མཱུལ > སུཏྟཔིཊཀ > ཁུདྡཀནིཀཱཡ

༡. དུཝེ ¶ ¶ ¶ ཧེཏཱུ དུཝེ པཙྩཡཱ སཱཝཀསྶ སམྨཱདིཊྛིཡཱ ཨུཔྤཱདཱཡ – པརཏོ ཙ གྷོསོ སཙྩཱནུསནྡྷི, ཨཛ྄ཛྷཏྟཉྩ ཡོནིསོ མནསིཀཱརོ. ཏཏྠ ཀཏམོ པརཏོ གྷོསོ? ཡཱ པརཏོ དེསནཱ ཨོཝཱདོ ཨནུསཱསནཱི སཙྩཀཐཱ སཙྩཱནུལོམོ. ཙཏྟཱརི སཙྩཱནི – དུཀྑཾ སམུདཡོ ནིརོདྷོ མགྒོ. ཨིམེསཾ ཙཏུནྣཾ སཙྩཱནཾ ཡཱ ¶ དེསནཱ སནྡསྶནཱ ཝིཝརཎཱ ཝིབྷཛནཱ ཨུཏྟཱནཱིཀིརིཡཱ [ཨུཏྟཱནིཀིརིཡཱ (ཀ.)] པཀཱསནཱ – ཨཡཾ ཝུཙྩཏི སཙྩཱནུལོམོ གྷོསོཏི.

༢. ཏཏྠ ཀཏམོ ཨཛ྄ཛྷཏྟཾ ཡོནིསོ མནསིཀཱརོ?

ཨཛ྄ཛྷཏྟཾ ཡོནིསོ མནསིཀཱརོ ནཱམ ཡོ ཡཐཱདེསིཏེ དྷམྨེ བཧིདྡྷཱ ཨཱརམྨཎཾ ཨནབྷིནཱིཧརིཏྭཱ ཡོནིསོ མནསིཀཱརོ – ཨཡཾ ཝུཙྩཏི ཡོནིསོ མནསིཀཱརོ.

ཏཾཨཱཀཱརོ ཡོནིསོ དྭཱརོ ཝིདྷི ཨུཔཱཡོ. ཡཐཱ པུརིསོ སུཀྑེ ཀཊྛེ ཝིགཏསྣེཧེ སུཀྑཱཡ ཨུཏྟརཱརཎིཡཱ ཐལེ ཨབྷིམནྠམཱནཾ བྷབྦོ ཛོཏིསྶ ཨདྷིགམཱཡ ¶ . ཏཾ ཀིསྶ ཧེཏུ. ཡོནིསོ ཨགྒིསྶ ཨདྷིགམཱཡ. ཨེཝམེཝསྶ ཡམིདཾ དུཀྑསམུདཡནིརོདྷམགྒཱནཾ ཨཝིཔརཱིཏདྷམྨདེསནཾ མནསིཀརོཏི – ཨཡཾ ཝུཙྩཏི ཡོནིསོ མནསིཀཱརོ.

ཡཐཱ ¶ ཏིསྶོ ཨུཔམཱ པུབྦེ ཨསྶུཏཱ ཙ ཨསྶུཏཔུབྦཱ ཙ པཊིབྷནྟི. ཡོ ཧི ཀོཙི ཀཱམེསུ ཨཝཱིཏརཱགོཏི…པེ… དུཝེ ཨུཔམཱ ཨཡོནིསོ ཀཱཏབྦཱ པཙྪིམེསུ ཝུཏྟཾ. ཏཏྠ ཡོ ཙ པརཏོ གྷོསོ ཡོ ཙ ཨཛ྄ཛྷཏྟཾ ཡོནིསོ མནསིཀཱརོ – ཨིམེ དྭེ པཙྩཡཱ. པརཏོ གྷོསེན ཡཱ ཨུཔྤཛྫཏི པཉྙཱ – ཨཡཾ ཝུཙྩཏི སུཏམཡཱི པཉྙཱ. ཡཱ ཨཛ྄ཛྷཏྟཾ ཡོནིསོ མནསིཀཱརེན ཨུཔྤཛྫཏི པཉྙཱ – ཨཡཾ ཝུཙྩཏི ཙིནྟཱམཡཱི པཉྙཱཏི. ཨིམཱ དྭེ པཉྙཱ ཝེདིཏབྦཱ. པུརིམཀཱ ཙ དྭེ པཙྩཡཱ. ཨིམེ དྭེ ཧེཏཱུ དྭེ པཙྩཡཱ སཱཝཀསྶ སམྨཱདིཊྛིཡཱ ཨུཔྤཱདཱཡ.

༣. ཏཏྠ པརཏོ གྷོསསྶ སཙྩཱནུསནྡྷིསྶ དེསིཏསྶ ཨཏྠཾ ཨཝིཛཱནནྟོ ཨཏྠཔྤཊིསཾཝེདཱི བྷཝིསྶཏཱིཏི ནེཏཾ ཋཱནཾ ཝིཛྫཏི. ན ཙ ཨཏྠཔྤཊིསཾཝེདཱི ཡོནིསོ མནསིཀརིསྶཏཱིཏི ནེཏཾ ཋཱནཾ ཝིཛྫཏི. པརཏོ གྷོསསྶ སཙྩཱནུསནྡྷིསྶ དེསིཏསྶ ཨཏྠཾ ཝིཛཱནནྟོ ཨཏྠཔྤཊིསཾཝེདཱི བྷཝིསྶཏཱིཏི ཋཱནམེཏཾ ཝིཛྫཏི. ཨཏྠཔྤཊིསཾཝེདཱི ཙ ཡོནིསོ མནསིཀརིསྶཏཱིཏི ཋཱནམེཏཾ ཝིཛྫཏི. ཨེས ཧེཏུ ཨེཏཾ ཨཱརམྨཎཾ ཨེསོ ཨུཔཱཡོ སཱཝཀསྶ ནིཡྻཱནསྶ, ནཏྠཉྙོ. སོཡཾ ན ཙ སུཏྟསྶ ཨཏྠཝིཛཱནནཱཡ སཧ ཡུཏྟོ ནཱཔི གྷོསཱནུཡོགེན པརཏོ གྷོསསྶ ཨཏྠཾ ཨཝིཛཱནནྟེན སཀྐཱ ཨུཏྟརིམནུསྶདྷམྨཾ ཨལམརིཡཉཱཎདསྶནཾ ཨདྷིགནྟུཾ, ཏསྨཱ ནིབྦཱཡིཏུཀཱམེན སུཏམཡེན ཨཏྠཱ པརིཡེསིཏབྦཱ. ཏཏྠ ¶ པརིཡེསནཱཡ ཨཡཾ ཨནུཔུབྦཱི བྷཝཏི སོལ༹ས ཧཱརཱ, པཉྩ ནཡཱ, ཨཊྛཱརས མཱུལཔདཱནི.

སོལ༹སཧཱརཱ ནེཏྟཱི, པཉྩནཡཱ སཱསནསྶ པརིཡེཊྛི;

ཨཊྛཱརསམཱུལཔདཱ, ཀཙྩཱཡནགོཏྟནིདྡིཊྛཱ.

དེསནཱ ཝིཙཡོ ཡུཏྟི པདཊྛཱནཾ ལཀྑཎཾ ཙཏུབྱཱུཧོ ཨཱཝཊྚོ ཝིབྷཏྟི པརིཝཏྟནོ ཝེཝཙནོ པཉྙཏྟི ཨོཏརཎོ སོདྷནོ ཨདྷིཊྛཱནོ པརིཀྑཱརོ སམཱརོཔནོ – ཨིམེ སོལ༹ས ཧཱརཱ.

དེསནཱ ¶ ཝིཙཡོ ཡུཏྟི, པདཊྛཱནོ ཙ ལཀྑཎོ [པདཊྛཱནཉྩ ལཀྑཎཾ (པཱི.)];

ཙཏུབྱཱུཧོ ཙ ཨཱཝཊྚོ, ཝིབྷཏྟི པརིཝཏྟནོ.

ཝེཝཙནོ ཙ པཉྙཏྟི, ཨོཏརཎོ ཙ སོདྷནོ;

ཨདྷིཊྛཱནོ པརིཀྑཱརོ, སམཱརོཔནོ སོལ༹སོ – [སོལ༹ས ཧཱརཱ (པཱི. ཀ.)];

ནནྡིཡཱཝཊྚོ ཏིཔུཀྑལོ སཱིཧཝིཀྐཱིལི༹ཏོ དིསཱལོཙནོ ཨངྐུསོཏི.

པཋམོ ནནྡིཡཱཝཊྚོ, དུཏིཡོ ཙ ཏིཔུཀྑལོ;

སཱིཧཝིཀྐཱིལི༹ཏོ ནཱམ, ཏཏིཡོ ཧོཏི སོ ནཡོ.

དིསཱལོཙནམཱཧཾསུ, ཙཏུཏྠོ ནཡལཉྫཀོ;

པཉྩམོ ཨངྐུསོ ནཱམ [པཉྩམཾ ཨངྐུསཾ ཨཱཧུ (པཱི. ཀ.)], སབྦེ པཉྩ ནཡཱ གཏཱ.

༦. ཏཏྠ ཀཏམཱནི ཨཊྛཱརས མཱུལཔདཱནི?

ཨཝིཛྫཱ ¶ ཏཎྷཱ ལོབྷོ དོསོ མོཧོ སུབྷསཉྙཱ སུཁསཉྙཱ ནིཙྩསཉྙཱ ཨཏྟསཉྙཱ སམཐོ ¶ ཝིཔསྶནཱ ཨལོབྷོ ཨདོསོ ཨམོཧོ ཨསུབྷསཉྙཱ དུཀྑསཉྙཱ ཨནིཙྩསཉྙཱ ཨནཏྟསཉྙཱ, ཨིམཱནི ཨཊྛཱརས མཱུལཔདཱནི. ཏཏྠ ནཝ པདཱནི ཨཀུསལཱནི ཡཏྠ སབྦཾ ཨཀུསལཾ སམོསརཏི. ནཝ པདཱནི ཀུསལཱནི ཡཏྠ སབྦཾ ཀུསལཾ སམོསརཏི.

ཀཏམཱནི ནཝ པདཱནི ཨཀུསལཱནི ཡཏྠ སབྦཾ ཨཀུསལཾ སམོསརཏི?

ཨཝིཛྫཱ ཡཱཝ ཨཏྟསཉྙཱ, ཨིམཱནི ནཝ པདཱནི ཨཀུསལཱནི, ཡཏྠ སབྦཾ ཨཀུསལཾ སམོསརཏི.

ཀཏམཱནི ནཝ པདཱནི ཀུསལཱནི ཡཏྠ སབྦཾ ཀུསལཾ སམོསརཏི?

སམཐོ ཡཱཝ ཨནཏྟསཉྙཱ, ཨིམཱནི ནཝ པདཱནི ཀུསལཱནི ཡཏྠ སབྦཾ ཀུསལཾ སམོསརཏི. ཨིམཱནི ཨཊྛཱརས མཱུལཔདཱནི.

ཏཎྷཱ ¶ ཙ ཨཝིཛྫཱ ལོབྷོ, དོསོ ཏཐེཝ མོཧོ ཙ;

ཙཏྟཱརོ ཙ ཝིཔལླཱསཱ, ཀིལེསབྷཱུམི ནཝ པདཱནི.

ཡེ ཙ སཏིཔཊྛཱནཱ སམཐོ, ཝིཔསྶནཱ ཀུསལམཱུལཾ;

ཨེཏཾ སབྦཾ ཀུསལཾ, ཨིནྡྲིཡབྷཱུམི ནཝཔདཱནི.

སབྦཾ ཀུསལཾ ནཝཧི པདེཧི ཡུཛྫཏི, ནཝཧི ཙེཝ ཨཀུསལཾ;

ཨེཀཀེ ནཝ མཱུལཔདཱནི, ཨུབྷཡཏོ ཨཊྛཱརས མཱུལཔདཱནི.

ཨིམེསཾ ཨཊྛཱརསནྣཾ མཱུལཔདཱནཾ ཡཱནི ནཝ པདཱནི ཨཀུསལཱནི, ཨཡཾ དུཀྑསམུདཡོ; ཡཱནི ནཝ པདཱནི ཀུསལཱནི, ཨཡཾ དུཀྑནིརོདྷགཱམིནཱི པཊིཔདཱ. ཨིཏི སམུདཡསྶ དུཀྑཾ ཕལཾ, དུཀྑནིརོདྷགཱམིནིཡཱ པཊིཔདཱཡ ནིརོདྷཾ ཕལཾ. ཨིམཱནི ¶ ཙཏྟཱརི ཨརིཡསཙྩཱནི བྷགཝཏཱ བཱརཱཎསིཡཾ དེསིཏཱནི.

༧. ཏཏྠ དུཀྑསྶ ཨརིཡསཙྩསྶ ཨཔརིམཱཎཱནི ཨཀྑརཱནི པདཱནི བྱཉྫནཱནི ཨཱཀཱརཱནི ¶ ནིརུཏྟིཡོ ནིདྡེསཱ དེསིཏཱ ཨེཏསྶེཝཏྠསྶ སངྐཱསནཱཡ པཀཱསནཱཡ ཝིཝརཎཱཡ ཝིབྷཛནཱཡ ཨུཏྟཱནཱིཀམྨཏཱཡ པཉྙཱཔནཱཡཱཏི ཡཱ ཨེཝཾ སབྦེསཾ སཙྩཱནཾ. ཨིཏི ཨེཀམེཀཾ སཙྩཾ ཨཔརིམཱཎེཧི ཨཀྑརཔདབྱཉྫནཨཱཀཱརནིརུཏྟིནིདྡེསེཧི པརིཡེསིཏབྦཾ, ཏཉྩ བྱཉྫནཾ ཨཏྠཔུཐུཏྟེན པན ཨཏྠེཝ བྱཉྫནཔུཐུཏྟེན.

ཡོ ཧི ཀོཙི སམཎོ ཝཱ བྲཱཧྨཎོ ཝཱ ཨེཝཾ ཝདེཡྻ ‘‘ཨཧཾ ཨིདཾ དུཀྑཾ པཙྩཀྑཱཡ ཨཉྙཾ དུཀྑཾ པཉྙཔེསྶཱམཱི’’ཏི ཏསྶ ཏཾ ཝཱཙཱཝཏྠུཀམེཝསྶ པུཙྪིཏོ ཙ ན སམྤཱཡིསྶཏི. ཨེཝཾ སཙྩཱནི. ཡཉྩ རཏྟིཾ བྷགཝཱ ཨབྷིསམྦུདྡྷོ, ཡཉྩ རཏྟིཾ ཨནུཔཱདཱཡ པརིནིབྦུཏོ, ཨེཏྠནྟརེ ཡཾ ཀིཉྩི བྷགཝཏཱ བྷཱསིཏཾ སུཏྟཾ གེཡྻཾ ཝེཡྻཱཀརཎཾ གཱཐཱ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླཾ, སབྦཾ ཏཾ དྷམྨཙཀྐཾ པཝཏྟིཏཾ. ན ཀིཉྩི བུདྡྷཱནཾ བྷགཝནྟཱནཾ ¶ དྷམྨདེསནཱཡ དྷམྨཙཀྐཏོ བཧིདྡྷཱ, ཏསྶ སབྦཾ སུཏྟཾ ཨརིཡདྷམྨེསུ པརིཡེསིཏབྦཾ. ཏཏྠ པརིགྒཎྷནཱཡ ཨཱལོཀསབྷཱནི ཙཏྟཱརི ཨརིཡསཙྩཱནི ཐཱཝརཱནི ཨིམཱནི.

ཏཏྠ ཀཏམཾ དུཀྑཾ? ཛཱཏི ཛརཱ བྱཱདྷི མརཎཾ སཾཁིཏྟེན པཉྩུཔཱདཱནཀྑནྡྷཱ དུཀྑཱ. ཏཏྠཱཡཾ ལཀྑཎནིདྡེསོ, པཱཏུབྷཱཝལཀྑཎཱ ¶ ཛཱཏི, པརིཔཱཀལཀྑཎཱ ཛརཱ, དུཀྑདུཀྑཏཱལཀྑཎོ བྱཱདྷི, ཙུཏིལཀྑཎཾ མརཎཾ, པིཡཝིཔྤཡོགཝིཔརིཎཱམཔརིཏཱཔནལཀྑཎོ སོཀོ, ལཱལཔྤནལཀྑཎོ པརིདེཝོ, ཀཱཡསམྤཱིལ༹ནལཀྑཎཾ དུཀྑཾ, ཙིཏྟསམྤཱིལ༹ནལཀྑཎཾ དོམནསྶཾ, ཀིལེསཔརིདཧནལཀྑཎོ ཨུཔཱཡཱསོ, ཨམནཱཔསམོདྷཱནལཀྑཎོ ཨཔྤིཡསམྤཡོགོ, མནཱཔཝིནཱབྷཱཝལཀྑཎོ པིཡཝིཔྤཡོགོ, ཨདྷིཔྤཱཡཝིཝཏྟནལཀྑཎོ ཨལཱབྷོ, ཨཔརིཉྙཱལཀྑཎཱ པཉྩུཔཱདཱནཀྑནྡྷཱ, པརིཔཱཀཙུཏིལཀྑཎཾ ཛརཱམརཎཾ, པཱཏུབྷཱཝཙུཏིལཀྑཎཾ ཙུཏོཔཔཏྟི, པཊིསནྡྷིནིབྦཏྟནལཀྑཎོ སམུདཡོ, སམུདཡཔརིཛཧནལཀྑཎོ ནིརོདྷོ, ཨནུསཡསམུཙྪེདལཀྑཎོ མགྒོ. བྱཱདྷིལཀྑཎཾ དུཀྑཾ, སཉྫཱནནལཀྑཎོ སམུདཡོ, ནིཡྻཱནིཀལཀྑཎོ མགྒོ, སནྟིལཀྑཎོ ནིརོདྷོ. ཨཔྤཊིསནྡྷིབྷཱཝནིརོདྷལཀྑཎཱ ཨནུཔཱདིསེསཱ ནིབྦཱནདྷཱཏུ, དུཀྑཉྩ སམུདཡོ ཙ, དུཀྑཉྩ ནིརོདྷོ ཙ, དུཀྑཉྩ མགྒོ ཙ, སམུདཡོ ཙ དུཀྑཉྩ, སམུདཡོ ཙ ནིརོདྷོ ཙ, སམུདཡོ ཙ མགྒོ ཙ, ནིརོདྷོ ཙ སམུདཡོ ཙ, ནིརོདྷོ ཙ དུཀྑཉྩ, ནིརོདྷོ ཙ མགྒོ ཙ, མགྒོ ཙ ནིརོདྷོ ཙ, མགྒོ ཙ སམུདཡོ ཙ, མགྒོ ཙ དུཀྑཉྩ.

‘‘ཡམེཀརཏྟིཾ ¶ [ཛཱཏཀ ༡ ཝཱིསཏིནིཔཱཏེ ཨཡོགྷརཛཱཏཀེ] པཋམཾ, གབྦྷེ ཝསཏི མཱཎཝོ;

ཨབྦྷུཊྛིཏོཝ སོ ཡཱཏི, ས གཙྪཾ ན ནིཝཏྟཏཱི’’ཏི.

ཨཊྛིམཱ, ཨཱནནྡ, དཱནུཔཔཏྟིཡོ ཨེཀུཏྟརིཀེ སུཏྟཾ – ཨཡཾ ཛཱཏི.

ཨཙརིཏྭཱ ¶ [དྷ. པ. ༡༥༥] བྲཧྨཙརིཡཾ, ཨལདྡྷཱ ཡོབྦནེ དྷནཾ;

ཛིཎྞཀོཉྩཱཝ ཛྷཱཡནྟི, ཁཱིཎམཙྪེཝ པལླལེ.

པཉྩ པུབྦནིམིཏྟཱནི དེཝེསུ – ཨཡཾ ཛརཱ.

སཱམཾ ཏེན ཀུཏོ རཱཛ, ཏུཝམྤི ཛརཱཡནྟི ཝེདེསི;

ཁཏྟིཡ ཀམྨསྶ ཕལོ, ལོཀོ ན ཧི ཀམྨཾ པནཡཏི.

ཡཐཱཔི [དཱིགྷནིཀཱཡེ ཨདྷོལིཁིཏགཱཐཱ] ཀུམྦྷཀཱརསྶ, ཀཏཾ མཏྟིཀབྷཱཛནཾ;

ཁུདྡཀཉྩ མཧནྟཉྩ, ཡཾ པཀྐཾ ཡཉྩ ཨཱམཀཾ;

སབྦཾ བྷེདནཔརིཡནྟཾ, ཨེཝཾ མཙྩཱན ཛཱིཝིཏཾ.

མམཱཡིཏེ པསྶཐ ཕནྡམཱནེ [ཧཉྙམཱནེ (པཱི) པསྶ སུ. ནི. ༧༨༣], མཙྪེཝ ཨཔྤོདཀེ ཁཱིཎསོཏེ;

ཨེཏམྤི དིསྭཱ ཨམམོ ཙརེཡྻ, བྷཝེསུ ཨཱསཏྟིམཀུབྦམཱནོ.

ཨིདྷ ¶ སོཙཏི པེཙྩ སོཙཏི, པཱཔཀཱརཱི ཨུབྷཡཏྠ སོཙཏི;

སོ སོཙཏི སོ ཝིཧཉྙཏི, དིསྭཱ ཀམྨཀིལིཊྛམཏྟནོ [ཀམྨཀིལིཊྛཾ ཨཏྠནོ (པཱི.) པསྶ དྷ. པ. ༡༥].

ཀཱམེསུ [སུ. ནི. ༧༨༠] གིདྡྷཱ པསུཏཱ པམཱུལ༹ྷཱ, ཨཝདཱནིཡཱ ཏེ ཝིསམེ ནིཝིཊྛཱ;

དུཀྑཱུཔནཱིཏཱ ¶ པརིདེཝཡནྟི, ཀིཾསུ བྷཝིསྶཱམ ཨིཏོ ཙུཏཱསེ.

སཏཾ ཨཱསི ཨཡོསངྐཱུ [ཨཡོསངྐུ (པཱི. ཀ.) པསྶ ཐེརགཱ. ༡༡༩༧], སབྦེ པཙྩཏྟཝེདནཱ;

ཛལིཏཱ ཛཱཏཝེདཱཝ, ཨཙྩིསངྒྷསམཱཀུལཱ.

མཧཱ ཝཏ སོ པརིལཱ༹ཧོ [པརིདཱགྷོ (པཱི. ཀ.) པསྶ སཾ. ནི. ༥.༡༡༡༣] སཾཡུཏྟཀེ སུཏྟཾ སཙྩསཾཡུཏྟེསུ – ཨིདཾ དུཀྑཾ.

སངྐཔྤེཧི པརེཏོ [པརཏོ (ཀ.) པསྶ སུ. ནི. ༨༢༤] སོ, ཀཔཎོ ཝིཡ ཛྷཱཡཏི;

སུཏྭཱ པརེསཾ ནིགྒྷོསཾ, མངྐུ ཧོཏི ཏཐཱཝིདྷོ.

དྭེམེ ཏཔནཱིཡཱ དྷམྨཱ – ཨིདཾ དོམནསྶཾ.

ཀམྨཱརཱནཾ ཡཐཱ ཨུཀྐཱ, ཨནྟོ ཌཡ྄ཧཏི ནོ བཧི;

ཨེཝཾ ཌཡ྄ཧཏི མེ ཧདཡཾ, སུཏྭཱ ནིབྦཏྟམམྦུཛཾ.

ཨཡསཱཝ ¶ [དྷ. པ. ༢༤༠] མལཾ སམུཊྛིཏཾ, ཏཏུཊྛཱཡ ཏམེཝ ཁཱདཏི;

ཨེཝཾ ཨཏིདྷོནཙཱརིནཾ, སཱནི ཀམྨཱནི ནཡནྟི དུགྒཏིཾ.

དྭེམེ ཏཐཱགཏཾ ཨབྦྷཱཙིཀྑནྟི, ཨེཀུཏྟརིཀེ སུཏྟཾ དུཀེསུ – ཨཡཾ ཨཔྤིཡསམྤཡོགོ.

སུཔིནེན ཡཐཱཔི སངྒཏཾ, པཊིབུདྡྷོ པུརིསོ ན པསྶཏི;

ཨེཝམྤི པིཡཱཡིཏཾ [མམཱཡིཏཾ (པཱི. ཀ.) པསྶ སུ. ནི. ༨༡༣] ཛནཾ, པེཏཾ ཀཱལངྐཏཾ [ཀཱལཀཏཾ (པཱི.)] ན པསྶཏི.

ཏེ དེཝཱ ཙཝནདྷམྨཾ ཝིདིཏྭཱ ཏཱིཧི ཝཱཙཱཧི ཨནུསཱསནྟི. ཨཡཾ པིཡཝིཔྤཡོགོ.

ཡམྤིཙྪཾ ¶ ན ལབྷཏི, ཏིསྶོ མཱརདྷཱིཏརོ;

ཏསྶ ཙེ ཀཱམཡཱནསྶ [ཀཱམཡམཱནསྶ (ཀ.) པསྶ སུ. ནི. ༧༧༣], ཚནྡཛཱཏསྶ ཛནྟུནོ;

ཏེ ཀཱམཱ པརིཧཱཡནྟི, སལླཝིདྡྷོཝ རུཔྤཏི.

སཾཁིཏྟེན པཉྩུཔཱདཱནཀྑནྡྷཱ དུཀྑཱ.

ཙཀྑུ སོཏཉྩ གྷཱནཉྩ, ཛིཝ྄ཧཱ ཀཱཡོ ཏཏོ མནཾ;

ཨེཏེ ལོཀཱམིསཱ གྷོརཱ, ཡཏྠ སཏྟཱ པུཐུཛྫནཱ.

པཉྩིམེ བྷིཀྑཝེ ཁནྡྷཱ – ཨིདཾ དུཀྑཾ.

ཨཔྤཾ ཝཏ ཛཱིཝིཏཾ ཨིདཾ, ཨོརཾ ཝསྶསཏཱཔི མཱིཡཏེ [མཱིཡཏི (སུ. ནི. ༨༡༠)];

ཨཐ ཝཱཔི ཨཀིཙྪཾ ཛཱིཝིཏཾ, ཨཐ ཁོ སོ ཛརསཱཔི མཱིཡཏེ.

སཾཡུཏྟཀེ པསེནདིསཾཡུཏྟཀེ སུཏྟཾ ཨཡྻིཀཱ མེ ཀཱལངྐཏཱ – ཨཡཾ ཛརཱ ཙ མརཎཉྩ.

‘‘སབྦེ ¶ སཏྟཱ མརིསྶནྟི, མརཎནྟཾ ཧི ཛཱིཝིཏཾ;

ཡཐཱཀམྨཾ གམིསྶནྟི, ཨཏྟཀམྨཕལཱུཔགཱ’’ཏི [པུཉྙཔཱཔཕལཱུཔགཱཏི (སཾ. ནི. ༡.༡༣༣)]. –

ཨིམེཧི སུཏྟེཧི ཨེཀསདིསེཧི ཙ ཨཉྙེཧི ནཝཝིདྷཾ སུཏྟཾ ཏཾ ཨནུཔཝིཊྛེཧི ¶ ལཀྑཎཏོ དུཀྑཾ ཉཏྭཱ སཱདྷཱརཎཉྩ ཨསཱདྷཱརཎཉྩ དུཀྑཾ ཨརིཡསཙྩཾ ནིདྡིསིཏབྦཾ. གཱཐཱཧི གཱཐཱ ཨནུམིནིཏབྦཱ, བྱཱཀརཎེཧི ཝཱ བྱཱཀརཎཾ – ཨིདཾ དུཀྑཾ.

ཀཱམེསུ སཏྟཱ ཀཱམསངྒསཏྟཱ [ཀཱམཔསངྒསཏྟཱ (པཱི.) པསྶ ཨུདཱ. ༦༣], སཾཡོཛནེ ཝཛྫམཔསྶམཱནཱ;

ན ཧི ཛཱཏུ སཾཡོཛནསངྒསཏྟཱ, ཨོགྷཾ ཏརེཡྻུཾ ཝིཔུལཾ མཧནྟཾ.

ཙཏྟཱརོ ཨཱསཝཱ སུཏྟཾ – ཨཡཾ དུཀྑསམུདཡོ.

པནུཎྞཀོདྷོ [པནུནྣཀོདྷོ (པཱི.) པསྶ ཨུདཱ. ༢༦] ཨབྷིནིབྦུཏཏྟོ;

དྭེམཱ ཝིམུཏྟིཡོ, རཱགཝིརཱགཱ ཙ ཙེཏོཝིམུཏྟི; ཨཝིཛྫཱཝིརཱགཱ ཙ པཉྙཱཝིམུཏྟི – ཨཡཾ ནིརོདྷོ.

ཨེསེཝ མགྒོ ནཏྠཉྙོ, དསྶནསྶ ཝིསུདྡྷིཡཱ;

ཨརིཡོ ཨཊྛངྒིཀོ མགྒོ, མཱརསྶེཏཾ པམོཧནཾ.

སཏྟིམེ, བྷིཀྑཝེ, བོཛ྄ཛྷངྒཱ – ཨཡཾ མགྒོ.

ཏཏྠ ¶ ཀཏམཱནི ཙཏྟཱརི ཨརིཡསཙྩཱནི?

‘‘ཡེ དྷམྨཱ [མཧཱཝ. ༦༠] ཧེཏུཔྤབྷཝཱ, ཏེསཾ ཧེཏུཾ ཏཐཱགཏོ ཨཱཧ;

ཏེསཉྩ ཡོ ནིརོདྷོ, ཨེཝཾཝཱདཱི མཧཱསམཎོ’’ཏི.

ཧེཏུཔྤབྷཝཱ ¶ དྷམྨཱ དུཀྑཾ, ཧེཏུསམུདཡོ, ཡཾ བྷགཝཏོ ཝཙནཾ. ཨཡཾ དྷམྨོ ཡོ ནིརོདྷོ, ཡེ ཧི ཀེཙི སཾཡོཛནིཡེསུ དྷམྨེསུ ཨསྶདཱནུཔསྶིནོ ཝིཧརནྟི. ཀིལེསཱ ཏཎྷཱ པཝཌྜྷཏི, ཏཎྷཱཔཙྩཡཱ ཨུཔཱདཱནཾ…པེ… ཨེཝམེཏསྶ ཀེཝལསྶ དུཀྑཀྑནྡྷསྶ སམུདཡོ ཧོཏི. ཏཏྠ ཡཾ སཾཡོཛནཾ – ཨཡཾ སམུདཡོ. ཡེ སཾཡོཛནིཡཱ དྷམྨཱ ཡེ ཙ སོཀཔརིདེཝདུཀྑདོམནསྶུཔཱཡཱསཱ སམྦྷཝནྟི – ཨིདཾ དུཀྑཾ. ཡཱ སཾཡོཛནིཡེསུ དྷམྨེསུ ཨཱདཱིནཝཱནུཔསྶནཱ – ཨཡཾ མགྒོ. པརིམུཙྩཏི ཛཱཏིཡཱ ཛརཱཡ བྱཱདྷཱིཧི མརཎེཧི སོཀེཧི པརིདེཝེཧི ཡཱཝ ཨུཔཱཡཱསེཧི – ཨིདཾ ནིབྦཱནཾ. ཨིམཱནི ཙཏྟཱརི སཙྩཱནི.

ཏཏྠ ཀཏམཱ ཨནུཔཱདིསེསཱ ནིབྦཱནདྷཱཏུ?

ཨཏྠངྒཏསྶ ན པམཱཎམཏྠི, ཏཾ ཧི ཝཱ ནཏྠི ཡེན ནཾ པཉྙཔེཡྻ;

སབྦསངྒཱནཾ སམཱུཧཏཏྟཱ ཝིདཱུ, སིཏཱ ཝཱདསཏསྶུ [ཝཱདསཏསྶ (པཱི. ཀ.)] སབྦེ.

ཨིམཱནི ¶ ཨསཱདྷཱརཎཱནི སུཏྟཱནི. ཡཧིཾ ཡཧིཾ སཙྩཱནི ནིདྡིཊྛཱནི, ཏཧིཾ ཏཧིཾ སཙྩལཀྑཎཏོ ཨོཏཱརེཏྭཱ [ཨོཧཱརེཏྭཱ (པཱི. ཀ.)] ཨཔརིམཱཎེཧི བྱཉྫནེཧི སོ ཨཏྠོ པརིཡེསིཏབྦོ. ཏཏྠ ཨཏྠཱནུཔརིཝཏྟི བྱཉྫནེན པུན བྱཉྫནཱནུཔརིཝཏྟི ཨཏྠེན ཏསྶ ཨེཀམེཀསྶ ཨཔརིམཱཎཱནི བྱཉྫནཱནི ཨིམེཧི སུཏྟེཧི ཡཐཱནིཀྑིཏྟེཧི ཙཏྟཱརི ཨརིཡསཙྩཱནི ནིདྡིསིཏབྦཱནི. པཉྩནིཀཱཡེ ཨནུཔཝིཊྛཱཧི གཱཐཱཧི གཱཐཱ ཨནུམིནིཏབྦཱ, བྱཱཀརཎེན བྱཱཀརཎཾ. ཨིམཱནི ཨསཱདྷཱརཎཱནི སུཏྟཱནི.

ཡམེཀརཏྟིཾ པཋམཾ, ཨཊྛ དཱནཱུཔཔཏྟིཡོ;

པཉྩ པུབྦནིམིཏྟཱནི, ཁཱིཎམཙྪཾཝ པལླལཾ.

སཱམཾ ¶ ཏེན ཀུཏོ རཱཛ, ཏཡོ དེཝཱ གིལཱནཀཱ;

ཡཐཱཔི ཀུམྦྷཀཱརསྶ, ཡཐཱ ནདིདཀཔྤནཾ.

ཨིདྷ སོཙཏི པེཙྩ སོཙཏི, ཏཱིཎི དུཙྩརིཏཱནི ཙ;

ཀཱམེསུ གིདྡྷཱ པསུཏཱ, ཡཱཝ ཏིསྶོ ཝིཔཏྟིཡོ.

སཏཾ ཨཱསི [སཏམཱཡུ (སཱི.), སཏདྷཱཏུ (པཱི.)] ཨཡོསངྐཱུ, པརིལཱ༹ཧོ མཧཏྟརོ;

སངྐཔྤེཧི པརེཏོ སོ, ཏཏྠ ཏཔནིཡེཧི ཙ.

ཀམྨཱརཱནཾ ཡཐཱ ཨུཀྐཱ, ཏཡོ ཨགྒཱི པཀཱསིཏཱ;

ཨཡཏོ མལམུཔྤནྣཾ, ཨབྦྷཀྑཱནཾ ཏཐཱགཏེ.

ཏིཝིདྷཾ དེཝཱནུསཱསནྟི, སུཔིནེན སངྒམོ ཡཐཱ;

ཏིསྶོ ཙེཝ མཱརདྷཱིཏཱ, སལླཝིདྡྷོཝ རུཔྤཏི.

ཙཀྑུ སོཏཉྩ གྷཱནཉྩ, པཉྩཀྑནྡྷཱ པཀཱསིཏཱ;

ཨཔྤཾ ཝཏ ཛཱིཝིཏཾ ཨིདཾ, ཨཡྻིཀཱ མེ མཧལླིཀཱ.

སབྦེ སཏྟཱ མརིསྶནྟི, ཨུཔཔཏྟི ཙུཏིཙཡཾ;

ཀཱམེསུ སཏྟཱ པསུཏཱ, ཨཱསཝེཧི ཙཏཱུཧི ཙ.

ཡམྷི ན མཱཡཱ ཝསཏི, དྭེམཱ ཙེཏོཝིམུཏྟིཡོ;

ཨེསེཝ མགྒོ ནཏྠཉྙོ, བོཛ྄ཛྷངྒཱ ཙ སུདེསིཏཱ.

ཨཏྠངྒཏསྶ ¶ ན པམཱཎམཏྠི, གོདྷིཀོ པརིནིབྦུཏོ;

ཡེ དྷམྨཱ ཧེཏུཔྤབྷཝཱ, སཾཡོཛནཱནུཔསྶིནོ.

༡༠. ཏཏྠིམཱནི ¶ སཱདྷཱརཎཱནི སུཏྟཱནི ཡེསུ སུཏྟེསུ སཱདྷཱརཎཱནི སཙྩཱནི དེསིཏཱནི ཨནུལོམམྤི པཊིལོམམྤི ཝོམིསྶཀམྤི. ཏཏྠ ཨཡཾ ཨཱདི.

ཨཝིཛྫཱཡ ¶ ནིཝུཏོ ལོཀོ, [ཨཛིཏཱཏི བྷགཝཱ]

ཛཔྤཱབྷིལེཔནཾ [ཛཔྤཱནུལེཔནཾ (ཀ.) པསྶ སུ. ནི. ༡༠༣༩] བྲཱུམི, དུཀྑམསྶ མཧབྦྷཡཾ.

ཏཏྠ ཡཱ ཨཝིཛྫཱ ཙ ཝིཝིཙྪཱ ཙ, ཨཡཾ སམུདཡོ. ཡཾ མཧབྦྷཡཾ, ཨིདཾ དུཀྑཾ. ཨིམཱནི དྭེ སཙྩཱནི – དུཀྑཉྩ སམུདཡོ ཙ. ‘‘སཾཡོཛནཾ སཾཡོཛནིཡཱ ཙ དྷམྨཱ’’ཏི སཾཡུཏྟཀེ ཙིཏྟསཾཡུཏྟཀེསུ བྱཱཀརཎཾ. ཏཏྠ ཡཾ སཾཡོཛནཾ, ཨཡཾ སམུདཡོ. ཡེ སཾཡོཛནིཡཱ དྷམྨཱ, ཨིདཾ དུཀྑཾ. ཨིམཱནི དྭེ སཙྩཱནི – དུཀྑཉྩ སམུདཡོ ཙ.

ཨུཙྪིནྣབྷཝཏཎྷསྶ, ནེཏྟིཙྪིནྣསྶ [སནྟཙིཏྟསྶ (སུ. ནི. ༧༥༡)] བྷིཀྑུནོ;

ཝིཀྑཱིཎོ ཛཱཏིསཾསཱརོ, ནཏྠི དཱནི པུནབྦྷཝོ.

ཡཾ ཙིཏྟཾ, ཨིདཾ དུཀྑཾ. ཡོ བྷཝཏཎྷཱཡ ཨུཔཙྪེདོ, ཨཡཾ དུཀྑནིརོདྷོ. ཝིཀྑཱིཎོ ཛཱཏིསཾསཱརོ, ནཏྠི དཱནི པུནབྦྷཝོཏི ནིདྡེསོ. ཨིམཱནི དྭེ སཙྩཱནི – དུཀྑཉྩ ནིརོདྷོ ཙ. དྭེམཱ, བྷིཀྑཝེ, ཝིམུཏྟིཡོ; རཱགཝིརཱགཱ ཙ ཙེཏོཝིམུཏྟི, ཨཝིཛྫཱཝིརཱགཱ ཙ པཉྙཱཝིམུཏྟི. ཡཾ ཙིཏྟཾ, ཨིདཾ དུཀྑཾ. ཡཱ ཝིམུཏྟི, ཨཡཾ ནིརོདྷོ. ཨིམཱནི དྭེ སཙྩཱནི – དུཀྑཉྩ ནིརོདྷོ ཙ.

ཀུམྦྷཱུཔམཾ [དྷ. པ. ༤༠] ཀཱཡམིམཾ ཝིདིཏྭཱ, ནགརཱུཔམཾ ཙིཏྟམིདཾ ཋཔེཏྭཱ;

ཡོདྷེཐ མཱརཾ པཉྙཱཝུདྷེན, ཛིཏཉྩ རཀྑེ ཨནིཝེསནོ སིཡཱ.

ཏཏྠ ¶ ཡཉྩ ཀུམྦྷཱུཔམོ ཀཱཡོ ཡཉྩ ནགརཱུཔམཾ ཙིཏྟཾ, ཨིདཾ དུཀྑཾ. ཡཾ པཉྙཱཝུདྷེན མཱརཾ ཡོདྷེཐཱཏི ཨཡཾ མགྒོ. ཨིམཱནི དྭེ སཙྩཱནི. ཡཾ, བྷིཀྑཝེ, ན ཏུམྷཱཀཾ, ཏཾ པཛཧིཏབྦཾ. ཡཱ སཾཡོཛནཱ, ཨཡཾ མགྒོ. ཡེ ཏེ དྷམྨཱ ཨནཏྟནིཡཱ པཧཱཏབྦཱ, རཱུཔཾ ཡཱཝ ཝིཉྙཱཎཾ, ཨིདཾ དུཀྑཉྩ མགྒོ ཙ.

ཏཏྠ ཀཏམཾ དུཀྑཉྩ སམུདཡོ ཙ ནིརོདྷོ ཙ?

ཡེ ¶ ཀེཙི སོཀཱ པརིདེཝིཏཱ ཝཱ, དུཀྑཱ ཙ [དུཀྑཉྩ (པཱི. ཀ.) པསྶ ཨུདཱ. ༧༠] ལོཀསྨིམནེཀརཱུཔཱ;

པིཡཾ པཊིཙྩཔྤབྷཝནྟི ཨེཏེ, པིཡེ ཨསནྟེ ན བྷཝནྟི ཨེཏེ.

ཡེ སོཀཔརིདེཝཱ, ཡཾ ཙ ཨནེཀརཱུཔཾ དུཀྑཾ, ཡཾ པེམཏོ བྷཝཏི, ཨིདཾ དུཀྑཾ. ཡཾ པེམཾ, ཨཡཾ སམུདཡོ. ཡོ ཏཏྠ ཚནྡརཱགཝིནཡོ པིཡསྶ ཨཀིརིཡཱ, ཨཡཾ ནིརོདྷོ. ཨིམཱནི ཏཱིཎི སཙྩཱནི. ཏིམྦརུཀོ པརིབྦཱཛཀོ པཙྩེཏི ‘‘སཡཾཀཏཾ པརཾཀཏ’’ནྟི. ཡཐེསཱ ཝཱིམཾསཱ, ཨིདཾ དུཀྑཾ. ཡཱ ¶ ཨེཏེ དྭེ ཨནྟེ ཨནུཔགམྨ མཛ྄ཛྷིམཱ པཊིཔདཱ ཨཝིཛྫཱཔཙྩཡཱ སངྑཱརཱ ཡཱཝ ཛཱཏིཔཙྩཡཱ ཛརཱམརཎཾ, ཨིདམྤི དུཀྑཉྩ སམུདཡོ ཙ. ཝིཉྙཱཎཾ ནཱམརཱུཔཾ སལཱ༹ཡཏནཾ ཕསྶོ ཝེདནཱ བྷཝོ ཛཱཏི ཛརཱམརཎཾ, ཨིདཾ དུཀྑཾ. ཨཝིཛྫཱ སངྑཱརཱ ཏཎྷཱ ཨུཔཱདཱནཾ, ཨཡཾ སམུདཡོ. ཨིཏི ཨིདཾ སཡཾཀཏཾ ཝཱིམཾསེཡྻཱཏི [ཝཱིམཾསཱིཡཏི (པཱི. ཀ.)] ཡཉྩ པཊིཙྩསམུཔྤཱདེ དུཀྑཾ, ཨིདཾ ཨེསོ སམུདཡོ ནིདྡིཊྛོ. ཨཝིཛྫཱནིརོདྷཱ སངྑཱརནིརོདྷོ ཙ ཡཱཝ ཙ ཛརཱམརཎནིརོདྷོཏི ཨཡཾ ནིརོདྷོ. ཨིམཱནི ཏཱིཎི སཙྩཱནི དུཀྑཉྩ སམུདཡོ ཙ ནིརོདྷོ ཙ.

༡༡. ཏཏྠ ཀཏམཾ དུཀྑཉྩ སམུདཡོ ཙ མགྒོ ཙ?

‘‘ཡོ དུཀྑམདྡཀྑི [སཾ. ནི. ༡.༡༥༧] ཡཏོནིདཱནཾ, ཀཱམེསུ སོ ཛནྟུ ཀཐཾ ནམེཡྻ;

ཀཱམཱ ཧི ལོཀེ སངྒཱཏི ཉཏྭཱ, ཏེསཾ སཏཱིམཱ ཝིནཡཱཡ སིཀྑེ’’ཏི.

ཡོ ¶ དུཀྑམདྡཀྑི, ཨིདཾ དུཀྑཾ. ཡཏོ བྷཝཏི, ཨཡཾ སམུདཡོ. སནྡིཊྛཾ ཡཏོ བྷཝཏི ཡཱཝ ཏསྶ ཝིནཡཱཡ སིཀྑཱ, ཨཡཾ མགྒོ. ཨིམཱནི ཏཱིཎི སཙྩཱནི.

ཨེཀཱདསངྒུཏྟརེསུ གོཔཱལཀོཔམསུཏྟཾ.

ཏཏྠ ཡཱཝ རཱུཔསཉྙུཏྟཱ ཡཉྩ སལཱ༹ཡཏནཾ ཡཐཱ ཝཎཾ པཊིཙྪཱདེཏི ཡཉྩ ཏིཏྠཾ ཡཐཱ ཙ ལབྷཏི དྷམྨཱུཔསཉྷིཏཾ ཨུལཱ༹རཾ པཱིཏིཔཱམོཛྫཾ ཙཏུབྦིདྷཾ ཙ ཨཏྟབྷཱཝཏོ ¶ ཙ ཝཏྠུ, ཨིདཾ དུཀྑཾ. ཡཱཝ ཨཱསཱཊིཀཾ ཧཱརེཏཱ [སཱཊེཏཱ (སཱི. པཱི.) པསྶ ཨངྒུཏྟརནིཀཱཡེ] ཧོཏི, ཨཡཾ སམུདཡོ. རཱུཔསཉྙུཏྟཱ ཨཱསཱཊཀཧརཎཾ [ཨཱསཱཊིཀསཱཊནཱ (པཱི.)] ཝཎཔཊིཙྪཱདནཾ ཝཱིཐིཉྙུཏཱ གོཙརཀུསལཉྩ, ཨཡཾ མགྒོ. ཨཝསེསཱ དྷམྨཱ ཨཏྠི ཧེཏཱུ ཨཏྠི པཙྩཡཱ ཨཏྠི ནིསྶཡཱ སཱཝསེསདོཧིཏཱ ཨནེཀཔཱུཛཱ ཙ ཀལྱཱཎམིཏྟཏཔྤཙྩཡཱ དྷམྨཱ ཝཱིཐིཉྙུཏཱ ཙ ཧེཏུ, ཨིམཱནི ཏཱིཎི སཙྩཱནི.

ཏཏྠ ¶ ཀཏམཾ དུཀྑཉྩ མགྒོ ཙ ནིརོདྷོ ཙ?

སཏི ཀཱཡགཏཱ ཨུཔཊྛིཏཱ, ཚསུ ཕསྶཱཡཏནེསུ སཾཝུཏོ [སཾཝརོ (པཱི. ཀ.) པསྶ ཨུདཱ. ༢༥];

སཏཏཾ བྷིཀྑུ སམཱཧིཏོ, ཛཉྙཱ [ཛཱནེཡྻ (པཱི. ཀ.)] ནིབྦཱནམཏྟནོ.

ཏཏྠ ཡཱ ཙ ཀཱཡགཏཱ སཏི ཡཉྩ སལཱ༹ཡཏནཾ ཡཏྠ སབྦཉྩེཏཾ དུཀྑཾ. ཡཱ ཙ ཀཱཡགཏཱ སཏི ཡོ ཙ སཱིལསཾཝརོ ཡོ ཙ སམཱདྷི ཡཏྠ ཡཱ སཏི, ཨཡཾ པཉྙཱཀྑནྡྷོ. སབྦམྤི སཱིལཀྑནྡྷོ སམཱདྷིཀྑནྡྷོ, ཨཡཾ མགྒོ. ཨེཝཾཝིཧཱརིནཱ ཉཱཏབྦཾ ནིབྦཱནཾ. ཨཡཾ ནིརོདྷོ, ཨིམཱནི ཏཱིཎི སཙྩཱནི. སཱིལེ པཏིཊྛཱཡ དྭེ དྷམྨཱ བྷཱཝེཏབྦཱ སམཐོ ཙ ཝིཔསྶནཱ ཙ. ཏཏྠ ཡཾ ཙིཏྟསཧཛཱཏཱ དྷམྨཱ, ཨིདཾ དུཀྑཾ. ཡོ ཙ སམཐོ ¶ ཡཱ ཙ ཝིཔསྶནཱ, ཨཡཾ མགྒོ. རཱགཝིརཱགཱ ཙ ཙེཏོཝིམུཏྟི, ཨཝིཛྫཱཝིརཱགཱ ཙ པཉྙཱཝིམུཏྟི, ཨཡཾ ནིརོདྷོ. ཨིམཱནི ཏཱིཎི སཙྩཱནི.

ཨཱསཱ ཙ པཱིཧཱ ཨབྷིནནྡནཱ ཙ, ཨནེཀདྷཱཏཱུསུ སརཱ པཏིཊྛིཏཱ;

ཨཉྙཱཎམཱུལཔྤབྷཝཱ པཛཔྤིཏཱ, སབྦཱ མཡཱ བྱནྟིཀཏཱ སམཱུལིཀཱ.

ཨཉྙཱཎམཱུལཔྤབྷཝཱཏི པུརིམཀེཧི སམུདཡོ. སབྦཱ མཡཱ བྱནྟིཀཏཱ སམཱུལིཀཱཏི ནིརོདྷོ. ཨིམཱནི དྭེ སཙྩཱནི. ཙཏུནྣཾ དྷམྨཱནཾ ཨནནུབོདྷཱ ཨཔྤཊིཝེདྷཱ ཝིཏྠཱརེན ཀཱཏབྦཾ. ཨརིཡསྶ སཱིལསྶ སམཱདྷིནོ པཉྙཱཡ ཝིམུཏྟིཡཱ. ཏཏྠ ཡོ ཨིམེསཾ ཙཏུནྣཾ དྷམྨཱནཾ ཨནནུབོདྷཱ ཨཔྤཊིཝེདྷཱ, ཨཡཾ སམུདཡོ. པཊིཝེདྷོ བྷཝནེཏྟིཡཱ, ཨཡཾ ནིརོདྷོ. ཨཡཾ སམུདཡོ ཙ ནིརོདྷོ ཙ.

ཡཱནི [སུ. ནི. ༡༠༤༡] སོཏཱནི ལོཀསྨིཾ, [ཨཛིཏཱཏི བྷགཝཱ]

སོཏཱནཾ སཾཝརཾ བྲཱུམི, པཉྙཱཡེཏེ པིདྷཱིཡརེ.

ཡཱནི ¶ སོཏཱནཱིཏི ཨཡཾ སམུདཡོ. ཡཱ ཙ པཉྙཱ ཡཱ ཙ སཏི ནིཝཱརཎཾ པིདྷཱནཉྩ, ཨཡཾ མགྒོ. ཨིམཱནི དྭེ སཙྩཱནི. སཉྩེཏནིཡཾ སུཏྟཾ དལ༹ྷནེམིཡཱནཱཀཱརོ ཚཧི མཱསེཧི ནིདྡིཊྛོ. ཏཏྠ ཡཾ ཀཱཡཾ ཀཱཡཀམྨཾ སཝངྐཾ སདོསཾ སཀསཱཝཾ ཡཱ སཝངྐཏཱ ¶ སདོསཏཱ སཀསཱཝཏཱ, ཨཡཾ སམུདཡོ. ཨེཝཾ ཝཙཱིཀམྨཾ མནོཀམྨཾ ཨཝངྐཾ ཨདོསཾ ཨཀསཱཝཾ, ཡཱ ཨཝངྐཏཱ ཨདོསཏཱ ཨཀསཱཝཏཱ, ཨཡཾ མགྒོ. ཨེཝཾ ཝཙཱིཀམྨཾ མནོཀམྨཾ. ཨིམཱནི དྭེ སཙྩཱནི སམུདཡོ ཙ མགྒོ ཙ.

ཏཏྠ ཀཏམོ སམུདཡོ ཙ ནིརོདྷོ ཙ མགྒོ ཙ?

‘‘ནིསྶིཏསྶ ཙལིཏཾ, ཨནིསྶིཏསྶ ཙལིཏཾ ནཏྠི, ཙལིཏེ ཨསཏི པསྶདྡྷི, པསྶདྡྷིཡཱ སཏི ནཏི ན ཧོཏི, ནཏིཡཱ ཨསཏི [ཨསཏིཡཱ (པཱི.) པསྶ ཨུདཱ. ༧༤] ཨཱགཏིགཏི ན ཧོཏི, ཨཱགཏིགཏིཡཱ ཨསཏི ཙུཏཱུཔཔཱཏོ ན ཧོཏི, ཙུཏཱུཔཔཱཏེ ཨསཏི ནེཝིདྷ ན ཧུརཾ ན ཨུབྷཡམནྟརེན. ཨེསེཝནྟོ དུཀྑསྶཱ’’ཏི.

ཏཏྠ ¶ དྭེ ནིསྶཡཱ, ཨཡཾ སམུདཡོ. ཡོ ཙ ཨནིསྶཡོ, ཡཱ ཙ ཨནཏི, ཨཡཾ མགྒོ. ཡཱ ཨཱགཏིགཏི ན ཧོཏི ཙུཏཱུཔཔཱཏོ ཙ ཡོ ཨེསེཝནྟོ དུཀྑསྶཱཏི, ཨཡཾ ནིརོདྷོ. ཨིམཱནི ཏཱིཎི སཙྩཱནི. ཨནུཔཊྛིཏཀཱཡགཏཱ སཏི…པེ… ཡཾ ཝིམུཏྟིཉཱཎདསྶནཾ, ཨཡཾ སམུདཡོ. ཨེཀཱརསཨུཔནིསྶཡཱ ཝིམུཏྟིཡོ ཡཱཝ ཨུཔནིསྶཡཨུཔསམྤདཱ ཨུཔཊྛིཏཀཱཡགཏཱསཏིསྶ ཝིཧརཏི. སཱིལསཾཝརོ སོསཱནིཡོ ཧོཏི, ཡཉྩ ཝིམུཏྟིཉཱཎདསྶནཾ, ཨཡཾ མགྒོ. ཡཱ ཙ ཝིམུཏྟི, ཨཡཾ ནིརོདྷོ. ཨིམཱནི ཏཱིཎི སཙྩཱནི. སམུདཡོ ཙ ནིརོདྷོ ཙ མགྒོ ཙ.

སཡཾ ¶ ཀཏེན སཙྩེན, ཏེན ཨཏྟནཱ ཨབྷིནིབྦཱནགཏོ ཝིཏིཎྞཀངྑོ;

ཝིབྷཝཉྩ ཉཏྭཱ ལོཀསྨིཾ, ཏཱཝ ཁཱིཎཔུནབྦྷཝོ ས བྷིཀྑུ.

ཡཾ སཙྩེན, ཨཡཾ མགྒོ. ཡཾ ཁཱིཎཔུནབྦྷཝོ, ཨཡཾ ནིརོདྷོ. ཨིམཱནི དྭེ སཙྩཱནི. པཉྩ ཝིམུཏྟཱཡཏནཱནི སཏྠཱ ཝཱ དྷམྨཾ དེསེསི ཨཉྙཏརོ ཝཱ ཝིཉྙཱུ སབྲཧྨཙཱརཱིཏི ཝིཏྠཱརེན ཀཱཏབྦཱ. ཏསྶ ཨཏྠཔྤཊིསཾཝེདིསྶ པཱམོཛྫཾ ཛཱཡཏི, པམུདིཏསྶ པཱིཏི ཛཱཡཏི, ཡཱཝ ནིབྦིནྡནྟོ ¶ ཝིརཛྫཏི, ཨཡཾ མགྒོ. ཡཱ ཝིམུཏྟི, ཨཡཾ ནིརོདྷོ. ཨེཝཾ པཉྩ ཝིམུཏྟཱཡཏནཱནི ཝིཏྠཱརེན. ཨིམཱནི དྭེ སཙྩཱནི ནིརོདྷོ ཙ མགྒོ ཙ.

ཨིམཱནི སཱདྷཱརཎཱནི སུཏྟཱནི. ཨིམེཧི སཱདྷཱརཎེཧི སུཏྟེཧི ཡཐཱནིཀྑིཏྟེཧི པཊིཝེདྷཏོ ཙ ལཀྑཎཏོ ཙ ཨོཏཱརེཏྭཱ ཨཉྙཱནི སུཏྟཱནི ནིདྡིསིཏབྦཱནི ཨཔརིཧཱཡནྟེན. གཱཐཱཧི གཱཐཱ ཨནུམིནིཏབྦཱ, བྱཱཀརཎེཧི བྱཱཀརཎཾ. ཨིམེ ཙ སཱདྷཱརཎཱ དས པརིཝཌྜྷཀཱ ཨེཀོ ཙ ཙཏུཀྐོ ནིདྡེསོ སཱདྷཱརཎོ. ཨཡཉྩ པཀིཎྞཀནིདྡེསོ. ཨེཀཾ པཉྩ ཚ ཙ སཝེཀདེསོ སབྦཾ. ཨིམེ དྭེ པརིཝཛྫནཱ པུརིམཀཱ ཙ དས. ཨིམེ དྭཱདས པརིཝཌྜྷཀཱ སཙྩཱནི. ཨེཏྟཱཝཏཱ སབྦཾ སུཏྟཾ ནཏྠི, ཏཾ བྱཱཀརཎཾ ཝཱ གཱཐཱ ཝིཡ. ཨིམེཧི དྭཱདསཧི པརིཝཌྜྷཀེཧི ན ཨོཏརིཏུཾ ཨཔྤམཏྟེན པརིཡེསིཏྭཱ ནིདྡིསིཏབྦཱ.

ཏཏྠཱཡཾ སངྑེཔོ. སབྦཾ དུཀྑཾ སཏྟཧི པདེཧི སམོསརཎཾ གཙྪཏི. ཀཏརེཧི སཏྟཧི? ཨཔྤིཡསམྤཡོགོ ཙ པིཡཝིཔྤཡོགོ ཙ, ཨིམེཧི དྭཱིཧི ¶ པདེཧི སབྦཾ དུཀྑཾ ནིདྡིསིཏབྦཾ. ཏསྶ དྭེ ནིསྶཡཱ – ཀཱཡོ ཙ ཙིཏྟཉྩ ¶ . ཏེན ཝུཙྩཏི ‘‘ཀཱཡིཀཾ དུཀྑཾ ཙེཏསིཀཉྩེ’’ཏི, ནཏྠི ཏཾ དུཀྑཾ ན ཀཱཡིཀཾ ཝཱ ན ཙེཏསིཀཾ, སབྦཾ དུཀྑཾ དྭཱིཧི དུཀྑེཧི ནིདྡིསིཏབྦཾ ཀཱཡིཀེན ཙ ཙེཏསིཀེན ཙ. ཏཱིཧི དུཀྑཏཱཧི སངྒཧིཏཾ དུཀྑདུཀྑཏཱཡ སངྑཱརདུཀྑཏཱཡ ཝིཔརིཎཱམདུཀྑཏཱཡ. ཨིཏི ཏཾ སབྦཾ དུཀྑཾ ཏཱིཧི དུཀྑཏཱཧི སངྒཧིཏཾ. ཨིཏི ཨིདཉྩ དུཀྑཾ ཏིཝིདྷཾ. དུཝིདྷཾ དུཀྑཾ ཀཱཡིཀཉྩ ཙེཏསིཀཉྩ. དུཝིདྷཾ ཨཔྤིཡསམྤཡོགོ ཙ པིཡཝིཔྤཡོགོ ཙ. ཨིདཾ སཏྟཝིདྷཾ དུཀྑཾ.

ཏཏྠ ཏིཝིདྷོ སམུདཡོ ཨཙཏུཏྠོ ཨཔཉྩམོ. ཀཏམོ ཏིཝིདྷོ? ཏཎྷཱ ཙ དིཊྛི ཙ ཀམྨཾ. ཏཏྠ ཏཎྷཱ ཙ བྷཝསམུདཡོ ཀམྨཾ. ཏཐཱ [ཏཏྠ (པཱི.)] ནིབྦཏྟསྶ ཧཱིནཔཎཱིཏཏཱ [ཧཱིནཔཎཱིཏཏཱཡ (པཱི.)], ཨཡཾ སམུདཡོ. ཨིཏི ཡཱཔི བྷཝགཏཱིསུ ཧཱིནཏཱ ཙ པཎཱིཏཏཱ ཙ, ཡཱཔི ཏཱིཧི དུཀྑཏཱཧི སངྒཧིཏཱ, ཡོཔི དྭཱིཧི མཱུལེཧི སམུདཱནཱིཏོ ཨཝིཛྫཱཡ ནིཝུཏསྶ བྷཝཏཎྷཱསཾཡུཏྟསྶ སཝིཉྙཱཎཀོ ཀཱཡོ, སོཔི ཏཱིཧི དུཀྑཏཱཧི སངྒཧིཏོ.

ཏཐཱ ཝིཔལླཱསཏོ དིཊྛིབྷཝགནྟབྦཱ. སཱ སཏྟཝིདྷཱ ནིདྡིསིཏབྦཱ. ཨེཀོ ཝིཔལླཱསོ ཏཱིཎི ནིདྡིསཱིཡཏི, ཙཏྟཱརི ཝིཔལླཱསཝཏྠཱུནི. ཏཏྠ ཀཏམོ ཨེཀོ ཝིཔལླཱསོ? ཡོ ཝིཔརཱིཏགྒཱཧོ པཊིཀྑེཔེན, ཨོཏརཎཾ ཡཐཱ ‘‘ཨནིཙྩེ ནིཙྩ’’མིཏི ཝིཔརཱིཏཾ གཎྷཱཏི. ཨེཝཾ ཙཏྟཱརོ ཝིཔལླཱསཱ. ཨཡམེཀོ ཝིཔལླཱསཱིཡཏི སཉྙཱ ཙིཏྟཾ དིཊྛི. ཀཏམཱནི ཙཏྟཱརི ཝིཔལླཱསཝཏྠཱུནི ¶ ? ཀཱཡོ ¶ ཝེདནཱ ཙིཏྟཾ དྷམྨཱ. ཨེཝཾ ཝིཔལླཱསགཏསྶ ཨཀུསལཉྩ པཝཌྜྷེཏི. ཏཏྠ སཉྙཱཝིཔལླཱསོ དོསཾ ཨཀུསལམཱུལཾ པཝཌྜྷེཏི. ཙིཏྟཝིཔལླཱསོ ལོབྷཾ ཨཀུསལམཱུལཾ པཝཌྜྷེཏི. དིཊྛིཝིཔལླཱསོ མོཧཾ ཨཀུསལམཱུལཾ པཝཌྜྷེཏི. ཏཏྠ དོསསྶ ཨཀུསལམཱུལསྶ ཏཱིཎི མིཙྪཏྟཱནི ཕལཾ – མིཙྪཱཝཱཙཱ མིཙྪཱཀམྨནྟོ མིཙྪཱཨཱཛཱིཝོ; ལོབྷསྶ ཨཀུསལམཱུལསྶ ཏཱིཎི མིཙྪཏྟཱནི ཕལཾ – མིཙྪཱསངྐཔྤོ མིཙྪཱཝཱཡཱམོ མིཙྪཱསམཱདྷི; མོཧསྶ ཨཀུསལམཱུལསྶ དྭེ མིཙྪཏྟཱནི ཕལཾ – མིཙྪཱདིཊྛི ཙ མིཙྪཱསཏི ཙ. ཨེཝཾ ཨཀུསལཾ སཧེཏུ སཔྤཙྩཡཾ ཝིཔལླཱསཱ ཙ པཙྩཡོ, ཨཀུསལམཱུལཱནི སཧེཏཱུ ཨེཏེཡེཝ པཊིཔཀྑེན ཨནཱུནཱ ཨནདྷིཀཱ དྭཱིཧི པཙྩཡེཧི ནིདྡིསིཏབྦཱ. ནིརོདྷེ ཙ མགྒེ ཙ ཝིཔལླཱསམུཔཱདཱཡ པརཏོ [པརིཏོ (པཱི.)] པཊིཔཀྑེན ཙཏསྶོ.

ཨཝིཛྫཱཡ ¶ ནིཝུཏོ ལོཀོ, ཙིཏྟཾ སཾཡོཛནམྤི;

སཱ པཙྪིནྣབྷཝཏཎྷཱ, དྭེམཱ ཙེཝ ཝིམུཏྟིཡོ.

ཀུམྦྷཱུཔམཾ ཀཱཡམིམཾ, ཡཾ ན ཏུམྷཱཀཾ ཏཾ པཛཧ [ཛཧཱ (པཱི. ཀ.)];

ཡེ ཀེཙི སོཀཔརིདེཝཱ, ཏིམྦརུཀོ ཙ སཡཾཀཏཾ.

དུཀྑཾ དིཊྛི ཙ ཨུཔྤནྣཾ, ཡཉྩ གོཔཱལཀོཔམཾ;

སཏི ཀཱཡགཏཱ མཱཧུ, སམཐོ ཙ ཝིཔསྶནཱ.

ཨཱསཱ པིཧཱ ཙ ཨབྷིནནྡནཱ ཙ, ཙཏུནྣམནནུབོདྷནཱ;

ཡཱནི ¶ སོཏཱནི ལོཀསྨིཾ, དལ༹ྷཾ ནེམིཡཱནཱཀཱརོ.

ཡཾ ནིསྶིཏསྶ ཙལིཏཾ, ཨནུཔཊྛིཏཀཱཡགཏཱསཏི;

སཡཾ ཀཏེན སཙྩེན, ཝིམུཏྟཱཡཏནེཧི ཙ.

པེཊཀོཔདེསེ མཧཱཀཙྩཱཡནེན བྷཱསིཏེ པཋམབྷཱུམི ཨརིཡསཙྩཔྤཀཱསནཱ ནཱཏཾ ཛཱིཝཏཱ བྷགཝཏཱ མཱདིསེན སམུདྡནེན ཏཐཱགཏེནཱཏི.

༡༣. ཏཏྠ ¶ ¶ ཀཏམཾ སཱསནཔྤཊྛཱནཾ? སཾཀིལེསབྷཱགིཡཾ སུཏྟཾ, ཝཱསནཱ བྷཱགིཡཾ སུཏྟཾ, ནིབྦེདྷབྷཱགིཡཾ སུཏྟཾ, ཨསེཀྑབྷཱགིཡཾ སུཏྟཾ, སཾཀིལེསབྷཱགིཡཉྩ ཝཱསནཱབྷཱགིཡཉྩ, སཾཀིལེསབྷཱགིཡཉྩ ནིབྦེདྷབྷཱགིཡཉྩ, སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ, ཝཱསནཱབྷཱགིཡཉྩ ནིབྦེདྷབྷཱགིཡཉྩ. ཨཱཎཏྟི, ཕལཾ, ཨུཔཱཡོ, ཨཱཎཏྟི ཙ ཕལཉྩ, ཕལཉྩ ཨུཔཱཡོ ཙ, ཨཱཎཏྟི ཙ ཕལཉྩ ཨུཔཱཡོ ཙ. ཨསྶཱདོ, ཨཱདཱིནཝོ, ནིསྶརཎཾ, ཨསྶཱདོ ཙ ཨཱདཱིནཝོ ཙ, ཨསྶཱདོ ཙ ནིསྶརཎཉྩ, ཨཱདཱིནཝོ ཙ ནིསྶརཎཉྩ, ཨསྶཱདོ ཙ ཨཱདཱིནཝོ ཙ ནིསྶརཎཉྩ. ལོཀིཀཾ, ལོཀུཏྟརཾ, ལོཀིཀཉྩ ལོཀུཏྟརཉྩ. ཀམྨཾ, ཝིཔཱཀོ, ཀམྨཉྩ ཝིཔཱཀོ ཙ. ནིདྡིཊྛཾ, ཨནིདྡིཊྛཾ, ནིདྡིཊྛཉྩ ཨནིདྡིཊྛཉྩ. ཉཱཎཾ, ཉེཡྻཾ, ཉཱཎཉྩ ཉེཡྻཉྩ. དསྶནཾ, བྷཱཝནཱ, དསྶནཉྩ བྷཱཝནཱ ཙ. ཝིཔཱཀཀམྨཾ, ན ཝིཔཱཀཀམྨཾ, ནེཝཝིཔཱཀནཝིཔཱཀཀམྨཾ ¶ . སཀཝཙནཾ, པརཝཙནཾ, སཀཝཙནཉྩ པརཝཙནཉྩ. སཏྟཱདྷིཊྛཱནཾ, དྷམྨཱདྷིཊྛཱནཾ, སཏྟཱདྷིཊྛཱནཉྩ དྷམྨཱདྷིཊྛཱནཉྩ. ཐཝོ, སཀཝཙནཱདྷིཊྛཱནཾ, པརཝཙནཱདྷིཊྛཱནཾ, སཀཝཙནཱདྷིཊྛཱནཉྩ པརཝཙནཱདྷིཊྛཱནཉྩ. ཀིརིཡཾ, ཕལཾ, ཀིརིཡཉྩ ཕལཉྩ. ཨནུཉྙཱཏཾ, པཊིཀྑིཏྟཾ, ཨནུཉྙཱཏཉྩ པཊིཀྑིཏྟཉྩ. ཨིམཱནི ཚ པཊིཀྑིཏྟཱནི.

༡༤. ཏཏྠ ¶ ཀཏམཾ སཾཀིལེསབྷཱགིཡཾ སུཏྟཾ?

ཀཱམནྡྷཱ ཛཱལསཉྪནྣཱ, ཏཎྷཱཚདནཚཱདིཏཱ;

པམཏྟབནྡྷུནཱ བདྡྷཱ, མཙྪཱཝ ཀུམིནཱམུཁེ;

ཛརཱམརཎམནྭེནྟི, ཝཙྪོ ཁཱིརཔཀོཝ [ཁཱིརཱུཔཀོཝ (ཀ.) པསྶ ཨུདཱ. ༦༤] མཱཏརཾ.

མནོཔུབྦངྒམཱ ¶ དྷམྨཱ, མནོསེཊྛཱ མནོམཡཱ;

མནསཱ ཙེ པསནྣེན, བྷཱསཏི ཝཱ ཀརོཏི ཝཱ;

ཏཏོ ནཾ སུཁམནྭེཏི, ཚཱཡཱཝ ཨནཔཱཡིནཱི.

མཧཱནཱམསྶ སཀྐསྶ ཨིདཾ བྷགཝཱ སཀྱཱནཾ ཀཔིལཝཏྠུམྷི ནགརེ ནཡཝིཏྠཱརེན སདྡྷཱསཱིལཔརིབྷཱཝིཏཾ སུཏྟཾ བྷཱཝཉྙེན པརིབྷཱཝིཏཾ ཏཾ ནཱམ པཙྪིམེ ཀཱལེ.

ཨུདྡྷཾ ཨདྷོ [ཨུདཱ. ༦༡] སབྦདྷི ཝིཔྤམུཏྟོ, ཨཡཾ ཨཧསྨཱིཏི ཨནཱནུཔསྶཱི;

ཨེཝཾ ཝིམུཏྟོ ཨུདཏཱརི ཨོགྷཾ, ཨཏིཎྞཔུབྦཾ ཨཔུནབྦྷཝཱཡ.

སཱིལཱནི ནུ ཁོ བྷཝནྟི ཀིམཏྠིཡཱནི ཨཱནནྡོ པུཙྪཏི སཏྠཱརཾ.

‘‘ཡསྶ སེལཱུཔམཾ ཙིཏྟཾ, ཋིཏཾ ནཱནུཔཀམྤཏི;

ཝིརཏྟཾ ¶ རཛནཱིཡེསུ, ཀོཔནེཡྻེ [ཀོཔནཱིཡེ (ཀ.) པསྶ ཨུདཱ. ༣༤] ན ཀུཔྤཏི;

ཡསྶེཝཾ བྷཱཝིཏཾ ཙིཏྟཾ, ཀུཏོ ཏཾ དུཀྑམེསྶཏཱི’’ཏི.

སཱརིཔུཏྟོ ནཱམ བྷགཝཱ ཐེརཉྙཏརོ སོ མཾ ཨཱསཛྫ ཨཔྤཊིནིསྶཛྫ ཙཱརིཀཾ པཀྐམཏི, སཱརིཔུཏྟསྶ བྱཱཀརཎཾ ཀཱཏབྦཾ. ཡསྶ ནཱུན བྷགཝཱ ཀཱཡགཏཱ སཏི ཨབྷཱཝིཏཱ ཨསྶ ཨབཧུལཱིཀཏཱ ཝིཏྠཱརེན ཀཱཏབྦཾ.

༡༥. ཏཏྠ ཀཏམཾ སཾཀིལེསབྷཱགིཡཉྩ ཝཱསནཱབྷཱགིཡཉྩ?

ཚནྣམཏིཝསྶཏི [ཨུདཱ. ༤༥], ཝིཝཊཾ ནཱཏིཝསྶཏི;

ཏསྨཱ ཚནྣཾ ཝིཝརེཐ, ཨེཝཾ ཏཾ ནཱཏིཝསྶཏི.

ཚནྣམཏིཝསྶཏཱིཏི ¶ སཾཀིལེསོ. ཝིཝཊཾ ནཱཏིཝསྶཏཱིཏི ཝཱསནཱ. ཏམོ ཏམཔརཱཡནོཏི ཝིཏྠཱརེན. ཏཏྠ ཡོ ཙ ཏམོ ཡོ ཙ ཏམཔརཱཡནོ, ཨཡཾ སཾཀིལེསོ. ཡོ ཙ ཛོཏི ཡོ ཙ ཛོཏིཔརཱཡནོ, ཨཡཾ ཝཱསནཱ.

ཏཏྠ ཀཏམཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ སུཏྟཾ?

ན ཏཾ དལ༹ྷཾ བནྡྷནམཱཧུ དྷཱིརཱ, ཡདཱཡསཾ དཱརུཛཔབྦཛཉྩ [དཱརུཛཾ པབྦཛཉྩ (པཱི.) དྷ. པ. ༣༤༥; སཾ. ནི. ༡.༡༢༡];

སཱརཏྟརཏྟཱ མཎིཀུཎྜལེསུ, པུཏྟེསུ དཱརེསུ ཙ ཡཱ ཨཔེཀྑཱ.

ན ཏཾ དལ༹ྷཾ བནྡྷནམཱཧུ དྷཱིརཱ, ཡདཱ པུཏྟེསུ དཱརེསུ ཙ ཡཱ ཨཔེཀྑཱ, ཨཡཾ སཾཀིལེསོ. ཨེཏམྤི ¶ ཚེཏྭཱ པརིབྦཛནྟི དྷཱིརཱ ཨནཔེཀྑིནོ སབྦཀཱམེ པཧཱཡཱཏི, ཨཡཾ ནིབྦེདྷོ. ཡཾ ཙེཏཡིཏཾ པཀཔྤིཏཾ ཡཱ ཙ ནཱམརཱུཔསྶ ཨཝཀྐནྟི ཧོཏི. ཨིམེཧི ཙཏཱུཧི པདེཧི སཾཀིལེསོ. པཙྪིམཀེཧི ཙཏཱུཧི ནིབྦེདྷོ.

ཏཏྠ ཀཏམཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟཾ?

ཨཡཾ ¶ ལོཀོ སནྟཱཔཛཱཏོ, ཕསྶཔརེཏོ རོགཾ [རོདཾ (པཱི.) པསྶ ཨུདཱ. ༣༠] ཝདཏི ཨཏྟཏོ;

ཡེན ཡེན ཧི མཉྙནྟི, ཏཏོ ཏཾ ཧོཏི ཨཉྙཐཱ.

ཨཉྙཐཱབྷཱཝཱི བྷཝསཏྟོ ལོཀོ, བྷཝཔརེཏོ བྷཝམེཝཱབྷིནནྡཏི;

ཡདབྷིནནྡཏི ཏཾ བྷཡཾ, ཡསྶ བྷཱཡཏི ཏཾ དུཀྑཾ;

བྷཝཝིཔྤཧཱནཱཡ ཁོ པནིདཾ བྲཧྨཙརིཡཾ ཝུསྶཏི.

ཡེ ཧི ཀེཙི སམཎཱ ཝཱ བྲཱཧྨཎཱ ཝཱ བྷཝེན བྷཝསྶ ཝིཔྤམོཀྑམཱཧཾསུ, སབྦེཏེ ‘‘ཨཝིཔྤམུཏྟཱ བྷཝསྨཱ’’ཏི ཝདཱམི. ཡེ ཝཱ པན ཀེཙི སམཎཱ ཝཱ བྲཱཧྨཎཱ ཝཱ ཝིབྷཝེན བྷཝསྶ ནིསྶརཎམཱཧཾསུ, སབྦེཏེ ‘‘ཨནིསྶཊཱ བྷཝསྨཱ’’ཏི ཝདཱམི. ཨུཔདྷིཾ ཧི པཊིཙྩ དུཀྑམིདཾ སམྦྷོཏི, སབྦུཔཱདཱནཀྑཡཱ ནཏྠི དུཀྑསྶ སམྦྷཝོ, ལོཀམིམཾ ¶ པསྶ, པུཐཱུ ཨཝིཛྫཱཡ པརེཏཱ བྷཱུཏཱ བྷཱུཏརཏཱ བྷཝཱ ཨཔརིམུཏྟཱ. ཡེ ཧི ཀེཙི བྷཝཱ སབྦདྷི སབྦཏྠཏཱཡ སབྦེཏེ བྷཝཱ ཨནིཙྩཱ དུཀྑཱ ཝིཔརིཎཱམདྷམྨཱཏི.

‘‘ཨེཝམེཏཾ ¶ ཡཐཱབྷཱུཏཾ, སམྨཔྤཉྙཱཡ པསྶཏོ;

བྷཝཏཎྷཱ པཧཱིཡཏི, ཝིབྷཝཾ ནཱབྷིནནྡཏི;

སབྦསོ ཏཎྷཱནཾ ཁཡཱ, ཨསེསཝིརཱགནིརོདྷོ ནིབྦཱནཾ.

‘‘ཏསྶ ནིབྦུཏསྶ བྷིཀྑུནོ, ཨནུཔཱདཱ པུནབྦྷཝོ ན ཧོཏི;

ཨབྷིབྷཱུཏོ མཱརོ ཝིཛིཏསངྒཱམོ, ཨུཔེཙྩགཱ སབྦབྷཝཱནི ཏཱདཱི’’ཏི.

ཨཡཾ ལོཀོ སནྟཱཔཛཱཏོ ཡཱཝ དུཀྑནྟི ཡཾ ཏཎྷཱ སཾཀིལེསོ.

ཡཾ པུནགྒཧཎཾ ཡེ ཧི ཀེཙི སམཎཱ ཝཱ བྲཱཧྨཎཱ ཝཱ བྷཝེན བྷཝསྶ ཝིམོཀྑམཱཧཾསུ, སབྦེཏེ ‘‘ཨཝིམུཏྟཱ བྷཝསྨཱ’’ཏི ཝདཱམི. ཡེ ཝཱ པན ཀེཙི སམཎཱ ཝཱ བྲཱཧྨཎཱ ཝཱ ཝིབྷཝེན བྷཝསྶ ནིསྶརཎམཱཧཾསུ ‘‘ཨནིསྶཊཱ བྷཝསྨཱ’’ཏི ཝདཱམི. ཨཡཾ དིཊྛིསཾཀིལེསོ, ཏཾ དིཊྛིསཾཀིལེསོ ¶ ཙ ཏཎྷཱསཾཀིལེསོ ཙ, ཨུབྷཡམེཏཾ སཾཀིལེསོ. ཡཾ པུནགྒཧཎཾ བྷཝཝིཔྤཧཱནཱཡ བྲཧྨཙརིཡཾ ཝུསྶཏི, ཡཱཝ སབྦསོ ཨུཔཱདཱནཀྑཡཱ སམྦྷཝཱ, ཨིདཾ ནིབྦེདྷབྷཱགིཡཾ. ཏསྶ ¶ ནིབྦུཏསྶ བྷིཀྑུནོ ཡཱཝ ཨུཔཙྩགཱ སབྦབྷཝཱནི ཏཱདཱིཏི ཨིདཾ ཨསེཀྑབྷཱགིཡཾ. ཙཏྟཱརོ པུགྒལཱ ཨནུསོཏགཱམཱི སཾཀིལེསོ ཋིཏཏྟོ ཙ པཊིསོཏགཱམཱི ཙ ནིབྦེདྷོ. ཐལེ ཏིཊྛཏཱིཏི ཨསེཀྑབྷཱུམི.

༡༦. ཏཏྠ ཀཏམཾ ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟཾ?

‘‘དདཏོ [ཨུདཱ. ༧༥; དཱི. ནི. ༢.༡༩༧] པུཉྙཾ པཝཌྜྷཏི, སཾཡམཏོ ཝེརཾ ན ཙཱིཡཏི;

ཀུསལོ ཙ ཛཧཱཏི པཱཔཀཾ, རཱགདོསམོཧཀྑཡཱ སནིབྦུཏོ’’ཏི.

‘‘དདཏོ པུཉྙཾ པཝཌྜྷཏི, སཾཡམཏོ ཝེརཾ ན ཙཱིཡཏཱི’’ཏི ཝཱསནཱ. ‘‘ཀུསལོ ཙ ཛཧཱཏི པཱཔཀཾ, རཱགདོསམོཧཀྑཡཱ སནིབྦུཏོ’’ཏི ནིབྦེདྷོ.

སོཏཱནུགཏེསུ དྷམྨེསུ ཝཙསཱ པརིཙིཏེསུ མནསཱནུཔེཀྑིཏེསུ དིཊྛིཡཱ སུཔྤཊིཝིདྡྷེསུ པཉྩཱནིསཾསཱ པཱཊིཀངྑཱ. ཨིདྷེཀཙྩསྶ བཧུསྶུཏཱ དྷམྨཱ ཧོནྟི དྷཱཏཱ ཨཔམུཊྛཱ ཝཙསཱ པརིཙིཏཱ མནསཱནུཔེཀྑིཏཱ དིཊྛིཡཱ སུཔྤཊིཝིདྡྷཱ, སོ ཡུཉྫནྟོ གྷཊེནྟོ ཝཱཡམནྟོ དིཊྛེཝ དྷམྨེ ཝིསེསཾ པཔྤོཏི. ནོ ཙེ དིཊྛེཝ དྷམྨེ ཝིསེསཾ པཔྤོཏི, གིལཱནོ པཔྤོཏི. ནོ ཙེ གིལཱནོ ¶ པཔྤོཏི, མརཎཀཱལསམཡེ པཔྤོཏི. ནོ ཙེ མརཎཀཱལསམཡེ པཔྤོཏི, དེཝབྷཱུཏོ པཱཔུཎཱཏི. ནོ ཙེ དེཝབྷཱུཏོ པཱཔུཎཱཏི, ཏེན དྷམྨརཱགེན ཏཱཡ དྷམྨནནྡིཡཱ པཙྩེཀབོདྷིཾ པཱཔུཎཱཏི.

ཏཏྠཱཡཾ དིཊྛེཝ དྷམྨེ པཱཔུཎཱཏི, ཨཡཾ ནིབྦེདྷོ. ཡཾ ¶ སམྤརཱཡེ པཙྩེཀབོདྷིཾ པཱཔུཎཱཏི, ཨཡཾ ཝཱསནཱ. ཨིམཱནི སོལ༹ས སུཏྟཱནི སབྦསཱསནཾ ཨཏིགྒཎྷནྟོ ཏིཊྛནྟི. ཨིམེཧི སོལ༹སཧི སུཏྟེཧི ནཝཝིདྷོ སུཏྟནྟོ ཝིབྷཏྟོ བྷཝཏི. སོ ཙ པཉྙཝཏོ ནོ དུཔྤཉྙསྶ, ཡུཏྟསྶ ནོ ཨཡུཏྟསྶ, ཨཀམྨསྶ ཝིཧཱརིསྶ པཀཏིཡཱ ལོཀེ སཾཀིལེསོ ¶ ཙརཏི. སོ སཾཀིལེསོ ཏིཝིདྷོ – ཏཎྷཱསཾཀིལེསོ དིཊྛིསཾཀིལེསོ དུཙྩརིཏསཾཀིལེསོ. ཏཏོ སཾཀིལེསཏོ ཨུཊྛཧནྟོ སཾཀིལེསོ དྷམྨེསུ པཏིཊྛཧཏི, ལོཀིཡེསུ པཏིཊྛཧཏཱིཏི. ཏཏྠཱཀུསལོ དིཊྛཏོ སཙེ ཏཾ སཱིལཉྩ དིཊྛིཉྩ པརཱམསཏི, ཏསྶ སོ ཏཎྷཱསཾཀིལེསོ ཧོཏི. སཙེ པནསྶ ཨེཝཾ ཧོཏི ‘‘ཨིམིནཱཧཾ སཱིལེན ཝཱ ཝཏེན ཝཱ བྲཧྨཙརིཡེན ཝཱ དེཝོ ཝཱ བྷཝིསྶཾ [བྷཝིསྶཱམི (པཱི.)] དེཝཉྙཏརོ ཝཱ’’ཏི ཡསྶ ཧོཏི མིཙྪཱདིཊྛི, ཨེཏསྶ མིཙྪཱདིཊྛིསཾཀིལེསོ བྷཝཏི. སཙེ པན སཱིལེ པཏིཊྛིཏོ ཨཔརཱམཊྛསྶ ཧི སཱིལཝཏཾ ཧོཏི, ཏསྶ ཏཾ སཱིལཝཏོ ཡོནིསོ གཧིཏཾ ཨཝིཔྤཊིསཱརཾ ཛནེཏི ཡཱཝ ཝིམུཏྟིཉཱཎདསྶནཾ, ཏཉྩ ཏསྶ དིཊྛེཝ དྷམྨེ ཀཱལངྐཏསྶ ཝཱ ཏམྷིཡེཝ ཝཱ པན ཨཔརཱཔརིཡཱཡེན ཝཱ, ཨཉྙེསུ ཁནྡྷེསུ ཨེཝཾ སུཏཾ ‘‘སུཙརིཏཾ ཝཱསནཱཡ སཾཝཏྟཏཱི’’ཏི ཝཱསནཱབྷཱགིཡཾ སུཏྟཾ ཝུཙྩཏི. ཏཏྠ སཱིལེསུ ཋིཏསྶ ཝིནཱིཝརཎཾ ཙིཏྟཾ, ཏཾ ཏཏོ སཀྐཱཡདིཊྛིཔྤཧཱནཱཡ བྷགཝཱ དྷམྨཾ དེསེཏི. སོ ཨཙྩནྟནིཊྛཾ ནིབྦཱནཾ པཱཔུཎཱཏི; ཡདི ཝཱ སཱསནནྟརེ, ཨཙྩནྟཾ ནིབྦཱནཾ པཱཔུཎཱཏི, ཡདི ཝཱ ཨེཀཱསནེ ཚ ཨབྷིཉྙེ. ཏཏྠ ¶ དྭེ པུགྒལཱ ཨརིཡདྷམྨེ པཱཔུཎནྟི སདྡྷཱནུསཱརཱི ཙ དྷམྨཱནུསཱརཱི ཙ. ཏཏྠ དྷམྨཱནུསཱརཱི ཨུགྒྷཊིཏཉྙཱུ, སདྡྷཱནུསཱརཱི ནེཡྻོ. ཏཏྠ ཨུགྒྷཊིཏཉྙཱུ དུཝིདྷོ – ཀོཙི ཏིཀྑིནྡྲིཡོ ཀོཙི མུདིནྡྲིཡོ. ཏཏྠ ནེཡྻོཔི དུཝིདྷོ – ཀོཙི ཏིཀྑིནྡྲིཡོ ཀོཙི མུདིནྡྲིཡོ. ཏཏྠ ཡོ ཙ ཨུགྒྷཊིཏཉྙཱུ མུདིནྡྲིཡོ, ཡོ ཙ ནེཡྻོ ཏིཀྑིནྡྲིཡོ, ཨིམེ པུགྒལཱ ཨསམིནྡྲིཡཱ ཧོནྟི. ཏཏྠ ཨིམེ པུགྒལཱ སམིནྡྲིཡཱ པརིཧཱཡནྟི ཙ ཨུགྒྷཊིཏཉྙུཏོ, ཝིཔཉྩིཏཉྙཱུ ནེཡྻཏོ, ཨིམེ མཛ྄ཛྷིམཱ བྷཱུམིགཏཱ ཝིཔཉྩིཏཉྙཱུ ཧོཏི. ཨིམེ ཏཡོ པུགྒལཱ.

༡༧. ཏཏྠ ཙཏུཏྠཱ པན པཉྩམཱ ཨུགྒྷཊིཏཉྙཱུ ཝིཔཉྩིཏཉྙཱུ ནེཡྻོ ཙ, ཏཏྠ ཨུགྒྷཊིཏཉྙཱུ པུགྒལོ ཨིནྡྲིཡཱནི པཊིལབྷིཏྭཱ དསྶནབྷཱུམིཡཾ ཋིཏོ སོཏཱཔཏྟིཕལཉྩ པཱཔུཎཱཏི, ཨེཀབཱིཛཱི ཧོཏི པཋམོ སོཏཱཔནྣོ. ཏཏྠ ཝིཔཉྩིཏཉྙཱུ པུགྒལོ ཨིནྡྲིཡཱནི པཊིལབྷིཏྭཱ དསྶནབྷཱུམིཡཾ ཋིཏོ སོཏཱཔཏྟིཕལཉྩ པཱཔུཎཱཏི, ཀོལཾཀོལོ ཙ ཧོཏི དུཏིཡོ སོཏཱཔནྣོ ¶ . ཏཏྠ ནེཡྻོ པུགྒལོ ཨིནྡྲིཡཱནི པཊིལབྷིཏྭཱ དསྶནབྷཱུམིཡཾ ཋིཏོ སོཏཱཔཏྟིཕལཉྩ པཱཔུཎཱཏི, སཏྟཀྑཏྟུཔརམོ ཙ ཧོཏི ¶ , ཨཡཾ ཏཏིཡོ སོཏཱཔནྣོ. ཨིམེ ཏཡོ པུགྒལཱ ཨིནྡྲིཡཝེམཏྟཏཱཡ སོཏཱཔཏྟིཕལེ ཋིཏཱ.

ཨུགྒྷཊིཏཉྙཱུ ཨེཀབཱིཛཱི ཧོཏི, ཝིཔཉྩིཏཉྙཱུ ཀོལཾཀོལོ ཧོཏི, ནེཡྻོ སཏྟཀྑཏྟུཔརམོ ཧོཏི. ཨིདཾ ནིབྦེདྷབྷཱགིཡཾ སུཏྟཾ. སཙེ ¶ པན ཏདུཏྟརི ཝཱཡམཏི, ཨཙྩནྟནིཊྛཾ ནིབྦཱནཾ པཱཔུཎཱཏི. ཏཏྠ ཨུགྒྷཊིཏཉྙཱུ པུགྒལོ ཡོ ཏིཀྑིནྡྲིཡོ, ཏེ དྭེ པུགྒལཱ ཧོནྟི – ཨནཱགཱམིཕལཾ པཱཔུཎིཏྭཱ ཨནྟརཱཔརིནིབྦཱཡཱི ཙ ཨུཔཧཙྩཔརིནིབྦཱཡཱི ཙ. ཏཏྠ ཝིཔཉྩིཏཉྙཱུ པུགྒལོ ཡོ ཏིཀྑིནྡྲིཡོ, ཏེ དྭེ པུགྒལཱ ཧོནྟི – ཨནཱགཱམིཕལཾ པཱཔུཎནྟི ཨསངྑཱརཔརིནིབྦཱཡཱི ཙ སསངྑཱརཔརིནིབྦཱཡཱི ཙ. ཏཏྠ ནེཡྻོ ཨནཱགཱམིཕལཾ པཱཔུཎནྟོ ཨུདྡྷཾསོཏོ ཨཀནིཊྛགཱམཱི ཧོཏི, ཨུགྒྷཊིཏཉྙཱུ ཙ ཝིཔཉྩིཏཉྙཱུ ཙ, ཨིནྡྲིཡནཱནཏྟེན ཨུགྒྷཊིཏཉྙཱུ པུགྒལོ ཏིཀྑིནྡྲིཡོ ཨནྟརཱཔརིནིབྦཱཡཱི ཧོཏི, ཨུགྒྷཊིཏཉྙཱུ མུདིནྡྲིཡོ ཨུདྡྷཾསོཏོ ཨཀནིཊྛགཱམཱི ཧོཏི. ཨུགྒྷཊིཏཉྙཱུ ཙ ཝིཔཉྩིཏཉྙཱུ ཙ ཨིནྡྲིཡནཱནཏྟེན ཨུགྒྷཊིཏཉྙཱུ པུགྒལོ ཏིཀྑིནྡྲིཡོ སསངྑཱརཔརིནིབྦཱཡཱི ཧོཏི, ཏིཀྑིནྡྲིཡོ ཨནྟརཱཔརིནིབྦཱཡཱི ཧོཏི, ཨུགྒྷཊིཏཉྙཱུ མུདིནྡྲིཡོ ཨུཔཧཙྩཔརིནིབྦཱཡཱི ཧོཏི. ཝིཔཉྩིཏཉྙཱུ ཏིཀྑིནྡྲིཡོ ཨསངྑཱརཔརིནིབྦཱཡཱི ཧོཏི, ཝིཔཉྩིཏཉྙཱུ མུདིནྡྲིཡོ སསངྑཱརཔརིནིབྦཱཡཱི ཧོཏི, ནེཡྻོ ཨུཔཧཙྩཔརིནིབྦཱཡཱི ཧོཏི, ཝིཔཉྩིཏཉྙཱུ ཏིཀྑིནྡྲིཡོ ཨསངྑཱརཔརིནིབྦཱཡཱི ཧོཏི. ཝིཔཉྩིཏཉྙཱུ མུདིནྡྲིཡོ སསངྑཱརཔརིནིབྦཱཡཱི ཧོཏི, ནེཡྻོ ཨུདྡྷཾསོཏོ ཨཀནིཊྛགཱམཱི ཧོཏི. ཨིཏི པཉྩ ཨནཱགཱམིནོ, ཚཊྛོ སཀདཱགཱམཱི, ཏཡོ ཙ སོཏཱཔནྣཱཏི ཨིམེ ནཝ སེཀྑཱ.

ཏཏྠ ཨུགྒྷཊིཏཉྙཱུ པུགྒལོ ཏིཀྑིནྡྲིཡོ ཨརཧཏྟཾ པཱཔུཎནྟོ དྭེ པུགྒལཱ ཧོནྟི ཨུབྷཏོབྷཱགཝིམུཏྟོ པཉྙཱཝིམུཏྟོ ཙ. ཏཏྠ ཨུགྒྷཊིཏཉྙཱུ པུགྒལོ མུདིནྡྲིཡོ ཨརཧཏྟཾ པཱཔུཎནྟོ དྭེ པུགྒལཱ ཧོནྟི, ཋིཏཀཔྤཱི [ཋིཏཀཔྤི (པཱི. ཀ.) པསྶ པུ. པ. ༡༧] ཙ པཊིཝེདྷནབྷཱཝོ པུགྒལོ ཙ ཏིཀྑིནྡྲིཡོ སོ ཨརཧཏྟཾ པཱཔུཎནྟོ དྭེ པུགྒལཱ ཧོནྟི ཙེཏནཱབྷབྦོ ཙ རཀྑཎཱབྷབྦོ ཙ. ཏཏྠ ཝིཔཉྩིཏཉྙཱུ མུདིནྡྲིཡོ ཨརཧཏྟཾ པཱཔུཎནྟོ དྭེ པུགྒལཱ ཧོནྟི, སཙེ ཙེཏེཏི ན པརིནིབྦཱཡཱི, ནོ ཙེ ཙེཏེཏི པརིནིབྦཱཡཱིཏི. སཙེ ཨནུརཀྑཏི ན པརིནིབྦཱཡཱི, ནོ ཙེ ཨནུརཀྑཏི པརིནིབྦཱཡཱིཏི. ཏཏྠ ནེཡྻོ པུགྒལོ བྷཱཝནཱནུཡོགམནུཡུཏྟོ པརིཧཱནདྷམྨོ ¶ ཧོཏི ཀམྨནིཡཏོ ཝཱ སམསཱིསི ཝཱ, ཨིམེ ནཝ ཨརཧནྟོ ཨིདཾ ཙཏུབྦིདྷཾ སུཏྟཾ སཾཀིལེསབྷཱགིཡཾ ཨསེཀྑབྷཱགིཡཾ. ཨིམེསུ པུགྒལེསུ ཏཐཱགཏསྶ དསཝིདྷཾ བལཾ པཝཏྟཏི.

༡༨. ཀཏམཾ ¶ དསཝིདྷཾ? ཨིདྷ བུདྡྷཱནཾ བྷགཝནྟཱནཾ ཨཔྤཝཏྟིཏེ དྷམྨཙཀྐེ མཧེསཀྑཱ དེཝཔུཏྟཱ ཡཱཙནཱཡ ཨབྷིཡཱཏཱ [ཨཏིཡཱཏཱ (པཱི. ཀ.)] ཧོནྟི ‘‘དེསེཏུ སུགཏོ དྷམྨ’’ནྟི. སོ ཨནུཏྟརེན བུདྡྷཙཀྑུནཱ ཝོལོཀེནྟོ ཨདྡསཱསི སཏྟཱནཾ ཏཡོ རཱསཱིནཾ སམྨཏྟནིཡཏོ མིཙྪཏྟནིཡཏོ ཨནིཡཏོ. ཏཏྠ སམྨཏྟནིཡཏོ རཱསི མིཙྪཱསཏིཾ ཨཱཔཛྫེཡྻཱཏི ནེཏཾ ཋཱནཾ ཝིཛྫཏི, ཨསཏྠུཀོ པརིནིབྦཱཡེཡྻཱཏི ནེཏཾ ཋཱནཾ ཝིཛྫཏི, སམཱཔཏྟིཾ ཨཱཔཛྫེཡྻཱཏི ཋཱནམེཏཾ ཝིཛྫཏི. ཏཏྠ མིཙྪཏྟནིཡཏོ རཱསི ཨརིཡསམཱཔཏྟིཾ པཊིཔཛྫིསྶཏཱིཏི ནེཏཾ ཋཱནཾ ཝིཛྫཏི, ཨནརིཡམིཙྪཱཔཊིཔཏྟིཾ པཊིཔཛྫིསྶཏཱིཏི ཋཱནམེཏཾ ཝིཛྫཏི. ཏཏྠ ¶ ཨནིཡཏོ རཱསི སམྨཱཔཊིཔཛྫམཱནཾ སམྨཏྟནིཡཏརཱསིཾ གམིསྶཏཱིཏི ཋཱནམེཏཾ ཝིཛྫཏི, མིཙྪཱཔཊིཔཛྫམཱནོ སམྨཏྟནིཡཏརཱསིཾ གམིསྶཏཱིཏི ནེཏཾ ཋཱནཾ ཝིཛྫཏི. སམྨཱཔཊིཔཛྫམཱནཾ སམྨཏྟནིཡཏརཱསིཾ གམིསྶཏཱིཏི ཋཱནམེཏཾ ཝིཛྫཏི, མིཙྪཱཔཊིཔཛྫམཱནཾ མིཙྪཏྟནིཡཏརཱསིཾ གམིསྶཏཱིཏི ཋཱནམེཏཾ ཝིཛྫཏི. ཨིམེ ཏཡོ ཨནུཏྟརེན བུདྡྷཙཀྑུནཱ ཝོལོཀེནྟསྶ སམྨཱསམྦུདྡྷསྶ མེ སཏོ ཨིམེ དྷམྨཱ ཨནབྷིསམྦུདྡྷཱཏི ཨེཏྟཝཏཱ མཾ ཀོཙི སཧདྷམྨེན པཊིཙོདིསྶཏཱིཏི ནེཏཾ ཋཱནཾ ཝིཛྫཏི, ཝཱིཏརཱགསྶ ཏེ པཊིཛཱནཏོ ཨཁཱིཎཱསཝཏཱཡ སཧདྷམྨེན ཀོཙི པཊིཙོདིསྶཏཱིཏི ནེཏཾ ཋཱནཾ ཝིཛྫཏི. ཡཏོ པན ཨིམསྶ ཨནིཡཏསྶ རཱསིསྶ དྷམྨདེསནཱ, སཱ ན དིསྶཏི ཏཀྐརསྶ སམྨཱདུཀྑཀྑཡཱཡཱཏི ནེཏཾ ཋཱནཾ ཝིཛྫཏི, ཏཐཱ ཨོཝདིཏོ ཡཾ པན མེ ཨནིཡཏརཱསི སཱཝཀོ པུབྦེནཱཔརཾ ཝིསེསཾ ན སཙྪིཀརིསྶཏཱིཏི ནེཏཾ ཋཱནཾ ཝིཛྫཏི.

༡༩. ཡཾ ཁོ མུནི ནཱནཔྤཀཱརསྶ ནཱནཱནིརུཏྟིཡོ དེཝནཱགཡཀྑཱནཾ དམེཏི དྷམྨེ ཝཝཏྠཱནེན ཝཏྭཱ ཀཱརཎཏོ ཨཉྙཾ པཱརཾ གམིསྶཏཱིཏི ནེཏཾ ཋཱནཾ ཝིཛྫཏི. དྷམྨཔཊིསམྦྷིདཱ. ཡཏོ པནིམཱ ནིརུཏྟིཏོ སཏྟ སཏྟ ནིརུཏྟིཡོ ནཱབྷིསམྦྷུནེཡྻཱཏི ནེཏཾ ཋཱནཾ ཝིཛྫཏི. ནིརུཏྟིཔཊིསམྦྷིདཱ. ནིརུཏྟི ཁོ པན ཨབྷིསམགྒརཏཱནཾ སཱཝཀཱནཾ ཏམཏྠམཝིཉྙཱཔཡེཏི ནེཏཾ ཋཱནཾ ཝིཛྫཏི. ཨཏྠཔཊིསམྦྷིདཱ ¶ . མཧེསཀྑཱ དེཝཔུཏྟཱ ཨུཔསངྐམིཏྭཱ པཉྷེ པུཙྪིཾསུ ¶ . ཀཱཡིཀེན ཝཱ མཱནསིཀེན ཝཱ པརིཔཱིལི༹ཏསྶ ཧཏྠཀུཎཱིཏི ཝཱ པཱདེ ཝཱ ཁཉྫེ དནྡྷསྶ [དནྟསྶ (པཱི. ཀ.)] སོ ཨཏྠོ ན པརིབྷཱཛིཡཏཱིཏི ནེཏཾ ཋཱནཾ ཝིཛྫཏི. པཊིབྷཱནཔཊིསམྦྷིདཱ. ཡམྷི ཏཾ ཏེསཾ ཧོཏི ཏམྷི ཨསནྟཾ བྷཝཏཱིཏི ནེཏཾ ཋཱནཾ ཝིཛྫཏི. ཡཾ ཧི ནཱསཾ ཏེསཾ ན བྷཝཏི, ཏམྷི ནཱསཾ ཏེསཾ བྷཝིསྶཏཱིཏི ནེཏཾ ཋཱནཾ ཝིཛྫཏི. ཨེཝཾ སམུདཡསྶ ནིརོདྷཱཡ དས ཨཀུསལཀམྨཔཐཱ. མཱརོ ཝཱ ཨིནྡོ ཝཱ བྲཧྨཱ ཝཱ ཏཐཱགཏོ ཝཱ ཙཀྐཝཏྟཱི ཝཱ སོ ཝཏ ནཱམ མཱཏུགཱམོ བྷཝིསྶཏཱིཏི ནེཏཾ ཋཱནཾ ཝིཛྫཏི, པུརིསོ ཨསྶ རཱཛཱ ཙཀྐཝཏྟཱི སཀྐོ དེཝཱནམིནྡོ བྷཝིསྶཏཱིཏི ཋཱནམེཏཾ ཝིཛྫཏི. ཨིཏིསྶ ཨེཝརཱུཔཾ བལཾ ཨེཝརཱུཔཾ ཉཱཎཾ, ཨིདཾ ཝུཙྩཏི ཋཱནཱཊྛཱནཉཱཎཾ པཋམཾ ཏཐཱགཏབལཾ ཏཾ ནིདྡིསིཏབྦཾ. ཏཱིཧི རཱསཱིཧི ཙཏཱུཧི ཝེསཱརཛྫེཧི ཙཏཱུཧི པཊིསམྦྷིདཱཧི ¶ པཊིཙྩསམུཔྤཱདསྶ པཝཏྟིཡཾ ནིཝཏྟིཡཾ བྷཱགིཡཉྩ. ཀུསལཾ ཀུསལཝིཔཱཀེསུ ཙ ཨུཔཔཛྫཏི ཡཉྩ ཨིཏྠིཔུརིསཱནཾ. ཨིདཾ པཋམཾ བལཾ ཏཐཱགཏོ ཨེཝཾ ཛཱནཱཏི.

ཡེསཾ པན སམྨཏྟནིཡཏོ རཱསི, ནཱཡཾ སབྦཏྠགཱམིནཱི པཊིཔདཱ, ནིབྦཱནགཱམིནཱིཡེཝཱཡཾ པཊིཔདཱ. ཏཏྠ སིཡཱ མིཙྪཏྟནིཡཏོ རཱསི, ཨེསཱཔི ན སབྦཏྠགཱམིནཱི པཊིཔདཱ. སཀྐཱཡསམུདཡགཱམིནཱིཡེཝཱཡཾ པཊིཔདཱ ¶ ཧོཏུ, ཨཡཾ ཏཏྠ ཏཏྠ པཊིཔཏྟིཡཱ ཋིཏོ གཙྪཏི ནིབྦཱནཾ, གཙྪཏི ཨཔཱཡཾ, གཙྪཏི དེཝམནུསྶསྶ. ཡཾ ཡཾ ཝཱ པཊིཔདཾ པཊིཔཛྫེཡྻ སབྦཏྠ གཙྪེཡྻ, ཨཡཾ སབྦཏྠགཱམིནཱི པཊིཔདཱ. ཡཾ ཨེཏྠ ཉཱཎཾ ཡཐཱབྷཱུཏཾ, ཨིདཾ ཝུཙྩཏི སབྦཏྠགཱམིནཱི པཊིཔདཱཉཱཎཾ དུཏིཡཾ ཏཐཱགཏབལཾ.

སཱ ཁོ པནཱཡཾ སབྦཏྠགཱམིནཱི པཊིཔདཱ ནཱནཱདྷིམུཏྟཱ ཀེཙི ཀཱམེསུ ཀེཙི དུཀྐརཀཱརིཡཾ ཀེཙི ཨཏྟཀིལམཐཱནུཡོགམནུཡུཏྟཱ ཀེཙི སཾསཱརེན སུདྡྷིཾ པཙྩེནྟི ཀེཙི ཨནཛྫཱབྷཱཝནཱཏི. ཏེན ཏེན ཙརིཏེན ཝིནིབནྡྷཱནཾ སཏྟཱནཾ ཡཾ ཉཱཎཾ ཡཐཱབྷཱུཏཾ ནཱནཱགཏཾ ལོཀསྶ ཨནེཀཱདྷིམུཏྟགཏཾ ཡཐཱབྷཱུཏཾ པཛཱནཱཏི. ཨིདཾ ཏཏིཡཾ ཏཐཱགཏབལཾ.

ཏཏྠ སཏྟཱནཾ ཨདྷིམུཏྟཱ བྷཝནྟི ཨཱསེཝནྟི བྷཱཝེནྟི བཧུལཱིཀརོནྟི. ཏེསཾ ཀམྨུཔསཡཱནཾ ཏདཱདྷིམུཏྟཱནཾ. སཱ ཙེཝ དྷཱཏུ སཾཝཧཏི. ཀཏརཱ པནེསཱ དྷཱཏུ ནེཀྑམྨདྷཱཏུ བལདྷཱཏུ ཀཱཙི སམྤཏྟི ཀཱཙི མིཙྪཏྟཉྩ དྷཱཏུ ཨདྷིམུཏྟཱ བྷཝནྟི. ཨཉྙཏརཱ ཨུཏྟརི ན སམནུཔསྶནྟི. ཏེ ཏདེཝཊྛཱནཾ མཡཱ ¶ ཛརཱམརཎསྶ ཨབྷིནིཝིསྶ ཝོཧརནྟི ‘‘ཨིདམེཝ སཙྩཾ མོགྷམཉྙ’’ནྟི. ཡཐཱ བྷགཝཱ སཀྐསྶ དེཝཱནམིནྡསྶ བྷཱསིཏཾ. ཡཾ ཏཏྠ ཡཐཱབྷཱུཏཾ ཉཱཎཾ. ཨིདཾ ཝུཙྩཏི ཙཏུཏྠཾ ཏཐཱགཏབལཾ.

ཏཏྠ ཡཾཡེཝ དྷཱཏུ [ཡཾ ཡདེཝ དྷཱཏུཾ (ཀ.)] སེཊྛནྟི ཏཾ ཏཾ ཀཱཡེན ཙ ཝཱཙཱཡ ཙ ཨཱརམྦྷནྟི ཙེཏསིཀོ. ཨཱརམྦྷོ ཙེཏནཱ ཀམྨཾ ཀཱཡིཀཱ ¶ ཝཱཙསིཀཱ ཨཱརམྦྷོ ཙེཏསིཀཏྟཱ ཀམྨནྟརཾ ཏཐཱགཏོ ཨེཝཾ པཛཱནཱཏི ‘‘ཨིམིནཱ སཏྟེན ཨེཝཾ དྷཱཏུཀེན ཨེཝརཱུཔཾ ཀམྨཾ ཀཏཾ, ཏཾ ཨཏཱིཏམདྡྷཱནཾ ཨིམིནཱ ཧེཏུནཱ ཏསྶ ཨེཝརཱུཔོ ཝིཔཱཀོ ཝིཔཙྩཏི ཨེཏརཧི ཝིཔཙྩིསྶཏི ཝཱ ཨནཱགཏམདྡྷཱན’’ནྟི. ཨེཝཾ པཙྩུཔྤནྣམདྡྷཱནཾ པཛཱནཱཏི ‘‘ཨཡཾ པུགྒལོ ཨེཝཾདྷཱཏུཀོ ཨིདཾ ཀམྨཾ ཀརོཏི’’. ཏཎྷཱཡ ཙ དིཊྛིཡཱ ཙ ཨིམིནཱ ཧེཏུནཱ ན ཏསྶ ཝིཔཱཀོ དིཊྛེཡེཝ དྷམྨེ ནིབྦཏྟིསྶཏི, ཨུཔཔཛྫེ ཝཱ’’ཏི ཨཔརམྷི ཝཱ པརིཡཱཡེ ཨེཝཾ པཛཱནཱཏི ‘‘ཨཡཾ པུགྒལོ ཨེཝརཱུཔཾ ཀམྨཾ ཀརིསྶཏི ཨནཱགཏམདྡྷཱནཾ, ཨིམིནཱ ཧེཏུནཱ ཏསྶ ཨེཝརཱུཔོ ཝིཔཱཀོ ནིབྦཏྟིསྶཏི, ཨིམིནཱ ཧེཏུནཱ ཡཱནི ཙཏྟཱརི ¶ ཀམྨཊྛཱནཱནི ཨིདཾ ཀམྨཊྛཱནཾ པཙྩུཔྤནྣསུཁཾ ཨཱཡཏིཾ ཙ སུཁཝིཔཱཀཾ’’ …པེ… ཨིཏི ཨཡཾ ཨཏཱིཏཱནཱགཏཔཙྩུཔྤནྣཱནཾ ཀམྨསམཱདཱནཱནཾ ཧེཏུསོ ཋཱནསོ ཝིཔཱཀཝེམཏྟཏཾ པཛཱནཱཏི ཨུཙྩཱཝཙཱ ཧཱིནཔཎཱིཏཏཱ, ཨིདཾ ཝུཙྩཏི ཀམྨཝིཔཱཀཉཱཎཾ པཉྩམཾ ཏཐཱགཏབལཾ.

