📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིནཡཔིཊཀེ

སཱརཏྠདཱིཔནཱི-ཊཱིཀཱ (དུཏིཡོ བྷཱགོ)

༡. པཱརཱཛིཀཀཎྜཾ

༡. པཋམཔཱརཱཛིཀཾ

སུདིནྣབྷཱཎཝཱརཝཎྞནཱ

༢༤. ཨནུཔདཝཎྞནནྟི ¶ ¶ པདཾ པདཾ པཊིཝཎྞནཾ, པདཱནུཀྐམེན ཝཎྞནཾ ཝཱ. བྷཎྜཔྤཡོཛནཨུདྡྷཱརསཱརཎཱདིནཱ ཀིཙྩེནཱཏི ཨེཏྠ ཝིཀྐཱཡིཀབྷཎྜསྶ ཝིཀྐིཎནཾ བྷཎྜཔྤཡོཛནཾ, དཱཏུཾ ¶ སངྐེཏིཏེ དིཝསེ གནྟྭཱ གཧཎཾ ཨུདྡྷཱརོ, ‘‘ཨསུཀསྨིཾ དིཝསེ དཱཏབྦ’’ནྟི སཏུཔྤཱདནཾ སཱརཎཾ. ཙཏུབྦིདྷཱཡཱཏི ཁཏྟིཡབྲཱཧྨཎགཧཔཏིསམཎཱནཾ ཝསེན ཙཏུབྦིདྷཱཡ, བྷིཀྑུབྷིཀྑུནཱིཨུཔཱསཀཨུཔཱསིཀཱནཾ ཝསེན ཝཱ. དིསྭཱནསྶ ཨེཏདཧོསཱིཏི ཧེཏུཨཏྠོ ཨཡཾ དིསྭཱན-སདྡོ ཨསམཱནཀཏྟུཀོ ཡཐཱ ‘‘གྷཏཾ པིཝིཏྭཱ བལཾ ཧོཏི, སཱིཧཾ དིསྭཱ བྷཡཾ ཧོཏཱི’’ཏི. དསྶནཀཱརཎཱ ཧི ཨེཝཾ པརིཝིཏཀྐནཾ ཨཧོསི. ཀིཉྩཱཔི ཨེཏྠ ‘‘བྷབྦཀུལཔུཏྟསྶཱ’’ཏི ཝུཏྟཾ, ཏཐཱཔི ཨུཔནིསྶཡསམྤནྣསྶཔི ཨཛཱཏསཏྟུནོ ཝིཡ ཨནྟརཱཡོ བྷཝིསྶཏཱིཏི ཨིམསྶ ཐེརསྶཔི ཀཏཔཱཔཀམྨམཱུལཝིཔྤཊིསཱརཝསེན ཨདྷིགམནྟརཱཡོ ཨཧོསཱིཏི ཝདནྟི.

ཀིཾ པན ཡེསཾ མགྒཕལཱནཾ ཨུཔནིསྶཡོ ཨཏྠི, བུདྡྷཱནཾ སམྨུཁཱིབྷཱཝེཔི ཏེསཾ ཨནྟརཱཡོ ཧོཏཱིཏི? ཨཱམ ཧོཏི, ན པན བུདྡྷེ པཊིཙྩ. བུདྡྷཱ ཧི པརེསཾ ¶ མགྒཕལཱདྷིགམཱཡ ཨུསྶཱཧཛཱཏཱ ཏཏྠ ནིརནྟརཾ ཡུཏྟཔཡུཏྟཱ ཨེཝ ཧོནྟི, ཏསྨཱ ཏེ པཊིཙྩ ཏེསཾ ཨནྟརཱཡོ ན ཧོཏི, ཨཐ ཁོ ཀིརིཡཱཔརིཧཱནིཡཱ ཝཱ པཱཔམིཏྟཏཱཡ ཝཱ ཧོཏི, ཀིརིཡཱཔརིཧཱནི ཙ དེསཀསྶ ཏསྶེཝ ཝཱ པུགྒལསྶ ཏཛྫཔཡོགཱབྷཱཝཏོ ཝེདིཏབྦཱ, དེསཀཝསེན པནེཏྠ པརིཧཱནི སཱཝཀཱནཾ ཝསེནེཝ ཝེདིཏབྦཱ, ན བུདྡྷཱནཾ ཝསེན. ཏཐཱ ཧི སཙེ དྷམྨསེནཱཔཏི དྷནཉྫཱནིཡསྶ བྲཱཧྨཎསྶ ཨཱསཡཾ ཉཏྭཱ དྷམྨཾ དེསཡིསྶ, བྲཱཧྨཎོ སོཏཱཔནྣོ ཨབྷཝིསྶ. ཨེཝཾ ཏཱཝ དེསཀསྶ ཝསེན ཀིརིཡཱཔརིཧཱནིཡཱ ཨནྟརཱཡོ ཧོཏི. སཙེ པེསྶོ ཧཏྠཱརོཧཔུཏྟོ བྷགཝཏོ སམྨུཁཱ དྷམྨཾ སུཎནྟོ མུཧུཏྟཾ ནིསཱིདེཡྻ, ཡཱཝ ཏསྶ བྷགཝཱ ཨཏྟནྟཔཱདིཀེ ཙཏྟཱརོ པུགྒལེ ཝིཏྠཱརེན ཝིབྷཛིཏྭཱ དེསེཏི, སོཏཱཔཏྟིཕལེན སཾཡུཏྟོ ཨབྷཝིསྶ. ཨེཝཾ པུགྒལསྶ ཝསེན ཀིརིཡཱཔརིཧཱནིཡཱ ཨནྟརཱཡོ ཧོཏི ནཱམ. ཨིམསྶ ཧི ཨུཔཱསཀསྶ ཀིརིཡཱཔརིཧཱནི ཛཱཏཱ ཨཔརིནིཊྛིཏཱཡ དེསནཱཡ ཨུཊྛཧིཏྭཱ པཀྐནྟཏྟཱ. སཙེ ཨཛཱཏསཏྟུ དེཝདཏྟསྶ ཝཙནཾ གཧེཏྭཱ པིཏུགྷཱཏཀམྨཾ ནཱཀརིསྶ, སཱམཉྙཕལསུཏྟཀཐིཏདིཝསེ སོཏཱཔནྣོ ཨབྷཝིསྶ, ཏསྶ ཝཙནཾ གཧེཏྭཱ པིཏུགྷཱཏཀམྨསྶ ཀཏཏྟཱ པན ནཱཧོསི. ཨེཝཾ པཱཔམིཏྟཏཱཡ ཨནྟརཱཡོ ཧོཏི. སུདིནྣསྶཔི པཱཔམིཏྟཝསེན ཨནྟརཱཡོ ཨཧོསཱིཏི དཊྛབྦཾ. ཡདི ཧི ཏེན མཱཏཱཔིཏཱུནཾ ཝཙནཾ གཧེཏྭཱ པུརཱཎདུཏིཡིཀཱཡ མེཐུནདྷམྨོ པཊིསེཝིཏོ ནཱབྷཝིསྶ, ན ཏཾམཱུལཝིཔྤཊིསཱརཝསེན ཨདྷིགམནྟརཱཡོ ཨབྷཝིསྶ.

ཡནྣཱུནཱཏི པརིཝིཏཀྐནཏྠེ ནིཔཱཏོཏི ཨཱཧ ‘‘པརིཝིཏཀྐདསྶནམེཏ’’ནྟི. ‘‘དྷམྨཾ སུཎེཡྻ’’ནྟི ཀིརིཡཱཔདེན ཝུཙྩམཱནོ ཨེཝ ཧི ཨཏྠོ ‘‘ཡནྣཱུནཱ’’ཏི ནིཔཱཏཔདེན ཛོཏཱིཡཏི. ཨཧཾ ཡནྣཱུན དྷམྨཾ སུཎེཡྻནྟི ཡོཛནཱ. ཡནྣཱུནཱཏི ཙ ཡདི པནཱཏི ཨཏྠོ. ཡདི པནཱཏི ཨིདམྤི ཧི ཏེན སམཱནཏྠམེཝ. ཡཾ དྷམྨཾ སུཎཱཏཱིཏི སམྦནྡྷོ. ཨུལཱ༹རུལཱ༹རཛནཱཏི ཁཏྟིཡམཧཱསཱལཱདིཨུལཱ༹རུལཱ༹རཛནཱཀིཎྞཱ ¶ . སཙེ ཨཡམྤི པཋམཾ ཨཱགཙྪེཡྻ, བྷགཝནྟཾ ཨུཔསངྐམིཏྭཱ ནིསཱིདིཏུཾ ཨརཧརཱུཔོཏི ཨཱཧ ‘‘པཙྪཱ ཨཱགཏེནཱ’’ཏི. སིཀྑཏྟཡཱུཔསཾཧིཏནྟི ཨདྷིསཱིལཨདྷིཙིཏྟཨདྷིཔཉྙཱསངྑཱཏསིཀྑཏྟཡཡུཏྟཾ. ཐོཀཾ དྷམྨཀཐཾ སུཏྭཱ ཨཧོསཱིཏི སམྦནྡྷོ. ཨིདྷཱཔི སུཏྭཱ-སདྡོ ཧེཏུཨཏྠོཏི དཊྛབྦོ, སཝནཀཱརཎཱ ཨེཏདཧོསཱིཏི ཝུཏྟཾ ¶ ཧོཏི. ཡདི ཨེཝཾ ཨཐ ཀསྨཱ ‘‘ཨེཀམནྟཾ ནིསིནྣསྶ…པེ… ཨེཏདཧོསཱི’’ཏི ཝུཏྟནྟི ཨཱཧ ‘‘ཏཾ པནསྶ ཡསྨཱ’’ཏིཨཱདི. ཏཏྠ ཏནྟི པརིཝིཏཀྐནཾ.

སངྑེཔཀཐཱཏི ཝིསུཾ ཝིསུཾ པདུདྡྷཱརཾ ཨཀཏྭཱ སམཱསཏོ ཨཏྠཝཎྞནཱ. ཡེན ཡེན ཨཱཀཱརེནཱཏི ཡེན ཡེན པཀཱརེན. ཏེན ཏེན མེ ཨུཔཔརིཀྑཏོཏི ‘‘ཀཱམཱ ནཱམེཏེ ཨནིཙྩཱ དུཀྑཱ ཝིཔརིཎཱམདྷམྨཱ ཨཊྛིཀངྐལཱུཔམཱ’’ཏི (མ. ནི. ༡.༢༣༤; ༢.༤༢; པཱཙི. ༤༡༧; མཧཱནི. ༣; ཙཱུལ༹ནི. ཁགྒཝིསཱཎསུཏྟནིདྡེས ༡༤༧) ཙ ཨཱདིནཱ ཡེན ཡེན ཨཱཀཱརེན ཀཱམེསུ ཨཱདཱིནཝཾ ཨོཀཱརཾ སཾཀིལེསཾ, ཏབྦིཔརིཡཱཡཏོ ནེཀྑམྨེ ཨཱནིསཾསཾ གུཎཾ པཀཱསེནྟཾ བྷགཝཏཱ དྷམྨཾ དེསིཏཾ ཨཱཛཱནཱམི ཨཝབུཛ྄ཛྷཱམི, ཏེན ཏེན པཀཱརེན ཨུཔཔརིཀྑཏོ ཝཱིམཾསནྟསྶ མཡ྄ཧཾ ཨེཝཾ ཧོཏི ཨེཝཾ ཨུཔཊྛཱཏི. སིཀྑཏྟཡབྲཧྨཙརིཡནྟི ཨདྷིསཱིལསིཀྑཱདིསིཀྑཏྟཡསངྒཧཾ སེཊྛཙརིཡཾ. ཨེཀམྤི དིཝསནྟི ཨེཀདིཝསམཏྟམྤི. ཨཁཎྜཾ ཀཏྭཱཏི དུཀྐཊམཏྟསྶཔི ཨནཱཔཛྫནེན ཨཁཎྜིཏཾ ཀཏྭཱ, ཨཁཎྜཨཙྪིདྡཱདིབྷཱཝཱཔཱདནེན ཝཱ. ཨཁཎྜལཀྑཎཝཙནཉྷེཏཾ. ཙརིམཀཙིཏྟནྟི ཙུཏིཙིཏྟཾ. ཀིཉྩིཔི ཨེཀདེསཾ ཨསེསེཏྭཱ ཨེཀནྟེནེཝ པརིཔཱུརེཏབྦཏཱཡ ཨེཀནྟཔརིཔུཎྞཾ. ཀིལེསམལེན ཨམལཱིནཾ ཀཏྭཱཏི ཏཎྷཱསཾཀིལེསཱདིནཱ ཨསཾཀིལིཊྛཾ ཀཏྭཱ, ཙིཏྟུཔྤཱདམཏྟམྤི སཾཀིལེསམལཾ ཨནུཔྤཱདེཏྭཱ. ཨཙྩནྟམེཝ ཝིསུདྡྷཾ ཀཏྭཱ པརིཧརིཏབྦཏཱཡ ཨེཀནྟཔརིསུདྡྷཾ. ཏཏོ ཨེཝ སངྑཾ ཝིཡ ལིཁིཏནྟི སངྑལིཁིཏཾ. ཏེནཱཧ ‘‘ལིཁིཏསངྑསདིས’’ནྟི. པརིཡོདཱཏཊྛེན ནིམྨལབྷཱཝེན སངྑཾ ཝིཡ ལིཁིཏཾ དྷོཏནྟི སངྑལིཁིཏནྟི ཨཱཧ ‘‘དྷོཏསངྑསཔྤཊིབྷཱག’’ནྟི. ‘‘ཨཛ྄ཛྷཱཝསཏཱ’’ཏི པདཔྤཡོགེན ཨགཱརནྟི བྷུམྨཏྠེ ཨུཔཡོགཝཙནནྟི ཨཱཧ ‘‘ཨགཱརམཛ྄ཛྷེ’’ཏི. དཱཋིཀཱཔི མསྶུགྒཧཎེནེཝ གཧེཏྭཱ ‘‘མསྶུ’’ཏྭེཝ ཝུཏྟཾ, ཨུཏྟརཱདྷརམསྶུནྟི ཨཏྠོ. ཀསཱཡེན རཏྟཱནཱིཏི ཀཱསཱཡཱནཱིཏི ཨཱཧ ‘‘ཀསཱཡརསཔཱིཏཏཱཡཱ’’ཏི. པརིདཧིཏྭཱཏི ནིཝཱསེཏྭཱ ཙེཝ པཱརུཔིཏྭཱ ཙ. ཨགཱརསྶ ཧིཏནྟི ཨགཱརཝཱསོ ཨགཱརཾ ཨུཏྟརཔདལོཔེན, ཏསྶ ཝཌྜྷིཨཱཝཧཾ ཨགཱརསྶ ཧིཏཾ.

༢༥. ཉཱཏིསཱལོཧིཏཱཏིཨཱདཱིསུ ‘‘ཨཡཾ ཨཛ྄ཛྷཏྟིཀོ’’ཏི ཛཱནནྟི, ཉཱཡནྟི ཝཱཏི ཉཱཏཱི, ལོཧིཏེན སམྦནྡྷཱཏི སཱལོཧིཏཱ. པིཏུཔཀྑིཀཱ ཉཱཏཱི, མཱཏུཔཀྑིཀཱ སཱལོཧིཏཱ. མཱཏུཔཀྑིཀཱ པིཏུཔཀྑིཀཱ ཝཱ ཉཱཏཱི ¶ , སསྶུསསུརཔཀྑིཀཱ སཱལོཧིཏཱ. མིཏྟཱཡནྟཱིཏི མིཏྟཱ, ¶ མིནནྟི ཝཱ སབྦགུཡ྄ཧེསུ ཨནྟོ པཀྑིཔནྟཱིཏི མིཏྟཱ. ཀིཙྩཀརཎཱིཡེསུ སཧབྷཱཝཊྛེན ཨམཱ ཧོནྟཱིཏི ཨམཙྩཱ. མམཱཡཏཱིཏི མཱཏཱ, པིཡཱཡཏཱིཏི པིཏཱ. སརཱིརཀིཙྩལེསེནཱཏི ཨུཙྩཱརཔསྶཱཝཱདིསརཱིརཀིཙྩལེསེན. ཨནནུཉྙཱཏཾ པུཏྟཾ ན པབྦཱཛེཏཱིཏི ‘‘མཱཏཱཔིཏཱུནཾ ལོཀིཡམཧཱཛནསྶ ཙ ཙིཏྟཉྙཐཏྟཾ མཱ ཧོཏཱུ’’ཏི ན པབྦཱཛེཏི. ཏཏོཡེཝ ཙ སུདྡྷོདནམཧཱརཱཛསྶ ཏཐཱ ཝརོ དིནྣོ.

༢༦. དྷུརནིཀྑེཔེནཱཏི བྷཎྜཔྤཡོཛནཱདཱིསུ དྷུརནིཀྑེཔེན. ཏེནཱཧ ‘‘ན ཧཱི’’ཏིཨཱདི. པིཡཱཡིཏབྦོཏི པིཡོཏི ཨཱཧ ‘‘པཱིཏིཛནནཀོ’’ཏི. མནསྶ ཨཔྤཱཡནཏོ མནཱཔོཏི ཨཱཧ ‘‘མནཝཌྜྷནཀོ’’ཏི. སུཁེདྷིཏོ ཏརུཎདཱརཀཀཱལེ, ཏཏོ པརཉྩ སཔྤིཁཱིརཱདིསཱདུརསམནུཉྙབྷོཛནཱདིཨཱཧཱརསམྤཏྟིཡཱ སུཁཔརིཧཏོ. ཨཐ ཝཱ དལ༹ྷབྷཏྟིཀདྷཱཏིཛནཱདིཔརིཛནསམྤཏྟིཡཱ ཙེཝ པརིཙྪེདསམྤཏྟིཡཱ ཙ ཨུལཱ༹རཔཎཱིཏསུཁཔཙྩཡཱུཔཧཱརེཧི ཙ སུཁེདྷིཏོ, ཨཀིཙྪེནེཝ དུཀྑཔཙྩཡཝིནོདནེན སུཁཔརིཧཏོ. ཨཛ྄ཛྷཏྟིཀངྒསམྤཏྟིཡཱ ཝཱ སུཁེདྷིཏོ, བཱཧིརངྒསམྤཏྟིཡཱ སུཁཔརིཧཏོ.

ཀིཉྩཱིཏི ཨེཏསྶ ཝིཝརཎཾ ‘‘ཨཔྤམཏྟཀམྤི ཀལབྷཱག’’ནྟི. ཡདཱ ཛཱནཱཏི-སདྡོ བོདྷནཏྠོ ན ཧོཏི, ཏདཱ ཏསྶ པཡོགེ ‘‘སཔྤིནོ ཛཱནཱཏི, མདྷུནོ ཛཱནཱཏཱི’’ཏིཨཱདཱིསུ ཝིཡ ཀརཎཏྠེ སཱམིཝཙནཾ སདྡཏྠཝིདཱུ ཨིཙྪནྟཱིཏི ཨཱཧ ‘‘ཀིཉྩི དུཀྑེན ནཱནུབྷོསཱི’’ཏི. ཏེནཱཧ ‘‘ཀརཎཏྠེ སཱམིཝཙནཾ, ཨནུབྷཝནཏྠེ ཙ ཛཱནནཱ’’ཏི. ཨེཏྠ ཙ ཀིཉྩི དུཀྑེན ནཱནུབྷོསཱིཏི ཀེནཙི དུཀྑེན ཀརཎབྷཱུཏེན ཝིསཡཾ ནཱནུབྷོསཱིཏི ཨེཝམཏྠོ ཝེདིཏབྦོ. ‘‘ཀིཉྩཱི’’ཏི ཨེཏྠཱཔི ཧི ཀརཎཏྠེ སཱམིཝཙནསྶ ལོཔོ ཀཏོ. ཏེནེཝ ཙ ཝཀྑཏི ‘‘ཝིཀཔྤདྭཡེཔི པུརིམཔདསྶ ཨུཏྟརཔདེན སམཱནཝིབྷཏྟིལོཔོ དཊྛབྦོ’’ཏི. ཡདཱ པན ཛཱནཱཏི-སདྡོ སརཎཏྠོ ཧོཏི, ཏདཱ སརཎཏྠཱནཾ དྷཱཏུསདྡཱནཾ པཡོགེ ‘‘མཱཏུ སརཏི, པིཏུ སརཏི, བྷཱཏུ ཛཱནཱཏཱི’’ཏིཨཱདཱིསུ ཝིཡ ཨུཔཡོགཏྠེ སཱམིཝཙནཾ སདྡསཏྠཝིདཱུ ཝདནྟཱིཏི ཨཱཧ ‘‘ཨཐ ཝཱ ཀིཉྩི དུཀྑཾ ནསྶརསཱིཏི ཨཏྠོ’’ཏི, ཀསྶཙི དུཀྑསྶ ཨནནུབྷཱུཏཏྟཱ ཨཏྟནཱ ཨནུབྷཱུཏཾ ཨཔྤམཏྟཀམྤི དུཀྑཾ པརིཡེསམཱནོཔི ཨབྷཱཝཏོཡེཝ ནསྶརསཱིཏི ཨཏྠོ ¶ . ཝིཀཔྤདྭཡེཔཱིཏི ཨནུབྷཝནསརཎཏྠཝསེན ཝུཏྟེ དུཏིཡཏཏིཡཝིཀཔྤདྭཡེ. པུརིམཔདསྶཱཏི ‘‘ཀིཉྩཱི’’ཏི པདསྶ. ཨུཏྟརཔདེནཱཏི ‘‘དུཀྑསྶཱ’’ཏི པདེན. སམཱནཝིབྷཏྟིལོཔོཏི ཨུཏྟརཔདེན སམཱནསྶ སཱམིཝཙནསྶ ལོཔོ. ‘‘ཀསྶཙི དུཀྑསྶཱ’’ཏི ཝཏྟབྦེ ཝིཀཔྤདྭཡེཔི པུརིམཔདེ སཱམིཝཙནསྶ ལོཔཾ ཀཏྭཱ ‘‘ཀིཉྩི དུཀྑསྶཱ’’ཏི ནིདྡེསོ ཀཏོ. ཨནིཙྪཀཱཏི ཨནིཙྪནྟཱ. ཨེཝཾ སནྟེཏི ནནུ མཡཾ སུདིནྣ སཱམཱདཱིསུ ཀེནཙིཔི ཨུཔཱཡེན ཨཔྤཊིསཱདྷནེན ཨཔྤཊིཀཱརེན མརཎེནཔི ཏཡཱ ཨཀཱམཀཱཔི ¶ ཝིནཱ བྷཝིསྶཱམ, ཨེཝཾ སཏི. ཡེནཱཏི ཡེན ཀཱརཎེན. ཀིཾ པནཱཏི ཨེཏྠ ཀིནྟི ཀརཎཏྠེ པཙྩཏྟཝཙནནྟི དསྶེནྟོ ཨཱཧ ‘‘ཀེན པན ཀཱརཎེནཱ’’ཏི.

༢༨. གནྡྷབྦནཊནཱཊཀཱདཱིནཱིཏི ཨེཏྠ གནྡྷབྦཱ ནཱམ གཱཡནཀཱ, ནཊཱ ནཱམ རངྒནཊཱ, ནཱཊཀཱ ལངྒྷནཀཱདཡོ. པརིཙཱརེཧཱིཏི ཨེཏྠ པརིཏོ ཏཏྠ ཏཏྠ ཡཐཱསཀཾ ཝིསཡེསུ ཙཱརེཧཱིཏི ཨཏྠོཏི ཨཱཧ ‘‘ཨིནྡྲིཡཱནི ཙཱརེཧཱི’’ཏིཨཱདི. པརིཙཱརེཧཱིཏི ཝཱ སུཁཱུཔཀརཎེཧི ཨཏྟཱནཾ པརིཙཱརེཧི ཨཏྟནོ པརིཙརཎཾ ཀཱརེཧི. ཏཐཱབྷཱུཏོ ཙ ཡསྨཱ ལལ༹ནྟོ ཀཱིལ༹ནྟོ ནཱམ ཧོཏི, ཏསྨཱ ‘‘ལལཱ༹’’ཏིཨཱདི ཝུཏྟཾ. བྷུཉྫིཏབྦཏོ པརིབྷུཉྫིཏབྦཏོ ཝིསེསཏོ པཉྩ ཀཱམགུཎཱ བྷོགཱ ནཱམཱཏི ཨཱཧ ‘‘བྷོགེ བྷུཉྫནྟོ’’ཏི. དཱནཔྤདཱནཱནཱིཏི ཨེཏྠ ནིཙྩདཱནཾ དཱནཾ ནཱམ, ཨུཔོསཐདིཝསཱདཱིསུ དཱཏབྦཾ ཨཏིརེཀདཱནཾ པདཱནཾ ནཱམ. པཝེཎཱིརཀྑཎཝསེན ཝཱ དཱིཡམཱནཾ དཱནཾ ནཱམ, ཨཏྟནཱཝ པཊྛཔེཏྭཱ དཱིཡམཱནཾ པདཱནཾ ནཱམ. པཙུརཛནསཱདྷཱརཎཾ ཝཱ ནཱཏིཨུལཱ༹རཾ དཱནཾ ནཱམ, ཨནཉྙསཱདྷཱརཎཾ ཨཏིཨུལཱ༹རཾ པདཱནཾ ནཱམ. ཨཱདི-སདྡེན སཱིལཱདཱིནི སངྒཎྷཱཏི. ནཏྠི ཨེཏསྶ ཝཙནཔྤཊིཝཙནསངྑཱཏོ ཨཱལཱཔསལླཱཔོཏི ནིརཱལཱཔསལླཱཔོ.

༣༠. བལཾ གཱཧེཏྭཱཏི ཨེཏྠ བལགྒཧཎཾ ནཱམ ཀཱཡབལསྶ ཨུཔྤཱདནམེཝཱཏི ཨཱཧ ‘‘ཀཱཡབལཾ ཛནེཏྭཱ’’ཏི. ཨསྶུམུཁནྟི ཨསྶཱུནི མུཁེ ཨེཏསྶཱཏི ཨསྶུམུཁོ, ཏཾ ཨསྶུམུཁཾ, ཨསྶུཀིལིནྣམུཁནྟི ཨཏྠོ. གཱམོཡེཝ གཱམནྟསེནཱསནཾ གཱམཔརིཡཱཔནྣཏྟཱ གཱམནྟསེནཱསནསྶ. ཨཏིརེཀལཱབྷཔཊིཀྑེཔེནཱཏི ‘‘པིཎྜིཡཱལོཔབྷོཛནཾ ནིསྶཱཡཱ’’ཏི (མཧཱཝ. ༡༢༨) ཨེཝཾ ཝུཏྟབྷིཀྑཱཧཱརལཱབྷཏོ ཨདྷིཀལཱབྷོ སངྒྷབྷཏྟཱདིཨཏིརེཀལཱབྷོ, ཏསྶ པཊིཀྑེཔེནཱཏི ཨཏྠོ. ཏེནཱཧ ‘‘ཙུདྡས ¶ བྷཏྟཱནི པཊིཀྑིཔིཏྭཱ’’ཏི. སངྒྷབྷཏྟཾ ཨུདྡེསབྷཏྟཾ ནིམནྟནབྷཏྟཾ སལཱཀབྷཏྟཾ པཀྑིཀཾ ཨུཔོསཐིཀཾ པཱཊིཔདིཀཾ ཨཱགནྟུཀབྷཏྟཾ གམིཀབྷཏྟཾ གིལཱནབྷཏྟཾ གིལཱནུཔཊྛཱཀབྷཏྟཾ ཝིཧཱརབྷཏྟཾ དྷུརབྷཏྟཾ ཝཱརབྷཏྟནྟི ཨིམཱནི ཙུདྡས བྷཏྟཱནི. ཏཏྠ སཀལསྶ སངྒྷསྶ དཱཏབྦཾ བྷཏྟཾ སངྒྷབྷཏྟཾ. ཀཏིཔཡེ བྷིཀྑཱུ ཨུདྡིསིཏྭཱ དཱཏབྦཾ བྷཏྟཾ ཨུདྡེསབྷཏྟཾ. ཨེཀསྨིཾ པཀྑེ ཨེཀདིཝསཾ དཱཏབྦཾ བྷཏྟཾ པཀྑིཀཾ. ཨུཔོསཐེ དཱཏབྦཾ བྷཏྟཾ ཨུཔོསཐིཀཾ. པཱཊིཔདདིཝསེ དཱཏབྦཾ བྷཏྟཾ པཱཊིཔདིཀཾ. ཝིཧཱརཾ ཨུདྡིསྶ དཱཏབྦཾ བྷཏྟཾ ཝིཧཱརབྷཏྟཾ. དྷུརགེཧེཡེཝ ཋཔེཏྭཱ དཱཏབྦཾ བྷཏྟཾ དྷུརབྷཏྟཾ. གཱམཝཱསཱིཨཱདཱིཧི ཝཱརེན དཱཏབྦཾ བྷཏྟཾ ཝཱརབྷཏྟཾ.

ཨཐ ‘‘གཧཔཏིཙཱིཝརཾ པཊིཀྑིཔིཏྭཱ’’ཏི ཀསྨཱ ཝུཏྟཾ. གཧཎེ ཧི སཏི པཊིཀྑེཔོ ཡུཛྫེཡྻ, ན ཙ པཋམབོདྷིཡཾ གཧཔཏིཙཱིཝརསྶ པཊིགྒཧཎཾ ཨནུཉྙཱཏཾ པརཏོ ཛཱིཝཀཝཏྠུསྨིཾ ཨནུཉྙཱཏཏྟཱ. ཏེནེཝ ཝཀྑཏི ཛཱིཝཀཝཏྠུསྨིཾ (མཧཱཝ. ཨཊྛ. ༣༣༧) ‘‘བྷགཝཏོ ཧི བུདྡྷབྷཱཝཔྤཏྟིཏོ ¶ པཊྛཱཡ ཡཱཝ ཨིདཾ ཝཏྠཾ, ཨེཏྠནྟརེ ཝཱིསཏི ཝསྶཱནི ན ཀོཙི གཧཔཏིཙཱིཝརཾ སཱདིཡི, སབྦེ པཾསུཀཱུལིཀཱཝ ཨཧེསུ’’ནྟི. སུདིནྣོ ཙ པཋམབོདྷིཡཾཡེཝ པབྦཛིཏོ. ཏེནེཝ ཝཀྑཏི ‘‘སུདིནྣོ ཧི བྷགཝཏོ དྭཱདསམེ ཝསྶེ པབྦཛིཏོ, ཝཱིསཏིམེ ཝསྶེ ཉཱཏིཀུལཾ པིཎྜཱཡ པཝིཊྛོ, སཡཾ པབྦཛྫཱཡ ཨཊྛཝསྶིཀོ ཧུཏྭཱ’’ཏི. ཏསྨཱ ‘‘གཧཔཏིཙཱིཝརཾ པཊིཀྑིཔིཏྭཱ’’ཏི ཀསྨཱ ཝུཏྟནྟི? ཝུཙྩཏེ – ཨནནུཉྙཱཏེཔི གཧཔཏིཙཱིཝརེ པཾསུཀཱུལིཀངྒསམཱདཱནཝསེན གཧཔཏིཙཱིཝརཾ པཊིཀྑིཏྟཾ ནཱམ ཧོཏཱིཏི ཀཏྭཱ ཝུཏྟཾ ‘‘གཧཔཏིཙཱིཝརཾ པཊིཀྑིཔིཏྭཱ’’ཏི.

ལོལུཔྤཙཱརཾ པཊིཀྑིཔིཏྭཱཏི ཀུསལབྷཎྜསྶ བྷུསཾ ཝིལུམྤནཊྛེན ལོལུཔྤཾ ཝུཙྩཏི ཏཎྷཱ, ལོལུཔྤེན ཙརཎཾ ལོལུཔྤཙཱརོ, ཏཎྷཱཝསེན གྷརཔཊིཔཱཊིཾ ཨཏིཀྐམིཏྭཱ བྷིཀྑཱཡ ཙརཎཾ, ཏཾ པཊིཀྑིཔིཏྭཱཏི ཨཏྠོ. ཏེནཱཧ ‘‘གྷརཔཊིཔཱཊིཡཱ བྷིཀྑཱཡ པཝིསཏཱི’’ཏི. ཨེཏྠ ཙ ཨཱརཉྙིཀངྒཱདིཔདྷཱནངྒཝསེན སེསདྷུཏངྒཱནིཔི གཧིཏཱནེཝ ཧོནྟཱིཏི ཝེདིཏབྦཾ. ཝཛྫཱིནནྟི རཱཛཱནོ ཨཔེཀྑིཏྭཱ སཱམིཝཙནཾ ཀཏཾ, ཝཛྫཱིརཱཛཱུནནྟི ཨཏྠོ. ཛནཔད-སདྡསྶ ཏཾནིཝཱསཱིསུཔི པཝཏྟནཏོ ‘‘ཝཛྫཱིསཱུ’’ཏི ཛནཔདཱཔེཀྑཾ བྷུམྨཝཙནཾ, ཝཛྫིནཱམཀེ ཛནཔདེཏི ཨཏྠོ.

ཨུཔབྷོགཔརིབྷོགཱུཔཀརཎམཧནྟཏཱཡཱཏི ¶ པཉྩཀཱམགུཎསངྑཱཏཱནཾ ཨུཔབྷོགཱནཉྩེཝ ཧཏྠིཨསྶརཐཨིཏྠིཡཱདིཨུཔབྷོགཱུཔཀརཎཱནཉྩ མཧནྟཏཱཡ. ཨུཔབྷོགཱུཔཀརཎཱནེཝ ཧི ཨིདྷ པརིབྷོགཱུཔཀརཎསདྡེན ཝུཏྟཱནི. ཏེནེཝཱཧ ‘‘ཡེ ཧི ཏེསཾ ཨུཔབྷོགཱ, ཡཱནི ཙ ཨུཔབྷོགཱུཔཀརཎཱནི, ཏཱནི མཧནྟཱནཱི’’ཏི. ‘‘ཨུཔབྷོགཱ ཧཏྠིཨསྶརཐཨིཏྠཱིཨཱདཡོ, ཨུཔབྷོགཱུཔཀརཎཱནི ཏེསམེཝ སུཝཎྞཱདིཨུཔཀརཎཱནཱི’’ཏིཔི ཝདནྟི. སཱརཀཱནཱིཏི སཱརབྷཱུཏཱནི. ནིདྷེཏྭཱཏི ནིདཧིཏྭཱ, ནིདྷཱནཾ ཀཏྭཱཏི ཨཏྠོ. དིཝསཔརིབྦཡསངྑཱཏབྷོགམཧནྟཏཱཡཱཏི དིཝསེ དིཝསེ པརིབྷུཉྫིཏབྦསངྑཱཏབྷོགཱནཾ མཧནྟཏཱཡ. ཛཱཏརཱུཔརཛཏསྶེཝ པཧཱུཏཏཱཡཱཏི པིཎྜཔིཎྜཝསེན ཙེཝ སུཝཎྞམཱསཀརཛཏམཱསཀཱདིཝསེན ཙ ཛཱཏརཱུཔརཛཏསྶེཝ པཧཱུཏཏཱཡ. ཝིཏྟཱིཏི ཏུཊྛི, ཝིཏྟིཡཱ ཨུཔཀརཎཾ ཝིཏྟཱུཔཀརཎཾ, པཧཱུཏཾ ནཱནཱཝིདྷཱལངྐཱརབྷཱུཏཾ ཝིཏྟཱུཔཀརཎམེཏེསནྟི པཧཱུཏཝིཏྟཱུཔཀརཎཱ. ཏེནཱཧ ‘‘ཨལངྐཱརབྷཱུཏསྶཱ’’ཏིཨཱདི. ཝོཧཱརཝསེནཱཏི ཝཎིཛྫཱཝསེན ཝཌྜྷིཀཏཱདིཝསེན. དྷནདྷཉྙསྶ པཧཱུཏཏཱཡཱཏི སཏྟརཏནསངྑཱཏསྶ དྷནསྶ སབྦཔུབྦཎྞཱཔརཎྞསངྒཧིཏསྶ དྷཉྙསྶ ཙ པཧཱུཏཏཱཡཱཏི ཨཏྠོ. ཏཏྠ ‘‘སུཝཎྞརཛཏམཎིམུཏྟཱཝེལུ༹རིཡཝཛིརཔཝཱལཱ༹ནི སཏྟ རཏནཱནཱི’’ཏི ཝདནྟི. སཱལིཝཱིཧིཨཱདི པུབྦཎྞཾ པུརཀྑཏཾ སསྶཕལནྟི ཀཏྭཱ, ཏབྦིཔརིཡཱཡཏོ མུགྒམཱསཱདི ¶ ཨཔརཎྞནྟི ཝེདིཏབྦཾ. ཨུཀྐཊྛཔིཎྜཔཱཏིཀཏྟཱཏི སེསདྷུཏངྒཔརིཝཱརིཏེན ཨུཀྐཊྛཔིཎྜཔཱཏདྷུཏངྒེན སམནྣཱགཏཏྟཱ. ཏེནཱཧ ‘‘སཔདཱནཙཱརཾ ཙརིཏུཀཱམོ’’ཏི.

༣༡. ཨནྟོཛཱཏཏཱཡ ཝཱ ཉཱཏིསདིསཱི དཱསཱིཏི ཉཱཏིདཱསཱི. པཱུཏིབྷཱཝེནེཝ ལཀྑིཏབྦདོསོ ཝཱ ཨཱབྷིདོསིཀོ, ཨབྷིདོསཾ ཝཱ པཙྩཱུསཀཱལཾ གཏོ པཏྟོ ཨཏིཀྐནྟོཏི ཨཱབྷིདོསིཀོ. ཏེནཱཧ ‘‘ཨེཀརཏྟཱཏིཀྐནྟསྶ ཝཱ’’ཏིཨཱདི. པཱུཏིབྷཱུཏབྷཱཝེན པརིབྷོགཾ ནཱརཧཏཱིཏི ཨཔརིབྷོགཱརཧོ. ཚཌྜནཱིཡསབྷཱཝེ ནིཙྪིཏེཔི པུཙྪཱཀཱལེ སནྡེཧཝོཧཱརཝསེནེཝ པུཙྪིཏུཾ ཡུཏྟནྟི ཨཱཧ ‘‘སཙེ’’ཏི. ཨརིཡཝོཧཱརེནཱཏི ཨརིཡསམུདཱཙཱརེན. ཨརིཡཱ ཧི མཱཏུགཱམཾ བྷགིནིཝཱདེན སམུདཱཙརནྟི. ནིསྶཊྛཔརིགྒཧནྟི པརིཙྩཏྟཱལཡཾ.

‘‘ཨཱཀིརཱ’’ཏི ཝུཏྟཏྟཱ ‘‘ཝིཉྙཏྟི ཝཱ’’ཏི ཝུཏྟཾ, ‘‘སཙེ ཏཾ ཚཌྜནཱིཡདྷམྨ’’ནྟི པརིཡཱཡཾ ཨམུཉྩིཏྭཱ ཝུཏྟཏྟཱ ‘‘པཡུཏྟཝཱཙཱ ཝཱ’’ཏི ཝུཏྟཾ, པཙྩཡཔཊིསཾཡུཏྟཱ ཝཱཙཱ པཡུཏྟཝཱཙཱ. ཝཏྟུཾ ཝཊྚཏཱིཏི ནིརཔེཀྑབྷཱཝཏོ ཝུཏྟཾ ¶ , ཨིདྷ པན ཝིསེསཏོ ཨཔརིབྷོགཱརཧཏྟཱཝ ཝཏྠུནོ. ཨགྒཨརིཡཝཾསིཀོཏི ཨརིཡཝཾསཔཊིཔཏྟིཔཱུརཀཱནཾ ཨགྒོ ཨུཏྟམོ. ནིམཱིཡཏི སཉྙཱཡཏཱིཏི ནིམིཏྟཾ, ཡཐཱསལླཀྑིཏོ ཨཱཀཱརོཏི ཨཱཧ ‘‘གིཧིཀཱལེ སལླཀྑིཏཔུབྦཾ ཨཱཀཱར’’ནྟི. ཧཏྠཔིཊྛིཨཱདཱིནི ཨོལོཀཡམཱནཱ ‘‘སཱམིཔུཏྟསྶ མེ སུདིནྣསྶ ཝིཡ སུཝཎྞཀཙྪཔཔིཊྛིསདིསཱ ཨིམཱ ཧཏྠཔཱདཔིཊྛིཡོ, ཧརིཏཱལཝཊྚིཡོ ཝིཡ སུཝཊྚིཏཱ ཨངྒུལིཡོ, མདྷུརོ སརོ’’ཏི གིཧིཀཱལེ སལླཀྑིཏཔུབྦཾ ཨཱཀཱརཾ ཨགྒཧེསི སཉྫཱནི སལླཀྑེསི. ཀསྨཱ པན སཱ ཉཱཏིདཱསཱི དིསྭཱཝ ན སཉྫཱནཱིཏི ཨཱཧ ‘‘སུདིནྣོ ཧཱི’’ཏིཨཱདི. པབྦཛྫུཔགཏེནཱཏི པབྦཛྫཾ ཨུཔགཏེན, པབྦཛིཏེནཱཏི ཨཏྠོ. གྷརཾ པཝིསིཏྭཱཏི གེཧསཱམིནིཡཱ ནིསཱིདིཏབྦཊྛཱནབྷཱུཏཾ ཨནྟོགེཧཾ པཝིསིཏྭཱ. ཡགྒྷེཏི ཨིམསྶ ཨཱརོཙཡཱམཱིཏི ཨཡམཏྠོཏི ཨཱཧ ‘‘ཨཱརོཙནཏྠེ ནིཔཱཏོ’’ཏི. ‘‘ཡགྒྷེ ཛཱནེཡྻཱསཱིཏི སུཊྛུ ཛཱནེཡྻཱསཱི’’ཏིཔི ཨཏྠཾ ཝདནྟི. ཨཱལཔནེཏི དཱསིཛནསྶ ཨཱལཔནེ. ཏེནཱཧ ‘‘ཨེཝཉྷཱི’’ཏིཨཱདི.

༣༢. གྷརེསུ སཱལཱ ཧོནྟཱིཏི གྷརེསུ ཨེཀམནྟེ བྷོཛནསཱལཱ ཧོནྟི པཱཀཱརཔརིཀྑིཏྟཱ སུསཾཝིཧིཏདྭཱརབནྡྷཱ སུསམྨཊྛཝཱལིཀངྒཎཱ. ཨུདཀཀཉྫིཡནྟི ཨུདཀཉྩ ཀཉྫིཡཉྩ. ཀསྨཱ པན ཨཱིདིསཱཡམེཝ སཱལཱཡ ཨཉྙཏརཾ ཀུཊྚམཱུལནྟི ཨཡམཏྠོ ཝུཏྟོཏི ཨཱཧ ‘‘ན ཧི པབྦཛིཏཱ’’ཏིཨཱདི. ཨསཱརུཔྤེ ཋཱནེཏི བྷིཀྑཱུནཾ ཨནནུཙྪཝིཀེ པདེསེ. ཨཏྠི ནུ ཁོཏི ནུ-སདྡོ པུཙྪནཏྠེ, ཁོ-སདྡོ ཝཙནསིལིཊྛཏཱཡ ཝུཏྟོ. ནུཁོཏི ཝཱ ནིཔཱཏསམུདཱཡོ པུཙྪནཏྠོ. ཏེན ནཱམ-སདྡསྶ པུཙྪནཏྠཏཾ དསྶེཏི. ཡེསཾ ནོ ཏྭནྟི ཡེསཾ ནོ པུཏྟོ ཏྭཾ. ཨཱིདིསེ ཋཱནེཏི ཀིཉྩཱཔི ¶ ཏཾ ཋཱནཾ བྷིཀྑཱུནཾ ཨནནུརཱུཔཾ ན ཧོཏི, ཏཐཱཔི མཱདིསཱནཾ མཧཱབྷོགཀུལཱནཾ པུཏྟསྶ པརཀུལེ ཨཱསནསཱལཱཡཾ ནིསཱིདིཏྭཱ བྷོཛནཾ ནཱམ ཨཡུཏྟརཱུཔནྟི མཉྙམཱནོ ཨཱཧ. ཏེནེཝཱཧ ‘‘ནནུ ནཱམ, ཏཱཏ སུདིནྣ, སཀཾ གེཧཾ གནྟབྦ’’ནྟི. ཨཉྙེནཔི པཀཱརེན ནཱམསདྡསྶ པུཙྪནཏྠཏམེཝ དསྶེནྟོ ཨཱཧ ‘‘ཏཐཱ ཨཏྠི ནུ ཁོ ཏཱཏཱ’’ཏིཨཱདི. ཏཐཱཏི སམུཙྩཡཏྠོ. ཨིདཱནི ནཱམསདྡསྶ མཉྙནཏྠཏཾ དསྶེནྟོ ཨཱཧ ‘‘ཏཐཱ ཨཏྠི མཉྙེ’’ཏིཨཱདི.

དུཀྑཱབྷིཏུནྣཏཱཡཱཏི མཱནསིཀེན དུཀྑེན ཨབྷིཔཱིལི༹ཏཏྟཱ. ཨེཏམཏྠནྟི ‘‘ཨཏྠི ནུ ཁོ, ཏཱཏ སུདིནྣ, ཨམྷཱཀཾ དྷན’’ནྟིཨཱདིནཱ ཡཐཱཝུཏྟམཏྠཾ. ཨནོཀཔྤནཱམརིསནཏྠཝསེནཱཏི ¶ ཨེཏྠ ཨནོཀཔྤནཾ ཨསདྡཧནཾ. ཨམརིསནཾ ཨསཧནཾ. ཨནཱགཏཝཙནཾ ཨནཱགཏསདྡཔྤཡོགོ, ཨཏྠོ པན ཝཏྟམཱནཀཱལིཀོཝ. ཏེནཱཧ ‘‘པཙྩཀྑམྤཱི’’ཏི. ན མརིསཡཱམཱིཏི ན ཝིསཧཱམི. ཏཾ ན སུནྡརནྟི ‘‘ཏདཱཡ’’ནྟི པཱཋཾ སནྡྷཱཡཱཧ. ཨལཾ, གཧཔཏི, ཀཏཾ མེ ཨཛྫ བྷཏྟཀིཙྩནྟི ཐེརོ ཨུཀྐཊྛཨེཀཱསནིཀཏཱཡ པཊིཀྑིཔནྟོ ཨེཝམཱཧ. ཨུཀྐཊྛཨེཀཱསནིཀཏཱཡཱཏི ཙ ཨིདཾ བྷཱུཏཀཐནཝསེན ཝུཏྟཾ ཐེརསྶ ཏཐཱབྷཱཝདཱིཔནཏྠཾ. མུདུཀསྶཔི ཧི ཨེཀཱསནིཀསྶ ཡཱཡ ནིསཛྫཱཡ ཀིཉྩིམཏྟམྤི བྷོཛནཾ བྷུཏྟཾ, ཝཏྟསཱིསེནཔི ཏཏོ ཝུཊྛིཏསྶ པུན བྷུཉྫིཏུཾ ན ཝཊྚཏི. ཏེནཱཧ ཏིཔིཊཀཙཱུལཱ༹བྷཡཏྠེརོ ‘‘ཨཱསནཾ ཝཱ རཀྑེཡྻ བྷོཛནཾ ཝཱ’’ཏི. ཨུཀྐཊྛཔིཎྜཔཱཏིཀོཔི སམཱནོཏི ནིདསྶནམཏྟམིདཾ, ཐེརོ སཔདཱནཙཱརིཀེསུཔི ཨུཀྐཊྛོཡེཝ. ཨུཀྐཊྛསཔདཱནཙཱརིཀོཔི ཧི པུརཏོ ཙ པཙྪཏོ ཙ ཨཱཧཊབྷིཀྑམྤི ཨགྒཧེཏྭཱཝ གྷརདྭཱརེ ཋཏྭཱ པཏྟཝིསྶཛྫནམེཝ ཀརོཏི, ཏསྨཱ ཐེརོ ཨུཀྐཊྛསཔདཱནཙཱརིཀཏྟཱཔི སྭཱཏནཱཡ བྷིཀྑཾ ནཱདྷིཝཱསེཏི. ཨཐ ཀསྨཱ ‘‘ཨདྷིཝཱསེསཱི’’ཏི ཨཱཧ ‘‘སཙེ ཨེཀབྷཏྟམྤི ན གཧེསྶཱམཱི’’ཏིཨཱདི. པཎྜིཏཱ ཧི མཱཏཱཔིཏཱུནཾ ཨཱཙརིཡུཔཛ྄ཛྷཱཡཱནཾ ཝཱ ཀཱཏབྦཾ ཨནུགྒཧཾ ཨཛ྄ཛྷུཔེཀྑིཏྭཱ དྷུཏངྒཝིསུདྡྷིཀཱ ན བྷཝནྟི.

༣༣. མཛ྄ཛྷིམཔྤམཱཎོཏི ཙཏུཧཏྠོ པུརིསོ མཛ྄ཛྷིམཔྤམཱཎོ. ‘‘ཚཧཏྠོ’’ཏིཔི ཀེཙི. ཏིརོ ཀརོནྟི ཨེཏཱཡཱཏི ཏིརོཀརཎཱིཏི སཱཎིཔཱཀཱརཝཙནོ ཨཡཾ ཏིརོཀརཎཱི-སདྡོཏི ཨཱཧ ‘‘ཏིརོཀརཎིཡནྟི ཀརཎཏྠེ བྷུམྨ’’ནྟི. ‘‘ཏིརོཀརཎིཡཱ’’ཏི ཝཏྟབྦེ ‘‘ཏིརོཀརཎིཡ’’ནྟི ཀརཎཏྠེ བྷུམྨཾ ཝུཏྟཾ. ཏིརོཀརཎཱིཡ-སདྡོ ཝཱ ཨཡཾ སཱཎིཔཱཀཱརཔརིཡཱཡོཏི དསྶེནྟོ ཨཱཧ ‘‘ཨཐ ཝཱ’’ཏིཨཱདི. ཏཾ པརིཀྑིཔིཏྭཱཏི ཏཾ སམནྟཏོ ཁིཔིཏྭཱ, པརིཏོ བནྡྷིཏྭཱཏི ཝུཏྟཾ ཧོཏི. ཏེནཱཧ ‘‘སམནྟཏོ ཀཏྭཱ’’ཏི. ཝིབྷཏྟིཔཏིརཱུཔཀོཔི ནིཔཱཏོ ཧོཏཱིཏི ཨཱཧ ‘‘ཏེནཱཏི ཨཡམྤི ཝཱ’’ཏིཨཱདི.

༣༤. ‘‘ཨཐ ¶ ཁོ ཨཱཡསྨཏོ སུདིནྣསྶ པིཏཱ སཀེ ནིཝེསནེ པཎཱིཏཾ ཁཱདནཱིཡཾ བྷོཛནཱིཡཾ པཊིཡཱདཱཔེཏྭཱ ཨཱཡསྨཏོ སུདིནྣསྶ ཀཱལཾ ཨཱརོཙེསི – ‘ཀཱལོ, ཏཱཏ སུདིནྣ, ནིཊྛིཏཾ བྷཏྟ’ནྟི’’ ཨེཝཾ ཀཱལཱརོཙནསྶ པཱལི༹ཡཾ ཨནཱརུལ༹ྷཏྟཱ ཨཱཧ – ‘‘ཀིཉྩཱཔི པཱལི༹ཡཾ ཀཱལཱརོཙནཾ ¶ ན ཝུཏྟ’’ནྟི. ཨཱརོཙིཏེཡེཝ ཀཱལེཏི ‘‘ཀཱལོ, ཏཱཏ སུདིནྣ, ནིཊྛིཏཾ བྷཏྟ’’ནྟི ཀཱལེ ཨཱརོཙིཏེཡེཝ. དྭེ པུཉྫེཏི ཀཧཱཔཎཔུཉྫཉྩ སུཝཎྞཔུཉྫཉྩ.

པེཏྟིཀནྟི པིཏིཏོ ཨཱགཏཾ པེཏྟིཀཾ. ནིཧིཏནྟི བྷཱུམིགཏཾ. པཡུཏྟནྟི ཝཌྜྷིཝསེན པཡོཛིཏཾ. ཏདྡྷིཏལོཔཾ ཀཏྭཱ ཝེདིཏབྦནྟི ཡཐཱ ཨཉྙཏྠཱཔི ‘‘པིཏཱམཧཾ དྷནཾ ལདྡྷཱ, སུཁཾ ཛཱིཝཏི སཉྫཡོ’’ཏི ཝུཏྟཾ, ཨེཝཾ ཏདྡྷིཏལོཔཾ ཀཏྭཱ ཝུཏྟནྟི དཊྛབྦཾ. པིཏཱམཧཏོ ཨཱགཏཾ, པིཏཱམཧསྶ ཝཱ ཨིདཾ པེཏཱམཧཾ. པབྦཛིཏལིངྒནྟི སམཎཝེསཾ. ན རཱཛབྷཱིཏོཏི ཨཔརཱདྷཀཱརཎཱ ན རཱཛཀུལཱ བྷཱིཏོ. ཡེསཾ སནྟཀཾ དྷནཾ གཧིཏཾ, ཏེ ཨིཎཱཡིཀཱ. པལིབུདྡྷོ པཱིལི༹ཏོ.

ཝིབྷཏྟིཔཏིརཱུཔཀོཏི ‘‘ཏེནཱ’’ཏི པདཾ སནྡྷཱཡཱཧ. ཏཾནིདཱནནྟི ཏཾ དྷནཾ ནིདཱནཾ ཀཱརཎམསྶཱཏི ཏཾནིདཱནཾ. ཨསྶཱཏི པཙྩཏྟཝཙནསྶ, པདསྶ ཝཱ. བྷཡནྟི ཙིཏྟསྶ ཨུཏྲསྟཱཀཱརེན པཝཏྟབྷཡཾ ཨདྷིཔྤེཏཾ, ན ཉཱཎབྷཡཾ, ནཱཔི ‘‘བྷཱཡཏི ཨེཏསྨཱ’’ཏི ཨེཝཾ ཝུཏྟཾ ཨཱརམྨཎབྷཡནྟི ཨཱཧ ‘‘ཙིཏྟུཏྲཱསོཏི ཨཏྠོ’’ཏི. ཚམྦྷིཏཏྟནྟི ཏེནེཝ ཙིཏྟུཏྲཱསབྷཡེན སཀལསརཱིརསྶ ཚམྦྷིཏབྷཱཝོ. ཝིསེསཏོ པན ཧདཡམཾསཙལནནྟི ཨཱཧ ‘‘ཀཱཡཀམྤོ ཧདཡམཾསཙལན’’ནྟི. ལོམཧཾསོཏི ཏེན བྷཡེན ཏེན ཚམྦྷིཏཏྟེན སཀལསརཱིརལོམཱནཾ ཧཊྛབྷཱཝོ, སོ པན ནེསཾ བྷིཏྟིཡཾ ནཱགདནྟཱནཾ ཝིཡ ཨུདྡྷཾམུཁཏཱཏི ཨཱཧ ‘‘ལོམཱནཾ ཧཾསནཾ ཨུདྡྷགྒབྷཱཝོ’’ཏི.

༣༥. ཨཏྟནཱཏི པཙྩཏྟེ ཀརཎཝཙནཾ, སཡནྟི ཨཏྠོ. དེཝཙྪརཱནནྟི ཨནཙྩནྟིཡོ སནྡྷཱཡཱཧ. དེཝནཱཊཀཱནནྟི ནཙྩནྟིཡོ, པརིཡཱཡཝཙནཾ ཝཱ ཨེཏཾ དེཝཀཉྙཱནཾ. སམུཔྤནྣབལཝསོཀཱ ཧུཏྭཱཏི ཨཡཾ ལོཀོ ནཱམ ཨཏྟཱནཾཝ ཙིནྟེཏི, ཏསྨཱ སཱཔི ‘‘ཨིདཱནི ཨཧཾ ཨནཱཐཱ ཛཱཏཱ’’ཏི ཨཏྟཱནཾཝ ཙིནྟཡམཱནཱ ‘‘ཨཡཾ ཨཛྫ ཨཱགམིསྶཏི, ཨཛྫ ཨཱགམིསྶཏཱི’’ཏི ཨཊྛ ཝསྶཱནི བཧི ན ནིཀྑནྟཱ ཨེཏཾ ནིསྶཱཡ མཡཱ དཱརཀོཔི ན ལདྡྷོ, ཡསྶ ཨཱནུབྷཱཝེན ཛཱིཝེཡྻཱམི, ཨིཏོ ཙཱམྷི པརིཧཱིནཱ ཨཉྙཏོ ཙཱཏི སམུཔྤནྣབལཝསོཀཱ ཧུཏྭཱ. ཀུལརུཀྑཔཏིཊྛཱཔནེ བཱིཛསདིསཏྟཱ ཀུལཝཾསཔྤཏིཊྛཱཔཀོ པུཏྟོ ཨིདྷ བཱིཛཀོཏི ཨདྷིཔྤེཏོཏི ཨཱཧ ‘‘ཀུལཝཾསབཱིཛཀཾ ¶ ཨེཀཾ པུཏྟ’’ནྟི. སཾ ནཱམ དྷནཾ, ཏསྶ པཏཱིཏི སཾཔཏི, དྷནཝཱ ¶ ཝིབྷཝསམྤནྣོ. དིཊྛདྷམྨིཀསམྤརཱཡིཀཧིཏཱཝཧཏྟཱ ཏསྶ ཧིཏནྟི སཱཔཏེཡྻཾ, ཏདེཝ དྷནཾ ཝིབྷཝོཏི ཨཱཧ – ‘‘ཨིམཾ སཱཔཏེཡྻཾ ཨེཝཾ མཧནྟཾ ཨམྷཱཀཾ ཝིབྷཝ’’ནྟི.

༣༦. ཨིཏྠཱིནཾ ཀུམཱརཱིབྷཱཝཔྤཏྟིཏོ པཊྛཱཡ པཙྪིམཝཡཏོ ཨོརཾ ཨསཏི ཝིབནྡྷེ ཨཊྛམེ ཨཊྛམེ སཏྟཱཧེ གབྦྷཱསཡསཉྙིཏེ ཏཏིཡེ ཨཱཝཏྟེ ཀཏིཔཡཱ ལོཧིཏཔཱིལ༹ཀཱ སཎྛཧིཏྭཱ ཨགྒཧིཏཔུབྦཱ ཨེཝ བྷིཛྫནྟི, ཏཏོ ལོཧིཏཾ པགྒྷརཏི, ཏཏྠ ཨུཏུསམཉྙཱ པུཔྥསམཉྙཱ ཙཱཏི ཨཱཧ – ‘‘པུཔྥནྟི ཨུཏུཀཱལེ ཨུཔྤནྣལོཧིཏསྶ ནཱམ’’ནྟི. གབྦྷཔཏིཊྛཱནཊྛཱནེཏི ཡསྨིཾ ཨོཀཱསེ དཱརཀོ ནིབྦཏྟཏི, ཏསྨིཾ པདེསེ. སཎྛཧིཏྭཱཏི ནིབྦཏྟིཏྭཱ. བྷིཛྫནྟཱིཏི ཨགྒཧིཏཔུབྦཱ ཨེཝ བྷིཛྫནྟི. ཨཡཉྷི ཏཱསཾ སབྷཱཝོ. དོསེནཱཏི ལོཧིཏམལེན. སུདྡྷེ ཝཏྠུམྷཱིཏི པགྒྷརིཏལོཧིཏཏྟཱ ཨནཱམཡཏྟཱ ཙ ནཧཱནཏོ པརཾ ཙཏུཏྠདིཝསཏོ པཊྛཱཡ སུདྡྷེ གབྦྷཱསཡེ. སུདྡྷེ པན ཝཏྠུམྷི མཱཏཱཔིཏཱུསུ ཨེཀཝཱརཾ སནྣིཔཏིཏེསུ ཡཱཝ སཏྟ དིཝསཱནི ཁེཏྟམེཝ ཧོཏི གབྦྷསཎྛཧནསྶ པརིཏྟསྶ ལོཧིཏལེཔསྶ ཝིཛྫམཱནཏྟཱ. ཀེཙི པན ‘‘ཨཌྜྷམཱསམཏྟམྤི ཁེཏྟམེཝཱ’’ཏི ཝདནྟི. བཱཧཱཡནྟི ཨདྷིཀརཎེ བྷུམྨནྟི ཨཱཧ ‘‘པུརཱཎདུཏིཡིཀཱཡ ཡཱ བཱཧཱ, ཏཏྲ ནཾ གཧེཏྭཱ’’ཏི. ཨུཔཡོགཏྠེ བྷུམྨཝཙནམྤི ཡུཛྫཏིཡེཝ ཡཐཱ ‘‘སུདིནྣསྶ པཱདེསུ གཧེཏྭཱ’’ཏི.

པུབྦེཔི པཉྙཏྟསིཀྑཱཔདཱནཾ སབྦྷཱཝཏོ ཨཔཉྙཏྟེ སིཀྑཱཔདེཏི པཱརཱཛིཀཾ སནྡྷཱཡ ཝུཏྟནྟི ཨཱཧ – ‘‘པཋམཔཱརཱཛིཀསིཀྑཱཔདེ ཨཊྛཔིཏེ’’ཏི. ཝུཏྟམེཝཏྠཾ ཝིབྷཱཝེནྟོ ཨཱཧ – ‘‘བྷགཝཏོ ཀིར པཋམབོདྷིཡ’’ནྟིཨཱདི. ཨེཝརཱུཔནྟི པཱརཱཛིཀཔཉྙཏྟིཡཱ ཨནུརཱུཔཾ. ནིདསྶནམཏྟཉྩེཏཾ, སངྒྷཱདིསེསཔཉྙཏྟིཡཱ ཨནུརཱུཔམྤི ཨཛ྄ཛྷཱཙཱརཾ ནཱཀཾསུཡེཝ. ཏེནེཝཱཧ – ‘‘ཨཝསེསེ པཉྩ ཁུདྡཀཱཔཏྟིཀྑནྡྷེ ཨེཝ པཉྙཔེསཱི’’ཏི. ཨིདཉྩ ཐུལླཙྩཡཱདཱིནཾ པཉྩནྣཾ ལཧུཀཱཔཏྟིཀྑནྡྷཱནཾ སབྦྷཱཝམཏྟཾ སནྡྷཱཡ ཝུཏྟཾ, ན པཉྩཱཔཏྟིཀྑནྡྷཱནཾ ཨནཝསེསཏོ པཉྙཏྟཏྟཱཝ. པཋམབོདྷིཡཾ པཉྩནྣཾ ལཧུཀཱཔཏྟཱིནཾ སབྦྷཱཝཝཙནེནེཝ དྷམྨསེནཱཔཏིསྶ སིཀྑཱཔདཔཉྙཏྟིཡཱཙནཱ ཝིསེསཏོ གརུཀཱཔཏྟིཔཉྙཏྟིཡཱ པཱཏིམོཀྑུདྡེསསྶ ཙ ཧེཏུབྷཱུཏཱཏི དཊྛབྦཱ. ཀེཙི ¶ པན ‘‘ཏསྨིཾ ཏསྨིཾ པན ཝཏྠུསྨིཾ ཨཝསེསཔཉྩཁུདྡཀཱཔཏྟིཀྑནྡྷེ ཨེཝ པཉྙཔེསཱིཏི ཨིདཾ དྭཱདསམེ ཝསྶེ ཝེརཉྫཱཡཾ ཝུཏྠཝསྶེན བྷགཝཏཱ ཏཏོ པཊྛཱཡ ཨཊྛཝསྶབྦྷནྟརེ པཉྙཏྟསིཀྑཱཔདཾ སནྡྷཱཡ ཝུཏྟ’’ནྟི ཝདནྟི, ཏཾ ན སུནྡརཾ ཏཏོ པུབྦེཔི སིཀྑཱཔདཔཉྙཏྟིཡཱ སབྦྷཱཝཏོ. ཏེནེཝ ཝེརཉྫཀཎྜེ ‘‘ཨེཀབྷིཀྑུནཱཔི རཏྟིཙྪེདོ ཝཱ པཙྪིམིཀཱཡ ཏཏྠ ཝསྶཾ ཨུཔགཙྪཱམཱཏི ཝསྶཙྪེདོ ཝཱ ན ཀཏོ’’ཏི ཙ ‘‘སཱམམྤི པཙནཾ སམཎསཱརུཔྤཾ ན ཧོཏི, ན ཙ ཝཊྚཏཱི’’ཏི ཙ ཝུཏྟཾ. ཨཱརཱདྷཡིཾསཱུཏི ཙིཏྟཾ གཎྷིཾསུ, ཨཛ྄ཛྷཱསཡཾ ¶ པཱུརཡིཾསུ, ཧདཡགཱཧིནིཾ པཊིཔཏྟིཾ པཊིཔཛྫིཾསཱུཏི ཨཏྠོ. ཨེཀཾ སམཡནྟི ཨེཀསྨིཾ སམཡེ, པཋམབོདྷིཡནྟི ཨཏྠོ.

ཡཾ ཨཱདཱིནཝནྟི སམྦནྡྷོ. སིཀྑཱཔདཾ པཉྙཔེནྟོཏི པཋམཔཱརཱཛིཀསིཀྑཱཔདཾ པཉྙཔེནྟོ. ཨཱདཱིནཝཾ དསྶེསྶཏཱིཏི ‘‘ཝརཾ ཏེ, མོགྷཔུརིས, ཨཱསཱིཝིསསྶ གྷོརཝིསསྶ མུཁེ ཨངྒཛཱཏཾ པཀྑིཏྟཾ, ན ཏྭེཝ མཱཏུགཱམསྶ ཨངྒཛཱཏེ ཨངྒཛཱཏཾ པཀྑིཏྟ’’ནྟིཨཱདིནཱ ཡཾ ཨཱདཱིནཝཾ དསྶེསྶཏི. ཨབྷིཝིཉྙཱཔེསཱིཏི ཨིམསྶ ‘‘པཝཏྟེསཱི’’ཏི ཨཡམཏྠོ ཀཐཾ ལདྡྷོཏི ཨཱཧ ‘‘པཝཏྟནཱཔི ཧཱི’’ཏིཨཱདི. ཀཱཡཝིཉྙཏྟིཙོཔནཏོཏི ཀཱཡཝིཉྙཏྟིཝསེན པཝཏྟཙལནཏོ. ཀསྨཱ པནེས མེཐུནདྷམྨེན ཨནཏྠིཀོཔི སམཱནོ ཏིཀྑཏྟུཾ ཨབྷིཝིཉྙཱཔེསཱིཏི ཨཱཧ – ‘‘ཏིཀྑཏྟུཾ ཨབྷིཝིཉྙཱཔནཉྩེསཱ’’ཏིཨཱདི. ཏཏྠ ཏིཀྑཏྟུཾ ཨབྷིཝིཉྙཱཔནནྟི མུཏྟིཔཱཔནཝསེན ཏཱིསུ ཝཱརེསུ མེཐུནདྷམྨསྶ པཝཏྟནཾ.

སབྦེསམྤི པདཱནཾ ཨཝདྷཱརཎཕལཏྟཱ ཝིནཱཔི ཨེཝཀཱརཾ ཨཝདྷཱརཎཏྠོ ཝིཉྙཱཡཏཱིཏི ཨཱཧ ‘‘ཏེནེཝ ཨཛ྄ཛྷཱཙཱརེནཱ’’ཏི. ཨཊྛ ཧི གབྦྷཀཱརཎཱནི. ཝུཏྟཉྷེཏཾ –

‘‘མེཐུནཙོལ༹གྒཧཎཾ, ཏནུསཾསགྒོ ཙ ནཱབྷིཨཱམསནཾ;

པཱནཾ དསྶནསཝནཾ, གྷཱཡནམིཏི གབྦྷཧེཏཝོ ཨཊྛཱ’’ཏི.

ཨིདཱནི ཨཝདྷཱརཎེན ནིཝཏྟིཏམཏྠཾ དསྶེཏུཀཱམོ ཨཱཧ – ‘‘ཀིཾ པན ཨཉྙཐཱཔི གབྦྷགྒཧཎཾ ཧོཏཱི’’ཏིཨཱདི. ནནུ ཙ ནཱབྷིཔརཱམསནམྤི ཀཱཡསཾསགྒོཡེཝ, ཀསྨཱ ནཾ ཝིསུཾ ཝུཏྟནྟི? ཨུབྷཡེསཾ ཚནྡརཱགཝསེན ཀཱཡསཾསགྒོ ཝུཏྟོ, ཨིཏྠིཡཱ ཚནྡརཱགཝསེན ནཱབྷིཔརཱམསནཾ, ཝཏྠུཝསེན ཝཱ ཏཾ ཝིསུཾ ཝུཏྟནྟི དཊྛབྦཾ. ཀཐཾ པན ཀཱཡསཾསགྒེན གབྦྷགྒཧཎཾ ཧོཏི, ཀཐཉྩ ཏཏྠ སུཀྐསོཎིཏསྶ སམྦྷཝོཏི ཨཱཧ ‘‘ཨིཏྠིཡོ ཧཱི’’ཏིཨཱདི ¶ . ཚནྡརཱགུཔྤཏྟིཝསེན ཨིཏྠིཡཱ སུཀྐཀོཊྛཱསོ ཙལིཏོ ཧོཏི, སོཔི གབྦྷསཎྛཱནསྶ པཙྩཡོ ཧོཏཱིཏི ཨདྷིཔྤཱཡོ. ཨིཏྠིསནྟཱནེཔི ཧི རསཱདིསཏྟདྷཱཏུཡོ ལབྦྷནྟིཡེཝ. ཏེནཱཧ – ‘‘ཨངྒཔཙྩངྒཔརཱམསནཾ སཱདིཡནྟིཡོཔི གབྦྷཾ གཎྷནྟཱི’’ཏི. གཎྛིཔདེསུ པན ‘‘ཀཱཡསཾསགྒཱདིནཱ སཏྟཔྤཀཱརེན གབྦྷགྒཧཎེ པིཏུ སུཀྐཀོཊྛཱསཾ ཝིནཱ ཚནྡརཱགཝསེན མཱཏུ ཝིཀཱརཔྤཏྟཾ ལོཧིཏམེཝ གབྦྷསཎྛཱནསྶ པཙྩཡོ ཧོཏཱི’’ཏི ཝུཏྟཾ. ‘‘ཡསྶ ཨངྒཔཙྩངྒཔརཱམསནཾ སཱདིཡིཏྭཱ མཱཏཱ པུཏྟཾ པཊིལབྷཏི, སཙེ སོ ཨཔརེན སམཡེན པརིཔུཎྞིནྡྲིཡོ ཧུཏྭཱ ཏཱདིསཾ པིཏརཾ མནུསྶཛཱཏིཀཾ ཛཱིཝིཏཱ ཝོརོཔེཏི, པིཏུགྷཱཏཀོཝ ཧོཏཱི’’ཏི ཝདནྟི.

ཏཾ ¶ ཨསུཙིཾ ཨེཀདེསཾ མུཁེན ཨགྒཧེསཱིཏི པུརཱཎཙཱིཝརཾ དྷོཝནྟཱི ཏཏྠ ཡཾ ཨསུཙིཾ ཨདྡས, ཏཾ ཨསུཙིཾ ཨེཀདེསཾ པིཝི. ‘‘ཝཊྚཏི ཏུམྷཱཀཾ མེཐུནདྷམྨོ’’ཏི པུཊྛོ ‘‘ཀཔྤཏུ ཝཱ མཱ ཝཱ ཀཔྤཏུ, མཡཾ ཏེན ཨནཏྠིཀཱ’’ཏི དསྶེནྟོ ཨཱཧ ‘‘ཨནཏྠིཀཱ མཡཾ ཨེཏེནཱ’’ཏི. ཀིཉྩཱཔི ནཱབྷིཔརཱམསནེ མེཐུནརཱགོ ནཏྠི, ཏཐཱཔི ནཱབྷིཔརཱམསནཀཱལེ ཕསྶསཱདིཡནཝསེན ཨསྶཱདམཏྟཾ ཏསྶཱ ཨཧོསཱིཏི གཧེཏབྦཾ, ཨཉྙཐཱ གབྦྷསཎྛཧནཾ ན སིཡཱ. དིཊྛམངྒལིཀཱཡ ནཱབྷིཔརཱམསནེན མཎྜབྱསྶ ནིབྦཏྟི ཨཧོསི, ཙཎྜཔཛྫོཏམཱཏུ ནཱབྷིཡཾ ཝིཙྪིཀཱ ཕརིཏྭཱ གཏཱ, ཏེན ཙཎྜཔཛྫོཏསྶ ནིབྦཏྟི ཨཧོསཱིཏི ཨཱཧ ‘‘ཨེཏེནེཝ ནཡེནཱ’’ཏིཨཱདི. པུརིསཾ ཨུཔནིཛ྄ཛྷཱཡཏཱིཏི ཝཱཏཔཱནཱདིནཱ དིསྭཱ ཝཱ དིཊྛཔུབྦཾ ཝཱ པུརིསཾ ཨུཔནིཛ྄ཛྷཱཡཏི. རཱཛོརོདྷཱ ཝིཡཱཏི སཱིཧལ༹དཱིཔེ ཀིར ཨེཀིསྶཱ ཨིཏྠིཡཱ ཏཐཱ ཨཧོསི, ཏསྨཱ ཨེཝཾ ཝུཏྟཾ.

ཨིདྷཱཏི ཨིམསྨིཾ ཝཏྠུསྨིཾ. ཨཡནྟི སུདིནྣསྶ པུརཱཎདུཏིཡིཀཱ. ཡཾ སནྡྷཱཡཱཏི ཡཾ ཨཛ྄ཛྷཱཙཱརཾ སནྡྷཱཡ. སུཀྐཾ སནྡྷཱཡ ‘‘མཱཏཱཔིཏརོ ཙ སནྣིཔཏིཏཱ ཧོནྟཱི’’ཏི ཝུཏྟཾ, མཱཏཱ ཙ ཨུཏུནཱི ཧོཏཱིཏི ལོཧིཏཾ སནྡྷཱཡ. ཏཏྠ སནྣིཔཏིཏཱ ཧོནྟཱིཏི ཨསདྡྷམྨཝསེན ཨེཀསྨིཾ ཋཱནེ སམཱགཏཱ སངྒཏཱ ཧོནྟི. མཱཏཱ ཙ ཨུཏུནཱི ཧོཏཱིཏི ཨིདཾ ཨུཏུསམཡཾ སནྡྷཱཡ ཝུཏྟཾ, ན ལོཀསམཉྙཱཀརཛསྶ ལགྒནདིཝསམཏྟཾ. གནྡྷབྦོཏི ཏཏྲཱུཔགསཏྟོ, གནྟབྦོཏི ཝུཏྟཾ ཧོཏི. ཏ-ཀཱརསྶ དྷ-ཀཱརོ ཀཏོཏི དཊྛབྦཾ. ཨཐ ཝཱ གནྡྷནཏོ ཨུཔྤཛྫནགཏིཡཱ ནིམིཏྟུཔཊྛཱནེན སཱུཙནཏོ ¶ དཱིཔནཏོ གནྡྷོཏི ལདྡྷནཱམེན བྷཝགཱམིཀམྨུནཱ ཨབྦཏི པཝཏྟཏཱིཏི གནྡྷབྦོ, ཏཏྠ ཨུཔྤཛྫནཀསཏྟོ. པཙྩུཔཊྛིཏོ ཧོཏཱིཏི ཨུཔགཏོ ཧོཏི. ཨེཏྠ ཙ ན མཱཏཱཔིཏཱུནཾ སནྣིཔཱཏཾ ཨོལོཀཡམཱནོ སམཱིཔེ ཋིཏོ ནཱམ ཧོཏི, ཀམྨཡནྟཡནྟིཏོ པན ཨེཀོ སཏྟོ ཏསྨིཾ ཨོཀཱསེ ནིབྦཏྟནཀོ པུརིམཛཱཏིཡཾ ཋིཏོཡེཝ གཏིནིམིཏྟཱདིཨཱརམྨཎཀརཎཝསེན ཨུཔཔཏྟཱབྷིམུཁོ ཧོཏཱིཏི ཨདྷིཔྤཱཡོ.

སནྣིཔཱཏཱཏི སམོདྷཱནེན སམཱགམེན. གབྦྷསྶཱཏི གབྦྷེ ནིབྦཏྟནཀསཏྟསྶ. གབྦྷེ ནིབྦཏྟནཀསཏྟོཔི ཧི གབྦྷོཏི ཝུཙྩཏི. ཡཐཱཧ – ‘‘ཡཐཱ ཁོ པནཱནནྡ, ཨཉྙཱ ཨིཏྠིཀཱ ནཝ ཝཱ དས ཝཱ མཱསེ གབྦྷཾ ཀུཙྪིནཱ པརིཧརིཏྭཱ ཝིཛཱཡནྟཱི’’ཏི (མ. ནི. ༣.༢༠༥). ཀཏྠཙི པན གབྦྷོཏི མཱཏུཀུཙྪི ཝུཏྟོ. ཡཐཱཧ –

‘‘ཡམེཀརཏྟིཾ པཋམཾ, གབྦྷེ ཝསཏི མཱཎཝོ;

ཨབྦྷུཊྛིཏོཝ སོ ཡཱཏི, ས གཙྪཾ ན ནིཝཏྟཏཱི’’ཏི. (ཛཱ. ༡.༡༥.༣༦༣); –

ཨེཏྠ ¶ ཙ གབྦྷཏི ཨཏྟབྷཱཝབྷཱཝེན པཝཏྟཏཱིཏི གབྦྷོ, ཀལལཱདིཨཝཏྠོ དྷམྨཔྤབནྡྷོ, ཏཾནིསྶིཏཏྟཱ པན སཏྟསནྟཱནོ ‘‘གབྦྷོ’’ཏི ཝུཏྟོ ཡཐཱ ‘‘མཉྩཱ ཨུཀྐུཊྛིཾ ཀརོནྟཱི’’ཏི. ཏཾནིསྶཡབྷཱཝཏོ མཱཏུཀུཙྪི ‘‘གབྦྷོ’’ཏི ཝེདིཏབྦོ. གབྦྷོ ཝིཡཱཏི ཝཱ. ཡཐཱ ཧི ནིཝཱསཊྛཱནཏཱཡ སཏྟཱནཾ ཨོཝརཀོ ‘‘གབྦྷོ’’ཏི ཝུཙྩཏི, ཨེཝཾ གབྦྷསེཡྻཀཱནཾ སཏྟཱནཾ ཡཱཝ ཨབྷིཛཱཏི ནིཝཱསཊྛཱནཏཱཡ མཱཏུཀུཙྪི ‘‘གབྦྷོ’’ཏི ཝུཏྟོཏི ཝེདིཏབྦོ. ཨཝཀྐནྟི ཧོཏཱིཏི ནིབྦཏྟི ཧོཏི.

ཨཱརཀྑདེཝཏཱཏི ཏསྶ ཨཱརཀྑཏྠཱཡ ཋིཏཱ དེཝཏཱ. ཨསྶ ཏཾ ཨཛ྄ཛྷཱཙཱརནྟི སམྦནྡྷོ. ཏཐཱ ནིཙྪཱརེསུནྟི ཏཐཱ མཧནྟཾ སདྡཾ ཀཏྭཱ ནིཙྪཱརེསུཾ. ཀིཉྩཱཔི ཨིདྷ པཱལི༹ཡཾ ཨཱཀཱསཊྛདེཝཏཱ ཝིསུཾ ན ཨཱགཏཱ, ཏཐཱཔི སདྡསྶ ཨནུསྶཱཝནེ ཨཡམནུཀྐམོཏི དསྶེཏུཾ ཙཱཏུམཧཱརཱཛིཀདེཝཏཱཡོ དྭིདྷཱ ཀཏྭཱ ཨཱཀཱསཊྛདེཝཏཱ ཝིསུཾ ཝུཏྟཱ. ཏེནེཏྠ ཨཱཀཱསཊྛཀཱནཾ ཝིསུཾ གཧིཏཏྟཱ ཙཱཏུམཧཱརཱཛིཀཱཏི པརིབྷཎྜཔབྦཏཊྛཀཱ ཝེདིཏབྦཱ. ཨིཏིཧཱཏི ནིཔཱཏསམུདཱཡོ ཨེཝཾསདྡསྶ ཨཏྠེ དཊྛབྦོཏི ཨཱཧ ‘‘ཨེཝ’’ནྟི. ཁཎེན མུཧུཏྟེནཱཏི པདདྭཡཾ ཝེཝཙནབྷཱཝཏོ སམཱནཏྠམེཝཱཏི དཊྛབྦཾ. ཨེཀཀོལཱཧལམཧོསཱིཏི དེཝབྲཧྨལོཀེསུ ¶ ཨེཀཀོལཱཧལམཧོསི. ཀིཉྩཱཔི ཧི སོ སདྡོ ཡཱཝ བྲཧྨལོཀཱ ཨབྦྷུགྒཙྪི, ཏཐཱཔི ན སོ མནུསྶཱནཾ ཝིསཡོ ཏེསཾ རཱུཔཾ ཝིཡ, ཏེནེཝ བྷིཀྑཱུ པུཙྪིཾསུ – ‘‘ཀཙྩི ནོ ཏྭཾ, ཨཱཝུསོ སུདིནྣ, ཨནབྷིརཏོ’’ཏི.

༣༧. ‘‘ཨེཝཾ མཱཏཱཔུཏྟཱནཾ པབྦཛྫཱ སཕལཱ ཨཧོསི, པིཏཱ པན ཝིཔྤཊིསཱརཱབྷིབྷཱུཏོ ཝིཧཱསཱི’’ཏི ཝཙནཏོ སུདིནྣསྶ ཏསྨིཾ ཨཏྟབྷཱཝེ ཨརཧཏྟཱདྷིགམོ ནཱཧོསཱིཏི ཝིཉྙཱཡཏི. ཀེཙི པན ‘‘པུབྦེཀཏཔུཉྙཏཱཡ ཙོདིཡམཱནསྶ བྷབྦཀུལཔུཏྟསྶཱཏི ཝུཏྟཏྟཱ སུདིནྣོ ཏཾ ཀུཀྐུཙྩཾ ཝིནོདེཏྭཱ ཨརཧཏྟཾ སཙྪཱཀཱསི, ཏེནེཝ པབྦཛྫཱ ཨནུཉྙཱཏཱ’’ཏི ཝདནྟི. ཏཾ པཱལི༹ཡཱ ཨཊྛཀཐཱཡ ཙ ན སམེཏི. པུབྦེཀཏཔུཉྙཏཱ ཙ ཨཔྤམཱཎཾ ཏཱདིསསྶཔི ཨནྟརཱཀཏཔཱཔཀམྨསྶ ཝསེན ཨཛཱཏསཏྟུནོ ཝིཡ ཨདྷིགམནྟརཱཡདསྶནཏོ. ཀཏཱཀཏཱནུསོཙནལཀྑཎཾ ཀུཀྐུཙྩཾ ཨིདྷཱདྷིཔྤེཏནྟི ཨཱཧ ‘‘ཨཛ྄ཛྷཱཙཱརཧེཏུཀོ པཙྪཱནུཏཱཔོ’’ཏི. ཀཏཾ ཨཛ྄ཛྷཱཙཱརཾ པཊིཙྩ ཨནུསོཙནཝསེན ཝིརཱུཔཾ སརཎཾ ཙིནྟནཾ ཝིཔྤཊིསཱརོཏི ཨཱཧ ‘‘ཝིཔྤཊིསཱརོཏིཔི ཏསྶེཝ ནཱམ’’ནྟི. ཀུཙྪིཏཾ ཀཏཾ ཀིརིཡཱཏི ཀུཀཏཾ, ཀུཀཏམེཝ ཀུཀྐུཙྩནྟི ཨཱཧ ‘‘ཀུཙྪིཏཀིརིཡཱབྷཱཝཏོ ཀུཀྐུཙྩ’’ནྟི. པརིཡཱདིནྣམཾསལོཧིཏཏྟཱཏི པརིཀྑཱིཎམཾསལོཧིཏཏྟཱ. ཨཝིཔྥཱརིཀོཏི ཨུདྡེསཱདཱིསུ བྱཱཔཱརརཧིཏོ, ཨབྱཱཝཊོཏི ཨཏྠོ. ཝཧཙྪིནྣོཏི ¶ ཚིནྣཝཧོ, བྷཱརཝཧནེན ཚིནྣཀྑནྡྷོཏི ཝུཏྟཾ ཧོཏི. ཏཾ ཏཾ ཙིནྟཡཱིཏི ‘‘ཡདི ཨཧཾ ཏཾ པཱཔཾ ན ཀརིསྶཾ, ཨིམེ བྷིཀྑཱུ ཝིཡ པརིཔུཎྞསཱིལོ ཨསྶ’’ནྟིཨཱདིནཱ ཏཾ ཏཾ ཙིནྟཡི.

༣༨. ཨེཝཾབྷཱུཏནྟི ཀིསལཱུཁཱདིབྷཱཝཔྤཏྟཾ. གཎསངྒཎིཀཱཔཔཉྩེནཱཏི གཎེ ཛནསམཱགམེ སནྣིཔཏནཾ གཎསངྒཎིཀཱ, གཎསངྒཎིཀཱཡེཝ པཔཉྩོ གཎསངྒཎིཀཱཔཔཉྩོ, ཏེན. ཡསྶཱཏི ཡེ ཨསྶ. ཀཐཱཕཱསུཀཱཏི ཝིསྶཱསིཀབྷཱཝེནེཝ ཀཐཱཀརཎེ ཕཱསུཀཱ, སུཁེན ཝཏྟུཾ སཀྐུཎེཡྻཱ, སུཁསམྦྷཱསཱཏི ཨཏྠོ. པསཱདསྶ པམཱཎཏོ ཨཱུནཱདྷིཀཏྟཾ སབྦདཱ སབྦེསཾ ནཏྠཱིཏི ཨཱཧ ‘‘པསཱདཔཏིཊྛཱནོཀཱསསྶ སམྤུཎྞཏྟཱ’’ཏི. དཱནཱིཏི ཨིམསྨིཾ ཨཏྠེ ཨེཏརཧི-སདྡོ ཨཏྠཱིཏི ཨཱཧ ‘‘དཱནཱིཏི ནིཔཱཏོ’’ཏི. ནོ-སདྡོཔི ནུ-སདྡོ ཝིཡ པུཙྪནཏྠོཏི ཨཱཧ ‘‘ཀཙྩི ¶ ནུ ཏྭ’’ནྟི. ཏམེཝ ཨནབྷིརཏིནྟི ཏེཧི བྷིཀྑཱུཧི པུཙྪིཏཾ ཏམེཝ གིཧིབྷཱཝཔཏྠནཱཀཱརཾ ཨནབྷིརཏིཾ. ‘‘ཏམེཝཱ’’ཏི ཨཝདྷཱརཎེན ནིཝཏྟིཏམཏྠཾ དསྶེནྟོ ཨཱཧ ‘‘ཨདྷིཀུསལཱན’’ནྟིཨཱདི. ཨདྷིཀུསལཱ དྷམྨཱ སམཐཝིཔསྶནཱདཡོ. ཨཏྠཱིཏི ཝིསཡབྷཱཝེན ཙིཏྟེ པརིཝཏྟནཾ སནྡྷཱཡ ཝུཏྟཾ, ན པཱཔསྶ ཝཏྟམཱནཏཾ སནྡྷཱཡ, ཨཏྠི ཝིསཡབྷཱཝེན ཙིཏྟེ པརིཝཏྟཏཱིཏི ཝུཏྟཾ ཧོཏི. ཏེནཱཧ – ‘‘ནིཙྩཀཱལཾ ཨབྷིམུཁཾ ཝིཡ མེ ཏིཊྛཏཱི’’ཏི.

ཡཾ ཏྭནྟི ཨེཏྠ ཡནྟི ཧེཏུཨཏྠེ ནིཔཱཏོ, ཀརཎཏྠེ ཝཱ པཙྩཏྟཝཙནནྟི ཨཱཧ ‘‘ཡེན པཱཔེནཱ’’ཏི. ཨནེཀཔརིཡཱཡེནཱཏི ཨེཏྠ པརིཡཱཡ-སདྡོ ཀཱརཎཝཙནོཏི ཨཱཧ ‘‘ཨནེཀཀཱརཎེནཱ’’ཏི. ཝིརཱགཏྠཱཡཱཏི བྷཝབྷོགེསུ ཝིརཛྫནཏྠཱཡ. ནོ རཱགེན རཛྫནཏྠཱཡཱཏི བྷཝབྷོགེསུཡེཝ རཱགེན ཨརཉྫནཏྠཱཡ. ཏེནཱཧ ‘‘བྷགཝཏཱ ཧཱི’’ཏིཨཱདི. ཨེས ནཡོ སབྦཔདེསཱུཏི ཨདྷིཔྤཱཡིཀམཏྟཾ སབྦཔདེསུ ཨཏིདིསྶཏི. ཨིདཾ པནེཏྠ པརིཡཱཡཝཙནམཏྟནྟི ‘‘ཝིསཾཡོགཱཡཱ’’ཏིཨཱདཱིསུ སབྦཔདེསུ ‘‘ཀིལེསེཧི ཝིསཾཡུཛྫནཏྠཱཡཱ’’ཏིཨཱདིནཱ པདཏྠཝིབྷཱཝནཝསེན ཝུཏྟཔརིཡཱཡཝཙནཾ སནྡྷཱཡ ཝདཏི. ན སཾཡུཛྫནཏྠཱཡཱཏི ཀིལེསེཧི ན སཾཡུཛྫནཏྠཱཡ. ཨགྒཧཎཏྠཱཡཱཏི ཀིལེསེ ཨགྒཧཎཏྠཱཡ, བྷཝབྷོགེ ཝཱ ཏཎྷཱདིཊྛིཝསེན ཨགྒཧཎཏྠཱཡ. ན སངྒཧཎཏྠཱཡཱཏི ཨེཏྠཱཔི ཨིམིནཱཝ ནཡེན ཨཏྠོ ཝེདིཏབྦོ.

ནིབྦཏྟིཏལོཀུཏྟརནིབྦཱནམེཝཱཏི སངྑཱརེཧི ནིཀྑནྟཾ ཝིཝིཏྟཾ, ཏཏོཡེཝ ལོཀཏོ ཨུཏྟིཎྞཏྟཱ ལོཀུཏྟརཾ ནིབྦཱནཾ. མདནིམྨདནཱཡཱཏི ཝཱཏི ཨེཏྠ ཨཝུཏྟསམུཙྩཡཏྠེན ཝཱ-སདྡེན ཨཱདིཨཏྠེན ཨིཏི-སདྡེན ཝཱ ‘‘པིཔཱསཝིནཡཱཡཱ’’ཏིཨཱདི སབྦཾ སངྒཧིཏནྟི དཊྛབྦཾ. ནིབྦཱནཾ ཨཱརམྨཎཾ ཀཏྭཱ པཝཏྟམཱནེན ཨརིཡམགྒེན པཧཱིཡམཱནཱ རཱགམཱནམདཱདཡོ ཏཾ པཏྭཱ པཧཱིཡནྟི ནཱམཱཏི ཨཱཧ ‘‘ཡསྨཱ པན ཏཾ ཨཱགམྨཱ’’ཏིཨཱདི. ཏཏྠ ཏཾ ཨཱགམྨཱཏི ནིབྦཱནཾ ཨཱགམྨ པཊིཙྩ ¶ ཨརིཡམགྒསྶ ཨཱརམྨཎཔཙྩཡབྷཱཝཧེཏུ. མཱནམདཔུརིསམདཱདཡོཏི ཨེཏྠ ཛཱཏིཨཱདིཾ ནིསྶཱཡ སེཡྻསྶ ‘‘སེཡྻོཧམསྨཱི’’ཏིཨཱདིནཱ ཨུཔྤཛྫནཀམཱནོཡེཝ མདཛནནཊྛེན མདོཏི མཱནམདོ. པུརིསམདོ ཝུཙྩཏི པུརིསམཱནོ, ‘‘ཨཧཾ པུརིསོ’’ཏི ཨུཔྤཛྫནཀམཱནོ. ‘‘ཨསདྡྷམྨསེཝནསམཏྠཏཾ ནིསྶཱཡ པཝཏྟོ མཱནོ, རཱགོ ཨེཝ ཝཱ པུརིསམདོ’’ཏི ཀེཙི. ཨཱདི-སདྡེན བལམདཡོབྦནམདཱདིཾ སངྒཎྷཱཏི ¶ . མཧཱགཎྛིཔདེ པན མཛ྄ཛྷིམགཎྛིཔདེ ཙ ‘‘པུརིསམདོ ནཱམ སམྦྷཝོ’’ཏི ཝུཏྟཾ, ཏཾ ཨིདྷ ཡུཏྟཾ ཝིཡ ན དིསྶཏི. ན ཧི ‘‘བྷགཝཏཱ སམྦྷཝསྶ ཝིནཱསཱཡ དྷམྨོ དེསིཏོ’’ཏི ཝཏྟུཾ ཝཊྚཏི. ནིམྨདཱཏི ཝིགཏམདབྷཱཝཱ. ཨིམམེཝ ཧི ཨཏྠཾ དསྶེཏུཾ ‘‘ཨམདཱ’’ཏི ཝུཏྟཾ. མདཱ ནིམྨདཱིཡནྟི ཨེཏྠ ཨམདབྷཱཝཾ ཝིནཱསཾ གཙྪནྟཱིཏི མདནིམྨདནོ. ཨེས ནཡོ སེསཔདེསུཔི.

ཀཱམཔིཔཱསཱཏི ཀཱམཱནཾ པཱཏུཀམྱཏཱ, ཀཱམཏཎྷཱཏི ཨཏྠོ. ཨཱལཱིཡནྟི ཨབྷིརམིཏབྦཊྛེན སེཝཱིཡནྟཱིཏི ཨཱལཡཱ, པཉྩ ཀཱམགུཎཱཏི ཨཱཧ ‘‘པཉྩ ཀཱམགུཎཱལཡཱ’’ཏི. པཉྩསུ ཧི ཀཱམགུཎེསུ ཚནྡརཱགཔྤཧཱནེནེཝ པཉྩ ཀཱམགུཎཱཔི པཧཱིནཱ ནཱམ ཧོནྟི, ཏེནེཝ ‘‘ཡོ, བྷིཀྑཝེ, རཱུཔེསུ ཚནྡརཱགོ’’ཏིཨཱདི (སཾ. ནི. ༣.༣༢༣) ཝུཏྟཾ. པཉྩཀཱམགུཎེསུ ཝཱ ཨཱལཡཱ པཉྩཀཱམགུཎཱལཡཱ. ཨཱལཱིཡནྟི ཨལླཱིཡནྟི ཨབྷིརམནཝསེན སེཝནྟཱིཏི ཨཱལཡཱཏི ཧི ཏཎྷཱཝིཙརིཏཱནཾ ཨདྷིཝཙནཾ. ཏེབྷཱུམཀཝཊྚནྟི ཏཱིསུ བྷཱུམཱིསུ ཀམྨཀིལེསཝིཔཱཀཱ ཝཊྚནཊྛེན ཝཊྚཾ. ཝིརཛྫཏཱིཏི པལུཛྫཏི. ‘‘ཝིརཛྫཏཱིཏི ཀཱམཝིནཱསོ ཝུཏྟོ, ནིརུཛ྄ཛྷཏཱིཏི ཨེཀཔྤཧཱརེན ཝིནཱསོ’’ཏི གཎྛིཔདེསུ ཝུཏྟཾ. ཝིརཱགོ ནིརོདྷོཏི སཱམཉྙཙོདནཱཡཔི ‘‘ཏཎྷཱཀྑཡོ’’ཏི ཨདྷིཀཏཏྟཱ ཏཎྷཱཡ ཨེཝ ཝིརཛྫནཾ ནིརུཛ྄ཛྷནཉྩ ཝུཏྟཾ.

ཙཏསྶོ ཡོནིཡོཏི ཨེཏྠ ཡོནཱིཏི ཁནྡྷཀོཊྛཱསསྶཔི ཀཱརཎསྶཔི པསྶཱཝམགྒསྶཔི ནཱམཾ. ‘‘ཙཏསྶོ ནཱགཡོནིཡོ (སཾ. ནི. ༣.༣༤༢-༣༤༣) ཙཏསྶོ སུཔཎྞཡོནིཡོ’’ཏི ཨེཏྠ ཧི ཁནྡྷཀོཊྛཱསོ ཡོནི ནཱམ. ‘‘ཡོནི ཧེསཱ བྷཱུམིཛ ཕལསྶ ཨདྷིགམཱཡཱ’’ཏི (མ. ནི. ༣.༢༢༦) ཨེཏྠ ཀཱརཎཾ. ‘‘ན ཙཱཧཾ བྲཱཧྨཎཾ བྲཱུམི, ཡོནིཛཾ མཏྟིསམྦྷཝ’’ནྟི (མ. ནི. ༢.༤༥༧; དྷ. པ. ༣༩༦) ཨེཏྠ པསྶཱཝམགྒོ. ཨིདྷ པན ཁནྡྷཀོཊྛཱསོ ‘‘ཡོནཱི’’ཏི ཨདྷིཔྤེཏོ. ཡཝནྟི ཏཱཡ སཏྟཱ ཨམིསྶིཏཱཔི སམཱནཛཱཏིཏཱཡ མིསྶིཏཱ ཧོནྟཱིཏི ཡོནི. སཱ པན ཨཏྠཏོ ཨཎྜཱདིཨུཔྤཏྟིཊྛཱནཝིསིཊྛོ ཁནྡྷཱནཾ བྷཱགསོ པཝཏྟིཝིསེསོ, སཱ ཙ ཨཎྜཛཛལཱབུཛསཾསེདཛཨོཔཔཱཏིཀཝསེན ཙཏུབྦིདྷཱ. ཝུཏྟཉྷེཏཾ ‘‘ཙཏསྶོ ཁོ ཨིམཱ, སཱརིཔུཏྟ, ཡོནིཡོ. ཀཏམཱ ཙཏསྶོ? ཨཎྜཛཱ ཡོནི ཛལཱབུཛཱ ཡོནི སཾསེདཛཱ ཡོནི ཨོཔཔཱཏིཀཱ ཡོནཱི’’ཏི (མ. ནི. ༡.༡༥༢).

ཏཏྠ ¶ ¶ ཨཎྜེ ཛཱཏཱ ཨཎྜཛཱ. ཛལཱབུམྷི ཛཱཏཱ ཛལཱབུཛཱ. སཾསེདེ ཛཱཏཱ སཾསེདཛཱ. ཝིནཱ ཨེཏེཧི ཀཱརཎེཧི ཨུཔྤཏིཏྭཱ ཝིཡ ནིབྦཏྟཱཏི ཨོཔཔཱཏིཀཱ. ཨེཏྠ ཙ པེཏལོཀེ ཏིརཙྪཱནེ མནུསྶེསུ ཙ ཨཎྜཛཱདཡོ ཙཏསྶོཔི ཡོནིཡོ སམྦྷཝནྟི, མནུསྶེསུ པནེཏྠ ཀེཙིདེཝ ཨོཔཔཱཏིཀཱ ཧོནྟི མཧཱཔདུམཀུམཱརཱདཡོ ཝིཡ. ཨཎྜཛཱཔི ཀོནྟཔུཏྟཱ དྭེབྷཱཏིཡཐེརཱ ཝིཡ, སཾསེདཛཱཔི པདུམགབྦྷེ ནིབྦཏྟཔོཀྑརསཱཏིབྲཱཧྨཎཔདུམཝཏཱིདེཝཱིཨཱདཡོ ཝིཡ ཀེཙིདེཝ ཧོནྟི, ཡེབྷུཡྻེན པན མནུསྶཱ ཛལཱབུཛཱཝ. པེཏེསུཔི ནིཛ྄ཛྷཱམཏཎྷིཀཔེཏཱནཾ ནིཙྩདུཀྑཱཏུརཏཱཡ ཀཱམསེཝནཱ ནཏྠི, ཏསྨཱ ཏེ གབྦྷསེཡྻཀཱ ན ཧོནྟི. ཛཱལཱཝནྟཏཱཡ ན ཏཱསཾ ཀུཙྪིཡཾ གབྦྷོ སཎྛཱཏི, ཏསྨཱ ཏེ ཨོཔཔཱཏིཀཱཡེཝ སཾསེདཛཏཱཡཔི ཨསམྦྷཝཏོ, ཨཝསེསཔེཏཱ པན ཙཏུཡོནིཀཱཔི ཧོནྟི. ཡཐཱ ཙ ཏེ, ཨེཝཾ ཡཀྑཱཔི སབྦཙཏུཔྤདཔཀྑིཛཱཏིདཱིགྷཛཱཏིཨཱདཡོཔི སབྦེ ཙཏུཡོནིཀཱཡེཝ. སབྦེ ནེརཡིཀཱ ཙ ཙཏུམཧཱརཱཛིཀཏོ པཊྛཱཡ ཨུཔརིདེཝཱ ཙ ཨོཔཔཱཏིཀཱཡེཝ, བྷུམྨདེཝཱ པན ཙཏུཡོནིཀཱཝ ཧོནྟི. ཏཏྠ དེཝམནུསྶེསུ སཾསེདཛཨོཔཔཱཏིཀཱནཾ ཨཡཾ ཝིསེསོ – སཾསེདཛཱ མནྡཱ དཧརཱ ཧུཏྭཱ ནིབྦཏྟནྟི, ཨོཔཔཱཏིཀཱ སོལ༹སཝསྶུདྡེསིཀཱ ཧུཏྭཱ.

པཉྩ གཏིཡོཏི ཨེཏྠ སུཀཏདུཀྐཊཀམྨཝསེན གནྟབྦཱ ཨུཔཔཛྫིཏབྦཱཏི གཏིཡོ. ཡཐཱ ཧི ཀམྨབྷཝོ པརམཏྠཏོ ཨསཏིཔི ཀཱརཀེ པཙྩཡསཱམགྒིཡཱ སིདྡྷོ, ཏཾསམངྒིནཱ སནྟཱནལཀྑཎེན སཏྟེན ཀཏོཏི ཝོཧརཱིཡཏི, ཨེཝཾ ཨུཔཔཏྟིབྷཝལཀྑཎགཏིཡོ པརམཏྠཏོ ཨསཏིཔི གམཀེ ཏཾཏཾཀམྨཝསེན ཡེསཾ ཏཱནི ཀམྨཱནི ཏེཧི གནྟབྦཱཏི ཝོཧརཱིཡནྟི. ཨཔིཙ གཏིགཏི ནིབྦཏྟིགཏི ཨཛ྄ཛྷཱསཡགཏི ཝིབྷཝགཏི ནིཔྥཏྟིགཏཱིཏི བཧུཝིདྷཱ གཏི ནཱམ. ཏཏྠ ‘‘ཏཾ གཏིཾ པེཙྩ གཙྪཱམཱི’’ཏི (ཨ. ནི. ༤.༡༨༤) ཙ ‘‘ཡསྶ གཏིཾ ན ཛཱནནྟི, དེཝཱ གནྡྷབྦམཱནུསཱ’’ཏི (དྷ. པ. ༤༢༠; སུ. ནི. ༦༤༩) ཙ ཨཡཾ གཏིགཏི ནཱམ. ‘‘ཨིམེསཾ ཁོ པནཱཧཾ བྷིཀྑཱུནཾ སཱིལཝནྟཱནཾ ནེཝ ཛཱནཱམི ཨཱགཏིཾ ཝཱ གཏིཾ ཝཱ’’ཏི (མ. ནི. ༡.༥༠༨) ཨཡཾ ནིབྦཏྟིགཏི ནཱམ. ‘‘ཨེཝམྤི ཁོ ཏེ ཨཧཾ བྲཧྨེ གཏིཉྩ པཛཱནཱམི ཙུཏིཉྩ པཛཱནཱམཱི’’ཏི (མ. ནི. ༡.༥༠༣) ཨཡཾ ཨཛ྄ཛྷཱསཡགཏི ནཱམ. ‘‘ཝིབྷཝོ གཏི དྷམྨཱནཾ, ནིབྦཱནཾ ཨརཧཏོ ¶ གཏཱི’’ཏི (པརི. ༣༣༩) ཨཡཾ ཝིབྷཝགཏི ནཱམ. ‘‘དྭེཡེཝ གཏིཡོ སམྦྷཝནྟི ཨནཉྙཱ’’ཏི (དཱི. ནི. ༡.༢༥༨; ༢.༣༤; ༣.༢༠༠) ཨཡཾ ནིཔྥཏྟིགཏི ནཱམ. ཏཱསུ ཨིདྷ གཏིགཏི ཨདྷིཔྤེཏཱ, སཱ པན ནིརཡཏིརཙྪཱནཡོནིཔེཏྟིཝིསཡམནཨུསྶདེཝཱནཾ ཝསེན པཉྩཝིདྷཱ ཧོཏི. ཝུཏྟཉྷེཏཾ – ‘‘པཉྩ ཁོ ཨིམཱ, སཱརིཔུཏྟ, གཏིཡོ. ཀཏམཱ པཉྩ? ནིརཡོ ཏིརཙྪཱནཡོནི པེཏྟིཝིསཡོ མནུསྶཱ དེཝཱ’’ཏི (མ. ནི. ༡.༡༥༣).

ཏཏྠ ¶ ཡསྶ ཨུཔྤཛྫཏི, ཏཾ བྲཱུཧེནྟོཡེཝ ཨུཔྤཛྫཏཱིཏི ཨཡོ, སུཁཾ. ནཏྠི ཨེཏྠ ཨཡོཏི ནིརཡོ, ཏཏོ ཨེཝ རམིཏབྦཾ ཨསྶཱདེཏབྦཾ ཏཏྠ ནཏྠཱིཏི ནིརཏིཨཏྠེན ནིརསྶཱདཊྛེན ཙ ནིརཡོཏི ཝུཙྩཏི. ཏིརིཡཾ ཨཉྩིཏཱཏི ཏིརཙྪཱནཱ, དེཝམནུསྶཱདཡོ ཝིཡ ཨུདྡྷཾ དཱིགྷཱ ཨཧུཏྭཱ ཏིརིཡཾ དཱིགྷཱཏི ཨཏྠོ. པཀཊྛཏོ སུཁཏོ ཨཡནཾ ཨཔགམོ པེཙྩབྷཱཝོ, ཏཾ པེཙྩབྷཱཝཾ པཏྟཱནཾ ཝིསཡོཏི པེཏྟིཝིསཡོ, པེཏཡོནི. མནསྶ ཨུསྶནྣཏཱཡ མནུསྶཱ, སཏིསཱུརབྷཱཝབྲཧྨཙརིཡཡོགྱཏཱདིགུཎཝསེན ཨུཔཙིཏམཱནསཏཱཡ ཨུཀྐཊྛགུཎཙིཏྟཏཱཡ མནུསྶཱཏི ཝུཏྟཾ ཧོཏི, ཨཡཾ པནཏྠོ ནིཔྤརིཡཱཡཏོ ཛམྦུདཱིཔཝཱསཱིཝསེན ཝེདིཏབྦོ. ཡཐཱཧ – ‘‘ཏཱིཧི, བྷིཀྑཝེ, ཋཱནེཧི ཛམྦུདཱིཔཀཱ མནུསྶཱ ཨུཏྟརཀུརུཀེ ཙ མནུསྶེ ཨདྷིགྒཎྷནྟི དེཝེ ཙ ཏཱཝཏིཾསེ. ཀཏམེཧི ཏཱིཧི? སཱུརཱ སཏིམནྟོ ཨིདྷ བྲཧྨཙརིཡཝཱསོ’’ཏི (ཨ. ནི. ༩.༢༡). ཏཐཱ ཧི བུདྡྷཱ ཙ བྷགཝནྟོ པཙྩེཀབུདྡྷཱ ཨགྒསཱཝཀཱ མཧཱསཱཝཀཱ ཙཀྐཝཏྟིནོ ཨཉྙེ ཙ མཧཱནུབྷཱཝཱ སཏྟཱ ཏཏྠེཝ ཨུཔྤཛྫནྟི, ཏེཧི སམཱནརཱུཔཱདིཏཱཡ པན སདྡྷིཾ པརིཏྟདཱིཔཝཱསཱིཧི ཨིཏརམཧཱདཱིཔཝཱསིནོཔི མནུསྶཱཏྭེཝ པཉྙཱཡིཾསུ.

ཨཔརེ པན བྷཎནྟི ‘‘ལོབྷཱདཱིཧི ཨལོབྷཱདཱིཧི ཙ སཧིཏསྶ མནསྶ ཨུསྶནྣཏཱཡ མནུསྶཱ. ཡེ ཧི སཏྟཱ མནུསྶཛཱཏིཀཱ, ཏེསུ ཝིསེསཏོ ལོབྷཱདཡོ ཨལོབྷཱདཡོ ཙ ཨུསྶནྣཱ. ཏེ ལོབྷཱདིཨུསྶནྣཏཱཡ ཨཔཱཡམགྒཾ, ཨལོབྷཱདིཨུསྶནྣཏཱཡ སུགཏིམགྒཾ ནིབྦཱནགཱམིམགྒཉྩ པརིཔཱུརེནྟི, ཏསྨཱ ལོབྷཱདཱིཧི ཨལོབྷཱདཱིཧི ཙ སཧིཏསྶ མནསྶ ཨུསྶནྣཏཱཡ པརིཏྟདཱིཔཝཱསཱིཧི སདྡྷིཾ ཙཏུམཧཱདཱིཔཝཱསིནོ སཏྟཝིསེསཱ མནུསྶཱཏི ཝུཙྩནྟཱི’’ཏི. ལོཀིཡཱ པན ‘‘མནུནོ ¶ ཨཔཙྩབྷཱཝེན མནུསྶཱ’’ཏི ཝདནྟི. མནུ ནཱམ པཋམཀཔྤིཀོ ལོཀམརིཡཱདཱཡ ཨཱདིབྷཱུཏོ སཏྟཱནཾ ཧིཏཱཧིཏཝིདྷཱཡཀོ ཀཏྟབྦཱཀཏྟབྦཏཱཝསེན པིཏུཊྛཱནིཡོ, ཡོ སཱསནེ མཧཱསམྨཏོཏི ཝུཙྩཏི ཨམྷཱཀཾ བོདྷིསཏྟོ, པཙྩཀྑཏོ པརམྤརཱཡ ཙ ཏསྶ ཨོཝཱདཱནུསཱསནིཡཾ ཋིཏཱ སཏྟཱ པུཏྟསདིསཏཱཡ ‘‘མནུསྶཱ, མཱནུསཱ’’ཏི ཙ ཝུཙྩནྟི. ཏཏོ ཨེཝ ཧི ཏེ ‘‘མཱནཝཱ མནུཛཱ’’ཏི ཙ ཝོཧརཱིཡནྟི.

པཉྩཧི ཀཱམགུཎེཧི ཨཏྟནོ ཨཏྟནོ དེཝཱནུབྷཱཝསངྑཱཏེཧི ཨིདྡྷིཝིསེསེཧི ཙ དིབྦནྟི ཀཱིལ༹ནྟི ལལ༹ནྟི ཛོཏནྟཱིཏི དེཝཱ. ཏཏྠ ཀཱམདེཝཱ ཀཱམགུཎེཧི ཙེཝ ཨིདྡྷིཝིསེསེཧི ཙ, ཨིཏརེ ཨིདྡྷིཝིསེསེཧེཝ དིབྦནྟཱིཏི ཝེདིཏབྦཱ. སརཎནྟི ཝཱ གམིཡནྟི ཨབྷིཏྠཝཱིཡནྟཱིཏི ཝཱ དེཝཱ. ཨེཏྠ ཙ ནིརཡགཏིདེཝགཏིམནུསྶགཏཱིཧི སདྡྷིཾ ཨོཀཱསེན ཁནྡྷཱ ཝུཏྟཱ. ཏིརཙྪཱནཡོནིཔེཏྟིཝིསཡགྒཧཎེན ཁནྡྷཱནཾ ཨེཝ གཧཎཾ ཝེདིཏབྦཾ ཏེསཾ ཏཱདིསསྶ པརིཙྪིནྣསྶ ཨོཀཱསསྶ ཨབྷཱཝཏོ. ཡཏྠ ཡཏྠ ཝཱ ཏེ ཨརཉྙསམུདྡཔབྦཏཔཱདཱདིཀེ ནིབདྡྷཝཱསཾ ཝསནྟི, ཏཱདིསསྶ ཋཱནསྶ ¶ ཝསེན ཨོཀཱསོཔི གཧེཏབྦོ. སཏྟ ཝིཉྙཱཎཊྛིཏིཡོ ནཝ སཏྟཱཝཱསཱ ཙ ཧེཊྛཱ སཾཝཎྞིཏནཡཱ ཨེཝ. ཨཔརཱཔརབྷཱཝཱཡཱཏི ཨཔརཱཔརཾ ཡོནིཨཱདིཏོ ཡོནིཨཱདིབྷཱཝཱཡ. ཨཱབནྡྷནཾ གཎྛིཀརཎཾ, སཾསིབྦནཾ ཏུནྣཀརཎཾ. ཏཎྷཱཡ ནིཀྑནྟཾ ཏཏྠ ཏསྶཱ སབྦསོ ཨབྷཱཝཏོ, ནིཀྑམནཉྩསྶ ཏཎྷཱཡ ཝིསཾཡོགོ ཨེཝཱཏི ཨཱཧ ‘‘ཝིསཾཡུཏྟ’’ནྟི.

ཀཱམཱནཾ པཧཱནནྟི ཨེཏྠ ཀཱམགྒཧཎེན ཀཱམཱིཡཏཱིཏི ཀཱམོ, ཀཱམེཏཱིཏི ཀཱམོཏི དུཝིདྷསྶཔི ཀཱམསྶ སངྒཧོ ཀཏོཏི ཨཱཧ ‘‘ཝཏྠུཀཱམཱནཾ ཀིལེསཀཱམཱནཉྩ པཧཱན’’ནྟི. ཝཏྠུཀཱམཔྤཧཱནཉྩེཏྠ ཏེསུ ཚནྡརཱགཔྤཧཱནེནཱཏི ཝེདིཏབྦཾ. ཀཱམསཉྙཱནནྟི ཀཱམེསུ, ཀཱམསཧགཏཱནཾ ཝཱ སཉྙཱནཾ. པརིཉྙཱཏི ཏིཝིདྷཱཔི པརིཉྙཱ ཨིདྷཱདྷིཔྤེཏཱཏི ཨཱཧ ‘‘ཉཱཏཏཱིརཎཔཧཱནཝསེན ཏིཝིདྷཱ པརིཉྙཱ’’ཏི. ཏཏྠ ཀཏམཱ ཉཱཏཔརིཉྙཱ? སབྦཾ ཏེབྷཱུམཀཾ ནཱམརཱུཔཾ ‘‘ཨིདཾ རཱུཔཾ, ཨེཏྟཀཾ རཱུཔཾ, ན ཨིཏོ བྷིཡྻོ, ཨིདཾ ནཱམཾ, ཨེཏྟཀཾ ནཱམཾ, ན ཨིཏོ བྷིཡྻོ’’ཏི བྷཱུཏུཔཱདཱཡབྷེདཾ རཱུཔཾ ཕསྶཱདིབྷེདཾ ནཱམཉྩ ལཀྑཎརསཔཙྩུཔཊྛཱནཔདཊྛཱནཏོ ཝཝཏྠཔེཏི, ཀམྨཱཝིཛྫཱདིཀཉྩསྶ པཙྩཡཾ པརིགྒཎྷཱཏི, ཨཡཾ ཉཱཏཔརིཉྙཱ.

ཀཏམཱ ¶ ཏཱིརཎཔརིཉྙཱ? ཨེཝཾ ཉཱཏཾ ཀཏྭཱ ཏཾ སབྦཾ ཏཱིརེཏི ཨནིཙྩཏོ དུཀྑཏོ རོགཏོཏི དྭཱཙཏྟཱལཱིསཱཡ ཨཱཀཱརེཧི, ཨཡཾ ཏཱིརཎཔརིཉྙཱ ནཱམ. ཀཏམཱ པཧཱནཔརིཉྙཱ? ཨེཝཾ ཏཱིརཡིཏྭཱ ཨགྒམགྒེན སབྦསྨིཾ ཚནྡརཱགཾ པཛཧཏི, ཨཡཾ པཧཱནཔརིཉྙཱ. དིཊྛིཝིསུདྡྷིཀངྑཱཝིཏརཎཝིསུདྡྷིཡོ ཝཱ ཉཱཏཔརིཉྙཱ, མགྒཱམགྒཔཊིཔདཱཉཱཎདསྶནཝིསུདྡྷིཨཱདཡོ, ཀལཱཔསམྨསནཱདིཨནུལོམཔརིཡོསཱནཱ ཝཱ པཉྙཱ ཏཱིརཎཔརིཉྙཱ, ཨརིཡམགྒེ ཉཱཎཾ ནིཔྤརིཡཱཡེན པཧཱནཔརིཉྙཱ. ཨིདྷ པན ཀཱམསཉྙཱནཾ སབྷཱཝལཀྑཎཔཊིཝེདྷཝསེན ཨནིཙྩཱདིསཱམཉྙལཀྑཎཝསེན ཙ པཝཏྟམཱནཱནཾ ཉཱཏཏཱིརཎཔརིཉྙཱནམྤི ཀིཙྩནིཔྥཏྟིཡཱ མགྒེནེཝ ཨིཛ྄ཛྷནཏོ མགྒཀྑཎཾཡེཝ སནྡྷཱཡ ཏིཝིདྷཱཔི པརིཉྙཱ ཝུཏྟཱ. ཏེནེཝ ‘‘ཨིམེསུ པཉྩསུ ཋཱནེསུ ཀིལེསཀྑཡཀརོ ལོཀུཏྟརམགྒོཝ ཀཐིཏོ’’ཏི ཝུཏྟཾ.

ཀཱམེསུ, ཀཱམེ ཝཱ པཱཏུམིཙྪཱ ཀཱམཔིཔཱསཱཏི ཨཱཧ – ‘‘ཀཱམེསུ པཱཏབྱཏཱནཾ, ཀཱམེ ཝཱ པཱཏུམིཙྪཱན’’ནྟི. ཨིམེསུ པཉྩསུ ཋཱནེསཱུཏི ‘‘ཀཱམཱནཾ པཧཱནཾ ཨཀྑཱཏ’’ནྟིཨཱདིནཱ ཝུཏྟེསུ པཉྩསུ ཋཱནེསུ. ཏཱིསུ ཋཱནེསཱུཏི ‘‘ཝིརཱགཱཡ དྷམྨོ དེསིཏོ, ནོ སརཱགཱཡ, ཝིསཾཡོགཱཡ དྷམྨོ དེསིཏོ, ནོ སཾཡོགཱཡ, ཨནུཔཱདཱནཱཡ དྷམྨོ དེསིཏོ, ནོ སཨུཔཱདཱནཱཡཱ’’ཏི ཨེཝཾ ཝུཏྟེསུ ཋཱནེསུ. ཝིཔྤཊིསཱརཾ ཀརོཏཱིཏི ཨེཝཾ ཏཾ པཱཔཾ ཝིཔྤཊིསཱརཾ ཨུཔྤཱདེཏི. ཀཱིདིསཾ ཝིཔྤཊིསཱརཾ ཀརོཏཱིཏི ཨཱཧ ‘‘ཨཱིདིསེཔི ནཱམཱ’’ཏིཨཱདི.

༣༩. ནེཝ ¶ པིཡཀམྱཏཱཡཱཏི ཨཏྟནི སཏྠུ ནེཝ པིཡབྷཱཝཀཱམཏཱཡ. ན བྷེདཔུརེཀྑཱརཏཱཡཱཏི ན སཏྠུ ཏེན བྷིཀྑུནཱ བྷེདནཱདྷིཔྤཱཡཔུརེཀྑཱརཏཱཡ. ན ཀལིསཱསནཱརོཔནཏྠཱཡཱཏི ན དོསཱརོཔནཏྠཱཡ. ཀལཱིཏི ཀོདྷསྶེཏཾ ཨདྷིཝཙནཾ, ཏསྶ སཱསནཾ ཀལིསཱསནཾ, ཀོདྷཝསེན ཝུཙྩམཱནོ གརཧདོསོ. ཝེལནྟི སིཀྑཱཔདཝེལཾ. མརིཡཱདནྟི ཏསྶེཝ ཝེཝཙནཾ. སིཀྑཱཔདཉྷི ཨནཏིཀྐམནཱིཡཊྛེན ‘‘ཝེལཱ, མརིཡཱདཱ’’ཏི ཙ ཝུཙྩཏི.

ཨཛ྄ཛྷཱཙཱརཝཱིཏིཀྐམོཏི མེཐུནཝསེན པཝཏྟཨཛ྄ཛྷཱཙཱརསངྑཱཏོ ཝཱིཏིཀྐམོ. པཀརཎེཏི ཨེཏྠ པ-སདྡོ ཨཱརམྦྷཝཙནོཏི ཨཱཧ ‘‘ཀཏྟུཾ ཨཱརབྷཏཱི’’ཏི. ཀཏྠཙི ཨུཔསགྒོ དྷཱཏུཨཏྠམེཝ ཝདཏི, ན ཝིསེསཏྠཛོཏཀོཏི ཨཱཧ ‘‘ཀརོཏིཡེཝ ཝཱ’’ཏི. ཛཱཏིཡཱཏི ¶ ཁཏྟིཡཱདིཛཱཏིཡཱ. གོཏྟེནཱཏི གོཏམཀསྶཔཱདིགོཏྟེན. ཀོལཔུཏྟིཡེནཱཏི ཁཏྟིཡཱདིཛཱཏཱིསུཡེཝ སཀྐཀུལསོཏྠིཡཀུལཱདིཝིསིཊྛཀུལཱནཾ པུཏྟབྷཱཝེན. ཡསསྶཱིཏི མཧཱཔརིཝཱརོ. པེསལནྟི པིཡསཱིལཾ. ཨཝིཀམྤམཱནེནཱཏི པཊིགྷཱནུནཡེཧི ཨཀམྤམཱནེན. ཡསྶ ཏསྨིཾ ཨཏྟབྷཱཝེ ཨུཔྤཛྫནཱརཧཱནཾ མགྒཕལཱནཾ ཨུཔནིསྶཡོ ནཏྠི, ཏཾ བུདྡྷཱ ‘‘མོགྷཔུརིསཱ’’ཏི ཝདནྟི ཨརིཊྛལཱལུ༹དཱཡཱིཨཱདིཀེ ཝིཡ. ཨུཔནིསྶཡེ སཏིཔི ཏསྨིཾ ཁཎེ མགྒེ ཝཱ ཕལེ ཝཱ ཨསཏི ‘‘མོགྷཔུརིསཱ’’ཏི ཝདནྟིཡེཝ དྷནིཡཨུཔསེནཏྠེརཱདིཀེ ཝིཡ. སུདིནྣསྶ པན ཏསྨིཾ ཨཏྟབྷཱཝེ མགྒཕལཱནཾ ཨུཔནིསྶཡོ སམུཙྪིནྣོཡེཝ, ཏེན ནཾ ‘‘མོགྷཔུརིསཱ’’ཏི ཨཱཧ.

སམཎཀརཎཱནཾ དྷམྨཱནནྟི ཧིརོཏྟཔྤཱདཱིནཾ. མགྒཕལནིབྦཱནགྒཧཎེན པཊིཝེདྷསཱསནསྶ གཧིཏཏྟཱ སཱསནཱནནྟི པཊིཔཏྟིཔརིཡཏྟིསཱསནཱནཾ གཧཎཾ ཝེདིཏབྦཾ. ཚཝིནྟི ཏེསཾ པབྷསྶརཀརཎཾ ཚཝིཾ. ཀིཾ ཏནྟི ཨཱཧ ‘‘ཚཱཡ’’ནྟི, ཏེསཾ པཀཱསཀཾ ཨོབྷཱསནྟི ཨཏྠོ. ཀིཾ ཏནྟི ཨཱཧ ‘‘སུནྡརབྷཱཝ’’ནྟི. ཚཝིམནུགཏཾ ཨནུཙྪཝིཀཾ. པཏིརཱུཔནྟིཨཱདཱིསུཔི ‘‘ཏེས’’ནྟི ཨཱནེཏྭཱ སམྦནྡྷིཏབྦཾ. སམཎཱནཾ ཀམྨཾ སཱམཎཀཾ, ན སཱམཎཀཾ ཨསྶཱམཎཀཾ. ཀཐཾ-སདྡཡོགེན ‘‘ན སཀྑིསྶསཱི’’ཏི ཨནཱགཏཝཙནཾ ཀཏཾ. ‘‘ནཱམ-སདྡཡོགེནཱ’’ཏི ཙ ཝདནྟི.

དཡཱལུཀེནཱཏི ཨནུཀམྤཱཡ སཧིཏེན. པརིབྷཱསནྟོཏི གརཧནྟོ. ནིརུཏྟིནཡེན ཨཱསཱིཝིས-སདྡསྶ ཨཏྠཾ དསྶེནྟོ ཨཱཧ ‘‘ཨཱསུ སཱིགྷ’’ནྟིཨཱདི. ཨེཏསྶཱཏི ཨཱསཱིཝིསསྶ. ཨཱགཙྪཏཱིཏི ཡོ ཏེན དཊྛོ, ཏཾ པཏིཨཱགཙྪཏི. ཨཱསིཏྟཝིསོཏིཔི ཨཱསཱིཝིསོ, སཀལཀཱཡེ ཨཱསིཉྩིཏྭཱ ཝིཡ ཋཔིཏཝིསོ པརསྶ ཙ སརཱིརེ ཨཱསིཉྩནཝིསོཏི ཨཏྠོ. ཨསིཏཝིསོཏིཔི ཨཱསཱིཝིསོ. ཡཾ ཡཉྷི ཨེཏེན ཨསིཏཾ ཧོཏི པརིབྷུཏྟཾ, ཏཾ ཝིསམེཝ སམྤཛྫཏི, ཏསྨཱ ཨསིཏཾ ཝིསཾ ཨེཏསྶཱཏི ཨསིཏཝིསོཏི ཝཏྟབྦེ ‘‘ཨཱསཱིཝིསོ’’ཏི ནིརུཏྟིནཡེན ¶ ཝུཏྟཾ. ཨསིསདིསཝིསོཏིཔི ཨཱསཱིཝིསོ, ཨསི ཝིཡ ཏིཁིཎཾ པརསྶ མམྨཙྪེདནསམཏྠཾ ཝིསཾ ཨེཏསྶཱཏི ཨཱསཱིཝིསོཏི ཝུཏྟཾ ཧོཏི. ཨཱསཱིཏི ཝཱ དཱཋཱ ཝུཙྩཏི, ཏཏྠ སནྣིཧིཏཝིསོཏི ཨཱསཱིཝིསོ. སེསསཔྤེཧི ཀཎྷསཔྤསྶ མཧཱཝིསཏྟཱ ཨཱསཱིཝིསསྶཱནནྟརཾ ཀཎྷསཔྤོ ཝུཏྟོ. སཔྤམུཁམྤི ¶ ཨངྒཱརཀཱསུ ཝིཡ བྷཡཱཝཧཏྟཱ ཨཀུསལུཔྤཏྟིཡཱ ཋཱནཾ ན ཧོཏཱིཏི ཨཀུསལཀམྨཏོ ནིཝཱརཎཱདྷིཔྤཱཡེན སཱིལབྷེདཏོཔི སུདྡྷསཱིལེ ཋིཏསྶ མརཎམེཝ ཝརཏརནྟི དསྶེཏུཾ ‘‘ཨཱསཱིཝིསསྶ ཀཎྷསཔྤསྶ མུཁེ ཨངྒཛཱཏཾ པཀྑིཏྟཾ ཝར’’ནྟི ཝུཏྟཾ. པབྦཛིཏེན ཧི ཀཏཔཱཔཀམྨཾ བྷགཝཏོ ཨཱཎཱཏིཀྐམནཏོ ཝཏྠུམཧནྟཏཱཡ མཧཱསཱཝཛྫཾ. ཀཱསུནྟི ཨཱཝཱཊོཔི ཝུཙྩཏི རཱསིཔི.

‘‘ཀིནྣུ སནྟརམཱནོཝ, ཀཱསུཾ ཁཎསི སཱརཐི;

པུཊྛོ མེ སམྨ ཨཀྑཱཧི, ཀིཾ ཀཱསུཡཱ ཀརིསྶསཱི’’ཏི. (ཛཱ. ༢.༢༢.༣) –

ཨེཏྠ ཧི ཨཱཝཱཊོ ཀཱསུ ནཱམ.

‘‘ཨངྒཱརཀཱསུཾ ཨཔརེ ཕུཎནྟི, ནརཱ རུདནྟཱ པརིདཌྜྷགཏྟཱ’’ཏི (ཛཱ. ༢.༢༢.༤༦༢) –

ཨེཏྠ རཱསི. ཨིདྷ པན ཨུབྷཡམྤི ཨདྷིཔྤེཏནྟི ཨཱཧ ‘‘ཨངྒཱརཔུཎྞཀཱུཔེ ཨངྒཱརརཱསིམྷི ཝཱ’’ཏི. ཀསྶཏི ཁཎཱིཡཏཱིཏི ཀཱསུ, ཨཱཝཱཊོ. ཀསཱིཡཏི ཙཱིཡཏཱིཏི ཀཱསུ, རཱསི. པདིཏྟཱཡཱཏི དིཔྤམཱནཱཡ. སཾ-སདྡོ ཨེཏྠ སམནྟཔརིཡཱཡོཏི ཨཱཧ ‘‘སམནྟཏོ པཛྫལིཏཱཡཱ’’ཏི.

ཨིདཾ མཱཏུགཱམསྶ ཨངྒཛཱཏེ ཨངྒཛཱཏཔཀྑིཔནཾ ནིདཱནཾ ཀཱརཎམསྶ ནིརཡུཔཔཛྫནསྶཱཏི ཨིཏོནིདཱནཾ, བྷཱཝནཔུཾསཀཉྩེཏཾ. པཙྩཏྟཝཙནསྶ ཏོ-ཨཱདེསོ ཀཏོ, ཏསྶ ཙ སམཱསེཔི ཨལོཔོ. ཏཏྠ ནཱམ ཏྭནྟི ཨེཏྠ ཏྭཾ-སདྡོ ‘‘སམཱཔཛྫིསྶསཱི’’ཏི ཨིམིནཱ སམྦནྡྷམུཔགཙྪམཱནོ ཨཏྠཱིཏི ཨཱཧ ‘‘ཏྭནྟི ཏཾསདྡསྶ ཝེཝཙན’’ནྟི. ‘‘ཡཾ ཏནྟི པན པཱཋོ ཡུཏྟརཱུཔོ’’ཏི གཎྛིཔདེསུ ཝུཏྟཾ. ཡཾ ཏནྟི ནཱཡཾ ཨུདྡེསནིདྡེསོ, ཡཐཱ ལོཀེ ཡཾ ཝཱ ཏཾ ཝཱཏི ཨཝཉྙཱཏཝཙནཾ, ཨེཝཾ དཊྛབྦནྟི ཨཱཧ – ‘‘ཡཾ ཝཱ ཏཾ ཝཱ ཧཱིལི༹ཏཾ ཨཝཉྙཱཏནྟི ཝུཏྟཾ ཧོཏཱི’’ཏི. ནཱིཙཛནཱནནྟི ནིཧཱིནགུཎཱནཾ སཏྟཱནཾ. གཱམདྷམྨནྟི ཨེཏྠ གཱམ-སདྡེན གཱམཝཱསིནོ ཝུཏྟཱ ཨབྷེདཱུཔཙཱརེནཱཏི ཨཱཧ ‘‘གཱམཝཱསིཀམནུསྶཱན’’ནྟི. ཀིལེསཔགྒྷརཎཀཾ དྷམྨནྟི རཱགཱདིཀིལེསཝིསྶནྡནཀདྷམྨཾ ¶ . མེཐུནདྷམྨོ ཧི རཱགཾ པགྒྷརཏི. མེཐུནདྷམྨསྶ མཧཱསཱཝཛྫཏཱཡ ཨོལཱ༹རིཀཏྟཱ ཝུཏྟཾ ‘‘ཨསུཁུམ’’ནྟི. ཨནིཔུཎནྟི ཏསྶེཝ ཝེཝཙནཾ. ཨུདཀེ བྷཝཾ ཨོདཀཾ. ཀིཾ ཏཾ? ཨུདཀཀིཙྩནྟི ཨཱཧ – ‘‘ཨུདཀཀིཙྩཾ ཨནྟིཀཾ ཨཝསཱནཾ ཨསྶཱ’’ཏི. སམཱཔཛྫིསྶཏཱིཏི ཨནཱགཏཝཙནཾ ནཱམ-སདྡཡོགེན ཀཏནྟི ཨཱཧ – ‘‘སམཱཔཛྫིསྶཏཱིཏི…པེ… ནཱམ-སདྡེན ¶ ཡོཛེཏབྦ’’ནྟི. ལོཀེ མེཐུནདྷམྨསྶ ཨཱདིཀཏྟཱ ཀོཙི པཋམཀཔྤིཀོ, ན པནཱཡནྟི ཨཱཧ – ‘‘སཱསནཾ སནྡྷཱཡ ཝདཏཱི’’ཏི. བཧཱུནནྟི པུགྒལཱཔེཀྑཾ, ན པན ཨཀུསལཱཔེཀྑནྟི ཨཱཧ ‘‘བཧཱུནཾ པུགྒལཱན’’ནྟི.

ཡཾ ཨསཾཝརཾ པཊིཙྩ དུབྦྷརཏཱདུཔྤོསཏཱདི ཧོཏི, སོ ཨསཾཝརོ དུབྦྷརཏཱདི-སདྡེན ཝུཏྟོ ཀཱརཎེ ཕལཱུཔཙཱརེནཱཏི ཨཱཧ – ‘‘དུབྦྷརཏཱདཱིནཾ ཝཏྠུབྷཱུཏསྶ ཨསཾཝརསྶཱ’’ཏི. ཝཏྠུབྷཱུཏསྶཱཏི ཀཱརཎབྷཱུཏསྶ. ཝསཏི ཨེཏྠ ཕལཾ ཏདཱཡཏྟཝུཏྟིཏཱཡཱཏི ཧི ཀཱརཎཾ ཝཏྠུ. ཨཏྟཱཏི ཙིཏྟཾ སརཱིརཉྩ, ཙིཏྟམེཝ ཝཱ. དུབྦྷརཏཉྩེཝ དུཔྤོསཏཉྩ ཨཱཔཛྫཏཱིཏི ཨཏྟནཱ པཙྩཡདཱཡཀེཧི ཙ དུཀྑེན བྷརིཏབྦཏཾ པོསེཏབྦཏཉྩ ཨཱཔཛྫཏི. ཨསཾཝརེ ཋིཏོ ཧི ཨེཀཙྩོ ཨཏྟནོཔི དུབྦྷརོ ཧོཏི དུཔྤོསོ, ཨེཀཙྩོ ཨུཔཊྛཱཀཱནམྤི. ཀཐཾ? ཡོ ཧི ཨམྦིལཱདཱིནི ལདྡྷཱ ཨནམྦིལཱདཱིནི པརིཡེསཏི, ཨཉྙསྶ གྷརེ ལདྡྷཾ ཨཉྙསྶ གྷརེ ཚཌྜེནྟོ སབྦཾ གཱམཾ ཙརིཏྭཱ རིཏྟཔཏྟོཝ ཝིཧཱརཾ པཝིསིཏྭཱ ནིཔཛྫཏི, ཨཡཾ ཨཏྟནོ དུབྦྷརོ. ཡོ པན སཱལིམཾསོདནཱདཱིནཾ པཏྟེ པཱུརེཏྭཱ དིནྣེཔི དུམྨུཁབྷཱཝཾ ཨནཏྟམནབྷཱཝམེཝ དསྶེཏི, ཏེསཾ ཝཱ སམྨུཁཱཝ ཏཾ པིཎྜཔཱཏཾ ‘‘ཀིཾ ཏུམྷེཧི དིནྣ’’ནྟི ཨཔསཱདེནྟོ སཱམཎེརགཧཊྛཱདཱིནཾ དེཏི, ཨཡཾ ཨུཔཊྛཱཀཱནཾ དུབྦྷརོ. ཨེཏཾ དིསྭཱ མནུསྶཱ དཱུརཏོཝ པརིཝཛྫེནྟི ‘‘དུབྦྷརོ བྷིཀྑུ ན སཀྐཱ པོསེཏུ’’ནྟི.

མཧིཙྪཏནྟི ཨེཏྠ མཧནྟཱནི ཝཏྠཱུནི ཨིཙྪཏི, མཧཏཱི ཝཱ པནསྶ ཨིཙྪཱཏི མཧིཙྪོ, ཏསྶ བྷཱཝོ མཧིཙྪཏཱ, སནྟགུཎཝིབྷཱཝནཏཱ པཊིགྒཧཎེ ཨམཏྟཉྙུཏཱ ཙ. མཧིཙྪོ ཧི ཨིཙྪཱཙཱརེ ཋཏྭཱ ཨཏྟནི ཝིཛྫམཱནསཱིལདྷུཏདྷམྨཱདིགུཎེ ཝིབྷཱཝེཏི, ཏཱདིསསྶ པཊིགྒཧཎེ ཨམཏྟཉྙུཏཱཔི ཧོཏི. ཡཾ སནྡྷཱཡ ཝདནྟི ‘‘སནྟགུཎསམྦྷཱཝནཏཱ པཊིགྒཧཎེ ཙ ཨམཏྟཉྙུཏཱ, ཨེཏཾ མཧིཙྪཏཱལཀྑཎ’’ནྟི. སཱ པནེསཱ མཧིཙྪཏཱ ‘‘ཨིདྷེཀཙྩོ སདྡྷོ སམཱནོ ‘སདྡྷོཏི མཾ ཛནོ ཛཱནཱཏཱུ’ཏི ཨིཙྪཏི, སཱིལཝཱ སམཱནོ ‘སཱིལཝཱཏི མཾ ཛནོ ཛཱནཱཏཱུ’ཏི’’ ཨིམིནཱ ནཡེན ཨཱགཏཱཡེཝ, ཏཱཡ སམནྣཱགཏོ པུགྒལོ དུསྶནྟཔྤིཡོ ཧོཏི, ཝིཛཱཏམཱཏཱཔིསྶ ཙིཏྟཾ གཧེཏུཾ ན སཀྐོཏི. ཏེནེཏཾ ཝུཙྩཏི –

‘‘ཨགྒིཀྑནྡྷོ ¶ སམུདྡོ ཙ, མཧིཙྪོ ཙཱཔི པུགྒལོ;

སཀཊེན པཙྩཡཾ དེནྟུ, ཏཡོཔེཏེ ཨཏཔྤིཡཱ’’ཏི. (མ. ནི. ཨཊྛ. ༡.༢༥༢; ཨ. ནི. ཨཊྛ. ༡.༡.༦༣; ཝིབྷ. ཨཊྛ. ༨༥༠; ཨུདཱ. ཨཊྛ. ༣༡; མཧཱནི. ཨཊྛ. ༨༥);

སཏྟེཧི ¶ ཀིལེསེཧི ཙ སངྒཎནཾ སམོདྷཱནཾ སངྒཎིཀཱཏི ཨཱཧ – ‘‘གཎསངྒཎིཀཱཡ ཙེཝ ཀིལེསསངྒཎིཀཱཡ ཙཱ’’ཏི. ཀོསཛྫཱནུགཏོ ཙ ཧོཏཱིཏི ཀུསཱིཏབྷཱཝེན ཨནུགཏོ ཧོཏི, ཀུསཱིཏསྶ བྷཱཝོ ཀོསཛྫཾ. ཨཊྛཀུསཱིཏཝཏྠུཔཱརིཔཱུརིཡཱཏི ཨེཏྠ ཀུཙྪིཏཾ སཱིདཏཱིཏི ཀུསཱིཏོ ད-ཀཱརསྶ ཏ-ཀཱརཾ ཀཏྭཱ. ཡསྶ དྷམྨསྶ ཝསེན པུགྒལོ ‘‘ཀུསཱིཏོ’’ཏི ཝུཙྩཏི, སོ ཀུསཱིཏབྷཱཝོ ཨིདྷ ཀུསཱིཏ-སདྡེན ཝུཏྟོ. ཝིནཱཔི ཧི བྷཱཝཛོཏནསདྡཾ བྷཱཝཏྠོ ཝིཉྙཱཡཏི ཡཐཱ ‘‘པཊསྶ སུཀྐ’’ནྟི, ཏསྨཱ ཀུསཱིཏབྷཱཝཝཏྠཱུནཱིཏི ཨཏྠོ, ཀོསཛྫཀཱརཎཱནཱིཏི ཝུཏྟཾ ཧོཏི. ཏཐཱ ཧི –

‘‘ཀམྨཾ ཁོ མེ ཀཏྟབྦཾ བྷཝིསྶཏི, ཀམྨཾ ཁོ པན མེ ཀརོནྟསྶ ཀཱཡོ ཀིལམིསྶཏི, ཧནྡཱཧཾ ནིཔཛྫཱམཱིཏི སོ ནིཔཛྫཏི, ན ཝཱིརིཡཾ ཨཱརབྷཏི ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ ཨསཙྪིཀཏསྶ སཙྪིཀིརིཡཱཡ, ཨིདཾ པཋམཾ ཀུསཱིཏཝཏྠུ. ཨཧཾ ཁོ ཀམྨཾ ཨཀཱསིཾ, ཀམྨཾ ཁོ པན མེ ཀརོནྟསྶ ཀཱཡོ ཀིལནྟོ, ཧནྡཱཧཾ ནིཔཛྫཱམི…པེ… མགྒོ ཁོ མེ གནྟབྦོ བྷཝིསྶཏི, མགྒཾ ཁོ པན མེ གཙྪནྟསྶ ཀཱཡོ ཀིལམིསྶཏི, ཧནྡཱཧཾ ནིཔཛྫཱམི…པེ… ཨཧཾ ཁོ མགྒཾ ཨགམཱསིཾ, མགྒཾ ཁོ པན མེ གཙྪནྟསྶ ཀཱཡོ ཀིལནྟོ, ཧནྡཱཧཾ ནིཔཛྫཱམི…པེ… ཨཧཾ ཁོ གཱམཾ ཝཱ ནིགམཾ ཝཱ པིཎྜཱཡ ཙརནྟོ ནཱལཏྠཾ ལཱུཁསྶ ཝཱ པཎཱིཏསྶ ཝཱ བྷོཛནསྶ ཡཱཝདཏྠཾ པཱརིཔཱུརིཾ, ཏསྶ མེ ཀཱཡོ ཀིལནྟོ ཨཀམྨཉྙོ, ཧནྡཱཧཾ ནིཔཛྫཱམི…པེ… ཨཧཾ ཁོ གཱམཾ ཝཱ ནིགམཾ ཝཱ པིཎྜཱཡ ཙརནྟོ ཨལཏྠཾ ལཱུཁསྶ ཝཱ པཎཱིཏསྶ ཝཱ བྷོཛནསྶ ཡཱཝདཏྠཾ པཱརིཔཱུརིཾ, ཏསྶ མེ ཀཱཡོ གརུཀོ ཨཀམྨཉྙོ མཱསཱཙིཏཾ མཉྙེ, ཧནྡཱཧཾ ནིཔཛྫཱམི…པེ… ཨུཔྤནྣོ ཁོ མེ ཨཡཾ ཨཔྤམཏྟཀོ ཨཱབཱདྷོ, ཨཏྠི ཀཔྤོ ནིཔཛྫིཏུཾ, ཧནྡཱཧཾ ནིཔཛྫཱམི…པེ… ཨཧཾ ཁོ གིལཱནཱ ཝུཊྛིཏོ ཨཙིརཝུཊྛིཏོ གེལཉྙཱ, ཏསྶ མེ ཀཱཡོ དུབྦལོ ཨཀམྨཉྙོ, ཧནྡཱཧཾ ནིཔཛྫཱམཱིཏི སོ ནིཔཛྫཏི, ན ཝཱིརིཡཾ ཨཱརབྷཏི ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ ཨསཙྪིཀཏསྶ སཙྪིཀིརིཡཱཡ. ཨིདཾ ཨཊྛམཾ ཀུསཱིཏཝཏྠུ’’ནྟི (དཱི. ནི. ༣.༣༣༤; ཨ. ནི. ༨.༨༠) –

ཨེཝམཱགཏཱནི ¶ ¶ ‘‘ཧནྡཱཧཾ ནིཔཛྫཱམཱི’’ཏི ཨེཝཾ པཝཏྟཨོསཱིདནཱནི ཨུཔརཱུཔརི ཀོསཛྫཀཱརཎཏྟཱ ཨཊྛ ཀུསཱིཏཝཏྠཱུནི ནཱམ, ཏེསཾ པཱརིཔཱུརིཡཱ སཾཝཏྟཏཱིཏི ཨཏྠོ.

སུབྷརོ ཧོཏི སུཔོསོཏི ཨཏྟནོ ཨུཔཊྛཱཀེཧི ཙ སུཁེན བྷརིཏབྦོ པོསེཏབྦོཏི ཨཏྠོ. སཾཝརེ ཋིཏོ ཧི ཨེཀཙྩོ ཨཏྟནོཔི སུབྷརོ ཧོཏི སུཔོསོ, ཨེཀཙྩོ ཨུཔཊྛཱཀཱནམྤི. ཀཐཾ? ཡོ ཧི ཡཾ ཀིཉྩི ལཱུཁཾ ཝཱ པཎཱིཏཾ ཝཱ ལདྡྷཱ ཏུཊྛཙིཏྟོཝ བྷུཉྫིཏྭཱ ཝིཧཱརཾ གནྟྭཱ ཨཏྟནོ ཀམྨཾ ཀརོཏི, ཨཡཾ ཨཏྟནོ སུབྷརོ. ཡོ པན པརེསམྤི ཨཔྤཾ ཝཱ བཧུཾ ཝཱ ལཱུཁཾ ཝཱ པཎཱིཏཾ ཝཱ དཱནཾ ཨཧཱིལེ༹ཏྭཱ ཨཏྟམནོ ཝིཔྤསནྣམུཁོ ཧུཏྭཱ ཨེཏེསཾ སམྨུཁཱཝ པརིབྷུཉྫིཏྭཱ ཡཱཏི, ཨཡཾ ཨུཔཊྛཱཀཱནཾ སུབྷརོ. ཨེཏཾ དིསྭཱ མནུསྶཱ ཨཏིཝིཡ ཝིསྶཏྠཱ ཧོནྟི, ‘‘ཨམྷཱཀཾ བྷདནྟོ སུབྷརོ, ཐོཀཐོཀེནཔི ཏུསྶཏི, མཡམེཝ ནཾ པོསེསྶཱམཱ’’ཏི པཊིཉྙཾ ཀཏྭཱ པོསེནྟི. ཨཔྤིཙྪཏནྟི ཨིཙྪཱཝིརཧིཏཏྟཾ. ཨེཏྠ ཧི བྱཉྫནཾ སཱཝསེསཾ ཝིཡ, ཨཏྠོ པན ནིརཝསེསོ. ཨཔྤ-སདྡོ ཧེཏྠ ཨབྷཱཝཏྠོཏི སཀྐཱ ཝིཉྙཱཏུཾ ‘‘ཨཔྤཱབཱདྷཏཉྩ སཉྫཱནཱམཱི’’ཏིཨཱདཱིསུ (མ. ནི. ༡.༢༢༥) ཝིཡ. ཏེནེཝཱཧ ‘‘ནིཏྟཎྷབྷཱཝ’’ནྟི.

ཏིཔྤབྷེདཱཡ སནྟུཊྛིཡཱཏི ཡཐཱལཱབྷཱདིསནྟོསསཱམཉྙེན ཝུཏྟཾ, ཙཏཱུསུ པན པཙྩཡེསུ ཏཡོ ཏཡོ སནྟོསཱཏི དྭཱདསཝིདྷོ ཧོཏི སནྟོསོ. ཀཐཾ? ཙཱིཝརེ ཡཐཱལཱབྷསནྟོསོ ཡཐཱབལསནྟོསོ ཡཐཱསཱརུཔྤསནྟོསོཏི ཏིཝིདྷོ ཧོཏི སནྟོསོ. ཨེཝཾ པིཎྜཔཱཏཱདཱིསུ. ཏསྶཱཡཾ པབྷེདསཾཝཎྞནཱ (མ. ནི. ཨཊྛ. ༡.༢༥༢; སཾ. ནི. ཨཊྛ. ༢.༢.༡༤༤; ཨ. ནི. ཨཊྛ. ༡.༡.༦༥) – ཨིདྷ བྷིཀྑུ ཙཱིཝརཾ ལབྷཏི སུནྡརཾ ཝཱ ཨསུནྡརཾ ཝཱ, སོ ཏེནེཝ ཡཱཔེཏི ཨཉྙཾ ན པཏྠེཏི, ལབྷནྟོཔི ན གཎྷཱཏི. ཨཡམསྶ ཙཱིཝརེ ཡཐཱལཱབྷསནྟོསོ. ཨཐ པན པཀཏིདུབྦལོ ཝཱ ཧོཏི ཨཱབཱདྷཛརཱབྷིབྷཱུཏོ ཝཱ, གརུཙཱིཝརཾ པཱརུཔནྟོ ཀིལམཏི, སོ སབྷཱགེན བྷིཀྑུནཱ སདྡྷིཾ ཏཾ པརིཝཏྟེཏྭཱ ལཧུཀེན ཡཱཔེནྟོཔི སནྟུཊྛོཡེཝ ཧོཏི. ཨཡམསྶ ཙཱིཝརེ ཡཐཱབལསནྟོསོ. པཀཏིདུབྦལཱདཱིནཉྷི གརུཙཱིཝརཱནི ན ཕཱསུབྷཱཝཱཝཧཱནི སརཱིརཁེདཱཝཧཱནི ཙ ཧོནྟཱིཏི པཡོཛནཝསེན ཨནཏྲིཙྪཏཱདིཝསེན ཏཱནི པརིཝཏྟེཏྭཱ ལཧུཀཙཱིཝརཔརིབྷོགོ ན སནྟོསཝིརོདྷཱིཏི. ཨཔརོ ¶ པཎཱིཏཔཙྩཡལཱབྷཱི ཧོཏི, སོ པཊྚཙཱིཝརཱདཱིནཾ ཨཉྙཏརཾ མཧགྒྷཙཱིཝརཾ བཧཱུནི ཝཱ པན ཙཱིཝརཱནི ལབྷིཏྭཱ ‘‘ཨིདཾ ཐེརཱནཾ ཙིརཔབྦཛིཏཱནཾ, ཨིདཾ བཧུསྶུཏཱནཾ ཨནུརཱུཔཾ, ཨིདཾ གིལཱནཱནཾ, ཨིདཾ ཨཔྤལཱབྷཱནཾ ཧོཏཱུ’’ཏི དཏྭཱ ཏེསཾ པུརཱཎཙཱིཝརཾ ཝཱ སངྐཱརཀཱུཊཱདིཏོ ཝཱ ནནྟཀཱནི ཨུཙྩིནིཏྭཱ ཏེཧི སངྒྷཱཊིཾ ཀཏྭཱ དྷཱརེནྟོཔི སནྟུཊྛོཝ ཧོཏི. ཨཡམསྶ ཙཱིཝརེ ཡཐཱསཱརུཔྤསནྟོསོ. མཧགྒྷཉྷི ཙཱིཝརཾ བཧཱུནི ཝཱ ¶ ཙཱིཝརཱནི ལབྷིཏྭཱཔི ཏཱནི ཝིསྶཛྫེཏྭཱ ཏདཉྙསྶ གཧཎཾ ཡཐཱསཱརུཔྤནཡེ ཋིཏཏྟཱ ན སནྟོསཝིརོདྷཱིཏི.

ཨིདྷ པན བྷིཀྑུ པིཎྜཔཱཏཾ ལབྷཏི ལཱུཁཾ ཝཱ པཎཱིཏཾ ཝཱ, སོ ཏེནེཝ ཡཱཔེཏི ཨཉྙཾ ན པཏྠེཏི, ལབྷནྟོཔི ན གཎྷཱཏི. ཨཡམསྶ པིཎྜཔཱཏེ ཡཐཱལཱབྷསནྟོསོ. ཡོ པན ཨཏྟནོ པཀཏིཝིརུདྡྷཾ ཝཱ བྱཱདྷིཝིརུདྡྷཾ ཝཱ པིཎྜཔཱཏཾ ལབྷཏི, ཡེནསྶ པརིབྷུཏྟེན ཨཕཱསུ ཧོཏི, སོ སབྷཱགསྶ བྷིཀྑུནོ ཏཾ དཏྭཱ ཏསྶ ཧཏྠཏོ སཔྤཱཡབྷོཛནཾ བྷུཉྫིཏྭཱ སམཎདྷམྨཾ ཀརོནྟོཔི སནྟུཊྛོཝ ཧོཏི. ཨཡམསྶ པིཎྜཔཱཏེ ཡཐཱབལསནྟོསོ. ཨཔརོ བཧུཾ པཎཱིཏཾ པིཎྜཔཱཏཾ ལབྷཏི, སོ ཏཾ ཙཱིཝརཾ ཝིཡ ཙིརཔབྦཛིཏབཧུསྶུཏཨཔྤལཱབྷགིལཱནཱནཾ དཏྭཱ ཏེསཾ ཝཱ སེསཀཾ པིཎྜཱཡ ཝཱ ཙརིཏྭཱ མིསྶཀཱཧཱརཾ བྷུཉྫནྟོཔི སནྟུཊྛོཝ ཧོཏི. ཨཡམསྶ པིཎྜཔཱཏེ ཡཐཱསཱརུཔྤསནྟོསོ.

