📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིནཡཔིཊཀེ

པཱཙིཏྟིཡ-ཨཊྛཀཐཱ

༥. པཱཙིཏྟིཡཀཎྜཾ

༡. མུསཱཝཱདཝགྒོ

༡. མུསཱཝཱདསིཀྑཱཔདཝཎྞནཱ

ཡེསཾ ¶ ¶ ¶ ནཝཧི ཝགྒེཧི, སངྒཧོ སུཔྤཏིཊྛིཏོ;

ཁུདྡཀཱནཾ ཨཡཾ དཱནི, ཏེསཾ བྷཝཏི ཝཎྞནཱ.

༡. ཏཏྠ མུསཱཝཱདཝགྒསྶ ཏཱཝ པཋམསིཀྑཱཔདེ ཧཏྠཀོཏི ཏསྶ ཐེརསྶ ནཱམཾ. སཀྱཱནཾ ¶ པུཏྟོཏི སཀྱཔུཏྟོ. བུདྡྷཀཱལེ ཀིར སཀྱཀུལཏོ ཨསཱིཏི པུརིསསཧསྶཱནི པབྦཛིཾསུ, ཏེསཾ སོ ཨཉྙཏརོཏི. ཝཱདཀྑིཏྟོཏི ‘‘ཝཱདཾ ཀརིསྶཱམཱི’’ཏི ཨེཝཾ པརིཝིཏཀྐིཏེན ཝཱདེན པརཝཱདིསནྟིཀཾ ཁིཏྟོ པཀྑིཏྟོ པཧིཏོ པེསིཏོཏི ཨཏྠོ. ཝཱདམྷི ཝཱ སཀེན ཙིཏྟེན ཁིཏྟོ. ཡཏྲ ཡཏྲ ཝཱདོ ཏཏྲ ཏཏྲེཝ སནྡིསྶཏཱིཏིཔི ཝཱདཀྑིཏྟོ. ཨཝཛཱནིཏྭཱ ཨཝཛཱནཱཏཱིཏི ཨཏྟནོ ཝཱདེ ཀཉྩི དོསཾ སལླཀྑེནྟོ ‘‘ནཱཡཾ མམ ཝཱདོ’’ཏི ཨཝཛཱནིཏྭཱ པུན ཀཐེནྟོ ཀཐེནྟོ ནིདྡོསཏཾ སལླཀྑེཏྭཱ ‘‘མམེཝ ཨཡཾ ཝཱདོ’’ཏི པཊིཛཱནཱཏི. པཊིཛཱནིཏྭཱ ཨཝཛཱནཱཏཱིཏི ཀིསྨིཉྩིདེཝ ཝཙནེ ཨཱནིསཾསཾ སལླཀྑེནྟོ ‘‘ཨཡཾ མམ ཝཱདོ’’ཏི པཊིཛཱནིཏྭཱ པུན ཀཐེནྟོ ཀཐེནྟོ ཏཏྠ དོསཾ སལླཀྑེཏྭཱ ¶ ‘‘ནཱཡཾ མམ ཝཱདོ’’ཏི ཨཝཛཱནཱཏི. ཨཉྙེནཉྙཾ པཊིཙརཏཱིཏི ཨཉྙེན ཀཱརཎེན ཨཉྙཾ ཀཱརཎཾ པཊིཙརཏི པཊིཙྪཱདེཏི ཨཛ྄ཛྷོཏྠརཏི, ‘‘རཱུཔཾ ཨནིཙྩཾ ཛཱནིཏབྦཏོ’’ཏི ཝཏྭཱ པུན ‘‘ཛཱཏིདྷམྨཏོ’’ཏིཨཱདཱིནི ཝདཏི. ཀུརུནྡིཡཾ པན ‘‘ཨེཏསྶ པཊིཙྪཱདནཧེཏུཾ ཨཉྙཾ བཧུཾ ཀཐེཏཱི’’ཏི ཝུཏྟཾ. ཏཏྲཱཡཾ ཨདྷིཔྤཱཡོ – ཡཾ ཏཾ པཊིཛཱནནཉྩ ཨཝཛཱནནཉྩ, ཏསྶ པཊིཙྪཱདནཏྠཾ ‘‘ཀོ ཨཱཧ ¶ , ཀིཾ ཨཱཧ, ཀིསྨིཾ ཨཱཧཱ’’ཏི ཨེཝམཱདི བཧུཾ བྷཱསཏཱིཏི. པུན མཧཱཨཊྛཀཐཱཡཾ ‘‘ཨཝཛཱནིཏྭཱ པཊིཛཱནནྟོ པཊིཛཱནིཏྭཱ ཨཝཛཱནནྟོ ཨེཝ ཙ ཨཉྙེནཉྙཾ པཊིཙརཏཱི’’ཏི ཝུཏྟཾ. སམྤཛཱནམུསཱ བྷཱསཏཱིཏི ཛཱནནྟོ མུསཱ བྷཱསཏི. སངྐེཏཾ ཀཏྭཱ ཝིསཾཝཱདེཏཱིཏི པུརེབྷཏྟཱདཱིསུ ‘‘ཨསུཀསྨིཾ ནཱམ ཀཱལེ ཨསུཀསྨིཾ ནཱམ པདེསེ ཝཱདོ ཧོཏཱུ’’ཏི སངྐེཏཾ ཀཏྭཱ སངྐེཏཏོ པུརེ ཝཱ པཙྪཱ ཝཱ གནྟྭཱ ‘‘པསྶཐ བྷོ, ཏིཏྠིཡཱ ན ཨཱགཏཱ པརཱཛིཏཱ’’ཏི པཀྐམཏི.

༢. སམྤཛཱནམུསཱཝཱདེཏི ཛཱནིཏྭཱ ཛཱནནྟསྶ ཙ མུསཱ བྷཎནེ.

༣. ཝིསཾཝཱདནཔུརེཀྑཱརསྶཱཏི ཝིསཾཝཱདནཙིཏྟཾ པུརཏོ ཀཏྭཱ ཝདནྟསྶ. ཝཱཙཱཏི མིཙྪཱཝཱཙཱཔརིཡཱཔནྣཝཙནསམུཊྛཱཔིཀཱ ཙེཏནཱ. གིརཱཏི ཏཱཡ ཙེཏནཱཡ སམུཊྛཱཔིཏསདྡཾ དསྶེཏི. བྱཔྤཐོཏི ཝཙནཔཐོ; ཝཱཙཱཡེཝ ཧི ཨཉྙེསམྤི དིཊྛཱནུགཏིམཱཔཛྫནྟཱནཾ པཐབྷཱུཏཏོ བྱཔྤཐོཏི ཝུཙྩཏི. ཝཙཱིབྷེདོཏི ཝཙཱིསཉྙིཏཱཡ ཝཱཙཱཡ བྷེདོ; པབྷེདགཏཱ ཝཱཙཱ ཨེཝ ཨེཝཾ ཝུཙྩཏི. ཝཱཙསིཀཱ ཝིཉྙཏྟཱིཏི ཝཙཱིཝིཉྙཏྟི. ཨེཝཾ པཋམཔདེན སུདྡྷཙེཏནཱ, མཛ྄ཛྷེ ཏཱིཧི ཏཾསམུཊྛཱཔིཏསདྡསཧིཏཱ ཙེཏནཱ, ཨནྟེ ཨེཀེན ཝིཉྙཏྟིསཧིཏཱ ཙེཏནཱ ‘‘ཀཐིཏཱ’’ཏི ཝེདིཏབྦཱ. ཨནརིཡཝོཧཱརཱཏི ཨནརིཡཱནཾ བཱལཔུཐུཛྫནཱནཾ ཝོཧཱརཱ.