ཏཐཱ སཏྟཱ ཡཾ ཝཱ ཀམྨསམཱདཱནཾ སམཱདིཡནྟཱ ཏཏྠ ཨེཝཾ པཛཱནཱཏི ཨིམསྶ པུགྒལསྶ ཀམྨཱདྷིམུཏྟསྶ རཱགཙརིཏསྶ ནེཀྑམྨདྷཱཏཱུནཾ པཱརིཔཱུརིཾ གཙྪནྟི, ཏསྶ རཱགཱནུགཏེ སུཉྙམཱནསྶ པཋམཾ ཛྷཱནཾ སཾཀིལིསྶཏི, སཙེ པུན ཨུཏྟརི ཝཱཡཱམཏོ ཛྷཱནཝོདཱནགཏེ མཱནསེ ཝིསེསབྷཱགིཡཾ པཊིཔདཾ ཨནུཡུཉྫིཡཏི. ཏསྶ ཧི ཛྷཱནབྷཱགིཡཾཡེཝ པཋམཛ྄ཛྷཱནེ ཋིཏསྶ དུཏིཡཾ ཛྷཱནཾ ཝོདཱནཾ གཙྪཏི, ཏཏིཡཉྩ ¶ ཛྷཱནཾ སམཱཔཛྫིཏུཀཱམསྶ སོམནསྶིནྡྲིཡཾ ཙིཏྟཾ པརིཡཱདཱཡ ཏིཊྛཏི, ཏསྶ སཱ པཱིཏི ཨཝིསེསབྷཱགིཡཾ ཏཏིཡཾ ཛྷཱནཾ ཨཱདིསྶ ཏིཊྛཏི. སཙེ ཏསྶ ནིསྶརཎཾ ཡཐཱབྷཱུཏཾ པཛཱནཱཏི. ཏཐཱགཏསྶ ཙཏུཏྠཛ྄ཛྷཱནཾ ཝོདཱནཾ གཙྪཏིཡེཝ, ཙཏུཏྠསྶ ཛྷཱནསྶ ཧཱནབྷཱགིཡཱ དྷམྨཱ, ཏེ ཙ དྷམྨཱ ཡཏྠ པཛཱཡནྟི ཡེཧི ཙཏུཏྠཛ྄ཛྷཱནཾ ཝོདཱནཾ དིསྶཏི. ཨེཝཾ ཨཛ྄ཛྷཱསཡསམཱཔཏྟིཡཱ ཡཱ ཙཏསྶོ སམཱཔཏྟིཡོ ཏཱིཎི ཝིམོཀྑམུཁཱནི ཨཊྛ ཝིམོཀྑཛྷཱནཱནཱིཏི ཙཏྟཱརི ཛྷཱནཱནི ཝིམོཀྑཱཏི. ཨཊྛ ཙ ཝིམོཀྑཱ ཏཱིཎི ཙ ཝིམོཀྑམུཁཱནི. སམཱདྷཱིཏི ཙཏྟཱརོ ¶ སམཱདྷཱི – ཚནྡསམཱདྷི ཝཱིརིཡསམཱདྷི ཙིཏྟསམཱདྷི ཝཱིམཾསཱསམཱདྷཱིཏི. སམཱཔཏྟིཡོ ཙཏསྶོ ཨཛ྄ཛྷཱསཡསམཱཔཏྟིཡོ ཨིཏི ཨིམེསཾ ཛྷཱནཱནཾ ཝིམོཀྑསམཱཔཏྟཱིཏི ཨེཝརཱུཔོ སཾཀིལེསོ རཱགཙརིཏསྶ པུགྒལསྶ. ཨེཝཾ དོསཙརིཏསྶ. མོཧཙརིཏསྶ. རཱགཙརིཏསྶ པུགྒལསྶ ཨེཝརཱུཔཾ ཝོདཱནཾ ཨིཏི ཡཾ ཨེཏྠ ཉཱཎཾ ཡཐཱབྷཱུཏཾ ཨསཱདྷཱརཎཾ སབྦསཏྟེཧི. ཨིདཾ ཝུཙྩཏི ཚཊྛཾ ཏཐཱགཏབལཾ.

ཏཏྠ ཏཐཱགཏོ ཨེཝཾ པཛཱནཱཏི ལོཀིཀཱ དྷམྨཱ ལོཀུཏྟརཱ དྷམྨཱ བྷཱཝནཱབྷཱགིཡཾ ཨིནྡྲིཡཾ ནཱམཾ ལབྷནྟི. ཨཱདྷིཔཏེཡྻབྷཱུམིཾ ཨུཔཱདཱཡ བལཾ ནཱམཾ ལབྷནྟི ཐཱམགཏཾ མནོ མནིནྡྲིཡཾ ཏཾ ཨུཔཱདཱཡ. ཝཱིརིཡཾ ནཱམཾ ལབྷནྟི ཨཱརམྦྷདྷཱཏུཾ ཨུཔཱདཱཡ. ཨིཏིསྶ དེཝ ཨེཝརཱུཔཾ ཉཱཎཾ ཨིམེཧི ཙ དྷམྨེཧི ཨིམེ པུགྒལཱ སམནྣཱགཏཱཏིཔི དྷམྨདེསནཾ ཨཀཱསི. ཨཱཀཱརཏོ ཙ ཝོཀཱརཏོ ཙ ཨཱསཡཛ྄ཛྷཱསཡསྶ ¶ ཨདྷིམུཏྟིསམནྣཱགཏཱནཾ. ཨིདཾ ཝུཙྩཏི པརསཏྟཱནཾ པརཔུགྒལཱནཾ ཨིནྡྲིཡབལཝཱིརིཡཝེམཏྟཏཾ ཉཱཎཾ སཏྟམཾ ཏཐཱགཏབལཾ.

ཏཏྠ ཙ ཏཐཱགཏོ ལོཀཱདཱིསུ ཙ བྷཱུམཱིསུ སཾཡོཛནཱནཉྩ སེཀྑཱནཾ དྭཱིཧི བལེཧི གཏིཾ པཛཱནཱཏི, པུབྦེནིཝཱསཱནུསྶཏིཡཱ ཨཏཱིཏེ སཾསཱརེ ཨེཏརཧི ཙ པཙྩུཔྤནྣེ དིབྦཙཀྑུནཱ ཙུཏཱུཔཔཱཏཾ ཨིཏི ཨིམཱནི དྭེ བལཱནི དིབྦཙཀྑུཏོ ཨབྷིནཱིཧིཏཱནི. སོ ཨཏཱིཏམདྡྷཱནཾ དིབྦསྶ ¶ ཙཀྑུནོ གོཙརོ སོ ཨེཏརཧི སཏི གོཙརོ ཨིཏི ཨཏྟནོ ཙ པརེསཾ ཙ པུབྦེནིཝཱསཉཱཎཾ ཨནེཀཝིདྷཾ ནཱནཔྤཀཱརཀཾ པཙྩུཔྤནྣམདྡྷཱནཾ དིབྦེན ཙཀྑུནཱ ཨིམཱནི དྭེ ཏཐཱགཏབལཱནི, ཨཊྛམཾ པུབྦེནིཝཱསོ, ནཝམཾ དིབྦཙཀྑུ.

པུན ཙཔརཾ ཏཐཱགཏོ ཨརིཡཔུགྒལཱནཾ ཛྷཱནཾ ཝོདཱནཾ ནིབྦེདྷབྷཱགིཡཾ པཛཱནཱཏི ཨཡཾ པུགྒལོ ཨིམིནཱ མགྒེན ཨིམཱཡ པཊིཔདཱཡ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཙྪིཀཏྭཱ ཨུཔསམྤཛྫ ཝིཧརཏཱིཏི ཨིཏི ཨཏྟནོ ཙ ཨཱསཝཱནཾ ཁཡཾ ཉཱཎཾ དིཊྛེཀཊྛཱནཾ ཙཏུབྷཱུམིམུཔཱདཱཡ ཡཱཝ ནཝནྣཾ ཨརཧནྟཱནཾ ཨཱསཝཀྑཡོ ཨོདྷིསོ སེཀྑཱནཾ ཨནོདྷིསོ ཨརཧནྟཱནཾ. ཏཏྠ ཙེཏོཝིམུཏྟི དྭཱིཧི ཨཱསཝེཧི ཨནཱསཝཱ ཀཱམཱསཝེན ཙ བྷཝཱསཝེན ཙ, པཉྙཱཝིམུཏྟི དྭཱིཧི ཨཱསཝེཧི ཨནཱསཝཱ དིཊྛཱསཝེན ཙ ཨཝིཛྫཱསཝེན ཙ, ཨིམཱསཾ དྭིནྣཾ ཝིམུཏྟཱིནཾ ཡཐཱབྷཱུཏཾ ¶ ཉཱཎཾ, ཨིདཾ ཝུཙྩཏི ཨཱསཝཀྑཡེ ཉཱཎཾ. དསམཾ ཏཐཱགཏབལཾ.

༢༠. ཨིམེསུ ¶ དསསུ བལེསུ ཋིཏོ ཏཐཱགཏོ པཉྩཝིདྷཾ སཱསནཾ དེསེཏི སཾཀིལེསབྷཱགིཡཾ ཝཱསནཱབྷཱགིཡཾ དསྶནབྷཱགིཡཾ བྷཱཝནཱབྷཱགིཡཾ ཨསེཀྑབྷཱགིཡཾ. ཏཏྠ ཡོ ཏཎྷཱསཾཀིལེསོ, ཨིམསྶ ཨལོབྷོ ནིསྶརཎཾ. ཡོ དིཊྛིསཾཀིལེསོ, ཨིམསྶ ཨམོཧོ ནིསྶརཎཾ. ཡོ དུཙྩརིཏསཾཀིལེསོ, ཨིམསྶ ཏཱིཎི ཀུསལཱནི ནིསྶརཎཾ. ཀིཾ ནིདཱནཾ? ཏཱིཎི ཨིམཱནི [ཏཱིཎི ཧི ཨིམཱནི (པཱི.)] མནོདུཙྩརིཏཱནི – ཨབྷིཛ྄ཛྷཱ བྱཱཔཱདོ མིཙྪཱདིཊྛི. ཏཏྠ ཨབྷིཛ྄ཛྷཱ མནོདུཙྩརིཏཾ ཀཱཡཀམྨཾ ཨུཔཊྛཔེཏི, ཨདིནྣཱདཱནཾ སབྦཉྩ ཏདུཔནིབྦདྡྷཾ ཝཱཙཱཀམྨཾ ཨུཔཊྛཔེཏི, མུསཱཝཱདཉྩ སབྦཝིཏཐཾ སབྦཾ ཝཱཙམབྷཱཝཾ སབྦམཀྑཾ པལཱསཾ ཨབྷིཛ྄ཛྷཱ ཨཀུསལམཱུལནྟི, སུཙརིཏེ སུཙརིཏཾ མུསཱཝཱདཱ ཨདིནྣཱདཱནཱ ཨབྷིཛ྄ཛྷཱཡ ཙེཏནཱ, ཏཏྠ བྱཱཔཱདོ མནོདུཙྩརིཏཾ ཀཱཡཀམྨཾ ཨུཔཊྛཔེཏི, པཱཎཱཏིཔཱཏཾ སབྦཉྩ མེཏཾ ཨཱཀཌྜྷནཾ པརིཀཌྜྷནཾ ནིབྦདྡྷཾ རོཙནཾ ཝཱཙཱཀམྨཾ ཨུཔཊྛཔེཏི, པིསུཎཝཱཙཾ ཕརུསཝཱཙཾ མིཙྪཱདིཊྛི མནོདུཙྩརིཏཉྩ ཨབྷིཛ྄ཛྷཾ བྱཱཔཱདཾ མིཙྪཱདིཊྛིཾ པཡོཛེཏི, ཏསྶ ཡོ ཀོཙི མིཙྪཱདིཊྛི ཙཱགོ རཱགཛོ ཝཱ དོསཛོ ཝཱ སབྦསོ མིཙྪཱདིཊྛི སམྦྷཱུཏོ ཨིམིནཱ ཀཱརཎེན མིཙྪཱདིཊྛིཾ ཨུཔཊྛཔེཏི, ཀཱམེསུམིཙྪཱཙཱརཾ ཝཙཱིཀམྨཾ ཨུཔཊྛཔེཏི སམྥཔྤལཱཔཾ. ཨིམཱནི ¶ ཏཱིཎི དུཙྩརིཏཱནི ཨཀུསལམཱུལཱནི.

ཡཱ ཨབྷིཛ྄ཛྷཱ, སོ ལོབྷོ. ཡོ བྱཱཔཱདོ, སོ དོསོ. ཡཱ མིཙྪཱདིཊྛི, སོ མོཧོ. ཏཱནི ཨཊྛ མིཙྪཏྟཱནི ཨུཔཊྛཔེནྟི. ཏེསུ གཧིཏེསུ ཏཱིསུ ཨཀུསལམཱུལེསུ དསཝིདྷཾ ཨཀུསལམཱུལཾ པཱརིཔཱུརིཾ གཙྪཏི, ཏསྶ ཏིཝིདྷསྶ དུཙྩརིཏསཾཀིལེསསྶ ཝཱསནཱབྷཱགིཡཉྩ སུཏྟཾ ནིསྶརཎཾ. ཏཏྠ ¶ ཡོ བཧུསིཏོ ནིདྡེསོ ཡཐཱ ལོབྷོ དོསོ མོཧོཔི, ཏཏྠ ཨསིཏུཾ ཨེཏྠ ལོབྷོ ཨུསྶདོ ཏེན ཀཱརཎེན ཏེསུ ཝཱ དྷམྨེསུ ལོབྷོ པཉྙཔིཡཏི. ཏཏྠཱཡཾ མོཧོ ཨཀུསལཾ མོཧོ ཨཡཾ ཨཝིཛྫཱ, སཱ ཙཏུབྦིདྷཱ རཱུཔེ ཨབྷིནིཝིཊྛཱ, རཱུཔཾ ཨཏྟཏོ སམནུཔསྶཏི, ཨཝིཛྫཱགཏོ རཱུཔཝནྟཾ ཨཏྟཱནཾ, ཨཏྟནི ཝཱ རཱུཔཾ, རཱུཔསྨིཾ ཝཱ ཨཏྟཱནཾ. ཏཏྠ ཀཏམཾ པདཾ སཀྐཱཡདིཊྛིཡཱ ཨུཙྪེདཾ ཝདཏི ‘‘ཏཾ ཛཱིཝཾ ཏཾ སརཱིར’’ནྟི ནཏྠིཀདིཊྛི ཨདྷིཙྩསམུཔྤནྣདིཊྛི ཙ ཨཉྙོ ཙ ཀརོཏི, ཨཉྙོ པཊིསཾཝེདིཡཏི. པཙྪིམསཊྛིཀཔྤཱནཾ ཏཱིཎི པདཱནི སཀྐཱཡདིཊྛིཡཱ སསྶཏཾ བྷཛནྟི ‘‘ཨཉྙཾ ཛཱིཝཾ ཨཉྙཾ སརཱིར’’ནྟི ཨཀིརིཡཉྩ ཏཾ དུཀྑམིཙྪཏོ ཨཧེཏུཀཱ ཙ པཏནྟི ཨནཛ྄ཛྷཱབྷཱཝོ ཙ ཀམྨཱནཾ སབྦཉྩ མཱནཡི [མཱནཏི (པཱི.)]. ཏཏྠ ‘‘ཨིདམེཝ སཙྩཾ མོགྷམཉྙ’’ནྟི སཾསཱརེན ¶ སུདྡྷི ཨཱཛཱིཝཀཱ ཚལཱ༹སཱིཏི པཉྙཔེནྟི. ཡཐཱརཱུཔེ སཀྐཱཡདིཊྛིཡཱ ཙཏུཝཏྠུཀཱ, ཨེཝཾ པཉྩསུ ཁནྡྷེསུ ཝཱིསཏིཝཏྠུཀཱ སཀྐཱཡདིཊྛིཡཱ སསྶཏཾ བྷཛཏི. ཨཉྙཱཛཱིཝཀཱ ཙ སསྶཏཝཱདིཀེ ཙ སཱིལབྦཏཾ བྷཛནྟི པརཱམསནྟི ¶ ཨིམིནཱ བྷཝིསྶཱམི དེཝོ ཝཱ དེཝཉྙཏརོ ཝཱ, ཨཡཾ སཱིལབྦཏཔརཱམཱསོ. ཏཏྠ སཀྐཱཡདིཊྛིཡཱ སོ རཱུཔཾ ཨཏྟཏོ སམནུཔསྶཏི, ‘‘ཏཾ ཛཱིཝཾ ཏཾ སརཱིར’’མིཏི ཏཾ ཀངྑཏི ཝིཙིཀིཙྪཏི ནཱདྷིམུཙྩཏི ནཱབྷིཔྤསཱིདཏི པུབྦནྟེ ཨཔརནྟེ པུབྦནྟཱཔརནྟེ…པེ… ཨིཏི ཝཱསནཱབྷཱགིཡེསུ ཋིཏསྶ ཨཡཾ ཨུཔཀྐིལེསོ.

༢༡. ཏཏྠ སདྡྷིནྡྲིཡེན སབྦཾ ཝིཙིཀིཙྪིཏཾ པཛཧཏི, པཉྙིནྡྲིཡེན ཨུདཡབྦཡཾ པསྶཏི, སམཱདྷིནྡྲིཡེན ཙིཏྟཾ ཨེཀོདི ཀརོཏི ཝཱིརིཡིནྡྲིཡེན ཨཱརབྷཏི. སོ ཨིམེཧི པཉྩཧི ཨིནྡྲིཡེཧི སདྡྷཱནུསཱརཱི ཨཝེཙྩཔྤསཱདེ ནིརཏོ ཨནནྟརིཡཾ སམཱདྷིཾ ཨུཔྤཱདེཏི. ཨིནྡྲིཡེཧི སུདྡྷེཧི དྷམྨཱནུསཱརཱི ཨཔྤཙྩཡཏཱཡ ཨནནྟརིཡཾ སམཱདྷིཾ ཨུཔྤཱདེཏི. སོ ‘‘ཨིདཾ དུཀྑ’’ནྟི ཡཐཱབྷཱུཏཾ པཛཱནཱཏི. སཙྩཱནི ཨིདཾ དསྶནབྷཱགིཡཾ སུཏྟཾ. ཏསྶ པཉྩནྣཾ ཨོརམྦྷཱགིཡཱནཾ སཾཡོཛནཱནཾ ཏཱིཎི སཾཡོཛནཱནི དསྶནཔཧཱཏབྦཱནི སབྦེན སབྦཾ པཧཱིནཱནི དྭེ པུགྒལཀཏཱནི. ཏཏྠ ཏཱིཎི ཨཀུསལམཱུལཱནི བྷཱཝནཱཔཧཱཏབྦཱནི ཨུཔརིཀྑིཏྟཱནི ཚ བྷཝེ ནིབྦཏྟེནྟི. ཏཏྠ ཏེསུ ཨབྷིཛ྄ཛྷཱཡ ཙ བྱཱཔཱདེསུ ཏནུཀཏེསུ ཚ བྷཝཱ པརིཀྑཡཱ མརིཡཱདཾ གཙྪནྟི, དྭེ བྷཝཱ ཨཝསིཊྛཱ. ཏསྶ ཨབྷིཛ྄ཛྷཱ ཙ བྱཱཔཱདོ ཙ སབྦེན སབྦཾ པརིཀྑཱིཎཱ ཧོནྟི. ཨེཀོ བྷཝོ ཨཝསིཊྛོ ཧོཏི. སོ ཙ མཱནཝསེན ནིབྦཏྟེཏི. ཀིཉྩཱཔི ཨེཏྠ ཨཉྙེཔི ཙཏྟཱརོ ཀིལེསཱ རཱུཔརཱགོ བྷཝརཱགོ ཨཝིཛྫཱ ཨུདྡྷཙྩཾ ཀེཏུསྨིམཱནབྷཱུཏཱ ནཔྤཊིབལཱ ཨསྨིམཱནཾ ཝིནིཝཏྟེཏུཾ, སབྦེཔི ¶ ཏེ ཨསྨིམཱནསྶ པཧཱནཾ ཨཱརབྷཏེ. ཁཱིཎེསུ ན ཙ ཏེསུ ཨིདམུཏྟརིདསྶནབྷཱུམིཡཾ པཉྩསུ སེཀྑཔུགྒལེསུ ཏཱིསུ ཙ པཊིཔྤནྣཀེསུ དྭཱིསུ ཙ ཕལཊྛེསུ བྷཱཝནཱབྷཱགིཡཾ སུཏྟཾ. ཏདུཏྟརི ཨསེཀྑབྷཱགིཡསུཏྟཾ, ཀཏྠཙི བྷཱུམི ནིཔཱིལི༹ཡཏི. ཨིདཉྩ པཉྩམཾ སུཏྟཾ. ཏིཎྞཾ པུགྒལཱནཾ དེསིཏཾ པུཐུཛྫནསྶ སེཀྑསྶ ཨསེཀྑསྶ སཾཀིལེསབྷཱགིཡཾ ཝཱསནཱབྷཱགིཡཾ. པུཐུཛྫནསྶ ¶ དསྶནབྷཱགིཡཾ. བྷཱཝནཱབྷཱགིཡཾ པཉྩནྣཾ སེཀྑཱནཾ. ཡཾ པཋམནིདྡིཊྛཾ ཨསེཀྑབྷཱགིཡཾ སབྦེསཾ ཨརཧནྟཱནཾ. སཱ པན པཉྩཝིདྷཱ སཏྟཝཱིསཨཱཀཱརེ [སཏྟཝཱིསཾ ཨཱཀཱརེ (པཱི.)] པརིཡེསིཏབྦཾ. ཨེཏེསུ ཏསྶ གཏཱིནཾ ཏཏོ ཨུཏྟརི. ཏཉྩ ཁོ སངྑེཔེན པཉྙཱསཱཡ ཨཱཀཱརེཧི ¶ སམྤཏཏི, ཡེ པཉྙཱས ཨཱཀཱརཱ སཱསནེ ནིདྡིཊྛཱ, ཏེ སངྑིཔིཡནྟཱ དསཧི ཨཱཀཱརེཧི པཏནྟི. ཡེ ཨརིཡསཙྩཾ ནིཀྑེཔེན ཋིཏེ སངྑིཔིཡཏྟཱ ཨཊྛསུ ཨཱཀཱརེསུ པཏནྟི. ཙཏཱུསུ ཙ སཱདྷཱརཎེསུ སུཏྟེསུ ཡཱ ཧཱརསམྤཱཏསྶ བྷཱུམི, ཏེ སངྑིཔིཡནྟཱ པཉྩསུ སུཏྟེསུ པཏནྟི. སཾཀིལེསབྷཱགིཡེ ཝཱསནཱབྷཱགིཡེ བྷཱཝནཱབྷཱགིཡེ ནིབྦེདྷབྷཱགིཡེ ཨསེཀྑབྷཱགིཡེ ཙ. ཏེ སངྑིཔིཡནྟཱ ཙཏཱུསུ སུཏྟེསུ པཏནྟི. སཾཀིལེསབྷཱགིཡེ ཝཱསནཱབྷཱགིཡེ ནིབྦེདྷབྷཱགིཡེ ཨསེཀྑབྷཱགིཡེ ཙ. ཏེ སངྑིཔིཡམཱནཱ ཏཱིསུ སུཏྟེསུ པཏནྟི, པུཐུཛྫནབྷཱགིཡེ སེཀྑབྷཱགིཡེ ཨསེཀྑབྷཱགིཡེ ཙ. ཏེ སངྑིཔིཡནྟཱ དྭཱིསུ སུཏྟེསུ པཏནྟི ནིབྦེདྷབྷཱགིཡེ ཙ པུབྦཡོགབྷཱགིཡེ ཙ. ཡཐཱ ཝུཏྟཾ ¶ བྷགཝཏཱ དྭེ ཨཏྠཝསེ སམྤསྶམཱནཱ ཏཐཱགཏཱ ཨརཧནྟོ སམྨཱསམྦུདྡྷཱ དྷམྨཾ དེསེནྟི སུཏྟཾ གེཡྻཾ…པེ… སཏྠཱ པུབྦཡོགསམནྣཱགཏེ ཨཔྤཀསིརེན མཉྙམཱནཱ ཝསིཡནྟི པུབྦཡོགཱ ཙ བྷཝིསྶནྟི སནྟཱནཾ མཉྙམཱནཱདྷརཱཡ. ཏཏྠ པཉྙཱཝེམཏྟཏཾ ཨཏྟནོ སམནུཔསྶམཱནེན ཨཊྛཝིདྷེ སུཏྟསངྑེཔེ, ཡཏྠ ཡཏྠ སཀྐོཏི, ཏཏྠ ཏཏྠ ཡོཛེཏབྦཾ. ཏཏྠ ཏཏྠ ཡོཛེཏྭཱ སུཏྟསྶ ཨཏྠོ ནིདྡིསིཏབྦོ. ན ཧི སཏི ཝེདནཱ མནོ དྷཱརེཏྭཱ སཀྐཱ ཡེན ཀེནཙི སུཏྟསྶ ཨཏྠོ ཡཐཱབྷཱུཏཾ ནིདྡིསིཏུཾ.

ཏཏྠ པུརིམཀཱནཾ སུཏྟཱནཾ ཨིམཱ ཨུདྡཱནགཱཐཱ

ཀཱམནྡྷཱ ཛཱལསཉྪནྣཱ, པཉྩ ནཱིཝརཎཱནི ཙ;

མནོཔུབྦངྒམཱ དྷམྨཱ, མཧཱནཱམོ ཙ སཱཀིཡོ.

ཨུདྡྷཾ ཨདྷོ ཝིཔྤམུཏྟོ, ཡཉྩ སཱིལཀིམཏྠིཡཱ;

ཡསྶ སེལཱུཔམཾ ཙིཏྟཾ, ཨུཔཏིསྶ པུཙྪཱདིཀཱ.

ཡསྶ ཀཱཡགཏཱསཏི, ཚནྣཾ ཏམོཔརཱཡཎོ;

ན ཏཾ དལ༹ྷཾ ཙེཏསིཀཾ, ཨཡཾ ལོཀོཏིཨཱདིཀཾ.

ཙཏྟཱརོ ཙེཝ པུགྒལཱ, དདཏོ པུཉྙཾ པཝཌྜྷིཏཾ;

སོཏཱནུགཏདྷམྨེསུ, ཨིམཱ ཏེསཾ ཨུདྡཱནགཱཐཱ.

སཙེ བྷཱཡཐ [ཨུདཱ. ༤༤] དུཀྑསྶ, སཙེ ཝོ དུཀྑམཔྤིཡཾ;

མཱཀཏྠ པཱཔཀཾ ཀམྨཾ, ཨཱཝི ཝཱ ཡདི ཝཱ རཧོ.

‘‘ཨཏཱིཏེ ¶ , རཱདྷ, རཱུཔེ ཨནཔེཀྑོ ཧོཧཱི’’ཏི ཝིཏྠཱརེན ཀཱཏབྦཱ. ‘‘སཱིལཝནྟེན ¶ , ཨཱནནྡ, པུགྒལེན སདཱ ཀརཎཱིཡཱ ཀིནྟིམེ ཨཝིཔྤཊིསཱརོ ཨསྶཱ’’ཏི. ཨཡཾ ཝུཙྩཏི ཨཱཎཏྟི.

དྷམྨོ ཧཝེ རཀྑཏི དྷམྨཙཱརིཾ, ཚཏྟཾ མཧནྟཾ ཡཐ ཝསྶཀཱལེ;

ཨེསཱནིསཾསོ དྷམྨེ སུཙིཎྞེ, ན དུགྒཏིཾ གཙྪཏི དྷམྨཙཱརཱི.

‘‘སབྦེ དྷམྨཱ [དྷ. པ. ༢༧༩] ཨནཏྟཱ’’ཏི, ཡདཱ པཉྙཱཡ པསྶཏི;

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ.

‘‘སཏྟཧངྒེཧི སམནྣཱགཏོ ཁོ, བྷིཀྑུ, ཨཔི ཧིམཝནྟཾ པབྦཏརཱཛཱནཾ ཙཱལེཡྻ, ཀོ པན ཝཱདོ ཚཝཾ ཨཝིཛྫཾ སཏྟཀེསུ’’ ཝེཡྻཱཀརཎཾ ཀཱཏབྦཾ. ཨཡཾ ཨུཔཱཡོ.

སཙེ བྷཱཡཐ དུཀྑསྶ, སཙེ ཝོ དུཀྑམཔྤིཡཾ;

མཱཀཏྠ པཱཔཀཾ ཀམྨཾ, ཨཱཝི ཝཱ ཡདི ཝཱ རཧོ.

སཙེ ཧི པཱཔཀཾ ཀམྨཾ, ཀརོཐ ཝཱ ཀརིསྶཐ;

ན ཝོ དུཀྑཱ པམོཀྑཱཏྠི, ཨུཔཙྩཱཔི པལཱཡཏཾ [པལཱཡཏོ (པཱི.)].

པུརིམིཀཱཡ ¶ གཱཐཱཡ ཨཱཎཏྟི པཙྪིམིཀཱཡ ཕལཾ. སཱིལེ པཏིཊྛཱཡ དྭེ དྷམྨཱ བྷཱཝེཏབྦཱ ཡཱ ཙ ཙིཏྟབྷཱཝནཱ ཡཱ ཙ པཉྙཱབྷཱཝནཱ ཡཱ ཙ ཨཱཎཏྟི རཱགཝིརཱགཱ ཙ ཕལཾ.

སཱིལེ པཏིཊྛཱཡ [སཾ. ནི. ༡.༢༣] ནརོ སཔཉྙོ, ཙིཏྟཾ པཉྙཉྩ བྷཱཝཡཾ;

ཨཱཏཱཔཱི ནིཔཀོ བྷིཀྑུ, སོ ཨིམཾ ཝིཛཊཡེ ཛཊཾ.

པུརིམིཀཱཡ ཨཌྜྷགཱཐཱཡ ཨུཔཱཡོ, པཙྪིམིཀཱཡ ཨཌྜྷགཱཐཱཡ ཕལཾ. ནནྡིཡོ [ནནྡིཀོ (པཱི. ཀ.)] སཀྐོ ཨིསིཝུཏྠཔུརིརིཀཱམཨེཀརཀྑེ [ཨིསིཝུཏྟ… (པཱི.)] སུཏྟཾ མཱུལཏོ ཨུཔཱདཱཡ ཡཱཝ ¶ ཚསུ དྷམྨེསུ. ཨུཏྟརི པཉྩསུ དྷམྨེསུ ཡཱཙཡོགོ [ཡོ ཙ ཡོགོ (པཱི.)] ཀརཎཱིཡོ, ཨཡཾ ཨུཔཱཡོ. ཨསཧགཏསྶ ཀཱམཱསཝཱཔི ཙིཏྟཾ མུཙྩཏཱིཏི. སབྦཱསུ ཚསུ ཏཱིསུ. ཨཡཾ ཨུཔཱཡོ ཙ ཕལཉྩ.

ཏཏྠ ཀཏམཱ ཨཱཎཏྟི ཙ ཕལཉྩ ཨུཔཱཡོ ཙ?

སུཉྙཏོ ལོཀཾ ཨཝེཀྑསྶུ, མོགྷརཱཛ སདཱ སཏོ;

ཨཏྟཱནུདིཊྛིཾ ཨུཧཙྩ [ཨཱུཧཙྩ (སུ. ནི. ༡༡༢༥)], ཨེཝཾ མཙྩུཏརོ སིཡཱ.

‘‘སུཉྙཏོ ལོཀཾ ཨཝེཀྑསྶུ, མོགྷརཱཛཱ’’ཏི ཨཱཎཏྟི. ‘‘སདཱ སཏོ’’ཏི ཨུཔཱཡོ. ‘‘ཨཏྟཱནུདིཊྛིཾ ཨུཧཙྩ, ཨེཝཾ མཙྩུཏརོ སིཡཱ’’ཏི ཕལཾ. སམཱདྷིཾ, བྷིཀྑཝེ, བྷཱཝེཐ, སམཱཧིཏོ, བྷིཀྑཝེ, བྷིཀྑུ རཱུཔཾ ཨནིཙྩནྟི པཛཱནཱཏི. ཨེཝཾ པསྶཾ ཨརིཡསཱཝཀོ པརིམུཙྩཏི ཛཱཏིཡཱཔི…པེ… ཨུཔཱཡཱསེཧིཔི ཨིདྷ ཏཱིཎིཔི’’.

ཀཱམཾ ཀཱམཡམཱནསྶ, ཏསྶ ཙེཏཾ སམིཛ྄ཛྷཏི. ཨཡཾ ཨསྶཱདོ.

‘‘དྷམྨཙརིཡཱ ¶ སམཙརིཡཱ ཀུསལཙརིཡཱ ཧེཏཱུཧི, བྲཱཧྨཎ, ཨེཝམིདྷེཀཙྩེ སཏྟཱ ཀཱཡསྶ བྷེདཱ སུགཏིཾ སགྒཾ ལོཀཾ ཨུཔཔཛྫནྟི’’. ཨཡཾ ཨསྶཱདོ.

ཀཱམེསུ ཝེ ཧཉྙཏེ སབྦཱ མུཙྩེཝ – ཨཡཾ ཨཱདཱིནཝོ. པསེནདིསཾཡུཏྟཀེ སུཏྟེ པབྦཏོཔམཱ – ཨཡཾ ཨཱདཱིནཝོ.

ཡོ ཀཱམེ པརིཝཛྫེཏི, སཔྤསྶེཝ པདཱ སིརོ;

སོམཾ ཝིསཏྟིཀཾ ལོཀེ, སཏོ སམཏིཝཏྟཏི.

སཾཡུཏྟཀེ སུཏྟཾ པཱརིཙྪཏྟཀོ པཎྜུཔལཱསོ སནྣིཔལཱསོ – ཨིདཾ ནིསྶརཎཾ.

ཡཱནི [ཛཱ. ༡.༢.༡༤༤ དུཀནིཔཱཏེ] ཀརོཏི པུརིསོ, ཏཱནི ཨཏྟནི པསྶཏི;

ཀལྱཱཎཀཱརཱི ཀལྱཱཎཾ, པཱཔཀཱརཱི ཙ པཱཔཀཾ.

ཏཏྠ ཡཾ པཱཔཀཱརཱི པཙྩནུབྷོཏི ཨཡཾ ཨསྶཱདོ. ལཱབྷཱལཱབྷཨཊྛཀེསུ བྱཱཀརཎཾ, ཏཏྠ ཨལཱབྷོ ཨཡསོ ནིནྡཱ དུཀྑཾ, ཨཡཾ ཨཱདཱིནཝོ. ལཱབྷོ ཡསོ སུཁཾ པསཾསཱ, ཨཡཾ ཨསྶཱདོ.

‘‘སུཁོ ཝིཔཱཀོ པུཉྙཱནཾ, ཨདྷིཔྤཱཡོ ཙ ཨིཛ྄ཛྷཏི;

ཁིཔྤཉྩ པརམཾ སནྟིཾ, ནིབྦཱནམདྷིགཙྪཏཱི’’ཏི.

ཡོ ཙ ཝིཔཱཀོ པུཉྙཱནཾ ཡཱ ཙ ཨདྷིཔྤཱཡསྶ ཨིཛ྄ཛྷནཱ, ཨཡཾ ཨསྶཱདོ. ཡཾ ཁིཔྤཉྩ པརམཾ སནྟིཾ ནིབྦཱནམདྷིགཙྪཏི, ཨིདཾ ནིསྶརཎཾ.

བཱཏྟིཾསཱཡ ཙེཝ མཧཱཔུརིསལཀྑཎེཧི སམནྣཱགཏསྶ མཧཱཔུརིསསྶ དྭེཡེཝ གཏིཡོ ཧོནྟི, སཙེ ¶ ཨགཱརཾ ཨཛ྄ཛྷཱཝསཏི, རཱཛཱ ¶ ཧོཏི ཙཀྐཝཏྟཱི ཡཱཝ ཨབྷིཝིཛིནིཏྭཱ ཨཛ྄ཛྷཱཝསཏི ཨཡཾ ཨསྶཱདོ. སཙེ ཨགཱརསྨཱ ཨནགཱརིཡཾ པབྦཛཏི སབྦེན ཨོགྷེན [ཨོསདྷེན (པཱི. ཀ.)] ནིསྶརཎཾ ཨཡཾ ཨསྶཱདོ ཙ ནིསྶརཎཉྩ.

ཨཱདཱནསྶ [ཨཱདིནྣསྶ (ཀ.)] བྷཡཾ ཉཏྭཱ, ཛཱཏིམརཎསམྦྷཝཾ;

ཨནཱདཱཏུཾ ནིབྦཏྟཏི, ཛཱཏིམརཎསངྑཡཱ.

པུརིམིཀཱཡ ཨཌྜྷགཱཐཱཡ ཛཱཏིམརཎསམྦྷཝོ ཨཱདཱིནཝོ. ཨནཱདཱཏུཾ ནིབྦཏྟཏི ཛཱཏིམརཎསངྑཡཱཏི ནིསྶརཎཾ.

ཀིཙྪཾ ཝཏཱཡཾ ལོཀོ ཨཱཔནྣོ ཡམིདཾ ཛཱཡཏེ ཙ མཱིཡཏེ ཙ. ཡཱཝ ཀུདསྶུནཱམསྶ དུཀྑསྶ ཨནྟོ བྷཝིསྶཏི པརཏོ ཝཱཏི ཨེཏྠ ཡཱ ཨུཔརིཀྑཱ, ཨཡཾ ཨཱདཱིནཝོ. ཡོ གེདྷཾ ཉཏྭཱ ཨབྷིནིཀྑམཏི ཡཱཝ པུརཱཎཀཱཡ རཱཛདྷཱནིཡཱ, ཨིདཾ ནིསྶརཎཾ. ཨཡཾ ཨཱདཱིནཝོ ཙ ནིསྶརཎཉྩ.

ཏཏྠ ¶ ཀཏམོ ཨསྶཱདོ ཙ ཨཱདཱིནཝོ ཙ ནིསྶརཎཉྩ?

ཀཱམཱ ཧི ཙིཏྲཱ ཝིཝིདྷཱ [མདྷུརཱ (ཐེརགཱ. ༧༨༧)] མནོརམཱ, ཝིརཱུཔརཱུཔེཧི མཐེནྟི ཙིཏྟཾ;

ཏསྨཱ ཨཧཾ [ཐེརགཱ. ༧༨༧] པབྦཛིཏོམྷི རཱཛ, ཨཔཎྞཀཾ སཱམཉྙམེཝ སེཡྻོ.

ཡཾ ‘‘ཀཱམཱ ཧི ཙིཏྲཱ ཝིཝིདྷཱ མནོརམཱ’’ཏི ཨཡཾ ཨསྶཱདོ. ཡཾ ‘‘ཝིརཱུཔརཱུཔེཧི མཐེནྟི ཙིཏྟ’’ནྟི ཨཡཾ ཨཱདཱིནཝོ. ཡཾ ཨཧཾ ¶ ཨགཱརསྨཱ པབྦཛིཏོམྷི རཱཛ ཨཔཎྞཀཾ སཱམཉྙམེཝ སེཡྻོཏི ཨིདཾ ནིསྶརཎཾ.

བལཝཾ བཱལོཔམསུཏྟཾ ཡཾ ཨཱསཱཡ ཝཱ ཝེདནཱིཡཾ ཀམྨཾ གཱཧཏི, ཏཐཱ ཙེཔི ཡཾ ཡཾ པཱཔཀམྨཾ ཨནུབྷོཏི, ཏཏྠ དུཀྑཝེདནཱིཡེན ཀམྨེན ཨབྷཱཝིཏཀཱཡེན ཙ ཡཱཝ པརིཏྟཙེཏསོ ཙ ཨཱདཱིནཝཾ དསྶེཏི སུཁཝེདནཱིཡེན ཀམྨེན ཨསྶཱདེཏི. ཡཾ པུརཱསདིསོ ཧོཏི. བྷཱཝིཏཙིཏྟོ བྷཱཝིཏཀཱཡོ བྷཱཝིཏཔཉྙོ མཧཱནཱམོ ཨཔརིཏྟཙེཏསོ, ཨིདཾ ནིསྶརཎཾ.

ན ཧི པཱཔཾ ཀཏཾ ཀམྨཾ, སཛྫུཁཱིརཾཝ མུཙྩཏི;

ཌཧནྟཾ བཱལམནྭེཏི, བྷསྨཙྪནྣོཝ [བྷསྨཱཚནྣོཝ (ཀ.) པསྶ དྷ. པ. ༧༡] པཱཝཀོ.

ཙཏྟཱརི ཨགཏིགམནཱནི, ཨིདཾ ལོཀིཀཾ སུཏྟཾ.

‘‘ཡསྶིནྡྲིཡཱནི སམཐངྒཏཱནི [སམཐཾ གཏཱནི (པཱི.) པསྶ དྷ. པ. ༩༤], ཨསྶཱ ཡཐཱ སཱརཐིནཱ སུདནྟཱ;

པཧཱིནམཱནསྶ ཨནཱསཝསྶ, དེཝཱཔི ཏསྶ པིཧཡནྟི ཏཱདིནོ’’ཏི.

‘‘ཨརིཡཾ ཝོ, བྷིཀྑཝེ, སམྨཱསམཱདྷིཾ དེསེསྶཱམཱི’’ཏི ཨིདཾ ལོཀུཏྟརཾ སུཏྟཾ.

ཏཏྠ ¶ ཀཏམཾ ལོཀིཀཾ ལོཀུཏྟརཉྩ སུཏྟཾ?

སཏྟིཡཱ ཝིཡ ཨོམཊྛོ, དཡ྄ཧམཱནོཝ མཏྠཀེ;

ཀཱམརཱགཔྤཧཱནཱཡ, སཏོ བྷིཀྑུ པརིབྦཛེ.

‘‘སཏྟིཡཱ ཝིཡ ཨོམཊྛོ, དཡ྄ཧམཱནོཝ མཏྠཀེ’’ཏི ལོཀིཀཾ;

‘‘ཀཱམརཱགཔྤཧཱནཱཡ, སཏོ བྷིཀྑུ པརིབྦཛེ’’ཏི ལོཀུཏྟརཾ;

ཀབལཱི༹ཀཱརེ ¶ ཨཱཧཱརེ ཨཏྠི ཚནྡོཏི ལོཀིཀཾ. ནཏྠི ཚནྡོཏི ལོཀུཏྟརཾ སུཏྟཾ.

ཡོ པཱཎམཏིཔཱཏེཏི, མུསཱཝཱདཉྩ བྷཱསཏི;

ལོཀེ ཨདིནྣཾ ཨཱདིཡཏི [ཨཱདིཡི (ཀ.) པསྶ ཨ. ནི. ༥.༡༧༤], པརདཱརཉྩ གཙྪཏི.

སུརཱམེརཡཔཱནཉྩ, ཡོ ནརོ ཨནུཡུཉྫཏི;

ཨཔྤཧཱཡ ¶ པཉྩ ཝེརཱནི, དུསྶཱིལོ ཨིཏི ཝུཙྩཏི.

ཏཱིཎིམཱནི, བྷིཀྑཝེ, དུཙྩརིཏཱནི. ཨིདཾ ཀམྨཾ.

སཊྛིཝསྶསཧསྶཱནི, ཡཐཱརཱུཔཱི ཝིཔཙྩགཱ.

‘‘དིཊྛཱ མཡཱ, བྷིཀྑཝེ [སཾ. ནི. ༤.༡༣༥], ཚ ཕསྶཱཡཏནིཀཱ ནཱམ ནིརཡཱ. དིཊྛཱ མཡཱ, བྷིཀྑཝེ, ཚ ཕསྶཱཡཏནིཀཱ ནཱམ སགྒཱ’’. ཨཡཾ ཝིཔཱཀོ.

ཨཡསཱཝ མལཾ སམུཊྛིཏཾ, ཏཏུཊྛཱཡ ཏམེཝ ཁཱདཏི;

ཨེཝཾ ཨཏིདྷོནཙཱརིནཾ, སཱནི ཀམྨཱནི ནཡནྟི དུགྒཏིཾ.

ཨཡསཱཝ མལཾ སམུཊྛིཏཾ, ཡཱཝ སཱནི ཀམྨཱནཱིཏི ཨིདཾ ཀམྨཾ. ནཡནྟི དུགྒཏིནྟི ཝིཔཱཀོ.

ཙཏཱུསུ སམྨཱཔཊིཔཛྫམཱནོ མཱཏརི པིཏརི ཏཐཱགཏེ ཏཐཱགཏསཱཝཀེ ¶ ཡཱ སམྨཱཔཊིཔཏྟི, ཨིདཾ ཀམྨཾ. ཡཾ དེཝེསུ ཨུཔཔཛྫཏི, ཨཡཾ ཝིཔཱཀོ. ཨིདཾ ཀམྨཉྩ ཝིཔཱཀོ ཙ.

ནེལངྒོ སེཏཔཙྪཱདོ, ཨེཀཱརོ ཝཏྟཏཱི [ཝཏྟཏེ (ཀ.) ཨུདཱ. ༦༥] རཐོ;

ཨནཱིགྷཾ པསྶ ཨཱཡནྟཾ, ཚིནྣསོཏཾ ཨབནྡྷནཾ;

ཡཾ ཝཱ ཙིཏྟཾ སམཎེསུ, ཙིཏྟཱགཧཔཏི དིསྶཏི.

ཨེཝཾ ཨིམཱཡ གཱཐཱཡ ནིདྡིཊྛོ ཨཏྠོ.

གོཔཱལཀོཔམེ ¶ ཨེཀཱདས པདཱནི. ཨེཝཾ ཁོ, བྷིཀྑཝེ, བྷིཀྑུ རཱུཔཉྙཱུ ཧོཏི. ཡཱ ཙ ཨཏིརེཀཔཱུཛཱཡ པཱུཛེཏཱ ཧོཏཱིཏི. ཨིམཱནི ཨེཀཱདས པདཱནི ཡཐཱབྷཱསིཏཱནི ནིདྡིཊྛོ ཨཏྠོ.

སུཁོ ཝིཝེཀོ ཏུཊྛསྶ, སུཏདྷམྨསྶ པསྶཏོ;

ཨབྱཱཔཛྫཾ [ཨབྱཱཔཛ྄ཛྷཾ (པཱི. ཀ.) པསྶ ཨུདཱ. ༡༡] སུཁཾ ལོཀེ, པཱཎབྷཱུཏེསུ སཾཡམོཏི.

སུཁཱ ཝིརཱགཏཱ ལོཀེ, ཀཱམཱནཾ སམཏིཀྐམོ;

ཨསྨིམཱནསྶ ཡོ ཝིནཡོ, ཨེཏཾ ཝེ པརམཾ སུཁནྟི.

ཨིདཾ ཨནིདྡིཊྛཾ. ཨཊྛ མཧཱཔུརིསཝིཏཀྐཱ. ཨིདཾ ཨནིདྡིཊྛཾ.

ཏཏྠ ཀཏམཾ ནིདྡིཊྛཉྩ ཨནིདྡིཊྛཉྩ?

པསནྣནེཏྟོ [སུ. ནི. ༥༥༥] སུམུཁོ, བྲཧཱ ཨུཛུ པཏཱཔཝཱ;

མཛ྄ཛྷེ སམཎསངྒྷསྶ, ཨཱདིཙྩོཝ ཝིརོཙསི.

པསནྣནེཏྟོ ¶ ཡཱཝ ཨཱདིཙྩོཝ ཝིརོཙསཱིཏི ནིདྡིཊྛོ. པསནྣནེཏྟོ ཡོ བྷགཝཱ ཀཐཉྩ པན པསནྣནེཏྟཏཱ, ཀཐཾ སུམུཁཏཱ, ཀཐཾ བྲཧཀཱཡཏཱ, ཀཐཾ ཨུཛུཀཏཱ, ཀཐཾ པཏཱཔཝཏཱ, ཀཐཾ ཝིརོཙཏཱཏི ཨནིདྡིཊྛོ. ཕེཎཔིཎྜོཔམཾ ཝེཡྻཱཀརཎཾ ཡཐཱ ཕེཎཔིཎྜོ ཨེཝཾ རཱུཔཾ ཡཐཱ པུབྦུལོ༹ ཨེཝཾ ཝེདནཱ མཱཡཱ ཝིཉྙཱཎཾ པཉྩཀྑནྡྷཱ པཉྩཧི ཨུཔམཱཧི ནིདྡིཊྛཱ. ཀེན ཀཱརཎེན ཕེཎཔིཎྜོཔམཾ རཱུཔཾ སབྦཉྩ ཙཀྑུཝིཉྙེཡྻཾ ཡཾ ཝཱ ཙཏཱུཧི ཨཱཡཏནེཧི? ཀཐཾ ཝེདནཱ པུབྦུལཱུ༹པམཱ? ཀཏརཱ ཙ སཱ ཝེདནཱ སུཁཱ དུཀྑཱ ཨདུཀྑམསུཁཱ? ཨེཝམེསཱ ཨནིདྡིཊྛཱ. ཨེཝཾ ནིདྡིཊྛཉྩ ཨནིདྡིཊྛཉྩ.

པཉྙཱ ཧི སེཊྛཱ ལོཀསྨིཾ, ཡཱཡཾ ནིབྦེདྷགཱམིནཱི;

ཡཱཡ [ཡཱཡཾ (ཀ.) པསྶ ཨིཏིཝུ. ༤༡] སམྨཱ པཛཱནཱཏི, ཛཱཏིམརཎསངྑཡཾ.

ཏཱིཎིམཱནི ¶ ཨིནྡྲིཡཱནི ཨནཉྙཱཏཉྙསྶཱམཱིཏིནྡྲིཡཾ ཨཉྙིནྡྲིཡཾ ཨཉྙཱཏཱཝིནྡྲིཡཾ, ཨིདཾ ཉཱཎཾ.

ཀཱམེསུ [ཨུདཱ. ༦༣] སཏྟཱ ཀཱམསངྒསཏྟཱ, སཾཡོཛནེ ཝཛྫམཔསྶམཱནཱ;

ན ཧི ཛཱཏུ སཾཡོཛནསངྒསཏྟཱ, ཨོགྷཾ ཏརེཡྻུཾ ཝིཔུལཾ མཧནྟཾ.

ཙཏཱུཧི ¶ ཨངྒེཧི སམནྣཱགཏཱ ཀཱཡསྶ བྷེདཱ དེཝེསུ ཨུཔྤཛྫནྟི. ཨུདཱནེ ཀཱཔིཡཾ སུཏྟཾ ཨཔཎྞཀཔསཱདནཱིཡཾ – ཨིདཾ ནེཡྻཾ.

སབྦེ དྷམྨཱ ཨནཏྟཱཏི, ཡདཱ པཉྙཱཡ པསྶཏི;

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ.

ཡདཱ པསྶཏཱིཏི ཉཱཎཾ. ཡོ སབྦདྷམྨེ ཨནཏྟཱཀཱརེན ཨུཔཊྛཔེཏི ཨིདཾ ནེཡྻཾ.

ཙཏྟཱརི ཨརིཡསཙྩཱནི, ཏཏྠ ཏཱིཎི ནེཡྻཱནི མགྒསཙྩཾ སཱིལཀྑནྡྷོ ཙ པཉྙཱཀྑནྡྷོ ཙ, ཨིདཾ ཉཱཎཉྩ ནེཡྻཉྩ.

ཨེསེཝ མགྒོ [དྷ. པ. ༢༧༤ དྷམྨཔདེ] ནཏྠཉྙོ, དསྶནསྶ ཝིསུདྡྷིཡཱ;

ཨེཏཉྷི ཏུམྷེ པཊིཔཛྫཐ, མཱརསྶེཏཾ པམོཧནཾ.

ཙཏཱུཧི ཨངྒེཧི སམནྣཱགཏོ ཨརིཡསཱཝཀོ ཨཏྟནཱཝ [ཨཏྟནཱཡེཝ (ཀ.) སཾ. ནི. ༥.༡༠༠༣] ཨཏྟཱནཾ བྱཱཀརེཡྻ ‘‘ཁཱིཎནིརཡོམྷི ཡཱཝ སོཏཱཔནྣོཧམསྨི ཨཝིནིཔཱཏདྷམྨོ ནིཡཏོ སམྦོདྷིཔརཱཡཎོ’’ཏི. ཨིདཾ དསྶནཾ.

ཡསྶིནྡྲིཡཱནི སུབྷཱཝིཏཱནི, ཨཛ྄ཛྷཏྟཾ བཧིདྡྷཱ ཙ སབྦལོཀེ;

སོ པུགྒལོ མཏི ཙ རཱུཔསཉྙཱི, སུམོཧགཏཱ ན ཛཱནཱཏི [ཀིཾསུ མོཧགཏཱནུ ཛཱནཱཏི (ཀ.)].

ཙཏྟཱརི དྷམྨཔདཱནི – ཨནབྷིཛ྄ཛྷཱ ཨབྱཱཔཱདོ སམྨཱསཏི སམྨཱསམཱདྷི. ཨཡཾ ¶ བྷཱཝནཱ.

ཝཙསཱ མནསཱཐ ཀམྨུནཱ ཙ, ཨཝིརུདྡྷོ སམྨཱ ཝིདིཏྭཱ [ཝིདིཏྭཱན (ཀ.) སུ. ནི. ༣༦༧] དྷམྨཾ;

ནིབྦཱནཔདཱབྷིཔཏྠཡཱནོ, སམྨཱ སོ ལོཀེ པརིབྦཛེཡྻ.

སོཏཱཔཏྟིཕལཾ སཙྪིཀཱཏུཀཱམེན ཀཏམེ དྷམྨཱ མནསིཀཱཏབྦཱ, བྷགཝཱ ཨཱཧ པཉྩུཔཱདཱནཀྑནྡྷཱ. ཨིདཾ དསྶནཉྩ བྷཱཝནཱ ཙ.

ཡཱནི ཀརོཏི པུརིསོཏི ཝིཏྠཱརོ. ཏཱིཎིམཱནི, བྷིཀྑཝེ, སུཙརིཏཱནི. ཨིམེ ཝིཔཱཀདྷམྨདྷམྨཱ.

རཱུཔཾ ཝེདཡིཏཾ སཉྙཱ, ཝིཉྙཱཎཾ ཡཱ ཙེཝ ཙེཏནཱ;

ནེསོཧམསྨི ན མེསོ ཨཏྟཱ, ཨིཏི དིཊྛོ ཝིརཛྫཏི.

པཉྩིམེ, བྷིཀྑཝེ, ཁནྡྷཱ – ཨིམེ ནཝིཔཱཀདྷམྨདྷམྨཱ.

ཏཏྠ ཀཏམོ ནེཝཝིཔཱཀོ ནཝིཔཱཀདྷམྨདྷམྨོ?

‘‘ཡེ ¶ ཨེཝཾ པཊིཔཛྫནྟི, ནཡཾ བུདྡྷེན དེསིཏཾ;

ཏེ དུཀྑསྶནྟཾ ཀརིསྶནྟི, སཏྠུསཱསནཀཱརཀཱ’’ཏི.

ཨིཏི ཡཱ ཙ སམྨཱཔཊིཔཏྟི ཡོ ཙ ནིརོདྷོ, ཨུབྷཡམེཏཾ ནེཝཝིཔཱཀོ ནཝིཔཱཀདྷམྨོ. བྲཧྨཙརིཡཾ ¶ ཝོ, བྷིཀྑཝེ, དེསེསྶཱམི, བྲཧྨཙརིཡཕལཱནི ཙ བྲཧྨཙརིཡཉྩ ཨརིཡོ ཨཊྛངྒིཀོ མགྒོ བྲཧྨཙརིཡཕལཱནི སོཏཱཔཏྟིཕལཾ ཡཱཝ ཨརཧཏྟཾ.

སབྦཔཱཔསྶ ཨཀརཎཾ, ཀུསལསྶ ཨུཔསམྤདཱ;

སཙིཏྟཔརིཡོདཔནཾ, ཨེཏཾ བུདྡྷཱན སཱསནཾ.

ཏཱིཎིམཱནི, བྷིཀྑཝེ, ཝིམོཀྑམུཁཱནི. ཨིདཾ སཀཝཙནཾ.

ནཏྠི པུཏྟསམཾ པེམཾ, ནཏྠི གོཎསམིཏཾ དྷནཾ;

ནཏྠི སཱུརིཡསམཱ ཨཱབྷཱ, སམུདྡཔརམཱ སརཱ.

ཧེཏུནཱ མཱརིསཱ ཀོསིཡཱ སུབྷཱསིཏེན སངྒཱམཝིཛཡོ སོཔི ནཱམ, བྷིཀྑཝེ, སཀྐོ དེཝཱནམིནྡོ སཀཾ ཕལཾ པརིབྷུཉྫམཱནོཏི ཝིཏྠཱརེན ཀཱཏབྦཾ. ཨིདཾ པརཝཙནཾ.

‘‘ཡཾ པཏྟཾ ཡཉྩ པཏྟབྦཾ, ཨུབྷཡམེཏཾ རཛཱནུཀིཎྞཾ;

ཡེ ཨེཝཾཝཱདིནོ ནཏྠི, ཏེསཾ ཀཱམེསུ དོསོ’’ཏི.

ཨིདཾ པརཝཙནཾ. ཡེ ཙ ཁོ ཏེ ཨུབྷོ ཨནྟེ ཨནུཔགམྨ ཝཊྚཾ ཏེསཾ ནཏྠི པཉྙཱཔནཱཡ. ཨིདཾ སཀཝཙནཾ.

‘‘ནནྡཏི ¶ ¶ པུཏྟེཧི པུཏྟིམཱ, གོམཱ གོཧི [བྷོགིཀོ བྷོགེཧི (པཱི.) སཾ. ནི. ༡.༡༢] ཏཐེཝ ནནྡཏི;

ཨུཔདྷཱི ཧི ནརསྶ ནནྡནཱ, ན ཧི སོ ནནྡཏི ཡོ ནིརཱུཔདྷཱི’’ཏི – པརཝཙནཾ.

‘‘སོཙཏི པུཏྟེཧི པུཏྟིམཱ, གོམཱ གོཧི ཏཐེཝ སོཙཏི;

ཨུཔདྷཱི ཧི ནརསྶ སོཙནཱ, ན ཧི སོ སོཙཏི ཡོ ནིརཱུཔདྷཱི’’ཏི – སཀཝཙནཾ.

ཡེ ཀེཙི བྷཱུཏཱ བྷཝིསྶནྟི ཡེ ཝཱཔི, སབྦེ གམིསྶནྟི པཧཱཡ དེཧཾ;

ཏཾ སབྦཛཱནིཾ ཀུསལོ ཝིདིཏྭཱ, དྷམྨེ [ཨཱཏཱཔིཡོ (ཨུདཱ. ༤༢)] ཋིཏོ བྲཧྨཙརིཡཾ ཙརེཡྻ.

ཏཡོམེ, བྷིཀྑཝེ, སཏྠཱརོ, ཏཐཱགཏོ ཨརཧཾ སེཀྑོ པཊིཔདོ. ཨིདཾ སཏྟཱདྷིཊྛཱནཾ.

ཡཉྩ ཀཱམསུཁཾ [ཨུདཱ. ༡༢] ལོཀེ, ཡཉྩིདཾ དིཝིཡཾ སུཁཾ;

ཏཎྷཀྑཡསུཁསྶེཏེ, ཀལཾ ནཱགྒྷནྟི སོལ༹སིཾ.

སཏྟིམེ ¶ , བྷིཀྑཝེ, བོཛ྄ཛྷངྒཱ, ཨིདཾ དྷམྨཱདྷིཊྛཱནཾ.

ཏཏྠ ཀཏམཾ སཏྟཱདྷིཊྛཱནཉྩ དྷམྨཱདྷིཊྛཱནཉྩ? དུདྡསམནྟཾ སཙྩཾ དུདྡསོ པཊིཝེདྷོ བཱལེཧི, ཛཱནཏོ པསྶཏོ ནཏྠི ནནྡཱིཏི ཝདཱམི. དུདྡསམནྟཾ སཙྩཾ དུདྡསོ པཊིཝེདྷོ བཱལེཧཱིཏི དྷམྨཱདྷིཊྛཱནཾ. ཛཱནཏོ པསྶཏོ ནཏྠི ནནྡཱིཏི སཏྟཱདྷིཊྛཱནཾ. དཱརུཀྑནྡྷོཔམཾ གངྒཱཡ ཏཱིརིཡཱ ཨོརིམཉྩ ཏཱིརཾ པཱརིམཉྩ ཏཱིརཾ ཐལེ ཝཱ [ཐལེཝ ཙ (ཀ.) སཾཡུཏྟནིཀཱཡེ] ན ཙ ཨུསྶཱིདནཾ, མཛ྄ཛྷེ ཙ ན སཾསཱིདནཾ མནུསྶགྒཱཧོ ཙ ཨམནུསྶགྒཱཧོ ཙ ཨནྟོཔཱུཏིབྷཱཝོ ཙ, ཨིདཾ དྷམྨཱདྷིཊྛཱནཾ. ཨེཝཾ པན བྷིཀྑུ ནིབྦཱནནིནྣོ བྷཝིསྶཏི ནིབྦཱནཔརཱཡཎོཏི སཏྟཱདྷིཊྛཱནཾ. ཨིདཾ སཏྟཱདྷིཊྛཱནཉྩ དྷམྨཱདྷིཊྛཱནཉྩ.

མགྒཱནཊྛངྒིཀོ ¶ སེཊྛོ, སཙྩཱནཾ ཙཏུརོ པདཱ;

ཝིརཱགོ སེཊྛོ དྷམྨཱནཾ, དྭིཔདཱནཉྩ ཙཀྑུམཱ.

ཏཱིཎིམཱནི, བྷིཀྑཝེ, ཨགྒཱནི – བུདྡྷོ སཏྟཱནཾ, ཝིརཱགོ དྷམྨཱནཾ, སངྒྷོ གཎཱནཾ. ཨཡཾ ཐཝོ.

ཀཱཡེན ¶ [དྷ. པ. ༣༦༡] སཾཝརོ སཱདྷུ, སཱདྷུ ཝཱཙཱཡ སཾཝརོ;

མནསཱ སཾཝརོ སཱདྷུ, སཱདྷུ སབྦཏྠ སཾཝུཏོ;

སབྦཏྠ སཾཝུཏོ བྷིཀྑུ, སབྦདུཀྑཱ པམུཙྩཏི.

ཏཱིཎིམཱནི, བྷིཀྑཝེ, ཀརཎཱིཡཱནི – ཀཱཡསུཙརིཏཾ ཝཙཱིསུཙརིཏཾ མནོསུཙརིཏཾ. ཨིདཾ ཨནུཉྙཱཏཾ.

ནཏྠི པུཏྟསམཾ པེམཾ. ཝིཏྠཱརོ ཨིདཾ པཊིཀྑིཏྟཾ.

ཏཱིཎིམཱནི, བྷིཀྑཝེ, ཨཀརཎཱིཡཱནི སཡཾ ཨབྷིཉྙཱཡ དེསིཏཱནི. ཀཏམཱནི ཏཱིཎི? ཀཱཡདུཙྩརིཏཾ ཝཙཱིདུཙྩརིཏཾ མནོདུཙྩརིཏཾ. ཨིདཾ པཊིཀྑིཏྟཾ.

ཏཏྠ ཀཏམཾ ཨནུཉྙཱཏཉྩ པཊིཀྑིཏྟཉྩ?

ཀཱཡེན ཀུསལཾ ཀརེ, ཨསྶ ཀཱཡེན སཾཝུཏོ;

ཀཱཡདུཙྩརིཏཾ ཧིཏྭཱ, ཀཱཡསུཙརིཏཾ ཙརེ.

དྭཱིཧི པཋམཔདེཧི ཙཏུཏྠེན ཙ པདེན ཨནུཛཱནཱཏི. ཀཱཡདུཙྩརིཏཾ ཧིཏྭཱཏི ཏཏིཡེན པདེན པཊིཀྑིཏྟནྟི. མཧཱཝིབྷངྒོ ཨཙིརཏཔཱནཱདོ.

སཙེ ¶ བྷཱཡསི དུཀྑསྶ, མཱབྷིནནྡི ཨནཱགཏཾ;

ཝསྶཀཱལེ ཡཐཱ ཚཏྟཾ, ཀུསལཱནི ཀམཏྠཀེ.

སབྦེ ¶ དྷམྨཱ ཨནཏྟཱཏི, སམཱགཏཾ ཝིཙཱལཡེ;

ན ཝོ དུཀྑཱ པམོཀྑཱཏྠི, སམཐོ ཙ ཝིཔསྶནཱ.

ཀཱམཙྪནྡཾ ཨུཔཱདཱཡ, ཡོ སོ ཝིཏཀྐེཧི ཁཛྫཏི;

སུབྷཱཝིཏཏྟེ བོཛ྄ཛྷངྒེ, སོ ཨིམཾ ཝིཛཊཡེ ཛཊཾ.

སུཉྙཏོ ལོཀཾ ཨཝེཀྑསྶུ, སམཱདྷིབྷཱཝི བྷཱཝསེ;

ཀཱམཾ ཀཱམཡམཱནསྶ, དྷམྨཙརིཡཱཡ སུགཏིཾ.

ཧཉྙཏེ སབྦཱ མུཙྩེཝ, ནིཔྤོཋེནྟོ ཙཏུདྡིསཱ;

ཡོ ཀཱམེ པརིཝཛྫེཏི, པཱརིཚཏྟོཔམེཝ ཙ.

ཡཱནི ¶ ཀརོཏི པུརིསོ, ལོཀདྷམྨཱ པཀཱསིཏཱ;

སུཁོ ཝིཔཱཀོ པུཉྙཱནཾ, ཏཏིཡཾ ཨཉྙཾ ན ཝིཛྫཏི.

ཨཱདཱནསྶ བྷཡཾ ཉཏྭཱ, ཛཱཡཏེ ཛཱིཡཏེཔི ཙ;

ཀཱམཱ ཧི ཙིཏྲཱ ཝིཝིདྷཱ, ཨཐ ལོཎསལློཔམཾ.

ན ཧི པཱཔཾ ཀཏཾ ཀམྨཾ, ཨགཏཱིཧི ཙ གཙྪཏི;

ཡསྶིནྡྲིཡཱནི སམཐངྒཏཱནི, ཏཐེཝ པཉྩཉཱཎིཀོ.

སཏྟིཡཱ ཝིཡ ཨོམཊྛོ, ཝིཉྙཱཎཉྩ པཏིཊྛིཏཱ;

ཡོ པཱཎམཏིཔཱཏེཏི, ཏཱིཎི དུཙྩརིཏཱནི ཙ.

སཊྛིཝསྶསཧསྶཱནི, ཁཎཾ ལདྡྷཱན དུལླབྷཾ;

ཨཡསཱཝ མལཾ སམུཊྛིཏཾ, ཙཏཱུསུ པཊིཔཏྟིསུ.

ནེལངྒོ ¶ སེཏཔཙྪཱདོ, ཨཐ གོཔཱལཀོཔམཾ;

སུཁོ ཝིཝེཀོ ཏུཊྛསྶ, ཝིཏཀྐཱ ཙ སུདེསིཏཱ.

ཕེཎཔིཎྜོཔམཾ རཱུཔཾ, བྲཧཱ ཨུཛུ པཏཱཔཝཱ;

པཉྙཱ ཧི སེཊྛཱ ལོཀསྨིཾ, ཨནཉྙཱ ཏཱིཎི ཨིནྡྲིཡཱནི.

ཀཱམེསུ ¶ སཏྟཱ ཀཱམསངྒསཏྟཱ, ཨཐ ཝཎྞོ རཧསྶཝཱ;

སབྦེ དྷམྨཱ ཨནཏྟཱཏི, ཨརིཡསཙྩཉྩ དེསིཏཾ.

ཨེསེཝ མགྒོ ནཏྠཉྙོ, སོཏཱཔནྣོཏི བྱཱཀརེ;

ཡསྶིནྡྲིཡཱནི སུབྷཱཝིཏཱནི, ཨཐ དྷམྨཔདེཧི ཙ.

ཝཙསཱ མནསཱ ཙེཝ, པཉྩཀྑནྡྷཱ ཨནིཙྩཏོ;

ཡཱནི ཀརོཏི པུརིསོ, ཏཱིཎི སུཙརིཏཱནི ཙ.

རཱུཔཾ ཝེདཡིཏཾ སཉྙཱ, པཉྩཀྑནྡྷཱ པཀཱསིཏཱ;

ཡོ ཨེཝཾ པཊིཔཛྫཏི, བྲཧྨཱ ཙེཝ ཕལཱནི ཙ.

སབྦཔཱཔསྶ ཨཀརཎཾ, ཝིམོཀྑཱ ཏཾ ཧི དེསིཏཱ;

ནཏྠི པུཏྟསམཾ པེམཾ, དེཝཱནཾ ཨསུརཱན ཙ.

ཡཾ པཏྟཾ ཡཉྩ པཏྟབྦཾ, ནནྡཏི སོཙཏི ནིཙྩཾ;

ཡེ ཀེཙི བྷཱུཏཱ བྷཝིསྶནྟི, སཏྠཱརོ ཙ པཀཱསིཏཱ.

ཡཉྩ ¶ ཀཱམསུཁཾ ལོཀེ, བོཛ྄ཛྷངྒཱ ཙ སུདེསིཏཱ;

མགྒཱནཊྛངྒིཀོ སེཊྛོ, ཏཡོ ཙ ཨགྒཔཏྟིཡོ.

ཀཱཡེན སཾཝརོ སཱདྷུ, ཀརཎཱིཡཉྩ དེསིཏཾ;

ནཏྠི ཨཏྟསམཾ པེམཾ, ཨརིཡཱ ཏཱིཎི ཙ དེསིཏཱ.

ཀཱཡེན ¶ ཀུསལཾ ཨབྷིརཏོ, ཝིནཡཉྩ ཀཱམསུཁཾ ལོཀེ;

བོཛ྄ཛྷངྒཱ ཙ སུདེསིཏཱ, དུདྡསཾ ཨནཏཾ ཙེཝ པརཱཔརཾ ཙ;

པེཊཀོཔདེསེ སཱསནཔྤཊྛཱནཾ ནཱམ དུཏིཡབྷཱུམི སམཏྟཱ.

ལོབྷཱདྷིཊྛཱནཾ དོསཱདྷིཊྛཱནཾ མོཧཱདྷིཊྛཱནཾ ཨལོབྷཱདྷིཊྛཱནཾ ཨདོསཱདྷིཊྛཱནཾ ཨམོཧཱདྷིཊྛཱནཾ ཀཱཡཀམྨཱདྷིཊྛཱནཾ ཝཱཙཱཀམྨཱདྷིཊྛཱནཾ མནོཀམྨཱདྷིཊྛཱནཾ སདྡྷིནྡྲིཡཱདྷིཊྛཱནཾ ཝཱིརིཡིནྡྲིཡཱདྷིཊྛཱནཾ སཏིནྡྲིཡཱདྷིཊྛཱནཾ སམཱདྷིནྡྲིཡཱདྷིཊྛཱནཾ པཉྙིནྡྲིཡཱདྷིཊྛཱནཾ.

ཝིཏཀྐམཐིཏསྶ [ཝིཏཀྐནིམྨཐིཏསྶ (ཀ.) དྷ. པ. ༣༤༩] ཛནྟུནོ, ཏིབྦརཱགསྶ སུབྷཱནུཔསྶིནོ;

བྷིཡྻོ ཏཎྷཱ པཝཌྜྷཏི, ཨེས ཁོ གཱལ༹ྷཾ ཀརོཏི བནྡྷནཾ.

ཝིཏཀྐམཐིཏསྶཱཏི ཀཱམརཱགོ. སུབྷཱནུཔསྶིནོཏི ཀཱམརཱགཝཏྠུ. བྷིཡྻོ ཏཎྷཱ པཝཌྜྷཏཱིཏི ཀཱམཏཎྷཱ. ཨེས གཱལ༹ྷཾ ཀརོཏི བནྡྷནནྟི རཱགཾ, ཨིཏི ཡོ ཡོ དྷམྨོ མཱུལནིཀྑིཏྟོ, སོ ཡེཝེཏྠ དྷམྨོ ཨུགྒཱཝཧིཏབྦོ [ཨུགྒཱཔཡིཏབྦོ (པཱི. ཀ.)]. ན བྷགཝཱ ཨེཀཾ དྷམྨཾ ཨཱརབྦྷ ཨཉྙཾ དྷམྨཾ དེསེཏི. ཡསྶ ཝིཏཀྐེཏི ཀཱམཝིཏཀྐོ ཏམེཝ ཝིཏཀྐཾ ཀཱམཝིཏཀྐེན ནིདྡིསཱིཡཏི. ཏིབྦརཱགསྶཱཏི ཏསྶེཝ ཝིཏཀྐསྶ ཝཏྠུཾ ནིདྡིསཏི. སུབྷཱནུཔསྶིནོ བྷིཡྻོ ཏཎྷཱ པཝཌྜྷཏཱིཏི ཏམེཝ རཱགཾ ཀཱམཏཎྷཱཏི ¶ ནིདྡིསཏི. ཨེས གཱལ༹ྷཾ ཀརོཏི བནྡྷནནྟི ཏམེཝ ཏཎྷཱསཾཡོཛནཾ ནིདྡིསཏི. ཨེཝཾ གཱཐཱསུ ཨནུམིནིཏབྦཾ. ཨེཝཾ སཝེཡྻཱཀརཎེསུ.

ཏཏྠ ¶ བྷགཝཱ ཨེཀཾ དྷམྨཾ ཏིཝིདྷཾ ནིདྡིསཏི, ནིསྶནྡཏོ ཧེཏུཏོ ཕལཏོ.

དདཾ པིཡོ [པསྶ སཾཡུཏྟནིཀཱཡེ] ཧོཏི བྷཛནྟི ནཾ བཧཱུ, ཀིཏྟིཉྩ པཔྤོཏི ཡསོ ཙ ཝཌྜྷཏི;

ཨམངྐུབྷཱུཏོ པརིསཾ ཝིགཱཧཏི, ཝིསཱརདོ ཧོཏི ནརོ ཨམཙྪརཱི.

དདནྟི ¶ ཡཾ ཡཾ དཱནཾ, ཨིདཾ དཱནམཡིཀཾ པུཉྙཀྲིཡཾ. ཏཏྠ ཧེཏུ. ཡཾ ཙེཏཾ. བྷཛནྟི ནཾ བཧཱུ, ཀིཏྟིནྟི ཡོ ཙ ཀལྱཱཎོ ཀིཏྟིསདྡོ ལོཀེ ཨབྦྷུགྒཙྪཏི, ཡཾ བཧུཀསྶ ཛནསྶ པིཡོ བྷཝཏི མནཱཔོ ཙ. ཡཉྩ ཨཝིཔྤཊིསཱརཱི ཀཱལངྐརོཏི ཨཡཾ ནིསྶནྡོ. ཡཾ ཀཱཡསྶ བྷེདཱ དེཝེསུ ཨུཔཔཛྫཏཱིཏི ཨིདཾ ཕལཾ. ཨིདཾ ལོབྷཱདྷིཊྛཱནཾ.

ཡོ པཱཎམཏིཔཱཏེཏི, མུསཱཝཱདཉྩ བྷཱསཏི;

ལོཀེ ཨདིནྣཾ ཨཱདིཡཏི, པརདཱརཉྩ གཙྪཏི;

སུརཱམེརཡཔཱནཉྩ, ཡོ ནརོ ཨནུཡུཉྫཏི [ཨབྷིགིཛ྄ཛྷཏི (པཱི. ཀ.) པསྶ ཨ. ནི. ༥.༡༧༤].

ཨཔྤཧཱཡ པཉྩ ཝེརཱནི, དུསྶཱིལོ ཨིཏི ཝུཙྩཏི;

ཀཱཡསྶ བྷེདཱ དུཔྤཉྙོ, ནིརཡཾ སོཔཔཛྫཏི.

ཡོ པཱཎམཏིཔཱཏེཏཱིཏི དུཊྛོ པཱཎམཏིཔཱཏེཏི. མུསཱཝཱདཉྩ བྷཱསཏཱིཏི དོསོཔགྷཱཏཱཡ མུསཱཝཱདཉྩ བྷཱསཏི. སུརཱམེརཡཔཱནཉྩ, ཡོ ནརོ ཨནུཡུཉྫཏཱིཏི དོསོ ནིདཱནཾ. ཡོ ¶ ཙ སུརཱམེརཡཔཱནཾ ཨནུཡུཉྫཏི ཡཐཱཔརདཱརཝིཧཱརཱི [ཡཐཱཔམུདིཏཝིཧཱརཱི (ཀ.)] ཨམིཏྟཱ ཛནཡནྟི.

པཉྩ ཝེརཱནི ཨཔྤཧཱཡཱཏི པཉྩནྣཾ བྷིཀྑཱཔདཱནཾ སམཏིཀྐམནཾ སབྦེསཾ དོསཛཱནཾ སཱ པཎྞཏྟི, ཏེནེཝ དོསཛནིཏེན ཀམྨེན དུསྶཱིལོ ཨིཏི ཝུཙྩཏི སོཔི དྷམྨོ ཧེཏུནཱ ནིདྡིསིཏབྦོ, ནིསྶནྡེན ཕལེན ཙ.

ཏཱིཎི བཱལསྶ བཱལལཀྑཎཱནི – དུབྦྷཱསིཏབྷཱསཱི [དུབྦྷཱསིཏབྷཱསིཏཱ (པཱི. ཀ.) པསྶ ཨ. ནི. ༣.༣] ཙ ཧོཏི, དུཙྩིནྟིཏཙིནྟཱི ཙ དུཀྐཊཀམྨཀཱརཱི ཙ. ཏཏྠ ཡཾ ཀཱཡེན ཙ ཝཱཙཱཡ ཙ པརཀྐམཏི, ཨིདམསྶ དུཀྐཊཀམྨཀཱརཱི. ཏཱཡཾ ཡཐཱ ཙ མུསཱཝཱདཾ བྷཱསཏི ཡཐཱ པུབྦནིདྡིཊྛཾ ¶ , ཨིདམསྶ དུབྦྷཱསིཏཱ. ཡཉྩ སངྐཔྤེཏི མནོདུཙྩརིཏཾ བྱཱཔཱདཾ, ཨིདམསྶ དུཙྩིནྟིཏཙིནྟིཏཱ. ཡཾ སོ ཨིམེཧི ཏཱིཧི བཱལལཀྑཎེཧི སམནྣཱགཏོ ཏཱིཎི ཏཛྫཱནི དུཀྑཱནི དོམནསྶཱནི ཨནུབྷཝཏི, སོ ཙ ཧོཏི སབྷགྒཏོ ཝཱ པརིསགྒཏོ ཝཱ ཏཛྫཾ ཀཐཾ ཀཐནྟི. ཡདཱ བྷཝཏི སོ ཙ པཱཎཱཏིཔཱཏཱདིདསཨཀུསལཀམྨཔཐཱ, སོ ཏཏོནིདཱནཾ དུཀྑཾ དོམནསྶཾ པཊིསཾཝེདེཏཱིཏི. པུན ཙཔརཾ ཡདཱ པསྶཏི ཙོརཾ རཱཛཱཔརཱདྷིཀཾ རཉྙཱ གཧིཏཾ ཛཱིཝིཏཱ ཝོརོཔེཏཾ, ཏསྶེཝཾ བྷཝཏི སཙེ མམམྤི རཱཛཱ ཛཱནེཡྻ ¶ མམམྤི རཱཛཱ གཱཧཱཔེཏྭཱ ཛཱིཝིཏཱ ཝོརོཔེཡྻཱཏི, སོ ཏཏོནིདཱནཾ དུཀྑཾ ¶ དོམནསྶཾ པཊིསཾཝེདེཏི. པུན ཙཔརཾ བཱལོ ཡདཱ བྷཝཏི ཨཱསནཱ སམཱརཱུལ༹ྷོ ཡཱཝ ཡཱ མེ གཏི བྷཝིསྶཏི ཨིཏོ པེཙྩ པརཾ མརཎཱཏི སོ ཏཏོནིདཱནཾ དུཀྑཾ དོམནསྶཾ པཊིསཾཝེདེཏི ཨིཏི བཱལལཀྑཎཾ ཧེཏུ. ཏཱིཎི ཏཛྫཱནི དུཀྑཱནི ནིསྶནྡོ. ཀཱཡསྶ བྷེདཱ ནིརཡེསུ ཨུཔཔཛྫཏི, ཨིདཾ ཕལཾ. ཨིདཾ དོསཱདྷིཊྛཱནཾ.

སཏཉྩེཝ སཧསྶཱནཾ, ཀཔྤཱནཾ སཾསརིསྶཏི;

ཨཐཝཱ པི ཏཏོ བྷིཡྻོ, གབྦྷཱ གབྦྷཾ གམིསྶཐ.

ཨནུཔཱདཱཡ བུདྡྷཝཙནཾ, སངྑཱརེ ཨཏྟཏོ ཨུཔཱདཱཡ;

དུཀྑསྶནྟཾ ཀརིསྶནྟི, ཋཱནམེཏཾ ན ཝིཛྫཏི.

ཡོ ཡཾ ཨནམཏགྒསཾསཱརཾ སམཱཔནྣོ ཛཱཡཏེ ཙ མཱིཡཏེ ཙ, ཨཡཾ ཨཝིཛྫཱཧེཏུཀཱ. ཡཱནིཔི ཙ སངྑཱརཱནཾ པཡོཛནཱནི, ཏཱནིཔི ཨཝིཛྫཱཔཙྩཡཱནི, ཡཾ ཨདསྶནཾ བུདྡྷཝཙནསྶ, ཨཡཾ ཨཝིཛྫཱསུཏྟེཡེཝ ནིདྡིཊྛཾ. ཡོ ཙ སངྑཱརེ ཨཏྟཏོ ཧརཏི པཉྩཀྑནྡྷེ པཉྩ དིཊྛིཡོ ཨུཔགཙྪཏི. ‘‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’’ཏི ཨིདཾ སུཏྟཾ ཨཝིཛྫཱཡ ནིཀྑིཏྟཾ, ཨཝིཛྫཱཡ ནིཀྑིཔིཏཾ. ཨེཝཾ སཏྠཱ སུཏྟེ ནཡེན [སུཏནཡེན (པཱི.)] དྷམྨེན ནིདྡིསཏི. ཨསཱདྷཱརཎེན ཏཾཡེཝ ཏཏྠ ནིདྡིསིཏབྦཾ. ན ཨཉྙཾ.

ཡེ ཧི ཀེཙི, བྷིཀྑཝེ, སམཎཱ ཝཱ བྲཱཧྨཎཱ ཝཱ ‘‘ཨིདཾ དུཀྑ’’ནྟི ནཔྤཛཱནནྟི ཙཏྟཱརི སཙྩཱནི ཝིཏྠཱརེན, ཡཾ ཏཏྠ ཨཔྤཛཱནནཱ, ཨིདཾ དུཀྑཾ, ཨཡཾ ཧེཏུ. ཨཔྤཛཱནནྟོ ཝིཝིདྷེ སངྑཱརེ ཨབྷིསངྑརོཏི, ཨཡཾ ནིསྶནྡོ. ཡཉྩ དིཊྛིགཏཱནི པརཱམསཏི ‘‘ཨིདམེཝ སཙྩཾ མོགྷམཉྙ’’ནྟི ཨཡཾ ནིསྶནྡོ. ཡཾ ¶ པུནབྦྷཝཾ ¶ ནིབྦཏྟེཏི, ཨིདཾ ཕལཾ. ཨཡམྤི དྷམྨོ སནིདྡིཊྛོ ཧེཏུཏོ ཙ ཕལཏོ ཙ ནིསྶནྡཏོ ཙ.

ཨེཏྠ པན ཀེཙི དྷམྨཱ སཱདྷཱརཎཱ བྷཝནྟི. ཧེཏུ ཁལུ ཨཱདིཏོཡེཝ སུཏྟེ ནིཀྑིཔིསྶནྟི. ཡཐཱ ཀིཾ བྷཝེ ཙཏྟཱརིམཱནི, བྷིཀྑཝེ, ཨགཏིགམནཱནི. ཏཏྠ ཡཉྩ ཚནྡཱགཏིཾ གཙྪཏི ཡཉྩ བྷཡཱགཏིཾ གཙྪཏི, ཨཡཾ ལོབྷོ ཨཀུསལམཱུལཾ. ཡཾ དོསཱ, ཨཡཾ དོསོཡེཝ ¶ . ཡཾ མོཧཱ, ཨཡཾ མོཧོཡེཝ. ཨེཝཾ ཨིམཱནི ཏཱིཎི ཨཀུསལམཱུལཱནི ཨཱདིཏོཡེཝ ཨུཔཔརིཀྑིཏབྦཱནི. ཡཏྠ ཨེཀཾ ནིདྡིསིཏབྦཾ, ཏཏྠ ཨེཀཾ ནིདྡིསཱིཡཏི. ཏཐཱ དྭེ ཡཐཱ ཏཱིཎི, ན ཧི ཨཱདཱིཧི ཨནིཀྑིཏྟེ ཧེཏུ ཝཱ ནིསྶནྡོ ཝཱ ཕལཾ ཝཱ ནིདྡིསིཏབྦཾ.

ཚནྡཱ དོསཱ བྷཡཱ མོཧཱ, ཡོ དྷམྨཾ ཨཏིཝཏྟཏི;

ནིཧཱིཡཏི [ནིཧཱིཡཏེ (པཱི. ཀ.) པསྶ ཨ. ནི. ༤.༡༧] ཏསྶ ཡསོ, ཀཱལ༹པཀྑེཝ ཙནྡིམཱ.

ཀཏྠ ཚནྡཱ ཙ ཨཡཾ ལོབྷོ ཡཐཱ ནིདྡིཊྛཾ པུབྦེ. ཨིདཾ མོཧཱདྷིཊྛཱནཾ.

‘‘ཨསུབྷཱནུཔསྶིཾ [ཨསུབྷཱནུཔསྶཱི (པཱི.) པསྶ དྷ. པ. ༨] ཝིཧརནྟཾ, ཨིནྡྲིཡེསུ སུསཾཝུཏཾ;

བྷོཛནམྷི ཙ མཏྟཉྙུཾ, སདྡྷཾ ཨཱརདྡྷཝཱིརིཡཾ;

ཏཾ ཝེ ནཔྤསཧཏི མཱརོ, ཝཱཏོ སེལཾཝ པབྦཏ’’ནྟི.

ཏཏྠ ཡཱ ཨསུབྷཱཡ ཨུཔཔརིཀྑཱ, ཨཡཾ ཀཱམེསུ ཨཱདཱིནཝདསྶནེན པརིཙྩཱགོ. ཨིནྡྲིཡེསུ སུསཾཝུཏོ ཏསྶེཝ ཨལོབྷསྶ པཱརིཔཱུརིཡཾ མམ ཨཱཡཏནསོཙིཏཾ ཨནུཔཱདཱཡ. བྷོཛནམྷི ཙ མཏྟཉྙུནྟི རསཏཎྷཱཔཧཱནཾ. ཨིཏི ཨཡཾ ཨལོབྷོ ཨསུབྷཱནུཔསྶིཏཱཡ ཝཏྠུཏོ དྷཱརཡཏི, སོ ཨལོབྷོ ¶ ཧེཏུ. ཨིནྡྲིཡེསུ གུཏྟདྭཱརཏཱཡ གོཙརཏོ དྷཱརཡཏི, བྷོཛནེམཏྟཉྙུཏཱཡ པརཏོ དྷཱརཡཏི, ཨཡཾ ནིསྶནྡོ. ཏཾ ཝེ ནཔྤསཧཏི མཱརོ, ཝཱཏོ སེལཾ ཝ པབྦཏནྟི, ཨིདཾ ཕལཾ. ཨིཏི ཡོཡེཝ དྷམྨོ ཨཱདིམྷི ནིཀྑིཏྟོ, སོཡེཝ མཛ྄ཛྷེ ཙེཝ ཨཝསཱནེ ཙ.

ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཨསམུཔྤནྣསྶ ཀཱམཙྪནྡསྶ ཨནུཔྤཱདཱཡ ཨུཔྤནྣསྶ ཝཱ པཧཱནཱཡ, ཡཐཡིདཾ [ཡདིདཾ (པཱི. ཀ.) པསྶ ཨ. ནི. ༡.༡༧] ཨསུབྷནིམིཏྟཾ. ཏཏྠ ཨསུབྷནིམིཏྟཾ ¶ མནསིཀརོནྟསྶ ཨནུཔྤནྣོ ཙེཝ ཀཱམཙྪནྡོ ན ཨུཔྤཛྫཏི, ཨུཔྤནྣོ ཙ ཀཱམཙྪནྡོ པཧཱིཡཏི. ཨིདཾ ཨལོབྷསྶ ཝཏྠུ. ཡཾ པུན ཨནུཔྤནྣོ ཀཱམརཱགོ པརིཡཱདིཡཏི རཱུཔརཱགཾ ཨརཱུཔརཱགཾ, ཨིཏི ཕལཾ. ཨིཏི ཨཡམྤི ཙ དྷམྨོ ནིདྡིཊྛོ ཧེཏུཏོ ཙ ནིསྶནྡཏོ ཙ ཕལཏོ ཙ. ཨིདཾ ཨལོབྷཱདྷིཊྛཱནཾ.

ཨེཀམྤི ཙེ པཱཎམདུཊྛཙིཏྟོ, མེཏྟཱཡཏི ཀུསལོ [ཀུསལཱི (ཀ.) པསྶ ཨིཏིཝུ. ༢༧] ཏེན ཧོཏི;

སབྦེ ཙ པཱཎེ མནསཱནུཀམྤཾ [ཨནུཀམྤམཱནོ (པཱི.)], པཧཱུཏམརིཡོ པཀརོཏི པུཉྙཾ.

ཨེཀམྤི ཙེ པཱཎམདུཊྛཙིཏྟོ མེཏྟཱཡཏཱིཏི ཨཡཾ ཨདོསོ. ནིགྒྷཱཏེན ཨསྶཱདོ, ཀུསལོ ཏེན ཧོཏཱིཏི ཏེན ཀུསལེན དྷམྨེན སཾཡུཏྟོ དྷམྨཔཉྙཏྟིཾ གཙྪཏི. ཀུསལོཏི ཡཐཱ པཉྙཱཡ པཉྙོ པཎྜིཙྩེན པཎྜིཏོ. པཧཱུཏམརིཡོ པཀརོཏི པུཉྙནྟི ཏསྶཱཡེཝ ཝིཔཱཀོ ཨཡཾ ལོཀིཡསྶ, ན ཧི ལོཀུཏྟརསྶ. ཏཏྠ ¶ ཡཱ མེཏྟཱཡནཱ, ཨཡཾ ཧེཏུ. ཡཾ ཀུསལོ བྷཝཏི ཨཡཾ ནིསྶནྡོ. ཡཱཝ ཨབྱཱཔཛྫོ བྷཱུམིཡཾ བཧུཔུཉྙཾ པསཝཏི, ཨིདཾ ཕལཾ. ཨིཏི ཨདོསོ ནིདྡིཊྛོ ཧེཏུཏོ ཙ ནིསྶནྡཏོ ཙ ཕལཏོ ཙ.

ཨེཀཱདསཱནིསཾསཱ མེཏྟཱཡ ཙེཏོཝིམུཏྟིཡཱ. ཏཏྠ ཡཱ མེཏྟཱཙེཏོཝིམུཏྟི, ཨཡཾ ཨརིཡདྷམྨེསུ རཱགཝིརཱགཱ ཙེཏོཝིམུཏྟི, ལོཀིཀཱཡ བྷཱུམིཀཱ ཧེཏུ, ཡཾ སུཁཾ ཨཱཡཏིཾ མནཱཔོ ཧོཏི མནུསྶཱནཾ, ཨིམེ ཨེཀཱདས དྷམྨཱ ནིསྶནྡོ. ཡཉྩ ཨཀཏཱཝཱི བྲཧྨཀཱཡེ ཨུཔཔཛྫཏི. ཨིདཾ ཕལཾ. ཨིདཾ ཨདོསཱདྷིཊྛཱནཾ.

པཉྙཱ ཧི སེཊྛཱ ལོཀསྨིཾ, ཡཱཡཾ ནིབྦེདྷགཱམིནཱི [ནིབྦེདྷབྷཱགིནཱི (པཱི. ཀ.) པསྶ ཨིཏིཝུ. ༤༡];

ཡཱཡ སམྨཱ པཛཱནཱཏི, ཛཱཏིམརཎསངྑཡཾ.

པཉྙཱ ¶ ཧི སེཊྛཱཏི ཝཏྠུཾ. ནིབྦེདྷགཱམིནཱིཏི ནིབྦཱནགཱམིནིཡཾ ཡཐཱབྷཱུཏཾ པཊིཝིཛ྄ཛྷཏི. སམྨཱ པཛཱནཱཏི, ཛཱཏིམརཎསངྑཡནྟི ཨམོཧོ. པཉྙཱཏི ཧེཏུ. ཡཾ པཛཱནཱཏི ཨཡཾ ནིསྶནྡོ. ཡོ ཛཱཏིམརཎསངྑཡོ, ཨིདཾ ཕལཾ. ཨིཏི ཨམོཧོ ནིདྡིཊྛོ ཧེཏུནཱ ཙ ནིསྶནྡེན ཙ ཕལེན ཙ.

ཏཱིཎིམཱནི, བྷིཀྑཝེ [ཨིཏིཝུ. ༦༢ ཏིཀནིཔཱཏེ], ཨིནྡྲིཡཱནི ཨནཉྙཱཏཉྙསྶཱམཱིཏིནྡྲིཡཾ ཨཉྙིནྡྲིཡཾ ཨཉྙཱཏཱཝིནྡྲིཡཾ. ཏཏྠ ཀཏམཾ ཨནཉྙཱཏཉྙསྶཱམཱིཏིནྡྲིཡཾ? ཨིདྷ, བྷིཀྑཝེ, བྷིཀྑུ ཨནབྷིསམེཏསྶ དུཀྑསྶ ཨརིཡསཙྩསྶ ཨབྷིསམཡཱཡ ཚནྡཾ ཛནེཏི ཝཱཡམཏི, ཝཱིརིཡཾ ཨཱརབྷཏི ¶ , ཙིཏྟཾ པགྒཎྷཱཏི པདཧཏི. ཨེཝཾ ཙཏུནྣཾ ཨརིཡསཙྩཱནཾ ཀཱཏབྦཾ. ཏཏྠ ཀཏམཾ ཨཉྙིནྡྲིཡཾ? ཨིདྷ ¶ , བྷིཀྑཝེ, བྷིཀྑུ ‘‘ཨིདཾ དུཀྑཾ ཨརིཡསཙྩ’’ནྟི ཡཐཱབྷཱུཏཾ པཛཱནཱཏི, ཡཱ ཙ མགྒོ, ཨིདཾ ཨཉྙིནྡྲིཡཾ. ཨཱསཝཀྑཡཱ ཨནཱསཝོ ཧོཏི, ཨིདཾ ཝུཙྩཏི ཨཉྙཱཏཱཝིནྡྲིཡཾ. ཏཐཱཡཾ པཉྙཱ, ཨཡཾ ཧེཏུ. ཡཾ ཚནྡཾ ཛནེཏི ཝཱཡམཏི, ཡཱ པཛཱནཱཏི, ཨཡཾ ནིསྶནྡོ. ཡེན སབྦསོ ཨཱསཝཱནཾ ཁཡཱ ཧེཏུ, ཡཾ ཁཡེ ཉཱཎམུཔྤཛྫཏི, ཨནུཔྤཱདེ ཉཱཎཉྩ, ཨཡཾ ནིསྶནྡོ. ཡཾ ཨརཧཏྟཾ, ཨིདཾ ཕལཾ. ཏཏྠ ཁཱིཎཱ མེ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡནྟི, ཨིདཾ ཁཡེ ཉཱཎཾ. ནཱཔརཾ ཨིཏྠཏྟཱཡཱཏི པཛཱནཱམཱིཏི ཨིདཾ ཨནུཔྤཱདེ ཉཱཎཾ. ཨིཏི ཨིམཱནི ཨིནྡྲིཡཱནི ཨམོཧོ ནིདྡིཊྛོ ཧེཏུནཱ ཙ ནིསྶནྡེན ཙ ཕལེན ཙ. ཨིམཱནི ཨསཱདྷཱརཎཱནི ནིདྡིཊྛཱནི.

ཏཏྠ ཀཏམཱནི ཀུསལམཱུལཱནི སཱདྷཱརཎཱནི? ཀུསལཉྩ ཝོ, བྷིཀྑཝེ, དེསེསྶཱམི ཀུསལམཱུལཉྩེཝ. ཏཏྠ ཀཏམཾ ཀུསལམཱུལཾ? ཨལོབྷོ ཨདོསོ ཨམོཧོ. ཏཏྠ ཀཏམཾ ཀུསལཾ? ཨཊྛ སམྨཏྟཱནི སམྨཱདིཊྛི ཡཱཝ སམྨཱསམཱདྷི. ཏཏྠ ཡཱནི ཀུསལམཱུལཱནི, ཨཡཾ ཧེཏུ. ཡཉྩ ཨལོབྷོ ཏཱིཎི ཀམྨཱནི སམུཊྛཱཔེཏི སངྐཔྤཾ ཝཱཡཱམཾ སམཱདྷིཉྩ, ཨཡཾ ཨལོབྷསྶ ནིསྶནྡོ. ཏཏྠ ཡོ ཨདོསོ, ཨཡཾ ཧེཏུ. ཡཾ ཏཡོ དྷམྨེ པཊྛཔེཏི སམྨཱཝཱཙཾ སམྨཱཀམྨནྟཾ སམྨཱཨཱཛཱིཝཉྩ, ཨཡཾ ནིསྶནྡོ. ཏཏྠ ¶ ཡོ ཨམོཧོ ཧེཏུ, ཡཾ དྭེ དྷམྨེ ཨུཔཊྛཔེཏི ཨཝིཔརཱིཏདསྶནམྤི ཙ ཨནབྷིལཱཔནཾ, ཨཡཾ ནིསྶནྡོ. ཨིམསྶ བྲཧྨཙརིཡསྶ ཡཾ ཕལཾ, ཏཱ དྭེ ཝིམུཏྟིཡོ རཱགཝིརཱགཱ ཙེཏོཝིམུཏྟི ཨཝིཛྫཱ ཝིརཱགཱ ཙ པཉྙཱཝིམུཏྟི, ཨིདཾ ཕལཾ. ཨིཏི ཨིམཱནི ཏཱིཎི ཀུསལམཱུལཱནི ནིདྡིཊྛཱནི ཧེཏུཏོ ¶ ཙ ནིསྶནྡཏོ ཙ ཕལཏོ ཙ. ཨེཝཾ སཱདྷཱརཎཱནི ཀུསལཱནི པཊིཝིཛ྄ཛྷིཏབྦཱནི.

ཡཏྠ དུཝེ ཡཏྠ ཏཱིཎི. ཨཡཉྩེཏྠ གཱཐཱ.

‘‘ཏུལམཏུལཉྩ སམྦྷཝཾ, བྷཝསངྑཱརམཝསྶཛི མུནི;

ཨཛ྄ཛྷཏྟརཏོ སམཱཧིཏོ, ཨབྷིནྡི ཀཝཙམིཝཏྟསམྦྷཝ’’ནྟི.

ཏུལམཏུལཉྩ སམྦྷཝནྟི ཏུལསངྑཏཾ ཨཏུལསངྑཏཾ. ཏཏྠ ཡེ སངྑཏཱ ཏུལཾ, ཏེ དྭེ དྷམྨཱ ཨསྶཱདོ ཙ ཨཱདཱིནཝོ ཙ ཏུལིཏཱ བྷཝནྟི. ཨེཏྟཀོ ཀཱམེསུ ཨསྶཱདོ. ཨེཏྟཀོ ཨཱདཱིནཝོ ཨིམསྶ, ཨིདཾ ནིསྶརཎནྟི ཨིཏི ནིབྦཱནཾ པཛཱནཱཏི. དྭཱིཧི ཀཱརཎེཧི ཨཏུལཾ ན ཙ སཀྐཱ ཏུལཡིཏུཾ. ཨེཏྟཀཾ ཨེཏཾ ནེཏཾ པརམཏྠཱིཏི ཏེན ཨཏུལཾ. ཨཐ པཱཔུཎཱ རཏནཾ ཀརིཏྭཱ ཨཙྪརིཡབྷཱཝེན ¶ ཨཏུལཾ. ཏཏྠ ཀུསལསྶ ཙ ཨབྷིསམྦྷཝཱ ཛཱནནཱ པསྶནཱ, ཨཡཾ ཨམོཧོ. ཡཾ ཏཏྠ ཉཱཏཱ ཨོསིརཎཱ བྷཝསངྑཱརཱནཾ, ཨཡཾ ཨལོབྷོ. ཡཾ ཨཛ྄ཛྷཏྟརཏོ སམཱཧིཏོཏི ཝིཀྑེཔཔཊིསཾཧརཎཱ, ཨཡཾ ཨདོསོ. ཨིཏི ཨིམཱནི ཏཱིཎི ཀུསལམཱུལཱནི. ཏུལམཏུལསམྦྷཝནྟི ¶ ཨཡཾ ཨམོཧོ. ཡོ བྷཝསངྑཱརཱནཾ སམོསརཎཾ ལོབྷོ སམྨཱསམཱདྷཱིནཾ ཨསྶཱདོ, ཨཡཾ ཧེཏུ. ཡཾ ཨཛ྄ཛྷཏྟརཏོ ཨཝིཛྫཎྜཀོསཾ སམྦྷེདོ, ཨཡཾ ནིསྶནྡོ. སཱ པཝཏྟི ཨིམཱནི ཏཱིཎི ནིདྡིཊྛཱནི ཀུསལམཱུལཱནི ཧེཏུཏོ ཙ ནིསྶནྡཏོ ཙ ཕལཏོ ཙ.

ཨེཏྟཱཝཏཱ ཨེསཱ པཝཏྟི ཙ ནིཝཏྟི ཙ ཨཀུསལམཱུལེཧི པཝཏྟཏི, ཀུསལམཱུལེཧི ནིཝཏྟཏཱིཏི ཨིམེཧི ཙ ཏཱིཧི སབྦཾ ཨཀུསལམཱུལཾ སམོསརཎཾ གཙྪཏི. སོ དྷམྨེ ཝཱ ཝཙནཏོ ནིདྡིཊྛོ ཏཎྷཱཏི ཝཱ ཀོདྷོཏི ཝཱ ཨསམྤཛཉྙནྟི ཝཱ ཨནུསཡོཏི ཝཱ མཀྑོཏི ཝཱ པལཱ༹སོཏི ཝཱ ཨསྶཏཱིཏི ཝཱ ཨིསྶཱཏི ཝཱ མཙྪརིཡནྟི ཝཱ ཨཉྙཱཎནྟི ཝཱ, ཏེཧི ཡེ ཙ ཝཏྠཱུཧི ནིདྡིསིཏབྦཾ. ཡསྶིམཱནི དྭེ ཝཙནཱནི དྷམྨཔདཱནི ནིདྡིཊྛཱནི ན སོ ཨཏྠི ཀིལེསཱ, ཡོ ཨིམེསུ ནཝསུ པདེསུ སམོདྷཱནཾ སམོསརཎཾ གཙྪཏི. ཨཡཾ ཀིལེསོ, ན ཙ ལོབྷོ, ན ཙ དོསོ, ན ཙ མོཧོ.

ཡཐཱ ཨཀུསལམཱུལཱནི, ཨེཝཾ ཀུསལཱནི པཊིཀྑེཔེན ནིདྡིསིཏབྦཱནི.

ཀཱཡེན ཀུསལཾ ཀརེ, ཨསྶ ཀཱཡེན སཾཝུཏོ;

ཀཱཡདུཙྩརིཏཾ ཧིཏྭཱ, ཀཱཡེན སུཙརིཏཾ ཙརེ.

ཏཱིཎིམཱནི, བྷིཀྑཝེ, སུཙརིཏཱནི [ཨིཏིཝུ. ༦༩ སུཙརིཏསུཏྟེ]. པཱཎཱཏིཔཱཏཱ ཝེརམཎཱི, ཨདིནྣཱདཱནཱ ཝེརམཎཱི, ཀཱམེསུམིཙྪཱཙཱརཱ ཝེརམཎཱི, ཨིདཾ ཀཱཡཀམྨཱདྷིཊྛཱནཾ.

སུབྷཱསིཏཾ ¶ [སུ. ནི. ༤༥༢ སུཏྟནིཔཱཏེ] ཨུཏྟམམཱཧུ སནྟོ, དྷམྨཾ བྷཎེ ནཱདྷམྨཾ ཏཾ དུཏིཡཾ;

པིཡཾ བྷཎེ ནཱཔྤིཡཾ ཏཾ ཏཏིཡཾ, སཙྩཾ བྷཎེ ནཱལིཀཾ ཏཾ ཙཏུཏྠཾ.

ཙཏྟཱརིམཱནི ¶ ཙ ཝཙཱིསུཙརིཏཱནི ཨིདཾ ཝཱཙཱཀམྨཱདྷིཊྛཱནཾ.

མནེན ཀུསལཾ ཀམྨཾ, མནསཱ སཾཝུཏོ བྷཝེ;

མནོདུཙྩརིཏཾ ཧིཏྭཱ, མནསཱ སུཙརིཏཾ ཙརེ.

ཏཱིཎིམཱནི མནོསུཙརིཏཱནི, ཨནབྷིཛ྄ཛྷཱ, ཨབྱཱཔཱདོ, སམྨཱདིཊྛི, ཨིདཾ མནོཀམྨཱདྷིཊྛཱནཾ. ཨིམཱནི ཨསཱདྷཱརཎཱནི སུཏྟཱནི.

ཝཱཙཱནུརཀྑཱི མནསཱ སུསཾཝུཏོ, ཀཱཡེན ཙ ནཱཀུསལཾ ཀཡིརཱ [ཨཀུསལཾ ན ཀཡིརཱ (པཱི. ཀ.) པསྶ དྷ. པ. ༢༨༡];

ཨེཏེ ཏཡོ ཀམྨཔཐེ ཝིསོདྷཡེ, ཨཱརཱདྷཡེ མགྒམིསིཔྤཝེདིཏཾ.

ཏིསྶོ ཨིམཱ, བྷིཀྑཝེ, པཱརིསུདྡྷིཡོ – ཀཱཡཀམྨཔཱརིསུདྡྷི, ཝཱཙཱཀམྨཔཱརིསུདྡྷི, མནོཀམྨཔཱརིསུདྡྷི.

ཏཏྠ ཀཏམཱ ཀཱཡཀམྨཔཱརིསུདྡྷི? པཱཎཱཏིཔཱཏཱ ཝེརམཎཱི, ཨདིནྣཱདཱནཱ ཝེརམཎཱི, ཀཱམེསུམིཙྪཱཙཱརཱ ཝེརམཎཱི. ཏཏྠ ཀཏམཱ ཝཙཱིཀམྨཔཱརིསུདྡྷི? མུསཱཝཱདཱ ཝེརམཎཱི…པེ… སམྥཔྤལཱཔཱ ཝེརམཎཱི. ཏཏྠ ཀཏམཱ མནོཀམྨཔཱརིསུདྡྷི? ཨནབྷིཛ྄ཛྷཱ ཨབྱཱཔཱདོ སམྨཱདིཊྛི. ཨིདཾ སཱདྷཱརཎསུཏྟཾ.

ཨིཏི ¶ སཱདྷཱརཎཱནི ཙ སུཏྟཱནི ཨསཱདྷཱརཎཱནི ཙ སུཏྟཱནི པཊིཝིཛ྄ཛྷིཏབྦཱནི. པཊིཝིཛ྄ཛྷིཏྭཱ ཝཱཙཱཡ ཀཱཡེན ཙ སུཏྟསྶ ཨཏྠོ ནིདྡིསིཏབྦོ.

༣༨. ཏཏྠ ཀཏམཾ སདྡྷིནྡྲིཡཱདྷིཊྛཱནཾ?

ཡསྶ ¶ ¶ སདྡྷཱ [སཾ. ནི. ༡.༢༦༠; ཐེརགཱ. ༥༠༧ ཨཊྛཀནིཔཱཏེ ཙ པསྶིཏབྦཾ] ཏཐཱགཏེ, ཨཙལཱ སུཔྤཏིཊྛིཏཱ;

སཱིལཉྩ ཡསྶ ཀལྱཱཎཾ, ཨརིཡཀནྟཾ པསཾསིཏཾ.

སངྒྷེ པསཱདོ ཡསྶཏྠི, ཨུཛུབྷཱུཏཉྩ དསྶནཾ;

ཨདལིདྡོཏི ཏཾ ཨཱཧུ, ཨམོགྷཾ ཏསྶ ཛཱིཝིཏཾ.

སདྡྷཱ ཝེ ནནྡིཀཱ ཨཱརཱདྷིཀོ, ནོ ཏསྶ སདྡྷོཏི;

སབྦཾ སིཡཱཏི བྷགཝནྟཾ, ཏཐཱརཱུཔོ དྷམྨསམྤསཱདོ.

ཨཱརམྦྷཐ [ཨཱརབྷཐ (པཱི.) པསྶ སཾ. ནི. ༡.༡༨༥] ནིཀྐམཐ, ཡུཉྫཐ བུདྡྷསཱསནེ;

དྷུནཱཐ མཙྩུནོ སེནཾ, ནལཱ༹གཱརཾཝ ཀུཉྫརོ.

ཙཏྟཱརོམེ, བྷིཀྑཝེ, སམྨཔྤདྷཱནཱ, ཨིདཾ ཝཱིརིཡཱདྷིཊྛཱནཾ.

སཏཱིམཏོ སདཱ བྷདྡཾ, བྷདྡམཏྠུ སཏཱིམཏོ;

སཏཱིམཏོ སདཱ [སུཝེ (སཾ. ནི. ༡.༢༣༨)] སེཡྻོ, སཏཱིམཱ སུཁམེདྷཏི.

ཙཏྟཱརོ སཏིཔཊྛཱནཱ ཝིཏྠཱརེན ཀཱཏབྦཱ, ཨིདཾ སཏིནྡྲིཡཱདྷིཊྛཱནཾ.

ཨཱཀངྑཏོ ཏེ ནརདམྨསཱརཐི, དེཝཱ མནུསྶཱ མནསཱ ཝིཙིནྟིཏཾ;

སབྦེན ཛཉྙཱ ཀསིཎཱཔི པཱཎིནོ, སནྟཾ སམཱདྷིཾ ཨརཎཾ ནིསེཝཏོ.

ཏཡོམེ ¶ , བྷིཀྑཝེ, སམཱདྷཱི – སཝིཏཀྐོ སཝིཙཱརོ, ཨཝིཏཀྐོ ཝིཙཱརམཏྟོ, ཨཝིཏཀྐོ ཨཝིཙཱརོ. ཨིདཾ སམཱདྷིནྡྲིཡཱདྷིཊྛཱནཾ.

ཏཏྠ ¶ ¶ ཀཏམཾ པཉྙིནྡྲིཡཱདྷིཊྛཱནཾ?

པཉྙཱ ཧི སེཊྛཱ ལོཀསྨིནྟི ཝིཏྠཱརེན.

ཏིསྶོ ཨིམཱ, བྷིཀྑཝེ, པཉྙཱ – སུཏམཡཱི, ཙིནྟཱམཡཱི, བྷཱཝནཱམཡཱི, ཨིདཾ པཉྙིནྡྲིཡཱདྷིཊྛཱནཾ སུཏྟཾ, ཨིམཱནི ཨིནྡྲིཡཱདྷིཊྛཱནཱནི ཨསཱདྷཱརཎཱནི སུཏྟཱནི.

༣༩. ཏཏྠ ཀཏམཱནི སཱདྷཱརཎཱནི ཨིནྡྲིཡཱདྷིཊྛཱནཱནི སུཏྟཱནི?

ཨཝཱིཏརཱགོ [ཨ. ནི. ༦.༥༤] ཀཱམེསུ, ཡསྶ པཉྩིནྡྲིཡཱ མུདཱུ;

སདྡྷཱ སཏི ཙ ཝཱིརིཡཾ, སམཐོ ཙ ཝིཔསྶནཱ;

ཏཱདིསཾ བྷིཀྑུམཱསཛྫ, པུབྦེཝ ཨུཔཧཉྙཏི.

པཉྩིམཱནི ཨིནྡྲིཡཱནི. སདྡྷིནྡྲིཡཱདིཨིནྡྲིཡཾ དཊྛབྦཾ. ཏཱིསུ ཨཝེཙྩཔྤསཱདེ ཝིཏྠཱརེན སུཏྟཾ ཀཱཏབྦཾ. ཨིམཱནི སཱདྷཱརཎཱནི ཨིནྡྲིཡཱདྷིཊྛཱནཱནི སུཏྟཱནི. ཡཾ ཡསྶ སམྦནྡྷཾ ཀུསལསྶ ཝཱ ཨཀུསལསྶ ཝཱ ཏེན ཏེན ཨདྷིཊྛཱནེན ཏཾ སུཏྟཾ ནིདྡིསིཏབྦཾ, ནཏྠཉྙོ དྷམྨོ ནིདྡིསིཏབྦོ. ཏཏྠ སཱདྷཱརཎཾ ཀུསལཾ ནཱཔི ཀུསལཾ ཨཀུསལཾ ཡཐཱ སཱདྷཱརཎཱནི ཙ ཀུསལམཱུལཱནི སཱདྷཱརཎཱནི ཙ ཨཀུསལམཱུལཱནི ཨུཔྤནྣཾ ཀཱམཝིཏཀྐཾ པཛཧཏི…པེ… ཙཏྟཱརོ སམྨཔྤདྷཱནཱ ཀུསལཾ ཨཀུསལཉྩ.

ཝིཏཀྐོ ཧི མམཏྠིཀོ [པམཏྠིཀོ (པཱི.)], དདཾ པིཡོ ནརོ ཨིཏི;

ཡོ ¶ པཱཎམཏིཔཱཏེཏི, ཏཱིཎི ཏསྶ བཱལལཀྑཎཾ.

སཏཉྩེཝ སཧསྶཱནཾ, ཡེ ཙ སམཎབྲཱཧྨཎཱ;

ཚནྡཱ དོསཱ བྷཡཱ མོཧཱ, ཙཏཱུཧི ཨགཏཱིཧི ཙ.

ཨསུབྷཱནུཔསྶིཾ ཝིཧརནྟཾ, ནིམིཏྟེསུ ཨསུབྷཱ ཙ;

ཨེཀམྤི ཙེ པིཡཾ པཱཎཾ, མིཏྟཱ སཙེ སུབྷཱསིཏཱ.