ཨིདྷ པན བྷིཀྑུ སེནཱསནཾ ལབྷཏི མནཱཔཾ ཝཱ ཨམནཱཔཾ ཝཱ, སོ ཏེན ནེཝ སོམནསྶཾ, ན པཊིགྷཾ ཨུཔྤཱདེཏི, ཨནྟམསོ ཏིཎསནྠརཀེནཔི ཡཐཱལདྡྷེནེཝ ཏུསྶཏི. ཨཡམསྶ སེནཱསནེ ཡཐཱལཱབྷསནྟོསོ. ཡོ པན ཨཏྟནོ པཀཏིཝིརུདྡྷཾ ཝཱ བྱཱདྷིཝིརུདྡྷཾ ཝཱ སེནཱསནཾ ལབྷཏི, ཡཏྠསྶ ཝསཏོ ཨཕཱསུ ཧོཏི, སོ ཏཾ སབྷཱགསྶ བྷིཀྑུནོ དཏྭཱ ཏསྶ སནྟཀེ སཔྤཱཡསེནཱསནེ ཝསནྟོཔི སནྟུཊྛོཝ ཧོཏི. ཨཡམསྶ སེནཱསནེ ཡཐཱབལསནྟོསོ. ཨཔརོ མཧཱཔུཉྙོ ལེཎམཎྜཔཀཱུཊཱགཱརཱདཱིནི བཧཱུནི པཎཱིཏསེནཱསནཱནི ལབྷཏི, སོ ཏཱནི ཙཱིཝརཱདཱིནི ཝིཡ ཙིརཔབྦཛིཏབཧུསྶུཏཨཔྤལཱབྷགིལཱནཱནཾ དཏྭཱ ཡཏྠ ཀཏྠཙི ཝསནྟོཔི སནྟུཊྛོཝ ཧོཏི. ཨཡམསྶ སེནཱསནེ ཡཐཱསཱརུཔྤསནྟོསོ. ཡོཔི ‘‘ཨུཏྟམསེནཱསནཾ ནཱམ པམཱདཊྛཱནཾ, ཏཏྠ ནིསིནྣསྶ ཐིནམིདྡྷཾ ཨོཀྐམཏི, ནིདྡཱབྷིབྷཱུཏསྶ པུན པཊིབུཛ྄ཛྷཏོ པཱཔཝིཏཀྐཱ པཱཏུབྷཝནྟཱི’’ཏི པཊིསཉྩིཀྑིཏྭཱ ཏཱདིསཾ སེནཱསནཾ ¶ པཏྟམྤི ན སམྤཊིཙྪཏི, སོ ཏཾ པཊིཀྑིཔིཏྭཱ ཨབྦྷོཀཱསརུཀྑམཱུལཱདཱིསུ ཝསནྟོཔི སནྟུཊྛོཝ ཧོཏི. ཨཡམྤིསྶ སེནཱསནེ ཡཐཱསཱརུཔྤསནྟོསོ.

ཨིདྷ པན བྷིཀྑུ བྷེསཛྫཾ ལབྷཏི ལཱུཁཾ ཝཱ པཎཱིཏཾ ཝཱ, སོ ཡཾ ལབྷཏི, ཏེནེཝ ཏུསྶཏི ཨཉྙཾ ན པཏྠེཏི, ལབྷནྟོཔི ན གཎྷཱཏི. ཨཡམསྶ གིལཱནཔཙྩཡེ ཡཐཱལཱབྷསནྟོསོ. ཡོ པན ཏེལེན ཨཏྠིཀོ ཕཱཎིཏཾ ལབྷཏི, སོ ཏཾ སབྷཱགསྶ བྷིཀྑུནོ དཏྭཱ ཏསྶ ཧཏྠཏོ ཏེལཾ གཧེཏྭཱ ཨཉྙདེཝ ཝཱ པརིཡེསིཏྭཱ བྷེསཛྫཾ ཀརོནྟོཔི སནྟུཊྛོཝ ཧོཏི. ཨཡམསྶ གིལཱནཔཙྩཡེ ཡཐཱབལསནྟོསོ. ཨཔརོ མཧཱཔུཉྙོ བཧུཾ ཏེལམདྷུཕཱཎིཏཱདིཔཎཱིཏབྷེསཛྫཾ ¶ ལབྷཏི, སོ ཏཾ ཙཱིཝརཾ ཝིཡ ཙིརཔབྦཛིཏབཧུསྶུཏཨཔྤལཱབྷགིལཱནཱནཾ དཏྭཱ ཏེསཾ ཨཱབྷཏེན ཡེན ཀེནཙི ཡཱཔེནྟོཔི སནྟུཊྛོཝ ཧོཏི. ཡོ པན ཨེཀསྨིཾ བྷཱཛནེ མུཏྟཧརཱིཏཀཾ ཋཔེཏྭཱ ཨེཀསྨིཾ ཙཏུམདྷུརཾ ‘‘གཎྷ, བྷནྟེ, ཡདིཙྪསཱི’’ཏི ཝུཙྩམཱནོ སཙསྶ ཏེསུ ཨཉྙཏརེནཔི རོགོ ཝཱུཔསམྨཏི, ཨཐ ‘‘མུཏྟཧརཱིཏཀཾ ནཱམ བུདྡྷཱདཱིཧི ཝཎྞིཏ’’ནྟི ཙཏུམདྷུརཾ པཊིཀྑིཔིཏྭཱ མུཏྟཧརཱིཏཀེནེཝ བྷེསཛྫཾ ཀརོནྟོ པརམསནྟུཊྛོཝ ཧོཏི. ཨཡམསྶ གིལཱནཔཙྩཡེ ཡཐཱསཱརུཔྤསནྟོསོ. ཨེཝཾ ཡཐཱལཱབྷཱདིཝསེན ཏིཔྤབྷེདོ སནྟོསོ ཙཏུནྣཾ པཙྩཡཱནཾ ཝསེན དྭཱདསཝིདྷོ ཧོཏཱིཏི ཝེདིཏབྦོ.

ཀཱམཝིཏཀྐབྱཱཔཱདཝིཏཀྐཝིཧིཾསཱཝིཏཀྐཱནཾ ཝསེན ཨཀུསལཝིཏཀྐཏྟཡཾ. ནེཀྑམྨཝིཏཀྐཨབྱཱཔཱདཝིཏཀྐཨཝིཧིཾ སཱཝིཏཀྐཱནཾ ཝསེན ཀུསལཝིཏཀྐཏྟཡཾ. སབྦཀིལེསཱཔཙཡབྷཱུཏཱཡ ཝིཝཊྚཱཡཱཏི རཱགཱདིསབྦཀིལེསཱནཾ ཨཔཙཡཧེཏུབྷཱུཏཱཡ ནིབྦཱནདྷཱཏུཡཱ. ཨཊྛཝཱིརིཡཱརམྦྷཝཏྠུཔཱརིཔཱུརིཡཱཏི ཨཊྛནྣཾ ཝཱིརིཡཱརམྦྷཀཱརཎཱནཾ པཱརིཔཱུརིཡཱ. ཡཐཱ ཏཐཱ པཋམཾ པཝཏྟཨབྦྷུསྶཧནཉྷི ཨུཔརི ཝཱིརིཡཱརམྦྷསྶ ཀཱརཎཾ ཧོཏི. ཨནུརཱུཔཔཙྩཝེཀྑཎཱསཧིཏཱནི ཧི ཨབྦྷུསྶཧནཱནི ཏམྨཱུལཀཱནི ཝཱ པཙྩཝེཀྑཎཱནི ཨཊྛ ཝཱིརིཡཱརམྦྷཝཏྠཱུནཱིཏི ཝེདིཏབྦཱནི. ཏཐཱ ཧི –

‘‘ཀམྨཾ ཁོ མེ ཀཏྟབྦཾ བྷཝིསྶཏི, ཀམྨཾ ཁོ པན མེ ཀརོནྟེན ན སུཀརཾ བུདྡྷཱནཾ སཱསནཾ མནསི ཀཱཏུཾ, ཧནྡཱཧཾ ཝཱིརིཡཾ ཨཱརབྷཱམི ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ ཨསཙྪིཀཏསྶ སཙྪིཀིརིཡཱཡ. ཨཧཾ ཁོ ཀམྨཾ ཨཀཱསིཾ, ཀམྨཾ ཁོ པནཱཧཾ ཀརོནྟོ ¶ ནཱསཀྑིཾ བུདྡྷཱནཾ སཱསནཾ མནསི ཀཱཏུཾ, ཧནྡཱཧཾ ཝཱིརིཡཾ ཨཱརབྷཱམི…པེ… མགྒོ ཁོ མེ གནྟབྦོ བྷཝིསྶཏི, མགྒཾ ཁོ པན མེ གཙྪནྟེན ན སུཀརཾ བུདྡྷཱནཾ སཱསནཾ མནསི ཀཱཏུཾ, ཧནྡཱཧཾ ཝཱིརིཡཾ ཨཱརབྷཱམི…པེ… ཨཧཾ ཁོ མགྒཾ ཨགམཱསིཾ, མགྒཾ ཁོ པནཱཧཾ གཙྪནྟོ ནཱསཀྑིཾ བུདྡྷཱནཾ སཱསནཾ མནསི ཀཱཏུཾ, ཧནྡཱཧཾ ཝཱིརིཡཾ ཨཱརབྷཱམི…པེ… ཨཧཾ ཁོ གཱམཾ ཝཱ ནིགམཾ ཝཱ པིཎྜཱཡ ཙརནྟོ ནཱལཏྠཾ ལཱུཁསྶ ཝཱ པཎཱིཏསྶ ཝཱ བྷོཛནསྶ ཡཱཝདཏྠཾ པཱརིཔཱུརིཾ, ཏསྶ མེ ཀཱཡོ ལཧུཀོ ཀམྨཉྙོ, ཧནྡཱཧཾ ཝཱིརིཡཾ ཨཱརབྷཱམི…པེ… ཨཧཾ ཁོ གཱམཾ ཝཱ ནིགམཾ ཝཱ པིཎྜཱཡ ཙརནྟོ ཨལཏྠཾ ལཱུཁསྶ ཝཱ པཎཱིཏསྶ ཝཱ བྷོཛནསྶ ཡཱཝདཏྠཾ པཱརིཔཱུརིཾ, ཏསྶ མེ ཀཱཡོ བལཝཱ ཀམྨཉྙོ, ཧནྡཱཧཾ ཝཱིརིཡཾ ཨཱརབྷཱམི…པེ… ཨུཔྤནྣོ ཁོ མེ ཨཡཾ ཨཔྤམཏྟཀོ ཨཱབཱདྷོ, ཋཱནཾ ཁོ པནེཏཾ ཝིཛྫཏི, ཡཾ མེ ཨཱབཱདྷོ པཝཌྜྷེཡྻ, ཧནྡཱཧཾ ཝཱིརིཡཾ ཨཱརབྷཱམི…པེ… ཨཧཾ ཁོ གིལཱནཱ ཝུཊྛིཏོ ཨཙིརཝུཊྛིཏོ གེལཉྙཱ, ཋཱནཾ ¶ ཁོ པནེཏཾ ཝིཛྫཏི, ཡཾ མེ ཨཱབཱདྷོ པཙྩུདཱཝཏྟེཡྻ, ཧནྡཱཧཾ ཝཱིརིཡཾ ཨཱརབྷཱམི ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ ཨསཙྪིཀཏསྶ སཙྪིཀིརིཡཱཡཱ’’ཏི (དཱི. ནི. ༣.༣༣༥; ཨ. ནི. ༨.༨༠) –

ཨེཝཾ པཝཏྟཨནུརཱུཔཔཙྩཝེཀྑཎཱསཧིཏཱནི ཨབྦྷུསྶཧནཱནི ཏམྨཱུལཀཱནི ཝཱ པཙྩཝེཀྑཎཱནི ཨཊྛ ཝཱིརིཡཱརམྦྷཝཏྠཱུནི ནཱམ.

ཏདནུཙྪཝིཀཾ ཏདནུལོམིཀནྟི ཨེཏྠ ཏ-སདྡོ ཝཀྑམཱནཱཔེཀྑོ ཙ ཨཏཱིཏཱཔེཀྑོ ཙ ཧོཏཱིཏི ཨཱཧ ‘‘ཡཾ ཨིདཱནི སིཀྑཱཔདཾ པཉྙཔེསྶཏཱི’’ཏིཨཱདི. སབྦནཱམཱནི ཧི ཝཀྑམཱནཝཙནཱནིཔི ཧོནྟི པཀྐནྟཝཙནཱནིཔི. སཾཝརཔྤཧཱནཔཊིསཾཡུཏྟནྟི པཉྩསཾཝརེཧི ཙེཝ པཉྩཔཧཱནེཧི ཙ པཊིསཾཡུཏྟཾ. པཉྩཝིདྷོ ཧི སཾཝརོ སཱིལསཾཝརོ སཏིསཾཝརོ ཉཱཎསཾཝརོ ཁནྟིསཾཝརོ ཝཱིརིཡསཾཝརོཏི. པཧཱནམྤི པཉྩཝིདྷཾ ཏདངྒཔྤཧཱནཾ ཝིཀྑམྦྷནཔྤཧཱནཾ སམུཙྪེདཔྤཧཱནཾ པཊིཔྤསྶདྡྷིཔྤཧཱནཾ ནིསྶརཎཔྤཧཱནནྟི.

ཏཏྠ ‘‘ཨིམིནཱ པཱཏིམོཀྑསཾཝརེན ཨུཔེཏོ ཧོཏི སམུཔེཏོ’’ཏི (ཝིབྷ. ༥༡༡) ཨེཝམཱགཏོ པཱཏིམོཀྑསཾཝརོ སཱིལསཾཝརོ ནཱམ, སོ ཙ ཨཏྠཏོ ¶ ཀཱཡིཀཝཱཙསིཀོ ཨཝཱིཏིཀྐམོ. ‘‘རཀྑཏི ཙཀྑུནྡྲིཡཾ, ཙཀྑུནྡྲིཡེ སཾཝརཾ ཨཱཔཛྫཏཱི’’ཏི (དཱི. ནི. ༡.༢༡༣; མ. ནི. ༡.༢༩༥; སཾ. ནི. ༤.༢༣༩; ཨ. ནི. ༣.༡༦) ཨེཝམཱགཏཱ ཨིནྡྲིཡཱརཀྑཱ སཏིསཾཝརོ, སཱ ཙ ཨཏྠཏོ ཏཐཱཔཝཏྟཱ སཏི ཨེཝ. ‘‘སོཏཱནཾ སཾཝརཾ བྲཱུམི, པཉྙཱཡེཏེ པིདྷཱིཡརེ’’ཏི (སུ. ནི. ༡༠༤༡; ནེཏྟི. ༡༡) ཨེཝམཱགཏོ ཉཱཎསཾཝརོ. ཨེཏྠ ཧི ‘‘སོཏཱནཾ སཾཝརཾ བྲཱུམཱི’’ཏི ཝཏྭཱ ‘‘པཉྙཱཡེཏེ པིདྷཱིཡརེ’’ཏི ཝཙནཏོ སོཏསངྑཱཏཱནཾ ཏཎྷཱདིཊྛིདུཙྩརིཏཨཝིཛྫཱདིཀིལེསཱནཾ སམུཙྪེདཀཉཱཎཾ པིདཧནཊྛེན སཾཝརོཏི ཝུཏྟཾ. ‘‘ཁམོ ཧོཏི སཱིཏསྶ ཨུཎྷསྶཱ’’ཏིཨེཝམཱགཏཱ (མ. ནི. ༡.༢༤; མ. ནི. ༣.༡༥༩; ཨ. ནི. ༤.༡༡༤) ཨདྷིཝཱསནཱ ཁནྟིསཾཝརོ, སཱ ཙ ཨཏྠཏོ ཏཐཱཔཝཏྟཱ ཁནྡྷཱ ཨདོསོ ཝཱ. པཉྙཱཏི ཨེཀེ, ཏཾ ན གཧེཏབྦཾ. ‘‘ཨུཔྤནྣཾ ཀཱམཝིཏཀྐཾ ནཱདྷིཝཱསེཏཱི’’ཏི (མ. ནི. ༡.༢༦) ཨེཝམཱགཏཾ ཀཱམཝིཏཀྐཱདཱིནཾ ཝིནོདནཝསེན པཝཏྟཾ ཝཱིརིཡམེཝ ཝཱིརིཡསཾཝརོ. སབྦོ ཙཱཡཾ སཾཝརོ ཡཐཱསཀཾ སཾཝརིཏབྦཱནཾ དུསྶཱིལྱསངྑཱཏཱནཾ ཀཱཡཝཙཱིདུཙྩརིཏཱནཾ མུཊྛསྶཙྩསངྑཱཏསྶ པམཱདསྶ ཨབྷིཛ྄ཛྷཱདཱིནཾ ཝཱ ཨཀྑནྟི ཨཉྙཱཎཀོསཛྫཱནཉྩ སཾཝརཎཏོ པིདཧནཏོ ཚཱདནཏོ ‘‘སཾཝརོ’’ཏི ཝུཙྩཏི. སཾཝརཏཱིཏི སཾཝརོ, པིདཧཏི ནིཝཱརེཏི པཝཏྟིཏུཾ ན ¶ དེཏཱིཏི ཨཏྠོ. པཙྩཡསམཝཱཡེ ཨུཔྤཛྫནཱརཧཱནཾ ཀཱཡདུཙྩརིཏཱདཱིནཾ ཏཐཱ ཏཐཱ ཨནུཔྤཱདནམེཝ ཧི ཨིདྷ སཾཝརཎཾ ནཱམ. ཨེཝཾ ཏཱཝ པཉྩཝིདྷོ སཾཝརོ ཝེདིཏབྦོ.

ཏེན ཏེན གུཎངྒེན ཏསྶ ཏསྶ ཨགུཎངྒསྶ པཧཱནཾ ཏདངྒཔྤཧཱནཾ. ནཱམརཱུཔཔརིཙྪེདཱདཱིསུ ཧི ཝིཔསྶནཱཉཱཎེསུ པཊིཔཀྑབྷཱཝཏོ དཱིཔཱལོཀེནེཝ ཏམསྶ ནཱམརཱུཔཝཝཏྠཱནེན སཀྐཱཡདིཊྛིཡཱ, པཙྩཡཔརིགྒཧེན ཨཧེཏུཝིསམཧེཏུདིཊྛཱིནཾ, ཏསྶེཝ ཨཔརབྷཱགེ ཨུཔྤནྣེན ཀངྑཱཝིཏརཎེན ཀཐཾཀཐཱིབྷཱཝསྶ, ཀལཱཔསམྨསནེན ‘‘ཨཧཾ མམཱ’’ཏི གཱཧསྶ, མགྒཱམགྒཝཝཏྠཱནེན ཨམགྒེ མགྒསཉྙཱཡ, ཨུདཡདསྶནེན ཨུཙྪེདདིཊྛིཡཱ, ཝཡདསྶནེན སསྶཏདིཊྛིཡཱ, བྷཡདསྶནེན སབྷཡེ ཨབྷཡསཉྙཱཡཱཏིཨཱདིནཱ ནཡེན ཏེན ཏེན ཝིཔསྶནཱཉཱཎེན ཏསྶ ཏསྶ ཨགུཎངྒསྶ པཧཱནཾ ཏདངྒཔྤཧཱནནྟི ཝེདིཏབྦཾ. ཡཾ པན ཨུཔཙཱརཔྤནཱབྷེདེན སམཱདྷིནཱ པཝཏྟིནིཝཱརཎཏོ གྷཊཔྤཧཱརེནེཝ ཨུདཀཔིཊྛེ སེཝཱལསྶ ཏེསཾ ཏེསཾ ནཱིཝརཎཱདིདྷམྨཱནཾ པཧཱནཾ, ཨེཏཾ ཝིཀྑམྦྷནཔྤཧཱནཾ ནཱམ. ཝིཀྑམྦྷནམེཝ པཧཱནཾ ཝིཀྑམྦྷནཔྤཧཱནཾ. ཡཾ ཙཏུནྣཾ ཨརིཡམགྒཱནཾ བྷཱཝིཏཏྟཱ ཏཾཏཾམགྒཝཏོ ¶ ཨཏྟནོ སནྟཱནེ ‘‘དིཊྛིགཏཱནཾ པཧཱནཱཡཱ’’ཏིཨཱདིནཱ (དྷ. ས. ༢༧༧) ནཡེན ཝུཏྟསྶ སམུདཡཔཀྑིཡསྶ ཀིལེསགཎསྶ ཨཙྩནྟཾ ཨཔྤཝཏྟིབྷཱཝེན པཧཱནཾ, ཨིདཾ སམུཙྪེདཔྤཧཱནཾ ནཱམ. ཡཾ པན ཕལཀྑཎེ པཊིཔྤསྶདྡྷཏྟཾ ཝཱུཔསནྟཏཱ ཀིལེསཱནཾ, ཨེཏཾ པཊིཔྤསྶདྡྷིཔྤཧཱནཾ ནཱམ. ཡཾ སབྦསངྑཏནིསྶཊཏྟཱ པཧཱིནསབྦསངྑཏཾ ནིབྦཱནཾ, ཨེཏཾ ནིསྶརཎཔྤཧཱནཾ ནཱམ. སབྦམྤི ཙེཏཾ ཙཱགཊྛེན པཧཱནནྟི ཝུཙྩཏི. ཨེཝམིམེཧི ཡཐཱཝུཏྟསཾཝརེཧི ཙེཝ པཧཱནེཧི ཙ པཊིསཾཡུཏྟཱ དྷམྨདེསནཱ ‘‘སཾཝརཔྤཧཱནཔཊིསཾཡུཏྟཱ’’ཏི ཝེདིཏབྦཱ.

ཨསུཏྟནྟཝིནིབདྡྷནྟི སུཏྟནྟེསུ ཨནིབདྡྷཾ, པཱལི༹ཨནཱརུལ༹ྷནྟི ཨཏྠོ. པཀིཎྞཀདྷམྨདེསནཱ ཧི སངྒཧཾ ན ཨཱརོཧཏི. ཝུཏྟམེཝཏྠཾ པཀཱསེནྟོ ཨཱཧ ‘‘པཱལི༹ཝིནིམུཏྟ’’ནྟི. ཨཐ ཝཱ ཨསུཏྟནྟཝིནིབདྡྷནྟི སུཏྟཱབྷིདྷམྨཔཱལི༹ཾ ཨནཱརུལ༹ྷབྷཱཝཾ སནྡྷཱཡ ཝུཏྟཾ, པཱལི༹ཝིནིམུཏྟནྟི ཝིནཡཔཱལི༹ཾ ཨནཱརུལ༹ྷབྷཱཝཾ སནྡྷཱཡ. ཨོཀྐནྟིཀདྷམྨདེསནཱ ནཱམ ཉཱཎེན ཨནུཔཝིསིཏྭཱ ཨནྟརཱ ཀཐིཡམཱནཱ དྷམྨདེསནཱ, པཊིཀྑིཔནཱདྷིཔྤཱཡཱ བྷདྡཱལིཏྠེརསདིསཱ. སམྤརེཏབྦཏོ པེཙྩ གནྟབྦཏོ སམྤརཱཡོ, པརལོཀོ. ཏཏྠ བྷཝཾ སམྤརཱཡིཀཾ. ཝཊྚབྷཡེན ཏཛྫེནྟོཏི ‘‘ཨེཝཾ དུསྶཱིལཱ ནིརཡཱདཱིསུ དུཀྑཾ པཱཔུཎནྟཱི’’ཏི ཏཛྫེནྟོ. དཱིགྷནིཀཱཡཔྤམཱཎམྤི མཛ྄ཛྷིམནིཀཱཡཔྤམཱཎམྤི དྷམྨདེསནཾ ཀརོཏཱིཏི ‘‘ཏེན ཁཎེན ཏེན མུཧུཏྟེན ཀཐཾ བྷགཝཱ ཏཱཝམཧནྟཾ དྷམྨདེསནཾ ཀརོཏཱི’’ཏི ན ཝཏྟབྦཾ. ཡཱཝཏཱ ཧི ལོཀིཡམཧཱཛནཱ ཨེཀཾ པདཾ ཀཐེནྟི, ཏཱཝ ཨཱནནྡཏྠེརོ ཨཊྛ པདཱནི ཀཐེཏི. ཨཱནནྡཏྠེརེ པན ཨེཀཾ ¶ པདཾ ཀཐེནྟེཡེཝ བྷགཝཱ སོལ༹ས པདཱནི ཀཐེཏི. ཨིམིནཱ ནཡེན ལོཀིཡཛནསྶ ཨེཀཔདུཙྩཱརཎཀྑཎེ བྷགཝཱ ཨཊྛཝཱིསསཏཾ པདཱནི ཀཐེཏི. ཀསྨཱ? བྷགཝཏོ ཧི ཛིཝ྄ཧཱ མུདུ, དནྟཱཝརཎཾ སུཕུསིཏཾ, ཝཙནཾ ཨགལི༹ཏཾ, བྷཝངྒཔརིཝཱསོ ལཧུཀོ, ཏསྨཱ སཙེ ཨེཀོ བྷིཀྑུ ཀཱཡཱནུཔསྶནཾ པུཙྪཏི, ཨཉྙོ ཝེདནཱནུཔསྶནཾ, ཨཉྙོ ཙིཏྟཱནུཔསྶནཾ, ཨཉྙོ དྷམྨཱནུཔསྶནཾ, ‘‘ཨིམིནཱ པུཊྛེ ཨཧཾ པུཙྪིསྶཱམཱི’’ཏི ཨེཀོ ཨེཀཾ ན ཨོལོཀེཏི, ཨེཝཾ སནྟེཔི ཏེསཾ བྷིཀྑཱུནཾ ‘‘ཨཡཾ པཋམཾ པུཙྪི, ཨཡཾ དུཏིཡ’’ནྟིཨཱདིནཱ པུཙྪནཝཱརོ ཏཱདིསསྶ པཉྙཝཏོ པཉྙཱཡཏི སུཁུམསྶ ཨནྟརསྶ ལབྦྷནཏོ. བུདྡྷཱནཾ པན དེསནཱཝཱརོ ཨཉྙེསཾ ན པཉྙཱཡཏེཝ ¶ ཨཙྪརཱསངྒྷཱཏམཏྟེ ཁཎེ ཨནེཀཀོཊིསཧསྶཙིཏྟཔྤཝཏྟིསམྦྷཝཏོ. དལ༹ྷདྷམྨེན དྷནུགྒཧེན ཁིཏྟསརསྶ ཝིདཏྠིཙཏུརངྒུལཾ ཏཱལཙྪཱཡཾ ཨཏིཀྐམནཏོ པུརེཏརཾཡེཝ བྷགཝཱ ཙུདྡསཝིདྷེན ཀཱཡཱནུཔསྶནཾ, ནཝཝིདྷེན ཝེདནཱནུཔསྶནཾ, སོལ༹སཝིདྷེན ཙིཏྟཱནུཔསྶནཾ, པཉྩཝིདྷེན དྷམྨཱནུཔསྶནཾ ཀཐེཏི. ཏིཊྛནྟུ ཝཱ ཨེཏེ ཙཏྟཱརོ, སཙེ ཧི ཨཉྙེ ཙཏྟཱརོ སམྨཔྤདྷཱནེསུ, ཨཉྙེ ཨིདྡྷིཔཱདེསུ, ཨཉྙེ པཉྩིནྡྲིཡེསུ, ཨཉྙེ པཉྩབལེསུ, ཨཉྙེ སཏྟབོཛ྄ཛྷངྒེསུ, ཨཉྙེ ཨཊྛམགྒངྒེསུ པཉྷེ པུཙྪེཡྻུཾ, ཏམྤི བྷགཝཱ ཀཐེཡྻ. ཏིཊྛནྟུ ཝཱ ཨེཏེ ཨཊྛ, སཙེ ཨཉྙེ སཏྟཏིཾས ཛནཱ བོདྷིཔཀྑིཡེསུ པཉྷེ པུཙྪེཡྻུཾ, ཏམྤི བྷགཝཱ ཏཱཝདེཝ ཀཐེཡྻ.

མཱུལཾ ནིསྶཡོ པཏིཊྛཱཏི པཙྪིམཾ པཙྪིམཾ པཋམསྶ པཋམསྶ ཝེཝཙནནྟི དཊྛབྦཾ. ཏཏྠ པཏིཊྛཱཏི སམྤཡོགཝསེན ཨུཔནིསྶཡཝསེན ཙ ཨོཀཱསབྷཱཝོ. སིཀྑཱསངྑཱཏཱནཉྷི ཨཝསེསཀུསལདྷམྨཱནཾ མེཐུནཝིརཏིསམྤཡོགཝསེན ཝཱ པཏིཊྛཱ སིཡཱ ཨུཔནིསྶཡབྷཱཝེན ཝཱ. ཏེནེཝཱཧ ‘‘མེཐུནསཾཝརོ ཧཱི’’ཏིཨཱདི. ཝུཏྟཏྠཝསེནཱཏི པཏིཊྛཱཨདྷིགམཱུཔཱཡཝསེན. སིཀྑཱཔདཝིབྷངྒེ ནིདྡིཊྛཝིརཏིཙེཏནཱ ཏཾསམྤཡུཏྟདྷམྨཱ ཙ སིཀྑཱཔདནྟི དསྶེཏུཀཱམོ ཨཱཧ – ‘‘ཨཡཉྩ ཨཏྠོ སིཀྑཱཔདཝིབྷངྒེ ཝུཏྟནཡེན ཝེདིཏབྦོ’’ཏི. སིཀྑཱཔདཝིབྷངྒེ ཧི ཝིརཏིཨཱདཡོ དྷམྨཱ ནིཔྤརིཡཱཡཏོ པརིཡཱཡཏོ ཙ ‘‘སིཀྑཱཔད’’ནྟི ཝུཏྟཱ. ཝུཏྟཉྷེཏཾ –

‘‘ཏཏྠ ¶ ཀཏམཾ ཀཱམེསུམིཙྪཱཙཱརཱ ཝེརམཎཱི སིཀྑཱཔདཾ? ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི སོམནསྶསཧགཏཾ ཉཱཎསམྤཡུཏྟཾ ཀཱམེསུམིཙྪཱཙཱརཱ ཝིརམནྟསྶ, ཡཱ ཏསྨིཾ སམཡེ ཀཱམེསུམིཙྪཱཙཱརཱ ཨཱརཏི ཝིརཏི པཊིཝིརཏི ཝེརམཎཱི ཨཀིརིཡཱ ཨཀརཎཾ ཨནཛ྄ཛྷཱཔཏྟི ཝེལཱནཏིཀྐམོ སེཏུགྷཱཏོ, ཨིདཾ ཝུཙྩཏི ཀཱམེསུམིཙྪཱཙཱརཱ ཝེརམཎཱི སིཀྑཱཔདཾ. ཨཝསེསཱ དྷམྨཱ ཝེརམཎིཡཱ སམྤཡུཏྟཱ.

‘‘ཏཏྠ ཀཏམཾ ཀཱམེསུམིཙྪཱཙཱརཱ ཝེརམཎཱི སིཀྑཱཔདཾ? ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི སོམནསྶསཧགཏཾ ཉཱཎསམྤཡུཏྟཾ ཀཱམེསུམིཙྪཱཙཱརཱ ཝིརམནྟསྶ, ཡཱ ཏསྨིཾ ¶ སམཡེ ཙེཏནཱ སཉྩེཏནཱ ཙེཏཡིཏཏྟཾ, ཨིདཾ ཝུཙྩཏི ཀཱམེསུམིཙྪཱཙཱརཱ ཝེརམཎཱི སིཀྑཱཔདཾ. ཨཝསེསཱ དྷམྨཱ ཙེཏནཱཡ སམྤཡུཏྟཱ.

‘‘ཏཏྠ ཀཏམཾ ཀཱམེསུམིཙྪཱཙཱརཱ ཝེརམཎཱི སིཀྑཱཔདཾ? ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི སོམནསྶསཧགཏཾ ཉཱཎསམྤཡུཏྟཾ ཀཱམེསུམིཙྪཱཙཱརཱ ཝིརམནྟསྶ, ཡོ ཏསྨིཾ སམཡེ ཕསྶོ…པེ… པགྒཱཧོ ཨཝིཀྑེཔོ, ཨིདཾ ཝུཙྩཏི ཀཱམེསུམིཙྪཱཙཱརཱ ཝེརམཎཱི སིཀྑཱཔད’’ནྟི (ཝིབྷ. ༧༠༦).

ཨེཏྠ ཧི ཡསྨཱ ན ཀེཝལཾ ཝིརཏིཡེཝ སིཀྑཱཔདཾ, ཙེཏནཱཔི སིཀྑཱཔདམེཝ, ཏསྨཱ ཏཾ དསྶེཏུཾ དུཏིཡནཡོ ཝུཏྟོ. ཡསྨཱ ཙ ན ཀེཝལཾ ཨེཏེཡེཝ དྭེ དྷམྨཱ སིཀྑཱཔདཾ, ཙེཏནཱསམྤཡུཏྟཱ པན པརོཔཎྞཱས དྷམྨཱཔི སིཀྑིཏབྦཀོཊྛཱསཏོ སིཀྑཱཔདམེཝ, ཏསྨཱ ཏཏིཡནཡོ དསྶིཏོ. དུཝིདྷཉྷི སིཀྑཱཔདཾ ནིཔྤརིཡཱཡསིཀྑཱཔདཾ པརིཡཱཡསིཀྑཱཔདནྟི. ཏཏྠ ཝིརཏི ནིཔྤརིཡཱཡསིཀྑཱཔདཾ. སཱ ཧི ‘‘པཱཎཱཏིཔཱཏཱ ཝེརམཎཱི’’ཏི པཱལི༹ཡཾ ཨཱགཏཱ, ནོ ཙེཏནཱ. ཝིརམནྟོ ཙ ཏཱཡ ཨེཝ ཏཏོ ཏཏོ ཝིརམཏི, ན ཙེཏནཱཡ, ཙེཏནམྤི པན ཨཱཧརིཏྭཱ དསྶེཏི, ཏཐཱ སེསཙེཏནཱསམྤཡུཏྟདྷམྨེ. ཏསྨཱ ཙེཏནཱ ཙེཝ ཨཝསེསསམྤཡུཏྟདྷམྨཱ ཙ པརིཡཱཡསིཀྑཱཔདནྟི ཝེདིཏབྦཾ.

ཨིདཱནི ན ཀེཝལཾ ཨིདྷ ཝིརཏིཨཱདཡོ དྷམྨཱཝ སིཀྑཱཔདཾ, ཨཐ ཁོ ཏདཏྠཛོཏིཀཱ པཉྙཏྟིཔཱིཏི དསྶེནྟོ ཨཱཧ ‘‘ཨཔིཙཱ’’ཏིཨཱདི. ‘‘ཡོ ཏཏྠ ནཱམཀཱཡོ པདཀཱཡོཏི ཨིདཾ མཧཱཨཊྛཀཐཱཡཾ ཝུཏྟ’’ནྟི ཝདནྟི. ནཱམཀཱཡོཏི ནཱམསམཱུཧོ ནཱམཔཎྞཏྟིཡེཝ. པདནིརུཏྟིབྱཉྫནཱནི ནཱམཝེཝཙནཱནེཝ ‘‘ནཱམཾ ནཱམཀམྨཾ ནཱམནིརུཏྟཱི’’ཏིཨཱདཱིསུ (དྷ. ས. ༡༣༡༣-༡༣༡༥) ཝིཡ. སིཀྑཱཀོཊྛཱསོཏི ཝིརཏིཨཱདཡོཝ ཝུཏྟཱ, ཏདཏྠཛོཏཀཾ ཝཙནམྤི སིཀྑཱཔདནྟི ཨིདམྤི ཨེཏྠ ལབྦྷཏེཝ.

ཨཏྠཝསེཏི ཝུདྡྷིཝིསེསེ ཨཱནིསཾསཝིསེསེ. ཏེསཾ པན སིཀྑཱཔདཔཉྙཏྟིཀཱརཎཏྟཱ ཨཱཧ ‘‘དས ཀཱརཎཝསེ’’ཏི, དས ཀཱརཎཝིསེསེཏི ཨཏྠོ. ཏེནཱཧ ‘‘ཧིཏཝིསེསེ’’ཏི. ཨཏྠོཡེཝ ཝཱ ཨཏྠཝསོ, དས ཨཏྠེ དས ཀཱརཎཱནཱིཏི ཝུཏྟཾ ཧོཏི. ཨཐ ཝཱ ཨཏྠོ ¶ ཕལཾ ཏདདྷཱིནཝུཏྟིཏཱཡ ཝསོ ¶ ཨེཏསྶཱཏི ཨཏྠཝསོ, ཧེཏཱུཏི ཨེཝམྤེཏྠ ཨཏྠོ དཊྛབྦོ. སུཊྛུ དེཝཱཏི ཨིདཾ རཱཛནྟེཔུརཔྤཝེསནསིཀྑཱཔདེ (པཱཙི. ༤༩༤ ཨཱདཡོ) ཝུཏྟཾ. ‘‘ཡེ མམ སོཏབྦཾ སདྡཧཱཏབྦཾ མཉྙིསྶནྟི, ཏེསཾ ཏཾ ཨསྶ དཱིགྷརཏྟཾ ཧིཏཱཡ སུཁཱཡཱ’’ཏི ཝུཏྟཏྟཱ ‘‘ཡོ ཙ ཏཐཱགཏསྶ ཝཙནཾ སམྤཊིཙྪཏི, ཏསྶ ཏཾ དཱིགྷརཏྟཾ ཧིཏཱཡ སུཁཱཡ ཧོཏཱི’’ཏི ཝུཏྟཾ. ཨསམྤཊིཙྪནེ ཨཱདཱིནཝནྟི བྷདྡཱལིསུཏྟེ (མ. ནི. ༢.༡༣༤ ཨཱདཡོ) ཝིཡ ཨསམྤཊིཙྪནེ ཨཱདཱིནཝཾ དསྶེཏྭཱ. སུཁཝིཧཱརཱབྷཱཝེ སཧཛཱིཝམཱནསྶ ཨབྷཱཝཏོ སཧཛཱིཝིཏཱཔི སུཁཝིཧཱརོཝ ཝུཏྟོ. སུཁཝིཧཱརོ ནཱམ ཙཏུནྣཾ ཨིརིཡཱཔཐཝིཧཱརཱནཾ ཕཱསུཏཱ.

མངྐུཏནྟི ནིཏྟེཛབྷཱཝཾ. དྷམྨེནཱཏིཨཱདཱིསུ དྷམྨོཏི བྷཱུཏཾ ཝཏྠུ. ཝིནཡོཏི ཙོདནཱ ཙེཝ སཱརཎཱ ཙ. སཏྠུསཱསནནྟི ཉཏྟིསམྤདཱ ཙེཝ ཨནུསྶཱཝནསམྤདཱ ཙ. པིཡསཱིལཱནནྟི སིཀྑཱཀཱམཱནཾ. ཏེསཉྷི སཱིལཾ པིཡཾ ཧོཏི. ཏེནེཝཱཧ ‘‘སིཀྑཏྟཡཔཱརིཔཱུརིཡཱ གྷཊམཱནཱ’’ཏི. སནྡིཊྛམཱནཱཏི སཾསཡཾ ཨཱཔཛྫམཱནཱ. ཨུབྦཱལ༹ྷཱ ཧོནྟཱིཏི པཱིལི༹ཏཱ ཧོནྟི. སངྒྷཀམྨཱནཱིཏི སཏིཔི ཨུཔོསཐཔཝཱརཎཱནཾ སངྒྷཀམྨབྷཱཝེ གོབལིབདྡཉཱཡེན ཨུཔོསཐཾ པཝཱརཎཉྩ ཋཔེཏྭཱ ཨུཔསམྤདཱདིསེསསངྒྷཀམྨཱནཾ གཧཎཾ ཝེདིཏབྦཾ. སམགྒཱནཾ བྷཱཝོ སཱམགྒཱི.

‘‘ན ཝོ ཨཧཾ, ཙུནྡ, དིཊྛདྷམྨིཀཱནཾཡེཝ ཨཱསཝཱནཾ སཾཝརཱཡ དྷམྨཾ དེསེམཱི’’ཏི (དཱི. ནི. ༣.༡༨༢) ཨེཏྠ ཝིཝཱདམཱུལབྷཱུཏཱ ཀིལེསཱ ཨཱསཝཱཏི ཨཱགཏཱ.

‘‘ཡེན དེཝཱུཔཔཏྱསྶ, གནྡྷབྦོ ཝཱ ཝིཧངྒམོ;

ཡཀྑཏྟཾ ཡེན གཙྪེཡྻཾ, མནུསྶཏྟཉྩ ཨབྦཛེ;

ཏེ མཡ྄ཧཾ ཨཱསཝཱ ཁཱིཎཱ, ཝིདྡྷསྟཱ ཝིནལཱི༹ཀཏཱ’’ཏི. (ཨ. ནི. ༤.༣༦) –

ཨེཏྠ ཏེབྷཱུམཀཾ ཀམྨཾ ཨཝསེསཱ ཙ ཨཀུསལཱ དྷམྨཱ. ཨིདྷ པན པརཱུཔཝཱདཝིཔྤཊིསཱརཝདྷབནྡྷཱདཡོ ཙེཝ ཨཔཱཡདུཀྑབྷཱུཏཱ ཙ ནཱནཔྤཀཱརཱ ཨུཔདྡཝཱ ཨཱསཝཱཏི ཨཱཧ – ‘‘ཨསཾཝརེ ཋིཏེན ཏསྨིཾཡེཝ ཨཏྟབྷཱཝེ པཏྟབྦཱ’’ཏིཨཱདི. ཡདི ཧི བྷགཝཱ སིཀྑཱཔདཾ ན པཉྙཔེཡྻ, ཏཏོ ཨསདྡྷམྨཔཊིསེཝནཨདིནྣཱདཱནཔཱཎཱཏིཔཱཏཱདིཧེཏུ ཡེ ཨུཔྤཛྫེཡྻུཾ པརཱུཔཝཱདཱདཡོ དིཊྛདྷམྨིཀཱ ནཱནཔྤཀཱརཱ ཨནཏྠཱ, ཡེ ཙ ཏཾནིམིཏྟམེཝ ནིརཡཱདཱིསུ ¶ ནིབྦཏྟསྶ པཉྩཝིདྷབནྡྷནཀམྨཀཱརཎཱདིཝསེན མཧཱདུཀྑཱནུབྷཝནནཱནཔྤཀཱརཱ ཨནཏྠཱ, ཏེ སནྡྷཱཡ ཨིདཾ ཝུཏྟཾ ‘‘དིཊྛདྷམྨིཀཱནཾ ཨཱསཝཱནཾ སཾཝརཱཡ སམྤརཱཡིཀཱནཾ ཨཱསཝཱནཾ པཊིགྷཱཏཱཡཱ’’ཏི. དིཊྛདྷམྨོ ཝུཙྩཏི པཙྩཀྑོ ཨཏྟབྷཱཝོ ¶ , ཏཏྠ བྷཝཱ དིཊྛདྷམྨིཀཱ. ཏེན ཝུཏྟཾ ‘‘ཏསྨིཾཡེཝ ཨཏྟབྷཱཝེ པཏྟབྦཱ’’ཏི. སམྨུཁཱ གརཧཎཾ ཨཀིཏྟི, པརམྨུཁཱ གརཧཎཾ ཨཡསོ. ཨཐ ཝཱ སམྨུཁཱ པརམྨུཁཱ ཙ གརཧཎཾ ཨཀིཏྟི, པརིཝཱརཧཱནི ཨཡསོཏི ཝེདིཏབྦཾ. ཨཱགམནམགྒཐཀནཱཡཱཏི ཨཱགམནདྭཱརཔིདཧནཏྠཱཡ. སམྤརེཏབྦཏོ པེཙྩ གནྟབྦཏོ སམྤརཱཡོ, པརལོཀོཏི ཨཱཧ ‘‘སམྤརཱཡེ ནརཀཱདཱིསཱུ’’ཏི. མེཐུནཱདཱིནི རཛྫནཊྛཱནཱནི, པཱཎཱཏིཔཱཏཱདཱིནི དུསྶནཊྛཱནཱནི.

ཙུདྡས ཁནྡྷཀཝཏྟཱནི ནཱམ ཝཏྟཀྑནྡྷཀེ ཝུཏྟཱནི ཨཱགནྟུཀཝཏྟཾ ཨཱཝཱསིཀགམིཀཨནུམོདནབྷཏྟགྒཔིཎྜཙཱརིཀཨཱརཉྙིཀསེནཱསནཛནྟཱགྷརཝཙྩཀུཊིཨུཔཛ྄ཛྷཱཡསདྡྷིཝིཧཱརིཀཨཱཙརིཡཨནྟེཝཱསིཀཝཏྟནྟི ཨིམཱནི ཙུདྡས ཝཏྟཱནི. ཏཏོ ཨཉྙཱནི པན ཀདཱཙི ཏཛྫནཱིཡཀམྨཀཏཱདིཀཱལེཡེཝ ཙརིཏབྦཱནི དྭེཨསཱིཏི མཧཱཝཏྟཱནི, ན སབྦཱསུ ཨཝཏྠཱསུ ཙརིཏབྦཱནི, ཏསྨཱ ཙུདྡསཁནྡྷཀཝཏྟེསུ ཨགཎིཏཱནི, ཏཱནི པན ‘‘པཱརིཝཱསིཀཱནཾ བྷིཀྑཱུནཾ ཝཏྟཾ པཉྙཔེསྶཱམཱི’’ཏི (ཙཱུལ༹ཝ. ༧༥ ཨཱདཡོ) ཨཱརབྷིཏྭཱ ‘‘ན ཨུཔསམྤཱདེཏབྦཾ…པེ… ན ཚམཱཡཾ ཙངྐམནྟེ ཙངྐམེ ཙངྐམིཏབྦ’’ནྟི (ཙཱུལ༹ཝ. ༧༦) ཝུཏྟཱཝསཱནཱནི ཚསཊྛི, ཏཏོ པརཾ ‘‘ན, བྷིཀྑཝེ, པཱརིཝཱསིཀེན བྷིཀྑུནཱ པཱརིཝཱསིཀཝུཌྜྷཏརེན བྷིཀྑུནཱ སདྡྷིཾ, མཱུལཱཡཔཊིཀསྶནཱརཧེན, མཱནཏྟཱརཧེན, མཱནཏྟཙཱརིཀེན, ཨབྦྷཱནཱརཧེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ཝཏྠབྦ’’ནྟིཨཱདིནཱ (ཙཱུལ༹ཝ. ༨༢) ཝུཏྟཝཏྟཱནི པཀཏཏྟཙརིཏབྦེཧི ཨནཉྙཏྟཱ ཝིསུཾ ཨགཎེཏྭཱ པཱརིཝཱསིཀཝུཌྜྷཏརཱདཱིསུ པུགྒལནྟརེསུ ཙརིཏབྦཏྟཱ ཏེསཾ ཝསེན སམྤིཎྜེཏྭཱ ཨེཀེཀཾ ཀཏྭཱ གཎིཏཱནི པཉྩཱཏི ཨེཀསཏྟཏི ཝཏྟཱནི, ཨུཀྑེཔནཱིཡཀམྨཀཏཝཏྟེསུ ཝུཏྟཾ ‘‘ན པཀཏཏྟསྶ བྷིཀྑུནོ ཨབྷིཝཱདནཾ པཙྩུཊྛཱནཾ…པེ… ནཧཱནེ པིཊྛིཔརིཀམྨཾ སཱདིཏབྦ’’ནྟི (ཙཱུལ༹ཝ. ༧༥) ཨིདཾ ཨབྷིཝཱདནཱདཱིནཾ ཨསཱདིཡནཾ ཨེཀཾ, ‘‘ན པཀཏཏྟོ བྷིཀྑུ སཱིལཝིཔཏྟིཡཱ ཨནུདྡྷཾསེཏབྦོ’’ཏིཨཱདཱིནི (ཙཱུལ༹ཝ. ༥༡) དསཱཏི ཨེཝམེཏཱནི དྭཱསཱིཏི ཝཏྟཱནི. ཨེཏེསྭེཝ པན ཀཱནིཙི ཏཛྫནཱིཡཀམྨཱདིཝཏྟཱཨཱནི, ཀཱནིཙི པཱརིཝཱསིཀཱདིཝཏྟཱནཱིཏི ཨགྒཧིཏགྒཧཎེན དྭཱསཱིཏི ཨེཝ, ཨཉྙཏྠ པན ཨཊྛཀཐཱཔདེསེ ཨཔྤཀཾ ¶ ཨཱུནམདྷིཀཾ ཝཱ གཎནཱུཔགཾ ན ཧོཏཱིཏི ‘‘ཨསཱིཏི ཁནྡྷཀཝཏྟཱནཱི’’ཏི ཝུཏྟཾ.

སཾཝརཝིནཡོཏི སཱིལསཾཝརོ སཏིསཾཝརོ ཉཱཎསཾཝརོ ཁནྟིསཾཝརོ ཝཱིརིཡསཾཝརོཏི པཉྩཝིདྷོཔི སཾཝརོ ཡཐཱསཀཾ སཾཝརིཏབྦཱནཾ ཝིནེཏབྦཱནཉྩ ཀཱཡདུཙྩརིཏཱདཱིནཾ སཾཝརཎཏོ སཾཝརོ, ཝིནཡནཏོ ཝིནཡོཏི ཝུཙྩཏི. པཧཱནཝིནཡོཏི ཏདངྒཔྤཧཱནཾ ཝིཀྑམྦྷནཔྤཧཱནཾ སམུཙྪེདཔྤཧཱནཾ པཊིཔྤསྶདྡྷིཔྤཧཱནཾ ནིསྶརཎཔྤཧཱནནྟི པཉྩཝིདྷམྤི པཧཱནཾ ཡསྨཱ ཙཱགཊྛེན པཧཱནཾ ¶ , ཝིནཡནཊྛེན ཝིནཡོ, ཏསྨཱ པཧཱནཝིནཡོཏི ཝུཙྩཏི. སམཐཝིནཡོཏི སཏྟ ཨདྷིཀརཎསམཐཱ. པཉྙཏྟིཝིནཡོཏི སིཀྑཱཔདམེཝ. སིཀྑཱཔདཔཉྙཏྟིཡཱ ཧི ཝིཛྫམཱནཱཡ ཨེཝ སིཀྑཱཔདསམྦྷཝཏོ པཉྙཏྟིཝིནཡོཔི སིཀྑཱཔདཔཉྙཏྟིཡཱ ཨནུགྒཧིཏོ ཧོཏི.

ཨིདཱནི –

‘‘ཡཾ སངྒྷསུཊྛུ, ཏཾ སངྒྷཕཱསུ, ཡཾ སངྒྷཕཱསུ, ཏཾ དུམྨངྐཱུནཾ པུགྒལཱནཾ ནིགྒཧཱཡ, ཡཾ དུམྨངྐཱུནཾ པུགྒལཱནཾ ནིགྒཧཱཡ, ཏཾ པེསལཱནཾ བྷིཀྑཱུནཾ ཕཱསུཝིཧཱརཱཡ, ཡཾ པེསལཱནཾ བྷིཀྑཱུནཾ ཕཱསུཝིཧཱརཱཡ, ཏཾ དིཊྛདྷམྨིཀཱནཾ ཨཱསཝཱནཾ སཾཝརཱཡ, ཡཾ དིཊྛདྷམྨིཀཱནཾ ཨཱསཝཱནཾ སཾཝརཱཡ, ཏཾ སམྤརཱཡིཀཱནཾ ཨཱསཝཱནཾ པཊིགྷཱཏཱཡ, ཡཾ སམྤརཱཡིཀཱནཾ ཨཱསཝཱནཾ པཊིགྷཱཏཱཡ, ཏཾ ཨཔྤསནྣཱནཾ པསཱདཱཡ, ཡཾ ཨཔྤསནྣཱནཾ པསཱདཱཡ, ཏཾ པསནྣཱནཾ བྷིཡྻོབྷཱཝཱཡ, ཡཾ པསནྣཱནཾ བྷིཡྻོབྷཱཝཱཡ, ཏཾ སདྡྷམྨཊྛིཏིཡཱ, ཡཾ སདྡྷམྨཊྛིཏིཡཱ, ཏཾ ཝིནཡཱནུགྒཧཱཡ.

‘‘ཡཾ སངྒྷསུཊྛུ, ཏཾ སངྒྷཕཱསུ, ཡཾ སངྒྷསུཊྛུ, ཏཾ དུམྨངྐཱུནཾ པུགྒལཱནཾ ནིགྒཧཱཡ, ཡཾ སངྒྷསུཊྛུ, ཏཾ པེསལཱནཾ བྷིཀྑཱུནཾ ཕཱསུཝིཧཱརཱཡ, ཡཾ སངྒྷསུཊྛུ, ཏཾ དིཊྛདྷམྨིཀཱནཾ ཨཱསཝཱནཾ སཾཝརཱཡ, ཡཾ སངྒྷསུཊྛུ, ཏཾ སམྤརཱཡིཀཱནཾ ཨཱསཝཱནཾ པཊིགྷཱཏཱཡ, ཡཾ སངྒྷསུཊྛུ, ཏཾ ཨཔྤསནྣཱནཾ པསཱདཱཡ, ཡཾ སངྒྷསུཊྛུ, ཏཾ པསནྣཱནཾ བྷིཡྻོབྷཱཝཱཡ, ཡཾ སངྒྷསུཊྛུ, ཏཾ སདྡྷམྨཊྛིཏིཡཱ, ཡཾ སངྒྷསུཊྛུ, ཏཾ ཝིནཡཱནུགྒཧཱཡ.

‘‘ཡཾ ¶ སངྒྷཕཱསུ, ཏཾ དུམྨངྐཱུནཾ པུགྒལཱནཾ ནིགྒཧཱཡ, ཡཾ སངྒྷཕཱསུ, ཏཾ པེསལཱནཾ བྷིཀྑཱུནཾ ཕཱསུཝིཧཱརཱཡ, ཡཾ སངྒྷཕཱསུ, ཏཾ དིཊྛདྷམྨིཀཱནཾ ཨཱསཝཱནཾ སཾཝརཱཡ, ཡཾ སངྒྷཕཱསུ, ཏཾ སམྤརཱཡིཀཱནཾ ཨཱསཝཱནཾ པཊིགྷཱཏཱཡ, ཡཾ སངྒྷཕཱསུ, ཏཾ ཨཔྤསནྣཱནཾ པསཱདཱཡ, ཡཾ སངྒྷཕཱསུ, ཏཾ པསནྣཱནཾ བྷིཡྻོབྷཱཝཱཡ, ཡཾ སངྒྷཕཱསུ, ཏཾ སདྡྷམྨཊྛིཏིཡཱ, ཡཾ སངྒྷཕཱསུ, ཏཾ ཝིནཡཱནུགྒཧཱཡ, ཡཾ སངྒྷཕཱསུ, ཏཾ སངྒྷསུཊྛུཏཱཡ.

‘‘ཡཾ དུམྨངྐཱུནཾ པུགྒལཱནཾ ནིགྒཧཱཡ…པེ… ཡཾ པེསལཱནཾ བྷིཀྑཱུནཾ ཕཱསུཝིཧཱརཱཡ…པེ… ཡཾ དིཊྛདྷམྨིཀཱནཾ ཨཱསཝཱནཾ སཾཝརཱཡ…པེ… ཡཾ སམྤརཱཡིཀཱནཾ ཨཱསཝཱནཾ པཊིགྷཱཏཱཡ…པེ… ཡཾ ཨཔྤསནྣཱནཾ པསཱདཱཡ…པེ… ཡཾ པསནྣཱནཾ བྷིཡྻོབྷཱཝཱཡ…པེ… ཡཾ སདྡྷམྨཊྛིཏིཡཱ…པེ… ཡཾ ཝིནཡཱནུགྒཧཱཡ, ཏཾ སངྒྷསུཊྛུཏཱཡ ¶ , ཡཾ ཝིནཡཱནུགྒཧཱཡ, ཏཾ སངྒྷཕཱསུཏཱཡ, ཡཾ ཝིནཡཱནུགྒཧཱཡ, ཏཾ དུམྨངྐཱུནཾ པུགྒལཱནཾ ནིགྒཧཱཡ, ཡཾ ཝིནཡཱནུགྒཧཱཡ, ཏཾ པེསལཱནཾ བྷིཀྑཱུནཾ ཕཱསུཝིཧཱརཱཡ, ཡཾ ཝིནཡཱནུགྒཧཱཡ, ཏཾ དིཊྛདྷམྨིཀཱནཾ ཨཱསཝཱནཾ སཾཝརཱཡ, ཡཾ ཝིནཡཱནུགྒཧཱཡ, ཏཾ སམྤརཱཡིཀཱནཾ ཨཱསཝཱནཾ པཊིགྷཱཏཱཡ, ཡཾ ཝིནཡཱནུགྒཧཱཡ, ཏཾ ཨཔྤསནྣཱནཾ པསཱདཱཡ, ཡཾ ཝིནཡཱནུགྒཧཱཡ, ཏཾ པསནྣཱནཾ བྷིཡྻོབྷཱཝཱཡ, ཡཾ ཝིནཡཱནུགྒཧཱཡ, ཏཾ སདྡྷམྨཊྛིཏིཡཱ (པརི. ༣༣༤).

‘‘ཨཏྠསཏཾ དྷམྨསཏཾ, དྭེ ཙ ནིརུཏྟིསཏཱནི;

ཙཏྟཱརི ཉཱཎསཏཱནི, ཨཏྠཝསེ པཀརཎེ’’ཏི (པརི. ༣༣༤) –

ཡཾ ཝུཏྟཾ པརིཝཱརེ, ཏཾ དསྶེནྟོ ‘‘ཨཔིཙེཏྠཱ’’ཏིཨཱདིམཱཧ.

ཏཏྠ ‘‘ཡཾ སངྒྷསུཊྛུ, ཏཾ སངྒྷཕཱསུ, ཡཾ སངྒྷཕཱསུ, ཏཾ དུམྨངྐཱུནཾ པུགྒལཱནཾ ནིགྒཧཱཡཱ’’ཏི ཨིམིནཱ ཨནུཀྐམེན ཡཾ ཝུཏྟཾ, ཏཾ སནྡྷཱཡ ཨཱསནྣཱསནྣཔདཱནཾ ཨུཔརཱུཔརིཔདེཧི སདྡྷིཾ ཡོཛིཏཏྟཱ སངྑལིཀབནྡྷནསདིསཏྟཱ ‘‘སངྑལིཀནཡ’’ནྟི ཝུཏྟཾ. སངྑལིཀནཡཾ ཀཏྭཱཏི སམྦནྡྷོ. ‘‘ཡཾ སངྒྷསུཊྛུ, ཏཾ སངྒྷཕཱསུ, ཡཾ སངྒྷསུཊྛུ, ཏཾ དུམྨངྐཱུནཾ པུགྒལཱནཾ ནིགྒཧཱཡཱ’’ཏི ཨེཝམཱདིནཱ དསསུ པདེསུ ཨེཀམེཀཾ པདཾ ཏདཝསེསེཧི ནཝནཝཔདེཧི ཡོཛེཏྭཱ ཡཾ ཝུཏྟཾ, ཏཾ སནྡྷཱཡ ‘‘ཨེཀེཀཔདམཱུལིཀཾ དསཀྑཏྟུཾ ཡོཛནཾ ཀཏྭཱ’’ཏི ཝུཏྟཾ.

ཨཏྠསཏནྟིཨཱདཱིསུ ¶ སངྑལིཀནཡེ ཏཱཝ པུརིམཔུརིམཔདཱནཾ ཝསེན དྷམྨསཏཾ ཝེདིཏབྦཾ, པཙྪིམཔཙྪིམཱནཾ ཝསེན ཨཏྠསཏཾ དཊྛབྦཾ. ཀཐཾ? ཀིཉྩཱཔི པརིཝཱརེ ‘‘ཡཾ སངྒྷསུཊྛུ, ཏཾ སངྒྷཕཱསཱུ’’ཏིཨཱདིནཱ སངྑལིཀནཡེ ཁཎྜཙཀྐམེཝ ཝུཏྟཾ, ཏཐཱཔི ཏེནེཝ ནཡེན བདྡྷཙཀྐསྶཔི ནཡོ དིནྣོ, ཏསྨཱ ‘‘ཡཾ སངྒྷསུཊྛུ, ཏཾ སངྒྷཕཱསཱུ’’ཏིཨཱདིཾ ཝཏྭཱ ‘‘ཡཾ ཝིནཡཱནུགྒཧཱཡ, ཏཾ སངྒྷསུཊྛཱུ’’ཏི ཡོཛེཏྭཱ བདྡྷཙཀྐཾ ཀཱཏབྦཾ. ཨེཝཾ ‘‘ཡཾ སངྒྷཕཱསུ, ཏཾ དུམྨངྐཱུནཾ པུགྒལཱནཾ ནིགྒཧཱཡཱ’’ཏིཨཱདིཾ ཝཏྭཱཔི ‘‘ཡཾ ཝིནཡཱནུགྒཧཱཡ, ཏཾ སངྒྷསུཊྛུ, ཡཾ སངྒྷསུཊྛུ, ཏཾ སངྒྷཕཱསཱུ’’ཏི ཡོཛེཏྭཱ བདྡྷཙཀྐཾ ཀཱཏབྦཾ. ཨིམིནཱ ཨནུཀྐམེན སེསཔདེསུཔི ཡོཛིཏེསུ སངྑལིཀནཡེན དས བདྡྷཙཀྐཱནི ཧོནྟི. ཏེསུ ཨེཀེཀསྨིཾ ཙཀྐེ པུརིམཔུརིམཔདཱནཾ ཝསེན དས དས དྷམྨཱ, པཙྪིམཔཙྪིམཔདཱནཾ ཝསེན དས དས ཨཏྠཱཏི སངྑལིཀནཡེ ཨཏྠསཏཾ དྷམྨསཏཉྩ སམྤཛྫཏི. ཨེཀམཱུལཀནཡེ པན ‘‘ཡཾ སངྒྷསུཊྛུ, ཏཾ སངྒྷཕཱསུ, ཡཾ སངྒྷསུཊྛུ, ཏཾ དུམྨངྐཱུནཾ པུགྒལཱནཾ ནིགྒཧཱཡཱ’’ཏི ཨེཝམཱདིནཱ ཨེཀམེཝ པདཾ སེསེཧི ནཝཧི པདེཧི ཡོཛིཏནྟི པུརིམཔདསྶ ¶ ཨེཀཏྟཱ ཨེཀམེཝ དྷམྨཔདཾ ནཝེཝ ཨཏྠཔདཱནི ཧོནྟི, ཏསྨཱ ཨེཀམཱུལཀནཡེ དསསུ པདེསུ ཨེཀམེཀཾ མཱུལཾ ཀཏྭཱ དསཀྑཏྟུཾ ཡོཛནཱཡ ཀཏཱཡ དྷམྨཔདཱནཾ ཝསེན དྷམྨཔདཱནི དས, ཨཏྠཔདཱནི ནཝུཏཱིཏི ཨཏྠསཏཾ དྷམྨསཏཉྩ ན སམྤཛྫཏི, ཏསྨཱ ཨེཀམཱུལཀནཡེ སངྑལིཀནཡེ ཝུཏྟནཡེན ཨཏྠསཏཾ དྷམྨསཏཉྩ ཨགྒཧེཏྭཱ ཡཾ ཏཏྠ དསདྷམྨཔདཱནཾ ནཝུཏིཨཏྠཔདཱནཉྩ ཝསེན པདསཏཾ ཝུཏྟཾ, ཏཾ སབྦཾ དྷམྨསཏནྟི གཧེཏྭཱ ཏདཏྠཛོཏནཝསེན ཨཊྛཀཐཱཡཾ ཝུཏྟཱནི སངྒྷསུཊྛུབྷཱཝཱདཱིནི ཨཏྠཔདཱནི ཨཏྠསཏནྟི ཨེཝཾ གཧིཏེ ཨཏྠསཏཾ དྷམྨསཏཉྩ སམྤཛྫཏི. ཨེཝཾ ཏཱཝ ཨཏྠསཏཾ དྷམྨསཏཉྩ ཝེདིཏབྦཾ. དྭེ ཙ ནིརུཏྟིསཏཱནཱིཏི ཨེཏྠ པན ཨཏྠཛོཏིཀཱནཾ ནིརུཏྟཱིནཾ ཝསེན ནིརུཏྟིསཏཾ, དྷམྨབྷཱུཏཱནཾ ནིརུཏྟཱིནཾ ཝསེན ནིརུཏྟིསཏནྟི དྭེ ནིརུཏྟིསཏཱནི ཙ ཝེདིཏབྦཱནི. ཙཏྟཱརི ཉཱཎསཏཱནཱིཏི ཨཏྠསཏེ ཉཱཎསཏཾ, དྷམྨསཏེ ཉཱཎསཏཾ, དྭཱིསུ ནིརུཏྟིསཏེསུ དྭེ ཉཱཎསཏཱནཱིཏི ཙཏྟཱརི ཉཱཎསཏཱནི.

ཨེཝཉྩ པན, བྷིཀྑཝེཏི ཨེཏྠ ཙ-སདྡོ བྷིནྣཀྐམེན ཡོཛེཏབྦོཏི ཨཱཧ ‘‘ཨུདྡིསེཡྻཱཐ ཙཱ’’ཏི. ཀཐཾ པནེཏྠ ‘‘ཨུདྡིསེཡྻཱཐཱ’’ཏི ཝུཏྟེ པརིཡཱཔུཎེཡྻཱཐཱཏིཨཱདི ཨཏྠསམྦྷཝོཏི ཨཱཧ ‘‘ཨཏིརེཀཱནཡནཏྠོ ཧི ཨེཏྠ ཙ-སདྡོ’’ཏི. ཝུཏྟཏྠཏོ ཨཏིརེཀསྶ ཨཏྠསྶ ཨཱནཡནཾ ཨཏིརེཀཱནཡནཾ, སོ ཨཏྠོ ཨེཏསྶཱཏི ཨཏིརེཀཱནཡནཏྠོ, ཨཝུཏྟསམུཙྩཡཏྠོཏི ¶ ཝུཏྟཾ ཧོཏི. ‘‘ཨསཾཝཱསོ’’ཏི ཝུཏྟཏྟཱ ‘‘དལ༹ྷཾ ཀཏྭཱ’’ཏི ཝུཏྟཾ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ སཱརཏྠདཱིཔནིཡཾ

པཋམཔཉྙཏྟིཀཐཱ ནིཊྛིཏཱ.

སུདིནྣབྷཱཎཝཱརཝཎྞནཱ ནིཊྛིཏཱ.

མཀྐཊིཝཏྠུཀཐཱཝཎྞནཱ

༤༠. ཨནུཏྟཱནཔདཝཎྞནཱཏི ཨུཏྟཱནཾ ཝུཙྩཏི པཱཀཊཾ, ཏཔྤཊིཔཀྑེན ཨནུཏྟཱནཾ ཨཔཱཀཊཾ ཨཔྤཙུརཾ དུཝིཉྙེཡྻཉྩ, ཨནུཏྟཱནཱནཾ པདཱནཾ ཝཎྞནཱ ཨནུཏྟཱནཔདཝཎྞནཱ. ཨུཏྟཱནཔདཝཎྞནཱཡ པཡོཛནཱབྷཱཝཏོ ཨནུཏྟཱནགྒཧཎཾ. པཙུརཔཊིསེཝནོ ཧོཏཱིཏི བཧུལཔཊིསེཝནོ ཧོཏི, དིཝསེ དིཝསེ ནིརནྟརཾ པཊིསེཝཏཱིཏི ཨཏྠོ. པཙུརཏྠེ ཧི ཝཏྟམཱནཝཙནནྟི སབྦདཱ པཊིསེཝནཱབྷཱཝེཔི ‘‘ཨིཧ ¶ མལླཱ ཡུཛ྄ཛྷནྟཱི’’ཏིཨཱདཱིསུ ཝིཡ བཱཧུལླཝུཏྟིཾ ཨུཔཱདཱཡ ཝཏྟམཱནཝཙནཾ. ཨཱཧིཎྜནྟཱཏི ཝིཙརནྟཱ. ཨཉྙེསུཔཱིཏི ཨཉྙེསུཔི བྷིཀྑཱུསུ.

༤༡. སཧོཌྜྷགྒཧིཏོཏི སཧ བྷཎྜེན གཧིཏོ. ཨཏྟནོ མིཙྪཱགཱཧེན ལེསཨོཌྜནེན ཝཱ པརིཔུཎྞཏྠམྤི པཋམཔཉྙཏྟིཾ ཨཉྙཐཱ ཀརོནྟོ ‘‘ཏཉྩ ཁོ མནུསྶིཏྠིཡཱ, ནོ ཏིརཙྪཱནགཏཱཡཱ’’ཏི ཨཱཧ. དསྶནནྟི སཱནུརཱགདསྶནཾ. གཧཎནྟི ཨནུརཱགཝསེནེཝ ཧཏྠེན གཧཎཾ. ཨཱམསནཾ ཨཏྟནོ སརཱིརེན ཏསྶཱ སརཱིརསྶ ཨུཔརི ཨཱམསནམཏྟཾ, ཕུསནཾ ཏཏོ དལ༹ྷཏརཾ ཀཏྭཱ སཾཕུསནཾ, གྷཊྚནཾ ཏཏོཔི དལ༹ྷཏརཾ ཀཏྭཱ སརཱིརེན སརཱིརསྶ གྷཊྚནཾ. ཏཾ སབྦམྤཱིཏི དསྶནཱདི སབྦམྤི.

༤༢. དལ༹ྷཏརཾ སིཀྑཱཔདམཀཱསཱིཏི ཨིམསྨིཾ ཨདྷིཀཱརེ ཨནུཔཉྙཏྟིཡཱ སིཀྑཱཔདསྶ དལ༹ྷཱིཀརཎཾ སིཐིལཀརཎཉྩ པསངྒཏོ ཨཱཔནྣཾ ཝིབྷཛིཏྭཱ དསྶེཏུཀཱམོ ‘‘དུཝིདྷཉྷི སིཀྑཱཔད’’ནྟིཨཱདིམཱཧ. ཏཏྠ ཡསྶ སཙིཏྟཀསྶ སིཀྑཱཔདསྶ ཙིཏྟཾ ཨཀུསལམེཝ ཧོཏི, ཏཾ ལོཀཝཛྫཾ. ཡསྶ སཙིཏྟཀཱཙིཏྟཀཔཀྑསཧིཏསྶ ཨཙིཏྟཀསྶ ཙ སཙིཏྟཀཔཀྑེ ཙིཏྟཾ ཨཀུསལམེཝ ¶ ཧོཏི, ཏམྤི སུརཱཔཱནཱདི ལོཀཝཛྫནྟི ཨིམམཏྠཾ སམྤིཎྜེཏྭཱ དསྶེཏུཾ ‘‘ཡསྶ སཙིཏྟཀཔཀྑེ ཙིཏྟཾ ཨཀུསལམེཝ ཧོཏི, ཏཾ ལོཀཝཛྫཾ ནཱམཱ’’ཏི ཝུཏྟཾ. ‘‘སཙིཏྟཀཔཀྑེ’’ཏི ཧི ཨིདཾ ཝཙནཾ ཨཙིཏྟཀཾ སནྡྷཱཡ ཝུཏྟཾ. ན ཧི ཨེཀཾསཏོ སཙིཏྟཀསྶ ‘‘སཙིཏྟཀཔཀྑེ’’ཏི ཝིསེསནེ པཡོཛནཾ ཨཏྠི. སཙིཏྟཀཔཀྑེཏི ཙ ཝཏྠུཝཱིཏིཀྐམཝིཛཱནནཙིཏྟེན ‘‘སཙིཏྟཀཔཀྑེ’’ཏི གཧེཏབྦཾ, ན པཎྞཏྟིཝིཛཱནནཙིཏྟེན. ཡདི ཧི ‘‘ན ཝཊྚཏཱི’’ཏི པཎྞཏྟིཝིཛཱནནཙིཏྟེནཔི ཡསྶ སིཀྑཱཔདསྶ སཙིཏྟཀཔཀྑེ ཙིཏྟཾ ཨཀུསལམེཝ, ཏམྤི ལོཀཝཛྫནྟི ཝདེཡྻ, སབྦེསཾ པཎྞཏྟིཝཛྫསིཀྑཱཔདཱནམྤི ལོཀཝཛྫཏཱ ཨཱཔཛྫེཡྻ པཎྞཏྟིཝཛྫཱནམྤི ‘‘ན ཝཊྚཏཱི’’ཏི ཛཱནིཏྭཱ ཝཱིཏིཀྐམེ ཨཀུསལཙིཏྟསྶེཝ སམྦྷཝཏོ. ན ཧི བྷགཝཏོ ཨཱཎཾ ཛཱནིཏྭཱ མདྡནྟསྶ ཀུསལཙིཏྟཾ ཨུཔྤཛྫཏི ཨནཱདརིཡཝསེན པཊིགྷཙིཏྟསྶེཝ ཨུཔྤཛྫནཏོ.

ཨཔིཙེཏྠ ‘‘སཙིཏྟཀཔཀྑེ ཙིཏྟཾ ཨཀུསལམེཝཱ’’ཏི ཝཙནཏོ ཨཙིཏྟཀསྶ ཝཏྠུཨཛཱནནཝསེན ཨཙིཏྟཀཔཀྑེ ཙིཏྟཾ ཨཀུསལམེཝཱཏི ཨཡཾ ནིཡམོ ནཏྠཱིཏི ཝིཉྙཱཡཏི. ཡདི ཧི ཨཙིཏྟཀསྶ ཨཙིཏྟཀཔཀྑེཔི ཙིཏྟཾ ཨཀུསལམེཝ སིཡཱ, ‘‘སཙིཏྟཀཔཀྑེ’’ཏི ཨིདཾ ཝིསེསནཾ ནིརཏྠཀཾ སིཡཱ. ‘‘ཡསྶ ཙིཏྟཾ ཨཀུསལམེཝ ཧོཏི, ཏཾ ལོཀཝཛྫ’’ནྟི ཨེཏྟཀེ ཝུཏྟེ སུརཱཏི ཨཛཱནིཏྭཱ པིཝནྟསྶ གནྡྷཝཎྞཀཱདིབྷཱཝཾ ཨཛཱནིཏྭཱ ཏཱནི ལིམྤནྟཱིནཾ བྷིཀྑུནཱིནཉྩ ¶ ཝིནཱཔི ཨཀུསལཙིཏྟེན ཨཱཔཏྟིསམྦྷཝཏོ ཨེཀནྟཱཀུསལཾ སཙིཏྟཀསིཀྑཱཔདཾ ཋཔེཏྭཱ སུརཱཔཱནཱདིཨཙིཏྟཀསིཀྑཱཔདཱནཾ ལོཀཝཛྫཏཱ ན སིཡཱཏི ཏེསམྤི སངྒཎྷཏྠཾ ‘‘ཡསྶ སཙིཏྟཀཔཀྑེ ཙིཏྟཾ ཨཀུསལམེཝ ཧོཏི, ཏཾ ལོཀཝཛྫ’’ནྟི ཝུཏྟཾ. ཏེནེཝ ཙཱུལ༹གཎྛིཔདེ མཛ྄ཛྷིམགཎྛིཔདེ ཙ ཝུཏྟཾ ‘‘ཨེཏཾ སཏྟཾ མཱརེསྶཱམཱིཏི ཏསྨིཾཡེཝ པདེསེ ནིཔནྣཾ ཨཉྙཾ མཱརེནྟསྶ པཱཎསཱམཉྙསྶ ཨཏྠིཏཱཡ ཡཐཱ པཱཎཱཏིཔཱཏོ ཧོཏི, ཨེཝཾ ཨེཏཾ མཛྫཾ པིཝིསྶཱམཱིཏི ཨཉྙཾ མཛྫཾ པིཝནྟསྶ མཛྫསཱམཉྙསྶ ཨཏྠིཏཱཡ ཨཀུསལམེཝ ཧོཏི. ཡཐཱ པན ཀཊྛསཉྙཱཡ སཔྤཾ གྷཱཏེནྟསྶ པཱཎཱཏིཔཱཏོ ན ཧོཏི, ཨེཝཾ ནཱལི༹ཀེརཔཱནསཉྙཱཡ མཛྫཾ པིཝནྟསྶ ཨཀུསལཾ ན ཧོཏཱི’’ཏི.

ཀེཙི པན ཝདནྟི ‘‘སཱམཎེརསྶ སུརཱཏི ཨཛཱནིཏྭཱ པིཝནྟསྶ པཱརཱཛིཀོ ནཏྠི, ཨཀུསལཾ པན ཧོཏཱི’’ཏི, ཏཾ ཏེསཾ མཏིམཏྟཾ. ‘‘བྷིཀྑུནོ ཨཛཱནིཏྭཱཔི བཱིཛཏོ པཊྛཱཡ མཛྫཾ པིཝནྟསྶ པཱཙིཏྟིཡཾ, སཱམཎེརོ ཛཱནིཏྭཱ ¶ པིཝནྟོ སཱིལབྷེདཾ ཨཱཔཛྫཏི, ན ཨཛཱནིཏྭཱ’’ཏི ཨེཏྟཀམེཝ ཧི ཨཊྛཀཐཱཡཾ ཝུཏྟཾ, ‘‘ཨཀུསལཾ པན ཧོཏཱི’’ཏི ན ཝུཏྟནྟི. ཨཔརམྤི ཝདནྟི ‘‘ཨཛཱནིཏྭཱ པིཝནྟསྶཔི སོཏཱཔནྣསྶ མུཁཾ སུརཱ ན པཝིསཏི ཀམྨཔཐཔྤཏྟཨཀུསལཙིཏྟེནེཝ པཱཏབྦཏོ’’ཏི, ཏམྤི ན སུནྡརཾ. བོདྷིསཏྟེ ཀུཙྪིགཏེ བོདྷིསཏྟམཱཏུ སཱིལཾ ཝིཡ ཧི ཨིདམྤི ཨརིཡསཱཝཀཱནཾ དྷམྨཏཱསིདྡྷནྟི ཝེདིཏབྦཾ. ཏེནེཝ དཱིགྷནིཀཱཡེ ཀཱུཊདནྟསུཏྟཊྛཀཐཱཡཾ (དཱི. ནི. ཨཊྛ. ༡.༣༥༢) ཝུཏྟཾ –

‘‘བྷཝནྟརེཔི ཧི ཨརིཡསཱཝཀོ ཛཱིཝིཏཧེཏུཔི ནེཝ པཱཎཾ ཧནཏི, ན སུརཾ པིཝཏི. སཙེཔིསྶ སུརཉྩ ཁཱིརཉྩ མིསྶེཏྭཱ མུཁེ པཀྑིཔནྟི, ཁཱིརམེཝ པཝིསཏི, ན སུརཱ. ཡཐཱ ཀིཾ? ཡཐཱ ཀོཉྩསཀུཎཱནཾ ཁཱིརམིསྶཀེ ཨུདཀེ ཁཱིརམེཝ པཝིསཏི, ན ཨུདཀཾ. ཨིདཾ ཡོནིསིདྡྷནྟི ཙེ? ཨིདམྤི དྷམྨཏཱསིདྡྷནྟི ཝེདིཏབྦ’’ནྟི.

ཡདི ཨེཝཾ སུརཱཔཱནསིཀྑཱཔདཊྛཀཐཱཡཾ (པཱཙི. ཨཊྛ. ༣༢༩) ‘‘ཝཏྠུཨཛཱནནཏཱཡ ཙེཏྠ ཨཙིཏྟཀཏཱ ཝེདིཏབྦཱ, ཨཀུསལེནེཝ པཱཏབྦཏཱཡ ལོཀཝཛྫཏཱ’’ཏི ཀསྨཱ ཝུཏྟཾ? ནཱཡཾ དོསོ. ཨཡཉྷེཏྠ ཨདྷིཔྤཱཡོ – སཙིཏྟཀཔཀྑེ ཨཀུསལཙིཏྟེནེཝ པཱཏབྦཏཱཡ ལོཀཝཛྫཏཱཏི. ཨིམིནཱཡེཝ ཧི ཨདྷིཔྤཱཡེན ཨཉྙེསུཔི ལོཀཝཛྫེསུ ཨཙིཏྟཀསིཀྑཱཔདེསུ ཨཀུསལཙིཏྟཏཱཡེཝ ཝུཏྟཱ, ན པན སཙིཏྟཀཏཱ. ཏེནེཝ བྷིཀྑུནཱིཝིབྷངྒཊྛཀཐཱཡཾ (པཱཙི. ཨཊྛ. ༡༢༢༧) ཝུཏྟཾ –

‘‘གིརགྒསམཛྫཾ ¶ ཙིཏྟཱགཱརསིཀྑཱཔདཾ སངྒྷཱཎི ཨིཏྠཱལངྐཱརོ གནྡྷཀཝཎྞཀོ ཝཱསིཏཀཔིཉྙཱཀོ བྷིཀྑུནཱིཨཱདཱིཧི ཨུམྨདྡནཔརིམདྡནཱཏི ཨིམཱནི དས སིཀྑཱཔདཱནི ཨཙིཏྟཀཱནི ལོཀཝཛྫཱནི ཨཀུསལཙིཏྟཱནཱི’’ཏི,

ཨཡཾ པནེཏྠ ཨདྷིཔྤཱཡོ – ཝིནཱཔི ཙིཏྟེན ཨཱཔཛྫིཏབྦཏྟཱ ཨཙིཏྟཀཱནི, ཙིཏྟེ པན སཏི ཨཀུསལེནེཝ ཨཱཔཛྫིཏབྦཏྟཱ ལོཀཝཛྫཱནི ཙེཝ ཨཀུསལཙིཏྟཱནི ཙཱཏི. ཏསྨཱ བྷིཀྑུཝིབྷངྒེ ཨཱགཏཱནི སུརཱཔཱནཨུཡྻུཏྟཨུཡྻོདྷིཀསིཀྑཱཔདཱནི ཏཱིཎི, བྷིཀྑུནཱིཝིབྷངྒེ ཨཱགཏཱནི གིརགྒསམཛྫཱདཱིནི དསཱཏི ཨིམེསཾ ཏེརསནྣཾ ཨཙིཏྟཀསིཀྑཱཔདཱནཾ ལོཀཝཛྫཏཱདསྶནཏྠཾ ‘‘སཙིཏྟཀཔཀྑེ’’ཏི ཨིདཾ ཝིསེསནཾ ཀཏནྟི ནིཊྛམེཏྠ གནྟབྦཾ. ཡསྨཱ ¶ པན པཎྞཏྟིཝཛྫསྶ ཝཏྠུཝཱིཏིཀྐམཝིཛཱནནཙིཏྟེན སཙིཏྟཀཔཀྑེ ཙིཏྟཾ སིཡཱ ཀུསལཾ, སིཡཱ ཨཀུསལཾ, སིཡཱ ཨབྱཱཀཏཾ, ཏསྨཱ ཏསྶ སཙིཏྟཀཔཀྑེ ཙིཏྟཾ ཨཀུསལམེཝཱཏི ཨཡཾ ནིཡམོ ནཏྠཱིཏི སེསཾ པཎྞཏྟིཝཛྫནྟི ཝུཏྟཾ.

རུནྡྷནྟཱིཏི ཝཱིཏིཀྐམཾ རུནྡྷནྟཱི. དྭཱརཾ པིདཧནྟཱིཏི ཝཱིཏིཀྐམལེསསྶ དྭཱརཾ པིདཧནྟཱི. སོཏཾ པཙྪིནྡམཱནཱཏི ཨུཔརཱུཔརི ཝཱིཏིཀྐམསོཏཾ པཙྪིནྡམཱནཱ. ཨཐ ཝཱ རུནྡྷནྟཱིཏི ཨནཱཔཏྟིལེསཾ རུནྡྷནྟཱི. དྭཱརཾ པིདཧནྟཱིཏི ཨནཱཔཏྟིལེསསྶ དྭཱརཾ པིདཧནྟཱི. སོཏཾ པཙྪིནྡམཱནཱཏི ཨནཱཔཏྟིསོཏཾ པཙྪིནྡམཱནཱ, ཨཱཔཏྟིམེཝ ཀུརུམཱནཱཏི ཝུཏྟཾ ཧོཏི. ནནུ ཙ ལོཀཝཛྫེ ཀཱཙི ཨནུཔཉྙཏྟི ཨུཔྤཛྫམཱནཱ སིཐིལཾ ཀརོནྟཱི ཨུཔྤཛྫཏི, ཏསྨཱ ‘‘ལོཀཝཛྫེ ཨནུཔཉྙཏྟི ཨུཔྤཛྫམཱནཱ…པེ… གཱལ༹ྷཏརཾ ཀརོནྟཱི ཨུཔྤཛྫཏཱི’’ཏི ཨིདཾ ཀསྨཱ ཝུཏྟནྟི ཨཱཧ ‘‘ཨཉྙཏྲ ཨདྷིམཱནཱ ཨཉྙཏྲ སུཔིནནྟཱ’’ཏིཨཱདི. ‘‘ཨཉྙཏྲ ཨདྷིམཱནཱ’’ཏི ཨིམིསྶཱ ཨནུཔཉྙཏྟིཡཱ ‘‘ཝཱིཏིཀྐམཱབྷཱཝཱ’’ཏི ཀཱརཎཾ ཝུཏྟཾ, ‘‘ཨཉྙཏྲ སུཔིནནྟཱ’’ཏི ཨིམིསྶཱ ‘‘ཨབྦོཧཱརིཀཏྟཱ’’ཏི ཀཱརཎཾ ཝུཏྟཾ. ཏཏྠ ཝཱིཏིཀྐམཱབྷཱཝཱཏི པཱཔིཙྪོ ཨིཙྪཱཔཀཏོཏིཨཱདིཝཱིཏིཀྐམཱབྷཱཝཱ. ཨུཏྟརིམནུསྶདྷམྨེ ཧི ‘‘པཱཔིཙྪོ ཨིཙྪཱཔཀཏོ ཨུཏྟརིམནུསྶདྷམྨཾ ཨུལླཔཏཱི’’ཏི (མཧཱཝ. ༡༢༩) ཝཙནཏོ ཝིསཾཝཱདནཱདྷིཔྤཱཡེན མུསཱ བྷཎནྟོ པཱརཱཛིཀོ ཧོཏི. ཨཡཾ པན ཨདྷིམཱནེན ཨདྷིགཏསཉྙཱི ཧུཏྭཱ ཨུལླཔཏི, ན སིཀྑཱཔདཾ ཝཱིཏིཀྐམིཏུཀཱམོ, ཏསྨཱ ‘‘ཨཉྙཏྲ ཨདྷིམཱནཱ’’ཏི ཨཡཾ ཨནུཔཉྙཏྟི ཨུཔྤཛྫམཱནཱ ཝཱིཏིཀྐམཱབྷཱཝཱ ཨནཱཔཏྟིཀརཱ ཛཱཏཱ. ཨབྦོཧཱརིཀཏྟཱཏི སུཔིནནྟེ ཝིཛྫམཱནཱཡཔི ཙེཏནཱཡ ཝཱིཏིཀྐམིཙྪཱཡ ཙ ཨབྦོཧཱརིཀཏྟཱ. ཀིཉྩཱཔི ཧི སུཔིནནྟེ མོཙནསྶཱདཙེཏནཱ སཾཝིཛྫཏི, ཀདཱཙི ཨུཔཀྐམནམྤི ཧོཏི, ཏཐཱཔི ཐིནམིདྡྷེན ཨབྷིབྷཱུཏཏྟཱ ཏཾ ཙིཏྟཾ ཨབྦོཧཱརིཀཾ, ཙིཏྟསྶ ཨབྦོཧཱརིཀཏྟཱ ཨུཔཀྐམཀིརིཡཱསཾཝཏྟནིཀཱཔི ཙེཏནཱ ཨབྦོཧཱརིཀཱ. ཏེནེཝ ¶ ‘‘ཨཏྠེསཱ བྷིཀྑཝེ ཙེཏནཱ, སཱ ཙ ཁོ ཨབྦོཧཱརིཀཱ’’ཏི (པཱརཱ. ༢༣༥) བྷགཝཏཱ ཝུཏྟཱ, ཏསྨཱ ‘‘ཨཉྙཏྲ སུཔིནནྟཱ’’ཏི ཨཡཾ ཨནུཔཉྙཏྟི ཨབྦོཧཱརིཀཏྟཱ ཨནཱཔཏྟིཀརཱ ཛཱཏཱ.

ཨཀཏེ ཝཱིཏིཀྐམེཏི ‘‘ཀུཀྐུཙྩཱཡནྟཱ ན བྷུཉྫིཾསཱུ’’ཏིཨཱདཱིསུ ཝིཡ ཝཱིཏིཀྐམེ ཨཀཏེ. སིཐིལཾ ཀརོནྟཱིཏི པཋམཾ སཱམཉྙཏོ བདྡྷསིཀྑཱཔདཾ མོཙེཏྭཱ ¶ ཨཏྟནོ ཨཏྟནོ ཝིསཡེ ཨནཱཔཏྟིཀརཎཝསེན སིཐིལཾ ཀརོནྟཱི. དྭཱརཾ དདམཱནཱཏི ཨནཱཔཏྟིཡཱ དྭཱརཾ དདམཱནཱ. ཏེནེཝཱཧ ‘‘ཨཔརཱཔརམྤི ཨནཱཔཏྟིཾ ཀུརུམཱནཱ’’ཏི. ནནུ ཙ སཉྩརིཏྟསིཀྑཱཔདེ ‘‘ཨནྟམསོ ཏངྑཎིཀཱཡཔཱི’’ཏི ཨནུཔཉྙཏྟི ཨུཔྤཛྫམཱནཱ ཨཱཔཏྟིམེཝ ཀརོནྟཱི ཨུཔྤནྣཱ, ཨཐ ཀསྨཱ ‘‘ཨནཱཔཏྟིཾ ཀུརུམཱནཱ ཨུཔྤཛྫཏཱི’’ཏི ཝུཏྟནྟི ཨཱཧ ‘‘ཨནྟམསོ ཏངྑཎིཀཱཡཔཱི’’ཏིཨཱདི. ཨུདཱཡིནཱ བྷིཀྑུནཱ ཏངྑཎིཀཱཡ སཉྩརིཏྟཾ ཨཱཔནྣཝཏྠུསྨིཾ པཉྙཏྟཏྟཱ ‘‘ཀཏེ ཝཱིཏིཀྐམེ’’ཏི ཝུཏྟཾ. པཉྙཏྟིགཏིཀཱཝ ཧོཏཱིཏི མཱུལཔཉྙཏྟིཡཾཡེཝ ཨནྟོགདྷཱ ཧོཏི.

མཀྐཊིཝཏྠུཀཐཱཝཎྞནཱ ནིཊྛིཏཱ.

སནྠཏབྷཱཎཝཱརོ

ཝཛྫིཔུཏྟཀཝཏྠུཝཎྞནཱ

༤༣. ཝེསཱལཱི ནིཝཱསོ ཨེཏེསནྟི ཝེསཱལིཀཱཏི ཨཱཧ ‘‘ཝེསཱལིཝཱསིནོ’’ཏི. ཝཛྫཱིསུ ཛནཔདེ ཝསནྟཱ ཝཛྫིནོ, ཝཛྫཱིནཾ པུཏྟཀཱ ཝཛྫིཔུཏྟཀཱཏི ཨཱཧ ‘‘ཝཛྫིརཊྛེ ཝེསཱལིཡཾ ཀུལཱནཾ པུཏྟཱ’’ཏི. ཉཱཏཱིནཾ བྱསནནྟི ཉཱཏཱིནཾ ཝིནཱསོ. སོ པན ཉཱཏཱིནཾ ཝིནཱསོ རཱཛདཎྜཱདིཀཱརཎེན ཧོཏཱིཏི ཨཱཧ ‘‘རཱཛདཎྜབྱཱདྷིམརཎཝིཔྤཝཱསནིམིཏྟེནཱ’’ཏི. བྷོགཱནཾ བྱསནཾ ཝིནཱསོ བྷོགབྱསནཾ. ཏཉྩ ཧིརཉྙསུཝཎྞདཱསིདཱསཱདཱིནཾ ཨུཔབྷོགཔརིབྷོགཝཏྠཱུནཾ རཱཛདཎྜཱདིནཱ ཝིནཱསོཏི ཨཱཧ ‘‘ཨེས ནཡོ དུཏིཡཔདེཔཱི’’ཏི. ན བུདྡྷཾ གརཧཱམཱཏི ‘‘ཨསབྦཉྙུ བུདྡྷོ’’ཏིཨཱདིནཱ བུདྡྷཾ ན གརཧཱམ. ན དྷམྨགརཧིནོཏི ‘‘ཨནིཡྻཱནིཀོ དྷམྨོ’’ཏིཨཱདིནཱ དྷམྨཾ ན གརཧཱམ. ན སངྒྷགརཧིནོཏི ‘‘དུཔྤཊིཔནྣོ སངྒྷོ’’ཏིཨཱདིནཱ སངྒྷཾ ན གརཧཱམ. ཨཊྛཏིཾསཱརམྨཎེསཱུཏི དས ཀསིཎཱ དས ཨསུབྷཱ དསཱནུསྶཏིཡོ ཙཏྟཱརོ བྲཧྨཝིཧཱརཱ ཙཏྟཱརོ ཨཱརུཔྤཱ ཙཏུདྷཱཏུཝཝཏྠཱནཾ ཨཱཧཱརེ པཊིཀཱུལསཉྙཱཏི ཨིམེསུ ཙཏྟཱལཱིསཀམྨཊྛཱནེསུ པཱལི༹ཡཾ ཨནཱགཏཏྟཱ ཨཱལོཀཱཀཱསཀསིཎདྭཡཾ ཋཔེཏྭཱ ཨཝསེསཱནི གཧེཏྭཱ ཝུཏྟཾ. ཝིབྷཏྟཱ ཀུསལཱ ¶ དྷམྨཱཏི ‘‘ཨིམསྨིཾ ཨཱརམྨཎེ ཨིདཾ ཧོཏཱི’’ཏི ཨེཝཾ ཝིབྷཏྟཱ ཨུཔཙཱརཛ྄ཛྷཱནེན སདྡྷིཾ པཋམཛ྄ཛྷཱནཱདཡོ མཧགྒཏཀུསལཱ དྷམྨཱ ¶ . ཏེཝ དྷམྨེཏི ཏེ ཨེཝ ཀུསལེ དྷམྨེ. མཛ྄ཛྷིམཡཱམོ བྷིཀྑཱུནཾ ནིདྡཱཀིལམཐཝིནོདནོཀཱསཏྟཱ ན གཧིཏོཏི ཨཱཧ ‘‘པཋམཡཱམཉྩ པཙྪིམཡཱམཉྩཱ’’ཏི. སཙྩཱནི བུཛ྄ཛྷཏི པཊིཝིཛ྄ཛྷཏཱིཏི བོདྷི, ཨརཧཏྟམགྒཉཱཎཾ. ཨུཔཀཱརཀཏྟེན ཏསྶ པཀྑེ བྷཝཱ བོདྷིཔཀྑིཡཱཏི ཨཱཧ ‘‘བོདྷིསྶ པཀྑེ བྷཝཱནཾ, ཨརཧཏྟམགྒཉཱཎསྶ ཨུཔཀཱརཀཱན’’ནྟི. ཙཏྟཱརོ སཏིཔཊྛཱནཱ, ཙཏྟཱརོ སམྨཔྤདྷཱནཱ, ཙཏྟཱརོ ཨིདྡྷིཔཱདཱ, པཉྩིནྡྲིཡཱནི, པཉྩ བལཱནི, སཏྟ བོཛ྄ཛྷངྒཱ, ཨརིཡོ ཨཊྛངྒིཀོ མགྒོཏི ཨིམེ སཏྟཏིཾས བོདྷིཔཀྑིཡདྷམྨཱ. ‘‘གིཧིཔལིབོདྷཾ ཨཱཝཱསཔལིབོདྷཉྩ པཧཱཡཱ’’ཏི ཨིམེསཾཡེཝ དྭིནྣཾ པལིབོདྷཱནཾ ཨུཔཙྪེདསྶ སུདུཀྐརབྷཱཝཏོ ཝུཏྟཾ. ཡུཏྟཔཡུཏྟཱཏི སམྨདེཝ ཡུཏྟཱ.

ཨཱསཡནྟི ཨཛ྄ཛྷཱསཡཾ. སིཀྑཾ ཨཔྤཙྩཀྑཱཡ བྷིཀྑུབྷཱཝེ ཋཏྭཱ པཊིསེཝིཏམེཐུནཱནཾ ཏེསཾ ཝཛྫིཔུཏྟཀཱནཾ ཨུཔསམྤདཾ ཨནུཛཱནནྟོ བྷགཝཱ ‘‘པཱརཱཛིཀོ ཧོཏི ཨསཾཝཱསོ’’ཏི ཨེཝཾ པཉྙཏྟསིཀྑཱཔདཾ སམཱུཧནཏི ནཱམཱཏི ཨཱཧ – ‘‘ཡདི ཧི བྷགཝཱ…པེ… པཉྙཏྟཾ སམཱུཧནེཡྻཱ’’ཏི. ‘‘ཡོ པན བྷིཀྑཱུ’’ཏི ཝུཏྟཏྟཱ པན སིཀྑཾ པཙྩཀྑཱཡ པཊིསེཝིཏམེཐུནསྶ ཨུཔསམྤདཾ ཨནུཛཱནནྟོ ན སམཱུཧནཏི ནཱམ. ན ཧི སོ བྷིཀྑུ ཧུཏྭཱ པཊིསེཝཏི. ‘‘སོ ཨཱགཏོ ན ཨུཔསམྤཱདེཏབྦོ’’ཏི ཝཙནཏོ སཱམཎེརབྷཱུམི ཨནུཉྙཱཏཱཏི ཨཱཧ ‘‘སཱམཎེརབྷཱུམིཡཾ པན ཋིཏོ’’ཏིཨཱདི. ཨུཏྟམཏྠནྟི ཨརཧཏྟཾ ནིབྦཱནམེཝ ཝཱ.

ཝཛྫིཔུཏྟཀཝཏྠུཝཎྞནཱ ནིཊྛིཏཱ.

ཙཏུབྦིདྷཝིནཡཀཐཱཝཎྞནཱ

༤༥. ནཱིཧརིཏྭཱཏི སཱསནཏོ ནཱིཧརིཏྭཱ. ཏཐཱ ཧི ‘‘པཉྩཧུཔཱལི ཨངྒེཧི སམནྣཱགཏེན བྷིཀྑུནཱ ནཱནུཡུཉྫིཏབྦཾ. ཀཏམེཧི པཉྩཧི? སུཏྟཾ ན ཛཱནཱཏི, སུཏྟཱནུལོམཾ ན ཛཱནཱཏཱི’’ཏི (པརི. ༤༤༢) ཨེཝམཱདིཔརིཡཏྟིསཱསནཏོ སུཏྟཾ སུཏྟཱནུལོམཉྩ ནཱིཧརིཏྭཱ པཀཱསེསུཾ, ‘‘ཨནཱཔཏྟི ཨེཝཾ ཨམྷཱཀཾ ཨཱཙརིཡཱནཾ ཨུགྒཧོ པརིཔུཙྪཱཏི གཎྷཱཏཱི’’ཏི ཨེཝམཱདིཔརིཡཏྟིསཱསནཏོ ཨཱཙརིཡཝཱདཾ ནཱིཧརིཏྭཱ པཀཱསེསུཾ, བྷཱརུཀཙྪཀཝཏྠུསྨིཾ (པཱརཱ. ༧༨) ‘‘ཨཱཡསྨཱ ¶ ཨུཔཱལི ཨེཝམཱཧ ཨནཱཔཏྟི ཨཱཝུསོ སུཔིནནྟེནཱ’’ཏི ཨེཝམཱདིཔརིཡཏྟིསཱསནཏོ ཨེཝ ཨཏྟནོམཏིཾ ནཱིཧརིཏྭཱ པཀཱསེསུཾ. ཏཱཡ ཧི ཨཏྟནོམཏིཡཱ ཐེརོ ཨེཏདགྒཊྛཱནཾ ལབྷི.

ཝུཏྟནྟི ¶ ནཱགསེནཏྠེརེན ཝུཏྟཾ. པཛྫཏེ ཨནེན ཨཏྠོཏི པདཾ, བྷགཝཏཱ ཀཎྛཱདིཝཎྞཔྤཝཏྟིཊྛཱནཾ ཨཱཧཙྩ ཝིསེསེཏྭཱ བྷཱསིཏཾ པདཾ ཨཱཧཙྩཔདཾ, བྷགཝཏོཡེཝ ཝཙནཾ. ཏེནཱཧ ‘‘ཨཱཧཙྩཔདནྟི སུཏྟཾ ཨདྷིཔྤེཏ’’ནྟི. ‘‘ཨིདཾ ཀཔྤཏི, ཨིདཾ ན ཀཔྤཏཱི’’ཏི ཨེཝཾ ཨཝིསེསེཏྭཱ ‘‘ཡཾ, བྷིཀྑཝེ, མཡཱ ‘ཨིདཾ ན ཀཔྤཏཱི’ཏི ཨཔྤཊིཀྑིཏྟཾ, ཏཉྩེ ཨཀཔྤིཡཾ ཨནུལོམེཏི, ཀཔྤིཡཾ པཊིབཱཧཏི, ཏཾ ཝོ ན ཀཔྤཏཱི’’ཏིཨཱདིནཱ (མཧཱཝ. ༣༠༥) ཝུཏྟཾ སཱམཉྙལཀྑཎཾ ཨིདྷ ‘‘རསོ’’ཏི ཨདྷིཔྤེཏནྟི ཨཱཧ ‘‘རསོཏི སུཏྟཱནུལོམ’’ནྟི. དྷམྨསངྒཱཧཀཔྤབྷུཏིཨཱཙརིཡཔརམྤརཏོ ཨཱནཱིཏཱ ཨཊྛཀཐཱཏནྟི ཨིདྷ ‘‘ཨཱཙརིཡཝཾསོ’’ཏི ཨདྷིཔྤེཏཱཏི ཨཱཧ ‘‘ཨཱཙརིཡཝཾསོཏི ཨཱཙརིཡཝཱདོ’’ཏི.

ཨིདྷ ཝིནཡཝིནིཙྪཡསྶ ཨདྷིཀཏཏྟཱ ཏདནུཙྪཝིཀམེཝ སུཏྟཾ དསྶེནྟོ ཨཱཧ – ‘‘སུཏྟཾ ནཱམ སཀལེ ཝིནཡཔིཊཀེ པཱལཱི༹’’ཏི. མཧཱཔདེསཱཏི མཧཱཨོཀཱསཱ, མཧནྟཱནི ཝིནཡསྶ པཏིཊྛཱཔནཊྛཱནཱནི ཡེསུ པཏིཊྛཱཔིཏོ ཝིནཡོ ཝིནིཙྪཡཏི ཨསནྡེཧཏོ. མཧནྟཱནི ཝཱ ཀཱརཎཱནི མཧཱཔདེསཱ, མཧནྟཱནི ཝིནཡཝིནིཙྪཡཀཱརཎཱནཱིཏི ཝུཏྟཾ ཧོཏི. ‘‘ཨཏྠཏོ པན ‘ཡཾ, བྷིཀྑཝེ’ཏིཨཱདིནཱ ཝུཏྟཱ སཱདྷིཔྤཱཡཱ པཱལི༹ཡེཝ མཧཱཔདེསཱ’’ཏི ཝདནྟི. ཏེནེཝཱཧ ‘‘ཡེ བྷགཝཏཱ ཨེཝཾ ཝུཏྟཱ’’ཏིཨཱདི. ཨིམེ ཙ མཧཱཔདེསཱ ཁནྡྷཀེ ཨཱགཏཱ, ཏསྨཱ ཏེསཾ ཝིནིཙྪཡཀཐཱ ཏཏྠེཝ ཨཱཝི བྷཝིསྶཏཱིཏི ཨིདྷ ན ཝུཙྩཏི. ཡདིཔི ཏཏྠ ཏཏྠ བྷགཝཏཱ པཝཏྟིཏཱ པཀིཎྞཀདེསནཱཝ ཨཊྛཀཐཱ, སཱ པན དྷམྨསངྒཱཧཀེཧི པཋམཾ ཏཱིཎི པིཊཀཱནི སངྒཱཡིཏྭཱ ཏསྶ ཨཏྠཝཎྞནཱནུརཱུཔེནེཝ ཝཱཙནཱམགྒཾ ཨཱརོཔིཏཏྟཱ ‘‘ཨཱཙརིཡཝཱདོ’’ཏི ཝུཙྩཏི ཨཱཙརིཡཱ ཝདནྟི སཾཝཎྞེནྟི པཱལི༹ཾ ཨེཏེནཱཏི ཀཏྭཱ. ཏེནཱཧ – ‘‘ཨཱཙརིཡཝཱདོ ནཱམ…པེ… ཨཊྛཀཐཱཏནྟཱི’’ཏི. ཏིསྶོ སངྒཱིཏིཡོ ཨཱརུལ༹ྷོཡེཝ ཙ བུདྡྷཝཙནསྶ ཨཏྠསཾཝཎྞནཱབྷཱུཏོ ཀཐཱམགྒོ མཧཱམཧིནྡཏྠེརེན ཏམྦཔཎྞིདཱིཔཾ ཨཱབྷཏོ, པཙྪཱ ཏམྦཔཎྞིཡེཧི མཧཱཐེརེཧི སཱིཧལ༹བྷཱསཱཡ ཋཔིཏོ ནིཀཱཡནྟརལདྡྷིསངྐརཔརིཧརཎཏྠཾ. ཀིཉྩཱཔི ཨཏྟནོམཏི སུཏྟཱདཱིཧི སཾསནྡིཏྭཱཝ པརིཀཔྤཱིཡཏི, ཏཐཱཔི སཱ ན སུཏྟཱདཱིསུ ཝིསེསཏོ ¶ ནིདྡིཊྛཱཏི ཨཱཧ ‘‘སུཏྟསུཏྟཱནུལོམཨཱཙརིཡཝཱདེ མུཉྩིཏྭཱ’’ཏི. ཨནུབུདྡྷིཡཱཏི སུཏྟཱདཱིནིཡེཝ ཨནུགཏབུདྡྷིཡཱ. ནཡགྒཱཧེནཱཏི སུཏྟཱདིཏོ ལབྦྷམཱནནཡགྒཧཎེན.

ཨཏྟནོམཏིཾ སཱམཉྙཏོ པཋམཾ དསྶེཏྭཱ ཨིདཱནི ཏམེཝ ཝིསེསེཏྭཱ དསྶེནྟོ ‘‘ཨཔིཙཱ’’ཏིཨཱདིམཱཧ. ཨིདཱནི ཏཏྠ པཊིཔཛྫིཏབྦཱཀཱརཾ དསྶེནྟོ ཨཱཧ – ‘‘ཏཾ པན ཨཏྟནོམཏིཾ གཧེཏྭཱ ཀཐེནྟེནཱ’’ཏིཨཱདི. ཨཏྠེནཱཏི ཨཏྟནཱ སལླཀྑིཏེན ཨཏྠེན. ཨཱཙརིཡཝཱདེ ཨོཏཱརེཏབྦཱཏི ཨཱཙརིཡཝཱདེ ཉཱཎེན ཨནུཔྤཝེསེཏབྦཱ. སབྦདུབྦལཱཏི པུགྒལསྶ སཡཾ ¶ པཊིབྷཱནབྷཱཝཏོ. པམཱདཔཱཋཝསེན ཨཱཙརིཡཝཱདསྶ ཀདཱཙི སུཏྟཱནུལོམེན ཨསཾསནྡནཱཔི སིཡཱ, སོ ན གཧེཏབྦོཏི དསྶེནྟོ ཨཱཧ – ‘‘ཨཱཙརིཡཝཱདོཔི…པེ… སམེནྟོ ཨེཝ གཧེཏབྦོ’’ཏི. སམེནྟམེཝ གཧེཏབྦནྟི ཡཐཱ སུཏྟེན སཾསནྡཏི, ཨེཝཾ མཧཱཔདེསཏོ ཨཏྠཱ ཨུདྡྷརིཏབྦཱཏི དསྶེཏི. སུཏྟཱནུལོམསྶ སུཏྟེཀདེསཏྟེཔི སུཏྟེ ཝིཡ ‘‘ཨིདཾ ཀཔྤཏི, ཨིདཾ ན ཀཔྤཏཱི’’ཏི པརིཙྪིནྡིཏྭཱ ཨཱཧཙྩབྷཱསིཏཾ ཀིཉྩི ནཏྠཱིཏི ཨཱཧ – ‘‘སུཏྟཱནུལོམཏོ ཧི སུཏྟམེཝ བལཝཏར’’ནྟི. ཨཔྤཊིཝཏྟིཡནྟི ཨཔྤཊིབཱཧིཡཾ. ཀཱརཀསངྒྷསདིསནྟི པམཱཎཏྟཱ སངྒཱིཏིཀཱརཀསངྒྷསདིསཾ. བུདྡྷཱནཾ ཋིཏཀཱལསདིསནྟི ཨིམིནཱ བུདྡྷེཧེཝ ཀཐིཏཏྟཱ དྷརམཱནབུདྡྷསདིསནྟི ཝུཏྟཾ ཧོཏི. སུཏྟེ ཧི པཊིབཱཧིཏེ བུདྡྷོཝ པཊིབཱཧིཏོ ཧོཏི. སཀཝཱདཱི སུཏྟཾ གཧེཏྭཱ ཀཐེཏཱིཏི སཀཝཱདཱི ཨཏྟནོ སུཏྟཾ གཧེཏྭཱ ཝོཧརཏི. པརཝཱདཱི སུཏྟཱནུལོམནྟི ཨཉྙནིཀཱཡཝཱདཱི ཨཏྟནོ ནིཀཱཡེ སུཏྟཱནུལོམཾ གཧེཏྭཱ ཀཐེཏི. ཁེཔཾ ཝཱ གརཧཾ ཝཱ ཨཀཏྭཱཏི ‘‘ཀིཾ ཨིམིནཱ’’ཏི ཁེཔཾ ཝཱ ‘‘ཀིམེས བཱལོ ཝདཏཱི’’ཏི གརཧཾ ཝཱ ཨཀཏྭཱ. སུཏྟཱནུལོམནྟི པརཝཱདིནཱ ཝུཏྟཾ ཨཉྙནིཀཱཡེ སུཏྟཱནུལོམཾ. སུཏྟེ ཨོཏཱརེཏབྦནྟི སཀཝཱདིནཱ ཨཏྟནོ སུཏྟེ ཨོཏཱརེཏབྦཾ. སུཏྟསྨིཾཡེཝ ཋཱཏབྦནྟི ཨཏྟནོ སུཏྟེཡེཝ ཋཱཏབྦཾ. ཨེཝཾ སེསཝཱརེསུཔི ཨཏྠཡོཛནཱ ཀཱཏབྦཱ. ཨཡནྟི སཀཝཱདཱི. པརོཏི ཨཉྙནིཀཱཡཝཱདཱི. ཨེཝཾ སེསེསུཔི.

ནནུ ཙ ‘‘སུཏྟཱནུལོམཏོ སུཏྟམེཝ བལཝཏར’’ནྟི ཧེཊྛཱ ཝུཏྟཾ, ཨིདྷ པན ‘‘སུཏྟཱནུལོམེ སུཏྟཾ ཨོཏཱརེཏབྦ’’ནྟིཨཱདི ཀསྨཱ ཝུཏྟནྟི? ནཱཡཾ ཝིརོདྷོ. ‘‘སུཏྟཱནུལོམཏོ སུཏྟམེཝ བལཝཏར’’ནྟི ཧི ཨིདཾ ¶ སཀམཏེཡེཝ སུཏྟཾ སནྡྷཱཡ ཝུཏྟཾ. ཏཏྠ ཧི སཀམཏིཔརིཡཱཔནྣམེཝ སུཏྟཱདིཾ སནྡྷཱཡ ‘‘ཨཏྟནོམཏི སབྦདུབྦལཱ, ཨཏྟནོམཏིཏོ ཨཱཙརིཡཝཱདོ བལཝཏརོ, ཨཱཙརིཡཝཱདཏོ སུཏྟཱནུལོམཾ བལཝཏརཾ, སུཏྟཱནུལོམཏོ སུཏྟམེཝ བལཝཏར’’ནྟི ཙ ཝུཏྟཾ. ཨིདྷ པན པརཝཱདིནཱ ཨཱནཱིཏཾ ཨཉྙནིཀཱཡེ སུཏྟཾ སནྡྷཱཡ ‘‘སུཏྟཱནུལོམེ སུཏྟཾ ཨོཏཱརེཏབྦ’’ནྟིཨཱདི ཝུཏྟཾ. ཏསྨཱ པརཝཱདིནཱ ཨཱནཱིཏཾ སུཏྟཱདིཾ ཨཏྟནོ སུཏྟཱནུལོམཨཱཙརིཡཝཱདཨཏྟནོམཏཱིསུ ཨོཏཱརེཏྭཱ སམེནྟཾཡེཝ གཧེཏབྦཾ, ཨིཏརཾ ན གཧེཏབྦནྟི ཨཡཾ ནཡོ ཨིདྷ ཝུཙྩཏཱིཏི ན ཀོཙི པུབྦཱཔརཝིརོདྷོ.

བཱཧིརཀསུཏྟནྟི ཏིསྶོ སངྒཱིཏིཡོ ཨནཱརུལ༹ྷགུལ༹ྷཝེསྶནྟརཱདཱིནི མཧཱསངྒྷིཀནིཀཱཡཝཱསཱིནཾ སུཏྟཱནི. ཝེདལླཱདཱིནནྟི ཨཱདི-སདྡེན གུལ༹ྷཨུམྨགྒཱདིགྒཧཎཾ ཝེདིཏབྦཾ, ཨིཏརཾ གཱརཡ྄ཧསུཏྟཾ ན གཧེཏབྦཾ. ཨཏྟནོམཏིཡམེཝ ཋཱཏབྦནྟི ཨིམིནཱ ཨཉྙནིཀཱཡཏོ ཨཱནཱིཏསུཏྟཏོཔི སཀནིཀཱཡེ ཨཏྟནོམཏིཡེཝ བལཝཏརཱཏི དསྶེཏི. སཀཝཱདཱི སུཏྟཾ གཧེཏྭཱ ཀཐེཏི, པརཝཱདཱིཔི སུཏྟམེཝཱཏིཨེཝམཱདིནཱ ¶ སམཱནཛཱཏིཀཱནཾ ཝསེན ཝཱརོ ན ཝུཏྟོ, སུཏྟསྶ སུཏྟེཡེཝ ཨོཏཱརཎཾ བྷིནྣཾ ཝིཡ ཧུཏྭཱ ན པཉྙཱཡཏི, ཝུཏྟནཡེནེཝ ཙ སཀྐཱ ཡོཛེཏུནྟི.

ཨིདཱནི སཀཝཱདཱིཔརཝཱདཱིནཾ ཀཔྤིཡཱཀཔྤིཡཱདིབྷཱཝཾ སནྡྷཱཡ ཝིཝཱདེ ཨུཔྤནྣེ ཏཏྠ པཊིཔཛྫིཏབྦཝིདྷིཾ དསྶེནྟོ ཨཱཧ – ‘‘ཨཐ པནཱཡཾ ཀཔྤིཡནྟི གཧེཏྭཱ ཀཐེཏཱི’’ཏིཨཱདི. ཏཏྠ སུཏྟེ ཙ སུཏྟཱནུལོམེ ཙ ཨོཏཱརེཏབྦནྟི སཀཝཱདིནཱ ཨཏྟནོཡེཝ སུཏྟེ ཙ སུཏྟཱནུལོམེ ཙ ཨོཏཱརེཏབྦཾ. པརོ ཀཱརཎཾ ན ཝིནྡཏཱིཏི པརཝཱདཱི ཀཱརཎཾ ན ལབྷཏི. སུཏྟཏོ བཧུཾ ཀཱརཎཉྩ ཝིནིཙྪཡཉྩ དསྶེཏཱིཏི པརཝཱདཱི ཨཏྟནོ སུཏྟཏོ བཧུཾ ཀཱརཎཾ ཝིནིཙྪཡཉྩ ཨཱཧརིཏྭཱ དསྶེཏི. སཱདྷཱུཏི སམྤཊིཙྪིཏྭཱ ཨཀཔྤིཡེཝ ཋཱཏབྦནྟི ཨིམིནཱ ཨཏྟནོ ནིཀཱཡེ སུཏྟཱདཱིནི ཨལབྷནྟེན སཀཝཱདིནཱ པརཝཱདཱིཝཙནེཡེཝ ཋཱཏབྦནྟི ཝདཏི. དྭིནྣམྤི ཀཱརཎཙྪཱཡཱ དིསྶཏཱིཏི སཀཝཱདཱིཔརཝཱདཱིནཾ ཨུབྷིནྣམྤི ཀཔྤིཡཱཀཔྤིཡབྷཱཝསཱདྷཀཾ ཀཱརཎཔཏིརཱུཔཀཾ དིསྶཏི. ཡདི དྭིནྣམྤི ཀཱརཎཙྪཱཡཱ དིསྶཏི, ཀསྨཱ ‘‘ཨཀཔྤིཡེཝ ཋཱཏབྦ’’ནྟི ཨཱཧ ‘‘ཝིནཡཉྷི པཏྭཱ’’ཏིཨཱདི. ‘‘ཝིནཡཾ པཏྭཱ’’ཏི ཝུཏྟམེཝཏྠཾ པཱཀཊཏརཾ ཀཏྭཱ དསྶེནྟོ ཨཱཧ ‘‘ཀཔྤིཡཱཀཔྤིཡཝིཙཱརཎམཱགམྨཱ’’ཏི. རུནྡྷིཏབྦནྟིཨཱདཱིསུ ¶ དུབྦིཉྙེཡྻཝིནིཙྪཡེ ཀཔྤིཡཱཀཔྤིཡབྷཱཝེ སཏི ཀཔྤིཡནྟི གཧཎཾ རུནྡྷིཏབྦཾ, ཨཀཔྤིཡནྟི གཧཎཾ གཱལ༹ྷཾ ཀཱཏབྦཾ. ཨཔརཱཔརཾ པཝཏྟཀཔྤིཡགཧཎསོཏཾ པཙྪིནྡིཏབྦཾ, གརུཀབྷཱཝསངྑཱཏེ ཨཀཔྤིཡབྷཱཝེཡེཝ ཋཱཏབྦནྟི ཨཏྠོ.

བཧཱུཧི སུཏྟཝིནིཙྪཡཀཱརཎེཧཱིཏི བཧཱུཧི སུཏྟེཧི ཙེཝ ཏཏོ ཨཱནཱིཏཝིནིཙྪཡཀཱརཎེཧི ཙ. ཨཏྟནོ གཧཎཾ ན ཝིསྶཛྫེཏབྦནྟི སཀཝཱདིནཱ ཨཏྟནོ ཨཀཔྤིཡནྟི གཧཎཾ ན ཝིསྶཛྫེཏབྦཾ. ཨིདཱནི ཝུཏྟམེཝཏྠཾ ནིགམེནྟོ ‘‘ཨེཝ’’ནྟིཨཱདིམཱཧ. ཏཏྠ ཡོཏི སཀཝཱདཱིཔརཝཱདཱིསུ ཡོ ཀོཙི. ཀེཙི པན ‘‘སཀཝཱདཱིསུཡེཝ ཡོ ཀོཙི ཨིདྷཱདྷིཔྤེཏོ’’ཏི ཝདནྟི, ཨེཝཾ སནྟེ ‘‘ཨཐ པནཱཡཾ ཀཔྤིཡནྟི གཧེཏྭཱ ཀཐེཏཱི’’ཏིཨཱདཱིསུ སབྦཏྠ ཨུབྷོཔི སཀཝཱདིནོཡེཝ སིཡུཾ ཧེཊྛཱ ཝུཏྟསྶེཝ ནིགམནཝསེན ‘‘ཨེཝ’’ནྟིཨཱདཱིནཾ ཝུཏྟཏྟཱ, ཏསྨཱ ཏཾ ན གཧེཏབྦཾ. ཨཏིརེཀཀཱརཎཾ ལབྷཏཱིཏི ཨེཏྠ སུཏྟཱདཱིསུ པུརིམཾ པུརིམཾ ཨཏིརེཀཀཱརཎཾ ནཱམ, ཡོ ཝཱ སུཏྟཱདཱིསུ ཙཏཱུསུ བཧུཏརཾ ཀཱརཎཾ ལབྷཏི, སོ ཨཏིརེཀཀཱརཎཾ ལབྷཏི ནཱམ.

སུཊྛུ པཝཏྟི ཨེཏསྶཱཏི སུཔྤཝཏྟི, སུཊྛུ པཝཏྟཏི སཱིལེནཱཏི ཝཱ སུཔྤཝཏྟི. ཏེནཱཧ ‘‘སུཔྤཝཏྟཱིཏི སུཊྛུ པཝཏྟ’’ནྟི. ཝཱཙཱཡ ཨུགྒཏཾ ཝཱཙུགྒཏཾ, ཝཙསཱ སུགྒཧིཏནྟི ཝུཏྟཾ ཧོཏི. སུཏྟཏོཏི ཨིམསྶ ཝིཝརཎཾ ‘‘པཱལི༹ཏོ’’ཏི. ཨེཏྠ ཙ ‘‘སུཏྟཾ ནཱམ སཀལཾ ཝིནཡཔིཊཀ’’ནྟི ཝུཏྟཏྟཱ ¶ པཱལི༹ཏོཏི ཏདཏྠདཱིཔིཀཱ ཨཉྙཱཡེཝ པཱལི༹ ཝེདིཏབྦཱ. ཨནུབྱཉྫནསོཏི ཨིམསྶ ཝིཝརཎཾ ‘‘པརིཔུཙྪཏོ ཙ ཨཊྛཀཐཱཏོ ཙཱ’’ཏི. པཱལི༹ཾ ཨནུགནྟྭཱ ཨཏྠསྶ བྱཉྫནཏོ པཀཱསནཏོ ཨནུབྱཉྫནནྟི ཧི པརིཔུཙྪཱ ཨཊྛཀཐཱ ཙ ཝུཙྩཏི. ཨེཏྠ ཙ ཨཊྛཀཐཱཡ ཝིསུཾ གཧིཏཏྟཱ པརིཔུཙྪཱཏི ཐེརཝཱདོ ཝུཏྟོ. སངྒྷབྷེདསྶ པུབྦབྷཱགེ པཝཏྟཀལཧསྶེཏཾ ཨདྷིཝཙནཾ སངྒྷརཱཛཱིཏི. ཀུཀྐུཙྩཀོཏི ཨཎུམཏྟེསུཔི ཝཛྫེསུ བྷཡདསྶནཝསེན ཀུཀྐུཙྩཾ ཨུཔྤཱདེནྟོ. ཏནྟིཾ ཨཝིསཾཝཱདེཏྭཱཏི པཱལི༹ཾ ཨཉྙཐཱ ཨཀཏྭཱ. ཨཝོཀྐམནྟོཏི ཨནཏིཀྐམནྟོ.

ཝིཏྠུནཏཱིཏི ཨཏྠཾ ཨདིསྭཱ ནིཏྠུནཏི. ཝིཔྥནྡཏཱིཏི ཀམྤཏི. སནྟིཊྛིཏུཾ ན སཀྐོཏཱིཏི ཨེཀསྨིཾཡེཝ ཨཏྠེ པཏིཊྛཱཏུཾ ན སཀྐོཏི. ཏེནཱཧ ‘‘ཡཾ ¶ ཡཾ པརེན ཝུཙྩཏི, ཏཾ ཏཾ ཨནུཛཱནཱཏཱི’’ཏི. པརཝཱདཾ གཎྷཱཏཱིཏི ‘‘ཨུཙྪུམྷི ཀསཊཾ ཡཱཝཛཱིཝིཀཾ, རསོ སཏྟཱཧཀཱལིཀོ, ཏདུབྷཡཝིནིམུཏྟོ ཙ ཨུཙྪུ ནཱམ ཝིསུཾ ནཏྠི, ཏསྨཱ ཨུཙྪུཔི ཝིཀཱལེ ཝཊྚཏཱི’’ཏི པརཝཱདིནཱ ཝུཏྟེ ཏམྤི གཎྷཱཏི. ཨེཀེཀལོམནྟི པལིཏཾ སནྡྷཱཡ ཝུཏྟཾ. ཡམྷཱིཏི ཡསྨིཾ པུགྒལེ. པརིཀྑཡཾ པརིཡཱདཱནནྟི ཨཏྠཏོ ཨེཀཾ.

ཨཱཙརིཡཔརམྤརཱ ཁོ པནསྶ སུགྒཧིཏཱ ཧོཏཱིཏི ཨེཏྠ ཨཱཙརིཡཔརམྤརཱཏི ཨཱཙརིཡཱནཾ ཝིནིཙྪཡཔརམྤརཱ. ཏེནེཝ ཝཀྑཏི ‘‘ཡཐཱ ཨཱཙརིཡོ ཙ ཨཱཙརིཡཱཙརིཡོ ཙ པཱལི༹ཉྩ པརིཔུཙྪཉྩ ཝདནྟི, ཏཐཱ ཉཱཏུཾ ཝཊྚཏཱི’’ཏི. པུབྦཱཔརཱནུསནྡྷིཏོཏི ‘‘ཨིདཾ པུབྦཝཙནཾ, ཨིདཾ པརཝཙནཾ, ཨཡམནུསནྡྷཱི’’ཏི ཨེཝཾ པུབྦཱཔརཱནུསནྡྷིཏོ. ཨཱཙརིཡཔརམྤརནྟི ཨིམསྶེཝ ཝེཝཙནཾ ཐེརཝཱདངྒནྟི, ཐེརཔཊིཔཱཊིནྟི ཨཏྠོ. དྭེ ཏཡོ པརིཝཊྚཱཏི དྭེ ཏིསྶོ པརམྤརཱ.

ཨིམེཧི ཙ པན ཏཱིཧི ལཀྑཎེཧཱིཏི ‘‘སུཏྟམསྶ སྭཱགཏཾ ཧོཏཱི’’ཏིཨཱདིནཱ ཧེཊྛཱ ཝུཏྟེཧི ཏཱིཧི ལཀྑཎེཧི. ཨེཏྠ ཙ པཋམེན ལཀྑཎེན ཝིནཡསྶ སུཊྛུ ཨུགྒཧིཏབྷཱཝོ ཝུཏྟོ, དུཏིཡེན ཨུགྒཧིཏེན ཨཙལཏཱ སུཔྤཏིཊྛིཏཏཱ ཝུཏྟཱ, ཏཏིཡེན ཡཾ པཱལི༹ཡཱ ཨཊྛཀཐཱཡ ཙ ནཏྠི, ཏམྤི ཨཱཙརིཡཝཙནེན ཝིནིཙྪིནིཏུཾ སམཏྠཏཱ ཝུཏྟཱ. ཨོཏིཎྞེ ཝཏྠུསྨིནྟི ཙོདནཱསངྑཱཏེ ཝཱིཏིཀྐམསངྑཱཏེ ཝཱ ཝཏྠུསྨིཾ སངྒྷམཛ྄ཛྷེ ཨོཏིཎྞེ, ཨོསཊེཏི ཨཏྠོ. ཝུཏྟམེཝ ཝིབྷཱཝེནྟོ ‘‘ཙོདཀེན ཙ ཙུདིཏཀེན ཙ ཝུཏྟེ ཝཏྟབྦེ’’ཏི ཨཱཧ. ཀེཙི པན ‘‘ཙོདཀེན ཨོཏིཎྞེ ཝཏྠུསྨིཾ ཙུདིཏཀེན ཙ ཝུཏྟེ ཝཏྟབྦེ’’ཏི ཨེཝཾ ཡོཛེནྟི. ཨཔརེ པན ‘‘ཙོདཀེན ཙ ཙུདིཏཀེན ཙ ཝུཏྟེ ཝིནཡདྷརེན ཙ ཝཏྟབྦེ’’ཏི ཨེཝམྤི ཡོཛེནྟི. ‘‘ཙོདཀེན ཙ ཙུདིཏཀེན ཙ ཝུཏྟེ ཝཏྟབྦེ’’ཏི ཨཡམེཝ པན ཡོཛནཱ སུནྡརཏརཱཏི ཝེདིཏབྦཱ. ཝཏྠུ ཨོལོཀེཏབྦནྟི ཏསྶ ཏསྶ སིཀྑཱཔདསྶ ཝཏྠུ ཨོལོཀེཏབྦཾ. ‘‘ཏིཎེན ཝཱ པཎྞེན ཝཱ…པེ… ཡོ ཨཱགཙྪེཡྻ, ཨཱཔཏྟི ¶ དུཀྐཊསྶཱ’’ཏི (པཱརཱ. ༥༡༧) ཧི ཨིདཾ ནིསྶགྒིཡེ ཨཉྙཱཏཀཝིཉྙཏྟིསིཀྑཱཔདསྶ ཝཏྠུསྨིཾ པཉྙཏྟཾ, ཐུལླཙྩཡདུབྦྷཱསིཏཱཔཏྟཱིནཾ མཱཏིཀཱཡ ཨནཱགཏཏྟཱ ‘‘པཉྩནྣཾ ཨཱཔཏྟཱིནཾ ཨཉྙཏར’’ནྟི ཝུཏྟཾ. ཨཉྙཏརཾ ཝཱ ཨཱཔཏྟིནྟི ‘‘ཀཱལེ ཝིཀཱལསཉྙཱི ཨཱཔཏྟི དུཀྐཊསྶ, ཀཱལེ ཝེམཏིཀོ ཨཱཔཏྟི དུཀྐཊསྶཱ’’ཏི ¶ ཨེཝམཱདིནཱ (པཱཙི. ༢༥༠) ཨཱགཏཾ དུཀྐཊཾ སནྡྷཱཡ ཝུཏྟཾ. སིཀྑཱཔདནྟརེསཱུཏི ཝིནཱིཏཝཏྠུཾ ཨནྟོཀཏྭཱ ཨེཀེཀསྨིཾ སིཀྑཱཔདནྟརེ.

སུཁུམཱཏི ཨཏྟནོཔི དུཝིཉྙེཡྻསབྷཱཝསྶ ལཧུཔརིཝཏྟིནོ ཙིཏྟསྶ སཱིགྷཔརིཝཏྟིཏཱཡ ཝུཏྟཾ. ཏེནཱཧ ‘‘ཙིཏྟལཧུཀཱ’’ཏི. ཙིཏྟཾ ལཧུ སཱིགྷཔརིཝཏྟི ཨེཏེསནྟི ཙིཏྟལཧུཀཱ. ཏེཏི ཏེ ཝཱིཏིཀྐམེ. ཏཾཝཏྠུཀནྟི ཏེ ཨདིནྣཱདཱནམནུསྶཝིགྒཧཝཱིཏིཀྐམཱ ཝཏྠུ ཨདྷིཊྛཱནཾ ཀཱརཎམེཏསྶཱཏི ཏཾཝཏྠུཀཾ. སཱིལཱནི སོདྷེཏྭཱཏི ཡཾཝཏྠུཀཾ ཀུཀྐུཙྩཾ ཨུཔྤནྣཾ, ཏཾ ཨམནསིཀརིཏྭཱ ཨཝསེསསཱིལཱནི སོདྷེཏྭཱ. པཱཀཊབྷཱཝཏོ སུཁཝལ༹ཉྫནཏཱཡ ཙ ‘‘དྭཏྟིཾསཱཀཱརཾ ཏཱཝ མནསི ཀརོཧཱི’’ཏི ཝུཏྟཾ. ཨཉྙསྨིཾ པན ཀམྨཊྛཱནེ ཀཏཔརིཙཡེན ཏདེཝ མནསི ཀཱཏབྦཾ. ཀམྨཊྛཱནཾ གྷཊཡཏཱིཏི ཨནྟརནྟརཱ ཁཎྜཾ ཨདསྶེཏྭཱ ཙིཏྟེན སདྡྷིཾ ཨཱལམྦནབྷཱཝེན ཙིརཀཱལཾ གྷཊཡཏི. སངྑཱརཱ པཱཀཊཱ ཧུཏྭཱ ཨུཔཊྛཧནྟཱིཏི ཝིཔསྶནཱཀམྨཊྛཱནིཀོ ཙེ, ཏསྶ སངྑཱརཱ པཱཀཊཱ ཧུཏྭཱ ཨུཔཊྛཧནྟི. སཙེ ཀཏཔཱརཱཛིཀཝཱིཏིཀྐམོ བྷཝེཡྻ, ཏསྶ སཏིཔི ཨསརིཏུཀཱམཏཱཡ ཝིཔྤཊིསཱརཝཏྠུཝསེན པུནཔྤུནཾ ཏཾ ཨུཔཊྛཧཏཱིཏི ཙིཏྟེཀགྒཏཾ ན ཝིནྡཏི. ཏེན ཝུཏྟཾ ‘‘ཀམྨཊྛཱནཾ ན གྷཊཡཏཱི’’ཏིཨཱདི. ཨཏྟནཱ ཛཱནཱཏཱིཏི སཡམེཝ ཛཱནཱཏི. པཙྩཏྟེ ཙེཏཾ ཀརཎཝཙནཾ, ཨཏྟཱ ཛཱནཱཏཱིཏི ཝུཏྟཾ ཧོཏི. ཨཉྙཱ ཙ དེཝཏཱ ཛཱནནྟཱིཏི ཨཱརཀྑདེཝཏཱཧི ཨཉྙཱ པརཙིཏྟཝིདུནིཡོ དེཝཏཱ ཙ ཛཱནནྟི.

ནིཊྛིཏཱ ཙཏུབྦིདྷཝིནཡཀཐཱཝཎྞནཱ

ཝིནཡདྷརསྶ ཙ ལཀྑཎཱདིཀཐཱཝཎྞནཱ.

བྷིཀྑུཔདབྷཱཛནཱིཡཝཎྞནཱ

ཏསྨཱཏི ཡསྨཱ པན-སདྡཾ ཨཔནེཏྭཱ ཨནིཡམེན པུགྒལདཱིཔཀཾ ཡོ-སདྡམེཝ ཨཱཧ, ཏསྨཱ. ཨེཏྠཱཏི ཨིམསྨིཾ ཡོ-སདྡེ. པན-སདྡསྶ ནིཔཱཏམཏྟཏྟཱ ཡོ-སདྡསྶེཝ ཨཏྠཾ པཀཱསེནྟོ ‘‘ཡོ ཀོཙཱིཏི ཝུཏྟཾ ཧོཏཱི’’ཏི ཨཱཧ. ཡོ ཀོཙི ནཱམཱཏི ཡོ ཝཱ སོ ཝཱ ཡོ ཀོཙཱིཏི ཝུཏྟོ. ཝཱསདྷུརཡུཏྟོ ཝཱཏི ཝིཔསྶནཱདྷུརཡུཏྟོ ཝཱ. སཱིལེསཱུཏི པཀཏཱིསུ.

བྷིཀྑཏཱིཏི ¶ ¶ ཡཱཙཏི. ལབྷནྟོ ཝཱ ཨལབྷནྟོ ཝཱཏི ཡོ ཀོཙི བྷིཀྑཏི བྷིཀྑཾ ཨེསཏི གཝེསཏི, སོ ཏཾ ལབྷཏུ ཝཱ མཱ ཝཱ, ཏཐཱཔི བྷིཀྑཏཱིཏི བྷིཀྑཱུཏི ཨཡམེཏྠ ཨདྷིཔྤཱཡོ. ཨརིཡཱཡ ཡཱཙནཱཡཱཏི ‘‘ཨུདྡིསྶ ཨརིཡཱ ཏིཊྛནྟི, ཨེསཱ ཨརིཡཱན ཡཱཙནཱ’’ཏི ཨེཝཾ ཝུཏྟཱཡ ཨརིཡཡཱཙནཱཡ, ན ཀཔཎདྡྷིཀཝཎིབྦཀཡཱཙཀཱནཾ ཝིཡ ‘‘དེཧི དེཧཱི’’ཏི ཨེཝཾ པཝཏྟཡཱཙནཱཡ. བྷིཀྑཱཙརིཡནྟི ཨུཉྪཱཙརིཡཾ. ཨཛ྄ཛྷུཔགཏཏྟཱཏི ཨནུཊྛིཏཏྟཱ. ཀཱཛབྷཏྟནྟི ཀཱཛེཧི ཨཱནཱིཏཾ བྷཏྟཾ. ཨགྒྷཕསྶཝཎྞབྷེདེནཱཏི ཨགྒྷཱདཱིནཾ པུརིམཔཀཏིཝིཛཧེན. པུརིམཔཀཏིཝིཛཧནཉྷེཏྠ བྷེདོཏི ཨདྷིཔྤེཏཾ. དྷོཝིཏྭཱ ཨཔནེཏུཾ ཨསཀྐུཎེཡྻསབྷཱཝཾ མལཾ, ཏཐཱ ཨཔནེཏུཾ སཀྐུཎེཡྻསབྷཱཝཱ ཛལླིཀཱ. བྷིནྣཔཊདྷརོཏི ནིབྦཙནཾ བྷིནྣཔཊདྷརེ བྷིཀྑུ-སདྡསྶ ནིརུལ༹ྷཏྟཱ ཀཏཾ.

ཨུཔནིསྶཡསམྤནྣནྟི པུབྦེ ཨཊྛཔརིཀྑཱརདཱནཱུཔནིསྶཡསམྤནྣཾ. ཡོ ཧི ཙཱིཝརཱདིཀེ ཨཊྛ པརིཀྑཱརེ པཏྟཙཱིཝརམེཝ ཝཱ སོཏཱཔནྣཱདིཨརིཡསྶ པུཐུཛྫནསྶེཝ ཝཱ སཱིལསམྤནྣསྶ དཏྭཱ ‘‘ཨིདཾ པརིཀྑཱརདཱནཾ ཨནཱགཏེ ཨེཧིབྷིཀྑུབྷཱཝཱཡ པཙྩཡོ ཧོཏཱུ’’ཏི པཏྠནཾ པཊྛཔེསི, ཏསྶ ཏཾ སཏི ཨདྷིཀཱརསམྤཏྟིཡཾ བུདྡྷཱནཾ སམྨུཁཱིབྷཱཝེ ཨིདྡྷིམཡཔརིཀྑཱརལཱབྷཱཡ སཾཝཏྟཏཱིཏི ཝེདིཏབྦཾ. བྲཧྨགྷོསནྟི ཨུཏྟམགྷོསཾ, བྲཧྨུནོ གྷོསསདིསཾ ཝཱ གྷོསཾ. བྲཧྨཙརིཡནྟི སཱསནབྲཧྨཙརིཡཾ མགྒབྲཧྨཙརིཡཉྩ. དུཀྑསྶ སམྨཱ ཨནྟཀིརིཡཱཡཱཏི ཡོཛེཏབྦཾ. བྷཎྜཱུཏི མུཎྜོ. ཝཱསཱིཏི དནྟཀཊྛཙྪེདནཝཱསི. བནྡྷནནྟི ཀཱཡབནྡྷནཾ. ཡུཏྟོ བྷཱཝནཱནུཡོགོ ཨསྶཱཏི ཡུཏྟཡོགོ, ཏསྶ ཡུཏྟཡོགསྶ, བྷཱཝནཱནུཡོགམནུཡུཏྟསྶཱཏི ཝུཏྟཾ ཧོཏི. ཨིརིཡཱཔཐསམྤནྣཏཱཝིབྷཱཝནཏྠཾ ‘‘སཊྛིཝསྶིཀཏྠེརོ ཝིཡཱ’’ཏི ཝུཏྟཾ. བུདྡྷོཝ པབྦཛྫཱཙརིཡོ ཨུཔསམྤདཱཙརིཡོ ཙ ཨསྶཱཏི བུདྡྷཱཙརིཡཀོ. པཋམབོདྷིཡམྤི པཋམཀཱལེཡེཝ སེསཨུཔསམྤདཱནཾ ཨབྷཱཝོཏི ཨཱཧ ‘‘པཋམབོདྷིཡཾ ཨེཀསྨིཾ ཀཱལེ’’ཏི. པཉྩ པཉྩཝགྒིཡཏྠེརཱཏི པཉྩཝགྒིཡཏྠེརཱ པཉྩ. ཏཱིཎི སཏནྟི ཏཱིཎི སཏཱནི, གཱཐཱབནྡྷསུཁཏྠཾ ཝཙནཝིཔལླཱསོ ཀཏོ. ཨེཀོ ཙ ཐེརོཏི ཨངྒུལིམཱལཏྠེརཾ སནྡྷཱཡ ཝུཏྟཾ. ན ཝུཏྟཱཏི ཨཊྛཀཐཱཡཾ ན ཝུཏྟཱ. ཏཏྠཱཏི ཝིནཡཔཱལི༹ཡཾ.

ཝེལུ༹ཝནམཧཱཝིཧཱརེ ¶ གནྡྷཀུཊིཡཾ ནིསིནྣོཡེཝ བྷགཝཱ མཧཱཀསྶཔཏྠེརསྶ ཨཏྟཱནཾ ཨུདྡིསྶ པབྦཛིཏབྷཱཝཾ ཝིདིཏྭཱ ཏསྶ པཙྩུགྒམནཾ ཀརོནྟོ ཏིགཱཝུཏཾ མགྒཾ ཨེཀཀོཝ གནྟྭཱ བཧུཔུཏྟནིགྲོདྷམཱུལེ པལླངྐཾ ཨཱབྷུཛིཏྭཱ ནིསིནྣོ ཨཏྟནོ སནྟིཀཾ ཨཱགནྟྭཱ པརམནིཔཙྩཀཱརཾ དསྶེཏྭཱ ‘‘སཏྠཱ མེ བྷནྟེ བྷགཝཱ, སཱཝཀོཧམསྨི, སཏྠཱ མེ བྷནྟེ བྷགཝཱ, སཱཝཀོཧམསྨཱི’’ཏི ཏིཀྑཏྟུཾ ཨཏྟནོ སཱཝཀཏྟཾ སཱཝེཏྭཱ ཋིཏསྶ མཧཱཀསྶཔཏྠེརསྶ ནིཔཙྩཀཱརམཧཏྟཏཾ ¶ ཨཏྟནོ ཙ མཧཱནུབྷཱཝཏཾ དཱིཔེཏུཾ ཡསྶ ཨཉྙསྶ ཨཛཱནཾཡེཝ ‘‘ཛཱནཱམཱི’’ཏི པཊིཉྙསྶ བཱཧིརཀསྶ སཏྠུནོ ཨེཝཾ སབྦཙེཏསཱ སམནྣཱགཏོ པསནྣཙིཏྟོ སཱཝཀོ ཨེཝརཱུཔཾ པརམནིཔཙྩཀཱརཾ ཀརེཡྻ, ཏསྶ ཝཎྚཙྪིནྣཏཱལཔཀྐཾ ཝིཡ གཱིཝཏོ མུདྡྷཱཔི ཝིཔཏེཡྻ, སཏྟདྷཱ ཝཱ ཕལེཡྻཱཏི དསྶེནྟོ ‘‘ཡོ ཁོ, ཀསྶཔ, ཨེཝཾ སབྦཙེཏསཱ སམནྣཱགཏཾ སཱཝཀཾ ཨཛཱནཾཡེཝ ཝདེཡྻ ‘ཛཱནཱམཱི’ཏི, ཨཔསྶཾཡེཝ ཝདེཡྻ ‘པསྶཱམཱི’ཏི, མུདྡྷཱཔི ཏསྶ ཝིཔཏེཡྻ, སཏྟདྷཱ ཝཱ ཕལེཡྻ, ཨཧཾ ཁོ, ཀསྶཔ, ཛཱནཾཡེཝ ཝདཱམི ‘ཛཱནཱམཱི’ཏི, པསྶཾཡེཝ ཝདཱམི ‘པསྶཱམཱི’’’ (སཾ. ནི. ༢.༡༥༤) ཏི ཝཏྭཱ ཛཱཏིམདམཱནམདརཱུཔམདཔྤཧཱནཏྠཾ ཏཱིཧི ཨོཝཱདེཧི མཧཱཀསྶཔཏྠེརཾ ཨོཝདནྟོ ‘‘ཏསྨཱཏིཧ ཏེ ཀསྶཔཱ’’ཏིཨཱདིམཱཧ.

ཏཏྠ (སཾ. ནི. ཨཊྛ. ༢.༢.༡༥༤) ཏསྨཱཏིཧཱཏི ཏསྨཱ ཨིཙྩེཝ ཝུཏྟཾ ཧོཏི, ཡསྨཱ ཨཧཾ ཛཱནནྟོཝ ‘‘ཛཱནཱམཱི’’ཏི པསྶནྟོ ཨེཝ ཙ ‘‘པསྶཱམཱི’’ཏི ཝདཱམི, ཏསྨཱཏི ཨཏྠོ. ཏི-ཀཱར ཧ-ཀཱརཱ ནིཔཱཏཱ. ཨིཧཱཏི ཝཱ ཨིམསྨིཾ སཱསནེ, ཏ-ཀཱརོ པདསནྡྷིཝསེན ཨཱགཏོ. ཨེཝཾ སིཀྑིཏབྦནྟི ཨིདཱནི ཝུཙྩམཱནཱཀཱརེན སིཀྑིཏབྦཾ. ཏིབྦནྟི བཧལཾ མཧནྟཾ. ཧིརོཏྟཔྤཉྩཱཏི ཧིརཱི ཙ ཨོཏྟཔྤཉྩ. པཙྩུཔཊྛིཏཾ བྷཝིསྶཏཱིཏི ཨུཔསངྐམནཏོ པཋམཏརམེཝ ཨུཔཊྛིཏཾ བྷཝིསྶཏི. ཏཐཱ ཧི སཏི ཏེསཾ པུརཏོ ཨསྶ སགཱརཝསཔྤཏིསྶཝཏཱ སཎྛཱཏི. ཡོ ཙ ཐེརཱདཱིསུ ཧིརོཏྟཔྤཾ ཨུཔཊྛཔེཏྭཱ ཨུཔསངྐམཏི, ཐེརཱདཡོཔི ཏཾ སཧིརིཀཱ སཨོཏྟཔྤཱ ཙ ཧུཏྭཱ ཨུཔསངྐམནྟཱིཏི ཨཡམེཏྠ ཨཱནིསཾསོ. ཀུསལཱུཔསཾཧིཏནྟི ཀུསལནིསྶིཏཾ, ཨནཝཛྫདྷམྨནིསྶིཏནྟི ཨཏྠོ. ཨཊྛིཾ ཀཏྭཱཏི ཨཏྟཱནཾ ཏེན དྷམྨེན ཨཊྛིཀཾ ཀཏྭཱ, ཏཾ ཝཱ དྷམྨཾ ‘‘ཨེས མཡ྄ཧཾ དྷམྨོ’’ཏི ཨཊྛིཾ ཀཏྭཱ. མནསི ཀཏྭཱཏི ཙིཏྟེ ཋཔེཏྭཱ. སབྦཙེཏསཱ སམནྣཱཧརིཏྭཱཏི ཙིཏྟསྶ ཐོཀམྤི བཧི གནྟུཾ ཨདེནྟོ ¶ སབྦེན སམནྣཱཧཱརཙིཏྟེན སམནྣཱཧརིཏྭཱ. ཨོཧིཏསོཏོཏི ཋཔིཏསོཏོ, དྷམྨེ ནིཧིཏསོཏོཏི ཨཏྠོ. ཨེཝཉྷི ཏེ སིཀྑིཏབྦནྟི ཉཱཎསོཏཉྩ པསཱདསོཏཉྩ ཨོདཧིཏྭཱ ‘‘མཡཱ དེསིཏཾ དྷམྨཾ སཀྐཙྩམེཝ སུཎིསྶཱམཱི’’ཏི ཨེཝཉྷི ཏེ སིཀྑིཏབྦཾ. སཱཏསཧགཏཱ ཙ མེ ཀཱཡགཏཱསཏཱིཏི ཨསུབྷེསུ ཙེཝ ཨཱནཱཔཱནེ ཙ པཋམཛ྄ཛྷཱནཝསེན སུཁསམྤཡུཏྟཱ ཀཱཡགཏཱསཏི. ཡོ ཙ པནཱཡཾ ཏིཝིདྷོ ཨོཝཱདོ, ཐེརསྶ ཨཡམེཝ པབྦཛྫཱ ཙ ཨུཔསམྤདཱ ཙ ཨཧོསི.

ཀསིཎཱརམྨཎཾ རཱུཔཱཝཙརཛ྄ཛྷཱནཾ རཱུཔསཉྙཱ. སཉྙཱསཱིསེན ཧེཏྠ ཛྷཱནཾ ཝུཏྟཾ, ཏདེཝ ཙ ཨུདྡྷུམཱཏཀཔཊིབྷཱགཱརམྨཎཏྟཱ ‘‘ཨུདྡྷུམཱཏཀསཉྙཱ’’ཏི ཝུཏྟཾ. སོཔཱཀསཱམཎེརོ བྷགཝཏཱ པུཊྛོ ‘‘ཨེཏེ དྭེ རཱུཔཱཝཙརབྷཱཝེན ཨེཀཏྠཱ, བྱཉྫནམེཝ ནཱན’’ནྟི ཨཱཧ. ཨཱརདྡྷཙིཏྟོཏི ཨཱརཱདྷིཏཙིཏྟོ. གརུདྷམྨཔཊིགྒཧཎཱདིཨུཔསམྤདཱ ཨུཔརི ཝིཏྠཱརཏོ སཡམེཝ ཨཱཝི བྷཝིསྶཏི.

ཀལྱཱཎཔུཐུཛྫནཱདཡོཏི ¶ ཨེཏྠ བཧཱུནཾ ནཱནཔྤཀཱརཱནཾ སཀྐཱཡདིཊྛིཨཱདཱིནཾ ཨཝིཧཏཏྟཱ ཛནེཏི, ཏཱཧི ཝཱ ཛནིཏོཏི པུཐུཛྫནོ, ཀལྱཱཎོ ཙ སོ པུཐུཛྫནོ ཙཱཏི ཀལྱཱཎཔུཐུཛྫནོ, སོ ཨཱདི ཡེསཾ སོཏཱཔནྣཱདཱིནཾ ཏེ ཀལྱཱཎཔུཐུཛྫནཱདཡོ. ཀལྱཱཎགྒཧཎེན ཙེཏྠ ཨནྡྷཔུཐུཛྫནཾ ནིཝཏྟེཏི. དྭིདྷཱ ཧི པུཐུཛྫནཱ ཨནྡྷཔུཐུཛྫནོ ཀལྱཱཎཔུཐུཛྫནོཏི. ཝུཏྟཉྷེཏཾ –

‘‘དུཝེ པུཐུཛྫནཱ ཝུཏྟཱ, བུདྡྷེནཱདིཙྩབནྡྷུནཱ;

ཨནྡྷོ པུཐུཛྫནོ ཨེཀོ, ཀལྱཱཎེཀོ པུཐུཛྫནོ’’ཏི. (དཱི. ནི. ཨཊྛ. ༡.༧; མ. ནི. ཨཊྛ. ༡.༢; སཾ. ནི. ཨཊྛ. ༢.༢.༦༡; ཨ. ནི. ཨཊྛ. ༡.༡.༥༡);

བྷདྲཱཡ པཉྙཱཡ བྷདྲཱཡ ཝིམུཏྟིཡཱཏི ཡོཛེཏབྦཾ. སཱིལེནཱཏིཨཱདཱིསུ སཱིལནྟི ཙཏུཔཱརིསུདྡྷིསཱིལཾ. སམཱདྷཱིཏི ཝིཔསྶནཱཔཱདཀཱ ཨཊྛ སམཱཔཏྟིཡོ. པཉྙཱཏི ལོཀིཡལོཀུཏྟརཉཱཎཾ. ཝིམུཏྟཱིཏི ཨརིཡཕལཝིམུཏྟི. ཝིམུཏྟིཉཱཎདསྶནནྟི ཨེཀཱུནཝཱིསཏིཝིདྷཾ པཙྩཝེཀྑཎཉཱཎཾ. ཡཐཱསམྦྷཝེན ཙེཏྠ ཡོཛནཱ ཝེདིཏབྦཱ. ཀལྱཱཎཔུཐུཛྫནསྶ ཧི སཱིལཱདཡོ ཏཡོ ཨེཝ སམྦྷཝནྟི, ཨརིཡཱནཾ པན སབྦེཔི སཱིལཱདཡོ. སཱརོ བྷིཀྑཱུཏིཔི ཀལྱཱཎཔུཐུཛྫནཱདཡོཝ ཝུཏྟཱཏི ཨཱཧ ‘‘ཏེཧིཡེཝ སཱིལསཱརཱདཱིཧཱི’’ཏིཨཱདི. ཨཐ ཝཱ ནིཔྤརིཡཱཡཏོ ཁཱིཎཱསཝོཝ སཱརོ ¶ བྷིཀྑུ ནཱམཱཏི ཨཱཧ ‘‘ཝིགཏཀིལེསཕེགྒུབྷཱཝཏོ ཝཱ’’ཏིཨཱདི.

