྩཡཔརིགྒཧེན ཝིཏིཎྞཀངྑསྶ ཏིལཀྑཎཾ ཨཱརོཔེཏྭཱ སངྑཱརེ སམྨསནྟསྶ ཨཱརདྡྷཝིཔསྶཀསྶ པུཐུཛྫནསྶ ཨུཔྤཛྫཏི, ན ཨཉྙེསཾ. ཨསྨིམཱནོཏི རཱུཔཱདཱིསུ ཁནྡྷེསུ ཨསྨཱིཏི མཱནོ, ‘‘ཨཧཾ རཱུཔ’’ནྟིཨཱདིཝསེན ཨུཔྤནྣམཱནོཏི ཝུཏྟཾ ཧོཏི. མིཙྪཱམཱནོཏི པཱཔཀེན ཀམྨཱཡཏནཱདིནཱ ཨུཔྤནྣམཱནོ.

ལོཀདྷམྨཱ ཝུཏྟཏྠཱ. སམྤརིཝཏྟཏཱིཏི ལོཀདྷམྨེཧི ཧེཏུབྷཱུཏེཧི ལཱབྷཱདཱིསུ ཙཏཱུསུ ཨནུརོདྷཝསེན, ཨལཱབྷཱདཱིསུ ཙཏཱུསུ པཊིཝིརོདྷཝསེན བྷུསཾ ནིཝཏྟཏི, པཀཏིབྷཱཝཾ ཛཧཱཏཱིཏི ཨཏྠོ. མིཙྪཏྟཱཔི ཝུཏྟཏྠཱ. ནིཡྻཱཏོཏི གཏོ པཀྑནྡོ, ཨབྷིབྷཱུཏོཏི ཨཏྠོ.

ཨཊྛཧི པུརིསདོསེཧཱིཏི ཨཊྛཀནིཔཱཏེ ཨུཔམཱཧི སཧ, ཁུདྡཀཝཏྠུཝིབྷངྒེ ཨུཔམཾ ཝིནཱ ཝུཏྟེཧི. ཝུཏྟཉྷི ཏཏྠ –

‘‘ཀཏམེ ཨཊྛ པུརིསདོསཱ? ཨིདྷ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ‘ན སརཱམི ན སརཱམཱི’ཏི ཨསྶཏིཡཱཝ ནིབྦེཋེཏི. ཨཡཾ པཋམོ པུརིསདོསོ.

‘‘པུན ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ཙོདཀཾཡེཝ པཊིཔྥརཏི ‘ཀིཾ ནུ ཁོ ཏུཡ྄ཧཾ བཱལསྶ ཨབྱཏྟསྶ བྷཎིཏེན, ཏྭམྤི ནཱམ མཾ བྷཎིཏབྦཾ མཉྙསཱི’ཏི? ཨཡཾ དུཏིཡོ པུརིསདོསོ.

‘‘པུན ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ཙོདཀཾཡེཝ པཙྩཱརོཔེཏི ‘ཏྭམྤི ཁོསི ཨིཏྠནྣཱམཾ ཨཱཔཏྟིཾ ཨཱཔནྣོ, ཏྭཾ ཏཱཝ པཋམཾ པཊིཀརོཧཱི’ཏི. ཨཡཾ ཏཏིཡོ པུརིསདོསོ.

‘‘པུན ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ཨཉྙེནཉྙཾ པཊིཙརཏི, བཧིདྡྷཱ ཀཐཾ ཨཔནཱམེཏི, ཀོཔཉྩ དོསཉྩ ཨཔྤཙྩཡཉྩ པཱཏུཀརོཏི. ཨཡཾ ཙཏུཏྠོ པུརིསདོསོ.

‘‘པུན ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ སངྒྷམཛ྄ཛྷེ བཱཧཱཝིཀྑེཔཀཾ བྷཎཏི. ཨཡཾ པཉྩམོ པུརིསདོསོ.

‘‘པུན ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ཨནཱདིཡིཏྭཱ སངྒྷཾ ཨནཱདིཡིཏྭཱ ཙོདཀཾ སཱཔཏྟིཀོཝ ཡེན ཀཱམཾ པཀྐམཏི. ཨཡཾ ཚཊྛོ པུརིསདོསོ.

‘‘པུན ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ‘ནེཝཱཧཾ ཨཱཔནྣོམྷི, ན པནཱཧཾ ཨནཱཔནྣོམྷཱི’ཏི སོ ཏུཎྷཱིབྷཱུཏོ སངྒྷཾ ཝིཧེསེཏི. ཨཡཾ སཏྟམོ པུརིསདོསོ.

‘‘པུན ཙཔརཾ བྷིཀྑཱུ བྷིཀྑུཾ ཨཱཔཏྟིཡཱ ཙོདེནྟི. སོ བྷིཀྑུ བྷིཀྑཱུཧི ཨཱཔཏྟིཡཱ ཙོདིཡམཱནོ ཨེཝམཱཧ – ‘ཀིཾ ནུ ཁོ ཏུམྷེ ཨཱཡསྨནྟོ ཨཏིབཱལ༹ྷཾ མཡི བྱཱཝཊཱ? ཨིདཱནཱཧཾ སིཀྑཾ པཙྩཀྑཱཡ ཧཱིནཱཡཱཝཏྟིསྶཱམཱི’ཏི. སོ སིཀྑཾ པཙྩཀྑཱཡ ཧཱིནཱཡཱཝཏྟིཏྭཱ ཨེཝམཱཧ ‘ཨིདཱནི ཁོ ཏུམྷེ ཨཱཡསྨནྟོ ཨཏྟམནཱ ཧོཐཱ’ཏི. ཨཡཾ ཨཊྛམོ པུརིསདོསོ. ཨིམེ ཨཊྛ པུརིསདོསཱ’’ཏི (ཝིབྷ. ༩༥༧; ཨ. ནི. ༨.༡༤).

ཏཏྠ པུརིསདོསཱཏི པུརིསཱནཾ དོསཱ, ཏེ པན པུརིསསནྟཱནཾ དཱུསེནྟཱིཏི དོསཱ. ན སརཱམི ན སརཱམཱིཏི ‘‘མཡཱ ཨེཏསྶ ཀམྨསྶ ཀཏཊྛཱནཾ ནསྶརཱམི ན སལླཀྑེམཱི’’ཏི ཨེཝཾ ཨསྶཏིབྷཱཝེན ནིབྦེཋེཏི མོཙེཏི. ཙོདཀཾཡེཝ པཊིཔྥརཏཱིཏི པཊིཝིརུདྡྷོ ཧུཏྭཱ ཕརཏི, པཊིཨཱཎིབྷཱཝེན ཏིཊྛཏི. ཀིཾ ནུ ཁོ ཏུཡ྄ཧནྟི ཏུཡ྄ཧཾ བཱལསྶ ཨབྱཏྟསྶ བྷཎིཏེན ནཱམ ཀིཾ, ཡོ ཏྭཾ ནེཝ ཝཏྠུཾ, ན ཨཱཔཏྟིཾ, ན ཙོདནཾ ཛཱནཱསཱིཏི དཱིཔེཏི. ཏྭམྤི ནཱམ ཨེཝཾ ཀིཉྩི ཨཛཱནནྟོ བྷཎིཏབྦཾ མཉྙསཱིཏི ཨཛ྄ཛྷོཏྠརཏི. པཙྩཱརོཔེཏཱིཏི ‘‘ཏྭམྤི ཁོསཱི’’ཏིཨཱདཱིནི ཝདནྟོ པཏིཨཱརོཔེཏི. པཊིཀརོཧཱིཏི དེསནཱགཱམིནིཾ དེསེཧི, ཝུཊྛཱནགཱམིནིཏོ ཝུཊྛཱཧི, ཏཏོ སུདྡྷནྟེ པཏིཊྛིཏོ ཨཉྙཾ ཙོདེསྶསཱིཏི དཱིཔེཏི. ཨཉྙེནཉྙཾ པཊིཙརཏཱིཏི ཨཉྙེན ཀཱརཎེན, ཝཙནེན ཝཱ ཨཉྙཾ ཀཱརཎཾ, ཝཙནཾ ཝཱ པཊིཙྪཱདེཏི. ‘‘ཨཱཔཏྟིཾ ཨཱཔནྣོསཱི’’ཏི ཝུཏྟོ ‘‘ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣོ, ཀཐཾ ཨཱཔནྣོ, ཀཾ བྷཎཐ, ཀིཾ བྷཎཐཱ’’ཏི བྷཎཏི. ‘‘ཨེཝརཱུཔཾ ཀིཉྩི ཏཡཱ དིཊྛ’’ནྟི ཝུཏྟེ ‘‘ན སུཎཱམཱི’’ཏི སོཏཾ ཨུཔནེཏི. བཧིདྡྷཱ ཀཐཾ ཨཔནཱམེཏཱིཏི ‘‘ཨིཏྠནྣཱམཾ ཨཱཔཏྟིཾ ཨཱཔནྣོསཱི’’ཏི པུཊྛོ ‘‘པཱཊལིཔུཏྟཾ གཏོམྷཱི’’ཏི ཝཏྭཱ པུན ‘‘ན ཏཝ པཱཊལིཔུཏྟགམནཾ པུཙྪཱམཱ’’ཏི ཝུཏྟེ ཏཏོ རཱཛགཧཾ གཏོམྷཱིཏི. ‘‘རཱཛགཧཾ ཝཱ ཡཱཧི བྲཱཧྨཎགེཧཾ ཝཱ, ཨཱཔཏྟིཾ ཨཱཔནྣོསཱི’’ཏི. ‘‘ཏཏྠ མེ སཱུཀརམཾསཾ ལདྡྷ’’ནྟིཨཱདཱིནི ཝདནྟོ ཀཐཾ བཧིདྡྷཱ ཝིཀྑིཔཏི. ཀོཔནྟི ཀུཔིཏབྷཱཝཾ, དོསནྟི དུཊྛབྷཱཝཾ. ཨུབྷཡམྤེཏཾ ཀོདྷསྶེཝ ནཱམཾ. ཨཔྤཙྩཡནྟི ཨསནྟུཊྛཱཀཱརཾ, དོམནསྶསྶེཏཾ ནཱམཾ. པཱཏུཀརོཏཱིཏི དསྶེཏི པཀཱསེཏི. བཱཧཱཝིཀྑེཔཀཾ བྷཎཏཱིཏི བཱཧཾ ཝིཀྑིཔིཏྭཱ ཝིཀྑིཔིཏྭཱ ཨལཛྫིཝཙནཾ ཝདཏི. ཨནཱདིཡིཏྭཱཏི ཙིཏྟཱིཀཱརེན ཨགྒཧེཏྭཱ ཨཝཛཱནིཏྭཱ, ཨནཱདརོ ཧུཏྭཱཏི ཨཏྠོ. ཝིཧེསེཏཱིཏི ཝིཧེཋེཏི བཱདྷཏི. ཨཏིབཱལ༹ྷནྟི ཨཏིདལ༹ྷཾ ཨཏིཔྤམཱཎཾ. མཡི བྱཱཝཊཱཏི མཡི བྱཱཔཱརཾ ཨཱཔནྣཱ. ཧཱིནཱཡཱཝཏྟིཏྭཱཏི ཧཱིནསྶ གིཧིབྷཱཝསྶ ཨཏྠཱཡ ཨཱཝཏྟིཏྭཱ, གིཧཱི ཧུཏྭཱཏི ཨཏྠོ. ཨཏྟམནཱ ཧོཐཱཏི ཏུཊྛཙིཏྟཱ ཧོཐ, ‘‘མཡཱ ལབྷིཏབྦཾ ལབྷཐ, མཡཱ ཝསིཏབྦཊྛཱནེ ཝསཐ, ཕཱསུཝིཧཱརོ ཝོ མཡཱ ཀཏོ’’ཏི ཨདྷིཔྤཱཡེན ཝདཏི. དུསྶཏཱིཏི དུཊྛོ ཧོཏི.

ནཝཧི ཨཱགྷཱཏཝཏྠཱུཧཱིཏི སཏྟེསུ ཨུཔྤཏྟིཝསེནེཝ ཀཐིཏཱནི. ཡཐཱཧ –

‘‘ནཝཡིམཱནི, བྷིཀྑཝེ, ཨཱགྷཱཏཝཏྠཱུནི. ཀཏམཱནི ནཝ? ‘ཨནཏྠཾ མེ ཨཙརཱི’ཏི ཨཱགྷཱཏཾ བནྡྷཏི, ‘ཨནཏྠཾ མེ ཙརཏཱི’ཏི ཨཱགྷཱཏཾ བནྡྷཏི, ‘ཨནཏྠཾ མེ ཙརིསྶཏཱི’ཏི ཨཱགྷཱཏཾ བནྡྷཏི, ‘པིཡསྶ མེ མནཱཔསྶ ཨནཏྠཾ ཨཙརི, ཨནཏྠཾ ཙརཏི, ཨནཏྠཾ ཙརིསྶཏཱི’ཏི ཨཱགྷཱཏཾ བནྡྷཏི, ‘ཨཔྤིཡསྶ མེ ཨམནཱཔསྶ ཨཏྠཾ ཨཙརི, ཨཏྠཾ ཙརཏི, ཨཏྠཾ ཙརིསྶཏཱི’ཏི ཨཱགྷཱཏཾ བནྡྷཏི. ཨིམཱནི ཁོ, བྷིཀྑཝེ, ནཝ ཨཱགྷཱཏཝཏྠཱུནཱི’’ཏི (ཨ. ནི. ༩.༢༩).

ཏཏྠ ཨཱགྷཱཏཝཏྠཱུནཱིཏི ཨཱགྷཱཏཀཱརཎཱནི. ཨཱགྷཱཏནྟི ཙེཏྠ ཀོཔོ, སོཡེཝ ཨུཔརཱུཔརི ཀོཔསྶ ཝཏྠུཏྟཱ ཨཱགྷཱཏཝཏྠུ. ཨཱགྷཱཏཾ བནྡྷཏཱིཏི ཀོཔཾ བནྡྷཏི ཀརོཏི ཨུཔྤཱདེཏི. ‘‘ཨཏྠཾ མེ ནཱཙརི, ན ཙརཏི, ན ཙརིསྶཏི. པིཡསྶ མེ མནཱཔསྶ ཨཏྠཾ ནཱཙརི, ན ཙརཏི, ན ཙརིསྶཏི. ཨཔྤིཡསྶ མེ ཨམནཱཔསྶ ཨནཏྠཾ ནཱཙརི, ན ཙརཏི, ན ཙརིསྶཏཱི’’ཏི (མཧཱནི. ༨༥; ཝིབྷ. ༩༦༠; དྷ. ས. ༡༠༦༦) ནིདྡེསེ ཝུཏྟཱནི ཨཔརཱནིཔི ནཝ ཨཱགྷཱཏཝཏྠཱུནི ཨིམེཧེཝ ནཝཧི སངྒཧིཏཱནི. ཨཱགྷཱཏིཏོཏི གྷཊྚིཏོ.

ནཝཝིདྷམཱནེཧཱིཏི ཀཏམེ ནཝཝིདྷམཱནཱ? སེཡྻསྶ སེཡྻོཧམསྨཱིཏི མཱནོ, སེཡྻསྶ སདིསོཧམསྨཱིཏི མཱནོ, སེཡྻསྶ ཧཱིནོཧམསྨཱིཏི མཱནོ. སདིསསྶ སེཡྻོཧམསྨཱིཏི མཱནོ, སདིསསྶ སདིསོཧམསྨཱིཏི མཱནོ, སདིསསྶ ཧཱིནོཧམསྨཱིཏི མཱནོ. ཧཱིནསྶ སེཡྻོཧམསྨཱིཏི མཱནོ, ཧཱིནསྶ སདིསོཧམསྨཱིཏི མཱནོ, ཧཱིནསྶ ཧཱིནོཧམསྨཱིཏི མཱནོ. ཨིམེ ནཝཝིདྷམཱནཱ (ཝིབྷ. ༩༦༢).

ཨེཏྠ པན སེཡྻསྶ སེཡྻོཧམསྨཱིཏི མཱནོ རཱཛཱུནཉྩེཝ པབྦཛིཏཱནཉྩ ཨུཔྤཛྫཏི. རཱཛཱ ཧི ‘‘རཊྛེན ཝཱ དྷནེན ཝཱ ཝཱཧནེཧི ཝཱ ཀོ མཡཱ སདིསོ ཨཏྠཱི’’ཏི ཨེཏཾ མཱནཾ ཀརོཏི, པབྦཛིཏོཔི ‘‘སཱིལདྷུཏངྒཱདཱིཧི ཀོ མཡཱ སདིསོ ཨཏྠཱི’’ཏི ཨེཏཾ མཱནཾ ཀརོཏི.

སེཡྻསྶ སདིསོཧམསྨཱིཏི མཱནོཔི ཨེཏེསཾཡེཝ ཨུཔྤཛྫཏི. རཱཛཱ ཧི ‘‘རཊྛེན ཝཱ དྷནེན ཝཱ ཝཱཧནེཧི ཝཱ ཨཉྙརཱཛཱུཧི སདྡྷིཾ མཡ྄ཧཾ ཀིཾ ནཱནཱཀརཎ’’ནྟི ཨེཏཾ མཱནཾ ཀརོཏི, པབྦཛིཏོཔི ‘‘སཱིལདྷུཏངྒཱདཱིཧི ཨཉྙེན བྷིཀྑུནཱ མཡ྄ཧཾ ཀིཾ ནཱནཱཀརཎ’’ནྟི ཨེཏཾ མཱནཾ ཀརོཏི.

སེཡྻསྶ ཧཱིནོཧམསྨཱིཏི མཱནོཔི ཨེཏེསཾཡེཝ ཨུཔྤཛྫཏི. ཡསྶ ཧི རཉྙོ རཊྛཾ ཝཱ དྷནཾ ཝཱ ཝཱཧནཱདཱིནི ཝཱ ནཱཏིསམྤནྣཱནི ཧོནྟི, སོ ‘‘མཡ྄ཧཾ རཱཛཱཏི ཝོཧཱརསུཁམཏྟཀམེཝ, ཀིཾ རཱཛཱ ནཱམ ཨཧ’’ནྟི ཨེཏཾ མཱནཾ ཀརོཏི, པབྦཛིཏོཔི ཨཔྤལཱབྷསཀྐཱརོ ‘‘ཨཧཾ དྷམྨཀཐིཀོ བཧུསྶུཏོ མཧཱཐེརོཏི ཀཐཱམཏྟམེཝ, ཀིཾ དྷམྨཀཐིཀོ ནཱམཱཧཾ, ཀིཾ བཧུསྶུཏོ ནཱམཱཧཾ, ཀིཾ མཧཱཐེརོ ནཱམཱཧཾ, ཡསྶ མེ ལཱབྷསཀྐཱརོ ནཏྠཱི’’ཏི ཨེཏཾ མཱནཾ ཀརོཏི.

སདིསསྶ སེཡྻོཧམསྨཱིཏི མཱནཱདཡོ ཨམཙྩཱདཱིནཾ ཨུཔྤཛྫནྟི. ཨམཙྩོ ཝཱ ཧི རཊྛིཡོ ཝཱ ‘‘བྷོགཡཱནཝཱཧནཱདཱིཧི ཀོ མཡཱ སདིསོ ཨཉྙོ རཱཛཔུརིསོ ཨཏྠཱི’’ཏི ཝཱ, ‘‘མཡ྄ཧཾ ཨཉྙེཧི སདྡྷིཾ ཀིཾ ནཱནཱཀརཎ’’ནྟི ཝཱ, ‘‘ཨམཙྩོཏི ནཱམམེཝ མཡ྄ཧཾ, གྷཱསཙྪཱདནམཏྟམྤི མེ ནཏྠི, ཀིཾ ཨམཙྩོ ནཱམཱཧ’’ནྟི ཝཱ ཨེཏཾ མཱནཾ ཀརོཏི.

ཧཱིནསྶ སེཡྻོཧམསྨཱིཏི མཱནཱདཡོ དཱསཱདཱིནཾ ཨུཔྤཛྫནྟི. དཱསོ ཧི ‘‘མཱཏིཏོ ཝཱ པིཏིཏོ ཝཱ ཀོ མཡཱ སདིསོ ཨཉྙོ དཱསོ ནཱམ ཨཏྠི, ཨཉྙེ ཛཱིཝིཏུཾ ཨསཀྐོནྟཱ ཀུཙྪིཧེཏུ དཱསཱ ནཱམ ཛཱཏཱ, ཨཧཾ པན པཝེཎིཨཱགཏཏྟཱ སེཡྻོ’’ཏི ཝཱ, ‘‘པཝེཎིཨཱགཏབྷཱཝེན ཨུབྷཏོསུདྡྷིཀདཱསཏྟེན ཨསུཀདཱསེན ནཱམ སདྡྷིཾ མཡ྄ཧཾ ཀིཾ ནཱནཱཀརཎ’’ནྟི ཝཱ, ‘‘ཀུཙྪིཝསེནཱཧཾ དཱསབྱཾ ཨུཔགཏོ, མཱཏཱཔིཏུཀོཊིཡཱ པན མེ དཱསཊྛཱནཾ ནཏྠི, ཀིཾ དཱསོ ནཱམ ཨཧ’’ནྟི ཝཱ ཨེཏཾ མཱནཾ ཀརོཏི. ཡཐཱ ཙ དཱསོ, ཨེཝཾ པུཀྐུསཙཎྜཱལཱདཡོཔི ཨེཏཾ མཱནཾ ཀརོནྟིཡེཝ. ཨེཏྠ ཙ སེཡྻསྶ སེཡྻོཧམསྨཱིཏི ཨུཔྤནྣམཱནོཝ ཡཱཐཱཝམཱནོ, ཨིཏརེ དྭེ ཨཡཱཐཱཝམཱནཱ. ཏཐཱ སདིསསྶ སདིསོཧམསྨཱིཏི ཧཱིནསྶ ཧཱིནོཧམསྨཱིཏི ཨུཔྤནྣམཱནོཝ ཡཱཐཱཝམཱནོ, ཨིཏརེ དྭེ ཨཡཱཐཱཝམཱནཱ. ཏཏྠ ཡཱཐཱཝམཱནཱ ཨརཧཏྟམགྒཝཛ྄ཛྷཱ, ཨཡཱཐཱཝམཱནཱ སོཏཱཔཏྟིམགྒཝཛ྄ཛྷཱཏི.

ཏཎྷཱམཱུལཀཱ ཝུཏྟཱཡེཝ. རཛྫཏཱིཏི ན ཀེཝལཾ རཱགེནེཝ རཛྫཏི, ཨཐ ཁོ ཏཎྷཱམཱུལཀཱནཾ པརིཡེསནཱདཱིནམྤི སམྦྷཝཏོ ཏཎྷཱམཱུལཀེཧི སབྦེཧི ཨཀུསལདྷམྨེཧི རཛྫཏི, ཡུཛྫཏི བཛ྄ཛྷཏཱིཏི ཨདྷིཔྤཱཡོ.

དསཧི ཀིལེསཝཏྠཱུཧཱིཏི ཀཏམཱནི དས ཀིལེསཝཏྠཱུནི? ལོབྷོ, དོསོ, མོཧོ, མཱནོ, དིཊྛི, ཝིཙིཀིཙྪཱ, ཐིནཾ, ཨུདྡྷཙྩཾ, ཨཧིརིཀཾ, ཨནོཏྟཔྤནྟི ཨིམཱནི དས ཀིལེསཝཏྠཱུནི (ཝིབྷ. ༩༦༦).

ཏཏྠ ཀིལེསཱ ཨེཝ ཀིལེསཝཏྠཱུནི, ཝསནྟི ཝཱ ཨེཏྠ ཨཁཱིཎཱསཝཱ སཏྟཱ ལོབྷཱདཱིསུ པཏིཊྛིཏཏྟཱཏི ཝཏྠཱུནི, ཀིལེསཱ ཙ ཏེ ཏཔྤཏིཊྛཱནཾ སཏྟཱནཾ ཝཏྠཱུནི ཙཱཏི ཀིལེསཝཏྠཱུནི. ཡསྨཱ ཙེཏྠ ཨནནྟརཔཙྩཡཱདིབྷཱཝེན ཨུཔྤཛྫམཱནཱཔི ཀིལེསཱ ཝསནྟི ཨེཝ ནཱམ, ཏསྨཱ ཀིལེསཱནཾ ཝཏྠཱུནཱིཏིཔི ཀིལེསཝཏྠཱུནི. ལུབྦྷནྟི ཏེན, སཡཾ ཝཱ ལུབྦྷཏི, ལུབྦྷནམཏྟམེཝ ཝཱ ཏནྟི ལོབྷོ. དུསྶནྟི ཏེན, སཡཾ ཝཱ དུསྶཏི, དུསྶནམཏྟམེཝ ཝཱ ཏནྟི དོསོ. མུཡ྄ཧནྟི ཏེན, སཡཾ ཝཱ མུཡ྄ཧཏི, མུཡ྄ཧནམཏྟམེཝ ཝཱ ཏནྟི མོཧོ. མཉྙཏཱིཏི མཱནོ. དིཊྛིཨཱདཡོ ཝུཏྟཏྠཱཝ. ན ཧིརཱིཡཏཱིཏི ཨཧིརིཀོ, ཏསྶ བྷཱཝོ ཨཧིརིཀཾ. ན ཨོཏྟཔྤཏཱིཏི ཨནོཏྟཔྤཱི, ཏསྶ བྷཱཝོ ཨནོཏྟཔྤཾ. ཏེསུ ཨཧིརིཀཾ ཀཱཡདུཙྩརིཏཱདཱིཧི ཨཛིགུཙྪནལཀྑཎཾ, ཨནོཏྟཔྤཾ ཏེཧེཝ ཨསཱརཛྫནལཀྑཎཾ, ཀིལིསྶཏཱིཏི ཨུཔཏཱཔཱིཡཏི ཝིབཱདྷཱིཡཏི.

དསཧི ཨཱགྷཱཏཝཏྠཱུཧཱིཏི པུབྦེ ཝུཏྟེཧི ནཝཧི ཙ ‘‘ཨཊྛཱནེ ཝཱ པནཱགྷཱཏོ ཛཱཡཏཱི’’ཏི (དྷ. ས. ༡༠༦༦) ཝུཏྟེན ཙཱཏི དསཧི. ཨནཏྠཾ མེ ཨཙརཱིཏིཨཱདཱིནིཔི ཧི ཨཝིཀཔྤེཏྭཱ ཁཱཎུཀཎྚཀཱདིམྷིཔི ཨཊྛཱནེ ཨཱགྷཱཏོ ཨུཔྤཛྫཏི.

དསཧི ཨཀུསལཀམྨཔཐེཧཱིཏི ཀཏམེ དས ཨཀུསལཀམྨཔཐཱ (དཱི. ནི. ༣.༣༦༠)? པཱཎཱཏིཔཱཏོ, ཨདིནྣཱདཱནཾ, ཀཱམེསུམིཙྪཱཙཱརོ, མུསཱཝཱདོ, པིསུཎཱ ཝཱཙཱ, ཕརུསཱ ཝཱཙཱ, སམྥཔྤལཱཔོ, ཨབྷིཛ྄ཛྷཱ, བྱཱཔཱདོ, མིཙྪཱདིཊྛི. ཨིམེ དས ཨཀུསལཀམྨཔཐཱ. ཏཏྠ ཨཀུསལཀམྨཱནི ཙ ཏཱནི པཐཱ ཙ དུགྒཏིཡཱཏི ཨཀུསལཀམྨཔཐཱ. སམནྣཱགཏོཏི སམངྒཱིབྷཱུཏོ.

དསཧི སཉྙོཛནེཧཱིཏི ཀཏམཱནི དས སཾཡོཛནཱནི (དྷ. ས. ༡༡༡༨)? ཀཱམརཱགསཾཡོཛནཾ, པཊིགྷསཾཡོཛནཾ, མཱནསཾཡོཛནཾ, དིཊྛིསཾཡོཛནཾ, ཝིཙིཀིཙྪཱསཾཡོཛནཾ, སཱིལབྦཏཔརཱམཱསསཾཡོཛནཾ, བྷཝརཱགསཾཡོཛནཾ, ཨིསྶཱསཾཡོཛནཾ, མཙྪརིཡསཾཡོཛནཾ, ཨཝིཛྫཱསཾཡོཛནཾ, ཨིམཱནི དས སཾཡོཛནཱནི. མིཙྪཏྟཱ ཝུཏྟཱཡེཝ.

དསཝཏྠུཀཱཡ མིཙྪཱདིཊྛིཡཱཏི ཀཏམཱ དསཝཏྠུཀཱ མིཙྪཱདིཊྛི (ཝིབྷ. ༩༧༡)? ནཏྠི དིནྣཾ, ནཏྠི ཡིཊྛཾ, ནཏྠི ཧུཏཾ, ནཏྠི སུཀཏདུཀྐཊཱནཾ ཀམྨཱནཾ ཕལཾ ཝིཔཱཀོ, ནཏྠི ཨཡཾ ལོཀོ, ནཏྠི པརོ ལོཀོ, ནཏྠི མཱཏཱ, ནཏྠི པིཏཱ, ནཏྠི སཏྟཱ ཨོཔཔཱཏིཀཱ, ནཏྠི ལོཀེ སམཎབྲཱཧྨཎཱ སམྨགྒཏཱ སམྨཱཔཊིཔནྣཱ ཡེ ཨིམཉྩ ལོཀཾ པརཉྩ ལོཀཾ སཡཾ ཨབྷིཉྙཱ སཙྪིཀཏྭཱ པཝེདེནྟི. ཨཡཾ དསཝཏྠུཀཱ མིཙྪཱདིཊྛི.

ཏཏྠ དསཝཏྠུཀཱཏི དས ཝཏྠཱུནི ཨེཏིསྶཱཏི དསཝཏྠུཀཱ. ནཏྠི དིནྣནྟི དིནྣཾ ནཱམ ཨཏྠི, སཀྐཱ ཀསྶཙི ཀིཉྩི དཱཏུནྟི ཛཱནཱཏི. དིནྣསྶ པན ཕལཾ ཝིཔཱཀོ ནཏྠཱིཏི གཎྷཱཏི. ནཏྠི ཡིཊྛནྟི ཡིཊྛཾ ཝུཙྩཏི མཧཱཡཱགོ, ཏཾ ཡཛིཏུཾ སཀྐཱཏི ཛཱནཱཏི. ཡིཊྛསྶ པན ཕལཾ ཝིཔཱཀོ ནཏྠཱིཏི གཎྷཱཏི. ཧུཏནྟི ཨཱཧུནཔཱཧུནམངྒལཀིརིཡཱ, ཏཾ ཀཱཏུཾ སཀྐཱཏི ཛཱནཱཏི. ཏསྶ པན ཕལཾ ཝིཔཱཀོ ནཏྠཱིཏི གཎྷཱཏི. སུཀཏདུཀྐཊཱནནྟི ཨེཏྠ དས ཀུསལཀམྨཔཐཱ སུཀཏཀམྨཱནི ནཱམ, དས ཨཀུསལཀམྨཔཐཱ དུཀྐཊཀམྨཱནི ནཱམ. ཏེསཾ ཨཏྠིབྷཱཝཾ ཛཱནཱཏི. ཕལཾ ཝིཔཱཀོ པན ནཏྠཱིཏི གཎྷཱཏི. ནཏྠི ཨཡཾ ལོཀོཏི པརལོཀེ ཋིཏོ ཨིམཾ ལོཀཾ ནཏྠཱིཏི གཎྷཱཏི. ནཏྠི པརོ ལོཀོཏི ཨིདྷལོཀེ ཋིཏོ པརལོཀཾ ནཏྠཱིཏི གཎྷཱཏི. ནཏྠི མཱཏཱ ནཏྠི པིཏཱཏི མཱཏཱཔིཏཱུནཾ ཨཏྠིབྷཱཝཾ ཛཱནཱཏི. ཏེསུ ཀཏཔྤཙྩཡེན ཀོཙི ཕལཾ ཝིཔཱཀོ ནཏྠཱིཏི གཎྷཱཏི. ནཏྠི སཏྟཱ ཨོཔཔཱཏིཀཱཏི ཙཝནཀཨུཔཔཛྫནཀསཏྟཱ ནཏྠཱིཏི གཎྷཱཏི. སམྨགྒཏཱ སམྨཱཔཊིཔནྣཱཏི ཨནུལོམཔཊིཔདཾ པཊིཔནྣཱ དྷམྨིཀསམཎབྲཱཧྨཎཱ ལོཀསྨིཾ ནཏྠཱིཏི གཎྷཱཏི. ཡེ ཨིམཉྩ ལོཀཾ…པེ… པཝེདེནྟཱིཏི ཨིམཉྩ པརཉྩ ལོཀཾ ཨཏྟནཱཝ ཨབྷིཝིསིཊྛེན ཉཱཎེན ཉཏྭཱ པཝེདནསམཏྠོ སབྦཉྙཱུ བུདྡྷོ ནཏྠཱིཏི གཎྷཱཏི.

ཨནྟགྒཱཧིཀཱཡ དིཊྛིཡཱཏི ‘‘སསྶཏོ ལོཀོ’’ཏིཨཱདིཀཾ ཨེཀེཀཾ ཨནྟཾ བྷཱགཾ གཎྷཱཏཱིཏི ཨནྟགྒཱཧིཀཱ. ཨཐ ཝཱ ཨནྟསྶ གཱཧོ ཨནྟགྒཱཧོ, ཨནྟགྒཱཧོ ཨསྶཱ ཨཏྠཱིཏི ཨནྟགྒཱཧིཀཱ. ཏཱཡ ཨནྟགྒཱཧིཀཱཡ. སཱ པན ཝུཏྟཱཡེཝ.

ཨཊྛསཏཏཎྷཱཔཔཉྩསཏེཧཱིཏི ཨཊྛུཏྟརཾ སཏཾ ཨཊྛསཏཾ. སཾསཱརེ པཔཉྩེཏི ཙིརཾ ཝསཱཔེཏཱིཏི པཔཉྩོ, ཏཎྷཱ ཨེཝ པཔཉྩོ ཏཎྷཱཔཔཉྩོ, ཨཱརམྨཎབྷེདེན པུནཔྤུནཾ ཨུཔྤཏྟིཝསེན ཙ ཏཎྷཱནཾ བཧུཀཏྟཱ བཧུཝཙནཾ ཀཏྭཱ ཏཎྷཱཔཔཉྩཱནཾ སཏཾ ཏཎྷཱཔཔཉྩསཏཾ. ཏེན ‘‘ཏཎྷཱཔཔཉྩསཏེནཱ’’ཏི ཝཏྟབྦེ ཝཙནཝིཔལླཱསཝསེན ‘‘ཏཎྷཱཔཔཉྩསཏེཧཱི’’ཏི བཧུཝཙནནིདྡེསོ ཀཏོ. ཨཊྛསཏནྟི སངྑཱཏེན ཏཎྷཱཔཔཉྩསཏེནཱཏི ཨཏྠོ དཊྛབྦོ. ཨཊྛ ཨབྦོཧཱརིཀཱནི ཀཏྭཱ སཏམེཝ གཧིཏནྟི ཝེདིཏབྦཾ. ཁུདྡཀཝཏྠུཝིབྷངྒེ པན ཏཎྷཱཝིཙརིཏཱནཱིཏི ཨཱགཏཾ. ཡཐཱཧ –

‘‘ཨཊྛཱརས ཏཎྷཱཝིཙརིཏཱནི ཨཛ྄ཛྷཏྟིཀསྶ ཨུཔཱདཱཡ, ཨཊྛཱརས ཏཎྷཱཝིཙརིཏཱནི བཱཧིརསྶ ཨུཔཱདཱཡ, ཏདེཀཛ྄ཛྷཾ ཨབྷིསཉྙུཧིཏྭཱ ཨབྷིསངྑིཔིཏྭཱ ཚཏྟིཾས ཏཎྷཱཝིཙརིཏཱནི ཧོནྟི. ཨིཏི ཨཏཱིཏཱནི ཚཏྟིཾས ཏཎྷཱཝིཙརིཏཱནི, ཨནཱགཏཱནི ཚཏྟིཾས ཏཎྷཱཝིཙརིཏཱནི, པཙྩུཔྤནྣཱནི ཚཏྟིཾས ཏཎྷཱཝིཙརིཏཱནི ཏདེཀཛ྄ཛྷཾ ཨབྷིསཉྙུཧིཏྭཱ ཨབྷིསངྑིཔིཏྭཱ ཨཊྛཏཎྷཱཝིཙརིཏསཏཾ ཧོཏཱི’’ཏི (ཝིབྷ. ༨༤༢).

ཏཎྷཱཔཔཉྩཱཡེཝ པནེཏྠ ཏཎྷཱཝིཙརིཏཱནཱིཏི ཝུཏྟཱ. ཏཎྷཱསམུདཱཙཱརཱ ཏཎྷཱཔཝཏྟིཡོཏི ཨཏྠོ. ཨཛ྄ཛྷཏྟིཀསྶ ཨུཔཱདཱཡཱཏི ཨཛ྄ཛྷཏྟིཀཾ ཁནྡྷཔཉྩཀཾ ཨུཔཱདཱཡ. ཨིདཉྷི ཨུཔཡོགཏྠེ སཱམིཝཙནཾ. ཝིཏྠཱརོ པནསྶ ཏསྶ ནིདྡེསེ (ཝིབྷ. ༩༧༣) ཝུཏྟནཡེནེཝ ཝེདིཏབྦོ. ཨཡཾ པན ཨཔརོ ནཡོ – རཱུཔཱརམྨཎཱཡེཝ ཀཱམཏཎྷཱ, བྷཝཏཎྷཱ, ཝིབྷཝཏཎྷཱཏི ཏིསྶོ ཏཎྷཱ ཧོནྟི, ཏཐཱ སདྡཱདིཨཱརམྨཎཱཏི ཚསུ ཨཱརམྨཎེསུ ཨཊྛཱརས ཏཎྷཱ ཧོནྟི, ཨཛ྄ཛྷཏྟཱརམྨཎཱ ཨཊྛཱརས, བཧིདྡྷཱརམྨཎཱ ཨཊྛཱརསཱཏི ཚཏྟིཾས ཧོནྟི. ཏཱ ཨེཝ ཨཏཱིཏཱརམྨཎཱ ཚཏྟིཾས, ཨནཱགཏཱརམྨཎཱ ཚཏྟིཾས, པཙྩུཔྤནྣཱརམྨཎཱ ཚཏྟིཾསཱཏི ཨཊྛཏཎྷཱཝིཙརིཏསཏཾ ཧོཏི. པཔཉྩིཏོཏི ཨཱརམྨཎེ, སཾསཱརེ ཝཱ པཔཉྩིཏོ ཙིརཝཱསིཏོ.

དྭཱསཊྛིཡཱ དིཊྛིགཏེཧཱིཏི ‘‘ཀཏམཱནི དྭཱསཊྛི དིཊྛིགཏཱནི བྲཧྨཛཱལེ ཝེཡྻཱཀརཎེ ཝུཏྟཱནི བྷགཝཏཱ? ཙཏྟཱརོ སསྶཏཝཱདཱ, ཙཏྟཱརོ ཨེཀཙྩསསྶཏཝཱདཱ, ཙཏྟཱརོ ཨནྟཱནནྟིཀཱ, ཙཏྟཱརོ ཨམརཱཝིཀྑེཔིཀཱ, དྭེ ཨདྷིཙྩསམུཔྤནྣིཀཱ, སོལ༹ས སཉྙཱིཝཱདཱ, ཨཊྛ ཨསཉྙཱིཝཱདཱ, ཨཊྛ ནེཝསཉྙཱིནཱསཉྙཱིཝཱདཱ, སཏྟ ཨུཙྪེདཝཱདཱ, པཉྩ དིཊྛདྷམྨནིབྦཱནཝཱདཱཏི ཨིམཱནི དྭཱསཊྛི དིཊྛིགཏཱནི བྲཧྨཛཱལེ ཝེཡྻཱཀརཎེ ཝུཏྟཱནི བྷགཝཏཱ’’ཏི (ཝིབྷ. ༩༧༧). ཝིཏྠཱརོ པནེཏྠ བྲཧྨཛཱལསུཏྟེ ཝུཏྟནཡེནེཝ ཝེདིཏབྦོ.

ཨཧཉྩམྷི ཏིཎྞོཏི ཨཧཉྩ ཙཏུརོགྷཾ, སཾསཱརསམུདྡཾ ཝཱ ཏིཎྞོ ཨམྷི བྷཝཱམི. མུཏྟོཏི རཱགཱདིབནྡྷནེཧི མུཏྟོ. དནྟོཏི ནིབྦིསེཝནོ ནིཔྤརིཔྥནྡོ. སནྟོཏི སཱིཏཱིབྷཱུཏོ. ཨསྶཏྠོཏི ནིབྦཱནདསྶནེ ལདྡྷསྶཱསོ. པརིནིབྦུཏོཏི ཀིལེསཔརིནིབྦཱནེན པརིནིབྦུཏོ. པཧོམཱིཏི སམཏྠོམྷི. ཁོཨིཏི ཨེཀཾསཏྠེ ནིཔཱཏོ. པརེ ཙ པརིནིབྦཱཔེཏུནྟི ཨེཏྠ པརེ ཙ-སདྡོ ‘‘པརེ ཙ ཏཱརེཏུ’’ནྟིཨཱདཱིཧིཔི ཡོཛེཏབྦོཏི.

མཧཱཀརུཎཱཉཱཎནིདྡེསཝཎྞནཱ ནིཊྛིཏཱ.

༧༢-༧༣. སབྦཉྙུཏཉྙཱཎནིདྡེསཝཎྞནཱ

༡༡༩. སབྦཉྙུཏཉྙཱཎནིདྡེསེ ཀཏམཾ ཏཐཱགཏསྶ སབྦཉྙུཏཉྙཱཎནྟི པུཙྪིཏྭཱ ཏེན སམགཏིཀཏྟཱ ཏེནེཝ སཧ ཨནཱཝརཎཉཱཎཾ ནིདྡིཊྛཾ. ན ཧི ཨནཱཝརཎཉཱཎཾ དྷམྨཏོ ཝིསུཾ ཨཏྠི, ཨེཀམེཝ ཧེཏཾ ཉཱཎཾ ཨཱཀཱརབྷེདཏོ དྭེདྷཱ ཝུཙྩཏི སདྡྷིནྡྲིཡསདྡྷཱབལཱདཱིནི ཝིཡ. སབྦཉྙུཏཉྙཱཎམེཝ ཧི ནཏྠི ཨེཏསྶ ཨཱཝརཎནྟི, ཀེནཙི དྷམྨེན, པུགྒལེན ཝཱ ཨཱཝརཎཾ ཀཱཏུཾ ཨསཀྐུཎེཡྻཏཱཡ ཨནཱཝརཎནྟི ཝུཙྩཏི ཨཱཝཛྫནཔཊིབདྡྷཏྟཱ སབྦདྷམྨཱནཾ. ཨཉྙེ པན ཨཱཝཛྫིཏྭཱཔི ན ཛཱནནྟི. ཀེཙི པནཱཧུ ‘‘མནོཝིཉྙཱཎཾ ཝིཡ སབྦཱརམྨཎིཀཏྟཱ སབྦཉྙུཏཉྙཱཎཾ. ཏཾཡེཝ ཉཱཎཾ ཨིནྡཝཛིརཾ ཝིཡ ཝིསཡེསུ ཨཔྤཊིཧཏཏྟཱ ཨནཱཝརཎཉཱཎཾ. ཨནུཔུབྦསབྦཉྙུཏཱཔཊིཀྑེཔོ སབྦཉྙུཏཉྙཱཎཾ, སཀིཾསབྦཉྙུཏཱཔཊིཀྑེཔོ ཨནཱཝརཎཉཱཎཾ, བྷགཝཱ སབྦཉྙུཏཉྙཱཎཔཊིལཱབྷེནཔི སབྦཉྙཱུཏི ཝུཙྩཏི, ན ཙ ཨནུཔུབྦསབྦཉྙཱུ. ཨནཱཝརཎཉཱཎཔཊིལཱབྷེནཔི སབྦཉྙཱུཏི ཝུཙྩཏི, ན ཙ སཀིཾསབྦཉྙཱུ’’ཏི.

སབྦཾ སངྑཏམསངྑཏཾ ཨནཝསེསཾ ཛཱནཱཏཱིཏི ཨེཏྠ སབྦནྟི ཛཱཏིཝསེན སབྦདྷམྨཱནཾ ནིསྶེསཔརིཡཱདཱནཾ. ཨནཝསེསནྟི ཨེཀེཀསྶེཝ དྷམྨསྶ སབྦཱཀཱརཝསེན ནིསྶེསཔརིཡཱདཱནཾ. སངྑཏམསངྑཏནྟི དྭིདྷཱ པབྷེདདསྶནཾ. སངྑཏཉྷི ཨེཀོ པབྷེདོ, ཨསངྑཏཾ ཨེཀོ པབྷེདོ. པཙྩཡེཧི སངྒམྨ ཀཏནྟི སངྑཏཾ. ཁནྡྷཔཉྩཀཾ. ཏཐཱ ན སངྑཏནྟི ཨསངྑཏཾ. ནིབྦཱནཾ. སངྑཏཾ ཨནིཙྩདུཀྑཱནཏྟཱདཱིཧི ཨཱཀཱརེཧི ཨནཝསེསཾ ཛཱནཱཏི, ཨསངྑཏཾ སུཉྙཏཱནིམིཏྟཨཔྤཎིཧིཏཱདཱིཧི ཨཱཀཱརེཧི ཨནཝསེསཾ ཛཱནཱཏི. ནཏྠི ཨེཏསྶ སངྑཏསྶ ཨསངྑཏསྶ ཙ ཨཝསེསོཏི ཨནཝསེསཾ. སངྑཏཾ ཨསངྑཏཉྩ. ཨནེཀབྷེདཱཔི པཉྙཏྟི པཙྩཡེཧི ཨཀཏཏྟཱ ཨསངྑཏཔཀྑཾ བྷཛཏི. སབྦཉྙུཏཉྙཱཎཉྷི སབྦཱཔི པཉྙཏྟིཡོ ཨནེཀབྷེདཏོ ཛཱནཱཏི. ཨཐ ཝཱ སབྦནྟི སབྦདྷམྨགྒཧཎཾ. ཨནཝསེསནྟི ནིཔྤདེསགྒཧཎཾ. ཏཏྠ ཨཱཝརཎཾ ནཏྠཱིཏི ཏཏྠ ཏསྨིཾ ཨནཝསེསེ སངྑཏཱསངྑཏེ ནིསྶངྒཏྟཱ སབྦཉྙུཏཉྙཱཎསྶ ཨཱཝརཎཾ ནཏྠཱིཏི ཏདེཝ སབྦཉྙུཏཉྙཱཎཾ ཨནཱཝརཎཉཱཎཾ ནཱམཱཏི ཨཏྠོ.

༡༢༠. ཨིདཱནི ཨནེཀཝིསཡབྷེདཏོ དསྶེཏུཾ ཨཏཱིཏནྟིཨཱདིམཱཧ. ཏཏྠ ཨཏཱིཏཾ ཨནཱགཏཾ པཙྩུཔྤནྣནྟི ཀཱལབྷེདཏོ དསྶིཏཾ, ཙཀྑུ ཙེཝ རཱུཔཱ ཙཱཏིཨཱདི ཝཏྠཱརམྨཎབྷེདཏོ. ཨེཝཾ ཏཾ སབྦནྟི ཏེསཾ ཙཀྑུརཱུཔཱནཾ ཨནཝསེསཔརིཡཱདཱནཾ. ཨེཝཾ སེསེསུ. ཡཱཝཏཱཏི ཨནཝསེསཔརིཡཱདཱནཾ. ཨནིཙྩཊྛནྟིཨཱདི སཱམཉྙལཀྑཎབྷེདཏོ དསྶིཏཾ. ཨནིཙྩཊྛནྟི ཙ ཨནིཙྩཱཀཱརཾ. པཙྩཏྟཏྠེ ཝཱ ཨུཔཡོགཝཙནཾ. ཨེས ནཡོ ཨེདིསེསུ. རཱུཔསྶཱཏིཨཱདི ཁནྡྷབྷེདཏོ དསྶིཏཾ. ཙཀྑུསྶ…པེ… ཛརཱམརཎསྶཱཏི ཧེཊྛཱ ཝུཏྟཔེཡྻཱལནཡེན ཡོཛེཏབྦཾ. ཨབྷིཉྙཱཡཱཏིཨཱདཱིསུ ཧེཊྛཱ ཝུཏྟཉཱཎཱནེཝ. ཨབྷིཉྙཊྛནྟི ཨབྷིཛཱནནསབྷཱཝཾ. ཨེས ནཡོ ཨེདིསེསུ. ཁནྡྷཱནཾ ཁནྡྷཊྛནྟིཨཱདི ཧེཊྛཱ ཝུཏྟནཡེནེཝ ཝེདིཏབྦཾ. ཀུསལེ དྷམྨེཏིཨཱདི ཀུསལཏྟིཀཝསེན བྷེདོ. ཀཱམཱཝཙརེ དྷམྨེཏིཨཱདི ཙཏུབྷཱུམཀཝསེན. ཨུབྷཡཏྠཱཔི ‘‘སབྦེ ཛཱནཱཏཱི’’ཏི བཧུཝཙནཔཱཋོ སུནྡརོ. ཨེཀཝཙནསོཏེ པཏིཏཏྟཱ པན པོཏྠཀེསུ ཨེཀཝཙནེན ལིཁིཏཾ. དུཀྑསྶཱཏིཨཱདི ཙུདྡསནྣཾ བུདྡྷཉཱཎཱནཾ ཝིསཡབྷེདོ. ཨིནྡྲིཡཔརོཔརིཡཏྟེ ཉཱཎནྟིཨཱདཱིནི ཙཏྟཱརི ཉཱཎཱནི ཝཏྭཱ སབྦཉྙུཏཉྙཱཎཾ ཀསྨཱ ན ཝུཏྟནྟི ཙེ? ཝུཙྩམཱནསྶ སབྦཉྙུཏཉྙཱཎཏྟཱ. ཝིསཡབྷེདཏོ ཧི སབྦཉྙུཏཉྙཱཎེ ཝུཙྩམཱནེ ཏཾ ཉཱཎཾ ན ཝཏྟབྦཾ ཧོཏི, སབྦཉྙུཏཉྙཱཎཾ པན སབྦཉྙུཏཉྙཱཎསྶ ཝིསཡོ ཧོཏིཡེཝ.

པུན ཀཱལ༹ཀཱརཱམསུཏྟནྟཱདཱིསུ (ཨ. ནི. ༤.༢༤) ཝུཏྟནཡེན སབྦཉྙུཏཉྙཱཎབྷཱུམིཾ དསྶེནྟོ ཡཱཝཏཱ སདེཝཀསྶ ལོཀསྶཱཏིཨཱདིམཱཧ. ཏཏྠ སཧ དེཝེཧི སདེཝཀསྶ. སཧ མཱརེན སམཱརཀསྶ. སཧ བྲཧྨུནཱ སབྲཧྨཀསྶ ལོཀསྶ. སཧ སམཎབྲཱཧྨཎེཧི སསྶམཎབྲཱཧྨཎིཡཱ. སཧ དེཝམནུསྶེཧི སདེཝམནུསྶཱཡ པཛཱཡ. པཛཱཏཏྟཱ པཛཱཏི སཏྟལོཀསྶ པརིཡཱཡཝཙནམེཏཾ. ཏཏྠ སདེཝཀཝཙནེན པཉྩཀཱམཱཝཙརདེཝགྒཧཎཾ, སམཱརཀཝཙནེན ཚཊྛཀཱམཱཝཙརདེཝགྒཧཎཾ, སབྲཧྨཀཝཙནེན བྲཧྨཀཱཡིཀཱདིབྲཧྨགྒཧཎཾ, སསྶམཎབྲཱཧྨཎིཝཙནེན སཱསནསྶ པཙྩཏྠིཀཔཙྩཱམིཏྟསམཎབྲཱཧྨཎགྒཧཎཾ སམིཏཔཱཔབཱཧིཏཔཱཔསམཎབྲཱཧྨཎགྒཧཎཉྩ, པཛཱཝཙནེན སཏྟལོཀགྒཧཎཾ, སདེཝམནུསྶཝཙནེན སམྨུཏིདེཝསེསམནུསྶགྒཧཎཾ ཝེདིཏབྦཾ. ཨེཝམེཏྠ ཏཱིཧི པདེཧི ཨོཀཱསལོཀོ, དྭཱིཧི པཛཱཝསེན སཏྟལོཀོ གཧིཏོཏི ཝེདིཏབྦོ.

ཨཔརོ ནཡོ – སདེཝཀགྒཧཎེན ཨརཱུཔཱཝཙརལོཀོ གཧིཏོ, སམཱརཀགྒཧཎེན ཚཀཱམཱཝཙརདེཝལོཀོ, སབྲཧྨཀགྒཧཎེན རཱུཔཱཝཙརབྲཧྨལོཀོ, སསྶམཎབྲཱཧྨཎཱདིགྒཧཎེན ཙཏུཔརིསཝསེན, སམྨུཏིདེཝེཧི ཝཱ སཧ མནུསྶལོཀོ, ཨཝསེསསཏྟལོཀོ ཝཱ.

ཨཔིཙེཏྠ སདེཝཀཝཙནེན ཨུཀྐཊྛཔརིཙྪེདཏོ སབྦསྶཔི ལོཀསྶ དིཊྛཱདིཛཱནནབྷཱཝཾ སཱདྷེཏི. ཏཏོ ཡེསཾ སིཡཱ ‘‘མཱརོ མཧཱནུབྷཱཝོ ཚཀཱམཱཝཙརིསྶརོ ཝསཝཏྟཱི, ཀིཾ ཏསྶཱཔི དིཊྛཱདིཾ ཛཱནཱཏཱི’’ཏི, ཏེསཾ ཝིམཏིཾ ཝིདྷམནྟོ ‘‘སམཱརཀསྶཱ’’ཏི ཨཱཧ. ཡེསཾ པན སིཡཱ ‘‘བྲཧྨཱ མཧཱནུབྷཱཝོ ཨེཀངྒུལིཡཱ ཨེཀསྨིཾ ཙཀྐཝཱལ༹སཧསྶེ ཨཱལོཀཾ ཕརཏི, དྭཱིཧི…པེ… དསཧི ཨངྒུལཱིཧི དསསུ ཙཀྐཝཱལ༹སཧསྶེསུ ཨཱལོཀཾ ཕརཏི, ཨནུཏྟརཉྩ ཛྷཱནསམཱཔཏྟིསུཁཾ པཊིསཾཝེདེཏི, ཀིཾ ཏསྶཱཔི དིཊྛཱདིཾ ཛཱནཱཏཱི’’ཏི, ཏེསཾ ཝིམཏིཾ ཝིདྷམནྟོ ‘‘སབྲཧྨཀསྶཱ’’ཏི ཨཱཧ. ཏཏོ ཡེསཾ སིཡཱ ‘‘པུཐཱུ སམཎབྲཱཧྨཎཱ སཱསནསྶ པཙྩཏྠིཀཱ, ཀིཾ ཏེསམྤི དིཊྛཱདིཾ ཛཱནཱཏཱི’’ཏི, ཏེསཾ ཝིམཏིཾ ཝིདྷམནྟོ ‘‘སསྶམཎབྲཱཧྨཎིཡཱ པཛཱཡཱ’’ཏི ཨཱཧ. ཨེཝཾ ཨུཀྐཊྛཱནཾ དིཊྛཱདིཛཱནནབྷཱཝཾ པཀཱསེཏྭཱ ཨཐ སམྨུཏིདེཝེ ཨཝསེསམནུསྶེ ཙ ཨུཔཱདཱཡ ཨུཀྐཊྛཔརིཙྪེདཝསེན སེསསཏྟལོཀསྶ དིཊྛཱདིཛཱནནབྷཱཝཾ པཀཱསེཏི. ཨཡམེཏྠ ཨནུསནྡྷིཀྐམོ. པོརཱཎཱ པནཱཧུ – སདེཝཀསྶཱཏི དེཝཏཱཧི སདྡྷིཾ ཨཝསེསལོཀསྶ. སམཱརཀསྶཱཏི མཱརེན སདྡྷིཾ ཨཝསེསལོཀསྶ. སབྲཧྨཀསྶཱཏི བྲཧྨེཧི སདྡྷིཾ ཨཝསེསལོཀསྶ. ཨེཝཾ སབྦེཔི ཏིབྷཝཱུཔགེ སཏྟེ ཏཱིཧཱཀཱརེཧི ཏཱིསུ པདེསུ པཀྑིཔིཏྭཱ པུན དྭཱིཧཱཀཱརེཧི པརིཡཱདཱཏུཾ སསྶམཎབྲཱཧྨཎིཡཱ པཛཱཡ སདེཝམནུསྶཱཡཱཏི ཝུཏྟཾ. ཨེཝཾ པཉྩཧི པདེཧི ཏེན ཏེན ཨཱཀཱརེན ཏེདྷཱཏུཀམེཝ པརིཡཱདིནྣཾ ཧོཏཱིཏི.

དིཊྛནྟི རཱུཔཱཡཏནཾ. སུཏནྟི སདྡཱཡཏནཾ. མུཏནྟི པཏྭཱ གཧེཏབྦཏོ གནྡྷཱཡཏནཾ, རསཱཡཏནཾ, ཕོཊྛབྦཱཡཏནཾ. ཝིཉྙཱཏནྟི སུཁདུཀྑཱདིདྷམྨཱརམྨཎཾ. པཏྟནྟི པརིཡེསིཏྭཱ ཝཱ ཨཔརིཡེསིཏྭཱ ཝཱ པཏྟཾ. པརིཡེསིཏནྟི པཏྟཾ ཝཱ ཨཔྤཏྟཾ ཝཱ པརིཡེསིཏཾ. ཨནུཝིཙརིཏཾ མནསཱཏི ཙིཏྟེན ཨནུསཉྩརིཏཾ. སབྦཾ ཛཱནཱཏཱིཏི ཨིམིནཱ ཨེཏཾ དསྶེཏི – ཡཾ ཨཔརིམཱནཱསུ ལོཀདྷཱཏཱུསུ ཨིམསྶ སདེཝཀསྶ ལོཀསྶ ‘‘ནཱིལཾ པཱིཏ’’ནྟིཨཱདི (དྷ. ས. ༦༡༩) རཱུཔཱརམྨཎཾ ཙཀྑུདྭཱརེ ཨཱཔཱཐཾ ཨཱགཙྪཏི, ཨཡཾ སཏྟོ ཨིམསྨིཾ ཁཎེ ཨིམཾ ནཱམ རཱུཔཱརམྨཎཾ དིསྭཱ སུམནོ ཝཱ དུམྨནོ ཝཱ མཛ྄ཛྷཏྟོ ཝཱ ཛཱཏོཏི ཏཾ སབྦཾ ཏཐཱགཏསྶ སབྦཉྙུཏཉྙཱཎཾ ཛཱནཱཏི. ཏཐཱ ཡཾ ཨཔརིམཱཎཱསུ ལོཀདྷཱཏཱུསུ ཨིམསྶ སདེཝཀསྶ ལོཀསྶ ‘‘བྷེརིསདྡོ, མུདིངྒསདྡོ’’ཏིཨཱདི སདྡཱརམྨཎཾ སོཏདྭཱརེ ཨཱཔཱཐཾ ཨཱགཙྪཏི, ‘‘མཱུལགནྡྷོ ཏཙགནྡྷོ’’ཏིཨཱདི (དྷ. ས. ༦༢༤-༦༢༧) གནྡྷཱརམྨཎཾ གྷཱནདྭཱརེ ཨཱཔཱཐཾ ཨཱགཙྪཏི, ‘‘མཱུལརསོ, ཁནྡྷརསོ’’ཏིཨཱདི (དྷ. ས. ༦༢༨-༦༣༡) རསཱརམྨཎཾ ཛིཝ྄ཧཱདྭཱརེ ཨཱཔཱཐཾ ཨཱགཙྪཏི, ‘‘ཀཀྑལ༹ཾ, མུདུཀ’’ནྟིཨཱདི (དྷ. ས. ༦༤༧-༦༥༠) པཐཝཱིདྷཱཏུཏེཛོདྷཱཏུཝཱཡོདྷཱཏུབྷེདཾ ཕོཊྛབྦཱརམྨཎཾ ཀཱཡདྭཱརེ ཨཱཔཱཐཾ ཨཱགཙྪཏི, ཨཡཾ སཏྟོ ཨིམསྨིཾ ཁཎེ ཨིམཾ ནཱམ ཕོཊྛབྦཱརམྨཎཾ ཕུསིཏྭཱ སུམནོ ཝཱ དུམྨནོ ཝཱ མཛ྄ཛྷཏྟོ ཝཱ ཛཱཏོཏི ཏཾ སབྦཾ ཏཐཱགཏསྶ སབྦཉྙུཏཉྙཱཎཾ ཛཱནཱཏི. ཏཐཱ ཡཾ ཨཔརིམཱཎཱསུ ལོཀདྷཱཏཱུསུ ཨིམསྶ སདེཝཀསྶ ལོཀསྶ སུཁདུཀྑཱདིབྷེདཾ དྷམྨཱརམྨཎཾ མནོདྭཱརེ ཨཱཔཱཐཾ ཨཱགཙྪཏི, ཨཡཾ སཏྟོ ཨིམསྨིཾ ཁཎེ ཨིམཾ ནཱམ དྷམྨཱརམྨཎཾ ཝིཛཱནིཏྭཱ སུམནོ ཝཱ དུམྨནོ ཝཱ མཛ྄ཛྷཏྟོ ཝཱ ཛཱཏོཏི ཏཾ སབྦཾ ཏཐཱགཏསྶ སབྦཉྙུཏཉྙཱཎཾ ཛཱནཱཏི. ཨིམསྶ པན མཧཱཛནསྶ པརིཡེསིཏྭཱ ཨཔྤཏྟམྤི ཨཏྠི, པརིཡེསིཏྭཱ པཏྟམྤི ཨཏྠི. ཨཔརིཡེསིཏྭཱ ཨཔྤཏྟམྤི ཨཏྠི, ཨཔརིཡེསིཏྭཱ པཏྟམྤི ཨཏྠི. སབྦཾ ཏཐཱགཏསྶ སབྦཉྙུཏཉྙཱཎེན ཨཔྤཏྟཾ ནཱམ ནཏྠཱིཏི.

༡༢༡. པུན ཨཔརེན པརིཡཱཡེན སབྦཉྙུཏཉྙཱཎབྷཱཝསཱདྷནཏྠཾ ན ཏསྶཱཏི གཱཐམཱཧ. ཏཏྠ ན ཏསྶ ཨདྡིཊྛམིདྷཏྠི ཀིཉྩཱིཏི ཏསྶ ཏཐཱགཏསྶ ཨིདྷ ཨིམསྨིཾ ཏེདྷཱཏུཀེ ལོཀེ, ཨིམསྨིཾ པཙྩུཔྤནྣཀཱལེ ཝཱ པཉྙཱཙཀྑུནཱ ཨདྡིཊྛཾ ནཱམ ཀིཉྩི ཨཔྤམཏྟཀམྤི ན ཨཏྠི ན སཾཝིཛྫཏི. ཨཏྠཱིཏི ཨིདཾ ཝཏྟམཱནཀཱལིཀཾ ཨཱཁྱཱཏཔདཾ. ཨིམིནཱ པཙྩུཔྤནྣཀཱལིཀསྶ སབྦདྷམྨསྶ ཉཱཏབྷཱཝཾ དསྶེཏི. གཱཐཱབནྡྷསུཁཏྠཾ པནེཏྠ ད-ཀཱརོ སཾཡུཏྟོ. ཨཐོ ཨཝིཉྙཱཏནྟི ཨེཏྠ ཨཐོཨིཏི ཝཙནོཔཱདཱནེ ནིཔཱཏོ. ཨཝིཉྙཱཏནྟི ཨཏཱིཏཀཱལིཀཾ ཨཝིཉྙཱཏཾ ནཱམ ཀིཉྩི དྷམྨཛཱཏཾ. ནཱཧོསཱིཏི པཱཋསེསོ. ཨབྱཡབྷཱུཏསྶ ཨཏྠིསདྡསྶ གཧཎེ པཱཋསེསཾ ཝིནཱཔི ཡུཛྫཏིཡེཝ. ཨིམིནཱ ཨཏཱིཏཀཱལིཀསྶ སབྦདྷམྨསྶ ཉཱཏབྷཱཝཾ དསྶེཏི. ཨཛཱནིཏབྦནྟི ཨནཱགཏཀཱལིཀཾ ཨཛཱནིཏབྦཾ ནཱམ དྷམྨཛཱཏཾ ན བྷཝིསྶཏི, ནཏྠི ཝཱ. ཨིམིནཱ ཨནཱགཏཀཱལིཀསྶ སབྦདྷམྨསྶ ཉཱཏབྷཱཝཾ དསྶེཏི. ཛཱནནཀིརིཡཱཝིསེསནམཏྟམེཝ ཝཱ ཨེཏྠ ཨ-ཀཱརོ. སབྦཾ ཨབྷིཉྙཱསི ཡདཏྠི ནེཡྻནྟི ཨེཏྠ ཡཾ ཏེཀཱལིཀཾ ཝཱ ཀཱལཝིམུཏྟཾ ཝཱ ནེཡྻཾ ཛཱནིཏབྦཾ ཀིཉྩི དྷམྨཛཱཏཾ ཨཏྠི, ཏཾ སབྦཾ ཏཐཱགཏོ ཨབྷིཉྙཱསི ཨདྷིཀེན སབྦཉྙུཏཉྙཱཎེན ཛཱནི པཊིཝིཛ྄ཛྷི. ཨེཏྠ ཨཏྠིསདྡེན ཏེཀཱལིཀསྶ ཀཱལཝིམུཏྟསྶ ཙ གཧཎཱ ཨཏྠི-སདྡོ ཨབྱཡབྷཱུཏོཡེཝ དཊྛབྦོ. ཏཐཱགཏོ ཏེན སམནྟཙཀྑཱུཏི ཀཱལཝསེན ཨོཀཱསཝསེན ཙ ནིཔྤདེསཏྟཱ སམནྟཱ སབྦཏོ པཝཏྟཾ ཉཱཎཙཀྑུ ཨསྶཱཏི སམནྟཙཀྑུ. ཏེན ཡཐཱཝུཏྟེན ཀཱརཎེན ཏཐཱགཏོ སམནྟཙཀྑུ, སབྦཉྙཱུཏི ཝུཏྟཾ ཧོཏི. ཨིམིསྶཱ གཱཐཱཡ པུགྒལཱདྷིཊྛཱནཱཡ དེསནཱཡ སབྦཉྙུཏཉྙཱཎཾ སཱདྷིཏཾ.

པུན བུདྡྷཉཱཎཱནཾ ཝིསཡཝསེན སབྦཉྙུཏཉྙཱཎཾ དསྶེཏུཀཱམོ སམནྟཙཀྑཱུཏི ཀེནཊྛེན སམནྟཙཀྑཱུཏིཨཱདིམཱཧ. ཏཏྠ གཱཐཱཡ སམནྟཙཀྑཱུཏི ཝུཏྟཔདེ ཡཾ ཏཾ སམནྟཙཀྑུ, ཏཾ ཀེནཊྛེན སམནྟཙཀྑཱུཏི ཨཏྠོ. ཨཏྠོ པནསྶ ཡཱཝཏཱ དུཀྑསྶ དུཀྑཊྛོཏིཨཱདཱིཧི ཝུཏྟོཡེཝ ཧོཏི. སབྦཉྙུཏཉྙཱཎཉྷི སམནྟཙཀྑུ. ཡཐཱཧ – ‘‘སམནྟཙཀྑུ ཝུཙྩཏི སབྦཉྙུཏཉྙཱཎ’’ནྟི (ཙཱུལ༹ནི. དྷོཏཀམཱཎཝཔུཙྪཱནིདྡེས ༣༢). ཏསྨིཾ སབྦཉྙུཏཉྙཱཎཊྛེ ཝུཏྟེ སམནྟཙཀྑུཊྛོ ཝུཏྟོཡེཝ ཧོཏཱིཏི. བུདྡྷསྶེཝ ཉཱཎཱནཱིཏི བུདྡྷཉཱཎཱནི. དུཀྑེ ཉཱཎཱདཱིནིཔི ཧི སབྦཱཀཱརེན བུདྡྷསྶེཝ བྷགཝཏོ པཝཏྟནྟི, ཨིཏརེསཾ པན ཨེཀདེསམཏྟེནེཝ པཝཏྟནྟི. སཱཝཀསཱདྷཱརཎཱནཱིཏི པན ཨེཀདེསེནཱཔི ཨཏྠིཏཾ སནྡྷཱཡ ཝུཏྟཾ. སབྦོ ཉཱཏོཏི སབྦོ ཉཱཎེན ཉཱཏོ. ཨཉྙཱཏོ དུཀྑཊྛོ ནཏྠཱིཏི ཝུཏྟམེཝ ཨཏྠཾ པཊིསེདྷེན ཝིབྷཱཝེཏི. སབྦོ དིཊྛོཏི ན ཀེཝལཾ ཉཱཏམཏྟོཡེཝ, ཨཐ ཁོ ཙཀྑུནཱ དིཊྛོ ཝིཡ ཀཏོ. སབྦོ ཝིདིཏོཏི ན ཀེཝལཾ དིཊྛམཏྟོཡེཝ, ཨཐ ཁོ པཱཀཊོ. སབྦོ སཙྪིཀཏོཏི ན ཀེཝལཾ ཝིདིཏོཡེཝ, ཨཐ ཁོ ཏཏྠ ཉཱཎཔཊིལཱབྷཝསེན པཙྩཀྑཱིཀཏོ. སབྦོ ཕསྶིཏོཏི ན ཀེཝལཾ སཙྪིཀཏོཡེཝ, ཨཐ ཁོ པུནཔྤུནཾ ཡཐཱརུཙི སམུདཱཙཱརཝསེན ཕུཊྛོཏི. ཨཐ ཝཱ ཉཱཏོ སབྷཱཝལཀྑཎཝསེན. དིཊྛོ སཱམཉྙལཀྑཎཝསེན. ཝིདིཏོ རསཝསེན. སཙྪིཀཏོ པཙྩུཔཊྛཱནཝསེན. ཕསྶིཏོ པདཊྛཱནཝསེན. ཨཐ ཝཱ ཉཱཏོ ཉཱཎུཔྤཱདཝསེན. དིཊྛོ ཙཀྑུཔྤཱདཝསེན. ཝིདིཏོ པཉྙུཔྤཱདཝསེན. སཙྪིཀཏོ ཝིཛྫུཔྤཱདཝསེན. ཕསྶིཏོ ཨཱལོཀུཔྤཱདཝསེན. ‘‘ཡཱཝཏཱ དུཀྑསྶ དུཀྑཊྛོ, སབྦོ དིཊྛོ, ཨདིཊྛོ དུཀྑཊྛོ ནཏྠཱི’’ཏིཨཱདིནཱ ནཡེན ཙ ‘‘ཡཱཝཏཱ སདེཝཀསྶ ལོཀསྶ…པེ… ཨནུཝིཙརིཏཾ མནསཱ, སབྦཾ ཉཱཏཾ, ཨཉྙཱཏཾ ནཏྠཱི’’ཏིཨཱདིནཱ ནཡེན ཙ ཝིཏྠཱརོ ཝེདིཏབྦོ. པཋམཾ ཝུཏྟགཱཐཱ ནིགམནཝསེན པུན ཝུཏྟཱ. ཏཾནིགམནེཡེཝ ཧི ཀཏེ ཉཱཎནིགམནམྤི ཀཏམེཝ ཧོཏཱིཏི.

སབྦཉྙུཏཉྙཱཎནིདྡེསཝཎྞནཱ ནིཊྛིཏཱ.

སདྡྷམྨཔྤཀཱསིནིཡཱ པཊིསམྦྷིདཱམགྒ-ཨཊྛཀཐཱཡ

ཉཱཎཀཐཱཝཎྞནཱ ནིཊྛིཏཱ.

༢. དིཊྛིཀཐཱ

༡. ཨསྶཱདདིཊྛིནིདྡེསཝཎྞནཱ

༡༢༢. ཨིདཱནི ཉཱཎཀཐཱནནྟརཾ ཀཐིཏཱཡ དིཊྛིཀཐཱཡ ཨནུཔུབྦཨནུཝཎྞནཱ ཨནུཔྤཏྟཱ. ཨཡཉྷི དིཊྛིཀཐཱ ཉཱཎཀཐཱཡ ཀཏཉཱཎཔརིཙཡསྶ སམདྷིགཏསམྨཱདིཊྛིསྶ མིཙྪཱདིཊྛིམལཝིསོདྷནཱ སུཀརཱ ཧོཏི, སམྨཱདིཊྛི ཙ སུཔརིསུདྡྷཱ ཧོཏཱིཏི ཉཱཎཀཐཱནནྟརཾ ཀཐིཏཱ. ཏཏྠ ཀཱ དིཊྛཱིཏིཨཱདིཀཱ པུཙྪཱ. ཀཱ དིཊྛཱིཏི ཨབྷིནིཝེསཔརཱམཱསོ དིཊྛཱིཏིཨཱདིཀཾ པུཙྪིཏཔུཙྪཱཡ ཝིསྶཛྫནཾ. ཀཐཾ ཨབྷིནིཝེསཔརཱམཱསོ དིཊྛཱིཏིཨཱདིཀོ ཝིསྶཛྫིཏཝིསྶཛྫནསྶ ཝིཏྠཱརནིདྡེསོ, སབྦཱཝ ཏཱ དིཊྛིཡོ ཨསྶཱདདིཊྛིཡོཏིཨཱདིཀཱ དིཊྛིསུཏྟསཾསནྡནཱཏི ཨེཝམིམེ ཙཏྟཱརོ པརིཙྪེདཱ. ཏཏྠ པུཙྪཱཔརིཙྪེདེ ཏཱཝ ཀཱ དིཊྛཱིཏི དྷམྨཔུཙྪཱ, སབྷཱཝཔུཙྪཱ. ཀཏི དིཊྛིཊྛཱནཱནཱིཏི ཧེཏུཔུཙྪཱ པཙྩཡཔུཙྪཱ, ཀིཏྟཀཱནི དིཊྛཱིནཾ ཀཱརཎཱནཱིཏི ཨཏྠོ. ཀཏི དིཊྛིཔརིཡུཊྛཱནཱནཱིཏི སམུདཱཙཱརཔུཙྪཱ ཝིཀཱརཔུཙྪཱ. དིཊྛིཡོ ཨེཝ ཧི སམུདཱཙཱརཝསེན ཙིཏྟཾ པརིཡོནནྡྷནྟིཡོ ཨུཊྛཧནྟཱིཏི དིཊྛིཔརིཡུཊྛཱནཱནི ནཱམ ཧོནྟི. ཀཏི དིཊྛིཡོཏི དིཊྛཱིནཾ སངྑཱཔུཙྪཱ གཎནཱཔུཙྪཱ. ཀཏི དིཊྛཱབྷིནིཝེསཱཏི ཝཏྠུཔྤབྷེདཝསེན ཨཱརམྨཎནཱནཏྟཝསེན དིཊྛིཔྤབྷེདཔུཙྪཱ. དིཊྛིཡོ ཨེཝ ཧི ཏཾ ཏཾ ཝཏྠུཾ ཏཾ ཏཾ ཨཱརམྨཎཾ ཨབྷིནིཝིསནྟི པརཱམསནྟཱིཏི དིཊྛིཔརཱམཱསཱཏི ཝུཙྩནྟི. ཀཏམོ དིཊྛིཊྛཱནསམུགྒྷཱཏོཏི དིཊྛཱིནཾ པཊིཔཀྑཔུཙྪཱ པཧཱནཱུཔཱཡཔུཙྪཱ. དིཊྛིཀཱརཎཱནི ཧི ཁནྡྷཱདཱིནི དིཊྛིསམུགྒྷཱཏེན ཏཱསཾ ཀཱརཎཱནི ན ཧོནྟཱིཏི ཏཱནི ཙ ཀཱརཎཱནི སམུགྒྷཱཏིཏཱནི ནཱམ ཧོནྟི. ཏསྨཱ དིཊྛིཊྛཱནཱནི སམྨཱ བྷུསཾ ཧཉྙནྟི ཨེཏེནཱཏི དིཊྛིཊྛཱནསམུགྒྷཱཏོཏི ཝུཙྩཏི.

ཨིདཱནི ཨེཏཱསཾ ཚནྣཾ པུཙྪཱནཾ ཀཱ དིཊྛཱིཏིཨཱདཱིནི ཚ ཝིསྶཛྫནཱནི. ཏཏྠ ཀཱ དིཊྛཱིཏི ཝིསྶཛྫེཏབྦཔུཙྪཱ. ཨབྷིནིཝེསཔརཱམཱསོ དིཊྛཱིཏི ཝིསྶཛྫནཾ. སཱ པན ཨནིཙྩཱདིཀེ ཝཏྠུསྨིཾ ནིཙྩཱདིཝསེན ཨབྷིནིཝིསཏི པཏིཊྛཧཏི དལ༹ྷཾ གཎྷཱཏཱིཏི ཨབྷིནིཝེསོ. ཨནིཙྩཱདིཨཱཀཱརཾ ཨཏིཀྐམིཏྭཱ ནིཙྩནྟིཨཱདིཝསེན ཝཏྟམཱནོ པརཏོ ཨཱམསཏི གཎྷཱཏཱིཏི པརཱམཱསོ. ཨཐ ཝཱ ནིཙྩནྟིཨཱདིཀཾ པརཾ ཨུཏྟམཾ སཙྩནྟི ཨཱམསཏི གཎྷཱཏཱིཏི པརཱམཱསོ, ཨབྷིནིཝེསོ ཙ སོ པརཱམཱསོ ཙཱཏི ཨབྷིནིཝེསཔརཱམཱསོ. ཨེཝཾཔཀཱརོ དིཊྛཱིཏི ཀིཙྩཏོ དིཊྛིསབྷཱཝཾ ཝིསྶཛྫེཏི. ཏཱིཎི སཏནྟི ཏཱིཎི སཏཱནི, ཝཙནཝིཔལླཱསོ ཀཏོ. ཀཏམོ དིཊྛིཊྛཱནསམུགྒྷཱཏོཏི པུཙྪཾ ཨནུདྡྷརིཏྭཱཝ སོཏཱཔཏྟིམགྒོ དིཊྛིཊྛཱནསམུགྒྷཱཏོཏི ཝིསྶཛྫནཾ ཀཏཾ.

༡༢༣. ཨིདཱནི ཀཐཾ ཨབྷིནིཝེསཔརཱམཱསོཏིཨཱདི ཝིཏྠཱརནིདྡེསོ. ཏཏྠ རཱུཔནྟི ཨུཔཡོགཝཙནཾ. རཱུཔཾ ཨབྷིནིཝེསཔརཱམཱསོཏི སམྦནྡྷོ. རཱུཔནྟི ཙེཏྠ རཱུཔུཔཱདཱནཀྑནྡྷོ ཀསིཎརཱུཔཉྩ. ‘‘ཨེཏཾ མམཱ’’ཏི ཨབྷིནིཝེསཔརཱམཱསོ དིཊྛི, ‘‘ཨེསོཧམསྨཱི’’ཏི ཨབྷིནིཝེསཔརཱམཱསོ དིཊྛི, ‘‘ཨེསོ མེ ཨཏྟཱ’’ཏི ཨབྷིནིཝེསཔརཱམཱསོ དིཊྛཱིཏི པཙྩེཀཾ ཡོཛེཏབྦཾ. ཨེཏནྟི སཱམཉྙཝཙནཾ. ཏེནེཝ ‘‘ཝེདནཾ ཨེཏཾ མམ, སངྑཱརེ ཨེཏཾ མམཱ’’ཏི ནཔུཾསཀཝཙནཾ ཨེཀཝཙནཉྩ ཀཏཾ. ཨེསོཏི པན ཝཏྟབྦམཔེཀྑིཏྭཱ པུལླིངྒེཀཝཙནཾ ཀཏཾ. ཨེཏཾ མམཱཏི ཏཎྷཱམཉྙནཱམཱུལིཀཱ དིཊྛི. ཨེསོཧམསྨཱིཏི མཱནམཉྙནཱམཱུལིཀཱ དིཊྛི. ཨེསོ མེ ཨཏྟཱཏི དིཊྛིམཉྙནཱ ཨེཝ. ཀེཙི པན ‘‘ཨེཏཾ མམཱཏི མམཾཀཱརཀཔྤནཱ, ཨེསོཧམསྨཱིཏི ཨཧཾཀཱརཀཔྤནཱ, ཨེསོ མེ ཨཏྟཱཏི ཨཧཾཀཱརམམཾཀཱརཀཔྤིཏོ ཨཏྟཱབྷིནིཝེསོཏི ཙ, ཏཐཱ ཡཐཱཀྐམེནེཝ ཏཎྷཱམཱུལནིཝེསོ མཱནཔགྒཱཧོ, ཏཎྷཱམཱུལནིཝིཊྛོ མཱནཔགྒཧིཏོ, ཨཏྟཱབྷིནིཝེསོཏི ཙ, སངྑཱརཱནཾ དུཀྑལཀྑཎཱདསྶནཾ, སངྑཱརཱནཾ ཨནིཙྩལཀྑཎཱདསྶནཾ, སངྑཱརཱནཾ ཏིལཀྑཎཱདསྶནཧེཏུཀོ ཨཏྟཱབྷིནིཝེསོཏི ཙ, དུཀྑེ ཨསུབྷེ ཙ སུཁཾ སུབྷནྟི ཝིཔལླཱསགཏསྶ, ཨནིཙྩེ ནིཙྩནྟི ཝིཔལླཱསགཏསྶ, ཙཏུབྦིདྷཝིཔལླཱསགཏསྶ ཙ ཨཏྟཱབྷིནིཝེསོཏི ཙ, པུབྦེནིཝཱསཉཱཎསྶ ཨཱཀཱརཀཔྤནཱ, དིབྦཙཀྑུཉཱཎསྶ ཨནཱགཏཔཊིལཱབྷཀཔྤནཱ, པུབྦནྟཱཔརནྟཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཀཔྤནིསྶིཏསྶ ཨཏྟཱབྷིནིཝེསོཏི ཙ, ནནྡིཡཱ ཨཏཱིཏམནྭཱགམེཏི, ནནྡིཡཱ ཨནཱགཏཾ པཊིཀངྑཏི, པཙྩུཔྤནྣེསུ དྷམྨེསུ སཾཧཱིརཏི ཨཏྟཱབྷིནིཝེསོཏི ཙ, པུབྦནྟེ ཨཉྙཱཎཧེཏུཀཱ དིཊྛི, ཨཔརནྟེ ཨཉྙཱཎཧེཏུཀཱ དིཊྛི, པུབྦནྟཱཔརནྟེ ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཨཉྙཱཎཧེཏུཀོ ཨཏྟཱབྷིནིཝེསོ’’ཏི ཙ ཨེཏེསཾ ཏིཎྞཾ ཝཙནཱནཾ ཨཏྠཾ ཝཎྞཡནྟི.

དིཊྛིཡོ པནེཏྠ པཋམཾ པཉྩཀྑནྡྷཝཏྠུཀཱ. ཏཏོ ཚཨཛ྄ཛྷཏྟིཀབཱཧིརཱཡཏནཝིཉྙཱཎ- ཀཱཡསམྥསྶཀཱཡཝེདནཱཀཱཡསཉྙཱཀཱཡཙེཏནཱཀཱཡཏཎྷཱཀཱཡཝིཏཀྐཝིཙཱརདྷཱཏུདསཀསིཎ- དྭཏྟིཾསཱཀཱརཝཏྠུཀཱ དིཊྛིཡོ ཝུཏྟཱ. དྭཏྟིཾསཱཀཱརེསུ ཙ ཡཏྠ ཝིསུཾ ཨབྷིནིཝེསོ ན ཡུཛྫཏི, ཏཏྠ སཀལསརཱིརཱབྷིནིཝེསཝསེནེཝ ཝིསུཾ ཨབྷིནིཝེསོ ཝིཡ ཀཏོཏི ཝེདིཏབྦཾ. ཏཏོ དྭཱདསཱཡཏནཨཊྛཱརསདྷཱཏུཨེཀཱུནཝཱིསཏིཨིནྡྲིཡཝསེན ཡོཛནཱ ཀཏཱ. ཏཱིཎི ཨེཀནྟལོཀུཏྟརིནྡྲིཡཱནི ན ཡོཛིཏཱནི. ན ཧི ལོཀུཏྟརཝཏྠུཀཱ དིཊྛིཡོ ཧོནྟི. སབྦཏྠཱཔི ཙ ལོཀིཡལོཀུཏྟརམིསྶེསུ དྷམྨེསུ ལོཀུཏྟརེ ཋཔེཏྭཱ ལོཀིཡཱ ཨེཝ གཧེཏབྦཱ. ཨནིནྡྲིཡབདྡྷརཱུཔཉྩ ན གཧེཏབྦམེཝ. ཏཏོ ཏེདྷཱཏུཀཝསེན ནཝཝིདྷབྷཝཝསེན ཛྷཱནབྲཧྨཝིཧཱརསམཱཔཏྟིཝསེན པཊིཙྩསམུཔྤཱདངྒཝསེན ཙ ཡོཛནཱ ཀཏཱ. ཛཱཏིཛརཱམརཎཱནཾ ཝིསུཾ གཧཎེ པརིཧཱརོ ཝུཏྟནཡོ ཨེཝ. སབྦཱནི ཙེཏཱནི རཱུཔཱདིཀཱནི ཛརཱམརཎནྟཱནི ཨཊྛནཝུཏིསཏཾ པདཱནི བྷཝནྟི.

༡༢༤. དིཊྛིཊྛཱནེསུ ཁནྡྷཱཔི དིཊྛིཊྛཱནནྟི ཝཱིསཏིཝཏྠུཀཱཡཔི སཀྐཱཡདིཊྛིཡཱ པཉྩནྣཾ ཁནྡྷཱནཾཡེཝ ཝཏྠུཏྟཱ ‘‘ཡེ ཧི ཀེཙི, བྷིཀྑཝེ, སམཎཱ ཝཱ བྲཱཧྨཎཱ ཝཱ ཨཏྟཱནཾ སམནུཔསྶམཱནཱ སམནུཔསྶནྟི, སབྦེ ཏེ པཉྩུཔཱདཱནཀྑནྡྷེསུཡེཝ སམནུཔསྶནྟི, ཨེཏེསཾ ཝཱ ཨཉྙཏར’’ནྟི (སཾ. ནི. ༣.༤༧) ཝུཏྟཏྟཱ ཙ པཉྩུཔཱདཱནཀྑནྡྷཱ དིཊྛཱིནཾ ཀཱརཎཾ. ཨཝིཛྫཱཔི དིཊྛིཊྛཱནནྟི ཨཝིཛྫཱཡ ཨནྡྷཱིཀཏཱནཾ དིཊྛིཨུཔྤཏྟིཏོ ‘‘ཡཱཡཾ, བྷནྟེ, དིཊྛི ‘ཨསམྨཱསམྦུདྡྷེསུ སམྨཱསམྦུདྡྷཱ’ཏི, ཨཡཾ ནུ ཁོ, བྷནྟེ, དིཊྛི ཀིཾ པཊིཙྩ པཉྙཱཡཏཱིཏི? མཧཏཱི ཁོ ཨེསཱ, ཀཙྩཱན, དྷཱཏུ, ཡདིདཾ ཨཝིཛྫཱདྷཱཏུ. ཧཱིནཾ, ཀཙྩཱན, དྷཱཏུཾ པཊིཙྩ ཨུཔྤཛྫཏི ཧཱིནཱ སཉྙཱ ཧཱིནཱ དིཊྛཱི’’ཏི (སཾ. ནི. ༢.༩༧) ཝཙནཏོ ཙ ཨཝིཛྫཱ དིཊྛཱིནཾ ཀཱརཎཾ. ཕསྶོཔི དིཊྛིཊྛཱནནྟི ཏེན ཕསྶེན ཕུཊྛསྶ དིཊྛིཨུཔྤཏྟིཏོ ‘‘ཡེ ཏེ, བྷིཀྑཝེ, སམཎབྲཱཧྨཎཱ པུབྦནྟཀཔྤིཀཱ པུབྦནྟཱནུདིཊྛིནོ པུབྦནྟཾ ཨཱརབྦྷ ཨནེཀཝིཧིཏཱནི ཨདྷིཝུཏྟིཔདཱནི ཨབྷིཝདནྟི, ཏདཔི ཕསྶཔཙྩཡཱ’’ཏི (དཱི. ནི. ༡.༡༢༣) ཝཙནཏོ ཙ ཕསྶོ དིཊྛཱིནཾ ཀཱརཎཾ. སཉྙཱཔི དིཊྛིཊྛཱནནྟི ཨཱཀཱརམཏྟགྒཧཎེན ཨཡཱཐཱཝསབྷཱཝགཱཧཧེཏུཏྟཱ སཉྙཱཡ –

‘‘ཡཱནི ཙ ཏཱིཎི ཡཱནི ཙ སཊྛི, སམཎཔྤཝཱདསིཏཱནི བྷཱུརིཔཉྙ;

སཉྙཀྑརསཉྙནིསྶིཏཱནི, ཨོསརཎཱནི ཝིནེཡྻ ཨོགྷཏམགཱ’’ཏི. (སུ. ནི. ༥༤༣) –

ཝཙནཏོ ‘‘སཉྙཱནིདཱནཱ ཧི པཔཉྩསངྑཱ’’ཏི (སུ. ནི. ༨༨༠; མཧཱནི. ༡༠༩) ཝཙནཏོ ཙ སཉྙཱ དིཊྛཱིནཾ ཀཱརཎཾ. ཝིཏཀྐོཔི དིཊྛིཊྛཱནནྟི ཨཱཀཱརཔརིཝིཏཀྐེན དིཊྛིཨུཔྤཏྟིཏོ –

‘‘ནཧེཝ སཙྩཱནི བཧཱུནི ནཱནཱ, ཨཉྙཏྲ སཉྙཱཡ ནིཙྩཱནི ལོཀེ;

ཏཀྐཉྩ དིཊྛཱིསུ པཀཔྤཡིཏྭཱ, སཙྩཾ མུསཱཏི དྭཡདྷམྨམཱཧཱུ’’ཏི. (སུ. ནི. ༨༩༢) –

ཝཙནཏོ ཙ ཝིཏཀྐོ དིཊྛཱིནཾ ཀཱརཎཾ. ཨཡོནིསོམནསིཀཱརོཔི དིཊྛིཊྛཱནནྟི ཨཡོནིསོ མནསིཀཱརསྶ ཨཀུསལཱནཾ ཨསཱདྷཱརཎཧེཏུཏྟཱ ‘‘ཏསྶེཝཾ ཨཡོནིསོ མནསིཀརོཏོ ཚནྣཾ དིཊྛཱིནཾ ཨཉྙཏརཱ དིཊྛི ཨུཔྤཛྫཏཱི’’ཏི (མ. ནི. ༡.༡༩) ཝཙནཏོ ཙ ཨཡོནིསོ མནསིཀཱརོ དིཊྛཱིནཾ ཀཱརཎཾ. པཱཔམིཏྟོཔི དིཊྛིཊྛཱནནྟི པཱཔམིཏྟསྶ དིཊྛཱནུགཏིཨཱཔཛྫནེན དིཊྛིཨུཔྤཏྟིཏོ ‘‘བཱཧིརཾ, བྷིཀྑཝེ, ཨངྒནྟི ཀརིཏྭཱ ན ཨཉྙཾ ཨེཀངྒམྤི སམནུཔསྶཱམི, ཡཾ ཨེཝཾ མཧཏོ ཨནཏྠཱཡ སཾཝཏྟཏི. ཡཐཡིདཾ, བྷིཀྑཝེ, པཱཔམིཏྟཏཱ’’ཏི (ཨ. ནི. ༡.༡༡༠) ཝཙནཏོ ཙ པཱཔམིཏྟོ དིཊྛཱིནཾ ཀཱརཎཾ. པརཏོཔི གྷོསོ དིཊྛིཊྛཱནནྟི དུརཀྑཱཏདྷམྨསྶཝནེན དིཊྛིཨུཔྤཏྟིཏོ ‘‘དྭེམེ, བྷིཀྑཝེ, ཧེཏཱུ དྭེ པཙྩཡཱ མིཙྪཱདིཊྛིཡཱ ཨུཔྤཱདཱཡ པརཏོ ཙ གྷོསོ ཨཡོནིསོ ཙ མནསིཀཱརོ’’ཏི (ཨ. ནི. ༢.༡༢༦) ཝཙནཏོ ཙ པརཏོ གྷོསོ མིཙྪཱདིཊྛིཀཏོ མིཙྪཱདིཊྛིཔཊིསཉྙུཏྟཀཐཱ དིཊྛཱིནཾ ཀཱརཎཾ.

ཨིདཱནི དིཊྛིཊྛཱནནྟི པདསྶ ཨཏྠཾ ཝིཝརནྟོ ཁནྡྷཱ ཧེཏུ ཁནྡྷཱ པཙྩཡོཏིཨཱདིམཱཧ. ཁནྡྷཱ ཨེཝ དིཊྛཱིནཾ ཨུཔཱདཱཡ, ཛནཀཧེཏུ ཙེཝ ཨུཔཏྠམྦྷཀཔཙྩཡོ ཙཱཏི ཨཏྠོ. སམུཊྛཱནཊྛེནཱཏི སམུཊྛཧནྟི ཨུཔྤཛྫནྟི ཨེཏེནཱཏི སམུཊྛཱནཾ, ཀཱརཎནྟི ཨཏྠོ. ཏེན སམུཊྛཱནཊྛེན, དིཊྛིཀཱརཎབྷཱཝེནཱཏི ཨཏྠོ.

༡༢༥. ཨིདཱནི ཀིཙྩབྷེདེན དིཊྛིབྷེདཾ དསྶེནྟོ ཀཏམཱནི ཨཊྛཱརས དིཊྛིཔརིཡུཊྛཱནཱནཱིཏིཨཱདིམཱཧ. ཏཏྠ ཡཱ དིཊྛཱིཏི ཨིདཱནི ཝུཙྩམཱནཱནཾ ཨཊྛཱརསནྣཾ པདཱནཾ སཱདྷཱརཎཾ མཱུལཔདཾ. ཡཱ དིཊྛི, ཏདེཝ དིཊྛིགཏཾ, ཡཱ དིཊྛི, ཏདེཝ དིཊྛིགཧནནྟི སབྦེཧི སམྦནྡྷོ ཀཱཏབྦོ. ཨཡཱཐཱཝདསྶནཊྛེན དིཊྛི, ཏདེཝ དིཊྛཱིསུ གཏཾ དསྶནཾ དྭཱསཊྛིདིཊྛིཨནྟོགདྷཏྟཱཏི དིཊྛིགཏཾ. ཧེཊྛཱཔིསྶ ཨཏྠོ ཝུཏྟོཡེཝ. དྭིནྣཾ ཨནྟཱནཾ ཨེཀནྟགཏཏྟཱཔི དིཊྛིགཏཾ. སཱ ཨེཝ དིཊྛི དུརཏིཀྐམནཊྛེན དིཊྛིགཧནཾ ཏིཎགཧནཝནགཧནཔབྦཏགཧནཱནི ཝིཡ. སཱསངྐསཔྤཊིབྷཡཊྛེན དིཊྛིཀནྟཱརཾ ཙོརཀནྟཱརཝཱལ༹ཀནྟཱརནིརུདཀཀནྟཱརདུབྦྷིཀྑཀནྟཱརཱ ཝིཡ. དྷམྨསངྒཎིཡཾ ‘‘དིཊྛིཀནྟཱརོ’’ཏི སཀལིངྒེནེཝ ཨཱགཏཾ. སམྨཱདིཊྛིཡཱ ཝིནིཝིཛ྄ཛྷནཊྛེན པཊིལོམཊྛེན ཙ དིཊྛིཝིསཱུཀཾ. མིཙྪཱདསྶནཉྷི ཨུཔྤཛྫམཱནཾ སམྨཱདསྶནཾ ཝིནིཝིཛ྄ཛྷཏི ཙེཝ ཝིལོམེཏི ཙ. དྷམྨསངྒཎིཡཾ (དྷ. ས. ༣༩༢, ༡༡༠༥) ‘‘དིཊྛིཝིསཱུཀཱཡིཀ’’ནྟི ཨཱགཏཾ. ཀདཱཙི སསྶཏསྶ, ཀདཱཙི ཨུཙྪེདསྶ གཧཎཏོ དིཊྛིཡཱ ཝིརཱུཔཾ ཕནྡིཏནྟི དིཊྛིཝིཔྥནྡིཏཾ. དིཊྛིགཏིཀོ ཧི ཨེཀསྨིཾ པཏིཊྛཱཏུཾ ན སཀྐོཏི, ཀདཱཙི སསྶཏཾ ཨནུསྶརཏི, ཀདཱཙི ཨུཙྪེདཾ. དིཊྛིཡེཝ ཨནཏྠེ སཾཡོཛེཏཱིཏི དིཊྛིསཉྙོཛནཾ. དིཊྛིཡེཝ ཨནྟོཏུདནཊྛེན དུནྣཱིཧརཎཱིཡཊྛེན ཙ སལླནྟི དིཊྛིསལླཾ. དིཊྛིཡེཝ པཱིལཱ༹ཀརཎཊྛེན སམྦཱདྷོཏི དིཊྛིསམྦཱདྷོ. དིཊྛིཡེཝ མོཀྑཱཝརཎཊྛེན པལིབོདྷོཏི དིཊྛིཔལིབོདྷོ. དིཊྛིཡེཝ དུམྨོཙནཱིཡཊྛེན བནྡྷནནྟི དིཊྛིབནྡྷནཾ. དིཊྛིཡེཝ དུརུཏྟརཊྛེན པཔཱཏོཏི དིཊྛིཔཔཱཏོ. དིཊྛིཡེཝ ཐཱམགཏཊྛེན ཨནུསཡོཏི དིཊྛཱནུསཡོ. དིཊྛིཡེཝ ཨཏྟཱནཾ སནྟཱཔེཏཱིཏི དིཊྛིསནྟཱཔོ. དིཊྛིཡེཝ ཨཏྟཱནཾ ཨནུདཧཏཱིཏི དིཊྛིཔརིལཱ༹ཧོ. དིཊྛིཡེཝ ཀིལེསཀཱཡཾ གནྠེཏཱིཏི དིཊྛིགནྠོ. དིཊྛིཡེཝ བྷུསཾ ཨཱདིཡཏཱིཏི དིཊྛུཔཱདཱནཾ. དིཊྛིཡེཝ ‘‘སཙྩ’’ནྟིཨཱདིཝསེན ཨབྷིནིཝིསཏཱིཏི དིཊྛཱབྷིནིཝེསོ. དིཊྛིཡེཝ ཨིདཾ པརནྟི ཨཱམསཏི, པརཏོ ཝཱ ཨཱམསཏཱིཏི དིཊྛིཔརཱམཱསོ.

༡༢༦. ཨིདཱནི རཱསིཝསེན སོལ༹ས དིཊྛིཡོ ཨུདྡིསནྟོ ཀཏམཱ སོལ༹ས དིཊྛིཡོཏིཨཱདིམཱཧ. ཏཏྠ སུཁསོམནསྶསངྑཱཏེ ཨསྶཱདེ དིཊྛི ཨསྶཱདདིཊྛི. ཨཏྟཱནཾ ཨནུགཏཱ དིཊྛི ཨཏྟཱནུདིཊྛི. ནཏྠཱིཏི པཝཏྟཏྟཱ ཝིཔརཱིཏཱ དིཊྛི མིཙྪཱདིཊྛི. སཏི ཀཱཡེ དིཊྛི, སནྟཱི ཝཱ ཀཱཡེ དིཊྛི སཀྐཱཡདིཊྛི. ཀཱཡོཏི ཙེཏྠ ཁནྡྷཔཉྩཀཾ, ཁནྡྷཔཉྩཀསངྑཱཏོ སཀྐཱཡོ ཝཏྠུ པཏིཊྛཱ ཨེཏིསྶཱཏི སཀྐཱཡཝཏྠུཀཱ. སསྶཏནྟི པཝཏྟཱ དིཊྛི སསྶཏདིཊྛི. ཨུཙྪེདོཏི པཝཏྟཱ དིཊྛི ཨུཙྪེདདིཊྛི. སསྶཏཱདིཨནྟཾ གཎྷཱཏཱིཏི ཨནྟགྒཱཧིཀཱ, ཨནྟགྒཱཧོ ཝཱ ཨསྶཱ ཨཏྠཱིཏི ཨནྟགྒཱཧིཀཱ. ཨཏཱིཏསངྑཱཏཾ པུབྦནྟཾ ཨནུགཏཱ དིཊྛི པུབྦནྟཱནུདིཊྛི. ཨནཱགཏསངྑཱཏཾ ཨཔརནྟཾ ཨནུགཏཱ དིཊྛི ཨཔརནྟཱནུདིཊྛི. ཨནཏྠེ སཾཡོཛེཏཱིཏི སཉྙོཛནིཀཱ. ཨཧངྐཱརཝསེན ཨཧནྟི ཨུཔྤནྣེན མཱནེན དིཊྛིཡཱ མཱུལབྷཱུཏེན ཝིནིབནྡྷཱ གྷཊིཏཱ ཨུཔྤཱདིཏཱ དིཊྛི ཨཧནྟི མཱནཝིནིབནྡྷཱ དིཊྛི. ཏཐཱ མམངྐཱརཝསེན མམནྟི ཨུཔྤནྣེན མཱནེན ཝིནིབནྡྷཱ དིཊྛི མམནྟི མཱནཝིནིབནྡྷཱ དིཊྛི. ཨཏྟནོ ཝདནཾ ཀཐནཾ ཨཏྟཝཱདོ, ཏེན པཊིསཉྙུཏྟཱ བདྡྷཱ དིཊྛི ཨཏྟཝཱདཔཊིསཾཡུཏྟཱ དིཊྛི. ཨཏྟཱནཾ ལོཀོཏི ཝདནཾ ཀཐནཾ ལོཀཝཱདོ, ཏེན པཊིསཉྙུཏྟཱ དིཊྛི ལོཀཝཱདཔཊིསཾཡུཏྟཱ དིཊྛི. བྷཝོ ཝུཙྩཏི སསྶཏཾ, སསྶཏཝསེན ཨུཔྤཛྫནདིཊྛི བྷཝདིཊྛི. ཝིབྷཝོ ཝུཙྩཏི ཨུཙྪེདོ, ཨུཙྪེདཝསེན ཨུཔྤཛྫནདིཊྛི ཝིབྷཝདིཊྛི.

༡༢༧-༡༢༨. ཨིདཱནི ཏཱིཎི སཏཾ དིཊྛཱབྷིནིཝེསེ ནིདྡིསིཏུཀཱམོ ཀཏམེ ཏཱིཎི སཏཾ དིཊྛཱབྷིནིཝེསཱཏི པུཙྪིཏྭཱ ཏེ ཨཝིསྶཛྫེཏྭཱཝ ཝིསུཾ ཝིསུཾ ཨབྷིནིཝེསཝིསྶཛྫནེནེཝ ཏེ ཝིསྶཛྫེཏུཀཱམོ ཨསྶཱདདིཊྛིཡཱ, ཀཏིཧཱཀཱརེཧི ཨབྷིནིཝེསོ ཧོཏཱིཏིཨཱདིནཱ ནཡེན སོལ༹སནྣཾ དིཊྛཱིནཾ ཨབྷིནིཝེསཱཀཱརགཎནཾ པུཙྪིཏྭཱ པུན ཨསྶཱདདིཊྛིཡཱ པཉྩཏིཾསཱཡ ཨཱཀཱརེཧི ཨབྷིནིཝེསོ ཧོཏཱིཏི ཏཱསཾ སོལ༹སནྣཾ དིཊྛཱིནཾ ཨབྷིནིཝེསཱཀཱརགཎནཾ ཝིསྶཛྫེཏྭཱ པུན ཏཱནི གཎནཱནི ཝིསྶཛྫེནྟོ ཨསྶཱདདིཊྛིཡཱ ཀཏམེཧི པཉྩཏིཾསཱཡ ཨཱཀཱརེཧི ཨབྷིནིཝེསོ ཧོཏཱིཏིཨཱདིམཱཧ. ཏཏྠ རཱུཔཾ པཊིཙྩཱཏི རཱུཔཀྑནྡྷཾ པཊིཙྩ. ཨུཔྤཛྫཏི སུཁཾ སོམནསྶནྟི ‘‘ཨཡཾ མེ ཀཱཡོ ཨཱིདིསོ’’ཏི རཱུཔསམྤདཾ ནིསྶཱཡ གེཧསིཏཾ རཱགསམྤཡུཏྟཾ སུཁཾ སོམནསྶཾ ཨུཔྤཛྫཏི. ཧེཊྛཱ ཝུཏྟེནཊྛེན སུཁཉྩ སོམནསྶཉྩ. ཏཾཡེཝ རཱུཔསྶ ཨསྶཱདོཏི རཱུཔནིསྶཡོ ཨསྶཱདོ. ཏཉྷི སུཁཾ ཏཎྷཱཝསེན ཨསྶཱདཱིཡཏི ཨུཔབྷུཉྫཱིཡཏཱིཏི ཨསྶཱདོ. ཨབྷིནིཝེསཔརཱམཱསོ དིཊྛཱིཏི སོ ཨསྶཱདོ སསྶཏོཏི ཝཱ ཨུཙྪིཛྫིསྶཏཱིཏི ཝཱ སསྶཏཾ ཝཱ ཨུཙྪིཛྫམཱནཾ ཝཱ ཨཏྟཱནཾ སུཁིཏཾ ཀརོཏཱིཏི ཝཱ ཨབྷིནིཝེསཔརཱམཱསོ ཧོཏི. ཏསྨཱ ཡཱ ཙ དིཊྛི ཡོ ཙ ཨསྶཱདོཏི ཨསྶཱདསྶ དིཊྛིབྷཱཝཱབྷཱཝེཔི ཨསྶཱདཾ ཝིནཱ སཱ དིཊྛི ན ཧོཏཱིཏི ཀཏྭཱ ཨུབྷཡམྤི སམུཙྩིཏཾ. ཨསྶཱདདིཊྛཱིཏི ཨསྶཱདེ པཝཏྟཱ དིཊྛཱིཏི ཝུཏྟཾ ཧོཏི.

ཨིདཱནི ནཱནཱསུཏྟེཧི སཾསནྡེཏྭཱ མིཙྪཱདིཊྛིཾ མིཙྪཱདིཊྛིཀཉྩ གརཧིཏུཀཱམོ ཨསྶཱདདིཊྛི མིཙྪཱདིཊྛཱིཏིཨཱདིམཱཧ. ཏཏྠ དིཊྛིཝིཔཏྟཱིཏི སམྨཱདིཊྛིཝིནཱསཀམིཙྪཱདིཊྛིསངྑཱཏདིཊྛིཡཱ ཝིཔཏྟི. དིཊྛིཝིཔནྣོཏི ཝིཔནྣཱ ཝིནཊྛཱ སམྨཱདིཊྛི ཨསྶཱཏི དིཊྛིཝིཔནྣོ, ཝིཔནྣདིཊྛཱིཏི ཝུཏྟཾ ཧོཏི. མིཙྪཱདིཊྛིཡཱ ཝཱ ཝིཔནྣོ ཝིནཊྛོཏི དིཊྛིཝིཔནྣོ. ན སེཝིཏབྦོ ཨུཔསངྐམནེན. ན བྷཛིཏབྦོ ཙིཏྟེན. ན པཡིརུཔཱསིཏབྦོ ཨུཔསངྐམིཏྭཱ ནིསཱིདནེན. ཏཾ ཀིསྶ ཧེཏཱུཏི ‘‘ཏཾ སེཝནཱདིཀཾ ཀེན ཀཱརཎེན ན ཀཱཏབྦ’’ནྟི ཏསྶ ཀཱརཎཔུཙྪཱ. དིཊྛི ཧིསྶ པཱཔིཀཱཏི ཀཱརཎཝིསྶཛྫནཾ. ཡསྨཱ ཨསྶ པུགྒལསྶ དིཊྛི པཱཔིཀཱ, ཏསྨཱ ཏཾ སེཝནཱདིཀཾ ན ཀཱཏབྦནྟི ཨཏྠོ. དིཊྛིཡཱ རཱགོཏི ‘‘སུནྡརཱ མེ དིཊྛཱི’’ཏི དིཊྛིཾ ཨཱརབྦྷ དིཊྛིཡཱ ཨུཔྤཛྫནརཱགོ. དིཊྛིརཱགརཏྟོཏི ཏེན དིཊྛིརཱགེན རངྒེན རཏྟཾ ཝཏྠཾ ཝིཡ རཏྟོ. ན མཧཔྥལནྟི ཝིཔཱཀཕལེན. ན མཧཱནིསཾསནྟི ནིསྶནྡཕལེན.

པུརིསཔུགྒལསྶཱཏི པུརིསསངྑཱཏསྶ པུགྒལསྶ. ལོཀིཡཝོཧཱརེན ཧི པུརི ཝུཙྩཏི སརཱིརཾ, ཏསྨིཾ པུརིསྨིཾ སེཏི པཝཏྟཏཱིཏི པུརིསོ, པུཾ ཝུཙྩཏི ནིརཡོ, ཏཾ པུཾ གལཏི གཙྪཏཱིཏི པུགྒལོ. ཡེབྷུཡྻེན ཧི སཏྟཱ སུགཏིཏོ ཙུཏཱ དུགྒཏིཡཾཡེཝ ནིབྦཏྟནྟི. ཏཾ ཀིསྶ ཧེཏཱུཏི ཏཾ ན མཧཔྥལཏྟཾ ཀེན ཀཱརཎེན ཧོཏི. དིཊྛི ཧིསྶ པཱཔིཀཱཏི ཡསྨཱ ཨསྶ པུགྒལསྶ དིཊྛི པཱཔིཀཱ, ཏསྨཱ ན མཧཔྥལཾ ཧོཏཱིཏི ཨཏྠོ. དྭེཝ གཏིཡོཏི པཉྩསུ གཏཱིསུ དྭེཝ གཏིཡོ. ཝིཔཛྫམཱནཱཡ དིཊྛིཡཱ ནིརཡོ. སམྤཛྫམཱནཱཡ ཏིརཙྪཱནཡོནི. ཡཉྩེཝ ཀཱཡཀམྨནྟི སཀལིངྒདྷཱརཎཔཊིཔདཱནུཡོགཨབྷིཝཱདནཔཙྩུཊྛཱནཨཉྫལིཀམྨཱདི ཀཱཡཀམྨཾ. ཡཉྩ ཝཙཱིཀམྨནྟི སཀསམཡཔརིཡཱཔུཎནསཛ྄ཛྷཱཡནདེསནཱསམཱདཔནཱདི ཝཙཱིཀམྨཾ. ཡཉྩ མནོཀམྨནྟི ཨིདྷལོཀཙིནྟཱཔཊིསཾཡུཏྟཉྩ པརལོཀཙིནྟཱཔཊིསཾཡུཏྟཉྩ ཀཏཱཀཏཙིནྟཱཔཊིསཾཡུཏྟཉྩ མནོཀམྨཾ. ཏིཎཀཊྛདྷཉྙབཱིཛེསུ སཏྟདིཊྛིསྶ དཱནཱནུཔྤདཱནཔཊིགྒཧཎཔརིབྷོགེསུ ཙ ཀཱཡཝཙཱིམནོཀམྨཱནི. ཡཐཱདིཊྛཱིཏི ཡཱ ཨཡཾ དིཊྛི, ཏསྶཱནུརཱུཔཾ. སམཏྟནྟི པརིཔུཎྞཾ. སམཱདིནྣནྟི གཧིཏཾ.

ཨཊྛཀཐཱཡཾ པན ཝུཏྟཾ – ཏདེཏཾ ཡཐཱདིཊྛིཡཾ ཋིཏཀཱཡཀམྨཾ, དིཊྛིསཧཛཱཏཀཱཡཀམྨཾ, དིཊྛཱནུལོམིཀཀཱཡཀམྨནྟི ཏིཝིདྷཾ ཧོཏི. ཏཏྠ ‘‘པཱཎཾ ཧནཏོ ཨདིནྣཾ ཨཱདིཡཏོ མིཙྪཱཙརཏོ ནཏྠི ཏཏོནིདཱནཾ པཱཔཾ, ནཏྠི པཱཔསྶ ཨཱགམོ’’ཏི ཡཾ ཨེཝཾ དིཊྛིཀསྶ སཏོ པཱཎཱཏིཔཱཏཨདིནྣཱདཱནམིཙྪཱཙཱརསངྑཱཏཾ ཀཱཡཀམྨཾ, ཨིདཾ ཡཐཱདིཊྛིཡཾ ཋིཏཀཱཡཀམྨཾ ནཱམ. ‘‘པཱཎཾ ཧནཏོ ཨདིནྣཾ ཨཱདིཡཏོ མིཙྪཱཙརཏོ ནཏྠི ཏཏོནིདཱནཾ པཱཔཾ, ནཏྠི པཱཔསྶ ཨཱགམོ’’ཏི ཡཾ ཨིམཱཡ དིཊྛིཡཱ ཨིམིནཱ དསྶནེན སཧཛཱཏཾ ཀཱཡཀམྨཾ, ཨིདཾ དིཊྛིསཧཛཱཏཀཱཡཀམྨཾ ནཱམ. ཏདེཝ པན སམཏྟཾ སམཱདིནྣཾ གཧིཏཾ པརཱམཊྛཾ དིཊྛཱནུལོམིཀཀཱཡཀམྨཾ ནཱམ. ཝཙཱིཀམྨམནོཀམྨེསུཔི ཨེསེཝ ནཡོ. ཨེཏྠ པན མུསཱ བྷཎཏོ པིསུཎཾ བྷཎཏོ ཕརུསཾ བྷཎཏོ སམྥཾ པལཔཏོ ཨབྷིཛ྄ཛྷཱལུནོ བྱཱཔནྣཙིཏྟསྶ མིཙྪཱདིཊྛིཀསྶ སཏོ ནཏྠི ཏཏོནིདཱནཾ པཱཔཾ, ནཏྠི པཱཔསྶ ཨཱགམོཏི ཡོཛནཱ ཀཱཏབྦཱ. ལིངྒདྷཱརཎཱདིཔརིཡཱཔུཎནཱདིལོཀཙིནྟཱདིཝསེན ཝུཏྟནཡོ ཙེཏྠ སུནྡརོ.

ཙེཏནཱདཱིསུ དིཊྛིསཧཛཱཏཱ ཙེཏནཱ ཙེཏནཱ ནཱམ. དིཊྛིསཧཛཱཏཱ པཏྠནཱ པཏྠནཱ ནཱམ. ཙེཏནཱཔཏྠནཱནཾ ཝསེན ཙིཏྟཊྛཔནཱ པཎིདྷི ནཱམ. ཏེཧི པན ཙེཏནཱདཱིཧི སམྤཡུཏྟཱ ཕསྶཱདཡོ སངྑཱརཀྑནྡྷཔརིཡཱཔནྣཱ དྷམྨཱ སངྑཱརཱ ནཱམ. ཨནིཊྛཱཡཱཏིཨཱདཱིཧི དུཀྑམེཝ ཝུཏྟཾ. དུཀྑཉྷི སུཁཀཱམེཧི སཏྟེཧི ན ཨེསིཏཏྟཱ ཨནིཊྛཾ. ཨཔྤིཡཏྟཱ ཨཀནྟཾ. མནསྶ ཨཝཌྜྷནཏོ, མནསི ཨཝིསཔྤནཏོ ཙ ཨམནཱཔཾ. ཨཱཡཏིཾ ཨབྷདྡཏཱཡ ཨཧིཏཾ. པཱིལ༹ནཏོ དུཀྑནྟི. ཏཾ ཀིསྶ ཧེཏཱུཏི ཏཾ ཨེཝཾ སཾཝཏྟནཾ ཀེན ཀཱརཎེན ཧོཏཱིཏི ཨཏྠོ. ཨིདཱནིསྶ ཀཱརཎཾ དིཊྛི ཧིསྶ པཱཔིཀཱཏི. ཡསྨཱ ཏསྶ པུགྒལསྶ དིཊྛི པཱཔིཀཱ ལཱམཀཱ, ཏསྨཱ ཨེཝཾ སཾཝཏྟཏཱིཏི ཨཏྠོ. ཨལླཱཡ པཐཝིཡཱ ནིཀྑིཏྟནྟི ཨུདཀེན ཏིནྟཱཡ བྷཱུམིཡཱ རོཔིཏཾ. པཐཝཱིརསཾ ཨཱཔོརསནྟི ཏསྨིཾ ཏསྨིཾ ཋཱནེ པཐཝིཡཱ ཙ སམྤདཾ ཨཱཔསྶ ཙ སམྤདཾ. བཱིཛནིཀྑིཏྟཊྛཱནེ ཧི ན སབྦཱ པཐཝཱི ན སབྦོ ཨཱཔོ ཙ བཱིཛཾ ཕལཾ གཎྷཱཔེཏི. ཡོ པན ཏེསཾ པདེསོ བཱིཛཾ ཕུསཏི, སོཡེཝ བཱིཛཾ ཕལཾ གཎྷཱཔེཏི. ཏསྨཱ བཱིཛཔོསནཱཡ པཙྩཡབྷཱུཏོཡེཝ སོ པདེསོ པཐཝཱིརསོ ཨཱཔོརསོཏི ཝེདིཏབྦོ. རསསདྡསྶ ཧི སམྤཏྟི ཙ ཨཏྠོ. ཡཐཱཧ ‘‘ཀིཙྩསམྤཏྟིཨཏྠེན རསོ ནཱམ པཝུཙྩཏཱི’’ཏི. ལོཀེ ཙ ‘‘སུརསོ གནྡྷབྦོ’’ཏི ཝུཏྟེ སུསམྤནྣོ གནྡྷབྦོཏི ཨཏྠོ ཉཱཡཏི. ཨུཔཱདིཡཏཱིཏི གཎྷཱཏི. ཡོ ཧི པདེསོ པཙྩཡོ ཧོཏི, ཏཾ པཙྩཡཾ ལབྷམཱནཾ བཱིཛཾ ཏཾ གཎྷཱཏི ནཱམ. སབྦཾ ཏནྟི སབྦཾ ཏཾ རསཛཱཏཾ. ཏིཏྟཀཏྟཱཡཱཏི སོ པཐཝཱིརསོ ཨཱཔོརསོ ཙ ཨཏིཏྟཀོ སམཱནོཔི ཏིཏྟཀཾ བཱིཛཾ ནིསྶཱཡ ནིམྦརུཀྑཱདཱིནཾ ཏེསཾ ཕལཱནཉྩ ཏིཏྟཀབྷཱཝཱཡ སཾཝཏྟཏི. ཀཊུཀཏྟཱཡཱཏི ཨིདཾ པུརིམསྶེཝ ཝེཝཙནཾ.

‘‘ཝཎྞགནྡྷརསཱུཔེཏོ, ཨམྦོཡཾ ཨཧུཝཱ པུརེ;

ཏམེཝ པཱུཛཾ ལབྷམཱནོ, ཀེནམྦོ ཀཊུཀཔྥལོ’’ཏི. (ཛཱ. ༡.༢.༧༡) –

ཨཱགཏཊྛཱནེ ཝིཡ ཧི ཨིདྷཱཔི ཏིཏྟཀམེཝ ཨཔྤིཡཊྛེན ཀཊུཀནྟི ཝེདིཏབྦཾ. ཨསཱཏཏྟཱཡཱཏི ཨམདྷུརབྷཱཝཱཡ. ཨསཱདུཏྟཱཡཱཏིཔི པཱཋོ, ཨསཱདུབྷཱཝཱཡཱཏི ཨཏྠོ. སཱདཱུཏི ཧི མདྷུརཾ. བཱིཛཾ ཧིསྶཱཏི ཨསྶ ནིམྦཱདིཀསྶ བཱིཛཾ. ཨེཝམེཝནྟི ཨེཝཾ ཨེཝཾ. ཡསྨཱ སུཁཱ ཝེདནཱ པརམོ ཨསྶཱདོ, ཏསྨཱ མིཙྪཱདིཊྛིཡཱ དུཀྑཝེདནཱཝསེན ཨཱདཱིནཝོ དསྶིཏོཏི. པུན ཨཊྛཱརསབྷེདེན དིཊྛིཡཱ ཨཱདཱིནཝཾ དསྶེཏུཾ ཨསྶཱདདིཊྛི མིཙྪཱདིཊྛཱིཏིཨཱདིམཱཧ. ཏཾ ཝུཏྟཏྠམེཝ. ཨིམེཧི ཨཊྛཱརསཧི ཨཱཀཱརེཧི པརིཡུཊྛིཏཙིཏྟསྶ སཉྙོགོཏི དིཊྛིཡཱ ཨེཝ སཾསཱརེ བནྡྷནཾ དསྶེཏི.

༡༢༩. ཡསྨཱ པན དིཊྛིབྷཱུཏཱནིཔི སཉྙོཛནཱནི ཨཏྠི ཨདིཊྛིབྷཱུཏཱནིཔི, ཏསྨཱ ཏཾ པབྷེདཾ དསྶེནྟོ ཨཏྠི སཉྙོཛནཱནི ཙེཝཱཏིཨཱདིམཱཧ. ཏཏྠ ཡསྨཱ ཀཱམརཱགསཉྙོཛནསྶེཝ ཨནུནཡསཉྙོཛནནྟི ཨཱགཏཊྛཱནམྤི ཨཏྠི, ཏསྨཱ ཨནུནཡསཉྙོཛནནྟི ཝུཏྟཾ. ཀཱམརཱགབྷཱཝཾ ཨཔྤཏྭཱ པཝཏྟཾ ལོབྷཾ སནྡྷཱཡ ཨེཏཾ ཝུཏྟནྟི ཝེདིཏབྦཾ. སེསཁནྡྷཱཡཏནཱདིམཱུལཀེསུཔི ཝཱརེསུ ཨིམིནཱཝ ནཡེན ཨཏྠོ ཝེདིཏབྦོ. ཝེདནཱཔརམཏྟཱ ཙ ཨསྶཱདསྶ ཝེདནཱཔརིཡོསཱནཱ ཨེཝ དེསནཱ ཀཏཱ. སཉྙཱདཡོ ན གཧིཏཱ. ཨིམེཧི པཉྩཏིཾསཱཡ ཨཱཀཱརེཧཱིཏི པཉྩཀྑནྡྷཱ ཨཛ྄ཛྷཏྟིཀཱཡཏནཱདཱིནི པཉྩ ཚཀྐཱནི ཙཱཏི ཨིམཱནི པཉྩཏིཾས ཝཏྠཱུནི ནིསྶཱཡ ཨུཔྤནྣཨསྶཱདཱརམྨཎཝསེན པཉྩཏིཾསཱཡ ཨཱཀཱརེཧི.

ཨསྶཱདདིཊྛིནིདྡེསཝཎྞནཱ ནིཊྛིཏཱ.

༢. ཨཏྟཱནུདིཊྛིནིདྡེསཝཎྞནཱ

༡༣༠. ཨཏྟཱནུདིཊྛིཡཾ ཨསྶུཏཝཱ པུཐུཛྫནོཏི ཨཱགམཱདྷིགམཱབྷཱཝཱ ཉེཡྻོ ཨསྶུཏཝཱ ཨིཏི. ཡསྶ ཧི ཁནྡྷདྷཱཏུཨཱཡཏནསཙྩཔཙྩཡཱཀཱརསཏིཔཊྛཱནཱདཱིསུ ཨུགྒཧཔརིཔུཙྪཱཝིནིཙྪཡཝིརཧིཏཏྟཱ ཨཏྟཱནུདིཊྛིཔཊིསེདྷཀརོ ནེཝ ཨཱགམོ, པཊིཔཏྟིཡཱ ཨདྷིགནྟབྦསྶ ཨནདྷིགཏཏྟཱ ན ཙ ཨདྷིགམོ ཨཏྠི, སོ ཨཱགམཱདྷིགམཱནཾ ཨབྷཱཝཱ ཉེཡྻོ ཨསྶུཏཝཱ ཨིཏི. སུཏནྟི ཧི བུདྡྷཝཙནཱགམོ ཙ སུཏཕལཏྟཱ ཧེཏུཝོཧཱརཝསེན ཨདྷིགམོ ཙ, ཏཾ སུཏཾ ཨསྶ ཨཏྠཱིཏི སུཏཝཱ, ན སུཏཝཱ ཨསྶུཏཝཱ. སྭཱཡཾ –

པུཐཱུནཾ ཛནནཱདཱིཧི, ཀཱརཎེཧི པུཐུཛྫནོ;

པུཐུཛྫནནྟོགདྷཏྟཱ, པུཐུཝཱཡཾ ཛནོ ཨིཏི.

སོ ཧི པུཐཱུནཾ ནཱནཔྤཀཱརཱནཾ ཀིལེསཱདཱིནཾ ཛནནཱདཱིཧི ཀཱརཎེཧི པུཐུཛྫནོ. ཡཐཱཧ – ‘‘པུཐུ ཀིལེསེ ཛནེནྟཱིཏི པུཐུཛྫནཱ, པུཐུ ཨཝིཧཏསཀྐཱཡདིཊྛིཀཱཏི པུཐུཛྫནཱ, པུཐུ སཏྠཱརཱནཾ མུཁུལློཀིཀཱཏི པུཐུཛྫནཱ, པུཐུ སབྦགཏཱིཧི ཨཝུཊྛིཏཱཏི པུཐུཛྫནཱ, པུཐུ ནཱནཱབྷིསངྑཱརེ ཨབྷིསངྑརོནྟཱིཏི པུཐུཛྫནཱ, པུཐུ ནཱནཱཨོགྷེཧི ཝུཡ྄ཧནྟཱིཏི པུཐུཛྫནཱ, པུཐུ ནཱནཱསནྟཱཔེཧི སནྟཔྤེནྟཱིཏི པུཐུཛྫནཱ, པུཐུ ནཱནཱཔརིལཱ༹ཧེཧི པརིདཡ྄ཧནྟཱིཏི པུཐུཛྫནཱ, པུཐུ པཉྩསུ ཀཱམགུཎེསུ རཏྟཱ གིདྡྷཱ གདྷིཏཱ མུཙྪིཏཱ ཨཛ྄ཛྷོསནྣཱ ལགྒཱ ལགྒིཏཱ པལིབུདྡྷཱཏི པུཐུཛྫནཱ, པུཐུ པཉྩཧི ནཱིཝརཎེཧི ཨཱཝུཏཱ ནིཝུཏཱ ཨོཝུཏཱ པིཧིཏཱ པཊིཙྪནྣཱ པཊིཀུཛྫིཏཱཏི པུཐུཛྫནཱ’’ཏི (མཧཱནི. ༩༤). པུཐཱུནཾ ཝཱ གཎནཔཐམཏཱིཏཱནཾ ཨརིཡདྷམྨཔརམྨུཁཱནཾ ནཱིཙདྷམྨསམུདཱཙཱརཱནཾ ཛནཱནཾ ཨནྟོགདྷཏྟཱཔི པུཐུཛྫནཱ, པུཐུ ཝཱ ཨཡཾ, ཝིསུཾཡེཝ སངྑཾ གཏོ ཝིསཾསཊྛོ སཱིལསུཏཱདིགུཎཡུཏྟེཧི ཨརིཡེཧི ཛནོཏིཔི པུཐུཛྫནོ. ཨེཝམེཏེཧི ‘‘ཨསྶུཏཝཱ པུཐུཛྫནོ’’ཏི དྭཱིཧི པདེཧི ཡེ ཏེ –

‘‘དུཝེ པུཐུཛྫནཱ ཝུཏྟཱ, བུདྡྷེནཱདིཙྩབནྡྷུནཱ;

ཨནྡྷོ པུཐུཛྫནོ ཨེཀོ, ཀལྱཱཎེཀོ པུཐུཛྫནོ’’ཏི. –

དྭེ པུཐུཛྫནཱ ཝུཏྟཱ, ཏེསུ ཨནྡྷཔུཐུཛྫནོ ཝུཏྟོ ཧོཏཱིཏི ཝེདིཏབྦོ.

ཨརིཡཱནཾ ཨདསྶཱཝཱིཏིཨཱདཱིསུ ཨརིཡཱཏི ཨཱརཀཏྟཱ ཀིལེསེཧི, ཨནཡེ ན ཨིརིཡནཏོ, ཨཡེ ཙ ཨིརིཡནཏོ, སདེཝཀེན ཙ ལོཀེན ཨརཎཱིཡཏོ བུདྡྷཱ ཙ པཙྩེཀབུདྡྷཱ ཙ བུདྡྷསཱཝཀཱ ཙ ཝུཙྩནྟི, བུདྡྷཱ ཨེཝ ཝཱ ཨིདྷ ཨརིཡཱ. ཡཐཱཧ – ‘‘སདེཝཀེ, བྷིཀྑཝེ, ལོཀེ…པེ… ཏཐཱགཏོ ཨརིཡོཏི ཝུཙྩཏཱི’’ཏི (སཾ. ནི. ༥.༡༠༩༨).

སཔྤུརིསཱཏི ཨེཏྠ པན པཙྩེཀབུདྡྷཱ ཏཐཱགཏསཱཝཀཱ ཙ ‘‘སཔྤུརིསཱ’’ཏི ཝེདིཏབྦཱ. ཏེ ཧི ལོཀུཏྟརགུཎཡོགེན སོབྷནཱ པུརིསཱཏི སཔྤུརིསཱ. སབྦེཡེཝ ཝཱ ཨེཏེ དྭེདྷཱཔི ཝུཏྟཱ. བུདྡྷཱཔི ཧི ཨརིཡཱ ཙ སཔྤུརིསཱ ཙ པཙྩེཀབུདྡྷཱ བུདྡྷསཱཝཀཱཔི. ཡཐཱཧ –

‘‘ཡོ ཝེ ཀཏཉྙཱུ ཀཏཝེདི དྷཱིརོ, ཀལྱཱཎམིཏྟོ དལ༹ྷབྷཏྟི ཙ ཧོཏི;

དུཁིཏསྶ སཀྐཙྩ ཀརོཏི ཀིཙྩཾ, ཏཐཱཝིདྷཾ སཔྤུརིསཾ ཝདནྟཱི’’ཏི. (ཛཱ. ༢.༡༧.༧༨);

ཨེཏྠ ཧི ‘‘ཀཏཉྙཱུ ཀཏཝེདི དྷཱིརོ’’ཏི པཙྩེཀསམྦུདྡྷོ ཝུཏྟོ, ‘‘ཀལྱཱཎམིཏྟོ དལ༹ྷབྷཏྟི ཙཱ’’ཏི བུདྡྷསཱཝཀོ, ‘‘དུཁིཏསྶ སཀྐཙྩ ཀརོཏི ཀིཙྩ’’ནྟི སམྨཱསམྦུདྡྷོཏི. ཨིདཱནི ཡོ ཏེསཾ ཨརིཡཱནཾ ཨདསྶནསཱིལོ, ན ཙ དསྶནེ སཱདྷུཀཱརཱི, སོ ‘‘ཨརིཡཱནཾ ཨདསྶཱཝཱི’’ཏི ཝེདིཏབྦོ. སོ ཙ ཙཀྑུནཱ ཨདསྶཱཝཱི ཉཱཎེན ཨདསྶཱཝཱིཏི དུཝིདྷོ. ཏེསུ ཉཱཎེན ཨདསྶཱཝཱི ཨིདྷཱདྷིཔྤེཏོ. མཾསཙཀྑུནཱ ཧི དིབྦཙཀྑུནཱ ཝཱ ཨརིཡཱ དིཊྛཱཔི ཨདིཊྛཱཝ ཧོནྟི ཏེསཾ ཙཀྑཱུནཾ ཝཎྞམཏྟགཧཎཏོ ན ཨརིཡབྷཱཝགོཙརཏོ. སོཎསིངྒཱལཱདཡོཔི ཧི ཙཀྑུནཱ ཨརིཡེ པསྶནྟི, ན ཙ ཏེ ཨརིཡཱནཾ དསྶཱཝིནོ, ཏསྨཱ ཙཀྑུནཱ དསྶནཾ ན དསྶནཾ, ཉཱཎེན དསྶནམེཝ དསྶནཾ. ཡཐཱཧ – ‘‘ཀིཾ ཏེ, ཝཀྐལི, ཨིམིནཱ པཱུཏིཀཱཡེན དིཊྛེན, ཡོ ཁོ, ཝཀྐལི, དྷམྨཾ པསྶཏི, སོ མཾ པསྶཏཱི’’ཏི (སཾ. ནི. ༣.༨༧). ཏསྨཱ ཙཀྑུནཱ པསྶནྟོཔི ཉཱཎེན ཨརིཡེཧི དིཊྛཾ ཨནིཙྩཱདིལཀྑཎཾ ཨཔསྶནྟོ ཨརིཡཱདྷིགཏཉྩ དྷམྨཾ ཨནདྷིགཙྪནྟོ ཨརིཡཀརདྷམྨཱནཾ ཨརིཡབྷཱཝསྶ ཙ ཨདིཊྛཏྟཱ ‘‘ཨརིཡཱནཾ ཨདསྶཱཝཱི’’ཏི ཝེདིཏབྦོ.