པཉྙཱ ཧི སེཊྛཱ ལོཀསྨིཾ, ཨནུཉྙཱ ཏཱིཎི ཨིནྡྲིཡཱནི;

ཀུསལཱཀུསལམཱུལཱནི ཙ, ཏུལམཏུལཉྩ སམྦྷཝཾ.

ཀཱཡེན ཀུསལཾ ཀརེ, ཏཱིཎི སུཙརིཏཱནི ཙ;

སུབྷཱསིཏཾ ཨུཏྟམམཱཧུ, སནྟོ ཝཙཱིསུཙརིཏཱནི ཙ.

ཀཱཡེན ¶ ཙ ཀུསལཾ ཀཡིརཱ, མནོདུཙྩརིཏཱནི ཙ;

ཀཱཡཱནུརཀྑཱི ཙ སདཱ, ཏིསྶོ ཙ པཱརིསུདྡྷིཡོ.

ཡསྶ སདྡྷཱ ཏཐཱགཏེ, སམུཔྤཱདེ ཙ དེསིཏོ;

ཨཱརམྦྷཐ ནིཀྐམཐ, ཡཱ ཙ སམྨཔྤདྷཱནཏཱ.

སཏཱིམཏོ སདཱ བྷདྡཾ, སཏིཔཊྛཱནབྷཱཝནཱ;

ཨཱཀངྑཏོ ཙ ཨནཉྙཱཎཾ, ཡེ ཙ ཏཱིཎི སམཱདྷཡོ.

པཉྙཱ ¶ ཧི སེཊྛཱ ལོཀསྨིཾ, ཏིསྶོ པཉྙཱ པཀཱསིཏཱ;

ཨཝཱིཏརཱགོ ཀཱམེསུ, ཏཐེཝ པཉྩིནྡྲིཡཱ.

ཏཏྠ ¶ ཀུསལེཧི དྷམྨེཧི ཨཀུསལེཧི དྷམྨེཧི པུབྦཱཔརསོ སཱདྷུཀཾ ཨུཔཔརིཀྑིཡཏི. ཀིཾནུ ཁོ ཨིདཾ སུཏྟཾ ཨཱརབྷི…པེ… ཏེཧི སུཏྟེཧི སཧ ཨདྷིསནྣཊྛེཧི ཡུཛྫཏི ཨུདཱཧུ ན ཡུཛྫཏཱིཏི?

ཡཐཱ བྷགཝཱ ཀིལེསེ ཨཱདིམྷི ཏཏྠ དེསེཏི. ཀིཾ དེསིཏཾ? ཏེསཾ ཀིལེསཱནཾ པཧཱནཾ ཨུདཱཧུ ནོ དེསིཏནྟི ཨུཔཔརིཀྑིཏབྦཾ. ཡདི ན དེསིཏཾ བྷགཝཏི ཏེསཾ ཀིལེསཱནཾ པཧཱནཾ ཀུསལཱ དྷམྨཱ པརིཡེསིཏབྦཱ ཡཏྠ ཏེ ཨཀུསལཱ པཧཱནཾ གཙྪནྟི. སཙེ སམནྣེཧམཱནོ ན ལབྷཏི. ཏཏྠ ཨཀུསལཱ དྷམྨཱ ཨཔཀཌྜྷིཏབྦཱ ཝཱིམཾསིཏབྦཱ, སཾཀིལེསབྷཱགིཡསུཏྟཾ, ཡདི ཀིལེསཱ ཨཔཀཌྜྷིཡནྟཱ. ཡེ ཝཱ ན དེནྟི ཏཏྠ ཨུཔཔརིཀྑིཏབྦཱ ཨརིཡམགྒདྷམྨཱ ཏཱསུ བྷཱུམཱིསུ ཀིལེསཱ པཧཱནཾ གཙྪནྟི, ཨུདཱཧུ ན གཙྪནྟཱིཏི. ཡཏྟཀཱ པན ཀིལེསཱ དེསིཏཱ. ན ཏཏྟཀཱ ཨརིཡདྷམྨཱ དེསིཏཱ. ཡཏྠ ཀིལེསཱ པཧཱནཾ གཙྪནྟི, ཏཏྠ ཡེ ཀིལེསཱ ཨརིཡདྷམྨཱནཾ པཊིཔཀྑེན ན ཡུཛྫནྟི, ཏེ ཨཔཀཌྜྷིཏབྦཱ, སཙེ ཨཔཀཌྜྷིཡནྟཱ ཡོཛནཾ དེཏི. ཏཏྠ ཨེཝཾ ཝཱིམཾསིཏབྦཾ. དྭེ ཏཱིཎི ཝཱ ཏདུཏྟརི ཝཱ ཀིལེསཱ ཨེཀེན ཨརིཡམགྒེན པཧཱནཾ གཙྪནྟཱིཏི. སཙེ ཨེཝཾ ཝཱིམཾསིཡནྟཱ ཡོཛནཾ དེཏི, ཏཏྠ ཨུཔཔརིཀྑིཏབྦཾ. པརམྤརཱཡ ཝཱ པིཊཀསམྤདཱནེན ཝཱ སུཏྟསྶ ཨཏྠོ ཙ ནཏྠོ ཙ. ཡཾ ཝཱ ན སཀྐཱ སུཏྟཾ ¶ ནིདྡིསིཏུཾ ནེཝ སུཏྟཾ ཝིཙིཀིཙྪིཏབྦཾ. ཨེཝཾ ཡཐཱ ཨཱདིམྷི ཀུསལཱ དྷམྨཱ ཧོནྟི. ཡེ ཀིལེསཱ ¶ ཏེ པཧཱིནེཡྻཱཏི. ཏེ ཨུཔཔརིཀྑིཏབྦཱ. པུརོ ཝཱ ཀུསལོ པཊིཔཀྑེན ཝཱ པུརོ དེསནཱ, ཨནཱུནཱ ཨནདྷིཀཱ ཨུགྒཧེཏབྦཱ. ཡཐཱ པཋམོ ཨུཏྟིལོ ཡེསམིདཱནི ཀིལེསཱནཾ ཡེ ཨརིཡདྷམྨཱ དེསིཏཱ ཨིམེ ཀིལེསཱ ཨིམེཧི ཨརིཡདྷམྨེཧི པཧཱིཡནྟི, ཨུདཱཧུ ནཔྤཧཱིཡནྟཱིཏི ཝིཙིནིཏབྦཱ. ཡདི ཨུཔཔརིཀྑིཡམཱནཱ ཡུཛྫནྟི, གཧེཏབྦཱ. ཨཐ ན ཡུཛྫནྟི, ཡེ ཀིལེསཱ ཨཔཊིཔཀྑཱ ཧོནྟི, ཏེ ཀིལེསཱ ཨཔརིཔཀྑིཏབྦཱ. ཡེ ཙ ཨརིཡདྷམྨཱ པཊིཔཀྑཱ ཧོནྟི, ཏེ ཨརིཡདྷམྨཱ ཨཔཀཌྜྷིཏབྦཱ ¶ . ན ཧི ཨརིཡདྷམྨཱ ཨནཱགཱམིཀིལེསཔྤཧཱནཾ གཙྪནྟི, ནཱཔི ཨརིཡདྷམྨཱ སབྦཀིལེསཱནཾ པཧཱནཱཡ སཾཝཏྟནྟི. ཡཐཱ ཀུསལཱ མེཏྟཱ ཨཀུསལོ རཱགོ ན ཏུ ཀུསལཱ མེཏྟཱཏི ཀཱརེཏྭཱ ཨཀུསལསྶ རཱགསྶ པཧཱནཱཡ སམྦྷཝཏི བྱཱཔཱདོ མེཏྟཱཡ པཧཱནཾ གཙྪཏི. ཏསྨཱ ཨུབྷོ ཀིལེསཱ ཨུཔཔརིཀྑིཏབྦཱ. ཡོ ཡོ ཙ དྷམྨོ ཨུཔདིསིཡཏི ཀུསལོ ཝཱ ཨཀུསལོ ཝཱ སོ ཨཔཀཌྜྷིཏབྦོ. སཙེ ཏེ ཡུཛྫནྟི ཨཔཀཌྜྷིཡམཱནོ ནཏྠི ཨུཔཔརིཀྑིཏབྦཾ. དྭེ ཝཱ ཀིལེསཱ ཨེཀེན ཨརིཡདྷམྨེན པཧཱིནེཡྻཱཏི དྭཱིཧི ཝཱ ཨརིཡདྷམྨེཧི ཨེཀོ ཝཱ ཀིལེསོ པཧཱིཡཏཱིཏི.

ཨཐ ཝཱ ཨེཝམྤི ཨུཔཔརིཀྑིཡམཱནཾ ཡུཛྫཏི, ཏཏྠ ཝཱིམཾསིཏབྦཾ ཝཱ ཡཐཱ ཡུཛྫཏི ཏཏྠ ཝཱིམཾསིཏབྦཾ ཝཱ, ཡཐཱ ནནུ སཀྐཱ སུཏྟཾ ནིདྡིསིཏུཾ, ན ཧི སུཏྟེ ཝིཙིཀིཙྪིཏབྦཾ. ཀིལེསོ ¶ མཾ ཨརིཡདྷམྨེསུ དེསིཏེསུ ཨུབྷཡཏོ ཨུཔཔརིཀྑིཏབྦཾ. ཀིར ཡེ ཝཱ ཨིམེ ཀིལེསཱ དེསིཏཱ ཡེ ཙ ཨརིཡདྷམྨཱ དེསིཏཱ གཱཐཱཡ ཝཱ བྱཱཀརཎེན ཝཱ, ཀིཾ ནུ ཁོ ཨིམེ ཀིལེསཱ ཨིམེཧི ཨརིཡདྷམྨེཧི པཧཱིཡནྟི, ཨུདཱཧུ ནཔྤཧཱིཡནྟི? ཨིམེ ཝཱ ཨརིཡདྷམྨཱ ཨིམེསཾ ཀིལེསཱནཾ པཧཱནཱཡ སཾཝཏྟནྟཱིཏི. ཀིཉྩཱཔི ཀུསལེཧི དྷམྨེཧི ཨཀུསལཱ དྷམྨཱ པཧཱནཾ གཙྪནྟི. ན ཏུ སབྦེཧི ཨརིཡདྷམྨེཧི སབྦཱཀུསལཱ པཧཱནཾ གཙྪནྟི. ཡཐཱ མེཏྟཱ ཀུསལོ ཨཀུསལོ ཙ རཱགོ ན ཏུ ཀུསལཱ མེཏྟཱ ཨཀུསལོ རཱགོཏི ཀཱརེཏྭཱ མེཏྟཱཡ རཱགོ པཧཱནཾ, བྱཱཔཱདོ མེཏྟཱཡ པཧཱནཾ གཙྪནྟི. ཨེཝཾ ཀིལེསོཏི ཀཱརེཏྭཱ སུཏྟེན པཧཱནཾ གཙྪཏི. ན སུཏྟོ དྷམྨོཏི ཀཱརེཏྭཱ སབྦཾ ཀིལེསསྶ པཧཱནཱཡ སཾཝཏྟཏི. ཡཾ ཏུ སུཏྟསྶ ཨརིཡདྷམྨོ སཾཀིལེསཔཊིཔཀྑོ, སོ ཏེན པཧཱནཾ གཙྪཏཱིཏི.

༤༡. ཏཏྠ ཀུསལེ དེསིཏེ སུཏྟེ བྱཱཀརཎེ ཝཱ སཾཀིལེསཱ ན ཡུཛྫནྟི ཨརིཡདྷམྨཱ ཝཱ, ཏེ མཧཱཔདེསེ ནིདྡིསིཏབྦཱཝཡཝེན ཨཔཀཌྜྷིཏབྦཱ ¶ . ཏཏྠ ཀིལེསེཧི ཙ དེསིཏེཧི ཨརིཡདྷམྨེསུ ཙ ཡདིཔི ཏེན ཨརིཡདྷམྨེན ཏེ ཀིལེསཱ པཧཱནཾ གཙྪནྟི. ཏཏྠཔི ཨུཏྟརི ཨུཔཔརིཀྑིཏབྦཾ. ཀེན ཀཱརཎེན ཨེཏེ ཀིལེསཱ པཛཧིཏབྦཱ, ཀེན ཀཱརཎེན ཨརིཡདྷམྨཱ དེསིཏཱཏི? ཡེན ཡེན ཝཱ ཨཱཀཱརེན ཨརིཡདྷམྨཱ དེསིཏཱ, ཏེན ཏེན པཀཱརེན ཨཡཾ ཀིལེསོ ཋིཏོ. ཨཏྠི ཧི ཨེཀོ ཀིལེསོ, ཏེན ཝཱ ཨརིཡདྷམྨཱ ན ཨཉྙཐཱ ཨཉྙཐཱ པཧཱཏབྦོ, ཡཐཱ དིཊྛི རཱགོ ཨཝིཛྫཱ ཙ དསྶནེན པཧཱཏབྦཱ. སཱ ཙེ ཨེཝཉྩ ཨཝིཛྫཱ བྷཱཝནཱཡ བྷཱུམི ཝཱ དྷམྨཱ བྷཱཝནཱཡ པཧཱཏབྦཱ. སཱཡེཝ ཨུདྡྷཾབྷཱགིཡཾ ཨསངྑཏདསྶནཱཡ ཝིམུཏྟིཡཱ ཨནིམིཏྟེན ཙེཏོསམཱདྷིནཱ ¶ ཨམནསིཀཱརེན པཧཱིཡཏི. ཨེཝཾ སཱཏྠཾ སབྱཉྫནཾ ཨུཔཔརིཀྑིཏབྦཾ. ཡེ དསྶནེན པཧཱཏབྦཱ ཀིལེསཱ དསྶནཱཀཱརེན ཨརིཡདྷམྨོ དེསིཏོ, བྷཱཝནཱཡ ¶ པཧཱཏབྦཱ བྷཱཝནཱཀཱརེན ཨརིཡདྷམྨོ དེསིཏོ, པཏིསེཝནཱ པཧཱཏབྦཱ པཏིསེཝནཱཀཱརེན ཨརིཡདྷམྨོ དེསིཏོ, ཨེཝཾ ཝིནོདནཔཧཱཏབྦཱ ཡཱཝ སཏྟ ཨཱསཝཱ ཀཱཏབྦཱ, ཡཱཝཉྙཐཱ. ཨཉྙཐཱ ཧེས དྷམྨོ པཧཱཏབྦོ ཨཉྙེནཱཀཱརེན ཨརིཡདྷམྨོ དེསིཏོ, སོ ཨརིཡདྷམྨོ ཨཉྙཐཱ པརིཡེསིཏབྦོ. ཡདི ཨཡཾ དྷམྨོ པརིཡེསཏོ ཡོ ཙ དེསེཏི ཡེན ཡེནཱཀཱརེན, སོ ཨརིཡདྷམྨོ པརིཡེསིཏབྦོ, ཏེནཱཀཱརེན ཀིལེསོ པཧཱིཡཏི. སོ ཏཏྠ ཨུཔཔརིཀྑིཏབྦོ. ཨཐ ན ཡུཛྫཏི ཡདི ཧི ཏེན སུཏྟེན ཝིཧིཏཾ སུཏྟཾ ཝཱིམཾསིཏབྦཾ. ཡཐཱ ཡུཛྫཏི, ཏཐཱ གཧེཏབྦཾ. ཡཐཱ ན ཡུཛྫཏི, ཏཐཱ ན གཧེཏབྦཾ, ཨདྡྷཱ ཨེཏཾ བྷགཝཏཱ ན བྷཱསིཏཾ, ཨཱཡསྨཏཱ ཝཱ དུགྒཧིཏཾ, ཡཐཱ མཧཱཔདེསེ ནིདྡིསིཏབྦཾ, བྷགཝཏཱ ཡཐཱབྷཱུཏཾ དེསིཏཾ, ཡོ ཙ དྷམྨོ དེསིཏོ ཀུསལོ ཙ ཨཀུསལོ ཙ ཏསྶ དྷམྨསྶ པཙྩཡོ པརིཡེསིཏབྦོ. ན ཧི པཙྩཡཱ ཝིནཱ དྷམྨོ ཨཔྤཙྩཡོ ཨུཔྤཛྫཏི. ཏཏྠ ཀོ ཨཱཀཱརོ པརིཡེསནཱཡ?

ཏཏྠ ཏཐཱརཱུཔཾ སཧེཏུ སཔྤཙྩཡཾ སོཡཾ དྷམྨོ ཝུཏྟོཏི ཨིདཾ ཝཱིམཾསིཏབྦཾ. སོ ཙ པཙྩཡོ ཏིཝིདྷོ – མུདུ མཛ྄ཛྷོ ཨདྷིམཏྟོ. ཏཏྠ མུདུམྷི པཙྩཡེ མུདུདྷམྨོ གཧེཏབྦོ, ཨེཝཾ སཏྱེས པཙྩཡོ དུཝིདྷོ པརཾཔརཱཔཙྩཡོ ཙ སམནནྟརཔཙྩཡོ ཙ. སོ པཙྩཡོ མུདུཏེན བྱཱདྷིམཏྟཾ པརིཡེསིཏབྦཾ. ཀིཾ ཀཱརཎཾ? ཨཉྙཏརོཔི པཙྩཡོ ཨཉྙེཧི པཙྩཡེཧི པརིཡཏྟིཾ ཝཱ པཱརིཔཱུརིཾ ཝཱ གཙྪཏི ¶ . ཏཏྠ ཡོ དྷམྨོ དེསིཏོ, ཏསྶ དྷམྨསྶ ¶ ཨེཏེན ཝཱ ཀཱརཎེན ཝཱ ཧེཏུ པརིཡེསིཏབྦོ. ཡཐཱ པཙྩཡོ ཧེཏུནཱ པཙྩཡེན ཙ, སོ ཏསྶ དྷམྨསྶ ནིསྶནྡོ པརིཡེསིཏབྦོ. ཡཐཱ ནིདྡིཊྛོ ཨདྷིཊྛཱནེ པདྷཱནཾ པརིཡེསཏི, སོ པཙྩཡོ པརིཡེསིཏབྦོ. ན ཧི མུདུསྶ དྷམྨསྶ ཨདྷིམཏྟོ ནིསྶནྡོ ཨདྷིམཏྟསྶ ཝཱ ནིསྶནྡསྶ མུདུདྷམྨོ, ཨཐ མུདུསྶ མུདུ མཛ྄ཛྷཱཡ མཛ྄ཛྷོ ཨདྷིམཏྟསྶ ཨདྷིམཏྟོ ཡུཛྫཏི, ཏཾ གཧེཏབྦཾ, ཨཐ ན ཡུཛྫཏི ན གཧེཏབྦཾ. ཡཉྩ བྷགཝཱ ཨཱརབྷཏི དྷམྨཾ དེསེཏུཾ, ཏཾཡེཝ དྷམྨཾ མཛ྄ཛྷནྟཔརིཡོསཱནཾ དེསེཏི, ཡཐཱ སུཏྟཱདྷིཊྛཱནེ དྷམྨཱ ཨཱདིམྷི ནིདྡིསཏི, ཏཾཡེཝ བཧུ ཏསྶ སུཏྟསྶ པརིཡོསཱནཾ. ཏསྶ ཧི དྷམྨསྶ ཝསེན ཏཾ སུཏྟཾ ཧོཏི གཱཐཱ ཝཱ བྱཱཀརཎཾ ཁུདྡཀཾ མཧནྟཾ ཝཱ, ཡཐཱ པན དུཝིདྷཱ ཨནུརཱུཔནྟི ཝཱ ཐཔནཱ ཙ དེསནཱཐཔནཱ. རཱུཔནྟིཔི དྷམྨསྶ པརིཡེསིཏབྦཱ. ཡཐཱ ཙ བྷགཝཏཱ པཉྩནྣཾ ཨིནྡྲིཡཱནཾ སཾཝརཎཾ དེསིཏཾ ཏཎྷཱཡ ནིགྒཧཎཏྠཾ ཨིཙྪཱཝ ཧོཏི. དེསེཏི ཡཐཱ གོཔཱལཀོཔམེ སུཏྟེ ཨཉྙེཧིཔི སུཏྟེཧི བྷགཝཱ བྷཱསཏི ཨིཙྪཱཝ ཧོཏི མཛ྄ཛྷིམནིཀཱཡེ ཝིཏཀྐོ ཨཡཾ བྷགཝཏོ དེསནཱནུརཱུཔནྟི ཨིཏི སོ དྷམྨོ ཨཉྙེསུཔི ཝེཡྻཱཀརཎེསུ པརིཡེསིཏབྦོ. ན ཧི ཨེཀཾ ཧི སུཏྟེ དཊྛབྦོ. ཡུཛྫནཾ ཏཾ གཧེཏབྦཾ.

༤༢. ཏཏྠ ཀཏམཾ ཨནུཉྙཱཏཾ? ཡཾ ཀིཉྩི སུཏྟཾ བྷགཝཏཱ ན བྷཱསིཏཾ ཏཉྩ སུཏྟེསུཡེཝ ¶ ནྡིསྶཏི, ཨེཝམེཏཾ དྷཱརེཏབྦཾ. ཡཐཱ ཨསུཀེན བྷཱསིཏནྟི, ཏཾ སུཏྟཾ ཝཱིམཾསིཏབྦཾ. ཀིཾ ནུ ཁོ ཨིམཾ སུཏྟཾ ¶ ཨནུཉྙཱཏཾ ཁམཾ བྷགཝཏོ ཨུདཱཧུ ནཱནུཉྙཱཏཾ ཁམཾ, ཀིཉྩི རཱུཔཉྩ སུཏྟཾ བྷགཝཏོ ཨནུཉྙཱཏཾ ཁམཾ ཀིཉྩི རཱུཔཉྩ ནཱནུཉྙཱཏཾ ཁམཾ? ཡཾ སབྦསོ ཨནོཏཱརེཏྭཱ དསབལོ གོཙརཾ དེསེཏི, ཏཾ སབྦཾ སུཏྟཾ བྷགཝཏོ ནཱནུཉྙཱཏཾ ཁམཾ. ཨཏྠིཔི སོ སཱཝཀོ དསབལཱནཾ གོཙརཾ ཛཱནཱཏི ཨོདྷིསོ ཨནོདྷིསོ, ཏཾ པན བལཾ སབྦསོ ན ཛཱནཱཏི ཨཉྙཐཱ ནཱམ སཝནེན, ཡཐཱ ཨཱཡསྨཏཱ སཱརིཔུཏྟེན ཡེན བྲཱཧྨཎོ ཨོཝདིཏོ, ཏསྶ ཨཱཡསྨཏོ ནཏྠི ཨིནྡྲིཡབལཝེམཏྟཉཱཎཾ, ཏེན པུགྒལཔརོ [པུགྒལོ པརོཔརཉྩ (པཱི.)] པརཉྩ ཏཾ ཨཛཱནནྟོ སཏི ཨུཏྟརིཀརཎཱིཡེ ཨུཔྤཱདིཏོ, སོ བྷགཝཏཱ ཨཔསཱདིཏོ. ཡཐཱཝ ཨཱཡསྨཱ མཧཱཀསྶཔོ བྷཱགིནེཡྻཾ ཨོཝདཏི ཨནནྟརིཡསམནྣཱགཏོ ཨིདྡྷིཔཱཊིཧཱིརེན ཨངྒུལིཡོ ཨདཱིཔེཏྭཱ ¶ ཡཾ སབྦེསཾ དྷམྨཱནཾ ཀམྨསམཱདཱནཱནཾ ཧེཏུསོ ཋཱནསོ ཡཐཱབྷཱུཏཾ ཉཱཎཾ, ཏསྶ ཨཱཡསྨཏོ སཾཝིཛྫཏེ, ཏེན ནཾ ཨོཝདཏི, ཏཾ བྷགཝཱ ཀརོཏི.

‘‘སཙེཔི དས པཛྫོཏེ, དྷཱརཡིསྶསི ཀསྶཔ;

ནེཝ དཀྑཏི རཱུཔཱནི, ཙཀྑུ ཏསྶ ན ཝིཛྫཏཱི’’ཏི.

ཨཔི ཙ ཁོ ཡཐཱ དཱུཏོ རཱཛཝཙནེན སཏྟམནུསཱསཏི, ཨེཝཾ སེསཱནུགོ ཨཉྙཱཏཀཾ གྷོསཾ པརེསཾ དེསེཏི. ཨནུཉྙཱཏཁམསུཏྟཾ གཧེཏབྦཾ. ཨནནུཉྙཱཏཁམཾ ན གཧེཏབྦཾ.

ཏཏྠ ཀཏམོ སུཏྟསངྐརོ? པཉྩཝིདྷཾ ¶ སུཏྟཾ, སཾཀིལེསབྷཱགིཡཾ ཝཱསནཱབྷཱགིཡཾ དསྶནབྷཱགིཡཾ བྷཱཝནཱབྷཱགིཡཾ ཨསེཀྑབྷཱགིཡཾ. ཨཉྙཾ ཨཱརཱདྷེཡྻ ཨཉྙཾ དེསེཏི ཨཉྙསྶ ཙ སུཏྟསྶ ཨཏྠཾ ཨཉྙམྷི སུཏྟེ ནིདྡིསཏི. སུཏྟསྶ ཝཱ ཧི ཨནེཀཱཀཱརཾ ཨཏྠཾ ནིདྡིསཏི. ཨརིཡདྷམྨསཱདྷནེ ཨཏྠཾ ཝིཝརཏི. ཝཱསནཱབྷཱགིཡསྶ ཨཏྠཾ དསྶནབྷཱགིཡེསུ ནིདྡིསཏི. ཨོརམྦྷཱགིཡཱནཾ སཾཡོཛནཱནཾ ཨཏྠཾ ཨུདྡྷཾབྷཱགིཡེསུ ནིདྡིསཏི. མུདུམཛ྄ཛྷཱནཾ ཨིནྡྲིཡཱནཾ ཨདྷིམཏྟེསུ སུཏྟེསུ ནིདྡིསཏི. ཨིཏི ཨཡཾ སུཏྟཾ སམྦྷེདཾ ཧེཏུནཱ ཙ ནིསྶནྡེན ཙ ཕལེན ཙ ནིདྡེསེན ཙ མུདུམཛ྄ཛྷཱདྷིམཏྟཏཱཡཔི ཙ ཨཏྠེན ཙ བྱཉྫནེན ཙ ཡོ སམྦྷེདོ, ཨཡཾ ཝུཙྩཏི སུཏྟསངྐརོ. ཡོ ཨསམྦྷེདོ, ཨཡཾ ཝུཙྩཏི སུཏྟཝིཙཡོ.

པུརིམཱནཾ ¶ ཨཀྑཎྜཾ, ཡཐཱབྷཱུཏསྶ པཙྩཡོ;

ནིསྶནྡོ ཝཱསནཱསདྡྷི, ཨནུཉྙཱ སུཏྟསངྐརོ.

༤༣. ཏཏྠ ¶ ¶ ཀཏམོ ཧཱརཝིབྷངྒོ? ཡཏྠ སོལ༹ས ཧཱརཱ ཨཀྑརསོ བྷེདཾ གཙྪནྟི. ཏཏྠ ཨཱདིམྷི དེསནཱཧཱརོ. ཏཏྠ ཨཡཾ གཱཐཱ ཀུསལཱ ཝཱ ཨཀུསལཱ ཝཱ སཙྩཱནི ཝཱ སཙྩེཀདེསོ ཝཱ. ཀིཾ དེསིཏནྟི? སུཏྟེ ཝཱིམཾསཱ དེསནཱཧཱརོ. ཡཐཱ ཨརིཡསཙྩཱནི ནིཀྑེཔོ ཙཏྟཱརི སཙྩཱནི ¶ སཱདྷཱརཎཱནི ཨསཱདྷཱརཎཱནི ཙ. ཡཱནི ཙ ཨཊྛཱརས པདཱནི དུཀྑཏོ སཏྟ པདཱནི སངྑེཔེན ཀཱཡིཀེན ཙེཏསིཀེན དུཀྑེན, ཨཔྤིཡསམྤཡོགེན པིཡཝིཔྤཡོགེན ཙ ཏཱིཧི ཙ སངྑཏཱཧི. ཏཏྠ ཏཱིཎི སངྑཏལཀྑཎཱནི ཏིསྶོ དུཀྑཏཱ ཨུཔྤཱདོ སངྑཏལཀྑཎཾ, སངྑཱརདུཀྑཏཱཡ དུཀྑཏཱ ཙ སངྑཏལཀྑཎཾ, ཝིཔརིཎཱམདུཀྑཏཱཡ དུཀྑཏཱཏི ཨཉྙཐཏྠཾ ཙ སངྑཏལཀྑཎཾ, དུཀྑདུཀྑཏཱཡ ཙ དུཀྑཏཱ, ཨིམེསཾ ཏིཎྞཾ སངྑཏལཀྑཎཱནཾ ཏཱིསུ ཝེདནཱབྷཱུམཱིསུ ཨདུཀྑམསུཁཱ ཝེདནཱ ཨུཔྤཱདོ སངྑཏལཀྑཎཾ, སངྑཱརདུཀྑཏཱཡ ཙ དུཀྑཏཱ ཏཡོ སངྑཏལཀྑཎཾ, སུཁཱ ཝེདནཱཡ ཙ ཝིཔརིཎཱམདུཀྑཏཱཡ ཙ དུཀྑཏཱཏི ཨཉྙཐཏྟཾ སངྑཏལཀྑཎཾ, དུཀྑཱཝེདནཱ དུཀྑདུཀྑཏཱ ཙ དུཀྑཏཱ ཨིམམྷི ཨིམེསུ ནཝཔདེསུ པཋམཀེསུ སཏྟསུ པདེསུ སོལ༹སསུ པདེསུ དུཀྑཱ པརིཡེསིཏབྦཱ, ཨེཀཱདས དུཀྑཏཱཡ ཙ ལཀྑཎཾ ¶ ནིདྡེསེ ནིདྡིཊྛཾ. པཱཏུབྷཱཝལཀྑཎཱ ཛཱཏིཡཱ ཙ པཱཏུབྷཱཝཙུཏིལཀྑཎོ ཙུཏོཏི ཝིཏྠཱརེན པནྣརསཔདཱནི ཀཏྟབྦཱནི, ཨེཝཾ སཱདྷཱརཎཱནི ཨསཱདྷཱརཎཱནི ཙ སཏྟསུ དསསུ པདེསུ སཉྙཱས ཏིཝིདྷེ ཙ སཱསནཔྤཊྛཱནེ ཨཊྛཱརསཝིདྷེསུ ཙ སུཏྟཱདྷིཊྛཱནེསུ དསཝིདྷེསུ ཙ སུཏྟཝིདྷེཡྻེསུ སོལ༹སཝིདྷེསུ ཙ ཧཱརེསུ ཨེཀཝཱིསཏིཝིདྷཱཡ ཙ པཝིཙཡཝཱིམཾསཱཡཱཏི ཨིདཾ དེསིཏཾ. ཡཐཱབྷཱུཏཉྩ དེསིཏནྟི, ཨཡཾ ཝུཙྩཏི དེསནཱཧཱརོ.

པདཾ པཉྷཱ ཙ པུཙྪཱ ཙ, ཀིཾ པུབྦཾ ཀིཉྩ པཙྪིམཾ;

ཨནུགཱིཏི སཱ ཙ ཝིཙཡོ, ཧཱརོ ཝིཙཡོཏི ནིདྡིཊྛོ.

པདནྟི ¶ པཋམཾ པདཾ. ཏསྶ ཀོ ཨཏྠོ? ཡཾ བྷགཝཱ པུཊྛོ ཨཱཡསྨཏཱ ཨཛིཏེན ཏཾ གཧེཏབྦཾ, ཀཏིཔདཱནི པུཊྛཱནི ཡཐཱཀིཾ ཀེནསྶུ ནིཝུཏོ ལོཀོཏི གཱཐཱ, ཨིམཱནི ཀཏིཔདཱནི ཙཏྟཱརི ཨིཏི ཝིསཛྫནཱཡ པུཙྪཱ. ཡཏྟཀེཧི པདེཧི བྷགཝཏཱ ཝིསཛྫིཏཱནི པདཱནི ཨིཏི པུཙྪཱཡ ཙ ཡཱ པདཱནཾ སངྐཱསནཱ, ཨིདཾ ཝུཙྩཏི པདནྟི.

པཉྷཱཏི ཨིམཱནི ཙཏྟཱརི པདཱནི. ཀཏི པཉྷཱ? ཨེཀོ ཝཱ དྭེ ཝཱ ཏདུཏྟརི ཝཱ ཨིམཱནི ཙཏྟཱརི པདཱནི ཨེཀོ པཉྷོ, ཨཏྠཱནུཔརིཝཏྟི བྱཉྫནཾ ཧོཏི, སམྦཧུལཱནིཔི པདཱནི ཨེཀམེཝཏྠཾ པུཙྪཏི. ཨིམཱནི ཙཏྟཱརི པདཱནི ཨནུཔརིཝཏྟཱིནི ཏཾ བྱཉྫནེན ཨེཀོ པཉྷོཝ ཧོཏི. ཀེནསྶུ ¶ ནིཝུཏོ ལོཀོཏི ¶ ལོཀཾ སནྡྷཱཡ པུཙྪཏི, ཀེནསྶུ ནཔྤཀཱསཏི ཀིསྶཱབྷིལེཔནཾ བྲཱུསཱིཏི ཏཾཡེཝ པུཙྪཏི. ཀིཾསུ ཏསྶ མཧབྦྷཡནྟི ཏཾཡེཝ པུཙྪཏི. ཨེཝཾ ཨཏྠཱནུཔརིཝཏྟི བྱཉྫནཾ ཨེཀོ པཉྷོ ཧོཏི, སོ པཉྷོ ཙཏུབྦིདྷོ ཨེཀཾསབྱཱཀརཎཱིཡོ ཝིབྷཛྫབྱཱཀརཎཱིཡོ པཊིཔུཙྪཱབྱཱཀརཎཱིཡོ ཋཔནིཡོཏི. ཏཏྠ ཙཀྑུ ཨནིཙྩནྟི ཨེཀཾསབྱཱཀརཎཱིཡོ, ཡཾ ཨནིཙྩཾ ཏཾ དུཀྑནྟི ཝིབྷཛྫབྱཱཀརཎཱིཡོ, སིཡཱ ཨནིཙྩཾ ན ཙཀྑུ, ཡཱནིཔི ཨཱཡཏནཱནི ཙ ན ཙཀྑུ, ཏཱནིཔི ཨནིཙྩནྟི ན ཙཀྑུཡེཝ, ཨཡཾ ཝིབྷཛྫབྱཱཀརཎཱིཡོ, ཡཾ ཙཀྑུ ཏཾ ཙཀྑུནྡྲིཡཾ ནེཏི པཊིཔུཙྪཱབྱཱཀརཎཱིཡོ, ཏཾ ཙཀྑུ ཏཐཱགཏོཏི ཋཔནིཡོ. ཨཉྙཏྲ ཙཀྑུནཱཏི ཋཔནིཡོ པཉྷོ. ཨིདཾ པཉྷཾ བྷགཝཱ ཀིཾ པུཙྪིཏོ, ལོཀསྶ སཾཀིལེསོ པུཙྪིཏོ. ཀིཾ ཀཱརཎཾ? ཏིཝིདྷོ ཧི སཾཀིལེསོ ཏཎྷཱསཾཀིལེསོ ཙ དིཊྛིསཾཀིལེསོ ཙ དུཙྩརིཏསཾཀིལེསོ ཙ. ཏཏྠ ཨཝིཛྫཱཡ ནིཝུཏོཏི ཨཝིཛྫཾ དསྶེཏི, ཛཔྤཱཏི ཏཎྷཾ དསྶེཏི, མཧབྦྷཡནྟི ཨཀུསལསྶ ཀམྨསྶ ཝིཔཱཀཾ དསྶེཏི, སོཏཾ ནཱམ སུཁཝེདནཱིཡསྶ ཀམྨསྶ དུཀྑཝེདནཱིཡོ ཝིཔཱཀོ བྷཝིསྶཏཱིཏི ནེཏཾ ཋཱནཾ ཝིཛྫཏཱིཏི བྷགཝཱ ཝིསཛྫེཏི, ཙཏཱུཧི ཡོ པདེཧི ཨཝིཛྫཱཡ ནིཝུཏོ ལོཀོཏི…པེ… ཨེཝཾ ཝུཙྩཏི.

༤༥. ཏདུཏྟརི པཊིཔུཙྪཏི, སཝནྟི སབྦདྷི སོཏཱཏི གཱཐཱ, ཙཏྟཱརི པདཱནི པུཙྪཏི ཏཾ བྷགཝཱ དྭཱིཧི པདེཧི ཝིསཛྫེཏི.

ཡཱནི ¶ སོཏཱནི ལོཀསྨིཾ, སཏི ཏེསཾ ནིཝཱརཎཾ;

སོཏཱནཾ སཾཝརཾ བྲཱུམི, པཉྙཱཡེཏེ པིདྷཱིཡརེ.

ཨིམཱནི ཙཏྟཱརི པདཱནི དྭཱིཧི པདེཧི ཝིསཛྫེཏི. ཨིདཾ པདནྟི པུཙྪིཏོ, ཏསྶ སཾཀིལིཊྛསྶ ¶ ལོཀསྶ ཝོདཱནཾ པུཙྪིཏོ, སོཏཱནི ཚ ཏཎྷཱཀཱཡཱ བཧུལཱདྷིཝཙནེན ནིདྡིཊྛཱ བྷཝནྟི སབྦེཧི ཨཱཡཏནེཧི. ཏཱནི སོཏཱནི ཀེན ནིཝཱརིཡནྟཱིཏི པརིཡུཊྛཱནཔཧཱནཾ པུཙྪཏི, ཀེན སོཏཱ པིདྷཱིཡརེཏི ཨནུསཡསམུགྒྷཱཏཾ པུཙྪཏི. ཏཏྠ བྷགཝཱ ཚསུ དྭཱརེསུ སཏིཡཱ དེསེཏི, ཡོ ཧི སམྤཛཱནོ ཝིཧརཏི སཏིདོཝཱརིཀེ ཙ ཏསྶ ཨིནྡྲིཡཱནི གུཏྟཱནི སམྦྷཝནྟི. ཏཏྠ གུཏྟེསུ ཨིནྡྲིཡེསུ ཡཱ ཡཱ ཝིཔསྶནཱ, སཱ སཱ ཏེསཾ ཏེསཾ སོཏཱནཾ ཏསྶཱ ཙ ཨཝིཛྫཱཡ ཡོ ལོཀོ ནིཝུཏོ ཨཙྩནྟཔཧཱནཱཡ སཾཝཏྟཏི. ཨེཝཾ སོཏཱནི པིཧིཏཱནིཔི བྷཝནྟི ཏཏོ ཨུཏྟརི པུཙྪཏི.

པཉྙཱ ¶ ཙ སཏི ཙ ནཱམརཱུཔསྶ ཁོ ཏསྶ བྷགཝནྟཾ པུཊྛུམཱགམྨ ཀཏྠེཏཾ ཨུཔསམྨཏི ཨིམཱནི ཙཏྟཱརི པདཱནི བྷགཝཱ ཨེཀེན པདེན ཝིསཛྫེཏི.

ཡམེཏཾ པཉྷཾ ཨཔུཙྪི [པུཙྪསེ པཉྷཾ (པཱི. ཀ.) པསྶ སུ. ནི. ༡༠༤༣], ཨཛིཏ ཏཾ ཝདཱམི ཏེ…པེ…;

ཝིཉྙཱཎསྶ ནིརོདྷེན, ཨེཏྠེཏཾ ཨུཔསམྨཏི.

ཨིམིནཱ པཉྷེན ཀིཾ པུཙྪཏི? ཨནུཔཱདིསེསནིབྦཱནདྷཱཏུཾ པུཙྪཏི, ཏཾ བྷགཝཱ ཨནུཔཱདིསེསཱཡ ནིབྦཱནདྷཱཏུཡཱ ཝིསཛྫེཏི. ཏཏྠ ¶ པཋམེན པཉྷེན སཾཀིལེསཾ པུཙྪཏི. དུཏིཡེན པཉྷེན ཝོདཱནཾ པུཙྪཏི. ཏཏིཡེན པཉྷེན སོཔཱདིསེསནིབྦཱནདྷཱཏུཾ པུཙྪཏི. ཙཏུཏྠེན པཉྷེན ཨནུཔཱདིསེསནིབྦཱནདྷཱཏུཾ པཊིཔུཙྪཏི ཏཏོ ཨུཏྟརི པཊིཔུཙྪཏི.

ཡེ ཙ སངྑཱཏདྷམྨཱསེ, ཡེ ཙ སེཁཱ [སེཀྑཱ (ཀ.) པསྶ སུ. ནི. ༡༠༤༤] པུཐཱུ ཨིདྷ;

ཏེསཾ མེ ནིཔཀོ ཨིརིཡཾ, པུཊྛོ པབྲཱུཧི མཱརིས.

ཨིམཱནི ཙཏྟཱརི པདཱནི པུཙྪཏི. ཀཏི ཙ པན ཏེ པཉྷེ སངྑཱཏདྷམྨཱ ཙ ཨརཧནྟཱ སེཀྑཱ ཙ? ཀིཾ པུབྦཾ ཀིཉྩ པཙྪིམནྟི ཨཡམཏྠོ. ཏཏྠ ཀཏརཾ པཋམཾ པུཙྪཏི, ཀཏརཾ པཙྪཱ? ཨརཧནྟཾ པཋམཾ པུཙྪཏི. སེཀྑདྷམྨེ ཏཏྠ ཀེན པདེན སངྑཱཏདྷམྨཱཏི ཨརཧནྟོ གཧིཏཱ, པུཐཱུཏི སེཀྑཱ གཧིཏཱ. ཏེསཾ མེ ནིཔཀོཏི སཱདྷཱརཎཾ པདཾ བྷགཝནྟཾ པུཙྪཏི. ཏསྶ སཱདྷཱརཎཱནི ཙ ཨསཱདྷཱརཎཱནི ཙ པཉྷེསུ པུཙྪིཏབྦཱནི. ཏཾ བྷགཝཱ ཝིསཛྫེཏི. ན ཏཐཱ པུཊྛཾ, པཋམཾ པུཊྛཾ, ཏཾ པཙྪཱ ཝིསཛྫེཏི. ཡཾ པཙྪཱ པུཙྪིཏཾ པཋམཾ ཝིསཛྫེཏི. ཀིཉྩ ཨིདཾ པུཙྪིཏཾ ཝིསུདྡྷཱནཾ ཝིསུཛ྄ཛྷནྟཱནཉྩ ཀཱ ཨིརིཡཱཏི ཨིདཾ པུཙྪི, ཏཾ ཀཱམེསུ ནཱབྷིགིཛ྄ཛྷེཡྻ. མནསཱནཱཝིལོ སིཡཱཏི པརིཡུཊྛཱནཱནི ཝིཏཀྐེན ཙ བྷགཝཱ ནིཝཱརེཏི, དྭེ པན ཝིཏཀྐཨནཱཝིལཏཱཡ ¶ པརིཡུཊྛཱནཾ, ཡཐཱ ནཱིཝརཎེསུ ནིདྡིཊྛཾ. ཀུསལཱ སབྦདྷམྨེསཱུཏི ཨརཧནྟཾ ཝིསཛྫེཏི.

ཀེནསྶུ ཏརཏི ཨོགྷནྟི གཱཐཱ, ཨིམཱནི ཙཏྟཱརི པདཱནི. ཙཏྟཱརོཡེཝ པཉྷཱ. ཀིཾ ¶ ཀཱརཎཾ, ན ཧི ཨེཏྠ ཨཏྠཱནུཔརིཝཏྟི བྱཉྫནཾ [ཡཐཱནུཔརིཝཏྠིཝཛྫཾ (པཱི. ཀ.)] ཡཐཱ པཋམཾ ཨཛིཏཔཉྷེསུ, ཏསྶ ན ཨེཀཾསེན བཧཱུནི ཝིསཛྫནཱནི, བཧུཀཱ པཉྷཱ, ཨེཀོཝ ན ཙཱཔི, སབྦེ པུཙྪཏི, པུབྦེ ཝིསཛྫིཏོ, ཡཐཱ ཙཏུཏྠོ ཨཛིཏོཔཉྷེ, ཡཾ ¶ ཨེཏྠ ཡཐཱབྷཱུཏཾ པརིཡེསནཱཔདབནྡྷེན ཝིསཛྫནཱཡོ ཨེཝཾ ཡཐཱབྷཱུཏཾ པརིཡེསཏི. ཡོ པུན ཨེཏྠ ཡཾ ཨེཝཾ པུཙྪཏི ཏཏྠ ཨཡམཱཀཱརོ པུཙྪནཱཡཾ ཨནྟོཛཊཱ བཧིཛཊཱཏི གཱཐཱ [སཾ. ནི. ༡.༢༩] པུཙྪིཏཝིསཛྫནཱཡ མགྒིཏབྦཱ. ཀཐཾ ཝིསཛྫིཏཱཏི བྷགཝཱཏི ཝིསཛྫེཏི? སཱིལེ པཏིཊྛཱཡ ནརོ སཔཉྙོཏི གཱཐཱ. ཏཏྠ ཙིཏྟབྷཱཝནཱཡ སམཐཱ, པཉྙཱབྷཱཝནཱཡ ཝིཔསྶནཱ. ཏཏྠ ཨེཝཾ ཨནུམཱིཡཏི, ཡེ དྷམྨཱ སམཐེན ཙ ཝིཔསྶནཱཡ ཙ པཧཱིཡནྟི, ཏེ ཨིམེ ཨནྟོཛཊཱ བཧིཛཊཱ. ཏཏྠ ཝིསཛྫནཾ སམཐེན རཱགོ པཧཱིཡཏི, ཝིཔསྶནཱཡ ཨཝིཛྫཱ. ཨཛ྄ཛྷཏྟཝཏྠུཀོ རཱགོ ཨནྟོཛཊཱ, བཱཧིརཝཏྠུཀོ རཱགོ བཧིཛཊཱ. ཨཛ྄ཛྷཏྟཝཏྠུཀཱ སཀྐཱཡདིཊྛི, ཨཡཾ ཨནྟོཛཊཱ. ཨེཀསཊྛི དིཊྛིགཏཱནི ཙ བཱཧིརཝཏྠུཀཱནི བཧིཛཊཱ, ཡཱ ཧི ཨཛ྄ཛྷཏྟཝཏྠུཀཱ ཡཱ དིཊྛིབྷཱགིཡེན བྷཝིསྶཏི, ཨཡཾ ཛཊཱ. ཏཐཱ སཾཁིཏྟེན ཡཱ ཀཱཙི ཨཛ྄ཛྷཏྟཝཏྠུཀཱ ཏཎྷཱ ཙ དིཊྛི ཙ, ཨཡཾ ཨནྟོཛཊཱ. ཡཱ ཀཱཙི བཱཧིརཝཏྠུཀཱ ཏཎྷཱ ཙ དིཊྛི ཙ, ཨཡཾ བཧིཛཊཱ.

ཡཐཱ དེཝཏཱ བྷགཝནྟཾ པུཙྪཏི ‘‘ཙཏུཙཀྐཾ ནཝདྭཱར’’ནྟི གཱཐཱ [སཾཡུཏྟནིཀཱཡེ]. ཏཏྠ བྷགཝཱ ཝིསཛྫེཏི ‘‘ཚེཏྭཱ ནདྡྷིཾ ཝརཏྟཾ ཙཱ’’ཏི གཱཐཱ, ཨིདཾ བྷགཝཱ དུཀྑནིརོདྷགཱམིནིཾ པཊིཔདཾ ཝིསཛྫེཏི. ཨིམཱཡ ཝིསཛྫནཱཡ བྷགཝཱ ཨནུམཱིཡཏི ¶ ཀིལེསེ ཨེཏྠ པུརིམཱཡ གཱཐཱཡ ནིདྡིསིཏབྦེན. ཏཾ ཧི ཙཏུཙཀྐནྟི ཙཏྟཱརོ ཝཱ ཧཏྠཔཱདཱ. ནཝདྭཱརནྟི ནཝ ཝཎམུཁཱནི. ཡཐཱ ཙཏུཙཀྐནྟི ཙཏྟཱརོ ཨུཔཱདཱནཱ, ཨུཔཱདཱནཔྤཙྩཡཱ བྷཝོ, ཨུཔཱདཱནནིརོདྷཱ བྷཝནིརོདྷོ. ནཝདྭཱརནྟི ནཝ མཱནཝིདྷཱ, མཱནཛཱཏིཀཱཡ ཧི དུཀྑཾ སེཡྻེནམྷི པརསོ ཏཱིཎི ཏིཀཱནི པུཎྞཾ. ཏིཀེན སཾཡུཏྟཾ ཧི པཉྩཀཱམགུཎིཀོ རཱགོ. ཏཏྠ ནདྡྷཱིཏི ཏཎྷཱ ཝིསཛྫཱིཡཏི. ཝརཏྟནྟི མཱནཾ ཝིསཛྫེཏི, ཨིཙྪཱ ལོབྷོ ཙ པཱཔཀོཏི པཉྩཀཱམགུཎིཀོ རཱགོ. ཏཏྠ ཝིསམལོབྷོ པཱཔཀོཏི ནིདྡིསིཡཏི སམཱུལཏཎྷནྟི. ཨཉྙཱཎམཱུལཀཱ ཏཎྷཱཏི ཨཉྙཱཎམཱུལཀཱ ཏཎྷཱ, ཏཎྷཱཡ ཙ དིཊྛིཡཱ ཙ པཧཱནཾ. ཡེ ཙ པུན ཨཉྙེཔི ཀེཙི ཙཏུཙཀྐཡོགེན ཏེནེཝ ཀཱརཎེན ཙ ཡུཛྫནྟི, སཾསཱརགཱམིནོ དྷམྨཱ སབྦེ ནིདྡིསིཏབྦཱ. ཏཏྠཱཡཾ གཱཐཱ ཝིསཛྫནཱ པུཙྪཱཡ ¶ ཙ ཝིསཛྫནཱཡ སམེཏི [སམཾཏི (པཱི.)]. ཡཾ ཡདི སནྡེན ཨཐ སཧ བྱཱཀརཎེན ཨནུགཱིཏིཡཾ ཙ སོ ཝིཙཡོཏི བྷགཝཱ ཡཏྟཀཱནི པདཱནི ནིཀྑིཔཏི, ཏཏྟཀེཧི ཨནུགཱཡཏི.

༤༦. ཨཊྛཧི ¶ , བྷིཀྑཝེ, ཨངྒེཧི སམནྣཱགཏོ བྷིཀྑུ དཱུཏེཡྻཾ གནྟུམརཧཏི [ཀཱཏུམརཧཏི (པཱི. ཀ.) པསྶ ཨ. ནི. ༨.༡༦]. ཨིམཱནི ཨཊྛ པདཱནི ནིཀྑིཏྟཱནི. ཚཧི པདེཧི བྷགཝཱ ཨནུགཱཡཏི.

‘‘ཡོ ཝེ ན བྱཐཏི [བྱཱཐཏི (ཀ.)] པཏྭཱ, པརིསཾ ཨུགྒཝཱདིནིཾ;

ན ཙ ཧཱཔེཏི ཝཙནཾ, ན ཙ ཚཱདེཏི སཱསནཾ.

‘‘ཨསནྡིདྡྷིཾ ཙ བྷཎཏི, པུཙྪིཏོ ན ཙ ཀུཔྤཏི;

ས ཝེ ཏཱདིསཀོ བྷིཀྑུ, དཱུཏེཡྻཾ གནྟུམརཧཏཱི’’ཏི.

ཏཏྠ པན བྷགཝཱ ཡཏྟཀཱནི པདཱནི ནིཀྑིཔཏི, ཏཏྟཀེཧི ཨནུགཱཡཏི. སཏྟཧི, བྷིཀྑཝེ, ཨངྒེཧི སམནྣཱགཏོ ཀལྱཱཎམིཏྟོ པིཡོ གརུབྷཱཝནཱིཡོཏི ཝིཏྠཱརེན, ཨིདཾ བྷགཝཱ སཏྟཧི པདེཧི ཨནུགཱཡཏི. ཨིཏི བཧུསྶུཏཝཱ ཨནུགཱཡཏི, ཨཔྤཏརཀཐཾ པདཾ ཝཱ ནིཀྑེཔོ, བཧུསྶུཏཝཱ ནཝ པདཱནི ནིཀྑེཔོ, ཨཔྤཏརིཀཱ ཨནུགཱིཏིཡཱ བཧུཏརིཀཱ ཨནུགཱཡཏི. ཨཡཾ ཝུཙྩཏི ཏེ ཨནུགཱིཏི ཙ ཝིཙཡོ, ཨཡཾ ¶ ཝིཙཡོ ནཱམ ཧཱརོ.

སབྦེསཾ ཧཱརཱནཾ, ཡཱ བྷཱུམཱི ཡོ ཙ གོཙརོ ཏེསཾ;

ཡུཏྟཱཡུཏྟི པརིཀྑཱ, ཧཱརོ ཡུཏྟཱིཏི ནིདྡིཊྛོ.

ཧཱརཱནཾ སོལ༹སནྣཾ ཡཐཱ དེསནཱ ཡཐཱ ཝིཙཡོ ཡོ ཙ ནིདྡིསིཡཏི, ཨཡཾ ནིདྡེསོ. ཨཡཾ པུཙྪཱ སུཏྟེསུ ན ཡུཛྫཏཱིཏི ཡཱ ཏཏྠ ཝཱིམཾསཱ, ཨཡཾ ཡུཏྟི.

ཡཐཱ ཧི སཧེཏཱུ སཔྤཙྩཡཱ སཏྟཱ སཾཀིལིསྶནྟི, ཨཏྠི ཧེཏུ ཨཏྠི པཙྩཡོ སཏྟཱནཾ སཾཀིལེསཱཡ, སཧེཏཱུ སཔྤཙྩཡཱ སཏྟཱ ཝིསུཛ྄ཛྷནྟི, ཨཏྠི ཧེཏུ ཨཏྠི པཙྩཡོ སཏྟཱནཾ ཝིསུདྡྷིཡཱ. སཱིལཝཏཱ, ཨཱནནྡ, པུགྒལེན ན ཝེཡྻཱཀརཎིཡཱ ཀིནྟི མེ ཝིཔྤཊིསཱརོ ཨུཔྤཱདེཡྻ…པེ… ཨབྱཱཀརཎཾ ཀཏྟབྦཾ, ཨཡཾ ཝིསུདྡྷིཡཱ མགྒོ. ཏསྶ ཧེཏུ ཀོ པཙྩཡོ, སཱིལཀྑནྡྷསྶ ¶ ཙཏྟཱརི ཙཏྟཱརི ཧེཏུ ཙ པཙྩཡོ ཙ. སཔྤུརིསསཾསེཝོ ཡོ ཙ པཏིརཱུཔདེསཝཱསོ ཙ, ཨཡཾ ཨུཔཱདཱཔཙྩཡཏཱ སཔྤཙྩཡོ. ཡཾ པོརཱཎཀམྨཾ ཨསྶ ཝིཔཱཀོ པཙྩཡོ, ཏཱཡ པཙྩཡཱཡ ཨཏྟསམྨཱཔཎིདྷི, ཨཡཾ ¶ ཧེཏུ. ཨིཏི སཱིལཀྑནྡྷོ སཧེཏུ སཔྤཙྩཡོཏི ཨིདཾ ལོཀིཀཾ སཱིལཾ.

ཡཾ པན ལོཀུཏྟརཾ སཱིལཾ, ཏསྶ ཏཱིཎི ཨིནྡྲིཡཱནི པཙྩཡོ – སདྡྷིནྡྲིཡཾ ཝཱིརིཡིནྡྲིཡཾ སམཱདྷིནྡྲིཡཾ – ཨཡཾ པཙྩཡོ. སཏིནྡྲིཡཉྩ པཉྙིནྡྲིཡཉྩ ཧེཏུ. པཉྙཱཡ ནིབྦེདྷགཱམིནིཡཱ, ཡཾ སཱིལཾ ཛཱཡཏི. སོཏཱཔནྣསྶ ཙ སཱིལཾ ཏེནཱཡཾ ཧེཏུ ཨཡཾ པཙྩཡོ. ཡཾ པུན སམཱདྷིནོ པསྶདྡྷི ཙ པཱིཏི ཙ པཱམོཛྫཾ པཙྩཡོ. ཡཾ སུཁཾ ཧེཏུ ཏེན སམཱདྷིཀྑནྡྷོ སཧེཏུ སཔྤཙྩཡོ. ཡཾ ¶ སམཱཧིཏོ ཡཐཱབྷཱུཏཾ པཛཱནཱཏི, ཨཡཾ པཉྙཱ. ཏསྶ པརཏོགྷོསོ ཨཛ྄ཛྷཏྟཾ ཙ ཡོནིསོ མནསིཀཱརོ ཧེཏུ ཙ པཙྩཡོ ཙ, ཨིཏི ཨིམེ ཏཡོ ཁནྡྷཱ སཧེཏཱུ སཔྤཙྩཡཱ ཨེཝཾ སཏྟ པཉྙཱ. སཏྟབྱཱཀརཎཱིསུ ཙ སུཏྟེསུ ན ཡུཛྫཏི. ཨཡཾ ཡུཏྟིཧཱརོ. སོ ཙཏཱུསུ མཧཱཔདེསེསུ དཊྛབྦོ.

དྷམྨཾ དེསེཏི ཛིནོ, ཏསྶ ཙ དྷམྨསྶ ཡཾ པདཊྛཱནཾ;

ཨིཏི ཡཱཝ སབྦདྷམྨཱ, ཨེསོ ཧཱརོ པདཊྛཱནོ.

ཏཏྠ པཉྩཀཱམགུཎཱ ཀཱམརཱགསྶ པདཊྛཱནཾ. ཡེསཾ ཀེསཉྩི ཀཱམརཱགོ ཨུཔྤཛྫཏི ཨུཔྤནྣོ ཝཱ ཨུཔྤཛྫིསྶཏི ཝཱ, ཨེཏེསུ ཡེཔི པཉྩསུ རཱུཔེསུ ཨཱཡཏནེསུ ནཱཉྙཏྲ ཨེཏེཧི ཀཱམརཱགསྶ པདཊྛཱནནྟི. ཝུཙྩཏེ, ཏེན པཉྩ ཀཱམགུཎཱ ཀཱམརཱགསྶ པདཊྛཱནཾ. པཉྩིནྡྲིཡཱནི རཱུཔརཱགསྶ པདཊྛཱནཾ. མནིནྡྲིཡཾ བྷཝརཱགསྶ པདཊྛཱནཾ. པཉྩཀྑནྡྷཱ སཀྐཱཡདིཊྛིཡཱ པདཊྛཱནཾ. ཨེཀསཊྛི དིཊྛིགཏཱནི དིཊྛིརཱགསྶ པདཊྛཱནཾ. ཀཱམདྷཱཏུ ཀཱམརཱགསྶ པདཊྛཱནཾ. ཨརཱུཔདྷཱཏུ ཨརཱུཔརཱགསྶ པདཊྛཱནཾ. སུཁསཉྙཱ ཀཱམརཱགསྶ པདཊྛཱནཾ. བྱཱཔཱདསཉྙཱ བྱཱཔཱདསྶ པདཊྛཱནཾ. ཨསམྤཛཉྙཏཱ སམྨོཧསྶ པདཊྛཱནཾ. ནཝ ཨཱགྷཱཏཝཏྠཱུནི བྱཱཔཱདསྶ པདཊྛཱནཾ. ནཝཝིདྷཾ མཱནཾ [ནཝམཱནཾ ཝིདྷམཱནསྶ (པཱི. ཀ.)] མཱནསྶ པདཊྛཱནཾ. སུཁཱ ཝེདནཱ རཱགཱནུསཡསྶ པདཊྛཱནཾ. དུཀྑཱ ཝེདནཱ པཊིགྷཱནུསཡསྶ པདཊྛཱནཾ. ཨདུཀྑམསུཁཱ ཝེདནཱ ཨཝིཛྫཱནུསཡསྶ པདཊྛཱནཾ. ཨཏྟཝཱདུཔཱདཱནཉྩ མུསཱཝཱདོ ཙ ལོབྷསྶ པདཊྛཱནཾ. པཱཎཱཏིཔཱཏོ ཙ པིསུཎཝཱཙཱ ཙ ཕརུསཝཱཙཱ ཙ བྱཱཔཱདསྶ པདཊྛཱནཾ. མིཙྪཏྟཉྩ སམྥཔྤལཱཔོ ཙ མོཧསྶ པདཊྛཱནཾ. བྷཝཾ བྷོགཉྩ ¶ ཝོཀཱརོ ཨཧཾཀཱརསྶ པདཊྛཱནཾ. བཱཧིརཱནཾ པརིགྒཧོ ¶ མམཾཀཱརསྶ ¶ པདཊྛཱནཾ. ཀཱཡསྶ སངྒཾ [ཀཱཡཝངྐཾ (པཱི.)] དིཊྛིཡཱ པདཊྛཱནཾ. ཀཱཡིཀདོསོ དོསསྶ པདཊྛཱནཾ. ཀཱཡིཀཀཱསཱཝོ ལོབྷསྶ པདཊྛཱནཾ. ཡོ ཡོ ཝཱ པན དྷམྨོ ཡེན ཡེན ཨཱརམྨཎེན ཨུཔྤཛྫཏི སཙྩཱདྷིཊྛཱནེན ཝཱ དྷམྨཱདྷིཊྛཱནེན ཝཱ ཨནུསཡནེན ཝཱ, སོ དྷམྨོ ཏསྶ པདཊྛཱནཾ. ཏེན སཱརམྨཎེན སོ དྷམྨོ ཨུཔྤཛྫཏི.

ཡཐཱ མནུསྶོ པུརིམསྶ པདསྶ པདཊྛཱནཾ ཨལབྷནྟོ དུཏིཡཾ པདཾ ཨུདྡྷརཏི, སོ པཙྪཱནུཔདཾ སཾཧརཏི. ཡདི པན ཡོ ན དུཏིཡཔདསྶ པདཊྛཱནཾ ལབྷཏི, ཨཔརཾ པདཾ ཨུདྡྷརཏི. ཏསྶ ཡོ ཙེསོ པཙྩཡོ བྷཝཏི. ཨེཝཾ དྷམྨོ ཀུསལོ ཝཱ ཨཀུསལོ ཝཱ ཨབྱཱཀཏོ ཝཱ པདཊྛཱནཾ ཨལབྷནྟོ ན པཝཏྟཏི. ཡཐཱ པཡུཏྟསྶ དྷམྨསྶ ཡོནིལཱབྷོ [ཡོནིསོ ལཱབྷོ (པཱི.)], ཨཡཾ ཝུཙྩཏི པདཊྛཱནོ ཧཱརོ.

ཝུཏྟམྷི ཨེཀདྷམྨེ, ཡེ དྷམྨཱ ཨེཀལཀྑཎཱ ཏེན;

སབྦེ བྷཝནྟི ཝུཏྟཱ, སོ ཧཱརོ ལཀྑཎོ ནཱམ.

ཡེསཉྩ སུསམཱརདྡྷཱ, ནིཙྩཾ ཀཱཡགཏཱསཏཱིཏི གཱཐཱཡ ཝུཏྟཱཡ ཀཱཡགཏཱསཏིཡཱ ཝུཏྟཱ ཝེདནཱགཏཱ ཙིཏྟགཏཱ དྷམྨགཏཱ ཙ སཏི ཙཏུནྣཾ སཏིཔཊྛཱནཱནཾ ཨེཀེན སཏིཔཊྛཱནེན. ན ཧི ཙིཏྟཾ ཨེཀསྨིཾ ཝིཉྙཱཎཊྛིཏིཡཱ པཝཏྟཏི, ནཱནཱསུ གཏཱིསུ པཝཏྟཏི, ཀཱཡགཏཱསཏིཡཱ ཝུཏྟཱཡ ཝུཏྟཱ ཝེདནཱགཏཱ ཙིཏྟདྷམྨགཏཱ ཙ. ན ཧི ཀཱཡགཏཱསཏིཡཱ བྷཱཝིཏཱཡ སཏིཔཊྛཱནཱ ཙཏྟཱརོ བྷཱཝནཱཔཱརིཔཱུརིཾ ན གཙྪནྟི. ཨེཝཾ ¶ ཏསྶདིསེསུ དྷམྨེསུ ཝུཏྟེསུ སབྦདྷམྨཱ ཝུཏྟཱ ཙ བྷཝནྟི.

སཙིཏྟཔརིཡོདཱཔནཾ, ཨེཏཾ བུདྡྷཱན སཱསནནྟི གཱཐཱ ཙེཏསིཀཱ དྷམྨཱ ཝུཏྟཱ, ཙིཏྟེ རཱུཔཾ ཝུཏྟཾ. ཨིདཾ ནཱམརཱུཔཾ དུཀྑཾ ཨརིཡསཙྩཾ. ཏཏོ སཙིཏྟཔརིཡོདཱཔནཱ ཡཾ ཡཾ ཨོདཔེཏི, ཏཾ དུཀྑཾ. ཡེན ཨོདཔེཏི, སོ མགྒོ. ཡཏོ ཨོདཔནཱ, སོ ནིརོདྷོ. ཙཀྑུཾ ཙ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ, ཏཏྠ སཧཛཱཏཱ ཝེདནཱ སཉྙཱ ཙེཏནཱ ཕསྶོ མནསིཀཱརོ ཨེཏེ ཏེ དྷམྨཱ ཨེཀལཀྑཎཱ ཨུཔྤཱདལཀྑཎེན. ཡོ ཙ རཱུཔེ ནིབྦིནྡཏི, ཝེདནཱཡ སོ ནིབྦིནྡཏི, སཉྙཱསངྑཱརཝིཉྙཱཎེསུཔི སོ ནིབྦིནྡཏི. ཨིཏི ¶ ཡེ ཨེཀལཀྑཎཱ དྷམྨཱ, ཏེསཾ ཨེཀམྷི དྷམྨེ ནིདྡིཊྛེ སབྦེ དྷམྨཱ ནིདྡིཊྛཱ ཧོནྟི, ཨཡཾ ཝུཙྩཏི ལཀྑཎོ ཧཱརོ.

ནིརུཏྟི ཨདྷིཔྤཱཡོ ཙ, བྱཉྫནཱ དེསནཱཡ ཙ;

སུཏྟཏྠོ པུབྦཱཔརསནྡྷི, ཨེསོ ཧཱརོ ཙཏུབྱཱུཧོ.

ཏཏྠ ཀཏམཱ ནིརུཏྟི, སཱ ཀཐཾ པརིཡེསིཏབྦཱ [པསྶིཏབྦཱ (པཱི. ཀ.)]? ཡཐཱ ཝུཏྟཾ བྷགཝཏཱ ཨེཀཱདསཧི ཨངྒེཧི སམནྣཱགཏོ བྷིཀྑུ ཁིཔྤཾ དྷམྨེསུ མཧཏྟཾ པཱཔུཎཱཏི, ཨཏྠཀུསལོ ཙ ཧོཏི, དྷམྨཀུསལོ ཙ ཧོཏི, ནིརུཏྟིཀུསལོ ཙ ཧོཏི, ཨིཏྠཱདྷིཝཙནཀུསལོ ཙ ཧོཏི, པུརིསཱདྷིཝཙནཀུསལོ ཙ, ཝིཔུརིསཱདྷིཝཙནཀུསལོ ཙ, ཨཏཱིཏཱདྷིཝཙནཀུསལོ ཙ, ཨནཱགཏཱདྷིཝཙནཀུསལོ ཙ, པཙྩུཔྤནྣཱདྷིཝཙནཀུསལོ ཙ. ཨེཀཱདྷིཔྤཱཡེན ཀུསལོ ནཱནཱདྷིཔྤཱཡེན ཀུསལོ. ཀིམྷི ¶ དེསིཏཾ, ཨཏཱིཏཱནཱགཏཔཙྩུཔྤནྣཾ. ཨིཏྠཱདྷིཝཙནེན པུརིསཱདྷིཝཙནེན ཝིཔུརིསཱདྷིཝཙནེན སབྦཾ ཡཐཱསུཏྟཾ ནིདྡིཊྛཾ. ཏཾ བྱཉྫནཏོ ནིརུཏྟིཀོསལླཏོ ཡོ ཡཾ སུཏྟསྶ སུནིརུཏྟིདུནྣིརུཏྟིཏཾ ཨཝེཀྑཏི, ཨིདཾ ཨེཝཾ ནིརོཔཡིཏབྦཾ. ཨིདམྤི ན ནིརོཔཡིཏབྦཾ. ཨིདཾ ཝུཙྩཏེ ནིརུཏྟིཀོསལླཾ.

༤༩. ཏཏྠ ཀཏམཾ ཨདྷིཔྤཱཡཀོསལླཾ? ཡཐཱདེསིཏསྶ སུཏྟསྶ སབྦསྶ ཝཱརཾ གཙྪཏི ཨིམེན བྷགཝཏཱ དེསིཏབྦནྟི. ཡཐཱ ཀིཾ ཨཔྤམཱདོ ཨམཏཾ པདཾ, པམཱདོ མཙྩུནོ པདནྟི གཱཐཱ. ཨེཏྠ བྷགཝཏོ ཀོ ཨདྷིཔྤཱཡོ? ཡེ ཨསཱིཏིམེཝ ཨཱཀངྑནྟི ཏེ ཨཔྤམཏྟཱ ཝིཧརིསྶནྟི, ཨཡཾ ཨདྷིཔྤཱཡོ.

ཡོགསྶ ཀཱལཾ ན ནིཝཏྟཏི ཡཱ ཙ, སོ ན ཏཏྠ པཱཔིནྟཝེ བྷཝནྟི;

ཝེདནཱམགྒཨིསིནཱ [ཝེདནཱམགྒཾ ཨིསིནཱ (པཱི.)] པཝེདིཏཾ, དྷུཏརཛཱསཝཱ དུཀྑཱ པམོཀྑཱཏཱ.

ཨེཏྠ བྷགཝཏོ ཀོ ཨདྷིཔྤཱཡོ? ཡེ དུཀྑེ ནཱསྶཱདཀཱ [དུཀྑེན སཱདྷཀཱ (པཱི.)], ཏེ ཝཱིརིཡམཱརབྷིསྶནྟི དུཀྑཀྑཡཱཡཱཏི. ཨཡཾ ཏཏྠ བྷགཝཏོ ཨདྷིཔྤཱཡོ. ཨིཏི གཱཐཱཡ ཝཱ བྱཱཀརཎེན ཝཱ དེསིཏེ ཨིམིནཱ སུཏྟེན སཱདྷཀཱ, ཡོ ¶ ཨེཝཾ དྷམྨཱནུདྷམྨཾ པཊིཔཛྫཏཱིཏི སོ ཨདྷིཔྤཱཡོ, ཨཡཾ ཝུཙྩཏི དེསནཱདྷིཔྤཱཡོ.

ཏཏྠ ཀཏམོ པུབྦཱཔརསནྡྷི? ཡཾ ¶ གཱཐཱཡཾ ཝཱ སུཏྟེསུ ཝཱ པདཱནི ཨསཱིཏི ཏཱནི བྷཝནྟི ཨེཝཾ ཝཱ ཨེཝམེཏི ཏསྶཱ གཱཐཱཡ སུཏྟསྶ ཝཱ ཡཱནི པུརིམཱནི པདཱནི ཡཱནི ཙ པཙྪིམཀཱནི ¶ , ཏཱནི སམོསཱརེཏབྦཱནི. ཨེཝཾ སོ པུབྦཱཔརེན སནྡྷི ཉཱཡཏི. ཡཱ ཨེཀཱ སམཱརདྡྷཱ གཱཐཱ དྭེ ཏཱིཎི ཝཱ ཏསྶ མེཀདེསེ བྷཱསིཏཱནཾ ཨབྷཱསིཏཱཧི གཱཐཱཧི ཨནིདྡིཊྛོ ཨཏྠོ བྷཝཏི ཏདུཔདྷཱརིཏབྦཾ. ཡཾཝ སབྦཱ [ཡཾ ཝཏྟབྦཾ (པཱི.)] ཨིཏིསྶ པརིཡེསམཱནསྶ པརིཡེསནཱ ཀངྑཱ, ཏསྶ ཝཱ པུགྒལསྶ པཉྙཏྟཱིནཾ ཨཔརེ པརིཡེསིཏབྦཾ. ཨིདཾ ཝུཙྩཏེ པུབྦཱཔརེན སནྡྷི. ཀོསལླནྟི ཝཏྠུཏོ ནིདཱནཀོསལླཾ. བྱཉྫནཏོ ནིརུཏྟིཀོསལླཾ. དེསནཱདྷིཔྤཱཡཀོསལླཾ. པུབྦཱཔརེན སནྡྷིཀོསལླཾ. ཏཏྠ ཏསྶ གཱཐཱ པརིཡེསིཏཱ ནིདཱནཾ ཝཱ. ཨུཔལབྦྷིཏུཾ ན ཨཏྠོ ནིདྡིསིཏབྦོ ཝཏྠུཏོ ནིདཱནཀོསལླཾ ཨཏྠཀོསལླཾ ཨིམེཧི ཙཏཱུཧི པདེཧི ཨཏྠོ པརིཡེསིཡནྟོ ཡཐཱབྷཱུཏཾ པརིཡིཊྛོ ཧོཏི. ཨཐ ཙ སབྦོ ཝཏྠུཏོ ཝཱ ནིདཱནེན ཝཱ ཡོ ཨདྷིཔྤཱཡོ བྱཉྫནོ ནིརུཏྟི སནྡྷི ཙ ཨནུཏྟརོ ཨེསོ པུབྦཱཔརེན ཨེཝཾ སུཏྟཏྠེན དེསིཏབྦཾ. ཨཡཾ ཙཏུབྱཱུཧོ ཧཱརོ.

ཨེཀམྷི པདཊྛཱནེ, པརིཡེསཏི སེསཀཾ པདཊྛཱནཾ;

ཨཱཝཊྚཏི པཊིཔཀྑེ, ཨཱཝཊྚོ ནཱམ སོ ཧཱརོ.

ཡཐཱ ཀིཾ ཨུནྣལཱ༹ནཾ པམཏྟཱནནྟི གཱཐཱཡོ. ཡཾ པམཱདོ, ཨིདཾ ཀིསྶ པདཊྛཱནཾ? ཀུསལཱནཾ དྷམྨཱནཾ ཨོསགྒསྶ. ཀུསལདྷམྨོསགྒོ པན ཀིསྶ པདཊྛཱནཾ ¶ ? ཨཀུསལདྷམྨཔཊིསེཝནཱཡ. ཀིསྶ པདཊྛཱནཾ, ཀུསལདྷམྨཔཊིསེཝནཱཡ? ཀིསྶ པདཊྛཱནཾ, ཀིལེསཝཏྠུཔཊིསེཝནཱཡ? ཨིཏི པམཱདེན མོཧཔཀྑིཡཱ དིཊྛི ཨཝིཛྫཱ ཚནྡརཱགཔཀྑིཡཱ. ཏཏྠ ཏཎྷཱ ཙ དིཊྛི ཙཏྟཱརོ ཨཱསཝཱ ཏཎྷཱ ཀཱམཱསཝོ ཙ བྷཝཱསཝོ ཙ དིཊྛཱསཝོ ཙ ཨཝིཛྫཱསཝོ ཙ. ཏཏྠ ཙིཏྟེ ཨཏྠཱིཏི དིཊྛི ཙེཏསིཀེསུ ནིཙྩནྟི པཉྩསུ ཀཱམགུཎེསུ ཨཛ྄ཛྷཱཝཧནེན ཀཱམཱསཝོ, ཨུཔཔཏྟཱིསུ ཨཱསཏྟི བྷཝཱསཝོ. ཏཏྠ རཱུཔཀཱཡོ ¶ ཀཱམཱསཝསྶ བྷཝཱསཝསྶ ཙ པདཊྛཱནཾ. ནཱམཀཱཡོ དིཊྛཱསཝསྶ ཨཝིཛྫཱསཝསྶ ཙ པདཊྛཱནཾ.

ཏཏྠ ཨལླིཡནཱཡ ཨཛ྄ཛྷཏྟཝཱཧནཾ ཀཱམཱསཝསྶ ལཀྑཎཾ. པཏྠནགནྠནཨབྷིསངྑཱརཀཱཡསངྑཱརཎཾ བྷཝཱསཝསྶ ལཀྑཎཾ, ཨབྷིནིཝེསོ ཙ པརཱམཱསོ ཙ དིཊྛཱསཝསྶ ལཀྑཎཾ. ཨཔྤཊིཝེདྷོ དྷམྨེསུ ཨསམྤཛཉྙཱ ཙ ཨཝིཛྫཱསཝསྶ ལཀྑཎཾ. ཨིམེ ཙཏྟཱརོ ཨཱསཝཱ ཙཏྟཱརི ཨུཔཱདཱནཱནི. ཀཱམཱསཝོ ཀཱམུཔཱདཱནཾ, བྷཝཱསཝོ བྷཝུཔཱདཱནཾ, དིཊྛཱསཝོ དིཊྛུཔཱདཱནཾ, ཨཝིཛྫཱསཝོ ཨཏྟཝཱདུཔཱདཱནཾ, ཨིམེཧི ཙཏཱུཧི ཨུཔཱདཱནེཧི པཉྩཀྑནྡྷཱ. ཏཏྠ ཨཝིཛྫཱསཝོ ཙིཏྟེ པཧཱཏབྦོ, སོ ཙིཏྟེ ཙིཏྟཱནུཔསྶིསྶ པཧཱིཡཏི. དིཊྛཱསཝོ དྷམྨེསུ པཧཱཏབྦོ, སོ དྷམྨེསུ ¶ དྷམྨཱནུཔསྶིསྶ པཧཱིཡཏི. བྷཝཱསཝོ ཨཱསཏྟིཡཱ པཧཱཏབྦོ, སོ ཝེདནཱསུ ཝེདནཱནུཔསྶིསྶ པཧཱིཡཏི. ཀཱམཱསཝོ པཉྩསུ ཀཱམགུཎེསུ པཧཱཏབྦོ, སོ ཀཱཡེ ཀཱཡཱནུཔསྶིསྶ པཧཱིཡཏི. ཏཏྠ ཀཱཡཱནུཔསྶནཱ དུཀྑམརིཡསཙྩཾ བྷཛཏི. ཝེདནཱནུཔསྶནཱ པཉྩནྣཾ ཨིནྡྲིཡཱནཾ པཙྩཡོ སུཁིནྡྲིཡསྶ ¶ དུཀྑིནྡྲིཡསྶ སོམནསྶིནྡྲིཡསྶ དོམནསྶིནྡྲིཡསྶ ཨུཔེཀྑིནྡྲིཡསྶ, སཏྟཀིལེསོཔཙཱརོ ཏེན སམུདཡཾ བྷཛཏི. ཙིཏྟེ ཙིཏྟཱནུཔསྶནཱ ནིརོདྷཾ བྷཛཏི. དྷམྨེསུ དྷམྨཱནུཔསྶནཱ མགྒཾ བྷཛཏི. ཏེནསྶ ཙཏཱུསུ ཙ དསྶནེན ཏསྶེཝ སབྦེ པཧཱིཡནྟི, ཡེན ནིདྡིཊྛཱ པཋམཾ ཨུནྣལཱ༹ནཾ པམཏྟཱནཾ ཏེསཾ ཝཌྜྷནྟི ཨཱསཝཱ. ཛཱནཏོ ཧི པསྶཏོ ཨཱསཝཱནཾ ཁཡོ དུཀྑཾ སམུདཡོ ནིརོདྷོ མགྒོ ཧི ཨཀུསལཱ དྷམྨཱ. ཨེཝཾ པརིཡེསིཏབྦཱ. ཡཱཝ ཏསྶ ཨཀུསལསྶ གཏི ཏཏོ པཊིཔཀྑེན ཨཀུསལེ དྷམྨེ པརིཡེསཏི ཏེསཾ ཀིལེསཱནཾ ཧཱརེན ཨཱཝཊྚཏི. ཨཡཾ ཝུཙྩཏེ ཨཱཝཊྚོ ཧཱརོ. ཨེཝཾ སུཀྐཱཔི དྷམྨཱ པརིཡེསིཏབྦཱ. ཨཀུསལདྷམྨེ ཨཱགམིསྶ.

ཏཏྠ ཨཱཝཊྚསྶ ཧཱརསྶ ཨཡཾ བྷཱུམི སཏི ཨུཔཊྛཱནཱ ཙ ཝིཔལླཱསཱ ཙ ཙཏྟཱརི ཉཱཎཱནི སཀྐཱཡསམུཔྤཱདཱཡགཱམིནཱི ཙ པཊིཔདཱ སཀྐཱཡནིརོདྷགཱམིནཱི པཊིཔདཱ.

༥༡. ཏཏྠ ཀཏམོ ཝིབྷཏྟི ཧཱརོ? ཡཾ ཀིཉྩི ཝིབྷཛྫབྱཱཀརཎཱིཡཾ ཝུཙྩཏི ཝིབྷཏྟི ཧཱརོ. ཡཐཱ ཀིཾ ཨཱགནྟྭཱ ཙ པུན པུགྒལོ ཧོཏི, ནོ ཝཱགཏཾ ¶ ན པརིབྷཱསཏི [ནོ ཝཱ ན པརིབྷཱསཏི (པཱི.), ན ཏཱཝཱཡཾ པརིབྷཱསི (ཀ.)] པརིཔུཙྪཏཱཡ པཉྷཱཡ ཨཏིཡནཾ ཨེཀསྶ ཀིཉྩི – ཨཡཾ ཝུཙྩཏེ ཝིབྷཏྟི ཧཱརོ.

ཏཏྠ ཀཏམོ པརིཝཏྟནོ ཧཱརོ. ཡཾ ཀིཉྩི པཊིཔཀྑནིདྡེསོ, ཨཡཾ ཝུཙྩཏི པརིཝཏྟནོ ཧཱརོ. ཡཐཱ ཝུཏྟཾ ¶ བྷགཝཏཱ སམྨཱདིཊྛིཀསྶ པུརིསཔུགྒལསྶ མིཙྪཱདིཊྛི ནིཛྫིཎྞཱ ཧོཏཱིཏི ཝིཏྠཱརེན སབྦཱནི མགྒངྒཱནི. ཨཡཾ ཝུཙྩཏེ པརིཝཏྟནོ ཧཱརོ.

ཝེཝཙནེཧི ཨནེཀེཧི, ཨེཀཾ དྷམྨཾ པཀཱསིཏཾ;

སུཏྟེ ཡོ ཛཱནཱཏི སུཏྟཝིདཱུ, ཝེཝཙནོ ནཱམ སོ ཧཱརོ.

ཡཐཱ ཨཱཡསྨཱ སཱརིཔུཏྟོ ཨེཀམྷི ཝཏྠུམྷི ཝེཝཙནེན ནཱནཱཝུཏྟེན བྷགཝཏཱ པསཾསིཏོ ‘‘མཧཱཔཉྙོ སཱརིཔུཏྟོ ཧཱསཔཉྙོ ཛཝནཔཉྙོ’’ཏི ཨིདཾ པཉྙཱཡ ཝེཝཙནཾ. ཡཐཱ ཙ མགྒཝིབྷངྒེ ¶ ནིཡྻཱནཏྠོ ཨེཀམེཀཾ མགྒངྒཾ ཝེཝཙནེཧི ནིདྡིཊྛཾ. ཨེཝཾ ཨཝིཛྫཱཡ ཝེཝཙནཱ. ཨེཀཾ ཨཀུསལམཱུལཾ ཏདེཝ སནྟཾ ཏེསུ ཏེསུ ཛནཔདེསུ ཏེན ཏེན པཛཱནནྟི. ན ཧི ཨནེན ཏདེཝཔི ཨཱལཔིཡནྟི ཨཉྙཾ བྷཛཏི. སབྦཀཱམཛཧསྶ བྷིཀྑུནོཏི ཀཱམཱ ཨཱལཔིཏཱ. ཡསྶ ནིཏྠིཎྞོ སངྐོཏི ཏེཡེཝ ཀཱམེ སངྐཱཏི ཨཱལཔཏི. སུཎམཱནསྶ པུརེཏརཾ རཛྫནྟི ཏེཡེཝ ཀཱམེ རཛྫནྟི ཨཱལཔཏི. ཨེཝཾ སུཏྟམྷི ཡོ དྷམྨོ དེསིཡཏི ཏསྶ པརིཡེཊྛི ‘‘ཀཏམསྶ དྷམྨསྶ ཨིདཾ ནཱམཾ ཀཏམསྶ ཨིདཾ ཝེཝཙན’’ནྟི. སབྦཉྙཱུ ཧི ཡེསཾ ཡེསཾ ཡཱ ནིརུཏྟི ཧོཏི, ཡཐཱགཱམི ཏེན ཏེན དེསེཏཱིཏི ཏསྶ ཝེཝཙནཾ པརིཡེསིཏབྦཾ. ཨཡཾ ཝེཝཙནོ ཧཱརོ.

༥༢. ཏཏྠ ཀཏམོ པཉྙཏྟི ཧཱརོ? ཙཏྟཱརི ¶ ཨརིཡསཙྩཱནཱིཏི སུཏྟཾ ནིདྡིསཏི, ནིཀྑེཔཔཉྙཏྟི. ཡཱ སམུདཡཔཉྙཏྟི. ཀབལཱི༹ཀཱརེ ཨཱཧཱརེ ཨཏྠི ཚནྡོ ཨཏྠི རཱགོ ཡཱཝ པཏིཊྛིཏཾ. ཏཏྠ ཝིཉྙཱཎཾ པབྷཝཔཉྙཏྟིཾ པཉྙཔེཏི. ཀབལཱི༹ཀཱརེ ཨཱཧཱརེ ནཏྠི ཚནྡོ…པེ… སམུགྒྷཱཏི པཉྙཏྟི.

ཏསྶ ཀཱམཱསཝཱཔི ཙིཏྟཾ ཝིམུཙྩཏི, བྷཝཱསཝཱཔི ཙིཏྟཾ ཝིམུཙྩཏི, ཨཝིཛྫཱསཝཱཔི ཙིཏྟཾ ཝིམུཙྩཏཱིཏི པཧཱནཔཉྙཏྟིཾ པཉྙཔེཏི. ཏཎྷཱ ཡསྶ པུརཀྑཏཱ པཉྙཱ ¶ པརིཝཏྟཏི གཱཐཱ མནཱཔཔཉྙཏྟིཾ པཉྙཔེཏི. ཨེཝཾ པན མནཱཔཔཉྙཏྟཱིཏི ཨེཀདྷམྨཾ བྷགཝཱ པཉྙཔེཏི. ན ཧི ཏཎྷཱ དུཀྑསམུདཡོཏི ཀཱརེཏྭཱ སབྦཏྠ ཏཎྷཱསམུདཡོ ནིདྡིསིཏབྦོ. ཡཐཱ ཨུཔྤནྣཾ ཀཱམཝིཏཀྐཾ ནཱདྷིཝཱསེཏི ཝིནོདེཏི པཛཧཏཱིཏི པཊིཀྑེཔཔཉྙཏྟི. ཨེཝཾ སབྦེསཾ དྷམྨཱནཾ ཀུསལཱནཉྩ ཨཀུསལཱནཉྩ ཡཉྩསྶ དྷམྨཀྑེཏྟཾ བྷཝཏི, སོ ཙེཝ དྷམྨོ ཏཏྠ པཝཏྟཏི. ཏདཝསིཊྛཱ དྷམྨཱ ཏསྶཱནུཝཏྟཀཱ ཧོནྟི. སཱ དུཝིདྷཱ པཉྙཏྟི – པརཱདྷཱིནཔཉྙཏྟི ཙ སཱདྷཱིནཔཉྙཏྟི ཙ. ཀཏམཱ སཱདྷཱིནཔཉྙཏྟི? སམཱདྷིཾ, བྷིཀྑཝེ [པསྶ སཾ. ནི. ༣.༥], བྷཱཝེཐ, སམཱཧིཏོ, བྷིཀྑཝེ, བྷིཀྑུ ཡཐཱབྷཱུཏཾ པཛཱནཱཏི. ‘‘རཱུཔཾ ཨནིཙྩ’’ནྟི ཡཐཱབྷཱུཏཾ པཛཱནཱཏི, ཨཡཾ སཱདྷཱིནཔཉྙཏྟི པརཱདྷཱིནཔཉྙཏྟི ཙ, སཱ པཉྙཏྟི པཉྙཱཡ ཙ སཱིལསྶ ཙ, ཡཐཱ ཙཏྟཱརི ཛྷཱནཱནི བྷཱཝེཐ. ཏསྶ ཨཏྠི སམཱདྷིནྡྲིཡཾ མུདཱུནི ཙཏྟཱརི ཨིནྡྲིཡཱནི ཏཱནི ཙཏུཔརཱདྷཱིནཱནི, ཏཱིཎི ཨཝེཙྩཔྤསཱདེཏི ¶ པརཱདྷཱིནཾ སམཱདྷིནྡྲིཡཾ ཙཏྟཱརི ཨིནྡྲིཡཱནི པརཱདྷཱིནཱཏི ཙཏཱུསུ ཨརིཡསཙྩེསུ ཨཔརཱདྷཱིནཾ པཉྙིནྡྲིཡཾ སཏིཔཊྛཱནེསུ སམྨཔྤདྷཱནེསུ ཝཱིརིཡིནྡྲིཡཾ. ཨིཏི སཀེ པདཊྛཱནེ སཀེ ཁེཏྟསཱདྷཱིནོ སོ དྷམྨོ, སོ ཙ ཏཏྠ པཉྙཱཔེཏབྦོ. ཏསྶ པཊིཔཀྑཱ ནིགྷཱཏོ ནིདྡིསིཏབྦོ. ཨེཏྠཱཡཾ ཨནེཀཱཀཱརཔཉྙཏྟི ཀེན ཀཱརཎེན ཨཡཾ དྷམྨོ པཉྙཏྟོཏི. ཨཡཾ ཝུཙྩཏེ པཉྙཏྟི.

༥༣. ཏཏྠ ¶ ཀཏམོ ཨོཏརཎོ ཧཱརོ? ཚསུ དྷམྨེསུ ཨོཏཱརེཏབྦཾ. ཀཏམེསུ ཚསུ? ཁནྡྷེསུ དྷཱཏཱུསུ ཨཱཡཏནེསུ ཨིནྡྲིཡེསུ སཙྩེསུ པཊིཙྩསམུཔྤཱདེསུ. ནཏྠི ཏཾ སུཏྟཾ ཝཱ གཱཐཱ ཝཱ བྱཱཀརཎཾ ཝཱ. ཨིམེསུ ཚནྣཾ དྷམྨཱནཾ ཨཉྙཏརསྨིཾ ན སནྡིསྶཏི. ཨེཏྟཱཝཏཱ ཨེས སབྦཱ དེསནཱ ཡཱ ཏཱ ཁནྡྷཱ ཝཱ དྷཱཏུཡོ ཝཱ ཨཱཡཏནཱནི ཝཱ སཙྩཱནི ཝཱ པཊིཙྩསམུཔྤཱདོ ཝཱ, ཏཏྠ པཉྩནྣཾ ཁནྡྷཱནཾ ཝེདནཱཀྑནྡྷོ རཱགདོསམོཧཱནཾ པདཊྛཱནཾ. ཏཏྠ ཏིསྶོ ཝེདནཱཡོ ཏསྶ སུཁཱཡ ཝེདནཱཡ སོམནསྶོ སཝིཙཱརོ, དུཀྑཱཡ ཝེདནཱཡ དོམནསྶོ སཝིཙཱརོ, ཨདུཀྑམསུཁཱཡ ཝེདནཱཡ ཨུཔེཀྑོ སཝིཙཱརོ. ཡཾ པུན ཏཏྠ ཝེདཡིཏཾ ཨིདཾ དུཀྑསཙྩཾ, ཁནྡྷེསུ སངྑཱརཀྑནྡྷོ ཏཏྠ ཀཱཡོ པམཏྟཾ སཨུཔཝཏྟཏི, ཏཉྩ སངྑཱརགཏོ དྭིདྷཱ ཙ བྷཝངྒོཏརཎཾ ཀམྨཾ ཏཱིཎི ཙ སངྑཱརཱནི ¶ པུཉྙཱབྷིསངྑཱརཱ ཝཱ ཨཔུཉྙཱ ཝཱ ཨཱནེཉྫཱ ཝཱ ཧེཏུ སབྦསརཱགསྶ ནོ ཝཱིཏརཱགསྶ, དོསསྶ ཨབྷིསངྑཱརཱནི ཙ ཨཝཱིཏརཱགོ ཙེཏེཏི ཙ པཀཔྤེཏི ཙ, ཝཱིཏརཱགོ ¶ པན ཙེཏེཏི ཙ ནོ ཨབྷིསངྑརོཏི, ཡཾ ཨུཎྷཾ ཝཛིརཾ ཀཊྛེ ཝཱ རུཀྑེ ཝཱ ཨཉྙཏྠ ཝཱ པཏནྟཾ བྷིནྡཏི ཙ ཌཧཏི ཙ, ཨེཝཾ སརཱགཙེཏནཱ ཙེཏེཏི ཙ ཨབྷིསངྑརོཏི ཙ. ཡཐཱ སཏཾ ཝཛིརཾ ན བྷིནྡཏི ན ཙ ཌཧཏི, ཨེཝཾ ཝཱིཏརཱགཙེཏནཱ ཙེཏེཏི ན ཙ ཨབྷིསངྑརོཏི. ཏཏྠ པཉྩནྣཾ ཁནྡྷཱནཾ ཨེཀོ ཁནྡྷོ ཨནིནྡྲིཡསརཱིརཾ སཉྙཱཀྑནྡྷོ.

ཏཏྠ དྷཱཏཱུནཾ ཨཊྛཱརས དྷཱཏུཡོ. ཏཏྠ ཡཱ རཱུཔཱི དས དྷཱཏུཡོ, ཏཱསུ དེསིཡམཱནཱསུ རཱུཔཀྑནྡྷོ ནིདྡིསིཏབྦོ, དུཀྑཾ ཨརིཡསཙྩཾ. ཡེཔི ཙ ཚ ཝིཉྙཱཎཀཱཡཱ མནོདྷཱཏུསཏྟམཱ, ཏཏྠ ཝིཉྙཱཎཀྑནྡྷོ ཙ ནིདྡིསིཏབྦོ, དུཀྑཾ ཨརིཡསཙྩཾ. དྷམྨདྷཱཏུ པན དྷམྨསམོསརཎཱ, སོ དྷམྨོ ཧེཏུནཱ ཙ ནིསྶནྡེན ཙ ཕལེན ཙ ཀིཙྩེན ཙ ཝེཝཙནེན ཙ ཡེན ཡེན ཨུཔལབྦྷཏི, ཏེན ཏེན ནིདྡིསིཏབྦོ. ཡདི ཝཱ ཀུསལཱ ཡདི ཝཱ ཨཀུསལཱ ཡདི ཝཱ ཨབྱཱཀཏཱ ཡདི ཝཱ ཨསངྑཏཱ. དྭཱདསནྣཾ ཨཱཡཏནཱནཾ དས ཨཱཡཏནཱནི རཱུཔཱནི ཏཾ དུཀྑཾ ཨརིཡསཙྩཾ ནིདྡིསིཏབྦཾ. རཱུཔཀྑནྡྷོ ཙ མནཱཡཏནཉྩ ཝིཉྙཱཎཀྑནྡྷེན ནིདྡིསིཏབྦཾ, དུཀྑཾ ཨརིཡསཙྩཾ. དྷམྨཱཡཏནཾ ནཱནཱདྷམྨསམོསརཎཾ. ཏཏྠ ཡེ དྷམྨཱ ཨིནྡྲིཡཱནཾ ཨིནྡྲིཡེསུ ནིདྡིསིཏབྦཱ, ཡེ ཨནིནྡྲིཡཱནཾ ཨནིནྡྲིཡེསུ ནིདྡིསིཏབྦཱ. པརིཡཱཡཏོ ཙ ¶ ཨོཏཱརེཏབྦཱ. ཡཐཱ སཱ དྷམྨདྷཱཏུ ཏཐཱ དྷམྨཱཡཏནཾ པརིཡེསིཏབྦཾ. ཡཱཡེཝ ཧི དྷམྨདྷཱཏུ ཏདེཝ དྷམྨཱཡཏནཾ ཨནཱུནཾ ཨནདྷིཀཾ.

ཏཏྠ པཊིཙྩསམུཔྤཱདོ ཨཏྠི ཏིཝིདྷོ, ཨཏྠི ཙཏུབྦིདྷོ, ཨཏྠི དུཝིདྷོ. ཏཏྠ ཏིཝིདྷོ པཊིཙྩསམུཔྤཱདོ ཧེཏུཕལནིསྶནྡོ. ཨཝིཛྫཱ སངྑཱརཱ ཏཎྷཱ ཨུཔཱདཱནཾ ཙ ཨཡཾ ཧེཏུ, ཝིཉྙཱཎཾ ¶ ནཱམརཱུཔཾ སལཱ༹ཡཏནཾ ཕསྶོ ཝེདནཱ ཙ ཨཡཾ པཙྩཡོ, ཡོ བྷཝོ ཨཡཾ ཝིཔཱཀོ, ཡཱ ཛཱཏི མརཎཾ ཨཡཾ ནིསྶནྡོ.

ཀཐཾ ཙཏུབྦིདྷོ ཧེཏུ པཙྩཡོ ཝིཔཱཀོ ནིསྶནྡོ ཙ? ཨཝིཛྫཱ ཙ ཏཎྷཱསངྑཱརཱ ཙ ཨུཔཱདཱནཾ ཙ – ཨཡཾ ཧེཏུ. ཝིཉྙཱཎཾ ནཱམརཱུཔསྶ པཙྩཡོ. ནཱམརཱུཔཾ ཨུཔཔཛྫཏི, ཏཐཱ ཨུཔཔནྣསྶ སལཱ༹ཡཏནཾ ཕསྶོ ཝེདནཱ ཙ – ཨཡཾ པཙྩཡོ. ཡོ བྷཝོ ཨཡཾ ཝིཔཱཀོ. ཡཱ ཛཱཏི ཡཱ ཙ ཛརཱམརཎཾ – ཨཡཾ ནིསྶནྡོ.

ཀཐཾ དུཝིདྷོ པཊིཙྩསམུཔྤཱདོ? ཨཝིཛྫཱ སངྑཱརཱ ཏཎྷཱ ཨུཔཱདཱནཾ – ཨཡཾ སམུདཡོ. ཝིཉྙཱཎཾ ནཱམརཱུཔཾ སལཱ༹ཡཏནཾ ཕསྶོ ཝེདནཱ བྷཝོ ཛཱཏི མརཎཉྩ ¶ – ཨིདཾ དུཀྑཾ. ཡཾ པན ཨཝིཛྫཱནིརོདྷཱ སངྑཱརནིརོདྷོ ཨིམཱནི ཏཔྤཊིཔཀྑེན དྭེ སཙྩཱནི. ཏསྨཱ པཊིཙྩསམུཔྤཱདོ ཡེན ཨཱཀཱརེན ནིདྡིཊྛོ, ཏེན ཏེན ནིདྡིསིཏབྦོ.

ཏཐཱ བཱཝཱིསཏི ཨིནྡྲིཡཱནི. དྭཱདས ཨིནྡྲིཡཱནི ཙཀྑུནྡྲིཡཱནི ཙཀྑུནྡྲིཡཾ ཡེན དོམནསྶིནྡྲིཡཾ, ཨིདཾ དུཀྑཾ. པུརིསིནྡྲིཡཾ ཙ དིཊྛིཡཱ ཙ ཏཎྷཱཔདཊྛཱནཾ. ཡཏོ པུརིསོ པུརིསཀཱནཾ ཏཾ ཨེཝཾ ཀཱཏབྦཏཱ. ཨཐ ཨཛ྄ཛྷཏྟཾ སཱརཛྫཏི. ཨཡཾ ཨཧཾཀཱརོ ཏཾ ཡསཱ སཱརཏྟོ བཧིདྡྷཱ པརིཡེསཏི, ཨཡཾ མམཾཀཱརོ ཨེཝཾ ཨིཏྠཱི, ཏཏྠ ¶ སུཁིནྡྲིཡཾ ཙ སོམནསྶིནྡྲིཡཾ ཙ པུརིསིནྡྲིཡསྶཱནུཝཏྟཀཱ ཧོནྟི. ཏསྶ ཨདྷིཔྤཱཡཔརིཔུཎྞཱ ལོབྷདྷམྨཱ ཀུསལམཱུལེ པཝཌྜྷེནྟི. ཏསྶ ཙེ ཨཡམདྷིཔྤཱཡོ ན པཱརིཔཱུརིཾ གཙྪཏི. ཏསྶ དུཀྑིནྡྲིཡཾ ཙ དོམནསྶིནྡྲིཡཾ ཙ ཝཏྟཏི. དོསོ ཙ ཨཀུསལམཱུལཾ པཝཌྜྷཏི. སཙེ པན ཨུཔེཀྑཱ བྷཱཝེཏི ཨུཔེཀྑིནྡྲིཡསྶ ཨནུཝཏྟཀཱམཱ བྷཝཏི. ཨམོཧོ ཙ ཀུསལམཱུལཾ པཝཌྜྷཏི. ཨིཏི སཏྟ ཨིནྡྲིཡཱནི ཀིལེསཝཏྠུམུཔཱདཱཡ ཨནནྭེམཱནི ཨཝམཱནི སབྦསྶ ཝེདནཱ ཨིཏྠིནྡྲིཡཾ པུརིསིནྡྲིཡཾ. ཏཏྠ ཨཊྛ ཨིནྡྲིཡཱནི སདྡྷིནྡྲིཡཾ ཡཱཝ ཨཉྙཱཏཱཝིནོ ཨིནྡྲིཡཾ, ཨཡཾ དུཀྑནིརོདྷགཱམིནཱི པཊིཔདཱ. དསནྣཾ པཉྙིནྡྲིཡཱནཾ ཀཱམརཱགསྶ པདཊྛཱནཾ. མནིནྡྲིཡཾ བྷཝརཱགསྶ པདཊྛཱནཾ. པཉྙིནྡྲིཡཱནི རཱུཔརཱགསྶ པདཊྛཱནཾ. ཨིཏྠིནྡྲིཡཾ ཙ པུརིསིནྡྲིཡཾ ཙ སཏྟ པཉྙཏྟིཡཱ པདཊྛཱནཾ. ཏཏྠ ཡེན ཡེན ཨིནྡྲིཡེན ཡུཏྟཾ ཝཱ གཱཐཱཡ ཨོཏཱརེཏུཾ སཀྐོཏི, ཏེན ཏེན ནིདྡིསིཏབྦོ. ཨེཝཾ ཁནྡྷེསུ དྷཱཏཱུསུ ཨཱཡཏནེསུ སཙྩེསུ པཊིཙྩསམུཔྤཱདེསུ ཨཡཾ ཨོཏརཎོ ཧཱརོ.

༥༤. ཏཏྠ ཀཏམོ སོདྷནོ ཧཱརོ? ཡོ གཱཐཱ ཨེཀེན ཨཱརམྦྷོ བྷཱསིསྶནྟི. ཏཏྠ ཨེཀིསྶཱ བྷཱསིཏཱཡ ཨཝསིཊྛཱསུ བྷཱསིཏཱསུ སོ ཨཏྠོ ན ནིདྡིསིཏབྦོ. ཀིཾ ཀཱརཎཾ? ན ཧི ¶ ཏཱཝ སོ ཨཏྠོ བྷཱསིཏོ, སོ ཨབྷཱསིཏོ ན སཀྐཱ ནིདྡིསིཏུཾ. ཡཐཱ ¶ ཀིཾ ཨཔྤམཱདོ ཨམཏཾ པདནྟི གཱཐཱ ཨཡམེཀཱ གཱཐཱ ནིདྡིསིཏབྦཱ. ཀིཾ ཀཱརཎཾ, ཨཏྠིཀྑཱཏཱཝ ཨིམསྶ ཨཱརམྦྷསྶ ཨནབྷཱསིཏཾ?

ཨེཝཾ [ཨེཏཾ (པཱི.) པསྶ དྷ. པ. ༢༢] ཝིསེསཏོ ཉཏྭཱ, ཨཔྤམཱདམྷི པཎྜིཏཱ;

ཨཔྤམཱདེ པམོདནྟི, ཨརིཡཱནཾ གོཙརེ རཏཱཏི.

ཨིདཾ ¶ ཨབྷཱསིཏཾ. ཨིམིསྶཱཔི གཱཐཱཡ བྷཱསིཏཱཡ ཨཏྠོ ནིདྡིསིཏབྦོ. ཀིཾ ཀཱརཎཾ, ཨཏྠི ཏཏྠ ཨཝསིཊྛཾ? ཏེ ཛྷཱཡིནོ [དྷ. པ. ༢༣] སཱཏཏིཀཱ, ནིཙྩཾ དལ༹ྷཔརཀྐམཱཏི གཱཐཱ, ཨེཝཾ ཨིམཱ གཱཐཱཡོ ཨུཔདྷཱརིཏཱ ཡདཱ བྷཝནྟི, ཏདཱ ཨཏྠོ ནིདྡིསིཏབྦོ. ཨེཝཾ ཨསྶུཏཔུབྦེསུ སུཏྟེསུ བྱཱཀརཎེསུ ཝཱ ཨེཀུདྡེསོ བྷཱསིཏོ. ཡཱ ཝཱིམཾསཱ ཏུལནཱ ཨིདཾ ཨཏྠི ཀིཙྩཾ, ཨིདཾ སུཏྟཾ བྷཱསིཏཾ ཏསྶ ཝེཝཙནཾ ནིདྡིཊྛཾ ཝཱ ན ཝཱཏི. ཏཏྠ ཡཱ ཝཱིམཾསཱ, ཨཡཾ ཝུཙྩཏེ སོདྷནོ ཧཱརོ.

༥༥. ཏཏྠ ཀཏམོ ཨདྷིཊྛཱནོ ཧཱརོ? ཨེཀཏྟཏཱ ཙ ཝེམཏྟཏཱ ཙ. ཏཏྠ ཀིཏཔཉྙཏྟི ཙ ཀིཙྩཔཉྙཏྟི ཙ. སཱ ཨེཀཏྟཏཱ ཙ ཝེམཏྟཏཱ ཙ ཡཐཱ པཉྙཏྟི ཨེཀཝེཝཙནེན ཝེམཏྟཏཱ པཛཱནཱཏཱིཏི པཉྙཱ, སཱ ཙ ཨཱདྷིཔཏེཡྻཊྛེན པཉྙཏྟི. ཡཾ ཨནོམཏྟིཡཊྛེན པཉྙཏྟནྟི. ཏཾ ཨནོམཏྟིཡཊྛེན པཉྙཱབལཾ. ཏནུབྷཱུཏཱ ¶ གོཙརཏྟཝསཱ སེཝསཏི ཏཱིསུ རཏནེསུ ཨནུསྶཏི བུདྡྷཱནུསྶཏི དྷམྨཱནུསྶཏི སངྒྷཱནུསྶཏི ཨཝིཔརཱིཏཱནུསྶརཎཏཱཡ. སམྨཱདིཊྛི དྷམྨཱནཾ པཝིཙཡེན དྷམྨཝིཙཡསམྦོཛ྄ཛྷངྒོ ཨབྷིནཱིཧཱརཏོ ཨབྷིཉྙཱཏི. སངྑེཔེན མགྒཱ ཀཱ ཝཏྠུ ཨཝིཀོཔནཏཱཡ ཨེཀཏྟཱ, ཡཐཱ ཨུཎྷེན སཾསཊྛཾ ཨུཎྷོདཀཾ, སཱིཏེན སཾསཊྛཾ སཱིཏོདཀཾ ཁཱརོདཀཾ གུལ༹ྷོདཀནྟི, ཨིདཾ ཨེཀཏྟཏཱ ཝེམཏྟཏཱ ཙ.

ཨཏྠི ¶ པུན དྷམྨོ ནཱནཱདྷམྨསངྒྷཏོ ཨེཀཏོ ཡཐཱརཱུཔཾ ཙཏྟཱརོ ཝཱརེཏབྦཱ, ཏཉྩ རཱུཔནྟི ཨེཀཏྟཏཱ. པཐཝཱིདྷཱཏུ ཨཱཔོ ཏེཛོ ཝཱཡོདྷཱཏཱུཏི ཝེམཏྟཏཱ. ཨེཝཾ སབྦཱ ཙཏསྶོ དྷཱཏུཡོ རཱུཔནྟི ཨེཀཏྟཏཱ, པཐཝཱིདྷཱཏུ ཨཱཔོ ཏེཛོ ཝཱཡོདྷཱཏཱུཏི ཝེམཏྟཏཱ. པཐཝཱིདྷཱཏཱུཏི ལཀྑཎཏོ ཨེཀཏྟཏཱ, སཾཀིཎྞཝཏྠུཏོ ཝེམཏྟཏཱ. ཡཾ ཀིཉྩི ཀཀྑལ༹ལཀྑཎཾ, སབྦཾ ཏཾ པཐཝཱིདྷཱཏཱུཏི ཨེཀཏྟཏཱ. ཀེསཱ ལོམཱ ནཁཱ དནྟཱ ཚཝི ཙམྨནྟི ཝེམཏྟཏཱ. ཨེཝཾ སབྦཾ ཙཏསྶོ དྷཱཏུཡོ རཱུཔནྟི ཨེཀཏྟཾ. སདྡཱ གནྡྷཱ རསཱ ཕོཊྛབྦཱཏི ཝེམཏྟཏཱ.

ཨཏྠི པུན དྷམྨོ ཝེམཏྟཏཱ ཨཉྙོ ནཱམཾ ལབྷཏི. ཡཐཱ ཀཱཡཱནུཔསྶནཱཡ ནཝསཉྙཱ ཝིནཱིལཀསཉྙཱ ཨུདྡྷུམཱཏཀསཉྙཱ, ཨཡཾ ཨསུབྷསཉྙཱ, ཡཱ ཨེཀཏྟཏཱ ཨཱརམྨཎཏོ ཝེམཏྟཏོ, སཱ ཨེཝཾ སཉྙཱཝེདནཱསུ ཨཱདཱིནཝཾ སམནུཔསྶཏོ ཏཐཱདྷིཊྛཱནཾ སམཱདྷིནྡྲིཡཾ ཙ སཱཡེཝ ¶ དྷམྨེསུ ཏཏྠ སཉྙཱབྷཱཝནཱ ཝཱིརིཡིནྡྲིཡཾ ཙ དྷམྨེསུ དྷམྨཱནུཔསྶནཱ ཙིཏྟེ ཨཏྟསཉྙཾ པཛཧཏོ པཉྙིནྡྲིཡཾ ཙ ཙིཏྟེ ཙིཏྟཱནུཔསྶནཱ. (ཨིཏི) [( ) ནཏྠི པཱི. པོཏྠཀེ] ཡོ ཀོཙི ཉཱཎཔཙཱརོ སབྦསོ ¶ པཉྙཱཡ གོཙརོ པཉྙཱ, ཨཡཾ ཝེམཏྟཏཱ, ཡཐཱ ཀཱམརཱགོ བྷཝརཱགོ དིཊྛིརཱགོཏི ཝེམཏྟཏཱ ཏཎྷཱཡ. ཨིཏི ཡཾ ཨེཀཏྟཏཱཡ ཙ ཝེམཏྟཏཱཡ ཙ ཉཱཎཾ ཝཱིམཾསནཱ ཏུལནཱ. ཨཡཾ ཨདྷིཊྛཱནོ ཧཱརོ.

༥༦. ཏཏྠ ཀཏམོ པརིཀྑཱརོ ཧཱརོ? སཧེཏུ སཔྤཙྩཡཾ ཝོདཱནཉྩ སཾཀིལེསོ ཙ, ཡཾ ཏདུབྷཡཾ པརིཡེཊྛི, ས པརིཀྑཱརོ ཧཱརོ. ཨིཏི དྷམྨཱནཾ སཧེཏུཀཱནཾ ཧེཏུ པརིཡེསིཏབྦོ, སཔྤཙྩཡཱནཾ པཙྩཡོ པརིཡེསིཏབྦོ.

ཏཏྠ ཀིཾ ནཱནཱཀརཎཾ, ཧེཏུསྶ ཙ པཙྩཡསྶ ཙ? སབྷཱཝོ ཧེཏུ, པརབྷཱཝོ པཙྩཡོ. པརབྷཱཝསྶ པཙྩཡོ ཧེཏུཔི, སབྷཱཝསྶ ཧེཏུཡཱ པརབྷཱཝསྶ ཀསྶཙི པཙྩཡོ ཨཝུཏྟོ ཧེཏུ, ཝུཏྟོ པཙྩཡོ. ཨཛ྄ཛྷཏྟིཀོ ཧེཏུ, བཱཧིརོ པཙྩཡོ. སབྷཱཝོ ཧེཏུ, པརབྷཱཝོ པཙྩཡོ. ནིབྦཏྟཀོ ཧེཏུ, པཊིགྒཱཧཀོ [པརིགྒཱཧཀོ (ཀ.)] པཙྩཡོ. ནེཝཱསིཀོ ཧེཏུ, ཨཱགནྟུཀོ པཙྩཡོ. ཨསཱདྷཱརཎོ ཧེཏུ, སཱདྷཱརཎོ པཙྩཡོ. ཨེཀོཡེཝ ཧེཏུ, ཨཔརཱཔརོ པཙྩཡོ.