ཨེཝཾ སམྤཛཱནམུསཱཝཱདཾ དསྶེཏྭཱ ཨིདཱནི ཨནྟེ ཝུཏྟཱནཾ སམྤཛཱནམུསཱཝཱདསངྑཱཏཱནཾ ཨནརིཡཝོཧཱརཱནཾ ¶ ལཀྑཎཾ དསྶེནྟོ ‘‘ཨདིཊྛཾ དིཊྛཾ མེ’’ཏིཨཱདིམཱཧ. ཏཏྠ ཨདིཊྛཾ དིཊྛཾ མེཏི ཨེཝཾ ཝདཏོ ཝཙནཾ ཏཾསམུཊྛཱཔིཀཱ ཝཱ ཙེཏནཱ ཨེཀོ ཨནརིཡཝོཧཱརོཏི ཨིམིནཱ ནཡེན ཨཏྠོ ཝེདིཏབྦོ. ཨཔིཙེཏྠ ཙཀྑུཝསེན ཨགྒཧིཏཱརམྨཎཾ ཨདིཊྛཾ, སོཏཝསེན ཨགྒཧིཏཾ ཨསུཏཾ, གྷཱནཱདིཝསེན མུནིཏྭཱ ཏཱིཧི ཨིནྡྲིཡེཧི ཨེཀཱབདྡྷཾ ཝིཡ ཀཏྭཱ པཏྭཱ ཨགྒཧིཏཾ ཨམུཏཾ, ཨཉྙཏྲ པཉྩཧི ཨིནྡྲིཡེཧི སུདྡྷེན ¶ ཝིཉྙཱཎེནེཝ ཨགྒཧིཏཾ ཨཝིཉྙཱཏནྟི ཝེདིཏབྦཾ. པཱལི༹ཡཾ པན ‘‘ཨདིཊྛཾ ནཱམ ན ཙཀྑུནཱ དིཊྛ’’ནྟི ཨེཝཾ ཨོལཱ༹རིཀེནེཝ ནཡེན དེསནཱ ཀཏཱཏི. དིཊྛཱདཱིསུ ཙ ཨཏྟནཱཔི ¶ པརེནཔི དིཊྛཾ དིཊྛམེཝ. ཨེཝཾ སུཏམུཏཝིཉྙཱཏཱནཱིཏི ཨཡམེཀོ པརིཡཱཡོ. ཨཔརོ ནཡོ ཡཾ ཨཏྟནཱ དིཊྛཾ དིཊྛམེཝ ཏཾ. ཨེས ནཡོ སུཏཱདཱིསུ. ཡཾ པན པརེན དིཊྛཾ, ཏཾ ཨཏྟནཱ སུཏཊྛཱནེ ཏིཊྛཏི. ཨེཝཾ མུཏཱདཱིནིཔི.

༤. ཨིདཱནི ཏེསཾ ཨནརིཡཝོཧཱརཱནཾ ཝསེན ཨཱཔཏྟིཾ ཨཱརོཔེཏྭཱ དསྶེནྟོ ‘‘ཏཱིཧཱཀཱརེཧཱི’’ཏིཨཱདིམཱཧ. ཏསྶཏྠོ ‘‘ཏཱིཧི ཨཱཀཱརེཧི པཋམཾ ཛྷཱནཾ སམཱཔཛྫིནྟི སམྤཛཱནམུསཱ བྷཎནྟསྶ ཨཱཔཏྟི པཱརཱཛིཀསྶཱ’’ཏི ཨེཝམཱདིཙཏུཏྠཔཱརཱཛིཀཔཱལི༹ཝཎྞནཱཡཾ ཝུཏྟནཡེནེཝ ཝེདིཏབྦོ. ཀེཝལཉྷི ཏཏྠ ‘‘པཋམཾ ཛྷཱནཾ སམཱཔཛྫི’’ནྟི ཨིདྷ ‘‘ཨདིཊྛཾ དིཊྛཾ མེ’’ཏི, ཏཏྠ ཙ ‘‘ཨཱཔཏྟི པཱརཱཛིཀསྶཱ’’ཏི ‘‘ཨིདྷ ཨཱཔཏྟི པཱཙིཏྟིཡསྶཱ’’ཏི ཨེཝཾ ཝཏྠུམཏྟེ ཨཱཔཏྟིམཏྟེ ཙ ཝིསེསོ, སེསཾ ཨེཀལཀྑཎམེཝཱཏི.

༩. ཏཱིཧཱཀཱརེཧི དིཊྛེ ཝེམཏིཀོཏིཨཱདཱིནམྤི ཨཏྠོ ‘‘དིཊྛསྶ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ དིཊྛེ ཝེམཏིཀོ’’ཏི ཨེཝམཱདིདུཊྛདོསཔཱལི༹ཝཎྞནཱཡཾ ཝུཏྟནཡེནེཝ ཝེདིཏབྦོ. པཱལི༹མཏྟམེཝ ཧི ཨེཏྠ ཝིསེསོ, ཨཏྠེ པན སཐེརཝཱདེ ཀིཉྩི ནཱནཱཀརཎཾ ནཏྠི.

༡༡. སཧསཱ བྷཎཏཱིཏི ཨཝཱིམཾསིཏྭཱ ཨནུཔདྷཱརེཏྭཱ ཝཱ ཝེགེན དིཊྛམྤི ‘‘ཨདིཊྛཾ མེ’’ཏི བྷཎཏི. ཨཉྙཾ བྷཎིསྶཱམཱིཏི ཨཉྙཾ བྷཎཏཱིཏི མནྡཏྟཱ ཛལ༹ཏྟཱ པཀྑལནྟོ ‘‘ཙཱིཝར’’ནྟི ཝཏྟབྦེ ‘‘ཙཱིར’’ནྟི ཨཱདིཾ བྷཎཏི. ཡོ པན སཱམཎེརེན ‘‘ཨཔི བྷནྟེ མཡ྄ཧཾ ཨུཔཛ྄ཛྷཱཡཾ པསྶིཏྠཱ’’ཏི ཝུཏྟོ ཀེལི༹ཾ ཀུརུམཱནོ ‘‘ཏཝ ཨུཔཛ྄ཛྷཱཡོ དཱརུསཀཊཾ ཡོཛེཏྭཱ གཏོ བྷཝིསྶཏཱི’’ཏི ཝཱ སིངྒཱལསདྡཾ སུཏྭཱ ‘‘ཀསྶཱཡཾ བྷནྟེ སདྡོ’’ཏི ཝུཏྟོ ‘‘མཱཏུཡཱ ཏེ ཡཱནེན གཙྪནྟིཡཱ ཀདྡམེ ལགྒཙཀྐཾ ཨུདྡྷརནྟཱནཾ ཨཡཾ སདྡོ’’ཏི ཝཱ ཨེཝཾ ནེཝ དཝཱ ན རཝཱ ཨཉྙཾ བྷཎཏི, སོ ཨཱཔཏྟིཾ ཨཱཔཛྫཏིཡེཝ. ཨཉྙཱ པཱུརཎཀཐཱ ནཱམ ཧོཏི, ཨེཀོ གཱམེ ཐོཀཾ ཏེལཾ ལབྷིཏྭཱ ཝིཧཱརཾ ཨཱགཏོ སཱམཎེརཾ བྷཎཏི – ‘‘ཏྭཾ ཨཛྫ ཀུཧིཾ གཏོ, གཱམོ ཨེཀཏེལོ ཨཧོསཱི’’ཏི ¶ ཝཱ པཙྪིཀཱཡ ཋཔིཏཾ པཱུཝཁཎྜཾ ལབྷིཏྭཱ ¶ ‘‘ཨཛྫ གཱམེ པཙྪིཀཱཧི པཱུཝེ ཙཱརེསུ’’ནྟི ཝཱ, ཨཡཾ མུསཱཝཱདོཝ ཧོཏི. སེསཾ ཨུཏྟཱནམེཝཱཏི.