ཨརིཡདྷམྨསྶ ཨཀོཝིདོཏི སཏིཔཊྛཱནཱདིབྷེདེ ཨརིཡདྷམྨེ ཨཀུསལོ. ཨརིཡདྷམྨེ ཨཝིནཱིཏོཏི ཨེཏྠ པན –

དུཝིདྷོ ཝིནཡོ ནཱམ, ཨེཀམེཀེཏྠ པཉྩདྷཱ;

ཨབྷཱཝཏོ ཏསྶ ཨཡཾ, ‘‘ཨཝིནཱིཏོ’’ཏི ཝུཙྩཏི.

ཨཡཉྷི སཾཝརཝིནཡོ པཧཱནཝིནཡོཏི དུཝིདྷོ ཝིནཡོ. ཨེཏྠ ཙ དུཝིདྷེཔི ཝིནཡེ ཨེཀམེཀོ ཝིནཡོ པཉྩདྷཱ བྷིཛྫཏི. སཾཝརཝིནཡོཔི ཧི སཱིལསཾཝརོ, སཏིསཾཝརོ, ཉཱཎསཾཝརོ, ཁནྟིསཾཝརོ, ཝཱིརིཡསཾཝརོཏི པཉྩཝིདྷོ. པཧཱནཝིནཡོཔི ཏདངྒཔྤཧཱནཾ, ཝིཀྑམྦྷནཔྤཧཱནཾ, སམུཙྪེདཔྤཧཱནཾ, པཊིཔྤསྶདྡྷིཔྤཧཱནཾ, ནིསྶརཎཔྤཧཱནནྟི པཉྩཝིདྷོ.

ཏཏྠ ‘‘ཨིམིནཱ པཱཏིམོཀྑསཾཝརེན ཨུཔེཏོ ཧོཏི སམུཔེཏོ’’ཏི (ཝིབྷ. ༥༡༡) ཨཡཾ སཱིལསཾཝརོ. ‘‘རཀྑཏི ཙཀྑུནྡྲིཡཾ ཙཀྑུནྡྲིཡེ སཾཝརཾ ཨཱཔཛྫཏཱི’’ཏི (དཱི. ནི. ༡.༢༡༣; མ. ནི. ༡.༢༩༥; སཾ. ནི. ༤.༢༣༩; ཨ. ནི. ༣.༡༦) ཨཡཾ སཏིསཾཝརོ.

‘‘ཡཱནི སོཏཱནི ལོཀསྨིཾ, (ཨཛིཏཱཏི བྷགཝཱ)

སཏི ཏེསཾ ནིཝཱརཎཾ;

སོཏཱནཾ སཾཝརཾ བྲཱུམི, པཉྙཱཡེཏེ པིདྷཱིཡརེ’’ཏི. (སུ. ནི. ༡༠༤༡; ཙཱུལ༹ནི. ཨཛིཏམཱཎཝཔུཙྪཱནིདྡེས ༤) –

ཨཡཾ ཉཱཎསཾཝརོ. ‘‘ཁམོ ཧོཏི སཱིཏསྶ ཨུཎྷསྶཱ’’ཏི (མ. ནི. ༡.༢༤; ཨ. ནི. ༤.༡༡༤; ༦.༥༨) ཨཡཾ ཁནྟིསཾཝརོ. ‘‘ཨུཔྤནྣཾ ཀཱམཝིཏཀྐཾ ནཱདྷིཝཱསེཏཱི’’ཏི (མ. ནི. ༡.༢༦; ཨ. ནི. ༤.༡༡༤; ༦.༥༨) ཨཡཾ ཝཱིརིཡསཾཝརོ. སབྦོཔི ཙཱཡཾ སཾཝརོ ཡཐཱསཀཾ སཾཝརིཏབྦཱནཾ ཝིནེཏབྦཱནཉྩ ཀཱཡདུཙྩརིཏཱདཱིནཾ སཾཝརཎཏོ ‘‘སཾཝརོ’’, ཝིནཡནཏོ ‘‘ཝིནཡོ’’ཏི ཝུཙྩཏི. ཨེཝཾ ཏཱཝ སཾཝརཝིནཡོ པཉྩདྷཱ བྷིཛྫཏཱིཏི ཝེདིཏབྦོ.

ཏཐཱ ཡཾ ནཱམརཱུཔཔརིཙྪེདཱདཱིསུ ཝིཔསྶནཱཉཱཎེསུ པཊིཔཀྑབྷཱཝཏོ དཱིཔཱལོཀེན ཝིཡ ཏམསྶ ཏེན ཏེན ཝིཔསྶནཱཉཱཎེན ཏསྶ ཏསྶ ཨནཏྠསྶ པཧཱནཾ, སེཡྻཐིདཾ – ནཱམརཱུཔཝཝཏྠཱནེན སཀྐཱཡདིཊྛིཡཱ, པཙྩཡཔརིགྒཧེན ཨཧེཏུཝིསམཧེཏུདིཊྛཱིནཾ, ཀངྑཱཝིཏརཎེན ཀཐཾཀཐཱིབྷཱཝསྶ, ཀལཱཔསམྨསནེན ‘‘ཨཧཾ མམཱ’’ཏི གཱཧསྶ, མགྒཱམགྒཝཝཏྠཱནེན ཨམགྒེ མགྒསཉྙཱཡ, ཨུདཡདསྶནེན ཨུཙྪེདདིཊྛིཡཱ, ཝཡདསྶནེན སསྶཏདིཊྛིཡཱ, བྷཡདསྶནེན སབྷཡེ ཨབྷཡསཉྙཱཡ, ཨཱདཱིནཝདསྶནེན ཨསྶཱདསཉྙཱཡ, ནིབྦིདཱནུཔསྶནེན ཨབྷིརཏིསཉྙཱཡ, མུཉྩིཏུཀམྱཏཱཉཱཎེན ཨམུཉྩིཏུཀམྱཏཱཡ, ཨུཔེཀྑཱཉཱཎེན ཨནུཔེཀྑཱཡ, ཨནུལོམཉཱཎེན དྷམྨཊྛིཏིཡཾ ནིབྦཱནེ ཙ པཊིལོམབྷཱཝསྶ, གོཏྲབྷུནཱ སངྑཱརནིམིཏྟགཱཧསྶ པཧཱནཾ, ཨེཏཾ ཏདངྒཔྤཧཱནཾ ནཱམ.

ཡཾ པན ཨུཔཙཱརཔྤནཱབྷེདེན སམཱདྷིནཱ པཝཏྟིབྷཱཝནིཝཱརཎཏོ གྷཊཔྤཧཱརེན ཝིཡ ཨུདཀཔིཊྛེ སེཝཱལསྶ ཏེསཾ ཏེསཾ ནཱིཝརཎཱདིདྷམྨཱནཾ པཧཱནཾ, ཨིདཾ ཝིཀྑམྦྷནཔྤཧཱནཾ ནཱམ. ཡཾ ཙཏུནྣཾ ཨརིཡམགྒཱནཾ བྷཱཝིཏཏྟཱ ཏཾཏཾམགྒཝཏོ ཨཏྟནོ སནྟཱནེ ‘‘དིཊྛིགཏཱནཾ པཧཱནཱཡཱ’’ཏིཨཱདིནཱ (དྷ. ས. ༢༧༧; ཝིབྷ. ༦༢༨) ནཡེན ཝུཏྟསྶ སམུདཡཔཀྑིཀསྶ ཀིལེསགྒཎསྶ ཨཙྩནྟཨཔྤཝཏྟིབྷཱཝེན པཧཱནཾ, ཨིདཾ སམུཙྪེདཔྤཧཱནཾ ནཱམ. ཡཾ པན ཕལཀྑཎེ པཊིཔྤསྶདྡྷཏྟཾ ཀིལེསཱནཾ, ཨིདཾ པཊིཔྤསྶདྡྷིཔྤཧཱནཾ ནཱམ. ཡཾ སབྦསངྑཏནིསྶཊཏྟཱ པཧཱིནསབྦསངྑཏཾ ནིབྦཱནཾ, ཨིདཾ ནིསྶརཎཔྤཧཱནཾ ནཱམ. སབྦམྤི ཙེཏཾ པཧཱནཾ ཡསྨཱ ཙཱགཊྛེན པཧཱནཾ, ཝིནཡནཊྛེན ཝིནཡོ, ཏསྨཱ ‘‘པཧཱནཝིནཡོ’’ཏི ཝུཙྩཏི, ཏཾཏཾཔཧཱནཝཏོ ཝཱ ཏསྶ ཏསྶ ཝིནཡསྶ སམྦྷཝཏོཔེཏཾ ‘‘པཧཱནཝིནཡོ’’ཏི ཝུཙྩཏི. ཨེཝཾ པཧཱནཝིནཡོཔི པཉྩདྷཱ བྷིཛྫཏཱིཏི ཝེདིཏབྦོ.

ཨེཝམཡཾ སངྑེཔཏོ དུཝིདྷོ, པབྷེདཏོ ཙ དསཝིདྷོ ཝིནཡོ བྷིནྣསཾཝརཏྟཱ པཧཱཏབྦསྶ ཙ ཨཔྤཧཱིནཏྟཱ ཡསྨཱ ཨེཏསྶ ཨསྶུཏཝཏོ པུཐུཛྫནསྶ ནཏྠི, ཏསྨཱ ཨབྷཱཝཏོ ཏསྶ ཨཡཾ ‘‘ཨཝིནཱིཏོ’’ཏི ཝུཙྩཏཱིཏི. ཨེས ནཡོ སཔྤུརིསཱནཾ ཨདསྶཱཝཱི སཔྤུརིསདྷམྨསྶ ཨཀོཝིདོ སཔྤུརིསདྷམྨེ ཨཝིནཱིཏོཏི ཨེཏྠཱཔི. ནིནྣཱནཱཀཱརཎཉྷི ཨེཏཾ ཨཏྠཏོ. ཡཐཱཧ – ‘‘ཡེཝ ཏེ ཨརིཡཱ, ཏེཝ ཏེ སཔྤུརིསཱ. ཡེཝ ཏེ སཔྤུརིསཱ, ཏེཝ ཏེ ཨརིཡཱ. ཡོཝ སོ ཨརིཡཱནཾ དྷམྨོ, སོཝ སོ སཔྤུརིསཱནཾ དྷམྨོ. ཡོཝ སོ སཔྤུརིསཱནཾ དྷམྨོ, སོཝ སོ ཨརིཡཱནཾ དྷམྨོ. ཡེཝ ཏེ ཨརིཡཝིནཡཱ, ཏེཝ ཏེ སཔྤུརིསཝིནཡཱ. ཡེཝ ཏེ སཔྤུརིསཝིནཡཱ, ཏེཝ ཏེ ཨརིཡཝིནཡཱ. ཨརིཡེཏི ཝཱ སཔྤུརིསེཏི ཝཱ, ཨརིཡདྷམྨེཏི ཝཱ སཔྤུརིསདྷམྨེཏི ཝཱ, ཨརིཡཝིནཡེཏི ཝཱ སཔྤུརིསཝིནཡེཏི ཝཱ ཨེསེསེ ཨེཀེ ཨེཀཊྛེ སམེ སམབྷཱགེ ཏཛྫཱཏེ ཏཉྙེཝཱ’’ཏི.

ཀསྨཱ པན ཐེརོ ཨཏྟཱནུདིཊྛིཡཱ ཀཏམེཧི ཝཱིསཏིཡཱ ཨཱཀཱརེཧི ཨབྷིནིཝེསོ ཧོཏཱིཏི པུཙྪིཏྭཱ ཏཾ ཨཝིསྶཛྫེཏྭཱཝ ‘‘ཨིདྷ ཨསྶུཏཝཱ པུཐུཛྫནོ’’ཏི ཨེཝཾ པུཐུཛྫནཾ ནིདྡིསཱིཏི? པུགྒལཱདྷིཊྛཱནཱཡ དེསནཱཡ ཏཾ ཨཏྠཾ ཨཱཝིཀཱཏུཾ པཋམཾ པུཐུཛྫནཾ ནིདྡིསཱིཏི ཝེདིཏབྦཾ.

༡༣༡. ཨེཝཾ པུཐུཛྫནཾ ནིདྡིསིཏྭཱ ཨིདཱནི ཨབྷིནིཝེསུདྡེསཾ དསྶེནྟོ རཱུཔཾ ཨཏྟཏོ སམནུཔསྶཏཱིཏིཨཱདིམཱཧ. ཏཏྠ རཱུཔཾ ཨཏྟཏོ སམནུཔསྶཏཱིཏི རཱུཔཀྑནྡྷཾ ཀསིཎརཱུཔཉྩ ‘‘ཨཏྟཱ’’ཏི དིཊྛིཔསྶནཱཡ སམནུཔསྶཏི. ནིདྡེསེ པནསྶ རཱུཔཀྑནྡྷེ ཨབྷིནིཝེསོ པཉྩཀྑནྡྷཱདྷིཀཱརཏྟཱ པཱཀཊོཏི ཏཾ ཨཝཏྭཱ ཀསིཎརཱུཔམེཝ ‘‘རཱུཔ’’ནྟི སཱམཉྙཝསེན ཝུཏྟནྟི ཝེདིཏབྦཾ. རཱུཔཝནྟཾ ཝཱ ཨཏྟཱནནྟི ཨརཱུཔཾ ‘‘ཨཏྟཱ’’ཏི གཧེཏྭཱ ཏཾ ཨཏྟཱནཾ རཱུཔཝནྟཾ སམནུཔསྶཏི. ཨཏྟནི ཝཱ རཱུཔནྟི ཨརཱུཔམེཝ ‘‘ཨཏྟཱ’’ཏི གཧེཏྭཱ ཏསྨིཾ ཨཏྟནི རཱུཔཾ སམནུཔསྶཏི. རཱུཔསྨིཾ ཝཱ ཨཏྟཱནནྟི ཨརཱུཔམེཝ ‘‘ཨཏྟཱ’’ཏི གཧེཏྭཱ ཏཾ ཨཏྟཱནཾ རཱུཔསྨིཾ སམནུཔསྶཏི.

ཏཏྠ རཱུཔཾ ཨཏྟཏོ སམནུཔསྶཏཱིཏི སུདྡྷརཱུཔམེཝ ‘‘ཨཏྟཱ’’ཏི ཀཐིཏཾ. རཱུཔཝནྟཾ ཝཱ ཨཏྟཱནཾ, ཨཏྟནི ཝཱ རཱུཔཾ, རཱུཔསྨིཾ ཝཱ ཨཏྟཱནཾ, ཝེདནཾ ཨཏྟཏོ སམནུཔསྶཏི, སཉྙཾ, སངྑཱརེ, ཝིཉྙཱཎཾ ཨཏྟཏོ སམནུཔསྶཏཱིཏི ཨིམེསུ སཏྟསུ ཋཱནེསུ ཨརཱུཔཾ ‘‘ཨཏྟཱ’’ཏི ཀཐིཏཾ. ཝེདནཱཝནྟཾ ཝཱ ཨཏྟཱནཾ, ཨཏྟནི ཝཱ ཝེདནཾ, ཝེདནཱཡ ཝཱ ཨཏྟཱནནྟི ཨེཝཾ ཙཏཱུསུ ཁནྡྷེསུ ཏིཎྞཾ ཏིཎྞཾ ཝསེན དྭཱདསསུ ཋཱནེསུ རཱུཔཱརཱུཔམིསྶཀོ ཨཏྟཱ ཀཐིཏོ. ཏཱ པན ཝཱིསཏིཔི དིཊྛིཡོ མགྒཱཝརཎཱ, ན སགྒཱཝརཎཱ, སོཏཱཔཏྟིམགྒཝཛ྄ཛྷཱ.

ཨིདཱནི ཏཾ ནིདྡིསནྟོ ཀཐཾ རཱུཔནྟིཨཱདིམཱཧ. ཏཏྠ པཐཝཱིཀསིཎནྟི པཐཝཱིམཎྜལཾ ནིསྶཱཡ ཨུཔྤཱདིཏཾ པཊིབྷཱགནིམིཏྟསངྑཱཏཾ སཀལཕརཎཝསེན པཐཝཱིཀསིཎཾ. ཨཧནྟི ཨཏྟཱནམེཝ སནྡྷཱཡ གཎྷཱཏི. ཨཏྟནྟི ཨཏྟཱནཾ. ཨདྭཡནྟི ཨེཀམེཝ. ཏེལཔྤདཱིཔསྶཱཏི ཏེལཡུཏྟསྶ པདཱིཔསྶ. ཛྷཱཡཏོཏི ཛལཏོ. ཡཱ ཨཙྩི, སོ ཝཎྞོཏིཨཱདི ཨཙྩིཾ མུཉྩིཏྭཱ ཝཎྞསྶ ཨབྷཱཝཏོ ཝུཏྟཾ. ཡཱ ཙ དིཊྛི ཡཉྩ ཝཏྠཱུཏི ཏདུབྷཡཾ ཨེཀཏོ ཀཏྭཱ རཱུཔཝཏྠུཀཱ ཨཏྟཱནུདིཊྛི ཝུཙྩཏཱིཏི ཨཏྠོ.

ཨཱཔོཀསིཎཱདཱིནི ཨཱཔཱདཱིནི ནིསྶཱཡ ཨུཔྤཱདིཏཀསིཎནིམིཏྟཱནེཝ. པརིཙྪིནྣཱཀཱསཀསིཎཾ པན རཱུཔཛ྄ཛྷཱནསྶ ཨཱརམྨཎཾ ཧོནྟམྤི ཨཱཀཱསཀསིཎནྟི ཝུཙྩམཱནེ ཨརཱུཔཛ྄ཛྷཱནཱརམྨཎེན ཀསིཎུགྒྷཱཊིམཱཀཱསེན སཾཀིཎྞཾ ཧོཏཱིཏི ན གཧིཏནྟི ཝེདིཏབྦཾ. རཱུཔཱདྷིཀཱརཏྟཱ ཝིཉྙཱཎཀསིཎཾ ན གཧེཏབྦམེཝཱཏི. ཨིདྷེཀཙྩོ ཝེདནཾ སཉྙཾ སངྑཱརེ ཝིཉྙཱཎཾ ཨཏྟཏོ སམནུཔསྶཏཱིཏི ཙཏྟཱརོ ཁནྡྷེ ཨབྷིནྡིཏྭཱ ཨེཀཏོ གཧཎཝསེན ཝུཏྟཾ. སོ ཧི ཙིཏྟཙེཏསིཀཱནཾ ཝིསུཾ ཝིསུཾ ཀརཎེ ཨསམཏྠཏྟཱ སབྦེ ཨེཀཏོ ཀཏྭཱ ‘‘ཨཏྟཱ’’ཏི གཎྷཱཏི. ཨིམིནཱ རཱུཔེན རཱུཔཝཱཏི ཨེཏྠ སརཱིརརཱུཔམྤི ཀསིཎརཱུཔམྤི ལབྦྷཏི. ཚཱཡཱསམྤནྣོཏི ཚཱཡཱཡ སམྤནྣོ ཨཝིརལོ༹. ཏམེནཱཏི ཨེཏྠ ཨེན-སདྡོ ནིཔཱཏམཏྟཾ, ཏམེཏནྟི ཝཱ ཨཏྠོ. ཚཱཡཱཝཱཏི ཝིཛྫམཱནཙྪཱཡོ. རཱུཔཾ ཨཏྟཱཏི ཨགྒཧིཏེཔི རཱུཔཾ ཨམུཉྩིཏྭཱ དིཊྛིཡཱ ཨུཔྤནྣཏྟཱ རཱུཔཝཏྠུཀཱཏི ཝུཏྟཾ.

ཨཏྟནི རཱུཔཾ སམནུཔསྶཏཱིཏི སརཱིརརཱུཔསྶ ཀསིཎརཱུཔསྶ ཙ ཙིཏྟནིསྶིཏཏྟཱ ཏསྨིཾ ཨརཱུཔསམུདཱཡེ ཨཏྟནི ཏཾ རཱུཔཾ སམནུཔསྶཏི. ཨཡཾ གནྡྷོཏི གྷཱཡིཏགནྡྷཾ ཨཱཧ. ཨིམསྨིཾ པུཔྥེཏི པུཔྥནིསྶིཏཏྟཱ གནྡྷསྶ ཨེཝམཱཧ.

རཱུཔསྨིཾ ཨཏྟཱནཾ སམནུཔསྶཏཱིཏི ཡཏྠ རཱུཔཾ གཙྪཏི, ཏཏྠ ཙིཏྟཾ གཙྪཏི. ཏསྨཱ རཱུཔནིསྶིཏཾ ཙིཏྟཾ གཧེཏྭཱ ཏཾ ཨརཱུཔསམུདཱཡཾ ཨཏྟཱནཾ ཏསྨིཾ རཱུཔེ སམནུཔསྶཏི. ཨོལཱ༹རིཀཏྟཱ རཱུཔསྶ ཨོལཱ༹རིཀཱདྷཱརཾ ཀརཎྜཀམཱཧ.

༡༣༢. ཨིདྷེཀཙྩོ ཙཀྑུསམྥསྶཛཾ ཝེདནནྟིཨཱདཱིསུ ཝིསུཾ ཝིསུཾ ཝེདནཱཡ དིཊྛིགཧཎེ ཨསཏིཔི ཝེདནཱཏི ཨེཀགྒཧཎེན གཧིཏེ སབྦཱསཾ ཝེདནཱནཾ ཨནྟོགདྷཏྟཱ ཝིསུཾ ཝིསུཾ གཧིཏཱ ཨེཝ ཧོནྟཱིཏི ཝིསུཾ ཝིསུཾ ཡོཛནཱ ཀཏཱཏི ཝེདིཏབྦཱ. སོ ཧི ཨནུབྷཝནཝསེན ཝེདནཱཡ ཨོལཱ༹རིཀཏྟཱ ཝེདནཾཡེཝ ‘‘ཨཏྟཱ’’ཏི གཎྷཱཏི. སཉྙཾ སངྑཱརེ ཝིཉྙཱཎཾ རཱུཔཾ ཨཏྟཏོ སམནུཔསྶཏཱིཏི སཉྙཱདཡོ ཨརཱུཔདྷམྨེ རཱུཔཉྩ ཨེཀཏོ ཀཏྭཱ ‘‘ཨཏྟཱ’’ཏི སམནུཔསྶཏི. ཨུམྨཏྟཀོ ཝིཡ ཧི པུཐུཛྫནོ ཡཐཱ ཡཐཱ ཨུཔཊྛཱཏི, ཏཐཱ ཏཐཱ གཎྷཱཏི.

༡༣༣. ཙཀྑུསམྥསྶཛཾ སཉྙནྟིཨཱདཱིསུ སཉྫཱནནཝསེན སཉྙཱཡ པཱཀཊཏྟཱ སཉྙཾ ‘‘ཨཏྟཱ’ཏི གཎྷཱཏི. སེསཾ ཝེདནཱཡ ཝུཏྟནཡེན ཝེདིཏབྦཾ.

༡༣༤. ཙཀྑུསམྥསྶཛཾ ཙེཏནནྟིཨཱདཱིསུ སངྑཱརཀྑནྡྷཔརིཡཱཔནྣེསུ དྷམྨེསུ ཙེཏནཱཡ པདྷཱནཏྟཱ པཱཀཊཏྟཱ ཙ ཙེཏནཱ ཨེཝ ནིདྡིཊྛཱ. ཏཱཡ ཨིཏརེཔི ནིདྡིཊྛཱཝ ཧོནྟི. སོ པན ཙེཏསིཀབྷཱཝཝསེན པཱཀཊཏྟཱ ཙེཏནཾ ‘‘ཨཏྟཱ’’ཏི གཎྷཱཏི. སེསཾ ཝུཏྟནཡམེཝ.

༡༣༥. ཙཀྑུཝིཉྙཱཎནྟིཨཱདཱིསུ ཝིཛཱནནཝསེན ཙིཏྟསྶ པཱཀཊཏྟཱ ཙིཏྟཾ ‘‘ཨཏྟཱ’’ཏི གཎྷཱཏི. སེསམེཏྠཱཔི ཝུཏྟནཡམེཝ.

ཨཏྟཱནུདིཊྛིནིདྡེསཝཎྞནཱ ནིཊྛིཏཱ.

༣. མིཙྪཱདིཊྛིནིདྡེསཝཎྞནཱ

༡༣༦. མིཙྪཱདིཊྛི ཧེཊྛཱ ཝུཏྟཏྠཱཡེཝ. ཨཡཾ པན ཨཔརོ ནཡོ – ནཏྠི དིནྣནྟི ཨུཙྪེདདིཊྛིཀཏྟཱ དཱནཕལཾ པཊིཀྑིཔཏི. ནཏྠི ཡིཊྛནྟི ཨེཏྠ ཡིཊྛནྟི ཁུདྡཀཡཉྙོ. ཧུཏནྟི མཧཱཡཉྙོ. དྭིནྣམྤི ཕལཾ པཊིཀྑིཔཏི. ནཏྠི སུཀཏདུཀྐཊཱནཾ ཀམྨཱནཾ ཕལཾ ཝིཔཱཀོཏི དཱནཕལསྶ པཊིཀྑིཏྟཏྟཱ སཱིལཱདཱིནཾ པུཉྙཀམྨཱནཾ, པཱཎཱཏིཔཱཏཱདཱིནཾ པཱཔཀམྨཱནཾ ཕལཾ པཊིཀྑིཔཏི. ནཏྠི ཨཡཾ ལོཀོཏི པུརེ ཀཏེན ཀམྨུནཱ. ནཏྠི པརོ ལོཀོཏི ཨིདྷ ཀཏེན ཀམྨུནཱ. ནཏྠི མཱཏཱ, ནཏྠི པིཏཱཏི ཏེསུ ཀཏཀམྨཱནཾ ཕལཾ པཊིཀྑིཔཏི. ནཏྠི སཏྟཱ ཨོཔཔཱཏིཀཱཏི ཀམྨཧེཏུཀཾ ཨུཔཔཏྟིཾ པཊིཀྑིཔཏི. ནཏྠི ལོཀེ སམཎབྲཱཧྨཎཱ…པེ… པཝེདེནྟཱིཏི ཨིདྷལོཀཔརལོཀེ པསྶིཏུཾ ཨབྷིཉྙཱཔཊིལཱབྷཱཡ པཊིཔདཾ པཊིཀྑིཔཏི. ཨིདྷ པཱལི༹ཡཾ པན ནཏྠི དིནྣནྟི ཝཏྠཱུཏི ནཏྠི དིནྣནྟི ཝུཙྩམཱནཾ དཱནཾ, ཏསྶཱ དིཊྛིཡཱ ཝཏྠཱུཏི ཨཏྠོ. ཨེཝཾཝཱདོ མིཙྪཱཏི ཨེཝཾ ནཏྠི དིནྣནྟི ཝཱདོ ཝཙནཾ མིཙྪཱ ཝིཔརཱིཏོཏི ཨཏྠོ.

མིཙྪཱདིཊྛིནིདྡེསཝཎྞནཱ ནིཊྛིཏཱ.

༤. སཀྐཱཡདིཊྛིནིདྡེསཝཎྞནཱ

༡༣༧. སཀྐཱཡདིཊྛི པན ཨཏྟཱནུདིཊྛིཡེཝ, ཨཉྙཏྠ ཨཱགཏཔརིཡཱཡཝཙནདསྶནཏྠཾ ཝུཏྟཱཏི ཝེདིཏབྦཱ.

སཀྐཱཡདིཊྛིནིདྡེསཝཎྞནཱ ནིཊྛིཏཱ.

༥. སསྶཏདིཊྛིནིདྡེསཝཎྞནཱ

༡༣༨. སཀྐཱཡཝཏྠུཀཱཡ སསྶཏདིཊྛིཡཱཏི ཀམྨདྷཱརཡསམཱསོ. རཱུཔཝནྟཾ ཝཱ ཨཏྟཱནནྟིཨཱདཱིནཾ པནྣརསནྣཾ ཝཙནཱནཾ ཨནྟེ སམནུཔསྶཏཱིཏི སམྦནྡྷོ ཀཱཏབྦོ, པཱཋོ ཝཱ. ཨཉྙཐཱ ཧི ན གྷཊཱིཡཏཱིཏི. ཨེཝཾ ‘‘རཱུཔཝནྟཾ ཝཱ ཨཏྟཱནཾ སམནུཔསྶཏཱི’’ཏི ཨེཀམེཝ དསྶེཏྭཱ སེསཱ ཙུདྡས སཾཁིཏྟཱ.

སསྶཏདིཊྛིནིདྡེསཝཎྞནཱ ནིཊྛིཏཱ.

༦. ཨུཙྪེདདིཊྛིནིདྡེསཝཎྞནཱ

༡༣༩. སཀྐཱཡཝཏྠུཀཱཡ ཨུཙྪེདདིཊྛིཡཱ ཨེཝཾ ‘‘རཱུཔཾ ཨཏྟཏོ སམནུཔསྶཏཱི’’ཏི ཨེཀམེཝ དསྶེཏྭཱ སེསཱ ཙཏསྶོ སཾཁིཏྟཱ.

ཨུཙྪེདདིཊྛིནིདྡེསཝཎྞནཱ ནིཊྛིཏཱ.

༧. ཨནྟགྒཱཧིཀཱདིཊྛིནིདྡེསཝཎྞནཱ

༡༤༠. ཨནྟགྒཱཧིཀཱཡ དིཊྛིཡཱ པཋམཝཱརེ ཨཱཀཱརཔུཙྪཱ. དུཏིཡེ ཨཱཀཱརགཧཎཾ. ཏཏིཡེ ཨཱཀཱརཝིསྶཛྫནཾ. ཏཏྠ ལོཀོཏི ཨཏྟཱ. སོ ཨནྟོཏི ཨཉྙམཉྙཔཊིཔཀྑེསུ སསྶཏུཙྪེདནྟེསུ སསྶཏགྒཱཧེ སསྶཏནྟོ, ཨསསྶཏགྒཱཧེ ཨུཙྪེདནྟོ. པརིཏྟཾ ཨོཀཱསནྟི སུཔྤམཏྟཾ ཝཱ སརཱཝམཏྟཾ ཝཱ ཁུདྡཀཾ ཋཱནཾ. ནཱིལཀཏོ ཕརཏཱིཏི ནཱིལནྟི ཨཱརམྨཎཾ ཀརོཏི. ཨཡཾ ལོཀོཏི ཨཏྟཱནཾ སནྡྷཱཡ ཝུཏྟཾ. པརིཝཊུམོཏི སམནྟཏོ པརིཙྪེདཝཱ. ཨནྟསཉྙཱིཏི ཨནྟཝཱཏིསཉྙཱི. ཨནྟོ ཨསྶ ཨཏྠཱིཏི ཨནྟོཏི གཧེཏབྦཾ. ཡཾ ཕརཏཱིཏི ཡཾ ཀསིཎརཱུཔཾ ཕརཏི. ཏཾ ཝཏྠུ ཙེཝ ལོཀོ ཙཱཏི ཏཾ ཀསིཎརཱུཔཾ ཨཱརམྨཎཉྩེཝ ཨཱལོཀིཡཊྛེན ལོཀོ ཙ. ཡེན ཕརཏཱིཏི ཡེན ཙིཏྟེན ཕརཏི. སོ ཨཏྟཱ ཙེཝ ལོཀོ ཙཱཏི ཨཏྟཱནམཔེཀྑིཏྭཱ པུལླིངྒཾ ཀཏཾ, ཏཾ ཙིཏྟཾ ཨཏྟཱ ཙེཝ ཨཱལོཀནཊྛེན ལོཀོ ཙཱཏི ཝུཏྟཾ ཧོཏི. ཨནྟཝཱཏི ཨནྟོ. ཨོཀཱསཀཏོ ཕརཏཱིཏི ཨཱལོཀཀསིཎཝསེན ཏེཛོཀསིཎཝསེན ཨོདཱཏཀསིཎཝསེན ཝཱ ཨོབྷཱསོཏི ཕརཏི. ནཱིལཱདཱིནཾ པཉྩནྣཾ པབྷསྶརཀསིཎཱནཾཡེཝ གཧིཏཏྟཱ པཐཝཱིཨཱཔོཝཱཡོཀསིཎཝསེན ཨཏྟཱབྷིནིཝེསོ ན ཧོཏཱིཏི གཧེཏབྦཾ.

ཝིཔུལཾ ཨོཀཱསནྟི ཁལམཎྜལམཏྟཱདིཝསེན མཧནྟཾ ཋཱནཾ. ཨནནྟཝཱཏི ཝུདྡྷཨནནྟཝཱ. ཨཔརིཡནྟོཏི ཝུདྡྷཨཔརིཡནྟོ. ཨནནྟསཉྙཱིཏི ཨནནྟོཏིསཉྙཱི. ཏཾ ཛཱིཝནྟི སོ ཛཱིཝོ. ལིངྒཝིཔལླཱསོ ཀཏོ. ཛཱིཝོཏི ཙ ཨཏྟཱ ཨེཝ. རཱུཔཱདཱིནི པཉྩཔི པརིཝཊུམཊྛེན སརཱིརཾ. ཛཱིཝཾ ན སརཱིརནྟི ཨཏྟསངྑཱཏོ ཛཱིཝོ རཱུཔསངྑཱཏཾ སརཱིརཾ ན ཧོཏི. ཨེས ནཡོ ཝེདནཱདཱིསུ. ཏཐཱགཏོཏི སཏྟོ. ཨརཧནྟི ཨེཀེ. པརཾ མརཎཱཏི མརཎཏོ ཨུདྡྷཾ, པརལོཀེཏི ཨཏྠོ. རཱུཔཾ ཨིདྷེཝ མརཎདྷམྨནྟི ཨཏྟནོ པཱཀཊཀྑནྡྷསཱིསེན པཉྩཀྑནྡྷགྒཧཎཾ, ཏཾ ཨིམསྨིཾཡེཝ ལོཀེ ནསྶནཔཀཏིཀནྟི ཨཏྠོ. སེསཀྑནྡྷེསུཔི ཨེསེཝ ནཡོ. ཀཱཡསྶ བྷེདཱཏི ཁནྡྷཔཉྩཀསངྑཱཏསྶ ཀཱཡསྶ བྷེདཏོ པརཾ. ཨིམིནཱ ཝཙནེན ‘‘པརཾ མརཎཱ’’ཏི ཨེཏསྶ ཨུདྡེསསྶ ཨཏྠོ ཝུཏྟོ. ཧོཏིཔཱིཏིཨཱདཱིསུ ཧོཏཱིཏི མཱུལཔདཾ. ཙཏཱུསུཔི ཨཔི-སདྡོ སམུཙྩཡཏྠོ. ཏིཊྛཏཱིཏི སསྶཏཏྟཱ ཏིཊྛཏི, ན ཙཝཏཱིཏི ཨཏྠོ. ‘‘ཧོཏཱི’’ཏི པདསྶ ཝཱ ཨཏྠཝིསེསནཏྠཾ ‘‘ཏིཊྛཏཱི’’ཏི པདཾ ཝུཏྟནྟི ཝེདིཏབྦཾ. ཨུཔྤཛྫཏཱིཏི ཨཎྜཛཛལཱབུཛཡོནིཔཝེསཝསེན ཨུཔྤཛྫཏི ནཱམ, ནིབྦཏྟཏཱིཏི སཾསེདཛཨོཔཔཱཏིཀཡོནིཔཝེསཝསེན ནིབྦཏྟཏི ནཱམཱཏི ཨཏྠཡོཛནཱ ཝེདིཏབྦཱ. ཨུཙྪིཛྫཏཱིཏི པབནྡྷཱབྷཱཝཝསེན. ཝིནསྶཏཱིཏི བྷངྒཝསེན. ན ཧོཏི པརཾ མརཎཱཏི པུརིམཔདཱནཾ ཨཏྠཝིཝརཎཾ, ཙུཏིཏོ ཨུདྡྷཾ ན ཝིཛྫཏཱིཏི ཨཏྠོ. ཧོཏི ཙ ན ཙ ཧོཏཱིཏི ཨེཀཙྩསསྶཏིཀཱནཾ དིཊྛི, ཨེཀེན པརིཡཱཡེན ཧོཏི, ཨེཀེན པརིཡཱཡེན ན ཧོཏཱིཏི ཨཏྠོ. ཛཱིཝབྷཱཝེན ཧོཏི, པུབྦཛཱིཝསྶ ཨབྷཱཝེན ན ཧོཏཱིཏི ཝུཏྟཾ ཧོཏི. ནེཝ ཧོཏི ན ན ཧོཏཱིཏི ཨམརཱཝིཀྑེཔིཀཱནཾ དིཊྛི, ཧོཏཱིཏི ཙ ནེཝ ཧོཏི, ན ཧོཏཱིཏི ཙ ན ཧོཏཱིཏི ཨཏྠོ. ཨནུཝཱདབྷཡཱ མུསཱཝཱདབྷཡཱ ཙ མནྡཏྟཱ མོམཱུཧཏྟཱ ཙ པུབྦཝུཏྟནཡསྶ པཊིཀྑེཔམཏྟཾ ཀརོཏི. ཨིམེཧི པཉྙཱསཱཡ ཨཱཀཱརེཧཱིཏི ཡཐཱཝུཏྟཱནཾ དསནྣཾ པཉྩཀཱནཾ ཝསེན པཉྙཱསཱཡ ཨཱཀཱརེཧཱིཏི.

ཨནྟགྒཱཧིཀཱདིཊྛིནིདྡེསཝཎྞནཱ ནིཊྛིཏཱ.

༨. པུབྦནྟཱནུདིཊྛིནིདྡེསཝཎྞནཱ

༡༤༡. པུབྦནྟཱཔརནྟཱནུདིཊྛཱིསུ སསྶཏཾ ཝདནྟཱིཏི སསྶཏཝཱདཱ. ཨཐ ཝཱ ཝདནྟི ཨེཏེནཱཏི ཝཱདོ, དིཊྛིགཏསྶེཏཾ ཨདྷིཝཙནཾ. སསྶཏནྟི ཝཱདོཔི སསྶཏཡོགེན སསྶཏོ, སསྶཏོ ཝཱདོ ཨེཏེསནྟི སསྶཏཝཱདཱ. ཏཐཱ ཨེཀཙྩཾ སསྶཏནྟི ཝཱདོ ཨེཀཙྩསསྶཏོ, སོ ཨེཏེསཾ ཨཏྠཱིཏི ཨེཀཙྩསསྶཏིཀཱ. ཏཐཱ ཨནྟཝཱ, ཨནནྟཝཱ, ཨནྟཝཱ ཙ ཨནནྟཝཱ ཙ, ནེཝནྟཝཱ ནཱནནྟཝཱཏི པཝཏྟོ ཝཱདོ ཨནྟཱནནྟོ, སོ ཨེཏེསཾ ཨཏྠཱིཏི ཨནྟཱནནྟིཀཱ. ན མརཏཱིཏི ཨམརཱ. ཀཱ སཱ? ‘‘ཨེཝམྤི མེ ནོ’’ཏིཨཱདིནཱ (དཱི. ནི. ༡.༦༢-༦༣) ནཡེན པརིཡནྟརཧིཏསྶ དིཊྛིགཏིཀསྶ དིཊྛི ཙེཝ ཝཱཙཱ ཙ. ཝིཝིདྷོ ཁེཔོ ཝིཀྑེཔོ, ཨམརཱཡ དིཊྛིཡཱ, ཝཱཙཱཡ ཝཱ ཝིཀྑེཔོ ཨམརཱཝིཀྑེཔོ, སོ ཨེཏེསཾ ཨཏྠཱིཏི ཨམརཱཝིཀྑེཔིཀཱ. ཨཔརོ ནཡོ – ཨམརཱ ནཱམ མཙྪཛཱཏི, སཱ ཨུམྨུཛྫནནིམུཛྫནཱདིཝསེན ཨུདཀེ སནྡྷཱཝམཱནཱ གཧེཏུཾ ན སཀྐཱ ཧོཏི, ཨེཝམེཝཾ ཨཡམྤི ཝཱདོ ཨིཏོ ཙིཏོ ཙ སནྡྷཱཝཏི, གཱཧཾ ན ཨུཔགཙྪཏཱིཏི ཨམརཱཝིཀྑེཔོཏི ཝུཙྩཏི, སོ ཨེཏེསཾ ཨཏྠཱིཏི ཨམརཱཝིཀྑེཔིཀཱ. ཨདྷིཙྩསམུཔྤནྣོཏི ཨཀཱརཎསམུཔྤནྣོ ཨཏྟཱ ཙ ལོཀོ ཙཱཏི དསྶནཾ ཨདྷིཙྩསམུཔྤནྣཾ, ཏཾ ཨེཏེསཾ ཨཏྠཱིཏི ཨདྷིཙྩསམུཔྤནྣིཀཱ.

པུབྦནྟཱནུདིཊྛིནིདྡེསཝཎྞནཱ ནིཊྛིཏཱ.

༩. ཨཔརནྟཱནུདིཊྛིནིདྡེསཝཎྞནཱ

༡༤༢. སཉྙིཾ ཝདནྟཱིཏི སཉྙཱིཝཱདཱ. ཨསཉྙིཾ ཝདནྟཱིཏི ཨསཉྙཱིཝཱདཱ. ནེཝསཉྙཱིནཱསཉྙིཾ ཝདནྟཱིཏི ནེཝསཉྙཱིནཱསཉྙཱིཝཱདཱ. ཨཐ ཝཱ སཉྙཱིཏི པཝཏྟོ ཝཱདོ སཉྙཱིཝཱདོ, སོ ཡེསཾ ཨཏྠཱིཏི ཏེ སཉྙཱིཝཱདཱ, ཏཐཱ ཨསཉྙཱིཝཱདཱ, ནེཝསཉྙཱིནཱསཉྙཱིཝཱདཱ ཙ. ཨུཙྪེདཾ ཝདནྟཱིཏི ཨུཙྪེདཝཱདཱ. དིཊྛདྷམྨོཏི པཙྩཀྑདྷམྨོ, ཏཏྠ ཏཏྠ པཊིལདྡྷཨཏྟབྷཱཝསྶེཏཾ ཨདྷིཝཙནཾ. དིཊྛདྷམྨེ ནིབྦཱནཾ དིཊྛདྷམྨནིབྦཱནཾ, ཨིམསྨིཾཡེཝ ཨཏྟབྷཱཝེ དུཀྑཝཱུཔསམོཏི ཨཏྠོ, ཏཾ ཝདནྟཱིཏི དིཊྛདྷམྨནིབྦཱནཝཱདཱ. ཨིམསྨིཾ པནཏྠེ ཝིཏྠཱརིཡམཱནེ སཱཊྛཀཐཾ སཀལཾ བྲཧྨཛཱལསུཏྟཾ ཝཏྟབྦཾ ཧོཏི. ཨེཝཉྩ སཏི ཨཏིཔཔཉྩོ ཧོཏཱིཏི ན ཝིཏྠཱརིཏོ. ཏདཏྠིཀེཧི ཏཾ ཨཔེཀྑིཏྭཱ གཧེཏབྦོ.

ཨཔརནྟཱནུདིཊྛིནིདྡེསཝཎྞནཱ ནིཊྛིཏཱ.

༡༠-༡༢. སཉྙོཛནིཀཱདིདིཊྛིནིདྡེསཝཎྞནཱ

༡༤༣. ཡསྨཱ སཉྙོཛནིཀཱ དིཊྛི སབྦདིཊྛིསཱདྷཱརཎཱ, ཏསྨཱ ཏསྶཱ སབྦདིཊྛིསཉྙོཛནཏྟཱ སབྦདིཊྛིསཱདྷཱརཎོ ཨཏྠོ ནིདྡིཊྛོ. སོ ཧེཊྛཱ ཝུཏྟདིཊྛིཔརིཡུཊྛཱནཱནེཝ.

༡༤༤. མཱནཝིནིབནྡྷདིཊྛཱིསུ ཙཀྑུ ཨཧནྟི ཨབྷིནིཝེསཔརཱམཱསོཏི མཱནཔུབྦཀོ ཨབྷིནིཝེསཔརཱམཱསོ. ན ཧི དིཊྛི མཱནསམྤཡུཏྟཱ ཧོཏི. ཏེནེཝ ཙ མཱནཝིནིབནྡྷཱཏི ཝུཏྟཾ, མཱནཔཊིབནྡྷཱ མཱནམཱུལཀཱཏི ཨཏྠོ.

༡༤༥. ཙཀྑུ མམནྟི ཨབྷིནིཝེསཔརཱམཱསོཏི ཨེཏྠཱཔི ཨེསེཝ ནཡོ. ཨེཏྠ པན ‘‘མམཱ’’ཏི ཝཏྟབྦེ ‘‘མམ’’ནྟི ཨནུནཱསིཀཱགམོ ཝེདིཏབྦོ. ‘‘ཨཧ’’ནྟི མཱནཝིནིབནྡྷཱཡ རཱུཔཱདཱིནིཔི ཨཛ྄ཛྷཏྟིཀཱནེཝ. ན ཧི ཀསིཎརཱུཔཾ ཝིནཱ བཱཧིརཱནི ‘‘ཨཧ’’ནྟི གཎྷཱཏི. ‘‘མམ’’ནྟི མཱནཝིནིབནྡྷཱཡ པན བཱཧིརཱནིཔི ལབྦྷནྟི. བཱཧིརཱནིཔི ཧི ‘‘མམ’’ནྟི གཎྷཱཏི. ཡསྨཱ པན དུཀྑཱ ཝེདནཱ ཨནིཊྛཏྟཱ མཱནཝཏྠུ ན ཧོཏི, ཏསྨཱ ཚ ཝེདནཱ ཏཱསཾ མཱུལཔཙྩཡཱ ཚ ཕསྶཱ ཙ ན གཧིཏཱ. སཉྙཱདཡོ པན ཨིདྷ པཙྪིནྣཏྟཱ ན གཧིཏཱཏི ཝེདིཏབྦཱ.

སཾཡོཛནིཀཱདིདིཊྛིནིདྡེསཝཎྞནཱ ནིཊྛིཏཱ.

༡༣. ཨཏྟཝཱདཔཊིསཾཡུཏྟདིཊྛིནིདྡེསཝཎྞནཱ

༡༤༦. ཨཏྟཝཱདཔཊིསཾཡུཏྟཱ དིཊྛི ཨཏྟཱནུདིཊྛིཡེཝ. ཨཏྟཱཏི ཝཱདེན པཊིསཾཡུཏྟཏྟཱ པུན ཨེཝཾ ཝུཏྟཱ.

ཨཏྟཝཱདཔཊིསཾཡུཏྟདིཊྛིནིདྡེསཝཎྞནཱ ནིཊྛིཏཱ.

༡༤. ལོཀཝཱདཔཊིསཾཡུཏྟདིཊྛིནིདྡེསཝཎྞནཱ

༡༤༧. ཨཏྟཱ ཙ ལོཀོ ཙཱཏི སོ ཨེཝ ཨཏྟཱ ཙ ཨཱལོཀནཊྛེན ལོཀོ ཙཱཏི ཨཏྠོ. སསྶཏོཏི སསྶཏཝཱདཱནཾ དིཊྛི. ཨསསྶཏོཏི ཨུཙྪེདཝཱདཱནཾ. སསྶཏོ ཙ ཨསསྶཏོ ཙཱཏི ཨེཀཙྩསསྶཏིཀཱནཾ. ནེཝ སསྶཏོ ནཱསསྶཏོཏི ཨམརཱཝིཀྑེཔིཀཱནཾ. ཨནྟཝཱཏི པརིཏྟཀསིཎལཱབྷཱིནཾ ཏཀྐིཀཱནཉྩ ནིགཎྛཱཛཱིཝིཀཱནཉྩ. ཨཐ ཝཱ ཨུཙྪེདཝཱདིནོ ‘‘སཏྟོ ཛཱཏིཡཱ པུབྦནྟཝཱ, མརཎེན ཨཔརནྟཝཱ’’ཏི ཝདནྟི. ཨདྷིཙྩསམུཔྤནྣིཀཱ ‘‘སཏྟོ ཛཱཏིཡཱ པུབྦནྟཝཱ’’ཏི ཝདནྟི. ཨནནྟཝཱཏི ཨཔྤམཱཎཀསིཎལཱབྷཱིནཾ. སསྶཏཝཱདིནོ པན ‘‘པུབྦནྟཱཔརནྟཱ ནཏྠི, ཏེན ཨནནྟཝཱ’’ཏི ཝདནྟི. ཨདྷིཙྩསམུཔྤནྣིཀཱ ‘‘ཨཔརནྟེན ཨནནྟཝཱ’’ཏི ཝདནྟི.

ཨནྟཝཱ ཙ ཨནནྟཝཱ ཙཱཏི ཨུདྡྷམདྷོ ཨཝཌྜྷིཏྭཱ ཏིརིཡཾ ཝཌྜྷིཏཀསིཎཱནཾ. ནེཝ ཨནྟཝཱ ན ཨནནྟཝཱཏི ཨམརཱཝིཀྑེཔིཀཱནཾ.

ལོཀཝཱདཔཊིསཾཡུཏྟདིཊྛིནིདྡེསཝཎྞནཱ ནིཊྛིཏཱ.

༡༥-༡༦. བྷཝཝིབྷཝདིཊྛིནིདྡེསཝཎྞནཱ

༡༤༨. བྷཝཝིབྷཝདིཊྛཱིནཾ ཡཐཱཝུཏྟདིཊྛིཏོ ཝིསུཾ ཨབྷིནིཝེསཱབྷཱཝཏོ ཝིསུཾ ནིདྡེསཾ ཨཀཏྭཱ ཡཐཱཝུཏྟདིཊྛཱིནཾཡེཝ ཝསེན ‘‘ཨོལཱིཡནཾ ཨཏིདྷཱཝན’’ནྟི ཨེཀེཀཾ ཨཱཀཱརཾ ནིདྡིསིཏུཾ པུཙྪཾ ཨཀཏྭཱ ཙ ཨོལཱིཡནཱབྷིནིཝེསོ བྷཝདིཊྛི, ཨཏིདྷཱཝནཱབྷིནིཝེསོ ཝིབྷཝདིཊྛཱིཏི ཨཱཧ. ཏཏྠ ‘‘བྷཝནིརོདྷཱཡ དྷམྨེ དེསིཡམཱནེ ཙིཏྟཾ ན པཀྑནྡཏཱི’’ཏི (ཨིཏིཝུ. ༤༩) ཝུཏྟཨོལཱིཡནཱབྷིནིཝེསོ, སསྶཏསཉྙཱཡ ནིབྦཱནཏོ སངྐོཙནཱབྷིནིཝེསོཏི ཨཏྠོ. ‘‘བྷཝེནེཝ ཁོ པནེཀེ ཨཊྚཱིཡམཱནཱ ཧརཱཡམཱནཱ ཛིགུཙྪམཱནཱ ཝིབྷཝཾ ཨབྷིནནྡནྟཱི’’ཏི ཝུཏྟཨཏིདྷཱཝནཱབྷིནིཝེསོ, ཨུཙྪེདསཉྙཱཡ ནིརོདྷགཱམིནིཔཊིཔདཱཏིཀྐམནཱབྷིནིཝེསོཏི ཨཏྠོ.

ཨིདཱནི ཏཱཝ བྷཝཝིབྷཝདིཊྛིཡོ སབྦདིཊྛཱིསུ ཡོཛེཏྭཱ དསྶེཏུཾ ཨསྶཱདདིཊྛིཡཱཏིཨཱདིམཱཧ. ཏཏྠ ཡསྨཱ ཨསྶཱདདིཊྛིཀཱ སསྶཏཾ ཝཱ ཨུཙྪེདཾ ཝཱ ནིསྶཱཡ ‘‘ནཏྠི ཀཱམེསུ དོསོ’’ཏི གཎྷནྟི, ཏསྨཱ པཉྩཏིཾསཱཀཱརཱཔི ཨསྶཱདདིཊྛིཡོ སིཡཱ བྷཝདིཊྛིཡོ, སིཡཱ ཝིབྷཝདིཊྛིཡོཏི ཝུཏྟཱ. ཏཏྠ ཡསྨཱ ཨེཀེཀཱཔི དིཊྛིཡོ སསྶཏགྒཱཧཝསེན བྷཝདིཊྛིཡོ བྷཝེཡྻུཾ, ཨུཙྪེདགྒཱཧཝསེན ཝིབྷཝདིཊྛིཡོ བྷཝེཡྻུནྟི ཨཏྠོ. ཨཏྟཱནུདིཊྛིཡཱ རཱུཔཾ ཨཏྟཏོ སམནུཔསྶཏི, ཝེདནཾ… སཉྙཾ… སངྑཱརེ… ཝིཉྙཱཎཾ ཨཏྟཏོ སམནུཔསྶཏཱིཏི པཉྩསུ རཱུཔཱདིཏོ ཨཏྟནོ ཨནཉྙཏྟཱ ཏེསུ ཨུཙྪིནྣེསུ ཨཏྟཱ ཨུཙྪིནྣོཏི གཧཎཏོ པཉྩ ཝིབྷཝདིཊྛིཡོཏི ཝུཏྟཾ. སེསེསུ པཉྩདསསུ ཋཱནེསུ རཱུཔཱདིཏོ ཨཏྟནོ ཨཉྙཏྟཱ ཏེསུ ཨུཙྪིནྣེསུཔི ‘‘ཨཏྟཱ སསྶཏོཏི གཧཎཏོ པནྣརས བྷཝདིཊྛིཡོཏི ཝུཏྟཾ.

མིཙྪཱདིཊྛིཡཱ ‘‘སབྦཱཝ ཏཱ ཝིབྷཝདིཊྛིཡོ’’ཏི ཨུཙྪེདཝསེན པཝཏྟཏྟཱ ཨནྟཝཱནནྟཝཱདིཊྛཱིསུ པརིཏྟཱརམྨཎཨཔྤམཱཎཱརམྨཎཛྷཱནལཱབྷིནོ དིབྦཙཀྑུནཱ རཱུཔདྷཱཏུཡཱ ཙཝིཏྭཱ སཏྟེ ཨཉྙཏྠ ཨུཔཔནྣེ པསྶིཏྭཱ བྷཝདིཊྛིཾ ཨཔསྶིཏྭཱ ཝིབྷཝདིཊྛིཾ གཎྷནྟི. ཏསྨཱ ཏཏྠ སིཡཱ བྷཝདིཊྛིཡོ, སིཡཱ ཝིབྷཝདིཊྛིཡོཏི ཝུཏྟཾ. ཧོཏི ཙ ན ཙ ཧོཏཱིཏི ཨེཏྠ ཧོཏི ཙཱཏི བྷཝདིཊྛི, ན ཙ ཧོཏཱིཏི ཝིབྷཝདིཊྛི. ནེཝ ཧོཏི ན ན ཧོཏཱིཏི ཨེཏྠ ནེཝ ཧོཏཱིཏི ཝིབྷཝདིཊྛི, ན ན ཧོཏཱིཏི བྷཝདིཊྛི. ཏསྨཱ ཏཏྠ ‘‘སིཡཱ’’ཏི ཝུཏྟཾ.

པུབྦནྟཱནུདིཊྛིཡཱ ཨེཀཙྩསསྶཏིཀཱ སསྶཏཉྩ པཉྙཔེནྟི, ཨསསྶཏཉྩ པཉྙཔེནྟི. ཏསྨཱ སཱ བྷཝདིཊྛི ཙ ཝིབྷཝདིཊྛི ཙ ཧོཏི. ཙཏྟཱརོ ཨནྟཱནནྟིཀཱ ཨནྟཱནནྟཾ ཨཏྟཱནཾ པཉྙཔེནྟི. ཏསྨཱ སཱ ཨཏྟཱནུདིཊྛིསདིསཱ བྷཝདིཊྛི ཙ ཝིབྷཝདིཊྛི ཙ. ཙཏྟཱརོ ཨམརཱཝིཀྑེཔིཀཱ བྷཝདིཊྛིཾ ཝཱ ཝིབྷཝདིཊྛིཾ ཝཱ ནིསྶཱཡ ཝཱཙཱཝིཀྑེཔཾ ཨཱཔཛྫནྟི, ཨཝསེསཱ པན བྷཝདིཊྛིཡོཝ. ཏསྨཱ ཏེ ཏེ སནྡྷཱཡ ‘‘སིཡཱ’’ཏི ཝུཏྟཾ. ཨཔརནྟཱནུདིཊྛིཡཱ སཏྟ ཨུཙྪེདཝཱདཱ ཝིབྷཝདིཊྛིཡོ, ཨཝསེསཱ བྷཝདིཊྛིཡོ. ཏསྨཱ ཏེ ཏེ སནྡྷཱཡ ‘‘སིཡཱ’’ཏི ཝུཏྟཾ. སཉྙོཛནིཀདིཊྛིཡཱ སབྦདིཊྛཱིནཾ ཝསེན ‘‘སིཡཱ’’ཏི ཝུཏྟཾ. ཨཧནྟི མཱནཝིནིབནྡྷཱཡ དིཊྛིཡཱ ཙཀྑཱདཱིནཾ ཨཧནྟི གཧིཏཏྟཱ ཏེསཾ ཝིནཱསེ ཨཏྟཱ ཝིནཊྛོ ཧོཏཱིཏི སབྦཱཝ ཏཱ ཝིབྷཝདིཊྛིཡོཏི ཝུཏྟཾ. ཨཏྟཱནུདིཊྛིཡོ ཝིཡ མམནྟི མཱནཝིནིབནྡྷཱཡ དིཊྛིཡཱ ཙཀྑཱདིཏོ ཨཏྟནོ ཨཉྙཏྟཱ ཏེསཾ ཝིནཱསེཔི ཨཏྟཱ ན ཝིནསྶཏཱིཏི སབྦཱཝ ཏཱ བྷཝདིཊྛིཡོཏི ཝུཏྟཾ. ལོཀཝཱདཔཊིསཾཡུཏྟཱཡ དིཊྛིཡཱ ‘‘སསྶཏོ ཨཏྟཱ ཙ ལོཀོ ཙཱ’’ཏིཨཱདིནཱ (པཊི. མ. ༡.༡༤༧) ནཡེན ཝུཏྟཏྟཱ བྷཝཝིབྷཝདིཊྛི པཱཀཊཱཡེཝ. ཨེཏྟཱཝཏཱ ཨསྶཱདདིཊྛཱདིཀཱ ཝིབྷཝདིཊྛིཔརིཡོསཱནཱ སོལ༹ས དིཊྛིཡོ ཏཱིཎིསཏཉྩ དིཊྛཱབྷིནིཝེསཱ ནིདྡིཊྛཱ ཧོནྟི. ཨཏྟཱནུདིཊྛི ཙ སཀྐཱཡདིཊྛི ཙ ཨཏྟཝཱདཔཊིསཉྙུཏྟཱ དིཊྛི ཙ ཨཏྠཏོ ཨེཀཱ པརིཡཱཡེན ཏིཝིདྷཱ ཝུཏྟཱ. སཉྙོཛནིཀཱ པན དིཊྛི ཨཝཏྠཱབྷེདེན སབྦཱཔི དིཊྛིཡོ ཧོནྟི.

ཨིདཱནི སབྦཱཝ ཏཱ དིཊྛིཡོ ཨསྶཱདདིཊྛིཡོཏིཨཱདི ཨཉྙེན པརིཡཱཡེན ཡཐཱཡོགཾ དིཊྛིསཾསནྡནཱ. ཏཏྠ སབྦཱཝ ཏཱ དིཊྛིཡོཏི ཡཐཱཝུཏྟཱ ཨནཝསེསཱ དིཊྛིཡོ. དིཊྛིརཱགརཏྟཏྟཱ ཏཎྷཱསྶཱདནིསྶིཏཏྟཱ ཙ ཨསྶཱདདིཊྛིཡོ, ཨཏྟསིནེཧཱནུགཏཏྟཱ ཨཏྟཱནུདིཊྛིཡོ, ཝིཔརཱིཏདསྶནཏྟཱ མིཙྪཱདིཊྛིཡོ, ཁནྡྷཝཏྠུཀཏྟཱ སཀྐཱཡདིཊྛིཡོ, ཨེཀེཀསྶ ཨནྟསྶ གཧིཏཏྟཱ ཨནྟགྒཱཧིཀཱ དིཊྛིཡོ, ཨནཏྠསཾཡོཛནིཀཏྟཱ སཉྙོཛནིཀཱ དིཊྛིཡོ, ཨཏྟཝཱདེན ཡུཏྟཏྟཱ ཨཏྟཝཱདཔཊིསཾཡུཏྟཱ དིཊྛིཡོཏི ཨིམཱ སཏྟ དིཊྛིཡོ སབྦདིཊྛིསངྒཱཧིཀཱ, སེསཱ པན ནཝ དིཊྛིཡོ ན སབྦདིཊྛིསངྒཱཧིཀཱ.

ཨིདཱནི ཝིཏྠཱརཏོ ཝུཏྟཱ སབྦཱཝ ཏཱ དིཊྛིཡོ དྭཱིསུཡེཝ དིཊྛཱིསུ སངྑིཔིཏྭཱ སཏྟཱནཾ དིཊྛིདྭཡནིསྶཡཾ དསྶེནྟོ བྷཝཉྩ དིཊྛིནྟིགཱཐམཱཧ. སབྦཱཔི ཧི ཏཱ དིཊྛིཡོ བྷཝདིཊྛཱི ཝཱ ཧོནྟི ཝིབྷཝདིཊྛཱི ཝཱ. བྷཝཉྩ དིཊྛིཾ ཝིབྷཝཉྩ དིཊྛིནྟི ཨེཏྠ པན ཙ-སདྡོ དིཊྛིམེཝ སམུཙྩིནོཏི, ན ནིསྶཡཾ. ན ཧི ཨེཀོ བྷཝཝིབྷཝདིཊྛིདྭཡཾ ནིསྶཡཏི. ཡཐཱཧ – ‘‘ཨིཏི བྷཝདིཊྛིསནྣིསྶིཏཱ ཝཱ སཏྟཱ ཧོནྟི ཝིབྷཝདིཊྛིསནྣིསྶིཏཱ ཝཱ’’ཏི (པཊི. མ. ༡.༡༡༣). ཏཀྐིཀཱཏི ཏཀྐེན ཝདནྟཱིཏི ཏཀྐིཀཱ. ཏེ ཧི དིཊྛིགཏིཀཱ སབྷཱཝཔཊིཝེདྷཔཉྙཱཡ ཨབྷཱཝཱ ཀེཝལཾ ཏཀྐེན ཝཏྟནྟི. ཡེཔི ཙ ཛྷཱནལཱབྷིནོ ཨབྷིཉྙཱལཱབྷིནོ ཝཱ དིཊྛིཾ གཎྷནྟི, ཏེཔི ཏཀྐེཏྭཱ གཧཎཏོ ཏཀྐིཀཱ ཨེཝ. ནིསྶིཏཱསེཏི ནིསྶིཏཱཏི ཨཏྠོ. ཨེཀམེཝ པདཾ, ‘‘སེ’’ཏི ནིཔཱཏམཏྟཾ ཝཱ. ཏེསཾ ནིརོདྷམྷི ན ཧཏྠི ཉཱཎནྟི དིཊྛིནིསྶཡསྶ ཀཱརཎཝཙནམེཏཾ. སཀྐཱཡདིཊྛིནིརོདྷེ ནིབྦཱནེ ཡསྨཱ ཏེསཾ ཉཱཎཾ ནཏྠི, ཏསྨཱ ཨེཏཾ དིཊྛིདྭཡཾ ནིསྶིཏཱཏི ཨཏྠོ. ‘‘ན ཧི ཨཏྠི ཉཱཎ’’ནྟི ཨེཏྠ ཧི-ཀཱརོ ཀཱརཎོཔདེསེ ནིཔཱཏོ. ཡཏྠཱཡཾ ལོཀོ ཝིཔརཱིཏསཉྙཱིཏི ཡཏྠ སུཁེ ནིརོདྷམྷི ཨཡཾ སདེཝཀོ ལོཀོ ‘‘དུཀྑ’’མིཏི ཝིཔརཱིཏསཉྙཱི ཧོཏི, ཏསྨིཾ ནིརོདྷམྷི ན ཧཏྠི ཉཱཎནྟི སམྦནྡྷོ. དུཀྑམིཏི ཝིཔརཱིཏསཉྙིཏཱཡ ཨིདཾ སུཏྟཾ –

‘‘རཱུཔཱ སདྡཱ རསཱ གནྡྷཱ, ཕསྶཱ དྷམྨཱ ཙ ཀེཝལཱ;

ཨིཊྛཱ ཀནྟཱ མནཱཔཱ ཙ, ཡཱཝཏཏྠཱིཏི ཝུཙྩཏི.

‘‘སདེཝཀསྶ ལོཀསྶ, ཨེཏེ ཝོ སུཁསམྨཏཱ;

ཡཏྠ ཙེཏེ ནིརུཛ྄ཛྷནྟི, ཏཾ ནེསཾ དུཀྑསམྨཏཾ.

‘‘སུཁནྟི དིཊྛམརིཡེཧི, སཀྐཱཡསྶུཔརོདྷནཾ;

པཙྩནཱིཀམིདཾ ཧོཏི, སབྦལོཀེན པསྶཏཾ.

‘‘ཡཾ པརེ སུཁཏོ ཨཱཧུ, ཏདརིཡཱ ཨཱཧུ དུཀྑཏོ;

ཡཾ པརེ དུཀྑཏོ ཨཱཧུ, ཏདརིཡཱ སུཁཏོ ཝིདཱུ.

‘‘པསྶ དྷམྨཾ དུརཱཛཱནཾ, སམྤམཱུལ༹ྷེཏྠཝིདྡསུ;

ནིཝུཏཱནཾ ཏམོ ཧོཏི, ཨནྡྷཀཱརོ ཨཔསྶཏཾ.

‘‘སཏཉྩ ཝིཝཊཾ ཧོཏི, ཨཱལོཀོ པསྶཏཱམིཝ;

སནྟིཀེ ན ཝིཛཱནནྟི, མགཱ དྷམྨསྶཀོཝིདཱ.

‘‘བྷཝརཱགཔརེཏེཧི, བྷཝསོཏཱནུསཱརིབྷི;

མཱརདྷེཡྻཱནུཔནྣེཧི, ནཱཡཾ དྷམྨོ སུསམྦུདྷོ.

‘‘ཀོ ནུ ཨཉྙཏྲ ཨརིཡེབྷི, པདཾ སམྦུདྡྷུམརཧཏི;

ཡཾ པདཾ སམྨདཉྙཱཡ, པརིནིབྦནྟི ཨནཱསཝཱ’’ཏི. (སུ. ནི. ༧༦༤-༧༧༡);

༡༤༩. ཨིདཱནི སབྦཱསཾ དིཊྛཱིནཾ དིཊྛིདྭཡབྷཱཝཾ དིཊྛིསམུགྒྷཱཏཀཉྩ སམྨཱདིཊྛིཾ སུཏྟཏོ དསྶེཏུཀཱམོ, དྭཱིཧི བྷིཀྑཝེཏི སུཏྟཾ ཨཱཧརི. ཏཏྠ དེཝཱཏི བྲཧྨཱནོཔི ཝུཙྩནྟི. ཨོལཱིཡནྟཱིཏི སངྐུཙནྟི. ཨཏིདྷཱཝནྟཱིཏི ཨཏིཀྐམིཏྭཱ གཙྪནྟི. ཙཀྑུམནྟོཏི པཉྙཝནྟོ. ཙ-སདྡོ ཨཏིརེཀཏྠོ. བྷཝཱརཱམཱཏི བྷཝོ ཨཱརཱམོ ཨབྷིརམཊྛཱནཾ ཨེཏེསནྟི བྷཝཱརཱམཱ. བྷཝརཏཱཏི བྷཝེ ཨབྷིརཏཱ. བྷཝསམྨུདིཏཱཏི བྷཝེན སནྟུཊྛཱ. དེསིཡམཱནེཏི ཏཐཱགཏེན ཝཱ ཏཐཱགཏསཱཝཀེན ཝཱ དེསིཡམཱནེ. ན པཀྑནྡཏཱིཏི དྷམྨདེསནཾ ཝཱ བྷཝནིརོདྷཾ ཝཱ ན པཝིསཏི. ན པསཱིདཏཱིཏི ཏཏྠ པསཱདཾ ན པཱཔུཎཱཏི. ན སནྟིཊྛཏཱིཏི ཏཏྠ ན པཏིཊྛཱཏི. ནཱདྷིམུཙྩཏཱིཏི ཏཏྠ གྷནབྷཱཝཾ ན པཱཔུཎཱཏི. ཨེཏྟཱཝཏཱ སསྶཏདིཊྛི ཝུཏྟཱ.

ཨཊྚཱིཡམཱནཱཏི དུཀྑཾ པཱཔུཎམཱནཱ. ཧརཱཡམཱནཱཏི ལཛྫཾ པཱཔུཎམཱནཱ. ཛིགུཙྪམཱནཱཏི ཛིགུཙྪཾ པཱཔུཎམཱནཱ. ཝིབྷཝཾ ཨབྷིནནྡནྟཱིཏི ཨུཙྪེདཾ པཊིཙྩ ཏུསྶནྟི, ཨུཙྪེདཾ པཏྠཡནྟཱིཏི ཝཱ ཨཏྠོ. ཀིརཱཏི ཨནུསྶཝནཏྠེ ནིཔཱཏོ. བྷོཏི ཨཱལཔནམེཏཾ. སནྟནྟི ནིབྦུཏཾ. པཎཱིཏནྟི དུཀྑཱབྷཱཝཏོ པཎཱིཏཾ, པདྷཱནབྷཱཝཾ ནཱིཏནྟི ཝཱ པཎཱིཏཾ. ཡཱཐཱཝནྟི ཡཐཱསབྷཱཝཾ. ཨེཏྟཱཝཏཱ ཨུཙྪེདདིཊྛི ཝུཏྟཱ.

ཨིདྷཱཏི ཨིམསྨིཾ སཱསནེ. བྷཱུཏནྟི ཧེཏུཏོ སཉྫཱཏཾ ཁནྡྷཔཉྩཀསངྑཱཏཾ དུཀྑཾ. བྷཱུཏཏོ པསྶཏཱིཏི ཨིདཾ བྷཱུཏཾ དུཀྑནྟི པསྶཏི. ནིབྦིདཱཡཱཏི ཝིཔསྶནཏྠཱཡ. ཝིརཱགཱཡཱཏི ཨརིཡམགྒཏྠཱཡ. ནིརོདྷཱཡཱཏི ནིབྦཱནཏྠཱཡ. པཊིཔནྣོ ཧོཏཱིཏི ཏདནུརཱུཔཾ པཊིཔདཾ པཊིཔནྣོ ཧོཏི. ཨེཝཾ པསྶནྟཱིཏི ཨིམིནཱ པཀཱརེན པུབྦབྷཱགེ ལོཀིཡཉཱཎེན, པཊིཝེདྷཀཱལེ ལོཀུཏྟརཉཱཎེན པསྶནྟི. ཨེཏྟཱཝཏཱ སམྨཱདིཊྛི ཝུཏྟཱ.

ཨིདཱནི དྭཱིཧི གཱཐཱཧི ཏསྶཱ སམྨཱདིཊྛིཡཱ ཨཱནིསཾསཾ དསྶེཏི. ཏཏྠ ཡོ བྷཱུཏཾ བྷཱུཏཏོ དིསྭཱཏི དུཀྑཾ པརིཉྙཱབྷིསམཡེན ཨབྷིསམེཏྭཱཏི ཨཏྠོ. བྷཱུཏསྶ ཙ ཨཏིཀྐམནྟི ནིརོདྷཾ སཙྪིཀིརིཡཱབྷིསམཡེན ཨབྷིསམེཏྭཱཏི ཨཏྠོ. ཡཐཱབྷཱུཏེདྷིམུཙྩཏཱིཏི མགྒབྷཱཝནཱབྷིསམཡཝསེན ཡཐཱསབྷཱཝེ ནིརོདྷེ ‘‘ཨེཏཾ སནྟཾ, ཨེཏཾ པཎཱིཏ’’ནྟི ཨདྷིམུཙྩཏི. བྷཝཏཎྷཱ པརིཀྑཡཱཏི སམུདཡསྶ པཧཱནེནཱཏི ཨཏྠོ. ཨསཏིཔི ཙེཏྠ སཙྩཱནཾ ནཱནཱབྷིསམཡཏྟེ ‘‘དིསྭཱ’’ཏི པུབྦཀཱལིཀཝཙནཾ སདྡྷིཾ པུབྦབྷཱགཔཊིཔདཱཡ ཝོཧཱརཝསེན ཝུཏྟནྟི ཝེདིཏབྦཾ. ན ཧི པུབྦཾ པསྶིཏྭཱ པཙྪཱ ཨདྷིམུཙྩཏི. ཙཏུསཙྩཱབྷིསམཡོ སམཱནཀཱལམེཝ ཧོཏི. སམཱནཀཱལེཔི ཝཱ པུབྦཀཱལིཀཱནི པདཱནི བྷཝནྟཱིཏི ན དོསོ. ཝེཏི ཨེཀཾསེན སོ ཨརཧཾ. བྷཱུཏཔརིཉྙཱཏོཏི དུཀྑཾ པརིཉྙཱཏཝཱ. ཝཱིཏཏཎྷོཏི ཝིགཏཏཎྷོ. བྷཝཱབྷཝེཏི ཁུདྡཀེ ཙ མཧནྟེ ཙ བྷཝེ. ཝུདྡྷིཨཏྠེཔི ཧི ཨ-ཀཱརསྶ སམྦྷཝཏོ ཨབྷཝོཏི མཧཱབྷཝོ. སོ པན ཁུདྡཀམཧནྟབྷཱཝོ ཨུཔཱདཱཡུཔཱདཱཡ ཝེདིཏབྦོ. ཨཐ ཝཱ བྷཝེཏི སསྶཏེ. ཨབྷཝེཏི ཨུཙྪེདེ. ཏདུབྷཡེཔི དིཊྛིརཱགཱབྷཱཝེན ཝཱིཏཏཎྷོ. བྷཱུཏསྶ ཝིབྷཝཱཏི ཝཊྚདུཀྑསྶ སམུཙྪེདཱ. ནཱགཙྪཏི པུནབྦྷཝནྟི ཨརཧཏོ པརིནིབྦཱནཾ ཝུཏྟཾ.

༡༥༠. ཏཡོ པུགྒལཱཏིཨཱདི མིཙྪཱདིཊྛིཀགརཧཎཏྠཾ སམྨཱདིཊྛིཀཔསཾསནཏྠཾ ཝུཏྟཾ. ཏཏྠ ཝིརཱུཔབྷཱཝཾ པནྣཱ གཏཱ དིཊྛི ཨེཏེསནྟི ཝིཔནྣདིཊྛཱི. སུནྡརབྷཱཝཾ པནྣཱ གཏཱ དིཊྛི ཨེཏེསནྟི སམྤནྣདིཊྛཱི. ཏིཏྠིཡོཏི ཏིཏྠཾ ཝུཙྩཏི དིཊྛི, ཏཾ པཊིཔནྣཏྟཱ ཏིཏྠེ སཱདྷུ, ཏིཏྠཾ ཡསྶ ཨཏྠཱིཏི ཝཱ ཏིཏྠིཡོ. ཨིཏོ བཧིདྡྷཱ པབྦཛྫཱུཔགཏོ. ཏིཏྠིཡསཱཝཀོཏི ཏེསཾ དིཊྛཱནུགཏིམཱཔནྣོ གཧཊྛོ. ཡོ ཙ མིཙྪཱདིཊྛིཀོཏི ཏདུབྷཡབྷཱཝཾ ཨནུཔགནྟྭཱ ཡཱཡ ཀཱཡཙི དིཊྛིཡཱ མིཙྪཱདིཊྛིཀོ.

ཏཐཱགཏོཏི སམྨཱསམྦུདྡྷོ. པཙྩེཀབུདྡྷོཔི ཨེཏྠེཝ སངྒཧིཏོ. ཏཐཱགཏསཱཝཀོཏི མགྒཔྤཏྟོ ཕལཔྤཏྟོ ཙ. ཡོ ཙ སམྨཱདིཊྛིཀོཏི ཏདུབྷཡཝིནིམུཏྟོ ལོཀིཡསམྨཱདིཊྛིཡཱ སམྨཱདིཊྛིཀོ.

གཱཐཱསུ ཀོདྷནོཏི ཡོ ཨབྷིཎྷཾ ཀུཛ྄ཛྷཏི, སོ. ཨུཔནཱཧཱིཏི ཏམེཝ ཀོདྷཾ ཝཌྜྷེཏྭཱ ཨུཔནནྡྷནསཱིལོ. པཱཔམཀྑཱིཏི ལཱམཀབྷཱུཏམཀྑཝཱ. མཱཡཱཝཱིཏི ཀཏཔཱཔཔཊིཙྪཱདནཝཱ. ཝསལོཏི ཧཱིནཛཙྩོ. ཝིསུདྡྷོཏི ཉཱཎདསྶནཝིསུདྡྷིཡཱ ཝིསུདྡྷོ. སུདྡྷཏཾ གཏོཏི མགྒཕལསངྑཱཏཾ སུདྡྷབྷཱཝཾ གཏོ. མེདྷཱཝཱིཏི པཉྙཝཱ. ཨིམཱཡ གཱཐཱཡ ལོཀུཏྟརསམྨཱདིཊྛིསམྤནྣོ ཨེཝ ཐོམིཏོ.

ཝིཔནྣདིཊྛིཡོ སམྤནྣདིཊྛིཡོཏི པུགྒལཝོཧཱརཾ པཧཱཡ དྷམྨམེཝ གརཧནྟོ ཐོམེནྟོ ཙ ཨཱཧ. ཨེཏཾ མམཱཏི ཏཎྷཱམཉྙནཝསེན དིཊྛི. ཨེསོཧམསྨཱིཏི མཱནམཉྙནམཱུལིཀཱ དིཊྛི. ཨེསོ མེ ཨཏྟཱཏི དིཊྛིམཉྙནམེཝ.

ཨེཏཾ མམཱཏི ཀཱ དིཊྛཱིཏིཨཱདཱིཧི ཏིསྶནྣཾ ཝིཔནྣདིཊྛཱིནཾ ཝིབྷཱགཉྩ གཎནཉྩ ཀཱལསངྒཧཉྩ པུཙྪིཏྭཱ ཝིསྶཛྫནཾ ཀཏཾ. ཏཏྠ ཀཱ དིཊྛཱིཏི ཨནེཀཱསུ དིཊྛཱིསུ ཀཏམཱ དིཊྛཱིཏི ཨཏྠོ. ཀཏམནྟཱནུགྒཧིཏཱཏི པུབྦནྟཱཔརནྟསངྑཱཏཀཱལདྭཡེ ཀཏམེན ཀཱལེན ཨནུགྒཧིཏཱ, ཨནུབདྡྷཱཏི ཨཏྠོ. ཡསྨཱ ‘‘ཨེཏཾ མམཱ’’ཏི པརཱམསནྟོ ‘‘ཨེཏཾ མམ ཨཧོསི, ཨེཝཾ མམ ཨཧོསི, ཨེཏྟཀཾ མམ ཨཧོསཱི’’ཏི ཨཏཱིཏཾ ཝཏྠུཾ ཨཔདིསིཏྭཱ པརཱམསཏི, ཏསྨཱ པུབྦནྟཱནུདིཊྛི ཧོཏི. པུབྦནྟཱནུགྒཧིཏཱ ཙ ཏཱ དིཊྛིཡོ ཧོནྟི. ཡསྨཱ ‘‘ཨེསོཧམསྨཱི’’ཏི པརཱམསནྟོ ‘‘ཨིམིནཱཧཾ སཱིལེན ཝཱ ཝཏེན ཝཱ ཏཔེན ཝཱ བྲཧྨཙརིཡེན ཝཱ ཨེསོསྨི ཝིསུཛ྄ཛྷིསྶཱམཱི’’ཏི ཨནཱགཏཕལཾ ཨུཔཱདཱཡ པརཱམསཏི, ཏསྨཱ ཨཔརནྟཱནུདིཊྛི ཧོཏི. ཨཔརནྟཱནུགྒཧིཏཱ ཙ ཏཱ དིཊྛིཡོ ཧོནྟི. ཡསྨཱ ‘‘ཨེསོ མེ ཨཏྟཱ’’ཏི པརཱམསནྟོ ཨཏཱིཏཱནཱགཏཾ ཨུཔཱདིནྣསནྟཏིཾ ཨུཔཱདཱཡ ‘‘ཨེསོ མེ ཨཏྟཱ’’ཏི པརཱམསཏི, སཀྐཱཡདིཊྛིཝསེན ཙ པརཱམསཏི, ཏསྨཱ སཀྐཱཡདིཊྛི ཧོཏི. པུབྦནྟཱཔརནྟཱནུགྒཧིཏཱ ཙ ཏཱ དིཊྛིཡོ ཧོནྟི. ཡསྨཱ པན སཀྐཱཡདིཊྛིཔྤམུཁཱཡེཝ དྭཱསཊྛི དིཊྛིཡོ ཧོནྟི, སཀྐཱཡདིཊྛིསམུགྒྷཱཏེནེཝ ཙ དྭཱསཊྛི དིཊྛིཡོ སམུགྒྷཱཏཾ གཙྪནྟི, ཏསྨཱ སཀྐཱཡདིཊྛིཔྤམུཁེན དྭཱསཊྛི དིཊྛིགཏཱནཱིཏི ཝུཏྟཱ, སཀྐཱཡདིཊྛིཔྤམུཁེན སཀྐཱཡདིཊྛིདྭཱརེན དྭཱསཊྛི དིཊྛིགཏཱནི ཧོནྟཱིཏི ཨཏྠོ. སཀྐཱཡདིཊྛིཔྤམུཁཱནཱིཏི པཱཋོ སུནྡརཏརོ. སཀྐཱཡདིཊྛི པམུཁཱ ཨཱདི ཨེཏེསནྟི སཀྐཱཡདིཊྛིཔྤམུཁཱནི. ཀཱནི ཏཱནི? དྭཱསཊྛི དིཊྛིགཏཱནི.

‘‘ཀཱ དིཊྛཱི’’ཏི པུཙྪཱཡ ཝཱིསཏིཝཏྠུཀཱ ཨཏྟཱནུདིཊྛི, ཝཱིསཏིཝཏྠུཀཱ སཀྐཱཡདིཊྛཱིཏི ཝིསྶཛྫནཾ. ‘‘ཀཏི དིཊྛིཡོ’’ཏི པུཙྪཱཡ སཀྐཱཡདིཊྛིཔྤམུཁཱནི དྭཱསཊྛི དིཊྛིགཏཱནཱིཏི ཝིསྶཛྫནཾ. སཱཡེཝ པན སཀྐཱཡདིཊྛི ‘‘ཨེསོ མེ ཨཏྟཱ’’ཏི ཝཙནསཱམཉྙེན ཨཏྟཱནུདིཊྛཱིཏི ཝུཏྟཱ. ཏསྶཱ ཝུཏྟཱཡ ཨཏྟཝཱདཔཊིསཉྙུཏྟཱ དིཊྛིཔི ཝུཏྟཱཡེཝ ཧོཏི.

༡༥༡. ཡེ ཀེཙི, བྷིཀྑཝེཏིཨཱདིསུཏྟཱཧརཎཾ སམྤནྣདིཊྛིཔུགྒལསམྦནྡྷེན སམྤནྣདིཊྛིཔུགྒལཝིབྷཱགདསྶནཏྠཾ ཀཏཾ. ཏཏྠ ནིཊྛཾ གཏཱཏི མགྒཉཱཎཝསེན སམྨཱསམྦུདྡྷོ བྷགཝཱཏི ནིཙྪཡཾ གཏཱ, ནིབྦེམཏིཀཱཏི ཨཏྠོ. ནིཊྛཱགཏཱཏི པཱཋོ སམཱསཔདཾ ཧོཏི, ཨཏྠོ པན སོཡེཝ. དིཊྛིསམྤནྣཱཏི དིཊྛིཡཱ སུནྡརབྷཱཝཾ གཏཱ. ཨིདྷ ནིཊྛཱཏི ཨིམིསྶཱ ཀཱམདྷཱཏུཡཱ པརིནིབྦཱནཾ. ཨིདྷ ཝིཧཱཡ ནིཊྛཱཏི ཨིམཾ ཀཱམབྷཝཾ ཝིཛཧིཏྭཱ སུདྡྷཱཝཱསབྲཧྨལོཀེ པརིནིབྦཱནཾ. སཏྟཀྑཏྟུཔརམསྶཱཏི སཏྟཀྑཏྟུཾཔརམཱ སཏྟཝཱརཔརམཱ བྷཝཱུཔཔཏྟི ཨཏྟབྷཱཝགྒཧཎཾ ཨསྶ, ཏཏོ པརཾ ཨཊྛམཾ བྷཝཾ ནཱདིཡཏཱིཏི སཏྟཀྑཏྟུཔརམོ. ཏསྶ སཏྟཀྑཏྟུཔརམསྶ སོཏཱཔནྣསྶ. ཀོལཾཀོལསྶཱཏི ཀུལཏོ ཀུལཾ གཙྪཏཱིཏི ཀོལཾཀོལོ. སོཏཱཔཏྟིཕལསཙྪིཀིརིཡཏོ ཧི པཊྛཱཡ ནཱིཙེ ཀུལེ ཨུཔཔཏྟི ནཱམ ནཏྠི, མཧཱབྷོགཀུལེསུཡེཝ ནིབྦཏྟཏཱིཏི ཨཏྠོ. ཏསྶ ཀོལཾཀོལསྶ སོཏཱཔནྣསྶ. ཨེཀབཱིཛིསྶཱཏི ཁནྡྷབཱིཛཾ ནཱམ ཀཐིཏཾ. ཡསྶ ཧི སོཏཱཔནྣསྶ ཨེཀཾཡེཝ ཁནྡྷབཱིཛཾ ཨཏྠི, ཨེཀཾ ཨཏྟབྷཱཝགྒཧཎཾ, སོ ཨེཀབཱིཛཱི ནཱམ. ཏསྶ ཨེཀབཱིཛིསྶ སོཏཱཔནྣསྶ. བྷགཝཏཱ གཧིཏནཱམཝསེནེཝེཏཱནི ཨེཏེསཾ ནཱམཱནི. ཨེཏྟཀཉྷི ཋཱནཾ གཏོ སཏྟཀྑཏྟུཔརམོ ནཱམ ཧོཏི, ཨེཏྟཀཾ ཀོལཾཀོལོ, ཨེཏྟཀཾ ཨེཀབཱིཛཱིཏི བྷགཝཏཱ ཨེཏེསཾ ནཱམཾ གཧིཏཾ. བྷགཝཱ ཧི ‘‘ཨཡཾ ཨེཏྟཀཾ ཋཱནཾ གམིསྶཏི, ཨཡཾ ཨེཏྟཀཾ ཋཱནཾ གམིསྶཏཱི’’ཏི ཉཏྭཱ ཏེསཾ ཏཱནི ཏཱནི ནཱམཱནི ཨགྒཧེསི. མུདུཔཉྙོ ཧི སོཏཱཔནྣོ སཏྟ བྷཝེ ནིབྦཏྟེནྟོ སཏྟཀྑཏྟུཔརམོ ནཱམ, མཛ྄ཛྷིམཔཉྙོ པརཾ ཚཊྛཾ བྷཝཾ ནིབྦཏྟེནྟོ ཀོལཾཀོལོ ནཱམ, ཏིཀྑཔཉྙོ ཨེཀཾ བྷཝཾ ནིབྦཏྟེནྟོ ཨེཀབཱིཛཱི ནཱམ. ཏཾ པནེཏཾ ཏེསཾ མུདུམཛ྄ཛྷིམཏིཀྑཔཉྙཏཾ པུབྦཧེཏུ ནིཡམེཏི. ཨིམེ ཏཡོཔི སོཏཱཔནྣཱ ཀཱམབྷཝཝསེན ཝུཏྟཱ, རཱུཔཱརཱུཔབྷཝེ པན བཧུཀཱཔི པཊིསནྡྷིཡོ གཎྷནྟི. སཀདཱགཱམིསྶཱཏི པཊིསནྡྷིཝསེན སཀིཾ ཀཱམབྷཝཾ ཨཱགཙྪཏཱིཏི སཀདཱགཱམཱི. ཏསྶ སཀདཱགཱམིསྶ. དིཊྛེཝ དྷམྨེ ཨརཧཱཏི ཨིམསྨིཾཡེཝ ཨཏྟབྷཱཝེ ཨརཧཱ. ཨརཧནྟིཔི པཱཋོ. ཨིདྷ ནིཊྛཱཏི ཀཱམབྷཝཾ སཾསརནྟེཡེཝ སནྡྷཱཡ ཝུཏྟཾ. རཱུཔཱརཱུཔབྷཝེ ཨུཔྤནྣཱ པན ཨརིཡཱ ཀཱམབྷཝེ ན ཨུཔྤཛྫནྟི, ཏཏྠེཝ པརིནིབྦཱཡནྟི.

ཨནྟརཱཔརིནིབྦཱཡིསྶཱཏི ཨཱཡུཝེམཛ྄ཛྷསྶ ཨནྟརཱཡེཝ ཀིལེསཔརིནིབྦཱནེན པརིནིབྦཱཡནཏོ ཨནྟརཱཔརིནིབྦཱཡཱི. སོ པན ཨུཔྤནྣསམནནྟརཱ པརིནིབྦཱཡཱི, ཨཱཡུཝེམཛ྄ཛྷཾ ཨཔྤཏྭཱ པརིནིབྦཱཡཱི, ཨཱཡུཝེམཛ྄ཛྷཾ པཏྭཱ པརིནིབྦཱཡཱིཏི ཏིཝིདྷོ ཧོཏི. ཏསྶ ཨནྟརཱཔརིནིབྦཱཡིསྶ ཨནཱགཱམིནོ. ཨུཔཧཙྩཔརིནིབྦཱཡིསྶཱཏི ཨཱཡུཝེམཛ྄ཛྷཾ ཨཏིཀྐམིཏྭཱ ཝཱ ཀཱལཀིརིཡཾ ཨུཔགནྟྭཱ ཝཱ ཀིལེསཔརིནིབྦཱནེན པརིནིབྦཱཡནྟསྶ ཨནཱགཱམིནོ. ཨསངྑཱརཔརིནིབྦཱཡིསྶཱཏི ཨསངྑཱརེན ཨཔྤཡོགེན ཨདྷིམཏྟཔྤཡོགཾ ཨཀཏྭཱཝ ཀིལེསཔརིནིབྦཱནེན པརིནིབྦཱཡནདྷམྨསྶ ཨནཱགཱམིནོ. སསངྑཱརཔརིནིབྦཱཡིསྶཱཏི སསངྑཱརེན དུཀྑེན ཀསིརེན ཨདྷིམཏྟཔྤཡོགཾ ཀཏྭཱཝ ཀིལེསཔརིནིབྦཱནེན པརིནིབྦཱཡནདྷམྨསྶ ཨནཱགཱམིནོ. ཨུདྡྷཾསོཏསྶ ཨཀནིཊྛགཱམིནོཏི ཨུདྡྷཾཝཱཧིབྷཱཝེན ཨུདྡྷམསྶ ཏཎྷཱསོཏཾ ཝཊྚསོཏཾ ཝཱཏི ཨུདྡྷཾསོཏོ, ཨུདྡྷཾ ཝཱ གནྟྭཱ པཊིལབྷིཏབྦཏོ ཨུདྡྷམསྶ མགྒསོཏནྟི ཨུདྡྷཾསོཏོ, ཨཀནིཊྛཾ གཙྪཏཱིཏི ཨཀནིཊྛགཱམཱི. ཏསྶ ཨུདྡྷཾསོཏསྶ ཨཀནིཊྛགཱམིནོ ཨནཱགཱམིསྶ. ཨཡཾ པན ཨནཱགཱམཱི ཙཏུཔྤབྷེདོ – ཡོ ཨཝིཧཏོ པཊྛཱཡ ཙཏྟཱརོ བྲཧྨལོཀེ སོདྷེཏྭཱ ཨཀནིཊྛཾ གནྟྭཱ པརིནིབྦཱཡཏི, ཨཡཾ ཨུདྡྷཾསོཏོ ཨཀནིཊྛགཱམཱི ནཱམ. ཡོ ཧེཊྛཱ ཏཡོ བྲཧྨལོཀེ སོདྷེཏྭཱ སུདསྶཱིབྲཧྨལོཀེ ཋཏྭཱ པརིནིབྦཱཡཏི, ཨཡཾ ཨུདྡྷཾསོཏོ ན ཨཀནིཊྛགཱམཱི ནཱམ. ཡོ ཨིཏོ ཨཀནིཊྛམེཝ གནྟྭཱ པརིནིབྦཱཡཏི, ཨཡཾ ན ཨུདྡྷཾསོཏོ ཨཀནིཊྛགཱམཱི ནཱམ. ཡོ ཧེཊྛཱ ཙཏཱུསུ བྲཧྨལོཀེསུ ཏཏྠ ཏཏྠེཝ པརིནིབྦཱཡཏི, ཨཡཾ ན ཨུདྡྷཾསོཏོ ན ཨཀནིཊྛགཱམཱི ནཱམཱཏི. ཨིམེ པཉྩ ཨནཱགཱམིནོ སུདྡྷཱཝཱསཾ གཧེཏྭཱ ཝུཏྟཱ. ཨནཱགཱམིནོ པན རཱུཔརཱགཱརཱུཔརཱགཱནཾ ཨཔྤཧཱིནཏྟཱ ཨཱཀངྑམཱནཱ སེསརཱུཔཱརཱུཔབྷཝེསུཔི ནིབྦཏྟནྟི. སུདྡྷཱཝཱསེ ནིབྦཏྟཱ པན ཨཉྙཏྠ ན ནིབྦཏྟནྟི. ཨཝེཙྩཔྤསནྣཱཏི ཨརིཡམགྒཝསེན ཛཱནིཏྭཱ བུཛ྄ཛྷིཏྭཱ ཨཙལཔྤསཱདེན པསནྣཱ. སོཏཱཔནྣཱཏི ཨརིཡམགྒསོཏཾ ཨཱཔནྣཱ. ཨིམིནཱ སབྦེཔི ཨརིཡཕལཊྛཱ པུགྒལཱ གཧིཏཱཏི.

བྷཝཝིབྷཝདིཊྛིནིདྡེསཝཎྞནཱ ནིཊྛིཏཱ.

སདྡྷམྨཔྤཀཱསིནིཡཱ པཊིསམྦྷིདཱམགྒཊྛཀཐཱཡ

དིཊྛིཀཐཱཝཎྞནཱ ནིཊྛིཏཱ.

༣. ཨཱནཱཔཱནསྶཏིཀཐཱ

༡. གཎནཝཱརཝཎྞནཱ

༡༥༢. ཨིདཱནི དིཊྛིཀཐཱནནྟརཾ ཀཐིཏཱཡ ཨཱནཱཔཱནསྶཏིཀཐཱཡ ཨཔུབྦཏྠཱནུཝཎྞནཱ ཨནུཔྤཏྟཱ. ཨཡཉྷི ཨཱནཱཔཱནསྶཏིཀཐཱ དིཊྛིཀཐཱཡ སུཝིདིཏདིཊྛཱདཱིནཝསྶ མིཙྪཱདིཊྛིམལཝིསོདྷནེན སུཝིསུདྡྷཙིཏྟསྶ ཡཐཱབྷཱུཏཱཝབོདྷཱཡ སམཱདྷིབྷཱཝནཱ སུཀརཱ ཧོཏི, སབྦསམཱདྷིབྷཱཝནཱསུ ཙ སབྦསབྦཉྙུབོདྷིསཏྟཱནཾ བོདྷིམཱུལེ ཨིམིནཱཝ སམཱདྷིནཱ སམཱཧིཏཙིཏྟཱནཾ ཡཐཱབྷཱུཏཱཝབོདྷཏོ ཨཡམེཝ སམཱདྷིབྷཱཝནཱ པདྷཱནཱཏི ཙ དིཊྛིཀཐཱནནྟརཾ ཀཐིཏཱ. ཏཏྠ སོལ༹སཝཏྠུཀཾ ཨཱནཱཔཱནསྶཏིསམཱདྷིཾ བྷཱཝཡཏོ སམདྷིཀཱནི དྭེ ཉཱཎསཏཱནི ཨུཔྤཛྫནྟཱིཏི ཉཱཎགཎནུདྡེསོ, ཨཊྛ པརིཔནྠེ ཉཱཎཱནཱིཏིཨཱདི ཉཱཎགཎནནིདྡེསོ, ཀཏམཱནི ཨཊྛ པརིཔནྠེ ཉཱཎཱནཱིཏིཨཱདི. ཨིམཱནི ཨེཀཝཱིསཏི ཝིམུཏྟིསུཁེ ཉཱཎཱནཱིཏིཔརིཡནྟཾ སབྦཉཱཎཱནཾ ཝིཏྠཱརནིདྡེསོ, ཨནྟེ སོལ༹སཝཏྠུཀཾ ཨཱནཱཔཱནསྶཏིསམཱདྷིཾ བྷཱཝཡཏོཏིཨཱདི ནིགམནནྟི ཨེཝཾ ཏཱཝ པཱལི༹ཝཝཏྠཱནཾ ཝེདིཏབྦཾ.

ཏཏྠ གཎནུདྡེསེ གཎནཝཱརེ ཏཱཝ སོལ༹སཝཏྠུཀནྟི དཱིགྷཾ རསྶཾ སབྦཀཱཡཔཊིསཾཝེདཱི པསྶམྦྷཡཾ ཀཱཡསངྑཱརནྟི ཀཱཡཱནུཔསྶནཱཙཏུཀྐཾ, པཱིཏིཔཊིསཾཝེདཱི སུཁཔཊིསཾཝེདཱི ཙིཏྟསངྑཱརཔཊིསཾཝེདཱི པསྶམྦྷཡཾ ཙིཏྟསངྑཱརནྟི ཝེདནཱནུཔསྶནཱཙཏུཀྐཾ, ཙིཏྟཔཊིསཾཝེདཱི ཨབྷིཔྤམོདཡཾ ཙིཏྟཾ སམཱདཧཾ ཙིཏྟཾ ཝིམོཙཡཾ ཙིཏྟནྟི ཙིཏྟཱནུཔསྶནཱཙཏུཀྐཾ, ཨནིཙྩཱནུཔསྶཱི ཝིརཱགཱནུཔསྶཱི ནིརོདྷཱནུཔསྶཱི པཊིནིསྶགྒཱནུཔསྶཱིཏི དྷམྨཱནུཔསྶནཱཙཏུཀྐནྟི ཨིམེསཾ ཙཏུནྣཾ ཙཏུཀྐཱནཾ ཝསེན སོལ༹ས ཝཏྠཱུནི པཏིཊྛཱ ཨཱརམྨཎཱནི ཨསྶཱཏི སོལ༹སཝཏྠུཀོ. ཏཾ སོལ༹སཝཏྠུཀཾ. སམཱསཝསེན པནེཏྠ ཝིབྷཏྟིལོཔོ ཀཏོ. ཨཱནནྟི ཨབྦྷནྟརཾ པཝིསནཝཱཏོ. ཨཔཱནནྟི བཧིནིཀྑམནཝཱཏོ. ཀེཙི པན ཝིཔརིཡཱཡེན ཝདནྟི. ཨཔཱནཉྷི ཨཔེཏཾ ཨཱནཏོཏི ཨཔཱནནྟི ཝུཙྩཏི, ནིདྡེསེ (པཊི. མ. ༡.༡༦༠) པན ནཱ-ཀཱརསྶ དཱིགྷཏྟམཛ྄ཛྷུཔེཀྑིཏྭཱ ཨཱཔཱནནྟི. ཏསྨིཾ ཨཱནཱཔཱནེ སཏི ཨཱནཱཔཱནསྶཏི, ཨསྶཱསཔསྶཱསཔརིགྒཱཧིཀཱཡ སཏིཡཱ ཨེཏཾ ཨདྷིཝཙནཾ. ཨཱནཱཔཱནསྶཏིཡཱ ཡུཏྟོ སམཱདྷི, ཨཱནཱཔཱནསྶཏིཡཾ ཝཱ སམཱདྷི ཨཱནཱཔཱནསྶཏིསམཱདྷི. བྷཱཝཡཏོཏི ནིབྦེདྷབྷཱགིཡཾ བྷཱཝེནྟསྶ. སམདྷིཀཱནཱིཏི སཧ ཨདྷིཀེན ཝཏྟནྟཱིཏི སམདྷིཀཱནི, སཱཏིརེཀཱནཱིཏི ཨཏྠོ. མ-ཀཱརོ པནེཏྠ པདསནྡྷིཀརོ. ཀེཙི པན ‘‘སཾཨདྷིཀཱནཱི’’ཏི ཝདནྟི. ཨེཝཾ སཏི དྭེ ཉཱཎསཏཱནིཡེཝ ཨདྷིཀཱནཱིཏི ཨཱཔཛྫཏི, ཏཾ ན ཡུཛྫཏི. ཨིམཱནི ཧི ཝཱིསཏིཨདྷིཀཱནི དྭེ ཉཱཎསཏཱནི ཧོནྟཱིཏི.

པརིཔནྠེ ཉཱཎཱནཱིཏི པརིཔནྠཾ ཨཱརམྨཎཾ ཀཏྭཱ པཝཏྟཉཱཎཱནི. ཏཐཱ ཨུཔཀཱརེ ཨུཔཀྐིལེསེ ཉཱཎཱནི. ཝོདཱནེ ཉཱཎཱནཱིཏི ཝོདཱཡཏི, ཏེན ཙིཏྟཾ པརིསུདྡྷཾ ཧོཏཱིཏི ཝོདཱནཾ. ཀིཾ ཏཾ? ཉཱཎཾ. ‘‘ཝོདཱནཉཱཎཱནཱི’’ཏི ཝཏྟབྦེ ‘‘སུཏམཡེ ཉཱཎ’’ནྟིཨཱདཱིསུ (པཊི. མ. མཱཏིཀཱ ༡.༡; པཊི. མ. ༡.༡) ཝིཡ ‘‘ཝོདཱནེ ཉཱཎཱནཱི’’ཏི ཝུཏྟཾ. སཏོ སམྤཛཱནོ ཧུཏྭཱ ཀརོཏཱིཏི སཏོཀཱརཱི, ཏསྶ སཏོཀཱརིསྶ ཉཱཎཱནི. ནིབྦིདཱཉཱཎཱནཱིཏི ནིབྦིདཱབྷཱུཏཱནི ཉཱཎཱནི. ནིབྦིདཱནུལོམཉཱཎཱནཱིཏི ནིབྦིདཱཡ ཨནུཀཱུལཱནི ཉཱཎཱནི. ནིབྦིདཱནུལོམིཉཱཎཱནཱིཏིཔི པཱཋོ, ནིབྦིདཱནུལོམོ ཨེཏེསཾ ཨཏྠཱིཏི ནིབྦིདཱནུལོམཱིཏི ཨཏྠོ. ནིབྦིདཱཔཊིཔྤསྶདྡྷིཉཱཎཱནཱིཏི ནིབྦིདཱཡ པཊིཔྤསྶདྡྷིཡཾ ཉཱཎཱནི. ཝིམུཏྟིསུཁེ ཉཱཎཱནཱིཏི ཝིམུཏྟིསུཁེན སམྤཡུཏྟཱནི ཉཱཎཱནི.

ཀཏམཱནི ཨཊྛཱཏིཨཱདཱིཧི པརིཔནྠཨུཔཀཱརཱནཾ པཊིཔཀྑཝིཔཀྑཡུགལཏྟཱ ཏེསུ ཉཱཎཱནི སཧེཝ ནིདྡིཊྛཱནི. ཀཱམཙྪནྡནེཀྑམྨཱདཱིནི ཧེཊྛཱ ཝུཏྟཏྠཱནི. ཨུཔཀཱརནྟི ཙ ལིངྒཝིཔལླཱསཝསེན ནཔུཾསཀཝཙནཾ ཀཏཾ. སབྦེཔི ཨཀུསལཱ དྷམྨཱཏི ཝུཏྟཱཝསེསཱ ཡེ ཀེཙི ཨཀུསལཱ དྷམྨཱ. ཏཐཱ སབྦེཔི ནིབྦེདྷབྷཱགིཡཱ ཀུསལཱ དྷམྨཱ. ‘‘པརིཔནྠོ ཨུཔཀཱར’’ནྟི ཙ ཏཾ ཏདེཝ ཨཔེཀྑིཏྭཱ ཨེཀཝཙནཾ ཀཏཾ. ཨེཏྠ ཙ པརིཔནྠེ ཉཱཎཱནིཨུཔཀཱརེ ཉཱཎཱནི ཙ པུཙྪིཏྭཱ ཏེསཾ ཨཱརམྨཎཱནེཝ ཝིསྶཛྫིཏྭཱ ཏེཧེཝ ཏཱནི ཝིསྶཛྫིཏཱནི ཧོནྟཱིཏི ཏདཱརམྨཎཱནི ཉཱཎཱནི ནིགམེཏྭཱ དསྶེསི. ཨུཔཀྐིལེསེ ཉཱཎཱདཱིསུཔི ཨེསེཝ ནཡོ.

གཎནཝཱརཝཎྞནཱ ནིཊྛིཏཱ.

༢. སོལ༹སཉཱཎནིདྡེསཝཎྞནཱ

༡༥༣. སོལ༹སཧི ཨཱཀཱརེཧཱིཏི ཨུབྷཡཔཀྑཝསེན ཝུཏྟེཧི སོལ༹སཧི ཉཱཎཀོཊྛཱསེཧི. ཨུདུཙིཏཾ ཙིཏྟཾ སམུདུཙིཏནྟི ཨུཔཙཱརབྷཱུམིཡཾ ཙིཏྟཾ ཨུདྡྷཾ ཨུཙིཏཾ, སམྨཱ ཨུདྡྷཾ ཨུཙིཏཾ, ཨུཔརཱུཔརི ཀཏཔརིཙཡཾ སམྨཱ ཨུཔརཱུཔརི ཀཏཔརིཙཡནྟི ཨཏྠོ. ཨུདུཛིཏཾ ཙིཏྟཾ སམུདུཛིཏནྟིཔི པཱཋོ. ཨུཔརིབྷཱཝཱཡ ཛིཏཾ, ཨུཔརིབྷཱཝཀརེཧི ཝཱ ཉཱཎེཧི ཛིཏཾ ཨུདུཛིཏཾ. སམུདུཛིཏནྟི སམཱ ཨུཔརིབྷཱཝཱཡ, ཨུཔརིབྷཱཝཀརེཧི ཝཱ ཉཱཎེཧི ཛིཏཾ. སམཱཏི ཙེཏྠ ཝིསམབྷཱཝཔཊིཀྑེཔོ. ཨིམསྨིཾ པཱཋེ ཨུ, དུ-ཨིཏི དྭེ དྭེ ཨུཔསགྒཱ ཧོནྟི. ཨུརཱུཛིཏཾ ཙིཏྟཾ སམྨཱརཱུཛིཏནྟིཔི པཱཋོ. ཨེཏྠཱཔི ཛིཏཏྠོཡེཝ. ཨུརཱུ ཨརཱུཏི ཨིདཾ པན ནིཔཱཏམཏྟམེཝཱཏི ཝདནྟི. ཝཱིཎོཔམཊྛཀཐཱཡ ཏཛྫིཏཾ སུཏཛྫིཏནྟི ཙ ཨཏྠོ ཝུཏྟོ, སོ ཨིདྷ ན ཡུཛྫཏི. ཨེཀཏྟེ སནྟིཊྛཏཱིཏི ཨུཔཙཱརབྷཱུམིཡཾ ཏཱཝ ནཱནཱརམྨཎཝིཀྑེཔཱབྷཱཝེན ཨེཀཏྟེ པཏིཊྛཱཏི. ནིཡྻཱནཱཝརཎཊྛེན ནཱིཝརཎཱཏི ཨེཏྠ ཨརཏིཔི སབྦེཔི ཨཀུསལཱ ཨཱཝརཎཊྛེན ནཱིཝརཎཱཏི ཝུཏྟཱ. ནིཡྻཱནཱཝརཎཊྛེནཱཏི ནིཡྻཱནཱནཾ ཨཱགམནམགྒཔིདཧནཊྛེན. ནིཡྻཱནཝཱརཎཊྛེནཱཏིཔི པཱཋོ, ནིཡྻཱནཱནཾ པཊིཀྑེཔནཊྛེནཱཏི ཨཏྠོ. ནེཀྑམྨཾ ཨརིཡཱནཾ ནིཡྻཱནནྟི མགྒཊྛཱནཾ ཨརིཡཱནཾ ནིཡྻཱནསངྑཱཏསྶ ཨརིཡམགྒསྶ ཧེཏུཏྟཱ ཕལཱུཔཙཱརེན ཨརིཡཱནཾ ནིཡྻཱནཾ. ཏེན ཙ ཧེཏུབྷཱུཏེན མགྒཀྑཎེ ཨརིཡཱ ནིཡྻནྟི ནིགཙྪནྟི. ཀེཙི པན ‘‘ནིཡྻཱནནྟི མགྒོ’’ཏི ཝདནྟི. ཨིདྷ ཨུཔཙཱརསྶ ཨདྷིཔྤེཏཏྟཱ མགྒཀྑཎེ ཙ ཨཱལོཀསཉྙཱཡ སབྦཀུསལདྷམྨཱནཉྩ ཨབྷཱཝཱ ཏཾ ན ཡུཛྫཏི. ནིཝུཏཏྟཱཏི པཊིཙྪནྣཏྟཱ. ནཔྤཛཱནཱཏཱིཏི པུགྒལཝསེན ཝུཏྟཾ.

ཝིསུདྡྷཙིཏྟསྶཱཏི ཨུཔཙཱརབྷཱུམིཡཾཡེཝ. ཁཎིཀསམོདྷཱནཱཏི ཙིཏྟཀྑཎེ ཙིཏྟཀྑཎེ ཨུཔྤཛྫནཏོ ཁཎོ ཨེཏེསཾ ཨཏྠཱིཏི ཁཎིཀཱ, ཨུཔཀྐིལེསཱ, ཁཎིཀཱནཾ སམོདྷཱནོ སམཱགམོ པབནྡྷོ ཁཎིཀསམོདྷཱནོ. ཏསྨཱ ཁཎིཀསམོདྷཱནཱ, ཨུཔྤཛྫམཱནཱ ཨུཔཀྐིལེསཱ ཁཎིཀཔྤབནྡྷཝསེན ཁཎིཀཔརམྤརཱཝསེན ཨུཔྤཛྫནྟི, ན ཨེཀཙིཏྟཀྑཎཝསེནཱཏི ཝུཏྟཾ ཧོཏི.

སོལ༹སཉཱཎནིདྡེསཝཎྞནཱ ནིཊྛིཏཱ.

༣. ཨུཔཀྐིལེསཉཱཎནིདྡེསཝཎྞནཱ

པཋམཙྪཀྐཾ

༡༥༤. པཋམཙྪཀྐེ ཨསྶཱསཱདིམཛ྄ཛྷཔརིཡོསཱནནྟི ཨབྦྷནྟརཔཝིསནཝཱཏསྶ ནཱསིཀགྒཾ ཝཱ མུཁནིམིཏྟཾ ཝཱ ཨཱདི, ཧདཡཾ མཛ྄ཛྷཾ, ནཱབྷི པརིཡོསཱནཾ. ཏཾ ཏསྶ ཨཱདིམཛ྄ཛྷཔརིཡོསཱནཾ སཏིཡཱ ཨནུགཙྪཏོ ཡོགིསྶ ཋཱནནཱནཏྟཱནུགམནེན ཙིཏྟཾ ཨཛ྄ཛྷཏྟཾ ཝིཀྑེཔཾ གཙྪཏི, ཏཾ ཨཛ྄ཛྷཏྟཝིཀྑེཔགཏཾ ཙིཏྟཾ ཨེཀཏྟེ ཨསཎྛཧནཏོ སམཱདྷིསྶ པརིཔནྠོ. པསྶཱསཱདིམཛ྄ཛྷཔརིཡོསཱནནྟི བཧིནིཀྑམནཝཱཏསྶ ནཱབྷི ཨཱདི, ཧདཡཾ མཛ྄ཛྷཾ, ནཱསིཀགྒཾ ཝཱ མུཁནིམིཏྟཾ ཝཱ བཧིཨཱཀཱསོ ཝཱ པརིཡོསཱནཾ. ཡོཛནཱ པནེཏྠ ཝུཏྟནཡེནེཝ ཝེདིཏབྦཱ. ཨསྶཱསཔཊིཀངྑནཱ ནིཀནྟིཏཎྷཱཙརིཡཱཏི ‘‘ནཱསིཀཱཝཱཏཱཡཏྟམིདཾ ཀམྨཊྛཱན’’ནྟི སལླཀྑེཏྭཱ ཨོལཱ༹རིཀོལཱ༹རིཀསྶ ཨསྶཱསསྶ པཏྠནཱསངྑཱཏཱ ནིཀཱམནཱ ཨེཝ ཏཎྷཱཔཝཏྟི. ཏཎྷཱཔཝཏྟིཡཱ སཏི ཨེཀཏྟེ ཨསཎྛཧནཏོ སམཱདྷིསྶ པརིཔནྠོ. པསྶཱསཔཊིཀངྑནཱ ནིཀནྟཱིཏི པུན ཨསྶཱསཔུབྦཀསྶ པསྶཱསསྶ པཏྠནཱསངྑཱཏཱ ནིཀནྟི. སེསཾ ཝུཏྟནཡེནེཝ ཡོཛེཏབྦཾ. ཨསྶཱསེནཱབྷིཏུནྣསྶཱཏི ཨཏིདཱིགྷཾ ཨཏིརསྶཾ ཝཱ ཨསྶཱསཾ ཀརོནྟསྶ ཨསྶཱསམཱུལཀསྶ ཀཱཡཙིཏྟཀིལམཐསྶ སབྦྷཱཝཏོ ཏེན ཨསྶཱསེན ཝིདྡྷསྶ པཱིལི༹ཏསྶ. པསྶཱསཔཊིལཱབྷེ མུཙྪནཱཏི ཨསྶཱསེན པཱིལི༹ཏཏྟཱཡེཝ པསྶཱསེ ཨསྶཱདསཉྙིནོ པསྶཱསཾ པཏྠཡཏོ ཏསྨིཾ པསྶཱསཔཊིལཱབྷེ རཛྫནཱ. པསྶཱསམཱུལཀེཔི ཨེསེཝ ནཡོ.

ཝུཏྟསྶེཝ ཨཏྠསྶ ཨནུཝཎྞནཏྠཾ ཝུཏྟེསུ གཱཐཱབནྡྷེསུ ཨནུགཙྪནཱཏི ཨནུགཙྪམཱནཱ. སཏཱིཏི ཨཛ྄ཛྷཏྟབཧིདྡྷཱཝིཀྑེཔཧེཏུབྷཱུཏཱ སཏི. ཝིཀྑིཔཏི ཨནེན ཙིཏྟནྟི ཝིཀྑེཔོ. ཀོ སོ? ཨསྶཱསོ. ཨཛ྄ཛྷཏྟཾ ཝིཀྑེཔོ ཨཛ྄ཛྷཏྟཝིཀྑེཔོ, ཏསྶ ཨཱཀངྑནཱ ཨཛ྄ཛྷཏྟཝིཀྑེཔཱཀངྑནཱ, ཨསམྨཱམནསིཀཱརཝསེན ཨཛ྄ཛྷཏྟཝིཀྑེཔཀསྶ ཨསྶཱསསྶ ཨཱཀངྑནཱཏི ཝུཏྟཾ ཧོཏི. ཨེཏེནེཝ ནཡེན བཧིདྡྷཱཝིཀྑེཔཔཏྠནཱ ཝེདིཏབྦཱ. ཡེཧཱིཏི ཡེཧི ཨུཔཀྐིལེསེཧི. ཝིཀྑིཔྤམཱནསྶཱཏི ཝིཀྑིཔིཡམཱནསྶ ཝིཀྑེཔཾ ཨཱཔཱདིཡམཱནསྶ. ནོ ཙ ཙིཏྟཾ ཝིམུཙྩཏཱིཏི ཙིཏྟཾ ཨསྶཱསཔསྶཱསཱརམྨཎེ ཙ ནཱདྷིམུཙྩཏི, པཙྩནཱིཀདྷམྨེཧི ཙ ན ཝིམུཙྩཏི. ཙིཏྟཾ ནོ ཙ ཝིམུཙྩཏི པརཔཏྟིཡཱ ཙ ཧོནྟཱིཏི སམྦནྡྷོ. ཝིམོཀྑཾ ཨཔྤཛཱནནྟཱཏི སོ ཝཱ ཨཉྙོ ཝཱ ཨཱརམྨཎཱདྷིམུཏྟིཝིམོཀྑཉྩ པཙྩནཱིཀཝིམུཏྟིཝིམོཀྑཉྩ ཨེཝཾ ཨཔྤཛཱནནྟཱ. པརཔཏྟིཡཱཏི པརཔཙྩཡཾ པརསདྡཧནཾ ཨརཧནྟི, ན ཨཏྟཔཙྩཀྑཾ ཉཱཎནྟི ‘‘པརཔཙྩཡིཀཱ’’ཏི ཝཏྟབྦེ ‘‘པརཔཏྟིཡཱ’’ཏི ཝུཏྟཾ. ཨཏྠོ པན སོཡེཝ.

དུཏིཡཙྪཀྐཾ

༡༥༥. དུཏིཡཙྪཀྐེ ནིམིཏྟནྟི ཨསྶཱསཔསྶཱསཱནཾ ཕུསནཊྛཱནཾ. ཨསྶཱསཔསྶཱསཱ ཧི དཱིགྷནཱསིཀསྶ ནཱསཱཔུཊཾ གྷཊྚེནྟཱ པཝཏྟནྟི, རསྶནཱསིཀསྶ ཨུཏྟརོཊྛཾ. ཡདི ཧི ཨཡཾ ཡོགཱི ཏཾ ནིམིཏྟམེཝ ཨཱཝཛྫཏི, ཏསྶ ནིམིཏྟམེཝ ཨཱཝཛྫམཱནསྶ ཨསྶཱསེ ཙིཏྟཾ ཝིཀམྤཏི, ན པཏིཊྛཱཏཱིཏི ཨཏྠོ. ཏསྶ ཏསྨིཾ ཙིཏྟེ ཨཔྤཏིཊྛིཏེ སམཱདྷིསྶ ཨབྷཱཝཏོ ཏཾ ཝིཀམྤནཾ སམཱདྷིསྶ པརིཔནྠོ. ཡདི ཨསྶཱསམེཝ ཨཱཝཛྫཏི, ཏསྶ ཙིཏྟཾ ཨབྦྷནྟརཔཝེསནཝསེན ཝིཀྑེཔཾ ཨཱཝཧཏི, ནིམིཏྟེ ན པཏིཊྛཱཏི, ཏསྨཱ ནིམིཏྟེ ཝིཀམྤཏི. ཨིམིནཱ ནཡེན སེསེསུཔི ཡོཛནཱ ཀཱཏབྦཱ. གཱཐཱསུ ཝིཀྑིཔྤཏེཏི ཝིཀྑིཔཱིཡཏི ཝིཀྑེཔཾ ཨཱཔཱདཱིཡཏི.

ཏཏིཡཙྪཀྐཾ

༡༥༦. ཏཏིཡཙྪཀྐེ ཨཏཱིཏཱནུདྷཱཝནཾ ཙིཏྟནྟི ཕུསནཊྛཱནཾ ཨཏིཀྐམིཏྭཱ གཏཾ ཨསྶཱསཾ ཝཱ པསྶཱསཾ ཝཱ ཨནུགཙྪམཱནཾ ཙིཏྟཾ. ཝིཀྑེཔཱནུཔཏིཏནྟི ཝིཀྑེཔེན ཨནུགཏཾ, ཝིཀྑེཔཾ ཝཱ སཡཾ ཨནུཔཏིཏཾ ཨནུགཏཾ. ཨནཱགཏཔཊིཀངྑནཾ ཙིཏྟནྟི ཕུསནཊྛཱནཾ ཨཔྤཏྟཾ ཨསྶཱསཾ ཝཱ པསྶཱསཾ ཝཱ པཊིཀངྑམཱནཾ པཙྩཱསཱིསམཱནཾ ཙིཏྟཾ. ཝིཀམྤིཏནྟི ཏསྨིཾ ཨཔྤཏིཊྛཱནེནེཝ ཝིཀྑེཔེན ཝིཀམྤིཏཾ. ལཱིནནྟི ཨཏིསིཐིལཝཱིརིཡཏཱདཱིཧི སངྐུཙིཏཾ. ཀོསཛྫཱནུཔཏིཏནྟི ཀུསཱིཏབྷཱཝཱནུགཏཾ. ཨཏིཔགྒཧིཏནྟི ཨཙྩཱརདྡྷཝཱིརིཡཏཱདཱིཧི ཨཏིཨུསྶཱཧིཏཾ. ཨུདྡྷཙྩཱནུཔཏིཏནྟི ཝིཀྑེཔཱནུགཏཾ. ཨབྷིནཏནྟི ཨསྶཱདཝཏྠཱུསུ བྷུསཾ ནཏཾ ཨལླཱིནཾ. ཨཔནཏནྟི ནིརསྶཱདཝཏྠཱུསུ པཏིཧཏཾ, ཏཏོ ཨཔགཏཾ ཝཱ, ཨཔགཏནཏཾ ཝཱ, ན ཏཏོ ཨཔགཏནྟི ཨཏྠོ. རཱགཱནུཔཏིཏནྟི ཨེཏྠ ཨསྶཱསཔསྶཱསནིམིཏྟཾ མནསིཀརོཏོ ཨུཔྤནྣཔཱིཏིསུཁེ ཝཱ པུབྦེ ཧསིཏལཔིཏཀཱིལི༹ཏཝཏྠཱུསུ ཝཱ རཱགོ ཨནུཔཏཏི. བྱཱཔཱདཱནུཔཏིཏནྟི ཨེཏྠ མནསིཀཱརེ ནིརསྶཱདགཏཙིཏྟསྶ ཨུཔྤནྣདོམནསྶཝསེན ཝཱ པུབྦེ སམུདཱཙིཎྞེསུ ཨཱགྷཱཏཝཏྠཱུསུ ཝཱ བྱཱཔཱདོ ཨནུཔཏཏི. གཱཐཱསུ ན སམཱདྷིཡཏཱིཏི ན སམཱཧིཏཾ ཧོཏི. ཨདྷིཙིཏྟནྟི ཙིཏྟསཱིསེན ནིདྡིཊྛོ ཨདྷིཀོ སམཱདྷི.

༡༥༧. ཨེཏྟཱཝཏཱ ཏཱིཧི ཚཀྐེཧི ཨཊྛཱརས ཨུཔཀྐིལེསེ ནིདྡིསིཏྭཱ ཨིདཱནི ཏེསཾ ཨུཔཀྐིལེསཱནཾ སམཱདྷིསྶ པརིཔནྠབྷཱཝསཱདྷནེན ཨཱདཱིནཝཾ དསྶེནྟོ པུན ཨསྶཱསཱདིམཛ྄ཛྷཔརིཡོསཱནནྟིཨཱདིམཱཧ. ཏཏྠ ཀཱཡོཔི ཙིཏྟམྤི སཱརདྡྷཱ ཙ ཧོནྟཱིཏི ཝིཀྑེཔསམུཊྛཱནརཱུཔཱནཾ ཝསེན རཱུཔཀཱཡོཔི, ཝིཀྑེཔསནྟཏིཝསེན ཙིཏྟམྤི མཧཏཱ ཁོབྷེན ཁུབྷིཏཱ སདརཐཱ ཙ ཧོནྟི. ཏཏོ མནྡཏརེན ཨིཉྫིཏཱ ཀམྤིཏཱ, ཏཏོ མནྡཏརེན ཕནྡིཏཱ ཙལིཏཱ ཧོནྟི. བལཝཱཔི མཛ྄ཛྷིམོཔི མནྡོཔི ཁོབྷོ ཧོཏིཡེཝ, ན སཀྐཱ ཁོབྷེན ན བྷཝིཏུནྟི ཝུཏྟཾ ཧོཏི. ཙིཏྟཾ ཝིཀམྤིཏཏྟཱཏི ཙིཏྟསྶ ཝིཀམྤིཏཏྟཱ. གཱཐཱསུ པརིཔུཎྞཱ ཨབྷཱཝིཏཱཏི ཡཐཱ པརིཔུཎྞཱ ཧོཏི, ཏཐཱ ཨབྷཱཝིཏཱ. ཨིཉྫིཏོཏི ཀམྤིཏོ. ཕནྡིཏོཏི མནྡཀམྤིཏོ. ཧེཊྛཱ ནཱིཝརཎཱནཾ ཨནནྟརཏྟཱ ‘‘ཨིམེཧི ཙ པན ནཱིཝརཎེཧཱི’’ཏི (པཊི. མ. ༡.༡༥༣) ཨཙྩནྟསམཱིཔནིདསྶནཝཙནཾ ཀཏཾ. ཨིདྷ པན ནིགམནེ ནཱིཝརཎཱནཾ སནྟརཏྟཱ ཏེཧི ཙ པན ནཱིཝརཎེཧཱིཏི པརམྨུཁནིདསྶནཝཙནཾ ཀཏཾ.

ཨུཔཀྐིལེསཉཱཎནིདྡེསཝཎྞནཱ ནིཊྛིཏཱ.

༤. ཝོདཱནཉཱཎནིདྡེསཝཎྞནཱ

༡༥༨. ཝོདཱནེ ཉཱཎཱནཱིཏི ཝིསུདྡྷཉཱཎཱནི. ཏཾ ཝིཝཛྫཡིཏྭཱཏི ཡཾ པུབྦེ ཝུཏྟཾ ཨཏཱིཏཱནུདྷཱཝནཾ ཙིཏྟཾ ཝིཀྑེཔཱནུཔཏིཏཾ, ཏཾ ཝིཝཛྫཡིཏྭཱཏི སམྦནྡྷིཏབྦཾ. ཨེཀཊྛཱནེ སམཱདཧཏཱིཏི ཨསྶཱསཔསྶཱསཱནཾ ཕུསནཊྛཱནེ སམཾ ཨཱདཧཏི པཏིཊྛཱཔེཏི. ཏཏྠེཝ ཨདྷིམོཙེཏཱིཏི ཨེཀཊྛཱནེཏི ཝུཏྟེ ཨསྶཱསཔསྶཱསཱནཾ ཕུསནཊྛཱནེཡེཝ སནྣིཊྛཔེཏི སནྣིཊྛཱནཾ ཀརོཏི. པགྒཎྷིཏྭཱཏི དྷམྨཝིཙཡཔཱིཏིསམྦོཛ྄ཛྷངྒབྷཱཝནཱཡ པགྒཧེཏྭཱ. ཝིནིགྒཎྷིཏྭཱཏི པསྶདྡྷིསམཱདྷིཨུཔེཀྑཱསམྦོཛ྄ཛྷངྒབྷཱཝནཱཡ ཝིནིགྒཎྷིཏྭཱ. ‘‘སཏིནྡྲིཡཝཱིརིཡིནྡྲིཡེཧི པགྒཧེཏྭཱ, སཏིནྡྲིཡསམཱདྷིནྡྲིཡེཧི ཝིནིགྒཧེཏྭཱ’’ཏིཔི ཝདནྟི. སམྤཛཱནོ ཧུཏྭཱཏི ཨསུབྷབྷཱཝནཱདཱིཧི. པུན སམྤཛཱནོ ཧུཏྭཱཏི མེཏྟཱབྷཱཝནཱདཱིཧི. ཡེན རཱགེན ཨནུཔཏིཏཾ, ཡེན བྱཱཔཱདེན ཨནུཔཏིཏཾ, ཏཾ པཛཧཏཱིཏི སམྦནྡྷོ. ཏཾ ཙིཏྟཾ ཨཱིདིསནྟི སམྤཛཱནནྟོ ཏཔྤཊིཔཀྑེན རཱགཾ པཛཧཏི, བྱཱཔཱདཾ པཛཧཏཱིཏི ཝཱ ཨཏྠོ. པརིསུདྡྷནྟི ནིརུཔཀྐིལེསཾ. པརིཡོདཱཏནྟི པབྷསྶརཾ. ཨེཀཏྟགཏཾ ཧོཏཱིཏི ཏཾ ཏཾ ཝིསེསཾ པཏྟསྶ ཏཾ ཏཾ ཨེཀཏྟཾ གཏཾ ཧོཏི.