ཧེཏུསྶ ཨུཔཀརཎཾ སམུདཱནེཏབྦོ. སམུདཱནཾ ཧེཏུ, ཏཏྠ དུཝིདྷོ ཧེཏུ. དུཝིདྷོ པཙྩཡོ – སམནནྟརཔཙྩཡོ ཙ པརམྤརཔཙྩཡོ ཙ. ཧེཏུཔི དུཝིདྷོ – སམནནྟརཧེཏུ ཙ པརམྤརཧེཏུ ཙ. ཏཏྠ ཀཏམོ པརམྤརཔཙྩཡོ? ཨཝིཛྫཱ ནཱམརཱུཔསྶ པརམྤརཔཙྩཡོ, ཝིཉྙཱཎཾ སམནནྟརཔཙྩཡཏཱཡ པཙྩཡོ. ཡདི ཨཱདིམྷི ཨཝིཛྫཱནིརོདྷོ བྷཝཏི ནཱམརཱུཔསྶ ནིརོདྷོཔི. ཏཏྠ སམནནྟརཾ ཀིཾ ཀཱརཎཾ པརམྤརཔཙྩཡོ སམནནྟརཔཙྩཡོ སམུདྡཱནིཏོ, ཨཡཾ པཙྩཡཏོ. ཏཏྠ ¶ ཀཏམོ པརམྤརཧེཏུ? ཝིཛཱནནྟསྶ པརམྤརཧེཏུཏཱཡ ཧེཏུ, ཨཉྙཱཀཱརོ སམནནྟརཧེཏུཏཱཡ ཧེཏུ. ཡསྶ ཧི ཡཾ སམནནྟརཾ ནིབྦཏྟཏི, སོ ཏསྶ ཧེཏུཔི ཛཱཏིནིརོདྷཱ བཧི ཨཱཀཱརནིརོདྷོ, ཨཱཀཱརནིརོདྷཱ དཎྜནིརོདྷོ, དཎྜནིརོདྷཱ ཁཎྜནིརོདྷོ. ཨེཝཾ ཧེཏུཔི དྭིདྷཱ སོ ཏཱཧི པསྶིཏབྦོ.

པཊིཙྩསམུཔྤཱདོ ¶ ཡཐཱ ཨཝིཛྫཱཔཙྩཡོ ཏསྶ པུན ཀིཾཔཙྩཡོ, ཨཡོནིསོ མནསིཀཱརོ. སོ ཀསྶ པཙྩཡོ སངྑཱརཱནཾ, ཨིཏི པཙྩཡོ ཙ སམུཔྤནྣཾ ཙ ཏསྶ ཀོ ཧེཏུ ཨཝིཛྫཱཡེཝ ¶ . ཏཐཱ ཧི པུརིམཱ ཀོཊི ན པཉྙཱཡཏི. ཏཏྠ ཨཝིཛྫཱནུསཡོ ཨཝིཛྫཱཔརིཡུཊྛཱནསྶ ཧེཏུ པུརིམཱ ཧེཏུ པཙྪཱ པཙྩཡོ, སཱཔི ཨཝིཛྫཱསངྑཱརཱནཾ པཙྩཡོ ཙཏཱུཧི ཀཱརཎེཧི སཧཛཱཏཔཙྩཡཏཱཡ སམནནྟརཔཙྩཡཏཱཡ ཨབྷིསནྡནཔཙྩཡཏཱཡ པཏིཊྛཱནཔཙྩཡཏཱཡ.

༥༧. ཀཐཾ སཧཛཱཏཔཙྩཡཏཱཡ ཨཝིཛྫཱསངྑཱརཱནཾ པཙྩཡོ? ཡཾ ཙིཏྟཾ རཱགཔརིཡུཊྛཾ, ཏཏྠ ཨཝིཛྫཱཔརིཡུཊྛཱནེན སབྦཾ པཉྙཱཡ གོཙརཾ ཧནྟི. ཏཏྠ སངྑཱརཱ ཏིཔཙྩཡཊྛིཀཱ ཨདྡྷཱབྷཱུམིཀཱརམཧཏྟསྶ [ལདྡྷཱ བྷཱུམིཀརམཧཏྟསྶ (པཱི. ཀ.)] ཨཡཾ ཨཝིཛྫཱསཧསམུཔྤནྣཾ ཝུདྡྷིཾ ཝིརཱུལ༹ྷིཾ ཝེཔུལླཏམཱཔཛྫནྟཱི ཙཏཱུཧི ཀཱརཎེཧི པཉྙཱ པཧཱིཡཏི. ཀཏམེཧི ཙཏཱུཧི? ཨནུསཡོ པརིཡུཊྛཱནཾ སཾཡོཛནཾ ཨུཔཱདཱནཾ. ཏཏྠ ཨནུསཡོ པརིཡུཊྛཱནཾ ཛཱཏི པརིཡུཊྛིཏཱ སཾཡུཛྫཏི སཾཡུཏྟཱ ཨུཔཱདིཡཏི ཨུཔཱདཱནཔཙྩཡཱ བྷཝོ. ཨེཝཾ ¶ ཏེ སངྑཱརཱ ཏིཝིདྷཱ ཨུཔྤནྣཱ བྷཱུམིགཏཱ ནཱསཉྙཏྠ ཨཡཾ མགྒེན ཝིནཱིཏཏྟཱཡཱཏི [ཝིནིབྷཏྟཱཡ (པཱི.), ཝིནིབྷཏྟཏཱཡ (ཀ.)] ཏེ ཐཱམགཏཱ ཨཔཏིཝིནཱིཏཱཏིཔི ཏེ སངྑཱརཱཏི ཝུཙྩཏི, ཨེཝཾ སཧེཏུསམུཔྤནྣཊྛེན ཨཏྠི མེཝ པཙྩཡཱ སངྑཱརཱནཾ པཙྩཡོ ནིདྡིཊྛཾ ཨཔནེཏྭཱ ཀུསལཾ ཨཀུསལཾ ཀུསལོ ཙ ཨཀུསལོ ཙ པཀྑིཔིཏབྦོ, ཝིཔཱཀདྷམྨཱ ཨཔནེཏྭཱ ཝཙནཱིཡཾ ཨཝཙནཱིཡཾ ཝཙནཱིཡཉྩ ཨཝཙནཱིཡཉྩ པཀྑིཔིཏབྦཾ, བྷཝཨཔེཝིརིཏྟཱ, སབྦསུཏྟཾ པརིཀྑིཔིཏབྦཾ.

དས ཏཐཱགཏབལཱནི ཙཏྟཱརི ཝེསཱརཛྫཱནི པུཉྙཱནི ཨནཉྙཱཀཏཾ ཨཝིཛྫཱ སམནནྟརཔཙྩཡཏཱཡ སངྑཱརཱནཾ པཙྩཡོ ཡེན ཙིཏྟེན སཧ སམུཔྤནྣཱ ཨཝིཛྫཱ ཏསྶ ཙིཏྟསྶ སམནནྟརཙིཏྟཾ སམུཔྤནྣནྟི, ཏསྶ ཡཾ སམནནྟརཙིཏྟཾ སམུཔྤནྣནྟི, ཏསྶ པཙྪིམསྶ ཙིཏྟསྶ པུརིམཙིཏྟཾ ཧེཏུཔཙྩཡཏཱཡ པཙྩཡོ, ཏེན ཨཝིཛྫཱ ཧེཏུ ཏེན ཙིཏྟེན ཨུཔཱདཱནཾ ཨནོཀཱསཀཏཱ ཉཱཎཾ ན ཨུཔྤཛྫནྟི. ཡཱ ཏསྶ ཨཔྤམཱདཱ དྷཱཏུ ཨབྷིཛ྄ཛྷཱབྷིསནྡིཏཱ ཏཧིཾ ཝིཔལླཱསཱ ཨུཔྤཛྫནྟི ‘‘ཨསུབྷེ སུབྷ’’ནྟི ‘‘དུཀྑེ སུཁ’’ནྟི, ཏཏྠ སངྑཱརཱ ཨུཔྤཛྫནྟི རཏྟཱ དུཊྛཱ མཱུལསྶ ཙེཏནཱ རཱགཔརིཡུཊྛཱནེན བྱཱཔཱདཔརིཡུཊྛཱནེན ཨཝིཛྫཱཔརིཡུཊྛཱནེན དིཊྛིཝིཔལླཱསོ ཝཏྠུནིདྡེསེ ནིདྡིསིཏབྦོ ¶ , ཡཾ ཝིཔརཱིཏཙིཏྟོ ཝིཛཱནཱཏི ཨཡཾ ཙིཏྟཝིཔལླཱསོ, ཡཱ ཝིཔརཱིཏསཉྙཱ ཨུཔགྒཎྷཱཏི ཨཡཾ སཉྙཱཝིཔལླཱསོ. ཡཾ ཝིཔརཱིཏདིཊྛི ཨབྷིནིཝིསཏི ཨཡཾ དིཊྛིཝིཔལླཱསོ. ཨཊྛ ¶ མིཙྪཏྟཱནི ཝཌྜྷནྟི, ཏཱིཎི ཨཀུསལཱནི ཨཡོནིསོ མནསིཀཱརེ ཨུཔྤནྣཾ ཝིཉྙཱཎཉྩ ཝིཛྫཉྩ ཀརོནྟི. ཨིཏི པུབྦཱཔརནྟེ ཨཀུསལཱནཱཏརིཏརོ སངྑཱརཱ ཝུདྡྷིཾ ཝེཔུལླཏཾ གཙྪནྟི. ཏེ ཙ མཧཏཱ ཙ ཨཔྤཊིཝིདིཏཱ པོནོབྷཝིཀཱ [པོནོབྦྷཝིཀཱ (ཀ.)] སངྑཱརཱ བྷཝནྟི. ཨིཏི ཨེཝཾ ཨཝིཛྫཱ སཧཛཱཏཔཙྩཡཏཱཡ སངྑཱརཱནཾ པཙྩཡོ སམནནྟརཔཙྩཡཏཱཡ ཙ.

༥༨. ཀཐཾ ¶ ཨབྷིསནྡནཱཀཱརེན ཨཝིཛྫཱ སངྑཱརཱནཾ པཙྩཡོ? སཱ ཨཝིཛྫཱ ཏེ སངྑཱརེ ཨབྷིསནྣེཏི པརིཔྥརཏི. སེཡྻཐཱཔི ནཱམ ཨུཔྤལཾ ཝཱ པདུམཾ ཝཱ ཏཾ ཨུདཀེ ཝཌྜྷཾ ཨསྶ, སཱིཏེན ཝཱརིནཱ ཨབྷིསནྣཾ པརིསནྡནཾ ཝུདྡྷིཾ ཝིརཱུལ༹ྷིཾ ཝེཔུལླཏཾ ཨཱཔཛྫཏི. ཨེཝཾ ཨབྷིསནྡནཊྛེན ཨཝིཛྫཱ སངྑཱརཱནཾ པཙྩཡོ.

ཀཐཾ པཏིཊྛཧནཊྛེན ཨཝིཛྫཱ སངྑཱརཱནཾ པཙྩཡོ? ཏེ སངྑཱརཱ ཨཝིཛྫཱཡཾ ནིསྶཱཡ ཝུདྡྷིཾ ཝིརཱུལ༹ྷིཾ ཝེཔུལླཏཾ ཨཱཔཛྫནྟི. སེཡྻཐཱཔི ནཱམ ཨུཔྤལཾ ཝཱ པདུམཾ ཝཱ པཐཝིཾ ནིསྶཱཡ པཐཝིཾ པཏིཊྛཱཡ ཝུདྡྷིཾ ཝིརཱུལ༹ྷིཾ ཝེཔུལླཏཾ ཨཱཔཛྫཏི. ཨེཏེ སངྑཱརཱ ཨཝིཛྫཱཡཾ པཏིཊྛིཏཱ ཨཝིཛྫཱཡཾ ནིསྶཱཡ ཝུདྡྷིཾ ཝིརཱུལ༹ྷིཾ ཝེཔུལླཏཾ གཙྪནྟི. ཨེཝཾ པཏིཊྛཧནཊྛེན ཨཝིཛྫཱ སངྑཱརཱནཾ པཙྩཡོ.

པུན རཱགསཧགཏསྶ ཀམྨསྶ ཝིཔཱཀེན པཊིསནྡྷིམྷི བྷཝོ ནིབྦཏྟཏི, ཏཾ ཀམྨསྶ [ཀཱམསྶ (པཱི.)] སབྦཾ ཨབྷིནིཝིཊྛཾ ཨཉྙཱཎཝསེན པོནོབྷཝིཀཱ སངྑཱརཱཏི ཝུཙྩནྟི, ཨེཝམྤི ཨཝིཛྫཱཔཙྩཡཱ སངྑཱརཱ ཨཏྠི. པུན ¶ པཉྩསུ ཡེ ཙ སེཀྑཱ པུགྒལཱ, ཡེ ཙ ཨསཉྙིསམཱཔཏྟིཾ སམཱཔནྣཱ, ཡེ ཙ བྷཝགཏཱ, ཡེ ཙ ཨནྟོགཏཱཡེཝ སཾསེདཛཱ, ཡེ ཙ ཝཱ པན ཨཉྙོ ཧི ཀོཙི ཨནཱགཱམིབྷཱུཏཱ ན ཙེཏེནྟི ན ཙ པཏྠེནྟི, ཏེསཾ ཀིཾ པཙྩཡཱ སངྑཱརཱ. པུན རཱགཱ ཨཏྠི ཏེསཾ སངྑཱརཱནི ཨུཔཱདཱནཱནི ཙིཏྟམནུསྶརནྟིཡེཝ ཨཝིཔཀྐཝིཔཱཀསམཱུཧཏཱ ཨསམུཙྪིནྣཔཙྩཡཱ ཏེསཾ པུན ཙ གཏོ བྷཝཏི. ཨེཝམྤི ཧི ཨཝིཛྫཱཔཙྩཡཱ སངྑཱརཱ. པུན སཱ ཏེ ན ཨུཔཱདཱནཱ ནཔི སངྑཱརཱ ཨཏྠི, པུན ཏེསཾ སཏྟ ཨནུསཡཱ ཨསམཱུཧཏཱ ཨསམུཙྪིནྣཱ ཏདཱརམྨཎཾ བྷཝཏི. ཝིཉྙཱཎསྶ པཏིཊྛཱཡ ཝིཉྙཱཎཔཙྩཡཱ ནཱམརཱུཔཾ. ཨེཝམྤི ཨཝིཛྫཱཔཙྩཡཱ སངྑཱརཱ. པུན སཱ ཡཾ ཀིཉྩི ཀམྨཾ ཨཱཙཡགཱམི སབྦཾ ཏཾ ཨཝིཛྫཱཝསེན ཨབྷིསངྑརིཡཏི ¶ ཏཎྷཱཝསེན ཙ ཨལླཱིཡཏི ཨཉྙཱཎཝསེན ཙ ཏཏྠ ཨཱདཱིནཝམྤི ན ཛཱནཱཏི. ཏདེཝ ཝིཉྙཱཎབཱིཛཾ བྷཝཏི, སཱཡེཝ ཏཎྷཱསིནེཧོ བྷཝཏི. སཱཡེཝ ཨཝིཛྫཱ སམྨོཧོཏི. ཨེཝམྤི ཨཝིཛྫཱཔཙྩཡཱ སངྑཱརཱ ཝཏྟབྦཱ. ཨིཏི ཨིམེཧི ཨཱཀཱརེཧི ཨཝིཛྫཱ སངྑཱརཱནཾ པཙྩཡོ.

ཏཏྠ ཨཝིཛྫཱཡ ཧེཏུ ཨཡོནིསོ མནསིཀཱརོ པཙྩཡོ ཧོཏི. ཏཏྠ ཨབྷིཙྪེདོ ཨཡཾ ཏཏྠ ཏཏིཡཾ བལཾ [ཕལཾ (པཱི.)] ནིཝཏྟི, ཨཡཾ པཊིསནྡྷི. ཏཏྠ པུནབྦྷཝོ ཡོ ཨཝེཙྪེདོ ཨསམུགྒྷཱཏནཊྛེན ཨཡཾ ཨནུསཡོ. ཡཐཱ ¶ པཊཱཀཾ ཝཱ སཱཊཀཾ ཝཱ དྭེ ཛནཱ པཱིལེ༹སུ ཙ ཨེཀཱ ཝཱ བལཾ ཝཱ ཨསྶ ནིཝཱཊསྶེསུ, ན པན པཱིལེ༹སུ སོསེཡྻ. ཏཏྠ ཡཾ སིནེཧཱ ཨཱཔོདྷཱཏུ ཨནུཔུལླནཱ སོསེཏབྦཱ. ཨུཎྷདྷཱཏུམཱགམྨ སཙེ པུན ཏཾ ཨཱཀཱསེ ནིཀྑིཔེཡྻ ཏཾ ཨུསྶཱཝེན ཡེབྷུཡྻཏརཾ སིནེཧམཱཔཛྫེཡྻ, ¶ ན ཧི ཨནཱགམྨ ཏེཛོདྷཱཏུཾ པརིསེསཾ གཙྪེཡྻ. ཨེཝམེཝ བྷཝགྒཔརམཱཔི སམཱཔཏྟི ན ཨནུརཱུཔསྶ སམུགྒྷཱཏཱཡ སཾཝཏྟཏི. ཏེ ཧི ཨཱལཡནྟི སམྨསནྟི, ན ཙ ཏཎྷཱཡ ཏཎྷཱཔཧཱནཾ གཙྪནྟི. ཏཏྠ སོ ཨསམུགྒྷཱཏོ. ཨཝིཛྫཱཡ ཨནུསཡོ ཙ ཙིཏྟསྶ སམྤལིབོདྷོ, ཨིདཾ པརིཡུཊྛཱནཾ. ཡཐཱབྷཱུཏཾ ཝིཉྙཱཎསྶ ཨཔྤཊིཝེདྷོ ཨཡཾ ཨཝིཛྫཱཨཱསཝོ ཨཝིཛྫཱཝིཉྙཱཎབཱིཛཾ བྷཝཏི. ཡཾ བཱིཛཾ སོ ཧེཏུ ན སམུཙྪིཛྫཏི, ཨསམུཙྪིཛྫནྟོ པཊིསནྡེཧཏི. པཊིསནྡཧནྟོ ན སམུགྒྷཱཏཾ གཙྪཏི. ཨསམུགྒྷཱཏཾ ཙིཏྟཾ པརིཡོནཧཏི, པརིཡོནདྡྷཙིཏྟོ ཡཐཱབྷཱུཏཾ ནཔྤཛཱནཱཏི, ཨིཏི སཉྙཱཎསྶ སཱསཝཏྠོ, ཨཝིཛྫཏྠོ, ཧེཏུཨཏྠོ, ཨཝཙྪེདཏྠོ, ཨནིཝཏྟིཨཏྠོ, ཕལཏྠོ པཊིསནྡྷིཨཏྠོ, པུནབྦྷཝཏྠོ, ཨསམུགྒྷཱཏཏྠོ, ཨནུསཡཏྠོ, པརིཡུཊྛཱནཏྠོ, ཨཔཊིཝེདྷནཏྠོ. ཨེཏྟཱཝཏཱ ཨཝིཛྫཱཡ ཁེཏྟཾ ནིདྡིཊྛཾ བྷཝཏི. ཨཡཾ ཝུཙྩཏེ པརིཀྑཱརོ ནཱམ ཧཱརོ.

༥༩. ཏཏྠ ཀཏམོ སམཱརོཔནོ ཧཱརོ? ཨུགྒྷཊིཏམྷི ¶ ཏམྷི སནྟཉྩེཝ ཙ ནཾ ཝིཏྠཱརཾ པན ཝཏྟབྦཾ. ཝིཏྠཱརཝིདྷཾ ཙིཏྟཉྙཱ ཨཡཾ སམཱརོཔནོ ཧཱརོ. ཏཏྠ ནཱམནིདྡེསོ ཨུཔགྷཊཀཱ [ཨུགྒྷཊཀཱ (པཱི.)] ཝཏྠུནིདྡེསོ ཝེཝཙནཾ ཝཏྠུབྷཱུཏོ ཝིཏྠཱརོ. ཡཐཱ ཀིཾ, ཡཱ བྷིཀྑཱུནཾ ཝཏྟཏོ [ནིཝཏྟཏོ (པཱི.)] པཧཱཏབྦོ, ཨཡཾ ཨུཔགྷཊནཱ.

ཏཏྠ ¶ ཀཏམོ སམཱརོཔནོ? ཀིཉྩི ན ཝཏྟབྦཾ, རཱུཔརཱགཾ ཝཱ ནཱམཝནྟཔཧཱཏབྦཾ [ནཱམམནྟཔཧཱཏབྦཾ (ཀ.)]. ཡཱཝ ཝིཉྙཱཎནྟི ཝིཏྠཱརེན ཀཱཏབྦཱནི. ཨཝིཛྫཱ ཏཱ ཨོཔམྨེན པཉྙཱཔེཏབྦཱ, ཨཡཾ སམཱརོཔནོ. ནིསྶིཏཙིཏྟསྶ ཙ མཏྟིཀོ ཙ ནིསྶཡོ ཏཎྷཱ ཙ དིཊྛི ཙ. ཏཏྠ དིཊྛི ཨཝིཛྫཱ ཏཎྷཱ སངྑཱརཱ. ཏཏྠ དིཊྛིཔཙྩཡཱ ཏཎྷཱ ཨིམེ ཨཝིཛྫཱཔཙྩཡཱ སངྑཱརཱ. ཏཏྠ ནིསྶིཏཾ ཝིཉྙཱཎཾ ཨིདཾ སངྑཱརཔཙྩཡཱ ཝིཉྙཱཎཾ ཡཱཝ ཛརཱམརཎཾ, ཨིདཾ སཾཁིཏྟེན བྷཱསིཏེ ཨཝསིཊྛཾ པརོཔཡཏི.

ཨནིསྶིཏསྶ [པསྶ ཨུདཱ. ༧༤] ཙལིཏཾ ནཏྠཱིཏི ཏསྶ ཨེཝཾ དིཊྛིཡཱ ཏཎྷཱཡ ཙ པཧཱནཾ ཏཏྠ དིཊྛིཨཝིཛྫཱནིརོདྷཱཡ བྷཱུཏཾ ཝིཉྙཱཎཾ སརཱགཊྛཱནིཡེསུ དྷམྨེསུ ཏཾ ཏཾ དྷམྨཾ ཨུཔེཙྩ ཨཉྙཾ དྷམྨཾ དྷཱཝཏི མཀྐཊོཔམཏཱཡ, ཨཐ ཁྭསྶ པརིཏྟེསུ དྷམྨེསུ སརཱགཊྛཱནིཡེསུ ཚནྡརཱགོ ནཏྠི ཀུཏོ ཏཏོ ཙལནཱ, ཨདྷིམཏྟེསུ སཏྟེསུ ཙིཏྟཾ ནིཝེསྶཡཏི ཏཾ ཨཔཏིཊྛིཏཾ ཝིཉྙཱཎཾ ཨནཱཧཱརཾ ནིརུཛ྄ཛྷཏི ཝིཉྙཱཎནིརོདྷཱ ནཱམརཱུཔནིརོདྷོ ཡཱཝ ཛརཱམརཎནིརོདྷོ. ཨཡཾ སམཱརོཔནོ.

ཏཏྠ ¶ རཱགཝསེན ཝིཉྙཱཎསྶ ཙལིཏཾ སཔརིགྒཧོ, ཏསྨིཾ ཙལིཏེ ཨསཏི ཡོ པརིཀིལེསོཔཙཱརོ ¶ ཏིཝིདྷོ ཨགྒི པཊིཔྤསྶདྡྷོ བྷཝཏི. ཏེནཱཧ ཙལིཏེ ཨསནྟེ པསྶདྡྷི ཧོཏི. ཏཏྠ ཡཾ སམཱརོཔནཱ པསྶདྡྷཀཱཡོ སུཁཾ ཝེདེཏི, སུཁིནོ ཙིཏྟཾ སམཱདྷིཡཏི. ཡཱཝ ཝིམུཏྟིཏམིཏི ཉཱཎདསྶནཾ བྷཝཏི. སོ ཨཱསཝཱནཾ ཁཡཱ ཙ ཝིམུཏྟི ནོ ཨུཔཔཛྫཏི. ཏསྶ ཨུཔཔཏྟིསྶ ཨཱགཏིགཏིཡཱ ཨསནྟིཡཱ ནེཝིདྷ ན ཧུརཾ ན ཨུབྷཡམནྟརེན. ཨེསེཝནྟོ དུཀྑསྶཱཏི ཨནུཔཱདིསེསཱ ནིབྦཱནདྷཱཏུ. ཨིདམསྶ སུཏྟསྶ མཛ྄ཛྷེ སམཱརོཔིཏཾ པཊིཙྩསམུཔྤཱདེ ཙ ཝིམུཏྟིཡཾ ཙ ཡོགོ ན ཙ ཨེཏཾ ཏསྶ སཾཁིཏྟེན བྷཱསིཏསྶ ཝིཏྠཱརེན ཨཏྠཾ ཝིབྷཛྫནྟི. ཨཡཾ ཝུཙྩཏེ སམཱརོཔནོ ཧཱརོ. ན ཙ སཾཀིལེསབྷཱགིཡེན སུཏྟེན སཾཀིལེསབྷཱགིཡོ ཡེ ཙ དྷམྨཱ སམཱརོཔཡིཏབྦཱ ནཱཉྙེ. ཨེཝཾ ཝཱསནཱབྷཱགིཡེ ནིབྦེདྷབྷཱགིཡེ, ཨཡཾ སམཱརོཔནོ ཧཱརོ. ཨིམེ སོལ༹ས ཧཱརཱ.

སུཝཱིརསྶ མཧཱཀཙྩཱཡནསྶ ཛམྦུཝནཝཱསིནོ པེཊཀོཔདེསེ

༦༠. བུདྡྷཱནཾ ¶ ¶ ¶ བྷགཝནྟཱནཾ སཱསནཾ ཏིཝིདྷེན སངྒཧཾ གཙྪཏི, ཁནྡྷེསུ དྷཱཏཱུསུ ཨཱཡཏནེསུ ཙ. ཏཏྠ པཉྩཀྑནྡྷཱ རཱུཔཀྑནྡྷོ ཡཱཝ ཝིཉྙཱཎཀྑནྡྷོ. དས རཱུཔཨཱཡཏནཱནི ཙཀྑུ རཱུཔཱ ཙ ཡཱཝ ཀཱཡོ ཕོཊྛབྦཱ ཙ, ཨཡཾ རཱུཔཀྑནྡྷོ. ཏཏྠ ཚ ཝེདནཱཀཱཡཱ ཝེདནཱཀྑནྡྷོ ཙཀྑུསམྥསྶཛཱ ཝེདནཱ ཡཱཝ མནོསམྥསྶཛཱ ཝེདནཱ, ཨཡཾ ཝེདནཱཀྑནྡྷོ. ཏཏྠ ཚ སཉྙཱཀཱཡཱ སཉྙཱཀྑནྡྷོ, རཱུཔསཉྙཱ ཡཱཝ དྷམྨསཉྙཱ ཨིམེ ཚ སཉྙཱཀཱཡཱ, ཨཡཾ སཉྙཱཀྑནྡྷོ. ཏཏྠ ཚ ཙེཏནཱཀཱཡཱ སངྑཱརཀྑནྡྷོ, རཱུཔསཉྩེཏནཱ ཡཱཝ དྷམྨསཉྩེཏནཱ ཨིམེ ཚ ཙེཏནཱཀཱཡཱ, ཨཡཾ སངྑཱརཀྑནྡྷོ. ཏཏྠ ཚ ཝིཉྙཱཎཀཱཡཱ ཝིཉྙཱཎཀྑནྡྷོ, ཙཀྑུཝིཉྙཱཎཾ ཡཱཝ མནོཝིཉྙཱཎཾ ཨིམེ ཚ ཝིཉྙཱཎཀཱཡཱ, ཨཡཾ ཝིཉྙཱཎཀྑནྡྷོ. ཨིམེ པཉྩཀྑནྡྷཱ.

ཏེསཾ ཀཱ པརིཉྙཱ? ཨནིཙྩཾ དུཀྑཾ སཉྙཱ ཨནཏྟཱཏི ཨེསཱ ཨེཏེསཾ པརིཉྙཱ. ཏཏྠ ཀཏམོ ཁནྡྷཏྠོ? སམཱུཧཏྠོ ཁནྡྷཏྠོ, པུཉྫཏྠོ ཁནྡྷཏྠོ, རཱསཏྠོ ཁནྡྷཏྠོ. ཏཾ ¶ ཡཐཱ དབྦཀྑནྡྷོ ཝནཀྑནྡྷོ དཱརུཀྑནྡྷོ ཨགྒིཀྑནྡྷོ ཨུདཀཀྑནྡྷོ ཝཱཡུཀྑནྡྷོ ཨིཏི ཨེཝཾ ཁནྡྷེསུ སབྦསངྒཧོཝ ཨེཝཾ ཁནྡྷཏྠོ.

ཏཏྠ ཨཊྛཱརས དྷཱཏུཡོ ཙཀྑུདྷཱཏུ རཱུཔདྷཱཏུ ཙཀྑུཝིཉྙཱཎདྷཱཏུ…པེ… མནོདྷཱཏུ དྷམྨདྷཱཏུ མནོཝིཉྙཱཎདྷཱཏུ. ཨེཏཱཡོ ཨཊྛཱརས དྷཱཏུཡོ. ཏཱསཾ པརིཉྙཱ ཨནིཙྩཾ དུཀྑཾ སཉྙཱ ཨནཏྟཱཏི ཨེསཱ ཨེཏཱསཾ པརིཉྙཱ. ཏཏྠ ཀོ དྷཱཏུཨཏྠོ? ཝུཙྩཏེ ཨཝཡཝཏྠོ དྷཱཏུཨཏྠོ. ཨཝཡཝོཏི ཙཀྑུ ནོ པསཱདོ ཙཀྑུདྷཱཏུ. ཨེཝཾ པཉྩསུ དྷཱཏཱུསུ པུན རཱགཝཝཙྪེདཏྠོ དྷཱཏུཨཏྠོ. ཝཝཙྪིནྣཱ ཧི ཙཀྑུདྷཱཏུ. ཨེཝཾ པཉྩསུ པུནརཱཧ ཨེཀནྟིཔཀཏྱཏྠེན དྷཱཏུཨཏྠོཏི ཝུཙྩཏེ. ཏཾ ཡཐཱ, པཀཏིཡཱ ཨཡཾ པུརིསོ པིཏྟིཀོ སེམྷིཀོ ཝཱཏིཀོ སནྣིཔཱཏིཀོཏི ཨེཝཾ པཀཏིཙཀྑུདྷཱཏུ དསནྣཾ པིཡཱ ཙ སབྦེསུ ཨིནྡྲིཡེསུ…པེ… ཝིསབྷཱགཏྠོ དྷཱཏུཨཏྠོ.

ཏཏྠ ¶ དྭཱདསཱཡཏནཱནི ཀཏམཱནི? ཚ ཨཛ྄ཛྷཏྟིཀཱནི ཚ བཱཧིརཱནི. ཙཀྑཱཡཏནཾ ཡཱཝ མནཱཡཏནནྟི ཨཛ྄ཛྷཏྟིཀཾ, རཱུཔཱཡཏནཾ ཡཱཝ དྷམྨཱཡཏནནྟི བཱཧིརཾ. ཨེཏཱནི དྭཱདས ཨཱཡཏནཱནི. ཨེཏེསཾ ཀཱ པརིཉྙཱ? ཨནིཙྩཾ དུཀྑཾ སཉྙཱ ཨནཏྟཱཏི, ཨེསཱ ཨེཏེསཾ པརིཉྙཱ. ཨཔི ¶ ¶ ཙ དྭིདྷཱ པརིཉྙཱ ཉཱཏཔརིཉྙཱ ཙ པཧཱནཔརིཉྙཱ ཙ. ཏཏྠ ཉཱཏཔརིཉྙཱ ནཱམ ཨནིཙྩཾ དུཀྑཾ སཉྙཱ ཨནཏྟཱཏི, ཨེསཱ ཉཱཏཔརིཉྙཱ. པཧཱནཔརིཉྙཱ པན ཚནྡརཱགཔྤཧཱནཱ, ཨེསཱ པཧཱནཔརིཉྙཱ. ཏཏྠ ཀཏམོ ཨཱཡཏནཏྠོ? ཝུཙྩཏེ ཨཱཀཱརཏྠོ ཨཱཡཏནཏྠོ. ཡཐཱ སུཝཎྞཱཀརོ དུབྦཎྞཱཀརོ, ཡཐཱ དྭཱིཧི ཏེཧི ཨཱཀཱརེཧི ཏེ ཏེ གཱཝཱ ཨུཏྟིཊྛནྟི. ཨེཝཾ ཨེཏེཧི ཙིཏྟཙེཏསིཀཱ གཱཝཱ ཨུཏྟིཊྛནྟི ཀམྨཀིལེསཱ དུཀྑདྷམྨཱ ཙ. པུནརཱཧ ཨཱཡདཱནཏྠོ ཨཱཡཏནཏྠོ. ཡཐཱ རཉྙོ ཨཱཡདཱནེཧི ཨཱཡོ བྷཝཏི, ཨེཝཾ ཨཱཡདཱནཏྠོ ཨཱཡཏནཏྠོ.

༦༡. ཙཏྟཱརི ཨརིཡསཙྩཱནི དུཀྑཾ སམུདཡོ ནིརོདྷོ མགྒོ ཙ. དུཀྑཾ ཡཐཱ སམཱསེན དྷམྨཱཙརིཡཾ མཱནསཉྩ, སམུདཡོ སམཱསེན ཨཝིཛྫཱ ཙ ཏཎྷཱ ཙ, ནིརོདྷོ སམཱསེན ཝིཛྫཱ ཙ ཝིམུཏྟི ཙ, མགྒོ སམཱསེན སམཐོ ཙ ཝིཔསྶནཱ ཙ.

ཏཏྠ སཏྟཏིཾས བོདྷིཔཀྑིཀཱ དྷམྨཱ ཀཏམེ? ཙཏྟཱརོ སཏིཔཊྛཱནཱ ཡཱཝ ཨརིཡོ ཨཊྛངྒིཀོ མགྒོ, ཨེཝམེཏེ སཏྟཏིཾས བོདྷིཔཀྑིཀཱ དྷམྨཱ. ཡེ དྷམྨཱ ཨཏཱིཏཱནཱགཏཔཙྩུཔྤནྣཱནཾ བུདྡྷཱནཾ བྷགཝནྟཱནཾ པཙྩེཀབུདྡྷཱནཾ སཱཝཀཱནཾ ཙ ནིབྦཱནཱཡ སཾཝཏྟནྟཱིཏི, སོ མགྒོ ཙཏྟཱརོ སཏིཔཊྛཱནཱ. ཀཏམེ ཙཏྟཱརོ? ཨིདྷ བྷིཀྑུ ཀཱཡེ ཀཱཡཱནུཔསྶཱི ཝིཧརཏི, སམྨཔྤདྷཱནཾ…པེ… ཨིདྡྷིཔཱདཾ…པེ… ཨིནྡྲིཡཱནི…པེ… བལཱནི…པེ… ཏཏྠ ཀོ ཨིནྡྲིཡཏྠོ? ཨིནྡཏྠོ ¶ ཨིནྡྲིཡཏྠོ, ཨཱདྷིཔཏེཡྻཏྠོ ཨིནྡྲིཡཏྠོ, པསཱདཏྠོ ཨིནྡྲིཡཏྠོ, ཨསཱདྷཱརཎཾ ཀསྶ ཀིརིཡཏྠོ ཨིནྡྲིཡཏྠོ ཨནཝཔརིཡཏྠོ བལཏྠོ, ཐཱམཏྠོ བལཏྠོ, ཨུཔཱདཱཡཏྠོ བལཏྠོ, ཨུཔཏྠམྦྷནཏྠོ བལཏྠོ.

ཏཏྠ ཀཏམེ སཏྟ བོཛ྄ཛྷངྒཱ? སཏིསམྦོཛ྄ཛྷངྒོ ཡཱཝ ཨུཔེཀྑཱསམྦོཛ྄ཛྷངྒོ. ཏཏྠ ཀཏམོ ཨཊྛངྒིཀོ མགྒོ? སམྨཱདིཊྛི ཡཱཝ སམྨཱསམཱདྷི. ཏཏྠ ཨཊྛངྒིཀོ མགྒོཏི ཁནྡྷོ སཱིལཀྑནྡྷོ ཙ སམཱདྷིཀྑནྡྷོ ཙ པཉྙཱཀྑནྡྷོ ཙ. ཏཏྠ ཡཱ ཙ སམྨཱཝཱཙཱ ཡོ ཙ སམྨཱཀམྨནྟོ ཡོ ཙ སམྨཱཨཱཛཱིཝོ, ཨཡཾ སཱིལཀྑནྡྷོ. ཡཱ ཙ སམྨཱསཏི ཡོ ཙ སམྨཱཝཱཡཱམོ ཡོ ཙ སམྨཱསམཱདྷི, ཨཡཾ སམཱདྷིཀྑནྡྷོ. ཡོ ཙ སམྨཱསངྐཔྤོ ཡཱ ཙ སམྨཱདིཊྛི, ཨཡཾ པཉྙཱཀྑནྡྷོ. ཨེཝཾ ཏཱཡོ ཏིསྶོ སིཀྑཱ. ཨེཝཾ ཏཱིཧཱཀཱརེཧི དས པདཱནི…པེ….

ཏཏྠ ¶ ¶ ཡོགཱཝཙརོ སཱིལཀྑནྡྷེ ཋིཏོ དོསཾ ཨཀུསལཾ ན ཨུཔཱདིཡཏི, དོསཱནུསཡཾ སམཱུཧནཏི, དོསསལླཾ ཨུདྡྷརཏི, དུཀྑཝེདནཾ པརིཛཱནཱཏི, ཀཱམདྷཱཏུཾ སམཏིཀྐམཏི. སམཱདྷིཀྑནྡྷེ ཋིཏོ ལོབྷཾ ཨཀུསལཾ ན ཨུཔཱདིཡཏི, རཱགཱནུསཡཾ སམཱུཧནཏི, ལོབྷསལླཾ ཨུདྡྷརཏི, སུཁཝེདནཾ པརིཛཱནཱཏི, རཱུཔདྷཱཏུཾ སམཏིཀྐམཏི. པཉྙཱཀྑནྡྷེ ཋིཏོ མོཧཾ ཨཀུསལཾ ན ཨུཔཱདིཡཏི, ཨཝིཛྫཱནུསཡཾ སམཱུཧནཏི, མོཧསལླཾ དིཊྛིསལླཉྩ ཨུདྡྷརཏི, ཨདུཀྑམསུཁཝེདནཾ ¶ པརིཛཱནཱཏི, ཨརཱུཔདྷཱཏུཾ སམཏིཀྐམཏི. ཨིཏི ཏཱིཧི ཁནྡྷེཧི ཏཱིཎི ཨཀུསལམཱུལཱནི ན ཨུཔཱདིཡཏི, ཙཏྟཱརི སལླཱནི ཨུདྡྷརཏི, ཏིསྶོ ཝེདནཱ པརིཛཱནཱཏི, ཏེདྷཱཏུཀཾ སམཏིཀྐམཏི.

༦༢. ཏཏྠ ཀཏམཱ ཨཝིཛྫཱ? ཡཾ ཙཏཱུསུ ཨརིཡསཙྩེསུ ཨཉྙཱཎནྟི ཝིཏྠཱརེན ཡཐཱ སོ པཱཎསཛྫེསུ ཀཐཾཀཐཱ ཀཱཏབྦཾ. ཏཏྠ ཀཏམཾ ཝིཉྙཱཎཾ? ཚ ཝིཉྙཱཎཀཱཡཱ ཝེདནཱ སཉྙཱ ཙེཏནཱ ཕསྶོ མནསིཀཱརོ, ཨིདཾ ནཱམཾ. ཏཏྠ ཀཏམཾ རཱུཔཾ? ཙཱཏུམཧཱབྷཱུཏིཀཾ ཙཏུནྣཾ མཧཱབྷཱུཏཱནཾ ཨུཔཱདཱཡརཱུཔསྶ པཉྙཏྟིཾ. ཨིཏི པུརིམཀཉྩ ནཱམཾ ཨིདཉྩ རཱུཔཾ ཏདུབྷཡཾ ནཱམརཱུཔནྟི ཝུཙྩཏི. ཏཏྠ ཚལཱ༹ཡཏནནྟི ཚ ཨཛ྄ཛྷཏྟིཀཱནི ཨཱཡཏནཱནི, ཙཀྑུ ཨཛ྄ཛྷཏྟིཀཾ ཨཱཡཏནཾ ཡཱཝ མནོ ཨཛ྄ཛྷཏྟིཀཾ ཨཱཡཏནཾ. ཕསྶོཏི ཚ ཕསྶཀཱཡཱ ཙཀྑུསམྥསྶོ ཡཱཝ མནོསམྥསྶོཏི ཕསྶོ. ཚ ཝེདནཱཀཱཡཱ ཝེདནཱ. ཏཎྷཱཏི ཚ ཏཎྷཱཀཱཡཱ ཏཎྷཱ. ཨུཔཱདཱནནྟི ཙཏྟཱརི ཨུཔཱདཱནཱནི ཀཱམུཔཱདཱནཾ དིཊྛུཔཱདཱནཾ སཱིལབྦཏུཔཱདཱནཾ ཨཏྟཝཱདུཔཱདཱནནྟི ཨུཔཱདཱནཾ. བྷཝོཏི ཏཡོ བྷཝཱ ཀཱམབྷཝོ རཱུཔབྷཝོ ཨརཱུཔབྷཝོ. ཏཏྠ ཀཏམཱ ཛཱཏི? ཡཱ པཋམཾ ཁནྡྷཱནཾ པཋམཾ དྷཱཏཱུནཾ པཋམཾ ཨཱཡཏནཱནཾ ཨུཔྤཏྟི ཛཱཏི སཉྫཱཏི ཨོཀྐནྟི ཨབྷིནིབྦཏྟི ཁནྡྷཱནཾ པཱཏུབྷཱཝོ, ཨཡཾ ཛཱཏི. ཏཏྠ ¶ ཀཏམཱ ཛརཱ? ཛརཱ ནཱམ ཡཾ ཏཾ ཁཎྜིཙྩཾ པཱལིཙྩཾ ཝལིཏྟཙཏཱ པཝིཝིཏྟཾ ཙཏུནྣཾ མཧཱབྷཱུཏཱནཾ ཝིཝཎྞཏཾ བྷགྒོ ཏཾ ཛརཱ ཧཱིཡནཱ པཧཱིཡནཱ ཨཱཡུནོ ཧཱནི སཾཧཱནི ཨིནྡྲིཡཱནཾ པརིབྷེདོ ཨུཔནཱཧོ པརིཔཱཀོ, ཨཡཾ ཛརཱ. ཏཏྠ ཀཏམཾ མརཎཾ? མརཎཾ ནཱམ ཡཾ ཏསྨིཾ ཏསྨིཾ སཏྟནིཀཱཡེ ཏེསཾ ཏེསཾ སཏྟཱནཾ ཙུཏི ཙཝནཏཱ མརཎཾ ཀཱལངྐིརིཡཱ ཨུདྡྷུམཱཏཀཱནཾ བྷེདོ ཀཱཡསྶ ཛཱིཝིཏིནྡྲིཡསྶ ཨུཔཙྪེདོ, ཨིདཾ མརཎཾ. ཨིཏི པུརིམིཀཱ ཙ ཛརཱ ཨིདཉྩ མརཎཾ ཏདུབྷཡཾ ཛརཱམརཎཾ.

ཏཏྠ ¶ ཨནྡྷཀཱརཏིམིསཱ ཡཐཱབྷཱུཏཾ ཨཔྤཛཱནནལཀྑཎཱ ཨཝིཛྫཱ སངྑཱརཱནཾ པདཊྛཱནཾ ཧ. ཨབྷིསངྑརཎལཀྑཎཱ སངྑཱརཱ, ཨུཔཙཡཔུནབྦྷཝཱབྷིརོཔནཔཙྩུཔཊྛཱནཱ. ཏེ ཝིཉྙཱཎསྶ པདཊྛཱནཾ. ཝཏྠུ སཝིཉྙཏྟིལཀྑཎཾ ཝིཉྙཱཎཾ, ཏཾ ནཱམརཱུཔསྶ པདཊྛཱནཾ. ཨནེཀསནྣིསྶཡལཀྑཎཾ ནཱམརཱུཔཾ, ཏཾ སལཱ༹ཡཏནསྶ པདཊྛཱནཾ. ཨིནྡྲིཡཝཝཏྠཱཔནལཀྑཎཾ སལཱ༹ཡཏནཾ, ཏཾ ཕསྶསྶ པདཊྛཱནཾ ¶ . སནྣིཔཱཏལཀྑཎོ ཕསྶོ, སོ ཝེདནཱཡ པདཊྛཱནཾ. ཨནུབྷཝནལཀྑཎཱ ཝེདནཱ, སཱ ཏཎྷཱཡ པདཊྛཱནཾ. ཨཛ྄ཛྷོསཱནལཀྑཎཱ ཏཎྷཱ, སཱ ཨུཔཱདཱནསྶ པདཊྛཱནཾ. ཨཱདཱནཔརིཧནནལཀྑཎཾ ཨུཔཱདཱནཾ, ཏཾ བྷཝསྶ པདཊྛཱནཾ ¶ . ནཱནཱགཏིཝིཀྑེཔལཀྑཎོ བྷཝོ, སོ ཛཱཏིཡཱ པདཊྛཱནཾ. ཁནྡྷཱནཾ པཱཏུབྷཱཝལཀྑཎཱ ཛཱཏི, སཱ ཛརཱཡ པདཊྛཱནཾ. ཨུཔནཡཔརིཔཱཀལཀྑཎཱ ཛརཱ, སཱ མརཎསྶ པདཊྛཱནཾ. ཨཱཡུཀྑཡཛཱིཝིཏཨུཔརོདྷལཀྑཎཾ མརཎཾ, ཏཾ དུཀྑསྶ པདཊྛཱནཾ. ཀཱཡསམྤཱིལ༹ནལཀྑཎཾ དུཀྑཾ, ཏཾ དོམནསྶསྶ པདཊྛཱནཾ. ཙིཏྟསམྤཱིལ༹ནལཀྑཎཾ དོམནསྶཾ, ཏཾ སོཀསྶ པདཊྛཱནཾ. སོཙནལཀྑཎོ སོཀོ, སོ པརིདེཝསྶ པདཊྛཱནཾ. ཝཙཱིནིཙྪཱརཎལཀྑཎོ པརིདེཝོ, སོ ཨུཔཱཡཱསསྶ པདཊྛཱནཾ. ཡེ ཨཱཡཱསཱ ཏེ ཨུཔཱཡཱསཱ.

ནཝ པདཱནི ཡཏྠ སབྦོ ཨཀུསལཔཀྑོ སངྒཧཾ སམོསརཎཾ གཙྪཏི. ཀཏམཱནི ནཝ པདཱནི? དྭེ མཱུལཀིལེསཱ, ཏཱིཎི ཨཀུསལམཱུལཱནི, ཙཏྟཱརོ ཝིཔལླཱསཱ. ཏཏྠ དྭེ མཱུལཀིལེསཱ ཨཝིཛྫཱ ཙ བྷཝཏཎྷཱ ཙ, ཏཱིཎི ཨཀུསལམཱུལཱནི ལོབྷོ དོསོ མོཧོ ཙ. ཙཏྟཱརོ ཝིཔལླཱསཱ [ཨ. ནི. ༤.༤༩] – ‘‘ཨནིཙྩེ ནིཙྩ’’ནྟི སཉྙཱཝིཔལླཱསོ ཙིཏྟཝིཔལླཱསོ དིཊྛིཝིཔལླཱསོ, ‘‘དུཀྑེ སུཁ’’ནྟི སཉྙཱཝིཔལླཱསོ ཙིཏྟཝིཔལླཱསོ དིཊྛིཝིཔལླཱསོ, ‘‘ཨནཏྟནི ཨཏྟཱ’’ཏི སཉྙཱཝིཔལླཱསོ ཙིཏྟཝིཔལླཱསོ དིཊྛིཝིཔལླཱསོ, ‘‘ཨསུབྷེ སུབྷ’’ནྟི སཉྙཱཝིཔལླཱསོ ཙིཏྟཝིཔལླཱསོ དིཊྛིཝིཔལླཱསོ.

༦༣. ཏཏྠ ཨཝིཛྫཱ ནཱམ ཙཏཱུསུ ཨརིཡསཙྩེསུ ཡཐཱབྷཱུཏཾ ཨཉྙཱཎཾ, ཨཡཾ ཨཝིཛྫཱ. བྷཝཏཎྷཱ ནཱམ ཡོ བྷཝེསུ རཱགོ སཱརཱགོ ཨིཙྪཱ མུཙྪཱ པཏྠནཱ ནནྡཱི ཨཛ྄ཛྷོསཱནཾ ཨཔརིཙྩཱགོ, ཨཡཾ བྷཝཏཎྷཱ.

ལོབྷོ ནཱམ སོ ཏེསུ ཏེསུ པརཝཏྠཱུསུ པརདབྦེསུ པརཊྛཱནེསུ པརསཱཔཏེཡྻེསུ པརཔརིགྒཧིཏེསུ ¶ ལོབྷོ ལུབྦྷནཱ ཨིཙྪཱ མུཙྪཱ པཏྠནཱ ནནྡཱི ཨཛ྄ཛྷོསཱནཾ ཨཔརིཙྩཱགོ, ཨཡཾ ལོབྷོ ཨཀུསལམཱུལཾ. ཀསྶེཏཾ མཱུལཾ? ལོབྷོ ལོབྷཛསྶ ཨཀུསལསྶ ཀཱཡཀམྨསྶ ཝཙཱིཀམྨསྶ མནོཀམྨསྶ ཙ, ཏཐཱ ཡཐཱ ཏཾསམྤཡུཏྟཱནཾ ཙིཏྟཙེཏསིཀཱནཾ དྷམྨཱནཾ མཱུལཾ.

སོ སཏྟེསུ ཨཱགྷཱཏོ ཨཀྑནྟི ཨཔྤཙྩཡོ བྱཱཔཱདོ པདོསོ ཨནཏྠཀཱམཏཱ ཙེཏསོ པཊིགྷཱཏོ, ཨཡཾ དོསོ ཨཀུསལམཱུལཾ.

དོསཛསྶ ཀཱཡཀམྨསྶ ཝཙཱིཀམྨསྶ མནོཀམྨསྶ སམྤཡུཏྟཱནཉྩ ཙིཏྟཙེཏསིཀཱནཾ དྷམྨཱནཾ མཱུལཾ.

ཡཾ ཙཏཱུསུ ཨརིཡསཙྩེསུ ཨནབྷིསམཡོ ཨསམྤཛྫགྒཱཧོ ཨཔྤཊིཝེདྷོ མོཧོ མུཡ྄ཧནཱ སམྨོཧོ སམྨུཡ྄ཧནཱ ཨཝིཛྫཱ ཏམོ ཨནྡྷཀཱརོ ཨཱཝརཎཾ ནཱིཝརཎཾ ཚདནཾ ཨཙྪདནཾ [ཨཝེཙྪདནཾ (པཱི. ཀ.)] ཨཔསཙྪཱགམནཾ ཀུསལཱནཾ དྷམྨཱནཾ, ཨཡཾ མོཧོ ཨཀུསལམཱུལཾ.

མོཧཛསྶ ཨཀུསལསྶ ཀཱཡཀམྨསྶ ཝཙཱིཀམྨསྶ མནོཀམྨསྶ ཙ ཏཾསམྤཡུཏྟཀཱནཉྩ ཙིཏྟཙེཏསིཀཱནཾ དྷམྨཱནཾ མཱུལཾ.

ཏཏྠ ¶ ཝིཔལླཱསཱ ཛཱནིཏབྦཱ, ཝིཔལླཱསཱནཾ ཝཏྠུ ཛཱནིཏབྦཾ. ཡཾ ཝིཔལླཱསཾ སིཡཱ, ཏཾ ཛཱནིཏབྦཾ. ཏཏྠ ཨེཀོ ཝིཔལླཱསོ ཏཱིཎི ཝིཔལླཱསཱནི ཙཏྟཱརི ཝིཔལླཱསཝཏྠཱུནི. ཀཏམོ ཨེཀོ ཝིཔལླཱསོ ཙ, ཡེན པཊིཔཀྑེན ཝིཔལླཱསིཏཾ གཎྷཱཏི?

‘‘ཨནིཙྩེ ནིཙྩ’’ནྟི, ‘‘དུཀྑེ སུཁ’’ནྟི, ‘‘ཨནཏྟནི ཨཏྟཱ’’ཏི, ‘‘ཨསུབྷེ སུབྷ’’ནྟི, ཨཡཾ ཨེཀོ ཝིཔལླཱསོ.

ཀཏམཱནི ཙཏྟཱརི ཝིཔལླཱསཝཏྠཱུནི?

ཀཱཡོ ཝེདནཱ ཙིཏྟཾ དྷམྨཱ ཙ. ཨིམཱནི ཙཏྟཱརི ཝིཔལླཱསཝཏྠཱུནི.

སཉྙཱ ཙིཏྟཾ དིཊྛི ཙ. ཨིམཱནི ཏཱིཎི ཝིཔལླཱསཱནི.

ཏཏྠ ¶ མནཱཔིཀེ ཝཏྠུམྷི ཨིནྡྲིཡཝཏྠེ ཝཎྞཱཡཏནེ ཝཱ ཡོ ནིམིཏྟསྶ ཨུགྒཱཧོ, ཨཡཾ སཉྙཱཝིཔལླཱསོ. ཏཏྠ ཝིཔརཱིཏཙིཏྟསྶ ཝཏྠུམྷི སཏི ཝིཉྙཏྟི, ཨཡཾ ཙིཏྟཝིཔལླཱསོ. ཏཏྠ ཝིཔརཱིཏཙིཏྟསྶ ཏམྷི རཱུཔེ ‘‘ཨསུབྷེ སུབྷ’’ནྟི ཡཱ ཁནྟི རུཙི ཨུཔེཀྑནཱ ནིཙྪཡོ དིཊྛི ནིདསྶནཾ སནྟཱིརཎཱ, ཨཡཾ དིཊྛིཝིཔལླཱསོ. ཏཏྠ ཝཏྠུབྷེདེན ཀཱཡེསུ དྭཱདས ཝིཔལླཱསཱ བྷཝནྟི. ཏཡོ ¶ ཀཱཡེ ཏཡོ ཝེདནཱཡ ཏཡོ ཙིཏྟེ ཏཡོ དྷམྨེ, ཙཏྟཱརོ སཉྙཱཝིཔལླཱསཱ ཙཏྟཱརོ ཙིཏྟཝིཔལླཱསཱ ཙཏྟཱརོ དིཊྛིཝིཔལླཱསཱ, ཨཱཡཏནཱུཔཙཡཏོ ཙཀྑུཝིཉྙཱཎསཉྙཱསམངྒིསྶ རཱུཔེསུ དྭཱདས ཝིཔལླཱསཱ ཡཱཝ མནོ སཉྙཱསམངྒིསྶ, དྷམྨེསུ དྭཱདས ཝིཔལླཱསཱ ཚ དྭཱདསཀཱ ཙཏྟཱརི ཝིཔལླཱསཱ བྷཝནྟི. ཨཱརམྨཎནཱནཏྟཏོ ¶ ཧི ཨཔརིམིཏསངྑེཡྻཱནཾ སཏྟཱནཾ [ཨཏྟཱནཾ (ཀ.)] ཨཔརིམིཏམསངྑེཡྻཱ ཝིཔལླཱསཱ བྷཝནྟི ཧཱིནུཀྐཊྛམཛ྄ཛྷིམཏཱཡ.

༦༤. ཏཏྠ པཉྩཀྑནྡྷཱ ཙཏྟཱརི ཨཏྟབྷཱཝཝཏྠཱུནི བྷཝནྟི. ཡོ རཱུཔཀྑནྡྷོ, སོ ཀཱཡོ ཨཏྟབྷཱཝཝཏྠུ. ཡོ ཝེདནཱཀྑནྡྷོ, སོ ཝེདནཱ ཨཏྟབྷཱཝཝཏྠུ. ཡོ སཉྙཱཀྑནྡྷོ ཙ སངྑཱརཀྑནྡྷོ ཙ, ཏེ དྷམྨཱ ཨཏྟབྷཱཝཝཏྠུ. ཡོ ཝིཉྙཱཎཀྑནྡྷོ, སོ ཙིཏྟཾ ཨཏྟབྷཱཝཝཏྠུ. ཨིཏི པཉྩཀྑནྡྷཱ ཙཏྟཱརི ཨཏྟབྷཱཝཝཏྠཱུནི. ཏཏྠ ཀཱཡེ ‘‘ཨསུབྷེ སུབྷ’’ནྟི ཝིཔལླཱསོ བྷཝཏི. ཨེཝཾ ཝེདནཱསུ…པེ… ཙིཏྟེ…པེ… དྷམྨེསུ ཙ ཨཏྟཝིཔལླཱསོ བྷཝཏི. ཏཏྠ ཙཏུནྣཾ ཝིཔལླཱསཱནཾ སམུགྒྷཱཏནཏྠཾ བྷགཝཱ ཙཏྟཱརོ སཏིཔཊྛཱནེ དེསེཏི པཉྙཔེཏི ཀཱཡེ ཀཱཡཱནུཔསྶཱི ཝིཧརཏོ ‘‘ཨསུབྷེ སུབྷ’’ནྟི ཝིཔལླཱསཾ སམུགྒྷཱཏེཏི, ཨེཝཾ ཝེདནཱསུ, ཙིཏྟེ, དྷམྨེསུ ཙ ཀཱཏབྦཾ.

ཏཏྠ ཨནྡྷཀཱརཏིམིསཱ ཨཔྤཊིཝེདྷལཀྑཎཱ ཨཝིཛྫཱ, ཏསྶཱ ཝིཔལླཱསཔདཊྛཱནཾ. ཨཛ྄ཛྷོསཱནལཀྑཎཱ ཏཎྷཱ, ཏསྶཱ པིཡརཱུཔསཱཏརཱུཔཾ པདཊྛཱནཾ. ཨཏྟཱསཡཝཉྩནཱལཀྑཎོ ལོབྷོ, ཏསྶ ཨདིནྣཱདཱནཾ པདཊྛཱནཾ. ཨིདྷ ཝིཝཱདལཀྑཎོ དོསོ, ཏསྶ པཱཎཱཏིཔཱཏོ པདཊྛཱནཾ. ཝཏྠུཝིཔྤཊིཔཏྟིལཀྑཎོ མོཧོ, ཏསྶ མིཙྪཱཔཊིཔཏྟི པདཊྛཱནཾ. སངྑཏཱནཾ དྷམྨཱནཾ ཨཝིནཱསགྒཧཎལཀྑཎཱ ནིཙྩསཉྙཱ, ཏསྶཱ སབྦསངྑཱརཱ པདཊྛཱནཾ. སཱསཝཕསྶོཔགམནལཀྑཎཱ སུཁསཉྙཱ, ཏསྶཱ མམངྐཱརོ པདཊྛཱནཾ. དྷམྨེསུ ཨུཔགམནལཀྑཎཱ ཨཏྟསཉྙཱ ¶ , ཏསྶཱ ཨཧངྐཱརོ པདཊྛཱནཾ. ཝཎྞསངྒཧཎལཀྑཎཱ སུབྷསཉྙཱ, ཏསྶཱ ཨིནྡྲིཡཨསཾཝརོ པདཊྛཱནཾ. ཨེཏེཧི ནཝཧི པདེཧི ཨུདྡིཊྛེཧི སབྦོ ཨཀུསལཔཀྑོ ནིདྡིཊྛོ བྷཝཏི, སོ ཙ ཁོ བཧུསྶུཏེན སཀྐཱ ཛཱནིཏུཾ ནོ ཨཔྤསྶུཏེན, པཉྙཝཏཱ ནོ དུཔྤཉྙེན, ཡུཏྟེན ནོ ཨཡུཏྟེན.

ནཝ ¶ ¶ པདཱནི ཀུསལཱནི ཡཏྠ སབྦོ ཀུསལཔཀྑོ སངྒཧོ སམོསརཎཾ གཙྪནྟི. ཀཏམཱནི ནཝ པདཱནི? སམཐོ ཝིཔསྶནཱ ཨལོབྷོ ཨདོསོ ཨམོཧོ ཨནིཙྩསཉྙཱ དུཀྑསཉྙཱ ཨནཏྟསཉྙཱ ཨསུབྷསཉྙཱ ཙ.

ཏཏྠ ཀཏམོ སམཐོ? ཡཱ ཙིཏྟསྶ ཋིཏི སཎྛིཏི ཨཝཊྛིཏི ཋཱནཾ པཊྛཱནཾ ཨུཔཊྛཱནཾ སམཱདྷི སམཱདྷཱནཾ ཨཝིཀྑེཔོ ཨཝིཔྤཊིསཱརོ ཝཱུཔསམོ མཱནསོ ཨེཀགྒཾ ཙིཏྟསྶ, ཨཡཾ སམཐོ.

ཏཏྠ ཀཏམཱ ཝིཔསྶནཱ? ཁནྡྷེསུ ཝཱ དྷཱཏཱུསུ ཝཱ ཨཱཡཏནེསུ ཝཱ ནཱམརཱུཔེསུ ཝཱ པཊིཙྩསམུཔྤཱདེསུ ཝཱ པཊིཙྩསམུཔྤནྣེསུ ཝཱ དྷམྨེསུ དུཀྑེསུ ཝཱ སམུདཡེསུ ཝཱ ནིརོདྷེ ཝཱ མགྒེ ཝཱ ཀུསལཱཀུསལེསུ ཝཱ དྷམྨེསུ སཱཝཛྫཨནཝཛྫེསུ ཝཱ ཀཎྷསུཀྐེསུ ཝཱ སེཝིཏབྦཨསེཝིཏབྦེསུ ཝཱ སོ ཡཐཱབྷཱུཏཾ ཝིཙཡོ པཝིཙཡོ ཝཱིམཾསཱ པརཝཱིམཾསཱ གཱཧནཱ ཨགྒཱཧནཱ པརིགྒཱཧནཱ ཙིཏྟེན པརིཙིཏནཱ ཏུལནཱ ཨུཔཔརིཀྑཱ ཉཱཎཾ ཝིཛྫཱ ཝཱ ཙཀྑུ བུདྡྷི མེདྷཱ པཉྙཱ ཨོབྷཱསོ ཨཱལོཀོ ཨཱབྷཱ པབྷཱ ཁགྒོ ནཱརཱཙོ [ནཱརཛྫོ (པཱི. ཀ.)] དྷམྨཝིཙཡསམྦོཛ྄ཛྷངྒོ ¶ སམྨཱདིཊྛི མགྒངྒཾ, ཨཡཾ ཝིཔསྶནཱ. ཏེནེསཱ ཝིཔསྶནཱ ཨིཏི ཝུཙྩཏི ཝིཝིདྷཱ ཝཱ ཨེསཱ ཝིཔསྶནཱཏི, ཏསྨཱ ཨེསཱ ཝིཔསྶནཱཏི ཝུཙྩཏི. དྭིདྷཱ ཙེསཱ ཧི ཝིཔསྶནཱ དྷམྨཝིཔསྶནཱཏི ཝུཙྩཏི, དྭིདྷཱ ཨིམཱཡ པསྶཏི སུབྷཉྩ ཨསུབྷཉྩ ཀཎྷཉྩ སུཀྐཉྩ སེཝིཏབྦཉྩ ཨསེཝིཏབྦཉྩ ཀམྨཉྩ ཝིཔཱཀཉྩ བནྡྷཉྩ ཝིམོཀྑཉྩ ཨཱཙཡཉྩ ཨཔཙཡཉྩ པཝཏྟིཉྩ ནིཝཏྟིཉྩ སཾཀིལེསཉྩ ཝོདཱནཉྩ, ཨེཝཾ ཝིཔསྶནཱཏི ཝུཙྩཏི. ཨཐ ཝཱ ཝིཨིཏི ཨུཔསགྒོ པསྶནཱཏི ཨཏྠོ ཏསྨཱ ཝིཔསྶནཱཏི ཝུཙྩཏེ, ཨཡཾ ཝིཔསྶནཱ.

༦༥. ཏཏྠ དྭེ རོགཱ སཏྟཱནཾ ཨཝིཛྫཱ ཙ བྷཝཏཎྷཱ ཙ, ཨེཏེསཾ དྭིནྣཾ རོགཱནཾ ནིགྷཱཏཱཡ བྷགཝཏཱ དྭེ བྷེསཛྫཱནི ཝུཏྟཱནི སམཐོ ཙ ཝིཔསྶནཱ ཙ. ཨིམཱནི དྭེ བྷེསཛྫཱནི པཊིསེཝེནྟོ དྭེ ཨརོགེ སཙྪིཀརོཏི རཱགཝིརཱགཾ ཙེཏོཝིམུཏྟིཾ ཨཝིཛྫཱཝིརཱགཉྩ པཉྙཱཝིམུཏྟིཾ. ཏཏྠ ཏཎྷཱརོགསྶ སམཐོ བྷེསཛྫཾ, རཱགཝིརཱགཱ ཙེཏོཝིམུཏྟི ཨརོགཾ. ཨཝིཛྫཱརོགསྶ ཝིཔསྶནཱབྷེསཛྫཾ ཨཝིཛྫཱཝིརཱགཱ པཉྙཱཝིམུཏྟི ཨརོགཾ. ཨེཝཉྷི བྷགཝཱ ཙཱཧ, ‘‘དྭེ དྷམྨཱ པརིཉྙེཡྻཱ [པསྶ དཱི. ནི. ༣.༣༥༢] ནཱམཉྩ རཱུཔཉྩ, དྭེ དྷམྨཱ པཧཱཏབྦཱ ཨཝིཛྫཱ ཙ བྷཝཏཎྷཱ ཙ, དྭེ དྷམྨཱ བྷཱཝེཏབྦཱ སམཐོ ཙ ཝིཔསྶནཱ ¶ ཙ, དྭེ དྷམྨཱ སཙྪིཀཱཏབྦཱ ཝིཛྫཱ ཙ ཝིམུཏྟི ཙཱ’’ཏི. ཏཏྠ སམཐཾ བྷཱཝེནྟོ རཱུཔཾ པརིཛཱནཱཏི, རཱུཔཾ པརིཛཱནནྟོ ཏཎྷཾ པཛཧཏི, ཏཎྷཾ པཛཧནྟོ རཱགཝིརཱགཱ ¶ ཙེཏོཝིམུཏྟིཾ སཙྪིཀརོཏི, ཝིཔསྶནཾ བྷཱཝེནྟོ ནཱམཾ པརིཛཱནཱཏི, ནཱམཾ པརིཛཱནནྟོ ཨཝིཛྫཾ པཛཧཏི, ཨཝིཛྫཾ པཛཧནྟོ ཨཝིཛྫཱཝིརཱགཱ པཉྙཱཝིམུཏྟིཾ ¶ སཙྪིཀརོཏི. ཡདཱ བྷིཀྑུནོ དྭེ དྷམྨཱ པརིཉྙཱཏཱ བྷཝནྟི ནཱམཉྩ རཱུཔཉྩ, ཏཐཱསྶ དྭེ དྷམྨཱ པཧཱིནཱ བྷཝནྟི ཨཝིཛྫཱ ཙ བྷཝཏཎྷཱ ཙ. དྭེ དྷམྨཱ བྷཱཝིཏཱ བྷཝནྟི སམཐོ ཙ ཝིཔསྶནཱ ཙ, དྭེ དྷམྨཱ སཙྪིཀཱཏབྦཱ བྷཝནྟི ཝིཛྫཱ ཙ ཝིམུཏྟི ཙ. ཨེཏྟཱཝཏཱ བྷིཀྑུ ཀཏཀིཙྩོ བྷཝཏི. ཨེསཱ སོཔཱདིསེསཱ ནིབྦཱནདྷཱཏུ. ཏསྶ ཨཱཡུཔརིཡཱདཱནཱ ཛཱིཝིཏིནྡྲིཡསྶ ཨུཔརོདྷཱ ཨིདཉྩ དུཀྑཾ ནིརུཛ྄ཛྷཏི, ཨཉྙཉྩ དུཀྑཾ ན ཨུཔྤཛྫཏི. ཏཏྠ ཡོ ཨིམེསཾ ཁནྡྷཱནཾ དྷཱཏུཨཱཡཏནཱནཾ ནིརོདྷོ ཝཱུཔསམོ ཨཉྙེསཉྩ ཁནྡྷདྷཱཏུཨཱཡཏནཱནཾ ཨཔྤཊིསནྡྷི ཨཔཱཏུབྷཱཝོ, ཨཡཾ ཨནུཔཱདིསེསཱ ནིབྦཱནདྷཱཏུ.

ཏཏྠ ཀཏམཾ ཨལོབྷོ ཀུསལམཱུལཾ? ཡཾདྷཱཏུཀོ ཨལོབྷོ ཨལུབྦྷནཱ ཨལུབྦྷིཏཏྟཾ ཨནིཙྪཱ ཨཔཏྠནཱ ཨཀནྟཱ ཨནཛ྄ཛྷོསཱནཾ. ཨཡཾ ཨལོབྷོ ཀུསལམཱུལཾ. ཀསྶེཏཾ མཱུལཾ? ཨལོབྷཛསྶ ཀུསལསྶ ཀཱཡཀམྨསྶ ཝཙཱིཀམྨསྶ མནོཀམྨསྶ ཏཾསམྤཡུཏྟཱནཉྩ ཙིཏྟཙེཏསིཀཱནཾ དྷམྨཱནཾ མཱུལཾ. ཨཐ ཝཱ ཨརིཡོ ཨཊྛངྒིཀོ མགྒོ ཀུསལནྟི ཝུཙྩཏི, སོ ཏིཎྞཾ མགྒངྒཱནཾ མཱུལཾ. ཀཏམེསཾ ཏིཎྞཾ, སམྨཱསངྐཔྤསྶ སམྨཱཝཱཡཱམསྶ སམྨཱསམཱདྷིསྶ ཙ ཨིམེསཾ མཱུལནྟི, ཏསྨཱ ཀུསལམཱུལནྟི ཝུཙྩཏི.

ཏཏྠ ཀཏམཾ ཨདོསོ ཀུསལམཱུལཾ? ཡཱ ¶ སཏྟེསུ ཝཱ སངྑཱརེསུ ཝཱ ཨནགྷཱཏོ ཨཔྤཊིགྷཱཏོ ཨབྱཱཔཏྟི ཨབྱཱཔཱདོ ཨདོསོ མེཏྟཱ མེཏྟཱཡནཱ ཨཏྠཀཱམཏཱ ཧིཏཀཱམཏཱ ཙེཏསོ པསཱདོ, ཨཡཾ ཨདོསོ ཀུསལམཱུལཾ. ཀསྶེཏཾ མཱུལཾ? ཨདོསཛསྶ ཀུསལསྶ ཀཱཡཀམྨསྶ ཝཙཱིཀམྨསྶ མནོཀམྨསྶ ཏཾསམྤཡུཏྟཱནཉྩ ཙིཏྟཙེཏསིཀཱནཾ དྷམྨཱནཾ མཱུལཾ. ཨཐ ཝཱ ཏིཎྞཾ མགྒངྒཱནཾ མཱུལཾ. ཀཏམེསཾ ཏིཎྞཾ? སམྨཱཝཱཙཱཡ སམྨཱཀམྨནྟསྶ སམྨཱཨཱཛཱིཝསྶ ཙ ཨིམེསཾ ཏིཎྞཾ མགྒངྒཱནཾ མཱུལཾ, ཏསྨཱ ཀུསལམཱུལནྟི ཝུཙྩཏི.

ཏཏྠ ཀཏམཾ ཨམོཧོ ཀུསལམཱུལཾ? ཡཾ ཙཏཱུསུ ཨརིཡསཙྩེསུ ཡཐཱབྷཱུཏཾ ཉཱཎདསྶནཾ ཨབྷིསམཡོ སམྨཱ ཙ པཙྩཱགམོ པཊིཝེདྷོ ཨམོཧོ ཨསམྨུཡ྄ཧནཱ ཨསམྨོཧོ ཝིཛྫཱཔཀཱསོ ཨཱལོཀོ ཨནཱཝརཎཾ ¶ སེཀྑཱནཾ ཀུསལཱནཾ དྷམྨཱནཾ, ཨཡཾ ཨམོཧོ ཀུསལམཱུལཾ. ཀསྶེཏཾ མཱུལཾ? ཨམོཧཛསྶ ཀུསལསྶ ཀཱཡཀམྨསྶ ཝཙཱིཀམྨསྶ མནོཀམྨསྶ ཏཾསམྤཡུཏྟཱནཉྩ ཙིཏྟཙེཏསིཀཱནཾ དྷམྨཱནཾ མཱུལཾ. ཨཐ ཝཱ དྭིནྣཾ མགྒངྒཱནཾ ཨེཏཾ མཱུལཾ. ཀཏམེསཾ དྭིནྣཾ? སམྨཱདིཊྛིཡཱ ཙ སམྨཱསཏིཡཱ ཙ ཨིམེསཾ དྭིནྣཾ མགྒངྒཱནཾ མཱུལཾ, ཏསྨཱ ཀུསལམཱུལནྟི ཝུཙྩཏི. ཨེཝཾ ¶ ཨིམེསཾ ཏཱིཧི ཀུསལམཱུལེཧི ཨཊྛངྒིཀོ མགྒོ ཡོཛེཏབྦོ.

༦༦. ཏཏྠ ¶ ཀཏམཱ ཨནིཙྩསཉྙཱ? ‘‘སབྦེ སངྑཱརཱ ཨུཔྤཱདཝཡདྷམྨིནོ’’ཏི ཙ ཡཱ སཉྙཱ སཉྫཱནནཱ ཝཝཏྠཔནཱ ཨུགྒཱཧོ, ཨཡཾ ཨནིཙྩསཉྙཱ. ཏསྶཱ ཀོ ནིསྶནྡོ? ཨནིཙྩསཉྙཱཡ བྷཱཝིཏཱཡ བཧུལཱིཀཏཱཡ ཨཊྛསུ ལོཀདྷམྨེསུ ཙིཏྟཾ ནཱནུསནྡྷཏི ན སནྡྷཏི ན སཎྛཧཏི, ཨུཔེཀྑཱ ཝཱ པཊིཀྐཱུལཏཱ ཝཱ སཎྛཧཏི, ཨཡམསྶཱ ནིསྶནྡོ.

ཏཏྠ ཀཏམཱ དུཀྑསཉྙཱ? ‘‘སབྦེ སངྑཱརཱ དུཀྑཱ’’ཏི ཡཱ སཉྙཱ སཉྫཱནནཱ ཝཝཏྠཔནཱ ཨུགྒཱཧོ, ཨཡཾ དུཀྑསཉྙཱ. ཏསྶཱ ཀོ ནིསྶནྡོ? དུཀྑསཉྙཱཡ བྷཱཝིཏཱཡ བཧུལཱིཀཏཱཡ ཨཱལསྶེ སཾཔམཱདེ ཝིམྷཡེ ཙ ཙིཏྟཾ ནཱནུསནྡྷཏི ན སནྡྷཏི ན སཎྛཧཏི, ཨུཔེཀྑཱ ཝཱ པཊིཀྐཱུལཏཱ ཝཱ སཎྛཧཏི, ཨཡམསྶཱ ནིསྶནྡོ.

ཏཏྠ ཀཏམཱ ཨནཏྟསཉྙཱ? ‘‘སབྦེསུ དྷམྨེསུ ཨནཏྟཱ’’ཏི ཡཱ སཉྙཱ སཉྫཱནནཱ ཝཝཏྠཔནཱ ཨུགྒཱཧོ, ཨཡཾ ཨནཏྟསཉྙཱ. ཏསྶཱ ཀོ ནིསྶནྡོ, ཨནཏྟསཉྙཱཡ བྷཱཝིཏཱཡ བཧུལཱིཀཏཱཡ ཨཧངྐཱརོ ཙིཏྟཾ ནཱནུསནྡྷཏི ན སནྡྷཏི, མམངྐཱརོ ན སཎྛཧཏི, ཨུཔེཀྑཱ ཝཱ པཊིཀྐཱུལཏཱ ཝཱ སཎྛཧཏི, ཨཡམསྶཱ ནིསྶནྡོ.

ཏཏྠ ཀཏམཱ ཨསུབྷསཉྙཱ? ‘‘སཏྟ སངྑཱརཱ ¶ ཨསུབྷཱ’’ཏི ཡཱ སཉྙཱ སཉྫཱནནཱ ཝཝཏྠཔནཱ ཨུགྒཱཧོ, ཨཡཾ ཨསུབྷསཉྙཱ. ཏསྶཱ ཀོ ནིསྶནྡོ? ཨསུབྷསཉྙཱཡ བྷཱཝིཏཱཡ བཧུལཱིཀཏཱཡ སུབྷནིམིཏྟེ ཙིཏྟཾ ནཱནུསནྡྷཏི ན སནྡྷཏི ན སཎྛཧཏི, ཨུཔེཀྑཱ ཝཱ པཊིཀྐཱུལཏཱ ཝཱ སཎྛཧཏི, ཨཡམསྶཱ ནིསྶནྡོ.

ཏཏྠ པཉྩནྣཾ ཁནྡྷཱནཾ པརིཉྙཱ བྷགཝཏཱ དེསིཏཱ, ཡོ ཏཏྠ ཨསུབྷསཉྙཱ རཱུཔཀྑནྡྷསྶ པརིཉྙཏྟཾ, དུཀྑསཉྙཱ ཝེདནཱཀྑནྡྷསྶ པརིཉྙཏྟཾ, ཨནཏྟསཉྙཱ སཉྙཱཀྑནྡྷསྶ སངྑཱརཀྑནྡྷསྶ པརིཉྙཏྟཾ, ཨནིཙྩསཉྙཱ ཝིཉྙཱཎཀྑནྡྷསྶ པརིཉྙཏྟཾ. ཏཏྠ སམཐེན ཏཎྷཾ སམུགྒྷཱཏེཏི, ཝིཔསྶནཱ ཨཝིཛྫཾ ¶ སམུགྒྷཱཏེཏི, ཨདོསེན དོསཾ སམུགྒྷཱཏེཏི, ཨམོཧེན མོཧཾ སམུགྒྷཱཏེཏི, ཨནིཙྩསཉྙཱཡ ནིཙྩསཉྙཾ སམུགྒྷཱཏེཏི, དུཀྑསཉྙཱཡ སུཁསཉྙཾ སམུགྒྷཱཏེཏི, ཨནཏྟསཉྙཱཡ ཨཏྟསཉྙཾ སམུགྒྷཱཏེཏི, ཨསུབྷསཉྙཱཡ སུབྷསཉྙཾ སམུགྒྷཱཏེཏི.

ཙིཏྟཝིཀྑེཔཔཊིསཾཧརཎལཀྑཎོ སམཐོ, ཏསྶ ཛྷཱནཱནི པདཊྛཱནཾ. སབྦདྷམྨཾ ཡཐཱབྷཱུཏཾ པཊིཝེདྷལཀྑཎཱ ཝིཔསྶནཱ, ཏསྶཱ སབྦནེཡྻཾ པདཊྛཱནཾ. ཨིཙྪཱཔཊིསཾཧརཎལཀྑཎོ ཨལོབྷོ, ཏསྶ ཨདིནྣཱདཱནཱ ཝེརམཎཱི པདཊྛཱནཾ. ཨབྱཱཔཱདལཀྑཎོ ཨདོསོ, ཏསྶ པཱཎཱཏིཔཱཏཱ ཝེརམཎཱི ¶ པདཊྛཱནཾ. ཝཏྠུཨཔྤཊིཧཏལཀྑཎོ ཨམོཧོ, ཏསྶ སམྨཱཔཊིཔཏྟི པདཊྛཱནཾ. སངྑཏཱནཾ དྷམྨཱནཾ ཝིནཱསགྒཧཎལཀྑཎཱ ཨནིཙྩསཉྙཱ, ཏསྶཱ ཨུདཡབྦཡོ པདཊྛཱནཾ. སཱསཝཕསྶསཉྫཱནནལཀྑཎཱ དུཀྑསཉྙཱ, ཏསྶཱ ཝེདནཱ པདཊྛཱནཾ. སབྦདྷམྨཨནུཔགམནལཀྑཎཱ ཨནཏྟསཉྙཱ, ཏསྶཱ དྷམྨསཉྙཱ ¶ པདཊྛཱནཾ. ཝིནཱིལཀཝིཔུབྦཀཨུདྡྷུམཱཏཀསམུགྒཧཎལཀྑཎཱ ཨསུབྷསཉྙཱ, ཏསྶཱ ནིབྦིདཱ པདཊྛཱནཾ. ཨིམེསུ ནཝསུ པདེསུ ཨུཔདིཊྛེསུ སབྦོ ཀུསལཔཀྑོ ཨུཔདིཊྛོ བྷཝཏི, སོ ཙ བཧུསྶུཏེན སཀྐཱ ཛཱནིཏུཾ ནོ ཨཔྤསྶུཏེན, པཉྙཝཏཱ ནོ དུཔྤཉྙེན, ཡུཏྟེན ནོ ཨཡུཏྟེནཱཏི.

༦༧. ཏཏྠ ནིཙྩསཉྙཱདྷིམུཏྟསྶ ཨཔརཱཔརཾ ཙིཏྟཾ པཎཱམེནྟོ སཏིམཔཙྩཝེཀྑཏོ ཨནིཙྩསཉྙཱ ན ཨུཔཊྛཱཏི, པཉྩསུ ཀཱམགུཎེསུ སུཁསྶཱདཱདྷིམུཏྟསྶ ཨིརིཡཱཔཐསྶ ཨགཏིམཔཙྩཝེཀྑཏོ དུཀྑསཉྙཱ ན ཨུཔཊྛཱཏི, ཁནྡྷདྷཱཏུཨཱཡཏནེསུ ཨཏྟཱདྷིམུཏྟསྶ ནཱནཱདྷཱཏུཨནེཀདྷཱཏུཝིནིབྦྷོགམཔཙྩཝེཀྑཏོ ཨནཏྟསཉྙཱ ན ཨུཔཊྛཱཏི, ཝཎྞསཎྛཱནཱབྷིརཏསྶ ཀཱཡེ སུབྷཱདྷིམུཏྟསྶ ཙ ཝིཔྤཊིཙྪནྣཱ ཨསུབྷསཉྙཱ ན ཨུཔཊྛཱཏི.

ཨཝིཔྤཊིསཱརལཀྑཎཱ སདྡྷཱ, སདྡཧནཱ པཙྩུཔཊྛཱནཾ. ཏསྶ ཙཏྟཱརི སོཏཱཔཏྟིཡངྒཱནི པདཊྛཱནཾ. ཨེཝཉྷི ཝུཏྟཾ བྷགཝཏཱ [པསྶ སཾཡུཏྟནིཀཱཡེ] སདྡྷིནྡྲིཡཾ བྷིཀྑཝེ, ཀུཧིཾ དཊྛབྦཾ, ཙཏཱུསུ སོཏཱཔཏྟིཡངྒེསུ ཀུསལེསུ དྷམྨེསུ.

སཱུརཱཨཔཊིཀྑེཔནལཀྑཎཾ ཝཱིརིཡིནྡྲིཡཾ, ཝཱིརིཡིནྡྲིཡཱརམྦྷོ པཙྩུཔཊྛཱནཾ. ཏསྶ ཨཏཱིཏཱ ཙཏྟཱརོ སམྨཔྤདྷཱནཱ པདཊྛཱནཾ. ཡཐཱ ཝུཏྟཾ བྷགཝཏཱ [པསྶ སཾཡུཏྟནིཀཱཡེ] ཝཱིརིཡིནྡྲིཡཾ, བྷིཀྑཝེ, ཀུཧིཾ དཊྛབྦཾ, ཙཏཱུསུ སམྨཔྤདྷཱནེསུ.

སཏི ¶ སརཎལཀྑཎཱ, ཨསམྨོཧཔཙྩུཔཊྛཱནཱ. ཏསྶ ཨཏཱིཏཱ ཙཏྟཱརོ སཏིཔཊྛཱནཱ པདཊྛཱནཾ. ཡཐཱ ཝུཏྟཾ བྷགཝཏཱ ¶ སཏིནྡྲིཡཾ བྷིཀྑཝེ, ཀུཧིཾ དཊྛབྦཾ, ཙཏཱུསུ སཏིཔཊྛཱནེསུ.

ཨེཀགྒལཀྑཎོ སམཱདྷི, ཨཝིཀྑེཔཔཙྩུཔཊྛཱནོ, ཏསྶ ཙཏྟཱརི ཉཱཎཱནི པདཊྛཱནཾ. ཡཐཱ ཝུཏྟཾ བྷགཝཏཱ སམཱདྷིནྡྲིཡཾ, བྷིཀྑཝེ, ཀུཧིཾ དཊྛབྦཾ, ཙཏཱུསུ ཛྷཱནེསུ.

པཛཱནནལཀྑཎཱ པཉྙཱ, བྷཱུཏཏྠསནྟཱིརཎཱ པཙྩུཔཊྛཱནཱ, ཏསྶ ཙཏྟཱརི ཨརིཡསཙྩཱནི པདཊྛཱནཾ. ཡཐཱ ཝུཏྟཾ བྷགཝཏཱ [པསྶ སཾཡུཏྟནིཀཱཡེ] པཉྙིནྡྲིཡཾ, བྷིཀྑཝེ, ཀུཧིཾ དཊྛབྦཾ, ཙཏཱུསུ ཨརིཡསཙྩེསུ.

ཙཏྟཱརི ¶ ཙཀྐཱནི [པསྶ ཨ. ནི. ༤.༣༡] པཏིརཱུཔདེསཝཱསོ ཙཀྐཾ, སཔྤུརིསཱུཔནིསྶཡོ ཙཀྐཾ, ཨཏྟསམྨཱཔཎིདྷཱནཾ ཙཀྐཾ, པུབྦེ ཀཏཔུཉྙཏཱ ཙཀྐཾ. ཏཏྠ ཨརིཡསནྣིསྶཡལཀྑཎོ པཏིརཱུཔདེསཝཱསོ, སོ སཔྤུརིསཱུཔནིསྶཡསྶ པདཊྛཱནཾ. ཨརིཡསནྣིསྶཡལཀྑཎོ སཔྤུརིསྶཱུཔནིསྶཡོ, སོ ཨཏྟསམྨཱཔཎིདྷཱནསྶ པདཊྛཱནཾ. སམྨཱཔཊིཔཏྟིལཀྑཎཾ ཨཏྟསམྨཱཔཎིདྷཱནཾ, ཏཾ པུཉྙཱནཾ པདཊྛཱནཾ. ཀུསལདྷམྨོཔཙཡལཀྑཎཾ པུཉྙཾ, ཏཾ སབྦསམྤཏྟཱིནཾ པདཊྛཱནཾ.

ཨེཀཱདསསཱིལམཱུལཀཱ དྷམྨཱ སཱིལཝཏོ ཨཝིཔྤཊིསཱརོ བྷཝཏི…པེ… སོ ཝིམུཏྟིཉཱཎདསྶནཾ ‘‘ནཱཔརཾ ཨིཏྠཏྟཱཡཱ’’ཏི པཛཱནནཱ. ཏཏྠ ཝེརམཎིལཀྑཎཾ སཱིལཾ, ཏཾ ཨཝིཔྤཊིསཱརསྶ པདཊྛཱནཾ. ན ཨཏྟཱནུཝཱདལཀྑཎོ ཨཝིཔྤཊིསཱརོ, སོ པཱམོཛྫསྶ པདཊྛཱནཾ. ཨབྷིཔྤམོདནལཀྑཎཾ པཱམོཛྫཾ, ཏཾ པཱིཏིཡཱ པདཊྛཱནཾ. ཨཏྟམནལཀྑཎཱ པཱིཏི ¶ , སཱ པསྶདྡྷིཡཱ པདཊྛཱནཾ. ཀམྨནིཡལཀྑཎཱ པསྶདྡྷི, སཱ སུཁསྶ པདཊྛཱནཾ. ཨབྱཱཔཱདལཀྑཎཾ སུཁཾ, ཏཾ སམཱདྷིནོ པདཊྛཱནཾ. ཨཝིཀྑེཔནལཀྑཎོ སམཱདྷི, སོ ཡཐཱབྷཱུཏཉཱཎདསྶནསྶ པདཊྛཱནཾ. ཨཝིཔརཱིཏསནྟཱིརཎལཀྑཎཱ པཉྙཱ, སཱ ནིབྦིདཱཡ པདཊྛཱནཾ ཨནཱལཡནལཀྑཎཱ ནིབྦིདཱ, སཱ ཝིརཱགསྶ པདཊྛཱནཾ. ཨསཾཀིལེསལཀྑཎོ ཝིརཱགོ, སོ ཝིམུཏྟིཡཱ པདཊྛཱནཾ. ཨཀུསལདྷམྨཝིཝེཀལཀྑཎཱ ཝིམུཏྟི, སཱ ཝིམུཏྟིནོ ཝོདཱནསྶ པདཊྛཱནཾ.

༦༨. ཙཏསྶོ ཨརིཡབྷཱུམིཡོ ཙཏྟཱརི སཱམཉྙཕལཱནི. ཏཏྠ ཡོ ཡཐཱབྷཱུཏཾ པཛཱནཱཏི, ཨེསཱ དསྶནབྷཱུམི. སོཏཱཔཏྟིཕལཉྩ སོ ཡཐཱབྷཱུཏཾ ¶ པཛཱནིཏྭཱ ནིབྦིནྡཏི, ཨིདཾ ཏནུཀཱམརཱགསྶ པདཊྛཱནཾ བྱཱཔཱདཱནཾ. སཀདཱགཱམིཕལཉྩ སཎྷཾ ཝིརཛྫཏི, ཨཡཾ རཱགཝིརཱགཱ ཙེཏོཝིམུཏྟི. ཨནཱགཱམིཕལཉྩ ཡཾ ཨཝིཛྫཱཝིརཱགཱ ཝིམུཙྩཏི, ཨཡཾ ཀཏཱབྷཱུམི. ཨརཧཏྟཉྩ སཱམཉྙཕལཱནཱིཏི ཀོ ཝཙནཏྠོ, ཨརིཡོ ཨཊྛངྒིཀོ མགྒོ སཱམཉྙཾ, ཏསྶེཏཱནི ཕལཱནི སཱམཉྙཕལཱནཱིཏི ཝུཙྩཏི. ཀིསྶ བྲཧྨཉྙཕལཱནཱིཏི ཝུཙྩནྟེ? བྲཧྨཉྙཨརིཡོ ཨཊྛངྒིཀོ མགྒོ, ཏསྶ ཏཱནི ཕལཱནཱིཏི བྲཧྨཉྙཕལཱནཱིཏི ཝུཙྩནྟེ.

ཏཏྠ སོཏཱཔནྣོ ཀཐཾ ཧོཏི? སཧ སཙྩཱབྷིསམཡཱ ཨརིཡསཱཝཀསྶ ཏཱིཎི སཾཡོཛནཱནི པཧཱིཡནྟི སཀྐཱཡདིཊྛི ཝིཙིཀིཙྪཱ སཱིལབྦཏཔརཱམཱསོ ཙ, ཨིམེསཾ ཏིཎྞཾ སཾཡོཛནཱནཾ པཧཱནཱ པརིཀྑཡཱ ཨརིཡསཱཝཀོ ཧོཏི སོཏཱཔནྣོ ཨཝིནིཔཱཏདྷམྨོ ཡཱཝ དུཀྑསྶནྟཾ ཀརོཏི.

ཏཏྠ ¶ ¶ ཀཏམཱ སཀྐཱཡདིཊྛི? ཨསྶུཏཝཱ བཱལོ པུཐུཛྫནོ ཡཱཝ ཨརིཡདྷམྨེ ཨཀོཝིདོ, སོ རཱུཔཾ ཨཏྟཏོ སམནུཔསྶཏི ཡཱཝ ཝིཉྙཱཎསྨིཾ ཨཏྟཱནཾ, སོ ཨིམེསུ པཉྩསུ ཁནྡྷེསུ ཨཏྟགྒཱཧོ ཝཱ ཨཏྟནིཡགྒཱཧོ ཝཱ ཨེསོཧམསྨི ཨེཀསྨིཾ ཝསཝཏྟིཀོ [ཨཝཏྟིཏོ (པཱི. ཀ.)] པཀྑིཏྟོ ཨནུགྒཧོ ཨནུསཡནྟོ ཨངྒམངྒནྟི པརཏི. ཡཱ ཏཐཱབྷཱུཏསྶ ཁནྟི རུཙི པེཀྑནཱ ཨཱཀཱརཔརིཝིཏཀྐོ དིཊྛིནིཛ྄ཛྷཱཡནཱ ཨབྷིཔྤསནྣཱ, ཨཡཾ ཝུཙྩཏེ སཀྐཱཡདིཊྛཱིཏི.

ཏཏྠ པཉྩ དིཊྛིཡོ ཨུཙྪེདཾ བྷཛནྟི. ཀཏམཱཡོ པཉྩ? རཱུཔཾ ཨཏྟཏོ སམནུཔསྶཏི, ཡཱཝ ཝིཉྙཱཎཾ ཨཏྟཏོ སམནུཔསྶཏི, ཨིམཱཡོ པཉྩ ཨུཙྪེདཾ བྷཛནྟི, ཨཝསེསཱཡོ པནྣརས སསྶཏཾ བྷཛནྟི. ཨིཏི སཀྐཱཡདིཊྛིཔཧཱནཱ དྭཱསཊྛིདིཊྛིགཏཱནི པཧཱིཡནྟི. པཧཱནཱ ཨུཙྪེདཾ སསྶཏཉྩ ན བྷཛཏི. ཨིཏི ཨུཙྪེདསསྶཏཔྤཧཱནཱ ཨརིཡསཱཝཀསྶ ན ཀིཉྩི དིཊྛིགཏཾ བྷཝཏི, ཨཉྙཱ ཝཱ ལོཀུཏྟརཱཡ སམྨཱདིཊྛིཡཱ. ཀཐཾ པན སཀྐཱཡདིཊྛི ན བྷཝཏི? ཨིདྷ ཨརིཡསཱཝཀོ སུཏཝཱ ཧོཏི, སབྦོ སུཀྐཔཀྑོ ཀཱཏབྦོ, ཡཱཝ ཨརིཡདྷམྨེསུ ཀོཝིདོ རཱུཔཾ ཨནཏྟཏོ སམནུཔསྶཏི, ཡཱཝ ཝིཉྙཱཎཾ…པེ… ཨེཝམསྶ སམནུཔསྶནྟསྶ སཀྐཱཡདིཊྛི ན བྷཝཏི.

ཀཐཾ ¶ ཝིཙིཀིཙྪཱ ན བྷཝཏི? ཨིདྷ ཨརིཡསཱཝཀོ བུདྡྷེ ན ཀངྑཏི, ན ཝིཙིཀིཙྪཏི ཨབྷིཔྤསཱིདཏི, ཨིཏིཔི སོ བྷགཝཱཏི སབྦཾ. དྷམྨེ ན ཀངྑཏི ན ཝིཙིཀིཙྪཏི སབྦཾ. ཡཱཝ ཏཎྷཀྑཡོ ཝིརཱགོ ནིརོདྷོ ནིབྦཱནནྟི, ཨིམིནཱ དུཏིཡེན ཨཱཀངྑིཡེན དྷམྨེན ¶ སམནྣཱགཏོ ཧོཏི. སངྒྷེ ན ཀངྑཏི…པེ… ཡཱཝ པཱུཛཱ དེཝཱནཉྩ མནུསྶཱནཉྩཱཏི, ཨིམིནཱ ཏཏིཡེན ཨཱཀངྑིཡེན དྷམྨེན སམནྣཱགཏོ ཧོཏི.

སབྦེ སངྑཱརཱ དུཀྑཱཏི ན ཀངྑཏི ན ཝིཙིཀིཙྪཏི ཨདྷིམུཙྩཏི ཨབྷིཔྤསཱིདཏི. ཏཎྷཱ དུཀྑསམུདཡོཏི ན ཀངྑཏི ན ཝིཙིཀིཙྪཏི. ཏཎྷཱནིརོདྷཱ དུཀྑནིརོདྷོཏི ན ཀངྑཏི ན ཝིཙིཀིཙྪཏི. ཨརིཡོ ཨཊྛངྒིཀོ མགྒོ དུཀྑནིརོདྷགཱམིནཱི པཊིཔདཱཏི ན ཀངྑཏི ན ཝིཙིཀིཙྪཏི ཨདྷིམུཙྩཏི ཨབྷིཔྤསཱིདཏི. ཡཱཝ བུདྡྷེ ཝཱ དྷམྨེ ཝཱ སངྒྷེ ཝཱ དུཀྑེ ཝཱ སམུདཡེ ཝཱ ནིརོདྷེ ཝཱ མགྒེ ཝཱ ཀངྑཱཡནཱ ཝིམཏི ཝིཙིཀིཙྪཱ དྭེདྷཱཔཐཱ ཨཱསཔྤནཱ [ཨཔྤནཱ (པཱི. ཀ.) དྷ. ས. ༡༠༠༨ ནིཀྑེཔཀཎྜེ པསྶིཏབྦཾ] པརིསཔྤནཱ ཨནཝཊྛཱནཾ ཨདྷིཊྛཱགམནཾ [ཨནིཊྛཱགམནཾ (ཀ.)] ཨནེཀཾསོ ཨནེཀཾསིཀཏཱ, ཏེ ཏསྶ པཧཱིནཱ བྷཝནྟི པཎུནྣཱ ཨུཙྪིནྣམཱུལཱ ཏཱལཱཝཏྠུཀཏཱ ཨནབྷཱཝཾཀཏཱ ཨཱཡཏིཾ ཨནུཔྤཱདདྷམྨཱ.

༦༩. ཏཏྠ སཱིལབྦཏཔརཱམཱསོ དྭིདྷཱ – སཱིལསྶ ཝཱ སུདྡྷསྶ ཝཱ. ཏཏྠ སཱིལསྶ སཱིལབྦཏཔརཱམཱསོ ¶ ཨིམིནཱཧཾ སཱིལེན ཝཱ ཝཏེན ཝཱ ཏཔེན ཝཱ བྲཧྨཙརིཡེན ཝཱ དེཝོ ཝཱ བྷཝིསྶཱམི དེཝཉྙཏརོ ཝཱ ཏཏྠ ཀཔོཏཔཱདཱཧི ཨཙྪརཱཧི སདྡྷིཾ ཀཱིལི༹སྶཱམི རམིསྶཱམི པརིཙརིསྶཱམཱིཏི. ཡཐཱབྷཱུཏདསྶནནྟི རུཙིཝིམུཏྟི རཱགོ རཱགཔརིཝཏྟཀཱ དིཊྛིརཱུཔནཱ པསྶནཱ ཨསནྟུསྶིཏསྶ སཱིལབྦཏཔརཱམཱསོ. ཏཏྠ ཀཏམོ སུདྡྷསྶ སཱིལབྦཏཔརཱམཱསོ? ཨིདྷེཀཙྩོ སཱིལཾ པརཱམསཏི, སཱིལེན སུཛ྄ཛྷཏི, སཱིལེན ནཱིཡཏི, སཱིལེན མུཙྩཏི, སུཁཾ ཝཱིཏིཀྐམཏི, དུཀྑཾ ཝཱིཏིཀྐམཏི, སུཁདུཀྑཾ ¶ ཝཱིཏིཀྐམཏི ཨནུཔཱཔུཎཱཏི ཨུཔརིམེན. ཏདུབྷཡཾ སཱིལཝཏཾ པརཱམསཏི ཏདུབྷཡེན སཱིལཝཏེན སུཛ྄ཛྷནྟི མུཙྩནྟི ནཱིཡནྟི, སུཁཾ ཝཱིཏིཀྐམནྟི, དུཀྑཾ ཝཱིཏིཀྐམནྟི, སུཁདུཀྑཾ ཝཱིཏིཀྐམནྟི, ཨནུཔཱཔུཎནྟཱིཏི ཨཝིསུཙིཀརཾ དྷམྨཾ ཨཝིམུཏྟིཀརཾ དྷམྨཾ ཝིསུཙིཏོ ཝིམུཏྟིཏོ པཙྩཱགཙྪནྟསྶ ཡཱ ཏཐཱབྷཱུཏསྶ ཁནྟི རུཙི མུཏྟི པེཀྑནཱ ཨཱཀཱརཔརིཝིཏཀྐོ དིཊྛིནིཛ྄ཛྷཱཡནཱ པསྶནཱ, ཨཡཾ སུདྡྷསྶ སཱིལབྦཏཔརཱམཱསོ. ཨེཏེ ཨུབྷོ པརཱམཱསཱ ཨརིཡསཱཝཀསྶ པཧཱིནཱ ¶ བྷཝནྟི ཡཱཝ ཨཱཡཏིཾ ཨནུཔྤཱདདྷམྨཱ, སོ སཱིལཝཱ བྷཝཏི ཨརིཡཀནྟེཧི སཱིལེཧི སམནྣཱགཏོ ཨཀྑཎྜེཧི ཡཱཝ ཨུཔསམསཾཝཏྟནིཀེཧི. ཨིམེསཾ ཏིཎྞཾ སཾཡོཛནཱནཾ པཧཱནཱ སུཏཝཱ ཨརིཡསཱཝཀོ བྷཝཏི སོཏཱཔནྣོ ཨཝིནིཔཱཏདྷམྨོ, སབྦཾ.

སཧསཙྩཱབྷིསམཡཱ, ཨིཏི ཀོ ཝཙནཏྠོ? ཙཏྟཱརོ ཨབྷིསམཡཱ, པརིཉྙཱབྷིསམཡོ པཧཱནཱབྷིསམཡོ སཙྪིཀིརིཡཱབྷིསམཡོ བྷཱཝནཱབྷིསམཡོ.

ཏཏྠ ཨརིཡསཱཝཀོ དུཀྑཾ པརིཉྙཱབྷིསམཡེན ཨབྷིསམེཏི, སམུདཡཾ པཧཱནཱབྷིསམཡེན ཨབྷིསམེཏི, ནིརོདྷཾ སཙྪིཀིརིཡཱབྷིསམཡེན ཨབྷིསམེཏི, མགྒཾ བྷཱཝནཱབྷིསམཡེན ཨབྷིསམེཏི. ཀིཾ ཀཱརཎཾ? དུཀྑསྶ པརིཉྙཱབྷིསམཡོ, སམུདཡསྶ པཧཱནཱབྷིསམཡོ, ནིརོདྷསྶ སཙྪིཀིརིཡཱབྷིསམཡོ, མགྒསྶ བྷཱཝནཱབྷིསམཡོ. སམཐཝིཔསྶནཱཡ ཀཐཾ ཨབྷིསམེཏི? ཨཱརམྨཎེ ཙིཏྟཾ ཨུཔནིབནྡྷེཏྭཱ པཉྩཀྑནྡྷེ དུཀྑཏོ པསྶཏི. ཏཏྠ ཡོ ཨུཔནིབནྡྷོ, ཨཡཾ སམཐོ. ཡཱ པརིཡོགཱཧནཱ, ཨཡཾ ཝིཔསྶནཱ. པཉྩཀྑནྡྷེ ¶ དུཀྑཱཏི པསྶཏོ ཡོ པཉྩཀྑནྡྷེསུ ཨཱལཡོ ནིཀནྟི ཨུཔགམནཾ ཨཛ྄ཛྷོསཱནཱ ཨིཙྪཱ མུཙྪཱ པཎིདྷི པཏྠནཱ པཧཱིཡཏི. ཏཏྠ པཉྩཀྑནྡྷཱ དུཀྑཾ. ཡོ ཏཏྠ ཨཱལཡོ ནིཀནྟི ཨུཔགམནཾ ཨཛ྄ཛྷོསཱནཾ ཨིཙྪཱ མུཙྪཱ པཎིདྷི པཏྠནཱ, ཨཡཾ སམུདཡོ. ཡཾ ཏསྶ པཧཱནཾ, སོ ནིརོདྷོ སམཐོ ཝིཔསྶནཱ ཙ མགྒོ, ཨེཝཾ ཏེསཾ ཙཏུནྣཾ ཨརིཡསཙྩཱནཾ ཨེཀཀཱལེ ཨེཀཀྑཎེ ཨེཀཙིཏྟེ ཨཔུབྦཾ ཨཙརིམཾ ཨབྷིསམཡོ བྷཝཏི. ཏེནཱཧ བྷགཝཱ ‘‘སཧསཙྩཱབྷིསམཡཱ ཨརིཡསཱཝཀསྶ ཏཱིཎི སཾཡོཛནཱནི པཧཱིཡནྟཱི’’ཏི.

༧༠. ཏཏྠ ¶ སམཐཝིཔསྶནཱ ཡུགནདྡྷཱ ཝཏྟམཱནཱ ཨེཀཀཱལེ ཨེཀཀྑཎེ ཨེཀཙིཏྟེ ཙཏྟཱརི ཀིཙྩཱནི ཀརོཏི, དུཀྑཾ པརིཉྙཱབྷིསམཡེན ཨབྷིསམེཏི, ཡཱཝ མགྒཾ བྷཱཝནཱབྷིསམཡེན ཨབྷིསམེཏི. ཀིཾ ཀཱརཎཱ? དུཀྑཾ པརིཉྙཱབྷིསམཡོ, ཡཱཝ མགྒཾ བྷཱཝནཱབྷིསམཡོ. ཨེཝཾ དིཊྛནྟོ ཡཐཱ ནཱཝཱ ཛལཾ གཙྪནྟཱི ཙཏྟཱརི ཀིཙྩཱནི ཀརོཏི, པཱརིམཾ ཏཱིརཾ པཱཔེཏི, ཨོརིམཾ ཏཱིརཾ ཛཧཏི, བྷཱརཾ ཝཧཏི, སོཏཾ ཚིནྡཏི; ཨེཝམེཝ སམཐཝིཔསྶནཱ ཡུགནདྡྷཱ ཝཏྟམཱནཱ ཨེཀཀཱལེ ཨེཀཀྑཎེ ཨེཀཙིཏྟེ ཙཏྟཱརི ཀིཙྩཱནི ཀརོཏི ¶ , དུཀྑཾ པརིཉྙཱབྷིསམཡེན ཨབྷིསམེཏི, ཡཱཝ མགྒཾ བྷཱཝནཱབྷིསམཡེན ཨབྷིསམེཏི. ཡཐཱ ཝཱ སཱུརིཡོ ཨུདཡནྟོ ཨེཀཀཱལེ ཨཔུབྦཾ ཨཙརིམཾ ཙཏྟཱརི ཀིཙྩཱནི ཀརོཏི, ཨནྡྷཀཱརཾ ཝིདྷམཏི, ཨཱལོཀཾ པཱཏུཀརོཏི, རཱུཔཾ ནིདསྶཱིཡཏི, སཱིཏཾ པརིཡཱདིཡཏི; ཨེཝམེཝ སམཐཝིཔསྶནཱ ཡུགནདྡྷཱ ཝཏྟམཱནཱ ཨེཀཀཱལེ…པེ… ཡཐཱ པདཱིཔོ ཛལནྟོ ཨེཀཀཱལེ ཨཔུབྦཾ ཨཙརིམཾ ཙཏྟཱརི ཀིཙྩཱནི ཀརོཏི, ཨནྡྷཀཱརཾ ཝིདྷམཏི, ཨཱལོཀཾ པཱཏུཀརོཏི, རཱུཔཾ ¶ ནིདསྶཱིཡཏི, ཨུཔཱདཱནཾ པརིཡཱདིཡཏི; ཨེཝམེཝ སམཐཝིཔསྶནཱ ཡུགནདྡྷཱ ཝཏྟམཱནཱ ཨེཀཀཱལེ…པེ….

ཡདཱ ཨརིཡསཱཝཀོ སོཏཱཔནྣོ བྷཝཏི ཨཝིནིཔཱཏདྷམྨོ ནིཡཏོ ཡཱཝ དུཀྑསྶནྟཾ ཀརོཏི, ཨཡཾ དསྶནབྷཱུམི. སོཏཱཔཏྟིཕལཉྩ སོཏཱཔཏྟིཕལེ ཋིཏོ ཨུཏྟརི སམཐཝིཔསྶནཾ བྷཱཝེནྟོ ཡུགནདྡྷཱ ཝཏྟམཱནཱ ཀཱམརཱགབྱཱཔཱདཱནཾ ཡེབྷུཡྻེན པཧཱནཱ ཨརིཡསཱཝཀོ ཧོཏི. སཀདཱགཱམི པརིནིཊྛིཏཏྟཱ སཀིདེཝ ཨིམཾ ལོཀཾ ཨཱགནྟྭཱ དུཀྑསྶནྟཾ ཀརོཏི, ཨཡཾ ཏནུབྷཱུམི.

སཀདཱགཱམིཕལཉྩ ཡོ སཀདཱགཱམིཕལེ ཋིཏོ ཝིཔསྶནཾ བྷཱཝེནྟོ ཀཱམརཱགབྱཱཔཱདེ སཱནུསཡེ ཨནཝསེསཾ པཛཧཏི, ཀཱམརཱགབྱཱཔཱདེསུ ཨནཝསེསཾ པཧཱིནེསུ པཉྩོརམྦྷཱགིཡཱནི སཾཡོཛནཱནི པཧཱིནཱནི བྷཝནྟི སཀྐཱཡདིཊྛི སཱིལབྦཏཔརཱམཱསོ ཝིཙིཀིཙྪཱ ཀཱམཙྪནྡོ བྱཱཔཱདོ ཙ, ཨིམེསཾ པཉྩནྣཾ ཨོརམྦྷཱགིཡཱནཾ སཾཡོཛནཱནཾ པཧཱནཱ [པཧཱནཱཡ (པཱི. ཀ.)] ཨརིཡསཱཝཀོ ཧོཏི ཨནཱགཱམཱི ཏཏྠ པརིནིབྦཱཡཱི ཨནཱཝཏྟིདྷམྨོ ཏསྨཱ ལོཀཱ, ཨཡཾ ཝཱིཏརཱགབྷཱུམི.

ཨནཱགཱམིཕལཉྩ ཨནཱགཱམིཕལེ ཋིཏོ ཨུཏྟརི སམཐཝིཔསྶནཾ བྷཱཝེནྟོ པཉྩ ཨུདྡྷམྦྷཱགིཡཱནི སཾཡོཛནཱནི པཛཧཏི རཱུཔརཱགཨརཱུཔརཱགམཱནཨུདྡྷཙྩཨཝིཛྫཉྩ. ཨིམེསཾ པཉྩནྣཾ ཨུདྡྷམྦྷཱགིཡཱནཾ སཾཡོཛནཱནཾ པཧཱནཱ ཨརིཡསཱཝཀོ ཨརཧཱ བྷཝཏི, ཁཱིཎཱསཝོ ཝུསིཏཝཱ སམྨདཉྙཱ [སམྤཛཉྙོ (པཱི. ཀ.)] ཝིམུཏྟོ པརིཀྑཱིཎབྷཝསཾཡོཛནོ ཨནུཔྤཏྟསདཏྠོ, ཨཡཾ ཀཏཱབྷཱུམི.

ཨརཧནྟོཝ ¶ ཨཡཾ སོཔཱདིསེསཱ ནིབྦཱནདྷཱཏུ. ཏསྶ ཨཱཡུཀྑཡཱ ཛཱིཝིཏིནྡྲིཡཱཔརོདྷཱ ཨིདཉྩ དུཀྑཾ ནིརུཛ྄ཛྷཏི, ཨཉྙཉྩ ¶ དུཀྑཾ ན ཨུཔྤཛྫཏི. ཡོ ཨིམསྶ དུཀྑསྶ ནིརོདྷོ ཝཱུཔསམོ, ཨཉྙསྶ ཙ ཨཔཱཏུབྷཱཝོ, ཨཡཾ ¶ ཨནུཔཱདིསེསཱ ནིབྦཱནདྷཱཏུ. ཨིམཱ དྭེ ནིབྦཱནདྷཱཏུཡོ. ཨིཏི སཙྩཱནི ཝུཏྟཱནི. སཙྩཱབྷིསམཡོ ཝུཏྟོ, ཀིལེསཝཝཏྠཱནཾ ཝུཏྟཾ, པཧཱནཾ ཝུཏྟཾ, བྷཱུམིཡོ ཝུཏྟཱ, ཕལཱནི ཝུཏྟཱནི, ནིབྦཱནདྷཱཏུཡོ ཝུཏྟཱ. ཨེཝམིམེསུ ཝུཏྟེསུ སབྦབོདྷི ཝུཏྟཱ བྷཝཏི. ཨེཏྠ ཡོགོ ཀརཎཱིཡོ.

༧༡. ཏཏྠ ཀཏམཱཡོ ནཝ ཨནུཔུབྦསམཱཔཏྟིཡོ? ཙཏྟཱརི ཛྷཱནཱནི ཙཏསྶོ ཙ ཨརཱུཔསམཱཔཏྟིཡོ ནིརོདྷསམཱཔཏྟི ཙ. ཏཏྠ ཙཏྟཱརི ཛྷཱནཱནི ཀཏམཱནི? ཨིདྷ, བྷིཀྑཝེ, [པསྶ དཱིགྷནིཀཱཡེ] བྷིཀྑུ ཝིཝིཙྩེཝ ཀཱམེཧཱིཏི ཝིཏྠཱརེན ཀཱཏབྦཱནི. ཏཏྠ ཀཏམཱ ཙཏྟཱརོ ཨརཱུཔསམཱཔཏྟིཡོ? ཝིརཱགིནོ ཝཏ ཝཏྟབྦོ, ཡཱཝ ནིརོདྷསམཱཔཏྟི ཝིཏྠཱརེན ཀཱཏབྦཱ. ཨིམཱཡོ ནཝ ཨནུཔུབྦསམཱཔཏྟིཡོ.