ཏིསམུཊྛཱནཾ – ཀཱཡཙིཏྟཏོ ¶ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, ཏིཝེདནནྟི.

མུསཱཝཱདསིཀྑཱཔདཾ པཋམཾ.

༢. ཨོམསཝཱདསིཀྑཱཔདཝཎྞནཱ

༡༢. དུཏིཡསིཀྑཱཔདེ ཨོམསནྟཱིཏི ཨོཝིཛ྄ཛྷནྟི. ཁུཾསེནྟཱིཏི ཨཀྐོསནྟི. ཝམྦྷེནྟཱིཏི པདྷཾསེནྟི.

༡༣. བྷཱུཏཔུབྦནྟི ཨིདཾ ཝཏྠུཾ བྷགཝཱ ཨོམསཝཱདགརཧཎཏྠཾ ཨཱཧརི. ནནྡིཝིསཱལོ ནཱམཱཏི ནནྡཱིཏི ཏསྶ བལཱིབདྡསྶ ནཱམཾ, ཝིསཱཎཱནི པནསྶ ཝིསཱལཱནི, ཏསྨཱ ‘‘ནནྡིཝིསཱལོ’’ཏི ཝུཙྩཏི. བོདྷིསཏྟོ ཏེན སམཡེན ནནྡིཝིསཱལོ ནཱམ ཧོཏི. བྲཱཧྨཎོ ཏཾ ཡཱགུབྷཏྟཱདཱིཧི ཨཏིཝིཡ པོསེསི. ཨཐ སོ བྲཱཧྨཎཾ ཨནུཀམྤམཱནོ ‘‘གཙྪ ཏྭ’’ནྟིཨཱདིམཱཧ. ཏཏྠེཝ ཨཊྛཱསཱིཏི ཨཧེཏུཀཔཊིསནྡྷིཀཱལེཔི པརཁུཾསནཾ ཨམནཱཔཏོཡེཝ པཙྩེསི, ཏསྨཱ བྲཱཧྨཎསྶ དོསཾ དསྶེཏུཀཱམོ ཨཊྛཱསི. སཀཊསཏཾ ཨཏིབདྡྷཾ པཝཊྚེསཱིཏི པཊིཔཱཊིཡཱ ཋཔེཏྭཱ ཧེཊྛཱརུཀྑེ དཏྭཱ ཨེཀཱབདྡྷཾ ཀཏྭཱ མུགྒམཱསཝཱལུཀཱདཱིཧི པུཎྞཾ སཀཊསཏཾ པཝཊྚེནྟོ, ཀིཉྩཱཔི པུབྦེ པཏིཊྛིཏཱརཔྤདེསཾ པུན ཨརེ པཏྟེ པཝཊྚིཏཾ ཧོཏི, བོདྷིསཏྟོ པན པུརིམསཀཊེན པཏིཊྛིཏཊྛཱནེ པཙྪིམསཀཊཾ པཏིཊྛཱཔེཏུཾ སཀཊསཏཔྤམཱཎཾ པདེསཾ པཝཊྚེསི. བོདྷིསཏྟཱནཉྷི སིཐིལཀརཎཾ ནཱམ ནཏྠི. ཏེན ཙཏྟམནོ ཨཧཱུཏི ཏེན བྲཱཧྨཎསྶ དྷནལཱབྷེན ཨཏྟནོ ཀམྨེན ཙ སོ ནནྡིཝིསཱལོ ཨཏྟམནོ ཨཧོསི.

༡༥. ཨཀྐོསེནཔཱིཏི ¶ ཨེཏྠ པན ཡསྨཱ པརཏོ ‘‘དྭེ ཨཀྐོསཱ – ཧཱིནོ ཙ ཨཀྐོསོ ཨུཀྐཊྛོ ཙ ཨཀྐོསོ’’ཏི ཝིབྷཛིཏུཀཱམོ, ཏསྨཱ ཡཐཱ པུབྦེ ‘‘ཧཱིནེནཔི ཨཀྐོསེན ཁུཾསེནྟཱི’’ཏི ཝུཏྟཾ; ཨེཝཾ ཨཝཏྭཱ ‘‘ཨཀྐོསེན’’ ཨིཙྩེཝམཱཧ. ཝེནཛཱཏཱིཏི ཏཙྪཀཛཱཏི; ཝེཎུཀཱརཛཱཏཱིཏིཔི ཝདནྟི. ནེསཱདཛཱཏཱིཏི མིགལུདྡཀཱདིཛཱཏི.

རཐཀཱརཛཱཏཱིཏི ¶ ཙམྨཀཱརཛཱཏི. པུཀྐུསཛཱཏཱིཏི པུཔྥཚཌྜཀཛཱཏི. ཨཝཀཎྞཀཱདི དཱསཱནཾ ནཱམཾ ཧོཏི; ཏསྨཱ ཧཱིནཾ. ཨོཉྙཱཏནྟི ཨཝཉྙཱཏཾ; ‘‘ཨུཉྙཱཏ’’ནྟིཔི པཋནྟི. ཨཝཉྙཱཏནྟི ཝམྦྷེཏྭཱ ཉཱཏཾ. ཧཱིལི༹ཏནྟི ཛིགུཙྪིཏཾ ¶ . པརིབྷཱུཏནྟི ཀིམེཏེནཱཏིཏི པརིབྷཝཀཏཾ. ཨཙིཏྟཱིཀཏནྟི ན གརུཀཏཾ.

ཀོཊྛཀཀམྨནྟི ཏཙྪཀཀམྨཾ. མུདྡཱཏི ཧཏྠམུདྡཱགཎནཱ. གཎནཱཏི ཨཙྪིདྡཀཱདིཨཝསེསགཎནཱ. ལེཁཱཏི ཨཀྑརལེཁཱ. མདྷུམེཧཱབཱདྷོ ཝེདནཱཡ ཨབྷཱཝཏོ ‘‘ཨུཀྐཊྛོ’’ཏི ཝུཏྟོ. པཱཊིཀངྑཱཏི ཨིཙྪིཏབྦཱ. ཡཀཱརེན ཝཱ བྷཀཱརེན ཝཱཏི ཡཀཱརབྷཀཱརེ ཡོཛེཏྭཱ ཡོ ཨཀྐོསོ. ཀཱཊཀོཊཙིཀཱཡ ཝཱཏི ‘‘ཀཱཊ’’ནྟི པུརིསནིམིཏྟཾ, ‘‘ཀོཊཙིཀཱ’’ཏི ཨིཏྠིནིམིཏྟཾ; ཨེཏེཧི ཝཱ ཡོ ཨཀྐོསོ, ཨེསོ ཧཱིནོ ནཱམ ཨཀྐོསོཏི.

༡༦. ཨིདཱནི ཏེསཾ ཛཱཏིཨཱདཱིནཾ པབྷེདཝསེན ཨཱཔཏྟིཾ ཨཱརོཔེཏྭཱ དསྶེནྟོ ‘‘ཨུཔསམྤནྣོ ཨུཔསམྤནྣ’’ནྟིཨཱདིམཱཧ. ཏཏྠ ཁུཾསེཏུཀཱམོ ཝམྦྷེཏུཀཱམོ མངྐུཀཏྟུཀཱམོཏི ཨཀྐོསིཏུཀཱམོ པདྷཾསིཏུཀཱམོ གརཧིཏུཀཱམོ ནིཏྟེཛཾ ཀཏྟུཀཱམོཏི ཨཏྠོ. ཧཱིནེན ཧཱིནནྟི ཧཱིནེན ཛཱཏིཝཙནེན ཧཱིནཛཱཏིཀཾ. ཨེཏེན ཨུཔཱཡེན སབྦཔདེསུ ཨཏྠོ ཝེདིཏབྦོ.