ཀཏམེ ཏེ ཨེཀཏྟཱཏི ཨིདྷ ཡུཛྫམཱནཱཡུཛྫམཱནེཔི ཨེཀཏྟེ ཨེཀཏོ ཀཏྭཱ པུཙྪཏི. དཱནཱུཔསགྒུཔཊྛཱནེཀཏྟནྟི དཱནཝཏྠུསངྑཱཏསྶ དཱནསྶ ཨུཔསགྒོ ཝོསཛྫནཾ དཱནཱུཔསགྒོ, དཱནཝཏྠུཔརིཙྩཱགཙེཏནཱ. ཏསྶ ཨུཔཊྛཱནཾ ཨཱརམྨཎཀརཎཝསེན ཨུཔགནྟྭཱ ཋཱནཾ དཱནཱུཔསགྒུཔཊྛཱནཾ, ཏདེཝ ཨེཀཏྟཾ, ཏེན ཝཱ ཨེཀཏྟཾ ཨེཀགྒབྷཱཝོ དཱནཱུཔསགྒུཔཊྛཱནེཀཏྟཾ. དཱནཝོསགྒུཔཊྛཱནེཀཏྟནྟི པཱཋོ སུནྡརཏརོ, སོ ཨེཝཏྠོ. ཨེཏེན པདུདྡྷཱརཝསེན ཙཱགཱནུསྶཏིསམཱདྷི ཝུཏྟོ. པདུདྡྷཱརཝསེན ཝུཏྟོཔི ཙེས ཨིཏརེསཾ ཏིཎྞམྤི ཨེཀཏྟཱནཾ ཨུཔནིསྶཡཔཙྩཡོ ཧོཏི, ཏསྨཱ ཨིདྷ ནིདྡིཊྛནྟི ཝདནྟི. ཝིསཱཁཱཔི ཧི མཧཱཨུཔཱསིཀཱ ཨཱཧ – ‘‘ཨིདྷ, བྷནྟེ, དིསཱསུ ཝསྶཾཝུཊྛཱ བྷིཀྑཱུ སཱཝཏྠིཾ ཨཱགཙྪིསྶནྟི བྷགཝནྟཾ དསྶནཱཡ, ཏེ བྷགཝནྟཾ ཨུཔསངྐམིཏྭཱ པུཙྪིསྶནྟི ‘ཨིཏྠནྣཱམོ, བྷནྟེ, བྷིཀྑུ ཀཱལངྐཏོ, ཏསྶ ཀཱ གཏི, ཀོ ཨབྷིསམྤརཱཡོ’ཏི? ཏཾ བྷགཝཱ བྱཱཀརིསྶཏི སོཏཱཔཏྟིཕལེ ཝཱ སཀདཱགཱམིཕལེ ཝཱ ཨནཱགཱམིཕལེ ཝཱ ཨརཧཏྟེ ཝཱ. ཏྱཱཧཾ ཨུཔསངྐམིཏྭཱ པུཙྪིསྶཱམི ‘ཨཱགཏཔུབྦཱ ནུ ཁོ, བྷནྟེ, ཏེན ཨཡྻེན སཱཝཏྠཱི’ཏི? སཙེ མེ ཝཀྑནྟི ‘ཨཱགཏཔུབྦཱ ཏེན བྷིཀྑུནཱ སཱཝཏྠཱི’ཏི. ནིཊྛམེཏྠ གཙྪིསྶཱམི ནིསྶཾསཡཾ པརིབྷུཏྟཾ ཏེན ཨཡྻེན ཝསྶིཀསཱཊིཀཱ ཝཱ ཨཱགནྟུཀབྷཏྟཾ ཝཱ གམིཀབྷཏྟཾ ཝཱ གིལཱནབྷཏྟཾ ཝཱ གིལཱནུཔཊྛཱཀབྷཏྟཾ ཝཱ གིལཱནབྷེསཛྫཾ ཝཱ དྷུཝཡཱགུ ཝཱཏི. ཏསྶཱ མེ ཏདནུསྶརནྟིཡཱ པཱམོཛྫཾ ཛཱཡིསྶཏི, པམུདིཏཱཡ པཱིཏི ཛཱཡིསྶཏི, པཱིཏིམནཱཡ ཀཱཡོ པསྶམྦྷིསྶཏི, པསྶདྡྷཀཱཡཱ སུཁཾ ཝེདཡིསྶཱམི, སུཁིནིཡཱ ཙིཏྟཾ སམཱདྷིཡིསྶཏི, སཱ མེ བྷཝིསྶཏི ཨིནྡྲིཡབྷཱཝནཱ བལབྷཱཝནཱ བོཛ྄ཛྷངྒབྷཱཝནཱ’’ཏི (མཧཱཝ. ༣༥༡). ཨཐ ཝཱ ཨེཀཏྟེསུ པཋམཾ ཨུཔཙཱརསམཱདྷིཝསེན ཝུཏྟཾ, དུཏིཡཾ ཨཔྤནཱསམཱདྷིཝསེན, ཏཏིཡཾ ཝིཔསྶནཱཝསེན, ཙཏུཏྠཾ མགྒཕལཝསེནཱཏི ཝེདིཏབྦཾ. སམཐསྶ ནིམིཏྟཾ སམཐནིམིཏྟཾ. ཝཡོ བྷངྒོ ཨེཝ ལཀྑཎཾ ཝཡལཀྑཎཾ. ནིརོདྷོ ནིབྦཱནཾ. སེསམེཏེསུ ཏཱིསུ ཝུཏྟནཡེནེཝ ཡོཛེཏབྦཾ.

ཙཱགཱདྷིམུཏྟཱནནྟི དཱནེ ཨདྷིམུཏྟཱནཾ. ཨདྷིཙིཏྟནྟི ཝིཔསྶནཱཔཱདཀསམཱདྷི. ཝིཔསྶཀཱནནྟི བྷངྒཱནུཔསྶནཏོ པཊྛཱཡ ཏཱིཧི ཨནུཔསྶནཱཧི སངྑཱརེ ཝིཔསྶནྟཱནཾ. ཨརིཡཔུགྒལཱནནྟི ཨཊྛནྣཾ. དུཏིཡཱདཱིནི ཏཱིཎི ཨེཀཏྟཱནི ཨཱནཱཔཱནསྶཏིཝསེན སེསཀམྨཊྛཱནཝསེན ཙ ཡུཛྫནྟི. ཙཏཱུཧི ཋཱནེཧཱིཏི ཙཏཱུཧི ཀཱརཎེཧི. སམཱདྷིཝིཔསྶནཱམགྒཕལཱནཾ ཝསེན ‘‘ཨེཀཏྟགཏཾ ཙིཏྟཾ པཊིཔདཱཝིསུདྡྷིཔཀྑནྡཉྩེཝ ཧོཏི ཨུཔེཀྑཱནུབྲཱུཧིཏཉྩ ཉཱཎེན ཙ སམྤཧཾསིཏ’’ནྟི ཨུདྡེསཔདཱནི. ‘‘པཋམསྶ ཛྷཱནསྶ ཀོ ཨཱདཱི’’ཏིཨཱདཱིནི ཏེསཾ ཨུདྡེསཔདཱནཾ ཝིཏྠཱརེཏུཀམྱཏཱཔུཙྪཱཔུབྦངྒམཱནི ནིདྡེསཔདཱནི. ཏཏྠ པཊིཔདཱཝིསུདྡྷིཔཀྑནྡནྟི པཊིཔདཱ ཨེཝ ནཱིཝརཎམལཝིསོདྷནཏོ ཝིསུདྡྷི, ཏཾ པཊིཔདཱཝིསུདྡྷིཾ པཀྑནྡཾ པཝིཊྛཾ. ཨུཔེཀྑཱནུབྲཱུཧིཏནྟི ཏཏྲམཛ྄ཛྷཏྟུཔེཀྑཱཡ བྲཱུཧིཏཾ ཝཌྜྷིཏཾ. ཉཱཎེན ཙ སམྤཧཾསིཏནྟི པརིཡོདཱཔཀེན ཉཱཎེན སམྤཧཾསིཏཾ པརིཡོདཱཔིཏཾ ཝིསོདྷིཏཾ. པཊིཔདཱཝིསུདྡྷི ནཱམ སསམྦྷཱརིཀོ ཨུཔཙཱརོ, ཨུཔེཀྑཱནུབྲཱུཧནཱ ནཱམ ཨཔྤནཱ, སམྤཧཾསནཱ ནཱམ པཙྩཝེཀྑཎཱཏི ཨེཝམེཀེ ཝཎྞཡནྟི. ཡསྨཱ པན ‘‘ཨེཀཏྟགཏཾ ཙིཏྟཾ པཊིཔདཱཝིསུདྡྷིཔཀྑནྡཉྩེཝ ཧོཏཱི’’ཏིཨཱདི ཝུཏྟཾ, ཏསྨཱ ཨནྟོཨཔྤནཱཡམེཝ ཨཱགམནཝསེན པཊིཔདཱཝིསུདྡྷི, ཏཏྲམཛ྄ཛྷཏྟུཔེཀྑཱཡ ཀིཙྩཝསེན ཨུཔེཀྑཱནུབྲཱུཧནཱ, དྷམྨཱནཾ ཨནཏིཝཏྟནཱདིབྷཱཝསཱདྷནེན པརིཡོདཱཔཀསྶ ཉཱཎསྶ ཀིཙྩནིཔྥཏྟིཝསེན སམྤཧཾསནཱ ཝེདིཏབྦཱ. ཀཐཾ? ཡསྨིཉྷི ཝཱརེ ཨཔྤནཱ ཨུཔྤཛྫཏི, ཏསྨིཾ ཡོ ནཱིཝརཎསངྑཱཏོ ཀིལེསགཎོ ཏསྶ ཛྷཱནསྶ པརིཔནྠོ, ཏཏོ ཙིཏྟཾ ཝིསུཛ྄ཛྷཏི, ཝིསུདྡྷཏྟཱ ཨཱཝརཎཝིརཧིཏཾ ཧུཏྭཱ མཛ྄ཛྷིམཾ སམཐནིམིཏྟཾ པཊིཔཛྫཏི. མཛ྄ཛྷིམཾ སམཐནིམིཏྟཾ ནཱམ སམཔྤཝཏྟོ ཨཔྤནཱསམཱདྷིཡེཝ. ཏདནནྟརཾ པན པུརིམཙིཏྟཾ ཨེཀསནྟཏིཔརིཎཱམནཡེན ཏཐཏྟཾ ཨུཔགཙྪམཱནཾ མཛ྄ཛྷིམཾ སམཐནིམིཏྟཾ པཊིཔཛྫཏི ནཱམ. ཨེཝཾ པཊིཔནྣཏྟཱ ཏཐཏྟུཔགམནེན ཏཏྠ པཀྑནྡཏི ནཱམ. ཨེཝཾ ཏཱཝ པུརིམཙིཏྟེ ཝིཛྫམཱནཱཀཱརནིཔྥཱདིཀཱ པཋམསྶ ཛྷཱནསྶ ཨུཔྤཱདཀྑཎེཡེཝ ཨཱགམནཝསེན པཊིཔདཱཝིསུདྡྷི ཝེདིཏབྦཱ. ཨེཝཾ ཝིསུདྡྷསྶ པན ཏསྶ པུན ཝིསོདྷེཏབྦཱབྷཱཝཏོ ཝིསོདྷནེ བྱཱཔཱརཾ ཨཀརོནྟོ ཝིསུདྡྷཾ ཙིཏྟཾ ཨཛ྄ཛྷུཔེཀྑཏི ནཱམ. སམཐབྷཱཝཱུཔགམནེན སམཐཔཊིཔནྣསྶ པུན སམཱདཱནེ བྱཱཔཱརཾ ཨཀརོནྟོ སམཐཔཊིཔནྣཾ ཨཛ྄ཛྷུཔེཀྑཏི ནཱམ. སམཐཔཊིཔནྣབྷཱཝཏོ ཨེཝ ཙསྶ ཀིལེསསཾསགྒཾ པཧཱཡ ཨེཀཏྟེན ཨུཔཊྛིཏསྶ པུན ཨེཀཏྟུཔཊྛཱནེ བྱཱཔཱརཾ ཨཀརོནྟོ ཨེཀཏྟུཔཊྛཱནཾ ཨཛ྄ཛྷུཔེཀྑཏི ནཱམ. ཨེཝཾ ཏཏྲམཛ྄ཛྷཏྟུཔེཀྑཱཡ ཀིཙྩཝསེན ཨུཔེཀྑཱནུབྲཱུཧནཱ ཝེདིཏབྦཱ.

ཡེ པནེཏེ ཨེཝཾ ཨུཔེཀྑཱནུབྲཱུཧིཏེ ཏཏྠ ཛཱཏཱ སམཱདྷིཔཉྙཱསངྑཱཏཱ ཡུགནདྡྷདྷམྨཱ ཨཉྙམཉྙཾ ཨནཏིཝཏྟམཱནཱ ཧུཏྭཱ པཝཏྟཱ, ཡཱནི ཙ སདྡྷཱདཱིནི ཨིནྡྲིཡཱནི ནཱནཱཀིལེསེཧི ཝིམུཏྟཏྟཱ ཝིམུཏྟིརསེན ཨེཀརསཱནི ཧུཏྭཱ པཝཏྟཱནི, ཡཾ ཙེས ཏདུཔགཾ ཏེསཾ ཨནཏིཝཏྟནཨེཀརསབྷཱཝཱནཾ ཨནུཙྪཝིཀཾ ཝཱིརིཡཾ ཝཱཧཡཏི, ཡཱ ཙསྶ ཏསྨིཾ ཁཎེ པཝཏྟཱ ཨཱསེཝནཱ, སབྦེཔི ཏེ ཨཱཀཱརཱ ཡསྨཱ ཉཱཎེན སཾཀིལེསཝོདཱནེསུ ཏཾ ཏཾ ཨཱདཱིནཝཉྩ ཨཱནིསཾསཉྩ དིསྭཱ ཏཐཱ ཏཐཱ སམྤཧཾསིཏཏྟཱ ཝིསོདྷིཏཏྟཱ པརིཡོདཱཔིཏཏྟཱ ནིཔྥནྣཱ, ཏསྨཱ དྷམྨཱནཾ ཨནཏིཝཏྟནཱདིབྷཱཝསཱདྷནེན པརིཡོདཱཔཀསྶ ཉཱཎསྶ ཀིཙྩནིཔྥཏྟིཝསེན སམྤཧཾསནཱ ཝེདིཏབྦཱཏི ཝུཏྟཾ. ཏཏྠ ཡསྨཱ ཨུཔེཀྑཱཝསེན ཉཱཎཾ པཱཀཊཾ ཧོཏི, ཡཐཱཧ – ‘‘ཏཐཱཔགྒཧིཏཾ ཙིཏྟཾ སཱདྷུཀཾ ཨཛ྄ཛྷུཔེཀྑཏི, ཨུཔེཀྑཱཝསེན པཉྙཱཝསེན པཉྙིནྡྲིཡཾ ཨདྷིམཏྟཾ ཧོཏི. ཨུཔེཀྑཱཝསེན ནཱནཏྟཀིལེསེཧི ཙིཏྟཾ ཝིམུཙྩཏི, ཝིམོཀྑཝསེན པཉྙཱཝསེན པཉྙིནྡྲིཡཾ ཨདྷིམཏྟཾ ཧོཏི. ཝིམུཏྟཏྟཱ ཏེ དྷམྨཱ ཨེཀརསཱ ཧོནྟི, ཨེཀརསཊྛེན བྷཱཝནཱ’’ཏི (པཊི. མ. ༡.༢༠༡). ཏསྨཱ ཉཱཎཀིཙྩབྷཱུཏཱ སམྤཧཾསནཱ པརིཡོསཱནནྟི ཝུཏྟཱ.

ཨེཝཾ ཏིཝཏྟགཏནྟིཨཱདཱིནི ཏསྶེཝ ཙིཏྟསྶ ཐོམནཝཙནཱནི. ཏཏྠ ཨེཝཾ ཏིཝཏྟགཏནྟི ཨེཝཾ ཡཐཱཝུཏྟེན ཝིདྷིནཱ པཊིཔདཱཝིསུདྡྷིཔཀྑནྡནཨུཔེཀྑཱནུབྲཱུཧནཱཉཱཎསམྤཧཾསནཱཝསེན ཏིཝིདྷབྷཱཝཾ གཏཾ. ཝིཏཀྐསམྤནྣནྟི ཀིལེསཀྑོབྷཝིརཧིཏཏྟཱ ཝིཏཀྐེན སུནྡརབྷཱཝཾ པནྣཾ གཏཾ. ཙིཏྟསྶ ཨདྷིཊྛཱནསམྤནྣནྟི ཏསྨིཾཡེཝ ཨཱརམྨཎེ ཙིཏྟསྶ ནིརནྟརཔྤཝཏྟིསངྑཱཏེན ཨདྷིཊྛཱནེན སམྤནྣཾ ཨནཱུནཾ. ཡཐཱ ཨདྷིཊྛཱནཝསིཡཾ ཨདྷིཊྛཱནནྟི ཛྷཱནཔྤཝཏྟི, ཏཐཱ ཨིདྷཱཔི ཙིཏྟསྶ ཨདྷིཊྛཱནནྟི ཙིཏྟེཀགྒཏཱཔི ཡུཛྫཏི. ཏེན ཧི ཨེཀསྨིཾཡེཝ ཨཱརམྨཎེ ཙིཏྟཾ ཨདྷིཊྛཱཏི, ན ཨེཏྠ ཝིཀྑིཔཏཱིཏི. ‘‘སམཱདྷིསམྤནྣ’’ནྟི ཝིསུཾ ཝུཏྟཏྟཱ པན ཝུཏྟནཡེནེཝ གཧེཏབྦཾ. ཨཐ ཝཱ སམཱདྷིསྶེཝ ཛྷཱནསངྒཧིཏཏྟཱ ཙིཏྟསྶ ཨདྷིཊྛཱནསམྤནྣནྟི ཛྷཱནངྒཔཉྩཀཝསེན ཝུཏྟཾ. སམཱདྷིསམྤནྣནྟི ཨིནྡྲིཡསངྒཧིཏཏྟཱ ཨིནྡྲིཡཔཉྩཀཝསེན, དུཏིཡཛ྄ཛྷཱནཱདཱིསུ པན ཨལབྦྷམཱནཱནི པདཱནི པཧཱཡ ལབྦྷམཱནཀཝསེན པཱིཏིསམྤནྣནྟིཨཱདི ཝུཏྟཾ.

ཨནིཙྩཱནུཔསྶནཱདཱིསུ ཨཊྛཱརསསུ མཧཱཝིཔསྶནཱསུ ཝིཏཀྐཱདཡོ པརིཔུཎྞཱཡེཝ ཏཱསཾ ཀཱམཱཝཙརཏྟཱ. ཨེཏཱསུ ཙ ཨཔྤནཱཡ ཨབྷཱཝཏོ པཊིཔདཱཝིསུདྡྷིཨཱདཡོ ཁཎིཀསམཱདྷིཝསེན ཡོཛེཏབྦཱ. ཙཏཱུསུ མགྒེསུ པཋམཛ྄ཛྷཱནིཀཝསེན ཝིཏཀྐཱདཱིནཾ ལབྦྷནཏོ ལབྦྷམཱནཀཝསེནེཝ ཝིཏཀྐཱདཡོ པརིཔུཎྞཱ ཝུཏྟཱ. དུཏིཡཛ྄ཛྷཱནིཀཱདཱིསུ ཧི མགྒེསུ ཝིཏཀྐཱདཡོ ཛྷཱནེསུ ཝིཡ པརིཧཱཡནྟཱིཏི. ཨེཏྟཱཝཏཱ ཏེརས ཝོདཱནཉཱཎཱནི ཝིཏྠཱརཏོ ནིདྡིཊྛཱནི ཧོནྟི. ཀཐཾ? ཨེཀཊྛཱནེ སམཱདཧནེན ཏཏྠེཝ ཨདྷིམུཙྩནེན ཀོསཛྫཔྤཛཧནེན ཨུདྡྷཙྩཔྤཛཧནེན རཱགཔྤཛཧནེན བྱཱཔཱདཔྤཛཧནེན སམྤཡུཏྟཱནི ཚ ཉཱཎཱནི, ཙཏཱུཧི ཨེཀཏྟེཧི སམྤཡུཏྟཱནི ཙཏྟཱརི ཉཱཎཱནི, པཊིཔདཱཝིསུདྡྷིཨུཔེཀྑཱནུབྲཱུཧནཱསམྤཧཾསནཱཧི སམྤཡུཏྟཱནི ཏཱིཎི ཉཱཎཱནཱིཏི ཨེཝཾ ཏེརས ཉཱཎཱནི ནིདྡིཊྛཱནི.

༡༥༩. ཨེཝཾ སནྟེཔི ཨཱནཱཔཱནསྶཏིསམཱདྷིབྷཱཝནཱཝསེན ཏེསཾ ནིཔྥཏྟིཾ དསྶེཏུཀཱམོ ཏཱནི ཉཱཎཱནི ཨནིགམེཏྭཱཝ ནིམིཏྟཾ ཨསྶཱསཔསྶཱསཱཏིཨཱདིནཱ ནཡེན ཙོདནཱཔུབྦངྒམཾ ཨཱནཱཔཱནསྶཏིསམཱདྷིབྷཱཝནཱཝིདྷིཾ དསྶེཏྭཱ ཨནྟེ ཏཱནི ཉཱཎཱནི ནིགམེཏྭཱ དསྶེསི. ཏཏྠ ནིམིཏྟཾ ཝུཏྟམེཝ. ཨནཱརམྨཎཱམེཀཙིཏྟསྶཱཏི ཨནཱརམྨཎཱ ཨེཀཙིཏྟསྶ. མ-ཀཱརོ པནེཏྠ པདསནྡྷིཀརོ. ཨནཱརམྨཎམེཀཙིཏྟསྶཱཏིཔི པཱཋོ, ཨེཀསྶ ཙིཏྟསྶ ཨཱརམྨཎཾ ན བྷཝནྟཱིཏི ཨཏྠོ. ཏཡོ དྷམྨེཏི ནིམིཏྟཱདཡོ ཏཡོ དྷམྨེ. བྷཱཝནཱཏི ཨཱནཱཔཱནསྶཏིསམཱདྷིབྷཱཝནཱ. ཀཐནྟི པཋམཾ ཝུཏྟཱཡ ཙོདནཱགཱཐཱཡ ཨནནྟརཾ ཝུཏྟཱཡ པརིཧཱརགཱཐཱཡ ཨཏྠཾ ཀཐེཏུཀམྱཏཱཔུཙྪཱ. ན ཙིམེཏི ན ཙ ཨིམེ. ན ཙམེཏིཔི པཱཋོ, སོཡེཝ པདཙྪེདོ. ཀཐཾ ན ཙ ཨཝིདིཏཱ ཧོནྟི, ཀཐཾ ན ཙ ཙིཏྟཾ ཝིཀྑེཔཾ གཙྪཏཱིཏི ཨེཝཾ ཀཐཾ སདྡོ སེསེཧི པཉྩཧི ཡོཛེཏབྦོ. པདྷཱནཉྩ པཉྙཱཡཏཱིཏི ཨཱནཱཔཱནསྶཏིསམཱདྷིབྷཱཝནཱརམྦྷཀཾ ཝཱིརིཡཾ སནྡིསྶཏི. ཝཱིརིཡཉྷི པདཧནྟི ཏེནཱཏི པདྷཱནནྟི ཝུཙྩཏི. པཡོགཉྩ སཱདྷེཏཱིཏི ནཱིཝརཎཝིཀྑམྦྷཀཾ ཛྷཱནཉྩ ཡོགཱི ནིཔྥཱདེཏི. ཛྷཱནཉྷི ནཱིཝརཎཝིཀྑམྦྷནཱཡ པཡུཉྫཱིཡཏཱིཏི པཡོགོཏི ཝུཏྟཾ. ཝིསེསམདྷིགཙྪཏཱིཏི སཾཡོཛནཔྤཧཱནཀརཾ མགྒཉྩ པཊིལབྷཏི. མགྒོ ཧི སམཐཝིཔསྶནཱནཾ ཨཱནིསཾསཏྟཱ ཝིསེསོཏི ཝུཏྟོ. ཝིསེསསྶ ཙ པམུཁབྷཱུཏཏྟཱ ཙ-ཀཱརེན སམུཙྩཡོ ན ཀཏོ.

ཨིདཱནི ཏཾ པུཙྪིཏམཏྠཾ ཨུཔམཱཡ སཱདྷེནྟོ སེཡྻཐཱཔི རུཀྑོཏིཨཱདིམཱཧ. ཏསྶཏྠོ – ཡཐཱ ནཱམ ཀཀཙེན ཕཱལནཏྠཾ ཝཱསིཡཱ ཏཙྪིཏྭཱ རུཀྑོ ཕཱལནཀཱལེ ནིཙྩལབྷཱཝཏྠཾ སམེ བྷཱུམིཔདེསེ པཡོགཀྑམཾ ཀཏྭཱ ཋཔིཏོ. ཀཀཙེནཱཏི ཧཏྠཀཀཙེན. ཨཱགཏེཏི རུཀྑཾ ཕུསིཏྭཱ ཨཏྟནོ སམཱིཔབྷཱགཾ ཨཱགཏེ. གཏེཏི རུཀྑཾ ཕུསིཏྭཱ པརབྷཱགཾ གཏེ. ཝཱ-སདྡོ སམུཙྩཡཏྠོ. ན ཨཝིདིཏཱ ཧོནྟཱིཏི རུཀྑེ ཀཀཙདནྟེཧི ཕུཊྛཾ པུརིསེན པེཀྑམཱནཾ ཋཱནཾ ཨཔྤཏྭཱ ཏེསཾ ཨཱགམནགམནཱབྷཱཝཏོ སབྦེཔི ཀཀཙདནྟཱ ཝིདིཏཱཝ ཧོནྟི. པདྷཱནནྟི རུཀྑཙྪེདནཝཱིརིཡཾ. པཡོགནྟི རུཀྑཙྪེདནཀིརིཡཾ. ‘‘ཝིསེསམདྷིགཙྪཏཱི’’ཏི ཝཙནཾ ཨུཔམཱཡ ནཏྠི. ཨུཔནིབནྡྷནཱ ནིམིཏྟནྟི ཨུཔནིབནྡྷནཱཡ སཏིཡཱ ནིམིཏྟབྷཱུཏཾ ཀཱརཎབྷཱུཏཾ ནཱསིཀགྒཾ ཝཱ མུཁནིམིཏྟཾ ཝཱ. ཨུཔནིབནྡྷཏི ཨེཏཱཡ ཨཱརམྨཎེ ཙིཏྟནྟི ཨུཔནིབནྡྷནཱ ནཱམ སཏི. ནཱསིཀགྒེ ཝཱཏི དཱིགྷནཱསིཀོ ནཱསིཀགྒེ. མུཁནིམིཏྟེ ཝཱཏི རསྶནཱསིཀོ ཨུཏྟརོཊྛེ. ཨུཏྟརོཊྛོ ཧི མུཁེ སཏིཡཱ ནིམིཏྟནྟི མུཁནིམིཏྟནྟི ཝུཏྟོ. ཨཱགཏེཏི ཕུཊྛཊྛཱནཏོ ཨབྦྷནྟརཾ ཨཱགཏེ. གཏེཏི ཕུཊྛཊྛཱནཏོ བཧིདྡྷཱ གཏེ. ན ཨཝིདིཏཱ ཧོནྟཱིཏི ཕུསནཊྛཱནཾ ཨཔྤཏྭཱ ཨསྶཱསཔསྶཱསཱནཾ ཨཱགམནགམནཱབྷཱཝཏོ སབྦེཔི ཏེ ཝིདིཏཱ ཨེཝ ཧོནྟི. ཀམྨནིཡཾ ཧོཏཱིཏི ཡེན ཝཱིརིཡེན ཀཱཡོཔི ཙིཏྟམྤི ཀམྨནིཡཾ བྷཱཝནཱཀམྨཀྑམཾ བྷཱཝནཱཀམྨཡོགྒཾ ཧོཏི. ཨིདཾ ཝཱིརིཡཾ པདྷཱནཾ ནཱམཱཏི ཕལེན ཀཱརཎཾ ཝུཏྟཾ ཧོཏི. ཨུཔཀྐིལེསཱ པཧཱིཡནྟཱིཏི ཝིཀྑམྦྷནཝསེན ནཱིཝརཎཱནི པཧཱིཡནྟི. ཝིཏཀྐཱ ཝཱུཔསམྨནྟཱིཏི ནཱནཱརམྨཎཙཱརིནོ ཨནཝཊྛིཏཱ ཝིཏཀྐཱ ཨུཔསམཾ གཙྪནྟི. ཡེན ཛྷཱནེན ཨུཔཀྐིལེསཱ པཧཱིཡནྟི, ཝིཏཀྐཱ ཝཱུཔསམྨནྟི. ཨཡཾ པཡོགོཏི པཡོགམཔེཀྑིཏྭཱ པུལླིངྒནིདྡེསོ ཀཏོ. སཉྙོཛནཱ པཧཱིཡནྟཱིཏི ཏཾཏཾམགྒཝཛ྄ཛྷཱ སཉྙོཛནཱ སམུཙྪེདཔྤཧཱནེན པཧཱིཡནྟི. ཨནུསཡཱ བྱནྟཱིཧོནྟཱིཏི པཧཱིནཱནཾ པུན ཨནུཔྤཏྟིདྷམྨཀཏྟཱ ཝིགཏོ ཨུཔྤཱདནྟོ ཝཱ ཝཡནྟོ ཝཱ ཨེཏེསནྟི བྱནྟཱ, པུབྦེ ཨབྱནྟཱ བྱནྟཱ ཧོནྟཱིཏི བྱནྟཱིཧོནྟི, ཝིནསྶནྟཱིཏི ཨཏྠོ. སཉྙོཛནཔྤཧཱནཾ ཨནུསཡཔྤཧཱནེན ཧོཏི, ན ཨཉྙཐཱཏི དསྶནཏྠཾ ཨནུསཡཔྤཧཱནམཱཧ. ཡེན མགྒེན སཉྙོཛནཱ པཧཱིཡནྟི ཨནུསཡཱ བྱནྟཱིཧོནྟི, ཨཡཾ ཝིསེསོཏི ཨཏྠོ. ཙཏུཏྠཙཏུཀྐེ ཨརིཡམགྒསྶཱཔི ནིདྡིཊྛཏྟཱ ཨིདྷ ཨརིཡམགྒོ ཝུཏྟོ. ཨེཀཙིཏྟསྶ ཨཱརམྨཎདྭཡཱབྷཱཝསྶ ཨཝུཏྟེཔི སིདྡྷཏྟཱ ཏཾ ཨཝིསྶཛྫེཏྭཱཝ ཨེཝཾ ཨིམེ ཏཡོ དྷམྨཱ ཨེཀཙིཏྟསྶ ཨཱརམྨཎཱ ན ཧོནྟཱིཏི ནིགམནཾ ཀཏཾ.

༡༦༠. ཨིདཱནི ཏཾ བྷཱཝནཱསིདྡྷིསཱདྷཀཾ ཡོགཱཝཙརཾ ཐུནནྟོ ཨཱནཱཔཱནསྶཏི ཡསྶཱཏི གཱཐཾ ཝཏྭཱ ཏསྶཱ ནིདྡེསམཱཧ. ཏཏྠ ཨཱནཱཔཱནསྶཏིཡོ ཡཐཱ བུདྡྷེན དེསིཏཱ, ཏཐཱ པརིཔུཎྞཱ སུབྷཱཝིཏཱ ཨནུཔུབྦཾ པརིཙིཏཱ ཡསྶ ཨཏྠི སཾཝིཛྫནྟི. སོ ཨིམཾ ལོཀཾ པབྷཱསེཏི. ཀིཾ ཝིཡ? ཨབྦྷཱ མུཏྟོཝ ཙནྡིམཱ ཡཐཱ ཨབྦྷཱདཱིཧི མུཏྟོ ཙནྡིམཱ ཨིམཾ ཨོཀཱསལོཀཾ པབྷཱསེཏི, ཏཐཱ སོ ཡོགཱཝཙརོ ཨིམཾ ཁནྡྷཱདིལོཀཾ པབྷཱསེཏཱིཏི གཱཐཱཡ སམྦནྡྷོ. ‘‘ཨབྦྷཱ མུཏྟོཝ ཙནྡིམཱ’’ཏི ཙ པདསྶ ནིདྡེསེ མཧིཀཱདཱིནམྤི ཝུཏྟཏྟཱ ཨེཏྠ ཨཱདིསདྡལོཔོ ཀཏོཏི ཝེདིཏབྦོ. གཱཐཱནིདྡེསེ ནོ པསྶཱསོ ནོ ཨསྶཱསོཏི སོ སོཡེཝ ཨཏྠོ པཊིསེདྷེན ཝིསེསེཏྭཱ ཝུཏྟོ. ཨུཔཊྛཱནཾ སཏཱིཏི ཨསམྨུསྶནཏཱཡ ཏམེཝ ཨསྶཱསཾ ཨུཔགནྟྭཱ ཋཱནཾ སཏི ནཱམཱཏི ཨཏྠོ. ཏཐཱ པསྶཱསཾ. ཨེཏྟཱཝཏཱ ཨཱནཱཔཱནེསུ སཏི ཨཱནཱཔཱནསྶཏཱིཏི ཨཏྠོ ཝུཏྟོ ཧོཏི.

ཨིདཱནི སཏིཝསེནེཝ ‘‘ཡསྶཱ’’ཏི ཝུཏྟཾ པུགྒལཾ ནིདྡིསིཏུཀཱམོ ཡོ ཨསྶསཏི, ཏསྶུཔཊྛཱཏི. ཡོ པསྶསཏི, ཏསྶུཔཊྛཱཏཱིཏི ཝུཏྟཾ. ཡོ ཨསྶསཏི, ཏསྶ སཏི ཨསྶཱསཾ ཨུཔགནྟྭཱ ཏིཊྛཏི. ཡོ པསྶསཏི, ཏསྶ སཏི པསྶཱསཾ ཨུཔགནྟྭཱ ཏིཊྛཏཱིཏི ཨཏྠོ. པརིཔུཎྞཱཏི ཛྷཱནཝིཔསྶནཱམགྒཔརམྤརཱཡ ཨརཧཏྟམགྒཔྤཏྟིཡཱ པརིཔུཎྞཱ. ཏེཡེཝ ཧི ཛྷཱནཝིཔསྶནཱམགྒདྷམྨེ སནྡྷཱཡ པརིགྒཧཊྛེནཱཏིཨཱདིམཱཧ. ཏེ ཧི དྷམྨཱ ཨིམིནཱ ཡོགིནཱ པརིགྒཡ྄ཧམཱནཏྟཱ པརིགྒཧཱ, ཏེན པརིགྒཧཊྛེན པརིཔུཎྞཱ. ཏཏྠ སབྦེསཾ ཙིཏྟཙེཏསིཀཱནཾ ཨཉྙམཉྙཔརིཝཱརཏྟཱ པརིཝཱརཊྛེན པརིཔུཎྞཱ. བྷཱཝནཱཔཱརིཔཱུརིཝསེན པརིཔཱུརཊྛེན པརིཔུཎྞཱ. ཙཏསྶོ བྷཱཝནཱཏིཨཱདཱིནི སུབྷཱཝིཏཱཏི ཝུཏྟཔདསྶ ཨཏྠཝསེན ཝུཏྟཱནི. ཙཏསྶོ བྷཱཝནཱ ཧེཊྛཱ ཝུཏྟཱཡེཝ. ཡཱནཱིཀཏཱཏི ཡུཏྟཡཱནསདིསཱ ཀཏཱ. ཝཏྠུཀཏཱཏི པཏིཊྛཊྛེན ཝཏྠུསདིསཱ ཀཏཱ. ཨནུཊྛིཏཱཏི པཙྩུཔཊྛིཏཱ. པརིཙིཏཱཏི སམནྟཏོ ཙིཏཱ ཨུཔཙིཏཱ. སུསམཱརདྡྷཱཏི སུཊྛུ སམཱརདྡྷཱ སུཀཏཱ. ཡཏྠ ཡཏྠ ཨཱཀངྑཏཱིཏི ཡེསུ ཡེསུ ཛྷཱནེསུ ཡཱསུ ཡཱསུ ཝིཔསྶནཱསུ སཙེ ཨིཙྪཏི. ཏཏྠ ཏཏྠཱཏི ཏེསུ ཏེསུ ཛྷཱནེསུ ཏཱསུ ཏཱསུ ཝིཔསྶནཱསུ. ཝསིཔྤཏྟོཏི ཝསཱིབྷཱཝཾ བཧུབྷཱཝཾ པཏྟོ. བལཔྤཏྟོཏི སམཐཝིཔསྶནཱབལཔྤཏྟོ. ཝེསཱརཛྫཔྤཏྟོཏི ཝིསཱརདབྷཱཝཾ པཊུབྷཱཝཾ པཏྟོ. ཏེ དྷམྨཱཏི སམཐཝིཔསྶནཱ དྷམྨཱ. ཨཱཝཛྫནཔཊིབདྡྷཱཏི ཨཱཝཛྫནཱཡཏྟཱ, ཨཱཝཛྫིཏམཏྟེཡེཝ ཏསྶ སནྟཱནེན, ཉཱཎེན ཝཱ སམྤཡོགཾ གཙྪནྟཱིཏི ཨཏྠོ. ཨཱཀངྑཔཊིབདྡྷཱཏི རུཙིཨཱཡཏྟཱ, རོཙིཏམཏྟེཡེཝ ཝུཏྟནཡེན སམྤཡོགཾ གཙྪནྟཱིཏི ཨཏྠོ. མནསིཀཱརོ པནེཏྠ ཨཱཝཛྫནཱཡ ཙིཏྟུཔྤཱདོ. ཨཱཀངྑནཱཡ ཝེཝཙནཝསེན ཨཏྠཝིཝརཎཏྠཾ ཝུཏྟོ. ཏེན ཝུཙྩཏི ཡཱནཱིཀཏཱཏི ཨེཝཾ ཀཏཏྟཱཡེཝ ཏེ ཡུཏྟཡཱནསདིསཱ ཀཏཱ ཧོནྟཱིཏི ཝུཏྟཾ ཧོཏི.

ཡསྨིཾ ཡསྨིཾ ཝཏྠུསྨིནྟི སོལ༹སསུ ཝཏྠཱུསུ ཨེཀེཀསྨིཾ. སྭཱདྷིཊྛིཏནྟི སུཔྤཏིཊྛིཏཾ. སཱུཔཊྛིཏཱཏི སུཊྛུ ཨུཔཊྛིཏཱ. སམྤཡུཏྟཙིཏྟསཏཱིནཾ སཧེཝ སཀསཀཀིཙྩཀརཎཏོ ཨནུལོམཔཊིལོམཝསེན ཡོཛེཏྭཱ ཏེ དྭེ དྷམྨཱ དསྶིཏཱ. ཏེན ཝུཙྩཏི ཝཏྠུཀཏཱཏི ཨེཝཾ བྷཱུཏཏྟཱཡེཝ ཀཏཔཏིཊྛཱ ཧོནྟཱིཏི ཝུཏྟཾ ཧོཏི. ཡེན ཡེན ཙིཏྟཾ ཨབྷིནཱིཧརཏཱིཏི པུབྦཔྤཝཏྟིཏོ ཨཔནེཏྭཱ ཡཏྠ ཡཏྠ བྷཱཝནཱཝིསེསེ ཙིཏྟཾ ཨུཔནེཏི. ཏེན ཏེན སཏི ཨནུཔརིཝཏྟཏཱིཏི ཏསྨིཾ ཏསྨིཾཡེཝ བྷཱཝནཱཝིསེསེ སཏི ཨནུཀཱུལཱ ཧུཏྭཱ པུབྦཔྤཝཏྟིཏོ ནིཝཏྟིཏྭཱ པཝཏྟཏི. ‘‘ཡེན, ཏེནཱ’’ཏི ཙེཏྠ ‘‘ཡེན བྷགཝཱ ཏེནུཔསངྐམཱི’’ཏིཨཱདཱིསུ (ཁུ. པཱ. ༥.༡; སུ. ནི. མངྒལསུཏྟ) ཝིཡ བྷུམྨཏྠོ ཝེདིཏབྦོ. ཏེན ཝུཙྩཏི ཨནུཊྛིཏཱཏི ཨེཝཾ ཀརཎཏོཡེཝ ཏཾ ཏཾ བྷཱཝནཾ ཨནུགནྟྭཱ ཋིཏཱ ཧོནྟཱིཏི ཝུཏྟཾ ཧོཏི. ཨཱནཱཔཱནསྶཏིཡཱ སཏིཔདྷཱནཏྟཱ ཝཏྠུཀཏཱནུཊྛིཏཔདེསུ སཏིཡཱ སཧ ཡོཛནཱ ཀཏཱཏི ཝེདིཏབྦཱ.

ཡསྨཱ པན པརིཔུཎྞཱཡེཝ པརིཙིཏཱ ཧོནྟི ཝཌྜྷིཏཱ ལདྡྷཱསེཝནཱ, ཏསྨཱ ‘‘པརིཔུཎྞཱ’’ཏིཔདེ ཝུཏྟཱ ཏཡོ ཨཏྠཱ ‘‘པརིཙིཏཱ’’ཏིཔདེཔི ཝུཏྟཱ, ཙཏུཏྠོ ཝིསེསཏྠོཔི ཝུཏྟོ. ཏཏྠ སཏིཡཱ པརིགྒཎྷནྟོཏི སམྤཡུཏྟཱཡ, པུབྦབྷཱགཱཡ ཝཱ སཏིཡཱ པརིགྒཧེཏབྦེ པརིགྒཎྷནྟོ ཡོགཱི. ཛིནཱཏི པཱཔཀེ ཨཀུསལེ དྷམྨེཏི སམུཙྪེདཝསེན ལཱམཀེ ཀིལེསེ ཛིནཱཏི ཨབྷིབྷཝཏི. ཨཡཉྩ པུགྒལཱདྷིཊྛཱནཱ དྷམྨདེསནཱ. དྷམྨེསུ ཧི ཛིནནྟེསུ ཏཾདྷམྨསམངྒཱིཔུགྒལོཔི ཛིནཱཏི ནཱམ. ཏེ ཙ དྷམྨཱ སཏིཾ ཨཝིཧཱཡ ཨཏྟནོ པཝཏྟིཀྑཎེ ཛིནིཏུམཱརདྡྷཱ ཛིཏཱཏི ཝུཙྩནྟི ཡཐཱ ‘‘བྷུཉྫིཏུམཱརདྡྷོ བྷུཏྟོ’’ཏི ཝུཙྩཏི. ལཀྑཎཾ པནེཏྠ སདྡསཏྠཏོ ཝེདིཏབྦཾ. ཨེཝཾ སནྟེཔི ‘‘པརིཛིཏཱ’’ཏི ཝཏྟབྦེ ཛ-ཀཱརསྶ ཙ-ཀཱརཾ ཀཏྭཱ ‘‘པརིཙིཏཱ’’ཏི ཝུཏྟཾ, ཡཐཱ སམྨཱ གདོ ཨསྶཱཏི སུགཏོཏི ཨཏྠཝིཀཔྤེ ད-ཀཱརསྶ ཏ-ཀཱརོ ནིརུཏྟིལཀྑཎེན ཀཏོ, ཨེཝམིདྷཱཔི ཝེདིཏབྦོ. ཨིམསྨིཾ ཨཏྠཝིཀཔྤེ པརིཙིཏཱཏི པདཾ ཀཏྟུསཱདྷནཾ, པུརིམཱནི ཏཱིཎི ཀམྨསཱདྷནཱནི.

ཙཏྟཱརོ སུསམཱརདྡྷཱཏི ཙཏྟཱརོ སུསམཱརདྡྷཏྠཱཏི ཝུཏྟཾ ཧོཏི, ཨཏྠསདྡསྶ ལོཔོ དཊྛབྦོ. སུསམཱརདྡྷཱཏི པདསྶ ཨཏྠཱཔི ཧི ཨིདྷ སུསམཱརདྡྷཱཏི ཝུཏྟཱཏི ཝེདིཏབྦཱ, སུསམཱརདྡྷདྷམྨཱ ཝཱ. ཙཏུརཏྠབྷེདཏོ ཙཏྟཱརོཏི ཝུཏྟཱཏི ཝེདིཏབྦཱ, ན དྷམྨབྷེདཏོ. ཡསྨཱ པན སུབྷཱཝིཏཱཡེཝ སུསམཱརདྡྷཱ ཧོནྟི, ན ཨཉྙེ, ཏསྨཱ ཏཡོ བྷཱཝནཏྠཱ ཨིདྷཱཔི ཝུཏྟཱ. ཨཱསེཝནཏྠོཔི ཏཱིསུ ཝུཏྟེསུ ཝུཏྟོཡེཝ ཧོཏི, ཏསྨཱ ཏཾ ཨཝཏྭཱ ཏཔྤཙྩནཱིཀཱནཾ སུསམཱུཧཏཏྠོ ཝུཏྟོ. པཙྩནཱིཀསམུགྒྷཱཏེན ཧི ཨཱརདྡྷཔརིཡོསཱནཾ པཉྙཱཡཏི, ཏེན སུསམཱརདྡྷསྶ སིཁཱཔྤཏྟོ ཨཏྠོ ཝུཏྟོ ཧོཏི. ཏཏྠ ཏཔྤཙྩནཱིཀཱནནྟི ཏེསཾ ཛྷཱནཝིཔསྶནཱམགྒཱནཾ པཊིཔཀྑབྷཱུཏཱནཾ. ཀིལེསཱནནྟི ཀཱམཙྪནྡཱདཱིནཾ ནིཙྩསཉྙཱདིསམྤཡུཏྟཱནཾ སཀྐཱཡདིཊྛཱདཱིནཉྩ. སུསམཱུཧཏཏྟཱཏི ཝིཀྑམྦྷནཏདངྒསམུཙྪེདཝསེན སུཊྛུ སམཱུཧཏཏྟཱ ནཱསིཏཏྟཱ. པོཏྠཀེསུ པན ‘‘སུསམུགྒྷཱཏཏྟཱ’’ཏི ལིཁནྟི, ཏཾ ན སུནྡརཾ.

༡༦༡. པུན ཏསྶེཝ པདསྶ ཨཉྙམྤི ཨཏྠཝིཀཔྤཾ དསྶེནྟོ སུསམནྟིཨཱདིམཱཧ. ཏཏྠ ཏཏྠ ཛཱཏཱཏི ཏསྨིཾ སིཁཱཔྤཏྟབྷཱཝནཱཝིསེསེ ཛཱཏཱ. ཨནཝཛྫཱཏི ཀིལེསཱནཾ ཨཱརམྨཎབྷཱཝཱནུཔགམནེན ཀིལེསདོསཝིརཧིཏཱ. ཀུསལཱཏི ཛཱཏིཝསེན ཀུསལཱ. བོདྷིཔཀྑིཡཱཏི བུཛ྄ཛྷནཊྛེན བོདྷཱིཏི ལདྡྷནཱམསྶ ཨརིཡསྶ པཀྑེ བྷཝཏྟཱ བོདྷིཔཀྑིཡཱ. པཀྑེ བྷཝཏྟཱཏི ཧི ཨུཔཀཱརབྷཱཝེ ཋིཏཏྟཱ. ཏེ ཙ ‘‘ཙཏྟཱརོ སཏིཔཊྛཱནཱ, ཙཏྟཱརོ སམྨཔྤདྷཱནཱ, ཙཏྟཱརོ ཨིདྡྷིཔཱདཱ, པཉྩིནྡྲིཡཱནི, པཉྩ བལཱནི, སཏྟ བོཛ྄ཛྷངྒཱ, ཨརིཡོ ཨཊྛངྒིཀོ མགྒོ’’ཏི (མ. ནི. ༣.༣༥; ཙཱུལ༹ནི. མེཏྟགཱུམཱཎཝཔུཙྪཱནིདྡེས ༢༢; མི. པ. ༥.༤.༡) སཏྟཏིཾས དྷམྨཱ. ཨིདཾ སམནྟི ཨིདཾ མགྒཀྑཎེ དྷམྨཛཱཏཾ སམུཙྪེདཝསེན ཀིལེསེ སམེཏི ཝིནཱསེཏཱིཏི སམཾ ནཱམ. ནིརོདྷོ ནིབྦཱནནྟི དུཀྑནིརོདྷཏྟཱ ནིརོདྷོ, ཝཱནསངྑཱཏཱཡ ཏཎྷཱཡ ཨབྷཱཝཱ ནིབྦཱནཾ. ཨིདཾ སུསམནྟི ཨིདཾ ནིབྦཱནཾ སབྦསངྑཏཝིསམཱཔགཏཏྟཱ སུཊྛུ སམནྟི སུསམཾ ནཱམ. ཉཱཏནྟི བོདྷིཔཀྑིཡསངྑཱཏཾ སམཾ ཨསམྨོཧཏོ ཉཱཎེན ཉཱཏཾ, ནིབྦཱནསངྑཱཏཾ སུསམཾ ཨཱརམྨཎཏོ ཉཱཎེན ཉཱཏཾ. ཏདེཝ དྭཡཾ ཏེནེཝ ཙཀྑུནཱ ཝིཡ དིཊྛཾ. ཝིདིཏནྟི ཏདེཝ དྭཡཾ སནྟཱནེ ཨུཔྤཱདནེན ཨཱརམྨཎཀརཎེན ཙ པཊིལདྡྷཾ. ཉཱཏཾ ཝིཡ པཉྙཱཡ སཙྪིཀཏཾ ཕསྶིཏཉྩ. ‘‘ཨསལླཱིནཾ ཨསམྨུཊྛཱ ཨསཱརདྡྷོ ཨེཀགྒ’’ནྟི པུརིམསྶ པུརིམསྶ པདསྶ ཨཏྠཔྤཀཱསནཾ. ཏཏྠ ཨཱརདྡྷནྟི པཊྛཔིཏཾ. ཨསལླཱིནནྟི ཨསངྐུཙིཏཾ. ཨུཔཊྛིཏཱཏི ཨུཔགནྟྭཱ ཋིཏཱ. ཨསམྨུཊྛཱཏི ཨཝིནཊྛཱ. པསྶདྡྷོཏི ནིབྦུཏོ. ཨསཱརདྡྷོཏི ནིདྡརཐོ. སམཱཧིཏནྟི སམཾ ཋཔིཏཾ. ཨེཀགྒནྟི ཨཝིཀྑིཏྟཾ.

‘‘ཙཏྟཱརོ སུསམཱརདྡྷཱ’’ཏིཨཱདི སཀལསྶ སུསམཱརདྡྷཝཙནསྶ མཱུལཏྠོ. ‘‘ཨཏྠི སམ’’ནྟིཨཱདི པན སུསམཝཙནསྶ, ‘‘ཉཱཏ’’ནྟིཨཱདི ཨཱརདྡྷཝཙནསྶ ཝིཀཔྤཏྠཱ. ཏཏྠཱཡཾ པདཏྠསཾསནྡནཱ – ‘‘སམཱ ཙ སུསམཱ ཙ སམསུསམཱ’’ཏི ཝཏྟབྦེ ཨེཀདེསསརཱུཔེཀསེསཾ ཀཏྭཱ ‘‘སུསམཱ’’ ཨིཙྩེཝ ཝུཏྟཱ ཡཐཱ ནཱམཉྩ རཱུཔཉྩ ནཱམརཱུཔཉྩ ནཱམརཱུཔནྟི. ‘‘ཨིདཾ སམཾ, ཨིདཾ སུསམ’’ནྟི པན ཨནཉྙཱཔེཀྑཾ ཀཏྭཱ ནཔུཾསཀཝཙནཾ ཀཏཾ. ཡསྨཱ པན ཉཱཏམྤི དིཊྛནྟི ཝུཙྩཏི, དིཊྛཉྩ ཨཱརདྡྷཉྩ ཨཏྠཏོ ཨེཀཾ. ཝིདིཏསཙྪིཀཏཕསྶིཏཱནི པན ཉཱཏཝེཝཙནཱནི, ཏསྨཱ ཉཱཏནྟི ཨཱརདྡྷཏྠོཡེཝ ཝུཏྟོ ཧོཏི.

ཨཱརདྡྷཾ ཧོཏི ཝཱིརིཡཾ ཨསལླཱིནནྟི ཨཡཾ པན ཨཱརདྡྷཝཙནསྶ ཨུཛུཀཏྠོཡེཝ. ཨུཔཊྛིཏཱ སཏཱིཏིཨཱདཱིནི པན སམྤཡུཏྟཝཱིརིཡསྶ ཨུཔཀཱརཀདྷམྨདསྶནཏྠཾ ཝུཏྟཱནི, ན ཨཱརདྡྷཝཙནསྶ ཨཏྠདསྶནཏྠཾ. པུརིམེན ཨཏྠེན སུཊྛུ སམཱརདྡྷཱཏི སུསམཱརདྡྷཱ ཙ, ཨིམིནཱ ཨཏྠེན སུསམཱ ཨཱརདྡྷཱཏི སུསམཱརདྡྷཱ ཙ ཨེཀསེསེ ཀཏེ ‘‘སུསམཱརདྡྷཱ’’ཏི ཝུཙྩནྟི. ཨིམམཏྠཾ པརིགྒཧེཏྭཱ ‘‘ཏེན ཝུཙྩཏི སུསམཱརདྡྷཱ’’ཏི ཝུཏྟཾ.

ཨནུཔུབྦནྟི ཡཐཱནུཀྐམེནཱཏི ཨཏྠོ, པུབྦཾ པུབྦཾ ཨནཱུཏི ཝུཏྟཾ ཧོཏི. དཱིགྷཾ ཨསྶཱསཝསེནཱཏི དཱིགྷནྟི ཝུཏྟཨསྶཱསཝསེན. པུརིམཱ པུརིམཱཏི པུརིམཱ པུརིམཱ སཏི. ཨེཏེན པུབྦནྟིཔདསྶ ཨཏྠོ ཝུཏྟོ ཧོཏི. པཙྪིམཱ པཙྪིམཱཏི སཏིཡེཝ. ཨེཏེན ཨནཱུཏིཔདསྶ ཨཏྠོ ཝུཏྟོ ཧོཏི. ཨུབྷཡེན པུབྦཉྩ ཨནུ ཙ པརིཙིཏཱཏི ཨཏྠོ ཝུཏྟོ ཧོཏི. ཨུཔརི སོལ༹ས ཝཏྠཱུནི ཝིཏྠཱརེཏྭཱ ཝཙནཏོ ཨིདྷ སངྑིཔིཏྭཱ ‘‘པཊིནིསྶགྒཱནུཔསྶཱི’’ཏི ཨནྟིམམེཝ དསྶིཏཾ. ཡསྨཱ སིཁཱཔྤཏྟབྷཱཝནསྶ སབྦཱཔི ཨཱནཱཔཱནསྶཏིཡོ པུནཔྤུནཾ ཡཐཱརུཙི པཝཏྟནཏོ ཨནུཔརིཙིཏཱཔི ཧོནྟི. ཏེན ཝུཏྟཾ – ‘‘ཨཉྙམཉྙཾ པརིཙིཏཱ ཙེཝ ཧོནྟི ཨནུཔརིཙིཏཱ ཙཱ’’ཏི.

ཡཐཏྠཱཏི ཡཐཱསབྷཱཝཏྠཱ. ཨཏྟདམཐཏྠོཏི ཨརཧཏྟམགྒཀྑཎེ ཨཏྟནོ ནིབྦིསེཝནཏྠོ. སམཐཏྠོཏི སཱིཏིབྷཱཝཏྠོ. པརིནིབྦཱཔནཏྠོཏི ཀིལེསཔརིནིབྦཱནེན. ཨབྷིཉྙཏྠོཏི སབྦདྷམྨཝསེན. པརིཉྙཏྠཱདཡོ མགྒཉཱཎཀིཙྩཝསེན. སཙྩཱབྷིསམཡཏྠོ ཙཏུནྣཾ སཙྩཱནཾ ཨེཀཔཊིཝེདྷདསྶནཝསེན. ནིརོདྷེ པཏིཊྛཱཔཀཏྠོ ཨཱརམྨཎཀརཎཝསེན.

བུདྡྷོཏིཔདསྶ ཨབྷཱཝེཔི བུདྡྷེནཱཏིཔདེ ཡོ སོ བུདྡྷོ, ཏཾ ནིདྡིསིཏུཀཱམེན བུདྡྷོཏི ཝུཏྟཾ. སཡམྦྷཱུཏི ཨུཔདེསཾ ཝིནཱ སཡམེཝ བྷཱུཏོ. ཨནཱཙརིཡཀོཏི སཡམྦྷཱུཔདསྶ ཨཏྠཝིཝརཎཾ. ཡོ ཧི ཨཱཙརིཡཾ ཝིནཱ སཙྩཱནི པཊིཝིཛ྄ཛྷཏི, སོ སཡམྦྷཱུ ནཱམ ཧོཏི. པུབྦེ ཨནནུསྶུཏེསཱུཏིཨཱདི ཨནཱཙརིཡཀབྷཱཝསྶ ཨཏྠཔྤཀཱསནཾ. ཨནནུསྶུཏེསཱུཏི ཨཱཙརིཡཾ ཨནནུསྶུཏེསུ. སཱམནྟི སཡམེཝ. ཨབྷིསམྦུཛ྄ཛྷཱིཏི བྷུསཾ སམྨཱ པཊིཝིཛ྄ཛྷི. ཏཏྠ ཙ སབྦཉྙུཏཾ པཱཔུཎཱིཏི ཏེསུ ཙ སཙྩེསུ སབྦཉྙུབྷཱཝཾ པཱཔུཎི. ཡཐཱ སཙྩཱནི པཊིཝིཛ྄ཛྷནྟཱ སབྦཉྙུནོ ཧོནྟི, ཏཐཱ སཙྩཱནཾ པཊིཝིདྡྷཏྟཱ ཨེཝཾ ཝུཏྟཾ. སབྦཉྙུཏཾ པཏྟོཏིཔི པཱཋོ. བལེསུ ཙ ཝསཱིབྷཱཝནྟི དསསུ ཙ ཏཐཱགཏབལེསུ ཨིསྶརབྷཱཝཾ པཱཔུཎི. ཡོ སོ ཨེཝཾ བྷཱུཏོ, སོ བུདྡྷོཏི ཝུཏྟཾ ཧོཏི. ཏཏྠ སབྦེསུ དྷམྨེསུ ཨཔྤཊིཧཏཉཱཎནིམིཏྟཱནུཏྟརཝིམོཀྑཱདྷིགམཔརིབྷཱཝིཏཾ ཁནྡྷསནྟཱནཾ ཨུཔཱདཱཡ པཎྞཏྟིཀོ, སབྦཉྙུཏཔདཊྛཱནཾ ཝཱ སཙྩཱབྷིསམྦོདྷིམུཔཱདཱཡ པཎྞཏྟིཀོ སཏྟཝིསེསོ བུདྡྷོ. ཨེཏྟཱཝཏཱ ཨཏྠཏོ བུདྡྷཝིབྷཱཝནཱ ཀཏཱ ཧོཏི.

༡༦༢. ཨིདཱནི བྱཉྫནཏོ ཝིབྷཱཝེནྟོ བུདྡྷོཏི ཀེནཊྛེན བུདྡྷོཏིཨཱདིམཱཧ. ཏཏྠ ཡཐཱ ལོཀེ ཨཝགནྟཱ ཨཝགཏོཏི ཝུཙྩཏི, ཨེཝཾ བུཛ྄ཛྷིཏཱ སཙྩཱནཱིཏི བུདྡྷོ. ཡཐཱ པཎྞསོསཱ ཝཱཏཱ པཎྞསུསཱཏི ཝུཙྩནྟི, ཨེཝཾ བོདྷེཏཱ པཛཱཡཱཏི བུདྡྷོ. སབྦཉྙུཏཱཡ བུདྡྷོཏི སབྦདྷམྨབུཛ྄ཛྷནསམཏྠཱཡ བུདྡྷིཡཱ བུདྡྷོཏི ཝུཏྟཾ ཧོཏི. སབྦདསྶཱཝིཏཱཡ བུདྡྷོཏི སབྦདྷམྨཱནཾ ཉཱཎཙཀྑུནཱ དིཊྛཏྟཱ བུདྡྷོཏི ཝུཏྟཾ ཧོཏི. ཨནཉྙནེཡྻཏཱཡ བུདྡྷོཏི ཨཉྙེན ཨབོདྷནཱིཡཏོ སཡམེཝ བུདྡྷཏྟཱ བུདྡྷོཏི ཝུཏྟཾ ཧོཏི. ཝིསཝིཏཱཡ བུདྡྷོཏི ནཱནཱགུཎཝིསཝནཏོ པདུམམིཝ ཝིཀསནཊྛེན བུདྡྷོཏི ཝུཏྟཾ ཧོཏི. ཁཱིཎཱསཝསངྑཱཏེན བུདྡྷོཏིཨཱདཱིཧི ཚཧི པརིཡཱཡེཧི ཙིཏྟསངྐོཙཀརདྷམྨཔྤཧཱནེན ནིདྡཀྑཡཝིབུདྡྷོ པུརིསོ ཝིཡ སབྦཀིལེསནིདྡཀྑཡཝིབུདྡྷཏྟཱ བུདྡྷོཏི ཝུཏྟཾ ཧོཏི. སངྑཱ སངྑཱཏནྟི ཨཏྠཏོ ཨེཀཏྟཱ སངྑཱཏེནཱཏི ཝཙནསྶ ཀོཊྛཱསེནཱཏི ཨཏྠོ. ཏཎྷཱལེཔདིཊྛིལེཔཱབྷཱཝེན ནིརུཔལེཔསངྑཱཏེན. སཝཱསནཱནཾ སབྦཀིལེསཱནཾ པཧཱིནཏྟཱ ཨེཀནྟཝཙནེན ཝིསེསེཏྭཱ ཨེཀནྟཝཱིཏརཱགོཏིཨཱདི ཝུཏྟཾ. ཨེཀནྟནིཀྐིལེསོཏི རཱགདོསམོཧཱཝསེསེཧི སབྦཀིལེསེཧི ནིཀྐིལེསོ. ཨེཀཱཡནམགྒཾ གཏོཏི བུདྡྷོཏི གམནཏྠཱནཾ དྷཱཏཱུནཾ བུཛ྄ཛྷནཏྠཏྟཱ བུཛ྄ཛྷནཏྠཱཔི དྷཱཏུཡོ གམནཏྠཱ ཧོནྟི, ཏསྨཱ ཨེཀཱཡནམགྒཾ གཏཏྟཱ བུདྡྷོཏི ཝུཏྟཾ ཧོཏི. ཨེཀཱཡནམགྒོཏི ཙེཏྠ –

‘‘མགྒོ པནྠོ པཐོ པཛྫོ, ཨཉྫསཾ ཝཊུམཱཡནཾ;

ནཱཝཱ ཨུཏྟརསེཏུ ཙ, ཀུལློ ཙ བྷིསི སངྐམོ’’ཏི . (ཙཱུལ༹ནི. པཱརཱཡནཏྠུཏིགཱཐཱནིདྡེས ༡༠༡) –

མགྒསྶ བཧཱུསུ ནཱམེསུ ཨཡནནཱམེན ཝུཏྟོ. ཏསྨཱ ཨེཀམགྒབྷཱུཏོ མགྒོ, ན དྭེདྷཱཔཐབྷཱུཏོཏི ཨཏྠོ. ཨཐ ཝཱ ཨེཀེན ཨཡིཏབྦོ མགྒོཏི ཨེཀཱཡནམགྒོ. ཨེཀེནཱཏི གཎསངྒཎིཀཾ པཧཱཡ པཝིཝེཀེན ཙིཏྟེན. ཨཡིཏབྦོཏི པཊིཔཛྫིཏབྦོ. ཨཡནྟི ཝཱ ཨེཏེནཱཏི ཨཡནོ, སཾསཱརཏོ ནིབྦཱནཾ གཙྪནྟཱིཏི ཨཏྠོ. ཨེཀེསཾ ཨཡནོ ཨེཀཱཡནོ. ཨེཀེཏི སེཊྛཱ, སབྦསཏྟསེཊྛཱ ཙ སམྨཱསམྦུདྡྷཱ, ཏསྨཱ ཨེཀཱཡནམགྒོཏི སམྨཱསམྦུདྡྷཱནཾ ཨཡནབྷཱུཏོ མགྒོཏི ཝུཏྟཾ ཧོཏི. ཨཡཏཱིཏི ཝཱ ཨཡནོ, གཙྪཏི པཝཏྟཏཱིཏི ཨཏྠོ. ཨེཀསྨིཾ ཨཡནོ མགྒོཏི ཨེཀཱཡནམགྒོ, ཨེཀསྨིཾཡེཝ བུདྡྷསཱསནེ པཝཏྟམཱནོ མགྒོ, ན ཨཉྙཏྠཱཏི ཝུཏྟཾ ཧོཏི. ཨཔི ཙ ཨེཀཾ ཨཡཏཱིཏི ཨེཀཱཡནོ, པུབྦབྷཱགེ ནཱནཱམུཁབྷཱཝནཱནཡཔྤཝཏྟོཔི ཨཔརབྷཱགེ ཨེཀཾ ནིབྦཱནམེཝ གཙྪཏཱིཏི ཝུཏྟཾ ཧོཏི, ཏསྨཱ ཨེཀཱཡནམགྒོཏི ཨེཀནིབྦཱནགམནམགྒོཏི ཨཏྠོ. ཨེཀོ ཨནུཏྟརཾ སམྨཱསམྦོདྷིཾ ཨབྷིསམྦུདྡྷོཏི བུདྡྷོཏི ན པརེཧི བུདྡྷཏྟཱ བུདྡྷོ, ཀིཾ པན སཡམེཝ ཨནུཏྟརཾ སམྨཱསམྦོདྷིཾ ཨབྷིསམྦུདྡྷཏྟཱ བུདྡྷོཏི ཝུཏྟཾ ཧོཏི. ཨབུདྡྷིཝིཧཏཏྟཱ བུདྡྷིཔཊིལཱབྷཱ བུདྡྷོཏི བུདྡྷི བུདྡྷཾ བོདྷོཏི པརིཡཱཡཝཙནམེཏཾ. ཏཏྠ ཡཐཱ ནཱིལརཏྟགུཎཡོགཱ ནཱིལོ པཊོ རཏྟོ པཊོཏི ཝུཙྩཏི, ཨེཝཾ བུདྡྷགུཎཡོགཱ བུདྡྷོཏི ཉཱཔེཏུཾ ཝུཏྟཾ.

ཏཏོ པརཾ བུདྡྷོཏི ནེཏཾ ནཱམནྟིཨཱདི ‘‘ཨཏྠམནུགཏཱ ཨཡཾ པཉྙཏྟཱི’’ཏི ཉཱཔནཏྠཾ ཝུཏྟཾ. ཏཏྠ མིཏྟཱ སཧཱཡཱ. ཨམཙྩཱ བྷཙྩཱ. ཉཱཏཱི པིཏུཔཀྑིཀཱ. སཱལོཧིཏཱ མཱཏུཔཀྑིཀཱ. སམཎཱ པབྦཛྫཱུཔགཏཱ. བྲཱཧྨཎཱ བྷོཝཱདིནོ, སམིཏཔཱཔབཱཧིཏཔཱཔཱ ཝཱ. དེཝཏཱ སཀྐཱདཡོ བྲཧྨཱནོ ཙ. ཝིམོཀྑནྟིཀནྟི ཝིམོཀྑོ ཨརཧཏྟམགྒོ, ཝིམོཀྑསྶ ཨནྟོ ཨརཧཏྟཕལཾ, ཏསྨིཾ ཝིམོཀྑནྟེ བྷཝཾ ཝིམོཀྑནྟིཀཾ ནཱམ. སབྦཉྙུབྷཱཝོ ཧི ཨརཧཏྟམགྒེན སིཛ྄ཛྷཏི, ཨརཧཏྟཕལོདཡེ སིདྡྷོ ཧོཏི, ཏསྨཱ སབྦཉྙུབྷཱཝོ ཝིམོཀྑནྟེ བྷཝོ ཧོཏི. ཏཾ ནེམིཏྟིཀམྤི ནཱམཾ ཝིམོཀྑནྟེ བྷཝཾ ནཱམ ཧོཏི. ཏེན ཝུཏྟཾ – ‘‘ཝིམོཀྑནྟིཀམེཏཾ བུདྡྷཱནཾ བྷགཝནྟཱན’’ནྟི. བོདྷིཡཱ མཱུལེ སཧ སབྦཉྙུཏཉྙཱཎསྶ པཊིལཱབྷཱཏི མཧཱབོདྷིརུཀྑམཱུལེ ཡཐཱཝུཏྟཀྑཎེ སབྦཉྙུཏཉྙཱཎསྶ པཊིལཱབྷེན སཧ. སཙྪིཀཱ པཉྙཏྟཱིཏི ཨརཧཏྟཕལསཙྪིཀིརིཡཱཡ, སབྦདྷམྨསཙྪིཀིརིཡཱཡ ཝཱ ཛཱཏཱ པཉྙཏྟི. ཡདིདཾ བུདྡྷོཏི ཡཱ ཨཡཾ བུདྡྷོཏི པཉྙཏྟི, ཨཡཾ བྱཉྫནཏོ བུདྡྷཝིབྷཱཝནཱ.

‘‘ཡཐཱ བུདྡྷེན དེསིཏཱ’’ཏིགཱཐཱཔཱདསྶ པན ཨིམིནཱ པདབྷཱཛནཱིཡེ ཝུཏྟཏྠེན ཨཡཾ སཾསནྡནཱ – ཨཱནཱཔཱནསྶཏིཡོ ཙ ཡཐཱ བུདྡྷེན དེསིཏཱ, ཡེན པཀཱརེན དེསིཏཱ. ཡཐཱསདྡེན སངྒཧིཏཱ དས ཡཐཏྠཱ ཙ ཡཐཱ བུདྡྷེན དེསིཏཱ, ཡེན པཀཱརེན དེསིཏཱཏི པཀཱརཏྠསྶ ཙ ཡཐཱསདྡསྶ, སབྷཱཝཏྠསྶ ཙ ཡཐཱསདྡསྶ སརཱུཔེཀསེསཝསེན ཨེཀསེསཾ ཀཏྭཱ ‘‘ཡཐཱ’’ཏི ཝུཏྟནྟི ཝེདིཏབྦཾ. པདབྷཱཛནཱིཡེ པནསྶ ཡཐཏྠེསུ ཨེཀེཀསྶ ཡོཛནཱཝསེན ‘‘དེསིཏོ’’ཏི ཨེཀཝཙནཾ ཀཏཾ.

‘‘སོཏི གཧཊྛོ ཝཱ ཧོཏི པབྦཛིཏོ ཝཱ’’ཏི ཝུཏྟཏྟཱ ཨཱདིཔདེཔི ཡསྶ གཧཊྛསྶ ཝཱ པབྦཛིཏསྶ ཝཱཏི ཝུཏྟམེཝ ཧོཏི. ལོཀཏྠོ ཝུཏྟོཡེཝ. པབྷཱསེཏཱིཏི ཨཏྟནོ ཉཱཎསྶ པཱཀཊཾ ཀརོཏཱིཏི ཨཏྠོ. ཨབྷིསམྦུདྡྷཏྟཱཏི སཱཝཀཔཱརམིཉཱཎེནཔི པཊིཝིདྡྷབྷཱཝེན. ཨོབྷཱསེཏཱིཏི ཀཱམཱཝཙརབྷཱུཏཾ ལོཀཾ. བྷཱསེཏཱིཏི རཱུཔཱཝཙརབྷཱུཏཾ ལོཀཾ. པབྷཱསེཏཱིཏི ཨརཱུཔཱཝཙརབྷཱུཏཾ ལོཀཾ.

ཨརིཡཉཱཎནྟི ཨརཧཏྟམགྒཉཱཎཾ. མཧིཀཱ མུཏྟོཏི མཧིཀཱཡ མུཏྟོ. མཧིཀཱཏི ནཱིཧཱརོ ཝུཙྩཏི. མཧིཡཱ མུཏྟོཏིཔི པཱཋོ. དྷཱུམརཛཱ མུཏྟོཏི དྷཱུམཏོ ཙ རཛཏོ ཙ མུཏྟོ. རཱཧུགཧཎཱ ཝིཔྤམུཏྟོཏི རཱཧུནོ ཙནྡསྶ ཨཱསནྣུཔཀྐིལེསཏྟཱ དྭཱིཧི ཨུཔསགྒེཧི ཝིསེསེཏྭཱ ཝུཏྟཾ. བྷཱསཏེ ཨིཏི སཨོབྷཱསཊྛེན. ཏཔཏེ ཨིཏི སཏེཛཊྛེན. ཝིརོཙཏེ ཨིཏི རུཙིརཊྛེན. ཨེཝམེཝནྟི ཨེཝཾ ཨེཝཾ. ཡསྨཱ པན ཙནྡོཔི སཡཾ བྷཱསནྟོ ཏཔནྟོ ཝིརོཙནྟོ ཨིམཾ ཨོཀཱསལོཀཾ ཨོབྷཱསེཏི, བྷིཀྑུ ཙ པཉྙཱཡ བྷཱསནྟོ ཏཔནྟོ ཝིརོཙནྟོ ཨིམཾ ཁནྡྷཱདིལོཀཾ པཉྙཱཡ ཨོབྷཱསེཏི, ཏསྨཱ ཨུབྷཡཏྲཱཔི ‘‘བྷཱསེཏཱི’’ཏི ཨཝཏྭཱ ‘‘བྷཱསཏེ’’ ཨིཙྩེཝ ཝུཏྟཾ. ཨེཝཉྷི ཝུཏྟེ ཧེཏུཨཏྠོཔི ཝུཏྟོ ཧོཏི. ཨཏིཝིསདཏརཱབྷསཱུརིཡོཔམཾ ཨགྒཧེཏྭཱ ཀསྨཱ ཙནྡོཔམཱ གཧིཏཱཏི ཙེ? སབྦཀིལེསཔརིལཱ༹ཧཝཱུཔསམེན སནྟསྶ བྷིཀྑུནོ སནྟགུཎཡུཏྟཙནྡོཔམཱ ཨནུཙྪཝིཀཱཏི གཧིཏཱཏི ཝེདིཏབྦཾ. ཨེཝཾ ཨཱནཱཔཱནསྶཏིབྷཱཝནཱསིདྡྷིསཱདྷཀཾ ཡོགཱཝཙརཾ ཐུནིཏྭཱ ཨིམཱནི ཏེརས ཝོདཱནེ ཉཱཎཱནཱིཏི ཏཱནི ཉཱཎཱནི ནིགམེཏྭཱ དསྶེཏཱིཏི.

ཝོདཱནཉཱཎནིདྡེསཝཎྞནཱ ནིཊྛིཏཱ.

༥. སཏོཀཱརིཉཱཎནིདྡེསཝཎྞནཱ

༡༦༣. སཏོཀཱརིཉཱཎནིདྡེསེ མཱཏིཀཱཡཾ ཨིདྷ བྷིཀྑཱུཏི ཨིམསྨིཾ སཱསནེ བྷིཀྑུ. ཨཡཉྷི ཨེཏྠ ཨིདྷ-སདྡོ སབྦཔྤཀཱརཨཱནཱཔཱནསྶཏིསམཱདྷིནིབྦཏྟཀསྶ པུགྒལསྶ སནྣིསྶཡབྷཱུཏསཱསནཔརིདཱིཔནོ, ཨཉྙསཱསནསྶ ཏཐཱབྷཱཝཔཊིསེདྷནོ ཙ. ཝུཏྟཉྷེཏཾ – ‘‘ཨིདྷེཝ, བྷིཀྑཝེ, སམཎོ…པེ… སུཉྙཱ པརཔྤཝཱདཱ སམཎེབྷི ཨཉྙེཧཱི’’ཏི (མ. ནི. ༡.༡༣༩; ཨ. ནི. ༤.༢༤༡).

ཨརཉྙགཏོ ཝཱ རུཀྑམཱུལགཏོ ཝཱ སུཉྙཱགཱརགཏོ ཝཱཏི ཨིདམསྶ ཨཱནཱཔཱནསྶཏིསམཱདྷི བྷཱཝནཱནུརཱུཔསེནཱསནཔརིགྒཧཔརིདཱིཔནཾ. ཨིམསྶ ཧི བྷིཀྑུནོ དཱིགྷརཏྟཾ རཱུཔཱདཱིསུ ཨཱརམྨཎེསུ ཨནུཝིསཊཾ ཙིཏྟཾ ཨཱནཱཔཱནསྶཏིསམཱདྷིཨཱརམྨཎཾ ཨབྷིརུཧིཏུཾ ན ཨིཙྪཏི, ཀཱུཊགོཎཡུཏྟརཐོ ཝིཡ ཨུཔྤཐམེཝ དྷཱཝཏི. ཏསྨཱ སེཡྻཐཱཔི ནཱམ གོཔོ ཀཱུཊདྷེནུཡཱ སབྦཾ ཁཱིརཾ པིཝིཏྭཱ ཝཌྜྷིཏཾ ཀཱུཊཝཙྪཾ དམེཏུཀཱམོ དྷེནུཏོ ཨཔནེཏྭཱ ཨེཀམནྟེ མཧནྟཾ ཐམྦྷཾ ནིཁཎིཏྭཱ ཏཏྠ ཡོཏྟེན བནྡྷེཡྻ, ཨཐསྶ སོ ཝཙྪོ ཨིཏོ ཙིཏོ ཙ ཝིཔྥནྡིཏྭཱ པལཱཡིཏུཾ ཨསཀྐོནྟོ ཏམེཝ ཐམྦྷཾ ཨུཔནིསཱིདེཡྻ ཝཱ ཨུཔནིཔཛྫེཡྻ ཝཱ, ཨེཝམེཝ ཨིམིནཱཔི བྷིཀྑུནཱ དཱིགྷརཏྟཾ རཱུཔཱརམྨཎཱདིརསཔཱནཝཌྜྷིཏཾ དུཊྛཙིཏྟཾ དམེཏུཀཱམེན རཱུཔཱདིཨཱརམྨཎཏོ ཨཔནེཏྭཱ ཨརཉྙཾ ཝཱ རུཀྑམཱུལཾ ཝཱ སུཉྙཱགཱརཾ ཝཱ པཝེསེཏྭཱ ཏཏྠ ཨསྶཱསཔསྶཱསཐམྦྷེ སཏིཡོཏྟེན བནྡྷིཏབྦཾ. ཨེཝམསྶ ཏཾ ཙིཏྟཾ ཨིཏོ ཙིཏོ ཙ ཝིཔྥནྡིཏྭཱཔི པུབྦེ ཨཱཙིཎྞཱརམྨཎཾ ཨལབྷམཱནཾ སཏིཡོཏྟཾ ཚིནྡིཏྭཱ པལཱཡིཏུཾ ཨསཀྐོནྟཾ ཏམེཝཱརམྨཎཾ ཨུཔཙཱརཔྤནཱཝསེན ཨུཔནིསཱིདཏི ཙེཝ ཨུཔནིཔཛྫཏི ཙ. ཏེནཱཧུ པོརཱཎཱ –

‘‘ཡཐཱ ཐམྦྷེ ནིབནྡྷེཡྻ, ཝཙྪཾ དམཾ ནརོ ཨིདྷ;

བནྡྷེཡྻེཝཾ སཀཾ ཙིཏྟཾ, སཏིཡཱརམྨཎེ དལ༹ྷ’’ནྟི. (ཝིསུདྡྷི. ༡.༢༡༧; པཱརཱ. ཨཊྛ. ༢.༡༦༥; དཱི. ནི. ཨཊྛ. ༢.༣༧༤; མ. ནི. ཨཊྛ. ༡.༡༠༧) –

ཨེཝམསྶ ཏཾ སེནཱསནཾ བྷཱཝནཱནུརཱུཔཾ ཧོཏི. ཨཐ ཝཱ ཡསྨཱ ཨིདཾ ཀམྨཊྛཱནཔྤབྷེདེ མུདྡྷབྷཱུཏཾ སབྦབུདྡྷཔཙྩེཀབུདྡྷབུདྡྷསཱཝཀཱནཾ ཝིསེསཱདྷིགམདིཊྛདྷམྨསུཁཝིཧཱརཔདཊྛཱནཾ ཨཱནཱཔཱནསྶཏིཀམྨཊྛཱནཾ ཨིཏྠིཔུརིསཧཏྠིཨསྶཱདིསདྡསམཱཀུལཾ གཱམནྟཾ ཨཔརིཙྩཛིཏྭཱ ན སུཀརཾ བྷཱཝེཏུཾ སདྡཀཎྚཀཏྟཱ ཛྷཱནསྶ. ཨགཱམཀེ པན ཨརཉྙེ སུཀརཾ ཡོགཱཝཙརེན ཨིདཾ ཀམྨཊྛཱནཾ པརིགྒཧེཏྭཱ ཨཱནཱཔཱནཙཏུཀྐཛ྄ཛྷཱནཾ ནིབྦཏྟེཏྭཱ ཏདེཝ པཱདཀཾ ཀཏྭཱ སངྑཱརེ སམྨསིཏྭཱ ཨགྒཕལཾ ཨརཧཏྟཾ པཱཔུཎིཏུཾ. ཏསྨཱ ཏསྶ ཨནུརཱུཔཾ སེནཱསནཾ ཨུཔདིསནྟོ བྷགཝཱ ‘‘ཨརཉྙགཏོ ཝཱ’’ཏིཨཱདིམཱཧ, ཏཐེཝ ཐེརོ.

ཝཏྠུཝིཛྫཱཙརིཡོ ཝིཡ ཧི བྷགཝཱ, སོ ཡཐཱ ཝཏྠུཝིཛྫཱཙརིཡོ ནགརབྷཱུམིཾ པསྶིཏྭཱ སུཊྛུ ཨུཔཔརིཀྑིཏྭཱ ‘‘ཨེཏྠ ནགརཾ མཱཔེཐཱ’’ཏི ཨུཔདིསཏི, སོཏྠིནཱ ཙ ནགརེ ནིཊྛིཏེ རཱཛཀུལཏོ མཧཱསཀྐཱརཾ ལབྷཏི, ཨེཝམེཝཾ ཡོགཱཝཙརསྶ ཨནུརཱུཔཾ སེནཱསནཾ ཨུཔཔརིཀྑིཏྭཱ ‘‘ཨེཏྠ ཀམྨཊྛཱནཾ ཨནུཡུཉྫིཏབྦ’’ནྟི ཨུཔདིསཏི, ཏཏོ ཏཏྠ ཀམྨཊྛཱནམནུཡུཏྟེན ཡོགིནཱ ཀམེན ཨརཧཏྟེ པཏྟེ ‘‘སམྨཱསམྦུདྡྷོ ཝཏ སོ བྷགཝཱ’’ཏི མཧནྟཾ སཀྐཱརཾ ལབྷཏི. ཨཡཾ པན བྷིཀྑུ ‘‘དཱིཔིསདིསོ’’ཏི ཝུཙྩཏི. ཡཐཱ ཧི མཧཱདཱིཔིརཱཛཱ ཨརཉྙེ ཏིཎགཧནཾ ཝཱ ཝནགཧནཾ ཝཱ པབྦཏགཧནཾ ཝཱ ནིསྶཱཡ ནིལཱིཡིཏྭཱ ཝནམཧིཾསགོཀཎྞསཱུཀརཱདཡོ མིགེ གཎྷཱཏི, ཨེཝམེཝཾ ཨཡཾ ཨརཉྙཱདཱིསུ ཀམྨཊྛཱནམནུཡུཉྫནྟོ བྷིཀྑུ ཡཐཱཀྐམེན སོཏཱཔཏྟིསཀདཱགཱམིཨནཱགཱམིཨརཧཏྟམགྒེ ཙེཝ ཨརིཡཕལཱནི ཙ གཎྷཱཏཱིཏི ཝེདིཏབྦོ. ཏེནཱཧུ པོརཱཎཱ –

‘‘ཡཐཱཔི དཱིཔིཀོ ནཱམ, ནིལཱིཡིཏྭཱ གཎྷཏེ མིགེ;

ཏཐེཝཱཡཾ བུདྡྷཔུཏྟོ, ཡུཏྟཡོགོ ཝིཔསྶཀོ;

ཨརཉྙཾ པཝིསིཏྭཱན, གཎྷཱཏི ཕལམུཏྟམ’’ནྟི. (མི. པ. ༦.༡.༥);

ཏེནསྶ པརཀྐམཛཝཡོགྒབྷཱུམིཾ ཨརཉྙསེནཱསནཾ དསྶེནྟོ ‘‘ཨརཉྙགཏོ ཝཱ’’ཏིཨཱདིམཱཧ.

ཏཏྠ ཨརཉྙགཏོཏི ཨུཔརི ཝུཏྟལཀྑཎཾ ཡཾཀིཉྩི པཝིཝེཀསུཁཾ ཨརཉྙཾ གཏོ. རུཀྑམཱུལགཏོཏི རུཀྑསམཱིཔཾ གཏོ. སུཉྙཱགཱརགཏོཏི སུཉྙཾ ཝིཝིཏྟོཀཱསཾ གཏོ. ཨེཏྠ ཙ ཋཔེཏྭཱ ཨརཉྙཉྩ རུཀྑམཱུལཉྩ ཨཝསེསསཏྟཝིདྷསེནཱསནཾ གཏོཔི ‘‘སུཉྙཱགཱརགཏོ’’ཏི ཝཏྟུཾ ཝཊྚཏི. ནཝཝིདྷཉྷི སེནཱསནཾ. ཡཐཱཧ – ‘‘སོ ཝིཝིཏྟཾ སེནཱསནཾ བྷཛཏི ཨརཉྙཾ རུཀྑམཱུལཾ པབྦཏཾ ཀནྡརཾ གིརིགུཧཾ སུསཱནཾ ཝནཔཏྠཾ ཨབྦྷོཀཱསཾ པལཱལཔུཉྫ’’ནྟི (ཝིབྷ. ༥༠༨). ཨེཝམསྶ ཨུཏུཏྟཡཱནུཀཱུལཾ དྷཱཏུཙརིཡཱནུཀཱུལཉྩ ཨཱནཱཔཱནསྶཏིབྷཱཝནཱནུརཱུཔཾ སེནཱསནཾ ཨུཔདིསིཏྭཱ ཨལཱིནཱནུདྡྷཙྩཔཀྑིཀཾ སནྟམིརིཡཱཔཐཾ ཨུཔདིསནྟོ ནིསཱིདཏཱིཏི ཨཱཧ. ཨཐསྶ ནིསཛྫཱཡ དལ༹ྷབྷཱཝཾ ཨསྶཱསཔསྶཱསཱནཾ པཝཏྟནསམཏྠཏཾ ཨཱརམྨཎཔརིགྒཧཱུཔཱཡཉྩ དསྶེནྟོ པལླངྐཾ ཨཱབྷུཛིཏྭཱཏིཨཱདིམཱཧ. ཏཏྠ པལླངྐནྟི སམནྟཏོ ཨཱུརུབདྡྷཱསནཾ. ཨཱབྷུཛིཏྭཱཏི བནྡྷིཏྭཱ. ཨུཛུཾ ཀཱཡཾ པཎིདྷཱཡཱཏི ཨུཔརིམསརཱིརཾ ཨུཛུཀཾ ཋཔེཏྭཱ ཨཊྛཱརས པིཊྛིཀཎྚཀེ ཀོཊིཡཱ ཀོཊིཾ པཊིཔཱདེཏྭཱ. ཨེཝཉྷི ནིསིནྣསྶ དྷམྨམཾསནྷཱརཱུནི ན པཎམནྟི. ཨཐསྶ ཡཱ ཏེསཾ པཎམནཔཙྩཡཱ ཁཎེ ཁཎེ ཝེདནཱ ཨུཔྤཛྫེཡྻུཾ, ཏཱ ན ཨུཔྤཛྫནྟི. ཏཱསུ ཨནུཔྤཛྫམཱནཱསུ ཙིཏྟཾ ཨེཀགྒཾ ཧོཏི, ཀམྨཊྛཱནཾ ན པརིཔཏཏི, ཝུདྡྷིཾ ཕཱཏིཾ ཨུཔགཙྪཏི.

པརིམུཁཾ སཏིཾ ཨུཔཊྛཔེཏྭཱཏི ཀམྨཊྛཱནཱབྷིམུཁཾ སཏིཾ ཋཔཡིཏྭཱ. སོ སཏོཝ ཨསྶསཏི སཏོ པསྶསཏཱིཏི སོ བྷིཀྑུ ཨེཝཾ ནིསཱིདིཏྭཱ ཨེཝཉྩ སཏིཾ ཨུཔཊྛཔེཏྭཱ ཏཾ སཏིཾ ཨཝིཛཧནྟོ སཏོ ཨེཝ ཨསྶསཏི སཏོ པསྶསཏི, སཏོཀཱརཱི ཧོཏཱིཏི ཝུཏྟཾ ཧོཏི.

ཨིདཱནི ཡེཧི པཀཱརེཧི སཏོཀཱརཱི ཧོཏི, ཏེ པཀཱརེ དསྶེཏུཾ དཱིགྷཾ ཝཱ ཨསྶསནྟོཏིཨཱདིམཱཧ. ཏཏྠ དཱིགྷཾ ཝཱ ཨསྶསནྟོཏི དཱིགྷཾ ཝཱ ཨསྶཱསཾ པཝཏྟཡནྟོ. ཏཐཱ རསྶཾ. ཡཱ པན ནེསཾ དཱིགྷརསྶཏཱ, སཱ ཀཱལཝསེན ཝེདིཏབྦཱ. ཀདཱཙི ཧི མནུསྶཱ ཧཏྠིཨཧིཨཱདཡོ ཝིཡ ཀཱལཝསེན དཱིགྷཾ ཨསྶསནྟི ཙ པསྶསནྟི ཙ, ཀདཱཙི སུནཁསསཱདཡོ ཝིཡ རསྶཾ. ཨཉྙཐཱ ཧི ཙུཎྞཝིཙུཎྞཱ ཨསྶཱསཔསྶཱསཱ དཱིགྷརསྶཱ ནཱམ ན ཧོནྟི. ཏསྨཱ ཏེ དཱིགྷཾ ཀཱལཾ པཝིསནྟཱ ཙ ནིཀྑམནྟཱ ཙ དཱིགྷཱ, རསྶཾ ཀཱལཾ པཝིསནྟཱ ཙ ནིཀྑམནྟཱ ཙ རསྶཱཏི ཝེདིཏབྦཱ. ཏཏྲཱཡཾ བྷིཀྑུ ཨུཔརི ཝུཏྟེཧི ནཝཧཱཀཱརེཧི དཱིགྷཾ ཨསྶསནྟོ ཙ པསྶསནྟོ ཙ དཱིགྷཾ ཨསྶསཱམི, པསྶསཱམཱིཏི པཛཱནཱཏི, ཏཐཱ རསྶཾ.

ཨེཝཾ པཛཱནཏོ ཙ –

‘‘དཱིགྷོ རསྶོ ཙ ཨསྶཱསོ, པསྶཱསོཔི ཙ ཏཱདིསོ;

ཙཏྟཱརོ ཝཎྞཱ ཝཏྟནྟི, ནཱསིཀགྒེཝ བྷིཀྑུནོ’’ཏི. (ཝིསུདྡྷི. ༡.༢༡༩; པཱརཱ. ཨཊྛ. ༢.༡༦༥);

ནཝནྣཉྩསྶ ཨཱཀཱརཱནཾ ཨེཀེནཱཀཱརེན ཀཱཡཱནུཔསྶནཱསཏིཔཊྛཱནབྷཱཝནཱ སམྤཛྫཏཱིཏི ཝེདིཏབྦཱ. སབྦཀཱཡཔཊིསཾཝེདཱི ཨསྶསིསྶཱམཱིཏི སིཀྑཏི. སབྦཀཱཡཔཊིསཾཝེདཱི པསྶསིསྶཱམཱིཏི སིཀྑཏཱིཏི སཀལསྶ ཨསྶཱསཀཱཡསྶཱདིམཛ྄ཛྷཔརིཡོསཱནཾ ཝིདིཏཾ ཀརོནྟོ པཱཀཊཾ ཀརོནྟོ ཨསྶསིསྶཱམཱིཏི སིཀྑཏི. སཀལསྶ པསྶཱསཀཱཡསྶཱདིམཛ྄ཛྷཔརིཡོསཱནཾ ཝིདིཏཾ ཀརོནྟོ པཱཀཊཾ ཀརོནྟོ པསྶསིསྶཱམཱིཏི སིཀྑཏི. ཨེཝཾ ཝིདིཏཾ ཀརོནྟོ པཱཀཊཾ ཀརོནྟོ ཉཱཎསམྤཡུཏྟཙིཏྟེན ཨསྶསཏི ཙེཝ པསྶསཏི ཙ. ཏསྨཱ ‘‘ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི ཝུཙྩཏི. ཨེཀསྶ ཧི བྷིཀྑུནོ ཙུཎྞཝིཙུཎྞཝིསཊེ (ཝིསུདྡྷི. ༡.༢༡༩; པཱརཱ. ༢.༡༦༥) ཨསྶཱསཀཱཡེ, པསྶཱསཀཱཡེ ཝཱ ཨཱདི པཱཀཊོ ཧོཏི, ན མཛ྄ཛྷཔརིཡོསཱནཾ. སོ ཨཱདིམེཝ པརིགྒཧེཏུཾ སཀྐོཏི, མཛ྄ཛྷཔརིཡོསཱནེ ཀིལམཏི. ཨེཀསྶ མཛ྄ཛྷཾ པཱཀཊཾ ཧོཏི, ན ཨཱདིཔརིཡོསཱནཾ. སོ མཛ྄ཛྷམེཝ པརིགྒཧེཏུཾ སཀྐོཏི, ཨཱདིཔརིཡོསཱནེ ཀིལམཏི. ཨེཀསྶ པརིཡོསཱནཾ པཱཀཊཾ ཧོཏི, ན ཨཱདིམཛ྄ཛྷཾ. སོ པརིཡོསཱནཾཡེཝ པརིགྒཧེཏུཾ སཀྐོཏི, ཨཱདིམཛ྄ཛྷེ ཀིལམཏི. ཨེཀསྶ སབྦཾ པཱཀཊཾ ཧོཏི, སོ སབྦམྤི པརིགྒཧེཏུཾ སཀྐོཏི, ན ཀཏྠཙི ཀིལམཏི. ཏཱདིསེན བྷཝིཏབྦནྟི དསྶེནྟོ ཨཱཧ – ‘‘སབྦཀཱཡཔཊིསཾཝེདཱི’’ཏིཨཱདི.

ཏཏྠ སིཀྑཏཱིཏི ཨེཝཾ གྷཊཏི ཝཱཡམཏི. ཡོ ཝཱ ཏཐཱབྷཱུཏསྶ སཾཝརོ, ཨཡམེཏྠ ཨདྷིསཱིལསིཀྑཱ. ཡོ ཏཐཱབྷཱུཏསྶ སམཱདྷི, ཨཡཾ ཨདྷིཙིཏྟསིཀྑཱ. ཡཱ ཏཐཱབྷཱུཏསྶ པཉྙཱ, ཨཡཾ ཨདྷིཔཉྙཱསིཀྑཱཏི ཨིམཱ ཏིསྶོ སིཀྑཱཡོ ཏསྨིཾ ཨཱརམྨཎེ ཏཱཡ སཏིཡཱ ཏེན མནསིཀཱརེན སིཀྑཏི ཨཱསེཝཏི བྷཱཝེཏི བཧུལཱིཀརོཏཱིཏི ཨེཝམེཏྠ ཨཏྠོ དཊྛབྦོ. ཏཏྠ ཡསྨཱ པུརིམནཡེན ཀེཝལཾ ཨསྶསིཏབྦཾ པསྶསིཏབྦམེཝ ཙ, ན ཨཉྙཾ ཀིཉྩི ཀཱཏབྦཾ, ཨིཏོ པཊྛཱཡ པན ཉཱཎུཔྤཱདནཱདཱིསུ ཡོགོ ཀརཎཱིཡོ. ཏསྨཱ ཏཏྠ ‘‘ཨསྶསཱམཱིཏི པཛཱནཱཏི པསྶསཱམཱིཏི པཛཱནཱཏི’’ཙྩེཝ ཝཏྟམཱནཀཱལཝསེན པཱལི༹ཾ ཝཏྭཱ ཨིཏོ པཊྛཱཡ ཀཏྟབྦསྶ ཉཱཎུཔྤཱདནཱདིནོ ཨཱ-ཀཱརསྶ དསྶནཏྠཾ ‘‘སབྦཀཱཡཔཊིསཾཝེདཱི ཨསྶསིསྶཱམཱི’’ཏིཨཱདིནཱ ནཡེན ཨནཱགཏཀཱལཝསེན པཱལི༹ ཨཱརོཔིཏཱཏི ཝེདིཏབྦཱ.

པསྶམྦྷཡཾ ཀཱཡསངྑཱརཾ…པེ… སིཀྑཏཱིཏི ཨོལཱ༹རིཀཾ ཨསྶཱསཔསྶཱསསངྑཱཏཾ ཀཱཡསངྑཱརཾ པསྶམྦྷེནྟོ པཊིཔྤསྶམྦྷེནྟོ ནིརོདྷེནྟོ ཝཱུཔསམེནྟོ ཨསྶསིསྶཱམི པསྶསིསྶཱམཱིཏི སིཀྑཏི.

ཏཏྲེཝཾ ཨོལཱ༹རིཀསུཁུམཏཱ ཙ པསྶདྡྷི ཙ ཝེདིཏབྦཱ – ཨིམསྶ ཧི བྷིཀྑུནོ པུབྦེ ཨཔརིགྒཧིཏཀཱལེ ཀཱཡོ ཙ ཙིཏྟཉྩ སདརཐཱ ཧོནྟི ཨོལཱ༹རིཀཱ. ཀཱཡཙིཏྟཱནཾ ཨོལཱ༹རིཀཏྟེ ཨཝཱུཔསནྟེ ཨསྶཱསཔསྶཱསཱཔི ཨོལཱ༹རིཀཱ ཧོནྟི, བལཝཏརཱ ཧུཏྭཱ པཝཏྟནྟི, ནཱསིཀཱ ནཔྤཧོཏི, མུཁེན ཨསྶསནྟོཔི པསྶསནྟོཔི ཏིཊྛཏི. ཡདཱ པནསྶ ཀཱཡོཔི ཙིཏྟམྤི པརིགྒཧིཏཱ ཧོནྟི, ཏདཱ ཏེ སནྟཱ ཧོནྟི ཝཱུཔསནྟཱ. ཏེསུ ཝཱུཔསནྟེསུ ཨསྶཱསཔསྶཱསཱ སུཁུམཱ ཧུཏྭཱ པཝཏྟནྟི, ‘‘ཨཏྠི ནུ ཁོ, ནཏྠཱི’’ཏི ཝིཙེཏབྦཱཀཱརཔྤཏྟཱ ཧོནྟི. སེཡྻཐཱཔི པུརིསསྶ དྷཱཝིཏྭཱ པབྦཏཱ ཝཱ ཨོརོཧིཏྭཱ མཧཱབྷཱརཾ ཝཱ སཱིསཏོ ཨོརོཔེཏྭཱ ཋིཏསྶ ཨོལཱ༹རིཀཱ ཨསྶཱསཔསྶཱསཱ ཧོནྟི, ནཱསིཀཱ ནཔྤཧོཏི, མུཁེན ཨསྶསནྟོཔི པསྶསནྟོཔི ཏིཊྛཏི. ཡདཱ པནེས ཏཾ པརིསྶམཾ ཝིནོདེཏྭཱ ནྷཏྭཱ ཙ པིཝིཏྭཱ ཙ ཨལླསཱཊཀཾ ཧདཡེ ཀཏྭཱ སཱིཏཱཡ ཚཱཡཱཡ ནིཔནྣོ ཧོཏི, ཨཐསྶ ཏེ ཨསྶཱསཔསྶཱསཱ སུཁུམཱ ཧོནྟི ‘‘ཨཏྠི ནུ ཁོ, ནཏྠཱི’’ཏི ཝིཙེཏབྦཱཀཱརཔྤཏྟཱ, ཨེཝམེཝཾ ཨིམསྶ བྷིཀྑུནོ ཨཔརིགྒཧིཏཀཱལེཏི ཝིཏྠཱརེཏབྦཾ. ཏཐཱ ཧིསྶ པུབྦེ ཨཔརིགྒཧིཏཀཱལེ ‘‘ཨོལཱ༹རིཀོལཱ༹རིཀེ ཀཱཡསངྑཱརེ པསྶམྦྷེམཱི’’ཏི ཨཱབྷོགསམནྣཱཧཱརམནསིཀཱརོ ནཏྠི, པརིགྒཧིཏཀཱལེ པན ཨཏྠི. ཏེནསྶ ཨཔརིགྒཧིཏཀཱལཏོ པརིགྒཧིཏཀཱལེ ཀཱཡསངྑཱརོ སུཁུམོ ཧོཏི. ཏེནཱཧུ པོརཱཎཱ –

‘‘སཱརདྡྷེ ཀཱཡེ ཙིཏྟེ ཙ, ཨདྷིམཏྟཾ པཝཏྟཏི;

ཨསཱརདྡྷམྷི ཀཱཡམྷི, སུཁུམཾ སམྤཝཏྟཏཱི’’ཏི. (ཝིསུདྡྷི. ༡.༢༢༠; པཱརཱ. ཨཊྛ. ༢.༡༦༥);

པརིགྒཧེཔི ཨོལཱ༹རིཀོ, པཋམཛ྄ཛྷཱནཱུཔཙཱརེ སུཁུམོ. ཏསྨིམྤི ཨོལཱ༹རིཀོ, པཋམཛ྄ཛྷཱནེ སུཁུམོ. པཋམཛ྄ཛྷཱནེ ཙ དུཏིཡཛ྄ཛྷཱནཱུཔཙཱརེ ཙ ཨོལཱ༹རིཀོ, དུཏིཡཛ྄ཛྷཱནེ སུཁུམོ. དུཏིཡཛ྄ཛྷཱནེ ཙ ཏཏིཡཛ྄ཛྷཱནཱུཔཙཱརེ ཙ ཨོལཱ༹རིཀོ, ཏཏིཡཛ྄ཛྷཱནེ སུཁུམོ. ཏཏིཡཛ྄ཛྷཱནེ ཙ ཙཏུཏྠཛ྄ཛྷཱནཱུཔཙཱརེ ཙ ཨོལཱ༹རིཀོ, ཙཏུཏྠཛ྄ཛྷཱནེ ཨཏིསུཁུམོ ཨཔྤཝཏྟིམེཝ པཱཔུཎཱཏི. ཨིདཾ ཏཱཝ དཱིགྷབྷཱཎཀསཾཡུཏྟབྷཱཎཀཱནཾ མཏཾ.

མཛ྄ཛྷིམབྷཱཎཀཱ པན ‘‘པཋམཛ྄ཛྷཱནེ ཨོལཱ༹རིཀོ, དུཏིཡཛ྄ཛྷཱནཱུཔཙཱརེ སུཁུམོ’’ཏི ཨེཝཾ ཧེཊྛིམཧེཊྛིམཛ྄ཛྷཱནཏོ ཨུཔརཱུཔརིཛ྄ཛྷཱནཱུཔཙཱརེཔི སུཁུམཏརཾ ཨིཙྪནྟི. སབྦེསཾཡེཝ པན མཏེན ཨཔརིགྒཧིཏཀཱལེ པཝཏྟཀཱཡསངྑཱརོ པརིགྒཧིཏཀཱལེ པཊིཔྤསྶམྦྷཏི, པརིགྒཧིཏཀཱལེ པཝཏྟཀཱཡསངྑཱརོ པཋམཛ྄ཛྷཱནཱུཔཙཱརེ…པེ… ཙཏུཏྠཛ྄ཛྷཱནཱུཔཙཱརེ པཝཏྟཀཱཡསངྑཱརོ ཙཏུཏྠཛ྄ཛྷཱནེ པཊིཔྤསྶམྦྷཏི. ཨཡཾ ཏཱཝ སམཐེ ནཡོ.

ཝིཔསྶནཱཡཾ པན ཨཔརིགྒཧིཏཀཱལེ པཝཏྟཀཱཡསངྑཱརོ ཨོལཱ༹རིཀོ, མཧཱབྷཱུཏཔརིགྒཧེ སུཁུམོ. སོཔི ཨོལཱ༹རིཀོ, ཨུཔཱདཱརཱུཔཔརིགྒཧེ སུཁུམོ. སོཔི ཨོལཱ༹རིཀོ, སཀལརཱུཔཔརིགྒཧེ སུཁུམོ. སོཔི ཨོལཱ༹རིཀོ, ཨརཱུཔཔརིགྒཧེ སུཁུམོ. སོཔི ཨོལཱ༹རིཀོ, རཱུཔཱརཱུཔཔརིགྒཧེ སུཁུམོ. སོཔི ཨོལཱ༹རིཀོ, པཙྩཡཔརིགྒཧེ སུཁུམོ. སོཔི ཨོལཱ༹རིཀོ, སཔྤཙྩཡནཱམརཱུཔདསྶནེ སུཁུམོ. སོཔི ཨོལཱ༹རིཀོ, ལཀྑཎཱརམྨཎིཀ ཝིཔསྶནཱཡ སུཁུམོ. སོཔི དུབྦལཝིཔསྶནཱཡ ཨོལཱ༹རིཀོ, བལཝཝིཔསྶནཱཡ སུཁུམོ. ཏཏྠ པུབྦེ ཝུཏྟནཡེནེཝ པུརིམསྶ པུརིམསྶ པཙྪིམེན པཙྪིམེན པཊིཔྤསྶདྡྷི ཝེདིཏབྦཱ. ཨེཝམེཏྠ ཨོལཱ༹རིཀསུཁུམཏཱ པཊིཔྤསྶདྡྷི ཙ ཝེདིཏབྦཱ. ཨཡཾ ཏཱཝེཏྠ ཀཱཡཱནུཔསྶནཱཝསེན ཝུཏྟསྶ པཋམཙཏུཀྐསྶ ཨནུཔུབྦཔདཝཎྞནཱ.

ཡསྨཱ པནེཏྠ ཨིདམེཝ ཙཏུཀྐཾ ཨཱདིཀམྨིཀསྶ ཀམྨཊྛཱནཝསེན ཝུཏྟཾ, ཨིཏརཱནི པན ཏཱིཎི ཙཏུཀྐཱནི ཨེཏྠ པཏྟཛ྄ཛྷཱནསྶ ཝེདནཱཙིཏྟདྷམྨཱནུཔསྶནཱཝསེན, ཏསྨཱ ཨིམཾ ཀམྨཊྛཱནཾ བྷཱཝེཏྭཱ ཨཱནཱཔཱནཙཏུཀྐཛ྄ཛྷཱནཔདཊྛཱནཱཡ ཝིཔསྶནཱཡ སཧ པཊིསམྦྷིདཱཧི ཨརཧཏྟཾ པཱཔུཎིཏུཀཱམེན ཨཱདིཀམྨིཀེན ཀུལཔུཏྟེན ཝིསུདྡྷིམགྒེ ཝུཏྟནཡེན སཱིལཔརིསོདྷནཱདཱིནི སབྦཀིཙྩཱནི ཀཏྭཱ སཏྟངྒསམནྣཱགཏསྶ ཨཱཙརིཡསྶ སནྟིཀེ པཉྩསནྡྷིཀཾ ཀམྨཊྛཱནཾ ཨུགྒཧེཏབྦཾ. ཏཏྲིམེ པཉྩ སནྡྷཡོ ཨུགྒཧོ པརིཔུཙྪཱ ཨུཔཊྛཱནཾ ཨཔྤནཱ ལཀྑཎནྟི. ཏཏྠ ཨུགྒཧོ ནཱམ ཀམྨཊྛཱནསྶ ཨུགྒཎྷནཾ. པརིཔུཙྪཱ ནཱམ ཀམྨཊྛཱནསྶ པརིཔུཙྪནཾ. ཨུཔཊྛཱནཾ ནཱམ ཀམྨཊྛཱནསྶ ཨུཔཊྛཱནཾ. ཨཔྤནཱ ནཱམ ཀམྨཊྛཱནསྶ ཨཔྤནཱ. ལཀྑཎཾ ནཱམ ཀམྨཊྛཱནསྶ ལཀྑཎཾ, ‘‘ཨེཝཾ ལཀྑཎམིདཾ ཀམྨཊྛཱན’’ནྟི ཀམྨཊྛཱནསབྷཱཝཱུཔདྷཱརཎནྟི ཝུཏྟཾ ཧོཏི.

ཨེཝཾ པཉྩསནྡྷིཀཾ ཀམྨཊྛཱནཾ ཨུགྒཎྷནྟོ ཨཏྟནཱཔི ན ཀིལམཏི, ཨཱཙརིཡམྤི ན ཝིཧེསེཏི. ཏསྨཱ ཐོཀཾ ཨུདྡིསཱཔེཏྭཱ བཧུཾ ཀཱལཾ སཛ྄ཛྷཱཡིཏྭཱ ཨེཝཾ པཉྩསནྡྷིཀཾ ཀམྨཊྛཱནཾ ཨུགྒཧེཏྭཱ ཨཱཙརིཡསྶ སནྟིཀེ ཝཱ ཨཉྙཏྠ ཝཱ ཨཊྛཱརས དོསཡུཏྟེ ཝིཧཱརེ ཝཛྫེཏྭཱ པཉྩངྒསམནྣཱགཏེ སེནཱསནེ ཝསནྟེན ཨུཔཙྪིནྣཁུདྡཀཔལིབོདྷེན ཀཏབྷཏྟཀིཙྩེན བྷཏྟསམྨདཾ པཊིཝིནོདེཏྭཱ སུཁནིསིནྣེན རཏནཏྟཡགུཎཱནུསྶརཎེན ཙིཏྟཾ སམྤཧཾསེཏྭཱ ཨཱཙརིཡུགྒཧཏོ ཨེཀཔདམྤི ཨཔརིཧཱཔེནྟེན ཨིདཾ ཨཱནཱཔཱནསྶཏིཀམྨཊྛཱནཾ མནསི ཀཱཏབྦཾ. ཏཏྲཱཡཾ མནསིཀཱརཝིདྷི –

‘‘གཎནཱ ཨནུབནྡྷནཱ, ཕུསནཱ ཋཔནཱ སལླཀྑཎཱ;

ཝིཝཊྚནཱ པཱརིསུདྡྷི, ཏེསཉྩ པཊིཔསྶནཱ’’ཏི.

ཏཏྠ གཎནཱཏི གཎནཱཡེཝ. ཨནུབནྡྷནཱཏི ཨནུགམནཱ. ཕུསནཱཏི ཕུཊྛཊྛཱནཾ. ཋཔནཱཏི ཨཔྤནཱ. སལླཀྑཎཱཏི ཝིཔསྶནཱ. ཝིཝཊྚནཱཏི མགྒོ. པཱརིསུདྡྷཱིཏི ཕལཾ. ཏེསཉྩ པཊིཔསྶནཱཏི པཙྩཝེཀྑཎཱ. ཏཏྠ ཨིམིནཱ ཨཱདིཀམྨིཀེན ཀུལཔུཏྟེན པཋམཾ གཎནཱཡ ཨིདཾ ཀམྨཊྛཱནཾ མནསི ཀཱཏབྦཾ. གཎེནྟེན པན པཉྩནྣཾ ཧེཊྛཱ ན ཋཔེཏབྦཾ, དསནྣཾ ཨུཔརི ན ནེཏབྦཾ, ཨནྟརཱ ཁཎྜཾ ན དསྶེཏབྦཾ. པཉྩནྣཾ ཧེཊྛཱ ཋཔེནྟསྶ ཧི སམྦཱདྷེ ཨོཀཱསེ ཙིཏྟུཔྤཱདོ ཝིཔྥནྡཏི སམྦཱདྷེ ཝཛེ སནྣིརུདྡྷགོགཎོ ཝིཡ. དསནྣཾ ཨུཔརི ནེནྟསྶ གཎནནིསྶིཏོཝ ཙིཏྟུཔྤཱདོ ཧོཏི. ཨནྟརཱ ཁཎྜཾ དསྶེནྟསྶ ‘‘སིཁཱཔྤཏྟཾ ནུ ཁོ མེ ཀམྨཊྛཱནཾ, ནོ’’ཏི ཙིཏྟཾ ཝིཀམྤཏི, ཏསྨཱ ཨེཏེ དོསེ ཝཛྫེཏྭཱ གཎེཏབྦཾ.

གཎེནྟེན ཙ པཋམཾ དནྡྷགཎནཱཡ དྷཉྙམཱཔཀགཎནཱཡ གཎེཏབྦཾ. དྷཉྙམཱཔཀོ ཧི ནཱལི༹ཾ པཱུརེཏྭཱ ‘‘ཨེཀ’’ནྟི ཝཏྭཱ ཨོཀིརཏི, པུན པཱུརེནྟོ ཀིཉྩི ཀཙཝརཾ དིསྭཱ ཚཌྜེནྟོ ‘‘ཨེཀཾ ཨེཀ’’ནྟི ཝདཏི. ཨེསེཝ ནཡོ དྭེ དྭེཏིཨཱདཱིསུ. ཨེཝམེཝཾ ཨིམིནཱཔི ཨསྶཱསཔསྶཱསེསུ ཡོ ཨུཔཊྛཱཏི, ཏཾ གཧེཏྭཱ ‘‘ཨེཀཾ ཨེཀ’’ནྟིཨཱདིཾ ཀཏྭཱ ཡཱཝ ‘‘དས དསཱ’’ཏི པཝཏྟམཱནཾ པཝཏྟམཱནཾ ཨུཔལཀྑེཏྭཱཝ གཎེཏབྦཾ. ཏསྶ ཨེཝཾ གཎཡཏོ ནིཀྑམནྟཱ ཙ པཝིསནྟཱ ཙ ཨསྶཱསཔསྶཱསཱ པཱཀཊཱ ཧོནྟི.

ཨཐཱནེན ཏཾ དནྡྷགཎནཾ དྷཉྙམཱཔཀགཎནཾ པཧཱཡ སཱིགྷགཎནཱཡ གོཔཱལཀགཎནཱཡ གཎེཏབྦཾ. ཚེཀོ ཧི གོཔཱལཀོ སཀྑརཱདཡོ ཨུཙྪངྒེན གཧེཏྭཱ རཛྫུདཎྜཧཏྠོ པཱཏོཝ ཝཛཾ གནྟྭཱ གཱཝོ པིཊྛིཡཾ པཧརིཏྭཱ པལིགྷཏྠམྦྷམཏྠཀེ ནིསིནྣོ དྭཱརཾ པཏྟཾ པཏྟཾཡེཝ གཱཝཾ ‘‘ཨེཀོ དྭེ’’ཏི སཀྑརཾ ཁིཔིཏྭཱ ཁིཔིཏྭཱ གཎེཏི. ཏིཡཱམརཏྟིཾ སམྦཱདྷེ ཨོཀཱསེ དུཀྑཾ ཝུཏྠགོགཎོ ནིཀྑམནྟོ ཨཉྙམཉྙཾ ཨུཔནིགྷཾསནྟོ ཝེགེན ཝེགེན པུཉྫཔུཉྫོ ཧུཏྭཱ ནིཀྑམཏི. སོ ཝེགེན ཝེགེན ‘‘ཏཱིཎི ཙཏྟཱརི པཉྩ དསཱ’’ཏི གཎེཏིཡེཝ, ཨེཝམསྶཱཔི པུརིམནཡེན གཎཡཏོ ཨསྶཱསཔསྶཱསཱ པཱཀཊཱ ཧུཏྭཱ སཱིགྷཾ སཱིགྷཾ པུནཔྤུནཾ སཉྩརནྟི. ཏཏོ ཏེན ‘‘པུནཔྤུནཾ སཉྩརནྟཱི’’ཏི ཉཏྭཱ ཨནྟོ ཙ བཧི ཙ ཨགྒཧེཏྭཱ དྭཱརཔྤཏྟཾ དྭཱརཔྤཏྟཾཡེཝ གཧེཏྭཱ ‘‘ཨེཀོ དྭེ ཏཱིཎི ཙཏྟཱརི པཉྩ, ཨེཀོ དྭེ ཏཱིཎི ཙཏྟཱརི པཉྩ ཚ, ཨེཀོ དྭེ ཏཱིཎི ཙཏྟཱརི པཉྩ ཚ སཏྟ…པེ… ཨཊྛ ནཝ དསཱ’’ཏི སཱིགྷཾ སཱིགྷཾ གཎེཏབྦམེཝ. གཎནཱཔཊིབདྡྷེ ཧི ཀམྨཊྛཱནེ གཎནབལེནེཝ ཙིཏྟཾ ཨེཀགྒཾ ཧོཏི ཨརིཏྟུཔཏྠམྦྷནཝསེན ཙཎྜསོཏེ ནཱཝཱཋཔནམིཝ.

ཏསྶེཝཾ སཱིགྷཾ སཱིགྷཾ གཎཡཏོ ཀམྨཊྛཱནཾ ནིརནྟརཾ པཝཏྟཾ ཝིཡ ཧུཏྭཱ ཨུཔཊྛཱཏི. ཨཐ ‘‘ནིརནྟརཾ པཝཏྟཏཱི’’ཏི ཉཏྭཱ ཨནྟོ ཙ བཧི ཙ ཝཱཏཾ ཨཔརིགྒཧེཏྭཱ པུརིམནཡེནེཝ ཝེགེན ཝེགེན གཎེཏབྦཾ. ཨནྟོཔཝིསནཝཱཏེན ཧི སདྡྷིཾ ཙིཏྟཾ པཝེསཡཏོ ཨབྦྷནྟརཾ ཝཱཏབྦྷཱཧཏཾ མེདཔཱུརིཏཾ ཝིཡ ཧོཏི. བཧིནིཀྑམནཝཱཏེན སདྡྷིཾ ཙིཏྟཾ ནཱིཧརཏོ བཧིདྡྷཱ པུཐུཏྟཱརམྨཎེ ཙིཏྟཾ ཝིཀྑིཔཏི. ཕུཊྛཕུཊྛོཀཱསེ པན སཏིཾ ཋཔེཏྭཱ བྷཱཝེནྟསྶེཝ བྷཱཝནཱ སམྤཛྫཏི. ཏེན ཝུཏྟཾ – ‘‘ཨནྟོ ཙ བཧི ཙ ཝཱཏཾ ཨཔརིགྒཧེཏྭཱ པུརིམནཡེནེཝ ཝེགེན ཝེགེན གཎེཏབྦ’’ནྟི.

ཀཱིཝཙིརཾ པནེཏཾ གཎེཏབྦནྟི? ཡཱཝ ཝིནཱ གཎནཱཡ ཨསྶཱསཔསྶཱསཱརམྨཎེ སཏི སནྟིཊྛཏི. བཧི ཝིསཊཝིཏཀྐཝིཙྪེདཾ ཀཏྭཱ ཨསྶཱསཔསྶཱསཱརམྨཎེ སཏི སཎྛཱཔནཏྠཾཡེཝ ཧི གཎནཱཏི.

ཨེཝཾ གཎནཱཡ མནསི ཀཏྭཱ ཨནུབནྡྷནཱཡ མནསི ཀཱཏབྦཾ. ཨནུབནྡྷནཱ ནཱམ གཎནཾ པཊིསཾཧརིཏྭཱ སཏིཡཱ ནིརནྟརཾ ཨསྶཱསཔསྶཱསཱནཾ ཨནུགམནཾ. ཏཉྩ ཁོ ན ཨཱདིམཛ྄ཛྷཔརིཡོསཱནཱནུགམནཝསེན. ཨཱདིམཛ྄ཛྷཔརིཡོསཱནཱནི ཏསྶཱནུགམནེ ཨཱདཱིནཝཱ ཙ ཧེཊྛཱ ཝུཏྟཱཡེཝ.

ཏསྨཱ ཨནུབནྡྷནཱཡ མནསིཀརོནྟེན ན ཨཱདིམཛ྄ཛྷཔརིཡོསཱནཝསེན མནསི ཀཱཏབྦཾ, ཨཔིཙ ཁོ ཕུསནཱཝསེནཋཔནཱཝསེན ཙ མནསི ཀཱཏབྦཾ. གཎནཱནུབནྡྷནཱཝསེན ཝིཡ ཧི ཕུསནཱཋཔནཱཝསེན ཝིསུཾ མནསིཀཱརོ ནཏྠི, ཕུཊྛཕུཊྛཊྛཱནེཡེཝ པན གཎེནྟོ གཎནཱཡ ཙ ཕུསནཱཡ ཙ མནསི ཀརོཏི, ཏཏྠེཝ གཎནཾ པཊིསཾཧརིཏྭཱ ཏེ སཏིཡཱ ཨནུབནྡྷནྟོ, ཨཔྤནཱཝསེན ཙ ཙིཏྟཾ ཋཔེནྟོ ‘‘ཨནུབནྡྷནཱཡ ཙ ཕུསནཱཡ ཙ ཋཔནཱཡ ཙ མནསི ཀརོཏཱི’’ཏི ཝུཙྩཏི. སྭཱཡམཏྠོ ཨཊྛཀཐཱསུ ཝུཏྟཔངྒུལ༹དོཝཱརིཀོཔམཱཧི ཨིདྷེཝ པཱལི༹ཡཾ ཝུཏྟཀཀཙཱུཔམཱཡ ཙ ཝེདིཏབྦོ.

ཏཏྲཱཡཾ པངྒུལོ༹པམཱ – སེཡྻཐཱཔི པངྒུལོ༹ དོལཱཡ ཀཱིལ༹ཏཾ མཱཏཱཔུཏྟཱནཾ དོལཾ ཁིཔིཏྭཱ ཏཏྠེཝ དོལཱཐམྦྷམཱུལེ ནིསིནྣོ ཀམེན ཨཱགཙྪནྟསྶ ཙ གཙྪནྟསྶ ཙ དོལཱཕལཀསྶ ཨུབྷོ ཀོཊིཡོ མཛ྄ཛྷཉྩ པསྶཏི, ན ཙ ཨུབྷོཀོཊིམཛ྄ཛྷཱནཾ དསྶནཏྠཾ བྱཱཝཊོ ཧོཏི, ཨེཝམེཝ བྷིཀྑུ སཏིཝསེན ཨུཔནིབནྡྷནཏྠམྦྷམཱུལེ ཋཏྭཱ ཨསྶཱསཔསྶཱསདོལཾ ཁིཔིཏྭཱ ཏཏྠེཝ ནིམིཏྟེ སཏིཡཱ ནིསཱིདནྟོ ཀམེན ཨཱགཙྪནྟཱནཉྩ གཙྪནྟཱནཉྩ ཕུཊྛཊྛཱནེ ཨསྶཱསཔསྶཱསཱནཾ ཨཱདིམཛ྄ཛྷཔརིཡོསཱནཾ སཏིཡཱ ཨནུགཙྪནྟོ ཏཏྠེཝ (ཝིསུདྡྷི. ༡.༢༢༥) ཙིཏྟཾ ཋཔེཏྭཱ པསྶཏི, ན ཙ ཏེསཾ དསྶནཏྠཾ བྱཱཝཊོ ཧོཏི. ཨཡཾ པངྒུལོ༹པམཱ.

ཨཡཾ པན དོཝཱརིཀོཔམཱ – སེཡྻཐཱཔི དོཝཱརིཀོ ནགརསྶ ཨནྟོ ཙ བཧི ཙ པུརིསེ ‘‘ཀོ ཏྭཾ, ཀུཏོ ཝཱ ཨཱགཏོ, ཀུཧིཾ ཝཱ གཙྪསི, ཀིཾ ཝཱ ཏེ ཧཏྠེ’’ཏི ན ཝཱིམཾསཏི. ན ཧི ཏསྶ ཏེ བྷཱརཱ, དྭཱརཔྤཏྟཾ དྭཱརཔྤཏྟཾཡེཝ པན ཝཱིམཾསཏི, ཨེཝམེཝ ཨིམསྶ བྷིཀྑུནོ ཨནྟོཔཝིཊྛཝཱཏཱ ཙ བཧིནིཀྑནྟཝཱཏཱ ཙ ན བྷཱརཱ ཧོནྟི, དྭཱརཔྤཏྟཱ དྭཱརཔྤཏྟཱཡེཝ བྷཱརཱཏི ཨཡཾ དོཝཱརིཀོཔམཱ.

ཀཀཙཱུཔམཱ པན ‘‘ནིམིཏྟཾ ཨསྶཱསཔསྶཱསཱ’’ཏིཨཱདིནཱ (པཊི. མ. ༡.༡༥༩) ནཡེན ཨིདྷ ཝུཏྟཱཡེཝ. ཨིདྷ པནསྶ ཨཱགཏཱགཏཝསེན ཨམནསིཀཱརམཏྟམེཝ པཡོཛནནྟི ཝེདིཏབྦཾ.

ཨིདཾ ཀམྨཊྛཱནཾ མནསིཀརོཏོ ཀསྶཙི ན ཙིརེནེཝ ནིམིཏྟཉྩ ཨུཔྤཛྫཏི, ཨཝསེསཛྷཱནངྒཔཊིམཎྜིཏཱ ཨཔྤནཱསངྑཱཏཱ ཋཔནཱ ཙ སམྤཛྫཏི. ཀསྶཙི པན གཎནཱཝསེནེཝ མནསིཀཱརཀཱལཏོ པབྷུཏི ཡཐཱ སཱརདྡྷཀཱཡསྶ མཉྩེ ཝཱ པཱིཋེ ཝཱ ནིསཱིདཏོ མཉྩཔཱིཋཾ ཨོནམཏི ཝིཀཱུཛཏི, པཙྩཏྠརཎཾ ཝལིཾ གཎྷཱཏི, ཨསཱརདྡྷཀཱཡསྶ པན ནིསཱིདཏོ ནེཝ མཉྩཔཱིཋཾ ཨོནམཏི ན ཝིཀཱུཛཏི, ན པཙྩཏྠརཎཾ ཝལིཾ གཎྷཱཏི, ཏཱུལཔིཙུཔཱུརིཏཾ ཝིཡ མཉྩཔཱིཋཾ ཧོཏི. ཀསྨཱ? ཡསྨཱ ཨསཱརདྡྷོ ཀཱཡོ ལཧུཀོ ཧོཏི, ཨེཝམེཝཾ གཎནཱཝསེན མནསིཀཱརཀཱལཏོ པབྷུཏི ཨནུཀྐམཏོ ཨོལཱ༹རིཀཨསྶཱསཔསྶཱསནིརོདྷཝསེན ཀཱཡདརཐེ ཝཱུཔསནྟེ ཀཱཡོཔི ཙིཏྟམྤི ལཧུཀཾ ཧོཏི, སརཱིརཾ ཨཱཀཱསེ ལངྒྷནཱཀཱརཔྤཏྟཾ ཝིཡ ཧོཏི.

ཏསྶ ཨོལཱ༹རིཀེ ཨསྶཱསཔསྶཱསེ ནིརུདྡྷེ སུཁུམཨསྶཱསཔསྶཱསནིམིཏྟཱརམྨཎཾ ཙིཏྟཾ པཝཏྟཏི. ཏསྨིམྤི ནིརུདྡྷེ ཨཔརཱཔརཾ ཏཏོ སུཁུམཏརཾ སུཁུམཏརཾ ཨསྶཱསཔསྶཱསནིམིཏྟཱརམྨཎཾ པཝཏྟཏིཡེཝ. སྭཱཡམཏྠོ ཨུཔརི ཝུཏྟཀཾསཐཱལོཔམཱཡ ཝེདིཏབྦོ.

ཡཐཱ ཧི ཨཉྙཱནི ཀམྨཊྛཱནཱནི ཨུཔརཱུཔརི ཝིབྷཱུཏཱནི ཧོནྟི, ན ཏཐཱ ཨིདཾ. ཨིདཾ པན ཨུཔརཱུཔརི བྷཱཝེནྟསྶ སུཁུམཏྟཾ གཙྪཏི, ཨུཔཊྛཱནམྤི ན ཨུཔགཙྪཏི. ཨེཝཾ ཨནུཔཊྛཧནྟེ པན ཏསྨིཾ ཏེན བྷིཀྑུནཱ ‘‘ཨཱཙརིཡཾ པུཙྪིསྶཱམཱི’’ཏི ཝཱ ‘‘ནཊྛཾ དཱནི མེ ཀམྨཊྛཱན’’ནྟི ཝཱ ཨུཊྛཱཡཱསནཱ ན གནྟབྦཾ. ཨིརིཡཱཔཐཾ ཝིཀོཔེཏྭཱ གཙྪཏོ ཧི ཀམྨཊྛཱནཾ ནཝནཝམེཝ ཧོཏི. ཏསྨཱ ཡཐཱནིསིནྣེནེཝ དེསཏོ ཨཱཧརིཏབྦཾ.

ཏཏྲཱཡཾ ཨཱཧརཎཱུཔཱཡོ – ཏེན བྷིཀྑུནཱ ཀམྨཊྛཱནསྶ ཨནུཔཊྛཱནབྷཱཝཾ ཉཏྭཱ ཨིཏི པཊིསཉྩིཀྑིཏབྦཾ ‘‘ཨིམེ ཨསྶཱསཔསྶཱསཱ ནཱམ ཀཏྠ ཨཏྠི, ཀཏྠ ནཏྠི. ཀསྶ ཝཱ ཨཏྠི, ཀསྶ ཝཱ ནཏྠཱི’’ཏི. ཨཐེཝཾ པཊིསཉྩིཀྑཏོ ‘‘ཨིམེ ཨནྟོམཱཏུཀུཙྪིཡཾ ནཏྠི, ཨུདཀེ ནིམུགྒཱནཾ ནཏྠི, ཏཐཱ ཨསཉྙཱིབྷཱུཏཱནཾ མཏཱནཾ ཙཏུཏྠཛ྄ཛྷཱནསམཱཔནྣཱནཾ རཱུཔཱརཱུཔབྷཝསམངྒཱིནཾ ནིརོདྷསམཱཔནྣཱན’’ནྟི ཉཏྭཱ ཨེཝཾ ཨཏྟནཱཝ ཨཏྟཱ པཊིཙོདེཏབྦོ ‘‘ནནུ, ཏྭཾ པཎྜིཏ, ནེཝ མཱཏུཀུཙྪིགཏོ, ན ཨུདཀེ ནིམུགྒོ, ན ཨསཉྙཱིབྷཱུཏོ, ན མཏོ, ན ཙཏུཏྠཛ྄ཛྷཱནསམཱཔནྣོ, ན རཱུཔཱརཱུཔབྷཝསམངྒཱི, ན ནིརོདྷསམཱཔནྣོ. ཨཏྠིཡེཝ ཏེ ཨསྶཱསཔསྶཱསཱ, མནྡཔཉྙཏཱཡ པན པརིགྒཧེཏུཾ ན སཀྐོསཱི’’ཏི. ཨཐཱནེན པཀཏིཕུཊྛཝསེན ཙིཏྟཾ ཋཔེཏྭཱ མནསིཀཱརོ པཝཏྟེཏབྦོ. ཨིམེ ཧི དཱིགྷནཱསིཀསྶ ནཱསཱཔུཊཾ གྷཊྚེནྟཱ པཝཏྟནྟི, རསྶནཱསིཀསྶ ཨུཏྟརོཊྛཾ. ཏསྨཱནེན ཨིམཾ ནཱམ ཋཱནཾ གྷཊྚེནྟཱིཏི ནིམིཏྟཾ ཋཔེཏབྦཾ. ཨིམམེཝ ཧི ཨཏྠཝསཾ པཊིཙྩ ཝུཏྟཾ བྷགཝཏཱ – ‘‘ནཱཧཾ, བྷིཀྑཝེ, མུཊྛསྶཏིསྶ ཨསམྤཛཱནསྶ ཨཱནཱཔཱནསྶཏིབྷཱཝནཾ ཝདཱམཱི’’ཏི (མ. ནི. ༣.༡༤༩; སཾ. ནི. ༥.༩༩༢). ཀིཉྩཱཔི ཧི ཡཾཀིཉྩི ཀམྨཊྛཱནཾ སཏསྶ སམྤཛཱནསྶེཝ སམྤཛྫཏི, ཨིཏོ ཨཉྙཾ པན མནསིཀརོནྟསྶ པཱཀཊཾ ཧོཏི. ཨིདཾ པན ཨཱནཱཔཱནསྶཏིཀམྨཊྛཱནཾ གརུཀཾ གརུཀབྷཱཝནཾ བུདྡྷཔཙྩེཀབུདྡྷབུདྡྷཔུཏྟཱནཾ མཧཱཔུརིསཱནཾཡེཝ མནསིཀཱརབྷཱུམིབྷཱུཏཾ, ན ཙེཝ ཨིཏྟརཾ, ན ཙ ཨིཏྟརསཏྟསམཱསེཝིཏཾ. ཡཐཱ ཡཐཱ མནསི ཀརཱིཡཏི, ཏཐཱ ཏཐཱ སནྟཉྩེཝ ཧོཏི སུཁུམཉྩ. ཏསྨཱ ཨེཏྠ བལཝཏཱི སཏི ཙ པཉྙཱ ཙ ཨིཙྪིཏབྦཱ.

ཡཐཱ ཧི མཊྛསཱཊཀསྶ ཏུནྣཀརཎཀཱལེ སཱུཙིཔི སུཁུམཱ ཨིཙྪིཏབྦཱ, སཱུཙིཔཱསཝེདྷནམྤི ཏཏོ སུཁུམཏརཾ, ཨེཝམེཝཾ མཊྛསཱཊཀསདིསསྶ ཨིམསྶ ཀམྨཊྛཱནསྶ བྷཱཝནཱཀཱལེ སཱུཙིཔཊིབྷཱགཱ སཏིཔི སཱུཙིཔཱསཝེདྷནཔཊིབྷཱགཱ ཏཾསམྤཡུཏྟཱ པཉྙཱཔི བལཝཏཱི ཨིཙྪིཏབྦཱ. ཏཱཧི ཙ པན སཏིཔཉྙཱཧི སམནྣཱགཏེན བྷིཀྑུནཱ ན ཏེ ཨསྶཱསཔསྶཱསཱ ཨཉྙཏྲ པཀཏིཕུཊྛོཀཱསཱ པརིཡེསིཏབྦཱ.