ཏཏྠ ཀཏམཾ པཋམཾ ཛྷཱནཾ? པཉྩངྒཝིཔྤཡུཏྟཾ པཉྩངྒསམནྣཱགཏཾ. ཀཏམེཧི པཉྩཧི ཨངྒེཧི ཝིཔྤཡུཏྟཾ? པཉྩཧི ནཱིཝརཎེཧི. ཏཏྠ ཀཏམཱནི པཉྩ ནཱིཝརཎཱནི? ཀཱམཙྪནྡོཏི ཝིཏྠཱརེཏབྦོ. ཏཏྠ ཀཏམོ ཀཱམཙྪནྡོ? ཡོ པཉྩསུ ཀཱམགུཎེསུ ཚནྡརཱགོ པེམཾ ནིཀནྟི ཨཛ྄ཛྷོསཱནཾ ཨིཙྪཱ མུཙྪཱ པཏྠནཱ ཨཔརིཙྩཱགོ ཨནུསཡོ པརིཡུཊྛཱནཾ, ཨཡཾ ཀཱམཙྪནྡནཱིཝརཎཾ. ཏཏྠ ¶ ཀཏམཾ བྱཱཔཱདནཱིཝརཎཾ? ཡོ སཏྟེསུ སངྑཱརེསུ ཙ ཨཱགྷཱཏོ…པེ… ཡཐཱ དོསེ ཏཐཱ ནིཨོཊྛཱནཱ, ཨཡཾ བྱཱཔཱདོ ནཱིཝརཎཾ. ཏཏྠ ཀཏམཾ མིདྡྷཾ? ཡཱ ཙིཏྟསྶ ཛལ༹ཏཱ ཙིཏྟསྶ གརུཏྟཾ ཙིཏྟསྶ ཨཀམྨནཱིཡཏཱ ཙིཏྟསྶ ནིཀྑེཔོ ནིདྡཱཡནཱ པཙལིཀཏཱ པཙལཱཡནཱ པཙལཱཡནཾ, ཨིདཾ མིདྡྷཾ. ཏཏྠ ཀཏམཾ ཐིནཾ [ཐཱིནཾ (པཱི.)]? ཡཱ ཀཱཡསྶ ཐིནཏཱ ཛལ༹ཏཱ ཀཱཡསྶ གརུཏྟཱ ཀཱཡསྶ ཨཔྤསྶདྡྷི, ཨིདཾ ཐིནཾ. ཨིཏི ཨིདཉྩ ཐིནཾ པུརིམཀཉྩ མིདྡྷཾ ཏདུབྷཡཾ ཐིནམིདྡྷནཱིཝརཎནྟི ཝུཙྩཏི. ཏཏྠ ཀཏམཾ ཨུདྡྷཙྩཾ? ཡོ ཨཝཱུཔསམོ ཙིཏྟསྶ, ཨིདཾ ཨུདྡྷཙྩཾ. ཏཏྠ ཀཏམཾ ཀུཀྐུཙྩཾ? ཡོ ཙེཏསོ ཝིལེཁོ ཨལཉྩནཱ ཝིལཉྩནཱ ཧདཡལེཁོ ཝིཔྤཊིསཱརོ, ཨིདཾ ཀུཀྐུཙྩཾ. ཨིཏི ཨིདཉྩ ཀུཀྐུཙྩཾ པུརིམཀཉྩ ཨུདྡྷཙྩཾ ཏདུབྷཡཾ ཨུདྡྷཙྩཀུཀྐུཙྩནཱིཝརཎནྟི ཝུཙྩཏི. ཏཏྠ ཀཏམཾ ཝིཙིཀིཙྪཱནཱིཝརཎཾ? ཡོ བུདྡྷེ ཝཱ དྷམྨེ ཝཱ སངྒྷེ ཝཱ…པེ… ཨཡཾ ཝིཙིཀིཙྪཱ. ཨཔི ¶ ཙ ཁོ པན པཉྩ ཝིཙིཀིཙྪཱཡོ སམནནྟརཱཡིཀཱ དེསནྟརཱཡིཀཱ སམཱཔཏྟནྟརཱཡིཀཱ མགྒནྟརཱཡིཀཱ སགྒནྟརཱཡིཀཱ, ཨིམཱཡོ པཉྩ ¶ ཝིཙིཀིཙྪཱཡོ ¶ . ཨིདྷ པན སམཱཔཏྟནྟརཱཡིཀཱ ཝིཙིཀིཙྪཱ ཨདྷིཔྤེཏཱ. ཨིམེ པཉྩ ནཱིཝརཎཱ.

ཏཏྠ ནཱིཝརཎཱནཱིཏི ཀོ ཝཙནཏྠོ, ཀུཏོ ནིཝཱརཡནྟཱིཏི? སབྦཏོ ཀུསལཔཀྑིཀཱ ནིཝཱརཡནྟི. ཀཐཾ [ཀིཾ ཀཾ (པཱི. ཀ.)] ནིཝཱརཡནྟི? ཀཱམཙྪནྡོ ཨསུབྷཏོ ནིཝཱརཡཏི, བྱཱཔཱདོ མེཏྟཱཡ [མེཏྟཏོ (པཱི.)] ནིཝཱརཡཏི, ཐིནཾ པསྶདྡྷིཏོ ནིཝཱརཡཏི, མིདྡྷཾ ཝཱིརིཡཱརམྦྷཏོ ནིཝཱརཡཏི, ཨུདྡྷཙྩཾ སམཐཏོ ནིཝཱརཡཏི, ཀུཀྐུཙྩཾ ཨཝིཔྤཊིསཱརཏོ ནིཝཱརཡཏི, ཝིཙིཀིཙྪཱ པཉྙཱཏོ པཊིཙྩསམུཔྤཱདཏོ ནིཝཱརཡཏི.

ཨཔརོ པརིཡཱཡོ. ཀཱམཙྪནྡོ ཨལོབྷཏོ ཀུསལམཱུལཏོ ནིཝཱརཡཏི, བྱཱཔཱདོ ཨདོསཏོ ནིཝཱརཡཏི, ཐིནམིདྡྷཾ སམཱདྷིཏོ ནིཝཱརཡཏི, ཨུདྡྷཙྩཀུཀྐུཙྩཾ སཏིཔཊྛཱནེཧི ནིཝཱརཡཏི, ཝིཙིཀིཙྪཱ ཨམོཧཏོ ཀུསལམཱུལཏོ ནིཝཱརཡཏི.

ཨཔརོ པརིཡཱཡོ. ཏཡོ ཝིཧཱརཱ དིབྦཝིཧཱརོ བྲཧྨཝིཧཱརོ ཨརིཡཝིཧཱརོ. དིབྦཝིཧཱརོ ཙཏྟཱརི ཛྷཱནཱནི, བྲཧྨཝིཧཱརོ ཙཏྟཱརི ཨཔྤམཱཎཱནི, ཨརིཡཝིཧཱརོ སཏྟཏིཾས བོདྷིཔཀྑིཡཱ དྷམྨཱ. ཏཏྠ ཀཱམཙྪནྡོ ཨུདྡྷཙྩཾ ཀུཀྐུཙྩཉྩ དིབྦཝིཧཱརཾ ནིཝཱརཡཏི, བྱཱཔཱདོ བྲཧྨཝིཧཱརཾ ནིཝཱརཡཏི, ཐིནམིདྡྷཾ ཝིཙིཀིཙྪཱ ཙ ཨརིཡཝིཧཱརཾ ནིཝཱརཡཏི.

ཨཔརོ པརིཡཱཡོ. ཀཱམཙྪནྡོ བྱཱཔཱདོ ཨུདྡྷཙྩཀུཀྐུཙྩཉྩ སམཐཾ ནིཝཱརཡནྟི, ཐིནམིདྡྷཾ ཝིཙིཀིཙྪཱ ཙ ཝིཔསྶནཾ ནིཝཱརཡནྟི, ཨཏོ ནཱིཝརཎནྟི ཝུཙྩནྟེ. ཨིམེཧི ¶ པཉྩཧི ཨངྒེཧི ཝིཔྤཡུཏྟཾ པཋམཾ ཛྷཱནཾ.

ཀཏམེཧི པཉྩཧི ཨངྒེཧི སམྤཡུཏྟཾ པཋམཾ ཛྷཱནཾ? ཝིཏཀྐཝིཙཱརེཧི པཱིཏིཡཱ སུཁེན ཙ ཙིཏྟེཀགྒཏཱཡ ཙ. ཨིམེསཾ པཉྩནྣཾ ཨངྒཱནཾ ཨུཔྤཱདཔཊིལཱབྷསམནྣཱགམོ སཙྪིཀིརིཡཾ པཋམཾ ཛྷཱནཾ པཊིལདྡྷནྟི ཝུཙྩཏི. ཨིམཱནི པཉྩ ཨངྒཱནི ཨུཔྤཱདེཏྭཱ ཝིཧརཏཱིཏི, ཏེན ཝུཙྩཏེ པཋམཾ ཛྷཱནཾ ཨུཔསམྤཛྫ ཝིཧརཏཱིཏི དིབྦེན ཝིཧཱརེན.

ཏཏྠ དུཏིཡཾ ཛྷཱནཾ ཙཏུརངྒསམནྣཱགཏཾ པཱིཏིསུཁེན ཙིཏྟེཀགྒཏཱཡ ཨཛ྄ཛྷཏྟཾ སམྤསཱདནེན ཨིམཱནི ཙཏྟཱརི ཨངྒཱནི ཨུཔྤཱདེཏྭཱ སམྤཱདེཏྭཱ ཝིཧརཏི, ཏེན ཝུཙྩཏི དུཏིཡཾ ཛྷཱནཾ ཨུཔསམྤཛྫ ཝིཧརཏཱིཏི.

ཏཏྠ ¶ ¶ པཉྩངྒསམནྣཱགཏཾ ཏཏིཡཾ ཛྷཱནཾ སཏིཡཱ སམྤཛཉྙེ སུཁེན ཙིཏྟེཀགྒཏཱཡ ཨུཔེཀྑཱཡ ཨིམཱནི པཉྩངྒཱནི ཨུཔྤཱདེཏྭཱ སམྤཱདེཏྭཱ ཝིཧརཏི, ཏེན ཝུཙྩཏི ཏཏིཡཾ ཛྷཱནཾ ཨུཔསམྤཛྫ ཝིཧརཏཱིཏི.

ཏཏྠ ཙཏུཏྠཾ ཛྷཱནཾ ཙཏུརངྒསམནྣཱགཏཾ ཨུཔེཀྑཱཡ སཏིཔཱརིསུདྡྷིཡཱ ཨདུཀྑམསུཁཱཡ ཝེདནཱཡ ཙིཏྟེཀགྒཏཱ ཙ, ཨིམེཧི ཙཏཱུཧངྒེཧི སམནྣཱགཏཾ ཙཏུཏྠཾ ཛྷཱནཾ. ཨིཏི ཨིམེསཾ ཙཏུནྣཾ ཨངྒཱནཾ ཨུཔྤཱདོ པཊིལཱབྷོ སམནྣཱགམོ སཙྪིཀིརིཡཱ ཙཏུཏྠཾ ཛྷཱནཾ པཊིལདྡྷནྟི ཝུཙྩཏི. ཨིམཱནི ཙཏྟཱརི ཛྷཱནཱནི ཨུཔྤཱདེཏྭཱ སམྤཱདེཏྭཱ ཨུཔསམྤཛྫ ཝིཧརཏི, ཏེན ཝུཙྩཏི དིབྦེན ཝིཧཱརེན ཝིཧརཏཱིཏི.

ཏཏྠ ¶ ཀཏམོ ཨནིཙྩཊྛོ? པཱིལ༹ནཊྛོ ཨནིཙྩཊྛོ པབྷངྒཊྛོ སམྤཱཔནཊྛོ ཝིཝེཀཊྛོ ཨནིཙྩཊྛོ, ཨཡཾ ཨནིཙྩཊྛོ.

ཏཏྠ ཀཏམོ དུཀྑཊྛོ? པཱིལ༹ནཊྛོ དུཀྑཊྛོ སམྤཱིལ༹ནཊྛོ སཾཝེགཊྛོ བྱཱདྷིནཊྛོ, ཨཡཾ དུཀྑཊྛོ.

ཏཏྠ ཀཏམོ སུཉྙཊྛོ? ཨནུཔལིཏྟོ སུཉྙཊྛོ, ཨསམྦྷཱཛནཊྛོ གཏཔཊྛོ [ཨཔྤཊྛོ (པཱི.)] ཝིཝཊྚཊྛོ, ཨཡཾ སུཉྙཊྛོ.

ཏཏྠ ཀཏམོ ཨནཏྟཊྛོ? ཨནིསྶརིཡཊྛོ ཨནཏྟཊྛོ, ཨཝསཝཏྟནཊྛོ, ཨཀཱམཀཱརིཊྛོ པརིཝིདཊྛོ, ཨཡཾ ཨནཏྟཊྛོཏི.

སུཏྟཏྠསམུཙྩཡོ ནཱམ སཾཝཏྟིསནྟིཀཱ པེཊཀབྷཱུམི སམཏྟཱ.

༧༢. ཛྷཱནཾ ¶ ¶ ཝིརཱགོ. ཙཏྟཱརི ཛྷཱནཱནི ཝིཏྠཱརེན ཀཱཏབྦཱནི. ཏཱནི དུཝིདྷཱནི; བོཛ྄ཛྷངྒཝིཔྤཡུཏྟཱནི ཙ བོཛ྄ཛྷངྒསམྤཡུཏྟཱནི ཙ. ཏཏྠ བོཛ྄ཛྷངྒཝིཔྤཡུཏྟཱནི བཱཧིརཀཱནི, བོཛ྄ཛྷངྒསམྤཡུཏྟཱནི ཨརིཡཔུགྒལཱནི. ཏཏྠ ཡེན ཚ པུགྒལམཱུལཱནི ཏེསཾ ནིཀྑིཔེཏྭཱ རཱགཙརིཏོ, དོསཙརིཏོ, མོཧཙརིཏོ, རཱགདོསཙརིཏོ, རཱགམོཧཙརིཏོ, དོསམོཧཙརིཏོ, སམབྷཱགཙརིཏོ, ཨིཏི ཨིམེསཾ པུགྒལཱནཾ ཛྷཱནཾ སམཱཔཛྫིཏཱནཾ པཉྩ ནཱིཝརཎཱནི པཊིཔཀྑོ ཏེསཾ པཊིགྷཱཏཱཡ ཡཐཱ ཨསམཏྠོ ཏཱིཎི ཨཀུསལམཱུལཱནི ¶ ནིགྒཎྷཱཏི. ལོབྷེན ཨཀུསལམཱུལེན ཨབྷིཛ྄ཛྷཱ ཙ ཨུདྡྷཙྩཉྩ ཨུཔྤིལཝཏཾ ཨལོབྷེན ཀུསལམཱུལེན ནིགྒཎྷཱཏི, ཀུཀྐུཙྩཉྩ ཝིཙིཀིཙྪཱ ཙ མོཧཔཀྑོ, ཏཾ ཨམོཧེན ནིགྒཎྷཱཏི. དོསོ ཙ ཐིནམིདྡྷཉྩ དོསཔཀྑོ, ཏཾ ཨདོསེན ནིགྒཎྷཱཏི.

ཏཏྠ ཨལོབྷསྶ པཱརིཔཱུརིཡཱ ནེཀྑམྨཝིཏཀྐཾ ཝིཏཀྐེཏི. ཏཏྠ ཨདོསསྶ པཱརིཔཱུརིཡཱ ཨབྱཱཔཱདཝིཏཀྐཾ ཝིཏཀྐེཏི. ཏཏྠ ཨམོཧསྶ པཱརིཔཱུརིཡཱ ཨཝིཧིཾསཱཝིཏཀྐཾ ཝིཏཀྐེཏི. ཏཏྠ ཨལོབྷསྶ པཱརིཔཱུརིཡཱ ཝིཝིཏྟོ ཧོཏི ཀཱམེཧི. ཏཏྠ ཨདོསསྶ པཱརིཔཱུརིཡཱ ཨམོཧསྶ པཱརིཔཱུརིཡཱ ཙ ཝིཝིཏྟོ ཧོཏི པཱཔཀེཧི ཨཀུསལེཧི དྷམྨེཧི, སཝིཏཀྐཾ ¶ སཝིཙཱརཾ ཝིཝེཀཛཾ པཱིཏིསུཁཾ པཋམཾ ཛྷཱནཾ ཨུཔསམྤཛྫ ཝིཧརཏི.

ཝིཏཀྐཱཏི ཏཡོ ཝིཏཀྐཱ – ནེཀྑམྨཝིཏཀྐོ ཨབྱཱཔཱདཝིཏཀྐོ ཨཝིཧིཾསཱཝིཏཀྐོ. ཏཏྠ པཋམཱབྷིནིཔཱཏོ ཝིཏཀྐོ, པཊིལདྡྷསྶ ཝིཙརཎཾ ཝིཙཱརོ. ཡཐཱ པུརིསོ དཱུརཏོ པུརིསཾ པསྶཏི ཨཱགཙྪནྟཾ, ན ཙ ཏཱཝ ཛཱནཱཏི ཨེསོ ཨིཏྠཱིཏི ཝཱ པུརིསོཏི ཝཱ ཡདཱ ཏུ པཊིལབྷཏི ཨིཏྠཱིཏི ཝཱ པུརིསོཏི ཝཱ ཨེཝཾ ཝཎྞོཏི ཝཱ ཨེཝཾ སཎྛཱནོཏི ཝཱ ཨིམེ ཝིཏཀྐཡནྟོ ཨུཏྟརི ཨུཔཔརིཀྑནྟི ཀིཾ ནུ ཁོ ཨཡཾ སཱིལཝཱ ཨུདཱཧུ དུསྶཱིལོ ཨཌྜྷོ ཝཱ དུགྒཏོཏི ཝཱ. ཨེཝཾ ཝིཙཱརོ ཝིཏཀྐེ ཨཔྤེཏི, ཝིཙཱརོ ཙརིཡཏི ཙ ཨནུཝཏྟཏི ཙ. ཡཐཱ པཀྑཱི པུབྦཾ ཨཱཡཱུཧཏི པཙྪཱ ནཱཡཱུཧཏི ཡཐཱ ཨཱཡཱུཧནཱ ཨེཝཾ ཝིཏཀྐོ, ཡཐཱ པཀྑཱནཾ པསཱརཎཾ ¶ ཨེཝཾ ཝིཙཱརོ ཨནུཔཱལཏི ཝིཏཀྐེཏི ཝིཙརཏི ཝིཙཱརེཏི. ཝིཏཀྐཡཏི ཝིཏཀྐེཏི, ཨནུཝིཙརཏི ཝིཙཱརེཏི. ཀཱམསཉྙཱཡ པཊིཔཀྑོ ཝིཏཀྐོ, བྱཱཔཱདསཉྙཱཡ ཝིཧིཾསསཉྙཱཡ ཙ པཊིཔཀྑོ ཝིཙཱརོ. ཝིཏཀྐཱནཾ ཀམྨཾ ཨཀུསལསྶ ཨམནསིཀཱརོ, ཝིཙཱརཱནཾ ཀམྨཾ ཛེཊྛཱནཾ སཾཝཱརཎཱ. ཡཐཱ པལིཀོ ཏུཎྷིཀོ སཛ྄ཛྷཱཡཾ ཀརོཏི ཨེཝཾ ཝིཏཀྐོ, ཡཐཱ ཏཾཡེཝ ཨནུཔསྶཏི ཨེཝཾ ཝིཙཱརོ. ཡཐཱ ཨཔརིཉྙཱ ཨེཝཾ ཝིཏཀྐོ. ཡཐཱ པརིཉྙཱ ཨེཝཾ ཝིཙཱརོ. ནིརུཏྟིཔཊིསམྦྷིདཱཡཉྩ པཊིབྷཱནཔཊིསམྦྷིདཱཡཉྩ ཝིཏཀྐོ, དྷམྨཔཊིསམྦྷིདཱཡཉྩ ཨཏྠཔཊིསམྦྷིདཱཡཉྩ ཝིཙཱརོ. ཀལླིཏཱ ཀོསལླཏྟཾ ཙིཏྟསྶ ཝིཏཀྐོ, ཨབྷིནཱིཧཱརཀོསལླཾ ཙིཏྟསྶ ཝིཙཱརོ ¶ . ཨིདཾ ཀུསལཾ ཨིདཾ ཨཀུསལཾ ཨིདཾ བྷཱཝེཏབྦཾ ཨིདཾ པཧཱཏབྦཾ ཨིདཾ སཙྪིཀཱཏབྦནྟི ཝིཏཀྐོ, ཡཐཱ པཧཱནཉྩ བྷཱཝནཱ ཙ སཙྪིཀིརིཡཱ ཙ ཨེཝཾ ཝིཙཱརོ. ཨིམེསུ ཝིཏཀྐཝིཙཱརེསུ ཋིཏསྶ དུཝིདྷཾ དུཀྑཾ ན ཨུཔྤཛྫཏི ཀཱཡིཀཉྩ ཙེཏསིཀཉྩ; དུཝིདྷཾ སུཁཾ ཨུཔྤཛྫཏི ཀཱཡིཀཉྩ ¶ ཙེཏསིཀཉྩ. ཨིཏི ཝིཏཀྐཛནིཏཾ ཙེཏསིཀཾ སུཁཾ པཱིཏི ཀཱཡིཀཾ སུཁཾ ཀཱཡིཀོཡེཝ. ཡཱ ཏཏྠ ཙིཏྟསྶ ཨེཀགྒཏཱ, ཨཡཾ སམཱདྷི. ཨིཏི པཋམཾ ཛྷཱནཾ པཉྩངྒཝིཔྤཧཱིནཾ པཉྩངྒསམནྣཱགཏཾ.

ཏེསཾཡེཝ ཝིཏཀྐཝིཙཱརཱནཾ ཨབྷིཀྑཎཾ ཨཱསེཝནཱཡ ཏསྶ ཏཔྤོཎམཱནསཾ ཧོཏི. ཏསྶ ཝིཏཀྐཝིཙཱརཱ ཨོལཱ༹རིཀཱ ཁཱཡནྟི. ཡཉྩ པཱིཏིསུཁཉྩ ནེཀྑམྨཉྩ ཨོལཱ༹རིཀཾ བྷཝཏི. ཨཔི ཙ སམཱདྷིཛཱ པཱིཏི རཏི ཙ ཛཱཡཏི. ཏསྶ ཝིཙཱརཱརམྨཎཾ. ཏེསཾ ཝཱུཔསམཱ ཨཛ྄ཛྷཏྟཾ ཙེཏོ སམྤསཱིདཏི. ཡེ ཝིཏཀྐཝིཙཱརཱ དྭེ དྷམྨཱནུསྶརིཏབྦཱ. པཙྩུཔྤནྣཱ དརཎིཏབྦཾ. ཏེསཾ ཝཱུཔསམཱ ཨེཀོདིབྷཱཝཾ ཙིཏྟེཀགྒཏཾ ཧོཏི. ཏསྶ ཨེཀོདིབྷཱཝེན པཱིཏི པཱརིཔཱུརིཾ གཙྪཏི. ཡཱ པཱིཏི, ཏཾ སོམནསྶིནྡྲིཡཾ, ཡཾ སུཁཾ, ཏཾ སུཁིནྡྲིཡཾ. ཡཱ ཙིཏྟེཀགྒཏཱ, ཨཡཾ སམཱདྷི. ཏཾ དུཏིཡཾ ཛྷཱནཾ ཙཏུརངྒསམནྣཱགཏཾ. སོ པཱིཏིཡཱ ཝིརཱགཱ ཡཱཏི ཨོཛཧི ཛལླསཧགཏཾ.

༧༣. ཏཏྠ སོམནསྶཙིཏྟམུཔཱདཱནནྟི ཙ སོ ཏཾ ཝིཙིནནྟོ ཨུཔེཀྑམེཝ མནསིཀརོཏི. སོ པཱིཏིཡཱ ཝིརཱགཱ ཨུཔེཀྑཀོ ཝིཧརཏི. ཡཐཱ ཙ པཱིཏིཡཱ སུཁམཱནིཏཾ, ཏཾ ཀཱཡེན པཊིསཾཝེདེཏི སམྤཛཱནོ ཝིཧརཏི. ཡེན སཏིསམྤཛཉྙེན ཨུཔེཀྑཱཔཱརིཔཱུརིཾ གཙྪཏི. ཨིདཾ ཏཏིཡཾ ཛྷཱནཾ ཙཏུརངྒསམནྣཱགཏཾ.

ཏཐཱ ¶ ཀཱཡིཀསྶ སུཁསྶ པཧཱནཱཡ པཋམེ ཛྷཱནེ སོམནསྶིནྡྲིཡཾ ནིརུཛ྄ཛྷཏི. དུཏིཡེ ཛྷཱནེ དུཀྑིནྡྲིཡཾ ནིརུཛ྄ཛྷཏི. སོ སུཁསྶ ཙ པཧཱནཱ དུཀྑསྶ ཙ པཧཱནཱ པུབྦེཝ སོམནསྶདོམནསྶཱནཾ ཨཏྠངྒམཱ ཨདུཀྑམསུཁཾ ཨུཔེཀྑཱསཏིཔཱརིསུདྡྷིཾ ཙཏུཏྠཾ ཛྷཱནཾ ཨུཔསམྤཛྫ ཝིཧརཏི ¶ . ཏཏྠ ཙཏཱུཧི ཨིནྡྲིཡེཧི ཨུཔེཀྑཱ པསཱདཱ ཧོཏི, དུཀྑིནྡྲིཡེན དོམནསྶིནྡྲིཡེན སུཁིནྡྲིཡེན སོམནསྶིནྡྲིཡེན ཙ. ཏེསཾ ནིརོདྷཱ ཨུཔེཀྑཱསམྤཛཉྙཾ ཧོཏི, ཏཏྠ སུཁིནྡྲིཡེན སོམནསྶིནྡྲིཡེན ཙ ཨསཏི ཧོཏི, ཏེསཾ ནིརོདྷཱ སཏིམཱ ཧོཏི, དུཀྑིནྡྲིཡེན དོམནསྶིནྡྲིཡེན ཙ ཨསམྤཛཉྙཾ, ཏེསཾ ནིརོདྷཱ སམྤཛཉྙཾ ཧོཏི, ཨིཏི ཨུཔེཀྑཱཡ ཙ སཉྙཱ, སཏོ སམྤཛཱནོ ཙིཏྟེཀགྒཏཱ ཙ ཨིདཾ ཝུཙྩཏེ ཙ ཙཏུཏྠཾ ཛྷཱནཾ.

ཏཏྠ ཡོ རཱགཙརིཏོ པུགྒལོ ཏསྶ སུཁིནྡྲིཡཉྩ སོམནསྶིནྡྲིཡཉྩ; ཡོ དོསཙརིཏོ པུགྒལོ ཏསྶ དུཀྑིནྡྲིཡཉྩ དོམནསྶིནྡྲིཡཉྩ; ཡོ མོཧཙརིཏོ པུགྒལོ ཏསྶ ཨསཏི ཙ ཨསམྤཛཉྙཉྩ.

ཏཏྠ ¶ རཱགཙརིཏསྶ པུགྒལསྶ ཏཏིཡེ ཛྷཱནེ ཙཏུཏྠེ ཙ ཨནུནཡོ ནིརུཛ྄ཛྷཏི, དོསཙརིཏསྶ པཋམེ ཛྷཱནེ དུཏིཡེ ཙ པཊིགྷཾ ནིརུཛ྄ཛྷཏི, མོཧཙརིཏསྶ པུགྒལསྶ པཋམེ ཛྷཱནེ དུཏིཡེ ཙ ཨསམྤཛཉྙཾ ནིརུཛ྄ཛྷཏི. ཏཏིཡེ ཛྷཱནེ ཙཏུཏྠེ ཙ ཨསཏི ནིརུཛ྄ཛྷཏི, ཨེཝམེཝ ཏེསཾ ཏིཎྞཾ པུགྒལཱནཾ ཙཏྟཱརི ཛྷཱནཱནི ཝོདཱནཾ གམིསྶནྟི.

ཏཏྠ རཱགདོསཙརིཏསྶ པུགྒལསྶ ཨསམྤཛཉྙཉྩ ཨནུནཡོ ཙ པཊིགྷཉྩ, ཏེན ཧཱནབྷཱགིཡཾ [པཧཱནབྷཱགིཡཾ (པཱི. ཀ.)] ཛྷཱནཾ ཧོཏི. ཏཏྠ ¶ རཱགམོཧཙརིཏསྶ པུགྒལསྶ ཨནུནཡཏྟཾ ཙ ཨཱདཱིནཝཾ དསྶིཏཱ, ཏཾ ཏསྶ ཧཱནབྷཱགིཡཾ ཛྷཱནཾ ཧོཏི. ཏཏྠ དོསམོཧཙརིཏསྶ པུགྒལསྶ པཊིགྷོ ཙ ཨསཏི ཙ ཨསམྤཛཉྙཉྩ ཨཱདཱིནཝཾ དསྶིཏཱ ཏེན ཏསྶ ཧཱནབྷཱགིཡཾ ཛྷཱནཾ ཧོཏི.

ཏཏྠ རཱགདོསམོཧསམབྷཱགཙརིཏསྶ པུགྒལསྶ ཝིསེསབྷཱགིཡཾ ཛྷཱནཾ ཧོཏི, ཨིམཱནི ཙཏྟཱརི ཛྷཱནཱནི སཏྟསུ པུགྒལེསུ ནིདྡིསིཏབྦཱནི. ཙཏཱུསུ ཙ སམཱདྷཱིསུ ཚནྡསམཱདྷིནཱ པཋམཾ ཛྷཱནཾ, ཝཱིརིཡསམཱདྷིནཱ དུཏིཡཾ ཛྷཱནཾ, ཙིཏྟསམཱདྷིནཱ ཏཏིཡཾ ཛྷཱནཾ, ཝཱིམཾསཱསམཱདྷིནཱ ཙཏུཏྠཾ ཛྷཱནཾ. ཨཔྤཎིཧིཏེན པཋམཾ ཛྷཱནཾ, སུཉྙཏཱཡ དུཏིཡཾ ཛྷཱནཾ, ཨནིམིཏྟེན ཏཏིཡཾ ཛྷཱནཾ, ཨཱནཱཔཱནསྶཏིཡཱ ཙཏུཏྠཾ ཛྷཱནཾ. ཀཱམཝིཏཀྐབྱཱཔཱདཱནཉྩ ཏཾ ཏཾ ཝཱུཔསམེན པཋམཾ ཛྷཱནཾ ཧོཏི, ཝིཏཀྐཝིཙཱརཱནཾ ཝཱུཔསམེན དུཏིཡཾ ཛྷཱནཾ, སུཁིནྡྲིཡསོམནསྶིནྡྲིཡཱནཾ ཝཱུཔསམེན ཏཏིཡཾ ཛྷཱནཾ, ཀཱཡསངྑཱརཱནཾ ཝཱུཔསམེན ཙཏུཏྠཾ ཛྷཱནཉྩ. ཙཱགཱདྷིཊྛཱནེན པཋམཾ ཛྷཱནཾ, སཙྩཱདྷིཊྛཱནེན དུཏིཡཾ ཛྷཱནཾ, པཉྙཱདྷིཊྛཱནེན ཏཏིཡཾ ཛྷཱནཾ, ཨུཔསམཱདྷིཊྛཱནེན ཙཏུཏྠཾ ཛྷཱནཾ. ཨིམཱནི ཙཏྟཱརི ཛྷཱནཱནི སངྑེཔནིདྡེསེན ནིདྡིཊྛཱནི, ཏཏྠ སམཱདྷིནྡྲིཡཾ པཱརིཔཱུརིཾ གཙྪཏི. ཨནུཝཏྟནཀཱནི ཙཏྟཱརི, ཏཏྠ ཡོ པཋམཾ ཛྷཱནཾ ནིསྶཱཡ ཨཱསཝཀྑཡཾ པཱཔུཎཱཏི, སོ སུཁཱཡ ¶ པཊིཔདཱཡ དནྡྷཱབྷིཉྙཱཡ དོམནསྶིནྡྲིཡཔཊིཔཀྑེན. ཡོ དུཏིཡཾ ཛྷཱནཾ ནིསྶཱཡ ཨཱསཝཱནཾ ཁཡཾ པཱཔུཎཱཏི, སོ སུཁཱཡ པཊིཔདཱཡ ཁིཔྤཱབྷིཉྙཱཡ དུཀྑིནྡྲིཡཔཊིཔཀྑེན. ཡོ ཏཏིཡཾ ཛྷཱནཾ ནིསྶཱཡ ཨཱསཝཱནཾ ཁཡཾ པཱཔུཎཱཏི, སོ སུཁཱཡ པཊིཔདཱཡ དནྡྷཱབྷིཉྙཱཡ སོམནསྶིནྡྲིཡཔཊིཔཀྑེན. ཡོ ཙཏུཏྠཾ ཛྷཱནཾ ¶ ནིསྶཱཡ ཨཱསཝཱནཾ ཁཡཾ པཱཔུཎཱཏི, སོ སུཁཱཡ པཊིཔདཱཡ ཁིཔྤཱབྷིཉྙཱཡ སུཁིནྡྲིཡཔཊིཔཀྑེན གཏོ.

༧༤. ཡཱནི ¶ ཙཏྟཱརི ཛྷཱནཱནི, ཏེསཾ ཛྷཱནཱནཾ ཨིམཱནི ཨངྒཱནི, ཏེསཾ ཨངྒཱནཾ སམཱུཧོ [སམྨོཧོ (པཱི. ཀ.)] ཨསྶ ཨངྒཱ, ཨཡཾ ཛྷཱནབྷཱུམི ཀོ ཝིསེསོཏི ཨསྶ ཝིསེསོ. ཨིམེ སམྦྷཱརཱ ཏེཧི ཨཡཾ སམུདཱགམོ, ཏསྶ སམུདཱགམསྶ ཨཡཾ ཨུཔནིསཱ, ཏཱཡ ཨུཔནིསཱཡ ཨཡཾ བྷཱཝནཱ. ཏསྶཱ བྷཱཝནཱཡ ཨཡཾ ཨཱདཱིནཝོ. ཏེན ཨཡཾ པརིཧཱནི. ཀསྶ པརིཧཱནཱིཏི ཏདུཔགཛ྄ཛྷཱཡིནོ [ཏདུཔཀཛ྄ཛྷཱཡིནོ (པཱི. ཀ.)]. ཏཾ ཡཐཱ བྷཎིཏཾ པཙྩཝེཀྑནྟོ ཨཡཾ ཝིསེསོ. ཏེན ཝིསེསེན ཨཡཾ ཨསྶཱདོ, སོ ཀསྶ ཨསྶཱདོ ཨཛྷཱནིཡཱ ཛྷཱཡིནོ, ཏསྶཱ ཨཛྷཱནིཡཱ ཛྷཱཡིནོ, ཨིདཾ ཀལླིཏཱ ཀོསལླེ ཋིཏཛ྄ཛྷཱནཾ ཨནོམདྡིཡཏཾ གཙྪཏི ཛྷཱནབལཾ, ཛྷཱནབལེ ཋིཏསྶ ཨཡཾ པཱརམིཔྤཏྟསྶ ཨིམཱནི ཛྷཱནངྒཱནི ཨནཱཝིལསངྐཔྤོ པཋམེ ཛྷཱནེ ཛྷཱནངྒཱནི བྷཱཝཱི. སོ པཱིཏི ཏདནུསཱརིཏྟཱཝ པཋམེ ཛྷཱནེ ཛྷཱནངྒཾ ཏསྶངྒུནོ ཙ དྷམྨཱ ཏདབྷིསནྣིཏཱཡ ཙ. པཱིཏི དུཏིཡེ ཛྷཱནེ ཛྷཱནངྒདྷམྨཏཱ ཁོ པན ཏཐཱ པཝཏྟསྶ སཧགཏཾ ཛྷཱནངྒདྷམྨཾ སསུཁཏཱཡ ཨཛ྄ཛྷཏྟཾ སམྤསཱདོ དུཏིཡེ ཛྷཱནེ ཛྷཱནངྒཾ མནོསམྤསཱདནཏཱཡ ¶ ཏདབྷིསནྣིཏཱཡ ཙ. པཱིཏི དུཏིཡེ ཛྷཱནེ ཛྷཱནངྒཾ ཨཛ྄ཛྷཏྟཾ སམྤསཱདནཾ སམཱདྷིཏཱ [སམཱདྷིཀཱ (པཱི.)] པཱིཏི དུཏིཡེ ཛྷཱནེ ཛྷཱནངྒཾ, ཙེཏསོ ཨེཀོདིབྷཱཝོ དུཏིཡེ ཛྷཱནེ ཛྷཱནངྒཾ, ཨུཔེཀྑཱ ཕསྶཏཱ ཏཏིཡེ ཛྷཱནེ ཛྷཱནངྒཾ, སུཁཾ ཏསྶ ཨངྒནྟི ཙ. ཙེཏསོ ཨེཀོདིབྷཱཝོ ཙཏུཏྠེ ཛྷཱནེ ཛྷཱནངྒཾ, ཨུཔེཀྑཱ ཨདུཀྑམསུཁཱ ཙཏུཏྠེ ཛྷཱནེ ཛྷཱནངྒཾ, ཨབྷིནིསཱབྷཱུམི ཨུཔེཀྑཱསཏིཔཱརིསུདྡྷི ཙཏུཏྠེ ཛྷཱནེ ཛྷཱནངྒཾ. སཏིཔཱརིསུདྡྷི ཙ ཨནེཀཛ྄ཛྷཱབྷཱུམཱིསུ ཛྷཱནངྒསམཱཡུཏྟཱ པཱིཏི ཙེཏསོ ཨེཀོདིབྷཱཝོ ཙཏུཏྠེ ཛྷཱནེ ཛྷཱནངྒཾ.

ཏཏྠ ཀཏམཱ ཛྷཱནབྷཱུམི? སཝིཏཀྐེ སཝིཙཱརེ ཝིཝེཀཱ ཨནུགཏཱ པཋམེ ཛྷཱནེ ཛྷཱནབྷཱུམི. ཨཝིཏཀྐེ ཨཝིཙཱརེ ཨཛ྄ཛྷཏྟཾ སམྤསཱདནཾ ཛནིཏཾ པཱིཏིམནུགཏཱ དུཏིཡེ ཛྷཱནེ ཛྷཱནབྷཱུམི. སུཁསཱཏསམོཧིཏཱ སཔྤཱིཏིཀཱ ཏཏིཡེ ཛྷཱནེ ཛྷཱནབྷཱུམི. ཏསྶ སུཁདུཀྑསཧགཏཱ ཨབྷིནཱིཧཱརསཧགཏཱ ཙཏུཏྠེ ཛྷཱནེ ཛྷཱནབྷཱུམི. ཨཔྤམཱཎསཧགཏཱ སཏྟཱརམྨཎཱ པཋམེ ཛྷཱནེ ཛྷཱནབྷཱུམི. ཨབྷིབྷཱུམིཨཱཡཏནསཧགཏཱ རཱུཔསཉྙཱིསུ དུཏིཡེ ཛྷཱནེ ཛྷཱནབྷཱུམི. ཝིམོཀྑསཧགཏཱནཾ ¶ ཝིམོཀྑེསུ ཏཏིཡེ ཛྷཱནེ ཛྷཱནབྷཱུམི. ཨནུཔསྶནཱསཧགཏཱ ཀཱཡསངྑཱརཱ སམྨཱ ཙཏུཏྠསྶ ཛྷཱནསྶ བྷཱུམི.

༧༥. ཏཏྠ ¶ ཀཏམེ ཛྷཱནཝིསེསཱ? ཝིཝིཙྩེཝ ཀཱམེཧི ཝིཝིཙྩ པཱཔཀེཧི ཨཀུསལེཧི དྷམྨེཧི ཙིཏྟཙེཏསིཀསཧགཏཱ ཀཱམདྷཱཏུསམཏིཀྐམནཏཱཔི, ཨཡཾ ཛྷཱནཝིསེསོ. ཨཝིཏཀྐཱ ཙེཝ ཨཝིཙཱརཱ ཙ སཔྤཱིཏིཀཱཡ སཏིསཧགཏཱཡ པཱིཏིསཧགཏཱ སཉྙཱམནསིཀཱརཱ སམུདཱཙརནྟི. ཨཡཾ ¶ ཛྷཱནཝིསེསོ. ཨཝིཏཀྐཱཡ བྷཱུམིཡཱ ཨཝིཙཱརེཡེཝ སཏི ཨནུགཏཱ ཨུཔེཀྑཱསཧགཏཱ མནསིཀཱརཱ སམུདཱཙརནྟི. ཏདནུདྷམྨཏཱཡ ཙ སཏི སཎྜཧཏི [སནྡཧཏི (པཱི.)]. ཏཉྩ བྷཱུམིཾ ཨུཔསམྤཛྫ ཝིཧརཏི, ཨཡཾ ཛྷཱནཝིསེསོ. སཏིཔཱརིསུདྡྷིསཧགཏཱ སཉྙཱམནསིཀཱརཱ སམུདཱཙརནྟི, ཏཉྩ བྷཱུམིཾ ཨུཔསམྤཛྫ ཝིཧརཏི, ཨཡཾ ཛྷཱནཝིསེསོ. ཝིཉྙཱཎཉྩཱཡཏནསཧགཏཱཡ བྷཱུམིཡཾ ཨཱཀིཉྩཉྙཱཡཏནསཧགཏཱ སཉྙཱམནསིཀཱརཱ སམུདཱཙརནྟི, ཏཉྩ བྷཱུམིཾ ཨུཔསམྤཛྫ ཝིཧརཏི, ཨཡཾ ཛྷཱནཝིསེསོ.

ཛྷཱནསམྦྷཱརཱ ནེཀྑམྨཝིཏཀྐོ སམྦྷཱརོ ཀཱམཝིཏཀྐཝིནོདནཱདྷིཔྤཱཡཏཱ. ཨབྱཱཔཱདཝིཏཀྐོ སམྦྷཱརོ བྱཱཔཱདཝིཏཀྐཔཊིཝིནོདནཱདྷིཔྤཱཡཏཱ. ཨཝིཧིཾསཱཝིཏཀྐོ སམྦྷཱརོ ཝིཧིཾསཱཝིཏཀྐཔཊིཝིནོདནཱདྷིཔྤཱཡཏཱ. ཨིནྡྲིཡེསུ གུཏྟདྭཱརཏཱ ཨཔྤིཙྪཏཱ སམྦྷཱརོ པརིསུདྡྷཱཛཱིཝོ ཙཏུནྣཾ སམཱཔཏྟཱིནཾ སམྦྷཱརོ ཨཀམྨསྶ ཝིཧཱརིཏཱ. མགྒསམྦྷཱརོ སམཱཔཏྟིཔཛྫནཏཱ. ཕལསམྦྷཱརོ ཛྷཱནནིབྦཏྟིཏཱཡ ཛྷཱནསམུདཱགམོ. ཀུསལཧེཏུ ཡཾ ཛྷཱནཾ སམུདཡཾ གཙྪནྟི ཀོ ཙ [ཀོཙི (ཀ.)] ན ཀུཏོཙི ནེཀྑམྨཔྤཏྟཱ སམུདཱགཙྪནྟི. ཨཱལམྦནིརོདྷསམཱདྷི སནྟོ སམུདཱགཙྪནྟི. ཨཝཱིཏིཀྐནྟཱ སམུདཱགཙྪནྟི. སུཁིནྡྲིཡཾ སོམནསྶིནྡྲིཡཾ པཧཱནཱཡ ཏེ ཙ ཨབྱཱཔཛྫཏཱཡ སམུདཱགཙྪནྟི. ཏཾ པན སནྡྷཱཡ སམུདཱགཙྪནྟི. ཨཔརིདཱཧནཱཡ སམུདཱགཙྪནྟི. ཨཡཾ ཉཱཎསམུདཱགམོ.

༧༦. ཏཏྠ ཀཏམཱ ཨུཔནིསཱ? ཀལྱཱཎམིཏྟཏཱ ¶ ཛྷཱནསྶ ཨུཔནིསཱ. ཀལྱཱཎསམྤཝངྐཏཱ ཛྷཱནསྶ ཨུཔནིསཱ. ཨིནྡྲིཡེསུ གུཏྟདྭཱརཏཱ ཛྷཱནསྶ ཨུཔནིསཱ. ཨསནྟུཊྛིཏཱ ཀུསལེསུ དྷམྨེསུ ཛྷཱནསྶ ཨུཔནིསཱ. སདྡྷམྨསྶཝནཾ ཛྷཱནསྶ ཨུཔནིསཱ. སཾཝེཛནིཡེ ཋཱནེ སཾཝིགྒསྶ ཡོནིསོ པདྷཱནཾ. ཨཡཾ ཛྷཱནོཔནིསཱ.

ཏཏྠ ¶ ཀཏམཱ བྷཱཝནཱ? མེཏྟཱསེཝནཱ ཨབྱཱཔཱདཝིཏཀྐབྷཱཝནཱ. ཀརུཎཱསེཝནཱ ཨཝིཧིཾསཱཝིཏཀྐབྷཱཝནཱ. མུདིཏཱབྷཱཝནཱ པཱིཏིསུཁསམྤཛཉྙཱ ཀཱརིཏཱ. ཨུཔེཀྑཱབྷཱཝནཱ པསྶཝཏཱ ¶ ཨུཔེཀྑཱབྷཱཝནཱ ཨཔསྶཝཏཱ ཨུཔེཀྑཱ ཙ ཨཛ྄ཛྷུཔེཀྑཱ ཙ, ཨསུབྷསཉྙཱབྷཱཝནཱ དུཀྑཱཔཊིཔདཱ དནྡྷཱབྷིཉྙཱ བྷཝསནྡྷཱབྷིཉྙཱ བྷཝསནྡྷཱནཾ, སཱ ཚབྦིདྷཱ བྷཱཝནཱ བྷཱཝིཏཱ བཧུལཱིཀཏཱ ཨནུཊྛིཏཱ ཝཏྠུཀཏཱ ཡཱནཱིཀཏཱ པརིཙིཏཱ སུསམཱརདྡྷཱ. ཨཡཾ བྷཱཝནཱ.

ཨེཝཾ བྷཱཝཡནྟསྶ ཨཡཾ ཨཱདཱིནཝོ. པཋམེ ཛྷཱནེ སངྑཱརསམནྣཱགཏོ ཨེསོ དྷམྨོ ཨསྶུཏོ སཱསཝོ. སཙེ ཨེས དྷམྨོ ཨཡཾ སཱིལོ ཨཱསནྣཔཊིཔཀྑོ ཙ ཨེས དྷམྨོ ཀཱམོ པཏིཙཱརོ པཏིཝིཙཱརོ སམཱཔཏྟཱིནཾ ཙ སབྦོལཱ༹རིཀོ ཨེས དྷམྨོ ཝིཏཀྐཝིཙཱརོ ཙ. ཏཏྠ ཙིཏྟཾ ཁོབྷེནྟི, ཀཱཡོ ཙེཏྠ ཀིལམཏི, ཀཱཡམྷི ཙེཏྠ ཀིལནྟེ ཙིཏྟཾ ཝིཧཉྙཏི. ཨནབྷིནཱིཧཱརཀྑམོཝ ཨབྷིཉྙཱནཾ ཨིམེ ཨཱདཱིནཝཱ པཋམེ ཛྷཱནེ.

དུཏིཡེ ¶ ཛྷཱནེ ཨིམེ ཨཱདཱིནཝཱ པཱིཏིཕརཎསཧགཏོ ཙ ཨེསོ དྷམྨོ, ན སམུདཱཙཱརསྶེཏི ཙིཏྟཾ. ཨསོདྷཡཾ ཨུཔགམོ ཙེས དྷམྨོ ཨུཔགམིཔརིསྶཡོ [ཨུཔགམིཔརིཙཡོ (པཱི.)] དོམནསྶཔཙྩཏྠིཀོ ཙེས དྷམྨོ. ཏཏྠ ཏཏྠ ཡུཏྟཱིནཾ པཱིཏི པརཛྫཏོ ཙེས དྷམྨོ དུཀྐརཾ ཧོཏི, ཨཝཏྟསནྟཱསབྷཱུམིཔརིཝཛྫཡནྟོ ཙཏཱུསུ དུཀྑཏཱསུ ཨེས དྷམྨོ ཨནུཝིདྡྷཱཔནསདྡྷཱཡ [ཨནུཝིདྡྷཱ པསྶཏིཡཱ (པཱི.)] དུཀྑཏཱཡ ཙ ན པལིབོདྷདུཀྑཏཱཡ ཙ ཨབྷིཉྙཱདུཀྑཏཱཡ ཙ རོགདུཀྑཏཱཡ ཙ, ཨིམེ ཨཱདཱིནཝཱ དུཏིཡེ ཛྷཱནེ.

ཏཏྠ ཀཏམེ ཨཱདཱིནཝཱ ཏཏིཡེ ཛྷཱནེ? ཨུཔེཀྑཱསུཁསཧགཏཱཡ ཏཏྠ སཱཏཱཝཱིནཾ པཉྩནྣཾ ཨུཔེཀྑཱསུཁཾ པརིཝཏྟིཏོ ཨེས དྷམྨོ ཏེན ནིཙྩསཉྙིཏཱནཉྩ ཡཾ ཧོཏི. དུཀྑོཔནིཡཾ སུཁཾ ཙིཏྟསྶ སངྑོབྷཏཾ ཨུཔཱདཱཡ སུཁདུཀྑཱཡ གཏོ སཝཏི. སུཁདུཀྑཱནུཀཏཉྩ ཨུཔཱདཱཡ ཨནབྷིཧཱརཀྑམཾ ཙིཏྟཾ ཧོཏི. ཨབྷིཉྙཱཡ སཙྪིཀིརིཡཱསུ སབྦེཔི ཙེཏེ དྷམྨཱ ཏཱིསུ ཛྷཱནསམཱཔཏྟཱིསུ ཙཏཱུཧི ཙ དུཀྑཏཱཧི ཨནུཝིདྡྷཱནཾ སཱ བྷཡཱ དུཀྑཏཱཡ པལིབོདྷདུཀྑཏཱཡ ཙ ཨབྷིཉྙཱཡ དུཀྑཏཱཡ ཙ ཨིམེ ཨཱདཱིནཝཱ ཏཏིཡེ ཛྷཱནེ.

ཏཏྠ ¶ ཀཏམེ ¶ ཨཱདཱིནཝཱ ཙཏུཏྠེ ཛྷཱནེ? ཨཱཀིཉྩཉྙཱསམཱཔཏྟིཀཱ ཏེ དྷམྨཱནུསམཱཔཏྟིཀཱ ཨེཏིསྶཱ ཙ བྷཱུམིཡཾ སཱཏཱནཾ བཱལཔུཐུཛྫནཱནཾ ཨནེཀཝིདྷཱནི དིཊྛིགཏཱནི ཨུཔྤཛྫནྟི. ཨོལཱ༹རིཀཱ སུཁུམེཧི ཙ རཱུཔསཉྙཱཧི ཨནུཝིདྷཱནི ཨེཏཱནི ཛྷཱནཱནི སདཱ ཨནུདཡམེཏྟཱཛྷཱནཀལཱནུདནུཀལཱཡ སཱདྷཱརཎཱ, དུཀྐརཱ ཙ སབྦེ ཙཏྟཱརོ མཧཱསམྦྷཱརཱ སམུདཱགཏཱནི ཙ ཨེཏཱནི ཛྷཱནཱནི ཨཉྙམཉྙཾ ནིསྶཱཡ སམུདཱགཙྪནྟི. ཨེཏྠ སམུདཱགཏཱ ཙ ཨེཏེ དྷམྨཱ ན སམཏྟཱ ཧོནྟི. ཨསམུགྒཧིཏནིམིཏྟཱ ཙ ཨེཏེ དྷམྨཱ པརིཧཱཡནྟི. ནིརུཛ྄ཛྷནྟི ཙ ཨེཏེ དྷམྨཱ ན ཨུཔཱདིཡནྟི ནིརུཛ྄ཛྷངྒཱནི ཙ, ཨེཏེསཾ དྷམྨཱནཾ ཛྷཱནཱནི ནིམིཏྟཱནི ན ཛྷཱནནིམིཏྟསཉྙཱ ¶ ཝོཀིརཏི. ཨཔྤཊིལདྡྷཔུབྦཱ ཙ ཛྷཱཡཱིཝསེན ཙ བྷཝཏི [ཛྷཱཡཱི ཙ ཝསེན ཙ བྷཝཏི (པཱི. ཀ.)]. ཨིམེཧི ཨཱདཱིནཝེཧི ཨཡཾ ཛྷཱནཔརིཧཱནི.

༧༧. ནིརོདྷསམཱཔཏྟིཡཱ ཨཔཊིསངྑཱཡ ཨཝསེསསཉྙིནོ ཨཱཀིཉྩཉྙཱཡཏནསཧགཏཱ སཉྙཱམནསིཀཱརཱ སམུདཱཙརནྟི, སོ ནིརོདྷསམཱཔཏྟིཏོ པརིཧཱཡཏི. ཨཱནེཉྫསཉྙིནོ ཨསཉྙཱཡཏནཾ སམཱཔནྣསྶ ཨཱཀིཉྩཉྙཱཡཏནསཧགཏཱ མནསིཀཱརཱ སམུདཱཙརནྟི, ཏཉྩ བྷཱུམིཾ ན པཛཱནཱཏི, སོ ཏཏོ པརིཧཱཡཏི. ཨཱཀིཉྩཉྙཱཡཏནཾ སམཱཔནྣསྶ ཝིཉྙཱཎཉྩཱཡཏནསཉྙཱ མནསིཀཱརཱ སམུདཱཙརནྟི, ཏཉྩ བྷཱུམིཾ ན པཛཱནཱཏི, སོ ཏཏོ པརིཧཱཡཏི. ཝིཉྙཱཎཉྩཱཡཏནཾ སམཱཔནྣསྶ རཱུཔསཉྙཱསཧགཏཱ. ཝིཏྠཱརེན…པེ… ཡཱཝ པཋམེ ཛྷཱནེ ཀཱམསཉྙཱསཧགཏཱ ཀཱཏབྦཱ. སཀསྶ ¶ [སཱ ཏསྶ (པཱི. ཀ.)] པརིཧཱཡཏི, ཀལངྐཛ྄ཛྷཱནེ ཀལངྐཾ ཛྷཱཡཏི, པརིསམནྟཏོ ཛྷཱཡཏི, བྷིནྡནྟོ ཛྷཱཡཏི, ན སཛ྄ཛྷཱཡཏི, ཨཱཡཱུཧནྟོ ཛྷཱཡཏི, ཀིཉྩི ཙ ནིཔརིཙིཏོ ཛྷཱཡཏི. ཨཏིཝིདྷཱཝནྟོ ཛྷཱཡཏི, ཨཏིམཉྙནྟོ ཛྷཱཡཏི, ཀཱཡསངྑཱརེ ཨཔྤཊིསམྦྷཱརེ ཛྷཱཡཏི, པརིཡུཊྛཱནསྶ ནིསྶརཎཾ ཨཛཱནནྟོ ཛྷཱཡཏི, ནཱིཝརཎཱབྷིབྷཱུཏོ ཛྷཱཡཏི, ཨསྶཱཔཏྟིམནསིཀརོནྟོ ཛྷཱནསྶ ཨསྶཱདོ ཀཱམརཱགཔརིཡུཊྛཱནཾ པཧཱནཾ ཛྷཱནསྶ ཨསྶཱདོ ཀཱམརཱགཧེཏཱུནཾ དྷམྨཱནཾ ཨུདཡནྟི, ནིརུཛ྄ཛྷངྒཱནི ཨེཏེསཾ དྷམྨཱནཾ ཛྷཱནཱནི ཨུཔརིམཱ སུཁུཔེཀྑཱ ཀཱམཀམྨཀིལེསཱནཾ པཧཱནཾ ཨསྶཱདོ, ཨེཝཾ ཁོ པུན ཛྷཱནསྶ ཨསྶཱདོ མཧཱསཾཝཱསམཔྤཱིལི༹ཏེ ལོཀསཾནིཝཱསེ ཨསམྦོདྷོཀཱསཱ ཝིགམེསྶམིདཾ ཛྷཱནཔྤཧཱནཱ. ཨཡཾ པལིརོདྷམཔྤལིརོདྷལོཀསནྣིཝཱསེ ཨེསནིདྷམིདཾ ཛྷཱནཾ ཨནམཏགྒསཾསཱརསམཱཔནྣཱནཾ སཏྟཱནཾ སཾསཱརཔྤཧཱནནཱ ཨཱནིསཾསོ, ཡམིདཾ ཛྷཱནསྶ ¶ ཨསྶཱདོ ཀཱཡསྶ ཨཛྷཱནིཡཛྷཱཡིནོ བྷཝཏི. ཨཛྷཱནིཡཛྷཱནིཡཛྷཱཡཱིཧི ཨཔརཱམསནྟོ ཨཛྷཱནིཡཛྷཱཡིཏཾ ཛྷཱཡཏི, ཡཱནི ཀལངྐཛ྄ཛྷཱཡིནོ པདཱནི, ཏཱནི ཨནུདྷིཏཱནི པཊིཔཀྑེ.

༧༨. ཏཏྠ ཀཏམཾ ཛྷཱནཀོསལླཾ? སམཱཔཏྟིཀོསལླཾ ཛྷཱནཀོསལླཾ, ཛྷཱནཝིསེསཀོསལླཾ ཛྷཱནཀོསལླཾ, ཛྷཱནནྟརིཀཀོསལླཾ ཛྷཱནཀོསལླཾ, སམཱཔཏྟིཝུཊྛཱནཀོསལླཾ ཛྷཱནཀོསལླཾ, ཛྷཱནེ སབྷཱཝཀོསལླཾ ཛྷཱནཀོསལླཾ, ཛྷཱནེ ཨཱདཱིནཝཀོསལླཾ ཛྷཱནཀོསལླཾ, ཛྷཱནེ ནིསྶརཎཀོསལླཾ ཛྷཱནཀོསལླཾ, ཛྷཱནཕལེན ¶ ཨུཔཱདཱཡ ཀོསལླཾ, ཛྷཱནཕལེན པཊིསངྑཱནཕལེ ཨཔརིཧཱནདྷམྨཏཱ ནིབྦཏྟིཛྷཱནེ ཙ ཀཱིལི༹ཏཱཔི ཝིསེསབྷཱགིཡཾ ཛྷཱནཾ པཊིལབྦྷཏི. ཨིདཾ པནསྶཱཏི བྷཝཧཱརིཏཱ ཙ ཨཱརམྨཎཱནིམིཏྟགྒཱཧོ ཨནབྷིནཱིཧཱརབལཾ, ཙིཏྟེཀགྒཏཱ ནིམིཏྟཱསུ གཏིསཧིཏཱ སམཐབལེན ཨསཾསཱིདནཉྩ ཛྷཱནེ མགྒཕལཾ སམཐཾ པཝཏྟེ སམཱདྷིནོ ཨུཔེཀྑཱཔལིཔུབྦཱཔརནིམིཏྟཱསཡོ པགྒཱཧིནོ [མགྒཱཧིནོ (པཱི.)] སཏིབལཾ ཏཾ པཝཏྟིཏཱནཉྩ ཝིཔསྶནཱནཾ སམཉྙཱབལེ.

ཏཏྠ ¶ ཀཏམཱ ཛྷཱནཔཱརམིཏཱ? སུཔཱརམིཏཱ མེཏྟཱ ཀཱམེསུ སཏྟཱ ཀཱམསངྒསཏྟཱཏི [ཨུདཱ. ༦༣ ཨུདཱནེ པསྶིཏབྦཾ] ཡམྷི སུཏྟེ དེསནཱཡ ཝོཧཱརེན དྭེ སཙྩཱནི ནིདྡིཊྛཱནི, དུཀྑཉྩ སམུདཡོ ཙ, ཝིཙཡེན ཧཱརེན ཡེ སཾཡོཛནཱིཡེསུ དྷམྨེསུ ཝཛྫཾ ན པསྶནྟི, ཏེ ཨོགྷཾ ཏརིསྶནྟཱིཏི ནེཏཾ ཋཱནཾ ཝིཛྫཏི. ན ཏརིསྶནྟཱིཏི ཨཏྠི ཨེསཱ ཡུཏྟི ཙ ཝིཙཡོ ཙ ཨིདཾ ནུ ཀིསྶ པདཊྛཱནཾ, ཀཱམེསུ སཏྟཱཏི པཉྩ ཀཱམགུཎཱ, ཏཾ ཀཱམཏཎྷཱཡ པདཊྛཱནཾ. སཾཡོཛནེ ཝཛྫམཔསྶམཱནཱཏི ཨཝིཛྫཱཡ པདཊྛཱནཾ, ན ཧི ཛཱཏུ སཾཡོཛནསངྒསཏྟཱ ཨོགྷཾ ཏརེཡྻུཾ ཝིཔུལཾ མཧནྟནྟི ཨུཔཱདཱནསྶ པདཊྛཱནཾ. ཀཱམེསུ སཏྟཱཏི ཀཱམཱ དྭིདྷཱ – ཝཏྠུཀཱམཱ ཙ ཀིལེསཀཱམཱ ཙ, ཏཏྠ ¶ ཀིལེསཀཱམཱ ཀཱམཏཎྷཱ ཀཱམཏཎྷཱཡ ཡུཏྟཱ བྷཝནྟི རཱུཔཏཎྷཱ བྷཝཏཎྷཱ ལཀྑཎེན ཧཱརེན, སཾཡོཛནེ ཝཛྫམཔསྶམཱནཱཏི སཾཡོཛནསྶ. ཡོ ཏཏྠ ཚནྡརཱགོ ཏསྶ ཀིཾ པདཊྛཱནཾ? སུཁཱ ཝེདནཱ དྭེ ཙ ཨིནྡྲིཡཱནི – སུཁིནྡྲིཡཉྩ སོམནསྶིནྡྲིཡཉྩ. ཨིཏི སུཁཱཡ ཝེདནཱཡ གཧིཏཱཡ ཏཡོཔི ཝེདནཱ གཧིཏཱ ཧོནྟི. ཝེདནཱཀྑནྡྷེ གཧིཏེ སབྦེ པཉྩཀྑནྡྷཱ གཧིཏཱ ཧོནྟི. རཱུཔསདྡགནྡྷརསཕོཊྛབྦཱ གཧིཏཱ, ཝཏྠུཀཱམེསུ ¶ གཧིཏེསུ སབྦཱནི ཚ བཱཧིརཱནི ཨཱཡཏནཱནི གཧིཏཱནི ཧོནྟི. ཨཛ྄ཛྷཏྟིཀབཱཧིརེསུ ཨཱཡཏནེསུ ཡོ སཏོ, ཨཡཾ ཝུཙྩཏེ ལཀྑཎོ ཧཱརོ, ཏཏྠ ཡོ ཨོལཱ༹རིཀམྷི ཀིལེསེ ཨཛ྄ཛྷཱཝསིཏོ སབྦཀིལེསེསུ ཡོ ན ཏཏོ སུཁུམཏརེསུ ན ཝཱིཏརཱགོ བྷཝཏི. ཏཏྠ བཱཧིརསཾཡོཛནཾ མམནྟི ཨཛ྄ཛྷཏྟསཾཡོཛནཾ ཨཧནྟི. ཏཏྠ བྷགཝཏོ ཀོ ཨདྷིཔྤཱཡོ? ཡེ ཨོགྷཾ ཏརིཏུཀཱམཱ ཏེ སཾཡོཛནཱིཡེསུ དྷམྨེསུ ཨཱདཱིནཝཱནུཔསྶིནོ ཝིཧརིསྶནྟཱིཏི ཨཡམེཏྠ བྷགཝཏོ ཨདྷིཔྤཱཡོ. ཀཱམེསུ སཏྟཱཏི ཡེསུ ཙ སཏྟཱ ཡེན ཙ སཏྟཱ ཡེསཉྩ སཏྟཱ ཨཡཾ ཙཏུབྦིདྷོ ཨཱཀཱརོ སབྦེསཾ ཧཱརབྷཱགིཡོ.

༧༩. ཏཏྠ ཀཏམཱནི ཏཱིཎི ཝིཔལླཱསཱནི པདཊྛཱནཱནི ཙ? ཙིཏྟཝིཔལླཱསསྶ དིཊྛིཝིཔལླཱསསྶ སཉྙཱཝིཔལླཱསསྶ ཏཡོ ཝིཔལླཱསཱ ཏཱིཎི ཨཀུསལམཱུལཱནི པདཊྛཱནཾ. ཏཱིཎི ཨཀུསལམཱུལཱནི ¶ ཧཱིནཔྤཎཱིཏཀཱརིཡཀམྨསྶ པདཊྛཱནཾ. ཙཏུནྣཉྩ ཨུཔཱདཱནཱནཾ དོསོ ཨཀུསལམཱུལཾ དིསྶཏི. ཧཱིནཔྤཎཱིཏཀཱརིཡཀམྨསྶ པདཊྛཱནཾ. ཡཐཱ མཱཏུཡཱ ཝཱ པིཏུནོ ཝཱ ཨཉྙཏརསྶ ཝཱ པུན ཨུལཱ༹རསྶ བྷིཀྑུནོ ཨབྷཡཾ དེཏི. ཏཏྠ ཨཉྙོ མིཙྪཱ པཊིཔཛྫེཡྻ ཀཱཡེན ཝཱ ཝཱཙཱཡ ཝཱ. ཏཏྠ སོ བྱཱཔཱདམུཔཱདཱཡ ཏེསཾ ཨུལཱ༹རཱནཾ རཀྑཱཝརཎགུཏྟིཡཱ ཨནུཔཱལཡནྟོ ཡོ ཨུལཱ༹རཱནཾ ཨབྷཡཾ དེཏི. ཏེསཾ ཨབྷཡེ དིནྣེ ཡོ ཏཏྠ མིཙྪཱ པཊིཔཛྫེཡྻ. ཏཏྠ སོ བྱཱཔཱདཾ ཨུཔཱདཱཡནྟོ དོསཛཾ ཀམྨཾ ཀརོཏི. ཡོ ཏཏྠ ཨསཱདྷུ ཨིནྡྲིཡཱ ནཱིཝརཎཾ ཡཾ ཏེསཾ ཨབྷཡཾ དཀྑིཎཏོ སཉྙཾ ཨིདཾ པཎཱིཏཾ ཀཱརཎཾ མཡཱ པུན ཏཏྠ མིཙྪཱཔཊིཔཏྟི ཨཡཾ བྱཱཔཱདོ ཧཱིནགམིཝཀམྨཾ ལོབྷོ མོཧོ ཙ ཨིམཱནི ནཱིཝརཎཱནི ཝཙནཱནི ཏཱནི ཙཏྟཱརི ཨུཔཱདཱནཱནི ¶ ཏེཧི ཙཏཱུཧི ཨུཔཱདཱནེཧི ཡོ སོ ཨུཔཱདཱནོ ཨིཏྠཱི ཝཱ པུརིསོ ཝཱ ཏེསཾ པཉྩཀྑནྡྷཱནཾ ཏེཡེཝ ཨུཔཱདཱནོ སམུདཡོ ཨིདཾ དུཀྑཉྩ སམུདཡོ ཙ སོཡེཝ དེསནཱཧཱརོ.

ཏཏྠ ཀཱམེསུ ཡེ ན པཛྫནྟི, ཏེ ཨཱདཱིནཝཱནུཔསྶནཱཡ པཛྫནྟི. ཨིཏིསྶཱ ཀཱམདྷཱཏུཡཱ ནིཀྑམིཏུཀཱམཏཱ, ཨཡཾ ཝུཙྩཏི ནེཀྑམྨཙྪནྡོ. ཡོ ཏཏྠ ཨནབྷིསངྑཱརཱནཾ ཀིཉྩི ཝིསོདྷེཏི ཏསྶ དྷཱཝརཱ ཝཱ, ཨཡཾ ཨབྱཱཔཱདཙྪནྡོ. ཀིཉྩི ཝིཧིཾསཏི, ཨཡཾ ཝིཧིཾསཱཚནྡོ. ཨིཏི ནེཀྑམྨཱབྷིནཱིཧཏཱ ཏཡོ ཚནྡཱ – ནེཀྑམྨཙྪནྡོ ཨབྱཱཔཱདཙྪནྡོ ཨཝིཧིཾསཱཚནྡོ. ཏཏྠ ¶ ¶ ནེཀྑམྨཙྪནྡོ ཨལོབྷོ; ཨབྱཱཔཱདཙྪནྡོ ཨདོསོ; ཨཝིཧིཾསཱཚནྡོ ཨམོཧོ. ཨིམཱནི ཏཱིཎི ཀུསལམཱུལཱནི ཨཊྛསུ སམྤཏྟེསུ པརཧིཏཱནི, ཏེསཾཡེཝ ཙཏུནྣཾ ཨུཔཱདཱནཱནཾ ནིརོདྷཱཡ སཾཝཏྟནྟི. སཙེ ཝཱ པུན ཀམྨཾ ཀརེཡྻ ཀཎྷཾ ཝཱ སུཀྐཾ ཝཱ ཏསྶ ཝིཔཱཀཧཱནཱཡ སཾཝཏྟནྟི. ཨིདཾ ཀམྨཾ ཨཀཎྷཾ ཨསུཀྐཾ ཀམྨཀྑཡཱཡ སཾཝཏྟཏི. ཏཏྠ ཡོ ཏིཎྞཾ ཨཀུསལམཱུལཱནཾ ནིརོདྷོ, ཨཡཾ ནིརོདྷོ. སོཡེཝ མགྒོ ཏཏྠ པཊིཔདཱནི ཨིམཱནི དྭེ སཙྩཱནི ཨིམཱནི ཙཏྟཱརི སཙྩཱནི ཨཱཝཊྚོ ཧཱརོ.

ཀཱམེསུ སཏྟཱཏི ཡེ སེཀྑཱ, ཏེ ཨེཀེནེཝཱཀཱརེན སཏྟཱ. ཡེ པུཐུཛྫནཱ, ཏེ དྭཱིཧཱཀཱརེཧི སཏྟཱ, ཏསྶཱཡཾ པཉྷོ ཝིབྷཛྫབྱཱཀརཎཱིཡོ ཝཏྟབྦོ. ཀིཉྩཱཔི སོཏཱཔནྣོ པཊིསེཝནཱཡ, ནོ ཙ ཁོ ཨབྷིནིཝེསེ སཏྟོ ཡོ ཧི ཨཔཙཡཱཡ པདཧཏི, ན ཨུཔཙཡཱཡ. སེཀྑོ ཧི ཀིལེསཝསེན ཀཱམེ པཊིསེཝཏི. པུཐུཛྫནོ པན ཀིལེསསམུཊྛཱནཱཡ ཀཱམེ པཊིསེཝཏི. ཏཏྠ ཀཱམེསུ སཏྟཱནཾ ཙཏུཨོགྷཾ ཏརིསྶཏཱིཏི ཝིབྷཛྫབྱཱཀརཎཱིཡོ, ཨཡཾ ཝིབྷཏྟི.

༨༠. པརིཝཏྟནོཏི ཀཱམེ ཡེ ནེཝ སཛྫནྟི ན ཙ སཾཡོཛནེཧི སཾཡུཏྟཱ, ཏེ ཨོགྷཾ ཏརིསྶནྟི ཝིཔུལཾ མཧནྟནྟི. ཨཡཾ སུཏྟསྶ པཊིཔཀྑོ.

ཝེཝཙནནྟི ཡོ ཀཱམེསུ སཏྟོ ཡོ ཙ ཏཏྠ ཀཱམཱནཾ གུཎོ, ཏཏྠ ཝིསོ སཏྟོ. ཡེཔི ཀཱམཱནཾ ཨཱཧཱརཱ དྷམྨཱ, ཏཏྠ ཝིསོ སཏྟོ. ཏཏྠིམཾ ཀཱམཱནཾ ཝེཝཙནཾ པཱཀོ རཛོ སལླཾ གཎྜོ ཨཱིཏི ཨུཔདྡཝོཏི. ཡཱནི ཝཱ པན ཨཉྙཱནི ¶ ཝེཝཙནཱནི ཏཏྠ ཝིསོ སཏྟོཏི ཝེཝཙནཾ. སཏྟོ བནྡྷོ མུཙྪིཏོ གདྷིཏོ ཨཛ྄ཛྷོསིཏོ ཀཱམེ ཨཛ྄ཛྷཱཔནྣཱ པརིམུཏྟོ ཏབྦཧུལཝིཧཱརཱིཏི. ཡཱནི ཝཱ པན ཨཉྙཱནི ཝེཝཙནཱནི, ཨཡཾ ཝེཝཙནོ ནཱམ. ཀཱམཔྤཙཱརཔཉྙཏྟིཡཱ ཀིལེསགོཙརཔཉྙཏྟིཡཱ པཉྙཏྟཱ ཙིཏྟནྟི ཝེཝཙནཾ. སཏྟོ ཏབྦཧུལཝིཧཱརཱིཏི ཡཱནི ཝཱ པན ཨཉྙཱནི. ཨིམེ ཀཱམཔྤཙཱརཔཉྙཏྟིཡཱ ཀིལེསགོཙར པཉྙཏྟིཡཱ ¶ པཉྙཏྟཱ, བཱིཛཔཉྙཏྟིཡཱ པཉྙཏྟཱ, སངྑཱརཱ སཾཡོཛནཔཉྙཏྟིཡཱ པཉྙཏྟཱ, ཨུཔཱདཱནཾ ཧེཏུཔཉྙཏྟིཡཱ པཉྙཏྟཾ, པུགྒལོ པུཐུཔཉྙཏྟིཡཱ པཉྙཏྟོ.

ཨོཏརཎོཏི ཨིམཱཡ པཊིཙྩསམུཔྤཱདོ དུཀྑཉྩ སམུདཡོ ཙ. ཡེ ཀིལེསཱ ཡེ སངྑཱརཱ སཾཡོཛནཱནི ཙ པཉྩསུ ཁནྡྷེསུ སངྑཱརཀྑནྡྷོ དྷམྨཱཡཏནེསུ ¶ ཨཀུསལཱ དྷམྨཱཡཏནཱནི ཨིནྡྲིཡེསུ སུཁིནྡྲིཡཉྩ, སོམནསྶིནྡྲིཡཉྩ, ཨཡཾ ཨིནྡྲིཡོཏརཎོ.

སོདྷནོཏི ཨེཏྟཀོ. ཨེསེཝ ཨཱརམྦྷོ ནིདྡིསིཏབྦོ སུཏྟཏྠོ.

ཨདྷིཊྛཱནོཏི ཨིམེ དྷམྨཱ ཨཏྠི ཨེཀཏྟཏཱཡ པཉྙཏྟཱ ཨཏྠི ཝེམཏྟཏཱཡ. ཡེ སཉྙཱ བཱཧིརོ ཀཱམེ, ཏེ ཝེམཏྟཏཱཡ པཉྙཏྟཱ. པཉྩསུ ཀཱམགུཎེསུ སཏྟཱཏི པརིཡུཊྛཱནཝིཔལླཱསཱ ཝེམཏྟཏཱཡ པཉྙཏྟཱ ཨོགྷཾ ཏརེཡྻུཾ. ཝིཔུལཾ མཧནྟནྟི ཨཝིཛྫཱ ཨེཀཏྟཏཱཡ པཉྙཏྟཱ.

པརིཀྑཱརོཏི ཏསྶ ཀོ ཧེཏུ ཀོ པཙྩཡོ? ཨཱརམྨཎཔཙྩཡཏཱཡ པཙྩཡོ. ཨཡོནིསོ ཙ མནསིཀཱརོ སནྣིསྶཡསྶ པཙྩཡཏཱཡ པཙྩཡོ. ཨཝིཛྫཱ སམནནྟརཔཙྩཡཏཱཡ པཙྩཡོ. རཱགཱནུསཡོ ཧེཏུཔཙྩཡཏཱཡ པཙྩཡོ. ཨཡཾ ཧེཏུ, ཨཡཾ པཙྩཡོ.

སམཱརོཔནོ ¶ པཙྩཡོཏི ཡེ ཀཱམེསུ སཏྟཱ སུགཏཱ སུརཱུཔཱཏི ཨཡཾ ཀཱམདྷཱཏུཡཱ ཚནྡོ རཱགོ ཏེ ཨཔུཉྙམཡཱ སངྑཱརཱ. ཏེ ཀིཾ པཙྩཡཱ? ཨཝིཛྫཱ པཙྩཡཱ. ཏེ ཀིསྶ པཙྩཡཱ? ཝིཉྙཱཎསྶ པཙྩཡཱ. ཨིཏི ཨཝིཛྫཱཔཙྩཡཱ སངྑཱརཱ. སངྑཱརཔཙྩཡཱ ཝིཉྙཱཎཾ ཡཱཝ ཛརཱམརཎཾ ཨེཝམེཏསྶ ཀེཝལསྶ མཧཏོ དུཀྑཀྑནྡྷསྶ སམུདཡོ ཧོཏི ཨེཀཾ སུཏྟཾ གཏཾ. པཉྩནཱིཝརཎིཀཾ སུཏྟཾ ཀཱཏབྦཾ.

༨༡. ཏཏྠ ཀཏམོ དེསནཱཧཱརོ ནཱམ? ཡཱ ཙ ཨབྷིཛ྄ཛྷཱ ཡོ ཙ བྱཱཔཱདོ ཡཉྩ ཨུདྡྷཙྩཾ, ཨཡཾ ཏཎྷཱ. ཡཉྩ ཐིནམིདྡྷཾ, ཡཉྩ ཀུཀྐུཙྩཾ ཡཱ ཙ ཝིཙིཀིཙྪཱ, ཨཡཾ དིཊྛི. ཡཱ པན ཀཱཡསྶ ཨཀམྨནིཡཏཱ ཀིཉྩཱཔི ཏཾ མིདྡྷཾ ནོ ཏུ སབྷཱཝཀིལེསཏཱཡ ཀིལེསོ, ཨིཏི ཡཱ ཙ ཙིཏྟསལླཱིཡནཱ ཡཱ ཙ ཀཱཡཱཀམྨནིཡཏཱ, ཨཡཾ པཀྑོཔཀིལེསོ ན ཏུ སབྷཱཝཀིལེསོ. ཏཏྠ ཨཏྟསཉྙཱནུཔཙིཏྟཾ ཀིལམཐོ ཀུཀྐུཙྩཱནུཔཙིཏྟཾ ཐིནཾ ཡཱ ཙིཏྟསྶ ལཱིཡནཱ, ཨིཏི ཨིམེ པཉྩ ནཱིཝརཎཱ ཙཏྟཱརི ནཱིཝརཎཱནི སབྷཱཝཀིལེསཱ ཐིནམིདྡྷཾ ནཱིཝརཎཔཀྑོཔཀིལེསོ. ཡཐཱ ཙཏྟཱརོ ཨཱསཝཱ སབྷཱཝཨཱསཝཏཱཡ ཨཱསཝཱ ནོ ཏུ ཙིཏྟསཱསཝཏཱཡ ¶ ཨཱསཝཱ. སབྷཱཝཏཱཡ ཨཱསཝཱ. པཀྑེ ཨཱསཝཏཱཡ ཨཱསཝཱ. ཨཐ པནཱཧ སུཏྟནྟཾ ཡེན ཏེ སམྤཡུཏྟཱ ཝཱ ཝིཔྤཡུཏྟཱ ཝཱ ཨཱསཝཱ, ཏེཡེཝ ཨེཏེ ཝཏྟབྦཱ སཱསཝཱ ཝཱ ཨནཱསཝཱ ཝཱ.

ཏཏྠ ¶ ¶ ཀཏམོ ཝིཙཡོ. ཨབྷིཛ྄ཛྷཱ ཀཱམཏཎྷཱ རཱུཔཏཎྷཱ བྷཝཏཎྷཱ. ཡཾ ཝཱ པན ཀིཉྩི ཨཛ྄ཛྷོསཱནགཏཾ སཱསཝཱ ཨབྷིཛ྄ཛྷིཏསྶ མེཏྟཱནུཔསྶིཡ ཡོ ཨནཏྠཾ ཙརཏི. ཏཏྠ ཡོ བྱཱཔཱདཾ ཨུཔྤཱདེཏི, ཨཙརི ཙརིསྶཏཱིཏི. ཨེཝཾ ནཝ ཨཱགྷཱཏཝཏྠཱུནི ཀཏྟབྦཱནི, ཏསྶེཝཾ བྱཱཔཱདཱནུཔསྶིསྶ ཀིལེསོ ཡོ པརིདཱཧོ ཀཱཡཀིལམཐོ ཨཀམྨནིཡཏཱ མིདྡྷཾ. ཙིཏྟཱནུཔསྶིསྶ པཊིགྷཱཏེན ཁིཡནཱ, ཨིདཾ ཐིནམིདྡྷཾ. ཏཏྠ ཨདྷིཀརཎཨཝཱུཔསམོ, ཨིདཾ ཨུདྡྷཙྩཾ. ཡཾ ཀིཾ ཀསཐམཱིཏི [ཀརཐམཱིཏི (པཱི. ཀ.)] ཨིདཾ ཀུཀྐུཙྩཾ. ཡཾ ཡཐཱ ཨིདཾ སནྟཱིརཎཾ, ཨཡཾ ཝིཙིཀིཙྪཱ. ཏཏྠ ཨཝིཛྫཱ ཙ ཏཎྷཱ ཙ ཨཏྠི, ཨིདཾ པརིཡུཊྛཱནཾ. ཨཱཝརཎཾ ནཱིཝརཎཾ ཚདནཾ ཨུཔཀྐིལེསོ ཙ ཨཏྠི, ཨིདཾ ཀཱམཙྪནྡོ ཀཱམརཱགཔརིཡུཊྛཱནསྶ པདཊྛཱནཾ. བྱཱཔཱདོ བྱཱཔཱདཔརིཡུཊྛཱནསྶ པདཊྛཱནཾ. ཐིནམིདྡྷཾ ཐིནམིདྡྷཔརིཡུཊྛཱནསྶ པདཊྛཱནཾ. ཨུདྡྷཙྩཀུཀྐུཙྩཾ ཨཝིཛྫཱཔརིཡུཊྛཱནསྶ པདཊྛཱནཾ. ཝིཙིཀིཙྪཱ ཝིཙིཀིཙྪཱཔརིཡུཊྛཱནསྶ པདཊྛཱནཾ. ཀཱམརཱགཔརིཡུཊྛཱནཾ ཨནུསཡསཾཡོཛནསྶ པདཊྛཱནཾ. བྱཱཔཱདཔརིཡུཊྛཱནཾ པཊིགྷསཾཡོཛནསྶ པདཊྛཱནཾ. ཐིནམིདྡྷཔརིཡུཊྛཱནཾ མཱནསཾཡོཛནསྶ པདཊྛཱནཾ. ཨཝིཛྫཱཔརིཡུཊྛཱནཉྩ ཝིཙིཀིཙྪཱཔརིཡུཊྛཱནཉྩ དིཊྛིསཾཡོཛནསྶ པདཊྛཱནཾ.

ཏཏྠ ཀཏམོ ལཀྑཎོ ཧཱརོ? ཀཱམརཱགཔརིཡུཊྛཱནེ ཝུཏྟེ སབྦཱནི པརིཡུཊྛཱནཱནི ཝུཏྟཱནི ཧོནྟཱིཏི. སཾཡོཛནེསུ ཝུཏྟེསུ སབྦསཾཡོཛནཱནི ཝུཏྟཱནི ཧོནྟི. ཨཡཾ ལཀྑཎོ ཧཱརོ.

༨༢. ཏཏྠ ཀཏམོ ཙཏུབྱཱུཧོ ཧཱརོ? ཡེ ཨིམེ པཉྩ ནཱིཝརཎཱ ཛྷཱནཔཊིཔཀྑོ སོ དུཀྑསམུདཡོ. ཡཾ ཕལཾ, ཨིདཾ དུཀྑཾ. ཏཏྠ ཀཱམཙྪནྡསྶ ¶ ནེཀྑམྨཝིཏཀྐོ པཊིཔཀྑོ; བྱཱཔཱདསྶ ཨབྱཱཔཱདཝིཏཀྐོ པཊིཔཀྑོ; ཏིཎྞཾ ནཱིཝརཎཱནཾ ཨཝིཧིཾསཱཝིཏཀྐོ པཊིཔཀྑོ. ཨིཏི ཨིམེ ཏཡོ ཝིཏཀྐཱ. ནེཀྑམྨཝིཏཀྐོ སམཱདྷིཀྑནྡྷཾ བྷཛཏི. ཨབྱཱཔཱདཝིཏཀྐོ སཱིལཀྑནྡྷཾ བྷཛཏི. ཨཝིཧིཾསཱཝིཏཀྐོ པཉྙཱཀྑནྡྷཾ བྷཛཏི. ཨིམེ ཏཡོ ཁནྡྷཱ. ཨརིཡོ ཨཊྛངྒིཀོ མགྒོ ནཱིཝརཎཔྤཧཱནཱཡ སཾཝཏྟཏི. ཡཾ ནཱིཝརཎཔྤཧཱནཾ, ཨཡཾ ནིརོདྷོ. ཨིམཱནི ཙཏྟཱརི སཙྩཱནི. ཨཡཾ ཙཏུབྱཱུཧོ ཧཱརོ.

ཏཏྠ ཀཏམོ ཨཱཝཊྚོ ཧཱརོ? པཉྩ ནཱིཝརཎཱནི དས བྷཝནྟི. ཡདཔི ཨཛ྄ཛྷཏྟཾ སཱརཛྫཏི ¶ , ཏདཔི ནཱིཝརཎཾ. ཡདཔི བཧིདྡྷཱ སཱརཛྫཏི, ཏདཔི ནཱིཝརཎཾ, ཨེཝཾ ¶ ཡཱཝ ཝིཙིཀིཙྪཱ ཨིམེ དས ནཱིཝརཎཱ. ཨཛ྄ཛྷཏྟབཧིདྡྷཱ ཀིལེསཱ ཨིམཱནི དྭེ སཾཡོཛནཱནི ཨཛ྄ཛྷཏྟསཾཡོཛནཉྩ བཧིདྡྷཱསཾཡོཛནཉྩ. ཏཏྠ ཨཧནྟི ཨཛ྄ཛྷཏྟཾ, མམནྟི བཧིདྡྷཱ. སཀྐཱཡདིཊྛི ཨཛ྄ཛྷཏྟཾ, ཨེཀསཊྛི དིཊྛིགཏཱནི བཧིདྡྷཱ. ཡོ ཨཛ྄ཛྷཏྟཾ ཚནྡརཱགོ རཱུཔེསུ ཨཝཱིཏརཱགོ བྷཝཏི ཨཝཱིཏཙྪནྡོ. ཨེཝཾ ཡཱཝ ཝིཉྙཱཎེ, ཨཡཾ ཨཛ྄ཛྷཏྟཱ ཏཎྷཱ. ཡཾ ཚསུ བཱཧིརེསུ ཨཱཡཏནེསུ ཏཱིསུ ཙ བྷཝེསུ ཨཛ྄ཛྷོསཱནཾ, ཨཡཾ བཧིདྡྷཱ ཏཎྷཱ. ཨིམཱནི དྭེ སཙྩཱནི སཾཡོཛནཱནི སཾཡོཛནཱིཡཱ ཙ དྷམྨཱ. ཏཏྠ སཾཡོཛནེསུ དྷམྨེསུ ཡཱ ནིབྦིདཱནུཔསྶནཱ ཙ, ཨཡཾ མགྒོ. ཡཾ སཾཡོཛནཔྤཧཱནཾ, ཨཡཾ ནིརོདྷོ. ཨཡཾ ཨཱཝཊྚོ ཧཱརོ.

ཏཏྠ ཀཏམོ ཝིབྷཏྟིཧཱརོ? སཾཡོཛནནྟི ན ཨེཏཾ ཨེཀཾསེན. མཱནསཾཡོཛནཾ དིཊྛིབྷཱགིཡནྟི ན ཏཾ ཨེཀཾསེན ཨདིཊྛམཱནཾ ནིསྶཱཡམཱནཾ ¶ ན པཛཧཏི. ཡོ པཉྩ ཨུདྡྷམྦྷཱགིཡོ མཱནོ ཀིཉྩཱཔི སོ དིཊྛིཔཀྑེ སིཡཱ. ན ཏུ ཨོརམྦྷཱགིཡཾ སཾཡོཛནཾ ཏསྶ པཧཱནཱཡ སཾཝཏྟཏཱིཏི. ཡོ ཙ ཨཧཾཀཱརོ ན པཝིདྡྷོཡཾ པནསྶ ཨེཝཾ ཧོཏི. ཀདཱསུ ནཱམཱཧཾ ཏཾ སནྟཾ ཨཱཡཏནཾ སཙྪིཀཏྭཱ ཨུཔསམྤཛྫ ཝིཧརིསྶཱམི, ཡཾ ཨརིཡཱ སནྟཾ ཨཱཡཏནཾ ཨུཔསམྤཛྫ ཝིཧརིསྶནྟཱིཏི, ཨཡཾ ཨབྷིཛ྄ཛྷཱ ན ཙ ཏཾ ནཱིཝརཎཾ. ཨཏྠི པན ཨརཧཏོ ཀཱཡཀིལེསམིདྡྷཉྩ ཨོཀྐམཏི ན ཙ ཏཾ ནཱིཝརཎཾ ཏསྶ ཐིནམིདྡྷཾ ནཱིཝརཎནྟི. ན ཨེཀཾསེན. ཨཡཾ ཝིབྷཏྟིཧཱརོ.

པརིཝཏྟནོཏི པཉྩ ནཱིཝརཎཱ པཉྩངྒིཀེན ཛྷཱནེན པཧཱནཾ གཙྪནྟི. ཨཡཾ ཏེསཾ པཊིཔཀྑོ ནཱིཝརཎོ ཨསུཀསྶ པཧཱིནཱཏི ན ཨཉྙཱནུམིནིཏབྦཾ, པརམཏྠམཛ྄ཛྷཏྟཾ, ཨཡཾ པརིཝཏྟནཱ.

ཏཏྠ ཀཏམོ ཝེཝཙནོ? ཀཱམཙྪནྡོ ཚནྡརཱགོ པེམཾ ནིཀནྟཱིཏི ཝེཝཙནཾ. ནཱིཝརཎཾ ཚདནཾ ཨུཔཀྐིལེསོ པརིཡུཊྛཱནནྟི ཝེཝཙནཾ.

པཉྙཏྟཱིཏི ཨཝིཛྫཱཔཙྩཡཱ ཀིཙྩཔཉྙཏྟིཡཱ [པཙྩཱཔཉྙཏྟིཡཱ (ཀ.)] པཉྙཏྟི, བྱཱཔཱདོ ཝིཀྑེཔཔཉྙཏྟིཡཱ པཉྙཏྟི, ཐིནམིདྡྷཾ ཨསམུགྒྷཱཏཔཉྙཏྟིཡཱ པཉྙཏྟི. ཨེཝཾ སབྦེཔི ཨེཏེ པཉྩ ནཱིཝརཎཱ ཨིམམྷི སུཏྟེ ཝིཀྑེཔཔཉྙཏྟིཡཱ པཉྙཏྟི.

ཏཏྠ ཀཏམོ ཨོཏརཎོ? ཨིམེ པཉྩ ནཱིཝརཎཱ ཨཝིཛྫཱ ཙ ཏཎྷཱ ཙ ཏཏྠ ཨཝིཛྫཱམཱུལཱ ¶ ནཱིཝརཎཱ. ཡཱ ཏཎྷཱ ཨིམེ སངྑཱརཱ, ཏེ ཨཝིཛྫཱཔཙྩཡཱ ¶ ཨིམེ ¶ དྭེ དྷམྨཱ པཉྩསུ ཁནྡྷེསུ སངྑཱརཀྑནྡྷཔརིཡཱཔནྣཱ, ཨཱཡཏནེསུ དྷམྨཱཡཏནཾ, དྷཱཏཱུསུ དྷམྨདྷཱཏུ, ཨིནྡྲིཡེསུ ཨིམེསཾ དྷམྨཱནཾ པདཊྛཱནཾ སུཁིནྡྲིཡསྶ ཙ སོམནསྶིནྡྲིཡསྶ ཙ ཨིཏྠིནྡྲིཡསྶ ཙ པུརིསིནྡྲིཡསྶ ཙ.

ཏཏྠ ཀཏམོ སོདྷནོ ཧཱརོ? ཨིདཾ སུཏྟཾ ཡཐཱ ཨཱརབྦྷ ནིཀྑིཏྟཾ སོ ཨཏྠོ བྷཱསིཏོ ཨིམེཧི པཉྩཧི པདེཧི.

ཏཏྠ ཀཱམཙྪནྡོ ཙ བྱཱཔཱདོ ཙ ཝིཙིཀིཙྪཱ ཙ ན ཨེཀཏྟཏཱཡ པཉྙཏྟཱ, ཀཱམཱཏི ན ཨེཀཏྟཏཱཡ པཉྙཏྟཱ, ཨཐ ཁལུ ཝེམཏྟཏཱཡ པཉྙཏྟཱ. ཨཡཾ ཨདྷིཊྛཱནོ ཧཱརོ.

ཏཏྠ ཀཏམོ པརིཀྑཱརོ? ཀཱམཙྪནྡསྶ ཨཡོནིསོ མནསིཀཱརོ སུབྷཱརམྨཎཔཙྩཡོ; སུབྷནིམིཏྟཉྩ ཧེཏུ. བྱཱཔཱདསྶ ཨཡོནིསོ མནསིཀཱརོ ཨཱགྷཱཏཝཏྠཱུནི ཙ པཙྩཡོ; པཊིགྷཱནུསཡོ ཧེཏུ. ཐིནམིདྡྷསྶ པཊིསཾཧཱརོ པཙྩཡོ; པཝཏྟིཡཱ ཀིལམཐཱ ཙལནཱ ཏཉྩ ཧེཏུ. ཨུདྡྷཙྩཀུཀྐུཙྩསྶ རཛནཱིཡཾ ཨཱརམྨཎིཡཾ ཨསྶཱདིཡཱཀིནྡྲིཡཾ ཏཱཝ ཨཔརིཔུཎྞཉྩ ཉཱཎཾ པཙྩཡོ; ཀཱམསཉྙཱ ཙ དིཊྛིཨནུསཡོ ཙ ཧེཏུ. ཝིཙིཀིཙྪཱཡ ནཝ མཱནཝིདྷཱ ཨཱརམྨཎཾ མཱནཱནུསཡོ, སོཝ པཙྩཡོ; ཝིཙིཀིཙྪཱནུསཡོ ཧེཏུ. ཨེཏེ པཉྩ དྷམྨཱ སཧེཏུ སཔྤཙྩཡཱ ཨུཔྤཛྫནྟི.

ཏཏྠ ཀཏམོ སམཱརོཔནོ ཧཱརོ? ཨིམེ པཉྩ ནཱིཝརཎཱ ཙཏྟཱརོཔི ཨེཏེ ཨཱསཝཱ གཎྜཱཔི [ཏཎྷཱཔི (པཱི.)] ཨེཏེ སལླཱཔི ཨེཏེ ཨུཔཱདཱནཱནི ཨེཏེ. ཏེསུ ཨེཝ བཱཧིརེསུ དྷམྨེསུ སཾཀིལེསབྷཱགིཡཾ སུཏྟནྟི པཉྙཏྟིཾ གཙྪཏི. ཨཡཾ སམཱརོཔནོ ཧཱརོ.

ནིདྡིཊྛཾ ¶ སཾཀིལེསིཀབྷཱགིཡཾ སུཏྟཾ.

ཏཏྠ ཀཏམོ དེསནཱ ཧཱརོ? ཨིམམྷི སུཏྟེ ཀོ ཨཏྠོ ཁནྡྷཝཝཏྠཱནེན ཝིཉྙཱཎཀྑནྡྷཾ དེསེཏི, དྷཱཏུཝཝཏྠཱནེན མནོཝིཉྙཱཎདྷཱཏུཾ, ཨཱཡཏནཝཝཏྠཱནེན མནཱཡཏནཾ, ཨིནྡྲིཡཝཝཏྠཱནེན མནིནྡྲིཡཾ. ཏསྶ ཀིཾ པུབྦངྒམཱ དྷམྨཱ? སཾཁིཏྟེན ཚ དྷམྨཱ པུབྦངྒམཱ དྷམྨཱ ཀུསལམཱུལཱནི ཙ ¶ ཨཀུསལམཱུལཱནི ཙ ཨནིམིཏྟཾ ཨིམམྷི སུཏྟེ ཀུསལམཱུལཾ དེསིཏཾ. ཏཏྠ ཀཏམཱ མནོཔུབྦངྒམཱ དྷམྨཱ? མནོ ཏེསཾ པུབྦངྒམཾ, ཡཐཱཔི བལསྶ རཱཛཱ པུབྦངྒམོ, ཨེཝམེཝ ¶ དྷམྨཱནཾ མནོཔུབྦངྒམཱ. ཏཏྠ ཏིཝིདྷཱནཾ པུབྦངྒམཱནཾ ནེཀྑམྨཙྪནྡེན ཨབྱཱཔཱདཙྪནྡེན ཨཝིཧིཾསཱཚནྡེན. ཨལོབྷསྶ ནེཀྑམྨཙྪནྡེན པུབྦངྒམཱ. ཨདོསསྶ ཨབྱཱཔཱདཙྪནྡེན པུབྦངྒམཱ. ཨམོཧསྶ ཨཝིཧིཾསཱཚནྡེན པུབྦངྒམཱ. ཏཏྠ མནོསེཊྛཱཏི མནསཱ ཨིམེ དྷམྨཱ ཨུསྶཊཱ མནེན ཝཱ ནིམྨིཏཱ. མནོཝ ཨིམེསཾ དྷམྨཱནཾ སེཊྛོཏི མནོཝ ཨིམེསཾ དྷམྨཱནཾ སེཊྛཛེཊྛོཏི མནོཝ ཨིམེསཾ དྷམྨཱནཾ ཨཱདྷིཔཙྩཾ ཀརོཏཱིཏི མནོསེཊྛཱ. མནོཛཝཱཏི ¶ ཡཏྠ མནོ གཙྪཏི. ཏཏྠ ཨིམེ དྷམྨཱ གཙྪནྟཱིཏི མནོཛཝཱ. ཡཐཱ ཝཱཏོ སཱིགྷཾ གཙྪཏི ཨཉྙོ ཝཱ ཀོཙི སཱིགྷཾ གཱམཀོ ཝུཙྩཏེ ཝཱཏཛཝོཏི པཀྑིགཱམིཀོཏི, ཨེཝམེཝ ཨིམེ དྷམྨཱ མནེན སམྤཛཱཡམཱནཱ གཙྪནྟི, ཏཏྠ ཨིམེ དྷམྨཱ གཙྪནྟཱིཏི མནོཛཝཱཏི. ཏེ ཏིཝིདྷཱ ཚནྡསམུདཱནིཏཱ ཨནཱཝིལཏཱ ཙ སངྐཔྤོ. སཏྟཝིདྷཱ ཙ ཀཱཡིཀཾ སུཙརིཏཾ ཝཱཙསིཀཾ སུཙརིཏཾ, ཏེ དས ཀུསལཀམྨཔཐཱ. ཏཏྠ མནསཱ ཙེ པསནྣེནཱཏི མནོཀམྨཾ. བྷཱསཏི ཝཱཏི ཝཙཱིཀམྨཾ. ཀརོཏི ཝཱཏི ཀཱཡཀམྨཾ. ཨིམེཧི ཨིམསྨིཾ སུཏྟེ དས ཀུསལཀམྨཔཐཱ པརམཱཔི སནྟཱ སཱིལཝཏཱ པརམཱ. སོ བྷཝཏི ཝིཝཏྟིཡཾ ན ལོཀནིཡྻཱནཱཡ ཝཱསནཱབྷཱགིཡཾ སུཏྟཾ བྷཝཏི. ཨཡཾ དེསནཱ.

ཏཏྠ ཀཏམོ ཝིཙཡོ ཧཱརོ? མནོཔུབྦངྒམཱ དྷམྨཱཏི ཀུསལམཱུལཱནི ཙ ཨཊྛངྒསམྨཏྟཱནི. ཨིདཾ སུཏྟཾ.

ཡུཏྟཱིཏི དསནྣཾ ཀུསལཀམྨཔཐཱནཾ ཡོ ཝིཔཱཀོ, སོ སུཁཝེདནཱིཡོ ཨབྱཱཔཱདསྶངྒམཱནོ. ཚཱཡཱཝ ཨནཔཱཡིནཱིཏི ཨནུགཙྪཏི ཨཏྠི ཨེསཱ ཡུཏྟི.

པདཊྛཱནནྟི ཨཊྛཱརསནྣཾ མནོཔཝིཙཱརཱནཾ པདཊྛཱནཾ. མནོཔུབྦངྒམཱ དྷམྨཱཏི སབྦཀུསལཔཀྑསྶ ཨིམེ དྷམྨཱ པདཊྛཱནཾ. མནསཱ ཙེ པསནྣེནཱཏི ཡོ ཙེཏསོ པསཱདོ, ཨིདཾ སདྡྷིནྡྲིཡསྶ པདཊྛཱནཾ. བྷཱསཏི ཝཱཏི སམྨཱཝཱཙཱཡ. ཀརོཏི ཝཱཏི སམྨཱཀམྨནྟསྶ ཙ སམྨཱཝཱཡཱམསྶ ཙ པདཊྛཱནཾ.

ལཀྑཎོཏི ¶ ཨིཏི པུབྦངྒམཱ དྷམྨཱཏི ཝེདནཱཔུབྦངྒམཱཔི ཨེཏེ, སཉྙཱཔུབྦངྒམཱཔི ཨེཏེ, སངྑཱརཔུབྦངྒམཱཔི ཨེཏེ. ཡེ ཀེཙི དྷམྨཱ སཧཛཱཏཱ སབྦེ པུབྦངྒམཱ ཨེཏེསཾ དྷམྨཱནཾ. ཏཏོ ནཾ སུཁམནྭེཏཱིཏི སོམནསྶམཔི ནཾ ཨནྭེཏི ཡཾ སུསུཁཙྪཱཡཱ ཏདཱཔི ནཾ སུཁཾ ཏདཔི ཨནྭེཏི.

༨༤. ཏཏྠ ¶ ¶ ཀཏམོ ཙཏུབྱཱུཧོ ཧཱརོ? མནོཔུབྦངྒམཱཏི ན ཨིདཾ ཨེཀཱདིཝཙནཾ. ཀིཾ ཀཱརཎཱ? སབྦེ ཡེཝ ཨིམེ ཚཝིཉྙཱཎཀཱཡཱ, ཨིམམྷི བྷགཝཏོ ཀོ ཨདྷིཔྤཱཡོ? ཡེ སུཁེན ཨཏྠིཀཱ, ཏེ མནཾ པསཱདེནྟཱིཏི ཨཡཾ ཨིམམྷི སུཏྟེ བྷགཝཏོ ཨདྷིཔྤཱཡོ. ཨཏྠོ པུབྦེཡེཝ ནིདྡིཊྛོ.

ཡཱནི ཧི ཀུསལམཱུལཱནི, ཏཱནི ཨཊྛཱནིསཾསམཏྟཱ ཧེཏུ, ཨཡཾ ཨཊྛངྒིཀོ མགྒོ. དས ཋཱནཱནི དེསནཱཧེཏཱུནི དེསནཱཔཙྩཡཱ ནིདྡེསནཱ ཙ. ཏཏྠ ཡཾ མཉྙེ དུཀྑེན སཧ ནཱམརཱུཔཾ ཝིཉྙཱཎསཙྩནྟི ཨངྒེན ཀུསལམཱུལཾ པཧཱིཡཏི, ཨཡཾ ཨཔྤཧཱིནབྷཱུམིཡཾ སམུདཡོ. ཡཾ ཏེསཾ པཧཱནཱ, ཨཡཾ ནིརོདྷོ. ཨིམཱནི ཙཏྟཱརི སཙྩཱནི. ཨཡཾ ཨཱཝཊྚོ ཧཱརོ.

མནོཔུབྦངྒམཱ དྷམྨཱ, མནོསེཊྛཱ མནོམཡཱ;

མནསཱ ཙེ པསནྣེན, བྷཱསཏི ཝཱ ཀརོཏི ཝཱ;

ཏཏོ ནཾ སུཁམནྭེཏི, ཚཱཡཱཝ ཨནཔཱཡིནཱིཏི.

ཏཾ ¶ ན ཨེཀཾསེན སམཎསྶ ཝཱ བྲཱཧྨཎསྶ ཝཱ པན ཧོཏི. ཏསྶ ཝཱ མིཙྪཱདིཊྛིཀསྶ སཀསཏྠེ ཙིཏྟཾ པསཱདེཏི, ཏེན ཙ པསནྣེན ཙིཏྟེན བྷཱསཏི བྱཱཀརོཏི ན ཏཾ སུཁམནྭེཏི ན ཚཱཡཱཝ ཨནུགཱམིནཱི, དུཀྑམེཝ ཏཾ ཨནྭེཏི. ཡཐཱ ཝཧནྟཾ ཙཀྐཾ པདམནྭེཏི, ཨིདཾ ཏཾ ཝིབྷཛྫབྱཱཀརཎཱིཡཾ. མནསཱ ཙེ པསནྣེན ཀཱཡཀམྨཾ ཝཙཱིཀམྨཾ སུཁཝེདནཱིཡནྟི སམགྒཏེ སུཁཝེདནཱིཡཾ མིཙྪགྒཏེ དུཀྑཝེདནཱིཡཾ, ཨཡཾ ཝིབྷཏྟི.

ཏཏྠ ཀཏམོ པརིཝཏྟནོ ཧཱརོ? མནོཔུབྦངྒམཱ དྷམྨཱཏི ཡཾ མནསཱ པདུཊྛེན བྷཱསཏི ཝཱ ཀརོཏི ཝཱ དུཀྑམསྶཱནུགཱམིནཱི, ཨེཏཱནིཡེཝ དྭེ སུཏྟཱནི བྷཱསིཏཱནི ཨེས ཨེཝ ཙ པཊིཔཀྑོ. ཝེཝཙནནྟི ཡདིདཾ མནོཙིཏྟཾ ཝིཉྙཱཎཾ མནིནྡྲིཡཾ མནོཝིཉྙཱཎདྷཱཏུ.

པཉྙཏྟཱིཏི མནོཔུབྦངྒམཱ དྷམྨཱཏི ཨཡཾ མནོ ཀིཉྩི པཉྙཏྟིཡཱ པཉྙཏྟཾ. དྷམྨཱཏི ཀུསལཀམྨཔཐཔཉྙཏྟིཡཱ པཉྙཏྟཾ. མནོསེཊྛཱཏི ཝིསིཊྛཔཉྙཏྟིཡཱ པཉྙཏྟཾ. མནོཛཝཱཏི སཧཔཉྙཏྟིཡཱ པཉྙཏྟཾ. ཙིཏྟནྟི ནེཀྑམྨཔཉྙཏྟིཡཱ པཉྙཏྟཾ. མནསཱ ཙེ པསནྣེནཱཏི སདྡྷིནྡྲིཡཔཉྙཏྟིཡཱ པཉྙཏྟཾ. མནསཱ ཙེ པསནྣེནཱཏི ཨནཱཝིལསངྐཔྤདུཏིཡཛ྄ཛྷཱནཔཉྙཏྟིཡཱ པཉྙཏྟཾ ¶ . མནསཱ ཙེ པསནྣེནཱཏི ¶ ཨསྶདྡྷཱནཾ པཊིཔཀྑཔཉྙཏྟིཡཱ པཉྙཏྟཾ. བྷཱསཏི ཝཱཏི སམྨཱཝཱཙཱཔཉྙཏྟིཡཱ པཉྙཏྟཾ. ཀརོཏི ཝཱཏི སམྨཱཀམྨནྟཔཉྙཏྟིཡཱ པཉྙཏྟཾ. ཏཏོ ¶ ནཾ སུཁམནྭེཏཱིཏི ཛྷཱནསམཱདྷཱནཾ. ཨིནྡྲིཡེསུ མནིནྡྲིཡཾ. པཊིཙྩསམུཔྤཱདེ ཝིཉྙཱཎཾ. མནོཔུབྦངྒམཱ དྷམྨཱཏི མེཏྟཱ ཙ མུདུཏཱ ཙ ཛྷཱནེསུ དུཏིཡཾ ཛྷཱནཾ ཏཏིཡཉྩ. ཁནྡྷེསུ སངྑཱརཀྑནྡྷཔརིཡཱཔནྣོ. དྷཱཏཱུསུ དྷམྨདྷཱཏུ, ཨཱཡཏནེསུ དྷམྨཱཡཏནཾ. ཡཾ ཀུསལཾ ཨིནྡྲིཡེསུ སུཁིནྡྲིཡཉྩ སོམནསྶིནྡྲིཡཉྩ པདཊྛཱནཾ. ཨིམེསཾ དྷམྨཱནཾ པཊིཙྩསམུཔྤནྣཱནཾ ཕསྶཔཙྩཡཱ སུཁཝེདནཱིཡོ ཕསྶོ སུཁཝེདནཱ མནོཔཝིཙཱརེསུ སོམནསྶཝིཙཱརོ ཚཏྟིཾསེསུ པཋམཔདེསུ ཚ སོམནསྶནེཀྑམྨསྶིཏཱ. ཨིཏི ཨཡཾ ཨོཏརཎོ ཧཱརོ.

ཏཏྠ ཀཏམོ སོདྷནོ ཧཱརོ? ཡཾ ཨཏྠཾ ཨཱརབྦྷ ཨིདཾ སུཏྟཾ བྷཱསིཏཾ. སོ ཨཏྠོ ནིཡུཏྟོ ཨེཏམཏྠཾ ཨཱརབྦྷ སུཏྟཾ. ཨཡཾ སོདྷནོ ཧཱརོ.

༨༥. ཏཏྠ ཀཏམོ ཨདྷིཊྛཱནོ ཧཱརོ? མནོཔུབྦངྒམཱ དྷམྨཱཏི ཝེཝཙནཔཉྙཏྟི, ན ཨེཀཏྟཔཉྙཏྟི. དྷམྨཱཏི ཨེཀཏོ ན ཝེཝཙནཔཉྙཏྟི. མནསཱ ཙེ པསནྣེནཱཏི སོ པསཱདོ དྭིདྷོ ཨཛ྄ཛྷཏྟཉྩ ཨབྱཱཔཱདཱཝིཀྑམྦྷནབཧིདྡྷཱ ཙ ཨོཀཔྤནཏོ. སོ ཨཛ྄ཛྷཏྟཔསཱདོ དྭིདྷོ. སམུགྒྷཱཏཔསཱདོ ཙ ཝིཀྑམྦྷནཔསཱདོ ཙ བྱཱཔཱདཔརིཡུཊྛཱནཾ. ཝིགྷཱཏོ ན མཱུལཔསཱདོ ཛཱཏམཱུལམྤི ཝཱ. པསཱདོ སབྱཱཔཱདཾ ཝིགྷཱཏེན. ཏཏོ ནཾ སུཁམནྭེཏཱིཏི སུཁཾ ཀཱཡིཀཉྩ ཙེཏསིཀཉྩ ཨཔྤིཡཝིཔྤཡོགོཔི པིཡསམྤཡོགོཔི ནེཀྑམྨསུཁམྤི པུཐུཛྫནསུཁམྤི པཱིཏིསམྦོཛ྄ཛྷངྒམྤི ཙེཏསིཀཾ སུཁཾ ¶ . ཡམྤི པསྶདྡྷཀཱཡོ སུཁཾ ཝེདེཏི, ཏམྤི ཀཱཡིཀཾ སུཁཾ བོཛ྄ཛྷངྒཱ ཙ ཙེཏསིཀཾ སུཁཾ. ཡམྤི པསྶདྡྷཀཱཡོ སུཁཾ ཝེདེསི, ཏམྤི ཏཉྩ སུཁཔདཊྛཱནཾ པཉྙཏྟིཡཱ ཡཐཱཝུཏྟཾ ཏཾ ཨཔརཱམཊྛཾ ཀུསལཱནཾ དྷམྨཱནཾ. ཨནྭེཏཱིཏི ཨཔྤནཱ སནྡིསྶཏི ན ཙཱཡཾ ཝཱ པཏྟབྷཱུཏོ ཨནྭེཏི. ཏདིདཾ སུཏྟཾ དྭཱིཧི ཨཱཀཱརེཧི ཨདྷིཊྛཱཏབྦཾ. ཧེཏུནཱ ཙ ཡོ པསནྣམཱནསོ ཝིཔཱཀེན ཙ ཡོ དུཀྑཝེདནཱིཡོ.