ཨེཏྠ ཙ ཧཱིནེན ཧཱིནཾ ཝདནྟོ ཀིཉྩཱཔི སཙྩཾ ཝདཏི, ཨོམསིཏུཀཱམཏཱཡ པནསྶ ཝཱཙཱཡ ཝཱཙཱཡ པཱཙིཏྟིཡཾ. ཨུཀྐཊྛེན ཧཱིནཾ ཝདནྟོ ཙ ཀིཉྩཱཔི ཨལིཀཾ བྷཎཏི, ཨོམསིཏུཀཱམཏཱཡ པན ཨིམིནཱཝ སིཀྑཱཔདེན པཱཙིཏྟིཡཾ ཨཱཔཛྫཏི, ན པུརིམེན. ཡོཔི ‘‘ཨཏིཙཎྜཱལོསི, ཨཏིབྲཱཧྨཎོསི, དུཊྛཙཎྜཱལོསི, དུཊྛབྲཱཧྨཎོསཱི’’ཏིཨཱདཱིནི ཝདཏི, སོཔི ཨཱཔཏྟིཡཱ ཀཱརེཏབྦོ.

༢༦. སནྟི ¶ ཨིདྷེཀཙྩེཏི ཝཱརེ པན པརིཧརིཏྭཱ ཝུཏྟབྷཱཝེན དུཀྐཊཾ. ཨེསེཝ ནཡོ ཡེ ནཱུན…པེ… ན མཡནྟི ཝཱརེསུཔི. ཨནུཔསམྤནྣེ པན ཙཏཱུསུཔི ཝཱརེསུ དུཀྐཊམེཝ. ཙོརོསི གཎྛིབྷེདཀོསཱིཏིཨཱདིཝཙནེཧི པན ཨུཔསམྤནྣེཔི ཨནུཔམྤནྣེཔི སབྦཝཱརེསུ དུཀྐཊམེཝ. དཝཀམྱཏཱཡ པན ཨུཔསམྤནྣེཔི ཨནུཔསམྤནྣེཔི སབྦཝཱརེསུ དུབྦྷཱསིཏཾ. དཝཀམྱཏཱ ནཱམ ཀེལི༹ཧསཱདྷིཔྤཱཡཏཱ. ཨིམསྨིཉྩ སིཀྑཱཔདེ ཋཔེཏྭཱ བྷིཀྑུཾ བྷིཀྑུནཱིཨཱདཡོ སབྦསཏྟཱ ཨནུཔསམྤནྣཊྛཱནེ ཋིཏཱཏི ¶ ཝེདིཏབྦཱ.

༣༥. ཨཏྠཔུརེཀྑཱརསྶཱཏིཨཱདཱིསུ པཱལི༹ཡཱ ཨཏྠཾ ཝཎྞཡནྟོ ཨཏྠཔུརེཀྑཱརོ; པཱལི༹ཾ ཝཱཙེནྟོ ¶ དྷམྨཔུརེཀྑཱརོ; ཨནུསིཊྛིཡཾ ཋཏྭཱ ‘‘ཨིདཱནིཔི ཙཎྜཱལོསི, པཱཔཾ མཱ ཨཀཱསི, མཱ ཏམོ ཏམཔརཱཡཎོ ཨཧོསཱི’’ཏིཨཱདིནཱ ནཡེན ཀཐེནྟོ ཨནུསཱསནཱིཔུརེཀྑཱརོ ནཱམཱཏི ཝེདིཏབྦོ. སེསཾ ཨུཏྟཱནམེཝ.

ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི. ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི. དུབྦྷཱསིཏཱཔཏྟི པནེཏྠ ཝཱཙཱཙིཏྟཏོ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ཨཀུསལཙིཏྟཾ, དྭིཝེདནཾ སུཁཱ ཙ མཛ྄ཛྷཏྟཱ ཙཱཏི.

ཨོམསཝཱདསིཀྑཱཔདཾ དུཏིཡཾ.

༣. པེསུཉྙསིཀྑཱཔདཝཎྞནཱ

༣༦. ཏཏིཡསིཀྑཱཔདེ – བྷཎྜནཛཱཏཱནནྟི སཉྫཱཏབྷཎྜནཱནཾ. བྷཎྜནནྟི ཀལཧསྶ པུབྦབྷཱགོ, ‘‘ཨིམིནཱ ཙ ཨིམིནཱ ཙ ཨིདཾ ཀཏཾ; ཨེཝཾ ཝུཏྟེ ཨེཝཾ ཝཀྑཱམཱ’’ཏིཨཱདིཀཾ སཀསཀཔཀྑེ སམྨནྟནཾ. ཀལཧོཏི ཨཱཔཏྟིགཱམིཀོ ཀཱཡཝཱཙཱཝཱིཏིཀྐམོ. ཝིཝཱདོཏི ཝིགྒཱཧིཀཀཐཱ. ཏཾ ཝིཝཱདཾ ཨཱཔནྣཱནཾ ཝིཝཱདཱཔནྣཱནཾ. པེསུཉྙནྟི པིསུཎཝཱཙཾ, པིཡབྷཱཝསྶ སུཉྙཀརཎཝཱཙནྟི ཝུཏྟཾ ཧོཏི.

༣༧. བྷིཀྑུཔེསུཉྙེཏི ¶ བྷིཀྑཱུནཾ པེསུཉྙེ; བྷིཀྑུཏོ སུཏྭཱ བྷིཀྑུནཱ བྷིཀྑུསྶ ཨུཔསཾཧཊཔེསུཉྙེཏི ཨཏྠོ.

༣༨. དྭཱིཧཱཀཱརེཧཱིཏི དྭཱིཧི ཀཱརཎེཧི. པིཡཀམྱསྶ ཝཱཏི ‘‘ཨེཝཾ ཨཧཾ ཨེཏསྶ པིཡོ བྷཝིསྶཱམཱི’’ཏི ཨཏྟནོ པིཡབྷཱཝཾ པཏྠཡམཱནསྶ ཝཱ. བྷེདཱདྷིཔྤཱཡསྶ ཝཱཏི ‘‘ཨེཝམཡཾ ཨེཏེན སདྡྷིཾ བྷིཛྫིསྶཏཱི’’ཏི པརསྶ པརེན བྷེདཾ ཨིཙྪནྟསྶ ཝཱ. ཛཱཏིཏོཔཱིཏིཨཱདི སབྦཾ པུརིམསིཀྑཱཔདེ ཝུཏྟནཡམེཝ. ཨིདྷཱཔི བྷིཀྑུནིཾ ཨཱདིཾ ཀཏྭཱ སབྦེ ཨནུཔསམྤནྣཱ ནཱམ.

ན པིཡཀམྱསྶ ན བྷེདཱདྷིཔྤཱཡསྶཱཏི ཨེཀཾ ཨཀྐོསནྟཾ ཨེཀཉྩ ཁམནྟཾ དིསྭཱ ‘‘ཨཧོ ནིལླཛྫོ, ཨཱིདིསམྤི ནཱམ བྷཝནྟཾ པུན ཝཏྟབྦཾ མཉྙིསྶཏཱི’’ཏི ཨེཝཾ ཀེཝལཾ པཱཔགརཧིཏཱཡ བྷཎནྟསྶ ཨནཱཔཏྟི. སེསཾ ཨུཏྟཱནཏྠམེཝ. ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ¶ ཙ སམུཊྛཱཏི ¶ , ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, ཏིཝེདནནྟི.