ཡཐཱ ཧི ཀསྶཀོ ཁེཏྟཾ ཀསིཏྭཱ བལཱིབདྡེ མུཉྩིཏྭཱ གོཙརམུཁེ ཀཏྭཱ ཚཱཡཱཡ ནིསིནྣོ ཝིསྶམེཡྻ, ཨཐསྶ ཏེ བལཱིབདྡཱ ཝེགེན ཨཊཝིཾ པཝིསེཡྻུཾ. ཡོ ཧོཏི ཚེཀོ ཀསྶཀོ, སོ པུན ཏེ གཧེཏྭཱ ཡོཛེཏུཀཱམོ ན ཏེསཾ ཨནུཔདཾ གནྟྭཱ ཨཊཝིཾ ཨཱཧིཎྜཏི. ཨཐ ཁོ རསྨིཉྩ པཏོདཉྩ གཧེཏྭཱ ཨུཛུཀམེཝ ཏེསཾ ནིཔཱཏནཏིཏྠཾ གནྟྭཱ ནིསཱིདཏི ཝཱ ནིཔཛྫཏི ཝཱ. ཨཐ ཏེ གོཎེ དིཝསབྷཱགཾ ཙརིཏྭཱ ནིཔཱཏནཏིཏྠཾ ཨོཏརིཏྭཱ ནྷཏྭཱ ཙ པིཝིཏྭཱ ཙ པཙྩུཏྟརིཏྭཱ ཋིཏེ དིསྭཱ རསྨིཡཱ བནྡྷིཏྭཱ པཏོདེན ཝིཛ྄ཛྷནྟོ ཨཱནེཏྭཱ ཡོཛེཏྭཱ པུན ཀམྨཾ ཀརོཏི. ཨེཝམེཝཾ ཏེན བྷིཀྑུནཱ ན ཏེ ཨསྶཱསཔསྶཱསཱ ཨཉྙཏྲ པཀཏིཕུཊྛོཀཱསཱ པརིཡེསིཏབྦཱ. སཏིརསྨིཾ པན པཉྙཱཔཏོདཉྩ གཧེཏྭཱ པཀཏིཕུཊྛོཀཱསེ ཙིཏྟཾ ཋཔེཏྭཱ མནསིཀཱརོ པཝཏྟེཏབྦོ. ཨེཝཾ ཧིསྶ མནསིཀརོཏོ ན ཙིརསྶེཝ ཏེ ཨུཔཊྛཧནྟི ནིཔཱཏནཏིཏྠེ ཝིཡ གོཎཱ. ཏཏོ ཏེན སཏིརསྨིཡཱ བནྡྷིཏྭཱ ཏསྨིཾཡེཝ ཋཱནེ ཡོཛེཏྭཱ པཉྙཱཔཏོདེན ཝིཛ྄ཛྷནྟེན པུནཔྤུནཾ ཀམྨཊྛཱནཾ ཨནུཡུཉྫིཏབྦཾ. ཏསྶེཝམནུཡུཉྫཏོ ན ཙིརསྶེཝ ནིམིཏྟཾ ཨུཔཊྛཱཏི. ཏཾ པནེཏཾ ན སབྦེསཾ ཨེཀསདིསཾ ཧོཏི, ཨཔིཙ ཁོ ཀསྶཙི སུཁསམྥསྶཾ ཨུཔྤཱདཡམཱནོ ཏཱུལཔིཙུ ཝིཡ ཀཔྤཱསཔིཙུ ཝིཡ ཝཱཏདྷཱརཱ ཝིཡ ཙ ཨུཔཊྛཱཏཱིཏི ཨེཀཙྩེ ཨཱཧུ.

ཨཡཾ པན ཨཊྛཀཐཱསུ ཝིནིཙྪཡོ – ཨིདཉྷི ཀསྶཙི ཏཱརཀརཱུཔཾ ཝིཡ མཎིགུལི༹ཀཱ ཝིཡ མུཏྟཱགུལི༹ཀཱ ཝིཡ ཙ, ཀསྶཙི ཁརསམྥསྶཾ ཧུཏྭཱ ཀཔྤཱསཊྛི ཝིཡ དཱརུསཱརསཱུཙི ཝིཡ ཙ, ཀསྶཙི དཱིགྷཔཱམངྒསུཏྟཾ ཝིཡ ཀུསུམདཱམཾ ཝིཡ དྷཱུམསིཁཱ ཝིཡ ཙ, ཀསྶཙི ཝིཏྠཏཾ མཀྐཊཀསུཏྟཾ ཝིཡ ཝལཱཧཀཔཊལཾ ཝིཡ པདུམཔུཔྥཾ ཝིཡ རཐཙཀྐཾ ཝིཡ ཙནྡམཎྜལཾ ཝིཡ སཱུརིཡམཎྜལཾ ཝིཡ ཙ ཨུཔཊྛཱཏི, ཏཉྩ པནེཏཾ ཡཐཱ སམྦཧུལེསུ བྷིཀྑཱུསུ སུཏྟནྟཾ སཛ྄ཛྷཱཡིཏྭཱ ནིསིནྣེསུ ཨེཀེན བྷིཀྑུནཱ ‘‘ཏུམྷཱཀཾ ཀཱིདིསཾ ཧུཏྭཱ ཨིདཾ སུཏྟཾ ཨུཔཊྛཱཏཱི’’ཏི ཝུཏྟེ ཨེཀོ ‘‘མཡ྄ཧཾ མཧཏཱི པབྦཏེཡྻཱ ནདཱི ཝིཡ ཧུཏྭཱ ཨུཔཊྛཱཏཱི’’ཏི ཨཱཧ. ཨཔརོ ‘‘མཡ྄ཧཾ ཨེཀཱ ཝནརཱཛི ཝིཡ’’. ཨཉྙོ ‘‘མཡ྄ཧཾ ཨེཀོ སཱིཏཙྪཱཡོ སཱཁཱསམྤནྣོ ཕལབྷཱརབྷརིཏོ རུཀྑོ ཝིཡཱ’’ཏི. ཏེསཉྷི ཏཾ ཨེཀམེཝ སུཏྟཾ སཉྙཱནཱནཏཱཡ ནཱནཏོ ཨུཔཊྛཱཏི. ཨེཝཾ ཨེཀམེཝ ཀམྨཊྛཱནཾ སཉྙཱནཱནཏཱཡ ནཱནཏོ ཨུཔཊྛཱཏི. སཉྙཛཉྷི ཨེཏཾ སཉྙཱནིདཱནཾ སཉྙཱཔབྷཝཾ, ཏསྨཱ སཉྙཱནཱནཏཱཡ ནཱནཏོ ཨུཔཊྛཱཏཱིཏི ཝེདིཏབྦཾ.

ཨེཝཾ ཨུཔཊྛིཏེ པན ནིམིཏྟེ ཏེན བྷིཀྑུནཱ ཨཱཙརིཡསྶ སནྟིཀཾ གནྟྭཱ ཨཱརོཙེཏབྦཾ ‘‘མཡ྄ཧཾ, བྷནྟེ, ཨེཝརཱུཔཾ ནཱམ ཨུཔཊྛཱཏཱི’’ཏི. ཨཱཙརིཡེན པན ‘‘ནིམིཏྟམིདཾ, ཨཱཝུསོ, ཀམྨཊྛཱནཾ པུནཔྤུནཾ མནསི ཀརོཧི སཔྤུརིསཱ’’ཏི ཝཏྟབྦོ. ཨཐཱནེན ནིམིཏྟེཡེཝ ཙིཏྟཾ ཋཔེཏབྦཾ. ཨེཝམསྶཱཡཾ ཨིཏོ པབྷུཏི ཋཔནཱཝསེན བྷཱཝནཱ ཧོཏི. ཝུཏྟཉྷེཏཾ པོརཱཎེཧི –

‘‘ནིམིཏྟེ ཋཔཡཾ ཙིཏྟཾ, ནཱནཱཀཱརཾ ཝིབྷཱཝཡཾ;

དྷཱིརོ ཨསྶཱསཔསྶཱསེ, སཀཾ ཙིཏྟཾ ནིབནྡྷཏཱི’’ཏི. (པཱརཱ. ཨཊྛ. ༢.༡༦༥; ཝིསུདྡྷི. ༡.༢༣༢);

ཏསྶེཝཾ ནིམིཏྟུཔཊྛཱནཏོ པབྷུཏི ནཱིཝརཎཱནི ཝིཀྑམྦྷིཏཱནེཝ ཧོནྟི, ཀིལེསཱ སནྣིསིནྣཱཝ, ཙིཏྟཾ ཨུཔཙཱརསམཱདྷིནཱ སམཱཧིཏམེཝ. ཨཐཱནེན ཏཾ ནིམིཏྟཾ ནེཝ ཝཎྞཏོ མནསི ཀཱཏབྦཾ, ན ལཀྑཎཏོ པཙྩཝེཀྑིཏབྦཾ, ཨཔིཙ ཁོ ཁཏྟིཡམཧེསིཡཱ ཙཀྐཝཏྟིགབྦྷོ ཝིཡ ཀསྶཀེན སཱལིཡཝགབྦྷོ ཝིཡ ཙ ཨཱཝཱསཱདཱིནི སཏྟ ཨསཔྤཱཡཱནི ཝཛྫེཏྭཱ ཏཱནེཝ སཏྟ སཔྤཱཡཱནི སེཝནྟེན སཱདྷུཀཾ རཀྑིཏབྦཾ, ཨཐ ནཾ ཨེཝཾ རཀྑིཏྭཱ པུནཔྤུནཾ མནསིཀཱརཝསེན ཝུདྡྷིཾ ཝིརཱུལ༹ྷིཾ གམཡིཏྭཱ དསཝིདྷཾ ཨཔྤནཱཀོསལླཾ སམྤཱདེཏབྦཾ, ཝཱིརིཡསམཏཱ ཡོཛེཏབྦཱ. ཏསྶེཝཾ གྷཊེནྟསྶ ཝིསུདྡྷིམགྒེ ཝུཏྟཱནུཀྐམེན ཏསྨིཾ ནིམིཏྟེ ཙཏུཀྐཔཉྩཀཛ྄ཛྷཱནཱནི ནིབྦཏྟནྟི. ཨེཝཾ ནིབྦཏྟཙཏུཀྐཔཉྩཀཛ྄ཛྷཱནོ པནེཏྠ བྷིཀྑུ སལླཀྑཎཱཝིཝཊྚནཱཝསེན ཀམྨཊྛཱནཾ ཝཌྜྷེཏྭཱ པཱརིསུདྡྷིཾ པཏྟུཀཱམོ ཏདེཝ ཛྷཱནཾ པཉྩཧཱཀཱརེཧི ཝསིཔྤཏྟཾ པགུཎཾ ཀཏྭཱ ནཱམརཱུཔཾ ཝཝཏྠཔེཏྭཱ ཝིཔསྶནཾ པཊྛཔེཏི. ཀཐཾ? སོ ཧི སམཱཔཏྟིཏོ ཝུཊྛཱཡ ཨསྶཱསཔསྶཱསཱནཾ སམུདཡོ ཀརཛཀཱཡོ ཙ ཙིཏྟཉྩཱཏི པསྶཏི. ཡཐཱ ཧི ཀམྨཱརགགྒརིཡཱ དྷམམཱནཱཡ བྷསྟཉྩ པུརིསསྶ ཙ ཏཛྫཾ ཝཱཡཱམཾ པཊིཙྩ ཝཱཏོ སཉྩརཏི, ཨེཝམེཝཾ ཀཱཡཉྩ ཙིཏྟཉྩ པཊིཙྩ ཨསྶཱསཔསྶཱསཱཏི. ཏཏོ ཨསྶཱསཔསྶཱསེ ཙ ཀཱཡཉྩ རཱུཔནྟི, ཙིཏྟཉྩ ཏཾསམྤཡུཏྟེ ཙ དྷམྨེ ཨརཱུཔནྟི ཝཝཏྠཔེཏི.

ཨེཝཾ ནཱམརཱུཔཾ ཝཝཏྠཔེཏྭཱ ཏསྶ པཙྩཡཾ པརིཡེསཏི, པརིཡེསནྟོ ཙ ཏཾ དིསྭཱ ཏཱིསུཔི ཨདྡྷཱསུ ནཱམརཱུཔསྶ པཝཏྟིཾ ཨཱརབྦྷ ཀངྑཾ ཝིཏརཏི, ཝིཏིཎྞཀངྑོ ཀལཱཔསམྨསནཝསེན ‘‘ཨནིཙྩཾ དུཀྑམནཏྟཱ’’ཏི ཏིལཀྑཎཾ ཨཱརོཔེཏྭཱ ཨུདཡབྦཡཱནུཔསྶནཱཡ པུབྦབྷཱགེ ཨུཔྤནྣེ ཨོབྷཱསཱདཡོ དས ཝིཔསྶནུཔཀྐིལེསེ པཧཱཡ ཨུཔཀྐིལེསཝིམུཏྟཾ ཨུདཡབྦཡཱནུཔསྶནཱཉཱཎཾ ‘‘མགྒོ’’ཏི ཝཝཏྠཔེཏྭཱ ཨུདཡཾ པཧཱཡ བྷངྒཱནུཔསྶནཾ པཏྭཱ ནིརནྟརཾ བྷངྒཱནུཔསྶནེན བྷཡཏོ ཨུཔཊྛིཏེསུ སབྦསངྑཱརེསུ ནིབྦིནྡནྟོ ཝིརཛྫནྟོ ཝིམུཙྩནྟོ ཡཐཱཀྐམེན ཙཏྟཱརོ ཨརིཡམགྒེ པཱཔུཎིཏྭཱ ཨརཧཏྟཕལེ པཏིཊྛཱཡ ཨེཀཱུནཝཱིསཏིབྷེདསྶ པཙྩཝེཀྑཎཱཉཱཎསྶ པརིཡནྟཾ པཏྟོ སདེཝཀསྶ ལོཀསྶ ཨགྒདཀྑིཎེཡྻོ ཧོཏི. ཨེཏྟཱཝཏཱ ཙསྶ གཎནཾ ཨཱདིཾ ཀཏྭཱ ཝིཔསྶནཱཔརིཡོསཱནཱ ཨཱནཱཔཱནསྶཏིསམཱདྷིབྷཱཝནཱ སམཏྟཱ ཧོཏཱིཏི. ཨཡཾ སབྦཱཀཱརཏོ པཋམཙཏུཀྐཝཎྞནཱ.

ཨིཏརེསུ པན ཏཱིསུ ཙཏུཀྐེསུ ཡསྨཱ ཝིསུཾ ཀམྨཊྛཱནབྷཱཝནཱནཡོ ནཱམ ནཏྠི, ཏསྨཱ ཨནུཔདཝཎྞནཱནཡེནེཝ ཏེསཾ ཨེཝམཏྠོ ཝེདིཏབྦོ. པཱིཏིཔཊིསཾཝེདཱིཏི པཱིཏིཾ པཊིསཾཝིདིཏཾ ཀརོནྟོ པཱཀཊཾ ཀརོནྟོ ཨསྶསིསྶཱམི པསྶསིསྶཱམཱིཏི སིཀྑཏི. ཏཏྠ དྭཱིཧཱཀཱརེཧི པཱིཏི པཊིསཾཝིདིཏཱ ཧོཏི ཨཱརམྨཎཏོ ཙ ཨསམྨོཧཏོ ཙ.

ཀཐཾ ཨཱརམྨཎཏོ པཱིཏི པཊིསཾཝིདིཏཱ ཧོཏི? སཔྤཱིཏིཀེ དྭེ ཛྷཱནེ སམཱཔཛྫཏི, ཏསྶ སམཱཔཏྟིཀྑཎེ ཛྷཱནཔཊིལཱབྷེན ཨཱརམྨཎཏོ པཱིཏི པཊིསཾཝིདིཏཱ ཧོཏི ཨཱརམྨཎསྶ པཊིསཾཝིདིཏཏྟཱ.

ཀཐཾ ཨསམྨོཧཏོ? སཔྤཱིཏིཀེ དྭེ ཛྷཱནེ སམཱཔཛྫིཏྭཱ ཝུཊྛཱཡ ཛྷཱནསམྤཡུཏྟཾ པཱིཏིཾ ཁཡཏོ ཝཡཏོ སམྨསཏི, ཏསྶ ཝིཔསྶནཱཀྑཎེ ལཀྑཎཔཊིཝེདྷེན ཨསམྨོཧཏོ པཱིཏི པཊིསཾཝིདིཏཱ ཧོཏི. ཨེཏེནེཝ ནཡེན ཨཝསེསཔདཱནིཔི ཨཏྠཏོ ཝེདིཏབྦཱནི. ཨིདཾ པནེཏྠ ཝིསེསམཏྟཾ – ཏིཎྞཾ ཛྷཱནཱནཾ ཝསེན སུཁཔཊིསཾཝིདིཏཱ ཧོཏི. ཙཏུནྣམྤི ཛྷཱནཱནཾ ཝསེན ཙིཏྟསངྑཱརཔཊིསཾཝིདིཏཱ ཝེདིཏབྦཱ. ཙིཏྟསངྑཱརོཏི ཝེདནཱསཉྙཱཀྑནྡྷཱ. པསྶམྦྷཡཾ ཙིཏྟསངྑཱརནྟི ཨོལཱ༹རིཀཾ ཨོལཱ༹རིཀཾ ཙིཏྟསངྑཱརཾ པསྶམྦྷེནྟོ, ནིརོདྷེནྟོཏི ཨཏྠོ. སོ ཝིཏྠཱརཏོ ཀཱཡསངྑཱརེ ཝུཏྟནཡེན ཝེདིཏབྦོ. ཨཔིཙེཏྠ པཱིཏིཔདེ པཱིཏིསཱིསེན ཝེདནཱ ཝུཏྟཱ, སུཁཔདེ སརཱུཔེནེཝ ཝེདནཱ. དྭཱིསུ ཙིཏྟསངྑཱརཔདེསུ ‘‘སཉྙཱ ཙ ཝེདནཱ ཙ ཙེཏསིཀཱ, ཨེཏེ དྷམྨཱ ཙིཏྟཔཊིབདྡྷཱ ཙིཏྟསངྑཱརཱ’’ཏི (པཊི. མ. ༡.༡༧༤; མ. ནི. ༡.༤༦༣) ཝཙནཏོ སཉྙཱསམྤཡུཏྟཱ ཝེདནཱཏི ཨེཝཾ ཝེདནཱནུཔསྶནཱནཡེན ཨིདཾ ཙཏུཀྐཾ བྷཱསིཏནྟི ཝེདིཏབྦཾ.

ཏཏིཡཙཏུཀྐེཔི ཙཏུནྣཾ ཛྷཱནཱནཾ ཝསེན ཙིཏྟཔཊིསཾཝིདིཏཱ ཝེདིཏབྦཱ. ཨབྷིཔྤམོདཡཾ ཙིཏྟནྟི ཙིཏྟཾ མོདེནྟོ པམོདེནྟོ ཧཱསེནྟོ པཧཱསེནྟོ ཨསྶསིསྶཱམི པསྶསིསྶཱམཱིཏི སིཀྑཏི. ཏཏྠ དྭཱིཧཱཀཱརེཧི ཨབྷིཔྤམོདོ ཧོཏི སམཱདྷིཝསེན ཙ ཝིཔསྶནཱཝསེན ཙ.

ཀཐཾ སམཱདྷིཝསེན? སཔྤཱིཏིཀེ དྭེ ཛྷཱནེ སམཱཔཛྫཏི, སོ སམཱཔཏྟིཀྑཎེ སམྤཡུཏྟཱཡ པཱིཏིཡཱ ཙིཏྟཾ ཨཱམོདེཏི པམོདེཏི. ཀཐཾ ཝིཔསྶནཱཝསེན? སཔྤཱིཏིཀེ དྭེ ཛྷཱནེ སམཱཔཛྫིཏྭཱ ཝུཊྛཱཡ ཛྷཱནསམྤཡུཏྟཾ པཱིཏིཾ ཁཡཏོ ཝཡཏོ སམྨསཏི. ཨེཝཾ ཝིཔསྶནཱཀྑཎེ ཛྷཱནསམྤཡུཏྟཾ པཱིཏིཾ ཨཱརམྨཎཾ ཀཏྭཱ ཙིཏྟཾ ཨཱམོདེཏི པམོདེཏི. ཨེཝཾ པཊིཔནྣོ ‘‘ཨབྷིཔྤམོདཡཾ ཙིཏྟཾ ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི ཝུཙྩཏི.

སམཱདཧཾ ཙིཏྟནྟི པཋམཛ྄ཛྷཱནཱདིཝསེན ཨཱརམྨཎེ ཙིཏྟཾ སམཾ ཨཱདཧནྟོ སམཾ ཋཔེནྟོ, ཏཱནི ཝཱ པན ཛྷཱནཱནི སམཱཔཛྫིཏྭཱ ཝུཊྛཱཡ ཛྷཱནསམྤཡུཏྟཾ ཙིཏྟཾ ཁཡཏོ ཝཡཏོ སམྨསཏོ ཝིཔསྶནཱཀྑཎེ ལཀྑཎཔཊིཝེདྷེན ཨུཔྤཛྫཏི ཁཎིཀཙིཏྟེཀགྒཏཱ, ཨེཝཾ ཨུཔྤནྣཱཡ ཁཎིཀཙིཏྟེཀགྒཏཱཡ ཝསེནཔི ཨཱརམྨཎེ ཙིཏྟཾ སམཾ ཨཱདཧནྟོ སམཾ ཋཔེནྟོ ‘‘སམཱདཧཾ ཙིཏྟཾ ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི ཝུཙྩཏི.

ཝིམོཙཡཾ ཙིཏྟནྟི པཋམཛ྄ཛྷཱནེན ནཱིཝརཎེཧི ཙིཏྟཾ མོཙེནྟོ ཝིམོཙེནྟོ, དུཏིཡེན ཝིཏཀྐཝིཙཱརེཧི, ཏཏིཡེན པཱིཏིཡཱ, ཙཏུཏྠེན སུཁདུཀྑེཧི ཙིཏྟཾ མོཙེནྟོ ཝིམོཙེནྟོ, ཏཱནི ཝཱ པན ཛྷཱནཱནི སམཱཔཛྫིཏྭཱ ཝུཊྛཱཡ ཛྷཱནསམྤཡུཏྟཾ ཙིཏྟཾ ཁཡཏོ ཝཡཏོ སམྨསཏི. སོ ཝིཔསྶནཱཀྑཎེ ཨནིཙྩཱནུཔསྶནཱཡ ནིཙྩསཉྙཱཏོ ཙིཏྟཾ མོཙེནྟོ ཝིམོཙེནྟོ, དུཀྑཱནུཔསྶནཱཡ སུཁསཉྙཱཏོ, ཨནཏྟཱནུཔསྶནཱཡ ཨཏྟསཉྙཱཏོ, ནིབྦིདཱནུཔསྶནཱཡ ནནྡིཏོ, ཝིརཱགཱནུཔསྶནཱཡ རཱགཏོ, ནིརོདྷཱནུཔསྶནཱཡ སམུདཡཏོ, པཊིནིསྶགྒཱནུཔསྶནཱཡ ཨཱདཱནཏོ ཙིཏྟཾ མོཙེནྟོ ཝིམོཙེནྟོ ཨསྶསཏི ཙེཝ པསྶསཏི ཙ. ཏེན ཝུཙྩཏི – ‘‘ཝིམོཙཡཾ ཙིཏྟཾ ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི. ཨེཝཾ ཙིཏྟཱནུཔསྶནཱཝསེན ཨིདཾ ཙཏུཀྐཾ བྷཱསིཏནྟི ཝེདིཏབྦཾ.

ཙཏུཏྠཙཏུཀྐེ པན ཨནིཙྩཱནུཔསྶཱིཏི ཨེཏྠ ཏཱཝ ཨནིཙྩཾ ཝེདིཏབྦཾ, ཨནིཙྩཏཱ ཝེདིཏབྦཱ, ཨནིཙྩཱནུཔསྶནཱ ཝེདིཏབྦཱ, ཨནིཙྩཱནུཔསྶཱི ཝེདིཏབྦོ. ཏཏྠ ཨནིཙྩནྟི པཉྩཀྑནྡྷཱ. ཀསྨཱ? ཨུཔྤཱདཝཡཉྙཐཏྟབྷཱཝཱ. ཨནིཙྩཏཱཏི ཏེསཾཡེཝ ཨུཔྤཱདཝཡཉྙཐཏྟཾ, ཧུཏྭཱ ཨབྷཱཝོ ཝཱ, ནིབྦཏྟཱནཾ ཏེནེཝཱཀཱརེན ཨཊྛཏྭཱ ཁཎབྷངྒེན བྷེདོཏི ཨཏྠོ. ཨནིཙྩཱནུཔསྶནཱཏི ཏསྶཱ ཨནིཙྩཏཱཡ ཝསེན རཱུཔཱདཱིསུ ‘‘ཨནིཙྩ’’ནྟི ཨནུཔསྶནཱ. ཨནིཙྩཱནུཔསྶཱིཏི ཏཱཡ ཨནུཔསྶནཱཡ སམནྣཱགཏོ. ཏསྨཱ ཨེཝཾབྷཱུཏོ ཨསྶསནྟོ ཙ པསྶསནྟོ ཙ ཨིདྷ ‘‘ཨནིཙྩཱནུཔསྶཱི ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི ཝེདིཏབྦོ.

ཝིརཱགཱནུཔསྶཱིཏི ཨེཏྠ པན དྭེ ཝིརཱགཱ ཁཡཝིརཱགོ ཙ ཨཙྩནྟཝིརཱགོ ཙ. ཏཏྠ ཁཡཝིརཱགོཏི སངྑཱརཱནཾ ཁཎབྷངྒོ. ཨཙྩནྟཝིརཱགོཏི ནིབྦཱནཾ. ཝིརཱགཱནུཔསྶནཱཏི ཏདུབྷཡདསྶནཝསེན པཝཏྟཱ ཝིཔསྶནཱ ཙ མགྒོ ཙ. ཏཱཡ དུཝིདྷཱཡཔི ཨནུཔསྶནཱཡ སམནྣཱགཏོ ཧུཏྭཱ ཨསྶསནྟོ ཙ པསྶསནྟོ ཙ ‘‘ཝིརཱགཱནུཔསྶཱི ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི ཝེདིཏབྦོ. ནིརོདྷཱནུཔསྶཱིཔདེཔི ཨེསེཝ ནཡོ.

པཊིནིསྶགྒཱནུཔསྶཱིཏི ཨེཏྠཱཔི དྭེ པཊིནིསྶགྒཱ པརིཙྩཱགཔཊིནིསྶགྒོ ཙ པཀྑནྡནཔཊིནིསྶགྒོ ཙ. པཊིནིསྶགྒོཡེཝ ཨནུཔསྶནཱ པཊིནིསྶགྒཱནུཔསྶནཱ, ཝིཔསྶནཱམགྒཱནམེཏཾ ཨདྷིཝཙནཾ. ཝིཔསྶནཱཏི ཏདངྒཝསེན སདྡྷིཾ ཁནྡྷཱབྷིསངྑཱརེཧི ཀིལེསེ པརིཙྩཛཏི, སངྑཏདོསདསྶནེན ཙ ཏབྦིཔརཱིཏེ ནིབྦཱནེ ཏནྣིནྣཏཱཡ པཀྑནྡཏཱིཏི པརིཙྩཱགཔཊིནིསྶགྒོ ཙེཝ པཀྑནྡནཔཊིནིསྶགྒོ ཙཱཏི ཝུཙྩཏི. མགྒོ སམུཙྪེདཝསེན སདྡྷིཾ ཁནྡྷཱབྷིསངྑཱརེཧི ཀིལེསེ པརིཙྩཛཏི, ཨཱརམྨཎཀརཎེན ཙ ནིབྦཱནེ པཀྑནྡཏཱིཏི པརིཙྩཱགཔཊིནིསྶགྒོ ཙེཝ པཀྑནྡནཔཊིནིསྶགྒོ ཙཱཏི ཝུཙྩཏི. ཨུབྷཡམྤི པན པུརིམཔུརིམཉཱཎཱནཾ ཨནུཨནུ པསྶནཏོ ཨནུཔསྶནཱཏི ཝུཙྩཏི. ཏཱཡ དུཝིདྷཱཡཔི པཊིནིསྶགྒཱནུཔསྶནཱཡ སམནྣཱགཏོ ཧུཏྭཱ ཨསྶསནྟོ ཙ པསྶསནྟོ ཙ ‘‘པཊིནིསྶགྒཱནུཔསྶཱི ཨསྶསིསྶཱམི པསྶསིསྶཱམཱིཏི སིཀྑཏཱི’’ཏི ཝེདིཏབྦོ.

ཨེཏྠ ཙ ‘‘ཨནིཙྩཱནུཔསྶཱི’’ཏི ཏརུཎཝིཔསྶནཱཡ ཝསེན ཝུཏྟཾ, ‘‘ཝིརཱགཱནུཔསྶཱི’’ཏི ཏཏོ བལཝཏརཱཡ སངྑཱརེསུ ཝིརཛྫནསམཏྠཱཡ ཝིཔསྶནཱཡ ཝསེན, ‘‘ནིརོདྷཱནུཔསྶཱི’’ཏི ཏཏོ བལཝཏརཱཡ ཀིལེསནིརོདྷནསམཏྠཱཡ ཝིཔསྶནཱཡ ཝསེན, ‘‘པཊིནིསྶགྒཱནུཔསྶཱི’’ཏི མགྒསྶ ཨཱསནྣབྷཱུཏཱཡ ཨཏིཏིཀྑཱཡ ཝིཔསྶནཱཡ ཝསེན ཝུཏྟནྟི ཝེདིཏབྦཾ. ཡཏྠ པན མགྒོཔི ལབྦྷཏི, སོ ཨབྷིནྣོཡེཝ. ཨེཝམིདཾ ཙཏུཀྐཾ སུདྡྷཝིཔསྶནཱཝསེན ཝུཏྟཾ, པུརིམཱནི པན ཏཱིཎི སམཐཝིཔསྶནཱཝསེནཱཏི.

ཨཱནཱཔཱནསྶཏིམཱཏིཀཱཝཎྞནཱ ནིཊྛིཏཱ.

༡༦༤. ཨིདཱནི ཡཐཱནིཀྑིཏྟཾ མཱཏིཀཾ པཊིཔཱཊིཡཱ བྷཱཛེཏྭཱ དསྶེཏུཾ ཨིདྷཱཏི ཨིམིསྶཱ དིཊྛིཡཱཏིཨཱདི ཨཱརདྡྷཾ. ཏཏྠ ཨིམིསྶཱ དིཊྛིཡཱཏིཨཱདཱིཧི དསཧི པདེཧི སིཀྑཏྟཡསངྑཱཏཾ སབྦཉྙུབུདྡྷསཱསནམེཝ ཀཐིཏཾ. ཏཉྷི བུདྡྷེན བྷགཝཏཱ དིཊྛཏྟཱ དིཊྛཱིཏི ཝུཙྩཏི, ཏསྶེཝ ཁམནཝསེན ཁནྟི, རུཙྩནཝསེན རུཙི, གཧཎཝསེན ཨཱདཱཡོ, སབྷཱཝཊྛེན དྷམྨོ, སིཀྑིཏབྦཊྛེན ཝིནཡོ, ཏདུབྷཡེནཔི དྷམྨཝིནཡོ, པཝུཏྟཝསེན པཱཝཙནཾ, སེཊྛཙརིཡཊྛེན བྲཧྨཙརིཡཾ, ཨནུསིཊྛིདཱནཝསེན སཏྠུསཱསནནྟི ཝུཙྩཏི. ཏསྨཱ ‘‘ཨིམིསྶཱ དིཊྛིཡཱ’’ཏིཨཱདཱིསུ ཨིམིསྶཱ བུདྡྷདིཊྛིཡཱ, ཨིམིསྶཱ བུདྡྷཁནྟིཡཱ, ཨིམིསྶཱ བུདྡྷརུཙིཡཱ, ཨིམསྨིཾ བུདྡྷཨཱདཱཡེ, ཨིམསྨིཾ བུདྡྷདྷམྨེ, ཨིམསྨིཾ བུདྡྷཝིནཡེ, ཨིམསྨིཾ བུདྡྷདྷམྨཝིནཡེ, ཨིམསྨིཾ བུདྡྷཔཱཝཙནེ, ཨིམསྨིཾ བུདྡྷབྲཧྨཙརིཡེ, ཨིམསྨིཾ བུདྡྷསཏྠུསཱསནེཏི ཨཏྠོ ཝེདིཏབྦོ. ཨཔིཙེཏཾ སིཀྑཏྟཡསངྑཱཏཾ སཀལཾ པཱཝཙནཾ བྷགཝཏཱ དིཊྛཏྟཱ སམྨཱདིཊྛིཔཙྩཡཏྟཱ སམྨཱདིཊྛིཔུབྦངྒམཏྟཱ ཙ དིཊྛི. བྷགཝཏོ ཁམནཝསེན ཁནྟི. རུཙྩནཝསེན རུཙི. གཧཎཝསེན ཨཱདཱཡོ. ཨཏྟནོ ཀཱརཀཾ ཨཔཱཡེ ཨཔཏམཱནཾ དྷཱརེཏཱིཏི དྷམྨོ. སོཝ སཾཀིལེསཔཀྑཾ ཝིནེཏཱིཏི ཝིནཡོ. དྷམྨོ ཙ སོ ཝིནཡོ ཙཱཏི དྷམྨཝིནཡོ, ཀུསལདྷམྨེཧི ཝཱ ཨཀུསལདྷམྨཱནཾ ཨེས ཝིནཡོཏི དྷམྨཝིནཡོ. ཏེནེཝ ཝུཏྟཾ – ‘‘ཡེ ཙ ཁོ ཏྭཾ, གོཏམི, དྷམྨེ ཛཱནེཡྻཱསི ཨིམེ དྷམྨཱ ཝིརཱགཱཡ སཾཝཏྟནྟི, ནོ སརཱགཱཡ…པེ… ཨེཀཾསེན, གོཏམི, དྷཱརེཡྻཱསི ཨེསོ དྷམྨོ ཨེསོ ཝིནཡོ ཨེཏཾ སཏྠུསཱསན’’ནྟི (ཨ. ནི. ༨.༥༣; ཙཱུལ༹ཝ. ༤༠༦). དྷམྨེན ཝཱ ཝིནཡོ, ན དཎྜཱདཱིཧཱིཏི དྷམྨཝིནཡོ. ཝུཏྟམྤི ཙེཏཾ –

‘‘དཎྜེནེཀེ དམཡནྟི, ཨངྐུསེཧི ཀསཱཧི ཙ;

ཨདཎྜེན ཨསཏྠེན, ནཱགོ དནྟོ མཧེསིནཱ’’ཏི. (མ. ནི. ༢.༣༥༢; ཙཱུལ༹ཝ. ༣༤༢);

ཏཐཱ ‘‘དྷམྨེན ནཡམཱནཱནཾ, ཀཱ ཨུསཱུཡཱ ཝིཛཱནཏ’’ནྟི (མཧཱཝ. ༦༣). དྷམྨཱཡ ཝཱ ཝིནཡོ དྷམྨཝིནཡོ. ཨནཝཛྫདྷམྨཏྠཾ ཧེས ཝིནཡོ, ན བྷཝབྷོགཱམིསཏྠཾ. ཏེནཱཧ བྷགཝཱ – ‘‘ནཡིདཾ, བྷིཀྑཝེ, བྲཧྨཙརིཡཾ ཝུསྶཏི ཛནཀུཧནཏྠ’’ནྟི (ཨིཏིཝུ. ༣༥; ཨ. ནི. ༤.༢༥) ཝིཏྠཱརོ. པུཎྞཏྠེརོཔི ཨཱཧ – ‘‘ཨནུཔཱདཱཔརིནིབྦཱནཏྠཾ ཁོ, ཨཱཝུསོ, བྷགཝཏི བྲཧྨཙརིཡཾ ཝུསྶཏཱི’’ཏི (མ. ནི. ༡.༢༥༩). ཝིསུདྡྷཾ ཝཱ ནཡཏཱིཏི ཝིནཡོ, དྷམྨཏོ ཝིནཡོ དྷམྨཝིནཡོ. སཾསཱརདྷམྨཏོ ཧི སོཀཱདིདྷམྨཏོ ཝཱ ཨེས ཝིསུདྡྷཾ ནིབྦཱནཾ ནཡཏི, དྷམྨསྶ ཝཱ ཝིནཡོ, ན ཏིཏྠཀརཱནནྟི དྷམྨཝིནཡོ. དྷམྨབྷཱུཏོ ཧི བྷགཝཱ, ཏསྶེཝ ཨེས ཝིནཡོ. ཡསྨཱ ཝཱ དྷམྨཱ ཨེཝ ཨབྷིཉྙེཡྻཱ པརིཉྙེཡྻཱ པཧཱཏབྦཱ བྷཱཝེཏབྦཱ སཙྪིཀཱཏབྦཱ ཙ, ཏསྨཱ ཨེས དྷམྨེསུ ཝིནཡོ, ན སཏྟེསུ ན ཛཱིཝེསུ ཙཱཏི དྷམྨཝིནཡོ. སཱཏྠསབྱཉྫནཏཱདཱིཧི ཨཉྙེསཾ ཝཙནཏོ པདྷཱནཾ ཝཙནནྟི པཝཙནཾ, པཝཙནམེཝ པཱཝཙནཾ. སབྦཙརིཡཱཧི ཝིསིཊྛཙརིཡབྷཱཝེན བྲཧྨཙརིཡཾ. དེཝམནུསྶཱནཾ སཏྠུབྷཱུཏསྶ བྷགཝཏོ སཱསནནྟི སཏྠུསཱསནཾ, སཏྠུབྷཱུཏཾ ཝཱ སཱསནནྟིཔི སཏྠུསཱསནཾ. ‘‘ཡོ ཝོ, ཨཱནནྡ, མཡཱ དྷམྨོ ཙ ཝིནཡོ ཙ དེསིཏོ པཉྙཏྟོ, སོ ཝོ མམཙྩཡེན སཏྠཱ’’ཏི (དཱི. ནི. ༢.༢༡༦) ཧི དྷམྨཝིནཡོཝ སཏྠཱཏི ཝུཏྟོ. ཨེཝམེཏེསཾ པདཱནཾ ཨཏྠོ ཝེདིཏབྦོ. ཡསྨཱ པན ཨིམསྨིཾཡེཝ སཱསནེ སབྦཱཀཱརཨཱནཱཔཱནསྶཏིསམཱདྷིནིབྦཏྟཀོ བྷིཀྑུ ཝིཛྫཏི, ན ཨཉྙཏྲ, ཏསྨཱ ཏཏྠ ཏཏྠ ‘‘ཨིམིསྶཱ’’ཏི ཙ ‘‘ཨིམསྨི’’ནྟི ཙ ཨཡཾ ནིཡམོ ཀཏོཏི ཝེདིཏབྦོ. ཨཡཾ ‘‘ཨིདྷཱ’’ཏིམཱཏིཀཱཡ ནིདྡེསསྶ ཨཏྠོ.

པུཐུཛྫནཀལྱཱཎཀོ ཝཱཏིཨཱདིནཱ ཙ བྷིཀྑུསདྡསྶ ཝཙནཏྠཾ ཨཝཏྭཱ ཨིདྷཱདྷིཔྤེཏབྷིཀྑུཡེཝ དསྶིཏོ. ཏཏྠ པུཐུཛྫནོ ཙ སོ ཀིལེསཱནཾ ཨསམུཙྪིནྣཏྟཱ, ཀལྱཱཎོ ཙ སཱིལཱདིཔཊིཔཏྟིཡུཏྟཏྟཱཏི པུཐུཛྫནཀལྱཱཎོ, པུཐུཛྫནཀལྱཱཎོཝ པུཐུཛྫནཀལྱཱཎཀོ. ཨདྷིསཱིལཱདཱིནི སིཀྑཏཱིཏི སེཀྑོ. སོཏཱཔནྣོ ཝཱ སཀདཱགཱམཱི ཝཱ ཨནཱགཱམཱི ཝཱ. ཨཀུཔྤོ ཙལཡིཏུམསཀྐུཎེཡྻོ ཨརཧཏྟཕལདྷམྨོ ཨསྶཱཏི ཨཀུཔྤདྷམྨོ. སོཔི ཧི ཨིམཾ སམཱདྷིཾ བྷཱཝེཏི.

ཨརཉྙནིདྡེསེ ཝིནཡཔརིཡཱཡེན ཏཱཝ ‘‘ཋཔེཏྭཱ གཱམཉྩ གཱམཱུཔཙཱརཉྩ ཨཝསེསཾ ཨརཉྙ’’ནྟི (པཱརཱ. ༩༢) ཨཱགཏཾ. སུཏྟནྟཔརིཡཱཡེན ཨཱརཉྙཀཾ བྷིཀྑུཾ སནྡྷཱཡ ‘‘ཨཱརཉྙཀཾ ནཱམ སེནཱསནཾ པཉྩདྷནུསཏིཀཾ པཙྪིམ’’ནྟི (པཱཙི. ༥༧༣) ཨཱགཏཾ. ཝིནཡསུཏྟནྟཱ པན ཨུབྷོཔི པརིཡཱཡདེསནཱ ནཱམ, ཨབྷིདྷམྨོ ནིཔྤརིཡཱཡདེསནཱཏི ཨབྷིདྷམྨཔརིཡཱཡེན (ཝིབྷ. ༥༢༩) ཨརཉྙཾ དསྶེཏུཾ ནིཀྑམིཏྭཱ བཧི ཨིནྡཁཱིལཱཏི ཝུཏྟཾ, ཨིནྡཁཱིལཏོ བཧི ནིཀྑམིཏྭཱཏི ཨཏྠོ. ནིཀྑམིཏྭཱ བཧི ཨིནྡཁཱིལནྟིཔི པཱཋོ, ཨིནྡཁཱིལཾ ཨཏིཀྐམིཏྭཱ བཧཱིཏི ཝུཏྟཾ ཧོཏི. ཨིནྡཁཱིལོཏི ཙེཏྠ གཱམསྶ ཝཱ ནགརསྶ ཝཱ ཨུམྨཱརོ.

རུཀྑམཱུལནིདྡེསེ རུཀྑམཱུལསྶ པཱཀཊཏྟཱ ཏཾ ཨཝཏྭཱཝ ཡཏྠཱཏིཨཱདིམཱཧ. ཏཏྠ ཡཏྠཱཏི ཡསྨིཾ རུཀྑམཱུལེ. ཨཱསནྟི ནིསཱིདནྟི ཨེཏྠཱཏི ཨཱསནཾ. པཉྙཏྟནྟི ཋཔིཏཾ. མཉྩོ ཝཱཏིཨཱདཱིནི ཨཱསནསྶ པབྷེདཝཙནཱནི. མཉྩོཔི ཧི ནིསཛྫཱཡཔི ཨོཀཱསཏྟཱ ཨིདྷ ཨཱསནེསུ ཝུཏྟོ. སོ པན མསཱརཀབུནྡིཀཱབདྡྷཀུལཱི༹རཔཱདཀཨཱཧཙྩཔཱདཀཱནཾ ཨཉྙཏརོ. པཱིཋཾ ཏེསཾ ཨཉྙཏརམེཝ. བྷིསཱིཏི ཨུཎྞཱབྷིསིཙོལ༹བྷིསིཝཱཀབྷིསིཏིཎབྷིསིཔཎྞབྷིསཱིནཾ ཨཉྙཏརཱ. ཏཊྚིཀཱཏི ཏཱལཔཎྞཱདཱིཧི ཙིནིཏྭཱ ཀཏཱ. ཙམྨཁཎྜོཏི ནིསཛྫཱརཧོ ཡོ ཀོཙི ཙམྨཁཎྜོ. ཏིཎསནྠརཱདཡོ ཏིཎཱདཱིནི གུམྦེཏྭཱ ཀཏཱ. ཏཏྠཱཏི ཏསྨིཾ རུཀྑམཱུལེ. ཙངྐམཏི ཝཱཏིཨཱདཱིཧི རུཀྑམཱུལསྶ ཙཏུཨིརིཡཱཔཐཔཝཏྟནཡོགྱཏཱ ཀཐིཏཱ. ‘‘ཡཏྠཱ’’ཏིཨཱདཱིཧི སབྦཔདེཧི རུཀྑམཱུལསྶ སནྡཙྪཱཡཏཱ ཛནཝིཝིཏྟཏཱ ཙ ཝུཏྟཱ ཧོཏི. ཀེནཙཱིཏི ཀེནཙི སམཱུཧེན. ཏཾ སམཱུཧཾ བྷིནྡིཏྭཱ ཝིཏྠཱརེནྟོ གཧཊྛེཧི ཝཱ པབྦཛིཏེཧི ཝཱཏི ཨཱཧ. ཨནཱཀིཎྞནྟི ཨསཾཀིཎྞཾ ཨསམྦཱདྷཾ. ཡསྶ སེནཱསནསྶ སམནྟཱ གཱཝུཏམྤི ཨཌྜྷཡོཛནམྤི པབྦཏགཧནཾ ཝནགཧནཾ ནདཱིགཧནཾ ཧོཏི, ན ཀོཙི ཨཝེལཱཡ ཨུཔསངྐམིཏུཾ སཀྐོཏི, ཨིདཾ སནྟིཀེཔི ཨནཱཀིཎྞཾ ནཱམ. ཡཾ པན ཨཌྜྷཡོཛནིཀཾ ཝཱ ཡོཛནིཀཾ ཝཱ ཧོཏི, ཨིདཾ དཱུརཏཱཡ ཨེཝ ཨནཱཀིཎྞཾ ནཱམ.

ཝིཧཱརོཏི ཨཌྜྷཡོགཱདིམུཏྟཀོ ཨཝསེསཱཝཱསོ. ཨཌྜྷཡོགོཏི སུཔཎྞཝངྐགེཧཾ. པཱསཱདོཏི དྭེ ཀཎྞིཀཱ གཧེཏྭཱ ཀཏོ དཱིགྷཔཱསཱདོ. ཧམྨིཡནྟི ཨུཔརིཨཱཀཱསཏལེ པཏིཊྛིཏཀཱུཊཱགཱརཔཱསཱདོཡེཝ. གུཧཱཏི ཨིཊྛཀཱགུཧཱ སིལཱགུཧཱ དཱརུགུཧཱ པཾསུགུཧཱཏི ཨེཝཉྷི ཁནྡྷཀཊྛཀཐཱཡཾ (ཙཱུལ༹ཝ. ཨཊྛ. ༢༩༤) ཝུཏྟཾ. ཝིབྷངྒཊྛཀཐཱཡཾ པན ཝིཧཱརོཏི སམནྟཱ པརིཧཱརཔཐཾ ཨནྟོཡེཝ རཏྟིཊྛཱནདིཝཱཊྛཱནཱནི ཙ དསྶེཏྭཱ ཀཏསེནཱསནཾ. གུཧཱཏི བྷཱུམིགུཧཱ, ཡཏྠ རཏྟིནྡིཝཾ དཱིཔཾ ལདྡྷུཾ ཝཊྚཏི. པབྦཏགུཧཱ ཝཱ བྷཱུམིགུཧཱ ཝཱཏི ཨིདཾ དྭཡཾ ཝིསེསེཏྭཱ ཝུཏྟཾ. མཱཏིཀཱཡ སབྦཀཱལསཱདྷཱརཎལཀྑཎཝསེན ‘‘ནིསཱིདཏཱི’’ཏི ཝཏྟམཱནཝཙནཾ ཀཏཾ, ཨིདྷ པན ནིསིནྣསྶ བྷཱཝནཱརམྦྷསབྦྷཱཝཏོ ནིསཛྫཱརམྦྷཔརིཡོསཱནདསྶནཏྠཾ ནིསིནྣོཏི ནིཊྛཱནཝཙནཾ ཀཏཾ. ཡསྨཱ པན ཨུཛུཾ ཀཱཡཾ པཎིདྷཱཡ ནིསིནྣསྶ ཀཱཡོ ཨུཛུཀོ ཧོཏི, ཏསྨཱ བྱཉྫནེ ཨཱདརཾ ཨཀཏྭཱ ཨདྷིཔྤེཏམ ཨེཝ དསྶེནྟོ ཨུཛུཀོཏིཨཱདིམཱཧ. ཏཏྠ ཋིཏོ སུཔཎིཧིཏོཏི ཨུཛུཀཾ པཎིཧིཏཏྟཱ ཨུཛུཀོ ཧུཏྭཱ ཋིཏོ, ན སཡམེཝཱཏི ཨཏྠོ. པརིགྒཧཊྛོཏི པརིགྒཧིཏཊྛོ. ཀིཾ པརིགྒཧིཏཾ? ནིཡྻཱནཾ. ཀིཾ ནིཡྻཱནཾ? ཨཱནཱཔཱནསྶཏིསམཱདྷིཡེཝ ཡཱཝ ཨརཧཏྟམགྒཱ ནིཡྻཱནཾ. ཏེནཱཧནིཡྻཱནཊྛོཏི མུཁསདྡསྶ ཛེཊྛཀཏྠཝསེན སཾསཱརཏོ ནིཡྻཱནཊྛོ ཝུཏྟོ. ཨུཔཊྛཱནཊྛོཏི སབྷཱཝཊྛོཡེཝ. སབྦེཧི པནེཏེཧི པདེཧི པརིགྒཧིཏནིཡྻཱནཾ སཏིཾ ཀཏྭཱཏི ཨཏྠོ ཝུཏྟོ ཧོཏི. ཀེཙི པན ‘‘པརིགྒཧཊྛོཏི སཏིཡཱ པརིགྒཧཊྛོ, ནིཡྻཱནཊྛོཏི ཨསྶཱསཔསྶཱསཱནཾ པཝིསནནིཀྑམནདྭཱརཊྛོ’’ཏི ཝཎྞཡནྟི. པརིགྒཧིཏཨསྶཱསཔསྶཱསནིཡྻཱནཾ སཏིཾ ཨུཔཊྛཔེཏྭཱཏི ཝུཏྟཾ ཧོཏི.

༡༦༥. བཱཏྟིཾསཱཡ ཨཱཀཱརེཧཱིཏི ཏཱསུ ཏཱསུ ཨཝཏྠཱསུ ཡཐཱཀྐམེན ལབྦྷམཱནཱནཾ ཨནཝསེསཔརིཡཱདཱནཝསེན ཝུཏྟཾ. དཱིགྷཾ ཨསྶཱསཝསེནཱཏི མཱཏིཀཱཡ ‘‘དཱིགྷ’’ནྟིཝུཏྟཨསྶཱསཝསེན. ཨེཝཾ སེསེསུ. ཨེཀགྒཏནྟི ཨེཀགྒབྷཱཝཾ. ཨཝིཀྑེཔནྟི ཨཝིཀྑིཔནཾ. ཨེཀགྒཏཱ ཨེཝ ཧི ནཱནཱརམྨཎེསུ ཙིཏྟསྶ ཨཝིཀྑིཔནཏོ ཨཝིཀྑེཔོཏི ཝུཙྩཏི. པཛཱནཏོཏི ཨསམྨོཧཝསེན པཛཱནནྟསྶ, ཝིནྡནྟསྶཱཏི ཝཱ ཨཏྠོ. ‘‘ཨཝིཀྑེཔོ མེ པཊིལདྡྷོ’’ཏི ཨཱརམྨཎཀརཎཝསེན པཛཱནནྟསྶ ཝཱ. ཏཱཡ སཏིཡཱཏི ཏཱཡ ཨུཔཊྛིཏཱཡ སཏིཡཱ. ཏེན ཉཱཎེནཱཏི ཏེན ཨཝིཀྑེཔཛཱནནཉཱཎེན. སཏོ ཀཱརཱི ཧོཏཱིཏི ཨེཏྠ ཡསྨཱ ཉཱཎསམྤཡུཏྟཱ ཨེཝ སཏི སཏཱིཏི ཨདྷིཔྤེཏཱ, ཡཐཱཧ – ‘‘སཏིམཱ ཧོཏི པརམེན སཏིནེཔཀྐེན སམནྣཱགཏོ’’ཏི (ཝིབྷ. ༤༦༧). ཏསྨཱ ‘‘སཏོ’’ཏི ཝཙནེནེཝ ཉཱཎམྤི གཧིཏམེཝ ཧོཏི.

༡༦༦. ཨདྡྷཱནསངྑཱཏེཏི དཱིགྷསངྑཱཏེ ཀཱལེ. དཱིགྷོ ཧི མགྒོ ཨདྡྷཱནོཏི ཝུཙྩཏི. ཨཡམྤི ཀཱལོ དཱིགྷཏྟཱ ཨདྡྷཱནོ ཝིཡ ཨདྡྷཱནོཏི ཝུཏྟོ. ‘‘ཨསྶསཏཱི’’ཏི ཙ ‘‘པསྶསཏཱི’’ཏི ཙ ཨསྶཱསཉྩ པསྶཱསཉྩ ཝིསུཾ ཝིསུཾ ཝཏྭཱཔི བྷཱཝནཱཡ ནིརནྟརཔྤཝཏྟིདསྶནཏྠཾ ‘‘ཨསྶསཏིཔི པསྶསཏིཔཱི’’ཏི པུན སམཱསེཏྭཱ ཝུཏྟཾ. ཚནྡོ ཨུཔྤཛྫཏཱིཏི བྷཱཝནཱབྷིཝུདྡྷིཡཱ བྷིཡྻོབྷཱཝཱཡ ཚནྡོ ཛཱཡཏི. སུཁུམཏརནྟི པསྶམྦྷནསབྦྷཱཝཏོ ཝུཏྟཾ. པཱམོཛྫཾ ཨུཔྤཛྫཏཱིཏི བྷཱཝནཱཔཱརིཔཱུརིཡཱ པཱིཏི ཛཱཡཏི. ཨསྶཱསཔསྶཱསཱཔི ཙིཏྟཾ ཝིཝཏྟཏཱིཏི ཨསྶཱསཔསྶཱསེ ནིསྶཱཡ པཊིབྷཱགནིམིཏྟེ ཨུཔྤཛྫནྟེ པཀཏིཨསྶཱསཔསྶཱསཏོ ཙིཏྟཾ ནིཝཏྟཏི. ཨུཔེཀྑཱ སཎྛཱཏཱིཏི ཏསྨིཾ པཊིབྷཱགནིམིཏྟེ ཨུཔཙཱརཔྤནཱསམཱདྷིཔཏྟིཡཱ པུན སམཱདྷཱནེ བྱཱཔཱརཱབྷཱཝཏོ ཏཏྲམཛ྄ཛྷཏྟུཔེཀྑཱ སཎྛཱཏི ནཱམ. ནཝཧཱཀཱརེཧཱིཏི ཨེཏྠ བྷཱཝནཱརམྦྷཏོ པབྷུཏི པུརེ ཚནྡུཔྤཱདཱ ‘‘ཨསྶསཏིཔི པསྶསཏིཔཱི’’ཏི ཝུཏྟཱ ཏཡོ ཨཱཀཱརཱ, ཚནྡུཔྤཱདཏོ པབྷུཏི པུརེ པཱམོཛྫུཔྤཱདཱ ཏཡོ, པཱམོཛྫུཔྤཱདཏོ པབྷུཏི ཏཡོཏི ནཝ ཨཱཀཱརཱ. ཀཱཡོཏི ཙུཎྞཝིཙུཎྞཱཔི ཨསྶཱསཔསྶཱསཱ སམཱུཧཊྛེན ཀཱཡོ. པཀཏིཨསྶཱསཔཀཏིཔསྶཱསེ ནིསྶཱཡ ཨུཔྤནྣནིམིཏྟམྤི ཨསྶཱསཔསྶཱསཱཏི ནཱམཾ ལབྷཏི. ཨུཔཊྛཱནཾ སཏཱིཏི ཏཾ ཨཱརམྨཎཾ ཨུཔེཙྩ ཏིཊྛཏཱིཏི སཏི ཨུཔཊྛཱནཾ ནཱམ. ཨནུཔསྶནཱ ཉཱཎནྟི སམཐཝསེན ནིམིཏྟཀཱཡཱནུཔསྶནཱ, ཝིཔསྶནཱཝསེན ནཱམཀཱཡརཱུཔཀཱཡཱནུཔསྶནཱ ཉཱཎནྟི ཨཏྠོ. ཀཱཡོ ཨུཔཊྛཱནནྟི སོ ཀཱཡོ ཨུཔེཙྩ ཏིཊྛཏི ཨེཏྠ སཏཱིཏི ཨུཔཊྛཱནཾ ནཱམ. ནོ སཏཱིཏི སོ ཀཱཡོ སཏི ནཱམ ན ཧོཏཱིཏི ཨཏྠོ. ཏཱཡ སཏིཡཱཏི ཨིདཱནི ཝུཏྟཱཡ སཏིཡཱ. ཏེན ཉཱཎེནཱཏི ཨིདཱནེཝ ཝུཏྟེན ཉཱཎེན. ཏཾ ཀཱཡཾ ཨནུཔསྶཏཱིཏི སམཐཝིཔསྶནཱཝསེན ཡཐཱཝུཏྟཾ ཀཱཡཾ ཨནུགནྟྭཱ ཛྷཱནསམྤཡུཏྟཉཱཎེན ཝཱ ཝིཔསྶནཱཉཱཎེན ཝཱ པསྶཏི.

མཱཏིཀཱཡ ཀཱཡཱདཱིནཾ པདཱནཾ ཨབྷཱཝེཔི ཨིམསྶ ཙཏུཀྐསྶ ཀཱཡཱནུཔསྶནཱཝསེན ཝུཏྟཏྟཱ ཨིདཱནི ཝཏྟབྦཾ ‘‘ཀཱཡེ ཀཱཡཱནུཔསྶནཱསཏིཔཊྛཱནབྷཱཝནཱ’’ཏི ཝཙནཾ སནྡྷཱཡ ཀཱཡཔདནིདྡེསོ ཀཏོ. ཀཱཡེ ཀཱཡཱནུཔསྶནཱཏི བཧུཝིདྷེ ཀཱཡེ ཏསྶ ཏསྶ ཀཱཡསྶ ཨནུཔསྶནཱ. ཨཐ ཝཱ ཀཱཡེ ཀཱཡཱནུཔསྶནཱ, ན ཨཉྙདྷམྨཱནུཔསྶནཱཏི ཝུཏྟཾ ཧོཏི. ཨནིཙྩདུཀྑཱནཏྟཱསུབྷབྷཱུཏེ ཀཱཡེ ན ནིཙྩསུཁཏྟསུབྷཱནུཔསྶནཱ, ཨཐ ཁོ ཨནིཙྩདུཀྑཱནཏྟཱསུབྷཏོ ཀཱཡསྶེཝ ཨནུཔསྶནཱ. ཨཐ ཝཱ ཀཱཡེ ཨཧནྟི ཝཱ མམནྟི ཝཱ ཨིཏྠཱིཏི ཝཱ པུརིསོཏི ཝཱ གཧེཏབྦསྶ ཀསྶཙི ཨནནུཔསྶནཏོ ཏསྶེཝ ཀཱཡམཏྟསྶ ཨནུཔསྶནཱཏི ཝུཏྟཾ ཧོཏི. ཨུཔརི ཝེདནཱསུ ཝེདནཱནུཔསྶནཱཏིཨཱདཱིསུ ཏཱིསུཔི ཨེསེཝ ནཡོ. སཏིཡེཝ ཨུཔཊྛཱནཾ སཏིཔཊྛཱནཾ, ཀཱཡཱནུཔསྶནཱཡ སམྤཡུཏྟཾ སཏིཔཊྛཱནཾ ཀཱཡཱནུཔསྶནཱསཏིཔཊྛཱནཾ, ཏསྶ བྷཱཝནཱ ཀཱཡཱནུཔསྶནཱསཏིཔཊྛཱནབྷཱཝནཱ.

༡༦༧. ཏཾ ཀཱཡནྟི ཨནིདྡིཊྛེཔི ནཱམརཱུཔཀཱཡེ ཀཱཡསདྡེན ཏསྶཱཔི སངྒཧིཏཏྟཱ ནིདྡིཊྛཾ ཝིཡ ཀཏྭཱ ཝུཏྟཾ. ཨནིཙྩཱནུཔསྶནཱདཡོ ཧི ནཱམརཱུཔཀཱཡེ ཨེཝ ལབྦྷནྟི, ན ནིམིཏྟཀཱཡེ. ཨནུཔསྶནཱ ཙ བྷཱཝནཱ ཙ ཝུཏྟཏྠཱ ཨེཝ. དཱིགྷཾ ཨསྶཱསཔསྶཱསཝསེནཱཏིཨཱདི ཨཱནཱཔཱནསྶཏིབྷཱཝནཱཡ ཨཱནིསཾསཾ དསྶེཏུཾ ཝུཏྟཾ. ཏསྶཱ ཧི སཏིཝེཔུལླཏཱཉཱཎཝེཔུལླཏཱ ཙ ཨཱནིསཾསོ. ཏཏྠ ཙིཏྟསྶ ཨེཀགྒཏཾ ཨཝིཀྑེཔཾ པཛཱནཏོཏི པཊིལདྡྷཛ྄ཛྷཱནསྶ ཝིཔསྶནཱཀཱལེ ཙིཏྟེཀགྒཏཾ སནྡྷཱཡ ཝུཏྟཾ. ཝིདིཏཱ ཝེདནཱཏི སཱམཉྙཏོ ཨུདཡདསྶནེན ཝིདིཏཱ ཝེདནཱ. ཝིདིཏཱ ཨུཔཊྛཧནྟཱིཏི ཁཡཏོ ཝཡཏོ སུཉྙཏོ ཝིདིཏཱ ཨུཔཊྛཧནྟི. ཝིདིཏཱ ཨབྦྷཏྠཾ གཙྪནྟཱིཏི སཱམཉྙཏོ ཝཡདསྶནེན ཝིདིཏཱ ཝིནཱསཾ གཙྪནྟི, བྷིཛྫནྟཱིཏི ཨཏྠོ. སཉྙཱཝིཏཀྐེསུཔི ཨེསེཝ ནཡོ. ཨིམེསུ པན ཏཱིསུ ཝུཏྟེསུ སེསཱ རཱུཔདྷམྨཱཔི ཝུཏྟཱ ཧོནྟི. ཀསྨཱ པན ཨིམེ ཏཡོ ཨེཝ ཝུཏྟཱཏི ཙེ? དུཔྤརིགྒཧཏྟཱ. ཝེདནཱསུ ཏཱཝ སུཁདུཀྑཱ པཱཀཊཱ, ཨུཔེཀྑཱ པན སུཁུམཱ དུཔྤརིགྒཧཱ, ན སུཊྛུ པཱཀཊཱ. སཱཔི ཙསྶ པཱཀཊཱ ཧོཏི, སཉྙཱ ཨཱཀཱརམཏྟགྒཱཧཀཏྟཱ ན ཡཐཱསབྷཱཝགྒཱཧིནཱི. སཱ ཙ སབྷཱཝསཱམཉྙལཀྑཎགྒཱཧཀེན ཝིཔསྶནཱཉཱཎེན སམྤཡུཏྟཱ ཨཏི ཝིཡ ཨཔཱཀཊཱ. སཱཔི ཙསྶ པཱཀཊཱ ཧོཏི, ཝིཏཀྐོ ཉཱཎཔཏིརཱུཔཀཏྟཱ ཉཱཎཏོ ཝིསུཾ ཀཏྭཱ དུཔྤརིགྒཧོ. ཉཱཎཔཏིརཱུཔཀོ ཧི ཝིཏཀྐོ. ཡཐཱཧ – ‘‘ཡཱ ཙཱཝུསོ ཝིསཱཁ, སམྨཱདིཊྛི ཡོ ཙ སམྨཱསངྐཔྤོ, ཨིམེ དྷམྨཱ པཉྙཱཀྑནྡྷེ སངྒཧིཏཱ’’ཏི (མ. ནི. ༡.༤༦༢). སོཔི ཙསྶ ཝིཏཀྐོ པཱཀཊོ ཧོཏཱིཏི ཨེཝཾ དུཔྤརིགྒཧེསུ ཝུཏྟེསུ སེསཱ ཝུཏྟཱཝ ཧོནྟཱིཏི. ཨིམེསཾ པན པདཱནཾ ནིདྡེསེ ཀཐཾ ཝིདིཏཱ ཝེདནཱ ཨུཔྤཛྫནྟཱིཏི པུཙྪིཏྭཱ ཏཾ ཨཝིསྶཛྫེཏྭཱཝ ཝེདནུཔྤཱདསྶ ཝིདིཏཏྟེཡེཝ ཝིསྶཛྫིཏེ ཝེདནཱཡ ཝིདིཏཏྟཾ ཝིསྶཛྫིཏཾ ཧོཏཱིཏི ཀཐཾ ཝེདནཱཡ ཨུཔྤཱདོ ཝིདིཏོ ཧོཏཱིཏིཨཱདིམཱཧ. སེསེསུཔི ཨེསེཝ ནཡོ. ཨཝིཛྫཱསམུདཡཱ ཨཝིཛྫཱནིརོདྷཱཏིཨཱདཡོ ཧེཊྛཱ ཝུཏྟཏྠཱ ཨེཝ. ཨིམིནཱཝ ནཡེན སཉྙཱཝིཏཀྐཱཔི ཝེདིཏབྦཱ. ཝིཏཀྐཝཱརེ པན ‘‘ཕསྶསམུདཡཱ ཕསྶནིརོདྷཱ’’ཏི ཨཝཏྭཱ ཕསྶཊྛཱནེ སཉྙཱསམུདཡཱ སཉྙཱནིརོདྷཱཏི ཝུཏྟཾ. ཏཾ ཀསྨཱ ཨིཏི ཙེ? སཉྙཱམཱུལཀཏྟཱ ཝིཏཀྐསྶ. ‘‘སཉྙཱནཱནཏྟཾ པཊིཙྩ ཨུཔྤཛྫཏི སངྐཔྤནཱནཏྟ’’ནྟི (དཱི. ནི. ༣.༣༥༩) ཧི ཝུཏྟཾ.

ཨནིཙྩཏོ མནསིཀརོཏོཏིཨཱདཱིསུ ཙ ‘‘ཝེདནཾ ཨནིཙྩཏོ མནསིཀརོཏོ’’ཏིཨཱདིནཱ ནཡེན ཏསྨིཾ ཏསྨིཾ ཝཱརེ སོ སོཡེཝ དྷམྨོ ཡོཛེཏབྦོ. ཡསྨཱ པན ཝིཔསྶནཱསམྤཡུཏྟཱ ཝེདནཱ ཝིཔསྶནཱཀིཙྩཀརཎེ ཨསམཏྠཏྟཱ ཝིཔསྶནཱཡ ཨནུཔཀཱརིཀཱ, ཏསྨཱཡེཝ ཙ བོདྷིཔཀྑིཡདྷམྨེསུ ནཱགཏཱ. ཝིཔསྶནཱསམྤཡུཏྟཱཡ པན སཉྙཱཡ ཀིཙྩམེཝ ཨཔརིབྱཏྟཾ, ཏསྨཱ སཱ ཝིཔསྶནཱཡ ཨེཀནྟམནུཔཀཱརིཀཱ ཨེཝ. ཝིཏཀྐཾ པན ཝིནཱ ཝིཔསྶནཱཀིཙྩམེཝ ནཏྠི. ཝིཏཀྐསཧཱཡཱ ཧི ཝིཔསྶནཱ སཀཀིཙྩཾ ཀརོཏི. ཡཐཱཧ –

‘‘པཉྙཱ ཨཏྟནོ དྷམྨཏཱཡ ཨནིཙྩཾ དུཀྑམནཏྟཱཏི ཨཱརམྨཎཾ ནིཙྪེཏུཾ ན སཀྐོཏི, ཝིཏཀྐེ པན ཨཱཀོཊེཏྭཱ ཨཱཀོཊེཏྭཱ དེནྟེ སཀྐོཏི. ཀཐཾ? ཡཐཱ ཧི ཧེརཉྙིཀོ ཀཧཱཔཎཾ ཧཏྠེ ཋཔེཏྭཱ སབྦབྷཱགེསུ ཨོལོཀེཏུཀཱམོ སམཱནོཔི ན ཙཀྑུཏལེནེཝ པརིཝཏྟེཏུཾ སཀྐོཏི, ཨངྒུལིཔབྦེཧི པན པརིཝཏྟེཏྭཱ པརིཝཏྟེཏྭཱ ཨིཏོ ཙིཏོ ཙ ཨོལོཀེཏུཾ སཀྐོཏི, ཨེཝམེཝ ན པཉྙཱ ཨཏྟནོ དྷམྨཏཱཡ ཨནིཙྩཱདིཝསེན ཨཱརམྨཎཾ ནིཙྪེཏུཾ སཀྐོཏི, ཨབྷིནིརོཔནལཀྑཎེན པན ཨཱཧནནཔརིཡཱཧནནརསེན ཝིཏཀྐེན ཨཱཀོཊེནྟེན ཝིཡ པརིཝཏྟེནྟེན ཝིཡ ཙ ཨཱདཱཡཱདཱཡ དིནྣམེཝ ནིཙྪེཏུཾ སཀྐོཏཱི’’ཏི (ཝིསུདྡྷི. ༢.༥༦༨).

ཏསྨཱ ཝེདནཱསཉྙཱནཾ ཝིཔསྶནཱཡ ཨནུཔཀཱརཏྟཱ ལཀྑཎམཏྟཝསེནེཝ དསྶེཏུཾ ‘‘ཝེདནཱཡ སཉྙཱཡཱ’’ཏི ཏཏྠ ཏཏྠ ཨེཀཝཙནེན ནིདྡེསོ ཀཏོ. ཡཏྟཀོ པན ཝིཔསྶནཱཡ བྷེདོ, ཏཏྟཀོ ཨེཝ ཝིཏཀྐསྶཱཏི དསྶེཏུཾ ‘‘ཝིཏཀྐཱན’’ནྟི ཏཏྠ ཏཏྠ བཧུཝཙནེན ནིདྡེསོ ཀཏོཏི ཝཏྟུཾ ཡུཛྫཏི.

༡༦༨. པུན དཱིགྷཾ ཨསྶཱསཔསྶཱསཝསེནཱཏིཨཱདི ཨཱནཱཔཱནསྶཏིབྷཱཝནཱཡ སམྤཏྟིཾ བྷཱཝནཱཕལཉྩ དསྶེཏུཾ ཝུཏྟཾ. ཏཏྠ སམོདྷཱནེཏཱིཏི ཨཱརམྨཎཾ ཋཔེཏི, ཨཱརམྨཎཾ པཏིཊྛཱཔེཏཱིཏི ཝཱ ཨཏྠོ. སམོདཧནབྱཱཔཱརཱབྷཱཝེཔི བྷཱཝནཱཔཱརིཔཱུརིཡཱ ཨེཝ སམོདཧཏི ནཱམ. གོཙརནྟི ཝིཔསྶནཱཀྑཎེ སངྑཱརཱརམྨཎཾ, མགྒཀྑཎེ ཕལཀྑཎེ ཙ ནིབྦཱནཱརམྨཎཾ. སམཏྠནྟི སམམེཝ ཨཏྠོ, སམསྶ ཝཱ ཨཏྠོཏི སམཏྠོ. ཏཾ སམཏྠཾ. སེསེསུཔི ཨེསེཝ ནཡོ. མགྒཾ སམོདྷཱནེཏཱིཏི མགྒཕལཀྑཎེཡེཝ གོཙརཾ ནིབྦཱནམེཝ. ཨཡཾ པུགྒལོཏི ཨཱནཱཔཱནསྶཏིབྷཱཝནཾ ཨནུཡུཏྟོ ཡོགཱཝཙརོཝ. ཨིམསྨིཾ ཨཱརམྨཎེཏི ཨེཏྠ པན ‘‘ཀཱཡེ’’ཏིཔདེན སངྒཧིཏེ ནཱམརཱུཔཀཱཡསངྑཱཏེ སངྑཏཱརམྨཎེ ཏེནེཝ ཀམེན མགྒེ ནིབྦཱནཱརམྨཎེ ཙ. ཡཾ ཏསྶཱཏིཨཱདཱིཧི ཨཱརམྨཎགོཙརསདྡཱནཾ ཨེཀཏྠཏཱ ཝུཏྟཱ. ཏསྶཱཏི ཏསྶ པུགྒལསྶ. པཛཱནཱཏཱིཏི པུགྒལོ པཛཱནནཱ པཉྙཱཏི པུགྒལོ པཉྙཱཡ པཛཱནཱཏཱིཏི ཝུཏྟཾ ཧོཏི. ཨཱརམྨཎསྶ ཨུཔཊྛཱནནྟི ཝིཔསྶནཱཀྑཎེ སངྑཱརཱརམྨཎསྶ, མགྒཕལཀྑཎེ ནིབྦཱནཱརམྨཎསྶ ཨུཔཊྛཱནཾ སཏི. ཨེཏྠ ཙ ཀམྨཏྠེ སཱམིཝཙནཾ ཡཐཱ རཉྙོ ཨུཔཊྛཱནནྟི. ཨཝིཀྑེཔོཏི སམཱདྷི. ཨདྷིཊྛཱནནྟི ཡཐཱཝུཏྟསངྑཱརཱརམྨཎཾ ནིབྦཱནཱརམྨཎཉྩ. ཏཉྷི ཨདྷིཊྛཱཏི ཨེཏྠ ཙིཏྟནྟི ཨདྷིཊྛཱནཾ. ཝོདཱནནྟི ཉཱཎཾ. ཏཉྷི ཝོདཱཡཏི ཝིསུཛ྄ཛྷཏི ཏེན ཙིཏྟནྟི ཝོདཱནཾ. ལཱིནཔཀྑིཀོ སམཱདྷི ཨལཱིནབྷཱཝཔྤཏྟིཡཱ སམབྷཱུཏཏྟཱ སམཾ, ཨུདྡྷཙྩཔཀྑིཀཾ ཉཱཎཾ ཨནུདྡྷཏབྷཱཝཔྤཏྟིཡཱ སམབྷཱུཏཏྟཱ སམཾ. ཏེན ཝིཔསྶནཱམགྒཕལཀྑཎེསུ སམཐཝིཔསྶནཱནཾ ཡུགནདྡྷཏཱ ཝུཏྟཱ ཧོཏི. སཏི པན སབྦཏྠིཀཏྟཱ ཏདུབྷཡསམཏཱཡ ཨུཔཀཱརིཀཱཏི སམཾ, ཨཱརམྨཎཾ སམཏཱདྷིཊྛཱནཏྟཱ སམཾ. ཨནཝཛྫཊྛོཏི ཝིཔསྶནཱཡ ཨནཝཛྫསབྷཱཝོ. ནིཀླེསཊྛོཏི མགྒསྶ ནིཀྐིལེསསབྷཱཝོ. ནིཀྐིལེསཊྛོཏི ཝཱ པཱཋོ. ཝོདཱནཊྛོཏི ཕལསྶ པརིསུདྡྷསབྷཱཝོ. པརམཊྛོཏི ནིབྦཱནསྶ སབྦདྷམྨུཏྟམསབྷཱཝོ. པཊིཝིཛ྄ཛྷཏཱིཏི ཏཾ ཏཾ སབྷཱཝཾ ཨསམྨོཧཏོ པཊིཝིཛ྄ཛྷཏི. ཨེཏྠ ཙ ‘‘ཨཱརམྨཎསྶ ཨུཔཊྛཱན’’ནྟིཨཱདཱིཧི སམྨཱ པཊིཝེདྷོ ཝུཏྟོ. ཨེཏྠེཝ ཙ ཝོདཱནཊྛཔཊིཝེདྷསྶ ཝུཏྟཏྟཱ ཏེན ཨེཀལཀྑཎཱ ཨནཝཛྫཊྛནིཀྐིལེསཊྛཔརམཊྛཱ ལཀྑཎཧཱརཝསེན ཝུཏྟཱཡེཝ ཧོནྟི. ཡཐཱཧ –

‘‘ཝུཏྟམྷི ཨེཀདྷམྨེ, ཡེ དྷམྨཱ ཨེཀལཀྑཎཱ ཀེཙི;

ཝུཏྟཱ བྷཝནྟི སབྦེ, སོ ཧཱརོ ལཀྑཎོ ནཱམཱ’’ཏི. (ནེཏྟི. ༤.༥ ནིདྡེསཝཱར);

ཨནཝཛྫཊྛོ ནིཀྐིལེསཊྛོ ཙེཏྠ ཨཝིཀྑེཔསངྑཱཏསྶ སམསྶ ཨཏྠོ པཡོཛནནྟི སམཏྠོ, ཝོདཱནཊྛོ ཝིཔསྶནཱམགྒཝོདཱནཾ སནྡྷཱཡ སམམེཝ ཨཏྠོཏི སམཏྠོ, ཕལཝོདཱནཾ སནྡྷཱཡ མགྒཝོདཱནསངྑཱཏསྶ སམསྶ ཨཏྠོཏི སམཏྠོ, པརམཊྛོ པན སམམེཝ ཨཏྠོཏི ཝཱ ནིབྦཱནཔཡོཛནཏྟཱ སབྦསྶ སམསྶ ཨཏྠོཏི ཝཱ སམཏྠོ, ཏཾ ཝུཏྟཔྤཀཱརཾ སམཉྩ སམཏྠཉྩ ཨེཀདེསསརཱུཔེཀསེསཾ ཀཏྭཱ སམཏྠཉྩ པཊིཝིཛ྄ཛྷཏཱིཏི ཝུཏྟཾ. ཨིནྡྲིཡབལབོཛ྄ཛྷངྒདྷམྨཱ ཝིཔསྶནཱམགྒཕལཀྑཎེཔི ལབྦྷནྟི, མགྒོ ཙ ཏིསྶོ ཙ ཝིསུདྡྷིཡོ མགྒཕལཀྑཎེཡེཝ, ཝིམོཀྑོ ཙ ཝིཛྫཱ ཙ ཁཡེ ཉཱཎཉྩ མགྒཀྑཎེཡེཝ, ཝིམུཏྟི ཙ ཨནུཔྤཱདེ ཉཱཎཉྩ ཕལཀྑཎེཡེཝ, སེསཱ ཝིཔསྶནཱཀྑཎེཔཱིཏི. དྷམྨཝཱརེ ཨིམེ དྷམྨེ ཨིམསྨིཾ ཨཱརམྨཎེ སམོདྷཱནེཏཱིཏི ནིབྦཱནཾ ཋཔེཏྭཱ སེསཱ ཡཐཱཡོགཾ ཝེདིཏབྦཱ. ཨིདཾ པན ཡེབྷུཡྻཝསེན ཝུཏྟཾ. ཨཝུཏྟཏྠཱ པནེཏྠ ཧེཊྛཱ ཝུཏྟཱ ཨེཝ. ཨེཀེཀཙཏུཀྐཝསེནེཏྠ ནིཡྻཱནེ དསྶིཏེཔི ཙཏུཀྐནྟོགདྷསྶ ཨེཀེཀསྶཱཔི བྷཱགསྶ ནིཡྻཱནསྶ ཨུཔནིསྶཡཏྟཱ ཨེཀེཀབྷཱགཝསེན ནིཡྻཱནཾ དསྶིཏཾ. ན ཧི ཨེཀེཀཾ ཝིནཱ ནིཡྻཱནཾ ཧོཏཱིཏི.

དཱིགྷཾཨསྶཱསཔསྶཱསནིདྡེསཝཎྞནཱ ནིཊྛིཏཱ.

༡༦༩. རསྶནིདྡེསེ ཨིཏྟརསངྑཱཏེཏི པརིཏྟསངྑཱཏེ ཀཱལེ. སེསམེཏྠ ཝུཏྟནཡེན ཝེདིཏབྦཾ.

༡༧༠. སབྦཀཱཡཔཊིསཾཝེདིནིདྡེསེ ཨརཱུཔདྷམྨེསུ ཝེདནཱཡ ཨོལཱ༹རིཀཏྟཱ སུཁགྒཧཎཏྠཾ པཋམཾ ཨིཊྛཱནིཊྛཱརམྨཎསཾཝེདིཀཱ ཝེདནཱ ཝུཏྟཱ, ཏཏོ ཡཾ ཝེདེཏི, ཏཾ སཉྫཱནཱཏཱིཏི ཨེཝཾ ཝེདནཱཝིསཡསྶ ཨཱཀཱརགྒཱཧིཀཱ སཉྙཱ, ཏཏོ སཉྙཱཝསེན ཨབྷིསངྑཱརིཀཱ ཙེཏནཱ, ཏཏོ ‘‘ཕུཊྛོ ཝེདེཏི, ཕུཊྛོ སཉྫཱནཱཏི, ཕུཊྛོ ཙེཏེཏཱི’’ཏི (སཾ. ནི. ༤.༩༣) ཝཙནཏོ ཕསྶོ, ཏཏོ སབྦེསཾ སཱདྷཱརཎལཀྑཎོ མནསིཀཱརོ, ཙེཏནཱདཱིཧི སངྑཱརཀྑནྡྷོ ཝུཏྟོ. ཨེཝཾ ཏཱིསུ ཁནྡྷེསུ ཝུཏྟེསུ ཏཾནིསྶཡོ ཝིཉྙཱཎཀྑནྡྷོ ཝུཏྟོཝ ཧོཏི. ནཱམཉྩཱཏི ཝུཏྟཔྤཀཱརཾ ནཱམཉྩ. ནཱམཀཱཡོ ཙཱཏི ཨིདཾ པན ནཱམེན ནིབྦཱནསྶཔི སངྒཧིཏཏྟཱ ལོཀུཏྟརཱནཉྩ ཨཝིཔསྶནུཔགཏྟཱ ཏཾ ཨཔནེཏུཾ ཝུཏྟཾ. ‘‘ཀཱཡོ’’ཏི ཧི ཝཙནེན ནིབྦཱནཾ ཨཔནཱིཏཾ ཧོཏི ནིབྦཱནསྶ རཱསིཝིནིམུཏྟཏྟཱ. ཡེ ཙ ཝུཙྩནྟི ཙིཏྟསངྑཱརཱཏི ‘‘སཉྙཱ ཙ ཝེདནཱ ཙ ཙེཏསིཀཱ ཨེཏེ དྷམྨཱ ཙིཏྟཔཊིབདྡྷཱ ཙིཏྟསངྑཱརཱ’’ཏི (པཊི. མ. ༡.༡༧༤; མ. ནི. ༡.༤༦༣) ཨེཝཾ ཝུཙྩམཱནཱཔི ཙིཏྟསངྑཱརཱ ཨིདྷ ནཱམཀཱཡེནེཝ སངྒཧིཏཱཏི ཝུཏྟཾ ཧོཏི. མཧཱབྷཱུཏཱཏི མཧནྟཔཱཏུབྷཱཝཏོ མཧཱབྷཱུཏསཱམཉྙཏོ མཧཱཔརིཧཱརཏོ མཧཱཝིཀཱརཏོ མཧནྟབྷཱུཏཏྟཱ ཙཱཏི མཧཱབྷཱུཏཱ. ཏེ པན – པཐཝཱི ཨཱཔོ ཏེཛོ ཝཱཡོཏི ཙཏྟཱརོ. ཙཏུནྣཉྩ མཧཱབྷཱུཏཱནཾ ཨུཔཱདཱཡརཱུཔནྟི ཨུཔཡོགཏྠེ སཱམིཝཙནཾ, ཙཏྟཱརོ མཧཱབྷཱུཏེ ཨུཔཱདཱཡ ནིསྶཱཡ ཨམུཉྩིཏྭཱ པཝཏྟརཱུཔནྟི ཨཏྠོ. ཏཾ པན – ཙཀྑུ སོཏཾ གྷཱནཾ ཛིཝ྄ཧཱ ཀཱཡོ རཱུཔཾ སདྡོ གནྡྷོ རསོ ཨིཏྠིནྡྲིཡཾ པུརིསིནྡྲིཡཾ ཛཱིཝིཏིནྡྲིཡཾ ཧདཡཝཏྠུ ཨོཛཱ ཀཱཡཝིཉྙཏྟི ཝཙཱིཝིཉྙཏྟི ཨཱཀཱསདྷཱཏུ རཱུཔསྶ ལཧུཏཱ མུདུཏཱ ཀམྨཉྙཏྟཱ ཨུཔཙཡོ སནྟཏི ཛརཏཱ ཨནིཙྩཏཱཏི ཙཏུཝཱིསཏིཝིདྷཾ. ཨསྶཱསོ ཙ པསྶཱསོ ཙཱཏི པཱཀཏིཀོཡེཝ. ཨསྶཱསཔསྶཱསེ ནིསྶཱཡ ཨུཔྤནྣཾ པཊིབྷཱགནིམིཏྟམྤི ཏདེཝ ནཱམཾ ལབྷཏི པཐཝཱིཀསིཎཱདཱིནི ཝིཡ. རཱུཔསརིཀྑཀཏྟཱ རཱུཔནྟི ཙ ནཱམཾ ལབྷཏི ‘‘བཧིདྡྷཱ རཱུཔཱནི པསྶཏཱི’’ཏིཨཱདཱིསུ (དྷ. ས. ༢༠༤; དཱི. ནི. ༣.༣༣༨) ཝིཡ. ནིམིཏྟཉྩ ཨུཔནིབནྡྷནཱཏི སཏིཨུཔནིབནྡྷནཱཡ ནིམིཏྟབྷཱུཏཾ ཨསྶཱསཔསྶཱསཱནཾ ཕུསནཊྛཱནཾ. ཡེ ཙ ཝུཙྩནྟི ཀཱཡསངྑཱརཱཏི ‘‘ཨསྶཱསཔསྶཱསཱ ཀཱཡིཀཱ ཨེཏེ དྷམྨཱ ཀཱཡཔཊིབདྡྷཱ ཀཱཡསངྑཱརཱ’’ཏི (པཊི. མ. ༡.༡༧༡; མ. ནི. ༡.༤༦༣) ཨེཝཾ ཝུཙྩམཱནཱཔི ཀཱཡསངྑཱརཱ ཨིདྷ རཱུཔཀཱཡེནེཝ སངྒཧིཏཱཏི ཝུཏྟཾ ཧོཏི.

ཏེ ཀཱཡཱ པཊིཝིདིཏཱ ཧོནྟཱིཏི ཛྷཱནཀྑཎེ ཨསྶཱསཔསྶཱསནིམིཏྟཀཱཡཱ ཝིཔསྶནཱཀྑཎེ ཨཝསེསརཱུཔཱརཱུཔཀཱཡཱ ཨཱརམྨཎཏོ པཊིཝིདིཏཱ ཧོནྟི, མགྒཀྑཎེ ཨསམྨོཧཏོ པཊིཝིདིཏཱ ཧོནྟི. ཨསྶཱསཔསྶཱསཝསེན པཊིལདྡྷཛ྄ཛྷཱནསྶ ཡོགིསྶ ཨུཔྤནྣཝིཔསྶནཱམགྒེཔི སནྡྷཱཡ དཱིགྷཾ ཨསྶཱསཔསྶཱསཝསེནཱཏིཨཱདི ཝུཏྟཾ.

ཨཱཝཛྫཏོ པཛཱནཏོཏིཨཱདཱིནི སཱིལཀཐཱཡཾ ཝུཏྟཏྠཱནི. ཏེ ཝུཏྟཔྤཀཱརེ ཀཱཡེ ཨནྟོཀརིཏྭཱ ‘‘སབྦཀཱཡཔཊིསཾཝེདཱི’’ཏི ཝུཏྟཾ.

སབྦཀཱཡཔཊིསཾཝེདཱི ཨསྶཱསཔསྶཱསཱནཾ སཾཝརཊྛེནཱཏིཨཱདཱིསུ ‘‘སབྦཀཱཡཔཊིསཾཝེདཱི’’ཏིཝུཏྟཨསྶཱསཔསྶཱསཏོ ཨུཔྤནྣཛ྄ཛྷཱནཝིཔསྶནཱམགྒེསུ སཾཝརོཡེཝ སཾཝརཊྛེན སཱིལཝིསུདྡྷི. ཨཝིཀྑེཔོཡེཝ ཨཝིཀྑེཔཊྛེན ཙིཏྟཝིསུདྡྷི. པཉྙཱཡེཝ དསྶནཊྛེན དིཊྛིཝིསུདྡྷི. ཛྷཱནཝིཔསྶནཱསུ ཝིརཏིཨབྷཱཝེཔི པཱཔཱབྷཱཝམཏྟམེཝ སཾཝརོ ནཱམཱཏི ཝེདིཏབྦཾ.

༡༧༡. པསྶམྦྷཡནྟིཨཱདཱིནཾ ནིདྡེསེ ཀཱཡིཀཱཏི རཱུཔཀཱཡེ བྷཝཱ. ཀཱཡཔཊིབདྡྷཱཏི ཀཱཡཾ པཊིབདྡྷཱ ཀཱཡཾ ནིསྶིཏཱ, ཀཱཡེ སཏི ཧོནྟི, ཨསཏི ན ཧོནྟི, ཏསྨཱཡེཝ ཏེ ཀཱཡེན སངྑརཱིཡནྟཱིཏི ཀཱཡསངྑཱརཱ. པསྶམྦྷེནྟོཏི ནིབྦཱཔེནྟོ སནྣིསཱིདཱཔེནྟོ. པསྶམྦྷནཝཙནེནེཝ ཨོལཱ༹རིཀཱནཾ པསྶམྦྷནཾ སིདྡྷཾ. ནིརོདྷེནྟོཏི ཨོལཱ༹རིཀཱནཾ ཨནུཔྤཱདནེན ནིརོདྷེནྟོ. ཝཱུཔསམེནྟོཏི ཨོལཱ༹རིཀེཡེཝ ཨེཀསནྟཏིཔརིཎཱམནཡེན སནྟབྷཱཝཾ ནཡནྟོ. སིཀྑཏཱིཏི ཨདྷིཀཱརཝསེན ཨསྶསིསྶཱམཱིཏི སིཀྑཏཱིཏི སམྦནྡྷོ, ཏིསྶོ སིཀྑཱ སིཀྑཏཱིཏི ཝཱ ཨཏྠོ.

ཨིདཱནི ཨོལཱ༹རིཀཔསྶམྦྷནཾ དསྶེཏུཾ ཡཐཱརཱུཔེཧཱིཏིཨཱདིམཱཧ. ཏཏྠ ཡཐཱརཱུཔེཧཱིཏི ཡཱདིསེཧི. ཨཱནམནཱཏི པཙྪཏོ ནམནཱ. ཝིནམནཱཏི ཨུབྷཡཔསྶཏོ ནམནཱ. སནྣམནཱཏི སབྦཏོཔི ནམནྟསྶ སུཊྛུ ནམནཱ. པཎམནཱཏི པུརཏོ ནམནཱ. ཨིཉྫནཱཏི ཀམྤནཱ. ཕནྡནཱཏི ཨཱིསཀཾ ཙལནཱ. པཀམྤནཱཏི བྷུསཾ ཀམྤནཱ. ཡཐཱརཱུཔེཧི ཀཱཡསངྑཱརེཧི ཀཱཡསྶ ཨཱནམནཱ…པེ… པཀམྤནཱ, ཏཐཱརཱུཔཾ ཀཱཡསངྑཱརཾ པསྶམྦྷཡནྟི ཙ, ཡཱ ཀཱཡསྶ ཨཱནམནཱ…པེ… པཀམྤནཱ, ཏཉྩ པསྶམྦྷཡནྟི ཙ སམྦནྡྷོ ཀཱཏབྦོ. ཀཱཡསངྑཱརེསུ ཧི པསྶམྦྷིཏེསུ ཀཱཡསྶ ཨཱནམནཱདཡོ ཙ པསྶམྦྷིཏཱཡེཝ ཧོནྟཱིཏི. ཡཐཱརཱུཔེཧི ཀཱཡསངྑཱརེཧི ཀཱཡསྶ ན ཨཱནམནཱདིཀཱ ཧོཏི, ཏཐཱརཱུཔཾ སནྟཾ སུཁུམམྤི ཀཱཡསངྑཱརཾ པསྶམྦྷཡནྟི ཙ, ཡཱ ཀཱཡསྶ ན ཨཱནམནཱདིཀཱ, ཏཉྩ སནྟཾ སུཁུམཾ པསྶམྦྷཡནྟི ཙ སམྦནྡྷཏོ ཝེདིཏབྦཾ. སནྟཾ སུཁུམནྟི ཙ བྷཱཝནཔུཾསཀཝཙནམེཏཾ. ཨིཏི ཀིརཱཏི ཨེཏྠ ཨིཏི ཨེཝམཏྠེ, ཀིར ཡདིཨཏྠེ. ཡདི ཨེཝཾ སུཁུམཀེཔི ཨསྶཱསཔསྶཱསེ པསྶམྦྷཡཾ ཨསྶསིསྶཱམི པསྶསིསྶཱམཱིཏི སིཀྑཏཱིཏི ཙོདཀེན ཙོདནཱ ཨཱརདྡྷཱ ཧོཏི. ཨཐ ཝཱ ཀིརཱཏི ཙོདཀཝཙནཏྟཱ ཨསདྡཧནཏྠེ ཨསཧནཏྠེ པརོཀྑཏྠེ ཙ ཡུཛྫཏིཡེཝ, ཨེཝཾ སུཁུམཱནམྤི པསྶམྦྷནཾ སིཀྑཏཱིཏི ན སདྡཧཱམི ན སཧཱམི ཨཔཙྩཀྑཾ མེཏི ཝུཏྟཾ ཧོཏི.

ཨེཝཾ སནྟེཏི ཨེཝཾ སུཁུམཱནཾ པསྶམྦྷནེ སནྟེ. ཝཱཏཱུཔལདྡྷིཡཱ ཙ པབྷཱཝནཱ ན ཧོཏཱིཏི ཨསྶཱསཔསྶཱསཝཱཏསྶ ཨུཔལདྡྷིཡཱ. ཨུཔལདྡྷཱིཏི ཝིཉྙཱཎཾ. ཨསྶཱསཔསྶཱསཝཱཏཾ ཨུཔལབྦྷམཱནསྶ ཏདཱརམྨཎསྶ བྷཱཝནཱཝིཉྙཱཎསྶ པབྷཱཝནཱ ཨུཔྤཱདནཱ ན ཧོཏི, ཏསྶ ཨཱརམྨཎསྶ བྷཱཝནཱ ན ཧོཏཱིཏི ཨཏྠོ. ཨསྶཱསཔསྶཱསཱནཉྩ པབྷཱཝནཱ ན ཧོཏཱིཏི བྷཱཝནཱཡ སུཁུམཀཱནམྤི ཨསྶཱསཔསྶཱསཱནཾ ནིརོདྷནཏོ ཏེསཉྩ ཨུཔྤཱདནཱ པཝཏྟནཱ ན ཧོཏཱིཏི ཨཏྠོ. ཨཱནཱཔཱནསྶཏིཡཱ ཙ པབྷཱཝནཱ ན ཧོཏཱིཏི ཨསྶཱསཔསྶཱསཱབྷཱཝཏོཡེཝ ཏདཱརམྨཎཱཡ བྷཱཝནཱཝིཉྙཱཎསམྤཡུཏྟཱཡ སཏིཡཱ ཙ པཝཏྟནཱ ན ཧོཏི. ཏསྨཱཡེཝ ཏཾསམྤཡུཏྟསྶ ཨཱནཱཔཱནསྶཏིསམཱདྷིསྶ ཙ བྷཱཝནཱ ན ཧོཏི. ན ཙ ནཾ ཏནྟི ཨེཏྠ ཙ ནནྟི ནིཔཱཏམཏྟཾ ‘‘བྷིཀྑུ ཙ ན’’ནྟིཨཱདཱིསུ (པཱརཱ. ༢༧༣) ཝིཡ. ཏཾ ཝུཏྟཝིདྷིཾ སམཱཔཏྟིཾ པཎྜིཏཱ ན སམཱཔཛྫནྟིཔི ཏཏོ ན ཝུཊྛཧནྟིཔཱིཏི སམྦནྡྷོ. ཙོདནཱཔཀྑསྶ པརིཧཱརཝཙནེ ཨིཏི ཀིརཱཏི ཨེཝམེཝ. ཨེཏྠ ཨེཝཀཱརཏྠེ ཀིརསདྡོ དཊྛབྦོ. ཨེཝཾ སནྟེཏི ཨེཝཾ པསྶམྦྷནེ སནྟེ ཨེཝ.

ཡཐཱ ཀཐཾ ཝིཡཱཏི ཡཐཱ ཏཾ ཝུཏྟཝིདྷཱནཾ ཧོཏི, ཏཐཱ ཏཾ ཀཐཾ ཝིཡཱཏི ཨུཔམཾ པུཙྪཏི. ཨིདཱནི སེཡྻཐཱཔཱིཏི ཏཾ ཨུཔམཾ དསྶེཏི. ཀཾསེཏི ཀཾསམཡབྷཱཛནེ. ནིམིཏྟནྟི ཏེསཾ སདྡཱནཾ ཨཱཀཱརཾ. ‘‘ནིམིཏྟ’’ནྟི ཙ སཱམིཨཏྠེ ཨུཔཡོགཝཙནཾ, ནིམིཏྟསྶཱཏི ཨཏྠོ. སདྡནིམིཏྟཉྩ སདྡཏོ ཨནཉྙཾ. སུགྒཧིཏཏྟཱཏི སུཊྛུ ཨུགྒཧིཏཏྟཱ. སུགཧིཏཏྟཱཏིཔི པཱཋོ, སུཊྛུ གཧིཏཏྟཱཏི ཨཏྠོ. སུམནསིཀཏཏྟཱཏི སུཊྛུ ཨཱཝཛྫིཏཏྟཱ. སཱུཔདྷཱརིཏཏྟཱཏི སུཊྛུ ཙིཏྟེ ཋཔིཏཏྟཱ. སུཁུམསདྡནིམིཏྟཱརམྨཎཏཱཔཱིཏི ཏདཱ སུཁུམཱནམྤི སདྡཱནཾ ནིརུདྡྷཏྟཱ ཨནུགྒཧིཏསདྡནིམིཏྟསྶ ཨནཱརམྨཎམྤི སུཁུམཏརཾ སདྡནིམིཏྟཾ ཨཱརམྨཎཾ ཀཏྭཱ སུཁུམཏརཾ སདྡནིམིཏྟཱརམྨཎམྤི ཙིཏྟཾ པཝཏྟཏི, སུཁུམཏརསདྡནིམིཏྟཱརམྨཎབྷཱཝཏོཔཱིཏི ཝཱ ཨཏྠོ. ཨིམིནཱཝ ནཡེན ཨཔྤནཱཡམྤི ཨཏྠོ ཝེདིཏབྦོ.

པསྶམྦྷཡནྟིཨཱདཱིསུ ‘‘པསྶམྦྷཡཾ ཀཱཡསངྑཱར’’ནྟི ཝུཏྟཱ ཨསྶཱསཔསྶཱསཱ ཀཱཡོཏི ཝཱ ‘‘པསྶམྦྷཡཾ ཀཱཡསངྑཱར’’ནྟི ཨེཏྠ ཨསྶཱསཔསྶཱསཱ ཀཱཡོཏི ཝཱ ཡོཛནཱ ཝེདིཏབྦཱ. བྷཱཝནཱཝིསུདྡྷིཡཱ ཀཱཡསངྑཱརེ པསྶམྦྷམཱནེཔི ཨོལཱ༹རིཀཾ ཀཱཡསངྑཱརཾ པསྶམྦྷེམཱིཏི ཡོགིནོ ཨཱབྷོགེ སཏི ཏེནཱདརེན ཨཏིཝིཡ པསྶམྦྷཏི. ཨནུཔཊྛཧནྟམྤི སུཁུམཾ སུཨཱནཡཾ ཧོཏི.

ཨཊྛ ཨནུཔསྶནཱཉཱཎཱནཱིཏི ‘‘དཱིགྷཾ རསྶཾ སབྦཀཱཡཔཊིསཾཝེདཱི པསྶམྦྷཡཾ ཀཱཡསངྑཱར’’ནྟི ཝུཏྟེསུ ཙཏཱུསུ ཝཏྠཱུསུ ཨསྶཱསཝསེན ཙཏསྶོ, པསྶཱསཝསེན ཙཏསྶོཏི ཨཊྛ ཨནུཔསྶནཱཉཱཎཱནི. ཨཊྛ ཙ ཨུཔཊྛཱནཱནུསྶཏིཡོཏི ‘‘དཱིགྷཾ ཨསྶཱསཝསེན ཙིཏྟསྶ ཨེཀགྒཏཾ ཨཝིཀྑེཔཾ པཛཱནཏོ སཏི ཨུཔཊྛིཏཱ ཧོཏཱི’’ཏིཨཱདིནཱ (པཊི. མ. ༡.༡༧༠) ནཡེན ཝུཏྟེསུ ཙཏཱུསུ ཝཏྠཱུསུ ཨསྶཱསཝསེན ཙཏསྶོ, པསྶཱསཝསེན ཙཏསྶོཏི ཨཊྛ ཙ ཨུཔཊྛཱནཱནུསྶཏིཡོ. ཨཊྛ ཙུཔཊྛཱནཱནུསྶཏིཡོཏིཔི པཱཋོ. ཙཏྟཱརི སུཏྟནྟིཀཝཏྠཱུནཱིཏི བྷགཝཏཱ ཨཱནཱཔཱནསྶཏིསུཏྟནྟེ (མ. ནི. ༣.༡༤༤ ཨཱདཡོ) ཝུཏྟཏྟཱ པཋམཙཏུཀྐཝསེན ཙཏྟཱརི སུཏྟནྟིཀཝཏྠཱུནཱིཏི.

པཋམཙཏུཀྐནིདྡེསཝཎྞནཱ ནིཊྛིཏཱ.

༡༧༢. དུཏིཡཙཏུཀྐསྶ པཱིཏིཔཊིསཾཝེདིནིདྡེསེ ཨུཔྤཛྫཏི པཱིཏི པཱམོཛྫནྟི ཨེཏྠ པཱིཏཱིཏི མཱུལཔདཾ. པཱམོཛྫནྟི ཏསྶ ཨཏྠཔདཾ, པམུདིཏབྷཱཝོཏི ཨཏྠོ. ཡཱ པཱིཏི པཱམོཛྫནྟིཨཱདཱིསུ ཡཱ ‘‘པཱིཏཱི’’ཏི ཙ ‘‘པཱམོཛྫ’’ནྟི ཙ ཨེཝམཱདཱིནི ནཱམཱནི ལབྷཏི, སཱ པཱིཏཱིཏི ཝུཏྟཾ ཧོཏི. ཏཏྠ པཱིཏཱིཏི སབྷཱཝཔདཾ. པམུདིཏསྶ བྷཱཝོ པཱམོཛྫཾ. ཨཱམོདནཱཀཱརོ ཨཱམོདནཱ. པམོདནཱཀཱརོ པམོདནཱ. ཡཐཱ ཝཱ བྷེསཛྫཱནཾ ཝཱ ཏེལཱནཾ ཝཱ ཨུཎྷོདཀསཱིཏོདཀཱནཾ ཝཱ ཨེཀཏོཀརཎཾ མོདནཱཏི ཝུཙྩཏི, ཨེཝམཡམྤི དྷམྨཱནཾ ཨེཀཏོཀརཎེན མོདནཱ, ཨུཔསགྒཝསེན པན པདཾ མཎྜེཏྭཱ ཨཱམོདནཱ པམོདནཱཏི ཝུཏྟཾ. ཧཱསེཏཱིཏི ཧཱསོ, པཧཱསེཏཱིཏི པཧཱསོ, ཧཊྛཔཧཊྛཱཀཱརཱནམེཏཾ ཨདྷིཝཙནཾ. ཝིཏྟཱིཏི ཝིཏྟཾ, དྷནསྶེཏཾ ནཱམཾ. ཨཡཾ པན སོམནསྶཔཙྩཡཏྟཱ ཝིཏྟིསརིཀྑཏཱཡ ཝིཏྟི. ཡཐཱ ཧི དྷནིནོ དྷནཾ པཊིཙྩ སོམནསྶཾ ཨུཔྤཛྫཏི, ཨེཝཾ པཱིཏིམཏོཔི པཱིཏིཾ པཊིཙྩ སོམནསྶཾ ཨུཔྤཛྫཏི. ཏསྨཱ ‘‘ཝིཏྟཱི’’ཏི ཝུཏྟཱ. ཏུཊྛིསབྷཱཝསཎྛིཏཱཡ ཧི པཱིཏིཡཱ ཨེཏཾ ནཱམཾ. པཱིཏིམཱ པན པུགྒལོ ཀཱཡཙིཏྟཱནཾ ཨུགྒཏཏྟཱ ཨབྦྷུགྒཏཏྟཱ ‘‘ཨུདགྒོ’’ཏི ཝུཙྩཏི, ཨུདགྒསྶ བྷཱགོ ཨོདགྱཾ. ཨཏྟནོ མནཏཱ ཨཏྟམནཏཱ. ཨནབྷིརདྡྷསྶ ཧི མནོ དུཀྑཔདཊྛཱནཏྟཱ ན ཨཏྟནོ མནོ ནཱམ ཧོཏི, ཨབྷིརདྡྷསྶ སུཁཔདཊྛཱནཏྟཱ ཨཏྟནོ མནོ ནཱམ ཧོཏི, ཨིཏི ཨཏྟནོ མནཏཱ ཨཏྟམནཏཱ, སཀམནཏཱ སཀམནསྶ བྷཱཝོཏི ཨཏྠོ. སཱ པན ཡསྨཱ ན ཨཉྙསྶ ཀསྶཙི ཨཏྟནོ མནཏཱ, ཙིཏྟསྶེཝ པནེསོ བྷཱཝོ ཙེཏསིཀོ དྷམྨོ, ཏསྨཱ ཨཏྟམནཏཱ ཙིཏྟསྶཱཏི ཝུཏྟཱ. སེསམེཏྠ ཙ ཨུཔརི ཙ ཧེཊྛཱ ཝུཏྟནཡེན ཡོཛེཏྭཱ ཝེདིཏབྦཾ.

༡༧༣. སུཁཔཊིསཾཝེདིནིདྡེསེ དྭེ སུཁཱནཱིཏི སམཐཝིཔསྶནཱབྷཱུམིདསྶནཏྠཾ ཝུཏྟཾ. ཀཱཡིཀཉྷི སུཁཾ ཝིཔསྶནཱཡ བྷཱུམི, ཙེཏསིཀཾ སུཁཾ སམཐསྶ ཙ ཝིཔསྶནཱཡ ཙ བྷཱུམི. ཀཱཡིཀནྟི པསཱདཀཱཡཾ ཝིནཱ ཨནུཔྤཏྟིཏོ ཀཱཡེ ནིཡུཏྟནྟི ཀཱཡིཀཾ. ཙེཏསིཀནྟི ཨཝིཔྤཡོགཝསེན ཙེཏསི ནིཡུཏྟནྟི ཙེཏསིཀཾ. ཏཏྠ ཀཱཡིཀཔདེན ཙེཏསིཀཾ སུཁཾ པཊིཀྑིཔཏི, སུཁཔདེན ཀཱཡིཀཾ དུཀྑཾ. ཏཐཱ ཙེཏསིཀཔདེན ཀཱཡིཀཾ སུཁཾ པཊིཀྑིཔཏི, སུཁཔདེན ཙེཏསིཀཾ དུཀྑཾ. སཱཏནྟི མདྷུརཾ སུམདྷུརཾ. སུཁནྟི སུཁམེཝ, ན དུཀྑཾ. ཀཱཡསམྥསྶཛནྟི ཀཱཡསམྥསྶེ ཛཱཏཾ. སཱཏཾ སུཁཾ ཝེདཡིཏནྟི སཱཏཾ ཝེདཡིཏཾ, ན ཨསཱཏཾ ཝེདཡིཏཾ. སུཁཾ ཝེདཡིཏཾ, ན དུཀྑཾ ཝེདཡིཏཾ. པརཏོ ཏཱིཎི པདཱནི ཨིཏྠིལིངྒཝསེན ཝུཏྟཱནི. སཱཏཱ ཝེདནཱ, ན ཨསཱཏཱ. སུཁཱ ཝེདནཱ, ན དུཀྑཱཏི ཨཡམེཝ པནེཏྠ ཨཏྠོ.

ཙེཏསིཀསུཁནིདྡེསོ ཝུཏྟཔཊིཔཀྑནཡེན ཡོཛེཏབྦོ. ཏེ སུཁཱཏི ལིངྒཝིཔལླཱསོ ཀཏོ, ཏཱནི སུཁཱནཱིཏི ཝུཏྟཾ ཧོཏི. སེསམེཏྠ ཙཏུཀྐེ ཧེཊྛཱ པཋམཙཏུཀྐེ ཝུཏྟནཡེནེཝ ཝེདིཏབྦཾ. ཙཏྟཱརི སུཏྟནྟིཀཝཏྠཱུནི དུཏིཡཙཏུཀྐཝསེན ཝེདིཏབྦཱནཱིཏི.

དུཏིཡཙཏུཀྐནིདྡེསཝཎྞནཱ ནིཊྛིཏཱ.

༡༧༦. ཏཏིཡཙཏུཀྐནིདྡེསེ ཙིཏྟནྟི མཱུལཔདཾ. ཝིཉྙཱཎནྟི ཨཏྠཔདཾ. ཡཾ ཙིཏྟནྟིཨཱདི པཱིཏིཡཾ ཝུཏྟནཡེན ཡོཛེཏབྦཾ. ཏཏྠ ཙིཏྟནྟིཨཱདཱིསུ ཙིཏྟཝིཙིཏྟཏཱཡ ཙིཏྟཾ. ཨཱརམྨཎཾ མིནམཱནཾ ཛཱནཱཏཱིཏི མནོ. མཱནསནྟི མནོཡེཝ. ‘‘ཨནྟལིཀྑཙརོ པཱསོ, ཡྭཱཡཾ ཙརཏི མཱནསོ’’ཏི (སཾ. ནི. ༡.༡༥༡; མཧཱཝ. ༣༣) ཧི ཨེཏྠ པན སམྤཡུཏྟཀདྷམྨོ མཱནསོཏི ཝུཏྟོ.

‘‘ཀཐཉྷི བྷགཝཱ ཏུཡ྄ཧཾ, སཱཝཀོ སཱསནེ རཏོ;

ཨཔྤཏྟམཱནསོ སེཀྑོ, ཀཱལཾ ཀཡིརཱ ཛནེ སུཏཱ’’ཏི. (སཾ. ནི. ༡.༡༥༩) –

ཨེཏྠ ཨརཧཏྟཾ མཱནསནྟི ཝུཏྟཾ. ཨིདྷ པན མནོཝ མཱནསཾ. བྱཉྫནཝསེན ཧེཏཾ པདཾ ཝཌྜྷིཏཾ.

ཧདཡནྟི ཙིཏྟཾ. ‘‘ཙིཏྟཾ ཝཱ ཏེ ཁིཔིསྶཱམི, ཧདཡཾ ཝཱ ཏེ ཕཱལེསྶཱམཱི’’ཏི (སཾ. ནི. ༡.༢༣༧; སུ. ནི. ཨཱལ༹ཝཀསུཏྟ) ཨེཏྠ ཨུརོ ཧདཡནྟི ཝུཏྟཾ. ‘‘ཧདཡཱ ཧདཡཾ མཉྙེ ཨཉྙཱཡ ཏཙྪཏཱི’’ཏི (མ. ནི. ༡.༦༣) ཨེཏྠ ཙིཏྟཾ. ‘‘ཝཀྐཾ ཧདཡ’’ནྟི (དཱི. ནི. ༢.༣༧༧; མ. ནི. ༡.༡༡༠) ཨེཏྠ ཧདཡཝཏྠུ. ཨིདྷ པན ཙིཏྟམེཝ ཨབྦྷནྟརཊྛེན ‘‘ཧདཡ’’ནྟི ཝུཏྟཾ. ཏདེཝ པརིསུདྡྷཊྛེན པཎྜརཾ. བྷཝངྒཾ སནྡྷཱཡེཏཾ ཝུཏྟཾ. ཡཐཱཧ – ‘‘པབྷསྶརམིདཾ, བྷིཀྑཝེ, ཙིཏྟཾ, ཏཉྩ ཁོ ཨཱགནྟུཀེཧི ཨུཔཀྐིལེསེཧི ཨུཔཀྐིལིཊྛ’’ནྟི (ཨ. ནི. ༡.༤༩). ཏཏོ ནིཀྑནྟཏྟཱ པན ཨཀུསལམྤི གངྒཱཡ ནིཀྑནྟཱ ནདཱི གངྒཱ ཝིཡ, གོདྷཱཝརིཏོ ནིཀྑནྟཱ གོདྷཱཝརཱི ཝིཡ ཙ ‘‘པཎྜར’’ནྟྭེཝ ཝུཏྟཾ. ཡསྨཱ པན ཨཱརམྨཎཝིཛཱནནལཀྑཎཾ ཙིཏྟཾ ཨུཔཀྐིལེསེན ཀིལེསོ ན ཧོཏི, སབྷཱཝཏོ པརིསུདྡྷམེཝ ཧོཏི, ཨུཔཀྐིལེསཡོགེ པན སཏི ཨུཔཀྐིལིཊྛཾ ནཱམ ཧོཏི, ཏསྨཱཔི ‘‘པཎྜར’’ནྟི ཝཏྟུཾ ཡུཛྫཏི.

མནོ མནཱཡཏནནྟི ཨིདྷ པན མནོགཧཎཾ མནསྶེཝ ཨཱཡཏནབྷཱཝདཱིཔནཏྠཾ. ཏེནེཏཾ དཱིཔེཏི – ‘‘ནཡིདཾ དེཝཱཡཏནཾ ཝིཡ མནསྶ ཨཱཡཏནཏྟཱ མནཱཡཏནཾ, ཨཐ ཁོ མནོ ཨེཝ ཨཱཡཏནཾ མནཱཡཏན’’ནྟི.

ཨཱཡཏནཊྛོ ཧེཊྛཱ ཝུཏྟོཡེཝ. མནཏེ ཨིཏི མནོ, ཝིཛཱནཱཏཱིཏི ཨཏྠོ. ཨཊྛཀཐཱཙརིཡཱ པནཱཧུ – ནཱལི༹ཡཱ མིནམཱནོ ཝིཡ མཧཱཏུལཱཡ དྷཱརཡམཱནོ ཝིཡ ཙ ཨཱརམྨཎཾ ཛཱནཱཏཱིཏི མནོ, ཏདེཝ མནནལཀྑཎེ ཨིནྡཊྛཾ ཀཱརེཏཱིཏི ཨིནྡྲིཡཾ, མནོཝ ཨིནྡྲིཡཾ མནིནྡྲིཡཾ.

ཝིཛཱནཱཏཱིཏི ཝིཉྙཱཎཾ. ཝིཉྙཱཎམེཝ ཁནྡྷོ ཝིཉྙཱཎཀྑནྡྷོ. རུལ༹ྷིཏོ ཁནྡྷོ ཝུཏྟོ. རཱསཊྛེན ཧི ཝིཉྙཱཎཀྑནྡྷསྶ ཨེཀདེསོ ཨེཀཾ ཝིཉྙཱཎཾ. ཏསྨཱ ཡཐཱ རུཀྑསྶ ཨེཀདེསཾ ཚིནྡནྟོ རུཀྑཾ ཚིནྡཏཱིཏི ཝུཙྩཏི, ཨེཝམེཝ ཝིཉྙཱཎཀྑནྡྷསྶ ཨེཀདེསབྷཱུཏཾ ཨེཀམྤི ཝིཉྙཱཎཾ རུལ༹ྷིཏོ ‘‘ཝིཉྙཱཎཀྑནྡྷོ’’ཏི ཝུཏྟཾ. ཡསྨཱ པན རཱསཊྛོཡེཝ ཁནྡྷཊྛོ ན ཧོཏི, ཀོཊྛཱསཊྛོཔི ཁནྡྷཊྛོཡེཝ, ཏསྨཱ ཀོཊྛཱསཊྛེན ཝིཉྙཱཎཀོཊྛཱསོཏིཔི ཨཏྠོ. ཏཛྫཱ མནོཝིཉྙཱཎདྷཱཏཱུཏི ཏེསཾ ཕསྶཱདཱིནཾ སམྤཡུཏྟདྷམྨཱནཾ ཨནུཙྪཝིཀཱ མནོཝིཉྙཱཎདྷཱཏུ. ཨིམསྨིཉྷི པདེ ཨེཀམེཝ ཙིཏྟཾ མིནནཊྛེན མནོ, ཝིཛཱནནཊྛེན ཝིཉྙཱཎཾ, སབྷཱཝཊྛེན, ནིསྶཏྟཊྛེན ཝཱ དྷཱཏཱུཏི ཏཱིཧི ནཱམེཧི ཝུཏྟཾ.

༡༧༧.

ཨབྷིཔྤམོདོཏི ཨདྷིཀཱ ཏུཊྛི.

༡༧༨. སམཱདྷིནིདྡེསེ ཨཙལབྷཱཝེན ཨཱརམྨཎེ ཏིཊྛཏཱིཏི ཋིཏི. པརཏོ པདདྭཡཾ ཨུཔསགྒཝསེན ཝཌྜྷིཏཾ. ཨཔིཙ སམྤཡུཏྟདྷམྨེ ཨཱརམྨཎམྷི སམྤིཎྜེཏྭཱ ཏིཊྛཏཱིཏི སཎྛིཏི. ཨཱརམྨཎཾ ཨོགཱཧེཏྭཱ ཨནུཔཝིསིཏྭཱ ཏིཊྛཏཱིཏི ཨཝཊྛིཏི. ཀུསལཔཀྑསྨིཾ ཧི ཙཏྟཱརོ དྷམྨཱ ཨཱརམྨཎཾ ཨོགཱཧནྟི སདྡྷཱ སཏི སམཱདྷི པཉྙཱཏི. ཏེནེཝ སདྡྷཱ ‘‘ཨོཀཔྤནཱ’’ཏི ཝུཏྟཱ, སཏི ‘‘ཨཔིལཱཔནཏཱ’’ཏི, སམཱདྷི ‘‘ཨཝཊྛིཏཱི’’ཏི, པཉྙཱ ‘‘པརིཡོགཱཧནཱ’’ཏི. ཨཀུསལཔཀྑེ པན ཏཡོ དྷམྨཱ ཨཱརམྨཎཾ ཨོགཱཧནྟི ཏཎྷཱ དིཊྛི ཨཝིཛྫཱཏི. ཏེནེཝ ཏེ ‘‘ཨོགྷཱ’’ཏི ཝུཏྟཱ. ཨུདྡྷཙྩཝིཙིཀིཙྪཱཝསེན པཝཏྟསྶ ཝིསཱཧཱརསྶ པཊིཔཀྑཏོ ཨཝིསཱཧཱརོ, ཨཝིསཱཧརཎནྟི ཨཏྠོ. ཨུདྡྷཙྩཝིཙིཀིཙྪཱཝསེནེཝ གཙྪནྟཾ ཙིཏྟཾ ཝིཀྑིཔཏི ནཱམ, ཨཡཾ པན ཏཐཱ ན ཧོཏཱིཏི ཨཝིཀྑེཔོ. ཨུདྡྷཙྩཝིཙིཀིཙྪཱཝསེནེཝ ཙིཏྟཾ ཝིསཱཧཊཾ ནཱམ ཧོཏི, ཨིཏོ ཙིཏོ ཙ ཧརཱིཡཏི, ཨཡཾ པན ཨཝིསཱཧཊསྶ མཱནསསྶ བྷཱཝོཏི ཨཝིསཱཧཊམཱནསཏཱ.

སམཐོཏི ཏིཝིདྷོ སམཐོ ཙིཏྟསམཐོ ཨདྷིཀརཎསམཐོ སབྦསངྑཱརསམཐོཏི. ཏཏྠ ཨཊྛསུ སམཱཔཏྟཱིསུ ཙིཏྟེཀགྒཏཱ ཙིཏྟསམཐོ ནཱམ. ཏཉྷི ཨཱགམྨ ཙིཏྟཙལནཾ ཙིཏྟཝིཔྥནྡནཾ སམྨཏི ཝཱུཔསམྨཏི, ཏསྨཱ སོ ‘‘ཙིཏྟསམཐོ’’ཏི ཝུཙྩཏི. སམྨུཁཱཝིནཡཱདིསཏྟཝིདྷོ ཨདྷིཀརཎསམཐོ ནཱམ. ཏཉྷི ཨཱགམྨ ཏཱནི ཏཱནི ཨདྷིཀརཎཱནི སམྨནྟི ཝཱུཔསམྨནྟི, ཏསྨཱ སོ ‘‘ཨདྷིཀརཎསམཐོ’’ཏི ཝུཙྩཏི. ཡསྨཱ པན སབྦེ སངྑཱརཱ ནིབྦཱནཾ ཨཱགམྨ སམྨནྟི ཝཱུཔསམྨནྟི, ཏསྨཱ ཏཾ སབྦསངྑཱརསམཐོཏི ཝུཙྩཏི. ཨིམསྨིཾ ཨཏྠེ ཙིཏྟསམཐོ ཨདྷིཔྤེཏོ. སམཱདྷིལཀྑཎེ ཨིནྡཊྛཾ ཀཱརེཏཱིཏི སམཱདྷིནྡྲིཡཾ. ཨུདྡྷཙྩེ ན ཀམྤཏཱིཏི སམཱདྷིབལཾ. སམྨཱསམཱདྷཱིཏི ཡཱཐཱཝསམཱདྷི ནིཡྻཱནིཀསམཱདྷི ཀུསལསམཱདྷི.

༡༧༩. རཱགཏོ ཝིམོཙཡཾ ཙིཏྟནྟིཨཱདཱིཧི དསཧི ཀིལེསཝཏྠཱུཧི ཝིམོཙནཾ ཝུཏྟཾ. ཐིནགྒཧཎེནེཝ ཙེཏྠ མིདྡྷགྒཧཎཾ, ཨུདྡྷཙྩགྒཧཎེནེཝ ཙ ཀུཀྐུཙྩགྒཧཎཾ ཀཏཾ ཧོཏཱིཏི ཨཉྙེསུ པཱཋེསུ སཧཙཱརིཏྟཱ ཀིལེསཝཏྠུཏོ ཝིམོཙནཝཙནེནེཝ པཋམཛ྄ཛྷཱནཱདཱིཧི ནཱིཝརཎཱདིཏོ ཝིམོཙནཾ, ཨནིཙྩཱནུཔསྶནཱདཱིཧི ནིཙྩསཉྙཱདིཏོ ཙ ཝིམོཙནཾ ཝུཏྟམེཝ ཧོཏཱིཏི. ཀཐཾ ཏཾ ཙིཏྟཾ ཨནུཔསྶཏཱིཏི ཨེཏྠ པེཡྻཱལེ ཙ ཨནིཙྩཱནུཔསྶནཱདཱིཧི ནིཙྩསཉྙཱདཱིནཾ པཧཱནཾ ཝུཏྟམེཝ. ཙཏྟཱརི སུཏྟནྟིཀཝཏྠཱུནི ཏཏིཡཙཏུཀྐཝསེན ཝེདིཏབྦཱནཱིཏི.

ཏཏིཡཙཏུཀྐནིདྡེསཝཎྞནཱ ནིཊྛིཏཱ.

༡༨༠. ཙཏུཏྠཙཏུཀྐནིདྡེསེ ‘‘ཨནིདྡིཊྛེ ནཔུཾསཀ’’ནྟི ཝཙནཏོ ཨསུཀནྟི ཨནིདྡིཊྛཏྟཱ ‘‘ཨནིཙྩནྟི ཀིཾ ཨནིཙྩ’’ནྟི ནཔུཾསཀཝཙནེན པུཙྪཱ ཀཏཱ. ཨུཔྤཱདཝཡཊྛེནཱཏི ཨུཔྤཱདཝཡསངྑཱཏེན ཨཏྠེན, ཨུཔྤཱདཝཡསབྷཱཝེནཱཏི ཨཏྠོ. ཨེཏྠ ཙ པཉྩཀྑནྡྷཱ སབྷཱཝལཀྑཎཾ, པཉྩནྣཾ ཁནྡྷཱནཾ ཨུཔྤཱདཝཡཱ ཝིཀཱརལཀྑཎཾ. ཨེཏེན ཧུཏྭཱ ཨབྷཱཝེན ཨནིཙྩཱཏི ཝུཏྟཾ ཧོཏི. ཏེནེཝ ཙ ཨཊྛཀཐཱཡཾ ‘‘སངྑཏལཀྑཎཝསེན ཨནིཙྩཏཱཏི ཏེསཾཡེཝ ཨུཔྤཱདཝཡཉྙཐཏྟ’’ནྟི ཙ ཝཏྭཱཔི ‘‘ཧུཏྭཱ ཨབྷཱཝོ ཝཱ’’ཏི ཝུཏྟཾ. ཨེཏེན ཧུཏྭཱ ཨབྷཱཝཱཀཱརོ ཨནིཙྩལཀྑཎནྟི ཝུཏྟཾ ཧོཏི. ‘‘པཉྩནྣཾ ཁནྡྷཱནཾ ཨུདཡབྦཡཾ པསྶནྟོ ཨིམཱནི པཉྙཱཡ ལཀྑཎཱནཱི’’ཏི པེཡྻཱལཾ ཀཏྭཱ ཝུཏྟཾ. དྷམྨཱཏི རཱུཔཀྑནྡྷཱདཡོ ཡཐཱཝུཏྟདྷམྨཱ.

ཝིརཱགཱནུཔསྶཱིནིདྡེསེ རཱུཔེ ཨཱདཱིནཝཾ དིསྭཱཏི བྷངྒཱནུཔསྶནཏོ པཊྛཱཡ པརཏོ ཝུཏྟེཧི ཨནིཙྩཊྛཱདཱིཧི རཱུཔཀྑནྡྷེ ཨཱདཱིནཝཾ དིསྭཱ. རཱུཔཝིརཱགེཏི ནིབྦཱནེ. ནིབྦཱནཉྷི ཨཱགམྨ རཱུཔཾ ཝིརཛྫཏི ཨཔུནརུཔྤཏྟིདྷམྨཏཾ ཨཱཔཛྫནེན ནིརུཛ྄ཛྷཏི, ཏསྨཱ ནིབྦཱནཾ ‘‘རཱུཔཝིརཱགོ’’ཏི ཝུཙྩཏི. ཚནྡཛཱཏོ ཧོཏཱིཏི ཨནུསྶཝཝསེན ཨུཔྤནྣདྷམྨཙྪནྡོ ཧོཏི. སདྡྷཱདྷིམུཏྟོཏི ཏསྨིཾཡེཝ ནིབྦཱནེ སདྡྷཱཡ ཙ ཨདྷིམུཏྟོ ནིཙྪིཏོ. ཙིཏྟཉྩསྶ སྭཱདྷིཊྛིཏནྟི ཨསྶ ཡོགིསྶ ཙིཏྟཾ ཁཡཝིརཱགསངྑཱཏེ རཱུཔབྷངྒེ ཨཱརམྨཎཝསེན, ཨཙྩནྟ ཝིརཱགསངྑཱཏེ རཱུཔཝིརཱགེ ནིབྦཱནེ ཨནུསྶཝཝསེན སུཊྛུ ཨདྷིཊྛིཏཾ སུཊྛུ པཏིཊྛིཏཾ ཧོཏཱིཏི སམྦནྡྷཏོ ཝེདིཏབྦཾ. རཱུཔེ ཝིརཱགཱནུཔསྶཱིཏི རཱུཔསྶ ཁཡཝིརཱགོ རཱུཔེ ཝིརཱགོཏི པཀཏིབྷུམྨཝཙནེན ཝུཏྟོ. རཱུཔསྶ ཨཙྩནྟཝིརཱགོ རཱུཔེ ཝིརཱགོཏི ནིམིཏྟཏྠེ བྷུམྨཝཙནེན ཝུཏྟོ. ཏཾ དུཝིདྷམྤི ཝིརཱགཾ ཨཱརམྨཎཏོ ཨཛ྄ཛྷཱསཡཏོ ཙ ཨནུཔསྶནསཱིལོ ‘‘རཱུཔེ ཝིརཱགཱནུཔསྶཱི’’ཏི ཝུཏྟོ. ཨེས ནཡོ ཝེདནཱདཱིསུ. ནིརོདྷཱནུཔསྶཱིཔདནིདྡེསེཔི ཨེསེཝ ནཡོ.

༡༨༡. ཀཏིཧཱཀཱརེཧཱིཏིཨཱདི པནེཏྠ ཝིསེསོ – ཏཏྠ ཨཝིཛྫཱདཱིནཾ པཊིཙྩསམུཔྤཱདངྒཱནཾ ཨཱདཱིནཝནིརོདྷདསྶནེནེཝ རཱུཔཱདཱིནམྤི ཨཱདཱིནཝནིརོདྷཱ དསྶིཏཱ ཧོནྟི ཏེསམྤི པཊིཙྩསམུཔྤཱདངྒཱནཏིཝཏྟནཏོ. ཨིམིནཱ ཨེཝ ཙ ཝིསེསཝཙནེན ཝིརཱགཱནུཔསྶནཏོ ནིརོདྷཱནུཔསྶནཱཡ ཝིསིཊྛབྷཱཝོ ཝུཏྟོ ཧོཏི. ཏཏྠ ཨནིཙྩཊྛེནཱཏི ཁཡཊྛེན, ཧུཏྭཱ ཨབྷཱཝཊྛེན ཝཱ. དུཀྑཊྛེནཱཏི བྷཡཊྛེན, པཊིཔཱིལ༹ནཊྛེན ཝཱ. ཨནཏྟཊྛེནཱཏི ཨསཱརཀཊྛེན, ཨཝསཝཏྟནཊྛེན ཝཱ. སནྟཱཔཊྛེནཱཏི ཀིལེསསནྟཱཔནཊྛེན. ཝིཔརིཎཱམཊྛེནཱཏི ཛརཱབྷངྒཝསེན དྭིདྷཱ པརིཎཱམནཊྛེན. ནིདཱནནིརོདྷེནཱཏི མཱུལཔཙྩཡཱབྷཱཝེན. ནིརུཛ྄ཛྷཏཱིཏི ན བྷཝཏི. སམུདཡནིརོདྷེནཱཏི ཨཱསནྣཔཙྩཡཱབྷཱཝེན. མཱུལཔཙྩཡོ ཧི བྱཱདྷིསྶ ཨསཔྤཱཡབྷོཛནཾ ཝིཡ ནིདཱནནྟི ཝུཏྟོ, ཨཱསནྣཔཙྩཡོ བྱཱདྷིསྶ ཝཱཏཔིཏྟསེམྷཱ ཝིཡ སམུདཡོཏི ཝུཏྟོ. ནིདཱནཉྷི ནིཙྪཡེན དདཱཏི ཕལམིཏི ནིདཱནཾ, སམུདཡོ པན སུཊྛུ ཨུདེཏི ཨེཏསྨཱ ཕལམིཏི སམུདཡོ. ཛཱཏིནིརོདྷེནཱཏི མཱུལཔཙྩཡསྶ ཨུཔྤཏྟིཨབྷཱཝེན. པབྷཝནིརོདྷེནཱཏི ཨཱསནྣཔཙྩཡསྶ ཨུཔྤཏྟིཨབྷཱཝེན. ཛཱཏིཡེཝ ཧི པབྷཝཏི ཨེཏསྨཱ དུཀྑནྟི པབྷཝོཏི ཝཏྟུཾ ཡུཛྫཏི. ཧེཏུནིརོདྷེནཱཏི ཛནཀཔཙྩཡཱབྷཱཝེན. པཙྩཡནིརོདྷེནཱཏི ཨུཔཏྠམྦྷཀཔཙྩཡཱབྷཱཝེན. མཱུལཔཙྩཡོཔི ཧི ཨཱསནྣཔཙྩཡོ ཙ ཛནཀཔཙྩཡོ ཨུཔཏྠམྦྷཀཔཙྩཡོ ཙ ཧོཏིཡེཝ. ཨེཏེཧི ཏིཀྑཝིཔསྶནཱཀྑཎེ ཏདངྒནིརོདྷོ, མགྒཀྑཎེ སམུཙྪེདནིརོདྷོ ཝུཏྟོ ཧོཏི. ཉཱཎུཔྤཱདེནཱཏི ཏིཀྑཝིཔསྶནཱཉཱཎསྶ ཝཱ མགྒཉཱཎསྶ ཝཱ ཨུཔྤཱདེན. ནིརོདྷུཔཊྛཱནེནཱཏི ཝིཔསྶནཱཀྑཎེ པཙྩཀྑཏོ ཁཡནིརོདྷསྶ ཨནུསྶཝཝསེན ནིརོདྷསངྑཱཏསྶ ནིབྦཱནསྶ ཨུཔཊྛཱནེན, མགྒཀྑཎེ པཙྩཀྑཏོ ཙ ནིབྦཱནསྶ ཨུཔཊྛཱནེན. ཨེཏེཧི ཝིསཡཝིསཡིནིཡམོཝ ཀཏོ ཧོཏི, ཏདངྒསམུཙྪེདནིརོདྷོ ཙ ཝུཏྟོ ཧོཏི.