པརིཀྑཱརོཏི བྷགཝཱ པཉྩསཏེན བྷིཀྑུསངྒྷེན ནགརཾ པཝིསཏི རཱཛགཧཾ. ཏཏྠ མནུསྶོ པུགྒལོ བྷགཝནྟཾ པརིཝིསཏི, ཏསྶ པསཱདོ ཨུཔྤནྣོ ཀུསལམཱུལཔུབྦཡོགཱཝཙརོཔི. སོ ཨཉྙེསཉྩ ཨཀྑཱཏི, ཨིདཾ ཝཱཙཾ བྷཱསཏི ¶ ལཱབྷཱ ཏེསཾ, ཡེསཾ ནིཝེསནཾ བྷགཝཱ པཝིསཏི, ཨམྷཱཀམྤི ཡདི བྷཝེཡྻ མཡམྤི བྷགཝཏོ སཾཔསཱདཾ ལཙྪམྷཱཏི. ཡེན བྷགཝཱ ཏེནཉྫལིཾ པཎཱམེཏྭཱ ‘‘ནམོ བྷགཝཏོ ནམོ བྷགཝཏོ’’ཏི ཨབྱཱཔཱདམཱནོ ཨེཀམནྟེ ཨཊྛཱསི. ཏདནནྟརེ བྷགཝཱ ཨིམཾ སུཏྟཾ ཨབྷཱསིཏྠ ‘‘མནོཔུབྦངྒམཱ དྷམྨཱ’’ཏི. སབྦཾ སུཏྟཾ ཏཐཱ ཡཾ པརེསཾ བྷཱསཏི ཨིདཾ ¶ ཝཱཙཱཀམྨཾ. ཡཾ ཨཉྫལིཾ པཎཱམེཏི, ཨིདཾ ཀཱཡཀམྨཾ. ཡོ མནོཔསཱདོ, ཨིདཾ མནོཀམྨཾ. ཏཏྠ ཡཾ པརེསཾ པཀཱསེཏི བྷཱསཏི ཝཎྞཾ. ཡེསཾ བྷགཝཱ ནིཝེསནཾ གཙྪཏཱིཏི. སབྦཾ ཏསྶ ཨལོབྷོ ཀུསལམཱུལཾ. ཡཾ བྷགཝཏི མེཏྟཙིཏྟོ, ཏསྶ ཨདོསོ ཀུསལམཱུལཾ ¶ . ཡཾ ཨཉྫལིཾ པཎཱམེཏི མཱནཉྩ ནིགྒཎྷཱཏི, ཏཏྠསྶ ཨམོཧོ ཀུསལམཱུལཾ པཱཏུབྷཝཏི. ཡཾ ཨུལཱ༹རཔཉྙཾ པཊིལབྷཏི, ཨིདམསྶ དིཊྛིཝིཔལླཱསཔྤཧཱནཾ. ཡཾ ཏཐཱཡེཝ སཾཝརོ ཧོཏི, ཨིདམསྶ སཉྙཱཝིཔལླཱསཔྤཧཱནཾ. ཡཾ མནསྶ པསཱདནཾ, ཨིདམསྶ ཙིཏྟཝིཔལླཱསཔྤཧཱནནྟི ཨཀུསལཝིཔལླཱསཱནཾ ཝིཀྑམྦྷནཾ པཧཱནཾ པཙྩཡོ. ཏཱིཎི ཀུསལམཱུལཱནི ཡོ ཨནཱཝིལཙིཏྟསངྐཔྤོ, སོ ཏསྶ མནསིཀཱརོཏི ཝུཙྩཏི. ཡཾ ཀིལེསེཧི ཝིཀྑམྦྷནཾ ཨིཏི ཝིཔལླཱསཱ ཙ ཨཱརམྨཎཱ སཔྤཙྩཡཏཱཡ པཙྩཡོ ཀུསལམཱུལཱནི ཙ སནྡིསྶཡཏཱཡ པཙྩཡོ, སོ ཙ མནསིཀཱརོ ཧེཏུནཱ ཨིམིནཱ པཙྩཡེན ཙིཏྟཾ ཨུཔྤནྣཾ. ཏཏྠ ཡཾ སསཏྠཱརམྨཎཾ ཙིཏྟཾ པཝཏྟཾ ཨཡཾ བུདྡྷཱནུསྶཏི. ཡམྤི བྷགཝཏོ གུཎེ མནསི ཀརོཏི, ཨཡམསྶ དྷམྨཱནུསྶཏི. ཏཏྠ སཏིསམྤཛཉྙཾ ཧེཏུ, ཨཡཉྩ པཙྩཡོ. ཝཱཙཱ པཉྙཱ ཧེཏུ ཝིཏཀྐཝིཙཱརཱ པཙྩཡོ. ཀཱཡསངྑཱརཱ ཀམྨསྶ ཨབྷིསངྑཱརོ ནཱམ ཧེཏུ ཝཱ ཨཔྤཙྩཡོ སུཁཝེདནཱིཡསྶ ཀམྨསྶ ཨུཔཙཡོ ཧེཏུཀཱ ཀམྨསྶ པཙྩཡོ.

༨༦. ཏཏྠ ཀཏམོ སམཱརོཔནོ ཧཱརོ? མནསཱཡེཝ པསནྣེན སཏོཡེཝེཏྠ པསནྣོ ཨཔི ཙ ཙིཏྟཝོདཱནཱ སཏྟཱ ཝིམུཙྩནྟཱིཏི ཏེན སཏྟཱ ཙིཏྟཔུབྦངྒམཱ ཙིཏྟེན པསནྣེན ཙེཏནཱཔི ཏཏྠ ཙིཏྟབྷཱུཏཱ བྷཝནྟཱིཏི པཊིགྷཱ ཨཡཾ ཙེཏནཱནཾ པསཱདེན ཀཱཡོ ཙསྶ པསཱདོ ¶ , སོ ཙ ཨཱརབྷཏི པསཱདེན པསནྣོ སཉྙཱནནྟི ཙསྶ ཨཝིཔརཱིཏཱ, སོ པཉྩཝིདྷོ ཝིཀྑམྦྷནཱ, ཀཱཡཔསྶམྦྷནཱཡེཝཱ པསཱདོ ཙིཏྟསིཏོ ཙིཏྟཾ པན པུབྦཾཡེཝ པསནྣཾ. ཨཡཾ སམཱརོཔནཱ. ཨེཝཾ པཉྩནྣམྤི པསཱདོ. ཏཏོ ནཾ སུཁམནྭེཏཱིཏི ཀཏམཾ བྷགཝཱ ནིདྡིསཏི? ན ཧི ཨཏྟསཙྩཾ ཏསྶ ཀམྨསྶ ཝིཔཱཀོ ཨནྭེཏི. ཏསྶ ཨུཔཱཡོ ཨནུགཙྪཏི ཡདཱ སིཏཔཙྩཡཱ ཨུཔྤཛྫཏེ ¶ སོམནསྶཾ ཨཝིཔྤཊིསཱརོཔི ཨནྭེཏི. ཨཡཾ སམཱརོཔནོ ཧཱརོ.

མཧཱནཱམ སཀྐསྶ སུཏྟཾ [པསྶ སཾ. ནི. ༥.༡༠༡༧]. ཏསྨིཾ ཙེ སམཡེ ཨསྶཏོ ཨསམྤཛཱནོ ཀཱལཾ ཀརེཡྻ ཀཱམེ བྷཝཏི. ཨསྶཏོ ཨབྷིསམཱཧཱརོ ཡོ མཱ བྷཱཡི, མཧཱནཱམ, ཡཾ ཏཾ ཙིཏྟཾ དཱིགྷརཏྟཾ སདྡྷཱཔརིབྷཱཝིཏཾ སཱིལཔརིབྷཱཝིཏཾ སུཏཙཱགཔརིབྷཱཝིཏནྟི ཝིཏྠཱརེན ཀཱཏབྦཾ. ཙཱགེན ཙ པཉྙཱཡ ཙ ཀིཾ དསྶེཏི? ཡཱ སདྡྷཱ, སཱ ཙེཏསོ པསཱདོ. ཡཱ ཨནཱཝིལསངྐཔྤིཏཱ, སཱ སདྡྷཱ. ཀིཾ ཀཱརཎཱ? ཨནཱཝིལལཀྑཎཱ. ཨནཱཝིལལཀྑཎཱ ཧི སདྡྷཱ. ཨཔརེ ¶ ཨཱཧུ གུཎཔརིསུདྡྷིནིཊྛཱགམནལཀྑཎཱ, ཡཉྩ ཨཔརེ ཝཱ ཝཙནཔཊིགྒཧལཀྑཎཱ སདྡྷཱ. ཨཔརོ པརིཡཱཡོ ¶ ཨཏྟཱནཾ ཡདི ཨེཝཾ ཨོཀཔྤེཏི ‘‘ནཱཧཾ ཀིཉྩི ཛཱནཱམཱིཏི ཨེསཱ ཨཧཾ ཏཏྠ ཨནུཉྙཏྟཱ ཨནཉྙཏཱ’’ཏི. ཨཡཾ སདྡྷཱཏི. ཨཔརོ པརིཡཱཡོ ཨེཀསཊྛིཡཱ དིཊྛིགཏཱནཾ ཨཱདཱིནཝཱནུཔསྶནཱ ཨནིཙྩཾ དུཀྑམནཏྟཱཏི. ཏེན ཙ པདིཊྛཾ བྷཝཏི ཡཐཱ གམྦྷཱིརེ ཨུདཔཱནེ ཨུདཀཾ ཙཀྑུནཱ པསྶཏི ན ཙ ཀཱཡེན ཨབྷིསམྦྷུནཱཏི. ཨེཝམསྶ ཨརིཡཱ ནིཛ྄ཛྷཱནཀྑནྟིཡཱ དིཊྛི བྷཝཏི, ན ཙ སཙྪིཀཏཱ. ཨཡཾ ཝུཙྩཏི སདྡྷཱ. སཱ ཙ ལོཀིཀཱ. ཨཔརོ པརིཡཱཡོ ཁམཏི པུཐུཛྫནབྷཱུཏསྶ ཝཱིསཏི ཙཱཏི ཀོ སཀྐཱཡཱདྷཱིནཱ ན ནིཝེསོ. ན ཨེཏཾ ཨེཀནྟི ནཡསཉྙཱ ཡཐཱབྷཱུཏཾ དིཊྛིཡཱ ཏུ ཁལུ མུདཱུཧི པཉྩཧི ཨིནྡྲིཡེཧི དསྶནམགྒེན པཧཱིནཱ བྷཝནྟི. དིཊྛེཀཊྛཱ ཙ ཀིལེསཱ, ཨཡཾ སདྡྷཱ.

སོཏཱཔཏྟངྒམདུཀྑཱཡཾ བྷཱུམིཡཾ པརིཔུཎྞཱ ཝུཙྩཏི. ཏསྨིཾཡེཝ བྷཱུམིཡཾ སེཀྑསཱིལཾ ཨརིཡཱ དྷཱརནྟི ཝུཙྩཏི. ཏསྨིཾཡེཝ བྷཱུམིཡཾ མུདུཔཉྙཱ པཉྙིནྡྲིཡནྟི ཝུཙྩཏི. ཏསྨིཾཡེཝ བྷཱུམིཡཾ ཁནྡྷེཧི ཨནཏྠིཀཏཱ, ཨཡཾ ཙཱགོ. ཏསྨཱ སདྡྷཱ ཙཱགཱདྷིཊྛཱནེན ནིདྡིསིཏབྦཱ. ཡཏིཀེན [ཏེན (ཀ.)] བྷིཡྻོ མནེན སཱ ཧིསྶ ཝིཔརཱིཏཱ དིཊྛིཀཱ ཨསྶདྡྷཱ, སཱ ནཡནཨུཔདྷཱིསུ པམཏྟཱ སམཱདིནྣཱ. ཏཏྠ སདྡྷིནྡྲིཡཾ ཡོ ཀཱམཾ པརིཝིསྶནྟི ཨིཏི སནྟཔཱཔཔཊིནིསྶགྒཱ ན ཙཱགཱདྷིཊྛཱནཾ པཉྙིནྡྲིཡེན པཉྙཱདྷིཊྛཱནཾ, སཱིལེན ཨུཔསམཱདྷིཊྛཱནཾ. ཨིམེ ཙཏྟཱརོ ¶ དྷམྨཱ སཱིལཾ པརིབྷཱཝཡནྟི སདྡྷཱ སཱིལཾ ཙཱགོ ཙ པཉྙཱཏི. ཏཏྠ སདྡྷཱཡ ཨོགྷཾ ཏརཏི. ཡཾ སཱིལཾ, ཨཡཾ ཨཔྤམཱདོ. ཡོ ཙཱགོ, ཨིདཾ པཉྙཱཡ ཀམྨཾ. ཡཱ པཉྙཱ, ཨིདཾ པཉྙིནྡྲིཡཾ, ཏཏྠ ཡཾ སདྡྷིནྡྲིཡཾ. ཏཾ ཏཱིསུ ཨཝེཙྩཔྤསཱདེསུ. ཡཾ སཱིལཾ, ཏཾ སདྡྷིནྡྲིཡེསུ. ཡོ ཙཱགོ, སོ ཙཏཱུསུ ¶ ཛྷཱནེསུ. ཡཱ པཉྙཱ, སཱ སཙྩེསུ, སཏི སབྦཏྠགཱམིནཱི. ཏསྶ སེཀྑསྶ བྷདྡིཀཱ བྷཏི, བྷདྡིཀོ ཨབྷིསམྤརཱཡོ. ཏསྶ སམྨུཊྛསྶཏིཀསྶ སཱིལཾ ཀརོནྟསྶ ན ཀཱཡསམྨུཊྛསྶཏིཏཱཡ ཏཱནི ཝཱ ཨིནྡྲིཡཱནི ཏཾ ཝཱ ཀུསལམཱུལཾ ཀམྨཝིཔཱཀཾ བྷཝཏི. ཏསྶ ཏིཀསྶ ཨཏྠནིདྡེསོ. ཏཏྠ སདྡྷཱ སཱིལཾ ཙཱགོ པཉྙཱ ཙཏྟཱརོ དྷམྨཱ. ཡཱ སདྡྷཱ ཡཱ ཙ པཉྙཱ, ཨིདཾ མནོསུཙརིཏཾ. ཡཾ སཱིལཾ, ཨིདཾ ཀཱཡིཀཾ ཝཱཙསིཀཾ སུཙརིཏཾ. ཡོ ཙཱགོ, ཨིདཾ ཙེཏསིཀཾ ཨལོབྷོ སུཙརིཏཾ. ཨིཏི ཙིཏྟེ གཧིཏེ པཉྩཀྑནྡྷཱ གཧིཏཱ བྷཝནྟི. ཨིམེཧི དྷམྨེཧི སུཙརིཏཾ ཨིདཾ དུཀྑཉྩ ཨརིཡསཙྩཾ པདཊྛཱནཾ མགྒསྶ.

༨༧. ཏཏྠ ཀཏམོ ཝིཙཡོ ཧཱརོ? ཡཱ ཙ སདྡྷཱ ཡཉྩ སཱིལཾ. ཏཾ ཀིསྶ ཀརོཏི? ཡཱ སདྡྷཱ ཏཱཡ བྷགཝནྟཾ ཨནུསྶརཏི མཏྟེནཔི ཧཏྠིནཱ སམཱགཏཱ, ཨསྶ བྷོ ཀུཀྐུརཱ སབྦཾ སཱིལེན ནཔྤཊིཔཛྫཏི ཀཱཡེན ཝཱ ཝཱཙཱཡ ཝཱ ཋཱནཾ ཝིསཱརདོ བྷཝཏཱིཏི ཨཝིཔྤཊིསཱརཱི པཉྙཱ ཡསྶ པཉྙཏྟཾ ཨུཔཊྛཔེཏི. ཏསྶ ཨཁཎྜསྶ ¶ སཱིལཾ ཡཾ ན པཙྪི ཏསྶཾ མོཧསྶ ཨཀུསལཙིཏྟཾ ¶ ཨུཔྤཛྫཏི མིཙྪཱདིཊྛིསཧགཏཾ ཝཱ, ཨཡཾ ཝིཙཡོ ཧཱརོ. དྷམྨཝཱདིནོ བྷདྡིཀཱརཱཏི བྷཝིསྶཏི ཨཏྠི ཨེསཱ ཡུཏྟི.

ཏཏྠ ཀཏམོ པདཊྛཱནོ ཧཱརོ? ཡམིདཾ ཙིཏྟཾ དཱིགྷརཏྟཾ པརིབྷཱཝིཏཾ སདྡྷཱཡ སཱིལེན ཙཱགེན པཉྙཱཡ སམཱདྷིནཱ པཋམཛ྄ཛྷཱནསྶ པདཊྛཱནཾ. ཡཱ སདྡྷཱ ཨསྶ ཨནཱཝིལསངྐཔྤོ, ཏཾ དུཏིཡཛ྄ཛྷཱནསྶ པདཊྛཱནཾ. ཏཱིཎི ཙ ཨཝེཙྩཔྤསཱདཱ ཡཾ སཱིལཾ, ཏཾ ཨརིཡཀནྟཾ, ཏཾ སཱིལཀྑནྡྷསྶ པདཊྛཱནཾ. ཡཱ པཉྙཱ, སཱ པཉྙཱཀྑནྡྷསྶ པདཊྛཱནཾ. ཨིམེ ཙ དྷམྨཱ ཨིདཉྩ ཙིཏྟཾ ཨེཀོདིབྷཱུཏསམཱདྷིསྶ པདཊྛཱནཾ. སདྡྷཱ སདྡྷིནྡྲིཡསྶ པདཊྛཱནཾ. ཙཱགོ སམཱདྷིནྡྲིཡསྶ པདཊྛཱནཾ. པཉྙཱ པཉྙིནྡྲིཡསྶ པདཊྛཱནཾ. སདྡྷཱ ཙ པཉྙཱ ཙ ཝིཔསྶནཱ པདཊྛཱནཾ. སཱིལཉྩ ཙཱགོ ཙ སམཐསྶ པདཊྛཱནཾ. སདྡྷཱ ཙ པཉྙཱ ཙ ཨཝིཛྫཱ ཝིརཱགཱཡ པཉྙཱཝིམུཏྟིཡཱ པདཊྛཱནཾ. སཱིལཉྩ ཙཱགོ ཙ རཱགཝིརཱགཱཡ ཙེཏོཝིམུཏྟིཡཱ པདཊྛཱནཾ.

ཏཏྠ ཀཏམོ ལཀྑཎོ ཧཱརོ? ཝིཉྙཱཎེ ཝུཏྟེ སདྡྷཱསཏིབྷཱཝིཏེ སབྦེ པཉྩཀྑནྡྷཱ ཝུཏྟཱ བྷཝནྟི. སདྡྷཱཡ བྷཎིཏཱཡ སབྦཱནི སཏྟ དྷནཱནི བྷཎིཏཱནི ཧོནྟི སདྡྷཱདྷནཾ…པེ… སཱིལཀྑནྡྷེ ཝུཏྟེ སམཱདྷིཀྑནྡྷོ ཙ པཉྙཱཀྑནྡྷོ ཙ ཝུཏྟཱ བྷཝནྟི. ཡཾ ཏཾ ཙིཏྟཾ དཱིགྷརཏྟཾ པརིབྷཱཝིཏཾ པཙྪིམཀེ ¶ ཀཱལེ ན ཏདནུཔརིཝཏྟི བྷཝིསྶཏཱིཏི ནེཏཾ ཋཱནཾ ཝིཛྫཏི. ཏཏྠ ¶ སཉྙཱཔི ཏདནུཔརིཝཏྟིནཱི བྷཝཏི. ཡེཔི ཏཛྫཱཏིཀཱ དྷམྨཱ, ཏེཔི ཏདནུཔརིཝཏྟིནོ བྷཝནྟི. རཱུཔསཉྙཱ རཱུཔསཉྩེཏནཱནུཔསྶནམནསིཀཱརོ ཨེཝཾ ཚནྣཾ ཨཱཡཏནཱནཾ ཝིཉྙཱཎཀཱཡེ, ཨཡཾ ལཀྑཎོ ཧཱརོ.

ཏཏྠ ཀཏམོ ཙཏུབྱཱུཧོ ཧཱརོ? ཨིདྷ སུཏྟེ བྷགཝཏོ ཀོ ཨདྷིཔྤཱཡོ? ཡེ བྷདྡིཀཾ བྷཏིཾ ཨཱཀངྑེཡྻ བྷདྡིཀཉྩ ཨབྷིསམྤརཱཡཾ, ཏེ སདྡྷཾ སཱིལཾ ཙཱགཾ པཉྙཉྩ མནསི ཀརིསྶནྟི, ཨཡཾ ཨདྷིཔྤཱཡོ. ཡེ ཙཉྙེཔི སཏྟཱ ཏཐཱགཏསྶ སམྨུཁཾ ན པཊིཡུཛ྄ཛྷནྟེ, ཨིམཾ དྷམྨཾ སོཏཱ ཨཝིཔྤཊིསཱརཏོ ཀཱལཾ ཀརིསྶནྟཱིཏི, ཨཡཾ ཨདྷིཔྤཱཡོ.

༨༨. ཏཏྠ ཀཏམོ ཨཱཝཊྚོ ཧཱརོ? ཨིདམྤི ཙཏྟཱརོ དྷམྨཱ སདྡྷཱ ཙ པཉྙཱ ཙ ཨསྶདྡྷིཡཉྩ ཨཝིཛྫཉྩ ཧནནྟི. སཱིལཉྩ ཙཱགོ ཙ ཏཎྷཱ ཙ དོསཉྩ ཧནནྟི. ཏསྶ དྭེ མཱུལཱནི པཧཱིཡནྟི. དུཀྑཾ ནིཝཏྟེཏི ཨཔྤཧཱིནབྷཱུམིཡཉྩ དྭིམཱུལཱནི པཉྩཀྑནྡྷཱ. དྭེ ཨརིཡསཙྩཱནི སམཐོ ཙ ཝིཔསྶནཱ ཙ. དྭིནྣཾ མཱུལཱནཾ པཧཱནཾ. ཨིམཱནི དྭེ སཙྩཱནི ནིརོདྷོ ཙ མགྒོ ཙ. ཨཡཾ ཨཱཝཊྚོ ཧཱརོ.

ཏཏྠ ¶ ཀཏམོ ཝིབྷཏྟི? ཡཾ ཏཾ ཙིཏྟཾ སདྡྷཱཔརིབྷཱཝིཏཾ…པེ… སཙེ པུཐུཛྫནསྶ ཏསྶཔི བྷདྡིཀཱ བྷཏི བྷཝིསྶཏཱིཏི ན ཨེཀཾསེན ཏསྶ ཀམྨཾ དིཊྛེཡེཝ དྷམྨེ ཝིཔཱཀནྟི པཙྩེསྶཏི, ཨཔརམྷི ཝཱ པརིཡཱཡེ བྷཝིསྶཏི. ཡཾ ཝཱ ཨཏཱིཏཾ ¶ ཝིཔཱཀཱཡ པཙྩུཔཊྛིཏཾ, ཏཔྤཙྩཡཱནི ཙེཏཱནི, ཡེ ཡཐཱ མཧཱཀམྨཝིབྷངྒེ ‘‘ཏེནཱཡཾ ཝིབྷཛྫབྱཱཀརཎིཡོ ནིདྡེསོ དྷམྨཙཱརིནོ ཡཱ བྷདྡིཀཱ བྷཏཱི’’ཏི.

ཏཏྠ ཀཏམཱ པརིཝཏྟནཱ? ཨསྶདྡྷིཡཾ དུསྶཱིལྱཾ ཡཾ མཙྪེརཾ དུཔྤཉྙཾ ཙ [དུཔྤཉྙིཡཾ (ཀ.)] ཡཉྩ པཊིཔཀྑེན པཧཱིནཱ བྷཝནྟི, ཨཡཾ པརིཝཏྟནཱ.

ཏཏྠ ཀཏམཾ ཝེཝཙནཾ? ཡཾ ཏཾ ཙིཏྟཾ དཱིགྷརཏྟཾ པརིབྷཱཝིཏཾ ཙིཏྟཾ མནོཝིཉྙཱཎཾ…པེ… ཡཾ སདྡྷཱབལཾ སདྡྷིནྡྲིཡཾ, ཡཾ སཱིལཾ ཏཾ སུཙརིཏཾ, སཾཡམོ ནིཡམོ དམོ ཁནྡྷཏཱ ཨིམཱནི ཏསྶ ཝེཝཙནཱནི. ཡོ ཙཱགོ སོ པཊིནིསྶགྒོ ཨལོབྷོ ཝོསགྒོ ཙཱགོཡིཊྛཱནཾ. ཡཱ པཉྙཱ སཱ པཉྙཏྟཱ པཉྙཔྤབྷཱ པཉྙིནྡྲིཡཾ པཉྙཱབལཾ.

ཏཏྠ ¶ ཀཏམཱ པཉྙཏྟི? ཡཾ ཏཾ ཙིཏྟཾ བཱིཛཾ པཉྙཏྟིཡཱ པཉྙཏྟཾ. པརིབྷཱཝནཱ ཝཱསནཱ པཉྙཏྟིཡཱ པཉྙཏྟི. སདྡྷཱ པསཱདཔཉྙཏྟིཡཱ པཉྙཏྟཱ. སཱིལཾ སུཙརིཏཔཉྙཏྟིཡཱ པཉྙཏྟཾ. ཙཱགོ པུཉྙཀིརིཡཔཉྙཏྟིཡཱ པཉྙཏྟོ. པཉྙཱ ཝཱིམཾསཔཉྙཏྟིཡཱ པཉྙཏྟཱ. ཨིམེ ཏཡོ དྷམྨཱ སདྡྷཱ སཱིལཾ ཙཱགོ པཉྙཝཏོ པཱརིསུདྡྷིཾ གཙྪནྟི.

ཏཏྠ ཀཏམོ ཨོཏརཎོ? ཡཾ ཙིཏྟཾ, ཏཾ ཁནྡྷེསུ ཝིཉྙཱཎཀྑནྡྷོ, དྷཱཏཱུསུ མནོཝིཉྙཱཎདྷཱཏུ, ཨཱཡཏནེསུ མནཱཡཏནཾ. ཡེ ཙཏྟཱརོ དྷམྨཱ, ཏེ ཁནྡྷེསུ སངྑཱརཀྑནྡྷེ པརིཡཱཔནྣཱ…པེ… དྷཱཏཱུསུ ཨཱཡཏནེསུ.

ཏཏྠ ¶ ཀཏམོ སོདྷནོ ཧཱརོ? ཨིདཾ བྷགཝཏོ བྷཱསིཏཾ མཧཱནཱམེན སཀྐེན པུཙྪིཏེན སབྦཾ ཏཾ ནིཡུཏྟཾ.

ཏཏྠ ཀཏམོ ཨདྷིཊྛཱནོ? ཨིདཾ ཙིཏྟཾ ཝེམཏྟཏཱཡ པཉྙཏྟཾ ཨཀུསལེཧི ཙིཏྟེཧི ཨཔརིབྷཱཝིཏེཧི པརིབྷཱཝིཏནྟི ཡཱནི པུན པརིབྷཱཝིཏཱནི ཨཉྙེསམྤི ཏཏྠ ཨུཔཱདཱཡ པཉྙཏྟཾ སབྦེཔིམེ ཙཏྟཱརོ དྷམྨཱ ཨེཀཏྟཏཱཡ པཉྙཏྟཱ. བྷདྡིཀཱ བྷཏཱིཏི ཀཱམབྷོགིནོ ཏེཝ རཱུཔདྷཱཏུ ཨརཱུཔདྷཱཏུ མནུསྶཱཏི སབྦཱ བྷདྡིཀཱ བྷཏི ཏདེཝ ཀཐཱཡ པཉྙཏྟཾ, ཨཡཾ པཉྙཏྟི.

ཏཏྠ ¶ ཀཏམོ པརིཀྑཱརོ? ཙིཏྟསྶ ཨིནྡྲིཡཱནི པཙྩཡོ ཨཱདྷིཔཏེཡྻཔཙྩཡཏཱཡ མནསིཀཱརོ. ཧེཏུཔཙྩཡཏཱཡ པཙྩཡོ. སདྡྷཱཡ ལོཀིཀཱ པཉྙཱ ཧེཏུཔཙྩཡཏཱཡ པཙྩཡོ. ཡོནིསོ ཙ མནསིཀཱརོ པཙྩཡོ. སཱིལསྶ པཏིརཱུཔདེསཝཱསོ པཙྩཡོ. ཨཏྟསམྨཱཔཎིདྷཱནཉྩ ཧེཏུ. ཙཱགསྶ ཨལོབྷོ ཧེཏུ. ཨཝིཔྤཊིསཱརོ ཙ ཧེཏུཔཙྩཡོ. པཉྙཱ པརཏོ ཙ གྷོསོ ཨཛ྄ཛྷཏྟཉྩ ཡོནིསོ མནསིཀཱརོ ཧེཏུཔཙྩཡོ ཙ.

ཏཏྠ ཀཏམོ སམཱརོཔནོ? ཡཾ ཏཾ ཙིཏྟཾ དཱིགྷརཏྟཾ པརིབྷཱཝིཏནྟི ཙེཏསིཀཱཔི. ཨེཏྠ སབྦེ དྷམྨཱ པརིབྷཱཝིཏཱ བྷདྡིཀཱ ཏེ བྷཏི བྷཝིསྶཏི, བྷདྡིཀཱ ཨུཔཔཏྟིཀོ ཨབྷིསམྤརཱཡོ. ཨིཏི ཡེ ཀེཙི མནུསྶཀཱ ཨུཔབྷོགཔརིབྷོགཱ སབྦེ བྷདྡིཀཱ བྷཏིཡེཝ, ཨཡཾ སམཱརོཔནོ.

༨༩. ཨུདྡྷཾ ¶ ཨདྷོ སབྦདྷི ཝཱིཏརཱགོཏི གཱཐཱ [པསྶ ཨུདཱ. ༦༡ ཨུདཱནེ]. ཏཏྠ ཀིཾ ཨུདྡྷཾ ནཱམ? ཡཾ ¶ ཨིཏོ ཨུདྡྷཾ བྷཝིསྶཏི ཨནཱགཱམཱི, ཨིདཾ ཨུདྡྷཾ. ཨདྷོ ནཱམ ཡམཏིཀྐནྟམཏཱིཏཾ, ཨིདམཝོཙ ཨཔདཱནཏནྟི ཨུདྡྷཾ. ཏཏྠ ཨཏཱིཏེན སསྶཏདིཊྛི པུབྦནྟཱཀཔྤིཀཱནཾ ཨཔརནྟདིཊྛི ཀེསཉྩི, ཨུཙྪེདདིཊྛིཾ ཡཾ [ཨུཙྪེདདིཊྛིཡཾ (ཀ.)] ཝུཏྟཀཔྤིཀཱནཾ ཨིམཱ ཙེཝ དིཊྛིཡོ ཨུཙྪེདདིཊྛི ཙ སསྶཏདིཊྛི ཙ. ཏཏྠཱཡཾ སསྶཏདིཊྛི ཨིམཱནི པནྣརས པདཱནི སཀྐཱཡདིཊྛི སསྶཏཾ བྷཛནྟི. རཱུཔཝནྟཾ མེ ཨཏྟཱ, ཨཏྟནི མེ རཱུཔཾ, རཱུཔཾ མེ ཨཏྟཱཏི ཡདུཙྩཏེ པཉྙཾ པརིདཧནྟི. ཡཱ ཨུཙྪེདདིཊྛི སཱ པཉྩསཏཱནི ཨུཙྪེདཾ བྷཛནྟི. ཏེ ‘‘ཏཾ ཛཱིཝཾ ཏཾ སརཱིར’’ནྟི པསྶནྟི, རཱུཔཾ མེ ཨཏྟཱཏི ཏཐཱརཱུཔཱ ཙཏུབྦིདྷཱ སཀྐཱཡདིཊྛི ཨུཙྪེདེན ཙ སསྶཏེན ཙ. ཨེཝཾ པཉྩསུ ཁནྡྷེསུ ཝཱིསཏིཝཏྠུཀཱཡ དིཊྛིཡཱ པནྣརས པདཱནི པུབྦནྟཾ བྷཛནྟི. སསྶཏདིཊྛིཡཱ པཉྩ པདཱནི ཨཔརནྟཾ བྷཛནྟི ཨུཙྪེདདིཊྛིཡཱ. ཏཏྠ ‘‘ཨཡམཧམསྨཱི’’ཏི པསྶནྟཱ རཱུཔཾ ཨཏྟཏོ སམནུཔསྶཏི, སོ ཨུཙྪེདཝཱདཱི རཱུཔཝནྟཉྩ ཨཏྟཱནཾ, ཨཏྟནི ཙ རཱུཔཾ, རཱུཔསྨིཾ ཝཱ ཨཏྟཱཏི སོ པསྶཏི ཙཱཏི ཨིཏི ཨུཙྪེདདིཊྛི ཙ, ཨཏྟཏོ པཊིསྶརཏི སསྶཏདིཊྛི པུབྦནྟཏོ ཙ པཊིསྶརཏི. ‘‘ཨཡམཧམསྨཱི’’ཏི ན སམནུཔསྶཏི. ཏསྶ དིཊྛཱསཝཱ པཧཱནཾ གཙྪནྟི. ཡོ ཏཱིསུ ཨདྡྷཱསུ པུབྦནྟེ ཙ ཨཔརནྟེ ཙ ཏེན ཏེན ནིདྡིཊྛཱནེན ཨུདྡྷཾ ཨདྷོ སབྦདྷི ཝཱིཏརཱགོ ‘‘ཨཧམསྨཱི’’ཏི ན ཨནུཔསྶཏཱིཏི ཨིམིནཱ དྭཱརེན ཨིམིནཱ པཡོགེན ཨིམིནཱ ཨུཔཱཡེན ཨིདཾ དསྶནབྷཱུམི ཙ སོཏཱཔཏྟིཕལཉྩ སོ ཨརིཡོ པཡོགོ ཨནབྷཱཝཾགཏེན སཾསཱརེན ཨཔུནབྦྷཝཱཏི ཡོ ཀོཙི ཨརིཡོ པཡོགོ ¶ པུནབྦྷཝཱཡ མུདཱུནི ཝཱ པཉྩིནྡྲིཡཱནི མཛ྄ཛྷཱནི ཨདྷིམཏྟཱནི ཝཱ སབྦཾ ཨཔུནབྦྷཝཔྤཧཱནཱཡ སཾཝཏྟནྟི. ཨཧནྟི དིཊྛོགྷོ ཀཱམོགྷོ བྷཝོགྷོ ཨཝིཛྫོགྷོ ཙ ཨོདྷིསོ. ཏཏྠ དེསནཱཧཱརེན ཙཏྟཱརི སཙྩཱནི པཉྩཧི ཨིནྡྲིཡེཧི སོཏཱཔཏྟིཕལེན ཙ དྭེ སཙྩཱནི མགྒོ ཙ ནིརོདྷོ ཙ. སཀྐཱཡསམུདཡེན དྭེ སཙྩཱནི དུཀྑཉྩ སམུདཡོ ཙ, ཨཡཾ དེསནཱ ཧཱརོ.

ཏཏྠ ¶ ཀཏམོ ཝིཙཡོ? ‘‘ཨཡམཧམསྨཱི’’ཏི ཨསམནུཔསྶནྟོ ཏཱིཎི དསྶནཔྤཧཱཏབྦཱནི སཾཡོཛནཱནི པཛཧཏི. ཨཡཾ ཝིཙཡོ.

ཏཏྠ ཀཏམཱ ཡུཏྟི? ཏིཝིདྷཱ པུགྒལཱ ཀོཙི ཨུགྒྷཊིཏཉྙཱུ ཀོཙི ཝིཔཉྩིཏཉྙཱུ ཀོཙི ནེཡྻོ. ཨུགྒྷཊིཏཉྙཱུ ཏིཀྑིནྡྲིཡོ ཙ ཏཏོ ཝིཔཉྩིཏཉྙཱུ མུདིནྡྲིཡོ ཏཏོ མུདིནྡྲིཡེཧི ནེཡྻོ. ཏཏྠ ཨུགྒྷཊིཏཉྙཱུ ཏིཀྑིནྡྲིཡཏཱཡ དསྶནབྷཱུམིམཱགམྨ ¶ སོཏཱཔཏྟིཕལཾ པཱཔུཎཱཏི, ཨེཀབཱིཛཀོ བྷཝཏི. ཨཡཾ པཋམོ སོཏཱཔནྣོ. ཝིཔཉྩིཏཉྙཱུ མུདཱུཧི ཨིནྡྲིཡེཧི དསྶནབྷཱུམིམཱགམྨ སོཏཱཔཏྟིཕལཾ པཱཔུཎཱཏི, ཀོལཾཀོལོ ཙ ཧོཏི. ཨཡཾ དུཏིཡོ སོཏཱཔནྣོ. ཏཏྠ ནེཡྻོ དསྶནབྷཱུམིམཱགམྨ སོཏཱཔཏྟིཕལཾ པཱཔུཎཱཏི, སཏྟཀྑཏྟུཔརམོ ཙ བྷཝཏི. ཨཡཾ ཏཏིཡོ སོཏཱཔནྣོ.

ཨཏྠི ཨེསཱ ཡུཏྟི མུདུམཛ྄ཛྷཱདྷིམཏྟེཧི ཨིནྡྲིཡེཧི མུདུམཛ྄ཛྷཱདྷིམཏྟཾ བྷཱུམིཾ སཙྪིཀརེཡྻ སཀྐཱཡདིཊྛིཔྤཧཱནེན ཝཱ དིཊྛིགཏཱནི པཛཧཏི. ཨཡཾ ¶ ཡུཏྟི.

ཏཏྠ ཀཏམོ པདཊྛཱནོ? ཏཏྠ སཀྐཱཡདིཊྛི སབྦམིཙྪཱདིཊྛིཡཱ པདཊྛཱནཾ. སཀྐཱཡོ ནཱམརཱུཔསྶ པདཊྛཱནཾ. ནཱམརཱུཔཾ སཀྐཱཡདིཊྛིཡཱ པདཊྛཱནཾ. པཉྩ ཨིནྡྲིཡཱནི རཱུཔཱིནི རཱུཔརཱགསྶ པདཊྛཱནཾ. སལཱ༹ཡཏནཾ ཨཧཾཀཱརསྶ པདཊྛཱནཾ. ཏཏྠ ཀཏམོ ལཀྑཎོ? དྭཱིསུ དིཊྛཱིསུ པཧཱིནཱསུ ཏཏྠ ཨེཀཱ དིཊྛི དིཊྛིགཏཱནི པཧཱནཾ གཙྪནྟི. ཨུདྡྷཾ ཙ ཨདྷོ ཙ ཝཱིཏརཱགོ སབྦརཛནཱིཡེསུ ཝཱིཏརཱགོ ཧོཏི. ཏཛྫཱ པརབྷཱུམིཡཾ, ཨིདཾ པཙྩཡནྟི ཡཐཱབྷཱུཏཾ པསྶཏི. སོ སབྦཔཊིཙྩསམུཔྤཱདཾ ཨཱམསཏི. ཨཡཾ ལཀྑཎོ ཧཱརོ.

༩༠. ཏཏྠ ཀཏམོ ཙཏུབྱཱུཧོ ཧཱརོ? ཨིམམྷི སུཏྟེ བྷགཝཏོ ཀོ ཨདྷིཔྤཱཡོ? ཡེ སཏྟཱ ཡེ ནཱབྷིརམིསྶནྟི, ཏེ དིཊྛིཔྤཧཱནཱཡ ཝཱཡམིསྶནྟི. ཨཡམེཏྠ བྷགཝཏོ ཨདྷིཔྤཱཡོ. ཨཡཾ ཙཏུབྱཱུཧོ ཧཱརོ.

ཏཏྠ ཀཏམོ ཨཱཝཊྚོ ཧཱརོ? ཡཱནིམཱནི མུདཱུནི པཉྩིནྡྲིཡཱནི ཏཱནི ཨོརམྦྷཱགིཡཱནི པཉྩིནྡྲིཡཱནི. སབྦེན སབྦཾ སམཱུཧནནྟི ཨབྷིཛ྄ཛྷཱབྱཱཔཱདོ ཙ བྷཱཝནཱཀཱརེན སེཀྑཱཡ ཝིམུཏྟིཡཱ བལཾ སདྡྷཱ, ཨུདྡྷམྦྷཱགིཡཱནི དིཊྛིཝསེན བལཾ སདྡྷཱ, ཝཱིརིཡིནྡྲིཡཾ ཨཱརབྷིཏཏྟཱ སཏིནྡྲིཡཾ པགྒཧིཏཏྟཱ ཨཙྩནྟཾ ནིཊྛཾ གཙྪནྟི. ཏཏྠ ཡཱནི ཨིནྡྲིཡཱནི, ཨཡཾ མགྒོ སཾཀིལེསཔྤཧཱནཾ. ཨཡཾ ནིརོདྷོ ཨཱཡཏིཾ ཨནུཔྤཱདདྷམྨོ, ཨིདཾ དུཀྑཾ. ཨཡཾ ཨཱཝཊྚོ ཧཱརོ.

ཏཏྠ ¶ ཀཏམོ ཝིབྷཏྟི ཧཱརོ? ‘‘ཨཡམཧམསྨཱི’’ཏི ¶ ཡོ སམནུཔསྶཏི, སོ ཙ ཁོ ཨདྷིམཏྟེན ལོཀིཀཱ ཡཾ བྷཱུམིཡཾ ན ཏུ ཨརིཡེན པཡོགེན སོ སཀྐཱཡདིཊྛི པཛཧཏི. ཡཾ ཝུཙྩཏི ཏཛྫཱཡ བྷཱུམིཡཱ ཨདྷིམཏྟཱཡ. ཏཏྠ ཏཛྫཱཡ བྷཱུམིཡཾ པཉྩཧི ཨཱཀཱརེཧི ཨདྷིམཏྟཏཾ པཊིལབྷཏི སཱིལེན ཝཏེན བཱཧུསྶཙྩེན སམཱདྷིནཱ ནེཀྑམྨསུཁེན. ཏཏྠ ཨཔྤཏྟེ པཏྟསཉྙཱི ¶ ཨདྷིམཱནཾ གཎྷཱཏི. ཨེཏསྨིཾཡེཝ ཝཏྠུཔྤཏྟིཡཾ བྷགཝཱ ཨིདཾ སུཏྟཾ བྷཱསཏི. སཱིལཝཱ ཝཏམཏྟེནཱཏི. ཏཏྠ ཡོ ཨཔྤཏྟེ པཏྟསཉྙཱི ཏསྶ ཡོ སམཱདྷི, སོ སཱམིསོ ཀཱཔུརིསསེཝིཏོ པན སོ ཀཱཔུརིསཱ ཝུཙྩནྟི པུཐུཛྫནཱ. ཨཱམིསཾ ཡཉྩ ཨརིཡམགྒམཱགམྨ ལོཀིཀཱ ཨནརིཡཾ ཏེན སམཱདྷི ཧོཏི ཨནརིཡོ ཀཱཔུརིསསེཝིཏོ. ཡོ པན ཨརིཡཱཀཱརེན ཡཐཱབྷཱུཏཾ ན ཛཱནཱཏི ན པསྶཏི [ཛཱནཱཏི པསྶཏི (པཱི.)], སོ ཨདྷིགམནཾ པཛཧཏི ཡོ ཨརིཡེན སམཱདྷིནཱ ཨཀཱཔུརིསསེཝིཏེན ནིརཱམིསེན ནཱིཡཏི, ཏཏྠ ཨཀཱཔུརིསཱ ཝུཙྩནྟི ཨརིཡཔུགྒལཱ. ཡོ ཏེཧི སེཝིཏོ སམཱདྷི, སོ ཨཀཱཔུརིསསེཝིཏོ. ཏསྨཱ ཨེཀཾ ཝིབྷཛྫབྱཱཀརཎཱིཡཾ ‘‘ཨཡམཧམསྨཱི’’ཏི ཨསམནུཔསྶནྟོ ཏཐཱ པཱཏེཏི.

ཏཏྠ ཀཏམཱ པརིཝཏྟནཱ? ཨིམཱཡ དསྶནབྷཱུམིཡཱ ཀིལེསཱ པཧཱཏབྦཱ, ཏེཧི པཧཱིཡནྟི ཨནིདྡིཊྛཱཔི བྷགཝཏཱ ནིདྡིསིཏབྦཱ ཡོ.

ཏཏྠ ཀཏམཾ ཝེཝཙནཾ? ཡཱ ¶ སཀྐཱཡདིཊྛིཡཱ ཨཏྟདིཊྛིཡཱ. ཨཡཾ བྷཱུམི. ཡེ ཀིལེསཱ པཧཱཏབྦཱ. ཏེ ཨཔྤཧཱིཡནྟི ཨནིདྡིཊྛཱཔི བྷགཝཏཱ སསྶཏདིཊྛི ཙ ཨུཙྪེདདིཊྛི ཙ, སཱ པརིཡནྟདིཊྛི ཙ. ཡཱ ཨཔརིཡནྟདིཊྛི ཙ, སཱ སསྶཏདིཊྛི ཙ. ཡཱ ཨུཙྪེདདིཊྛི, སཱ ནཏྠིཀཱ དིཊྛི. ཡཱ སསྶཏདིཊྛི, སཱ ཨཀིརིཡདིཊྛི. ཨིདཾ ཝེཝཙནཾ.

ཏཏྠ ཀཏམཱ པཉྙཏྟི? ཏཎྷཱ སཾཡོཛནཔཉྙཏྟིཡཱ པཉྙཏྟཱ. མགྒོ པཊིལཱབྷཔཉྙཏྟིཡཱ པཉྙཏྟོ. ཨིནྡྲིཡཱ པཊིལཱབྷཔཉྙཏྟིཡཱ པཉྙཏྟཱཏི. ཏཏྠ ཀཏམོ ཨོཏརཎོ? སཀྐཱཡོ དུཀྑཾ དསྶནཔྤཧཱཏབྦོ. སམུདཡོ མགྒོ. ཨིནྡྲིཡཱནི ཏཱནི ཙ ནིདྡིཊྛཱནི ཁནྡྷདྷཱཏུཨཱཡཏནེསུ.

ཏཏྠ ཀཏམོ སོདྷནོ ཧཱརོ? ཡཉྷི ཨཱརབྦྷ བྷགཝཏཱ ཨིདཾ སུཏྟཾ བྷཱསིཏཾ, སོ ཨཱརབྦྷ ནིདྡིཊྛོ. ཏཏྠ ཀཏམོ པརིཀྑཱརོ? ནཱམརཱུཔསྶ ཧེཏུཔཙྩཡོཔི ཝིཉྙཱཎཾ ཧེཏུ བཱིཛཾ. ཏེན ཨཝིཛྫཱ ཙ སངྑཱརཱ ཙ པཙྩཡོ. ནིཝཏྟིནཡོ ན ཨཔརོ པརིཡཱཡོ སབྦབྷཝོ, ཡེ ཙ སབྦབྷཝསྶ ཧེཏུ པརབྷཎྜཔཙྩཡོ ཨིཏི སམྨཱདིཊྛི པརཏོ ཙ གྷོསོ ཡོནིསོ ཙ མནསིཀཱརོ པཙྩཡོ ¶ . ཡཱ པཉྙཱ ཨུཔྤཱདེཏི, ཨེསཱ ཧེཏུ སམྨཱདིཊྛིཡཱ སམྨཱསངྐཔྤོ བྷཝཏི, ཡཱ སམྨཱསམཱདྷི [སམྨཱདིཊྛི (པཱི.)], ཨཡཾ པརིཀྑཱརོ.

ཏཏྠ ¶ ཀཏམོ སམཱརོཔནོ? ‘‘ཨཡམཧམསྨཱི’’ཏི ¶ ཨསམནུཔསྶཱི དུཀྑཏོ རོགཏོ…པེ… པནྣརས པདཱནི. སཱིལཱནི བྷགཝཱ ཀིམཏྠིཡཱནི ཀིམཱནིསཾསཱནི. སཱིལཱནི, ཨཱནནྡ, ཨཝིཔྤཊིསཱརཏྠཱནི ཡཱཝ ཝིམུཏྟི. ཏཏྠ དུཝིདྷོ ཨཏྠོ – པུརིསཏྠོ ཙ ཝཙནཏྠོ ཙ.

༩༡. ཏཏྠ ཀཏམོ པུརིསཏྠོ? ཡཱཡཾ ན པཙྪཱནུཏཱཔིཏཱ ཨཡཾ ཨཝིཔྤཊིསཱརོ, ཨཡཾ པུརིསཏྠོ. ཡཐཱ ཀོཙི བྲཱུཧཡཏི ཨིམཏྠམཱསེཝཏི སོ བྷཎེཡྻ, ཀིཉྩི མམེཏྠ ཨདྷཱིནཾ ཏསྶཏྠཱཡ ཨིདཾ ཀིརིཡཾ ཨཱརབྷཱམཱིཏི. ཨཡཾ པུརིསཏྠོ.

ཏཏྠ ཀཏམོ ཝཙནཏྠོ? སཱིལཱནི ཀཱཡིཀཾ ཝཱ ཝཱཙསིཀཾ ཝཱ སུཙརིཏཾ ཨཝིཔྤཊིསཱརོཏི. ཏཏྠ སཱིལསྶ ཝཏསྶ ཙ བྷཱསོཡེཝ. ཨནཉྙཱ སུགཏཀམྨཏཱ སུཙརིཏཾ ཨཡཾ ཨཝིཔྤཊིསཱརོ. ཨེཝཾ ཡཱཝ ཝིམུཏྟཱིཏི ཨེཀམེཀསྨིཾ པདེ དྭེ ཨཏྠཱ – པུརིསཏྠོ ཙ ཝཙནཏྠོ ཙ, ཡཐཱ ཨིམམྷི སུཏྟེ ཨེཝཾ སབྦེསུ སུཏྟེསུ དྭེ དྭེ ཨཏྠཱ. ཨཡཾ ཧི པརམཏྠོ ཨུཏྟམཏྠོ ཙ. ཡཾ ནིབྦཱནསཙྪིཀཾ ནིསྶཱཡ ཡཾ སཀཾ སཙྪིཀཱཏབྦཾ བྷཝཏི, སོ ཝུཙྩཏི ཀཏསྶ [སཏསྶ (ཀ.)] ཀཏྠོཏི. ཨཡཾ པུན ཝེཝཙནཾ སམྤཛཱནཱཏི. ཨིམིནཱ ནིཡུཏྟཏྠམབྷིལབྦྷནྟི ཝཙནཏྠོ. ཏཏྠ ཡཾ ཨཏྠཾ སཱཝཀོ ཨབྷིཀངྑཏི. ཏསྶ ཡོ པཊིལཱབྷོ, ཨཡཾ པུརིསཏྠོ. ཡཾ ཡཾ བྷགཝཱ དྷམྨཾ དེསེཏི, ཏསྶ ཏསྶ དྷམྨསྶ ཡཱ ཨཏྠཝིཉྙཏྟི. ཨཡཾ ཨཏྠོ, ཏཏྠ ¶ སཱིལཱནཾ ཨཝིཔྤཊིསཱརོ ཨཏྠོཔི ཨཱནིསཾསོཔི. ཨེསོ ཙ ཨཱནིསཾསོ ཡཾ དུགྒཏིཾ ན གཙྪཏི. ཡཐཱ ཏཾ བྷགཝཏཱ ཨེསཱནིསཾསོ དྷམྨེ སུཙིཎྞེ ན དུགྒཏིཾ གཙྪཏི དྷམྨཙཱརཱི, ཨཡཾ ཨཏྠོ.

ཡཾ པུརིསོ བྷཱཝནཱབྷཱུམིཡཾ སཱིལཱནི ཨཱརབྦྷ སཱིལེན སཾཡུཏྟོ ཧོཏི ཨེཝཾ ཡཱཝ ཝིམུཏྟི ཏཐཱ སཱིལཀྑནྡྷོ. ཏཏྠ ཡོ ཙ ཨཝིཔྤཊིསཱརོ ཨནུསཡཝསེན ནིདྡིཊྛོ, ཏཉྩ སཱིལཾ ཨཡཾ སཱིལཀྑནྡྷོ. པཱམོཛྫཔཱིཏིཔསྶདྡྷཱིཏི ཙ སམཱདྷིནྡྲིཡེན, ཨཡཾ སམཱདྷིཀྑནྡྷོ. ཡཾ སམཱཧིཏོ ཡཐཱབྷཱུཏཾ པཛཱནཱཏི, ཨཡཾ པཉྙཱཀྑནྡྷོ. ཨིམེ ཏཡོ ཁནྡྷཱ སཱིལཾ སམཱདྷི པཉྙཱ ཙ ཏཐཱ སཱིལཾ པརིཔཱུརེཏི ཡཾ ཝཱིརིཡིནྡྲིཡཾ ཏེན ཀཱརཎེན སོ སཱིལཾ པརིཔཱུརེཏི, ཨནུཔྤནྣསྶ ཙ ཨཀུསལསྶ ཨནུཔྤཱདཱཡ ཝཱཡམཏི, ཨུཔྤནྣསྶ ཙ པཧཱནཱཡ ཨནུཔྤནྣསྶ ཙ ཀུསལསྶ ཨུཔྤཱདཱཡ, ཨུཔྤནྣསྶ ཙ ཀུསལསྶ བྷིཡྻོབྷཱཝཱཡ ¶ ཨིཏི ཝཱིརིཡིནྡྲིཡཾ ནིདྡིཊྛཾ. ཏཏྠ ཡོ སམཱདྷིཀྑནྡྷོ ¶ , ཨིདཾ སམཱདྷིནྡྲིཡཾ. པཉྙཱཀྑནྡྷོ པཉྙིནྡྲིཡཾ, ཏཾ ཙཏཱུསུ སམྨཔྤདྷཱནེསུ དཊྛབྦཾ. ཏཐཱ ཡོ ཨནུཔྤནྣསྶ ཙ ཨཀུསལསྶ ཨནུཔྤཱདཱཡ ཝཱཡམཏི, ཨིདཾ པཋམཾ སམྨཔྤདྷཱནཾ. ཡཾ ཨུཔྤནྣསྶ, ཨིདཾ དུཏིཡཾ. ཙཏྟཱརི སམྨཔྤདྷཱནཱནི ཙཏཱུསུ ཛྷཱནེསུ པསྶིཏབྦཱནི. ཏཐཱ ¶ སཱིལཀྑནྡྷེན ནེཀྑམྨདྷཱཏུ ཙ ཨདྷིཀཱ [ཨཱདིཀཱ (པཱི.)], ཏཡོ ཙ ཝིཏཀྐཱ ནེཀྑམྨཝིཏཀྐོ ཨབྱཱཔཱདཝིཏཀྐོ ཨཝིཧིཾསཱཝིཏཀྐོ ཙ. སཱདྷཱརཎབྷཱུཏཱ. ཡཱ པིཡཱཡམཱནསྶ པཱམོཛྫེན ཨིདཾ ཀཱཡིཀཾ སུཁཾ ཨཱནིཏཾ ཨནིཡམཱིཏིཔེམེན, ཨིདཾ དུཀྑཾ. ཡོ ཏཏྠ ཨཝིཀྑེཔོ, ཨཡཾ སམཱདྷི. ཨིདཾ པཉྩངྒིཀཾ པཋམཾ ཛྷཱནཾ. ཡཱ ཙེཏསིཀཱ པསྶདྡྷི སཝིཏཀྐཾ སཝིཙཱརཾ ཝིརོདྷནཾ, ཡོ ཀིལེསོ ཙ པརིདཱཧོ, སོ པཋམེ ཛྷཱནེ ནིརུདྡྷོ. ཏཐཱ ཡཱ ཙ ཀིལེསཔསྶདྡྷི ཡཱ ཙ ཝིཏཀྐཝིཙཱརཱནཾ པསྶདྡྷི, ཨུབྷཡེཔི ཨེཏེ དྷམྨེ པསྶདྡྷཱཡཾ. ཏཏྠ ཀཱཡསྶ ཙིཏྟསྶ ཙ སུཁཾ སུཁཱཡནཱ, ཨིདཾ པཱིཏིསུཁིནོ པསྶདྡྷི. ཡོཔི ཨེཀོདིབྷཱཝོ ཙིཏྟསྶ, ཏེན ཨེཀོདིབྷཱཝེན ཡཾ ཙིཏྟསྶ ཨཛ྄ཛྷཏྟཾ སམྤསཱདནཾ, ཨིདཾ ཙཏུཏྠཾ ཛྷཱནངྒཾ. ཨིཏི ཨཛ྄ཛྷཏྟཉྩ སམྤསཱདོ ཙེཏསོ ཙ ཨེཀོདིབྷཱཝོ པཱིཏི ཙ སུཁཉྩ, ཨིདཾ དུཏིཡཾ ཛྷཱནཾ ཙཏུརངྒིཀཾ. ཡོ པསྶདྡྷཀཱཡོ སུཁཾ ཝེདེཏི, ཏེན ཨདྷིམཏྟེན སུཁེན ཕརིཏྭཱ སུཁཾ ཙེཏསིཀཾ ཡཾ, སོ པཱིཏིཝཱིཏརཱགོ ཨེཝཾ ཏསྶ པཱིཏིཝཱིཏརཱགཏཱཡ ཨུཔེཀྑཾ པཊིལབྷཏི. སོ པཱིཏིཡཱ ཙ ཝིརཱགཱ ཨུཔེཀྑཾ པཊིལབྷཏི. སུཁཉྩ པཊིསཾཝེདེཏི. སཏི ཙ སམྨཱ པཉྙཱཡ པཊིལབྷཏི. སཙེ སཏི ཨེཀགྒཏཱ ཨིདཾ པཉྩངྒིཀཾ ཏཏིཡཾ ཛྷཱནཾ. ཡཾ ¶ སུཁིནོ ཙིཏྟཾ སམཱདྷིཡཏི, ཨཡཾ ཨེཀགྒཏཱཡ པརཱཝིདྷཱནབྷཱགིཡཱ, པཋམེ ཛྷཱནེ ཨཏྠི ཙིཏྟེཀགྒཏཱ ནོ ཙཀྑུསྶ ཝེདནཱ སབྦཾ པཱརིཔཱུརིཾ གཙྪཏི. ཡཐཱ ཙཏུཏྠེ ཛྷཱནེ, ཏཐཱ ཡཱ ཨུཔེཀྑཱ པསྶམྦྷཡཾ སཏིསམྤཛཉྙཾ ཙིཏྟེཀགྒཏཱ ཙ, ཨིདཾ ཙཏུཏྠཾ ཛྷཱནཾ.

༩༢. ཡཐཱ སམཱདྷི དསྶཡིཏབྦཾ, ཏཐཱ པཉྙིནྡྲིཡཾ ཏཾ ཙཏཱུསུ ཨརིཡསཙྩེསུ པསྶིཏབྦཾ. ཡཾ སམཱཧིཏོ ཡཐཱབྷཱུཏཾ པཛཱནཱཏི, སཱ པཛཱནནཱ ཙཏུབྦིདྷཱ ཨསུབྷཏོ དུཀྑཏོ ཨནཏྟཏོ ཙ, ཡདཱརམྨཎཾ ཏཾ དུཀྑཾ ཨརིཡསཙྩཾ, ཡཾ པཛཱནནྟོ ནིབྦིནྡཏི ཝིམུཙྩཏི ཏཐཱ ཡཾ ཀཱམཱསཝསྶ པཧཱནཾ བྷཝཱསཝསྶ དིཊྛཱསཝསྶ ཨཝིཛྫཱསཝསྶ, ཨཡཾ ནིརོདྷོ ཨཔྤཧཱིནབྷཱུམིཡཾ ¶ ཨཱསཝསམུདཡོ. ཨིམཱནི ཙཏྟཱརི ཨརིཡསཙྩཱནི ཡཐཱ པཉྙིནྡྲིཡཾ པསྶིཏབྦཾ. ཡཐཱཡཾ སམཱཧིཏོ ཡཐཱབྷཱུཏཾ པཛཱནཱཏི, ཨཡཾ དསྶནབྷཱུམི. སོཏཱཔཏྟིཕལཉྩ ཡཐཱབྷཱུཏཾ པཛཱནནྟོ ནིབྦིནྡཏཱིཏི, ཨིདཾ ཏནུཀཉྩ. ཀཱམརཱགབྱཱཔཱདཾ སཀདཱགཱམིཕལཉྩ ཡཾ ནིབྦིནྡཏི ཝིརཛྫཏི, ཨཡཾ པཋམཛ྄ཛྷཱནབྷཱཝནཱབྷཱུམི ཙ རཱགཝིརཱགཱ ཙེཏོཝིམུཏྟི ཨནཱགཱམིཕལཉྩ. ཡཾ ཝིམུཏྟི ཝིམུཙྩཏི, ཨཡཾ ཨཝིཛྫཱཝིརཱགཱ པཉྙཱཝིམུཏྟི ཨརཧཏྟཉྩ. ཨིམེ ཨཝིཔྤཊིསཱརཱ ཙ ཝཱིརིཡིནྡྲིཡཉྩ ཙཏྟཱརོ སམྨཔྤདྷཱནཱ ཨཝིཔྤཊིསཱརཱ ཏཉྩ ཨུཔརི ཡཱཝ ¶ སམཱདྷི, ཨེཝཾ ཏེ ཙཏྟཱརི ཛྷཱནཱནི སམཱདྷིནྡྲིཡཉྩ ཡཾ སམཱཧིཏོ ཡཐཱབྷཱུཏཾ པཛཱནཱཏི. ཨིམེ ཙཏྟཱརོ སཏིཔཊྛཱནཱ སཱིལཔཱརིཔཱུརིམུཔཱདཱཡ ཙཱགསཾཧིཏེན ཙ ནིབྦེདྷིཀཱནཉྩ ནིམིཏྟཱནཾ ཨནཱཝིལམནཱ, ཨིདཾ སཏིནྡྲིཡཾ ཙཏྟཱརོ སཏིཔཊྛཱནཱ. ཡཾ ¶ པུན ཨིམཱཡ དྷམྨདེསནཱཡ ཏཱིསུ ཋཱནེསུ དིཊྛོགམནཀིནྡྲིཡཾ ཀིལེསཔཧཱནེན ཙ སེཀྑསཱིལཾ, ཨིདཾ སདྡྷིནྡྲིཡཾ. ཙཏྟཱརི ཙ སོཏཱཔཏྟིཡངྒཱནི ཕལཱནི. སམཱདྷིནྡྲིཡཱནི སོཔནིཡཱཧཱརཱིནི སབྦསུཏྟེསུ ནིདྡིསིཏབྦཱནི. ཡཾ ཛྷཱནཾ པཊིལབྷནཾ ཝཱིརིཡགཧིཏཾཡེཝ ཉཱཎཾ པཊིསྶརཏོ, ཨཡཾ སུཏམཡཱི པཉྙཱ. ཡོ སམཱདྷི པུབྦཱཔརནིམིཏྟཱབྷཱསོ ཨནོམགཏིཏཱཡ ཡཐཱཀཱམོ, ཨཡཾ ཙིནྟཱམཡཱི པཉྙཱ, ཡཾ ཏཐཱསམཱཧིཏོ ཡཐཱབྷཱུཏཾ པཛཱནཱཏི, ཨཡཾ བྷཱཝནཱམཡཱི པཉྙཱ. ཨཡཾ སུཏྟནིདྡེསོ.

ཨིམཾ སུཏྟཾ ནིབྦེདྷབྷཱགིཡཾ བུཛ྄ཛྷཀཱརདྷིཀཾ བུཛ྄ཛྷིཏབྦཾ. ཡེཧི ཨངྒེཧི སམནྣཱགཏཾ ཏཾ བུཛ྄ཛྷིསྶནྟི ཏསྶ ཨངྒཱནི བུཛ྄ཛྷིསྶནྟི, ཏེན བོཛ྄ཛྷངྒཱ. ཏཐཱ ཨཱདིཏོ ཡཱཝ སཱིལཾ ཝཏཾ ཙེཏནཱ ཀརཎཱིཡཱ, ཀིསྶ སཱིལཱནི པཱརིཔཱུརེཏི. ཨནུཔྤནྣསྶ ཙ ཨཀུསལསྶ ཨནུཔྤཱདཱཡ ཨུཔྤནྣསྶ ཙ ཨཀུསལསྶ པཧཱནཱཡ ཨནུཔྤནྣསྶ ཀུསལསྶ ཨུཔྤཱདཱཡ ཨུཔྤནྣསྶ ཙ ཀུསལསྶ བྷིཡྻོབྷཱཝཱཡ, ཨིདཾ ཝཱིརིཡཾ ཏསྶ ཏསྶ བུཛ྄ཛྷིཏསྶ ཨངྒནྟི. ཨཡཾ ཝཱིརིཡསམྦོཛ྄ཛྷངྒོ. ཨིམིནཱ ཝཱིརིཡེན དྭེ དྷམྨཱ ཨཱདིཏོ ཨཝིཔྤཊིསཱརོ པཱམོཛྫཉྩ ཡཱ པུན པཱིཏི ཨཝིཔྤཊིསཱརཔཙྩཡཱ པཱམོཛྫཔཙྩཡཱ, ཨཡཾ པཱིཏིསམྦོཛ྄ཛྷངྒོ. ཡཾ པཱིཏིམནསྶ ཀཱཡོ པསྶམྦྷཏི. ཨཡཾ པསྶདྡྷིསམྦོཛ྄ཛྷངྒོ. ཏེན ¶ ཀཱཡིཀསུཁམཱནིཏཾ ཡཾ སུཁིནོ ཙིཏྟཾ སམཱདྷིཡཏི, ཨཡཾ སམཱདྷིསམྦོཛ྄ཛྷངྒོ. ཡཾ སམཱཧིཏོ ཡཐཱབྷཱུཏཾ པཛཱནཱཏི, ཨཡཾ དྷམྨཝིཙཡསམྦོཛ྄ཛྷངྒོ. ཡཱ སཱིལམུཔཱདཱཡ པཉྩནྣཾ བོཛ྄ཛྷངྒཱནཾ ཨུཔཱདཱཡཱནུལོམཏཱ ནིམིཏྟཱཡནཱ པཱིཏིབྷཱགིཡཱནཉྩ ཝིསེསབྷཱགིཡཱནཉྩ ¶ ཨཔིལཱཔནཏཱ སཧགཏཱ ཧོཏི ཨནཝམགྒོ, ཨཡཾ སཏིསམྦོཛ྄ཛྷངྒོ. ཡཾ ཡཐཱབྷཱུཏཾ པཛཱནཱཏི, ཨཙྩཱརདྡྷཝཱིརིཡཾ ཀརོཏི. ཨུདྡྷཙྩབྷཱུམཱིཏི ཀཏཱ ཨབྷིཔཏྠིཏཾ པེསེཏི. ཀོསཛྫབྷཱུམཱིཏི གརཧིཏོ རཧིཏེཧི ཨངྒེཧི བུཛ྄ཛྷཏི ཡཾ ཙཀྑུསམཐཔཐཾ, སཱ ཨུཔེཀྑཱཏི. ཏེན སཱ ཨུཔེཀྑཱ ཏསྶ བོཛ྄ཛྷངྒསྶ ཨངྒནྟི ཀརིཏྭཱ ཨུཔེཀྑཱསམྦོཛ྄ཛྷངྒོཏི ཝུཙྩཏེ. ཨེསོ སུཏྟནིདྡེསོ.

༩༣. ཏཏྠ ཀཏམཱ དེསནཱ? ཨསྨིཾ སུཏྟེ ཙཏྟཱརི ཨརིཡསཙྩཱནི དེསིཏཱནི. ཏཏྠ ཀཏམོ ཝིཙཡོ? སཱིལཝཏོ ཨཝིཔྤཊིསཱརོ ཡཱཝ ཝིམུཏྟི ཨིམིསྶཱཡ པུཙྪཱཡ མིནིཀིམཏྠསྶམཱིཏི དྭེ པདཱནི པུཙྪཱ དྭེ པདཱནི ཝིསཛྫནཱནི དྭཱིཧི པདེཧི དྭེ ཨབྷིཉྙཾ དྭཱིཧི ཙེཝ པདེཧི ཝིསཛྫནཱ ཀིཾ པུཙྪཏི ནིབྦཱདྷིཀཾ ཀཱཡབྷཱུམིཾ ཀམྨསྶ ཏཐཱ ཧི པཏིཊྛཱ ཙ ཨསེཀྑེ དྷམྨེ ཨུཔྤཱདེཏི. ཏཏྠ ཀཏམཱ ཡུཏྟི? སཱིལཝཏོ ¶ ཨཝིཔྤཊིསཱརོ བྷཝཏི ཀིཾ ནིཙྪནྡསྶ ¶ ཙ ཝིརཱགོ ཨཏྠི ཨེསཱ ཡུཏྟི. ཏཏྠ ཀཏམཾ པདཊྛཱནཾ? ཝཱིརིཡཾ ཝཱིརིཡིནྡྲིཡསྶ པདཊྛཱནཾ. སམཱདྷི སམཱདྷིནྡྲིཡསྶ པདཊྛཱནཾ. པཉྙཱ པཉྙིནྡྲིཡསྶ པདཊྛཱནཾ. ཝཱིརིཡཾ ཨདོསསྶ པདཊྛཱནཾ. སམཱདྷི ཨལོབྷསྶ པདཊྛཱནཾ. པཉྙཱ ཨམོཧསྶ པདཊྛཱནཾ. ཝཱིརིཡིནྡྲིཡཾ ཏིཎྞཾ མགྒངྒཱནཾ པདཊྛཱནཾ, སམྨཱཝཱཙཱཡ སམྨཱཀམྨནྟསྶ སམྨཱཨཱཛཱིཝསྶ. སམཱདྷིནྡྲིཡཾ ཏིཎྞཾ མགྒངྒཱནཾ པདཊྛཱནཾ, སམྨཱསངྐཔྤསྶ སམྨཱཝཱཙཱཡ སམྨཱསམཱདྷིནོ. པཉྙིནྡྲིཡཾ དྭིནྣཾ མགྒངྒཱནཾ པདཊྛཱནཾ, སམྨཱསཏིཡཱ སམྨཱདིཊྛིཡཱ ཙ.

ཏཏྠ ཀཏམོ ལཀྑཎོ? སཱིལཀྑནྡྷེ ཝུཏྟེ སབྦེ ཏཡོ ཁནྡྷཱ ཝུཏྟཱ བྷཝནྟི, སཱིལམེཝ ཧི སེལོཔམཏཱ ཡཐཱ སེལོ སབྦཔཙྩཏྠིཀེཧི ཨཀརཎཱིཡོ ཨེཝཾ ཏཾ ཙིཏྟཾ སབྦཀིལེསེཧི ན ཀམྤཏཱིཏི, ཨཡཾ ཨམོཧོ. ཝིརཏྟཾ [པསྶ ཨུདཱ. ༣༤ ཨུདཱནཔཱལི༹ཡཾ] རཛནཱིཡེསཱུཏི ཨཡཾ ཨལོབྷོ. ཀོཔནེཡྻེ ན ཀུཔྤཏཱིཏི ཨཡཾ ཨདོསོ. ཏཏྠ པཉྙཱ ཨམོཧོ ཀུསལམཱུལཾ, ཨལོབྷོ ཨལོབྷོཡེཝ, ཨདོསོ ཨདོསོཡེཝ. ཨིམེཧི ཏཱིཧི ཀུསལམཱུལེཧི སེཀྑབྷཱུམིཡཾ ཋིཏོ ཨསེཀྑམགྒཾ ཨུཔྤཱདེཏི. སེཀྑབྷཱུམི སམྤཏྟིཀམྨདྷམྨེ ཨུཔྤཱདེཏི, སཱ ཙ སམྨཱཝིམུཏྟི, ཡཉྩ ཝིམུཏྟིརསཉཱཎདསྶནཾ ཨིམེ དས ཨསེཀྑཱནཾ ཨརཧཏྟཾ དྷམྨཱ. ཏཏྠ ཨཊྛངྒིཀེན མགྒེན ཙཏུབྦིདྷཱ བྷཱཝནཱཔི ལབྦྷཏི. སཱིལབྷཱཝནཱ ཀཱཡབྷཱཝནཱ ཙིཏྟབྷཱཝནཱ ¶ པཉྙཱབྷཱཝནཱ ཙ. ཏཏྠ སམྨཱཀམྨནྟེན སམྨཱཨཱཛཱིཝེན ཙ ཀཱཡོ བྷཱཝིཏོ. སམྨཱཝཱཙཱཡ སམྨཱཝཱཡཱམེན ཙ སཱིལཾ བྷཱཝིཏཾ. སམྨཱསངྐཔྤེན སམྨཱསམཱདྷིནཱ ཙ ཙིཏྟཾ བྷཱཝིཏཾ. སམྨཱདིཊྛིཡཱ སམྨཱསཏིཡཱ ཙ པཉྙཱ བྷཱཝིཏཱ. ཨིམཱཡ ཙཏུབྦིདྷཱཡ བྷཱཝནཱཡ དྭེ དྷམྨཱ བྷཱཝནཱཔཱརིཔཱུརིཾ གཙྪནྟི ཙིཏྟཾ པཉྙཉྩ. ཙིཏྟཾ བྷཱཝནཱཡ སམཐོ, པཉྙཱ བྷཱཝནཱཡ ཝིཔསྶནཱ. ཏཏྠ པཉྙཱ ཨཝིཛྫཱཔཧཱནེན ཙིཏྟཾ ཨུཔཀྐིལེསེཧི ཨམིསྶཱིཀཏནྟི. པཉྙཱ བྷཱཝནཱཡ ཙིཏྟབྷཱཝནཾཡེཝ པརིཔཱུརེཏི. ཨེཝཾ ཡསྶ སུབྷཱཝིཏཾ ཙིཏྟཾ ཀུཏོ ཏཾ དུཀྑམེསྶཏཱིཏི. ཨཔི ཙ ཁོ པན ཏསྶ ཨཱཡསྨཏོ ཨབྱཱཔཱདདྷཱཏུ ཨདྷིམུཏྟཱ, ན སོ པེཏཾ སམཱཔནྣོ ཏསྶ སངྑཱཔཧཱརཾ དེཏི, སངྑཱཝིཏཀྐིཏེ སརཱིརེ དུཀྑཾ ན ཝེདིཡཏི, ཨཡཾ སུཏྟཏྠོ.

༩༤. ཏཏྠ ཀཏམཱ དེསནཱ? ཨིམམྷི སུཏྟེ དས ཨསེཀྑཱ ཨརཧཏྟདྷམྨཱ དེསིཏཱ ཨཔྤམཱཎཱ ཙ སམྨཱ ཝིབྷཱཝནཱ. ཏཏྠ ཀཏམོ ཝིཙཡོ? སེལོཔམཏཱ ཡེ ཡེ དྷམྨཱ ཝེདནཱིཡསུཁདུཀྑོཔགཏཱ, ཏེ སབྦེ ནིརཱུཔཾ ཝཱནུཔསྶནྟཱནཾ ཝཱུཔགཏཱ ཀཱཡཏོ ཝེདཡིཏཔརིཀྑཱརོ ཨཔྤཝཏྟིཏོ དུཀྑཾ ན ཝེདིཡཏི. ཏཏྠ ཀཏམཱ ཡུཏྟི, ཡསྶེཝཾ བྷཱཝིཏཾ ཙིཏྟཾ ཀུཏོ ཏཾ [ནཾ (ཀ.)] དུཀྑམེསྶཏཱིཏི. ཏཱིསུ བྷཱཝནཱསུ དུཀྑཾ ནཀྑམཏི ཙིཏྟཾ ཙིཏྟབྷཱཝནཱཡ ཙ. ནིརོདྷབྷཱཝནཱཡ ཙ ¶ ཨཱནནྟརིཀཱ སམཱདྷིབྷཱཝནཱཡ ཙ. ཨིཏི ཡསྶེཝཾ བྷཱཝིཏཾ ཙིཏྟནྟི སམཱདྷི ཕལསྶ པདཊྛཱནཾ.

ཏཏྠ ཀཏམོ ལཀྑཎོ? ཡསྶེཝཾ བྷཱཝིཏཾ [པསྶ ཨུདཱ. ༣༤ ཨུདཱནཔཱལི༹ཡཾ] ཙིཏྟནྟི ཙིཏྟཱནི བྷཱཝིཏཱནི ཡཐཱ པཋམཾ ནིདྡིཊྛཱནི པཉྙཱ སཱིལཾ ཀཱཡོ ཙིཏྟཾ, སཱིལམྤི སུབྷཱཝིཏཾ ཀཱཡིཀཙེཏསིཀཉྩ ཋིཏཏྟཱ ནཱནུཔཀམྤཏཱིཏི ཝེདནཱཔི ཏཐཱ སཉྙཱཔི སངྑཱརཱཔི. ཀུཏོ ཏཾ དུཀྑམེསྶཏཱིཏི སུཁམྤི ནཱནུགཙྪཏི, ཨདུཀྑམསུཁམྤི ནཱགཏནྟི.

ཏཏྠ ཀཏམོ ཙཏུབྱཱུཧོ ཧཱརོ? ཨིདྷ བྷགཝཏོ ཀོ ཨདྷིཔྤཱཡོ? ཡེ དུཀྑེན ཨདྷིཀཱ བྷཝིསྶནྟི, ཏེ ཨེཝརཱུཔཱཧི སམཱཔཏྟཱིཧི ཝིརཧིསྶནྟི. ཨཡམེཏྠ བྷགཝཏོ ཨདྷིཔྤཱཡོ. ཡེ ཙ ཨཔྤསནྣཱ, ཏེ ཧི བྷཝིསྶནྟི, པསནྣཱནཉྩ ¶ པཱིཏིཔཱམོཛྫཾ བྷཝིསྶཏི, ཨཡཾ ཏཏྠ བྷགཝཏོ ཨདྷིཔྤཱཡོ. ཨཱཝཊྚོཏི ནཏྠི ཨཱཝཊྚནསྶ བྷཱུམི.

ཝིབྷཏྟཱིཏི ཡསྶེཝཾ བྷཱཝིཏཾ ཙིཏྟཾ ཀུཏོ ཏཾ དུཀྑམེསྶཏཱིཏི དུཝིདྷོ ནིདྡེསོ – དུཀྑཧེཏུནིདྡེསོ ཙ པཊིཔཀྑནིདྡེསོ ཙ. ཀོ སོ དུཀྑཧེཏུ? ཡཏོ དུཀྑཾ ཨཱགཙྪཏི པཊིཔཀྑེ ཝུཏྟེ སེསདྷམྨཱནཾ སཱིལཾ ཧེཏུ ཙ པཙྩཡོ ཙ, ཏེ སབྦེ དྷམྨཱ ཝུཏྟཱ ཧོནྟི. ཨེཀབོདྷིཔཀྑིཡེ དྷམྨེ ཝུཏྟེ སབྦེ བོདྷགམནཱིཡཱ དྷམྨཱ ཝུཏྟཱ བྷཝནྟི.

ཏཏྠ ཀཏམོ ཙཏུབྱཱུཧོ ཧཱརོ? ཨིམམྷི སུཏྟེ བྷགཝཏོ ཀོ ཨདྷིཔྤཱཡོ? ཡེ ཨཝིཔྤཊིསཱརེན ཚནྡིཀཱ, ཏེ སཱིལཔཱརིཔཱུརཱི བྷཝནྟི པཱམོཛྫཚནྡིཀཱ ཨཝིཔྤཊིསཱརཱིཔཱརིཔཱུརཱི, ཨཡམེཏྠ བྷགཝཏོ ཨདྷིཔྤཱཡོ…པེ… ཨཡཾ ཙཏུབྱཱུཧོ ཧཱརོ.

ཏཏྠ ཀཏམོ ཨཱཝཊྚོ? ཨིདཾ ¶ སུཏྟཾ ནིབྦེདྷབྷཱགིཡཾ. ཡོ ནིབྦེདྷོ, ཨཡཾ ནིརོདྷོ. ཡེན ནིབྦིཛ྄ཛྷཏི, སོ མགྒོ. ཡཾ ནིབྦིཛ྄ཛྷཏི, ཏཾ དུཀྑཾ. ཡཾ ནིབྦེདྷགཱམིནཱ མགྒེན པཧཱིཡཏི, སམུདཡོཡཾ ཝུཏྟོ.

ཏཏྠ ཀཏམཱ ཝིབྷཏྟི? སཱིལཝཏོ ཨཝིཔྤཊིསཱརོཏི ཝིབྷཛྫབྱཱཀརཎཱིཡཾ, པརཱམསནྟསྶ ནཏྠི ཨཝིཔྤཊིསཱརོ ཡཱཝ དོསཀཏཾ ཀཱཡེན ཝཱ ཝཱཙཱཡ ཝཱ ཨཀུསལཾ ཨཱརབྷཏི. ཀིཉྩིཔིསྶ ཨེཝཾ ཧོཏི ‘‘སུཀཏམེཏཾ སུཙརིཏམེཏཾ ནོ ཙསྶ ཏེན ཨཝིཔྤཊིསཱརེན པཱམོཛྫཾ ཛཱཡཏི ¶ ཡཱཝ ཝིམུཏྟི, ཏསྶ སཱིལཝཏོ ཨཝིཔྤཊིསཱརོ’’ཏི ཝིབྷཛྫབྱཱཀརཎཱིཡཾ, ཨཡཾ ཝིབྷཏྟིཧཱརོ.

ཏཏྠ ཀཏམཱ པརིཝཏྟནཱ? ཨིམེཧི སཏྟཧི ཨུཔནིསཱསམྤཏྟཱིཧི ཨེཀཱདས ཨུཔནིསཱ ཝིབྷཏྟིཡཾ པཛཧཱནཾ པཛཧནྟི, ཨཡཾ པརིཝཏྟནཱ.

ཏཏྠ ཀཏམཱ ཝེཝཙནཱ? ཨིམེསཾ ཨརིཡདྷམྨཱནཾ བལབོཛ྄ཛྷངྒཝིམོཀྑསམཱདྷིསམཱཔཏྟཱིནཾ ཨིམཱནི ཝེཝཙནཱནི.

ཏཏྠ ཀཏམཱ པཉྙཏྟི? སཱིལཝཏོ ཨཝིཔྤཊིསཱརོཏི སཱིལཀྑནྡྷེ ནེཀྑམྨཔཉྙཏྟིཡཱ པཉྙཏྟཾ, ནིསཛྫཔཉྙཏྟི ཙ ཨེཝཾ དས ཨངྒཱནི དྭཱིཧི དྭཱིཧི ཨངྒེཧི པཉྙཏྟཱནི.

ཏཏྠ ཀཏམོ ཨོཏརཎོ? ཨིདཾ ནིབྦེདྷབྷཱགིཡསུཏྟཾ པཉྩསུ ཨོཏིཎྞཾ ཡཐཱ ཡཾ པཋམཾ ནིདྡིཊྛཾ ཨེཝམིནྡྲིཡཱདིཁནྡྷདྷཱཏུཨཱཡཏནེསུ ནིདྡིསིཏབྦཱནི.

ཏཏྠ ¶ ཀཏམོ སོདྷནོ ཧཱརོ? སཱིལཝཏོ ཨཝིཔྤཊིསཱརོཏི ན ཏཱཝ སུདྡྷོ ཨཱརམྦྷོ ཨཝིཔྤཊིསཱརིནོ པཱམོཛྫནྟི ན ཏཱཝ སུདྡྷོ ཨཱརམྦྷོ ཡཱནི ཨེཀཱདས པདཱནི དེསིཏཱནི ཡདཱ ཏདཱ སུདྡྷོ ཨཱརམྦྷོ, ཨཡཾ སོདྷནོ.

ཏཏྠ ¶ ཀཏམོ ཨདྷིཊྛཱནོ? སཱིལཝེམཏྟཏཱཡ པཉྙཏྟཾ ཨེཝཾ དས པདཱནི སབྦཱནི སཱིལཀྑནྡྷསྶ ཨཱནིསཾསོ, ཏེ ཙ པཏིརཱུཔདེསཝཱསོ ཙ པཙྩཡོ ཨཏྟསམྨཱཔཎིདྷཱནཉྩ ཧེཏུ, སམཱདྷིཀྑནྡྷསྶ སུཁཾ ཧེཏུ པསྶདྡྷི པཙྩཡོ, ཡེན ཛྷཱནསཧཛཱཏི ཙ ཋཱནནྟི ཛྷཱནངྒཱ ཨཔརོ པརིཡཱཡོ ཀཱམེསུ ཨཱདཱིནཝཱནུཔསྶནཱ སམཱདྷིནོ པཙྩཡོ ནེཀྑམྨེ ཨཱནིསཾསདསྶཱཝིཏཱ ཧེཏུ.

ཏཏྠ ཀཏམཱ སམཱརོཔནཱ? ཡཾ ཝཱིརིཡིནྡྲིཡཾ, སོ སཱིལཀྑནྡྷོ. ཡཾ སཱིལཾ, ཏེ ཙཏྟཱརོ དྷམྨཱ པདྷཱནཱ. ཡཾ དྷམྨཱནུདྷམྨཔཊིཔཏྟི, སོ པཱཏིམོཀྑསཾཝརོ.

༩༥. ཡསྶ སེལོཔམཾ ཙིཏྟནྟི གཱཐཱ [པསྶ ཨུདཱ. ༣༤ ཨུདཱནེ], སེལོཔམནྟི ཨུཔམཱ ཡཐཱ སེལོ ཝཱཏེན ན ཀམྤཏི ན ཨུཎྷེན ན སཱིཏེན སཾཀམྤཏི. ཡཐཱ ཨནེཀཱ ཨཙེཏནཱ, ཏེ ཨུཎྷེན མིལཱཡནྟི, སཱིཏེན ཨཝསུསྶནྟི, ཝཱཏེན བྷཛནྟི. ན ཨེཝཾ སེལོ ཝིརཏྟཾ རཛནཱིཡེསུ དོསནཱིཡེ ན དུསྶཏཱིཏི ¶ ཀཱརཎཾ དོསནཱིཡེ དོམནསྶནྟཾ, ན དུཊྛེན ཝཱ ཀམྤཏི ཨུཎྷེན ཝཱ, སོ མིལཱཡཏི སཱིཏེན ཝཱ ཨཝསུསྶཏི, ཨེཝཾ ཙིཏྟཾ རཱགེན ནཱནུསྶཏི སཱིཏེན ཀམྤཏཱིཏི. ཀིཾ ཀཱརཎཾ? ཝིརཏྟཾ རཛནཱིཡེསུ དོསནཱིཡེ ན དུསྶཏི. ཀིཾ ཀཱརཎཾ? དོསནཱིཡེ ¶ པནསྶནྟི ན དུསྶཏི, ཨདུཊྛཾ ཏཾ ན ཀོསིསྶནྟི, ཏེན ཀུཔྤནཱིཡེ ན ཀུཔྤཏི, ཡསྶེཝཾ བྷཱཝིཏཾ ཙིཏྟཾ ཀུཏོ ཏཾ དུཀྑནིདྡེསོ ཙ ¶ ཀུཏོ ཨེཝརཱུཔསྶ དུཀྑཾ ཨཱགམིསྶཏཱིཏི ནིདྡིཊྛཾ.

པརིཝཏྟནཱཏི ཀུཏོ ཏཾ དུཀྑམེསྶཏཱིཏི ཡཾ ཙེཏསིཀཾ སུཁཾ ཨནུཔཱདིསེསཱ ཨཡཾ ནཏྠི སོཔཱདིསེསཱ ཨཡཾ ཨཏྠི. པུན ཨེཝམཱཧཾསུ ཏཾ ཁཎཾ ཏཾ མུཧུཏྟཾ ཨུབྷཡམེཝ ཨཝེདཡིཏཾ སོཔཱདིསེསཾ ཡཉྩ ཨནུཔཱདིསེསཾ ཡཉྩ ཏཾ ཁཎཾ ཏཾ མུཧུཏྟཾ ཨནུཔཱདིསེསཾ ཡཉྩ སོཔཱདིསེསཾ ཙ ཨཝེདཡིཏཾ. སུཁམཱཔནྣསྶ ཨནཱཝཏྟིཀནྟི ཨཡམེཏྠ ཝིསེསོ པརིཝཏྟནཱ.

ཏཏྠ ¶ ཀཏམོ ཝེཝཙནོ? ཡསྶེཝཾ བྷཱཝིཏཾ ཙིཏྟཾ ཝཱ བྷཱཝིཏཾ སུབྷཱཝིཏཾ ཨནུཊྛིཏཾ ཝཏྠུཀཏཾ སུསམཱརདྡྷཾ. ཙིཏྟནྟི མནོ ཝིཉྙཱཎཾ མནིནྡྲིཡཾ མནོཝིཉྙཱཎདྷཱཏུ.

ཏཏྠ ¶ ཀཏམཱ པཉྙཏྟི? ཙིཏྟཾ མནོ སངྑཱརཱ ཝཱུཔསམཔཉྙཏྟིཡཱ པཉྙཏྟཾ. སམཱདྷི ཨསེཀྑཔཉྙཏྟིཡཱ པཉྙཏྟོ. དུཀྑཾ ཨུཙྪིནྣཔཉྙཏྟིཡཱ པཉྙཏྟཾ.

ཏཏྠ ཀཏམོ ཨོཏརཎོ? ཙིཏྟེ ནིདྡིཊྛེ པཉྩཀྑནྡྷཱ ནིདྡིཊྛཱ ཧོནྟི, ཨཡཾ ཁནྡྷེསུ ཨོཏརཎོ, མནོཝིཉྙཱཎདྷཱཏུཡཱ ནིདྡིཊྛཱཡ ཨཊྛཱརས དྷཱཏུཡོ ནིདྡིཊྛཱ ཧོནྟི, ཨཡཾ དྷཱཏཱུསུ ཨོཏརཎོ. མནཱཡཏནེ ནིདྡིཊྛེ སབྦཱནི ཨཱཡཏནཱནི ནིདྡིཊྛཱནི ཧོནྟི. ཏཏྠ མནཱཡཏནཾ ནཱམརཱུཔསྶ པདཊྛཱནཾ. ནཱམརཱུཔཔཙྩཡཱ སལཱ༹ཡཏནཾ. ཏཐཱ པཊིཙྩསམུཔྤཱདེ. ཨཡཾ ཨོཏརཎོ. ཏཏྠ ཀཏམོ སོདྷནོ སུདྡྷོཡེཝ ཨཱརམྦྷོ.

ཏཏྠ ཀཏམོ ཨདྷིཊྛཱནོ? ཚལི༹ནྡྲིཡཾ བྷཱཝནཱ ཨེཀཏྟཱཡཾ པཉྙཏྟི ཚཊྛིཏེན ཀཱཡོ ཨེཀཏྟཱཡ པཉྙཏྟོ.

ཏཏྠ ཀཏམོ པརིཀྑཱརོ? ཙིཏྟསྶ པུབྦཧེཏུ སམུཔྤཱདཱཡ མནསིཀཱརོ ཙ ཏཔྤོཎཏཱ ཙ ཡཾ ཨསམཱཧིཏབྷཱུམིཡཾ ཙ ཝིསེསདྷམྨཱནཾ ཨབྷཱཝིཏཏྟཱ ཙིཏྟསཏཏཾ གཙྪཏི, སཙེ སམཱདྷིནོ སུཁཾ ཧེཏུ ཨཝིཔྤཊིསཱརོ པཙྩཡོ, ཨཡཾ ཧེཏུ ཨཡཾ པཙྩཡོ པརིཀྑཱརོ.

ཏཏྠ ¶ ཀཏམཱ སམཱརོཔནཱ? ཡསྶེཝཾ བྷཱཝིཏནྟི ཏསྶ དྷམྨཱ སམཱརོཔཡིཏབྦཱ. ཀཱཡོ སཱིལཾ པཉྙཱ བྷཱཝིཏཙིཏྟནྟི ཨནབྷིརཏཾ ཨནཔཎཏཾ ཨནེཀཾ ཨནུཏཾ ཨནཱཔཛྫཱསཏྟཾ ཨཡཾ སམཉྙཱཡཏནཱ ན ཏསྶ སེཀྑསྶ སམྨཱསམཱདྷི སབྦེ ཨསེཀྑཱ དས ཨརཧནྟདྷམྨཱ ནིདྡིཊྛཱ ཧོནྟི. ཨསེཀྑབྷཱགིཡཱནི སུཏྟཱནི.

༩༦. ཡསྶ ¶ ནཱུན, བྷནྟེ, ཀཱཡགཏཱསཏི ཨབྷཱཝིཏཱ, ཨཡཾ སོ ཨཉྙཏརཾ སབྲཧྨཙཱརིཾ [སབྲཧྨཙཱརཱིནཾ (ཀ.)] ཨཱསཛྫ སམཱཔཛྫ ཨཔྤཊིནིསཛྫ ཛནཔདཙཱརིཀཾ པཀྐམེཡྻ, སོ ཨཱཡསྨཱ ཨིམསྨིཾ ཝིཔྤཊིཛཱནཱཏི དྭེ པཛཱནི པཊིཛཱནཱཏི ཙིཏྟབྷཱཝནཱཡཉྩ དིཊྛིཡཱ པཧཱནཾ, ཀཱཡབྷཱཝནཱཡཉྩ དིཊྛིཔྤཧཱནཾ, ཀཱཡབྷཱཝནཱཡཉྩ ཏཎྷཱཔཧཱནཾ, ཡཾ པཋམཾ ཨུཔམཾ ཀརོཏི. ཨསུཙིནཱཔི སུཙིནཱཔི པཐཝཱི ནེཝ ཨཊྚིཡཏི ན ཛིགུཙྪཏི ན པཱིཏིཔཱམོཛྫཾ པཊིལབྷཏི, ཨེཝམེཝ ¶ ཧི པཐཝཱིསམེན སོ ཙེཏསཱ ཨནྭཡེན ཨཔྤཀེན ཨཝེརེན ཨབྱཱཔཛྫེན ཝིཧརཱམཱིཏི. ཨིཏི སོ ཨཱཡསྨཱ ཀིཾ པཊིཛཱནཱཏི, ཀཱཡབྷཱཝནཱཡ སུཁིནྡྲིཡཔཧཱནཾ པཊིཛཱནཱཏི, ཙིཏྟབྷཱཝནཱཡ སོམནསྶིནྡྲིཡཔཧཱནཾ པཊིཛཱནཱཏི. ཀཱཡིཀཱ ཝེདནཱ རཱགཱནུསཡམནུགཏཱནཾ སུཁིནྡྲིཡཾ པཊིཀྑིཔཏི. ན ཧི ཝེདནཱཀྑནྡྷཾ ཡཱ ཙེཏསིཀཱ སུཁཝེདནཱ ཏཏྠ ཨཡཾ པཊིལཱབྷཔཙྩཡཱ ཨུཔྤཛྫཏི སུཁཾ སོམནསྶཾ. སོཏཾ པཊིཀྑིཔཏི, ན ཧི མནོསམྥསྶཛཾ ཝེདནཾ. ཏཏྠ ཙཏཱུསུ མཧཱབྷཱུཏེསུ རཱུཔཀྑནྡྷསྶ ཨནུསཡཔཊིགྷཔཧཱནཾ བྷཎཏི. ཀཱམེ རཱུཔཉྩ ཏཉྩ ཨསེཀྑབྷཱུམིཡཾ. ཀཱཡེ ཀཱཡཱནུཔསྶནཱ དིཊྛདྷམྨསུཁཝིཧཱརཉྩ. བལེན ཙ ཨུསྶཱཧེན ཙ སབྦཾ མནསི ཀཏཏྟཱནཾ པཧཱནཾ ¶ མེདཾ ཀཏཱལིཀཱཡ ཙ པུརིསེན ཙ མཎྜནཀཛཱཏིཀེན ཙ, ཨེཏེཧི ཨིམསྶ མཱཏཱཔིཏུསམྦྷཱུཏཾ པཙྩཝེཀྑཎཾ, སོ ཀཱཡེན ཙ ཀཱཡཱནུཔསྶནཱཡ ཙ ཙིཏྟེན ཙ ཙིཏྟཱནུཔསྶནཱཡ ཙ དྭེ དྷམྨེ དྷཱརེཏི. ཀཱཡཀིལེསཝཏྠུཾ ཙིཏྟེན ཙ ཙིཏྟསནྣིསྶཡེ ཙིཏྟེན སུབྷཱཝིཏེན སཏྟནྣཾ ཙ སམཱཔཏྟཱིནཾ ཝིཧརིཏུཾ པཊིཛཱནཱཏི.

གཧཔཏིཔུཏྟོཔམཏཱཡ ཙ ཡཐཱ གཧཔཏིཔུཏྟསྶ ནཱནཱརངྒཱནཾ ཝཏྠཀརཎྜཀོ པུཎྞོ བྷཝེཡྻ, སོ ཡཾ ཡདེཝ ཝཏྠཡུགཾ པུབྦཎྷསམཡེ ཨཱཀངྑཏི, པུབྦཎྷསམཡེ ནིབྦཱཔེཏི, ཨེཝཾ མཛ྄ཛྷནྷིཀསམཡེ, སཱཡནྷསམཡེ, ཨེཝམེཝ སོ ཨཱཡསྨཱ ཙིཏྟསྶ སུབྷཱཝིཏཏྟཱ ཡཐཱརཱུཔེན ཝིཧཱརེན ཨཱཀངྑཏི པུབྦཎྷསམཡཾ ཝིཧརིཏུཾ, ཏཐཱརཱུཔེན [ཡཐཱརཱུཔེན (པཱི. ཀ.)] པུབྦཎྷསམཡཾ ཝིཧརཏི, མཛ྄ཛྷནྷིཀསམཡེ, སཱཡནྷསམཡེ. ཏེན ཝེས ཨཱཡསྨཏཱ ཨུཔམཱཡ མེ ཨཱསིཏཱཡ པཐཝཱི ཝཱ ཨནུཏྟརཱ ཨིནྡྲིཡབྷཱཝནཱ བྷཱཝིཏཙིཏྟེན. ཏེན སོ ཨཱཡསྨཱ ཨིདཾ ཨཊྛཝིདྷཾ བྷཱཝནཾ པཊིཛཱནཱཏི ཙཏཱུསུ མཧཱབྷཱུཏེསུ, ཀཱཡབྷཱཝནཾ ཨུཔཀཙཎྜཱལཾ པུརིསམེཏཀཾ བྷཝཏལཱཀཱསུ ཙིཏྟབྷཱཝནཾ, ཨིམཱཧི བྷཱཝནཱཧི ཏཱཡ བྷཱཝནཱཡ ཙ སམཐཱ པཱརིཔཱུརིམནྟེཧི. ཨིམེཧི ཙཏཱུཧི པཉྙཱཔཱརིཔཱུརིམནྟེཧི.

༩༧. ཀཐཾ ¶ ཨུཔཀཙཎྜཱལཾ པཊིཀཱུལེསུ དྷམྨེསུ ཨཔྤཊིཀཱུལསཉྙཱི ཝིཧརཏི? ཀཱཡོ ¶ པཀཏིཡཱ ཨཔྤཊིཀཱུལཾ ཀཱཡེ ཨུདྡྷུམཱཏཀསཉྙཱ སཾཁིཏྟེན ནཝ སཉྙཱ ཨིམེ པཊིཀཱུལཱ དྷམྨཱ ཙེསོ ཨཱཡསྨཱ པཊིཀཱུལཏོ ཨཛིགུཙྪིཏོ ཀཱཡགཏཱསཏིཡཱ བྷཱཝནཱནུཡོགམནུཡུཏྟོ ཝིཧརཏི, ན ཧི ཏསྶ ཛིགུཙྪཔྤཧཱཡ ཙིཏྟཾ པཊིཀཱུལཏི.

ཀཐཾ ¶ ཨཔྤཊིཀཱུལེསུ དྷམྨེསུ པཊིཀཱུལསཉྙཱི ཝིཧརཏཱིཏི? ཀཱཡོ སབྦལོཀསྶ ཨཔྤཊིཀཱུལོ ཏཾ སོ ཨཱཡསྨཱ ཨསུབྷསཉྙཱཡ ཝིཧརཏི. ཨེཝཾ ཨཔྤཊིཀཱུལེསུ དྷམྨེསུ པཊིཀཱུལསཉྙཱི ཝིཧརཏི.

ཀཐཾ པཊིཀཱུལེསུ ཙ ཨཔྤཊིཀཱུལེསུ ཙ ཨཔྤཊིཀཱུལསཉྙཱི ཝིཧརཏཱིཏི ཨཔི སབྦོཡཾ ལོཀསྶ ཡམིདཾ མུཎྜོ པཏྟཔཱཎཱི ཀུལེསུ པིཎྜཱཡ ཝིཙརཏི, ཏེན ཙ སོ ཨཱཡསྨཱ སུཝཎྞདུབྦཎྞེན ཨཔྤཊིཀཱུལསཉྙཱི ཙིཏྟེན ཙ ཀཱཡེན ནིབྦིདཱསཧགཏེན ཨཔྤཊིཀཱུལསཉྙཱི, ཨེཝཾ པཊིཀཱུལེསུ ཨཔྤཊིཀཱུལེསུ ཙ དྷམྨེསུ ཨཔྤཊིཀཱུལསཉྙཱི ཝིཧརཏི.

ཀཐཾ པཊིཀཱུལེསུ ཙ དྷམྨེསུ ཨཔྤཊིཀཱུལསཉྙཱི ཝིཧརཏི? པཊིཀཱུལེསུ ཙ དྷམྨེསུ སུབྷསཉྙིནོ ཨིཏྠིརཱུཔེ པཊིཀཱུལེསུ ཙ ཛིགུཙྪིནོ ཝིནཱིལཀཝིཔུབྦཀེ ཏཏྠ སོ ཨཱཡསྨཱ པཊིཀཱུལསཉྙཱི ཝིཧརཏི.

ཀཐཾ པཊིཀཱུལེསུ དྷམྨེསུ ཏདུབྷཡཾ ཨབྷིནིཝཛྫཡིཏྭཱ ཨུཔེཀྑཀོ ཝིཧརཏི སཏོ ཙ སམྤཛཱནོ ཙ? ཨཔྤཊིཀཱུལེསུ ཙ དྷམྨེསུ སུབྷསཉྙིནོ ཨིཏྠིརཱུཔེ པཊིཀཱུལེསུ ཙ ཛིགུཙྪིནོ ཝིནཱིལཀཝིཔུབྦཀེ ཏདུབྷཡཾ ཨབྷིནིཝཛྫཡིཏྭཱ ‘ནེཏཾ མམ’‘ནེསོཧམསྨི’‘ནེསོ མེ’ ཨཏྟཱཏི ཝིཧརཏི. ཨེཝཾ ¶ ཏདུབྷཡཾ ཨབྷིནིཝཛྫཡིཏྭཱ ཨུཔེཀྑཀོ ཝིཧརཏི སཏོ སམྤཛཱནོ.

ཨཔརོ པརིཡཱཡོ. ཏེདྷཱཏུཀོ ལོཀསནྣིཝཱསོ སབྦབཱལཔུཐུཛྫནཱནཾ ཨཔྤཊིཀཱུལསཉྙཱ. ཏཏྠ ཙ ཨཱཡསྨཱ སཱརིཔུཏྟོ ཨཔྤཊིཀཱུལསཉྙཱི ཝིཧརཏི. ཨེཝཾ ཨཔྤཊིཀཱུལེསུ དྷམྨེསུ པཊིཀཱུལསཉྙཱི ཝིཧརཏི.

ཀཐཾ པཊིཀཱུལེསུ དྷམྨེསུ ཨཔྤཊིཀཱུལསཉྙཱི ཝིཧརཏི? པཊིཀཱུལསཉྙིནོ སབྦསེཀྑཱ ཨིདྷ ཀཱ ཏེདྷཱཏུཀེ སབྦལོཀེ. ཏཏྠ ཀཏམོ བྷཱུམིཔྤཏྟོ སམཱདྷིཕལེ སཙྪིཀཏོ ཨཔྤཊིཀཱུལསཉྙཱི ཝིཧརཏི ¶ ? ཀིཾ ཀཱརཎཾ? ན ཧི ཏཾ ཨཏྠི ཡསྶ ལོཀསྶ པཧཱནཱཡ པཊིཀཱུལསཉྙཱི ཨུཔྤཱདེཡྻ.

ཀཐཾ པཊིཀཱུལེསུ ཙ ཨཔྤཊིཀཱུལེསུ ཙ དྷམྨེསུ པཊིཀཱུལསཉྙཱི ཝིཧརཏི? ཏེདྷཱཏུཀེ ལོཀསནྣིཝཱསེ ཡཱཝ ཀཱམལོཀབྷཱུམཏཱ ཧི རཱགཱནཾ ཝཱིཏརཱགཱནཾ པཊིཀཱུལསམཏཱ རཱུཔཱརཱུཔདྷཱཏུཾ ཨཔྤཊིཀཱུལསམཏཱ. ཏཏྠ ཙ ཨཱཡསྨཱ སཱརིཔུཏྟོ པཊིཀཱུལསཉྙཱི ཝིཧརཏི. ཨེཝཾ པཊིཀཱུལེསུ ཙ ཨཔྤཊིཀཱུལེསུ ཙ དྷམྨེསུ པཊིཀཱུལསཉྙཱི ཝིཧརཏི.

ཀཐཾ ¶ པཊིཀཱུལེསུ ཙ ཨཔྤཊིཀཱུལེསུ ཙ དྷམྨེསུ ཨཔྤཊིཀཱུལསཉྙཱི ཝིཧརཏི? ཡཾ ཀིཉྩི པརཏོ དུརུཏྟཱནཾ དུརཱགཏཱནཾ ཝཙནཔཐཱནཾ ཏཾ ཝཙནཾ ཨཔྤཊིཀཱུལཾ ཡཱཝཏཱ ཝཱཙསོ ཨཔྤཏིརཱུཔཱ ཏཐཱ ཛནསྶ ཨཔྤཊིཀཱུལསཉྙཱ. ཏཏྠ ཨཱཡསྨཱ སཱརིཔུཏྟོ ཨབྷིཉྙཱཡ སཙྪིཀཏོ ཨཔྤཊིཀཱུལསཉྙཱི ཝིཧརཏི, ཨེཝཾ པཊིཀཱུལེསུ ཙ ཨཔྤཊིཀཱུལེསུ ཙ དྷམྨེསུ ཨཔྤཊིཀཱུལསཉྙཱི ཝིཧརཏི.

༩༨. ཀཐཾ ¶ པཊིཀཱུལེསུ ཙ ཨཔྤཊིཀཱུལེསུ ཙ དྷམྨེསུ ཏདུབྷཡཾ ཨབྷིནིཝཛྫཡིཏྭཱ ཨུཔེཀྑཀོ ཙ ཝིཧརཏི སཏོ ཙ སམྤཛཱནོ? ཡཉྩ ནེསཾ སམནུཔསྶཏི ཡེ དྷམྨཱ དུཙྩརིཏཱ, ཏེ དྷམྨཱ ཨཔྤཊིཀཱུལཱ. ཏཏྠ ཨཱཡསྨཱ སཱརིཔུཏྟོ ཨིཏི པཊིསཉྩིཀྑཏི ཡེ དྷམྨཱ དུཙྩརིཏཱ, ཏེ དྷམྨཱ ཨནིཊྛཝིཔཱཀཱ. ཡེ དྷམྨཱ སུཙརིཏཱ, ཏེ ཨཱཙཡགཱམིནོ. སོ ཙ སུཙརིཏཾ ཨཱཙཡགཱམིནིཾ ཀརིཏྭཱ དུཙྩརིཏཾ ཨནིཊྛཝིཔཱཀཾ ཀརིཏྭཱ ཏདུབྷཡཾ ཨབྷིནིཝཛྫཡིཏྭཱ ཨུཔེཀྑཀོ ཝིཧརཏི.

ཨཐ པཊིཀཱུལེསུ ཙ དྷམྨེསུ ཨཔྤཊིཀཱུལེསུ ཙ པཊིཀཱུལསཉྙཱི ཝིཧརཏི. ཏཎྷཱ པཊིཀཱུལདྷམྨཱ ཀིཾ ཀཱརཎཾ? ཏཎྷཱཝསེན ཧི སཏྟཱ དྭཱིཧི དྷམྨེཧི སཏྟཱ, ཀབལཱི༹ཀཱརེ ཨཱཧཱརེ རསཏཎྷཱཡ སཏྟཱ, ཕསྶེ སུཁསཉྙཱཡ སཏྟཱ. ཏཏྠཱཡསྨཱ སཱརིཔུཏྟོ ཀབལཱི༹ཀཱརེ ཙ ཨཱཧཱརེ པཊིཀཱུལསཉྙཱི ཝིཧརཏི, ཕསྶེ ཙ དུཀྑསཉྙཱི ཝིཧརཏི. ཨེཝཾ པཊིཀཱུལེསུ ཙ ཨཔྤཊིཀཱུལེསུ ཙ པཊིཀཱུལསཉྙཱི ཝིཧརཏི.

ཀཐཾ པཊིཀཱུལེསུ ཙ དྷམྨེསུ ཨཔྤཊིཀཱུལེསུ ཙ དྷམྨེསུ ཨཔྤཊིཀཱུལསཉྙཱི ཝིཧརཏི? ཏཎྷཱཀྑཡཾ ཨནུཏྟརཾ ནིབྦཱནཾ ཏཐཱ བཱལཔུཐུཛྫནཱནཾ པཊིཀཱུལསཉྙཱ པཧཏསཉྙཱ ཙ. ཏཏྠཱཡསྨཏོ ¶ སཱརིཔུཏྟསྶ ཨཔྤཊིཀཱུལསཉྙཱ ཨབྱཱཔཱདསཉྙཱ ཙ སཱམཾ པཉྙཱཡ པསྶིཏྭཱ ཨེཝཾ པཊིཀཱུལེསུ ཙ དྷམྨེསུ ཨཔྤཊིཀཱུལསཉྙཱི ཝིཧརཏི.

ཀཐཾ པཊིཀཱུལེསུ ཙ ཨཔྤཊིཀཱུལེསུ ཙ དྷམྨེསུ ཨཔྤཊིཀཱུལསཉྙཱི ཝིཧརཏི? ཏཏིཡེ ¶ ཙ ནིབྦཱནེ པཊིཀཱུལསཉྙིནོ ཡསེན ཙ ཀིཏྟིནི ཙ ཨཔྤཊིཀཱུལསཉྙིནོ. ཏཏྠཱཡསྨཱ སཱརིཔུཏྟོ ཨསྶཱདཉྩ ཨཱདཱིནཝཉྩ ནིསྶརཎཉྩ ཡཐཱབྷཱུཏཾ སམྨཱཔཉྙཱཡ པཊིཛཱནནྟོ པཊིཀཱུལཉྩ ཨཔྤཊིཀཱུལཉྩ དྷམྨཾ ཏདུབྷཡཾ ཨབྷིནིཝཛྫཡིཏྭཱ ཨཔྤཊིཀཱུལསཉྙཱི ཝིཧརཏི.

ཀཐཾ ¶ པཊིཀཱུལཾ ཨཔྤཊིཀཱུལཉྩ དྷམྨཾ ཏདུབྷཡཾ ཨབྷིནིཝཛྫཡིཏྭཱ ཨུཔེཀྑཀོ ཝིཧརཏི? སཏོ ཙ སམྤཛཱནོ ཙ, ཡཉྩ སམནུཔསྶཏི ཨནུནཡོ ཨཔྤཊིཀཱུལོ དྷམྨོ པཊིགྷོ ཙ པཊིཀཱུལོ དྷམྨོ, ཏཏྠཱཡསྨཱ སཱརིཔུཏྟོ ཨནུནཡསྶ པཊིགྷཔྤཧཱིནཏྟཱ ཨུཔེཀྑཀོ ཝིཧརཏི སཏོ སམྤཛཱནོ ཙ. ཡཉྩསྶ སམནུཔསྶཏི ཨཡཾ པཉྩཝིདྷཱ ཨནུཏྟརཱ ཨིནྡྲིཡབྷཱཝནཱ. ཨཡཾ སུཏྟནིདྡེསོ.

༩༩. ཏཏྠ ཀཏམོ དེསནཱཧཱརོ? ཨིམམྷི སུཏྟེ ཀིཾ དེསིཏབྦཾ? ཏཏྠ ཝུཙྩཏེ, ཨིམམྷི སུཏྟེ དིཊྛདྷམྨསུཁཝིཧཱརོ དེསིཏོ, ཏཐཱ ཝིམུཏྟཾ ཙིཏྟཾ པཙྩཝེཀྑཎཱ ཙ ཨདྷིཔཉྙཱདྷམྨཾ དེསིཏཾ.

ཏཏྠ ཀཏམོ ཝིཙཡོ? ཡེ ཀཱཡེ ཀཱཡཱནུཔསྶིནོ ཝིཧརནྟི, ཏེསཾ ཙིཏྟཾ ཨནུནཡཔྤཊིགྷེན ན ཝིཧརཏི ཨནུནཡཔྤཊིགྷེན ཙཱབྷིརམམཱནསྶ ཙིཏྟཾ སམགྒཏཾ བྷཝིསྶཏཱིཏི བྷཱཝནཱཡ བལམེཏཾ, ཨཡཾ ཝིཙཡོ ཧཱརོ.

ཏཏྠ ཀཏམོ ཡུཏྟིཧཱརོ? ཀཱཡབྷཱཝནཱཡ ཙ ཙིཏྟབྷཱཝནཱཡ ཙ ན ཀིཉྩི སབྲཧྨཙཱརཱི ཨཏིམཉྙིསྶཏཱིཏི. ཨཏྠི ཨེསཱ ཡུཏྟི, ཨཡཾ ཡུཏྟིཧཱརོ.