པེསུཉྙསིཀྑཱཔདཾ ཏཏིཡཾ.

༤. པདསོདྷམྨསིཀྑཱཔདཝཎྞནཱ

༤༤. ཙཏུཏྠསིཀྑཱཔདེ – ཨཔྤཏིསྶཱཏི ཨཔྤཏིསྶཝཱ. ཨུཔཱསཀཱཏི ཝུཏྟེ ཝཙནམྤི ན སོཏུཀཱམཱ; ཨནཱདརཱཏི ཨཏྠོ. ཨཔྤཏིསྶཡཱ ཝཱ ཨནཱིཙཝུཏྟིནོཏི ཨཏྠོ. ཨསབྷཱགཝུཏྟིཀཱཏི ཝིསབྷཱགཛཱིཝིཀཱ, ཡཐཱ བྷིཀྑཱུསུ ཝཏྟིཏབྦཾ; ཨེཝཾ ཨཔྤཝཏྟཝུཏྟིནོཏི ཨཏྠོ.

༤༥. པདསོ དྷམྨཾ ཝཱཙེཡྻཱཏི ཨེཀཏོ པདཾ པདཾ དྷམྨཾ ཝཱཙེཡྻ; ཀོཊྛཱསཾ ཀོཊྛཱསཾ ཝཱཙེཡྻཱཏི ཨཏྠོ. ཡསྨཱ པན ཏཾ ཀོཊྛཱསནཱམཀཾ པདཾ ཙཏུབྦིདྷཾ ཧོཏི, ཏསྨཱ ཏཾ དསྶེཏུཾ ‘‘པདཾ ཨནུཔདཾ ཨནྭཀྑརཾ ཨནུབྱཉྫན’’ནྟི པདབྷཱཛནཾ ཝུཏྟཾ. ཏཏྠ པདནྟི ཨེཀོ གཱཐཱཔཱདོ ཨདྷིཔྤེཏོ. ཨནུཔདནྟི དུཏིཡཔཱདོ. ཨནྭཀྑརནྟི ཨེཀེཀམཀྑརཾ. ཨནུབྱཉྫནནྟི པུརིམབྱཉྫནེན སདིསཾ པཙྪཱབྱཉྫནཾ. ཡཾ ཀིཉྩི ཝཱ ཨེཀམཀྑརཾ ཨནྭཀྑརཾ, ཨཀྑརསམཱུཧོ ཨནུབྱཉྫནཾ, ཨཀྑརཱནུབྱཉྫནསམཱུཧོ པདཾ. པཋམཔདཾ པདམེཝ, དུཏིཡཾ ཨནུཔདནྟི ཨེཝམེཏྠ ནཱནཱཀརཎཾ ཝེདིཏབྦཾ.

ཨིདཱནི ¶ པདཾ ནཱམ ཨེཀཏོ པཊྛཔེཏྭཱ ཨེཀཏོ ཨོསཱཔེནྟཱིཏི གཱཐཱབནྡྷཾ དྷམྨཾ ཝཱཙེནྟོ ‘‘མནོཔུབྦངྒམཱ དྷམྨཱ’’ཏི ཨེཀམེཀཾ པདཾ སཱམཎེརེན སདྡྷིཾ ཨེཀཏོ ཨཱརབྷིཏྭཱ ཨེཀཏོཡེཝ ནིཊྛཱཔེཏི. ཨེཝཾ ཝཱཙེནྟསྶ པདགཎནཱཡ པཱཙིཏྟིཡཱ ཝེདིཏབྦཱ. ཨནུཔདཾ ནཱམ པཱཊེཀྐཾ པཊྛཔེཏྭཱ ཨེཀཏོ ཨོསཱཔེནྟཱིཏི ཐེརེན ‘‘མནོཔུབྦངྒམཱ དྷམྨཱ’’ཏི ཝུཏྟེ སཱམཎེརོ ཏཾ པདཾ ཨཔཱཔུཎིཏྭཱ ‘‘མནོསེཊྛཱ མནོམཡཱ’’ཏི དུཏིཡཔདཾ ཨེཀཏོ བྷཎཏི, ཨིམེ པཱཊེཀྐཾ པཊྛཔེཏྭཱ ཨེཀཏོ ཨོསཱཔེནྟི ནཱམ. ཨེཝཾ ཝཱཙེནྟསྶཱཔི ཨནུཔདགཎནཱཡ པཱཙིཏྟིཡཱ. ཨནྭཀྑརཾ ནཱམ རཱུཔཾ ཨནིཙྩནྟི ¶ ཝུཙྩམཱནོ ‘‘རཱུ’’ཏི ཨོཔཱཏེཏཱིཏི ‘‘རཱུཔཾ ཨནིཙྩནྟི བྷཎ སཱམཎེརཱ’’ཏི ཝུཙྩམཱནོ རཱུཀཱརམཏྟམེཝ ཨེཀཏོ ཝཏྭཱ ཏིཊྛཏི. ཨེཝཾ ཝཱཙེནྟསྶཱཔི ཨནྭཀྑརགཎནཱཡ པཱཙིཏྟིཡཱ. གཱཐཱབནྡྷེཔི ཙ ཨེས ནཡོ ལབྦྷཏིཡེཝ. ཨནུབྱཉྫནཾ ནཱམ རཱུཔཾ ཨནིཙྩནྟི ཝུཙྩམཱནོ ཝེདནཱ ཨནིཙྩཱཏི སདྡཾ ནིཙྪཱརེཏཱིཏི ‘‘རཱུཔཾ, བྷིཀྑཝེ, ཨནིཙྩཾ, ཝེདནཱ ཨནིཙྩཱ’’ཏི ཨིམཾ སུཏྟཾ ཝཱཙཡམཱནོ ཐེརེན ‘‘རཱུཔཾ ཨནིཙྩ’’ནྟི ཝུཙྩམཱནོ སཱམཎེརོ སཱིགྷཔཉྙཏཱཡ ¶ ‘‘ཝེདནཱ ཨནིཙྩཱ’’ཏི ཨིམཾ ཨནིཙྩཔདཾ ཐེརསྶ ‘‘རཱུཔཾ ཨནིཙྩ’’ནྟི ཨེཏེན ཨནིཙྩཔདེན སདྡྷིཾ ཨེཀཏོ བྷཎནྟོ ཝཱཙཾ ནིཙྪཱརེཏི. ཨེཝཾ ཝཱཙེནྟསྶཱཔི ཨནུབྱཉྫནགཎནཱཡ པཱཙིཏྟིཡཱ. ཨཡཾ པནེཏྠ སངྑེཔོ – ཨིམེསུ པདཱདཱིསུ ཡཾ ཡཾ ཨེཀཏོ བྷཎཏི ཏེན ཏེན ཨཱཔཏྟིཾ ཨཱཔཛྫཏཱིཏི.