༡༨༢. པཊིནིསྶགྒཱནུཔསྶཱིཔདནིདྡེསེ རཱུཔཾ པརིཙྩཛཏཱིཏི ཨཱདཱིནཝདསྶནེན ནིརཔེཀྑཏཱཡ རཱུཔཀྑནྡྷཾ པརིཙྩཛཏི. པརིཙྩཱགཔཊིནིསྶགྒོཏི པརིཙྩཱགཊྛེན པཊིནིསྶགྒོཏི ཝུཏྟཾ ཧོཏི. ཨེཏེན པཊིནིསྶགྒཔདསྶ པརིཙྩཱགཊྛོ ཝུཏྟོ, ཏསྨཱ ཀིལེསཱནཾ པཛཧནནྟི ཨཏྠོ. ཨེཏྠ ཙ ཝུཊྛཱནགཱམིནཱི ཝིཔསྶནཱ ཀིལེསེ ཏདངྒཝསེན པརིཙྩཛཏི, མགྒོ སམུཙྪེདཝསེན. རཱུཔནིརོདྷེ ནིབྦཱནེ ཙིཏྟཾ པཀྑནྡཏཱིཏི ཝུཊྛཱནགཱམིནཱི ཏཾནིནྣཏཱཡ པཀྑནྡཏི, མགྒོ ཨཱརམྨཎཀརཎེན. པཀྑནྡནཔཊིནིསྶགྒོཏི པཀྑནྡནཊྛེན པཊིནིསྶགྒོཏི ཝུཏྟཾ ཧོཏི. ཨེཏེན པཊིནིསྶགྒཔདསྶ པཀྑནྡནཊྛོ ཝུཏྟོ, ཏསྨཱ ཙིཏྟསྶ ནིབྦཱནེ ཝིསྶཛྫནནྟི ཨཏྠོ. ཙཏྟཱརི སུཏྟནྟིཀཝཏྠཱུནི ཙཏུཏྠཙཏུཀྐཝསེན ཝེདིཏབྦཱནི. ཨིམསྨིཾ ཙཏུཀྐེ ཛརཱམརཎེ ཝཏྟབྦཾཧེཊྛཱ ཝུཏྟནཡེནེཝ ཝེདིཏབྦཾ. སཏིཔཊྛཱནེསུ ཙ ‘‘ཀཱཡེ ཀཱཡཱནུཔསྶནཱ, ཙིཏྟེ ཙིཏྟཱནུཔསྶནཱ’’ཏི ཀཱཡཙིཏྟཱནཾ ཨེཀཏྟཝོཧཱརཝསེན ཨེཀཝཙནནིདྡེསོ ཀཏོ. ‘‘ཝེདནཱསུ ཝེདནཱནུཔསྶནཱ, དྷམྨེསུ དྷམྨཱནུཔསྶནཱ’’ཏི ཝེདནཱདྷམྨཱནཾ ནཱནཏྟཝོཧཱརཝསེན བཧུཝཙནནིདྡེསོ ཀཏོཏི ཝེདིཏབྦོཏི.

ཙཏུཏྠཙཏུཀྐནིདྡེསཝཎྞནཱ ནིཊྛིཏཱ.

ནིཊྛིཏཱ ཙ སཏོཀཱརིཉཱཎནིདྡེསཝཎྞནཱ.

༦. ཉཱཎརཱསིཚཀྐནིདྡེསཝཎྞནཱ

༡༨༣. ཨིདཱནི ཚཧི རཱསཱིཧི ཨུདྡིཊྛཉཱཎེསུ ཙཏུཝཱིསཏིསམཱདྷིཉཱཎནིདྡེསེ ཏཱཝ ཀཱཡཱནུཔསྶནཱདཱིནཾ ཏིཎྞཾ ཙཏུཀྐཱནཾ ཝསེན དྭཱདསནྣཾ ཝཏྠཱུནཾ ཨེཀེཀསྨིཾ ཨསྶཱསཝསེན ཨེཀོ, པསྶཱསཝསེན ཨེཀོཏི དྭེ དྭེ སམཱདྷཱིཏི དྭཱདསསུ ཝཏྠཱུསུ ཙཏུཝཱིསཏི སམཱདྷཡོ ཧོནྟི. ཛྷཱནཀྑཎེ ཏེཧི སམྤཡུཏྟཱནི ཙཏུཝཱིསཏིསམཱདྷིཝསེན ཉཱཎཱནི.

དྭཱསཏྟཏིཝིཔསྶནཱཉཱཎནིདྡེསེ དཱིགྷཾ ཨསྶཱསཱཏི ‘‘དཱིགྷ’’ནྟིཝུཏྟཨསྶཱསཏོ. ཀིཾ ཝུཏྟཾ ཧོཏི? དཱིགྷཾ ཨསྶཱསཧེཏུ ཛྷཱནཾ པཊིལབྷིཏྭཱ སམཱཧིཏེན ཙིཏྟེན ཝིཔསྶནཱཀྑཎེ ཨནིཙྩཏོ ཨནུཔསྶནཊྛེན ཝིཔསྶནཱཏི ཝུཏྟཾ ཧོཏི. ཨེས ནཡོ ཨུཏྟརཏྲཱཔི. ཏེསཾཡེཝ དྭཱདསནྣཾ ཝཏྠཱུནཾ ཨེཀེཀསྨིཾ ཨསྶཱསཝསེན ཏིསྶོ, པསྶཱསཝསེན ཏིསྶོཏི ཚ ཚ ཨནུཔསྶནཱཏི དྭཱདསསུ ཝཏྠཱུསུ དྭཱསཏྟཏི ཨནུཔསྶནཱ ཧོནྟི. ཏཱ ཨེཝ དྭཱསཏྟཏི ཨནུཔསྶནཱ དྭཱསཏྟཏིཝིཔསྶནཱཝསེན ཉཱཎཱནི.

ནིབྦིདཱཉཱཎནིདྡེསེ ཨནིཙྩཱནུཔསྶཱི ཨསྶསནྟི ཨནིཙྩཱནུཔསྶཱི ཧུཏྭཱ ཨསྶསནྟོ, ཨནིཙྩཱནུཔསྶཱི ཧུཏྭཱ ཝཏྟེནྟོཏི ཨཏྠོ. ‘‘ཨསྶས’’ནྟི ཙ ཨིདཾ ཝཙནཾ ཧེཏུཨཏྠེ དཊྛབྦཾ. ཡཐཱབྷཱུཏཾ ཛཱནཱཏི པསྶཏཱིཏི ནིབྦིདཱཉཱཎནྟི ཀལཱཔསམྨསནཏོ པཊྛཱཡ ཡཱཝ བྷངྒཱནུཔསྶནཱ པཝཏྟཝིཔསྶནཱཉཱཎེན སངྑཱརཱནཾ ཡཐཱསབྷཱཝཾ ཛཱནཱཏི, ཙཀྑུནཱ དིཊྛམིཝ ཙ ཏེནེཝ ཉཱཎཙཀྑུནཱ པསྶཏི. ཏསྨཱ ནིབྦིདཱཉཱཎཾ ནཱམཱཏི ཨཏྠོ, སངྑཱརེསུ ནིབྦིནྡཉཱཎཾ ནཱམཱཏི ཝུཏྟཾ ཧོཏི. ཨུཔརི བྷཡཏཱུཔཊྛཱནཱདཱིནཾ མུཉྩིཏུཀམྱཏཱདཱིནཉྩ ཉཱཎཱནཾ ཝིསུཾ ཨཱགཏཏྟཱ ཨིདྷ ཡཐཱཝུཏྟཱནེཝ ཝིཔསྶནཱཉཱཎཱནི ནིབྦིདཱཉཱཎཱནཱིཏི ཝེདིཏབྦཱནི.

ནིབྦིདཱནུལོམཉཱཎནིདྡེསེ ཨནིཙྩཱནུཔསྶཱི ཨསྶསནྟི ཨནིཙྩཱནུཔསྶིནོ ཨསྶསནྟསྶ. སཱམིཨཏྠེ པཙྩཏྟཝཙནཾ. བྷཡཏུཔཊྛཱནེ པཉྙཱཏིཝཙནེནེཝ བྷཡཏུཔཊྛཱནཨཱདཱིནཝཱནུཔསྶནཱནིབྦིདཱནུཔསྶནཱཉཱཎཱནི ཝུཏྟཱནི ཧོནྟི ཏིཎྞཾ ཨེཀལཀྑཎཏྟཱ. ཨིམཱནི ཏཱིཎི ཉཱཎཱནི ཨནནྟརཱ ཝུཏྟཱནཾ ནིབྦིདཱཉཱཎཱནཾ ཨནུཀཱུལབྷཱཝེན ཨནུལོམཏོ ནིབྦིདཱནུལོམཉཱཎཱནཱིཏི ཝུཏྟཱནི.

ནིབྦིདཱཔཊིཔྤསྶདྡྷིཉཱཎནིདྡེསེ ཨནིཙྩཱནུཔསྶཱི ཨསྶསནྟི ཨནནྟརསདིསམེཝ. པཊིསངྑཱ སནྟིཊྛནཱ པཉྙཱཏིཝཙནེནེཝ མུཉྩིཏུཀམྱཏཱཔཊིསངྑཱནུཔསྶནཱསངྑཱརུཔེཀྑཱཉཱཎཱནི ཝུཏྟཱནི ཧོནྟི ཏིཎྞཾ ཨེཀལཀྑཎཏྟཱ. ‘‘པཊིསངྑཱ སནྟིཊྛནཱ’’ཏིཝཙནེནེཝ ཨནུལོམཉཱཎམགྒཉཱཎཱནིཔི གཧིཏཱནི ཧོནྟི. སངྑཱརུཔེཀྑཱཉཱཎཨནུལོམཉཱཎཱནིཔི ཧི ནིབྦིདཱཡ སིཁཱཔྤཏྟཏྟཱ ནིབྦིདཱཛནནབྱཱཔཱརཔྤཧཱནེན ནིབྦིདཱཔཊིཔྤསྶདྡྷིཉཱཎཱནི ནཱམ ཧོནྟི. མགྒཉཱཎཾ པན ནིབྦིདཱཔཊིཔྤསྶདྡྷནྟེ ཨུཔྤཛྫནཏོ ནིབྦིདཱཔཊིཔྤསྶདྡྷིཉཱཎཾ ནཱམ ཧོཏཱིཏི ཨཏིཝིཡ ཡུཛྫཏཱིཏི. ནིབྦིདཱནུལོམཉཱཎེསུ ཝིཡ ཨཱདིབྷཱུཏཾ མུཉྩིཏུཀམྱཏཱཉཱཎཾ ཨགྒཧེཏྭཱ ‘‘པཊིསངྑཱ སནྟིཊྛནཱ’’ཏི ཨནྟེ ཉཱཎདྭཡགྒཧཎཾ མགྒཉཱཎསངྒཧཎཏྠཾ. མུཉྩིཏུཀམྱཏཱཏི ཧི ཝུཏྟེ ཨནུལོམཉཱཎཾ སངྒཡ྄ཧཏི, ན མགྒཉཱཎཾ. མགྒཉཱཎཉྷི མུཉྩིཏུཀམྱཏཱ ནཱམ ན ཧོཏི, ཀིཙྩསིདྡྷིཡཾ སནྟིཊྛནཏོ པན སནྟིཊྛནཱ ནཱམ ཧོཏི. ཨཊྛཀཐཱཡམྤི ཙ ‘‘ཕུསནཱཏི ཨཔྤནཱ’’ཏི ཝུཏྟཾ. ཨིདཉྩ མགྒཉཱཎཾ ནིབྦཱནེ ཨཔྤནཱཏི ཀཏྭཱ སནྟིཊྛནཱ ནཱམ ཧོཏཱིཏི ‘‘སནྟིཊྛནཱ’’ཏིཝཙནེན མགྒཉཱཎམྤི སངྒཡ྄ཧཏི. ནིབྦིདཱནུལོམཉཱཎཱནིཔི ཨཏྠཏོ ནིབྦིདཱཉཱཎཱནེཝ ཧོནྟཱིཏི ཏཱནིཔི ནིབྦིདཱཉཱཎེཧི སངྒཧེཏྭཱ ནིབྦིདཱཔཊིཔྤསྶདྡྷིཉཱཎཱནཱིཏི ནིབྦིདཱགཧཎམེཝ ཀཏཾ, ན ནིབྦིདཱནུལོམགྒཧཎཾ. ཏཱིསུཔི ཙེཏེསུ ཉཱཎཊྛཀནིདྡེསེསུ ཙཏུཏྠསྶ དྷམྨཱནུཔསྶནཱཙཏུཀྐསྶ ཝསེན ཝུཏྟཱནཾ ཙཏུནྣཾ ཝཏྠཱུནཾ ཨེཀེཀསྨིཾ ཨསྶཱསཝསེན ཨེཀཾ, པསྶཱསཝསེན ཨེཀནྟི དྭེ དྭེ ཉཱཎཱནཱིཏི ཙཏཱུསུ ཝཏྠཱུསུ ཨཊྛ ཉཱཎཱནི ཧོནྟི.

ཝིམུཏྟིསུཁཉཱཎནིདྡེསེ པཧཱིནཏྟཱཏི པཧཱནཾ དསྶེཏྭཱ ཏསྶ པཧཱནསྶ སམུཙྪེདཔྤཧཱནཏྟཾ དསྶེནྟོ སམུཙྪིནྣཏྟཱཏི ཨཱཧ. ཝིམུཏྟིསུཁེ ཉཱཎནྟི ཕལཝིམུཏྟིསུཁསམྤཡུཏྟཉཱཎཉྩ ཕལཝིམུཏྟིསུཁཱརམྨཎཔཙྩཝེཀྑཎཉཱཎཉྩ. ཨནུསཡཝཏྠུསྶ ཀིལེསསྶ པཧཱནེན པརིཡུཊྛཱནདུཙྩརིཏཝཏྠུཔྤཧཱནཾ ཧོཏཱིཏི དསྶནཏྠཾ པུན ཨནུསཡཱནཾ པཧཱནཾ ཝུཏྟཾ. ཨེཀཝཱིསཏིཕལཉཱཎཾ སནྡྷཱཡ པཧཱིནཀིལེསགཎནཱཡཔི ཉཱཎགཎནཱ ཀཏཱ ཧོཏི, པཙྩཝེཀྑཎཉཱཎཉྩ སནྡྷཱཡ པཧཱིནཀིལེསཔཙྩཝེཀྑཎགཎནཱཡ ཕལཔཙྩཝེཀྑཎཉཱཎགཎནཱ ཀཏཱ ཧོཏཱིཏི.

ཉཱཎརཱསིཚཀྐནིདྡེསཝཎྞནཱ ནིཊྛིཏཱ.

སདྡྷམྨཔྤཀཱསིནིཡཱ པཊིསམྦྷིདཱམགྒཊྛཀཐཱཡ

ཨཱནཱཔཱནསྶཏིཀཐཱཝཎྞནཱ ནིཊྛིཏཱ.

༤. ཨིནྡྲིཡཀཐཱ

༡. པཋམསུཏྟནྟནིདྡེསཝཎྞནཱ

༡༨༤. ཨིདཱནི ཨཱནཱཔཱནསྶཏིཀཐཱནནྟརཾ ཀཐིཏཱཡ ཨིནྡྲིཡཀཐཱཡ ཨཔུབྦཏྠཱནུཝཎྞནཱ ཨནུཔྤཏྟཱ. ཨཡཉྷི ཨིནྡྲིཡཀཐཱ ཨཱནཱཔཱནསྶཏིབྷཱཝནཱཡ ཨུཔཀཱརཀཱནཾ ཨིནྡྲིཡཱནཾ ཨབྷཱཝེ ཨཱནཱཔཱནསྶཏིབྷཱཝནཱཡ ཨབྷཱཝཏོ ཏདུཔཀཱརཀཱནཾ ཨིནྡྲིཡཱནཾ ཝིསོདྷནཱདིཝིདྷིདསྶནཏྠཾ ཨཱནཱཔཱནསྶཏིཀཐཱནནྟརཾ ཀཐིཏཱཏི ཏཉྩ ཀཐེཏབྦཾ ཨིནྡྲིཡཀཐཾ ཨཏྟནཱ བྷགཝཏོ སམྨུཁཱ སུཏཾ ཝིཉྙཱཏཱདྷིཔྤཱཡསུཏྟནྟིཀདེསནཾ པུབྦངྒམཾ ཀཏྭཱ ཏདཏྠཔྤཀཱསནཝསེན ཀཐེཏུཀཱམོ པཋམཾ ཏཱཝ ཨེཝཾ མེ སུཏནྟིཨཱདིམཱཧ.

ཏཏྠ ཨེཝནྟི ནིཔཱཏཔདཾ. མེཏིཨཱདཱིནི ནཱམཔདཱནི. ཝིཧརཏཱིཏི ཨེཏྠ ཝི-ཨིཏི ཨུཔསགྒཔདཾ, ཧརཏཱིཏི ཨཱཁྱཱཏཔདནྟི ཨིམིནཱ ཏཱཝ ནཡེན པདཝིབྷཱགོ ཝེདིཏབྦོ.

ཨཏྠཏོ པན ཨུཔམཱུཔདེསགརཧཔསཾསནཱཀཱརཝཙནགྒཧཎེསུ ཨེཝཾ-སདྡོ དིསྶཏི ནིདསྶནཏྠེ ཙ ཨཝདྷཱརཎཏྠེ ཙ. ཨིདྷ པན ཨེཝཾསདྡོ ཨཱཀཱརཏྠེ ནིདསྶནཏྠེ ཙ ཝིཉྙུཛནེན པཝུཏྟོ, ཏཐེཝ ཨཝདྷཱརཎཏྠེ ཙ.

ཏཏྠ ཨཱཀཱརཏྠེན ཨེཝཾསདྡེན ཨེཏམཏྠཾ དཱིཔེཏི – ནཱནཱནཡནིཔུཎམནེཀཛ྄ཛྷཱསཡསམུཊྛཱནཾ ཨཏྠབྱཉྫནསམྤནྣཾ ཝིཝིདྷཔཱཊིཧཱརིཡཾ དྷམྨཏྠདེསནཱཔཊིཝེདྷགམྦྷཱིརཾ སབྦསཏྟཱནཾ སཀསཀབྷཱསཱནུརཱུཔཏོ སོཏཔཐམཱགཙྪནྟཾ ཏསྶ བྷགཝཏོ ཝཙནཾ སབྦཔྤཀཱརེན ཀོ སམཏྠོ ཝིཉྙཱཏུཾ, སབྦཐཱམེན པན སོཏུཀཱམཏཾ ཛནེཏྭཱཔི ཨེཝཾ མེ སུཏཾ, མཡཱཔི ཨེཀེནཱཀཱརེན སུཏནྟི.

ནིདསྶནཏྠེན ‘‘ནཱཧཾ སཡམྦྷཱུ, ན མཡཱ ཨིདཾ སཙྪིཀཏ’’ནྟི ཨཏྟཱནཾ པརིམོཙེནྟོ ‘‘ཨེཝཾ མེ སུཏཾ, མཡཱཔི ཨེཝཾ སུཏ’’ནྟི ཨིདཱནི ཝཏྟབྦཾ སཀལཾ སུཏྟཾ ནིདསྶེཏི.

ཨཝདྷཱརཎཏྠེན ཐེརོ སཱརིཔུཏྟོ ‘‘ཨེཏདགྒཾ, བྷིཀྑཝེ, མམ སཱཝཀཱནཾ བྷིཀྑཱུནཾ མཧཱཔཉྙཱནཾ ཡདིདཾ སཱརིཔུཏྟོ’’ཏི (ཨ. ནི. ༡.༡༨༨-༡༨༩), ‘‘ནཱཧཾ, བྷིཀྑཝེ, ཨཉྙཾ ཨེཀཔུགྒལམྤི སམནུཔསྶཱམི, ཡོ ཨེཝཾ ཏཐཱགཏེན ཨནུཏྟརཾ དྷམྨཙཀྐཾ པཝཏྟིཏཾ སམྨདེཝ ཨནུཔྤཝཏྟེཏི ཡཐཡིདཾ, བྷིཀྑཝེ, སཱརིཔུཏྟོ. སཱརིཔུཏྟོ, བྷིཀྑཝེ, ཏཐཱགཏེན ཨནུཏྟརཾ དྷམྨཙཀྐཾ པཝཏྟིཏཾ སམྨདེཝ ཨནུཔྤཝཏྟེཏཱི’’ཏིཨེཝམཱདིནཱ (ཨ. ནི. ༡.༡༨༧) ནཡེན བྷགཝཏཱ པསཏྠབྷཱཝཱནུརཱུཔཾ ཨཏྟནོ དྷཱརཎབལཾ དསྶེནྟོ སཏྟཱནཾ སོཏུཀཱམཏཾ ཛནེཏི ‘‘ཨེཝཾ མེ སུཏཾ, ཏཉྩ ཁོ ཨཏྠཏོ ཝཱ བྱཉྫནཏོ ཝཱ ཨནཱུནམནདྷིཀཾ, ཨེཝམེཝ, ན ཨཉྙཐཱ དཊྛབྦ’’ནྟི.

མེསདྡོ ཀརཎསམྤདཱནསཱམིཨཏྠེསུ དིསྶཏི. ཨིདྷ པན ‘‘མཡཱ སུཏཾ, མམ སུཏ’’ནྟི ཙ ཨཏྠདྭཡེ ཡུཛྫཏི.

སུཏནྟི ཨཡཾསདྡོ སཨུཔསགྒོ ཨནུཔསགྒོ ཙ ཝིསྶུཏགམནཀིལིནྣཨུཔཙིཏཨནུཡོགསོཏཝིཉྙེཡྻེསུ དིསྶཏི ཝིཉྙཱཏེཔི ཙ སོཏདྭཱརཱནུསཱརེན. ཨིདྷ པནསྶ སོཏདྭཱརཱནུསཱརེན ཨུཔདྷཱརིཏནྟི ཝཱ ཨུཔདྷཱརཎནྟི ཝཱ ཨཏྠོ. མེ-སདྡསྶ ཧི མཡཱཏིཨཏྠེ སཏི ‘‘ཨེཝཾ མཡཱ སུཏཾ སོཏདྭཱརཱནུསཱརེན ཨུཔདྷཱརིཏ’’ནྟི ཡུཛྫཏི, མམཱཏིཨཏྠེ སཏི ‘‘ཨེཝཾ མམ སུཏཾ སོཏདྭཱརཱནུསཱརེན ཨུཔདྷཱརཎ’’ནྟི ཡུཛྫཏི.

ཨཔིཙ ‘‘ཨེཝཾ མེ སུཏ’’ནྟི ཨཏྟནཱ ཨུཔྤཱདིཏབྷཱཝཾ ཨཔྤཊིཛཱནནྟོ པུརིམསཝནཾ ཝིཝརནྟོ ‘‘སམྨུཁཱ པཊིགྒཧིཏམིདཾ མཡཱ ཏསྶ བྷགཝཏོ ཙཏུཝེསཱརཛྫཝིསཱརདསྶ དསབལདྷརསྶ ཨཱསབྷཊྛཱནཊྛཱཡིནོ སཱིཧནཱདནཱདིནོ སབྦསཏྟུཏྟམསྶ དྷམྨིསྶརསྶ དྷམྨརཱཛསྶ དྷམྨཱདྷིཔཏིནོ དྷམྨདཱིཔསྶ དྷམྨསརཎསྶ སདྡྷམྨཝརཙཀྐཝཏྟིནོ སམྨཱསམྦུདྡྷསྶ ཝཙནཾ, ན ཨེཏྠ ཨཏྠེ ཝཱ དྷམྨེ ཝཱ པདེ ཝཱ བྱཉྫནེ ཝཱ ཀངྑཱ ཝཱ ཝིམཏི ཝཱ ཀཱཏབྦཱ’’ཏི ཨིམསྨིཾ དྷམྨེ ཨསྶདྡྷིཡཾ ཝིནཱསེཏི, སདྡྷཱསམྤདཾ ཨུཔྤཱདེཏཱིཏི. ཏེནེཏཾ ཝུཙྩཏི –

‘‘ཝིནཱསཡཏི ཨསྶདྡྷཾ, སདྡྷཾ ཝཌྜྷེཏི སཱསནེ;

ཨེཝཾ མེ སུཏམིཙྩེཝཾ, ཝདཾ གོཏམསཱཝཀོ’’ཏི.

ཨེཀནྟི གཎནཔརིཙྪེདནིདྡེསོ. སམཡནྟི པརིཙྪིནྣནིདྡེསོ. ཨེཀཾ སམཡནྟི ཨནིཡམིཏཔརིདཱིཔནཾ. ཏཏྠ སམཡསདྡོ –

སམཝཱཡེ ཁཎེ ཀཱལེ, སམཱུཧེ ཧེཏུདིཊྛིསུ;

པཊིལཱབྷེ པཧཱནེ ཙ, པཊིཝེདྷེ ཙ དིསྶཏི.

ཨིདྷ པནསྶ ཀཱལོ ཨཏྠོ. ཏེན སཾཝཙྪརཨུཏུམཱསདྡྷམཱསརཏྟིནྡིཝཔུབྦཎྷམཛ྄ཛྷནྷིཀསཱཡནྷཔཋམ- མཛ྄ཛྷིམཔཙྪིམཡཱམམུཧུཏྟཱདཱིསུ ཀཱལཔྤབྷེདབྷཱུཏེསུ སམཡེསུ ཨེཀཾ སམཡནྟི དཱིཔེཏི.

ཏཏྠ ཀིཉྩཱཔི ཨེཏེསུ སཾཝཙྪརཱདཱིསུ སམཡེསུ ཡཾ ཡཾ སུཏྟཾ ཡམྷི ཡམྷི སཾཝཙྪརེ ཨུཏུམྷི མཱསེ པཀྑེ རཏྟིབྷཱགེ དིཝསབྷཱགེ ཝཱ ཝུཏྟཾ, སབྦཾ ཏཾ ཐེརསྶ སུཝིདིཏཾ སུཝཝཏྠཱཔིཏཾ པཉྙཱཡ. ཡསྨཱ པན ‘‘ཨེཝཾ མེ སུཏཾ ཨསུཀསཾཝཙྪརེ ཨསུཀཨུཏུམྷི ཨསུཀམཱསེ ཨསུཀཔཀྑེ ཨསུཀརཏྟིབྷཱགེ ཨསུཀདིཝསབྷཱགེ ཝཱ’’ཏི ཨེཝཾ ཝུཏྟེ ན སཀྐཱ སུཁེན དྷཱརེཏུཾ ཝཱ ཨུདྡིསིཏུཾ ཝཱ ཨུདྡིསཱཔེཏུཾ ཝཱ, བཧུ ཙ ཝཏྟབྦཾ ཧོཏི, ཏསྨཱ ཨེཀེནེཝ པདེན ཏམཏྠཾ སམོདྷཱནེཏྭཱ ‘‘ཨེཀཾ སམཡ’’ནྟི ཨཱཧ.

ཡེ ཝཱ ཨིམེ གབྦྷོཀྐནྟིསམཡོ ཛཱཏིསམཡོ སཾཝེགསམཡོ ཨབྷིནིཀྑམནསམཡོ དུཀྐརཀཱརིཀསམཡོ མཱརཝིཛཡསམཡོ ཨབྷིསམྦོདྷིསམཡོ དིཊྛདྷམྨསུཁཝིཧཱརསམཡོ དེསནཱསམཡོ པརིནིབྦཱནསམཡོཏིཨེཝམཱདཡོ བྷགཝཏོ དེཝམནུསྶེསུ ཨཏིཝིཡ པཀཱསཱ ཨནེཀཀཱལཔྤབྷེདཱ ཨེཝ སམཡཱ, ཏེསུ སམཡེསུ དེསནཱསམཡསངྑཱཏཾ ཨེཀཾ སམཡནྟི དཱིཔེཏི. ཡོ ཙཱཡཾ ཉཱཎཀརུཎཱཀིཙྩསམཡེསུ ཀརུཎཱཀིཙྩསམཡོ, ཨཏྟཧིཏཔརཧིཏཔཊིཔཏྟིསམཡེསུ པརཧིཏཔཊིཔཏྟིསམཡོ, སནྣིཔཏིཏཱནཾ ཀརཎཱིཡདྭཡསམཡེསུ དྷམྨིཀཐཱསམཡོ, དེསནཱཔཊིཔཏྟིསམཡེསུ དེསནཱསམཡོ, ཏེསུཔི སམཡེསུ ཨཉྙཏརཾ སམཡཾ སནྡྷཱཡ ‘‘ཨེཀཾ སམཡ’’ནྟི ཨཱཧ.

ཡསྨཱ པན ‘‘ཨེཀཾ སམཡ’’ནྟི ཨཙྩནྟསཾཡོགཏྠོ སམྦྷཝཏི. ཡཉྷི སམཡཾ བྷགཝཱ ཨིམཾ ཨཉྙཾ ཝཱ སུཏྟནྟཾ དེསེསི, ཨཙྩནྟམེཝ ཏཾ སམཡཾ ཀརུཎཱཝིཧཱརེན ཝིཧཱསི, ཏསྨཱ ཏདཏྠཛོཏནཏྠཾ ཨིདྷ ཨུཔཡོགཝཙནནིདྡེསོ ཀཏོཏི.

ཏེནེཏཾ ཝུཙྩཏི –

‘‘ཏཾ ཏཾ ཨཏྠམཔེཀྑིཏྭཱ, བྷུམྨེན ཀརཎེན ཙ;

ཨཉྙཏྲ སམཡོ ཝུཏྟོ, ཨུཔཡོགེན སོ ཨིདྷཱ’’ཏི.

པོརཱཎཱ པན ཝཎྞཡནྟི – ‘‘ཏསྨིཾ སམཡེ’’ཏི ཝཱ ‘‘ཏེན སམཡེནཱ’’ཏི ཝཱ ‘‘ཏཾ སམཡ’’ནྟི ཝཱ ཨབྷིལཱཔམཏྟབྷེདོ ཨེས, སབྦཏྠ བྷུམྨམེཝཏྠོཏི. ཏསྨཱ ‘‘ཨེཀཾ སམཡ’’ནྟི ཝུཏྟེཔི ‘‘ཨེཀསྨིཾ སམཡེ’’ཏི ཨཏྠོ ཝེདིཏབྦོ.

བྷགཝཱཏི གརུ. གརུཉྷི ལོཀེ ‘‘བྷགཝཱ’’ཏི ཝདནྟི. ཨཡཉྩ སབྦགུཎཝིསིཊྛཏཱཡ སབྦསཏྟཱནཾ གརུ, ཏསྨཱ ‘‘བྷགཝཱ’’ཏི ཝེདིཏབྦོ. པོརཱཎེཧིཔི ཝུཏྟཾ –

‘‘བྷགཝཱཏི ཝཙནཾ སེཊྛཾ, བྷགཝཱཏི ཝཙནམུཏྟམཾ;

གརུ གཱརཝཡུཏྟོ སོ, བྷགཝཱ ཏེན ཝུཙྩཏཱི’’ཏི.

ཨཔིཙ –

‘‘བྷཱགྱཝཱ བྷགྒཝཱ ཡུཏྟོ, བྷགེཧི ཙ ཝིབྷཏྟཝཱ;

བྷཏྟཝཱ ཝནྟགམནོ, བྷཝེསུ བྷགཝཱ ཏཏོ’’ཏི. –

ཨིམིསྶཱཔི གཱཐཱཡ ཝསེན ཨསྶ པདསྶ ཝིཏྠཱརཏོ ཨཏྠོ ཝེདིཏབྦོ. སོ ཙ ཝིསུདྡྷིམགྒེ བུདྡྷཱནུསྶཏིནིདྡེསེ (ཝིསུདྡྷི. ༡.༡༢༣ ཨཱདཡོ) ཝུཏྟོཡེཝ.

ཨེཏྟཱཝཏཱ ཙེཏྠ ཨེཝནྟི ཝཙནེན དེསནཱསམྤཏྟིཾ ནིདྡིསཏི, མེ སུཏནྟི སཱཝཀསམྤཏྟིཾ, ཨེཀཾ སམཡནྟི ཀཱལསམྤཏྟིཾ, བྷགཝཱཏི དེསཀསམྤཏྟིཾ.

སཱཝཏྠིཡནྟི ཨེཏྠ ཙ སཝཏྠསྶ ཨིསིནོ ནིཝཱསཊྛཱནབྷཱུཏཱ ནགརཱི སཱཝཏྠཱི, ཡཐཱ ཀཱཀནྡཱི མཱཀནྡཱིཏི ཨེཝཾ ཏཱཝ ཨཀྑརཙིནྟཀཱ. ཨཊྛཀཐཱཙརིཡཱ པན བྷཎནྟི – ཡཾ ཀིཉྩི མནུསྶཱནཾ ཨུཔབྷོགཔརིབྷོགཾ སབྦམེཏྠ ཨཏྠཱིཏི སཱཝཏྠཱི, སཏྠསམཱཡོགེ ཙ ཀིཾ བྷཎྜམཏྠཱིཏི པུཙྪིཏེ སབྦམཏྠཱིཏིཔི ཝཙནམུཔཱདཱཡ སཱཝཏྠཱི.

‘‘སབྦདཱ སབྦཱུཔཀརཎཾ, སཱཝཏྠིཡཾ སམོཧིཏཾ;

ཏསྨཱ སབྦམུཔཱདཱཡ, སཱཝཏྠཱིཏི པཝུཙྩཏཱི’’ཏི. –

ཏསྶཾ སཱཝཏྠིཡཾ. སམཱིཔཏྠེ བྷུམྨཝཙནཾ. ཝིཧརཏཱིཏི ཨཝིསེསེན ཨིརིཡཱཔཐདིབྦབྲཧྨཨརིཡཝིཧཱརེསུ ཨཉྙཏརཝིཧཱརསམངྒིཔརིདཱིཔནམེཏཾ, ཨིདྷ པན ཋཱནགམནཱསནསཡནཔྤབྷེདེསུ ཨིརིཡཱཔཐེསུ ཨཉྙཏརཨིརིཡཱཔཐསམཱཡོགཔརིདཱིཔནཾ. ཏེན ཋིཏོཔི གཙྪནྟོཔི ནིསིནྣོཔི སཡཱནོཔི བྷགཝཱ ‘‘ཝིཧརཏི’’ཙྩེཝ ཝེདིཏབྦོ. སོ ཧི བྷགཝཱ ཨེཀཾ ཨིརིཡཱཔཐབཱདྷནཾ ཨཉྙེན ཨིརིཡཱཔཐེན ཝིཙྪིནྡིཏྭཱ ཨཔརིཔཏནྟམཏྟབྷཱཝཾ ཧརཏི པཝཏྟེཏི, ཏསྨཱ ‘‘ཝིཧརཏཱི’’ཏི ཝུཙྩཏི.

ཛེཏཝནེཏི ཨེཏྠ ཨཏྟནོ པཙྩཏྠིཀཛནཾ ཛིནཱཏཱིཏི ཛེཏོ, རཉྙོ ཝཱ ཨཏྟནོ པཙྩཏྠིཀཛནེ ཛིཏེ ཛཱཏོཏི ཛེཏོ, མངྒལཀམྱཏཱཡ ཝཱ ཏསྶ ཨེཝཾནཱམམེཝ ཀཏནྟི ཛེཏོ, ཝནཡཏཱིཏི ཝནཾ, ཨཏྟསམྤདཱཡ སཏྟཱནཾ བྷཏྟིཾ ཀཱརེཏི, ཨཏྟནི སིནེཧཾ ཨུཔྤཱདེཏཱིཏི ཨཏྠོ. ཝནུཏེ ཨིཏི ཝཱ ཝནཾ, ནཱནཱཝིདྷཀུསུམགནྡྷསམྨོདམཏྟཀོཀིལཱདིཝིཧངྒཱབྷིརུཏེཧི མནྡམཱརུཏཙལིཏརུཀྑསཱཁཱཝིཊཔཔལླཝཔལཱསེཧི ‘‘ཨེཐ མཾ པརིབྷུཉྫཐཱ’’ཏི པཱཎིནོ ཡཱཙཏི ཝིཡཱཏི ཨཏྠོ. ཛེཏསྶ ཝནཾ ཛེཏཝནཾ. ཏཉྷི ཛེཏེན རཱཛཀུམཱརེན རོཔིཏཾ སཾཝདྡྷིཏཾ པརིཔཱལིཏཾ, སོ ཙ ཏསྶ སཱམཱི ཨཧོསི, ཏསྨཱ ཛེཏཝནནྟི ཝུཙྩཏི. ཏསྨིཾ ཛེཏཝནེ. ཝནཉྩ ནཱམ རོཔིམཾ སཡཾཛཱཏནྟི དུཝིདྷཾ. ཨིདཉྩ ཝེལུ༹ཝནཱདཱིནི ཙ རོཔིམཱནི, ཨནྡྷཝནམཧཱཝནཱདཱིནི སཡཾཛཱཏཱནི.

ཨནཱཐཔིཎྜིཀསྶ ཨཱརཱམེཏི སུདཏྟོ ནཱམ སོ གཧཔཏི མཱཏཱཔིཏཱུཧི ཀཏནཱམཝསེན. སབྦཀཱམསམིདྡྷཏཱཡ པན ཝིགཏམཙྪེརཏཱཡ ཀརུཎཱདིགུཎསམངྒིཏཱཡ ཙ ནིཙྩཀཱལཾ ཨནཱཐཱནཾ པིཎྜམདཱསི, ཏེན ཨནཱཐཔིཎྜིཀོཏི སངྑཾ གཏོ. ཨཱརམནྟི ཨེཏྠ པཱཎིནོ, ཝིསེསེན ཝཱ པབྦཛིཏཱཏི ཨཱརཱམོ, ཏསྶ པུཔྥཕལཱདིསོབྷཱཡ ནཱཏིདཱུརནཙྩཱསནྣཏཱདིཔཉྩཝིདྷསེནཱསནངྒསམྤཏྟིཡཱ ཙ ཏཏོ ཏཏོ ཨཱགམྨ རམནྟི ཨབྷིརམནྟི, ཨནུཀྐཎྛིཏཱ ཧུཏྭཱ ནིཝསནྟཱིཏི ཨཏྠོ. ཝུཏྟཔྤཀཱརཱཡ ཝཱ སམྤཏྟིཡཱ ཏཏྠ ཏཏྠ གཏེཔི ཨཏྟནོ ཨབྦྷནྟརཾ ཨཱནེཏྭཱ རམཱཔེཏཱིཏི ཨཱརཱམོ. སོ ཧི ཨནཱཐཔིཎྜིཀེན གཧཔཏིནཱ ཛེཏསྶ རཱཛཀུམཱརསྶ ཧཏྠཏོ ཨཊྛཱརསཧི ཧིརཉྙཀོཊཱིཧི ཀོཊིསནྠརེན ཀཱིཎིཏྭཱ ཨཊྛཱརསཧི ཧིརཉྙཀོཊཱིཧི སེནཱསནཱནི ཀཱརཱཔེཏྭཱ ཨཊྛཱརསཧི ཧིརཉྙཀོཊཱིཧི ཝིཧཱརམཧཾ ནིཊྛཱཔེཏྭཱ ཨེཝཾ ཙཏུཔཉྙཱསཧིརཉྙཀོཊིཔརིཙྩཱགེན བུདྡྷཔྤམུཁསྶ བྷིཀྑུསངྒྷསྶ ནིཡྻཱདིཏོ, ཏསྨཱ ‘‘ཨནཱཐཔིཎྜིཀསྶ ཨཱརཱམོ’’ཏི ཝུཙྩཏི. ཏསྨིཾ ཨནཱཐཔིཎྜིཀསྶ ཨཱརཱམེ.

ཨེཏྠ ཙ ‘‘ཛེཏཝནེ’’ཏིཝཙནཾ པུརིམསཱམིཔརིཀིཏྟནཾ, ‘‘ཨནཱཐཔིཎྜིཀསྶ ཨཱརཱམེ’’ཏི པཙྪིམསཱམིཔརིཀིཏྟནཾ. ཀིམེཏེསཾ པརིཀིཏྟནེ པཡོཛནནྟི? པུཉྙཀཱམཱནཾ དིཊྛཱནུགཏིཨཱཔཛྫནཾ. ཏཏྠ ཧི དྭཱརཀོཊྛཀཔཱསཱདམཱཔནེ བྷཱུམིཝིཀྐཡལདྡྷཱ ཨཊྛཱརས ཧིརཉྙཀོཊིཡོ ཨནེཀཀོཊིཨགྒྷནཀཱ རུཀྑཱ ཙ ཛེཏསྶ པརིཙྩཱགོ, ཙཏུཔཉྙཱས ཧིརཉྙཀོཊིཡོ ཨནཱཐཔིཎྜིཀསྶ. ཨིཏི ཏེསཾ པརིཀིཏྟནེན ཨེཝཾ པུཉྙཀཱམཱ པུཉྙཱནི ཀརོནྟཱིཏི དསྶེནྟོ ཨཱཡསྨཱ སཱརིཔུཏྟོ ཨཉྙེཔི པུཉྙཀཱམེ ཏེསཾ དིཊྛཱནུགཏིཨཱཔཛྫནེ ནིཡོཛེཏི.

ཏཏྠ སིཡཱ – ཡདི ཏཱཝ བྷགཝཱ སཱཝཏྠིཡཾ ཝིཧརཏི, ‘‘ཛེཏཝནེ ཨནཱཐཔིཎྜིཀསྶ ཨཱརཱམེ’’ཏི ན ཝཏྟབྦཾ. ཨཐ ཏཏྠ ཝིཧརཏི, ‘‘སཱཝཏྠིཡ’’ནྟི ན ཝཏྟབྦཾ. ན ཧི སཀྐཱ ཨུབྷཡཏྠ ཨེཀཾ སམཡཾ ཝིཧརིཏུནྟི. ན ཁོ པནེཏཾ ཨེཝཾ དཊྛབྦཾ, ནནུ ཨཝོཙུམྷ ‘‘སམཱིཔཏྠེ བྷུམྨཝཙན’’ནྟི. ཏསྨཱ ཡཐཱ གངྒཱཡམུནཱདཱིནཾ སམཱིཔེ གོཡཱུཐཱནི ཙརནྟཱནི ‘‘གངྒཱཡ ཙརནྟི, ཡམུནཱཡ ཙརནྟཱི’’ཏི ཝུཙྩནྟི, ཨེཝམིདྷཱཔི ཡདིདཾ སཱཝཏྠིཡཱ སམཱིཔེ ཛེཏཝནཾ ཨནཱཐཔིཎྜིཀསྶ ཨཱརཱམོ, ཏཏྠ ཝིཧརནྟོ ཝུཙྩཏི ‘‘སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ’’ཏི. གོཙརགཱམནིདསྶནཏྠཾ ཧིསྶ སཱཝཏྠིཝཙནཾ, པབྦཛིཏཱནུརཱུཔནིཝཱསཊྛཱནནིདསྶནཏྠཾ སེསཝཙནཾ.

ཏཏྠ སཱཝཏྠིཀིཏྟནེན ཨཱཡསྨཱ སཱརིཔུཏྟོ བྷགཝཏོ གཧཊྛཱནུགྒཧཀརཎཾ དསྶེཏི, ཛེཏཝནཱདིཀིཏྟནེན པབྦཛིཏཱནུགྒཧཀརཎཾ. ཏཐཱ པུརིམེན པཙྩཡགྒཧཎཏོ ཨཏྟཀིལམཐཱནུཡོགཝིཝཛྫནཾ, པཙྪིམེན ཝཏྠུཀཱམཔྤཧཱནཏོ ཀཱམསུཁལླིཀཱནུཡོགཝིཝཛྫནཱུཔཱཡཾ. ཨཐ ཝཱ པུརིམེན ཙ དྷམྨདེསནཱབྷིཡོགཾ, པཙྪིམེན ཝིཝེཀཱདྷིམུཏྟིཾ. པུརིམེན ཀརུཎཱཡ ཨུཔགམནཾ, པཙྪིམེན པཉྙཱཡ ཨཔགམནཾ. པུརིམེན སཏྟཱནཾ ཧིཏསུཁནིཔྥཱདནཱདྷིམུཏྟཏཾ, པཙྪིམེན པརཧིཏསུཁཀརཎེ ནིརུཔལེཔཏཾ. པུརིམེན དྷམྨིཀསུཁཱཔརིཙྩཱགནིམིཏྟཾ ཕཱསུཝིཧཱརཾ, པཙྪིམེན ཨུཏྟརིམནུསྶདྷམྨཱནུཡོགནིམིཏྟཾ. པུརིམེན མནུསྶཱནཾ ཨུཔཀཱརབཧུལཏཾ, པཙྪིམེན དེཝཱནཾ. པུརིམེན ལོཀེ ཛཱཏསྶ ལོཀེ སཾཝདྡྷབྷཱཝཾ, པཙྪིམེན ལོཀེན ཨནུཔལིཏྟཏཾ. པུརིམེན ‘‘ཨེཀཔུགྒལོ, བྷིཀྑཝེ, ལོཀེ ཨུཔྤཛྫམཱནོ ཨུཔྤཛྫཏི བཧུཛནཧིཏཱཡ བཧུཛནསུཁཱཡ ལོཀཱནུཀམྤཱཡ ཨཏྠཱཡ ཧིཏཱཡ སུཁཱཡ དེཝམནུསྶཱནཾ. ཀཏམོ ཨེཀཔུགྒལོ? ཏཐཱགཏོ ཨརཧཾ སམྨཱསམྦུདྡྷོ’’ཏི (ཨ. ནི. ༡.༡༧༠) ཝཙནཏོ ཡདཏྠཾ བྷགཝཱ ཨུཔྤནྣོ, ཏདཏྠཔརིདཱིཔནཾ, པཙྪིམེན ཡཏྠ ཨུཔྤནྣོ, ཏདནུརཱུཔཝིཧཱརཔརིདཱིཔནཾ. བྷགཝཱ ཧི པཋམཾ ལུམྦིནིཝནེ, དུཏིཡཾ བོདྷིམཎྜེཏི ལོཀིཡལོཀུཏྟརསྶ ཨུཔྤཏྟིཡཱ ཝནེཡེཝ ཨུཔྤནྣོ, ཏེནསྶ ཝནེཡེཝ ཝིཧཱརཾ དསྶེཏཱིཏི ཨེཝམཱདིནཱ ནཡེནེཏྠ ཨཏྠཡོཛནཱ ཝེདིཏབྦཱ.

ཏཏྲཱཏི དེསཀཱལཔརིདཱིཔནཾ. ཏཉྷི ཡཾ སམཡཾ ཝིཧརཏི, ཏཏྲ སམཡེ, ཡསྨིཉྩ ཛེཏཝནེ ཝིཧརཏི, ཏཏྲ ཛེཏཝནེཏི དཱིཔེཏི. བྷཱསིཏབྦཡུཏྟེ ཝཱ དེསཀཱལེ དཱིཔེཏི. ན ཧི བྷགཝཱ ཨཡུཏྟེ དེསེ ཀཱལེ ཝཱ དྷམྨཾ དེསེཏི. ‘‘ཨཀཱལོ ཁོ ཏཱཝ བཱཧིཡཱ’’ཏིཨཱདི (ཨུདཱ. ༡༠) ཙེཏྠ སཱདྷཀཾ. ཁོཏི པདཔཱུརཎམཏྟེ ཨཝདྷཱརཎཏྠེ ཨཱདིཀཱལཏྠེ ཝཱ ནིཔཱཏོ. བྷགཝཱཏི ལོཀགརུདཱིཔནཾ. བྷིཀྑཱུཏི ཀཐཱསཝནཡུཏྟཔུགྒལཝཙནཾ. ཨཔིཙེཏྠ ‘‘བྷིཀྑཀོཏི བྷིཀྑུ, བྷིཀྑཱཙརིཡཾ ཨཛ྄ཛྷུཔགཏོཏི བྷིཀྑཱུ’’ཏིཨཱདིནཱ (ཝིབྷ. ༥༡༠; པཱརཱ. ༤༥) ནཡེན ཝཙནཏྠོ ཝེདིཏབྦོ. ཨཱམནྟེསཱིཏི ཨཱལཔི ཨབྷཱསི སམྦོདྷེསི, ཨཡམེཏྠ ཨཏྠོ. ཨཉྙཏྲ པན ཉཱཔནེཔི པཀྐོསནེཔི. བྷིཀྑཝོཏི ཨཱམནྟནཱཀཱརདཱིཔནཾ. ཏེན ཏེསཾ བྷིཀྑཱུནཾ བྷིཀྑནསཱིལཏཱབྷིཀྑནདྷམྨཏཱབྷིཀྑནེསཱདྷུཀཱརིཏཱདིགུཎཡོགསིདྡྷེན ཝཙནེན ཧཱིནཱདྷིཀཛནསེཝིཏཾ ཝུཏྟིཾ པཀཱསེནྟོ ཨུདྡྷཏདཱིནབྷཱཝནིགྒཧཾ ཀརོཏི. ‘‘བྷིཀྑཝོ’’ཏི ཨིམིནཱ ཙ ཀརུཎཱཝིཔྥཱརསོམྨཧདཡནཡནནིཔཱཏཔུབྦངྒམེན ཝཙནེན ཏེ ཨཏྟནོ མུཁཱབྷིམུཁེ ཀརོནྟོ ཏེནེཝ ཀཐེཏུཀམྱཏཱདཱིཔཀེན ཝཙནེན ནེསཾ སོཏུཀམྱཏཾ ཛནེཏི. ཏེནེཝ ཙ སམྦོདྷནཏྠེན ཝཙནེན སཱདྷུཀསཝནམནསིཀཱརེཔི ཏེ ནིཡོཛེཏི. སཱདྷུཀསཝནམནསིཀཱརཱཡཏྟཱ ཧི སཱསནསམྤཏྟི.

ཨཔརེསུ དེཝམནུསྶེསུ ཝིཛྫམཱནེསུ ཀསྨཱ བྷིཀྑཱུཡེཝ ཨཱམནྟེསཱིཏི ཙེ? ཛེཊྛསེཊྛཱསནྣསདཱསནྣིཧིཏབྷཱཛནབྷཱཝཏོ. སབྦཔརིསསཱདྷཱརཎཱ ཧི བྷགཝཏོ དྷམྨདེསནཱ. པརིསཱཡ ཙ ཛེཊྛཱ བྷིཀྑཱུ པཋམུཔྤནྣཏྟཱ, སེཊྛཱ ཨནགཱརིཡབྷཱཝཾ ཨཱདིཾ ཀཏྭཱ སཏྠུ ཙརིཡཱནུཝིདྷཱཡཀཏྟཱ སཀལསཱསནཔཊིགྒཱཧཀཏྟཱ ཙ, ཨཱསནྣཱ ཏཏྠ ནིསིནྣེསུ སཏྠུསནྣིཀཏྟཱ, སདཱསནྣིཧིཏཱ སཏྠུསནྟིཀཱཝཙརཏྟཱ, དྷམྨདེསནཱཡ ཙ ཏེ ཨེཝ བྷཱཛནཾ ཡཐཱནུསིཊྛཾ པཊིཔཏྟིསབྦྷཱཝཏོ.

ཏཏྠ སིཡཱ – ཀིམཏྠཾ པན བྷགཝཱ དྷམྨཾ དེསེནྟོ པཋམཾ བྷིཀྑཱུ ཨཱམནྟེསི, ན དྷམྨམེཝ དེསེསཱིཏི? སཏིཛནནཏྠཾ. པརིསཱཡ ཧི བྷིཀྑཱུ ཨཉྙཾ ཙིནྟེནྟཱཔི ཝིཀྑིཏྟཙིཏྟཱཔི དྷམྨཾ པཙྩཝེཀྑནྟཱཔི ཀམྨཊྛཱནཾ མནསིཀརོནྟཱཔི ནིསིནྣཱ ཧོནྟི, ཏེ ཨནཱམནྟེཏྭཱ དྷམྨེ དེསིཡམཱནེ ‘‘ཨཡཾ དེསནཱ ཀིཾནིདཱནཱ ཀིཾཔཙྩཡཱ ཀཏམཱཡ ཨཏྠུཔྤཏྟིཡཱ དེསིཏཱ’’ཏི སལླཀྑེཏུཾ ཨསཀྐོནྟཱ ཝིཀྑེཔཾ ཨཱཔཛྫེཡྻུཾ, དུགྒཧིཏཾ ཝཱ གཎྷེཡྻུཾ. ཏེན ཏེསཾ སཏིཛནནཏྠཾ བྷགཝཱ པཋམཾ ཨཱམནྟེཏྭཱ པཙྪཱ དྷམྨཾ དེསེཏི.

བྷདནྟེཏི གཱརཝཝཙནམེཏཾ, སཏྠུནོ པཊིཝཙནདཱནཾ ཝཱ. ཨཔིཙེཏྠ ‘‘བྷིཀྑཝོ’’ཏི ཝདམཱནོ བྷགཝཱ ཏེ བྷིཀྑཱུ ཨཱལཔཏི, ‘‘བྷདནྟེ’’ཏི ཝདམཱནཱ ཏེ བྷགཝནྟཾ པཙྩཱལཔནྟི. ཏཐཱ ‘‘བྷིཀྑཝོ’’ཏི བྷགཝཱ ཨཱབྷཱསཏི, ‘‘བྷདནྟེ’’ཏི ཏེ པཙྩཱབྷཱསནྟི. ‘‘བྷིཀྑཝོ’’ཏི པཊིཝཙནཾ དཱཔེཏི, བྷདནྟེཏི པཊིཝཙནཾ དེནྟི. ཏེ བྷིཀྑཱུཏི ཡེ བྷགཝཱ ཨཱམནྟེསི. བྷགཝཏོ པཙྩསྶོསུནྟི བྷགཝཏོ ཨཱམནྟནཾ པཊིཨསྶོསུཾ, ཨབྷིམུཁཱ ཧུཏྭཱ སུཎིཾསུ སམྤཊིཙྪིཾསུ པཊིགྒཧེསུནྟི ཨཏྠོ. བྷགཝཱ ཨེཏདཝོཙཱཏི བྷགཝཱ ཨེཏཾ ཨིདཱནི ཝཏྟབྦཾ སཀལསུཏྟཾ ཨཝོཙ.

ཨེཏྟཱཝཏཱ ཙ ཡཾ ཨཱཡསྨཏཱ སཱརིཔུཏྟེན ཀམལཀུཝལཡུཛྫལཝིམལསཱདུརསསལིལཱཡ པོཀྑརཎིཡཱ སུཁཱཝཏརཎཏྠཾ ནིམྨལསིལཱཏལརཙནཝིལཱསསོཔཱནཾ ཝིཔྤཀིཎྞམུཏྟཱཛཱལསདིསཝཱལིཀཱཀིཎྞཔཎྜརབྷཱུམིབྷཱགཾ ཏིཏྠཾ ཝིཡ, སུཝིབྷཏྟབྷིཏྟིཝིཙིཏྲཝེདིཀཱཔརིཀྑིཏྟསྶ ནཀྑཏྟཔཐཾ ཕུསིཏུཀཱམཏཱཡ ཝིཡ, ཝིཛམྦྷིཏསམུསྶཡསྶ པཱསཱདཝརསྶ སུཁཱརོཧཎཏྠཾ དནྟམཡསཎྷམུདུཕལཀཀཉྩནལཏཱཝིནདྡྷམཎིགཎཔྤབྷཱསམུདཡུཛྫལསོབྷཾ སོཔཱནཾ ཝིཡ, སུཝཎྞཝལཡནཱུཔུརཱདིསངྒྷཊྚནསདྡསམྨིསྶིཏཀཐིཏཧསིཏམདྷུརསྶརགེཧཛནཝིཙརིཏསྶ ཨུལཱ༹རིསྶརིཡཝིབྷཝསོབྷིཏསྶ མཧཱགྷརསྶ སུཁཔྤཝེསནཏྠཾ སུཝཎྞརཛཏམཎིམུཏྟཱཔཝཱལཱ༹དིཛུཏིཝིསདཝིཛྫོཏིཏསུཔྤཏིཊྛིཏཝིསཱལདྭཱརཀཝཱཊཾ མཧཱདྭཱརཾ ཝིཡ ཨཏྠབྱཉྫནསམྤནྣསྶ བུདྡྷཱནཾ དེསནཱཉཱཎགམྦྷཱིརབྷཱཝསཾསཱུཙཀསྶ ཨིམསྶ སུཏྟསྶ སུཁཱཝགཱཧཎཏྠཾ ཀཱལདེསདེསཀཔརིསཱཔདེསཔཊིམཎྜིཏཾ ནིདཱནཾ བྷཱསིཏཾ, ཏསྶ ཨཏྠཝཎྞནཱ སམཏྟཱ.

སུཏྟནྟེ པཉྩཱཏི གཎནཔརིཙྪེདོ. ཨིམཱནི ཨིནྡྲིཡཱནཱིཏི པརིཙྪིནྣདྷམྨནིདསྶནཾ. ཨིནྡྲིཡཊྛོ ཧེཊྛཱ ཝུཏྟོ.

༡༨༥. ཨིདཱནི ཨིམཾ སུཏྟནྟཾ དསྶེཏྭཱ ཨིམསྨིཾ སུཏྟནྟེ ཝུཏྟཱནཾ ཨིནྡྲིཡཱནཾ ཝིསུདྡྷིབྷཱཝནཱཝིདྷཱནཾ བྷཱཝིཏཏྟཾ པཊིཔྤསྶདྡྷིཉྩ དསྶེཏུཀཱམོ ཨིམཱནི པཉྩིནྡྲིཡཱནཱིཏིཨཱདིམཱཧ. ཏཏྠ ཝིསུཛ྄ཛྷནྟཱིཏི ཝིསུདྡྷིཾ པཱཔུཎནྟི. ཨསྶདྡྷེཏི ཏཱིསུ རཏནེསུ སདྡྷཱཝིརཧིཏེ. སདྡྷེཏི ཏཱིསུ རཏནེསུ སདྡྷཱསམྤནྣེ. སེཝཏོཏི ཙིཏྟེན སེཝནྟསྶ. བྷཛཏོཏི ཨུཔསངྐམནྟསྶ. པཡིརུཔཱསཏོཏི སཀྐཙྩཾ ཨུཔནིསཱིདནྟསྶ. པསཱདནཱིཡེ སུཏྟནྟེཏི པསཱདཛནཀེ རཏནཏྟཡགུཎཔཊིསཾཡུཏྟེ སུཏྟནྟེ. ཀུསཱིཏེཏི ཀུཙྪིཏེན ཨཱཀཱརེན སཱིདནྟཱིཏི ཀུསཱིདཱ, ཀུསཱིདཱ ཨེཝ ཀུསཱིཏཱ. ཏེ ཀུསཱིཏེ. སམྨཔྤདྷཱནེཏི ཙཏུཀིཙྩསཱདྷཀཝཱིརིཡཔཊིསཾཡུཏྟསུཏྟནྟེ. མུཊྛསྶཏཱིཏི ནཊྛསྶཏིཀེ. སཏིཔཊྛཱནེཏི སཏིཔཊྛཱནཱདྷིཀཱརཀེ སུཏྟནྟེ. ཛྷཱནཝིམོཀྑེཏི ཙཏུཏྠཛ྄ཛྷཱནཨཊྛཝིམོཀྑཏིཝིདྷཝིམོཀྑཱདྷིཀཱརཀེ སུཏྟནྟེ. དུཔྤཉྙེཏི ནིཔྤཉྙེ, པཉྙཱབྷཱཝཏོ ཝཱ དུཊྛཱ པཉྙཱ ཨེཏེསནྟི དུཔྤཉྙཱ. ཏེ དུཔྤཉྙེ. གམྦྷཱིརཉཱཎཙརིཡནྟི ཙཏུསཙྩཔཊིཙྩསམུཔྤཱདཱདིཔཊིསཾཡུཏྟེ སུཏྟནྟེ, ཉཱཎཀཐཱསདིསེ ཝཱ. སུཏྟནྟཀྑནྡྷེཏི སུཏྟནྟཀོཊྛཱསེ. ཨསྶདྡྷིཡནྟིཨཱདཱིསུ ཨསྶདྡྷིཡནྟི ཨསྶདྡྷབྷཱཝཾ. ཨསྶདྡྷིཡེ ཨཱདཱིནཝདསྶཱཝཱི ཨསྶདྡྷིཡཾ པཛཧནྟོ སདྡྷིནྡྲིཡཾ བྷཱཝེཏི, སདྡྷིནྡྲིཡེ ཨཱནིསཾསདསྶཱཝཱི སདྡྷིནྡྲིཡཾ བྷཱཝེནྟོ ཨསྶདྡྷིཡཾ པཛཧཏི. ཨེས ནཡོ སེསེསུ. ཀོསཛྫནྟི ཀུསཱིཏབྷཱཝཾ. པམཱདནྟི སཏིཝིཔྤཝཱསཾ. ཨུདྡྷཙྩནྟི ཨུདྡྷཏབྷཱཝཾ, ཝིཀྑེཔནྟི ཨཏྠོ. པཧཱིནཏྟཱཏི ཨཔྤནཱཝསེན ཛྷཱནཔཱརིཔཱུརིཡཱ པཧཱིནཏྟཱ. སུཔྤཧཱིནཏྟཱཏི ཝུཊྛཱནགཱམིནིཝསེན ཝིཔསྶནཱཔཱརིཔཱུརིཡཱ སུཊྛུ པཧཱིནཏྟཱ. བྷཱཝིཏཾ ཧོཏི སུབྷཱཝིཏནྟི ཝུཏྟཀྐམེནེཝ ཡོཛེཏབྦཾ. ཝིཔསྶནཱཡ ཧི ཝིཔཀྑཝསེན པཧཱིནཏྟཱ ‘‘སུཔྤཧཱིནཏྟཱ’’ཏི ཝཏྟུཾ ཡུཛྫཏི. ཏསྨཱཡེཝ ཙ ‘‘སུབྷཱཝིཏ’’ནྟི, ན ཏཐཱ ཛྷཱནེན. ཡསྨཱ པན པཧཱཏབྦཱནཾ པཧཱནེན བྷཱཝནཱསིདྡྷི, བྷཱཝནཱསིདྡྷིཡཱ ཙ པཧཱཏབྦཱནཾ པཧཱནསིདྡྷི ཧོཏི, ཏསྨཱ ཡམཀཾ ཀཏྭཱ ནིདྡིཊྛཾ.

༡༨༦. པཊིཔྤསྶདྡྷིཝཱརེ བྷཱཝིཏཱནི ཙེཝ ཧོནྟི སུབྷཱཝིཏཱནི ཙཱཏི བྷཱཝིཏཱནཾཡེཝ སུབྷཱཝིཏཏཱ. པཊིཔྤསྶདྡྷཱནི ཙ སུཔྤཊིཔྤསྶདྡྷཱནི ཙཱཏི པཊིཔྤསྶདྡྷཱནཾཡེཝ སུཔྤཊིཔྤསྶདྡྷཏཱ ཝུཏྟཱ. ཕལཀྑཎེ མགྒཀིཙྩནིབྦཏྟིཝསེན བྷཱཝིཏཏཱ པཊིཔྤསྶདྡྷཏཱ ཙ ཝེདིཏབྦཱ. སམུཙྪེདཝིསུདྡྷིཡོཏི མགྒཝིསུདྡྷིཡོཡེཝ. པཊིཔྤསྶདྡྷིཝིསུདྡྷིཡོཏི ཕལཝིསུདྡྷིཡོ ཨེཝ.

ཨིདཱནི ཏཐཱ ཝུཏྟཝིདྷཱནཱནི ཨིནྡྲིཡཱནི ཀཱརཀཔུགྒལཝསེན ཡོཛེཏྭཱ དསྶེཏུཾ ཀཏིནཾ པུགྒལཱནནྟིཨཱདིམཱཧ. ཏཏྠ སཝནེན བུདྡྷོཏི སམྨཱསམྦུདྡྷཏོ དྷམྨཀཐཱསཝནེན ཙཏུསཙྩཾ བུདྡྷཝཱ, ཉཱཏཝཱཏི ཨཏྠོ. ཨིདཾ བྷཱཝིཏིནྡྲིཡབྷཱཝསྶ ཀཱརཎཝཙནཾ. བྷཱཝནཱབྷིསམཡཝསེན ཧི མགྒསྶ བུདྡྷཏྟཱ ཕལཀྑཎེ བྷཱཝིཏིནྡྲིཡོ ཧོཏི. ཨཊྛནྣམྤི ཨརིཡཱནཾ ཏཐཱགཏསྶ སཱཝཀཏྟཱ ཝིསེསེཏྭཱ ཨརཧཏྟཕལཊྛམེཝ དསྶེནྟོ ཁཱིཎཱསཝོཏི ཨཱཧ. སོཡེཝ ཧི སབྦཀིཙྩནིཔྥཏྟིཡཱ བྷཱཝིཏིནྡྲིཡོཏི ཝུཏྟོ. ཨིཏརེཔི པན ཏཾཏཾམགྒཀིཙྩནིཔྥཏྟིཡཱ པརིཡཱཡེན བྷཱཝིཏིནྡྲིཡཱ ཨེཝ. ཏསྨཱ ཨེཝ ཙ ཙཏཱུསུ ཕལཀྑཎེསུ ‘‘པཉྩིནྡྲིཡཱནི བྷཱཝིཏཱནི ཙེཝ ཧོནྟི སུབྷཱཝིཏཱནི ཙཱ’’ཏི ཝུཏྟཾ. ཡསྨཱ པན ཏེསཾ ཨུཔརིམགྒཏྠཱཡ ཨིནྡྲིཡབྷཱཝནཱ ཨཏྠིཡེཝ, ཏསྨཱ ཏེ ན ནིཔྤརིཡཱཡེན བྷཱཝིཏིནྡྲིཡཱ. སཡཾ བྷཱུཏཊྛེནཱཏི ཨནཱཙརིཡོ ཧུཏྭཱ སཡམེཝ ཨརིཡཱཡ ཛཱཏིཡཱ བྷཱུཏཊྛེན ཛཱཏཊྛེན བྷགཝཱ. སོཔི ཧི བྷཱཝནཱསིདྡྷིཝསེན ཕལཀྑཎེ སཡམྦྷཱུ ནཱམ ཧོཏི. ཨེཝཾ སཡཾ བྷཱུཏཊྛེན བྷཱཝིཏིནྡྲིཡོ. ཨཔྤམེཡྻཊྛེནཱཏི ཨནནྟགུཎཡོགཏོ པམཱཎེཏུཾ ཨསཀྐུཎེཡྻཊྛེན. བྷགཝཱ ཕལཀྑཎེ བྷཱཝནཱསིདྡྷིཏོ ཨཔྤམེཡྻོཏི. ཏསྨཱཡེཝ བྷཱཝིཏིནྡྲིཡོ.

པཋམསུཏྟནྟནིདྡེསཝཎྞནཱ ནིཊྛིཏཱ.

༢. དུཏིཡསུཏྟནྟནིདྡེསཝཎྞནཱ

༡༨༧. པུན ཨཉྙཾ སུཏྟནྟཾ ནིཀྑིཔིཏྭཱ ཨིནྡྲིཡཝིདྷཱནཾ ནིདྡིསིཏུཀཱམོ པཉྩིམཱནི, བྷིཀྑཝེཏིཨཱདིཀཾ སུཏྟནྟཾ དསྶེཏི. ཏཏྠ ཡེ ཧི ཀེཙཱིཏི ཨནཝསེསཔརིཡཱདཱནཾ, ཧི-ཀཱརོ པདཔཱུརཎམཏྟེ ནིཔཱཏོ. སམཎཱ ཝཱ བྲཱཧྨཎཱ ཝཱཏི ལོཀཝོཧཱརཝསེན ཝུཏྟཾ. སམུདཡནྟི པཙྩཡཾ. ཨཏྠངྒམནྟི ཨུཔྤནྣཱནཾ ཨབྷཱཝགམནཾ, ཨནུཔྤནྣཱནཾ ཨནུཔྤཱདཾ ཝཱ. ཨསྶཱདནྟི ཨཱནིསཾསཾ. ཨཱདཱིནཝནྟི དོསཾ. ནིསྶརཎནྟི ནིགྒམནཾ. ཡཐཱབྷཱུཏནྟི ཡཐཱསབྷཱཝཾ. སམཎེསཱུཏི སམིཏཔཱཔེསུ. སམཎསམྨཏཱཏི ན མཡཱ སམཎཱཏི སམྨཏཱ. ‘‘སམྨཏཱ’’ཏི ཝཏྟམཱནཀཱལཝསེན ཝུཙྩམཱནེ སདྡལཀྑཎཝསེན ‘‘མེ’’ཏི ཨེཏྠ སཱམིཝཙནམེཝ ཧོཏི. བྲཱཧྨཎེསཱུཏི བཱཧིཏཔཱཔེསུ. སཱམཉྙཏྠནྟི སམཎབྷཱཝསྶ ཨཏྠཾ. བྲཧྨཉྙཏྠནྟི བྲཱཧྨཎབྷཱཝསྶ ཨཏྠཾ. དྭཡེནཱཔི ཨརཧཏྟཕལམེཝ ཝུཏྟཾ. ཨཐ ཝཱ སཱམཉྙཏྠནྟི ཧེཊྛཱ ཏཱིཎི ཕལཱནི. བྲཧྨཉྙཏྠནྟི ཨརཧཏྟཕལཾ. སཱམཉྙབྲཧྨཉྙནྟི ཧི ཨརིཡམགྒོཡེཝ. དིཊྛེཝ དྷམྨེཏི པཙྩཀྑེཡེཝ ཨཏྟབྷཱཝེ. སཡཾ ཨབྷིཉྙཱ སཙྪིཀཏྭཱཏི ཨཏྟནཱཡེཝ ཨདྷིཀེན ཉཱཎེན པཙྩཀྑཾ ཀཏྭཱ. ཨུཔསམྤཛྫཱཏི པཱཔུཎིཏྭཱ, ནིཔྥཱདེཏྭཱ ཝཱ.

༡༨༨. སུཏྟནྟནིདྡེསེ པཋམཾ ཨིནྡྲིཡསམུདཡཱདཱིནཾ པབྷེདགཎནཾ པུཙྪིཏྭཱ པུན པབྷེདགཎནཱ ཝིསྶཛྫིཏཱ. ཏཏྠ ཨསཱིཏིསཏནྟི ཨསཱིཏིཨུཏྟརཾ སཏཾ. པཎྜིཏེཧི ‘‘ཨསཱིཏིསཏ’’ནྟི ཝུཏྟེཧི ཨཱཀཱརེཧཱིཏི ཡོཛནཱ.

པུན པབྷེདགཎནཱཔུཙྪཱཔུབྦངྒམེ གཎནཱནིདྡེསེ ཨདྷིམོཀྑཏྠཱཡཱཏི ཨདྷིམུཙྩནཏྠཱཡ སདྡཧནཏྠཱཡ. ཨཱཝཛྫནཱཡ སམུདཡོཏི མནོདྭཱརཱཝཛྫནཙིཏྟསྶ སམུདཡོ. སདྡྷིནྡྲིཡསྶ སམུདཡོཏི སདྡྷིནྡྲིཡསྶ པཙྩཡོ, སདྡྷཾ ཨུཔྤཱདེསྶཱམཱིཏི པུབྦབྷཱགཱཝཛྫནཾ སདྡྷིནྡྲིཡསྶ ཨུཔནིསྶཡཔཙྩཡོ, སདྡྷིནྡྲིཡཛཝནསྶ ཨཱཝཛྫནཾ པཋམསྶ ཛཝནསྶ ཨནནྟརཔཙྩཡོ, དུཏིཡཛཝནཱདཱིནཾ ཨུཔནིསྶཡཔཙྩཡོ. ཨདྷིམོཀྑཝསེནཱཏི ཚནྡསམྤཡུཏྟཨདྷིམོཀྑཝསེན. ཚནྡསྶ སམུདཡོཏི པུབྦབྷཱགཱཝཛྫནཔཙྩཡཱ ཨུཔྤནྣསྶ ཨདྷིམོཀྑསམྤཡུཏྟསྶ ཡེཝཱཔནཀབྷཱུཏསྶ དྷམྨཙྪནྡསྶ སམུདཡོ. སོ པན སདྡྷིནྡྲིཡསྶ སཧཛཱཏཨཉྙམཉྙནིསྶཡསམྤཡུཏྟཨཏྠིཨཝིགཏཝསེན པཙྩཡོ ཧོཏི, ཚནྡཱདྷིཔཏིཀཱལེ ཨདྷིཔཏིཔཙྩཡོ ཙ ཧོཏི, སོཡེཝ དུཏིཡསྶ ཨནནྟརསམནནྟརཨནནྟརཱུཔནིསྶཡཱསེཝནནཏྠིཝིགཏཝསེན པཙྩཡོ ཧོཏི. ཨིམིནཱཝ ནཡེན མནསིཀཱརསྶཔི ཡོཛནཱ ཀཱཏབྦཱ. ཀེཝལཉྷེཏྠ མནསིཀཱརོཏི སཱརཎལཀྑཎོ ཡེཝཱཔནཀམནསིཀཱརོ. ཨདྷིཔཏིཔཙྩཡཏཱ པནསྶ ན ཧོཏི. སམྤཡུཏྟེསུ ཨིམེསཾ དྭིནྣཾཡེཝ གཧཎཾ བལཝཔཙྩཡཏྟཱཏི ཝེདིཏབྦཾ. སདྡྷིནྡྲིཡསྶ ཝསེནཱཏི བྷཱཝནཱབྷིཝུདྡྷིཡཱ ཨིནྡྲིཡབྷཱཝཾ པཏྟསྶ སདྡྷིནྡྲིཡསྶ ཝསེན. ཨེཀཏྟུཔཊྛཱནནྟི ཨེཀཱརམྨཎེ ཨཙལབྷཱཝེན བྷུསཾ ཋཱནཾ ཨུཔརཱུཔརི སདྡྷིནྡྲིཡསྶ པཙྩཡོ ཧོཏི. སདྡྷིནྡྲིཡེ ཝུཏྟནཡེནེཝ སེསིནྡྲིཡཱནིཔི ཝེདིཏབྦཱནི. ཨེཝམེཀེཀསྶ ཨིནྡྲིཡསྶ ཙཏྟཱརོ ཙཏྟཱརོ སམུདཡཱཏི པཉྩནྣཾ ཨིནྡྲིཡཱནཾ ཝཱིསཏི སམུདཡཱ ཧོནྟི. པུན ཙཏུནྣཾ སམུདཡཱནཾ ཨེཀེཀསྨིཾ སམུདཡེ པཉྩ པཉྩ ཨིནྡྲིཡཱནི ཡོཛེཏྭཱ ཝཱིསཏི སམུདཡཱ ཝུཏྟཱ. པཋམཝཱིསཏི ནཱནཱམགྒཝསེན དཊྛབྦཱ, དུཏིཡཝཱིསཏི ཨེཀམགྒཝསེན དཊྛབྦཱཏི ཝདནྟི. ཨེཝཾ ཙཏྟཱལཱིས ཨཱཀཱརཱ ཧོནྟི. ཨཏྠངྒམཝཱརོཔི ཨིམིནཱཝ ནཡེན ཝེདིཏབྦོ. སོ པན ཨཏྠངྒམོ ཨིནྡྲིཡབྷཱཝནཾ ཨནནུཡུཏྟསྶ ཨཔྤཊིལདྡྷཱ པཊིལཱབྷཏྠངྒམོ, ཨིནྡྲིཡབྷཱཝནཱཡ པརིཧཱིནསྶ པཊིལདྡྷཔརིཧཱནི ཨཏྠངྒམོ, ཕལཔྤཏྟསྶ པཊིཔྤསྶདྡྷིཨཏྠངྒམོ. ཨེཀཏྟཨནུཔཊྛཱནནྟི ཨེཀཏྟེ ཨནུཔཊྛཱནཾ.

ཀ. ཨསྶཱདནིདྡེསཝཎྞནཱ

༡༨༩. ཨསྶཱདནིདྡེསེ ཨསྶདྡྷིཡསྶ ཨནུཔཊྛཱནནྟི ཨསྶདྡྷེ པུགྒལེ པརིཝཛྫཡཏོ སདྡྷེ པུགྒལེ སེཝཏོ པསཱདནཱིཡསུཏྟནྟེ པཙྩཝེཀྑཏོ ཏཏྠ ཡོནིསོམནསིཀཱརཾ བཧུལཱིཀརོཏོ ཙ ཨསྶདྡྷིཡསྶ ཨནུཔཊྛཱནཾ ཧོཏི. ཨསྶདྡྷིཡཔརིལཱ༹ཧསྶ ཨནུཔཊྛཱནནྟི ཨེཏྠ ཨསྶདྡྷསྶ སདྡྷཱཀཐཱཡ པཝཏྟམཱནཱཡ དུཀྑཾ དོམནསྶཾ ཨུཔྤཛྫཏི. ཨཡཾ ཨསྶདྡྷིཡཔརིལཱ༹ཧོ. ཨདྷིམོཀྑཙརིཡཱཡ ཝེསཱརཛྫནྟི སདྡྷཱཝཏྠུཝསེན ཝཱ བྷཱཝནཱཡ ཝཱ ཝསིཔྤཏྟསྶ སདྡྷཱཔཝཏྟིཡཱ ཝིསཱརདབྷཱཝོ ཧོཏི. སནྟོ ཙ ཝིཧཱརཱདྷིགམོཏི སམཐསྶ ཝཱ ཝིཔསྶནཱཡ ཝཱ པཊིལཱབྷོ. སུཁཾ སོམནསྶནྟི ཨེཏྠ ཙེཏསིཀསུཁབྷཱཝདསྶནཏྠཾ སོམནསྶཝཙནཾ. སདྡྷིནྡྲིཡསམུཊྛིཏཔཎཱིཏརཱུཔཕུཊྛཀཱཡསྶ ཀཱཡིཀསུཁམྤི ལབྦྷཏིཡེཝ. སུཁསོམནསྶསྶ པདྷཱནསྶཱདཏྟཱ ‘‘ཨཡཾ སདྡྷིནྡྲིཡསྶ ཨསྶཱདོ’’ཏི ཝིསེསེཏྭཱ ཝུཏྟཾ. ཨིམིནཱཝ ནཡེན སེསིནྡྲིཡསྶཱདཱཔི ཡོཛེཏྭཱ ཝེདིཏབྦཱ.

ཁ. ཨཱདཱིནཝནིདྡེསཝཎྞནཱ

༡༩༠. ཨཱདཱིནཝནིདྡེསེ ཨནིཙྩཊྛེནཱཏི སདྡྷིནྡྲིཡསྶ ཨནིཙྩཊྛེན. སོ ཨནིཙྩཊྛོ སདྡྷིནྡྲིཡསྶ ཨཱདཱིནཝོཏི ཝུཏྟཾ ཧོཏི. ཨིཏརདྭཡེཔི ཨེསེཝ ནཡོ. ཨིམེ སམུདཡཏྠངྒམསྶཱདཱདཱིནཝཱ ལོཀིཡཨིནྡྲིཡཱནམེཝཱཏི ཝེདིཏབྦཱ.

ག. ནིསྶརཎནིདྡེསཝཎྞནཱ

༡༩༡. ནིསྶརཎནིདྡེསེ ཨདྷིམོཀྑཊྛེནཱཏིཨཱདཱིསུ ཨེཀེཀསྨིཾ ཨིནྡྲིཡེ པཉྩ པཉྩ ཀཏྭཱ པཉྩནྣཾ ཨིནྡྲིཡཱནཾ པཉྩཝཱིསཏི ནིསྶརཎཱནི མགྒཕལཝསེན ནིདྡིཊྛཱནི. ཏཏྠ ཏཏོ པཎཱིཏཏརསདྡྷིནྡྲིཡསྶ པཊིལཱབྷཱཏི ཏཏོ ཝིཔསྶནཱཀྑཎེ པཝཏྟསདྡྷིནྡྲིཡཏོ མགྒཀྑཎེ པཎཱིཏཏརསྶ སདྡྷིནྡྲིཡསྶ པཊིལཱབྷཝསེན. པུརིམཏརསདྡྷིནྡྲིཡཱ ནིསྶཊཾ ཧོཏཱིཏི ཏསྨིཾ མགྒཀྑཎེ སདྡྷིནྡྲིཡཾ པུརིམཏརཏོ ཝིཔསྶནཱཀྑཎེ པཝཏྟསདྡྷིནྡྲིཡཏོ ནིཀྑནྟཾ ཧོཏི. ཨིམིནཱཝ ནཡེན ཕལཀྑཎེ སདྡྷིནྡྲིཡམྤི ཨུབྷཡཏྠ སེསིནྡྲིཡཱནིཔི ཡོཛེཏབྦཱནི.

༡༩༢. པུབྦབྷཱགེ པཉྩཧི ཨིནྡྲིཡེཧཱིཏི པཋམཛ྄ཛྷཱནཱུཔཙཱརེ པཉྩཧི ཨིནྡྲིཡེཧི པཋམཛ྄ཛྷཱནཱདིཨཊྛསམཱཔཏྟིཝསེན ཨཊྛ ནིསྶརཎཱནི, ཨནིཙྩཱནུཔསྶནཱདིཨཊྛཱརསམཧཱཝིཔསྶནཱཝསེན ཨཊྛཱརས ནིསྶརཎཱནི, སོཏཱཔཏྟིམགྒཱདིཝསེན ཨཊྛ ལོཀུཏྟརནིསྶརཎཱནི. ཨེཝཾ ཛྷཱནསམཱཔཏྟིམཧཱཝིཔསྶནཱམགྒཕལཝསེན ཙཏུཏྟིཾས ནིསྶརཎཱནི པུརིམཔུརིམསམཏིཀྐམཏོ ནིདྡིཊྛཱནི. ནེཀྑམྨེ པཉྩིནྡྲིཡཱནཱིཏིཨཱདཱིནི པན སཏྟཏིཾས ནིསྶརཎཱནི པཊིཔཀྑཔཧཱནཝསེན པཊིཔཀྑཏོ ནིདྡིཊྛཱནི. ཏཏྠ ནེཀྑམྨཱདཱིསུ སཏྟསུ སཏྟ ནིསྶརཎཱནི ཨུཔཙཱརབྷཱུམིཝསེན ཝུཏྟཱནི, ཕལཱནི པན པཊིཔཀྑཔཧཱནཱབྷཱཝཏོ ན ཝུཏྟཱནི.

༡༩༣. དིཊྛེཀཊྛེཧཱིཏི ཡཱཝ སོཏཱཔཏྟིམགྒཱ དིཊྛིཡཱ སཧ ཨེཀསྨིཾ པུགྒལེ ཋིཏཱཏི དིཊྛེཀཊྛཱ. ཏེཧི དིཊྛེཀཊྛེཧི. ཨོལཱ༹རིཀེཧཱིཏི ཐཱུལེཧི ཀཱམརཱགབྱཱཔཱདེཧི. ཨཎུསཧགཏེཧཱིཏི སུཁུམབྷཱུཏེཧི ཀཱམརཱགབྱཱཔཱདེཧིཡེཝ. སབྦཀིལེསེཧཱིཏི རཱུཔརཱགཱདཱིཧི. ཏེསུ ཧི པཧཱིནེསུ སབྦཀིལེསཱ པཧཱིནཱ ཧོནྟི, ཏསྨཱ ‘‘སབྦཀིལེསེཧཱི’’ཏི ཝུཏྟཾ. ཨཝུཏྟཏྠཱནི པནེཏྠ པདཱནི ཧེཊྛཱ ཝུཏྟཏྠཱནེཝཱཏི. སབྦེསཉྙེཝ ཁཱིཎཱསཝཱནཾ ཏཏྠ ཏཏྠ པཉྩིནྡྲིཡཱནཱིཏི ‘‘ཨདྷིམོཀྑཊྛེནཱ’’ཏིཨཱདཱིསུ པུབྦེ ཝུཏྟེསུ ཋཱནེསུ ཏསྨིཾ ཏསྨིཾ ཋཱནེ པཉྩིནྡྲིཡཱནི བུདྡྷཔཙྩེཀབུདྡྷསཱཝཀཱནཾ ཁཱིཎཱསཝཱནཾ ཡཐཱཡོགཾ ཏཏོ ཏཏོ ནིསྶཊཱནི ཧོནྟི. ཨིམསྨིཾ ཝཱརེ པཋམཾ ཝུཏྟནཡཱ ཨེཝ ཡཐཱཡོགཾ ཁཱིཎཱསཝཝསེན ཝུཏྟཱ.

ཀཐཾ པནེཏཱནི ནིསྶརཎཱནི ཨསཱིཏིསཏཾ ཧོནྟཱིཏི? ཝུཙྩཏེ – མགྒཕལཝསེན ཝུཏྟཱནི པཉྩཝཱིསཏི, སམཏིཀྐམཝསེན ཝུཏྟཱནི ཙཏུཏྟིཾས, པཊིཔཀྑཝསེན ཝུཏྟཱནི སཏྟཏིཾསཱཏི པཋམཝཱརེ སབྦཱནི ཚནྣཝུཏི ནིསྶརཎཱནི ཧོནྟི, ཨེཏཱནིཡེཝ དུཏིཡཝཱརེ ཁཱིཎཱསཝཱནཾ ཝསེན དྭཱདསསུ ཨཔནཱིཏེསུ ཙཏུརཱསཱིཏི ཧོནྟི. ཨིཏི པུརིམཱནི ཚནྣཝུཏི, ཨིམཱནི ཙ ཙཏུརཱསཱིཏཱིཏི ཨསཱིཏིསཏཾ ཧོནྟི. ཀཏམཱནི པན དྭཱདས ཁཱིཎཱསཝཱནཾ ཨཔནེཏབྦཱནི? སམཏིཀྐམཏོ ཝུཏྟེསུ མགྒཕལཝསེན ཝུཏྟཱནི ཨཊྛ ནིསྶརཎཱནི, པཊིཔཀྑཏོ ཝུཏྟེསུ མགྒཝསེན ཝུཏྟཱནི ཙཏྟཱརཱིཏི ཨིམཱནི དྭཱདས ཨཔནེཏབྦཱནི. ཨརཧཏྟཕལཝསེན ཝུཏྟཱནི ཀསྨཱ ཨཔནེཏབྦཱནཱིཏི ཙེ? སབྦཔཋམཾ ཝུཏྟཱནཾ པཉྩཝཱིསཏིཡཱ ནིསྶརཎཱནཾ མགྒཕལཝསེནེཝ ལབྦྷནཏོ. ཨརཧཏྟཕལཝསེན ནིསྶརཎཱནི ཝུཏྟཱནེཝ ཧོནྟི. ཧེཊྛིམཾ ཧེཊྛིམཾ པན ཕལསམཱཔཏྟིཾ ཨུཔརིམཱ ཨུཔརིམཱ ན སམཱཔཛྫནྟིཡེཝཱཏི ཧེཊྛཱ ཏཱིཎིཔི ཕལཱནི ན ལབྦྷནྟིཡེཝ. ཛྷཱནསམཱཔཏྟིཝིཔསྶནཱནེཀྑམྨཱདཱིནི ཙ ཀིརིཡཱཝསེན ལབྦྷནྟི. པཉྩཔི ཙེཏཱནི ཨིནྡྲིཡཱནི པུབྦམེཝ པཊིཔཀྑཱནཾ པཊིཔྤསྶདྡྷཏྟཱ པཊིཔཀྑཏོ ནིསྶཊཱནེཝ ཧོནྟཱིཏི.

དུཏིཡསུཏྟནྟནིདྡེསཝཎྞནཱ ནིཊྛིཏཱ.

༣. ཏཏིཡསུཏྟནྟནིདྡེསཝཎྞནཱ

༡༩༤. པུན ཨཉྙཾ སུཏྟནྟཾ ནིཀྑིཔིཏྭཱ ཨིནྡྲིཡཝིདྷཱནཾ ནིདྡིསིཏུཀཱམོ པཉྩིམཱནི, བྷིཀྑཝེཏིཨཱདིམཱཧ. ཏཏྠ སོཏཱཔཏྟིཡངྒེསཱུཏི ཨེཏྠ སོཏོ ཨརིཡོ ཨཊྛངྒིཀོ མགྒོ, སོཏསྶ ཨཱཔཏྟི བྷུསཾ པཱཔུཎནཾ སོཏཱཔཏྟི, སོཏཱཔཏྟིཡཱ ཨངྒཱནི སམྦྷཱརཱནི སོཏཱཔཏྟིཨངྒཱནི. སོཏཱཔནྣཏཱཡ པུབྦབྷཱགཔཊིལཱབྷཨངྒཱནི. སཔྤུརིསསཾསེཝོ སོཏཱཔཏྟིཨངྒཾ, སདྡྷམྨསྶཝནཾ སོཏཱཔཏྟིཨངྒཾ, ཡོནིསོམནསིཀཱརོ སོཏཱཔཏྟིཨངྒཾ, དྷམྨཱནུདྷམྨཔཊིཔཏྟི སོཏཱཔཏྟིཨངྒཾ, ཨིམཱནི ཙཏྟཱརི སོཏཱཔཏྟིཨངྒཱནི. སེསཱ ཧེཊྛཱ ཝུཏྟཱ ཨེཝ. ཨིདཉྩ ཨིམེསཾ ཨིནྡྲིཡཱནཾ སཀཝིསཡེ ཛེཊྛཀབྷཱཝདསྶནཏྠཾ ཝུཏྟཾ. ཡཐཱ ཧི ཙཏྟཱརོ སེཊྛིཔུཏྟཱ རཱཛཱཏིརཱཛཔཉྩམེསུ སཧཱཡེསུ ‘‘ནཀྑཏྟཾ ཀཱིལི༹སྶཱམཱ’’ཏི ཝཱིཐིཾ ཨོཏིཎྞེསུ ཨེཀསྶ སེཊྛིཔུཏྟསྶ གེཧཾ གཏཀཱལེ ཨིཏརེ ཙཏྟཱརོ ཏུཎྷཱི ནིསཱིདནྟི, གེཧསཱམིཀོཝ ‘‘ཨིམེསཾ ཁཱདནཱིཡཾ བྷོཛནཱིཡཾ དེཐ, ཨིམེསཾ གནྡྷམཱལཱལངྐཱརཱདཱིནི དེཐཱ’’ཏི གེཧེ ཝིཙཱརེཏི, དུཏིཡསྶ ཏཏིཡསྶ ཙཏུཏྠསྶ གེཧཾ གཏཀཱལེ ཨིཏརེ ཙཏྟཱརོ ཏུཎྷཱི ནིསཱིདནྟི, གེཧསཱམིཀོཝ ‘‘ཨིམེསཾ ཁཱདནཱིཡཾ བྷོཛནཱིཡཾ དེཐ, ཨིམེསཾ གནྡྷམཱལཱལངྐཱརཱདཱིནི དེཐཱ’’ཏི གེཧེ ཝིཙཱརེཏི, ཨཐ སབྦཔཙྪཱ རཉྙོ གེཧཾ གཏཀཱལེ ཀིཉྩཱཔི རཱཛཱ སབྦཏྠ ཨིསྶརོཝ, ཨིམསྨིཾ པན ཀཱལེ ཨཏྟནོ གེཧེཡེཝ ‘‘ཨིམེསཾ ཁཱདནཱིཡཾ བྷོཛནཱིཡཾ དེཐ, ཨིམེསཾ གནྡྷམཱལཱལངྐཱརཱདཱིནི དེཐཱ’’ཏི ཝིཙཱརེཏི, ཨེཝམེཝ སདྡྷཱཔཉྩམཀེསུ ཨིནྡྲིཡེསུ ཏེསུ སཧཱཡེསུ ཨེཀཏོ ཝཱིཐིཾ ཨོཏརནྟེསུ ཝིཡ ཨེཀཱརམྨཎེ ཨུཔྤཛྫམཱནེསུཔི ཡཐཱ པཋམསྶ གེཧེ ཨིཏརེ ཙཏྟཱརོ ཏུཎྷཱི ནིསཱིདནྟི, གེཧསཱམིཀོཝ ཝིཙཱརེཏི, ཨེཝཾ སོཏཱཔཏྟིཨངྒཱནི པཏྭཱ ཨདྷིམོཀྑལཀྑཎཾ སདྡྷིནྡྲིཡམེཝ ཛེཊྛཀཾ ཧོཏི པུབྦངྒམཾ, སེསཱནི ཏདནྭཡཱནི ཧོནྟི. ཡཐཱ དུཏིཡསྶ གེཧེ ཨིཏརེ ཙཏྟཱརོ ཏུཎྷཱི ནིསཱིདནྟི, གེཧསཱམིཀོཝ ཝིཙཱརེཏི, ཨེཝཾ སམྨཔྤདྷཱནཱནི པཏྭཱ པགྒཧཎལཀྑཎཾ ཝཱིརིཡིནྡྲིཡམེཝ ཛེཊྛཀཾ ཧོཏི པུབྦངྒམཾ, སེསཱནི ཏདནྭཡཱནི ཧོནྟི. ཡཐཱ ཏཏིཡསྶ གེཧེ ཨིཏརེ ཙཏྟཱརོ ཏུཎྷཱི ནིསཱིདནྟི, གེཧསཱམིཀོཝ ཝིཙཱརེཏི, ཨེཝཾ སཏིཔཊྛཱནཱནི པཏྭཱ ཨུཔཊྛཱནལཀྑཎཾ སཏིནྡྲིཡམེཝ ཛེཊྛཀཾ ཧོཏི པུབྦངྒམཾ, སེསཱནི ཏདནྭཡཱནི ཧོནྟི. ཡཐཱ ཙཏུཏྠསྶ གེཧེ ཨིཏརེ ཙཏྟཱརོ ཏུཎྷཱི ནིསཱིདནྟི, གེཧསཱམིཀོཝ ཝིཙཱརེཏི, ཨེཝཾ ཛྷཱནཱནི པཏྭཱ ཨཝིཀྑེཔལཀྑཎཾ སམཱདྷིནྡྲིཡམེཝ ཛེཊྛཀཾ ཧོཏི པུབྦངྒམཾ, སེསཱནི ཏདནྭཡཱནི ཧོནྟི. སབྦཔཙྪཱ རཉྙོ གེཧཾ གཏཀཱལེ པན ཡཐཱ ཨིཏརེ ཙཏྟཱརོ ཏུཎྷཱི ནིསཱིདནྟི, རཱཛཱཝ ཝིཙཱརེཏི, ཨེཝཾ ཨརིཡསཙྩཱནི པཏྭཱ པཛཱནནལཀྑཎཾ པཉྙིནྡྲིཡམེཝ ཛེཊྛཀཾ ཧོཏི པུབྦངྒམཾ, སེསཱནི ཏདནྭཡཱནི ཧོནྟཱིཏི.

ཀ. པབྷེདགཎནནིདྡེསཝཎྞནཱ

༡༩༥. སུཏྟནྟསྶ པབྷེདགཎནཱཔུཙྪཱཔུབྦངྒམེཝ པབྷེདགཎནནིདྡེསེ སཔྤུརིསསཾསེཝེཏི སོབྷནཱནཾ པུརིསཱནཾ སམྨཱ སེཝནེ. ཨདྷིམོཀྑཱདྷིཔཏེཡྻཊྛེནཱཏི ཨདྷིམོཀྑསངྑཱཏེན སེསིནྡྲིཡེསུ ཨདྷིཔཏིབྷཱཝཊྛེན, སེསིནྡྲིཡཱནཾ པུབྦངྒམཊྛེནཱཏི ཨཏྠོ. སདྡྷམྨསཝནེཏི སཏཾ དྷམྨོ, སོབྷནོ ཝཱ དྷམྨོཏི སདྡྷམྨོ. ཏསྶ སདྡྷམྨསྶ སཝནེ. ཡོནིསོམནསིཀཱརེཏི ཨུཔཱཡེན མནསིཀཱརེ. དྷམྨཱནུདྷམྨཔཊིཔཏྟིཡཱཏི ཨེཏྠ ནཝ ལོཀུཏྟརདྷམྨེ ཨནུགཏོ དྷམྨོ དྷམྨཱནུདྷམྨོ, སཱིལསམཱདྷིཔཉྙཱསངྑཱཏསྶ དྷམྨཱནུདྷམྨསྶ པཊིཔཏྟི པཊིཔཛྫནཾ དྷམྨཱནུདྷམྨཔཊིཔཏྟི. སམྨཔྤདྷཱནཱདཱིསུཔི ཨེསེཝ ནཡོ.

ཁ. ཙརིཡཱཝཱརཝཎྞནཱ

༡༩༦. ཙརིཡཱཝཱརེཔི ཨིམིནཱཝ ནཡེན ཨཏྠོ ཝེདིཏབྦོ. ཀེཝལཾ པཋམཝཱརོ ཨིནྡྲིཡཱནཾ ཨུཔྤཱདནཀཱལཝསེན ཝུཏྟོ, ཙརིཡཱཝཱརོ ཨུཔྤནྣཱནཾ ཨཱསེཝནཀཱལཝསེན ཙ པཱརིཔཱུརིཀཱལཝསེན ཙ ཝུཏྟོ. ཙརིཡཱ པཀཏི ཨུསྶནྣཏཱཏི ཧི ཨཏྠཏོ ཨེཀཾ.

ཙཱརཝིཧཱརནིདྡེསཝཎྞནཱ

༡༩༧. ཨིདཱནི ཙརིཡཱསམྦནྡྷེནེཝ ཙཱརཝིཧཱརནིདྡེསཝསེན ཨཔརེན པརིཡཱཡེན ཨིནྡྲིཡཝིདྷཱནཾ ནིདྡིསིཏུཀཱམོ ཙཱརོ ཙ ཝིཧཱརོ ཙཱཏིཨཱདིཀཾ ཨུདྡེསཾ ཨུདྡིསིཏྭཱ ཏསྶ ནིདྡེསམཱཧ. ཏཏྠ ཨུདྡེསེ ཏཱཝ ཡཐཱ ཙརནྟཾ ཝིཧརནྟཾ ཝིཉྙཱུ སབྲཧྨཙཱརཱི གམྦྷཱིརེསུ ཋཱནེསུ ཨོཀཔྤེཡྻུཾ – ཨདྡྷཱ ཨཡམཱཡསྨཱ པཏྟོ ཝཱ པཱཔུཎིསྶཏི ཝཱཏི, ཏཐཱ ཨིནྡྲིཡསམྤནྣསྶ ཙཱརོ ཙ ཝིཧཱརོ ཙ ཝིཉྙཱུཧི སབྲཧྨཙཱརཱིཧི ཨནུབུདྡྷོ ཧོཏི པཊིཝིདྡྷོཏི ཨུདྡེསསྶ སམྦནྡྷོ ཝེདིཏབྦོ. ཨུདྡེསནིདྡེསེ ཙརིཡཱ ཙཱརོཡེཝ. ཙཱརོ ཙརིཡཱཏི ཧི ཨཏྠཏོ ཨེཀཾ. ཏསྨཱ ‘‘ཙཱརོ’’ཏིཔདསྶ ནིདྡེསེ ‘‘ཙརིཡཱ’’ཏི ཝུཏྟཾ. ཨིརིཡཱཔཐཙརིཡཱཏི ཨིརིཡཱཔཐཱནཾ ཙརིཡཱ, པཝཏྟནནྟི ཨཏྠོ. སེསེསུཔི ཨེསེཝ ནཡོ. ཨཱཡཏནཙརིཡཱ པན ཨཱཡཏནེསུ སཏིསམྤཛཉྙཱནཾ ཙརིཡཱ. པཏྟཱིཏི ཕལཱནི. ཏཱནི ཧི པཱཔུཎིཡནྟཱིཏི ‘‘པཏྟཱི’’ཏི ཝུཏྟཱ. སཏྟལོཀསྶ དིཊྛདྷམྨིཀསམྤརཱཡིཀཱ ཨཏྠཱ ལོཀཏྠཱཏི ཨཡཾ ཝིསེསོ.

ཨིདཱནི ཏཱསཾ ཙརིཡཱནཾ བྷཱུམིཾ དསྶེནྟོ ཙཏཱུསུ ཨིརིཡཱཔཐེསཱུཏིཨཱདིམཱཧ. སཏིཔཊྛཱནེསཱུཏི ཨཱརམྨཎསཏིཔཊྛཱནེསུ. སཏིཔཊྛཱནེསུཔི ཝུཙྩམཱནེསུ སཏིཏོ ཨནཉྙཱནི ཝོཧཱརཝསེན ཨཉྙཱནི ཝིཡ ཀཏྭཱ ཝུཏྟཾ. ཨརིཡསཙྩེསཱུཏི པུབྦབྷཱགལོཀིཡསཙྩཉཱཎེན ཝིསུཾ ཝིསུཾ སཙྩཔརིགྒཧཝསེན ཝུཏྟཾ. ཨརིཡམགྒེསུ སཱམཉྙཕལེསཱུཏི ཙ ཝོཧཱརཝསེནེཝ ཝུཏྟཾ. པདེསེཏི ལོཀཏྠཙརིཡཱཡ ཨེཀདེསེ. ནིཔྤདེསཏོ ཧི ལོཀཏྠཙརིཡཾ བུདྡྷཱ ཨེཝ ཀརོནྟི. པུན ཏཱ ཨེཝ ཙརིཡཱཡོ ཀཱརཀཔུགྒལཝསེན དསྶེནྟོ པཎིདྷིསམྤནྣཱནནྟིཨཱདིམཱཧ. ཏཏྠ པཎིདྷིསམྤནྣཱ ནཱམ ཨིརིཡཱཔཐཱནཾ སནྟཏྟཱ ཨིརིཡཱཔཐགུཏྟིཡཱ སམྤནྣཱ ཨཀམྤིཏཨིརིཡཱཔཐཱ བྷིཀྑུབྷཱཝཱནུརཱུཔེན སནྟེན ཨིརིཡཱཔཐེན སམྤནྣཱ. ཨིནྡྲིཡེསུ གུཏྟདྭཱརཱནནྟི ཙཀྑཱདཱིསུ ཚསུ ཨིནྡྲིཡེསུ ཨཏྟནོ ཨཏྟནོ ཝིསཡེ པཝཏྟཨེཀེཀདྭཱརཝསེན གུཏྟཾ དྭཱརཾ ཨེཏེསནྟི གུཏྟདྭཱརཱ. ཏེསཾ གུཏྟདྭཱརཱནཾ. དྭཱརནྟི ཙེཏྠ ཨུཔྤཏྟིདྭཱརཝསེན ཙཀྑཱདཡོ ཨེཝ. ཨཔྤམཱདཝིཧཱརཱིནནྟི སཱིལཱདཱིསུ ཨཔྤམཱདཝིཧཱརཝཏཾ. ཨདྷིཙིཏྟམནུཡུཏྟཱནནྟི ཝིཔསྶནཱཡ པཱདཀབྷཱཝེན ཨདྷིཙིཏྟསངྑཱཏཾ སམཱདྷིམནུཡུཏྟཱནཾ. བུདྡྷིསམྤནྣཱནནྟི ནཱམརཱུཔཝཝཏྠཱནཾ ཨཱདིཾ ཀཏྭཱ ཡཱཝ གོཏྲབྷུ, ཏཱཝ པཝཏྟེན ཉཱཎེན སམྤནྣཱནཾ. སམྨཱཔཊིཔནྣཱནནྟི ཙཏུམགྒཀྑཎེ. ཨདྷིགཏཕལཱནནྟི ཙཏུཕལཀྑཎེ.

ཨདྷིམུཙྩནྟོཏི ཨདྷིམོཀྑཾ ཀརོནྟོ. སདྡྷཱཡ ཙརཏཱིཏི སདྡྷཱཝསེན པཝཏྟཏི. པགྒཎྷནྟོཏི ཙཏུསམྨཔྤདྷཱནཝཱིརིཡེན པདཧནྟོ. ཨུཔཊྛཱཔེནྟོཏི སཏིཡཱ ཨཱརམྨཎཾ ཨུཔཊྛཱཔེནྟོ. ཨཝིཀྑེཔཾ ཀརོནྟོཏི སམཱདྷིཝསེན ཝིཀྑེཔཾ ཨཀརོནྟོ. པཛཱནནྟོཏི ཙཏུསཙྩཔཛཱནནཔཉྙཱཡ པཀཱརེན ཛཱནནྟོ. ཝིཛཱནནྟོཏི ཨིནྡྲིཡསམྤཡུཏྟཛཝནཔུབྦངྒམེན ཨཱཝཛྫནཝིཉྙཱཎེན ཨཱརམྨཎཾ ཝིཛཱནནྟོ. ཝིཉྙཱཎཙརིཡཱཡཱཏི ཨཱཝཛྫནཝིཉྙཱཎཙརིཡཝསེན. ཨེཝཾ པཊིཔནྣསྶཱཏི སཧཛཝནཱཡ ཨིནྡྲིཡཙརིཡཱཡ པཊིཔནྣསྶ. ཀུསལཱ དྷམྨཱ ཨཱཡཱཔེནྟཱིཏི སམཐཝིཔསྶནཱཝསེན པཝཏྟཱ ཀུསལཱ དྷམྨཱ བྷུསཾ ཡཱཔེནྟི, པཝཏྟནྟཱིཏི ཨཏྠོ. ཨཱཡཏནཙརིཡཱཡཱཏི ཀུསལཱནཾ དྷམྨཱནཾ བྷུསཾ ཡཏནཙརིཡཱཡ, གྷཊནཙརིཡཱཡ པཝཏྟནཙརིཡཱཡཱཏི ཝུཏྟཾ ཧོཏི. ཝིསེསམདྷིགཙྪཏཱིཏི ཝིཀྑམྦྷནཏདངྒསམུཙྪེདཔཊིཔྤསྶདྡྷིཝསེན ཝིསེསཾ ཨདྷིགཙྪཏི. དསྶནཙརིཡཱདཡོ ཝུཏྟཏྠཱཡེཝ.

སདྡྷཱཡ ཝིཧརཏཱིཏིཨཱདཱིསུ སདྡྷཱདིསམངྒིསྶ ཨིརིཡཱཔཐཝིཧཱརོ དཊྛབྦོ. ཨནུབུདྡྷོཏི ཨནུམཱནབུདྡྷིཡཱ. པཊིཝིདྡྷོཏི པཙྩཀྑབུདྡྷིཡཱ. ཡསྨཱ ཨདྷིམོཀྑཊྛཱདཱིསུ ཨནུབུདྡྷེསུ པཊིཝིདྡྷེསུ ཙ ཙཱརོ ཙ ཝིཧཱརོ ཙ ཨནུབུདྡྷོ ཧོཏི པཊིཝིདྡྷོ, ཏསྨཱ ཨནུབོདྷཔཊིཝེདྷེསུ ཨདྷིམོཀྑཊྛཱདཡོ ཙ ནིདྡིཊྛཱ.

ཨེཝཾ སདྡྷཱཡ ཙརནྟནྟིཨཱདཱིསུ ཨེཝནྟི ཝུཏྟཔྤཀཱརཾ ནིདྡིསནྟོ ཡཐཱསདྡསྶ ཨཏྠཾ ནིདྡིསཏི. ཝིཉྙཱུཏིཨཱདཱིསུཔི ཡཐཱསབྷཱཝཾ ཛཱནནྟཱིཏི ཝིཉྙཱུ. ཝིཉྙཱཏཾ སབྷཱཝཾ ཝིབྷཱཝེནྟི པཱཀཊཾ ཀརོནྟཱིཏི ཝིབྷཱཝཱི. ཨསནི ཝིཡ སིལུཙྩཡེ ཀིལེསེ མེདྷཏི ཧིཾསཏཱིཏི མེདྷཱ, ཁིཔྤཾ གཧཎདྷཱརཎཊྛེན ཝཱ མེདྷཱ, མེདྷཱ ཨེཏེསཾ ཨཏྠཱིཏི མེདྷཱཝཱི. ཉཱཎགཏིཡཱ པཎྜནྟི གཙྪནྟི པཝཏྟནྟཱིཏི པཎྜིཏཱ. བུདྡྷིསམྤདཱཡ སམནྣཱགཏཏྟཱ བུདྡྷིསམྤནྣཱ. སཧ བྲཧྨཾ ཙརིཡཾ ཨུཏྟམཾ པཊིཔདཾ ཙརནྟཱིཏི སབྲཧྨཙཱརིནོ. ཨཔལོཀནཀམྨཱདིཙཏུབྦིདྷཾ ཀམྨཾ ཨེཀཏོ ཀརཎཝསེན ཨེཀཾ ཀམྨཾ. ཏཐཱ པཉྩཝིདྷོ པཱཏིམོཀྑུདྡེསོ ཨེཀུདྡེསོ. སམཱ སིཀྑཱ ཨེཏེསནྟི སམསིཀྑཱ, སམསིཀྑཱནཾ བྷཱཝོ སམསིཀྑཏཱ. སམསིཀྑཱཏཱཏིཔི པཋནྟི. ཡེསཾ ཨེཀཾ ཀམྨཾ ཨེཀོ ཨུདྡེསོ སམསིཀྑཏཱ, ཏེ སབྲཧྨཙཱརཱིཏི ཝུཏྟཾ ཧོཏི. ‘‘ཛྷཱནཱནཱི’’ཏི ཝཏྟབྦེ ཛྷཱནཱཏི ལིངྒཝིཔལླཱསོ ཀཏོ. ཝིམོཀྑཱཏི ཏཡོ ཝཱ ཨཊྛ ཝཱ ཝིམོཀྑཱ. སམཱདྷཱིཏི སཝིཏཀྐསཝིཙཱརཨཝིཏཀྐཝིཙཱརམཏྟཨཝིཏཀྐཱཝིཙཱརཱ ཏཡོ སམཱདྷཱི. སམཱཔཏྟིཡོཏི སུཉྙཏཱནིམིཏྟཱཔྤཎིཧིཏཱ. ཨབྷིཉྙཱཡོཏི ཚ ཨབྷིཉྙཱ.

ཨེཀོ ཨཾསོ བྷཱགོ, ན དུཏིཡོཏི ཨེཀཾསོ, ཨེཀཾསསྶ ཨཏྠསྶ ཝཙནཾ ཨེཀཾསཝཙནཾ. ཨེཝཾ སེསེསུཔི ཡོཛནཱ ཀཱཏབྦཱ. ཝིསེསཏོ པན སམཾ, སམནྟཱ ཝཱ སེཏི པཝཏྟཏཱིཏི སཾསཡོ, ནཏྠེཏྠ སཾསཡོཏི ནིསྶཾསཡོ. ཨེཀསྨིཾཡེཝ ཨནིཙྪཡཏཱ ཧུཏྭཱ ཨིཏརམྤི ཀངྑཏཱིཏི ཀངྑཱ, ནཏྠེཏྠ ཀངྑཱཏི ནིཀྐངྑོ. དྭིདྷཱ བྷཱཝོ དྭེཛ྄ཛྷཾ, ནཏྠེཏྠ དྭེཛ྄ཛྷནྟི ཨདྭེཛ྄ཛྷོ. དྭིདྷཱ ཨེལཡཏི ཀམྤེཏཱིཏི དྭེལ༹ྷཀཾ, ནཏྠེཏྠ དྭེལ༹ྷཀནྟི ཨདྭེལ༹ྷཀོ. ནིཡོགེན ནིཡམེན ཝཙནཾ ནིཡོགཝཙནཾ. ནིཡྻོགཝཙནནྟིཔི པཋནྟི. ཨཔཎྞཀསྶ ཨཝིརདྡྷསྶ ནིཡྻཱནིཀསྶ ཨཏྠསྶ ཝཙནཾ ཨཔཎྞཀཝཙནཾ. ཨཝཏྠཱཔནཝཙནནྟི ནིཙྪཡཝཙནཾ. སབྦམྤི ཧེཏཾ ཝིཙིཀིཙྪཱབྷཱཝསྶ ཝེཝཙནཾ. པིཡསྶ ཨཏྠསྶ སབྦྷཱཝཏོ ཝཙནཾ, པིཡམེཝཱཏི པིཡཝཙནཾ. ཏཐཱ གརུཝཙནཾ. སཧ གཱརཝེན གརུབྷཱཝེན སགཱརཝཾ. པཏིསྶཡནཾ པཏིསྶཡོ པརཾ གརུཾ ཀཏྭཱ ནིསྶཡནཾ ཨཔསྶཡནནྟི ཨཏྠོ. པཏིསྶཝནཾ ཝཱ པཏིསྶཝོ, ནིཝཱཏཝུཏྟིཏཱཡ པརཝཙནསཝནནྟི ཨཏྠོ. ཨུབྷཡཐཱཔི པརཛེཊྛཀབྷཱཝསྶེཏཾ ནཱམཾ. སཧ གཱརཝེན ཝཏྟཏཱིཏི སགཱརཝཾ. སཧ པཏིསྶཡེན, པཏིསྶཝེན ཝཱ ཝཏྟཏཱིཏི སཔྤཏིསྶཡཾ. ‘‘སཔྤཏིསྶཝ’’ནྟི ཝཱ ཝཏྟབྦེ ཡ-ཀཱརཾ, ཝ-ཀཱརཾ ཝཱ ལོཔཾ ཀཏྭཱ ‘‘སཔྤཏིསྶ’’ནྟི ཝུཏྟཾ. ཨདྷིཀཾ ཝིསིཊྛཾ ཝཙནཾ ཨདྷིཝཙནཾ, སགཱརཝཉྩ ཏཾ སཔྤཏིསྶཉྩཱཏི སགཱརཝསཔྤཏིསྶཾ, སགཱརཝསཔྤཏིསྶཾ ཨདྷིཝཙནཾ སགཱརཝསཔྤཏིསྶཱདྷིཝཙནཾ. ཨུབྷཡཏྠཱཔི ཝེཝཙནཝིཀཔྤནཱནཏྟཝསེན པུནཔྤུནཾ ཨེཏནྟི ཝུཏྟཾ. པཏྟོ ཝཱ པཱཔུཎིསྶཏི ཝཱཏི ཛྷཱནཱདཱིནིཡེཝཱཏི.

ཏཏིཡསུཏྟནྟནིདྡེསཝཎྞནཱ ནིཊྛིཏཱ.

༤. ཙཏུཏྠསུཏྟནྟནིདྡེསཝཎྞནཱ

༡༩༨. པུན པཋམསུཏྟམེཝ ནིཀྑིཔིཏྭཱ ཨཔརེན ཨཱཀཱརེན ཨིནྡྲིཡཱནི ནིདྡིསཏི. ཏཏྠ ཀཏིཧཱཀཱརེཧི ཀེནཊྛེན དཊྛབྦཱནཱིཏི ཀཏིཧི ཨཱཀཱརེཧི དཊྛབྦཱནི. ཀེནཊྛེན དཊྛབྦཱནཱིཏི དཊྛབྦཱཀཱརེ ཙ དཊྛབྦཊྛཉྩ པུཙྪཏི. ཚཧཱཀཱརེཧི ཏེནཊྛེན དཊྛབྦཱནཱིཏི ཚཧི ཨཱཀཱརེཧི དཊྛབྦཱནི, ཏེནེཝ ཚཨཱཀཱརསངྑཱཏེནཊྛེན དཊྛབྦཱནི. ཨཱདྷིཔཏེཡྻཊྛེནཱཏི ཨདྷིཔཏིབྷཱཝཊྛེན. ཨཱདིཝིསོདྷནཊྛེནཱཏི ཀུསལཱནཾ དྷམྨཱནཾ ཨཱདིབྷཱུཏསྶ སཱིལསྶ ཝིསོདྷནཊྛེན. ཨདྷིམཏྟཊྛེནཱཏི བལཝཊྛེན. བལཝཉྷི ཨདྷིཀཱ མཏྟཱ པམཱཎཾ ཨསྶཱཏི ཨདྷིམཏྟནྟི ཝུཙྩཏི. ཨདྷིཊྛཱནཊྛེནཱཏི པཏིཊྛཱནཊྛེན. པརིཡཱདཱནཊྛེནཱཏི ཁེཔནཊྛེན. པཏིཊྛཱཔཀཊྛེནཱཏི པཏིཊྛཱཔནཊྛེན.

ཀ. ཨཱདྷིཔཏེཡྻཊྛནིདྡེསཝཎྞནཱ

༡༩༩. ཨཱདྷིཔཏེཡྻཊྛནིདྡེསེ ཨསྶདྡྷིཡཾ པཛཧཏོཏིཨཱདི ཨེཀེཀསྶེཝ ཨིནྡྲིཡསྶ པཊིཔཀྑཔཛཧནཝཙནཾ ཨེཀཀྑཎེཔི ཨཏྟནོ ཨཏྟནོ པཊིཔཀྑཔཧཱནཀིཙྩསཱདྷནེ ཨདྷིཔཏིབྷཱཝསཱདྷནཏྠཾ ཝུཏྟཾ. སེསཱནི ཙཏྟཱརི ཨིནྡྲིཡཱནི ཏཾསམྤཡུཏྟཱནེཝ ཝུཏྟཱནི. ནཱནཱཀྑཎེསུ ཝཱ ཨེཀེཀཾ ཨིནྡྲིཡཾ དྷུརཾ ཀཏྭཱ ཏསྶ ཏསྶ པཊིཔཀྑསྶ ཏཾ ཏཾ ཨིནྡྲིཡཾ ཛེཊྛཀཾ ཀཏྭཱ སེསཱནི ཏདནྭཡཱནི ཀཏྭཱ ཝུཏྟནྟིཔི ཝེདིཏབྦཾ. ཀཱམཙྪནྡཾ པཛཧཏོཏིཨཱདི པན ཨེཀཀྑཎཝསེནེཝ ཝུཏྟཾ.

ཁ. ཨཱདིཝིསོདྷནཊྛནིདྡེསཝཎྞནཱ

༢༠༠. ཨཱདིཝིསོདྷནཊྛནིདྡེསེ ཨསྶདྡྷིཡསཾཝརཊྛེན སཱིལཝིསུདྡྷཱིཏི ཨསྶདྡྷིཡསྶ ནིཝཱརཎཊྛེན ཝིརཏིཨཏྠེན སཱིལམལཝིསོདྷནཏོ སཱིལཝིསུདྡྷི ནཱམ. སདྡྷིནྡྲིཡསྶ ཨཱདིཝིསོདྷནཱཏི སདྡྷིནྡྲིཡསྶ ཨུཔནིསྶཡཝསེན ཨཱདིབྷཱུཏསྶ སཱིལསྶ ཝིསོདྷནཱ. ཨིམིནཱཝ ནཡེན སེསཱནིཔི ཀཱམཙྪནྡཱདིསཾཝརཎམཱུལཀཱནི ཙ ཨིནྡྲིཡཱནི ཝེདིཏབྦཱནི.

ག. ཨདྷིམཏྟཊྛནིདྡེསཝཎྞནཱ

༢༠༡. ཨདྷིམཏྟཊྛནིདྡེསེ སདྡྷིནྡྲིཡསྶ བྷཱཝནཱཡ ཚནྡོ ཨུཔྤཛྫཏཱིཏི སདྡྷསྶ པུགྒལསྶ སདྡྷཱཔཊིསཾཡུཏྟཾ དྷམྨཾ སུཏྭཱ ཝཱ སདྡྷིནྡྲིཡབྷཱཝནཱཡ ཨསྶཱདཾ དིསྭཱ ཝཱ སདྡྷིནྡྲིཡེ ཀུསལོ དྷམྨཙྪནྡོ ཛཱཡཏི. པཱམོཛྫཾ ཨུཔྤཛྫཏཱིཏི ཚནྡཛཱཏཏྟཱ དུབྦལཔཱིཏི ཨུཔྤཛྫཏི. པཱིཏི ཨུཔྤཛྫཏཱིཏི པམུདིཏཏྟཱ བལཝཔཱིཏི ཨུཔྤཛྫཏི. པསྶདྡྷི ཨུཔྤཛྫཏཱིཏི པཱིཏིཡཱ པཱིཎིཏཏྟཱ ཀཱཡཙིཏྟཔསྶདྡྷི ཨུཔྤཛྫཏི. སུཁཾ ཨུཔྤཛྫཏཱིཏི པསྶདྡྷཀཱཡཙིཏྟཏྟཱ ཙེཏསིཀཾ སུཁཾ ཨུཔྤཛྫཏི. ཨོབྷཱསོ ཨུཔྤཛྫཏཱིཏི སུཁེན ཨབྷིསནྣཏྟཱ ཉཱཎོབྷཱསོ ཨུཔྤཛྫཏི. སཾཝེགོ ཨུཔྤཛྫཏཱིཏི ཉཱཎོབྷཱསེན ཝིདིཏསངྑཱརཱདཱིནཝཏྟཱ སངྑཱརཔཝཏྟིཡཾ སཾཝེགོ ཨུཔྤཛྫཏི. སཾཝེཛེཏྭཱ ཙིཏྟཾ སམཱདཧཏཱིཏི སཾཝེགཾ ཨུཔྤཱདེཏྭཱ ཏེནེཝ སཾཝེགེན ཙིཏྟཾ སམཱཧིཏཾ ཀརོཏི. སཱདྷུཀཾ པགྒཎྷཱཏཱིཏི ལཱིནུདྡྷཏབྷཱཝཾ མོཙེཏྭཱ སུཊྛུ པགྒཎྷཱཏི. སཱདྷུཀཾ ཨཛ྄ཛྷུཔེཀྑཏཱིཏི ཝཱིརིཡསྶ སམཾ ཧུཏྭཱ པཝཏྟཏྟཱ པུན ཝཱིརིཡསམཏཱནིཡོཛནེ བྱཱཔཱརཾ ཨཀརོནྟོ ཏཏྲམཛ྄ཛྷཏྟུཔེཀྑཱཝསེན སཱདྷུཀཾ ཨཛ྄ཛྷུཔེཀྑཏི ནཱམ. ཨུཔེཀྑཱཝསེནཱཏི སམཝཱཧིཏལཀྑཎཱཡ ཏཏྲམཛ྄ཛྷཏྟུཔེཀྑཱཡ ཝསེན. ནཱནཏྟཀིལེསེཧཱིཏི ཝིཔསྶནཱཡ པཊིཔཀྑབྷཱུཏེཧི ནཱནཱསབྷཱཝེཧི ཀིལེསེཧི. ཝིམོཀྑཝསེནཱཏི བྷངྒཱནུཔསྶནཏོ པཊྛཱཡ ནཱནཏྟཀིལེསེཧི ཝིམུཙྩནཝསེན. ཝིམུཏྟཏྟཱཏི ནཱནཏྟཀིལེསེཧི ཝིམུཏྟཏྟཱ.

ཏེ དྷམྨཱཏི ཚནྡཱདཡོ དྷམྨཱ. ཨེཀརསཱ ཧོནྟཱིཏི ཝིམུཏྟིརསེན ཨེཀརསཱ ཧོནྟི. བྷཱཝནཱཝསེནཱཏི ཨེཀརསབྷཱཝནཱཝསེན. ཏཏོ པཎཱིཏཏརེ ཝིཝཊྚནྟཱིཏི ཏེན ཀཱརཎེན ཝིཔསྶནཱརམྨཎཏོ པཎཱིཏཏརེ ནིབྦཱནཱརམྨཎེ ཝིཝཊྚནཱནུཔསྶནཱསངྑཱཏེན གོཏྲབྷུཉཱཎེན ཚནྡཱདཡོ དྷམྨཱ ནིཝཏྟནྟི, སངྑཱརཱརམྨཎཏོ ཨཔགནྟྭཱ ནིབྦཱནཱརམྨཎེ པཝཏྟནྟཱིཏི ཨཏྠོ. ཝིཝཊྚནཱཝསེནཱཏི ཨེཝཾ གོཏྲབྷུཁཎེ སངྑཱརཱརམྨཎཏོ ཝིཝཊྚནཝསེན. ཝིཝཊྚིཏཏྟཱ ཏཏོ ཝོསཛྫཏཱིཏི མགྒསམངྒིཔུགྒལོ མགྒསྶ ཨུཔྤཱདཀྑཎེཡེཝ དུབྷཏོཝུཊྛཱནཝསེན ཝིཝཊྚིཏཏྟཱ ཏེནེཝ ཀཱརཎེན ཀིལེསེ ཙ ཁནྡྷེ ཙ ཝོསཛྫཏི. ཝོསཛྫིཏཏྟཱ ཏཏོ ནིརུཛ྄ཛྷནྟཱིཏི མགྒསྶ ཨུཔྤཱདཀྑཎེཡེཝ ཀིལེསེ ཙ ཁནྡྷེ ཙ ཝོསཛྫིཏཏྟཱ ཏེནེཝ ཀཱརཎེན ཀིལེསཱ ཙ ཁནྡྷཱ ཙ ཨནུཔྤཏྟིནིརོདྷཝསེན ནིརུཛ྄ཛྷནྟི. ཝོསཛྫིཏཏྟཱཏི ཙ ཨཱསཾསཱཡཾ བྷཱུཏཝཙནཾ ཀཏཾ. ཀིལེསནིརོདྷེ སཏི ཁནྡྷནིརོདྷསབྦྷཱཝཏོ ཙ ཁནྡྷནིརོདྷོ ཝུཏྟོ. ནིརོདྷཝསེནཱཏི ཡཐཱཝུཏྟནིརོདྷཝསེན. ཏསྶེཝ མགྒསྶ ཨུཔྤཱདཀྑཎེ དྭེ ཝོསགྒེ དསྶེཏུཀཱམོ ནིརོདྷཝསེན དྭེ ཝོསགྒཱཏིཨཱདིམཱཧ. དྭེཔི ཧེཊྛཱ ཝུཏྟཏྠཱ ཨེཝ. ཨསྶདྡྷིཡསྶ པཧཱནཱཡ ཚནྡོ ཨུཔྤཛྫཏཱིཏིཨཱདཱིསུཔི ཨིམིནཱཝ ནཡེན ཝིཏྠཱརཏོ ཨཏྠོ ཝེདིཏབྦོ. ཝཱིརིཡིནྡྲིཡཱདིམཱུལཀེསུཔི ཝཱརེསུ ཨེསེཝ ནཡོ. ཨིམིནཱཝ ནཡེན ཨདྷིཊྛཱནཊྛནིདྡེསོཔི ཝིཏྠཱརཏོ ཝེདིཏབྦོ. ཀེཝལཉྷེཏྠ ཨདྷིཊྛཱཏཱིཏི ཝིསེསོ, པཏིཊྛཱཏཱིཏི ཨཏྠོ.

གྷ-ང. པརིཡཱདཱནཊྛཔཏིཊྛཱཔཀཊྛནིདྡེསཝཎྞནཱ

༢༠༢-༢༠༣. པརིཡཱདཱནཊྛནིདྡེསེ པརིཡཱདིཡཏཱིཏི ཁེཔེཏི. པཏིཊྛཱཔཀཊྛནིདྡེསེ སདྡྷོ སདྡྷིནྡྲིཡཾ ཨདྷིམོཀྑེ པཏིཊྛཱཔེཏཱིཏི སདྡྷཱསམྤནྣོ ‘‘སབྦེ སངྑཱརཱ ཨནིཙྩཱ དུཀྑཱ ཨནཏྟཱ’’ཏི ཨདྷིམུཙྩནྟོ སདྡྷིནྡྲིཡཾ ཨདྷིམོཀྑེ པཏིཊྛཱཔེཏི. ཨིམིནཱ པུགྒལཝིསེསེན ཨིནྡྲིཡབྷཱཝནཱཝིསེསོ ནིདྡིཊྛོ. སདྡྷསྶ སདྡྷིནྡྲིཡཾ ཨདྷིམོཀྑེ པཏིཊྛཱཔེཏཱིཏི སདྡྷཱསམྤནྣསྶ པུགྒལསྶ སདྡྷིནྡྲིཡཾ ཏཾཡེཝ སདྡྷཾ པཏིཊྛཱཔེཏི. ཏཐཱ ཨདྷིམུཙྩནྟཾ ཨདྷིམོཀྑེ པཏིཊྛཱཔེཏཱིཏི. ཨིམིནཱ ཨིནྡྲིཡབྷཱཝནཱཝིསེསེན པུགྒལཝིསེསོ ནིདྡིཊྛོ. ཨེཝཾ ཙིཏྟཾ པགྒཎྷནྟོ པགྒཧེ པཏིཊྛཱཔེཏི, སཏིཾ ཨུཔཊྛཱཔེནྟོ ཨུཔཊྛཱནེ པཏིཊྛཱཔེཏི, ཙིཏྟཾ སམཱདཧནྟོ ཨཝིཀྑེཔེ པཏིཊྛཱཔེཏི, ཨནིཙྩཾ དུཀྑཾ ཨནཏྟཱཏི པསྶནྟོ དསྶནེ པཏིཊྛཱཔེཏཱིཏི སེསེསུཔི ཡོཛནཱ ཝེདིཏབྦཱ. ཡོགཱཝཙརོཏི སམཐཡོགེ, ཝིཔསྶནཱཡོགེ ཝཱ ཨཝཙརཏཱིཏི ཡོགཱཝཙརོ. ཨཝཙརཏཱིཏི པཝིསིཏྭཱ ཙརཏཱིཏི.

ཙཏུཏྠསུཏྟནྟནིདྡེསཝཎྞནཱ ནིཊྛིཏཱ.

༥. ཨིནྡྲིཡསམོདྷཱནཝཎྞནཱ

༢༠༤. ཨིདཱནི སམཱདྷིཾ བྷཱཝཡཏོ ཝིཔསྶནཾ བྷཱཝཡཏོ ཙ ཨིནྡྲིཡསམོདྷཱནཾ དསྶེཏུཀཱམོ པཋམཾ ཏཱཝ ཨུཔཊྛཱནཀོསལླཔྤབྷེདཾ ནིདྡིསིཏུཾ པུཐུཛྫནོ སམཱདྷིཾ བྷཱཝེནྟོཏིཨཱདིམཱཧ. ཏཏྠ པུཐུཛྫནོ སམཱདྷིཾ བྷཱཝེནྟོཏི ནིབྦེདྷབྷཱགིཡཾ སམཱདྷིཾ བྷཱཝེནྟོ. སེཀྑསྶ ཝཱིཏརཱགསྶ ཙ པན ལོཀུཏྟརོཔི སམཱདྷི ལབྦྷཏི. ཨཱཝཛྫིཏཏྟཱཏི ཀསིཎཱདིནིམིཏྟསྶ ཨཱཝཛྫིཏཏྟཱ, ཀསིཎཱདིཔརིཀམྨཾ ཀཏྭཱ ཏཏྠ ཨུཔྤཱདིཏནིམིཏྟཏྟཱཏི ཝུཏྟཾ ཧོཏི. ཨཱརམྨཎཱུཔཊྛཱནཀུསལོཏི ཏསྶ ཨུཔྤཱདིཏསྶ ནིམིཏྟསྶེཝ ཨུཔཊྛཱནེ ཀུསལོ. སམཐནིམིཏྟཱུཔཊྛཱནཀུསལོཏི ཨཙྩཱརདྡྷཝཱིརིཡཏཱདཱིཧི ཨུདྡྷཏེ ཙིཏྟེ པསྶདྡྷིསམཱདྷིཨུཔེཀྑཱསམྦོཛ྄ཛྷངྒབྷཱཝནཱཝསེན ཙིཏྟོཔསམནིམིཏྟསྶ ཨུཔཊྛཱནེ ཀུསལོ. པགྒཧནིམིཏྟཱུཔཊྛཱནཀུསལོཏི ཨཏིསིཐིལཝཱིརིཡཏཱདཱིཧི ལཱིནེ ཙིཏྟེ དྷམྨཝིཙཡཝཱིརིཡཔཱིཏིསམྦོཛ྄ཛྷངྒབྷཱཝནཱཝསེན ཙིཏྟཔགྒཧནིམིཏྟསྶ ཨུཔཊྛཱནེ ཀུསལོ. ཨཝིཀྑེཔཱུཔཊྛཱནཀུསལོཏི ཨནུདྡྷཏཱལཱིནཙིཏྟསྶ སམྤཡུཏྟསྶ སམཱདྷིསྶ ཨུཔཊྛཱནེ ཀུསལོ. ཨོབྷཱསཱུཔཊྛཱནཀུསལོཏི པཉྙཱཔཡོགམནྡཏཱཡ ནིརསྶཱདེ ཙིཏྟེ ཨཊྛསཾཝེགཝཏྠུཔཙྩཝེཀྑཎེན ཙིཏྟཾ སཾཝེཛེཏྭཱ ཉཱཎོབྷཱསསྶ ཨུཔཊྛཱནེ ཀུསལོ. ཨཊྛ སཾཝེགཝཏྠཱུནི ནཱམ ཛཱཏིཛརཱབྱཱདྷིམརཎཱནི ཙཏྟཱརི, ཨཔཱཡདུཀྑཾ པཉྩམཾ, ཨཏཱིཏེ ཝཊྚམཱུལཀཾ དུཀྑཾ, ཨནཱགཏེ ཝཊྚམཱུལཀཾ དུཀྑཾ, པཙྩུཔྤནྣེ ཨཱཧཱརཔརིཡེཊྛིམཱུལཀཾ དུཀྑནྟི. སམྤཧཾསནཱུཔཊྛཱནཀུསལོཏི ཨུཔསམསུཁཱནདྷིགམེན ནིརསྶཱདེ ཙིཏྟེ བུདྡྷདྷམྨསངྒྷགུཎཱནུསྶརཎེན ཙིཏྟཾ པསཱདེནྟོ སམྤཧཾསནསྶ ཨུཔཊྛཱནེ ཀུསལོ. ཨུཔེཀྑཱུཔཊྛཱནཀུསལོཏི ཨུདྡྷཏཱདིདོསཝིརཧིཏེ ཙིཏྟེ ནིགྒཧཔགྒཧཱདཱིསུ བྱཱཔཱརཱབྷཱཝཀརཎེན ཨུཔེཀྑཱཡ ཨུཔཊྛཱནེ ཀུསལོ. སེཀྑོཏི ཏིསྶོ སིཀྑཱ སིཀྑཏཱིཏི སེཀྑོ. ཨེཀཏྟཱུཔཊྛཱནཀུསལོཏི སཀྐཱཡདིཊྛཱདཱིནཾ པཧཱིནཏྟཱ ནེཀྑམྨཱདིནོ ཨེཀཏྟསྶ ཨུཔཊྛཱནེ ཀུསལོ.