ཡོཔི ཀལྱཱཎཔུཐུཛྫནོ ཨནུལོམཔཊིཔདཱཡ པརིཔཱུརཀཱརཱི སཱིལསམྤནྣོ ཨིནྡྲིཡེསུ གུཏྟདྭཱརོ བྷོཛནེ མཏྟཉྙཱུ ཛཱགརིཡཱནུཡོགམནུཡུཏྟོ པུབྦརཏྟཱཔརརཏྟཾ བོདྷིཔཀྑིཡཱནཾ དྷམྨཱནཾ བྷཱཝནཱནུཡོགམནུཡུཏྟོ ཝིཧརཏི ‘‘ཨཛྫ ཝཱ སྭེ ཝཱ ཨཉྙཏརཾ སཱམཉྙཕལཾ ཨདྷིགམིསྶཱམཱི’’ཏི, སོཔི ཝུཙྩཏི སིཀྑཏཱིཏི སེཁོཏི ཨཱཧ ‘‘པུཐུཛྫནཀལྱཱཎཀེན སདྡྷི’’ནྟི. སཏྟ ཨརིཡཱཏི ཙཏྟཱརོ མགྒཊྛཱ, ཧེཊྛིམཱ ཙ ཏཡོ ཕལཊྛཱཏི ཨིམེ སཏྟ ཨརིཡཱ. ཏིསྶོ སིཀྑཱཏི ཨདྷིསཱིལཱདིཀཱ ཏིསྶོ སིཀྑཱ. སིཀྑཱསུ ཛཱཏོཏི ཝཱ སེཁོ. ཨརིཡཔུགྒལོ ཧི ཨརིཡཱཡ ཛཱཏིཡཱ ཛཱཡམཱནོ སིཀྑཱསུ ཛཱཡཏི, ན ཡོནིཡཾ. སིཀྑནསཱིལོཏི ཝཱ སེཁོ, པུགྒལཱདྷིཊྛཱནཱཡ ཝཱ ཀཐཱཡ སེཁསྶ ཨཡནྟི ཨནཉྙསཱདྷཱརཎཱ མགྒཕལཏྟཡདྷམྨཱ སེཁཔརིཡཱཡེན ཝུཏྟཱ. ཨསེཁོཏི ཙ ཡཏྠ སེཁབྷཱཝཱསངྐཱ ཨཏྠི, ཏཏྠཱཡཾ པཊིསེདྷོཏི ལོཀིཡནིབྦཱནེསུ ཨསེཁབྷཱཝཱནཱཔཏྟི དཊྛབྦཱ. སཱིལསམཱདྷིཔཉྙཱསངྑཱཏཱ ཧི སིཀྑཱ ཨཏྟནོ པཊིཔཀྑཀིལེསེཧི ཝིམུཏྟཏྟཱ པརིསུདྡྷཱ, ཨུཔཀྐིལེསཱནཾ ཨཱརམྨཎབྷཱཝམྤི ཨནུཔགམནཏོ ¶ ཨེཏཱ སིཀྑཱཏི ཝཏྟུཾ ཡུཏྟཱ, ཨཊྛསུཔི མགྒཕལེསུ ཝིཛྫནྟི, ཏསྨཱ ཙཏུམགྒཧེཊྛིམཕལཏྟཡསམངྒིནོ ཝིཡ ཨརཧཏྟཕལསམངྒཱིཔི ཏཱསུ སིཀྑཱསུ ཛཱཏོཏི ཏཾསམངྒིནོ ཨརཧཏོ ཨིཏརེསཾ ཝིཡ སེཁཏྟེ སཏི སེཁསྶ ཨཡནྟི, སིཀྑཱ སཱིལཾ ཨེཏསྶཱཏི ཙ སེཁོཏི ཝཏྟབྦོ སིཡཱཏི ཏཾ ནིཝཏྟནཏྠཾ ‘‘ཨསེཁོ’’ཏི ཡཐཱཝུཏྟསེཁབྷཱཝཔཊིསེདྷོ ཀཏོ. ཨརཧཏྟཕལེཧི པཝཏྟམཱནཱ སིཀྑཱ པརིནིཊྛིཏསིཀྑཱཀིཙྩཏྟཱ ན སིཀྑཱཀིཙྩཾ ཀརོནྟི, ཀེཝལཾ སིཀྑཱཕལབྷཱཝེནེཝ པཝཏྟནྟི, ཏསྨཱ ཏཱ ན སིཀྑཱཝཙནཾ ཨརཧནྟི, ནཱཔི ཏཾསམངྒཱི སེཁཝཙནཾ, ན ཙ སིཀྑནསཱིལོ, སིཀྑཱསུ ཛཱཏོཏི ཙ ཝཏྟབྦཏཾ ཨརཧཏི, ཧེཊྛིམཕལེསུ པན སིཀྑཱ སཀདཱགཱམིམགྒཝིཔསྶནཱདཱིནཾ ཨུཔནིསྶཡབྷཱཝཏོ སིཀྑཱཀིཙྩཾ ཀརོནྟཱིཏི སིཀྑཱཝཙནཾ ཨརཧནྟི, ཏཾསམངྒིནོ ཙ སེཁཝཙནཾ སིཀྑནསཱིལཱ, སིཀྑཱསུ ཛཱཏཱཏི ཙ ཝཏྟབྦཏཾ ཨརཧནྟི ‘‘སིཀྑནྟཱིཏི སེཁཱ’’ཏི ཨཔརིཡོསིཏསིཀྑཱནཾ དསྶིཏཏྟཱ, ‘‘ན སིཀྑཏཱིཏི ཨསེཁོ’’ཏི ཨིམིནཱ པརིཡོསིཏསིཀྑོ དསྶིཏོ, ན སིཀྑཱཡ རཧིཏོཏི ཨཱཧ – ‘‘སེཀྑདྷམྨེ ཨཏིཀྐམྨ ¶ …པེ… ཁཱིཎཱསཝོ ཨསེཁོཏི ཝུཙྩཏཱི’’ཏི. ཝུདྡྷིཔྤཏྟསིཀྑོ ཝཱ ཨསེཁོཏི ཨེཏསྨིཾ ཨཏྠེ སེཁདྷམྨེསུ ཨེཝ ཋིཏསྶ ཀསྶཙི ཨརིཡསྶ ཨསེཁབྷཱཝཱཔཏྟཱིཏི ཨརཧཏྟམགྒདྷམྨཱ ཝུདྡྷིཔྤཏྟཱ ཙ ཡཐཱཝུཏྟེཧི ཨཏྠེཧི སེཁཱཏི ཀཏྭཱ ཏཾསམངྒིནོ ཨགྒམགྒཊྛསྶ ཨསེཁབྷཱཝོ ཨཱཔནྣོཏི? ན, ཏཾསདིསེསུ ཏབྦོཧཱརཏོ. ཨརཧཏྟམགྒཏོ ཧི ནིནྣཱནཱཀརཎཾ ཨརཧཏྟཕལཾ ཋཔེཏྭཱ པརིཉྙཱཀིཙྩཀརཎཾ ཝིཔཱཀབྷཱཝཉྩ, ཏསྨཱ ཏེ ཨེཝ སེཁཱ ཨགྒཕལདྷམྨབྷཱཝཾ ཨཱཔནྣཱཏི སཀྐཱ ཝཏྟུཾ. ཀུསལསུཁཏོ ཙ ཝིཔཱཀསུཁཾ སནྟཏརཏཱཡ པཎཱིཏཏརནྟི ཝུདྡྷིཔྤཏྟཱ ཙ ཏེ དྷམྨཱ ཧོནྟཱིཏི ཏཾསམངྒཱི ཨསེཁོཏི ཝུཙྩཏཱིཏི.

སབྦནྟིམེན པརིཡཱཡེནཱཏི སབྦནྟིམེན པརིཙྪེདེན. ཨུཔསམྤདཱཀམྨསྶ ཨདྷིཀཱརཏྟཱ ‘‘པཉྩཝགྒཀརཎཱིཡེ’’ཏི ཝུཏྟཾ. པཉྩནྣཾ ཝགྒོ སམཱུཧོཏི པཉྩཝགྒོ, པཉྩཔརིམཱཎཡུཏྟོ ཝཱ ཝགྒོ པཉྩཝགྒོ, ཏེན ཀཏྟབྦཾ ཀམྨཾ པཉྩཝགྒཀརཎཱིཡཾ. ཡཱཝཏིཀཱ བྷིཀྑཱུཏི ཡཏྟཀཱ བྷིཀྑཱུ. ཀམྨཔྤཏྟཱཏི ཀམྨཱརཧཱ པཱརཱཛིཀཾ ཨནཱཔནྣཱ ཨནུཀྑིཏྟཱ ཙ. ཨུཔསམྤདཱཀམྨསྶ པཉྩཝགྒཀརཎཱིཡཏྟཱ པཉྩེཝ བྷིཀྑཱུ ཀམྨཔྤཏྟཱ ཨེཏྟཀེཧིཔི ཀམྨསིདྡྷིཏོ, ཨིཏརེ ཚནྡཱརཧཱ. ཉཏྟིཙཏུཏྠེནཱཏི ཨེཏྠ ཀིཉྩཱཔི ཉཏྟི སབྦཔཋམཾ ཝུཙྩཏི, ཏིསྶནྣཾ པན ཨནུསྶཱཝནཱནཾ ཨཏྠབྱཉྫནབྷེདཱབྷཱཝཏོ ཨཏྠབྱཉྫནབྷིནྣཱ ཉཏྟི ཏཱསཾ ཙཏུཏྠཱཏི ཀཏྭཱ ‘‘ཉཏྟིཙཏུཏྠ’’ནྟི ཝུཙྩཏི. བྱཉྫནཱནུརཱུཔམེཝ ཨཊྛཀཐཱཡཾ ‘‘ཏཱིཧི ཨནུསྶཱཝནཱཧི ཨེཀཱཡ ཙ ཉཏྟིཡཱ’’ཏི ཝུཏྟཾ, ཨཏྠཔྤཝཏྟིཀྐམེན པན ‘‘ཨེཀཱཡ ཉཏྟིཡཱ ཏཱིཧི ཨནུསྶཱཝནཱཧཱི’’ཏི ཝཏྟབྦཾ. ཝཏྠུཉཏྟིཨནཨུསྶཱཝནསཱིམཱཔརིསསམྤཏྟིསམྤནྣཏྟཱཏི ཨེཏྠ ཝཏྠཱུཏི ཨུཔསམྤདཱཔེཀྑོ པུགྒལོ, སོ ཋཔེཏྭཱ ཨཱུནཝཱིསཏིཝསྶཾ ¶ ཨནྟིམཝཏྠུཾ ཨཛ྄ཛྷཱཔནྣཔུབྦཾ པཎྜཀཱདཡོ ཙ ཨེཀཱདས ཨབྷབྦཔུགྒལེ ཝེདིཏབྦོ. ཨཱུནཝཱིསཏིཝསྶཱདཡོ ཧི ཏེརས པུགྒལཱ ཨུཔསམྤདཱཡ ཨཝཏྠུ, ཨིམེ པན ཋཔེཏྭཱ ཨཉྙསྨིཾ ཨུཔསམྤདཱཔེཀྑེ སཏི ཨུཔསམྤདཱཀམྨཾ ཝཏྠུསམྤཏྟིསམྤནྣཾ ནཱམ ཧོཏི.

ཝཏྠུསངྒྷཔུགྒལཉཏྟཱིནཾ ཨཔརཱམསནཱནི པཙྪཱ ཉཏྟིཊྛཔནཉྩཱཏི ཨིམེ ཏཱཝ པཉྩ ཉཏྟིདོསཱ. ཏཏྠ ‘‘ཨཡཾ ཨིཏྠནྣཱམོ’’ཏི ཨུཔསམྤདཱཔེཀྑསྶ ཨཀིཏྟནཾ ཝཏྠུཨཔརཱམསནཾ ནཱམ. ‘‘སུཎཱཏུ མེ, བྷནྟེ, སངྒྷོ’’ཏི ཨེཏྠ ‘‘སུཎཱཏུ མེ, བྷནྟེ’’ཏི ཝཏྭཱ ‘‘སངྒྷོ’’ཏི ཨབྷཎནཾ སངྒྷཨཔརཱམསནཾ ནཱམ. ‘‘ཨིཏྠནྣཱམསྶ ཨུཔསམྤདཱཔེཀྑོ’’ཏི ཨུཔཛ྄ཛྷཱཡསྶ ཨཀིཏྟནཾ པུགྒལཨཔརཱམསནཾ ¶ ནཱམ. སབྦེན སབྦཾ ཉཏྟིཡཱ ཨནུཙྩཱརཎཾ ཉཏྟིཨཔརཱམསནཾ ནཱམ. པཋམཾ ཀམྨཝཱཙཾ ནིཊྛཱཔེཏྭཱ ‘‘ཨེསཱ ཉཏྟཱི’’ཏི ཝཏྭཱ ‘‘ཁམཏི སངྒྷསྶཱ’’ཏི ཨེཝཾ ཉཏྟིཀིཏྟནཾ པཙྪཱ ཉཏྟིཊྛཔནཾ ནཱམ. ཨིཏི ཨིམེཧི དོསེཧི ཝིམུཏྟཱཡ ཉཏྟིཡཱ སམྤནྣཾ ཉཏྟིསམྤཏྟིསམྤནྣཾ ནཱམ.

ཝཏྠུསངྒྷཔུགྒལཱནཾ ཨཔརཱམསནཱནི སཱཝནཱཡ ཧཱཔནཾ ཨཀཱལེ སཱཝནནྟི ཨིམེ པཉྩ ཨནུསྶཱཝནདོསཱ. ཏཏྠ ཝཏྠཱདཱིནཾ ཨཔརཱམསནཱནི ཉཏྟིཡཾ ཝུཏྟསདིསཱནེཝ. ཏཱིསུ པན ཨནུསྶཱཝནཱསུ ཡཏྠ ཀཏྠཙི ཨེཏེསཾ ཨཔརཱམསནཾ ཨཔརཱམསནམེཝ, སབྦེན སབྦཾ པན ཀམྨཝཱཙཾ ཨཝཏྭཱ ཙཏུཀྑཏྟུཾ ཉཏྟིཀིཏྟནམེཝ. ཨཐ ཝཱ པན ཀམྨཝཱཙབྦྷནྟརེ ཨཀྑརསྶ ཝཱ པདསྶ ཝཱ ཨནུཙྩཱརཎཾ ཝཱ དུརུཙྩཱརཎཾ ཝཱ སཱཝནཱཡ ཧཱཔནཾ ནཱམ. སཱཝནཱཡ ཨནོཀཱསེ པཋམཾ ཉཏྟིཾ ཨཊྛཔེཏྭཱ ཨནུསྶཱཝནཀརཎཾ ཨཀཱལེ སཱཝནཾ ནཱམ. ཨིཏི ཨིམེཧི དོསེཧི ཝིམུཏྟཱཡ ཨནུསྶཱཝནཱཡ སམྤནྣཾ ཨནུསྶཱཝནསམྤཏྟིསམྤནྣཾ ནཱམ.

ཝིཔཏྟིསཱིམཱལཀྑཎཾ སམཏིཀྐནྟཱཡ པན སཱིམཱཡ ཀཏཾ སཱིམཱསམྤཏྟིསམྤནྣཾ ནཱམ. ཡཱཝཏིཀཱ བྷིཀྑཱུ ཀམྨཔྤཏྟཱ, ཏེསཾ ཨནཱགམནཾ, ཚནྡཱརཧཱནཾ ཚནྡསྶ ཨནཱཧརཎཾ, སམྨུཁཱིབྷཱུཏཱནཾ པཊིཀྐོསནནྟི ཨིམེ པན ཏཡོ པརིསདོསཱ, ཏེཧི ཝིམུཏྟཱཡ པརིསཱཡ ཀཏཾ པརིསསམྤཏྟིསམྤནྣཾ ནཱམ.

ཨུཔསམྤདཱཀམྨཝཱཙཱསངྑཱཏཾ བྷགཝཏོ ཝཙནཾ ཨུཔསམྤདཱཀམྨཀརཎསྶ ཀཱརཎཏྟཱ ཋཱནཾ, ཡཐཱ ཙ ཏཾ ཀཏྟབྦནྟི བྷགཝཏཱ ཨནུསིཊྛཾ, ཏཐཱ ཀཏཏྟཱ ཏདནུཙྪཝིཀཾ ཡཐཱཝུཏྟཾ ཨནཱུནཾ ཉཏྟིཨནུསྶཱཝནཾ ཨུཔྤཊིཔཱཊིཡཱ ཙ ཨཝུཏྟཾ ཋཱནཱརཧཾ. ཡཐཱ ཀཏྟབྦནྟི ཧི བྷགཝཏཱ ཝུཏྟཾ, ཏཐཱ ཨཀཏེ ཨུཔསམྤདཱཀམྨསྶ ཀཱརཎཾ ན ཧོཏཱིཏི ན ཏཾ ཋཱནཱརཧཾ. ཏེནཱཧ ‘‘ཀཱརཎཱརཧེན སཏྠུསཱསནཱརཧེནཱ’’ཏི. ཨིམིནཱ ཉཏྟིཨནུསྶཱཝནསམྤཏྟི ཀཐིཏཱཏི ཝེདིཏབྦཱ. ‘‘སམགྒེན སངྒྷེནཱ’’ཏི ¶ ཨིམིནཱ པན པརིསསམྤཏྟི ཀཐིཏཱཝ. ‘‘ཨཀུཔྤེནཱ’’ཏི ཨིམིནཱ པཱརིསེསཏོ ཝཏྠུསཱིམཱསམྤཏྟིཡོ ཀཐིཏཱཏི ཝེདིཏབྦཱ. ཨཊྛཀཐཱཡཾ པན ཨཀུཔྤལཀྑཎཾ ཨེཀཏྠ སམྤིཎྜེཏྭཱ དསྶེཏུཾ ཨཀུཔྤེནཱཏི ཨིམསྶ ‘‘ཝཏྠུཉཏྟིཨནུསྶཱཝནསཱིམཱཔརིསསམྤཏྟིསམྤནྣཏྟཱ ཨཀོཔེཏབྦཏཾ ཨཔྤཊིཀྐོསིཏབྦཏཾ ཨུཔགཏེནཱ’’ཏི ཨཏྠོ ཝུཏྟོ. ཀེཙི པན ‘‘ཋཱནཱརཧེནཱཏིཨེཏྠ ‘ན ཧཏྠཙྪིནྣོ པབྦཱཛེཏབྦོ’ཏིཨཱདི (མཧཱཝ. ༡༡༩) སཏྠུསཱསནཾ ཋཱན’’ནྟི ཝདནྟི.

‘‘ཉཏྟིཙཏུཏྠེན ¶ ཀམྨེནཱ’’ཏི ཨིམསྨིཾ ཨདྷིཀཱརེ པསངྒཏོ ཨཱཧརིཏྭཱ ཡཾ ཀམྨལཀྑཎཾ སབྦཨཊྛཀཐཱསུ པཔཉྩིཏཾ, ཏཾ ཡཐཱཨཱགཏཊྛཱནེཡེཝ དསྶེཏུཀཱམོ ཨིདྷ ཏསྶ ཨཝཙནེ ཏཏྠ ཝཙནེ ཙ པཡོཛནཾ དསྶེཏུཾ ‘‘ཨིམསྨིཾ པན ཋཱནེ ཋཏྭཱ’’ཏིཨཱདིམཱཧ.

ཨཊྛསུ ཨུཔསམྤདཱསུ ཨེཧིབྷིཀྑཱུཔསམྤདཱ སརཎགམནཱུཔསམྤདཱ ཨོཝཱདཔཊིགྒཧཎཱུཔསམྤདཱ པཉྷབྱཱཀརཎཱུཔསམྤདཱཏི ཨིམཱཧི ཨུཔསམྤདཱཧི ཨུཔསམྤནྣཱནཾ ལོཀཝཛྫསིཀྑཱཔདཝཱིཏིཀྐམེ ཨབྷབྦཏྟཱ གརུདྷམྨཔཊིགྒཧཎཱུཔསམྤདཱ དཱུཏེནཱུཔསམྤདཱ ཨཊྛཝཱཙིཀཱུཔསམྤདཱཏི ཨིམཱསཉྩ ཏིསྶནྣཾ ཨུཔསམྤདཱནཾ བྷིཀྑུནཱིནཾཡེཝ ཨནུཉྙཱཏཏྟཱ ཉཏྟིཙཏུཏྠེནེཝ ཀམྨེན ཨུཔསམྤནྣོ གཧིཏོཏི ཝེདིཏབྦོ. ཏཐཱ ཧི ཨེཧིབྷིཀྑཱུཔསམྤདཱ ཨནྟིམབྷཝིཀཱནཾཡེཝ, སརཎགམནཱུཔསམྤདཱ པརིསུདྡྷཱནཾ, ཨོཝཱདཔཊིགྒཧཎཔཉྷབྱཱཀརཎཱུཔསམྤདཱ མཧཱཀསྶཔསོཔཱཀཱནཾ, ན ཙ ཏེ བྷབྦཱ པཱརཱཛིཀཱདིལོཀཝཛྫཾ ཨཱཔཛྫིཏུཾ, གརུདྷམྨཔཊིགྒཧཎཱདཡོ ཙ བྷིཀྑུནཱིནཾཡེཝ ཨནུཉྙཱཏཱ, ཨཡཉྩ བྷིཀྑུ, ཏསྨཱ ཨེཏྠ ཉཏྟིཙཏུཏྠེན ཨུཔསམྤནྣོཝ གཧིཏོཏི ཝེདིཏབྦོ.

པཎྞཏྟིཝཛྫེསུ པན སིཀྑཱཔདེསུ ཨཉྙེཔི ཨེཧིབྷིཀྑཱུཔསམྤདཱཡ ཨུཔསམྤནྣཱདཡོ སངྒཧཾ གཙྪནྟི. ཏེཔི ཧི སཧསེཡྻཱདིཔཎྞཏྟིཝཛྫཾ ཨཱཔཏྟིཾ ཨཱཔཛྫནྟིཡེཝ. ཡདི ཨེཝཾ པཎྞཏྟིཝཛྫེསུཔི སིཀྑཱཔདེསུ ‘‘ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུ’’ཏི ཉཏྟིཙཏུཏྠེནེཝ ཀམྨེན ཨུཔསམྤནྣོ ཀསྨཱ ཝུཏྟོཏི? སབྦསིཀྑཱཔདཝཱིཏིཀྐམཱརཧཏྟཱ སབྦཀཱལིཀཏྟཱ ཙ. ཨེཧིབྷིཀྑཱུཔསམྤདཱདཡོ ཧི ན སབྦསིཀྑཱཔདཝཱིཏིཀྐམཱརཧཱ ཨསབྦཀཱལིཀཱ ཙ. ཏཐཱ ཧི ཨཊྛསུ ཨུཔསམྤདཱསུ ཉཏྟིཙཏུཏྠཀམྨཱུཔསམྤདཱ དཱུཏེནཱུཔསམྤདཱ ཨཊྛཝཱཙིཀཱུཔསམྤདཱཏི ཨིམཱ ཏིསྶོཡེཝ ཐཱཝརཱ, སེསཱ བུདྡྷེ དྷརམཱནེཡེཝ ཨཧེསུཾ. ཏེནེཝ ཙ བྷིཀྑུནཱིཝིབྷངྒེཔི (པཱཙི. ༦༥༨) ‘‘ཏཏྲ ཡཱཡཾ བྷིཀྑུནཱི སམགྒེན ཨུབྷཏོསངྒྷེན ཉཏྟིཙཏུཏྠེན ཀམྨེན ཨཀུཔྤེན ཋཱནཱརཧེན ཨུཔསམྤནྣཱ, ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱི’’ཏི དཱུཏེནཱུཔསམྤདཱཡ ཨཊྛཝཱཙིཀཱུཔསམྤདཱཡ ཙ ཨུཔསམྤནྣཾ ཨནྟོཀཏྭཱ ཨུབྷཏོསངྒྷེན ཉཏྟིཙཏུཏྠེནེཝ ཀམྨེན ཨུཔསམྤནྣཱ བྷིཀྑུནཱི ཝུཏྟཱ, ན གརུདྷམྨཔཊིགྒཧཎཱུཔསམྤདཱཡ ཨུཔསམྤནྣཱ ཏསྶཱ ཨུཔསམྤདཱཡ པཱཊིཔུགྒལིཀབྷཱཝཏོ ¶ ཨསབྦཀཱལིཀཏྟཱ. གརུདྷམྨཔཊིགྒཧཎཱུཔསམྤདཱ ཧི མཧཱཔཛཱཔཏིཡཱ ཨེཝ ཨནུཉྙཱཏཏྟཱ པཱཊིཔུགྒལིཀཱཏི, ཏསྨཱ སབྦསིཀྑཱཔདཝཱིཏིཀྐམཱརཧཾ ¶ སབྦཀཱལིཀཱཡ ཉཏྟིཙཏུཏྠཀམྨཱུཔསམྤདཱཡ ཨུཔསམྤནྣམེཝ གཧེཏྭཱ སབྦསིཀྑཱཔདཱནི པཉྙཏྟཱནཱིཏི གཧེཏབྦཾ. ཡདི ཨེཝཾ པཎྞཏྟིཝཛྫེསུ སིཀྑཱཔདེསུ ཙ ཨེཧིབྷིཀྑཱུཔསམྤནྣཱདཱིནམྤི སངྒཧོ ཀཐཾ ཝིཉྙཱཡཏཱིཏི? ཨཏྠཏོ ཨཱཔནྣཏྟཱ. ཏཐཱ ཧི ‘‘དྭེ པུགྒལཱ ཨབྷབྦཱ ཨཱཔཏྟིཾ ཨཱཔཛྫིཏུཾ བུདྡྷཱ ཙ པཙྩེཀབུདྡྷཱ ཙ, དྭེ པུགྒལཱ བྷབྦཱ ཨཱཔཏྟིཾ ཨཱཔཛྫིཏུཾ བྷིཀྑཱུ ཙ བྷིཀྑུནིཡོ ཙཱ’’ཏི (པརི. ༣༢༢) སཱམཉྙཏོ ཝུཏྟཏྟཱ ཨེཧིབྷིཀྑཱུཔསམྤནྣཱདཡོཔི ཨསཉྩིཙྩ ཨསྶཏིཡཱ ཨཙིཏྟཀཾ པཎྞཏྟིཝཛྫཾ སཧསེཡྻཱདིཨཱཔཏྟིཾ ཨཱཔཛྫནྟཱིཏི ཨཏྠཏོ ཨཱཔནྣནྟི ཨཡམེཏྠ སཱརོ. ཡཾ པནེཏྠ ཨིཏོ ཨཉྙཐཱ ཀེནཙི པཔཉྩིཏཾ, ན ཏཾ སཱརཏོ པཙྩེཏབྦཾ.

ནིརུཏྟིཝསེནཱཏི ནིབྦཙནཝསེན. ཨབྷིལཱཔཝསེནཱཏི ཝོཧཱརཝསེན. ཨནུཔྤནྣཱཡ ཀམྨཝཱཙཱཡཱཏི ཨནུཔྤནྣཱཡ ཉཏྟིཙཏུཏྠཀམྨཝཱཙཱཡ. གུཎཝསེནཱཏི སཱིལཱདིཏཾཏཾགུཎཡོགཏོ. ཨེཏྠ ཙ བྷིནྡཏི པཱཔཀེ ཨཀུསལེ དྷམྨེཏི བྷིཀྑཱུཏི ནིབྦཙནཾ ཝེདིཏབྦཾ.

བྷིཀྑུཔདབྷཱཛནཱིཡཝཎྞནཱ ནིཊྛིཏཱ.

སིཀྑཱསཱཛཱིཝཔདབྷཱཛནཱིཡཝཎྞནཱ

སིཀྑིཏབྦཱཏི ཨཱསེཝིཏབྦཱ. ཨུཏྟམནྟི ཝིསིཊྛཾ. ཨདྷིསཱིལཱདཱིསུ ཝིཛྫམཱནེསུ སཱིལཱདཱིཧིཔི བྷཝིཏབྦཾ. ཡཐཱ ཧི ཨོམཀཏརཔྤམཱཎཾ ཚཏྟཾ ཝཱ དྷཛཾ ཝཱ ཨུཔཱདཱཡ ཨཏིརེཀཔྤམཱཎཾ ‘‘ཨཏིཚཏྟཾ ཨཏིདྷཛོ’’ཏི ཝུཙྩཏི, ཨེཝམིཧཱཔི ‘‘ཨནུཀྐཊྛསཱིལཾ ཨུཔཱདཱཡ ཨདྷིསཱིལེན བྷཝིཏབྦཾ, ཏཐཱ ཨནུཀྐཊྛཾ ཙིཏྟཾ པཉྙཉྩ ཨུཔཱདཱཡ ཨདྷིཙིཏྟེན ཨདྷིཔཉྙཱཡ ཙ བྷཝིཏབྦ’’ནྟི མནསི ཀཏྭཱ སཱིལཱདིཾ སརཱུཔཏོ ཝིབྷཱཝེཏུཀཱམོ ‘‘ཀཏམཾ པནེཏྠ སཱིལ’’ནྟིཨཱདིམཱཧ. ཨཊྛངྒསཱིལཾ དསངྒསཱིལེསྭེཝ ཨནྟོགདྷཏྟཱ ཝིསུཾ ཨགྒཧེཏྭཱ ‘‘པཉྩངྒདསངྒསཱིལ’’ནྟི ཨེཏྟཀམེཝ ཝུཏྟཾ. པཱཏིམོཀྑསཾཝརསཱིལནྟི ཙཱརིཏྟཝཱརིཏྟཝསེན དུཝིདྷཾ ཝིནཡཔིཊཀཔརིཡཱཔནྣཾ སིཀྑཱཔདསཱིལཾ. ཏཉྷི ཡོ ནཾ པཱཏི རཀྑཏི, ཏཾ མོཀྑེཏི མོཙེཏི ཨཱཔཱཡིཀཱདཱིཧི དུཀྑེཧཱིཏི པཱཏིམོཀྑནྟི ཝུཙྩཏི. སཾཝརཎཾ སཾཝརོ ¶ , ཀཱཡཝཱཙཱཧི ཨཝཱིཏིཀྐམོ. པཱཏིམོཀྑམེཝ སཾཝརོ པཱཏིམོཀྑསཾཝརོ. སོ ཨེཝ སཱིལནཊྛེན སཱིལནྟི པཱཏིམོཀྑསཾཝརསཱིལཾ.

ཨཔརོ ¶ ནཡོ (ཨུདཱ. ཨཊྛ. ༣༡; ཨིཏིཝུ. ཨཊྛ. ༩༧) – ཀིལེསཱནཾ བལཝབྷཱཝཏོ པཱཔཀིརིཡཱཡ སུཀརབྷཱཝཏོ པུཉྙཀིརིཡཱཡ ཙ དུཀྐརབྷཱཝཏོ བཧུཀྑཏྟུཾ ཨཔཱཡེསུ པཏནསཱིལོཏི པཱཏཱི, པུཐུཛྫནོ. ཨནིཙྩཏཱཡ ཝཱ བྷཝཱབྷཝཱདཱིསུ ཀམྨཝེགཀྑིཏྟོ གྷཊིཡནྟཾ ཝིཡ ཨནཝཊྛཱནེན པརིབྦྷམནཏོ གམནསཱིལོཏི པཱཏཱི, མརཎཝསེན ཝཱ ཏམྷི ཏམྷི སཏྟནིཀཱཡེ ཨཏྟབྷཱཝསྶ པཏནསཱིལོཏི པཱཏཱི, སཏྟསནྟཱནོ, ཙིཏྟམེཝ ཝཱ. ཏཾ པཱཏིནཾ སཾསཱརདུཀྑཏོ མོཀྑེཏཱིཏི པཱཏིམོཀྑཾ. ཙིཏྟསྶ ཧི ཝིམོཀྑེན སཏྟོ ཝིམུཏྟོཏི ཝུཙྩཏི. ཝུཏྟཉྷི ‘‘ཙིཏྟཝོདཱནཱ ཝིསུཛ྄ཛྷནྟཱི’’ཏི (སཾ. ནི. ༣.༡༠༠), ‘‘ཨནུཔཱདཱཡ ཨཱསཝེཧི ཙིཏྟཾ ཝིམུཏྟ’’ནྟི (མཧཱཝ. ༢༨) ཙ.

ཨཐ ཝཱ ཨཝིཛྫཱདིནཱ ཧེཏུནཱ སཾསཱརེ པཏཏི གཙྪཏི པཝཏྟཏཱིཏི པཱཏི. ‘‘ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱནཾ སནྡྷཱཝཏཾ སཾསརཏ’’ནྟི (སཾ. ནི. ༢.༡༢༤) ཧི ཝུཏྟཾ. ཏསྶ པཱཏིནོ སཏྟསྶ ཏཎྷཱདིསཾཀིལེསཏྟཡཏོ མོཀྑོ ཨེཏེནཱཏི པཱཏིམོཀྑོ. ‘‘ཀཎྛེཀཱལོ༹’’ཏིཨཱདཱིནཾ ཝིཡསྶ སམཱསསིདྡྷི ཝེདིཏབྦཱ.

ཨཐ ཝཱ པཱཏེཏི ཝིནིཔཱཏེཏི དུཀྑེཧཱིཏི པཱཏི, ཙིཏྟཾ. ཝུཏྟཉྷི ‘‘ཙིཏྟེན ནཱིཡཏི ལོཀོ, ཙིཏྟེན པརིཀསྶཏཱི’’ཏི (སཾ. ནི. ༡.༦༢). ཏསྶ པཱཏིནོ མོཀྑོ ཨེཏེནཱཏི པཱཏིམོཀྑོ. པཏཏི ཝཱ ཨེཏེན ཨཔཱཡདུཀྑེ སཾསཱརདུཀྑེ ཙཱཏི པཱཏི, ཏཎྷཱསཾཀིལེསོ. ཝུཏྟཉྷི ‘‘ཏཎྷཱ ཛནེཏི པུརིསཾ (སཾ. ནི. ༡.༥༥-༥༧), ཏཎྷཱདུཏིཡོ པུརིསོ’’ཏི (ཨ. ནི. ༤.༩; ཨིཏིཝུ. ༡༥, ༡༠༥) ཙ ཨཱདི. ཏཏོ པཱཏིཏོ མོཀྑོཏི པཱཏིམོཀྑོ.

ཨཐ ཝཱ པཏཏི ཨེཏྠཱཏི པཱཏི, ཚ ཨཛ྄ཛྷཏྟིཀབཱཧིརཱནི ཨཱཡཏནཱནི. ཝུཏྟཉྷི ‘‘ཚསུ ལོཀོ སམུཔྤནྣོ, ཚསུ ཀུབྦཏི སནྠཝ’’ནྟི (སཾ. ནི. ༡.༧༠; སུ. ནི. ༡༧༡). ཏཏོ ཚཨཛ྄ཛྷཏྟིཀབཱཧིརཱཡཏནསངྑཱཏཏོ པཱཏིཏོ མོཀྑོཏི པཱཏིམོཀྑོ.

ཨཐ ¶ ཝཱ པཱཏོ ཝིནིཔཱཏོ ཨསྶ ཨཏྠཱིཏི པཱཏཱི, སཾསཱརོ. ཏཏོ མོཀྑོཏི པཱཏིམོཀྑོ.

ཨཐ ཝཱ སབྦལོཀཱདྷིཔཏིབྷཱཝཏོ དྷམྨིསྶརོ བྷགཝཱ པཏཱིཏི ཝུཙྩཏི, མུཙྩཏི ཨེཏེནཱཏི མོཀྑོ, པཏིནོ མོཀྑོ ཏེན པཉྙཏྟཏྟཱཏི པཏིམོཀྑོ, པཏིམོཀྑོ ཨེཝ པཱཏིམོཀྑོ. སབྦགུཎཱནཾ ཝཱ མཱུལབྷཱཝཏོ ཨུཏྟམཊྛེན པཏི ཙ སོ ཡཐཱཝུཏྟེན ཨཏྠེན མོཀྑོ ཙཱཏི ¶ པཏིམོཀྑོ, པཏིམོཀྑོ ཨེཝ པཱཏིམོཀྑོ. ཏཐཱ ཧི ཝུཏྟཾ ‘‘པཱཏིམོཀྑནྟི མུཁམེཏཾ པམུཁམེཏ’’ནྟི (མཧཱཝ. ༡༣༥) ཝིཏྠཱརོ.

ཨཐ ཝཱ པ-ཨིཏི པཀཱརེ, ཨཏཱིཏི ཨཙྩནྟཏྠེ ནིཔཱཏོ, ཏསྨཱ པཀཱརེཧི ཨཙྩནྟཾ མོཀྑེཏཱིཏི པཱཏིམོཀྑོ. ཨིདཉྷི སཱིལཾ སཡཾ ཏདངྒཝསེན སམཱདྷིསཧིཏཾ པཉྙཱསཧིཏཉྩ ཝིཀྑམྦྷནཝསེན སམུཙྪེདཝསེན ཙ ཨཙྩནྟཾ མོཀྑེཏི མོཙེཏཱིཏི པཱཏིམོཀྑོ.

པཏི པཏི མོཀྑོཏི ཝཱ པཏིམོཀྑོ, ཏམྷཱ ཏམྷཱ ཝཱིཏིཀྐམདོསཏོ པཙྩེཀཾ མོཀྑེཏཱིཏི ཨཏྠོ, པཏིམོཀྑོ ཨེཝ པཱཏིམོཀྑོ. མོཀྑོ ཝཱ ནིབྦཱནཾ, ཏསྶ མོཀྑསྶ པཊིབིམྦབྷཱུཏོཏི པཏིམོཀྑོ. སཱིལསཾཝརོ ཧི སཱུརིཡསྶ ཨརུཎུགྒམནཾ ཝིཡ ནིབྦཱནསྶ ཨུདཡབྷཱུཏོ ཏཔྤཊིབྷཱགོ ཙ ཡཐཱརཧཾ ཀིལེསནིབྦཱཔནཏོ, པཏིམོཀྑོཡེཝ པཱཏིམོཀྑོ. པཏིཝཏྟཏི མོཀྑཱབྷིམུཁནྟི ཝཱ པཏིམོཀྑཾ, པཏིམོཀྑམེཝ པཱཏིམོཀྑནྟི ཨེཝཾ ཏཱཝེཏྠ པཱཏིམོཀྑསདྡསྶ ཨཏྠོ ཝེདིཏབྦོ.

སཾཝརཏི པིདཧཏི ཨེཏེནཱཏི སཾཝརོ, པཱཏིམོཀྑམེཝ སཾཝརོ པཱཏིམོཀྑསཾཝརོ. སོ ཨེཝ སཱིལཾ པཱཏིམོཀྑསཾཝརསཱིལཾ, ཨཏྠཏོ པན ཏཏོ ཏཏོ ཝཱིཏིཀྐམིཏབྦཏོ ཝིརཏིཡོ ཙེཝ ཙེཏནཱ ཙ.

ཨདྷིསཱིལནྟི ཝུཙྩཏཱིཏི ཨནཝསེསཏོ ཀཱཡིཀཝཱཙསིཀསཾཝརབྷཱཝཏོ ཙ མགྒསཱིལསྶ པདཊྛཱནབྷཱཝཏོ ཙ པཱཏིམོཀྑསཾཝརསཱིལཾ ཨདྷིཀཾ ཝིསིཊྛཾ སཱིལཾ ཨདྷིསཱིལནྟི ཝུཙྩཏི. པཛྫོཏཱནནྟི ཨཱལོཀཱནཾ. ནནུ ཙ པཙྩེཀབུདྡྷཱཔི དྷམྨཏཱཝསེན པཱཏིམོཀྑསཾཝརསཱིལེན སམནྣཱགཏཱཝ ཧོནྟི, ཨེཝཾ སཏི ཀསྨཱ ‘‘བུདྡྷུཔྤཱདེཡེཝ པཝཏྟཏི, ན ཝིནཱ བུདྡྷུཔྤཱདཱ’’ཏི ¶ ནིཡམེཏྭཱ ཝུཏྟནྟི ཨཱཧ – ‘‘ན ཧི ཏཾ པཉྙཏྟིཾ ཨུདྡྷརིཏྭཱ’’ཏིཨཱདི. ཀིཉྩཱཔི པཙྩེཀབུདྡྷཱ པཱཏིམོཀྑསཾཝརསམྤནྣཱགཏཱ ཧོནྟི, ན པན ཏེསཾ ཝསེན ཝིཏྠཱརིཏཾ ཧུཏྭཱ པཝཏྟཏཱིཏི ཨདྷིཔྤཱཡོ. ‘‘ཨིམསྨིཾ ཝཏྠུསྨིཾ ཨིམསྨིཾ ཝཱིཏིཀྐམེ ཨིདཾ ནཱམ ཧོཏཱི’’ཏི པཉྙཔནཾ ཨཉྙེསཾ ཨཝིསཡོ, བུདྡྷཱནཾཡེཝ ཨེས ཝིསཡོ, བུདྡྷཱནཾ བལནྟི ཨཱཧ – ‘‘བུདྡྷཱཡེཝ པནཱ’’ཏིཨཱདི. ལོཀིཡསཱིལསྶ ཨདྷིསཱིལབྷཱཝོ པརིཡཱཡེནཱཏི ནིཔྤརིཡཱཡམེཝ ཏཾ དསྶེཏུཾ ‘‘པཱཏིམོཀྑསཾཝརཏོཔི ཙ མགྒཕལསམྤཡུཏྟམེཝ སཱིལཾ ཨདྷིསཱིལ’’ནྟི ཝུཏྟཾ. ན ཧི ཏཾ སམཱཔནྣོ བྷིཀྑཱུཏི གཧཊྛེསུ སོཏཱཔནྣཱནཾ སདཱརཝཱིཏིཀྐམསམྦྷཝཏོ ཝུཏྟཾ. ཏཐཱ ཧི ཏེ སཔུཏྟདཱརཱ ཨགཱརཾ ཨཛ྄ཛྷཱཝསནྟི.

སམཱདཱཔནཾ ¶ སམཱདཱནཉྩཱཏི ཨཉྙེསཾ སམཱདཱཔནཾ སཡཾ སམཱདཱནཉྩ. ཨདྷིཙིཏྟནྟི ཝུཙྩཏཱིཏི མགྒསམཱདྷིསྶ ཨདྷིཊྛཱནབྷཱཝཏོ ཨདྷིཙིཏྟནྟི ཝུཙྩཏི. ན ཝིནཱ བུདྡྷུཔྤཱདཱཏི ཀིཉྩཱཔི པཙྩེཀབུདྡྷཱནཾ ཝིཔསྶནཱཔཱདཀཾ ཨཊྛསམཱཔཏྟིཙིཏྟཾ ཧོཏིཡེཝ, ན པན ཏེ ཏཏྠ ཨཉྙེ སམཱདཱཔེཏུཾ སཀྐོནྟཱིཏི ན ཏེསཾ ཝསེན ཝིཏྠཱརིཏཾ ཧུཏྭཱ པཝཏྟཏཱིཏི ཨདྷིཔྤཱཡོ. ཝིཔསྶནཱཔཉྙཱཡཔི ཨདྷིཔཉྙཏཱསཱདྷནེ ‘‘ན ཝིནཱ བུདྡྷུཔྤཱདཱ’’ཏི ཝཙནཾ ཨིམིནཱཝ ཨདྷིཔྤཱཡེན ཝུཏྟནྟི ཝེདིཏབྦཾ. ལོཀིཡཙིཏྟསྶ ཨདྷིཙིཏྟཏཱ པརིཡཱཡེནཱཏི ནིཔྤརིཡཱཡམེཝ ཏཾ དསྶེཏུཾ ‘‘ཏཏོཔི ཙ མགྒཕལཙིཏྟམེཝ ཨདྷིཙིཏྟ’’ནྟི ཨཱཧ. ཏཾ པན ཨིདྷ ཨནདྷིཔྤེཏནྟི ཨིམིནཱ ཨཊྛཀཐཱཝཙནེན ལོཀིཡཙིཏྟསྶ ཝསེན ཨདྷིཙིཏྟསིཀྑཱཔི ཨིདྷ ཨདྷིཔྤེཏཱཏི ཝིཉྙཱཡཏི. ན ཧི ཏཾ སམཱཔནྣོ བྷིཀྑུ མེཐུནཾ དྷམྨཾ པཊིསེཝཏཱིཏི ཙ ཨིམིནཱ ལོཀིཡཨདྷིཙིཏྟཾ སམཱཔནྣོ མེཐུནཾ དྷམྨཾ པཊིསེཝཏཱིཏི ཨཱཔནྣཾ. ཨདྷིཔཉྙཱནིདྡེསེ ཙ ‘‘ཏཏོཔི ཙ མགྒཕལཔཉྙཱཝ ཨདྷིཔཉྙཱ’’ཏི ཝཏྭཱ ‘‘སཱ པན ཨིདྷ ཨནདྷིཔྤེཏཱ. ན ཧི ཏཾ སམཱཔནྣོ བྷིཀྑུ མེཐུནཾ དྷམྨཾ པཊིསེཝཏཱི’’ཏི ཝུཏྟཏྟཱ ལོཀིཡཔཉྙཱཝསེན ཨདྷིཔཉྙཱསིཀྑཱཡཔི ཨིདྷཱདྷིཔྤེཏབྷཱཝོ ཏཾ སམཱཔནྣསྶ མེཐུནདྷམྨཔཊིསེཝནཉྩ ཨཊྛཀཐཱཡཾ ཨནུཉྙཱཏནྟི ཝིཉྙཱཡཏི. ཨིདཉྩ སབྦཾ ‘‘ཏཏྲ ཡཱཡཾ ཨདྷིསཱིལསིཀྑཱ, ཨཡཾ ཨིམསྨིཾ ཨཏྠེ ཨདྷིཔྤེཏཱ སིཀྑཱ’’ཏི ཨིམཱཡ པཱལི༹ཡཱ ན སམེཏི. ཨཡཉྷི པཱལི༹ ཨདྷིསཱིལསིཀྑཱཝ ཨིདྷ ཨདྷིཔྤེཏཱ, ན ཨིཏརཱཏི དཱིཔེཏི, ཏསྨཱ པཱལི༹ཡཱ ཨཊྛཀཐཱཡ ཙ ཨེཝམདྷིཔྤཱཡོ ཝེདིཏབྦོ – ལོཀིཡཨདྷིཙིཏྟཨདྷིཔཉྙཱསམཱཔནྣསྶ ཏཐཱརཱུཔཔཙྩཡཾ པཊིཙྩ ‘‘མེཐུནཾ དྷམྨཾ པཊིསེཝིསྶཱམཱི’’ཏི ཙིཏྟེ ཨུཔྤནྣེ ཏཏོ ཨདྷིཙིཏྟཏོ ¶ ཨདྷིཔཉྙཏོ ཙ པརིཧཱནི སམྦྷཝཏཱིཏི ཏཾ དྭཡཾ སམཱཔནྣེན ན སཀྐཱ མེཐུནཾ དྷམྨཾ པཊིསེཝིཏུནྟི པཱལི༹ཡཾ ཨདྷིསཱིལསིཀྑཱཝ ཝུཏྟཱ. ཨདྷིསཱིལསིཀྑཉྷི ཡཱཝ ཝཱིཏིཀྐམཾ ན ཀརོཏི, ཏཱཝ སམཱཔནྣོཝ ཧོཏི. ན ཧི ཙིཏྟུཔྤཱདམཏྟེན པཱཏིམོཀྑསཾཝརསཱིལཾ བྷིནྣཾ ནཱམ ཧོཏཱིཏི. ཨཊྛཀཐཱཡཾ པན ལོཀིཡཨདྷིཙིཏྟཏོ ཨདྷིཔཉྙཏོ ཙ པརིཧཱཡིཏྭཱཔི བྷིཀྑུནོ མེཐུནདྷམྨཔཊིསེཝནཾ ཀདཱཙི བྷཝེཡྻཱཏི ཏཾ དྭཡཾ ཨཔྤཊིཀྑིཔིཏྭཱ མགྒཕལདྷམྨཱནཾ ཨཀུཔྤསབྷཱཝཏྟཱ ཏཾ སམཱཔནྣསྶ བྷིཀྑུནོ ཏཏོ པརིཧཱཡིཏྭཱ མེཐུནདྷམྨཔཊིསེཝནཾ ནཱམ ན ཀདཱཙི སམྦྷཝཏཱིཏི ལོཀུཏྟརཱདྷིཙིཏྟཨདྷིཔཉྙཱནཾཡེཝ པཊིཀྑེཔོ ཀཏོཏི ཝེདིཏབྦོ.

ཨཏྠི དིནྣཾ ཨཏྠི ཡིཊྛནྟིཨཱདིནཡཔྤཝཏྟནྟི ཨིམིནཱ –

‘‘ཏཏྠ ཀཏམཾ ཀམྨསྶཀཏཉྙཱཎཾ? ‘ཨཏྠི དིནྣཾ, ཨཏྠི ཡིཊྛཾ, ཨཏྠི ཧུཏཾ, ཨཏྠི སུཀཏདུཀྐཊཱནཾ ཀམྨཱནཾ ཕལཾ ཝིཔཱཀོ, ཨཏྠི ཨཡཾ ལོཀོ, ཨཏྠི པརོ ལོཀོ, ཨཏྠི མཱཏཱ, ཨཏྠི པིཏཱ, ཨཏྠི སཏྟཱ ཨོཔཔཱཏིཀཱ, ཨཏྠི ལོཀེ སམཎབྲཱཧྨཎཱ སམྨགྒཏཱ སམྨཱ ¶ པཊིཔནྣཱ, ཡེ ཨིམཉྩ ལོཀཾ པརཉྩ ལོཀཾ སཡཾ ཨབྷིཉྙཱ སཙྪིཀཏྭཱ པཝེདེནྟཱི’ཏི ཡཱ ཨེཝརཱུཔཱ པཉྙཱ པཛཱནནཱ…པེ… ཨམོཧོ དྷམྨཝིཙཡོ སམྨཱདིཊྛི, ཨིདཾ ཝུཙྩཏི ཀམྨསྶཀཏཉྙཱཎཾ. ཋཔེཏྭཱ སཙྩཱནུལོམིཀཾ ཉཱཎཾ སབྦཱཔི སཱསཝཱ ཀུསལཱ པཉྙཱ ཀམྨསྶཀཏཉྙཱཎ’’ནྟི (ཝིབྷ. ༧༩༣) –

ཨིམཾ ཝིབྷངྒཔཱལི༹ཾ སངྒཎྷཱཏི.

ཏཏྠ (ཝིབྷ. ཨཊྛ. ༧༩༣) ཨཏྠི དིནྣནྟིཨཱདཱིསུ དིནྣཔཙྩཡཱ ཕལཾ ཨཏྠཱིཏི ཨིམིནཱ ཨུཔཱཡེན ཨཏྠོ ཝེདིཏབྦོ. དིནྣནྟི ཙ དེཡྻདྷམྨསཱིསེན དཱནཾ ཝུཏྟཾ. ཡིཊྛནྟི མཧཱཡཱགོ, སབྦསཱདྷཱརཎཾ མཧཱདཱནནྟི ཨཏྠོ. ཧུཏནྟི པཧོནཀསཀྐཱརོ ཨདྷིཔྤེཏོ. ཨཏྠི མཱཏཱ, ཨཏྠི པིཏཱཏི མཱཏཱཔིཏཱུསུ སམྨཱཔཊིཔཏྟིམིཙྪཱཔཊིཔཏྟིཨཱདཱིནཾ ཕལསམྦྷཝོ ཝུཏྟོ. ཨིདཾ ཝུཙྩཏཱིཏི ཡཾ ཉཱཎཾ ‘‘ཨིདཾ ཀམྨཾ སཀཾ, ཨིདཾ ནོ སཀ’’ནྟི ཛཱནཱཏི, ཨིདཾ ཀམྨསྶཀཏཉྙཱཎཾ ནཱམ ཝུཙྩཏཱིཏི ཨཏྠོ. ཏཏྠ ཏིཝིདྷཾ ཀཱཡདུཙྩརིཏཾ ཙཏུབྦིདྷཾ ཝཙཱིདུཙྩརིཏཾ ཏིཝིདྷཾ མནོདུཙྩརིཏནྟི ཨིདཾ ན སཀཀམྨཾ ནཱམ, ཏཱིསུ དྭཱརེསུ དསཝིདྷམྤི སུཙརིཏཾ སཀཀམྨཾ ནཱམ. ཨཏྟནོ ཝཱཔི ཧོཏུ པརསྶ ཝཱ, སབྦམྤི ཨཀུསལཾ ན སཀཀམྨཾ ¶ ནཱམ. ཀསྨཱ? ཨཏྠབྷཉྫནཏོ ཨནཏྠཛནནཏོ ཙ. ཨཏྟནོ ཝཱ ཧོཏུ པརསྶ ཝཱ, སབྦམྤི ཀུསལཾ སཀཀམྨཾ ནཱམ. ཀསྨཱ? ཨནཏྠབྷཉྫནཏོ ཨཏྠཛནནཏོ ཙ. ཨེཝཾ ཛཱནནསམཏྠེ ཨིམསྨིཾ ཀམྨསྶཀཏཉྙཱཎེ ཋཏྭཱ བཧུཾ དཱནཾ དཏྭཱ སཱིལཾ པཱུརེཏྭཱ ཨུཔོསཐཾ སམཱདིཡིཏྭཱ སུཁེན སུཁཾ སམྤཏྟིཡཱ སམྤཏྟིཾ ཨནུབྷཝིཏྭཱ ནིབྦཱནཾ པཏྟཱནཾ སཏྟཱནཾ གཎནཔརིཙྪེདོ ནཏྠི. ཋཔེཏྭཱ སཙྩཱནུལོམིཀཾ ཉཱཎནྟི མགྒསཙྩསྶ པརམཏྠསཙྩསྶ ཙ ཨནུལོམནཏོ སཙྩཱནུལོམིཀནྟི ལདྡྷནཱམཾ ཝིཔསྶནཱཉཱཎཾ ཋཔེཏྭཱ ཨཝསེསཱ སབྦཱཔི སཱསཝཱ ཀུསལཱ པཉྙཱ ཀམྨསྶཀཏཉྙཱཎམེཝཱཏི ཨཏྠོ.

ཏིལཀྑཎཱཀཱརཔརིཙྪེདཀནྟི ཨནིཙྩཱདིལཀྑཎཏྟཡསྶ ཧུཏྭཱ ཨབྷཱཝཱདིཨཱཀཱརཔཨཙྪིནྡནཀཾ. ཨདྷིཔཉྙཱཏི ཝུཙྩཏཱིཏི མགྒཔཉྙཱཡ ཨདྷིཊྛཱནབྷཱཝཏོ ཝིཔསྶནཱཉཱཎཾ ཨདྷིཔཉྙཱཏི ཝུཙྩཏི.

‘‘ཀལྱཱཎཀཱརཱི ཀལྱཱཎཾ, པཱཔཀཱརཱི ཙ པཱཔཀཾ;

ཨནུབྷོཏི དྭཡམེཏཾ, ཨནུབནྡྷཏི ཀཱརཀ’’ནྟི. (སཾ. ནི. ༡.༢༥༦);

ཨེཝཾ ¶ ཨཏཱིཏེ ཨནཱགཏེ ཙ ཝཊྚམཱུལཀདུཀྑསལླཀྑཎཝསེན སཾཝེགཝཏྠུཏཱཡ ཝིམུཏྟིཨཱཀངྑཱཡ པཙྩཡབྷཱུཏཱ ཀམྨསྶཀཏཔཉྙཱ ཨདྷིཔཉྙཱཏིཔི ཝདནྟི. ལོཀིཡཔཉྙཱཡ ཨདྷིཔཉྙཱབྷཱཝོ པརིཡཱཡེནཱཏི ནིཔྤརིཡཱཡམེཝ ཏཾ དསྶེཏུཾ ‘‘ཏཏོཔི ཙ མགྒཕལཔཉྙཱཝ ཨདྷིཔཉྙཱ’’ཏི ཝུཏྟཾ.

སཧ ཨཱཛཱིཝནྟི ཨེཏྠཱཏི སཱཛཱིཝོཏི སབྦསིཀྑཱཔདཾ ཝུཏྟནྟི ཨཱཧ – ‘‘སབྦམྤི…པེ… ཏསྨཱ སཱཛཱིཝནྟི ཝུཙྩཏཱི’’ཏི. ཏཏྠ སིཀྑཱཔདནྟི ‘‘ནཱམཀཱཡོ པདཀཱཡོ ནིརུཏྟིཀཱཡོ བྱཉྫནཀཱཡོ’’ཏི ཝུཏྟཾ བྷགཝཏོ ཝཙནསངྑཱཏཾ སིཀྑཱཔདཾ. སབྷཱགཝུཏྟིནོཏི སམཱནཝུཏྟིཀཱ, སདིསཔྤཝཏྟིཀཱཏི ཨཏྠོ. ཏསྨིཾ སིཀྑཏཱིཏི ཨེཏྠ ཨཱདྷེཡྻཱཔེཀྑཏྟཱ ཨདྷིཀརཎསྶ ཀིམཱདྷེཡྻམཔེཀྑིཏྭཱ ‘‘ཏསྨི’’ནྟི ཨདྷིཀརཎཾ ནིདྡིཊྛནྟི ཨཱཧ – ‘‘ཏཾ སིཀྑཱཔདཾ ཙིཏྟསྶ ཨདྷིཀརཎཾ ཀཏྭཱ’’ཏི, ཏཾ སཱཛཱིཝསངྑཱཏཾ སིཀྑཱཔདཾ ‘‘ཡཐཱསིཀྑཱཔདཾ ནུ ཁོ སིཀྑཱམི, ན སིཀྑཱམཱི’’ཏི ཨེཝཾ པཝཏྟིཝསེན སིཀྑཱཔདཝིསཡཏྟཱ ཏདཱདྷེཡྻབྷཱུཏསྶ ཙིཏྟསྶ ཨདྷིཀརཎཾ ཀཏྭཱཏི ཨཏྠོ. ནནུ ཙ ‘‘སིཀྑཱསཱཛཱིཝསམཱཔནྣོ’’ཏི ཨིམསྶ པདབྷཱཛནཾ ཀརོནྟེན ‘‘ཡཾ སིཀྑཾ སཱཛཱིཝཉྩ སམཱཔནྣོ, ཏདུབྷཡཾ དསྶེཏྭཱ ཏེསུ སིཀྑཏི, ཏེན ¶ ཝུཙྩཏི སིཀྑཱསཱཛཱིཝསམཱཔནྣོ’’ཏི ཝཏྟབྦཾ སིཡཱ, ཨེཝམཝཏྭཱ ‘‘ཏསྨིཾ སིཀྑཏི, ཏེན ཝུཙྩཏི སཱཛཱིཝསམཱཔནྣོ’’ཏི ཨེཏྟཀམེཝ ཀསྨཱ ཝུཏྟནྟི ཨནྟོལཱིནཙོདནཾ སནྡྷཱཡཱཧ ‘‘ན ཀེཝལཉྩཱཡམེཏསྨི’’ནྟིཨཱདི.

ཏསྶཱ ཙ སིཀྑཱཡཱཏི ཏསྶཱ ཨདྷིསཱིལསངྑཱཏཱཡ སིཀྑཱཡ. སིཀྑཾ པརིཔཱུརེནྟོཏི

སཱིལསཾཝརཾ པརིཔཱུརེནྟོ, ཝཱརིཏྟསཱིལཝསེན ཝིརཏིསམྤཡུཏྟཾ ཙེཏནཾ ཙཱརིཏྟསཱིལཝསེན ཝིརཏིཝིཔྤཡུཏྟཾ ཙེཏནཉྩ ཨཏྟནི པཝཏྟེནྟོཏི ཨཏྠོ. ཏསྨིཉྩ སིཀྑཱཔདེ ཨཝཱིཏིཀྐམནྟོ སིཀྑཏཱིཏི ‘‘ནཱམཀཱཡོ པདཀཱཡོ ནིརུཏྟིཀཱཡོ བྱཉྫནཀཱཡོ’’ཏི ཨེཝཾ ཝུཏྟཾ བྷགཝཏོ ཝཙནསངྑཱཏཾ སིཀྑཱཔདཾ ཨཝཱིཏིཀྐམནྟོ ཧུཏྭཱ ཏསྨིཾ ཡཐཱཝུཏྟསིཀྑཱཔདེ སིཀྑཏཱིཏི ཨཏྠོ. སཱིལསཾཝརཔཱུརཎཾ སཱཛཱིཝཱནཏིཀྐམནཉྩཱཏི ཨིདམེཝ ཙ དྭཡཾ ཨིདྷ སིཀྑནཾ ནཱམཱཏི ཨདྷིཔྤཱཡོ. ཏཏྠ སཱཛཱིཝཱནཏིཀྐམོ སིཀྑཱཔཱརིཔཱུརིཡཱ པཙྩཡོ. སཱཛཱིཝཱནཏིཀྐམཏོ ཧི ཡཱཝ མགྒཱ སིཀྑཱཔཱརིཔཱུརཱི ཧོཏི. ཨཔིཙེཏྠ ‘‘སིཀྑཾ པརིཔཱུརེནྟོ སིཀྑཏཱི’’ཏི ཨིམིནཱ ཝིརཏིཙེཏནཱསངྑཱཏསྶ སཱིལསཾཝརསྶ ཝིསེསཏོ སནྟཱནེ པཝཏྟནཀཱལོཝ གཧིཏོ, ‘‘ཨཝཱིཏིཀྐམནྟོ སིཀྑཏཱི’’ཏི ཨིམིནཱ པན ཨཔྤཝཏྟནཀཱལོཔི. སིཀྑཉྷི པརིཔཱུརཎཝསེན ཨཏྟནི པཝཏྟེནྟོཔི ནིདྡཱདིཝསེན ཨཔྤཝཏྟེནྟོཔི ཝཱིཏིཀྐམཱབྷཱཝཱ ‘‘ཨཝཱིཏིཀྐམནྟོ སིཀྑཏཱི’’ཏི ཝུཙྩཏཱིཏི.

སིཀྑཱསཱཛཱིཝཔདབྷཱཛནཱིཡཝཎྞནཱ ནིཊྛིཏཱ.

སིཀྑཱཔཙྩཀྑཱནཝིབྷངྒཝཎྞནཱ

‘‘ཨཔྤཙྩཀྑཱཡ ¶ ཨཔྤཙྩཀྑཱཏཱཡཱ’’ཏི ཨུབྷཡཐཱཔི པཱཋོ ཏཱིསུཔི གཎྛིཔདེསུ ཝུཏྟོ. དུབྦལྱེ ཨཱཝིཀཏེཔཱིཏི ‘‘ཡཾནཱུནཱཧཾ བུདྡྷཾ པཙྩཀྑེཡྻ’’ནྟིཨཱདིནཱ དུབྦལབྷཱཝེ པཀཱསིཏེཔི. སིཀྑཱཡ པན པཙྩཀྑཱཏཱཡཱཏི ‘‘བུདྡྷཾ པཙྩཀྑཱམཱི’’ཏིཨཱདིནཱ སིཀྑཱཡ པཙྩཀྑཱཏཱཡ. ཡསྨཱ དིརཏྟཝཙནེ གཧིཏེ ཏེན པུརིམཔཙྪིམཔདཱནི སཾསིལིཊྛཱནི ཧོནྟི, ན ཏསྨིཾ ཨགྒཧིཏེ, ཏསྨཱ དིརཏྟཝཙནེན བྱཉྫནསིལིཊྛཏཱམཏྟམེཝ པཡོཛནནྟི ཨཱཧ ‘‘བྱཉྫནསིལིཊྛཏཱཡཱ’’ཏི. མུཁཱརུལ༹ྷཏཱཡཱཏི ཡསྨཱ ཨེཝརཱུཔཾ ཝཙནཾ ལོཀསྶ མུཁམཱརུལ༹ྷཾ, ཏསྨཱཏི ཨཏྠོ.

བྱཉྫནཾ ¶ སམྤཱདེཏཱིཏི ཏསྶ ཝིསུཾ ཨཏྠཱབྷཱཝཏོ ཝུཏྟམེཝཏྠཾ ཨཉྙཔདེན དཱིཔེནྟོ བྱཉྫནཾ སམྤཱདེཏི. ཝུཏྟམེཝཏྠཾ ཀཱརཎེན ཝིབྷཱཝེནྟོ ཨཱཧ ‘‘པརིཝཱརཀཔདཝིརཧིཏཉྷཱི’’ཏིཨཱདི. ཨཏྠདཱིཔཀཾ པདཾ ཨཏྠཔདཾ.

སིཀྑཱཔཙྩཀྑཱནསྶཱཏི ‘‘བུདྡྷཾ པཙྩཀྑཱམཱི’’ཏིཨཱདིསིཀྑཱཔཙྩཀྑཱནཝཙནསྶ. ‘‘བུདྡྷཾ པཙྩཀྑཱམཱི’’ཏིཨཱདཱིསུ ‘‘ཨེཝཾ ཁོ, བྷིཀྑཝེ, དུབྦལྱཱཝིཀམྨཉྩེཝ ཧོཏི སིཀྑཱ ཙ པཙྩཀྑཱཏཱ’’ཏི ཝུཏྟཏྟཱ ཨུབྷཡམྤི ཧོཏཱིཏི ཨཱཧ – ‘‘ཨེཀཙྩཾ དུབྦལྱཱཝིཀམྨཾ ཨཏྠོ ཧོཏཱི’’ཏི. ཀིཉྩཱཔི ‘‘བུདྡྷཾ པཙྩཀྑཱམཱི’’ཏིཨཱདིསིཀྑཱཔཙྩཀྑཱནཝཙནསྶ དུབྦལྱཱཝིཀམྨཔདཏྠོ ན ཧོཏི, ཏཐཱཔི ‘‘བུདྡྷཾ པཙྩཀྑཱམཱི’’ཏི ཝུཏྟེ སིཀྑཱཔརིཔཱུརཎེ དུབྦལྱཱཝིབྷཱཝསྶཔི གམྱམཱནཏྟཱ ‘‘སིཀྑཱཔཙྩཀྑཱནསྶ ཨེཀཙྩཾ དུབྦལྱཱཝིཀམྨཾ ཨཏྠོ ཧོཏཱི’’ཏི ཝུཏྟཾ. ནཾ སནྡྷཱཡཱཏི ནཾ ཨཏྠབྷཱུཏཾ དུབྦལྱཱཝིཀམྨཾ སནྡྷཱཡ.

ཝིསེསཱཝིསེསནྟི ཨེཏྠ ཡེན དུབྦལྱཱཝིཀམྨམེཝ ཧོཏི, ན སིཀྑཱཔཙྩཀྑཱནཾ, ཏཏྠ སིཀྑཱཔཙྩཀྑཱནདུབྦལྱཱཝིཀམྨཱནཾ ཨཏྠི ཝིསེསོ. ཡེན པན སིཀྑཱཔཙྩཀྑཱནཉྩེཝ དུབྦལྱཱཝིཀམྨཉྩ ཧོཏི, ཏཏྠ ནེཝཏྠི ཝིསེསོཏི ཝེདིཏབྦཾ. ཀཋཀིཙྪཛཱིཝནེཏི དྷཱཏཱུསུ པཋིཏཏྟཱ ཝུཏྟཾ ‘‘ཀིཙྪཛཱིཝིཀཔྤཏྟོ’’ཏི. ཨུཀྐཎྛནཾ ཨུཀྐཎྛཱ, ཀིཙྪཛཱིཝིཀཱ, ཏཾ ཨིཏོ པཏྟོཏི ཨུཀྐཎྛིཏོ. ཨིཏོཏི ཨིཏོ ཋཱནཏོ, ཨིཏོ ཝིཧཱརཏོ ཝཱ. ཨེཏྠཱཏི གནྟུམིཙྪིཏཾ པདེསཾ ཝདཏི. ཨནབྷིརཏིཡཱ པཱིལི༹ཏོ ཝིཀྑིཏྟཙིཏྟོ ཧུཏྭཱ སཱིསཾ ཨུཀྑིཔིཏྭཱ ཨུདྡྷཾམུཁོ ཨིཏོ ཙིཏོ ཙ ཨོལོཀེནྟོ ཨཱཧིཎྜཏཱིཏི ཨཱཧ ‘‘ཨུདྡྷཾ ཀཎྛཾ ཀཏྭཱ ཝིཧརམཱནོ’’ཏི.

ཨཊྚཱིཡམཱནོཏི ཨེཏྠ ཨཊྚམིཝ ཨཏྟཱནམཱཙརཏི ཨཊྚཱིཡཏཱིཏི ཨཊྚཱིཡསདྡསྶ ཨནྟོགདྷཨུཔམཱནབྷཱུཏཀམྨཏྟཱ ¶ ཨུཔམེཡྻབྷཱུཏེན ཨཏྟནཱཝ སཀམྨཀཏྟཾ, ན བྷིཀྑུབྷཱཝེནཱཏི ཨཱཧ ‘‘བྷིཀྑུབྷཱཝནྟི བྷིཀྑུབྷཱཝེནཱ’’ཏི. ན ཧི སོ བྷིཀྑུབྷཱཝཾ ཨཊྚམིཝ ཨཱཙརཏི, ཀིཉྩརཧི ཨཏྟཱནཾ ཏསྨཱ བྷིཀྑུབྷཱཝེན ཀརཎབྷཱུཏེན ཨཏྟཱནཾ ཨཊྚཱིཡམཱནོཏི ཨེཝམེཏྠ ཨཏྠོ དཊྛབྦོཏི ཨཱཧ ‘‘ཀརཎཏྠེ ཨུཔཡོགཝཙན’’ནྟི. ཀཎྛེ ཨཱསཏྟེན ཨཊྚཱིཡེཡྻཱཏི ཨེཏྠ པན ཀརཎཏྠེཡེཝ ཀརཎཝཙནནྟི ཨཱཧ – ‘‘ཡཐཱལཀྑཎཾ ཀརཎཝཙནེནེཝ ཝུཏྟ’’ནྟི. ཀཏྟུཨཏྠེ ཝཱ ཨུཔཡོགཝཙནཾ དཊྛབྦནྟི ཨཱཧ – ‘‘ཏེན ཝཱ བྷིཀྑུབྷཱཝེནཱ’’ཏིཨཱདི, ཏེན ཀཏྟུབྷཱུཏེན བྷིཀྑུབྷཱཝེནཱཏི ཨཏྠོ. ཨིམསྨིཾ པནཏྠེ ཨཊྚཾ ཀརོཏཱིཏི ཨཊྚཱིཡཏཱིཏི ¶ ཨཊྚཱིཡ-སདྡཾ ནིཔྥཱདེཏྭཱ ཏཏོ ཀམྨནི མཱན-སདྡེ ཀཏེ ‘‘ཨཊྚཱིཡམཱནོ’’ཏི པདསིདྡྷི ཝེདིཏབྦཱ. ཏེནེཝཱཧ – ‘‘ཨཊྚོ ཀརིཡམཱནོ པཱིལི༹ཡམཱནོ’’ཏི. ཛིགུཙྪམཱནོཏི ཨིམིནཱ པན སམྦནྡྷེ ཀརིཡམཱནེ བྷིཀྑུབྷཱཝནྟི ཨུཔཡོགཏྠེ ཨེཝ ཨུཔཡོགཝཙནནྟི ཨཱཧ – ‘‘ཨསུཙིཾ ཝིཡ ཏཾ ཛིགུཙྪནྟོ’’ཏི, ཏཾ བྷིཀྑུབྷཱཝཾ ཛིགུཙྪནྟོཏི ཨཏྠོ. སཙཱཧནྟི སཙེ ཨཧཾ.

པཙྩཀྑཱནཱཀཱརེན ཝུཏྟཱནཱིཏི ‘‘པཙྩཀྑེཡྻཾ པཙྩཀྑེཡྻ’’ནྟི ཝུཏྟཏྟཱ པཙྩཀྑཱནཱཀཱརསམྦནྡྷེན ཝུཏྟཱནི. བྷཱཝཝིཀཔྤཱཀཱརེནཱཏི ‘‘ཨསྶཾ ཨསྶ’’ནྟི ཨཱགཏཏྟཱ ཡཾ ཡཾ བྷཝིཏུཀཱམོ, ཏསྶ ཏསྶ བྷཱཝསྶ ཝིཀཔྤཱཀཱརེན, བྷིཀྑུབྷཱཝཏོ ཨཉྙབྷཱཝཝིཀཔྤཱཀཱརེནཱཏི ཨདྷིཔྤཱཡོ.

༥༠. ན ཨུསྶཧཱམཱིཏི ཨཏྟནོ ཏཏྠ ཏཏྠ ཨུསྶཧཱབྷཱཝཾ དསྶེཏི. ན ཝིསཧཱམཱིཏི ཨེཀབྷཏྟཱདཱིནཾ ཨསཡ྄ཧབྷཱཝཾ དསྶེཏི. ན རམཱམཱིཏི ‘‘པབྦཛྫཱམཱུལཀཾ ནཏྠི མེ སུཁ’’ནྟི དསྶེཏི. ནཱབྷིརམཱམཱིཏི པབྦཛྫཱཡ ཨཏྟནོ སནྟོསཱབྷཱཝཾ དསྶེཏི.

ཨིདཱནི སིཀྑཱཔཙྩཀྑཱནཝཱརེ ཋཏྭཱ ཨཡཾ ཝིནིཙྪཡོ ཝེདིཏབྦོ – ཏཏྠ ‘‘སཱམཉྙཱ ཙཝིཏུཀཱམོ’’ཏིཨཱདཱིཧི པདེཧི ཙིཏྟནིཡམཾ དསྶེཏི. ‘‘བུདྡྷཾ དྷམྨ’’ནྟིཨཱདཱིཧི པདེཧི ཁེཏྟནིཡམཾ དསྶེཏི. ཡཐཱ ཧི ལོཀེ སསྶཱནཾ རུཧནཊྛཱནཾ ‘‘ཁེཏྟ’’ནྟི ཝུཙྩཏི, ཨེཝམིདམྤི སིཀྑཱཔཙྩཀྑཱནསྶ རུཧནཊྛཱནཏྟཱ ‘‘ཁེཏྟ’’ནྟི ཝུཙྩཏི. ‘‘པཙྩཀྑཱམི དྷཱརེཧཱི’’ཏི ཨེཏེན ཀཱལནིཡམཾ དསྶེཏི. ‘‘ཝདཏཱི’’ཏི ཨིམིནཱ པཡོགནིཡམཾ དསྶེཏི. ‘‘ཨལཾ མེ བུདྡྷེན, ཀིནྣུ མེ བུདྡྷེན, ན མམཏྠོ བུདྡྷེན, སུམུཏྟཱཧཾ བུདྡྷེནཱ’’ཏིཨཱདཱིཧི ཨནཱམཊྛཀཱལཝསེནཔི པཙྩཀྑཱནཾ ཧོཏཱིཏི དསྶེཏི. ‘‘ཝིཉྙཱཔེཏཱི’’ཏི ཨིམིནཱ ཝིཛཱནནནིཡམཾ དསྶེཏི. ‘‘ཨུམྨཏྟཀོ སིཀྑཾ པཙྩཀྑཱཏི, ཨུམྨཏྟཀསྶ སནྟིཀེ སིཀྑཾ པཙྩཀྑཱཏཱི’’ཏིཨཱདཱིཧི པུགྒལནིཡམཾ དསྶེཏི. ‘‘ཨརིཡཀེན མིལཀྑསྶ སནྟིཀེ སིཀྑཾ པཙྩཀྑཱཏི, སོ ཙ ནཔྤཊིཝིཛཱནཱཏི, ཨཔྤཙྩཀྑཱཏཱ ཧོཏི སིཀྑཱ’’ཏིཨཱདཱིཧི པུགྒལཱདིནིཡམེ སཏིཔི ཝིཛཱནནནིཡམཱསམྦྷཝཾ དསྶེཏི ¶ . ‘‘དཝཱཡ སིཀྑཾ པཙྩཀྑཱཏི, ཨཔྤཙྩཀྑཱཏཱ ཧོཏི སིཀྑཱ’’ཏིཨཱདཱིཧི ཁེཏྟཱདིནིཡམེ སཏིཔི ཙིཏྟནིཡམཱབྷཱཝེན ན རུཧཏཱིཏི དསྶེཏི. ‘‘སཱཝེཏུཀཱམོ ན སཱཝེཏི, ཨཔཙྩཀྑཱཏཱ ཧོཏི སིཀྑཱ’’ཏི ཨིམིནཱ ཙིཏྟནིཡམེཔི སཏི པཡོགནིཡམཱབྷཱཝེན ན རུཧཏཱིཏི ¶ དསྶེཏི. ‘‘ཨཝིཉྙུསྶ སཱཝེཏི, ཝིཉྙུསྶ ན སཱཝེཏཱི’’ཏི ཨེཏེཧི ཙིཏྟཁེཏྟཀཱལཔཡོགཔུགྒལཝིཛཱནནནིཡམེཔི སཏི ཡཾ པུགྒལཾ ཨུདྡིསྶ སཱཝེཏི, ཏསྶེཝ སཝནེན རུཧཏི, ན ཨཉྙསྶཱཏི དསྶེཏི. ‘‘སབྦསོ ཝཱ པན ན སཱཝེཏི, ཨཔྤཙྩཀྑཱཏཱ ཧོཏི སིཀྑཱ’’ཏི ཨིདཾ པན ཙིཏྟཱདིནིཡམེནེཝ སིཀྑཱ པཙྩཀྑཱཏཱ ཧོཏི, ན ཨཉྙཐཱཏི དསྶནཏྠཾ ཝུཏྟཾ. ཏསྨཱ ཙིཏྟཁེཏྟཀཱལཔཡོགཔུགྒལཝིཛཱནནནིཡམཝསེན སིཀྑཱཡ པཙྩཀྑཱནཾ ཉཏྭཱ ཏདབྷཱཝེན ཨཔྤཙྩཀྑཱནཾ ཝེདིཏབྦཾ.

ཀཐཾ? ཨུཔསམྤནྣབྷཱཝཏོ ཙཝིཏུཀཱམཏཱཙིཏྟེནེཝ ཧི སིཀྑཱཔཙྩཀྑཱནཾ ཧོཏི, ན དཝཱ ཝཱ རཝཱ ཝཱ བྷཎནྟསྶ. ཨེཝཾ ཙིཏྟཝསེན སིཀྑཱཔཙྩཀྑཱནཾ ཧོཏི, ན ཏདབྷཱཝེན.

ཏཐཱ ‘‘བུདྡྷཾ པཙྩཀྑཱམི, དྷམྨཾ པཙྩཀྑཱམི, སངྒྷཾ པཙྩཀྑཱམི, སིཀྑཾ, ཝིནཡཾ, པཱཏིམོཀྑཾ, ཨུདྡེསཾ, ཨུཔཛ྄ཛྷཱཡཾ, ཨཱཙརིཡཾ, སདྡྷིཝིཧཱརིཀཾ, ཨནྟེཝཱསིཀཾ, སམཱནུཔཛ྄ཛྷཱཡཀཾ, སམཱནཱཙརིཡཀཾ, སབྲཧྨཙཱརིཾ པཙྩཀྑཱམཱི’’ཏི ཨེཝཾ ཝུཏྟཱནཾ བུདྡྷཱདཱིནཾ ཙཏུདྡསནྣཾ, ‘‘གིཧཱིཏི མཾ དྷཱརེཧི, ཨུཔཱསཀོ, ཨཱརཱམིཀོ, སཱམཎེརོ, ཏིཏྠིཡོ, ཏིཏྠིཡསཱཝཀོ, ཨསྶམཎོ, ཨསཀྱཔུཏྟིཡོཏི མཾ དྷཱརེཧཱི’’ཏི ཨེཝཾ ཝུཏྟཱནཾ གིཧིཨཱདཱིནཾ ཨཊྛནྣཉྩཱཏི ཨིམེསཾ དྭཱཝཱིསཏིཡཱ ཁེཏྟཔདཱནཾ ཡསྶ ཀསྶཙི སཝེཝཙནསྶ ཝསེན ཏེསུ ཙ ཡཾཀིཉྩི ཝཏྟུཀཱམསྶ ཡཾཀིཉྩི ཝདཏོཔི སིཀྑཱཔཙྩཀྑཱནཾ ཧོཏི, ན རུཀྑཱདཱིནཾ ཨཉྙཏརསྶ ནཱམཾ གཧེཏྭཱ སིཀྑཾ པཙྩཀྑནྟསྶ. ཨེཝཾ ཁེཏྟཝསེན སིཀྑཱཔཙྩཀྑཱནཾ ཧོཏི, ན ཏདབྷཱཝེན.

ཏཏྠ ཡདེཏཾ ‘‘པཙྩཀྑཱམཱི’’ཏི ཙ ‘‘མཾ དྷཱརེཧཱི’’ཏི ཙ ཝུཏྟཾ ཝཏྟམཱནཀཱལཝཙནཾ, ཡཱནི ཙ ‘‘ཨལཾ མེ བུདྡྷེན, ཀིནྣུ མེ བུདྡྷེན, ན མམཏྠོ བུདྡྷེན, སུམུཏྟཱཧཾ བུདྡྷེནཱ’’ཏིཨཱདིནཱ ནཡེན ཨཱཁྱཱཏཝསེན ཀཱལཾ ཨནཱམསིཏྭཱ པུརིམེཧི ཙུདྡསཧི པདེཧི སདྡྷིཾ ཡོཛེཏྭཱ ཝུཏྟཱནི ‘‘ཨལཾ མེ’’ཏིཨཱདཱིནི ཙཏྟཱརི པདཱནི, ཏེསཾཡེཝ ཙ སཝེཝཙནཱནཾ ཝསེན པཙྩཀྑཱནཾ ཧོཏི, ན ‘‘པཙྩཀྑཱསི’’ནྟི ཝཱ ‘‘པཙྩཀྑིསྶ’’ནྟི ཝཱ ‘‘མཾ དྷཱརེསཱི’’ཏི ཝཱ ‘‘དྷཱརེསྶསཱི’’ཏི ཝཱ ‘‘ཡནཱུནཱཧཾ པཙྩཀྑེཡྻ’’ནྟི ཝཱཏིཨཱདཱིནི ཨཏཱིཏཱནཱགཏཔརིཀཔྤཝཙནཱནི བྷཎནྟསྶ. ཨེཝཾ ཝཏྟམཱནཀཱལཝསེན ཙེཝ ཨནཱམཊྛཀཱལཝསེན ཙ པཙྩཀྑཱནཾ ཧོཏི, ན ཏདབྷཱཝེན.

པཡོགོ ¶ ¶ པན དུཝིདྷོ ཀཱཡིཀོ ཝཱཙསིཀོ. ཏཏྠ ‘‘བུདྡྷཾ པཙྩཀྑཱམཱི’’ཏིཨཱདིནཱ ནཡེན ཡཱཡ ཀཱཡཙི བྷཱསཱཡ ཝཙཱིབྷེདཾ ཀཏྭཱ ཝཱཙསིཀཔཡོགེནེཝ པཙྩཀྑཱནཾ ཧོཏི, ན ཨཀྑརལིཁནཾ ཝཱ ཧཏྠམུདྡཱདིདསྶནཾ ཝཱ ཀཱཡཔཡོགཾ ཀརོནྟསྶ. ཨེཝཾ ཝཱཙསིཀཔཡོགེནེཝ པཙྩཀྑཱནཾ ཧོཏི, ན ཏདབྷཱཝེན.

པུགྒལོ པན དུཝིདྷོ ཡོ ཙ པཙྩཀྑཱཏི, ཡསྶ ཙ པཙྩཀྑཱཏི. ཏཏྠ ཡོ པཙྩཀྑཱཏི, སོ སཙེ ཨུམྨཏྟཀཁིཏྟཙིཏྟཝེདནཱཊྚཱནཾ ཨཉྙཏརོ ན ཧོཏི. ཡསྶ པན པཙྩཀྑཱཏི, སོ སཙེ མནུསྶཛཱཏིཀོ ཧོཏི, ན ཙ ཨུམྨཏྟཀཱདཱིནཾ ཨཉྙཏརོ, སམྨུཁཱིབྷཱུཏོ ཙ སིཀྑཱཔཙྩཀྑཱནཾ ཧོཏི. ན ཧི ཨསམྨུཁཱིབྷཱུཏསྶ དཱུཏེན ཝཱ པཎྞེན ཝཱ ཨཱརོཙནཾ རུཧཏི. ཨེཝཾ ཡཐཱཝུཏྟཔུགྒལཝསེན པཙྩཀྑཱནཾ ཧོཏི, ན ཏདབྷཱཝེན.

ཝིཛཱནནམྤི ནིཡམིཏཱནིཡམིཏཝསེན དུཝིདྷཾ. ཏཏྠ ཡསྶ ཡེསཾ ཝཱ ནིཡམེཏྭཱ ‘‘ཨིམསྶ ཨིམེསཾ ཝཱ ཨཱརོཙེམཱི’’ཏི ཝདཏི, སཙེ ཏེ ཡཐཱ པཀཏིཡཱ ལོཀེ མནུསྶཱ ཝཙནཾ སུཏྭཱ ཨཱཝཛྫནསམཡེ ཛཱནནྟི, ཨེཝཾ ཏསྶ ཝཙནཱནནྟརམེཝ ཏསྶ ‘‘ཨཡཾ ཨུཀྐཎྛིཏོ’’ཏི ཝཱ ‘‘གིཧིབྷཱཝཾ པཏྠཡཏཱི’’ཏི ཝཱ ཡེན ཀེནཙི ཨཱཀཱརེན སིཀྑཱཔཙྩཀྑཱནབྷཱཝཾ ཛཱནནྟི, པཙྩཀྑཱཏཱ ཧོཏི སིཀྑཱ. ཨཐ ཨཔརབྷཱགེ ‘‘ཀིཾ ཨིམིནཱ ཝུཏྟ’’ནྟི ཙིནྟེཏྭཱ ཛཱནནྟི, ཨཉྙེ ཝཱ ཛཱནནྟི, ཨཔྤཙྩཀྑཱཏཱཝ ཧོཏི སིཀྑཱ. ཨནིཡམེཏྭཱ ཨཱརོཙེནྟསྶ པན སཙེ ཝུཏྟནཡེན ཡོ ཀོཙི མནུསྶཛཱཏིཀོ ཝཙནཏྠཾ ཛཱནཱཏི, པཙྩཀྑཱཏཱཝ ཧོཏི སིཀྑཱ. ཨེཝཾ ཝིཛཱནནཝསེན པཙྩཀྑཱནཾ ཧོཏི, ན ཏདབྷཱཝེན. ཨིཏི ཨིམེསཾ ཝུཏྟཔྤཀཱརཱནཾ ཙིཏྟཱདཱིནཾ ཝསེནེཝ སིཀྑཱཔཙྩཀྑཱནཾ ཧོཏི, ན ཨཉྙཐཱཏི དཊྛབྦཾ.

༥༡. ‘‘ཝདཏཱི’’ཏི ཝཙཱིབྷེདཔྤཡོགཾ དསྶེཏྭཱ ཏདནནྟརཾ ‘‘ཝིཉྙཱཔེཏཱི’’ཏི ཝུཏྟཏྟཱ ཏེནེཝ ཝཙཱིབྷེདེན ཨདྷིཔྤཱཡཝིཉྙཱཔནཾ ཨིདྷཱདྷིཔྤེཏཾ, ན ཡེན ཀེནཙི ཨུཔཱཡེནཱཏི ཨཱཧ ‘‘ཏེནེཝ ཝཙཱིབྷེདེནཱ’’ཏི. པདཔཙྩཱབྷཊྛཾ ཀཏྭཱཏི པདཝིཔརཱཝུཏྟིཾ ཀཏྭཱ. ཨིདཉྩ པདཔྤཡོགསྶ ཨནིཡམིཏཏྟཱ ཝུཏྟཾ. ཡཐཱ ཧི ལོཀེ ‘‘ཨཱཧར པཏྟཾ, པཏྟཾ ཨཱཧརཱ’’ཏི ཨནིཡམིཏེན པདཔྤཡོགེན ཏདཏྠཝིཉྙཱཔནཾ དིཊྛཾ, ཨེཝམིདྷཱཔི ‘‘བུདྡྷཾ པཙྩཀྑཱམི, པཙྩཀྑཱམི བུདྡྷ’’ནྟི ཨནིཡམིཏེན པདཔྤཡོགེན ཏདཏྠཝིཉྙཱཔནཾ ཧོཏིཡེཝཱཏི ཨདྷིཔྤཱཡོ. བུདྡྷཾ པཙྩཀྑཱམཱིཏི ཨཏྠཔྤདྷཱནོ ཨཡཾ ¶ ནིདྡེསོ, ན སདྡཔྤདྷཱནོཏི ཨཱཧ ‘‘མིལཀྑབྷཱསཱསུ ཝཱ ཨཉྙཏརབྷཱསཱཡ ཏམཏྠཾ ཝདེཡྻཱ’’ཏི. མཱགདྷབྷཱསཏོ ཨཝསིཊྛཱ སབྦཱཔི ཨནྡྷདམིལཱ༹དིབྷཱསཱ མིལཀྑབྷཱསཱཏི ཝེདིཏབྦཱ. ཁེཏྟཔདེསུ ཨེཀཾ ཝཏྟུཀཱམོ སཙེཔི ཨཉྙཾ ཝདེཡྻ, ཁེཏྟཔདནྟོགདྷཏྟཱ པཙྩཀྑཱཏཱཝ ¶ ཧོཏི སིཀྑཱཏི དསྶེནྟོ ཨཱཧ ‘‘བུདྡྷཾ པཙྩཀྑཱམཱིཏི ཝཏྟུཀཱམོ’’ཏིཨཱདི. ཡདིཔི ‘‘བུདྡྷཾ པཙྩཀྑཱམཱི’’ཏི ཝཏྟུཾ ཨནིཙྪནྟོ ཙིཏྟེན ཏཾ པཊིཀྑིཔིཏྭཱ ཨཉྙཾ ཝཏྟུཀཱམོ པུན ཝིརཛ྄ཛྷིཏྭཱ ཏམེཝ ཝདེཡྻ, ཏཐཱཔི སཱསནཏོ ཙཝིཏུཀཱམཏཱཙིཏྟེ སཏི ཁེཏྟཔདསྶེཝ ཝུཏྟཏྟཱ ཨངྒཔཱརིཔཱུརིསམྦྷཝཏོ ཧོཏྭེཝ སིཀྑཱཔཙྩཀྑཱནནྟི ཝེདིཏབྦཾ. ཁེཏྟམེཝ ཨོཏིཎྞནྟི སིཀྑཱཔཙྩཀྑཱནསྶ རུཧནཊྛཱནབྷཱུཏཾ ཁེཏྟམེཝ ཨོཏིཎྞཾ.

‘‘པཙྩཀྑཱམི དྷཱརེཧཱི’’ཏི ཝཏྟམཱནཀཱལསྶ པདྷཱནབྷཱཝེན ཝཏྟུམིཙྪིཏཏྟཱ ཨཏཱིཏཱནཱགཏཔརིཀཔྤཝཙནེཧི ནེཝཏྠི སིཀྑཱཔཙྩཀྑཱནནྟི དསྶེནྟོ ཨཱཧ ‘‘སཙེ པན བུདྡྷཾ པཙྩཀྑིནྟི ཝཱ’’ཏིཨཱདི. ཝདཏི ཝིཉྙཱཔེཏཱིཏི ཨེཏྠ ཝདཏཱིཏི ཨིམིནཱ པཡོགསྶ ནིཡམིཏཏྟཱ ཨེཀསྶ སནྟིཀེ ཨཏྟནོ ཝཙཱིབྷེདཔྤཡོགེནེཝ སིཀྑཱཔཙྩཀྑཱནཾ ཧོཏི, ན དཱུཏསཱསནཱདིཔྤཡོགེནཱཏི དསྶེནྟོ ཨཱཧ ‘‘དཱུཏཾ ཝཱ པཧིཎཱཏཱི’’ཏིཨཱདི. ཏཏྠ ‘‘མམ སིཀྑཱཔཙྩཀྑཱནབྷཱཝཾ ཀཐེཧཱི’’ཏི མུཁསཱསནཝསེན ‘‘དཱུཏཾ ཝཱ པཧིཎཱཏཱི’’ཏི ཝུཏྟཾ. པཎྞེ ལིཁིཏྭཱ པཧིཎནཝསེན ‘‘སཱསནཾ ཝཱ པེསེཏཱི’’ཏི ཝུཏྟཾ. རུཀྑཱདཱིསུ ཨཀྑརཱནི ལིཁིཏྭཱ དསྶནཝསེན ‘‘ཨཀྑརཾ ཝཱ ཚིནྡཏཱི’’ཏི ཝུཏྟཾ. ཧཏྠམུདྡཱཡ ཝཱ ཏམཏྠཾ ཨཱརོཙེཏཱིཏི ཧཏྠེན ཨདྷིཔྤཱཡཝིཉྙཱཔནཾ སནྡྷཱཡ ཝུཏྟཾ. ཨདྷིཔྤཱཡཝིཉྙཱཔཀོ ཧི ཧཏྠཝིཀཱརོ ཧཏྠམུདྡཱ. ཧཏྠ-སདྡོ ཙེཏྠ ཏདེཀདེསེསུ ཨངྒུལཱིསུ དཊྛབྦོ ‘‘ན སབྦཾ ཧཏྠཾ མུཁེ པཀྑིཔིསྶཱམཱི’’ཏིཨཱདཱིསུ (པཱཙི. ༦༡༨) ཝིཡ. ཏསྨཱ ཨདྷིཔྤཱཡཝིཉྙཱཔཀེན ཨངྒུལིསངྐོཙཱདིནཱ ཧཏྠཝིཀཱརེན ཏམཏྠཾ ཨཱརོཙེཏཱིཏི ཨེཝམེཏྠ ཨཏྠོ དཊྛབྦོ.

ཙིཏྟསམྤཡུཏྟནྟི པཙྩཀྑཱཏུཀཱམཏཱཙིཏྟསམྤཡུཏྟཾ. ཨིདཱནི ཝིཛཱནནཝསེན སིཀྑཱཔཙྩཀྑཱནཾ ནིཡམིཏཱནིཡམིཏཝསེན དྭིདྷཱ ཝེདིཏབྦནྟི དསྶེནྟོ ཨཱཧ – ‘‘ཡདི ཨཡམེཝ ཛཱནཱཏཱུ’’ཏིཨཱདི. ཨཡཉྩ ཝིབྷཱགོ ‘‘ཝདཏི ཝིཉྙཱཔེཏཱིཏི ཨེཀཝིསཡཏྟཱ ¶ ཡསྶ ཝདཏི, ཏསྶེཝ ཝིཛཱནནཾ ཨདྷིཔྤེཏཾ, ན ཨཉྙསྶཱ’’ཏི ཨིམིནཱ ནཡེན ལདྡྷོཏི དཊྛབྦཾ. ན ཧི ཡསྶ ཝདཏི, ཏཏོ ཨཉྙཾ ཝིཉྙཱཔེཏཱིཏི ཨཡམཏྠོ སམྦྷཝཏི. སོཡེཝ ཛཱནཱཏཱིཏི ཨཝདྷཱརཎེན ཏསྨིཾ ཨཝིཛཱནནྟེཡེཝ ཨཉྙསྶ ཛཱནནཾ པཊིཀྑིཔཏི. ཏེནེཝཱཧ – ‘‘ཨཐ སོ ན ཛཱནཱཏི, ཨཉྙོ སམཱིཔེ ཋིཏོ ཛཱནཱཏི, ཨཔཙྩཀྑཱཏཱ ཧོཏི སིཀྑཱ’’ཏི. ཏསྨཱ ‘‘ཨཡམེཝ ཛཱནཱཏཱུ’’ཏི ཨེཀཾ ནིཡམེཏྭཱ ཨཱརོཙིཏེ ཡདིཔི སོཔི ཛཱནཱཏི ཨཉྙོཔི, ནིཡམིཏསྶ པན ནིཡམིཏཝསེན ཝིཛཱནནསམྦྷཝཏོ སིཀྑཱཔཙྩཀྑཱནཾ ཧོཏིཡེཝཱཏི དཊྛབྦཾ ‘‘ཨཉྙོ མཱ ཛཱནཱཏཱུ’’ཏི ཨནིཡམིཏཏྟཱ. དྭིནྣམྤི ནིཡམེཏྭཱཏི ཨིདཾ ‘‘དྭེ ཝཱ ཛཱནནྟུ ཨེཀོ ཝཱ, ཨིམེསཾཡེཝ དྭིནྣཾ ཨཱརོཙེམཱི’’ཏི ཨེཝཾ ནིཡམེཏྭཱ ཨཱརོཙནཾ སནྡྷཱཡ ཝུཏྟཾ. ཏེནེཝཱཧ – ‘‘ཨེཀསྨིཾ ¶ ཛཱནནྟེཔི དྭཱིསུ ཛཱནནྟེསུཔཱི’’ཏི. ཏསྨཱ ‘‘དྭེཡེཝ ཛཱནནྟུ, ཨེཀོ མཱ ཛཱནཱཏཱུ’’ཏི ཨེཝཾ དྭིནྣཾ ནིཡམེཏྭཱ ཨཱརོཙིཏེ དྭཱིསུཡེཝ ཛཱནནྟེསུ སིཀྑཱཔཙྩཀྑཱནཾ ཧོཏི, ན ཨེཀསྨིཾ ཛཱནནྟེཏི ཝདནྟི.

སབྷཱགེཏི ཝིསྶཱསིཀེ. པརིསངྐམཱནོཏི ‘‘སཙེ ཏེ ཛཱནེཡྻུཾ, མཾ ཏེ ཝཱརེསྶནྟཱི’’ཏི ཨཱསངྐམཱནོ. སམཡཉྙཱུཏི སཱསནཱཙཱརཀུསལོ, ཨིདྷ པན ཏདདྷིཔྤཱཡཛཱནནམཏྟེནཔི སམཡཉྙཱུ ནཱམ ཧོཏི. ཏེནེཝ ཨཱཧ – ‘‘ཨུཀྐཎྛིཏོ ཨཡཾ…པེ… སཱསནཏོ ཙུཏོཏི ཛཱནཱཏཱི’’ཏི. ཏསྨཱ ‘‘བུདྡྷཾ པཙྩཀྑཱམཱི’’ཏི ཨིམསྶ ཨཏྠཾ ཉཏྭཱཔི སཙེ ‘‘ཨཡཾ བྷིཀྑུབྷཱཝཏོ ཙཝིཏུཀཱམོ, གིཧཱི ཝཱ ཧོཏུཀཱམོ’’ཏི ན ཛཱནཱཏི, ཨཔྤཙྩཀྑཱཏཱཝ ཧོཏི སིཀྑཱ. སཙེ པན ‘‘བུདྡྷཾ པཙྩཀྑཱམཱི’’ཏི ཝཙནསྶ ཨཏྠཾ ཨཛཱནིཏྭཱཔི ‘‘ཨུཀྐཎྛིཏོ གིཧཱི ཧོཏུཀཱམོ’’ཏི ཨདྷིཔྤཱཡཾ ཛཱནཱཏི, པཙྩཀྑཱཏཱཝ ཧོཏི སིཀྑཱ. ཨཉྙསྨིཾ ཁཎེ སོཏཝིཉྙཱཎཝཱིཐིཡཱ སདྡགྒཧཎཾ, ཨཉྙསྨིཾཡེཝ ཙ མནོཝིཉྙཱཎཝཱིཐིཡཱ ཏདཏྠཝིཛཱནནནྟི ཨཱཧ – ‘‘ཏངྑཎཉྙེཝ པན ཨཔུབྦཾ ཨཙརིམཾ དུཛྫཱན’’ནྟི. ན ཧི ཨེཀསྨིཾཡེཝ ཁཎེ སདྡསཝནཾ ཏདཏྠཝིཛཱནནཉྩ སམྦྷཝཏི. ཏཐཱ ཧི ‘‘གྷཊོ’’ཏི ཝཱ ‘‘པཊོ’’ཏི ཝཱ ཀེནཙི ཝུཏྟེ ཏཏྠ གྷ-སདྡཾ པཙྩུཔྤནྣཾ གཧེཏྭཱ ཨེཀཱ སོཏཝིཉྙཱཎཝཱིཐི ཨུཔྤཛྫིཏྭཱ ནིརུཛ྄ཛྷཏི, ཏདནནྟརཾ ཨེཀཱ མནོཝིཉྙཱཎཝཱིཐི ཏམེཝ ཨཏཱིཏཾ གཧེཏྭཱ ཨུཔྤཛྫཏི. ཨེཝཾ ཏེན ཝུཏྟཝཙནེ ཡཏྟཀཱནི ཨཀྑརཱནི ཧོནྟི, ཏེསུ ཨེཀམེཀཾ ཨཀྑརཾ པཙྩུཔྤནྣམཏཱིཏཉྩ གཧེཏྭཱ སོཏཝིཉྙཱཎཝཱིཐིཡཱ མནོཝིཉྙཱཎཝཱིཐིཡཱ ཙ ཨུཔྤཛྫིཏྭཱ ནིརུདྡྷཱཡ ཨཝསཱནེ ¶ ཏཱནི ཨཀྑརཱནི སམྤིཎྜེཏྭཱ ཨཀྑརསམཱུཧཾ གཧེཏྭཱ ཨེཀཱ མནོཝིཉྙཱཎཝཱིཐི ཨུཔྤཛྫིཏྭཱ ནིརུཛ྄ཛྷཏི. ཏདནནྟརཾ ‘‘ཨཡམཀྑརསམཱུཧོ ཨེཏསྶ ནཱམ’’ནྟི ནཱམཔཉྙཏྟིགྒཧཎཝསེན ཨཔརཱཡ མནོཝིཉྙཱཎཝཱིཐིཡཱ ཨུཔྤཛྫིཏྭཱ ནིརུདྡྷཱཡ ཏདནནྟརཾ ཨུཔྤནྣཱཡ མནོཝིཉྙཱཎཝཱིཐིཡཱ ‘‘ཨཡམེཏསྶ ཨཏྠོ’’ཏི པཀཏིཡཱ ཏདཏྠཝིཛཱནནཾ སམྦྷཝཏི.

ཨཱཝཛྫནསམཡེནཱཏི བྷུམྨཏྠེ ཀརཎཝཙནཾ, ཨཏྠཱབྷོགསམཡེཏི ཨཏྠོ. ཨིདཱནི ཏམེཝ ཨཱཝཛྫནསམཡཾ ཝིབྷཱཝེནྟོ ཨཱཧ – ‘‘ཡཐཱ པཀཏིཡཱ…པེ… ཛཱནནྟཱི’’ཏི. ཏེནེཝ ཝཙཱིབྷེདེན ཨདྷིཔྤཱཡཝིཉྙཱཔནསྶ ཨིདྷཱདྷིཔྤེཏཏྟཱ ཨཔརབྷཱགེ ‘‘ཀིཾ ཨིམིནཱ ཝུཏྟ’’ནྟི ཏཾ ཀངྑནྟསྶ ཙིརེན ཨདྷིཔྤཱཡཝིཛཱནནཾ ཨཉྙེནཔི ཀེནཙི ཨུཔཱཡནྟརེན སམྦྷཝཏི, ན ཀེཝལཾ ཝཙཱིབྷེདམཏྟེནཱཏི ཨཱཧ – ‘‘ཨཐ ཨཔརབྷཱགེ…པེ… ཨཔྤཙྩཀྑཱཏཱ ཧོཏི སིཀྑཱ’’ཏི. ‘‘གིཧཱི བྷཝིསྶཱམཱི’’ཏི ཝུཏྟེ ཨཏྠབྷེདོ ཀཱལབྷེདོ ཙ ཧོཏཱིཏི ཨཔྤཙྩཀྑཱཏཱ ཧོཏི སིཀྑཱ. ‘‘དྷཱརེཧཱི’’ཏི ཧི ཨིམསྶ ཡོ ཨཏྠོ ཀཱལོ ཙ, ན སོ ‘‘བྷཝིསྶཱམཱི’’ཏི ཨེཏསྶ. ‘‘གིཧཱི ¶ ཧོམཱི’’ཏི ཝུཏྟེ པན ཨཏྠབྷེདོཡེཝ, ན ཀཱལབྷེདོ ‘‘ཧོམཱི’’ཏི ཝཏྟམཱནཀཱལསྶེཝ ཝུཏྟཏྟཱ. ‘‘གིཧཱི ཛཱཏོམྷི, གིཧཱིམྷཱི’’ཏི ཨེཏྠཱཔི ཨཏྠསྶ ཙེཝ ཀཱལསྶ ཙ བྷིནྣཏྟཱ ཨཔྤཙྩཀྑཱཏཱ ཧོཏི སིཀྑཱ. ‘‘ཨཛྫ པཊྛཱཡཱ’’ཏི ཨིདཾ ཏཐཱ ཝུཏྟེཔི དོསབྷཱཝཏོ པརིཔུཎྞཾ ཀཏྭཱ ཝུཏྟཾ. ‘‘དྷཱརེཧཱི’’ཏི ཨཏྠཔྤདྷཱནཏྟཱ ནིདྡེསསྶ པརིཡཱཡཝཙནེཧིཔི སིཀྑཱཔཙྩཀྑཱནཾ ཧོཏིཡེཝཱཏི དསྶེནྟོ ཨཱཧ ‘‘ཛཱནཱཧཱི’’ཏིཨཱདི. དྷཱརེཧི ཛཱནཱཧི སཉྫཱནཱཧི མནསི ཀརོཧཱིཏི ཧི ཨེཏཱནི པདཱནི ཨཏྠཏོ ཀཱལཏོ ཙ ཨབྷིནྣཱནི.

༥༢. པུརིམཱནེཝ ཙུདྡསཱཏི བུདྡྷཱདིསབྲཧྨཙཱརཱིཔརིཡནྟཱནི. ཧོཏུ བྷཝཏཱུཏི ཨིདམྤི པཊིཀྑེཔམཏྟམེཝཱཏི ཨཱཧ ‘‘ཧོཏུ, པརིཡཏྟནྟི ཨཏྠོ’’ཏི.

༥༣. ཝཎྞཔཊྛཱནནྟི མཧཱསངྒྷིཀཱནཾ བུདྡྷགུཎཔརིདཱིཔཀཾ ཨེཀཾ སུཏྟནྟི ཝདནྟི. ཨུཔཱལིགཱཐཱསཱུཏི (མ. ནི. ༢.༧༦) –

‘‘དྷཱིརསྶ ¶ ཝིགཏམོཧསྶ,

པབྷིནྣཁཱིལསྶ ཝིཛིཏཝིཛཡསྶ;

ཨནཱིགྷསྶ སུསམཙིཏྟསྶ;

ཝུདྡྷསཱིལསྶ སཱདྷུཔཉྙསྶ;

ཝེསམནྟརསྶ ཝིམལསྶ;

བྷགཝཏོ ཏསྶ སཱཝཀོཧམསྨི.

‘‘ཨཀཐཾཀཐིསྶ ཏུསིཏསྶ;

ཝནྟལོཀཱམིསསྶ མུདིཏསྶ;

ཀཏསམཎསྶ མནུཛསྶ;

ཨནྟིམསཱརཱིརསྶ ནརསྶ;

ཨནོཔམསྶ ཝིརཛསྶ;

བྷགཝཏོ ཏསྶ སཱཝཀོཧམསྨི.

‘‘ཨསཾསཡསྶ ཀུསལསྶ;

ཝེནཡིཀསྶ སཱརཐིཝརསྶ;

ཨནུཏྟརསྶ ¶ རུཙིརདྷམྨསྶ;

ནིཀྐངྑསྶ པབྷཱསཀསྶ;

མཱནཙྪིདསྶ ཝཱིརསྶ;

བྷགཝཏོ ཏསྶ སཱཝཀོཧམསྨི.

‘‘ནིསབྷསྶ ཨཔྤམེཡྻསྶ;

གམྦྷཱིརསྶ མོནཔྤཏྟསྶ;

ཁེམངྐརསྶ ཝེདསྶ;

དྷམྨཊྛསྶ སཾཝུཏཏྟསྶ;

སངྒཱཏིགསྶ མུཏྟསྶ;

བྷགཝཏོ ཏསྶ སཱཝཀོཧམསྨི.

‘‘ནཱགསྶ པནྟསེནསྶ;

ཁཱིཎསཾཡོཛནསྶ མུཏྟསྶ;

པཊིམནྟཀསྶ དྷོནསྶ;

པནྣདྡྷཛསྶ ཝཱིཏརཱགསྶ;

དནྟསྶ ནིཔྤཔཉྩསྶ;

བྷགཝཏོ ཏསྶ སཱཝཀོཧམསྨི.

‘‘ཨིསིསཏྟམསྶ ¶ ཨཀུཧསྶ;

ཏེཝིཛྫསྶ བྲཧྨཔྤཏྟསྶ;

ནྷཱཏཀསྶ པདཀསྶ;

པསྶདྡྷསྶ ཝིདིཏཝེདསྶ;

པུརིནྡདསྶ སཀྐསྶ;

བྷགཝཏོ ཏསྶ སཱཝཀོཧམསྨི.

‘‘ཨརིཡསྶ བྷཱཝིཏཏྟསྶ;

པཏྟིཔྤཏྟསྶ ཝེཡྻཱཀརཎསྶ;

སཏིམཏོ ཝིཔསྶིསྶ;

ཨནབྷིནཏསྶ ནོ ཨཔནཏསྶ;

ཨནེཛསྶ ¶ ཝསིཔྤཏྟསྶ;

བྷགཝཏོ ཏསྶ སཱཝཀོཧམསྨི.

‘‘སམུགྒཏསྶ ཛྷཱཡིསྶ;

ཨནནུགཏནྟརསྶ སུདྡྷསྶ;

ཨསིཏསྶ ཧིཏསྶ;

པཝིཝིཏྟསྶ ཨགྒཔྤཏྟསྶ;

ཏིཎྞསྶ ཏཱརཡནྟསྶ;

བྷགཝཏོ ཏསྶ སཱཝཀོཧམསྨི.

‘‘སནྟསྶ བྷཱུརིཔཉྙསྶ;

མཧཱཔཉྙསྶ ཝཱིཏལོབྷསྶ;

ཏཐཱགཏསྶ སུགཏསྶ;

ཨཔྤཊིཔུགྒལསྶ ཨསམསྶ;

ཝིསཱརདསྶ ནིཔུཎསྶ;

བྷགཝཏོ ཏསྶ སཱཝཀོཧམསྨི.

‘‘ཏཎྷཙྪིདསྶ ¶ བུདྡྷསྶ;

ཝཱིཏདྷཱུམསྶ ཨནུཔལིཏྟསྶ;

ཨཱཧུནེཡྻསྶ ཡཀྑསྶ;

ཨུཏྟམཔུགྒལསྶ ཨཏུལསྶ;

མཧཏོ ཡསགྒཔྤཏྟསྶ;

བྷགཝཏོ ཏསྶ སཱཝཀོཧམསྨཱི’’ཏི. –

ཨེཝཾ ཨུཔཱལིགཧཔཏིནཱ ཝུཏྟཱསུ ཨུཔཱལིསུཏྟེ ཨཱགཏགཱཐཱསུ.

ཡཐཱརུཏམེཝཱཏི ཡཐཱཝུཏྟམེཝ, པཱལི༹ཡཾ ཨཱགཏམེཝཱཏི ཨདྷིཔྤཱཡོ. ཡསྨཱ ‘‘སམྨཱསམྦུདྡྷཾ ཨནནྟབུདྡྷིཾ ཨནོམབུདྡྷིཾ བོདྷིཔཉྙཱཎ’’ནྟི ཨིམཱནི ཝཎྞཔཊྛཱནེ ཨཱགཏནཱམཱནི, ‘‘དྷཱིར’’ནྟིཨཱདཱིནི པན ཨུཔཱལིགཱཐཱསུ ཨཱགཏནཱམཱནི. ཏཏྠ བོདྷི ཝུཙྩཏི སབྦཉྙུཏཉྙཱཎཾ, ཏཾ སཉྫཱནནཧེཏུཏྟཱ པཉྙཱཎཾ ཨེཏསྶཱཏི བོདྷིཔཉྙཱཎོ, བྷགཝཱ. དྷིཡཱ པཉྙཱཡ རཱཏི གཎྷཱཏི ¶ , སེཝཏཱིཏི ཝཱ དྷཱིརོ. སམུཙྪིནྣསབྦཙེཏོཁཱིལཏྟཱ པབྷིནྣཁཱིལོ. སབྦཔུཐུཛྫནེ ཝིཛིནིཾསུ ཝིཛཡནྟི ཝིཛིནིསྶནྟི ཙཱཏི ཝིཛཡཱ. ཀེ ཏེ? མཙྩུམཱརཀིལེསམཱརདེཝཔུཏྟམཱརཱ. ཏེ ཝིཛིཏཱ ཝིཛཡཱ ཨེཏེནཱཏི ཝིཛིཏཝིཛཡོ, བྷགཝཱ. ཀིལེསམཱརམཙྩུམཱརཝིཛཡེནེཝ པནེཏྠ ཨབྷིསངྑཱརཀྑནྡྷམཱརཱཔི ཝིཛིཏཱཝ ཧོནྟཱིཏི དཊྛབྦཾ.

སྭཱཀྑཱཏནྟིཨཱདཱིསུ (ཝིསུདྡྷི. ༡.༡༤༧) སཱཏྠསབྱཉྫནཀེཝལཔརིཔུཎྞཔརིསུདྡྷབྲཧྨཙརིཡསྶ པཀཱསནཏོ སྭཱཀྑཱཏོ དྷམྨོ, ཨཏྠཝིཔལླཱསཱབྷཱཝཏོ ཝཱ སུཊྛུ ཨཀྑཱཏོཏི སྭཱཀྑཱཏོ. ཡཐཱ ཧི ཨཉྙཏིཏྠིཡཱནཾ དྷམྨསྶ ཨཏྠོ ཝིཔལླཱསཾ ཨཱཔཛྫཏི ‘‘ཨནྟརཱཡིཀཱ’’ཏི ཝུཏྟདྷམྨཱནཾ ཨནྟརཱཡིཀཏྟཱབྷཱཝཏོ, ‘‘ནིཡྻཱནིཀཱ’’ཏི ཙ ཝུཏྟདྷམྨཱནཾ ནིཡྻཱནིཀཏྟཱབྷཱཝཏོ, ཏེན ཏེ ཨཉྙཏིཏྠིཡཱ དུརཀྑཱཏདྷམྨཱཡེཝ ཧོནྟི, ན ཏཐཱ བྷགཝཏོ དྷམྨསྶ ཨཏྠོ ཝིཔལླཱསཾ ཨཱཔཛྫཏི ‘‘ཨིམེ དྷམྨཱ ཨནྟརཱཡིཀཱ ནིཡྻཱནིཀཱ’’ཏི ཨེཝཾ ཝུཏྟདྷམྨཱནཾ ཏཐཱབྷཱཝཱནཏིཀྐམནཏོཏི. ཨེཝཾ ཏཱཝ པརིཡཏྟིདྷམྨོ སྭཱཀྑཱཏོ དྷམྨོ.

ལོཀུཏྟརདྷམྨོ པན ནིབྦཱནཱནུརཱུཔཱཡ པཊིཔཏྟིཡཱ པཊིཔདཱནུརཱུཔསྶ ཙ ནིབྦཱནསྶ ཨཀྑཱཏཏྟཱ སྭཱཀྑཱཏོ. ཡཐཱཧ –

‘‘སུཔཉྙཏྟཱ ¶ ཁོ པན ཏེན བྷགཝཏཱ སཱཝཀཱནཾ ནིབྦཱནགཱམིནཱི པཊིཔདཱ སཾསནྡཏི ནིབྦཱནཉྩ པཊིཔདཱ ཙ. སེཡྻཐཱཔི ནཱམ གངྒོདཀཾ ཡམུནོདཀེན སཾསནྡཏི སམེཏི, ཨེཝམེཝ སུཔཉྙཏྟཱ ཏེན བྷགཝཏཱ སཱཝཀཱནཾ ནིབྦཱནགཱམིནཱི པཊིཔདཱ སཾསནྡཏི ནིབྦཱནཉྩ པཊིཔདཱ ཙཱ’’ཏི (དཱི. ནི. ༢.༢༩༦).

ཨརིཡམགྒོ ཙེཏྠ ཨནྟདྭཡཾ ཨནུཔགམྨ མཛ྄ཛྷིམཱཔཊིཔདཱབྷཱུཏོཝ ‘‘མཛ྄ཛྷིམཱ པཊིཔདཱ’’ཏི ཨཀྑཱཏཏྟཱ སྭཱཀྑཱཏོ. སཱམཉྙཕལཱནི པཊིཔྤསྶདྡྷཀིལེསཱནེཝ ‘‘པཊིཔྤསྶདྡྷཀིལེསཱནཱི’’ཏི ཨཀྑཱཏཏྟཱ སྭཱཀྑཱཏཱནི. ནིབྦཱནཾ སསྶཏཱམཏཏཱཎལེཎཱདིསབྷཱཝམེཝ སསྶཏཱདིསབྷཱཝཝསེན ཨཀྑཱཏཏྟཱ སྭཱཀྑཱཏནྟི ཨེཝཾ ལོཀུཏྟརདྷམྨོཔི སྭཱཀྑཱཏོ.

ཨརིཡམགྒོ ཨཏྟནོ སནྟཱནེ རཱགཱདཱིནཾ ཨབྷཱཝཾ ཀརོནྟེན ཨརིཡཔུགྒལེན སཱམཾ དཊྛབྦོ ‘‘ཨརིཡམགྒེན མམ རཱགཱདཡོ པཧཱིནཱ’’ཏི སཡཾ ཨཏྟནཱ ཨནཉྙནེཡྻེན པསྶིཏབྦོཏི སནྡིཊྛི, སནྡིཊྛི ཨེཝ སནྡིཊྛིཀོ. ཨཔིཙ ནཝཝིདྷོ ལོཀུཏྟརདྷམྨོ ཡེན ཡེན ཨདྷིགཏོ ཧོཏི, ཏེན ཏེན ཨརིཡསཱཝཀེན པརསདྡྷཱཡ གནྟབྦཏཾ ཧིཏྭཱ པཙྩཀྑཉཱཎེན སཡཾ དཊྛབྦོཏི སནྡིཊྛིཀོ. ཨཐ ཝཱ པསཏྠཱ དིཊྛི སནྡིཊྛི, སནྡིཊྛིཡཱ ཛཡཏཱིཏི སནྡིཊྛིཀོ. ཏཐཱ ཧེཏྠ ཨརིཡམགྒོ སམྤཡུཏྟཱཡ, ཨརིཡཕལཾ ཀཱརཎབྷཱུཏཱཡ, ནིབྦཱནཾ ཝིསཡིབྷཱུཏཱཡ སནྡིཊྛིཡཱ ཀིལེསེ ཛཡཏི, ཏསྨཱ ཡཐཱ རཐེན ཛཡཏཱིཏི རཐིཀོ, ཨེཝཾ ནཝཝིདྷོཔི ལོཀུཏྟརདྷམྨོ སནྡིཊྛིཡཱ ཛཡཏཱིཏི ¶ སནྡིཊྛིཀོ. ཨཐ ཝཱ དིཊྛནྟི དསྶནཾ ཝུཙྩཏི, དིཊྛམེཝ སནྡིཊྛཾ, སནྡསྶནནྟི ཨཏྠོ. སནྡིཊྛཾ ཨརཧཏཱིཏི སནྡིཊྛིཀོ. ལོཀུཏྟརདྷམྨོ ཧི བྷཱཝནཱབྷིསམཡཝསེན སཙྪིཀིརིཡཱབྷིསམཡཝསེན ཙ དིསྶམཱནོཡེཝ ཝཊྚབྷཡཾ ནིཝཏྟེཏི, ཏསྨཱ ཡཐཱ ཝཏྠམརཧཏཱིཏི ཝཏྠིཀོ, ཨེཝཾ སནྡིཊྛཾ ཨརཧཏཱིཏི སནྡིཊྛིཀོ.

ཨཏྟནོ ཕལདཱནཾ སནྡྷཱཡ ནཱསྶ ཨཱགམེཏབྦོ ཀཱལོ ཨཏྠཱིཏི ཨཀཱལོ. ཡཐཱ ཧི ལོཀིཡཀུསལསྶ ཨུཔཔཛྫཨཔརཱཔརིཡཱཡེཏིཨཱདིནཱ ཕལདཱནཾ པཏི ཨཱགམེཏབྦོ ཀཱལོ ཨཏྠི, ན ཨེཝམེཏསྶཱཏི ཨཏྠོ. ཨཀཱལོཡེཝ ཨཀཱལིཀོ, ན པཉྩཱཧསཏྟཱཧཱདིབྷེདཾ ཀཱལཾ ཁེཔེཏྭཱ ཕལཾ དེཏི, ཨཏྟནོ པན པཝཏྟིསམནནྟརམེཝ ཕལདོཏི ¶ ཝུཏྟཾ ཧོཏི. ཨཐ ཝཱ ཨཏྟནོ ཕལཔྤདཱནེ ཝིཔྤཀཊྛོ དཱུརོ ཀཱལོ པཏྟོ ཨུཔནཱིཏོ ཨསྶཱཏི ཀཱལིཀོ, ཀཱལནྟརཕལདཱཡཱི. ཀོ སོ? ལོཀིཡོ ཀུསལདྷམྨོ. ཨཡཾ པན སམནནྟརཕལདཱཡཀཏྟཱ ན ཀཱལིཀོཏི ཨཀཱལིཀོ. མགྒམེཝ ཧི སནྡྷཱཡ ‘‘ཨཀཱལིཀོ’’ཏི ཨིདཾ ཝུཏྟཾ.

‘‘ཨེཧི པསྶ ཨིམཾ དྷམྨ’’ནྟི ཨེཝཾ པཝཏྟཾ ཨེཧིཔསྶཝིདྷིཾ ཨརཧཏཱིཏི ཨེཧིཔསྶིཀོ. ཀསྨཱ པནེས ཏཾ ཝིདྷིཾ ཨརཧཏཱིཏི? པརམཏྠཏོ ཝིཛྫམཱནཏྟཱ པརིསུདྡྷཏྟཱ ཙ. རིཏྟམུཊྛིཡཉྷི ཧིརཉྙཾ ཝཱ སུཝཎྞཾ ཝཱ ཨཏྠཱིཏི ཝཏྭཱཔི ‘‘ཨེཧི པསྶ ཨིམ’’ནྟི ན སཀྐཱ ཝཏྟུཾ. ཀསྨཱ? ཨཝིཛྫམཱནཏྟཱ. ཝིཛྫམཱནམྤི ཙ གཱུཐཾ ཝཱ མུཏྟཾ ཝཱ མནུཉྙབྷཱཝཔྤཀཱསནེན ཙིཏྟསམྤཧཾསནཏྠཾ ‘‘ཨེཧི པསྶ ཨིམ’’ནྟི ན སཀྐཱ ཝཏྟུཾ, ཨཔིཙ ཁོ ནཾ ཏིཎེཧི ཝཱ པཎྞེཧི ཝཱ པཊིཙྪཱདེཏབྦམེཝ ཧོཏི. ཀསྨཱ? ཨཔརིསུདྡྷཏྟཱ. ཨཡཾ པན ནཝཝིདྷོཔི ལོཀུཏྟརདྷམྨོ སབྷཱཝཏོ ཙ ཝིཛྫམཱནོ ཝིགཏཝལཱཧཀེ ཙ ཨཱཀཱསེ སམྤུཎྞཙནྡམཎྜལཾ ཝིཡ པཎྜུཀམྦལེ ནིཀྑིཏྟཛཱཏིམཎི ཝིཡ ཙ པརིསུདྡྷོ, ཏསྨཱ ཝིཛྫམཱནཏྟཱ པརིསུདྡྷཏྟཱ ཙ ཨེཧིཔསྶཝིདྷིཾ ཨརཧཏཱིཏི ཨེཧིཔསྶིཀོ.

ཨུཔནེཏབྦོཏི ཨོཔནེཡྻིཀོ. ཨཡཾ པནེཏྠ ཝིནིཙྪཡོ – ཨུཔནཡནཾ ཨུཔནཡོ, ཨཱདིཏྟཾ ཙེལཾ ཝཱ སཱིསཾ ཝཱ ཨཛ྄ཛྷུཔེཀྑིཏྭཱཔི བྷཱཝནཱཝསེན ཨཏྟནོ ཙིཏྟེ ཨུཔནཡནཾ ཨུཔྤཱདནཾ ཨརཧཏཱིཏི ཨོཔནེཡྻིཀོ. ཨིདཾ སངྑཏེ ལོཀུཏྟརདྷམྨེ ཡུཛྫཏི, ཨསངྑཏོ པན ཨཏྟནོ ཙིཏྟེ ཨཱརམྨཎབྷཱཝེན ཨུཔནཡནཾ ཨརཧཏཱིཏི ཨོཔནེཡྻིཀོ, སཙྪིཀིརིཡཱཝསེན ཨལླཱིཡནཾ ཨརཧཏཱིཏི ཨཏྠོ ¶ . ཨཐ ཝཱ ནིབྦཱནཾ ཨུཔནེཏི ཨརིཡཔུགྒལནྟི ཨརིཡམགྒོ ཨུཔནེཡྻོ, སཙྪིཀཱཏབྦཏཾ ཨུཔནེཏབྦོཏི ཕལནིབྦཱནདྷམྨོ ཨུཔནེཡྻོ, ཨུཔནེཡྻོ ཨེཝ ཨོཔནེཡྻིཀོ.

སབྦེཧི ཨུགྒྷཊིཏཉྙཱུཨཱདཱིཧི ཝིཉྙཱུཧི ‘‘བྷཱཝིཏོ མེ མགྒོ, ཨདྷིགཏཾ ཕལཾ, སཙྪིཀཏོ ནིརོདྷོ’’ཏི ཨཏྟནི ཨཏྟནི ཝེདིཏབྦོཏི པཙྩཏྟཾ ཝེདིཏབྦོ ཝིཉྙཱུཧི. ན ཧི ཨུཔཛ྄ཛྷཱཡེན བྷཱཝིཏེན མགྒེན སདྡྷིཝིཧཱརིཀསྶ ཀིལེསཱ པཧཱིཡནྟི, ན སོ ཏསྶ ཕལསམཱཔཏྟིཡཱ ཕཱསུ ཝིཧརཏི, ན ཏེན སཙྪིཀཏཾ ནིབྦཱནཾ སཙྪིཀརོཏི, ཏསྨཱ ན ཨེས པརསྶ སཱིསེ ཨཱབྷརཎཾ ཝིཡ དཊྛབྦོ, ཨཏྟནོ པན ཙིཏྟེཡེཝ དཊྛབྦོ, ཨནུབྷཝིཏབྦོ ཝིཉྙཱུཧཱིཏི ཝུཏྟཾ ཧོཏི.

ཨསངྑཏནྟི ¶ སངྒམྨ སམཱགམྨ པཙྩཡསམོདྷཱནལཀྑཎེན སངྒམེན སནྣིཔཏིཏྭཱ ཨནུརཱུཔེཧི པཙྩཡེཧི ཨཀཏཾ ཨནིབྦཏྟིཏནྟི ཨསངྑཏཾ. ནཏྠི ཨེཏྠ མཏནྟི ཨམཏཾ, ཨེཏསྨིཾ ཝཱ ཨདྷིགཏེ ནཏྠི པུགྒལསྶ མཏཾ མརཎནྟི ཨམཏཾ. ཀིཉྩཱཔི ཨེཏྠ ‘‘སྭཱཀྑཱཏཾ དྷམྨཾ པཙྩཀྑཱམཱི’’ཏིཨཱདིནཱ སབྦཏྠ དྷམྨ-སདྡཔྤཡོགོ དསྶིཏོ, ཏཐཱཔི དྷམྨ-སདྡེན ཨཡོཛེཏྭཱ ཝུཏྟེ ཝེཝཙནེ ན པཙྩཀྑཱནཾ ནཱམ ན ཧོཏཱིཏི ‘‘སྭཱཀྑཱཏཾ པཙྩཀྑཱམཱི’’ཏིཨཱདིནཱ ཝུཏྟེཔི སིཀྑཱཔཙྩཀྑཱནཾ ཧོཏིཡེཝཱཏི དཊྛབྦཾ. ‘‘སྭཱཀྑཱཏཾ དྷམྨ’’ནྟིཨཱདིནཱ པན དྷམྨ-སདྡཔྤཡོགོ སྭཱཀྑཱཏཱ-དིསདྡཱནཾ དྷམྨ-ཝིསེསནབྷཱཝདསྶནཏྠཾ ཀཏོཏི ཝེདིཏབྦཾ. ཨེཀདྷམྨཀྑནྡྷསྶཔི ནཱམནྟི ཨེཏྠ ‘‘པཋམདྷམྨཀྑནྡྷཾ དུཏིཡདྷམྨཀྑནྡྷཾ པུཙྪཱདྷམྨཀྑནྡྷཾ ཝིསྶཛྫནཱདྷམྨཀྑནྡྷ’’ནྟིཨཱདིནཱ དྷམྨཀྑནྡྷནཱམཱནི ཝེདིཏབྦཱནི.

སུཔྤཊིཔནྣནྟི སྭཱཀྑཱཏེ དྷམྨཝིནཡེ ཡཐཱནུསིཊྛཾ པཊིཔནྣཏྟཱ སུཔྤཊིཔནྣཾ. མཛ྄ཛྷིམཱཡ པཊིཔདཱཡ ཨནྟདྭཡཾ ཨནུཔགམྨ པཊིཔནྣཏྟཱ ཀཱཡཝཙཱིམནོཝངྐཀུཊིལཛིམྷདོསཔྤཧཱནཱཡ པཊིཔནྣཏྟཱ ཙ ཨུཛུཔྤཊིཔནྣཾ. ཉཱཡོ ཝུཙྩཏི ནིབྦཱནཾ ཨརིཡམགྒཱདཱིཧི ཉཱཡཏི པཊིཝིཛ྄ཛྷཱིཡཏི སཙྪིཀརཱིཡཏཱིཏི ཀཏྭཱ, ཏདཏྠཱཡ པཊིཔནྣཏྟཱ ཉཱཡཔྤཊིཔནྣཾ. ཡཐཱ པཊིཔནྣཱ གུཎསམྦྷཱཝནཱཡ པརེཧི ཀརིཡམཱནཾ པཙྩུཊྛཱནཱདིསཱམཱིཙིཀམྨཾ ཨརཧནྟི, ཏཐཱ པཊིཔནྣཏྟཱ སཱམཱིཙིཔྤཊིཔནྣཾ.

ཡུགལ༹ཝསེན པཋམམགྒཊྛོ ཕལཊྛོཏི ཨིདམེཀཾ ཡུགལ༹ནྟི ཨེཝཾ ཙཏྟཱརི པུརིསཡུགཱནི ཧོནྟི. ཨེཏྠ པན ‘‘ཙཏུཔུརིསཡུགཾ སངྒྷ’’ནྟི ཝཏྟབྦེ ‘‘ཙཏྟཱརཱི’’ཏི ཝིབྷཏྟིལོཔཾ ཨཀཏྭཱ ནིདྡེསོ ཀཏོཏི དཊྛབྦཾ. ཙཏྟཱརི པུརིསཡུགཱནི ཨེཏྠཱཏི ཙཏུཔུརིསཡུགོཏི ཧི སངྒྷོ ཝུཙྩཏི. ཨཊྛཔུརིསཔུགྒལནྟི ¶ པུརིསཔུགྒལཝསེན ཨེཀོ པཋམམགྒཊྛོ, ཨེཀོ ཕལཊྛོཏི ཨིམིནཱ ནཡེན ཨཊྛེཝ པུརིསཔུགྒལཱ ཧོནྟི. ཨཊྛ པུརིསཔུགྒལཱ ཨེཏྠཱཏི ཨཊྛཔུརིསཔུགྒལོ, སངྒྷོ. ཨེཏྠ ཙ པུརིསོཏི ཝཱ པུགྒལོཏི ཝཱ ཨེཀཏྠཱནེཏཱནི པདཱནི, ཝེནེཡྻཝསེན པནེཏཾ ཝུཏྟཾ.

ཨཱཧུནེཡྻནྟིཨཱདཱིསུ (ཝིསུདྡྷི. ༡.༡༥༦) ཨཱནེཏྭཱ ཧུནིཏབྦནྟི ཨཱཧུནཾ, དཱུརཏོཔི ཨཱནེཏྭཱ སཱིལཝནྟེསུ དཱཏབྦཱནཾ ཙཏུནྣཾ པཙྩཡཱནམེཏཾ ཨདྷིཝཙནཾ. ཏཾ ཨཱཧུནཾ པཊིགྒཧེཏུཾ ཡུཏྟོ ཏསྶ མཧཔྥལབྷཱཝཀརཎཏོཏི ཨཱཧུནེཡྻོ, སངྒྷོ. ཨཐ ཝཱ དཱུརཏོཔི ཨཱགནྟྭཱ སབྦསཱཔཏེཡྻམྤི ཨེཏྠ ཧུནིཏབྦནྟི ¶ ཨཱཧཝནཱིཡོ, སཀྐཱདཱིནམྤི ཝཱ ཨཱཧཝནཾ ཨརཧཏཱིཏི ཨཱཧཝནཱིཡོ. ཡོ ཙཱཡཾ བྲཱཧྨཎཱནཾ ཨཱཧཝནཱིཡོ ཨགྒི, ཡཏྠ ཧུཏཾ མཧཔྥལནྟི ཏེསཾ ལདྡྷི. སཙེ ཧུཏསྶ མཧཔྥལཏཱཡ ཨཱཧཝནཱིཡོ, སངྒྷོཝ ཨཱཧཝནཱིཡོ. སངྒྷེ ཧུཏཉྷི མཧཔྥལཾ ཧོཏི. ཡཐཱཧ –

‘‘ཡོ ཙ ཝསྶསཏཾ ཛནྟུ, ཨགྒིཾ པརིཙརེ ཝནེ;

ཨེཀཉྩ བྷཱཝིཏཏྟཱནཾ, མུཧུཏྟམཔི པཱུཛཡེ;

སཱཡེཝ པཱུཛནཱ སེཡྻོ, ཡཉྩེ ཝསྶསཏཾ ཧུཏ’’ནྟི. (དྷ. པ. ༡༠༧);

ཏདེཏཾ ནིཀཱཡནྟརེ ‘‘ཨཱཧཝནཱིཡོ’’ཏི པདཾ ཨིདྷ ‘‘ཨཱཧུནེཡྻོ’’ཏི ཨིམིནཱ པདེན ཨཏྠཏོ ཨེཀཾ, བྱཉྫནཏོ པནེཏྠ ཀིཉྩིམཏྟམེཝ ནཱནཾ.

པཱཧུནེཡྻནྟི ཨེཏྠ པན པཱཧུནཾ ཝུཙྩཏི དིསཱཝིདིསཏོ ཨཱགཏཱནཾ པིཡམནཱཔཱནཾ ཉཱཏིམིཏྟཱནཾ ཨཏྠཱཡ སཀྐཱརེན པཊིཡཏྟཾ ཨཱགནྟུཀདཱནཾ. ཏམྤི ཋཔེཏྭཱ ཏེ ཏཐཱརཱུཔེ པིཡམིཏྟཱདིཀེ པཱཧུནཀེ སངྒྷསྶེཝ དཱཏུཾ ཡུཏྟཾ, སངྒྷོཝ ཏཾ པཊིགྒཧེཏུཾ ཡུཏྟོ. སངྒྷསདིསོ ཧི པཱཧུནཀོ ནཏྠི. ཏཐཱ ཧེས ཨེཀབུདྡྷནྟརེ ཝཱིཏིཝཏྟེཡེཝ དིསྶཏི, ཨབྦོཀིཎྞཉྩ པིཡམནཱཔཏྟཀརེཧི སཱིལཱདིདྷམྨེཧི སམནྣཱགཏོཏི ཨེཝཾ པཱཧུནམསྶ དཱཏུཾ ཡུཏྟཾ, པཱཧུནཉྩ པཊིགྒཧེཏུཾ ཡུཏྟོཏི པཱཧུནེཡྻོ.

དཀྑནྟི ཨེཏཱཡ སཏྟཱ ཡཐཱདྷིཔྤེཏཱཧི སམྤཏྟཱིཧི ཝཌྜྷནྟཱིཏི དཀྑིཎཱ, པརལོཀཾ སདྡཧིཏྭཱ དཱཏབྦདཱནཾ. ཏཾ དཀྑིཎཾ ཨརཧཏི, དཀྑིཎཱཡ ཝཱ ཧིཏོ ཡསྨཱ ནཾ མཧཔྥལཀརཏཱཡ ཝིསོདྷེཏཱིཏི དཀྑིཎེཡྻོ. ཨུབྷོ ཧཏྠེ སིརསི པཏིཊྛཱཔེཏྭཱ སབྦལོཀེན ཀརིཡམཱནཾ ཨཉྫལིཀམྨཾ ཨརཧཏཱིཏི ཨཉྫལིཀརཎཱིཡོ. ཨནུཏྟརཾ པུཉྙཀྑེཏྟནྟི སབྦལོཀསྶ ཨསདིསཾ པུཉྙཝིརུཧནཊྛཱནཾ ¶ . ཡཐཱ ཧི རཉྙོ ཝཱ ཨམཙྩསྶ ཝཱ སཱལཱིནཾ ཝཱ ཡཝཱནཾ ཝཱ ཝིརུཧནཊྛཱནཾ རཉྙོ སཱལིཀྑེཏྟཾ ཡཝཀྑེཏྟནྟི ཝུཙྩཏི, ཨེཝཾ སངྒྷོ སབྦལོཀསྶ པུཉྙཱནཾ ཝིརུཧནཊྛཱནཾ. སངྒྷཾ ནིསྶཱཡ ཧི ལོཀསྶ ནཱནཔྤཀཱརཧིཏསུཁསཾཝཏྟནིཀཱནི པུཉྙཱནི ཝིརུཧནྟི, ཏསྨཱ སངྒྷོ ཨནུཏྟརཾ པུཉྙཀྑེཏྟཾ ལོཀསྶ. ཨེཏྠཱཔི ‘‘སུཔྤཊིཔནྣཾ སངྒྷ’’ནྟིཨཱདིནཱ སབྦཏྠ སངྒྷ-སདྡཔྤཡོགོ སུཔྤཊིཔནྣཱ-དིསདྡཱནཾ སངྒྷཝིསེསནབྷཱཝདསྶནཏྠཾ ཀཏོ, ཏསྨཱ ‘‘སུཔྤཊིཔནྣཾ པཙྩཀྑཱམཱི’’ཏིཨཱདིནཱ ཝུཏྟེཔི སིཀྑཱཔཙྩཀྑཱནཾ ཧོཏིཡེཝཱཏི དཊྛབྦཾ.

སིཀྑཱཝེཝཙནེསུ ¶ པན སིཀྑཱ-སདྡཾ ཝིནཱ ཀེཝལཾ བྷིཀྑུ-སདྡོ བྷིཀྑུནཱི-སདྡོ ཙ སིཀྑཱཡ ཨདྷིཝཙནཾ ན ཧོཏཱིཏི ‘‘བྷིཀྑུསིཀྑཾ བྷིཀྑུནཱིསིཀྑ’’ནྟི ཝུཏྟེཡེཝ སཱིསཾ ཨེཏི, ཨདྷིསཱིལཱདཡོ པན སིཀྑཱ ཨེཝཱཏི ‘‘ཨདྷིསཱིལཾ པཙྩཀྑཱམཱི’’ཏིཨཱདིནཱ ཝུཏྟེཔི སཱིསཾ ཨེཏི. པཋམཾ པཱརཱཛིཀནྟིཨཱདིནཱ སིཀྑཱཔདཱནཾཡེཝ གཧཎཾ ཝེདིཏབྦཾ, ན ཨཱཔཏྟཱིནཾ.

ཨུཔཛ྄ཛྷཱཡཝེཝཙནེསུ ཨུཔཛ྄ཛྷཱཡོ ཧུཏྭཱ ཡོ པབྦཱཛེསི ཙེཝ ཨུཔསམྤཱདེསི ཙ, ཏཾ སནྡྷཱཡ ‘‘ཡོ མཾ པབྦཱཛེསཱི’’ཏིཨཱདི ཝུཏྟཾ. ཡསྶ མཱུལེནཱཏི ཡསྶ པདྷཱནབྷཱཝེན ཀཱརཎབྷཱཝེན ཝཱ. ཡསྶ མཱུལཾ པདྷཱནབྷཱཝོ ཀཱརཎབྷཱཝོ ཝཱ ཨེཏིསྶཱཏི ཡསྶམཱུལིཀཱ, པབྦཛྫཱ ཨུཔསམྤདཱ ཙ. མཱུལ-སདྡསྶ སཱཔེཀྑབྷཱཝེཔི ནིཙྩསཱཔེཀྑཏཱཡ གམཀཏྟཱ ཏདྡྷིཏཝུཏྟི དཊྛབྦཱ.

ཨཱཙརིཡཝེཝཙནེསུ པན ཡོ ཨུཔཛ྄ཛྷཾ ཨདཏྭཱ ཨཱཙརིཡོཝ ཧུཏྭཱ པབྦཱཛེསི, ཀམྨཝཱཙཱཙརིཡོ ཧུཏྭཱ ཨུཔསམྤཱདེསི ཙ, ཏཾ སནྡྷཱཡ ‘‘ཡོ མཾ པབྦཱཛེསི, ཡོ མཾ ཨནུསཱཝེསཱི’’ཏི ཝུཏྟཾ. ཨིམེཧི དྭཱིཧི ཝཙནེཧི པབྦཛྫཱཙརིཡོ ཙ ཨུཔསམྤདཱཙརིཡོ ཙ དསྶིཏོ. ཡཱཧཾ ནིསྶཱཡ ཝསཱམཱིཏི ནིསྶཡཱཙརིཡཾ དསྶེཏི. ཡཱཧཾ ཨུདྡིསཱཔེམཱིཏིཨཱདིནཱ པན དྷམྨཱཙརིཡོ ཝུཏྟོ. ཏཏྠ ཨུདྡིསཱཔེམཱིཏི པཱཋཾ ཨུདྡིསཱཔེམི. པརིཔུཙྪཱམཱིཏི ཨུགྒཧིཏཔཱཋསྶ ཨཏྠཾ པརིཔུཙྪཱམི. སདྡྷིཝིཧཱརིཀཝེཝཙནཱདཱིསུ ཙ ཝུཏྟཱནུསཱརེནེཝ ཨཏྠོ ཝེདིཏབྦོ. ཏསྶ མཱུལེཏི ཨེཏྠ པན ཏསྶ སནྟིཀེཏི ཨཏྠོ དཊྛབྦོ.

ཨོཀལླཀོཏི ཁུཔྤིཔཱསཱདིདུཀྑཔརེཏཱནཾ ཁཱིཎསུཁཱནཾ ནཧཱནཱདིསརཱིརཔཊིཛགྒནརཧིཏཱནཾ ཀཔཎམནུསྶཱནམེཏཾ ཨདྷིཝཙནཾ. མོལི༹བདྡྷོཏི སིཁཱབདྡྷོ ཨོམུཀྐམཀུཊོ ཝཱ. ཀིཉྩཱཔི དྭེཝཱཙིཀོ ཨུཔཱསཀོ པཋམབོདྷིཡཾཡེཝ སམྦྷཝཏི, ཏཐཱཔི ཏདཱ ལབྦྷམཱནནཱམཾ གཧེཏྭཱ ཝུཏྟེཔི སིཀྑཱཔཙྩཀྑཱནཾ ཧོཏིཡེཝཱཏི དསྶནཏྠཾ ‘‘དྭེཝཱཙིཀོ ཨུཔཱསཀོ’’ཏི ཝུཏྟཾ. ‘‘དྭེཝཱཙིཀོ’’ཏི ཨིདམེཝ ¶ པནེཏྠ ཝེཝཙནནྟི དཊྛབྦཾ, ཏསྨཱ ‘‘དྭེཝཱཙིཀོཏི མཾ དྷཱརེཧཱི’’ཏི ཨེཏྟཀེཔི ཝུཏྟེ སཱིསཾ ཨེཏི. ཨེཝཾ སེསེསུཔི.

ཀུམཱརཀོཏི ¶ ཀུམཱརཱཝཏྠོ ཨཏིཝིཡ དཧརསཱམཎེརོ. ཙེལླཀོཏི ཏཏོ མཧནྟཏརོ ཁུདྡཀསཱམཎེརོ. ཙེཊཀོཏི མཛ྄ཛྷིམོ. མོལི༹གལློཏི མཧཱསཱམཎེརོ. སམཎུདྡེསོཏི པན ཨཝིསེསཏོ སཱམཎེརཱདྷིཝཙནཾ. ནིགཎྛུཔཊྛཱཀོཏིཨཱདཱིནིཔི ཏིཏྠིཡསཱཝཀཝེཝཙནཱནཱིཏི དཊྛབྦཾ.

དུསྶཱིལོཏི ནིསྶཱིལོ སཱིལཝིརཧིཏོ. པཱཔདྷམྨོཏི དུསྶཱིལཏྟཱ ཨེཝ ཧཱིནཛ྄ཛྷཱསཡཏཱཡ ལཱམཀསབྷཱཝོ. ཨསུཙིསངྐསྶརསམཱཙཱརོཏི ཨཔརིསུདྡྷཀཱཡཀམྨཱདིཏཱཡ ཨསུཙི ཧུཏྭཱ སངྐཱཡ སརིཏབྦསམཱཙཱརོ. དུསྶཱིལོ ཧི ཀིཉྩིདེཝ ཨསཱརུཔྤཾ དིསྭཱ ‘‘ཨིདཾ ཨསུཀེན ཀཏཾ བྷཝིསྶཏཱི’’ཏི པརེསཾ ཨཱསངྐནཱིཡོ ཧོཏི. ཀེནཙིདེཝ ཀརཎཱིཡེན མནྟཡནྟེ བྷིཀྑཱུ དིསྭཱ ‘‘ཀཙྩི ནུ ཁོ ཨིམེ མཡཱ ཀཏཀམྨཾ ཛཱནིཏྭཱ མནྟེནྟཱི’’ཏི ཨཏྟནོཡེཝ སངྐཱཡ སརིཏབྦསམཱཙཱརོ. པཊིཙྪནྣཀམྨནྟོཏི ལཛྫིཏབྦཏཱཡ པཊིཙྪཱདེཏབྦཀམྨནྟོ. ཨསྶམཎོཏི ན སམཎོ. སལཱཀགྒཧཎཱདཱིསུ ‘‘ཨཧམྤི སམཎོ’’ཏི མིཙྪཱཔཊིཉྙཱཡ སམཎཔཊིཉྙོ, ཨསེཊྛཙཱརིཏཱཡ ཨབྲཧྨཙཱརཱི, ཨུཔོསཐཱདཱིསུ ‘‘ཨཧམྤི བྲཧྨཙཱརཱི’’ཏི མིཙྪཱཔཊིཉྙཱཡ བྲཧྨཙཱརིཔཊིཉྙོ, པཱུཏིནཱ ཀམྨེན སཱིལཝིཔཏྟིཡཱ ཨནྟོ ཨནུཔཝིཊྛཏྟཱ ཨནྟོཔཱུཏི, ཚཧི དྭཱརེཧི རཱགཱདིཀིལེསཱནུསྶཝནེན ཏིནྟཏྟཱ ཨཝསྶུཏོ, སཉྫཱཏརཱགཱདིཀཙཝརཏྟཱ སཱིལཝནྟེཧི ཚཌྜེཏབྦཏྟཱ ཙ ཀསམྦུཛཱཏོ. ཀོཎྛོཏི དུསྶཱིལཱདྷིཝཙནམེཏཾ.

‘‘ཡཱནི ཝཱ པནཉྙཱནིཔི ཨཏྠི བུདྡྷཝེཝཙནཱནི ཝཱ’’ཏིཨཱདིནཱ ཡཾ-སདྡཔརཱམཊྛཱནཾ བུདྡྷཱདིཝེཝཙནཱནཾཡེཝ ཏཾ-སདྡེན པརཱམསནཾ ཧོཏཱིཏི ཨཱཧ – ‘‘ཏེཧི ཨཱཀཱརེཧི…པེ… བུདྡྷཱདཱིནཾ ཝེཝཙནེཧཱི’’ཏི. ཀཐཾ པན ཏཱནི ཨཱཀཱརཱདིསདྡེཧི ཝོཧརཱིཡནྟཱིཏི ཨཱཧ ‘‘ཝེཝཙནཱནི ཧཱི’’ཏིཨཱདི. སཎྛཱནཝནྟཱནཾ བུདྡྷཱདཱིནཾ སཎྛཱནདཱིཔནཾ ཏཱཝ ཧོཏུ, སཎྛཱནརཧིཏཱནཾ པན དྷམྨསིཀྑཱདཱིནཾ ཀཐནྟི ཨཱཧ ‘‘སིཀྑཱཔཙྩཀྑཱནསཎྛཱནཏྟཱ ཨེཝ ཝཱ’’ཏི. སིཀྑཱཔཙྩཀྑཱནརཱུཔཱནི ཧི ཝེཝཙནཱནི ‘‘སིཀྑཱཔཙྩཀྑཱནསཎྛཱནཱནཱི’’ཏི ཝུཙྩནྟི. ཨེཝཾ ཁོཏི ཨེཏྠ ཁོཏི ཨཝདྷཱརཎཏྠེ ནིཔཱཏོཏི ཨཱཧ ‘‘ཨེཝམེཝཱ’’ཏི.

༥༤. མུཙྪཱཔརེཏོཏི ¶ མུཙྪཱཡ ཨབྷིབྷཱུཏོ. ཝཙནཏྠཝིཛཱནནསམཏྠཾ ཏིརཙྪཱནགཏཾ དསྶེཏུཾ ‘‘ནཱགམཱཎཝཀསྶཱ’’ཏིཨཱདི ཝུཏྟཾ. ཏིཧེཏུཀཔཊིསནྡྷིཀཱཏི ཡེབྷུཡྻཝསེན ཝུཏྟཾ. ན ཧི སབྦཱཔི དེཝཏཱ ¶ ཏིཧེཏུཀཔཊིསནྡྷིཀཱཝ ཧོནྟི དྭིཧེཏུཀཱནམྤི སམྦྷཝཏོ. ཨཏིཁིཔྤཾ ཛཱནནྟཱིཏི དེཝཏཱནཾ བྷཝངྒཔརིཝཱསསྶ མནུསྶཱནཾ ཝིཡ ཨདནྡྷབྷཱཝཏོ ཝུཏྟཾ.

སབྷཱགསྶཱཏི པུརིསསྶ. ཝིསབྷཱགསྶཱཏི མཱཏུགཱམསྶ. ཨནརིཡཀོཏི མཱགདྷཝོཧཱརཏོ ཨཉྙོ. དཝཱཏི སཧསཱ. རཝཱཏི ཝིརཛ྄ཛྷིཏྭཱ. ཨཉྙཾ བྷཎིསྶཱམཱིཏི ཨཉྙཾ བྷཎནྟོ བུདྡྷཾ པཙྩཀྑཱམཱིཏི བྷཎཏཱིཏི ཡོཛེཏབྦཾ. ཨཀྑརསམཡཱནབྷིཉྙཏཱཡ ཝཱ ཀརཎསམྤཏྟིཡཱ ཨབྷཱཝཏོ ཝཱ ཀཐེཏབྦཾ ཀཐེཏུཾ ཨསཀྐོནྟོ ཧུཏྭཱ ཨཉྙཾ ཀཐེནྟོ རཝཱ བྷཎཏི ནཱམ. ཨུབྷཡཐཱཔི ཨཉྙཾ བྷཎིཏུཀཱམསྶ ཨཉྙབྷཎནཾ སམཱནནྟི ཨཱཧ ‘‘པུརིམེན ཀོ ཝིསེསོ’’ཏི.

ཝཱཙེཏཱིཏི པཱལི༹ཾ ཀཐེནྟོ ཨཉྙཾ ཨུགྒཎྷཱཔེནྟོ ཝཱ ཝཱཙེཏི. པརིཔུཙྪཏཱིཏི པཱལི༹ཡཱ ཨཏྠཾ པརིཔུཙྪནྟོ པཱལི༹ཾ པརིཔུཙྪཏི. ཨུགྒཎྷཱཏཱིཏི ཨཉྙསྶ སནྟིཀེ པཱལི༹ཾ ཨུགྒཎྷཱཏི. སཛ྄ཛྷཱཡཾ ཀརོཏཱིཏི ཨུགྒཧིཏཔཱལི༹ཾ སཛ྄ཛྷཱཡཏི. ཝཎྞེཏཱིཏི པཱལི༹ཡཱ ཨཏྠཾ སཾཝཎྞེནྟོ པཱལི༹ཾ ཝཎྞེཏི. མཧལླཀསྶ ཀིཉྩི ཨཛཱནནཏོ ཨཝིདིཏིནྡྲིཡཏཱཡ ཝཱ ‘‘པོཏྠཀརཱུཔསདིསསྶཱ’’ཏི ཝུཏྟཾ, མཏྟིཀཱཡ ཀཏརཱུཔསདིསསྶཱཏི ཨཏྠོ. གརུམེདྷསྶཱཏི ཨཱརམྨཎེསུ ལཧུཔྤཝཏྟིཡཱ ཨབྷཱཝཏོ དནྡྷགཏིཀཏཱཡ གརུཔཉྙསྶ, མནྡཔཉྙསྶཱཏི ཝུཏྟཾ ཧོཏི. སབྦསོ ཝཱཏི ཨིམིནཱ ‘‘ཨིདཾ པདཾ སཱཝེསྶཱམི ‘སིཀྑཾ པཙྩཀྑཱམཱི’’’ཏི ཨེཝཾ པཝཏྟཙིཏྟུཔྤཱདསྶ ཨབྷཱཝཾ དསྶེཏི. ཡསྨཱ པན ཨསཏི ཨེཝརཱུཔེ ཙིཏྟུཔྤཱདེ ཀེནཙི པརིཡཱཡེན ཏཐཱཝིདྷཾ ཝཙཱིབྷེདཾ ཀཏྭཱ སཱཝནཾ ནཱམ ནེཝ སམྦྷཝཏི, ཏསྨཱ ཝུཏྟཾ ‘‘བུདྡྷཾ པཙྩཀྑཱམཱིཏིཨཱདཱིསུ…པེ… ཝཙཱིབྷེདཾ ཀཏྭཱ ན སཱཝེཏཱི’’ཏི.

སིཀྑཱཔཙྩཀྑཱནཝིབྷངྒཝཎྞནཱ ནིཊྛིཏཱ.

མཱུལཔཉྙཏྟིཝཎྞནཱ

༥༥. ནིདྡིསིཏབྦསྶཱཏི ¶ ཝིཝརིཏབྦསྶ པཀཱསེཏབྦསྶ. ཀིལེསེཧཱིཏི ཨཧིརིཀཱདཱིཧི ཀིལེསེཧི. ཨིཏོ པཊྛཱཡཱཏི དུཊྛུལླ-པདཏོ པཊྛཱཡ. ཏསྶ ཀམྨསྶཱཏི མེཐུནདྷམྨཔཊིསེཝནསངྑཱཏསྶ ཀམྨསྶ. དསྶནནྟིཨཱདི ཝུཏྟནཡམེཝ. ཨསྶཱཏི མེཐུནདྷམྨསྶ.

དྭཱིཧི དྭཱིཧི སམཱཔཛྫིཏབྦཱ དྭཡཾདྭཡསམཱཔཏྟཱིཏི ཨཱཧ ‘‘དྭཡེན དྭཡེན སམཱཔཛྫིཏབྦཏོ’’ཏི. རཱགཔརིཡུཊྛཱནེན སདིསབྷཱཝཔྤཏྟིཡཱ མིཐུནཱནཾ ཨིདཾ མེཐུནཾ, མེཐུནམེཝ དྷམྨོ མེཐུནདྷམྨོཏི ¶ ཨཱཧ ‘‘ཨུབྷིནྣཾ རཏྟཱན’’ནྟིཨཱདི. ཏཏྠ རཏྟཱནནྟི མེཐུནརཱགེན རཏྟཱནཾ. སཱརཏྟཱནནྟི ཏེནེཝ རཱགེན ཨཏིཝིཡ རཏྟཱནཾ. ཨཝསྶུཏཱནནྟི ལོཀསྶཱདམིཏྟསནྠཝཝསེན ཨུཔྤནྣམེཐུནརཱགེན ཏིནྟཱནཾ. པརིཡུཊྛིཏཱནནྟི མེཐུནརཱགུཔྤཏྟིཡཱ པརིཡོནདྡྷཙིཏྟཱནཾ. སདིསཱནནྟི རཏྟཏཱདཱིཧི སདིསཱནཾ.

ཡསྨཱ ‘‘པཊིསེཝཏི ནཱམཱ’’ཏི པདཾ མཱཏིཀཱཡ ནཏྠི, ཏསྨཱ ‘‘པཊིསེཝཏི ནཱམཱཏི ཀསྨཱ ཨུདྡྷཊ’’ནྟི ཡོ མཉྙཏི, ཏསྶ ཀཱརཎཾ དསྶེནྟོ ‘‘པཊིསེཝེཡྻཱཏི ཨེཏྠ…པེ… མཱཏིཀཱཔད’’ནྟི ཨཱཧ. ཨིཏྠིཡཱ ནིམིཏྟེནཱཏི ཨིདཾ ‘‘མགྒེན གཙྪཏཱི’’ཏིཨཱདི ཝིཡ དཊྛབྦཾ. ཡཐཱ ཧི ‘‘མགྒེན གཙྪཏཱི’’ཏི ཝུཏྟེ ‘‘མགྒཾ གཙྪཏི, མགྒེ ཝཱ གཙྪཏཱི’’ཏི ཨཡམཏྠོ ལབྦྷཏི, ཨེཝཾ ‘‘ཨིཏྠིཡཱ ནིམིཏྟེན པཝེསེཏཱི’’ཏི ཝུཏྟེ ‘‘ཨིཏྠིཡཱ ནིམིཏྟཾ པཝེསེཏི, ནིམིཏྟེ ཝཱ པཝེསེཏཱི’’ཏི ཨཡམཏྠོ ལབྦྷཏི. ཨིདཉྩ ཡེབྷུཡྻེན པུརིསཔཡོགདསྶནཏྠཾ ཝུཏྟཾ. ནིམིཏྟཾ ཨངྒཛཱཏནྟི ཨཏྠཏོ ཨེཀཾ. པཝེསནཾ ནཱམ ན བཧི ཚུཔནམཏྟནྟི ཨཱཧ ‘‘ཝཱཏེན ཨསམྥུཊྛེ ཨལློཀཱསེ’’ཏི. ཨབྦྷནྟརཉྷི པཝེསེནྟོ ‘‘པཝེསེཏཱི’’ཏི ཝུཙྩཏི, ན བཧི ཚུཔནྟོ. ཨབྦྷནྟརནྟི ཙ པཀཏིཡཱ སབྦསོ པིཧིཏསྶ ནིམིཏྟསྶ ཝཱཏེན ཨསམྥུཊྛོཀཱསོ ཝུཙྩཏཱིཏི.