བུདྡྷབྷཱསིཏོཏི སཀལཾ ཝིནཡཔིཊཀཾ ཨབྷིདྷམྨཔིཊཀཾ དྷམྨཔདཾ ཙརིཡཱཔིཊཀཾ ཨུདཱནཾ ཨིཏིཝུཏྟཀཾ ཛཱཏཀཾ སུཏྟནིཔཱཏོ ཝིམཱནཝཏྠུ པེཏཝཏྠུ བྲཧྨཛཱལཱདཱིནི ཙ སུཏྟཱནི. སཱཝཀབྷཱསིཏོཏི ཙཏུཔརིསཔརིཡཱཔནྣེཧི སཱཝཀེཧི བྷཱསིཏོ ཨནངྒཎསམྨཱདིཊྛིཨནུམཱནསུཏྟཙུལ༹ཝེདལླམཧཱཝེདལླཱདིཀོ. ཨིསིབྷཱསིཏོཏི བཱཧིརཔརིབྦཱཛཀེཧི བྷཱསིཏོ སཀལོ པརིབྦཱཛཀཝགྒོ, བཱཝརིཡསྶ ཨནྟེཝཱསིཀཱནཾ སོལ༹སནྣཾ བྲཱཧྨཎཱནཾ པུཙྪཱཏི ཨེཝམཱདི. དེཝཏཱབྷཱསིཏོཏི དེཝཏཱཧི བྷཱསིཏོ; སོ དེཝཏཱསཾཡུཏྟདེཝཔུཏྟསཾཡུཏྟམཱརསཾཡུཏྟབྲཧྨསཾཡུཏྟསཀྐསཾཡུཏྟཱདིཝསེན ཝེདིཏབྦོ.

ཨཏྠཱུཔསཉྷིཏོཏི ཨཊྛཀཐཱནིསྶིཏོ. དྷམྨཱུཔསཉྷིཏོཏི པཱལི༹ནིསྶིཏོ; ཨུབྷཡེནཱཔི ཝིཝཊྚཱུཔནིསྶིཏམེཝ ཝདཏི. ཀིཉྩཱཔི ཝིཝཊྚཱུཔནིསྶིཏཾ ཝདཏི, ཏིསྶོ སངྒཱིཏིཡོ ཨཱརུལ༹ྷདྷམྨཾཡེཝ པན པདསོ ཝཱཙེནྟསྶ ཨཱཔཏྟི ¶ . ཝིཝཊྚཱུཔནིསྶིཏེཔི ནཱནཱབྷཱསཱཝསེན གཱཐཱསིལོཀབནྡྷཱདཱིཧི ཨབྷིསངྑཏེ ཨནཱཔཏྟི. ཏིསྶོ སངྒཱིཏིཡོ ཨནཱརུལ༹ྷེཔི ཀུལུམྦསུཏྟཾ རཱཛོཝཱདསུཏྟཾ ཏིཀྑིནྡྲིཡཾ ཙཏུཔརིཝཊྚཾ ནནྡོཔནནྡནྟི ཨཱིདིསེ ཨཱཔཏྟིཡེཝ. ཨཔལཱལདམནམྤི ཝུཏྟཾ, མཧཱཔཙྩརིཡམྤན པཊིསིདྡྷཾ. མེཎྜཀམིལིནྡཔཉྷེསུ ཐེརསྶ སཀཔཊིབྷཱནེ ཨནཱཔཏྟི, ཡཾ རཉྙོ སཉྙཱཔནཏྠཾ ཨཱཧརིཏྭཱ ཝུཏྟཾ, ཏཏྠ ཨཱཔཏྟི. ཝཎྞཔིཊཀཨངྒུལིམཱལཔིཊཀརཊྛཔཱལགཨཛཏཨཱལ༹ཝཀགཛྫིཏགུལ༹ྷམགྒགུལ༹ྷཝེསྶནྟརགུལ༹ྷཝིནཡཝེདལླཔིཊཀཱནི པན ཨབུདྡྷཝཙནཱནིཡེཝཱཏི ¶ ཝུཏྟཾ. སཱིལཱུཔདེསོ ནཱམ དྷམྨསེནཱཔཏིནཱ ཝུཏྟོཏི ཝདནྟི, ཏསྨིཾ ཨཱཔཏྟིཡེཝ. ཨཉྙཱནིཔི མགྒཀཐཱཨཱརམྨཎཀཐཱབུདྡྷིཀདཎྜཀ ཉཱཎཝཏྠུཨསུབྷཀཐཱདཱིནི ཨཏྠི, ཏེསུ སཏྟཏིཾས བོདྷིཔཀྑིཡདྷམྨཱ ཝིབྷཏྟཱ, དྷུཏངྒཔཉྷེ པཊིཔདཱ ཝིབྷཏྟཱ; ཏསྨཱ ཏེསུ ཨཱཔཏྟཱིཏི ཝུཏྟཾ. མཧཱཔཙྩརིཡཱདཱིསུ པན སངྒཱིཏིཾ ཨནཱརུལ༹ྷེསུ རཱཛོཝཱདཏིཀྑིནྡྲིཡཙཏུཔརིཝཊྚནནྡོཔནནྡཀུལུམྦསུཏྟེསུཡེཝ ཨཱཔཏྟཱིཏི ཝཏྭཱ ཨཝསེསེསུ ཡཾ བུདྡྷཝཙནཏོ ཨཱཧརིཏྭཱ ཝུཏྟཾ, ཏདེཝ ཨཱཔཏྟིཝཏྠུ ཧོཏི, ན ཨིཏརནྟི ཨཡམཏྠོ པརིགྒཧིཏོ.

༤༨. ཨེཀཏོ ཨུདྡིསཱཔེནྟོཏི ཨནུཔསམྤནྣེན སདྡྷིཾ ཨེཀཏོ ཨུདྡེསཾ གཎྷནྟོཔི ཨེཀཏོ ཝདཏི ཨནཱཔཏྟཱིཏི ཨཏྠོ.

ཏཏྲཱཡཾ ¶ ཝིནིཙྪཡོ – ཨུཔསམྤནྣོ ཙ ཨནུཔསམྤནྣོ ཙ ནིསཱིདིཏྭཱ ཨུདྡིསཱཔེནྟི. ཨཱཙརིཡོ ནིསིནྣཱནཾ བྷཎཱམཱིཏི ཏེཧི སདྡྷིཾ ཨེཀཏོ ཝདཏི, ཨཱཙརིཡསྶ ཨཱཔཏྟི. ཨནུཔསམྤནྣེན སདྡྷིཾ གཎྷནྟསྶ ཨནཱཔཏྟི. དྭེཔི ཋིཏཱ གཎྷནྟི, ཨེསེཝ ནཡོ. དཧརབྷིཀྑུ ནིསིནྣོ, སཱམཎེརོ ཋིཏོ, ནིསིནྣསྶ བྷཎཱམཱིཏི བྷཎཏོ ཨནཱཔཏྟི. སཙེ དཧརོ ཏིཊྛཏི, ཨིཏརོ ནིསཱིདཏི, ཋིཏསྶ བྷཎཱམཱིཏི བྷཎཏོཔི ཨནཱཔཏྟི. སཙེ བཧཱུནཾ བྷིཀྑཱུནཾ ཨནྟརེ ཨེཀོ སཱམཎེརོ ནིསིནྣོ ཧོཏི, ཏསྨིཾ ནིསིནྣེ པདསོ དྷམྨཾ ཝཱཙེནྟསྶ ཨཱཙརིཡསྶ ཨཙིཏྟཀཱཔཏྟི. སཙེ སཱམཎེརོ ཨུཔཙཱརཾ མུཉྩིཏྭཱ ཋིཏོ ཝཱ ནིསིནྣོ ཝཱ ཧོཏི, ཡེསཾ ཝཱཙེཏི, ཏེསུ ཨཔརིཡཱཔནྣཏྟཱ ཨེཀེན དིསཱབྷཱགེན པལཱཡནཀགནྠཾ ནཱམ གཎྷཱཏཱིཏི སངྑྱཾ གཙྪཏི, ཏསྨཱ ཨནཱཔཏྟི. ཨེཀཏོ སཛ྄ཛྷཱཡཾ ཀརོནྟོཔི ཨནུཔསམྤནྣེན སདྡྷིཾ ཨུཔསམྤནྣོ ཨེཀཏོ སཛ྄ཛྷཱཡཾ ཀརོནྟོ ¶ ཏེན སདྡྷིཾཡེཝ བྷཎཏི, ཨནཱཔཏྟི. ཨནུཔསམྤནྣསྶ སནྟིཀེ ཨུདྡེསཾ གཎྷནྟསྶཔི ཏེན སདྡྷིཾ ཨེཀཏོ བྷཎནྟསྶ ཨནཱཔཏྟི. ཨཡམྤི ཧི ཨེཀཏོ སཛ྄ཛྷཱཡཾ ཀརོཏིཙྩེཝ སངྑྱཾ གཙྪཏི.