ཝཱིཏརཱགོཏི སབྦསོ པཧཱིནརཱགཏྟཱ ཝཱིཏརཱགོ ཁཱིཎཱསཝོ. ཉཱཎཱུཔཊྛཱནཀུསལོཏི ཨརཧཱ དྷམྨེསུ ཝིགཏསམྨོཧཏྟཱ ཏཏྠ ཏཏྠ ཨསམྨོཧཉཱཎསྶ ཨུཔཊྛཱནེ ཀུསལོ. ཝིམུཏྟཱུཔཊྛཱནཀུསལོཏི ཨརཧཏྟཕལཝིམུཏྟིཡཱ ཨུཔཊྛཱནེ ཀུསལོ. ཝིམུཏྟཱིཏི ཧི སབྦཀིལེསེཧི ཝིམུཏྟཏྟཱ ཨརཧཏྟཕལཝིམུཏྟི ཨདྷིཔྤེཏཱ.

༢༠༥. ཝིཔསྶནཱབྷཱཝནཱཡ ཨུཔཊྛཱནཱནུཔཊྛཱནེསུ ཨནིཙྩཏོཏིཨཱདཱིནི ནིཙྩཏོཏིཨཱདཱིནི ཙ སཱིལཀཐཱཡཾ ཝུཏྟནཡེནེཝ ཝེདིཏབྦཱནི. པཱཋཏོ པན ‘‘ཨཱཡཱུཧནཱནུཔཊྛཱནཀུསལོ ཝིཔརིཎཱམཱུཔཊྛཱནཀུསལོ ཨནིམིཏྟཱུཔཊྛཱནཀུསལོ ནིམིཏྟཱནུཔཊྛཱནཀུསལོ ཨཔྤཎིཧིཏཱུཔཊྛཱནཀུསལོ པཎིདྷིཨནུཔཊྛཱནཀུསལོ ཨབྷིནིཝེསཱནུཔཊྛཱནཀུསལོ’’ཏི ཨེཏེསུ སཱམིཝཙནེན སམཱསཔདཙྪེདོ ཀཱཏབྦོ. སེསེསུ པན ནིསྶཀྐཝཙནེན པཱཋོ.

༢༠༦. སུཉྙཏཱུཔཊྛཱནཀུསལོཏི པནེཏྠ སུཉྙཏོ ཨུཔཊྛཱནཀུསལོཏི ཝཱ སུཉྙཏཱཡ ཨུཔཊྛཱནཀུསལོཏི ཝཱ པདཙྪེདོ ཀཱཏབྦོ. ཡསྨཱ པན ནིབྦིདཱཝིརཱགནིརོདྷཔཊིནིསྶགྒཱནུཔསྶནཱ ཨདྷིཔཉྙཱདྷམྨཝིཔསྶནཱ ཡཐཱབྷཱུཏཉཱཎདསྶནཾ པཊིསངྑཱནུཔསྶནཱ ཝིཝཊྚནཱནུཔསྶནཱཏི ཨིམཱ ཨཊྛ མཧཱཝིཔསྶནཱ ཨཏྟནོ སབྷཱཝཝིསེསེན ཝིསེསིཏཱ, ན ཨཱརམྨཎཝིསེསེན, ཏསྨཱ ཨིམཱསཾ ཨཊྛནྣཾ ‘‘ཨནིཙྩཏོ ཨུཔཊྛཱནཀུསལོ ཧོཏཱི’’ཏིཨཱདཱིནི ཝཙནཱནི ཝིཡ ‘‘ནིབྦིདཱཏོ ཨུཔཊྛཱནཀུསལོ ཧོཏཱི’’ཏིཨཱདཱིནི ཝཙནཱནི ན ཡུཛྫནྟི. ཏསྨཱ ཨེཝ ཨིམཱ ཨཊྛ ན ཡོཛིཏཱ. ཨཱདཱིནཝཱནུཔསྶནཱ པན ‘‘སུཉྙཏཱུཔཊྛཱནཀུསལོ ཧོཏི, ཨབྷིནིཝེསཱནུཔཊྛཱནཀུསལོ ཧོཏཱི’’ཏི ཨིམིནཱ ཡུགལཀཝཙནེནེཝ ཨཏྠཏོ ‘‘ཨཱདཱིནཝཏོ ཨུཔཊྛཱནཀུསལོ ཧོཏི, ཨཱལཡཱབྷིནིཝེསཱནུཔཊྛཱནཀུསལོ ཧོཏཱི’’ཏི ཡོཛིཏཱཝ ཧོཏཱིཏི སརཱུཔེན ན ཡོཛིཏཱ. ཨིཏི པུརིམཱ ཙ ཨཊྛ, ཨཡཉྩ ཨཱདཱིནཝཱནུཔསྶནཱཏི ཨཊྛཱརསསུ མཧཱཝིཔསྶནཱསུ ཨིམཱ ནཝ ཨཡོཛེཏྭཱ ཨིཏརཱ ཨེཝ ནཝ ཡོཛིཏཱཏི ཝེདིཏབྦཱ. ཉཱཎཱུཔཊྛཱནཀུསལོཏི སེཀྑོ ཝིཔསྶནཱུཔཀྐིལེསཱནཾ ཨབྷཱཝཏོ ཝིཔསྶནཱབྷཱཝནཱཡ ཉཱཎསྶ ཨུཔཊྛཱནེ ཀུསལོ. སམཱདྷིབྷཱཝནཱཡ པན ནིཀནྟིསབྦྷཱཝཏོ ཉཱཎཱུཔཊྛཱནེ ཀུསལོཏི ན ཝུཏྟོ.

ཝིསཉྙོགཱུཔཊྛཱནཀུསལོཏི ‘‘ཀཱམཡོགཝིསཉྙོགོ བྷཝཡོགཝིསཉྙོགོ དིཊྛིཡོགཝིསཉྙོགོ ཨཝིཛྫཱཡོགཝིསཉྙོགོ’’ཏི (དཱི. ནི. ༣.༣༡༢) ཙཏུདྷཱ ཝུཏྟསྶ ཝིསཉྙོགསྶ ཨུཔཊྛཱནེ ཀུསལོ. སཉྙོགཱནུཔཊྛཱནཀུསལོཏི ཀཱམཡོགབྷཝཡོགདིཊྛིཡོགཱཝིཛྫཱཡོགཝསེན ཙཏུདྷཱ ཝུཏྟསྶ སཉྙོགསྶ ཨནུཔཊྛཱནེ ཀུསལོ. ནིརོདྷཱུཔཊྛཱནཀུསལོཏི ‘‘པུན ཙཔརཾ, བྷིཀྑཝེ, ཁཱིཎཱསཝསྶ བྷིཀྑུནོ ནིབྦཱནནིནྣཾ ཙིཏྟཾ ཧོཏི ནིབྦཱནཔོཎཾ ནིབྦཱནཔབྦྷཱརཾ ཝིཝེཀཊྛཾ ནེཀྑམྨཱབྷིརཏཾ བྱནྟཱིབྷཱུཏཾ སབྦསོ ཨཱསཝཊྛཱནིཡེཧི དྷམྨེཧཱི’’ཏི (ཨ. ནི. ༡༠.༩༠; པཊི. མ. ༢.༤༤ ཨཏྠཏོ སམཱནཾ) ཝུཏྟཁཱིཎཱསཝབལཝསེན ནིབྦཱནནིནྣཙིཏྟཏྟཱ ཁཱིཎཱསཝོཝ ནིརོདྷསངྑཱཏསྶ ནིབྦཱནསྶ ཨུཔཊྛཱནེ ཀུསལོ.

ཨཱརམྨཎཱུཔཊྛཱནཀུསལཝསེནཱཏིཨཱདཱིསུ ཀུསལནྟི ཉཱཎཾ. ཉཱཎམྤི ཧི ཀུསལཔུགྒལཡོགཏོ ཀུསལཾ ཡཐཱ པཎྜིཏཔུགྒལཡོགཏོ ‘‘པཎྜིཏཱ དྷམྨཱ’’ཏི (དྷ. ས. དུཀམཱཏིཀཱ ༡༠༣). ཏསྨཱ ཀོསལླཝསེནཱཏི ཨཏྠོ.

༢༠༧. ཨིདཱནི ཙཏུསཊྛིཡཱ ཨཱཀཱརེཧཱིཏིཨཱདི ཉཱཎཀཐཱཡཾ (པཊི. མ. ༡.༡༠༧) ཝུཏྟམྤི ཨིནྡྲིཡཀཐཱསམྦནྡྷེན ཨིདྷཱནེཏྭཱ ཝུཏྟཾ. ཏཾ ཧེཊྛཱ ཝུཏྟནཡེནེཝ ཝེདིཏབྦཾ.

༢༠༨. པུན སམནྟཙཀྑུསམྦནྡྷེན ཨིནྡྲིཡཝིདྷཱནཾ ཝཏྟུཀཱམོ ན ཏསྶ ཨདྡིཊྛམིདྷཏྠི ཀིཉྩཱིཏིཨཱདིམཱཧ. ཏཏྠ སམནྟཙཀྑཱུཏི སབྦཉྙུཏཉྙཱཎཾ. པཉྙིནྡྲིཡསྶ ཝསེནཱཏིཨཱདིནཱ པཉྩནྣཾ ཨིནྡྲིཡཱནཾ ཨཝིཡོགིཏཾ དསྶེཏི. སདྡཧནྟོ པགྒཎྷཱཏཱིཏིཨཱདཱིཧི ཨེཀེཀིནྡྲིཡམཱུལཀེཧི པཉྩཧི ཙཏུཀྐེཧི པཉྩནྣཾ ཨིནྡྲིཡཱནཾ ནིནྣཔཡོགཀཱལེ ཝཱ མགྒཀྑཎེ ཝཱ ཨེཀརསབྷཱཝཾ ཨཉྙམཉྙཔཙྩཡབྷཱཝཉྩ དསྶེཏི. སདྡཧིཏཏྟཱ པགྒཧིཏནྟིཨཱདཱིཧི ཨེཀེཀིནྡྲིཡམཱུལཀེཧི པཉྩཧི ཙཏུཀྐེཧི པཉྩནྣཾ ཨིནྡྲིཡཱནཾ ནིབྦཏྟིཀཱལེ ཝཱ ཕལཀཱལེ ཝཱ ཨེཀརསབྷཱཝཾ ཨཉྙམཉྙཔཙྩཡབྷཱཝཉྩ དསྶེཏི. པུན བུདྡྷཙཀྑུསམྦནྡྷེན ཨིནྡྲིཡཝིདྷཱནཾ ཝཏྟུཀཱམོ ཡཾ བུདྡྷཙཀྑཱུཏིཨཱདིམཱཧ. ཏཏྠ བུདྡྷཙཀྑཱུཏི ཨིནྡྲིཡཔརོཔརིཡཏྟཉཱཎཾ ཨཱསཡཱནུསཡཉཱཎཉྩ. བུདྡྷཉཱཎནྟི ཙ ཨིདཾ ཏདེཝ དྭཡཾ, སེསཾ ཧེཊྛཱ ཝུཏྟཏྠམེཝཱཏི.

ཨིནྡྲིཡསམོདྷཱནཝཎྞནཱ ནིཊྛིཏཱ.

སདྡྷམྨཔྤཀཱསིནིཡཱ པཊིསམྦྷིདཱམགྒ-ཨཊྛཀཐཱཡ

ཨིནྡྲིཡཀཐཱཝཎྞནཱ ནིཊྛིཏཱ.

༥. ཝིམོཀྑཀཐཱ

༡. ཝིམོཀྑུདྡེསཝཎྞནཱ

༢༠༩. ཨིདཱནི ཨིནྡྲིཡཀཐཱནནྟརཾ ཀཐིཏཱཡ ཝིམོཀྑཀཐཱཡ ཨཔུབྦཏྠཱནུཝཎྞནཱ ཨནུཔྤཏྟཱ. ཨཡཉྷི ཝིམོཀྑཀཐཱ ཨིནྡྲིཡབྷཱཝནཱནུཡུཏྟསྶ ཝིམོཀྑསབྦྷཱཝཏོ ཨིནྡྲིཡཀཐཱནནྟརཾ ཀཐིཏཱ. ཏཉྩ ཀཐེནྟོ བྷགཝཏོ སམྨུཁཱ སུཏསུཏྟནྟདེསནཱཔུབྦངྒམཾ ཀཏྭཱ ཀཐེསི. ཏཏྠ སུཏྟནྟེ ཏཱཝ སུཉྙཏོ ཝིམོཀྑོཏིཨཱདཱིསུ སུཉྙཏཱཀཱརེན ནིབྦཱནཾ ཨཱརམྨཎཾ ཀཏྭཱ པཝཏྟོ ཨརིཡམགྒོ སུཉྙཏོ ཝིམོཀྑོ. སོ ཧི སུཉྙཏཱཡ དྷཱཏུཡཱ ཨུཔྤནྣཏྟཱ སུཉྙཏོ, ཀིལེསེཧི ཝིམུཏྟཏྟཱ ཝིམོཀྑོ. ཨེཏེནེཝ ནཡེན ཨནིམིཏྟཱཀཱརེན ནིབྦཱནཾ ཨཱརམྨཎཾ ཀཏྭཱ པཝཏྟོ ཨནིམིཏྟོ, ཨཔྤཎིཧིཏཱཀཱརེན ནིབྦཱནཾ ཨཱརམྨཎཾ ཀཏྭཱ པཝཏྟོ ཨཔྤཎིཧིཏོཏི ཝེདིཏབྦོ.

ཨེཀོ ཧི ཨཱདིཏོཝ ཨནིཙྩཏོ སངྑཱརེ སམྨསཏི. ཡསྨཱ པན ན ཨནིཙྩཏོ སམྨསནམཏྟེནེཝ མགྒཝུཊྛཱནཾ ཧོཏི, དུཀྑཏོཔི ཨནཏྟཏོཔི སམྨསིཏབྦམེཝ, ཏསྨཱ དུཀྑཏོཔི ཨནཏྟཏོཔི སམྨསཏི. ཏསྶ ཨེཝཾ པཊིཔནྣསྶ ཨནིཙྩཏོ ཙེ སམྨསནཀཱལེ མགྒཝུཊྛཱནཾ ཧོཏི, ཨཡཾ ཨནིཙྩཏོ ཨབྷིནིཝིསིཏྭཱ ཨནིཙྩཏོ ཝུཊྛཱཏི ནཱམ. སཙེ པནསྶ དུཀྑཏོ ཨནཏྟཏོ སམྨསནཀཱལེ མགྒཝུཊྛཱནཾ ཧོཏི, ཨཡཾ ཨནིཙྩཏོ ཨབྷིནིཝིསིཏྭཱ དུཀྑཏོ, ཨནཏྟཏོ ཝུཊྛཱཏི ནཱམ. ཨེས ནཡོ དུཀྑཏོ ཨནཏྟཏོ ཨབྷིནིཝིསིཏྭཱ ཝུཊྛཱནེསུཔི. ཨེཏྠ ཙ ཡོཔི ཨནིཙྩཏོ ཨབྷིནིཝིཊྛོ, ཡོཔི དུཀྑཏོ, ཡོཔི ཨནཏྟཏོ. ཝུཊྛཱནཀཱལེ ཙེ ཨནིཙྩཏོ ཝུཊྛཱནཾ ཧོཏི, ཏཡོཔི ཛནཱ ཨདྷིམོཀྑབཧུལཱ ཧོནྟི, སདྡྷིནྡྲིཡཾ པཊིལབྷནྟི, ཨནིམིཏྟཝིམོཀྑེན ཝིམུཙྩནྟི, པཋམམགྒཀྑཎེ སདྡྷཱནུསཱརིནོ ཧོནྟི, སཏྟསུ ཋཱནེསུ སདྡྷཱཝིམུཏྟཱ. སཙེ པན དུཀྑཏོ ཝུཊྛཱནཾ ཧོཏི, ཏཡོཔི ཛནཱ པསྶདྡྷིབཧུལཱ ཧོནྟི, སམཱདྷིནྡྲིཡཾ པཊིལབྷནྟི, ཨཔྤཎིཧིཏཝིམོཀྑེན ཝིམུཙྩནྟི, སབྦཏྠ ཀཱཡསཀྑིནོ ཧོནྟི. ཡསྶ པནེཏྠ ཨརཱུཔཛ྄ཛྷཱནཾ པཱདཀཾ ཧོཏི, སོ ཨགྒཕལེ ཨུབྷཏོབྷཱགཝིམུཏྟོ ཧོཏི. ཨཐ ནེསཾ ཨནཏྟཏོ ཝུཊྛཱནཾ ཧོཏི, ཏཡོཔི ཛནཱ ཝེདབཧུལཱ ཧོནྟི, པཉྙིནྡྲིཡཾ པཊིལབྷནྟི, སུཉྙཏཝིམོཀྑེན ཝིམུཙྩནྟི, པཋམམགྒཀྑཎེ དྷམྨཱནུསཱརིནོ ཧོནྟི, ཚསུ ཋཱནེསུ དིཊྛིཔྤཏྟཱ, ཨགྒཕལེ པཉྙཱཝིམུཏྟཱཏི.

ཨཔིཙ མགྒོ ནཱམ པཉྩཧི ཀཱརཎེཧི ནཱམཾ ལབྷཏི སརསེན ཝཱ པཙྩནཱིཀེན ཝཱ སགུཎེན ཝཱ ཨཱརམྨཎེན ཝཱ ཨཱགམནེན ཝཱ. སཙེ ཧི སངྑཱརུཔེཀྑཱ ཨནིཙྩཏོ སངྑཱརེ སམྨསིཏྭཱ ཝུཊྛཱཏི, ཨནིམིཏྟཝིམོཀྑེན ཝིམུཙྩཏི. སཙེ དུཀྑཏོ སམྨསིཏྭཱ ཝུཊྛཱཏི, ཨཔྤཎིཧིཏཝིམོཀྑེན ཝིམུཙྩཏི. སཙེ ཨནཏྟཏོ སམྨསིཏྭཱ ཝུཊྛཱཏི, སུཉྙཏཝིམོཀྑེན ཝིམུཙྩཏི. ཨིདཾ སརསཏོ ནཱམཾ ནཱམ. ཨནིཙྩཱནུཔསྶནཱཡ པན སངྑཱརཱནཾ གྷནཝིནིབྦྷོགཾ ཀཏྭཱ ནིཙྩནིམིཏྟདྷུཝནིམིཏྟསསྶཏནིམིཏྟཱནི པཧཱཡ ཨཱགཏཏྟཱ ཨནིམིཏྟོ, དུཀྑཱནུཔསྶནཱཡ སུཁསཉྙཾ པཧཱཡ པཎིདྷིཔཏྠནཾ སུཀྑཱཔེཏྭཱ ཨཱགཏཏྟཱ ཨཔྤཎིཧིཏོ, ཨནཏྟཱནུཔསྶནཱཡ ཨཏྟསཏྟཔུགྒལསཉྙཾ པཧཱཡ སངྑཱརེ སུཉྙཏོ དིཊྛཏྟཱ སུཉྙཏོཏི ཨིདཾ པཙྩནཱིཀཏོ ནཱམཾ ནཱམ. རཱགཱདཱིཧི པན སུཉྙཏྟཱ སུཉྙཏོ, རཱུཔནིམིཏྟཱདཱིནཾ, རཱགནིམིཏྟཱདཱིནཾཡེཝ ཝཱ ཨབྷཱཝེན ཨནིམིཏྟོ, རཱགཔཎིདྷིཨཱདཱིནཾ ཨབྷཱཝཏོ ཨཔྤཎིཧིཏོཏི ཨིདམསྶ སགུཎཏོ ནཱམཾ ནཱམ. སོཡཾ སུཉྙཾ ཨནིམིཏྟཾ ཨཔྤཎིཧིཏཉྩ ནིབྦཱནཾ ཨཱརམྨཎཾ ཀརོཏཱིཏིཔི སུཉྙཏོ ཨནིམིཏྟོ ཨཔྤཎིཧིཏོཏི ཝུཙྩཏི. ཨིདམསྶ ཨཱརམྨཎཏོ ནཱམཾ ནཱམ. ཨཱགམནཾ པན དུཝིདྷཾ ཝིཔསྶནཱགམནཾ མགྒཱགམནཉྩ. ཏཏྠ མགྒེ ཝིཔསྶནཱགམནཾ ལབྦྷཏི, ཕལེ མགྒཱགམནཾ. ཨནཏྟཱནུཔསྶནཱ ཧི སུཉྙཏཱ ནཱམ, སུཉྙཏཝིཔསྶནཱཡ མགྒོ སུཉྙཏོ, སུཉྙཏམགྒསྶ ཕལཾ སུཉྙཏཾ. ཨནིཙྩཱནུཔསྶནཱ ཨནིམིཏྟཱ ནཱམ, ཨནིམིཏྟཝིཔསྶནཱཡ མགྒོ ཨནིམིཏྟོ. ཨིདཾ པན ནཱམཾ ཨབྷིདྷམྨཔརིཡཱཡེ ན ལབྦྷཏི, སུཏྟནྟཔརིཡཱཡེ པན ལབྦྷཏི. ཏཏྠ ཧི གོཏྲབྷུཉཱཎཾ ཨནིམིཏྟཾ ནིབྦཱནཾ ཨཱརམྨཎཾ ཀཏྭཱ ཨནིམིཏྟནཱམཀཾ ཧུཏྭཱ སཡཾ ཨཱགམནཱིཡཊྛཱནེ ཋཏྭཱ མགྒསྶ ནཱམཾ དེཏཱིཏི ཝདནྟི. ཏེན མགྒོ ཨནིམིཏྟོཏི ཝུཏྟོ. མགྒཱགམནེན ཕལཾ ཨནིམིཏྟནྟི ཡུཛྫཏིཡེཝ. དུཀྑཱནུཔསྶནཱ སངྑཱརེསུ པཎིདྷིཾ སུཀྑཱཔེཏྭཱ ཨཱགཏཏྟཱ ཨཔྤཎིཧིཏཱ ནཱམ, ཨཔྤཎིཧིཏཝིཔསྶནཱཡ མགྒོ ཨཔྤཎིཧིཏོ, ཨཔྤཎིཧིཏམགྒསྶ ཕལཾ ཨཔྤཎིཧིཏནྟི ཨེཝཾ ཝིཔསྶནཱ ཨཏྟནོ ནཱམཾ མགྒསྶ དེཏི, མགྒོ ཕལསྶཱཏི ཨིདཾ ཨཱགམནཏོ ནཱམཾ ནཱམ. ཨེཝཾ སངྑཱརུཔེཀྑཱ ཝིམོཀྑཝིསེསཾ ནིཡམེཏཱིཏི.

ཨེཝཾ བྷགཝཏཱ དེསིཏེ ཏཡོ མཧཱཝཏྠུཀེ ཝིམོཀྑེ ཨུདྡིསིཏྭཱ ཏཾནིདྡེསཝསེནེཝ ཨཔརེཔི ཝིམོཀྑེ ནིདྡིསིཏུཀཱམོ ཨཔིཙ ཨཊྛསཊྛི ཝིམོཀྑཱཏིཨཱདིམཱཧ. ཏཏྠ ཨཔིཙཱཏི ཨཔརཔརིཡཱཡདསྶནཾ. ཀཐཾ ཏེ ཨཊྛསཊྛི ཧོནྟི, ནནུ ཏེ པཉྩསཏྟཏཱིཏི? སཙྩཾ ཡཐཱརུཏཝསེན པཉྩསཏྟཏི. བྷགཝཏཱ པན དེསིཏེ ཏཡོ ཝིམོཀྑེ ཋཔེཏྭཱ ཨཉྙཝིམོཀྑེ ནིདྡིསནཏོ ཨིམེསཾ ཏདཝརོདྷཏོ ཙ ཨིམེ ཏཡོ ན གཎེཏབྦཱ, ཨཛ྄ཛྷཏྟཝིམོཀྑཱདཡོ ཏཡོཔི ཝིམོཀྑཱ ཙཏུདྷཱ ཝིཏྠཱརཝཙནེཡེཝ ཨནྟོགདྷཏྟཱ ན གཎེཏབྦཱ, ‘‘པཎིཧིཏོ ཝིམོཀྑོ, ཨཔྤཎིཧིཏོ ཝིམོཀྑོ’’ཏི ཨེཏྠ ཨཔྤཎིཧིཏོ ཝིམོཀྑོ པཋམཾ ཨུདྡིཊྛེན ཨེཀནཱམིཀཏྟཱ ན གཎེཏབྦོ, ཨེཝཾ ཨིམེསུ སཏྟསུ ཨཔནཱིཏེསུ སེསཱ ཨཊྛསཊྛི ཝིམོཀྑཱ ཧོནྟི. ཨེཝཾ སནྟེ སུཉྙཏཝིམོཀྑཱདཡོ ཏཡོ པུན ཀསྨཱ ཨུདྡིཊྛཱཏི ཙེ? ཨུདྡེསེན སངྒཧེཏྭཱ ཏེསམྤི ནིདྡེསཀརཎཏྠཾ. ཨཛ྄ཛྷཏྟཝུཊྛཱནཱདཡོ པན ཏཡོ པབྷེདཾ ཝིནཱ མཱུལརཱསིཝསེན ཨུདྡིཊྛཱ, པཎིཧིཏཝིམོཀྑཔཊིཔཀྑཝསེན པུན ཨཔྤཎིཧིཏོ ཝིམོཀྑོ ཨུདྡིཊྛོཏི ཝེདིཏབྦོ.

ཨཛ྄ཛྷཏྟཝུཊྛཱནཱདཱིསུ ཨཛ྄ཛྷཏྟཏོ ཝུཊྛཱཏཱིཏི ཨཛ྄ཛྷཏྟཝུཊྛཱནོ. ཨནུལོམེནྟཱིཏི ཨནུལོམཱ. ཨཛ྄ཛྷཏྟཝུཊྛཱནཱནཾ པཊིཔྤསྶདྡྷི ཨཔགམཱ ཨཛ྄ཛྷཏྟཝུཊྛཱནཔཊིཔྤསྶདྡྷི. རཱུཔཱིཏི ཨཛ྄ཛྷཏྟཾ ཀེསཱདཱིསུ ཨུཔྤཱདིཏཾ རཱུཔཛ྄ཛྷཱནཾ རཱུཔཾ, ཏཾ རཱུཔམསྶ ཨཏྠཱིཏི རཱུཔཱི རཱུཔཱནི པསྶཏཱིཏི བཧིདྡྷཱ ནཱིལཀསིཎཱདིརཱུཔཱནི ཛྷཱནཙཀྑུནཱ པསྶཏི. ཨིམིནཱ ཨཛ྄ཛྷཏྟབཧིདྡྷཱཝཏྠུཀེསུ ཀསིཎེསུ ཛྷཱནཔཊིལཱབྷོ དསྶིཏོ. ཨཛ྄ཛྷཏྟཾ ཨརཱུཔསཉྙཱིཏི ཨཛ྄ཛྷཏྟཾ ན རཱུཔསཉྙཱི, ཨཏྟནོ ཀེསཱདཱིསུ ཨནུཔྤཱདིཏརཱུཔཱཝཙརཛ྄ཛྷཱནོཏི ཨཏྠོ. ཨིམིནཱ བཧིདྡྷཱ པརིཀམྨཾ ཀཏྭཱ བཧིདྡྷཱཝ པཊིལདྡྷཛ྄ཛྷཱནཏཱ དསྶིཏཱ. སུབྷནྟེཝ ཨདྷིམུཏྟོཏི ‘‘སུབྷ’’མིཙྩེཝ ཨཱརམྨཎེ ཨདྷིམུཏྟོ. ཏཏྠ ཀིཉྩཱཔི ཨནྟོཨཔྤནཱཡཾ ‘‘སུབྷ’’ནྟི ཨཱབྷོགོ ནཏྠི, ཡོ པན ཨཔྤཊིཀཱུལཱཀཱརེན སཏྟཱརམྨཎཾ ཕརནྟོ ཝིཧརཏི, སོ ཡསྨཱ ‘‘སུབྷ’’ནྟེཝ ཨདྷིམུཏྟོ ཧོཏི, ཏསྨཱ ཨེཝཾ ཨུདྡེསོ ཀཏོཏི. ཨཔྤིཏཔྤིཏསམཡེ ཨེཝ ཝིཀྑམྦྷནཝིམུཏྟིསབྦྷཱཝཏོ སམཡཝིམོཀྑོ. སོཡེཝ སཀིཙྩཀརཎཝསེན ཨཔྤིཏསམཡེ ཨེཝ ནིཡུཏྟོཏི སཱམཡིཀོ. སཱམཱཡིཀོཏིཔི པཱཋོ. ཀོཔེཏུཾ བྷཉྫིཏུཾ སཀྐུཎེཡྻཏཱཡ ཀུཔྤོ. ལོཀཾ ཨནཏིཀྐམནཏོ ལོཀེ ནིཡུཏྟོཏི ལོཀིཀོ. ལོཀིཡོཏིཔི པཱཋོ. ལོཀཾ ཨུཏྟརཏི, ཨུཏྟིཎྞོཏི ཝཱ ལོཀུཏྟརོ. ཨཱརམྨཎཀརཎཝསེན སཧ ཨཱསཝེཧཱིཏི སཱསཝོ. ཨཱརམྨཎཀརཎཝསེན སམྤཡོགཝསེན ཙ ནཏྠེཏྠ ཨཱསཝཱཏི ཨནཱསཝོ. རཱུཔསངྑཱཏེན སཧ ཨཱམིསེནཱཏི སཱམིསོ. སབྦསོ རཱུཔཱརཱུཔཔྤཧཱནཱ ནིརཱམིསཏོཔི ནིརཱམིསཏརོཏི ནིརཱམིསཱ ནིརཱམིསཏརོ. པཎིཧིཏོཏི ཏཎྷཱཝསེན པཎིཧིཏོ པཏྠིཏོ. ཨཱརམྨཎཀརཎཝསེན སཉྙོཛནེཧི སཾཡུཏྟཏྟཱ སཉྙུཏྟོ. ཨེཀཏྟཝིམོཀྑོཏི ཀིལེསེཧི ཨནཛ྄ཛྷཱརུལ༹ྷཏྟཱ ཨེཀསབྷཱཝོ ཝིམོཀྑོ. སཉྙཱཝིམོཀྑོཏི ཝིཔསྶནཱཉཱཎམེཝ ཝིཔརཱིཏསཉྙཱཡ ཝིམུཙྩནཏོ སཉྙཱཝིམོཀྑོ. ཏདེཝ ཝིཔསྶནཱཉཱཎཾ སམྨོཧཏོ ཝིམུཙྩནཝསེན ཉཱཎམེཝ ཝིམོཀྑོཏི ཉཱཎཝིམོཀྑོ. སཱིཏིསིཡཱཝིམོཀྑོཏི ཝིཔསྶནཱཉཱཎམེཝ སཱིཏི བྷཝེཡྻཱཏི པཝཏྟོ ཝིམོཀྑོ སཱིཏིསིཡཱཝིམོཀྑོ. སཱིཏིསིཀཱཝིམོཀྑོཏིཔི པཱཋོ, སཱིཏིབྷཱཝིཀཱཡ ཝིམོཀྑོཏི ཏསྶ ཨཏྠཾ ཝཎྞཡནྟི. ཛྷཱནཝིམོཀྑོཏི ཨུཔཙཱརཔྤནཱབྷེདཾ ལོཀིཡལོཀུཏྟརབྷེདཉྩ ཛྷཱནམེཝ ཝིམོཀྑོ. ཨནུཔཱདཱ ཙིཏྟསྶ ཝིམོཀྑོཏི ཨནུཔཱདིཡིཏྭཱ གཧཎཾ ཨཀཏྭཱ ཙིཏྟསྶ ཝིམོཀྑོ. སེསཾ ཝུཏྟནཡེནེཝ ཝེདིཏབྦནྟི.

ཝིམོཀྑུདྡེསཝཎྞནཱ ནིཊྛིཏཱ.

༢. ཝིམོཀྑནིདྡེསཝཎྞནཱ

༢༡༠. ཀཏམོཏིཨཱདིཀེ ཨུདྡེསསྶ ནིདྡེསེ ཨིཏི པཊིསཉྩིཀྑཏཱིཏི ཨེཝཾ ཨུཔཔརིཀྑཏི. སུཉྙམིདནྟི ཨིདཾ ཁནྡྷཔཉྩཀཾ སུཉྙཾ. ཀེན སུཉྙཾ? ཨཏྟེན ཝཱ ཨཏྟནིཡེན ཝཱ. ཏཏྠ ཨཏྟེན ཝཱཏི བཱལཛནཔརིཀཔྤིཏསྶ ཨཏྟནོ ཨབྷཱཝཱ ཏེན ཨཏྟནཱ ཙ སུཉྙཾ. ཨཏྟནིཡེན ཝཱཏི ཏསྶ པརིཀཔྤིཏསྶ ཨཏྟནོ སནྟཀེན ཙ སུཉྙཾ. ཨཏྟནོ ཨབྷཱཝེནེཝ ཨཏྟནིཡཱབྷཱཝོ. ཨཏྟནིཡཉྩ ནཱམ ནིཙྩཾ ཝཱ སིཡཱ སུཁཾ ཝཱ, ཏདུབྷཡམྤི ནཏྠི. ཏེན ནིཙྩཔཊིཀྑེཔེན ཨནིཙྩཱནུཔསྶནཱ, སུཁཔཊིཀྑེཔེན དུཀྑཱནུཔསྶནཱ ཙ ཝུཏྟཱ ཧོཏི. སུཉྙམིདཾ ཨཏྟེན ཝཱཏི ཨནཏྟཱནུཔསྶནཱཡེཝ ཝུཏྟཱ. སོཏི སོ ཨེཝཾ ཏཱིཧི ཨནུཔསྶནཱཧི ཝིཔསྶམཱནོ བྷིཀྑུ. ཨབྷིནིཝེསཾ ན ཀརོཏཱིཏི ཨནཏྟཱནུཔསྶནཱཝསེན ཨཏྟཱབྷིནིཝེསཾ ན ཀརོཏི.

ནིམིཏྟཾ ན ཀརོཏཱིཏི ཨནིཙྩཱནུཔསྶནཱཝསེན ནིཙྩནིམིཏྟཾ ན ཀརོཏི. པཎིདྷིཾ ན ཀརོཏཱིཏི དུཀྑཱནུཔསྶནཱཝསེན པཎིདྷིཾ ན ཀརོཏི. ཨིམེ ཏཡོ ཝིམོཀྑཱ པརིཡཱཡེན ཝིཔསྶནཱཀྑཎེ ཏདངྒཝསེནཱཔི ལབྦྷནྟི, ནིཔྤརིཡཱཡེན པན སམུཙྪེདཝསེན མགྒཀྑཎེཡེཝ. ཙཏྟཱརི ཛྷཱནཱནི ཨཛ྄ཛྷཏྟཾ ནཱིཝརཎཱདཱིཧི ཝུཊྛཱནཏོ ཨཛ྄ཛྷཏྟཝུཊྛཱནོ ཝིམོཀྑོ. ཙཏསྶོ ཨརཱུཔསམཱཔཏྟིཡོ ཨཱརམྨཎེཧི ཝུཊྛཱནཏོ བཧིདྡྷཱཝུཊྛཱནོ ཝིམོཀྑོ. ཨཱརམྨཎམྤི ཧི བཱཧིརཱཡཏནཱནི ཝིཡ ཨིདྷ ‘‘བཧིདྡྷཱ’’ཏི ཝུཏྟཾ. ཨིམེ དྭེ ཝིཀྑམྦྷནཝིམོཀྑཱ, དུབྷཏོ ཝུཊྛཱནོ པན སམུཙྪེདཝིམོཀྑོ.

ནཱིཝརཎེཧི ཝུཊྛཱཏཱིཏིཨཱདཱིཧི ཨཛ྄ཛྷཏྟཝུཊྛཱནཾ སརཱུཔཏོ ཝུཏྟཾ. རཱུཔསཉྙཱཡཱཏིཨཱདཱིཧི ཀསིཎཱདིཨཱརམྨཎསམཏིཀྐམསྶ པཱཀཊཏྟཱ ཏཾ ཨཝཏྭཱ སུཏྟནྟེསུ ཝུཏྟརཱུཔསཉྙཱདིསམཏིཀྐམོ ཝུཏྟོ. སཀྐཱཡདིཊྛིཝིཙིཀིཙྪཱསཱིལབྦཏཔརཱམཱསཱཏི སམཱསཔདཾ, སཀྐཱཡདིཊྛིཡཱ ཝིཙིཀིཙྪཱཡ སཱིལབྦཏཔརཱམཱསཱཏི ཝིཙྪེདོ. ཨཡམེཝ ཝཱ པཱཋོ.

༢༡༡. ཝིཏཀྐོ ཙཱཏིཨཱདཱིཧི ཛྷཱནཱནཾ སམཱཔཏྟཱིནཉྩ ཨུཔཙཱརབྷཱུམིཡོ ཝུཏྟཱ. ཨནིཙྩཱནུཔསྶནཱཏིཨཱདཱིཧི ཙཏུནྣཾ མགྒཱནཾ པུབྦབྷཱགཝིཔསྶནཱ ཝུཏྟཱ. པཊིལཱབྷོ ཝཱཏི པཉྩཝིདྷཝསིཔྤཏྟིཡཱ བྱཱཔིཏོ པཏྠཊོ ལཱབྷོཏི པཊིལཱབྷོ. ཝསིཔྤཏྟིཡཱ ཧི སབྦོ ཛྷཱནཔཡོགོ ཙ སམཱཔཏྟིཔཡོགོ ཙ པཊིཔྤསྶདྡྷོ ཧོཏི, ཏསྨཱ པཊིལཱབྷོ ‘‘པཊིཔྤསྶདྡྷིཝིམོཀྑོ’’ཏི ཝུཏྟོ. ཝིཔཱཀོ པན ཛྷཱནསྶ སམཱཔཏྟིཡཱ ཙ པཊིཔྤསྶདྡྷི ཧོཏཱིཏི ཨུཛུཀམེཝ. ཀེཙི པན ‘‘ཨུཔཙཱརཔཡོགསྶ པཊིཔྤསྶདྡྷཏྟཱ ཛྷཱནསྶ སམཱཔཏྟིཡཱ ཙ པཊིལཱབྷོ ཧོཏི, ཏསྨཱ ཛྷཱནསམཱཔཏྟིཔཊིལཱབྷོ ‘པཊིཔྤསྶདྡྷིཝིམོཀྑོ’ཏི ཝུཙྩཏཱི’’ཏི ཝདནྟི.

༢༡༢. ཨཛ྄ཛྷཏྟནྟི ཨཏྟཱནཾ ཨདྷིཀིཙྩ པཝཏྟཾ. པཙྩཏྟནྟི ཨཏྟཱནཾ པཊིཙྩ པཝཏྟཾ. ཨུབྷཡེནཱཔི ནིཡཀཛ྄ཛྷཏྟམེཝ དཱིཔེཏི ནཱིལནིམིཏྟནྟི ནཱིལམེཝ. ནཱིལསཉྙཾ པཊིལབྷཏཱིཏི ཏསྨིཾ ནཱིལནིམིཏྟེ ནཱིལམིཏིསཉྙཾ པཊིལབྷཏི. སུགྒཧིཏཾ ཀརོཏཱིཏི པརིཀམྨབྷཱུམིཡཾ སུཊྛུ ཨུགྒཧིཏཾ ཀརོཏི. སཱུཔདྷཱརིཏཾ ཨུཔདྷཱརེཏཱིཏི ཨུཔཙཱརབྷཱུམིཡཾ སུཊྛུ ཨུཔདྷཱརིཏཾ ཀཏྭཱ ཨུཔདྷཱརེཏི. སྭཱཝཏྠིཏཾ ཨཝཏྠཱཔེཏཱིཏི ཨཔྤནཱབྷཱུམིཡཾ སུཊྛུ ནིཙྪིཏཾ ནིཙྪིནཱཏི. ཝཝཏྠཱཔེཏཱིཏིཔི པཱཋོ. ཨཛ྄ཛྷཏྟཉྷི ནཱིལཔརིཀམྨཾ ཀརོནྟོ ཀེསེ ཝཱ པིཏྟེ ཝཱ ཨཀྑིཏཱརཀཱཡཾ ཝཱ ཀརོཏི. བཧིདྡྷཱ ནཱིལནིམིཏྟེཏི ནཱིལཔུཔྥནཱིལཝཏྠནཱིལདྷཱཏཱུནཾ ཨཉྙཏརེ ནཱིལཀསིཎེ. ཙིཏྟཾ ཨུཔསཾཧརཏཱིཏི ཙིཏྟཾ ཨུཔནེཏི. པཱིཏཱདཱིསུཔི ཨེསེཝ ནཡོ. ཨཱསེཝཏཱིཏི ཏམེཝ སཉྙཾ ཨཱདིཏོ སེཝཏི. བྷཱཝེཏཱིཏི ཝཌྜྷེཏི. བཧུལཱིཀརོཏཱིཏི པུནཔྤུནཾ ཀརོཏི. རཱུཔནྟི ནཱིལནིམིཏྟཾ རཱུཔཾ. རཱུཔསཉྙཱིཏི ཏསྨིཾ རཱུཔེ སཉྙཱ རཱུཔསཉྙཱ, སཱ ཨསྶ ཨཏྠཱིཏི རཱུཔསཉྙཱི. ཨཛ྄ཛྷཏྟཾ པཱིཏནིམིཏྟཱདཱིསུ པཱིཏཔརིཀམྨཾ ཀརོནྟོ མེདེ ཝཱ ཚཝིཡཱ ཝཱ ཨཀྑཱིནཾ པཱིཏཊྛཱནེ ཝཱ ཀརོཏི. ལོཧིཏཔརིཀམྨཾ ཀརོནྟོ མཾསེ ཝཱ ལོཧིཏེ ཝཱ ཛིཝ྄ཧཱཡ ཝཱ ཧཏྠཏལཔཱདཏལེསུ ཝཱ ཨཀྑཱིནཾ རཏྟཊྛཱནེ ཝཱ ཀརོཏི. ཨོདཱཏཔརིཀམྨཾ ཀརོནྟོ ཨཊྛིམྷི ཝཱ དནྟེ ཝཱ ནཁེ ཝཱ ཨཀྑཱིནཾ སེཏཊྛཱནེ ཝཱ ཀརོཏི. ཨཛ྄ཛྷཏྟཾ ཨརཱུཔནྟི ཨཛ྄ཛྷཏྟཾ རཱུཔནིམིཏྟཾ ནཏྠཱིཏི ཨཏྠོ.

མེཏྟཱསཧགཏེནཱཏི པཋམདུཏིཡཏཏིཡཛ྄ཛྷཱནཝསེན མེཏྟཱཡ སམནྣཱགཏེན. ཙེཏསཱཏི ཙིཏྟེན. ཨེཀཾ དིསནྟི ཨེཀཾ ཨེཀིསྶཱ དིསཱཡ པཋམཔརིགྒཧིཏཾ སཏྟཾ ཨུཔཱདཱཡ ཨེཀདིསཱཔརིཡཱཔནྣསཏྟཕརཎཝསེན ཝུཏྟཾ. ཕརིཏྭཱཏི ཕུསིཏྭཱ ཨཱརམྨཎཾ ཀཏྭཱ. ཝིཧརཏཱིཏི བྲཧྨཝིཧཱརཱདྷིཊྛིཏཾ ཨིརིཡཱཔཐཝིཧཱརཾ པཝཏྟེཏི. ཏཐཱ དུཏིཡནྟི ཡཐཱ པུརཏྠིམཱདཱིསུ ཡཾཀིཉྩི ཨེཀཾ དིསཾ ཕརིཏྭཱ ཝིཧརཏི, ཏཐེཝ ཏདནནྟརཾ དུཏིཡཾ ཏཏིཡཾ ཙཏུཏྠཾ ཝཱཏི ཨཏྠོ. ཨིཏི ཨུདྡྷནྟི ཨེཏེནེཝ ནཡེན ཨུཔརིམཾ དིསནྟི ཝུཏྟཾ ཧོཏི. ཨདྷོ ཏིརིཡནྟི ཨདྷོདིསམྤི ཏིརིཡཾ དིསམྤི ཨེཝམེཝ. ཏཏྠ ཙ ཨདྷོཏི ཧེཊྛཱ. ཏིརིཡནྟི ཨནུདིསཱ. ཨེཝཾ སབྦདིསཱསུ ཨསྶམཎྜལིཀཱཡ ཨསྶམིཝ མེཏྟཱསཧགཏཾ ཙིཏྟཾ སཱརེཏིཔི པཙྩཱསཱརེཏིཔཱིཏི. ཨེཏྟཱཝཏཱ ཨེཀམེཀཾ དིསཾ པརིགྒཧེཏྭཱ ཨོདྷིསོ མེཏྟཱཕརཎཾ དསྶིཏཾ. སབྦདྷཱིཏིཨཱདི པན ཨནོདྷིསོ དསྶནཏྠཾ ཝུཏྟཾ. ཏཏྠ སབྦདྷཱིཏི སབྦཏྠ. སབྦཏྟཏཱཡཱཏི སབྦེསུ ཧཱིནམཛ྄ཛྷིམུཀྐཊྛམིཏྟསཔཏྟམཛ྄ཛྷཏྟཱདིཔྤབྷེདེསུ ཨཏྟཏཱཡ, ‘‘ཨཡཾ པརསཏྟོ’’ཏི ཝིབྷཱགཾ ཨཀཏྭཱ ཨཏྟསམཏཱཡཱཏི ཝུཏྟཾ ཧོཏི. ཨཐ ཝཱ སབྦཏྟཏཱཡཱཏི སབྦེན ཙིཏྟབྷཱཝེན, ཨཱིསཀམྤི བཧི ཨཝིཀྑིཔམཱནོཏི ཝུཏྟཾ ཧོཏི. སབྦཱཝནྟནྟི སབྦསཏྟཝནྟཾ, སབྦསཏྟཡུཏྟནྟི ཨཏྠོ. སབྦཝནྟནྟིཔི པཱཋོ. ལོཀནྟི སཏྟལོཀཾ.

ཝིཔུལེནཱཏི ཨེཝམཱདིཔརིཡཱཡདསྶནཏོ པནེཏྠ པུན ‘‘མེཏྟཱསཧགཏེནཱ’’ཏི ཝུཏྟཾ. ཡསྨཱ ཝཱ ཨེཏྠ ཨོདྷིསོ ཕརཎེ ཝིཡ པུན ཏཐཱསདྡོ ཝཱ ཨིཏི-སདྡོ ཝཱ ན ཝུཏྟོ, ཏསྨཱ པུན ‘‘མེཏྟཱསཧགཏེན ཙེཏསཱ’’ཏི ཝུཏྟཾ, ནིགམནཝསེན ཝཱ ཨེཏཾ ཝུཏྟཾ. ཝིཔུལེནཱཏི ཨེཏྠ ཕརཎཝསེན ཝིཔུལཏཱ དཊྛབྦཱ. བྷཱུམིཝསེན པན ཏཾ མཧགྒཏཾ. ཏཉྷི ཀིལེསཝིཀྑམྦྷནསམཏྠཏཱཡ ཝིཔུལཕལཏཱཡ དཱིགྷསནྟཱནཏཱཡ ཙ མཧནྟབྷཱཝཾ གཏཾ, མཧནྟེཧི ཝཱ ཨུལཱ༹རཙྪནྡཝཱིརིཡཙིཏྟཔཉྙེཧི གཏཾ པཊིཔནྣནྟི མཧགྒཏཾ. པགུཎཝསེན ཨཔྤམཱཎསཏྟཱརམྨཎཝསེན ཙ ཨཔྤམཱཎཾ. བྱཱཔཱདཔཙྩཏྠིཀཔྤཧཱནེན ཨཝེརཾ. དོམནསྶཔྤཧཱནཏོ ཨབྱཱཔཛྫཾ, ནིདྡུཀྑནྟི ཝུཏྟཾ ཧོཏི. ཨཔྤཊིཀཱུལཱ ཧོནྟཱིཏི བྷིཀྑུནོ ཙིཏྟསྶ ཨཔྤཊིཀཱུལཱ ཧུཏྭཱ ཨུཔཊྛཧནྟི. སེསེསུཔི ཝུཏྟནཡེནེཝ ཀརུཎཱམུདིཏཱཨུཔེཀྑཱཝསེན ཡོཛེཏབྦཾ. ཀརུཎཱཡ ཝིཧེསཱཔཙྩཏྠིཀཔྤཧཱནེན ཨཝེརཾ, མུདིཏཱཡ ཨརཏིཔཙྩཏྠིཀཔྤཧཱནེན.

ཨུཔེཀྑཱསཧགཏེནཱཏི ཙཏུཏྠཛ྄ཛྷཱནཝསེན ཨུཔེཀྑཱཡ སམནྣཱགཏེན. རཱགཔཙྩཏྠིཀཔྤཧཱནེན ཨཝེརཾ, གེཧསིཏསོམནསྶཔྤཧཱནཏོ ཨབྱཱཔཛྫཾ. སབྦམྤི ཧི ཨཀུསལཾ ཀིལེསཔརིལཱ༹ཧཡོགཏོ སབྱཱཔཛྫམེཝཱཏི ཨཡམེཏེསཾ ཝིསེསོ.

༢༡༣. སབྦསོཏི སབྦཱཀཱརེན, སབྦཱསཾ ཝཱ, ཨནཝསེསཱནནྟི ཨཏྠོ. རཱུཔསཉྙཱནནྟི སཉྙཱསཱིསེན ཝུཏྟརཱུཔཱཝཙརཛ྄ཛྷཱནཱནཉྩེཝ ཏདཱརམྨཎཱནཉྩ. རཱུཔཱཝཙརཛ྄ཛྷཱནམྤི ཧི རཱུཔནྟི ཝུཙྩཏི ‘‘རཱུཔཱི རཱུཔཱནི པསྶཏཱི’’ཏིཨཱདཱིསུ (པཊི. མ. ༡.༢༠༩; དྷ. ས. ༢༤༨), ཏསྶ ཨཱརམྨཎམྤི བཧིདྡྷཱ རཱུཔཱནི པསྶཏི ‘‘སུཝཎྞདུབྦཎྞཱནཱི’’ཏིཨཱདཱིསུ (དྷ. ས. ༢༢༣). ཏསྨཱ ཨིདྷ རཱུཔེ སཉྙཱ རཱུཔསཉྙཱཏི ཨེཝཾ སཉྙཱསཱིསེན ཝུཏྟརཱུཔཱཝཙརཛ྄ཛྷཱནསྶེཏཾ ཨདྷིཝཙནཾ. རཱུཔཾ སཉྙཱ ཨསྶཱཏི རཱུཔསཉྙཾ, རཱུཔམསྶ ནཱམནྟི ཝུཏྟཾ ཧོཏི. ཨེཝཾ པཐཝཱིཀསིཎཱདིབྷེདསྶ ཏདཱརམྨཎསྶ ཙེཏཾ ཨདྷིཝཙནནྟི ཝེདིཏབྦཾ. སམཏིཀྐམཱཏི ཝིརཱགཱ ནིརོདྷཱ ཙ. ཀིཾ ཝུཏྟཾ ཧོཏི? ཨེཏཱསཾ ཀུསལཝིཔཱཀཀིརིཡཱཝསེན པཉྩདསནྣཾ ཛྷཱནསངྑཱཏཱནཾ རཱུཔསཉྙཱནཾ, ཨེཏེསཉྩ པཐཝཱིཀསིཎཱདིཝསེན ནཝནྣཾ ཨཱརམྨཎསངྑཱཏཱནཾ རཱུཔསཉྙཱནཾ སབྦཱཀཱརེན, ཨནཝསེསཱནཾ ཝཱ ཝིརཱགཱ ཙ ནིརོདྷཱ ཙ ཝིརཱགཧེཏུ ཙེཝ ནིརོདྷཧེཏུ ཙ ཨཱཀཱསཱནཉྩཱཡཏནཾ ཨུཔསམྤཛྫ ཝིཧརཏི. ན ཧི སཀྐཱ སབྦསོ ཨནཏིཀྐནྟརཱུཔསཉྙེན ཨེཏཾ ཨུཔསམྤཛྫ ཝིཧརིཏུནྟི. ཡསྨཱ པན ཨཱརམྨཎསམཏིཀྐམེན པཏྟབྦཱ ཨེཏཱ སམཱཔཏྟིཡོ, ན ཨེཀསྨིཾཡེཝ ཨཱརམྨཎེ པཋམཛ྄ཛྷཱནཱདཱིནི ཝིཡ. ཨཱརམྨཎེ ཨཝིརཏྟསྶ ཙ སཉྙཱསམཏིཀྐམོ ན ཧོཏི, ཏསྨཱ ཨཡཾ ཨཱརམྨཎསམཏིཀྐམཝསེནཱཔི ཨཏྠཝཎྞནཱ ཀཏཱཏི ཝེདིཏབྦཱ.

པཊིགྷསཉྙཱནཾ ཨཏྠངྒམཱཏི ཙཀྑཱདཱིནཾ ཝཏྠཱུནཾ རཱུཔཱདཱིནཾ ཨཱརམྨཎཱནཉྩ པཊིགྷཱཏེན ཨུཔྤནྣཱ སཉྙཱ པཊིགྷསཉྙཱ, རཱུཔསཉྙཱདཱིནཾ ཨེཏཾ ཨདྷིཝཙནཾ. ཏཱསཾ ཀུསལཝིཔཱཀཱནཾ པཉྩནྣཾ, ཨཀུསལཝིཔཱཀཱནཾ པཉྩནྣནྟི སབྦསོ དསནྣམྤི པཊིགྷསཉྙཱནཾ ཨཏྠངྒམཱ པཧཱནཱ ཨསམུཔྤཱདཱ, ཨཔྤཝཏྟིཾ ཀཏྭཱཏི ཝུཏྟཾ ཧོཏི. ཀཱམཉྩེཏཱ པཋམཛ྄ཛྷཱནཱདཱིནི སམཱཔནྣསྶཔི ན སནྟི, ན ཧི ཏསྨིཾ སམཡེ པཉྩདྭཱརཝསེན ཙིཏྟཾ པཝཏྟཏི, ཨེཝཾ སནྟེཔི ཨཉྙཏྠ པཧཱིནཱནཾ སུཁདུཀྑཱནཾ ཙཏུཏྠཛ྄ཛྷཱནེ ཝིཡ སཀྐཱཡདིཊྛཱདཱིནཾ ཏཏིཡམགྒེ ཝིཡ ཙ ཨིམསྨིཾ ཛྷཱནེ ཨུསྶཱཧཛནནཏྠཾ ཨིམསྶ ཛྷཱནསྶ པསཾསཱཝསེན ཨེཏཱསཾ ཨེཏྠ ཝཙནཾ ཝེདིཏབྦཾ. ཨཐ ཝཱ ཀིཉྩཱཔི ཏཱ རཱུཔཱཝཙརཾ སམཱཔནྣསྶ ན སནྟི, ཨཐ ཁོ ན པཧཱིནཏྟཱ ན སནྟི. ན ཧི རཱུཔཝིརཱགཱཡ རཱུཔཱཝཙརབྷཱཝནཱ སཾཝཏྟཏི, རཱུཔཱཡཏྟཱཡེཝ ཙ ཨེཏཱསཾ པཝཏྟི. ཨཡཾ པན བྷཱཝནཱ རཱུཔཝིརཱགཱཡ སཾཝཏྟཏི, ཏསྨཱ ཏཱ ཨེཏྠ པཧཱིནཱཏི ཝཏྟུཾ ཝཊྚཏི. ན ཀེཝལཉྩ ཝཏྟུཾ, ཨེཀཾསེནེཝ ཨེཝཾ དྷཱརེཏུམྤི ཝཊྚཏི. ཏཱསཉྷི ཨིཏོ པུབྦེ ཨཔྤཧཱིནཏྟཱཡེཝ ‘‘པཋམཛ྄ཛྷཱནཾ སམཱཔནྣསྶ སདྡོ ཀཎྚཀོ’’ཏི (ཨ. ནི. ༡༠.༧༢) ཝུཏྟོ བྷགཝཏཱ. ཨིདྷ ཙ པཧཱིནཏྟཱཡེཝ ཨརཱུཔསམཱཔཏྟཱིནཾ ཨཱནེཉྫཏཱ སནྟཝིམོཀྑཏཱ ཙ ཝུཏྟཱ.

ནཱནཏྟསཉྙཱནཾ ཨམནསིཀཱརཱཏི ནཱནཏྟེ ཝཱ གོཙརེ པཝཏྟཱནཾ སཉྙཱནཾ, ནཱནཏྟཱནཾ ཝཱ སཉྙཱནཾ. ཡསྨཱ ཧེཏཱ རཱུཔསདྡཱདིབྷེདེ ནཱནཏྟེ ནཱནཱསབྷཱཝེ གོཙརེ པཝཏྟནྟི, ཡསྨཱ ཙེཏཱ ཨཊྛ ཀཱམཱཝཙརཀུསལསཉྙཱ, དྭཱདས ཨཀུསལསཉྙཱ, ཨེཀཱདས ཀཱམཱཝཙརཀུསལཝིཔཱཀསཉྙཱ, དྭེ ཨཀུསལཝིཔཱཀསཉྙཱ, ཨེཀཱདས ཀཱམཱཝཙརཀིརིཡཱསཉྙཱཏི ཨེཝཾ ཙཏུཙཏྟཱལཱིསམྤི སཉྙཱ ནཱནཏྟཱ ནཱནཱསབྷཱཝཱ ཨཉྙམཉྙཝིསདིསཱ, ཏསྨཱ ‘‘ནཱནཏྟསཉྙཱ’’ཏི ཝུཏྟཱ. ཏཱསཾ སབྦསོ ནཱནཏྟསཉྙཱནཾ ཨམནསིཀཱརཱ ཨནཱཝཛྫནཱ ཙིཏྟེ ཙ ཨནུཔྤཱདནཱ. ཡསྨཱ ཏཱ ནཱཝཛྫཏི ཙིཏྟེ ཙ ན ཨུཔྤཱདེཏི ན མནསིཀརོཏི ན པཙྩཝེཀྑཏི, ཏསྨཱཏི ཝུཏྟཾ ཧོཏི. ཡསྨཱ ཙེཏྠ པུརིམཱ རཱུཔསཉྙཱ པཊིགྷསཉྙཱ ཙ ཨིམིནཱ ཛྷཱནེན ནིབྦཏྟེ བྷཝེཔི ན ཝིཛྫནྟི, པགེཝ ཏསྨིཾ བྷཝེ ཨིམཾ ཛྷཱནཾ ཨུཔསམྤཛྫ ཝིཧརཎཀཱལེ, ཏསྨཱ ཏཱསཾ སམཏིཀྐམཱ ཨཏྠངྒམཱཏི དྭེདྷཱཔི ཨབྷཱཝོཡེཝ ཝུཏྟོ. ནཱནཏྟསཉྙཱསུ པན ཡསྨཱ ཨཊྛ ཀཱམཱཝཙརཀུསལསཉྙཱ, ནཝ ཀིརིཡཱསཉྙཱ, དསཱཀུསལསཉྙཱཏི ཨིམཱ སཏྟཝཱིསཏི སཉྙཱ ཨིམིནཱ ཛྷཱནེན ནིབྦཏྟེ བྷཝེ ཝིཛྫནྟི, ཏསྨཱ ཏཱསཾ ཨམནསིཀཱརཱཏི ཝུཏྟནྟི ཝེདིཏབྦཾ. ཏཏྠཱཔི ཧི ཨིམཾ ཛྷཱནཾ ཨུཔསམྤཛྫ ཝིཧརནྟོ ཏཱསཾ ཨམནསིཀཱརཱཡེཝ ཨུཔསམྤཛྫ ཝིཧརཏི. ཏཱ པན མནསིཀརོནྟོ ཨསམཱཔནྣོ ཧོཏཱིཏི. སངྑེཔཏོ ཙེཏྠ ‘‘རཱུཔསཉྙཱནཾ སམཏིཀྐམཱ’’ཏིཨིམིནཱ སབྦརཱུཔཱཝཙརདྷམྨཱནཾ པཧཱནཾ ཝུཏྟཾ. ‘‘པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ’’ཏིཨིམིནཱ སབྦེསཾ ཀཱམཱཝཙརཙིཏྟཙེཏསིཀཱནཾ པཧཱནཉྩ ཨམནསིཀཱརོ ཙ ཝུཏྟོཏི ཝེདིཏབྦོ.

ཨནནྟོ ཨཱཀཱསོཏི ཨེཏྠ པཉྙཏྟིམཏྟཏྟཱ ནཱསྶ ཨུཔྤཱདནྟོ ཝཱ ཝཡནྟོ ཝཱ པཉྙཱཡཏཱིཏི ཨནནྟོ, ཨནནྟཕརཎཝསེནཱཔི ཨནནྟོ. ན ཧི སོ ཡོགཱི ཨེཀདེསཝསེན ཕརཏི, སཀལཝསེནེཝ ཕརཏི. ཨཱཀཱསོཏི ཀསིཎུགྒྷཱཊིམཱཀཱསོ. ཨཱཀཱསཱནཉྩཱཡཏནཱདཱིནི ཝུཏྟཏྠཱནི. ཨུཔསམྤཛྫ ཝིཧརཏཱིཏི ཏཾ པཏྭཱ ནིཔྥཱདེཏྭཱ ཏདནུརཱུཔེན ཨིརིཡཱཔཐེན ཝིཧརཏི. ཏདེཝ སམཱཔཛྫིཏབྦཏོ སམཱཔཏྟི.

ཨཱཀཱསཱནཉྩཱཡཏནཾ སམཏིཀྐམྨཱཏི པུབྦེ ཝུཏྟནཡེན ཛྷཱནམྤི ཨཱཀཱསཱནཉྩཱཡཏནཾ ཨཱརམྨཎམྤི. ཨཱརམྨཎམྤི ཧི པུབྦེ ཝུཏྟནཡེནེཝ ཨཱཀཱསཱནཉྩཾ ཙ ཏཾ པཋམསྶ ཨཱརུཔྤཛ྄ཛྷཱནསྶ ཨཱརམྨཎཏྟཱ དེཝཱནཾ དེཝཱཡཏནཾ ཝིཡ ཨདྷིཊྛཱནཊྛེན ཨཱཡཏནཉྩཱཏི ཨཱཀཱསཱནཉྩཱཡཏནཾ, ཏཐཱ ཨཱཀཱསཱནཉྩཾ ཙ ཏཾ ཏསྶ ཛྷཱནསྶ སཉྫཱཏིཧེཏུཏྟཱ ‘‘ཀམྦོཛཱ ཨསྶཱནཾ ཨཱཡཏན’’ནྟིཨཱདཱིནི ཝིཡ སཉྫཱཏིདེསཊྛེན ཨཱཡཏནཉྩཱཏིཔི ཨཱཀཱསཱནཉྩཱཡཏནཾ. ཨེཝམེཏཾ ཛྷཱནཉྩ ཨཱརམྨཎཉྩཱཏི ཨུབྷཡམྤི ཨཔྤཝཏྟིཀརཎེན ཙ ཨམནསིཀརཎེན ཙ སམཏིཀྐམིཏྭཱཝ ཡསྨཱ ཨིདཾ ཝིཉྙཱཎཉྩཱཡཏནཾ ཨུཔསམྤཛྫ ཝིཧཱཏབྦཾ, ཏསྨཱ ཨུབྷཡམྤེཏམེཀཛ྄ཛྷཾ ཀཏྭཱ ‘‘ཨཱཀཱསཱནཉྩཱཡཏནཾ སམཏིཀྐམྨཱ’’ཏི ཨིདཾ ཝུཏྟནྟི ཝེདིཏབྦཾ. ཨནནྟཾ ཝིཉྙཱཎནྟི ཏཾཡེཝ ‘‘ཨནནྟོ ཨཱཀཱསོ’’ཏི ཕརིཏྭཱ པཝཏྟཾ ཝིཉྙཱཎཾ ‘‘ཨནནྟཾ ཝིཉྙཱཎ’’ནྟི མནསིཀརོནྟོཏི ཝུཏྟཾ ཧོཏི. མནསིཀཱརཝསེན ཝཱ ཨནནྟཾ. སོ ཧི ཏཾ ཨཱཀཱསཱརམྨཎཾ ཝིཉྙཱཎཾ ཨནཝསེསཏོ མནསིཀརོནྟོ ཨནནྟཾ མནསི ཀརོཏི.

ཝིཉྙཱཎཉྩཱཡཏནཾ སམཏིཀྐམྨཱཏི ཨེཏྠཱཔི ཙ པུབྦེ ཝུཏྟནཡེནེཝ ཛྷཱནམྤི ཝིཉྙཱཎཉྩཱཡཏནཾ ཨཱརམྨཎམྤི. ཨཱརམྨཎམྤི ཧི པུབྦེ ཝུཏྟནཡེནེཝ ཝིཉྙཱཎཉྩཾ ཙ ཏཾ དུཏིཡསྶ ཨཱརུཔྤཛ྄ཛྷཱནསྶ ཨཱརམྨཎཏྟཱ ཨདྷིཊྛཱནཊྛེན ཨཱཡཏནཉྩཱཏི ཝིཉྙཱཎཉྩཱཡཏནཾ, ཏཐཱ ཝིཉྙཱཎཉྩཾ ཙ ཏཾ ཏསྶེཝ ཛྷཱནསྶ སཉྫཱཏིཧེཏུཏྟཱ སཉྫཱཏིདེསཊྛེན ཨཱཡཏནཉྩཱཏིཔི ཝིཉྙཱཎཉྩཱཡཏནཾ. ཨེཝམེཏཾ ཛྷཱནཉྩ ཨཱརམྨཎཉྩཱཏི ཨུབྷཡམྤི ཨཔྤཝཏྟིཀརཎེན ཙ ཨམནསིཀརཎེན ཙ སམཏིཀྐམིཏྭཱཝ ཡསྨཱ ཨིདཾ ཨཱཀིཉྩཉྙཱཡཏནཾ ཨུཔསམྤཛྫ ཝིཧཱཏབྦཾ, ཏསྨཱ ཨུབྷཡམྤེཏམེཀཛ྄ཛྷཾ ཀཏྭཱ ‘‘ཝིཉྙཱཎཉྩཱཡཏནཾ སམཏིཀྐམྨཱ’’ཏི ཨིདཾ ཝུཏྟནྟི ཝེདིཏབྦཾ. ནཏྠི ཀིཉྩཱིཏི ནཏྠི ནཏྠི, སུཉྙཾ སུཉྙཾ, ཝིཝིཏྟཾ ཝིཝིཏྟནྟི ཨེཝཾ མནསིཀརོནྟོཏི ཝུཏྟཾ ཧོཏི.

ཨཱཀིཉྩཉྙཱཡཏནཾ སམཏིཀྐམྨཱཏི ཨེཏྠཱཔི པུབྦེ ཝུཏྟནཡེནེཝ ཛྷཱནམྤི ཨཱཀིཉྩཉྙཱཡཏནཾ ཨཱརམྨཎམྤི. ཨཱརམྨཎམྤི ཧི པུབྦེ ཝུཏྟནཡེནེཝ ཨཱཀིཉྩཉྙཉྩ ཏཾ ཏཏིཡསྶ ཨཱརུཔྤཛ྄ཛྷཱནསྶ ཨཱརམྨཎཏྟཱ ཨདྷིཊྛཱནཊྛེན ཨཱཡཏནཉྩཱཏི ཨཱཀིཉྩཉྙཱཡཏནཾ, ཏཐཱ ཨཱཀིཉྩཉྙཉྩ ཏཾ ཏསྶེཝ ཛྷཱནསྶ སཉྫཱཏིཧེཏུཏྟཱ སཉྫཱཏིདེསཊྛེན ཨཱཡཏནཉྩཱཏིཔི ཨཱཀིཉྩཉྙཱཡཏནཾ. ཨེཝམེཏཾ ཛྷཱནཉྩ ཨཱརམྨཎཉྩཱཏི ཨུབྷཡམྤི ཨཔྤཝཏྟིཀརཎེན ཙ ཨམནསིཀརཎེན ཙ སམཏིཀྐམིཏྭཱཝ ཡསྨཱ ཨིདཾ ནེཝསཉྙཱནཱསཉྙཱཡཏནཾ ཨུཔསམྤཛྫ ཝིཧཱཏབྦཾ, ཏསྨཱ ཨུབྷཡམྤེཏམེཀཛ྄ཛྷཾ ཀཏྭཱ ‘‘ཨཱཀིཉྩཉྙཱཡཏནཾ སམཏིཀྐམྨཱ’’ཏི ཨིདཾ ཝུཏྟནྟི ཝེདིཏབྦཾ. སཉྙཱཝེདཡིཏནིརོདྷཀཐཱ ཧེཊྛཱ ཀཐིཏཱཝ.

‘‘རཱུཔཱི རཱུཔཱནི པསྶཏཱི’’ཏིཨཱདིཀཱ སཏྟ ཝིམོཀྑཱ པཙྩནཱིཀདྷམྨེཧི སུཊྛུ ཝིམུཙྩནཊྛེན ཨཱརམྨཎེ ཨབྷིརཏིཝསེན སུཊྛུ མུཙྩནཊྛེན ཙ ཝིམོཀྑཱ, ནིརོདྷསམཱཔཏྟི པན ཙིཏྟཙེཏསིཀེཧི ཝིམུཏྟཊྛེན ཝིམོཀྑོ. སམཱཔཏྟིསམཱཔནྣསམཡེ ཝིམུཏྟོ ཧོཏི, ཝུཊྛིཏསམཡེ ཨཝིམུཏྟོ ཧོཏཱིཏི སམཡཝིམོཀྑོ. སམུཙྪེདཝིམུཏྟིཝསེན ཨཙྩནྟཝིམུཏྟཏྟཱ ཨརིཡམགྒཱ, པཊིཔྤསྶདྡྷིཝིམུཏྟིཝསེན ཨཙྩནྟཝིམུཏྟཏྟཱ སཱམཉྙཕལཱནི, ནིསྶརཎཝིམུཏྟིཝསེན ཨཙྩནྟཝིམུཏྟཏྟཱ ནིབྦཱནཾ ཨསམཡཝིམོཀྑོ. ཏཐཱ སཱམཡིཀཱསཱམཡིཀཝིམོཀྑཱ.

པམཱདཾ ཨཱགམྨ པརིཧཱཡཏཱིཏི ཀུཔྤོ. ཏཐཱ ན པརིཧཱཡཏཱིཏི ཨཀུཔྤོ. ལོཀཱཡ སཾཝཏྟཏཱིཏི ལོཀིཡོ. ཨརིཡམགྒཱ ལོཀཾ ཨུཏྟརནྟཱིཏི ལོཀུཏྟརཱ, སཱམཉྙཕལཱནི ནིབྦཱནཉྩ ལོཀཏོ ཨུཏྟིཎྞཱཏི ལོཀུཏྟརཱ. ཨཱདིཏྟཾ ཨཡོགུལ༹ཾ མཀྑིཀཱ ཝིཡ ཏེཛུསྶདཾ ལོཀུཏྟརཾ དྷམྨཾ ཨཱསཝཱ ནཱལམྦནྟཱིཏི ཨནཱསཝོ. རཱུཔཔྤཊིསཉྙུཏྟོཏི རཱུཔཛ྄ཛྷཱནཱནི. ཨརཱུཔཔྤཊིསཉྙུཏྟོཏི ཨརཱུཔསམཱཔཏྟིཡོ. ཏཎྷཱཡ ཨཱལམྦིཏོ པཎིཧིཏོ. ཨནཱལམྦིཏོ ཨཔྤཎིཧིཏོ. མགྒཕལཱནི ཨེཀཱརམྨཎཏྟཱ ཨེཀནིཊྛཏྟཱ ཙ ཨེཀཏྟཝིམོཀྑོ, ནིབྦཱནཾ ཨདུཏིཡཏྟཱ ཨེཀཏྟཝིམོཀྑོ, ཨཱརམྨཎནཱནཏྟཱ ཝིཔཱཀནཱནཏྟཱ ཙ ནཱནཏྟཝིམོཀྑོ.

༢༡༤. སིཡཱཏི བྷཝེཡྻ, དས ཧོནྟཱིཏི ཙ ཨེཀོ ཧོཏཱིཏི ཙ བྷཝེཡྻཱཏི ཨཏྠོ. ‘‘སིཡཱ’’ཏི ཙ ཨེཏཾ ཝིདྷིཝཙནཾ, ན པུཙྪཱཝཙནཾ. ཝཏྠུཝསེནཱཏི ནིཙྩསཉྙཱདིདསཝཏྠུཝསེན དས ཧོནྟི. པརིཡཱཡེནཱཏི ཝིམུཙྩནཔརིཡཱཡེན ཨེཀོ ཧོཏི. སིཡཱཏི ཀཐཉྩ སིཡཱཏི ཡཾ ཝཱ སིཡཱཏི ཝིཧིཏཾ, ཏཾ ཀཐཾ སིཡཱཏི པུཙྪཏི. ཨནིཙྩཱནུཔསྶནཉཱཎནྟི སམཱསཔདཾ. ཨནིཙྩཱནུཔསྶནཱཉཱཎནྟི ཝཱ པཱཋོ. ཏཐཱ སེསེསུཔི. ནིཙྩཏོ སཉྙཱཡཱཏི ནིཙྩཏོ པཝཏྟཱཡ སཉྙཱཡ, ‘‘ནིཙྩ’’ནྟི པཝཏྟཱཡ སཉྙཱཡཱཏི ཨཏྠོ. ཨེས ནཡོ སུཁཏོ ཨཏྟཏོ ནིམིཏྟཏོ སཉྙཱཡཱཏི ཨེཏྠཱཔི. ནིམིཏྟཏོཏི ཙ ནིཙྩནིམིཏྟཏོ. ནནྡིཡཱ སཉྙཱཡཱཏི ནནྡིཝསེན པཝཏྟཱཡ སཉྙཱཡ, ནནྡིསམྤཡུཏྟཱཡ སཉྙཱཡཱཏི ཨཏྠོ. ཨེས ནཡོ རཱགཏོ སམུདཡཏོ ཨཱདཱནཏོ པཎིདྷིཏོ ཨབྷིནིཝེསཏོ སཉྙཱཡཱཏི ཨེཏྠཱཔི. ཡསྨཱ པན ཁཡཝཡཝིཔརིཎཱམཱནུཔསྶནཱ ཏིསྶོ ཨནིཙྩཱནུཔསྶནཱདཱིནཾ བལཝབྷཱཝཱཡ བལཝཔཙྩཡབྷཱུཏཱ བྷངྒཱནུཔསྶནཱཝིསེསཱ. བྷངྒདསྶནེན ཧི ཨནིཙྩཱནུཔསྶནཱ བལཝཏཱི ཧོཏི. ཨནིཙྩཱནུཔསྶནཱཡ ཙ བལཝཏིཡཱ ཛཱཏཱཡ ‘‘ཡདནིཙྩཾ ཏཾ དུཀྑཾ, ཡཾ དུཀྑཾ ཏདནཏྟཱ’’ཏི (སཾ. ནི. ༣.༡༥) དུཀྑཱནཏྟཱནུཔསྶནཱཔི བལཝཏིཡོ ཧོནྟི. ཏསྨཱ ཨནིཙྩཱནུཔསྶནཱདཱིསུ ཝུཏྟཱསུ ཏཱཔི ཏིསྶོ ཝུཏྟཱཝ ཧོནྟི. ཡསྨཱ ཙ སུཉྙཏཱནུཔསྶནཱ ‘‘ཨབྷིནིཝེསཏོ སཉྙཱཡ མུཙྩཏཱི’’ཏི ཝཙནེནེཝ སཱརཱདཱནཱབྷིནིཝེསསམྨོཧཱབྷིནིཝེསཨཱལཡཱབྷིནིཝེསསཉྙོགཱབྷིནིཝེསཏོ སཉྙཱཡ མུཙྩཏཱིཏི ཝུཏྟམེཝ ཧོཏི, ཨབྷིནིཝེསཱབྷཱཝེནེཝ ཨཔྤཊིསངྑཱཏོ སཉྙཱཡ མུཙྩཏཱིཏི ཝུཏྟམེཝ ཧོཏི, ཏསྨཱ ཨདྷིཔཉྙཱདྷམྨཝིཔསྶནཱདཡོ པཉྩཔི ཨནུཔསྶནཱ ན ཝུཏྟཱཏི ཝེདིཏབྦཱ. ཨེཝཾ ཨཊྛཱརསསུ མཧཱཝིཔསྶནཱསུ ཨེཏཱ ཨཊྛ ཨནུཔསྶནཱ ཨཝཏྭཱ དསེཝ ཨནུཔསྶནཱ ཝུཏྟཱཏི ཝེདིཏབྦཱ.

༢༡༥. ཨནིཙྩཱནུཔསྶནཱ ཡཐཱབྷཱུཏཾ ཉཱཎནྟི ཨནིཙྩཱནུཔསྶནཱཡེཝ ཡཐཱབྷཱུཏཉཱཎཾ. ཨུབྷཡམྤི པཙྩཏྟཝཙནཾ. ཡཐཱབྷཱུཏཉཱཎནྟི ཉཱཎཏྠོ ཝུཏྟོ. ཨེཝཾ སེསེསུཔི. སམྨོཧཱ ཨཉྙཱཎཱཏི སམྨོཧབྷཱུཏཱ ཨཉྙཱཎཱ. མུཙྩཏཱིཏི ཝིམོཀྑཏྠོ ཝུཏྟོ.

༢༡༦. ཨནིཙྩཱནུཔསྶནཱ ཨནུཏྟརཾ སཱིཏིབྷཱཝཉཱཎནྟི ཨེཏྠ སཱསནེཡེཝ སབྦྷཱཝཏོ ཨུཏྟམཊྛེན ཨནུཏྟརཾ, ཨནུཏྟརསྶ པཙྩཡཏྟཱ ཝཱ ཨནུཏྟརཾ, སཱིཏིབྷཱཝོ ཨེཝ ཉཱཎཾ སཱིཏིབྷཱཝཉཱཎཾ. ཏཾ ཨནིཙྩཱནུཔསྶནཱསངྑཱཏཾ ཨནུཏྟརཾ སཱིཏིབྷཱཝཉཱཎཾ. ‘‘ཚཧི, བྷིཀྑཝེ, དྷམྨེཧི སམནྣཱགཏོ བྷིཀྑུ བྷབྦོ ཨནུཏྟརཾ སཱིཏིབྷཱཝཾ སཙྪིཀཱཏུ’’ནྟི (ཨ. ནི. ༦.༨༥) ཨེཏྠ ནིབྦཱནཾ ཨནུཏྟརོ སཱིཏིབྷཱཝོ ནཱམ. ཨིདྷ པན ཝིཔསྶནཱ ཨནུཏྟརོ སཱིཏིབྷཱཝོ. ནིཙྩཏོ སནྟཱཔཔརིལཱ༹ཧདརཐཱ མུཙྩཏཱིཏི ཨེཏྠཱཔི ‘‘ནིཙྩ’’ནྟི པཝཏྟཀིལེསཱ ཨེཝ ཨིདྷ ཙཱམུཏྲ ཙ སནྟཱཔནཊྛེན སནྟཱཔོ, པརིདཧནཊྛེན པརིལཱ༹ཧོ, ཨུཎྷཊྛེན དརཐོཏི ཝུཙྩནྟི.

༢༡༧. ནེཀྑམྨཾ ཛྷཱཡཏཱིཏི ཛྷཱནནྟིཨཱདཡོ ཧེཊྛཱ ཝུཏྟཏྠཱ. ནེཀྑམྨཱདཱིནི ཙེཏྠ ཨཊྛ སམཱཔཏྟིཡོ ཙ ནིབྦེདྷབྷཱགིཡཱནེཝ.

༢༡༨. ཨནུཔཱདཱ ཙིཏྟསྶ ཝིམོཀྑོཏི ཨིདྷ ཝིཔསྶནཱཡེཝ. ‘‘ཨེཏདཏྠཱ ཀཐཱ, ཨེཏདཏྠཱ མནྟནཱ, ཡདིདཾ ཨནུཔཱདཱ ཙིཏྟསྶ ཝིམོཀྑོ’’ཏི (པརི. ༣༦༦; ཨ. ནི. ༣.༦༨) ཨེཏྠ པན ནིབྦཱནཾ ཨནུཔཱདཱ ཙིཏྟསྶ ཝིམོཀྑོ. ཀཏིཧུཔཱདཱནེཧཱིཏི ཀཏིཧི ཨུཔཱདཱནེཧི. ཀཏམཱ ཨེཀུཔཱདཱནཱཏི ཀཏམཏོ ཨེཀུཔཱདཱནཏོ. ཨིདཾ ཨེཀུཔཱདཱནཱཏི ཨིཏོ ཨེཀཏོ ཨུཔཱདཱནཏོ. ཨིདནྟི པུབྦཉཱཎཱཔེཀྑཾ ཝཱ. ཨུཔཱདཱནཏོ མུཙྩནེསུ ཡསྨཱ ཨཱདིཏོ སངྑཱརཱནཾ ཨུདཡབྦཡཾ པསྶིཏྭཱ པསྶིཏྭཱ ཨནིཙྩཱནུཔསྶནཱཡ ཝིཔསྶཏི, པཙྪཱ སངྑཱརཱནཾ བྷངྒམེཝ པསྶིཏྭཱ ཨནིམིཏྟཱནུཔསྶནཱཡ ཝིཔསྶཏི. ཨནིཙྩཱནུཔསྶནཱཝིསེསོཡེཝ ཧི ཨནིམིཏྟཱནུཔསྶནཱ. སངྑཱརཱནཾ ཨུདཡབྦཡདསྶནེན ཙ བྷངྒདསྶནེན ཙ ཨཏྟཱབྷཱཝོ པཱཀཊོ ཧོཏི. ཏེན དིཊྛུཔཱདཱནསྶ ཙ ཨཏྟཝཱདུཔཱདཱནསྶ ཙ པཧཱནཾ ཧོཏི. དིཊྛིཔྤཧཱནེནེཝ ཙ ‘‘སཱིལབྦཏེན ཨཏྟཱ སུཛ྄ཛྷཏཱི’’ཏི དསྶནསྶ ཨབྷཱཝཏོ སཱིལབྦཏུཔཱདཱནསྶ པཧཱནཾ ཧོཏི. ཡསྨཱ ཙ ཨནཏྟཱནུཔསྶནཱཡ ཨུཛུཀམེཝ ཨཏྟཱབྷཱཝཾ པསྶཏི, ཨནཏྟཱནུཔསྶནཱཝིསེསོཡེཝ ཙ སུཉྙཏཱནུཔསྶནཱ, ཏསྨཱ ཨིམཱནི ཙཏྟཱརི ཉཱཎཱནི དིཊྛུཔཱདཱནཱདཱིཧི ཏཱིཧི ཨུཔཱདཱནེཧི མུཙྩནྟི. དུཀྑཱནུཔསྶནཱདཱིནཾཡེཝ པན ཙཏསྶནྣཾ ཏཎྷཱཡ ཨུཛུཝིཔཙྩནཱིཀཏྟཱ ཨནིཙྩཱནུཔསྶནཱདཱིནཾ ཙཏསྶནྣཾ ཀཱམུཔཱདཱནཏོ མུཙྩནཾ ན ཝུཏྟཾ. ཡསྨཱ ཨཱདིཏོ དུཀྑཱནུཔསྶནཱཡ ‘‘སངྑཱརཱ དུཀྑཱ’’ཏི པསྶཏོ པཙྪཱ ཨཔྤཎིཧིཏཱནུཔསྶནཱཡ ཙ ‘‘སངྑཱརཱ དུཀྑཱ’’ཏི པསྶཏོ སངྑཱརཱནཾ པཏྠནཱ པཧཱིཡཏི. དུཀྑཱནུཔསྶནཱཝིསེསོཡེཝ ཧི ཨཔྤཎིཧིཏཱནུཔསྶནཱ. ཡསྨཱ ཙ སངྑཱརེསུ ནིབྦིདཱནུཔསྶནཱཡ ནིབྦིནྡནྟསྶ ཝིརཱགཱནུཔསྶནཱཡ ཝིརཛྫནྟསྶ སངྑཱརཱནཾ པཏྠནཱ པཧཱིཡཏི, ཏསྨཱ ཨིམཱནི ཙཏྟཱརི ཉཱཎཱནི ཀཱམུཔཱདཱནཏོ མུཙྩནྟི. ཡསྨཱ ནིརོདྷཱནུཔསྶནཱཡ ཀིལེསེ ནིརོདྷེཏི, པཊིནིསྶགྒཱནུཔསྶནཱཡ ཀིལེསེ པརིཙྩཛཏི, ཏསྨཱ ཨིམཱནི དྭེ ཉཱཎཱནི ཙཏཱུཧི ཨུཔཱདཱནེཧི མུཙྩནྟཱིཏི ཨེཝཾ སབྷཱཝནཱནཏྟེན ཙ ཨཱཀཱརནཱནཏྟེན ཙ ཨཊྛསཊྛི ཝིམོཀྑཱ ནིདྡིཊྛཱ.

༢༡༩. ཨིདཱནི ཨཱདིཏོ ཨུདྡིཊྛཱནཾ ཏིཎྞཾ ཝིམོཀྑཱནཾ མུཁཱནི དསྶེཏྭཱ ཝིམོཀྑམུཁཔུབྦངྒམཾ ཨིནྡྲིཡཝིསེསཾ པུགྒལཝིསེསཉྩ དསྶེཏུཀཱམོ ཏཱིཎི ཁོ པནིམཱནཱིཏིཨཱདིམཱཧ. ཏཏྠ ཝིམོཀྑམུཁཱནཱིཏི ཏིཎྞཾ ཝིམོཀྑཱནཾ མུཁཱནི. ལོཀནིཡྻཱནཱཡ སཾཝཏྟནྟཱིཏི ཏེདྷཱཏུཀལོཀཏོ ནིཡྻཱནཱཡ ནིགྒམནཱཡ སཾཝཏྟནྟི. སབྦསངྑཱརེ པརིཙྪེདཔརིཝཊུམཏོ སམནུཔསྶནཏཱཡཱཏི སབྦེསཾ སངྑཱརཱནཾ ཨུདཡབྦཡཝསེན པརིཙྪེདཏོ ཙེཝ པརིཝཊུམཏོ ཙ སམནུཔསྶནཏཱཡ. ལོཀནིཡྻཱནཾ ཧོཏཱིཏི པཱཋསེསོ. ཨནིཙྩཱནུཔསྶནཱ ཧི ཨུདཡཏོ པུབྦེ སངྑཱརཱ ནཏྠཱིཏི པརིཙྪིནྡིཏྭཱ ཏེསཾ གཏིཾ སམནྣེསམཱནཱ ཝཡཏོ པརཾ ན གཙྪནྟི, ཨེཏྠེཝ ཨནྟརདྷཱཡནྟཱིཏི པརིཝཊུམཏོ པརིཡནྟཏོ སམནུཔསྶཏི. སབྦསངྑཱརཱ ཧི ཨུདཡེན པུབྦནྟཔརིཙྪིནྣཱ, ཝཡེན ཨཔརནྟཔརིཙྪིནྣཱ. ཨནིམིཏྟཱཡ ཙ དྷཱཏུཡཱ ཙིཏྟསམྤཀྑནྡནཏཱཡཱཏི ཝིཔསྶནཱཀྑཎེཔི ནིབྦཱནནིནྣཏཱཡ ཨནིམིཏྟཱཀཱརེན ཨུཔཊྛཱནཏོ ཨནིམིཏྟསངྑཱཏཱཡ ནིབྦཱནདྷཱཏུཡཱ ཙིཏྟཔཝིསནཏཱཡ ཙ ལོཀནིཡྻཱནཾ ཧོཏི. མནོསམུཏྟེཛནཏཱཡཱཏི ཙིཏྟསཾཝེཛནཏཱཡ. དུཀྑཱནུཔསྶནཱཡ ཧི སངྑཱརེསུ ཙིཏྟཾ སཾཝིཛྫཏི. ཨཔྤཎིཧིཏཱཡ ཙ དྷཱཏུཡཱཏི ཝིཔསྶནཱཀྑཎེཔི ནིབྦཱནནིནྣཏཱཡ ཨཔྤཎིཧིཏཱཀཱརེན ཨུཔཊྛཱནཏོ ཨཔྤཎིཧིཏསངྑཱཏཱཡ ནིབྦཱནདྷཱཏུཡཱ. སབྦདྷམྨེཏི ནིབྦཱནསྶ ཨཝིཔསྶནུཔགཏྟེཔི ཨནཏྟསབྷཱཝསབྦྷཱཝཏོ ‘‘སབྦསངྑཱརེ’’ཏི ཨཝཏྭཱ ‘‘སབྦདྷམྨེ’’ཏི ཝུཏྟཾ. པརཏོ སམནུཔསྶནཏཱཡཱཏི པཙྩཡཱཡཏྟཏྟཱ ཨཝསཏཱཡ ཨཝིདྷེཡྻཏཱཡ ཙ ‘‘ནཱཧཾ ན མམ’’ནྟི ཨེཝཾ ཨནཏྟཏོ སམནུཔསྶནཏཱཡ. སུཉྙཏཱཡ ཙ དྷཱཏུཡཱཏི ཝིཔསྶནཱཀྑཎེཔི ནིབྦཱནནིནྣཏཱཡ སུཉྙཏཱཀཱརེན ཨུཔཊྛཱནཏོ སུཉྙཏཱསངྑཱཏཱཡ ནིབྦཱནདྷཱཏུཡཱ. ཨིཏི ཨིམཱནི ཏཱིཎི ཝཙནཱནི ཨནིཙྩདུཀྑཱནཏྟཱནུཔསྶནཱནཾ ཝསེན ཝུཏྟཱནི. ཏེནེཝ ཏདནནྟརཾ ཨནིཙྩཏོ མནསིཀརོཏོཏིཨཱདི ཝུཏྟཾ. ཏཏྠ ཁཡཏོཏི ཁཱིཡནཏོ. བྷཡཏོཏི སབྷཡཏོ. སུཉྙཏོཏི ཨཏྟརཧིཏཏོ.

ཨདྷིམོཀྑབཧུལནྟི ཨནིཙྩཱནུཔསྶནཱཡ ‘‘ཁཎབྷངྒཝསེན སངྑཱརཱ བྷིཛྫནྟཱི’’ཏི སདྡྷཱཡ པཊིཔནྣསྶ པཙྩཀྑཏོ ཁཎབྷངྒདསྶནེན ‘‘སཙྩཾ ཝཏཱཧ བྷགཝཱ’’ཏི བྷགཝཏི སདྡྷཱཡ སདྡྷཱབཧུལཾ ཙིཏྟཾ ཧོཏི. ཨཐ ཝཱ པཙྩུཔྤནྣཱནཾ པདེསསངྑཱརཱནཾ ཨནིཙྩཏཾ པསྶིཏྭཱ ‘‘ཨེཝཾ ཨནིཙྩཱ ཨཏཱིཏཱནཱགཏཔཙྩུཔྤནྣཱ སབྦེ སངྑཱརཱ’’ཏི ཨདྷིམུཙྩནཏོ ཨདྷིམོཀྑབཧུལཾ ཙིཏྟཾ ཧོཏི. པསྶདྡྷིབཧུལནྟི དུཀྑཱནུཔསྶནཱཡ ཙིཏྟཀྑོབྷཀརཱཡ པཎིདྷིཡཱ པཛཧནཏོ ཙིཏྟདརཐཱབྷཱཝེན པསྶདྡྷིབཧུལཾ ཙིཏྟཾ ཧོཏི. ཨཐ ཝཱ དུཀྑཱནུཔསྶནཱཡ སཾཝེགཛནནཏོ སཾཝིགྒསྶ ཙ ཡོནིསོ པདཧནཏོ ཝིཀྑེཔཱབྷཱཝེན པསྶདྡྷིབཧུལཾ ཙིཏྟཾ ཧོཏི. ཝེདབཧུལནྟི ཨནཏྟཱནུཔསྶནཱཡ བཱཧིརཀེཧི ཨདིཊྛཾ གམྦྷཱིརཾ ཨནཏྟལཀྑཎཾ པསྶཏོ ཉཱཎབཧུལཾ ཙིཏྟཾ ཧོཏི. ཨཐ ཝཱ ‘‘སདེཝཀེན ལོཀེན ཨདིཊྛཾ ཨནཏྟལཀྑཎཾ དིཊྛ’’ནྟི ཏུཊྛསྶ ཏུཊྛིབཧུལཾ ཙིཏྟཾ ཧོཏི.

ཨདྷིམོཀྑབཧུལོ སདྡྷིནྡྲིཡཾ པཊིལབྷཏཱིཏི པུབྦབྷཱགེ ཨདྷིམོཀྑོ བཧུལཾ པཝཏྟམཱནོ བྷཱཝནཱཔཱརིཔཱུརིཡཱ སདྡྷིནྡྲིཡཾ ནཱམ ཧོཏི, ཏཾ སོ པཊིལབྷཏི ནཱམ. པསྶདྡྷིབཧུལོ སམཱདྷིནྡྲིཡཾ པཊིལབྷཏཱིཏི པུབྦབྷཱགེ པསྶདྡྷིབཧུལསྶ ‘‘པསྶདྡྷཀཱཡོ སུཁཾ ཝེདེཏི, སུཁིནོ ཙིཏྟཾ སམཱདྷིཡཏཱི’’ཏི (པཊི. མ. ༡.༧༣; ཨ. ནི. ༥.༢༦) ཝཙནཏོ བྷཱཝནཱཔཱརིཔཱུརིཡཱ པསྶདྡྷིཔཙྩཡཱ སམཱདྷིནྡྲིཡཾ ཧོཏི, ཏཾ སོ པཊིལབྷཏི ནཱམ. ཝེདབཧུལོ པཉྙིནྡྲིཡཾ པཊིལབྷཏཱིཏི པུབྦབྷཱགེ ཝེདོ བཧུལཾ པཝཏྟམཱནོ བྷཱཝནཱཔཱརིཔཱུརིཡཱ པཉྙིནྡྲིཡཾ ནཱམ ཧོཏི, ཏཾ སོ པཊིལབྷཏི ནཱམ.

ཨཱདྷིཔཏེཡྻཾ ཧོཏཱིཏི ཚནྡཱདིཀེ ཨདྷིཔཏིབྷཱུཏེཔི སཀིཙྩནིཔྥཱདནཝསེན ཨདྷིཔཏི ཧོཏི པདྷཱནོ ཧོཏི. བྷཱཝནཱཡཱཏི བྷུམྨཝཙནཾ, ཨུཔརཱུཔརི བྷཱཝནཏྠཱཡ ཝཱ. ཏདནྭཡཱ ཧོནྟཱིཏི ཏཾ ཨནུགཱམིནཱི ཏཾ ཨནུཝཏྟིནཱི ཧོནྟི. སཧཛཱཏཔཙྩཡཱ ཧོནྟཱིཏི ཨུཔྤཛྫམཱནཱ ཙ སཧཨུཔྤཱདནབྷཱཝེན ཨུཔཀཱརཀཱ ཧོནྟི པཀཱསསྶ པདཱིཔོ ཝིཡ. ཨཉྙམཉྙཔཙྩཡཱ ཧོནྟཱིཏི ཨཉྙམཉྙཾ ཨུཔྤཱདནུཔཏྠམྦྷནབྷཱཝེན ཨུཔཀཱརཀཱ ཧོནྟི ཨཉྙམཉྙཱུཔཏྠམྦྷཀཾ ཏིདཎྜཾ ཝིཡ. ནིསྶཡཔཙྩཡཱ ཧོནྟཱིཏི ཨདྷིཊྛཱནཱཀཱརེན ནིསྶཡཱཀཱརེན ཙ ཨུཔཀཱརཀཱ ཧོནྟི ཏརུཙིཏྟཀམྨཱནཾ པཐཝཱིཔཊཱདི ཝིཡ. སམྤཡུཏྟཔཙྩཡཱ ཧོནྟཱིཏི ཨེཀཝཏྠུཀཨེཀཱརམྨཎཨེཀུཔྤཱདཨེཀནིརོདྷསངྑཱཏེན སམྤཡུཏྟབྷཱཝེན ཨུཔཀཱརཀཱ ཧོནྟི.

༢༢༠. པཊིཝེདྷཀཱལེཏི མགྒཀྑཎེ སཙྩཔཊིཝེདྷཀཱལེ. པཉྙིནྡྲིཡཾ ཨཱདྷིཔཏེཡྻཾ ཧོཏཱིཏི མགྒཀྑཎེ ནིབྦཱནཾ ཨཱརམྨཎཾ ཀཏྭཱ སཙྩདསྶནཀིཙྩཀརཎཝསེན ཙ ཀིལེསཔྤཧཱནཀིཙྩཀརཎཝསེན ཙ པཉྙིནྡྲིཡམེཝ ཛེཊྛཀཾ ཧོཏི. པཊིཝེདྷཱཡཱཏི སཙྩཔཊིཝིཛ྄ཛྷནཏྠཱཡ. ཨེཀརསཱཏི ཝིམུཏྟིརསེན. དསྶནཊྛེནཱཏི སཙྩདསྶནཊྛེན. ཨེཝཾ པཊིཝིཛ྄ཛྷནྟོཔི བྷཱཝེཏི, བྷཱཝེནྟོཔི པཊིཝིཛ྄ཛྷཏཱིཏི མགྒཀྑཎེ སཀིཾཡེཝ བྷཱཝནཱཡ ཙ པཊིཝེདྷསྶ ཙ སབྦྷཱཝདསྶནཏྠཾ ཝུཏྟཾ. ཨནཏྟཱནུཔསྶནཱཡ ཝིཔསྶནཱཀྑཎེཔི པཉྙིནྡྲིཡསྶེཝ ཨཱདྷིཔཏེཡྻཏྟཱ ‘‘པཊིཝེདྷཀཱལེཔཱི’’ཏི ཨཔིསདྡོ པཡུཏྟོ.

༢༢༡. ཨནིཙྩཏོ མནསིཀརོཏོ ཀཏམིནྡྲིཡཾ ཨདྷིམཏྟཾ ཧོཏཱིཏིཨཱདི ཨིནྡྲིཡཝིསེསེན པུགྒལཝིསེསཾ དསྶེཏུཾ ཝུཏྟཾ. ཏཏྠ ཨདྷིམཏྟནྟི ཨདྷིཀཾ. ཏཏྠ སདྡྷིནྡྲིཡསམཱདྷིནྡྲིཡཔཉྙིནྡྲིཡཱནཾ ཨདྷིམཏྟཏཱ སངྑཱརུཔེཀྑཱཡ ཝེདིཏབྦཱ. སདྡྷཱཝིམུཏྟོཏི ཨེཏྠ ཨཝིསེསེཏྭཱ ཝུཏྟེཔི ཨུཔརི ཝིསེསེཏྭཱ ཝུཏྟཏྟཱ སོཏཱཔཏྟིམགྒཾ ཋཔེཏྭཱ སེསེསུ སཏྟསུ ཋཱནེསུ སདྡྷཱཝིམུཏྟོཏི ཝུཏྟཾ ཧོཏི. སདྡྷཱཝིམུཏྟོ སདྡྷིནྡྲིཡསྶ ཨདྷིམཏྟཏྟཱ ཧོཏི, ན སདྡྷིནྡྲིཡསྶ ཨདྷིམཏྟཏྟཱ སབྦཏྠ སདྡྷཱཝིམུཏྟོཏིཔི ཝུཏྟཾ ཧོཏི. སོཏཱཔཏྟིམགྒཀྑཎེ སདྡྷིནྡྲིཡསྶ ཨདྷིམཏྟཏྟཱཡེཝ སེསེསུ སམཱདྷིནྡྲིཡཔཉྙིནྡྲིཡཱདྷིམཏྟཏྟེཔི སཏི སདྡྷཱཝིམུཏྟོཡེཝ ནཱམ ཧོཏཱིཏི ཝདནྟི. ཀཱཡསཀྑཱི ཧོཏཱིཏི ཨཊྛསུཔི ཋཱནེསུ ཀཱཡསཀྑཱི ནཱམ ཧོཏི. དིཊྛིཔྤཏྟོ ཧོཏཱིཏི སདྡྷཱཝིམུཏྟེ ཝུཏྟནཡེནེཝ ཝེདིཏབྦཾ.

སདྡཧནྟོ ཝིམུཏྟོཏི སདྡྷཱཝིམུཏྟོཏི སདྡྷིནྡྲིཡསྶ ཨདྷིམཏྟཏྟཱ སོཏཱཔཏྟིམགྒཀྑཎེ སདྡཧནྟོ ཙཏཱུསུཔི ཕལཀྑཎེསུ ཝིམུཏྟོཏི སདྡྷཱཝིམུཏྟོཏི ཝུཏྟཾ ཧོཏི. ཨུཔརིམགྒཏྟཡཀྑཎེ སདྡྷཱཝིམུཏྟཏྟཾ ཨིདཱནི ཝཀྑཏི. སོཏཱཔཏྟིམགྒཀྑཎེ པན སདྡྷཱནུསཱརིཏྟཾ པཙྪཱ ཝཀྑཏི. ཕུཊྛཏྟཱ སཙྪིཀཏོཏི ཀཱཡསཀྑཱིཏི སུཀྑཝིཔསྶཀཏྟེ སཏི ཨུཔཙཱརཛ྄ཛྷཱནཕསྶསྶ རཱུཔཱརཱུཔཛ྄ཛྷཱནལཱབྷིཏྟེ སཏི རཱུཔཱརཱུཔཛ྄ཛྷཱནཕསྶསྶ ཕུཊྛཏྟཱ ནིབྦཱནཾ སཙྪིཀཏོཏི ཀཱཡསཀྑཱི, ནཱམཀཱཡེན ཝུཏྟཔྤཀཱརེ ཛྷཱནཕསྶེ ཙ ནིབྦཱནེ ཙ སཀྑཱིཏི ཝུཏྟཾ ཧོཏི. དིཊྛཏྟཱ པཏྟོཏི དིཊྛིཔྤཏྟོཏི སོཏཱཔཏྟིམགྒཀྑཎེ སམྤཡུཏྟེན པཉྙིནྡྲིཡེན པཋམཾ ནིབྦཱནསྶ དིཊྛཏྟཱ པཙྪཱ སོཏཱཔཏྟིཕལཱདིཝསེན ནིབྦཱནཾ པཏྟོཏི དིཊྛིཔྤཏྟོ, པཉྙིནྡྲིཡསངྑཱཏཱཡ དིཊྛིཡཱ ནིབྦཱནཾ པཏྟོཏི ཝུཏྟཾ ཧོཏི. སོཏཱཔཏྟིམགྒཀྑཎེ པན དྷམྨཱནུསཱརིཏྟཾ པཙྪཱ ཝཀྑཏི. སདྡཧནྟོ ཝིམུཙྩཏཱིཏི སདྡྷཱཝིམུཏྟོཏི སདྡྷིནྡྲིཡསྶ ཨདྷིམཏྟཏྟཱ སཀདཱགཱམིཨནཱགཱམིཨརཧཏྟམགྒཀྑཎེསུ སདྡཧནྟོ ཝིམུཙྩཏཱིཏི སདྡྷཱཝིམུཏྟོ. ཨེཏྠ ཝིམུཙྩམཱནོཔི ཨཱསཾསཱཡ བྷཱུཏཝཙནཝསེན ‘‘ཝིམུཏྟོ’’ཏི ཝུཏྟོ. ཛྷཱནཕསྶནྟི ཏིཝིདྷཾ ཛྷཱནཕསྶཾ. ‘‘ཛྷཱནཕསྶ’’ནྟིཨཱདཱིནི ‘‘དུཀྑཱ སངྑཱརཱ’’ཏིཨཱདཱིནི ཙ པཋམཾ ཝུཏྟཾ དྭཡམེཝ ཝིསེསེཏྭཱ ཝུཏྟཱནི. ཉཱཏཾ ཧོཏཱིཏིཨཱདཱིནི ཧེཊྛཱ ཝུཏྟཏྠཱནི. ཨེཏྠ ཙ ཛྷཱནལཱབྷཱི པུགྒལོ སམཱདྷིནྡྲིཡསྶ ཨནུཀཱུལཱཡ དུཀྑཱནུཔསྶནཱཡ ཨེཝ ཝུཊྛཧིཏྭཱ མགྒཕལཱནི པཱཔུཎཱཏཱིཏི ཨཱཙརིཡཱནཾ ཨདྷིཔྤཱཡོ.

སིཡཱཏི སིཡུཾ, བྷཝེཡྻུནྟི ཨཏྠོ. ‘‘སིཡཱ’’ཏི ཨེཏཾ ཝིདྷིཝཙནམེཝ. ཏཡོ པུགྒལཱཏི ཝིཔསྶནཱནིཡམེན ཨིནྡྲིཡནིཡམེན ཙ ཝུཏྟཱ ཏཡོ པུགྒལཱ. ཝཏྠུཝསེནཱཏི ཏཱིསུ ཨནུཔསྶནཱསུ ཨེཀེཀཨིནྡྲིཡཝཏྠུཝསེན. པརིཡཱཡེནཱཏི ཏེནེཝ པརིཡཱཡེན. ཨིམིནཱ ཝཱརེན ཀིཾ དསྶིཏཾ ཧོཏི? ཧེཊྛཱ ཨེཀེཀིསྶཱ ཨནུཔསྶནཱཡ ཨེཀེཀསྶ ཨིནྡྲིཡསྶ ཨཱདྷིཔཙྩཾ ཡེབྷུཡྻཝསེན ཝུཏྟནྟི ཙ, ཀདཱཙི ཏཱིསུཔི ཨནུཔསྶནཱསུ ཨེཀེཀསྶེཝ ཨིནྡྲིཡསྶ ཨཱདྷིཔཙྩཾ ཧོཏཱིཏི ཙ དསྶིཏཾ ཧོཏི. ཨཐ ཝཱ པུབྦབྷཱགཝིཔསྶནཱཀྑཎེ ཏིསྶནྣམྤི ཨནུཔསྶནཱནཾ སབྦྷཱཝཏོ ཏཱསུ པུབྦབྷཱགཝིཔསྶནཱསུ ཏེསཾ ཏེསཾ ཨིནྡྲིཡཱནཾ ཨཱདྷིཔཙྩཾ ཨཔེཀྑིཏྭཱ མགྒཕལཀྑཎེསུ སདྡྷཱཝིམུཏྟཱདཱིནི ནཱམཱནི ཧོནྟཱིཏི. ཨེཝཉྷི ཝུཙྩམཱནེ ཧེཊྛཱ ཝུཊྛཱནགཱམིནིཝིཔསྶནཱཡ ཨུཔརི ཙ ཀཏོ ཨིནྡྲིཡཱདྷིཔཙྩཔུགྒལནིཡམོ སུཀཏོཡེཝ ནིཙྩལོཡེཝ ཙ ཧོཏི. ཨནནྟརཝཱརེ སིཡཱཏི ཨཉྙོཡེཝཱཏི ཨེཝཾ སིཡཱཏི ཨཏྠོ. ཨེཏྠ པུབྦེ ཝུཏྟོཡེཝ ནིཡམོ.

ཨིདཱནི མགྒཕལཝསེན པུགྒལཝིསེསཾ ཝིབྷཛིཏྭཱ དསྶེཏུཾ ཨནིཙྩཏོ མནསིཀརོཏོ…པེ… སོཏཱཔཏྟིམགྒཾ པཊིལབྷཏཱིཏིཨཱདིམཱཧ. ཏཏྠ སདྡྷཾ ཨནུསྶརཏི ཨནུགཙྪཏི, སདྡྷཱཡ ཝཱ ནིབྦཱནཾ ཨནུསྶརཏི ཨནུགཙྪཏཱིཏི སདྡྷཱནུསཱརཱི. སཙྪིཀཏནྟི པཙྩཀྑཀཏཾ. ཨརཧཏྟནྟི ཨརཧཏྟཕལཾ. པཉྙཱསངྑཱཏཾ དྷམྨཾ ཨནུསྶརཏི, ཏེན ཝཱ དྷམྨེན ནིབྦཱནཾ ཨནུསྶརཏཱིཏི དྷམྨཱནུསཱརཱི.

༢༢༢. པུན ཨཔརེཧི པརིཡཱཡེཧི ཨིནྡྲིཡཏྟཡཝིསེསེན པུགྒལཝིསེསཾ ཝཎྞེཏུཀཱམོ ཡེ ཧི ཀེཙཱིཏིཨཱདིམཱཧ. ཏཏྠ བྷཱཝིཏཱ ཝཱཏི ཨཏཱིཏེ བྷཱཝཡིཾསུ ཝཱ. བྷཱཝེནྟི ཝཱཏི པཙྩུཔྤནྣེ. བྷཱཝིསྶནྟི ཝཱཏི ཨནཱགཏེ. ཨདྷིགཏཱ ཝཱཏིཨཱདི ཨེཀེཀནྟིཀཾ པུརིམསྶ པུརིམསྶ ཨཏྠཝིཝརཎཏྠཾ ཝུཏྟཾ. ཕསྶིཏཱ ཝཱཏི ཉཱཎཕུསནཱཡ ཕུསིཾསུ ཝཱ. ཝསིཔྤཏྟཱཏི ཨིསྶརབྷཱཝཾ པཏྟཱ. པཱརམིཔྤཏྟཱཏི ཝོསཱནཾ པཏྟཱ. ཝེསཱརཛྫཔྤཏྟཱཏི ཝིསཱརདབྷཱཝཾ པཏྟཱ. སབྦཏྠ སདྡྷཱཝིམུཏྟཱདཡོ ཧེཊྛཱ ཝུཏྟཀྑཎེསུཡེཝ, སཏིཔཊྛཱནཱདཡོ མགྒཀྑཎེཡེཝ. ཨཊྛ ཝིམོཀྑེཏི ‘‘རཱུཔཱི རཱུཔཱནི པསྶཏཱི’’ཏིཨཱདིཀེ (པཊི. མ. ༡.༢༠༩; དྷ. ས. ༢༤༨) པཊིསམྦྷིདཱམགྒཔྤཏྟིཡཱ ཨེཝ པཏྟཱ.

ཏིསྶོ སིཀྑཱཏི ཨདྷིསཱིལསིཀྑཱ ཨདྷིཙིཏྟསིཀྑཱ ཨདྷིཔཉྙཱསིཀྑཱ མགྒཔྤཏྟཱ ཨེཝ སིཀྑམཱནཱ. དུཀྑཾ པརིཛཱནནྟཱིཏིཨཱདཱིནི མགྒཀྑཎེཡེཝ. པརིཉྙཱཔཊིཝེདྷཾ པཊིཝིཛ྄ཛྷཏཱིཏི པརིཉྙཱཔཊིཝེདྷེན པཊིཝིཛ྄ཛྷཏི, པརིཉྙཱཡ པཊིཝིཛ྄ཛྷིཏབྦནྟི ཝཱ པརིཉྙཱཔཊིཝེདྷཾ. ཨེཝཾ སེསེསུཔི. སབྦདྷམྨཱདཱིཧི ཝིསེསེཏྭཱ ཨབྷིཉྙཱཔཊིཝེདྷཱདཡོ ཝུཏྟཱ. སཙྪིཀིརིཡཱཔཊིཝེདྷོ པན མགྒཀྑཎེཡེཝ ནིབྦཱནཔཙྩཝེཀྑཎཉཱཎསིདྡྷིཝསེན ཝེདིཏབྦོཏི. ཨེཝམིདྷ པཉྩ ཨརིཡཔུགྒལཱ ནིདྡིཊྛཱ ཧོནྟི, ཨུབྷཏོབྷཱགཝིམུཏྟོ ཙ པཉྙཱཝིམུཏྟོ ཙཱཏི ཨིམེ དྭེ ཨནིདྡིཊྛཱ. ཨཉྙཏྠ (ཝིསུདྡྷི. ༢.༧༧༣) པན ‘‘ཡོ པན དུཀྑཏོ མནསིཀརོནྟོ པསྶདྡྷིབཧུལོ སམཱདྷིནྡྲིཡཾ པཊིལབྷཏི, སོ སབྦཏྠ ཀཱཡསཀྑཱི ནཱམ ཧོཏི, ཨརཱུཔཛ྄ཛྷཱནཾ པན པཏྭཱ ཨགྒཕལཾ པཏྟོ ཨུབྷཏོབྷཱགཝིམུཏྟོ ནཱམ ཧོཏི. ཡོ པན ཨནཏྟཏོ མནསིཀརོནྟོ ཝེདབཧུལོ པཉྙིནྡྲིཡཾ པཊིལབྷཏི, སོཏཱཔཏྟིམགྒཀྑཎེ དྷམྨཱནུསཱརཱི ཧོཏི, ཚསུ ཋཱནེསུ དིཊྛིཔྤཏྟོ, ཨགྒཕལེ པཉྙཱཝིམུཏྟོ’’ཏི ཝུཏྟཾ. ཏེ ཨིདྷ ཀཱཡསཀྑིདིཊྛིཔྤཏྟེཧིཡེཝ སངྒཧིཏཱ. ཨཏྠཏོ པན ཨརཱུཔཛ྄ཛྷཱནེན ཙེཝ ཨརིཡམགྒེན ཙཱཏི ཨུབྷཏོབྷཱགེན ཝིམུཏྟོཏི ཨུབྷཏོབྷཱགཝིམུཏྟོ. པཛཱནནྟོ ཝིམུཏྟོཏི པཉྙཱཝིམུཏྟོཏི. ཨེཏྟཱཝཏཱ ཨིནྡྲིཡཔུགྒལཝིསེསཱ ནིདྡིཊྛཱ ཧོནྟི.

༢༢༣-༢༢༦. ཨིདཱནི ཝིམོཀྑཔུབྦངྒམམེཝ ཝིམོཀྑཝིསེསཾ པུགྒལཝིསེསཉྩ དསྶེཏུཀཱམོ ཨནིཙྩཏོ མནསིཀརོཏོཏིཨཱདིམཱཧ. ཏཏྠ དྭེ ཝིམོཀྑཱཏི ཨཔྤཎིཧིཏསུཉྙཏཝིམོཀྑཱ. ཨནིཙྩཱནུཔསྶནཱགམནཝསེན ཧི ཨནིམིཏྟཝིམོཀྑོཏི ལདྡྷནཱམོ མགྒོ རཱགདོསམོཧཔཎིདྷཱིནཾ ཨབྷཱཝཱ སགུཎཏོ ཙ ཏེསཾཡེཝ པཎིདྷཱིནཾ ཨབྷཱཝཱ ཨཔྤཎིཧིཏནྟི ལདྡྷནཱམཾ ནིབྦཱནཾ ཨཱརམྨཎཾ ཀརོཏཱིཏི ཨཱརམྨཎཏོ ཙ ཨཔྤཎིཧིཏཝིམོཀྑོཏི ནཱམམྤི ལབྷཏི. ཏཐཱ རཱགདོསམོཧེཧི སུཉྙཏྟཱ སགུཎཏོ ཙ རཱགཱདཱིཧིཡེཝ སུཉྙཏྟཱ སུཉྙཏནྟི ལདྡྷནཱམཾ ནིབྦཱནཾ ཨཱརམྨཎཾ ཀརོཏཱིཏི ཨཱརམྨཎཏོ ཙ སུཉྙཏཝིམོཀྑོཏི ནཱམམྤི ལབྷཏི. ཏསྨཱ ཏེ དྭེ ཝིམོཀྑཱ ཨནིམིཏྟཝིམོཀྑནྭཡཱ ནཱམ ཧོནྟི. ཨནིམིཏྟམགྒཏོ ཨནཉྙེཔི ཨཊྛནྣཾ མགྒངྒཱནཾ ཨེཀེཀསྶ མགྒངྒསྶ ཝསེན སཧཛཱཏཱདིཔཙྩཡཱ ཙ ཧོནྟཱིཏི ཝེདིཏབྦཱ. པུན དྭེ ཝིམོཀྑཱཏི སུཉྙཏཱནིམིཏྟཝིམོཀྑཱ. དུཀྑཱནུཔསྶནཱགམནཝསེན ཧི ཨཔྤཎིཧིཏཝིམོཀྑོཏི ལདྡྷནཱམོ མགྒོ རཱུཔནིམིཏྟཱདཱིནཾ རཱགནིམིཏྟཱདཱིནཾ ནིཙྩནིམིཏྟཱདཱིནཉྩ ཨབྷཱཝཱ སགུཎཏོ ཙ ཏེསཾཡེཝ ནིམིཏྟཱནཾ ཨབྷཱཝཱ ཨནིམིཏྟསངྑཱཏཾ ནིབྦཱནཾ ཨཱརམྨཎཾ ཀརོཏཱིཏི ཨཱརམྨཎཏོ ཙ ཨནིམིཏྟཝིམོཀྑོཏི ནཱམམྤི ལབྷཏི. སེསཾ ཝུཏྟནཡེནེཝ ཡོཛེཏབྦཾ. པུན དྭེ ཝིམོཀྑཱཏི ཨནིམིཏྟཨཔྤཎིཧིཏཝིམོཀྑཱ. ཡོཛནཱ པནེཏྠ ཝུཏྟནཡཱ ཨེཝ.

པཊིཝེདྷཀཱལེཏི ཨིནྡྲིཡཱནཾ ཝུཏྟཀྐམེནེཝ ཝུཏྟཾ. མགྒཀྑཎཾ པན མུཉྩིཏྭཱ ཝིཔསྶནཱཀྑཎེ ཝིམོཀྑོ ནཱམ ནཏྠི. པཋམཾ ཝུཏྟོཡེཝ པན མགྒཝིམོཀྑོ ‘‘པཊིཝེདྷཀཱལེ’’ཏི ཝཙནེན ཝིསེསེཏྭཱ དསྶིཏོ. ‘‘ཡོ ཙཱཡཾ པུགྒལོ སདྡྷཱཝིམུཏྟོ’’ཏིཨཱདིཀཱ དྭེ ཝཱརཱ ཙ ‘‘ཨནིཙྩཏོ མནསིཀརོནྟོ སོཏཱཔཏྟིམགྒཾ པཊིལབྷཏཱི’’ཏིཨཱདིཀོ ཝཱརོ ཙ སངྑིཏྟོ, ཝིམོཀྑཝསེན པན ཡོཛེཏྭཱ ཝིཏྠཱརཏོ ཝེདིཏབྦོ. ཡེ ཧི ཀེཙི ནེཀྑམྨནྟིཨཱདིཀོ ཝཱརོ ཝུཏྟནཡེནེཝ ཝེདིཏབྦོཏི. ཨེཏྟཱཝཏཱ ཝིམོཀྑཔུགྒལཝིསེསཱ ནིདྡིཊྛཱ ཧོནྟཱིཏི.

༢༢༧. པུན ཝིམོཀྑམུཁཱནི ཙ ཝིམོཀྑེ ཙ ཨནེཀདྷཱ ནིདྡིསིཏུཀཱམོ ཨནིཙྩཏོ མནསིཀརོནྟོཏིཨཱདིམཱཧ. ཏཏྠ ཡཐཱབྷཱུཏནྟི ཡཐཱསབྷཱཝེན. ཛཱནཱཏཱིཏི ཉཱཎེན ཛཱནཱཏི. པསྶཏཱིཏི ཏེནེཝ ཉཱཎེན ཙཀྑུནཱ ཝིཡ པསྶཏི. ཏདནྭཡེནཱཏི ཏདནུགམནེན, ཏསྶ པཙྩཀྑཏོ ཉཱཎེན དིཊྛསྶ ཨནུགམནེནཱཏི ཨཏྠོ. ཀངྑཱ པཧཱིཡཏཱིཏི ཨནིཙྩཱནུཔསྶནཱཡ ནིཙྩཱནིཙྩཀངྑཱ, ཨིཏརཱཧི ཨིཏརཀངྑཱ. ནིམིཏྟནྟི སནྟཏིགྷནཝིནིབྦྷོགེན ནིཙྩསཉྙཱཡ པཧཱིནཏྟཱ ཨཱརམྨཎབྷཱུཏཾ སངྑཱརནིམིཏྟཾ ཡཐཱབྷཱུཏཾ ཛཱནཱཏི. ཏེན ཝུཙྩཏི སམྨཱདསྶནནྟི ཏེན ཡཐཱབྷཱུཏཛཱནནེན ཏཾ ཉཱཎཾ ‘‘སམྨཱདསྶན’’ནྟི ཝུཙྩཏི. པཝཏྟནྟི དུཀྑཔྤཏྟཱཀཱརེ སུཁསཉྙཾ ཨུགྒྷཱཊེཏྭཱ སུཁསཉྙཱཡ པཧཱནེན པཎིདྷིསངྑཱཏཱཡ ཏཎྷཱཡ པཧཱིནཏྟཱ སུཁསམྨཏམྤི ཝིཔཱཀཔཝཏྟཾ ཡཐཱབྷཱུཏཾ ཛཱནཱཏི. ནིམིཏྟཉྩ པཝཏྟཉྩཱཏི ནཱནཱདྷཱཏུམནསིཀཱརསམྦྷཝེན སམཱུཧགྷནཝིནིབྦྷོགེན ཨུབྷཡཐཱཔི ཨཏྟསཉྙཱཡ པཧཱིནཏྟཱ སངྑཱརནིམིཏྟཉྩ ཝིཔཱཀཔཝཏྟཉྩ ཡཐཱབྷཱུཏཾ ཛཱནཱཏི. ཡཉྩ ཡཐཱབྷཱུཏཾ ཉཱཎནྟིཨཱདིཏྟཡཾ ཨིདཱནི ཝུཏྟམེཝ, ན ཨཉྙཾ. བྷཡཏོ ཨུཔཊྛཱཏཱིཏི ནིཙྩསུཁཨཏྟཱབྷཱཝདསྶནཏོ ཡཐཱཀྐམཾ ཏཾ ཏཾ བྷཡཏོ ཨུཔཊྛཱཏི. ཡཱ ཙ བྷཡཏུཔཊྛཱནེ པཉྙཱཏིཨཱདིནཱ ‘‘ཨུདཡབྦཡཱནུཔསྶནཱཉཱཎཾ བྷངྒཱནུཔསྶནཱཉཱཎཾ བྷཡཏུཔཊྛཱནཉཱཎཾ ཨཱདཱིནཝཱནུཔསྶནཱཉཱཎཾ ནིབྦིདཱནུཔསྶནཱཉཱཎཾ མུཉྩིཏུཀམྱཏཱཉཱཎཾ པཊིསངྑཱནུཔསྶནཱཉཱཎཾ སངྑཱརུཔེཀྑཱཉཱཎཾ ཨནུལོམཉཱཎ’’ནྟི ཝུཏྟེསུ པཊིཔདཱཉཱཎདསྶནཝིསུདྡྷིསངྑཱཏེསུ ནཝསུ ཝིཔསྶནཱཉཱཎེསུ བྷཡཏུཔཊྛཱནསམྦནྡྷེན ཨཝཏྠཱབྷེདེན བྷིནྣཱནི ཨེཀཊྛཱནི ཏཱིཎི ཉཱཎཱནི ཝུཏྟཱནི, ན སེསཱནི.

པུན ཏཱིསུ ཨནུཔསྶནཱསུ ཨནྟེ ཋིཏཱཡ ཨནནྟརཱཡ ཨནཏྟཱནུཔསྶནཱཡ སམྦནྡྷེན ཏཱཡ སཧ སུཉྙཏཱནུཔསྶནཱཡ ཨེཀཊྛཏཾ དསྶེཏུཾ ཡཱ ཙ ཨནཏྟཱནུཔསྶནཱ ཡཱ ཙ སུཉྙཏཱནུཔསྶནཱཏིཨཱདིམཱཧ. ཨིམཱནི ཧི དྭེ ཉཱཎཱནི ཨཏྠཏོ ཨེཀམེཝ, ཨཝཏྠཱབྷེདེན པན བྷིནྣཱནི. ཡཐཱ ཙ ཨིམཱནི, ཏཐཱ ཨནིཙྩཱནུཔསྶནཱ ཙ ཨནིམིཏྟཱནུཔསྶནཱ ཙ ཨཏྠཏོ ཨེཀམེཝ ཉཱཎཾ, དུཀྑཱནུཔསྶནཱ ཙ ཨཔྤཎིཧིཏཱནུཔསྶནཱ ཙ ཨཏྠཏོ ཨེཀམེཝ ཉཱཎཾ, ཀེཝལཾ ཨཝཏྠཱབྷེདེནེཝ བྷིནྣཱནི. ཨནཏྟཱནུཔསྶནཱསུཉྙཏཱནུཔསྶནཱནཉྩ ཨེཀཊྛཏཱཡ ཝུཏྟཱཡ ཏེསཾ དྭིནྣཾ དྭིནྣམྤི ཉཱཎཱནཾ ཨེཀལཀྑཎཏྟཱ ཨེཀཊྛཏཱ ཝུཏྟཱཝ ཧོཏཱིཏི. ནིམིཏྟཾ པཊིསངྑཱ ཉཱཎཾ ཨུཔྤཛྫཏཱིཏི ‘‘སངྑཱརནིམིཏྟཾ ཨདྡྷུཝཾ ཏཱཝཀཱལིཀ’’ནྟི ཨནིཙྩལཀྑཎཝསེན ཛཱནིཏྭཱ ཉཱཎཾ ཨུཔྤཛྫཏི. ཀཱམཉྩ ན པཋམཾ ཛཱནིཏྭཱ པཙྪཱ ཉཱཎཾ ཨུཔྤཛྫཏི, ཝོཧཱརཝསེན པན ‘‘མནཉྩ པཊིཙྩ དྷམྨེ ཙ ཨུཔྤཛྫཏི མནོཝིཉྙཱཎ’’ནྟིཨཱདཱིནི (སཾ. ནི. ༤.༦༠; མ. ནི. ༡.༤༠༠; ༣.༤༢༡) ཝིཡ ཨེཝཾ ཝུཙྩཏི. སདྡསཏྠཝིདཱུཔི ཙ ‘‘ཨཱདིཙྩཾ པཱཔུཎིཏྭཱ ཏམོ ཝིགཙྪཏཱི’’ཏིཨཱདཱིསུ ཝིཡ སམཱནཀཱལེཔི ཨིམཾ པདཾ ཨིཙྪནྟི. ཨེཀཏྟནཡེན ཝཱ པུརིམཉྩ པཙྪིམཉྩ ཨེཀཾ ཀཏྭཱ ཨེཝཾ ཝུཏྟནྟི ཝེདིཏབྦཾ. ཨིམིནཱ ནཡེན ཨིཏརསྨིམྤི པདདྭཡེ ཨཏྠོ ཝེདིཏབྦོ. མུཉྩིཏུཀམྱཏཱདཱིནཾ ཏིཎྞཾ ཉཱཎཱནཾ ཨེཀཊྛཏཱ ཧེཊྛཱ ཝུཏྟནཡཱ ཨེཝ.

ནིམིཏྟཱ ཙིཏྟཾ ཝུཊྛཱཏཱིཏི སངྑཱརནིམིཏྟེ དོསདསྶནེན ཏཏྠ ཨནལླཱིནཏཱཡ སངྑཱརནིམིཏྟཱ ཙིཏྟཾ ཝུཊྛཱཏི ནཱམ. ཨནིམིཏྟེ ཙིཏྟཾ པཀྑནྡཏཱིཏི སངྑཱརནིམིཏྟཔཊིཔཀྑེན ཨནིམིཏྟསངྑཱཏེ ནིབྦཱནེ ཏནྣིནྣཏཱཡ ཙིཏྟཾ པཝིསཏི. སེསཱནུཔསྶནཱདྭཡེཔི ཨིམིནཱ ནཡེན ཨཏྠོ ཝེདིཏབྦོ. ནིརོདྷེ ནིབྦཱནདྷཱཏུཡཱཏི ཨིདྷ ཝུཏྟེནེཝ པཋམཱནུཔསྶནཱདྭཡམྤི ཝུཏྟམེཝ ཧོཏི. ནིརོདྷེཏིཔི པཱཋོ. བཧིདྡྷཱཝུཊྛཱནཝིཝཊྚནེ པཉྙཱཏི ཝུཊྛཱནསམྦནྡྷེན གོཏྲབྷུཉཱཎཾ ཝུཏྟཾ. གོཏྲབྷཱུ དྷམྨཱཏི གོཏྲབྷུཉཱཎམེཝ. ཨིཏརཐཱ ཧི ཨེཀཊྛཏཱ ན ཡུཛྫཏི. ‘‘ཨསངྑཏཱ དྷམྨཱ, ཨཔྤཙྩཡཱ དྷམྨཱ’’ཏིཨཱདཱིསུ (དྷ. ས. དུཀམཱཏིཀཱ ༧, ༨) ཝིཡ ཝཱ ཙཏུམགྒཝསེན ཝཱ བཧུཝཙནཾ ཀཏནྟི ཝེདིཏབྦཾ. ཡསྨཱ ཝིམོཀྑོཏི མགྒོ, མགྒོ ཙ དུབྷཏོཝུཊྛཱནོ, ཏསྨཱ ཏེན སམྦནྡྷེན ཡཱ ཙ དུབྷཏོཝུཊྛཱནཝིཝཊྚནེ པཉྙཱཏིཨཱདི ཝུཏྟཾ.

༢༢༨. པུན ཝིམོཀྑཱནཾ ནཱནཱཀྑཎཱནཾ ཨེཀཀྑཎཔརིཡཱཡཾ དསྶེཏུཀཱམོ ཀཏིཧཱཀཱརེཧཱིཏིཨཱདིམཱཧ. ཏཏྠ ཨཱདྷིཔཏེཡྻཊྛེནཱཏི ཛེཊྛཀཊྛེན. ཨདྷིཊྛཱནཊྛེནཱཏི པཏིཊྛཱནཊྛེན. ཨབྷིནཱིཧཱརཊྛེནཱཏི ཝིཔསྶནཱཝཱིཐིཏོ ནཱིཧརཎཊྛེན. ནིཡྻཱནཊྛེནཱཏི ནིབྦཱནུཔགམནཊྛེན. ཨནིཙྩཏོ མནསིཀརོཏོཏི ཝུཊྛཱནགཱམིནིཝིཔསྶནཱཀྑཎེཡེཝ. ཨནིམིཏྟོ ཝིམོཀྑོཏི མགྒཀྑཎེཡེཝ. ཨེས ནཡོ སེསེསུ. ཙིཏྟཾ ཨདྷིཊྛཱཏཱིཏི ཙིཏྟཾ ཨདྷིཀཾ ཀཏྭཱ ཋཱཏི, ཙིཏྟཾ པཏིཊྛཱཔེཏཱིཏི ཨདྷིཔྤཱཡོ. ཙིཏྟཾ ཨབྷིནཱིཧརཏཱིཏི ཝིཔསྶནཱཝཱིཐིཏོ ཙིཏྟཾ ནཱིཧརཏི. ནིརོདྷཾ ནིབྦཱནཾ ནིཡྻཱཏཱིཏི ནིརོདྷསངྑཱཏཾ ནིབྦཱནཾ ཨུཔགཙྪཏཱིཏི ཨེཝཾ ཨཱཀཱརནཱནཏྟཏོ ཙཏུདྷཱ ནཱནཱཀྑཎཏཱ དསྶིཏཱ.