ཨིདཱནི སབྦཐཱ ལེསོཀཱསཔིདཧནཏྠཾ ཨིཏྠིནིམིཏྟེ པུརིསནིམིཏྟེ ཙ ལབྦྷམཱནཾ པཝེསཀཱལེ ཨཉྙམཉྙཾ ཕསྶཱརཧཾ པདེསཝིསེསཾ ཝིབྷཛིཏྭཱ དསྶེནྟོ ‘‘ཨིཏྠིནིམིཏྟེ ཙཏྟཱརི པསྶཱནཱི’’ཏིཨཱདིམཱཧ. ཝཱཏེན ཧི ཨསམྥུཊྛེ ཨལློཀཱསེ ཡཏྠ ཀཏྠཙི ཨེཀེནཔི པདེསེན ཚུཔིཏྭཱ པཝེསེནྟོ ‘‘པཝེསེཏཱི’’ཏི ཝུཙྩཏི. ཝེམཛ྄ཛྷནྟི ཡཐཱ ཙཏྟཱརི པསྶཱནི ཨསམྥུསནྟོ པཝེསེཏི, ཨེཝཾ ཀཏཝིཝརསྶ ཨིཏྠིནིམིཏྟསྶ ཧེཊྛིམཏལཾ ཝུཙྩཏི ¶ , པུརིསནིམིཏྟེ པན མཛ྄ཛྷནྟི ཨགྒཀོཊིཾ སནྡྷཱཡ ཝདཏི. ཨུཔརཱིཏི ཨགྒཀོཊིཏོ ཨུཔརིབྷཱགཔྤདེསོ. ཨིདཉྩ མཛ྄ཛྷེན སམིཉྫིཏྭཱ པཝེསེནྟསྶ མཛ྄ཛྷིམཔབྦསམིཉྫིཏངྒུལིཾ ཀཏྠཙི པཝེསེནྟསྶ ཨངྒུལིཡཱ མཛ྄ཛྷིམཔབྦཔིཊྛིསདིསཾ ཨངྒཛཱཏསྶ ཨུཔརིབྷཱགཝེམཛ྄ཛྷཾ སནྡྷཱཡ ཝུཏྟཾ. ཧེཊྛཱ པཝེསེནྟོཏི ཨིཏྠིནིམིཏྟསྶ ཧེཊྛིམབྷཱགེན ཚུཔནྟཾ པཝེསེནྟོ. མཛ྄ཛྷེན པཝེསེནྟོཏི ཨབྦྷནྟརཏལཾ ཚུཔིཏྭཱ མཛ྄ཛྷེན པཝེསེནྟོ. ཀཏྠཙི ཨཙྪུཔནྟཾ པཝེསེཏྭཱ ནཱིཧརནྟསྶ ཧི ནཏྠི པཱརཱཛིཀཾ, དུཀྐཊཾ པན ཧོཏི ཚིནྣསཱིསཝཏྠུསྨིཾ ཝཊྚཀཏེ མུཁེ ཨཙྪུཔནྟཾ པཝེསེཏྭཱ ནཱིཧརནྟསྶ ཝིཡ. མཛ྄ཛྷེནེཝ ཚུཔནྟཾ པཝེསེནྟོཏི ཨགྒཀོཊིཡཱ ཚུཔནྟཾ པཝེསེནྟོ. མཛ྄ཛྷིམཔབྦཔིཊྛིཡཱ སམིཉྫིཏངྒུལིནྟི སམྦནྡྷོ. ཨཐ ཝཱ སམིཉྫིཏངྒུལིཾ མཛ྄ཛྷིམཔབྦཔིཊྛིཡཱ པཝེསེནྟོ ཝིཡཱཏི ཡོཛེཏབྦཾ. སངྐོཙེཏྭཱཏི ནིམིཏྟམཛ྄ཛྷེན བྷིནྡིཏྭཱ. ཨུཔརིབྷཱགེནཱཏི སངྐོཙིཏསྶ ཨུཔརིབྷཱགཀོཊིཡཱ. ཨིདཱནི པུརིསནིམིཏྟསྶ ཧེཊྛཱ ཝུཏྟེསུ ཚསུ ཋཱནེསུ ཨུཔརཱིཏི ཝུཏྟཊྛཱནནྟརསྶ ཝསེན ཝིསུཾ ཙཏྟཱརི ¶ པསྶཱནི གཧེཏྭཱ པུརིསནིམིཏྟེ དསདྷཱ ཋཱནབྷེདཾ དསྶེནྟོ ‘‘ཏཏྠཱ’’ཏིཨཱདིམཱཧ. ཧེཊྛཱ པན ཝིསུཾ ཏཱནི ཨགྒཧེཏྭཱ ‘‘ཙཏྟཱརི པསྶཱནཱི’’ཏི ཝཙནསཱམཉྙཏོཔི ཝིསུཾ ཝིསུཾ ལབྦྷམཱནཱནི ཨེཀཙྩཾ གཧེཏྭཱ ཚ ཋཱནཱནི ཝུཏྟཱནི. ཏུལཱདཎྜསདིསཾ པཝེསེནྟསྶཱཏི ཨུཛུཀཾ པཝེསེནྟསྶ.

ནིམིཏྟེ ཛཱཏནྟི ཨཏྟནོ ནིམིཏྟེ ཛཱཏཾ. ཙམྨཁཱིལནྟི ནིམིཏྟེ ཨུཊྛིཏཾ ཙམྨམེཝ. ‘‘ཨུཎྞིགཎྜོ’’ཏིཔི ཝདནྟི. ནིམིཏྟེ ཛཱཏམྤི ཙམྨཁཱིལཱདི ནིམིཏྟམེཝཱཏི ཨཱཧ ‘‘ཨཱཔཏྟི པཱརཱཛིཀསྶཱ’’ཏི. ‘‘ཨུཔཧཏཀཱཡཔྤསཱད’’ནྟི ཨཝཏྭཱ ‘‘ནཊྛཀཱཡཔྤསཱད’’ནྟི ཝཙནཾ ཨུཔཱདིནྣབྷཱཝསྶ ནཏྠིཏཱདསྶནཏྠཾ. ཏེནེཝཱཧ – ‘‘མཏཙམྨཾ ཝཱ སུཀྑཔཱིལ༹ཀཾ ཝཱ’’ཏི. སཏི ཧི ཨུཔཱདིནྣབྷཱཝེ ཨུཔཧཏེཔི ཀཱཡཔྤསཱདེ ཨུཔཧཏིནྡྲིཡཝཏྠུསྨིཾ ཝིཡ པཱརཱཛིཀཱཔཏྟིཡེཝ སིཡཱ, མཏཙམྨཾ པན སུཀྑཔཱིལ༹ཀཉྩ ཨནུཔཱདིནྣཀཾ ཨུཔཱདིནྣཀེཡེཝ ཙ པཱརཱཛིཀཱཔཏྟི. ཏེནེཝཱཧ ‘‘ཨཱཔཏྟི དུཀྐཊསྶཱ’’ཏི. ན ཙ ཨེཝཾ ཀརོནྟསྶ ཨནཱཔཏྟི སཀྐཱ ཝཏྟུནྟི དུཀྐཊཾ ཝུཏྟཾ, ཨིཏྠིནིམིཏྟསྶ པན ནཊྛེཔི ཨུཔཱདིནྣབྷཱཝེ པཱརཱཛིཀཱཔཏྟིཡེཝ. མཏེ ཨཀྑཱཡིཏེ ཡེབྷུཡྻེན ཨཀྑཱཡིཏེ པཱརཱཛིཀཱཔཏྟིཝཙནཏོ མེཐུནསྶཱདེནཱཏི ཨིམིནཱ ཀཱཡསཾསགྒརཱགཾ ནིཝཏྟེཏི. སཏི ཧི ཀཱཡསཾསགྒརཱགེ སངྒྷཱདིསེསོཝ སིཡཱ, བཱིཛཱནིཔི ནིམིཏྟསངྑྱཾ ན གཙྪནྟཱིཏི དུཀྐཊམེཝ ཝུཏྟཾ. ‘‘ནིམིཏྟེན ནིམིཏྟཾ པཝེསེཏཱི’’ཏི ཧི ཝུཏྟཾ.

ཨིདཱནི ¶ ཨིམིསྶཱ མེཐུནཀཐཱཡ ཨསབྦྷིརཱུཔཏྟཱ ‘‘ཨཱིདིསཾ ཋཱནཾ ཀཐེནྟེཧི སུཎནྟེཧི ཙ ཨེཝཾ པཊིཔཛྫིཏབྦ’’ནྟི ཨནུསཱསནྟོ ‘‘ཨཡཉྩ མེཐུནཀཐཱ ནཱམཱ’’ཏིཨཱདིམཱཧ. མེཐུནཀཐཱཡ རཱགཝུདྡྷིཧེཏུཏྟཱ ཧཱསཝིསཡཏྟཱ ཙ ཏདུབྷཡནིཝཏྟནཏྠཾ པཊིཀཱུལམནསིཀཱརཱདཱིསུ ནིཡོཛེཏི. པཊིཀཱུལམནསིཀཱརེན ཧི རཱགོ ནིཝཏྟཏི, སམཎསཉྙཱདཱིསུ པཙྩུཔཊྛིཏེསུ ཧཱསོ ནིཝཏྟཏི. སཏྟཱནུདྡཡཱཡཱཏི སཏྟཱནཾ ཨཔཱཡདུཀྑཱདཱིཧི ཨནུརཀྑཎཏྠཾ. ལོཀཱནུཀམྤཱཡཱཏི སཏྟལོཀཝིསཡཱཡ ཨནུཀམྤཱཡ.

མུཁཾ ཨཔིདྷཱཡཱཏི མུཁཾ ཨཔིདཧིཏྭཱ, ཡེན ཀེནཙི པམཱདེན ཀདཱཙི མནྡཧཱསོ བྷཝེཡྻ, ཏདཱ གརུཏྟཾ ཀུཔྤེཡྻ, ཏསྨཱ ཏཱདིསེ ཀཱལེ གརུབྷཱཝསྶ ཨཝིཀོཔནཏྠཾ བཱིཛཀེན མུཁཾ པཊིཙྪཱདེཏྭཱ ནིསཱིདིཏབྦནྟི ཨདྷིཔྤཱཡོ. ཨཐ ཝཱ མུཁཾ ཨཔིདྷཱཡཱཏི མུཁཾ པིདཧིཏྭཱཏི ཨཏྠོ. བཱིཛཀེན མུཁཾ པཊིཙྪཱདེཏྭཱ ཧསམཱནེན ན ནིསཱིདིཏབྦནྟི ཨཡམེཏྠ ཨདྷིཔྤཱཡོ. དནྟཝིདཾསཀནྟི དནྟེ དསྶེཏྭཱ ཝིཝརིཏྭཱ ཙཱཏི ཨཏྠོ. གབྦྷིཏེནཱཏི སངྐོཙཾ ཨནཱཔཛྫནྟེན, ཨུསྶཱཧཛཱཏེནཱཏི ཨཏྠོ. ཡདི ཧི ‘‘ཨཱིདིསཾ ནཱམ ཨསབྦྷིཾ ཀཐེམཱི’’ཏི སངྐོཙཾ ¶ ཨཱཔཛྫེཡྻ, ཨཏྠཝིབྷཱཝནཾ ན སིཡཱ, ཏསྨཱ ‘‘ཏཱདིསེན སམྨཱསམྦུདྡྷེནཔི ཏཱཝ ཨཱིདིསཾ ཀཐིཏཾ, ཀིམངྒཾ པནཱཧཾ ཀཐེམཱི’’ཏི ཨེཝཾ ཨུསྶཱཧཛཱཏེན ཀཐེཏབྦནྟི ཨདྷིཔྤཱཡོ. སཏྠུཔཊིབྷཱགེནཱཏི སཏྠུཀཔྤེན, སཏྠུསདིསེནཱཏི ཨཏྠོ.

མཱུལཔཉྙཏྟིཝཎྞནཱ ནིཊྛིཏཱ.

ཨནུཔཉྙཏྟིཝཎྞནཱ

ཏིརཙྪཱནེསུ གཏཱཡཱཏི ཏིརཙྪཱནེསུ ཨུཔྤནྣཱཡ. ཡསྨཱ ཏིརཙྪཱནགཏཱ ནཱམ ཨཏིཁུདྡཀཱཔི ཧོནྟི, ཡེསཾ མགྒེསུ ཏིལཕལམཏྟམྤི པཝེསནཾ ནཔྤཧོཏི, ཏསྨཱ ན སབྦཱཝ ཏིརཙྪཱནགཏིཏྠིཡོ པཱརཱཛིཀཝཏྠུབྷཱུཏཱཏི པཝེསནཔྤཧོནཀཝསེན ལབྦྷམཱནཀཏིརཙྪཱནགཏིཏྠིཡོ པརིཙྪིནྡིཏྭཱ དསྶེནྟོ ‘‘པཱརཱཛིཀཝཏྠུབྷཱུཏཱ ཨེཝ ཙེཏྠཱ’’ཏིཨཱདིམཱཧ. ཨཔདཱནཾ ཨཧིམཙྪཱཏིཨཱདིགཱཐཱ པཱརཱཛིཀཝཏྠཱུནཾ ཧེཊྛིམཔརིཙྪེདདསྶནཏྠཾ པོརཱཎེཧི ཋཔིཏཱ. ཏཏྠ ཨཧཱིཏི ཛཱཏིནིདྡེསེན སབྦཱཔི ¶ སཔྤཛཱཏི སངྒཧིཏཱཏི ཨཱཧ – ‘‘ཨཧིགྒཧཎེན…པེ… དཱིགྷཛཱཏི སངྒཧིཏཱ’’ཏི. ཏཏྠ གོནསཱཏི སཔྤཝིསེསཱ, ཡེསཾ པིཊྛཱིསུ མཧནྟཱནི མཎྜལཱནི སནྡིསྶནྟི. མཙྪགྒཧཎཾ ཨོདཀཛཱཏིཡཱ ཨུཔལཀྑཎཔདནྟི ཨཱཧ – ‘‘མཙྪགྒཧཎེན…པེ… ཨོདཀཛཱཏི སངྒཧིཏཱ’’ཏི. ཏེནེཝ མཎྜཱུཀཀཙྪཔཱནཾ སཔཱདཀཏྟེཔི ཨོདཀཛཱཏིཀཏྟཱ སངྒཧོ ཀཏོ.

མུཁསཎྛཱནནྟི ཨོཊྛཙམྨསཎྛཱནཾ. ཝཎསངྑེཔཾ གཙྪཏཱིཏི ཝཎསངྒཧཾ གཙྪཏི ནཝསུ ཝཎམུཁེསུ སངྒཧིཏཏྟཱཏི ཨདྷིཔྤཱཡོ. ཝཎེ ཐུལླཙྩཡཉྩ ‘‘ཨམགྒེན ཨམགྒཾ པཝེསེཏི, ཨཱཔཏྟི ཐུལླཙྩཡསྶཱ’’ཏི ཨིམསྶ ཝསེན ཝེདིཏབྦཾ. ཏསྨིཉྷི སུཏྟེ དྭཱིསུ སམྦྷིནྣཝཎེསུ ཨེཀེན ཝཎེན པཝེསེཏྭཱ དུཏིཡེན ནཱིཧརནྟསྶ ཐུལླཙྩཡཾ ཝུཏྟཾ. ཝཀྑཏི ཙ ‘‘ཨིམསྶ སུཏྟསྶ ཨནུལོམཝསེན སབྦཏྠ ཝཎསངྑེཔེ ཐུལླཙྩཡཾ ཝེདིཏབྦ’’ནྟི (པཱརཱ. ཨཊྛ. ༡.༦༦). ཀུཀྐུཊིགྒཧཎམྤི སབྦཱཡ པཀྑིཛཱཏིཡཱ ཨུཔལཀྑཎཔདནྟི ཨཱཧ – ‘‘ཀུཀྐུཊིགྒཧཎེན…པེ… པཀྑིཛཱཏི སངྒཧིཏཱ’’ཏི. མཛྫཱརིགྒཧཎམྤི ཙཏུཔྤདཛཱཏིཡཱ ཨུཔལཀྑཎཔདནྟི དཊྛབྦཾ. ཏེནཱཧ – ‘‘མཛྫཱརིགྒཧཎེན…པེ… ཙཏུཔྤདཛཱཏི སངྒཧིཏཱ’’ཏི. རུཀྑསུནཁཱ ནཱམ ཀལནྡཀཱཏིཔི ཝདནྟི. མངྒུསཱཏི ནངྒུལཱ.

པརཱཛིཏ-སདྡོ ཨུཔསགྒསྶ ཝུདྡྷིཾ ཀཏྭཱ ཏ-ཀཱརསྶ ཙ ཀ-ཀཱརཾ ཀཏྭཱ པཱརཱཛིཀོཏི ནིདྡིཊྛོཏི ཨཱཧ ‘‘པཱརཱཛིཀོཏི པརཱཛིཏོ’’ཏི. ‘‘ཀཏྠཙི ཨཱཔཏྟཱིཏི ‘པཱརཱཛིཀེན དྷམྨེན ཨནུདྡྷཾསེཡྻཱ’ཏིཨཱདཱིསུ ¶ (པཱརཱ. ༣༨༤, ༣༩༡), ཀཏྠཙི སིཀྑཱཔདནྟི ཨིདཾ པན དིསྭཱ ཛཱནིཏབྦ’’ནྟི གཎྛིཔདེསུ ཝུཏྟཾ. པརཱཛཡཏཱིཏི པཱརཱཛིཀཾ, པཱརཱཛིཀཱཏི ཙ ཀཏྟུསཱདྷནེན པཱརཱཛིཀ-སདྡེན སིཀྑཱཔདཾ ཨཱཔཏྟི ཙ ཝུཙྩཏཱིཏི དསྶེནྟོ ཨཱཧ ‘‘ཡོ ཏཾ ཨཏིཀྐམཏཱི’’ཏིཨཱདི. པུགྒལོ པན ཀམྨསཱདྷནེན པཱརཱཛིཀ-སདྡེན ཝུཙྩཏཱིཏི དསྶེནྟོ ཨཱཧ ‘‘པུགྒལོ ཡསྨཱ པརཱཛིཏོ’’ཏིཨཱདི.

ཨེཏམེཝ ཧི ཨཏྠཾ སནྡྷཱཡཱཏི ‘‘ཏཾ ཨཱཔཏྟིཾ ཨཱཔནྣོ པུགྒལོ པརཱཛིཏོ ཧོཏི པརཱཛཡམཱཔནྣོ’’ཏི ཨེཏམཏྠཾ སནྡྷཱཡ. ཙུཏོ པརདྡྷོཏིཨཱདིནཱ ཧི ཏཾ ཨཱཔཏྟིཾ ཨཱཔནྣཔུགྒལོ ཙུཏོ ཧོཏི པརཱཛིཏོ པརཱཛཡཾ ཨཱཔནྣོཏི ཨཡམཏྠོ ཝིཉྙཱཡཏི, ན པན པུགྒལོ པཱརཱཛིཀོ ནཱམ ཧོཏཱིཏི ཨེཏམཏྠཾ སནྡྷཱཡཱཏི ཨེཝམཏྠོ གཧེཏབྦོ. ན ཧི པརིཝཱརེཔི གཱཐཱ པུགྒལཝུཏྟིཔཱརཱཛིཀསདྡནིབྦཙནདསྶནཏྠཾ ཝུཏྟཱ ¶ ཨཱཔཏྟིཝུཏྟཱིནཾ པཱརཱཛིཀཱ-དིསདྡཱནཾ ནིབྦཙནཝིབྷཱགཔྤསངྒེ ཝུཏྟཏྟཱ. ཨཡཉྷི པརིཝཱརགཱཐཱཡ ཨཏྠོ (པརི. ཨཊྛ. ༣༣༩) – ཡདིདཾ པུགྒལཱཔཏྟིསིཀྑཱཔདཔཱརཱཛིཀེསུ ཨཱཔཏྟིཔཱརཱཛིཀཾ ནཱམ ཝུཏྟཾ, ཏཾ ཨཱཔཛྫནྟོ པུགྒལོ ཡསྨཱ པརཱཛིཏོ པརཱཛཡམཱཔནྣོ སདྡྷམཱ ཙུཏོ པརདྡྷོ བྷཊྛོ ནིརངྐཏོ ཙ ཧོཏི, ཨནཱིཧཊེ ཏསྨིཾ པུགྒལེ པུན ཨུཔོསཐཔཝཱརཎཱདིབྷེདོ སཾཝཱསོ ནཏྠི, ཏེནེཏཾ ཨིཏི ཝུཙྩཏི ཏེན ཀཱརཎེན ཨེཏཾ ཨཱཔཏྟིཔཱརཱཛིཀཾ ཨིཏི ཝུཙྩཏཱིཏི. ཨཡཾ པནེཏྠ སངྑེཔཏྠོ – ཡསྨཱ པརཱཛིཏོ ཧོཏི ཨེཏེན, ཏསྨཱ ཨེཏཾ པཱརཱཛིཀནྟི ཝུཙྩཏཱིཏི. པརིབྷཊྛོཏི སཱསནཏོ བྷཊྛོ, པརིཧཱིནོཏི ཨཏྠོ. ཚིནྣོཏི ཨནྟརཱ ཁཎྜིཏོ.

སདྡྷིཾ ཡོཛནཱཡཱཏི པདཡོཛནཱཡ སདྡྷིཾ. ཙཏུབྦིདྷཾ སངྒྷཀམྨནྟི ཨཔལོཀནཱདིཝསེན ཙཏུབྦིདྷཾ ཀམྨཾ. སཱིམཱཔརིཙྪིནྣེཧཱིཏི ཨེཀསཱིམཱཔརིཡཱཔནྣེཧི. པཀཏཏྟཱ ནཱམ པཱརཱཛིཀཾ ཨནཱཔནྣཱ ཨནུཀྑིཏྟཱ ཙ. པཉྩཝིདྷོཔཱིཏི ནིདཱནུདྡེསཱདིཝསེན པཉྩཝིདྷོཔི. ནཧཱཔིཏཔུབྦཀཱནཾ ཝིཡ ཨོདྷིསཨནུཉྙཱཏཾ ཋཔེཏྭཱ ཨཝསེསཾ སབྦམྤི སིཀྑཱཔདཾ སབྦེཧིཔི ལཛྫཱིཔུགྒལེཧི ཨནཏིཀྐམནཱིཡཏྟཱ ཝུཏྟཾ ‘‘སབྦེཧིཔི ལཛྫཱིཔུགྒལེཧི སམཾ སིཀྑིཏབྦབྷཱཝཏོ’’ཏི. སམནྟི སདྡྷིཾ, ཨེཀཔྤཧཱརེན ཝཱ. སིཀྑིཏབྦབྷཱཝཏོཏི ཨནཏིཀྐམནཝསེན ཨུགྒཧཔརིཔུཙྪཱདིནཱ ཙ སིཀྑིཏབྦབྷཱཝཏོ. སཱམཉྙསིཀྑཱཔདེསུ ‘‘ཨིདཾ ཏཡཱ ན སིཀྑིཏབྦ’’ནྟི ཨེཝཾ ཨབཧིཀཱཏབྦཏོ ‘‘ན ཨེཀོཔི ཏཏོ བཧིདྡྷཱ སནྡིསྶཏཱི’’ཏི ཝུཏྟཾ. ཡཾ ཏཾ ཝུཏྟནྟི སམྦནྡྷོ.

༥༦. ན ཀེཝལཾ ཨིཏྠིཡཱ ཨེཝ ནིམིཏྟཾ པཱརཱཛིཀཝཏྠཱུཏི ཨིམིནཱ ཀེཝལཾ ཨིཏྠིཡཱ ཨེཝ ནིམིཏྟཾ ¶ པཱརཱཛིཀཝཏྠུ ན ཧོཏི, ཨཐ ཁོ ཨུབྷཏོབྱཉྫནཀཔཎྜཀཔུརིསཱནམྤི ནིམིཏྟཾ པཱརཱཛིཀཝཏྠཱུཏི དསྶེཏི. ན ཙ མནུསྶིཏྠིཡཱ ཨེཝཱཏི ཨིམིནཱ པན མནུསྶིཏྠིཡཱ ཨེཝ ནིམིཏྟཾ པཱརཱཛིཀཝཏྠུ ན ཧོཏི, ཨམནུསྶིཏྠིཏིརཙྪཱནགཏིཏྠིཨམནུསྶུབྷཏོབྱཉྫནཀཱདཱིནམྤི ནིམིཏྟཾ པཱརཱཛིཀཝཏྠཱུཏི དསྶེཏི. ‘‘ཝཏྠུམེཝ ན ཧོཏཱིཏི ཨམནུསྶིཏྠིཔསངྒེན ཨཱགཏཾ སུཝཎྞརཛཏཱདིམཡཾ པཊིཀྑིཔཏཱི’’ཏི ཏཱིསུཔི གཎྛིཔདེསུ ཝུཏྟཾ, ཏཾ ཡུཏྟཾ ཝིཡ ན དིསྶཏི. ན ཧི ཨིཏོ པུབྦེ ཨམནུསྶིཏྠིགྒཧཎཾ ཀཏཾ ཨཏྠི, ཡེན ཏཔྤསངྒོ སིཡཱ. ཨིདཱནེཝ ཧི ‘‘ཏིསྶོ ཨིཏྠིཡོ’’ཏིཨཱདིནཱ ཨམནུསྶིཏྠིགྒཧཎཾ ཀཏཾ, ན ཙ ཨམནུསྶིཏྠིགྒཧཎེན སུཝཎྞརཛཏཱདིམཡཱནཾ ¶ པསངྒོ ཡུཏྟོ. མནུསྶཱམནུསྶཏིརཙྪཱནཛཱཏིཝསེན ཏིཝིདྷཱ ཀཏྭཱ པཱརཱཛིཀཝཏྠུབྷཱུཏསཏྟཱནཾ ནིདྡེསེན སུཝཎྞརཛཏཱདིམཡཱནཾ པསངྒསྶ ནིཝཏྟིཏཏྟཱ. ཏཐཱ ཧི ཨིཏྠིཔུརིསཱདཱིསུ མནུསྶཱམནུསྶཱདཱིསུ ཝཱ ཀཉྩི ཨནཱམསིཏྭཱ ཨཝིསེསེན ‘‘མེཐུནཾ དྷམྨཾ པཊིསེཝེཡྻཱ’’ཏི ཨེཏྟཀམེཝ མཱཏིཀཱཡཾ ཝུཏྟཾ. ཏསྶ པདབྷཱཛནེ ཙ ‘‘པཊིསེཝཏི ནཱམཱ’’ཏི མཱཏིཀཾ པདཾ ཨུདྡྷརིཏྭཱ ‘‘ཡོ ནིམིཏྟེན ནིམིཏྟཾ ཨངྒཛཱཏེན ཨངྒཛཱཏཾ ཨནྟམསོ ཏིལཕལམཏྟམྤི པཝེསེཏི, ཨེསོ པཊིསེཝཏི ནཱམཱ’’ཏི པཊིསེཝནཱཀཱརོཝ དསྶིཏོ, ན པན པཱརཱཛིཀཝཏྠུབྷཱུཏནིམིཏྟནིསྶཡཱ མནུསྶཱམནུསྶཏིརཙྪཱནགཏཱ ཨིཏྠིཔུརིསཔཎྜཀཨུབྷཏོབྱཉྫནཀཱ ནིཡམེཏྭཱ དསྶིཏཱ, ཏསྨཱ ‘‘ཨིཏྠིཡཱ ཨེཝ ནུ ཁོ ནིམིཏྟཾ པཱརཱཛིཀཝཏྠུ, ཨུདཱཧུ ཨཉྙེསམྤཱི’’ཏི ཨེཝམཱདི སནྡེཧོ སིཡཱ, ནིམིཏྟཝོཧཱརོ ཙ སུཝཎྞརཛཏཱདིམཡརཱུཔཀེསུ ཙ ལབྦྷཏིཡེཝ. ཏེནེཝ ཝིནཱིཏཝཏྠཱུསུ (པཱརཱ. ༧༡) ‘‘ལེཔཙིཏྟསྶ ནིམིཏྟཾ ཨངྒཛཱཏེན ཚུཔི, དཱརུདྷཱིཏལིཀཱཡ ནིམིཏྟཾ ཨངྒཛཱཏེན ཚུཔཱི’’ཏི ཝུཏྟཾ, ཏསྨཱ ནིམིཏྟསཱམཉྙཏོ ‘‘སུཝཎྞརཛཏཱདིམཡཱནམྤི ནིམིཏྟཾ པཱརཱཛིཀཝཏྠུ ཧོཏི, ན ཧོཏཱི’’ཏི ཀསྶཙི ཨཱསངྐཱ སིཡཱ. ཏེནེཝ ‘‘ལེཔཙིཏྟཱདིཝཏྠཱུསུ ཏསྶ ཀུཀྐུཙྩཾ ཨཧོསཱི’’ཏི ཝུཏྟཾ. ཏསྨཱ ཏདཱསངྐཱནིཝཏྟནཏྠཾ པཱརཱཛིཀཝཏྠུབྷཱུཏསཏྟནིཡམནཏྠཉྩ ཛཱཏིཝསེན མནུསྶཱམནུསྶཱདིཏོ ཏིདྷཱ ཀཏྭཱ པཱརཱཛིཀཝཏྠུབྷཱུཏེ སཏྟེ བྷགཝཱ ཝིབྷཛིཏྭཱ དསྶེཏི, ཏསྨཱ ‘‘ཝཏྠུམེཝ ན ཧོཏཱི’’ཏི ནིམིཏྟསཱམཉྙཏོ པསངྒཱགཏཾ སུཝཎྞརཛཏཱདིམཡཱནཾ ནིམིཏྟཾ པཊིཀྑིཔཏཱིཏི ཝཏྟབྦཾ.

ཏཡོ མགྒེཏི བྷུམྨཏྠེ ཨུཔཡོགཝཙནནྟི ཨཱཧ ‘‘ཏཱིསུ མགྒེསཱུཏི ཨཏྠོ ཝེདིཏབྦོ’’ཏི. ཨེཝཾ སབྦཏྠཱཏི ཨིམིནཱ ‘‘དྭེ མགྒེ’’ཏི ཨེཏྠཱཔི དྭཱིསུ མགྒེསཱུཏི ཨཏྠོ ཝེདིཏབྦོཏི ཨཏིདིསྶཏི.

ཨནུཔཉྙཏྟིཝཎྞནཱ ནིཊྛིཏཱ.

པཋམཙཏུཀྐཀཐཱཝཎྞནཱ

༥༧. ཨསྶཱཏི ¶ ཨཱཁྱཱཏིཀཔདནྟི ཏསྶ ཨཏྠཾ དསྶེནྟོ ‘‘ཧོཏཱི’’ཏི ཨཱཧ. གཎྛིཔདེསུ པན ‘‘ཨསྶཱཏི པུགྒལཾ པརཱམསིཏྭཱ ཧོཏཱིཏི ¶ ཝཙནསེསོ དསྶིཏོ’’ཏིཔི ཨཏྠཝིཀཔྤོ དསྶིཏོ, ན སོ སུནྡརཏརོ. ཡདི ཧི ཝཙནསེསོ ཨདྷིཔྤེཏོ སིཡཱ, ‘‘ཧོཏཱི’’ཏི ཝཏྟབྦཾ, ཏེནེཝ ཨཉྙསྨིཾ ཨཏྠཝིཀཔྤེ ཧོཏཱིཏི ཝཙནསེསོ ཀཏོ.

༥༨. སཱདིཡནྟསྶེཝཱཏི ཨེཏྠ སཱདིཡནཾ ནཱམ སེཝེཏུཀཱམཏཱཙིཏྟསྶ ཨུཔཊྛཱཔནནྟི ཨཱཧ ‘‘པཊིསེཝནཙིཏྟསམངྒིསྶཱ’’ཏི. ‘‘པཊིཔཀྑཾ ཨཏྠཡནྟཱིཏི སིཀྑཱཀཱམཱནཾ བྷིཀྑཱུནཾ པཊིཔཀྑཾ དུསྶཱིལབྷཱཝཾ ཨཏྠཡནྟཱི’’ཏི གཎྛིཔདེསུ ཝུཏྟཾ. ཨཏྟནོ ཝེརིཔུགྒལསྶ པན པཊིཔཀྑབྷཱུཏཾ ཀཉྩི ཨམིཏྟཾ ཨཏྠཡནྟི གཝེསནྟཱིཏི ཨེཝམེཏྠ ཨཏྠོ དཊྛབྦོ. པཙྩཏྠིཀཱ ཧི ཨཏྟནོ ཝེརིཾ ནཱསེཏུཀཱམཱ ཏསྶ པཊིཔཀྑབྷཱུཏཾ ཀཉྩི ཨམིཏྟཾ ཨཏྟནོ སཧཱཡབྷཱཝམུཔགཙྪནྟཾ ཨིཙྪནྟི. རཱཛཔཙྩཏྠིཀཱདཱིནཾ ཨུཔརི ཝཀྑམཱནཏྟཱ ཏདནུརཱུཔཝསེན ཨཏྠཾ དསྶེནྟོ ‘‘བྷིཀྑཱུ ཨེཝ པཙྩཏྠིཀཱ བྷིཀྑུཔཙྩཏྠིཀཱ’’ཏི ཨཱཧ. ‘‘བྷིཀྑུསྶ པཙྩཏྠིཀཱ བྷིཀྑུཔཙྩཏྠིཀཱ’’ཏི ཨེཝཾ པན ཝུཙྩམཱནེ བྷིཀྑུསྶ པཙྩཏྠིཀཱ རཱཛཱདཡོཔི ཨེཏྠེཝ སངྒཡ྄ཧནྟཱིཏི རཱཛཔཙྩཏྠིཀཱདཡོ ཝིསུཾ ན ཝཏྟབྦཱ སིཡུཾ, ཨཉྙཏྠ པན བྷིཀྑུསྶ པཙྩཏྠིཀཱ བྷིཀྑུཔཙྩཏྠིཀཱཏི ཨཡམཏྠོ ལབྦྷཏེཝ ‘‘སཱསནཔཙྩཏྠིཀཱ’’ཏི ཡཐཱ. ཨིསྶཱཔཀཏཱཏི པརེསཾ ལཱབྷསཀྐཱརཱདིཨསཧནལཀྑཎཱཡ ཨིསྶཱཡ ཨབྷིབྷཱུཏཱ. ནིཔྤརིཔྥནྡནྟི པརིཔྥནྡཝིརཧིཏཾ, ཡཐཱ ཙལིཏུཾ པརིཝཏྟིཏུཾ ན སཀྐོཏི, ཏཐཱ གཧེཏྭཱཏི ཨཏྠོ. སམྤཡོཛེནྟཱིཏི ཝཙྩམགྒེན སདྡྷིཾ ཡོཛེནྟི.

ཏསྨིཾ ཁཎེཏི ཏསྨིཾ པཝེསནཀྑཎེ, ཨགྒཏོ ཡཱཝ མཱུལཱ པཝེསནཀཱལོ ‘‘པཝེསནཀྑཎོ’’ཏི ཝུཙྩཏི. སཱདིཡནཾ ནཱམ སེཝནཙིཏྟསྶ ཨུཔྤཱདནནྟི ཨཱཧ ‘‘སེཝནཙིཏྟཾ ཨུཔཊྛཱཔེཏཱི’’ཏི. པཝིཊྛཀཱལེཏི ཨངྒཛཱཏསྶ ཡཏྟཀཾ ཋཱནཾ པཝེསནཱརཧཾ, ཏཏྟཀཾ ཨནཝསེསཏོ པཝིཊྛཀཱལེ. ཨེཝཾ པཝིཊྛསྶ ཨུདྡྷརཎཱརམྦྷཏོ ཨནྟརཱ ཋིཏཀཱལོ ཋིཏཾ ནཱམ. ཨཊྛཀཐཱཡཾ པན མཱཏུགཱམསྶ སུཀྐཝིསྶཊྛིཾ པཏྭཱ སབྦཐཱ ཝཱཡམཏོ ཨོརམིཏྭཱ ཋིཏཀཱལཾ སནྡྷཱཡ ‘‘སུཀྐཝིསྶཊྛིསམཡེ’’ཏི ཝུཏྟཾ. ཨུདྡྷརཎཾ ནཱམ ཡཱཝ ཨགྒཱ ནཱིཧརཎཀཱལོཏི ཨཱཧ – ‘‘ནཱིཧརཎཀཱལེ པཊིསེཝནཙིཏྟཾ ཨུཔཊྛཱཔེཏཱི’’ཏི. ཨངྒཱརཀཱསུནྟི ཨངྒཱརརཱསིཾ. ཨེཝརཱུཔེ ཀཱལེ ཨསཱདིཡནཾ ནཱམ ན སབྦེསཾ ཝིསཡོཏི ཨཱཧ ‘‘ཨིམཉྷི ཨེཝརཱུཔཾ ཨཱརདྡྷཝིཔསྶཀ’’ནྟིཨཱདི ¶ . ཨེཀཱདསཧི ཨགྒཱིཧཱིཏི རཱགདོསམོཧཛཱཏིཛརཱམརཎསོཀཔརིདེཝདུཀྑདོམནསྶུཔཱཡཱསསངྑཱཏེཧི ཨེཀཱདསཧི ཨགྒཱིཧི. རཱགཱདཡོ ཧི ཨནུཌཧནཊྛེན ‘‘ཨགྒཱི’’ཏི ཝུཙྩནྟི. ཏེ ཧི ཡསྶ སནྟི ¶ , ཏཾ ནིཌཧནྟི, མཧཱཔརིལཱ༹ཧཱ ཙ ཧོནྟི དུནྣིབྦཱཔཡཱ ཙ. བྷགཝཏཱ ཙ དུམྨངྐཱུནཾ པུགྒལཱནཾ ནིགྒཧོ ཨིཙྪིཏོཡེཝཱཏི ཨཱཧ – ‘‘པཙྩཏྠིཀཱནཉྩསྶ མནོརཐཝིགྷཱཏཾ ཀརོནྟོ’’ཏི. ཨསྶཱཏི ཨསཱདིཡནྟསྶ ཡཐཱཝུཏྟགུཎསམངྒིསྶ.

པཋམཙཏུཀྐཀཐཱཝཎྞནཱ ནིཊྛིཏཱ.

ཨེཀཱུནསཏྟཏིདྭིསཏཙཏུཀྐཀཐཱཝཎྞནཱ

༥༩-༦༠. ཨཀྑཱཡིཏནིམིཏྟཱ ཨཀྑཱཡིཏ-སདྡེན ཝུཏྟཱ ཨུཏྟརཔདལོཔེནཱཏི ཨཱཧ ‘‘སོཎསིངྒཱལཱདཱིཧི ཨཀྑཱཡིཏནིམིཏྟ’’ནྟི. ཨཀྑཱཡིཏཾ ནིམིཏྟཾ ཡསྶཱ སཱ ཨཀྑཱཡིཏནིམིཏྟཱ. ‘‘ཛཱགརནྟི’’ནྟིཨཱདི ཝིསེསནརཧིཏཏྟཱ ‘‘སུདྡྷིཀཙཏུཀྐཱནཱི’’ཏི ཝུཏྟཾ.

སམཱནཱཙརིཡཀཱ ཐེརཱཏི ཨེཀཱཙརིཡསྶ པཱཋཀནྟེཝཱསིཀཱ. མཧཱབྷཡེཏི བྲཱཧྨཎཏིསྶབྷཡེ. གངྒཱཡ ཨཔརབྷཱགོ ཨཔརགངྒཾ. ཝཏ རེཏི གརཧཏྠེ ནིཔཱཏོ. ཨཝིསྶཛྫནྟེན ཀིཾ ཀཏྟབྦནྟི ཨཱཧ ‘‘ནིཙྩཀཱལཾ སོཏབྦ’’ནྟིཨཱདི. ཨེཝཾ ཝིནཡགརུཀཱནནྟི ཨིམིནཱ ཨུཔརི ཏེཧི ཝུཙྩམཱནཝིནིཙྪཡསྶ གརུཀརཎཱིཡཏཱཡ ཀཱརཎཾ ཝུཏྟཾ. སབྦཾ པརིཡཱདིཡིཏྭཱཏི སབྦཾ པཱརཱཛིཀཀྑེཏྟཾ ཨནཝསེསཏོ གཧེཏྭཱ. སོཏཾ ཚིནྡིཏྭཱཏི པཱརཱཛིཀཀྑེཏྟེ ཝཱིཏིཀྐམསོཏཾ ཚིནྡིཏྭཱ. ཨཔཉྙཏྟབྷཱཝཏོ ཡུཏྟིཨབྷཱཝཏོ ཙ ‘‘པཱརཱཛིཀཙྪཱཡཱ པནེཏྠ ན དིསྶཏཱི’’ཏི ཝུཏྟཾ. ཀེཙི པན ‘‘ཨུཔཌྜྷཀྑཱཡིཏབྷཱཝསྶ དུབྦིནིཙྪཡཏྟཱ ཏཏྠ པཱརཱཛིཀཾ ན པཉྙཔེསཱི’’ཏི ཝདནྟི, ཏཾ ཨཀཱརཎཾ, ན ཙ དུབྦིནིཙྪཡཏཱ ཨཔཉྙཏྟིཀཱརཎཾ ཡེབྷུཡྻཀྑཱཡིཏཱདཱིསུཔི དུབྦིནིཙྪཡབྷཱཝསྶ སམཱནཏྟཱ. ཨུཔཌྜྷཀྑཱཡིཏཏོ ཧི ཀིཉྩིདེཝ ཨདྷིཀཾ ཨཱུནཾ ཝཱ ཡདི ཁཱཡིཏཾ སིཡཱ, ཏམྤི ཡེབྷུཡྻེན ཁཱཡིཏཾ ཨཀྑཱཡིཏནྟི སངྑྱཾ གཙྪཏཱིཏི ཨུཔཌྜྷཀྑཱཡིཏམིཝ ཡེབྷུཡྻཀྑཱཡིཏཱདཱིནིཔི དུབྦིནིཙྪཡཱནེཝ. ཨཔིཙ ཨུཔཌྜྷཀྑཱཡིཏཾ ཡདི སབྷཱཝཏོ ¶ པཱརཱཛིཀཀྑེཏྟཾ སིཡཱ, ན ཏཏྠ བྷགཝཱ དུབྦིནིཙྪཡནྟི པཱརཱཛིཀཾ ན པཉྙཔེཏི.

ཨིདཱནི ཐེརེན ཀཏཝིནིཙྪཡམེཝ ཨུཔཏྠམྦྷེཏྭཱ ཨཔརམྤི ཏཏྠ ཀཱརཎཾ དསྶེནྟོ ‘‘ཨཔིཙཱ’’ཏིཨཱདིམཱཧ. ནིམིཏྟེ ཨཔྤམཏྟིཀཱཔི མཾསརཱཛི སཙེ ཨཝསིཊྛཱ ཧོཏི, ཏཾ ཡེབྷུཡྻཀྑཱཡིཏམེཝ ཧོཏི, ཏཏོ པརཾ པན སབྦསོ ཁཱཡིཏེ ནིམིཏྟེ དུཀྐཊམེཝཱཏི དསྶེནྟོ ཨཱཧ ‘‘ཏཏོ པརཾ ཐུལླཙྩཡཾ ནཏྠཱི’’ཏི. ཨཐ ཝཱ ཡེབྷུཡྻེན ཁཱཡིཏཾ ནཱམ ཝཙྩམགྒཔསྶཱཝམགྒམུཁཱནཾ ཙཏཱུསུ ཀོཊྛཱསེསུ དྭེ ཀོཊྛཱསེ ཨཏིཀྐམྨ ཡཱཝ ཏཏིཡཀོཊྛཱསསྶ པརིཡོསཱནཱ ¶ ཁཱདིཏཾ, ཏཏོ པརཾ པན ཏཏིཡཀོཊྛཱསཾ ཨཏིཀྐམྨ ཡཱཝ ཙཏུཏྠཀོཊྛཱསསྶ པརིཡོསཱནཱ ཁཱདིཏཾ དུཀྐཊཝཏྠཱུཏི ཝེདིཏབྦཾ. མཏསརཱིརསྨིཾཡེཝ ཝེདིཏབྦནྟི ‘‘མཏཾ ཡེབྷུཡྻེན ཨཀྑཱཡིཏ’’ནྟིཨཱདིཝཙནཏོ. ‘‘ཡདིཔི ནིམིཏྟཾ སབྦསོ ཁཱཡིཏནྟིཨཱདི སབྦཾ ཛཱིཝམཱནཀསརཱིརམེཝ སནྡྷཱཡ ཝུཏྟ’’ནྟི མཧཱགཎྛིཔདེ ཝུཏྟཾ. ཀེནཙི པན ‘‘ཏཾ ཝཱིམཾསིཏྭཱ གཧེཏབྦ’’ནྟི ལིཁིཏཾ. ཀིམེཏྠ ཝཱིམཾསིཏབྦཾ ཛཱིཝམཱནཀསརཱིརསྶེཝ ཨདྷིཀཏཏྟཱ མཏསརཱིརེ ལབྦྷམཱནསྶ ཝིནིཙྪཡསྶ ཝིསུཾ ཝཀྑམཱནཏྟཱ ཙ. ཏེནེཝ མཱཏིཀཱཊྛཀཐཱཡམྤི (ཀངྑཱ. ཨཊྛ. པཋམཔཱརཱཛིཀཝཎྞནཱ) –

‘‘ཛཱིཝམཱནཀསརཱིརསྶ ཝུཏྟཔྤཀཱརེ མགྒེ སཙེཔི ཏཙཱདཱིནི ཨནཝསེསེཏྭཱ སབྦསོ ཚིནྣེ ནིམིཏྟསཎྛཱནམཏྟཾ པཉྙཱཡཏི, ཏཏྠ ཨནྟམསོ ཨངྒཛཱཏེ ཨུཊྛིཀཾ ཨནཊྛཀཱཡཔྤསཱདཾ པཱིལ༹ཀཾ ཝཱ ཙམྨཁཱིལཾ ཝཱ པཝེསེནྟསྶཔི སེཝནཙིཏྟེ སཏི པཱརཱཛིཀཾ, ནཊྛཀཱཡཔྤསཱདཾ སུཀྑཔཱིལ༹ཀཾ ཝཱ མཏཙམྨཾ ཝཱ ལོམཾ ཝཱ པཝེསེནྟསྶ དུཀྐཊཾ. སཙེ ནིམིཏྟསཎྛཱནམཏྟམྤི ཨནཝསེསེཏྭཱ སབྦསོ མགྒོ ཨུཔྤཱཊིཏོ, ཏཏྠ ཨུཔཀྐམཏོ ཝཎསངྑེཔཝསེན ཐུལླཙྩཡ’’ནྟི –

ཛཱིཝམཱནཀསརཱིརསྨིཾཡེཝ ཡཐཱཝུཏྟཝིནིཙྪཡོ དསྶིཏོ.

སབྦསོ ཁཱཡིཏནྟི ནིམིཏྟཔྤདེསེ བཧིཊྛིཏཾ ཚཝིཙམྨཾ སབྦསོ ཚིནྡིཏྭཱ སོཎསིངྒཱལཱདཱིཧི ཁཱཡིཏསདིསཾ ཀཏཾ. ཏེནེཝཱཧ ‘‘ཚཝིཙམྨཾ ནཏྠཱི’’ཏི. ནིམིཏྟམཾསསྶ པན ཨབྦྷནྟརེ ཚཝིཙམྨསྶ ཙ ཝིཛྫམཱནཏྟཱ ‘‘ནིམིཏྟསཎྛཱནཾ པཉྙཱཡཏཱི’’ཏི ཝུཏྟཾ. ཏེནེཝཱཧ ‘‘པཝེསནཾ ཛཱཡཏཱི’’ཏི. ནིམིཏྟསཎྛཱནཾ པན ¶ ཨནཝསེསེཏྭཱཏི ནིམིཏྟཱཀཱརེན ཋིཏཾ ཚཝིཙམྨམཾསཱདིཾ ཨནཝསེསེཏྭཱ. ཛཱིཝམཱནཀསརཱིརེ ལབྦྷམཱནཝིསེསཾ དསྶེཏྭཱ ཨིདཱནི མཏསརཱིརེ ལབྦྷམཱནཝིསེསཾ དསྶེནྟོ ཨཱཧ ‘‘མཏསརཱིརེ པནཱ’’ཏིཨཱདི.

མནུསྶཱནཾ ཛཱིཝམཱནཀསརཱིརེཏིཨཱདིནཱ པན ཨཀྑིཨཱདཡོཔི ཝཎསངྒཧཾ གཙྪནྟཱིཏི ཝཎེན ཨེཀཔརིཙྪེདཾ ཀཏྭཱ ཨཀྑིཨཱདཱིསུཔི ཐུལླཙྩཡཾ ཝུཏྟཾ. ཏེསཉྩ ཝཎསངྒཧོ ‘‘ནཝདྭཱརོ མཧཱཝཎོ’’ཏི (མི. པ. ༢.༦.༡) ཨེཝམཱདིསུཏྟཱནུསཱརེན ཝེདིཏབྦོ. ཏིརཙྪཱནགཏཱནཾ ཨཀྑིཀཎྞཝཎེསུ དུཀྐཊཾ པན ཨཊྛཀཐཱཔྤམཱཎེན གཧེཏབྦཾ. ཡཐཱ ཧི མནུསྶཱམནུསྶཏིརཙྪཱནགཏེསུ ཝཙྩམགྒཔསྶཱཝམགྒམུཁཱནཾ པཱརཱཛིཀཝཏྠུབྷཱཝེ ནཱནཱཀརཎཾ ནཏྠི, ཨེཝཾ ཨཀྑིཨཱདཱིནམྤི ཐུལླཙྩཡཱདིཝཏྠུབྷཱཝེ ནིནྣཱནཱཀརཎེན བྷཝིཏབྦཾ. ཝཎེ ཐུལླཙྩཡཉྩ ‘‘ཨམགྒེན ¶ ཨམགྒཾ པཝེསེཏི, ཨཱཔཏྟི ཐུལླཙྩཡསྶཱ’’ཏི (པཱརཱ. ༦༦) སཱམཉྙཏོ ཝུཏྟཾ, ན པན ‘‘མནུསྶཱན’’ནྟི ཝིསེསནཾ ཨཏྠི. ཡདི ཙ ཏིརཙྪཱནགཏཱནཾ ཝཎེསུ ཐུལླཙྩཡེན ན བྷཝིཏབྦཾ, པཏངྒམུཁམཎྜཱུཀསྶ མུཁསཎྛཱནེ ཝཎསངྑེཔཏོ ཐུལླཙྩཡཾ ན ཝཏྟབྦཾ, ཝུཏྟཉྩ, ཏསྨཱ ཨཊྛཀཐཱཙརིཡཱ ཨེཝེཏྠ པམཱཎཾ. བྷགཝཏོ ཨདྷིཔྤཱཡཉྙུནོ ཧི ཨཊྛཀཐཱཙརིཡཱ. ཏེནེཝ ཝུཏྟཾ ‘‘བུདྡྷེན དྷམྨོ ཝིནཡོ ཙ ཝུཏྟོ, ཡོ ཏསྶ པུཏྟེཧི ཏཐེཝ ཉཱཏོ’’ཏིཨཱདི (པཱརཱ. ཨཊྛ. ༡.). མནུསྶཱནནྟི ཨིཏྠིཔུརིསཔཎྜཀཨུབྷཏོབྱཉྫནཀཱནཾ སཱམཉྙཏོ ཝུཏྟཾ. ཝཏྠིཀོསེསཱུཏི ཝཏྠིཔུཊེསུ པུརིསཱནཾ ཨངྒཛཱཏཀོསེསུ. མཏསརཱིརཾ ཡཱཝ ཨུདྡྷུམཱཏཀཱདིབྷཱཝེན ཀུཐིཏཾ ན ཧོཏི, ཏཱཝ ཨལླསརཱིརནྟི ཝེདིཏབྦཾ. ཏེནཱཧ – ‘‘ཡདཱ པན སརཱིརཾ ཨུདྡྷུམཱཏཀཾ ཧོཏཱི’’ཏིཨཱདི. པཱརཱཛིཀཝཏྠུཉྩ ཐུལླཙྩཡཝཏྠུཉྩ ཝིཛཧཏཱིཏི ཨེཏྠ པཱརཱཛིཀཝཏྠུབྷཱཝཾ ཐུལླཙྩཡཝཏྠུབྷཱཝཉྩ ཝིཛཧཏཱིཏི ཨཏྠོ ཝེདིཏབྦོ. མཏཱནཾ ཏིརཙྪཱནགཏཱནནྟི སམྦནྡྷོ.

མེཐུནརཱགེན ཝཏྠིཀོསཾ པཝེསེནྟསྶ ཐུལླཙྩཡཾ ཝུཏྟནྟི ཨཱཧ ‘‘པཏྠིཀོསཾ ཨཔྤཝེསེནྟོ’’ཏི. ཨིཏྠིཡཱ ཨཔྤཝེསེནྟོཏི ཨིཏྠིཡཱ ནིམིཏྟཾ ཨཔྤཝེསེནྟོ. ཨཔྤཝེསེནྟོཏི ཙ པཝེསནཱདྷིཔྤཱཡསྶ ཨབྷཱཝཾ དསྶེཏི. པཝེསནཱདྷིཔྤཱཡེན བཧི ཚུཔནྟསྶ པན མེཐུནསྶ པུབྦཔཡོགཏྟཱ དུཀྐཊེནེཝ བྷཝིཏབྦཾ. ནིམིཏྟེན ནིམིཏྟཾ ཚུཔཏི, ཐུལླཙྩཡནྟི ཨིདཾ ‘‘ན ཙ, བྷིཀྑཝེ, རཏྟཙིཏྟེན ཨངྒཛཱཏཾ ཚུཔིཏབྦཾ, ཡོ ཚུཔེཡྻ, ཨཱཔཏྟི ཐུལླཙྩཡསྶཱ’’ཏི ¶ (མཧཱཝ. ༢༥༢) ཨིམསྶ སུཏྟསྶ ཝསེན ཝུཏྟཾ. ཏཏྠ ཙ ཀེསཉྩི ཨཉྙཐཱཔི ཨཏྠཝིཀཔྤསྶ ཝིདྷིཾ དསྶེནྟོ ‘‘མཧཱཨཊྛཀཐཱཡཾ པནཱ’’ཏིཨཱདིམཱཧ. ཏཏྠ ཀིཉྩཱཔི ‘‘ཀཏྭཱ མཧཱཨཊྛཀཐཾ སརཱིར’’ནྟི (པཱརཱ. ཨཊྛ. ༡.གནྠཱརམྦྷཀཐཱ) ཝུཏྟཾ, ཏཐཱཔི སེསཨཊྛཀཐཱསུ ‘‘མེཐུནརཱགེན མུཁེནཱ’’ཏི ཝཙནསྶ ཨབྷཱཝཾ དསྶེཏུཾ ‘‘མཧཱཨཊྛཀཐཱཡཾ པནཱ’’ཏི ཝུཏྟཾ. ‘‘ཨངྒཛཱཏེནཱ’’ཏི ཨཝུཏྟཏྟཱ ‘‘ཨཝིསེསེནཱ’’ཏི ཝུཏྟཾ.

ཨིདཱནི མཧཱཨཊྛཀཐཾ པཱལི༹ཡཱ སཾསནྡིཏྭཱ དསྶེནྟོ ‘‘ཡཾ ཏཱཝ མཧཱཨཊྛཀཐཱཡ’’ནྟིཨཱདིམཱཧ. ཨིཏརཐཱ ཧི དུཀྐཊཾ སིཡཱཏི པཀཏིམུཁེན ཚུཔནྟསྶ ཝིསཱཎཱདིགྒཧཎེ ཝིཡ དུཀྐཊཾ སིཡཱ. ཨེཝཾ མཧཱཨཊྛཀཐཾ པཱལི༹ཡཱ སཾསནྡིཏྭཱ ཨིདཱནི ཏཏྠ ཀེསཉྩི ཨཉྙཐཱ ཨཏྠཝིཀཔྤཾ དསྶེནྟོ ‘‘ཀེཙི པནཱ’’ཏིཨཱདིམཱཧ. སངྒྷཱདིསེསོཏི ཀཱཡསཾསགྒསིཀྑཱཔདེན སངྒྷཱདིསེསོ. ཝུཏྟནཡེནེཝཱཏི མེཐུནརཱགེནེཝ. ‘‘ནིམིཏྟམུཁེནཱ’’ཏི ཝུཏྟཏྟཱ ཏིརཙྪཱནགཏིཏྠིཡཱ པསྶཱཝམགྒཾ མེཐུནརཱགེན པཀཏིམུཁེན ཚུཔནྟསྶ དུཀྐཊནྟི ཝེདིཏབྦཾ. ཀཱཡསཾསགྒརཱགེན དུཀྐཊནྟི ནིམིཏྟམུཁེན ཝཱ པཀཏིམུཁེན ཝཱ ཀཱཡསཾསགྒརཱགེན ཚུཔནྟསྶ དུཀྐཊམེཝ.

ཨེཀཱུནསཏྟཏིདྭིསཏཙཏུཀྐཀཐཱཝཎྞནཱ ནིཊྛིཏཱ.

སནྠཏཙཏུཀྐབྷེདཀཐཱཝཎྞནཱ

༦༡-༢. པཊིཔནྣཀསྶཱཏི ¶ ཨཱརདྡྷཝིཔསྶཀསྶ. ཨུཔཱདིནྣཀནྟི ཀཱཡིནྡྲིཡཾ སནྡྷཱཡ ཝུཏྟཾ. ཨུཔཱདིནྣཀེན ཕུསཏཱིཏི ཨུཔཱདིནྣཀེན ཕུསཱིཡཏི གྷཊྚཱིཡཏཱིཏི ཨེཝཾ ཀམྨནི ཡ-ཀཱརལོཔེན ཨཏྠོ ཝེདིཏབྦོ. ཨཐ ཝཱ ཨེཝཾ ཀརོནྟོ ཀིཉྩི ཨུཔཱདིནྣཀཾ ཨུཔཱདིནྣཀེན ན ཕུསཏི ན གྷཊྚེཏཱིཏི ཨེཝམེཏྠ ཨཏྠོ དཊྛབྦོ. ལེསཾ ཨོཌྜེསྶནྟཱིཏི ལེསཾ སམུཊྛཱཔེསྶནྟི, པརིཀཔྤེསྶནྟཱིཏི ཝུཏྟཾ ཧོཏི. སནྠཏཱདིབྷེདེཧི བྷིནྡིཏྭཱཏི སནྠཏཱདིཝིསེསནེཧི ཝིསེསེཏྭཱ, སནྠཏཱདཱིཧི ཙཏཱུཧི ཡོཛེཏྭཱཏི ཝུཏྟཾ ཧོཏི.

སནྠཏཱཡཱཏི ཨེཀདེསེ སམུདཱཡཝོཧཱརོ ‘‘པཊོ དཌྜྷོ’’ཏིཨཱདཱིསུ ཝིཡ. ཏཐཱ ཧི པཊསྶ ཨེཀདེསེཔི དཌྜྷེ ‘‘པཊོ དཌྜྷོ’’ཏི ཝོཧརནྟི ¶ , ཨེཝཾ ཨིཏྠིཡཱ ཝཙྩམགྒཱདཱིསུ ཀིསྨིཉྩི མགྒེ སནྠཏེ ཨིཏྠཱི ‘‘སནྠཏཱ’’ཏི ཝུཙྩཏི. ཏེནཱཧ ‘‘སནྠཏཱ ནཱམཱ’’ཏིཨཱདི. ཝཏྠཱདཱིནི ཨནྟོ ཨཔྤཝེསེཏྭཱ བཧི ཋཔེཏྭཱ བནྡྷནཾ སནྡྷཱཡ ‘‘པལིཝེཋེཏྭཱ’’ཏི ཝུཏྟཾ. ཨེཀདེསེ སམུདཱཡཝོཧཱརཝསེནེཝ བྷིཀྑུཔི ‘‘སནྠཏོ’’ཏི ཝུཙྩཏཱིཏི ཨཱཧ ‘‘སནྠཏོ ནཱམཱ’’ཏིཨཱདི. ཡཏྟཀེ པཝིཊྛེཏི ཏིལཕལམཏྟེ པཝིཊྛེ. ཨཀྑིཨཱདིམྷི སནྠཏེཔི ཡཐཱཝཏྠུཀམེཝཱཏི ཨཱཧ ‘‘ཐུལླཙྩཡཀྑེཏྟེ ཐུལླཙྩཡཾ, དུཀྐཊཀྑེཏྟེ དུཀྐཊམེཝ ཧོཏཱི’’ཏི.

ཁཱཎུཾ གྷཊྚེནྟསྶ དུཀྐཊནྟི ཨིཏྠིནིམིཏྟསྶ ཨནྟོ ཁཱཎུཾ པཝེསེཏྭཱ སམཏལཾ ཨཏིརིཏྟཾ ཝཱ ཁཱཎུཾ གྷཊྚེནྟསྶ དུཀྐཊཾ པཝེསཱབྷཱཝཏོ. སཙེ པན ཨཱིསཀཾ ཨནྟོ པཝིསིཏྭཱ ཋིཏཾ ཁཱཎུཀམེཝ ཨངྒཛཱཏེན ཚུཔཏི, པཱརཱཛིཀམེཝ. ཏསྶ ཏལནྟི ཝེལུ༹ནལཱ༹དིཀསྶ ཨནྟོཏལཾ. ཝིནཱིཏཝཏྠཱུསུ ‘‘ཏེན ཁོ པན སམཡེན ཨཉྙཏརོ བྷིཀྑུ སཱིཝཐིཀཾ གནྟྭཱ ཚིནྣསཱིསཾ པསྶིཏྭཱ ཝཊྚཀཏེ མུཁེ ཨཙྪུཔནྟཾ ཨངྒཛཱཏཾ པཝེསེསི. ཏསྶ ཀུཀྐུཙྩཾ ཨཧོསི…པེ… ཨནཱཔཏྟི བྷིཀྑུ པཱརཱཛིཀསྶ, ཨཱཔཏྟི དུཀྐཊསྶཱ’’ཏི ཝུཏྟཏྟཱ ཏསྶ སུཏྟསྶ ཨནུལོམཏོ ‘‘ཨཱཀཱསགཏམེཝ ཀཏྭཱ པཝེསེཏྭཱ ནཱིཧརཏི, དུཀྐཊ’’ནྟི (པཱརཱ. ༧༣) ཝུཏྟཾ. བཧིདྡྷཱ ཁཱཎུཀེཏི ཨནྟོཔཝེསིཏཝེཎུཔབྦཱདིཀསྶ བཧི ནིཀྑནྟཁཱཎུཀེ. མེཐུནརཱགེན ཨིནྡྲིཡབདྡྷཨཱནིནྡྲིཡབདྡྷསནྟཱནེསུ ཡཏྠ ཀཏྠཙི ཨུཔཀྐམནྟསྶ ན སཀྐཱ ཨནཱཔཏྟིཡཱ བྷཝིཏུནྟི ‘‘དུཀྐཊམེཝཱ’’ཏི ཝུཏྟཾ. ཏེནེཝ ཝིནཱིཏཝཏྠུམྷི ཨཊྛིཀེསུ ཨུཔཀྐམནྟསྶ དུཀྐཊཾ ཝུཏྟཾ.

སནྠཏཙཏུཀྐབྷེདཀཐཱཝཎྞནཱ ནིཊྛིཏཱ.

རཱཛཔཙྩཏྠིཀཱདིཙཏུཀྐབྷེདཀཐཱཝཎྞནཱ

༦༥. སཱམཉྙཛོཏནཱཡ ¶ པཀརཎཏོ ཝིསེསཝིནིཙྪཡོཏི ཨཱཧ ‘‘དྷུཏྟཱཏི མེཐུནུཔསཾཧིཏཁིཌྜཱཔསུཏཱ’’ཏིཨཱདི. ཨིདཱནི སཱམཉྙཏོཔི ཨཏྠསམྦྷཝཾ དསྶེནྟོ ‘‘ཨིཏྠིདྷུཏྟསུརཱདྷུཏྟཱདཡོ ཝཱ’’ཏི ཨཱཧ. ཧདཡནྟི ཧདཡམཾསཾ.

སབྦཱཀཱརེན ཙཏུཀྐབྷེདཀཐཱཝཎྞནཱ ནིཊྛིཏཱ.

ཨཱཔཏྟཱནཱཔཏྟིཝཱརཝཎྞནཱ

༦༦. པཊིཉྙཱཀརཎཾ ¶ ནཏྠཱིཏི པུཙྪིཏབྦཱབྷཱཝཏོ. ན ཧི དཱུསཀོ ‘‘ཀེན ཙིཏྟེན ཝཱིཏིཀྐམཾ ཨཀཱསི, ཛཱནིཏྭཱ ཨཀཱསི, ཨུདཱཧུ ཨཛཱནིཏྭཱ’’ཏི ཨེཝཾ པུཙྪཱཡ ཨརཧཏི. ཏཏྠེཝཱཏི ཝེསཱལིཡཾ མཧཱཝནེ ཨེཝ. སབྦངྒགཏནྟི ཋཔེཏྭཱ ཀེསལོམདནྟནཁཱནཾ མཾསཝིནིམུཏྟཊྛཱནཉྩེཝ ཐདྡྷསུཀྑཙམྨཉྩ ཨུདཀམིཝ ཏེལབིནྡུ ཨཝསེསསབྦསརཱིརཾ བྱཱཔེཏྭཱ ཋིཏཾ. སརཱིརཀམྤཱདཱིནཱིཏི ཨཱདི-སདྡེན ཨཀྑཱིནཾ པཱིཏཝཎྞཱདིཾ སངྒཎྷཱཏི. པིཏྟཀོསཀེ ཋིཏནྟི ཧདཡཔཔྥཱསཱནཾ ཨནྟརེ ཡཀནམཾསཾ ནིསྶཱཡ པཏིཊྛིཏེ མཧཱཀོསཱཏཀཱིཀོསསདིསེ པིཏྟཀོསེ ཋིཏཾ. ཀུཔིཏེཏི པིཏྟཀོསཏོ ཙལིཏྭཱ བཧི ནིཀྑནྟེ.

ཝིསྶཊྛཙིཏྟོཏི ཝིསྶཊྛཔཀཏིཙིཏྟོ. ཡཀྑུམྨཏྟཀོཏི ཡཀྑཱ ཀིར ཡསྶ ཙིཏྟཾ ཁིཔིཏུཀཱམཱ ཧོནྟི, ཏསྶ སེཏམུཁཾ ནཱིལོདརཾ སུརཏྟཧཏྠཔཱདཾ མཧཱསཱིསཾ པཛྫལིཏནེཏྟཾ བྷེརཝཾ ཝཱ ཨཏྟབྷཱཝཾ ནིམྨིནིཏྭཱ དསྶེནྟི, བྷེརཝཾ ཝཱ སདྡཾ སཱཝེནྟི, ཀཐེནྟསྶེཝ ཝཱ མུཁེན ཧཏྠཾ པཀྑིཔིཏྭཱ ཧདཡམཾསཾ མདྡནྟི, ཏེན སོ སཏྟོ ཨུམྨཏྟཀོ ཧོཏི ཁིཏྟཙིཏྟོ. ཏེནེཝཱཧ ‘‘བྷེརཝཱནི ཝཱ ཨཱརམྨཎཱནི དསྶེཏྭཱ’’ཏིཨཱདི. ཏཏྠ བྷེརཝཱནཱིཏི དསྶནམཏྟེནེཝ སཏྟཱནཾ བྷཡཾ ཚམྦྷིཏཏྟཾ ལོམཧཾསཾ ཨུཔྤཱདེཏུཾ སམཏྠཱནི. ནིཙྩམེཝ ཨུམྨཏྟཀོ ཧོཏཱིཏི ཡསྶ པིཏྟཀོསཏོ པིཏྟཾ ཙལིཏྭཱ བཧི ནིཀྑནྟཾ ཧོཏི, ཏཾ སནྡྷཱཡ ཝུཏྟཾ. ཡསྶ པན པིཏྟཾ ཙལིཏྭཱ པིཏྟཀོསེཡེཝ ཋིཏཾ ཧོཏི བཧི ཨནིཀྑནྟཾ, སོ ཨནྟརནྟརཱ སཉྙཾ པཊིལབྷཏི, ན ནིཙྩམེཝ ཨུམྨཏྟཀོ ཧོཏཱིཏི ཝེདིཏབྦཾ. ཉཏྭཱཏི སཉྙཱཔཊིལཱབྷེན ཛཱནིཏྭཱ. ཨདྷིམཏྟཱཡཱཏི ཨདྷིཀཔྤམཱཎཱཡ.

ཨཱཔཏྟཱནཱཔཏྟིཝཱརཝཎྞནཱ ནིཊྛིཏཱ.

པདབྷཱཛནཱིཡཝཎྞནཱ ནིཊྛིཏཱ.

པཀིཎྞཀཀཐཱཝཎྞནཱ

པཀིཎྞཀནྟི ¶ ཝོམིསྶཀནཡཾ. སམུཊྛཱནནྟི ཨུཔྤཏྟིཀཱརཎཾ. ཀིརིཡཱཏིཨཱདི ནིདསྶནམཏྟཾ, ཨཀིརིཡཱདཱིནམྤི སངྒཧོ དཊྛབྦོ. ཝེདནཱཡཱཏི སཧཡོགེ ཀརཎཝཙནཾ, ཝེདནཱཡ སཧ ཀུསལཉྩཱཏི ཝུཏྟཾ ཧོཏི. སབྦསངྒཱཧཀཝསེནཱཏི ¶ སབྦེསཾ སིཀྑཱཔདཱནཾ སངྒཱཧཀཝསེན. ཚ སིཀྑཱཔདསམུཊྛཱནཱནཱིཏི ཀཱཡོ ཝཱཙཱ ཀཱཡཝཱཙཱ ཀཱཡཙིཏྟཾ ཝཱཙཱཙིཏྟཾ ཀཱཡཝཱཙཱཙིཏྟནྟི ཨེཝཾ ཝུཏྟཱནི ཚ ཨཱཔཏྟིསམུཊྛཱནཱནི. ཨཱཔཏྟིཡེཝ ཧི སིཀྑཱཔདསཱིསེན ཝུཏྟཱ. སམུཊྛཱནཱདཡོ ཧི ཨཱཔཏྟིཡཱ ཧོནྟི, ན སིཀྑཱཔདསྶ, ཨིམེསུ པན ཚསུ སམུཊྛཱནེསུ པུརིམཱནི ཏཱིཎི ཨཙིཏྟཀཱནི, པཙྪིམཱནི སཙིཏྟཀཱནི. ཏེསུ ཨེཀེན ཝཱ དྭཱིཧི ཝཱ ཏཱིཧི ཝཱ ཙཏཱུཧི ཝཱ ཚཧི ཝཱ སམུཊྛཱནེཧི ཨཱཔཏྟིཡོ སམུཊྛཧནྟི, པཉྩསམུཊྛཱནཱ ཨཱཔཏྟི ནཱམ ནཏྠི. ཏཏྠ ཨེཀསམུཊྛཱནཱ ཙཏུཏྠེན ཙ པཉྩམེན ཙ ཚཊྛེན ཙ སམུཊྛཱནེན སམུཊྛཱཏི, ན ཨཉྙེན. དྭིསམུཊྛཱནཱ པཋམཙཏུཏྠེཧི ཙ དུཏིཡཔཉྩམེཧི ཙ ཏཏིཡཚཊྛེཧི ཙ ཙཏུཏྠཚཊྛེཧི ཙ པཉྩམཚཊྛེཧི ཙ སམུཊྛཱནེཧི སམུཊྛཱཏི, ན ཨཉྙེཧི. ཏིསམུཊྛཱནཱ པཋམེཧི ཙ ཏཱིཧི, པཙྪིམེཧི ཙ ཏཱིཧི སམུཊྛཱནེཧི སམུཊྛཱཏི, ན ཨཉྙེཧི. ཙཏུསམུཊྛཱནཱ པཋམཏཏིཡཙཏུཏྠཚཊྛེཧི ཙ དུཏིཡཏཏིཡཔཉྩམཚཊྛེཧི ཙ སམུཊྛཱནེཧི སམུཊྛཱཏི, ན ཨཉྙེཧི. ཚསམུཊྛཱནཱ ཚཧིཔི སམུཊྛཱཏི.

སིཀྑཱཔདཾ ནཱམ ཨཏྠི ཚསམུཊྛཱནནྟི ཨེཏྠཱཔི སིཀྑཱཔདསཱིསེན ཨཱཔཏྟི ཝུཏྟཱཏི ཝེདིཏབྦཱ. ཏེནེཝ ཝཀྑཏི ‘‘སབྦཉྩེཏཾ ཨཱཔཏྟིཡཾ ཡུཛྫཏི, སིཀྑཱཔདསཱིསེན པན སབྦཨཊྛཀཐཱསུ དེསནཱ ཨཱརུལ༹ྷཱ’’ཏི. ཀཱཡཱདཱིཧི ཚཧི སམུཊྛཱནཾ ཨུཔྤཏྟི, ཚ ཝཱ སམུཊྛཱནཱནི ཨེཏསྶཱཏི ཚསམུཊྛཱནཾ. ཨཏྠི ཙཏུསམུཊྛཱནནྟི ཀཱཡོ ཀཱཡཝཱཙཱ ཀཱཡཙིཏྟཾ ཀཱཡཝཱཙཱཙིཏྟནྟི ཨིམཱནི ཙཏྟཱརི, ཝཱཙཱ ཀཱཡཝཱཙཱ ཝཱཙཱཙིཏྟཾ ཀཱཡཝཱཙཱཙིཏྟནྟི ཨིམཱནི ཝཱ ཙཏྟཱརི སམུཊྛཱནཱནི ཨེཏསྶཱཏི ཙཏུསམུཊྛཱནཾ. ཨཏྠི ཏིསམུཊྛཱནནྟི ཀཱཡོ ཝཱཙཱ ཀཱཡཝཱཙཱཏི ཨིམཱནི ཏཱིཎི, ཀཱཡཙིཏྟཾ ཝཱཙཱཙིཏྟཾ ཀཱཡཝཱཙཱཙིཏྟནྟི ཨིམཱནི ཝཱ ཏཱིཎི སམུཊྛཱནཱནི ཨེཏསྶཱཏི ཏིསམུཊྛཱནཾ. དྭིསམུཊྛཱནཾ ཨེཀསམུཊྛཱནཉྩ སམུཊྛཱནསཱིསཝསེན དསྶེནྟོ ‘‘ཨཏྠི ཀཐིནསམུཊྛཱན’’ནྟིཨཱདིམཱཧ. ཏེརས ཧི སམུཊྛཱནསཱིསཱནི པཋམཔཱརཱཛིཀསམུཊྛཱནཾ ཨདིནྣཱདཱནསམུཊྛཱནཾ སཉྩརིཏྟསམུཊྛཱནཾ སམནུབྷཱསནསམུཊྛཱནཾ ཀཐིནསམུཊྛཱནཾ ཨེལ༹ཀལོམསམུཊྛཱནཾ པདསོདྷམྨསམུཊྛཱནཾ ཨདྡྷཱནསམུཊྛཱནཾ ཐེཡྻསཏྠསམུཊྛཱནཾ དྷམྨདེསནཱསམུཊྛཱནཾ བྷཱུཏཱརོཙནསམུཊྛཱནཾ ཙོརིཝུཊྛཱཔནསམུཊྛཱནཾ ཨནནུཉྙཱཏསམུཊྛཱནནྟི.

ཏཏྠ ¶ ¶ ‘‘ཨཏྠི ཚསམུཊྛཱན’’ནྟི ཨིམིནཱ སཉྩརིཏྟསམུཊྛཱནཾ ཝུཏྟཾ. ‘‘ཨཏྠི ཙཏུསམུཊྛཱན’’ནྟི ཨིམིནཱ པན ཨདྡྷཱནསམུཊྛཱནཾ ཨནནུཉྙཱཏསམུཊྛཱནཉྩ སངྒཧིཏཾ. ཡཉྷི པཋམཏཏིཡཙཏུཏྠཚཊྛེཧི སམུཊྛཱཏི, ཨིདཾ ཨདྡྷཱནསམུཊྛཱནཾ. ཡཾ པན དུཏིཡཏཏིཡཔཉྩམཚཊྛེཧི སམུཊྛཱཏི, ཨིདཾ ཨནནུཉྙཱཏསམུཊྛཱནཾ. ‘‘ཨཏྠི ཏིསམུཊྛཱན’’ནྟི ཨིམིནཱ ཨདིནྣཱདཱནསམུཊྛཱནཾ བྷཱུཏཱརོཙནསམུཊྛཱནཉྩ སངྒཧིཏཾ. ཡཉྷི སཙིཏྟཀེཧི ཏཱིཧི སམུཊྛཱནེཧི སམུཊྛཱཏི, ཨིདཾ ཨདིནྣཱདཱནསམུཊྛཱནཾ. ཡཾ པན ཨཙིཏྟཀེཧི ཏཱིཧི སམུཊྛཱཏི, ཨིདཾ བྷཱུཏཱརོཙནསམུཊྛཱནཾ. ‘‘ཨཏྠི ཀཐིནསམུཊྛཱན’’ནྟིཨཱདིནཱ པན ཨཝསེསསམུཊྛཱནསཱིསེན དྭིསམུཊྛཱནཾ ཨེཀསམུཊྛཱནཉྩ སངྒཎྷཱཏི. ཏཐཱ ཧི ཡཾ ཏཏིཡཚཊྛེཧི སམུཊྛཱཏི, ཨིདཾ ཀཐིནསམུཊྛཱནནྟི ཝུཙྩཏི. ཡཾ པཋམཙཏུཏྠེཧི སམུཊྛཱཏི, ཨིདཾ ཨེལ༹ཀལོམསམུཊྛཱནཾ. ཡཾ ཚཊྛེནེཝ སམུཊྛཱཏི, ཨིདཾ དྷུརནིཀྑེཔསམུཊྛཱནཾ, སམནུབྷཱསནསམུཊྛཱནནྟིཔི ཏསྶེཝ ནཱམཾ. ཨཱདི-སདྡསངྒཧིཏེསུ པན པཋམཔཱརཱཛིཀསམུཊྛཱནཔདསོདྷམྨཐེཡྻསཏྠདྷམྨདེསནཱཙོརིཝུཊྛཱཔནསམུཊྛཱནེསུ ཡཾ ཀཱཡཙིཏྟཏོ སམུཊྛཱཏི, ཨིདཾ པཋམཔཱརཱཛིཀསམུཊྛཱནཾ. ཡཾ དུཏིཡཔཉྩམེཧི སམུཊྛཱཏི, ཨིདཾ པདསོདྷམྨསམུཊྛཱནཾ. ཡཾ ཙཏུཏྠཚཊྛེཧི སམུཊྛཱཏི, ཨིདཾ ཐེཡྻསཏྠསམུཊྛཱནཾ. ཡཾ པཉྩམེནེཝ སམུཊྛཱཏི, ཨིདཾ དྷམྨདེསནཱསམུཊྛཱནཾ. ཡཾ པཉྩམཚཊྛེཧི སམུཊྛཱཏི, ཨིདཾ ཙོརིཝུཊྛཱཔནསམུཊྛཱནནྟི ཝེདིཏབྦཾ.

ཨེཝཾ སམུཊྛཱནསཱིསེན སབྦསིཀྑཱཔདཱནི ཏེརསདྷཱ དསྶེཏྭཱ ཨིདཱནི ཀིརིཡཱཝསེན པཉྩདྷཱ དསྶེནྟོ ‘‘ཏཏྲཱཔི ཀིཉྩི ཀིརིཡཏོ སམུཊྛཱཏཱི’’ཏིཨཱདིམཱཧ. ཏཏྠ ཀིཉྩཱིཏི སིཀྑཱཔདསཱིསེན ཨཱཔཏྟིཾ ཝདཏི. ཏསྨཱ ཡཱ ཀཱཡེན ཝཱ ཝཱཙཱཡ ཝཱ པཐཝཱིཁཎནཱདཱིསུ ཝིཡ ཝཱིཏིཀྐམཾ ཀརོནྟསྶ ཧོཏི, ཨཡཾ ཀིརིཡཏོ སམུཊྛཱཏི ནཱམ. ཡཱ ཀཱཡཝཱཙཱཡ ཀཏྟབྦཾ ཨཀརོནྟསྶ ཧོཏི པཋམཀཐིནཱཔཏྟི ཝིཡ, ཨཡཾ ཨཀིརིཡཏོ སམུཊྛཱཏི ནཱམ. ཡཱ ཀརོནྟསྶ ཙ ཨཀརོནྟསྶ ཙ ཧོཏི ཨཉྙཱཏིཀཱཡ བྷིཀྑུནིཡཱ ཧཏྠཏོ ཙཱིཝརཔཊིགྒཧཎཱཔཏྟི ཝིཡ, ཨཡཾ ཀིརིཡཱཀིརིཡཏོ སམུཊྛཱཏི ནཱམ. ཡཱ སིཡཱ ཀརོནྟསྶ ཙ སིཡཱ ཨཀརོནྟསྶ ཙ ཧོཏི རཱུཔིཡཔཊིགྒཧཎཱཔཏྟི ཝིཡ, ཨཡཾ སིཡཱ ཀིརིཡཏོ སིཡཱ ཨཀིརིཡཏོ སམུཊྛཱཏི ནཱམ. ཡཱ སིཡཱ ཀརོནྟསྶ ཙ སིཡཱ ཀརོནྟསྶ ཙ ཨཀརོནྟསྶ ཙ ཧོཏི ཀུཊིཀཱརཱཔཏྟི ཝིཡ, ཨཡཾ སིཡཱ ཀིརིཡཏོ སིཡཱ ཀིརིཡཱཀིརིཡཏོ སམུཊྛཱཏི ནཱམ.

ཨིདཱནི ¶ སབྦསིཀྑཱཔདཱནི སཉྙཱཝསེན དྭིདྷཱ ཀཏྭཱ དསྶེནྟོ ‘‘ཏཏྲཱཔི ཨཏྠི སཉྙཱཝིམོཀྑ’’ནྟིཨཱདིམཱཧ. སཉྙཱཡ ཨབྷཱཝེན ཝིམོཀྑོ ཨསྶཱཏི སཉྙཱཝིམོཀྑནྟི མཛ྄ཛྷེཔདལོཔསམཱསོ དཊྛབྦོ. ཡཏོ ཧི ཝཱིཏིཀྐམསཉྙཱཨབྷཱཝེན མུཙྩཏི, ཨིདཾ སཉྙཱཝིམོཀྑནྟི ཝུཙྩཏི. ཙིཏྟངྒཾ ལབྷཏིཡེཝཱཏི ཀཱཡཙིཏྟཱདིསཙིཏྟཀསམུཊྛཱནེཧེཝ སམུཊྛཧནཏོ ¶ . ‘‘ལབྷཏིཡེཝཱ’’ཏི ཨཝདྷཱརཎེན ནོ ན ལབྷཏཱིཏི དསྶེཏི. ཏསྨཱ ཡཾ ཙིཏྟངྒཾ ལབྷཏི, ན ལབྷཏི ཙ, ཏཾ ‘‘ཨིཏར’’ནྟི ཝུཏྟཾ ཨིཏར-སདྡསྶ ཝུཏྟཔཊིཡོགཝིསཡཏྟཱ.

པུན སབྦསིཀྑཱཔདཱནི ཙིཏྟཝསེན དྭིདྷཱ དསྶེནྟོ ‘‘པུན ཨཏྠི སཙིཏྟཀ’’ནྟིཨཱདིམཱཧ. ཡཾ སཧེཝ ཙིཏྟེན ཨཱཔཛྫཏཱིཏི ཡཾ སཙིཏྟཀེནེཝ སམུཊྛཱནེན ཨཱཔཛྫཏི, ནོ ཨཙིཏྟཀེན. ཝིནཱཔཱིཏི ཨཔི-སདྡེན སཧཱཔི ཙིཏྟེན ཨཱཔཛྫཏཱིཏི དསྶེཏི. ཡཉྷི ཀདཱཙི ཨཙིཏྟཀེན, ཀདཱཙི སཙིཏྟཀེན སམུཊྛཱནེན སམུཊྛཱཏི, ཏཾ ཨཙིཏྟཀནྟི ཝུཙྩཏི. ཨེཏྠ ཙ སཉྙཱདུཀཾ ཨནཱཔཏྟིམུཁེན, སཙིཏྟཀདུཀཾ ཨཱཔཏྟིམུཁེན ཝུཏྟནྟི ཨིདམེཏེསཾ ནཱནཱཀརཎནྟི ཝེདིཏབྦཾ.

ལོཀཝཛྫདུཀསྶ ཧེཊྛཱ ཝུཏྟལཀྑཎཏྟཱ ཏཾ ཨཝིབྷཛིཏྭཱ ཨིདཱནི སབྦསིཀྑཱཔདཱནི ཀམྨཝསེན དུཝིདྷཱནི, ཀུསལཱདིཝསེན ཝེདནཱཝསེན ཙ ཏིཝིདྷཱནི ཧོནྟཱིཏི དསྶེནྟོ ‘‘ཀམྨཀུསལཝེདནཱཝསེནཱ’’ཏིཨཱདིམཱཧ. ཨེཏྠ པན ཀིཉྩཱཔི ཨཊྛཀཐཱསུ ཨཱགཏནཡེན ཀཱཡཀམྨཾ ཝཙཱིཀམྨནྟི ཀམྨཝསེན དུཀཾ ཝུཏྟཾ, ཏིཀམེཝ པན དསྶེཏུཾ ཝཊྚཏི. སབྦམེཝ ཧི སིཀྑཱཔདཾ ཀཱཡདྭཱརེ ཨཱཔཛྫིཏབྦཏོ ཝཙཱིདྭཱརེ ཨཱཔཛྫིཏབྦཏོ ཀཱཡཝཙཱིདྭཱརེ ཨཱཔཛྫིཏབྦཏོ ཙ ཏིཝིདྷཾ ཧོཏི. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. པཋམཔཱརཱཛིཀཝཎྞནཱ) ཝུཏྟཾ ‘‘སབྦཱཝ ཀཱཡཀམྨཝཙཱིཀམྨཏདུབྷཡཝསེན ཏིཝིདྷཱ ཧོནྟི. ཏཏྠ ཀཱཡདྭཱརེ ཨཱཔཛྫིཏབྦཱ ཀཱཡཀམྨནྟི ཝུཙྩཏི, ཝཙཱིདྭཱརེ ཨཱཔཛྫིཏབྦཱ ཝཙཱིཀམྨནྟི ཝུཙྩཏི, ཨུབྷཡཏྠ ཨཱཔཛྫིཏབྦཱ ཀཱཡཀམྨཝཙཱིཀམྨ’’ནྟི. ཏཏོཡེཝ ཙ ཨདིནྣཱདཱནསིཀྑཱཔདཱདཱིསུ ཀཱཡཀམྨཝཙཱིཀམྨནྟི ཏདུབྷཡཝསེན དསྶིཏཾ.

ཨཏྠི པན སིཀྑཱཔདཾ ཀུསལནྟིཨཱདིནཱ ཨཱཔཏྟིཾ ཨཱཔཛྫནྟོ ཀུསལཙིཏྟསམངྒཱི ཝཱ ཨཱཔཛྫཏི ཨཀུསལཙིཏྟསམངྒཱི ཝཱ ཨབྱཱཀཏཙིཏྟསམངྒཱི ཝཱཏི ¶ དསྶེཏི, ན པན ཀུསལཱཔི ཨཱཔཏྟི ཨཏྠཱིཏི. ན ཧི ཀུསལཱ ཨཱཔཏྟི ནཱམ ཨཏྠི ‘‘ཨཱཔཏྟཱདྷིཀརཎཾ སིཡཱ ཨཀུསལཾ སིཡཱ ཨབྱཱཀཏཾ, ནཏྠི ཨཱཔཏྟཱདྷིཀརཎཾ ཀུསལ’’ནྟི (པརི. ༣༠༣) ཝཙནཏོ. དས ཀཱམཱཝཙརཀིརིཡཙིཏྟཱནཱིཏི ཧསིཏུཔྤཱདཝོཊྛབྦནེཧི སདྡྷིཾ ཨཊྛ མཧཱཀིརིཡཙིཏྟཱནི. དྭིནྣཾ ཨབྷིཉྙཱཙིཏྟཱནཾ ཨཱཔཏྟིསམུཊྛཱཔཀཏྟཾ པཉྙཏྟིཾ ཨཛཱནནྟསྶ ཨིདྡྷིཝིཀུབྦནཱདཱིསུ དཊྛབྦཾ. ཡཾ ཀུསལཙིཏྟེན ཨཱཔཛྫཏཱིཏི ཡཾ སིཀྑཱཔདསཱིསེན གཧིཏཾ ཨཱཔཏྟིཾ ཀུསལཙིཏྟསམངྒཱི ཨཱཔཛྫཏི. ཨིམིནཱ པན ཝཙནེན ཏཾ ཀུསལནྟི ཨཱཔཏྟིཡཱ ཝུཙྩམཱནོ ཀུསལབྷཱཝོ པརིཡཱཡཏོཝ, ན པརམཏྠཏོཏི དསྶེཏི. ཀུསལཙིཏྟེན ཧི ཨཱཔཏྟིཾ ཨཱཔཛྫནྟོ སཝིཉྙཏྟིཀཾ ཨཝིཉྙཏྟིཀཾ ¶ ཝཱ སིཀྑཱཔདཝཱིཏིཀྐམཱཀཱརཔྤཝཏྟཾ རཱུཔཀྑནྡྷསངྑཱཏཾ ཨབྱཱཀཏཱཔཏྟིཾ ཨཱཔཛྫཏི. ཨིཏརེཧི ཨིཏརནྟི ཨིཏརེཧི ཨཀུསལཱབྱཱཀཏཙིཏྟེཧི ཡཾ ཨཱཔཛྫཏི, ཏཾ ཨིཏརཾ, ཨཀུསལཾ ཨབྱཱཀཏཉྩཱཏི ཨཏྠོ. ཨིདཉྩ ཨཱཔཏྟིཾ ཨཱཔཛྫནྟོ ཨཀུསལཙིཏྟསམངྒཱི ཝཱ ཨཱཔཛྫཏི ཀུསལཱབྱཱཀཏཙིཏྟསམངྒཱི ཝཱཏི དསྶནཏྠཾ ཝུཏྟཾ. ཨེཝཾ སནྟེཔི སབྦསིཀྑཱཔདེསུ ཀིཉྩི ཨཀུསལཙིཏྟམེཝ ཀིཉྩི ཀུསལཱབྱཱཀཏཝསེན དྭིཙིཏྟཾ, ཀིཉྩི སབྦེསཾ ཝསེན ཏིཙིཏྟནྟི ཨཡམེཝ པབྷེདོ ལབྦྷཏི, ན ཨཉྙོཏི ཝེདིཏབྦཾ.

ཏིཝེདནཾ དྭིཝེདནཾ ཨེཀཝེདནནྟི ཨིདཉྩ ཡཐཱཝུཏྟཝེདནཱཝསེནེཝ ལབྦྷཏི, ནཱཉྙཐཱཏི དཊྛབྦཾ. ནིཔཛྫིཏྭཱ ནིརོདྷཾ སམཱཔནྣསྶ སཧསེཡྻཝསེན ཏདཱཀཱརཔྤཝཏྟརཱུཔཀྑནྡྷསྶེཝ ཨཱཔཏྟིབྷཱཝཏོ ‘‘ཨཏྠི ཨཝེདན’’ནྟིཔི ཝཏྟབྦམེཏཾ, ཀདཱཙི ཀརཧཙི ཡདིཙྪཀཾ སམྦྷཝཏཱིཏི ཨགྒཧེཏྭཱ ཡེབྷུཡྻཝསེན ལབྦྷམཱནཾཡེཝ གཧེཏྭཱ ཝུཏྟནྟི ཝེདིཏབྦཾ.

ཨིདཱནི ཡཐཱཝུཏྟསམུཊྛཱནཱདཱིནི ཨིམསྨིཾ སཾཝཎྞིཡམཱནསིཀྑཱཔདེ ཝིབྷཛིཏྭཱ དསྶེནྟོ ‘‘ཨིམཾ པཀིཎྞཀཾ ཝིདིཏྭཱ’’ཏིཨཱདིམཱཧ. ཏཏྠ ཝིདིཏྭཱཏི ཨིམསྶ ‘‘ཝེདིཏབྦ’’ནྟི ཨིམིནཱ ཨཔརཀཱལཀིརིཡཱཝཙནེན སམྦནྡྷོ ཝེདིཏབྦོ. ཀིརིཡསམུཊྛཱནནྟི ཨིདཾ ཡེབྷུཡྻཝསེན ཝུཏྟཾ པརཱུཔཀྐམེ སཏི སཱདིཡནྟསྶ ཨཀིརིཡསམུཊྛཱནབྷཱཝཏོ. ‘‘མནོདྭཱརེ ཨཱཔཏྟི ནཱམ ནཏྠཱིཏི ཨིདམྤི བཱཧུལླཝསེནེཝ ཝུཏྟ’’ནྟི ཝདནྟི. ཙིཏྟཾ པནེཏྠ ཨངྒམཏྟཾ ཧོཏཱིཏི པཋམཔཱརཱཛིཀཾ ཀཱཡཙིཏྟཏོ སམུཊྛཱཏཱིཏི ཙིཏྟམེཏྠ ཨཱཔཏྟིཡཱ ཨངྒམེཝ ཧོཏི. ན ཏསྶ ཝསེན ཀམྨབྷཱཝོ ལབྦྷཏཱིཏི ཝིཉྙཏྟིཛནཀཝསེན ¶ ཀཱཡདྭཱརེ པཝཏྟཏྟཱ ཏསྶ ཙིཏྟསྶ ཝསེན ཨིམསྶ སིཀྑཱཔདསྶ མནོཀམྨབྷཱཝོ ན ལབྦྷཏཱིཏི ཨཏྠོ. སིཀྑཱཔདསྶ ཧེཊྛཱ ཝུཏྟནཡེན པཉྙཏྟིབྷཱཝཏོ ‘‘སབྦཉྩེཏཾ ཨཱཔཏྟིཡཾ ཡུཛྫཏཱི’’ཏི ཝུཏྟཾ. ན ཧི ཡཐཱཝུཏྟསམུཊྛཱནཱདི པཉྙཏྟིཡཾ ཡུཛྫཏི.

པཀིཎྞཀཀཐཱཝཎྞནཱ ནིཊྛིཏཱ.

ཝིནཱིཏཝཏྠུཝཎྞནཱ

ཨིདཾ ཀིནྟི ཀཐེཏུཀམྱཏཱཡ པུཙྪཏི. ཝིནཱིཏཱནི ཝིནིཙྪིཏཱནི ཝཏྠཱུནི ཝིནཱིཏཝཏྠཱུནི. ཏཱནི ཧི ‘‘ཨཱཔཏྟིཾ ཏྭཾ བྷིཀྑུ ཨཱཔནྣོ པཱརཱཛིཀཾ. ཨནཱཔཏྟི བྷིཀྑུ པཱརཱཛིཀསྶ, ཨཱཔཏྟི སངྒྷཱདིསེསསྶ. ཨནཱཔཏྟི བྷིཀྑུ ཨསཱདིཡནྟསྶཱ’’ཏིཨཱདིནཱ བྷགཝཏཱཡེཝ ཝིནིཙྪིཏཱནི ¶ . ཏེནཱཧ ‘‘བྷགཝཏཱ སཡཾ ཝིནིཙྪིཏཱན’’ནྟི. ཨུདྡཱནགཱཐཱཏི ཨུདྡེསགཱཐཱ, སངྒཧགཱཐཱཏི ཝུཏྟཾ ཧོཏི. ཝཏྠུགཱཐཱཏི ‘‘ཏེན ཁོ པན སམཡེན ཨཉྙཏརོ བྷིཀྑཱུ’’ཏིཨཱདིཀཱ ནིདཱནཝཏྠུདཱིཔིཀཱ ཝིནཱིཏཝཏྠུཔཱལི༹ཡེཝ ཏེསཾ ཏེསཾ ཝཏྠཱུནཾ གནྠནཏོ ‘‘ཝཏྠུགཱཐཱ’’ཏི ཝུཏྟཱ, ན ཚནྡོཝིཙིཏིལཀྑཎེན. གཱཐཱནཾ ཝཏྠུ ཝཏྠུགཱཐཱཏི ཨེཝཾ ཝཱ ཨེཏྠ ཨཏྠོ དཊྛབྦོ. ཨེཏྠཱཏི ཝིནཱིཏཝཏྠཱུསུ. དུཏིཡཱདཱིནནྟི དུཏིཡཔཱརཱཛིཀཱདཱིནཾ. དུཏིཡཱདཱིནི ཝིནིཙྪིནིཏབྦཱནཱིཏི ཡོཛེཏབྦཾ. སིཔྤིཀཱནནྟི ཙིཏྟཀཱརཱདིསིཔྤིཀཱནཾ. ཡཾ པསྶིཏྭཱ པསྶིཏྭཱ ཙིཏྟཀཱརཱདཡོ ཙིཏྟཀམྨཱདཱིནི ཨུགྒཎྷནྟཱ ཀརོནྟི, ཏཾ ‘‘པཊིཙྪནྣཀརཱུཔ’’ནྟི ཝུཙྩཏི.

༦༧. པུརིམཱནི དྭེ ཝཏྠཱུནཱིཏི མཀྐཊིཝཏྠུཾ ཝཛྫིཔུཏྟཀཝཏྠུཉྩ. ཏཱནི པན ཀིཉྩཱཔི ཨནུཔཉྙཏྟིཡཾ ཨཱགཏཱནེཝ, ཏཐཱཔི བྷགཝཏཱ སཡཾ ཝིནིཙྪིཏཝཏྠུབྷཱཝཏོ ཨདིནྣཱདཱནཱདཱིསུ ཨནུཔཉྙཏྟིཡཾ ཨཱགཏཱནི རཛཀཱདིཝཏྠཱུནི ཝིཡ པུན ཝིནཱིཏཝཏྠཱུསུ པཀྑིཏྟཱནི. ཡདི ཨེཝཾ ‘‘ཏསྶ ཀུཀྐུཙྩཾ ཨཧོསཱི’’ཏི ཨིདཾ ཝིརུཛ྄ཛྷེཡྻ, ཨནུཔཉྙཏྟིཡཉྷི ཨཉྙེ བྷིཀྑཱུ དིསྭཱ ཏཾ བྷིཀྑུཾ ཙོདེསུནྟི? སཙྩམེཏཾ, ཏེཧི པན བྷིཀྑཱུཧི ཨནུཔཉྙཏྟིཡཾ ཝུཏྟནཡེན ཙོདེཏྭཱ ‘‘ནནུ, ཨཱཝུསོ, ཏཐེཝ ཏཾ ཧོཏཱི’’ཏི ཝུཏྟེ ཏསྶ ཀུཀྐུཙྩཾ ཨཧོསཱིཏི གཧེཏབྦཾ. ‘‘བྷགཝཏོ ཨེཏམཏྠཾ ཨཱརོཙེསཱི’’ཏི ཨིདཉྩ ཏེཧི བྷིཀྑཱུཧི ཨནུཔཉྙཏྟིཡཾ ཝུཏྟནཡེན བྷགཝཏོ ཨཱརོཙིཏེ ‘‘སཙྩཾ ཀིར ཏྭཾ བྷིཀྑུ མཀྐཊིཡཱ མེཐུནཾ དྷམྨཾ པཊིསེཝཱི’’ཏི བྷགཝཏཱ ¶ པུཊྛོ སམཱནོ ‘‘སཙྩཾ བྷགཝཱ’’ཏི བྷགཝཏོ ཨེཏམཏྠཾ ཨཱརོཙེསཱིཏི གཧེཏབྦཾ.

ཝཛྫིཔུཏྟཀཝཏྠུམྷི པན སིཀྑཾ ཨཔྤཙྩཀྑཱཡ དུབྦལྱཾ ཨནཱཝིཀཏྭཱ མེཐུནཾ དྷམྨཾ པཊིསེཝིཏྭཱ ཝིབྦྷམིཏྭཱ ཡེ ཨཱནནྡཏྠེརཾ ཨུཔསངྐམིཏྭཱ པུན པབྦཛྫཾ ཨུཔསམྤདཉྩ ཡཱཙིཾསུ, ཏེ སནྡྷཱཡ ‘‘ཨཊྛཱནམེཏཾ, ཨཱནནྡ, ཨནཝཀཱསོ, ཡཾ ཏཐཱགཏོ ཝཛྫཱིནཾ ཝཱ ཝཛྫིཔུཏྟཀཱནཾ ཝཱ ཀཱརཎཱ སཱཝཀཱནཾ པཱརཱཛིཀཾ སིཀྑཱཔདཾ པཉྙཏྟཾ སམཱུཧནེཡྻཱ’’ཏིཨཱདི ཨནུཔཉྙཏྟིཡཾ ཝུཏྟཾ. ཡེ པན ཨཝིབྦྷམིཏྭཱ སལིངྒེ ཋིཏཱཡེཝ ཨུཔྤནྣཀུཀྐུཙྩཱ བྷགཝཏོ ཨེཏམཏྠཾ ཨཱརོཙེསུཾ, ཏེ སནྡྷཱཡ ‘‘ཨཱཔཏྟིཾ ཏུམྷེ, བྷིཀྑཝེ, ཨཱཔནྣཱ པཱརཱཛིཀ’’ནྟི ཨིདྷ ཝུཏྟཾ. ཀེཙི པན ཨིམཾ ཨདྷིཔྤཱཡཾ ཨཛཱནནྟཱཝ ‘‘ཨཉྙམེཝ མཀྐཊིཝཏྠུ ཝཛྫིཔུཏྟཀཝཏྠུ ཙ ཝིནཱིཏཝཏྠཱུསུ ཨཱགཏ’’ནྟི ཝདནྟི.

ཀུསེ གནྠེཏྭཱཏི ཀུསཏིཎཱནི གནྠེཏྭཱ. ཀེསེཧཱིཏི མནུསྶཀེསེཧི. ཏཾ རཱགནྟི ཀཱཡསཾསགྒརཱགཾ. ཉཏྭཱཏི སཡམེཝ ཛཱནིཏྭཱ. ཡདི ཀཱཡསཾསགྒརཱགེན ཀཏཾ, ཀཱཡསཾསགྒརཱགསིཀྑཱཔདསྶ ¶ ཝིནཱིཏཝཏྠཱུསུ ཨཝཏྭཱ ཨིདྷ ཀསྨཱ ཝུཏྟནྟི? ཝུཙྩཏེ – ཀིཉྩཱཔི ཏཾ ཀཱཡསཾསགྒརཱགེན ཀཏཾ, ཏསྶ པན བྷིཀྑུནོ པཱརཱཛིཀཀྑེཏྟེ ཀཏུཔཀྐམཏྟཱ ‘‘པཱརཱཛིཀཾ ནུ ཁོ ཨཧཾ ཨཱཔནྣོ’’ཏི པཱརཱཛིཀཝིསཡཾ ཀུཀྐུཙྩཾ ཨཧོསཱིཏི ཨིདྷ ཝུཏྟཾ. ཏེནེཝཱཧ – ‘‘ཨནཱཔཏྟི བྷིཀྑུ པཱརཱཛིཀསྶ, ཨཱཔཏྟི སངྒྷཱདིསེསསྶཱ’’ཏི.

༦༨. ཨཏིདསྶནཱིཡཱཏི དིཝསམྤི པསྶནྟཱནཾ ཨཏིཏྟིཀརཎཏོ ཨཏིཝིཡ དསྶནཡོགྒཱ. ཝཎྞཔོཀྑརཏཱཡཱཏི ཨེཏྠ པོཀྑརཏཱ ཝུཙྩཏི སུནྡརབྷཱཝོ, ཝཎྞསྶ པོཀྑརཏཱ ཝཎྞཔོཀྑརཏཱ, ཏཱཡ ཝཎྞཔོཀྑརཏཱཡ, ཝཎྞསམྤཏྟིཡཱཏི ཨཏྠོ. པོརཱཎཱ པན པོཀྑརནྟི སརཱིརཾ ཝདནྟི, ཝཎྞཾ ཝཎྞམེཝ. ཏེསཾ མཏེན ཝཎྞཉྩ པོཀྑརཉྩ ཝཎྞཔོཀྑརཱནི, ཏེསཾ བྷཱཝོ ཝཎྞཔོཀྑརཏཱ, ཏསྨཱ ཝཎྞཔོཀྑརཏཱཡཱཏི པརིསུདྡྷེན ཝཎྞེན ཙེཝ སརཱིརསཎྛཱནསམྤཏྟིཡཱ ཙཱཏི ཨཏྠོ. ཨཐ ཝཱ ཝཎྞསམྤནྣཾ པོཀྑརཾ ཝཎྞཔོཀྑརནྟི ཨུཏྟརཔདལོཔོ པུབྦཔདསྶ དཊྛབྦོ, ཏསྶ བྷཱཝོ ཝཎྞཔོཀྑརཏཱ, ཏཱཡ ཝཎྞཔོཀྑརཏཱཡ, ཝཎྞསམྤནྣསརཱིརཏཱཡཱཏི ཨཏྠོ. པདྷཾསེསཱིཏི ཨབྷིབྷཝཱིཏི ཨཏྠོ. ཀཐཾ པན ཨསཱདིཡནྟཱི ནིསཱིདཱིཏི ཨཱཧ – ‘‘ཨསདྡྷམྨཱདྷིཔྤཱཡེན…པེ… ཁཱཎུཀཱ ཝིཡཱ’’ཏི.

ན ¶ ལིམྤཏཱིཏི ན ཨལླཱིཡཏི. ཀཱམེསཱུཏི ཝཏྠུཀཱམཀིལེསཀཱམེསུ. ཨིདཾ ཝུཏྟཾ ཧོཏི – ཡཐཱ པདུམིནིཔཎྞེ ཨུདཀབིནྡུ ན སཎྛཱཏི, ཡཐཱ ཙ སཱུཙིམུཁེ སཱསཔོ ན སནྟིཊྛཏི, ཨེཝམེཝ ཡོ ཨབྦྷནྟརེ དུཝིདྷེནཔི ཀཱམེན ན ལིམྤཏི, ཏསྨིཾ ཀཱམོ ན སཎྛཱཏི, ཏམཧཾ བྲཱཧྨཎཾ ཝདཱམཱིཏི.

༦༩. པུརིསསཎྛཱནཾ ཨནྟརཧིཏཾ, ཨིཏྠིསཎྛཱནཾ ཨུཔྤནྣནྟི ཕལསྶ ཝིནཱསུཔྤཱདདསྶནེན ཀཱརཎསྶཔི ཝིནཱསུཔྤཱདཱ ཝུཏྟཱཏི དཊྛབྦཾ. པུརིསིནྡྲིཡེ ཧི ནཊྛེ པུརིསསཎྛཱནཾ ཨནྟརདྷཱཡཏི, ཨིཏྠིནྡྲིཡེ སམུཔྤནྣེ ཨིཏྠིསཎྛཱནཾ པཱཏུབྷཝཏི. ཏཐཱ ཧི ‘‘ཡསྶ ཨིཏྠིནྡྲིཡཾ ཨུཔྤཛྫཏི, ཏསྶ པུརིསིནྡྲིཡཾ ཨུཔྤཛྫཏཱིཏི? ནོ. ཡསྶ ཝཱ པན པུརིསིནྡྲིཡཾ ཨུཔྤཛྫཏི, ཏསྶ ཨིཏྠིནྡྲིཡཾ ཨུཔྤཛྫཏཱིཏི? ནོ’’ཏི ཡམཀཔཀརཎེ (ཡམ. ༣. ཨིནྡྲིཡཡམཀ.༡༨༨) ཝུཏྟཏྟཱ ཨིནྡྲིཡདྭཡསྶ ཨེཀསྨིཾ སནྟཱནེ སཧཔཝཏྟིཡཱ ཨསམྦྷཝཏོ ཡསྨིཾ ཁཎེ ཨིཏྠིནྡྲིཡཾ པཱཏུབྷཝཏི, ཏཏོ པུབྦེ སཏྟརསམཙིཏྟཏོ པཊྛཱཡ པུརིསིནྡྲིཡཾ ནུཔྤཛྫཏི. ཏཏོ པུབྦེ ཨུཔྤནྣེསུ ཙ པུརིསིནྡྲིཡེསུ སཧཛརཱུཔེཧི སདྡྷིཾ ཀམེན ནིརུདྡྷེསུ ཏསྨིཾ སནྟཱནེ ཨིཏྠིནྡྲིཡཾ ཨུཔྤཛྫཏི. ཏཏོ པུརིསསཎྛཱནཱཀཱརེན པཝཏྟེསུ ཀམྨཛརཱུཔེསུ སེསརཱུཔེསུ ཙ ཀཉྩི ཀཱལཾ པཝཏྟིཏྭཱ ནིརུདྡྷེསུ ཨིཏྠིསཎྛཱནཱཀཱརེན ¶ ཙ ཙཏུཛརཱུཔསནྟཏིཡཱ པཝཏྟཱཡ པུརིསསཎྛཱནཾ ཨནྟརཧིཏཾ, ཨིཏྠིསཎྛཱནཾ པཱཏུབྷཱུཏནྟི ཝུཙྩཏི. ཨིཏྠིཡཱ པུརིསལིངྒཔཱཏུབྷཱཝེཔི ཨཡམེཝ ནཡོ ཝེདིཏབྦོ.

པུརིསལིངྒཾ ཨུཏྟམཾ, ཨིཏྠིལིངྒཾ ཧཱིནནྟི ཨིམིནཱ ཙ པུརིསིནྡྲིཡསྶ ཨུཏྟམབྷཱཝོ, ཨིཏྠིནྡྲིཡསྶ ཙ ཧཱིནབྷཱཝོ ཝུཏྟོཏི དཊྛབྦཾ. ན ཧི ཨིནྡྲིཡསྶ ཧཱིནུཀྐཊྛབྷཱཝཾ ཝིནཱ ཏནྣིསྶཡསྶ ལིངྒསྶ ཧཱིནུཀྐཊྛཏཱ སམྦྷཝཏི. པུརིསལིངྒཾ བལཝཨཀུསལེན ཨནྟརདྷཱཡཏཱིཏིཨཱདིནཱཔི ཨིནྡྲིཡསྶེཝ ཝིནཱསུཔྤཱདཱ ཝུཏྟཱཏི དཊྛབྦཾ. ཨིནྡྲིཡེ ཧི ཝིནཊྛེ ཨུཔྤནྣེ ཙ ཏནྣིསྶཡསྶ ལིངྒསྶཔི ཨནྟརདྷཱནཾ པཏིཊྛཱནཉྩ སམྦྷཝཏི. ཀཐཾ པནེཏྠ པུརིསལིངྒཾ བལཝཨཀཨུསལེན ཨནྟརདྷཱཡཏི, ཨིཏྠིལིངྒཾ དུབྦལཀུསལེན པཏིཊྛཱཏཱིཏི? ཝུཙྩཏེ – པཊིསནྡྷིཡཾ ཏཱཝ པུརིསིནྡྲིཡུཔྤཱདཀཾ ཨནུཔཧཏསཱམཏྠིཡཾ བལཝཀུསལཀམྨཾ ཡཱཝཏཱཡུཀཾ པུརིསིནྡྲིཡམེཝ ཨུཔྤཱདེཏི, ཨནྟརཱ པན ཀེནཙི ལདྡྷཔཙྩཡེན པཱརདཱརིཀཏྟཱདིནཱ བལཝཨཀུསལཀམྨེན ཨུཔཧཏསཱམཏྠིཡཾ ཏདེཝ པཊིསནྡྷིདཱཡཀཾ ཀུསལཀམྨཾ དུབྦལཱིབྷཱུཏཾ པུརིསིནྡྲིཡཾ ཨནུཔྤཱདེཏྭཱ ཨཏྟནོ སཱམཏྠིཡཱནུརཱུཔཾ ¶ ཨིཏྠིནྡྲིཡཾ པཝཏྟེ ཨུཔྤཱདེཏི. ཡདཱ པན པཊིསནྡྷིདཱནཀཱལེཡེཝ ཀེནཙི ལདྡྷཔཙྩཡེན པཱརདཱརིཀཏྟཱདིནཱ བལཝཨཀུསལཀམྨེན པུརིསིནྡྲིཡུཔྤཱདནསཱམཏྠིཡཾ ཨུཔཧཏཾ ཧོཏི, ཏདཱ དུབྦལཱིབྷཱུཏཾ ཀུསལཀམྨཾ པུརིསིནྡྲིཡཾ ཨནུཔྤཱདེཏྭཱ པཊིསནྡྷིཡཾཡེཝ ཨིཏྠིནྡྲིཡཾ ཨུཔྤཱདེཏི. ཏསྨཱ ‘‘པུརིསལིངྒཾ བལཝཨཀུསལེན ཨནྟརདྷཱཡཏི, ཨིཏྠིལིངྒཾ དུབྦལཀུསལེན པཏིཊྛཱཏཱི’’ཏི ཝུཙྩཏི.

དུབྦལཨཀུསལེན ཨནྟརདྷཱཡཏཱིཏི པཱརདཱརིཀཏྟཱདིབལཝཨཀུསལཀམྨསྶ པུརིསིནྡྲིཡུཔྤཱདནཝིབནྡྷཀསྶ དུབྦལབྷཱཝེ སཏི ཨནྟརདྷཱཡནྟཾ ཨིཏྠིལིངྒཾ དུབྦལཨཀུསལེན ཨནྟརདྷཱཡཏཱིཏི ཝུཏྟཾ. ཏཐཱ ཧི པཱརདཱརིཀཏྟཱདིནཱ བལཝཨཀུསལཀམྨེན བཱཧིཏཏྟཱ པུརིསིནྡྲིཡུཔྤཱདནེ ཨསམཏྠཾ པཊིསནྡྷིཡཾ ཨིཏྠིཡཱ ཨིཏྠིནྡྲིཡུཔྤཱདཀཾ དུབྦལཀུསལཀམྨཾ ཡདཱ པཝཏྟིཡཾ བྲཧྨཙརིཡཝཱསམིཙྪཱཙཱརཔཊིཝིརཏིཝསེན པུརིསཏྟཔཏྠནཱཝསེན ཝཱ ཀཏུཔཙིཏབལཝཀུསལཀམྨེན ཨཱཧིཏསཱམཏྠིཡཾ པུརིསིནྡྲིཡུཔྤཱདནེ སམཏྠཾ ཨིཏྠིནྡྲིཡཾ ཨནུཔྤཱདེཏྭཱ ཨཏྟནོ སཱམཏྠིཡཱནུརཱུཔཾ པུརིསིནྡྲིཡཾ ཨུཔྤཱདེཏི, ཏདཱ པུརིསིནྡྲིཡུཔྤཱདནཝིབནྡྷཀསྶ བལཝཨཀུསལཀམྨསྶ དུབྦལབྷཱཝེ སཏི ཏཾ ཨིཏྠིནྡྲིཡཾ ཨནྟརཧིཏནྟི ‘‘ཨིཏྠིལིངྒཾ ཨནྟརདྷཱཡནྟཾ དུབྦལཨཀུསལེན ཨནྟརདྷཱཡཏཱི’’ཏི ཝུཙྩཏི. ཡཐཱཝུཏྟནཡེནེཝ བལཝཏཱ ཀུསལཀམྨེན པུརིསིནྡྲིཡསྶ ཨུཔྤཱདིཏཏྟཱ ‘‘པུརིསལིངྒཾ བལཝཀུསལེན པཏིཊྛཱཏཱི’’ཏི ཝུཙྩཏི. པུབྦེ ཨིཏྠིབྷཱུཏསྶ པཊིསནྡྷིཡཾ པུརིསིནྡྲིཡུཔྤཱདེཔི ཨཡཾ ནཡོ ཝེདིཏབྦོ. ཨུབྷཡམྤི ཨཀུསལེན ཨནྟརདྷཱཡཏི, ཀུསལེན པཊིལབྦྷཏཱིཏི ཨིདཾ སུགཏིབྷཝཾ སནྡྷཱཡ ཝུཏྟཾ, དུགྒཏིཡཾ པན ཨུབྷིནྣཾ ཨུཔྤཏྟི ཝིནཱསོ ཙ ཨཀུསལཀམྨེནེཝཱཏི དཊྛབྦཾ.

ཨུབྷིནྣམྤི ¶ སཧསེཡྻཱཔཏྟི ཧོཏཱིཏི ‘‘ཡོ པན བྷིཀྑུ མཱཏུགཱམེན སཧསེཡྻཾ ཀཔྤེཡྻ, པཱཙིཏྟིཡཾ. ཡཱ པན བྷིཀྑུནཱི པུརིསེན སཧསེཡྻཾ ཀཔྤེཡྻ, པཱཙིཏྟིཡ’’ནྟི ཝུཏྟཏྟཱ ཨུབྷིནྣམྤི སཧསེཡྻཝསེན པཱཙིཏྟིཡཱཔཏྟི ཧོཏི. དུཀྑཱིཏི ཙེཏོདུཀྑསམངྒིཏཱཡ དུཀྑཱི. དུམྨནོཏི དོསེན དུཊྛམནོ, ཝིརཱུཔམནོ ཝཱ དོམནསྶཱབྷིབྷཱུཏཏཱཡ. ‘‘སམསྶཱསེཏབྦོ’’ཏི ཝཏྭཱ སམསྶཱསེཏབྦཝིདྷིཾ དསྶེནྟོ ‘‘ཧོཏུ མཱ ཙིནྟཡིཏྠཱ’’ཏིཨཱདིམཱཧ. ཨནཱཝཊོཏི ཨཝཱརིཏོ. དྷམྨོཏི པརིཡཏྟིཔཊིཔཏྟིཔཊིཝེདྷསངྑཱཏོ ཏིཝིདྷོཔི སདྡྷམྨོ. སགྒོ ཙ མགྒོ ཙ སགྒམགྒོ, སགྒསྶ ¶ ཝཱ མགྒོ སགྒམགྒོ, སགྒཱུཔཔཏྟིསཱདྷིཀཱ པཊིཔཏྟི. བྷིཀྑུནིཡཱ སདྡྷིཾ སཾཝིདྷཱཡ ཨདྡྷཱནགམནེ ཨཱཔཏྟི པརིཧརིཏབྦཱཏི དསྶེནྟོ ‘‘སཾཝིདཧནཾ པརིམོཙེཏྭཱ’’ཏི ཨཱཧ. ‘‘མཡཾ ཨསུཀཾ ནཱམ ཋཱནཾ གཙྪཱམཱ’’ཏི ཝཏྭཱ ‘‘ཨེཧི སདྡྷིཾ གམིསྶཱམཱ’’ཏིཨཱདིནཱ ཨསཾཝིདཧིཏཏྟཱ ཨནཱཔཏྟི.

བཧིགཱམེཏི ཨཏྟནོ ཝསནགཱམཏོ བཧི. གཱམནྟརནདཱིཔཱརརཏྟིཝིཔྤཝཱསགཎཨོཧཱིཡནཱཔཏྟཱིཧི ཨནཱཔཏྟཱིཏི ‘‘དུཏིཡིཀཱ བྷིཀྑུནཱི པཀྐནྟཱ ཝཱ ཧོཏཱི’’ཏིཨཱདིནཱ (པཱཙི. ༦༩༣) ཝུཏྟཨནཱཔཏྟིལཀྑཎེཧི སཾསནྡནཏོ ཝུཏྟཾ. ཨཱརཱདྷིཀཱཏི ཙིཏྟཱརཱདྷནེ སམཏྠཱ. ཏཱ ཀོཔེཏྭཱཏི ཏཱ པརིཙྩཛིཏྭཱ. ལཛྫིནིཡོ…པེ… ལབྦྷཏཱིཏི ‘‘སངྒཧེ ཨསཏི ཨུཀྐཎྛིཏྭཱ ཝིབྦྷམེཡྻཱཔཱི’’ཏི སངྒཧཝསེནེཝ ཝུཏྟཾ. ཨལཛྫིནིཡོ…པེ… ལབྦྷཏཱིཏི ཨལཛྫིབྷཱཝཏོ ཨསནྟཔཀྑཾ བྷཛནྟཱིཏི ཝུཏྟཾ. ཨཉྙཱཏིཀཱ…པེ… ཝཊྚཏཱིཏི ཨིདཾ པན ཨིམིསྶཱ ཨཱཝེཎིཀཾ ཀཏྭཱ ཨཊྛཀཐཱཡཾ ཨནུཉྙཱཏནྟི ཝདནྟི. བྷིཀྑུབྷཱཝེཔཱིཏི བྷིཀྑུཀཱལེཔི. པརིསཱཝཙརོཏི ཨུཔཛ྄ཛྷཱཡོ ཙ ཨཱཙརིཡོ ཙ ཧུཏྭཱ པརིསུཔཊྛཱཀོ. ཨཉྙསྶ སནྟིཀེ ནིསྶཡོ གཧེཏབྦོཏི ཏསྶ སནྟིཀེ ཨུཔསམྤནྣེཧི སདྡྷིཝིཧཱརིཀེཧི ཨཉྙསྶ ཨཱཙརིཡསྶ སནྟིཀེ ནིསྶཡོ གཧེཏབྦོ. ཏཾ ནིསྶཱཡ ཝསནྟེཧིཔཱིཏི ཨནྟེཝཱསིཀེ སནྡྷཱཡ ཝདཏི. ཨུཔཛ྄ཛྷཱ གཧེཏབྦཱཏི ཨུཔསམྤདཏྠཾ ཨུཔཛ྄ཛྷཱ གཧེཏབྦཱ, ཨཉྙསྶ སནྟིཀེ ཨུཔསམྤཛྫིཏབྦནྟི ཝུཏྟཾ ཧོཏི.

ཝིནཡཀམྨནྟི ཝིཀཔྤནཾ སནྡྷཱཡ ཝུཏྟཾ. པུན ཀཱཏབྦནྟི པུན ཝིཀཔྤེཏབྦཾ. པུན པཊིགྒཧེཏྭཱ སཏྟཱཧཾ ཝཊྚཏཱིཏི ‘‘ཨནུཛཱནཱམི, བྷིཀྑཝེ, བྷིཀྑུནཱིནཾ སནྣིདྷི བྷིཀྑཱུཧི, བྷིཀྑཱུནཾ སནྣིདྷི བྷིཀྑུནཱིཧི པཊིགྒཱཧཱཔེཏྭཱ པརིབྷུཉྫིཏུ’’ནྟི (ཙཱུལ༹ཝ. ༤༢༡) ཝཙནཏོ པུན པཊིགྒཧིཏཾ ཏདཧུ སཱམིསམྤི ཝཊྚཏཱིཏི དསྶནཏྠཾ ཝུཏྟཾ. སཏྟམེ དིཝསེཏི ཨིདཾ ཏཉྩ ནིསྶགྒིཡཾ ཨནཱཔཛྫིཏྭཱཝ པུནཔི སཏྟཱཧཾ པརིབྷུཉྫིཏུཾ ཝཊྚཏཱིཏི དསྶནཏྠཾ ཝུཏྟཾ. ཡསྨཱ པན བྷིཀྑུནིཡཱ ནིསྶགྒིཡཾ བྷིཀྑུསྶ ཝཊྚཏི, བྷིཀྑུསྶ ནིསྶགྒིཡཾ བྷིཀྑུནིཡཱ ཝཊྚཏི, ཏསྨཱ ཨཊྛམེཔི དིཝསེ ལིངྒཔརིཝཏྟེ སཏི ཨནིསྶཛྫིཏྭཱཝ ཨནྟོསཏྟཱཧེ པརིབྷུཉྫིཏུཾ ཝཊྚཏཱིཏི ¶ ཝདནྟི. ཏཾ པཀཏཏྟོ རཀྑཏཱིཏི ཨཔརིཝཏྟལིངྒོ ཏཾ པཊིགྒཧཎཝིཛཧནཏོ རཀྑཏི, ཨཝིབྷཏྟཏཱཡ པཊིགྒཧཎཾ ན ཝིཛཧཏཱིཏི ཨདྷིཔྤཱཡོ. སཱམཾ གཧེཏྭཱན ནིཀྑིཔེཡྻཱཏི པཊིགྒཧེཏྭཱ སཡཾ ནིཀྑིཔེཡྻ. པརིབྷུཉྫནྟསྶ ¶ ཨཱཔཏྟཱིཏི ལིངྒཔརིཝཏྟེ སཏི པཊིགྒཧཎཝིཛཧནཏོ པུན པཊིགྒཧེཏྭཱ པརིབྷུཉྫནྟསྶ ཨཱཔཏྟི.

‘‘ཧཱིནཱཡཱཝཏྟནེནཱཏི པཱརཱཛིཀཾ ཨཱཔནྣསྶ གིཧིབྷཱཝཱུཔགམནེནཱ’’ཏི ཏཱིསུཔི གཎྛིཔདེསུ ཝུཏྟཾ, ཏཾ སུཝུཏྟཾ. ན ཧི པཱརཱཛིཀཾ ཨནཱཔནྣསྶ སིཀྑཾ ཨཔྤཙྩཀྑཱཡ ‘‘ཝིབྦྷམིསྶཱམཱི’’ཏི གིཧིལིངྒགྒཧཎམཏྟེན བྷིཀྑུབྷཱཝོ ཝིནསྶཏི. པཱརཱཛིཀཾ ཨཱཔནྣོ ཙ བྷིཀྑུལིངྒེ ཋིཏོ ཡཱཝ ན པཊིཛཱནཱཏི, ཏཱཝ ཨཏྠེཝ ཏསྶ བྷིཀྑུབྷཱཝོ, ན སོ ཨནུཔསམྤནྣསངྑྱཾ གཙྪཏི. ཏཐཱ ཧི སོ སཾཝཱསཾ སཱདིཡནྟོཔི ཐེཡྻསཾཝཱསཀོ ན ཧོཏི, སཧསེཡྻཱདིཨཱཔཏྟིཾ ན ཛནེཏི, ཨོམསཝཱདེ པཱཙིཏྟིཡཉྩ ཛནེཏི. ཏེནེཝ ‘‘ཨསུདྡྷོ ཧོཏི པུགྒལོ ཨཉྙཏརཾ པཱརཱཛིཀཾ དྷམྨཾ ཨཛ྄ཛྷཱཔནྣོ, ཏཉྩེ སུདྡྷདིཊྛི སམཱནོ ཨོཀཱསཾ ཀཱརཱཔེཏྭཱ ཨཀྐོསཱདྷིཔྤཱཡོ ཝདེཏི, ཨཱཔཏྟི ཨོམསཝཱདསྶཱ’’ཏི (པཱརཱ. ༣༨༩) ཨོམསཝཱདེ པཱཙིཏྟིཡཾ ཝུཏྟཾ. ཨསཏི ཧི བྷིཀྑུབྷཱཝེ དུཀྐཊཾ བྷཝེཡྻ, སཏི ཙ བྷིཀྑུབྷཱཝེ པཊིགྒཧིཏསྶ པཊིགྒཧཎཝིཛཧནཾ ནཱམ ཨཡུཏྟཾ, ཏསྨཱ སབྦསོ བྷིཀྑུབྷཱཝསྶ ཨབྷཱཝཏོ པཱརཱཛིཀཾ ཨཱཔཛྫིཏྭཱ གིཧིལིངྒགྒཧཎེན གིཧིབྷཱཝཱུཔགམནཾ ཨིདྷ ‘‘ཧཱིནཱཡཱཝཏྟན’’ནྟི ཨདྷིཔྤེཏཾ, ན པན པཀཏཏྟསྶ གིཧིལིངྒགྒཧཎམཏྟཾ. ཏེནེཝ ཀཏྠཙི སིཀྑཱཔཙྩཀྑཱནེན སམཱནགཏིཀཏྟཱ ཧཱིནཱཡཱཝཏྟནཾ ཝིསུཾ ན གཎྷནྟི. སིཀྑཱཔཙྩཀྑཱནེན པཊིགྒཧཎཝིཛཧནེ ཝུཏྟེ པཱརཱཛིཀཾ ཨཱཔནྣསྶ གིཧིབྷཱཝཱུཔགམནེན སབྦསོ བྷིཀྑུབྷཱཝསྶ ཨབྷཱཝཏོ ཝཏྟབྦམེཝ ནཏྠཱིཏི. ཏཐཱ ཧི བུདྡྷདཏྟཱཙརིཡེན ཨཏྟནོ ཝིནཡཝིནིཙྪཡེ –

‘‘ཨཙྪེདགཱཧནིརཔེཀྑནིསགྒཏོ ཙ,

སིཀྑཱཔྤཧཱནམརཎེཧི ཙ ལིངྒབྷེདཱ;

དཱནེན ཏསྶ ཙ པརསྶ ཨབྷིཀྑུཀསྶ,

སབྦཾ པཊིགྒཧཎམེཏི ཝིནཱསམེཝ’’ནྟི. –

ཨེཏྟཀམེཝ ཝུཏྟཾ. ཏཐཱ དྷམྨསིརིཏྠེརེནཔི –

‘‘སིཀྑཱམརཎལིངྒེཧི, ཨནཔེཀྑཝིསགྒཏོ;

ཨཙྪེདཱནུཔསམྤནྣ-དཱནཱ གཱཧོཔསམྨཏཱི’’ཏི. –

ཝུཏྟཾ ¶ ¶ . ཡདི ཙ པཀཏཏྟསྶ གིཧིལིངྒགྒཧཎམཏྟེནཔི པཊིགྒཧཎཾ ཝིཛཧེཡྻ, ཏེཔི ཨཱཙརིཡཱ ཝིསུཾ ཏམྤི ཝདེཡྻུཾ, ན ཝུཏྟཉྩ, ཏཏོ ཝིཉྙཱཡཏི ‘‘པཀཏཏྟསྶ གིཧིལིངྒགྒཧཎམཏྟཾ ཨིདྷ ཧཱིནཱཡཱཝཏྟནནྟི ནཱདྷིཔྤེཏ’’ནྟི. བྷིཀྑུནིཡཱ པན སིཀྑཱཔཙྩཀྑཱནསྶ ཨབྷཱཝཏོ གིཧིལིངྒགྒཧཎམཏྟེནཔི པཊིགྒཧཎཾ ཝིཛཧཏི.

ཨནཔེཀྑཝིསྶཛྫནེནཱཏི ཨཉྙསྶ ཨདཏྭཱཝ ཨནཏྠིཀཏཱཡ ‘‘ནཏྠི ཨིམིནཱ ཀམྨཾ, ན ཨིདཱནི ནཾ པརིབྷུཉྫིསྶཱམཱི’’ཏི ཝཏྠཱུསུ ཝཱ ‘‘པུན པཊིགྒཧེཏྭཱ པརིབྷུཉྫིསྶཱམཱི’’ཏི པཊིགྒཧཎེ ཝཱ ཨནཔེཀྑཝིསྶཛྫནེན. ཨཙྪིནྡིཏྭཱ གཱཧེནཱཏི ཙོརཱདཱིཧི ཨཙྪིནྡིཏྭཱ གཧཎེན.

ཨེཏྠཱཏི བྷིཀྑུཝིཧཱརེ. ཨུཔརོཔཀཱཏི ཏེན རོཔིཏཱ རུཀྑགཙྪཱ. ཏེརསསུ སམྨུཏཱིསཱུཏི བྷཏྟུདྡེསཀསེནཱསནཔཉྙཱཔཀབྷཎྜཱགཱརིཀཙཱིཝརཔཊིགྒཱཧཀཙཱིཝརབྷཱཛཀཡཱགུབྷཱཛཀཕལབྷཱཛཀཁཛྫབྷཱཛཀཨཔྤམཏྟཀཝིསྶཛྫཀསཱཊིཡགྒཱཧཱཔཀཔཏྟགྒཱཧཱཔཀཨཱརཱམིཀཔེསཀསཱམཎེརཔེསཀསམྨུཏིསངྑཱཏཱསུ ཏེརསསུ སམྨུཏཱིསུ. ཀཱམཾ པུརིམིཀཱཡ པཙྪིམིཀཱཡ ཙ སེནཱསནགྒཱཧོ པཊིཔྤསྶམྦྷཏིཡེཝ, པུརིམིཀཱཡ པན སེནཱསནགྒཱཧེ པཊིཔྤསྶདྡྷེ པཙྪིམིཀཱཡ ཨཉྙཏྠ ཨུཔགནྟུཾ སཀྐཱཏི པུརིམིཀཱཡ སེནཱསནགྒཱཧཔཊིཔྤསྶདྡྷིཾ ཝིསུཾ དསྶེཏྭཱ པཙྪིམིཀཱཡ སེནཱསནགྒཱཧེ པཊིཔྤསྶདྡྷེ ན སཀྐཱ ཨཉྙཏྠ ཨུཔགནྟུནྟི ཏཏྠ བྷིཀྑཱུཧི ཀཏྟབྦསངྒཧཾ དསྶེནྟོ ‘‘སཙེ པཙྪིམིཀཱཡ སེནཱསནེ གཧིཏེ’’ཏིཨཱདིམཱཧ.

པཀྑམཱནཏྟམེཝ དཱཏབྦནྟི བྷིཀྑུནཱིནཾ པཊིཙྪནྣཱཡཔི ཨཱཔཏྟིཡཱ མཱནཏྟཙཱརསྶེཝ ཨནུཉྙཱཏཏྟཱ. པུན པཀྑམཱནཏྟམེཝ དཱཏབྦནྟི བྷིཀྑུཀཱལེ ཙིཎྞམཱནཏྟཱབྷཱཝཏོ. བྷིཀྑུནཱིཧི ཨབྦྷཱནཀམྨཾ ཀཱཏབྦནྟི བྷིཀྑུཀཱལེ ཙིཎྞམཱནཏྟཏཱཡ བྷིཀྑུནཱིཀཱལེཔི ཙིཎྞམཱནཏྟཱ ཨིཙྩེཝ སངྑྱཾ གཙྪཏཱིཏི ཀཏྭཱ ཝུཏྟཾ. སཙེ ཨཀུསལཝིཔཱཀེ…པེ… ཚཱརཏྟཾ མཱནཏྟམེཝ དཱཏབྦནྟི མཱནཏྟཾ ཙརནྟསྶ ལིངྒཔརིཝཏྟཱདྷིཀཱརཏྟཱ ཝུཏྟཾ. སཙེ པན བྷིཀྑུཀཱལེ པཊིཙྪནྣཱཡ སཱདྷཱརཎཱཔཏྟིཡཱ པརིཝསནྟསྶ ཨསམཱདིཎྞཔརིཝཱསསྶ ཝཱ ལིངྒཾ པརིཝཏྟཏི, ཏསྶ བྷིཀྑུནཱིཀཱལེ པཀྑམཱནཏྟཾ ཙརནྟསྶ ཨཀུསལཝིཔཱཀེ པརིཀྑཱིཎེ པུན ལིངྒེ པརིཝཏྟིཏེ པརིཝཱསཾ དཏྭཱ པརིཝུཏྠཔརིཝཱསསྶ ཚཱརཏྟཾ མཱནཏྟཾ དཱཏབྦནྟི ཝདནྟི.

སཉྩརིཏྟཱཔཏྟཱིཏི ¶ སཱདྷཱརཎཱཔཏྟིདསྶནཏྠཾ ཝུཏྟཾ. པརིཝཱསདཱནཾ ནཏྠཱིཏི བྷིཀྑུཀཱལེ ཨཔྤཊིཙྪནྣབྷཱཝཏོ. བྷིཀྑུནཱིཀཱལེ པན ཨཱརོཙིཏཱཔི སཱདྷཱརཎཱཔཏྟི སཙེ བྷིཀྑུཀཱལེ ཨནཱརོཙིཏཱ, པཊིཙྪནྣཱཝ ཧོཏཱིཏི ཝདནྟི. བྷིཀྑཱུཧི མཱནཏྟེ ཨདིནྣེཏི ཨཙིཎྞམཱནཏྟཱཡ ལིངྒཔརིཝཏྟེ ¶ སཏི. བྷིཀྑུནཱིབྷཱཝེ ཋིཏཱཡཔི ཏཱ སུཔྤཊིཔྤསྶདྡྷཱ ཨེཝཱཏི སམྦནྡྷོ. ཡཱ ཨཱཔཏྟིཡོ པུབྦེ པཊིཔྤསྶདྡྷཱཏི ཡཱ ཨསཱདྷཱརཎཱཔཏྟིཡོ པུབྦེ བྷིཀྑུབྷཱཝེ པཊིཔྤསྶདྡྷཱ. ‘‘པཱརཱཛིཀཾ ཨཱཔནྣསྶ ལིངྒཔརིཝཏྟེ སཏི སནྟཱནསྶ ཨེཀཏྟཱ ན པུན སོ ཨུཔསམྤདཾ ལབྷཏི, ཏཐཱ ཝིབྦྷནྟཱཔི བྷིཀྑུནཱི ལིངྒཔརིཝཏྟེ སཏི པུན ཨུཔསམྤདཾ ན ལབྷཏཱི’’ཏི ཝདནྟི.

༧༡. ‘‘ཨནུཔཱདིནྣཀེསཱུཏི ཨདྷིཀཱརཏྟཱ ཨུཔཱདིནྣཀེཔི ཨེསེཝ ནཡོཏི ཝུཏྟ’’ནྟི ཙཱུལ༹གཎྛིཔདེ མཛ྄ཛྷིམགཎྛིཔདེ ཙ ཝུཏྟཾ, ཏཾ དུཝུཏྟཾ. ན ཧི ཨུཔཱདིནྣཀེསུ ནིམིཏྟེ ཨུཔཀྐམནྟསྶ དུཀྐཊཾ དིསྶཏི. ཏཐཱ ཧི ཨུཔཱདིནྣཀེསུ ནིམིཏྟེ ཨཔྤཝེསེཏྭཱ བཧི ཨུཔཀྐམནྟསྶ ཐུལླཙྩཡཾ ཝུཏྟཾ ‘‘ན ཙ, བྷིཀྑཝེ, རཏྟཙིཏྟེན ཨངྒཛཱཏཾ ཚུཔིཏབྦཾ, ཡོ ཚུཔེཡྻ, ཨཱཔཏྟི ཐུལླཙྩཡསྶཱ’’ཏི (མཧཱཝ. ༢༥༢) ཝུཏྟཏྟཱ. ཨེཏྠ ཙ ཡཾ ཝཏྟབྦཾ, ཏཾ སབྦཾ ཨཊྛཀཐཱཡཾ པུབྦེ ཝིཙཱརིཏམེཝ. དུཀྐཊམེཝཱཏི མོཙནརཱགསྶ ཨབྷཱཝཏོ. ཏཐེཝཱཏི མུཙྩཏུ ཝཱ མཱ ཝཱཏི ཨིམམཏྠཾ ཨཏིདིསྶཏི.

ཨཝིསཡོཏི ཨསཱདིཡནཾ ནཱམ ཨེཝརཱུཔེ ཋཱནེ དུཀྐརནྟི ཀཏྭཱ ཝུཏྟཾ. མཱཏུགཱམསྶ ཝཙནཾ གཧེཏྭཱཏི ‘‘ཨཧཾ ཝཱཡམིསྶཱམི, ཏྭཾ མཱ ཝཱཡམཱི’’ཏིཨཱདིནཱ ཝུཏྟཝཙནཾ གཧེཏྭཱ. ཨུབྷཡཝཱཡཱམེནེཝ ཨཱཔཏྟཱིཏི སཉྙཱཡ ‘‘ཏྭཾ མཱ ཝཱཡམཱི’’ཏི ཝུཏྟཾ.

༧༣. ཝཊྚཀཏེཏི ཨིམསྶ ཨཏྠཾ དསྶེནྟོ ‘‘ཝིཝཊེ’’ཏི ཨཱཧ. ‘‘པཱརཱཛིཀབྷཡེན ཨཱཀཱསགཏམེཝ ཀཏྭཱ པཝེསནཱདཱིནི ཀརོནྟསྶ སཧསཱ ཏཱལུཀཾ ཝཱ པསྶཾ ཝཱ ཨངྒཛཱཏཾ ཕུསཏི ཙེ, དུཀྐཊམེཝ མེཐུནརཱགསྶ ཨབྷཱཝཏོ’’ཏི ཝདནྟི, ཨུཔཔརིཀྑིཏྭཱ གཧེཏབྦོ. སུཕུསིཏཱཏི སུཊྛུ པིཧིཏཱ. ཨནྟོམུཁེ ཨོཀཱསོ ནཏྠཱིཏི དནྟཱནཾ སུཔིཧིཏབྷཱཝཏོ ཨནྟོམུཁེ པཝེསེཏུཾ ཨོཀཱསོ ནཏྠི. ཨུཔྤཱཊིཏེ པན ཨོཊྛམཾསེ དནྟེསུཡེཝ ཨུཔཀྐམནྟསྶ ཐུལླཙྩཡནྟི པཏངྒམུཁམཎྜཱུཀསྶ མུཁསཎྛཱནེ ¶ ཝིཡ ཝཎསངྑེཔཝསེན ཐུལླཙྩཡཾ. ‘‘མེཐུནརཱགེན ཨིཏྠིཡཱ ཨཔྤཝེསེནྟོ ནིམིཏྟེན ནིམིཏྟཾ ཚུཔཏི, ཐུལླཙྩཡ’’ནྟི ཨིམིནཱ ཝཱ ལཀྑཎེན སམཱནཏྟཱ ཨིདྷ ཐུལླཙྩཡཾ ཝུཏྟཾ. བཧི ནིཀྑནྟདནྟཛིཝ྄ཧཱསུཔི ཨེསེཝ ནཡོ.

ཨམུཙྩནྟེ ཐུལླཙྩཡནྟི ‘‘ཙེཏེཏི ཨུཔཀྐམཏི ན མུཙྩཏི, ཨཱཔཏྟི ཐུལླཙྩཡསྶཱ’’ཏི (པཱརཱ. ༢༦༢) ཝཙནཏོ. ནིཛ྄ཛྷཱམཏཎྷིཀཱདཱིཏི ཨཱདི-སདྡེན ཁུཔྤིཔཱསིཀཱདིཔེཏཱིནཾ སངྒཧོ དཊྛབྦོ. ཨལླཱིཡིཏུམྤི ན སཀྐཱཏི ནིཛ྄ཛྷཱམཏཎྷིཀཱནཾ ལོམཀཱུཔེཧི སམུཊྛིཏཨགྒིཛཱལཱཧི ནིཙྩཾ པཛྫལིཏསརཱིརཏཱཡ ཁུཔྤིཔཱསིཀཱདཱིནཾ ཨཏིཝིཡ པཊིཀཱུལཝིརཱུཔབཱིབྷཙྪཨཊྛིཙམྨཱཝསིཊྛནིཙྩཱཏུརསརཱིརཏཱཡ ¶ ཨཱམསིཏུམྤི ན སཀྐཱ. དེཝཏཱ ཝིཡ སམྤཏྟིཾ ཨནུབྷོནྟཱིཏི ཨེཏྠ ཡཱསནྟི སཱམིཝཙནཾ ཡཱཏི པཙྩཏྟཝཙནེན ཝིཔརིཎཱམེཏྭཱ ཡོཛེཏབྦཾ ‘‘ཡཱ དེཝཏཱ ཝིཡ སམྤཏྟིཾ ཨནུབྷོནྟཱི’’ཏི. དསྶནཱདཱིསུ དསྶནཾ ནཱམ བྷིཀྑུནཱ ཏཱསཾ དསྶནཾ, གཧཎམྤི བྷིཀྑུནཱཝ ཏཱསཾ ཨངྒཔཙྩངྒགཧཎཾ. ཨཱམསནཱདཱིནི པན ཏཱསཾ ཀིཙྩཱནི. ཏཏྠ ཨཱམསནཾ ནཱམ ཨཏྟནོ སརཱིརེན བྷིཀྑུནོ སརཱིརསྶ ཨུཔརི ཨཱམསནམཏྟཾ, ཕུསནཾ ཏཏོ དལ༹ྷཏརཾ ཀཏྭཱ སམྥུསནཾ, གྷཊྚནཾ ཏཏོཔི དལ༹ྷཏརཾ ཀཏྭཱ སརཱིརེན སརཱིརསྶ གྷཊྚནཾ. ཝིསཉྙཾ ཀཏྭཱཏི ཡཐཱ སོ ཀཏམྤི ཨུཔཀྐམནཾ ན ཛཱནཱཏི, ཨེཝཾ ཀཏྭཱ. ཡདིཔི ཨཱམསནཱདི ཏསྶཱ ཀིཙྩཾ, ཏཐཱཔི ཏེནེཝ ཨནཱཔཏྟིཾ ཨཝཏྭཱ ‘‘ཏཾ པུགྒལཾ ཝིསཉྙཾ ཀཏྭཱ’’ཏི ཝཙནཏོ ཨཀཏཝིསཉྙོ ཛཱནིཏྭཱ སཱདིཡཏི ཙེ, པཱརཱཛིཀམེཝ. བྷིཀྑུནོ པན དསྶནགཧཎེསུ སཏི ཨསཱདིཡནཾ ནཱམ ན ཧོཏཱིཏི དསྶནགཧཎེསུ པཉྙཱཡམཱནེསུ ཨནཱཔཏྟི ན ཝུཏྟཱ. ཡདི པན པཋམཾ དསྶནགཧཎེསུ སཏི པཙྪཱ ཏཾ པུགྒལཾ ཝིསཉྙཾ ཀཏྭཱ ཨཱམསནཱདཱིནི ཀརོནྟཱི ཨཏྟནོ མནོརཐཾ པཱུརེཏྭཱ གཙྪཏི, ནཏྠི པཱརཱཛིཀཾ.

ཨུཔཧཏཀཱཡཔྤསཱདོཏི ཨནཊྛེཔི ཀཱཡཔྤསཱདེ ཀཱཡཝིཉྙཱཎུཔྤཱདནེ ཨསམཏྠཏཱཔཱདནཝསེན ཝཱཏཔིཏྟཱདཱིཧི ཨུཔཧཏཀཱཡཔྤསཱདོ. སེཝནཙིཏྟཝསེན ཨཱཔཏྟཱིཏི ཡཐཱ སནྠཏནིམིཏྟཝསེན ཨུཔཱདིནྣཕསྶཾ ཨཝིནྡནྟསྶཔི སེཝནཙིཏྟཝསེན ཨཱཔཏྟི, ཨེཝམིདྷཱཔི པིཏྟཝཱཏཱདིནཱ ཨུཔཧཏཀཱཡཔྤསཱདཏྟཱ ཨཝེདིཡནྟསྶཔི སེཝནཙིཏྟཝསེན ཨཱཔཏྟི.

ནནུ ¶ ཙ ཚུཔིཏམཏྟཝཏྠུསྨིཾ ‘‘མེཐུནཾ དྷམྨཾ པཊིསེཝིསྶཱམཱིཏི ཚུཔིཏམཏྟེ ཝིཔྤཊིསཱརཱི ཨཧོསཱི’’ཏི ཝུཏྟཏྟཱ མེཐུནསྶ པུབྦཔཡོགེ དུཀྐཊེན བྷཝིཏབྦཾ, ཨཐ ཀསྨཱ ‘‘ཨཱཔཏྟི སངྒྷཱདིསེསསྶཱ’’ཏི ཝུཏྟནྟི ཨིམཾ ཨནྟོལཱིནཙོདནཾ མནསིཀཏྭཱ ཏཾ པརིཧརིཏུཾ ‘‘ཡོ མེཐུན’’ནྟིཨཱདི ཨཱརདྡྷཾ. ཏཏྠ སཱིསནྟི མགྒེན མགྒཔཊིཔཱདནཾ. ཏཉྷི པཡོགཱནཾ མཏྠཀསདིསཏྟཱ ‘‘སཱིས’’ནྟི ཝུཏྟཾ ཏཏོ པརཾ པཡོགཱབྷཱཝཏོ. དུཀྐཊེ ཏིཊྛནྟཱིཏི དུཀྐཊཾ ཛནེནྟི. དུཀྐཊཉྷི ཛནེནྟཱ ཧཏྠགྒཱཧཱདཡོ པཡོགཱ ‘‘དུཀྐཊེ ཏིཊྛནྟཱི’’ཏི ཝུཏྟཱ ཨཉྙིསྶཱ ཨཱཔཏྟིཡཱ ཛནཀཝསེན ཨཔྤཝཏྟནཏོ.

༧༤. ཛཱཏིཔུཔྥགུམྦཱནནྟི ཛཱཏིསུམནགུམྦཱནཾ. ཨུསྶནྣཏཱཡཱཏི བཱཧུལླཏཱཡ. ཨུཔཙཱརེཏི ཨཱསནྣཔྤདེསེ. ཏེན ཝཱཏུཔཏྠམྦྷེནཱཏི ‘‘ཨངྒམངྒཱནི ཝཱཏུཔཏྠདྡྷཱནི ཧོནྟཱི’’ཏི ཨེཝཾ ཝུཏྟཝཱཏུཔཏྠམྦྷེན. ཨིམིནཱ ནིདྡོཀྐམནསྶ ཀཱརཎཾ ཝུཏྟཾ. ཨེཀརསནྟི ཨཱཝཛྫནཱདིཝཱིཐིཙིཏྟེཧི ཨབྦོཀིཎྞཾ.

༧༦. སངྒཱམསཱིསཡོདྷོ ¶ བྷིཀྑཱུཏི ཡསྨཱ ཀིལེསཱརཱིཧི ཨནབྷིབྷཱུཏོ ཧུཏྭཱ ཏེ པརཱཛེསི, ཏསྨཱ སངྒཱམམུཁེ ཡོདྷསདིསོ བྷིཀྑུ.

༧༧. ཨུཔྤནྣེ ཝཏྠུསྨིནྟི མེཐུནཝཏྠུསྨིཾ ཨུཔྤནྣེ. པརིཝཏྟཀདྭཱརམེཝཱཏི སཾཝརཎཝིཝརཎཝསེན ཨིཏོ ཙིཏོ ཙ པརིཝཏྟནཡོགྒདྭཱརམེཝ. རུཀྑསཱུཙིཀཎྚཀདྭཱརནྟི རུཀྑསཱུཙིདྭཱརཾ ཀཎྚཀདྭཱརཉྩ. ‘‘རུཀྑསཱུཙིདྭཱརཾ ཀཎྚཀདྭཱར’’མིཙྩེཝ ཝཱ པཱཋོ. ཡཾ ཨུབྷོསུ པསྶེསུ རུཀྑཐམྦྷེ ནིཁཎིཏྭཱ ཏཏྠ ཝིཛ྄ཛྷིཏྭཱ མཛ྄ཛྷེ དྭེ ཏིསྶོ རུཀྑསཱུཙིཡོ པཝེསེཏྭཱ ཀརོནྟི, ཏཾ རུཀྑསཱུཙིདྭཱརཾ. ཡཾ པཝེསནནིཀྑམནཀཱལེ ཨཔནེཏྭཱ ཐཀནཡོགྒཾ, ཨེཀཱཡ བཧཱུཧི ཝཱ ཀཎྚཀསཱཁཱཧི ཀཏཾ, ཏཾ ཀཎྚཀདྭཱརཾ. ཙཀྐལཀཡུཏྟདྭཱརནྟི ཧེཊྛཱ ཨེཏཾ ཙཀྐཾ ཡོཛེཏྭཱ ཀཏཾ མཧཱདྭཱརཾ, ཡཾ ན སཀྐཱ ཨེཀེན སཾཝརིཏུཾ ཝིཝརིཏུཉྩ. གོཔྥེཏྭཱཏི རཛྫཱུཧི གནྠེཏྭཱ. ཨེཀཾ དུསྶསཱཎིདྭཱརམེཝཱཏི ཨེཏྠ ཀིལཉྫསཱཎིདྭཱརམྤི སངྒཧཾ གཙྪཏི.