ཡེབྷུཡྻེན པགུཎཾ གནྠཾ བྷཎནྟཾ ཨོཔཱཏེཏཱིཏི སཙེ ཨེཀགཱཐཱཡ ཨེཀོ པཱདོ ན ཨཱགཙྪཏི, སེསཾ ཨཱགཙྪཏི, ཨཡཾ ཡེབྷུཡྻེན པགུཎགནྠོ ནཱམ. ཨེཏེན ¶ ནཡེན སུཏྟེཔི ཝེདིཏབྦོ. ཏཾ ཨོཔཱཏེནྟསྶ ཨེཝཾ བྷཎཱཧཱིཏི ཨེཀཏོཔི བྷཎནྟསྶ ཨནཱཔཏྟི. ཨོསཱརེནྟཾ ཨོཔཱཏེཏཱིཏི སུཏྟཾ ཨུཙྩཱརེནྟཾ པརིསམཛ྄ཛྷེ པརིསངྐམཱནཾ ཨེཝཾ ཝདེཧཱིཏི ཏེན སདྡྷིཾ ཨེཀཏོཔི ཝདནྟསྶ ཨནཱཔཏྟི. ཡཾ པན མཧཱཔཙྩརིཡཱདཱིསུ ‘‘མཡཱ སདྡྷིཾ མཱ ཝདཱ’’ཏི ཝུཏྟོ ཡདི ཝདཏི, ‘‘ཨནཱཔཏྟཱི’’ཏི ཝུཏྟཾ, ཏཾ མཧཱཨཊྛཀཐཱཡཾ ནཏྠི, ནཏྠིབྷཱཝོཡེཝ ཙསྶ ཡུཏྟོ. ཀསྨཱ? ཀིརིཡསམུཊྛཱནཏྟཱ. ཨིཏརཐཱ ཧི ཀིརིཡཱཀིརིཡཾ བྷཝེཡྻ. སེསཾ ཨུཏྟཱནཏྠམེཝ.

པདསོདྷམྨསམུཊྛཱནཾ – ཝཱཙཏོ ཙ ཝཱཙཱཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པདསོདྷམྨསིཀྑཱཔདཾ ཙཏུཏྠཾ.

༥. སཧསེཡྻསིཀྑཱཔདཝཎྞནཱ

༤༩. པཉྩམསིཀྑཱཔདེ – མུཊྛསྶཏཱི ཨསམྤཛཱནཱཏི པུབྦབྷཱགེ སཏིསམྤཛཉྙསྶ ཨཀརཎཝསེནེཏཾ ཝུཏྟཾ, བྷཝངྒོཏིཎྞཀཱལེ པན ཀུཏོ སཏིསམྤཛཉྙནྟི! ཝིཀཱུཛམཱནཱཏི ཝིཔྤལཔམཱནཱ ¶ . ཀཱཀཙྪམཱནཱཏི ནཱསཱཡ ཀཱཀསདྡཾ ཝིཡ ནིརཏྠཀསདྡཾ མུཉྩམཱནཱ. ཨུཔཱསཀཱཏི པཋམཏརཾ ཨུཊྛིཏཨུཔཱསཀཱ.

༥༠. ཨེཏདཝོཙུནྟི ‘‘བྷགཝཏཱ ཨཱཝུསོ རཱཧུལ སིཀྑཱཔདཾ པཉྙཏྟ’’ནྟི བྷིཀྑཱུ སིཀྑཱཔདགཱརཝེནེཝ ཨེཏཾ ཨཝོཙུཾ. པཀཏིཡཱ པན ཏེ བྷགཝཏི ཙ གཱརཝེན ཨཱཡསྨཏོ ཙ རཱཧུལསྶ སིཀྑཱཀཱམཏཱཡ ཏསྶ ཨཱཡསྨཏོ ཝསནཊྛཱནཾ ཨཱགཏསྶ ཙཱུལ༹མཉྩཀཾ ཝཱ ཨཔསྶེནཾ ཝཱ ཡཾ ཨཏྠི ཏཾ པཉྙཔེཏྭཱ ཙཱིཝརཾ ཝཱ ཨུཏྟརཱསངྒཾ ཝཱ ཨུསྶཱིསཀརཎཏྠཱཡ དེནྟི ¶ . ཏཏྲིདཾ ཏསྶཱཡསྨཏོ སིཀྑཱཀཱམཏཱཡ – བྷིཀྑཱུ ཀིར ཏཾ དཱུརཏོཝ ཨཱགཙྪནྟཾ དིསྭཱ མུཊྛིསམྨུཉྫནིཉྩ ཀཙཝརཚཌྜནཀཉྩ བཧི ཁིཔནྟི. ཨཐཉྙེཧི ‘‘ཨཱཝུསོ ཀེནིདཾ པཱཏིཏ’’ནྟི ཝུཏྟེ ཨཉྙེ ཨེཝཾ ཝདནྟི – ‘‘བྷནྟེ, རཱཧུལོ ཨིམསྨིཾ པདེསེ སཉྩརི, ཏེན ནུ ཁོ པཱཏིཏ’’ནྟི. སོ པནཱཡསྨཱ ‘‘ན མཡ྄ཧཾ བྷནྟེ ཨིདཾ ཀམྨ’’ནྟི ཨེཀདིཝསམྤི ཨཝཏྭཱ ཏཾ པཊིསཱམེཏྭཱ བྷིཀྑཱུ ཁམཱཔེཏྭཱ གཙྪཏི. ཝཙྩཀུཊིཡཱ སེཡྻཾ ཀཔྤེསཱིཏི ཏཾཡེཝ ¶ སིཀྑཱཀཱམཏཾ ཨནུབྲཱུཧནྟོ དྷམྨསེནཱཔཏིམཧཱམོགྒལླཱནཨཱནནྡཏྠེརཱདཱིནཾ སནྟིཀཾ ཨགནྟྭཱ བྷགཝཏོ ཝལ༹ཉྫནཀཝཙྩཀུཊིཡཾ སེཡྻཾ ཀཔྤེསི. སཱ ཀིར ཀུཊི ཀཝཱཊབདྡྷཱ གནྡྷཔརིབྷཎྜཀཏཱ སམོསརིཏཔུཔྥདཱམཱ ཙེཏིཡཊྛཱནམིཝ ཏིཊྛཏི, ཨཔརིབྷོགཱ ཨཉྙེསཾ.