ཨེཀཀྑཎཏཱཡ སམོདྷཱནཊྛེནཱཏི ཨེཀཛ྄ཛྷཾ སམོསརཎཊྛེན. ཨདྷིགམནཊྛེནཱཏི ཝིནྡནཊྛེན. པཊིལཱབྷཊྛེནཱཏི པཱཔུཎནཊྛེན. པཊིཝེདྷཊྛེནཱཏི ཉཱཎེན པཊིཝིཛ྄ཛྷནཊྛེན. སཙྪིཀིརིཡཊྛེནཱཏི པཙྩཀྑཀརཎཊྛེན. ཕསྶནཊྛེནཱཏི ཉཱཎཕུསནཱཡ ཕུསནཊྛེན. ཨབྷིསམཡཊྛེནཱཏི ཨབྷིམུཁཾ སམཱགམནཊྛེན. ཨེཏྠ ‘‘སམོདྷཱནཊྛེནཱ’’ཏི མཱུལཔདཾ, སེསཱནི ཨདྷིགམཝེཝཙནཱནི. ཏསྨཱཡེཝ ཧི སབྦེསཾ ཨེཀཏོ ཝིསྶཛྫནཾ ཀཏཾ. ནིམིཏྟཱ མུཙྩཏཱིཏི ནིཙྩནིམིཏྟཏོ མུཙྩཏི. ཨིམིནཱ ཝིམོཀྑཊྛོ ཝུཏྟོ. ཡཏོ མུཙྩཏཱིཏི ཡཏོ ནིམིཏྟཏོ མུཙྩཏི. ཏཏྠ ན པཎིདཧཏཱིཏི ཏསྨིཾ ནིམིཏྟེ པཏྠནཾ ན ཀརོཏི. ཡཏྠ ན པཎིདཧཏཱིཏི ཡསྨིཾ ནིམིཏྟེ ན པཎིདཧཏི. ཏེན སུཉྙོཏི ཏེན ནིམིཏྟེན སུཉྙོ. ཡེན སུཉྙོཏི ཡེན ནིམིཏྟེན སུཉྙོ. ཏེན ནིམིཏྟེན ཨནིམིཏྟོཏི ཨིམིནཱ ཨནིམིཏྟཊྛོ ཝུཏྟོ.

པཎིདྷིཡཱ མུཙྩཏཱིཏི པཎིདྷིཏོ མུཙྩཏི. ‘‘པཎིདྷི མུཙྩཏཱི’’ཏི པཱཋོ ནིསྶཀྐཏྠོཡེཝ. ཨིམིནཱ ཝིམོཀྑཊྛོ ཝུཏྟོ. ཡཏྠ ན པཎིདཧཏཱིཏི ཡསྨིཾ དུཀྑེ ན པཎིདཧཏི. ཏེན སུཉྙོཏི ཏེན དུཀྑེན སུཉྙོ. ཡེན སུཉྙོཏི ཡེན དུཀྑནིམིཏྟེན སུཉྙོ. ཡེན ནིམིཏྟེནཱཏི ཡེན དུཀྑནིམིཏྟེན. ཏཏྠ ན པཎིདཧཏཱིཏི ཨིམིནཱ ཨཔྤཎིཧིཏཊྛོ ཝུཏྟོ. ཨབྷིནིཝེསཱ མུཙྩཏཱིཏི ཨིམིནཱ ཝིམོཀྑཊྛོ ཝུཏྟོ. ཡེན སུཉྙོཏི ཡེན ཨབྷིནིཝེསནིམིཏྟེན སུཉྙོ. ཡེན ནིམིཏྟེནཱཏི ཡེན ཨབྷིནིཝེསནིམིཏྟེན. ཡཏྠ ན པཎིདཧཏི, ཏེན སུཉྙོཏི ཡསྨིཾ ཨབྷིནིཝེསནིམིཏྟེ ན པཎིདཧཏི, ཏེན ཨབྷིནིཝེསནིམིཏྟེན སུཉྙོ. ཨིམིནཱ སུཉྙཏཊྛོ ཝུཏྟོ.

༢༢༩. པུན ཨཊྛཝིམོཀྑཱདཱིནི ནིདྡིསིཏུཀཱམོ ཨཏྠི ཝིམོཀྑོཏིཨཱདིམཱཧ. ཏཏྠ ནིཙྩཏོ ཨབྷིནིཝེསཱཏིཨཱདཱིནི སཉྙཱཝིམོཀྑེ ཝུཏྟནཡེན ཝེདིཏབྦཱནི. སབྦཱབྷིནིཝེསེཧཱིཏི ཝུཏྟཔྤཀཱརེཧི ཨབྷིནིཝེསེཧི. ཨིཏི ཨབྷིནིཝེསམུཙྩནཝསེན སུཉྙཏཝིམོཀྑཱ ནཱམ ཛཱཏཱ, ཏེཡེཝ ནིཙྩཱདིནིམིཏྟམུཙྩནཝསེན ཨནིམིཏྟཝིམོཀྑཱ, ནིཙྩནྟིཨཱདིཔཎིདྷཱིཧི མུཙྩནཝསེན ཨཔྤཎིཧིཏཝིམོཀྑཱ. ཨེཏྠ ཙ པཎིདྷི མུཙྩཏཱིཏི སབྦཏྠ ནིསྶཀྐཏྠོ ཝེདིཏབྦོ. པཎིདྷིཡཱ མུཙྩཏཱིཏི ཝཱ པཱཋོ. ‘‘སབྦཔཎིདྷཱིཧི མུཙྩཏཱི’’ཏི ཙེཏྠ སཱདྷཀཾ. ཨེཝཾ ཏིསྶོ ཨནུཔསྶནཱ ཏདངྒཝིམོཀྑཏྟཱ ཙ སམུཙྪེདཝིམོཀྑསྶ པཙྩཡཏྟཱ ཙ པརིཡཱཡེན ཝིམོཀྑཱཏི ཝུཏྟཱ.

༢༣༠. ཏཏྠ ཛཱཏཱཏི ཨནནྟརེ ཝིཔསྶནཱཝིམོཀྑེཔི སཏི ཨིམིསྶཱ ཀཐཱཡ མགྒཝིམོཀྑཱདྷིཀཱརཏྟཱ ཏསྨིཾ མགྒཝིམོཀྑེ ཛཱཏཱཏི ཝུཏྟཾ ཧོཏི. ཨནཝཛྫཀུསལཱཏི རཱགཱདིཝཛྫཝིརཧིཏཱ ཀུསལཱ. ཝིཙྪེདཾ ཀཏྭཱ ཝཱ པཱཋོ. བོདྷིཔཀྑིཡཱ དྷམྨཱཏི ‘‘ཙཏྟཱརོ སཏིཔཊྛཱནཱ, ཙཏྟཱརོ སམྨཔྤདྷཱནཱ, ཙཏྟཱརོ ཨིདྡྷིཔཱདཱ, པཉྩིནྡྲིཡཱནི, པཉྩ བལཱནི, སཏྟ བོཛ྄ཛྷངྒཱ, ཨརིཡོ ཨཊྛངྒིཀོ མགྒོ’’ཏི (མ. ནི. ༣.༣༥, ༤༣; ཙཱུལ༹ནི. མེཏྟགཱུམཱཎཝཔུཙྪཱནིདྡེས ༢༢; མི. པ. ༥.༤.༡) ཝུཏྟཱ སཏྟཏིཾས བོདྷིཔཀྑིཡདྷམྨཱ. ཨིདཾ མུཁནྟི ཨིདཾ ཝུཏྟཔྤཀཱརཾ དྷམྨཛཱཏཾ ཨཱརམྨཎཏོ ནིབྦཱནཔཝེསཱཡ མུཁཏྟཱ མུཁཾ ནཱམཱཏི ཝུཏྟཾ ཧོཏི. ཏེསཾ དྷམྨཱནནྟི ཏེསཾ བོདྷིཔཀྑིཡཱནཾ དྷམྨཱནཾ. ཨིདཾ ཝིམོཀྑམུཁནྟི ནིབྦཱནཾ ཝིཀྑམྦྷནཏདངྒསམུཙྪེདཔཊིཔྤསྶདྡྷིནིསྶརཎཝིམོཀྑེསུ ནིསྶརཎཝིམོཀྑོཝ, ‘‘ཡཱཝཏཱ, བྷིཀྑཝེ, དྷམྨཱ སངྑཏཱ ཝཱ ཨསངྑཏཱ ཝཱ, ཝིརཱགོ ཏེསཾ དྷམྨཱནཾ ཨགྒམཀྑཱཡཏཱི’’ཏི (ཨིཏིཝུ. ༩༠; ཨ. ནི. ༤.༣༤) ཝུཏྟཏྟཱ ཨུཏྟམཊྛེན མུཁཉྩཱཏི ཝིམོཀྑམུཁཾ. ཝིམོཀྑཉྩ ཏཾ མུཁཉྩ ཝིམོཀྑམུཁནྟི ཀམྨདྷཱརཡསམཱསཝསེན ཨཡམེཝ ཨཏྠོ ཝུཏྟོ. ཝིམོཀྑཉྩཱཏི ཨེཏྠ ལིངྒཝིཔལླཱསོ ཀཏོ. ཏཱིཎི ཨཀུསལམཱུལཱནཱིཏི ལོབྷདོསམོཧཱ. ཏཱིཎི དུཙྩརིཏཱནཱིཏི ཀཱཡཝཙཱིམནོདུཙྩརིཏཱནི. སབྦེཔི ཨཀུསལཱ དྷམྨཱཏི ཨཀུསལམཱུལེཧི སམྤཡུཏྟཱ དུཙྩརིཏེཧི སམྤཡུཏྟཱ ཙ ཨསམྤཡུཏྟཱ ཙ སེཝིཏབྦདོམནསྶཱདཱིནི ཋཔེཏྭཱ སབྦེཔི ཨཀུསལཱ དྷམྨཱ. ཀུསལམཱུལསུཙརིཏཱནི ཝུཏྟཔཊིཔཀྑེན ཝེདིཏབྦཱནི. སབྦེཔི ཀུསལཱ དྷམྨཱཏི ཝུཏྟནཡེནེཝ སམྤཡུཏྟཱ ཨསམྤཡུཏྟཱ ཙ ཝིམོཀྑསྶ ཨུཔནིསྶཡབྷཱུཏཱ སབྦེཔི ཀུསལཱ དྷམྨཱ. ཝིཝཊྚཀཐཱ ཧེཊྛཱ ཝུཏྟཱ. ཝིམོཀྑཝིཝཊྚསམྦནྡྷེན པནེཏྠ སེསཝིཝཊྚཱཔི ཝུཏྟཱ. ཨཱསེཝནཱཏི ཨཱདིཏོ སེཝནཱ. བྷཱཝནཱཏི ཏསྶེཝ ཝཌྜྷནཱ. བཧུལཱིཀམྨནྟི ཏསྶེཝ ཝསིཔྤཏྟིཡཱ པུནཔྤུནཾ ཀརཎཾ. མགྒསྶ པན ཨེཀཀྑཎེཡེཝ ཀིཙྩསཱདྷནཝསེན ཨཱསེཝནཱདཱིནི ཝེདིཏབྦཱནི. པཊིལཱབྷོ ཝཱ ཝིཔཱཀོ ཝཱཏིཨཱདཱིནི ཧེཊྛཱ ཝུཏྟཏྠཱནེཝཱཏི.

ཝིམོཀྑནིདྡེསཝཎྞནཱ ནིཊྛིཏཱ.

སདྡྷམྨཔྤཀཱསིནིཡཱ པཊིསམྦྷིདཱམགྒ-ཨཊྛཀཐཱཡ

ཝིམོཀྑཀཐཱཝཎྞནཱ ནིཊྛིཏཱ.

༦. གཏིཀཐཱ

གཏིཀཐཱཝཎྞནཱ

༢༣༡. ཨིདཱནི ཏསྶཱ ཝིམོཀྑུཔྤཏྟིཡཱ ཧེཏུབྷཱུཏཾ ཧེཏུསམྤཏྟིཾ དསྶེནྟེན ཀཐིཏཱཡ གཏིཀཐཱཡ ཨཔུབྦཏྠཱནུཝཎྞནཱ. དུཧེཏུཀཔཊིསནྡྷིཀསྶཱཔི ཧི ‘‘ནཏྠི ཛྷཱནཾ ཨཔཉྙསྶཱ’’ཏི (དྷ. པ. ༣༧༢) ཝཙནཏོ ཛྷཱནམྤི ན ཨུཔྤཛྫཏི, ཀིཾ པན ཝིམོཀྑོ. ཏཏྠ གཏིསམྤཏྟིཡཱཏི ནིརཡཏིརཙྪཱནཡོནིཔེཏྟིཝིསཡམནུསྶདེཝསངྑཱཏཱསུ པཉྩསུ གཏཱིསུ མནུསྶདེཝསངྑཱཏཱཡ གཏིསམྤཏྟིཡཱ. ཨེཏེན པུརིམཱ ཏིསྶོ གཏིཝིཔཏྟིཡོ པཊིཀྑིཔཏི. གཏིཡཱ སམྤཏྟི གཏིསམྤཏྟི, སུགཏཱིཏི ཝུཏྟཾ ཧོཏི. གཏཱིཏི ཙ སཧོཀཱསཱ ཁནྡྷཱ. པཉྩསུ ཙ གཏཱིསུ པེཏྟིཝིསཡགྒཧཎེནེཝ ཨསུརཀཱཡོཔི གཧིཏོ. དེཝཱཏི ཚ ཀཱམཱཝཙརདེཝཱ བྲཧྨཱནོ ཙ. དེཝགྒཧཎེན ཨསུརཱཔི སངྒཧིཏཱ. ཉཱཎསམྤཡུཏྟེཏི ཉཱཎསམྤཡུཏྟཔཊིསནྡྷིཀྑཎེ. ཁཎོཔི ཧི ཉཱཎསམྤཡུཏྟཡོགེན ཏེནེཝ ཝོཧཱརེན ཝུཏྟོཏི ཝེདིཏབྦོ. ཀཏིནཾ ཧེཏཱུནནྟི ཨལོབྷཱདོསཱམོཧཧེཏཱུསུ ཀཏིནཾ ཧེཏཱུནཾ. ཨུཔཔཏྟཱིཏི ཨུཔཔཛྫནཾ, ནིབྦཏྟཱིཏི ཨཏྠོ.

ཡསྨཱ པན སུདྡཀུལཛཱཏཱཔི ཏིཧེཏུཀཱ ཧོནྟི, ཏསྨཱ ཏེ སནྡྷཱཡ པཋམཔུཙྪཱ. ཡསྨཱ ཙ ཡེབྷུཡྻེན མཧཱཔུཉྙཱ ཏཱིསུ མཧཱསཱལཀུལེསུ ཛཱཡནྟི, ཏསྨཱ ཏེསཾ ཏིཎྞཾ ཀུལཱནཾ ཝསེན ཏིསྶོ པུཙྪཱ. པཱཋོ པན སངྑིཏྟོ. མཧཏཱི སཱལཱ ཨེཏེསནྟི མཧཱསཱལཱ, མཧཱགྷརཱ མཧཱཝིབྷཝཱཏི ཨཏྠོ. ཨཐ ཝཱ མཧཱ སཱརོ ཨེཏེསནྟི མཧཱསཱརཱཏི ཝཏྟབྦེ ར-ཀཱརསྶ ལ-ཀཱརཾ ཀཏྭཱ ‘‘མཧཱསཱལཱ’’ཏི ཝུཏྟཾ. ཁཏྟིཡཱ མཧཱསཱལཱ, ཁཏྟིཡེསུ ཝཱ མཧཱསཱལཱཏི ཁཏྟིཡམཧཱསཱལཱ. སེསེསུཔི ཨེསེཝ ནཡོ. ཏཏྠ ཡསྶ ཁཏྟིཡསྶ གེཧེ པཙྪིམནྟེན ཀོཊིསཏཾ དྷནཾ ནིདྷཱནགཏཾ ཧོཏི, ཀཧཱཔཎཱནཉྩ ཝཱིསཏི ཨམྦཎཱནི དིཝསཾ ཝལཉྫེ ནིཀྑམནྟི, ཨཡཾ ཁཏྟིཡམཧཱསཱལོ ནཱམ. ཡསྶ བྲཱཧྨཎསྶ གེཧེ པཙྪིམནྟེན ཨསཱིཏིཀོཊིདྷནཾ ནིདྷཱནགཏཾ ཧོཏི, ཀཧཱཔཎཱནཉྩ དས ཨམྦཎཱནི དིཝསཾ ཝལཉྫེ ནིཀྑམནྟི, ཨཡཾ བྲཱཧྨཎམཧཱསཱལོ ནཱམ. ཡསྶ གཧཔཏིསྶ གེཧེ པཙྪིམནྟེན ཙཏྟཱལཱིསཀོཊིདྷནཾ ནིདྷཱནགཏཾ ཧོཏི, ཀཧཱཔཎཱནཉྩ པཉྩ ཨམྦཎཱནི དིཝསཾ ཝལཉྫེ ནིཀྑམནྟི, ཨཡཾ གཧཔཏིམཧཱསཱལོ ནཱམ.

རཱུཔཱཝཙརཱནཾ ཨརཱུཔཱཝཙརཱནཉྩ ཨེཀནྟཏིཧེཏུཀཏྟཱ ‘‘ཉཱཎསམྤཡུཏྟེ’’ཏི ན ཝུཏྟཾ, མནུསྶེསུ པན དུཧེཏུཀཱཧེཏུཀཱནཉྩ སབྦྷཱཝཏོ, ཀཱམཱཝཙརེསུ དེཝེསུ དུཧེཏུཀཱནཉྩ སབྦྷཱཝཏོ སེསེསུ ‘‘ཉཱཎསམྤཡུཏྟེ’’ཏི ཝུཏྟཾ. ཨེཏྠ ཙ ཀཱམཱཝཙརདེཝཱ པཉྩཀཱམགུཎརཏིཡཱ ཀཱིལ༹ནྟི, སརཱིརཛུཏིཡཱ ཙ ཛོཏནྟཱིཏི དེཝཱ, རཱུཔཱཝཙརབྲཧྨཱནོ ཛྷཱནརཏིཡཱ ཀཱིལ༹ནྟི, སརཱིརཛུཏིཡཱ ཙ ཛོཏནྟཱིཏི དེཝཱ, ཨརཱུཔཱཝཙརབྲཧྨཱནོ ཛྷཱནརཏིཡཱ ཀཱིལ༹ནྟི, ཉཱཎཛུཏིཡཱ ཙ ཛོཏནྟཱིཏི དེཝཱ.

༢༣༢. ཀུསལཀམྨསྶ ཛཝནཀྑཎེཏི ཨཏཱིཏཛཱཏིཡཱ ཨིདྷ ཏིཧེཏུཀཔཊིསནྡྷིཛནཀསྶ ཏིཧེཏུཀཀཱམཱཝཙརཀུསལཀམྨསྶ ཙ ཛཝནཝཱིཐིཡཾ པུནཔྤུནཾ ཨུཔྤཏྟིཝསེན སཏྟཝཱརཾ ཛཝནཀྑཎེ, པཝཏྟནཀཱལེཏི ཨཏྠོ. ཏཡོ ཧེཏཱུ ཀུསལཱཏི ཨལོབྷོ ཀུསལཧེཏུ ཨདོསོ ཀུསལཧེཏུ ཨམོཧོ ཀུསལཧེཏུ. ཏསྨིཾ ཁཎེ ཛཱཏཙེཏནཱཡཱཏི ཏསྨིཾ ཝུཏྟཀྑཎེཡེཝ ཛཱཏཱཡ ཀུསལཙེཏནཱཡ. སཧཛཱཏཔཙྩཡཱ ཧོནྟཱིཏི ཨུཔྤཛྫམཱནཱ ཙ སཧཨུཔྤཱདནབྷཱཝེན ཨུཔཀཱརཀཱ ཧོནྟི. ཏེན ཝུཙྩཏཱིཏི ཏེན སཧཛཱཏཔཙྩཡབྷཱཝེནེཝ ཝུཙྩཏི. ཀུསལམཱུལཔཙྩཡཱཔི སངྑཱརཱཏི ཨེཀཙིཏྟཀྑཎིཀཔཙྩཡཱཀཱརནཡེན ཝུཏྟཾ. ‘‘སངྑཱརཱ’’ཏི ཙ བཧུཝཙནེན ཏཏྠ སངྑཱརཀྑནྡྷསངྒཧིཏཱ སབྦེ ཙེཏསིཀཱ གཧིཏཱཏི ཝེདིཏབྦཾ. ཨཔིསདྡེན སངྑཱརཔཙྩཡཱཔི ཀུསལམཱུལཱནཱིཏིཔི ཝུཏྟཾ ཧོཏི.

ནིཀནྟིཀྑཎེཏི ཨཏྟནོ ཝིཔཱཀཾ དཱཏུཾ པཙྩུཔཊྛིཏཀམྨེ ཝཱ ཏཐཱ པཙྩུཔཊྛིཏཀམྨེན ཨུཔཊྛཱཔིཏེ ཀམྨནིམིཏྟེ ཝཱ གཏིནིམིཏྟེ ཝཱ ཨུཔྤཛྫམཱནཱནཾ ནིཀནྟིཀྑཎེ. ནིཀནྟཱིཏི ནིཀཱམནཱ པཏྠནཱ. ཨཱསནྣམརཎསྶ ཧི མོཧེན ཨཱཀུལཙིཏྟཏྟཱ ཨཝཱིཙིཛཱལཱཡཔི ནིཀནྟི ཨུཔྤཛྫཏི, ཀིཾ པན སེསེསུ ནིམིཏྟེསུ. དྭེ ཧེཏཱུཏི ལོབྷོ ཨཀུསལཧེཏུ མོཧོ ཨཀུསལཧེཏུ. བྷཝནིཀནྟི པན པཊིསནྡྷིཨནནྟརཾ པཝཏྟབྷཝངྒཝཱིཐིཏོ ཝུཊྛིཏམཏྟསྶེཝ ཨཏྟནོ ཁནྡྷསནྟཱནཾ ཨཱརབྦྷ སབྦེསམྤི ཨུཔྤཛྫཏི. ‘‘ཡསྶ ཝཱ པན ཡཏྠ ཨཀུསལཱ དྷམྨཱ ན ཨུཔྤཛྫིཏྠ, ཏསྶ ཏཏྠ ཀུསལཱ དྷམྨཱ ན ཨུཔྤཛྫིཏྠཱཏི ཨཱམནྟཱ’’ཏི ཨེཝམཱདི ཨིདམེཝ སནྡྷཱཡ ཝུཏྟཾ. ཏསྨིཾ ཁཎེ ཛཱཏཙེཏནཱཡཱཏི ཨཀུསལཙེཏནཱཡ.

པཊིསནྡྷིཀྑཎེཏི ཏེན ཀམྨེན གཧིཏཔཊིསནྡྷིཀྑཎེ. ཏཡོ ཧེཏཱུཏི ཨལོབྷོ ཨབྱཱཀཏཧེཏུ ཨདོསོ ཨབྱཱཀཏཧེཏུ ཨམོཧོ ཨབྱཱཀཏཧེཏུ. ཏསྨིཾ ཁཎེ ཛཱཏཙེཏནཱཡཱཏི ཝིཔཱཀཱབྱཱཀཏཙེཏནཱཡ. ནཱམརཱུཔཔཙྩཡཱཔི ཝིཉྙཱཎནྟི ཨེཏྠ ཏསྨིཾ པཊིསནྡྷིཀྑཎེ ཏཡོ ཝིཔཱཀཧེཏཱུ སེསཙེཏསིཀཱ ཙ ནཱམཾ, ཧདཡཝཏྠུ རཱུཔཾ. ཏཏོ ནཱམརཱུཔཔཙྩཡཏོཔི པཊིསནྡྷིཝིཉྙཱཎཾ པཝཏྟཏི. ཝིཉྙཱཎཔཙྩཡཱཔི ནཱམརཱུཔནྟི ཨེཏྠཱཔི ནཱམཾ ཝུཏྟཔྤཀཱརམེཝ, རཱུཔཾ པན ཨིདྷ སཧེཏུཀམནུསྶཔཊིསནྡྷིཡཱ ཨདྷིཔྤེཏཏྟཱ གབྦྷསེཡྻཀཱནཾ ཝཏྠུདསཀཾ ཀཱཡདསཀཾ བྷཱཝདསཀནྟི སམཏིཾས རཱུཔཱནི, སཾསེདཛཱནཾ ཨོཔཔཱཏིཀཱནཉྩ པརིཔུཎྞཱཡཏནཱནཾ ཙཀྑུདསཀཾ སོཏདསཀཾ གྷཱནདསཀཾ ཛིཝ྄ཧཱདསཀཉྩཱཏི སམསཏྟཏི རཱུཔཱནི. ཏཾ ཝུཏྟཔྤཀཱརཾ ནཱམརཱུཔཾ པཊིསནྡྷིཀྑཎེ པཊིསནྡྷིཝིཉྙཱཎཔཙྩཡཱ པཝཏྟཏི.

པཉྩཀྑནྡྷཱཏི ཨེཏྠ པཊིསནྡྷིཙིཏྟེན པཊིསནྡྷིཀྑཎེ ལབྦྷམཱནཱནི རཱུཔཱནི རཱུཔཀྑནྡྷོ, སཧཛཱཏཱ ཝེདནཱ ཝེདནཱཀྑནྡྷོ, སཉྙཱ སཉྙཱཀྑནྡྷོ, སེསཙེཏསིཀཱ སངྑཱརཀྑནྡྷོ, པཊིསནྡྷིཙིཏྟཾ ཝིཉྙཱཎཀྑནྡྷོ. སཧཛཱཏཔཙྩཡཱ ཧོནྟཱིཏི ཙཏྟཱརོ ཨརཱུཔིནོ ཁནྡྷཱ ཨཉྙམཉྙཾ སཧཛཱཏཔཙྩཡཱ ཧོནྟི, རཱུཔཀྑནྡྷེ ཙཏྟཱརོ མཧཱབྷཱུཏཱ ཨཉྙམཉྙཾ སཧཛཱཏཔཙྩཡཱ ཧོནྟི, ཨརཱུཔིནོ ཁནྡྷཱ ཙ ཧདཡརཱུཔཉྩ ཨཉྙམཉྙཾ སཧཛཱཏཔཙྩཡཱ ཧོནྟི, མཧཱབྷཱུཏཱཔི ཨུཔཱདཱརཱུཔཱནཾ སཧཛཱཏཔཙྩཡཱ ཧོནྟི. ཨཉྙམཉྙཔཙྩཡཱ ཧོནྟཱིཏི ཨཉྙམཉྙཾ ཨུཔྤཱདནུཔཏྠམྦྷནབྷཱཝེན ཨུཔཀཱརཀཱ ཧོནྟི, ཙཏྟཱརོ ཨརཱུཔིནོ ཁནྡྷཱ ཙ ཨཉྙམཉྙཔཙྩཡཱ ཧོནྟི, ཙཏྟཱརོ མཧཱབྷཱུཏཱ ཨཉྙམཉྙཔཙྩཡཱ ཧོནྟི. ནིསྶཡཔཙྩཡཱ ཧོནྟཱིཏི ཨདྷིཊྛཱནཱཀཱརེན ནིསྶཡཱཀཱརེན ཙ ཨུཔཀཱརཀཱ ཧོནྟི, ཙཏྟཱརོ ཨརཱུཔིནོ ཁནྡྷཱ ཙ ཨཉྙམཉྙཾ ནིསྶཡཔཙྩཡཱ ཧོནྟཱིཏི སཧཛཱཏཱ ཝིཡ ཝིཏྠཱརེཏབྦཱ. ཝིཔྤཡུཏྟཔཙྩཡཱ ཧོནྟཱིཏི ཨེཀཝཏྠུཀཱདིབྷཱཝཱནུཔགམནེན ཝིཔྤཡུཏྟབྷཱཝེན ཨུཔཀཱརཀཱ ཧོནྟི, ཨརཱུཔིནོ ཁནྡྷཱ པཊིསནྡྷིརཱུཔཱནཾ ཝིཔྤཡུཏྟཔཙྩཡཱ ཧོནྟི, ཧདཡརཱུཔཾ ཨརཱུཔཱིནཾ ཁནྡྷཱནཾ ཝིཔྤཡུཏྟཔཙྩཡོ ཧོཏི. ‘‘པཉྩཀྑནྡྷཱ’’ཏི ཧེཏྠ ཨེཝཾ ཡཐཱལཱབྷཝསེན ཝུཏྟཾ.

ཙཏྟཱརོ མཧཱབྷཱུཏཱཏི ཨེཏྠ ཏཡོ པཙྩཡཱ པཋམཾ ཝུཏྟཱཡེཝ. ཏཡོ ཛཱིཝིཏསངྑཱརཱཏི ཨཱཡུ ཙ ཨུསྨཱ ཙ ཝིཉྙཱཎཉྩ. ཨཱཡཱུཏི རཱུཔཛཱིཝིཏིནྡྲིཡཾ ཨརཱུཔཛཱིཝིཏིནྡྲིཡཉྩ. ཨུསྨཱཏི ཏེཛོདྷཱཏུ. ཝིཉྙཱཎནྟི པཊིསནྡྷིཝིཉྙཱཎཾ. ཨེཏཱནི ཧི ཨུཔརཱུཔརི ཛཱིཝིཏསངྑཱརཾ སངྑརོནྟི པཝཏྟེནྟཱིཏི ཛཱིཝིཏསངྑཱརཱ. སཧཛཱཏཔཙྩཡཱ ཧོནྟཱིཏི ཨརཱུཔཛཱིཝིཏིནྡྲིཡཾ པཊིསནྡྷིཝིཉྙཱཎཉྩ སམྤཡུཏྟཀཱནཾ ཁནྡྷཱནཉྩ ཧདཡརཱུཔསྶ ཙ ཨཉྙམཉྙསཧཛཱཏཔཙྩཡཱ ཧོནྟི, ཏེཛོདྷཱཏུ ཏིཎྞཾ མཧཱབྷཱུཏཱནཾ ཨཉྙམཉྙསཧཛཱཏཔཙྩཡོ ཧོཏི, ཨུཔཱདཱརཱུཔཱནཾ སཧཛཱཏཔཙྩཡོཝ, རཱུཔཛཱིཝིཏིནྡྲིཡཾ སཧཛཱཏརཱུཔཱནཾ པརིཡཱཡེན སཧཛཱཏཔཙྩཡོ ཧོཏཱིཏི ཝེདིཏབྦཾ. ཨཉྙམཉྙཔཙྩཡཱ ཧོནྟི, ནིསྶཡཔཙྩཡཱ ཧོནྟཱིཏི དྭཡཾ ཨརཱུཔཛཱིཝིཏིནྡྲིཡཾ པཊིསནྡྷིཝིཉྙཱཎཉྩ སམྤཡུཏྟཁནྡྷཱནཾ ཨཉྙམཉྙཔཙྩཡཱ ཧོནྟི. ཨཉྙམཉྙནིསྶཡཔཙྩཡཱ ཧོནྟཱིཏི ཝུཏྟནཡེནེཝ ཡོཛེཏྭཱ ཝེདིཏབྦཾ. ཝིཔྤཡུཏྟཔཙྩཡཱ ཧོནྟཱིཏི ཨརཱུཔཛཱིཝིཏིནྡྲིཡཾ པཊིསནྡྷིཝིཉྙཱཎཉྩ པཊིསནྡྷིརཱུཔཱནཾ ཝིཔྤཡུཏྟཔཙྩཡཱ ཧོནྟི. རཱུཔཛཱིཝིཏིནྡྲིཡཾ པན ཨཉྙམཉྙནིསྶཡཝིཔྤཡུཏྟཔཙྩཡཏྟེ ན ཡུཛྫཏི. ཏསྨཱ ‘‘ཏཡོ ཛཱིཝིཏསངྑཱརཱ’’ཏི ཡཐཱལཱབྷཝསེན ཝུཏྟཾ. ནཱམཉྩ རཱུཔཉྩ ཝུཏྟནཡེནེཝ ཙཏུཔཙྩཡཏྟེ ཡོཛེཏབྦཾ. ཙུདྡས དྷམྨཱཏི པཉྩཀྑནྡྷཱ, ཙཏྟཱརོ མཧཱབྷཱུཏཱ, ཏཡོ ཛཱིཝིཏསངྑཱརཱ, ནཱམཉྩ རཱུཔཉྩཱཏི ཨེཝཾ གཎནཱཝསེན ཙུདྡས དྷམྨཱ. ཏེསཉྩ ཨུཔརི ཨཉྙེསཉྩ སཧཛཱཏཱདིཔཙྩཡབྷཱཝོ ཝུཏྟནཡོ ཨེཝ. སམྤཡུཏྟཔཙྩཡཱ ཧོནྟཱིཏི པུན ཨེཀཝཏྠུཀཨེཀཱརམྨཎཨེཀུཔྤཱདཨེཀནིརོདྷསངྑཱཏེན སམྤཡུཏྟབྷཱཝེན ཨུཔཀཱརཀཱ ཧོནྟི.

པཉྩིནྡྲིཡཱནཱིཏི སདྡྷིནྡྲིཡཱདཱིནི. ནཱམཉྩཱཏི ཨིདྷ ཝེདནཱདཡོ ཏཡོ ཁནྡྷཱ. ཝིཉྙཱཎཉྩཱཏི པཊིསནྡྷིཝིཉྙཱཎཾ. པུན ཙུདྡས དྷམྨཱཏི ཙཏྟཱརོ ཁནྡྷཱ, པཉྩིནྡྲིཡཱནི, ཏཡོ ཧེཏཱུ, ནཱམཉྩ ཝིཉྙཱཎཉྩཱཏི ཨེཝཾ གཎནཱཝསེན ཙུདྡས དྷམྨཱ. ཨཊྛཝཱིསཏི དྷམྨཱཏི པུརིམཱ ཙ ཙུདྡས, ཨིམེ ཙ ཙུདྡསཱཏི ཨཊྛཝཱིསཏི. ཨིདྷ རཱུཔསྶཱཔི པཝིཊྛཏྟཱ སམྤཡུཏྟཔཙྩཡཾ ཨཔནེཏྭཱ ཝིཔྤཡུཏྟཔཙྩཡོ ཝུཏྟོ.

ཨེཝཾ པཊིསནྡྷིཀྑཎེ ཝིཛྫམཱནསྶ ཏསྶ ཏསྶ པཙྩཡུཔྤནྣསྶ དྷམྨསྶ ཏཾ ཏཾ པཙྩཡབྷེདཾ དསྶེཏྭཱ པཋམཾ ནིདྡིཊྛེ ཧེཏཱུ ནིགམེཏྭཱ དསྶེནྟོ ཨིམེསཾ ཨཊྛནྣཾ ཧེཏཱུནཾ པཙྩཡཱ ཨུཔཔཏྟི ཧོཏཱིཏི ཨཱཧ. ཀམྨཱཡཱུཧནཀྑཎེ ཏཡོ ཀུསལཧེཏཱུ, ནིཀནྟིཀྑཎེ དྭེ ཨཀུསལཧེཏཱུ, པཊིསནྡྷིཀྑཎེ ཏཡོ ཨབྱཱཀཏཧེཏཱུཏི ཨེཝཾ ཨཊྛ ཧེཏཱུ. ཏཏྠ ཏཡོ ཀུསལཧེཏཱུ, དྭེ ཨཀུསལཧེཏཱུ ཙ ཨིདྷ པཊིསནྡྷིཀྑཎེ པཝཏྟིཡཱ ཨུཔནིསྶཡཔཙྩཡཱ ཧོནྟི. ཏཡོ ཨབྱཱཀཏཧེཏཱུ ཡཐཱཡོགཾ ཧེཏུཔཙྩཡསཧཛཱཏཔཙྩཡཝསེན པཙྩཡཱ ཧོནྟི. སེསཝཱརེསུཔི ཨེསེཝ ནཡོ.

ཨརཱུཔཱཝཙརཱནཾ པན རཱུཔཱབྷཱཝཱ ནཱམཔཙྩཡཱཔི ཝིཉྙཱཎཾ, ཝིཉྙཱཎཔཙྩཡཱཔི ནཱམནྟི ཝུཏྟཾ. རཱུཔམིསྶཀཙུདྡསཀོཔི ཙ པརིཧཱིནོ. ཏསྶ པརིཧཱིནཏྟཱ ‘‘ཨཊྛཝཱིསཏི དྷམྨཱ’’ཏི ཝཱརོ ཙ ན ལབྦྷཏི.

༢༣༣. ཨིདཱནི ཝིམོཀྑསྶ པཙྩཡབྷཱུཏཾ ཏིཧེཏུཀཔཊིསནྡྷིཾ དསྶེཏྭཱ ཏེནེཝ སམྦནྡྷེན དུཧེཏུཀཔཊིསནྡྷིཝིསེསཉྩ དསྶེཏུཀཱམོ གཏིསམྤཏྟིཡཱ ཉཱཎཝིཔྤཡུཏྟེཏིཨཱདིམཱཧ. ཀུསལཀམྨསྶ ཛཝནཀྑཎེཏི ཨཏཱིཏཛཱཏིཡཱ ཨིདྷ པཊིསནྡྷིཛནཀསྶ དུཧེཏུཀཀུསལཀམྨསྶ ཝུཏྟནཡེནེཝ ཛཝནཀྑཎེ. དྭེ ཧེཏཱུཏི ཉཱཎཝིཔྤཡུཏྟཏྟཱ ཨལོབྷོ ཀུསལཧེཏུ ཨདོསོ ཀུསལཧེཏུ. དྭེ ཨབྱཱཀཏཧེཏཱུཔི ཨལོབྷཱདོསཱཡེཝ.

ཙཏྟཱརི ཨིནྡྲིཡཱནཱིཏི པཉྙིནྡྲིཡཝཛྫཱནི སདྡྷིནྡྲིཡཱདཱིནི ཙཏྟཱརི. དྭཱདས དྷམྨཱཏི པཉྙིནྡྲིཡསྶ ཨམོཧཧེཏུསྶ ཙ པརིཧཱིནཏྟཱ དྭཱདས. ཏེསཾ དྭིནྣཾཡེཝ པརིཧཱིནཏྟཱ ཚབྦཱིསཏི. ཚནྣཾ ཧེཏཱུནནྟི དྭིནྣཾ ཀུསལཧེཏཱུནཾ, དྭིནྣཾ ཨཀུསལཧེཏཱུནཾ, དྭིནྣཾ ཝིཔཱཀཧེཏཱུནནྟི ཨེཝཾ ཚནྣཾ ཧེཏཱུནཾ. རཱུཔཱརཱུཔཱཝཙརཱ པནེཏྠ ཨེཀནྟཏིཧེཏུཀཏྟཱ ན གཧིཏཱ. སེསཾ པཋམཝཱརེ ཝུཏྟནཡེནེཝ ཝེདིཏབྦཾ. ཨིམསྨིཾ ཝཱརེ དུཧེཏུཀཔཊིསནྡྷིཡཱ དུཧེཏུཀཀམྨསྶེཝ ཝུཏྟཏྟཱ ཏིཧེཏུཀཀམྨེན དུཧེཏུཀཔཊིསནྡྷི ན ཧོཏཱིཏི ཝུཏྟཾ ཧོཏི. ཏསྨཱ ཡཾ དྷམྨསངྒཧཊྛཀཐཱཡཾ (དྷ. ས. ཨཊྛ. ༤༩༨) ཏིཔིཊཀམཧཱདྷམྨརཀྑིཏཏྠེརཝཱདེ ‘‘ཏིཧེཏུཀཀམྨེན པཊིསནྡྷི ཏིཧེཏུཀཱཝ ཧོཏི, དུཧེཏུཀཱཧེཏུཀཱ ན ཧོཏི. དུཧེཏུཀཀམྨེན དུཧེཏུཀཱཧེཏུཀཱ ཧོཏི, ཏིཧེཏུཀཱ ན ཧོཏཱི’’ཏི ཝུཏྟཾ, ཏཾ ཨིམཱཡ པཱལི༹ཡཱ སམེཏི. ཡཾ པན ཏིཔིཊཀཙཱུལ༹ནཱགཏྠེརསྶ ཙ མོརཝཱཔིཝཱསིམཧཱདཏྟཏྠེརསྶ ཙ ཝཱདེསུ ‘‘ཏིཧེཏུཀཀམྨེན པཊིསནྡྷི ཏིཧེཏུཀཱཔི ཧོཏི དུཧེཏུཀཱཔི, ཨཧེཏུཀཱ ན ཧོཏི. དུཧེཏུཀཀམྨེན དུཧེཏུཀཱཔི ཧོཏི ཨཧེཏུཀཱཔི, ཏིཧེཏུཀཱ ན ཧོཏཱི’’ཏི ཝུཏྟཾ, ཏཾ ཨིམཱཡ པཱལི༹ཡཱ ཝིརུདྡྷཾ ཝིཡ དིསྶཏི. ཨིམིསྶཱ ཀཐཱཡ ཧེཏུཨདྷིཀཱརཏྟཱ ཨཧེཏུཀཔཊིསནྡྷི ན ཝུཏྟཱཏི.

གཏིཀཐཱཝཎྞནཱ ནིཊྛིཏཱ.

༧. ཀམྨཀཐཱཝཎྞནཱ

ཀམྨཀཐཱཝཎྞནཱ

༢༣༤. ཨིདཱནི ཏསྶཱ ཧེཏུསམྤཏྟིཡཱ པཙྩཡབྷཱུཏཾ ཀམྨཾ དསྶེནྟེན ཀཐིཏཱཡ ཀམྨཀཐཱཡ ཨཔུབྦཏྠཱནུཝཎྞནཱ. ཏཏྠ ཨཧོསི ཀམྨཾ ཨཧོསི ཀམྨཝིཔཱཀོཏིཨཱདཱིསུ ཨཏཱིཏབྷཝེསུ ཀཏསྶ ཀམྨསྶ ཨཏཱིཏབྷཝེསུཡེཝ ཝིཔཀྐཝིཔཱཀཾ གཧེཏྭཱ ‘‘ཨཧོསི ཀམྨཾ ཨཧོསི ཀམྨཝིཔཱཀོ’’ཏི ཝུཏྟཾ. ཏསྶེཝ ཨཏཱིཏསྶ ཀམྨསྶ དིཊྛདྷམྨཝེདནཱིཡསྶ ཨུཔཔཛྫཝེདནཱིཡསྶ ཙ པཙྩཡཝེཀལླེན ཨཏཱིཏབྷཝེསུཡེཝ ཨཝིཔཀྐཝིཔཱཀཉྩ ཨཏཱིཏེཡེཝ པརིནིབྦུཏསྶ ཙ དིཊྛདྷམྨཝེདནཱིཡཨུཔཔཛྫཝེདནཱིཡཨཔརཔརིཡཱཡཝེདནཱིཡསྶ ཀམྨསྶ ཨཝིཔཀྐཝིཔཱཀཉྩ གཧེཏྭཱ ཨཧོསི ཀམྨཾ ནཱཧོསི ཀམྨཝིཔཱཀོཏི ཝུཏྟཾ. ཨཏཱིཏསྶེཝ ཀམྨསྶ ཨཝིཔཀྐཝིཔཱཀསྶ པཙྩུཔྤནྣབྷཝེ པཙྩཡསམྤཏྟིཡཱ ཝིཔཙྩམཱནཾ ཝིཔཱཀཾ གཧེཏྭཱ ཨཧོསི ཀམྨཾ ཨཏྠི ཀམྨཝིཔཱཀོཏི ཝུཏྟཾ. ཨཏཱིཏསྶེཝ ཀམྨསྶ ཨཏིཀྐནྟཝིཔཱཀཀཱལསྶ ཙ པཙྩུཔྤནྣབྷཝེ པརིནིབྦཱཡནྟསྶ ཙ ཨཝིཔཙྩམཱནཾ ཝིཔཱཀཾ གཧེཏྭཱ ཨཧོསི ཀམྨཾ ནཏྠི ཀམྨཝིཔཱཀོཏི ཝུཏྟཾ. ཨཏཱིཏསྶེཝ ཀམྨསྶ ཝིཔཱཀཱརཧསྶ ཨཝིཔཀྐཝིཔཱཀསྶ ཨནཱགཏེ བྷཝེ པཙྩཡསམྤཏྟིཡཱ ཝིཔཙྩིཏབྦཾ ཝིཔཱཀཾ གཧེཏྭཱ ཨཧོསི ཀམྨཾ བྷཝིསྶཏི ཀམྨཝིཔཱཀོཏི ཝུཏྟཾ. ཨཏཱིཏསྶེཝ ཀམྨསྶ ཨཏིཀྐནྟཝིཔཱཀཀཱལསྶ ཙ ཨནཱགཏབྷཝེ པརིནིབྦཱཡིཏབྦསྶ ཙ ཨཝིཔཙྩིཏབྦཾ ཝིཔཱཀཾ གཧེཏྭཱ ཨཧོསི ཀམྨཾ ན བྷཝིསྶཏི ཀམྨཝིཔཱཀོཏི ཝུཏྟཾ. ཨེཝཾ ཨཏཱིཏཀམྨཾ ཨཏཱིཏཔཙྩུཔྤནྣཱནཱགཏཝིཔཱཀཱཝིཔཱཀཝསེན ཚདྷཱ དསྶིཏཾ.

པཙྩུཔྤནྣབྷཝེ ཀཏསྶ དིཊྛདྷམྨཝེདནཱིཡསྶ ཀམྨསྶ ཨིདྷེཝ ཝིཔཙྩམཱནཾ ཝིཔཱཀཾ གཧེཏྭཱ ཨཏྠི ཀམྨཾ ཨཏྠི ཀམྨཝིཔཱཀོཏི ཝུཏྟཾ. ཏསྶེཝ པཙྩུཔྤནྣསྶ ཀམྨསྶ པཙྩཡཝེཀལླེན ཨིདྷ ཨཝིཔཙྩམཱནཉྩ དིཊྛེཝ དྷམྨེ པརིནིབྦཱཡནྟསྶ ཨིདྷ ཨཝིཔཙྩམཱནཉྩ ཝིཔཱཀཾ གཧེཏྭཱ ཨཏྠི ཀམྨཾ ནཏྠི ཀམྨཝིཔཱཀོཏི ཝུཏྟཾ. པཙྩུཔྤནྣསྶེཝ ཀམྨསྶ ཨུཔཔཛྫཝེདནཱིཡསྶ ཙ ཨཔརཔརིཡཱཡཝེདནཱིཡསྶ ཙ ཨནཱགཏབྷཝེ ཝིཔཙྩིཏབྦཾ ཝིཔཱཀཾ གཧེཏྭཱ ཨཏྠི ཀམྨཾ བྷཝིསྶཏི ཀམྨཝིཔཱཀོཏི ཝུཏྟཾ. པཙྩུཔྤནྣསྶེཝ ཀམྨསྶ ཨུཔཔཛྫཝེདནཱིཡསྶ པཙྩཡཝེཀལླེན ཨནཱགཏབྷཝེ ཨཝིཔཙྩིཏབྦཉྩ ཨནཱགཏབྷཝེ པརིནིབྦཱཡིཏབྦསྶ ཨཔརཔརིཡཱཡཝེདནཱིཡསྶ ཨཝིཔཙྩིཏབྦཉྩ ཝིཔཱཀཾ གཧེཏྭཱ ཨཏྠི ཀམྨཾ ན བྷཝིསྶཏི ཀམྨཝིཔཱཀོཏི ཝུཏྟཾ. ཨེཝཾ པཙྩུཔྤནྣཀམྨཾ པཙྩུཔྤནྣཱནཱགཏཝིཔཱཀཱཝིཔཱཀཝསེན ཙཏུདྷཱ དསྶིཏཾ.

ཨནཱགཏབྷཝེ ཀཱཏབྦསྶ ཀམྨསྶ ཨནཱགཏབྷཝེ ཝིཔཙྩིཏབྦཾ ཝིཔཱཀཾ གཧེཏྭཱ བྷཝིསྶཏི ཀམྨཾ བྷཝིསྶཏི ཀམྨཝིཔཱཀོཏི ཝུཏྟཾ. ཏསྶེཝ ཨནཱགཏསྶ ཀམྨསྶ པཙྩཡཝེཀལླེན ཨཝིཔཙྩིཏབྦཉྩ ཨནཱགཏབྷཝེ པརིནིབྦཱཡིཏབྦསྶ ཨཝིཔཙྩིཏབྦཉྩ ཝིཔཱཀཾ གཧེཏྭཱ བྷཝིསྶཏི ཀམྨཾ ན བྷཝིསྶཏི ཀམྨཝིཔཱཀོཏི ཝུཏྟཾ. ཨེཝཾ ཨནཱགཏཀམྨཾ ཨནཱགཏཝིཔཱཀཱཝིཔཱཀཝསེན དྭིདྷཱ དསྶིཏཾ. ཏཾ སབྦཾ ཨེཀཏོ ཀཏྭཱ དྭཱདསཝིདྷེན ཀམྨཾ དསྶིཏཾ ཧོཏི.

ཨིམསྨིཾ ཋཱནེ ཋཏྭཱ ཏཱིཎི ཀམྨཙཏུཀྐཱནི ཨཱཧརིཏྭཱ ཝུཙྩནྟི – ཏེསུ ཧི ཝུཏྟེསུ ཨཡམཏྠོ པཱཀཊཏརོ བྷཝིསྶཏཱིཏི. ཙཏུབྦིདྷཉྷི ཀམྨཾ དིཊྛདྷམྨཝེདནཱིཡཾ ཨུཔཔཛྫཝེདནཱིཡཾ ཨཔརཔརིཡཱཡཝེདནཱིཡཾ ཨཧོསིཀམྨནྟི. ཏེསུ ཨེཀཛཝནཝཱིཐིཡཾ སཏྟསུ ཙིཏྟེསུ ཀུསལཱ ཝཱ ཨཀུསལཱ ཝཱ པཋམཛཝནཙེཏནཱ དིཊྛདྷམྨཝེདནཱིཡཀམྨཾ ནཱམ. ཏཾ ཨིམསྨིཾཡེཝ ཨཏྟབྷཱཝེ ཝིཔཱཀཾ དེཏི. ཏཐཱ ཨསཀྐོནྟཾ པན ‘‘ཨཧོསི ཀམྨཾ ནཱཧོསི ཀམྨཝིཔཱཀོ, ན བྷཝིསྶཏི ཀམྨཝིཔཱཀོ, ནཏྠི ཀམྨཝིཔཱཀོ’’ཏི ཨིམསྶ ཏིཀསྶ ཝསེན ཨཧོསིཀམྨཾ ནཱམ ཧོཏི. ཨཏྠསཱདྷིཀཱ པན སཏྟམཛཝནཙེཏནཱ ཨུཔཔཛྫཝེདནཱིཡཀམྨཾ ནཱམ. ཏཾ ཨནནྟརེ ཨཏྟབྷཱཝེ ཝིཔཱཀཾ དེཏི. ཏཐཱ ཨསཀྐོནྟཾ ཝུཏྟནཡེནེཝ ཨཧོསིཀམྨཾ ནཱམ ཧོཏི. ཨུབྷིནྣཾ ཨནྟརེ པན པཉྩཛཝནཙེཏནཱ ཨཔརཔརིཡཱཡཝེདནཱིཡཀམྨཾ ནཱམ. ཏཾ ཨནཱགཏེ ཡདཱ ཨོཀཱསཾ ལབྷཏི, ཏདཱ ཝིཔཱཀཾ དེཏི. སཏི སཾསཱརཔྤཝཏྟིཡཱ ཨཧོསིཀམྨཾ ནཱམ ན ཧོཏི.

ཨཔརམྤི ཙཏུབྦིདྷཾ ཀམྨཾ ཡགྒརུཀཾ ཡབྦཧུལཾ ཡདཱསནྣཾ ཀཊཏྟཱ ཝཱ པན ཀམྨནྟི. ཏཏྠ ཀུསལཾ ཝཱ ཧོཏུ ཨཀུསལཾ ཝཱ, གརུཀཱགརུཀེསུ ཡཾ གརུཀཾ མཱཏུགྷཱཏཱདིཀམྨཾ ཝཱ མཧགྒཏཀམྨཾ ཝཱ, ཏདེཝ པཋམཾ ཝིཔཙྩཏི. ཏཐཱ བཧུལཱབཧུལེསུཔི ཡཾ བཧུལཾ ཧོཏི སུསཱིལྱཾ ཝཱ དུསྶཱིལྱཾ ཝཱ, ཏདེཝ པཋམཾ ཝིཔཙྩཏི. ཡདཱསནྣཾ ནཱམ མརཎཀཱལེ ཨནུསྶརིཏཀམྨཾ ཝཱ ཀཏཀམྨཾ ཝཱ. ཡཉྷི ཨཱསནྣམརཎེ ཨནུསྶརིཏུཾ སཀྐོཏི ཀཱཏུཾ ཝཱ, ཏེནེཝ ཨུཔཔཛྫཏི. ཨེཏེཧི པན ཏཱིཧི མུཏྟཾ པུནཔྤུནཾ ལདྡྷཱསེཝནཾ ཀཊཏྟཱ ཝཱ པན ཀམྨཾ ནཱམ ཧོཏི. ཏེསཾ ཨབྷཱཝེ ཏཾ པཊིསནྡྷིཾ ཨཱཀཌྜྷཏི.

ཨཔརཾ ཝཱ ཙཏུབྦིདྷཾ ཀམྨཾ ཛནཀཾ ཨུཔཏྠམྦྷཀཾ ཨུཔཔཱིལ༹ཀཾ ཨུཔགྷཱཏཀནྟི. ཏཏྠ ཛནཀཾ ནཱམ ཀུསལམྤི ཧོཏི ཨཀུསལམྤི. ཏཾ པཊིསནྡྷིཡཾ པཝཏྟེཔི རཱུཔཱརཱུཔཝིཔཱཀཾ ཛནེཏི. ཨུཔཏྠམྦྷཀཾ པན ཛནེཏུཾ ན སཀྐོཏི, ཨཉྙེན ཀམྨེན དིནྣཱཡ པཊིསནྡྷིཡཱ ཛནིཏེ ཝིཔཱཀེ ཨུཔྤཛྫནཀསུཁདུཀྑཾ ཨུཔཏྠམྦྷེཏི, ཨདྡྷཱནཾ པཝཏྟེཏི. ཨུཔཔཱིལ༹ཀཾ ཨཉྙེན ཀམྨེན དིནྣཱཡ པཊིསནྡྷིཡཱ ཛནིཏེ ཝིཔཱཀེ ཨུཔྤཛྫནཀསུཁདུཀྑཾ པཱིལེ༹ཏི བཱདྷཏི, ཨདྡྷཱནཾ པཝཏྟིཏུཾ ན དེཏི. ཨུཔགྷཱཏཀཾ པན ཀུསལམྤི ཨཀུསལམྤི སམཱནཾ ཨཉྙཾ དུབྦལཀམྨཾ གྷཱཏེཏྭཱ ཏསྶ ཝིཔཱཀཾ པཊིབཱཧིཏྭཱ ཨཏྟནོ ཝིཔཱཀསྶ ཨོཀཱསཾ ཀརོཏི. ཨེཝཾ པན ཀམྨེན ཀཏེ ཨོཀཱསེ ཏཾ ཝིཔཱཀཾ ཨུཔྤནྣཾ ནཱམ ཝུཙྩཏི.

ཨིཏི ཨིམེསཾ དྭཱདསནྣཾ ཀམྨཱནཾ ཀམྨནྟརཉྩ ཝིཔཱཀནྟརཉྩ བུདྡྷཱནཾ ཀམྨཝིཔཱཀཉཱཎསྶེཝ ཡཱཐཱཝསརསཏོ པཱཀཊཾ ཧོཏི ཨསཱདྷཱརཎཾ སཱཝཀེཧི. ཝིཔསྶཀེན པན ཀམྨནྟརཾ ཝིཔཱཀནྟརཉྩ ཨེཀདེསཏོ ཛཱནིཏབྦཾ. ཏསྨཱ ཨཡཾ མུཁམཏྟདསྶནེན ཀམྨཝིསེསོ པཀཱསིཏོཏི.

༢༣༥. ཨེཝཾ སུདྡྷིཀཀམྨཝསེན པཋམཝཱརཾ ཝཏྭཱ ཏདེཝ ཀམྨཾ དྭིདྷཱ ཝིབྷཛིཏྭཱ ཀུསལཱཀུསལཱདིཡུགལཝསེན དསཧི པརིཡཱཡེཧི ཨཔརེ དས ཝཱརཱ ཝུཏྟཱ. ཏཏྠ ཨཱརོགྱཊྛེན ཀུསལཾ, ཨནཱརོགྱཊྛེན ཨཀུསལཾ, ཨིདཾ དུཀཾ ཛཱཏིཝསེན ཝུཏྟཾ. ཨཀུསལམེཝ རཱགཱདིདོསསཾཡོགེན སཱཝཛྫཾ, ཀུསལཾ ཏདབྷཱཝེན ཨནཝཛྫཾ. ཨཀུསལཾ ཨཔརིསུདྡྷཏྟཱ, ཀཎྷཱབྷིཛཱཏིཧེཏུཏྟཱ ཝཱ ཀཎྷཾ, ཀུསལཾ པརིསུདྡྷཏྟཱ, སུཀྐཱབྷིཛཱཏིཧེཏུཏྟཱ ཝཱ སུཀྐཾ. ཀུསལཾ སུཁཝུདྡྷིམཏྟཱ སུཁུདྲཡཾ, ཨཀུསལཾ དུཀྑཝུདྡྷིམཏྟཱ དུཀྑུདྲཡཾ. ཀུསལཾ སུཁཕལཝཏྟཱ སུཁཝིཔཱཀཾ, ཨཀུསལཾ དུཀྑཕལཝཏྟཱ དུཀྑཝིཔཱཀནྟི ཨེཝམེཏེསཾ ནཱནཱཀཱརོ ཝེདིཏབྦོཏི.

ཀམྨཀཐཱཝཎྞནཱ ནིཊྛིཏཱ.

༨. ཝིཔལླཱསཀཐཱ

ཝིཔལླཱསཀཐཱཝཎྞནཱ

༢༣༦. ཨིདཱནི ཏསྶ ཀམྨསྶ པཙྩཡབྷཱུཏེ ཝིཔལླཱསེ དསྶེནྟེན ཀཐིཏཱཡ སུཏྟནྟཔུབྦངྒམཱཡ ཝིཔལླཱསཀཐཱཡ ཨཔུབྦཏྠཱནུཝཎྞནཱ. སུཏྟནྟེ ཏཱཝ སཉྙཱཝིཔལླཱསཱཏི སཉྙཱཡ ཝིཔལླཏྠབྷཱཝཱ ཝིཔརཱིཏབྷཱཝཱ, ཝིཔརཱིཏསཉྙཱཏི ཨཏྠོ. སེསདྭཡེསུཔི ཨེསེཝ ནཡོ. ཙིཏྟཀིཙྩསྶ དུབྦལཊྛཱནེ དིཊྛིཝིརཧིཏཱཡ ཨཀུསལསཉྙཱཡ སཀཀིཙྩསྶ བལཝཀཱལེ སཉྙཱཝིཔལླཱསོ. དིཊྛིཝིརཧིཏསྶེཝ ཨཀུསལཙིཏྟསྶ སཀཀིཙྩསྶ བལཝཀཱལེ ཙིཏྟཝིཔལླཱསོ. དིཊྛིསམྤཡུཏྟེ ཙིཏྟེ དིཊྛིཝིཔལླཱསོ. ཏསྨཱ སབྦདུབྦལོ སཉྙཱཝིཔལླཱསོ, ཏཏོ བལཝཏརོ ཙིཏྟཝིཔལླཱསོ, སབྦབལཝཏརོ དིཊྛིཝིཔལླཱསོ. ཨཛཱཏབུདྡྷིདཱརཀསྶ ཀཧཱཔཎདསྶནཾ ཝིཡ ཧི སཉྙཱ ཨཱརམྨཎསྶ ཨུཔཊྛཱནཱཀཱརམཏྟགྒཧཎཏོ. གཱམིཀཔུརིསསྶ ཀཧཱཔཎདསྶནཾ ཝིཡ ཙིཏྟཾ ལཀྑཎཔཊིཝེདྷསྶཱཔི སམྤཱཔནཏོ. ཀམྨཱརསྶ མཧཱསཎྜཱསེན ཨཡོགཧཎཾ ཝིཡ དིཊྛི ཨབྷིནིཝིསྶ པརཱམསནཏོ. ཨནིཙྩེ ནིཙྩནྟི སཉྙཱཝིཔལླཱསོཏི ཨནིཙྩེ ཝཏྠུསྨིཾ ‘‘ནིཙྩཾ ཨིད’’ནྟི ཨེཝཾ གཧེཏྭཱ ཨུཔྤཛྫནཀསཉྙཱ སཉྙཱཝིཔལླཱསོ. ཨིམིནཱ ནཡེན སབྦཔདེསུ ཨཏྠོ ཝེདིཏབྦོ. ན སཉྙཱཝིཔལླཱསོ ན ཙིཏྟཝིཔལླཱསོ ན དིཊྛིཝིཔལླཱསོཏི ཙཏཱུསུ ཝཏྠཱུསུ དྭཱདསནྣཾ ཝིཔལླཱསགྒཱཧཱནཾ ཨབྷཱཝཱ ཡཱཐཱཝགྒཧཎཾ ཝུཏྟཾ.

གཱཐཱསུ ཨནཏྟནི ཙ ཨཏྟཱཏི ཨནཏྟནི ཨཏྟཱཏི ཨེཝཾསཉྙིནོཏི ཨཏྠོ. མིཙྪཱདིཊྛིཧཏཱཏི ན ཀེཝལཾ སཉྙིནོཝ, སཉྙཱཡ ཝིཡ ཨུཔྤཛྫམཱནཱཡ མིཙྪཱདིཊྛིཡཱཔི ཧཏཱ. ཁིཏྟཙིཏྟཱཏི སཉྙཱདིཊྛཱིཧི ཝིཡ ཨུཔྤཛྫམཱནེན ཁིཏྟེན ཝིབྦྷནྟེན ཙིཏྟེན སམནྣཱགཏཱ. ཝིསཉྙིནོཏི དེསནཱམཏྟམེཏཾ, ཝིཔརཱིཏསཉྙཱཙིཏྟདིཊྛིནོཏི ཨཏྠོ. ཨཐ ཝཱ སཉྙཱཔུབྦངྒམཏྟཱ དིཊྛིཡཱ པཋམཾ ཙཏཱུཧི པདེཧི སཉྙཱཝིཔལླཱསོ ཝུཏྟོ, ཏཏོ མིཙྪཱདིཊྛིཧཏཱཏི དིཊྛིཝིཔལླཱསོ, ཁིཏྟཙིཏྟཱཏི ཙིཏྟཝིཔལླཱསོ. ཝིསཉྙིནོཏི ཏཱིཧི ཝིཔལླཱསགྒཱཧེཧི པཀཏིསཉྙཱཝིརཧིཏཱ མོཧཾ གཏཱ ‘‘མུཙྪིཏོ ཝིསཝེགེན, ཝིསཉྙཱི སམཔཛྫཐཱ’’ཏིཨེཏྠ (ཛཱ. ༢.༢༢.༣༢༨) ཝིཡ. ཏེ ཡོགཡུཏྟཱ མཱརསྶཱཏི ཏེ ཛནཱ སཏྟཱ མཱརསྶ ཡོགེ ཡུཏྟཱ ནཱམ ཧོནྟི. ཨཡོགཀྑེམིནོཏི ཙཏཱུཧི ཡོགེཧི ཨཱིཏཱིཧི ཁེམཾ ནིབྦཱནཾ ཨཔྤཏྟཱ. སཏྟཱ གཙྪནྟི སཾསཱརནྟི ཏེཡེཝ པུགྒལཱ སཾསཱརཾ སཾསརནྟི. ཀསྨཱ? ཛཱཏིམརཎགཱམིནོ ཧི ཏེ, ཏསྨཱ སཾསརནྟཱིཏི ཨཏྠོ. བུདྡྷཱཏི ཙཏུསཙྩབུདྡྷཱ སབྦཉྙུནོ. ཀཱལཏྟཡསཱདྷཱརཎཝསེན བཧུཝཙནཾ. ལོཀསྨིནྟི ཨོཀཱསལོཀེ. པབྷངྐརཱཏི ལོཀསྶ པཉྙཱལོཀཾ ཀརཱ. ཨིམཾ དྷམྨཾ པཀཱསེནྟཱིཏི ཝིཔལླཱསཔྤཧཱནཾ དྷམྨཾ ཛོཏེནྟི. དུཀྑཱུཔསམགཱམིནནྟི དུཀྑཝཱུཔསམཾ ནིབྦཱནཾ གཙྪནྟཾ. ཏེསཾ སུཏྭཱནཱཏི ཏེསཾ བུདྡྷཱནཾ དྷམྨཾ སུཏྭཱན. སཔྤཉྙཱཏི བྷབྦབྷཱུཏཱ པཉྙཝནྟོ. སཙིཏྟཾ པཙྩལདྡྷཱུཏི ཝིཔལླཱསཝཛྫིཏཾ སཀཙིཏྟཾ པཊིལབྷིཏྭཱ. པཊིཨལདྡྷཱུཏི པདཙྪེདོ. ཨཐ ཝཱ པཊིལབྷིཾསུ པཊིཨལདྡྷུནྟི པདཙྪེདོ. ཨནིཙྩཏོ དཀྑུནྟི ཨནིཙྩཝསེནེཝ ཨདྡསཾསུ. ཨནཏྟནི ཨནཏྟཱཏི ཨནཏྟཱནཾ ཨནཏྟཱཏི ཨདྡཀྑུཾ. ཨཐ ཝཱ ཨནཏྟནི ཝཏྠུསྨིཾ ཨཏྟཱ ནཏྠཱིཏི ཨདྡཀྑུཾ. སམྨཱདིཊྛིསམཱདཱནཱཏི གཧིཏསམྨཱདསྶནཱ. སབྦཾ དུཀྑཾ ཨུཔཙྩགུནྟི སཀལཾ ཝཊྚདུཀྑཾ སམཏིཀྐནྟཱ.

པཧཱིནཱཔཧཱིནཔུཙྪཱཡ དིཊྛིསམྤནྣསྶཱཏི སོཏཱཔནྣསྶ. དུཀྑེ སུཁནྟི སཉྙཱ ཨུཔྤཛྫཏི. ཙིཏྟཾ ཨུཔྤཛྫཏཱིཏི མོཧཀཱལུསྶིཡསྶ ཨཔྤཧཱིནཏྟཱ སཉྙཱམཏྟཾ ཝཱ ཙིཏྟམཏྟཾ ཝཱ ཨུཔྤཛྫཏི, ཨནཱགཱམིསྶཔི ཨུཔྤཛྫཏི, ཀིཾ པན སོཏཱཔནྣསྶ. ཨིམེ དྭེ ཨརཧཏོཡེཝ པཧཱིནཱ. ཨསུབྷེ སུབྷནྟི སཉྙཱ ཨུཔྤཛྫཏི. ཙིཏྟཾ ཨུཔྤཛྫཏཱིཏི སཀདཱགཱམིསྶཔི ཨུཔྤཛྫཏི, ཀིཾ པན སོཏཱཔནྣསྶ. ཨིམེ དྭེ ཨནཱགཱམིསྶ པཧཱིནཱཏི ཨཊྛཀཐཱཡཾ ཝུཏྟཾ. ཏསྨཱ ཨིདཾ དྭཡཾ སོཏཱཔནྣསཀདཱགཱམིནོ སནྡྷཱཡ ཝུཏྟནྟི ཝེདིཏབྦཾ. ཨནཱགཱམིནོ ཀཱམརཱགསྶ པཧཱིནཏྟཱ ‘‘ཨསུབྷེ སུབྷ’’ནྟི སཉྙཱཙིཏྟཝིཔལླཱསཱནཉྩ པཧཱནཾ ཝུཏྟནྟི ཝེདིཏབྦཾ. དྭཱིསུ ཝཏྠཱུསཱུཏིཨཱདཱིཧི པདེཧི པཧཱིནཱཔཧཱིནེ ནིགམེཏྭཱ དསྶེཏི. ཏཏྠ ‘‘ཨནིཙྩེ ནིཙྩ’’ནྟི, ‘‘ཨནཏྟནི ཨཏྟཱ’’ཏི ཨིམེསུ དྭཱིསུ ཝཏྠཱུསུ ཚ ཝིཔལླཱསཱ པཧཱིནཱ. ‘‘དུཀྑེ སུཁ’’ནྟི, ‘‘ཨསུབྷེ སུབྷ’’ནྟི ཨིམེསུ དྭཱིསུ ཝཏྠཱུསུ དྭེ དིཊྛིཝིཔལླཱསཱ པཧཱིནཱ. ཀེསུཙི པོཏྠཀེསུ དྭེཏི པཋམཾ ལིཁིཏཾ, པཙྪཱ ཚཱཏི. ཙཏཱུསུ ཝཏྠཱུསཱུཏི ཙཏྟཱརི ཨེཀཏོ ཀཏྭཱ ཝུཏྟཾ. ཨཊྛཱཏི དྭཱིསུ ཚ, དྭཱིསུ དྭེཏི ཨཊྛ. ཙཏྟཱརོཏི དུཀྑཱསུབྷཝཏྠཱུསུ ཨེཀེཀསྨིཾ དྭེ དྭེ སཉྙཱཙིཏྟཝིཔལླཱསཱཏི ཙཏྟཱརོ. ཀེསུཙི པོཏྠཀེསུ ‘‘ཚ དྭཱིསཱུ’’ཏི ཝུཏྟཊྛཱནེསུཔི ཨེཝམེཝ ལིཁིཏནྟི.

ཝིཔལླཱསཀཐཱཝཎྞནཱ ནིཊྛིཏཱ.

༩. མགྒཀཐཱ

མགྒཀཐཱཝཎྞནཱ

༢༣༧. ཨིདཱནི ཏེསཾ ཏིཎྞཾ ཝིཔལླཱསཱནཾ པཧཱནཀརཾ ཨརིཡམགྒཾ དསྶེནྟེན ཀཐིཏཱཡ མགྒཀཐཱཡ ཨཔུབྦཏྠཱནུཝཎྞནཱ. ཏཏྠ མགྒོཏི ཀེནཊྛེན མགྒོཏི ཡོ བུདྡྷསཱསནེ མགྒོཏི ཝུཙྩཏི, སོ ཀེནཊྛེན མགྒོ ནཱམ ཧོཏཱིཏི ཨཏྠོ. མིཙྪཱདིཊྛིཡཱ པཧཱནཱཡཱཏིཨཱདཱིསུ དསསུ པརིཡཱཡེསུ པཋམོ པཋམོ ཏསྶ ཏསྶ མགྒངྒསྶ ཨུཛུཝིཔཙྩནཱིཀཝསེན ཝུཏྟོ. མགྒོ ཙེཝ ཧེཏུ ཙཱཏི ཏསྶ ཏསྶ ཀིཙྩསྶ ཀརཎཱཡ པཊིཔདཊྛེན མགྒོ, སམྤཱཔཀཊྛེན ཧེཏུ. ཏེན མགྒསྶ པཊིཔདཊྛོ སམྤཱཔཀཊྛོ ཙ ཝུཏྟོ ཧོཏི. ‘‘ཨཡཾ མགྒོ ཨཡཾ པཊིཔདཱ’’ཏིཨཱདཱིསུ (སཾ. ནི. ༥.༥, ༤༨) ཧི པཊིཔདཱ མགྒོ, ‘‘མགྒསྶ ནིཡྻཱནཊྛོ ཧེཏུཊྛོ’’ཏིཨཱདཱིསུ (པཊི. མ. ༢.༨) སམྤཱཔཀོ ཧེཏུ. ཨེཝཾ དྭཱིཧི དྭཱིཧི པདེཧི ‘‘མགྒོཏི ཀེནཊྛེན མགྒོ’’ཏི པུཙྪཱཡ ཝིསྶཛྫནཾ ཀཏཾ ཧོཏི. སཧཛཱཏཱནཾ དྷམྨཱནཾ ཨུཔཏྠམྦྷནཱཡཱཏི ཨཏྟནཱ སཧཛཱཏཱནཾ ཨརཱུཔདྷམྨཱནཾ སཧཛཱཏཨཉྙམཉྙནིསྶཡཱདིབྷཱཝེན ཨུཔཏྠམྦྷནབྷཱཝཱཡ. ཀིལེསཱནཾ པརིཡཱདཱནཱཡཱཏི ཏཾཏཾམགྒཝཛ྄ཛྷཱནཾ ཝུཏྟཱཝསེསཀིལེསཱནཾ ཁེཔནཱཡ. པཊིཝེདྷཱདིཝིསོདྷནཱཡཱཏི ཨེཏྠ ཡསྨཱ ‘‘ཀོ ཙཱདི ཀུསལཱནཾ དྷམྨཱནཾ, སཱིལཉྩ སུཝིསུདྡྷཾ དིཊྛི ཙ ཨུཛུཀཱ’’ཏི (སཾ. ནི. ༥.༣༦༩, ༣༨༡) ཝཙནཏོ སཱིལཉྩ དིཊྛི ཙ སཙྩཔཊིཝེདྷསྶ ཨཱདི. སོ ཙ ཨཱདིམགྒཀྑཎེ ཝིསུཛ྄ཛྷཏི. ཏསྨཱ ‘‘པཊིཝེདྷཱདིཝིསོདྷནཱཡཱ’’ཏི ཝུཏྟཾ. ཙིཏྟསྶ ཨདྷིཊྛཱནཱཡཱཏི སམྤཡུཏྟཙིཏྟསྶ སཀཀིཙྩེ པཏིཊྛཱནཱཡ. ཙིཏྟསྶ ཝོདཱནཱཡཱཏི ཙིཏྟསྶ པརིསུདྡྷབྷཱཝཱཡ. ཝིསེསཱདྷིགམཱཡཱཏི ལོཀིཡཏོ ཝིསེསཔཊིལཱབྷཱཡ. ཨུཏྟརི པཊིཝེདྷཱཡཱཏི ལོཀིཡཏོ ཨུཏྟརི པཊིཝིཛ྄ཛྷནཏྠཱཡ. སཙྩཱབྷིསམཡཱཡཱཏི ཙཏུནྣཾ སཙྩཱནཾ ཨེཀཱབྷིསམཡཱཡ ཀིཙྩནིཔྥཏྟིཝསེན ཨེཀཔཊིཝེདྷཱཡ. ནིརོདྷེ པཏིཊྛཱཔནཱཡཱཏི ཙིཏྟསྶ ཝཱ པུགྒལསྶ ཝཱ ནིབྦཱནེ པཏིཊྛཱཔནཏྠཱཡ. སཀདཱགཱམིམགྒཀྑཎཱདཱིསུ ཨཊྛ མགྒངྒཱནི ཨེཀཏོ ཀཏྭཱ ཏཾཏཾམགྒཝཛ྄ཛྷཀིལེསཔྤཧཱནཾ ཝུཏྟཾ. ཨེཝཾ ཝཙནེ ཀཱརཎཾ ཧེཊྛཱ ཝུཏྟམེཝ. ཡསྨཱ ཨུཔརཱུཔརིམགྒེནཱཔི སུཊྛུ ཨཱདིཝིསོདྷནཱ སུཊྛུ ཙིཏྟཝོདཱནཉྩ ཧོཏི, ཏསྨཱ ཏཱནིཔི པདཱནི ཝུཏྟཱནི.

དསྶནམགྒོཏིཨཱདཱིཧི ཡཱཝ པརིཡོསཱནཱ ཏསྶ དྷམྨསྶ ལཀྑཎཝསེན མགྒཊྛོ ཝུཏྟོ. ཏཱནི སབྦཱནིཔི པདཱནི ཨབྷིཉྙེཡྻནིདྡེསེ ཝུཏྟཏྠཱནེཝ. ཨེཝམེཏྠ ཡཐཱསམྦྷཝཾ ལོཀིཡལོཀུཏྟརོ མགྒོ ནིདྡིཊྛོ. ཧེཏུཊྛེན མགྒོཏི ཙ ཨཊྛངྒིཀོ མགྒོ ནིདྡིཊྛོ. ནིཔྤརིཡཱཡམགྒཏྟཱ ཙསྶ པུན ‘‘མགྒོ’’ཏི ན ཝུཏྟཾ. ཨཱདྷིཔཏེཡྻཊྛེན ཨིནྡྲིཡཱཏི ཨཱདཱིནི ཙ ཨིནྡྲིཡཱདཱིནཾ ཨཏྠཝསེན ཝུཏྟཱནི, ན མགྒཊྛཝསེན. སཙྩཱནཱིཏི ཙེཏྠ སཙྩཉཱཎཱནི. སབྦེཔི ཏེ དྷམྨཱ ནིབྦཱནསྶ པཊིཔདཊྛེན མགྒོ. ཨནྟེ ཝུཏྟཾ ནིབྦཱནཾ པན སཾསཱརདུཀྑཱབྷིབྷཱུཏེཧི དུཀྑནིསྶརཎཏྠིཀེཧི སཔྤུརིསེཧི མགྒཱིཡཏི གཝེསཱིཡཏཱིཏི མགྒོཏི ཝུཏྟནྟི ཝེདིཏབྦནྟི.

མགྒཀཐཱཝཎྞནཱ ནིཊྛིཏཱ.

༡༠. མཎྜཔེཡྻཀཐཱ

མཎྜཔེཡྻཀཐཱཝཎྞནཱ

༢༣༨. ཨིདཱནི ཏསྶ མགྒསྶ མཎྜཔེཡྻཏྟཾ དསྶེནྟེན ཀཐིཏཱཡ བྷགཝཏོ ཝཙནེཀདེསཔུབྦངྒམཱཡ མཎྜཔེཡྻཀཐཱཡ ཨཔུབྦཏྠཱནུཝཎྞནཱ. ཏཏྠ མཎྜཔེཡྻནྟི ཡཐཱ སམྤནྣཾ ནིམྨལཾ ཝིཔྤསནྣཾ སཔྤི སཔྤིམཎྜོཏི ཝུཙྩཏི, ཨེཝཾ ཝིཔྤསནྣཊྛེན མཎྜོ, པཱཏབྦཊྛེན པེཡྻཾ. ཡཉྷི པིཝིཏྭཱ ཨནྟརཝཱིཐིཡཾ པཏིཏཱ ཝིསཉྙིནོ ཨཏྟནོ སཱཊཀཱདཱིནམྤི ཨསྶཱམིཀཱ ཧོནྟི, ཏཾ པསནྣམྤི ན པཱཏབྦཾ. མཡ྄ཧཾ པན ཨིདཾ སིཀྑཏྟཡསངྒཧིཏཾ སཱསནབྲཧྨཙརིཡཾ སམྤནྣཏྟཱ ནིམྨལཏྟཱ ཝིཔྤསནྣཏྟཱ མཎྜཉྩ ཧིཏསུཁཱཝཧཏྟཱ པེཡྻཉྩཱཏི མཎྜཔེཡྻནྟི དཱིཔེཏི. མཎྜོ པེཡྻོ ཨེཏྠཱཏི མཎྜཔེཡྻཾ. ཀིཾ ཏཾ? སཱསནབྲཧྨཙརིཡཾ. ཀསྨཱ སིཀྑཏྟཡཾ བྲཧྨཙརིཡཾ ནཱམ? ཨུཏྟམཊྛེན ནིབྦཱནཾ བྲཧྨཾ ནཱམ, སིཀྑཏྟཡཾ ནིབྦཱནཏྠཱཡ པཝཏྟནཏོ བྲཧྨཏྠཱཡ ཙརིཡཱཏི བྲཧྨཙརིཡནྟི ཝུཙྩཏི. སཱསནབྲཧྨཙརིཡནྟི ཏཾཡེཝ. སཏྠཱ སམྨུཁཱིབྷཱུཏོཏི ཨིདམེཏྠ ཀཱརཎཝཙནཾ. ཡསྨཱ པན སཏྠཱ སམྨུཁཱིབྷཱུཏོ, ཏསྨཱ ཝཱིརིཡཔཡོགཾ ཀཏྭཱ པིཝཐེཏཾ མཎྜཾ. བཱཧིརཀཉྷི བྷེསཛྫམཎྜཾ ཝེཛྫསྶ ཨསམྨུཁཱ པིཝནྟཱནཾ པམཱཎཾ ཝཱ ཨུགྒམནནིགྒམནཾ ཝཱ ན ཛཱནཱམཱཏི ཨཱསངྐཱ ཧོཏི. ཝེཛྫསྶ སམྨུཁཱ པན ཝེཛྫོ ཛཱནིསྶཏཱིཏི ནིརཱསངྐཱ པིཝནྟི. ཨེཝམེཝཾ ཨམྷཱཀཉྩ དྷམྨསྶཱམཱི སཏྠཱ སམྨུཁཱིབྷཱུཏོཏི ཝཱིརིཡཾ ཀཏྭཱ པིཝཐཱཏི མཎྜཔཱནེ སནྣིཡོཛེཏི. དིཊྛདྷམྨིཀསམྤརཱཡིཀཔརམཏྠེཧི ཡཐཱརཧཾ ཨནུསཱསཏཱིཏི སཏྠཱ. ཨཔིཙ ‘‘སཏྠཱ བྷགཝཱ སཏྠཝཱཧོ’’ཏིཨཱདིནཱ (མཧཱནི. ༡༩༠) ནིདྡེསནཡེནཔེཏྠ ཨཏྠོ ཝེདིཏབྦོ. སནྡིསྶམཱནོ མུཁོ བྷཱུཏོཏི སམྨུཁཱིབྷཱུཏོ.

མཎྜཔེཡྻནིདྡེསེ ཏིདྷཏྟམཎྜོཏི ཏིདྷཱབྷཱཝོ ཏིདྷཏྟཾ. ཏིདྷཏྟེན མཎྜོ ཏིདྷཏྟམཎྜོ, ཏིཝིདྷེན མཎྜོཏི ཨཏྠོ. སཏྠརི སམྨུཁཱིབྷཱུཏེཏི ཨིདཾ སབྦཱཀཱརཔརིཔུཎྞམཎྜཏྟཡདསྶནཏྠཾ ཝུཏྟཾ. པརིནིབྦུཏེཔི པན སཏྠརི ཨེཀདེསེན མཎྜཏྟཡཾ པཝཏྟཏིཡེཝ. ཏེནེཝ ཙསྶ ནིདྡེསེ ‘‘སཏྠརི སམྨུཁཱིབྷཱུཏེ’’ཏི ཨཝཏྭཱ ཀཏམོ དེསནཱམཎྜོཏིཨཱདི ཝུཏྟནྟི ཝེདིཏབྦཾ.

དེསནཱམཎྜོཏི དྷམྨདེསནཱ ཨེཝ མཎྜོ. པཊིགྒཧམཎྜོཏི དེསནཱཔཊིགྒཱཧཀོ ཨེཝ མཎྜོ. བྲཧྨཙརིཡམཎྜོཏི མགྒབྲཧྨཙརིཡམེཝ མཎྜོ.

ཨཱཙིཀྑནཱཏི དེསེཏབྦཱནཾ སཙྩཱདཱིནཾ ཨིམཱནི ནཱམཱནཱིཏི ནཱམཝསེན ཀཐནཱ. དེསནཱཏི དསྶནཱ. པཉྙཱཔནཱཏི ཛཱནཱཔནཱ, ཉཱཎམུཁེ ཋཔནཱ ཝཱ. ཨཱསནཾ ཋཔེནྟོ ཧི ‘‘ཨཱསནཾ པཉྙཱཔེཏཱི’’ཏི ཝུཙྩཏི. པཊྛཔནཱཏི པཉྙཱཔནཱ, པཝཏྟནཱཏི ཨཏྠོ, ཉཱཎམུཁེ ཋཔནཱ ཝཱ. ཝིཝརཎཱཏི ཝིཝཊཀརཎཾ, ཝིཝརིཏྭཱ དསྶནཱཏི ཨཏྠོ. ཝིབྷཛནཱཏི ཝིབྷཱགཀིརིཡཱ, ཝིབྷཱགཏོ དསྶནཱཏི ཨཏྠོ. ཨུཏྟཱནཱིཀམྨནྟི པཱཀཊབྷཱཝཀརཎཾ. ཨཐ ཝཱ ཨཱཙིཀྑནཱཏི དེསནཱདཱིནཾ ཚནྣཾ པདཱནཾ མཱུལཔདཾ. དེསནཱདཱིནི ཚ པདཱནི ཏསྶ ཨཏྠཝིཝརཎཏྠཾ ཝུཏྟཱནི. ཏཏྠ དེསནཱཏི ཨུགྒྷཊིཏཉྙཱུནཾ ཝསེན སངྑེཔཏོ པཋམཾ ཨུདྡེསཝསེན དེསནཱ. ཨུགྒྷཊིཏཉྙཱུ ཧི སངྑེཔེན ཝུཏྟཾ པཋམཾ ཝུཏྟཉྩ པཊིཝིཛ྄ཛྷནྟི. པཉྙཱཔནཱཏི ཝིཔཉྩིཏཉྙཱུནཾ ཝསེན ཏེསཾ ཙིཏྟཏོསནེན བུདྡྷིནིསཱནེན ཙ པཋམཾ སངྑིཏྟསྶ ཝིཏྠཱརཏོ ནིདྡེསཝསེན པཉྙཱཔནཱ. པཊྛཔནཱཏི ཏེསཾཡེཝ ནིདྡིཊྛསྶ ནིདྡེསསྶ པཊིནིདྡེསཝསེན ཝིཏྠཱརཏརཝཙནེན པཉྙཱཔནཱ. ཝིཝརཎཱཏི ནིདྡིཊྛསྶཱཔི པུནཔྤུནཾ ཝཙནེན ཝིཝརཎཱ. ཝིབྷཛནཱཏི པུནཔྤུནཾ ཝུཏྟསྶཱཔི ཝིབྷཱགཀརཎེན ཝིབྷཛནཱ. ཨུཏྟཱནཱིཀམྨནྟི ཝིཝཊསྶ ཝིཏྠཱརཏརཝཙནེན, ཝིབྷཏྟསྶ ཙ ནིདསྶནཝཙནེན ཨུཏྟཱནཱིཀརཎཾ. ཨཡཾ དེསནཱ ནེཡྻཱནམྤི པཊིཝེདྷཱཡ ཧོཏི. ཡེཝཱཔནཉྙེཔི ཀེཙཱིཏི པིཡངྐརམཱཏཱདིཀཱ ཝིནིཔཱཏིཀཱ གཧིཏཱ. ཝིཉྙཱཏཱརོཏི པཊིཝེདྷཝསེན ལོཀུཏྟརདྷམྨཾ ཝིཉྙཱཏཱརོ. ཨེཏེ ཧི བྷིཀྑུཨཱདཡོ པཊིཝེདྷཝསེན དྷམྨདེསནཾ པཊིགྒཎྷནྟཱིཏི པཊིགྒཧཱ. ཨཡམེཝཱཏིཨཱདཱིནི པཋམཉཱཎནིདྡེསེ ཝུཏྟཏྠཱནི. ཨརིཡམགྒོ ནིབྦཱནེན སཾསནྡནཏོ བྲཧྨཏྠཱཡ ཙརིཡཱཏི བྲཧྨཙརིཡནྟི ཝུཙྩཏི.

༢༣༩. ཨིདཱནི ཨདྷིམོཀྑམཎྜོཏིཨཱདཱིཧི ཏསྨིཾ མགྒཀྑཎེ ཝིཛྫམཱནཱནི ཨིནྡྲིཡབལབོཛ྄ཛྷངྒམགྒངྒཱནི མཎྜཔེཡྻཝིདྷཱནེ ཡོཛེཏྭཱ དསྶེཏི. ཏཏྠ ཨདྷིམོཀྑམཎྜོཏི ཨདྷིམོཀྑསངྑཱཏོ མཎྜོ. ཀསཊོཏི པསཱདཝིརཧིཏོ ཨཱཝིལོ. ཚཌྜེཏྭཱཏི སམུཙྪེདཝསེན པཧཱཡ. སདྡྷིནྡྲིཡསྶ ཨདྷིམོཀྑམཎྜཾ པིཝཏཱིཏི མཎྜཔེཡྻནྟི སདྡྷིནྡྲིཡཏོ ཨདྷིམོཀྑམཎྜསྶ ཨནཉྙཏྟེཔི སཏི ཨཉྙཾ ཝིཡ ཀཏྭཱ ཝོཧཱརཝསེན ཝུཙྩཏི, ཡཐཱ ལོཀེ ནིསདཔོཏཀོ ནིསདཔོཏསརཱིརསྶ ཨནཉྙཏྟེཔི སཏི ནིསདཔོཏསྶ སརཱིརནྟི ཝུཙྩཏི, ཡཐཱ ཙ པཱལི༹ཡཾ ‘‘ཕུསིཏཏྟ’’ནྟིཨཱདཱིསུ དྷམྨཏོ ཨནཉྙོཔི བྷཱཝོ ཨཉྙོ ཝིཡ ཝུཏྟོ, ཡཐཱ ཙ ཨཊྛཀཐཱཡཾ ‘‘ཕུསནལཀྑཎོ ཕསྶོ’’ཏིཨཱདཱིསུ (དྷ. ས. ཨཊྛ. ༡ དྷམྨུདྡེསཝཱར ཕསྶཔཉྩམཀརཱསིཝཎྞནཱ) དྷམྨཏོ ཨནཉྙམྤི ལཀྑཎཾ ཨཉྙཾ ཝིཡ ཝུཏྟཾ, ཨེཝམིདནྟི ཝེདིཏབྦཾ. པིཝཏཱིཏི ཙེཏྠ ཏཾསམངྒིཔུགྒལོཏི ཝུཏྟཾ ཧོཏི. ཏཾསམངྒིཔུགྒལོ ཏཾ མཎྜཾ པིཝཏཱིཏི ཀཏྭཱ ཏེན པུགྒལེན སོ མཎྜོ པཱཏབྦཏོ མཎྜཔེཡྻཾ ནཱམ ཧོཏཱིཏི ཝུཏྟཾ ཧོཏི. ‘‘མཎྜཔེཡྻོ’’ཏི ཙ ཝཏྟབྦེ ‘‘མཎྜཔེཡྻ’’ནྟི ལིངྒཝིཔལླཱསོ ཀཏོ. སེསཱནམྤི ཨིམིནཱ ནཡེན ཨཏྠོ ཝེདིཏབྦོ. ཨཔུབྦེསུ པན པརིལཱ༹ཧོཏི པཱིཎནལཀྑཎཱཡ པཱིཏིཡཱ པཊིཔཀྑོ ཀིལེསསནྟཱཔོ. དུཊྛུལླནྟི ཨུཔསམཔཊིཔཀྑོ ཀིལེསཝསེན ཨོལཱ༹རིཀབྷཱཝོ ཨསནྟབྷཱཝོ. ཨཔྤཊིསངྑཱཏི པཊིསངྑཱནཔཊིཔཀྑོ ཀིལེསཝསེན ཨསམཝཱཧིཏབྷཱཝོ.

༢༤༠. པུན ཨཉྙེན པརིཡཱཡེན མཎྜཔེཡྻཝིདྷིཾ ནིདྡིསིཏུཀཱམོ ཨཏྠི མཎྜོཏིཨཱདིམཱཧ. ཏཏྠ ཏཏྠཱཏི ཏསྨིཾ སདྡྷིནྡྲིཡེ. ཨཏྠརསོཏིཨཱདཱིསུ སདྡྷིནྡྲིཡསྶ ཨདྷིམུཙྩནཾ ཨཏྠོ, སདྡྷིནྡྲིཡཾ དྷམྨོ, ཏདེཝ ནཱནཱཀིལེསེཧི ཝིམུཏྟཏྟཱ ཝིམུཏྟི, ཏསྶ ཨཏྠསྶ སམྤཏྟི ཨཏྠརསོ. ཏསྶ དྷམྨསྶ སམྤཏྟི དྷམྨརསོ. ཏསྶཱ ཝིམུཏྟིཡཱ སམྤཏྟི ཝིམུཏྟིརསོ. ཨཐ ཝཱ ཨཏྠཔཊིལཱབྷརཏི ཨཏྠརསོ, དྷམྨཔཊིལཱབྷརཏི དྷམྨརསོ, ཝིམུཏྟིཔཊིལཱབྷརཏི ཝིམུཏྟིརསོ. རཏཱིཏི ཙ ཏཾསམྤཡུཏྟཱ, ཏདཱརམྨཎཱ ཝཱ པཱིཏི. ཨིམིནཱ ནཡེན སེསཔདེསུཔི ཨཏྠོ ཝེདིཏབྦོ. ཨིམསྨིཾ པརིཡཱཡེ མཎྜསྶ པེཡྻཾ མཎྜཔེཡྻནྟི ཨཏྠོ ཝུཏྟོ ཧོཏི.

ཨེཝཾ ཨིནྡྲིཡཱདིབོདྷིཔཀྑིཡདྷམྨཔཊིཔཱཊིཡཱ ཨིནྡྲིཡབལབོཛ྄ཛྷངྒམགྒངྒཱནཾ ཝསེན མཎྜཔེཡྻཾ དསྶེཏྭཱ པུན ཨནྟེ ཋིཏཾ བྲཧྨཙརིཡམཎྜཾ དསྶེནྟོ མགྒསྶ པདྷཱནཏྟཱ མགྒཾ པུབྦངྒམཾ ཀཏྭཱ ཨུཔྤཊིཔཱཊིཝསེན མགྒངྒབོཛ྄ཛྷངྒབལཨིནྡྲིཡཱནི དསྶེསི. ཨཱདྷིཔཏེཡྻཊྛེན ཨིནྡྲིཡཱ མཎྜོཏིཨཱདཡོ ཡཐཱཡོགཾ ལོཀིཡལོཀུཏྟརཱ མཎྜཱ. ཏཾ ཧེཊྛཱ ཝུཏྟནཡེན ཝེདིཏབྦཾ. ཏཐཊྛེན སཙྩཱ མཎྜོཏི ཨེཏྠ པན དུཀྑསམུདཡཱནཾ མཎྜཏྟཱབྷཱཝཱ མཧཱཧཏྠིཔདསུཏྟེ (མ. ནི. ༡.༣༠༠) ཝིཡ སཙྩཉཱཎཱནི སཙྩཱཏི ཝུཏྟནྟི ཝེདིཏབྦཾ.

སདྡྷམྨཔྤཀཱསིནིཡཱ པཊིསམྦྷིདཱམགྒ-ཨཊྛཀཐཱཡ

མཎྜཔེཡྻཀཐཱཝཎྞནཱ ནིཊྛིཏཱ.

ནིཊྛིཏཱ ཙ མཧཱཝགྒཝཎྞནཱ.

(༢) ཡུགནདྡྷཝགྒོ

༡. ཡུགནདྡྷཀཐཱ

ཡུགནདྡྷཀཐཱཝཎྞནཱ

. ཨིདཱནི མཎྜཔེཡྻགུཎསྶ ཨརིཡམགྒསྶ ཡུགནདྡྷགུཎཾ དསྶེནྟེན ཀཐིཏཱཡ སུཏྟནྟཔུབྦངྒམཱཡ ཡུགནདྡྷཀཐཱཡ ཨཔུབྦཏྠཱནུཝཎྞནཱ. ཡསྨཱ པན དྷམྨསེནཱཔཏི དྷམྨརཱཛེ དྷརམཱནེཡེཝ དྷམྨརཱཛསྶ པརིནིབྦཱནསཾཝཙྪརེ པརིནིབྦུཏོ, ཏསྨཱ དྷམྨརཱཛེ དྷརམཱནེཡེཝ དྷམྨབྷཎྜཱགཱརིཀེན དེསིཏཾ ཨིདཾ སུཏྟནྟཾ ཏསྶེཝ སམྨུཁཱ སུཏྭཱ ཨེཝཾ མེ སུཏནྟིཨཱདིམཱཧཱཏི ཝེདིཏབྦཾ. ཏཏྠ ཨཱཡསྨཱཏི པིཡཝཙནཾ གརུཝཙནཾ སགཱརཝསཔྤཏིསྶཝཙནཾ, ཨཱཡུམཱཏི ཨཏྠོ. ཨཱནནྡོཏི ཏསྶ ཐེརསྶ ནཱམཾ. སོ ཧི ཛཱཡམཱནོཡེཝ ཀུལེ ཨཱནནྡཾ བྷུསཾ ཏུཊྛིཾ ཨཀཱསི. ཏསྨཱསྶ ‘‘ཨཱནནྡོ’’ཏི ནཱམཾ ཀཏནྟི ཝེདིཏབྦཾ. ཀོསམྦིཡནྟི ཨེཝཾནཱམཀེ ནགརེ. ཏསྶ ཧི ནགརསྶ ཨཱརཱམཔོཀྑརཎཱིཨཱདཱིསུ ཏེསུ ཏེསུ ཋཱནེསུ ཀོསམྦརུཀྑཱ ཨུསྶནྣཱ ཨཧེསུཾ, ཏསྨཱ ཏཾ ཀོསམྦཱིཏི སངྑཾ ཨགམཱསི. ‘‘ཀུསམྦསྶ ཨིསིནོ ཨསྶམཏོ ཨཝིདཱུརེ མཱཔིཏཏྟཱ’’ཏི ཨེཀེ.

གྷོསིཏཱརཱམེཏི གྷོསིཏསེཊྛིནཱ ཀཱརིཏེ ཨཱརཱམེ. ཀོསམྦིཡཉྷི ཏཡོ སེཊྛིནོ ཨཧེསུཾ གྷོསིཏསེཊྛི ཀུཀྐུཊསེཊྛི པཱཝཱརིཀསེཊྛཱིཏི. ཏེ ཏཡོཔི ‘‘ལོཀེ བུདྡྷོ ཨུཔྤནྣོ’’ཏི སུཏྭཱ པཉྩཧི པཉྩཧི སཀཊསཏེཧི དཱནཱུཔཀརཎཱནི གཱཧཱཔེཏྭཱ སཱཝཏྠིཾ གནྟྭཱ ཛེཏཝནསམཱིཔེ ཁནྡྷཱཝཱརཾ བནྡྷིཏྭཱ སཏྠུ སནྟིཀཾ གནྟྭཱ ཝནྡིཏྭཱ པཊིསནྠཱརཾ ཀཏྭཱ ནིསིནྣཱ སཏྠུ དྷམྨདེསནཾ སུཏྭཱ སོཏཱཔཏྟིཕལེ པཏིཊྛཧིཏྭཱ སཏྠཱརཾ ནིམནྟེཏྭཱ བུདྡྷཔྤམུཁསྶ བྷིཀྑུསངྒྷསྶ ཨཌྜྷམཱསམཏྟཾ མཧཱདཱནཾ དཏྭཱ བྷགཝཏོ པཱདམཱུལེ ནིཔཛྫིཏྭཱ སཀཛནཔདགམནཏྠཾ བྷགཝནྟཾ ཡཱཙིཏྭཱ ‘‘སུཉྙཱགཱརེ ཁོ གཧཔཏཡོ ཏཐཱགཏཱ ཨབྷིརམནྟཱི’’ཏི བྷགཝཏཱ ཝུཏྟེ ‘‘དིནྣཱ ནོ བྷགཝཏཱ པཊིཉྙཱ’’ཏི ཉཏྭཱ ཨཏིཝིཡ ཏུཊྛཱ དསབལཾ ཝནྡིཏྭཱ ནིཀྑནྟཱ ཨནྟརཱམགྒེ ཡོཛནེ ཡོཛནེ བྷགཝཏོ ནིཝཱསཏྠཾ ཝིཧཱརཾ ཀཱརེནྟཱ ཨནུཔུབྦེན ཀོསམྦིཾ པཏྭཱ ཨཏྟནོ ཨཏྟནོ ཨཱརཱམེ མཧནྟཾ དྷནཔརིཙྩཱགཾ ཀཏྭཱ བྷགཝཏོ ཝིཧཱརེ ཀཱརཱཔཡིཾསུ. ཏཏྠ གྷོསིཏསེཊྛིནཱ ཀཱརིཏོ གྷོསིཏཱརཱམོ ནཱམ ཨཧོསི, ཀུཀྐུཊསེཊྛིནཱ ཀཱརིཏོ ཀུཀྐུཊཱརཱམོ ནཱམ, པཱཝཱརིཀསེཊྛིནཱ ཨམྦཝནེ ཀཱརིཏོ པཱཝཱརིཀམྦཝནཾ ནཱམ. ཏཾ སནྡྷཱཡ ཝུཏྟཾ ‘‘གྷོསིཏསེཊྛིནཱ ཀཱརིཏེ ཨཱརཱམེ’’ཏི.

ཨཱཝུསོ བྷིཀྑཝོཏི ཨེཏྠ བུདྡྷཱ བྷགཝནྟོ སཱཝཀེ ཨཱལཔནྟཱ ‘‘བྷིཀྑཝོ’’ཏི ཨཱལཔནྟི. སཱཝཀཱ པན ‘‘བུདྡྷེཧི སདིསཱ མཱ ཧོམཱ’’ཏི ‘‘ཨཱཝུསོ’’ཏི པཋམཾ ཝཏྭཱ པཙྪཱ ‘‘བྷིཀྑཝོ’’ཏི ཝདནྟི. བུདྡྷེཧི ཙ ཨཱལཔིཏེ བྷིཀྑུསངྒྷོ ‘‘བྷདནྟེ’’ཏི པཊིཝཙནཾ དེཏི, སཱཝཀེཧི ཨཱལཔིཏེ ‘‘ཨཱཝུསོ’’ཏི.

ཡོ ཧི ཀོཙཱིཏི ཨནིཡམཝཙནཾ. ཨེཏེན ཏཱདིསཱནཾ སབྦབྷིཀྑཱུནཾ པརིཡཱདཱནཾ. མམ སནྟིཀེཏི མམ སམཱིཔེ. ཨརཧཏྟཔྤཏྟནྟི ཨཏྟནཱ ཨརཧཏྟསྶ པཏྟཾ. ནཔུཾསཀེ བྷཱཝེ སིདྡྷཝཙནཾ. ཨརཧཏྟཾ པཏྟནྟི ཝཱ པདཙྪེདོ, ཨཏྟནཱ པཏྟཾ ཨརཧཏྟནྟི ཨཏྠོ. ཨརཧཏྟཔྤཏྟཾ ཨཏྟཱནནྟི ཝཱ པཱཋསེསོ. ཙཏཱུཧི མགྒེཧཱིཏི ཨུཔརི ཝུཙྩམཱནེཧི ཙཏཱུཧི པཊིཔདཱམགྒེཧི, ན ཨརིཡམགྒེཧི. ‘‘ཙཏཱུཧི མགྒེཧཱི’’ཏི ཝིསུཉྩ ཝུཏྟཏྟཱ ཀསྶཙི ཨརཧཏོ པཋམསྶ ཨརིཡམགྒསྶ དྷམྨུདྡྷཙྩཔུབྦངྒམོ མགྒོ, ཨེཀསྶ ཨརིཡམགྒསྶ སམཐཔུབྦངྒམོ, ཨེཀསྶ ཝིཔསྶནཱཔུབྦངྒམོ, ཨེཀསྶ ཡུགནདྡྷཔུབྦངྒམོཏི ཨེཝཾ ཙཏྟཱརོཔི པཊིཔདཱ མགྒཱ ཧོནྟཱིཏི ཝེདིཏབྦཾ. ཨེཏེསཾ ཝཱ ཨཉྙཏརེནཱཏི ཨེཏེསཾ ཙཏུནྣཾ པཊིཔདཱནཾ མགྒཱནཾ ཨེཀེན ཝཱ, པཊིཔདཱམགྒེན ཨརཧཏྟཔྤཏྟཾ བྱཱཀརོཏཱིཏི ཨཏྠོ. སུཀྑཝིཔསྶཀསྶ ཧི ཨརཧཏོ དྷམྨུདྡྷཙྩཔུབྦངྒམཾ སོཏཱཔཏྟིམགྒཾ པཏྭཱ སེསམགྒཏྟཡམྤི སུདྡྷཝིཔསྶནཱཧིཡེཝ པཏྟསྶ ཨརཧཏྟཔྤཏྟི དྷམྨུདྡྷཙྩཔུབྦངྒམམགྒཱ ཧོཏི. དྷམྨུདྡྷཙྩཝིགྒཧཾ པཏྭཱ ཝཱ ཨཔྤཏྭཱ ཝཱ སམཐཔུབྦངྒམཱདཱིནཾ ཏིཎྞཾ པཊིཔདཱནཾ མགྒཱནཾ ཨེཀེཀསྶ ཝསེན པཏྟཙཏུམགྒསྶ ཨརཧཏོ ཨརཧཏྟཔྤཏྟི ཨིཏརཨེཀེཀམགྒཔུབྦངྒམཱ ཧོཏི. ཏསྨཱ ཨཱཧ – ‘‘ཨེཏེསཾ ཝཱ ཨཉྙཏརེནཱ’’ཏི.

སམཐཔུབྦངྒམཾ ཝིཔསྶནཾ བྷཱཝེཏཱིཏི སམཐཾ པུབྦངྒམཾ པུརེཙཱརིཀཾ ཀཏྭཱ ཝིཔསྶནཾ བྷཱཝེཏི, པཋམཾ སམཱདྷིཾ ཨུཔྤཱདེཏྭཱ པཙྪཱ ཝིཔསྶནཾ བྷཱཝེཏཱིཏི ཨཏྠོ. མགྒོ སཉྫཱཡཏཱིཏི པཋམོ ལོཀུཏྟརམགྒོ ནིབྦཏྟཏི. སོ ཏཾ མགྒནྟིཨཱདཱིསུ ཨེཀཙིཏྟཀྑཎིཀསྶ མགྒསྶ ཨཱསེཝནཱདཱིནི ནཱམ ནཏྠི, དུཏིཡམགྒཱདཡོ པན ཨུཔྤཱདེནྟོ ཏམེཝ མགྒཾ ‘‘ཨཱསེཝཏི བྷཱཝེཏི བཧུལཱིཀརོཏཱི’’ཏི ཝུཙྩཏི. སཉྙོཛནཱནི པཧཱིཡནྟི, ཨནུསཡཱ བྱནྟཱིཧོནྟཱིཏི ཡཱཝ ཨརཧཏྟམགྒཱ ཀམེན སབྦེ སཉྙོཛནཱ པཧཱིཡནྟི, ཨནུསཡཱ བྱནྟཱིཧོནྟི. ཨནུསཡཱ བྱནྟཱིཧོནྟཱིཏི ཙ པུན ཨནུཔྤཏྟིཡཱ ཝིགཏནྟཱ ཧོནྟཱིཏི ཨཏྠོ.

པུན ཙཔརནྟི པུན ཙ ཨཔརཾ ཀཱརཎཾ. ཝིཔསྶནཱཔུབྦངྒམཾ སམཐཾ བྷཱཝེཏཱིཏི ཝིཔསྶནཾ པུབྦངྒམཾ པུརེཙཱརིཀཾ ཀཏྭཱ སམཐཾ བྷཱཝེཏི, པཋམཾ ཝིཔསྶནཾ ཨུཔྤཱདེཏྭཱ པཙྪཱ སམཱདྷིཾ བྷཱཝེཏཱིཏི ཨཏྠོ. ཡུགནདྡྷཾ བྷཱཝེཏཱིཏི ཡུགནདྡྷཾ ཀཏྭཱ བྷཱཝེཏི. ཨེཏྠ ཏེནེཝ ཙིཏྟེན སམཱཔཏྟིཾ སམཱཔཛྫིཏྭཱ ཏེནེཝ སངྑཱརེ སམྨསིཏུཾ ན སཀྐཱ. ཨཡཾ པན ཡཱཝཏཱ སམཱཔཏྟིཡོ སམཱཔཛྫཏི, ཏཱཝཏཱ སངྑཱརེ སམྨསཏི. ཡཱཝཏཱ སངྑཱརེ སམྨསཏི, ཏཱཝཏཱ སམཱཔཏྟིཡོ སམཱཔཛྫཏི. ཀཐཾ? པཋམཛ྄ཛྷཱནཾ སམཱཔཛྫཏི, ཏཏོ ཝུཊྛཱཡ སངྑཱརེ སམྨསཏི. སངྑཱརེ སམྨསིཏྭཱ དུཏིཡཛ྄ཛྷཱནཾ སམཱཔཛྫཏི, ཏཏོ ཝུཊྛཱཡ སངྑཱརེ སམྨསཏི. སངྑཱརེ སམྨསིཏྭཱ ཏཏིཡཛ྄ཛྷཱནཾ…པེ… ནེཝསཉྙཱནཱསཉྙཱཡཏནསམཱཔཏྟིཾ སམཱཔཛྫཏི, ཏཏོ ཝུཊྛཱཡ སངྑཱརེ སམྨསཏི. ཨེཝཾ སམཐཝིཔསྶནཾ ཡུགནདྡྷཾ བྷཱཝེཏི ནཱམ.

དྷམྨུདྡྷཙྩཝིགྒཧིཏཾ མཱནསཾ ཧོཏཱིཏི ཨེཏྠ མནྡཔཉྙཱནཾ ཝིཔསྶཀཱནཾ ཨུཔཀྐིལེསཝཏྠུཏྟཱ ཝིཔསྶནུཔཀྐིལེསསཉྙིཏེསུ ཨོབྷཱསཱདཱིསུ དསསུ དྷམྨེསུ བྷནྟཏཱཝསེན ཨུདྡྷཙྩསཧགཏཙིཏྟུཔྤཏྟིཡཱ ཝིཀྑེཔསངྑཱཏཾ ཨུདྡྷཙྩཾ དྷམྨུདྡྷཙྩཾ, ཏེན དྷམྨུདྡྷཙྩེན ཝིགྒཧིཏཾ ཝིརཱུཔགྒཧིཏཾ ཝིརོདྷམཱཔཱདིཏཾ མཱནསཾ ཙིཏྟཾ དྷམྨུདྡྷཙྩཝིགྒཧིཏཾ མཱནསཾ ཧོཏི, ཏེན ཝཱ དྷམྨུདྡྷཙྩེན ཀཱརཎབྷཱུཏེན ཏམྨཱུལཀཏཎྷཱམཱནདིཊྛུཔྤཏྟིཡཱ ཝིགྒཧིཏཾ མཱནསཾ ཧོཏི. དྷམྨུདྡྷཙྩཝིགྒཧིཏམཱནསནྟི ཝཱ པཱཋོ. ཧོཏི སོ ཨཱཝུསོ སམཡོཏི ཨིམིནཱ མགྒཱམགྒཝཝཏྠཱནེན ཏཾ དྷམྨུདྡྷཙྩཾ པཊིབཱཧིཏྭཱ པུན ཝིཔསྶནཱཝཱིཐིཾ པཊིཔནྣཀཱལཾ དསྶེཏི. ཡཾ ཏཾ ཙིཏྟནྟི ཡསྨིཾ སམཡེ ཏཾ ཝིཔསྶནཱཝཱིཐིཾ ཨོཀྐམིཏྭཱ པཝཏྟཾ ཙིཏྟཾ. ཨཛ྄ཛྷཏྟམེཝ སནྟིཊྛཏཱིཏི ཝིཔསྶནཱཝཱིཐིཾ པཙྩོཏརིཏྭཱ ཏསྨིཾ སམཡེ གོཙརཛ྄ཛྷཏྟསངྑཱཏེ ཨཱརམྨཎེ སནྟིཊྛཏི པཏིཊྛཱཏི. སནྣིསཱིདཏཱིཏི ཏཏྠེཝ པཝཏྟིཝསེན སམྨཱ ནིསཱིདཏི. ཨེཀོདི ཧོཏཱིཏི ཨེཀགྒཾ ཧོཏི. སམཱདྷིཡཏཱིཏི སམྨཱ ཨཱདྷིཡཏི སུཊྛུ ཋིཏཾ ཧོཏཱིཏི.

ཨཡཾ སུཏྟནྟཝཎྞནཱ.

༡. སུཏྟནྟནིདྡེསཝཎྞནཱ

. ཏསྶ སུཏྟནྟསྶ ནིདྡེསཀཐཱཡ ཏཏྠ ཛཱཏེ དྷམྨེཏི ཏསྨིཾ སམཱདྷིསྨིཾ ཛཱཏེ ཙིཏྟཙེཏསིཀེ དྷམྨེ. ཨནིཙྩཏོ ཨནུཔསྶནཊྛེནཱཏིཨཱདིནཱ ཝིཔསྶནཱཡ བྷེདཾ དསྶེཏི. སམྨཱདིཊྛི མགྒོཏི སམྨཱདིཊྛིསངྑཱཏོ མགྒོ. ཨཊྛསུ མགྒངྒེསུ ཨེཀེཀོཔི ཧི མགྒོཏི ཝུཙྩཏི.ཨཱསེཝཏཱིཏི སོཏཱཔཏྟིམགྒཝསེན. བྷཱཝེཏཱིཏི སཀདཱགཱམིམགྒུཔྤཱདནེན. བཧུལཱིཀརོཏཱིཏི ཨནཱགཱམིཨརཧཏྟམགྒུཔྤཱདནེན. ཨིམེསཾ ཏིཎྞཾ ཨཝཏྠཱབྷེདེཔི སཏི ཨཱཝཛྫནཱདཱིནཾ སཱདྷཱརཎཏྟཱ སདིསམེཝ ཝིསྶཛྫནཾ ཀཏཾ.

. ཨཱལོཀསཉྙཱཔཊིནིསྶགྒཱནུཔསྶནཱནཾ ཨནྟརཱཔེཡྻཱལེ ཨཝིཀྑེཔཱདཱིནི ཙ ཛྷཱན སམཱཔཏྟིཀསིཎཱནུསྶཏིཨསུབྷཱ ཙ དཱིགྷཾ ཨསྶཱསཱདཱིནི ཙ ཨཱནནྟརིཀསམཱདྷིཉཱཎནིདྡེསེ (པཊི. མ. ༡.༨༠-༨༡) ནིདྡིཊྛཏྟཱ སངྑིཏྟཱནི. ཏཏྠ ཙ ཨཝིཀྑེཔཝསེནཱཏི པུབྦབྷཱགཱཝིཀྑེཔཝསེན གཧེཏབྦཾ. ཨནིཙྩཱནུཔསྶཱི ཨསྶཱསཝསེནཱཏིཨཱདིཀེ སུདྡྷཝིཔསྶནཱཝསེན ཝུཏྟཙཏུཀྐེ པན ཏརུཎཝིཔསྶནཱཀཱལེ ཝིཔསྶནཱསམྤཡུཏྟསམཱདྷིཔུབྦངྒམཱ བལཝཝིཔསྶནཱ ཝེདིཏབྦཱ.

. ཝིཔསྶནཱཔུབྦངྒམཝཱརེ པཋམཾ ཨནིཙྩཏོཏིཨཱདིནཱ ཨཱརམྨཎཾ ཨནིཡམེཏྭཱ ཝིཔསྶནཱ ཝུཏྟཱ, པཙྪཱ རཱུཔཾ ཨནིཙྩཏོཏིཨཱདིནཱ ཨཱརམྨཎཾ ནིཡམེཏྭཱ ཝུཏྟཱ. ཏཏྠ ཛཱཏཱནནྟི ཏསྶཱ ཝིཔསྶནཱཡ ཛཱཏཱནཾ ཙིཏྟཙེཏསིཀཱནཾ དྷམྨཱནཾ. ཝོསགྒཱརམྨཎཏཱཏི ཨེཏྠ ཝོསགྒོ ནིབྦཱནཾ. ནིབྦཱནཉྷི སངྑཏཝོསགྒཏོ པརིཙྩཱགཏོ ‘‘ཝོསགྒོ’’ཏི ཝུཏྟོ. ཝིཔསྶནཱ ཙ ཏཾསམྤཡུཏྟདྷམྨཱ ཙ ནིབྦཱནནིནྣཏཱཡ ཨཛ྄ཛྷཱསཡཝསེན ནིབྦཱནེ པཏིཊྛིཏཏྟཱ ནིབྦཱནཔཏིཊྛཱ ནིབྦཱནཱརམྨཎཱ. པཏིཊྛཱཔི ཧི ཨཱལམྦཱིཡཏཱིཏི ཨཱརམྨཎཾ ནཱམ ཧོཏི, ནིབྦཱནེ པཏིཊྛཊྛེནེཝ ནིབྦཱནཱརམྨཎཱ. ཨཉྙཏྠ པཱལི༹ཡམྤི ཧི པཏིཊྛཱ ‘‘ཨཱརམྨཎ’’ནྟི ཝུཙྩནྟི. ཡཐཱཧ – ‘‘སེཡྻཐཱཔི, ཨཱཝུསོ, ནལཱ༹གཱརཾ ཝཱ ཏིཎཱགཱརཾ ཝཱ སུཀྑཾ ཀོལཱ༹པཾ ཏེརོཝསྶིཀཾ པུརཏྠིམཱཡ ཙེཔི དིསཱཡ པུརིསོ ཨཱདིཏྟཱཡ ཏིཎུཀྐཱཡ ཨུཔསངྐམེཡྻ, ལབྷེཐ ཨགྒི ཨོཏཱརཾ, ལབྷེཐ ཨགྒི ཨཱརམྨཎ’’ནྟིཨཱདི (སཾ. ནི. ༤.༢༤༣). ཏསྨཱ ཏཏྠ ཛཱཏཱནཾ དྷམྨཱནཾ ཝོསགྒཱརམྨཎཏཱཡ ནིབྦཱནཔཏིཊྛཱབྷཱཝེན ཧེཏུབྷཱུཏེན ཨུཔྤཱདིཏོ ཡོ ཙིཏྟསྶ ཨེཀགྒཏཱསངྑཱཏོ ཨུཔཙཱརཔྤནཱབྷེདོ ཨཝིཀྑེཔོ, སོ སམཱདྷཱིཏི ཝིཔསྶནཱཏོ པཙྪཱ ཨུཔྤཱདིཏོ ནིབྦེདྷབྷཱགིཡོ སམཱདྷི ནིདྡིཊྛོ ཧོཏི. ཏསྨཱཡེཝ ཧི ཨིཏི པཋམཾ ཝིཔསྶནཱ, པཙྪཱ སམཐོཏི ཝུཏྟཾ.

. ཡུགནདྡྷནིདྡེསེ ཡསྨཱ ཧེཊྛཱ སུཏྟནྟཝཎྞནཱཡཾ ཝུཏྟོ ཡུགནདྡྷཀྐམོ པུརིམདྭཡནིདྡེསནཡེནེཝ པཱཀཊོ, མགྒཀྑཎེ ཡུགནདྡྷཀྐམོ པན ན པཱཀཊོ, ཏསྨཱ པུབྦབྷཱགེ ཨནེཀནྟིཀཾ ཡུགནདྡྷབྷཱཝནཾ ཨཝཏྭཱ མགྒཀྑཎེ ཨེཀནྟེན ལབྦྷམཱནཡུགནདྡྷབྷཱཝནམེཝ དསྶེནྟོ སོལ༹སཧི ཨཱཀཱརེཧཱིཏིཨཱདིམཱཧ. ཏཏྠ ཨཱརམྨཎཊྛེནཱཏིཨཱདཱིསུ སཏྟརསསུ ཨཱཀཱརེསུ ཨནྟེ ཨུདྡིཊྛཾ ཡུགནདྡྷཾ མཱུལཔདེན ཨེཀཊྛཏྟཱ ཏཾ ཝིཔྤཧཱཡ སེསཱནཾ ཝསེན ‘‘སོལ༹སཧཱི’’ཏི ཝུཏྟཾ. ཨཱརམྨཎཊྛེནཱཏི ཨཱལམྦནཊྛེན, ཨཱརམྨཎཝསེནཱཏི ཨཏྠོ. ཨེཝཾ སེསེསུཔི. གོཙརཊྛེནཱཏི ཨཱརམྨཎཊྛེཔི སཏི ནིསྶཡིཏབྦཊྛཱནཊྛེན. པཧཱནཊྛེནཱཏི པཛཧནཊྛེན. པརིཙྩཱགཊྛེནཱཏི པཧཱནེཔི སཏི པུན ཨནཱདིཡནེན པརིཙྩཱགཊྛེན. ཝུཊྛཱནཊྛེནཱཏི ཨུགྒམནཊྛེན. ཝིཝཊྚནཊྛེནཱཏི ཨུགྒམནེཔི སཏི ཨཔུནརཱཝཊྚནེན ནིཝཏྟནཊྛེན. སནྟཊྛེནཱཏི ནིབྦུཏཊྛེན. པཎཱིཏཊྛེནཱཏི ནིབྦུཏཊྛེཔི སཏི ཨུཏྟམཊྛེན, ཨཏཔྤཀཊྛེན ཝཱ. ཝིམུཏྟཊྛེནཱཏི བནྡྷནཱཔགཏཊྛེན. ཨནཱསཝཊྛེནཱཏི བནྡྷནམོཀྑེཔི སཏི ཨཱརམྨཎཾ ཀཏྭཱ པཝཏྟམཱནཱསཝཝིརཧིཏཊྛེན. ཏརཎཊྛེནཱཏི ཨནོསཱིདིཏྭཱ པིལཝནཊྛེན, ཨཏིཀྐམནཊྛེན ཝཱ. ཨནིམིཏྟཊྛེནཱཏི སངྑཱརནིམིཏྟཝིརཧིཏཊྛེན. ཨཔྤཎིཧིཏཊྛེནཱཏི པཎིདྷིཝིརཧིཏཊྛེན. སུཉྙཏཊྛེནཱཏི ཨབྷིནིཝེསཝིརཧིཏཊྛེན. ཨེཀརསཊྛེནཱཏི ཨེཀཀིཙྩཊྛེན. ཨནཏིཝཏྟནཊྛེནཱཏི ཨཉྙམཉྙཾ ཨནཏིཀྐམནཊྛེན. ཡུགནདྡྷཊྛེནཱཏི ཡུགལཀཊྛེན.

ཨུདྡྷཙྩཾ པཛཧཏོ, ཨཝིཛྫཾ པཛཧཏོཏི ཡོགིནོ ཏསྶ ཏསྶ པཊིཔཀྑཔྤཧཱནཝསེན ཝུཏྟཾ. ནིརོདྷོ ཙེཏྠ ནིབྦཱནམེཝ. ཨཉྙམཉྙཾ ནཱཏིཝཏྟནྟཱིཏི སམཐོ ཙེ ཝིཔསྶནཾ ཨཏིཝཏྟེཡྻ, ལཱིནཔཀྑིཀཏྟཱ སམཐསྶ ཙིཏྟཾ ཀོསཛྫཱཡ སཾཝཏྟེཡྻ. ཝིཔསྶནཱ ཙེ སམཐཾ ཨཏིཝཏྟེཡྻ, ཨུདྡྷཙྩཔཀྑིཀཏྟཱ ཝིཔསྶནཱཡ ཙིཏྟཾ ཨུདྡྷཙྩཱཡ སཾཝཏྟེཡྻ. ཏསྨཱ སམཐོ ཙ ཝིཔསྶནཾ ཨནཏིཝཏྟམཱནོ ཀོསཛྫཔཱཏཾ ན ཀརོཏི, ཝིཔསྶནཱ སམཐཾ ཨནཏིཝཏྟམཱནཱ ཨུདྡྷཙྩཔཱཏཾ ན ཀརོཏི. སམཐོ སམཾ པཝཏྟམཱནོ ཝིཔསྶནཾ ཨུདྡྷཙྩཔཱཏཏོ རཀྑཏི, ཝིཔསྶནཱ སམཾ པཝཏྟམཱནཱ སམཐཾ ཀོསཛྫཔཱཏཏོ རཀྑཏི. ཨེཝམིམེ ཨུབྷོ ཨཉྙམཉྙཾ ཨནཏིཝཏྟནཀིཙྩེན ཨེཀཀིཙྩཱ, སམཱ ཧུཏྭཱ པཝཏྟམཱནེན ཨཉྙམཉྙཾ ཨནཏིཝཏྟམཱནཱ ཨཏྠསིདྡྷིཀརཱ ཧོནྟི. ཏེསཾ མགྒཀྑཎེ ཡུགནདྡྷཏྟཾ ཝུཊྛཱནགཱམིནིཝིཔསྶནཱཀྑཎེ ཡུགནདྡྷཏྟཱཡེཝ ཧོཏི. པཧཱནཔརིཙྩཱགཝུཊྛཱནཝིཝཊྚནཀརཎཱནཾ མགྒཀིཙྩཝསེན ཝུཏྟཏྟཱ སཀལསྶ མགྒཀིཙྩསྶ དསྶནཏྠཾ ཨུདྡྷཙྩསཧགཏཀིལེསཱ ཙ ཁནྡྷཱ ཙ ཨཝིཛྫཱསཧགཏཀིལེསཱ ཙ ཁནྡྷཱ ཙ ནིདྡིཊྛཱ. སེསཱནཾ ན ཏཐཱ ཝུཏྟཏྟཱ པཊིཔཀྑདྷམྨམཏྟདསྶནཝསེན ཨུདྡྷཙྩཱཝིཛྫཱ ཨེཝ ནིདྡིཊྛཱ. ཝིཝཊྚཏོཏི ནིཝཏྟནྟསྶ.

སམཱདྷི ཀཱམཱསཝཱ ཝིམུཏྟོ ཧོཏཱིཏི སམཱདྷིསྶ ཀཱམཙྪནྡཔཊིཔཀྑཏྟཱ ཝུཏྟཾ. རཱགཝིརཱགཱཏི རཱགསྶ ཝིརཱགོ སམཏིཀྐམོ ཨེཏིསྶཱ ཨཏྠཱིཏི རཱགཝིརཱགཱ, ‘‘རཱགཝིརཱགཏོ’’ཏི ནིསྶཀྐཝཙནཾ ཝཱ. ཏཐཱ ཨཝིཛྫཱཝིརཱགཱ. ཙེཏོཝིམུཏྟཱིཏི མགྒསམྤཡུཏྟོ སམཱདྷི. པཉྙཱཝིམུཏྟཱིཏི མགྒསམྤཡུཏྟཱ པཉྙཱ. ཏརཏོཏི ཏརནྟསྶ. སབྦཔཎིདྷཱིཧཱིཏི རཱགདོསམོཧཔཎིདྷཱིཧི, སབྦཔཏྠནཱཧི ཝཱ. ཨེཝཾ ཙུདྡས ཨཱཀཱརེ ཝིསྶཛྫིཏྭཱ ཨེཀརསཊྛཉྩ ཨནཏིཝཏྟནཊྛཉྩ ཨཝིབྷཛིཏྭཱཝ ཨིམེཧི སོལ༹སཧི ཨཱཀཱརེཧཱིཏི ཨཱཧ. ཀསྨཱ? ཏེསཾ ཙུདྡསནྣཾ ཨཱཀཱརཱནཾ ཨེཀེཀསྶ ཨཝསཱནེ ‘‘ཨེཀརསཱ ཧོནྟི, ཡུགནདྡྷཱ ཧོནྟི, ཨཉྙམཉྙཾ ནཱཏིཝཏྟནྟཱི’’ཏི ནིདྡིཊྛཏྟཱ ཏེ དྭེཔི ཨཱཀཱརཱ ནིདྡིཊྛཱཝ ཧོནྟི. ཏསྨཱ ‘‘སོལ༹སཧཱི’’ཏི ཨཱཧ. ཡུགནདྡྷཊྛོ པན ཨུདྡེསེཔི ན བྷཎིཏོཡེཝཱཏི.

༢. དྷམྨུདྡྷཙྩཝཱརནིདྡེསཝཎྞནཱ

. དྷམྨུདྡྷཙྩཝཱརེ ཨནིཙྩཏོ མནསིཀརོཏོ ཨོབྷཱསོ ཨུཔྤཛྫཏཱིཏི ཨུདཡབྦཡཱནུཔསྶནཱཡ ཋིཏསྶ ཏཱིཧི ཨནུཔསྶནཱཧི པུནཔྤུནཾ སངྑཱརེ ཝིཔསྶནྟསྶ ཝིཔསྶནྟསྶ ཝིཔསྶནཱཉཱཎེསུ པརིཔཱཀགཏེསུ ཏདངྒཝསེན ཀིལེསཔྤཧཱནེན པརིསུདྡྷཙིཏྟསྶ ཨནིཙྩཏོ ཝཱ དུཀྑཏོ ཝཱ ཨནཏྟཏོ ཝཱ མནསིཀཱརཀྑཎེ ཝིཔསྶནཱཉཱཎཱནུབྷཱཝེན པཀཏིཡཱཝ ཨོབྷཱསོ ཨུཔྤཛྫཏཱིཏི པཋམཾ ཏཱཝ ཨནིཙྩཏོ མནསིཀརོཏོ ཨོབྷཱསོ ཀཐིཏོ. ཨཀུསལོ ཝིཔསྶཀོ ཏསྨིཾ ཨོབྷཱསེ ཨུཔྤནྣེ ‘‘ན ཙ ཝཏ མེ ཨིཏོ པུབྦེ ཨེཝརཱུཔོ ཨོབྷཱསོ ཨུཔྤནྣཔུབྦོ, ཨདྡྷཱ མགྒཾ པཏྟོམྷི, ཕལཾ པཏྟོམྷཱི’’ཏི ཨམགྒཾཡེཝ ‘‘མགྒོ’’ཏི, ཨཕལམེཝ ‘‘ཕལ’’ནྟི གཎྷཱཏི. ཏསྶ ཨམགྒཾ ‘‘མགྒོ’’ཏི, ཨཕལཾ ‘‘ཕལ’’ནྟི གཎྷཏོ ཝིཔསྶནཱཝཱིཐི ཨུཀྐནྟཱ ཧོཏི. སོ ཨཏྟནོ ཝིཔསྶནཱཝཱིཐིཾ ཝིསྶཛྫེཏྭཱ ཝིཀྑེཔམཱཔནྣོ ཝཱ ཨོབྷཱསམེཝ ཏཎྷཱདིཊྛིམཉྙནཱཧི མཉྙམཱནོ ཝཱ ནིསཱིདཏི. སོ ཁོ པནཱཡཾ ཨོབྷཱསོ ཀསྶཙི བྷིཀྑུནོ པལླངྐཊྛཱནམཏྟམེཝ ཨོབྷཱསེནྟོ ཨུཔྤཛྫཏི, ཀསྶཙི ཨནྟོགབྦྷཾ, ཀསྶཙི བཧིགབྦྷམྤི, ཀསྶཙི སཀལཝིཧཱརཾ, གཱཝུཏཾ ཨཌྜྷཡོཛནཾ ཡོཛནཾ དྭིཡོཛནཾ…པེ… ཀསྶཙི པཐཝིཏལཏོ ཡཱཝ ཨཀནིཊྛབྲཧྨལོཀཱ ཨེཀཱལོཀཾ ཀུརུམཱནོ. བྷགཝཏོ པན དསསཧསྶིལོཀདྷཱཏུཾ ཨོབྷཱསེནྟོ ཨུདཔཱདི. ཨཡཉྷི ཨོབྷཱསོ ཙཏུརངྒསམནྣཱགཏེཔི ཨནྡྷཀཱརེ ཏཾ ཏཾ ཋཱནཾ ཨོབྷཱསེནྟོ ཨུཔྤཛྫཏི.