ཏཏྠ ཀཏམོ པདཊྛཱནོ ཧཱརོ? ཀཱཡབྷཱཝནཱཡ ¶ པཋམསྶ སཏི ཨུཔཊྛཱནསྶ པདཊྛཱནཾ. ཡཱ པཐཝཱིསམཙིཏྟཏཱ, སཱ ཨནིཙྩཱནུཔསྶནཱཡ པདཊྛཱནཾ.

ཏཏྠ ཀཏམོ ལཀྑཎོ? ཡཾ པཐཝཱིསམེན ཙེཏསཱ ཝིཧརཏི ཨཏྟཱནུཔསྶཱི པཐཝཱིསམེན གིཧཱི ¶ ཝིཧརཏི. ཀོ ཨཏྠོ པཐཝཱིསམེནཱཏི? ཡཐཱ ཡེ ཙ སེལོཔམཏཱཡ ཨཀམྨཡུཏྟཱ ཨེཝམེཝ པཐཝཱིསམོ ཨཡཾ ཧིརིཡཏཱཡ. ཨཡཾ ལཀྑཎོ.

ཏཏྠ ཀཏམོ ཙཏུབྱཱུཧོ ཧཱརོ? ཨིམམྷི བྱཱཀརཎེ ཀོ ཏསྶ ཨཱཡསྨཏོ ཨདྷིཔྤཱཡོ? ཡེ ཀེཙི ཨརཧནྟཱ ཨིནྡྲིཡབྷཱཝནཾ ཨཱཀངྑིཡནྟི, ཏེ པཐཝཱིསམཏཾ ཨུཔྤཱདཡིསྶནྟཱིཏི. ཨཡཾ ཨདྷིཔྤཱཡོ.

ཏཏྠ ཀཏམོ ཨཱཝཊྚོཏི? ནཏྠི ཨཱཝཊྚསྶ བྷཱུམི.

ཏཏྠ ¶ ཀཏམོ ཝིབྷཏྟི? ཡོ ཀཱཡཱནུཔསྶཱི ཝིཧརཏི, སོ པཐཝཱིསམཙིཏྟཏཾ པཊིལབྷིསྶཏཱིཏི ན ཨེཀཾསེན. ཀིཾ ཀཱརཎཾ? ཡེ ཁཎྜཀཱདིཚིནྣཀཱདིནོ, ན ཏེ པཐཝཱིསམཙིཏྟཏཾ པཊིལབྷནྟི. སབྦཱ ཀཱཡགཏཱསཏི སེཀྑབྷཱཝནཱཡ ནིབྦཱནཾ ཕལཾ, ཨཡཾ ཝིབྷཏྟི.

ཏཏྠ ཀཏམོ པརིཝཏྟནོ ཧཱརོ? ཡེ ཀཱཡཱནུཔསྶིནོ ཝིཧརིསྶནྟི, ཏེསཾཡེཝ ཀཱཡཔཙྩཡཱ ཨུཔྤཛྫེཡྻ ཨཱསཝཱ ཝིགྷཱཏཔརིལཱ༹ཧཱ, ཨཡཾ པརིཝཏྟནོ ཧཱརོ.

ཏཏྠ ཀཏམོ ཨོཏརཎོ? པཉྩཀྑནྡྷཱ [སཏྟེསུ ཙ པཉྩཀྑནྡྷཱ (པཱི.)] ཨཝིཏིཎྞཱ [ཨཝཏིཎྞཱ (པཱི.)] བཱཝཱིསཏིནྡྲིཡཱནི, ཏཐཱ ཡཾ མནིནྡྲིཡཾ, ཏཾ མནོདྷཱཏུ མནཱཡཏནཉྩ. ཡཾ སམཱདྷིནྡྲིཡཾ, ཏཾ དྷམྨདྷཱཏུ དྷམྨཱཡཏནཉྩ. ཨཡཾ ཨོཏརཎོ ཧཱརོ.

ཏཏྠ ¶ ཀཏམོ སོདྷནོ ཧཱརོ? ཡེ ཙ མནསཱ ཙཏྟཱརོ བྷཱཝེཏབྦཱ, ཏེ སབྦེ བྷཱཝིཏཱ ཡཾ ཏཾ མནེན པཧཱིནེ པཏྟབྦཏཾ སབྦཏྠ ཨེཏསྶ ཙ ཨཏྠཱཡ ཨཱརམྦྷོ, སོ ཨཏྠོ སུདྡྷོ. ཨཡཾ སོདྷནོ ཧཱརོ.

ཏཏྠ ཀཏམོ ཨདྷིཊྛཱནོ? ཨཡཾ སམཱདྷི ཨེཀཏྟཏཱཡ པཉྙཏྟོ, ཚ ཀཱཡཱ ཨེཀཏྟཏཱཡ པཉྙཏྟཱ. པཉྩིནྡྲིཡཱནི རཱུཔཱིནི རཱུཔཀཱཡོ. ཚ ཝེདནཱཀཱཡཱ ཝེདནཱཀཱཡོ. ཚ སཉྙཱཀཱཡཱ སཉྙཱཀཱཡོ. ཚ ཙེཏནཱཀཱཡཱ ཙེཏནཱཀཱཡོ. ཚ ཝིཉྙཱཎཀཱཡཱ ཝིཉྙཱཎཀཱཡོ. སབྦེཔི ཨེཏེ དྷམྨཱ དྷམྨཀཱཡོཏིཡེཝ སངྑཾ གཙྪནྟི. ཨཡཾ ཨདྷིཊྛཱནོ.

པརིཀྑཱརོཏི ¶ སམཱཔཏྟིཀོསལླཉྩ ཝཱིཐིཀོསལླཉྩ [དྷཱིཏིཀོསལླཉྩ (པཱི.)] ཧེཏུ. ཡཉྩ གོཙརཀོསལླཾ ཡཉྩ ཀལླཾ ཏཾ ཀོསལླཾ པཙྩཡོ. ཝོདཱནཀོསལླཾ ཧེཏུ, ཀལླཾ པཙྩཡོ. སུཁཾ ཧེཏུ, ཨབྱཱཔཛྫཾ པཙྩཡོ. ཨཡཾ པརིཀྑཱརོ.

ཏཏྠ ཀཏམོ སམཱརོཔནོཏི? ཡཐཱ པཐཝཱི སུཙིམྤི ནིཀྑཱིཔནྟེ ཨསུཙིམྤི ནིཀྑིཏྟེ ཏཱདིསེཡེཝ ཨེཝཾ ཀཱཡོ མནཱཔིཀེཧིཔི ཕསྶེཧི ཨམནཱཔིཀེཧིཔི ཕསྶེཧི ཏཱདིསོཡེཝ པཊིགྷསམྥསྶེན ཝཱ སུཁཱཡ ཝེདནཱཡ ཏཱདིསཾ ཡོ ཙིཏྟཾ. ཨིདཾ སུཏྟཾ ཝིབྷཏྟཾ སཨོཔམྨཾ ཨུགྒྷཊིཏཉྙུསྶ པུགྒལསྶ ཝིབྷཱགེན. ཏཏྠ སམཱརོཔནཱཡ ཨཝཀཱསོ ནཏྠི.

༡༠༠. ཏཏྠ ¶ ཀཏམཾ སུཏྟཾ སཾཀིལེསབྷཱགིཡཾ? ཡཏོ ཙ ཀུསལེཧི དྷམྨེཧི ན ཝིརོདྷཏི, ན ཝཌྜྷཏི, ཨིམཾ ཨཱདཱིནཝཾ བྷགཝཱ དེསེཏི, ཏསྨཱ ཚནྣཾ ཝིཝརེཡྻ, ཝིཝཊཾ ནཱཏིཝསྶཏི, ཏཏོ ཨཱདཱིནཝཏོ ཝིཝརེཡྻཱཏི ཏཾ ¶ ཏཱིཧི དྷམྨེཧི ནཱབྷིདྷཾསིཏཱཏི ཨསུབྷསཉྙཱཡ རཱགེན ནཱབྷིདྷཾསིཡཏི. མེཏྟཱཡ དོསེན ནཱབྷིདྷཾསིཡཏི. ཝིཔསྶནཱ མོཧེན ནཱབྷིདྷཾསིཡཏི. ཨེཝཉྩསྶ ཡོ ཡོ དྷམྨོ པཊིཔཀྑོ ཏམྷི ཏམྷི དྷམྨེ པརིཔཱུརིསྶཏི. ཡོ ཏསྶ དྷམྨསྶ ཨཀུསལོ དྷམྨོ པཊིཔཀྑོ, ཏེན ནཱདྷིཝཱསིཡཏི.

ཨཔརོ པརིཡཱཡོ. ཡེ ཨིམེ དྷམྨཱ ཨཏྟནཱ ན སཀྐོཏི ཝུཊྛཱནཾ, ཏེ ཨེཏེ དྷམྨཱ དེསིཏཱ. ཚནྣམཏིཝསྶཏཱིཏི ཏེཧི ཝིཏཀྐཾ ཡེན ཙ སཀྐཱ པུན དེསིཏཾ ཙིཏྟཾ ཝིབྷཱཝེཏུཾ པརིཡོདཱཔེཏུཾ ཝིཝེཀནིནྣསྶ ཝིཝེཀཔོཎསྶ ཝིཝེཀཔབྦྷཱརསྶ ཝུདྡྷིཾ ཝིརཱུལ༹ྷིཾ ཝེཔུལླཏཾ ཨཱཔཛྫཏི ཀུསལེསུ དྷམྨེསུ, སེཡྻཐཱཔི ནཱམ ཨུཔྤལཾ ཝཱ ཀུམུདཾ ཝཱ པདུམཾ ཝཱ ཨུདཀེ སུཀྐཔཀྑེ ཙནྡོ ཡཱཝརཏྟི ཡཱཝདིཝསོ ཨཱགཙྪཏི, ཏསྶ ཝུདྡྷིཡེཝ པཱཊིཀངྑིཏབྦཱ, ན པརིཧཱནི, ཨེཝཾཝིདྷཾ ཏཾ ཙིཏྟཾ ནཱབྷིདྷཾསིཡཏི. ཨཔརོཔེཏྠ ཡོ ཨཀཱུཊོ ཨསཋོ ཨམཱཡཱཝཱི ཨུཛུ པུརིསོ ཡཐཱབྷཱུཏཾ ཨཏྟཱནཾ ཨཱཝིཀརོཏི. ཏཏྠ ཡོ ཚཱདེཏི ཏསྶ ཨཀུསལཱ དྷམྨཱ ཙིཏྟཾ ཨནུདྷཱཝནྟི. ཚནྣམཏིཝསྶཏཱིཏི ཡོ པན ཧོཏི ཨསཋོ ཨཀཱུཊོ ཨམཱཡཱཝཱི ཨུཛུ པུརིསོ ཡཐཱབྷཱུཏཾ ཨཏྟཱནཾ ཨཱཝིཀརོཏི. ཏསྶ ཙིཏྟཾ ཨཀུསལེཧི དྷམྨེཧི ན ཝིདྡྷཾསིཡཏི, ཨཡཾ སུཏྟཏྠོ.

༡༠༡. ཏཏྠ ཀཏམཱ དེསནཱ? ཨིདྷ དེསིཏཱ དས ཨཀུསལཀམྨཔཐཱ ཨདྷིཝསྶནཏཱཡ དས ཀུསལཀམྨཔཐཱ ཨནདྷིཝསྶནཏཱཡ ཨཀུསལེཧི ན ¶ ཝིསུཛ྄ཛྷཏི. ཡཐཱ ཝུཏྟཾ བྷགཝཏཱ ‘‘ཙིཏྟསཾཀིལེསཱ, བྷིཀྑཝེ, སཏྟཱ སཾཀིལིསྶནྟཱི’’ཏི.

ཏཏྠ ¶ ཀཏམོ ཝིཙཡོ? ཡསྶེཝཾ ཙིཏྟཾ ཨདྷིཝཱསིཡཏི, ཏསྶ བུཛ྄ཛྷིཏསྶ ཡཾ བྷཝེཡྻ ཀཱུཊེཡྻ, ཏཾ ཨཱནནྟརིཡེནཔི སཏྠརི ཝཱ གུཎཱནུཀམྤནཏཱཡ, ཨཡཾ ཝིཙཡོ.

ཏཏྠ ཀཏམཱ ཡུཏྟཱིཏི? ཨེཝཾ ཨནདྷིཝསིཡནྟཾ ཙིཏྟཾ ཝུཊྛཱཏི. ཝུཊྛིཏཾ པཏིཊྛཧཏི ཀུསལེསུ དྷམྨེསཱུཏི ཨཏྠི ཨེསཱ ཡུཏྟི.

པདཊྛཱནནྟི ¶ ཚནྣམཏིཝསྶཏཱིཏི ཚནྣཾ ཨསཾཝརཱནཾ པདཊྛཱནཾ, ཝིཝཊཾ ནཱཏིཝསྶཏཱིཏི ཨཚནྣཾ སཾཝརཎཱནཾ. ཏསྨཱ ཚནྣཾ ཝིཝརེཡྻ ཝིཝཊཾ ནཱཏིཝསྶཏཱིཏི དེསནཱཡ པདཊྛཱནཾ.

ལཀྑཎོཏི ཚནྣམཏིཝསྶཏཱིཏི ཡེ ཀེཙི ཝིཙིཏྟེན ཚནྣེན ཨེཀལཀྑཎཱ དྷམྨཱ སབྦེ ཏེ ཨཝིདྡྷཾསིཡནྟི. ཏསྨཱ ཚནྣཾ ཝིཝརེཡྻ. ཝིཝཊཾ ནཱཏིཝསྶཏཱིཏི ཡེ ཀེཙི ཏེན ཨཙྪནྣེན ཨེཀལཀྑཎཱ དྷམྨཱ སབྦེ ཏེ ནཱཏིཝསྶནྟཱིཏི ལཀྑཎོ ཧཱརོ.

ཏཏྠ ཀཏམོ ཙཏུབྱཱུཧོ ཧཱརོ? ཨིམམྷི སུཏྟེ བྷགཝཏོ ཀོ ཨདྷིཔྤཱཡོ? ཡེསཾ ཀེསཉྩི ཙིཏྟཾ ཨཀུསལཱ དྷམྨཱ ཨདྷིཔཊིདེསིཏཱ ཏེ ཡཐཱདྷམྨཾ པཊིཀརིསྶནྟཱིཏི ཨཡཾ ཏཏྠ བྷགཝཏོ ཨདྷིཔྤཱཡོ. ཨཡཾ ཙཏུབྱཱུཧོ ཧཱརོ.

ཨཱཝཊྚོཏི ¶ ཡཾ ཚནྣཾ ཏཾ དུཝིདྷཾ ཀམྤམཱནཾ སམུཙྪིཏབྦོ. ཨཱནནྟརིཡསམཱདྷཱིནཾ. ཏཏྠ པསྶདྡྷིཡཉྩ མཱནོ ཨཱསཝེ ཝཌྜྷེཏི, ཨསྶདྡྷིཡེན ཙ པམཱདཾ གཙྪཏི, པམཱདེན ཨོནམཏི, ཨུནྣལ༹བྷཱཝཾ གཙྪཏི. ཝུཏྟཾ ཙེཏཾ བྷགཝཏཱ ‘‘ཨུནྣལཱ༹ནཾ པམཏྟཱནཾ ཏེསཾ ཝཌྜྷནྟི ཨཱསཝཱ’’ཏི ཙཏྟཱརི ཏཱནི ཨུཔཱདཱནཱནི, ཡཱནི ཙཏྟཱརི ཨུཔཱདཱནཱནི, ཏེ པཉྩུཔཱདཱནཀྑནྡྷཱ བྷཝནྟི. ཨིམཱནི སཙྩཱནི དུཀྑཉྩ སམུདཡོ ཙ. ཏསྨཱ ཚནྣཾ ཝིཝརེཡྻཱཏི ཡེན ཧེཏུནཱ, ཏེ ཨཱསཝཱ ཝཌྜྷནྟི. ཏེསཾ པཧཱིནཏྟཱ ཨཱསཝཱ པཧཱིཡནྟེ. ཏཏྠ ཨཔྤམཱདེན ཨསྶདྡྷིཡཾ པཧཱིཡཏི ཨུདྡྷཙྩཀུཀྐུཙྩཔྤཧཱནེན ཨོལཱ༹རིཀཏཱ ཏསྶ དྭེ དྷམྨཱ ན སམཐོ ཙ བྷཱཝནཱ ཙ པཱརིཔཱུརིཾ གཙྪནྟི. ཡོ ཏེསཾ ཨཱསཝཱནཾ ཁཡོ, ཨཡཾ ནིརོདྷོ. ཨིམཱནི ཙཏྟཱརི སཙྩཱནི, ཨཡཾ ཨཱཝཊྚོ.

ཏཏྠ ཀཏམོ ཝིབྷཏྟི ཧཱརོ? ཚནྣམཏིཝསྶཏཱིཏི ན ཨེཀཾསོ. ཀིཾ ཀཱརཎཾ? ཡསྶ ཨསྶཱ ནིཝཏྟནཱ ཡཐཱཔི སེཀྑཱནཾ. ཡཐཱཝུཏྟཾ བྷགཝཏཱ –

‘‘ཀིཉྩཱཔི ¶ སེཀྑོ པཀརེཡྻ པཱཔཾ, ཀཱཡེན ཝཱཙཱཡ ཨུད ཙེཏསཱ ཝཱ;

ཨབྷབྦོ ཧི ཏསྶ པརིགུཧནཱཡ, ཨབྷབྦཏཱ དིཊྛཔདསྶ ཧོཏཱི’’ཏི.

ཀིཉྩཱཔི ¶ ཏེསཾ ནིཝཱརཎཾ ཙིཏྟཾ ཧོཏི. ཨཔི ཏུ ཨཔྤཙྩཡཱ སམཱཡེ ཙ ཏེ ནིདྡིསིཏབྦཱ, ཨཡཾ ཝིབྷཏྟིཧཱརོ.

ཏཏྠ ཀཏམོ པརིཝཏྟནོ ཧཱརོ. ཚནྣམཏིཝསྶཏཱིཏི ཡསྶ ཡེ དྷམྨཱ སབྦཾ ཨནཝིཝཊཾ ཨཏིཝསྶིཡཏི, ཝིཝཊཾ ནཱཏིཝསྶཏི, ཨཝགུཎནྟཾ ནཱཏིཝསྶཏི. ཨཡཾ པརིཝཏྟནོ ཧཱརོ.

ཏཏྠ ཀཏམོ ཝེཝཙནོ ཧཱརོ. ཚནྣནྟི ཨཱཝུཏཾ ནིཝུཏཾ པིཧིཏཾ པཊིཀུཛྫིཏཾ སཉྪནྣཾ པརོདྷཾ, ཝིཝཊཾ ནཱཏིཝསྶཏཱིཏི ཡསྶ ཏེ དྷམྨཱ པབྦཛྫིཏཱ ¶ ཝིནོདཾ ནཱདྷིཝསྶིཏཱ ཝནྟིཀཏཱཏི, ཨཡཾ ཝེཝཙནོ ཧཱརོ.

ཏཏྠ ཀཏམོ པཉྙཏྟི ཧཱརོ. ཚནྣམཏིཝསྶཏཱིཏི ཀིལེསབྷཱགིཡཔཉྙཏྟཾ ཝིཝཊཾ ནཱཏིཝསྶཏཱིཏི སདྷམྨཀིཙྩཾ ཡཾ པཊིཔདཱ པཉྙཏྟིཡཱ པཉྙཏྟཾ, ཏསྨཱ ཧི ཚནྣཾ ཝིཝརེཡྻཱཏི ཨནུསཱསནཔཉྙཏྟིཡཱ པཉྙཏྟཾ, ཝིཝཊཾ ནཱཏིཝསྶཏཱིཏི ནིདྡྷཱནཔཉྙཏྟིཡཱ པཉྙཏྟཾ, ཨཡཾ པཉྙཏྟི ཧཱརོ.

ཏཏྠ ཀཏམོ ཨོཏརཎོ ཧཱརོ? ཚནྣམཏིཝསྶཏཱིཏི ཏཡོ ཀིལེསཱ རཱགོ དོསོ མོཧོ, ཏེ ཁནྡྷེསུ སངྑཱརཀྑནྡྷོ…པེ… ཏེ པུརཱ ཡཐཱ ནིདྡིཊྛཾ ཁནྡྷདྷཱཏུཨཱཡཏནེསུ, ཨཡཾ ཨོཏརཎོ ཧཱརོ.

ཏཏྠ ཀཏམོ སོདྷནོ ཧཱརོ? ཡེནཱརམྦྷེན ཨིདཾ སུཏྟཾ བྷཱསཏི སོ ཨཱརམྦྷོ ནིཡུཏྟོ.

ཨདྷིཊྛཱནོཏི ཚནྣམཏིཝསྶཏཱིཏི ཨེཀཏྟཏཱཡ པཉྙཏྟཾ. ཀིཾཀཱརཎཾ? ཨིདཾ ཧི ཨཏིཝསྶཏཱིཏི ཨིམསྶ ཙ ཨཏིཝསྶཏི ཨེཝཉྩ ཨཏིཝསྶཏཱིཏི ཨཡཾ ཝེམཏྟཏཱཡ ཡཱ སུཎསཱདྷཱརཎེཧི ལཀྑཎེཧི པཉྙཱཔིཡཏི, སཱ ཨེཀཏྟཔཉྙཏྟི.

ཏཏྠ ཀཏམོ པརིཀྑཱརོ? ཡཉྩ ཏཾ ཨཏིཝསྶིཡནྟི, ཏསྶ དྭེ ཧེཏཱུ དྭེ པཙྩཡཱ ཨཀུསལཔསུཏེཝ ¶ ཝཱཙཀཏྟཱབྷིརཏི ཙ. ཨིམེ དྭེ ཨཡོནིསོམནསིཀཱརོ ཙ ཀུསལཱ དྷམྨཱ ཝོཔསགྒཱ ཙ, ཨིམེ དྭེ པཙྩཡཱ.

ཏཏྠ ཀཏམོ སམཱརོཔནོ? ཚནྣམཏིཝསྶཏཱིཏི ཝེམཏི པསྶཏཱིཏི ཚནྣཾ ཡཾ པརིགྒཧིཏུཾ ཡཾ ཨདེསིཏུཾ ཨཔྤསྶུཏཾ ཡཾ ཀཐཾཀཐཱ ཝིབྷཱུཏེན ¶ ཨཀུསལམཱུལེན ཡཾ ཏཎྷཱཡ ཙ ཏེ ཝཌྜྷཏི དོསཱཏི སནྣིཏྭཱ ཏེ ཨཔྤསཀྑཡེན སངྑཱརཱ. སངྑཱརཔཙྩཡཱ ཝིཉྙཱཎཾ ཡཱཝ ཛརཱམརཎཾ, ཨཡཾ སམཱརོཔནོ ¶ . ཡཾ པུན ཏཐཱ དེསནཱ, ཏསྶེཝ ཨཀུསལཱ དྷམྨཱ ཝུདྡྷིཾ ཝིརཱུལ༹ྷིཾ ཝེཔུལླཏམཱཔཛྫཏི ཏསྶ སངྑཱརཱ ནིརོདྷཱ, ཨཡཾ སམཱརོཔནོ.

༡༠༢. ཙཏྟཱརོ པུགྒལཱ [པསྶ ཨ. ནི. ༤.༨༥] ཏམོ ཏམཔརཱཡནོཏི…པེ… ཏཏྠ ཀཏམོ ཝུཙྩཏེ ཏམོ ནཱམ? ཡོ ཏམོ ཨནྡྷཀཱརོ, ཡཐཱ ཝུཏྟཾ བྷགཝཏཱ ‘‘ཡཐཱ ཨནྡྷཀཱརེ ཏསྨིཾ བྷཡཱནཀེ སཀམྤིདྷཱཏུཔུརིསོ ན པསྶཏི, ཨེཝམེཝ ཨཉྙཱཎཏོ ཏམོཔནནྡྷཀཱརོ པཱཔཀསཀམྨསཝིཔཱཀཾ ན སདྡྷོ ཧོཏི. ཨིཏི ཨེཝཾ ལཀྑཎཏཱ ཨཉྙཱཎཾ ཏམོ ཨཝིཛྫཱ མོཧོ, ཡེན སཏྟཱ ཡཐཱབྷཱུཏཾ ནཔྤཛཱནནྟི, ཨིཏི ཝུཙྩཏི ཏམོཏི. སོ ཏིཎྞཾ ཙཀྑཱུནཾ ཏམོ མཾསཙཀྑུནོ དིབྦཙཀྑུནོ པཉྙཱཙཀྑུནོ, ཨིམེསཾ ཙཀྑཱུནཾ ཨིདྷ ཏམོ ནིདྡིསིཡཏི ཨཉྙཱཎནྟི. ཏཏྠ ཀཏམཾ ཨཉྙཱཎཾ ཨདསྶནཾ? ཨཐ ནིསྶཡེ ཡཾ པུབྦནྟེ ཨཉྙཱཎཾ ཨཔརནྟེ ཨཉྙཱཎཾ པུབྦནྟཱཔརནྟེ ཨཉྙཱཎཾ ཧེཏུམྷི ཨཉྙཱཎཾ པཙྩཡམྷི ཨཉྙཱཎཾ ཏསྶ ཨཉྙཱཎིནོ སམཱདྷིབྷཱུཏསྶ ཨེསོ ནིསྶནྡོ. ཡཾ ན ཛཱནཱཏི ཨིདཾ སེཝིཏབྦཾ ཨིདཾ ན མནསིཀཱཏབྦནྟི. སོ ཏེན ཏམེན ནིདྡིསིཡཏི ཏམོཔི ཡཐཱ ཝུཙྩཏི. མཱུལ༹ྷོཏི ཨེཝཾ ཙེཏནཱ. ཏེན ཏམེན སོ པུགྒལོ ཝུཙྩཏི. ཏམོཏི ¶ སོ ཏེན ཏམེན ཨསམཱུཧཏེན ཨསམུཙྪིནྣེན ཏཔྤརམོ བྷཝཏི ཏཔྤརཱཡནོ, ཨཡཾ ཝུཙྩཏི པུགྒལོ ཏམོ ཏམཔརཱཡནོཏི. པརཱཡནོཡེཝ དྷམྨོ མནསིཀཱཏབྦོ སོ ཏམོ དཧཏི ཨཉྙཙིཏྟཾ ཨུཔཊྛཔེཏི. ཏེ ཙསྶ དྷམྨཱ ནིཛ྄ཛྷཱནཀྑམནྟི. སོ སུཏམཡཱཡ པཉྙཱཡ སམནུཔསྶཏི.

ཏཏྠ ཀཏམོ ཏམོ ཛོཏིཔརཱཡནོ? སོ ཏེན པཉྙཱཝསེན ཨིརིཡཏི ཨེཝཾ ཏསྶེཝ ཨིརིཡནྟསྶ པརཱཡནོ བྷཝཏི. ཨཡཾ ཝུཙྩཏེ པུགྒལོ ཏམོ ཛོཏིཔརཱཡནོ.

ཏཏྠ ཀཏམོ པུགྒལོ ཛོཏི ཛོཏིཔརཱཡནོ [ཛོཏིཔརཱཡནོ (པཱི.)]? ཏཏྠ ཝུཙྩཏི ཛོཏི ནཱམ ཡཾ ཏསྶ ཙེ ཏམསྶ པཊིཔཀྑེན ཡེ ཙ དྷམྨེ ཨནྟམསོ ཉཱཎཱལོཀོ, སོ སུཎདྷམྨོ པུགྒལོ ཏམོ ཛོཏིཔརཱཡནོ, ཏཏྠ ཝུཙྩཏེ, ཡོཡཾ པུགྒལོ ཏམོ ཛོཏིཔརཱཡནོ, སོ ཡདི ཏཐཱརཱུཔཾ ཀལྱཱཎམིཏྟཾ པཊིལབྷཏི, ཡོ ནཾ ཨཀུསལཏོ ཙ ནིཝཱརེཏི ¶ བྷཱཝིཏཀུསལཏཱཝ བྷཱཝཱི ནིཡོཛེཏཱིཏི ¶ . ཨེཝཉྩ སདྡྷམྨཾ དེསེཏི. ཨིམེ དྷམྨཱ ཀུསལཱ, ཨིམེ དྷམྨཱ ཨཀུསལཱ. ཨིམེ དྷམྨཱ སཱཝཛྫཱ, ཨིམེ དྷམྨཱ ཨནཝཛྫཱ. ཨིམེ དྷམྨཱ སེཝིཏབྦཱ, ཨིམེ དྷམྨཱ ན སེཝིཏབྦཱ. ཨིམེ དྷམྨཱ བྷཛིཏབྦཱ, ཨིམེ དྷམྨཱ ན བྷཛིཏབྦཱ. ཨིམེ དྷམྨཱ ཨུཔསམྤཛྫ ཝིཧཱཏབྦཱ, ཨིམེ དྷམྨཱ ན ཨུཔསམྤཛྫ ཝིཧཱཏབྦཱ. ཨིམེ དྷམྨཱ མནསིཀཱཏབྦཱ, ཨིམེ དྷམྨཱ ན མནསིཀཱཏབྦཱཏི. པཙྩཏེ སཉྙཱཡ ཡཐཱ སཉྙཱཡཏི སཏིནྡྲིཡཱནི, སོ ཨེཝཾ པཛཱནཱཏི. ཨིམེ དྷམྨཱ ཀུསལཱ, ཨིམེ དྷམྨཱ ཨཀུསལཱ. ཨིམེ དྷམྨཱ སཱཝཛྫཱ, ཨིམེ དྷམྨཱ ཨནཝཛྫཱ. ཨིམེ དྷམྨཱ སེཝིཏབྦཱ, ཨིམེ ¶ དྷམྨཱ ན སེཝིཏབྦཱ. ཨིམེ དྷམྨཱ བྷཱཝེཏབྦཱ, ཨིམེ དྷམྨཱ ན བྷཱཝེཏབྦཱ. ཨིམེ དྷམྨཱ ཨུཔསམྤཛྫ ཝིཧཱཏབྦཱ, ཨིམེ དྷམྨཱ ན ཨུཔསམྤཛྫ ཝིཧཱཏབྦཱ. ཨིམེ དྷམྨཱ མནསིཀཱཏབྦཱ, ཨིམེ དྷམྨཱ ན མནསིཀཱཏབྦཱཏི. སོ ཏེ དྷམྨེ སུསུཡྻཏི, སོཏཾ ཨོདཧཏི, ཨཉྙཾ ཙིཏྟཾ ཨུཔཊྛཔེཏི, ཏེ ཙསྶ དྷམྨཱ ནིཛ྄ཛྷཱནཀྑམནྟི, སོ སུཏམཡཱཡ པཉྙཱཡ སམནྣཱགཏོ སོ ཏེན པཙྩཡཝསེན ཨིརིཡཏི ཨེཝཾ ཏསྶེཝ ཨིརིཡནྟི ཏཔྤརམོ བྷཝཏི ཏཔྤརཱཡནོ. ཨཡཾ ཝུཙྩཏེ པུགྒལོ ཏམོ ཏམཔརཱཡནོ.

ཏཏྠ ཀཏམོ པུགྒལོ ཛོཏི ཏམཔརཱཡནོ? ཛོཏི ནཱམ ཡཱ ཏསྶེཝ ཏམསྶ པཊིཔཀྑེན ཡེ དྷམྨཱ ཨནྟམསོ ཉཱཎཱལོཀོ, སོ པུན དྷམྨོ. ཀཏམཱ ཨུཙྩཏེ? པཉྙཱཡཏོ པཎྜིཏོཏི ཝུཙྩཏེ, སོ ཨེཝཾ པཛཱནཱཏི. ཨིམེ དྷམྨཱ ཀུསལཱ, ཨིམེ དྷམྨཱ ཨཀུསལཱ. ཨིམེ དྷམྨཱ སཱཝཛྫཱ, ཨིམེ དྷམྨཱ ཨནཝཛྫཱ. ཨིམེ དྷམྨཱ སེཝིཏབྦཱ, ཨིམེ དྷམྨཱ ན སེཝིཏབྦཱ. ཨིམེ དྷམྨཱ བྷཱཝིཏབྦཱ, ཨིམེ དྷམྨཱ ན བྷཱཝིཏབྦཱ. ཨིམེ དྷམྨཱ ཨུཔསམྤཛྫ ཝིཧཱཏབྦཱ, ཨིམེ དྷམྨཱ ན ཨུཔསམྤཛྫ ཝིཧཱཏབྦཱ. ཨིམེ དྷམྨཱ མནསིཀཱཏབྦཱ, ཨིམེ དྷམྨཱ ན མནསིཀཱཏབྦཱ. ཨིདྷ པན པཱཔམིཏྟསཾསེཝནོ པཱཔམིཏྟཝསཱནུགོ ཨཀུསལེ དྷམྨེ ཨབྷིཝཌྜྷེཏི, ཀུསལེ དྷམྨེ པཛཧཏི. སོ ཏེན པམཱདེན པཙྩཡསཉྙཱ ཨམནསིཀཏྭཱ ཨསྶཏིཨསམྤཛཉྙཾ ཨཱསེཝཏི. ཏཡཱ ཡོ པཊིཔཀྑོ ཏམོ, སོ པཝཌྜྷེཏི. སོ ཏམཱབྷིབྷཱུཏོ པརཱཡནོ ཏམཔརམོ ཙེཝ བྷཝཏི. ཨཡཾ ¶ ཝུཙྩཏི པུགྒལོ ཛོཏི ཏམཔརཱཡནོ.

༡༠༣. ཏཏྠ ཀཏམོ པུགྒལོ ཛོཏི ཛོཏིཔརཱཡནོ? ཏཏྠ ཝུཙྩཏེ སོཡཾ པུགྒལོ ཀལྱཱཎམིཏྟསྶ སནྣིསྶིཏོ བྷཝཏི སཀྐཱ སཾཡོགཱི ཀུསལཾ ¶ གཝེསཱི, སོ ཀལྱཱཎམིཏྟེ ཨུཔསངྐམིཏྭཱ པརིཔུཙྪཏི, པརིཔཉྷཡཏི? ཀིཾ ཀུསལཾ, ཀིཾ ཨཀུསལཾ? ཀིཾ སཱཝཛྫཾ, ཀིཾ ཨནཝཛྫཾ? ཀིཾ སེཝིཏབྦཾ, ཀིཾ ན སེཝིཏབྦཾ? ཀིཾ བྷཱཝིཏབྦཾ, ཀིཾ ན བྷཱཝིཏབྦཾ? ཀིཾ ཨུཔསམྤཛྫ ཝིཧཱཏབྦཾ, ཀིཾ ན ཨུཔསམྤཛྫ ཝིཧཱཏབྦཾ? ཀིཾ མནསིཀཱཏབྦཾ, ཀིཾ ན མནསིཀཱཏབྦཾ? ཀཐཾ སཾཀིལེསོ ཧོཏི, ཀཐཾ ཝོདཱནཾ ཧོཏི? ཀཐཾ པཝཏྟི ཧོཏི, ཀཐཾ ནིཝཏྟི ¶ ཧོཏི? ཀཐཾ བནྡྷོ ཧོཏི, ཀཐཾ མོཀྑོ ཧོཏི? ཀཐཾ སཀྐཱཡསམུདཡོ ཧོཏི, ཀཐཾ སཀྐཱཡནིརོདྷོ ཧོཏི? སོ ཨེཏྠ དེསིཏཾ ཡཐཱ ཨུཔཊྛིཏཾ ཏཐཱ སམྤཊིཔཛྫནྟོ སོ ཨེཝཾ པཛཱནཱཏི. ཨིམེ དྷམྨཱ ཀུསལཱ, ཨིམེ དྷམྨཱ ཨཀུསལཱ. ཨེཝཾ…པེ… ཡཱཝ ཀཐཾ སཀྐཱཡསམུདཡོ ཧོཏི, ཀཐཾ སཀྐཱཡནིརོདྷོ ཧོཏཱིཏི ཝིཏྠཱརེན ཀཱཏབྦཾ. སོ ཏེ དྷམྨེ ཨདྷིཔཱཊིཀངྑཱཏི ཨེཝཾ ལཀྑཎཾ ཉཱཎཾ ཝིཛྫཱ ཨཱལོཀཾ ཝཌྜྷེཏི. སོ པུགྒལོ ཏཔྤརམོ བྷཝཏི ཏཔྤརཱཡནོ, ཨཡཾ ཝུཙྩཏེ པུགྒལོ ཛོཏི ཛོཏིཔརཱཡནོ.

ཏཏྠ ཀཏམོ པུགྒལོ ཏམོ ཏམཔརཱཡནོ? ཡོ ཨཀུསལཾ དྷམྨཾ དཱིཔེཏི. ཏཾ བྷཱཝནཱཡ ཧཱིནཱསུ གཏཱིསུ ཨུཔཔཏྟིཾ དསྶེཏི, ཏཔྤརམོ བྷཝཏི ཏཔྤརཱཡནོ. ཨཡཾ ཝུཙྩཏེ པུགྒལོ ཏམོ ཏམཔརཱཡནོ.

ཏཏྠ ཡོ པུགྒལོ ཏམོ ཛོཏིཔརཱཡནོ? སོ ཏམེན ཨཀུསལསྶ ཀམྨསྶ ཝིཔཱཀཾ དསྶེཏི. ཏམེཏི ཡཾ ཙཀྑུ ཀལྱཱཎམིཏྟསྶ ཡེན ཨཀུསལེ དྷམྨེ པཛཧཏི, ཀུསལེ དྷམྨེ ཨབྷིཝཌྜྷཏི.

ཏཏྠ ¶ ཡོ ཙ པཎཱིཏཱསུ གཏཱིསུ ཨུཔཔཏྟིཾ དསྶེཏི, ཏཔྤརམོ ཏེན ཝུཙྩཏེ ཏམོ ཛོཏིཔརཱཡནོ.

ཏཏྠ ཡོ པུགྒལོ ཛོཏི ཏམཔརཱཡནོ? ཀུསལསྶ ཀམྨཝིཔཱཀཾ དསྶེཏི. ཡཾ ཙཀྑུ པཱཔམིཏྟསཾསགྒེན པཱཔམིཏྟུཔསེཝེན པཱཔམིཏྟཝསཱནུགོ ཨཀུསལཾ དྷམྨཾ ཨབྷིཝཌྜྷཏི, ཏཾ བྷཱཝནཱཡ ཧཱིནཱསུ གཏཱིསུ ཨུཔཔཏྟིཾ དསྶེཏི. ཏཔྤརམོ ཏེན ཝུཙྩཏེ ཛོཏི ཏམཔརཱཡནོ.

ཏཏྠ ཡོ པུགྒལོ ཛོཏི ཛོཏིཔརཱཡནོ སོ ཛོཏིཏཱ པབྷཱཏཱ [ཛོཏིཏབྷཱཝཏཱཡ (པཱི.)] ཡཱཝ པཎཱིཏཱསུ གཏཱིསུ ཨུཔཔཏྟིཾ དསྶེཏི. ཏཔྤརམོ ཏེནཱཧ ཛོཏི ཛོཏིཔརཱཡནོ.

ཛོཏིཏམཔརཱཡནེན ¶ དས ཨཀུསལཱནཾ ཀམྨཱནཾ ཨུདཡཾ དསྶེཏི. ཏམེན པུགྒལེན ཨཀུསལཱནཾ ཀམྨཱནཾ ཝིཔཱཀཾ དསྶེཏི. ན ཨཀུསལཱནཾ དྷམྨཱནཾ ཝིཔཱཀཾ དསྶེཏི. ཏམེན ཨཊྛ མིཙྪཏྟཱནི དསྶེཏི. ཛོཏིནཱ ཨཊྛ སམྨཏྟཱནི དསྶེཏི. ཛོཏིནཱ ཏམཔརཱཡནེན དས ཨཀུསལཀམྨཔཐེ དསྶེཏི. ཛོཏིནཱ པཎཱིཏཏྟཾ དསྶེཏི. ཏམེན ཛོཏིཔརཱཡནེན ཨཏཔནཱིཡཾ དྷམྨཾ དསྶེཏི. ཛོཏིནཱ ཏམཔརཱཡནེན ཏཔནཱིཡཾ དྷམྨཾ དསྶེཏི. ཨཡཾ སུཏྟཏྠོ.

༡༠༤. ཏཏྠ ¶ ཀཏམོ དེསནཱ ཧཱརོ? ཨིམམྷི སུཏྟེ ཀིཾ དེསིཏཾ? ཏཏྠ ཝུཙྩཏེ ཨིམམྷི སུཏྟེ ཀུསལཱཀུསལཱ དྷམྨཱ དེསིཏཱ. ཀུསལཱཀུསལཱནཉྩ དྷམྨཱནཾ ཝིཔཱཀོ དེསིཏོ. ཧཱིནཔྤཎཱིཏཱནཉྩ སཏྟཱནཾ གཏི ནཱནཱཀཱརཎཾ དེསིཏཾ. ཨཡཾ དེསནཱ ཧཱརོ.

ཏཏྠ ཀཏམོ ཝིཙཡོ ཧཱརོ? ཨཀུསལསྶ ¶ ཀམྨསྶ ཡོ ཝིཔཱཀཾ པཙྩནུབྷོཏི. ཏཏྠ ཋིཏོ ཨཀུསལེ དྷམྨེ ཨུཔྤཱདིཡཏི ཝིཙཡནྟཾ ཡུཛྫཏི. ཀུསལསྶ ཀམྨསྶ ཡོ ཝིཔཱཀཾ པཙྩནུབྷོཏི. ཏཏྠ ཋིཏོ ཀུསལེ དྷམྨེ ཨུཔྤཱདིཡཏི ཝིཙཡནྟཾ ཡུཛྫཏི. ཨཡཾ ཝིཙཡོ ཡུཏྟི ཙ.

ཏཏྠ ཀཏམོ པདཊྛཱནོ ཧཱརོ? ཡོ པུགྒལོ ཛོཏི, སོ པཙྩཝེཀྑཎཱཡ པདཊྛཱནཾ. ཡོ པུགྒལོ ཏམོ, སོ ཏམཱདིནྣཾ ཝཱནུཔསྶནཱཡ པདཊྛཱནནྟི དསྶེཏི. ཏམེན ཛོཏིཔརཱཡནེན ཨཔྤམཱདསྶ པདཊྛཱནཾ དསྶེཏི, ཏམོ ཨཝིཛྫཱཡ ཙ དིཊྛིཡཱ ཙ པདཊྛཱནཾ དསྶེཏི. ཛོཏིནཱ ཏམཔརཱཡནེན པམཱདསྶ ཙ དིཊྛིཡཱ ཙ པདཊྛཱནཾ དསྶེཏི. ཨཡཾ པདཊྛཱནོ.

ཏཏྠ ཀཏམོ ལཀྑཎོ ཧཱརོ? ཏམེན ཏམཔརཱཡནེན ཏམོཏི ཨཝིཛྫཱཡ ནིདྡིཊྛཱཡ སབྦཀིལེསདྷམྨཱ ནིདྡིཊྛཱ ཧོནྟི. ཏམེན ཛོཏིཔརཱཡནེན ཛོཏིཝིཛྫཱཡ ནིདྡིཊྛཱཡ སབྦེ བོདྷིཔཀྑིཡདྷམྨཱ ནིདྡིཊྛཱ ཧོནྟི. ཛོཏིཏམཔརཱཡནེན པམཱདོ ནིདྡིཊྛོ ཧོཏི. ཏམེན ཛོཏིཔརཱཡནེན ཨཔྤམཱདོ ནིདྡིཊྛོ ཧོཏི. ཨཡཾ ལཀྑཎོ ཧཱརོ.

ཏཏྠ ཀཏམོ ཙཏུབྱཱུཧོ ཧཱརོ? ཨིམམྷི སུཏྟེ བྷགཝཏོ ཀོ ཨདྷིཔྤཱཡོ? ཡེ སཏྟཱ ནཱིཙཀུལིནོ, ན ཏེ ཨིམཾ སུཏྭཱ ཀུསལེ དྷམྨེ སམཱདཱཡ ཝཏྟིསྶནྟི. ཡེ སཏྟཱ ཨུཙྩཀུལིནོ, ཏེ ཨིམཾ དྷམྨདེསནཾ སུཏྭཱ ¶ བྷིཡྻོསོ མཏྟཱཡ ཀུསལེ དྷམྨེ སམཱདཱཡ ཝཏྟིསྶནྟཱིཏི. ཨཡཾ ཙཏུབྱཱུཧོ ཧཱརོ. བྷཱུམིཡཾ ཨུཔདེསོ.

ཏཏྠ ཀཏམོ ཨཱཝཊྚོ ཧཱརོ? ཡཱ ཨཝིཛྫཱཏོ པབྷཱུཏི ཏཎྷཱ, ཨཡཾ སམུདཡོ. ཡོ ཏམོ ཏམཔརཱཡནོ, ཨིདཾ དུཀྑཾ. ཨིམཱནི དྭེ སཙྩཱནི དུཀྑཉྩ སམུདཡོ ཙ ཛོཏི ཡེན སུཏྟེན དྷམྨེན པཉྙཱཔིཡཏི, སོ ¶ དྷམྨོ པཉྙིནྡྲིཡསྶ པདཊྛཱནཾ. ཏེན ཨམོཧེན ཏཱིཎི ཀུསལམཱུལཱནི པཱརིཔཱུརིཾ གཙྪནྟི སགྒསྶ པདཊྛཱནཾ.

ཏཏྠ ཀཏམཱ ཝིབྷཏྟི? ཏམོ ཏམཔརཱཡནོཏི ན ཨེཀཾསེན. ཀིཾ ཀཱརཎཾ? ཨཏྠི ཏམོ ཙ ¶ བྷཝོ ཨཔརཱཔརིཡཝེདནཱིཡེན ཙ ཀུསལེན ཛོཏིནཱ པུགྒལེན སཧོཔཏྟིབྷཱཝེ. ཨཏྠི ཛོཏི ཙ བྷཝོ ཨཔརཱཔརིཡཝེདནཱིཡེན ཙ ཨཀུསལེན ཏམེན པུགྒལེན སཧོཔཏྟིབྷཱཝེ པརིཝཏྟནཱ ཏམེསུ པཊིཔཀྑོཏི ཛོཏིནཱ ཏམཔརཱཡནོ.

ཏཏྠ ཀཏམོ ཝེཝཙནོ? ཡོ ཏམོ, སོ ཨེཝཾ ཨཏྟབྱཱཔཱདཱཡ པཊིཔནྣོ, སོ ཨསྶདྡྷཱཡ བཱལོ ཨཀུསལོ ཨབྱཏྟོ ཨནཱདཱིནཝདསྶཱི. ཡོ ཛོཏི, སོ ཨཏྟཧིཏཱཡ པཊིཔནྣོ པཎྜིཏོ ཀུསལོ བྱཏྟོ ཨཱདཱིནཝདསྶཱི. ཨཡཾ ཝེཝཙནོ.

ཏཏྠ ཀཏམཱ པཉྙཏྟི? སོ པུགྒལོ ཝིཔཱཀཔཉྙཏྟིཡཱ པཉྙཱཔིཡཏི, ཨཀུསལེ པརིཡཱདིནྣཏཱ པཉྙཱཔིཡཏི. ཛོཏིཀུསལདྷམྨུཔཔཏྟིཔཉྙཏྟིཡཱ པཉྙཱཔིཡཏི ཀུསལདྷམྨཝིཔཱཀཔཉྙཏྟིཡཱ ཙཱཏི.

ཨོཏརཎོཏི ཡེ ཨཝིཛྫཱཔཙྩཡཱ སངྑཱརཱ ཡཉྩ ཛརཱམརཎཾ ཡཱ ཙ ཨཝིཛྫཱ, ཏཾ པདཊྛཱནཾ, ནིདྡེསེན ཝིཛྫུཔྤཱདོ ཨཝིཛྫཱནིརོདྷོ ཡོ ཡཱཝ ཛརཱམརཎནིརོདྷོ, ཨིམེ དྭེ དྷམྨཱ སངྑཱརཀྑནྡྷཔརིཡཱཔནྣཱ. དྷམྨདྷཱཏུ དྷམྨཱཡཏནཉྩ པདཊྛཱནཾ ནིདྡེསེན དྷཱཏཱུསུ.

ཏཏྠ ཀཏམོ སོདྷནོ? ཨིམསྶ སུཏྟསྶ དེསིཏསྶ ཨཱརམྦྷོ. ཨདྷིཊྛཱནོཏི ¶ ཏམོཏི བྷགཝཱ བྲཝཱིཏི, ན ཨེཀཾ པུགྒལཾ དེསེཏི. ཡཱཝཏཱ སཏྟཱནཾ གཏི, ཏཏྠ ཡེ དུཙྩརིཏདྷམྨེན ཨུཔཔནྣཱ, ཏེ བཧུལཱདྷིཝཙནེན ཏམོ ནིདྡིསཏི. ཡཱ ཛོཏི སབྦསཏྟེསུ ཀུསལདྷམྨོཔཔཏྟི སབྦཾ ཏཾ ཛོཏཱིཏི ཨབྷིལཔཏི ཨཡམེཀཏཱ པཙྩཡོ ཡོནིསོམནསིཀཱརཔཉྙཏྟི ཙཏུནྣཾ མཧཱབྷཱུཏཱནཾ པུགྒལཱནཾ.

ཏཏྠ ¶ ཀཏམོ པརིཀྑཱརོ? ཨཀུསལསྶ པཱཔམིཏྟཏཱ པཙྩཡོ, ཨཡོནིསོ མནསིཀཱརོ ཧེཏུ. ཀུསལསྶ ཀལྱཱཎམིཏྟཏཱ པཙྩཡོ, ཡོནིསོ མནསིཀཱརོ ཧེཏུ.

ཏཏྠ ཀཏམཱ སམཱརོཔནཱཏི? ཨིདྷེཀཙྩོ ནཱིཙེ ཀུལེ པཙྩཱཛཱཏོ ཧོཏཱིཏི ནཱིཙེ ཀུལེ པཙྩཱཛཱཏོ རཱུཔེསུ སདྡེསུ གནྡྷེསུ རསེསུ ཕསྶེསུ, སོ ཨུཔཔནྣོ སབྦམྷི མཱནུསྶཀེ ཨུཔབྷོགཔརིབྷོགེ. ཛོཏི པཎཱིཏེསུ ཀུསལེསུ ཨུཔཔནྣོ སབྦམྷི མཱནུསྶཀེ ཨུཔབྷོགཔརིབྷོགེ ཨུཔཔནྣོཏི.

༡༠༥. ཏཏྠ ¶ ཀཏམཾ སཾཀིལེསབྷཱགིཡཾ ནིབྦེདྷབྷཱགིཡཾ ཙ སུཏྟཾ? ན ཏཾ དལ༹ྷཾ བནྡྷནམཱཧུ དྷཱིརཱཏི གཱཐཱ. ཀེན ཀཱརཎེན ཏཾ བནྡྷནཾ དལ༹ྷཾ? ཙཏཱུཧི ཀཱརཎེཧི ཨིསྶརིཡེན སཀྐཱ མོཙེཏུཾ དྷནེན ཝཱ ཨཉྙེན ཝཱ ཡཱཙནཱཡ ཝཱ པརཱཡནེན ཝཱ. ཡེསུ ཙ ཨཡཾ རཱགོ མཎིཀུཎྜལེསུ པུཏྟེསུ དཱརེསུ ཙ ཡཱ ཨཔེཀྑཱ, ཨིདམསྶ ཙེཏསིཀབནྡྷནཾ. ཏཾ ན སཀྐཱ ཨིསྶརིཡེན ཝཱ དྷནེན ཝཱ ཨཉྙེན ཝཱ ཡཱཙནཱཡ ཝཱ པརཱཡནེན ཝཱ མོཙེཏུཾ. ན ཙ ཏཏྠ ཀོཙི ཨཏྠི ¶ པཱཊིབྷོགོ. ཨིམིནཱ བནྡྷནཏོ མོཙཡིཏྠཱཏི དེཝོ ཝཱ མནུསྶོ ཝཱ ཏདིདཾ བནྡྷནཾ རཱགཱནུསཡེན ཙ ཚསུ བཱཧིརེསུ ཙ ཨཱཡཏནེསུ བནྡྷཏི. རཱུཔེསུ རཱུཔཏཎྷཱ བནྡྷཏི, ཡཱཝ དྷམྨེསུ དྷམྨཏཎྷཱ. ཡོ ཨིདྷ ལོཀེ བནྡྷོ པརལོཀསྨིཾ བནྡྷོ ནཱིཡཏི. སོ བནྡྷོ ཛཱཡཏི, བནྡྷོ མཱིཡཏི. བནྡྷོ ཨསྨཱ ལོཀཱ པརཾ ལོཀཾ གཙྪཏི. ན སཀྐཱ མོཙེཏུཾ ཨཉྙཏྲ ཨརིཡམགྒེན ཨིམཉྩ བནྡྷནཾ. མརཎབྷཱཝཉྩ ཨུཔཔཏྟིབྷཱཝཉྩ བྷཡཏོ ཝིདིཏྭཱ ཚནྡརཱགཾ པཛཧཏི. སོ ཨིམཾ ཚནྡརཱགཾ པཛཧིཏྭཱ ཨཏིཀྐམཏི. ཨཡཉྩ ལོཀོ ཨིཏོ པརཾ དུཏིཡོ.

ཏཏྠ ཡཾ བནྡྷནཱསངྑཱརཱནཾ པཧཱནཾ ཨིདཾ ཝུཙྩཏི ཨུབྷཡེསུ ཋཱནེསུ ཝཱིརིཡཾ, གནྡྷཔརིཝཱཏོ [གནྠཔརིཝསོ (པཱི.) གནྠཔརིཝུཏོ (ཀ.)] སུམུནི ནོཔལིམྤཏི. ཏཐེཝ པརིགྒཧེསུ པུཏྟེསུ དཱརེསུ ཙ ཨཝཱུལ༹ྷོ སལློཏི ཏསྶེཝ ཏཎྷཱཡ པཧཱནཾ དསྶེཏི. ཨཡཾ ཏཎྷཱམཱུལསྶ པཧཱནཱ ཝརེ [ཨཧནཱཝརེ (པཱི.), ཨཧནཱཝརོ (ཀ.)] ཨཔྤམཏྟོཏི ཀཱམོ པམཱདཝཏྟཏི པཧཱནཱཡ ནེཀྑམྨཱབྷིརཏོ ཨཔྤམཱདཝིཧཱརཱི བྷཝཏི. ཏསྶ ཨཱསཡཾ པཧཱནཱཡ ནེཝ ཨིམཾ ལོཀཾ ཨཱསཱིསཏི ན པརལོཀཾ. ན ཨིདྷལོཀཾ ནིསྶིཏཾ, པིཡརཱུཔཾ སཱཏརཱུཔཾ ཨཱཀངྑཏི. ནཱཔི པརལོཀཾ ནིསྶིཏཾ པིཡརཱུཔཾ སཱཏརཱུཔཾ ¶ ཨཱཀངྑཏི, ཏེན ཝུཙྩཏེ ‘‘ནཱསཱིསཏེ ལོཀམིམཾ པརཾ ལོཀཉྩཱ’’ཏི. ཡཾ ཏསྶ པཧཱནཾ ཏཾ ཚེདནཾ ཨཊྛཀཝགྒིཡེསུ མུནི ནིདྡིཊྛོ. སོ ཨིདྷ ཝིརོདྷོ ཨཊྛཀཝགྒིཡེསུ ནཱསཱིསནཾ ཨིདྷ ཨནཱཐཱ. ཏཐཱཡཾ ཏཎྷཱཡ ཏསྶ པརིགྒཧསྶ ཝཏྠུཀཱམསྶ ¶ ཨེཀགཱཐཱཡ ཨེཏེ སབྦེ ཀཱམཱ དསྶིཏཱ. ཏེན བྷགཝཱ དེསེཏི ‘‘ཨེཏམྤི ཚེཏྭཱན པརིབྦཛནྟི ཨནཔེཀྑིནོ སབྦཀཱམེ པཧཱཡཱ’’ཏི. ཨིམིསྶཱ གཱཐཱཡ དྭིདྷཱ ནིདྡེསོ སཾསནྡནནིདྡེསོ ཙ སམཡནིདྡེསོ ཙ, ཡཐཱ ཨཡཾ གཱཐཱ སཾཀིལེསབྷཱགིཡཉྩ ནིབྦེདྷབྷཱགིཡཉྩ, ཨེཝཾ ཏཱཡ གཱཐཱཡ སཾཀིལེསབྷཱགིཡཉྩ ནིབྦེདྷབྷཱགིཡཉྩ ཝིསཛྫནཱ. ཨེཝཾ གཱཐཱ སབྦགཱཐཱསུ བྱཱཀརཎེསུ ཝཱ ནིདྡིཊྛཾ སུཏྟཾ.

༡༠༦. ཏཏྠ ཀཏམཱ དེསནཱ? ཨིམཾ སུཏྟཾ ཀེནཱདྷིཔྤཱཡེན དེསིཏཾ. ཡེ རཱགཙརིཏཱ སཏྟཱ, ཏེ ཀཱམེ པཛཧིསྶནྟཱིཏི ཨཡཾ ཏཏྠ བྷགཝཏོ ཨདྷིཔྤཱཡོ.

ཏཏྠ ཀཏམོ ཝིཙཡོ? ཡསྶ དསཝཏྠུཀཱ ཀིལེསཱ ཨུཏྟིཎྞཱ ཝནྟཱ ཝིདིཏཱ. ཀཏམེ དསཝིདྷཱཏི ¶ , ཀིལེསཀཱམཱ ཙ ཨོརམྦྷཱགིཡཨུདྡྷམྦྷཱགིཡཱ ཙ སཾཡོཛནཱ དསཝཏྠུཀཱནི ཨཱཡཏནཱནི, ཨཡཾ ཝིཙཡོ.

ཏཏྠ ཀཏམཱ ཡུཏྟི? ཡེ སཱརཏྟཱ ཏེ གཱལ༹ྷབནྡྷནེན བནྡྷནྟི ཨཏྠི ཨེསཱ ཡུཏྟི.

ཏཏྠ ཀཏམོ པདཊྛཱནོ? སཱརཏྟོ མཎིཀུཎྜལེསུ མམཾཀཱརསྶ པདཊྛཱནཾ. ཨཔེཀྑཱཏི ཨཏཱིཏཝཏྠུསྶ སརཱགསྶ པདཊྛཱནཾ. ཨེཏམྤི ཚེཏྭཱཏི བྷཱཝནཱཡ པདཊྛཱནཾ.

ཏཏྠ ཀཏམོ ལཀྑཎོ? སཱརཏྟཙིཏྟོ མཎིཀུཎྜལེསུ ཡོ ཨཧཾཀཱརེ ཝིསཏྟོ མམཾཀཱརེ ཝིསཏྟོ, ཡོ པུཏྟདཱརེ སཱརཏྟོ. ཁེཏྟཝཏྠུསྨིཾ སཱརཏྟོ. ཨཡཾ ¶ ལཀྑཎོ ཧཱརོ.

ཏཏྠ ཀཏམོ ཙཏུབྱཱུཧོ ཧཱརོ? ཨིདྷ སུཏྟེ བྷགཝཏོ ཀོ ཨདྷིཔྤཱཡོ. ཡེ ནིབྦཱནེན ཚནྡིཀཱ བྷཝིསྶནྟི, ཏེ པུཏྟདཱརེ ཏཎྷཾ པཛཧིསྶནྟི. ཨཡཾ ཏཏྠ བྷགཝཏོ ཨདྷིཔྤཱཡོ. ཨིམཱནི ཙཏྟཱརི སཙྩཱནི.

ཏཏྠ ཀཏམོ ཨཱཝཊྚོ? ཡཱ པུཏྟདཱརེ ཏཎྷཱ, ཨཡཾ སམུདཡོ. ཡེ ཨུཔཱདིནྣཀྑནྡྷཱ, ཏེ ཡེ ཙ བཱཧིརེསུ རཱུཔེསུ རཱུཔཔརིགྒཧོ, ཨིདཾ དུཀྑཾ, ཡཾ ¶ ཏཏྠ ཚེདནཱིཡཾ, ཨཡཾ ནིརོདྷོ. ཡེན བྷིཛྫཏི, ཨཡཾ མགྒོ. ཝིབྷཏྟཱིཏི ནཏྠི ཝིབྷཏྟིཡཱ བྷཱུམི, པརིཝཏྟནོཏི པཊིཔཀྑོ ནིདྡིཊྛོ.

ཏཏྠ ཀཏམོ ཝེཝཙནོ? ནིདྡིཊྛོ ཝེཝཙནོ. ཏཏྠ ཀཏམོ ཨོཏརཎོ? ཨཏྠི ཏཎྷཱ ཨེཀོ སཏྟོ ཨོཏིཎྞོ ཏཔྤཙྩཡཱ ཝིཉྙཱཎཾ ཡཱཝ ཛརཱམརཎཾ. ཡཱ ཏཏྠ ཝེདནཱ, ཨཡཾ ཨཝིཛྫཱ ཝིཛྫུཔྤཱདཱ ཨཝིཛྫཱནིརོདྷོ ཡཱཝ ཛརཱམརཎནིརོདྷོ.

ཏཏྠ ཀཏམོ སོདྷནོ? སུདྡྷོ གཱཐཱཡ ཨཱརམྦྷོ. ཏཏྠ ཀཏམོ ཨདྷིཊྛཱནོ? ན ཏཾ དལ༹ྷཾ བནྡྷནམཱཧུ དྷཱིརཱཏི ཨེཀཏྟཏཱཡ པཉྙཏྟཱ, ན ཝེམཏྟཏཱཡ. ཙཏྟཱརོ རཱགཱ ཀཱམརཱགོ རཱུཔརཱགོ བྷཝརཱགོ དིཊྛིརཱགོ ཙཱཏི ཨེཀཏྟཏཱཡ པཉྙཏྟཱ.

ཏཏྠ ཀཏམོ པརིཀྑཱརོ? ཡེསཾ རཱགོ མཎིཀུཎྜལེསུ ཏསྶ སུབྷསཉྙཱ ཧེཏུ, ཨནུབྱཉྫནསོ ¶ ཙ ནིམིཏྟགྒཱཧིཏཱ པཙྩཡོ. ཡཱཡ ཏེ ཚིནྣཱནི ཏསྶ ཨསུབྷསཉྙཱ ཧེཏུ, ནིམིཏྟགྒཧཎཨནུབྱཉྫནགྒཧཎཝིནོདནཾ པཙྩཡོ.

ཏཏྠ ¶ ཀཏམོ སམཱརོཔནོ? སཱརཏྟོ མཎིཀུཎྜལེསུ སམྨཱུལ༹ྷཝིདྷོ དུཊྛཱཏིཔི ཨེཏམྤི [ཨེཝམྤི (པཱི. ཀ.)] ཚེཏྭཱན པརིབྦཛནྟཱིཏི ཏཾ པརིཉྙཱཏཏྠཾ པརིཝཛྫིཏཏྠཾ པཛཧིཏཱ, ཨཡཾ སམཱརོཔནོ.

༡༠༧. ཡཾ ཙེཏསིཀཾ ཡཾ པཀཔྤིཏཾ ཝིཏྠཱརེན པཙྩཡོ, ཡཾ ཝཱ ཙེཏསིཀཾ ཀཱཡིཀཾ ཙེཏསིཀཾ ཀམྨཾ. ཀིཾཀཱརཎཱ? ཙེཏསིཀཱ ཧི ཙེཏནཱ མནོཀམྨཱཏི ཝུཙྩཏེ, སཱ ཙེཏནཱཀམྨཾ, ཡཾ ཙེཏསིཀཾ ཨིམཾ ཀཱཡིཀཉྩ ཝཱཙསིཀཉྩ ཨིམཱནི ཏཱིཎི ཀམྨཱནི ནིདྡིཊྛཱནི. ཀཱཡཀམྨཾ ཝཙཱིཀམྨཉྩ ཏཱནི ཀུསལཱནི པིཡཾ ཀཱཡེན ཙ ཝཱཙཱཡ ཙ ཨཱརབྷཏི པརཱམསཏི, ཨཡཾ ཝུཙྩཏི སཱིལབྦཏཔརཱམཱསོ. སངྐཔྤནཱ ཏེ ཏིཝིདྷཱ སངྑཱརཱ པུཉྙམཡཱ ཨཔུཉྙམཡཱ ཨཱནེཉྫམཡཱ, ཏཔྤཙྩཡཱ ཝིཉྙཱཎཾ ཏེ ཨཱརམྨཎམེཏཾ ཧོཏི ཝིཉྙཱཎསྶ ཋིཏིཡཱ. ཡཱ སུབྷསཉྙཱ སུཁསཉྙཱ ཨཏྟསཉྙཱ ཙ. ཨིདཾ ཙེཏསིཀཾ. ཡཾ རཱུཔཱུཔགཾ ཝིཉྙཱཎཾ ཏིཊྛཏི རཱུཔཱརམྨཎཾ རཱུཔཔཏིཊྛིཏཾ ནནྡཱུཔསེཙནཾ ཝུདྡྷིཾ ཝིརཱུལ༹ྷིཾ ཝེཔུལླཏཾ གཙྪཏི, ཨཡཾ སངྐཔྤནཱ, ཨིཏི ཡཾ ཝིཉྙཱཎཊྛིཏཱིསུ ¶ ཋིཏཾ པཋམཱབྷིནིབྦཏྟིཨཱརམྨཎཝསེན ཨུཔཱདཱནཾ, ཨིདཾ ཝུཙྩཏི ཙེཏསིཀནྟི.

ཏཏྠ ཋིཏསྶ ཨརཱུཔསྶ ཡཱ ནིཀནྟི ཨཛ྄ཛྷོསཱནཾ, ཨིདམྤི སཀམྤིཏཾ མནཱཔིཀེསུ རཱུཔེསུ པིཡརཱུཔསཱཏརཱུཔེསུ ཨཱབྷོགོ, ཨིདཾ ཙེཏསིཀཾ. ཡཾ ཙེཏེཏི སཏྟེསུ [སཏྟསུ (པཱི.)] མནཱཔིཀེསུ ཨབྷིཛ྄ཛྷཱཀཱཡགནྠོ པཊིགྷཱནུསཡེསུ བྱཱཔཱདཀཱཡགནྠོ སབྦེ ཙཏྟཱརོ གནྠཱ, ཨཡཾ ¶ པཉྩསུ ཀཱམགུཎེསུ པཋམཱབྷིནིཔཱཏོ ཙིཏྟསྶ ཡཱ ཙེཏནཱ ཡསྶ ཏཏྠ ཨསྶཱདཱནུཔསྶིསྶ ཨནེཀཱ པཱཔཀཱ ཨཀུསལཱ དྷམྨཱ ཙིཏྟཾ ཨརཱུཔཝཏིཡོ ཧོནྟི. པུགྒལོ རཱགཱནུབནྡྷིབྷཱུཏོ ཏེཧི ཀིལེསཀཱམེཧི ཡཐཱ ཀཱམཀརཎཱིཡོ, ཨཡཾ ཝུཙྩཏེ ཀཱམེསུ པཀཔྤནཱ. ཨེཝཾ སབྦེ ཙཏྟཱརོ ཨོགྷཱ. ཡཾ ཏེཧི ཀཱམེཧི སཾཡུཏྟོ ཝིཧརཏི བྷཱཝིཏོ ཨཛ྄ཛྷོསནྣོ, ཨཡཾ ཙེཏནཱ. ཡསྶ ཏཐཱཡཾ ཨཝཱིཏརཱགསྶ ཨདྷིགཏཔེམསྶ ཏསྶ ཝིཔརིཎཱམཉྙཐཱབྷཱཝཱ ཨུཔྤཛྫནྟི སོཀཔརིདེཝདུཀྑདོམནསྶུཔཱཡཱསཱ དུཀྑཱནུཔརིཝཏྟིཏཾ ཝིཉྙཱཎཾ ཧོཏི སརིཏསྶ ཝཡདྷམྨསམུཔྤཱདོ ཙིཏྟཾ པརིཡཱདིཡཏི, ཨིདཾ ཝུཙྩཏི པཀཔྤིཏནྟི.

ཨེཀམེཀསྶ ཙེཏེཏི ཙ པཀཔྤེཏི ཙ ཝིཉྙཱཎསྶ ཋིཏི ཡཱ ཧོཏི, སཱ ཙ ཋིཏི དྭིདྷཱ ཨཱརམྨཎཊྛིཏི ཙ ཨཱཧཱརཊྛིཏི ཙ. ཏཏྠ ཡཱ ཨཱརམྨཎཊྛིཏི, ཨཡཾ ནཱམརཱུཔསྶ པཙྩཡོ ¶ . ཡཱ ཨཱཧཱརཊྛིཏི ཡཱ པུནབྦྷཝཱབྷིནིབྦཏྟིཀཱ ཋིཏི ཡཱ ཙ པོནོབྷཝིཀཱ ཋིཏི, ཨཡཾ ཝུཙྩཏི ཨཱརམྨཎཾ. ཏཾ ཧོཏི ཝིཉྙཱཎསྶ ཋིཏིཡཱ ཏསྶ ཝིཉྙཱཎཔཙྩཡཱ ནཱམརཱུཔཾ ཡཱཝ ཛརཱམརཎཉྩ ཙེཏེཏི, ཨཐ ཙ པུན པཏྠཡཏེ ཡཏོ ན པོནོབྷཝིཀཱ ཨནཱགཏཝཏྠུམྷི, ཨཡཾ པཊིཔཀྑོ ནིདྡིཊྛོ. ན ཙེཏེཏི ན པཏྠཡཏི ཨཐ ཙ དཱུསེཏཱིཏི དུཝིདྷོ ནིདྡེསོ. ཨསྶ པུབྦེ ཧོཏི ཏཾ ཙེཏསིཀཾ ཏཾ པཀཔྤིཏཾ ཨསམཱུཧཏཾ ཏཔྤཙྩཡཱ, ཨཡཾ ཝིཉྙཱཎསྶ ཋིཏི ཧོཏི.

༡༠༨. ཨཐ ¶ ཝཱ ཏསྶ ཨནུསཡཱ ཨཱཝིབྷཝནྟི ཏཔྤཙྩཡཱ ཏསྶ པུནབྦྷཝོ ནིབྦཏྟཏི. ཨཐ ཝཱ ནཾ སཾཀིཡཏེ ཨཔྤེཏུ ཨཱགཱརེ ཝཱ, སུཁུམཱ ཝཱ སནྟི ཝཱ ན སཾཀིཡཏེ ཀཱམེ ཏཾ ཨེཝཾ ནིཙྩེསུཔི ཨཱགཱརེསུ ཛཱཏོ ཧོཏི. ཏཾ ནཡཏི ཡཾ ནོ ཀཔྤེཏུཾ ཨེཝཾ སངྑཱརཱ ཙེཏིཏཱ པཀཔྤིཏཱ ཙ ཨཱརམྨཎབྷཱུཏཱ ¶ ཧོནྟི, ཡཱ ཙ ཙེཏནཱ ཡཱ ཙ པཀཔྤནཱ ཡཉྩ ཝཏྠུ ནིབྦཏྟཾ, ཨུབྷོཔི ཨེཏེ ཨཱརམྨཎཾ ཝིཉྙཱཎསྶ ཏཐཱ ཙེཏནཱཡ ཙ སངྐཔྤནཱཡ ཙ པཏྠནཱཡ ཙ བྷཱུཏཱ སཏྟཱ ཙེཏེཏི ཙ སངྐཔྤེཏི ཙ. ཡཾ གཝེསནཱ ན ཙ ཙེཏེཏི ན ཙ སངྐཔྤེཏི. ཀཏམེ ཙ སཏྟཱ བྷཱུཏཱ? ཡེ ཙ ཏནུཛཱཏཨཎྜཛཱཔི ཨཎྜཀཱ ཨནུབྷིནྣཱ སཾསེདཛཱ ན ཙ སམྦྷིནྣཱ ཨིམེ བྷཱུཏཱ. ཀཏམེ སམྦྷཝེསིནོ གབྦྷགཏཱ ཨཎྜགཏཱ སཾསརནྟོ ཨིམེ ན ཙེཏེཏི ན པཏྠེཏི ན ཙ སངྐཔྤེཏི. ཨནུསཡེ ན ཙ པུནབྦྷཝོ ནིབྦཏྟཱིཏི? ཡེ བྷཱུཏཱ སཏྟཱ ཡེ སམྦྷཝེསིནོ, ཏེ ཐཱཝརཱ. ཡེ ཝཱ སཏོ ཙེཏེནྟི པཏྠེནྟི ཙ ཡེ ཐཱཝརཱ. ཏེ ན ཙ ཙེཏེནྟི, ན ཙ པཏྠེནྟི, ན ཙ སངྐཔྤེནྟི, ཨནུསཡེན ཙ སཾསརནྟི.

ཨཔརོ པརིཡཱཡོ. ཡེ ཨརིཡཔུགྒལཱ སེཀྑཱ, ཏཏྠ ཏེ ན ཙ ཙེཏེནྟི, ན ཙ སངྐཔྤེནྟི, ཨནུསཡེན པུན ཨུཔྤཛྫནྟི.

ཨཔརོ པརིཡཱཡོ. སུཁུམཱ པཱཎཱ བྷཱུམིགཏཱ ཨུདཀགཏཱ ཙཀྑུནོ ཨཱཔཱཐཾ ནཱགཙྪནྟི, ཏེ ན ཙ ཙེཏེནྟི, ན ཙ སངྐཔྤེནྟི, ཨནུསཡེན ཙ སཾསརནྟི.

ཨཔརོ པརིཡཱཡོ. བཱཧིཀཱ སབྦེ བྷིཀྑཱུ ཨབྷིམཱནིཀཱ, ཏེ ན ཙ ཙེཏེནྟི, ན ཙ པཏྠཡནྟི, ཨནུསཡེན ཙ སཾསརནྟི, ན ཙ ཙེཏེནྟི, ན ཙ སངྐཔྤེནྟི, ན ཙ ཨནུསེནྟི. ཨཱརམྨཎམྤེཏཾ ¶ ན ཧོཏི ཝིཉྙཱཎསྶ ཋིཏིཡཱ.

ན ཙ ཙེཏེཏཱིཏི པརིཡུཊྛཱནསམུགྒྷཱཏཾ དསྶེཏི. ན ཙ ཨནུསེཏཱིཏི ཨནུསཡསམུགྒྷཱཏཾ དསྶེཏི ¶ . ན ཙ ཙེཏེཏཱིཏི ཨོལཱ༹རིཀཱནཾ ཀིལེསཱནཾ པཧཱནཾ དསྶེཏི. ན ཙ ཨནུསེཏཱིཏི སུཁུམཱནཾ ཀིལེསཱནཾ པཧཱནཾ དསྶེཏི. ན ཙ ཙེཏེཏཱིཏི ཡེན བྷཱུམི ཙ ན ཙ པཏྠཡནྟཱིཏི སཀདཱགཱམཱི ཨནཱགཱམཱི, ན ཙ ཨནུསེཏཱིཏི ཨརཧཾ, ན ཙ ཙེཏེཏཱིཏི སཱིལཀྑནྡྷསྶ པཊིཔཀྑེན པཧཱནཾ དསྶེཏི, ན ཙ པཏྠཡཏཱིཏི སམཱདྷིཀྑནྡྷསྶ པཊིཔཀྑེན པཧཱནཾ དསྶེཏི, ན ཙ ཨནུསཡཏཱིཏི པཉྙཱཀྑནྡྷསྶ པཊིཔཀྑེན པཧཱནཾ དསྶེཏི, ན ཙ ཙེཏེཏཱིཏི ཨཔུཉྙམཡཱནཾ སངྑཱརཱནཾ པཧཱནཾ དསྶེཏི, ན ཙ པཏྠཡཏཱིཏི པུཉྙམཡཱནཾ སངྑཱརཱནཾ པཧཱནཾ དསྶེཏི, ན ཙ ཨནུསེཏཱིཏི ཨཱནེཉྫམཡཱནཾ སངྑཱརཱནཾ པཧཱནཾ དསྶེཏི, ན ཙ ཙེཏེཏཱིཏི ཨནཉྙཱཏཉྙསྶཱམཱིཏིནྡྲིཡཾ, ན ཙ པཏྠཡཏཱིཏི ཨཉྙིནྡྲིཡཾ, ན ཙ ཨནུསཡཏཱིཏི ཨཉྙཱཏཱཝིནོ ཨིནྡྲིཡཾ. ན ཙ ཙེཏེཏཱིཏི མུདུཀཱ ཨིནྡྲིཡབྷཱཝནཱ, ན ཙ པཏྠཡཏཱིཏི ¶ མཛ྄ཛྷཨིནྡྲིཡབྷཱཝནཱ, ན ཙ ཨནུསེཏཱིཏི ཨདྷིམཏྟཱ ཨིནྡྲིཡབྷཱཝནཱ. ཨཡཾ སུཏྟཏྠོ.

༡༠༩. ཏཏྠ ཀཏམཱ དེསནཱ? ཨིདྷ སུཏྟེ ཙཏྟཱརི སཙྩཱནི དེསིཏཱནི. ཡཉྩ ཙེཏཡིཏཾ ཡཉྩ པཀཔྤིཏཾ ཨཏྠི ཨེཏཾ ཨཱརམྨཎཾ ཙིཏྟཾ པཏིཊྛཏི ཝིཙིནཏི [ཝིཙིནཡཏི (པཱི. ཀ.)] ཡུཛྫཏི. ན ཙ ཙེཏེཏཱིཏི ན ཙ པཏྠཡཏཱིཏི ཨཏྠི ཨེཝཾ ཨཱརམྨཎཾ ཨནུསཡེ ཝིཉྙཱཎམིཏི ཝིཙིནིཡཏི ཡུཛྫཏི ན ཙ ཙེཏེཏི ན ཙ པཏྠཡཏི. ཨནུསཡཔྤཧཱནཱ ཝིཉྙཱཎཊྛིཏིཾ ན གཝེསནྟི, ཝིཙིཡནྟཾ ཡུཛྫཏི. ཨཡཾ ཡུཏྟིཝིཙཡོ.

ཏཏྠ ཀཏམོ པདཊྛཱནོ? ཙེཏནཱ ¶ པརིཡུཊྛཱནཾ ཙེཏནཱཔརིཡུཊྛཱནསྶ པདཊྛཱནཾ. སངྐཔྤནཾ ཨུཔཱདཱནསྶ པདཊྛཱནཾ. ཨནུསཡོ པརིཡུཊྛཱནསྶ པདཊྛཱནཾ. ཏེསཾ ཚནྡརཱགཝིནཱསཱཡ བྷཱཝནཱ བྷཝརཱགསྶ པཧཱནཾ.

ཏཏྠ ཀཏམོ ལཀྑཎོ? ཡཾ ཙེཏསིཀནྟི ཝེདཡིཏཾ པཀཔྤིཏཾ ཨུགྒཧིཏཾ ཝིཉྙཱཏཾ ཏབྦིཉྙཱཎཾ ཨཱརམྨཎམྤི པཙྩཡོཔི.

ཏཏྠ ཀཏམོ ཙཏུབྱཱུཧོ? ཨིདྷ སུཏྟེ བྷགཝཏོ ཀོ ཨདྷིཔྤཱཡོ? ཡེ པུནབྦྷཝཾ ན ཨིཙྪནྟི, ཏེ ན ཙེཏཡིསྶནྟི ན ཙ པཏྠཡིསྶནྟཱིཏི, ཨཡཾ ཨདྷིཔྤཱཡོ.

ཨཱཝཊྚོཏི ཡཱ ཙ ཙེཏནཱ པཏྠནཱ ཙ ཨནུསཡོ ཙ ཝིཉྙཱཎཊྛིཏིཔཧཱནཱ ཙ, ཨིམཱནི དྭེ སཙྩཱནི. ཝིབྷཏྟཱིཏི ནཏྠི ཝིབྷཏྟིཡཱ བྷཱུམི. པརིཝཏྟནཱ པན པཊིཔཀྑཾ སུཏྟཾ.

ཏཏྠ ¶ ཀཏམོ ཝེཝཙནོ? ཙེཏནཱ རཱུཔསཉྩེཏནཱ ཡཱཝདྷམྨསཉྩེཏནཱ. ཡོ ཨནུསཡོ, ཏེ སཏྟ ཨནུསཡཱ.

པཉྙཏྟཱིཏི ཙེཏནཱཔརིཡུཊྛཱནཾ པཉྙཏྟིཡཱ པཉྙཏྟཱ. སངྐཔྤནཾ ཨུཔཱདཱནཔཉྙཏྟིཡཱ པཉྙཏྟཾ. ཨནུསཡོ ཧེཏུཔཉྙཏྟིཡཱ པཉྙཏྟོ. ཝིཉྙཱཎཊྛིཏི ཨུཔཔཏྟིཧེཏུཔཉྙཏྟིཡཱ པཉྙཏྟཱ. ཙེཏནཱ སངྐཔྤནཱ ཨནུསཡོ སམུཙྪེདོ ཚནྡརཱགཝིནཡཔཉྙཏྟིཡཱ པཉྙཏྟོ. པཋམེ ཀེཙི དྭཱིཧི པརིཝཏྟཀེཧི པཊིཙྩསམུཔྤཱདོ ཨིདཔྤཙྩཡཏཱཡ མཛ྄ཛྷཔཉྙཏྟི.

ཨོཏརཎོཏི ¶ དྭཱིཧི པརིཝཏྟཀེཧི དུཀྑཉྩ སམུདཡོ ཙ མཛ྄ཛྷིམཀེཧི མགྒོ ཙ ནིརོདྷོ ཙ. སོདྷནོཏི སུཏྟེ སུཏྟསྶ ཨཱརམྦྷོ.

ཨདྷིཊྛཱནོཏི ¶ ཡཉྩེཏཡིཏཾ སབྦཾ ཨདྷིཊྛཱནེན ཨེཀཏྟཱཡ པཉྙཏྟཾ. སངྐཔྤིཏནྟི ཨུཔཱདཱནེཀཏྟཱཡ པཉྙཏྟཾ. ཝིཉྙཱཎཾ ཨེཀཏྟཱཡ པཉྙཏྟཾ.

པརིཀྑཱརོཏི སུབྷཉྩ ཨཱརམྨཎཾ ཨཡོནིསོ མནསིཀཱརོ ཙེཏནཱ ཧེཏུཔཙྩཡཏཱཡ པཙྩཡོ. ཝིཉྙཱཎསྶ པཏིཊྛཱནོ དྷམྨོ ཨཱརམྨཎཔཙྩཡཏཱཡ པཙྩཡོ. ཏསྶ མནསིཀཱརོ ཧེཏུཔཙྩཡཏཱཡ པཙྩཡོ.

ཏཏྠ ཀཏམོ སམཱརོཔནོ? ཨིདཾ སུཏྟཾ སཉྙིཏཾ ཏཏྠ ཙེཏེཏི ཝིསཛྫནཱ ཨིཏི ནིདྡིསིཏབྦཱ. ཏསྶ དིཊྛིཡཱ ཝིཉྙཱཎཔཙྩཡཱ ནཱམརཱུཔཾ ཡཱཝ ཛརཱམརཎཾ, ཨཡཾ སམཱརོཔནོ. ཨཱརམྨཎམེཏཾ ན ཧོཏི ཝིཉྙཱཎསྶ ཋིཏིཡཱ, ཝིཉྙཱཎནིརོདྷཱ ནཱམརཱུཔནིརོདྷོ, ནཱམརཱུཔནིརོདྷཱ ཡཱཝ ཛརཱམརཎནིརོདྷོ.

༡༡༠. ཏཏྠ ཀཏམཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟཾ? ཨཡཾ ལོཀོ [པསྶ ཨུདཱ. ༣༠ ཨུདཱནེ] སནྟཱཔཛཱཏོ ཡཱཝ ཡེ ཧི ཀེཙི སམཎཱ ཝཱ བྲཱཧྨཎཱ ཝཱ བྷཝེན བྷཝསྶ ཝིཔྤམོཀྑམཱཧཾསུ. སཾཀིལེསབྷཱགིཡཾ ཨུཔདྷིཾ ཧི པཊིཙྩ དུཀྑམིདཾ སམྦྷོཏི, ཡཱ ཏཱ པན ཏཎྷཱ པཧཱིཡནྟི, བྷཝཾ ནཱབྷིནནྡཏཱིཏི ནིབྦེདྷསྶ ནིབྦུཏསྶ [ནིཙྩུཏསྶ (པཱི. ཀ.)] བྷིཀྑུནོ ཨནུཔཱདཱཡ པུནབྦྷཝོ ན ཧོཏི. ཨུཔཙྩགཱ སབྦབྷཝཱནི ཏཱདཱིཏི ཨསེཀྑབྷཱགིཡཾ.

ཏཏྠ སནྟཱཔཛཱཏོཏི རཱགཛོ སནྟཱཔོ དོསཛོ མོཧཛོཏི. ཏེསཾ སཏྟཱནཾ ཋཱནཾ དསྶེཏི ¶ . ལོཀོ སནྟཱཔཛཱཏོཏི ཕསྶོ ཏིཝིདྷོ སུཁཝེདནཱིཡོ དུཀྑཝེདནཱིཡོ ཨདུཀྑམསུཁཝེདནཱིཡོ. ཏཏྠ སུཁཝེདནཱིཡོ ཕསྶོ རཱགསནྟཱཔོ, དུཀྑཝེདནཱིཡོ དོསསནྟཱཔོ, ཨདུཀྑམསུཁཝེདནཱིཡོ མོཧསནྟཱཔོ. ཡཐཱ ¶ ཙ བྷགཝཱ ཨཱཧ པཋམཀསྶ ཝལཱཧཀསྶ གོམགྒེ [ཀོམགྒེ (པཱི. ཀ.) པསྶ ཨ. ནི. ༣.༣༥] ཡེཧི གཧཔཏིཔུཏྟ རཱགཛེཧི དོསཛེཧི མོཧཛེཧི སནྟཱཔེཧི དུཀྑཾ སུཔཏི, ཏེ མམ སནྟཱཔཱ ན སནྟི.

རོགཾ ¶ ཝདཏི ཨཏྟཏོཏི ཏེཧི སནྟཱཔེཧི སནྟཱཔིཏོ ཏིཝིདྷཾ ཝིཔལླཱསཾ པཊིལབྷཏི སཉྙཱཝིཔལླཱསཾ ཙིཏྟཝིཔལླཱསཾ དིཊྛིཝིཔལླཱསཾ. ཏཏྠ ཨསུབྷེ སུབྷནྟི སཉྙཱཝིཔལླཱསོ. དུཀྑེ སུཁནྟི ཙིཏྟཝིཔལླཱསོ. ཨནིཙྩེ ནིཙྩནྟི ཨནཏྟནི ཨཏྟཱཏི དིཊྛིཝིཔལླཱསོ.

ཡཐཱ ཙིཏྟསྶ ཝིཔལླཱསོ སཉྙཱདིཊྛིཏེ ཏིཝིདྷཱ ཝིཏཀྐཱ – ཙིཏྟཝིཏཀྐོ ཝིཔལླཱསོ སཉྙཱཝིཏཀྐོ ཝིཔལླཱསོ དིཊྛིཝིཏཀྐོ ཝིཔལླཱསོཔི. ཏཏྠ ཨཝིཛྫཱ ཝིཔལླཱསོ གོཙརཱ གཏིཔཏེཡྻབྷཱུམི, ཡཐཱ ཧི ཏཾ སཉྫཱནཱཏི ཡཐཱ ཝིཛཱནཱཏི ཡཐཱ སཉྫཱནཱཏི ཙ ཝིཛཱནཱཏི ཙ. ཡཐཱ ཁནྟི ཙེཏེཏི ཨིམེ ཙཏྟཱརོ ཝིཔལླཱསཱ སཏྟཱ ཡེཧི ཙཏུབྦིདྷཾ ཨཏྟབྷཱཝཝཏྠུཾ རོགབྷཱུཏཾ གཎྜབྷཱུཏཾ ‘‘ཨཏྟཱ’’ཏི ཝདནྟི. རོགཾ ཝདཏི ཨཏྟཏོཏི ཨཡཾ ཨཱཝཊྚོ. ཡེན ཡེན ཧི མཉྙཏི ཏཏོ ཏཾ ཧོཏི ཨཉྙཐཱཏི སུབྷནྟི མཉྙཏི ན ཏཐཱ ཧོཏི. ཨེཝཾ སུཁནྟི ནིཙྩཾ ཨཏྟཱཏི སོ ཨཉྙཐཱ བྷཝམེཝ སནྟཾ ཨནཱགཏཾ བྷཝཾ པཏྠཡཏི, ཏེན ཝུཙྩཏི ‘‘བྷཝརཱགོ’’ཏི. བྷཝམེཝཱབྷིནནྡཏི, ཡཾ ཨབྷིནནྡཏི, ཏཾ དུཀྑནྟི པཉྩཀྑནྡྷེ ནིདྡིསིཡཏི. ཡཉྩ ཏཔྤཙྩཡཱ སོཀཔརིདེཝདུཀྑཾ ཏསྶ ཧི བྷཱཝེསྶཏི. ཨེཏྟཱཝཏཱ སཾཀིལེསོ ཧོཏི. པཧཱནཏྠཾ ཁོ པན བྲཧྨཙརིཡཾ ¶ ཝུསྶཏི. ཏིཎྞཾ སནྟཱཔཱནཾ ཚནྡརཱགཝིནཡོ ཧོཏི.

ཨུཔདྷིཾ ཧི པཊིཙྩ དུཀྑམིདཾ བྷཝཏཱིཏི ཡེ བྷཝམེཝཱབྷིནནྡནྟི ཡསྶ བྷཱཝེསྶཏི, ཏཾ དུཀྑཾ ཏསྶ དུཀྑསྶ པཧཱནམཱཧ. སབྦསོ ཨུཔཱདཱནཉྩ ཡཾ ནཏྠི དུཀྑསྶ སམྦྷཝོཏི ཙཏྟཱརོ ཝིཔལླཱསཱ ཡཐཱ ནིདྡིཊྛཨུཔཱདཱནམཱཧ. ཏསྶ པཋམོ ཝིཔལླཱསོ ཀཱམུཔཱདཱནཾ, དུཏིཡཾ དིཊྛུཔཱདཱནཾ, ཏཏིཡཾ སཱིལབྦཏུཔཱདཱནཾ, ཙཏུཏྠཾ ཨཏྟཝཱདུཔཱདཱནཾ, ཏེསཾ ཡོ ཁཡོ ནཏྠི དུཀྑསྶ སམྦྷཝོ ཨུཔདྷི ནིདཱནཾ དུཀྑནིརོདྷམཱཧ. ཨེཝམེཏཾ ཡཐཱབྷཱུཏཾ སམྨཔྤཉྙཱཡ པསྶཏོ ཝིབྷཝཏཎྷཱ ན ཧོཏི. ཝིབྷཝཾ ནཱབྷིནནྡཏཱིཏི དསྶནབྷཱུམིཾ མནྟེཏི སབྦསོ ཏཎྷཀྑཡཾ ནིབྦཱནནྟི དྭེ ཝིམུཏྟིཡོ ཀཐེཏི རཱགཝིརཱགཉྩ ཨཝིཛྫཱཝིརཱགཉྩ. ཏསྶ བྷིཀྑུནོཏི ཨནུཔཱདིསེསནིབྦཱནདྷཱཏུཾ མནྟེཏི. ཨཡཾ སུཏྟསྶ ཨཏྠནིདྡེསོ.

༡༡༡. ཏཏྠ ¶ ཀཏམོ ཝིཙཡོ? ཡསྶ ཡཏྠ པརིལཱ༹ཧེཏི ཏསྶ པརིཌཡ྄ཧནྟསྶ སོ ཡཐཱབྷཱུཏཾ ནཏྠི ནིབྦིནྡཏི ཙ, ཨཡཾ ཝིཙཡོ ཙ ཡུཏྟི ཙ. པདཊྛཱནོ ¶ རཱགཛོ པརིལཱ༹ཧོ སུཁིནྡྲིཡསྶ དོམནསྶིནྡྲིཡསྶ ཙ པདཊྛཱནཾ. དོསཛོ པརིལཱ༹ཧོ སུཁིནྡྲིཡསྶ དོམནསྶིནྡྲིཡསྶ ཙ པདཊྛཱནཾ. མོཧཛོ པརིལཱ༹ཧོ ཨུཔེཀྑིནྡྲིཡསྶ དོམནསྶིནྡྲིཡསྶ ཙ པདཊྛཱནཾ.

ཏཏྠ ཀཏམོ ལཀྑཎོ ཧཱརོ? ཕསྶཔརེཏོ ཝེདནཱཔརེཏོ སཉྙཱཔརེཏོཔི སངྑཱརཔརེཏོཔི ཡེན ཡེན མཉྙཏི ཡདི སུབྷནིམིཏྟེན ཡདི སུཁནིམིཏྟེན ཡདི ནིཙྩནིམིཏྟེན ཡདི ཨཏྟནིམིཏྟེན ཨསུབྷེ སུབྷནྟི མཉྙཏི, ཨེཝཾ སབྦཾ རཱགཛེ པརིལཱ༹ཧེ ཝུཏྟེ ཙཏྟཱརོ པརིལཱ༹ཧཱ ཝུཏྟཱ བྷཝནྟི. རཱགཛོ དོསཛོ མོཧཛོ དིཊྛིཛོ ¶ ཙ རཱགཾ ཝདཱམཱིཏི ཨཏྟཏོ ཝདཏི. སབྦཱནི པནྣརས པདཱནི ཨནིཙྩཾ དུཀྑནྟི.

ཏཏྠ ཀཏམོ ཙཏུབྱཱུཧོ? ཨིདྷ སུཏྟེ བྷགཝཏོ ཀོ ཨདྷིཔྤཱཡོ? ཡེ པརིལཱ༹ཧེན ན ཨཙྪནྟི ཏེ བྷཝཾ ནཱབྷིནནྡནྟི. ཡེ བྷཝཾ ནཱབྷིནནྡནྟི, ཏེ པརིནིབྦཱཡིསྶནྟི. ཨཡཾ ཨདྷིཔྤཱཡོ.

ཏཏྠ ཀཏམོ ཨཱཝཊྚོ? སཾཀིལེསབྷཱགིཡེན དུཀྑཉྩ སམུདཡཉྩ ནིདྡིསཏི. ནིབྦེདྷབྷཱགིཡེན མགྒཉྩ ནིརོདྷཉྩ.

ཏཏྠ ཀཏམཱ ཝིབྷཏྟི? སནྟཱཔཛཱཏོ རོགཛཱཏོ རོགཾ ཝདཏི ཨཏྟཏོ ཏཾ ན ཨེཀཾསེན ཧོཏི ཨམནསིཀཱརཱ སནྟཱཔཛཱཏོ ཁོ ན ཙ རོགཾ ཨཏྟཏོ ཝདཏི.

ཏཏྠ ཀཏམོ པརིཝཏྟནོ? པཀྑཔཊིཔཀྑནིདསྶནཏྠཾ བྷཱུམི པརིཝཏྟནཱཡ.

ཏཏྠ ཀཏམོ ཝེཝཙནོ ཧཱརོ? རོགཉྩ ཨཏྟཏོ ཝདཏི སལླཾ ཨཏྟཏོ ཝདཏི. པནྣརས པདཱནི སབྦཱནི ཝཏྟབྦཱནི.

ཏཏྠ ཀཏམཱ པཉྙཏྟི? སནྟཱཔཛཱཏོཏི དོམནསྶཔདཊྛཱནཾ. སབྦེ ཝཙནཔཉྙཏྟིཡཱ པཉྙཔེཏི. རོགཾ ཝདཏི ཨཏྟཏོ ཝིཔལླཱསོ སཾཀིལེསཔཉྙཏྟིཡཱ པཉྙཔེཏི. ཡཾ ནཱབྷིནནྡཏི, ཏཾ ¶ དུཀྑནྟི ཝིཔལླཱསནིཀྑེཔཔཉྙཏྟིཡཱ པཉྙཏྟཱ. ཏེ ཨཀཏསཏྟཱ ལོཀཱ མཛ྄ཛྷེན ཝེམཏྟཏཱཡ པཉྙཏྟཱ.

ཏཏྠ ཀཏམོ ཨོཏརཎོ? སནྟཱཔཛཱཏོཏི ཏཱིཎི ཨཀུསལམཱུལཱནི, ཏེ སངྑཱརཱ སངྑཱརཀྑནྡྷཔརིཡཱཔནྣཱ, དྷཱཏཱུསུ དྷམྨདྷཱཏུ, ཨཱཡཏནེསུ ¶ དྷམྨཱཡཏནཾ. ཨིནྡྲིཡེསུ ཨིཏྠིནྡྲིཡཾ པུརིསིནྡྲིཡཉྩ པདཊྛཱནཾ.

ཏཏྠ ¶ ཀཏམོ སོདྷནོ? སུདྡྷོ སུཏྟསྶ ཨཱརམྦྷོ.

ཏཏྠ ཀཏམོ ཨདྷིཊྛཱནོ ཧཱརོ? པརིལཱ༹ཧོཏི ཡེ སཏྟཱ ལོཀཱ ཨེཀཏྟཔཉྙཏྟིཡཱ པཉྙཏྟཱ, ཏེ ཨཀཏསཏྟཱ ལོཀཱ མཛ྄ཛྷེན ཝེམཏྟཏཱཡ པཉྙཏྟཱ.

ཏཏྠ ཀཏམོ པརིཀྑཱརོ? སནྟཱཔཛཱཏོཏི ཨཡོནིསོ མནསིཀཱརོ ཧེཏུ, ཝིཔལླཱསཉྩ པཙྩཡོ. ཏཏྠ དྭཱིཧི དྷམྨེཧི ཨཏྟཱ ཨབྷིནིཝིཊྛཱ ཙིཏྟཉྩ ཙེཏསིཀཉྩ དྷམྨེ ཨུབྷཡཱནི ཏསྶ ཝིཔརཱིཏེན པརཱམསཏོ. ཨཔརོ པརིཡཱཡོ, ཙེཏསིཀེཧི དྷམྨེཧི ཨཏྟསཉྙཱ ཨནཏྟསཉྙཱ སམུགྒྷཱཏེཏི. ཨཔརོ པརིཡཱཡོ. ཨནིཙྩསཉྙཱ ཙེཏསིཀེསུ དྷམྨེསུ, ན ཏུ ཨཏྟསཉྙཱ. ཨིདཾ ཝུཙྩཏི ཙིཏྟནྟི ཝཱ མནོཏི ཝཱ ཝིཉྙཱཎནྟི ཝཱ ཨིདཾ དཱིགྷརཏྟཾ ཨབྦྷུགྒཏཾ ཨེཏཾ མམ, ཨེསོཧམསྨི, ཨེསོ མེ ཨཏྟཱཏི. ཏཏྠ ཙེཏསིཀཱ དྷམྨཱནུཔསྶནཱ ཨེསཱཔི དྷམྨསཉྙཱ. ཏསྶ ཀོ ཧེཏུ, ཀོ པཙྩཡོ? ཨཧཾཀཱརོ ཧེཏུ, མམཾཀཱརོ པཙྩཡོ.

ཏཏྠ ཀཏམོ སམཱརོཔནོ? ཨཡཾ ལོཀོ སནྟཱཔཛཱཏོཏི ཨཀུསལཾ མནྟེཏི ཝིཉྙཱཎཾ ནཱམརཱུཔསྶ པཙྩཡོ ཡཱཝ ཛརཱམརཎནྟི, ཨཡཾ སམཱརོཔནོ.

༡༡༢. ཨེཝམེཏཾ ཡཐཱབྷཱུཏཾ, སམྨཔྤཉྙཱཡ པསྶཏི ཨཀུསལམཱུལཱནཾ པཧཱནཾ. ཏཏྠ ཨཝིཛྫཱནིརོདྷོ ཨཝིཛྫཱནིརོདྷཱ ཡཱཝ ཛརཱམརཎནིརོདྷོ, ཨཡཾ སམཱརོཔནོ.

ཙཏྟཱརོ ¶ པུགྒལཱ [པསྶ ཨ. ནི. ༤.༥] – ཨནུསོཏགཱམཱི པཊིསོཏགཱམཱི ཋིཏཏྟོ, ཏིཎྞོ པཱརངྒཏོ ཐལེ ཏིཊྛཏི བྲཱཧྨཎོཏི.

ཏཏྠ ཡོ ཨནུསོཏགཱམཱི ཨཡཾ ཀཱམེ སེཝཏི. པཱཔཉྩ ཀམྨཾ ཀརོཏི ཡཱཝ ཀཱམེ པཊིསེཝཏི ¶ . ཨིདཾ ལོབྷོ ཨཀུསལམཱུལཾ, སོ ཡེཝ ཏཎྷཱ, སོ ཏེཧི ཀཱམེཧི ཝུཡ྄ཧཏི ཨནུསོཏགཱམཱིཏི ཝུཙྩཏི. ཡོ པུགྒལོ ཏཱཧི གམིཏོ ཏཔྤཙྩཡཱ ཏསྶ ཧེཏུ ཨཀུསལཀམྨཾ ཀརོཏི ཀཱཡེན ཙ ཝཱཙཱཡ ཙ, ཨཡཾ ཝུཙྩཏི པཱཔཀམྨཾ ཀརོཏཱིཏི. ཏསྶ ཏཱིཎི སོཏཱནི སཀྐཱཡདིཊྛི ཝིཙིཀིཙྪཱ སཱིལབྦཏཔརཱམཱསོ. ཨིམེཧི ཏཱིཧི སོཏེཧི ¶ ཏིཝིདྷདྷཱཏུཡཾ ཨུཔྤཛྫཏི ཀཱམདྷཱཏུཡཾ རཱུཔདྷཱཏུཡཾ ཨརཱུཔདྷཱཏུཡཾ. ཏེན པཊིཔཀྑེན ཡོ ཀཱམེ ན པཊིསེཝཏི. ཡོ སཱིལཝཏཾ ན པརཱམསཏི. ཡོ སཀྐཱཡདིཊྛཱིནཾ པཧཱནཱཡ ཀཱམེསུ ཡཐཱབྷཱུཏཾ ཨཱདཱིནཝཾ པསྶཏི. ཡེན ཙ ཏེ དྷམྨེ པཊིསེཝཏི. ཡཉྩ ཏཔྤཙྩཡཱ ཏིཊྛཏི བྲཱཧྨཎོཏི ཨརཧཾ ཀིར. ཏཏྠ ཨརཧཾ ཏསྶ པཱརངྒཏོ ཧོཏི, པཱརངྒཏསྶ ཐལེ ཏིཊྛཏི སོཔཱདིསེསཱ ནིབྦཱནདྷཱཏུ. ཨནུསོཏགཱམིནཱིཏི དསྶནཔྤཧཱཏབྦཱནཾ སཾཡོཛནཱནཾ ཨཔྤཧཱནམཱཧ. པཊིསོཏགཱམིནཱིཏི ཕལེ དིཊྛེཀཊྛཱནཉྩ ཀིལེསཱནཾ པཧཱནམཱཧ, ཋིཏཏྟེན པཉྩནྣཾ ཨོརམྦྷཱགིཡཱནཾ སཾཡོཛནཱནཾ པཧཱནམཱཧ. ཏཏྠ ཨནུསོཏགཱམིནཱ མགྒརཱུཔིམཱཧ. པཊིསོཏགཱམིནཱ ཋིཏཏྟེན ཙ མགྒམིཏིམཱཧ. པཱརངྒཏེན སཱཝཀཱ ཨསེཀྑཱ ¶ ཙ སམྨཱསམྦུདྡྷཱ ཙ ཝུཏྟཱ. ཨནུསོཏགཱམིནཱ སཀྐཱཡསམུདཡགཱམིནིཾ པཊིཔདམཱཧ. པཊིསོཏགཱམིནཱ ཋིཏཏྟེན སཀྐཱཡནིརོདྷགཱམིནིཾ པཊིཔདམཱཧ. པཱརངྒཏེན དས ཨསེཀྑཱ ཨརཧནྟཱ དྷམྨཱ ཝུཏྟཱ. ཨཡཾ སུཏྟཏྠོ.

༡༡༣. ཏཏྠ ཀཏམཱ དེསནཱ? ཨིམསྨིཾ ཧི སུཏྟེ ཙཏྟཱརི ཨརིཡསཙྩཱནི དེསིཏཱནི. ཏེདྷཱཏུཀལོཀསམཏིཀྐམནཉྩ.

ཏཏྠ ཀཏམོ ཝིཙཡོ ཧཱརོ? ཡོ ཀཱམེ པཊིསེཝཏི པཱཔཾ [པཱཔཀཾ (པཱི.)] ཀརེཡྻཱཏི ཡོ ཙ ཀཱམེ ན པཊིསེཝཏི སོ པཱཔཀམྨཾ ན ཀརེཡྻཱཏི ཡོ ཙ ཨིམེཧི དྭཱིཧི བྷཱུམཱིཧི ཨུཏྟིཎྞོ པཱརངྒཏོཏི ཡཱ ཝཱིམཾསཱ ཨཡཾ ཝིཙཡོ.

ཡུཏྟཱིཏི ཡུཛྫཏི སུཏྟེསུ, ནཱཡུཛྫཏཱིཏི ཡཱ ཝཱིམཾསཱཡ, ཨཡཾ ཡུཏྟི. པདཊྛཱནོཏི ཨནུསོཏགཱམིནཱ སཏྟནྣཾ སཾཡོཛནཱནཾ པདཊྛཱནཾ. ཨཀུསལསྶ ཀིརིཡཱ ཨཀུསལསྶ མཱུལཱནཾ པདཊྛཱནཾ. པཊིསོཏགཱམིནཱ ཡཐཱབྷཱུཏདསྶནསྶ པདཊྛཱནཾ. ཋིཏཏྟེན ཨསཾཧཱརིཡཱཡ [ཨསཧཱརིཡཱཡ (པཱི.)] པདཊྛཱནཾ. པཱརངྒཏོཏི ཀདཱཙི བྷཱུམིཡཱ པདཊྛཱནཾ.

ཏཏྠ ཀཏམོ ལཀྑཎོ ཧཱརོ? ཡོ ཨནུསོཏཾ གཙྪཏི ཏཎྷཱཝསེན. སབྦེསམྤི ཀིལེསཱནཾ ཝསེན གཙྪཏི. ཡོ པཊིསོཏཾ ཝཱཡམཏི. ཏཎྷཱཡ སབྦེསམྤི སོ ཀིལེསཱནཾ ཝཱཡམཏི ¶ པཊིསོཏཾ. ཡོ ¶ ཨཏྟནཱ ཋིཏོ ཀཱཡེནཔི སོ ཋིཏོ ཝཱཙཱཙིཏྟེནཔི སོ ཋིཏོ. ཨཡཾ ལཀྑཎོ ཧཱརོ.

ཏཏྠ ཀཏམོ ཙཏུབྱཱུཧོ? ཨིདྷ སུཏྟེ བྷགཝཏོ ཀོ ཨདྷིཔྤཱཡོ? ཡེ ཨནུསོཏགཱམིནིཡཱ པཊིཔདཱཡ ནཱབྷིརམིསྶནྟི, ཏེ པཊིསོཏཾ ཝཱཡམིསྶནྟཱིཏི ཡཱཝ ཀདཱཙི བྷཱུམིཡཾ, ཨཡཾ ཨདྷིཔྤཱཡོ. ཨཱཝཊྚོཏི ¶ ཨིདྷ སུཏྟེ ཙཏྟཱརི སུཏྟཱནི དེསིཏཱནི.

ཏཏྠ ཀཏམོ ཝིབྷཏྟི ཧཱརོ? ཡོ ཀཱམེ པཊིསེཝཏི པཱཔཉྩ ཀམྨཾ ཀརོཏི. སོ ཨནུསོཏགཱམཱིཏི ན ཨེཀཾསེན སོཏཱཔནྣོཔི ཀཱམེ པཊིསེཝཏི. ཏཾ བྷཱགིཡཉྩ པཱཔཀམྨཾ ཀརོཏི. ཀིཉྩཱཔི སེཀྑོཔི ཀརེཡྻ པཱཔཾ ཡཐཱ སུཏྟེ ནིདྡིཊྛོ ན ཙ སོ ཨནུསོཏགཱམཱི, ཨིདཾ ཝིབྷཛྫབྱཱཀརཎཱིཡཾ. ན ཙ ཀཱམེ པཊིསེཝཏི ན ཙ པཱཔཀམྨཾ ཀརོཏི པཊིསོཏགཱམཱི ན ཙ ཨེཀཾསེན སབྦེ བཱཧིརཀོ ཀཱམེསུ ཝཱིཏརཱགོ ན ཙ ཀཱམེ པཊིསེཝཏི, ཏེན ཙ པཱཔཀམྨཾ ཀརོཏི ཨནུསོཏགཱམཱི པཊིསོཏགཱམཱི, ཨཡཾ ཝིབྷཏྟི.

ཏཏྠ ཀཏམོ པརིཝཏྟནོ ཧཱརོ? ནིདྡིཊྛོ པཊིཔཀྑོ. ཝེཝཙནོཏི ཀཱམེསུ ཝཏྠུཀཱམཱཔི ཀིལེསཀཱམཱཔི རཱུཔསདྡགནྡྷརསཕསྶཔུཏྟདཱརདཱསཀམྨཀརཔོརིསཉྩ པརིགྒཧཱ.

པཉྙཏྟཱིཏི སབྦེ པུཐུཛྫནཱ ཨེཀཏྟཱཡ པཉྙཏྟཱ. ཨནུསོཏགཱམཱིཏི ཀིལེསསམུདཱཙཱརཔཉྙཏྟིཡཱ པཉྙཏྟཱ. ཡེ པན སེཀྑཱ པུགྒལཱ, ཏེ ནིབྦཱནཔཉྙཏྟིཡཱ [ནིཊྛཱནཔཉྙཏྟིཡཱ (ཀ.)] པཉྙཏྟཱ. ཡེ པན ཨནཱགཱམཱི, ཏེ ཨསཾཧཱརིཡ པཉྙཏྟིཡཱ པཉྙཏྟཱ, ཨཡཾ པཉྙཏྟི.

ཨོཏརཎོཏི ཡོ ཨནུསོཏགཱམཱི, སོ དུཀྑཾ. ཡེ ཏསྶ དྷམྨཱ, ཏེ དུཀྑསྶ སམུདཡོ. ཡཾ རཱུཔཾ, ཨཡཾ རཱུཔཀྑནྡྷོ, ཨེཝཾ པཉྩཔི ཁནྡྷཱ པཊིཙྩསམུཔྤཱདོ, ཏེ ཀིལེསཱ སངྑཱརཀྑནྡྷཔརིཡཱཔནྣཱ དྷམྨཱཡཏནཾ དྷམྨདྷཱཏུ ཨིནྡྲིཡེསུ ཙ པཉྙཏྟཱ.

སོདྷནོཏི ཡེནཱརམྦྷེན ཨིདཾ སུཏྟཾ དེསིཏཾ, སོ ཨཱརམྦྷོ སབྦོ སུདྡྷོ.

ཨདྷིཊྛཱནོཏི ¶ ¶ པཊིསོཏགཱམིནཱ སབྦེ སོཏཱཔནྣཱ ཨེཀཏྟེན ཝཱ ནིདྡིཊྛཱ རཱགཱནུསཡཔཊིསོཏགཱམིནོ སེཀྑཱཝ མགྒོ ཙ སེཀྑོ ཙ པུགྒལོ ཋིཏཏྟོཏི.

ཝཱིཏརཱགོ ¶ ཨེཀཏྟཱཡ པཉྙཏྟོ. པཱརངྒཏོཏི སབྦེ ཨརཧནྟོ སབྦེ པཙྩེཀབུདྡྷཱ སམྨཱསམྦུདྡྷཱ ཙ ཨེཀཏྟཱཡ པཉྙཏྟཱ.

པརིཀྑཱརོཏི ཨནུསོཏགཱམིནོ པཱཔམིཏྟཔཙྩཡོ ཀཱམཔརིཡུཊྛཱནཾ ཧེཏུ. པཊིསོཏགཱམིནོ དྭེ ཧེཏཱུ དྭེ པཙྩཡཱ ཙ ཡཱཝ སམྨཱདིཊྛིཡཱ ཨུཔྤཱདཱཡདིཊྛི [ཨུཔཱདཱཡདིཊྛི (པཱི.)], ཏསྶ པཊིལདྡྷམགྒོ ཧེཏུ ཨཱརམྦྷོ པཙྩཡོ ཀཱཡིཀོ ཙེཏསིཀསྶ ཀོཊྛཱསོ ཙ. སམཱརོཔནོཏི ཝིབྷཏྟི ཨིདཾ སུཏྟཾ ནཏྠི སམཱརོཔནཱཡ བྷཱུམི.