ཡཏྠ དྭཱརཾ སཾཝརིཏྭཱ ནིཔཛྫིཏུཾ ན སཀྐཱ ཧོཏི, ཏཏྠ ཀཏྟབྦཝིདྷིཾ དསྶེཏུཾ ‘‘སཙེ བཧཱུནཾ ཝལ༹ཉྫནཊྛཱནཾ ཧོཏཱི’’ཏིཨཱདི ཝུཏྟཾ. བཧཱུནཾ ཨཝལ༹ཉྫནཊྛཱནེཔི ཨེཀཾ ཨཱཔུཙྪིཏྭཱ ནིཔཛྫིཏུཾ ཝཊྚཏིཡེཝ. ཨཐ བྷིཀྑཱུ…པེ… ནིསིནྣཱ ཧོནྟཱིཏི ཨིདཾ ཏཏྠ བྷིཀྑཱུནཾ སནྣིཧིཏབྷཱཝསནྡསྶནཏྠཾ ཝུཏྟཾ. ‘‘ནིསིནྣོ ¶ ཝཱ པན ཧོཏུ ནིཔནྣོ ཝཱ, ཡེན ཀེནཙི ཨིརིཡཱཔཐེན སམནྣཱགཏོ སཙེ ཏཏྠ སནྣིཧིཏོ ཧོཏི, ཨཱབྷོགཾ ཀཱཏུཾ ཝཊྚཏཱི’’ཏི ཏཱིསུཔི གཎྛིཔདེསུ ཝུཏྟཾ. ཀེཙི པན ‘‘ནིསིནྣཱ ཧོནྟཱིཏི ཝཙནཏོ སཙེ ནིཔནྣཱ ཧོནྟི, ཨཱབྷོགཾ ཀཱཏུཾ ན ཝཊྚཏཱི’’ཏི ཝདནྟི, ཏཾ ན སུནྡརཾ. ཡདི ཧི ‘‘ནིསིནྣཱ ཧོནྟཱི’’ཏི ཝཙནཏོ ནིཔནྣེ ཨཱབྷོགཾ ཀཱཏུཾ ན ཝཊྚཏི, ཋིཏེཔི ཙངྐམནྟེཔི ཨཱབྷོགཾ ཀཱཏུཾ ན ཝཊྚཏི. ན ཧི ནིསིནྣཝཙནཾ ནིཔནྣཾཡེཝ ནིཝཏྟེཏི, ཏསྨཱ ‘‘ནིསིནྣཱ ཧོནྟཱི’’ཏི ཨིདཾ ཏཏྠ ཏེསཾ ཨཏྠིཏཱམཏྟསནྡསྶནཏྠཾ, ན སེསཨིརིཡཱཔཐསམངྒིཏཱནིཝཏྟནཏྠཾ. ཨེཝཾ སནྟེཔི ནིཔཛྫིཏྭཱ ནིདྡཱཡནྟོ ཨསནྟཔཀྑེ ཋིཏཏྟཱ ཨཱབྷོགཱརཧོ ན ཧོཏཱིཏི ཨམྷཱཀཾ ཁནྟི. ཨསནྟཔཀྑེ ཋིཏཏྟཱཡེཝ ཧི རཧོ ནིསཛྫཱཡ ནིཔཛྫིཏྭཱ ནིདྡཱཡནྟོ ཨནཱཔཏྟིཾ ན ཀརོཏཱིཏི ཝུཏྟཾ. དྭཱརསཾཝརཎཾ ནཱམ བྷིཀྑུནཱིཨཱདཱིནཾ པཝེསནནིཝཱརཎཏྠནྟི ཨཱཧ – ‘‘བྷིཀྑུནིཾ ཝཱ མཱཏུགཱམཾ ཝཱ ཨཱཔུཙྪིཏུཾ ན ཝཊྚཏཱི’’ཏི. ‘‘ཨིཏྠིཨུབྷཏོབྱཉྫནཀཾ ཨིཏྠིཔཎྜཀཉྩ ཨཱཔུཙྪིཏུཾ ན ཝཊྚཏཱི’’ཏི ཝདནྟི. མཱཏུགཱམསྶ ཨནྟོགབྦྷེ ཋིཏབྷཱཝཾ ཛཱནིཏྭཱཔི དྭཱརེ ཡཐཱཝུཏྟཝིདྷིཾ ཀཏྭཱ ནིཔཛྫནྟསྶ ཨནཱཔཏྟི. ནིསྶེཎིཾ ཨཱརོཔེཏྭཱཏི ཨུཔརིཏལཾ ཨཱརོཔེཏྭཱ ཝིསངྑརིཏྭཱ བྷཱུམིཡཾ པཱཏེཏྭཱ ཚིནྡིཏྭཱ ཝཱ ནིཔཛྫིཏུམྤི ཝཊྚཏི. དྭེཔི དྭཱརཱནི ཛགྒིཏབྦཱནཱིཏི ཨེཏྠ སཙེ ཨེཀསྨིཾ དྭཱརེ ཀཝཱཊཾ ཝཱ ནཏྠི, ཧེཊྛཱ ཝུཏྟནཡེན སཾཝརིཏུཾ ཝཱ ན སཀྐཱ, ཨིཏརཾ དྭཱརཾ ཨསཾཝརིཏྭཱཔི ནིཔཛྫིཏུཾ ཝཊྚཏི.

བྷིཀྑཱཙཱརཱ ¶ པཊིཀྐམྨཱཏི བྷིཀྑཱཙཱརཏོ ནིཝཏྟིཏྭཱ. དྭཱརཔཱལསྶཱཏི དྭཱརཀོཊྛཀེ མཧཱདྭཱརེ ནིསྶེཎིམཱུལེ ཝཱ ཋཏྭཱ དྭཱརརཀྑཎཀསྶ. པཙྪིམཱནཾ བྷཱརོཏི ཨེཀཱནུབནྡྷཝསེན ཨཱགཙྪནྟེ སནྡྷཱཡ ཝུཏྟཾ. ཨསཾཝུཏདྭཱརེ ཨནྟོགབྦྷེ ཝཱཏི ཡོཛེཏབྦཾ. བཧི ཝཱཏི གབྦྷཏོ བཧི. ནིཔཛྫནཀཱལེཔི…པེ… ཝཊྚཏིཡེཝཱཏི ཨེཏྠ ‘‘དྭཱརཛགྒནཀསྶ ཏདདྷཱིནཏྟཱ ཏདཱ ཏསྶ ཏཏྠ སནྣིཧིཏཱསནྣིཧིཏབྷཱཝཾ ཨནུཔདྷཱརེཏྭཱཔི ཨཱབྷོགཾ ཀཱཏུཾ ཝཊྚཏིཡེཝཱ’’ཏི ཝདནྟི.

ཡེན ཀེནཙི པརིཀྑིཏྟེཏི པཱཀཱརེན ཝཱ ཝཏིཡཱ ཝཱ ཡེན ཀེནཙི པརིཀྑིཏྟེ. ‘‘པརིཀྑེཔསྶ ཨུཙྩཏོ པམཱཎཾ སཧསེཡྻཔྤཧོནཀེ ཝུཏྟནཡེན ཝེདིཏབྦ’’ནྟི ཝདནྟི. ཡདི པན ཨེཀསྨིཾ པདེསེ པརིཀྑེཔོ ཝུཏྟཔྤམཱཎཏོ ནཱིཙཏརོ ཧོཏི, ཝཊྚཏི. མཧཱཔརིཝེཎཾ ཧོཏཱིཏི མཧནྟཾ ¶ ཨངྒཎཾ ཧོཏི. མཧཱབོདྷིཡངྒཎལོཧཔཱསཱདཡངྒཎསདིསནྟི བཧུསཉྩཱརདསྶནཏྠཾ ཝུཏྟཾ, ན མཧཱཔརིཙྪེདདསྶནཏྠཾ. ཨརུཎེ ཨུགྒཏེ ཨུཊྛཧཏི, ཨནཱཔཏྟཱིཏི སུདྡྷཙིཏྟེན ནིཔནྣསྶ ནིདྡཱཡནྟསྶེཝ ཨརུཎེ ཨུགྒཏེཡེཝ ནིདྡཱཝསེནེཝ ཨནཱཔཏྟི. པབུཛ྄ཛྷིཏྭཱ པུན སུཔཏི, ཨཱཔཏྟཱིཏི ཨརུཎེ ཨུགྒཏེ པབུཛ྄ཛྷིཏྭཱ ཨརུཎུགྒམནཾ ཨཛཱནིཏྭཱཔི ཨནུཊྛཧིཏྭཱཝ སཡིཏསནྟཱནེན སཡནྟསྶ ཨཱཔཏྟི, པུརཱརུཎེ པབུཛ྄ཛྷིཏྭཱཔི ཨཛཱནིཏྭཱ སཡིཏསནྟཱནེན སཡནྟསྶཔི ཨརུཎེ ཨུགྒཏེ ཨཱཔཏྟིཡེཝ. ཡཐཱཔརིཙྪེདམེཝ ཝུཊྛཱཏཱིཏི ཨརུཎེ ཨུགྒཏེཡེཝ ཨུཊྛཧཏི. ཏསྶ ཨཱཔཏྟཱིཏི ཨསུདྡྷཙིཏྟེནེཝ ནིཔནྣཏྟཱ ནིདྡཱཡནྟསྶཔི ཨརུཎེ ཨུགྒཏེ དིཝཱཔཊིསལླཱནམཱུལིཀཱ ཨཱཔཏྟི. ‘‘ཨེཝཾ ནིཔཛྫནྟོ ཨནཱདརིཡདུཀྐཊཱཔི ན མུཙྩཏཱི’’ཏི ཝུཏྟཏྟཱ ཨསུདྡྷཙིཏྟེན ནིཔཛྫནྟོ ཨརུཎུགྒམནཏོ པུརེཏརཾ ཨུཊྛཧནྟོཔི ཨནུཊྛཧནྟོཔི ནིཔཛྫནཀཱལེཡེཝ ཨནཱདརིཡདུཀྐཊཾ ཨཱཔཛྫཏི, དིཝཱཔཊིསལླཱནམཱུལིཀཾ པན དུཀྐཊཾ ཨརུཎེ ཨུགྒཏེཡེཝ ཨཱཔཛྫཏི.

ཡཾ པནེཏྠ ཏཱིསུཔི གཎྛིཔདེསུ ཝུཏྟཾ ‘‘རཏྟིཾ དྭཱརཾ སཾཝརིཏྭཱ ནིཔནྣོ སཙེ ཨརུཎུགྒམནཝེལཱཡཾ དྭཱརེ ཝིཝཊེཔི ནིཔཛྫཏི, ཏསྶ ཨཱཔཏྟི ཨཁེཏྟེ སཾཝརིཏྭཱ ནིཔནྣཏྟཱ. ཨརུཎུགྒམནཝེལཱཡཾ ཝིཝཊེཔི དྭཱརེ ‘‘ནིཔཛྫིསྶཱམཱི’’ཏི རཏྟིཾ དྭཱརཾ སཾཝརིཏྭཱཔི ནིཔནྣསྶ ཨཁེཏྟེ པིཧིཏཏྟཱ ནིཔཛྫནཀཱལེ ཨནཱདརིཡདུཀྐཊཾ, ཨརུཎེ ཨུགྒཏེ ནིཔཛྫནམཱུལདུཀྐཊཉྩ ཧོཏི. རཏྟིཾ པིཧིཏེཔི ཨཔིཧིཏེཔི དྭཱརེ ནིཔནྣསྶ ཨརུཎུགྒམནཀྑཎེཡེཝ ཨཔིཧིཏདྭཱརེ པིཧིཏེ པིཧིཏདྭཱརེ ཙ པུན ཝིཝརིཏྭཱ པིཧིཏེ ཁེཏྟེ པིཧིཏཏྟཱ ཨནཱཔཏྟཱི’’ཏི, ཏཾ ཨཊྛཀཐཱཡ ན སམེཏི. རཏྟིཾ དྭཱརཾ ཨསཾཝརིཏྭཱ ནིཔནྣསྶེཝ ཧི ཨརུཎུགྒམནེ ཨཱཔཏྟི ཨཊྛཀཐཱཡཾ དསྶིཏཱ, ཏསྨཱ ཁེཏྟེ ཝཱ པིཧིཏཾ ཧོཏུ ཨཁེཏྟེ ཝཱ, སཾཝརཎམེཝེཏྠ པམཱཎནྟི ཨམྷཱཀཾ ཁནྟི.

ནིདྡཱཝསེན ནིཔཛྫཏཱིཏི ནིདྡཱབྷིབྷཱུཏཏཱཡ ཨེཀཔསྶེན ནིཔཛྫཏི, ཨེཝཾ པན ནིཔནྣོ ནིཔནྣོ ¶ ནཱམ ན ཧོཏཱིཏི ཨནཱཔཏྟི ཝུཏྟཱ. ཨཔསྶཱཡ སུཔནྟསྶཱཏི ཀཊིཡཱ པིཊྛིཝེམཛ྄ཛྷསྶ ཙ ཨནྟརེ ཨཔྤམཏྟཀམྤི པདེསཾ བྷཱུམིཾ ཨཕུསཱཔེཏྭཱ ཐམྦྷཱདིཾ ཨཔསྶཱཡ སུཔནྟསྶ. སཧསཱཝ ཝུཊྛཱཏཱིཏི པཀྑལིཏྭཱ པཏིཏོ ཝིཡ སཧསཱ ཝུཊྛཱཏི. ཏཏྠེཝ སཡཏི ན ཝུཊྛཱཏཱིཏི ནིདྡཱབྷིབྷཱུཏཏཱཡ ¶ སུཔནྟོ ན ཝུཊྛཱཏི, ན མུཙྪཱཔརེཏོ. ཏེནེཝ ‘‘ཨཝིསཡཏྟཱ ཨཱཔཏྟི ན དིསྶཏཱི’’ཏི ན ཝུཏྟཾ.

ཨེཀབྷངྒེནཱཏི ཨེཀསྶ པསྶསྶ བྷཉྫནེན, ཧེཊྛཱ ཝུཏྟནཡེན པཱདེ བྷཱུམིཏོ ཨམོཙེཏྭཱཝ ཨེཀཾ པསྶཾ བྷཉྫིཏྭཱ ནཱམེཏྭཱ ནིཔནྣོཏི ཝུཏྟཾ ཧོཏི. མཧཱཨཊྛཀཐཱཡཾ པན མཧཱཔདུམཏྠེརེན ཝུཏྟནྟི སམྦནྡྷོ. མུཙྪིཏྭཱ པཏིཏཏྟཱ ཐེརེན ‘‘ཨཝིསཡཏྟཱ ཨཱཔཏྟི ན དིསྶཏཱི’’ཏི ཝུཏྟཾ. ཨཱཙརིཡཱ པན ཡཐཱ ཡཀྑགཧིཏཀོ བནྡྷིཏྭཱ ནིཔཛྫཱཔིཏོ ཙ པརཝསོ ཧོཏི, ཨེཝཾ ཨཔརཝསཏྟཱ མུཙྪིཏྭཱ པཏིཏོ ཀཉྩི ཀཱལཾ ཛཱནིཏྭཱཔི ནིཔཛྫཏཱིཏི ཨནཱཔཏྟིཾ ན ཝདནྟི. ཡོ ཙ ཡཀྑགཧིཏཀོ, ཡོ ཙ བནྡྷིཏྭཱ ནིཔཛྫཱཔིཏོཏི ཨིམསྶ མཧཱཨཊྛཀཐཱཝཱདསྶ པཙྪིམཏྟཱ སོཡེཝ པམཱཎཏོ གཧེཏབྦོ. ཏཐཱ ཙ ཝཀྑཏི ‘‘སབྦཏྠ ཡོ ཡོ ཨཊྛཀཐཱཝཱདོ ཝཱ ཐེརཝཱདོ ཝཱ པཙྪཱ ཝུཙྩཏི, སོཝ པམཱཎཏོ དཊྛབྦོ’’ཏི (པཱརཱ. ཨཊྛ. ༡.༩༢). ཡཀྑགཧིཏགྒཧཎེནེཝ ཙེཏྠ ཝིསཉྙཱིབྷཱུཏོཔི སངྒཧིཏོཏི ཝེདིཏབྦཾ. ཨེཀབྷངྒེན ནིཔནྣོ པན ཨཏྠཏོ ཨནིཔནྣཏྟཱ མུཙྩཏིཡེཝཱཏི མཧཱཨཊྛཀཐཱཝཱདེན སོ ཨཔྤཊིཀྑིཏྟོཝ ཧོཏཱིཏི དཊྛབྦཾ. དིཝཱ སཾཝརིཏྭཱ ནིཔནྣསྶ ཀེནཙི ཝིཝཊེཔི དྭཱརེ ཨནཱཔཏྟི ནིཔཛྫནཀཱལེ སཾཝརིཏྭཱ ནིཔནྣཏྟཱ. སཙེ དིཝཱ སཾཝརིཏྭཱ དྭཱརསམཱིཔེ ནིཔནྣོ པཙྪཱ སཡམེཝ དྭཱརཾ ཝིཝརཏི, ཨེཝམྤི ཝཊྚཏི. ཨཙིཏྟཀཱ ཙཱཡཾ ཨཱཔཏྟི ཀིརིཡཱ ཙ ཨཀིརིཡཱ ཙ.

༧༨. ‘‘ཨཔདེ པདཾ ཀརོནྟོ ཝིཡཱ’’ཏི ཝཏྭཱ པུན ཏམེཝཏྠཾ ཨཱཝིཀརོནྟོ ‘‘ཨཱཀཱསེ པདཾ དསྶེནྟོ ཝིཡཱ’’ཏི ཨཱཧ. ཨེཏདགྒནྟི ཨེསོ ཨགྒོ. ཡདིདནྟི ཡོ ཨཡཾ. སེསམེཏྠ ཨུཏྟཱནཏྠམེཝ.

ཝིནཱིཏཝཏྠུཝཎྞནཱ ནིཊྛིཏཱ.

ཏཏྲིདནྟིཨཱདི ཧེཊྛཱ ཝུཏྟཏྠམེཝ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ སཱརཏྠདཱིཔནིཡཾ

པཋམཔཱརཱཛིཀཝཎྞནཱ ནིཊྛིཏཱ.

༢. དུཏིཡཔཱརཱཛིཀཾ

ཨདུཏིཡེན ¶ ¶ ཛིནེན ཡཾ དུཏིཡཾ པཱརཱཛིཀཾ པཀཱསིཏཾ, ཏསྶ ཨིདཱནི ཡསྨཱ སཾཝཎྞནཱཀྐམོ པཏྟོ, ཏསྨཱ ཡཾ སུཝིཉྙེཡྻཾ, ཡཉྩ པུབྦེ པཀཱསིཏཾ, ཏཾ སབྦཾ ཝཛྫཡིཏྭཱ ཨསྶ དུཏིཡསྶ ཨཡཾ སཾཝཎྞནཱ ཧོཏཱིཏི སམྦནྡྷོ.

དྷནིཡཝཏྠུཝཎྞནཱ

༨༤. རཱཛགཧེཏི ཨེཏྠ དུགྒཛནཔདཊྛཱནཝིསེསསམྤདཱདིཡོགཏོ པདྷཱནབྷཱཝེན རཱཛཱུཧི གཧིཏཾ པརིགྒཧིཏནྟི རཱཛགཧནྟི ཨཱཧ ‘‘མནྡྷཱཏུ…པེ… ཝུཙྩཏཱི’’ཏི. ཏཏྠ མཧཱགོཝིནྡེན མཧཱསཏྟེན པརིགྒཧིཏཾ རེཎུནཱ པརིགྒཧིཏམེཝ ཧོཏཱིཏི མཧཱགོཝིནྡགྒཧཎཾ. མཧཱགོཝིནྡཔཨགྒཧིཏཏཱཀིཏྟནཉྷི ཏདཱ རེཎུནཱ མགདྷརཱཛེན པརིགྒཧིཏབྷཱཝཱུཔལཀྑཎཾ. ཏསྶ ཧི སོ པུརོཧིཏོ. ‘‘མཧཱགོཝིནྡོཏི མཧཱནུབྷཱཝོ པུརཱཏནོ ཨེཀོ མགདྷརཱཛཱ’’ཏི ཀེཙི. པརིགྒཧིཏཏྟཱཏི རཱཛདྷཱནཱིབྷཱཝེན པརིགྒཧིཏཏྟཱ. གཡ྄ཧཏཱིཏི གཧོ, རཱཛཱུནཾ གཧོཏི རཱཛགཧཾ, ནགརསདྡཱཔེཀྑཱཡ ནཔུཾསཀནིདྡེསོ. ཨཉྙེཔེཏྠ པཀཱརེཏི ‘‘ནགརམཱཔནེན རཉྙཱ ཀཱརིཏསབྦགཧཏྟཱ རཱཛགཧཾ, གིཛ྄ཛྷཀཱུཊཱདཱིཧི པརིཀྑིཏྟཏྟཱ པབྦཏརཱཛེཧི པརིཀྑིཏྟགེཧསདིསནྟིཔི རཱཛགཧཾ, སམྤནྣབྷཝནཏཱཡ རཱཛམཱནཾ གེཧནྟིཔི རཱཛགཧཾ, སུཝིཧིཏཱརཀྑཏཱཡ ཨནཏྠཱཝཧབྷཱཝེན ཨུཔགཏཱནཾ པཊིརཱཛཱུནཾ གཧཾ གེཧབྷཱུཏནྟིཔི རཱཛགཧཾ, རཱཛཱུཧི དིསྭཱ སམྨཱ པཏིཊྛཱཔིཏཏྟཱ ཏེསཾ གཧཾ གེཧབྷཱུཏནྟིཔི རཱཛགཧཾ. ཨཱརཱམརཱམཎེཡྻཀཱདཱིཧི རཱཛཏེ, ནིཝཱསསུཁཏཱདིནཱ སཏྟེཧི མམཏྟཝསེན གཡ྄ཧཏི པརིགྒཡ྄ཧཏཱིཏི ཝཱ རཱཛགཧ’’ནྟི ཨེདིསེ པཀཱརེ. སོ པདེསོ ཋཱནཝིསེསབྷཱཝེན ཨུལཱ༹རསཏྟཔརིབྷོགོཏི ཨཱཧ ‘‘ཏཾ པནེཏ’’ནྟིཨཱདི. ཏཏྠ བུདྡྷཀཱལེ ཙཀྐཝཏྟིཀཱལེ ཙཱཏི ཨིདཾ ཡེབྷུཡྻཝསེན ཝུཏྟཾ. ཏེསནྟི ཡཀྑཱནཾ. ཝསནཝནནྟི ཨཱཔཱནབྷཱུམིབྷཱུཏཾ ཨུཔཝནཾ. གིཛ྄ཛྷཱ ཨེཏྠ སནྟཱིཏི གིཛ྄ཛྷཾ, ཀཱུཊཾ. ཏཾ ཨེཏསྶཱཏི གིཛ྄ཛྷཀཱུཊོ. གིཛ྄ཛྷོ ཝིཡཱཏི ཝཱ གིཛ྄ཛྷཾ, ཀཱུཊཾ. ཏཾ ཨེཏསྶཱཏི གིཛ྄ཛྷཀཱུཊོ, པབྦཏོ. གིཛ྄ཛྷསདིསཀཱུཊོཏི གིཛ྄ཛྷཀཱུཊོཏི ¶ ཝཱ མཛ྄ཛྷེཔདལོཔཱིསམཱསོ ཡཐཱ ‘‘སཱཀཔཏྠཝོ’’ཏི, ཏསྨིཾ གིཛ྄ཛྷཀཱུཊེ. ཏེནཱཧ ‘‘གིཛ྄ཛྷཱ’’ཏིཨཱདི.

ཏཏོ ¶ པརཾ སངྒྷོཏི ཏིཎྞཾ ཛནཱནཾ ཨུཔརི སངྒྷོ ཙཏུཝགྒཀརཎཱིཡཱདིཀམྨཔྤཏྟཏྟཱ. ཏསྨིཾ པབྦཏེ སནྣིཔཏིཏྭཱ སམཱཔཏྟིཡཱ ཝཱིཏིནཱམེནྟཱིཏི ཡཐཱཕཱསུཀཊྛཱནེ པིཎྜཱཡ ཙརིཏྭཱ ཀཏབྷཏྟཀིཙྩཱ ཨཱགནྟྭཱ ཙེཏིཡགབྦྷེ ཡམཀམཧཱདྭཱརཾ ཝིཝརནྟཱ ཝིཡ ཏཾ པབྦཏཾ དྭིདྷཱ ཀཏྭཱ ཨནྟོ པཝིསིཏྭཱ རཏྟིཊྛཱནདིཝཱཊྛཱནཱནི མཱཔེཏྭཱ ཏཏྠ སམཱཔཏྟིཡཱ ཝཱིཏིནཱམེནྟི.

ཀདཱ པནེཏེ ཏཏྠ ཝསིཾསུ? ཨཏཱིཏེ ཀིར ཨནུཔྤནྣེ ཏཐཱགཏེ བཱརཱཎསིཾ ཨུཔནིསྶཱཡ ཨེཀསྨིཾ གཱམཀེ ཨེཀཱ ཀུལདྷཱིཏཱ ཁེཏྟཾ རཀྑཏི, ཏསྶཱ ཁེཏྟཀུཊིཡཱ ཝཱིཧཡོ བྷཛྫནྟིཡཱ ཏཏྠ མཧཱཀརཉྫཔུཔྥཔྤམཱཎཱ མཧནྟམཧནྟཱ མནོཧརཱ པཉྩསཏམཏྟཱ ལཱཛཱ ཛཱཡིཾསུ. སཱ ཏེ གཧེཏྭཱ མཧཏི པདུམིནིཔཏྟེ ཋཔེསི. ཏསྨིཉྩ སམཡེ ཨེཀོ པཙྩེཀསམྦུདྡྷོ ཏསྶཱ ཨནུགྒཧཏྠཾ ཨཝིདཱུརེ ཁེཏྟཔཱལི༹ཡཱ གཙྪཏི. སཱ ཏཾ དིསྭཱ པསནྣམཱནསཱ སུཔུཔྥིཏཾ མཧནྟཾ ཨེཀཾ པདུམཾ གཧེཏྭཱ ཏཏྠ ལཱཛེ པཀྑིཔིཏྭཱ པཙྩེཀབུདྡྷཾ ཨུཔསངྐམིཏྭཱ པཉྩཧི ལཱཛསཏེཧི སདྡྷིཾ ཏཾ པདུམཔུཔྥཾ དཏྭཱ པཉྩཔཏིཊྛིཏེན ཝནྡིཏྭཱ ‘‘ཨིམསྶ, བྷནྟེ, པུཉྙསྶ ཨཱནུབྷཱཝེན ཨཱནུབྷཱཝསམྤནྣེ པཉྩསཏཔུཏྟེ ལབྷེཡྻ’’ནྟི པཉྩ པུཏྟསཏཱནི པཏྠེསི. ཏསྨིཾཡེཝ ཁཎེ པཉྩསཏཱ མིགལུདྡཀཱ སམྦྷཏསམྦྷཱརཱ པརིཔཀྐཔཙྩེཀབོདྷིཉཱཎཱ ཏསྶེཝ པཙྩེཀབུདྡྷསྶ མདྷུརམཾསཾ དཏྭཱ ‘‘ཨེཏིསྶཱ པུཏྟཱ བྷཝེཡྻཱམཱ’’ཏི པཏྠཡིཾསུ. ཨཏཱིཏཱསུ ཨནེཀཱསུ ཛཱཏཱིསུ ཏསྶཱ པུཏྟབྷཱཝེན ཨཱགཏཏྟཱ ཏཐཱ ཏེསཾ ཨཧོསི. སཱ ཡཱཝཏཱཡུཀཾ ཋཏྭཱ དེཝལོཀེ ནིབྦཏྟི, ཏཏོ ཙུཏཱ ཛཱཏསྶརེ པདུམགབྦྷེ ནིབྦཏྟི. ཏམེཀོ ཏཱཔསོ དིསྭཱ པཊིཛགྒི. ཏསྶཱ པདསཱ ཝིཙརནྟིཡཱ པདུདྡྷཱརེ པདུདྡྷཱརེ བྷཱུམིཏོ པདུམཱནི ཨུཊྛཧནྟི. ཨེཀོ ཝནཙརཀོ དིསྭཱ བཱརཱཎསིརཉྙོ ཨཱརོཙེསི. རཱཛཱ ཏཾ ཨཱནེཏྭཱ ཨགྒམཧེསིཾ ཨཀཱསི, ཏསྶཱ གབྦྷོ སཎྛཱཏི. མཧཱཔདུམཀུམཱརོ མཱཏུཀུཙྪིཡཾ ཝསི, སེསཱ བཧི ནིཀྑནྟཾ གབྦྷམལཾ ནིསྶཱཡ སཾསེདཛབྷཱཝེན ནིབྦཏྟཱ. ‘‘ཨོཔཔཱཏིཀབྷཱཝེནཱ’’ཏི ཀེཙི. ཏེ ཝཡཔྤཏྟཱ ཨུཡྻཱནེ པདུམསྶརེ ཀཱིལ༹ནྟཱ ཨེཀེཀསྨིཾ པདུམེ ནིསཱིདིཏྭཱ ཁཡཝཡཾ པཊྛཔེཏྭཱ པཙྩེཀབོདྷིཉཱཎཾ ནིབྦཏྟཡིཾསུ. ཨཡཾ ཏེསཾ བྱཱཀརཎགཱཐཱ ཨཧོསི –

‘‘སརོརུཧཾ ¶ པདུམཔལཱསམཏྲཛཾ, སུཔུཔྥིཏཾ བྷམརགཎཱནུཙིཎྞཾ;

ཨནིཙྩཏཱཡཾ ཝཡཏཾ ཝིདིཏྭཱ, ཨེཀོ ཙརེ ཁགྒཝིསཱཎཀཔྤོ’’ཏི. –

ཏསྨིཾ ¶ ཀཱལེ ཏེ ཏཏྠ ཝསིཾསུ. ཏདཱ ཙསྶ པབྦཏསྶ ‘‘ཨིསིགིལཱི’’ཏི སམཉྙཱ ཨུདཔཱདི. ཨིམེ ཨིསཡོཏི ཨིམེ པཙྩེཀབུདྡྷཨིསཱི. སམཱ ཉཱཡཏི ཨེཏཱཡཱཏི སམཉྙཱ, ནཱམནྟི ཨཏྠོ.

ཏིཎཙྪདནཱ ཀུཊིཡོ མཛ྄ཛྷེཔདལོཔཱིསམཱསཾ ཀཏྭཱ, ཨེཀདེསེ ཝཱ སམུདཱཡཝོཧཱརཝསེན ‘‘ཏིཎཀུཊིཡོ’’ཏི ཝུཏྟཱ. ‘‘ཝསྶཾ ཨུཔགཙྪིཾསཱུ’’ཏི ཝཙནཏོ ཝསྶཱུཔགམནཱརཧཱ སདྭཱརབནྡྷཱ ཨེཝ ཝེདིཏབྦཱཏི ཨཱཧ ‘‘ཏིཎཙྪདནཱ སདྭཱརབནྡྷཱ ཀུཊིཡོ’’ཏི. ཝསྶཾ ཨུཔགཙྪནྟེནཱཏི ཝསྶཱཝཱསཾ ཨུཔགཙྪནྟེན. ནཱལཀཔཊིཔདནྟི ‘‘མོནེཡྻཾ ཏེ ཨུཔཉྙིསྶ’’ནྟིཨཱདིནཱ (སུ. ནི. ༧༢༡) སཏྠཱརཱ ནཱལཀཏྠེརསྶ དེསིཏཾ པུཐུཛྫནཀཱལཏོ པབྷུཏི ཀིལེསཙིཏྟཾ ཨནུཔྤཱདེཏྭཱ པཊིཔཛྫིཏབྦཾ མོནེཡྻཔཊིཔདཾ. ཏཾ པན པཊིཔདཾ སུཏྭཱ ནཱལཀཏྠེརོ ཏཱིསུ ཋཱནེསུ ཨཔྤིཙྪོ ཨཧོསི དསྶནེ སཝནེ པུཙྪཱཡཱཏི. སོ ཧི དེསནཱཔརིཡོསཱནེ པསནྣཙིཏྟོ བྷགཝནྟཾ ཝནྡིཏྭཱ ཝནཾ པཝིཊྛོ. པུན ‘‘ཨཧོ ཝཏཱཧཾ བྷགཝནྟཾ པསྶེཡྻ’’ནྟི ལོལབྷཱཝཾ ན ཛནེསི, ཨཡམསྶ དསྶནེ ཨཔྤིཙྪཏཱ. ཏཐཱ ‘‘ཨཧོ ཝཏཱཧཾ པུན དྷམྨདེསནཾ སུཎེཡྻ’’ནྟི ལོལབྷཱཝཾ ན ཛནེསི, ཨཡམསྶ སཝནེ ཨཔྤིཙྪཏཱ. ཏཐཱ ‘‘ཨཧོ ཝཏཱཧཾ པུན མོནེཡྻཔཊིཔདཾ པུཙྪེཡྻ’’ནྟི ལོལབྷཱཝཾ ན ཛནེསི, ཨཡམསྶ པུཙྪཱཡ ཨཔྤིཙྪཏཱ.

སོ ཨེཝཾ ཨཔྤིཙྪོ སམཱནོ པབྦཏཔཱདཾ པཝིསིཏྭཱ ཨེཀཝནསཎྜེ དྭེ དིཝསཱནི ན ཝསི, ཨེཀརུཀྑམཱུལེ དྭེ དིཝསཱནི ན ནིསཱིདི, ཨེཀསྨིཾ གཱམེ དྭེ དིཝསཱནི པིཎྜཱཡ ན པཱཝིསི. ཨིཏི ཝནཏོ ཝནཾ, རུཀྑཏོ རུཀྑཾ, གཱམཏོ གཱམཾ ཨཱཧིཎྜནྟོ ཨནུརཱུཔཔཊིཔདཾ པཊིཔཛྫིཏྭཱ ཨགྒཕལེ པཏིཊྛཱསི. ཨེཀསྶ བྷགཝཏོ ཀཱལེ ཨེཀོཡེཝ ནཾ པཱུརེཏི. ཨིམཉྷི མོནེཡྻཔཊིཔདཾ ཨུཀྐཊྛཾ ཀཏྭཱ པཱུརེནྟོ བྷིཀྑུ སཏྟེཝ མཱསཱནི ཛཱིཝཏི, མཛ྄ཛྷིམཾ ཀཏྭཱ པཱུརེནྟོ སཏྟ ཝསྶཱནི, མུདུཀཾ ཀཏྭཱ པཱུརེནྟོ སོལ༹ས ཝསྶཱནི. ཨཡཾ པན ཐེརོ ཨུཀྐཊྛཾ ཀཏྭཱ པཱུརེསི, ཏསྨཱ སཏྟ མཱསེ ཋཏྭཱ ཨཏྟནོ ¶ ཨཱཡུསངྑཱརསྶ པརིཀྑཡཾ ཉཏྭཱ ནཧཱཡིཏྭཱ ནིཝཱསེཏྭཱ ཀཱཡབནྡྷནཾ བནྡྷིཏྭཱ དིགུཎཾ སངྒྷཱཊིཾ པཱརུཔིཏྭཱ དསབལཱབྷིམུཁོ པཉྩཔཏིཊྛིཏེན ཏཾ ཝནྡིཏྭཱ ཨཉྫལིཾ པགྒཧེཏྭཱ ཧིངྒུལཀཔབྦཏཾ ནིསྶཱཡ ཋིཏཀོཝ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡི. ཏསྶ པརིནིབྦུཏབྷཱཝཾ ཉཏྭཱ བྷགཝཱ བྷིཀྑུསངྒྷེན སདྡྷིཾ ཏཏྠ གནྟྭཱ སརཱིརཀིཙྩཾ ཀཏྭཱ དྷཱཏུཡོ གཱཧཱཔེཏྭཱ ཙེཏིཡཾ པཏིཊྛཱཔེཏྭཱ ཨགམཱསི. ཨེཝརཱུཔཾ པཊིཔདཾ པཊིཔནྣེནཔི ཝསྶཾ ཨུཔགཙྪནྟེན ཚནྣེ སདྭཱརབནྡྷེཡེཝ ཋཱནེ ཨུཔགནྟབྦཾ. ཨཔྤིཙྪཏཾ ནིསྶཱཡཔི སིཀྑཱཔདསྶ ཨནཏིཀྐམནཱིཡཏྟཾ དསྶེཏུཾ ‘‘ནཱལཀཔཊིཔདཾ པཊིཔནྣེནཔཱི’’ཏི ཝུཏྟཾ.

པཉྩནྣཾ ཚདནཱནནྟི ཏིཎཔཎྞཨིཊྛཀསིལཱསུདྷཱསངྑཱཏཱནཾ པཉྩནྣཾ ཚདནཱནཾ. ‘‘ན, བྷིཀྑཝེ, ཨསེནཱསནིཀེན ཝསྶཾ ¶ ཨུཔགནྟབྦནྟི (མཧཱཝ. ༢༠༤) ཝཙཱིབྷེདཾ ཀཏྭཱ ཝསྶཱུཔགམནཾ སནྡྷཱཡེཝ པཊིཀྑེཔོ, ན ཨཱལཡཀརཎཝསེན ཨུཔགམནཾ སནྡྷཱཡཱ’’ཏི ཝདནྟི. པཱལི༹ཡཾ པན ཨཝིསེསཏྟཱ ཨཊྛཀཐཱཡཉྩ ‘‘ནཱལཀཔཊིཔདཾ པཊིཔནྣེནཔཱི’’ཏིཨཱདིནཱ ཨཝིསེསེནེཝ དལ༹ྷཾ ཀཏྭཱ ཝུཏྟཏྟཱ ཨསེནཱསནིཀསྶ ནཱཝཱདིཾ ཝིནཱ ཨཉྙཏྠ ཨཱལཡོ ན ཝཊྚཏཱིཏི ཨམྷཱཀཾ ཁནྟི. ནཱཝཱསཏྠཝཛེསུཡེཝ ཧི ‘‘ཨནུཛཱནཱམི, བྷིཀྑཝེ, ནཱཝཱཡཾ ཝསྶཾ ཨུཔགནྟུ’’ནྟིཨཱདིནཱ (མཧཱཝ. ༢༠༣) སཏི ཨསཏི ཝཱ སེནཱསནེ ཝསྶཱུཔགམནསྶ ཝིསུཾ ཨནུཉྙཱཏཏྟཱ ‘‘ན, བྷིཀྑཝེ, ཨསེནཱསནིཀེན ཝསྶཾ ཨུཔགནྟབྦ’’ནྟི ཨཡཾ པཊིཀྑེཔོ ཏཏྠ ན ལབྦྷཏཱིཏི ཨསཏི སེནཱསནེ ཨཱལཡཝསེནཔི ནཱཝཱདཱིསུ ཨུཔགམནཾ ཝུཏྟཾ. ཨནུདྷམྨཏཱཏི ཝཏྟཾ. རཏྟིཊྛཱནདིཝཱཊྛཱནཱདཱིནཱིཏི ཨཱདི-སདྡེན ཝཙྩཀུཊིཔསྶཱཝཊྛཱནཱདིཾ སངྒཎྷཱཏི.

ཀཏིཀཝཏྟཱནི ཙ ཁནྡྷཀཝཏྟཱནི ཙ ཨདྷིཊྛཱཡཱཏི པརིཡཏྟིདྷམྨོ ནཱམ ཏིཝིདྷམྤི སདྡྷམྨཾ པཏིཊྛཱཔེཏི, ཏསྨཱ སཀྐཙྩཾ ཨུདྡིསཐ ཨུདྡིསཱཔེཐ, སཛ྄ཛྷཱཡཾ ཀརོཐ, པདྷཱནགྷརེ ཝསནྟཱནཾ སངྒྷཊྚནཾ ཨཀཏྭཱ ཨནྟོཝིཧཱརེ ནིསཱིདིཏྭཱ ཨུདྡིསཐ ཨུདྡིསཱཔེཐ, སཛ྄ཛྷཱཡཾ ཀརོཐ, དྷམྨསྶཝནཾ སམིདྡྷཾ ཀརོཐ, པབྦཱཛེནྟཱ སོདྷེཏྭཱ པབྦཱཛེཐ, སོདྷེཏྭཱ ཨུཔསམྤཱདེཐ, སོདྷེཏྭཱ ནིསྶཡཾ དེཐ. ཨེཀོཔི ཧི ཀུལཔུཏྟོ པབྦཛྫཉྩ ཨུཔསམྤདཉྩ ལབྷིཏྭཱ སཀལཾ སཱསནཾ པཏིཊྛཱཔེཏི. ཨཏྟནོ ཐཱམེན ཡཏྟཀཱནི སཀྐོཐ, ཏཏྟཀཱནི དྷུཏངྒཱནི སམཱདིཡཐ, ཨནྟོཝསྶཾ ནཱམེཏཾ སཀལདིཝསཾ རཏྟིཡཱ ཙ པཋམཔཙྪིམཡཱམེསུ ཨཔྤམཏྟེཧི བྷཝིཏབྦཾ, ཝཱིརིཡཾ ཨཱརབྷིཏབྦཾ ¶ . པོརཱཎཀམཧཨཱཐེརཱཔི སབྦཔལིབོདྷེ ཚིནྡིཏྭཱ ཨནྟོཝསྶེ ཨེཀཙརིཡཝཏྟཾ པཱུརཡིཾསུ. བྷསྶེ མཏྟཾ ཛཱནིཏྭཱ དསཝཏྠུཀཀཐཾ དསཨསུབྷདསཱནུསྶཏིཨཊྛཏིཾསཱརམྨཎཀཐཾ ཀཱཏུཾ ཝཊྚཏི. ཨཱགནྟུཀཱནཾ ཝཏྟཾ ཀཱཏུཾ, སཏྟཱཧཀརཎཱིཡེན གཏཱནཾ ཨཔལོཀེཏྭཱ དཱཏུཾ ཝཊྚཏི. ཝིགྒཱཧིཀཔིསུཎཕརུསཝཙནཱནི མཱ ཝདཐ, དིཝསེ དིཝསེ སཱིལཱནི ཨཱཝཛྫེནྟཱ ཙཏུརཱརཀྑཾ ཨཧཱཔེནྟཱ མནསིཀཱརབཧུལཱ ཝིཧརཐ, ཙེཏིཡཾ ཝཱ བོདྷིཾ ཝཱ ཝནྡནྟེན གནྡྷམཱལཾ ཝཱ པཱུཛེནྟེན པཏྟཾ ཝཱ ཐཝིཀཱཡ པཀྑིཔནྟེན ན ཀཐེཏབྦཾ, ཨནྟོགཱམེ མནུསྶེཧི སདྡྷིཾ པཙྩཡསཾཡུཏྟཀཐཱ ཝཱ ཝིསབྷཱགཀཐཱ ཝཱ ན ཀཐེཏབྦཱ, རཀྑིཏིནྡྲིཡེཧི བྷཝིཏབྦཾ, ཁནྡྷཀཝཏྟཉྩ སེཁིཡཝཏྟཉྩ པཱུརེཏབྦནྟི ཨེཝམཱདིནཱ ཀཏིཀཝཏྟཱནི ཁནྡྷཀཝཏྟཱནི ཙ ཨདྷིཊྛཧིཏྭཱ.

‘‘ཨནུཛཱནཱམི, བྷིཀྑཝེ, ཝསྶཾཝུཊྛཱནཾ ཏཱིཧི ཋཱནེཧི པཝཱརེཏུ’’ནྟི (མཧཱཝ. ༢༠༩) ཝུཊྛཝསྶཱནཾ པཝཱརཎཱཡ ཨནུཉྙཱཏཏྟཱ ཨིམསྶ སུཏྟསྶ ཝསེན པཝཱརཎཱདིཝསསྶ ཨརུཎུགྒམནཏོ པཊྛཱཡ ཨཔྤཝཱརིཏཱཔི ‘‘ཝུཊྛཝསྶཱ’’ཏི ཝུཙྩནྟི. ཀིཉྩཱཔི ‘‘ཨིམཾ ཏེམཱསཾ ཝསྶཾ ཨུཔེམཱི’’ཏི (མཧཱཝ. ཨཊྛ. ༡༨༤) ཝཙནཏོ པཝཱརཎཱདིཝསསྶ ཏེམཱསནྟོགདྷཏྟཱ ཏཾ དིཝསཾ ཡཱཝ ན པཝཱརེནྟི ¶ , ཏཱཝ ཝསྶཾ ཝསནྟཱ ནཱམ ཧོནྟི, ཏཐཱཔི ཨེཀདེསེན ཨཝུཊྛམྤི ཏཾ དིཝསཾ ཝུཊྛབྷཱགཱཔེཀྑཱཡ ཝུཊྛམེཝ ཧོཏཱིཏི ཀཏྭཱ ཨེཝཾ ཝུཏྟཾ ཀཏཱཀཏབྷཱགཱཔེཀྑཱཡ སམུདཱཡེ པཝཏྟཀཏཱཀཏཝོཧཱརོ ཝིཡ. ཝིཔྤཀཏཉྷི ཡཾ ཀིཉྩི ‘‘ཀཏཱཀཏ’’ནྟི ཝུཙྩཏི. ‘‘ཨནུཛཱནཱམི, བྷིཀྑཝེ, ཝསྶཾཝུཊྛཱནཾ ཀཐིནཾ ཨཏྠརིཏུ’’ནྟི (མཧཱཝ. ༣༠༦) ཨིམསྶ པན སུཏྟསྶ ཝསེན ནིཔྤརིཡཱཡཏོ མཧཱཔཝཱརཎཱཡ པཝཱརིཏཱ པཱཊིཔདདིཝསཏོ པཊྛཱཡ ‘‘ཝུཊྛཝསྶཱ’’ཏི ཝུཙྩནྟཱིཏི དསྶེཏུཾ ‘‘མཧཱཔཝཱརཎཱཡ པཝཱརིཏཱ’’ཏིཨཱདི ཝུཏྟཾ. པཱཊིཔདདིཝསཏོ པཊྛཱཡ ཧི ཝསྶཱནསྶ པཙྪིམེ མཱསེ ཀཐིནཏྠཱརོ ཨནུཉྙཱཏོ པརིཝཱརེ ‘‘ཀཐིནསྶ ཨཏྠཱརམཱསོ ཛཱནིཏབྦོཏི ཝསྶཱནསྶ པཙྪིམོ མཱསོ ཛཱནིཏབྦོ’’ཏི (པརི. ༤༡༢) ཝུཏྟཏྟཱ. ‘‘མཧཱཔཝཱརཎཱཡ པཝཱརིཏཱ’’ཏི ཨིདཉྩ པུརིམིཀཱཡ ཝསྶཱུཔགཏཱནཾ སབྷཱཝདསྶནམཏྟཾ, ཀེནཙི ཨནྟརཱཡེན ཨཔྤཝཱརིཏཱཔི ‘‘ཝུཊྛཝསྶཱ’’ཨིཙྩེཝ ཝུཙྩནྟི.

‘‘ཨཱཔུཙྪིཏབྦཱ’’ཏི ཝཏྭཱ ཨིདཱནི ཨཱཔུཙྪནཝིདྷིཾ དསྶེནྟོ ‘‘སཙེ ཨིམཾ ཀུཊི’’ནྟིཨཱདིམཱཧ. པཊིཛགྒནཀཾ ཝཱ ན ལབྷཏཱིཏི ཝིཧཱརཔཙྩནྟེ ཀཏེ ¶ པཊིཛགྒནཀཾ ན ལབྷཏི. ཏེ པན བྷིཀྑཱུ ཛནཔདཙཱརིཀཾ པཀྐམིཾསཱུཏི སམྦནྡྷོ. ཨདྡྷཱནགམནེ ཙཱརིཀཱཝོཧཱརོ སཱསནེ ནིརུལ༹ྷོ. ཀིཉྩཱཔི ཨཡཾ ཙཱརིཀཱ ནཱམ མཧཱཛནསངྒཧཏྠཾ བུདྡྷཱནཾཡེཝ ལབྦྷཏི, བུདྡྷེ ཨུཔཱདཱཡ པན རུལ༹ྷཱིསདྡཝསེན སཱཝཀཱནམྤི ཝུཙྩཏི ཀིལཉྫཱདཱིཧི ཀཏབཱིཛནཱིནམྤི ཏཱལཝཎྚཝོཧཱརོ ཝིཡ. སངྒོཔེཏྭཱཏི ཨེཀསྨིཾ པདེསེ རཱསིཾ ཀཏྭཱ. ཨིདཱནི ཏམེཝ སངྒོཔནཝིདྷིཾ དསྶེནྟོ ‘‘ཡཐཱ ཙ ཋཔིཏ’’ནྟིཨཱདིམཱཧ. ན ཨོཝསྶཱིཡཏཱིཏི ཨནོཝསྶཀཾ, ཀམྨནི ཨཀ-སདྡོ དཊྛབྦོ. ཡཐཱ ཙ ཋཔིཏཾ ན ཨོཝསྶཱིཡཏི ན ཏེམཱིཡཏཱིཏི ཨཏྠོ.

ཨནཝཡོཏི ཨེཏྠ ཝཡོཏི ཧཱནི ‘‘ཨཱཡཝཡོ’’ཏིཨཱདཱིསུ ཝིཡ. ནཏྠི ཨེཏསྶ ཨཏྟནོ སིཔྤེ ཝཡོ ཨཱུནཏཱཏི ཨཝཡོཏི ཨཱཧ ‘‘ཨནཱུནོ པརིཔུཎྞསིཔྤོ’’ཏི. ཨཱཙརིཡསྶ ཀམྨཾ ཨཱཙརིཡཀནྟི ཨཱཧ ‘‘ཨཱཙརིཡཀམྨེ’’ཏི. པིཊྛསངྒྷཱཊོ དྭཱརབཱཧཱ, ཀཊྛཀམྨཾ ཐམྦྷཱདི. ཏེལཏམྦམཏྟིཀཱཡཱཏི ཏེལམིསྶཏམྦམཏྟིཀཱཡ.

༨༥. ཀུཊིཀཱཡ ཀརཎབྷཱཝནྟི ཀུཊིཡཱ ཀཏབྷཱཝཾ. སདྡསཏྠཝིདཱུཧི ཀིཾ-སདྡཡོགེ ཨནཱགཏཝཙནསྶ ཨིཙྪིཏཏྟཱ ཝུཏྟཾ ‘‘ཏསྶ ལཀྑཎཾ སདྡསཏྠཏོ པརིཡེསིཏབྦ’’ནྟི. མེཏྟཱཔུབྦབྷཱགནྟི མེཏྟཱཛྷཱནསྶ པུབྦབྷཱགབྷཱུཏཾ སབྦསཏྟེསུ ཧིཏཕརཎམཏྟཾ. ཀསྨཱ པནེཏཾ ཝུཏྟཾ, ནནུ ཨནུདྡཡཱ-སདྡོ ཀརུཎཱཡ པཝཏྟཏཱིཏི? སཙྩམེཏཾ, ཨཡཾ པན ཨནུདྡཡཱསདྡོ ཨནུརཀྑཎམཏྠཾ ཨནྟོནཱིཏཾ ཀཏྭཱ པཝཏྟམཱནོ མེཏྟཱཡ ཀརུཎཱཡ ཙ པཝཏྟཏཱིཏི ཨིདྷ མེཏྟཱཡ པཝཏྟམཱནོ ¶ ཝུཏྟོ, ཏསྨཱ སུཝུཏྟམེཏཾ ‘‘ཨེཏེན མེཏྟཱཔུབྦབྷཱགཾ དསྶེཏཱི’’ཏི. ཀརུཎཱཔུབྦབྷཱགནྟི ཀརུཎཱཛྷཱནསྶ པུབྦབྷཱགབྷཱུཏཾ སཏྟེསུ ཨནུཀམྤམཏྟཾ. ཙིཀྑལླཾ མཏྟིཀཱ, ཏསྶ མདྡནཾ ཨུདཀཾ ཨཱསིཉྩིཏྭཱ ཧཏྠཱདཱིཧི པརིམདྡནཾ. མེཏྟཱཀརུཎཱནནྟི ཨཔྤནཱཔྤཏྟམེཏྟཱཀརུཎཱནཾ. ཀིཉྩཱཔི ཐེརེན སཉྩིཙྩ ཁུདྡཱནུཁུདྡཀཱ པཱཎཱ མརཎཱདྷིཔྤཱཡེན ན བྱཱབཱདྷིཏཱ, ཏཐཱཔི ཀརུཎཱཡ ཨབྷཱཝེན ‘‘ཨེཝཾ ཀཏེ ཨིམེ པཱཎཱ ཝིནསྶིསྶནྟཱི’’ཏི ཨནུཔཔརིཀྑིཏྭཱ ཀཏཏྟཱ ཐེརཾ ཝིགརཧི. ཛནཱནཾ སམཱུཧོ ཛནཏཱཏི ཨཱཧ ‘‘པཙྪིམོ ཛནསམཱུཧོ’’ཏི. པཱཏབྱབྷཱཝནྟི ཝིནཱསེཏབྦཏཾ. པཱཎཱཏིཔཱཏཾ ཀརོནྟཱནནྟི ཐེརེན ཨཀཏེཔི པཱཎཱཏིཔཱཏེ པརེཧི སལླཀྑཎཱཀཱརཾ དསྶེཏི. ཨིམསྶ དིཊྛཱནུགཏིནྟི ཨིམསྶ དིཊྛིཡཱ ཨནུགམནཾ. གྷཾསིཏབྦེཏི གྷཊྚཡིཏབྦེ, ཝིནཱསིཏབྦེཏི ཨཏྠོ. ཨེཝཾ མཉྙཱིཏི ཡཐཱ ཐེརེན ཀཏཾ, ཨེཝཾ མཱ མཉྙི. ‘‘མཱ པཙྪིམཱ ¶ ཛནཏཱ པཱཎེསུ པཱཏབྱཏཾ ཨཱཔཛྫཱི’’ཏི ཝཙནཏོ ཡོ བྷིཀྑུ ཨིཊྛཀཔཙནཔཏྟཔཙནཀུཊིཀརཎཝིཧཱརཀཱརཱཔནཝིཧཱརསམྨཛྫནཔཊགྒིདཱནཀཱུཔཔོཀྑརཎཱིཁཎཱཔནཱདཱིསུ ཡཏྠ ‘‘ཁུདྡཱནུཁུདྡཀཱནཾ པཱཎཱནཾ ཝིཧིཾསཱ བྷཝིསྶཏཱི’’ཏི ཛཱནཱཏི, ཏེན ཏཱདིསེ པདེསེ ཀཔྤིཡཝཙནཾ ཝཏྭཱཔི ན ཏཾ ཀམྨཾ ཀཱརེཏབྦནྟི དསྶེཏི.

ཏཏྠ ཏཏྠ ཝུཏྟམེཝ ཨཱཔཏྟིནྟི པཐཝཱིཁཎནབྷཱུཏགཱམཔཱཏབྱཏཱདཱིསུ ཝུཏྟཔཱཙིཏྟིཡཱདིཨཱཔཏྟིཾ. ཨཱདིཀམྨིཀཏྟཱ ཨནཱཔཏྟཱིཏི ཀུཊིཀརཎཔཙྩཡཱ ཨནཱཔཏྟི. སིཀྑཱཔདཾ ཨཏིཀྐམིཏྭཱཏི ‘‘ན ཙ, བྷིཀྑཝེ, སབྦམཏྟིཀཱམཡཱ ཀུཊིཀཱ ཀཱཏབྦཱ, ཡོ ཀརེཡྻ, ཨཱཔཏྟི དུཀྐཊསྶཱ’’ཏི ཝུཏྟསིཀྑཱཔདཾ ཨཏིཀྐམིཏྭཱ. ཡདི ཨཉྙེན ཀཏཾ ལབྷིཏྭཱ ཝསནྟསྶ ཨནཱཔཏྟི སིཡཱ, ན བྷགཝཱ ཏཾ ཀུཊིཀཾ བྷིནྡཱཔེཡྻཱཏི ཨཱཧ – ‘‘ཀཏཾ ལབྷིཏྭཱ ཏཏྠ ཝསནྟཱནམྤི དུཀྐཊམེཝཱ’’ཏི. ཡཐཱ ཝཱ ཏཐཱ ཝཱ མིསྶཱ ཧོཏཱུཏི ཧེཊྛཱ མཏྟིཀཱ ཨུཔརི དབྦསམྦྷཱརཱཏིཨཱདིནཱ ཡེན ཀེནཙི ཨཱཀཱརེན མིསྶཱ ཧོཏུ. གིཉྫཀཱཝསཐསངྑེཔེནཱཏི ཨེཏྠ གིཉྫཀཱ ཝུཙྩནྟི ཨིཊྛཀཱ, གིཉྫཀཱཧི ཨེཝ ཀཏོ ཨཱཝསཐོ གིཉྫཀཱཝསཐོ. ཨིཊྛཀཱམཡསྶ ཨཱཝསཐསྶེཏཾ ཨདྷིཝཙནཾ. ཏཾ ཀིར ཨཱཝསཐཾ ཡཐཱ སུདྷཱཔརིཀམྨེན པཡོཛནཾ ནཏྠི, ཨེཝཾ ཨིཊྛཀཱཧི ཨེཝ ཙིནིཏྭཱ ཚཱདེཏྭཱ ཀརོནྟི, ཏུལཱདཎྜཀཝཱཊཕལཀཱནི པན དཱརུམཡཱནེཝ. ཝིཀིརནྟཱཏི ཙུཎྞཝིཙུཎྞཾ ཀརོནྟཱ.

ཀིསྶཱཏི ཀེན ཀཱརཎེན. ཝཡཀམྨམྤི ཨཏྠཱིཏི དྭཱརཀཝཱཊཱདིཨབྷིསངྑརཎཱདཱིསུ ཀཏཝཡཀམྨམྤི ཨཏྠི. བྷིཀྑཱུནཾ ཨཀཔྤིཡཏྟཱ ཨེཝ ཏིཏྠིཡཝཏཱནུརཱུཔཏྟཱ ཏིཏྠིཡདྷཛོ. མཧཱཨཊྛཀཐཱཡཾ ཝུཏྟཀཱརཎེསུ ཨཏྟནོ ཨདྷིཔྤེཏཀཱརཎདྭཡཾ པཏིཊྛཱཔེཏྭཱ ཨཔརཱནིཔི ཏཏྠ ཝུཏྟཀཱརཎཱནི དསྶེནྟོ ཨཱཧ – ‘‘ཨཊྛཀཐཱཡཾ པན ཨཉྙཱནིཔི ཀཱརཎཱནི ཝུཏྟཱནཱི’’ཏིཨཱདི. ཏཏྠ ¶ སཏྟཱནུདྡཡཱཡཱཏི ཏཱདིསཱཡ ཀུཊིཀཱཡ ཀརཎཔཙྩཡཱ ཝིནསྶམཱནསཏྟེསུ ཨནུདྡཡཱཡ. ཡསྨཱ སབྦམཏྟིཀཱམཡཱ ཀུཊི སུཀརཱ བྷིནྡིཏུཾ, ཏསྨཱ ཏཏྠ ཋཔིཏཾ པཏྟཙཱིཝརཱདི ཨགུཏྟཾ ཧོཏི, ཙོརཱདཱིཧི ཨཝཧརིཏུཾ སཀྐཱ. ཏེན ཝུཏྟཾ ‘‘པཏྟཙཱིཝརགུཏྟཏྠཱཡཱ’’ཏི. སེནཱསནབཱཧུལླཔཊིསེདྷནཏྠཱཡཱཏི སེནཱསནཱནཾ བཧུབྷཱཝནིསེདྷནཏྠཱཡ, ཏཱདིསསྶ ཝཱ སེནཱསནསྶ ཨབྷིསངྑརཎེ བྷིཀྑཱུནཾ ཨུདྡེསཔརིཔུཙྪཱདཱིནི སེསཀམྨཱནི པརིཙྩཛིཏྭཱ ནིཙྩབྱཱཝཊཏཱནིསེདྷནཏྠཾ. ཨནུཔཝཛྫོཏི དོསཾ ཨཱརོཔེཏྭཱ ན ཝཏྟབྦོ.

པཱལི༹མུཏྟཀཝིནིཙྪཡཝཎྞནཱ

པཱལི༹མུཏྟཀཝིནིཙྪཡེསུ ¶ ཏཉྩ ཁོ…པེ… ན ཝཎྞམཊྛཏྠཱཡཱཏི ཨིདཾ ཚཏྟདཎྜགྒཱཧཀསལཱཀཔཉྫརཝིནནྡྷནཾ སནྡྷཱཡཱཏི ཝདནྟི. སབྦཏྠཱཏི ཚཏྟདཎྜེ སབྦཏྠ. ཨཱརགྒེནཱཏི ནིཁཱདནམུཁེན. གྷཊཀམྤི ཝཱལ༹རཱུཔམྤི བྷིནྡིཏྭཱ དྷཱརེཏབྦནྟི སཙེ ཏཱདིསཾ ཨཀཔྤིཡཚཏྟཾ ལབྷཏི, གྷཊཀམྤི ཝཱལ༹རཱུཔམྤི བྷིནྡིཏྭཱ ཏཙྪེཏྭཱ དྷཱརེཏབྦཾ. སུཏྟཀེན ཝཱ དཎྜོ ཝེཋེཏབྦོཏི ཡཐཱ ཚཏྟདཎྜེ ལེཁཱ ན པཉྙཱཡཏི, ཏཐཱ ཝེཋེཏབྦོ. དཎྜབུནྡེཏི དཎྜམཱུལེ, ཚཏྟདཎྜསྶ ཧེཊྛིམཏལེཏི ཨཏྠོ. ཚཏྟམཎྜལིཀནྟི ཚཏྟསྶ ཨནྟོ ཁུདྡཀམཎྜལཾ. ཨུཀྐིརིཏྭཱཏི ཨུཊྛཔེཏྭཱ. སཱ ཝཊྚཏཱིཏི ཡདིཔི རཛྫུཀེཧི ན བནྡྷནྟི, བནྡྷིཏུཾ པན ཡུཏྟཊྛཱནཏྟཱ ཝཊྚཏི.

ནཱནཱསུཏྟཀེཧཱིཏི ནཱནཱཝཎྞེཧི སུཏྟེཧི. ཨིདཉྩ ཏཐཱ ཀརོནྟཱནཾ ཀརཎཔྤཀཱརདསྶནཏྠཾ ཝུཏྟཾ, ཨེཀཝཎྞསུཏྟཀེནཔི ཝུཏྟཔྤཀཱརེན སིབྦིཏུཾ ན ཝཊྚཏིཡེཝ. པཊྚམུཁེཏི པཊྚཀོཊིཡཾ. དྭིནྣཾ པཊྚཱནཾ སངྒྷཊྚིཏཊྛཱནཾ སནྡྷཱཡེཏཾ ཝུཏྟཾ. པརིཡནྟེཏི ཙཱིཝརཔརིཡནྟེ. ཙཱིཝརཨནུཝཱཏཾ སནྡྷཱཡེཏཾ ཝུཏྟཾ. ཝེཎིནྟི ཝརཀསཱིསཱཀཱརེན སིབྦནཾ. སངྑལིཀནྟི བིལཱ༹ལབནྡྷནཱཀཱརེན སིབྦནཾ. ‘‘ཝེཎིཾ སངྑལིཀ’’ནྟི ཙེཏྠ ཨུཔཡོགཝཙནཾ ‘‘ཀརོནྟཱི’’ཏི ཀརཎཀིརིཡཱཔེཀྑཾ. ཨགྒྷིཡགཡམུགྒརཱདཱིནཱིཏི ཨེཏྠ ཨགྒྷིཡཾ ནཱམ ཙེཏིཡསཎྛཱནེན སིབྦནཾ, མཱུལེ ཏནུཀཾ ཨགྒེ མཧནྟཾ ཀཏྭཱ གདཱཀཱརེན སིབྦནཾ གཡཱ, མཱུལེ ཙ ཨགྒེ ཙ ཨེཀསདིསཾ ཀཏྭཱ མུགྒརཱཀཱརེན སིབྦནཾ མུགྒརོ. ཀཀྐཊཀྑཱིནི ཨུཀྐིརནྟཱིཏི གཎྛིཀཔཊྚཔཱསཀཔཊྚཱནཾ ཨནྟེ པཱལི༹བདྡྷཾ ཀཏྭཱ ཀཀྐཊཀཱནཾ ཨཀྑིསཎྛཱནཾ ཨུཊྛཔེནྟི, ཀརོནྟཱིཏི ཨཏྠོ. ‘‘ཀོཎསུཏྟཔིལ༹ཀཱཏི གཎྛིཀཔཱསཀཔཊྚཱནཾ ཀོཎེཧི ནཱིཧཊསུཏྟཱནཾ ཀོཊིཡོ’’ཏི ཏཱིསུཔི གཎྛིཔདེསུ ཝུཏྟཾ. ཀཐཾ པན ཏཱ པིལ༹ཀཱ དུཝིཉྙེཡྻརཱུཔཱ ཀཱཏབྦཱཏི? ཀོཎེཧི ནཱིཧཊསུཏྟཱནཾ ཨནྟེསུ ཨེཀཝཱརཾ གཎྛིཀཀརཎེན ཝཱ པུན ¶ ནིཝཏྟེཏྭཱ སིབྦནེན ཝཱ དུཝིཉྙེཡྻསབྷཱཝཾ ཀཏྭཱ སུཏྟཀོཊིཡོ རསྶཾ ཀཏྭཱ ཚིནྡིཏབྦཱ. དྷམྨསིརིཏྠེརེན པན –

‘‘ཀོཎསུཏྟཱ ཙ པིལ༹ཀཱ, དུཝིཉྙེཡྻཱཝ ཀཔྤརེ’’ཏི –

ཝུཏྟཾ. ཏཐཱ ཨཱཙརིཡབུདྡྷདཏྟཏྠེརེནཔི –

‘‘སུཏྟཱ ཙ པིལ༹ཀཱ ཏཏྠ, དུཝིཉྙེཡྻཱཝ དཱིཔིཏཱ’’ཏི –

ཝུཏྟཾ ¶ . ཏསྨཱ ཏེསཾ མཏེན ཀོཎསུཏྟཱ ཙ པིལ༹ཀཱ ཙ ཀོཎསུཏྟཔིལ༹ཀཱཏི ཨེཝམེཏྠ ཨཏྠོ དཊྛབྦོ.

མཎིནཱཏི མསཱརགལླཱདིཔཱསཱཎེན. ན གྷཊྚེཏབྦནྟི ན གྷཾསིཏབྦཾ, ཨཾསབདྡྷཀཀཱཡབནྡྷནཱནི པན སངྑཱདཱིཧི གྷཾསིཏུཾ ཝཊྚཏི. པཱསཀཾ ཀཏྭཱ བནྡྷིཏབྦནྟི རཛནཀཱལེ བནྡྷིཏབྦཾ, སེསཀཱལེ མོཙེཏྭཱ ཋཔེཏབྦཾ. གཎྛིཀེཏི དནྟམཡཱདིགཎྛིཀེ. པིལ༹ཀཱཏི བིནྡུཾ བིནྡུཾ ཀཏྭཱ ཨུཊྛཱཔེཏབྦཔིལ༹ཀཱ.

‘‘ཏེལཝཎྞོཏི སམཎསཱརུཔྤཝཎྞཾ སནྡྷཱཡ ཝུཏྟཾ, མཎིཝཎྞཾ པན པཏྟཾ ཨཉྙེན ཀཏཾ ལབྷིཏྭཱ པརིབྷུཉྫིཏུཾ ཝཊྚཏཱི’’ཏི ཝདནྟི. པཏྟམཎྜལེཏི ཏིཔུསཱིསཱདིམཡེ པཏྟམཎྜལེ. ‘‘ན, བྷིཀྑཝེ, ཙིཏྲཱནི པཏྟམཎྜལཱནི དྷཱརེཏབྦཱནི རཱུཔཀཱཀིཎྞཱནི བྷིཏྟིཀམྨཀཏཱནཱི’’ཏི (ཙཱུལ༹ཝ. ༢༥༣) ཝུཏྟཏྟཱ ‘‘བྷིཏྟིཀམྨཾ ན ཝཊྚཏཱི’’ཏི ཝུཏྟཾ. ‘‘ཨནུཛཱནཱམི, བྷིཀྑཝེ, མཀརདནྟཀཾ ཚིནྡིཏུ’’ནྟི ཝཙནཏོ ‘‘མཀརདནྟཀཾ པན ཝཊྚཏཱི’’ཏི ཝུཏྟཾ.

མཀརམུཁནྟི མཀརམུཁསཎྛཱནཾ. དེཌྜྷུབྷསཱིསནྟི ཨུདཀསཔྤསཱིསསཎྛཱནཾ. ཨཙྪཱིནཱིཏི ཀུཉྫརཙྪིསཎྛཱནཱནི. རཛྫུཀཀཱཡབནྡྷནཾ ཨེཀམེཝ ཝཊྚཏཱིཏི རཛྫུཀཾ བནྡྷནྟེན ཨེཀགུཎམེཝ ཀཏྭཱ བནྡྷིཏུཾ ཝཊྚཏི, མཛ྄ཛྷེ བྷིནྡིཏྭཱ དིགུཎཾ ཀཏྭཱ བནྡྷིཏུཾ ན ཝཊྚཏི, དིགུཎཾ པན ཨཀཏྭཱ ཨེཀརཛྫུཀམེཝ སཏཝཱརམྤི པུནཔྤུནཾ ཨཱཝིཛྫིཏྭཱ བནྡྷིཏུཾ ཝཊྚཏི. ཨེཀམྤི ན ཝཊྚཏཱིཏི ཨེཀགུཎམྤི ཀཏྭཱ བནྡྷིཏུཾ ན ཝཊྚཏི. བཧུརཛྫུཀེ…པེ... ཝཊྚཏཱིཏི ཨིདཾ ཀཱཡབནྡྷནཾ སནྡྷཱཡ ཝུཏྟཾ, ན དསཱ སནྡྷཱཡ. ཨཱིདིསཉྷི ཀཱཡབནྡྷནཾ བནྡྷིཏུཾ ཝཊྚཏི. ཏེནེཝ ཨཱཙརིཡབུདྡྷདཏྟཏྠེརེན ཝུཏྟཾ –

‘‘ཨེཀརཛྫུམཡཾ ¶ ཝུཏྟཾ, མུནིནཱ ཀཱཡབནྡྷནཾ;

པཉྩཔཱམངྒསཎྛཱནཾ, ཨེཀམྤི ཙ ན ཝཊྚཏི.

‘‘རཛྫུཀེ ཨེཀཏོ ཀཏྭཱ, བཧཱུ ཨེཀཱཡ རཛྫུཡཱ;

ནིརནྟརཉྷི ཝེཋེཏྭཱ, ཀཏཾ ཝཊྚཏི བནྡྷིཏུ’’ནྟི.

མུརཛཾ པན ཀཱཡབནྡྷནཾ ན ཝཊྚཏི ‘‘ན, བྷིཀྑཝེ, ཨུཙྩཱཝཙཱནི ཀཱཡབནྡྷནཱནི དྷཱརེཏབྦཱནི ཀལཱབུཀཾ དེཌྜྷུབྷཀཾ མུརཛཾ མདྡཝཱིཎཾ, ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༢༧༨) ཝུཏྟཏྟཱ. ཀིཾ པན བཧུརཛྫུཀེ ཨེཀཏོ ཀཏྭཱ ¶ ཨེཀེན ནིརནྟརཾ ཝེཋེཏྭཱ ཀཏཾ མུརཛསངྑྱཾ ན གཙྪཏཱིཏི? ཨཱམ ན གཙྪཏི. མུརཛཉྷི ནཱམ ནཱནཱཝཎྞེཧི སུཏྟེཧི མུརཛཝཊྚིསཎྛཱནཾ ཝེཋེཏྭཱ ཀཏཾ. ཀེཙི པན ‘‘མུརཛནྟི བཧུརཛྫུཀེ ཨེཀཏོ སངྐཌྜྷིཏྭཱ ཨེཀཱཡ རཛྫུཡཱ པལིཝེཋེཏྭཱ ཀཏརཛྫཱུ’’ཏི ཝདནྟི, ཏཾ ན གཧེཏབྦཾ. ཡདི ཙེཏཾ མུརཛཾ སིཡཱ, ‘‘བཧུརཛྫུཀེ ཨེཀཏོ ཀཏྭཱ ཨེཀེན ནིརནྟརཾ ཝེཋེཏྭཱ ཀཏཾ བཧུརཛྫུཀ’’ནྟི ན ཝཏྟབྦཾ, ‘‘ཏཾ ཝཊྚཏཱི’’ཏི ཨིདཾ ཝིརུཛ྄ཛྷེཡྻ. མུརཛཾ པན པཱམངྒསཎྛཱནཉྩ དསཱསུ ཝཊྚཏི ‘‘ཀཱཡབནྡྷནསྶ དསཱ ཛཱིརནྟི. ཨནུཛཱནཱམི, བྷིཀྑཝེ, མུརཛཾ མདྡཝཱིཎ’’ནྟི (ཙཱུལ༹ཝ. ༢༧༨) ཝུཏྟཏྟཱ. ཏེནེཝ ཝཀྑཏི ‘‘ཨནུཛཱནཱམི, བྷིཀྑཝེ, མུརཛཾ མདྡཝཱིཎནྟི ཨིདཾ དསཱསུཡེཝ ཨནུཉྙཱཏ’’ནྟི.

ཀཱཡབནྡྷནཝིདྷེཏི ‘‘ཀཱཡབནྡྷནསྶ པཝནནྟོ ཛཱིརཏི. ཨནུཛཱནཱམི, བྷིཀྑཝེ, ཝིདྷ’’ནྟི ཝུཏྟཏྟཱ ཀཱཡབནྡྷནསྶ པཱསནྟེ དསཱམཱུལེ ཏསྶ ཐིརབྷཱཝཏྠཾ ཀཏྟབྦེ དནྟཝིསཱཎཱདིམཡེ ཝིདྷེ. ‘‘ཨཊྛ མངྒལཱནི ནཱམ སངྑོ ཙཀྐཾ པུཎྞཀུམྦྷོ གཡཱ སིརཱིཝཙྪོ ཨངྐུསོ དྷཛཾ སོཝཏྠིཀ’’ནྟི ཝདནྟི. པརིཙྪེདལེཁཱམཏྟནྟི ཨུབྷོསུ ཀོཊཱིསུ ཀཱཏབྦཔརིཙྪེདརཱཛིམཏྟཾ. ‘‘ཨུཛུཀམེཝཱ’’ཏི ཝུཏྟཏྟཱ ཙཏུརསྶཱདིཝངྐགཏིཀཾ ན ཝཊྚཏི. ‘‘ཚཏྟདཎྜདྷམྨཀརཎཨཉྫནནཱལི༹ཀཱ ནཱནཱཝཎྞལེཁཱཔཨཀམྨཀཏཱ ན ཝཊྚནྟཱི’’ཏི ཝདནྟི.

ཨཱརཀཎྚཀེཏི པོཏྠཀཱདིཨབྷིསངྑརཎཏྠཾ ཀཏེ དཱིགྷམུཁསཏྠཀེ. ཝཊྚམཎིཀནྟི ཝཊྚཾ ཀཏྭཱ ཨགྒཀོཊིཡཾ ཨུཊྛཱཔེཏབྦཔུབྦུལ༹ཾ. ཨཉྙཾ ཝཱ ཝཎྞམཊྛནྟི ཨིམིནཱ པིལ༹ཀཱདིཾ སངྒཎྷཱཏི. མཎིཀནྟི ཨེཀཱཝཊྚམཎི. པིལ༹ཀནྟི སཱསཔམཏྟིཀཱ མུཏྟརཱཛིསདིསཱ བཧུཝཊྚལེཁཱ. ‘‘ཨིམསྨིཾ ཨདྷིཀཱརེ ཨཝུཏྟཏྟཱ ལེཁནིཡཾ ཡཾ ཀིཉྩི ཝཎྞམཊྛཾ ཝཊྚཏཱི’’ཏི ཝདནྟི. ཝལིཏཀནྟི མཛ྄ཛྷེ ཝལིཾ ཨུཊྛཱཔེཏྭཱ. མཎྜལཾ ཧོཏཱིཏི ཨུཏྟརཱརཎིཡཱ པཝེསནཏྠཾ ཨཱཧཊམཎྜལཾ ཧོཏི.

ཀིཉྩཱཔི ¶ ཨེཏྠ དནྟཀཊྛཙྪེདནཝཱསིཡེཝ ཝུཏྟཱ, མཧཱཝཱསིཡམྤི པན ན ཝཊྚཏིཡེཝ. ཨུཛུཀམེཝ བནྡྷིཏུནྟི སམྦནྡྷོ. ‘‘ཨུབྷོསུ ཝཱ པསྶེསུ ཨེཀཔསྶེཝཱ’’ཏི ཝཙནསེསོ. ཀཏྟརཡཊྛིཀོཊིཡཾ ཀཏཨཡོཝལཡཱནིཔི ཝཊྚནྟི, ཡེསཾ ཨཉྙམཉྙསངྒྷཊྚནེན སདྡོ ནིཙྪརཏི.

ཨཱམཎྜསཱརཀེཏི ¶ ཨཱམལཀེཧི ཀཏབྷཱཛནེ. བྷཱུམཏྠརཎེཏི ཙིཏྟཀཊསཱརཀཙིཏྟཏྠརཎཱདིཀེ པརིཀམྨཀཏཱཡ བྷཱུམིཡཱ ཨཏྠརིཏབྦཨཏྠརཎེ. པཱནཱིཡགྷཊེཏི ཨིམིནཱ ཀུཎྜིཀསརཀེཔི སངྒཎྷཱཏི. བཱིཛནེཏི ཙཏུརསྶབཱིཛནེ. སབྦཾ…པེ… ཝཊྚཏཱིཏི ཡཐཱཝུཏྟེསུ མཉྩཔཱིཋཱདཱིསུ ཨིཏྠིརཱུཔཾ ཝིནཱ སབྦཾ མཱལཱཀམྨལཏཱཀམྨཱདི ཝཎྞམཊྛཾ བྷིཀྑུནོ ཝཊྚཏི. སེནཱསནེ ཀིཉྩི པཊིསེདྷེཏབྦཾ ནཏྠི ཨཉྙཏྲ ཝིརུདྡྷསེནཱསནཱཏི ཨེཏྠཱཡམདྷིཔྤཱཡོ – སེནཱསནཔརིཀྑཱརེསུ པཊིསེདྷེཏབྦཾ ནཱམ ཀིཉྩི ནཏྠི, ཝིརུདྡྷསེནཱསནཾ པན སཡམེཝ པཊིཀྑིཔིཏབྦནྟི. ཨཉྙེསནྟི སཱིམསཱམིནོ ཝུཏྟཱ. རཱཛཝལླབྷཱ པརནིཀཱཡིཀཱཔི ཨེཀནིཀཱཡིཀཱཔི ཨུཔོསཐཔཝཱརཎཱནཾ ཨནྟརཱཡཀརཱ ཨལཛྫིནོ རཱཛཀུལཱུཔགཱ ཝུཙྩནྟི. ཏེསཾ ལཛྫིཔརིསཱཏི ཏེསཾ སཱིམསཱམིཀཱནཾ པཀྑཱ ཧུཏྭཱ ཨནུབལཾ དཱཏུཾ སམཏྠཱ ལཛྫིཔརིསཱ. སུཀཏམེཝཱཏི ཨཉྙེསཾ སནྟཀེཔི ཨཏྟནོ སཱིམཱཡ ཨནྟོཝུཏྟཝིདྷིནཱ ཀཏཾ སུཀཏམེཝ.

པཱལི༹མུཏྟཀཝིནིཙྪཡཝཎྞནཱ ནིཊྛིཏཱ.

༨༦. དེཝེན གཧིཏདཱརཱུནཱིཏི རཉྙཱ པརིགྒཧིཏདཱརཱུནི, རཉྙོ སནྟཀཱནཱིཏི ཝུཏྟཾ ཧོཏི. ཁཎྜཱཁཎྜཾ ཀརོནྟོཏི ཁུདྡཀཾ མཧནྟཉྩ ཁཎྜཾ ཀརོནྟོ.

༨༧. ཀུལབྷོགཨིསྶརིཡཱདཱིཧི མཧཏཱི མཏྟཱ པམཱཎཾ ཨེཏསྶཱཏི མཧཱམཏྟོ. ཏེནཱཧ – ‘‘མཧཏིཡཱ ཨིསྶརིཡམཏྟཱཡ སམནྣཱགཏོ’’ཏི.

༨༨. ཨཝཛ྄ཛྷཱཡནྟཱིཏི ཧེཊྛཱ ཀཏྭཱ ཨོལོཀེནྟི, ཙིནྟེནྟི ཝཱ. ཏེནཱཧ ‘‘ཨཝཛཱནནྟཱ’’ཏིཨཱདི. ལཱམཀཏོ ཝཱ ཙིནྟེནྟཱིཏི ནིཧཱིནཏོ ཙིནྟེནྟི. ཀཐེནྟཱིཏི ‘‘ཀིཾ ནཱམེཏཾ ཀིཾ ནཱམེཏ’’ནྟི ཨཉྙམཉྙཾ ཀཐེནྟི.

ཀཐཾ པནེཏྠ ‘‘དཱརཱུནཱི’’ཏི བཧུཝཙནཾ ‘‘ཨདིནྣ’’ནྟི ཨེཀཝཙནེན སདྡྷིཾ སམྦནྡྷམུཔགཙྪཏཱིཏི ཨཱཧ – ‘‘ཨདིནྣཾ ཨཱདིཡིསྶཏཱིཏི ཨཡཾ ཨུཛ྄ཛྷཱཡནཏྠོ’’ཏིཨཱདི. ཨུཛ྄ཛྷཱཡནསྶ ཨདིནྣཱདཱནཝིསཡཏྟཱ ཨདིནྣཱདཱནཾ ཨུཛ྄ཛྷཱཡནཏྠོཏི ཝུཏྟཾ. སཏིཔི པནེཏྠ གོཔཀེན དིནྣདཱརཱུནཾ ¶ གཧཎེ ཨུཛུཀཾ ཨཝཏྭཱ ལེསེན གཧིཏཏྟཱ ཐེརོ ‘‘ཨདིནྣཾ ཨཱདིཡཱི’’ཏི ཝེདིཏབྦོ. ཝཙནབྷེདེཏི ཨེཀཝཙནབཧུཝཙནཱནཾ བྷེདེ.

སབྦཱཝནྟཾ ¶ པརིསནྟི བྷིཀྑུབྷིཀྑུནཱིཨཱདིསབྦཱཝཡཝཝནྟཾ པརིསཾ. སབྦཱ ཙཏུཔརིསསངྑཨཱཏཱ པཛཱ ཨེཏྠ ཨཏྠཱིཏི སབྦཱཝནྟཱ, པརིསཱ. སེནཱ ཨེཏསྶ ཨཏྠཱིཏི སེནིཀོ, སེནིཀོ ཨེཝ སེནིཡོ. བིམྦིསཱརོཏི ཏསྶ ནཱམནྟི ཨེཏྠ བིམྦཱིཏི སུཝཎྞཾ, ཏསྨཱ སཱརསུཝཎྞསདིསཝཎྞཏཱཡ བིམྦིསཱརོཏི ཝུཙྩཏཱིཏི ཝེདིཏབྦོ. ཙཏུཏྠོ བྷཱགོ པཱདོཏི ཝེདིཏབྦོཏི ཨིམིནཱཝ སབྦཛནཔདེསུ ཀཧཱཔཎསྶ ཝཱིསཏིམོ བྷཱགོ མཱསཀོཏི ཨིདཉྩ ཝུཏྟམེཝ ཧོཏཱིཏི དཊྛབྦཾ. པོརཱཎསཏྠཱནུརཱུཔཾ ལཀྑཎསམྤནྣཱ ཨུཔྤཱདིཏཱ ནཱིལཀཧཱཔཎཱཏི ཝེདིཏབྦཱ. རུདྲདཱམེན ཨུཔྤཱདིཏོ རུདྲདཱམཀོ. སོ ཀིར ནཱིལཀཧཱཔཎསྶ ཏིབྷཱགཾ ཨགྒྷཏི. ཡསྨིཾ པདེསེ ནཱིལཀཧཱཔཎཱ ན སནྟི, ཏཏྠཱཔི ནཱིལཀཧཱཔཎཱནཾ ཝལ༹ཉྫནཊྛཱནེ ཙ ཨཝལ༹ཉྫནཊྛཱནེ ཙ སམཱནཨགྒྷཝསེན པཝཏྟམཱནཾ བྷཎྜཾ གཧེཏྭཱ ནཱིལཀཧཱཔཎཝསེནེཝ པརིཙྪེདོ ཀཱཏབྦོཏི ཝདནྟི.

དྷནིཡཝཏྠུཝཎྞནཱ ནིཊྛིཏཱ.

ཏསྶཏྠོ…པེ… ཝུཏྟནཡེནེཝ ཝེདིཏབྦོཏི ཨིམིནཱ ‘‘བྷགཝཏཱ བྷིཀྑཱུནཾ ཨིདཾ སིཀྑཱཔདཾ ཨེཝཾ པཉྙཏྟཾ ཧོཏི ཙ, ཨིདཉྩ ཨཉྙཾ ཝཏྠུ ཨུདཔཱདཱི’’ཏི ཨེཝཾ པཋམཔཱརཱཛིཀཝཎྞནཱཡཾ (པཱརཱ. ཨཊྛ. ༡.༣༩) ཝུཏྟནཡེན ཏསྶཏྠོ ཝེདིཏབྦོ. ‘‘ཨིདཱནི ཡཾ ཏཾ ཨཉྙཾ ཝཏྠུ ཨུཔྤནྣཾ, ཏཾ དསྶེཏུཾ ‘ཏེན ཁོ པན སམཡེནཱ’ཏིཨཱདིམཱཧཱ’’ཏི ཨེཝཾ ཨནུཔཉྙཏྟིསམྦནྡྷོ ཙ ཏཏྠ ཝུཏྟནཡེནེཝ ཝེདིཏབྦོཏི དསྶེཏི.

༩༠-༩༡. རཛཀཱ ཨཏྠརནྟི ཨེཏྠཱཏི རཛཀཏྠརཎཾ, རཛཀཏྠརཎནྟི རཛཀཏིཏྠཾ ཝུཙྩཏཱིཏི ཨཱཧ ‘‘རཛཀཏིཏྠཾ གནྟྭཱ’’ཏི. ཝུཏྟམེཝཏྠཾ ཝིབྷཱཝེནྟོ ཨཱཧ ‘‘ཏཉྷཱི’’ཏིཨཱདི.

པདབྷཱཛནཱིཡཝཎྞནཱ

༩༢. ‘‘ཨབྷིནཝནིཝིཊྛོ ཨེཀཀུཊིཀཱདིགཱམོ ཡཱཝ མནུསྶཱ པཝིསིཏྭཱ ཝཱསཾ ན ཀཔྤེནྟི, ཏཱཝ གཱམསངྑྱཾ ན གཙྪཏཱི’’ཏི ཝདནྟི, ཏསྨཱ ཏཏྠ གཱམཔྤཝེསནཱཔུཙྪཱདིཀིཙྩམྤི ནཏྠི. ཡཀྑཔརིགྒཧབྷཱུཏོཏི སཨུཔདྡཝཝསེན ཝུཏྟཾ, ཡཀྑནགརཱདིཾ ཝཱ སངྒཎྷཱཏི. ཡཀྑནགརམྤི ཨཱཔཎཱདཱིསུ དིསྶམཱནེསུ གཱམསངྑྱཾ ¶ གཙྪཏི, ཨདིསྶམཱནེསུ ན གཙྪཏི, ཏསྨཱ ¶ ཡཀྑནགརམྤི པཝིསནྟེན ཨཱཔཎཱདཱིསུ དིསྶམཱནེསུ སབྦཾ གཱམཔྤཝེསནཝཏྟཾ ཀཱཏབྦཾ, ཨདིསྶམཱནེསུ ན ཀཱཏབྦནྟི ཝདནྟི. པུནཔི ཨཱགནྟུཀཱམཱཏི ཨིམིནཱ ཏེསཾ ཏཏྠ སཱཔེཀྑབྷཱཝཾ དསྶེཏི. ཡཏོ པན ནིརཔེཀྑཱཝ ཧུཏྭཱ པཀྐམནྟི, སོ གཱམསངྑྱཾ ན གཙྪཏི, ཏསྨཱ ཏཏྠ གཱམཔྤཝེསནཱཔུཙྪཱདིཀིཙྩམྤི ནཏྠི.

ནནུ ཙ ‘‘གཱམཱ ཝཱ ཨརཉྙཱ ཝཱ’’ཏི ཨེཏྟཀམེཝ མཱཏིཀཱཡཾ ཝུཏྟཾ, ཏསྨཱ གཱམལཀྑཎཾ དསྶེཏྭཱ ཨརཉྙམེཝ དསྶེཏབྦཾ སིཡཱ, གཱམཱུཔཙཱརོ ནཱམཱཏིཨཱདི པན ཀསྨཱ ཝུཏྟནྟི ཨཱཧ – ‘‘གཱམཱུཔཙཱརོཏིཨཱདི ཨརཉྙཔརིཙྪེདདསྶནཏྠཾ ཝུཏྟ’’ནྟི. གཱམཱུཔཙཱརེ ཧི དསྶིཏེ ཋཔེཏྭཱ གཱམཉྩ གཱམཱུཔཙཱརཉྩ ཨཝསེསཾ ཨརཉྙཾ ནཱམཱཏི ཨརཉྙཔརིཙྪེདོ སཀྐཱ དསྶེཏུཾ, ཨིདཉྩ གཱམགཱམཱུཔཙཱརེ ཨསངྐརཏོ དསྶེཏུཾ ཝུཏྟཾ. མཱཏིཀཱཡཾ པན གཱམགྒཧཎེནེཝ གཱམཱུཔཙཱརོཔི སངྒཧིཏོཏི དཊྛབྦཾ. གཱམཱུཔཙཱརོ ཧི ལོཀེ གཱམསངྑྱམེཝ གཙྪཏི. ཨེཝཉྩ ཀཏྭཱ མཱཏིཀཱཡ ཨནཝསེསཨཝཧརཎཊྛཱནཔརིགྒཧོ སིདྡྷོ ཧོཏི. ཨིནྡཁཱིལེཏི ཨུམྨཱརེ. ཨརཉྙསངྑེཔཾ གཙྪཏཱིཏི ‘‘ནིཀྑམིཏྭཱ བཧི ཨིནྡཁཱིལཱ སབྦམེཏཾ ཨརཉྙ’’ནྟི (ཝིབྷ. ༥༢༩) ཨབྷིདྷམྨེ ཝུཏྟཏྟཱ. ཝེམཛ྄ཛྷམེཝ ཨིནྡཁཱིལོཏི ཝུཙྩཏཱིཏི ཨིནྡཁཱིལཊྛཱནིཡཏྟཱ ཨསཏིཔི ཨིནྡཁཱིལེ ཝེམཛ྄ཛྷམེཝ ཏཐཱ ཝུཙྩཏི. ཡཏྠ པན དྭཱརབཱཧཱཔི ནཏྠི, ཏཏྠ ཨུབྷོསུ པསྶེསུ ཝཏིཡཱ ཝཱ པཱཀཱརསྶ ཝཱ ཀོཊིཝེམཛ྄ཛྷམེཝ ཨིནྡཁཱིལཊྛཱནིཡཏྟཱ ‘‘ཨིནྡཁཱིལོ’’ཏི གཧེཏབྦཾ. ཨུཌྜཱཔེནྟོཏི པལཱཔེནྟོ. ལུཋིཏྭཱཏི པརིཝཏྟེཏྭཱ.

མཛ྄ཛྷིམསྶ པུརིསསྶཱཏི ཐཱམམཛ྄ཛྷིམསྶ པུརིསསྶ. ཨིམིནཱ པན ཝཙནེན སུཔྤམུསལཔཱཏོཔི བལདསྶནཝསེནེཝ ཀཏོཏི དཊྛབྦཾ. ཀུརུནྡཊྛཀཐཱཡཾ མཧཱཔཙྩརིཡཉྩ གྷརཱུཔཙཱརོ གཱམོཏི ཨདྷིཔྤཱཡེན ‘‘གྷརཱུཔཙཱརེ ཋིཏསྶ ལེཌྜུཔཱཏོ གཱམཱུཔཙཱརོ’’ཏི ཝུཏྟཾ. དྭཱརེཏི ནིབྦཀོསསྶ ཨུདཀཔཏནཊྛཱནཏོ ཨབྦྷནྟརཾ སནྡྷཱཡ ཝུཏྟཾ. ཨནྟོགེཧེཏི ཙ པམུཁསྶ ཨབྦྷནྟརམེཝ སནྡྷཱཡ ཝུཏྟཾ. ཀཏཔརིཀྑེཔོཏི ཨིམིནཱཝ གྷརསྶ སམནྟཏོ ཏཏྟཀོ པརིཙྪེདོ གྷརཱུཔཙཱརོ ནཱམཱཏི ཝུཏྟཾ ཧོཏི. ཡསྶ པན གྷརསྶ སམནྟཏོ གོརཱུཔཱནཾ པཝེསནནིཝཱརཎཏྠཾ པཱཀཱརཝཏིཨཱདཱིཧི པརིཀྑེཔོ ཀཏོ ཧོཏི, ཏཏྠ སོཝ པརིཀྑེཔོ གྷརཱུཔཙཱརོ, སུཔྤཔཱཏཱདིཔརིཙྪེདོ པན ཨཔརིཀྑིཏྟགྷརཾ སནྡྷཱཡ ཝུཏྟོཏི དཊྛབྦཾ ¶ . ཨིདམེཏྠ པམཱཎནྟི ཝིཀཱལགཱམཔྤཝེསནཱདཱིསུ གཱམགཱམཱུཔཙཱརཱནཾ ཨསངྐརཏོ ཝིནིཙྪཡསྶ ཝེདིཏབྦཏྟཱ. ཀུརུནྡཱིཨཱདཱིསུ ཝུཏྟནཡེན ཧི གྷརཱུཔཙཱརསྶ གཱམོཏི ཨཱཔནྣཏྟཱ གྷརགྷརཱུཔཙཱརགཱམགཱམཱུཔཙཱརཱནཾ སངྐརོ སིཡཱ. ཨེཝཾ སབྦཏྠཱཏི ཨིམིནཱ ཨིཏོ པུབྦེཔི པཙྪིམསྶེཝ ཝཱདསྶ པམཱཎབྷཱཝཾ དསྶེཏི ¶ . ཀེཙི པན ‘‘ཨིཏོ པཊྛཱཡ ཝཀྑམཱནཝཱདཾ སནྡྷཱཡ ཝུཏྟ’’ནྟི ཝདནྟི, ཏཾ ན གཧེཏབྦཾ.

སེསམྤཱིཏི གཱམཱུཔཙཱརལཀྑཎཾ སནྡྷཱཡ ཝདཏི. ཏཏྲཱཏི ཏསྨིཾ གཱམཱུཔཙཱརགྒཧཎེ. ཏསྶ གཱམཔརིཙྪེདདསྶནཏྠནྟི ཏསྶ ཨཔརིཙྪེདསྶ གཱམསྶ གཱམཔརིཙྪེདཾ དསྶེཏུནྟི ཨཏྠོ. ཡདི ཨེཝཾ ‘‘གཱམོ ནཱམཱ’’ཏི པདཾ ཨུདྡྷརིཏྭཱ ‘‘ཨཔརིཀྑིཏྟསྶ གཱམསྶ གྷརཱུཔཙཱརེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ’’ཏི ཀསྨཱ ན ཝུཏྟནྟི? ‘‘གཱམོ ནཱམཱཏི ཨིདྷ ཨཝུཏྟམྤི ཨདྷིཀཱརཝསེན ལབྦྷཏིཡེཝཱ’’ཏི ཝདནྟི. ཨཔརེ པན བྷཎནྟི ‘‘གཱམཱུཔཙཱརོ ནཱམཱཏི ཨིམིནཱཝ གཱམསྶ ཙ གཱམཱུཔཙཱརསྶ ཙ སངྒཧོ དཊྛབྦོ. ཀཐཾ? ‘གཱམསྶ ཨུཔཙཱརོ གཱམཱུཔཙཱརོ’ཏི ཨེཝཾ ཝིགྒཧེ ཀརིཡམཱནེ ‘པརིཀྑིཏྟསྶ གཱམསྶ ཨིནྡཁཱིལེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ’ཏི ཨིམིནཱ པརིཀྑིཏྟསྶ གཱམསྶ གཱམཱུཔཙཱརལཀྑཎཾ དསྶིཏཾ ཧོཏི, ‘གཱམསངྑཱཏོ ཨུཔཙཱརོ གཱམཱུཔཙཱརོ’ཏི ཨེཝཾ པན གཡ྄ཧམཱནེ ‘ཨཔརིཀྑིཏྟསྶ གཱམསྶ གྷརཱུཔཙཱརེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ’ཏི ཨིམིནཱ ཨཔརིཀྑིཏྟསྶ གཱམསྶ གཱམཔརིཙྪེདོ དསྶིཏོཏི སཀྐཱ ཝིཉྙཱཏུ’’ནྟི. ‘‘གྷརཱུཔཙཱརེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ’’ཏི ཨིམིནཱ པརིཀྑིཏྟསྶཔི གཱམསྶ སཙེ ལེཌྜུཔཱཏཏོ དཱུརེ པརིཀྑེཔོ ཧོཏི, ལེཌྜུཔཱཏོཡེཝ གཱམཔརིཙྪེདོཏི གཧེཏབྦནྟི ཝདནྟི. པུབྦེ ཝུཏྟནཡེནེཝཱཏི པརིཀྑིཏྟགཱམེ ཝུཏྟནཡེནེཝ.

སངྐརཱིཡཏཱིཏི མིསྶཱིཡཏི. ཨེཏྠཱཏི གྷརགྷརཱུཔཙཱརགཱམགཱམཱུཔཙཱརེསུ. ‘‘ཝིཀཱལེ གཱམཔྤཝེསནེ པརིཀྑིཏྟསྶ གཱམསྶ པརིཀྑེཔཾ ཨཏིཀྐམནྟསྶ ཨཱཔཏྟི པཱཙིཏྟིཡསྶ, ཨཔརིཀྑིཏྟསྶ གཱམསྶ ཨུཔཙཱརཾ ཨོཀྐམནྟསྶ ཨཱཔཏྟི པཱཙིཏྟིཡསྶཱ’’ཏི (པཱཙི. ༥༡༣) ཝུཏྟཏྟཱ གཱམགཱམཱུཔཙཱརཱནཾ ཨསངྐརཏཱ ཨིཙྪིཏབྦཱཏི ཨཱཧ – ‘‘ཨསངྐརཏོ ཙེཏྠ ཝིནིཙྪཡོ ཝེདིཏབྦོ ཝིཀཱལེ གཱམཔྤཝེསནཱདཱིསཱུ’’ཏི. ཨེཏྠ ཙ ‘‘པརིཀྑིཏྟསྶ གཱམསྶ པརིཀྑེཔཾ, ཨཔརིཀྑིཏྟསྶ ¶ པརིཀྑེཔཱརཧཊྛཱནཾ ཨཏིཀྐམནྟསྶ ཝིཀཱལགཱམཔྤཝེསནཱཔཏྟི ཧོཏཱི’’ཏི ཀེཙི ཝདནྟི, ཏཾ ན གཧེཏབྦཾ པདབྷཱཛནིཡཾ པན ‘‘པརིཀྑིཏྟསྶ གཱམསྶ པརིཀྑེཔཾ ཨཏིཀྐམནྟསྶ ཨཱཔཏྟི པཱཙིཏྟིཡསྶ, ཨཔརིཀྑིཏྟསྶ གཱམསྶ ཨུཔཙཱརཾ ཨོཀྐམནྟསྶ ཨཱཔཏྟི པཱཙིཏྟིཡསྶཱ’’ཏི (པཱཙི. ༥༡༣) ཝུཏྟཏྟཱ. ཨཔརིཀྑིཏྟསྶ གཱམསྶ གྷརཱུཔཙཱརཏོ པཊྛཱཡ དུཏིཡལེཌྜུཔཱཏསངྑཱཏསྶ གཱམཱུཔཙཱརསྶ ཨོཀྐམནེ ཨཱཔཏྟི ཝེདིཏབྦཱ. ཏེནེཝ ཝིཀཱལགཱམཔྤཝེསནསིཀྑཱཔདཊྛཀཐཱཡཾ (པཱཙི. ཨཊྛ. ༥༡༢) ‘‘ཨཔརིཀྑིཏྟསྶ གཱམསྶ ཨུཔཙཱརོ ཨདིནྣཱདཱནེ ཝུཏྟནཡེནེཝ ཝེདིཏབྦོ’’ཏི ཝུཏྟཾ. མཱཏིཀཱཊྛཀཐཱཡམྤི (ཀངྑཱ. ཨཊྛ. དུཏིཡཔཱརཱཛིཀཝཎྞནཱ) ཝུཏྟཾ ‘‘ཡྭཱཡཾ ཨཔརིཀྑིཏྟསྶ གཱམསྶ ཨུཔཙཱརོ དསྶིཏོ, ཏསྶ ཝསེན ¶ ཝིཀཱལགཱམཔྤཝེསནཱདཱིསུ ཨཱཔཏྟི པརིཙྪིནྡིཏབྦཱ’’ཏི. ཡདི ཨེཝཾ ‘‘ཝིཀཱལེ གཱམཾ པཝིསེཡྻཱ’’ཏི ཨིམིནཱ ཝིརུཛ྄ཛྷཏཱིཏི? ན ཝིརུཛ྄ཛྷཏི གཱམཱུཔཙཱརསྶཔི གཱམགྒཧཎེན གཧིཏཏྟཱ. ཏསྨཱ པརིཀྑིཏྟསྶ གཱམསྶ པརིཀྑེཔཾ ཨཏིཀྐམནྟསྶ, ཨཔརིཀྑིཏྟསྶ ཨུཔཙཱརཾ ཨོཀྐམནྟསྶ ཝིཀཱལགཱམཔྤཝེསནཱཔཏྟི ཧོཏཱིཏི ནིཊྛམེཏྠ གནྟབྦཾ. ཝིཀཱལེ གཱམཔྤཝེསནཱདཱིསཱུཏི ཨཱདི-སདྡེན གྷརགྷརཱུཔཙཱརཱདཱིསུ ཋིཏཱནཾ ཨུཔྤནྣལཱབྷབྷཱཛནཱདིཾ སངྒཎྷཱཏི.

ནིཀྑམིཏྭཱ བཧི ཨིནྡཁཱིལཱཏི ཨིནྡཁཱིལཏོ བཧི ནིཀྑམིཏྭཱཏི ཨཏྠོ. ཨེཏྠ ཙ ཝིནཡཔརིཡཱཡེན ཏཱཝ ‘‘ཋཔེཏྭཱ གཱམཉྩ གཱམཱུཔཙཱརཉྩ ཨཝསེསཾ ཨརཉྙ’’ནྟི (པཱརཱ. ༩༢) ཨཱགཏཾ, སུཏྟནྟཔརིཡཱཡེན ཨཱརཉྙིཀཾ བྷིཀྑུཾ སནྡྷཱཡ ‘‘ཨཱརཉྙཀཾ ནཱམ སེནཱསནཾ པཉྩདྷནུསཏིཀཾ པཙྪིམ’’ནྟི (པཱརཱ. ༦༥༤) ཨཱགཏཾ. ཝིནཡསུཏྟནྟཱ ཨུབྷོཔི པརིཡཱཡདེསནཱ ནཱམ, ཨབྷིདྷམྨོ པན ནིཔྤརིཡཱཡདེསནཱ. ནིཔྤརིཡཱཡཏོ ཙ གཱམཝིནིམུཏྟཾ ཋཱནཾ ཨརཉྙམེཝ ཧོཏཱིཏི ཨབྷིདྷམྨཔརིཡཱཡེན ཨརཉྙཾ དསྶེཏུཾ ‘‘ནིཀྑམིཏྭཱ བཧི ཨིནྡཁཱིལཱ’’ཏི (ཝིབྷ. ༥༢༩) ཝུཏྟཾ. ‘‘ཨཱཙརིཡདྷནུ ནཱམ པཀཏིཧཏྠེན ནཝཝིདཏྠིཔྤམཱཎཾ, ཛིཡཱཡ པན ཨཱརོཔིཏཱཡ ཙཏུཧཏྠཔྤམཱཎ’’ནྟི ཝདནྟི. ལེསོཀཱསནིསེདྷནཏྠནྟི ‘‘མཡཱ ནེཝ གཱམེ, ན ཨརཉྙེ ཧཊཾ, གྷརེ ཝཱ གྷརཱུཔཙཱརེསུ ཝཱ གཱམཱུཔཙཱརེསུ ཝཱ ཨཉྙཏརསྨི’’ནྟི ཝཏྟུཾ མཱ ལབྷཏཱུཏི ཝུཏྟཾ ཧོཏི.

ཀཔྤིཡནྟི ཨནུརཱུཔཝསེན ཝུཏྟཾ. ཨཀཔྤིཡམྤི པན ཨཔྤཊིགྒཧིཏཉྩེ, ཨདིནྣསངྑྱམེཝ གཙྪཏི. པརིཙྩཱགཱདིམྷི ཨཀཏེ ‘‘ཨིདཾ མཡ྄ཧཾ སནྟཀ’’ནྟི ཨཝིདིཏམྤི པརཔརིགྒཧིཏམེཝ ¶ མཱཏཱཔིཏཱུནཾ ཨཙྩཡེན མནྡཱནཾ ཨུཏྟཱནསེཡྻཀཱནཾ དཱརཀཱནཾ སནྟཀམིཝ.

ཡསྶ ཝསེན པུརིསོ ཐེནོཏི ཝུཙྩཏི, ཏཾ ཐེཡྻནྟི ཨཱཧ ‘‘ཨཝཧརཎཙིཏྟསྶེཏཾ ཨདྷིཝཙན’’ནྟི. སངྑཱ-སདྡོ ཉཱཎཀོཊྛཱསཔཉྙཏྟིགཎནཱདཱིསུ དིསྶཏི. ‘‘སངྑཱཡེཀཾ པཊིསེཝཏཱི’’ཏིཨཱདཱིསུ (མ. ནི. ༢.༡༦༨) ཧི ཉཱཎེ དིསྶཏི. ‘‘པཔཉྩསཉྙཱསངྑཱ སམུདཱཙརནྟཱི’’ཏིཨཱདཱིསུ (མ. ནི. ༡.༢༠༤) ཀོཊྛཱསེ. ‘‘ཏེསཾ ཏེསཾ དྷམྨཱནཾ སངྑཱ སམཉྙཱ’’ཏིཨཱདཱིསུ (དྷ. ས. ༡༣༡༣) པཉྙཏྟིཡཾ. ‘‘ན སུཀརཾ སངྑཱཏུ’’ནྟིཨཱདཱིསུ (དྷ. པ. ༡༩༦; ཨཔ. ཐེར. ༡.༡༠.༢) གཎནཱཡཾ. ཏཏྠ ཀོཊྛཱསཝཙནཾ སངྑཱ-སདྡཾ སནྡྷཱཡཱཧ ‘‘སངྑཱསངྑཱཏནྟི ཨཏྠཏོ ཨེཀ’’ནྟི. ཏེནཱཧ ‘‘ཀོཊྛཱསསྶེཏཾ ཨདྷིཝཙན’’ནྟི. པཔཉྩསངྑཱཏི ཏཎྷཱམཱནདིཊྛིསངྑཱཏཱ པཔཉྩཀོཊྛཱསཱ. ‘‘ཨེཀོ ཙིཏྟཀོཊྛཱསོཏི ཡཉྩ པུབྦབྷཱགེ ཨཝཧརིསྶཱམཱིཏི པཝཏྟཾ ཙིཏྟཾ, ཡཉྩ གམནཱདིསཱདྷཀཾ པརཱམསནཱདིསཱདྷཀཾ ཝཱ མཛ྄ཛྷེ པཝཏྟཾ, ཡཉྩ ¶ ཋཱནཱཙཱཝནཔྤཡོགསཱདྷཀཾ, ཏེསུ ཨཡམེཝེཀོ པཙྪིམོ ཙིཏྟཀོཊྛཱསོ ཨིདྷཱདྷིཔྤེཏོ’’ཏི ཀེཙི ཝདནྟི. ཙཱུལ༹གཎྛིཔདེ པན ‘‘ཨཱུནམཱསཀམཱསཀཨཱུནཔཉྩམཱསཀཔཉྩམཱསཀཱཝཧརཎཙིཏྟེསུ ཨེཀོ ཙིཏྟཀོཊྛཱསོ’’ཏི ཝུཏྟཾ. ‘‘ཨནེཀཔྤབྷེདཏྟཱ ཙིཏྟསྶ ཨེཀོ ཙིཏྟཀོཊྛཱསོཏི ཝུཏྟ’’ནྟི མཧཱགཎྛིཔདེ མཛ྄ཛྷིམགཎྛིཔདེ ཙ ཝུཏྟཾ. ཨིདམེཝེཏྠ སུནྡརཏརཾ ‘‘ཐེཡྻཙིཏྟསངྑཱཏོ ཨེཀོ ཙིཏྟཀོཊྛཱསོ’’ཏི ཝུཏྟཏྟཱ. ཐེཡྻསངྑཱཏེནཱཏི ཐེཡྻཙིཏྟཀོཊྛཱསེན ཀརཎབྷཱུཏེན, ན ཝིསྶཱསཏཱཝཀཱལིཀཱདིགཱཧཝསཔྤཝཏྟཙིཏྟཀོཊྛཱསེནཱཏི ཝུཏྟཾ ཧོཏི.

ཨབྷིཡོགཝསེནཱཏི ཨཌྜཀརཎཝསེན. ཨབྷིཡུཉྫཏཱིཏི ཙོདེཏི, ཨཌྜཾ ཀརོཏཱིཏི ཨཏྠོ. པརིཀཔྤིཏཊྛཱནནྟི ཨོཀཱསཔརིཀཔྤནཝསེན པརིཀཔྤིཏཔྤདེསཾ. སུངྐགྷཱཏནྟི ཨེཏྠ རཱཛཱུནཾ དེཡྻབྷཱགསྶ ཨེཏཾ ཨདྷིཝཙནཾ སུངྐོཏི, སོ ཨེཏྠ ཧཉྙཏི ཨདཏྭཱ གཙྪནྟེཧཱིཏི སུངྐགྷཱཏོ. ‘‘ཨེཏྠ པཝིཊྛེཧི སུངྐོ དཱཏབྦོ’’ཏི རུཀྑཔབྦཏཱདིསཉྙཱཎེན ནིཡམིཏཔྤདེསསྶེཏཾ ཨདྷིཝཙནཾ.

པཉྩཝཱིསཏིཨཝཧཱརཀཐཱཝཎྞནཱ

ཨཱཀུལཱཏི ¶ སངྐུལཱ. ལུལི༹ཏཱཏི ཝིལོལི༹ཏཱ. ཀཏྠཙཱིཏི ཨེཀིསྶཱཡ ཨཊྛཀཐཱཡཾ. ཨེཀཾ པཉྩཀཾ དསྶིཏནྟི ‘‘པརཔརིགྒཧིཏཉྩ ཧོཏི, པརཔརིགྒཧིཏསཉྙཱི ཙ, གརུཀོ ཙ ཧོཏི པརིཀྑཱརོ པཉྩམཱསཀོ ཝཱ ཨཏིརེཀཔཉྩམཱསཀོ ཝཱ, ཐེཡྻཙིཏྟཉྩ པཙྩུཔཊྛིཏཾ ཧོཏི, ཨཱམསཏི, ཨཱཔཏྟི དུཀྐཊསྶ. ཕནྡཱཔེཏི, ཨཱཔཏྟི ཐུལླཙྩཡསྶ. ཋཱནཱ ཙཱཝེཏི, ཨཱཔཏྟི པཱརཱཛིཀསྶཱ’’ཏི (པཱརཱ. ༡༢༢) ཨེཝཾ ཝུཏྟཔཉྩཨཝཧཱརངྒཱནི ཨེཀཾ པཉྩཀནྟི དསྶིཏཾ. དྭེ པཉྩཀཱནི དསྶིཏཱནཱིཏི ‘‘ཚཧཱཀཱརེཧི ཨདིནྣཾ ཨཱདིཡནྟསྶ ཨཱཔཏྟི པཱརཱཛིཀསྶ. ན ཙ སཀསཉྙཱི, ན ཙ ཝིསྶཱསགྒཱཧཱི, ན ཙ ཏཱཝཀཱལིཀཾ, གརུཀོ ཙ ཧོཏི པརིཀྑཱརོ པཉྩམཱསཀོ ཝཱ ཨཏིརེཀཔཉྩམཱསཀོ ཝཱ, ཐེཡྻཙིཏྟཉྩ པཙྩུཔཊྛིཏཾ ཧོཏི, ཨཱམསཏི, ཨཱཔཏྟི དུཀྐཊསྶ. ཕནྡཱཔེཏི, ཨཱཔཏྟི ཐུལླཙྩཡསྶ. ཋཱནཱ ཙཱཝེཏི, ཨཱཔཏྟི པཱརཱཛིཀསྶཱ’’ཏི ཨེཝཾ ཝུཏྟེསུ ཚསུ པདེསུ ཨེཀཾ ཨཔནེཏྭཱ ཨཝསེསཱནི པཉྩ པདཱནི ཨེཀཾ པཉྩཀནྟི དསྶེཏྭཱ ཧེཊྛཱ ཝུཏྟཔཉྩཀཉྩ གཧེཏྭཱ དྭེ པཉྩཀཱནི དསྶིཏཱནི. ཨེཏྠ པནཱཏི ‘‘པཉྩཧཱཀཱརེཧི ཨདིནྣཾ ཨཱདིཡནྟསྶཱ’’ཏིཨཱདཱིསུ. སབྦེཧིཔི པདེཧཱིཏི ‘‘པརཔརིགྒཧིཏཉྩ ཧོཏཱི’’ཏིཨཱདཱིཧི པདེཧི. ལབྦྷམཱནཱནིཡེཝ པཉྩཀཱནཱིཏི པཉྩཝཱིསཏིཡཱ ཨཝཧཱརེསུ ལབྦྷམཱནཔཉྩཀཱནི.

པཉྩནྣཾ ཨཝཧཱརཱནཾ སམཱུཧོ པཉྩཀཾ, སཀོ ཧཏྠོ སཧཏྠོ, ཏེན ནིབྦཏྟོ, ཏསྶ ཝཱ སམྦནྡྷཱིཏི ¶ སཱཧཏྠིཀོ, ཨཝཧཱརོ. སཱཧཏྠིཀཱདི པཉྩཀཾ སཱཧཏྠིཀཔཉྩཀནྟི ཨཱདིཔདཝསེན ནཱམལཱབྷོ དཊྛབྦོ ཀུསལཱདིཏྟིཀསྶ ཀུསལཏྟིཀཝོཧཱརོ ཝིཡ. ཨིམིནཱཝ ནཡེན པུབྦཔཡོགཱདི པཉྩཀཾ པུབྦཔཡོགཔཉྩཀཾ, ཐེཡྻཱཝཧཱརཱདི པཉྩཀཾ ཐེཡྻཱཝཧཱརཔཉྩཀནྟི ནཱམལཱབྷོ དཊྛབྦོཏི. ཏཏིཡཔཉྩམེསུ པཉྩཀེསཱུཏི སཱཧཏྠིཀཔཉྩཀཐེཡྻཱཝཧཱརཔཉྩཀེསུ. ལབྦྷམཱནཔདཝསེནཱཏི སཱཧཏྠིཀཔཉྩཀེ ལབྦྷམཱནསྶ ནིསྶགྒིཡཱཝཧཱརཔདསྶ ཝསེན ཐེཡྻཱཝཧཱརཔཉྩཀེ ལབྦྷམཱནསྶ པརིཀཔྤཱཝཧཱརཔདསྶ ཙ ཝསེན ཡོཛེཏབྦནྟི ཨཏྠོ.

ཨཱཎཏྟིཡཱ ནིབྦཏྟོ ཨཝཧཱརོ ཨཱཎཏྟིཀོ. ནིསྶཛྫནཾ ནིསྶགྒོ, སུངྐགྷཱཏཊྛཱནེ པརིཀཔྤིཏོཀཱསེ ཝཱ ཋཏྭཱ བྷཎྜསྶ བཧི པཱཏནཾ. ནིསྶགྒོཝ ནིསྶགྒིཡོ. ཀིརིཡཱསིདྡྷིཏོ པུརེཏརམེཝ པཱརཱཛིཀཱཔཏྟིསངྑཱཏཾ ¶ ཨཏྠཾ སཱདྷེཏཱིཏི ཨཏྠསཱདྷཀོ. ‘‘ཨསུཀསྶ བྷཎྜཾ ཡདཱ སཀྐོསི, ཏདཱ ཨཝཧརཱ’’ཏི ཨེཝརཱུཔོ ཧི ཨཱཎཱཔནཔཡོགོ པརསྶ ཏེལཀུམྦྷིཡཱ པཱདགྒྷནཀཾ ཏེལཾ ཨཝསྶཾ པིཝནཀཱནཾ ཨུཔཱཧནཱདཱིནཾ ནིཀྑེཔཔཡོགོ ཙ ཨཱཎཏྟསྶ བྷཎྜགྒཧཎཏོ ཨུཔཱཧནཱདཱིནཾ ཏེལཔཱཏནཏོ ཙ པུརེཏརམེཝ པཱརཱཛིཀཱཔཏྟིསངྑཱཏཾ ཨཏྠཾ སཱདྷེཏི. སཱཧཏྠིཀཔཡོགོཔི ཧི ཨེཝརཱུཔོ ཨཏྠསཱདྷཀོཏི ཝུཙྩཏི. ཝུཏྟཉྷེཏཾ མཱཏིཀཱཊྛཀཐཱཡཾ (ཀངྑཱ. ཨཊྛ. དུཏིཡཔཱརཱཛིཀཝཎྞནཱ) –

‘‘ཨཏྠསཱདྷཀོ ནཱམ ‘ཨསུཀསྶ བྷཎྜཾ ཡདཱ སཀྐོསི, ཏདཱ ཏཾ ཨཝཧརཱ’ཏི ཨཱཎཱཔེཏི. ཏཏྠ སཙེ པརོ ཨནནྟརཱཡིཀོ ཧུཏྭཱ ཏཾ ཨཝཧརཏི, ཨཱཎཱཔཀསྶ ཨཱཎཏྟིཀྑཎེཡེཝ པཱརཱཛིཀཾ. པརསྶ ཝཱ པན ཏེལཀུམྦྷིཡཱ པཱདགྒྷནཀཾ ཏེལཾ ཨཝསྶཾ པིཝནཀཱནི ཨུཔཱཧནཱདཱིནི པཀྑིཔཏི, ཧཏྠཏོ མུཏྟམཏྟེཡེཝ པཱརཱཛིཀ’’ནྟི.

དྷུརསྶ ནིཀྑིཔནཾ དྷུརནིཀྑེཔོ. ཨཱརཱམཱབྷིཡུཉྫནཱདཱིསུ ཨཏྟནོ ཙ པརསྶ ཙ དཱནགྒཧཎེསུ ནིརུསྶཱཧབྷཱཝཱཔཛྫནཾ. སཧཏྠཱ ཨཝཧརཏཱིཏི སཧཏྠེན གཎྷཱཏི. ‘‘ཨསུཀསྶ བྷཎྜཾ ཨཝཧརཱ’’ཏི ཨཉྙཾ ཨཱཎཱཔེཏཱིཏི ཨེཏྠཱཔི ཨཱཎཱཔཀསྶ ཨཱཎཏྟིཀྑཎེཡེཝ ཨཱཔཏྟི དཊྛབྦཱ. ཡདི ཨེཝཾ ཨིམསྶ, ཨཏྠསཱདྷཀསྶ ཙ ཀོ ཝིསེསོཏི? ཏངྑཎཉྙེཝ གཧཎེ ནིཡུཉྫནཾ ཨཱཎཏྟིཀཔཡོགོ, ཀཱལནྟརེན གཧཎཏྠཾ ནིཡོགོ ཨཏྠསཱདྷཀོཏི ཨཡམེཏེསཾ ཝིསེསོ. ཏེནེཝཱཧ – ‘‘ཨསུཀསྶ བྷཎྜཾ ཡདཱ སཀྐོསི, ཏདཱ ཨཝཧརཱཏི ཨཱཎཱཔེཏཱི’’ཏི. ཨེཏྠ ཙ ཨཱཎཱཔནཔཡོགོཝ ཨཏྠསཱདྷཀོཏི དསྶིཏོ, སཱཧཏྠིཀཝསེནཔི ཨཏྠསཱདྷཀཔཡོགོ པན ཨུཔརི ཨཱཝི བྷཝིསྶཏི. དྷུརནིཀྑེཔོ པན ཨུཔནིཀྑིཏྟབྷཎྜཝསེན ཝེདིཏབྦོཏི ཨིདཾ ནིདསྶནམཏྟཾ. ཨཱརཱམཱབྷིཡུཉྫནཱདཱིསུཔི ཏཱཝཀཱལིཀབྷཎྜདེཡྻཱནཾ ཨདཱནེཔི ཨེསེཝ ནཡོ.

‘‘ཨཱཎཏྟིཝསེན ¶ པུབྦཔཡོགོ ཝེདིཏབྦོ’’ཏི ཝུཏྟཏྟཱ ཨནནྟརཱཡེན གཎྷནྟསྶ ‘ཨསུཀསྶ བྷཎྜཾ ཨཝཧརཱ’ཏི ཨཱཎཱཔནཾ བྷཎྜགྒཧཎཏོ པུབྦཏྟཱ པུབྦཔཡོགོ, པཡོགེན སཧ ཝཏྟམཱནོ ཨཝཧཱརོ སཧཔཡོགོ, ‘‘ཨསུཀཾ ནཱམ བྷཎྜཾ ཧརིསྶཱམཱ’’ཏི སཾཝིདཧིཏྭཱ ¶ སམྨནྟཡིཏྭཱ ཨཝཧརཎཾ སཾཝིདཱཝཧཱརོ. སངྐེཏཀམྨཾ ནཱམ པུབྦཎྷཱདིཀཱལཔརིཙྪེདཝསེན སཉྫཱནནཀམྨཾ, ནིམིཏྟཀམྨཾ ནཱམ སཉྙུཔྤཱདནཏྠཾ ཨཀྑིནིཁཎནཱདིནིམིཏྟཀརཎཾ. ཋཱནཱཙཱཝནཝསེན སཧཔཡོགོཏི ཨིདཾ པན ནིདསྶནམཏྟཾ དཊྛབྦཾ, ཁིལསངྐམནཱདཱིསུཔི ཨསཏི ཙ ཋཱནཱཙཱཝནེ སཧཔཡོགོ དཊྛབྦོ. ཝུཏྟཉྷེཏཾ མཱཏིཀཱཊྛཀཐཱཡཾ (ཀངྑཱ. ཨཊྛ. དུཏིཡཔཱརཱཛིཀཝཎྞནཱ) ‘‘ཋཱནཱཙཱཝནཝསེན ཁིལཱདཱིནི སངྐཱམེཏྭཱ ཁེཏྟཱདིགྒཧཎཝསེན ཙ སཧཔཡོགོ ཝེདིཏབྦོ’’ཏི.

ཐེནོ ཝུཙྩཏི ཙོརོ, ཏསྶ བྷཱཝོ ཐེཡྻཾ, ཏེན ཨཝཧརཎཾ ཐེཡྻཱཝཧཱརོ. ཡོ ཧི སནྡྷིཙྪེདཱདཱིནི ཀཏྭཱ ཨདིསྶམཱནོ ཨཝཧརཏི, ཏུལཱཀཱུཊམཱནཀཱུཊཀཱུཊཀཧཱཔཎཱདཱིཧི ཝཱ ཝཉྩེཏྭཱ གཎྷཱཏི, ཏསྶེཝཾ གཎྷཏོ ཨཝཧཱརོ ཐེཡྻཱཝཧཱརོ. པསཡ྄ཧ ཨབྷིབྷཝིཏྭཱ ཨཝཧརཎཾ པསཡ྄ཧཱཝཧཱརོ. ཡོ ཧི པསཡ྄ཧ བལཀྐཱརེན པརེསཾ སནྟཀཾ གཎྷཱཏི གཱམགྷཱཏཀཱདཡོ ཝིཡ, ཨཏྟནོ པཏྟབལིཏོ ཝཱ ཝུཏྟནཡེན ཨདྷིཀཾ གཎྷཱཏི རཱཛབྷཊཱདཡོ ཝིཡ, ཏསྶེཝཾ གཎྷཏོ ཨཝཧཱརོ པསཡ྄ཧཱཝཧཱརོ. བྷཎྜཝསེན ཙ ཨོཀཱསཝསེན ཙ པརིཀཔྤེཏྭཱ ཨཝཧརཎཾ པརིཀཔྤཱཝཧཱརོ. ཏིཎཔཎྞཱདཱིཧི ཨངྒུལིམུདྡིཀཱདིཾ པཊིཙྪཱདེཏྭཱ པཙྪཱ ཏསྶ པཊིཙྪནྣསྶ ཨཝཧརཎཾ པཊིཙྪནྣཱཝཧཱརོ. ཀུསཾ སངྐཱམེཏྭཱ ཨཝཧརཎཾ ཀུསཱཝཧཱརོ.

ཏུལཡིཏྭཱཏི ཨུཔཔརིཀྑིཏྭཱ. སཱམཱིཙཱིཏི ཝཏྟཾ, ཨཱཔཏྟི པན ནཏྠཱིཏི ཨདྷིཔྤཱཡོ. མཧཱཛནསམྨདྡོཏི མཧཱཛནསངྑོབྷོ. བྷཊྛེ ཛནཀཱཡེཏི ཨཔགཏེ ཛནཀཱཡེ. ‘‘ཨིདཉྩ ཀཱསཱཝཾ ཨཏྟནོ སནྟཀཾ ཀཏྭཱ ཨེཏསྶེཝ བྷིཀྑུནོ དེཧཱི’’ཏི ཀིཾཀཱརཎཱ ཨེཝམཱཧ? ཙཱིཝརསཱམིཀེན ཡསྨཱ དྷུརནིཀྑེཔོ ཀཏོ, ཏསྨཱ ཏསྶ ཨདིནྣཾ གཧེཏུཾ ན ཝཊྚཏི. ཨཝཧཱརཀོཔི ཝིཔྤཊིསཱརསྶ ཨུཔྤནྣཀཱལཏོ པཊྛཱཡ ཙཱིཝརསཱམིཀཾ པརིཡེསནྟོ ཝིཙརཏི ‘‘དསྶཱམཱི’’ཏི, ཙཱིཝརསཱམིཀེན ཙ ‘‘མམེཏ’’ནྟི ཝུཏྟེ ཨེཏེནཔི ཨཝཧཱརཀེན ཨཱལཡོ པརིཙྩཏྟོ, ཏསྨཱ ཨེཝམཱཧ. ཡདི ཨེཝཾ ཙཱིཝརསཱམིཀོཡེཝ ‘‘ཨཏྟནོ སནྟཀཾ གཎྷཱཧཱི’’ཏི ཀསྨཱ ན ཝུཏྟོཏི? ཨུབྷིནྣམྤི ཀུཀྐུཙྩཝིནོདནཏྠཾ. ཀཐཾ? ཨཝཧཱརཀསྶ ‘‘མཡཱ སཧཏྠེན ན དིནྣཾ, བྷཎྜདེཡྻམེཏ’’ནྟི ཀུཀྐུཙྩཾ ཨུཔྤཛྫེཡྻ, ཨིཏརསྶ ‘‘མཡཱ པཋམཾ དྷུརནིཀྑེཔཾ ཀཏྭཱ པཙྪཱ ཨདིནྣཾ གཧིཏ’’ནྟི ཀུཀྐུཙྩཾ ཨུཔྤཛྫེཡྻཱཏི.

སམགྒྷནྟི ¶ ཨཔྤགྒྷཾ. དཱརུཨཏྠཾ ཕརཏཱིཏི དཱརཱུཧི ཀཏྟབྦཀིཙྩཾ སཱདྷེཏི. མཡི སནྟེཏིཨཱདི ¶ སབྦཾ རཉྙཱ པསཱདེན ཝུཏྟཾ, ‘‘ཐེརེན པན ཨནནུཙྪཝིཀཾ ཀཏ’’ནྟི ན མཉྙིཏབྦཾ.

ཨེཀདིཝསཾ དནྟཀཊྛཙྪེདནཱདིནཱ ཡཱ ཨཡཾ ཨགྒྷཧཱནི ཝུཏྟཱ, སཱ སབྦཱ བྷཎྜསཱམིནཱ

ཀིཎིཏྭཱ གཧིཏམེཝ སནྡྷཱཡ ཝུཏྟཱ, སབྦཾ པནེཏཾ ཨཊྛཀཐཱཙརིཡཔྤམཱཎེན གཧེཏབྦཾ. པཱསཱཎཉྩ སཀྑརཉྩ པཱསཱཎསཀྑརཾ. དྷཱརེཡྻཏྠཾ ཝིཙཀྑཎོཏི ཨིམསྶེཝ ཝིཝརཎཾ ‘‘ཨཱཔཏྟིཾ ཝཱ ཨནཱཔཏྟིཾ ཝཱ’’ཏིཨཱདི.

པཉྩཝཱིསཏིཨཝཧཱརཀཐཱཝཎྞནཱ ནིཊྛིཏཱ.

ཨཀྑདསྶཱཏི ཨེཏྠ ཨཀྑ-སདྡེན ཀིར ཝིནིཙྪཡསཱལཱ ཝུཙྩཏི. ཏཏྠ ནིསཱིདིཏྭཱ ཝཛྫཱཝཛྫཾ པསྶནྟཱིཏི ཨཀྑདསྶཱ ཝུཙྩནྟི དྷམྨཝིནིཙྪནཀཱ. ཧནེཡྻུནྟི ཨེཏྠ ཧནནཾ ནཱམ ཧཏྠཔཱདཱདཱིཧི པོཐནཉྩེཝ སཱིསཱདིཙྪེདནཉྩ ཧོཏཱིཏི ཨཱཧ – ‘‘ཧནེཡྻུནྟི པོཐེཡྻུཉྩེཝ ཚིནྡེཡྻུཉྩཱ’’ཏི. ཏེནེཝ པདབྷཱཛནིཡཉྩ ‘‘ཧཏྠེན ཝཱ པཱདེན ཝཱ ཀསཱཡ ཝཱ ཝེཏྟེན ཝཱ ཨཌྜྷདཎྜཀེན ཝཱ ཚེཛྫཱཡ ཝཱ ཧནེཡྻུ’’ནྟི ཝུཏྟཾ. ཏཏྠ ཨཌྜྷདཎྜཀེནཱཏི དྭིཧཏྠཔྤམཱཎེན རསྶམུགྒརེན ཝེལུ༹པེསིཀཱཡ ཝཱ. ཚེཛྫཱཡཱཏི ཧཏྠཔཱདསཱིསཱདཱིནཾ ཚེདནེན. ནཱིཧརེཡྻུནྟི གཱམནིགམཱདིཏོ ནཱིཧརེཡྻུཾ. ཙོརོསི…པེ… ཐེནོསཱིཏི ཨེཏྠ ‘‘པརིབྷཱསེཡྻུ’’ནྟི པདཾ ཨཛ྄ཛྷཱཧརིཏྭཱ ཨཏྠོ ཝེདིཏབྦོཏི ཨཱཧ ‘‘ཙོརོསཱིཏི ཨེཝམཱདཱིནི ཙ ཝཏྭཱ པརིབྷཱསེཡྻུ’’ནྟི.

༩༣. ཡཾ ཏཾ བྷཎྜཾ དསྶིཏནྟི སམྦནྡྷོ. ཡཏྠ ཡཏྠ ཋིཏནྟི བྷཱུམིཨཱདཱིསུ ཡཏྠ ཡཏྠ ཋིཏཾ. ཡཐཱ ཡཐཱ ཨཱདཱནཾ གཙྪཏཱིཏི བྷཱུམིཨཱདཱིསུ ཋིཏཾ བྷཎྜཾ སབྦསོ ཨགྒཧཎེཔི ཡེན ཡེན ཨཱཀཱརེན གཧཎཾ ཨུཔགཙྪཏི.

བྷཱུམཊྛཀཐཱཝཎྞནཱ

༩༤. ཕནྡཱཔེཏི, སབྦཏྠ དུཀྐཊམེཝཱཏི ཨེཏྠ ‘‘ཨུཊྛཧིསྶཱམཱི’’ཏི ཕནྡཱཔེཏྭཱ པུན ཨནུཊྛཧིཏྭཱ ཏཏྠེཝ སཡནྟསྶཔི ཨངྒཔཙྩངྒཾ ཨཕནྡཱཔེཏྭཱ ཨེཀཔཡོགེན ཨུཊྛཧནྟསྶཔི དུཀྐཊམེཝཱཏི དཊྛབྦཾ. ཨཉྙསྨིཾ ཝཱ གམནསྶ ¶ ཨནུཔཀཱརེཏི ཡཐཱ དྭཱརཔིདཧནེ ཀུམྦྷིཊྛཱནགམནསྶ ཨནུཔཀཱརཏྟཱ ཨནཱཔཏྟི, ཨེཝཾ ཨཉྙསྨིཾ ཝཱ གམནསྶ ཨནུཔཀཱརེ ཀཱཡཝཙཱིཀམྨེ ཨནཱཔཏྟི. ཝཱཙཱཡ ཝཱཙཱཡཱཏི ཨེཀེཀཏྠདཱིཔིཀཱཡ ཝཱཙཱཡ ཝཱཙཱཡ. ཨུཔལདྡྷོཏི ཉཱཏོ. པུཉྙཱནི ཙ ཀརིསྶཱམཱཏི ཨེཏྠ ‘‘མུསཱཝཱདཾ ཀཏྭཱ པུཉྙཱནི ཀརིསྶཱམཱཏི ཝདནྟསྶ དུཀྐཊམེཝཱ’’ཏི ¶ ཏཱིསུཔི གཎྛིཔདེསུ ཝུཏྟཾ, ཏཾ ཨིམསྨིཾཡེཝ པདེསེ ཨཊྛཀཐཱཝཙནེན ཝིརུཛ྄ཛྷཏི. ཏཐཱ ཧི ‘‘ཡཾ ཡཾ ཝཙནཾ མུསཱ, ཏཏྠ ཏཏྠ པཱཙིཏྟིཡ’’ནྟི ཙ ‘‘ན ཧི ཨདིནྣཱདཱནསྶ པུབྦཔཡོགེ པཱཙིཏྟིཡཊྛཱནེ དུཀྐཊཾ ནཱམ ཨཏྠཱི’’ཏི ཙ ཝཀྑཏི. ཨེཝཾ པན ཝུཏྟེ ན ཝིརུཛ྄ཛྷཏི ‘‘མུསཱཝཱདཾ ཀཏྭཱ པུཉྙཱནི ཙ ཀརིསྶཱམཱཏི ཝདནྟསྶ པཱཙིཏྟིཡེན སདྡྷིཾ དུཀྐཊ’’ནྟི. ཏཐཱ ཧི ‘‘ཨཀཔྤིཡཔཐཝིཾ ཁཎནྟཱནཾ དུཀྐཊེཧི སདྡྷིཾ པཱཙིཏྟིཡཱནཱིཏི མཧཱཔཙྩརིཡཾ ཝུཏྟ’’ནྟི ཙ ‘‘ཡཐཱ ཙ ཨིདྷ, ཨེཝཾ སབྦཏྠ པཱཙིཏྟིཡཊྛཱནེ དུཀྐཊཱ ན མུཙྩཏཱི’’ཏི ཙ ཝཀྑཏི. སཙེ པན ཀུསལཙིཏྟོ ‘‘པུཉྙཱནི ཀརིསྶཱམཱ’’ཏི ཝདཏི, ཨནཱཔཏྟི ‘‘བུདྡྷཔཱུཛཾ ཝཱ དྷམྨཔཱུཛཾ ཝཱ སངྒྷབྷཏྟཾ ཝཱ ཀརིསྶཱམཱཏི ཀུསལཾ ཨུཔྤཱདེཏི, ཀུསལཙིཏྟེན གམནེ ཨནཱཔཏྟཱི’’ཏི ཙ ‘‘ཡཐཱ ཙ ཨིདྷ, ཨེཝཾ སབྦཏྠ ཨཐེཡྻཙིཏྟསྶ ཨནཱཔཏྟཱི’’ཏི ཙ ཝཀྑམཱནཏྟཱ.

པམཱདལིཁིཏནྟི ཝེདིཏབྦནྟི ཨཔརབྷཱགེ པོཏྠཀཱརུལ༹ྷཀཱལེ པམཛྫིཏྭཱ ལིཁིཏནྟི ཝེདིཏབྦཾ. པཱལི༹ཡཾ སེསཨཊྛཀཐཱསུ ཙ ‘‘ཀུདཱལཾ ཝཱ པིཊཀཾ ཝཱ’’ཏི ཨིདམེཝ དྭཡཾ ཝཏྭཱ ཝཱསིཕརསཱུནཾ ཨཝུཏྟཏྟཱ ཏེསམྤི སངྑེཔཊྛཀཐཱདཱིསུ ཨཱགཏབྷཱཝཾ དསྶེཏུཾ ‘‘སངྑེཔཊྛཀཐཱཡཾ པན མཧཱཔཙྩརིཡཉྩཱ’’ཏིཨཱདི ཝུཏྟཾ. ཐེཡྻཙིཏྟེན ཀཏཏྟཱ ‘‘དུཀྐཊེཧི སདྡྷིཾ པཱཙིཏྟིཡཱནཱི’’ཏི ཝུཏྟཾ. ཏཏོ པརཾ སབྦཀིརིཡཱསཱུཏི བཱིཛགྒཧཎཏོ པརཾ ཀཏྟབྦཀིརིཡཱསུ. སབྦཾ པུརིམནཡེནེཝཱཏི ཡཱཝ པིཊཀཔརིཡོསཱནཱ ཧཏྠཝཱརཔདཝཱརེསུ དུཀྐཊཾ.

ཐེརེཧི དསྶིཏནྟི པུབྦཔཡོགསཧཔཡོགདུཀྐཊེསུ ཨསམྨོཧཏྠཾ སམོདྷཱནེཏྭཱ དྷམྨསངྒཱཧཀཏྠེརེཧི དསྶིཏཾ. ‘‘སབྦེསམྤི དུཀྐཊཱནཾ ཨིམེསུཡེཝ ཨཊྛསུ སངྒཧེཏབྦབྷཱཝཏོ ཨིཏརེཧི སཏྟཧི དུཀྐཊེཧི ཝིནིམུཏྟཾ ཝིནཡདུཀྐཊེཡེཝ སངྒཧེཏབྦ’’ནྟི ཝདནྟི. དསཝིདྷཾ རཏནནྟི ‘‘མུཏྟཱ མཎི ཝེལུ༹རིཡོ སངྑོ སིལཱ པཝཱལ༹ཾ རཛཏཾ ཛཱཏརཱུཔཾ ལོཧིཏངྒོ མསཱརགལླ’’ནྟི ཨེཝམཱགཏཾ དསཝིདྷཾ རཏནཾ.

‘‘མཎི ¶ མུཏྟཱ ཝེལུ༹རིཡོ ཙ སངྑོ,

སིལཱ པཝཱལ༹ཾ རཛཏཉྩ ཧེམཾ;

སལོཧིཏངྒཉྩ མསཱརགལླཾ,

དསེཏི དྷཱིརོ རཏནཱནི ཛཉྙཱ’’ཏི. –

ཧི ཝུཏྟཾ.

སཏྟཝིདྷཾ ¶ དྷཉྙནྟི སཱལི ཝཱིཧི ཡཝོ ཀངྒུ ཀུདྲཱུསོ ཝརཀོ གོདྷུམོཏི ཨིདཾ སཏྟཝིདྷཾ དྷཉྙཾ. ཨཱཝུདྷབྷཎྜཱདིནྟི ཨཱདི-སདྡེན ཏཱུརིཡབྷཎྜཨིཏྠིརཱུཔཱདིཾ སངྒཎྷཱཏི. ཨནཱམསིཏབྦེ ཝཏྠུམྷི དུཀྐཊཾ ཨནཱམཱསདུཀྐཊཾ. དུརུཔཙིཎྞདུཀྐཊནྟི ‘‘ན ཀཏྟབྦ’’ནྟི ཝཱརིཏསྶ ཀཏཏྟཱ དུཊྛུ ཨཱཙིཎྞཾ ཙརིཏནྟི དུརུཔཙིཎྞཾ, ཏསྨིཾ དུཀྐཊཾ དུརུཔཙིཎྞདུཀྐཊཾ. ཝིནཡེ པཉྙཏྟཾ དུཀྐཊཾ ཝིནཡདུཀྐཊཾ. ‘‘སངྒྷབྷེདཱཡ པརཀྐམཏཱི’’ཏི སུཏྭཱ ཏཾནིཝཱརཎཏྠཱཡ ཉཱཏེ ཨཏྠེ ཨཝདནྟསྶ ཉཱཏདུཀྐཊཾ. ཨེཀཱདས སམནུབྷཱསནཱ ནཱམ བྷིཀྑུཔཱཏིམོཀྑེ ཙཏྟཱརོ ཡཱཝཏཏིཡཀཱ སངྒྷཱདིསེསཱ, ཨརིཊྛསིཀྑཱཔདནྟི པཉྩ, བྷིཀྑུནཱིཔཱཏིམོཀྑེ ཨེཀཾ ཡཱཝཏཏིཡཀཾ པཱརཱཛིཀཾ, ཙཏྟཱརོ སངྒྷཱདིསེསཱ, ཙཎྜཀཱལཱི༹སིཀྑཱཔདནྟི ཚ. ཝསྶཱཝཱསཱདིཾ པཊིསྶུཎིཏྭཱ ན སམྤཱདེནྟསྶ པཊིསྶཝནིམིཏྟཾ དུཀྐཊཾ པཊིསྶཝདུཀྐཊཾ.

པུབྦསཧཔཡོགེ ཙ, ཨནཱམཱསདུརུཔཙིཎྞེ;

ཝིནཡེ ཙེཝ ཉཱཏེ ཙ, ཉཏྟིཡཱ ཙ པཊིསྶཝེ;

ཨཊྛེཏེ དུཀྐཊཱ ཝུཏྟཱ, ཝིནཡེ ཝིནཡཉྙུནཱ.

སཧཔཡོགཏོ པཊྛཱཡ ཙེཏྠ པུརིམཱ པུརིམཱ ཨཱཔཏྟིཡོ པཊིཔྤསྶམྦྷནྟཱིཏི ཨཱཧ ‘‘ཨཐ དྷུརནིཀྑེཔཾ ཨཀཏྭཱ’’ཏིཨཱདི. ཏཏྠ ‘‘དྷུརནིཀྑེཔཾ ཨཀཏྭཱ’’ཏི ཝུཏྟཏྟཱ དྷུརནིཀྑེཔཾ ཀཏྭཱ ཁཎནྟསྶ པུརིམཱཔཏྟིཡོ ན པཊིཔྤསྶམྦྷནྟཱིཏི དཊྛབྦཾ. ཝིཡཱུཧནདུཀྐཊཾ པཊིཔྤསྶམྦྷཏི, ཨུདྡྷརཎདུཀྐཊེ པཏིཊྛཱཏཱིཏི ཨིདཾ པཱལི༹ཡཾ ཨཱགཏཱནུཀྐམེན དསྶེཏུཾ ཝུཏྟཾ. ཡདི པན པཾསུཾ ཨུདྡྷརིཏྭཱ སཨུསྶཱཧོཝ པུན ཁཎཏི, ཨུདྡྷརཎདུཀྐཊཾ པཊིཔྤསྶམྦྷཏི, ཁཎནདུཀྐཊེ པཏིཊྛཱཏི.

ཀཏཾ ཀརཎཾ ཀིརིཡཱཏི ཨཏྠཏོ ཨེཀནྟི ཨཱཧ ‘‘ཝིརཱུཔཱ སཱ ཀིརིཡཱ’’ཏི. ཨིདཱནི ཝུཏྟམེཝཏྠཾ པརིཝཱརཔཱལི༹ཡཱ ནིདསྶེནྟོ ‘‘ཝུཏྟམྤི ཙེཏ’’ནྟིཨཱདིམཱཧ. ཏཏྠ ཨཔརདྡྷཾ ཝིརདྡྷཾ ཁལིཏནྟི སབྦམེཏཾ ཡཉྩ དུཀྐཊནྟི ཨེཏྠ ཝུཏྟསྶ དུཀྐཊསྶ པརིཡཱཡཝཙནཾ. ཡཉྷི དུཊྛུ ཀཏཾ, ཝིརཱུཔཾ ཝཱ ཀཏཾ ¶ , ཏཾ དུཀྐཊཾ. ཏཾ པནེཏཾ ཡཐཱ སཏྠཱརཱ ཝུཏྟཾ, ཨེཝཾ ཨཀཏཏྟཱ ཨཔརདྡྷཾ, ཀུསལཾ ཝིརཛ྄ཛྷིཏྭཱ པཝཏྟཏྟཱ ཝིརདྡྷཾ, ཨརིཡཝཾསཔྤཊིཔདཾ ཨནཱརུལ༹ྷཏྟཱ ཁལིཏཾ. ཡཾ མནུསྶོ ཀརེཏི ཨིདཾ པནེཏྠ ཨོཔམྨནིདསྶནཾ. ཏསྶཏྠོ – ཡཐཱ ཡཾ ལོཀེ མནུསྶོ ཨཱཝི ཝཱ ཡདི ཝཱ རཧོ པཱཔཾ ཀརོཏི, ཏཾ དུཀྐཊནྟི པཝེདེནྟི, ཨེཝམིདམྤི བུདྡྷཔཊིཀུཊྛེན ལཱམཀབྷཱཝེན པཱཔཾ, ཏསྨཱ དུཀྐཊནྟི ཝེདིཏབྦནྟི.

ཡཐཱ ¶ དུཀྑཱ, ཀུཙྪིཏཱ ཝཱ གཏི དུགཏཱིཏི ཝཏྟབྦེ ‘‘དུགྒཏཱི’’ཏི ཝུཏྟཾ, ཡཐཱ ཙ ཀཊུཀཾ ཕལམེཏསྶཱཏི ཀཊུཀཕལནྟི ཝཏྟབྦེ ‘‘ཀཊུཀཔྥལ’’ནྟི ཝུཏྟཾ, ཨེཝམིདྷཱཔི ཐཱུལཏྟཱ ཨཙྩཡཏྟཱ ཙ ཐཱུལཙྩཡནྟི ཝཏྟབྦེ ‘‘ཐུལླཙྩཡ’’ནྟི ཝུཏྟནྟི དསྶེཏུཾ ‘‘སམྤརཱཡེ ཙ དུགྒཏཱི’’ཏིཨཱདིམཱཧ. སཾཡོགེ པན ཀཏེ སཾཡོགཔརསྶ རསྶཏྟཾ སིདྡྷམེཝཱཏི མནསི ཀཏྭཱ ‘‘སཾཡོགབྷཱཝོ ཝེདིཏབྦོ’’ཏི ཨེཏྟཀམེཝ ཝུཏྟཾ. ཨེཀསྶ མཱུལེཏི ཨེཀསྶ སནྟིཀེ. ཨཙྩཡོ ཏེན སམོ ནཏྠཱིཏི དེསནཱགཱམཱིསུ ཨཙྩཡེསུ ཏེན སམོ ཐཱུལོ ཨཙྩཡོ ནཏྠི. ཏེནེཏཾ ཨིཏི ཝུཙྩཏཱིཏི ཐཱུལཏྟཱ ཨཙྩཡསྶ ཨེཏཾ ཐུལླཙྩཡནྟི ཝུཙྩཏཱིཏི ཨཏྠོ.

‘‘སབྦཏྠཱཔི ཨཱམསནེ དུཀྐཊཾ ཕནྡཱཔནེ ཐུལླཙྩཡཉྩ ཝིསུཾ ཝིསུཾ ཐེཡྻཙིཏྟེན ཨཱམསནཕནྡཱཔནཔཡོགཾ ཀརོནྟསྶེཝ ཧོཏི, ཨེཀཔཡོགེན གཎྷནྟསྶ པན ཨུདྡྷཱརེ པཱརཱཛིཀམེཝ, ན དུཀྐཊཐུལླཙྩཡཱནཱི’’ཏི ཝདནྟི. སཧཔཡོགཾ པན ཨཀཏྭཱཏི ཨེཏྠ ‘‘པུབྦཔཡོགེ ཨཱཔནྣཱཔཏྟཱིནཾ པཊིཔྤསྶདྡྷིཡཱ ཨབྷཱཝཏོ སཧཔཡོགཾ ཀཏྭཱཔི ལཛྫིདྷམྨཾ ཨོཀྐནྟེན པུབྦཔཡོགེ ཨཱཔནྣཱཔཏྟིཡོ དེསེཏབྦཱ’’ཏི ཏཱིསུཔི གཎྛིཔདེསུ ཝུཏྟཾ. ཨཊྛཀཐཱཝཙནཾ པན ཀཏེ སཧཔཡོགེ པུབྦཔཡོགེ ཨཱཔནྣཱཔཏྟཱིནམྤི པཊིཔྤསྶདྡྷིཾ དཱིཔེཏི, ཨཉྙཐཱ ‘‘སཧཔཡོགཾ པན ཨཀཏྭཱ’’ཏི ཨིདཾ ཝིསེསནམེཝ ནིརཏྠཀཾ སིཡཱ. ཡཉྩ ཧེཊྛཱ ཝུཏྟཾ ‘‘སཙེ པནསྶ ཏཏྠཛཱཏཀེ ཏིཎརུཀྑལཏཱདིམྷི ཚིནྣེཔི ལཛྫིདྷམྨོ ཨོཀྐམཏི, སཾཝརོ ཨུཔྤཛྫཏི, ཚེདནཔཙྩཡཱ དུཀྐཊཾ དེསེཏྭཱ མུཙྩཏཱི’’ཏི, ཏམྤི སཧཔཡོགེ ཀཏེ པུབྦཔཡོགེ ཨཱཔནྣཱཔཏྟཱིནཾ པཊིཔྤསྶདྡྷིམེཝ དཱིཔེཏི སཧཔཡོགེ ཚེདནཔཙྩཡཱ ཨཱཔནྣདུཀྐཊསྶེཝ དེསནཱཡ ཝུཏྟཏྟཱ. སཧཔཡོགཏོ པཊྛཱཡེཝཱཏི ཙ ཨིདཾ སཧཔཡོགཾ པཏྟསྶ ཏཏོ པུབྦེ ཨཱཔནྣཱནཾ པུབྦཔཡོགཱཔཏྟཱིནམྤི པཊིཔྤསྶདྡྷིཾ དཱིཔེཏི. ཏེན ཧི ཨཡམཏྠོ ཝིཉྙཱཡཏི ‘‘ཡཱཝ སཧཔཡོགཾ ན པཱཔུཎཱཏི, ཏཱཝ པུབྦེ ཨཱཔནྣཱཔཏྟཱིནཾ པཊིཔྤསྶདྡྷི ན ¶ ཧོཏི, སཧཔཡོགཾ པཏྟཀཱལཏོ པན པཊྛཱཡ ཏཱསམྤི པཊིཔྤསྶདྡྷི ཧོཏཱི’’ཏི, ཏསྨཱ སུཊྛུ ཨུཔཔརིཀྑིཏྭཱ ཡུཏྟཏརཾ གཧེཏབྦཾ.

བཧུཀཱཔི ཨཱཔཏྟིཡོ ཧོནྟུ, ཨེཀམེཝ དེསེཏྭཱ མུཙྩཏཱིཏི ཨེཏྠཱཡམདྷིཔྤཱཡོ – སཙེ ཁཎནཝིཡཱུཧནུདྡྷརཎེསུ དས དས ཀཏྭཱ ཨཱཔཏྟིཡོ ཨཱཔནྣཱ, ཏཱསུ ཨུདྡྷརཎེ དས ཨཱཔཏྟིཡོ དེསེཏྭཱ མུཙྩཏི ཝིསབྷཱགཀིརིཡཾ པཏྭཱ པུརིམཱཔུརིམཱཔཏྟཱིནཾ པཊིཔྤསྶདྡྷཏྟཱཏི. ཛཱཏིཝསེན པན སམཱནཀིརིཡཱཡ ཨཱཔནྣཱཔཏྟིཡོ ཨེཀཏྟེན གཧེཏྭཱ ‘‘ཨེཀམེཝ དེསེཏྭཱ’’ཏི ཝུཏྟཾ, ཏསྨཱ ཨིམིནཱཔི ཀུརུནྡཊྛཀཐཱཝཙནེན པཋམཾ མཧཱཨཊྛཀཐཱཡཾ ཝུཏྟཔུརིམཱཔཏྟིཔཊིཔྤསྶདྡྷིམེཝ སམཏྠཡཏི, ན པན ཨུབྷིནྣཾ ཨཊྛཀཐཱནཾ ཨཏྠཏོ ནཱནཱཀརཎཾ ཨཏྠི. ཨཔརམྤེཏྠ པཀཱརཾ ཝཎྞཡནྟི ‘‘སམཱནཀིརིཡཱསུཔི པུརིམཔུརིམཁཎནཔཙྩཡཱ ཨཱཔནྣཱཔཏྟིཡོ པཙྪིམཔཙྪིམཁཎནཾ པཏྭཱ པཊིཔྤསྶམྦྷནྟཱིཏི ¶ ཨིམིནཱ ཨདྷིཔྤཱཡེན ‘པཾསུཁཎནཱདཱིསུ ཙ ལཛྫིདྷམྨེ ཨུཔྤནྣེ བཧུཀཱཔི ཨཱཔཏྟིཡོ ཧོནྟུ, ཨེཀམེཝ དེསེཏྭཱ མུཙྩཏཱིཏི ཀུརུནྡཊྛཀཐཱཡཾ ཝུཏྟ’’’ནྟི. ‘‘ཨེཝཉྩ སཏི ‘བཧུཀཱཔི ཨཱཔཏྟིཡོ ཧོནྟཱུ’ཏི ན ཝཏྟབྦཾ བྷཝེཡྻ, ཝུཏྟཉྩ, ཏསྨཱ ཝིསབྷཱགཀིརིཡམེཝ པཏྭཱ པུརིམཱཔཏྟཱིནཾ པཊིཔྤསྶདྡྷིཾ ཨིཙྪནྟེནེཝ བཧུཀཱསུཔི ཨཱཔཏྟཱིསུ ཨེཀམེཝ དེསེཏྭཱ མུཙྩཏཱིཏི ཨིམསྨིཾ ཋཱནེ ཝིསུཾཡེཝེཀོ དེསནཱཀྐམོ དསྶིཏོ’’ཏིཔི ཝདནྟི. ཨཡམེཏེསཾ ཨདྷིཔྤཱཡོ – ཡཐཱ ཨིདྷ པུརིམཱཔཏྟཱིནཾ པཊིཔྤསྶདྡྷི ཨཊྛཀཐཱཙརིཡཔྤམཱཎེན གཧིཏཱ, ཨེཝཾ བཧུཀཱསུཔི ཨཱཔཏྟཱིསུ ཨེཀམེཝ དེསེཏྭཱ མུཙྩཏཱིཏི ཨིདམྤི ཨིདྷ ཨཊྛཀཐཱཙརིཡཔྤམཱཎཏོཡེཝ ཝེདིཏབྦཾ. ཡཐཱ ཙ པཱལི༹ཡཾ པཱཙིཏྟིཡཊྛཱནེཔི དུཀྐཊམེཝ ཧོཏཱིཏི ཨིདྷ ཨཱཝེཎིཀཾ ཀཏྭཱ ཨཱཔཏྟིཝིསེསོ དསྶིཏོ, ཨེཝཾ པུརིམཱཔཏྟཱིནཾ པཊིཔྤསྶདྡྷིཝིསེསོ ཙ དེསནཱཝིསེསོ ཙ ཨཊྛཀཐཱཙརིཡེཧི དསྶིཏོཏི.

ཧེཊྛཏོ ཨོསཱིདེནྟོཏི ‘‘སཱམིཀེསུ ཨཱགནྟྭཱ ཨཔསྶིཏྭཱ གཏེསུ གཎྷིསྶཱམཱི’’ཏི ཐེཡྻཙིཏྟེན ཧེཊྛཱབྷཱུམིཡཾ ཨོསཱིདེནྟོ. བུནྡེནཱཏི ཀུམྦྷིཡཱ ཧེཊྛིམཏལེན. ཨེཝཾ ཨེཀཊྛཱནེ ཋིཏཱཡ ཀུམྦྷིཡཱ ཋཱནཱཙཱཝནཾ ཚཧི ཨཱཀཱརེཧི ཝེདིཏབྦནྟི སམྦནྡྷོ. ཝལཡཾ ནཱིཧརཏི, པཱརཱཛིཀནྟི ཨཱཀཱསགཏཾ ཨཀཏྭཱ གྷཾསིཏྭཱ ནཱིཧརནྟསྶ ཚིནྣཀོཊིཏོ ནཱིཧཊམཏྟེ པཱརཱཛིཀཾ. ཨིཏོ ཙིཏོ ཙ སཱརེཏཱིཏི གྷཾསནྟོཡེཝ ཨཱཀཱསགཏཾ ཨཀཏྭཱ སཱརེཏི.