ཨོབྷཱསོ དྷམྨོཏི ཨོབྷཱསཾ ཨཱཝཛྫཏཱིཏི ཨཡཾ ཨོབྷཱསོ མགྒདྷམྨོ ཕལདྷམྨོཏི ཝཱ ཏཾ ཏཾ ཨོབྷཱསཾ མནསི ཀརོཏི. ཏཏོ ཝིཀྑེཔོ ཨུདྡྷཙྩནྟི ཏཏོ ཨོབྷཱསཏོ དྷམྨོཏི ཨཱཝཛྫནཀརཎཏོ ཝཱ ཡོ ཨུཔྤཛྫཏི ཝིཀྑེཔོ, སོ ཨུདྡྷཙྩཾ ནཱམཱཏི ཨཏྠོ. ཏེན ཨུདྡྷཙྩེན ཝིགྒཧིཏམཱནསོཏི ཏེན ཨེཝཾ ཨུཔྤཛྫམཱནེན ཨུདྡྷཙྩེན ཝིརོདྷིཏཙིཏྟོ, ཏེན ཝཱ ཨུདྡྷཙྩེན ཀཱརཎབྷཱུཏེན ཏམྨཱུལཀཀིལེསུཔྤཏྟིཡཱ ཝིརོདྷིཏཙིཏྟོ ཝིཔསྶཀོ ཝིཔསྶནཱཝཱིཐིཾ ཨོཀྐམིཏྭཱ ཝིཀྑེཔཾ ཝཱ ཏམྨཱུལཀཀིལེསེསུ ཝཱ ཋིཏཏྟཱ ཨནིཙྩཏོ དུཀྑཏོ ཨནཏྟཏོ ཨུཔཊྛཱནཱནི ཡཐཱབྷཱུཏཾ ནཔྤཛཱནཱཏི. ‘‘ཏེན ཝུཙྩཏི དྷམྨུདྡྷཙྩཝིགྒཧིཏམཱནསོ’’ཏི ཨེཝཾ ཨིཏི-སདྡོ ཡོཛེཏབྦོ. ཧོཏི སོ སམཡོཏི ཨེཝཾ ཨསྶཱདཝསེན ཨུཔཀྐིལིཊྛཙིཏྟསྶཱཔི ཡོགིནོ སཙེ ཨུཔཔརིཀྑཱ ཨུཔྤཛྫཏི, སོ ཨེཝཾ པཛཱནཱཏི – ‘‘ཝིཔསྶནཱ ནཱམ སངྑཱརཱརམྨཎཱ, མགྒཕལཱནི ནིབྦཱནཱརམྨཎཱནི, ཨིམཱནི ཙ ཙིཏྟཱནི སངྑཱརཱརམྨཎཱནི, ཏསྨཱ ནཱཡམོབྷཱསོ མགྒོ, ཨུདཡབྦཡཱནུཔསྶནཱཡེཝ ནིབྦཱནསྶ ལོཀིཀོ མགྒོ’’ཏི མགྒཱམགྒཾ ཝཝཏྠཔེཏྭཱ ཏཾ ཝིཀྑེཔཾ པརིཝཛྫཡིཏྭཱ ཨུདཡབྦཡཱནུཔསྶནཱཡ ཋཏྭཱ སཱདྷུཀཾ སངྑཱརེ ཨནིཙྩཏོ དུཀྑཏོ ཨནཏྟཏོ ཝིཔསྶཏི. ཨེཝཾ ཨུཔཔརིཀྑནྟསྶ སོ སམཡོ ཧོཏི. ཨེཝཾ ཨཔསྶནྟོ པན ‘‘མགྒཕལཔྤཏྟོམྷཱི’’ཏི ཨདྷིམཱནིཀོ ཧོཏི.

ཡཾ ཏཾ ཙིཏྟནྟི ཡཾ ཏཾ ཝིཔསྶནཱཙིཏྟཾ. ཨཛ྄ཛྷཏྟམེཝཱཏི ཨནིཙྩཱནུཔསྶནཱཡ ཨཱརམྨཎེ གོཙརཛ྄ཛྷཏྟེཡེཝ. ཉཱཎཾ ཨུཔྤཛྫཏཱིཏི ཏསྶེཝ ཡོགཱཝཙརསྶ རཱུཔཱརཱུཔདྷམྨེ ཏུལཡནྟསྶ ཏཱིརཡནྟསྶ ཝིསྶཊྛཨིནྡཝཛིརམིཝ ཨཝིཧཏཝེགཾ ཏིཁིཎཾ སཱུརམཏིཝིསདཾ ཝིཔསྶནཱཉཱཎཾ ཨུཔྤཛྫཏི. པཱིཏི ཨུཔྤཛྫཏཱིཏི ཏསྶེཝ ཏསྨིཾ སམཡེ ཁུདྡིཀཱ པཱིཏི, ཁཎིཀཱ པཱིཏི, ཨོཀྐནྟིཀཱ པཱིཏི, ཨུབྦེགཱ པཱིཏི, ཕརཎཱ པཱིཏཱིཏི ཨཡཾ པཉྩཝིདྷཱ ཝིཔསྶནཱསམྤཡུཏྟཱ པཱིཏི སཀལསརཱིརཾ པཱུརཡམཱནཱ ཨུཔྤཛྫཏི. པསྶདྡྷི ཨུཔྤཛྫཏཱིཏི ཏསྶེཝ ཏསྨིཾ སམཡེ ཀཱཡཙིཏྟཱནཾ ནེཝ དརཐོ, ན གཱརཝཏཱ, ན ཀཀྑལ༹ཏཱ, ན ཨཀམྨཉྙཏཱ, ན གེལཉྙཏཱ, ན ཝངྐཏཱ ཧོཏི. ཨཐ ཁོ པནསྶ ཀཱཡཙིཏྟཱནི པསྶདྡྷཱནི ལཧཱུནི མུདཱུནི ཀམྨཉྙཱནི པགུཎཱནི སུཝིསདཱནི ཨུཛུཀཱནིཡེཝ ཧོནྟི. སོ ཨིམེཧི པསྶདྡྷཱདཱིཧི ཨནུགྒཧིཏཀཱཡཙིཏྟོ ཏསྨིཾ སམཡེ ཨམཱནུསིཾ ནཱམ རཏིཾ ཨནུབྷཝཏི. ཡཾ སནྡྷཱཡ ཝུཏྟཾ –

‘‘སུཉྙཱགཱརཾ པཝིཊྛསྶ, སནྟཙིཏྟསྶ བྷིཀྑུནོ;

ཨམཱནུསཱི རཏཱི ཧོཏི, སམྨཱ དྷམྨཾ ཝིཔསྶཏོ.

‘‘ཡཏོ ཡཏོ སམྨསཏི, ཁནྡྷཱནཾ ཨུདཡབྦཡཾ;

ལབྷཏཱི པཱིཏིཔཱམོཛྫཾ, ཨམཏཾ ཏཾ ཝིཛཱནཏ’’ནྟི. (དྷ. པ. ༣༧༣-༤) –

ཨེཝམསྶ ཨིམཾ ཨམཱནུསིཾ རཏིཾ སཱདྷཡམཱནཱ ལཧུཏཱདཱིཧི སཧིཏཱ ཝིཔསྶནཱསམྤཡུཏྟཱ ཀཱཡཙིཏྟཔསྶདྡྷི ཨུཔྤཛྫཏི. སུཁཾ ཨུཔྤཛྫཏཱིཏི ཏསྶེཝ ཏསྨིཾ སམཡེ སཀལསརཱིརཾ ཨབྷིསནྡཡམཱནཾ ཝིཔསྶནཱསམྤཡུཏྟཾ སུཁཾ ཨུཔྤཛྫཏི. ཨདྷིམོཀྑོ ཨུཔྤཛྫཏཱིཏི ཏསྶེཝ ཏསྨིཾ སམཡེ ཙིཏྟཙེཏསིཀཱནཾ ཨཏིསཡཔསཱདབྷཱུཏཱ ཝིཔསྶནཱསམྤཡུཏྟཱ སདྡྷཱ ཨུཔྤཛྫཏི. པགྒཧོ ཨུཔྤཛྫཏཱིཏི ཏསྶེཝ ཏསྨིཾ སམཡེ ཨསིཐིལམནཙྩཱརདྡྷཾ སུཔགྒཧིཏཾ ཝིཔསྶནཱསམྤཡུཏྟཾ ཝཱིརིཡཾ ཨུཔྤཛྫཏི. ཨུཔཊྛཱནཾ ཨུཔྤཛྫཏཱིཏི ཏསྶེཝ ཏསྨིཾ སམཡེ སཱུཔཊྛིཏཱ སུཔྤཏིཊྛིཏཱ ནིཁཱཏཱ ཨཙལཱ པབྦཏརཱཛསདིསཱ ཝིཔསྶནཱསམྤཡུཏྟཱ སཏི ཨུཔྤཛྫཏི. སོ ཡཾ ཡཾ ཋཱནཾ ཨཱཝཛྫཏི སམནྣཱཧརཏི མནསི ཀརོཏི པཙྩཝེཀྑཏི, ཏཾ ཏཾ ཋཱནམསྶ ཨོཀྐནྟིཏྭཱ པཀྑནྡིཏྭཱ དིབྦཙཀྑུནོ པརལོཀོ ཝིཡ སཏིཡཱ ཨུཔཊྛཱཏི (ཝིསུདྡྷི. ༢.༧༣༤).

ཨུཔེཀྑཱཏི ཝིཔསྶནུཔེཀྑཱ ཙེཝ ཨཱཝཛྫནུཔེཀྑཱ ཙ. ཏསྨིཉྷི སམཡེ སབྦསངྑཱརེསུ མཛ྄ཛྷཏྟབྷཱུཏཱ ཝིཔསྶནུཔེཀྑཱཔི བལཝཏཱི ཨུཔྤཛྫཏི, མནོདྭཱརེ ཨཱཝཛྫནུཔེཀྑཱཔི. སཱ ཧིསྶ ཏཾ ཏཾ ཋཱནཾ ཨཱཝཛྫནྟསྶ ཝིསྶཊྛཨིནྡཝཛིརམིཝ པཏྟཔུཊེ པཀྑནྡཏཏྟནཱརཱཙོ ཝིཡ ཙ སཱུརཱ ཏིཁིཎཱ ཧུཏྭཱ ཝཧཏི. ཨེཝཉྷི ཝིསུདྡྷིམགྒེ (ཝིསུདྡྷི. ༢.༧༣༤) ཝུཏྟཾ. ཝིཔསྶནུཔེཀྑཱཏི ཙེཏྠ ‘‘ཝིཔསྶནཱསམྤཡུཏྟཱ ཏཏྲམཛ྄ཛྷཏྟུཔེཀྑཱ’’ཏི ཨཱཙརིཡཱ ཝདནྟི. ཝིཔསྶནཱཉཱཎེ ཧི གཡ྄ཧམཱནེ ‘‘ཉཱཎཾ ཨུཔྤཛྫཏཱི’’ཏི ཝིཔསྶནཱཉཱཎསྶ ཨཱགཏཏྟཱ པུནརུཏྟིདོསོ ཧོཏི. ཏཏིཡཛ྄ཛྷཱནཝཎྞནཱཡཉྩ ‘‘སངྑཱརུཔེཀྑཱཝིཔསྶནུཔེཀྑཱནམྤི ཨཏྠཏོ ཨེཀཱིབྷཱཝོ. པཉྙཱ ཨེཝ ཧི སཱ, ཀིཙྩཝསེན དྭིདྷཱ བྷིནྣཱ’’ཏི ཝུཏྟཾ. ཏསྨཱ ཝིཔསྶནཱསམྤཡུཏྟཱཡ ཏཏྲམཛ྄ཛྷཏྟུཔེཀྑཱཡ ཝུཙྩམཱནཱཡ པུནརུཏྟིདོསོ ཙ ན ཧོཏི, ཏཏིཡཛ྄ཛྷཱནཝཎྞནཱཡ ཙ སམེཏི. ཡསྨཱ ཙ པཉྩསུ ཨིནྡྲིཡེསུ ‘‘ཉཱཎཾ ཨདྷིམོཀྑོ པགྒཧོ ཨུཔཊྛཱན’’ནྟི པཉྙིནྡྲིཡསདྡྷིནྡྲིཡཝཱིརིཡིནྡྲིཡསཏིནྡྲིཡཱནི ནིདྡིཊྛཱནི, སམཱདྷིནྡྲིཡཾ པན ཨནིདྡིཊྛཾ ཧོཏི, ཡུགནདྡྷཝསེནཱཔི ཙ སམཱདྷིནྡྲིཡཾ ནིདྡིསིཏབྦམེཝ ཧོཏི, ཏསྨཱ སམཔྤཝཏྟོ སམཱདྷི པུན སམཱདྷཱནེ བྱཱཔཱརཔྤཧཱནཀརཎེན ‘‘ཨུཔེཀྑཱ’’ཏི ཝུཏྟོཏི ཝེདིཏབྦཾ.

ནིཀནྟི ཨུཔྤཛྫཏཱིཏི ཨེཝཾ ཨོབྷཱསཱདིཔཊིམཎྜིཏཱཡ ཝིཔསྶནཱཡ ཨཱལཡཾ ཀུརུམཱནཱ སུཁུམཱ སནྟཱཀཱརཱ ནིཀནྟི ཨུཔྤཛྫཏི, ཡཱ ཀིལེསོཏི པརིགྒཧེཏུམྤི ན སཀྐཱ ཧོཏི. ཡཐཱ ཙ ཨོབྷཱསེ, ཨེཝཾ ཨེཏེསུཔི ཨཉྙཏརསྨིཾ ཨུཔྤནྣེ ཡོགཱཝཙརོ ‘‘ན ཙ ཝཏ མེ ཨིཏོ པུབྦེ ཨེཝརཱུཔཾ ཉཱཎཾ ཨུཔྤནྣཔུབྦཾ, ཨེཝརཱུཔཱ པཱིཏི པསྶདྡྷི སུཁཾ ཨདྷིམོཀྑོ པགྒཧོ ཨུཔཊྛཱནཾ ཨུཔེཀྑཱ ནིཀནྟི ཨུཔྤནྣཔུབྦཱ, ཨདྡྷཱ མགྒཾ པཏྟོམྷི, ཕལཾ པཏྟོམྷཱི’’ཏི ཨམགྒམེཝ ‘‘མགྒོ’’ཏི, ཨཕལམེཝ ‘‘ཕལ’’ནྟི གཎྷཱཏི. ཏསྶ ཨམགྒཾ ‘‘མགྒོ’’ཏི, ཨཕལཉྩ ‘‘ཕལ’’ནྟི གཎྷཏོ ཝིཔསྶནཱཝཱིཐི ཨུཀྐནྟཱ ཧོཏི. སོ ཨཏྟནོ མཱུལཀམྨཊྛཱནཾ ཝིསྶཛྫེཏྭཱ ནིཀནྟིམེཝ ཨསྶཱདེནྟོ ནིསཱིདཏི. ཨེཏྠ ཙ ཨོབྷཱསཱདཡོ ཨུཔཀྐིལེསཝཏྠུཏཱཡ ཨུཔཀྐིལེསཱཏི ཝུཏྟཱ, ན ཨཀུསལཏྟཱ. ནིཀནྟི པན ཨུཔཀྐིལེསོ ཙེཝ ཨུཔཀྐིལེསཝཏྠུ ཙ. ཝཏྠུཝསེནེཝ ཙེཏེ དས, གཱཧཝསེན པན སམཏིཾས ཧོནྟི. ཀཐཾ? ‘‘མམ ཨོབྷཱསོ ཨུཔྤནྣོ’’ཏི གཎྷཏོ ཧི དིཊྛིགྒཱཧོ ཧོཏི, ‘‘མནཱཔོ ཝཏ ཨོབྷཱསོ ཨུཔྤནྣོ’’ཏི གཎྷཏོ མཱནགྒཱཧོ, ཨོབྷཱསཾ ཨསྶཱདཡཏོ ཏཎྷཱགྒཱཧོ. ཨིཏི ཨོབྷཱསེ དིཊྛིམཱནཏཎྷཱཝསེན ཏཡོ གཱཧཱ. ཏཐཱ སེསེསུཔཱིཏི ཨེཝཾ གཱཧཝསེན སམཏིཾས ཨུཔཀྐིལེསཱ ཧོནྟི. དུཀྑཏོ མནསིཀརོཏོ, ཨནཏྟཏོ མནསིཀརོཏོཏི ཝཱརེསུཔི ཨིམིནཱཝ ནཡེན ཨཏྠོ ཝེདིཏབྦོ. ཨེཀེཀཨནུཔསྶནཱཝསེན ཧེཏྠ ཨེཀེཀསྶ ཝིཔསྶནུཔཀྐིལེསུཔྤཏྟི ཝེདིཏབྦཱ, ན ཨེཀསྶེཝ.

ཏཱིསུ ཨནུཔསྶནཱསུ. ཨེཝཾ ཨབྷེདཏོ ཝིཔསྶནཱཝསེན ཨུཔཀྐིལེསེ དསྶེཏྭཱ པུན བྷེདཝསེན དསྶེནྟོ རཱུཔཾ ཨནིཙྩཏོ མནསིཀརོཏོཏིཨཱདིམཱཧ. ཏཏྠ ཛརཱམརཎཾ ཨནིཙྩཏོ ཨུཔཊྛཱནནྟི ཛརཱམརཎསྶ ཨནིཙྩཏོ ཨུཔཊྛཱནཾ.

. ཡསྨཱ པུབྦེ ཝུཏྟཱནཾ སམཏིཾསཱཡ ཨུཔཀྐིལེསཱནཾ ཝསེན ཨཀུསལོ ཨབྱཏྟོ ཡོགཱཝཙརོ ཨོབྷཱསཱདཱིསུ ཝིཀམྤཏི, ཨོབྷཱསཱདཱིསུ ཨེཀེཀཾ ‘‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’’ཏི སམནུཔསྶཏི, ཏསྨཱ ཏམཏྠཾ དསྶེནྟོ ཨོབྷཱསེ ཙེཝ ཉཱཎེ ཙཱཏིཨཱདིགཱཐཱདྭཡམཱཧ. ཏཏྠ ཝིཀམྤཏཱིཏི ཨོབྷཱསཱདིཀེ ཨཱརམྨཎེ ནཱནཱཀིལེསཝསེན ཝིཝིདྷཱ ཀམྤཏི ཝེདྷཏི. ཡེཧི ཙིཏྟཾ པཝེདྷཏཱིཏི ཡེཧི པསྶདྡྷིསུཁེཧི ཙིཏྟཾ ནཱནཱཀིལེསཝསེན ནཱནཔྤཀཱརེན ཝེདྷཏི ཀམྤཏི. ཏསྨཱ པསྶདྡྷིཡཱ སུཁེ ཙེཝ ཡོགཱཝཙརོ ཝིཀམྤཏཱིཏི སམྦནྡྷོ ཝེདིཏབྦོ. ཨུཔེཀྑཱཝཛྫནཱཡ ཙེཝཱཏི ཨུཔེཀྑཱསངྑཱཏཱཡ ཨཱཝཛྫནཱཡ ཙེཝ ཝིཀམྤཏི, ཨཱཝཛྫནུཔེཀྑཱཡ ཙེཝ ཝིཀམྤཏཱིཏི ཨཏྠོ. ཝིསུདྡྷིམགྒེ (ཝིསུདྡྷི. ༢.༧༣༦) པན ‘‘ཨུཔེཀྑཱཝཛྫནཱཡཉྩཱ’’ཏི ཝུཏྟཾ. ཨུཔེཀྑཱཡ ཙཱཏི ཧེཊྛཱ ཝུཏྟཔྤཀཱརཱཡ ཨུཔེཀྑཱཡ ཙ ཝིཀམྤཏི, ནིཀནྟིཡཱ ཙ ཝིཀམྤཏཱིཏི ཨཏྠོ. ཨེཏྠ ཙ དྭིནྣཾ ཨུཔེཀྑཱནཾ ནིདྡིཊྛཏྟཱ ཧེཊྛཱ ‘‘ཨུཔེཀྑཱ ཨུཔྤཛྫཏཱི’’ཏི ཝུཏྟཊྛཱནེ ཙ ཨུབྷཡཐཱ ཨཏྠོ ཝུཏྟོ. ཨནིཙྩཱནུཔསྶནཱདཱིསུ ཙ ཨེཀེཀིསྶཱཡེཝ ཨཱཝཛྫནུཔེཀྑཱཡ སབྦྷཱཝཏོ ཨེཀེཀཱཡེཝ ཨནུཔསྶནཱ ཨནིཙྩཾ ཨནིཙྩཾ, དུཀྑཾ དུཀྑཾ, ཨནཏྟཱ ཨནཏྟཱཏི པུནཔྤུནཾ བྷཱཝཱིཡཏཱིཏི ཝུཏྟཾ ཧོཏི. ཡསྨཱ པན ཀུསལོ པཎྜིཏོ བྱཏྟོ བུདྡྷིསམྤནྣོ ཡོགཱཝཙརོ ཨོབྷཱསཱདཱིསུ ཨུཔྤནྣེསུ ‘‘ཨཡཾ ཁོ མེ ཨོབྷཱསོ ཨུཔྤནྣོ, སོ ཁོ པནཱཡཾ ཨནིཙྩོ སངྑཏོ པཊིཙྩསམུཔྤནྣོ ཁཡདྷམྨོ ཝཡདྷམྨོ ཝིརཱགདྷམྨོ ནིརོདྷདྷམྨོ’’ཏི ཨིཏི ཝཱ ནཾ པཉྙཱཡ པརིཙྪིནྡཏི ཨུཔཔརིཀྑཏི. ཨཐ ཝཱ པནསྶ ཨེཝཾ ཧོཏི – སཙེ ཨོབྷཱསོ ཨཏྟཱ བྷཝེཡྻ, ‘‘ཨཏྟཱ’’ཏི གཧེཏུཾ ཝཊྚེཡྻ. ཨནཏྟཱཝ པནཱཡཾ ‘‘ཨཏྟཱ’’ཏི གཧིཏོ. ཏསྨཱཡཾ ཨཝསཝཏྟནཊྛེན ཨནཏྟཱཏི པསྶནྟོ དིཊྛིཾ ཨུགྒྷཱཊེཏི. སཙེ ཨོབྷཱསོ ནིཙྩོ བྷཝེཡྻ, ‘‘ནིཙྩོ’’ཏི གཧེཏུཾ ཝཊྚེཡྻ. ཨནིཙྩོཝ པནཱཡཾ ‘‘ནིཙྩོ’’ཏི གཧིཏོ. ཏསྨཱཡཾ ཧུཏྭཱ ཨབྷཱཝཊྛེན ཨནིཙྩོཏི པསྶནྟོ མཱནཾ སམུགྒྷཱཊེཏི. སཙེ ཨོབྷཱསོ སུཁོ བྷཝེཡྻ, ‘‘སུཁོ’’ཏི གཧེཏུཾ ཝཊྚེཡྻ. དུཀྑོཝ པནཱཡཾ ‘‘སུཁོ’’ཏི གཧིཏོ. ཏསྨཱཡཾ ཨུཔྤཱདཝཡཔཊིཔཱིལ༹ནཊྛེན དུཀྑོཏི པསྶནྟོ ནིཀནྟིཾ པརིཡཱདིཡཏི. ཡཐཱ ཙ ཨོབྷཱསེ, ཨེཝཾ སེསེསུཔི.

ཨེཝཾ ཨུཔཔརིཀྑིཏྭཱ ཨོབྷཱསཾ ‘‘ནེཏཾ མམ, ནེསོཧམསྨི, ན མེསོ ཨཏྟཱ’’ཏི སམནུཔསྶཏི. ཉཱཎཾ…པེ… ནིཀནྟིཾ ‘‘ནེཏཾ མམ, ནེསོཧམསྨི, ན མེསོ ཨཏྟཱ’’ཏི སམནུཔསྶཏི. ཨེཝཾ སམནུཔསྶནྟོ ཨོབྷཱསཱདཱིསུ ན ཀམྤཏི ན ཝེདྷཏི. ཏསྨཱ ཏམཏྠཾ དསྶེནྟོ ཨིམཱནི དས ཋཱནཱནཱིཏི གཱཐམཱཧ. ཏཏྠ དས ཋཱནཱནཱིཏི ཨོབྷཱསཱདཱིནི. པཉྙཱ ཡསྶ པརིཙྩིཏཱཏི ཡསྶ ཨུཔཀྐིལེསཝིམུཏྟཱཡ པཉྙཱཡ པརིཙིཏཱནི པུནཔྤུནཾ ཕུཊྛཱནི པརིབྷཱཝིཏཱནི. དྷམྨུདྡྷཙྩཀུསལོ ཧོཏཱིཏི སོ པཉྙཱཡ པརིཙིཏདསཊྛཱནོ ཡོགཱཝཙརོ པུབྦེ ཝུཏྟཔྤཀཱརསྶ དྷམྨུདྡྷཙྩསྶ ཡཐཱསབྷཱཝཔཊིཝེདྷེན ཚེཀོ ཧོཏི. ན ཙ སམྨོཧ གཙྪཏཱིཏི དྷམྨུདྡྷཙྩཀུསལཏྟཱཡེཝ ཏཎྷཱམཱནདིཊྛུགྒྷཱཊཝསེན སམྨོཧཉྩ ན གཙྪཏི.

ཨིདཱནི པུབྦེ ཝུཏྟམེཝ ཝིདྷིཾ ཨཔརེན པརིཡཱཡེན ཝིབྷཱཝེཏྭཱ དསྶེནྟོ ཝིཀྑིཔཏི ཙེཝ ཀིལིསྶཏི ཙཱཏིཨཱདིགཱཐམཱཧ. ཏཏྠ མནྡཔཉྙོ ཡོགཱཝཙརོ ཨོབྷཱསཱདཱིསུ ཝིཀྑེཔཉྩ ཨཝསེསཀིལེསུཔྤཏྟིཉྩ པཱཔུཎཱཏི. མཛ྄ཛྷིམཔཉྙོ ཝིཀྑེཔམེཝ པཱཔུཎཱཏི, ནཱཝསེསཀིལེསུཔྤཏྟིཾ, སོ ཨདྷིམཱནིཀོ ཧོཏི. ཏིཀྑཔཉྙོ ཝིཀྑེཔཾ པཱཔུཎིཏྭཱཔི ཏཾ ཨདྷིམཱནཾ པཧཱཡ ཝིཔསྶནཾ ཨཱརབྷཏི. ཨཏིཏིཀྑཔཉྙོ ན ཝིཀྑེཔཾ པཱཔུཎཱཏི, ན ཙཱཝསེསཀིལེསུཔྤཏྟིཾ. ཝིཀྑིཔྤཏི ཙེཝཱཏི ཏེསུ མནྡཔཉྙོ དྷམྨུདྡྷཙྩསངྑཱཏཾ ཝིཀྑེཔཉྩེཝ པཱཔུཎཱིཡཏི. ཀིལིསྶཏི ཙཱཏི ཏཎྷཱམཱནདིཊྛིཀིལེསེཧི ཀིལེསཱིཡཏི ཙ, ཨུཔཏཱཔཱིཡཏི ཝིབཱདྷཱིཡཏཱིཏི ཨཏྠོ. ཙཝཏི ཙིཏྟབྷཱཝནཱཏི ཏསྶ མནྡཔཉྙསྶ ཝིཔསྶནཱཙིཏྟབྷཱཝནཱ ཀིལེསེསུཡེཝ ཋཱནཏོ པཊིཔཀྑཱཝིཧཏཏྟཱ ཙཝཏི, པརིཔཏཏཱིཏི ཨཏྠོ. ཝིཀྑིཔཏི ན ཀིལིསྶཏཱིཏི མཛ྄ཛྷིམཔཉྙོ ཝིཀྑེཔེན ཝིཀྑིཔཏི, ཀིལེསེཧི ན ཀིལིསྶཏི. བྷཱཝནཱ པརིཧཱཡཏཱིཏི ཏསྶ མཛ྄ཛྷིམཔཉྙསྶ ཨདྷིམཱནིཀཏྟཱ ཝིཔསྶནཱརམྦྷཱབྷཱཝེན ཝིཔསྶནཱ པརིཧཱཡཏི, ནཔྤཝཏྟཏཱིཏི ཨཏྠོ. ཝིཀྑིཔཏི ན ཀིལིསྶཏཱིཏི ཏིཀྑཔཉྙོཔི ཝིཀྑེཔེན ཝིཀྑིཔཏི, ཀིལེསེཧི ན ཀིལིསྶཏི. བྷཱཝནཱ ན པརིཧཱཡཏཱིཏི ཏསྶ ཏིཀྑཔཉྙསྶ སནྟེཔི ཝིཀྑེཔེ ཏཾ ཨདྷིམཱནཝིཀྑེཔཾ པཧཱཡ ཝིཔསྶནཱརམྦྷསབྦྷཱཝེན ཝིཔསྶནཱབྷཱཝནཱ ན པརིཧཱཡཏི, པཝཏྟཏཱིཏི ཨཏྠོ. ན ཙ ཝིཀྑིཔཏེ ཙིཏྟཾ ན ཀིལིསྶཏཱིཏི ཨཏིཏིཀྑཔཉྙསྶ ཙིཏྟཾ ན ཝིཀྑེཔེན ཝིཀྑིཔཏི, ན ཙ ཀིལེསེཧི ཀིལིསྶཏི. ན ཙཝཏི ཙིཏྟབྷཱཝནཱཏི ཏསྶ ཝིཔསྶནཱཙིཏྟབྷཱཝནཱ ན ཙཝཏི, ཝིཀྑེཔཀིལེསཱབྷཱཝེན ཡཐཱཋཱནེ ཏིཊྛཏཱིཏི ཨཏྠོ.

ཨིམེཧི ཙཏཱུཧི ཋཱནེཧཱིཏིཨཱདཱིསུ ཨིདཱནི ཝུཏྟེཧི ཨིམེཧི ཙཏཱུཧི ཋཱནེཧི ཧེཏུབྷཱུཏེཧི, ཀརཎབྷཱུཏེཧི ཝཱ ཨོབྷཱསཱདིཀེ དས ཋཱནེ ཙིཏྟསྶ སངྑེཔེན ཙ ཝིཀྑེཔེན ཙ ཝིགྒཧིཏཾ མཱནསཾ ཝིཀྑེཔཀིལེསུཔྤཏྟིཝིརཧིཏོ ཙཏུཏྠོ ཀུསལོ མཧཱཔཉྙོ ཡོགཱཝཙརོ མནྡཔཉྙཱདཱིནཾ ཏིཎྞཾ ཡོགཱཝཙརཱནཾ མཱནསཾ ཨེཝཉྩ ཨེཝཉྩ ཧོཏཱིཏི ནཱནཔྤཀཱརཏོ ཛཱནཱཏཱིཏི སམྦནྡྷཏོ ཨཏྠཝཎྞནཱ ཝེདིཏབྦཱ. སངྑེཔོཏི ཙེཏྠ ཝིཀྑེཔསྶ ཙེཝ ཀིལེསཱནཉྩ ཨུཔྤཏྟིཝསེན ཙིཏྟསྶ ལཱིནབྷཱཝོ ཝེདིཏབྦོ. ཝིཀྑེཔོཏི ‘‘ཝིཀྑིཔཏི ན ཀིལིསྶཏཱི’’ཏི དྭཱིསུ ཋཱནེསུ ཝུཏྟཝིཀྑེཔཝསེན ཙིཏྟསྶ ཨུདྡྷཏབྷཱཝོ ཝེདིཏབྦོཏི.

ཡུགནདྡྷཀཐཱཝཎྞནཱ ནིཊྛིཏཱ.

༢. སཙྩཀཐཱ

སཙྩཀཐཱཝཎྞནཱ

. ཨིདཱནི ཡུགནདྡྷགུཎསྶ ཨརིཡམགྒསྶ ཝསེན སཙྩཊྛཾ སཙྩཔཊིཝེདྷཝིསེསཾ སཙྩལཀྑཎཱདིཝིདྷཱནཉྩ དསྶེནྟེན ཀཐིཏཱཡ སུཏྟནྟཔུབྦངྒམཱཡ སཙྩཀཐཱཡ ཨཔུབྦཏྠཱནུཝཎྞནཱ. ཏཏྠ སུཏྟནྟེ ཏཱཝ ཏཐཱནཱིཏི ཡཐཱསབྷཱཝཝསེན ཏཙྪཱནི. ཡཐཱསབྷཱཝབྷཱུཏཱནེཝ ཧི དྷམྨཛཱཏཱནི སཙྩཊྛེན སཙྩཱནི. སཙྩཊྛོ པཋམཉཱཎནིདྡེསཝཎྞནཱཡཾ ཝུཏྟོ. ཨཝིཏཐཱནཱིཏི ཝུཏྟསབྷཱཝེ ཝིཔརིཡཱཡཝིརཧིཏཱནི. ན ཧི སཙྩཱནི ཨསཙྩཱནི ནཱམ ཧོནྟི. ཨནཉྙཐཱནཱིཏི ཨཉྙསབྷཱཝཝིརཧིཏཱནི. ན ཧི ཨསཙྩཱནི སཙྩཱནི ནཱམ ཧོནྟི. ཨིདཾ དུཀྑནྟི, བྷིཀྑཝེ, ཏཐམེཏནྟི བྷིཀྑཝེ, ཨིདཾ དུཀྑནྟི ཡཾ ཝུཙྩཏི, ཨེཏཾ ཡཐཱསབྷཱཝཏྟཱ ཏཐཾ. དུཀྑམེཝ ཧི དུཀྑཾ. ཝུཏྟསབྷཱཝེ ཝིཔརིཡཱཡཱབྷཱཝཏོ ཨཝིཏཐཾ. ན ཧི དུཀྑཾ ཨདུཀྑཾ ནཱམ ཧོཏི. ཨཉྙསབྷཱཝཝིརཧིཏཏྟཱ ཨནཉྙཐཾ. ན ཧི དུཀྑཾ སམུདཡཱདིསབྷཱཝཾ ཧོཏི. སམུདཡཱདཱིསུཔི ཨེསེཝ ནཡོ.

༡. པཋམསུཏྟནྟནིདྡེསཝཎྞནཱ

ཏཐཊྛེནཱཏི ཡཐཱསབྷཱཝཊྛེན. པཱིལ༹ནཊྛཱདཡོ ཉཱཎཀཐཱཡཾ ཝུཏྟཏྠཱཡེཝ.

. ཨེཀཔྤཊིཝེདྷཱནཱིཏི ཨེཀེན མགྒཉཱཎེན པཊིཝེདྷོ, ཨེཀཏོ ཝཱ པཊིཝེདྷོ ཨེཏེསནྟི ཨེཀཔྤཊིཝེདྷཱནི. ཨནཏྟཊྛེནཱཏི ཙཏུནྣམྤི སཙྩཱནཾ ཨཏྟཝིརཧིཏཏྟཱ ཨནཏྟཊྛེན. ཝུཏྟཉྷེཏཾ ཝིསུདྡྷིམགྒེ (ཝིསུདྡྷི. ༢.༥༦༧) – པརམཏྠཏོ ཧི སབྦཱནེཝ སཙྩཱནི ཝེདཀཀཱརཀནིབྦུཏགམཀཱབྷཱཝཏོ སུཉྙཱནཱིཏི ཝེདིཏབྦཱནི. ཏེནེཏཾ ཝུཙྩཏི –

‘‘དུཀྑམེཝ ཧི, ན ཀོཙི དུཀྑིཏོ, ཀཱརཀོ ན, ཀིརིཡཱཝ ཝིཛྫཏི;

ཨཏྠི ནིབྦུཏི, ན ནིབྦུཏོ པུམཱ, མགྒམཏྠི, གམཀོ ན ཝིཛྫཏཱི’’ཏི. (ཝིསུདྡྷི. ༢.༥༦༧);

ཨཐ ཝཱ –

‘‘དྷུཝསུབྷསུཁཏྟསུཉྙཾ, པུརིམདྭཡམཏྟསུཉྙམམཏཔདཾ;

དྷུཝསུཁཨཏྟཝིརཧིཏོ, མགྒོ ཨིཏི སུཉྙཏཱ ཏེསཱུ’’ཏི. (ཝིསུདྡྷི. ༢.༥༦༧);

སཙྩཊྛེནཱཏི ཨཝིསཾཝཱདཀཊྛེན. པཊིཝེདྷཊྛེནཱཏི མགྒཀྑཎེ པཊིཝིཛ྄ཛྷིཏབྦཊྛེན. ཨེཀསངྒཧིཏཱནཱིཏི ཏཐཊྛཱདིནཱ ཨེཀེཀེནེཝ ཨཏྠེན སངྒཧིཏཱནི, ཨེཀགཎནཾ གཏཱནཱིཏི ཨཏྠོ. ཡཾ ཨེཀསངྒཧིཏཾ, ཏཾ ཨེཀཏྟནྟི ཡསྨཱ ཨེཀེན སངྒཧིཏཾ, ཏསྨཱ ཨེཀཏྟནྟི ཨཏྠོ. སཙྩཱནཾ བཧུཏྟེཔི ཨེཀཏྟམཔེཀྑིཏྭཱ ཨེཀཝཙནཾ ཀཏཾ. ཨེཀཏྟཾ ཨེཀེན ཉཱཎེན པཊིཝིཛ྄ཛྷཏཱིཏི པུབྦབྷཱགེ ཙཏུནྣཾ སཙྩཱནཾ ནཱནཏྟེཀཏྟཾ སྭཱཝཏྠིཏཾ ཝཝཏྠཔེཏྭཱ ཋིཏོ མགྒཀྑཎེ ཨེཀེན མགྒཉཱཎེན ཏཐཊྛཱདིཏཾཏཾཨེཀཏྟཾ པཊིཝིཛ྄ཛྷཏི. ཀཐཾ? ནིརོདྷསཙྩསྶ ཏཐཊྛཱདིཀེ ཨེཀཏྟེ པཊིཝིདྡྷེ སེསསཙྩཱནམྤི ཏཐཊྛཱདིཀཾ ཨེཀཏྟཾ པཊིཝིདྡྷམེཝ ཧོཏི. ཡཐཱ པུབྦབྷཱགེ པཉྩནྣཾ ཁནྡྷཱནཾ ནཱནཏྟེཀཏྟཾ སྭཱཝཏྠིཏཾ ཝཝཏྠཔེཏྭཱ ཋིཏསྶ མགྒཝུཊྛཱནཀཱལེ ཨནིཙྩཏོ ཝཱ དུཀྑཏོ ཝཱ ཨནཏྟཏོ ཝཱ ཝུཊྛཧནྟསྶ ཨེཀསྨིམྤི ཁནྡྷེ ཨནིཙྩཱདིཏོ དིཊྛེ སེསཁནྡྷཱཔི ཨནིཙྩཱདིཏོ དིཊྛཱཝ ཧོནྟི, ཨེཝམིདནྟི དཊྛབྦཾ. དུཀྑསྶ དུཀྑཊྛོ ཏཐཊྛོཏི དུཀྑསཙྩསྶ པཱིལ༹ནཊྛཱདིཀོ ཙཏུབྦིདྷོ ཨཏྠོ སབྷཱཝཊྛེན ཏཐཊྛོ. སེསསཙྩེསུཔི ཨེསེཝ ནཡོ. སོཡེཝ ཙཏུབྦིདྷོ ཨཏྠོ ཨཏྟཱབྷཱཝཏོ ཨནཏྟཊྛོ. ཝུཏྟསབྷཱཝེ ཨཝིསཾཝཱདཀཏོ སཙྩཊྛོ. མགྒཀྑཎེ པཊིཝིཛ྄ཛྷིཏབྦཏོ པཊིཝེདྷཊྛོ ཝུཏྟོཏི ཝེདིཏབྦཾ.

༡༠. ཡཾ ཨནིཙྩནྟིཨཱདི སཱམཉྙལཀྑཎཔུབྦངྒམཾ ཀཏྭཱ དསྶིཏཾ. ཏཏྠ ཡཾ ཨནིཙྩཾ, ཏཾ དུཀྑཾ. ཡཾ དུཀྑཾ, ཏཾ ཨནིཙྩནྟི དུཀྑསམུདཡམགྒཱ གཧིཏཱ. ཏཱནི ཧི ཏཱིཎི སཙྩཱནི ཨནིཙྩཱནི ཙེཝ ཨནིཙྩཏྟཱ དུཀྑཱནི ཙ. ཡཾ ཨནིཙྩཉྩ དུཀྑཉྩ, ཏཾ ཨནཏྟཱཏི ཏཱནིཡེཝ ཏཱིཎི གཧིཏཱནི. ཡཾ ཨནིཙྩཉྩ དུཀྑཉྩ ཨནཏྟཱ ཙཱཏི ཏེཧི ཏཱིཧི སཧ ནིརོདྷསཙྩཉྩ སངྒཧིཏཾ. ཙཏྟཱརིཔི ཧི ཨནཏྟཱཡེཝ. ཏཾ ཏཐནྟི ཏཾ སཙྩཙཏུཀྐཾ སབྷཱཝབྷཱུཏཾ. ཏཾ སཙྩནྟི ཏདེཝ སཙྩཙཏུཀྐཾ ཡཐཱསབྷཱཝེ ཨཝིསཾཝཱདཀཾ. ནཝཧཱཀཱརེཧཱིཏིཨཱདཱིསུ ‘‘སབྦཾ, བྷིཀྑཝེ, ཨབྷིཉྙེཡྻ’’ནྟི (པཊི. མ. ༡.༣; སཾ. ནི. ༤.༤༦) ཝཙནཏོ ཨབྷིཉྙཊྛེན, དུཀྑསྶ པརིཉྙཊྛེ, སམུདཡསྶ པཧཱནཊྛེ, མགྒསྶ བྷཱཝནཊྛེ, ནིརོདྷསྶ སཙྪིཀིརིཡཊྛེ ཨཱཝེནིཀེཔི ཨིདྷ ཙཏཱུསུཔི སཙྩེསུ ཉཱཏཔརིཉྙཱསབྦྷཱཝཏོ པརིཉྙཊྛེན, ཙཏུསཙྩདསྶནེན པཧཱནསབྦྷཱཝཏོ པཧཱནཊྛེན, ཙཏུསཙྩབྷཱཝནཱསབྦྷཱཝཏོ བྷཱཝནཊྛེན, ཙཏུནྣཾ སཙྩཱནཾ སཙྪིཀིརིཡསབྦྷཱཝཏོ སཙྪིཀིརིཡཊྛེནཱཏི ནིདྡིཊྛནྟི ཝེདིཏབྦཾ. ནཝཧཱཀཱརེཧི ཏཐཊྛེནཱཏིཨཱདཱིསུ པཋམཾ ཝུཏྟནཡེནེཝ ཡོཛནཱ ཀཱཏབྦཱ.

༡༡. དྭཱདསཧི ཨཱཀཱརེཧཱིཏིཨཱདཱིསུ ཏཐཊྛཱདཡོ ཉཱཎཀཐཱཡཾ ཝུཏྟཏྠཱ. ཨེཏེསཾ ནིདྡེསེཔི ཝུཏྟནཡེནེཝ ཡོཛནཱ ཝེདིཏབྦཱ.

༡༢. སཙྩཱནཾ ཀཏི ལཀྑཎཱནཱིཏིཨཱདཱིསུ ཨུཔརི ཝཏྟབྦཱནི ཚ ལཀྑཎཱནི སངྑཏཱསངྑཏཝསེན དྭིདྷཱ བྷིནྡིཏྭཱ དྭེ ལཀྑཎཱནཱིཏི ཨཱཧ. ཏཏྠ སངྑཏལཀྑཎཉྩ ཨསངྑཏལཀྑཎཉྩཱཏི ‘‘ཏཱིཎིམཱནི, བྷིཀྑཝེ, སངྑཏསྶ སངྑཏལཀྑཎཱནི ཨུཔྤཱདོ པཉྙཱཡཏི, ཝཡོ པཉྙཱཡཏི, ཋིཏསྶ ཨཉྙཐཏྟཾ པཉྙཱཡཏི. ཏཱིཎིམཱནི, བྷིཀྑཝེ, ཨསངྑཏསྶ ཨསངྑཏལཀྑཎཱནི ན ཨུཔྤཱདོ པཉྙཱཡཏི, ན ཝཡོ པཉྙཱཡཏི, ན ཋིཏསྶ ཨཉྙཐཏྟཾ པཉྙཱཡཏཱི’’ཏི (ཨ. ནི. ༣.༤༧-༤༨) ཨེཝཾ ཝུཏྟཾ སངྑཏསྶ སངྑཏམིཏི ལཀྑཎཉྩ ཨསངྑཏསྶ ཨསངྑཏམིཏི ལཀྑཎཉྩ. སངྑཏཾ པན ན ལཀྑཎཾ, ལཀྑཎཾ ན སངྑཏཾ. ན ཙ སངྑཏཾ ཝིནཱ ལཀྑཎཾ པཉྙཱཔེཏུཾ སཀྐཱ, ནཔི ལཀྑཎཾ ཝིནཱ སངྑཏཾ. ལཀྑཎེན པན སངྑཏཾ པཱཀཊཾ ཧོཏི.

པུན ཏདེཝ ལཀྑཎདྭཡཾ ཝིཏྠཱརཏོ དསྶེནྟོ ཚ ལཀྑཎཱནཱིཏི ཨཱཧ. སངྑཏཱནཾ སཙྩཱནནྟི དུཀྑསམུདཡམགྒསཙྩཱནཾ. ཏཱནི ཧི པཙྩཡེཧི སངྒམྨ ཀཏཏྟཱ སངྑཏཱནི. ཨུཔྤཱདོཏི ཛཱཏི. པཉྙཱཡཏཱིཏི ཛཱནཱིཡཏི. ཝཡོཏི བྷངྒོ. ཋིཏཱནཾ ཨཉྙཐཏྟནྟི ཋིཏིཔྤཏྟཱནཾ ཨཉྙཐཱབྷཱཝོ ཛརཱ. ཏིཎྞཾ སངྑཏསཙྩཱནཾ ནིཔྥནྣཏྟཱ ཨུཔྤཱདཝཡཉྙཐཏྟཾ ཝུཏྟཾ, ཏེསཾཡེཝ པན ཨུཔྤཱདསྶ, ཛརཱཡ བྷངྒསྶ ཙ ཨནིཔྥནྣཏྟཱ ཨུཔྤཱདཝཡཉྙཐཏྟཾ ན ཝཏྟབྦཾ. སངྑཏནིསྶིཏཏྟཱ ཨུཔྤཱདཝཡཉྙཐཏྟཾ ན པཉྙཱཡཏཱིཏི ན ཝཏྟབྦཾ. སངྑཏཝིཀཱརཏྟཱ པན སངྑཏནྟི ཝཏྟབྦཾ. དུཀྑསམུདཡཱནཾ ཨུཔྤཱདཛརཱབྷངྒཱ སཙྩཔརིཡཱཔནྣཱ, མགྒསཙྩསྶ ཨུཔྤཱདཛརཱབྷངྒཱ ན སཙྩཔརིཡཱཔནྣཱཏི ཝདནྟི. ཏཏྠ ‘‘སངྑཏཱནཾ ཨུཔྤཱདཀྑཎེ སངྑཏཱཔི ཨུཔྤཱདལཀྑཎམྤི ཀཱལསངྑཱཏོ ཏསྶ ཁཎོཔི པཉྙཱཡཏི, ཨུཔྤཱདེ ཝཱིཏིཝཏྟེ སངྑཏཱཔི ཛརཱལཀྑཎམྤི ཀཱལསངྑཱཏོ ཏསྶ ཁཎོཔི པཉྙཱཡཏི, བྷངྒཀྑཎེ སངྑཏཱཔི ཛརཱཔི བྷངྒལཀྑཎམྤི ཀཱལསངྑཱཏོ ཏསྶ ཁཎོཔི པཉྙཱཡཏཱི’’ཏི ཁནྡྷཀཝགྒཊྛཀཐཱཡཾ (སཾ. ནི. ཨཊྛ. ༢.༣.༣༧-༣༨) ཝུཏྟཾ. ཨསངྑཏསྶ སཙྩསྶཱཏི ནིརོདྷསཙྩསྶ. ཏཉྷི པཙྩཡེཧི སམཱགམྨ ཨཀཏཏྟཱ སཡམེཝ ནིཔྥནྣནྟི ཨསངྑཏཾ. ཋིཏསྶཱཏི ནིཙྩཏྟཱ ཋིཏསྶ, ན ཋཱནཔྤཏྟཏྟཱ. པུན ཏདེཝ ལཀྑཎདྭཡཾ ཝིཏྠཱརཏོ དསྶེནྟོ དྭཱདས ལཀྑཎཱནཱིཏི ཨཱཧ.

ཙཏུནྣཾ སཙྩཱནཾ ཀཏི ཀུསལཱཏིཨཱདཱིསུ ཨབྱཱཀཏནྟི ཝིཔཱཀཱབྱཱཀཏཾ ཀིརིཡཱབྱཱཀཏཾ རཱུཔཱབྱཱཀཏཾ ནིབྦཱནཱབྱཱཀཏནྟི ཙཏཱུསུ ཨབྱཱཀཏེསུ ནིབྦཱནཱབྱཱཀཏཾ. ཙཏྟཱརིཔི ཧི ཀུསལཱཀུསལལཀྑཎེན ན བྱཱཀཏཏྟཱ ཨབྱཱཀཏཱནི. སིཡཱ ཀུསལནྟི ཀཱམཱཝཙརརཱུཔཱཝཙརཱརཱུཔཱཝཙརཀུསལཱནཾ ཝསེན ཀུསལམྤི བྷཝེཡྻ. སིཡཱ ཨཀུསལནྟི ཏཎྷཾ ཋཔེཏྭཱ སེསཱཀུསལཝསེན. སིཡཱ ཨབྱཱཀཏནྟི ཀཱམཱཝཙརརཱུཔཱཝཙརཱརཱུཔཱཝཙརཝིཔཱཀཀིརིཡཱནཾ རཱུཔཱནཉྩ ཝསེན. སིཡཱ ཏཱིཎི སཙྩཱནཱིཏིཨཱདཱིསུ སངྒཧིཏཱནཱིཏི གཎིཏཱནི. ཝཏྠུཝསེནཱཏི ཨཀུསལཀུསལཱབྱཱཀཏདུཀྑསམུདཡནིརོདྷམགྒསངྑཱཏཝཏྠུཝསེན. ཡཾ དུཀྑསཙྩཾ ཨཀུསལནྟི ཋཔེཏྭཱ ཏཎྷཾ ཨཝསེསཾ ཨཀུསལཾ. ཨཀུསལཊྛེན དྭེ སཙྩཱནི ཨེཀསཙྩེན སངྒཧིཏཱནཱིཏི ཨིམཱནི དྭེ དུཀྑསམུདཡསཙྩཱནི ཨཀུསལཊྛེན ཨེཀསཙྩེན སངྒཧིཏཱནི, ཨཀུསལསཙྩཾ ནཱམ ཧོཏཱིཏི ཨཏྠོ. ཨེཀསཙྩཾ དྭཱིཧི སཙྩེཧི སངྒཧིཏནྟི ཨེཀཾ ཨཀུསལསཙྩཾ དྭཱིཧི དུཀྑསམུདཡསཙྩེཧི སངྒཧིཏཾ. ཡཾ དུཀྑསཙྩཾ ཀུསལནྟི ཏེབྷཱུམཀཾ ཀུསལཾ. ཨིམཱནི དྭེ དུཀྑམགྒསཙྩཱནི ཀུསལཊྛེན ཨེཀསཙྩེན སངྒཧིཏཱནི, ཀུསལསཙྩཾ ནཱམ ཧོཏི. ཨེཀཾ ཀུསལསཙྩཾ དྭཱིཧི དུཀྑམགྒསཙྩེཧི སངྒཧིཏཾ. ཡཾ དུཀྑསཙྩཾ ཨབྱཱཀཏནྟི ཏེབྷཱུམཀཝིཔཱཀཀིརིཡཱ རཱུཔཉྩ. ཨིམཱནི དྭེ དུཀྑནིརོདྷསཙྩཱནི ཨབྱཱཀཏཊྛེན ཨེཀསཙྩེན སངྒཧིཏཱནི, ཨེཀཾ ཨབྱཱཀཏསཙྩཾ ནཱམ ཧོཏི. ཨེཀཾ ཨབྱཱཀཏསཙྩཾ དྭཱིཧི དུཀྑནིརོདྷསཙྩེཧི སངྒཧིཏཾ. ཏཱིཎི སཙྩཱནི ཨེཀསཙྩེན སངྒཧིཏཱནཱིཏི སམུདཡམགྒནིརོདྷསཙྩཱནི ཨེཀེན ཨཀུསལཀུསལཱབྱཱཀཏབྷཱུཏེན དུཀྑསཙྩེན སངྒཧིཏཱནི. ཨེཀཾ སཙྩཾ ཏཱིཧི སཙྩེཧི སངྒཧིཏནྟི ཨེཀཾ དུཀྑསཙྩཾ ཝིསུཾ ཨཀུསལཀུསལཨབྱཱཀཏབྷཱུཏེཧི སམུདཡམགྒནིརོདྷསཙྩེཧི སངྒཧིཏཾ. ཀེཙི པན ‘‘དུཀྑསམུདཡསཙྩཱནི ཨཀུསལཊྛེན སམུདཡསཙྩེན སངྒཧིཏཱནི, དུཀྑམགྒསཙྩཱནི ཀུསལཊྛེན མགྒསཙྩེན སངྒཧིཏཱནི, ན དསྶནཊྛེན. དུཀྑནིརོདྷསཙྩཱནི ཨབྱཱཀཏཊྛེན ནིརོདྷསཙྩེན སངྒཧིཏཱནི, ན ཨསངྑཏཊྛེནཱ’’ཏི ཝཎྞཡནྟི.

༢. དུཏིཡསུཏྟནྟཔཱལི༹ཝཎྞནཱ

༡༣. པུན ཨཉྙསྶ སུཏྟནྟསྶ ཨཏྠཝསེན སཙྩཔྤཊིཝེདྷཾ ནིདྡིསིཏུཀཱམོ པུབྦེ མེ, བྷིཀྑཝེཏིཨཱདིཀཾ སུཏྟནྟཾ ཨཱཧརིཏྭཱ དསྶེསི. ཏཏྠ པུབྦེ མེ, བྷིཀྑཝེ, སམྦོདྷཱཏི བྷིཀྑཝེ, མམ སམྦོདྷིཏོ སབྦཉྙུཏཉྙཱཎཏོ པུབྦེ. ཨནབྷིསམྦུདྡྷསྶཱཏི སབྦདྷམྨེ ཨཔྤཊིཝིདྡྷསྶ. བོདྷིསཏྟསྶེཝ སཏོཏི བོདྷིསཏྟབྷཱུཏསྶེཝ. ཨེཏདཧོསཱིཏི བོདྷིཔལླངྐེ ནིསིནྣསྶ ཨེཏཾ པརིཝིཏཀྐིཏཾ ཨཧོསི. ཨསྶཱདོཏི ཨསྶཱདཱིཡཏཱིཏི ཨསྶཱདོ. ཨཱདཱིནཝོཏི དོསོ. ནིསྶརཎནྟི ཨཔགམནཾ. སུཁནྟི སུཁཡཏཱིཏི སུཁཾ, ཡསྶུཔྤཛྫཏི, ཏཾ སུཁིཏཾ ཀརོཏཱིཏི ཨཏྠོ. སོམནསྶནྟི པཱིཏིསོམནསྶཡོགཏོ སོབྷནཾ མནོ ཨསྶཱཏི སུམནོ, སུམནསྶ བྷཱཝོ སོམནསྶཾ, སུཁམེཝ པཱིཏིཡོགཏོ ཝིསེསིཏཾ. ཨནིཙྩནྟི ཨདྡྷུཝཾ. དུཀྑནྟི དུཀྑཝཏྠུཏྟཱ སངྑཱརདུཀྑཏྟཱ ཙ དུཀྑཾ. ཝིཔརིཎཱམདྷམྨནྟི ཨཝསཱི ཧུཏྭཱ ཛརཱབྷངྒཝསེན པརིཝཏྟནཔཀཏིཀཾ. ཨེཏེན ཨནཏྟབྷཱཝོ ཝུཏྟོ ཧོཏི. ཚནྡརཱགཝིནཡོཏི ཚནྡསངྑཱཏསྶ རཱགསྶ སཾཝརཎཾ, ན ཝཎྞརཱགསྶ. ཚནྡརཱགཔྤཧཱནནྟི ཏསྶེཝ ཚནྡརཱགསྶ པཛཧནཾ.

ཡཱཝཀཱིཝཉྩཱཏིཨཱདཱིསུ ཡཱཝ ཨིམེསཾ པཉྩནྣཾ ཨུཔཱདཱནཀྑནྡྷཱནཾ…པེ… ཡཐཱབྷཱུཏཾ ནཱབྦྷཉྙཱསིཾ ན ཨདྷིཀེན ཉཱཎེན པཊིཝིཛ྄ཛྷིཾ, ཏཱཝ ཨནུཏྟརཾ སམྨཱསམྦོདྷིཾ ཨནུཏྟརཾ སབྦཉྙུབྷཱཝཾ ཨབྷིསམྦུདྡྷོ ཨབྷིསམེཏཱཝཱི ཨརཧནྟི ནེཝཱཧཾ པཙྩཉྙཱསིཾ ནེཝ པཊིཉྙཾ ཨཀཱསིནྟི སམྦནྡྷཏོ ཨཏྠོ. ཀཱིཝཉྩཱཏི ནིཔཱཏམཏྟཾ. ཡཏོཏི ཡསྨཱ, ཡདཱ ཝཱ. ཨཐཱཏི ཨནནྟརཾ. ཉཱཎཉྩ པན མེ དསྶནཾ ཨུདཔཱདཱིཏི དསྶནཀིཙྩཀརཎེན དསྶནསངྑཱཏཾ པཙྩཝེཀྑཎཉཱཎཉྩ མེ ཨུཔྤཛྫི. ཨཀུཔྤཱཏི ཀོཔེཏུཾ ཙཱལེཏུཾ ཨསཀྐུཎེཡྻཱ. ཝིམུཏྟཱིཏི ཨརཧཏྟཕལཝིམུཏྟི. ཨེཏཱཡ ཨེཝ ཕལཔཙྩཝེཀྑཎཱཡ མགྒནིབྦཱནཔཙྩཝེཀྑཎཱཔི ཝུཏྟཱཝ ཧོནྟི. ཨཡམནྟིམཱ ཛཱཏཱིཏི ཨཡཾ པཙྪིམཱ ཁནྡྷཔྤཝཏྟི. ནཏྠིདཱནི པུནབྦྷཝོཏི ཨིདཱནི པུན ཨུཔྤཏྟི ནཏྠི. ཨེཏེན པཧཱིནཀིལེསཔཙྩཝེཀྑཎཱ ཝུཏྟཱ. ཨརཧཏོ ཧི ཨཝསིཊྛཀིལེསཔཙྩཝེཀྑཎཱ ན ཧོཏི.

༣. དུཏིཡསུཏྟནྟནིདྡེསཝཎྞནཱ

༡༤. སཙྩཔྤཊིཝེདྷཉཱཎཡོཛནཀྐམེ ཙ ཨཡཾ རཱུཔསྶ ཨསྶཱདོཏི པཧཱནཔྤཊིཝེདྷོཏི པུབྦབྷཱགེ ‘‘ཨཡཾ ཏཎྷཱསམྤཡུཏྟོ རཱུཔསྶ ཨསྶཱདོ’’ཏི ཉཏྭཱ མགྒཀྑཎེ སམུདཡཔྤཧཱནསངྑཱཏོ སམུདཡསཙྩཔྤཊིཝེདྷོ. སམུདཡསཙྩནྟི སམུདཡསཙྩཔྤཊིཝེདྷཉཱཎཾ. ཨརིཡསཙྩཱརམྨཎཉཱཎམྤི ཧི ‘‘ཡེ ཀེཙི ཀུསལཱ དྷམྨཱ, སབྦེ ཏེ ཙཏཱུསུ ཨརིཡསཙྩེསུ སངྒཧཾ གཙྪནྟཱི’’ཏིཨཱདཱིསུ (མ. ནི. ༡.༣༠༠) ཝིཡ ‘‘སཙྩ’’ནྟི ཝུཙྩཏི. ཨཡཾ རཱུཔསྶ ཨཱདཱིནཝོཏི པརིཉྙཱཔཊིཝེདྷོཏི པུབྦབྷཱགེ ‘‘ཨཡཾ རཱུཔསྶ ཨཱདཱིནཝོ’’ཏི ཉཏྭཱ མགྒཀྑཎེ དུཀྑཔརིཉྙཱསངྑཱཏོ དུཀྑསཙྩཔྤཊིཝེདྷོ. དུཀྑསཙྩནྟི དུཀྑསཙྩཔྤཊིཝེདྷཉཱཎཾ. ཨིདཾ རཱུཔསྶ ནིསྶརཎནྟི སཙྪིཀིརིཡཱཔཊིཝེདྷོཏི པུབྦབྷཱགེ ‘‘ཨིདཾ རཱུཔསྶ ནིསྶརཎ’’ནྟི ཉཏྭཱ མགྒཀྑཎེ ནིརོདྷསཙྪིཀིརིཡཱསངྑཱཏོ ནིརོདྷསཙྩཔྤཊིཝེདྷོ. ནིརོདྷསཙྩནྟི ནིརོདྷསཙྩཱརམྨཎཾ ནིརོདྷསཙྩཔྤཊིཝེདྷཉཱཎཾ. ཡཱ ཨིམེསུ ཏཱིསུ ཋཱནེསཱུཏི ཨིམེསུ ཡཐཱཝུཏྟེསུ ཏཱིསུ སམུདཡདུཀྑནིརོདྷེསུ པཊིཝེདྷཝསེན པཝཏྟཱ ཡཱ དིཊྛི ཡོ སངྐཔྤོཏི ཡོཛནཱ. བྷཱཝནཱཔཊིཝེདྷོཏི ཨཡཾ མགྒབྷཱཝནཱསངྑཱཏོ མགྒསཙྩཔྤཊིཝེདྷོ. མགྒསཙྩནྟི མགྒསཙྩཔྤཊིཝེདྷཉཱཎཾ.

༡༥. པུན ཨཔརེན པརིཡཱཡེན སཙྩཱནི ཙ སཙྩཔྤཊིཝེདྷཉྩ དསྶེནྟོ སཙྩནྟི ཀཏིཧཱཀཱརེཧི སཙྩནྟིཨཱདིམཱཧ. ཏཏྠ ཡསྨཱ སབྦེཔི སབྦཉྙུབོདྷིསཏྟཱ བོདྷིཔལླངྐེ ནིསིནྣཱ ཛརཱམརཎཱདིཀསྶ དུཀྑསཙྩསྶ ཛཱཏིཨཱདིཀཾ སམུདཡསཙྩཾ ‘‘ཀིཾ ནུ ཁོ’’ཏི ཨེསནྟི, ཏཐཱ ཨེསནྟཱ ཙ ཛརཱམརཎཱདིཀསྶ དུཀྑསཙྩསྶ ཛཱཏིཨཱདིཀཾ སམུདཡསཙྩཾ ‘‘པཙྩཡོ’’ཏི ཝཝཏྠཔེནྟོ པརིགྒཎྷནྟི, ཏསྨཱ སཱ ཙ ཨེསནཱ སོ ཙ པརིགྒཧོ སཙྩཱནཾ ཨེསནཏྟཱ པརིགྒཧཏྟཱ ཙ ‘‘སཙྩ’’ནྟི ཀཏྭཱ ཨེསནཊྛེན པརིགྒཧཊྛེནཱཏི ཝུཏྟཾ. ཨཡཉྩ ཝིདྷི པཙྩེཀབུདྡྷཱནམྤི པཙྩཡཔརིགྒཧེ ལབྦྷཏིཡེཝ, སཱཝཀཱནཾ པན ཨནུསྶཝཝསེན པཙྩཡཔརིགྒཧེ ལབྦྷཏི. པཊིཝེདྷཊྛེནཱཏི པུབྦབྷཱགེ ཏཐཱ ཨེསིཏཱནཾ པརིགྒཧིཏཱནཉྩ མགྒཀྑཎེ ཨེཀཔཊིཝེདྷཊྛེན.

ཀིཾནིདཱནནྟིཨཱདཱིསུ ནིདཱནཱདཱིནི སབྦཱནི ཀཱརཎཝེཝཙནཱནི. ཀཱརཎཉྷི ཡསྨཱ ཕལཾ ནིདེཏི ‘‘ཧནྡ ནཾ གཎྷཐཱ’’ཏི ཨཔྤེཏི ཝིཡ, ཏསྨཱ ‘‘ནིདཱན’’ནྟི ཝུཙྩཏི. ཡསྨཱ ཕལཾ ཏཏོ སམུདེཏི, ཛཱཡཏི, པབྷཝཏི; ཏསྨཱ སམུདཡོ, ཛཱཏི, པབྷཝོཏི ཝུཙྩཏི. ཨཡཾ པནེཏྠ ཨཏྠོ – ཀིཾ ནིདཱནཾ ཨེཏསྶཱཏི ཀིཾནིདཱནཾ. ཀོ སམུདཡོ ཨེཏསྶཱཏི ཀིཾསམུདཡཾ. ཀཱ ཛཱཏི ཨེཏསྶཱཏི ཀིཾཛཱཏིཀཾ. ཀོ པབྷཝོ ཨེཏསྶཱཏི ཀིཾཔབྷཝཾ. ཡསྨཱ པན ཏསྶ ཛཱཏི ཡཐཱཝུཏྟེན ཨཏྠེན ནིདཱནཉྩེཝ སམུདཡོ ཙ ཛཱཏི ཙ པབྷཝོ ཙ, ཏསྨཱ ཛཱཏིནིདཱནནྟིཨཱདིམཱཧ. ཛརཱམརཎནྟི དུཀྑསཙྩཾ. ཛརཱམརཎསམུདཡནྟི ཏསྶ པཙྩཡཾ སམུདཡསཙྩཾ. ཛརཱམརཎནིརོདྷནྟི ནིརོདྷསཙྩཾ. ཛརཱམརཎནིརོདྷགཱམིནིཾ པཊིཔདནྟི མགྒསཙྩཾ. ཨིམིནཱཝ ནཡེན སབྦཔདེསུ ཨཏྠོ ཝེདིཏབྦོ.

༡༦. ནིརོདྷཔྤཛཱནནཱཏི ཨཱརམྨཎཀརཎེན ནིརོདྷསྶ པཛཱནནཱ. ཛཱཏི སིཡཱ དུཀྑསཙྩཾ, སིཡཱ སམུདཡསཙྩནྟི བྷཝཔཙྩཡཱ པཉྙཱཡནཊྛེན དུཀྑསཙྩཾ, ཛརཱམརཎསྶ པཙྩཡཊྛེན སམུདཡསཙྩཾ. ཨེས ནཡོ སེསེསུཔི. ཨཝིཛྫཱ སིཡཱ དུཀྑསཙྩནྟི པན ཨཱསཝསམུདཡཱ ཨཝིཛྫཱསམུདཡཊྛེནཱཏི.

སཙྩཀཐཱཝཎྞནཱ ནིཊྛིཏཱ.

༣. བོཛ྄ཛྷངྒཀཐཱ

བོཛ྄ཛྷངྒཀཐཱཝཎྞནཱ

༡༧. ཨིདཱནི སཙྩཔྤཊིཝེདྷསིདྡྷཾ བོཛ྄ཛྷངྒཝིསེསཾ དསྶེནྟེན ཀཐིཏཱཡ སུཏྟནྟཔུབྦངྒམཱཡ བོཛ྄ཛྷངྒཀཐཱཡ ཨཔུབྦཏྠཱནུཝཎྞནཱ. ཏཏྠ སུཏྟནྟེ ཏཱཝ བོཛ྄ཛྷངྒཱཏི བོདྷིཡཱ, བོདྷིསྶ ཝཱ ཨངྒཱཏི བོཛ྄ཛྷངྒཱ. ཀིཾ ཝུཏྟཾ ཧོཏི (སཾ. ནི. ཨཊྛ. ༣.༥.༡༨༢) – ཡཱ ཧི ཨཡཾ དྷམྨསཱམགྒཱི, ཡཱཡ ལོཀུཏྟརམགྒཀྑཎེ ཨུཔྤཛྫམཱནཱཡ ལཱིནུདྡྷཙྩཔཏིཊྛཱནཱཡཱུཧནཀཱམསུཁཏྟཀིལམཐཱནུཡོགཨུཙྪེདསསྶཏཱབྷིནིཝེསཱདཱིནཾ ཨནེཀེསཾ ཨུཔདྡཝཱནཾ པཊིཔཀྑབྷཱུཏཱཡ སཏིདྷམྨཝིཙཡཝཱིརིཡཔཱིཏིཔསྶདྡྷིསམཱདྷིཨུཔེཀྑཱསངྑཱཏཱཡ དྷམྨསཱམགྒིཡཱ ཨརིཡསཱཝཀོ བུཛ྄ཛྷཏཱིཏི ཀཏྭཱ བོདྷཱིཏི ཝུཙྩཏི, བུཛ྄ཛྷཏཱིཏི ཀིལེསསནྟཱནནིདྡཱཡ ཝུཊྛཧཏི, ཙཏྟཱརི ཝཱ ཨརིཡསཙྩཱནི པཊིཝིཛ྄ཛྷཏི, ནིབྦཱནམེཝ ཝཱ སཙྪིཀརོཏཱིཏི ཝུཏྟཾ ཧོཏི. ཡཐཱཧ – ‘‘སཏྟ བོཛ྄ཛྷངྒེ བྷཱཝེཏྭཱ ཨནུཏྟརཾ སམྨཱསམྦོདྷིཾ ཨབྷིསམྦུདྡྷོ’’ཏི (སཾ. ནི. ༥.༣༧༨; དཱི. ནི. ༣.༡༤༣). ཏསྶཱ དྷམྨསཱམགྒཱིསངྑཱཏཱཡ བོདྷིཡཱ ཨངྒཱཏི བོཛ྄ཛྷངྒཱ ཛྷཱནངྒམགྒངྒཱདཡོ ཝིཡ. ཡོཔེས ཡཐཱཝུཏྟཔྤཀཱརཱཡ ཨེཏཱཡ དྷམྨསཱམགྒིཡཱ བུཛ྄ཛྷཏཱིཏི ཀཏྭཱ ཨརིཡསཱཝཀོ བོདྷཱིཏི ཝུཙྩཏི, ཏསྶ བོདྷིསྶ ཨངྒཱཏིཔི བོཛ྄ཛྷངྒཱ སེནངྒརཐངྒཱདཡོ ཝིཡ. ཏེནཱཧུ ཨཊྛཀཐཱཙརིཡཱ ‘‘བུཛ྄ཛྷནཀསྶ པུགྒལསྶ ཨངྒཱཏི བོཛ྄ཛྷངྒཱ’’ཏི. སཏིསམྦོཛ྄ཛྷངྒཱདཱིནཾ ཨཏྠོ ཨབྷིཉྙེཡྻནིདྡེསེ ཝུཏྟོ.

བོཛ྄ཛྷངྒཏྠནིདྡེསེ བོདྷཱཡ སཾཝཏྟནྟཱིཏི བུཛ྄ཛྷནཏྠཱཡ སཾཝཏྟནྟི. ཀསྶ བུཛ྄ཛྷནཏྠཱཡ? མགྒཕལེཧི ནིབྦཱནསྶ པཙྩཝེཀྑཎཱཡ ཀཏཀིཙྩསྶ བུཛ྄ཛྷནཏྠཱཡ, མགྒེན ཝཱ ཀིལེསནིདྡཱཏོ པབུཛ྄ཛྷནཏྠཱཡ ཕལེན པབུདྡྷབྷཱཝཏྠཱཡཱཔཱིཏི ཝུཏྟཾ ཧོཏི. བལཝཝིཔསྶནཱཡཔི བོཛ྄ཛྷངྒཱ བོདྷཱཡ སཾཝཏྟནྟི. ཏསྨཱ ཨཡཾ ཝིཔསྶནཱམགྒཕལབོཛ྄ཛྷངྒཱནཾ སཱདྷཱརཎཏྠོ. ཏཱིསུཔི ཧི ཋཱནེསུ བོདྷཱཡ ནིབྦཱནཔཊིཝེདྷཱཡ སཾཝཏྟནྟི. ཨེཏེན བོདྷིཡཱ ཨངྒཱཏི བོཛ྄ཛྷངྒཱཏི ཝུཏྟཾ ཧོཏི. བུཛ྄ཛྷནྟཱིཏི བོཛ྄ཛྷངྒཱཏིཨཱདཱིཧི པཉྩཧི ཙཏུཀྐེཧི ཝུཏྟཱནཾ བོཛ྄ཛྷངྒཱནཾ ཨུཔྤཏྟིཊྛཱནཾ ཨབྷིཉྙེཡྻནིདྡེསེ ཝུཏྟཾ. ཨཔི ཙ བུཛ྄ཛྷནྟཱིཏི བོཛ྄ཛྷངྒཱནཾ སཀིཙྩཀརཎེ སམཏྠབྷཱཝདསྶནཏྠཾ ཀཏྟུནིདྡེསོ. བུཛ྄ཛྷནཊྛེནཱཏི སཀིཙྩཀརཎསམཏྠཏྟེཔི སཏི ཀཏྟུནོ ཨབྷཱཝདསྶནཏྠཾ བྷཱཝནིདྡེསོ. བོདྷེནྟཱིཏི བོཛ྄ཛྷངྒབྷཱཝནཱཡ བུཛ྄ཛྷནྟཱནཾ ཡོགཱིནཾ པཡོཛཀཏྟཱ བོཛ྄ཛྷངྒཱནཾ ཧེཏུཀཏྟུནིདྡེསོ. བོདྷནཊྛེནཱཏི པཋམཾ ཝུཏྟནཡེནེཝ པཡོཛཀཧེཏུཀཏྟུནཱ བྷཱཝནིདྡེསོ. ཨེཏེཧི བོདྷིཡཱ ཨངྒཱ བོཛ྄ཛྷངྒཱཏི ཝུཏྟཾ ཧོཏི. བོདྷིཔཀྑིཡཊྛེནཱཏི བུཛ྄ཛྷནཊྛེན བོདྷཱིཏི ལདྡྷནཱམསྶ ཡོགིསྶ པཀྑེ བྷཝཏྟཱ. ཨཡམེཏེསཾ ཡོགིནོ ཨུཔཀཱརཀཏྟནིདྡེསོ. ཨེཏེཧི བོདྷིསྶ ཨངྒཱཏི བོཛ྄ཛྷངྒཱཏི ཝུཏྟཾ ཧོཏི. བུདྡྷིལབྷནཊྛེནཱཏིཨཱདིཀེ ཚཀྐེ བུདྡྷིལབྷནཊྛེནཱཏི ཡོགཱཝཙརེན བུདྡྷིཡཱ པཱཔུཎནཊྛེན. རོཔནཊྛེནཱཏི སཏྟཱནཾ པཏིཊྛཱཔནཊྛེན. པཱཔནཊྛེནཱཏི པཏིཊྛཱཔིཏཱཡ ནིཊྛཱཔནཊྛེན. ཨིམེ ཝིཔསྶནཱབོཛ྄ཛྷངྒཱ པཏི-ཨབྷི-སཾ-ཨིཏི ཏཱིཧི ཨུཔསགྒེཧི ཝིསེསིཏཱ མགྒཕལབོཛ྄ཛྷངྒཱཏི ཝདནྟི. སབྦེསམྤི དྷམྨཝོཧཱརེན ནིདྡིཊྛཱནཾ བོཛ྄ཛྷངྒཱནཾ བོདྷིཡཱ ཨངྒཱཏི བོཛ྄ཛྷངྒཱཏི ཝུཏྟཾ ཧོཏཱིཏི ཝེདིཏབྦཾ.

མཱུལམཱུལཀཱདིདསཀཝཎྞནཱ

༡༨. མཱུལཊྛེནཱཏིཨཱདིཀེ མཱུལམཱུལཀེ དསཀེ མཱུལཊྛེནཱཏི ཝིཔསྶནཱདཱིསུ པུརིམཱ པུརིམཱ བོཛ྄ཛྷངྒཱ པཙྪིམཱནཾ པཙྪིམཱནཾ བོཛ྄ཛྷངྒཱནཉྩ སཧཛཱཏདྷམྨཱནཉྩ ཨཉྙམཉྙཉྩ མཱུལཊྛེན. མཱུལཙརིཡཊྛེནཱཏི མཱུལཾ ཧུཏྭཱ ཙརིཡཱ པཝཏྟི མཱུལཙརིཡཱ. ཏེན མཱུལཙརིཡཊྛེན, མཱུལཾ ཧུཏྭཱ པཝཏྟནཊྛེནཱཏི ཨཏྠོ. མཱུལཔརིགྒཧཊྛེནཱཏི ཏེ ཨེཝ བོཛ྄ཛྷངྒཱ ཨཱདིཏོ པབྷུཏི ཨུཔྤཱདནཏྠཱཡ པརིགཡ྄ཧམཱནཏྟཱ པརིགྒཧཱ, མཱུལཱནིཡེཝ པརིགྒཧཱ མཱུལཔརིགྒཧཱ. ཏེན མཱུལཔརིགྒཧཊྛེན. ཏེ ཨེཝ ཨཉྙམཉྙཾ པརིཝཱརཝསེན པརིཝཱརཊྛེན. བྷཱཝནཱཔཱརིཔཱུརིཝསེན པརིཔཱུརཎཊྛེན. ནིཊྛཾ པཱཔུཎནཝསེན པརིཔཱཀཊྛེན. ཏེ ཨེཝ མཱུལཱནི ཙ ཚབྦིདྷཱ པབྷེདབྷིནྣཏྟཱ པཊིསམྦྷིདཱ ཙཱཏི མཱུལཔཊིསམྦྷིདཱ. ཏེན མཱུལཔཊིསམྦྷིདཊྛེན. མཱུལཔཊིསམྦྷིདཱཔཱཔནཊྛེནཱཏི བོཛ྄ཛྷངྒབྷཱཝནཱནུཡུཏྟསྶ ཡོགིནོ ཏཾ མཱུལཔཊིསམྦྷིདཾ པཱཔནཊྛེན. ཏསྶེཝ ཡོགིནོ ཏསྶཱ མཱུལཔཊིསམྦྷིདཱཡ ཝསཱིབྷཱཝཊྛེན. སེསེསུཔི ཨཱིདིསེསུ པུགྒལཝོཧཱརེསུ བོདྷིསྶ ཨངྒཱཏི བོཛ྄ཛྷངྒཱཏི ཝུཏྟཾ ཧོཏཱིཏི ཝེདིཏབྦཾ. མཱུལཔཊིསམྦྷིདཱཡ ཝསཱིབྷཱཝཔྤཏྟཱནམྤཱིཏི ཨཱིདིསེསུཔི ནིཊྛཱཝཙནེསུ ཕལབོཛ྄ཛྷངྒཱཏི ཝེདིཏབྦཾ. ཝསཱིབྷཱཝཾ པཏྟཱནནྟིཔི པཱཋོ.

མཱུལམཱུལཀདསཀཾ ནིཊྛིཏཾ.

སེསེསུཔི ཧེཏུམཱུལཀཱདཱིསུ ནཝསུ དསཀེསུ ཨིམིནཱཝ ནཡེན སཱདྷཱརཎཝཙནཱནཾ ཨཏྠོ ཝེདིཏབྦོ. ཨསཱདྷཱརཎེསུ པན ཡཐཱཝུཏྟཱ ཨེཝ བོཛ྄ཛྷངྒཱ ཡཐཱཝུཏྟཱནཾ དྷམྨཱནཾ ཛནཀཏྟཱ ཧེཏཱུ ནཱམ ཧོནྟི. ཨུཔཏྠམྦྷཀཏྟཱ པཙྩཡཱ ནཱམ. ཏེ ཨེཝ ཏདངྒསམུཙྪེདཔཊིཔྤསྶདྡྷིཝིསུདྡྷིབྷཱུཏཏྟཱ ཝིསུདྡྷི ནཱམ. ཝཛྫཝིརཧིཏཏྟཱ ཨནཝཛྫཱ ནཱམ. ‘‘སབྦེཔི ཀུསལཱ དྷམྨཱ ནེཀྑམྨ’’ནྟི ཝཙནཏོ ནེཀྑམྨཾ ནཱམ. ཀིལེསེཧི ཝིམུཏྟཏྟཱ ཏདངྒཝིམུཏྟིཨཱདིཝསེན ཝིམུཏྟི ནཱམ. མགྒཕལབོཛ྄ཛྷངྒཱ ཝིསཡཱིབྷཱུཏེཧི ཨཱསཝེཧི ཝིརཧིཏཏྟཱ ཨནཱསཝཱ. ཏིཝིདྷཱཔི བོཛ྄ཛྷངྒཱ ཀིལེསེཧི སུཉྙཏྟཱ ཏདངྒཝིཝེཀཱདིཝསེན ཝིཝེཀཱ. ཝིཔསྶནཱམགྒབོཛ྄ཛྷངྒཱ པརིཙྩཱགཝོསགྒཏྟཱ པཀྑནྡནཝོསགྒཏྟཱ ཙ ཝོསགྒཱ. ཕལབོཛ྄ཛྷངྒཱ པཀྑནྡནཝོསགྒཏྟཱ ཝོསགྒཱ.

༡༩. མཱུལཊྛཾ བུཛ྄ཛྷནྟཱིཏིཨཱདཡོ ཨེཀེཀཔདཝསེན ནིདྡིཊྛཱ ནཝ དསཀཱ ཝུཏྟནཡེནེཝ ཝེདིཏབྦཱ. ཝསཱིབྷཱཝཔྤཏྟཱནནྟི པདཾ པན ཝཏྟམཱནཝཙནཱབྷཱཝེན ན ཡོཛིཏཾ. པརིགྒཧཊྛཱདཡོ ཨབྷིཉྙེཡྻནིདྡེསེ ཝུཏྟཏྠཱ.

༢༠. པུན ཐེརོ ཨཏྟནཱ དེསིཏཾ སུཏྟནྟཾ ཨུདྡིསིཏྭཱ ཏསྶ ནིདྡེསཝསེན བོཛ྄ཛྷངྒཝིདྷིཾ དསྶེཏུཀཱམོ ཨེཀཾ སམཡནྟིཨཱདིཀཾ ནིདཱནཾ ཝཏྭཱ སུཏྟནྟཾ ཏཱཝ ཨུདྡིསི. ཨཏྟནཱ དེསིཏསུཏྟཏྟཱ ཨེཝ ཙེཏྠ ཨེཝཾ མེ སུཏནྟི ན ཝུཏྟཾ. ཨཱཡསྨཱ སཱརིཔུཏྟོཏི པནེཏྠ དེསཀབྱཏྟིབྷཱཝཏྠཾ ཨཏྟཱནཾ པརཾ ཝིཡ ཀཏྭཱ ཝུཏྟཾ. ཨཱིདིསཉྷི ཝཙནཾ ལོཀེ གནྠེསུ པཡུཛྫནྟི. པུབྦཎྷསམཡནྟི སཀལཾ པུབྦཎྷསམཡཾ. ཨཙྩནྟསཾཡོགཏྠེ ཨུཔཡོགཝཙནཾ. སེསདྭཡེཔི ཨེསེཝ ནཡོ. སཏིསམྦོཛ྄ཛྷངྒོ ཨིཏི ཙེ མེ ཧོཏཱིཏི སཏིསམྦོཛ྄ཛྷངྒོཏི ཨེཝཉྩེ མཡ྄ཧཾ ཧོཏི. ཨཔྤམཱཎོཏི མེ ཧོཏཱིཏི ཨཔྤམཱཎོཏི ཨེཝཾ མེ ཧོཏི. སུསམཱརདྡྷོཏི མེ ཧོཏཱིཏི སུཊྛུ པརིཔུཎྞོཏི ཨེཝཾ མེ ཧོཏི. ཏིཊྛནྟནྟི ནིབྦཱནཱརམྨཎེ པཝཏྟིཝསེན ཏིཊྛནྟཾ. ཙཝཏཱིཏི ནིབྦཱནཱརམྨཎཏོ ཨཔགཙྪཏི. སེསབོཛ྄ཛྷངྒེསུཔི ཨེསེཝ ནཡོ.

རཱཛམཧཱམཏྟསྶཱཏི རཉྙོ མཧཱཨམཙྩསྶ, མཧཏིཡཱ ཝཱ བྷོགམཏྟཱཡ བྷོགཔྤམཱཎེན སམནྣཱགཏསྶ. ནཱནཱརཏྟཱནནྟི ནཱནཱརངྒརཏྟཱནཾ, པཱུརཎཏྠེ སཱམིཝཙནཾ, ནཱནཱརཏྟེཧཱིཏི ཨཏྠོ. དུསྶཀརཎྜཀོཏི དུསྶཔེལཱ༹. དུསྶཡུགནྟི ཝཏྠཡུགལཾ. པཱརུཔིཏུནྟི ཨཙྪཱདེཏུཾ. ཨིམསྨིཾ སུཏྟནྟེ ཐེརསྶ ཕལབོཛ྄ཛྷངྒཱ ཀཐིཏཱ. ཡདཱ ཧི ཐེརོ སཏིསམྦོཛ྄ཛྷངྒཾ སཱིསཾ ཀཏྭཱ ཕལསམཱཔཏྟིཾ སམཱཔཛྫཏི, ཏདཱ ཨིཏརེ ཏདནྭཡཱ ཧོནྟི. ཡདཱ དྷམྨཝིཙཡཱདཱིསུ ཨཉྙཏརཾ, ཏདཱ སེསཱཔི ཏདནྭཡཱ ཧོནྟཱིཏི ཨེཝཾ ཕལསམཱཔཏྟིཡཱ ཨཏྟནོ ཙིཎྞཝསཱིབྷཱཝཾ དསྶེནྟོ ཐེརོ ཨིམཾ སུཏྟནྟཾ ཀཐེསཱིཏི.

སུཏྟནྟནིདྡེསཝཎྞནཱ

༢༡. ཀཐཾ སཏིསམྦོཛ྄ཛྷངྒོ ཨིཏི ཙེ ཧོཏཱིཏི བོཛ྄ཛྷངྒོཏི སཏིསམྦོཛ྄ཛྷངྒཾ སཱིསཾ ཀཏྭཱ ཕལསམཱཔཏྟིཾ སམཱཔཛྫནྟསྶ ཨཉྙེསུ བོཛ྄ཛྷངྒེསུ ཝིཛྫམཱནེསུ ཨེཝཾ ཨཡཾ སཏིསམྦོཛ྄ཛྷངྒོ ཧོཏཱིཏི ཨིཏི ཙེ པཝཏྟསྶ ཀཐཾ སོ སཏིསམྦོཛ྄ཛྷངྒོ ཧོཏཱིཏི ཨཏྠོ. ཡཱཝཏཱ ནིརོདྷཱུཔཊྛཱཏཱིཏི ཡཏྟཀེན ཀཱལེན ནིརོདྷོ ཨུཔཊྛཱཏི, ཡཏྟཀེ ཀཱལེ ཨཱརམྨཎཏོ ནིབྦཱནཾ ཨུཔཊྛཱཏཱིཏི ཨཏྠོ. ཡཱཝཏཱ ཨཙྩཱིཏི ཡཏྟཀེན པརིམཱཎེན ཛཱལཱ. ཀཐཾ ཨཔྤམཱཎོ ཨིཏི ཙེ ཧོཏཱིཏི བོཛ྄ཛྷངྒོཏི ན ཨཔྤམཱཎེཔི སཏིསམྦོཛ྄ཛྷངྒེ ཝིཛྫམཱནེ ཨེཝཾ ཨཡཾ ཨཔྤམཱཎོ ཧོཏཱིཏི ཨིཏི ཙེ པཝཏྟསྶ སོ ཨཔྤམཱཎོ སཏིསམྦོཛ྄ཛྷངྒོ ཀཐཾ ཧོཏཱིཏི ཨཏྠོ. པམཱཎབདྡྷཱཏི ཀིལེསཱ ཙ པརིཡུཊྛཱནཱ ཙ པོནོབྷཝིཀསངྑཱརཱ ཙ པམཱཎབདྡྷཱ ནཱམ ཧོནྟི. ‘‘རཱགོཔམཱཎཀརཎོ, དོསོ པམཱཎཀརཎོ, མོཧོ པམཱཎཀརཎོ’’ཏི (མ. ནི. ༡.༤༥༩) ཝཙནཏོ རཱགཱདཡོ ཡསྶ ཨུཔྤཛྫནྟི, ‘‘ཨཡཾ ཨེཏྟཀོ’’ཏི ཏསྶ པམཱཎཀརཎཏོ པམཱཎཾ ནཱམ. ཏསྨིཾ པམཱཎེ བདྡྷཱ པཊིབདྡྷཱ ཨཱཡཏྟཱཏི ཀིལེསཱདཡོ པམཱཎབདྡྷཱ ནཱམ ཧོནྟི. ཀིལེསཱཏི ཨནུསཡབྷཱུཏཱ, པརིཡུཊྛཱནཱཏི སམུདཱཙཱརཔྤཏྟཀིལེསཱ. སངྑཱརཱ པོནོབྷཝིཀཱཏི པུནཔྤུནཾ བྷཝཀརཎཾ པུནབྷཝོ, པུནབྷཝོ སཱིལམེཏེསནྟི པོནབྷཝིཀཱ, པོནབྷཝིཀཱ ཨེཝ པོནོབྷཝིཀཱ. ཀུསལཱཀུསལཀམྨསངྑཱཏཱ སངྑཱརཱ. ཨཔྤམཱཎོཏི ཝུཏྟཔྤཀཱརསྶ པམཱཎསྶ ཨབྷཱཝེན ཨཔྤམཱཎོ. མགྒཕལཱནམྤི ཨཔྤམཱཎཏྟཱ ཏཏོ ཝིསེསནཏྠཾ ཨཙལཊྛེན ཨསངྑཏཊྛེནཱཏི ཝུཏྟཾ. བྷངྒཱབྷཱཝཏོ ཨཙལོ, པཙྩཡཱབྷཱཝཏོ ཨསངྑཏོ. ཡོ ཧི ཨཙལོ ཨསངྑཏོ ཙ, སོ ཨཏིཝིཡ པམཱཎཝིརཧིཏོ ཧོཏི.

ཀཐཾ སུསམཱརདྡྷོ ཨིཏི ཙེ ཧོཏཱིཏི བོཛ྄ཛྷངྒོཏི ཨནནྟརཾ ཝུཏྟནཡེན ཡོཛེཏབྦཾ. ཝིསམཱཏི སཡཉྩ ཝིསམཏྟཱ, ཝིསམསྶ ཙ བྷཱཝསྶ ཧེཏུཏྟཱ ཝིསམཱ. སམདྷམྨོཏི སནྟཊྛེན པཎཱིཏཊྛེན སམོ དྷམྨོ. པམཱཎཱབྷཱཝཏོ སནྟོ. ‘‘ཡཱཝཏཱ, བྷིཀྑཝེ, དྷམྨཱ སངྑཏཱ ཝཱ ཨསངྑཏཱ ཝཱ, ཝིརཱགོ ཏེསཾ དྷམྨཱནཾ ཨགྒམཀྑཱཡཏཱི’’ཏི (ཨ. ནི. ༤.༣༤; ཨིཏིཝུ. ༩༠) ཝཙནཏོ སབྦདྷམྨུཏྟམཊྛེན པཎཱིཏོ. ཏསྨིཾ སམདྷམྨོཏི ཝུཏྟེ སུསམེ ཨཱརདྡྷོ སུསམཱརདྡྷོ. ཨཱཝཛྫིཏཏྟཱཏི ཕལསམཱཔཏྟིཡཱ པཝཏྟཀཱལཾ སནྡྷཱཡ ཝུཏྟཾ. ཨནུཔྤཱདཱདིསངྑཱཏེ ནིབྦཱནེ མནོདྭཱརཱཝཛྫནསྶ ཨུཔྤནྣཏྟཱཏི ཝུཏྟཾ ཧོཏི. ཏིཊྛཏཱིཏི པཝཏྟཏི. ཨུཔྤཱདཱདཱིནི ཧེཊྛཱ ཝུཏྟཏྠཱནི. སེསབོཛ྄ཛྷངྒམཱུལཀེསུཔི ཝཱརེསུ ཨེསེཝ ནཡོ.

བོཛ྄ཛྷངྒཀཐཱཝཎྞནཱ ནིཊྛིཏཱ.

༤. མེཏྟཱཀཐཱ

མེཏྟཱཀཐཱཝཎྞནཱ

༢༢. ཨིདཱནི བོཛ྄ཛྷངྒཀཐཱནནྟརཾ ཀཐིཏཱཡ བོཛ྄ཛྷངྒཀཐཱགཏིཡཱ སུཏྟནྟཔུབྦངྒམཱཡ མེཏྟཱཀཐཱཡ ཨཔུབྦཏྠཱནུཝཎྞནཱ. ཏཏྠ སུཏྟནྟེ ཏཱཝ ཨཱསེཝིཏཱཡཱཏི ཨཱདརེན སེཝིཏཱཡ. བྷཱཝིཏཱཡཱཏི ཝཌྜྷིཏཱཡ. བཧུལཱིཀཏཱཡཱཏི པུནཔྤུནཾ ཀཏཱཡ. ཡཱནཱིཀཏཱཡཱཏི ཡུཏྟཡཱནསདིསཱཡ ཀཏཱཡ. ཝཏྠུཀཏཱཡཱཏི པཏིཊྛཱནཊྛེན ཝཏྠུ ཝིཡ ཀཏཱཡ. ཨནུཊྛིཏཱཡཱཏི པཙྩུཔཊྛིཏཱཡ. པརིཙིཏཱཡཱཏི སམནྟཏོ ཙིཏཱཡ ཨུཔཙིཏཱཡ. སུསམཱརདྡྷཱཡཱཏི སུཊྛུ སམཱརདྡྷཱཡ སུཀཏཱཡ. ཨཱནིསཾསཱཏི གུཎཱ. པཱཊིཀངྑཱཏི པཊིཀངྑིཏབྦཱ ཨིཙྪིཏབྦཱ. སུཁཾ སུཔཏཱིཏི ཡཐཱ སེསཛནཱ སམྤརིཝཏྟམཱནཱ ཀཱཀཙྪམཱནཱ དུཀྑཾ སུཔནྟི, ཨེཝཾ ཨསུཔིཏྭཱ སུཁཾ སུཔཏི. ནིདྡཾ ཨོཀྐནྟོཔི སམཱཔཏྟིཾ སམཱཔནྣོ ཝིཡ ཧོཏི. སུཁཾ པཊིབུཛ྄ཛྷཏཱིཏི ཡཐཱ ཨཉྙེ ནིཏྠུནནྟཱ ཝིཛམྦྷནྟཱ སམྤརིཝཏྟནྟཱ དུཀྑཾ པཊིབུཛ྄ཛྷནྟི, ཨེཝཾ ཨཔཊིབུཛ྄ཛྷིཏྭཱ ཝིཀསམཱནམིཝ པདུམཾ སུཁཾ ནིབྦིཀཱརཾ པཊིབུཛ྄ཛྷཏི. ན པཱཔཀཾ སུཔིནཾ པསྶཏཱིཏི སུཔིནཾ པསྶནྟོཔི བྷདྡཀམེཝ སུཔིནཾ པསྶཏི. ཙེཏིཡཾ ཝནྡནྟོ ཝིཡ པཱུཛཾ ཀརོནྟོ ཝིཡ དྷམྨཾ སུཎནྟོ ཝིཡ ཙ ཧོཏི. ཡཐཱ པནཉྙེ ཨཏྟཱནཾ ཙོརེཧི པརིཝཱརིཏཾ ཝིཡ ཝཱལེ༹ཧི ཨུཔདྡུཏཾ ཝིཡ པཔཱཏེ པཏནྟཾ ཝིཡ ཙ པསྶནྟི, ན ཨེཝཾ པཱཔཀཾ སུཔིནཾ པསྶཏི. མནུསྶཱནཾ པིཡོ ཧོཏཱིཏི ཨུརེ ཨཱམུཏྟམུཏྟཱཧཱརོ ཝིཡ སཱིསེ པིལ༹ནྡྷམཱལཱ ཝིཡ ཙ མནུསྶཱནཾ པིཡོ ཧོཏི མནཱཔོ. ཨམནུསྶཱནཾ པིཡོ ཧོཏཱིཏི ཡཐེཝ ཙ མནུསྶཱནཾ, ཨེཝཾ ཨམནུསྶཱནམྤི པིཡོ ཧོཏི. དེཝཏཱ རཀྑནྟཱིཏི པུཏྟམིཝ མཱཏཱཔིཏརོ དེཝཏཱ རཀྑནྟི. ནཱསྶ ཨགྒི ཝཱ ཝིསཾ ཝཱ སཏྠཾ ཝཱ ཀམཏཱིཏི མེཏྟཱཝིཧཱརིསྶ ཀཱཡེ ཨགྒི ཝཱ ཝིསཾ ཝཱ སཏྠཾ ཝཱ ན ཀམཏི ན པཝིསཏི, ནཱསྶ ཀཱཡཾ ཝིཀོཔེཏཱིཏི ཝུཏྟཾ ཧོཏི. ཏུཝཊཾ ཙིཏྟཾ སམཱདྷིཡཏཱིཏི མེཏྟཱཝིཧཱརིནོ ཁིཔྤམེཝ ཙིཏྟཾ སམཱདྷིཡཏི, ནཏྠི ཏསྶ དནྡྷཱཡིཏཏྟཾ. མུཁཝཎྞོ ཝིཔྤསཱིདཏཱིཏི བནྡྷནཱ པམུཏྟཏཱལཔཀྐཾ ཝིཡ ཙསྶ ཝིཔྤསནྣཝཎྞཾ མུཁཾ ཧོཏི. ཨསམྨཱུལ༹ྷོ ཀཱལཾ ཀརོཏཱིཏི མེཏྟཱཝིཧཱརིནོ སམྨོཧམརཎཾ ནཱམ ནཏྠི, ཨསམྨཱུལ༹ྷོ ནིདྡཾ ཨོཀྐམནྟོ ཝིཡ ཀཱལཾ ཀརོཏི. ཨུཏྟརི ཨཔྤཊིཝིཛ྄ཛྷནྟོཏི མེཏྟཱསམཱཔཏྟིཏོ ཨུཏྟརིཾ ཨརཧཏྟཾ ཨདྷིགནྟུཾ ཨསཀྐོནྟོ ཨིཏོ ཙཝིཏྭཱ སུཏྟཔྤབུདྡྷོ ཝིཡ བྲཧྨལོཀཱུཔགོ ཧོཏཱིཏི བྲཧྨལོཀཾ ཨུཔཔཛྫཏཱིཏི ཨཏྠོ.

མེཏྟཱནིདྡེསེ ཨནོདྷིསོ ཕརཎཱཏི ཨོདྷི མརིཡཱདཱ, ན ཨོདྷི ཨནོདྷི. ཏཏོ ཨནོདྷིསོ, ཨནོདྷིཏོཏི ཨཏྠོ, ནིཔྤདེསཏོ ཕུསནཱཏི ཝུཏྟཾ ཧོཏི. ཨོདྷིསོཏི པདེསཝསེན. དིསཱཕརཎཱཏི དིསཱསུ ཕརཎཱ. སབྦེཏི ཨནཝསེསཔརིཡཱདཱནཾ. སཏྟཱཏིཔདསྶ ཨཏྠོ ཉཱཎཀཐཱམཱཏིཀཱཝཎྞནཱཡཾ ཝུཏྟོ, རུལ༹ྷཱིསདྡེན པན ཝཱིཏརཱགེསུཔི ཨཡཾ ཝོཧཱརོ ཝཏྟཏི ཝིལཱིཝམཡེཔི བཱིཛནིཝིསེསེ ཏཱལཝཎྚཝོཧཱརོ ཝིཡ. ཨཝེརཱཏི ཝེརརཧིཏཱ. ཨབྱཱཔཛྫཱཏི བྱཱཔཱདརཧིཏཱ. ཨནཱིགྷཱཏི ནིདྡུཀྑཱ. ཨནིགྒྷཱཏིཔི པཱཋོ. སུཁཱི ཨཏྟཱནཾ པརིཧརནྟཱུཏི སུཁིཏཱ ཧུཏྭཱ ཨཏྟབྷཱཝཾ ཝཏྟཡནྟུ. ‘‘ཨཝེརཱ’’ཏི ཙ སཀསནྟཱནེ ཙ པརེ པཊིཙྩ, པརསནྟཱནེ ཙ ཨིཏརེ པཊིཙྩ ཝེརཱབྷཱཝོ དསྶིཏོ, ‘‘ཨབྱཱཔཛྫཱ’’ཏིཨཱདཱིསུ ཝེརཱབྷཱཝཱ ཏམྨཱུལཀབྱཱཔཱདཱབྷཱཝོ, ‘‘ཨནཱིགྷཱ’’ཏི བྱཱཔཱདཱབྷཱཝཱ ཏམྨཱུལཀདུཀྑཱབྷཱཝོ, ‘‘སུཁཱི ཨཏྟཱནཾ པརིཧརནྟཱུ’’ཏི དུཀྑཱབྷཱཝཱསུཁེན ཨཏྟབྷཱཝཔརིཧརཎཾ དསྶིཏནྟི ཨེཝམེཏྠ ཝཙནསམྦནྡྷོ ཝེདིཏབྦོཏི. ཨིམེསུ ཙ ‘‘ཨཝེརཱ ཧོནྟཱུ’’ཏིཨཱདཱིསུ ཙཏཱུསུཔི ཝཙནེསུ ཡཾ ཡཾ པཱཀཊཾ ཧོཏི, ཏསྶ ཏསྶ ཝསེན མེཏྟཱཡ ཕརཏི.

པཱཎཱཏིཨཱདཱིསུ པཱཎནཏཱཡ པཱཎཱ, ཨསྶཱསཔསྶཱསཱཡཏྟཝུཏྟིཏཱཡཱཏི ཨཏྠོ. བྷཱུཏཏྟཱ བྷཱུཏཱ, ཨབྷིནིབྦཏྟཱཏི ཨཏྠོ. པུཾ ཝུཙྩཏི ནིརཡོ, ཏཾ པུཾ གལནྟི གཙྪནྟཱིཏི པུགྒལཱ. ཨཏྟབྷཱཝོ ཝུཙྩཏི སརཱིརཾ, ཁནྡྷཔཉྩཀམེཝ ཝཱ, ཏཾ ཨུཔཱདཱཡ པཉྙཏྟིམཏྟསབྦྷཱཝཏོ, ཏསྨིཾ ཨཏྟབྷཱཝེ པརིཡཱཔནྣཱ པརིཙྪིནྣཱ ཨནྟོགདྷཱཏི ཨཏྟབྷཱཝཔརིཡཱཔནྣཱ. ཡཐཱ ཙ སཏྟཱཏི ཝཙནཾ, ཨེཝཾ སེསཱནིཔི རུལ༹ྷཱིཝསེན ཨཱརོཔེཏྭཱ སབྦཱནེཏཱནི སབྦསཏྟཝེཝཙནཱནཱིཏི ཝེདིཏབྦཱནི. ཀཱམཉྩ ཨཉྙཱནིཔི ‘‘སབྦེ ཛནྟཱུ སབྦེ ཛཱིཝཱ’’ཏིཨཱདཱིནི སབྦསཏྟཝེཝཙནཱནི ཨཏྠི, པཱཀཊཝསེན པན ཨིམཱནེཝ པཉྩ གཧེཏྭཱ ‘‘པཉྩཧཱཀཱརེཧི ཨནོདྷིསོ ཕརཎཱ མེཏྟཱཙེཏོཝིམུཏྟཱི’’ཏི ཝུཙྩཏི. ཡེ པན ‘‘སཏྟཱ པཱཎཱ’’ཏིཨཱདཱིནཾ ན ཀེཝལཾ ཝཙནམཏྟཏོཝ, ཨཐ ཁོ ཨཏྠཏོཔི ནཱནཏྟམེཝ ཨིཙྪེཡྻུཾ, ཏེསཾ ཨནོདྷིསོ ཕརཎཱ ཝིརུཛ྄ཛྷཏི. ཏསྨཱ ཏཐཱ ཨཏྠཾ ཨགྒཧེཏྭཱ ཨིམེསུ པཉྩསུ ཨཱཀཱརེསུ ཨཉྙཏརཝསེན ཨནོདྷིསོ མེཏྟཱཡ ཕརཏི.

ཨོདྷིསོ ཕརཎེ པན ཨིཏྠིཡོ པུརིསཱཏི ལིངྒཝསེན ཝུཏྟཾ, ཨརིཡཱ ཨནརིཡཱཏི ཨརིཡཔུཐུཛྫནཝསེན, དེཝཱམནུསྶཱ ཝིནིཔཱཏིཀཱཏི ཨུཔཔཏྟིཝསེན. དིསཱཕརཎེཔི དིསཱཝིབྷཱགཾ ཨཀཏྭཱ སབྦདིསཱསུ ‘‘སབྦེ སཏྟཱ’’ཏིཨཱདིནཱ ནཡེན ཕརཎཏོ ཨནོདྷིསོ ཕརཎཱ ཧོཏི, སབྦདིསཱསུ ‘‘སབྦཱ ཨིཏྠིཡོ’’ཏིཨཱདིནཱ ནཡེན ཕརཎཏོ ཨོདྷིསོ ཕརཎཱ.

ཡསྨཱ པན ཨཡཾ ཏིཝིདྷཱཔི མེཏྟཱཕརཎཱ ཨཔྤནཱཔཏྟཙིཏྟསྶ ཝསེན ཝུཏྟཱ, ཏསྨཱ ཏཱིསུ ཝཱརེསུ ཨཔྤནཱ གཧེཏབྦཱ. ཨནོདྷིསོ ཕརཎེ ཏཱཝ ‘‘སབྦེ སཏྟཱ ཨཝེརཱ ཧོནྟཱུ’’ཏི ཨེཀཱ, ‘‘ཨབྱཱཔཛྫཱ ཧོནྟཱུ’’ཏི ཨེཀཱ ‘‘ཨནཱིགྷཱ ཧོནྟཱུ’’ཏི ཨེཀཱ, ‘‘སུཁཱི ཨཏྟཱནཾ པརིཧརནྟཱུ’’ཏི ཨེཀཱ. ཏཱནིཔི ཧི ཙཏྟཱརི ཧིཏོཔསཾཧཱརཝསེནེཝ ཝུཏྟཱནི. ཧིཏོཔསཾཧཱརལཀྑཎཱ ཧི མེཏྟཱ. ཨིཏི ‘‘སཏྟཱ’’ཏིཨཱདཱིསུ པཉྩསུ ཨཱཀཱརེསུ ཙཏསྶནྣཾ ཙཏསྶནྣཾ ཨཔྤནཱནཾ ཝསེན ཝཱིསཏི ཨཔྤནཱ ཧོནྟི, ཨོདྷིསོ ཕརཎེ ‘‘སབྦཱ ཨིཏྠིཡོ’’ཏིཨཱདཱིསུ སཏྟསུ ཨཱཀཱརེསུ ཙཏསྶནྣཾ ཙཏསྶནྣཾ ཝསེན ཨཊྛཝཱིསཏི ཨཔྤནཱ. དིསཱཕརཎེ པན ‘‘སབྦེ པུརཏྠིམཱཡ དིསཱཡ སཏྟཱ’’ཏིཨཱདིནཱ ནཡེན ཨེཀམེཀིསྶཱ དིསཱཡ ཝཱིསཏི ཝཱིསཏི ཀཏྭཱ དྭེ སཏཱནི, ‘‘སབྦཱ པུརཏྠིམཱཡ དིསཱཡ ཨིཏྠིཡོ’’ཏིཨཱདིནཱ ནཡེན ཨེཀམེཀིསྶཱ དིསཱཡ ཨཊྛཝཱིསཏི ཨཊྛཝཱིསཏི ཀཏྭཱ ཨསཱིཏི དྭེ སཏཱནཱིཏི ཙཏྟཱརི སཏཱནི ཨསཱིཏི ཙ ཨཔྤནཱ. ཨིཏི སབྦཱནིཔི ཨིདྷ ཝུཏྟཱནི ཨཊྛཝཱིསཱདྷིཀཱནི པཉྩ ཨཔྤནཱསཏཱནི ཧོནྟི. ཡཐཱ ཙ མེཏྟཱཡ ཏིཝིདྷེན ཕརཎཱ ཝུཏྟཱ, ཏཐཱ ཀརུཎཱམུདིཏཱཨུཔེཀྑཱནམྤི ཝུཏྟཱཝ ཧོཏཱིཏི ཝེདིཏབྦཾ.

༡. ཨིནྡྲིཡཝཱརཝཎྞནཱ

༢༣. ཨཐ མེཏྟཱུཔསཾཧཱརཱཀཱརཾ ཨིནྡྲིཡཱདིཔརིབྷཱཝནཉྩ དསྶེཏུཾ སབྦེསཾ སཏྟཱནཾ པཱིལ༹ནཾ ཝཛྫེཏྭཱཏིཨཱདིམཱཧ. ཏཏྠ པཱིལ༹ནནྟི ཨབྦྷནྟརཏོ སརཱིརཔཱིལ༹ནཾ. ཨུཔགྷཱཏནྟི བཱཧིརཏོ སརཱིརོཔགྷཱཏཾ. སནྟཱཔནྟི ཡཐཱ ཏཐཱ ཝཱ ཙིཏྟསནྟཱཔནཾ. པརིཡཱདཱནནྟི པཀཏིཡཱ ཛཱིཝིཏཱདིཔརིཀྑཡཾ. ཝིཧེསནྟི པརཏོ ཛཱིཝིཏཝིཧེཋནཾ. ཝཛྫེཏྭཱཏི པཱིལ༹ནཱདཱིསུ ཨེཀེཀཾ ཨཏྟནོ ཙིཏྟེནེཝ ཨཔནེཏྭཱ. ཨིམཱནི པཱིལ༹ནཱདཱིནི པཉྩ པདཱནི མེཏྟོཔསཾཧཱརསྶ པཊིཔཀྑཝིཝཛྫནཝསེན ཝུཏྟཱནི, ཨཔཱིལ༹ནཱཡཱཏིཨཱདཱིནི མེཏྟོཔསཾཧཱརཝསེན. ཨཔཱིལ༹ནཱཡཱཏི ཨཔཱིལ༹ནཱཀཱརེན, སབྦེ སཏྟེ མེཏྟཱཡཏཱིཏི སམྦནྡྷོ. ཨེཝཾ སེསེསུཔི. མཱ ཝེརིནོ མཱ དུཀྑིནོ མཱ དུཀྑིཏཏྟཱཏི ཨིམཱནིཔི ཏཱིཎི མེཏྟོཔསཾཧཱརསྶ པཊིཔཀྑཔཊིཀྑེཔཝཙནཱནི. མཱ-ཝཙནསྶ མཱ ཧོནྟཱུཏི ཨཏྠོ. ཨཝེརིནོ སུཁིནོ སུཁིཏཏྟཱཏི ཨིམཱནི ཏཱིཎི མེཏྟོཔསཾཧཱརཝཙནཱནི. ‘‘ཨབྱཱཔཛྫཱ ཨནཱིགྷཱ’’ཏི ཨིདཾ དྭཡཾ ‘‘སུཁིནོ’’ཏི ཝཙནེན སངྒཧིཏནྟི ཝེདིཏབྦཾ. སུཁིཏཏྟཱཏི ཏསྶེཝ སུཁསྶ ནིཙྩཔྤཝཏྟིདསྶནཾ. ‘‘སུཁིཏཏྟཱ’’ཏི ཙ ‘‘སུཁཱི ཨཏྟཱནཾ པརིཧརནྟཱུ’’ཏི ཙ ཨཏྠཏོ ཨེཀཾ. ‘‘ཨཔཱིལ༹ནཱཡཱ’’ཏིཨཱདཱིཧི ཝཱ ཨབྱཱཔཛྫཱནཱིགྷཝཙནཱནི སངྒཧིཏཱནི. ཨཊྛཧཱཀཱརེཧཱིཏི ‘‘ཨཔཱིལ༹ནཱཡཱ’’ཏིཨཱདཡོ པཉྩ མེཏྟོཔསཾཧཱརཱཀཱརཱ ‘‘ཨཝེརིནོ ཧོནྟཱུ’’ཏིཨཱདཡོ ཏཡོ མེཏྟོཔསཾཧཱརཱཀཱརཱཏི ཨིམེཧི ཨཊྛཧཱཀཱརེཧི. མེཏྟཱཡཏཱིཏི སིནིཡ྄ཧཏི. ཏཾ དྷམྨཾ ཙེཏཡཏཱིཏི ཏཾ ཧིཏོཔསཾཧཱརཾ ཙེཏཡཏི ཨབྷིསནྡཧཏི, པཝཏྟེཏཱིཏི ཨཏྠོ. སབྦབྱཱཔཱདཔརིཡུཊྛཱནེཧི ཝིམུཙྩཏཱིཏི མེཏྟཱཡ པཊིཔཀྑབྷཱུཏེཧི སབྦེཧི བྱཱཔཱདསམུདཱཙཱརེཧི ཝིཀྑམྦྷནཏོ ཝིམུཙྩཏི. མེཏྟཱ ཙ ཙེཏོ ཙ ཝིམུཏྟི ཙཱཏི ཨེཀཱཡེཝ མེཏྟཱ ཏིདྷཱ ཝཎྞིཏཱ.

ཨཝེརིནོ ཁེམིནོ སུཁིནོཏི ཨིམཱནི ཏཱིཎི པདཱནི པུབྦེ ཝུཏྟེ ཨཱཀཱརེ སངྑེཔེན སངྒཧེཏྭཱ ཝུཏྟཱནི. སདྡྷཱཡ ཨདྷིམུཙྩཏཱིཏིཨཱདིནཱ ནཡེན ཝུཏྟཱནི པཉྩིནྡྲིཡཱནི མེཏྟཱཡ སམྤཡུཏྟཱནིཡེཝ. ཨཱསེཝནཱཏིཨཱདཱིསུ ཚསུ ཝཱརེསུ ཨཱསེཝཱིཡཏི ཨེཏེཧི མེཏྟཱཏི ཨཱསེཝནཱ. ཏཐཱ བྷཱཝནཱ བཧུལཱིཀམྨཾ. ཨལངྐཱརཱཏི ཝིབྷཱུསནཱ. སྭཱལངྐཏཱཏི སུཊྛུ ཨལངྐཏཱ བྷཱུསིཏཱ. པརིཀྑཱརཱཏི སམྦྷཱརཱ. སུཔརིཀྑཏཱཏི སུཊྛུ སམྦྷཏཱ. པརིཝཱརཱཏི རཀྑནཊྛེན. པུན ཨཱསེཝནཱདཱིནི ཨཊྛཝཱིསཏི པདཱནི མེཏྟཱཡ ཝཎྞབྷཎནཏྠཾ ཝུཏྟཱནི. ཏཏྠ པཱརིཔཱུརཱིཏི པརིཔུཎྞབྷཱཝཱ. སཧགཏཱཏི མེཏྟཱཡ སཧགཏཱ. ཏཐཱ སཧཛཱཏཱདཡོ. པཀྑནྡནཱཏི མེཏྟཱཡ པཝིསནཱ, པཀྑནྡཏི ཨེཏེཧི མེཏྟཱཏི ཝཱ པཀྑནྡནཱ. ཏཐཱ སཾསཱིདནཱདཡོ. ཨེཏཾ སནྟནྟི ཕསྶནཱཏི ཨེསཱ མེཏྟཱ སནྟཱཏི ཨེཏེཧི ཕསྶནཱ ཧོཏཱིཏི ཨེཏཾ སནྟནྟི ཕསྶནཱ ‘‘ཨེཏདགྒ’’ནྟིཨཱདཱིསུ (ཨ. ནི. ༡.༡༨༨ ཨཱདཡོ) ཝིཡ ནཔུཾསཀཝཙནཾ. སྭཱདྷིཊྛིཏཱཏི སུཊྛུ པཏིཊྛིཏཱ. སུསམུགྒཏཱཏི སུཊྛུ སམུསྶིཏཱ. སུཝིམུཏྟཱཏི ཨཏྟནོ ཨཏྟནོ པཙྩནཱིཀེཧི སུཊྛུ ཝིམུཏྟཱ. ནིབྦཏྟེནྟཱིཏི མེཏྟཱསམྤཡུཏྟཱ ཧུཏྭཱ མེཏྟཾ ནིབྦཏྟེནྟི. ཛོཏེནྟཱིཏི པཱཀཊཾ ཀརོནྟི. པཏཱཔེནྟཱིཏི ཝིརོཙེནྟི.

༢-༤. བལཱདིཝཱརཏྟཡཝཎྞནཱ

༢༤-༢༧. ཨིནྡྲིཡཝཱརེ ཝུཏྟནཡེནེཝ བལཝཱརོཔི ཝེདིཏབྦོ. བོཛ྄ཛྷངྒམགྒངྒཝཱརཱ པརིཡཱཡེན ཝུཏྟཱ, ན ཡཐཱལཀྑཎཝསེན. མགྒངྒཝཱརེ སམྨཱཝཱཙཱཀམྨནྟཱཛཱིཝཱ མེཏྟཱཡ པུབྦབྷཱགཝསེན ཝུཏྟཱ, ན ཨཔྤནཱཝསེན. ན ཧི ཨེཏེ མེཏྟཱཡ སཧ བྷཝནྟི. སབྦེསཾ པཱཎཱནནྟིཨཱདཱིནཾ སེསཝཱརཱནམྤི སཏྟཝཱརེ ཝུཏྟནཡེནེཝ ཨཏྠོ ཝེདིཏབྦོ. མེཏྟཱབྷཱཝནཱཝིདྷཱནཾ པན ཝིསུདྡྷིམགྒཏོ (ཝིསུདྡྷི. ༡.༢༤༠ ཨཱདཡོ) གཧེཏབྦནྟི.

མེཏྟཱཀཐཱཝཎྞནཱ ནིཊྛིཏཱ.

༥. ཝིརཱགཀཐཱ

ཝིརཱགཀཐཱཝཎྞནཱ

༢༨. ཨིདཱནི མགྒཔཡོཛནཔརིཡོསཱནཱཡ མེཏྟཱཀཐཱཡ ཨནནྟརཾ ཀཐིཏཱཡ ཝིརཱགསངྑཱཏམགྒཔུབྦངྒམཱཡ ཝིརཱགཀཐཱཡ ཨཔུབྦཏྠཱནུཝཎྞནཱ. ཏཏྠ པཋམཾ ཏཱཝ ‘‘ནིབྦིནྡཾ ཝིརཛྫཏི ཝིརཱགཱ ཝིམུཙྩཏཱི’’ཏི (མཧཱཝ ༢༣) ཝུཏྟཱནཾ དྭིནྣཾ སུཏྟནྟཔདཱནཾ ཨཏྠཾ ནིདྡིསིཏུཀཱམེན ཝིརཱགོ མགྒོ, ཝིམུཏྟི ཕལནྟི ཨུདྡེསོ ཋཔིཏོ. ཏཏྠ པཋམཾ ཝཙནཏྠཾ ཏཱཝ ནིདྡིསིཏུཀཱམོ ཀཐཾ ཝིརཱགོ མགྒོཏིཨཱདིམཱཧ. ཏཏྠ ཝིརཛྫཏཱིཏི ཝིརཏྟཱ ཧོཏི. སེསཱནི མགྒཉཱཎནིདྡེསེ ཝུཏྟཏྠཱནི. ཝིརཱགོཏི ཡསྨཱ སམྨཱདིཊྛི ཝིརཛྫཏི, ཏསྨཱ ཝིརཱགོ ནཱམཱཏི ཨཏྠོ. སོ ཙ ཝིརཱགོ ཡསྨཱ ཝིརཱགཱརམྨཎོ…པེ… ཝིརཱགེ པཏིཊྛིཏོ, ཏསྨཱ ཙ ཝིརཱགོཏི ཨེཝཾ ‘‘ཝིརཱགཱརམྨཎོ’’ཏིཨཱདཱིནཾ པཉྩནྣཾ ཝཙནཱནཾ སམྦནྡྷོ ཝེདིཏབྦོ. ཏཏྠ ཝིརཱགཱརམྨཎོཏི ནིབྦཱནཱརམྨཎོ. ཝིརཱགགོཙརོཏི ནིབྦཱནཝིསཡོ. ཝིརཱགེ སམུདཱགཏོཏི ནིབྦཱནེ སམུཔྤནྣོ. ཝིརཱགེ ཋིཏོཏི པཝཏྟིཝསེན ནིབྦཱནེ ཋིཏོ. ཝིརཱགེ པཏིཊྛིཏོཏི ཨནིཝཏྟནཝསེན ནིབྦཱནེ པཏིཊྛིཏོ.

ནིབྦཱནཉྩ ཝིརཱགོཏི ནིབྦཱནཾ ཝིརཱགཧེཏུཏྟཱ ཝིརཱགོ. ནིབྦཱནཱརམྨཎཏཱཛཱཏཱཏི ནིབྦཱནཱརམྨཎེ ཛཱཏཱ, ནིབྦཱནཱརམྨཎབྷཱཝེན ཝཱ ཛཱཏཱ. ཏེ མགྒསམྤཡུཏྟཱ སབྦེཝ ཕསྶཱདཡོ དྷམྨཱ ཝིརཛྫནཊྛེན ཝིརཱགཱ ཧོནྟཱིཏི ཝིརཱགཱ ནཱམ ཧོནྟི. སཧཛཱཏཱནཱིཏི སམྨཱདིཊྛིསཧཛཱཏཱནི སམྨཱསངྐཔྤཱདཱིནི སཏྟ མགྒངྒཱནི. ཝིརཱགཾ གཙྪནྟཱིཏི ཝིརཱགོ མགྒོཏི ཝིརཱགཾ ནིབྦཱནཾ ཨཱརམྨཎཾ ཀཏྭཱ གཙྪནྟཱིཏི ཝིརཱགཱརམྨཎཏྟཱ ཝིརཱགོ ནཱམ, མགྒནཊྛེན མགྒོ ནཱམ ཧོཏཱིཏི ཨཏྠོ. ཨེཀེཀམྤི མགྒངྒཾ མགྒོཏི ནཱམཾ ལབྷཏི. ཨིཏི ཨེཀེཀསྶ ཨངྒསྶ མགྒཏྟེ ཝུཏྟེ སམྨཱདིཊྛིཡཱཔི མགྒཏྟཾ ཝུཏྟམེཝ ཧོཏི. ཏསྨཱཡེཝ ཙ ཨེཏེན མགྒེནཱཏི ཨཊྛ མགྒངྒཱནི གཧེཏྭཱ ཝུཏྟཾ. བུདྡྷཱ ཙཱཏི པཙྩེཀབུདྡྷཱཔི སངྒཧིཏཱ. ཏེཔི ཧི ‘‘དྭེམེ, བྷིཀྑཝེ, བུདྡྷཱ ཏཐཱགཏོ ཙ ཨརཧཾ སམྨཱསམྦུདྡྷོ པཙྩེཀབུདྡྷོ ཙཱ’’ཏི (ཨ. ནི. ༢.༥༧) ཝུཏྟཏྟཱ བུདྡྷཱཡེཝ. ཨགཏནྟི ཨནམཏགྒེ སཾསཱརེ ཨགཏཔུབྦཾ. དིསནྟི སཀལཱཡཔཊིཔཏྟིཡཱ དིསྶཏི ཨཔདིསྶཏི ཨབྷིསནྡཧཱིཡཏཱིཏི དིསཱ, སབྦབུདྡྷེཧི ཝཱ པརམཾ སུཁནྟི དིསྶཏི ཨཔདིསྶཏི ཀཐཱིཡཏཱིཏི དིསཱ, སབྦདུཀྑཾ ཝཱ དིསྶནྟི ཝིསྶཛྫེནྟི ཨུཛ྄ཛྷནྟི ཨེཏཱཡཱཏི དིསཱ. ཏཾ དིསཾ. ཨཊྛངྒིཀོ མགྒོཏི ཀིཾ ཝུཏྟཾ ཧོཏི? ཡོ སོ ཨཊྛངྒིཀོ དྷམྨསམཱུཧོ, སོ ཨེཏེན ནིབྦཱནཾ གཙྪནྟཱིཏི གམནཊྛེན མགྒོ ནཱམཱཏི ཝུཏྟཾ ཧོཏི. པུཐུསམཎབྲཱཧྨཎཱནཾ པརཔྤཝཱདཱནནྟི ཝིསུཾ ཝིསུཾ སམཎཱནཾ བྲཱཧྨཎཱནཉྩ ཨིཏོ ཨཉྙལདྡྷིཀཱནཾ. ཨགྒོཏི ཏེསཾ སེསམགྒཱནཾ ཝིསིཊྛོ. སེཊྛོཏི སེསམགྒཏོ ཨཏིཝིཡ པསཾསནཱིཡོ. མོཀྑོཏི མུཁེ སཱདྷུ, སེསམགྒཱནཾ ཨབྷིམུཁེ ཨཡམེཝ སཱདྷཱུཏི ཨཏྠོ. ཨུཏྟམོཏི སེསམགྒེ ཨཏིཝིཡ ཨུཏྟིཎྞོ. པཝརོཏི སེསམགྒཏོ ནཱནཔྤཀཱརེཧི སཾབྷཛནཱིཡོ. ཨིཏཱིཏི ཀཱརཎཏྠེ ནིཔཱཏོ. ཏསྨཱ བྷགཝཏཱ ‘‘མགྒཱནཾ ཨཊྛངྒིཀོ སེཊྛོ’’ཏི ཝུཏྟོཏི ཨདྷིཔྤཱཡོ. ཝུཏྟཉྷི བྷགཝཏཱ –

‘‘མགྒཱནཊྛངྒིཀོ སེཊྛོ, སཙྩཱནཾ ཙཏུརོ པདཱ;

ཝིརཱགོ སེཊྛོ དྷམྨཱནཾ, དྭིཔདཱནཉྩ ཙཀྑུམཱ’’ཏི. (དྷ. པ. ༢༧༣);

ཏཾ ཨིདྷ ཝིཙྪིནྡིཏྭཱ ‘‘མགྒཱནཾ ཨཊྛངྒིཀོ སེཊྛོ’’ཏི ཝུཏྟཾ. སེསཝཱརེསུཔི ཨིམིནཱ ཙ ནཡེན ཧེཊྛཱ ཝུཏྟནཡེན ཙ ཨཏྠོ ཝེདིཏབྦོ.

དསྶནཝིརཱགོཏིཨཱདཱིསུ དསྶནསངྑཱཏོ ཝིརཱགོ དསྶནཝིརཱགོ. ཨིནྡྲིཡཊྛཏོ བལསྶ ཝིསིཊྛཏྟཱ ཨིདྷ ཨིནྡྲིཡཏོ བལཾ པཋམཾ ཝུཏྟནྟི ཝེདིཏབྦཾ. ཨཱདྷིཔཏེཡྻཊྛེན ཨིནྡྲིཡཱནཱིཏིཨཱདི ཨིནྡྲིཡཱདཱིནཾ ཨཏྠཝིབྷཱཝནཱ, ན ཝིརཱགསྶ. ཏཐཊྛེན སཙྩཱཏི སཙྩཉཱཎཾ ཝེདིཏབྦཾ. སཱིལཝིསུདྡྷཱིཏི སམྨཱཝཱཙཱཀམྨནྟཱཛཱིཝཱ. ཙིཏྟཝིསུདྡྷཱིཏི སམྨཱསམཱདྷི. དིཊྛིཝིསུདྡྷཱིཏི སམྨཱདིཊྛིསངྐཔྤཱ. ཝིམུཏྟཊྛེནཱཏི ཏཾཏཾམགྒཝཛ྄ཛྷཀིལེསེཧི མུཏྟཊྛེན. ཝིཛྫཱཏི སམྨཱདིཊྛི. ཝིམུཏྟཱིཏི སམུཙྪེདཝིམུཏྟི. ཨམཏོགདྷཾ ནིབྦཱནཾ པརིཡོསཱནཊྛེན མགྒོཏི མགྒཕལཔཙྩཝེཀྑཎཱཧི མགྒཱིཡཏཱིཏི མགྒོ.

ཨིམསྨིཾ ཝིརཱགནིདྡེསེ ཝུཏྟཱ དྷམྨཱ སབྦེཔི མགྒཀྑཎེཡེཝ. ཝིམུཏྟིནིདྡེསེ ཕལཀྑཎེ. ཏསྨཱ ཚནྡམནསིཀཱརཱཔི མགྒཕལསམྤཡུཏྟཱ.

༢༩. ཝིརཱགནིདྡེསེ ཝུཏྟནཡེནེཝ ཝིམུཏྟིནིདྡེསེཔི ཨཏྠོ ཝེདིཏབྦོ. ཕལཾ པནེཏྠ པཊིཔྤསྶདྡྷིཝིམུཏྟཏྟཱ ཝིམུཏྟི, ནིབྦཱནཾ ནིསྶརཎཝིམུཏྟཏྟཱ ཝིམུཏྟི. ‘‘སཧཛཱཏཱནི སཏྟངྒཱནཱི’’ཏིཨཱདཱིནི ཝཙནཱནི ཨིདྷ ན ལབྦྷནྟཱིཏི ན ཝུཏྟཱནི. སཡཾ ཕལཝིམུཏྟཏྟཱ པརིཙྩཱགཊྛེན ཝིམུཏྟཱིཏི ཨེཏྟཀམེཝ ཝུཏྟཾ. སེསཾ ཝུཏྟནཡམེཝཱཏི.

ཝིརཱགཀཐཱཝཎྞནཱ ནིཊྛིཏཱ.

༦. པཊིསམྦྷིདཱཀཐཱ

༡. དྷམྨཙཀྐཔཝཏྟནཝཱརཝཎྞནཱ

༣༠. ཨིདཱནི ཝིརཱགསངྑཱཏམགྒཝསེན སིདྡྷཾ པཊིསམྦྷིདཱཔབྷེདཾ དསྶེནྟེན ཀཐིཏཱཡ དྷམྨཙཀྐཔྤཝཏྟནསུཏྟནྟཔུབྦངྒམཱཡ པཊིསམྦྷིདཱཀཐཱཡ ཨཔུབྦཏྠཱནུཝཎྞནཱ. སུཏྟནྟེ ཏཱཝ བཱརཱཎསིཡནྟི བཱརཱཎསཱ ནཱམ ནདཱི, བཱརཱཎསཱཡ ཨཝིདཱུརེ བྷཝཱ ནགརཱི བཱརཱཎསཱི. ཏསྶཾ བཱརཱཎསིཡཾ. ཨིསིཔཏནེ མིགདཱཡེཏི ཨིསཱིནཾ པཏནུཔྤཏནཝསེན ཨེཝཾལདྡྷནཱམེ མིགཱནཾ ཨབྷཡདཱནདིནྣཊྛཱནཏྟཱ མིགདཱཡསངྑཱཏེ ཨཱརཱམེ. ཏཏྠ ཧི ཨུཔྤནྣུཔྤནྣཱ སབྦཉྙུཨིསཡོ པཏནྟི, དྷམྨཙཀྐཔྤཝཏྟནཏྠཾ ནིསཱིདནྟཱིཏི ཨཏྠོ. ནནྡམཱུལཀཔབྦྷཱརཏོ སཏྟཱཧཙྩཡེན ནིརོདྷསམཱཔཏྟིཏོ ཝུཊྛིཏཱ ཨནོཏཏྟདཧེ ཀཏམུཁདྷོཝནཀིཙྩཱ ཨཱཀཱསེན ཨཱགནྟྭཱ པཙྩེཀབུདྡྷཨིསཡོཔེཏྠ སམོསརཎཝསེན པཏནྟི, ཨུཔོསཐཏྠཉྩ ཨནུཔོསཐཏྠཉྩ སནྣིཔཏནྟི, གནྡྷམཱདནཾ པཊིགཙྪནྟཱ ཙ ཏཏོ ཙ ཨུཔྤཏནྟཱིཏིཔི ཨིམིནཱ ཨིསཱིནཾ པཏནུཔྤཏནཝསེན ཏཾ ‘‘ཨིསིཔཏན’’ནྟི ཝུཙྩཏི. ‘‘ཨིསིཔདན’’ནྟིཔི པཱཋོ. པཉྩཝགྒིཡེཏི –

‘‘ཀོཎྜཉྙོ བྷདྡིཡོ ཝཔྤོ, མཧཱནཱམོ ཙ