༡༡༤. པཉྩཱནིསཾསཱ སོཏཱནུགཏཱནཾ དྷམྨཱནཾ [པསྶ ཨ. ནི. ༤.༡༩༡] ཡཱཝ དིཊྛིཡཱ སུཔྤཊིཝིདྡྷཱནཾ སུཏྟཾ ཝིཏྠཱརེན ཀཱཏབྦཾ. ཡུཉྫཏོ གྷཊེནྟསྶ ཝཱཡམཏོ གིལཱནོ མརཎཀཱལེ དེཝབྷཱུཏོ པཙྩེཀབོདྷིཾ པཱཔུཎཱཏི. སོཏཱནུགཏཱཏི སདྡྷམྨསྶཝནེན ཀཏཾ ཧོཏི. ན ཙ ཨདྷིཔཉྙཱདྷམྨཝིཔསྶནཱཡ ཏསྶ ཙིཏྟཾ ཏསིཏཾ ཧོཏི, ན ཙ ཨནིབྦིདྡྷཏྟཾ, ཨིདཾ ཙ སུཏྟཾ པཉྩནྣཾ པུགྒལཱནཾ དེསིཏཾ, སདྡྷཱནུསཱརིནོ མུདིནྡྲིཡསྶ ཏིཀྑིནྡྲིཡསྶ ཙ དྷམྨཱནུསཱརིནོ ཏིཀྑིནྡྲིཡསྶ མུདིནྡྲིཡསྶ ཙ. ཡོ པན མོཧཙརིཏོ པུགྒལོ ན སཀྐོཏི ཡུཉྫིཏུཾ གྷཊིཏུཾ ཝཱཡམིཏུཾ ཡཐཱབྷཱུཏཾ ཡཐཱསམཱདྷིཀཱ ཝིམུཏྟི ཏཾ ཁཎཾ ཏཾ ལཡཾ ཏཾ མུཧུཏྟཾ ཕལཾ དསྶེཏི. སཱདྷུ པརིཧཱཡཏི པརོ ཏཾ དུཡ྄ཧཏི, ནོ ཏུ སུཁཨཝིཔཱཀིནཱི བྷཝཏི ¶ . ཏསྶ དིཊྛེ ཡེཝ ཙ དྷམྨེ ཨུཔཔཛྫཨཔརཱཔརིཡཝེདནཱིཡཾ. ཏཏྠ ཡོ པུགྒལོ དྷམྨཱནུསཱརཱི ཏསྶ ཡདི སོཏཱནུགཏཱ དྷམྨཱ ཧོནྟི སོ ཡུཉྫནྟོ པཱཔུཎཱཏི. ཡོ དྷམྨཱནུསཱརཱི མུདིནྡྲིཡོ, སོ གིལཱནོ པཱཔུཎཱཏི. ཡོ སདྡྷཱནུསཱརཱི ཏིཀྑིནྡྲིཡོ, སོ མརཎཀཱལསམཡེ པཱཔུཎཱཏི. ཡོ མུདིནྡྲིཡོ, སོ དེཝབྷཱུཏོ པཱཔུཎཱཏི. ཡདཱ དེཝབྷཱུཏོ ན པཱཔུཎཱཏི, ན སོ ཏེནེཝ དྷམྨརཱགེན ཏཱཡ དྷམྨནནྡིཡཱ པཙྩེཀབོདྷིཾ པཱཔུཎཱཏི. ཡོ སོཏཱནུགཏེསུ ཡུཉྫཏི གྷཊེཏི ཝཱཡམཏི, སོ པུབྦཱཔནྣེན ཝིསེསཾ སཉྫཱནཱཏི, སཉྫཱནནྟོ པཱཔུཎཱཏི. སཙེ པན གིལཱནསྶ མནསིཀཱརོ ཧོཏི, ཏཏྠ ཡུཉྫནྟོ པཱཔུཎཱཏི. སཙེ པནསྶ མརཎཀཱལེ སཾཝིགྒོ ཧོཏི, ཏཏྠ ¶ ཡུཉྫནྟོ པཱཔུཎཱཏི. སཙེ པན ན ཀཏྠཙི [ཀཏྠ (པཱི. ཀ.), ཏཏྠ (ཀ.)] སཾཝེགོ ཧོཏི, ཏསྶ དེཝབྷཱུཏསྶ སུཁིནོ དྷམྨབྷཱུཏཱ པཱདཱ ཨེཝཾ ཨཝིལཔཏི. སོ ཨེཝཾ ཛཱནཱཏི ‘‘ཨཡཾ སོ དྷམྨཝིནཡོ ཡཏྠ མཡཾ པུབྦེ མནུསྶབྷཱུཏཱ བྲཧྨཙརིཡཾ ཙརིམྷཱ’’ཏི. ཨཐ དེཝབྷཱུཏོ པཱཔུཎཱཏི. དིབྦེསུ ཝཱ པཉྩསུ ཀཱམགུཎེསུ ཨཛ྄ཛྷོསིཏོ ཧོཏི པམཱདཝིཧཱརཱི, སོ ཏེན ཀུསལམཱུལེན པཙྩེཀབོདྷིཾ པཱཔུཎཱཏི.

ཡཱ པརཏོགྷོསེན ཝཙསཱ སུཔརིཙིཏཱ, ཨཡཾ སུཏམཡཱི པཉྙཱ. ཡེ པན དྷམྨཱ ཧོནྟི མནསཱ ཨནུཔེཀྑིཏཱ, ཨཡཾ ཙིནྟཱམཡཱི པཉྙཱ. ཡཾ དིཊྛིཡཱ སུཔྤཊིཝིདྡྷཱ, ཨཡཾ བྷཱཝནཱམཡཱི པཉྙཱ ¶ . ཡཾ སོཏཱནུགཏཱ ཝཙསཱ པརིཙིཏཱ ཧོནྟི, སོ ཙ དིཊྛེ ཡེཝ དྷམྨེ པརིནིབྦཱཡཱི, ཨཡཾ ཨརཧཾ པུགྒལོ. ཡོ ཨུཔཔཛྫཏི དེཝབྷཱུཏོ པཱཔུཎཱཏི, ཏཏྠ ཙ པརིནིབྦཱཡཏི, ཨཡཾ ཨནཱགཱམཱི. ཡོ ཏེན ཀུསལམཱུལེན པཙྩེཀབོདྷིཾ པཱཔུཎཱཏི, ཨཡཾ པུབྦཡོགསམྦྷཱརསམྦྷཱུཏོ པུགྒལོ.

སོཏཱནུགཏཱ ¶ དྷམྨཱཏི པཋམཾ ཝིམུཏྟཱཡཏནཾ, ཝཙསཱ པརིཙིཏཱཏི དུཏིཡཾ ཏཏིཡཉྩ ཝིམུཏྟཱཡཏནཾ, མནསཱ ཨནུཔེཀྑིཏཱཏི ཙཏུཏྠཾ ཝིམུཏྟཱཡཏནཾ དིཊྛིཡཱ སུཔྤཊིཝིདྡྷཱཏི པཉྩམཾ ཝིམུཏྟཱཡཏནཾ.

སོཏཱནུགཏཱཡ ཝིམུཏྟིཡཱ ཝཙསཱ ཡཱ ཝཱཙཱ སུཔྤཊིཝིདྡྷཱ ཨནུཔུབྦདྷམྨསྶ སོཏེན སུཏྭཱ སཱིལཀྑནྡྷེ པརིཔཱུརེཏི, མནསཱ ཨནུཔེཀྑིཏཱ སམཱདྷིཀྑནྡྷཾ པརིཔཱུརེཏི, དིཊྛིཡཱ སུཔྤཊིཝིདྡྷཱ པཉྙཱཀྑནྡྷཾ པརིཔཱུརེཏི.

སོཏཱནུགཏཱ དྷམྨཱ བཧུསྶུཏཱ ཧོནྟཱིཏི ཝིཏྠཱརེན ཀཱཏབྦཾ. ཨིདཾ པཋམཾ སདྡྷཱཔདཱནཾ མནསཱ ཨནུཔེཀྑིཏཱཏི པཊིསལླཱནབཧུལོ ཝིཧརཏི, ཝིཏྠཱརེན ཀཱཏབྦཾ. ཨིདཾ དུཏིཡཾ སདྡྷཱཔདཱནཾ དིཊྛིཡཱ སུཔྤཊིཝིདྡྷཱཏི ཨནཱསཝཱ ཙེཏོཝིམུཏྟིཡཱ ནཱཔརཾ ཨིཏྠཏྟཱཡཱཏི པཛཱནཱཏཱིཏི. ཨིདཾ ཏཏིཡཾ སདྡྷཱཔདཱནཾ.

སོཏཱནུགཏཱ དྷམྨཱཏི སེཀྑཾ སཏྠཱ དསྶེཏི. མནསཱ ཨནུཔེཀྑིཏཱཏི ཨརཧཏྟཾ སཏྠཱ དསྶེཏི. དིཊྛིཡཱ སུཔྤཊིཝིདྡྷཱཏི ཏཐཱགཏཾ ཨརཧནྟཾ སམྨཱསམྦུདྡྷཾ སཏྠཱ དསྶེཏི.

སོཏཱནུགཏཱ ¶ དྷམྨཱཏི ཀཱམཱནཾ ནིསྶརཎཾ དསྶེཏི. མནསཱ ཨནུཔེཀྑིཏཱཏི རཱུཔདྷཱཏུཡཱ ནིསྶརཎཾ དསྶེཏི. དིཊྛིཡཱ སུཔྤཊིཝིདྡྷཱཏི ཏེདྷཱཏུཀཱནཾ ནིསྶརཎཾ དསྶེཏི. ཨཡཾ སུཏྟཏྠོ.

༡༡༥. ཏཏྠ ཀཏམོ དེསནཱཧཱརོ? ཨིམམྷི སུཏྟེ ཏཡོ ཨེསནཱ དེསིཏཱ སོཏཱནུགཏེཧི དྷམྨེཧི ཝཙསཱ པརིཙིཏེཧི ཀཱམེསནཱཡ སམཐམགྒོ. དིཊྛིཡཱ སུཔྤཊིཝིདྡྷེཧི བྲཧྨཙརིཡེསནཱཡ སམཐམགྒོ.

ཝིཙཡོཏི ཡཐཱ སུཏྟཾ མནསིཀརོནྟོ ཝིཙིནནྟོ སུཏམཡིཔཉྙཾ པཊིལབྷཏི. ཡཐཱ ཙ སོ ¶ མནསིཀརོཏཱིཏི ཡཐཱ སུཏདྷམྨཱ ཏདཱ ཙིནྟཱམཡིཔཉྙཾ པཊིལབྷཏི. ཡཐཱ དིཊྛེཝ ¶ དྷམྨེ མནསིཀརོཏི ཏདཱ བྷཱཝནཱམཡིཔཉྙཾ པཊིལབྷཏི. ཨཡཾ ཝིཙཡོ.

སུཏེན སུཏམཡིཔཉྙཾ པཊིལབྷཏི. ཙིནྟཱཡ ཙིནྟཱམཡིཔཉྙཾ བྷཱཝནཱཡ བྷཱཝནཱམཡིཔཉྙཾ པཊིལབྷཏི. ཨཏྠི ཨེསཱ ཡུཏྟི.

པདཊྛཱནོཏི སོཏཱནུགཏཱ དྷམྨཱཏི དྷམྨསྶཝནསྶ པདཊྛཱནཾ. ཝཙསཱ པརིཙིཏཱཏི ཡུཉྫནཱཡ པདཊྛཱནཾ. མནསཱ ཨནུཔེཀྑིཏཱཏི དྷམྨཱནུདྷམྨཱཡ ཝིཔསྶནཱཡ པདཊྛཱནཾ. དིཊྛིཡཱ ཨནུཔེཀྑིཏཱཏི པཉྙཱཡཔི ཨནུཔེཀྑིཏཱ དིཊྛིཡཱཔི ཨནུཔེཀྑིཏཱ.

ཙཏུབྱཱུཧོཏི ཨིམམྷི སུཏྟེ བྷགཝཏོ ཀོ ཨདྷིཔྤཱཡོ? ཡེ ཨིམཱཧི དྭཱིཧི པཉྙཱཧི སམནྣཱགཏཱ ཏེཧི….

ས ནིབྦུཏོཏི མགྒཕལཾ ཨནུཔཱདིསེསཉྩ ནིབྦཱནདྷཱཏུཾ མནྟེཏི, དཱནེན ཨོལཱ༹རིཀཱནཾ ཀིལེསཱནཾ པཧཱནཾ མནྟེཏི. སཱིལེན མཛ྄ཛྷིམཱནཾ, པཉྙཱཡ སུཁུམཀིལེསཱནཾ མནྟེཏི, རཱགདོསམོཧཀྑཡཱ ས ནིབྦུཏོཏི ཀཏཱ ཙ བྷཱུམི.

དདཏོ པུཉྙཾ པཝཌྜྷཏི, སཾཡམཏོ ཝེརཾ ན ཙཱིཡཏི;

ཀུསལོ ཙ ཛཧཱཏི པཱཔཀནྟི མགྒོ ཝུཏྟོ;

རཱགདོསམོཧཀྑཡཱ ས ནིབྦུཏོཏི མགྒཕལམཱཧ.

དདཏོ ¶ པུཉྙཾ པཝཌྜྷཏི, སཾཡམཏོཏི ཏཱིཧི པདེཧི ལོཀིཀཾ ཀུསལམཱུལཾ ཝུཏྟཾ. རཱགདོསམོཧཀྑཡཱ ས ནིབྦུཏོཏི ལོཀུཏྟརཾ ཀུསལམཱུལཾ ཝུཏྟཾ.

དདཏོ པུཉྙཾ པཝཌྜྷཏི, སཾཡམཏོ ཝེརཾ ན ཙཱིཡཏཱིཏི པུཐུཛྫནབྷཱུམིཾ མནྟེཏི. ཀུསལོ ཙ ཛཧཱཏི པཱཔཀནྟི སེཀྑབྷཱུམིཾ མནྟེཏི. རཱགདོསམོཧཀྑཡཱ ས ནིབྦུཏོཏི ཨསེཀྑབྷཱུམི ཝུཏྟཱ.

དདཏོ ¶ པུཉྙཾ པཝཌྜྷཏི, སཾཡམཏོ ཝེརཾ ན ཙཱིཡཏཱིཏི མགྒནིཡཱ པཊིཔདཱ ཝུཏྟཱ. ཀུསལོ ¶ ཙ ཛཧཱཏི པཱཔཀནྟི སེཀྑཝིམུཏྟི. རཱགདོསམོཧཀྑཡཱ ས ནིབྦུཏོཏི ཨསེཀྑཝིམུཏྟི.

དདཏོ པུཉྙཾ པཝཌྜྷཏི, སཾཡམཏོ ཝེརཾ ན ཙཱིཡཏཱིཏི དཱནཀཐཾ སཱིལཀཐཾ མགྒཀཐཾ ལོཀིཀཱནཾ དྷམྨཱནཾ དེསནམཱཧ. ཀུསལོ ཙ ཛཧཱཏི པཱཔཀནྟི ལོཀེ ཨཱདཱིནཝཱནུཔསྶནཱ. རཱགདོསམོཧཀྑཡཱ ས ནིབྦུཏོཏི སཱམུཀྐཾསིཀཱཡ དྷམྨདེསནཱཡཔི པཊིཝིདྡྷཱ.

དདཏོ པུཉྙཾ པཝཌྜྷཏཱིཏི པཱཎཱནཾ ཨབྷཡདཱནེན པཱཎཱཏིཔཱཏཱ ཝེརམཎིསཏྟཱནཾ ཨབྷཡཾ དེཏི. ཨེཝཾ སབྦཱནི སིཀྑཱཔདཱནི ཀཱཏབྦཱནི. སཾཡམཏོ ཝེརཾ ན ཙཱིཡཏཱིཏི སཱིལེ པཏིཊྛཱཡ ཙིཏྟཾ སཾཡམེཏི, ཏསྶ སཾཡམཏོ པཱརིཔཱུརིཾ གཙྪཏི. རཱགདོསམོཧཀྑཡཱ ས ནིབྦུཏོཏི དྭེ ཝིམུཏྟིཡོ. ཨཡཾ སུཏྟནིདྡེསོ.

༡༡༦. ཏཏྠ ཀཏམཱ དེསནཱ? ཨིམམྷི སུཏྟེ ཀིཾ དེསིཏཾ? དྭེ སུགཏིཡོ དེཝཱ ཙ མནུསྶཱ ཙ, དིབྦཱ ཙ པཉྩཀཱམགུཎཱ, མཱནུསྶཀཱ ཙ. དྭཱིཧི པདེཧི ནིདྡེསོ. དདཏོ པུཉྙཾ པཝཌྜྷཏི, སཾཡམཏོ ཝེརཾ ན ཙཱིཡཏི, ཀུསལོ ཙ ཛཧཱཏི པཱཔཀནྟི མགྒོ ཝུཏྟོ. རཱགདོསམོཧཀྑཡཱ ས ནིབྦུཏོཏི དྭེ ནིབྦཱནདྷཱཏུཡོ དེསིཏཱ སོཔཱདིསེསཱ ཙ ཨནུཔཱདིསེསཱ ཙ. ཨཡཾ དེསནཱ.

ཝིཙཡོཏི དདཏོ པུཉྙཾ པཝཌྜྷཏཱིཏི ཨིམིནཱ པཋམེན པདེན དཱནམཡིཀཔུཉྙཀིརིཡཝཏྠུ ཝུཏྟཾ. ཏེནསྶ ཨཱནནྟརིཡཱནཾ ཀུསལཱནཾ དྷམྨཱནཾ. དུཏིཡེན པདེན… ཡནྟི, ནིཡྻཱནིཀཾ སཱསནནྟི, ཨཡཾ ཨདྷིཔྤཱཡོ. ཨསྶཝནེན ¶ ཙ ཨམནསིཀཱརེན ཙ ཨཔྤཊིཝེདྷེན ཙ སཀྐཱཡསམུདཡགཱམིནཱི པཊིཔདཱ ཝུཏྟཱ. སཝནེན ¶ ཙ མནསིཀཱརེན ཙ པཊིཝེདྷེན ཙ སཀྐཱཡནིརོདྷགཱམིནཱི པཊིཔདཱ ཝུཏྟཱ. ཨཡཾ ཨཱཝཊྚོ.

ཝིབྷཏྟཱིཏི ཨེཀཾསབྱཱཀརཎཱིཡོ. ནཏྠི ཏཏྠ ཝིབྷཏྟིཡཱ བྷཱུམི. པརིཝཏྟནཱཏི ཡེ པཉྩཱནིསཾསཱ, ཏེ པཉྩཱདིནཱ པཊིཔཀྑེན ཏེནེཝ དིཊྛེཝ དྷམྨེ པཱཔུཎཱཏི, ཏཾ ཨུཔཔཛྫམཱནཱ ཨཔརོ པརིཡཱཡོ.

ཝེཝཙནནྟི སོཏཱནུགཏཱ དྷམྨཱཏི ཡཾ སུཏྟཾ དིཊྛམྤི པཉྙིནྡྲིཡཾ ཝིཉྙཏྟམྤི དིཊྛིཡཱ སུཔྤཊིཝིདྡྷམྤི ཝིབྷཱཝིཏམྤི.

པཉྙཏྟཱིཏི ¶ སོཏཱནུགཏཱདྷམྨཱཏི དེསནཱ ཨཝིཛྫཱཔཉྙཏྟིཡཱ པཉྙཏྟཾ. མནསིཀཱརོ པཱམོཛྫཔཉྙཏྟིཡཱ པཉྙཏྟོ, དིཊྛདྷམྨཱཔི ཨཱནིསཾསཔཉྙཏྟིཡཱ པཉྙཏྟཱ.

ཨོཏརཎོཏི ཏིསྶོ པཉྙཱ ཝཙསཱ པརིཙིཏེསུ སུཏམཡཱིཔཉྙཱ མནསཱ ཨནུཔེཀྑིཏེསུ ཙིནྟཱམཡཱིཔཉྙཱ དིཊྛིཡཱ སུཔྤཊིཝིདྡྷཱསུ བྷཱཝནཱམཡཱིཔཉྙཱ. ཨིམཱནི ཨརིཡསཙྩཱནི ཨིནྡྲིཡཱནི ཝིཛྫུཔྤཱདཱ ཨཝིཛྫཱནིརོདྷོ པཊིཙྩསམུཔྤཱདོ ཨིནྡྲིཡེསུ ཏཱིཎི ཨིནྡྲིཡཱནི, ཨཱཡཏནེསུ དྷམྨཱཡཏནཔརིཡཱཔནྣཱ དྷཱཏཱུསུ དྷམྨདྷཱཏུཔརིཡཱཔནྣཱཏི. སོདྷནོཏི ཡོ ཨཱརམྦྷོ སུཏྟསྶ པཝེསོ ནིཡུཏྟོ.

ཨདྷིཊྛཱནོཏི པཉྩཱནིསཾསཱཏི ཝེམཏྟཏཱཡ པཉྙཏྟཱ ཨཱནིསཾསཱ སོཏཱ ཨནུགཏཱཏི ཝེམཏྟཏཱཡ ཨརིཡཝོཧཱརོ པཉྙཏྟོ, དྷམྨེ ཙ སཝནནྟི ཨེཀཏྟཏཱཡ པཉྙཏྟཾ.

པརིཀྑཱརོཏི དྷམྨསྶཝནསྶ པཡིརུཔཱསནཱ པཙྩཡོ, སདྡྷཱ ཧེཏུ. མནསཱ ཨནུཔེཀྑིཏཱཏི ཨཏྠཔྤཊིསཾཝེདིཏཱ པཙྩཡོ, དྷམྨཔྤཊིསཾཝེདིཏཱ ཧེཏུ, དིཊྛིཡཱ སུཔྤཊིཝིདྡྷཱཏི ¶ སདྡྷམྨསྶཝནཉྩ མནསིཀཱརོ ཙ པཙྩཡོ, སུཏམཡཱི ཙིནྟཱམཡཱི པཉྙཱ ཧེཏུ. སམཱརོཔནོཏི ཝིབྷཏྟཾ སུཏྟཾ ཨཔརོ པརིཡཱཡོ ནིབྦཏྟི བལེ ནཏྠི. ཏཏྠ སམཱརོཔནཱཡ བྷཱུམི.

༡༡༧. ཏཏྠ ཀཏམཾ ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟཾ? དདཏོ པུཉྙཾ པཝཌྜྷཏཱིཏི གཱཐཱ. དདཏོཏི དཱནམཡིཀཔུཉྙཀིརིཡཝཏྠུ ཝུཏྟཾ. སཾཡམཏོ ཝེརཾ ན ཙཱིཡཏཱིཏི སཱིལམཡིཀཔུཉྙཀིརིཡཝཏྠུ ཝུཏྟཾ. ཀུསལོ ཙ ཛཧཱཏི པཱཔཀནྟི ལོབྷསྶ ཙ མོཧསྶ ཙ བྱཱཔཱདསྶ ཙ པཧཱནམཱཧ. རཱགདོསམོཧཀྑཡཱ ས ནིབྦུཏོཏི ལོབྷསྶ ཙ མོཧསྶ ཙ བྱཱཔཱདསྶ ¶ ཙ ཚནྡརཱགཝིནཡམཱཧཱཏི. དདཏོ པུཉྙཾ པཝཌྜྷཏཱིཏི གཱཐཱ ཨལོབྷོ ཀུསལམཱུལཾ བྷཝཏི. སཾཡམཏོ ཝེརཾ ན ཙཱིཡཏཱིཏི ཨདོསོ ཀུསལམཱུལཾ བྷཝཏི. སཾཡམཏོ ཝེརཾ ན ཙཱིཡཏཱིཏི ཨཝེརཱ ཨསཔཏྟཱ ཨབྱཱཔཱདཏཱཡ སདཱ. ཀུསལོ ཙ ཛཧཱཏི པཱཔཀནྟི ཉཱཎུཔྤཱདཱ ཨཉྙཱཎནིརོདྷོ. ཙཏུཏྠཔདེན རཱགདོསམོཧཀྑཡེན རཱགཝིརཱགཱ ཙེཏོཝིམུཏྟིམོཧཀྑཡེན ཨཝིཛྫཱཝིརཱགཱ པཉྙཱཝིམུཏྟི, ཨཡཾ ཝིཙཡོ.

ཡུཏྟཱིཏི དཱནེ ཋིཏོ ཨུབྷཡཾ ཧི པརིཔཱུརེཏི. མཙྪརིཡཉྩ པཛཧཏི. པུཉྙཉྩ པཝཌྜྷཏི. ཨཏྠི ཨེསཱ ཡུཏྟི.

པདཊྛཱནནྟི ¶ དདཏོ པུཉྙཾ པཝཌྜྷཏཱིཏི ཙཱགཱདྷིཊྛཱནསྶ པདཊྛཱནཾ. སཾཡམཏོ ཝེརཾ ན ཙཱིཡཏཱིཏི པཉྙཱདྷིཊྛཱནསྶ པདཊྛཱནཾ ཀུསལོ ཙ ཛཧཱཏི པཱཔཀནྟི སཙྩཱདྷིཊྛཱནསྶ པདཊྛཱནཾ. རཱགདོསམོཧཀྑཡཱ ས ནིབྦུཏོཏི ཨུཔསམཱདྷིཊྛཱནསྶ པདཊྛཱནཾ. ཨཡཾ པདཊྛཱནོ.

ཏཏྠ ¶ ཀཏམོ ལཀྑཎོ? དདཏོ པུཉྙཾ པཝཌྜྷཏི སཾཡམཏོ ཝེརཾ ན ཙཱིཡཏི. དདཏོཔི ཝེརཾ ན ཀརིཡཱཏི ཀུསལོ ཙ ཛཧཱཏི པཱཔཀཾ རཱགདོསམོཧཀྑཡཱ ས ནིབྦུཏོ རཱུཔཀྑཡཱཔི ཝེདནཀྑཡཱཔི, ཡེན རཱུཔེན དིཊྛཾ, ཏེན ཏཐཱགཏོ པཉྙཔེནྟོ པཉྙཔེཡྻ རཱུཔསྶ ཁཡཱ ཝིརཱགནིརོདྷཱཏི ཨེཝཾ པཉྩཀྑནྡྷཱ.

ཙཏུབྱཱུཧོ ཨིདྷ བྷགཝཏོ ཀོ ཨདྷིཔྤཱཡོ? ཡེ མཧཱབྷོགཱནཾ པཏྠཡིསྶནྟི? ཏེ དཱནཾ དསྶནྟི པརིསྶཡཔཧཱནཱཡ, ཡེ ཨཝེརཱབྷིཚནྡཀཱ, ཏེ པཉྩ ཝེརཱནི པཛཧིསྶནྟི, ཡེ ཀུསལཱབྷིཚནྡཀཱ, ཏེ ཨཊྛངྒིཀཾ མགྒཾ བྷཱཝེསྶནྟི ཨཊྛནྣཾ མིཙྪཏྟཱནཾ པཧཱནཱཡ. ཡེ ནིབྦཱཡིཏུཀཱམཱ, ཏེ རཱགདོསམོཧཾ པཛཧིསྶནྟཱིཏི ཨཡཾ བྷགཝཏོ ཨདྷིཔྤཱཡོ.

ཨཱཝཊྚོཏི ཡཉྩ ཨདདཏོ མཙྪརིཡཾ ཡཉྩ ཨསཾཡམཏོ ཝེརཾ ཡཉྩ ཨཀུསལསྶ པཱཔསྶ ཨཔྤཧཱནཾ, ཨཡཾ དུཀྑནིདྡེསོ ན སམུདཡོ. ཨལོབྷེན ཙ ཨདོསེན ཙ ཨམོཧེན ཙ ཀུསལེན ཨིམཱནི ཏཱིཎི ཀུསལམཱུལཱནི. ཏེསཾ པཙྩཡོ ཨཊྛ སམྨཏྟཱནི, ཨཡཾ མགྒོ. ཏེསཾ རཱགདོསམོཧཱནཾ ཁཡཱ, ཨཡཾ ནིརོདྷོ.

ཝིབྷཏྟཱིཏི དདཏོ པུཉྙཾ པཝཌྜྷཏཱིཏི ན ཨེཀཾསེན ཡོ རཱཛདཎྜབྷཡེན དེཏི, ཡོ ཙ ཨཀཔྤིཡསྶ པརིབྷོགེན སཱིལཝནྟེསུ དེཏི, ན ཏསྶ པུཉྙཾ ¶ པཝཌྜྷཏཱིཏི སོ ཙེཏཾ དཱནཾ ཨཀུསལེན དེཏི, དཎྜདཱནཾ སཏྠདཱནཾ ཨཔུཉྙམཡཾ པཝཌྜྷཏི, ན པུཉྙཾ. སཾཡམཏོ ཝེརཾ ན ཙཱིཡཏཱིཏི ན ཨེཀཾསེན ཀིཾ ཀཱརཎཾ ཡཉྩ ཡོ པདཾ དིཊྛདྷམྨིཀཾ པསྶཏི ཡདི མམ རཱཛཱནོ གཧེཏྭཱ ཧཏྠཾ ཝཱ ཚིནྡེཡྻ…པེ… ན ཏེན སཾཡམེན ཝེརཾ ན ཀརོཏི. ཡོ ཏུ ཨེཝཾ སམཱདིཡཏི པཱཎཱཏིཔཱཏསྶ ¶ པཱཔཀོ ཝིཔཱཀོཏི, དིཊྛེ ཡེཝ དྷམྨེ ཨབྷིསམྤརཱཡེ ཙ ཨེཝཾ སབྦསྶ ཨཀུསལསྶ ཧེཏུཏོ ཨཱརཏི. ཨིམིནཱ སཾཡམེན ཝེརཾ ན ཙཱིཡཏི.

པརིཝཏྟནཱཏི དདཏོ པུཉྙཾ པཝཌྜྷཏཱིཏི ཨདདཏོ པུཉྙཾ ན པཝཌྜྷཏི. ཡཾ དཱནམཡཾ, ཏཾ སཾཡམཏོ ཝེརཾ ན ཙཱིཡཏི, ཨསཾཡམཏོ ཝེརཾ ཀརཱིཡཏི. ཀུསལོ ཙ ཛཧཱཏི པཱཔཀཾ ཨཀུསལོ ན ཛཧཱཏི. རཱགདོསམོཧཀྑཡཱ སནིབྦུཏོཏི དཱུཏཾ པེསེཏྭཱ པཎཱིཏཾ པེསེཏྭཱཔི ན པཀྐོསཱམི, སོ ¶ སཡམེཝ པན མཧཱབྷིཀྑུསངྒྷཔརིཝཱརོ ཨམྷཱཀཾ ཝསནཊྛཱནཾ སམྤཏྟོ ཨམྷེཧི ཙ སནྠཱགཱརསཱལཱ [སནྡྷཱགཱརསཱལཱ (ཀ.)] ཀཱརིཏཱ, ཨེཏྠ མཡཾ དསབལཾ ཨཱནེཏྭཱ མངྒལཾ བྷཎཱཔེམཱཏི ཙིནྟེཏྭཱ ཨུཔསངྐམིཾསུ. ཡེན སནྠཱགཱརཾ ཏེནུཔསངྐམིཾསཱུཏི ཏཾ དིཝསཾ ཀིར སནྠཱགཱརེ ཙིཏྟཀམྨཾ ནིཊྛཱཔེཏྭཱ ཨཊྚཀཱ མུཏྟམཏྟཱ ཧོནྟི. བུདྡྷཱ ནཱམ ཨརཉྙཛ྄ཛྷཱསཡཱ ཨརཉྙཱརཱམཱ ཨནྟོགཱམེ ཝསེཡྻུཾ ཝཱ ནོ ཝཱཏི ཏསྨཱ བྷགཝཏོ མནཾ ཛཱནིཏྭཱཝ པཊིཛགྒིསྶཱམཱཏི ཙིནྟེཏྭཱ ཏེ བྷགཝནྟཾ ཨུཔསངྐམིཾསུ. ཨིདཱནི པན མནཾ ལབྷིཏྭཱ པཊིཛགྒིཏུཀཱམཱ ཡེན སནྠཱགཱརཾ, ཏེནུཔསངྐམིཾསུ. སབྦསནྠརིནྟི ཡཐཱ སབྦཾ སནྠཏཾ ཧོཏི ཨེཝཾ ཡེན བྷགཝཱ ཏེནུཔསངྐམིཾསཱུཏི. ཨེཏྠ པན ཏེ མལླརཱཛཱནོ སནྠཱགཱརཾ པཊིཛགྒིཏྭཱ ནགརཝཱིཐིཡོཔི སམྨཛྫཱཔེཏྭཱ དྷཛེ ཨུསྶཱཔེཏྭཱ སུཝཎྞགྷཊིཀདལིཡོ ཙ ཋཔཱཔེཏྭཱ སཀལནགརཾ དཱིཔམཱལཱཧི ཝིཔྤཀིཎྞཏཱརཀཾ ཝིཡ ཀཏྭཱ ཁཱིརཔཀེ [ཁཱིརུཔཀེ (པཱི. ཀ.)] དཱརཀེ ཁཱིརཾ པཱཡེཐ, དཧརེ ཀུམཱརེ ལཧུཾ ལཧུཾ བྷོཛཱཔེཏྭཱ སཡཱཔེཐ, ཨུཙྩཱསདྡཾ མཱཀརི, ཨཛྫ ཨེཀརཏྟིཾ སཏྠཱ ཨནྟོགཱམེཝ ཝསིསྶཏི, བུདྡྷཱ ནཱམ ཨཔྤསདྡཀཱམཱ ཧོནྟཱིཏི བྷེརིཾ ཙརཱཔེཏྭཱ སཡཾ དཎྜཀདཱིཔིཀཱ ཨཱདཱཡ ཡེན བྷགཝཱ ཏེནུཔསངྐམིཾསུ. བྷགཝནྟཾ ཡེཝ པུརཀྑཏྭཱཏི བྷགཝནྟཾ པུརཏོ ¶ ཀཏྭཱ, ཏཏྠ བྷགཝཱ བྷིཀྑཱུནཉྩེཝ ཨུཔཱསཀཱནཉྩ མཛ྄ཛྷེ ནིསིནྣོ ཨཏིཝིཡ ཝིརོཙཏི. སམནྟཔཱསཱདིཀོ སུཝཎྞཝཎྞོ ཨབྷིརཱུཔོ དསྶནཱིཡོ པུརཏྠིམཀཱཡཏོ ¶ སུཝཎྞཝཎྞཱ རསྨི ཨུཊྛཧིཏྭཱ གགནཏལེ ཨསཱིཏིཧཏྠཾ ཋཱནཾ གཎྷཱཏི. པཙྪིམཀཱཡཏོ དཀྑིཎཧཏྠཏོ ཝཱམཧཏྠཏོ སུཝཎྞཝཎྞཱ ཧེཊྛཱ པཱདཏལེཧི པཝཱལ༹ཝཎྞརསྨི ཨུཊྛཧིཏྭཱ གྷནཔཐཝིཡཾ ཨསཱིཏིཧཏྠཾ ཋཱནཾ གཎྷཱཏི, ཨེཝཾ སམནྟཱ ཨསཱིཏིཧཏྠམཏྟཾ ཋཱནཾ ཚབྦཎྞབུདྡྷརསྨིཡོ ཝིཛྫོཏམཱནཱ ཝིཏཎྜམཱནཱ ཝིདྷཱཝནྟི, སབྦེ དིསཱབྷཱགཱ སུཝཎྞཙམྤཀཔུཔྥེཧི ཝིཀིརིཡམཱནཱ ཝིཡ སུཝཎྞགྷཊཏོ ནིཀྑནྟསུཝཎྞརསདྷཱརཱཧི སིཉྩམཱནཱ ཝིཡ པསཱརིཏསུཝཎྞཔཊཔརིཀྑིཏྟཱ ཝྺིཡ ཝེརམྦྷཝཱཏསམུཊྛིཏཀིཾསུཀཀིཾསུཀཱརཀཎིཀཱརཔུཔྥཙུཎྞསམོཀིཎྞཱ ཝིཡ ཝིཔྤཀསནྟཾ ཨསཱིཏིཨནུབྱཉྫནབྱཱམཔྤབྷཱ དྭཏྟིཾསཝརལཀྑཎསམུཛྫལཾ སརཱིརཾ སམུགྒཏཏཱརཀཾ ཝིཡ གགནཏལཾ ཝིཀསིཏམིཝ པདུམཝནཾ སབྦཕཱལིཕུལློ ཝིཡ ཡོཛནསཏིཀོ པཱརིཙྪཏྟཀོ པཊིཔཱཊིཡཱ ཋཔིཏཱནཾ དྭཏྟིཾསཙནྡཱནཾ དྭཏྟིཾསསཱུརིཡཱནཾ དྭཏྟིཾསཙཀྐཝཏྟཱིནཾ དྭཏྟིཾསདེཝརཱཛཱནཾ དྭཏྟིཾསམཧཱབྲཧྨཱནཾ ནིབྦུཏོ ཨསེཀྑསྶ ནཏྠི ནིབྦུཏི.

ཝེཝཙནནྟི དདཏོ པུཉྙཾ པཝཌྜྷཏི, ཨནུམོདཏོཔི པུཉྙཾ པཝཌྜྷཏི. ཙིཏྟསྶ སམཱདཧཏོཔི ཝེཡྻཱཝཙྩཀིརིཡཱཡཔི པུཉྙཾ པཝཌྜྷཏཱིཏི.

པཉྙཏྟཱིཏི དདཏོ པུཉྙཾ པཝཌྜྷཏི, ཨལོབྷསྶ པཊིནིསྶཡགྷཱཏཔཉྙཏྟིཡཱ པཉྙཏྟཾ. སཾཡམཏོ ¶ ཝེརཾ ན ཙཱིཡཏཱིཏི ཨདོསསྶ པཊིནིསྶཡགྷཱཏཔཉྙཏྟིཡཱ པཉྙཏྟཾ ཀུསལོ ཙ ཛཧཱཏི པཱཔཀནྟི ཨམོཧསྶ པཊིནིསྶཡགྷཱཏཔཉྙཏྟིཡཱ པཉྙཏྟཾ.

ཨོཏརཎོཏི ¶ པཉྩསུ ཨིནྡྲིཡེསུ དདཏོ པུཉྙཾ པཝཌྜྷཏི, སཾཡམཏོ ཝེརཾ ན ཙཱིཡཏི སཾཡམེན སཱིལཀྑནྡྷོ. ཨོཏིཎྞོ ཚསུ ཨིནྡྲིཡེསུ སཾཝརོ, ཨཡཾ སམཱདྷིཀྑནྡྷོ, ཡཾ ཀུསལོ ཙ ཛཧཱཏི པཱཔཀཾ, ཨཡཾ པཉྙཱཀྑནྡྷོ, རཱགདོསམོཧཀྑཡཱ ས ནིབྦུཏོཏི ཝིམུཏྟིཀྑནྡྷོ. དྷཱཏཱུསུ དྷམྨདྷཱཏུ, ཨཱཡཏནེསུ མནཱཡཏནཾ.

སོདྷནོཏི ཡེནཱརམྦྷེན ཨིདཾ སུཏྟཾ དེསིཏཾ སོ ཨཱརམྦྷོ སུདྡྷོ.

ཨདྷིཊྛཱནོ དཱནནྟི ཨེཀཏྟཏཱཡ པཉྙཏྟཾ. ཙཱགོ པརིཙྩཱགོ དྷམྨདཱནཾ ཨཱམིསདཱནཾ, ཨཊྛ དཱནཱནི ཝིཏྠཱརེན ཀཱཏབྦཱནི, ཨཡཾ ཝེམཏྟཏཱ. ན ཙ དདཏོ ¶ ཨེཀཏྟཔཉྙཏྟིཡཱ པཉྙཏྟཾ. ཁནྟཱི ཨནཝཛྫནྟི པཉྙཏྟིཡཱ པཉྙཏྟཾ. རཱགདོསམོཧཀྑཡཱ ས ནིབྦུཏོཏི རོདྷཝཱིརིཡཔཉྙཏྟིཡཱ [ཡོདྷ ཝཱིརིཡཔཉྙཏྟིཡཱ (པཱི. ཀ.)] པཉྙཏྟཱ.

པརིཀྑཱརོཏི དཱནསྶ པཱམོཛྫཾ པཙྩཡོ, ཨལོབྷོ ཧེཏུ. སཾཡམཏོ ཡོནིསོ མནསིཀཱརོ ཧེཏུ, པརིཙྩཱགོ པཙྩཡོ. ཀུསལོ ཙ ཛཧཱཏི པཱཔཀནྟི ཡཐཱབྷཱུཏདསྶནཾ པཙྩཡོ, ཉཱཎཔྤཊིལཱབྷོ ཧེཏུ. རཱགདོསམོཧཀྑཡཱ ས ནིབྦུཏོཏི པརཏོ ཙ གྷོསོ ཨཛ྄ཛྷཏྟཉྩ ཡོནིསོ མནསིཀཱརོ མགྒོ ཙ ཧེཏུ ཙ པཙྩཡོ ཙ.

སམཱརོཔནོཏི དདཏོ པུཉྙཾ པཝཌྜྷཏཱིཏི གཱཐཱ ཏསྶ སཱིལམྤི ཝཌྜྷཏི. སཾཡམོཔི ཝཌྜྷཏི. སཾཡམཏོ ཝེརཾ ན ཙཱིཡཏཱིཏི. ཨཉྙེཔི ཀིལེསཱ ན ཙཱིཡནྟི ཡེཔིསྶ ཏཔྤཙྩཡཱ ཨུཔྤཛྫེཡྻུཾ ཨཱསཝཱ ཝིགྷཱཏཱ, ཏེཔིསྶ ན ཨུཔྤཛྫནྟི. རཱགདོསམོཧཀྑཡཱ ས ནིབྦུཏོཏི རཱགདོསསྶཱཔི ཁཡཱ རཱགཱནུསཡསྶཔི ཁཡཱ དོསསྶ མོཧསྶཱཔི ས ནིབྦུཏོཏི སོཔཱདིསེསཱ ནིབྦཱནདྷཱཏུ ཨནུཔཱདིསེསཱཔི. ཨཡཾ སམཱརོཔནོ.

ཐེརསྶ མཧཱཀཙྩཱཡནསྶ པེཊཀོཔདེསེ

༡༡༨. པུབྦཱ ¶ ¶ ཀོཊི ན པཉྙཱཡཏི ཨཝིཛྫཱཡ ཙ བྷཝཏཎྷཱཡ ཙ. ཏཏྠ ཨཝིཛྫཱནཱིཝརཎཱནཾ ཏཎྷཱསཾཡོཛནཱནཾ སཏྟཱནཾ པུབྦཀོཊི ན པཉྙཱཡཏི. ཏཏྠ ཡེ སཏྟཱ ཏཎྷཱསཾཡོཛནཱ, ཏེ ཨཛ྄ཛྷོསཱནབཧུལཱ མནྡཝིཔསྶཀཱ. ཡེ པན ཨུསྶནྣདིཊྛིཀཱ སཏྟཱ, ཏེ ཝིཔསྶནཱབཧུལཱ མནྡཛ྄ཛྷོསཱནཱ.

ཏཏྠ ཏཎྷཱཙརིཏཱ སཏྟཱ སཏྟསཉྙཱབྷིནིཝིཊྛཱ ཨནུཔྤཱདཝཡདསྶིནོ. ཏེ པཉྩསུ ཁནྡྷེསུ ཨཏྟཱནཾ སམནུཔསྶནྟི ‘‘རཱུཔཝནྟཾ ཝཱ ཨཏྟཱནཾ, ཨཏྟནི ཝཱ རཱུཔཾ, རཱུཔསྨིཾ ཝཱ ཨཏྟཱན’’ནྟི. ཨེཝཾ པཉྩཀྑནྡྷཱ. ཨཉྙེཧི ཁནྡྷེཧི ཨཏྟཱནཾ སམནུཔསྶནྟི ཏསྶ ཨུསྶནྣདིཊྛིཀཱ སཏྟཱ ཝིཔསྶམཱནཱ ཁནྡྷེ ཨུཛུཾ ཨཏྟཏོ སམནུཔསྶནྟི. ཏེ རཱུཔཾ ཨཏྟཀོ སམནུཔསྶནྟི. ཡཾ རཱུཔཾ, སོ ཨཏྟཱ. ཡོ ཨཧཾ, ཏཾ རཱུཔཾ. སོ རཱུཔཝིནཱསཾ པསྶཏི, ཨཡཾ ཨུཙྪེདཝཱདཱི ¶ . ཨིཏི པཉྩནྣཾ ཁནྡྷཱནཾ པཋམཱབྷིནིཔཱཏཱ སཀྐཱཡདིཊྛིཡོ པཉྩ ཨུཙྪེདཾ བྷཛནྟི ‘‘ཏཾ ཛཱིཝཾ ཏཾ སརཱིར’’ནྟི. ཨེཀམེཀམྷི ཁནྡྷེ ཏཱིཧི པདེཧི པཙྪིམཀེཧི སསྶཏཾ བྷཛཏི ‘‘ཨཉྙཾ ཛཱིཝཾ ཨཉྙཾ སརཱིར’’ནྟི. ཨིཏོ བཧིདྡྷཱཏེ པབྦཛིཏཱ ཏཎྷཱཙརིཏཱ ཀཱམསུཁལླིཀཱནུཡོགམནུཡུཏྟཱ ཝིཧརནྟི. ཏེན ཡེ ཙ ནིསྶནྡེན དིཊྛིཙརིཏཱ ཨཏྟཀིལམཐཱནུཡོགམནུཡུཏྟཱ ¶ ཝིཧརནྟི. ཏེན ཡེཝ དིཊྛིསུཁེན ཨེཏྟཱཝཏཱ བཱཧིརཀོ པཡོགོ.

ཏཏྠ དིཊྛིཙརིཏཱ སཏྟཱ ཡེ ཨརིཡདྷམྨཝིནཡཾ ཨོཏརནྟི, ཏེ དྷམྨཱནུསཱརིནོ ཧོནྟི. ཡེ ཏཎྷཱཙརིཏཱ སཏྟཱ ཨརིཡཾ དྷམྨཝིནཡཾ ཨོཏརནྟི, ཏེ སདྡྷཱནུསཱརིནོ ཧོནྟི.

ཏཏྠ ཡེ དིཊྛིཙརིཏཱ སཏྟཱ, ཏེ ཀཱམེསུ དོསདིཊྛཱི, ན ཙ ཡེ ཀཱམེསུ ཨནུསཡཱ སམཱུཧཏཱ, ཏེ ཨཏྟཀིལམཐཱནུཡོགམནུཡུཏྟཱ ཝིཧརནྟི. ཏེསཾ སཏྠཱ དྷམྨཾ དེསེཏི. ཨཉྙོ ཝཱ སཱཝཀོ ཀཱམེཧི ནཏྠི ཨཏྠོཏི ཏེ ཙ པུབྦེཡེཝ ཀཱམེཧི ཨནཏྠིཀཱ ཨིཏི ཀཱམེ ཨཔྤཀསིརེན པཊིནིསྶཛྫནྟི. ཏེ ཙེཏསིཀེན དུཀྑེན ཨནཛ྄ཛྷོསིཏཱ. ཏེན ཝུཙྩཏི ‘‘སུཁཱ པཊིཔདཱ’’ཏི ¶ . ཡེ པན ཏཎྷཱཙརིཏཱ སཏྟཱ, ཏེ ཀཱམེསུ ཨཛ྄ཛྷོསིཏཱ, ཏེསཾ སཏྠཱ ཝཱ དྷམྨཾ དེསེཏི. ཨཉྙཏརོ ཝཱ བྷིཀྑུ ཀཱམེཧི ནཏྠི ཨཏྠོཏི, ཏེ པིཡརཱུཔཾ དུཀྑེན པཊིནིསྶཛྫནྟི. ཏེན ཝུཙྩཏི ‘‘དུཀྑཱ པཊིཔདཱ’’ཏི. ཨིཏི ཨིམེ སབྦསཏྟཱ དྭཱིསུ པཊིཔདཱསུ སམོསརཎཾ གཙྪནྟི དུཀྑཱཡཉྩ སུཁཱཡཉྩ.

ཏཏྠ ཡེ དིཊྛིཙརིཏཱ སཏྟཱ, ཏེ དྭིདྷཱ མུདིནྡྲིཡཱ ཙ ཏིཀྑིནྡྲིཡཱ ཙ. ཏཏྠ ཡེ དིཊྛིཙརིཏཱ སཏྟཱ ཏིཀྑིནྡྲིཡཱ སུཁེན པཊིནིསྶཛྫནྟི, ཁིཔྤཉྩ ཨབྷིསམེནྟི, ཏེན ཝུཙྩཏི ‘‘ཁིཔྤཱབྷིཉྙཱ སུཁཱ པཊིཔདཱ’’ཏི. ཏཏྠ ཡེ དིཊྛིཙརིཏཱ སཏྟཱ མུདིནྡྲིཡཱ པཋམཾ ཏིཀྑིནྡྲིཡཾ ཨུཔཱདཱཡ དནྡྷཏརཾ ཨབྷིསམེནྟི, ཏེ སུཁེན པཊིནིསྶཛྫནྟི, དནྡྷཉྩ ཨབྷིསམེནྟི. ཏེན ཝུཙྩཏི ‘‘སུཁཱ པཊིཔདཱ དནྡྷཱབྷིཉྙཱ’’ཏི. ཏཏྠ ཏཎྷཱཙརིཏཱ སཏྟཱ དྭིདྷཱ ཏིཀྑིནྡྲིཡཱ ཙ མུདིནྡྲིཡཱ ཙ. ཏཏྠ ¶ ཡེ ཏཎྷཱཙརིཏཱ སཏྟཱ ཏིཀྑིནྡྲིཡཱ དུཀྑེན པཊིནིསྶཛྫནྟི, ཁིཔྤཉྩ ཨབྷིསམེནྟི. ཏེན ཝུཙྩཏི ‘‘དུཀྑཱ པཊིཔདཱ ཁིཔྤཱབྷིཉྙཱ’’ཏི. ཏཏྠ ཡེ ཏཎྷཱཙརིཏཱ སཏྟཱ མུདིནྡྲིཡཱ པཋམཾ ཏིཀྑིནྡྲིཡཾ ཨུཔཱདཱཡ དནྡྷཏརཾ ཨབྷིསམེནྟི, ཏེ དུཀྑེན པཊིནིསྶཛྫནྟི, དནྡྷཉྩ ཨབྷིསམེནྟི. ཏེན ཝུཙྩཏི ‘‘དུཀྑཱ པཊིཔདཱ དནྡྷཱབྷིཉྙཱ’’ཏི. ཨིམཱ ཙཏསྶོ པཊིཔདཱཡོ ཨཔཉྩམཱ ཨཚཊྛཱ. ཡེ ཧི ཀེཙི ནིབྦུཏཱ ནིབྦཱཡིསྶནྟི ¶ ཝཱ ཨིམཱཧི ཙཏཱུཧི པཊིཔདཱཧི ཨནཉྙཱཧི ཨཡཾ པཊིཔདཱཙཏུཀྐེན ཀིལེསེ ནིདྡིསཏི. ཡཱ ཙཏུཀྐམགྒེན ཨརིཡདྷམྨེསུ ནིདྡིསིཏབྦཱ, ཨཡཾ ཝུཙྩཏི སཱིཧཝིཀྐཱིལི༹ཏོ ནཱམ ནཡོ.

༡༡༩. ཏཏྲིམེ ཙཏྟཱརོ ཨཱཧཱརཱ. ཙཏྟཱརོ ཝིཔལླཱསཱ ཨུཔཱདཱནཱ ཡོགཱ གནྠཱ ཨཱསཝཱ ཨོགྷཱ སལླཱ ཝིཉྙཱཎཊྛིཏིཡོ ཨགཏིགམནཱཏི, ཨེཝཾ ཨིམཱནི སབྦཱནི དས པདཱནི. ཨཡཾ སུཏྟསྶ སཾསནྡནཱ.

ཙཏྟཱརོ ཨཱཧཱརཱ. ཏཏྠ ཡོ ཙ ཀབལཱི༹ཀཱརོ ཨཱཧཱརོ ཡོ ཙ ཕསྶོ ཨཱཧཱརོ, ཨིམེ ཏཎྷཱཙརིཏེན པཧཱཏབྦཱ. ཏཏྠ ཡོ ཙ མནོསཉྩེཏནཱཧཱརོ ཡོ ཙ ཝིཉྙཱཎཱཧཱརོ, ཨིམེ དིཊྛིཙརིཏེན པཧཱཏབྦཱ.

པཋམོ ཨཱཧཱརོ པཋམོ ཝིཔལླཱསོ, དུཏིཡོ ཨཱཧཱརོ དུཏིཡོ ཝིཔལླཱསོ, ཏཏིཡོ ཨཱཧཱརོ ཏཏིཡོ ཝིཔལླཱསོ, ཙཏུཏྠོ ཨཱཧཱརོ ཙཏུཏྠོ ཝིཔལླཱསོ. ཨིམེ ཙཏྟཱརོ ཝིཔལླཱསཱ ཨཔཉྩམཱ ཨཚཊྛཱ. ཨིདཉྩ པམཱཎཱ ཙཏྟཱརོ ཨཱཧཱརཱ.

ཏཏྠ ¶ པཋམེ ཝིཔལླཱསེ ཋིཏོ ཀཱམེ ཨུཔཱདིཡཏི, ཨིདཾ ཀཱམུཔཱདཱནཾ. དུཏིཡེ ཝིཔལླཱསེ ཋིཏོ ཨནཱགཏཾ བྷཝཾ ཨུཔཱདིཡཏི, ཨིདཾ སཱིལབྦཏུཔཱདཱནཾ. ཏཏིཡེ ཝིཔལླཱསེ ཋིཏོ ཝིཔརཱིཏོ དིཊྛིཾ ཨུཔཱདིཡཏི, ཨིདཾ དིཊྛུཔཱདཱནཾ. ཙཏུཏྠེ ¶ ཝིཔལླཱསེ ཋིཏོ ཁནྡྷེ ཨཏྟཏོ ཨུཔཱདིཡཏི, ཨིདཾ ཨཏྟཝཱདུཔཱདཱནཾ.

ཏཏྠ ཀཱམུཔཱདཱནེ ཋིཏོ ཀཱམེ ཨབྷིཛ྄ཛྷཱཡཏི གནྠཏི, ཨཡཾ ཨབྷིཛ྄ཛྷཱཀཱཡགནྠོ. སཱིལབྦཏུཔཱདཱནེ ཋིཏོ བྱཱཔཱདཾ གནྠཏི, ཨཡཾ བྱཱཔཱདཀཱཡགནྠོ. དིཊྛུཔཱདཱནེ ཋིཏོ པརཱམཱསཾ གནྠཏི, ཨཡཾ པརཱམཱསཀཱཡགནྠོ. ཨཏྟཝཱདུཔཱདཱནེ ཋིཏོ པཔཉྩནྟོ གནྠཏི, ཨཡཾ ཨིདཾསཙྩཱབྷིནིཝེསོ ཀཱཡགནྠོ.

ཏསྶ གནྠིཏཱ ཀིལེསཱ ཨཱསཝནྟི. ཀིཉྩི པན ཝུཙྩཏི ཝིཔྤཊིསཱརོ. ཡེ ཝིཔྤཊིསཱརཱ [ཡོ ཝིཔྤཊིསཱརོ (པཱི. ཀ.)] ཏེ ཨནུསཡཱ. ཏཏྠ ཨབྷིཛ྄ཛྷཱཀཱཡགནྠེན ཀཱམཱསཝོ, བྱཱཔཱདཀཱཡགནྠེན བྷཝཱསཝོ, པརཱམཱསཀཱཡགནྠེན དིཊྛཱསཝོ, ཨིདཾ སཙྩཱབྷིནིཝེསཀཱཡགནྠེན ཨཝིཛྫཱསཝོ.

ཏེ ¶ ཙཏྟཱརོ ཨཱསཝཱ ཝེཔུལླབྷཱཝཾ གཏཱ ཨོགྷཱ ཧོནྟི, ཏེན ཝུཙྩནྟི ‘‘ཨོགྷཱ’’ཏི. ཏཏྠ ཀཱམཱསཝོ ཀཱམོགྷོ, བྷཝཱསཝོ བྷཝོགྷོ, ཨཝིཛྫཱསཝོ ཨཝིཛྫོགྷོ, དིཊྛཱསཝོ དིཊྛོགྷོ.

ཏེ ཙཏྟཱརོ ཨོགྷཱ ཨཱསཡམནུཔཝིཊྛཱ ཨནུསཡསཧགཏཱ ཝུཙྩནྟི. སལླཱཏི ཧདཡམཱཧཙྩ ཏིཊྛནྟཱ. ཏཏྠ ཀཱམོགྷོ རཱགསལླཾ, བྷཝོགྷོ དོསསལླཾ, ཨཝིཛྫོགྷོ མོཧསལླཾ, དིཊྛོགྷོ དིཊྛིསལླཾ.

ཨིམེཧི ཙཏཱུཧི སལླེཧི པརིཡཱདིནྣཾ ཝིཉྙཱཎཾ ཙཏཱུསུ དྷམྨེསུ ཏིཊྛཏི རཱུཔེ ཝེདནཱཡ སཉྙཱཡ སངྑཱརེསུ. ཨིམཱ ཙཏསྶོ ཝིཉྙཱཎཊྛིཏིཡོ. ཏཏྠ རཱགསལླེན ནནྡཱུཔསེཙནཾ རཱུཔཱུཔགཾ ཝིཉྙཱཎཾ ཏིཊྛཏི. དོསསལླེན ཝེདནཱུཔགཾ མོཧསལླེན སཉྙཱུཔགཾ ¶ དིཊྛིསལླེན ནནྡཱུཔསེཙནཾ སངྑཱརཱུཔགཾ ཝིཉྙཱཎཾ ཏིཊྛཏི.

ཙཏཱུཧི ཝིཉྙཱཎཊྛིཏཱིཧི ཙཏུབྦིདྷཾ ཨགཏིཾ གཙྪནྟི ཚནྡཱ དོསཱ བྷཡཱ མོཧཱ. རཱགེན ཚནྡཱ ཨགཏིཾ གཙྪཏི, དོསེན དོསཱ ཨགཏིཾ གཙྪཏི, མོཧེན མོཧཱ ཨགཏིཾ གཙྪཏི, དིཊྛིཡཱ བྷཡཱ ཨགཏིཾ གཙྪཏི. ཨིཏི ཨིདཉྩ ཀམྨཾ ཨིམེ ཙ ཀིལེསཱ. ཨཡཾ སཾསཱརསྶ ཧེཏུ.

༡༢༠. ཏཏྠིམཱ ¶ ཙཏསྶོ དིསཱ ཀབལཱི༹ཀཱརཱཧཱརོ ‘‘ཨསུབྷེ སུབྷ’’ནྟི ཝིཔལླཱསོ ཀཱམུཔཱདཱནཾ ཀཱམཡོགོ ཨབྷིཛ྄ཛྷཱཀཱཡགནྠོ ཀཱམཱསཝོ ཀཱམོགྷོ རཱགསལླཾ རཱུཔཱུཔགཱ ཝིཉྙཱཎཊྛིཏི ཚནྡཱ ཨགཏིགམནཾ. ཨཡཾ པཋམཱ དིསཱ.

ཕསྶོ ཨཱཧཱརོ ‘‘དུཀྑེ སུཁ’’ནྟི ཝིཔལླཱསོ སཱིལབྦཏུཔཱདཱནཾ བྷཝཡོགོབྱཱཔཱདོ ཀཱཡགནྠོ བྷཝཱསཝོ བྷཝོགྷོ དོསསལླཾ ཝེདནཱུཔགཱ ཝིཉྙཱཎཊྛིཏི དོསཱ ཨགཏིགམནཾ, ཨཡཾ དུཏིཡཱ དིསཱ.

མནོསཉྩེཏནཱཧཱརོ ‘‘ཨནཏྟནི ཨཏྟཱ’’ཏི ཝིཔལླཱསོ དིཊྛུཔཱདཱནཾ དིཊྛིཡོགོ པརཱམཱསཀཱཡགནྠོ དིཊྛཱསཝོ དིཊྛོགྷོ དིཊྛིསལླཾ སཉྙཱུཔགཱ ཝིཉྙཱཎཊྛིཏི བྷཡཱ ཨགཏིགམནཾ. ཨཡཾ ཏཏིཡཱ དིསཱ.

ཝིཉྙཱཎཱཧཱརོ ‘‘ཨནིཙྩེ ནིཙྩ’’ནྟི ཝིཔལླཱསོ ཨཏྟཝཱདུཔཱདཱནཾ ཨཝིཛྫཱཡོགོ ཨིདཾསཙྩཱབྷིནིཝེསོ ཀཱཡགནྠོ ཨཝིཛྫཱསཝོ ཨཝིཛྫོགྷོ མོཧསལླཾ སངྑཱརཱུཔགཱ ཝིཉྙཱཎཊྛིཏི མོཧཱ ཨགཏིགམནཾ, ཨཡཾ ¶ ཙཏུཏྠཱི དིསཱ. ཨིཏི ཨིམེསཾ དསནྣཾ སུཏྟཱནཾ པཋམེན པདེན པཋམཱཡ དིསཱཡ ཨཱལོཀནཾ. ཨཡཾ ཝུཙྩཏི དིསཱལོཀནཱ.

ཙཏཱུཧི ¶ ཝིཔལླཱསེཧི ཨཀུསལཔཀྑེ དིསཱཝིལོཀནཱ ཀིལེསཾ སཾཡོཛེཏྭཱ ཨཡཾ ཨཀུསལཔཀྑེ དིསཱཝིལོཀནཱཡ བྷཱུམི པཉྩནྣཾ དསནྣཾ སུཏྟཱནཾ ཡཱནི པཋམཱནི པདཱནི ཨིམེསཾ དྷམྨཱནཾ ཀོ ཨཏྠོ? ཨེཀོ ཨཏྠོ, བྱཉྫནམེཝ ནཱནཾ. ཨེཝཾ དུཏིཡཱ ཨེཝཾ ཏཏིཡཱ ཨེཝཾ ཙཏུཏྠཱི. ཨཡཾ པཋམཱ སཾསནྡནཱ.

ཨིམིནཱ པེཡྻཱལེན སབྦེ ཀིལེསཱ ཙཏཱུསུ པདེསུ པཀྑིཔིཏབྦཱ. ཏཏོ ཀུསལཔཀྑེ ཙཏསྶོ པཊིཔདཱ ཙཏྟཱརི ཛྷཱནཱནི ཙཏྟཱརོ སཏིཔཊྛཱནཱ ཙཏྟཱརོ ཝིཧཱརཱ དིབྦོ བྲཧྨཱ ཨརིཡོ ཨཱནེཉྫོ ཙཏྟཱརོ སམྨཔྤདྷཱནཱ ཙཏྟཱརོ ཨཙྪརིཡཱ ཨབྦྷུཏདྷམྨཱ ཙཏྟཱརོ ཨདྷིཊྛཱནཱ ཙཏྟཱརོ སམཱདྷཡོ ཚནྡསམཱདྷི ཝཱིརིཡསམཱདྷི ཙིཏྟསམཱདྷི ཝཱིམཾསཱསམཱདྷི. ཙཏྟཱརོ དྷམྨཱ སུཁབྷཱགིཡཱ ནཱཉྙཏྲ བོཛ྄ཛྷངྒཱ ནཱཉྙཏྲ ཏཔསཱ ནཱཉྙཏིནྡྲིཡསཾཝརཱ ནཱཉྙཏྲ སབྦནིསྶགྒཱ ཙཏྟཱརི ཨཔྤམཱཎཱནི.

ཏཏྠ དུཀྑཱ པཊིཔདཱ དནྡྷཱབྷིཉྙཱ བྷཱཝིཡམཱནཱ བཧུལཱིཀརིཡམཱནཱ པཋམཾ ཛྷཱནཾ པརིཔཱུརེཏི, པཋམཾ ཛྷཱནཾ པརིཔུཎྞཾ པཋམཾ སཏིཔཊྛཱནཾ པརིཔཱུརེཏི ¶ , པཋམཾ སཏིཔཊྛཱནཾ པརིཔུཎྞཾ པཋམཾ ཝིཧཱརཾ པརིཔཱུརེཏི, པཋམོ ཝིཧཱརོ པརིཔུཎྞོ པཋམཾ སམྨཔྤདྷཱནཾ པརིཔཱུརེཏི, པཋམཾ སམྨཔྤདྷཱནཾ པརིཔུཎྞཾ པཋམཾ ཨཙྪརིཡཾ ཨབྦྷུཏདྷམྨཾ པརིཔཱུརེཏི, པཋམོ ཨཙྪརིཡོ ཨབྦྷུཏོ དྷམྨོ པརིཔུཎྞོ པཋམཾ ཨདྷིཊྛཱནཾ པརིཔཱུརེཏི, པཋམཾ ཨདྷིཊྛཱནཾ པརིཔུཎྞཾ ཚནྡསམཱདྷིཾ པརིཔཱུརེཏི, ཚནྡསམཱདྷི པརིཔུཎྞོ ཨིནྡྲིཡསཾཝརཾ པརིཔཱུརེཏི, ཨིནྡྲིཡསཾཝརོ པརིཔུཎྞོ པཋམཾ མེཏྟཱཨཔྤམཱཎཾ པརིཔཱུརེཏི. ཨེཝཾ ཡཱཝ སབྦནིསྶགྒོ ཙཏུཏྠཾ ཨཔྤམཱཎཾ པརིཔཱུརེཏི.

ཏཏྠ པཋམཱ ཙ པཊིཔདཱ པཋམཉྩ ཛྷཱནཾ པཋམཉྩ སཏིཔཊྛཱནཾ པཋམོ ཙ ཝིཧཱརོ པཋམཉྩ སམྨཔྤདྷཱནཾ ¶ པཋམོ ཙ ཨཙྪརིཡོ ཨབྦྷུཏོ དྷམྨོ སཙྩཱདྷིཊྛཱནཉྩ ཚནྡསམཱདྷི ཙ ཨིནྡྲིཡསཾཝརོ ཙ མེཏྟཱ ཙ ཨཔྤམཱཎཾ. ཨཡཾ པཋམཱ དིསཱ.

དུཀྑཱ ཙ [དུཏིཡཱ ཙ (ཀ.)] པཊིཔདཱ ཁིཔྤཱབྷིཉྙཱ དུཏིཡཾ ཛྷཱནཾ དུཏིཡཉྩ སཏིཔཊྛཱནཾ དུཏིཡོ ཙ ཝིཧཱརོ དུཏིཡཉྩ སམྨཔྤདྷཱནཾ དུཏིཡོ ཙ ཨཙྪརིཡོ ཨབྦྷུཏོ ¶ དྷམྨོ ཙཱགཱདྷིཊྛཱནཾ ཙིཏྟསམཱདྷི ཙཏྟཱརོ ཨིདྡྷིཔཱདཱ ཀརུཎཱ ཙ ཨཔྤམཱཎཾ, ཨཡཾ དུཏིཡཱ དིསཱ.

སུཁཱ ཙ [ཏཏིཡཱ ཙ (ཀ.)] པཊིཔདཱ དནྡྷཱབྷིཉྙཱ ཏཏིཡཉྩ ཛྷཱནཾ ཏཏིཡཉྩ སཏིཔཊྛཱནཾ ཏཏིཡོ ཙ ཝིཧཱརོ ཏཏིཡཉྩ སམྨཔྤདྷཱནཾ ཏཏིཡོ ཙ ཨཙྪརིཡོ ཨབྦྷུཏོ དྷམྨོ པཉྙཱདྷིཊྛཱནཉྩ ཝཱིརིཡསམཱདྷི ཙ བོཛ྄ཛྷངྒཱ ཙ མུདིཏཱ ཙ ཨཔྤམཱཎཾ. ཨཡཾ ཏཏིཡཱ དིསཱ.

སུཁཱ ཙ [ཙཏུཏྠཱི ཙ (ཀ.)] པཊིཔདཱ ཁིཔྤཱབྷིཉྙཱ ཙཏུཏྠཾ ཛྷཱནཾ ཙཏུཏྠཉྩ སཏིཔཊྛཱནཾ ཙཏུཏྠོ ཙ ཝིཧཱརོ ཙཏུཏྠཉྩ སམྨཔྤདྷཱནཾ ཙཏུཏྠོ ཙ ཨཙྪརིཡོ ཨབྦྷུཏོ དྷམྨོ ཨུཔསམཱདྷིཊྛཱནཉྩ ཝཱིམཾསཱསམཱདྷི ཙ སབྦནིསྶགྒོ ཙ ཨུཔེཀྑཱ ཨཔྤམཱཎཉྩ. ཨཡཾ ཙཏུཏྠཱི དིསཱ. ཨིམཱསཾ ཙཏསྶནྣཾ དིསཱནཾ ཨཱལོཀནཱ. ཨཡཾ ཝུཙྩཏི དིསཱལོཀནོ ནཱམ ནཡོ.

ཏཏྠཱཡཾ ཡོཛནཱ. ཙཏྟཱརོ ཙ ཨཱཧཱརཱ ཙཏསྶོ ཙ པཊིཔདཱ, ཙཏྟཱརོ ཙ ཝིཔལླཱསཱ ཙཏྟཱརོ ཙ སཏིཔཊྛཱནཱ, ཙཏྟཱརི ཙ ཨུཔཱདཱནཱནི ཙཏྟཱརི ཙ ཛྷཱནཱནི ཙཏྟཱརོ ཙ ཡོགཱ ཝིཧཱརཱ ཙ, གནྠཱ ཙ སམྨཔྤདྷཱནཱ ཙ, ཨཱསཝཱ ཙ ཨཙྪརིཡཱ ཨབྦྷུཏདྷམྨཱ ཙ, ཨོགྷཱ ཙ ཨདྷིཊྛཱནཱནི ཙ, སལླཱ ཙ སམཱདྷཡོ, ཝིཉྙཱཎཊྛིཏིཡོ ¶ ཙཏྟཱརོ ཙ སུཁབྷཱགིཡཱ དྷམྨཱ, ཙཏྟཱརི ཙ ཨགཏིགམནཱནི ཙཏྟཱརི ཙ ཨཔྤམཱཎཱནི ཨིཏི ཀུསལཱཀུསལཱནཾ པཊིཔཀྑཝསེན ཡོཛནཱ, ཨཡཾ ཝུཙྩཏི དིསཱལོཀནོ ནཡོ.

ཏསྶ ¶ ཙཏྟཱརི སཱམཉྙཕལཱནི པརིཡོསཱནཾ, ཡོ ཙ དྷམྨོ ཀུསལཱཀུསལནིདྡེསེ པཋམོ དིསཱནིདྡེསོ, ཨིམསྶ སོཏཱཔཏྟིཕལཾ པརིཡོསཱནཾ དུཏིཡཾ སཀདཱགཱམིཕལཾ, ཏཏིཡཾ ཨནཱགཱམིཕལཾ, ཙཏུཏྠཾ ཨརཧཏྟཕལཾ.

ཏཏྠ ཀཏམོ ཏིཔུཀྑལོ ནཡོ? ཡེ ཙ དུཀྑཱཡ པཊིཔདཱཡ དནྡྷཱབྷིཉྙཱཡ ཁིཔྤཱབྷིཉྙཱཡ ཙ ནིཡྻནྟི དྭེ པུགྒལཱ, ཡེ ཙ སུཁཱཡ པཊིཔདཱཡ དནྡྷཱབྷིཉྙཱཡ ཁིཔྤཱབྷིཉྙཱཡ ཙ ནིཡྻནྟི དྭེ པུགྒལཱ.

ཨིམེསཾ ཙཏུནྣཾ པུགྒལཱནཾ ཡོ པུགྒལོ སུཁཱཡ པཊིཔདཱཡ དནྡྷཱབྷིཉྙཱཡ ནིཡྻཱཏི, ཡོ ཙ པུགྒལོ དུཀྑཱཡ པཊིཔདཱཡ ཁིཔྤཱབྷིཉྙཱཡ ནིཡྻཱཏི. ཨིམེ དྭེ པུགྒལཱ བྷཝནྟི. ཏཏྠ ཡོ སུཁཱཡ པཊིཔདཱཡ ཁིཔྤཱབྷིཉྙཱཡ ནིཡྻཱཏི ¶ , ཨཡཾ ཨུགྒྷཊིཏཉྙཱུ. ཡོ པཙྪིམོ པུགྒལོ སཱདྷཱརཎོ, ཨཡཾ ཝིཔཉྩིཏཉྙཱུ. ཡོ པུགྒལོ དནྡྷཱབྷིཉྙཱཡ དུཀྑཱཡ པཊིཔདཱཡ ནིཡྻཱཏི, ཨཡཾ ནེཡྻོ. ཨིམེ ཙཏྟཱརོ བྷཝིཏྭཱ ཏཱིཎི ཧོནྟི, ཏཏྠ ཨུགྒྷཊིཏཉྙུསྶ སམཐཔུབྦངྒམཱ ཝིཔསྶནཱ, ནེཡྻསྶ ཝིཔསྶནཱཔུབྦངྒམོ སམཐོ, ཝིཔཉྩིཏཉྙུསྶ སམཐཝིཔསྶནཱ ཡུགནདྡྷཱ. ཨུགྒྷཊིཏཉྙུསྶ མུདུཀཱ དེསནཱ, ནེཡྻསྶ ཏིཀྑཱ དེསནཱ, ཝིཔཉྩིཏཉྙུསྶ ཏིཀྑམུདུཀཱ དེསནཱ.

ཨུགྒྷཊིཏཉྙུསྶ ཨདྷིཔཉྙཱསིཀྑཱ, ནེཡྻསྶ ཨདྷིཙིཏྟསིཀྑཱ, ཝིཔཉྩིཏཉྙུསྶ ཨདྷིསཱིལསིཀྑཱ. ཨིཏི ཨིམེསཾ པུགྒལཱནཾ ཙཏཱུཧི པཊིཔདཱཧི ནིཡྻཱནཾ.

ཏཏྠ ¶ ཨཡཾ སཾཀིལེསོ, ཏཱིཎི ཨཀུསལམཱུལཱནི ཏཡོ ཕསྶཱ ཏིསྶོ ཝེདནཱ ཏཡོ ཨུཔཝིཙཱརཱ ཏཡོ སཾཀིལེསཱ ཏཡོ ཝིཏཀྐཱ ཏཡོ པརིལཱ༹ཧཱ ཏཱིཎི སངྑཏལཀྑཎཱནི ཏིསྶོ དུཀྑཏཱཏི.

ཏཱིཎི ཨཀུསལམཱུལཱནཱིཏི ལོབྷོ ཨཀུསལམཱུལཾ, དོསོ ཨཀུསལམཱུལཾ, མོཧོ ཨཀུསལམཱུལཾ. ཏཡོ ཕསྶཱཏི སུཁཝེདནཱིཡོ ཕསྶོ, དུཀྑཝེདནཱིཡོ ཕསྶོ, ཨདུཀྑམསུཁཝེདནཱིཡོ ཕསྶོ. ཏིསྶོ ཝེདནཱཏི སུཁཱ ཝེདནཱ དུཀྑཱ ཝེདནཱ ཨདུཀྑམསུཁཱ ཝེདནཱ. ཏཡོ ཨུཔཝིཙཱརཱཏི སོམནསྶོཔཝིཙཱརོ དོམནསྶོཔཝིཙཱརོ ཨུཔེཀྑོཔཝིཙཱརོ. ཏཡོ སཾཀིལེསཱཏི རཱགོ དོསོ མོཧོ. ཏཡོ ཝིཏཀྐཱཏི ཀཱམཝིཏཀྐོ བྱཱཔཱདཝིཏཀྐོ ཝིཧིཾསཱཝིཏཀྐོ. ཏཡོ པརིལཱ༹ཧཱཏི ¶ རཱགཛོ དོསཛོ མོཧཛོ. ཏཱིཎི སངྑཏལཀྑཎཱནཱིཏི ཨུཔྤཱདོ ཋིཏི ཝཡོ. ཏིསྶོ དུཀྑཏཱཏི དུཀྑདུཀྑཏཱ ཝིཔརིཎཱམདུཀྑཏཱ སངྑཏདུཀྑཏཱ.

ཏཏྠ ལོབྷོ ཨཀུསལམཱུལཾ ཀུཏོ སམུཊྛིཏཾ? ཏིཝིདྷཾ ཨཱརམྨཎཾ མནཱཔིཀཾ ཨམནཱཔིཀཾ ཨུཔེཀྑཱཋཱནིཡཉྩ. ཏཏྠ མནཱཔིཀེན ཨཱརམྨཎེན ལོབྷོ ཨཀུསལམཱུལཾ སམུཊྛཧཏི. ཨིཏི མནཱཔིཀཱ ཨཱརམྨཎཱ སུཁཝེདནཱིཡོ ཕསྶོ, སུཁཝེདནཱིཡཾ ཕསྶཾ པཊིཙྩ ཨུཔྤཛྫཏེ སུཁཝེདནཱ, སུཁཝེདནཾ པཊིཙྩ ཨུཔྤཛྫཏེ སོམནསྶཱུཔཝིཙཱརོ, སོམནསྶཱུཔཝིཙཱརཾ པཊིཙྩ ཨུཔྤཛྫཏེ རཱགོ, རཱགཾ པཊིཙྩ ཨུཔྤཛྫཏེ ཀཱམཝིཏཀྐོ, ཀཱམཝིཏཀྐཾ པཊིཙྩ ཨུཔྤཛྫཏེ རཱགཛོ པརིལཱ༹ཧོ ¶ རཱགཛཾ པརིལཱ༹ཧཾ པཊིཙྩ ཨུཔྤཛྫཏེ ཨུཔྤཱདོ སངྑཏལཀྑཎོ, ཨུཔྤཱདཾ སངྑཏལཀྑཎཾ པཊིཙྩ ཨུཔྤཛྫཏེ ཝིཔརིཎཱམདུཀྑཏཱ.

དོསོ ¶ ཨཀུསལམཱུལཾ ཀུཏོ སམུཊྛིཏཾ? ཨམནཱཔིཀེན ཨཱརམྨཎེན དོསོ ཨཀུསལམཱུལཾ སམུཊྛིཏཾ. ཨིཏི ཨམནཱཔིཀཱ ཨཱརམྨཎཱ དུཀྑཝེདནཱིཡོ ཕསྶོ, དུཀྑཝེདནཱིཡཾ ཕསྶཾ པཊིཙྩ ཨུཔྤཛྫཏེ དུཀྑཝེདནཱ, དུཀྑཝེདནཾ པཊིཙྩ ཨུཔྤཛྫཏེ དོམནསྶཱུཔཝིཙཱརོ, དོམནསྶཱུཔཝིཙཱརཾ པཊིཙྩ ཨུཔྤཛྫཏེ དོསོ, དོསཾ པཊིཙྩ ཨུཔྤཛྫཏེ བྱཱཔཱདཝིཏཀྐོ, བྱཱཔཱདཝིཏཀྐཾ པཊིཙྩ ཨུཔྤཛྫཏེ དོསཛོ པརིལཱ༹ཧོ, དོསཛཾ པརིལཱ༹ཧཾ པཊིཙྩ ཨུཔྤཛྫཏེ ཋིཏསྶ ཨཉྙཐཏྟཾ སངྑཏལཀྑཎཾ, ཋིཏསྶ ཨཉྙཐཏྟཾ སངྑཏལཀྑཎཾ པཊིཙྩ ཨུཔྤཛྫཏེ དུཀྑདུཀྑཏཱ ཝེདནཱ.

མོཧོ ཨཀུསལམཱུལཾ ཀུཏོ སམུཊྛིཏཾ? ཨུཔེཀྑཱཋཱནིཡེན ཨཱརམྨཎེན མོཧོ ཨཀུསལམཱུལཾ སམུཊྛིཏཾ. ཨིཏི ཨུཔེཀྑཱཋཱནིཡཱ ཨཱརམྨཎཱ ཨདུཀྑམསུཁཝེདནཱིཡོ ཕསྶོ, ཨདུཀྑམསུཁཝེདནཱིཡཾ ཕསྶཾ པཊིཙྩ ཨུཔྤཛྫཏེ ཨདུཀྑམསུཁཱ ཝེདནཱ, ཨདུཀྑམསུཁཝེདནཾ པཊིཙྩ ཨུཔྤཛྫཏེ ཨུཔེཀྑཱུཔཝིཙཱརོ, ཨུཔེཀྑཱུཔཝིཙཱརཾ པཊིཙྩ ཨུཔྤཛྫཏེ མོཧོ, མོཧཾ པཊིཙྩ ཨུཔྤཛྫཏེ ཝིཧིཾསཱཝིཏཀྐོ, ཝིཧིཾསཱཝིཏཀྐཾ པཊིཙྩ ཨུཔྤཛྫཏེ མོཧཛོ པརིལཱ༹ཧོ, མོཧཛཾ པརིལཱ༹ཧཾ པཊིཙྩ ཨུཔྤཛྫཏེ ཝཡོ སངྑཏལཀྑཎཾ, ཝཡཾ སངྑཏལཀྑཎཾ པཊིཙྩ ཨུཔྤཛྫཏེ སངྑཏདུཀྑཏཱ, ཨིཏི ཨཡཾ ཏིཎྞཾ ཀིལེསཱནཾ ནིདྡེསོ, ཨཡཾ ཝུཙྩཏེ ཀུསལཔཀྑེ ཏིཔུཀྑལོ ནཡོ.

ཨིཏི ཏཱིཎི ཨཀུསལམཱུལཱནི ན ཙཏུཏྠཱནི ན པཉྩམཱནི, ཏཡོ ཕསྶཱཏི ཏིསྶོ ཝེདནཱ ཡཱཝ སངྑཏདུཀྑཏཱཏི, ཡོ ¶ ཀོཙི ཨཀུསལཔཀྑོ, སབྦོ སོ ཏཱིསུ ཨཀུསལམཱུལེསུ སམོསརཏི.

ཏཏྠ ¶ ཀཏམོ ཀུསལཔཀྑོ? ཏཱིཎི ཀུསལམཱུལཱནི, ཏིསྶོ པཉྙཱ སུཏམཡཱི པཉྙཱ ཙིནྟཱམཡཱི པཉྙཱ བྷཱཝནཱམཡཱི པཉྙཱ. ཏཡོ སམཱདྷཱི སཝིཏཀྐསཝིཙཱརོ…པེ… ཏིསྶོ སིཀྑཱ ཨདྷིསཱིལསིཀྑཱ…པེ… སིཀྑཱ. ཏཱིཎི ནིམིཏྟཱནི སམཐནིམིཏྟཾ པགྒཧནིམིཏྟཾ ཨུཔེཀྑཱནིམིཏྟཾ. ཏཡོ ཝིཏཀྐཱ ནེཀྑམྨཝིཏཀྐོ…པེ… ཨཝིཧིཾསཱཝིཏཀྐོ. ཏཱིཎི ཨིནྡྲིཡཱནི ཨནཉྙཱཏཉྙསྶཱམཱིཏིནྡྲིཡནྟི ཝིཏྠཱརོ. ཏཡོ ཨུཔཝིཙཱརཱ ནེཀྑམྨཱུཔཝིཙཱརོ ཨབྱཱཔཱདཱུཔཝིཙཱརོ ཨཝིཧིཾསཱུཔཝིཙཱརོ. ཏིསྶོ ཨེསནཱ ཀཱམེསནཱ བྷཝེསནཱ བྲཧྨཙརིཡེསནཱ. ཏཡོ ཁནྡྷཱ སཱིལཀྑནྡྷོ སམཱདྷིཀྑནྡྷོ པཉྙཱཀྑནྡྷོ.

ཏཏྠ ¶ ཡཾ ཨལོབྷོ ཀུསལམཱུལཾ, ཏཾ སུཏམཡིཔཉྙཾ པརིཔཱུརེཏི, སུཏམཡཱི པཉྙཱ པརིཔུཎྞཱ སཝིཏཀྐཾ སཝིཙཱརཾ སམཱདྷིཾ པརིཔཱུརེཏི, སཝིཏཀྐོ སཝིཙཱརོ སམཱདྷི པརིཔུཎྞོ ཨདྷིཙིཏྟསིཀྑཾ པརིཔཱུརེཏི, ཨདྷིཙིཏྟསིཀྑཱ པརིཔུཎྞཱ སམཐནིམིཏྟཾ པརིཔཱུརེཏི, སམཐནིམིཏྟཾ པརིཔུཎྞཾ ནེཀྑམྨཝིཏཀྐཾ པརིཔཱུརེཏི, ནེཀྑམྨཝིཏཀྐོ པརིཔུཎྞོ ཨནཉྙཱཏཉྙསྶཱམཱིཏིནྡྲིཡཾ པརིཔཱུརེཏི, ཨནཉྙཱཏཉྙསྶཱམཱིཏིནྡྲིཡཾ པརིཔུཎྞཾ ནེཀྑམྨཱུཔཝིཙཱརཾ པརིཔཱུརེཏི, ནེཀྑམྨཱུཔཝིཙཱརོ པརིཔུཎྞོ ཀཱམེསནཾ པཛཧཏི, ཀཱམེསནཔྤཧཱནཾ སམཱདྷིཀྑནྡྷཾ པརིཔཱུརེཏི.

ཨདོསོ ཀུསལམཱུལཾ ཙིནྟཱམཡིཔཉྙཾ པརིཔཱུརེཏི, ཙིནྟཱམཡཱི པཉྙཱ པརིཔུཎྞཱ ཨཝིཏཀྐཝིཙཱརམཏྟཾ སམཱདྷིཾ པརིཔཱུརེཏི ¶ . ཨཝིཏཀྐཝིཙཱརམཏྟོ སམཱདྷི པརིཔུཎྞོ ཨདྷིསཱིལསིཀྑཾ པརིཔཱུརེཏི, ཨདྷིསཱིལསིཀྑཱ པརིཔུཎྞཱ ཨུཔེཀྑཱནིམིཏྟཾ པརིཔཱུརེཏི, ཨུཔེཀྑཱནིམིཏྟཾ པརིཔུཎྞཾ ཨབྱཱཔཱདཝིཏཀྐཾ པརིཔཱུརེཏི, ཨབྱཱཔཱདཝིཏཀྐོ པརིཔུཎྞོ ཨཉྙིནྡྲིཡཾ པརིཔཱུརེཏི, ཨཉྙིནྡྲིཡཾ པརིཔུཎྞཾ ཨབྱཱཔཱདཱུཔཝིཙཱརཾ པརིཔཱུརེཏི, ཨབྱཱཔཱདཱུཔཝིཙཱརོ པརིཔུཎྞོ བྷཝེསནཾ པཛཧཏི, བྷཝེསནཔྤཧཱནཾ སཱིལཀྑནྡྷཾ པརིཔཱུརེཏི.

ཨམོཧོ ཀུསལམཱུལཾ བྷཱཝནཱམཡིཔཉྙཾ པརིཔཱུརེཏི, བྷཱཝནཱམཡཱིཔཉྙཱ པརིཔུཎྞཱ ཨཝིཏཀྐཨཝིཙཱརཾ སམཱདྷིཾ པརིཔཱུརེཏི, ཨཝིཏཀྐོ ཨཝིཙཱརོ སམཱདྷི པརིཔུཎྞོ ཨདྷིཔཉྙཱསིཀྑཾ པརིཔཱུརེཏི, ཨདྷིཔཉྙཱསིཀྑཱ པརིཔུཎྞཱ པགྒཧནིམིཏྟཾ པརིཔཱུརེཏི, པགྒཧནིམིཏྟཾ པརིཔུཎྞཾ ཨཉྙཱཏཱཝིནོ ཨིནྡྲིཡཾ པརིཔཱུརེཏི, ཨཉྙཱཏཱཝིནོ ཨིནྡྲིཡཾ པརིཔུཎྞཾ ཨཝིཧིཾསཱུཔཝིཙཱརཾ པརིཔཱུརེཏི, ཨཝིཧིཾསཱུཔཝིཙཱརོ པརིཔུཎྞོ བྲཧྨཙརིཡེསནཾ པརིཔཱུརེཏི, བྲཧྨཙརིཡེསནཱ པརིཔུཎྞཱ པཉྙཱཀྑནྡྷཾ པརིཔཱུརེཏི.

ཨིཏི ཨིམེ ཏཡོ དྷམྨཱ ཀུསལཔཀྑིཀཱ སབྦེ ཀུསལཱ དྷམྨཱ ཏཱིཧི ཏིཀནིདྡེསེཧི ནིདྡིསིཡནྟི ¶ ཏཱིཎི ཝིམོཀྑམུཁཱནི ཏསྶ པརིཡོསཱནཾ. ཏཏྠ པཋམེན ཨཔྤཎིཧིཏཾ, དུཏིཡེན སུཉྙཏཾ, ཏཏིཡེན ཨནིམིཏྟཾ. ཨཡཾ ཝུཙྩཏི དུཏིཡོ ཏིཔུཀྑལོ ནཱམ ནཡོ.

ཏཏྠ ཡེ ཨིམེ ཏཡོ པུགྒལཱ ཨུགྒྷཊིཏཉྙཱུ ཝིཔཉྩིཏཉྙཱུ ནེཡྻོཏི. ཨིམེསཾ ཏིཎྞཾ པུགྒལཱནཾ ཡེ ཙ པུགྒལཱ སུཁཱཡ པཊིཔདཱཡ ཁིཔྤཱབྷིཉྙཱཡ, སུཁཱཡ པཊིཔདཱཡ དནྡྷཱབྷིཉྙཱཡ ཙ ནིཡྻནྟི, ཏེ དྭེ པུགྒལཱ. ཡེ ཙ དྭེ པུགྒལཱ དུཀྑཱཡ ¶ པཊིཔདཱཡ ཁིཔྤཱབྷིཉྙཱཡ, དུཀྑཱཡ པཊིཔདཱཡ དནྡྷཱབྷིཉྙཱཡ ཙ ནིཡྻནྟི ¶ , ཨིམེ ཙཏྟཱརོ ཏེན ཝིསེསེན དྭེ བྷཝནྟི དིཊྛིཙརིཏོ ཙ ཏཎྷཱཙརིཏོ ཙ. ཨིམེ ཙཏྟཱརོ བྷཝིཏྭཱ ཏཡོ བྷཝནྟི, ཏཡོ བྷཝིཏྭཱ དྭེ བྷཝནྟི. ཨིམེསཾ དྭིནྣཾ པུགྒལཱནཾ ཨཡཾ སཾཀིལེསོ, ཨཝིཛྫཱ ཙ ཏཎྷཱ ཙ, ཨཧིརིཀཉྩ ཨནོཏྟཔྤཉྩ, ཨསྶཏི ཙ ཨསམྤཛཉྙཉྩ, ནཱིཝརཎཱནི ཙ སཾཡོཛནཱནི ཙ, ཨཛ྄ཛྷོསཱནཉྩ ཨབྷིནིཝེསོ ཙ, ཨཧཾཀཱརོ ཙ མམཾཀཱརོ ཙ, ཨསྶདྡྷིཡཉྩ དོཝཙསྶཉྩ, ཀོསཛྫཉྩ ཨཡོནིསོ ཙ མནསིཀཱརོ, ཝིཙིཀིཙྪཱ ཙ ཨབྷིཛ྄ཛྷཱ ཙ, ཨསདྡྷམྨསྶཝནཉྩ ཨསམཱཔཏྟི ཙ.

ཏཏྠ ཨཝིཛྫཱ ཙ ཨཧིརིཀཉྩ ཨསྶཏི ཙ ནཱིཝརཎཱནི ཙ ཨཛ྄ཛྷོསཱནཉྩ ཨཧཾཀཱརོ ཙ ཨསྶདྡྷིཡཉྩ ཀོསཛྫཉྩ ཝིཙིཀིཙྪཱ ཙ ཨསདྡྷམྨསྶཝནཉྩ, ཨཡཾ ཨེཀཱ དིསཱ.

ཏཎྷཱ ཙ ཨནོཏྟཔྤཉྩ ཨསམྤཛཉྙཉྩ སཾཡོཛནཱནི ཙ ཨབྷིནིཝེསོ ཙ མམཾཀཱརོ ཙ དོཝཙསྶཏཱ ཙ ཨཡོནིསོ མནསིཀཱརོ ཙ ཨབྷིཛ྄ཛྷཱ ཙ ཨསམཱཔཏྟི ཙ, ཨཡཾ དུཏིཡཱ དིསཱ. དསནྣཾ དུཀཱནཾ དས པདཱནི པཋམཱནི ཀཱཏབྦཱནི. སཾཁིཏྟེན ཨཏྠཾ ཉཱཔེནྟི པཊིཔཀྑེ ཀཎྷཔཀྑསྶ སབྦེསཾ དུཀཱནཾ དས པདཱནི དུཏིཡཀཱནི, ཨཡཾ དུཏིཡཱ དིསཱ.

ཨིཏི ཨཀུསལཱནཾ དྷམྨཱནཾ དུཀྑནིདྡེསོ, ཨཡཾ སམུདཡོ. ཡཾ ཏཾ དྷམྨཾ ཨཛ྄ཛྷཱཝསཏི ནཱམཉྩ རཱུཔཉྩ ཨིདཾ དུཀྑཾ ཨིཏི ཨཡཉྩ སམུདཡོ, ཨིདཉྩ དུཀྑཾ, ཨིམཱནི དྭེ སཙྩཱནི དུཀྑཉྩ སམུདཡོ ཙ ནནྡིཡཱཝཊྚསྶ ནཡསྶ པཋམནིདྡེསོ.

ཏཏྠ ཀཏམོ ཀུསལཔཀྑོ? སམཐོ ཙ ཝིཔསྶནཱ ཙ, ཝིཛྫཱ ཙ ཙརཎཉྩ, སཏི ཙ སམྤཛཉྙཉྩ, ཧིརཱི ཙ ཨོཏྟཔྤཉྩ, ཨཧཾཀཱརཔྤཧཱནཉྩ ¶ མམཾཀཱརཔྤཧཱནཉྩ, སམྨཱཝཱཡཱམོ ཙ ཡོནིསོ ཙ མནསིཀཱརོ, སམྨཱསཏི ཙ སམྨཱསམཱདྷི ཙ, པཉྙཱ ཙ ནིབྦིདཱ ཙ, སམཱཔཏྟི ཙ སདྡྷམྨསྶཝནཉྩ, སོམནསྶཉྩ དྷམྨཱནུདྷམྨཔྤཊིཔཏྟི ཙ.

ཏཏྠ ¶ སམཐོ ཙ ཝིཛྫཱ ཙ སཏི ཙ ཧིརཱི ཙ ཨཧཾཀཱརཔྤཧཱནཉྩ སམྨཱཝཱཡཱམོ ཙ སམྨཱསཏི ཙ པཉྙཱ ཙ སམཱཔཏྟི ཙ སོམནསྶཉྩ, ཨིམེ དྷམྨཱ ཨེཀཱ དིསཱ. ཝིཔསྶནཱ ཙ ཙརཎཉྩ སམྤཛཉྙཉྩ ཨོཏྟཔྤཉྩ མམཾཀཱརཔྤཧཱནཉྩ ཡོནིསོ མནསིཀཱརོ ཙ སམྨཱསམཱདྷི ཙ ནིབྦིདཱ ཙ སདྡྷམྨསྶཝནཉྩ དྷམྨཱནུདྷམྨཔྤཊིཔཏྟི ཙ, ཨཡཾ དུཏིཡཱ དིསཱ. ཨིཏི ཀུསལཔཀྑེ ཙ ཨཀུསལཔཀྑེ ཙ ནནྡིཡཱཝཊྚསྶ པན ནཡསྶ ཙཏསྶོ དིསཱ.

ཏཱསུ ¶ ཡཱནི ཨཀུསལཔཀྑསྶ པཋམཱནི པདཱནི ཨཀུསལཱནི ཀུསལེཧི པཧཱནཾ གཙྪནྟི, ཏཱནི ཀུསལཔཀྑེ དུཏིཡེཧི པདེཧི པཧཱནཾ གཙྪནྟི. ཏེསཾ པཧཱནཱ རཱགཝིརཱགཱ ཙེཏོཝིམུཏྟི ཡཱནི ཨཀུསལཔཀྑསྶ དུཏིཡཱནི ཨཀུསལཔདཱནི པཧཱནཾ གཙྪནྟི, ཏཱནི ཀུསལཔཀྑསྶ པཋམེཧི པདེཧི པཧཱནཾ གཙྪནྟི. ཏེསཾ པཧཱནཱ ཨཝིཛྫཱཝིརཱགཱ པཉྙཱཝིམུཏྟི པརིཡོསཱནཾ. ཨིམེསཾ ཏིཎྞཾ ནཡཱནཾ པཋམོ ནཡོ སཱིཧཝིཀྐཱིལི༹ཏོ ནཱམ. ཨཊྛ པདཱནི ཙཏྟཱརི ཙ ཀུསལཱནི ཙཏྟཱརི ཙ ཨཀུསལཱནི ཨིམཱནི ཨཊྛ པདཱནི མཱུལཔདཱནི, ཨཏྠནཡེན དུཏིཡོ ཏིཔུཀྑལོ. སོ ཚཧི དྷམྨེཧི ནེཏི ཀུསལམཱུལཱནི ཙ ནེཏི ཨཀུསལམཱུལཱནི ཙ, ཨིཏི ཨིམཱནི ཚ པདཱནི པུརིམཀཱནི ཙ ཨཊྛ མཱུལཔདཱནི ཨིམཱནི ཙུདྡས པདཱནི ཨཊྛཱརསནྣཾ མཱུལཔདཱནཾ. ཏཏྠ ¶ ཡོ པཙྪིམཀོ ནཡོ ནནྡིཡཱཝཊྚོ, སོ ཙཏཱུཧི དྷམྨེཧི ནེཏི. ཨཝིཛྫཱཡ ཙ ཏཎྷཱཡ ཙ སམཐེན ཙ ཝིཔསྶནཱཡ ཙ, ཨིམེ ཙཏྟཱརོ དྷམྨཱ ཨིམཱནི ཨཊྛཱརས མཱུལཔདཱནི ཏཱིསུ ནཡེསུ ནིདྡིཊྛཱནི.

ཏཏྠ ཡཱནི ནཝ པདཱནི ཀུསལཱནི, ཏཏྠ སབྦཾ ཀུསལཾ སམོསརཏི. ཏེསཉྩ ནཝནྣཾ མཱུལཱནཾ ཙཏྟཱརི པདཱནི སཱིཧཝིཀྐཱིལི༹ཏནཡེ ཏཱིཎི ཏིཔུཀྑལེ དྭེ ནནྡིཡཱཝཊྚེ, ཨིཙྩེཏེ ཀུསལསྶ པཀྑཱ. ཏཏྠ ཡཱནི ནཝ པདཱནི ཀུསལཱནི, ཏཏྠ སབྦཾ ཀུསལཾ ཡུཛྫཏི. ཏཏྠ སཱིཧཝིཀྐཱིལི༹ཏེ ནཡེ ཙཏྟཱརི པདཱནི ཏཱིཎི ཏིཔུཀྑལེ དྭེ ནནྡིཡཱཝཊྚེ ཨིམཱནི ནཝ པདཱནི ཀུསལཱནི ནིདྡིཊྛཱནི.

ཏཏྠ ཡཱནི ནནྡིཡཱཝཊྚེ ནཡེ ཙཏྟཱརི པདཱནི, ཏཏྠ ཨཊྛཱརས མཱུལཔདཱནི སམོསརནྟི. ཡཐཱ ཀཐཾ, སམཐོ ཙ ཨལོབྷོ ཙ ཨདོསོ ཙ ཨསུབྷསཉྙཱ ཙ དུཀྑསཉྙཱ ཙ ཨིམཱནི ཀུསལཔཀྑེ པཉྩ པདཱནི སམཐཾ བྷཛནྟི. ཝིཔསྶནཱ ཙ ཨམོཧོ ཙ ཨནིཙྩསཉྙཱ ཙ ཨནཏྟསཉྙཱ ཙ ཨིམཱནི ཙཏྟཱརི པདཱནི ཝིཔསྶནཾ བྷཛནྟི. ཨིམཱནི ནཝ པདཱནི ཀུསལཱནི དྭཱིསུ པདེསུ ཡོཛིཏཱནི, ཏཏྠ ཨཀུསལཔཀྑེ ནཝནྣཾ ཨཀུསལམཱུལཔདཱནཾ ཡཱ ཙ ཏཎྷཱ ཡོ ཙ ལོབྷོ ཡོ ཙ དོསོ ཡཱ ཙ སུབྷསཉྙཱ ཡཱ ཙ སུཁསཉྙཱ, ཨིམཱནི པཉྩ པདཱནི ཏཎྷཾ བྷཛནྟི ¶ . ཡཱ ཙ ཨཝིཛྫཱ ཡོ ཙ མོཧོ ཡཱ ཙ ནིཙྩསཉྙཱ ཡཱ ཙ ཨཏྟསཉྙཱ, ཨིམཱནི ཙཏྟཱརི པདཱནི ཨཝིཛྫཾ བྷཛནྟི. ཨེཏཱནི ནཝ པདཱནི ཨཀུསལཱནི སུསཾཁིཏྟཱནི. ཨིཏི ཏཡོ ནཡཱ ཨེཀཾ ནཡཾ ན པཝིཊྛཱ. ཨེཝཾ ཨཊྛཱརས མཱུལཔདཱནི ནནྡིཡཱཝཊྚནཡེ ནིདྡིསིཏབྦཱནི.

ཀཐཾ ¶ ཨཊྛཱརས མཱུལཔདཱནི, ཏིཔུཀྑལེ ¶ ནཡེ ཡུཛྫནྟི? ནཝནྣཾ པདཱནཾ ཀུསལཱནཾ, ཝིཔསྶནཱ ཙ ཨམོཧོ ཙ ཨནིཙྩསཉྙཱ ཙ ཨནཏྟསཉྙཱ ཙ, ཨིམཱནི ཙཏྟཱརི པདཱནི; ཨམོཧོ ཙ སམཐོ ཙ ཨལོབྷོ ཙ ཨསུབྷསཉྙཱ ཙ, ཨིམཱནི ཙཏྟཱརི པདཱནི; ལོབྷོ ཙ དོསོ ཙ, ཨེཝཾ ཨིམཱནི ནཝ པདཱནི ཏཱིསུ ཀུསལེསུ ཡོཛེཏབྦཱནི. ཏཏྠ ནཝནྣཾ པདཱནཾ ཨཀུསལཱནཾ ཏཎྷཱ ཙ ལོབྷོ ཙ སུབྷསཉྙཱ ཙ སུཁསཉྙཱ ཙ, ཨིམཱནི ཙཏྟཱརི པདཱནི ལོབྷོ ཨཀུསལམཱུལཾ; ཨཝིཛྫཱ ཙ མོཧོ ཙ ནིཙྩསཉྙཱ ཙ ཨཏྟསཉྙཱ ཙ ཨཡཾ མོཧོ ཨཡཾ དོསོ, ཡེ ཙ ཨིམཱནི ནཝ པདཱནི ཏཱིསུ ཨཀུསལེསུ ཡོཛིཏཱནི. ཨེཝཾ ཨཊྛཱརས མཱུལཔདཱནི ཀུསལམཱུལེསུ ཙ ཡོཛེཏྭཱ ཏིཔུཀྑལེན ནཡེན ནིདྡིསིཏབྦཱནི.

ཀཐཾ ཨཊྛཱརས མཱུལཔདཱནི སཱིཧཝིཀྐཱིལི༹ཏེ ནཡེ ཡུཛྫནྟི? ཏཎྷཱ ཙ སུབྷསཉྙཱ ཙ, ཨཡཾ པཋམོ ཝིཔལླཱསོ. ལོབྷོ ཙ སུཁསཉྙཱ ཙ, ཨཡཾ དུཏིཡོ ཝིཔལླཱསོ. ཨཝིཛྫཱ ཙ ནིཙྩསཉྙཱ ཙ, ཨཡཾ ཏཏིཡོ ཝིཔལླཱསོ. མོཧོ ཙ ཨཏྟསཉྙཱ ཙ, ཨཡཾ ཙཏུཏྠོ ཝིཔལླཱསོ. ཨིཏི ནཝ པདཱནི ཨཀུསལམཱུལཱནི ཙཏཱུསུ པདེསུ ཡོཛིཏཱནི. ཏཏྠ ནཝནྣཾ མཱུལཔདཱནཾ ཀུསལཱནཾ སམཐོ ཙ ཨསུབྷསཉྙཱ ཙ, ཨིདཾ པཋམཾ སཏིཔཊྛཱནཾ. ཨལོབྷོ ཙ དུཀྑསཉྙཱ ཙ, ཨིདཾ དུཏིཡཾ སཏིཔཊྛཱནཾ. ཝིཔསྶནཱ ཙ ཨནིཙྩསཉྙཱ ཙ, ཨིདཾ ཏཏིཡཾ སཏིཔཊྛཱནཾ. ཨམོཧོ ཙ ཨནཏྟསཉྙཱ ཙ, ཨིདཾ ཙཏུཏྠཾ སཏིཔཊྛཱནཾ. ཨིམཱནི ཨཊྛཱརས མཱུལཔདཱནི སཱིཧཝིཀྐཱིལི༹ཏནཡཾ ཨནུཔཝིཊྛཱནི. ཨིམེསཾ ཏིཎྞཾ ནཡཱནཾ ཡཱ བྷཱུམི ཙ ཡོ རཱགོ ཙ ཡོ དོསོ ཙ ཨེཀཾ ནཡཾ པཝིསཏི. ཨེཀསྶ ནཡསྶ ཨཀུསལེ ཝཱ དྷམྨེ ཀུསལེ ཝཱ དྷམྨེ ཝིཉྙཱཏེ པཊིཔཀྑོ ཨནྭེསིཏབྦོ, པཊིཔཀྑེ ཨནྭེསིཏྭཱ སོ ནཡོ ནིདྡིསིཏབྦོ, ཏམྷི ནཡེ ¶ ནིདྡིཊྛོ. ཡཐཱ ཨེཀམྷི ནཡེ སབྦེ ནཡཱ པཝིཊྛཱ ཏཐཱ ནིདྡིསིཏབྦཱ. ཨེཀམྷི ཙ ནཡེ ཨཊྛཱརས མཱུལཔདཱནི པཝིཊྛཱནི, ཏམྷི དྷམྨེ ཝིཉྙཱཏེ སབྦེ དྷམྨཱ ཝིཉྙཱཏཱ ཧོནྟི. ཨིམེསཾ ཏིཎྞཾ ནཡཱནཾ སཱིཧཝིཀྐཱིལི༹ཏནཡསྶ ཙཏྟཱརི ཕལཱནི པརིཡོསཱནཾ. པཋམཱཡ དིསཱཡ པཋམཾ ཕལཾ, དུཏིཡཱཡ དིསཱཡ དུཏིཡཾ ཕལཾ, ཏཏིཡཱཡ དིསཱཡ ཏཏིཡཾ ཕལཾ, ཙཏུཏྠཱཡ དིསཱཡ ཙཏུཏྠཾ ཕལཾ. ཏིཔུཀྑལསྶ ནཡསྶ ཏཱིཎི ཝིམོཀྑམུཁཱནི པརིཡོསཱནཾ. པཋམཱཡ དིསཱཡ ཨཔྤཎིཧིཏཾ, དུཏིཡཱཡ དིསཱཡ སུཉྙཏཾ, ཏཏིཡཱཡ དིསཱཡ ཨནིམིཏྟཾ. ནནྡིཡཱཝཊྚསྶ ནཡསྶ རཱགཝིརཱགཱ ཙེཏོཝིམུཏྟི ཨཝིཛྫཱཝིརཱགཱ ཙ པཉྙཱཝིམུཏྟི པརིཡོསཱནཾ ¶ . པཋམཱཡ དིསཱཡ རཱགཝིརཱགཱ ¶ ཙེཏོཝིམུཏྟི, དུཏིཡཱཡ དིསཱཡ ཨཝིཛྫཱཝིརཱགཱ པཉྙཱཝིམུཏྟི. ཨིམེ ཏཡོ ནཡཱ ཨིམེསཾ ཏིཎྞཾ ནཡཱནཾ ཨཊྛཱརསནྣཾ མཱུལཔདཱནཾ ཨཱལོཀནཱ, ཨཡཾ ཝུཙྩཏི དིསཱལོཀནོ [དིསཱལོཙནོ (ཀ.)] ནཡོ. ཨཱལོཀེཏྭཱན ཛཱནཱཏི ‘‘ཨཡཾ དྷམྨོ ཨིམཾ དྷམྨཾ བྷཛཏཱི’’ཏི སམྨཱ ཡོཛནཱ. ཀུསལཔཀྑེ ཨཀུསལཔཀྑེ ཙ ཨཡཾ ནཡོ ཨངྐུསོ ནཱམ. ཨིམེ པཉྩ ནཡཱ.

ཏཎྷཱ ཙ ཨཝིཛྫཱཔི ཙ, ལོབྷོ དོསོ ཏཐེཝ མོཧོ ཙ;

ཙཏྟཱརོ ཙ ཝིཔལླཱསཱ, ཀིལེསབྷཱུམཱི ནཝ པདཱནི.

ཡེ ¶ ཙ སཏིཔཊྛཱནཱ, སམཐོ ཙ ཝིཔསྶནཱ ཀུསལམཱུལཱ;

ཨེཏཾ སབྦཾ ཀུསལཾ, ཨིནྡྲིཡབྷཱུམཱི ནཝ པདཱནི.

སབྦཀུསལཾ ནཝཧི པདེཧི ཡུཛྫཏི, ནཝཧི ཙེཝ ཨཀུསལཾ;

ཨེཏེ ཏེ མཱུལཔདཱ, ཨུབྷཏོ ཨཊྛཱརས པདཱནི.

ཏཎྷཱ ཙེཝ ཨཝིཛྫཱ ཙ, སམཐོ ཙ ཝིཔསྶནཱ;

ཡོ ནེཏི སབྦེསུ ཡོགཡུཏྟོ, ཨཡཾ ནཡོ ནནྡིཡཱཝཊྚོ.

ཡཾ ཀུསལམཱུལེཧི, ནཡཏི ཀུསལཨཀུསལམཱུལེཧི;

བྷཱུཏཾ ཏཐཾ ཨཝིཏཐཾ, ཏིཔུཀྑལཾ ཏཾ ནཡཾ ཨཱཧུ.

སོ ནེཏི ཝིཔལླཱསེཧི, ཀིལེསཨིནྡྲིཡེཧི ཙ;

དྷམྨེ ཏཾ ནཡཾ ཝིནཡམཱཧུ, སཱིཧཝིཀྐཱིལི༹ཏཾ ནཱམ.

ཝེཡྻཱཀརཎེ ཝུཏྟེ, ཀུསལཏཱཧི ཨཀུསལཏཱཧི ཙ;

ཏཡོ ཨཱལོཀཡཏི, ཨཡཾ ནཡོ དིསཱལོཙནོ ནཱམ.

ཨོལོཀེཏྭཱ དིསཱལོཙནེན, ཨུཀྑིཔིཡ ཡཾ སམཱནེཏི;

སབྦེ ཀུསལཱཀུསལེ, ཨཡཾ ནཡོ ཨངྐུསོ ནཱམ.

པེཊཀོཔདེསེ ¶ མཧཱཀཙྩཱཡནསྶ ཐེརསྶ སུཏྟཝིབྷངྒསྶ

ཡཱནི ¶ ཙཏུཀྐཱནི ཨཀུསལཱནི ཀུསལཱནི ཙ སཱིཧཝིཀྐཱིལི༹ཏེ ནཡེ ནིདྡིཊྛཱནི, ཏིཀཱནི ཀུསལཱནི ཙ ཨཀུསལཱནི ཙ ཏིཔུཀྑལེ ནཡེ ནིདྡིཊྛཱནི, དུཀཱནི ཀུསལཱནི ཙ ཨཀུསལཱནི ཙ ནནྡིཡཱཝཊྚེ ནཡེ ནིདྡིཊྛཱནི. ཡེསུ ¶ དྭཱིསུ དྷམྨེསུ [ཝིསུདྡྷཱིསུ (ཀ.)] ཀུསལེསུ སོ ཨཏྠོ ཏིཀེསུ ཝིབྷཛྫམཱནསྶ བྷཝབྷཱུམི, ཨཐ ཙ སབྦོ [པུབྦོ (ཀ.)] ཙ ཨཏྠོ ཏཱིཧི བྱཉྫནེཧི ནིདྡིསཏི. ཏཏྟཀཱནི ཝུཙྩཏི. ཡོ ཨཏྠོ ཙཏཱུཧི པདེཧི ཨཊྛཝཱིསཏིབྷཱགེཧི ནཏྠིབྷཱུམི ནིདྡིསིཏུཾ, ཨཝཙརནྟོཝ ཙཏཱུཧི པདེཧི ནིདྡིསཏི. ཨིཏི ཡཾ ཡཐཱནིདྡིཊྛསྶ ཨཝིཀོསནཱ ཨིདཾ པམཱཎཾ. ཡཐཱ སབྦེ སམཱདྷཡོ ཏཱིསུ སམཱདྷཱིསུ པརིཡེསིཏབྦཱ, སཝིཏཀྐསཝིཙཱརེ ཨཝིཏཀྐཝིཙཱརམཏྟེ ཨཝིཏཀྐཨཝིཙཱརེ ཨིདཾ པམཱཎཾ, ནཏྠི ཙཏུཏྠོ སམཱདྷི. ཏཐཱ ཏིསྶོ པཉྙཱ ཙིནྟཱམཡཱི སུཏམཡཱི བྷཱཝནཱམཡཱི སབྦཱསུ པཉྙཱསུ ནིདྡིསཏི, ནཏྠི ཙཏུཏྠཱི པཉྙཱ ན ཙིནྟཱམཡཱི ན སུཏམཡཱི ན བྷཱཝནཱམཡཱི, པཉྙཱ ནཱསྶ ཨཏྠི ཨིམེསཾ དྷམྨཱནཾ ཡཱ ཨཝིཀྑེཔནཱ, ཨིདཾ ཝུཙྩཏི པམཱཎནྟི.

ཐེརསྶ མཧཱཀཙྩཱཡནསྶ ཛམྦུཝནཝཱསིནོ པེཊཀོཔདེསོ