ཚིནྣམཏྟེ ¶ པཱརཱཛིཀནྟི ཨཝསྶཾ ཙེ པཏཏི, ཚིནྣམཏྟེ པཱརཱཛིཀཾ. པརིཙྪེདོཏི ‘‘པཉྩམཱསཀཾ ཝཱ ཨཏིརེཀཔཉྩམཱསཀཾ ཝཱ’’ཏི ཝུཏྟགཎནཔརིཙྪེདོ. ཨཔབྱཱུཧནྟོཏི ‘‘ཧེཊྛཱ ཋིཏཾ གཎྷིསྶཱམཱི’’ཏི ཧཏྠེན དྭིདྷཱ ཀརོནྟོ. ཨུཔཌྜྷཀུམྦྷིཡནྟི ཨུཔཌྜྷཔུཎྞཱཡ ཀུམྦྷིཡཱ. ནནུ ཙ ཨཊྛཀཐཱཙརིཡཔྤམཱཎེན སངྑེཔཊྛཀཐཱདཱིསུ ཝུཏྟམྤི ཀསྨཱ ན གཧེཏབྦནྟི ཨཱཧ – ‘‘ཝིནཡཝིནིཙྪཡེ ཧི ཨཱགཏེ གརུཀེ ཋཱཏབྦ’’ནྟི. ཝིནཡདྷམྨཏཱཏི ཝིནཡགརུཀཱནཾ དྷམྨཏཱ. ཝིནཡགརུཀཱ ཧི ཝིནཡཝིནིཙྪཡེ ཨཱགཏེ གརུཀེ ཏིཊྛནྟི. ཝིནཡགརུཀཏཱབྱཱཔནཏྠཉྷི ཝིནཡགརུཀོཡེཝེཏྠ ཝིནཡ-སདྡེན ཝུཏྟོ, ཝིནཡསྶ ཝཱ ཨེསཱ དྷམྨཏཱ ཏེསཾ གརུགཱརཝཊྛཱནསྶ ཝིནཡཝིསཡཏྟཱ.

ཨིདཱནི སངྑེཔཊྛཀཐཱདཱིསུ ཝུཏྟཾ པཱལི༹ཡཱཔི ན སམེཏཱིཏི དསྶེནྟོ ཨཱཧ ‘‘ཨཔིཙཱ’’ཏིཨཱདི. བྷཱཛནནྟི པཏྟཱདིབྷཱཛནཾ. པཏྟཱདིཾ ཨཔཱུརེཏྭཱ གཎྷནྟསྶ ཨནུདྡྷཊེཔི མུཁཝཊྚིཔརིཙྪེདོ ཧོཏི, པཱུརེཏྭཱ གཎྷནྟསྶ པན ཨུདྡྷརཎཀཱལེ ཧོཏཱིཏི ཨཱཧ ‘‘མུཁཝཊྚིཔརིཙྪེདེན ཝཱ ཨུདྡྷཱརེན ཝཱ’’ཏི. ཡདཱ པན ཏེལཀུམྦྷཱིཨཱདཱིསུ ཏེལཱདཱིནཾ ཨབཧུབྷཱཝཏོ བྷཱཛནཾ ¶ ནིམུཛྫཱཔེཏྭཱ གཎྷིཏུཾ ན སཀྐཱ ཧོཏི, ཏདཱ མུཁཝཊྚིཔརིཙྪེདེནེཝ ཧོཏི. ཙིཀྐནནྟི ཐདྡྷཾ. ཨཱཀཌྜྷནཝིཀཌྜྷནཡོགྒནྟི ཨེཏྠ ཨབྷིམུཁཾ ཀཌྜྷནཾ ཨཱཀཌྜྷནཾ, པརཏོ ཀཌྜྷནཾ ཝིཀཌྜྷནཾ. པཊིནཱིཧརིཏུནྟི ཨཏྟནོ བྷཱཛནཏོ པཊིནཱིཧརིཏུཾ. ཧཏྠཏོ མུཏྟམཏྟེ པཱརཱཛིཀནྟི ཐེཡྻཙིཏྟེན པརསནྟཀགྒཧཎཔཡོགསྶ ཀཏཏྟཱ. མཧཱཨཊྛཀཐཱཡམེཝ ‘‘སཙེཔི མརིཡཱདཾ དུབྦལཾ ཀཏྭཱ སུཀྑཏལཱ༹ཀསྶ ཨུདཀནིབྦཧནཊྛཱནཾ ཨུདཀནིདྡྷམནཏུམྦཾ ཝཱ པིདཧཏི, ཨཉྙཏོ ཙ གམནམགྒེ ཝཱ པཱལི༹ཾ བནྡྷཏི, སུཀྑམཱཏིཀཾ ཝཱ ཨུཛུཾ ཀརོཏི, པཙྪཱ དེཝེ ཝུཊྛེ ཨུདཀཾ ཨཱགནྟྭཱ མརིཡཱདཾ བྷིནྡཏི, སབྦཏྠ བྷཎྜདེཡྻ’’ནྟི ཝུཏྟཏྟཱ ‘‘ཏཾ པན ཏཏྠེཝ སུཀྑཏལཱ༹ཀེ སུཀྑམཱཏིཀཱཡ ཨུཛུཀརཎཝིནིཙྪཡེན ཝིརུཛ྄ཛྷཏཱི’’ཏི ཝུཏྟཾ.

ཨཝཧཱརལཀྑཎནྟི པཉྩཝཱིསཏིཡཱ ཨཝཧཱརེསུ ཨེཀམྤི ཨཝཧཱརལཀྑཎཾ, ཋཱནཱཙཱཝནཔཡོགོ ཨེཝ ཝཱ. ཨུདྡྷཱརེཏི ཀུམྦྷིཡཱ ཕུཊྛཊྛཱནཏོ ཀེསགྒམཏྟེཔི ཨུདྡྷཊེ. ཡུཏྟནྟི ཋཱནཱཙཱཝནཔཡོགསབྦྷཱཝཏོ ཡུཏྟཾ. སངྒོཔནཏྠཱཡཱཏི ཨིམིནཱ སུདྡྷཙིཏྟཏཾ དསྶེཏི. པལིབུཛ྄ཛྷིསྶཏཱིཏི ནིཝཱརེསྶཏི. ཝུཏྟནཡེནེཝ པཱརཱཛིཀནྟི ཧཏྠཏོ མུཏྟམཏྟེཡེཝ པཱརཱཛིཀཾ. སུདྡྷཙིཏྟོཝ ¶ ཨུདྡྷརཏཱིཏི ཀུམྦྷིཡཾ ཏེལསྶ ཨཱཀིརཎཏོ པུརེཏརམེཝ སུདྡྷཙིཏྟོ ནིཀྑིཔིཏྭཱ པཙྪཱ སུདྡྷཙིཏྟོཝ ཨུདྡྷརཏི. ནེཝ ཨཝཧཱརོཏི ཐེཡྻཙིཏྟེན ཨཝཧརཎཔཡོགསྶ ཨཀཏཏྟཱ. ཨཏྟནོ བྷཱཛནཏྟཱ པན ‘‘ན གཱིཝཱ’’ཏི ཝུཏྟཾ, ཨནཱཔཏྟིམཏྟམེཝ ཝུཏྟཾ, ན པན ཨེཝཾ ཝིཙཱརིཏནྟི ཨདྷིཔྤཱཡོ. ཨཐ ཝཱ ཨནཱཔཏྟིམཏྟམེཝ ཝུཏྟནྟི ཨིམིནཱཔི ཏཏྠ ‘‘གཱིཝཱ’’ཏི ཝཙནཱབྷཱཝཏོ ‘‘ན གཱིཝཱ’’ཏི པུབྦེ ཝུཏྟམཧཱཨཊྛཀཐཱཝཱདམེཝ པཏིཊྛཱཔེཏི, པཙྪཱ དསྶིཏེན ཀུརུནྡིཝཱདེནཔི མཧཱཨཊྛཀཐཱཝཱདོཝ སམཏྠིཏོ. ཨཏྟནོ བྷཎྜནྟི ཏེལཱཀིརཎཏོ པུརེཏརམེཝ ཨཏྟནོ ཀུམྦྷིཡཾ སུདྡྷཙིཏྟེན ཋཔིཏཾ པཱིཏཏེལཾ ཨཏྟནོ པརིཀྑཱརཾ. སམྨོཧཊྛཱནནྟི ཨཱཔཏྟིཝིནིཙྪཡཝསེན སམྨོཧཊྛཱནཾ.

བཧིགཏཾ ནཱམ ཧོཏཱིཏི ཏཏོ པཊྛཱཡ ཏེལསྶ ཨཊྛཱནབྷཱཝཏོ ཨདྷོམུཁབྷཱཝཏོ ཙ བཧིགཏཾ ནཱམ ཧོཏི. ཨནྟོ པཊྛཱཡ ཚིདྡེ ཀརིཡམཱནེ ཏེལསྶ ནིཀྑམིཏྭཱ གཏགཏཊྛཱནཾ བྷཱཛནསངྑྱམེཝ གཙྪཏཱིཏི ཨཱཧ – ‘‘བཱཧིརནྟཏོ པཱདགྒྷནཀེ གལི༹ཏེ པཱརཱཛིཀ’’ནྟི. ཡཐཱ ཏཐཱ ཝཱ ཀཏསྶཱཏི བཱཧིརནྟཏོ ཨབྦྷནྟརཏོ ཝཱ པཊྛཱཡ ཀཏསྶ. མཛ྄ཛྷེ ཋཔེཏྭཱ ཀཏཚིདྡེཏི མཛ྄ཛྷེ ཐོཀཾ ཀཔཱལཾ ཋཔེཏྭཱ པཙྪཱ ཏཾ ཚིནྡནྟེན ཀཏཚིདྡེ. ‘‘མརིཡཱདཙྪེདནེ ཨནྟོ ཋཏྭཱ བཧིམུཁོ ཚིནྡནྟོ བཧི ཨནྟེན ཀཱརེཏབྦོ, བཧི ཋཏྭཱ ཨནྟོམུཁོ ཚིནྡནྟོ ཨནྟོ ཨནྟེན ཀཱརེཏབྦོ, ཨནྟོ ཙ བཧི ཙ ཚིནྡིཏྭཱ མཛ྄ཛྷེ ཋཔེཏྭཱ ཏཾ ཚིནྡནྟོ མཛ྄ཛྷེན ཀཱརེཏབྦོ’’ཏི (པཱརཱ. ཨཊྛ. ༡.༡༠༨) ཝུཏྟཏྟཱ ‘‘ཏལཱ༹ཀསྶ ཙ མརིཡཱདབྷེདེན སམེཏཱི’’ཏི ཝུཏྟཾ. ཨིདམེཏྠ ཡུཏྟནྟི ¶ ཨནྟོ ཙ བཧི ཙ པཊྛཱཡ ཀཏཚིདྡེ མཛ྄ཛྷེན ཀཱརེཏབྦོ. ཨནྟོ པཊྛཱཡ ཀཏེ པན བཱཧིརནྟེན, བཧི པཊྛཱཡ ཀཏེ ཨབྦྷནྟརེན ཀཱརེཏབྦོཏི ཨཡཾ ཏིཔྤཀཱརོཔི ཨེཏྠ ཝེམཊྛཚིདྡེ ཡུཏྟོ. ཨུདཀེ ཀཏཔཡོགསྶ ཨབྷཱཝཏོ ‘‘ཋཱནཱཙཱཝནཔཡོགསྶ ཨབྷཱཝཱ’’ཏི ཝུཏྟཾ.

ཨཊྛཀཐཱཡཾ ཏཱཝ ཝུཏྟནྟི མཧཱཨཊྛཀཐཱཡཾ ཝུཏྟཾ. པཏྠིནྣསྶ ཁཱདནཾ ཨིཏརསྶ པཱནཉྩ སཔྤིཨཱདཱིནཾ པརིབྷོགོཏི ཨཱཧ – ‘‘ཨཁཱདིཏབྦཾ ཝཱ ཨཔཱཏབྦཾ ཝཱ ཀརོཏཱི’’ཏི. ཀཐཾ པན ཏཐཱ ཀརོཏཱིཏི ཨཱཧ ‘‘ཨུཙྩཱརཾ ཝཱ པསྶཱཝཾ ཝཱ’’ཏིཨཱདི. ཀསྨཱ པནེཏྠ དུཀྐཊཾ ཝུཏྟནྟི ཨཱཧ ‘‘ཋཱནཱཙཱཝནསྶ ནཏྠིཏཱཡ དུཀྐཊ’’ནྟི. པུརིམདྭཡནྟི བྷེདནཾ ཚཌྜནཉྩ. ཀསྨཱ ན སམེཏཱིཏི ¶ ཨཱཧ ‘‘ཏཉྷཱི’’ཏིཨཱདི. ཀུམྦྷིཛཛྫརཀརཎེནཱཏི པུཎྞཀུམྦྷིཡཱ ཛཛྫརཀརཎེན. མཱཏིཀཱཨུཛཨུཀརཎེནཱཏི ཨུདཀཔུཎྞཱཡ མཱཏིཀཱཡ ཨུཛུཀརཎེན. ཨེཀལཀྑཎནྟི བྷེདནཾ ཀུམྦྷིཛཛྫརཀརཎེན ཚཌྜནཾ མཱཏིཀཱཡ ཨུཛུཀརཎེན སདྡྷིཾ ཨེཀསབྷཱཝཾ ཋཱནཱཙཱཝནཔཡོགསབྦྷཱཝཏོ. པཙྪིམཾ པན དྭཡནྟི ཛྷཱཔནཾ ཨཔརིབྷོགཀརཎཉྩ.

ཨེཏྠ ཨེཝཾ ཝིནིཙྪཡཾ ཝདནྟཱིཏི ཨེཏྠ མཧཱཨཊྛཀཐཱཡཾ ཝུཏྟེ ཨེཀེ ཨཱཙརིཡཱ ཨེཝཾ ཝིནིཙྪཡཾ ཝདནྟི. པཙྪིམདྭཡཾ སནྡྷཱཡ ཝུཏྟནྟི ཨེཏྠ པུརིམདྭཡེ ཝིནིཙྪཡོ ཧེཊྛཱ ཝུཏྟཱནུསཱརེན སཀྐཱ ཝིཉྙཱཏུནྟི ཏཏྠ ཀིཉྩི ཨཝཏྭཱ པཙྪིམདྭཡཾ སནྡྷཱཡ ཋཱནཱཙཱཝནསྶ ནཏྠིཏཱཡ དུཀྐཊནྟི ཨིདཾ ཝུཏྟནྟི ཨདྷིཔྤཱཡོ. ཐེཡྻཙིཏྟེནཱཏི ཨཏྟནོ ཝཱ པརསྶ ཝཱ ཀཱཏུཀཱམཏཱཝསེན ཨུཔྤནྣཐེཡྻཙིཏྟེན. ཝིནཱསེཏུཀཱམཏཱཡཱཏི ཧཏྠཔཱདཱདིཾ ཚིནྡནྟོ ཝིཡ ཀེཝལཾ ཝིནཱསེཏུཀཱམཏཱཡ. པུརིམདྭཡེ ཀིཾ ཧོཏི, ཀིཾ ཨདྷིཔྤཱཡེན ན ཀིཉྩི ཝུཏྟནྟི ཨཱཧ – ‘‘པུརིམདྭཡེ པན…པེ… པཱརཱཛིཀ’’ནྟི. ཏཏྠ ཝུཏྟནཡེན བྷིནྡནྟསྶ ཝཱ ཚཌྜེནྟསྶ ཝཱཏི མུགྒརེན པོཐེཏྭཱ བྷིནྡནྟསྶ ཨུདཀཾ ཝཱ ཝཱལིཀཾ ཝཱ ཨཱཀིརིཏྭཱ ཨུཏྟརཱཔེནྟསྶཱཏི ཨཏྠོ. ཨཡུཏྟནྟི ཙེཏི པཱལི༹ཡཾ པུརིམཔདདྭཡེཔི དུཀྐཊསྶེཝ ཝུཏྟཏྟཱ ‘‘པུརིམདྭཡེ…པེ… པཱརཱཛིཀནྟི ཨིདཾ ཨཡུཏྟ’’ནྟི ཡདི ཏུམྷཱཀཾ སིཡཱཏི ཨཏྠོ. ནཱཏི ཨཡུཏྟབྷཱཝཔྤསངྒཾ ནིསེདྷེཏྭཱ ཏཏྠ ཀཱརཎམཱཧ ‘‘ཨཉྙཐཱ གཧེཏབྦཏྠཏོ’’ཏི. ཀཐཾ པནེཏྠ ཨཏྠོ གཧེཏབྦོཏི ཨཱཧ ‘‘པཱལི༹ཡཾ ཧཱི’’ཏིཨཱདི. ནཱསེཏུཀཱམཏཱཔཀྑེ ཧེཊྛཱ ཝུཏྟནཡེནེཝ ཨཏྠསྶ ཨཝིརུཛ྄ཛྷནཏོ ‘‘ཐེཡྻཙིཏྟཔཀྑེ’’ཏི ཝུཏྟཾ. ‘‘ཨེཝཾ ཝིནིཙྪཡཾ ཝདནྟཱི’’ཏི ཨིཏོ པཊྛཱཡ ཝུཏྟསྶ སབྦསྶཔི ཨེཀསྶེཝ ཝཙནཏྟཱ ‘‘ཨེཝམེཀེ ཝདནྟཱི’’ཏི ནིགམནཝསེན ཝུཏྟཾ.

ཨིདཱནི ཡཐཱཝུཏྟཝསེན པཱལི༹ཡཱ ཨཏྠེ གཡ྄ཧམཱནེ མཧཱཨཊྛཀཐཱཡཾ ཙཏུནྣམྤི སཱམཉྙཏོ ཝུཏྟསྶ པཙྪིམདྭཡཾ སནྡྷཱཡ ཝུཏྟནྟི ཝཙནེ ཝིསེསཱབྷཱཝཏོ པཱལི༹ཡཾ ཝུཏྟེསུ ཙཏཱུསུ པདེསུ ‘‘ཚཌྜེཏི ¶ ཝཱ ཨཔརིབྷོགཾ ཝཱ ཀརོཏཱི’’ཏི ཨིམེསཾ པདཱནཾ ཝིསེསཱབྷཱཝཔྤསངྒཏོ ཙ སཡཾ ཨཉྙཐཱ པཱལི༹ཾ ཨཊྛཀཐཉྩ སཾསནྡིཏྭཱ ཨཏྠཾ དསྶེཏུཀཱམོ ‘‘ཨཡཾ པནེཏྠ སཱརོ’’ཏིཨཱདིམཱཧ. ཝིནཱིཏཝཏྠུམྷི ‘‘སངྒྷསྶ པུཉྫཀིཏཾ ཏིཎཾ ཐེཡྻཙིཏྟོ ཛྷཱཔེསཱི’’སི (པཱརཱ. ༡༥༦) ཝུཏྟཏྟཱ ཝིནཱིཏཝཏྠུམྷི ཏིཎཛ྄ཛྷཱཔཀོ ཝིཡཱཏི ཨིམིནཱཝ ¶ ཋཱནཱ ཨཙཱཝེཏུཀཱམོཝཱཏི ཨེཏྠཱཔི ཐེཡྻཙིཏྟེན ཋཱནཱ ཨཙཱཝེཏུཀཱམོཏི ཨིདཾ ཝུཏྟམེཝ ཧོཏཱིཏི དཊྛབྦཾ. ཨཚཌྜེཏུཀཱམོཡེཝཱཏི ཨེཏྠཱཔི ཐེཡྻཙིཏྟེནཱཏི སམྦནྡྷིཏབྦཾ. ཨིདཉྷི ཐེཡྻཙིཏྟཔཀྑཾ སནྡྷཱཡ ཝུཏྟཾ ནཱསེཏུཀཱམཏཱཔཀྑསྶ ཝཀྑམཱནཏྟཱ. ཏེནེཝཱཧ ‘‘ནཱསེཏུཀཱམཏཱཔཀྑེ པནཱ’’ཏིཨཱདི. ཨིཏརཐཱཔི ཡུཛྫཏཱིཏི ཐེཡྻཙིཏྟཱབྷཱཝཱ ཋཱནཱ ཙཱཝེཏུཀཱམསྶཔི དུཀྐཊཾ ཡུཛྫཏཱིཏི ཝུཏྟཾ ཧོཏི.

བྷཱུམཊྛཀཐཱཝཎྞནཱ ནིཊྛིཏཱ.

ཨཱཀཱསཊྛཀཐཱཝཎྞནཱ

༩༦. ཨཱཀཱསཊྛཀཐཱཡཾ མུཁཏུཎྜཀེནཱཏི མུཁགྒེན. ཀལཱཔགྒེནཱཏི པིཉྪཀལཱཔསྶ ཨགྒེན. པསཱརེཏཱིཏི གཧཎཏྠཾ པསཱརེཏི. ཨགྒཧེཏྭཱ ཝཱཏི ལེཌྜུཨཱདཱིཧི པཧརིཏྭཱ ནཡནཝསེན ཨགྒཧེཏྭཱ ཝཱ. ཨཱཀཱསཊྛཝིནིཙྪཡེ ཝུཙྩམཱནེཔི ཏཔྤསངྒེན ཨཱཀཱསཊྛསྶ ཝེཧཱསཊྛཱདིབྷཱཝམུཔགཏེཔི ཨསམྨོཧཏྠཾ ‘‘ཡསྨིཾ ཨངྒེ ནིལཱིཡཏཱི’’ཏིཨཱདི ཝུཏྟཾ. ཨནྟོཝཏྠུམྷཱིཏི པརིཀྑིཏྟཝཏྠུསྶ ཨནྟོ. ཨནྟོགཱམེཏི པརིཀྑིཏྟསྶ གཱམསྶ ཨནྟོ. ཨཔརིཀྑིཏྟེ པན ཝཏྠུམྷི, གཱམེ ཝཱ ཋིཏཊྛཱནམེཝ ཋཱནཾ. ཨཊཝིམུཁཾ ཀརོཏཱིཏི ཨརཉྙཱབྷིམུཁཾ ཀརོཏི. རཀྑཏཱིཏི ཏེན པཡོགེན ཏསྶ ཨིཙྪིཏཊྛཱནཾ ཨགཏཏྟཱ རཀྑཏི. བྷཱུམིཡཱ གཙྪནྟཾ སནྡྷཱཡ ‘‘དུཏིཡཔདཝཱརེ ཝཱ’’ཏི ཝུཏྟཾ. གཱམཏོ ནིཀྑནྟསྶཱཏི པརིཀྑིཏྟགཱམཏོ ནིཀྑནྟསྶ. ཀཔིཉྫརོ ནཱམ ཨེཀཱ པཀྑིཛཱཏི.

ཨཱཀཱསཊྛཀཐཱཝཎྞནཱ ནིཊྛིཏཱ.

ཝེཧཱསཊྛཀཐཱཝཎྞནཱ

༩༧. ཝེཧཱསཊྛཀཐཱཡཾ པན ཙཱིཝརཝཾསེ ཋཔིཏསྶ ཙཱིཝརསྶ ཨཱཀཌྜྷནེ ཡཐཱཝུཏྟཔྤདེསཱཏིཀྐམོ ཨེཀདྭངྒུལམཏྟཱཀཌྜྷནེན སིཡཱཏི ཨདྷིཔྤཱཡེན ཝུཏྟཾ ‘‘ཨེཀདྭངྒུལམཏྟཱཀཌྜྷནེནེཝ པཱརཱཛིཀ’’ནྟི. ཨིདཉྩ ཏཱདིསཾ ནཱཏིམཧནྟཾ ཙཱིཝརཝཾསདཎྜཀཾ སནྡྷཱཡ ཝུཏྟཾ, མཧནྟེ པན ཏཏོ ཨདྷིཀམཏྟཱཀཌྜྷནེནེཝ ¶ སིཡཱ. རཛྫུཀེན བནྡྷིཏྭཱཏི ཨེཀཱཡ རཛྫུཀོཊིཡཱ ཙཱིཝརཾ བནྡྷིཏྭཱ ¶ ཨཔརཱཡ ཀོཊིཡཱ ཙཱིཝརཝཾསཾ བནྡྷིཏྭཱ ཋཔིཏཙཱིཝརཾ. མུཏྟམཏྟེ ཨཊྛཏྭཱ པཏནཀསབྷཱཝཏྟཱ ‘‘མུཏྟེ པཱརཱཛིཀ’’ནྟི ཝུཏྟཾ.

ཨེཀམེཀསྶ ཕུཊྛོཀཱསམཏྟེ ཨཏིཀྐནྟེ པཱརཱཛིཀནྟི བྷིཏྟིཾ ཨཕུསཱཔེཏྭཱ ཋཔིཏཏྟཱ ཝུཏྟཾ. བྷིཏྟིཾ ནིསྶཱཡ ཋཔིཏནྟི པཊིཔཱཊིཡཱ ཋཔིཏེསུ ནཱགདནྟཱདཱིསུཡེཝ ཨཱརོཔེཏྭཱ བྷིཏྟིཾ ཕུསཱཔེཏྭཱ ཋཔིཏཾ. པཎྞནྟརཾ ཨཱརོཔེཏྭཱ ཋཔིཏཱཏི ཨཉྙེཧི ཋཔིཏཾ སནྡྷཱཡ ཝུཏྟཾ.

ཝེཧཱསཊྛཀཐཱཝཎྞནཱ ནིཊྛིཏཱ.

ཨུདཀཊྛཀཐཱཝཎྞནཱ

༩༨. ཨུདཀཊྛཀཐཱཡཾ སནྡམཱནཨུདཀེ ནིཀྑིཏྟཾ ན ཏིཊྛཏཱིཏི ཨཱཧ ‘‘ཨསནྡནཀེ ཨུདཀེ’’ཏི. ཨནཱཔཏྟཱིཏི ཧཏྠཝཱརཔདཝཱརེསུ དུཀྐཊཱཔཏྟིཡཱ ཨབྷཱཝཾ སནྡྷཱཡ ཝུཏྟཾ. ཀཌྜྷཏཱིཏི ཧེཊྛཏོ ཨོསཱརེཏི. ཨུཔྤལཱདཱིསཱུཏི ཨཱདི-སདྡེན པདུམཔུཎྜརཱིཀཱདིཾ སངྒཎྷཱཏི. རཏྟཾ པདུམཾ, སེཏཾ པུཎྜརཱིཀཾ. སེཏཾ ཝཱ པདུམཾ, རཏྟཾ པུཎྜརཱིཀཾ. ཨཐ ཝཱ རཏྟཾ ཝཱ ཧོཏུ སེཏཾ ཝཱ སཏཔཏྟཾ པདུམཾ, ཨཱུནསཏཔཏྟཾ པུཎྜརཱིཀཾ. ཝཏྠུ པཱུརཏཱིཏི པཱརཱཛིཀཝཏྠུ པཧོཏི. ཏསྨིཾ ཚིནྣམཏྟེ པཱརཱཛིཀནྟི ཨུདཀཏོ ཨཙྩུགྒཏསྶ ཨུདཀཝིནིམུཏྟཊྛཱནཏོ ཚེདནཾ སནྡྷཱཡ ཝུཏྟཾ. ཡཾ ཝཏྠུཾ པཱུརེཏཱིཏི ཡཾ པུཔྥཾ པཱརཱཛིཀཝཏྠུཾ པཱུརེཏི. དསཧི པུཔྥེཧི ཀཏཀལཱཔོ ཧཏྠཀོ, མཧནྟཾ ཀལཱཔཾ ཀཏྭཱ བདྡྷཾ བྷཱརབདྡྷཾ. རཛྫུཀེསུ ཏིཎཱནི སནྠརིཏྭཱཏི ཨེཏྠ ‘‘དྭེ རཛྫུཀཱནི ཨུདཀཔིཊྛེ ཋཔེཏྭཱ ཏེསཾ ཨུཔརི ཏིརིཡཏོ ཏིཎཱནི སནྠརིཏྭཱ ཏེསཾ ཨུཔརི བནྡྷིཏྭཱ ཝཱ ཨབནྡྷིཏྭཱ ཝཱ ཏིརིཡཏོཡེཝ པུཔྥཱནི ཋཔེཏྭཱ ཧེཊྛཏོ གཏཱནི དྭེ རཛྫུཀཱནི ཨུཀྑིཔིཏྭཱ པུཔྥམཏྠཀེ ཋཔེནྟཱི’’ཏི ཝདནྟི.

ཀེསགྒམཏྟམྤི ཡཐཱཋིཏཊྛཱནཏོ ཙཱཝེཏཱིཏི པཱརིམནྟེན ཕུཊྛོཀཱསཾ, ཨོརིམནྟེན ཀེསགྒམཏྟཾ ཙཱཝེཏི. སཀལམུདཀནྟི དཎྜེན ཕུཊྛོཀཱསགཏཾ སཀལམུདཀཾ. ན ཨུདཀཾ ཋཱནནྟི ཨཏྟནཱ ཀཏཊྛཱནསྶ ཨཊྛཱནཏྟཱ. ཨིདཾ ཨུབྷཡནྟི ཨེཏྠ ‘‘བནྡྷནཾ ཨམོཙེཏྭཱ…པེ… པཱརཱཛིཀ’’ནྟི ཨིདམེཝེཀཾ, ‘‘པཋམཾ བནྡྷནཾ…པེ… ཋཱནཔརིཙྪེདོ’’ཏི ཨིདཾ དུཏིཡཾ. པདུམིནིཡནྟི པདུམགཙྪེ. ཨུཔྤཱཊིཏཱཡཱཏི པརེཧི ཨཏྟནོ ཨཏྠཱཡ ཨུཔྤཱཊིཏཱཡ.

བཧི ¶ ཋཔིཏེཏི ཨུདཀཏོ བཧི ཋཔིཏེ. ཧཏྠཀཝསེན ཁུདྡཀཾ ཀཏྭཱ

བདྡྷཾ ཀལཱཔབདྡྷཾ. མུལཱ༹ལནྟི ཀནྡཾ. པཏྟཾ ཝཱ པུཔྥཾ ཝཱཏི ཨིདཾ ཀདྡམསྶ ཨནྟོ པཝིསིཏྭཱ ཋིཏཾ སནྡྷཱཡ ཝུཏྟཾ. སཀལམུདཀནྟི ¶ ཝཱཔིཨཱདཱིསུ པརིཡཱཔནྣཾ སཀལམུདཀཾ. ནིདྡྷམནཏུམྦནྟི ཝཱཔིཡཱ ཨུདཀསྶ ནིཀྑམནམགྒཾ. ཨུདཀཝཱཧཀནྟི མཧཱམཱཏིཀཾ. ན ཨཝཧཱརོཏི ཨིདཾ པུབྦསདིསཾ ན ཧོཏཱིཏི ཨཱཧ – ‘‘ཀསྨཱ…པེ… ཨེཝརཱུཔཱ ཧི ཏཏྠ ཀཏིཀཱ’’ཏི. ཨཝཧཱརོ ནཏྠཱིཏི སབྦསཱདྷཱརཎེ ཨཔརིགྒཧཊྛཱནེ གཧིཏཏྟཱ. མཱཏིཀཾ ཨཱརོཔེཏྭཱཏི ཁུདྡཀམཱཏིཀཾ ཨཱརོཔེཏྭཱ. མརིཏྭཱ…པེ… ཏིཊྛནྟཱིཏི ཨེཏྠ ‘‘མཏམཙྪཱནཾཡེཝ ཏེསཾ སནྟཀཏྟཱ ཨམཏེ གཎྷནྟསྶ ནཏྠི ཨཝཧཱརོ’’ཏི ཝདནྟི.

ཨུདཀཊྛཀཐཱཝཎྞནཱ ནིཊྛིཏཱ.

ནཱཝཊྛཀཐཱཝཎྞནཱ

༩༩. ནཱཝཊྛཀཐཱཡཾ པན ཡཱ བནྡྷནཱ མུཏྟམཏྟེ ཋཱནཱ ན ཙཝཏཱིཏི ཨིམིནཱ ཙཎྜསོཏེ བདྡྷནཱཝཾ པཊིཀྑིཔཏི. ཏཱཝ དུཀྐཊནྟི ‘‘བནྡྷནཾ མོཙེཏི, ཨཱཔཏྟི དུཀྐཊསྶཱ’’ཏི ཨེཝཾ མོཙེནྟསྶ པཉྙཏྟཾ དུཀྐཊཾ སནྡྷཱཡ ཝུཏྟཾ. ཐུལླཙྩཡམྤི པཱརཱཛིཀམྤི ཧོཏཱིཏི ཨེཏྠ པཋམཾ ཋཱནཱ ཨཙཱཝེཏྭཱ མུཏྟེ ཐུལླཙྩཡཾ, པཋམཾ ཋཱནཱ ཙཱཝེཏྭཱ མུཏྟེ པཱརཱཛིཀནྟི ཝེདིཏབྦཾ.

‘‘པཱསེ བདྡྷསཱུཀརོ ཝིཡཱ’’ཏིཨཱདིནཱ ཝུཏྟཾ སནྡྷཱཡཱཧ ‘‘ཏཏྠ ཡུཏྟི པུབྦེ ཝུཏྟཱ ཨེཝཱ’’ཏི. ཝིཔྤནཊྛཱ ནཱཝཱཏི ཝིསམཝཱཏཱདཱིཧི ཝིནཱསཾ པཏྭཱ ཨུདཀེ ནིམུཛྫིཏྭཱ ཧེཊྛཱ བྷཱུམིཏལཾ ཨཔྤཏྭཱ མཛ྄ཛྷེ ཋིཏཾ སནྡྷཱཡ ཝདཏི. ཏེནེཝ ‘‘ཨདྷོ ཝཱ ཨོཔིལཱཔེནྟསྶ…པེ… ནཱཝཱཏལེན ཕུཊྛོཀཱསཾ མུཁཝཊྚིཾ ཨཏིཀྐནྟམཏྟེ པཱརཱཛིཀ’’ནྟི ཝུཏྟཾ. ཨོཔིལཱཔེནྟསྶཱཏི ཨོསཱིདཱཔེནྟསྶ. ཨཏིཀྐནྟམཏྟེཏི ཕུཊྛོཀཱསཾ ཨཏིཀྐནྟམཏྟེ. ཨེསེཝ ནཡོཏི མུཏྟམཏྟེ པཱརཱཛིཀནྟི དསྶེཏི.

ནཱཝཱཀཌྜྷནཡོགྒམཧཱཡོཏྟཏཱཡ ཡོཏྟཀོཊིཏོ པཊྛཱཡ སཀལམྤི ‘‘ཋཱན’’ནྟི ཝུཏྟཾ.

ཨསཏིཔི ཝཱཏེ ཡཐཱ ཝཱཏཾ གཎྷཱཏི, ཏཐཱ ཋཔིཏཏྟཱ ‘‘ཝཱཏཾ གཎྷཱཔེཏཱི’’ཏི ཝུཏྟཾ. བལཝཱ ཙ ཝཱཏོ ཨཱགམྨཱཏི ཨིམིནཱ ¶ ཨསཏི ཝཱཏེ ཨཡཾ པཡོགོ ཀཏོཏི དསྶེཏི. ཏེནེཝ ‘‘པུགྒལསྶ ནཏྠི ཨཝཧཱརོ’’ཏི ཝུཏྟཾ. སཏི པན ཝཱཏེ ཀཏོ པཡོགོ ཋཱནཱཙཱཝནཔཡོགོཡེཝཱཏི མཱཏིཀཱཨུཛུཀརཎེ ཝིཡ ཨཏྠེཝ ཨཝཧཱརོཏི དཊྛབྦཾ. ཋཱནཱཙཱཝནཔཡོགོ ན ཧོཏཱིཏི སུཀྑམཱཏིཀཱཨུཛུཀརཎེ ཝིཡ ཨསཏི ཝཱཏེ ཀཏཔཡོགཏྟཱ. བྷཎྜདེཡྻཾ པན ཧོཏཱིཏི ནཱཝཱསཱམིཀསྶ བྷཎྜདེཡྻཾ ཧོཏི.

ནཱཝཊྛཀཐཱཝཎྞནཱ ནིཊྛིཏཱ.

ཡཱནཊྛཀཐཱཝཎྞནཱ

༡༠༠. ཡཱནཊྛཀཐཱཡཾ ¶ དུཀཡུཏྟསྶཱཏི དྭཱིཧི གོཎེཧི ཡུཏྟསྶ. ཨཡུཏྟཀནྟི གོཎེཧི ཨཡུཏྟཾ. ཀཔྤཀཏཱཏི ཡཐཱ དྭཱིཧི བྷཱགེཧི ཧེཊྛཱ པཏིཊྛཱཏི, ཨེཝཾ ཀཏཱ. ཏཱིཎི ཝཱ ཙཏྟཱརི ཝཱ ཋཱནཱནཱིཏི ཨཀཔྤཀཏཱཡ ཨུཔཏྠམྦྷནིཡཱ ཝསེན ཏཱིཎི ཋཱནཱནི, ཀཔྤཀཏཱཡ ཝསེན ཙཏྟཱརི ཋཱནཱནཱིཏི. ཏཐཱ པཐཝིཡཾ ཋཔིཏསྶ ཏཱིཎི ཋཱནཱནཱིཏི སམྦནྡྷོ. ཏནྟི ཕལཀསྶ ཝཱ དཱརུཀསྶ ཝཱ ཨུཔརི ཋཔིཏཾ པཐཝིཡཾ ཋཔིཏཉྩ. དྭཱིཧི ཨཀྑསཱིསེཧཱིཏི དྭཱིཧི ཨཀྑཀོཊཱིཧི. དཱརཱུནཾ ཨུཔརི ཋཔིཏསྶཱཏི དྭིནྣཾ དཱརཱུནཾ ཨུཔརི དྭཱིཧི ཨཀྑཀོཊཱིཧི ཨོལམྦེཏྭཱ སཀཊསཱལཱཡཾ ཋཔིཏསྶ. ཧེཊྛིམཏལསྶཱཏི སཀཊབཱཧཱཡ བྷཱུམིཾ ཕུསིཏྭཱ ཋིཏསྶ ཧེཊྛིམབྷཱགསྶ. སེསཾ ནཱཝཱཡཾ ཝུཏྟསདིསནྟི ཨིམིནཱ ‘‘ཡདི པན ཏཾ ཨེཝཾ གཙྪནྟཾ པཀཏིགམནཾ ཨུཔཙྪིནྡིཏྭཱ ཨཉྙཾ དིསཱབྷཱགཾ ནེཏི, པཱརཱཛིཀཾ. སཡམེཝ ཡཾ ཀཉྩི གཱམཾ སམྤཏྟཾ ཋཱནཱ ཨཙཱཝེནྟོཝ ཝིཀྐིཎིཏྭཱ གཙྪཏི, ནེཝཏྠི ཨཝཧཱརོ, བྷཎྜདེཡྻཾ པན ཧོཏཱི’’ཏི ཨིམཾ ནཡཾ ཨཏིདིསྶཏི.

ཡཱནཊྛཀཐཱཝཎྞནཱ ནིཊྛིཏཱ.

བྷཱརཊྛཀཐཱཝཎྞནཱ

༡༠༡. བྷཱརཊྛཀཐཱཡཾ པུརིམགལེ གལཝཱཊཀོཏི པུརིམགལེ ཨུཔརིམགལཝཱཊཀོ. ཨུརཔརིཙྪེདམཛ྄ཛྷེཏི ཨུརཔརིཡནྟསྶ མཛ྄ཛྷེ. ཨནཱཎཏྟཏྟཱཏི ‘‘ཨསུཀཊྛཱནཾ ནེཧཱི’’ཏི ཨནཱཎཏྟཏྟཱ. ཡོ ཙཱཡཾ སཱིསབྷཱརེ ¶ ཝུཏྟོཏི ཡོ ཙཱཡཾ ཝིནིཙྪཡོ སཱིསབྷཱརེ ཝུཏྟོ. སཱིསཱདཱིཧི ཝཱ གཧིཏོ ཧོཏཱུཏི སམྦནྡྷོ. ཏཱདིསནྟི ཏཔྤཊིཙྪཱདནསམཏྠཾ.

བྷཱརཊྛཀཐཱཝཎྞནཱ ནིཊྛིཏཱ.

ཨཱརཱམཊྛཀཐཱཝཎྞནཱ

༡༠༢. ཨཱརཱམཊྛཀཐཱཡཾ བནྡྷནནྟི པུཔྥཱནཾ ཝཎྚེ པཏིཊྛིཏཊྛཱནཾ. ཨབྷིཡུཉྫཏཱིཏི ཙོདེཏི ཨཌྜཾ ཀརོཏི. ཨདིནྣཱདཱནསྶ པཡོགཏྟཱཏི སཧཔཡོགམཱཧ ཝཏྠུམྷིཡེཝ ཀཏཔཡོགཏྟཱ. སཧཔཡོགཝསེན ཧེཏཾ དུཀྐཊཾ. ཝིནིཙྪཡཔྤསུཏནྟི ཝིནིཙྪཡེ ནིཡུཏྟཾ. ཀཀྑལོ༹ཏི དཱརུཎོ. དྷུརཾ ནིཀྑིཔཏཱིཏི ཨུསྶཱཧཾ ཋཔེཏི, ཨཏྟནོ སནྟཀཀརཎེ ནིརུསྶཱཧོ ཧོཏཱིཏི ཨཏྠོ. ཀཱུཊཌྜཀཱརཀོཔི ¶ སཙེ དྷུརཾ ན ནིཀྑིཔཏི, ནཏྠི ཨཝཧཱརོཏི ཨཱཧ ‘‘སཙེ སཡམྤི ཀཏདྷུརནིཀྑེཔོ ཧོཏཱི’’ཏི. སཡམྤཱིཏི ཨབྷིཡུཉྫཀོཔི. ཀཏདྷུརནིཀྑེཔོཏི ‘‘ན དཱནི ནཾ ཨིམསྶ དསྶཱམཱི’’ཏི ཨེཝཾ ཏསྶ དཱནེ ཀཏདྷུརནིཀྑེཔོ. ཀིངྐཱརཔྤཊིསྶཱཝིབྷཱཝེཏི ‘‘ཀིཾ ཀརོམི ཀིཾ ཀརོམཱི’’ཏི ཨེཝཾ ཀིངྐཱརམེཝ པཊིསྶུཎནྟོ ཝིཙརཏཱིཏི ཀིངྐཱརཔཊིསྶཱཝཱི, ཏསྶ བྷཱཝོ ཀིངྐཱརཔཊིསྶཱཝིབྷཱཝོ, ཏསྨིཾ, ཨཏྟནོ ཝསཝཏྟིབྷཱཝེཏི ཝུཏྟཾ ཧོཏི.

ཨུཀྐོཙཾ དཏྭཱཏི ལཉྫཾ དཏྭཱ. ཀཱུཊཝིནིཙྪཡིཀཱནནྟི ཀཱུཊཝིནིཙྪཡེ ནིཡུཏྟཱནཾ ཝིནཡདྷརཱནཾ. ‘‘གཎྷཱ’’ཏི ཨཝཏྭཱ ‘‘ཨསཱམིཀསྶ སཱམིཀོ ཨཡ’’ནྟིཨཱདིནཱ པརིཡཱཡེན ཝུཏྟེཔི ཏསྶ སནྟཀབྷཱཝཾ པརིཙྪིནྡིཏྭཱ པཝཏྟཝཙནཏྟཱ ཀཱུཊཝིནིཙྪཡཾ ཀརོནྟཱནཾ ཀཱུཊསཀྑཱིནཉྩ པཱརཱཛིཀམེཝ. ཨསཏིཔི ཙེཏྠ ཋཱནཱཙཱཝནེ ཨུབྷིནྣཾ དྷུརནིཀྑེཔོཡེཝ ཋཱནཱཙཱཝནཊྛཱནེ ཏིཊྛཏི. ཨིམསྨིཾ དྷུརནིཀྑེཔེ པཱརཱཛིཀེ སཱམིཀསྶ ཝིམཏུཔྤཱདནཔཡོགེ ཀཏེ ཐུལླཙྩཡཾ, ཏསྶེཝ དྷུརནིཀྑེཔཔཡོགེ ནིཔྥཱདིཏེ པཱརཱཛིཀཾ. སཡཾ པརཱཛཡཾ པཱཔུཎཱཏཱིཏི ཀཱུཊཌྜཀཱརཀོ པརཱཛཡཾ པཱཔུཎཱཏི.

ཨཱརཱམཊྛཀཐཱཝཎྞནཱ ནིཊྛིཏཱ.

ཝིཧཱརཊྛཀཐཱཝཎྞནཱ

༡༠༣. ཝིཧཱརཊྛཀཐཱཡཾ ¶ ཝིཧཱརོཔི པརིཝེཎམྤི ཨཱཝཱསོཔི ཝིཧཱརོཏྭེཝ སངྑཾ གཙྪཏཱིཏི ཨཱཧ ‘‘ཝིཧཱརཾ ཝཱ’’ཏིཨཱདི. ཏཏྠ ཝིཧཱརནྟི མཧཱཝིཧཱརཾ. པརིཝེཎནྟི མཧཱཝིཧཱརསྶ ཨབྦྷནྟརེ ཝིསུཾ ཝིསུཾ པཱཀཱརཔརིཙྪིནྣཊྛཱནཾ. ཨཱཝཱསནྟི ཨེཀཾ ཨཱཝསཐཾ. ཨབྷིཡོགེ ཀཏེཔི ཨཝཧཱརསྶ ཨསིཛ྄ཛྷནཏོ ཝུཏྟཾ ‘‘ཨབྷིཡོགོ ན རུཧཏཱི’’ཏི. གཎསནྟཀེ པན པརིཙྪིནྣསཱམིཀཏྟཱ སཀྐཱ དྷུརཾ ནིཀྑིཔཱཔེཏུནྟི ཨཱཧ ‘‘དཱིགྷབྷཱཎཀཱདིབྷེདསྶ པན གཎསྶཱ’’ཏི. ཨིདྷཱཔི སཙེ ཨེཀོཔི དྷུརཾ ན ནིཀྑིཔཏི, རཀྑཏིཡེཝ. སབྦེསཾ དྷུརནིཀྑེཔེནེཝ ཧི པཱརཱཛིཀཾ.

ཝིཧཱརཊྛཀཐཱཝཎྞནཱ ནིཊྛིཏཱ.

ཁེཏྟཊྛཀཐཱཝཎྞནཱ

༡༠༤. ཁེཏྟཊྛཀཐཱཡཾ སཏྟ དྷཉྙཱནཱིཏི སཱལིཝཱིཧིཡཝཀངྒུཀུདྲཱུསཝརཀགོདྷུམཱནཾ ཝསེན སཏྟ དྷཉྙཱནི ¶ . ནིརུམྦྷིཏྭཱ ཝཱཏིཨཱདཱིསུ ‘‘གཎྷནྟསྶཱ’’ཏི པཙྩེཀཾ ཡོཛེཏབྦཾ. ཏཏྠ ནིརུམྦྷིཏྭཱ གཧཎཾ ནཱམ ཝཱིཧིསཱིསཾ ཨཙྪིནྡིཏྭཱ ཡཐཱཋིཏམེཝ ཧཏྠེན གཧེཏྭཱ ཨཱཀཌྜྷིཏྭཱ བཱིཛམཏྟསྶེཝ གཧཎཾ. ཨེཀམེཀནྟི ཨེཀམེཀཾ ཝཱིཧིསཱིསཾ. ཨུཔྤཱཊེཏྭཱ ཝཱཏི མུགྒམཱསཱདཱིནི ཨུདྡྷརིཏྭཱ ཝཱ. ཡསྨིཾ བཱིཛེ ཝཱཏིཨཱདི ནིརུམྦྷིཏྭཱ གཧཎཱདཱིསུ ཡཐཱཀྐམཾ ཡོཛེཏབྦཾ. སཱལིསཱིསཱདཱིནི ནིརུམྦྷིཏྭཱ གཎྷནྟསྶ ཡསྨིཾ བཱིཛེ ཝཏྠུ པཱུརཏི, ཨེཀམེཀཾ ཧཏྠེནེཝ ཚིནྡིཏྭཱ གཎྷནྟསྶ ཡསྨིཾ སཱིསེ ཝཏྠུ པཱུརཏི, ཨསིཏེན ལཱཡིཏྭཱ གཎྷནྟསྶ ཡསྶཾ མུཊྛིཡཾ ཝཏྠུ པཱུརཏི, བཧཱུནི ཨེཀཏོ ཨུཔྤཱཊེཏྭཱ གཎྷནྟསྶ ཡསྨིཾ མུགྒམཱསཱདིཕལེ ཝཏྠུ པཱུརཏཱིཏི ཨེཝམེཏྠ ཡཐཱཀྐམོ ཝེདིཏབྦོ. ‘‘ཏསྨིཾ བནྡྷནཱ མོཙིཏམཏྟེ’’ཏི ཝཙནཏོ ཏསྨིཾ བཱིཛཱདིམྷི བནྡྷནཱ མོཙིཏེ སཏི ཏཏོ ཨནཔནཱིཏེཔི པཱརཱཛིཀམེཝཱཏི དཊྛབྦཾ. ཨཙྪིཛྫམཱནོཏི ཨཙྪིནྣོ ཧུཏྭཱ ཋིཏོ. ཛཊིཏཱནཱིཏི ཚིནྡིཏཱནི ཨཙྪིནྣེཧི སདྡྷིཾ ཛཊིཏཱནི ཧོནྟཱིཏི ཨཏྠོ. སབྷུསནྟི པལཱལསཧིཏཾ. ཨབྷུསནྟི པལཱལརཧིཏཾ.

ཁཱིལེནཱཏི ¶ ཁཱཎུཀེན. ཨེཏྠ ཙ ཁཱིལསངྐམནཱདཱིསུ ཨུབྷཡཾ སམྦྷཝཏི སཧཔཡོགོ དྷུརནིཀྑེཔོ ཙ. ཡདཱ ཧི པརསྶ ཁེཏྟཱདཱིསུ ཨེཀདེསཾ ཁཱིལསངྐམནཱདིཝསེན ཨཏྟནོ སནྟཀཾ ཀརོཏི, ཏདཱ སཏིཔི པཋམཏརཾ སཱམིཀཱནཾ དྷུརནིཀྑེཔེ ཁཱིལསངྐམནཱདིསཧཔཡོགཾ ཝིནཱ ན ཧོཏཱིཏི སཧཔཡོགེནེཝ པཱརཱཛིཀཾ. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. དུཏིཡཔཱརཱཛིཀཝཎྞནཱ) ཝུཏྟཾ ‘‘ཋཱནཱཙཱཝནཝསེན ཁཱིལཱདཱིནི སངྐཱམེཏྭཱ ཁེཏྟཱདིགྒཧཎཝསེན ཙ སཧཔཡོགོ ཝེདིཏབྦོ’’ཏི. ཡདཱ པན ཨསཏི དྷུརནིཀྑེཔེ ཁཱིལསངྐམནཱདིམཏྟཾ ཀཏཾ, ཏདཱ ཝིནཱ དྷུརནིཀྑེཔེན ན ཧོཏཱིཏི དྷུརནིཀྑེཔེནེཝ པཱརཱཛིཀཾ. ཏེནེཝེཏྠ ‘‘ཏཉྩ ཁོ སཱམིཀཱནཾ དྷུརནིཀྑེཔེནཱ’’ཏི ཝུཏྟཾ. ཨེཝཾ སབྦཏྠཱཏི ཡཐཱཝུཏྟམཏྠཾ རཛྫུསངྐམནཱདཱིསུཔི ཨཏིདིསཏི.

ཡཊྛིནྟི མཱནདཎྜཾ. ཨེཀསྨིཾ ཨནཱགཏེ ཐུལླཙྩཡཾ, ཏསྨིཾ ཨཱགཏེ པཱརཱཛིཀནྟི ཨེཏྠ སཙེ དཱརཱུནི ནིཁཎིཏྭཱ ཏཏྟཀེནེཝ གཎྷིཏུཀཱམོ ཧོཏི, ཨཝསཱནེ དཱརུམྷི པཱརཱཛིཀཾ. སཙེ ཏཏྠ སཱཁཱཡོཔི ཀཏྭཱ གཧེཏུཀཱམོ ཧོཏི, ཨཝསཱནསཱཁཱཡ པཱརཱཛིཀནྟི ཝེདིཏབྦཾ. ཏཏྟཀེན ཨསཀྐོནྟོཏི དཱརཱུནི ནིཁཎིཏྭཱ ཝཏིཾ ཀཱཏུཾ ཨསཀྐོནྟོ. ཁེཏྟམརིཡཱདནྟི ཝུཏྟམེཝཏྠཾ ཝིབྷཱཝེཏུཾ ‘‘ཀེདཱརཔཱལི༹’’ནྟི ཝུཏྟཾ. ཝིཏྠཏཾ ཀརོཏཱིཏི པུབྦེ ཝིཛྫམཱནམེཝ མརིཡཱདཾ ཝིཏྠིཎྞཾ ཀརོཏི. ཨཀཏཾ ཝཱ པན པཏིཊྛཔེཏཱིཏི པུབྦེ ཨཀཏཾ ཝཱ མརིཡཱདཾ ཋཔེཏི.

ཁེཏྟཊྛཀཐཱཝཎྞནཱ ནིཊྛིཏཱ.

ཝཏྠུཊྛཀཐཱཝཎྞནཱ

༡༠༥. ཝཏྠུཊྛཀཐཱཡཾ ¶ ཏིཎྞཾ པཱཀཱརཱནནྟི ཨིཊྛཀསིལཱདཱརཱུནཾ ཝསེན ཏིཎྞཾ པཱཀཱརཱནཾ. ཨེཏེནེཝ ནཡེནཱཏི ཨིམིནཱ ‘‘ཀེཝལཾ བྷཱུམིཾ སོདྷེཏྭཱ…པེ… ཨཔརིཀྑིཔིཏྭཱ ཝཱ’’ཏི ཝུཏྟམཏྠཾ ནིདསྶེཏི.

གཱམཊྛཀཐཱཝཎྞནཱ

༡༠༦. གཱམཊྛཀཐཱཡཾ གཱམོ ནཱམཱཏི པཱལི༹ཡཾ ན ཝུཏྟཾ སབྦསོ གཱམལཀྑཎསྶ པུབྦེ ཝུཏྟཏྟཱ.

ཨརཉྙཊྛཀཐཱཝཎྞནཱ

༡༠༧. ཨརཉྙཊྛཀཐཱཡཾ ¶ ཨརཉྙཾ ནཱམཱཏི ཨིདཾ པན ན ཀེཝལཾ པུབྦེ ཝུཏྟཨརཉྙལཀྑཎཔྤཏྟིམཏྟེན ཨརཉྙཾ ཨིདྷཱདྷིཔྤེཏཾ, ཀིནྟུ ཡཾ ཨཏྟནོ ཨརཉྙལཀྑཎེན ཨརཉྙཾ པརཔརིགྒཧིཏཉྩ ཧོཏི, ཏཾ ཨརཉྙཾ ཨིདྷཱདྷིཔྤེཏནྟི དསྶེཏུཾ ཝུཏྟཾ. ཏེནཱཏི པུན ཨརཉྙཝཙནེན. ན པརིགྒཧིཏབྷཱཝོ ཨརཉྙསྶ ལཀྑཎནྟི ཡདི ཧི པརིགྒཧིཏབྷཱཝོ ཨརཉྙལཀྑཎཾ སིཡཱ, ‘‘ཨརཉྙཾ ནཱམ ཡཾ མནུསྶཱནཾ པརིགྒཧིཏ’’ནྟི ཨེཏྟཀམེཝ ཝདེཡྻཱཏི ཨདྷིཔྤཱཡོ. ཡནྟི ཨིམིནཱ པུབྦེ ཝུཏྟལཀྑཎམེཝ ཨརཉྙཾ པརཱམཊྛནྟི ཨཱཧ ‘‘ཡཾ པན ཨཏྟནོ ཨརཉྙལཀྑཎེན ཨརཉྙ’’ནྟི.

ཝིནིཝིཛ྄ཛྷིཏྭཱཏི ཨུཛུཀམེཝ ཝིནིཝིཛ྄ཛྷིཏྭཱ. པཎྞཾ ཝཱཏི ཏཱལཔཎྞཱདི པཎྞཾ ཝཱ. ཨདྡྷགཏོཔཱིཏི ཙིརཀཱལཾ ཏཏྠེཝ ཋིཏོཔི. ན གཧེཏབྦོཏི ཨེཏྠ པན ཡོ པརེཧི ཨརཉྙསཱམིཀཱནཾ ཧཏྠཏོ ཀིཎིཏྭཱ ཏཙྪེཏྭཱ ཏཏྠེཝ ཋཔིཏོ, སོ ཨརཉྙསཱམིཀེན ཨནུཉྙཱཏོཔི ན གཧེཏབྦོ. སཱམིཀེཧི ཚཌྜིཏོཏི གཧེཏུཾ ཝཊྚཏཱིཏི པཾསུཀཱུལསཉྙཱཡ གཧཎཾ ཝུཏྟཾ. ལཀྑཎཙྪིནྣསྶཱཔཱིཏི ཨརཉྙསཱམིཀཱནཾ ཧཏྠཏོ ཀིཎིཏྭཱ གཎྷནྟེཧི ཀཏསཉྙཱཎསྶ. ཚལླིཡཱ པརིཡོནདྡྷཾ ཧོཏཱིཏི ཨིམིནཱ སཱམིཀཱནཾ ནིརཔེཀྑཏཾ དཱིཔེཏི. ཏེན ཝུཏྟཾ ‘‘གཧེཏུཾ ཝཊྚཏཱི’’ཏི. ཡདི སཱམིཀཱནཾ སཱཔེཀྑཏཱ ཨཏྠི, ན ཝཊྚཏི. ཏཱནི ཀཏཱནི ཨཛ྄ཛྷཱཝུཏྠཱནི ཙ ཧོནྟཱིཏི ཏཱནི གེཧཱདཱིནི ཀཏཱནི པརིནིཊྛིཏཱནི མནུསྶེཧི ཙ ཨཛ྄ཛྷཱཝུཏྠཱནི ཧོནྟི. དཱརཱུནིཔཱིཏི གེཧཱདཱིནཾ ཀཏཏྟཱ ཏཏོ ཨཝསིཊྛདཱརཱུནིཔི. ཨེཏེསནྟི ཨེཏེསཾ ཡཐཱཝུཏྟདཱརཱུནཾ.

ཏེསཾ ¶ ཨཱརཀྑཊྛཱནནྟི ཏེསཾ ཨརཉྙཔཱལཱནཾ ཋིཏཊྛཱནཾ. དེཧཱིཏི ཝུཏྟེ དཱཏབྦམེཝཱཏི ཨེཏྠ ‘‘དེཧཱི’’ཏི ཝུཏྟེ ‘‘དསྶཱམཱི’’ཏི ཨཱབྷོགསབྦྷཱཝཏོ ‘‘དེཧཱི’’ཏི ཨཝུཏྟེ ཨདཏྭཱཔི གནྟུཾ ཝཊྚཏིཡེཝ. གནྟུཾ དེཐཱཏི གམནཾ དེཐ. ཨདིསྭཱ གཙྪཏི, བྷཎྜདེཡྻནྟི པརིསུདྡྷཙིཏྟེན གཙྪཏི, བྷཎྜདེཡྻཾ. ཡཏྠ ཀཏྠཙི ནཱིཏཱནམྤི དཱརཱུནཾ ཨརཉྙསཱམིཀཱནཾཡེཝ སནྟཀཏྟཱ སུདྡྷཙིཏྟེན ནིཀྑནྟོཔི པུན ཐེཡྻཙིཏྟཾ ཨུཔྤཱདེཏྭཱ གཙྪཏི, པཱརཱཛིཀམེཝཱཏི ཝདནྟི.

ཨརཉྙཊྛཀཐཱཝཎྞནཱ ནིཊྛིཏཱ.

ཨུདཀཀཐཱཝཎྞནཱ

༡༠༨. ཨུདཀཀཐཱཡཾ ¶ མཧཱཀུཙྪིཀཱ ཨུདཀཙཱཊི ཨུདཀམཎིཀོ. ‘‘སམེཁལཱ ཙཱཊི ཨུདཀམཎིཀོ’’ཏིཔི ཝདནྟི. ཏཏྠཱཏི ཏེསུ བྷཱཛནེསུ. ནིབྦཧནཨུདཀནྟི ‘‘མཧོདཀཾ ཨཱགནྟྭཱ ཏལཱ༹ཀམརིཡཱདཾ མཱ ཚིནྡཱི’’ཏི ཏལཱ༹ཀརཀྑཎཏྠཾ ཏསྶ ཨེཀཔསྶེན ཝིསྶཛྫིཏཨུདཀཾ. ནིདྡྷམནཏུམྦནྟི སསྶཱདཱིནཾ ཨཏྠཱཡ ཨུདཀནིཀྑམནམགྒཾ. མརིཡཱདཾ དུབྦལཾ ཀཏྭཱཏི ཨིདཾ ཨཝསྶཾ ཚིནྣསབྷཱཝདསྶནཏྠཾ བྷཎྜདེཡྻཝིསཡདསྶནཏྠཉྩ ཝུཏྟཾ. མརིཡཱདཾ དུབྦལཾ ཨཀཏྭཱཔི ཡཐཱཝུཏྟཔྤཡོགེ ཀཏེ མརིཡཱདཾ ཚིནྡིཏྭཱ ནིཀྑནྟཨུདཀགྒྷཱནུརཱུཔེན ཨཝཧཱརེན ཀཱརེཏབྦམེཝ.

ཨནིགྒཏེཏི ཨནིཀྑམིཏྭཱ ཏལཱ༹ཀསྨིཾཡེཝ ཨུདཀེ ཋིཏེ. ཨསམྤཏྟེཝཱཏི ཏལཱ༹ཀཏོ ནིཀྑམིཏྭཱ མཧཱམཱཏིཀཱཡ ཨེཝ ཋིཏེ. ཨནིཀྑནྟེཏི ཏལཱ༹ཀཏོ ཨནིཀྑནྟེ ཨུདཀེ. སུབདྡྷཱཏི བྷཎྜདེཡྻམྤི ན ཧོཏཱིཏི ཨདྷིཔྤཱཡོ. ཏེནཱཧ ‘‘ནིཀྑནྟེ བདྡྷཱ བྷཎྜདེཡྻ’’ནྟི, ཏལཱ༹ཀཏོ ནིཀྑམིཏྭཱ པརེསཾ ཁུདྡཀམཱཏིཀཱམུཁཾ ཨཔཱཔུཎིཏྭཱ མཧཱམཱཏིཀཱཡཾཡེཝ ཋིཏེ བདྡྷཱ ཙེ, བྷཎྜདེཡྻནྟི ཨཏྠོ. ‘‘ཨནིཀྑནྟེ བདྡྷཱ སུབདྡྷཱ, ནིཀྑནྟེ བདྡྷཱ བྷཎྜདེཡྻ’’ནྟི ཧི ཨིདཾ དྭཡཾ ཧེཊྛཱ ཝུཏྟཝིཀཔྤདྭཡསྶ ཡཐཱཀྐམེན ཝུཏྟཾ. ནཏྠི ཨཝཧཱརོཏི ཨེཏྠ ‘‘ཨཝཧཱརོ ནཏྠི, བྷཎྜདེཡྻཾ པན ཧོཏཱི’’ཏི ཀེཙི ཝདནྟི, ཏལཱ༹ཀགཏཨུདཀསྶ སབྦསཱདྷཱརཎཏྟཱ ཏཾ ཨཡུཏྟཾ ཝིཡ དིསྶཏི, ‘‘ཨནིཀྑནྟེ བདྡྷཱ སུབདྡྷཱ’’ཏི ཨིམིནཱ ཙ ཨཊྛཀཐཱཝཙནེན ན སམེཏི. ཝཏྠུཾ…པེ… ན སམེཏཱིཏི ཨེཏྠ ཏལཱ༹ཀགཏཨུདཀསྶ སབྦསཱདྷཱརཎཏྟཱ ཨཔརིགྒཧིཏཾ ཨིདྷ ཝཏྠུནྟི ཨདྷིཔྤཱཡོ.

ཨུདཀཀཐཱཝཎྞནཱ ནིཊྛིཏཱ.

དནྟཔོནཀཐཱཝཎྞནཱ

༡༠༩. དནྟཀཊྛཀཐཱཡཾ ¶ ཏཏོ པཊྛཱཡ ཨཝཧཱརོ ནཏྠཱིཏི ‘‘ཡཐཱསུཁཾ བྷིཀྑུསངྒྷོ པརིབྷུཉྫཏཱུ’’ཏི ཡཐཱསུཁཾ པརིབྷོགཏྠཱཡ ཋཔིཏཏྟཱ ཝསྶགྒེན ཨབྷཱཛེཏབྦཏྟཱ ཨརཀྑིཏབྦཏྟཱ སབྦསཱདྷཱརཎཏྟཱ ཙ ཨཉྙཾ སངྒྷིཀཾ ཝིཡ ན ཧོཏཱིཏི ཐེཡྻཙིཏྟེན གཎྷནྟསྶཔི ནཏྠི ཨཝཧཱརོ ¶ . ཝཏྟནྟི དནྟཀཊྛགྒཧཎེ ཝཏྟཾ. ཨིདཱནི ཏདེཝ ཝཏྟཾ དསྶེནྟོ ‘‘ཡོ ཧཱི’’ཏིཨཱདིམཱཧ. ‘‘པུན སཱམཎེརཱ ཨཱཧརིསྶནྟཱི’’ཏི ཀེཙི ཐེརཱ ཝདེཡྻུནྟི ཡོཛེཏབྦཾ.

དནྟཔོནཀཐཱཝཎྞནཱ ནིཊྛིཏཱ.

ཝནཔྤཏིཀཐཱཝཎྞནཱ

༡༡༠. ཝནཔྤཏིཀཐཱཡཾ ‘‘ཨུཛུཀམེཝ ཏིཊྛཏཱིཏི རུཀྑབྷཱརེན ཀིཉྩིདེཝ བྷསྶིཏྭཱ ཋིཏཏྟཱ ཧོཏིཡེཝ ཋཱནཱཙཱཝནནྟི ཨདྷིཔྤཱཡེན ཝུཏྟ’’ནྟི ཝདནྟི. ཝཱཏམུཁཾ སོདྷེཏཱིཏི ཡཐཱ ཝཱཏོ ཨཱགནྟྭཱ རུཀྑཾ པཱཏེཏི, ཨེཝཾ ཝཱཏསྶ ཨཱགམནམགྒཾ རུནྡྷིཏྭཱ ཋིཏཱནི སཱཁཱགུམྦཱདཱིནི ཚིནྡིཏྭཱ ཨཔནེནྟོ སོདྷེཏི. ‘‘མཎྜཱུཀཀཎྚཀཾ ཝཱ ཝིསནྟི མཎྜཱུཀཱནཾ ནངྒུཊྛེ ཨགྒཀོཊིཡཾ ཋིཏཀཎྚཀ’’ནྟི ཝདནྟི, ‘‘ཨེཀཾ ཝིསམཙྪཀཎྚཀ’’ནྟིཔི ཝདནྟི.

ཝནཔྤཏིཀཐཱཝཎྞནཱ ནིཊྛིཏཱ.

ཧརཎཀཀཐཱཝཎྞནཱ

༡༡༡. ཧརཎཀཀཐཱཡཾ ཧརཎཀནྟི ཧརིཡམཱནཾ. ཨབྷིམུཁཾ ཀཏྭཱ ཀཌྜྷནཾ ཨཱཀཌྜྷནཾ, སེསདིསཱཀཌྜྷནཾ ཝིཀཌྜྷནཾ. པཱདཾ ཨགྒྷཏི, པཱརཱཛིཀམེཝཱཏི ཨེཏྠ ཨནྟཾ ན གཎྷཱམཱིཏི ཨསལླཀྑིཏཏྟཱ ཨནྟསྶ ཙ གཎྷིསྶཱམཱིཏི སལླཀྑིཏསྶེཝ པཊསྶ ཨེཀདེསཏྟཱ པཱརཱཛིཀཾ ཝུཏྟཾ. སཧབྷཎྜཧཱརཀནྟི བྷཎྜཧཱརཀེན སདྡྷིཾ. སནྟཛྫེཏྭཱཏི དྷནུཨཱདཱིཧི སནྟཛྫེཏྭཱ.

སོཏི བྷཎྜཧཱརཀོ. ཨནཛ྄ཛྷཱཝུཏྠཀནྟི ཨཔརིགྒཧིཏཀཾ, ཨསཱམིཀནྟི ཨཏྠོ.

ཨཱཧརཱཔེནྟེ དཱཏབྦནྟི ཨེཏྠ ‘‘ཚཌྜེཏྭཱ དྷུརཾ ནིཀྑིཔིཏྭཱ གཏཱནམྤི ནིརཱལཡཱནཾ པུན ཨཱཧརཱཔནསྶ ཝུཏྟཏྟཱ བྷིཀྑཱུནམྤི ཨཏྟནོ སནྟཀེ པརིཀྑཱརེ ཨཙྪིནྡིཏྭཱ པརེཧི གཧིཏེ ཏཏྠ ¶ དྷུརནིཀྑེཔཾ ཀཏྭཱཔི པུན ཏཾ བལཀྐཱརེནཔི ཨཱཧརཱཔེཏུཾ ཝཊྚཏཱི’’ཏི དེསཝཱསིནོ ཨཱཙརིཡཱ ཝདནྟི, སཱིཧལ༹དཱིཔཝཱསིནོ པན ཏཾ ཀེཙི ཨཱཙརིཡཱ ན ཨིཙྪནྟི. ཏེནེཝ ¶ མཧཱགཎྛིཔདེ མཛ྄ཛྷིམགཎྛིཔདེ ཙ ཝུཏྟཾ ‘‘ཨམྷཱཀཾ པན ཏཾ ན རུཙྩཏཱི’’ཏི. ཨཉྙེསཱུཏི མཧཱཔཙྩརིཨཱདཱིསུ. ཝིཙཱརཎཱ ཨེཝ ནཏྠཱིཏི ཏཏྠཱཔི པཊིཀྑེཔཱབྷཱཝཏོ ཨཡམེཝཏྠོཏི ཝུཏྟཾ ཧོཏི.

ཧརཎཀཀཐཱཝཎྞནཱ ནིཊྛིཏཱ.

ཨུཔནིདྷིཀཐཱཝཎྞནཱ

༡༡༢. ཨུཔནིདྷིཀཐཱཡཾ ‘‘སངྒོཔནཏྠཱཡ ཨཏྟནོ ཧཏྠེ ནིཀྑིཏྟསྶ བྷཎྜསྶ གུཏྟཊྛཱནེ པཊིསཱམནཔཡོགཾ ཝིནཱ ཨཉྙསྨིཾ པཡོགེ ཨཀཏེཔི རཛྫསངྑོབྷཱདིཀཱལེ ‘ན དཱནི ཏསྶ དསྶཱམི, ན མཡ྄ཧཾ དཱནི དསྶཏཱི’ཏི ཨུབྷོཧིཔི སཀསཀཊྛཱནེ ནིསཱིདིཏྭཱ དྷུརནིཀྑེཔེ ཀཏེ པཱརཱཛིཀམེཝ པཊིསཱམནཔཡོགསྶ ཀཏཏྟཱ’’ཏི ཝདནྟི. ཨཏྟནོ ཧཏྠེ ནིཀྑིཏྟཏྟཱཏི ཨེཏྠ ཨཏྟནོ ཧཏྠེ སངྒོཔནཏྠཱཡ ནིཀྑིཏྟཀཱལཏོ པཊྛཱཡ ཏཔྤཊིབདྡྷཏྟཱ ཨཱརཀྑཱཡ བྷཎྜསཱམིཀཊྛཱནེ ཋིཏཏྟཱ ཋཱནསྶ ཙ ཏདཱཡཏྟཏཱཡ ཋཱནཱཙཱཝནསྶ ཨལབྦྷནཏོ ནཏྠི ཨཝཧཱརོཏི ཨདྷིཔྤཱཡོ.

དྷམྨཾ ཝཱཙཱཔེཏྭཱཏི དྷམྨཾ ཀཐཱཔེཏྭཱ. ཨེསེཝ ནཡོཏི ཨུདྡྷཱརེཡེཝ པཱརཱཛིཀཾ. ཀསྨཱ? ཨཉྙེཧི ཨསཱདྷཱརཎསྶ ཨབྷིཉྙཱཎསྶ ཝུཏྟཏྟཱ. ‘‘ཨཉྙཾ ཏཱདིསམེཝ གཎྷནྟེ ཡུཛྫཏཱིཏི ཨིདཾ སཉྙཱཎཾ ཀཐེནྟེནེཝ ‘ཨསུཀསྨིཾ ཋཱནེ’ཏི ཨོཀཱསསྶ ཙ ནིཡམིཏཏྟཱ ཏསྨིཾ ཋཱནེ ཋིཏཾ པཏྟཾ ཨཔནེཏྭཱ ཏསྨིཾ ཨོཀཱསེ ཨཉྙཾ ཏཱདིསམེཝ པཙྪཱ ཋཔིཏཾ པཏྟཾ སནྡྷཱཡ ཀཐིཏ’’ནྟི ཏཱིསུཔི གཎྛིཔདེསུ ཝུཏྟཾ. ཙོརེན སལླཀྑིཏཔཏྟསྶ གཧཎཱབྷཱཝེཔི ‘‘ཨིདཾ ཐེནེཏྭཱ གཎྷིསྶཱམཱི’’ཏི ཏསྨིཾ ཨོཀཱསེ ཋིཏེ ཏཱདིསེ ཝཏྠུམཏྟེ ཏསྶ ཐེཡྻཙིཏྟསབྦྷཱཝཏོ ཨཉྙཾ ཏཱདིསམེཝ གཎྷནྟེ ཡུཛྫཏཱིཏི ཙོརསྶ ཨཝཧཱརོ དསྶིཏོ. པདཝཱརེནཱཏི ཐེརེན ནཱིཧརིཏྭཱ དིནྣཾ པཏྟཾ གཧེཏྭཱ གཙྪཏོ ཙོརསྶ པདཝཱརེན. ཏཾ ཨཏཱདིསམེཝ གཎྷནྟེ ཡུཛྫཏཱིཏི ‘‘མམཱཡཾ པཏྟོ ན ཧོཏཱི’’ཏི ཝཱ ‘‘མཡཱ ཀཐིཏོ ཨཡཾ པཏྟོ ན ཧོཏཱི’’ཏི ཝཱ ཛཱནིཏྭཱ ཐེཡྻཙིཏྟེན གཎྷནྟསྶ ‘‘ཨིདཾ ཐེནེཏྭཱ གཎྷིསྶཱམཱི’’ཏི ཝཏྠུམཏྟེ ཐེཡྻཙིཏྟཾ ཨུཔྤཱདེཏྭཱ གཎྷནྟསྶ ཙ ཨཝཧཱརསབྦྷཱཝཏོ ཝུཏྟཾ.

གཱམདྭཱརནྟི ¶ སམཎསཱརུཔྤཾ ཝོཧཱརམཏྟམེཏཾ, ཨནྟོགཱམཾ ཨིཙྩེཝ ཝུཏྟཾ ཧོཏི. ཝུཏྟནཡེནེཝ ཐེརསྶ ¶ པཱརཱཛིཀནྟི ཐེཡྻཙིཏྟེནེཝ པརསནྟཀསྶ གཧིཏཏྟཱ ཨུདྡྷཱརེཡེཝ ཐེརསྶ པཱརཱཛིཀཾ. ཙོརསྶ དུཀྐཊནྟི ཨསུདྡྷཙིཏྟེན གཧིཏཏྟཱ གཧིཏཀཱལེ ཙོརསྶ དུཀྐཊཾ. ཝུཏྟནཡེནེཝ ཨུབྷིནྣམྤི དུཀྐཊནྟི ཙོརསྶ སཱམིཀེན དིནྣཏྟཱ པཱརཱཛིཀཾ ནཏྠི, ཨསུདྡྷཙིཏྟེན གཧིཏཏྟཱ དུཀྐཊཾ, ཐེརསྶ པན ཨཏྟནོ སནྟཀེཔི ཨསུདྡྷཙིཏྟཏཱཡ དུཀྐཊནྟི.

ཨཱཎཏྟིཡཱ གཧིཏཏྟཱཏི ཨེཏྠ ‘‘པཏྟཙཱིཝརཾ གཎྷ, ཨསུཀཾ ནཱམ གཱམཾ གནྟྭཱ པིཎྜཱཡ ཙརིསྶཱམཱ’’ཏི ཨེཝཾ ཐེརེན ཀཏཨཱཎཏྟིཡཱ ཝིཧཱརསྶ པརབྷཱགེ ཨུཔཙཱརཏོ པཊྛཱཡ ཡཱཝ ཏསྶ གཱམསྶ པརཏོ ཨུཔཙཱརོ, ཏཱཝ སབྦཾ ཁེཏྟམེཝ ཛཱཏནྟི ཨདྷིཔྤཱཡོ. མགྒཏོ ཨོཀྐམྨཱཏི ཨེཏྠ ཨུབྷིནྣཾ སཀཊཙཀྐམགྒཱནཾ ཨནྟརཱལ༹མྤི མགྒོཡེཝཱཏི དཊྛབྦཾ. ཨཊྛཏྭཱ ཨནིསཱིདིཏྭཱཏི ཨེཏྠ ཝིཧཱརཾ པཝིསིཏྭཱ སཱིསཱདཱིསུ བྷཱརཾ བྷཱུམིཡཾ ཨནིཀྑིཔིཏྭཱཝ ཏིཊྛནྟོ ནིསཱིདནྟོ ཝཱ ཝིསྶམིཏྭཱ ཐེཡྻཙིཏྟེ ཝཱུཔསནྟེ པུན ཐེཡྻཙིཏྟཾ ཨུཔྤཱདེཏྭཱ གཙྪཏི ཙེ, པཱདུདྡྷཱརེན ཀཱརེཏབྦོ. སཙེ བྷཱུམིཡཾ ནིཀྑིཔིཏྭཱ པུན ཏཾ གཧེཏྭཱ གཙྪཏི, ཨུདྡྷཱརེན ཀཱརེཏབྦོ. ཀསྨཱ? ཨཱཎཱཔཀསྶ ཨཱཎཏྟིཡཱ ཡཾ ཀཏྟབྦཾ, ཏསྶ ཏཱཝ པརིནིཊྛིཏཏྟཱ. ཀེཙི པན ‘‘པུརིམསྨིཾ ཐེཡྻཙིཏྟེ ཨཝཱུཔསནྟེཔི ཝུཏྟནཡེནེཝ ཝིསྶམིཏྭཱ གཙྪཏོ པཱདུདྡྷཱརེན ཨུདྡྷཱརེན ཝཱ ཀཱརེཏབྦོ’’ཏི ཝདནྟི, ‘‘ཨསུཀཾ ནཱམ གཱམནྟི ཨནིཡམེཏྭཱ ‘ཨནྟོགཱམཾ པཝིསིསྶཱམཱ’ཏི ཨཝིསེསེན ཝུཏྟེ ཝིཧཱརསཱམནྟཱ སབྦོཔི གོཙརགཱམོ ཁེཏྟམེཝཱ’’ཏིཔི ཝདནྟི. སེསནྟི མགྒུཀྐམནཝིཧཱརཱབྷིམུཁགམནཱདི སབྦཾ. པུརིམསདིསམེཝཱཏི ཨནཱཎཏྟིཡཱ གཧིཏེཔི སཱམིཀསྶ ཀཐེཏྭཱ གཧིཏཏྟཱ ཧེཊྛཱ ཝུཏྟཝིཧཱརཱུཔཙཱརཱདི སབྦཾ ཁེཏྟམེཝཱཏི ཀཏྭཱ ཝུཏྟཾ.

ཨེསེཝ ནཡོཏི ‘‘ཨནྟརཱམགྒེ ཐེཡྻཙིཏྟཾ ཨུཔྤཱདེཏྭཱ’’ཏིཨཱདིནཱ ཝུཏྟནཡཾ ཨཏིདིསཏི. ནིམིཏྟེ ཝཱ ཀཏེཏི ‘‘ཙཱིཝརཾ མེ ཀིལིཊྛཾ, ཀོ ནུ ཁོ རཛིཏྭཱ དསྶཏཱི’’ཏིཨཱདིནཱ ནིམིཏྟེ ཀཏེ. ཝུཏྟནཡེནེཝཱཏི ཨནཱཎཏྟསྶ ཐེརེན སདྡྷིཾ པཏྟཙཱིཝརཾ གཧེཏྭཱ གམནཝཱརེ ཝུཏྟནཡེནེཝ. ཨེཀཔསྶེ ཝཱཏི ཝིཧཱརསྶ མཧནྟཏཱཡ ཨཏྟཱནཾ ཨདསྶེཏྭཱ ཨེཀསྨིཾ པསྶེ ཝསནྟོ ཝཱ. ཐེཡྻཙིཏྟེན པརིབྷུཉྫནྟོ ཛཱིརཱཔེཏཱིཏི ཐེཡྻཙིཏྟེ ཨུཔྤནྣེ ཋཱནཱཙཱཝནཾ ཨཀཏྭཱ ནིཝཏྠཔཱརུཏནཱིཧཱརེནེཝ པརིབྷུཉྫནྟོ ¶ ཛཱིརཱཔེཏི, ཋཱནཱ ཙཱཝེནྟསྶ པན ཐེཡྻཙིཏྟེ སཏི པཱརཱཛིཀམེཝ སཱིསེ བྷཱརཾ ཁནྡྷེ ཀརཎཱདཱིསུ ཝིཡ. ཡཐཱ ཏཐཱ ཝཱ ནསྶཏཱིཏི ཨགྒིཨཱདིནཱ ཝཱ ཨུཔཙིཀཱདཱིཧི ཁཱདིཏཾ ཝཱ ནསྶཏི.

ཨཉྙོ ཝཱ ཀོཙཱིཏི ཨིམིནཱ པན ཡེན ཋཔིཏཾ, སོཔི སངྒཧིཏོཏི ཝེདིཏབྦཾ. ཏཝ ཐཱུལསཱཊཀོ ལདྡྷོཏིཨཱདིནཱ མུསཱཝཱདེ དུཀྐཊཾ ཨདིནྣཱདཱནཔཡོགཏྟཱ. ཨིཏརཾ གཎྷཏོ ཨུདྡྷཱརེ པཱརཱཛིཀནྟི ¶ ཨེཏྠ ‘‘པཝིསིཏྭཱ ཏཝ སཱཊཀཾ གཎྷཱཧཱི’’ཏི ཨིམིནཱཝ ཨུཔནིདྷིབྷཱཝཏོ མུཏྟཏྟཱ སཱམིཀསྶ ཨིཏརཾ གཎྷཏོཔི ཨཏྟནོ སཱཊཀེ ཨཱལཡསྶ སབྦྷཱཝཏོ ཙ ཨུདྡྷཱརེ པཱརཱཛིཀཾ ཝུཏྟཾ. ན ཛཱནནྟཱིཏི ཏེན ཝུཏྟཾ ཝཙནཾ ཨསུཎནྟཱ ན ཛཱནནྟི. ཨེསེཝ ནཡོཏི ཨེཏྠ སཙེ ཛཱནིཏྭཱཔི ཙིཏྟེན ན སམྤཊིཙྪནྟི, ཨེསེཝ ནཡོཏི དཊྛབྦཾ. པཊིཀྑིཔནྟཱིཏི ཨེཏྠ ཙིཏྟེན པཊིཀྑེཔོཔི སངྒཧིཏོཝཱཏི ཝེདིཏབྦཾ. ཡཱཙིཏཱ ཝཱ ཨཡཱཙིཏཱ ཝཱཏི ཨེཏྠ ཡཱཙིཏཱ ཡདི ཙིཏྟེནཔི སམྤཊིཙྪནྟི, ནཊྛེ གཱིཝཱ. ཨཡཱཙིཏཱ པན ཡདིཔི ཙིཏྟེན སམྤཊིཙྪནྟི, ནཏྠི གཱིཝཱ.

གཧེཏྭཱ ཋཔེཏཱིཏི ཨེཏྠ ཙཱལེཏྭཱ ཏསྨིཾཡེཝ ཋཱནེ ཋཔིཏེཔི ནཊྛེ གཱིཝཱ. ཨུཔཙཱརེ ཝིཛྫམཱནེཏི བྷཎྜཱགཱརསྶ སམཱིཔེ ཨུཙྩཱརཔསྶཱཝཊྛཱནེ ཝིཛྫམཱནེ. མཡི ཙ མཏེ སངྒྷསྶ ཙ སེནཱསནེ ཝིནཊྛེཏི ཨེཏྠ ‘‘ཀེཝལཾ སངྒྷསྶ སེནཱསནཾ མཱ ནསྶཱིཏི ཨིམིནཱཝ ཨདྷིཔྤཱཡེན ཝིཝརིཏུམྤི ཝཊྚཏིཡེཝཱ’’ཏི ཝདནྟི. སཧཱཡེཧི བྷཝིཏབྦནྟི ཏེཧིཔི ཀིཉྩི ཀིཉྩི དཱཏབྦནྟི ཝུཏྟཾ ཧོཏི. ཨཡཾ སཱམཱིཙཱིཏི བྷཎྜཱགཱརེ ཝསནྟཱནཾ ཨིདཾ ཝཏྟཾ.

ལོལམཧཱཐེརོཏི མནྡོ མོམཱུཧོ ཧསིཏཀཱིལི༹ཏཔྤསུཏོ ཝཱ མཧཱཐེརོ. ཨཏྟནོ ཨཏྟནོ ཝསནགབྦྷེསུ སབྷཱགབྷིཀྑཱུནཾ པརིཀྑཱརཾ ཋཔེནྟཱིཏི ཡོཛེཏབྦཾ. ཨིཏརེཧཱིཏི ཏསྨིཾཡེཝ གབྦྷེ ཝསནྟེཧི ཨིཏརབྷིཀྑཱུཧི. ཝིཧཱརཝཱརེ ནིཡུཏྟོ ཝིཧཱརཝཱརིཀོ, ཝཱརཾ ཀཏྭཱ ཝིཧཱརརཀྑཎཀོ. ནིཝཱཔནྟི བྷཏྟཝེཏནཾ. པཊིཔཐཾ གཏེསཱུཏི ཙོརཱནཾ ཨཱགམནཾ ཉཏྭཱ ‘‘པཋམཏརཾཡེཝ གནྟྭཱ སདྡཾ ཀརིསྶཱམཱ’’ཏི ཙོརཱནཾ ཨབྷིམུཁཾ གཏེསུ. ནིསྶིཏཀེ ཛགྒེནྟཱིཏི ཨཏྟནོ ཨཏྟནོ ནིསྶིཏཀེ སིཀྑཱཙརིཡཱཡ པོསེནྟཱཔི ནིསྶིཏཀེ ཝིཧཱརཾ ཛགྒཱཔེནྟི. ‘‘ཨསཧཱཡསྶ ཨདུཏིཡསྶཱ’’ཏི པཱཋོ ཡུཏྟོ, པཙྪིམཾ པུརིམསྶེཝ ཝེཝཙནཾ. ཨསཧཱཡསྶ ཝཱ ཨཏྟདུཏིཡསྶ ཝཱཏི ཨིམསྨིཾ པན པཱཋེ ཨེཀེན ཨཱནཱིཏཾ དྭིནྣཾ ནཔྤཧོཏཱིཏི ¶ ཨཏྟདུཏིཡསྶཔི ཝཱརོ ནིཝཱརིཏོཏི ཝདནྟི, ཏཾ ‘‘ཡསྶ སབྷཱགོ བྷིཀྑུ བྷཏྟཾ ཨཱནེཏྭཱ དཱཏཱ ནཏྠཱི’’ཏི ཨིམིནཱ ན སམེཏཱིཏི ཝཱིམཾསིཏབྦཾ. ཨུཔཛཱིཝནྟེན ཋཱཏབྦནྟི ཨབྦྷོཀཱསིཀེན རུཀྑམཱུལིཀེནཔི པཱཀཝཊྚཾ ཨུཔནིསྶཱཡ ཛཱིཝནྟེན པཏྟཙཱིཝརརཀྑཎཏྠཱཡ ཝིཧཱརཝཱརེ སམྤཏྟེ ཋཱཏབྦཾ. པརིཔུཙྪནྟི པུཙྪིཏཔཉྷཝིསྶཛྫནཾ ཨཊྛཀཐཾ ཝཱ. དིགུཎནྟི ཝསྶགྒེན པཱཔིཏཾ ཝིནཱཝ དྭེ ཀོཊྛཱསེཏི ཝདནྟི. པཀྑཝཱརེནཱཏི ཨཌྜྷམཱསཝཱརེན.

ཨུཔནིདྷིཀཐཱཝཎྞནཱ ནིཊྛིཏཱ.

སུངྐགྷཱཏཀཐཱཝཎྞནཱ

༡༡༣. སུངྐགྷཱཏཀཐཱཡཾ ¶ ཏཏོ ཧནནྟཱིཏི ཏཏོ ནཱིཧརནྟཱ ཧནནྟི. ཏནྟི སུངྐཊྛཱནཾ. ཡཏོཏི ཡཏོ ནཱིཧརིཡམཱནབྷཎྜཏོ. རཱཛཀནྟི རཱཛཱཡཏྟཾ. ཏམྤི རཱཛཱརཧམེཝཱཏི ཨཱཧ ‘‘ཨཡམེཝཏྠོ’’ཏི. ཨིཏོཏི ཨིཏོ བྷཎྜཏོ. དུཏིཡཾ པཱདཾ ཨཏིཀྐཱམེཏཱིཏི ཨེཏྠ ‘‘པཋམཾ པཱདཾ པརིཙྪེདཏོ བཧི ཋཔེཏྭཱ དུཏིཡེ པཱདེ ཨུདྡྷཊམཏྟེ པཱརཱཛིཀ’’ནྟི ཝདནྟི ཨུདྡྷརིཏྭཱ བཧི ཨཊྛཔིཏོཔི བཧི ཋིཏོཡེཝ ནཱམ ཧོཏཱིཏི ཀཏྭཱ. ཡཏྠ ཡཏྠ པདཝཱརེན ཨཱཔཏྟི ཀཱརེཏབྦཱ, ཏཏྠ ཏཏྠ སབྦཏྠཱཔི ཨེསེཝ ནཡོཏི ཝདནྟི. སུངྐགྷཱཏཏོ བཧི བཧིསུངྐགྷཱཏཾ. ཨཝསྶཾ པཏནཀནྟི ཨཝསྶཾ སུངྐགྷཱཏཏོ བཧི པཏནཀཾ. པུབྦེ ཝུཏྟནཡེནེཝཱཏི ཨཝསྶཾ པཏནཀེ ཧཏྠཏོ མུཏྟམཏྟེཏི ཝུཏྟཾ ཧོཏི. ཝཊྚནྟཾ པུན ཨནྟོ པཝིསཏཱིཏི མཧཱཨཊྛཀཐཱཝཙནསྶ ཀུརུནྡིསངྑེཔཊྛཀཐཱཧི ཨདྷིཔྤཱཡོ པཀཱསིཏོ. ཨནྟོ ཋཏྭཱ བཧི གཙྪནྟཾ རཀྑཏཱིཏི བྷིཀྑུནོ པཡོགེན གམནཝེགསྶ ཨནྟོཡེཝ ཝཱུཔསནྟཏྟཱ. པརིཝཏྟེཏྭཱ ཨབྦྷནྟརིམཾ བཧི ཋཔེཏཱིཏི ཨབྦྷནྟརེ ཋིཏཾ པུཊཀཾ པརིཝཏྟེཏྭཱ བཧི ཋཔེཏི. ཨེཏྠ ཙ ‘‘ཨབྦྷནྟརིམེ པུཊཀེ བྷཱུམིཏོ མོཙིཏམཏྟེ པཱརཱཛིཀ’’ནྟི ཝདནྟི.

‘‘གཙྪནྟེ ཡཱནེ ཝཱ…པེ… ཋཔེཏཱིཏི སུངྐགྷཱཏཾ ཨཔཝིསིཏྭཱ བཧིཡེཝ ཋཔེཏཱི’’ཏི ཏཱིསུཔི གཎྛིཔདེསུ ཝུཏྟཾ སུངྐཊྛཱནསྶ བཧི ཋཔིཏནྟི ཝཀྑམཱནཏྟཱ. ཨཱཙརིཡཱ པན ‘‘སུངྐཊྛཱནསྶ བཧི ཋིཏ’’ནྟི པཱཋཾ ཝིཀཔྤེཏྭཱ ‘‘པཋམཾ ཨནྟོསུངྐགྷཱཏཾ པཝིཊྛེསུཡེཝ ཡཱནཱདཱིསུ ཋཔིཏཾ པཙྪཱ ཡཱནེན སདྡྷིཾ ནཱིཧཊཾ སུངྐགྷཱཏསྶ བཧི ཋིཏཾ, ན ཙ ཏེན ནཱིཏ’’ནྟི ¶ ཨཏྠཾ ཝདནྟི. ཨཡཾ པན ཏེསཾ ཨདྷིཔྤཱཡོ – སུངྐཊྛཱནསྶ ཨནྟོ པཝིཊྛཡཱནཱདཱིསུ ཋཔིཏེཔི བྷིཀྑུསྶ པཡོགཾ ཝིནཱ ཨཉྙེན ནཱིཧཊཏྟཱ ནེཝཏྠི པཱརཱཛིཀཾ, ‘‘ཨཏྲ པཝིཊྛསྶ སུངྐཾ གཎྷནྟཱུ’’ཏི ཝུཏྟཏྟཱ ཨཉྙེན ནཱིཧཊསྶ བཧི ཋིཏེ བྷཎྜདེཡྻམྤི ན ཧོཏཱིཏི. ཨཡམེཝ ཙ ནཡོ ‘‘ཝཊྚིཏྭཱ གམིསྶཏཱིཏི ཝཱ ཨཉྙོ ནཾ ཝཊྚེསྶཏཱིཏི ཝཱ ཨནྟོ ཋཔིཏཾ པཙྪཱ སཡཾ ཝཱ ཝཊྚམཱནཾ ཨཉྙེན ཝཱ ཝཊྚིཏཾ བཧི གཙྪཏི, རཀྑཏིཡེཝཱ’’ཏི ཨིམིནཱ ཝཙནེན སམེཏཱིཏི ཡུཏྟཏརོ ཝིཡ དིསྶཏི. སུངྐཊྛཱནསྶ ཨནྟོ པཝིསིཏྭཱ པུན པཙྩཱགཙྪཏོཔི ཏེན པསྶེན པརིཙྪེདཾ ཨཏིཀྐམནྟསྶ ཡདི ཏཏོཔི གཙྪནྟཱནཾ ཧཏྠཏོ སུངྐཾ གཎྷནྟི, སཱིམཱཏིཀྐམེ པཱརཱཛིཀམེཝ.

ཧཏྠིསུཏྟཱདཱིསཱུཏི ཧཏྠིསིཀྑཱདཱིསུ. ཨིམསྨིཾ ཋཱནེཏི ཡཐཱཝུཏྟཡཱནཱདཱིཧི ཝུཏྟཔྤཀཱརེན ནཱིཧརཎེ. ཨནཱཔཏྟཱིཏི ཏཏྠ ‘‘སཧཏྠཱ’’ཏི ཝཙནཏོ ཨཉྙེན ནཱིཧརཱཔེནྟསྶ ཨནཱཔཏྟི. ཨིདྷཱཏི ཨིམསྨིཾ ¶ ཨདིནྣཱདཱནསིཀྑཱཔདེ. ཏཏྲཱཏི ཏསྨིཾ ཨེལ༹ཀལོམསིཀྑཱཔདེ. ཧོནྟཱིཏི ཨེཏྠ ཨིཏི-སདྡོ ཧེཏུཨཏྠོ, ཡསྨཱ ཨེལ༹ཀལོམཱནི ནིསྶགྒིཡཱནི ཧོནྟི, ཏསྨཱ པཱཙིཏྟིཡནྟི ཨཏྠོ. ཨིདྷ ཨནཱཔཏྟཱིཏི ཨིམསྨིཾ སིཀྑཱཔདེ ཨཝཧཱརཱབྷཱཝཱ ཨནཱཔཏྟི. ཨུཔཙཱརནྟི སུངྐགྷཱཏཔརིཙྪེདཏོ བཧི སམནྟཱ དྭིནྣཾ ལེཌྜུཔཱཏཱནཾ ཨབྦྷནྟརཾ ཝཏིཨཱསནྣཔྤདེསསངྑཱཏཾ ཨུཔཙཱརཾ. ཏཱདིསཾ ཨུཔཙཱརཾ ཨོཀྐམིཏྭཱ པརིཧརཎེ སཱདཱིནཝཏྟཱ དུཀྐཊཾ ཝུཏྟཾ. ཨེཏྠཱཏི སུངྐགྷཱཏེ. ‘‘དྭཱིཧི ལེཌྜུཔཱཏེཧཱིཏི ཨཡཾ ནིཡམོ ཨཱཙརིཡཔརམྤརཱབྷཏོ’’ཏི མཧཱགཎྛིཔདེ ཝུཏྟཾ.

སུངྐགྷཱཏཀཐཱཝཎྞནཱ ནིཊྛིཏཱ.

པཱཎཀཐཱཝཎྞནཱ

༡༡༤. པཱཎཀཐཱཡཾ ཏིརཙྪཱནགཏསྶ ཨེཀནྟེན པཱདགྒྷནཀཏཱ ན སམྦྷཝཏཱིཏི ཨཱཧ – ‘‘ཨེཀཾསེན ཨཝཧཱརཀཔྤཧོནཀཔཱཎཾ དསྶེནྟོ’’ཏི. བྷུཛིསྶཾ ཧརནྟསྶ ཨཝཧཱརོ ནཏྠཱིཏི པརཔརིགྒཧིཏཱབྷཱཝཏོ. བྷུཛིསྶོཏི ཨདཱསོ. ཨཱཋཔིཏོཏི མཱཏཱཔིཏཱུཧི ཨིཎཾ གཎྷནྟེཧི ‘‘ཡཱཝ ཨིཎདཱནཱ ཨཡཾ ཏུམྷཱཀཾ སནྟིཀེ ཧོཏཱུ’’ཏི ཨིཎདཱཡཀཱནཾ ནིཡྻཱཏིཏོ. ཡསྨཱ མཱཏཱཔིཏརོ དཱསཱནཾ ཝིཡ པུཏྟཱནཾ ན ¶ སཱམིནོ. ཡེསཉྩ སནྟིཀེ ཨཱཋཔིཏོ, ཏེཔི ཏསྶ ཧཏྠཀམྨེ སཱམིནོ, ན ཏསྶཱཏི ཨཱཧ ‘‘ཨཝཧཱརོ ནཏྠཱི’’ཏི. དྷནཾ པན གཏཊྛཱནེ ཝཌྜྷཏཱིཏི ཨེཏྠ ‘‘ཨཱཋཔེཏྭཱ གཧིཏདྷནཾ ཝཌྜྷིཡཱ སཧ ཨཝཧཱརཀསྶ གཱིཝཱ’’ཏི ཏཱིསུཔི གཎྛིཔདེསུ ཝུཏྟཾ.

ཨནྟོཛཱཏ…པེ… ཨཝཧཱརོ ཧོཏཱིཏི ཨེཏྠ པདེསཙཱརིཏྟཝསེན ཨཏྟནཱཝ ཨཏྟཱནཾ ནིཡྻཱཏེཏྭཱ དཱསབྱཾ ཨུཔགཏཾ ཨཝཧརནྟསྶཔི པཱརཱཛིཀམེཝཱཏི ཝེདིཏབྦཾ. གེཧདཱསིཡཱ ཀུཙྪིམྷི དཱསསྶ ཛཱཏོཏི ཨེཝམྤི སམྦྷཝཏཱིཏི སམྦྷཝནྟཾ གཧེཏྭཱ ཝུཏྟཾ. གེཧདཱསིཡཱ ཀུཙྪིསྨིཾ པན ཨཉྙསྶ ཛཱཏོཔི ཨེཏྠེཝ སངྒཧིཏོ. ཀརམརཱནཱིཏོ ནཱམ བནྡྷགཱཧགཧིཏོ. ཏེནཱཧ ‘‘པརདེསཏོ པཧརིཏྭཱ’’ཏིཨཱདི. ཏཏྠ པརདེསཏོ པཧརིཏྭཱཏི པརདེསཾ ཝིལུམྤཀེཧི རཱཛརཱཛམཧཱམཏྟཱདཱིཧི མཧཱཙོརེཧི པརདེསཏོ པཧརིཏྭཱ. ཨནཱཔཏྟི པཱརཱཛིཀསྶཱཏི ཡདི ཏསྶ ཝཙནེན ཏཏོ ཨདྷིཀཾ ཝེགཾ ན ཝཌྜྷེཏི, ཨནཱཔཏྟི. པརིཡཱཡེནཱཏི པརིཡཱཡཝཙནེན. མནུསྶཝིགྒཧེ ‘‘མརཎཝཎྞཾ ཝཱ སཾཝཎྞེཡྻཱ’’ཏི ཝུཏྟཏྟཱ པརིཡཱཡཀཐཱཡཔི ན མུཙྩཏི, ཨིདྷ པན ‘‘ཨདིནྣཾ ཐེཡྻསངྑཱཏཾ ཨཱདིཡེཡྻཱ’’ཏི ཨཱདཱནསྶེཝ ཝུཏྟཏྟཱ པརིཡཱཡཀཐཱཡ མུཙྩཏི.

པཱཎཀཐཱཝཎྞནཱ ནིཊྛིཏཱ.

ཨཔདཀཐཱཝཎྞནཱ

ཨཔདཀཐཱཡཾ ¶ ནཱམེནཱཏི སཔྤནཱམེན ཝཱ སཱམིཀེན ཀཏནཱམེན ཝཱ. ཀརཎྜཔུཊནྟི པེལཱ༹ཡ པིདྷཱནཾ. ཨཱཧཙྩཱཏི པཧརིཏྭཱ.

ཙཏུཔྤདཀཐཱཝཎྞནཱ

༡༡༦. ཙཏུཔྤདཀཐཱཡཾ བྷིངྐཙྪཱཔནྟི བྷིངྐབྷིངྐཱཏི སདྡཱཡནཏོ ཨེཝཾལདྡྷནཱམཾ ཧཏྠིཔོཏཀཾ. ཨནྟོཝཏྠུམྷཱིཏི པརིཀྑིཏྟེ ཨནྟོཝཏྠུམྷི. རཱཛངྒཎེཏི པརིཀྑིཏྟེ ནགརེ ཝཏྠུདྭཱརཏོ བཧིརཱཛངྒཎེ. ཧཏྠིསཱལཱ ཋཱནནྟི ནིབྦཀོསཏོ ཨུདཀཔཱཏབྦྷནྟརཾ ཋཱནཾ. བཧིནགརེ ཋིཏསྶཱཏི ¶ པརིཀྑིཏྟནགརཾ སནྡྷཱཡ ཝུཏྟཾ, ཨཔརིཀྑིཏྟནགརེ པན ཨནྟོནགརེ ཋིཏསྶཔི ཋིཏཊྛཱནམེཝ ཋཱནཾ. ཁཎྜདྭཱརནྟི ཨཏྟནཱ ཁཎྜིཏདྭཱརཾ. སཱཁཱབྷངྒནྟི བྷཉྫིཏསཱཁཾ. ནིཔནྣསྶ དྭེཏི བནྡྷནེན སདྡྷིཾ དྭེ. གྷཱཏེཏཱིཏི ཨེཏྠ ‘‘ཐེཡྻཙིཏྟེན ཝིནཱསེནྟསྶ སཧཔཡོགཏྟཱ དུཀྐཊམེཝ, ན པཱཙིཏྟིཡ’’ནྟི ཨཱཙརིཡཱ ཝདནྟི.

ཙཏུཔྤདཀཐཱཝཎྞནཱ ནིཊྛིཏཱ.

ཨོཎིརཀྑཀཐཱཝཎྞནཱ

ཨོཎིརཀྑཀཐཱཡཾ ཨོཎིནྟི ཨོཎཱིཏཾ, ཨཱནཱིཏནྟི ཨཏྠོ. ‘‘ཨོཎིརཀྑསྶ སནྟིཀེ ཋཔིཏཾ བྷཎྜཾ ཨུཔནིདྷི ཝིཡ སངྒོཔནཏྠཱཡ ཨནིཀྑིཔིཏྭཱ མུཧུཏྟཾ ཨོལོཀནཏྠཱཡ ཋཔིཏཏྟཱ ཏསྶ ཋཱནཱཙཱཝནམཏྟེན པཱརཱཛིཀཾ ཛནེཏཱི’’ཏི ཝདནྟི.

སཾཝིདཱཝཧཱརཀཐཱཝཎྞནཱ

སཾཝིདཱཝཧཱརཀཐཱཡཾ ‘‘སམྦཧུལཱ སཾཝིདཧིཏྭཱ ཨེཀོ བྷཎྜཾ ཨཝཧརཏི, ཨཱཔཏྟི སབྦེསཾ པཱརཱཛིཀསྶཱ’’ཏི པཱལི༹ཡཾ ཨཝིསེསེན ཝུཏྟཏྟཱ ཨཱཎཱཔཀཱནཾ ཨཱཎཏྟིཀྑཎེ ཨཱཔཏྟི, ཨཝཧཱརཀསྶ ཨུདྡྷཱརེཏི ཡཐཱསམྦྷཝཾ ཡོཛེཏྭཱ ཨཏྠོ གཧེཏབྦོ ཨཱཎཏྟིཀཐཱཡཾ ‘‘སོ ཏཾ བྷཎྜཾ ཨཝཧརཏི, ཨཱཔཏྟི སབྦེསཾ པཱརཱཛིཀསྶཱ’’ཏིཨཱདཱིསུ ཝིཡ. ཨེཏྠཱཔི ཧི ཨཱཎཱཔཀསྶ ཨཱཎཏྟིཀྑཎེཡེཝ ཨཱཔཏྟི ཝུཏྟཱ. ཏཐཱ ཙ ཝཀྑཏི ‘‘ཨཐ ཏཾ བྷཎྜཾ ཨཝསྶཾ ཧཱརིཡཾ ཧོཏི, ཡཾ ¶ པརཏོ སབྦེསཾ ཨཱཔཏྟི པཱརཱཛིཀསྶཱཏི ཝུཏྟཾ, ཏཏོ ཨིམསྶ ཏངྑཎེཡེཝ པཱརཱཛིཀཾ ཧོཏཱིཏི ཨཡཾ ཡུཏྟི སབྦཏྠ ཝེདིཏབྦཱ’’ཏི (པཱརཱ. ཨཊྛ. ༡.༡༢༡). སཾཝིདཱཝཧཱརེ ཙ ‘‘ཨཱཎཏྟི ནཏྠཱི’’ཏི ན ཝཏྟབྦཱ ‘‘ཨནྟེཝཱསིཀེསུ ཨེཀམེཀསྶ ཨེཀེཀོ མཱསཀོ སཱཧཏྠིཀོ ཧོཏི, པཉྩ ཨཱཎཏྟིཀཱ’’ཏི ཝཙནཏོ. ཨཱཎཏྟིཡཱ ཙ སཏི ཨཱཎཱཔཀསྶ ཨཱཎཏྟིཀྑཎེཡེཝ ཨཱཔཏྟི ཨིཙྪིཏབྦཱ, ན ཨུདྡྷཱརེ.

ཡདི ཨེཝཾ ‘‘ཏེསུ ཨེཀོ བྷཎྜཾ ཨཝཧརཏི, ཏསྶུདྡྷཱརེ སབྦེསཾ པཱརཱཛིཀ’’ནྟི ཀསྨཱ ཝུཏྟནྟི? ནཱཡཾ དོསོ. ཨེཏྠ ཧི སབྦེསཾཡེཝ ཨཱཔཏྟིདསྶནཏྠཾ ¶ ཨཝཧཱརཀསྶཔི ཨཱཔཏྟིསམྦྷཝཊྛཱནཾ དསྶེནྟོ ‘‘ཏསྶུདྡྷཱརེ སབྦེསཾ པཱརཱཛིཀ’’ནྟི ཨཱཧ, ན པན ཨཱཎཱཔཀཱནམྤི ཨུདྡྷཱརེཡེཝ ཨཱཔཏྟིདསྶནཏྠནྟི ཨེཝམཏྠོ གཧེཏབྦོ. ‘‘སམྦཧུལཱ ཨེཀཾ ཨཱཎཱཔེནྟི ‘གཙྪེཏཾ ཨཱཧརཱ’ཏི, ཏསྶུདྡྷཱརེ སབྦེསཾ པཱརཱཛིཀ’’ནྟིཨཱདཱིསུཔི ཨེཝམེཝ ཨཏྠོ གཧེཏབྦོ. ཨཐ ཝཱ སཾཝིདཱཝཧཱརེ ཨཱཎཱཔཀཱནམྤི ཨུདྡྷཱརེཡེཝ ཨཱཔཏྟི, ན ཨཱཎཏྟིཀྑཎེཏི ཨཱཝེཎིཀམིདཾ ལཀྑཎནྟི ཨཊྛཀཐཱཙརིཡཔྤམཱཎེན གཧེཏབྦཾ, ཨིཏོ ཝཱ ཨཉྙེན པཀཱརེན ཡཐཱ ཨཊྛཀཐཱཡཾ པུབྦེནཱཔརཾ ན ཝིརུཛ྄ཛྷཏི, ཏཐཱ ཝཱིམཾསིཏྭཱ གཧེཏབྦཾ.

སཾཝིདྷཱཡཱཏི སཾཝིདཧིཏྭཱ. ཏེན ནེསཾ དུཀྐཊཱཔཏྟིཡོཏི ཨཱཎཏྟིཝསེན པཱརཱཛིཀཱཔཏྟིཡཱ ཨསམྦྷཝེ སཏི ཝུཏྟཾ. ཡདི ཧི ཏེ ཨཱཎཏྟཱ ཨཝསྶཾ ཏཾ ཧརནྟི, པཱརཱཛིཀཱཔཏྟིཡེཝ ནེསཾ དཊྛབྦཱ, ན དུཀྐཊཱཔཏྟི. སཱཧཏྠིཀཾ ཝཱ ཨཱཎཏྟིཀསྶ ཨཱཎཏྟིཀཾ ཝཱ སཱཧཏྠིཀསྶ ཨངྒཾ ན ཧོཏཱིཏི བྷིནྣཀཱལཝིསཡཏྟཱ ཨཉྙམཉྙསྶ ཨངྒཾ ན ཧོཏི. ཏཐཱ ཧི སཧཏྠཱ ཨཝཧརནྟསྶ ཋཱནཱཙཱཝནེ ཨཱཔཏྟི, ཨཱཎཏྟིཡཱ པན ཨཱཎཏྟིཀྑཎེཡེཝཱཏི བྷིནྣཀཱལཝིསཡཱ སཱཧཏྠིཀཱཎཏྟིཀེཧི ཨཱཔཛྫིཏབྦཱཔཏྟིཡོ.

སཾཝིདཱཝཧཱརཀཐཱཝཎྞནཱ ནིཊྛིཏཱ.

སངྐེཏཀམྨཀཐཱཝཎྞནཱ

༡༡༩. སངྐེཏཀམྨཀཐཱཡཾ ཨོཙརཀེ ཝུཏྟནཡེནེཝཱཏི ‘‘ཨཝསྶཾ ཧཱརིཡེ བྷཎྜེ’’ཏིཨཱདིནཱ ཝུཏྟནཡེན. པཱལི༹ཡཾ ཏཾ སངྐེཏཾ པུརེ ཝཱ པཙྪཱ ཝཱཏི ཨེཏྠ ཏཾ སངྐེཏནྟི སཱམིཨཏྠེ ཨུཔཡོགཝཙནནྟི དཊྛབྦཾ, ཏསྶ སངྐེཏསྶཱཏི ཨཏྠོ. ཨཐ ཝཱ ཏཾ སངྐེཏཾ ཨསམྤཏྭཱ པུརེ ཝཱ ཏཾ སངྐེཏཾ ཨཏིཀྐམྨ པཙྪཱ ཝཱཏི ཨེཝམེཏྠ ཡོཛནཱ ཝེདིཏབྦཱ. ཏེནེཝཱཧ – ‘‘ཨཛྫཱཏི ནིཡཱམིཏཾ ¶ ཏཾ སངྐེཏཾ ཨཏིཀྐམྨཱ’’ཏིཨཱདི. ཏཾ ནིམིཏྟཾ པུརེ ཝཱ པཙྪཱ ཝཱཏི ཨེཏྠཱཔི ཨིམིནཱཝ ནཡེན ཨཏྠོ ཝེདིཏབྦོ.

སངྐེཏཀམྨཀཐཱཝཎྞནཱ ནིཊྛིཏཱ.

ནིམིཏྟཀམྨཀཐཱཝཎྞནཱ

༡༢༠. ནིམིཏྟཀམྨཀཐཱཡཾ ¶ ཨཀྑིནིཁཎཱདིནིམིཏྟཀམྨཾ པན ལཧུཀཾ ཨིཏྟརཀཱལཾ, ཏསྨཱ ཏངྑཎེཡེཝ ཏཾ བྷཎྜཾ ཨཝཧརིཏུཾ ན སཀྐཱ. ཏཐཱ ཧི ཀིཉྩི བྷཎྜཾ དཱུརེ ཧོཏི ཀིཉྩི བྷཱརིཡཾ, ཏཾ གཧེཏུཾ ཡཱཝ གཙྪཏི, ཡཱཝ ཨུཀྑིཔིཏུཾ ཝཱཡམཏི, ཏཱཝ ནིམིཏྟཀམྨསྶ པཙྪཱ ཧོཏི. ཨེཝཾ སནྟེཔི ནིམིཏྟཀམྨཏོ པཊྛཱཡ གཎྷིཏུཾ ཨཱརདྡྷཏྟཱ ཏེནེཝ ནིམིཏྟེན ཨཝཧརཏཱིཏི ཝུཙྩཏི. ཡདི ཨེཝཾ ‘‘པུརེབྷཏྟཔཡོགོཝ ཨེསོ’’ཏི ཝཱདོ པམཱཎབྷཱཝཾ ཨཱཔཛྫཏཱིཏི? ནཱཔཛྫཏི. ན ཧི སངྐེཏཀམྨཾ ཝིཡ ནིམིཏྟཀམྨཾ དཊྛབྦཾ. ཏཏྠ ཧི ཀཱལཔརིཙྪེདོ ཨཏྠི, ཨིདྷ ནཏྠི. ཀཱལཝསེན ཧི སངྐེཏཀམྨཾ ཝུཏྟཾ, ཀིརིཡཱཝསེན ནིམིཏྟཀམྨནྟི ཨཡམེཏེསཾ ཝིསེསོ. ‘‘ཏཾ ནིམིཏྟཾ པུརེ ཝཱ པཙྪཱ ཝཱ ཏཾ བྷཎྜཾ ཨཝཧརཏི, མཱུལཊྛསྶ ཨནཱཔཏྟཱི’’ཏི ཨིདཾ པན ཏེན ནིམིཏྟཀམྨེ ཀཏེ གཎྷིཏུཾ ཨནཱརབྷིཏྭཱ སཡམེཝ གཎྷནྟསྶ ཝསེན ཝུཏྟཾ.

ནིམིཏྟཀམྨཀཐཱཝཎྞནཱ ནིཊྛིཏཱ.

ཨཱཎཏྟིཀཐཱཝཎྞནཱ

༡༢༡. ཨཱཎཏྟིཀཐཱཡཾ ཨསམྨོཧཏྠནྟི ཡསྨཱ སངྐེཏཀམྨནིམིཏྟཀམྨཱནི ཀརོནྟོ ཨེཀོ པུརེབྷཏྟཱདཱིསུ ཝཱ ཨཀྑིནིཁཎནཱདཱིནི ཝཱ དིསྭཱ ‘‘གཎྷཱ’’ཏི ཝདཏི, ཨེཀོ གཧེཏབྦབྷཎྜནིསྶིཏཾ ཀཏྭཱ ‘‘པུརེབྷཏྟཾ ཨེཝཾཝཎྞསཎྛཱནཾ བྷཎྜཾ གཎྷཱ’’ཏི ཝདཏི, ཨེཀོ ‘‘ཏྭཾ ཨིཏྠནྣཱམསྶ པཱཝད, སོ ཨཉྙསྶ པཱཝདཏཱུ’’ཏིཨཱདིནཱ པུགྒལཔཊིཔཱཊིཡཱ ཙ ཨཱཎཱཔེཏི, ཏསྨཱ ཀཱལཝསེན ཀིརིཡཱཝསེན བྷཎྜཝསེན པུགྒལཝསེན ཙ ཨཱཎཏྟེ ཝིསངྐེཏཱཝིསངྐེཏཝསེན ཨེཏེསུ སངྐེཏཀམྨནིམིཏྟཀམྨེསུ ཨསམྨོཧཏྠཾ. ནིམིཏྟསཉྙཾ ཀཏྭཱཏི ‘‘ཨཱིདིསཾ ནཱམ བྷཎྜ’’ནྟི ཝཎྞསཎྛཱནཱདིཝསེན གཧཎསྶ ནིམིཏྟབྷཱུཏཾ སཉྙཱཎཾ ཀཏྭཱ.

ཡཐཱདྷིཔྤཱཡཾ གཙྪཏཱིཏི དུཏིཡོ ཏཏིཡསྶ, ཏཏིཡོ ཙཏུཏྠསྶཱཏི ཨེཝཾ པཊིཔཱཊིཡཱ ཙེ ཝདནྟཱིཏི ཝུཏྟཾ ཧོཏི. སཙེ པན དུཏིཡོ ཙཏུཏྠསྶ ཨཱརོཙེཏི, ན ཡཐཱདྷིཔྤཱཡཾ ཨཱཎཏྟི གཏཱཏི ¶ ནེཝཏྠི ཐུལླཙྩཡཾ, པཋམཾ ཝུཏྟདུཀྐཊམེཝ ཧོཏི. ཏདེཝ ཧོཏཱིཏི བྷཎྜགྒཧཎཾ ཝིནཱ ཀེཝལཾ སཱསནཔྤཊིགྒཧཎམཏྟསྶེཝ སིདྡྷཏྟཱ ཏདེཝ ཐུལླཙྩཡཾ ཧོཏི ¶ , ན དུཀྐཊཾ ནཱཔི པཱརཱཛིཀནྟི ཨཏྠོ. སབྦཏྠཱཏི ཨཱིདིསེསུ སབྦཊྛཱནེསུ.

ཏེསམྤི དུཀྐཊནྟི ཨཱརོཙནཔཙྩཡཱ དུཀྐཊཾ. པཊིགྒཧིཏམཏྟེཏི ཨེཏྠ ཨཝསྶཾ ཙེ པཊིགྒཎྷཱཏི, ཏཏོ པུབྦེཝ ཨཱཙརིཡསྶ ཐུལླཙྩཡཾ, ན པན པཊིགྒཧིཏེཏི དཊྛབྦཾ. ཀསྨཱ པནསྶ ཐུལླཙྩཡནྟི ཨཱཧ – ‘‘མཧཱཛནོ ཧི ཏེན པཱཔེ ནིཡོཛིཏོ’’ཏི.

མཱུལཊྛསྶེཝ དུཀྐཊནྟི ཨཡཾ ཏཱཝ ཨཊྛཀཐཱནཡོ, ཨཱཙརིཡཱ པན ‘‘ཝིསངྐེཏཏྟཱ ཨེཝ མཱུལཊྛསྶཱཏི པཱལི༹ཡཾ ཨཝུཏྟཏྟཱ པཊིགྒཎྷནྟསྶེཝ ཏཾ དུཀྐཊཾ ཝུཏྟཾ, ཨིམིནཱཝ ཧེཊྛཱ ཨཱགཏཝཱརེསུཔི པཊིགྒཎྷནྟཱནཾ པཊིགྒཧཎེ དུཀྐཊཾ ཝེདིཏབྦཾ, ཏཾ པན ཏཏྠ ཨོཀཱསཱབྷཱཝཏོ ཨཝཏྭཱ ཨིདྷ ཝུཏྟ’’ནྟི ཝདནྟི.

ཨེཝཾ པུན ཨཱཎཏྟིཡཱཔི དུཀྐཊམེཝ ཧོཏཱིཏི པཋམཾ ཨཏྠསཱདྷཀཏྟཱབྷཱཝཏོ ཝུཏྟཾ. ཨཱཎཏྟིཀྑཎེཡེཝ པཱརཱཛིཀོཏི མགྒཱནནྟརཕལཾ ཝིཡ ཨཏྠསཱདྷིཀཱཎཏྟིཙེཏནཱཀྑཎེཡེཝ པཱརཱཛིཀོ. བདྷིརཏཱཡཱཏི ཨུཙྩཾ བྷཎནྟོ བདྷིརཏཱཡ ཝཱ ན སཱཝེཏཱིཏི ཝུཏྟཾ ཧོཏི. ‘‘ཨཱཎཏྟོ ཨཧཾ ཏཡཱ’’ཏི ཨིམསྨིཾ ཝཱརེ པུན པཊིཀྑིཔིཏབྦཱབྷཱཝེན ཨཏྠསཱདྷཀཏྟཱབྷཱཝཏོ མཱུལཊྛསྶ ནཏྠི པཱརཱཛིཀཾ. ‘‘པཎྞེ ཝཱ སིལཱཡ ཝཱ ཡཏྠ ཀཏྠཙི ‘ཙོརིཡཾ ཀཱཏབྦ’ནྟི ལིཁིཏྭཱ ཋཔིཏེ པཱརཱཛིཀམེཝཱ’’ཏི ཏཱིསུཔི གཎྛིཔདེསུ ཝུཏྟཾ. ཏཾ པན ཡསྨཱ ཨདིནྣཱདཱནཏོ པརིཡཱཡཀཐཱཡ མུཙྩཏི, ཏསྨཱ ཝཱིམཾསིཏྭཱ གཧེཏབྦཾ. ཡདི པན ‘‘ཨསུཀསྨིཾ ནཱམ ཋཱནེ ཨསུཀཾ ནཱམ བྷཎྜཾ ཋིཏཾ, ཏཾ ཨཝཧརཱ’’ཏི པཎྞེ ལིཁིཏྭཱ ཀསྶཙི པེསེཏི, སོ ཙེ ཏཾ བྷཎྜཾ ཨཝཧརཏི, ཨཱཎཏྟིཡཱ ཨཝཧཊཾ ནཱམ ཧོཏཱིཏི ཡུཏྟཾ ཨཱཎཱཔཀསྶ པཱརཱཛིཀཾ.

ཨཱཎཏྟིཀཐཱཝཎྞནཱ ནིཊྛིཏཱ.

ཨཱཔཏྟིབྷེདཝཎྞནཱ

༡༢༢. ཏཏྠ ཏཏྠཱཏི བྷཱུམཊྛཐལཊྛཱདཱིསུ. ཨངྒཉྩ དསྶེནྟོཏི ཡོཛེཏབྦཾ. ཝཏྠུབྷེདེནཱཏི ཨཝཧརིཏབྦསྶ ཝཏྠུསྶ གརུཀལཧུཀབྷེདེན. ཨཱཔཏྟིབྷེདནྟི པཱརཱཛིཀཐུལླཙྩཡདུཀྐཊཱནཾ ཝསེན ཨཱཔཏྟིབྷེདཾ. མནུསྶབྷཱུཏེན པརེན པརིགྒཧིཏཾ པརཔརིགྒཧིཏཾ.

༡༢༥. ན ¶ ¶ ཙ སཀསཉྙཱིཏི ཨིམིནཱ པན པརཔརིགྒཧིཏཾ ཝཏྠུ ཀཐིཏཾ. ན ཙ ཝིསྶཱསགྒཱཧཱི, ན ཙ ཏཱཝཀཱལིཀནྟི ཨིམིནཱ པན པརཔརིགྒཧིཏསཉྙཱ ཀཐིཏཱ. ན ཝིསྶཱསགྒཱཧིཏཱཏི ཝིསྶཱསགྒཱཧེན ཨགྒཧིཏབྷཱཝོ. ན ཏཱཝཀཱལིཀཏཱཏི པཙྪཱ དཱཏབྦཏཾ ཀཏྭཱ ཨགྒཧིཏབྷཱཝོ. ཨནཛ྄ཛྷཱཝུཏྠཀནྟི ‘‘མམེད’’ནྟི པརིགྒཧཝསེན ཨནཛ྄ཛྷཱཝུཏྠཀཾ ཨརཉྙེ དཱརུཏིཎཔཎྞཱདི. ཚཌྜིཏནྟི ཀཊྛཧཱརཱདཱིཧི ཨཏིབྷཱརཱདིཏཱཡ ཨནཏྠིཀབྷཱཝེན ཨརཉྙཱདཱིསུ ཚཌྜིཏཾ. ཚིནྣམཱུལཀནྟི ནཊྛཾ པརིཡེསིཏྭཱ ཨཱལཡསངྑཱཏསྶ མཱུལསྶ ཚིནྣཏྟཱ ཚིནྣམཱུལཾ. ཨསཱམིཀནྟི ཨནཛ྄ཛྷཱཝུཏྠཀཱདཱིཧི ཏཱིཧི ཨཱཀཱརེཧི དསྶིཏཾ ཨསཱམིཀཝཏྠུ. ཨུབྷཡམྤཱིཏི ཡཐཱཝུཏྟལཀྑཎཾ ཨསཱམིཀཾ ཨཏྟནོ སནྟཀཉྩ.

ཨཱཔཏྟིབྷེདཝཎྞནཱ ནིཊྛིཏཱ.

ཨནཱཔཏྟིབྷེདཝཎྞནཱ

༡༣༡. ཡཱཡ སེཡྻཱཡ སཡིཏོ ཀཱལཾ ཀརོཏི, སཱ ཨནུཊྛཱནསེཡྻཱ ནཱམ. ‘‘ཙིཏྟེན པན ཨདྷིཝཱསེཏཱི’’ཏི ཝུཏྟམཏྠཾ ཝིབྷཱཝེཏུཾ ‘‘ན ཀིཉྩི ཝདཏཱི’’ཏི ཝུཏྟཾ. པཱཀཏིཀཾ ཀཱཏུནྟི ཡཏྟཀཾ གཧིཏཾ པརིབྷུཏྟཾ ཝཱ, ཏཏྟཀཾ དཱཏབྦནྟི ཝུཏྟཾ ཧོཏི.

པཊིདསྶཱམཱིཏི ཡཾ གཧིཏཾ, ཏདེཝ ཝཱ ཨཉྙཾ ཝཱ ཏཱདིསཾ པུན དསྶཱམཱིཏི ཨཏྠོ. སངྒྷསནྟཀེ སངྒྷཾ ཨནུཛཱནཱཔེཏུམསཀྐུཎེཡྻཏྟཱ ཀསྶཙི ཝཏྠུནོ ཨནནུཛཱནིཏབྦཏོ ཙ ‘‘སངྒྷསནྟཀཾ པན པཊིདཱཏུམེཝ ཝཊྚཏཱི’’ཏི ཝུཏྟཾ.

ཏསྨིཾཡེཝ ཨཏྟབྷཱཝེ ནིབྦཏྟཱཔཱིཏི ཏསྨིཾཡེཝ མཏསརཱིརེ ཨུཔྤནྣཱཔི. ཝིནཱིཏཝཏྠཱུསུ སཱཊཀཏཎྷཱཡ ཏསྨིཾཡེཝ མཏསརཱིརེ ནིབྦཏྟཔེཏོ ཝིཡཱཏི དཊྛབྦཾ. རུཀྑཱདཱིསུ ལགྒིཏསཱཊཀེ ཝཏྟབྦམེཝ ནཏྠཱིཏི མནུསྶེཧི ཨཔརིགྒཧིཏཾ སནྡྷཱཡ ཝུཏྟཾ. སཙེ པན ཏཾ ཨཱརཀྑཀེཧི པརིགྒཧིཏཾ ཧོཏི, གཧེཏུཾ ན ཝཊྚཏཱིཏི.

ཨནཱཔཏྟིབྷེདཝཎྞནཱ ནིཊྛིཏཱ.

པདབྷཱཛནཱིཡཝཎྞནཱ ནིཊྛིཏཱ.

པཀིཎྞཀཀཐཱཝཎྞནཱ

དཱརུཁཎྜཱདཱིསུ ¶ ¶ ‘‘བྷཱརིཡམིདཾ, ཏྭཾ ཨེཀཔསྶཾ ཨུཀྑིཔཱཧི, ཨཧཾ ཨེཀཔསྶཾ ཨུཀྑིཔཱམཱི’’ཏི ཨུབྷཡེསཾ པཡོགེན ཨེཀསྶ ཝཏྠུནོ ཋཱནཱཙཱཝནཾ སནྡྷཱཡ ‘‘སཱཧཏྠིཀཱཎཏྟིཀ’’ནྟི ཝུཏྟཾ. ཨིདཉྩ ཀཱཡཝཱཙཱནཾ ཨཱིདིསེ ཋཱནེ ཨངྒབྷཱཝམཏྟདསྶནཏྠཾ ཝུཏྟཾ. ཡཱཡ པན ཙེཏནཱཡ སམུཊྛཱཔིཏོ པཡོགོ སཱཧཏྠིཀོ ཨཱཎཏྟིཀོ ཝཱ པདྷཱནབྷཱཝེན ཋཱནཱཙཱཝནཾ སཱདྷེཏི, ཏསྶཱ ཝསེན ཨཱཔཏྟི ཀཱརེཏབྦཱ. ཨཉྙཐཱ སཱཧཏྠིཀཾ ཝཱ ཨཱཎཏྟིཀསྶ ཨངྒཾ ན ཧོཏི, ཨཱཎཏྟིཀཾ ཝཱ སཱཧཏྠིཀསྶཱཏི ཨིདཾ ཝིརུཛ྄ཛྷཏི.

པཀིཎྞཀཀཐཱཝཎྞནཱ ནིཊྛིཏཱ.

ཝིནཱིཏཝཏྠུཝཎྞནཱ

༡༣༢. ཝིནཱིཏཝཏྠཱུསུ སནྡྷཱཝཏཱིཏི སུཊྛུ དྷཱཝཏི. ཝིདྷཱཝཏཱིཏི ཝིཝིདྷཱ ནཱནཔྤཀཱརེན དྷཱཝཏི. ཀཱཡཝཙཱིདྭཱརབྷེདཾ ཝིནཱཔཱིཏི ཀཱཡཙོཔནཾ ཝཙཱིབྷེདཉྩ ཝིནཱ. པཊིསངྑཱནབལེནཱཏི ཏཐཱཝིདྷཙིཏྟུཔྤཱདེ ཨཱདཱིནཝཔཙྩཝེཀྑཎབལེན.

༡༣༥. པུཙྪཱསབྷཱགེནཱཏི པུཙྪཱནུརཱུཔེན. ནིརུཏྟི ཨེཝ པཐོ ནིརུཏྟིཔཐོ, ཏསྨིཾ ནིརུཏྟིཔཐེ. ཏེནཱཧ ‘‘ཝོཧཱརཝཙནམཏྟེ’’ཏི.

༡༣༧. ཡཐཱཀམྨཾ གཏོཏི ཨིམིནཱ ཏསྶ མཏབྷཱཝཾ དསྶེཏི. ཨབྦྷུཎྷེཏི ཨིམིནཱཔི ཝུཏྟམེཝ པརིཡཱཡནྟརེན ཝིབྷཱཝེཏུཾ ‘‘ཨལླསརཱིརེ’’ཏི ཝུཏྟཾ. ཝིསབྷཱགསརཱིརེཏི ཨིཏྠིསརཱིརེ. ཝིསབྷཱགསརཱིརཏྟཱ ཨཙྩཱསནྣེན ན བྷཝིཏབྦནྟི ཨཱཧ ‘‘སཱིསེ ཝཱ’’ཏིཨཱདི. ཝཊྚཏཱིཏི ཝིསབྷཱགསརཱིརེཔི ཨཏྟནཱཝ ཝུཏྟཝིདྷིཾ ཀཱཏུཾ སཱཊཀཉྩ གཧེཏུཾ ཝཊྚཏི. ཀེཙི པན ‘‘ཀིཉྩཱཔི ཨིམིནཱ སིཀྑཱཔདེན ཨནཱཔཏྟི, ཨིཏྠིརཱུཔཾ པན ཨཱམསནྟསྶ དུཀྐཊ’’ནྟི ཝདནྟི.

༡༣༨. ཀུསཾ སངྐཱམེཏྭཱཏི ཀུསཾ པརིཝཏྟེཏྭཱ. ཀཱུཊམཱནཀཱུཊཀཧཱཔཎཱདཱིཧཱིཏི ཨཱདི-སདྡེན ཏུལཱཀཱུཊཀཾསཀཱུཊཝཉྩནཱདིཾ སངྒཎྷཱཏི. ཏཏྠ ¶ ཀཱུཊམཱནཾ ཧདཡབྷེདསིཁཱབྷེདརཛྫུབྷེདཝསེན ཏིཝིདྷཾ ཧོཏི. ཏཏྠ ཧདཡནྟི ནཱལི༹ཨཱདིམཱནབྷཱཛནཱནཾ ཨབྦྷནྟརཾ, ཏསྶ བྷེདོ ཚིདྡཀརཎཾ ཧདཡབྷེདོ, སོ སཔྤིཏེལཱདིམིནནཀཱལེ ལབྦྷཏི. ཏཱནི ཧི གཎྷནྟོ ཧེཊྛཱཚིདྡེན མཱནེན ‘‘སཎིཀཾ ཨཱསིཉྩཱ’’ཏི ཝཏྭཱ ཨནྟོབྷཱཛནེ བཧུཾ པགྒྷརཱཔེཏྭཱ གཎྷཱཏི, དདནྟོ ཚིདྡཾ པིདྷཱཡ སཱིགྷཾ པཱུརེཏྭཱ ¶ དེཏི. སིཁཱབྷེདོ ཏིལཏཎྜུལཱདིམིནནཀཱལེ ལབྦྷཏི. ཏཱནི ཧི གཎྷནྟོ སཎིཀཾ སིཁཾ ཨུསྶཱཔེཏྭཱ གཎྷཱཏི, དེནྟོ ཝེགེན པཱུརེཏྭཱ སིཁཾ ཚིནྡནྟོ དེཏི. རཛྫུབྷེདོ ཁེཏྟཝཏྠུམིནནཀཱལེ ལབྦྷཏི. ཁེཏྟཱདིཾ མིནནྟཱ ཧི ཨམཧནྟམྤི མཧནྟཾ ཀཏྭཱ མིནནྟི, མཧནྟམྤི ཨམཧནྟཾ. ཀཱུཊཀཧཱཔཎོ པཱཀཊོཡེཝ.

ཏུལཱཀཱུཊཾ པན རཱུཔཀཱུཊཾ ཨངྒཀཱུཊཾ གཧཎཀཱུཊཾ པཊིཙྪནྣཀཱུཊནྟི ཙཏུབྦིདྷཾ ཧོཏི. ཏཏྠ རཱུཔཀཱུཊཾ ནཱམ དྭེ ཏུལཱ སརཱུཔཱ ཀཏྭཱ གཎྷནྟོ མཧཏིཡཱ གཎྷཱཏི, དདནྟོ ཁུདྡིཀཱཡ དེཏི. ཨངྒཀཱུཊཾ ནཱམ གཎྷནྟོ པཙྪཱབྷཱགེ ཧཏྠེན ཏུལཾ ཨཀྐམཏི, དདནྟོ པུབྦབྷཱགེ ཨཀྐམཏི. གཧཎཀཱུཊཾ ནཱམ གཎྷནྟོ མཱུལེ རཛྫུཾ གཎྷཱཏི, དདནྟོ ཨགྒེ. པཊིཙྪནྣཀཱུཊཾ ནཱམ ཏུལཾ སུསིརཾ ཀཏྭཱ ཨནྟོ ཨཡཙུཎྞཾ པཀྑིཔིཏྭཱ གཎྷནྟོ ཏཾ པཙྪཱབྷཱགེ ཀརོཏི, དདནྟོ ཨགྒབྷཱགེ.

ཀཾསོ ཝུཙྩཏི སུཝཎྞཔཱཏི, ཏཱཡ ཝཉྩནཾ ཀཾསཀཱུཊཾ. ཀཐཾ? ཨེཀཾ སུཝཎྞཔཱཏིཾ ཀཏྭཱ ཨཉྙཱ དྭེ ཏིསྶོ ལོཧཔཱཏིཡོ སུཝཎྞཝཎྞཱ ཀརོནྟི, ཏཏོ ཛནཔདཾ གནྟྭཱ ཀིཉྩིདེཝ ཨཌྜྷཾ ཀུལཾ པཝིསིཏྭཱ ‘‘སུཝཎྞབྷཱཛནཱནི ཀིཎཐཱ’’ཏི ཝཏྭཱ ཨགྒྷེ པུཙྪིཏེ སམགྒྷཏརཾ དཱཏུཀཱམཱ ཧོནྟི. ཏཏོ ཏེཧི ‘‘ཀཐཾ ཨིམེསཾ སུཝཎྞབྷཱཝོ ཛཱནིཏབྦོ’’ཏི ཝུཏྟེ ‘‘ཝཱིམཾསིཏྭཱ གཎྷཐཱ’’ཏི སུཝཎྞཔཱཏིཾ པཱསཱཎེ གྷཾསིཏྭཱ སབྦཔཱཏིཡོ དཏྭཱ གཙྪནྟི.

ཝཉྩནཾ ནཱམ ཏེཧི ཏེཧི ཨུཔཱཡེཧི པརེསཾ ཝཉྩནཾ. ཏཏྲིདམེཀཾ ཝཏྠུ – ཨེཀོ ཀིར ལུདྡཀོ མིགཉྩ མིགཔོཏཀཉྩ གཧེཏྭཱ ཨཱགཙྪཏི. ཏམེཀོ དྷུཏྟོ ‘‘ཀིཾ, བྷོ, མིགོ ཨགྒྷཏི, ཀིཾ མིགཔོཏཀོ’’ཏི ཨཱཧ. ‘‘མིགོ དྭེ ཀཧཱཔཎེ, མིགཔོཏཀོ ཨེཀ’’ནྟི ཙ ཝུཏྟེ ཨེཀཾ ཀཧཱཔཎཾ དཏྭཱ མིགཔོཏཀཾ གཧེཏྭཱ ཐོཀཾ གནྟྭཱ ནིཝཏྟོ ‘‘ན མེ, བྷོ, མིགཔོཏཀེན ཨཏྠོ, མིགཾ མེ དེཧཱི’’ཏི ཨཱཧ. ཏེན ཧི དྭེ ཀཧཱཔཎེ དེཧཱིཏི. སོ ཨཱཧ – ‘‘ནནུ, བྷོ, མཡཱ པཋམཾ ཨེཀོ ཀཧཱཔཎོ ¶ དིནྣོ’’ཏི? ‘‘ཨཱམ དིནྣོ’’ཏི. ‘‘ཨིམཾ མིགཔོཏཀཾ གཎྷ, ཨེཝཾ སོ ཙ ཀཧཱཔཎོ, ཨཡཉྩ ཀཧཱཔཎགྒྷནཀོ མིགཔོཏཀོཏི དྭེ ཀཧཱཔཎཱ བྷཝིསྶནྟཱི’’ཏི. སོ ‘‘ཀཱརཎཾ ཝདཏཱི’’ཏི སལླཀྑེཏྭཱ མིགཔོཏཀཾ གཧེཏྭཱ མིགཾ ཨདཱསཱིཏི.

བལསཱཏི བལེན. པནྠགྷཱཏ-གྒཧཎེན ཧིམཝིཔརཱམོསགུམྦཝིཔརཱམོསཱཔི སངྒཧིཏཱ. ཏཏྠ ཡཾ ཧིམཔཱཏསམཡེ ཧིམེན པཊིཙྪནྣཱ ཧུཏྭཱ མགྒཔྤཊིཔནྣཾ ཛནཾ མཱུསནྟི, ཨཡཾ ཧིམཝིཔརཱམོསོ. ཡཾ གུམྨཱདཱིཧི པཊིཙྪནྣཱ ཛནཾ མཱུསནྟི, ཨཡཾ གུམྦཝིཔརཱམོསོ.

ཨུདྡྷཱརེཡེཝ ¶ པཱརཱཛིཀནྟི ‘‘སཙེ སཱཊཀོ བྷཝིསྶཏི, གཎྷིསྶཱམཱི’’ཏི པརིཀཔྤསྶ པཝཏྟཏྟཱ སཱཊཀསྶ ཙ ཏཏྠ སབྦྷཱཝཏོ. པདཝཱརེན ཀཱརེཏབྦོཏི བྷཱུམིཡཾ ཨནིཀྑིཔིཏྭཱཝ ཝཱིམཾསིཏཏྟཱ ཝུཏྟཾ. པརིཡུཊྛིཏོཏི ཨནུབདྡྷོ. དིསྭཱ ཧཊཏྟཱ པརིཀཔྤཱཝཧཱརོ ན དིསྶཏཱིཏི ཨིམིནཱ པརིཀཔྤཱཝཧཱརསྶ ཨསམྦྷཝཾ དསྶེནྟོ མཧཱཔཙྩརིཨཱདཱིསུ ཝུཏྟསྶ ཨཡུཏྟབྷཱཝཾ ཝིབྷཱཝེཏི. མཧཱཨཊྛཀཐཱཡནྟིཨཱདིནཱ པན པརིཀཔྤཱཝཧཱརསམྦྷཝཾ པཱལི༹ཡཱ སཾསནྡནབྷཱཝཉྩ ཝིབྷཱཝེནྟོ མཧཱཨཊྛཀཐཱཡཾ ཝུཏྟམེཝ སུཝུཏྟནྟི དཱིཔེཏི. ཏེནེཝ མཱཏིཀཱཊྛཀཐཱཡམྤི མཧཱཨཊྛཀཐཱནཡོཝ དསྶིཏོ.

ཀེཙཱིཏི མཧཱཨཊྛཀཐཱཡམེཝ ཨེཀཙྩེ ཨཱཙརིཡཱ. མཧཱཔཙྩརིཡཾ པནཱཏི པན-སདྡོ ཀེཙིཝཱདཏོ མཧཱཔཙྩརིཝཱདསྶ ཝིསེསསནྡསྶནཏྠོ. ཏེན ཀེཙིཝཱདོ མཧཱཔཙྩརིཝཱདེནཔི ན སམེཏཱིཏི དསྶེཏི. མཧཱཨཊྛཀཐཱནཡོ ཨེཝ ཙ མཧཱཔཙྩརིཝཱདེནཔི སཾསནྡནཏོ ཡུཏྟཏརོཏི ཝིབྷཱཝེཏི.

ཨལངྐཱརབྷཎྜནྟི ཨངྒུལིམུདྡིཀཱདི ཨལངྐཱརབྷཎྜཾ. ཀུསཾ པཱཏེཏྭཱཏི ཝིལཱིཝམཡཾ ཝཱ ཏཱལཔཎྞམཡཾ ཝཱ ཀཏསཉྙཱཎཾ ཡཾ ཀིཉྩི ཀུསཾ པཱཏེཏྭཱ. སམགྒྷཏརནྟི ཨཔྤགྒྷཏརཾ. པརཀོཊྛཱསཏོ ཀུསེ ཨུདྡྷཊེཔི ན ཏཱཝ ཀུསསྶ པརིཝཏྟནཾ ཛཱཏནྟི ཝུཏྟཾ ‘‘ཨུདྡྷཱརེ རཀྑཏཱི’’ཏི. སིཝེཡྻཀནྟི སིཝིརཊྛེ ཛཱཏཾ.

༡༣༩. ཛནྟཱགྷརཝཏྠུསྨིཾ ཡསྨཱ ཨཱནནྡཏྠེརོ ཏཏྠ ཨནཱཔཏྟིབྷཱཝཾ ཛཱནཱཏི, ཏསྨཱ ‘‘ཏསྶ ཀུཀྐུཙྩཾ ཨཧོསཱི’’ཏི ན ཝུཏྟཾ. ཡསྨཱ ཙ སཡཾ བྷགཝཏོ ནཱརོཙེསི, ཏསྨཱ ‘‘ཨཱརོཙེསཱི’’ཏི ཨེཀཝཙནཾ ན ཝུཏྟཾ.

༡༤༠. ཝིགྷཱསནྟི ¶ ཁཱདིཏཱཝསེསཾ ཨུཙྪིཊྛཾ ཝཱ. ཀཔྤིཡཾ ཀཱརཱཔེཏྭཱཏི པཙཱཔེཏྭཱ. ཨཏྟགུཏྟཏྠཱཡཱཏི ཏཾནིམིཏྟཨུཔདྡཝཏོ ཨཏྟཱནཾ རཀྑཎཏྠཱཡ. ཛིགྷཙྪཱབྷིབྷཱུཏཱ ཧི སཱིཧཱདཡོ ཨཏྟནཱ ཁཱདིཡམཱནཾ གཎྷནྟཱནཾ ཨནཏྠམྤི ཀརེཡྻུཾ. པརཱནུདྡཡཏཱཡཱཏི སཱིཧཱདཱིསུ པརསཏྟེསུ ཨནུཀམྤཱཡ. ཛིགྷཙྪཱཝིནོདནཏྠཉྷི ཏེཧི ཁཱདིཡམཱནཾ ཏེ པལཱཔེཏྭཱ གཎྷཏོ ཏེསུ ཨནུཀམྤཱ ནཱམ ན བྷཝིསྶཏི.

༡༤༡. ཏེཀཊུལཡཱགུཝཏྠུམྷི ཝིཡཱཏི མུསཱཝཱདསཱམཉྙཏོ ཝུཏྟཾ. ཨཱཎཏྟེཧཱིཏི སམྨཏེན ཨཱཎཏྟེཧི. ཨཱཎཏྟེནཱཏི སཱམིཀེཧི ཨཱཎཏྟེན. ཨཔརསྶ བྷཱགཾ དེཧཱིཏི ཨསནྟཾ པུགྒལཾ དསྶེཏྭཱ ¶ གཧིཏཏྟཱ ‘‘བྷཎྜདེཡྻ’’ནྟི ཝུཏྟཾ. ཨཉྙེནཱཏི ཡཐཱཝུཏྟེཧི སམྨཏཱདཱིཧི ཙཏཱུཧི ཨཉྙེན. ‘‘ཨཔརམྤི བྷཱགཾ དེཧཱི’’ཏི ཝུཏྟེཔི སངྒྷསནྟཀཏྟཱ ཨམཱུལཀམེཝ གཧིཏནྟི ‘‘ཨུདྡྷཱརེཡེཝ བྷཎྜགྒྷེན ཀཱརེཏབྦོ’’ཏི ཝུཏྟཾ. ཨིཏརེཧི དཱིཡམཱནནྟི སམྨཏེན, ཏེན ཨཱཎཏྟེན ཝཱ དཱིཡམཱནཾ. ཨེཝཾ གཎྷཏོཏི ‘‘ཨཔརམྤི བྷཱགཾ དེཧཱི’’ཏི ཝཏྭཱ ཝཱ ཀཱུཊཝསྶཱནི གཎེཏྭཱ ཝཱ གཎྷཏོ. སུདིནྣནྟི ཧེཊྛཱ སཱམིཀེན, ཏེན ཨཱཎཏྟེན ཝཱ དཱིཡམཱནཾ གིཧིསནྟཀཾ ‘‘ཨཔརསྶ བྷཱགཾ དེཧཱི’’ཏི ཝཏྭཱ གཎྷཏོ ཨཔརསྶ ཨབྷཱཝཏོ སཱམིསནྟཀམེཝ ཧོཏཱིཏི བྷཎྜདེཡྻཾ ཛཱཏཾ. ཨིདྷ པན ཏེཧི ཨེཝཾ དཱིཡམཱནཾ ‘‘ཨཔརམྤི བྷཱགཾ དེཧཱིཏི ཝཏྭཱ ཝཱ ཀཱུཊཝསྶཱནི གཎེཏྭཱ ཝཱ གཎྷཏོ དེཧཱི’’ཏི ཝུཏྟཏྟཱ ཨཉྙཱཏཀཝིཉྙཏྟིམཏྟཾ ཋཔེཏྭཱ ནེཝ པཱརཱཛིཀཾ ན བྷཎྜདེཡྻནྟི སུདིནྣམེཝ ཧོཏི.

༡༤༢-༣. པརིཀྑཱརཝཏྠཱུསུ ཝུཏྟཔརིཀྑཱརསྶ ཧེཊྛཱ ཝུཏྟབྷཎྜསྶ ཙ ཀོ ཝིསེསོ? ཡཾ པརིབྷོགཡོགྒཾ ཨཱབྷརཎཱདིརཱུཔཾ ཨཀཏྭཱ ཡཐཱསབྷཱཝཏོ ཋཔིཏཾ, ཏཾ བྷཎྜཾ. ཡཾ པན ཏཐཱ ཀཏྭཱ པརིབྷུཉྫིཏུཾ ཨནུཙྪཝིཀཱཀཱརེན ཋཔིཏཾ ཨཱབྷརཎཱདིཀཾ, ཏཾ པརིཀྑཱརནྟི ཝེདིཏབྦཾ.

༡༤༤-༡༤༦. སངྐཱམེཏྭཱཏི ཋིཏཊྛཱནཏོ ཨཔནེཏྭཱ. ཐཝིཀནྟི ཨུཔཱཧནཏྠཝིཀཱདི ཡཾཀིཉྩི ཐཝིཀཾ. ཨཱཧརཱཔེནྟེསུ བྷཎྜདེཡྻནྟི ‘‘གཧིཏེ ཨཏྟམནོ ཧོཏཱི’’ཏི (མཧཱཝ. ༣༥༦) ཝཙནཏོ ཨནཏྟམནསྶ སནྟཀཾ གཧིཏམྤི ¶ པུན དཱཏབྦམེཝཱཏི ཝུཏྟཾ. ‘‘སམྨུཁཱིབྷཱུཏེཧི བྷཱཛེཏབྦ’’ནྟི (མཧཱཝ. ༣༧༩) ཝཙནཏོ བྷཱཛནཱིཡབྷཎྜཾ ཨུཔཙཱརསཱིམཊྛཱནཾཡེཝ པཱཔུཎཱཏཱིཏི ཨཱཧ ‘‘ཨུཔཙཱརསཱིམཱཡཾ ཋིཏསྶེཝ གཧེཏུཾ ཝཊྚཏཱི’’ཏི.

༡༤༨-༩. ‘‘བྷཎྜདེཡྻནྟི ཨུབྷིནྣཾ སཱལཡབྷཱཝེ སཏི ཙོརསྶ ཝཱ སཱམིཀསྶ ཝཱ སམྤཏྟསྶ ཀསྶཙི དཱཏུཾ ཝཊྚཏཱི’’ཏི ཝདནྟི. ཨེསེཝ ནཡོཏི པཾསུཀཱུལསཉྙཱཡ གཧིཏེ བྷཎྜདེཡྻཾ, ཐེཡྻཙིཏྟེན པཱརཱཛིཀནྟི ཨཏྠོ. གཱམེསཱུཏི གཱམིཀེསུ མནུསྶེསུ. གཱམ-གྒཧཎེན ཧེཏྠ གཱམཊྛཱ ཝུཏྟཱ. ཝུཊྛཧནྟེསཱུཏི གཱམཾ ཚཌྜེཏྭཱ པལཱཡནྟེསུ. པུན ཨཱཝསནྟེ ཛནཔདེཏི ཛཱནཔདིཀེསུ པུན ཨཱགནྟྭཱ ཝསནྟེསུ.

ཨཝིསེསེན ཝུཏྟནྟི ‘‘སཨུསྶཱཧཱ ཝཱ ནིརུསྶཱཧཱ ཝཱ’’ཏི ཝིསེསཾ ཨཔརཱམསིཏྭཱ སཱམཉྙཏོ ཝུཏྟཾ. ན ཧི ཀཏིཔཡཱནཾ ཨནུསྶཱཧེ སཏི སངྒྷིཀཾ ཨསངྒྷིཀཾ ཧོཏཱིཏི ཨཡམེཏྠ ཨདྷིཔྤཱཡོ. སཨུསྶཱཧམཏྟམེཝ པམཱཎནྟི སཱམིཀཱནཾ པརིཙྪིནྣབྷཱཝཏོ ཝུཏྟཾ. ཏཏོཏི གཎསནྟཀཏོ པུགྒལསནྟཀཏོ ཝཱ. སེནཱསནཏྠཱཡ ནིཡམིཏནྟི ཨིདཾ ནིདསྶནམཏྟཾ, ཙཏཱུསུ པཙྩཡེསུ ¶ ཡསྶ ཀསྶཙི ཨཏྠཱཡ ནིཡམིཏེཔི ཝུཏྟནཡམེཝ. ཨིསྶརཝཏཱཡཱཏི པརཾ ཨཱཔུཙྪིཏྭཱ ཝཱ ཨནཱཔུཙྪིཏྭཱ ཝཱ དཱཏབྦཀིཙྩཾ ནཏྠི, ཨཡམེཝེཏྠ པམཱཎནྟི ཨེཝཾ ཨཏྟནོ ཨིསྶརབྷཱཝེན. ཨགྒྷེན ཀཱརེཏབྦོཏི ཨགྒྷཱནུརཱུཔཾ དུཀྐཊེན ཐུལླཙྩཡེན ཝཱ ཀཱརེཏབྦོ. ཨིསྶརཝཏཱཡ པརིབྷུཉྫཏོ གཱིཝཱཏི ན ཀེཝལཾ ཨེཏྠེཝ གཱིཝཱ, ཧེཊྛཱ ཀུལསངྒཧཏྠཱཡ ཨིསྶརཝཏཱཡ ཝཱ དིནྣེཔི གཱིཝཱཡེཝ. སུཁཱདིཏམེཝཱཏི ཨནྟོཝིཧཱརེ ནིསཱིདིཏྭཱ གྷཎྚིཔྤཧརཎཱདིཝུཏྟཝིདྷཱནསྶ ཀཏཏྟཱ སུཁཱདིཏཾ. སངྒྷིཀཉྷི ཝེབྷངྒིཡབྷཎྜཾ ཨནྟོཝིཧཱརེ ཝཱ བཧིསཱིམཱཡ ཝཱ ཧོཏུ, བཧིསཱིམཱཡཾ ཋིཏེཧི ཨཔལོཀེཏྭཱ བྷཱཛེཏུཾ ན ཝཊྚཏི, ཨུབྷཡཏྠ ཋིཏམྤི པན ཨནྟོསཱིམཱཡཾ ཋིཏེཧི ཨཔལོཀེཏྭཱ བྷཱཛེཏུཾ ཝཊྚཏིཡེཝ. ཏེནེཝ ཏཱིསུཔི གཎྛིཔདེསུ ཝུཏྟཾ ‘‘ཝིཧཱརེཡེཝ ནིསཱིདིཏྭཱ ཨེཝཾ ཀཏཏྟཱ སུཁཱདིཏནྟི ཨཱཧཱ’’ཏི. ཨཡཉྩ ཨཏྠོ ཝསྶཱུཔནཱཡིཀཀྑནྡྷཀཊྛཀཐཱཡཾ ཨཱཝི བྷཝིསྶཏི.

༡༥༠. ཝུཏྟཝཱདཀཝཏྠཱུསུ པཱལི༹ཡཾ ཡུགསཱཊཀནྟི སཱཊཀཡུགཾ. ཏུལནྟི པལསཏཾ. དོཎནྟི སོལ༹སནཱལི༹མཏྟཾ. པརིཙྪེདཾ པན ཀཏྭཱཏི ཡཏྟཀཾ ¶ ཨིཙྪིཏཾ, ཏཏྟཀཾ ཨགྒྷཝསེན ཝཱ ཙཱིཝརཱདིཔཙྩཡཝསེན ཝཱ པརིཙྪེདཾ ཀཏྭཱ. ཨུཔཱརམྦྷཱཏི ‘‘བྷདནྟཱ ཨཔརིཙྪེདཾ ཀཏྭཱ ཝདནྟཱི’’ཏི ཨེཝཾ དོསཱརོཔནཏོ.

༡༥༣. ཚཱཏཛ྄ཛྷཏྟནྟི ཛིགྷཙྪཱདུཀྑེན པཱིལི༹ཏཨཏྟསནྟཱནཾ. དྷནུཀནྟི ཁུདྡཀདྷནུཀཾ. བདྡྷོ ཧོཏཱིཏི ཏིརིཡཾ བདྡྷོ ཧོཏི. སུནཁདཊྛནྟི སཱམིཀེཧི ཝིསྶཛྫིཏསུནཁེན གཧིཏཾ. ཡཊྛིཡཱ སཧ པཱཏེཏཱིཏི སཱུཀརསྶ ཨཱགམནཏོ པུརེཏརམེཝ ཏཏྠ ཨབཛ྄ཛྷནཏྠཱཡ པཱཏེཏི. མདྡནྟོ གཙྪཏི, བྷཎྜདེཡྻནྟི ཨེཀསཱུཀརགྒྷནཀཾ བྷཎྜཾ དཱཏབྦཾ. ན ཧི ཏེན མགྒེན གཙྪནྟཱ སབྦེཝ སཱུཀརཱ ཏེན པཱསེན བཛ྄ཛྷནྟི, ཨེཀོཡེཝ པཋམཏརཾ གཙྪནྟོ བཛ྄ཛྷཏི, ཏསྨཱ ཨེཀསཱུཀརགྒྷནཀཾ བྷཎྜཾ དཱཏབྦཾ. པཙྪཱ གཙྪཏཱིཏི ཏེན ཀཏཔཡོགེན ཨགནྟྭཱ པཙྪཱ སཡམེཝ གཙྪཏི. ཧེཊྛཱ ཝུཏྟེསུཔི ཨཱིདིསེསུ ཋཱནེསུ ཨེསེཝ ནཡོ. ཨུདྡྷརིཏྭཱ ཚཌྜེཏཱིཏི པུརེཏརམེཝ ཨུདྡྷརིཏྭཱ ཚཌྜེཏི. ཝིཧཱརབྷཱུམིཡནྟི ཝིཧཱརསཱམནྟཱ ཨརཉྙཔྤདེསེ. རཀྑཾ ཡཱཙིཏྭཱཏི རཱཛརཱཛམཧཱམཏྟཱདཱིནཾ སནྟིཀཾ གནྟྭཱ ཨནུདྡིསྶ རཀྑཾ ཡཱཙིཏྭཱ.

ཀུམཱིནམུཁནྟི ཀུམཱིནསྶ ཨནྟོ མཙྪཱནཾ པཝིསནམུཁཾ. གུམྦེ ཁིཔཏི, བྷཎྜདེཡྻམེཝཱཏི ཀུམཱིནསྶ ཨནྟོ པཝིསིཏབྦཱནཾ མཙྪཱནཾ ཨགྒྷེན བྷཎྜདེཡྻཾ.

༡༥༦. ཝཱིསཏིཾསཱདིཝསེན པརིཙྪིནྣཱ བྷིཀྑཱུ ཨེཏྠཱཏི པརིཙྪིནྣབྷིཀྑུཀཾ. ཐེརཱནནྟི ཨཱགནྟུཀཏྠེརཱནཾ ¶ . ཏེསམྤཱིཏི ཨཱཝཱསིཀབྷིཀྑཱུནམྤི. པརིབྷོགཏྠཱཡཱཏི སངྒྷིཀཔརིབྷོགཝསེན པརིབྷུཉྫནཏྠཱཡ. གཧཎེཏི པཱཋསེསོ དཊྛབྦོ. ཡཏྠཱཏི ཡསྨིཾ ཨཱཝཱསེ. ཨཉྙེསཾ ཨཏྠིབྷཱཝནྟི ཨཉྙེསཾ ཨཱགནྟུཀབྷིཀྑཱུནཾ ཨཏྠིབྷཱཝཾ. ཏཏྠཱཏི ཏཱདིསེ ཨཱཝཱསེ. བྷཱཛེཏྭཱ ཁཱདནྟཱིཏི ཨཱགནྟུཀཱནམྤི སམྤཏྟཱནཾ བྷཱཛེཏྭཱ ཁཱདནྟཱིཏི ཨདྷིཔྤཱཡོ. ཙཏཱུསུ པཙྩཡེསུ སམྨཱ ཨུཔནེནྟཱིཏི ཨམྦཕལཱདཱིནི ཝིཀྐིཎིཏྭཱ ཙཱིཝརཱདཱིསུ ཙཏཱུསུ པཙྩཡེསུ སམྨཱ ཨུཔནེནྟི. ཙཱིཝརཏྠཱཡ ནིཡམེཏྭཱ དིནྣཱཏི ‘‘ཨིམེསཾ རུཀྑཱནཾ ཕལཱནི ཝིཀྐིཎིཏྭཱ ཙཱིཝརེསུཡེཝ ཨུཔནེཏབྦཱནི, ན བྷཱཛེཏྭཱ ཁཱདིཏབྦཱནཱི’’ཏི ཨེཝཾ ནིཡམེཏྭཱ དིནྣཱ. ཏེསུཔི ཨཱགནྟུཀཱ ¶ ཨནིསྶརཱཏི པཙྩཡཔརིབྷོགཏྠཱཡ ནིཡམེཏྭཱ དིནྣཏྟཱ བྷཱཛེཏྭཱ ཁཱདིཏུཾ ཨནིསྶརཱ.

ན ཏེསུ…པེ… ཋཱཏབྦནྟི ཨེཏྠ ཨཱགནྟུཀེཧི ཧེཊྛཱ ཝུཏྟནཡེན བྷཱཛེཏྭཱ ཁཱདིཏབྦནྟི ཨདྷིཔྤཱཡོ. ཏེསཾ ཀཏིཀཱཡ ཋཱཏབྦནྟི ‘‘བྷཱཛེཏྭཱ ན ཁཱདིཏབྦ’’ནྟི ཝཱ ‘‘ཨེཏྟཀེསུ རུཀྑེསུ ཕལཱནི གཎྷིསྶཱམཱ’’ཏི ཝཱ ‘‘ཨེཏྟཀཱནི ཕལཱནི གཎྷིསྶཱམཱ’’ཏི ཝཱ ‘‘ཨེཏྟཀཱནཾ དིཝསཱནཾ ཨབྦྷནྟརེ གཎྷིསྶཱམཱ’’ཏི ཝཱ ‘‘ན ཀིཉྩི གཎྷིསྶཱམཱ’’ཏི ཝཱ ཨེཝཾ ཀཏཱཡ ཨཱཝཱསིཀཱནཾ ཀཏིཀཱཡ ཨཱགནྟུཀེཧི ཋཱཏབྦཾ. མཧཱཨཊྛཀཐཱཡཾ ‘‘ཨནིསྶརཱ’’ཏི ཝཙནེན དཱིཔིཏོཡེཝ ཨཏྠོ མཧཱཔཙྩརིཡཾ ‘‘ཙཏུནྣཾ པཙྩཡཱན’’ནྟིཨཱདིནཱ ཝིཏྠཱརེཏྭཱ དསྶིཏོ. པརིབྷོགཝསེནེཝཱཏི ཨེཏྠ ཨེཝ-སདྡོ ཨཊྛཱནཔྤཡུཏྟོ. པརིབྷོགཝསེན ཏམེཝ བྷཱཛེཏྭཱཏི ཡོཛེཏབྦཾ. ཨེཏྠཱཏི ཨེཏསྨིཾ ཝིཧཱརེ རཊྛེ ཝཱ. སེནཱསནཔཙྩཡནྟི སེནཱསནཉྩ ཏདཏྠཱཡ ནིཡམེཏྭཱ ཋཔིཏཉྩ.

ལཱམཀཀོཊིཡཱཏི ལཱམཀཾ ཨཱདིཾ ཀཏྭཱ, ལཱམཀསེནཱསནཏོ པཊྛཱཡཱཏི ཝུཏྟཾ ཧོཏི. སེནཱསནེཔི ཏིཎཱདཱིནི ལཱམཀཀོཊིཡཱཝ ཝིསྶཛྫེཏབྦཱནི, སེནཱསནཔརིཀྑཱརཱཔི ལཱམཀཀོཊིཡཱཝ ཝིསྶཛྫེཏབྦཱ. མཱུལཝཏྠུཙྪེདཾ པན ཀཏྭཱ ན ཨུཔནེཏབྦནྟི ཨིམིནཱ ཀིཾ ཝུཏྟཾ ཧོཏཱིཏི? ཏཱིསུཔི གཎྛིཔདེསུ ཏཱཝ ཨིདཾ ཝུཏྟཾ ‘‘སབྦཱནི སེནཱསནཱནི ན ཝིསྶཛྫེཏབྦཱནཱིཏི ཝུཏྟཾ ཧོཏཱི’’ཏི. ལཱམཀཀོཊིཡཱ ཝིསྶཛྫེནྟེཧིཔི སེནཱསནབྷཱུམིཡོ ན ཝིསྶཛྫེཏབྦཱཏི ཨཡམཏྠོ ཝུཏྟོ ཧོཏཱིཏི ནོ ཁནྟི, ཝཱིམཾསིཏྭཱ ཡཾ རུཙྩཏི, ཏཾ གཧེཏབྦཾ.

དྷམྨསནྟཀེན བུདྡྷཔཱུཛཾ ཀཱཏུཾ, བུདྡྷསནྟཀེན ཝཱ དྷམྨཔཱུཛཾ ཀཱཏུཾ ཝཊྚཏི, ན ཝཊྚཏཱིཏི? ‘‘ཏཐཱགཏསྶ ཁོ ཨེཏཾ ཝཱསེཊྛ ཨདྷིཝཙནཾ དྷམྨཀཱཡོ ཨིཏིཔཱིཏི ཙ ཡོ ཁོ, ཝཀྐལི, དྷམྨཾ པསྶཏི, སོ མཾ པསྶཏཱི’’ཏི (སཾ. ནི. ༣.༨༧) ཙ ཝཙནཏོ ཝཊྚཏཱིཏི ཝདནྟི. ཀེཙི པན ‘‘ཨེཝཾ སནྟེ ‘ཡོ, བྷིཀྑཝེ, མཾ ཨུཔཊྛཧེཡྻ, སོ གིལཱནཾ ཨུཔཊྛཧེཡྻཱ’ཏི ཝཙནཏོ བུདྡྷསནྟཀེན གིལཱནསྶཔི བྷེསཛྫཾ ཀཱཏུཾ ཡུཏྟནྟི ཨཱཔཛྫེཡྻ, ཏསྨཱ ན ཝཊྚཏཱི’’ཏི ཝདནྟི, ཏཾ ¶ ཨཀཱརཎཾ. ན ཧི ‘‘ཡོ, བྷིཀྑཝེ, མཾ ཨུཔཊྛཧེཡྻ, སོ གིལཱནཾ ཨུཔཊྛཧེཡྻཱ’’ཏི ཨིམིནཱ ཨཏྟནོ ཙ གིལཱནསྶ ཙ ཨེཀསདིསཏཱ ཏདུཔཊྛཱནསྶ ཝཱ ¶ སམཕལཏཱ ཝུཏྟཱ. ཨཡཉྷེཏྠ ཨཏྠོ ‘‘ཡོ མཾ ཨོཝཱདཱནུསཱསནཱིཀརཎེན ཨུཔཊྛཧེཡྻ, སོ གིལཱནཾ ཨུཔཊྛཧེཡྻ, མམ ཨོཝཱདཀརཎེན གིལཱནོ ཨུཔཊྛཱཏབྦོ’’ཏི. བྷགཝཏོ ཙ གིལཱནསྶ ཙ ཨུཔཊྛཱནཾ ཨེཀསདིསནྟི ཨེཝཾ པནེཏྠ ཨཏྠོ ན གཧེཏབྦོ. ཏསྨཱ ‘‘ཡོ ཝོ, ཨཱནནྡ, མཡཱ དྷམྨོ ཙ ཝིནཡོ ཙ དེསིཏོ པཉྙཏྟོ, སོ ཝོ མམཙྩཡེན སཏྠཱ’’ཏི ཝཙནཏོ ‘‘ཨཧཉྩ པནིདཱནི ཨེཀོ ཨོཝདཱམི ཨནུསཱསཱམི, མཡི པརིནིབྦུཏེ ཨིམཱནི ཙཏུརཱསཱིཏི བུདྡྷསཧསྶཱནི ཏུམྷེ ཨོཝདིསྶནྟི ཨནུསཱསིསྶནྟཱི’’ཏི ཝུཏྟཏྟཱ ཙ བཧུསྶུཏཾ བྷིཀྑུཾ པསཾསནྟེན ཙ ‘‘ཡོ བཧུསྶུཏོ, ན སོ ཏུམྷཱཀཾ སཱཝཀོ ནཱམ, བུདྡྷོ ནཱམ ཨེས ཙུནྡཱ’’ཏི ཝུཏྟཏྟཱ དྷམྨགརུཀཏྟཱ ཙ ཏཐཱགཏསྶ པུབྦནཡོ ཨེཝ པསཏྠཏརོཏི ཨམྷཱཀཾ ཁནྟི.

པཎྞཾ ཨཱརོཔེཏྭཱཏི ‘‘ཨེཏྟཀེཧེཝ རུཀྑེཧི ཨེཏྟཀམེཝ གཧེཏབྦ’’ནྟི པཎྞཾ ཨཱརོཔེཏྭཱ, ལིཁིཏྭཱཏི ཝུཏྟཾ ཧོཏི. ནིམིཏྟསཉྙཾ ཀཏྭཱཏི སངྐེཏཾ ཀཏྭཱ. དཱརཀཱཏི ཏེསཾ པུཏྟནཏྟཱདཡོ དཱརཀཱ. ཨཉྙེཔི ཡེ ཀེཙི གོཔཀཱ ཧོནྟི, ཏེ སབྦེཔི ཝུཏྟཱ. སབྦཏྠཱཔི གིཧཱིནཾ གོཔཀདཱནེ ཡཏྟཀཾ གོཔཀཱ དེནྟི, ཏཏྟཀཾ གཧེཏབྦཾ. སངྒྷིཀེ པན ཡཐཱཔརིཙྪེདམེཝ གཧེཏབྦནྟི དཱིཔིཏཏྟཱ ‘‘ཨཏྠཏོ ཨེཀ’’ནྟི ཝུཏྟཾ.

ཏཏོཏི ཡཐཱཝུཏྟཨུཔོསཐཱགཱརཱདིཀརཎཏྠཱཡ ཋཔིཏདཱརུསམྦྷཱརཏོ. ཨཱཔུཙྪིཏྭཱཏི ཀཱརཀསངྒྷཾ ཨཱཔུཙྪིཏྭཱ. ཏཾ སབྦམྤི ཨཱཧརིཏྭཱཏི ཨནཱཔུཙྪིཏྭཱཔི ཏཱཝཀཱལིཀཾ ཨཱཧརིཏྭཱ. ཨཱཧརཱཔེནྟོཏི ཨེཏྠ ཨནཱཧརཱཔེནྟེཔི དཱཏབྦམེཝ. ཨཡམེཝ བྷིཀྑུ ཨིསྶརོཏི ཨེཀསྶ བྷིཀྑུནོ པཱཔུཎནཊྛཱནཾ, ཏཏོཡེཝ སེནཱསནཏོ ཏསྶ དཱཏབྦཾ, ན ཙ སོ ཏཏོ ཨུཊྛཱཔེཏབྦོཏི ཝུཏྟཾ ཧོཏི.

‘‘ཨུདཀཔཱུཛནྟི ཙེཏིཡཊྛཱནེསུ སིཉྩན’’ནྟི གཎྛིཔདེསུ ཝུཏྟཾ. ཝཏྟསཱིསེནཱཏི ཀེཝལཾ སདྡྷཱཡ, ན ཝེཏནཱདིཨཏྠཱཡ. སཝཏྠུཀནྟི སཧ བྷཱུམིཡཱ. ཏིཎམཏྟཾ པན དཱཏབྦནྟི ཀསྨཱ ཝུཏྟཾ, ཀིཾ ཏཾ གརུབྷཎྜཾ ན ཧོཏཱིཏི? ན ཧོཏི. ཨརཀྑིཏཨགོཔིཏཊྛཱནེ ཧི ཝིནསྶཀབྷཱཝེན ཋིཏཾ གརུབྷཎྜཾ ན ཧོཏི, ཏསྨཱ ཏཱདིསཾ སནྡྷཱཡ ‘‘ཏིཎམཏྟཾ པན དཱཏབྦ’’ནྟི ཝུཏྟཾ. ཛགྒིཏྭཱཏི སཾཝཙྪརེ སཾཝཙྪརེ ཛགྒིཏྭཱ.

ཀུཊྚནྟི ¶ གེཧབྷིཏྟིཾ. པཱཀཱརནྟི པརིཀྑེཔཔཱཀཱརཾ. ཏཏོཏི ཚཌྜིཏཝིཧཱརཏོ. ཏཏོ ¶ ཨཱཧརིཏྭཱ སེནཱསནཾ ཀཏཾ ཧོཏཱིཏི སཱམནྟགཱམཝཱསཱིཧི བྷིཀྑཱུཧི ཚཌྜིཏཝིཧཱརཏོ དཱརུསམྦྷཱརཱདིཾ ཨཱཧརིཏྭཱ སེནཱསནཾ ཀཏཾ ཧོཏི.

༡༥༧. ཙཏུབྷཱགཨུདཀསམྦྷིནྣེཏི ཙཏུཏྠབྷཱགེན ཨུདཀེན སམྦྷིནྣེ. ཨོདནབྷཱཛནཱིཡཝཏྠུསྨིནྟི ‘‘དེཧི ཨཔརསྶ བྷཱག’’ནྟི ཨཱགཏཝཏྠུསྨིཾ.

༡༥༩. ཨཡྻཱ ཨཏྟནཱ ཀཱཏུཾ ཡུཏྟམྤི ན ཀརོནྟི, ཨཏིཝིཡ ཐདྡྷཱཏི པསཱདཾ བྷིནྡིཏྭཱ ཙིཏྟེན ཀུཔྤནྟི, ཏསྨཱ ‘‘པསཱདཱནུརཀྑཎཏྠཱཡཱ’’ཏི ཝུཏྟཾ. ཨིདྡྷིཾ པཊིསཾཧརཱིཏི ཨིདྡྷིཾ ཝིསྶཛྫེསི. སཀཊྛཱནེཡེཝ ཨཊྛཱསཱིཏི ཨིདྡྷིཡཱ ཝིསྶཛྫིཏཏྟཱ ཨེཝ ‘‘པཱསཱདོ པུན ཨཱགཙྪཏཱུ’’ཏི ཨནདྷིཊྛིཏེཔི སཡམེཝ ཨཱགནྟྭཱ སཀཊྛཱནེཡེཝ ཨཊྛཱསི. ‘‘ཡཱཝ དཱརཀཱ པཱསཱདཾ ཨཱརོཧནྟི, ཏཱཝ པཱསཱདོ ཏེསཾ སནྟིཀེ ཧོཏཱུ’’ཏི པུབྦེ ཨདྷིཊྛིཏཏྟཱ ཨེཝ ཙ ཀཱལཔརིཙྪེདཾ ཀཏྭཱ ཨདྷིཊྛིཏེན ཏཏོ པརཾ ཨིདྡྷི ཝིསྶཛྫིཏཱ ནཱམ ཧོཏཱིཏི ཀཏྭཱ ཝུཏྟཾ ‘‘ཐེརོ ཨིདྡྷིཾ པཊིསཾཧརཱི’’ཏི. ཡསྨཱ ཏེ དཱརཀཱ ཨེཝཾ གཧེཏྭཱ གཏཱནཾ སནྟཀཱ ན ཧོནྟི, ཡསྨཱ ཙ ཨཱིདིསེན པཡོགེན ཐེརེན ཏེ ཨཱནཱིཏཱ ནཱམ ན ཧོནྟི, ཏསྨཱ ཐེརོ ཨེཝམཀཱསཱིཏི དཊྛབྦཾ. ཏེནེཝཱཧ ‘‘ཝོཧཱརཝསེནཱ’’ཏིཨཱདི. ཨཏྟནོ པཀཏིཝཎྞཾ ཨཝིཛཧིཏྭཱ བཧིདྡྷཱ ཧཏྠིཨཱདིདསྶནཾ ‘‘ཨེཀོཔི ཧུཏྭཱ བཧུདྷཱ ཧོཏཱི’’ཏི (དཱི. ནི. ༡.༢༣༨; མ. ནི. ༡.༡༤༧; སཾ. ནི. ༥.༨༤༢) ཨཱགཏཉྩ ཨདྷིཊྛཱནཝསེན ནིཔྥནྣཏྟཱ ཨདྷིཊྛཱནིདྡྷི ནཱམ. ‘‘སོ པཀཏིཝཎྞཾ ཝིཛཧིཏྭཱ ཀུམཱརཀཝཎྞཾ ཝཱ དསྶེཏི ནཱགཝཎྞཾ ཝཱ…པེ… ཝིཝིདྷམྤི སེནཱབྱཱུཧཾ དསྶེཏཱི’’ཏི (པཊི. མ. ༣.༡༣) ཨེཝཾ ཨཱགཏཱ ཨིདྡྷི པཀཏིཝཎྞཝིཛཧནཝིཀཱརཝསེན པཝཏྟཏྟཱ ཝིཀུབྦནིདྡྷི ནཱམ. ཨཏྟཱནཾ ཨདསྶེཏྭཱ བཧིདྡྷཱ ཧཏྠིཨཱདིདསྶནམྤི ཨེཏྠེཝ སངྒཧིཏནྟི དཊྛབྦཾ. པཀཏིཝཎྞཝིཛཧནཉྷི ནཱམ ཨཏྟནོ པཀཏིརཱུཔསྶ ཨཉྙེསཾ ཨདསྶནཾ, ན སབྦེན སབྦཾ ཏསྶ ནིརོདྷནཾ. ཨེཝཉྩ ཀཏྭཱ ‘‘ཨཏྟཱནཾ ཨདསྶེཏྭཱ བཧིདྡྷཱ ཧཏྠིཨཱདིདསྶནམྤི ཨེཏྠེཝ སངྒཧིཏ’’ནྟི ཨིདཾ ‘‘པཀཏིཝཎྞཾ ཝིཛཧིཏྭཱ’’ཏི ཝུཏྟམཱུལཔདེན ན ཝིརུཛ྄ཛྷཏི.

ཝིནཱིཏཝཏྠུཝཎྞནཱ ནིཊྛིཏཱ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ སཱརཏྠདཱིཔནིཡཾ

དུཏིཡཔཱརཱཛིཀཝཎྞནཱ སམཏྟཱ.

ཨནུསཱསནཱིཀཐཱཝཎྞནཱ

པརཱཛིཏཀིལེསེནཱཏི ¶ ¶ སནྟཱནེ པུན ཨནུཔྤཏྟིདྷམྨཏཱཔཱདནེན ཙཏཱུཧི མགྒཉཱཎེཧི སཧ ཝཱསནཱཡ སམུཙྪིནྣསབྦཀིལེསེན. ཨིདྷཱཏི ཨིམསྨིཾ སཱསནེ. ཏེན སིཀྑཱཔདེན སམཾ ཨཉྙཾ ཨནེཀནཡཝོཀིཎྞཾ གམྦྷཱིརཏྠཝིནིཙྪཡཾ ཀིཉྩི སིཀྑཱཔདཾ ན ཝིཛྫཏཱིཏི ཡོཛེཏབྦཾ. ཨཏྠོ ཙ ཝིནིཙྪཡོ ཙ ཨཏྠཝིནིཙྪཡཱ, གམྦྷཱིརཱ ཨཏྠཝིནིཙྪཡཱ ཨསྶཱཏི གམྦྷཱིརཏྠཝིནིཙྪཡཾ. ཝཏྠུམྷི ཨོཏིཎྞེཏི ཙོདནཱཝཏྠུམྷི སངྒྷམཛ྄ཛྷཾ ཨོཏིཎྞེ, ཨེཀེན ཨེཀསྨིཾ ཙོདིཏེ, སཡམེཝ ཝཱ ཨཱགནྟྭཱ ཨཏྟནོ ཀཏཝཱིཏིཀྐམེ ཨཱརོཙིཏེཏི ཝུཏྟཾ ཧོཏི. ཨེཏྠཱཏི ཨོཏིཎྞེ ཝཏྠུམྷི.

ཝིནིཙྪཡཾ ཀརོནྟེན སཧསཱ ‘‘པཱརཱཛིཀ’’ནྟི ཨཝཏྭཱ ཡཾ ཀཏྟབྦཾ, ཏཾ དསྶེཏུཾ ‘‘པཱལི༹’’ནྟིཨཱདིམཱཧ. ཝིནིཙྪཡོཏི པཱརཱཛིཀཱཔཏྟིཝིནིཙྪཡོ. ཨཝཏྭཱཝཱཏི ‘‘ཏྭཾ པཱརཱཛིཀཾ ཨཱཔནྣོ’’ཏི ཨཝཏྭཱཝ. ཀཔྤིཡེཔི ཙ ཝཏྠུསྨིནྟི ཨཝཏྭཱཔི གཎྷིཏུཾ ཀཔྤིཡེ མཱཏུཔིཏུསནྟཀེཔི ཝཏྠུསྨིཾ. ལཧུཝཏྟིནོཏི ཐེཡྻཙིཏྟུཔྤཱདེན ལཧུཔརིཝཏྟིནོ. ཨཱསཱིཝིསནྟི སཱིགྷམེཝ སཀལསརཱིརེ ཕརཎསམཏྠཝིསཾ.

ཨནུསཱསནཱིཀཐཱཝཎྞནཱ ནིཊྛིཏཱ.

པཱརཱཛིཀཀཎྜཊྛཀཐཱཡ པཋམབྷཱགཝཎྞནཱ སམཏྟཱ.

༣. ཏཏིཡཔཱརཱཛིཀཾ

ཏཱིཧཱིཏི ¶ ཀཱཡཝཙཱིམནོདྭཱརེཧི. ཝིབྷཱཝིཏནྟི པཀཱསིཏཾ, དེསིཏཾ པཉྙཏྟནྟི ཝུཏྟཾ ཧོཏི.

པཋམཔཉྙཏྟིནིདཱནཝཎྞནཱ

༡༦༢. ཏིཀྑཏྟུཾ པཱཀཱརཔརིཀྑེཔཝཌྜྷནེནཱཏི ཏིཀྑཏྟུཾ པཱཀཱརཔརིཀྑེཔེན ནགརབྷཱུམིཡཱ ཝཌྜྷནེན. ཝིསཱལཱིབྷཱུཏཏྟཱཏི གཱཝུཏནྟརཾ གཱཝུཏནྟརཾ པུཐུབྷཱུཏཏྟཱ. བཱརཱཎསིརཉྙོ ཀིར (མ. ནི. ཨཊྛ. ༡.༡༤༦; ཁུ. པཱ. ཨཊྛ. ༦. རཏནསུཏྟཝཎྞནཱ) ཨགྒམཧེསིཡཱ ཀུཙྪིམྷི གབྦྷོ ¶ སཎྛཱསི, སཱ ཉཏྭཱ རཉྙོ ནིཝེདེསི, རཱཛཱ གབྦྷཔརིཧཱརཾ ཨདཱསི. སཱ སམྨཱ པརིཧརིཡམཱནཱ གབྦྷཔརིཔཱཀཀཱལེ ཝིཛཱཡནགྷརཾ པཱཝིསི. པུཉྙཝནྟཱིནཾ པཙྩཱུསསམཡེ གབྦྷཝུཊྛཱནཾ ཧོཏི, སཱ ཙ ཏཱསཾ ཨཉྙཏརཱ, ཏེན པཙྩཱུསསམཡེ ཨལཏྟཀཔཊལབནྡྷུཛཱིཝཀཔུཔྥསདིསཾ མཾསཔེསིཾ ཝིཛཱཡི. ཏཏོ ‘‘ཨཉྙཱ དེཝིཡོ སུཝཎྞབིམྦསདིསེ པུཏྟེ ཝིཛཱཡནྟི, ཨགྒམཧེསཱི མཾསཔེསིནྟི རཉྙོ པུརཏོ མམ ཨཝཎྞོ ཨུཔྤཛྫེཡྻཱ’’ཏི ཙིནྟེཏྭཱ ཏེན ཨཝཎྞབྷཡེན ཏཾ མཾསཔེསིཾ ཨེཀསྨིཾ བྷཱཛནེ པཀྑིཔིཏྭཱ པཊིཀུཛྫིཏྭཱ རཱཛམུདྡིཀཱཡ ལཉྪེཏྭཱ གངྒཱཡ སོཏེ པཀྑིཔཱཔེསི. མནུསྶེཧི ཚཌྜིཏམཏྟེ དེཝཏཱ ཨཱརཀྑཾ སཾཝིདཧིཾསུ. སུཝཎྞཔཊྚིཀཉྩེཏྠ ཛཱཏིཧིངྒུལཀེན ‘‘བཱརཱཎསིརཉྙོ ཨགྒམཧེསིཡཱ པཛཱ’’ཏི ལིཁིཏྭཱ བནྡྷིཾསུ. ཏཏོ ཏཾ བྷཱཛནཾ ཨཱུམིབྷཡཱདཱིཧི ཨནུཔདྡུཏཾ གངྒཱསོཏེན པཱཡཱསི.

ཏེན ཙ སམཡེན ཨཉྙཏརོ ཏཱཔསོ གོཔཱལཀཀུལཾ ནིསྶཱཡ གངྒཱཏཱིརེ ཝིཧརཏི. སོ པཱཏོཝ གངྒཾ ཨོཏིཎྞོ ཏཾ བྷཱཛནཾ ཨཱགཙྪནྟཾ དིསྭཱ པཾསུཀཱུལསཉྙཱཡ ཨགྒཧེསི. ཨཐེཏྠ ཏཾ ཨཀྑརཔཊྚིཀཾ རཱཛམུདྡིཀཱལཉྪནཉྩ དིསྭཱ མུཉྩིཏྭཱ ཏཾ མཾསཔེསིཾ ཨདྡས. དིསྭཱནསྶ ཨེཏདཧོསི ‘‘སིཡཱ གབྦྷོ, ཏཐཱ ཧིསྶ དུགྒནྡྷཔཱུཏིབྷཱཝོ ནཏྠཱི’’ཏི. ཨུདཀཔྤཝཱཧེནཱགཏསྶཔི ཧི ཨུསྨཱ ན ཝིགཙྪཏི, ཨུསྨཱ ཙ ནཱམ ཨཱིདིསཱཡ སཝིཉྙཱཎཀཏཱཡ བྷཝེཡྻཱཏི ‘‘སིཡཱ གབྦྷོ’’ཏི ¶ ཙིནྟེསི. པུཉྙཝནྟཏཱཡ པན དུགྒནྡྷཾ ནཱཧོསི སཨུསུམགཏཱཡ པཱུཏིབྷཱཝོ ཙ. ཨེཝཾ པན ཙིནྟེཏྭཱ ཨསྶམཾ ནེཏྭཱ ནཾ སུདྡྷེ ཨོཀཱསེ ཋཔེསི. ཨཐ ཨཌྜྷམཱསཙྩཡེན དྭེ མཾསཔེསིཡོ ཨཧེསུཾ. ཏཱཔསོ དིསྭཱ སཱདྷུཀཏརཾ ཋཔེསི. ཏཏོ པུན ཨཌྜྷམཱསཙྩཡེན ཨེཀམེཀིསྶཱ པེསིཡཱ ཧཏྠཔཱདསཱིསཱནམཏྠཱཡ པཉྩ པཉྩ པིལ༹ཀཱ ཨུཊྛཧིཾསུ. ཨཐ ཏཏོ ཨཌྜྷམཱསཙྩཡེན ཨེཀཱ མཾསཔེསི སུཝཎྞབིམྦསདིསོ དཱརཀོ, ཨེཀཱ དཱརིཀཱ ཨཧོསི. ཏེསུ ཏཱཔསསྶ པུཏྟསིནེཧོ ཨུཔྤཛྫི, དཱརཀཱནཾ པུཉྙུཔནིསྶཡཏོ ཨངྒུཊྛཀཏོ ཙསྶ ཁཱིརཾ ནིབྦཏྟི. ཏཏོ པབྷུཏི ཙ ཁཱིརབྷཏྟཾ ཨལབྷིཏྠ. ཏཱཔསོ བྷཏྟཾ བྷུཉྫིཏྭཱ ཁཱིརཾ དཱརཀཱནཾ མུཁེ ཨཱསིཉྩཏི. ཏེསཾ པན ཡཾ ཡཾ ཨུདརཾ པཝིསཏི, ཏཾ སབྦཾ མཎིབྷཱཛནགཏཾ ཝིཡ དིསྶཏི. ཙརིམབྷཝེ བོདྷིསཏྟེ ཀུཙྪིགཏེ བོདྷིསཏྟམཱཏུ ཝིཡ ཨུདརཙྪཝིཡཱ ¶ ཨཙྪཝིཔྤསནྣཏཱཡ ཨེཝཾ ཏེ ནིཙྪཝཱི ཨཧེསུཾ. ཨཔརེ ཨཱཧུ ‘‘སིབྦིཏྭཱ ཋཔིཏཱ ཝིཡ ནེསཾ ཨཉྙམཉྙཾ ལཱིནཱ ཚཝི ཨཧོསཱི’’ཏི. ཨེཝཾ ཏེ ནིཙྪཝིཏཱཡ ཝཱ ལཱིནཙྪཝིཏཱཡ ཝཱ ‘‘ལིཙྪཝཱི’’ཏི པཉྙཱཡིཾསུ.

ཏཱཔསོ དཱརཀེ པོསེནྟོ ཨུསྶཱུརེ གཱམཾ བྷིཀྑཱཡ པཝིསཏི, ཨཏིདིཝཱ པཊིཀྐམཏི. ཏསྶ ཏཾ བྱཱཔཱརཾ ཉཏྭཱ གོཔཱལཀཱ ཨཱཧཾསུ – ‘‘བྷནྟེ, པབྦཛིཏཱནཾ དཱརཀཔོསནཾ པལིབོདྷོ, ཨམྷཱཀཾ དཱརཀེ དེཐ, མཡཾ པོསེསྶཱམ, ཏུམྷེ ཨཏྟནོ ཀམྨཾ ཀརོཐཱ’’ཏི. ཏཱཔསོ ‘‘སཱདྷཱུ’’ཏི པཊིསྶུཎི. གོཔཱལཀཱ དུཏིཡདིཝསེ མགྒཾ སམཾ ཀཏྭཱ པུཔྥེཧི ཨོཀིརིཏྭཱ དྷཛཔཊཱཀཱ ཨུསྶཱཔེཏྭཱ ཏཱུརིཡེཧི ཝཛྫམཱནེཧི ཨསྶམཾ ཨཱགཏཱ. ཏཱཔསོ ‘‘མཧཱཔུཉྙཱ དཱརཀཱ, ཨཔྤམཱདེནེཝ ཝཌྜྷེཐ, ཝཌྜྷེཏྭཱ ཨཉྙམཉྙཾ ཨཱཝཱཧཾ ཀརོཐ, པཉྩགོརསེན རཱཛཱནཾ ཏོསེཏྭཱ བྷཱུམིབྷཱགཾ གཧེཏྭཱ ནགརཾ མཱཔེཐ, ཏཏྠ ཀུམཱརཾ ཨབྷིསིཉྩཐཱ’’ཏི ཝཏྭཱ དཱརཀེ ཨདཱསི. ཏེ ‘‘སཱདྷཱུ’’ཏི པཊིསྶུཎིཏྭཱ དཱརཀེ ནེཏྭཱ པོསེསུཾ. དཱརཀཱ ཝུཌྜྷིམནྭཱཡ ཀཱིལ༹ནྟཱ ཝིཝཱདཊྛཱནེསུ ཨཉྙེ གོཔཱལཀདཱརཀེ ཧཏྠེནཔི པཱདེནཔི པཧརནྟི, ཏེ རོདནྟི. ‘‘ཀིསྶ རོདཐཱ’’ཏི ཙ མཱཏཱཔིཏཱུཧི ཝུཏྟཱ ‘‘ཨིམེ ནིམྨཱཏཱཔིཏིཀཱ ཏཱཔསཔོསིཏཱ ཨམྷེ ཨཏཱིཝ པཧརནྟཱི’’ཏི ཝདནྟི. ཏཏོ ནེསཾ པོསཀམཱཏཱཔིཏརོཔི ‘‘ཨིམེ དཱརཀཱ ཨཉྙེ དཱརཀེ ཝིཧེསེནྟི དུཀྑཱཔེནྟི, ན ཨིམེ སངྒཧེཏབྦཱ, ཝཛྫེཏབྦཱ ཨིམེ’’ཏི ཨཱཧཾསུ. ཏཏོ པབྷུཏི ཀིར སོ པདེསོ ‘‘ཝཛྫཱི’’ཏི ཝུཙྩཏི ཡོཛནསཏཔརིམཱཎེན.

ཨཐ ཏཾ པདེསཾ གོཔཱལཀཱ རཱཛཱནཾ ཏོསེཏྭཱ ཨགྒཧེསུཾ. ཏཏྠ ཙ ནགརཾ མཱཔེཏྭཱ སོལ༹སཝསྶུདྡེསིཀཾ ཀུམཱརཾ ཨབྷིསིཉྩིཏྭཱ རཱཛཱནཾ ཨཀཾསུ. རཛྫསམྤཏྟིདཱཡཀསྶ ཀམྨསྶ ཀཏཏྟཱ ཨསམྦྷིནྣེ ཨེཝ རཱཛཀུལེ ཨུཔྤནྣཏྟཱ ཙ རཱཛཀུམཱརསྶ པུཉྙཱནུབྷཱཝསཉྩོདིཏཱ དེཝཏཱདྷིགྒཧིཏཱ ཨཀཾསཱུཏི ཀེཙི. དཱརཀསྶ དཱརིཀཱཡ སདྡྷིཾ ཝཱརེཡྻཾ ཀཏྭཱ ཀཏིཀཾ ཨཀཾསུ ‘‘བཱཧིརཏོ ¶ དཱརིཀཱ ན ཨཱནེཏབྦཱ, ཨིཏོ དཱརིཀཱ ན ཀསྶཙི དཱཏབྦཱ’’ཏི. ཏེསཾ པཋམསཾཝཱསེན དྭེ དཱརཀཱ ཛཱཏཱ དྷཱིཏཱ ཙ པུཏྟོ ཙ. ཨེཝཾ སོལ༹སཀྑཏྟུཾ དྭེ དྭེ ཛཱཏཱ. ཏཏོ ཏེསཾ དཱརཀཱནཾ ཡཐཱཀྐམཾ ཝཌྜྷནྟཱནཾ ཨཱརཱམུཡྻཱནནིཝཱསཊྛཱནཔརིཝཱརསམྤཏྟིཾ གཧེཏུཾ ཨཔྤཧོནྟཾ ནགརཾ ཏིཀྑཏྟུཾ གཱཝུཏནྟརེན གཱཝུཏནྟརེན པརིཀྑིཔིཾསུ. ཏསྶ པུནཔྤུནཾ ཝིསཱལཱིཀཏཏྟཱ ‘‘ཝེསཱལཱི’’ཏྭེཝ ¶ ནཱམཾ ཛཱཏཾ. ཏེན ཝུཏྟཾ – ‘‘ཏིཀྑཏྟུཾ པཱཀཱརཔརིཀྑེཔཝཌྜྷནེན ཝིསཱལཱིབྷཱུཏཏྟཱ ཝེསཱལཱིཏི ཝུཙྩཏཱི’’ཏི.

ཨིདམྤི ཙ ནགརནྟི ན ཀེཝལཾ རཱཛགཧསཱཝཏྠིཡོ ཡེཝཱཏི དསྶེཏི. ཏཏྠ མཧཱཝནཾ ནཱམཱཏིཨཱདི མཛ྄ཛྷིམབྷཱཎཀསཾཡུཏྟབྷཱཎཀཱནཾ སམཱནཊྛཀཐཱ. མཛ྄ཛྷིམཊྛཀཐཱཡཉྷི (མ. ནི. ཨཊྛ. ༡.༡༤༦) སཾཡུཏྟཊྛཀཐཱཡཉྩ (སཾ. ནི. ཨཊྛ. ༣.༥.༩༨༤-༩༨༥) ཨིམིནཱཝ ནཡེན ཝུཏྟཾ. དཱིགྷནིཀཱཡཊྛཀཐཱཡཾ (དཱི. ནི. ཨཊྛ. ༡.༣༥༩) པན ‘‘མཧཱཝནེཏི བཧིནགརེ ཧིམཝནྟེན སདྡྷིཾ ཨེཀཱབདྡྷཾ ཧུཏྭཱ ཋིཏཾ སཡཾཛཱཏཾ ཝནཾ ཨཏྠི, ཡཾ མཧནྟབྷཱཝེནེཝ མཧཱཝནནྟི ཝུཙྩཏི, ཏསྨིཾ མཧཱཝནེ. ཀཱུཊཱགཱརསཱལཱཡནྟི ཏསྨིཾ ཝནསཎྜེ སངྒྷཱརཱམཾ པཏིཊྛཱཔེསུཾ. ཏཏྠ ཀཎྞིཀཾ ཡོཛེཏྭཱ ཐམྦྷཱནཾ ཨུཔརི ཀཱུཊཱགཱརསཱལཱསངྑེཔེན དེཝཝིམཱནསདིསཾ པཱསཱདཾ ཨཀཾསུ, ཏཾ ཨུཔཱདཱཡ སཀལོཔི སངྒྷཱརཱམོ ཀཱུཊཱགཱརསཱལཱཏི པཉྙཱཡིཏྠཱ’’ཏི ཝུཏྟཾ. ཝནམཛ྄ཛྷེ ཀཏཏྟཱ ‘‘ཝནཾ ནིསྶཱཡཱ’’ཏི ཝུཏྟཾ. ཨཱརཱམེཏི སངྒྷཱརཱམེ. ཧཾསཝཊྚཀཙྪདནེནཱཏི ཧཾསཝཊྚཀཔཊིཙྪནྣེན, ཧཾསམཎྜལཱཀཱརེནཱཏི ཨཏྠོ.

ཨནེཀཔརིཡཱཡེནཱཏི ཨེཏྠ པརིཡཱཡ-སདྡོ ཀཱརཎཝཙནོཏི ཨཱཧ ‘‘ཨནེཀེཧི ཀཱརཎེཧཱི’’ཏི, ཨཡཾ ཀཱཡོ ཨཝིཉྙཱཎཀོཔི སཝིཉྙཱཎཀོཔི ཨེཝམྤི ཨསུབྷོ ཨེཝམྤི ཨསུབྷོཏི ནཱནཱཝིདྷེཧི ཀཱརཎེཧཱིཏི ཨཏྠོ. ཨསུབྷཱཀཱརསནྡསྶནཔྤཝཏྟནྟི ཀེསཱདིཝསེན ཏཏྠཱཔི ཝཎྞཱདིཏོ ཨསུབྷཱཀཱརསྶ སབྦསོ དསྶནཝསེན པཝཏྟཾ. ཀཱཡཝིཙྪནྡནིཡཀཐནྟི ཨཏྟནོ པརསྶ ཙ ཀརཛཀཱཡེ ཝིཙྪནྡནུཔྤཱདནཀཐཾ. མུཏྟཾ ཝཱཏིཨཱདིནཱ བྱཏིརེཀམུཁེན ཀཱཡསྶ ཨམནུཉྙཏཾ དསྶེཏི. ཏཏྠ ཨཱདིཏོ ཏཱིཧི པདེཧི ཨདསྶནཱིཡཏཱཡ ཨསཱརཀཏཱཡ མཛ྄ཛྷེ ཙཏཱུཧི དུགྒནྡྷཏཱཡ, ཨནྟེ ཨེཀེན ལེསམཏྟེནཔི མནུཉྙཏཱབྷཱཝམསྶ དསྶེཏི. ཨཐ ཁོཏིཨཱདིནཱ ཨནྭཡཏོ སརཱུཔེནེཝ ཨམནུཉྙཏཱཡ དསྶནཾ. ཚནྡོཏི དུབྦལརཱགོ. རཱགོཏི བལཝརཱགོ. ‘‘ཀེསཱ ལོམཱདཱི’’ཏི སངྑེཔཏོ ཝུཏྟམཏྠཾ ཝིབྷཱགེན དསྶེཏུཾ ‘‘ཡེཔི ཧཱི’’ཏིཨཱདི ཝུཏྟཾ. ཨསུབྷཱཏི ཨཱགནྟུཀེན སུབྷཱཀཱརེན ཝིརཧིཏཏྟཱ ཨསུབྷཱ. ཨསུཙིནོཏི ཨཏྟནོ སབྷཱཝེནེཝ ཨསུཙིནོ. པཊིཀཱུལཱཏི ནཱགརིཀསྶ ཨསུཙིཀཊྛཱནཾ ཝིཡ ཛིགུཙྪནཱིཡཏྟཱ པཊིཀཱུལཱ.

ཀེསཱ ¶ ¶ ནཱམེཏེ ཝཎྞཏོཔི པཊིཀཱུལཱ, སཎྛཱནཏོཔི གནྡྷཏོཔི ཨཱསཡཏོཔི ཨོཀཱསཏོཔི པཊིཀཱུལཱཏི དསྶེནྟོ ‘‘སོ ཙ ནེསཾ…པེ… པཉྩཧི ཀཱརཎེཧི ཝེདིཏབྦོ’’ཏི ཨཱཧ. མནུཉྙེཔི (ཝིསུདྡྷི. ༡.༣༨༣; ཝིབྷ. ཨཊྛ. ༣༥༦) ཧི ཡཱགུཔཏྟེ ཝཱ བྷཏྟཔཏྟེ ཝཱ ཀེསཝཎྞཾ ཀིཉྩི དིསྭཱ ‘‘ཀེསམིསྶཀམིདཾ, ཧརཐ ན’’ནྟི ཛིགུཙྪནྟི, ཨེཝཾ ཀེསཱ ཝཎྞཏོ པཊིཀཱུལཱ. རཏྟིཾ པརིབྷུཉྫནྟཱཔི ཀེསསཎྛཱནཾ ཨཀྐཝཱཀཾ ཝཱ མཀཙིཝཱཀཾ ཝཱ ཚུཔིཏྭཱ ཏཐེཝ ཛིགུཙྪནྟི, ཨེཝཾ སཎྛཱནཏོཔི པཊིཀཱུལཱ. ཏེལམཀྑནཔུཔྥདྷཱུཔཱདིསངྑཱརཝིརཧིཏཱནཉྩ ཀེསཱནཾ གནྡྷོ པརམཛེགུཙྪོ ཧོཏི, ཏཏོ ཛེགུཙྪཏརོ ཨགྒིམྷི པཀྑིཏྟཱནཾ. ཀེསཱ ཧི ཝཎྞསཎྛཱནཏོ ཨཔྤཊིཀཱུལཱཔི སིཡུཾ, གནྡྷེན པན པཊིཀཱུལཱཡེཝ. ཡཐཱ ཧི དཧརསྶ ཀུམཱརཀསྶ ཝཙྩཾ ཝཎྞཏོ ཧལིདྡིཝཎྞཾ, སཎྛཱནཏོཔི ཧལིདྡིཔིཎྜསཎྛཱནཾ, སངྐཱརཊྛཱནེ ཚཌྜིཏཉྩ ཨུདྡྷུམཱཏཀཀཱལ༹སུནཁསརཱིརཾ ཝཎྞཏོ ཏཱལཔཀྐཝཎྞཾ, སཎྛཱནཏོ ཝཊྚེཏྭཱ ཝིསྶཊྛམུདིངྒསཎྛཱནཾ, དཱཋཱཔིསྶ སུམནམཀུལ༹སདིསཱཏི ཨུབྷཡམྤི ཝཎྞསཎྛཱནཏོ སིཡཱ ཨཔྤཊིཀཱུལཾ, གནྡྷེན པན པཊིཀཱུལམེཝ, ཨེཝཾ ཀེསཱཔི སིཡུཾ ཝཎྞསཎྛཱནཏོ ཨཔྤཊིཀཱུལཱ, གནྡྷེན པན པཊིཀཱུལཱཡེཝཱཏི.

ཡཐཱ པན ཨསུཙིཊྛཱནེ གཱམནིསྶནྡེན ཛཱཏཱནི སཱུཔེཡྻཔཎྞཱནི ནཱགརིཀམནུསྶཱནཾ ཛེགུཙྪཱནི ཧོནྟི ཨཔརིབྷོགཱནི, ཨེཝཾ ཀེསཱཔི པུབྦལོཧིཏམུཏྟཀརཱིསཔིཏྟསེམྷཱདིནིསྶནྡེན ཛཱཏཏྟཱ ཛེགུཙྪཱཏི ཨིདཾ ཏེསཾ ཨཱསཡཏོ པཱཊིཀུལྱཾ. ཨིམེ ཙ ཀེསཱ ནཱམ གཱུཐརཱསིམྷི ཨུཊྛིཏཀཎྞཀཾ ཝིཡ ཨེཀཏིཾསཀོཊྛཱསརཱསིམྷི ཛཱཏཱ, ཏེ སུསཱནསངྐཱརཊྛཱནཱདཱིསུ ཛཱཏསཱཀཾ ཝིཡ པརིཁཱདཱིསུ ཛཱཏཀམལཀུཝལཡཱདིཔུཔྥཾ ཝིཡ ཙ ཨསུཙིཊྛཱནེ ཛཱཏཏྟཱ པརམཛེགུཙྪཱཏི ཨིདཾ ཏེསཾ ཨོཀཱསཏོ པཱཊིཀུལྱཾ. ཡཐཱ ཙ ཀེསཱནཾ, ཨེཝཾ སབྦཀོཊྛཱསཱནཉྩ ཝཎྞསཎྛཱནགནྡྷཱསཡོཀཱསཝསེན པཉྩདྷཱ པཊིཀཱུལཏཱ ཝེདིཏབྦཱཏི ཨཱཧ ‘‘ཨེཝཾ ལོམཱདཱིན’’ནྟི. པཉྩཔཉྩཔྤབྷེདེནཱཏི ཨེཏྠ བཱཧིརཏྠསམཱསོ དཊྛབྦོ པཉྩ པཉྩ པབྷེདཱ ཨེཏསྶཱཏི པཉྩཔཉྩཔྤབྷེདོཏི.

སཾཝཎྞེནྟོཏི ཝིཏྠཱརེནྟོ. ཨསུབྷཱཡཱཏི ཨསུབྷམཱཏིཀཱཡ. ཕཱཏིཀམྨནྟི བཧུལཱིཀཱརོ. པཉྩངྒཝིཔྤཧཱིནཾ པཉྩངྒསམནྣཱགཏནྟི ཨེཏྠ ཀཱམཙྪནྡོ བྱཱཔཱདོ ཐིནམིདྡྷཾ ཨུདྡྷཙྩཀུཀྐུཙྩཾ ཝིཙིཀིཙྪཱཏི ཨིམེསཾ པཉྩནྣཾ ནཱིཝརཎཱནཾ ¶ པཧཱནཝསེན པཉྩངྒཝིཔྤཧཱིནཏཱ ཝེདིཏབྦཱ. ན ཧི ཨེཏེསུ ཨཔྤཧཱིནེསུ ཛྷཱནཾ ཨུཔྤཛྫཏི, ཏེནསྶེཏཱནི པཧཱནངྒཱནཱིཏི ཝུཙྩནྟི. ཀིཉྩཱཔི ཧི ཛྷཱནཀྑཎེ ཨཉྙེཔི ཨཀུསལཱ དྷམྨཱ པཧཱིཡནྟི, ཏཐཱཔི ཨེཏཱནེཝ ཝིསེསེན ཛྷཱནནྟརཱཡཀརཱནི. ཀཱམཙྪནྡེན ཧི ནཱནཱཝིསཡཔལོབྷིཏཾ ཙིཏྟཾ ན ཨེཀཏྟཱརམྨཎེ སམཱདྷིཡཏི, ཀཱམཙྪནྡཱབྷིབྷཱུཏཾ ¶ ཝཱ ཙིཏྟཾ ན ཀཱམདྷཱཏུཔྤཧཱནཱཡ པཊིཔདཾ པཊིཔཛྫཏི, བྱཱཔཱདེན ཙ ཨཱརམྨཎེ པཊིཧཉྙམཱནཾ ན ནིརནྟརཾ པཝཏྟཏི, ཐིནམིདྡྷཱབྷིབྷཱུཏཾ ཨཀམྨཉྙཾ ཧོཏི, ཨུདྡྷཙྩཀུཀྐུཙྩཔརེཏཾ ཨཝཱུཔསནྟམེཝ ཧུཏྭཱ པརིབྦྷམཏི, ཝིཙིཀིཙྪཱཡ ཨུཔཧཏཾ ཛྷཱནཱདྷིགམསཱདྷིཀཾ པཊིཔདཾ ནཱརོཧཏི. ཨིཏི ཝིསེསེན ཛྷཱནནྟརཱཡཀརཏྟཱ ཨེཏཱནེཝ པཧཱནངྒཱནཱིཏི ཝུཏྟཱནི.

ཡསྨཱ པན ཝིཏཀྐོ ཨཱརམྨཎེ ཙིཏྟཾ ཨབྷིནིརོཔེཏི, ཝིཙཱརོ ཨནུཔྤབནྡྷཏི, ཏེཧི ཨཝིཀྑེཔཱཡ སམྤཱདིཏཔཡོགསྶ ཙེཏསོ པཡོགསམྤཏྟིསམྦྷཝཱ པཱིཏི པཱིནནཾ, སུཁཉྩ ཨུཔབྲཱུཧནཾ ཀརོཏི, ཨཐ ནཾ སསམྤཡུཏྟདྷམྨཾ ཨེཏེཧི ཨབྷིནིརོཔནཱནུབནྡྷནཔཱིནནཨུཔབྲཱུཧནེཧི ཨནུགྒཧིཏཱ ཨེཀགྒཏཱ ཨེཀཏྟཱརམྨཎེ སམཾ སམྨཱ ཨཱདྷིཡཏི, ཏསྨཱ ཝིཏཀྐོ ཝིཙཱརོ པཱིཏི སུཁཾ ཙིཏྟེཀགྒཏཱཏི ཨིམེསཾ པཉྩནྣཾ ཨུཔྤཏྟིཝསེན པཉྩངྒསམནྣཱགཏཏཱ ཝེདིཏབྦཱ. ཨུཔྤནྣེསུ ཧི ཨེཏེསུ པཉྩསུ ཛྷཱནཾ ཨུཔྤནྣཾ ནཱམ ཧོཏི, ཏེནསྶ ཨེཏཱནི པཉྩ སམནྣཱགཏངྒཱནཱིཏི ཝུཙྩནྟི. ཏསྨཱ ན ཨེཏེཧི སམནྣཱགཏཾ ཨཉྙདེཝ ཛྷཱནཾ ནཱམ ཨཏྠཱིཏི གཧེཏབྦཾ. ཡཐཱ པན ཨངྒམཏྟཝསེནེཝ ཙཏུརངྒིནཱི སེནཱ, པཉྩངྒིཀཾ ཏཱུརིཡཾ ཨཊྛངྒིཀོ ཙ མགྒོཏི ཝུཙྩཏི, ཨེཝམིདམྤི ཨངྒམཏྟཝསེནེཝ ‘‘པཉྩངྒིཀ’’ནྟི ཝཱ ‘‘པཉྩངྒསམནྣཱགཏ’’ནྟི ཝཱ ཝུཙྩཏཱིཏི ཝེདིཏབྦཾ.

ཨེཏཱནི ཙ པཉྩངྒཱནི ཀིཉྩཱཔི ཨུཔཙཱརཀྑཎེཔི ཨཏྠི, ཨཐ ཁོ ཨུཔཙཱརེ པཀཏིཙིཏྟཏོ བལཝཏརཱནི, ཨིདྷ པན ཨུཔཙཱརཏོཔི བལཝཏརཱནི རཱུཔཱཝཙརཀྑཎཔྤཏྟཱནི. ཨེཏྠ ཧི ཝིཏཀྐོ སུཝིསདེན ཨཱཀཱརེན ཨཱརམྨཎེ ཙིཏྟཾ ཨབྷིནིརོཔཡམཱནོ ཨུཔྤཛྫཏི, ཝིཙཱརོ ཨཏིཝིཡ ཨཱརམྨཎཾ ཨནུམཛྫམཱནོ, པཱིཏིསུཁཾ སབྦཱཝནྟམྤི ཀཱཡཾ ཕརམཱནཾ. ཏེནེཝ ཝུཏྟཾ ‘‘ནཱསྶ ཀིཉྩི སབྦཱཝཏོ ཀཱཡསྶ ཝིཝེཀཛེན པཱིཏིསུཁེན ཨཔྥུཊཾ ཧོཏཱི’’ཏི. ཙིཏྟེཀགྒཏཱཔི ཧེཊྛིམམྷི སམུགྒཔཊལེ ཨུཔརིམཾ སམུགྒཔཊལཾ ཝིཡ ཨཱརམྨཎེ སུཕུསིཏཱ ཧུཏྭཱ ཨུཔྤཛྫཏི. ཨཡམེཏེསཾ ¶ ཨིཏརེཧི ཝིསེསོ, ཏསྨཱ ‘‘པཉྩངྒསམནྣཱགཏ’’ནྟི ཨཔྤནཱཛྷཱནམེཝ ཝིསེསེཏྭཱ ཝུཏྟཾ.

ཏིཝིདྷཀལྱཱཎཾ དསལཀྑཎསམྤནྣནྟི ཨེཏྠ པན ཛྷཱནསྶ ཨཱདིམཛ྄ཛྷཔརིཡོསཱནཝསེན ཏིཝིདྷཀལྱཱཎཏཱ, ཏེསཾཡེཝ ཨཱདིམཛ྄ཛྷཔརིཡོསཱནཱནཾ ལཀྑཎཝསེན དསལཀྑཎསམྤནྣཏཱ ཝེདིཏབྦཱ. ཝིཏྠཱརནཡཾ པནེཏྠ སཡམེཝ པཀཱསཡིསྶཏི. ཀིལེསཙོརེཧི ཨནབྷིབྷཝནཱིཡཏྟཱ ཛྷཱནཾ ‘‘ཙིཏྟམཉྫཱུས’’ནྟི ཝུཏྟཾ. ནིསྶཱཡཱཏི པཱདཀཾ ཀཏྭཱ.

དསལཀྑཎཝིབྷཱཝནེནེཝ ¶ ཏིཝིདྷཀལྱཱཎཏཱཔི ཝིབྷཱཝིཏཱ ཧོཏཱིཏི དསལཀྑཎཾ ཏཱཝ དསྶེནྟོ ‘‘ཏཏྲིམཱནཱི’’ཏིཨཱདིམཱཧ. ཏཏྠ པཱརིཔནྠིཀཏོ ཙིཏྟཝིསུདྡྷཱིཏིཨཱདཱིནཾ པདཱནཾ ཨཏྠོ ‘‘ཏཏྲཱཡཾ པཱལཱི༹’’ཏིཨཱདིནཱ ཝུཏྟཔཱལི༹ཝཎྞནཱཡམེཝ ཨཱཝི བྷཝིསྶཏི. ཏཏྲཱཏི ཏསྨིཾ དསལཀྑཎཝིབྷཱཝནེ. པཊིཔདཱཝིསུདྡྷཱིཏི པཊིཔཛྫཏི ཛྷཱནཾ ཨེཏཱཡཱཏི པཊིཔདཱ, གོཏྲབྷུཔརིཡོསཱནོ པུབྦབྷཱགིཡོ བྷཱཝནཱནཡོ. པརིཔནྠཏོ ཝིསུཛ྄ཛྷནཾ ཝིསུདྡྷི, པཊིཔདཱཡ ཝིསུདྡྷི པཊིཔདཱཝིསུདྡྷི. སཱ པནཱཡཾ ཡསྨཱ ཛྷཱནསྶ ཨུཔྤཱདཀྑཎེ ལབྦྷཏི, ཏསྨཱ ཝུཏྟཾ ‘‘པཊིཔདཱཝིསུདྡྷི ཨཱདཱི’’ཏི. ཨུཔེཀྑཱནུབྲཱུཧནཱཏི ཝིསོདྷེཏབྦཏཱདཱིནཾ ཨབྷཱཝཏོ ཛྷཱནཔརིཡཱཔནྣཱཡ ཏཏྲམཛ྄ཛྷཏྟུཔེཀྑཱཡ ཀིཙྩནིཔྥཏྟིཡཱ ཨནུབྲཱུཧནཱ. སཱ པནཱཡཾ ཡསྨཱ ཝིསེསཏོ ཛྷཱནསྶ ཋིཏིཀྑཎེ ལབྦྷཏི, ཏེན ཝུཏྟཾ ‘‘ཨུཔེཀྑཱནུབྲཱུཧནཱ མཛ྄ཛྷེ’’ཏི. སམྤཧཾསནཱཏི ཏཏྠ དྷམྨཱནཾ ཨནཏིཝཏྟནཱདིསཱདྷཀསྶ ཉཱཎསྶ ཀིཙྩནིཔྥཏྟིཝསེན པརིཡོདཔནཱ. སཱ པན ཡསྨཱ ཛྷཱནསྶ ཨོསཱནཀྑཎེ པཱཀཊཱ ཧོཏི, ཏསྨཱ ཝུཏྟཾ ‘‘སམྤཧཾསནཱ པརིཡོསཱན’’ནྟི. ཨིམཱནི ཏཱིཎི ལཀྑཎཱནཱིཏི པརིཔནྠཏོ ཙིཏྟསྶ ཝིསུཛ྄ཛྷནཱཀཱརོ, མཛ྄ཛྷིམསྶ སམཐནིམིཏྟསྶ པཊིཔཛྫནཱཀཱརོ, ཏཏྠ པཀྑནྡནཱཀཱརོཏི ཨིམཱནི ཏཱིཎི ཛྷཱནསྶ ཨཱདིཏོ ཨུཔྤཱདཀྑཎེ ཨཔྤནཱཔྤཏྟིལཀྑཎཱནི. ཏེཧི ཨཱཀཱརེཧི ཝིནཱ ཨཔྤནཱཔྤཏྟིཡཱ ཨབྷཱཝཏོ ཨསཏི ཙ ཨཔྤནཱཡཾ ཏདབྷཱཝཏོ ཨཱདིཀལྱཱཎཉྩེཝ ཝིསུདྡྷིཔཊིཔདཏྟཱ ཡཐཱཝུཏྟེཧི ལཀྑཎེཧི སམནྣཱགཏཏྟཱ ཙ ཏིལཀྑཎསམྤནྣཉྩ. ཨིམིནཱ ནཡེན མཛ྄ཛྷཔརིཡོསཱནལཀྑཎཱནཉྩ ཡོཛནཱ ཝེདིཏབྦཱ.

ཀེཙི ¶ པན ‘‘པཊིཔདཱཝིསུདྡྷི ནཱམ སསམྦྷཱརིཀོ ཨུཔཙཱརོ, ཨུཔེཀྑཱནུབྲཱུཧནཱ ནཱམ ཨཔྤནཱ, སམྤཧཾསནཱ ནཱམ པཙྩཝེཀྑཎཱ’’ཏི ཝཎྞཡནྟི, ཏཾ ན ཡུཏྟཾ. ཏཐཱ ཧི སཏི ཨཛྷཱནདྷམྨེཧི ཛྷཱནསྶ གུཎསཾཀིཏྟནཾ ནཱམ ཀཏཾ ཧོཏི. ན ཧི བྷཱུམནྟརཾ བྷཱུམནྟརཔརིཡཱཔནྣཾ ཧོཏི, པཱལི༹ཡཱ ཙེཏཾ ཝིརུཛ྄ཛྷཏི. ‘‘ཨེཀཏྟགཏཾ ཙིཏྟཾ པཊིཔདཱཝིསུདྡྷིཔཀྑནྡཉྩེཝ ཧོཏི ཨུཔེཀྑཱནུབྲཱུཧིཏཉྩ ཉཱཎེན ཙ སམྤཧཾསིཏ’’ནྟི (པཊི. མ. ༡.༡༥༨) ཧི པཱལི༹ཡཾ ཝུཏྟཾ. ཨེཏྠ ཧི ཨེཀཏྟགཏཾ ཙིཏྟནྟི ཨིནྡྲིཡཱནཾ ཨེཀརསབྷཱཝེན ཨེཀགྒཏཱཡ ཙ སིཁཱཔྤཏྟིཡཱ ཏདནུགུཎཾ ཨེཀཏྟགཏཾ སསམྤཡུཏྟཾ ཨཔྤནཱཔྤཏྟཾ ཙིཏྟཾ ཝུཏྟཾ, ཏསྶེཝ ཙ པཊིཔདཱཝིསུདྡྷིཔཀྑནྡཏཱདི ཨནནྟརཾ ཝུཙྩཏེ. ཏསྨཱ པཱལི༹ཡཾ ཨེཀསྨིཾཡེཝ ཨཔྤནཱཙིཏྟཀྑཎེ པཊིཔདཱཝིསུདྡྷིཨཱདཱིནཾ ཝུཏྟཏྟཱ ཨནྟོཨཔྤནཱཡམེཝ པརིཀམྨཱགམནཝསེན པཊིཔདཱཝིསུདྡྷི, ཏཏྲམཛ྄ཛྷཏྟུཔེཀྑཱཡ ཀིཙྩཝསེན ཨུཔེཀྑཱནུབྲཱུཧནཱ, དྷམྨཱནཾ ཨནཏིཝཏྟནཱདིབྷཱཝསཱདྷནེན པརིཡོདཱཔཀསྶ ཉཱཎསྶ ཀིཙྩནིཔྥཏྟིཝསེན སམྤཧཾསནཱ ཙ ཝེདིཏབྦཱ.

ཀཐཾ? ཡསྨིཾ (པཊི. མ. ཨཊྛ. ༢.༡.༡༥༨; ཝིསུདྡྷི. ༡.༡༧༥) ཝཱརེ ཨཔྤནཱ ཨུཔྤཛྫཏི ¶ , ཏསྨིཾ ཡོ ནཱིཝརཎསངྑཱཏོ ཀིལེསགཎོ ཏསྶ ཛྷཱནསྶ པརིཔནྠོ, ཏཏོ ཙིཏྟཾ ཝིསུཛ྄ཛྷཏི, ཝིསུདྡྷཏྟཱ ཨཱཝརཎཝིརཧིཏཾ ཧུཏྭཱ མཛ྄ཛྷིམཾ སམཐནིམིཏྟཾ པཊིཔཛྫཏི. མཛ྄ཛྷིམཾ སམཐནིམིཏྟཾ ནཱམ སམཔྤཝཏྟོ ཨཔྤནཱསམཱདྷིཡེཝ, ལཱིནུདྡྷཙྩསངྑཱཏཱནཾ ཨུབྷིནྣཾ ཨནྟཱནཾ ཨནུཔགམནེན མཛ྄ཛྷིམོ, སཝིསེསཾ པཙྩནཱིཀདྷམྨཱནཾ ཝཱུཔསམནཏོ སམཐོ, ཡོགིནོ སུཁཝིསེསཱནཾ ཀཱརཎབྷཱཝཏོ ནིམིཏྟནྟི ཀཏྭཱ. ཏསྶ པན ཨཔྤནཱཙིཏྟསྶ ཨནནྟརཔཙྩཡབྷཱུཏཾ གོཏྲབྷུཙིཏྟཾ སཏིཔི པརིཏྟམཧགྒཏབྷཱཝབྷེདེ པཙྩཡཔཙྩཡུཔྤནྣབྷཱཝབྷེདེ ཙ ཨེཀིསྶཱཡེཝ སནྟཏིཡཱ པརིཎཱམཱུཔགམནཏོ ཨེཀསནྟཏིཔརིཎཱམནཡེན ཏཐཏྟཾ ཨཔྤནཱསམཱདྷིཝསེན སམཱཧིཏབྷཱཝཾ ཨུཔགཙྪམཱནཾ མཛ྄ཛྷིམཾ སམཐནིམིཏྟཾ པཊིཔཛྫཏི ནཱམ. ཨེཝཾ པཊིཔནྣཏྟཱ ཏཐཏྟུཔགམནེན ཏཏྠ པཀྑནྡཏི ནཱམ. ཡསྨིཉྷི ཁཎེ ཏཐཏྟཾ མཛ྄ཛྷིམཾ སམཐནིམིཏྟཾ པཊིཔཛྫཏི, ཏསྨིཾཡེཝ ཁཎེ ཏཐཏྟུཔགམནེན ཨཔྤནཱསམཱདྷིནཱ སམཱཧིཏབྷཱཝཱུཔགམནེན ཏཏྠ པཀྑནྡཏི ནཱམ. ཨེཝཾ ཏཱཝ པུརིམསྨིཾ གོཏྲབྷུཙིཏྟེ ཝིཛྫམཱནཱ པརིཔནྠཝིསུདྡྷིམཛ྄ཛྷིམསམཐཔྤཊིཔཏྟིཔཀྑནྡནཱཀཱརཱ ཨཱགམནཝསེན ནིཔྥཛྫམཱནཱ པཋམསྶ ཛྷཱནསྶ ཨུཔྤཱདཀྑཎེཡེཝ པཊིཔདཱཝིསུདྡྷཱིཏི ཝེདིཏབྦཱ. ཏེཡེཝ ཧི ཨཱཀཱརཱ པཙྩཡཝིསེསཏོ ཛྷཱནཀྑཎེ ནིཔྥཛྫམཱནཱ པཊིཔདཱཝིསུདྡྷཱིཏི ཝུཏྟཱ.

ཨེཝཾ ¶ ཝིསུདྡྷསྶ པན ཏསྶ ཙིཏྟསྶ པུན སོདྷེཏབྦཱབྷཱཝཏོ ཝིསོདྷནེ བྱཱཔཱརཾ ཨཀརོནྟོ ཝིསུདྡྷཾ ཙིཏྟཾ ཨཛ྄ཛྷུཔེཀྑཏི ནཱམ. སམཐབྷཱཝཱུཔགམནེན སམཐཔྤཊིཔནྣསྶ པུན སམཱདྷཱནེ བྱཱཔཱརཾ ཨཀརོནྟོ སམཐཔྤཊིཔནྣཾ ཨཛ྄ཛྷུཔེཀྑཏི ནཱམ. སམཐཔྤཊིཔནྣབྷཱཝཏོ ཨེཝ ཙསྶ ཀིལེསསཾསགྒཾ པཧཱཡ ཨེཀཏྟེན ཨུཔཊྛིཏསྶ པུན ཨེཀཏྟུཔཊྛཱནེ བྱཱཔཱརཾ ཨཀརོནྟོ ཨེཀཏྟུཔཊྛཱནཾ ཨཛ྄ཛྷུཔེཀྑཏི ནཱམ. ཨེཝཾ ཏཏྲམཛ྄ཛྷཏྟུཔེཀྑཱཡ ཀིཙྩཝསེན ཨུཔེཀྑཱནུབྲཱུཧནཱ ཝེདིཏབྦཱ.

ཡེ པནེཏེ ཨེཝཾ ཨུཔེཀྑཱནུབྲཱུཧིཏེ ཏསྨིཾ ཛྷཱནཙིཏྟེ ཛཱཏཱ སམཱདྷིཔཉྙཱསངྑཱཏཱ ཡུགནདྡྷདྷམྨཱ ཨཉྙམཉྙཾ ཨནཏིཝཏྟམཱནཱ ཧུཏྭཱ པཝཏྟཱ, ཡཱནི ཙ སདྡྷཱདཱིནི ཨིནྡྲིཡཱནི ནཱནཱཀིལེསེཧི ཝིམུཏྟཏྟཱ ཝིམུཏྟིརསེན ཨེཀརསཱནི ཧུཏྭཱ པཝཏྟཱནི, ཡཉྩེས ཏདུཔགཾ ཏེསཾ ཨནཏིཝཏྟནཨེཀརསསབྷཱཝཱནཾ ཨནུཙྪཝིཀཾ ཝཱིརིཡཾ ཝཱཧཡཏི, ཡཱ ཙསྶ ཏསྨིཾ ཁཎེ པཝཏྟཱ ཨཱསེཝནཱ, སབྦེཔི ཏེ ཨཱཀཱརཱ ཡསྨཱ ཉཱཎེན སཾཀིལེསཝོདཱནེསུ ཏཾ ཏཾ ཨཱདཱིནཝཉྩ ཨཱནིསཾསཉྩ དིསྭཱ ཏཐཱ ཏཐཱ སམྤཧཾསིཏཏྟཱ ཝིསོདྷིཏཏྟཱ པརིཡོདཱཔིཏཏྟཱ ནིཔྥནྣཱ, ཏསྨཱ དྷམྨཱནཾ ཨནཏིཝཏྟནཱདིབྷཱཝསཱདྷནེན པརིཡོདཱཔཀསྶ ཉཱཎསྶ ཀིཙྩནིཔྥཏྟིཝསེན སམྤཧཾསནཱ ཝེདིཏབྦཱཏི ཝུཏྟཾ.

ཨཐ ¶ ཀསྨཱ སམྤཧཾསནཱཝ ‘‘པརིཡོསཱན’’ནྟི ཝུཏྟཱ, ན ཨུཔེཀྑཱནུབྲཱུཧནཱཏི? ཡསྨཱ ཏསྨིཾ བྷཱཝནཱཙིཏྟེ ཨུཔེཀྑཱཝསེན ཉཱཎཾ པཱཀཊཾ ཧོཏི, ཏསྨཱ ཉཱཎཀིཙྩབྷཱུཏཱ སམྤཧཾསནཱ ‘‘པརིཡོསཱན’’ནྟི ཝུཏྟཱ. ཏཐཱ ཧི ཨཔྤནཱཀཱལེ བྷཱཝནཱཡ སམཔྤཝཏྟིཡཱ པཊིཔཀྑསྶ ཙ སུཔྤཧཱནཏོ པགྒཧཱདཱིསུ བྱཱཔཱརསྶ ཨཀཱཏབྦཏོ ཨཛ྄ཛྷུཔེཀྑནཱཝ ཧོཏི. ཡཾ སནྡྷཱཡ ཝུཏྟཾ ‘‘སམཡེ ཙིཏྟསྶ ཨཛ྄ཛྷུཔེཀྑནཱ ཝིསུདྡྷཾ ཙིཏྟཾ ཨཛ྄ཛྷུཔེཀྑཏཱི’’ཏི ཙ ཨཱདི. སཱ པནཱཡཾ ཨཛ྄ཛྷུཔེཀྑནཱ ཉཱཎསྶ ཀིཙྩསིདྡྷིཡཱ ཧོཏི ཝིསེསཏོ ཉཱཎསཱདྷནཏྟཱ ཨཔྤནཱབྱཱཔཱརསྶ, ཏསྨཱ ཉཱཎཀིཙྩབྷཱུཏཱ སམྤཧཾསནཱ ‘‘པརིཡོསཱན’’ནྟི ཝུཏྟཱ. ཨེཝཾ ཏིཝིདྷཱཡ པཊིཔདཱཝིསུདྡྷིཡཱ ལདྡྷཝིསེསཱཡ ཏིཝིདྷཱཡ ཨུཔེཀྑཱནུབྲཱུཧནཱཡ སཱཏིསཡཾ པཉྙིནྡྲིཡསྶ ཨདྷིམཏྟབྷཱཝེན ཙཏུབྦིདྷཱཔི སམྤཧཾསནཱ སིཛ྄ཛྷཏཱིཏི ཨཱགམནུཔེཀྑཱཉཱཎཀིཙྩཝསེན དསཔི ཨཱཀཱརཱ ཛྷཱནེ ཨེཝ ཝེདིཏབྦཱ.

ཨེཝཾ ¶ ཏིཝིདྷཏྟགཏཾ ཙིཏྟནྟིཨཱདཱིནི ཏསྶེཝ ཙིཏྟསྶ ཐོམནཝཙནཱནི. ཏཏྠ ཨེཝཾ ཏིཝིདྷཏྟགཏནྟི ཨེཝཾ ཡཐཱཝུཏྟེན ཝིདྷིནཱ པཊིཔདཱཝིསུདྡྷིཔཀྑནྡནཨུཔེཀྑཱནུབྲཱུཧནཉཱཎསམྤཧཾསནཱཝསེན ཏིཝིདྷབྷཱཝཾ གཏཾ. ཝིཏཀྐསམྤནྣནྟི ཀིལེསཀྑོབྷཝིརཧིཏཏྟཱ ཝིཏཀྐེན སུནྡརབྷཱཝམུཔགཏཾ. ཙིཏྟསྶ ཨདྷིཊྛཱནསམྤནྣནྟི ཏསྨིཾཡེཝ ཨཱརམྨཎེ ཙིཏྟསྶ ནིརནྟརཔྤཝཏྟིསངྑཱཏེན ཨདྷིཊྛཱནེན སམྤནྣཾ ཨནཱུནཾ. ཡཐཱ ཨདྷིཊྛཱནཝསིཡཾ ཨདྷིཊྛཱནནྟི ཛྷཱནཔྤཝཏྟི, ཏཐཱ ཨིདྷཱཔི ཙིཏྟསྶ ཨདྷིཊྛཱནནྟི ཙིཏྟེཀགྒཏཱཔི ཡུཛྫཏི. ཏེན ཧི ཨེཀསྨིཾཡེཝ ཨཱརམྨཎེ ཙིཏྟཾ ཨདྷིཊྛཱཏི, ན ཨེཏྠ ཝིཀྑིཔཏཱིཏི. སམཱདྷིསམྤནྣནྟི ཝིསུཾ ཝུཏྟཏྟཱ པན ཝུཏྟནཡེནེཝ གཧེཏབྦོ. ཨཐ ཝཱ སམཱདྷིསྶེཝ ཛྷཱནངྒསངྒཧིཏཏྟཱ ‘‘ཙིཏྟསྶ ཨདྷིཊྛཱནསམྤནྣ’’ནྟི ཛྷཱནངྒཔཉྩཀཝསེན ཝུཏྟཾ. སམཱདྷིསམྤནྣནྟི ཨིནྡྲིཡསངྒཧིཏཏྟཱ ཨིནྡྲིཡཔཉྩཀཝསེན.

ཨསུབྷསཉྙཱཔརིཙིཏེནཱཏི སཀལཾ ཀཱཡཾ ཨསུབྷནྟི པཝཏྟཱཡ སཉྙཱཡ སཧགཏཏྟཱ ཛྷཱནཾ ཨསུབྷསཉྙཱ, ཏེན པརིཙིཏེན པརིབྷཱཝིཏེན. ཙེཏསཱཏི ཙིཏྟེན. བཧུལནྟི ཨབྷིཎྷཾ. ཝིཧརཏོཏི ཝིཧརནྟསྶ, ཨསུབྷསམཱཔཏྟིབཧུལསྶཱཏི ཨཏྠོ. མེཐུནདྷམྨསམཱཔཏྟིཡཱཏི མེཐུནདྷམྨེན སམངྒིབྷཱཝཏོ. པཊིལཱིཡཏཱིཏི ཨེཀཔསྶེན ནིལཱིཡཏི ནིལཱིནཾ ཝིཡ ཧོཏི. པཊིཀུཊཏཱིཏི སངྐུཙཏི. པཊིཝཏྟཏཱིཏི ནིཝཏྟཏི. ན སམྤསཱརཱིཡཏཱིཏི ན ཝིསརཏི, ཨབྷིརཏིཝསེན ན པཀྑནྡཏཱིཏི ཨཏྠོ. ཨཐ ཝཱ པཊིལཱིཡཏཱིཏི སངྐུཙཏི ཏཏྠ པཊིཀཱུལཏཱཡ སཎྛིཏཏྟཱ. པཊིཀུཊཏཱིཏི ཨཔསཀྐཏི ན ཨུཔསཀྐཏི. པཊིཝཏྟཏཱིཏི ནིཝཏྟཏི, ཏཏོ ཨེཝ ན སམྤསཱརཱིཡཏཱིཏི. ནྷཱརུདདྡུལནྟི ནྷཱརུཁཎྜཾ ནྷཱརུཝིལེཁནཾ ཝཱ.

ཨདྡྷམཱསནྟི ¶ ཨཙྩནྟསཾཡོགེ ཨུཔཡོགཝཙནཾ. པཊིསལླཱིཡིཏུནྟི ཡཐཱཝུཏྟཀཱལཾ པཊི པཊི དིཝསེ དིཝསེ སམཱཔཏྟིཡཾ དྷམྨཙིནྟཱཡ ཙིཏྟཾ ནིལཱིཡིཏུཾ. པཡུཏྟཝཱཙནྟི པཙྩཡཔཊིསཾཡུཏྟཝཱཙཾ, བུདྡྷཱ ཨིམེསུ དིཝསེསུ པིཎྜཱཡ ན ཙརནྟི, ཝིཧཱརེཡེཝ ནིསཱིདནྟི, ཏེསཾ དིནྣཾ མཧཔྥལཾ ཧོཏཱིཏི ཨཱདིཝཙནཾ.

ཀལྱཱཎཱུཔནིསྶཡཝསེནཱཏི པབྦཛྫཱཡ ཨུཔནིསྶཡཝསེན. པརེ ཀིརཱཏི ཀིར-སདྡོ ཨརུཙིསཱུཙནཏྠོ. ཏེནཱཧ ‘‘ཨིདཾ པན ཨིཙྪཱམཏྟ’’ནྟི, པཝཏྟིཨཛཱནནཾ ཨཱརོཙཡིཏཱབྷཱཝོ ཉཱཏེ ནིཝཱརཎཉྩཱཏི ཨིདཾ ཏེསཾ ཨིཙྪཱམཏྟཾ ¶ , ན པན ཀཱརཎནྟི ཨཏྠོ. ཨཔརེ པན ཝདནྟི ‘‘ཨེཏསྨིཾ ཀིར ཨཌྜྷམཱསེ ན ཀོཙི བུདྡྷཝེནེཡྻོ ཨཧོསི, ཨཐ སཏྠཱ ཨིམཾ ཨཌྜྷམཱསཾ ཕལསམཱཔཏྟིསུཁེན ཝཱིཏིནཱམེསྶཱམི, ཨིཏི མཡ྄ཧཉྩེཝ སུཁཝིཧཱརོ བྷཝིསྶཏི, ཨནཱགཏེ ཙ པཙྪིམཱ ཛནཏཱ ‘སཏྠཱཔི གཎཾ པཧཱཡ ཨེཀཀོ ཝིཧཱསི, ཀིམངྒཾ པན མཡ’ནྟི དིཊྛཱནུགཏིཾ ཨཱཔཛྫིསྶཏི, ཏདསྶ བྷཝིསྶཏི དཱིགྷརཏྟཾ ཧིཏཱཡ སུཁཱཡཱཏི ཨིམིནཱ ཀཱརཎེན ཨེཝམཱཧཱ’’ཏི. ནེཝ ཀོཙི བྷགཝནྟཾ ཨུཔསངྐམཏཱིཏི ཋཔེཏྭཱ པིཎྜཔཱཏནཱིཧཱརཀཾ ཨཉྙོ ཀོཙི ནེཝ བྷགཝནྟཾ ཨུཔསངྐམཏི, བྷིཀྑུསངྒྷོ པན སཏྠུ ཝཙནཾ སམྤཊིཙྪིཏྭཱ ཨེཀཾ བྷིཀྑུཾ ཨདཱསི. སོ པཱཏོཝ གནྡྷཀུཊིཔརིཝེཎསམྨཛྫནམུཁོདཀདནྟཀཊྛདཱནཱདཱིནི སབྦཀིཙྩཱནི ཏསྨིཾ ཏསྨིཾ ཁཎེ ཀཏྭཱ ཨཔགཙྪཏི.

ཨནེཀཀཱརཎསམྨིསྶོཏི ཨེཏྠ ཀཱཡསྶ ཨསུཙིདུགྒནྡྷཛེགུཙྪཔཊིཀཱུལཏཱཝ ཨནེཀཀཱརཎཾ. མཎྜནཀཔཀཏིཀོཏི ཨལངྐཱརཀསབྷཱཝོ. ཀོཙི ཏརུཎོཔི ཡུཝཱ ན ཧོཏི, ཀོཙི ཡུཝཱཔི མཎྜནཀཛཱཏིཀོ ན ཧོཏི ཡཐཱ ཨུཔསནྟསབྷཱཝོ ཨཱལསིཡབྱསནཱདཱིཧི ཝཱ ཨབྷིབྷཱུཏོ, ཨིདྷ པན དཧརོ ཙེཝ ཡུཝཱ ཙ མཎྜནཀཛཱཏིཀོ ཙ ཨདྷིཔྤེཏོ. པཋམཡོབྦནཾ ནཱམ པནྣརསཝསྶཏོ ཡཱཝ དྭཏྟིཾས སཾཝཙྪརཱནི, སོལ༹སཝསྶཏོ ཝཱ ཡཱཝ ཏེཏྟིཾས ཝསྶཱནི. ཀུཎཔནྟི མཏཀལེ༹ཝརཾ, ཨཧིསྶ ཀུཎཔཾ ཨཧིཀུཎཔཾ. ཨེཝཾ ཨིཏརཱནིཔི. ཨཏིཔཊིཀཱུལཛིགུཙྪནཱིཡསབྷཱཝཏོ ཙེཏྠ ཨིམཱནེཝ ཏཱིཎི ཝུཏྟཱནཱིཏི ཝེདིཏབྦཱནི. ཨཉྙེསཉྷི སསསཱུཀརཱདཱིནཾ ཀུཎཔཾ མནུསྶཱ ཀཊུཀབྷཎྜཱདཱིཧི ཨབྷིསངྑརིཏྭཱ པརིབྷུཉྫནྟིཔི, ཨིམེསཾ པན ཀུཎཔཾ ཨབྷིནཝམྤི ཛིགུཙྪནྟིཡེཝ, ཀོ པན ཝཱདོ ཀཱལཱཏིཀྐམེན པཱུཏིབྷཱུཏེ. ཨཏིཔཊིཀཱུལཛིགུཙྪནཱིཡཏཱ ཙ ནེསཾ ཨཏིཝིཡ དུགྒནྡྷཏཱཡ, སཱ ཙ ཨཧཱིནཾ ཏིཁིཎཀོཔཏཱཡ ཀུཀྐུརམནུསྶཱནཾ ཨོདནཀུམྨཱསཱུཔཙཡཏཱཡ ཙ སརཱིརསྶ ཧོཏཱིཏི ཝདནྟི.

སམཎཀུཏྟཀོཏི སམཎཀིཙྩཀོ, ཀཱསཱཝནིཝཱསནཱདིཝསེན སམཎཀིཙྩཀཱརཱིཏི ཝུཏྟཾ ཧོཏི ¶ . ཏེནཱཧ ‘‘སམཎཝེསདྷཱརཀོ’’ཏི. སབྦམཀཾསཱུཏི པུཐུཛྫནཱ སཱཝཛྫེཔི ཏཏྠ ཨནཝཛྫསཉྙིནོ ཧུཏྭཱ ཀརཎཀཱརཱཔནསམནུཉྙཏཱདིབྷེདཾ སབྦམཀཾསུ. ལོཧིཏཀནྟི ཨེཏྠ ‘‘ལོཧིཏགཏ’’ནྟིཔི པཋནྟི. ཝགྒཱུཏི མཏཱ ཝགྒུམཏཱ. པུཉྙསམྨཏཱཏི པུཛྫབྷཝཕལནིབྦཏྟནེན ¶ སཏྟཱནཾ པུནནེན ཝིསོདྷནེན པུཉྙནྟི སམྨཏཱ. པཝཱཧེསྶཱམཱིཏི གམཡིསྶཱམི, ཝིསོདྷེསྶཱམཱིཏི ཨཏྠོ.

༡༦༣. མཱརདྷེཡྻཾ ཝུཙྩཏི ཏེབྷཱུམཀཱ དྷམྨཱ. ཝཙནཏྠཏོ པན མཱརསྶ དྷེཡྻཾ མཱརདྷེཡྻཾ. དྷེཡྻནྟི ཋཱནཾ ཝཏྠུ ནིཝཱསོ གོཙརོ. མཱརོ ཝཱ ཨེཏྠ དྷིཡཏི ཏིཊྛཏི པཝཏྟཏཱིཏི མཱརདྷེཡྻཾ, མཱརོཏི ཙེཏྠ ཀིལེསམཱརོ ཨདྷིཔྤེཏོ, ཀིལེསམཱརཝསེནེཝ ཙ དེཝཔུཏྟམཱརསྶ ཀཱམབྷཝེ ཨཱདྷིཔཙྩནྟི. མཱརཝིསཡཾ ནཱཏིཀྐམིསྶཏཱིཏི ཙིནྟེཏྭཱཏི ཨེཝམཡཾ སཾཝེགཾ པཊིལབྷིཏྭཱ མཱརཝིསཡཾ ཨཏིཀྐམེཡྻཱཔི, མཡཱ པན ཨེཝཾ ཝུཏྟེ ཨུཔྤནྣཾ སཾཝེགཾ པཊིཔྤསྶམྦྷེཏྭཱ མཱརཝིསཡཾ ནཱཏིཀྐམིསྶཏཱིཏི ཨེཝཾ ཙིནྟེཏྭཱ. དྭིཝཙནནྟི དྭིཀྑཏྟུཾ ཝཙནཾ, ཨཱམེཌིཏཝཙནནྟི ཝུཏྟཾ ཧོཏི. ནིཡོཛེནྟཱིཏི ཨེཏྠ ཨཡཾ ཨནྡྷབཱལཱ དེཝཏཱ ཨེཝཾ ཨུཔྤནྣསཾཝེགམཱུལཀཾ སམཎདྷམྨཾ ཀཏྭཱ ‘‘ཨཡཾ མཱརཝིསཡཾ ཨཏིཀྐམེཡྻཱཔཱི’’ཏི ཙིནྟེཏྭཱ ཨཏྟནོ ཨཉྙཱཎཏཱཡ ‘‘མཏཱ སཾསཱརཏོ མུཙྩནྟཱི’’ཏི ཨེཝཾལདྡྷིཀཱཔི སམཱནཱ ཨཏྟནོ ལདྡྷིཝསེན མཏཱ བྷིཀྑཱུ སཾསཱརཏོ མུཙྩནྟཱིཏི ཨིམམཏྠཾ ཨནུཔཔརིཀྑིཏྭཱ ཏཾ ཏཏྠ ནིཡོཛེསཱིཏི ཝེདིཏབྦཾ.

ཀིཉྩཱཔི ཨསུབྷཀཐཾ ཀཐེནྟེན བྷགཝཏཱ ཡཐཱ ཏེསཾ བྷིཀྑཱུནཾ མརཎབྷཡཾ ན བྷཝིསྶཏི, ཏཐཱ དེསིཏཏྟཱ བྷིཀྑཱུནཉྩ ཏཾ དྷམྨཀཐཾ སུཏྭཱ ཨསུབྷབྷཱཝནཱནུཡོགེན ཀཱཡེ ཝིགཏཚནྡརཱགཏཱཡ མརཎསྶ ཨབྷིཔཏྠིཏབྷཱཝཏོ བྷཡཾ ནཏྠི, ཏཾ པན ཨསིཧཏྠཾ ཏཐཱ ཝིཙརནྟཾ དིསྭཱ ཏདཉྙེསཾ བྷིཀྑཱུནཾ ཨུཔྤཛྫནཀབྷཡཾ སནྡྷཱཡ ‘‘ཧོཏིཡེཝ བྷཡ’’ནྟིཨཱདི ཝུཏྟནྟི ཝདནྟི. ‘‘ཨཏྟནཱཔི ཨཏྟཱནཾ ཛཱིཝིཏཱ ཝོརོཔེནྟི, ཨཉྙམཉྙམྤི ཛཱིཝིཏཱ ཝོརོཔེནྟཱི’’ཏི ཝུཏྟཏྟཱ ‘‘སབྦཱནིཔི ཏཱནི པཉྩ བྷིཀྑུསཏཱནི ཛཱིཝིཏཱ ཝོརོཔེསཱི’’ཏི ཨིདཾ ཡེབྷུཡྻཝསེན ཝུཏྟནྟི གཧེཏབྦཾ. ཨཔྤཀཉྷི ཨཱུནམདྷིཀཾ ཝཱ གཎནཱུཔགཾ ན ཧོཏཱིཏི ‘‘པཉྩསཏཱནཱི’’ཏི ཝུཏྟཾ. ཏསྨཱ ཡེ ཙ ཨཏྟནཱཝ ཨཏྟཱནཾ ཨཉྙམཉྙཉྩ ཛཱིཝིཏཱ ཝོརོཔེསུཾ, ཏེ ཋཔེཏྭཱ ཨཝསེསེ པུཐུཛྫནབྷིཀྑཱུ སབྦེ ཙ ཨརིཡེ ཨཡཾ ཛཱིཝིཏཱ ཝོརོཔེསཱིཏི ཝེདིཏབྦཾ.

༡༦༤. པཊིསལླཱནཱ ཝུཊྛིཏོཏི ཨེཏྠ པཊིསལླཱནནྟི ཏེཧི ཏེཧི སཏྟསངྑཱརེཧི པཊིནིཝཏྟིཏྭཱ ཨཔསཀྐིཏྭཱ སལླཱནཾ ནིལཱིཡནཾ ཝིཝེཙནཾ, ཀཱཡཙིཏྟེཧི ཏཏོ ཝིཝིཏྟཏཱ ཨེཀཱིབྷཱཝོཏི ཝུཏྟཾ ཧོཏི. ཏེནཱཧ ‘‘ཨེཀཱིབྷཱཝཏོ’’ཏི ¶ , པཝིཝེཀཏོཏི ཨཏྠོ. ཨེཀཱིབྷཱཝོཏི ཧི ¶ ཀཱཡཙིཏྟཝིཝེཀོ ཝུཏྟོ. ཝུཊྛིཏོཏི ཏཏོ དུཝིདྷཝིཝེཀཏོ བྷཝངྒུཔྤཏྟིཡཱ རཱུཔཱརམྨཎཱདིསངྑཱརསམཱཡོགེན གཧཊྛཔབྦཛིཏཱདིསཏྟསམཱགམེན ཙ ཨཔེཏོ. ཨུདྡེསཾ པརིཔུཙྪཾ གཎྷནྟཱིཏི ཨཏྟནོ ཨཏྟནོ ཨཱཙརིཡཱནཾ སནྟིཀེ གཎྷནྟི. ཀཱམཾ དསཱནུསྶཏིགྒཧཎེནེཝ ཨཱནཱཔཱནསྶཏིཔི གཧིཏཱ, སཱ པན ཏཏྠ སནྣིཔཏིཏབྷིཀྑཱུསུ བཧཱུནཾ སཔྤཱཡཱ སཱཏྠིཀཱ ཙ, ཏསྨཱ པུན གཧིཏཱ. ཏཐཱ ཧི བྷགཝཱ ཏམེཝ ཀམྨཊྛཱནཾ ཏེསཾ བྷིཀྑཱུནཾ ཀཐེསི. ཨཱཧཱརེ པཊིཀཱུལསཉྙཱ ཨསུབྷཀམྨཊྛཱནསདིསཱ, ཙཏྟཱརོ པན ཨཱརུཔྤཱ ཨཱདིཀམྨིཀཱནཾ ཨནནུརཱུཔཱཏི ཏེསཾ ཨིདྷ ཨགྒཧཎཾ དཊྛབྦཾ.

ཝེསཱལིཾ ཨུཔནིསྶཱཡཱཏི ཝེསཱལཱིནགརཾ གོཙརགཱམཾ ཀཏྭཱ. ཨུཔཊྛཱནསཱལཱཡནྟི དྷམྨསབྷཱཡཾ. མུཧུཏྟེནེཝཱཏི སཏྠརི སདྡྷམྨེ ཙ གཱརཝེན ཨུཔགཏབྷིཀྑཱུནཾ ཝཙནསམནནྟརམེཝ ཨུཊྛཧིཾསཱུཏི ཀཏྭཱ ཝུཏྟཾ. བུདྡྷཀཱལེ ཀིར བྷིཀྑཱུ བྷགཝཏོ སནྡེསཾ སིརསཱ སམྤཊིཙྪིཏུཾ ཨོཧིཏསོཏཱ ཝིཧརནྟི. ཡསྶཱཏི ཡསྶ ཀཏྟབྦསྶ. ཀཱལནྟི དེསནཱཀཱལཾ སནྡྷཱཡ ཝདཏི.

པཋམཔཉྙཏྟིནིདཱནཝཎྞནཱ ནིཊྛིཏཱ.

ཨཱནཱཔཱནསྶཏིསམཱདྷིཀཐཱཝཎྞནཱ

༡༦༥. ཨརཧཏྟཔྤཏྟིཡཱཏི ཨརཧཏྟཔྤཏྟིཨཏྠཱཡ. ཨཉྙཾ པརིཡཱཡནྟི ཨརཧཏྟཱདྷིགམཏྠཱཡ ཨཉྙམྤི ཀཱརཎཾ. ཨཱཙིཀྑནྟོཏི པསཾསཱཔུབྦཀཾ དེསེནྟོ, པསཾསཱ ཙ ཏཏྠ ཨབྷིརུཙིཛནནེན ཨུསྶཱཧནཏྠཱ. ཏཉྷི སུཏྭཱ བྷིཀྑཱུ ‘‘བྷགཝཱ ཨིམཾ སམཱདྷིཾ ཨནེཀེཧི ཨཱཀཱརེཧི པསཾསཏི, སནྟོ ཀིརཱཡཾ སམཱདྷི པཎཱིཏོ ཙ ཨསེཙནཀོ ཙ སུཁོ ཙ ཝིཧཱརོ, པཱཔདྷམྨེ ཙ ཋཱནསོ ཨནྟརདྷཱཔེཏཱི’’ཏི སཉྫཱཏཱབྷིརུཙིནོ ཨུསྶཱཧཛཱཏཱ སཀྐཙྩཾ ཨནུཡུཉྫིཏབྦཾ པཊིཔཛྫིཏབྦཾ མཉྙནྟི.

ཨཏྠཡོཛནཀྐམནྟི ཨཏྠཉྩ ཡོཛནཀྐམཉྩ. བྷགཝཱ ཨཏྟནོ པཙྩཀྑབྷཱུཏཾ སམཱདྷིཾ དེསནཱནུབྷཱཝེན ཏེསམྤི བྷིཀྑཱུནཾ ཨཱསནྣཾ པཙྩཀྑཉྩ ཀརོནྟོ ¶ སམྤིཎྜནཝསེན ‘‘ཨཡམྤི ཁོ’’ཏིཨཱདིམཱཧ. ཨསྶཱསཔསྶཱསཔརིགྒཱཧིཀཱཏི དཱིགྷརསྶཱདིཝིསེསེཧི སདྡྷིཾ ཨསྶཱསཔསྶཱསེ པརིཙྪིཛྫ གཱཧིཀཱ, ཏེ ཨཱརབྦྷ པཝཏྟཱཏི ཨཏྠོ.

ཨིདཱནི ཡཐཱཝུཏྟམཏྠཾ པཱལི༹ཡཱ ཝིབྷཱཝེནྟོ ཨཱཧ ‘‘ཝུཏྟཉྷེཏ’’ནྟིཨཱདི. ཏཏྠ ནོ པསྶཱསོ ¶ ནོ ཨསྶཱསོཏི སོ སོཡེཝ ཨཏྠོ པཊིསེདྷེན ཝིསེསེཏྭཱ ཝུཏྟོ. ཨསྶཱསཝསེནཱཏི ཨསྶཱསཾ ཨཱརམྨཎཾ ཀཏྭཱཏི ཝུཏྟཾ ཧོཏི. པསྶཱསཝསེནཱཏི ཨེཏྠཱཔི ཨེསེཝ ནཡོ. ཨུཔཊྛཱནཾ སཏཱིཏི ཨསམྨུསྶནཏཱཡ ཏམེཝ ཨསྶཱསཾ པསྶཱསཉྩ ཨུཔགནྟྭཱ ཋཱནཾ སཏི ནཱམཱཏི ཨཏྠོ. ཨེཏྟཱཝཏཱ ཨཱནཱཔཱནེསུ སཏི ཨཱནཱཔཱནསྶཏཱིཏི ཨཡམཏྠོ ཝུཏྟོ ཧོཏི. ཨིདཱནི སཏིཝསེནེཝ པུགྒལཾ ནིདྡིསིཏུཀཱམེན ‘‘ཡོ ཨསྶསཏི, ཏསྶུཔཊྛཱཏི, ཡོ པསྶསཏི, ཏསྶུཔཊྛཱཏཱི’’ཏི ཝུཏྟཾ. ཡོ ཨསྶསཏི, ཏསྶ སཏི ཨསྶཱསཾ ཨུཔགནྟྭཱ ཏིཊྛཏི. ཡོ པསྶསཏི, ཏསྶ སཏི པསྶཱསཾ ཨུཔགནྟྭཱ ཏིཊྛཏཱིཏི ཨཏྠོ.

ཡུཏྟོཏི སམྤཡུཏྟོ. ཨཱནཱཔཱནསྶཏིཡནྟི ཨཱནཱཔཱནསྶཏིཡཾ པཙྩཡབྷཱུཏཱཡནྟི ཨཏྠོ. པུརིམསྨིཉྷི ཨཏྠེ སམཱདྷིསྶ སཏིཡཱ སཧཛཱཏཱདིཔཙྩཡབྷཱཝོ ཝུཏྟོ སམྤཡུཏྟཝཙནཏོ, དུཏིཡསྨིཾ པན ཨུཔནིསྶཡབྷཱཝོཔི. ཨུཔཙཱརཛ྄ཛྷཱནསཧགཏཱ ཧི སཏི ཨཔྤནཱསམཱདྷིསྶ ཨུཔནིསྶཡོ ཧོཏཱིཏི ཨུབྷཡཐཱཔི སཧཛཱཏཱདཱིནཾ སཏྟནྣམྤི པཙྩཡཱནཾ ཝསེན པཙྩཡབྷཱཝཾ དསྶེཏི. ‘‘པུན ཙཔརཾ, ཨུདཱཡི, ཨཀྑཱཏཱ མཡཱ སཱཝཀཱནཾ པཊིཔདཱ, ཡཐཱཔཊིཔནྣཱ མེ སཱཝཀཱ ཙཏྟཱརོ སཏིཔཊྛཱནེ བྷཱཝེནྟཱི’’ཏིཨཱདཱིསུ (མ. ནི. ༢.༢༤༧) ཨུཔྤཱདནཝཌྜྷནཊྛེན བྷཱཝནཱཏི ཝུཙྩཏཱིཏི ཏདུབྷཡཝསེན ཨཏྠཾ དསྶེནྟོ ‘‘བྷཱཝིཏོཏི ཨུཔྤཱདིཏོ ཝཌྜྷིཏོ ཙཱ’’ཏི ཨཱཧ. ཏཏྠ བྷཱཝཾ ཝིཛྫམཱནཏཾ ཨིཏོ གཏོཏི བྷཱཝིཏོ, ཨུཔྤཱདིཏོ པཊིལདྡྷམཏྟོཏི ཨཏྠོ. ཨུཔྤནྣོ པན ལདྡྷཱསེཝནོ བྷཱཝིཏོ, པགུཎབྷཱཝཾ ཨཱཔཱདིཏོ ཝཌྜྷིཏོཏི ཨཏྠོ. བཧུལཱིཀཏོཏི བཧུལཾ པཝཏྟིཏོ. ཏེན ཨཱཝཛྫནཱདིཝསཱིབྷཱཝཔྤཏྟིམཱཧ. ཡོ ཧི ཝསཱིབྷཱཝཾ ཨཱཔཱདིཏོ, སོ ཨིཙྪིཏིཙྪིཏཀྑཎེ སམཱཔཛྫིཏབྦཏོ པུནཔྤུནཾ པཝཏྟིསྶཏི. ཏེན ཝུཏྟཾ ‘‘པུནཔྤུནཾ ཀཏོ’’ཏི. ཡཐཱ ‘‘ཨིདྷེཝ, བྷིཀྑཝེ, སམཎོ (མ. ནི. ༡.༡༣༩; ཨ. ནི. ༤.༢༤༡) ཝིཝིཙྩེཝ ཀཱམེཧཱི’’ཏི (དཱི. ནི. ༡.༢༢༦; སཾ. ནི. ༢.༡༥༢) ཙ ཨེཝམཱདཱིསུ པཋམཔདེ ཝུཏྟོ ཨེཝ-སདྡོ ¶ དུཏིཡཱདཱིསུཔི ཝུཏྟོཡེཝ ཧོཏི, ཨེཝམིདྷཱཔཱིཏི ཨཱཧ ‘‘ཨུབྷཡཏྠ ཨེཝ-སདྡེན ནིཡམོ ཝེདིཏབྦོ’’ཏི.

ཨུབྷཡཔདནིཡམེན ལདྡྷགུཎཾ དསྶེཏུཾ ‘‘ཨཡཾ ཧཱི’’ཏིཨཱདི ཝུཏྟཾ. ཨསུབྷཀམྨཊྛཱནནྟི ཨསུབྷཱརམྨཎཾ ཛྷཱནམཱཧ. ཏཉྷི ཨསུབྷེསུ ཡོགཀམྨབྷཱཝཏོ ཡོགིནོ སུཁཝིསེསཱནཾ ཀཱརཎབྷཱཝཏོ ཙ ‘‘ཨསུབྷཀམྨཊྛཱན’’ནྟི ཝུཙྩཏི. ཀེཝལནྟི ཨིམིནཱ ཨཱརམྨཎཾ ནིཝཏྟེཏི. པཊིཝེདྷཝསེནཱཏི ཛྷཱནཔཊིཝེདྷཝསེན. ཛྷཱནཉྷི བྷཱཝནཱཝིསེསེན ཨིཛ྄ཛྷནྟཾ ཨཏྟནོ ཝིསཡཾ པཊིཝིཛ྄ཛྷནྟམེཝ པཝཏྟཏི ཡཐཱསབྷཱཝཏོ པཊིཝིཛ྄ཛྷཱིཡཏི ཙཱཏི པཊིཝེདྷོཏི ཝུཙྩཏི. ཨོལཱ༹རིཀཱརམྨཎཏྟཱཏི བཱིབྷཙྪཱརམྨཎཏྟཱ. པཊིཀཱུལཱརམྨཎཏྟཱཏི ཛིགུཙྪིཏབྦཱརམྨཎཏྟཱ. པརིཡཱཡེནཱཏི ¶ ཀཱརཎེན ལེསནྟརེན ཝཱ. ཨཱརམྨཎསནྟཏཱཡཔཱིཏི ཨནུཀྐམེན ཝིཙེཏབྦཏཾ པཏྟཱརམྨཎསྶ པརམསུཁུམཏཾ སནྡྷཱཡཱཧ. སནྟེ ཧི སནྣིསིནྣེ ཨཱརམྨཎེ པཝཏྟམཱནོ དྷམྨོ སཡམྤི སནྣིསིནྣོཝ ཧོཏི. ཏེནཱཧ – ‘‘སནྟོ ཝཱུཔསནྟོ ནིབྦུཏོ’’ཏི, ནིབྦུཏསབྦཔརིལཱ༹ཧོཏི ཨཏྠོ. ཨཱརམྨཎསནྟཏཱཡ ཏདཱརམྨཎཱནཾ དྷམྨཱནཾ སནྟཏཱ ལོཀུཏྟརདྷམྨཱརམྨཎཱཧི པཙྩཝེཀྑཎཱཧི དཱིཔེཏབྦཱ.

ནཱསྶ སནྟཔཎཱིཏབྷཱཝཱཝཧཾ ཀིཉྩི སེཙནནྟི ཨསེཙནཀོ, ཨསེཙནཀཏྟཱ ཨནཱསིཏྟཀོ, ཨནཱསིཏྟཀཏྟཱ ཨེཝ ཨབྦོཀིཎྞོ ཨསམྨིསྶོ པརིཀམྨཱདིནཱ, ཏཏོཡེཝ པཱཊིཡེཀྐོ, ཝིསུཾཡེཝེཀོ ཨཱཝེཎིཀོ ཨསཱདྷཱརཎོ. སབྦམེཏཾ སརསཏོ ཨེཝ སནྟབྷཱཝཾ དསྶེཏུཾ ཝུཏྟཾ, པརིཀམྨཾ ཝཱ སནྟབྷཱཝནིམིཏྟཾ. པརིཀམྨནྟི ཙ ཀསིཎཀརཎཱདིནིམིཏྟུཔྤཱདཔརིཡོསཱནཾ, ཏཱདིསཾ ཨིདྷ ནཏྠཱིཏི ཨདྷིཔྤཱཡོ. ཏདཱ ཧི ཀམྨཊྛཱནཾ ནིརསྶཱདཏྟཱ ཨསནྟཾ ཨཔྤཎཱིཏཾ སིཡཱ. ཨུཔཙཱརེན ཝཱ ནཏྠི ཨེཏྠ སནྟཏཱཏི ཡོཛནཱ. ཡཐཱ ཨུཔཙཱརཀྑཎེ ནཱིཝརཎཝིགམེན ཨངྒཔཱཏུབྷཱཝེན ཙ པརེསཾ སནྟཏཱ ཧོཏི, ན ཨེཝམིམསྶ. ཨཡཾ པན ཨཱདིམནསི…པེ… པཎཱིཏོ ཙཱཏི ཡོཛནཱ. ཀེཙཱིཏི ཨུཏྟརཝིཧཱརཝཱསིཀེ སནྡྷཱཡཱཧ. ཨནཱསིཏྟཀོཏི ཨུཔསེཙནེན ཨནཱསིཏྟཀོ. ཏེནཱཧ ‘‘ཨོཛཝནྟོ’’ཏི, ཨོཛཝནྟསདིསོཏི ཨཏྠོ. མདྷུརོཏི ཨིཊྛོ. ཙེཏསིཀསུཁཔྤཊིལཱབྷསཾཝཏྟནཾ ཏིཀཙཏུཀྐཛ྄ཛྷཱནཝསེན ཨུཔེཀྑཱཡ ཝཱ སནྟབྷཱཝེན སུཁགཏིཀཏྟཱ སབྦེསམྤི ཝསེན ཝེདིཏབྦཾ. ཛྷཱནསམུཊྛཱནཔཎཱིཏརཱུཔཕུཊསརཱིརཏཱཝསེན པན ཀཱཡིཀསུཁཔྤཊིལཱབྷསཾཝཏྟནཾ ¶ དཊྛབྦཾ, ཏཉྩ ཁོ ཛྷཱནཏོ ཝུཊྛིཏཀཱལེ. ཨིམསྨིཾ པཀྑེ ཨཔྤིཏཔྤིཏཀྑཎེཏི ཨིདཾ ཧེཏུམྷི བྷུམྨཝཙནཾ དཊྛབྦཾ.

ཨཝིཀྑམྦྷིཏེཏི ཛྷཱནེན སཀསནྟཱནཏོ ཨནཱིཧཊེ ཨཔྤཧཱིནེ. ཨཀོསལླསམྦྷཱུཏེཏི ཨཀོསལླཾ ཝུཙྩཏི ཨཝིཛྫཱ, ཏཏོ སམྦྷཱུཏེ. ཨཝིཛྫཱཔུབྦངྒམཱ ཧི སབྦེ པཱཔདྷམྨཱ. ཁཎེནེཝཱཏི ཨཏྟནོ པཝཏྟིཀྑཎེནེཝ. ཨནྟརདྷཱཔེཏཱིཏི ཨེཏྠ ཨནྟརདྷཱཔནཾ ཝིནཱསནཾ. ཏཾ པན ཛྷཱནཀཏྟུཀསྶ ཨིདྷཱདྷིཔྤེཏཏྟཱ པརིཡུཊྛཱནཔྤཧཱནཾ ཧོཏཱིཏི ཨཱཧ ‘‘ཝིཀྑམྦྷེཏཱི’’ཏི. ཝཱུཔསམེཏཱིཏི ཝིསེསེན ཨུཔསམེཏི. ཝིསེསེན ཨུཔསམནཾ པན སམྨདེཝ ཨུཔསམནཾ ཧོཏཱིཏི ཨཱཧ ‘‘སུཊྛུ ཨུཔསམེཏཱི’’ཏི.

ནནུ ཙ ཨཉྙོཔི སམཱདྷི ཨཏྟནོ པཝཏྟིཀྑཎེནེཝ པཊིཔཀྑདྷམྨེ ཨནྟརདྷཱཔེཏི ཝཱུཔསམེཏི, ཨཐ ཀསྨཱ ཨཡམེཝ སམཱདྷི ཨེཝཾ ཝིསེསེཏྭཱ ཝུཏྟོཏི? པུབྦབྷཱགཏོ པཊྛཱཡ ནཱནཱཝིཏཀྐཝཱུཔསམནསབྦྷཱཝཏོ. ཝུཏྟཉྷེཏཾ ‘‘ཨཱནཱཔཱནསྶཏི བྷཱཝེཏབྦཱ ཝིཏཀྐུཔཙྪེདཱཡཱ’’ཏི ¶ (ཨ. ནི. ༩.༡; ཨུདཱ. ༣༡). ཨཔིཙ ཏིཀྑཔཉྙསྶ ཉཱཎུཏྟརསྶེཏཾ ཀམྨཊྛཱནཾ, ཉཱཎུཏྟརསྶ ཙ ཀིལེསཔྤཧཱནཾ ཨིཏརེཧི སཱཏིསཡཾ ཡཐཱ སདྡྷཱདྷིམུཏྟེཧི དིཊྛིཔྤཏྟསྶ, ཏསྨཱ ཨིམཾ ཝིསེསཾ སནྡྷཱཡ ‘‘ཋཱནསོ ཨནྟརདྷཱཔེཏི ཝཱུཔསམེཏཱི’’ཏི ཝུཏྟཾ. ཨཐ ཝཱ ནིམིཏྟཔཱཏུབྷཱཝེ སཏི ཁཎེནེཝ ཨངྒཔཱཏུབྷཱཝསབྦྷཱཝཏོ ཨཡམེཝ སམཱདྷི ‘‘ཋཱནསོ ཨནྟརདྷཱཔེཏི ཝཱུཔསམེཏཱི’’ཏི ཝུཏྟོ ཡཐཱ ཏཾ མཧཏོ ཨཀཱལམེགྷསྶ ཨུཊྛིཏསྶ དྷཱརཱནིཔཱཏེ ཁཎེནེཝ པཐཝིཡཾ རཛོཛལླསྶ ཝཱུཔསམོ. ཏེནེཝཱཧ ‘‘སེཡྻཐཱཔི, བྷིཀྑཝེ, མཧཱ ཨཀཱལམེགྷོ ཨུཊྛིཏོ’’ཏིཨཱདི. སཱསནིཀསྶ ཛྷཱནབྷཱཝནཱ ཡེབྷུཡྻེན ནིབྦེདྷབྷཱགིཡཱཝ ཧོཏཱིཏི ཨཱཧ ‘‘ནིབྦེདྷབྷཱགིཡཏྟཱ’’ཏི. བུདྡྷཱནཾ པན ཨེཀཾསེན ནིབྦེདྷབྷཱགིཡཱཝ ཧོཏི. ཨིམམེཝ ཧི ཀམྨཊྛཱནཾ བྷཱཝེཏྭཱ སབྦེཔི སམྨཱསམྦུདྡྷཱ སམྨཱསམྦོདྷིཾ ཨདྷིགཙྪནྟི, ཨརིཡམགྒསྶ པཱདཀབྷཱུཏོ ཨཡཾ སམཱདྷི ཨནུཀྐམེན ཝཌྜྷིཏྭཱ ཨརིཡམགྒབྷཱཝཾ ཨུཔགཏོ ཝིཡ ཧོཏཱིཏི ཨཱཧ ‘‘ཨནུཔུབྦེན ཨརིཡམགྒཝུཌྜྷིཔྤཏྟོ’’ཏི. ཨཡཾ པནཏྠོ ཝིརཱགནིརོདྷཔཊིནིསྶགྒཱནུཔསྶནཱནཾ ཝསེན སམྨདེཝ ཡུཛྫཏི.

ཀཐནྟི ¶ ཨིདཾ པུཙྪནཱཀཱརཝིབྷཱཝནཔདཾ, པུཙྪཱ ཙེཏྠ ཀཐེཏུཀམྱཏཱཝསེན ཨཉྙེསཾ ཨསམྦྷཝཏོ, སཱ ཙ ཨུཔརི དེསནཾ ཨཱརུལ༹ྷཱནཾ སབྦེསཾ པཀཱརཝིསེསཱནཾ ཨཱམསནཝསེནཱཏི ཨིམམཏྠཾ དསྶེནྟོ ‘‘ཀཐནྟི…པེ… ཝིཏྠཱརེཏུཀམྱཏཱཔུཙྪཱ’’ཏི ཨཱཧ. ཀཐཾ བཧུལཱིཀཏོཏི ཨེཏྠཱཔི ཨཱནཱཔཱནསྶཏིསམཱདྷཱིཏི པདཾ ཨཱནེཏྭཱ སམྦནྡྷིཏབྦཾ. ཏཏྠ ཀཐནྟི ཨཱནཱཔཱནསྶཏིསམཱདྷིབཧུལཱིཀཱརཾ ནཱནཔྤཀཱརཏོ ཝིཏྠཱརེཏུཀམྱཏཱཔུཙྪཱ. བཧུལཱིཀཏོ ཨཱནཱཔཱནསྶཏིསམཱདྷཱིཏི ཏཐཱ པུཊྛདྷམྨནིདསྶནནྟི ཨིམམཏྠཾ ‘‘ཨེསེཝ ནཡོ’’ཏི ཨིམིནཱཡེཝ ཨཏིདིསྶཏི. ཧེཊྛཱ པཔཉྩཝསེན ཝུཏྟམཏྠཾ སུཁགྒཧཎཏྠཾ སངྒཧེཏྭཱ དསྶེནྟོ ‘‘ཨཡཾ པནེཏྠ སངྑེཔཏྠོ’’ཏི ཨཱཧ, པིཎྜཏྠོཏི ཝུཏྟཾ ཧོཏི.

ཏམཏྠནྟི ཏཾ ‘‘ཀཐཾ བྷཱཝིཏོ’’ཏིཨཱདིནཱ པུཙྪཱཝསེན སངྑེཔཏོ ཝུཏྟམཏྠཾ. ‘‘ཨིདྷ ཏཐཱགཏོ ལོཀེ ཨུཔྤཛྫཏཱི’’ཏིཨཱདཱིསུ (མ. ནི. ༡.༢༩༡; ཨ. ནི. ༣.༦༡) ཨིདྷ-སདྡོ ལོཀཾ ཨུཔཱདཱཡ ཝུཏྟོ. ‘‘ཨིདྷེཝ ཏིཊྛམཱནསྶཱ’’ཏིཨཱདཱིསུ (དཱི. ནི. ༢.༣༦༩) ཨོཀཱསཾ. ‘‘ཨིདྷཱཧཾ, བྷིཀྑཝེ, བྷུཏྟཱཝཱི ཨསྶཾ པཝཱརིཏོ’’ཏིཨཱདཱིསུ (མ. ནི. ༡.༣༠) པདཔཱུརཎམཏྟཾ. ‘‘ཨིདྷ བྷིཀྑུ དྷམྨཾ པརིཡཱཔུཎཱཏཱི’’ཏིཨཱདཱིསུ (ཨ. ནི. ༥.༧༣) པན སཱསནཾ. ‘‘ཨིདྷ, བྷིཀྑཝེ, བྷིཀྑཱུ’’ཏི ཨིདྷཱཔི སཱསནམེཝཱཏི དསྶེནྟོ ‘‘བྷིཀྑཝེ, ཨིམསྨིཾ སཱསནེ བྷིཀྑཱུ’’ཏི ཝཏྭཱ ཏམེཝཏྠཾ པཱཀཊཾ ཀཏྭཱ དསྶེཏུཾ ‘‘ཨཡཾ ཧཱི’’ཏིཨཱདིམཱཧ. ཏཏྠ སབྦཔྤཀཱརཨཱནཱཔཱནསྶཏིསམཱདྷིནིབྦཏྟཀསྶཱཏི སབྦཔྤཀཱརགྒཧཎཾ སོལ༹ས པཀཱརེ སནྡྷཱཡ. ཏེ ཧི ¶ ཨིམསྨིཾཡེཝ སཱསནེ. བཱཧིརཀཱ ཧི ཛཱནནྟཱ ཨཱདིཏོ ཙཏུཔྤཀཱརམེཝ ཛཱནནྟི. ཏེནཱཧ ‘‘ཨཉྙསཱསནསྶ ཏཐཱབྷཱཝཔྤཊིསེདྷནོ’’ཏི, ཡཐཱཝུཏྟསྶ པུགྒལསྶ ནིསྶཡབྷཱཝཔྤཊིསེདྷནོཏི ཨཏྠོ. ཨེཏེན ‘‘ཨིདྷ, བྷིཀྑཝེ’’ཏི ཨིདཾ ཨནྟོགདྷཨེཝ-སདྡནྟི དསྶེཏི. སནྟི ཧི ཨེཀཔདཱནིཔི ཨཝདྷཱརཎཱནི ཡཐཱ ཝཱཡུབྷཀྑོཏི. ཏེནེཝཱཧ ‘‘ཨིདྷེཝ, བྷིཀྑཝེ, སམཎོ’’ཏིཨཱདི. པརིཔུཎྞསམཎཀརཎདྷམྨོ ཧི ཡོ, སོ སབྦཔྤཀཱརཨཱནཱཔཱནསྶཏིསམཱདྷིནིབྦཏྟཀོ. པརཔྤཝཱདཱཏི པརེསཾ ཨཉྙཏིཏྠིཡཱནཾ ནཱནཔྤཀཱརཝཱདཱ ཏིཏྠཱཡཏནཱནི.

ཨརཉྙཱདིཀསྶེཝ ¶ བྷཱཝནཱནུརཱུཔསེནཱསནཏཾ དསྶེཏུཾ ‘‘ཨིམསྶ ཧཱི’’ཏིཨཱདི ཝུཏྟཾ. དུདྡམོ དམཐཾ ཨནུཔགཏོ གོཎོ ཀཱུཊགོཎོ. ཡཐཱ ཐནེཧི སབྦསོ ཁཱིརཾ ན པགྒྷརཏི, ཨེཝཾ དོཧཔཊིབནྡྷིནཱི ཀཱུཊདྷེནུ. ཨསྶཱཏི གོཔསྶ. རཱུཔསདྡཱདིཀེ པཊིཙྩ ཨུཔྤཛྫནཀཨསྶཱདོ རཱུཔཱརམྨཎཱདིརསོ. པུབྦེ ཨཱཙིཎྞཱརམྨཎནྟི པབྦཛིཏཏོ པུབྦེ, ཨནཱདིམཏི ཝཱ སཾསཱརེ པརིཙིཏཱརམྨཎཾ. ཨུཔཙཱརཝསེན ཨུཔནིསཱིདཏི, ཨཔྤནཱཝསེན ཨུཔནིཔཛྫཏཱིཏི ཡོཛེཏབྦཾ.

ཨིདྷཱཏི ཨིམསྨིཾ སཱསནེ. ནིབནྡྷེཡྻཱཏི བནྡྷེཡྻ. སཏིཡཱཏི སམྨདེཝ ཀམྨཊྛཱནསལླཀྑཎཝསཔྤཝཏྟཱཡ སཏིཡཱ. ཨཱརམྨཎེཏི ཀམྨཊྛཱནཱརམྨཎེ. དལ༹ྷནྟི ཐིརཾ, ཡཐཱ སཏོཀཱརིསྶ ཨུཔཙཱརཔྤནཱབྷེདོ སམཱདྷི ཨིཛ྄ཛྷཏི, ཏཐཱ ཐཱམགཏཾ ཀཏྭཱཏི ཨཏྠོ.

མུདྡྷབྷཱུཏནྟི སནྟཏཱདིཝིསེསགུཎཝནྟཏཱཡ བུདྡྷཱདཱིཧི ཨརིཡེཧི སམཱསེཝིཏབྷཱཝཏོ ཙ མུདྡྷསདིསཾ, ཨུཏྟམནྟི ཨཏྠོ. ཝིསེསཱདྷིགམདིཊྛདྷམྨསུཁཝིཧཱརཔདཊྛཱནནྟི སབྦེསཾ བུདྡྷཱནཾ ཨེཀཙྩཱནཾ པཙྩེཀབུདྡྷཱནཾ བུདྡྷསཱཝཀཱནཉྩ ཝིསེསཱདྷིགམསྶ ཙེཝ ཨཉྙཀམྨཊྛཱནེན ཨདྷིགཏཝིསེསཱནཾ དིཊྛདྷམྨསུཁཝིཧཱརསྶ ཙ པདཊྛཱནབྷཱུཏཾ. ཝཏྠུཝིཛྫཱཙརིཡོ ཝིཡ བྷགཝཱ ཡོགཱིནཾ ཨནུརཱུཔནིཝཱསཊྛཱནུཔདིསྶནཏོ. བྷིཀྑུ དཱིཔིསདིསོ ཨརཉྙེ ཨེཀཀོ ཝིཧརིཏྭཱ པཊིཔཀྑནིམྨཐནེན ཨིཙྪིཏཏྠསཱདྷནཏོ. ཕལམུཏྟམནྟི སཱམཉྙཕལམཱཧ. པརཀྐམཛཝཡོགྒབྷཱུམིནྟི བྷཱཝནུསྶཱཧཛཝསྶ ཡོགྒཀརཎབྷཱུམིབྷཱུཏཾ.

ཨེཝཾ ཝུཏྟལཀྑཎེསཱུཏི ཨབྷིདྷམྨཔརིཡཱཡེན སུཏྟནྟཔརིཡཱཡེན ཝུཏྟལཀྑཎེསུ. རུཀྑསམཱིཔནྟི ‘‘ཡཱཝཏཱ མཛ྄ཛྷནྷིཀེ ཀཱལེ སམནྟཱ ཚཱཡཱ ཕརཏི, ནིཝཱཏེ པཎྞཱནི པཏནྟི, ཨེཏྟཱཝཏཱ རུཀྑམཱུལནྟི ཝུཙྩཏཱི’’ཏི ཨེཝཾ ཝུཏྟཾ རུཀྑསྶ སམཱིཔཊྛཱནཾ. ཨཝསེསསཏྟཝིདྷསེནཱསནནྟི པབྦཏཾ ཀནྡརཾ གིརིགུཧཾ སུསཱནཾ ཝནཔྤཏྠཾ ཨབྦྷོཀཱསཾ པལཱལཔུཉྫནྟི ཨེཝཾ ཝུཏྟཾ. ཨུཏུཏྟཡཱནུཀཱུལཾ དྷཱཏུཙརིཡཱནུཀཱུལནྟི གིམྷཱདིཨུཏུཏྟཡསྶ སེམྷཱདིདྷཱཏུཏྟཡསྶ མོཧཱདིཙརིཏཏྟཡསྶ ¶ ཙ ཨནུཀཱུལཾ. ཏཐཱ ཧི གིམྷཀཱལེ ཨརཉྙཾ ཨནུཀཱུལཾ སོམྨསཱིཏལབྷཱཝཏོ, ཧེམནྟེ རུཀྑམཱུལཾ ཧིམཔཱཏནིཝཱརཎཏོ, ཝསྶཀཱལེ སུཉྙཱགཱརཾ ཝསྶནིཝཱརཎགེཧསམྦྷཝཏོ. སེམྷདྷཱཏུཀསྶ སེམྷཔཀཏིཀསྶ ཨརཉྙཾ ཨནུཀཱུལཾ དཱུརཾ གནྟྭཱ བྷིཀྑཱཙརཎེན སེམྷསྶ ཝཱུཔསམནཏོ, པིཏྟདྷཱཏུཀསྶ རུཀྑམཱུལཾ ཨནུཀཱུལཾ སཱིཏཝཱཏསམྥསྶསམྦྷཝཏོ ¶ , ཝཱཏདྷཱཏུཀསྶ སུཉྙཱགཱརཾ ཨནུཀཱུལཾ ཝཱཏནིཝཱརཎཏོ. མོཧཙརིཏསྶ ཨརཉྙཾ ཨནུཀཱུལཾ. མཧཱཨརཉྙེ ཧི ཙིཏྟཾ ན སངྐུཙཏི ཝིཝཊངྒཎབྷཱཝཏོ, དོསཙརིཏསྶ རུཀྑམཱུལཾ ཨནུཀཱུལཾ པསཱདནཱིཡབྷཱཝཏོ, རཱགཙརིཏསྶ སུཉྙཱགཱརཾ ཨནུཀཱུལཾ ཝིསབྷཱགཱརམྨཎཱནཾ པཝེསནིཝཱརཎཏོ. ཨལཱིནཱནུདྡྷཙྩཔཀྑིཀནྟི ཨསངྐོཙཱཝིཀྑེཔཔཀྑིཀཾ. སཡནཉྷི ཀོསཛྫཔཀྑིཀཾ, ཋཱནཙངྐམནཱནི ཨུདྡྷཙྩཔཀྑིཀཱནི, ན ཨེཝཾ ནིསཛྫཱ. ཏཏོ ཨེཝ ཏསྶཱ སནྟཏཱ. ནིསཛྫཱཡ དལ༹ྷབྷཱཝཾ པལླངྐཱབྷུཛནེན, ཨསྶཱསཔསྶཱསཱནཾ པཝཏྟནསུཁཏཾ ཨུཔརིམཀཱཡསྶ ཨུཛུཀཊྛཔནེན, ཨཱརམྨཎཔརིགྒཧཱུཔཱཡཾ པརིམུཁཾ སཏིཡཱ ཋཔནེན དསྶེནྟོ.

ཨཱུརུབདྡྷཱསནནྟི ཨཱུརཱུནམདྷོབནྡྷནཝསེན ནིསཛྫཱ. ཧེཊྛིམཀཱཡསྶ ཨནུཛུཀཾ ཋཔནཾ ནིསཛྫཱཝཙནེནེཝ བོདྷིཏནྟི. ཨུཛུཾ ཀཱཡནྟི ཨེཏྠ ཀཱཡ-སདྡོ ཨུཔརིམཀཱཡཝིསཡོཏི ཨཱཧ – ‘‘ཨུཔརིམཾ སརཱིརཾ ཨུཛུཀཾ ཋཔེཏྭཱ’’ཏི. ཏཾ པན ཨུཛུཀཊྛཔནཾ སརཱུཔཏོ པཡོཛནཏོ ཙ དསྶེཏུཾ ‘‘ཨཊྛཱརསཱ’’ཏིཨཱདི ཝུཏྟཾ. ན པཎམནྟཱིཏི ན ཨོཎམནྟི. ན པརིཔཏཏཱིཏི ན ཝིགཙྪཏི ཝཱིཐིཾ ན ཝིལངྒྷེཏི, ཏཏོ ཨེཝ པུབྦེནཱཔརཾ ཝིསེསུཔྤཏྟིཡཱ ཝུཌྜྷིཾ ཕཱཏིཾ ཨུཔགཙྪཏི. ཨིདྷ པརི-སདྡོ ཨབྷི-སདྡེན སམཱནཏྠོཏི ཨཱཧ ‘‘ཀམྨཊྛཱནཱབྷིམུཁ’’ནྟི, བཧིདྡྷཱ པུཐུཏྟཱརམྨཎཏོ ནིཝཱརེཏྭཱ ཀམྨཊྛཱནཾཡེཝ པུརཀྑཏྭཱཏི ཨཏྠོ. པརཱིཏི པརིགྒཧཊྛོ ‘‘པརིཎཱཡིཀཱ’’ཏིཨཱདཱིསུ (དྷ. ས. ༡༦, ༢༠) ཝིཡ. ནིཡྻཱནཊྛོ པཊིཔཀྑཏོ ནིགྒམནཊྛོ, ཏསྨཱ པརིགྒཧིཏནིཡྻཱནནྟི སབྦཐཱ གཧིཏཱསམྨོསཾ པརིཙྩཏྟསམྨོསཾ སཏིཾ ཀཏྭཱ, པརམཾ སཏིནེཔཀྐཾ ཨུཔཊྛཔེཏྭཱཏི ཨཏྠོ. སཏོཝཱཏི སཏིཡཱ སམནྣཱགཏོ ཨེཝ སརནྟོ ཨེཝ ཨསྶསཏི, ནཱསྶ ཀཱཙི སཏིཝིརཧིཏཱ ཨསྶཱསཔྤཝཏྟི ཧོཏཱིཏི ཨཏྠོ. སཏོ པསྶསཏཱིཏི ཨེཏྠཱཔི སཏོཝ པསྶསཏཱིཏི ཨེཝ-སདྡོ ཨཱནེཏྭཱ ཝཏྟབྦོ. སཏོཀཱརཱིཏི སཏོ ཨེཝ ཧུཏྭཱ སཏིཡཱ ཨེཝ ཝཱ ཀཱཏབྦསྶ ཀཏྟཱ, ཀརཎསཱིལོ ཝཱ.

བཱཏྟིཾསཱཡ ཨཱཀཱརེཧཱིཏི ཙཏཱུསུ ཙཏུཀྐེསུ ཨཱགཏཱནི དཱིགྷརསྶཱདཱིནི སོལ༹ས པདཱནི ཨསྶཱསཔསྶཱསཝསེན དྭིདྷཱ ཝིབྷཛིཏྭཱ ཝུཏྟེཧི དཱིགྷམསྶཱསཾ ཨཱདིཾ ཀཏྭཱ པཊིནིསྶགྒཱནུཔསྶིཔསྶཱསཔརིཡནྟེཧི བཱཏྟིཾསཱཀཱརེཧི. ཡདི ‘‘སཏོཝ ཨསྶསཏི, སཏོ པསྶསཏཱི’’ཏི ཨེཏསྶ ཝིབྷངྒེ ཝུཏྟཾ, ཨཐ ཀསྨཱ ‘‘ཨསྶསཏི ¶ པསྶསཏི’’ཙྩེཝ ཨཝཏྭཱ ‘‘སཏོཀཱརཱི’’ཏི ¶ ཝུཏྟཾ? ཨེཀརསཾ དེསནཾ ཀཱཏུཀཱམཏཱཡ. པཋམཙཏུཀྐེ པདདྭཡམེཝ ཧི ཝཏྟམཱནཀཱལཝསེན ཨཱགཏཾ, ཨིཏརཱནི ཨནཱགཏཀཱལཝསེན, ཏསྨཱ ཨེཀརསཾ དེསནཾ ཀཱཏུཀཱམཏཱཡ སབྦཏྠ ‘‘སཏོཀཱརི’’ཙྩེཝ ཝུཏྟཾ. དཱིགྷཾཨསྶཱསཝསེནཱཏི དཱིགྷཨསྶཱསཝསེན, ཝིབྷཏྟིཨལོཔཾ ཀཏྭཱ ནིདྡེསོ. དཱིགྷནྟི ཝཱ བྷགཝཏཱ ཝུཏྟཨསྶཱསཝསེན. ཙིཏྟསྶ ཨེཀགྒཏཾ ཨཝིཀྑེཔནྟི ཝིཀྑེཔསྶ པཊིཔཀྑབྷཱཝཏོ ཨཝིཀྑེཔོཏི ལདྡྷནཱམཾ ཙིཏྟསྶ ཨེཀགྒབྷཱཝཾ པཛཱནཏོ སཏི ཨུཔཊྛིཏཱ ཨཱརམྨཎཾ ཨུཔགནྟྭཱ ཋིཏཱ ཧོཏི. ཏཱཡ སཏིཡཱ ཏེན ཉཱཎེནཱཏི ཡཐཱཝུཏྟཱཡ སཏིཡཱ ཡཐཱཝུཏྟེན ཙ ཉཱཎེན. ཨིདཾ ཝུཏྟཾ ཧོཏི – དཱིགྷཾ ཨསྶཱསཾ ཨཱརམྨཎབྷཱུཏཾ ཨཝིཀྑིཏྟཙིཏྟསྶ ཨསམྨོཧཏོ ཝཱ སམྤཛཱནནྟསྶ ཏཏྠ སཏི ཨུཔཊྛིཏཱཝ ཧོཏི, ཏཾ སམྤཛཱནནྟསྶ ཨཱརམྨཎཀརཎཝསེན ཨསམྨོཧཝསེན ཝཱ སམྤཛཉྙཾ, ཏདདྷཱིནསཏིསམྤཛཉྙེན ཏཾསམངྒཱི ཡོགཱཝཙརོ སཏོཀཱརཱི ནཱམ ཧོཏཱིཏི. པཊིནིསྶགྒཱནུཔསྶཱི ཨསྶཱསཝསེནཱཏི པཊིནིསྶགྒཱནུཔསྶཱི ཧུཏྭཱ ཨསྶསནསྶ ཝསེན. ‘‘པཊིནིསྶགྒཱནུཔསྶིཨསྶཱསཝསེནཱ’’ཏི ཝཱ པཱཋོ, ཏསྶ པཊིནིསྶགྒཱནུཔསྶིནོ ཨསྶཱསཱ པཊིནིསྶགྒཱནུཔསྶིཨསྶཱསཱ, ཏེསཾ ཝསེནཱཏི ཨཏྠོ.

ཨནྟོ ཨུཊྛིཏསསནཾ ཨསྶཱསོ, བཧི ཨུཊྛིཏསསནཾ པསྶཱསོཏི ཨཱཧ – ‘‘ཨསྶཱསོཏི བཧིནིཀྑམནཝཱཏོ’’ཏིཨཱདི. སུཏྟནྟཊྛཀཐཱཡཾ པན བཧི ཨུཊྛཧིཏྭཱཔི ཨནྟོ སསནཏོ ཨསྶཱསོ, ཨནྟོ ཨུཊྛཧིཏྭཱཔི བཧི སསནཏོ པསྶཱསོཏི ཀཏྭཱ ཨུཔྤཊིཔཱཊིཡཱ ཝུཏྟཾ. ཨཐ ཝཱ མཱཏུཀུཙྪིཡཾ བཧི ནིཀྑམིཏུཾ ཨལདྡྷོཀཱསོ ནཱསིཀཱཝཱཏོ མཱཏུཀུཙྪིཏོ ནིཀྑནྟམཏྟེ པཋམཾ བཧི ནིཀྑམཏཱིཏི ཝིནཡཊྛཀཐཱཡཾ ཨུཔྤཏྟིཀྐམེན ‘‘ཨཱདིམྷི སཱསོ ཨསྶཱསོ’’ཏི བཧིནིཀྑམནཝཱཏོ ཝུཏྟོ. ཏེནེཝཱཧ ‘‘སབྦེསམྤི གབྦྷསེཡྻཀཱན’’ནྟིཨཱདི. སུཏྟནྟཊྛཀཐཱཡཾ པན པཝཏྟིཡཾ བྷཱཝནཱརམྦྷསམཡེ པཋམཾ ནཱསིཀཱཝཱཏསྶ ཨནྟོ ཨཱཀཌྜྷིཏྭཱ པཙྪཱ བཧི ཝིསྶཛྫནཏོ པཝཏྟིཀྐམེན ‘‘ཨཱདིམྷི སཱསོ ཨསྶཱསོ’’ཏི ཨནྟོཔཝིསནཝཱཏོ ཝུཏྟོ. སུཏྟནྟནཡོཡེཝ ཙེཏྠ ‘‘ཨསྶཱསཱདིམཛ྄ཛྷཔརིཡོསཱནཾ སཏིཡཱ ཨནུགཙྪཏོ ཨཛ྄ཛྷཏྟཾ ཝིཀྑེཔགཏེན ཙིཏྟེན ཀཱཡོཔི ཙིཏྟམྤི སཱརདྡྷཱ ཙ ཧོནྟི ཨིཉྫིཏཱ ཙ ཕནྡིཏཱ ཙ, པསྶཱསཱདིམཛ྄ཛྷཔརིཡོསཱནཾ སཏིཡཱ ཨནུགཙྪཏོ བཧིདྡྷཱ ¶ ཝིཀྑེཔགཏེན ཙིཏྟེན ཀཱཡོཔི ཙིཏྟམྤི སཱརདྡྷཱ ཙ ཧོནྟི ཨིཉྫིཏཱ ཙ ཕནྡིཏཱ ཙཱ’’ཏི (པཊི. མ. ༡.༡༥༧) ཨིམཱཡ པཱལི༹ཡཱ སམེཏི. ‘‘བྷཱཝནཱརམྦྷེ པཝཏྟིཀྐམསྶེཝ ཨིཙྪིཏཏྟཱ སུནྡརཏརོ’’ཏི ཝདནྟི. ཏཱལུཾ ཨཱཧཙྩ ནིབྦཱཡཏཱིཏི ཏཱལུཾ ཨཱཧཙྩ ནིརུཛ྄ཛྷཏི. ཏེན ཀིར སམྤཏིཛཱཏོ བཱལདཱརཀོ ཁིཔིཏཾ ཀརོཏི. ཨེཝཾ ཏཱཝཱཏིཨཱདི ཡཐཱཝུཏྟསྶ ཨཏྠསྶ ནིགམནཾ. ཀེཙི ‘‘ཨེཝཾ ཏཱཝཱཏི ཨནེན པཝཏྟིཀྐམེན ཨསྶཱསོ བཧིནིཀྑམནཝཱཏོཏི གཧེཏབྦནྟི ཨདྷིཔྤཱཡོ’’ཏི ཝདནྟི.

ཨདྡྷཱནཝསེནཱཏི ¶ ཀཱལདྡྷཱནཝསེན. ཨཡཉྷི ཨདྡྷཱན-སདྡོ ཀཱལསྶ དེསསྶ ཙ ཝཱཙཀོཏི. ཏཏྠ དེསདྡྷཱནཾ ཨུདཱཧརཎབྷཱཝེན དསྶེཏྭཱ ཀཱལདྡྷཱནསྶ ཝསེན ཨསྶཱསཔསྶཱསཱནཾ དཱིགྷརསྶཏཾ ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཏཏྠ ཨོཀཱསདྡྷཱནནྟི ཨོཀཱསབྷཱུཏཾ ཨདྡྷཱནཾ. ཕརིཏྭཱཏི བྱཱཔེཏྭཱ. ཙུཎྞཝིཙུཎྞཱཔི ཨནེཀཀལཱཔབྷཱཝེན, དཱིགྷམདྡྷཱནནྟི དཱིགྷཾ པདེསཾ. ཏསྨཱཏི སཎིཀཾ པཝཏྟིཡཱ དཱིགྷསནྟཱནཏཱཡ དཱིགྷཱཏི ཝུཙྩནྟི. ཨེཏྠ ཙ ཧཏྠིཨཱདིསརཱིརེ སུནཁཱདིསརཱིརེ ཙ ཨསྶཱསཔསྶཱསཱནཾ དེསདྡྷཱནཝིསིཊྛེན ཀཱལདྡྷཱནཝསེནེཝ དཱིགྷརསྶཏཱ ཝུཏྟཱཏི ཝེདིཏབྦཱ ‘‘སཎིཀཾ པཱུརེཏྭཱ སཎིཀམེཝ ནིཀྑམནྟི, སཱིགྷཾ པཱུརེཏྭཱ སཱིགྷམེཝ ནིཀྑམནྟཱི’’ཏི ཝཙནཏོ. མནུསྶེསཱུཏི སམཱནཔྤམཱཎེསུཔི མནུསྶསརཱིརེསུ. དཱིགྷཾ ཨསྶསནྟཱིཏི དཱིགྷཾ ཨསྶཱསཔྤབནྡྷཾ པཝཏྟེནྟཱིཏི ཨཏྠོ. པསྶསནྟཱིཏི ཨེཏྠཱཔི ཨེསེཝ ནཡོ. སུནཁསསཱདཡོ ཝིཡ རསྶཾ ཨསྶསནྟི པསྶསནྟི ཙཱཏི ཡོཛནཱ. ཨིདཾ པན དཱིགྷཾ རསྶཉྩ ཨསྶསནཾ པསྶསནཉྩ ཏེསཾ སཏྟཱནཾ སརཱིརསྶ སབྷཱཝོཏི དཊྛབྦཾ. ཏེསནྟི ཏེསཾ སཏྟཱནཾ. ཏེཏི ཨསྶཱསཔསྶཱསཱ. ཨིཏྟརམདྡྷཱནནྟི ཨཔྤཀཾ ཀཱལཾ. ནཝཧཱཀཱརེཧཱིཏི བྷཱཝནམནུཡུཉྫནྟསྶ པུབྦེནཱཔརཾ ཨལདྡྷཝིསེསསྶ ཀེཝལཾ ཨདྡྷཱནཝསེན ཨཱདིཏོ ཝུཏྟཱ ཏཡོ ཨཱཀཱརཱ, ཏེ ཙ ཁོ ཨེཀཙྩོ ཨསྶཱསཾ སུཊྛུ སལླཀྑེཏི, ཨེཀཙྩོ པསྶཱསཾ, ཨེཀཙྩོ ཏདུབྷཡནྟི ཨིམེསཾ ཏིཎྞཾ པུགྒལཱནཾ ཝསེན. ཀེཙི པན ‘‘ཨསྶསཏིཔི པསྶསཏིཔཱིཏི ཨེཀཛ྄ཛྷཾ ཝཙནཾ བྷཱཝནཱཡ ནིརནྟརཾ པཝཏྟིདསྶནཏྠ’’ནྟི ཝདནྟི. ཚནྡཝསེན པུབྦེ ཝིཡ ཏཡོ, ཏཐཱ པཱམོཛྫཝསེནཱཏི ཨིམེཧི ནཝཧི ཨཱཀཱརེཧི.

ཀཱམཉྩེཏྠ ཨེཀསྶ པུགྒལསྶ ཏཡོ ཨེཝ ཨཱཀཱརཱ ལབྦྷནྟི, ཏནྟིཝསེན པན སབྦེསཾ པཱལི༹ཨཱརུལ༹ྷཏྟཱ ཏེསཾ ཝསེན པརིཀམྨསྶ ཀཱཏབྦཏྟཱ ཙ ‘‘ཏཏྲཱཡཾ ¶ བྷིཀྑུ ནཝཧཱཀཱརེཧཱི’’ཏི ཝུཏྟཾ. ཨེཝཾ པཛཱནཏོཏི ཨེཝཾ ཡཐཱཝུཏྟེཧི ཨཱཀཱརེཧི ཨསྶཱསཔསྶཱསེ པཛཱནཏོ, ཏཏྠ མནསིཀཱརཾ པཝཏྟེནྟསྶ. ཨེཀེནཱཀཱརེནཱཏི དཱིགྷཾཨསྶཱསཱདཱིསུ ཙཏཱུསུ ཨཱཀཱརེསུ ཨེཀེན ཨཱཀཱརེན, ནཝསུ ཏཱིསུ ཝཱ ཨེཀེན. ཏཐཱ ཧི ཝཀྑཏི –

‘‘དཱིགྷོ རསྶོ ཙ ཨསྶཱསོ,

པསྶཱསོཔི ཙ ཏཱདིསོ;

ཙཏྟཱརོ ཝཎྞཱ ཝཏྟནྟི,

ནཱསིཀགྒེཝ བྷིཀྑུནོ’’ཏི. (པཱརཱ. ཨཊྛ. ༢.༡༦༥);

ཨཡཾ བྷཱཝནཱ ཨསྶཱསཔསྶཱསཀཱཡཱནུཔསྶནཱཏི ཀཏྭཱ ཝུཏྟཾ ‘‘ཀཱཡཱནུཔསྶནཱསཏིཔཊྛཱནབྷཱཝནཱ སམྤཛྫཏཱི’’ཏི.

ཨིདཱནི ¶ པཱལི༹ཝསེནེཝ ཏེ ནཝ ཨཱཀཱརེ བྷཱཝནཱཝིདྷིཉྩ དསྶེཏུཾ ‘‘ཡཐཱཧཱ’’ཏིཨཱདི ཨཱརདྡྷཾ. ཏཏྠ ‘‘ཀཐཾ པཛཱནཱཏཱི’’ཏི པཛཱནནཝིདྷིཾ ཀཐེཏུཀམྱཏཱཡ པུཙྪཏི. དཱིགྷཾ ཨསྶཱསནྟི ཝུཏྟལཀྑཎཾ དཱིགྷཾ ཨསྶཱསཾ. ཨདྡྷཱནསངྑཱཏེཏི ཨདྡྷཱནནྟི སངྑཾ གཏེ དཱིགྷེ ཀཱལེ, དཱིགྷཾ ཁཎནྟི ཨཏྠོ. ཀོཊྛཱསཔརིཡཱཡོ ཝཱ སངྑཱཏ-སདྡོ ‘‘ཐེཡྻསངྑཱཏ’’ནྟིཨཱདཱིསུ ཝིཡ, ཏསྨཱ ཨདྡྷཱནསངྑཱཏེཏི ཨདྡྷཱནཀོཊྛཱསེ དེསབྷཱགེཏི ཨཏྠོ. ཚནྡོ ཨུཔྤཛྫཏཱིཏི བྷཱཝནཱཡ པུབྦེནཱཔརཾ ཝིསེསཾ ཨཱཝཧནྟིཡཱ ལདྡྷསྶཱདཏྟཱ ཏཏྠ སཱཏིསཡོ ཀཏྟུཀཱམཏཱལཀྑཎོ ཀུསལཙྪནྡོ ཨུཔྤཛྫཏི. ཚནྡཝསེནཱཏི ཏཐཱཔཝཏྟཚནྡསྶ ཝསེན ཝིསེསབྷཱཝནམནུཡུཉྫནྟསྶ ཀམྨཊྛཱནཾ ཝུཌྜྷིཾ ཕཱཏིཾ གམེནྟསྶ. ཏཏོ སུཁུམཏརནྟི ཡཐཱཝུཏྟཚནྡཔྤཝཏྟིཡཱ པུརིམཀཏོ སུཁུམཏརཾ. བྷཱཝནཱབལེན ཧི པཊིཔྤསྶདྡྷདརཐཔརིལཱ༹ཧཏཱཡ ཀཱཡསྶ ཨསྶཱསཔསྶཱསཱ སུཁུམཏརཱ ཧུཏྭཱ པཝཏྟནྟི. པཱམོཛྫཾ ཨུཔྤཛྫཏཱིཏི ཨསྶཱསཔསྶཱསཱནཾ སུཁུམཏརབྷཱཝེན ཨཱརམྨཎསྶ སནྟཏརཏཱཡ ཀམྨཊྛཱནསྶ ཙ ཝཱིཐིཔྤཊིཔནྣཏཱཡ བྷཱཝནཱཙིཏྟསཧགཏོ པམོདོ ཁུདྡིཀཱདིབྷེདཱ ཏརུཎཔཱིཏི ཨུཔྤཛྫཏི. ཙིཏྟཾ ཝིཝཏྟཏཱིཏི ཨནུཀྐམེན ཨསྶཱསཔསྶཱསཱནཾ ཨཏིཝིཡ སུཁུམཏརབྷཱཝཔྤཏྟིཡཱ ཨནུཔཊྛཧནེ ཝིཙེཏབྦཱཀཱརཔྤཏྟེཧི ཏེཧི ¶ ཙིཏྟཾ ཝིནིཝཏྟཏཱིཏི ཀེཙི. བྷཱཝནཱབལེན པན སུཁུམཏརབྷཱཝཔྤཏྟེསུ ཨསྶཱསཔསྶཱསེསུ ཏཏྠ པཊིབྷཱགནིམིཏྟེ ཨུཔྤནྣེ པཀཏིཨསྶཱསཔསྶཱསཏོ ཙིཏྟཾ ནིཝཏྟཏི. ཨུཔེཀྑཱ སཎྛཱཏཱིཏི ཏསྨིཾ པཊིབྷཱགནིམིཏྟེ ཨུཔཙཱརཔྤནཱབྷེདེ སམཱདྷིམྷི ཨུཔྤནྣེ པུན ཛྷཱནནིབྦཏྟནཏྠཾ བྱཱཔཱརཱབྷཱཝཏོ ཨཛ྄ཛྷུཔེཀྑནཾ ཧོཏི, སཱ པནཱཡཾ ཨུཔེཀྑཱ ཏཏྲམཛ྄ཛྷཏྟུཔེཀྑཱཏི ཝེདིཏབྦཱ.

ཨིམེཧི ནཝཧི ཨཱཀཱརེཧཱིཏི ཨིམེཧི ཡཐཱཝུཏྟེཧི ནཝཧི པཀཱརེཧི པཝཏྟཱ. དཱིགྷཾ ཨསྶཱསཔསྶཱསཱ ཀཱཡོཏི དཱིགྷཱཀཱརཱ ཨསྶཱསཔསྶཱསཱ ཙུཎྞཝིཙུཎྞཱཔི སམཱུཧཊྛེན ཀཱཡོ. ཨསྶཱསཔསྶཱསེ ནིསྶཱཡ ཨུཔྤནྣནིམིཏྟམྤི ཨེཏྠ ཨསྶཱསཔསྶཱསསཱམཉྙཝསེན ཝུཏྟཾ. ཨུཔཊྛཱནཾ སཏཱིཏི ཏཾ ཨཱརམྨཎཾ ཨུཔགནྟྭཱ ཏིཊྛཏཱིཏི སཏི ཨུཔཊྛཱནཾ ནཱམ. ཨནུཔསྶནཱ ཉཱཎནྟི སམཐཝསེན ནིམིཏྟསྶ ཨནུཔསྶནཱ ཝིཔསྶནཱཝསེན ཨསྶཱསཔསྶཱསེ ཏནྣིསྶཡཉྩ ཀཱཡཾ ‘‘རཱུཔ’’ནྟི, ཙིཏྟཾ ཏཾསམྤཡུཏྟདྷམྨེ ཙ ‘‘ཨརཱུཔ’’ནྟི ཝཝཏྠཔེཏྭཱ ནཱམརཱུཔསྶ ཨནུཔསྶནཱ ཙ ཉཱཎཾ ཏཏྠ ཡཐཱབྷཱུཏཱཝབོདྷོ. ཀཱཡོ ཨུཔཊྛཱནནྟི སོ ཀཱཡོ ཨཱརམྨཎཀརཎཝསེན ཨུཔགནྟྭཱ སཏི ཨེཏྠ ཏིཊྛཏཱིཏི ཨུཔཊྛཱནཾ ནཱམ. ཨེཏྠ ཙ ‘‘ཀཱཡོ ཨུཔཊྛཱན’’ནྟི ཨིམིནཱ ཨིཏརཀཱཡསྶཔི སངྒཧོཏི ཏཐཱ ཝུཏྟཾ སམྨསནཙཱརསྶཔི ཨིདྷ ཨིཙྪིཏཏྟཱ. ནོ སཏཱིཏི སོ ཀཱཡོ སཏི ནཱམ ན ཧོཏི. སཏི ཨུཔཊྛཱནཉྩེཝ སཏི ཙ སརཎཊྛེན ཨུཔཊྛཱནཊྛེན ཙ. ཏཱཡ སཏིཡཱཏི ཡཐཱཝུཏྟཱཡ སཏིཡཱ. ཏེན ཉཱཎེནཱཏི ཡཐཱཝུཏྟེནེཝ ཉཱཎེན. ཏཾ ཀཱཡནྟི ཏཾ ཨསྶཱསཔསྶཱསཀཱཡཉྩེཝ ཏནྣིསྶཡརཱུཔཀཱཡཉྩ. ཨནུཔསྶཏཱིཏི ཛྷཱནསམྤཡུཏྟཉཱཎེན ཙེཝ ཝིཔསྶནཱཉཱཎེན ¶ ཙ ཨནུ ཨནུ པསྶཏི. ཏེན ཝུཙྩཏི ཀཱཡེ ཀཱཡཱནུཔསྶནཱ སཏིཔཊྛཱནབྷཱཝནཱཏི ཏེན ཨནུཔསྶནེན ཡཐཱཝུཏྟེ ཀཱཡེ ཨཡཾ ཀཱཡཱནུཔསྶནཱསཏིཔཊྛཱནབྷཱཝནཱཏི ཝུཙྩཏི. ཨིདཾ ཝུཏྟཾ ཧོཏི – ཡཱ ཨཡཾ ཡཐཱཝུཏྟེ ཨསྶཱསཔསྶཱསཀཱཡེ ཏསྶ ནིསྶཡབྷཱུཏེ ཀརཛཀཱཡེ ཙ ཀཱཡསྶེཝ ཨནུཔསྶནཱ ཨནུདཀབྷཱུཏཱཡ མརཱིཙིཡཱ ཨུདཀཱནུཔསྶནཱ ཝིཡ ན ཨནིཙྩཱདིསབྷཱཝེ ཀཱཡེ ནིཙྩཱདིབྷཱཝཱནུཔསྶནཱ, ཨཐ ཁོ ཡཐཱརཧཾ ཨནིཙྩདུཀྑཱནཏྟཱ སུབྷབྷཱཝསྶེཝ ཨནུཔསྶནཱ. ཨཐ ཝཱ ཀཱཡེ ‘‘ཨཧནྟི ཝཱ, མམནྟི ཝཱ, ཨིཏྠཱིཏི ཝཱ, པུརིསོ’’ཏི ཝཱ གཧེཏབྦསྶ ཀསྶཙི ཨབྷཱཝཏོ ཏཱདིསཾ ཨནནུཔསྶིཏྭཱ ¶ ཀཱཡམཏྟསྶེཝ ཨནུཔསྶནཱ ཀཱཡཱནུཔསྶནཱ, ཏཱཡ ཀཱཡཱནུཔསྶནཱཡ སམྤཡུཏྟཱ སཏིཡེཝ ཨུཔཊྛཱནཾ སཏིཔཊྛཱནཾ, ཏསྶ བྷཱཝནཱ ཝཌྜྷནཱ ཀཱཡཱནུཔསྶནཱ སཏིཔཊྛཱནབྷཱཝནཱཏི.

ཨེསེཝ ནཡོཏི ‘‘ནཝཧི ཨཱཀཱརེཧཱི’’ཏིཨཱདིནཱ ཝུཏྟཝིདྷིཾ རསྶ-པདེ ཨཏིདིསྶཏི. ཨེཏྠཱཏི ཨེཏསྨིཾ ཡཐཱདསྶིཏེ ‘‘ཀཐཾ དཱིགྷཾ ཨསྶསནྟོ’’ཏིཨཱདིནཱ ཨཱགཏེ པཱལི༹ནཡེ. ཨིདྷཱཏི ཨིམསྨིཾ རསྶཔདཝསེན ཨཱགཏེ པཱལི༹ནཡེ. ཨཡནྟི ཡོགཱཝཙརོ. ཨདྡྷཱནཝསེནཱཏི དཱིགྷཀཱལཝསེན. ཨིཏྟརཝསེནཱཏི པརིཏྟཀཱལཝསེན. ཨིམེཧི ཨཱཀཱརེཧཱིཏི ཨིམེཧི ནཝཧི ཨཱཀཱརེཧི.

ཏཱདིསོཏི དཱིགྷོ རསྶོ ཙ. ཙཏྟཱརོ ཝཎྞཱཏི ཙཏྟཱརོ ཨཱཀཱརཱ ཏེ ཙ དཱིགྷཱདཡོ ཨེཝ. ནཱསིཀགྒེཝ བྷིཀྑུནོཏི གཱཐཱསུཁཏྠཾ རསྶཾ ཀཏྭཱ ཝུཏྟཾ. ནཱསིཀགྒེ ཝཱཏི ཝཱ-སདྡོ ཨནིཡམཏྠོ, ཏེན ཨུཏྟརོཊྛཾ སངྒཎྷཱཏི.

སབྦཀཱཡཔྤཊིསཾཝེདཱིཏི སབྦསྶ ཀཱཡསྶ པཊི པཊི པཙྩེཀཾ སམྨདེཝ ཝེདནསཱིལོ ཛཱནནསཱིལོ, ཏསྶ ཝཱ པཊི པཊི སམྨདེཝ ཝེདོ ཨེཏསྶ ཨཏྠི, ཏཾ ཝཱ པཊི པཊི སམྨདེཝ ཝེདམཱནོཏི ཨཏྠོ. ཏཏྠ ཏཏྠ སབྦ-གྒཧཎེན ཨསྶཱསཱདིཀཱཡསྶ ཨནཝསེསཔརིཡཱདཱནེ སིདྡྷེཔི ཨནེཀཀལཱཔསམུདཱཡབྷཱཝཏོ ཏསྶ སབྦེསམྤི བྷཱགཱནཾ སཾཝེདནདསྶནཏྠཾ པཊི-སདྡགྒཧཎཾ, ཏཏྠ སཀྐཙྩཀཱརིབྷཱཝདསྶནཏྠཾ སཾ-སདྡགྒཧཎནྟི ཨིམམཏྠཾ དསྶེནྟོ ‘‘སཀལསྶཱ’’ཏིཨཱདིམཱཧ. ཏཏྠ ཡཐཱ སམཱནེསུཔི ཨསྶཱསཔསྶཱསེསུ ཡོགིནོ པཊིཔཏྟིཝིདྷཱནེ པཙྩེཀཾ སཀྐཙྩཾཡེཝ པཊིཔཛྫིཏབྦནྟི དསྶེཏུཾ ཝིསུཾ དེསནཱ ཀཏཱ, ཨེཝཾ ཏམེཝཏྠཾ དཱིཔེཏུཾ སཏིཔི ཨཏྠསྶ སམཱནཏཱཡ ‘‘སཀལསྶཱ’’ཏིཨཱདིནཱ པདདྭཡསྶ ཝིསུཾ ཝིསུཾ ཨཏྠཝཎྞནཱ ཀཏཱཏི ཝེདིཏབྦཱ. པཱཀཊཾ ཀརོནྟོཏི ཝིབྷཱུཏཾ ཀརོནྟོ, སབྦསོ ཝིབྷཱཝེནྟོཏི ཨཏྠོ. པཱཀཊཱིཀརཎཾ ཝིབྷཱཝནཾ ཏཏྠ ཨསམྨུཡ྄ཧནཉཱཎེནེཝ ནེསཾ པཝཏྟནེན ཧོཏཱིཏི དསྶེནྟོ ‘‘ཨེཝཾ ཝིདིཏཾ ཀརོནྟོ’’ཏིཨཱདིམཱཧ ¶ . ཏཏྠ ཏསྨཱཏི ཡསྨཱ ཉཱཎསམྤཡུཏྟཙིཏྟེནེཝ ཨསྶཱསཔསྶཱསེ པཝཏྟེཏི, ན ཝིཔྤཡུཏྟཙིཏྟེན, ཏསྨཱ ཨེཝཾབྷཱུཏོ སབྦཀཱཡཔྤཊིསཾཝེདཱི ཨསྶསིསྶཱམི པསྶསིསྶཱམཱིཏི སིཀྑཏཱིཏི ཝུཙྩཏི བུདྡྷཱདཱིཧཱིཏི ཡོཛནཱ. ཙུཎྞཝིཙུཎྞཝིསཊེཏི ཨནེཀཀལཱཔཏཱཡ ཙུཎྞཝིཙུཎྞབྷཱཝེན ཝིསཊེ. ཨཱདི པཱཀཊོ ¶ ཧོཏི སཏིཡཱ ཉཱཎསྶ ཙ ཝསེན ཀཏཔུབྦཱབྷིསངྑཱརསྶ པཝཏྟཏྟཱ. ཏཱདིསེན བྷཝིཏབྦནྟི ཙཏུཏྠཔུགྒལསདིསེན བྷཝིཏབྦཾ, པགེཝ སཏིཾ ཉཱཎཉྩ པཙྩུཔཊྛཔེཏྭཱ ཏཱིསུཔི ཋཱནེསུ ཉཱཎསམྤཡུཏྟམེཝ ཙིཏྟཾ པཝཏྟེཏབྦནྟི ཨདྷིཔྤཱཡོ.

ཨེཝནྟི ཝུཏྟཔྤཀཱརེན སབྦཀཱཡཔྤཊིསཾཝེདནཝསེནེཝ. གྷཊཏཱིཏི ཨུསྶཧཏི. ཝཱཡམཏཱིཏི ཝཱཡཱམཾ ཀརོཏི, མནསིཀཱརཾ པཝཏྟེཏཱིཏི ཨཏྠོ. ཏཐཱབྷཱུཏསྶཱཏི ཨཱནཱཔཱནསྶཏིཾ བྷཱཝེནྟསྶ. སཾཝརོཏི སཏི ཝཱིརིཡམྤི ཝཱ. ཏཱཡ སཏིཡཱཏི ཡཱ སཱ ཨཱནཱཔཱནེ ཨཱརབྦྷ པཝཏྟཱ སཏི, ཏཱཡ. ཏེན མནསིཀཱརེནཱཏི ཡོ སོ ཏཏྠ སཏིཔུབྦངྒམོ བྷཱཝནཱམནསིཀཱརོ, ཏེན སདྡྷིནྟི ཨདྷིཔྤཱཡོ. ཨཱསེཝཏཱིཏི ‘‘ཏིསྶོ སིཀྑཱཡོ’’ཏི ཝུཏྟེ ཨདྷིཀུསལདྷམྨེ ཨཱསེཝཏི. ཏདཱསེཝནཉྷེཏྠ སིཀྑནནྟི ཨདྷིཔྤེཏཾ. པུརིམནཡེཏི པུརིམསྨིཾ བྷཱཝནཱནཡེ, པཋམཝཏྠུདྭཡེཏི ཨདྷིཔྤཱཡོ. ཏཏྠཱཔི ཀཱམཾ ཉཱཎུཔྤཱདནཾ ལབྦྷཏེཝ ཨསྶཱསཔསྶཱསཱནཾ ཡཱཐཱཝཏོ དཱིགྷརསྶབྷཱཝཱཝབོདྷསབྦྷཱཝཏོ, ཏཐཱཔི ཏཾ ན དུཀྐརཾ ཡཐཱཔཝཏྟཱནཾ ཏེསཾ གཧཎམཏྟབྷཱཝཏོཏི ཏཏྠ ཝཏྟམཱནཀཱལཔྤཡོགོ ཀཏོ. ཨིདཾ པན དུཀྐརཾ པུརིསསྶ ཁུརདྷཱརཱཡཾ གམནསདིསཾ, ཏསྨཱ སཱཏིསཡེནེཏྠ པུབྦཱབྷིསངྑཱརེན བྷཝིཏབྦནྟི དཱིཔེཏུཾ ཨནཱགཏཀཱལཔྤཡོགོ ཀཏོཏི ཨིམམཏྠཾ དསྶེཏུཾ ‘‘ཏཏྠ ཡསྨཱ’’ཏིཨཱདི ཝུཏྟཾ. ཏཏྠ ཉཱཎུཔྤཱདནཱདཱིསཱུཏི ཨཱདི-སདྡེན ཀཱཡསངྑཱརཔསྶམྦྷནཔཱིཏིཔཊིསཾཝེདནཱདིཾ སངྒཎྷཱཏི. ཀེཙི པནེཏྠ ‘‘སཾཝརསམཱདཱནཱནཾ སངྒཧོ’’ཏི ཝདནྟི.

ཀཱཡསངྑཱརནྟི ཨསྶཱསཔསྶཱསཾ. སོ ཧི ཙིཏྟསམུཊྛཱནོཔི སམཱནོ ཀརཛཀཱཡཔཊིབདྡྷཝུཏྟིཏཱཡ ཏེན སངྑརཱིཡཏཱིཏི ཀཱཡསངྑཱརོཏི ཝུཙྩཏི. ཡོ པན ‘‘ཀཱཡསངྑཱརོ ཝཙཱིསངྑཱརོ’’ཏི (མ. ནི. ༡.༡༠༢) ཨེཝམཱགཏོ ཀཱཡསངྑཱརོ ཙེཏནཱལཀྑཎོ སཏིཔི དྭཱརནྟརུཔྤཏྟིཡཾ ཡེབྷུཡྻཝུཏྟིཡཱ ཏབྦཧུལཝུཏྟིཡཱ ཙ ཀཱཡདྭཱརེན ལཀྑིཏོ, སོ ཨིདྷ ནཱདྷིཔྤེཏོ. པསྶམྦྷེནྟོཏིཨཱདཱིསུ པཙྪིམཾ པཙྪིམཾ པདཾ པུརིམསྶ པུརིམསྶ ཨཏྠཝཙནཾ. ཏསྨཱ པསྶམྦྷནཾ ནཱམ ཝཱུཔསམནཾ, ཏཉྩ ཏཐཱཔཡོགེ ཨསཏི ཨུཔྤཛྫནཱརཧསྶ ཨོལཱ༹རིཀསྶ ཀཱཡསངྑཱརསྶ པཡོགསམྤཏྟིཡཱ ཨནུཔྤཱདནནྟི དཊྛབྦཾ ¶ . ཏཏྲཱཏི ‘‘ཨོལཱ༹རིཀཾ ཀཱཡསངྑཱརཾ པསྶམྦྷེནྟོ’’ཏི ཨེཏྠ. ཨཔརིགྒཧིཏཀཱལེཏི ཀམྨཊྛཱནསྶ ཨནཱརདྡྷཀཱལེ, ཏཏོ ཨེཝ ཀཱཡཙིཏྟཱནམྤི ཨཔརིགྒཧིཏཀཱལེ. ‘‘ནིསཱིདཏི པལླངྐཾ ཨཱབྷུཛིཏྭཱ ཨུཛུཾ ཀཱཡཾ པཎིདྷཱཡཱ’’ཏི ཧི ཨིམིནཱ ཀཱཡཔརིགྒཧོ ¶ , ‘‘པརིམུཁཾ སཏིཾ ཨུཔཊྛཔེཏྭཱ’’ཏི ཨིམིནཱ ཙིཏྟཔརིགྒཧོ ཝུཏྟོ. ཏེནེཝཱཧ – ‘‘ཀཱཡོཔི ཙིཏྟམྤི པརིགྒཧིཏཱ ཧོནྟཱི’’ཏི. ཀཱཡོཏི ཀརཛཀཱཡོ. སདརཐཱཏི སཔརིལཱ༹ཧཱ. སཱ ཙ ནེསཾ སདརཐཏཱ གརུབྷཱཝེན ཝིཡ ཨོལཱ༹རིཀཏཱཡ ཨཝིནཱབྷཱཝིནཱིཏི ཨཱཧ ‘‘ཨོལཱ༹རིཀཱ’’ཏི. བལཝཏརཱཏི སབལཱ ཐཱུལཱ. སནྟཱ ཧོནྟཱིཏི ཙིཏྟཾ ཏཱཝ བཧིདྡྷཱ ཝིཀྑེཔཱབྷཱཝེན ཨེཀགྒཾ ཧུཏྭཱ ཀམྨཊྛཱནཾ པརིགྒཧེཏྭཱ པཝཏྟམཱནཾ སནྟཾ ཧོཏི ཝཱུཔསནྟཾ, ཏཏོ ཨེཝ ཏཾསམུཊྛཱནཱ རཱུཔདྷམྨཱ ལཧུམུདུཀམྨཉྙབྷཱཝཔྤཏྟཱ, ཏདནུགུཎཏཱཡ སེསཾ ཏིསནྟཏིརཱུཔནྟི ཨེཝཾ ཙིཏྟེ ཀཱཡེ ཙ ཝཱུཔསནྟེ པཝཏྟམཱནེ ཏནྣིསྶིཏཱ ཨསྶཱསཔསྶཱསཱ སནྟསབྷཱཝཱ ཨནུཀྐམེན སུཁུམསུཁུམཏརསུཁུམཏམཱ ཧུཏྭཱ པཝཏྟནྟི. ཏེན ཝུཏྟཾ ‘‘ཡདཱ པནསྶ ཀཱཡོཔཱི’’ཏིཨཱདི. པསྶམྦྷེམཱིཏི པཋམཱཝཛྫནཱ. ཨཱབྷུཛནཾ ཨཱབྷོགོ, སམྨཱ ཨནུ ཨནུ ཨཱཧརཎཾ སམནྣཱཧཱརོ, ཏསྨིཾཡེཝ ཨཏྠེ ཨཔརཱཔརཾ པཝཏྟཨཱཝཛྫནཱ ཏསྶེཝ ཨཏྠསྶ མནསིཀརཎཾ ཙིཏྟེ ཋཔནཾ མནསིཀཱརོ, ཝཱིམཾསཱ པཙྩཝེཀྑཎཱ.

སཱརདྡྷེཏི སདརཐེ སཔརིལཱ༹ཧེ. ཨདྷིམཏྟནྟི བལཝཾ ཨོལཱ༹རིཀཾ, ལིངྒཝིཔལླཱསེན ཝུཏྟཾ. ཀཱཡསངྑཱརོ ཧི ཨདྷིཔྤེཏོ. ‘‘ཨདྷིམཏྟཾ ཧུཏྭཱ པཝཏྟཏཱི’’ཏི ཀིརིཡཱཝིསེསནཾ ཝཱ ཨེཏཾ. སུཁུམནྟི ཨེཏྠཱཔི ཨེསེཝ ནཡོ. ཀཱཡམྷཱིཏི ཨེཏྠ ཙིཏྟེ ཙཱཏི ཨཱནེཏྭཱ སམྦནྡྷིཏབྦཾ.

པཋམཛ྄ཛྷཱནཏོ ཝུཊྛཱཡ ཀརིཡམཱནཾ དུཏིཡཛ྄ཛྷཱནསྶ ནཱནཱཝཛྫནཾ པརིཀམྨཾ པཋམཛ྄ཛྷཱནཾ ཝིཡ དཱུརསམུསྶཱརིཏཔཊིཔཀྑནྟི ཀཏྭཱ ཏཾསམུཊྛཱནོ ཀཱཡསངྑཱརོ པཋམཛ྄ཛྷཱནེ ཙ དུཏིཡཛ྄ཛྷཱནཱུཔཙཱརེ ཙ ཨོལཱ༹རིཀོཏི སདིསོ ཝུཏྟོ. ཨེས ནཡོ སེསུཔཙཱརདྭཡེཔི. ཨཐ ཝཱ དུཏིཡཛ྄ཛྷཱནཱདཱིནཾ ཨདྷིགམཱཡ པཊིཔཛྫཏོ དུཀྑཱཔཊིཔདཱདིཝསེན ཀིལམཏོ ཡོགིནོ ཀཱཡཀིལམཐཙིཏྟུཔགྷཱཏཱདིཝསེན ཝིཏཀྐཱདིསངྑོབྷེན སཔརིཔྥནྡཏཱཡ ཙ ཙིཏྟཔྤཝཏྟིཡཱ དུཏིཡཛ྄ཛྷཱནཱདིཨུཔཙཱརེསུ ཀཱཡསངྑཱརསྶ ཨོལཱ༹རིཀཏཱ ཝེདིཏབྦཱ. ཨཏིསུཁུམོཏི ཨཉྙཏྠ ལབྦྷམཱནོ ཀཱཡསངྑཱརོ ཙཏུཏྠཛ྄ཛྷཱནེ ¶ ཨཏིཀྐནྟསུཁུམོ. སུཁུམབྷཱཝོཔིསྶ ཏཏྠ ནཏྠི ཀུཏོ ཨོལཱ༹རིཀཏཱ ཨཔྤཝཏྟནཏོ. ཏེནཱཧ ‘‘ཨཔྤཝཏྟིམེཝ པཱཔུཎཱཏཱི’’ཏི.

ལཱབྷིསྶ སཏོ ཨནུཔུབྦསམཱཔཏྟིསམཱཔཛྫནཝེལཾ ཨེཀཱསནེནེཝ ཝཱ སབྦེསཾ ཛྷཱནཱནཾ པཊིལཱབྷཾ སནྡྷཱཡ མཛ྄ཛྷིམབྷཱཎཀཱ ཧེཊྛིམཧེཊྛིམཛ྄ཛྷཱནཏོ ཨུཔརཱུཔརིཛྷཱནཱུཔཙཱརེཔི སུཁུམཏརཾ ཨིཙྪནྟི. ཏཏྠ ཧི སོཔཙཱརཱནཾ ཛྷཱནཱནཾ ཨུཔརཱུཔརི ཝིསེསཝནྟཏཱ སནྟཏཱ ཙ སམྦྷཝེཡྻ, ཨེཀཱཝཛྫནཱུཔཙཱརཾ ཝཱ སནྡྷཱཡ ཨེཝཾ ཝུཏྟཾ. ཨེཝཉྷི ཧེཊྛཱ ཝུཏྟཝཱདེན ཨིམསྶ ཝཱདསྶ ཨཝིརོདྷོ སིདྡྷོ བྷིནྣཝིསཡཏྟཱ. སབྦེསཾཡེཝཱཏི ཨུབྷཡེསམྤི. ཡསྨཱ ཏེ སབྦེཔི ཝུཙྩམཱནེན ཝིདྷིནཱ པསྶདྡྷིམིཙྪནྟིཡེཝ ¶ . ཨཔརིགྒཧིཏཀཱལེ པཝཏྟཀཱཡསངྑཱརོ པརིགྒཧིཏཀཱལེ པཊིཔྤསྶམྦྷཏཱིཏི ཨིདཾ སདིསསནྟཱནཏཱཡ ཝུཏྟཾ. ན ཧི ཏེ ཨེཝ ཨོལཱ༹རིཀཱ ཨསྶཱསཱདཡོ སུཁུམཱ ཧོནྟི. པསྶམྦྷནཱཀཱརོ པན ཏེསཾ ཧེཊྛཱ ཝུཏྟོཡེཝ.

མཧཱབྷཱུཏཔརིགྒཧེ སུཁུམོཏི ཙཏུདྷཱཏུམུཁེན ཝིཔསྶནཱབྷིནིཝེསཾ སནྡྷཱཡ ཝུཏྟཾ. སཀལརཱུཔཔརིགྒཧེ སུཁུམོ བྷཱཝནཱཡ ཨུཔརཱུཔརི པཎཱིཏབྷཱཝཏོ. ཏེནེཝཱཧ ‘‘རཱུཔཱརཱུཔཔརིགྒཧེ སུཁུམོ’’ཏི. ལཀྑཎཱརམྨཎིཀཝིཔསྶནཱཡཱཏི ཀལཱཔསམྨསནམཱཧ. ནིབྦིདཱནུཔསྶནཱཏོ པཊྛཱཡ བལཝཝིཔསྶནཱ, ཏཏོ ཨོརཾ དུབྦལཝིཔསྶནཱ. པུབྦེ ཝུཏྟནཡེནཱཏི ‘‘ཨཔརིགྒཧིཏཀཱལེ’’ཏིཨཱདིནཱ སམཐནཡེ ཝུཏྟནཡེན. ‘‘ཨཔརིགྒཧེ པཝཏྟོ ཀཱཡསངྑཱརོ མཧཱབྷཱུཏཔརིགྒཧེ པཊིཔྤསྶམྦྷཏཱི’’ཏིཨཱདིནཱ ཝིཔསྶནཱནཡེཔི པཊིཔྤསྶདྡྷི ཡོཛེཏབྦཱཏི ཝུཏྟཾ ཧོཏི.

ཨསྶཱཏི ཨིམསྶ ‘‘པསྶམྦྷཡཾ ཀཱཡསངྑཱར’’ནྟི པདསྶ. ཙོདནཱསོདྷནཱཧཱིཏི ཨནུཡོགཔརིཧཱརེཧི. ཨེཝནྟི ཨིདཱནི ཝུཙྩམཱནཱཀཱརེན. ཀཐནྟི ཡཾ ཨིདཾ ‘‘པསྶམྦྷཡཾ…པེ… སིཀྑཏཱི’’ཏི ཝུཏྟཾ, ཏཾ ཀཐཾ ཀེན པཀཱརེན ཀཱཡསངྑཱརསྶ པསྶམྦྷནཾ ཡོགིནོ ཙ སིཀྑནཾ ཧོཏཱིཏི ཀཐེཏུཀཱམཏཱཡ པུཙྪིཏྭཱ ཀཱཡསངྑཱརེ སརཱུཔཏོ ཨོལཱ༹རིཀསུཁུམཏོ ཝཱུཔསམཏོ ཨནུཡོགཔརིཧཱརཏོ ཙ དསྶེཏུཾ ‘‘ཀཏམེ ཀཱཡསངྑཱརཱ’’ཏིཨཱདི ཨཱརདྡྷཾ. ཏཏྠ ཀཱཡིཀཱཏི རཱུཔཀཱཡེ བྷཝཱ. ཀཱཡཔྤཊིབདྡྷཱཏི ཀཱཡསནྣིསྶིཏཱ. ཀཱཡེ སཏི ཧོནྟི, ཨསཏི ན ཧོནྟི, ཏཏོ ཨེཝ ཏེ ཨཀཱཡསམུཊྛཱནཱཔི ཀཱཡེན སངྑརཱིཡནྟཱིཏི ཀཱཡསངྑཱརཱ. པསྶམྦྷེནྟོཏི ཨོལཱ༹རིཀོལཱ༹རིཀཾ པསྶམྦྷེནྟོ.

སེསཔདདྭཡཾ ¶ ཏསྶེཝ ཝེཝཙནཾ. ཨོལཱ༹རིཀཉྷི ཀཱཡསངྑཱརཾ ཨཝཱུཔསནྟསབྷཱཝཾ སནྣིསཱིདཱཔེནྟོ ‘‘པསྶམྦྷེནྟོ’’ཏི ཝུཙྩཏི, ཨནུཔྤཱདནིརོདྷཾ པཱཔེནྟོ ‘‘ནིརོདྷེནྟོ’’ཏི, སུཊྛུ སནྟསབྷཱཝཾ ནཡནྟོ ‘‘ཝཱུཔསམེནྟོ’’ཏི.

ཡཐཱརཱུཔེཧཱིཏི ཡཱདིསེཧི. ཀཱཡསངྑཱརེཧཱིཏི ཨོལཱ༹རིཀེཧི ཀཱཡསངྑཱརེཧི. ཨཱནམནཱཏི ཨབྷིམུཁེན ཀཱཡསྶ ནམནཱ. ཝིནམནཱཏི ཝིསུཾ ཝིསུཾ པསྶཏོ ནམནཱ. སནྣམནཱཏི སབྦཏོ, སུཊྛུ ཝཱ ནམནཱ. པཎམནཱཏི པཙྪཏོ ནམནཱ. ཨིཉྫནཱདཱིནི ཨཱནམནཱདཱིནཾ ཝེཝཙནཱནི, ཨདྷིམཏྟཱནི ཝཱ ཨབྷིམུཁཙལནཱདཱིནི ཨཱནམནཱདཡོ, མནྡཱནི ཨིཉྫནཱདཡོ. པསྶམྦྷཡཾ ཀཱཡསངྑཱརནྟི ¶ ཏཐཱརཱུཔཾ ཨཱནམནཱདཱིནཾ ཀཱརཎབྷཱུཏཾ ཨོལཱ༹རིཀཾ ཀཱཡསངྑཱརཾ པཊིཔྤསྶམྦྷེནྟོ. ཏསྨིཉྷི པསྶམྦྷིཏེ ཨཱནམནཱདཡོཔི པསྶམྦྷིཏཱ ཨེཝ ཧོནྟི.

སནྟཾ སུཁུམནྟི ཡཐཱརཱུཔེཧི ཀཱཡསངྑཱརེཧི ཀཱཡསྶ ཨཔརིཔྥནྡནཧེཏཱུཧི ཨཱནམནཱདཡོ ན ཧོནྟི, ཏཐཱརཱུཔཾ དརཐཱབྷཱཝཏོ སནྟཾ, ཨནོལཱ༹རིཀཏཱཡ སུཁུམཾ. པསྶམྦྷཡཾ ཀཱཡསངྑཱརནྟི སཱམཉྙཏོ ཨེཀཾ ཀཏྭཱ ཝདཏི. ཨཐ ཝཱ པུབྦེ ཨོལཱ༹རིཀོལཱ༹རིཀཾ ཀཱཡསངྑཱརཾ པཊིཔྤསྶམྦྷེནྟོ ཨནུཀྐམེན ཀཱཡསྶ ཨཔརིཔྥནྡནཧེཏུབྷཱུཏེ སུཁུམསུཁུམཏརེ ཨུཔྤཱདེཏྭཱ ཏེཔི པཊིཔྤསྶམྦྷེཏྭཱ པརམསུཁུམཏཱཡ ཀོཊིཔྤཏྟཾ ཡཾ ཀཱཡསངྑཱརཾ པཊིཔྤསྶམྦྷེཏི, ཏཾ སནྡྷཱཡ ཝུཏྟཾ ‘‘སནྟཾ སུཁུམཾ པསྶམྦྷཡཾ ཀཱཡསངྑཱར’’ནྟི.

ཨིཏཱིཏིཨཱདི ཙོདཀཝཙནཾ. ཏཏྠ ཨིཏཱིཏི པཀཱརཏྠེ ནིཔཱཏོ, ཀིརཱཏི ཨརུཙིསཱུཙནེ, ཨེཝཉྩེཏི ཨཏྠོ. ཨཡཉྷེཏྠ ཨདྷིཔྤཱཡོ ‘‘ཝུཏྟཔྤཀཱརེན ཡདི ཨཏིསུཁུམམྤི ཀཱཡསངྑཱརཾ པསྶམྦྷེཏཱི’’ཏི. ཨེཝཾ སནྟེཏི ཨེཝཾ སཏི ཏཡཱ ཝུཏྟཱཀཱརེ ལབྦྷམཱནེ. ཝཱཏཱུཔལདྡྷིཡཱཏི ཝཱཏསྶ ཨུཔལདྡྷིཡཱ. ཙ-སདྡོ སམུཙྩཡཏྠོ, ཨསྶཱསཱདིཝཱཏཱརམྨཎསྶ ཙིཏྟསྶ པབྷཱཝནཱ ཨུཔྤཱདནཱ པཝཏྟནཱ ན ཧོཏི, ཏེ ཙ ཏེན པསྶམྦྷེཏབྦཱཏི ཨདྷིཔྤཱཡོ. ཨསྶཱསཔསྶཱསཱནཉྩ པབྷཱཝནཱཏི ཨོལཱ༹རིཀེ ཨསྶཱསཔསྶཱསེ བྷཱཝནཱཡ པཊིཔྤསྶམྦྷེཏྭཱ སུཁུམཱནཾ ཏེསཾ པབྷཱཝནཱ ཙ ན ཧོཏི ཨུབྷཡེསཾ ཏེསཾ ཏེན པཊིཔྤསྶམྦྷེཏབྦཏོ. ཨཱནཱཔཱནསྶཏིཡཱཏི ཨཱནཱཔཱནཱརམྨཎཱཡ སཏིཡཱ ཙ པཝཏྟནཾ ན ཧོཏི ཨཱནཱཔཱནཱནཾ ¶ ཨབྷཱཝཏོ. ཏཏོ ཨེཝ ཏཾསམྤཡུཏྟསྶ ཨཱནཱཔཱནསྶཏིསམཱདྷིསྶ ཙ པབྷཱཝནཱ ཨུཔྤཱདནཱཔི ན ཧོཏི. ན ཧི ཀདཱཙི ཨཱརམྨཎེན ཝིནཱ སཱརམྨཎཱ དྷམྨཱ སམྦྷཝནྟི. ན ཙ ནཾ ཏནྟི ཨེཏྠ ནནྟི ནིཔཱཏམཏྟཾ. ཏཾ ཝུཏྟཝིདྷཱནཾ སམཱཔཏྟིཾ པཎྜིཏཱ པཉྙཝནྟོ ན ཙེཝ སམཱཔཛྫནྟིཔི ཏཏོ ན ཝུཊྛཧནྟིཔཱིཏི ཡོཛནཱ. ཨེཝཾ ཙོདཀོ སབྦེན སབྦཾ ཨབྷཱཝཱུཔནཡནཾ པསྶམྦྷནནྟི ཨདྷིཔྤཱཡེན ཙོདེཏི.

པུན ཨིཏི ཀིརཱཏིཨཱདི ཡཐཱཝུཏྟཱཡ ཙོདནཱཡ ཝིསྶཛྫནཱ. ཏཏྠ ཀིརཱཏི ཡདཱིཏི ཨེཏསྶ ཨཏྠེ ནིཔཱཏོ. ཨིཏི ཀིར སིཀྑཏི, མཡཱ ཝུཏྟཱཀཱརེན ཡདི སིཀྑཏཱིཏི ཨཏྠོ. ཨེཝཾ སནྟེཏི ཨེཝཾ པསྶམྦྷནེ སཏི. པབྷཱཝནཱ ཧོཏཱིཏི ཡདིཔི ཨོལཱ༹རིཀཱ ཀཱཡསངྑཱརཱ པཊིཔྤསྶམྦྷནྟི, སུཁུམཱ པན ཨཏྠེཝཱཏི ཨནུཀྐམེན པརམསུཁུམབྷཱཝཔྤཏྟསྶ ཝསེན ནིམིཏྟུཔྤཏྟིཡཱ ཨཱནཱཔཱནསྶཏིཡཱ ཨཱནཱཔཱནསྶཏིསམཱདྷིསྶ ཙ པབྷཱཝནཱ ཨིཛ྄ཛྷཏེཝཱཏི ཨདྷིཔྤཱཡོ.

ཡཐཱ ¶ ཀཐཾ ཝིཡཱཏི ཡཐཱཝུཏྟཝིདྷཱནཾ ཏཾ ཀཐཾ ཝིཡ དཊྛབྦཾ, ཨཏྠི ཀིཉྩི ཏདཏྠསམྤཊིཔཱདནེ ཨོཔམྨནྟི ཨདྷིཔྤཱཡོ. ཨིདཱནི ཨོཔམྨཾ དསྶེཏུཾ ‘‘སེཡྻཐཱཔཱི’’ཏིཨཱདི ཝུཏྟཾ. ཏཏྠ སེཡྻཐཱཔཱིཏི ཨོཔམྨཏྠེ ནིཔཱཏོ. ཀཾསེཏི ཀཾསབྷཱཛནེ. ནིམིཏྟནྟི ནིམིཏྟསྶ, ཏེསཾ སདྡཱནཾ པཝཏྟཱཀཱརསྶཱཏི ཨཏྠོ. སཱམིཨཏྠེ ཧི ཨིདཾ ཨུཔཡོགཝཙནཾ. སུགྒཧིཏཏྟཱཏི སུཊྛུ གཧིཏཏྟཱ. སུམནསིཀཏཏྟཱཏི སུཊྛུ ཙིཏྟེ ཋཔིཏཏྟཱ. སཱུཔདྷཱརིཏཏྟཱཏི སམྨདེཝ ཨུཔདྷཱརིཏཏྟཱ སལླཀྑིཏཏྟཱ. སུཁུམཀཱ སདྡཱཏི ཨནུརཝེ ཨཱཧ, ཡེ ཨཔྤཀཱ. ཨཔྤཏྠོ ཧི ཨཡཾ ཀ-སདྡོ. སུཁུམསདྡནིམིཏྟཱརམྨཎཏཱཔཱིཏི སུཁུམོ སདྡོཝ ནིམིཏྟཾ སུཁུམསདྡནིམིཏྟཾ, ཏདཱརམྨཎཏཱཡཔཱིཏི ཝུཏྟཾ ཧོཏི. ཀཱམཾ ཏདཱ སུཁུམཱཔི སདྡཱ ནིརུདྡྷཱ, སདྡནིམིཏྟསྶ པན སུགྒཧིཏཏྟཱ སུཁུམཏརསདྡནིམིཏྟཱརམྨཎབྷཱཝེནཔི ཙིཏྟཾ པཝཏྟཏི. ཨཱདིཏོ པཊྛཱཡ ཧི ཏསྶ ཏསྶ ནིརུདྡྷསྶ སདྡསྶ ནིམིཏྟཾ ཨཝིཀྑིཏྟེན ཙིཏྟེན ཨུཔདྷཱརེནྟསྶ ཨནུཀྐམེན པརིཡོསཱནེ ཨཏིསུཁུམསདྡནིམིཏྟམྤི ཨཱརམྨཎཾ ཀཏྭཱ ཙིཏྟཾ པཝཏྟཏེཝ. ཙིཏྟཾ ན ཝིཀྑེཔཾ གཙྪཏི ཏསྨིཾ ཡཐཱཨུཔཊྛིཏེ ནིམིཏྟེ སམཱདྷཱནསབྦྷཱཝཏོ.

ཨེཝཾ སནྟེཏིཨཱདི ཝུཏྟསྶེཝཏྠསྶ ནིགམནཝསེན ཝུཏྟཾ. ཏཏྠ ཡསྶ སུཏྟཔདསྶ སདྡྷིཾ ཙོདནཱསོདྷནཱཧི ཨཏྠོ ཝུཏྟོ, ཏཾ ཨུདྡྷརིཏྭཱ ཀཱཡཱནུཔསྶནཱསཏིཔཊྛཱནཱནི ཝིབྷཱགཏོ དསྶེཏུཾ ‘‘པསྶམྦྷཡ’’ནྟིཨཱདི ཝུཏྟཾ ¶ . ཏཏྠ པསྶམྦྷཡཾ ཀཱཡསངྑཱརནྟི ཝུཏྟཨསྶཱསཔསྶཱསཱ ཀཱཡོཏི ཡོཛནཱ ཝེདིཏབྦཱ. ཨཐ ཝཱ པསྶམྦྷཡཾ ཀཱཡསངྑཱརནྟི ཨེཏྠ ཨསྶཱསཔསྶཱསཱ ཀཱཡོཏི ཨེཝམཏྠོ དཊྛབྦོ. མཧཱསཏིཔཊྛཱནསུཏྟེ (དཱི. ནི. ༢.༣༧༢ ཨཱདཡོ; མ. ནི. ༡.༡༠༥ ཨཱདཡོ) ཀཱཡཱནུཔསྶནཾ ཀཐེནྟེན པཋམཙཏུཀྐསྶེཝ ཝུཏྟཏྟཱ, ཨཱནཱཔཱནསྶཏིསུཏྟེཔི ‘‘ཡསྨིཾ སམཡེ, བྷིཀྑཝེ, བྷིཀྑུ དཱིགྷཾ ཝཱ ཨསྶསནྟོ དཱིགྷཾ ཨསྶསཱམཱིཏི པཛཱནཱཏི…པེ… པསྶམྦྷཡཾ ཀཱཡསངྑཱརཾ པསྶསིསྶཱམཱིཏི སིཀྑཏི. ཀཱཡེ ཀཱཡཱནུཔསྶཱི, བྷིཀྑཝེ, ཏསྨིཾ སམཡེ བྷིཀྑུ ཝིཧརཏཱི’’ཏི (མ. ནི. ༢.༡༤༩) ཝུཏྟཏྟཱ ཙ ‘‘ཀཱཡཱནུཔསྶནཱཝསེན ཝུཏྟསྶ པཋམཙཏུཀྐསྶཱ’’ཏི ཝུཏྟཾ.

ཨཱདིཀམྨིཀསྶ ཀམྨཊྛཱནཝསེནཱཏི སམཐཀམྨཊྛཱནཾ སནྡྷཱཡ ཝུཏྟཾ, ཝིཔསྶནཱཀམྨཊྛཱནཾ པན ཨིཏརཙཏུཀྐེསུཔི ལབྦྷཏེཝ. ཨེཏྠཱཏི པཋམཙཏུཀྐེ. སཧ པཊིསམྦྷིདཱཧཱིཏི ནིདསྶནམཏྟམེཏཾ, པུཉྙཝནྟཱནཾ པན ཨུཔནིསྶཡསམྤནྣཱནཾ ཨབྷིཉྙཱཔི སིཛ྄ཛྷཏིཡེཝ. ཙཏུབྦིདྷནྟི པཱཏིམོཀྑསཾཝརཱདིཝསེན ཙཏུབྦིདྷཾ. ཨནཱཔཛྫནནྟི སཏྟནྣཾ ཨཱཔཏྟིཀྑནྡྷཱནཾ ཨཉྙཏརསྶ ཨནཱཔཛྫནཾ. ཨཱཔནྣཝུཊྛཱནནྟི ཨཱཔནྣསཔྤཊིཀམྨཱཔཏྟིཏོ ཡཐཱདྷམྨཾ པཊིཀམྨཀརཎེན ཝུཊྛཱནཾ, དེསནཱགཱམིནིཏོ དེསནཱཡ, ཝུཊྛཱནགཱམིནིཏོ པརིཝཱསཱདིཝིནཡཀམྨཀརཎེན ཝུཊྛཱནནྟི ཝུཏྟཾ ཧོཏི ¶ . དེསནཱཡཔི ཧི ཨཱཔནྣཱཔཏྟིཏོ ཝུཊྛཱནཾ ཧོཏཱིཏི སཱཔི ཝུཊྛཱནེནེཝ སངྒཧིཏཱ. ཀིལེསེཧི ཙ ཨཔྤཊིཔཱིལ༹ནནྟི ཀོདྷོ ཨུཔནཱཧོ མཀྑོ པལཱསོ ཨིསྶཱ མཙྪརིཡཾ མཱཡཱ སཱཋེཡྻཾ ཐམྦྷོ སཱརམྦྷོ མཱནོ ཨཏིམཱནོ མདོ པམཱདོཏི ཨེཝམཱདཱིཧི པཱཔདྷམྨེཧི ཨཔྤཊིཔཱིལ༹ནཾ, ཏེསཾ ཨནུཔྤཱདནནྟི ཝུཏྟཾ ཧོཏི.

ཡམིདཾ ཨཱབྷིསམཱཙཱརིཀསཱིལཾ ཝུཙྩཏཱིཏི སམྦནྡྷོ. དྭེཨསཱིཏི ཁནྡྷཀཝཏྟཱནི ཙུདྡསཝིདྷཾ མཧཱཝཏྟནྟི ཨེཏྠ མཧཱཝཏྟཾ ནཱམ ཝཏྟཀྑནྡྷཀེ ཝུཏྟཱནི ཨཱགནྟུཀཝཏྟཾ ཨཱཝཱསིཀགམིཀཨནུམོདནབྷཏྟགྒཔིཎྜཙཱརིཀཨཱརཉྙིཀསེནཱསནཛནྟཱགྷརཝཙྩཀུཊིཨུཔཛ྄ཛྷཱཡསདྡྷིཝིཧཱརིཀཨཱཙརིཡཨནྟེཝཱསིཀཝཏྟནྟི ཙུདྡས ཝཏྟཱནི. ཏཏོ ཨཉྙཱནི པན ཀདཱཙི ཏཛྫནཱིཡཀམྨཀཏཱདིཀཱལེཡེཝ ཙརིཏབྦཱནི དྭཱསཱིཏི ཁནྡྷཀཝཏྟཱནི, ན སབྦཱསུ ཨཝཏྠཱསུ ཙརིཏབྦཱནི, ཏསྨཱ མཧཱཝཏྟེསུ ཨགཎིཏཱནི. ཏཏྠ ‘‘པཱརིཝཱསིཀཱནཾ བྷིཀྑཱུནཾ ཝཏྟཾ པཉྙཔེསྶཱམཱི’’ཏི ཨཱརབྷིཏྭཱ ‘‘ན ཨུཔསམྤཱདེཏབྦཾ…པེ… ན ཚམཱཡཾ ཙངྐམནྟེ ཙངྐམེ ཙངྐམིཏབྦ’’ནྟི (ཙཱུལ༹ཝ. ༧༦) ཝུཏྟཝཏྟཱནི ཚསཊྛི, ཏཏོ པརཾ ¶ ‘‘ན, བྷིཀྑཝེ, པཱརིཝཱསིཀེན བྷིཀྑུནཱ པཱརིཝཱསིཀཝུཌྜྷཏརེན བྷིཀྑུནཱ སདྡྷིཾ མཱུལཱཡཔཊིཀསྶནཱརཧེན, མཱནཏྟཱརཧེན, མཱནཏྟཙཱརིཀེན, ཨབྦྷཱནཱརཧེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ཝཏྠབྦ’’ནྟིཨཱདིནཱ (ཙཱུལ༹ཝ. ༨༢) ཝུཏྟཱནི པཀཏཏྟེ ཙརིཏབྦེཧི ཨནཉྙཏྟཱ ཝིསུཾ ཏཱནི ཨགཎེཏྭཱ པཱརིཝཱསིཀཝུཌྜྷཏརཱདཱིསུ པུགྒལནྟརེསུ ཙརིཏབྦཏྟཱ ཏེསཾ ཝསེན སམྤིཎྜེཏྭཱ ཨེཀེཀཾ ཀཏྭཱ གཎིཏཱནི པཉྩཱཏི ཨེཀསཏྟཏི ཝཏྟཱནི, ཨུཀྑེཔནཱིཡཀམྨཀཏཝཏྟེསུ ཝཏྟཔཉྙཱཔནཝསེན ཝུཏྟཾ ‘‘ན པཀཏཏྟསྶ བྷིཀྑུནོ ཨབྷིཝཱདནཾ…པེ… ནཧཱནེ པིཊྛིཔརིཀམྨཾ སཱདིཏབྦ’’ནྟི (ཙཱུལ༹ཝ. ༥༡) ཨིདཾ ཨབྷིཝཱདནཱདཱིནཾ ཨསཱདིཡནཾ ཨེཀཾ, ‘‘ན པཀཏཏྟོ བྷིཀྑུ སཱིལཝིཔཏྟིཡཱ ཨནུདྡྷཾསེཏབྦོ’’ཏིཨཱདཱིནི (ཙཱུལ༹ཝ. ༥༡) ཙ དསཱཏི ཨེཝམེཏཱནི དྭཱསཱིཏི. ཨེཏེསྭེཝ པན ཀཱནིཙི ཏཛྫནཱིཡཀམྨཱདིཝཏྟཱནི ཀཱནིཙི པཱརིཝཱསིཀཱདིཝཏྟཱནཱིཏི ཨགྒཧིཏགྒཧཎེན དྭཱསཱིཏི ཨེཝ. ཨཉྙཏྠ པན ཨཊྛཀཐཱཔདེསེ ཨཔྤཀཾ ཨཱུནམདྷིཀཾ ཝཱ གཎནཱུཔགཾ ན ཧོཏཱིཏི ཨསཱིཏི ཁནྡྷཀཝཏྟཱནཱིཏི ཝུཙྩཏི. ཨཱབྷིསམཱཙཱརིཀསཱིལནྟི ཨེཏྠ ཨབྷིསམཱཙཱརོཏི ཨུཏྟམསམཱཙཱརོ, ཨབྷིསམཱཙཱརོཝ ཨཱབྷིསམཱཙཱརིཀཾ, ཨབྷིསམཱཙཱརཾ ཝཱ ཨཱརབྦྷ པཉྙཏྟཾ ཨཱབྷིསམཱཙཱརིཀཾ, ཏདེཝ སཱིལནྟི ཨཱབྷིསམཱཙཱརིཀསཱིལཾ. ཁནྡྷཀཝཏྟཔརིཡཱཔནྣསྶ སཱིལསྶེཏཾ ཨདྷིཝཙནཾ. ཨཧཾ སཱིལཾ རཀྑཱམི, ཀིཾ ཨཱབྷིསམཱཙཱརིཀེནཱཏིཨཱདཱིསུ སཱིལནྟི ཨུབྷཏོཝིབྷངྒཔརིཡཱཔནྣམེཝ གཧེཏབྦཾ ཁནྡྷཀཝཏྟཔརིཡཱཔནྣསྶ ཨཱབྷིསམཱཙཱརིཀགྒཧཎེན གཧིཏཏྟཱ. པརིཔཱུརེཏི པརིཔུཎྞེ, པརིཔཱུརིཏེཏི ཝཱ ཨཏྠོ.

ཏཏོཏི ¶ ཡཐཱཝུཏྟསཱིལཝིསོདྷནཏོ པརཾ. ཨཱཝཱསོཏི ཨཱཝཱསཔལིབོདྷོ. ཀུལནྟིཨཱདཱིསུཔི ཨེསེཝ ནཡོ. ཏཏྠ (ཝིསུདྡྷི. ༡.༤༡) ཨཱཝཱསོཏི ཨེཀོཔི ཨོཝརཀོ ཝུཙྩཏི ཨེཀམྤི པརིཝེཎཾ སཀལོཔི སངྒྷཱརཱམོ. སྭཱཡཾ ན སབྦསྶེཝ པལིབོདྷོ ཧོཏི, ཡོ པནེཏྠ ནཝཀམྨཱདིཨུསྶུཀྐཾ ཝཱ ཨཱཔཛྫཏི, བཧུབྷཎྜསནྣིཙཡོ ཝཱ ཧོཏི, ཡེན ཀེནཙི ཝཱ ཀཱརཎེན ཨཔེཀྑཝཱ པཊིབདྡྷཙིཏྟོ, ཏསྶེཝ པལིབོདྷོ ཧོཏི, ན ཨིཏརསྶ.

ཀུལནྟི ཉཱཏིཀུལཾ ཝཱ ཨུཔཊྛཱཀཀུལཾ ཝཱ. ཨེཀཙྩསྶ ཧི ཨུཔཊྛཱཀཀུལམྤི ‘‘སུཁིཏེ སུཁིཏོ’’ཏིཨཱདིནཱ ནཡེན སཾསཊྛསྶ ཝིཧརཏོ པལིབོདྷོ ཧོཏི, སོ ཀུལམཱནུསཀེཧི ཝིནཱ དྷམྨསྶཝནཱཡ སཱམནྟཝིཧཱརམྤི ན གཙྪཏི. ཨེཀཙྩསྶ མཱཏཱཔིཏརོཔི པལིབོདྷཱ ན ཧོནྟི ཀོརཎྜཀཝིཧཱརཝཱསིཏྠེརསྶ བྷཱགིནེཡྻདཧརབྷིཀྑུནོ ཝིཡ.

ལཱབྷོཏི ¶ ཙཏྟཱརོ པཙྩཡཱ. ཏེ ཀཐཾ པལིབོདྷཱ ཧོནྟི? པུཉྙཝནྟསྶ ཧི བྷིཀྑུནོ གཏགཏཊྛཱནེ མནུསྶཱ མཧཱཔརིཝཱརེ པཙྩཡེ དེནྟི, སོ ཏེསཾ ཨནུམོདེནྟོ དྷམྨཾ དེསེནྟོ སམཎདྷམྨཾ ཀཱཏུཾ ཨོཀཱསཾ ན ལབྷཏི, ཨརུཎུགྒམནཏོ ཡཱཝ པཋམཡཱམོ, ཏཱཝ མནུསྶསཾསགྒོ ན ཨུཔཙྪིཛྫཏི, པུན བལཝཔཙྩཱུསེཡེཝ བཱཧུལླིཀཔིཎྜཔཱཏིཀཱ ཨཱགནྟྭཱ ‘‘བྷནྟེ, ཨསུཀོ ཨུཔཊྛཱཀོ ཨུཔཱསཀོ ཨུཔཱསིཀཱ ཨམཙྩོ ཨམཙྩདྷཱིཏཱ ཏུམྷཱཀཾ དསྶནཀཱམཱ’’ཏི ཝདནྟི, སོ ‘‘གཎྷཱཝུསོ པཏྟཙཱིཝར’’ནྟི གམནསཛྫོཝ ཧོཏི ནིཙྩབྱཱཝཊོ, ཏསྶེཝ ཏེ པཙྩཡཱ པལིབོདྷཱ ཧོནྟི. ཏེན གཎཾ པཧཱཡ ཡཏྠ ནཾ ན ཛཱནནྟི, ཏཏྠ ཨེཀཀེན ཙརིཏབྦཾ. ཨེཝཾ སོ པལིབོདྷོ ཨུཔཙྪིཛྫཏི.

གཎོཏི སུཏྟནྟིཀགཎོ ཝཱ ཨཱབྷིདྷམྨིཀགཎོ ཝཱ. ཡོ ཏསྶ ཨུདྡེསཾ ཝཱ པརིཔུཙྪཾ ཝཱ དེནྟོ སམཎདྷམྨསྶ ཨོཀཱསཾ ན ལབྷཏི, ཏསྶ གཎོ པལིབོདྷོ ཧོཏི. ཏེན སོ ཨེཝཾ ཨུཔཙྪིནྡིཏབྦོ – སཙེ ཏེསཾ བྷིཀྑཱུནཾ བཧུ ཀཏཾ ཧོཏི, ཨཔྤཾ ཨཝསིཊྛཾ, ཏཾ ནིཊྛཔེཏྭཱ ཨརཉྙཾ པཝིསིཏབྦཾ. སཙེ ཨཔྤཾ ཀཏཾ, བཧུ ཨཝསིཊྛཾ, ཡོཛནཏོ པརཾ ཨགནྟྭཱ ཨནྟོཡོཛནཔརིཙྪེདེ ཨཉྙཾ གཎཝཱཙཀཾ ཨུཔསངྐམིཏྭཱ ‘‘ཨིམེ ཨཱཡསྨཱ ཨུདྡེསཱདཱིཧི སངྒཎྷཏཱུ’’ཏི ཝཏྟབྦཾ. ཨེཝམྤི ཨལབྷམཱནེན ‘‘མཡ྄ཧཾ, ཨཱཝུསོ, ཨེཀཾ ཀིཙྩཾ ཨཏྠི, ཏུམྷེ ཡཐཱཕཱསུཀཊྛཱནཱནི གཙྪཐཱ’’ཏི གཎཾ པཧཱཡ ཨཏྟནོ ཀམྨཾ ཀཱཏབྦཾ.

ཀམྨེནཱཏི ཀམྨཔལིབོདྷེན. ‘‘ཀམྨཉྩ པཉྩམ’’ནྟིཔི པཱཋོ. ཏཏྠ ཀམྨནྟི ནཝཀམྨཾ. ཏཾ ཀརོནྟེན ཝཌྜྷཀཱིཨཱདཱིཧི ལདྡྷཱལདྡྷཾ ཛཱནིཏབྦཾ, ཀཏཱཀཏེ ཨུསྶུཀྐཾ ཨཱཔཛྫིཏབྦནྟི སབྦཐཱཔི ¶ པལིབོདྷོ ཧོཏི. སོཔི ཨེཝཾ ཨུཔཙྪིནྡིཏབྦོ – སཙེ ཨཔྤཾ ཨཝསིཊྛཾ ཧོཏི, ནིཊྛཔེཏབྦཾ. སཙེ བཧུ, སངྒྷིཀཾ ཙེ, ནཝཀམྨཾ སངྒྷསྶ ཝཱ བྷཱརཧཱརཀབྷིཀྑཱུནཾ ཝཱ ནིཡྻཱཏེཏབྦཾ. ཨཏྟནོ སནྟཀཾ ཙེ, ཨཏྟནོ བྷཱརཧཱརཀཱནཾ ནིཡྻཱཏེཏབྦཾ. ཏཱདིསཾ ཨལབྷནྟེན སངྒྷསྶ པརིཙྩཛིཏྭཱ གནྟབྦཾ.

ཨདྡྷཱནནྟི མགྒགམནཾ. ཡསྶ ཧི ཀཏྠཙི པབྦཛྫཱཔེཀྑོ ཝཱ ཧོཏི, པཙྩཡཛཱཏཾ ཝཱ ཀིཉྩི ལདྡྷབྦཾ ཧོཏི. སཙེ ཏཾ ཨལབྷནྟོ ན སཀྐོཏི ཨདྷིཝཱསེཏུཾ, ཨརཉྙཾ པཝིསིཏྭཱ སམཎདྷམྨཾ ཀརོནྟསྶཔི གམིཀཙིཏྟཾ ནཱམ དུཔྤཊིཝིནོདཡཾ ¶ ཧོཏི, ཏསྨཱ གནྟྭཱ ཏཾ ཀིཙྩཾ ཏཱིརེཏྭཱཝ སམཎདྷམྨེ ཨུསྶུཀྐཾ ཀཱཏབྦཾ.

ཉཱཏཱིཏི ཝིཧཱརེ ཨཱཙརིཡུཔཛ྄ཛྷཱཡསདྡྷིཝིཧཱརིཀཨནྟེཝཱསིཀསམཱནུཔཛ྄ཛྷཱཡཀསམཱནཱཙརིཡཀཱ, གྷརེ མཱཏཱ པིཏཱ བྷཱཏཱཏི ཨེཝམཱདིཀཱ. ཏེ གིལཱནཱ ཨིམསྶ པལིབོདྷཱ ཧོནྟི. ཏསྨཱ སོ པལིབོདྷོ ཏེ ཨུཔཊྛཧིཏྭཱ ཏེསཾ པཱཀཏིཀཀརཎེན ཨུཔཙྪིནྡིཏབྦོ. ཏཏྠ ཨུཔཛ྄ཛྷཱཡོ ཏཱཝ གིལཱནོ སཙེ ལཧུཾ ན ཝུཊྛཱཏི, ཡཱཝཛཱིཝཾ པཊིཛགྒིཏབྦོ, ཏཐཱ པབྦཛྫཱཙརིཡོ ཨུཔསམྤདཱཙརིཡོ སདྡྷིཝིཧཱརིཀོ ཨུཔསམྤཱདིཏཔབྦཱཛིཏཨནྟེཝཱསིཀསམཱནུཔཛ྄ཛྷཱཡཀཱ ཙ. ནིསྶཡཱཙརིཡཨུདྡེསཱཙརིཡནིསྶཡནྟེཝཱསིཀཨུདྡེསནྟེཝཱསིཀསམཱནཱཙརིཡཀཱ པན ཡཱཝ ནིསྶཡཨུདྡེསཱ ཨནུཔཙྪིནྣཱ, ཏཱཝ པཊིཛགྒིཏབྦཱ. པཧོནྟེན ཏཏོ ཨུདྡྷམྤི པཊིཛགྒིཏབྦཱ ཨེཝ. མཱཏཱཔིཏཱུསུ ཨུཔཛ྄ཛྷཱཡེ ཝིཡ པཊིཛགྒིཏབྦཾ. སཙེཔི ཧི ཏེ རཛྫེ ཋིཏཱ ཧོནྟི, པུཏྟཏོ ཙ ཨུཔཊྛཱནཾ པཙྩཱསཱིསནྟི, ཀཱཏབྦམེཝ. ཨཐ ཏེསཾ བྷེསཛྫཾ ནཏྠི, ཨཏྟནོ སནྟཀཾ དཱཏབྦཾ. ཨསཏི, བྷིཀྑཱཙརིཡཱཡ པརིཡེསིཏྭཱཔི དཱཏབྦམེཝ. བྷཱཏུབྷགིནཱིནཾ པན ཏེསཾ སནྟཀམེཝ ཡོཛེཏྭཱ དཱཏབྦཾ. སཙེ ནཏྠི, ཨཏྟནོ སནྟཀཾ ཏཱཝཀཱལིཀཾ དཏྭཱ པཙྪཱ ལབྷནྟེན གཎྷིཏབྦཾ, ཨལབྷནྟེན ན ཙོདེཏབྦཱ. ཨཉྙཱཏཀསྶ བྷགིནིཡཱ སཱམིཀསྶ བྷེསཛྫཾ ནེཝ ཀཱཏུཾ, ན དཱཏུཾ ཝཊྚཏི, ‘‘ཏུཡ྄ཧཾ སཱམིཀསྶ དེཧཱི’’ཏི ཝཏྭཱ པན བྷགིནིཡཱ དཱཏབྦཾ. བྷཱཏུ ཛཱཡཱཡཔི ཨེསེཝ ནཡོ, ཏེསཾ པན པུཏྟཱ ཨིམསྶ ཉཱཏཀཱཡེཝཱཏི ཏེསཾ ཀཱཏུཾ ཝཊྚཏི.

ཨཱབཱདྷོཏི ཡོ ཀོཙི རོགོ. སོ བཱདྷཡམཱནོ པལིབོདྷོ ཧོཏི, ཏསྨཱ བྷེསཛྫཀརཎེན ཨུཔཙྪིནྡིཏབྦོ. སཙེ པན ཀཏིཔཱཧཾ བྷེསཛྫཾ ཀརོནྟསྶཔི ན ཝཱུཔསམྨཏི, ‘‘ནཱཧཾ ཏུཡ྄ཧཾ དཱསོ, ན བྷཏཀོ, ཏཾཡེཝམྷི པོསེནྟོ ཨནམཏགྒེ སཾསཱརཝཊྚེ དུཀྑཔྤཏྟོ’’ཏི ཨཏྟབྷཱཝཾ གརཧིཏྭཱ སམཎདྷམྨོ ཀཱཏབྦོ.

གནྠོཏི ¶ པརིཡཏྟིཔརིཧརཎཾ. ཏཾ སཛ྄ཛྷཱཡཱདཱིཧི ནིཙྩབྱཱཝཊསྶེཝ པལིབོདྷོ ཧོཏི, ན ཨིཏརསྶ.

ཨིདྡྷིཡཱཏི ¶ ཨིདྡྷིཔལིབོདྷེན. ‘‘ཨིདྡྷཱིཏི ཏེ དསཱ’’ཏིཔི པཱཋོ. ཏཏྠ ཨིདྡྷཱིཏི པོཐུཛྫནིཀཱ ཨིདྡྷི. སཱ ཧི ཨུཏྟཱནསེཡྻཀདཱརཀོ ཝིཡ ཏརུཎསསྶཾ ཝིཡ ཙ དུཔྤརིཧཱརཱ ཧོཏི, ཨཔྤམཏྟཀེན ཙ བྷིཛྫཏི. སཱ པན ཝིཔསྶནཱཡ པལིབོདྷོ ཧོཏི, ན སམཱདྷིསྶ སམཱདྷིཾ པཏྭཱ པཏྟབྦཏོ, ཏསྨཱ ཝིཔསྶནཱཏྠིཀེན ཨིདྡྷིཔལིབོདྷོ ཨུཔཙྪིནྡིཏབྦོ, ཨིཏརེན ཨཝསེསཱཏི. ཀམྨཊྛཱནབྷཱཝནཾ པརིབུནྡྷེཏི ཨུཔརོདྷེཏི པཝཏྟིཏུཾ ན དེཏཱིཏི པལིབོདྷོ, ར-ཀཱརསྶ ལ-ཀཱརཾ ཀཏྭཱ ཝུཏྟོ, པརིཔནྠོཏི ཨཏྠོ. ཨུཔཙྪིནྡིཏབྦོཏི སམཱཔནེན སངྒཧཎེན ཨུཔརུནྡྷིཏབྦོ, ཨཔལིབོདྷོ ཀཱཏབྦོཏི ཨཏྠོ.

ཀམྨཊྛཱནེ ནིཡུཏྟོ ཀམྨཊྛཱནིཀོ, བྷཱཝནམནུཡུཉྫནྟོ. ཏེན ཀམྨཊྛཱནིཀེན. པརིཙྪིནྡིཏྭཱཏི ‘‘ཨིམསྨིཾ ཝིཧཱརེ སབྦེཔི བྷིཀྑཱུ’’ཏི ཨེཝཾ པརིཙྪིནྡིཏྭཱ. སཧཝཱསཱིནནྟི སཧཝཱསཱིནཾ བྷིཀྑཱུནཾ. མུདུཙིཏྟཏཾ ཛནེཏཱིཏི ཨཏྟནི མུདུཙིཏྟཏཾ ཨུཔྤཱདེཏི. ཨཡཉྩ སཧཝཱསཱིནཾ ཙིཏྟམདྡཝཛནནཱདིཨཏྠོ ‘‘མནུསྶཱནཾ པིཡོ ཧོཏཱི’’ཏིཨཱདིནཡཔྤཝཏྟེན མེཏྟཱནིསཾསསུཏྟེན (ཨ. ནི. ༨.༡) དཱིཔེཏབྦོ.

ཨནོལཱིནཝུཏྟིཀོ ཧོཏཱིཏི སམྨཱཔཊིཔཏྟིཡཾ ཨོལཱིནཝུཏྟིཀོ ཧཱིནཝཱིརིཡོ ན ཧོཏི, ཨཱརདྡྷཝཱིརིཡོ ཧོཏཱིཏི ཨཏྠོ. དིབྦེསུཔི ཨཱརམྨཎེསུ, པགེཝ ཨིཏརེསཱུཏི ཨདྷིཔྤཱཡོ. སབྦཏྠཱཏི སབྦསྨིཾ སམཎཀརཎཱིཡེ, སབྦསྨིཾ ཝཱ ཀམྨཊྛཱནཱནུཡོགེ. ཨཏྠཡིཏབྦནྟི པུབྦཱསེཝནཝསེན ཨཏྠཡིཏབྦཾ. ཡོགསྶ བྷཱཝནཱཡ ཨནུཡུཉྫནཾ ཡོགཱནུཡོགོ, ཏདེཝ ཀརཎཱིཡཊྛེན ཀམྨཾ, ཏསྶ ཡོགཱནུཡོགཀམྨསྶ. པདཊྛཱནཏྟཱཏི ནིཔྥཏྟིཧེཏུཏྟཱ.

ཨོདཱཏཀསིཎེ ཨཱལོཀཀསིཎཾ, ཀསིཎུགྒྷཱཊིམཱཀཱསཀསིཎེ པརིཙྪིནྣཱཀཱསཀསིཎཉྩ ཨནྟོགདྷཾ ཀཏྭཱ པཱལི༹ཡཾ པཐཝཱིཀསིཎཱདཱིནཾ རཱུཔཛ྄ཛྷཱནཱརམྨཎཱནཾ ཨཊྛནྣཾཡེཝ ཀསིཎཱནཾ སརཱུཔཏོ ཝུཏྟཏྟཱ ཨཱཀཱསཀསིཎཾ ཨཱལོཀཀསིཎཉྩ ཝཛྫེཏྭཱ ‘‘ཨཊྛཏིཾསཱརམྨཎེསཱུ’’ཏི པཱལི༹ཡཾ ཨཱགཏནཡེནེཝ ཝུཏྟཾ. ཨཊྛཀཐཱནཡེན པན ཨཱཀཱསཀསིཎེ ཨཱལོཀཀསིཎེ ཙ ཝིསུཾ གཧིཏེ ཙཏྟཱལཱིསཾཡེཝ ཀམྨཊྛཱནཱནི. ཏཏྲིམཱནི ཙཏྟཱལཱིས ཀམྨཊྛཱནཱནི – དས ཀསིཎཱ, དས ཨསུབྷཱ ¶ , དས ཨནུསྶཏིཡོ, ཙཏྟཱརོ བྲཧྨཝིཧཱརཱ, ཙཏྟཱརོ ཨཱརུཔྤཱ, ཨེཀཱ སཉྙཱ, ཨེཀཾ ཝཝཏྠཱནནྟི. ཏཏྠ པཐཝཱིཀསིཎཾ ཨཱཔོཀསིཎཾ ཏེཛོཀསིཎཾ ཝཱཡོཀསིཎཾ ནཱིལཀསིཎཾ པཱིཏཀསིཎཾ ¶ ལོཧིཏཀསིཎཾ ཨོདཱཏཀསིཎཾ ཨཱལོཀཀསིཎཾ པརིཙྪིནྣཱཀཱསཀསིཎནྟི ཨིམེ དས ཀསིཎཱ. ཨུདྡྷུམཱཏཀཾ ཝིནཱིལཀཾ ཝིཔུབྦཀཾ ཝིཙྪིདྡཀཾ ཝིཀྑཱཡིཏཀཾ ཝིཀྑིཏྟཀཾ ཧཏཝིཀྑིཏྟཀཾ ལོཧིཏཀཾ པུལ༹ཝཀཾ ཨཊྛིཀནྟི ཨིམེ དས ཨསུབྷཱ. བུདྡྷཱནུསྶཏི དྷམྨ སངྒྷ སཱིལ ཙཱག དེཝཏཱནུསྶཏི མརཎསྶཏི ཀཱཡགཏཱསཏི ཨཱནཱཔཱནསྶཏི ཨུཔསམཱནུསྶཏཱིཏི ཨིམཱ དས ཨནུསྶཏིཡོ. མེཏྟཱ ཀརུཎཱ མུདིཏཱ ཨུཔེཀྑཱཏི ཨིམེ ཙཏྟཱརོ བྲཧྨཝིཧཱརཱ. ཨཱཀཱསཱནཉྩཱཡཏནཾ ཝིཉྙཱཎཉྩཱཡཏནཾ ཨཱཀིཉྩཉྙཱཡཏནཾ ནེཝསཉྙཱནཱསཉྙཱཡཏནནྟི ཨིམེ ཙཏྟཱརོ ཨཱརུཔྤཱ. ཨཱཧཱརེ པཊིཀཱུལསཉྙཱ ཨེཀཱ སཉྙཱ. ཙཏུདྷཱཏུཝཝཏྠཱནཾ ཨེཀཾ ཝཝཏྠཱནནྟི.

ཡཾ ཡསྶ ཙརིཏཱནུཀཱུལནྟི ཨེཏྠ རཱགཙརིཏསྶ ཏཱཝ དས ཨསུབྷཱ ཀཱཡགཏཱསཏཱིཏི ཨེཀཱདས ཀམྨཊྛཱནཱནི ཨནུཀཱུལཱནི, དོསཙརིཏསྶ ཙཏྟཱརོ བྲཧྨཝིཧཱརཱ ཙཏྟཱརི ཝཎྞཀསིཎཱནཱིཏི ཨཊྛ, མོཧཙརིཏསྶ ཙ ཝིཏཀྐཙརིཏསྶ ཙ ཨེཀཾ ཨཱནཱཔཱནསྶཏིཀམྨཊྛཱནམེཝ, སདྡྷཱཙརིཏསྶ པུརིམཱ ཚ ཨནུསྶཏིཡོ, བུདྡྷིཙརིཏསྶ མརཎསྶཏི ཨུཔསམཱནུསྶཏི ཙཏུདྷཱཏུཝཝཏྠཱནཾ ཨཱཧཱརེ པཊིཀཱུལསཉྙཱཏི ཙཏྟཱརི, སེསཀསིཎཱནི ཙཏྟཱརོ ཙ ཨཱརུཔྤཱ སབྦཙརིཏཱནཾ ཨནུཀཱུལཱནི. ཀསིཎེསུ ཙ ཡཾ ཀིཉྩི པརིཏྟཾ ཝིཏཀྐཙརིཏསྶ, ཨཔྤམཱཎཾ མོཧཙརིཏསྶ ཨནུཀཱུལནྟི ཝེདིཏབྦཾ. ཡཐཱཝུཏྟེནེཝ ནཡེནཱཏི ‘‘ཡོགཱནུཡོགཀམྨསྶ པདཊྛཱནཏྟཱ’’ཏི ཨིམམཏྠཾ ཨཏིདིསཏི.

ཡཾ ཀམྨཊྛཱནཾ གཧེཏུཀཱམོ ཧོཏི, ཏསྶེཝ ཝསེན ཙཏུཀྐཔཉྩཀཛ྄ཛྷཱནཱནི ནིབྦཏྟེཏྭཱ ཛྷཱནཔདཊྛཱནཾ ཝིཔསྶནཾ ཝཌྜྷེཏྭཱ ཨཱསཝཀྑཡཔྤཏྟསྶ ཁཱིཎཱསཝསྶ སནྟིཀེ གཧེཏབྦནྟི ཨཱཧ – ‘‘ཨིམིནཱཝ ཀམྨཊྛཱནེན…པེ… ཨུགྒཧེཏབྦ’’ནྟི. ཨརཧནྟཱདཡོ ཧཱིཏིཨཱདི ཨེཀཙྩཁཱིཎཱསཝཏོ བཧུསྶུཏོཝ ཀམྨཊྛཱནདཱནེ སེཡྻོཏི དསྶནཏྠཾ ཨཱརདྡྷཾ. མཧཱཧཏྠིཔཐཾ ནཱིཧརནྟོ ཝིཡཱཏི ཀམྨཊྛཱནཔཐཝིཾ མཧཱཧཏྠིཔཐཾ ཀཏྭཱ དསྶེནྟོ ཝིཡ. སཔྤཱཡཱསཔྤཱཡཾ པརིཙྪིནྡིཏྭཱཏི ཡསྶ ཀམྨཊྛཱནཾ ཨཱཙིཀྑཏི, ཏསྶ ཨུཔཀཱརཱནུཔཀཱརཾ ཡུཏྟིམགྒནེན པརིཙྪིནྡིཏྭཱ.

ཨིདཱནི ¶ ཀམྨཊྛཱནདཱཡཀསྶ སནྟིཀཾ གཙྪནྟེན དྷོཏམཀྑིཏེཧི པཱདེཧི ཨུཔཱཧནཱ ཨཱརུཧིཏྭཱ ཚཏྟཾ གཧེཏྭཱ ཏེལནཱལི༹མདྷུཕཱཎིཏཱདཱིནི གཱཧཱཔེཏྭཱ ཨནྟེཝཱསིཀཔརིཝུཏེན ན གནྟབྦཾ, གམིཀཝཏྟཾ པན པཱུརེཏྭཱ ཨཏྟནོ པཏྟཙཱིཝརཾ སཡམེཝ གཧེཏྭཱ ཨནྟརཱམགྒེ ཡཾ ཡཾ ཝིཧཱརཾ པཝིསཏི, སབྦཏྠ པཝིཊྛཀཱལེ ཨཱགནྟུཀཝཏྟཾ, ནིཀྑམནཀཱལེ གམིཀཝཏྟནྟི ཡཐཱརཧཾ ཏཾ ཏཾ ཝཏྟཾ པཱུརེནྟེན སལླཧུཀཔརིཀྑཱརེན པརམསལླེཁཝུཏྟིནཱ ཧུཏྭཱ གནྟབྦནྟི ཨིམམཏྠཾ སངྑིཔིཏྭཱ དསྶེནྟོ ‘‘སལླཧུཀཝུཏྟིནཱ ཝིནཡཱཙཱརསམྤནྣེནཱ’’ཏི ཨཱཧ. ཨེཝཾ པན གནྟྭཱ ཏཾ ཝིཧཱརཾ ¶ པཝིསནྟེན ཨནྟརཱཡེཝ དནྟཀཊྛཾ ཀཔྤིཡཾ ཀཱརཱཔེཏྭཱ གཧེཏྭཱ པཝིསིཏབྦཾ, ན ཙ མུཧུཏྟཾ ཝིསྶམིཏྭཱ པཱདདྷོཝནམཀྑནཱདཱིནི ཀཏྭཱ ཨཱཙརིཡསྶ སནྟིཀཾ གམིསྶཱམཱིཏི ཨཉྙཾ པརིཝེཎཾ པཝིསིཏབྦཾ. ཀསྨཱ? སཙེ ཧིསྶ ཏཏྲ ཨཱཙརིཡསྶ ཝིསབྷཱགཱ བྷིཀྑཱུ བྷཝེཡྻུཾ, ཏཾ ཏེ ཨཱགམནཀཱརཎཾ པུཙྪིཏྭཱ ཨཱཙརིཡསྶ ཨཝཎྞཾ པཀཱསེཏྭཱ ‘‘ནཊྛོསི, སཙེ ཏསྶ སནྟིཀཾ ཨཱགཏོ’’ཏི ཝིཔྤཊིསཱརཾ ཨུཔྤཱདེཡྻུཾ, ཡེན ཏཏོཝ པཊིནིཝཏྟེཡྻ, ཏསྨཱ ཨཱཙརིཡསྶ ཝསནཊྛཱནཾ པུཙྪིཏྭཱ ཨུཛུཀཾ ཏཏྠེཝ གནྟབྦཾ.

ཝུཏྟཔྤཀཱརམཱཙརིཡནྟི –

‘‘པིཡོ གརུ བྷཱཝནཱིཡོ, ཝཏྟཱ ཙ ཝཙནཀྑམོ;

གམྦྷཱིརཉྩ ཀཐཾ ཀཏྟཱ, ནོ ཙཊྛཱནེ ནིཡོཛཀོ’’ཏི. (ཨ. ནི. ༧.༣༧; ནེཏྟི. ༡༡༣) –

ཨེཝམཱདིནཱ ཝུཏྟཔྤཀཱརཾ སདྡྷཱདིགུཎསམནྣཱགཏཾ ཨེཀནྟཧིཏེསིཾ ཝུཌྜྷིཔཀྑེ ཋིཏཾ ཀལྱཱཎམིཏྟཾ ཨཱཙརིཡཾ. ཝཏྟཔཊིཔཏྟིཡཱ ཨཱརཱདྷིཏཙིཏྟསྶཱཏི ཨེཏྠ སཙེ ཨཱཙརིཡོ དཧརཏརོ ཧོཏི, པཏྟཙཱིཝརཔཊིགྒཧཎཱདཱིནི ན སཱདིཏབྦཱནི. སཙེ ཝུཌྜྷཏརོ, གནྟྭཱ ཨཱཙརིཡཾ ཝནྡིཏྭཱ ཋཱཏབྦཾ. ‘‘ནིཀྑིཔཱཝུསོ, པཏྟཙཱིཝར’’ནྟི ཝུཏྟེན ནིཀྑིཔིཏབྦཾ. ‘‘པཱནཱིཡཾ པིཝཱ’’ཏི ཝུཏྟེན སཙེ ཨིཙྪཏི, པཱཏབྦཾ. ‘‘པཱདེ དྷོཝཱ’’ཏི ཝུཏྟེན ན ཏཱཝ དྷོཝིཏབྦཱ. སཙེ ཧི ཨཱཙརིཡེན ཨཱབྷཏམུདཀཾ བྷཝེཡྻ, ན སཱརུཔྤཾ སིཡཱ. ‘‘དྷོཝཱཝུསོ, ན མཡཱ ཨཱབྷཏཾ, ཨཉྙེཧི ཨཱབྷཏ’’ནྟི ཝུཏྟེན པན ཡཏྠ ཨཱཙརིཡོ ན པསྶཏི, ཨེཝརཱུཔེ པཊིཙྪནྣེ ཝཱ ཨོཀཱསེ ཨབྦྷོཀཱསཝིཧཱརསྶཔི ཝཱ ཨེཀམནྟེ ནིསཱིདིཏྭཱ པཱདཱ དྷོཝིཏབྦཱ. སཙེ ཨཱཙརིཡོ ཏེལནཱལི༹ཾ ཨཱཧརཏི, ཨུཊྛཧིཏྭཱ ཨུབྷོཧི ཧཏྠེཧི སཀྐཙྩཾ ¶ གཧེཏབྦཱ. སཙེ ཧི ན གཎྷེཡྻ, ‘‘ཨཡཾ བྷིཀྑུ ཨིཏོ ཨེཝ པཊྛཱཡ སམྦྷོགཾ ཀོཔེཏཱི’’ཏི ཨཱཙརིཡསྶ ཨཉྙཐཏྟཾ བྷཝེཡྻ. གཧེཏྭཱ པན ན ཨཱདིཏོཝ པཱདཱ མཀྑེཏབྦཱ. སཙེ ཧི ཏཾ ཨཱཙརིཡསྶ གཏྟབྦྷཉྫནཏེལཾ བྷཝེཡྻ, ན སཱརུཔྤཾ སིཡཱ, ཏསྨཱ པཋམཾ སཱིསཾ མཀྑེཏྭཱ ཁནྡྷཱདཱིནི མཀྑེཏབྦཱནི. ‘‘སབྦཔཱརིཧཱརིཡཏེལམིདཾ, ཨཱཝུསོ, པཱདེཔི མཀྑེཧཱི’’ཏི ཝུཏྟེན པན པཱདེ མཀྑེཏྭཱ ‘‘ཨིམཾ ཏེལནཱལི༹ཾ ཋཔེམི, བྷནྟེ’’ཏི ཝཏྭཱ ཨཱཙརིཡེ གཎྷནྟེ དཱཏབྦཱ.

གཏདིཝསཏོ པཊྛཱཡ ‘‘ཀམྨཊྛཱནཾ མེ, བྷནྟེ, ཀཐེཐ’’ཨིཙྩེཝཾ ན ཝཏྟབྦཾ. དུཏིཡདིཝསཏོ པན པཊྛཱཡ སཙེ ཨཱཙརིཡསྶ པཀཏིཨུཔཊྛཱཀོ ཨཏྠི, ཏཾ ཡཱཙིཏྭཱ ཝཏྟཾ ཀཱཏབྦཾ. སཙེ ཡཱཙིཏོཔི ¶ ན དེཏི, ཨོཀཱསེ ལདྡྷེཡེཝ ཀཱཏབྦཾ. ཀརོནྟེན ཙ ཁུདྡཀམཛ྄ཛྷིམམཧནྟཱནི ཏཱིཎི དནྟཀཊྛཱནི ཨུཔནཱམེཏབྦཱནི. སཱིཏཾ ཨུཎྷནྟི དུཝིདྷཾ མུཁདྷོཝནུདཀཉྩ ནྷཱནོདཀཉྩ པཊིཡཱདེཏབྦཾ. ཏཏོ ཡཾ ཨཱཙརིཡོ ཏཱིཎི དིཝསཱནི པརིབྷུཉྫཏི, ཏཱདིསམེཝ ནིཙྩཾ ཨུཔཊྛཱཔེཏབྦཾ, ནིཡམཾ ཨཀཏྭཱ ཡཾ ཝཱ ཏཾ ཝཱ པརིབྷུཉྫནྟསྶ ཡཐཱལདྡྷཾ ཨུཔནཱམེཏབྦཾ. ཀིཾ བཧུནཱ ཝུཏྟེན, ཡཾ ཏཾ བྷགཝཏཱ ‘‘ཨནྟེཝཱསིཀེན, བྷིཀྑཝེ, ཨཱཙརིཡམྷི སམྨཱ ཝཏྟིཏབྦཾ. ཏཏྲཱཡཾ སམྨཱཝཏྟནཱ – ཀཱལསྶེཝ ཝུཊྛཱཡ ཨུཔཱཧནཱ ཨོམུཉྩིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ དནྟཀཊྛཾ དཱཏབྦཾ, མུཁོདཀཾ དཱཏབྦཾ, ཨཱསནཾ པཉྙཔེཏབྦཾ. སཙེ ཡཱགུ ཧོཏི, བྷཱཛནཾ དྷོཝིཏྭཱ ཡཱགུ ཨུཔནཱམེཏབྦཱ’’ཏིཨཱདིཀཾ (མཧཱཝ. ༦༦) ཁནྡྷཀེ ཝཏྟཾ པཉྙཏྟཾ, ཏཾ སབྦམྤི ཀཱཏབྦཾ. ཨིཏི ཨིམིནཱ ཡཐཱཝུཏྟེན ནཡེན པཊིཔཛྫནྟོ ཝཏྟཔཊིཔཏྟིཡཱ ཙིཏྟཾ ཨཱརཱདྷེཏཱིཏི དཊྛབྦཾ.

པཉྩསནྡྷིཀནྟི པཉྩཔབྦཾ, པཉྩབྷཱགནྟི ཨཏྠོ. ཀམྨཊྛཱནསྶ ཨུགྒཎྷནནྟི ཀམྨཊྛཱནགནྠསྶ ཨུགྒཎྷནཾ, ཏདཏྠཔརིཔུཙྪཱ ཀམྨཊྛཱནསྶ པརིཔུཙྪནཱ. ཨཐ ཝཱ གནྠཏོ ཨཏྠཏོ ཙ ཀམྨཊྛཱནསྶ ཨུགྒཎྷནཾ ཨུགྒཧོ, ཏཏྠ སཾསཡཔརིཔུཙྪནཱ པརིཔུཙྪཱ. ཀམྨཊྛཱནསྶ ཨུཔཊྛཱནནྟི ནིམིཏྟུཔཊྛཱནཾ, ཨེཝཾ བྷཱཝནམནུཡུཉྫནྟསྶ ‘‘ཨེཝམིདཾ ནིམིཏྟཾ ཨུཔཊྛཱཏཱི’’ཏི ཨུཔདྷཱརཎཾ, ཏཐཱ ཀམྨཊྛཱནཔྤནཱ ‘‘ཨེཝཾ ཛྷཱནམཔྤེཏཱི’’ཏི. ཀམྨཊྛཱནསྶ ལཀྑཎནྟི གཎནཱནུབནྡྷནཱཕུསནཱནཾ ཝསེན བྷཱཝནཾ ཨུསྶུཀྐཱཔེཏྭཱ ཋཔནཱཡ སམྤཏྟི, ཏཏོ པརམྤི ཝཱ སལླཀྑཎཱདིཝསེན མཏྠཀཔྤཏྟཱིཏི ཀམྨཊྛཱནསབྷཱཝསྶ སལླཀྑཎཾ. ཏེནཱཧ – ‘‘ཀམྨཊྛཱནསབྷཱཝུཔདྷཱརཎནྟི ཝུཏྟཾ ཧོཏཱི’’ཏི.

ཨཏྟནཱཔི ¶ ན ཀིལམཏི ཨོདྷིསོ ཀམྨཊྛཱནསྶ ཨུགྒཎྷནཏོ, ཏཏོ ཨེཝ ཨཱཙརིཡམྤི ན ཝིཧེཋེཏི དྷམྨཱདྷིཀརཎམྤི བྷཱཝནཱཡ མཏྠཀཾ པཱཔནཏོ. ཏསྨཱཏི ཏཾནིམིཏྟཾ ཨཏྟནོཨཀིལམནཨཱཙརིཡཱཝིཧེཋནཧེཏུ. ཐོཀནྟི ཐོཀཾ ཐོཀཾ. ཏཏྠཱཏི ཡཏྠ ཨཱཙརིཡོ ཝསཏི, ཏཏྠ. སཔྤཱཡཾ ཧོཏཱིཏི ཨཱཝཱསསཔྤཱཡཱདིལཱབྷེན མནསིཀཱརཕཱསུཏཱ བྷཱཝནཱནུཀཱུལཏཱ ཧོཏི. ཡོཛནཔརམནྟི ཨིམིནཱ གཱཝུཏཨཌྜྷཡོཛནཱནིཔི སངྒཎྷཱཏི. ཡསྨཱ པན མནྡཔཉྙོ གཱཝུཏེ ཨཌྜྷཡོཛནེ ཡོཛནམཏྟེ ཝཱ ཝསནྟོ ཀམྨཊྛཱནསྶ ཀིསྨིཉྩིདེཝ ཋཱནེ སནྡེཧེ ཝཱ སཏིསམྨོསེ ཝཱ ཛཱཏེ ཀཱལསྶེཝ ཝིཧཱརེ ཝཏྟཾ ཀཏྭཱ ཨནྟརཱམགྒེ པིཎྜཱཡ ཙརིཏྭཱ བྷཏྟཀིཙྩཔརིཡོསཱནེཡེཝ ཨཱཙརིཡསྶ ཝསནཊྛཱནཾ གནྟྭཱ ཏཾ དིཝསཾ ཨཱཙརིཡསྶ སནྟིཀེ ཀམྨཊྛཱནཾ སོདྷེཏྭཱ དུཏིཡདིཝསེ ཨཱཙརིཡཾ ཝནྡིཏྭཱ ནིཀྑམིཏྭཱ ཨནྟརཱམགྒེ པིཎྜཱཡ ཙརིཏྭཱ ཨཀིལམནྟོཡེཝ ཨཏྟནོ ཝསནཊྛཱནཾ ཨཱགནྟུཾ སཀྑིསྶཏི, ཏསྨཱ ཝུཏྟཾ ‘‘མནྡཔཉྙོ ཡོཛནཔརམཾ གནྟྭཱ’’ཏི. སཙེ ཏིཀྑཔཉྙོ ཡོཛནཔརམེ ཕཱསུཀཊྛཱནཾ ན ལབྷཏི, ཏེན ཀམྨཊྛཱནེ སབྦཾ གཎྛིཊྛཱནཾ ཚིནྡིཏྭཱ ¶ ཝིསུདྡྷཾ ཨཱཝཛྫནཔཊིབདྡྷཾ ཀམྨཊྛཱནཾ ཀཏྭཱ ཡོཛནཔརམཏོ དཱུརམྤི གནྟུཾ ཝཊྚཏཱིཏི ཨཱཧ ‘‘ཏིཀྑཔཉྙོ དཱུརམྤི གནྟྭཱ’’ཏི.

ཨཊྛཱརསསེནཱསནདོསཝིཝཛྫིཏནྟི མཧཏྟཾ, ནཝཏྟཾ, ཛིཎྞཏྟཾ, པནྠནིསྶིཏཏྟཾ, སོཎྜཱི, པཎྞཾ, པུཔྥཾ, ཕལཾ, པཏྠནཱིཡཏཱ, ནགརསནྣིསྶིཏཏཱ, དཱརུསནྣིསྶིཏཏཱ, ཁེཏྟསནྣིསྶིཏཏཱ, ཝིསབྷཱགཱནཾ པུགྒལཱནཾ ཨཏྠིཏཱ, པཊྚནསནྣིསྶིཏཏཱ, པཙྩནྟསནྣིསྶིཏཏཱ, རཛྫསཱིམསནྣིསྶིཏཏཱ, ཨསཔྤཱཡཏཱ, ཀལྱཱཎམིཏྟཱནཾ ཨལཱབྷོཏི ཨིམེཧི ཨཊྛཱརསཧི སེནཱསནདོསེཧི ཝིཝཛྫིཏཾ. ཨིམེསཉྷི ཨཊྛཱརསནྣཾ དོསཱནཾ ཨཉྙཏརེན སམནྣཱགཏཾ སེནཱསནཾ བྷཱཝནཱཡ ཨནནུརཱུཔཾ.

ཀསྨཱ? མཧཱཝིཧཱརེ (ཝིསུདྡྷི. ༡.༥༢) ཏཱཝ བཧཱུ ནཱནཱཚནྡཱ སནྣིཔཏནྟི, ཏེ ཨཉྙམཉྙཾ པཊིཝིརུདྡྷཏཱཡ ཝཏྟཾ ན ཀརོནྟི, བོདྷིཡངྒཎཱདཱིནི ཨསམྨཊྛཱནེཝ ཧོནྟི, ཨནུཔཊྛཱཔིཏཾ པཱནཱིཡཾ པརིབྷོཛནཱིཡཾ. ཏཏྲཱཡཾ ‘‘གོཙརགཱམེ པིཎྜཱཡ ཙརིསྶཱམཱི’’ཏི པཏྟཙཱིཝརམཱདཱཡ ནིཀྑནྟོཔི སཙེ པསྶཏི ཝཏྟཾ ཨཀཏཾ, པཱནཱིཡགྷཊཾ ཝཱ རིཏྟཾ, ཨཐཱནེན ཝཏྟཾ ཀཱཏབྦཾ ཧོཏི, པཱནཱིཡཾ ཨུཔཊྛཱཔེཏབྦཾ ¶ , ཨཀརོནྟོ ཝཏྟབྷེདེ དུཀྐཊཾ ཨཱཔཛྫཏི. ཀརོནྟསྶ ཀཱལོ ཨཏིཀྐམཏི, ཨཏིདིཝཱ པཝིཊྛོ ནིཊྛིཏཱཡ བྷིཀྑཱཡ ཀིཉྩི ན ལབྷཏི. པཊིསལླཱནགཏོཔི སཱམཎེརདཧརབྷིཀྑཱུནཾ ཨུཙྩཱསདྡེན སངྒྷཀམྨེཧི ཙ ཝིཀྑིཔཏི. ཡཏྠ པན སབྦཾ ཝཏྟཾ ཀཏམེཝ ཧོཏི, ཨཝསེསཱཔི ཙ གྷཊྚནཱ ནཏྠི, ཨེཝརཱུཔེ མཧཱཝིཧཱརེཔི ཝིཧཱཏབྦཾ.

ནཝཝིཧཱརེ བཧུ ནཝཀམྨཾ ཧོཏི, ཨཀརོནྟཾ ཨུཛ྄ཛྷཱཡནྟི. ཡཏྠ པན བྷིཀྑཱུ ཨེཝཾ ཝདནྟི ‘‘ཨཱཡསྨཱ ཡཐཱསུཁཾ སམཎདྷམྨཾ ཀརོཏུ, མཡཾ ནཝཀམྨཾ ཀརིསྶཱམཱ’’ཏི, ཨེཝརཱུཔེ ཝིཧཱཏབྦཾ.

ཛིཎྞཝིཧཱརེ པན བཧུ པཊིཛགྒིཏབྦཾ ཧོཏི, ཨནྟམསོ ཨཏྟནོ སེནཱསནམཏྟམྤི ཨཔྤཊིཛགྒནྟཾ ཨུཛ྄ཛྷཱཡནྟི, པཊིཛགྒནྟསྶ ཀམྨཊྛཱནཾ པརིཧཱཡཏི.

པནྠནིསྶིཏེ མཧཱཔཐཝིཧཱརེ རཏྟིནྡིཝཾ ཨཱགནྟུཀཱ སནྣིཔཏནྟི. ཝིཀཱལེ ཨཱགཏཱནཾ ཨཏྟནོ སེནཱསནཾ དཏྭཱ རུཀྑམཱུལེ ཝཱ པཱསཱཎཔིཊྛེ ཝཱ ཝསིཏབྦཾ ཧོཏི, པུནདིཝསེཔི ཨེཝམེཝཱཏི ཀམྨཊྛཱནསྶ ཨོཀཱསོ ན ཧོཏི. ཡཏྠ པན ཨེཝརཱུཔོ ཨཱགནྟུཀསམྦཱདྷོ ན ཧོཏི, ཏཏྠ ཝིཧཱཏབྦཾ.

སོཎྜཱི ¶ ནཱམ པཱསཱཎཔོཀྑརཎཱི ཧོཏི. ཏཏྠ པཱནཱིཡཏྠཾ མཧཱཛནོ སམོསརཏི, ནགརཝཱསཱིནཾ རཱཛཀུལཱུཔཀཏྠེརཱནཾ ཨནྟེཝཱསིཀཱ རཛནཀམྨཏྠཱཡ ཨཱགཙྪནྟི, ཏེསཾ བྷཱཛནདཱརུདོཎིཀཱདཱིནི པུཙྪནྟཱནཾ ‘‘ཨསུཀེ ཙ ཨསུཀེ ཙ ཋཱནེ’’ཏི དསྶེཏབྦཱནི ཧོནྟི. ཨེཝཾ སབྦཀཱལམྤི ནིཙྩབྱཱཝཊོ ཧོཏི.

ཡཏྠ ནཱནཱཝིདྷཾ སཱཀཔཎྞཾ ཧོཏི, ཏཏྠསྶ ཀམྨཊྛཱནཾ གཧེཏྭཱ དིཝཱཝིཧཱརཾ ནིསིནྣསྶཔི སནྟིཀེ སཱཀཧཱརིཀཱ གཱཡམཱནཱ པཎྞཾ ཨུཙྩིནནྟིཡོ ཝིསབྷཱགསདྡསངྒྷཊྚནེན ཀམྨཊྛཱནནྟརཱཡཾ ཀརོནྟི.

ཡཏྠ པན ནཱནཱཝིདྷཱ མཱལཱགཙྪཱ སུཔུཔྥིཏཱ ཧོནྟི, ཏཏྲཱཔི ཏཱདིསོཡེཝ ཨུཔདྡཝོ.

ཡཏྠ ནཱནཱཝིདྷཾ ཨམྦཛམྦུཔནསཱདིཕལཾ ཧོཏི, ཏཏྠ ཕལཏྠིཀཱ ཨཱགནྟྭཱ ཡཱཙནྟི, ཨདེནྟསྶ ཀུཛ྄ཛྷནྟི, བལཀྐཱརེན ཝཱ གཎྷནྟི, སཱཡནྷསམཡེ ཝིཧཱརམཛ྄ཛྷེ ཙངྐམནྟེན ཏེ དིསྭཱ ‘‘ཀིཾ ཨུཔཱསཀཱ ཨེཝཾ ཀརོཐཱ’’ཏི ཝུཏྟཱ ཡཐཱརུཙི ཨཀྐོསནྟི, ཨཝཱསཱཡཔིསྶ པརཀྐམནྟི.

པཏྠནཱིཡེ ¶ པན ལོཀསམྨཏེ དཀྑིཎགིརིཧཏྠིཀུཙྪིཙེཏིཡགིརིཙིཏྟལཔབྦཏསདིསེ ཝིཧཱརེ ཝིཧརནྟཾ ‘‘ཨཡཾ ཨརཧཱ’’ཏི སམྦྷཱཝེཏྭཱ ཝནྡིཏུཀཱམཱ མནུསྶཱ སམནྟཱ ཨོསརནྟི, ཏེནསྶ ན ཕཱསུ ཧོཏི. ཡསྶ པན ཏཾ སཔྤཱཡཾ ཧོཏི, ཏེན དིཝཱ ཨཉྙཏྠ གནྟྭཱ རཏྟིཾ ཝསིཏབྦཾ.

ནགརསནྣིསྶིཏེ ཝིསབྷཱགཱརམྨཎཱནི ཨཱཔཱཐམཱགཙྪནྟི, ཀུམྦྷདཱསིཡོཔི གྷཊེཧི ནིགྷཾསནྟིཡོ གཙྪནྟི, ཨོཀྐམིཏྭཱ མགྒཾ ན དེནྟི, ཨིསྶརམནུསྶཱཔི ཝིཧཱརམཛ྄ཛྷེ སཱཎིཾ པརིཀྑིཔིཏྭཱ ནིསཱིདནྟི.

དཱརུསནྣིསྶཡེ པན ཡཏྠ ཀཊྛཱནི ཙ དབྦུཔཀརཎརུཀྑཱ ཙ སནྟི, ཏཏྠ ཀཊྛཧཱརིཀཱ པུབྦེ ཝུཏྟསཱཀཔུཔྥཧཱརིཀཱ ཝིཡ ཨཕཱསུཀཾ ཀརོནྟི. ཝིཧཱརེ རུཀྑཱ སནྟི, ཏེ ‘‘ཚིནྡིཏྭཱ གྷརཱནི ཀརིསྶཱམཱ’’ཏི མནུསྶཱ ཨཱགནྟྭཱ ཚིནྡནྟི. སཙེ སཱཡནྷསམཡེ པདྷཱནགྷརཱ ནིཀྑམིཏྭཱ ཝིཧཱརམཛ྄ཛྷེ ཙངྐམནྟོ ཏེ དིསྭཱ ‘‘ཀིཾ ཨུཔཱསཀཱ ཨེཝཾ ཀརོཐཱ’’ཏི ཝདཏི, ཡཐཱརུཙི ཨཀྐོསནྟི, ཨཝཱསཱཡཔིསྶ པརཀྐམནྟི.

ཡོ ¶ པན ཁེཏྟསནྣིསྶིཏོ ཧོཏི སམནྟཱ ཁེཏྟེཧི པརིཝཱརིཏོ, ཏཏྠ མནུསྶཱ ཝིཧཱརམཛ྄ཛྷེཡེཝ ཁལཾ ཀཏྭཱ དྷཉྙཾ མདྡནྟི, པམུཁེསུ སཡནྟི, ཨཉྙམྤི བཧུཾ ཨཕཱསུཾ ཀརོནྟི. ཡཏྲཔི མཧཱསངྒྷབྷོགོ ཧོཏི, ཨཱརཱམིཀཀུལཱནཾ གཱཝོ རུནྡྷནྟི, ཨུདཀཝཱརཾ པཊིསེདྷེནྟི, མནུསྶཱ ཝཱིཧིསཱིསཾ གཧེཏྭཱ ‘‘པསྶཐ ཏུམྷཱཀཾ ཨཱརཱམིཀཀུལཱནཾ ཀམྨ’’ནྟི སངྒྷསྶ དསྶེནྟི. ཏེན ཏེན ཀཱརཎེན རཱཛརཱཛམཧཱམཏྟཱནཾ གྷརདྭཱརཾ གནྟབྦཾ ཧོཏི, ཨཡམྤི ཁེཏྟསནྣིསྶིཏེནེཝ སངྒཧིཏོ.

ཡཏྠ ཨཉྙམཉྙཝིསབྷཱགཱ ཝེརཱི བྷིཀྑཱུ ཝིཧརནྟི, ཡེ ཀལཧཾ ཀརོནྟཱ ‘‘མཱ, བྷནྟེ, ཨེཝཾ ཀརོཐཱ’’ཏི ཝཱརིཡམཱནཱ ‘‘ཨེཏསྶ པཾསུཀཱུལིཀསྶ ཨཱགཏཀཱལཏོ པཊྛཱཡ ནཊྛཱམྷཱ’’ཏི ཝཏྟཱརོ བྷཝནྟི.

ཡོཔི ཨུདཀཔཊྚནཾ ཝཱ ཐལཔཊྚནཾ ཝཱ སནྣིསྶིཏོ ཧོཏི, ཏཏྠ ཨབྷིཎྷཾ ནཱཝཱཧི ཙ སཏྠེཧི ཙ ཨཱགཏམནུསྶཱ ‘‘ཨོཀཱསཾ དེཐ, པཱནཱིཡཾ དེཐ, ལོཎཾ དེཐཱ’’ཏི གྷཊྚཡནྟཱ ཨཕཱསུཾ ཀརོནྟི.

པཙྩནྟསནྣིསྶིཏེ པན མནུསྶཱ བུདྡྷཱདཱིསུ ཨཔྤསནྣཱ ཧོནྟི.

རཛྫསཱིམསནྣིསྶིཏེ ¶ རཱཛབྷཡཾ ཧོཏི. ཏཉྷི པདེསཾ ཨེཀོ རཱཛཱ ‘‘ན མཡ྄ཧཾ ཝསེ ཝཏྟཏཱི’’ཏི པཧརཏི, ཨིཏརོཔི ‘‘ན མཡ྄ཧཾ ཝསེ ཝཏྟཏཱི’’ཏི. ཏཏྲཱཡཾ བྷིཀྑུ ཀདཱཙི ཨིམསྶ རཉྙོ ཝིཛིཏེ ཝིཙརཏི, ཀདཱཙི ཨེཏསྶ, ཨཐ ནཾ ‘‘ཙརཔུརིསོ ཨཡ’’ནྟི མཉྙམཱནཱ ཨནཡབྱསནཾ པཱཔེནྟི.

ཨསཔྤཱཡཏཱཏི ཝིསབྷཱགརཱུཔཱདིཨཱརམྨཎསམོསརཎེན ཝཱ ཨམནུསྶཔརིགྒཧིཏཏཱཡ ཝཱ ཨསཔྤཱཡཏཱ. ཏཏྲིདཾ ཝཏྠུ – ཨེཀོ ཀིར ཐེརོ ཨརཉྙེ ཝསཏི. ཨཐསྶ ཨེཀཱ ཡཀྑིནཱི པཎྞསཱལདྭཱརེ ཋཏྭཱ གཱཡི. སོ ནིཀྑམིཏྭཱ དྭཱརེ ཨཊྛཱསི, སཱ གནྟྭཱ ཙངྐམནསཱིསེ གཱཡི. ཐེརོ ཙངྐམནསཱིསཾ ཨགམཱསི, སཱ སཏཔོརིསེ པཔཱཏེ ཋཏྭཱ གཱཡི. ཐེརོ པཊིནིཝཏྟི, ཨཐ ནཾ སཱ ཝེགེན གནྟྭཱ གཧེཏྭཱ ‘‘མཡཱ, བྷནྟེ, ན ཨེཀོ, ན དྭེ ཏུམྷཱདིསཱ ཁཱདིཏཱ’’ཏི ཨཱཧ.

ཡཏྠ ན སཀྐཱ ཧོཏི ཨཱཙརིཡཾ ཝཱ ཨཱཙརིཡསམཾ ཝཱ ཨུཔཛ྄ཛྷཱཡཾ ཝཱ ཨུཔཛ྄ཛྷཱཡསམཾ ཝཱ ¶ ཀལྱཱཎམིཏྟཾ ལདྡྷུཾ, ཏཏྠ སོ ཀལྱཱཎམིཏྟཱནཾ ཨལཱབྷོ མཧཱདོསོཡེཝ. ཏསྨཱ ཨིམེསཾ ཨཊྛཱརསནྣཾ དོསཱནཾ ཨཉྙཏརེན སམནྣཱགཏཾ སེནཱསནཾ བྷཱཝནཱཡ ཨནནུརཱུཔནྟི ཝེདིཏབྦཾ. ཝུཏྟམྤི ཙེཏཾ ཨཊྛཀཐཱསུ –

‘‘མཧཱཝཱསཾ ནཝཱཝཱསཾ, ཛརཱཝཱསཉྩ པནྠནིཾ;

སོཎྜིཾ པཎྞཉྩ པུཔྥཉྩ, ཕལཾ པཏྠིཏམེཝ ཙ.

‘‘ནགརཾ དཱརུནཱ ཁེཏྟཾ, ཝིསབྷཱགེན པཊྚནཾ;

པཙྩནྟསཱིམཱསཔྤཱཡཾ, ཡཏྠ མིཏྟོ ན ལབྦྷཏི.

‘‘ཨཊྛཱརསེཏཱནི ཋཱནཱནི, ཨིཏི ཝིཉྙཱཡ པཎྜིཏོ;

ཨཱརཀཱ པརིཝཛྫེཡྻ, མགྒཾ སཔྤཊིབྷཡཾ ཡཐཱ’’ཏི. (ཝིསུདྡྷི. ༡.༥༢);

པཉྩསེནཱསནངྒསམནྣཱགཏནྟི གཱམཏོ ནཱཏིདཱུརནཱཙྩཱསནྣཏཱདཱིཧི པཉྩཧི སེནཱསནངྒེཧི སམནྣཱགཏཾ. ཝུཏྟཉྷེཏཾ བྷགཝཏཱ –

‘‘ཀཐཉྩ, བྷིཀྑཝེ, སེནཱསནཾ པཉྩངྒསམནྣཱགཏཾ ཧོཏི? ཨིདྷ, བྷིཀྑཝེ, སེནཱསནཾ ནཱཏིདཱུརཾ ཧོཏི ནཱཙྩཱསནྣཾ གམནཱགམནསམྤནྣཾ, དིཝཱ ཨཔྤཱཀིཎྞཾ རཏྟིཾ ཨཔྤསདྡཾ ཨཔྤནིགྒྷོསཾ, ཨཔྤཌཾསམཀསཝཱཏཱཏཔསརཱིསཔསམྥསྶཾ, ཏསྨིཾ ཁོ པན སེནཱསནེ ཝིཧརནྟསྶ ¶ ཨཔྤཀསིརེན ཨུཔྤཛྫནྟི ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱ, ཏསྨིཾ ཁོ པན སེནཱསནེ ཐེརཱ བྷིཀྑཱུ ཝིཧརནྟི བཧུསྶུཏཱ ཨཱགཏཱགམཱ དྷམྨདྷརཱ ཝིནཡདྷརཱ མཱཏིཀཱདྷརཱ, ཏེ ཀཱལེན ཀཱལཾ ཨུཔསངྐམིཏྭཱ པརིཔུཙྪཏི པརིཔཉྷཏི ‘ཨིདཾ, བྷནྟེ, ཀཐཾ, ཨིམསྶ ཀོ ཨཏྠོ’ཏི. ཏསྶ ཏེ ཨཱཡསྨནྟོ ཨཝིཝཊཉྩེཝ ཝིཝརནྟི, ཨནུཏྟཱནཱིཀཏཉྩ ཨུཏྟཱནིཾ ཀརོནྟི, ཨནེཀཝིཧིཏེསུ ཙ ཀངྑཱཋཱནིཡེསུ དྷམྨེསུ ཀངྑཾ པཊིཝིནོདེནྟི. ཨེཝཾ ཁོ, བྷིཀྑཝེ, སེནཱསནཾ པཉྩངྒསམནྣཱགཏཾ ཧོཏཱི’’ཏི (ཨ. ནི. ༡༠.༡༡).

ཨེཏྠ ཙ ནཱཏིདཱུརཾ ནཱཙྩཱསནྣཾ གམནཱགམནསམྤནྣནྟི ཨེཀཾ ཨངྒཾ, དིཝཱ ཨཔྤཱཀིཎྞཾ རཏྟིཾ ཨཔྤསདྡཾ ཨཔྤནིགྒྷོསནྟི ཨེཀཾ, ཨཔྤཌཾསམཀསཝཱཏཱཏཔསརཱིསཔསམྥསྶནྟི ཨེཀཾ, ཏསྨིཾ ཁོ པན ¶ སེནཱསནེ ཝིཧརནྟསྶ…པེ… པརིཀྑཱརཱཏི ཨེཀཾ, ཏསྨིཾ ཁོ པན སེནཱསནེ ཐེརཱ…པེ… ཀངྑཾ པཊིཝིནོདེནྟཱིཏི ཨེཀཾ. ཨེཝཾ པཉྩངྒཱནི ཝེདིཏབྦཱནི.

ཨུཔཙྪིནྣཁུདྡཀཔལིབོདྷེནཱཏི ཨེཏྠ པན ཁུདྡཀཔལིབོདྷེ ཨུཔཙྪིནྡནྟེན དཱིགྷཱནི ཀེསནཁལོམཱནི ཚིནྡིཏབྦཱནི, ཛིཎྞཙཱིཝརེསུ ཨགྒལ༹ཨནུཝཱཏཔརིབྷཎྜདཱནཱདིནཱ དལ༹ྷཱིཀམྨཾ ཝཱ ཏནྟུཙྪེདཱདཱིསུ ཏུནྣཀམྨཾ ཝཱ ཀཱཏབྦཾ, ཀིལིཊྛཱནི ཝཱ རཛིཏབྦཱནི. སཙེ པཏྟེ མལཾ ཧོཏི, པཏྟོ པཙིཏབྦོ, མཉྩཔཱིཋཱདཱིནི སོདྷེཏབྦཱནི. བྷཏྟསམྨདཾ པཊིཝིནོདེཏྭཱཏི བྷོཛནནིམིཏྟཾ པརིསྶམཾ ཝིནོདེཏྭཱ. ཨཱཧཱརེ ཧི ཨཱསཡཾ པཝིཊྛམཏྟེ ཏསྶ ཨཱགནྟུཀཏཱཡ ཡེབྷུཡྻེན སིཡཱ སརཱིརསྶ ཀོཙི པརིསྶམོ, ཏཾ ཝཱུཔསམེཏྭཱ. ཏསྨིཉྷི ཨཝཱུཔསནྟེ སརཱིརཁེདེན ཙིཏྟཾ ཨེཀགྒཏཾ ན ལབྷེཡྻཱཏི. ཨུགྒཧེཏབྦཏོ ཨུགྒཧོ, སབྦོཔི ཀམྨཊྛཱནཝིདྷི, ན པུབྦེ ཝུཏྟཨུགྒཧམཏྟཾ. ཨཱཙརིཡཏོ ཨུགྒཧོ ཨཱཙརིཡུགྒཧོ, ཏཏོ. ཨེཀཔདམྤཱིཏི ཨེཀཀོཊྛཱསམྤི.

ཨནུབནྡྷནཱཏི ཨསྶཱསཔསྶཱསཱནཾ ཨནུགམནཝསེན སཏིཡཱ ནིརནྟརཾ ཨནུཔཝཏྟནཱ. ཕུསནཱཏི ཨསྶཱསཔསྶཱསེ གཎེནྟསྶ གཎནཾ པཊིསཾཧརིཏྭཱ ཏེ སཏིཡཱ ཨནུབནྡྷནྟསྶ ཡཐཱ ཨཔྤནཱ ཧོཏི, ཏཐཱ ཙིཏྟཾ ཋཔེནྟསྶ ཙ ནཱསིཀགྒཱདིཊྛཱནསྶ ནེསཾ ཕུསནཱ. ཡསྨཱ པན གཎནཱདིཝསེན ཝིཡ ཕུསནཱདིཝསེན ཝིསུཾ མནསིཀཱརོ ནཏྠི, ཕུཊྛཕུཊྛཊྛཱནེཡེཝ ¶ གཎནཱ ཀཱཏབྦཱཏི དསྶེཏུཾ ཨིདྷ ཕུསནཱགཧཎནྟི དཱིཔེནྟོ ‘‘ཕུསནཱཏི ཕུཊྛཊྛཱན’’ནྟི ཨཱཧ. ཋཔནཱཏི སམཱདྷཱནཾ. ཏཉྷི སམྨདེཝ ཨཱརམྨཎེ ཙིཏྟསྶ ཨཱདྷཱནཾ ཋཔནཾ ཧོཏི. ཏཐཱ ཧི སམཱདྷི ‘‘ཙིཏྟསྶ ཋིཏི སཎྛིཏཱི’’ཏི ནིདྡིཊྛོ. སམཱདྷིཔྤདྷཱནཱ པན ཨཔྤནཱཏི ཨཱཧ ‘‘ཋཔནཱཏི ཨཔྤནཱ’’ཏི. ཨནིཙྩཏཱདཱིནཾ སཾལཀྑཎཏོ སལླཀྑཎཱ ཝིཔསྶནཱ. པཝཏྟཏོ ནིམིཏྟཏོ ཙ ཝིནིཝཊྚནཏོ ཝིནིཝཊྚནཱ མགྒོ. སཀལསཾཀིལེསཔཊིཔྤསྶདྡྷིབྷཱཝཏོ སབྦསོ སུདྡྷཱིཏི པཱརིསུདྡྷི ཕལཾ. ཏེསནྟི ཝིཝཊྚནཱཔཱརིསུདྡྷཱིནཾ. པཊིཔསྶནཱཏི པཏི པཏི དསྶནཾ པེཀྑནཾ. ཏེནཱཧ ‘‘པཙྩཝེཀྑཎཱ’’ཏི.

ཁཎྜནྟི ཨེཀཾ ཏཱིཎི པཉྩཱཏི ཨེཝཾ གཎནཱཡ ཁཎྜནཾ. ཨོཀཱསེཏི གཎནཱཝིདྷིཾ སནྡྷཱཡཱཧ, གཎནཱནིསྶིཏོཝ ན ཀམྨཊྛཱནནིསྶིཏོ. སིཁཱཔྤཏྟཾ ནུ ཁོཏི ཨིདཾ ཙིརཏརཾ གཎནཱཡ མནསིཀརོནྟསྶ ཝསེན ཝུཏྟཾ. སོ ཧི ཏཐཱ ལདྡྷཾ ཨཝིཀྑེཔམཏྟཾ ནིསྶཱཡ ཨེཝཾ མཉྙེཡྻ. ཨསྶཱསཔསྶཱསེསུ ཡོ ཨུཔཊྛཱཏི, ཏཾ གཧེཏྭཱཏི ཨིདཾ ཨསྶཱསཔསྶཱསེསུ ཡསྶ ཨེཀོཝ པཋམཾ ཨུཔཊྛཱཏི, ཏཾ སནྡྷཱཡ ཝུཏྟཾ. ཡསྶ པན ཨུབྷོཔི ཨུཔཊྛཧནྟི, ཏེན ཨུབྷཡམྤི གཧེཏྭཱ གཎེཏབྦཾ ¶ . ཡོ ཨུཔཊྛཱཏཱིཏི ཨིམིནཱ ཙ དྭཱིསུ ནཱསཱཔུཊཝཱཏེསུ ཡོ པཱཀཊཏརོ ཨུཔཊྛཱཏི, སོ གཧེཏབྦོཏི ཨཡམྤི ཨཏྠོ དཱིཔིཏོཏི དཊྛབྦཾ. པཝཏྟམཱནཾ པཝཏྟམཱནནྟི ཨཱམེཌིཏཝཙནེན ནིརནྟརཾ ཨསྶཱསཔསྶཱསཱནཾ ཨུཔལཀྑཎཾ དསྶེཏི. ཨེཝནྟི ཝུཏྟཔྤཀཱརེན ཨུཔལཀྑེཏྭཱཝཱཏི ཨཏྠོ. པཋམཾ ཨེཀེཀསྨིཾ ཨུཔཊྛིཏེཔི ཨུཔལཀྑེཏྭཱཝ གཎེནྟསྶ ཀམེན ཨུབྷོཔི པཱཀཊཱ ཧོནྟཱིཏི ཨཱཧ – ‘‘ཨསྶཱསཔསྶཱསཱ པཱཀཊཱ ཧོནྟཱི’’ཏི. ཏེན ‘‘ཨུཔལཀྑེཏྭཱཝ གཎེཏབྦ’’ནྟི ཨིམསྶ ‘‘ཏསྶེཝཾ གཎཡཏོ…པེ… པཱཀཊཱ ཧོནྟཱི’’ཏི ཨིདཾ ཀཱརཎཝཙནཾ དཊྛབྦཾ. ཏཏྠ པཱཀཊཱ ཧོནྟཱིཏི གཎནཱཝསེན བཧིདྡྷཱ ཝིཀྑེཔཱབྷཱཝཏོ ཝིབྷཱུཏཱ ཧོནྟི.

པལིགྷཱཡ པརིཝཏྟནཀཾ ཡཏྠ ནིཀྑིཔནྟི, སོ པལིགྷཏྠམྦྷོ. ཏིཡཱམརཏྟིནྟི ཨཙྩནྟསཾཡོགེ ཨུཔཡོགཝཙནཾ. པུརིམནཡེནཱཏི སཱིགྷགཎནཱཡ, གོཔཱལཀགཎནཱཡཱཏི ཨཏྠོ. ཨེཀོ དྭེ ཏཱིཎི ཙཏྟཱརི པཉྩཱཏི གཎནཱཝིདྷིདསྶནཾ. ཏསྨཱ ཨཊྛཱཏིཨཱདཱིསུཔི ཨེཀཏོ པཊྛཱཡེཝ པཙྩེཀཾ ཨཊྛཱདཱིནི པཱཔེཏབྦཱནི. ‘‘སཱིགྷཾ སཱིགྷཾ གཎེཏབྦམེཝཱ’’ཏི ཝཏྭཱ ཏཏྠ ¶ ཀཱརཎཾ ནིདསྶནཉྩ དསྶེཏི ‘‘གཎནཱཔཊིབདྡྷེ ཧཱི’’ཏིཨཱདིནཱ. ཏཏྠ ཨརཱིཡཏི ཏེན ནཱཝཱཏི ཨརིཏྟཾ, པཱཛནདཎྜོ. ཨརིཏྟེན ཨུཔཏྠམྦྷནཾ ཨརིཏྟུཔཏྠམྦྷནཾ, ཏསྶ ཝསེན.

ནིཔྤརིཡཱཡཏོ ནིརནྟརཔྤཝཏྟི ནཱམ ཋཔནཱཡམེཝཱཏི ཨཱཧ ‘‘ནིརནྟརཔྤཝཏྟཾ ཝིཡཱ’’ཏི. ཨནྟོ པཝིསནྟཾ མནསིཀརོནྟོ ཨནྟོ ཙིཏྟཾ པཝེསེཏི ནཱམ. བཧི ཙིཏྟནཱིཧརཎེཔི ཨེསེཝ ནཡོ. ཝཱཏབྦྷཱཧཏནྟི ཨབྦྷནྟརགཏཝཱཏཾ བཧུལཾ མནསིཀརོནྟསྶ ཝཱཏེན ཏཾ ཋཱནཾ ཨབྦྷཱཧཏཾ ཝིཡ མེདེན པཱུརིཏཾ ཝིཡ ཙ ཧོཏི, ཏཐཱ ཨུཔཊྛཱཏི. ནཱིཧརཏོཏི ཕུཊྛོཀཱསཾ མུཉྩིཏྭཱ ནཱིཧརཏོ. ཏཐཱ པན ནཱིཧརཏོ ཝཱཏསྶ གཏིསམནྭེསནམུཁེན ནཱནཱརམྨཎེསུ ཙིཏྟཾ ཝིདྷཱཝཏཱིཏི ཨཱཧ ‘‘པུཐུཏྟཱརམྨཎེ ཙིཏྟཾ ཝིཀྑིཔཏཱི’’ཏི.

ཨེཏནྟི ཨེཏཾ ཨསྶཱསཔསྶཱསཛཱཏཾ. ཨནུགམནནྟི པཝཏྟཔཝཏྟཱནཾ ཨསྶཱསཔསྶཱསཱནཾ ཨཱརམྨཎཀརཎཝསེན སཏིཡཱ ཨནུ ཨནུ པཝཏྟནཾ ཨནུགཙྪནཾ. ཏེནེཝཱཧ – ‘‘ཏཉྩ ཁོ ཨཱདིམཛ྄ཛྷཔརིཡོསཱནཱནུགམནཝསེནཱ’’ཏི. ནཱབྷི ཨཱདི ཏཏྠ པཋམཾ ཨུཔྤཛྫནཏོ. པཋམུཔྤཏྟིཝསེན ཧི ཨིདྷ ཨཱདིཙིནྟཱ, ན ཨུཔྤཏྟིམཏྟཝསེན. ཏཐཱ ཧི ཏེ ནཱབྷིཏོ པཊྛཱཡ ཡཱཝ ནཱསིཀགྒཱ སབྦཏྠ ཨུཔྤཛྫནྟེཝ. ཡཏྠ ཡཏྠ ཙ ཨུཔྤཛྫནྟི, ཏཏྠ ཏཏྠེཝ བྷིཛྫནྟི དྷམྨཱནཾ གམནཱབྷཱཝཏོ. ཡཐཱཔཙྩཡཾ པན དེསནྟརཔྤཏྟིཡཾ གཏིསམཉྙཱ. ཧདཡཾ མཛ྄ཛྷནྟི ཧདཡསམཱིཔཾ ཏསྶ ཨུཔརིབྷཱགོ མཛ྄ཛྷཾ. ནཱསིཀགྒཾ པརིཡོསཱནནྟི ནཱསིཀཊྛཱནཾ ཏསྶ པརིཡོསཱནཾ ཨསྶཱསཔསྶཱསཱནཾ སམཉྙཱཡ ཏདཝདྷིབྷཱཝཏོ. ཏཐཱ ཧེཏེ ཙིཏྟསམུཊྛཱནཱ ཝུཏྟཱ, ན ཙ བཧིདྡྷཱ ཙིཏྟསམུཊྛཱནཱནཾ ¶ སམྦྷཝོ ཨཏྠི. ཏེནཱཧ ‘‘ཨབྦྷནྟརཔཝིསནཝཱཏསྶ ནཱསིཀགྒཾ ཨཱདཱི’’ཏི. པཝིསནནིཀྑམནཔརིཡཱཡོ པན ཏཾསདིསཝསེནེཝ ཝུཏྟོཏི ཝེདིཏབྦོ. ཝིཀྑེཔགཏནྟི ཝིཀྑེཔཾ ཨུཔགཏཾ, ཝིཀྑིཏྟཾ ཨསམཱཧིཏནྟི ཨཏྠོ. སཱརདྡྷཱཡཱཏི སདརཐབྷཱཝཱཡ. ཨིཉྫནཱཡཱཏི ཀམྨཊྛཱནམནསིཀཱརསྶ ཙལནཱཡ. ཝིཀྑེཔགཏེན ཙིཏྟེནཱཏི ཧེཏུམྷི ཀརཎཝཙནཾ, ཨིཏྠམྦྷཱུཏལཀྑཎེ ཝཱ. སཱརདྡྷཱཏི སདརཐཱ. ཨིཉྫིཏཱཏི ཨིཉྫནཀཱ ཙལནཀཱ, ཏཐཱ ཕནྡིཏཱ.

ཨཱདིམཛ྄ཛྷཔརིཡོསཱནཝསེནཱཏིཨཱདིམཛ྄ཛྷཔརིཡོསཱནཱནུགམནཝསེན ན མནསི ཀཱཏབྦནྟི སམྦནྡྷོ. ‘‘ཨནུབནྡྷནཱཡ མནསིཀརོནྟེན ཕུསནཱཝསེན ¶ ཋཔནཱཝསེན ཙ མནསི ཀཱཏབྦ’’ནྟི ཡེན ཨདྷིཔྤཱཡེན ཝུཏྟཾ, ཏཾ ཝིཝརིཏུཾ ‘‘གཎནཱནུབནྡྷནཱཝསེན ཝིཡཱ’’ཏིཨཱདིམཱཧ. ཏཏྠ ཝིསུཾ མནསིཀཱརོ ནཏྠཱིཏི གཎནཱཡ ཨནུབནྡྷནཱཡ ཙ ཝིནཱ ཡཐཱཀྐམཾ ཀེཝལཾ ཕུསནཱཝསེན ཋཔནཱཝསེན ཙ ཀམྨཊྛཱནམནསིཀཱརོ ནཏྠི. ནནུ ཕུསནཱཡ ཝིནཱ ཋཔནཱཡ ཝིཡ ཕུསནཱཡ ཝིནཱ གཎནཱཡཔི མནསིཀཱརོ ནཏྠིཡེཝཱཏི? ཡདིཔི ནཏྠི, གཎནཱ པན ཡཐཱ ཀམྨཊྛཱནམནསིཀཱརསྶ མཱུལབྷཱཝཏོ པདྷཱནབྷཱཝེན གཧེཏབྦཱ, ཨེཝཾ ཨནུབནྡྷནཱ ཋཔནཱཡ ཏཱཡ ཝིནཱ ཋཔནཱཡ ཨསམྦྷཝཏོ. ཏསྨཱ སཏིཔི ཕུསནཱཡ ནཱནནྟརིཀབྷཱཝེ གཎནཱནུབནྡྷནཱ ཨེཝ མཱུལབྷཱཝཏོ པདྷཱནབྷཱཝེན གཧེཏྭཱ ཨིཏརཱསཾ ཏདབྷཱཝཾ དསྶེནྟོ ཨཱཧ – ‘‘གཎནཱནུབནྡྷནཱཝསེན ཝིཡ ཧི ཕུསནཱཋཔནཱཝསེན ཝིསུཾ མནསིཀཱརོ ནཏྠཱི’’ཏི. ཡདི ཨེཝཾ ཏཱ ཀསྨཱ ཨུདྡེསེ ཝིསུཾ གཧིཏཱཏི ཨཱཧ ‘‘ཕུཊྛཕུཊྛཊྛཱནེཡེཝཱ’’ཏིཨཱདི. ཏཏྠ ཕུཊྛཕུཊྛཊྛཱནེཡེཝ གཎེནྟོཏི ཨིམིནཱ གཎནཱཡ ཕུསནཱ ཨངྒནྟི དསྶེཏི. ཏེནཱཧ – ‘‘གཎནཱཡ ཙ ཕུསནཱཡ ཙ མནསི ཀརོཏཱི’’ཏི. ཏཏྠེཝཱཏི ཕུཊྛཕུཊྛཊྛཱནེཡེཝ. ཏེཏི ཨསྶཱསཔསྶཱསེ. སཏིཡཱ ཨནུབནྡྷནྟོཏི གཎནཱཝིདྷིཾ ཨནུགནྟྭཱ སཏིཡཱ ནིབནྡྷནྟོ, ཕུཊྛོཀཱསེཡེཝ ཏེ ནིརནྟརཾ ཨུཔདྷཱརེནྟོཏི ཨཏྠོ. ཨཔྤནཱཝསེན ཙིཏྟཾ ཋཔེནྟོཏི ཡཐཱ ཨཔྤནཱ ཧོཏི, ཨེཝཾ ཡཐཱཨུཔཊྛིཏེ ནིམིཏྟེ ཙིཏྟཾ ཋཔེནྟོ སམཱདཧནྟོ. ཨནུབནྡྷནཱཡ ཙཱཏིཨཱདཱིསུ ཨནུབནྡྷནཱཡ ཙ ཕུསནཱཡ ཙ ཋཔནཱཡ ཙ མནསི ཀརོཏཱིཏི ཝུཙྩཏཱིཏི ཡོཛནཱ. སྭཱཡམཏྠོཏི ཡྭཱཡཾ ‘‘ཕུཊྛཕུཊྛཊྛཱནེཡེཝ གཎེནྟོ ཏཏྠེཝ གཎནཾ པཊིསཾཧརིཏྭཱ ཏེ སཏིཡཱ ཨནུབནྡྷནྟོ’’ཏི ཝུཏྟོ, སོ ཨཡམཏྠོ. ཡཱ ཨཙྩནྟཱཡ ན མིནོཏི ན ཝིནིཙྪིནཏི, སཱ མཱནསྶ སམཱིཔེཏི ཨུཔམཱ ཡཐཱ གོཎོ ཝིཡ གཝཡོཏི.

པངྒུལོ༹ཏི པཱིཋསཔྤཱི. དོལཱཏི པེངྑོལོ. ཀཱིལ༹ཏནྟི ཀཱིལ༹ནྟཱནཾ. མཱཏཱཔུཏྟཱནནྟི ཨཏྟནོ བྷརིཡཱཡ པུཏྟསྶ ཙ. ཨུབྷོ ཀོཊིཡོཏི ཨཱགཙྪནྟསྶ པུརིམཀོཊིཾ, གཙྪནྟསྶ པཙྪིམཀོཊིནྟི དྭེཔི ཀོཊིཡོ. མཛ྄ཛྷཉྩཱཏི དོལཱཕལཀསྶེཝ མཛ྄ཛྷཾ. ཨུཔནིབནྡྷནཏྠམྦྷོ ཝིཡཱཏི ཨུཔནིབནྡྷནཏྠམྦྷོ, ནཱསིཀགྒཾ མུཁནིམིཏྟཾ ཝཱ, ཏསྶ མཱུལེ སམཱིཔེ ཋཏྭཱ. ཀཐཾ ཋཏྭཱ ¶ ? སཏིཡཱ ཝསེན. སཏིཉྷི ཏཏྠ སཱུཔཊྛིཏཾ ཀརོནྟོ ཡོགཱཝཙརོ ཏཏྠ ཋིཏོ ནཱམ ཧོཏི ཨཝཡཝདྷམྨེན སམུདཱཡསྶ ཨཔདིསིཏབྦཏོ ¶ . ནིམིཏྟེཏི ནཱསིཀགྒཱདིནིམིཏྟེ. སཏིཡཱ ནིསིནྣོཏི སཏིཝསེན ནིསཱིདནྟོ. ‘‘སཏིཉྷི ཏཏྠཱ’’ཏིཨཱདིནཱ ཋཱནེ ཝིཡ ཝཏྟབྦཾ. ཏཏྠཱཏི ཕུཊྛཊྛཱནེ. ཏེཏི ནགརསྶ ཨནྟོ བཧི ཙ གཏཱ མནུསྶཱ ཏེསཾ སངྒཧཱ ཙ ཧཏྠགཏཱ. ཨཱདིཏོ པབྷུཏཱིཏི ཨུཔམེཡྻཏྠདསྶནཏོ པཊྛཱཡ.

གཱཐཱཡཾ ནིམིཏྟནྟི ཨུཔནིབནྡྷནནིམིཏྟཾ. ཨནཱརམྨཎམེཀཙིཏྟསྶཱཏི ཨེཀསྶ ཙིཏྟསྶ ན ཨཱརམྨཎཾ, ཨཱརམྨཎཾ ན ཧོནྟཱིཏི ཨཏྠོ. ཨཛཱནཏོ ཙ ཏཡོ དྷམྨེཏི ནིམིཏྟཾ ཨསྶཱསོ པསྶཱསོཏི ཨིམེ ནིམིཏྟཱདཡོ ཏཡོ དྷམྨེ ཨཱརམྨཎཀརཎཝསེན ཨཝིནྡནྟསྶ. ཙ-སདྡོ བྱཏིརེཀེ. བྷཱཝནཱཏི ཨཱནཱཔཱནསྶཏིསམཱདྷིབྷཱཝནཱ. ནུཔལབྦྷཏཱིཏི ན ཨུཔལབྦྷཏི ན སིཛ྄ཛྷཏཱིཏི ཨཡཾ ཙོདནཱགཱཐཱཡ ཨཏྠོ. དུཏིཡཱ པན པརིཧཱརགཱཐཱ སུཝིཉྙེཡྻཱཝ.

ཀཐནྟི ཏཱསཾ ཙོདནཱཔརིཧཱརགཱཐཱནཾ ཨཏྠཾ ཝིཝརིཏུཾ ཀཐེཏུཀམྱཏཱཔུཙྪཱ. ཨིམེ ཏཡོ དྷམྨཱཏིཨཱདཱིསུ པདཡོཛནཱཡ སདྡྷིཾ ཨཡམཏྠནིདྡེསོ – ཨིམེ ནིམིཏྟཱདཡོ ཏཡོ དྷམྨཱ ཨེཀཙིཏྟསྶ ཀཐཾ ཨཱརམྨཎཾ ན ཧོནྟི, ཨསཏིཔི ཨཱརམྨཎབྷཱཝེ ན ཙིམེ ན ཙ ཨིམེ ཏཡོ དྷམྨཱ ཨཝིདིཏཱ ཧོནྟི, ཀཐཉྩ ན ཧོནྟི ཨཝིདིཏཱ, ཏེསཉྷི ཨཝིདིཏཏྟེ ཙིཏྟཉྩ ཀཐཾ ཝིཀྑེཔཾ ན གཙྪཏི, པདྷཱནཉྩ བྷཱཝནཱཡ ནིཔྥཱདཀཾ ཝཱིརིཡཉྩ ཀཐཾ པཉྙཱཡཏི, ནཱིཝརཎཱནཾ ཝིཀྑམྦྷཀཾ སམྨདེཝ སམཱདྷཱནཱཝཧཾ བྷཱཝནཱནུཡོགསངྑཱཏཾ པཡོགཉྩ ཡོགཱི ཀཐཾ སཱདྷེཏི, ཨུཔརཱུཔརི ལོཀིཡལོཀུཏྟརཉྩ ཝིསེསཾ ཀཐམདྷིགཙྪཏཱིཏི.

ཨིདཱནི ཏམཏྠཾ ཀཀཙོཔམཱཡ སཱདྷེཏུཾ ‘‘སེཡྻཐཱཔཱི’’ཏིཨཱདི ཝུཏྟཾ. བྷཱུམིབྷཱགསྶ ཝིསམཏཱཡ ཙཉྩལེ རུཀྑེ ཚེདནཀིརིཡཱ ན སུཀརཱ སིཡཱ, ཏཐཱ ཙ སཏི ཀཀཙདནྟགཏི དུཝིཉྙེཡྻཱཏི ཨཱཧ – ‘‘སམེ བྷཱུམིབྷཱགེ’’ཏི. ཀཀཙེནཱཏི ཁུདྡཀེན ཁརཔཏྟེན. ཏེནཱཧ ‘‘པུརིསོ’’ཏི. ཕུཊྛཀཀཙདནྟཱནནྟི ཕུཊྛཕུཊྛཀཀཙདནྟཱནཾ ཝསེན. ཏེན ཀཀཙདནྟེཧི ཕུཊྛཕུཊྛཊྛཱནེཡེཝ པུརིསསྶ སཏིཡཱ ཨུཔཊྛཱནཾ དསྶེཏི. ཏེནཱཧ – ‘‘ན ཨཱགཏེ ཝཱ གཏེ ཝཱ ཀཀཙདནྟེ མནསི ཀརོཏཱི’’ཏི.

ཀཀཙསྶ ¶ ཨཱཀཌྜྷནཀཱལེ པུརིསཱབྷིམུཁཾ པཝཏྟཱ ཨཱགཏཱ, པེལླནཀཱལེ ཏཏོ ཝིགཏཱ གཏཱཏི ཝུཏྟཱ, ན ཙ ཨཱགཏཱ ཝཱ གཏཱ ཝཱ ཀཀཙདནྟཱ ཨཝིདིཏཱ ཧོནྟི སབྦཏྠ སཏིཡཱ ཨུཔཊྛིཏཏྟཱ ཚིནྡིཏབྦཊྛཱནཾ ཨཕུསིཏྭཱ གཙྪནྟཱནཾ ཨཱགཙྪནྟཱནཉྩ ཀཀཙདནྟཱནཾ ཨབྷཱཝཏོ. པདྷཱནནྟི ¶ རུཀྑསྶ ཚེདནཝཱིརིཡཾ. པཡོགནྟི ཏསྶེཝ ཚེདནཀིརིཡཾ. ཨུཔམཱཡཾ ‘‘ཝིསེསམདྷིགཙྪཏཱི’’ཏི པདཾ པཱལི༹ཡཾ ནཏྠི, ཡོཛེཏྭཱ པན དསྶེཏབྦཾ. ཏེནེཝ ཝིསུདྡྷིམགྒེ (ཝིསུདྡྷི. ༡.༢༢༧) ཨུཔམཱཡམྤི ‘‘ཝིསེསམདྷིགཙྪཏཱི’’ཏི པདཾ ཡོཛེཏྭཱཝ ཝུཏྟཾ. ཏཾསཾཝཎྞནཱཡཉྩ ‘‘ཝིསེསནྟི ཨནེཀབྷཱཝཱཔཱདནཾ, ཏེན ཙ སཱདྷེཏབྦཾ པཡོཛནཝིསེས’’ནྟི ཨཏྠོ ཝུཏྟོ.

ཡཐཱ རུཀྑོཏིཨཱདི ཨུཔམཱསཾསནྡནཾ. ཨུཔནིབནྡྷཏི ཨཱརམྨཎེ ཙིཏྟཾ ཨེཏཱཡཱཏི སཏི ཨུཔནིབནྡྷནཱ ནཱམ, ཏསྶཱ ཨསྶཱསཔསྶཱསཱནཾ སལླཀྑཎསྶ ནིམིཏྟནྟི ཨུཔནིབནྡྷནཱནིམིཏྟཾ, ནཱསིཀགྒཾ མུཁནིམིཏྟཾ ཝཱ. ཨེཝམེཝནྟི ཡཐཱ སོ པུརིསོ ཀཀཙེན རུཀྑཾ ཚིནྡནྟོ ཨཱགཏགཏེ ཀཀཙདནྟེ ཨམནསིཀརོནྟོཔི ཕུཊྛཕུཊྛཊྛཱནེཡེཝ སཏིཡཱ ཨུཔཊྛཔནེན ཨཱགཏགཏེ ཀཀཙདནྟེ ཛཱནཱཏི, སུཏྟཔདཉྩ ཨཝིརཛ྄ཛྷནྟོ ཨཏྠཀིཙྩཾ སཱདྷེཏི, ཨེཝམེཝཾ. ནཱསིཀགྒེ མུཁནིམིཏྟེཏི དཱིགྷནཱསིཀོ ནཱསིཀགྒེ, ཨིཏརོ མུཁཾ ཨསནཾ ནིམཱིཡཏི ཚཱདཱིཡཏི ཨེཏེནཱཏི མུཁནིམིཏྟནྟི ལདྡྷནཱམེ ཨུཏྟརོཊྛེ.

ཨིདཾ པདྷཱནནྟི ཡེན ཝཱིརིཡཱརམྦྷེན ཨཱརདྡྷཝཱིརིཡསྶ ཡོགིནོ ཀཱཡོཔི ཙིཏྟམྤི ཀམྨནིཡཾ བྷཱཝནཱཀམྨཀྑམཾ བྷཱཝནཱཀམྨཡོགྒཾ ཧོཏི, ཨིདཾ ཝཱིརིཡཾ པདྷཱནནྟི ཕལེན ཧེཏུཾ དསྶེཏི. ཨུཔཀྐིལེསཱ པཧཱིཡནྟཱིཏི ཙིཏྟསྶ ཨུཔཀྐིལེསབྷཱུཏཱནི ནཱིཝརཎཱནི ཝིཀྑམྦྷནཝསེན པཧཱིཡནྟི. ཝིཏཀྐཱ ཝཱུཔསམྨནྟཱིཏི ཏཏོ ཨེཝ ཀཱམཝིཏཀྐཱདཡོ མིཙྪཱཝིཏཀྐཱ ཨུཔསམཾ གཙྪནྟི, ནཱིཝརཎཔྤཧཱནེན ཝཱ པཋམཛ྄ཛྷཱནཱདྷིགམཾ དསྶེཏྭཱ ཝིཏཀྐཝཱུཔསམཱཔདེསེན དུཏིཡཛ྄ཛྷཱནཱདཱིནམདྷིགམམཱཧ. ཨཡཾ པཡོགོཏི ཨཡཾ ཛྷཱནཱདྷིགམསྶ ཧེཏུབྷཱུཏོ ཀམྨཊྛཱནཱནུཡོགོ པཡོགོ. སཾཡོཛནཱ པཧཱིཡནྟཱིཏི དསཔི སཾཡོཛནཱནི མགྒཔྤཊིཔཱཊིཡཱ སམུཙྪེདཝསེན པཧཱིཡནྟི. ཨནུསཡཱ བྱནྟཱི ཧོནྟཱིཏི ཏཐཱ སཏྟཔི ཨནུསཡཱ ཨནུཔྤཏྟིདྷམྨཏཱཔཱདནེན བྷངྒམཏྟསྶཔི ཨནཝསེསཏོ ཝིགཏནྟཱ ཧོནྟི. ཨེཏྠ ཙ སཾཡོཛནཔྤཧཱནཾ ནཱམ ཨནུསཡནིརོདྷེནེཝ ¶ ཧོཏི, པཧཱིནེསུ ཙ སཾཡོཛནེསུ ཨནུསཡཱནཾ ལེསོཔི ན བྷཝིསྶཏཱིཏི ཙ དསྶནཏྠཾ ‘‘སཾཡོཛནཱ པཧཱིཡནྟི, ཨནུསཡཱ བྱནྟཱི ཧོནྟཱི’’ཏི ཝུཏྟཾ. ཨཡཾ ཝིསེསོཏི ཨིམཾ སམཱདྷིཾ ནིསྶཱཡ ཨནུཀྐམེན ལབྦྷམཱནོ ཨཡཾ སཾཡོཛནཔྤཧཱནཱདིཀོ ཨིམསྶ སམཱདྷིསྶ ཝིསེསོཏི ཨཏྠོ.

ཡསྶཱཏི ཡེན. ཨནུཔུབྦནྟི ཨནུཀྐམེན. པརིཙིཏཱཏི པརིཙིཎྞཱ. ཨཡཉྷེཏྠ སངྑེཔཏྠོ – ཨཱནཱཔཱནསྶཏི ཡཐཱ བུདྡྷེན བྷགཝཏཱ དེསིཏཱ, ཏཐཱ ཡེན དཱིགྷརསྶཔཛཨཱནནཱདིཝིདྷིནཱ ¶ ཨནུཔུབྦཾ པརིཙིཏཱ སུཊྛུ བྷཱཝིཏཱ, ཏཏོ ཨེཝ པརིཔུཎྞཱ སོལ༹སནྣཾ ཝཏྠཱུནཾ པཱརིཔཱུརིཡཱ སབྦསོ པུཎྞཱ, སོ བྷིཀྑུ ཨིམཾ ཨཏྟནོ ཁནྡྷཱདིལོཀཾ པཉྙོབྷཱསེན པབྷཱསེཏི. ཡཐཱ ཀིཾ? ཨབྦྷཱ མུཏྟོཝ ཙནྡིམཱ ཨབྦྷཱདིཨུཔཀྐིལེསཝིམུཏྟོ ཙནྡིམཱ ཏཱརཀརཱཛཱ ཝིཡཱཏི. ‘‘ཨབྦྷཱ མུཏྟོཝ ཙནྡིམཱ’’ཏི ཧི པདསྶ ནིདྡེསེ མཧིཀཱདཱིནམྤི ཝུཏྟཏྟཱ ཨེཏྠ ཨཱདི-སདྡལོཔོ ཀཏོཏི ཝེདིཏབྦོ.

ཨིདྷཱཏི ཀཀཙཱུཔམཱཡ. ཨསྶཱཏི ཡོགིནོ. ཨིདྷཱཏི ཝཱ ཨིམསྨིཾ ཋཱནེ. ཨསྶཱཏི ཨུཔམཱབྷཱུཏསྶ ཀཀཙསྶ. ཨཱགཏགཏཝསེན ཡཐཱ ཏསྶ པུརིསསྶ ཨམནསིཀཱརོ, ཨེཝཾ ཨསྶཱསཔསྶཱསཱནཾ ཨཱགཏགཏཝསེན ཨམནསིཀཱརམཏྟམེཝ ཨཱནཡནཔྤཡོཛནཾ. ན ཙིརེནེཝཱཏི ཨིདཾ ཀཏཱདྷིཀཱརཾ སནྡྷཱཡ ཝུཏྟཾ. ནིམིཏྟནྟི པཊིབྷཱགནིམིཏྟཾ. ཨཝསེསཛ྄ཛྷཱནངྒཔཊིམཎྜིཏཱཏི ཝིཏཀྐཱདིཨཝསེསཛ྄ཛྷཱནངྒཔཊིམཎྜིཏཱཏི ཝདནྟི, ཝིཙཱརཱདཱིཏི པན ཝཏྟབྦཾ ནིཔྤརིཡཱཡེན ཝིཏཀྐསྶ ཨཔྤནཱབྷཱཝཏོ. སོ ཧི པཱལི༹ཡཾ ‘‘ཨཔྤནཱ བྱཔྤནཱ’’ཏི ནིདྡིཊྛོ, ཏཾསམྤཡོགཏོ ཝཱ ཡསྨཱ ཛྷཱནཾ ཨཔྤནཱཏི ཨཊྛཀཐཱཝོཧཱརོ, ཛྷཱནངྒེསུ ཙ སམཱདྷི པདྷཱནཾ, ཏསྨཱ ཏཾ ཨཔྤནཱཏི དསྶེནྟོ ‘‘ཨཝསེསཛ྄ཛྷཱནངྒཔཊིམཎྜིཏཱ ཨཔྤནཱསངྑཱཏཱ ཋཔནཱ ཙ སམྤཛྫཏཱི’’ཏི ཨཱཧ. ཀསྶཙི པན གཎནཱཝསེནེཝ མནསིཀཱརཀཱལཏོ པབྷུཏཱིཏི ཨེཏྠ ‘‘ཨནུཀྐམཏོ…པེ… པཏྟཾ ཝིཡ ཧོཏཱི’’ཏི ཨེཏྟཀོཝ གནྠོ པརིཧཱིནོ, པུརཱཎཔོཏྠཀེསུ པན ཀཏྠཙི སོ གནྠོ ལིཁིཏོཡེཝ ཏིཊྛཏི.

སཱརདྡྷཀཱཡསྶ ¶ ཀསྶཙི པུགྒལསྶ. ཨོནམཏི ཝཏྠིཀཱདིཔལམྦནེན. ཝིཀཱུཛཏཱིཏི སདྡཾ ཀརོཏི. ཝལིཾ གཎྷཱཏཱིཏི. ཏཏྠ ཏཏྠ ཝལིནཾ ཧོཏི. ཀསྨཱ? ཡསྨཱ སཱརདྡྷཀཱཡོ གརུཀོ ཧོཏཱིཏི. ཀཱཡདརཐཝཱུཔསམེན སདྡྷིཾ སིཛ྄ཛྷམཱནོ ཨོལཱ༹རིཀཨསྶཱསཔསྶཱསནིརོདྷོ བྱཏིརེཀམུཁེན ཏསྶ སཱདྷནཾ ཝིཡ ཝུཏྟོ. ཨོལཱ༹རིཀཨསྶཱསཔསྶཱསནིརོདྷཝསེནཱཏི ཨནྭཡཝསེན ཏདཏྠསྶ སཱདྷནཾ. ཀཱཡདརཐེ ཝཱུཔསནྟེཏི ཙིཏྟཛརཱུཔཱནཾ ལཧུམུདུཀམྨཉྙབྷཱཝེན ཡོ སེསཏིསནྟཏིརཱུཔཱནམྤི ལཧུཨཱདིབྷཱཝོ, སོ ཨིདྷ ཀཱཡསྶ ལཧུབྷཱཝོཏི ཨདྷིཔྤེཏོ. སྭཱཡཾ ཡསྨཱ ཙིཏྟསྶ ལཧུཨཱདིབྷཱཝེན ཝིནཱ ནཏྠི, ཏསྨཱ ཝུཏྟཾ ‘‘ཀཱཡོཔི ཙིཏྟམྤི ལཧུཀཾ ཧོཏཱི’’ཏི.

ཨོལཱ༹རིཀེ ཨསྶཱསཔསྶཱསེ ནིརུདྡྷེཏིཨཱདི ཧེཊྛཱ ཝུཏྟནཡམྷི ཝིཙེཏབྦཱཀཱརཔྤཏྟསྶ ཀཱཡསངྑཱརསྶ ཝིཙཡནཝིདྷིཾ དསྶེཏུཾ ཨཱནཱིཏཾ.

ཨུཔརཱུཔརི ¶ ཝིབྷཱུཏཱནཱིཏི བྷཱཝནཱབལེན ཨུདྡྷཾ ཨུདྡྷཾ པཱཀཊཱནི ཧོནྟི. དེསཏོཏི པཀཏིཡཱ ཕུསནདེསཏོ, པུབྦེ ཨཏྟནོ ཕུསནཝསེན ཨུཔདྷཱརིཏཊྛཱནཏོ.

‘‘ཀཏྠ ནཏྠཱི’’ཏི ཋཱནཝསེན ‘‘ཀསྶ ནཏྠཱི’’ཏི པུགྒལཝསེན ཙ ཝཱིམཾསིཡམཱནམཏྠཾ ཨེཀཛ྄ཛྷཾ ཀཏྭཱ ཝིབྷཱཝེཏུཾ ‘‘ཨནྟོམཱཏུཀུཙྪིཡ’’ནྟིཨཱདི ཝུཏྟཾ. ཏཏྠ ‘‘ཡཐཱ ཨུདཀེ ནིམུགྒསྶ ནིརུདྡྷོཀཱསཏཱཡ ཨསྶཱསཔསྶཱསཱ ན པཝཏྟནྟི, ཨེཝཾ ཨནྟོམཱཏུཀུཙྪིཡཾ. ཡཐཱ མཏཱནཾ སམུཊྛཱཔཀཙིཏྟཱབྷཱཝཏོ, ཨེཝཾ ཨསཉྙཱིབྷཱུཏཱནཾ མུཙྪཱཔརེཏཱནཾ ཨསཉྙཱིསུ ཝཱ ཛཱཏཱནཾ, ཏཐཱ ནིརོདྷསམཱཔནྣཱན’’ནྟི ཨཱཙརིཡདྷམྨཔཱལཏྠེརེན ཝུཏྟཾ. མཧཱགཎྛིཔདེ པན ‘‘མུཙྪཱཔརེཏཱནཾ ཙིཏྟཔྤཝཏྟིཡཱ དུབྦལབྷཱཝཏོ’’ཏི ཀཱརཎཾ ཝུཏྟཾ. ཙཏུཏྠཛ྄ཛྷཱནསམཱཔནྣཱནཾ དྷམྨཏཱཝསེནེཝ ནེསཾ ཨནུཔྤཛྫནཾ, ཏཐཱ རཱུཔཱརཱུཔབྷཝསམངྒཱིནཾ. ཀེཙི པན ‘‘ཨནུཔུབྦཏོ སུཁུམབྷཱཝཔྤཏྟིཡཱ ཙཏུཏྠཛ྄ཛྷཱནསམཱཔནྣསྶ, རཱུཔབྷཝེ རཱུཔཱནཾ བྷཝངྒསྶ ཙ སུཁུམབྷཱཝཏོ རཱུཔབྷཝསམངྒཱིནཾ ནཏྠཱི’’ཏི ཀཱརཎཾ ཝདནྟི. ཨཏྠིཡེཝ ཏེ ཨསྶཱསཔསྶཱསཱ པཱརིསེསཏོཏི ཨདྷིཔྤཱཡོ ཡཐཱཝུཏྟསཏྟཊྛཱནཝིནིམུཏྟསྶ ཨསྶཱསཔསྶཱསཱནཾ ཨནུཔྤཛྫནཊྛཱནསྶ ཨབྷཱཝཏོ. པཀཏིཕུཊྛཝསེནཱཏི པཀཏིཡཱ ཕུསནཊྛཱནཝསེན. ནིམིཏྟཾ ཋཔེཏབྦནྟི སཏིཡཱ ཏཏྠ སུཁཔྤཝཏྟནཏྠཾ ¶ ཐིརཏརཾ སཉྙཱཎཾ པཝཏྟེཏབྦཾ. ཐིརསཉྙཱཔདཊྛཱནཱ ཧི སཏི. ཨིམམེཝཱཏི ཨིམཾ ཨེཝ ཨནུཔཊྛཧནྟསྶ ཀཱཡསངྑཱརསྶ ཀཎྚཀུཊྛཱཔནཉཱཡེན ཨུཔཊྛཱཔནཝིདྷིམེཝ. ཨཏྠཝསནྟི ཧེཏུཾ. ཨཏྠོ ཧི ཕལཾ. སོ ཡསྶ ཝསེན པཝཏྟཏི, སོ ཨཏྠཝསོཏི. མུཊྛསྶཏིསྶཱཏི ཝིནཊྛསྶཏིསྶ. ཨསམྤཛཱནསྶཱཏི སམྤཛཉྙཝིརཧིཏསྶ, བྷཱཝེནྟསྶ ཨནུཀྐམེན ཨནུཔཊྛཧནྟེ ཨསྶཱསཔསྶཱསེ ཝཱིམཾསིཏྭཱ ‘‘ཨིམེ ཏེ’’ཏི ཨུཔདྷཱརེཏུཾ སམྨདེཝ ཛཱནིཏུཉྩ སམཏྠཱཧི སཏིཔཉྙཱཧི ཝིརཧིཏསྶཱཏི ཨདྷིཔྤཱཡོ. ཨིཏོ ཨཉྙཾ ཀམྨཊྛཱནཾ. གརུཀནྟི བྷཱརིཡཾ. སཱ ཙསྶ གརུཀཏཱ བྷཱཝནཱཡ སུདུཀྐརབྷཱཝེནཱཏི ཨཱཧ ‘‘གརུཀབྷཱཝན’’