༥༡. ཨུཏྟརིདིརཏྟཏིརཏྟནྟི བྷགཝཱ སཱམཎེརཱནཾ སངྒཧཀརཎཏྠཱཡ ཏིརཏྟཾ པརིཧཱརཾ ཨདཱསི. ན ཧི ཡུཏྟཾ ཀུལདཱརཀེ པབྦཱཛེཏྭཱ ནཱནུགྒཧེཏུནྟི. སཧསེཡྻནྟི ཨེཀཏོ སེཡྻཾ. སེཡྻཱཏི ཀཱཡཔྤསཱརཎསངྑཱཏཾ སཡནམྤི ཝུཙྩཏི, ཡསྨིཾ སེནཱསནེ སཡནྟི, ཏམྤི. ཏཏྠ སེནཱསནཾ ཏཱཝ དསྶེཏུཾ ‘‘སེཡྻཱ ནཱམ སབྦཙྪནྣཱ’’ཏིཨཱདི ཝུཏྟཾ. ཀཱཡཔྤསཱརཎཾ དསྶེཏུཾ ཨནུཔསམྤནྣེ ནིཔནྣེ བྷིཀྑུ ནིཔཛྫཏཱི’’ཏིཨཱདི ཝུཏྟཾ. ཏསྨཱ ཨཡམེཏྠ ཨཏྠོ – ‘‘སེནཱསནསངྑཱཏཾ སེཡྻཾ པཝིསིཏྭཱ ཀཱཡཔྤསཱརཎསངྑཱཏཾ སེཡྻཾ ཀཔྤེཡྻ ཝིདཧེཡྻ སམྤཱདེཡྻཱ’’ཏི. སབྦཙྪནྣཱཏིཨཱདིནཱ པན ཏསྶཱ སེནཱསནསངྑཱཏཱཡ སེཡྻཱཡ ལཀྑཎཾ ཝུཏྟཾ. ཏསྨཱ ཡཾ སེནཱསནཾ ཨུཔརི པཉྩཧི ཚདནེཧི ཨཉྙེན ཝཱ ཀེནཙི སབྦམེཝ པཊིཙྪནྣཾ, ཨཡཾ སབྦཙྪནྣཱ ནཱམ སེཡྻཱ. ཨཊྛཀཐཱསུ པན པཱཀཊཝོཧཱརཾ གཧེཏྭཱ ཝཱཙུགྒཏཝསེན ‘‘སབྦཙྪནྣཱ ནཱམ པཉྩཧི ཚདནེཧི ཚནྣཱ’’ཏི ཝུཏྟཾ. ཀིཉྩཱཔི ཝུཏྟཾ? ཨཐ ཁོ དུསྶཀུཊིཡཾ ཝསནྟསྶཱཔི ན སཀྐཱ ཨནཱཔཏྟི ཀཱཏུཾ, ཏསྨཱ ཡཾ ཀིཉྩི པཊིཙྪཱདནསམཏྠཾ ཨིདྷ ཚདནཉྩ པརིཙྪནྣཉྩ ཝེདིཏབྦཾ. པཉྩཝིདྷཙྪདནེཡེཝ ཧི གཡ྄ཧམཱནེ པདརཙྪནྣེཔི སཧསེཡྻཱ ན བྷཝེཡྻ. ཡཾ པན སེནཱསནཾ བྷཱུམིཏོ པཊྛཱཡ ཡཱཝ ཚདནཾ ཨཱཧཙྩ པཱཀཱརེན ཝཱ ཨཉྙེན ཝཱ ཀེནཙི ཨནྟམསོ ཝཏྠེནཱཔི པརིཀྑིཏྟཾ, ཨཡཾ སབྦཔརིཙྪནྣཱ ནཱམ སེཡྻཱ. ཚདནཾ ཨནཱཧཙྩ སབྦནྟིམེན པརིཡཱཡེན དིཡཌྜྷཧཏྠུབྦེདྷེན པཱཀཱརཱདིནཱ ¶ པརིཀྑིཏྟཱཔི སབྦཔརིཙྪནྣཱཡེཝཱཏི ཀུརུནྡཊྛཀཐཱཡཾ ཝུཏྟཾ. ཡསྶཱ པན ཨུཔརི བཧུཏརཾ ཋཱནཾ ཚནྣཾ, ཨཔྤཾ ཨཙྪནྣཾ, སམནྟཏོ ¶ ཝཱ བཧུཏརཾ པརིཀྑིཏྟཾ, ཨཔྤཾ ཨཔརིཀྑིཏྟཾ, ཨཡཾ ཡེབྷུཡྻེན ཚནྣཱ ཡེབྷུཡྻེན པརིཙྪནྣཱ ནཱམ. ཨིམིནཱ ¶ ཧི ལཀྑཎེན སམནྣཱགཏོ སཙེཔི སཏྟབྷཱུམཀོ པཱསཱདོ ཨེཀཱུཔཙཱརོ ཧོཏི, སཏགབྦྷཾ ཝཱ ཙཏུསྶཱལཾ ཝཱ, ཨེཀསེཡྻཱཨིཙྩེཝ སངྑྱཾ གཙྪཏི. ཏཾ སནྡྷཱཡ ཝུཏྟཾ ‘‘ཙཏུཏྠེ དིཝསེ ཨཏྠངྒཏེ སཱུརིཡེ ཨནུཔསམྤནྣེ ནིཔནྣེ བྷིཀྑུ ནིཔཛྫཏི, ཨཱཔཏྟི པཱཙིཏྟིཡསྶཱ’’ཏིཨཱདི.

ཏཏྠ ཙ ནིཔཛྫནམཏྟེནེཝ པཱཙིཏྟིཡཾ. སཙེ པན སམྦཧུལཱ སཱམཎེརཱ, ཨེཀོ བྷིཀྑུ, སཱམཎེརགཎནཱཡ པཱཙིཏྟིཡཱ. ཏེ ཙེ ཨུཊྛཱཡུཊྛཱཡ ནིཔཛྫནྟི, ཏེསཾ པཡོགེ པཡོགེ བྷིཀྑུསྶ ཨཱཔཏྟི. བྷིཀྑུསྶ ཨུཊྛཱཡུཊྛཱཡ ནིཔཛྫནེ པན བྷིཀྑུསྶེཝ པཡོགེན བྷིཀྑུསྶ ཨཱཔཏྟི. སཙེ པན སམྦཧུལཱ བྷིཀྑཱུ ཨེཀོ སཱམཎེརོ སབྦེསཾ ཨཱཔཏྟིཾ ཀརོཏི, ཏསྶ ཨུཊྛཱཡུཊྛཱཡ ནིཔཛྫནེནཔི བྷིཀྑཱུནཾ ཨཱཔཏྟིཡེཝ. ཨུབྷཡེསཾ སམྦཧུལབྷཱཝེཔི ཨེསེཝ ནཡོ.

ཨཔིཙེཏྠ ཨེཀཱཝཱསཱདིཀམྤི ཙཏུཀྐཾ ཝེདིཏབྦཾ. ཡོ ཧི ཨེཀསྨིཾ ཨཱཝཱསེ ཨེཀེནེཝ ཨནུཔསམྤནྣེན སདྡྷིཾ ཏིརཏྟཾ སཧསེཡྻཾ ཀཔྤེཏི, ཏསྶ ཙཏུཏྠདིཝསཏོ པཊྛཱཡ དེཝསིཀཱ ཨཱཔཏྟི. ཡོཔི ཨེཀསྨིཾཡེཝ ཨཱཝཱསེ ནཱནཱཨནུཔསམྤནྣེཧི སདྡྷིཾ ཏིརཏྟཾ སཧསེཡྻཾ ཀཔྤེཏི, ཏསྶཔི. ཡོཔི ནཱནཱཨཱཝཱསེསུ ཨེཀེནེཝ ཨནུཔསམྤནྣེན སདྡྷིཾ ཏིརཏྟཾ སཧསེཡྻཾ ཀཔྤེཏི, ཏསྶཔི. ཡོཔི ནཱནཱཨཱཝཱསེསུ ནཱནཱཨནུཔསམྤནྣེཧི སདྡྷིཾ ཡོཛནསཏམྤི གནྟྭཱ སཧསེཡྻཾ ཀཔྤེཏི, ཏསྶཔི ཙཏུཏྠདིཝསཏོ པཊྛཱཡ དེཝསིཀཱ ཨཱཔཏྟི.

ཨཡཉྩ སཧསེཡྻཱཔཏྟི ནཱམ ‘‘བྷིཀྑུཾ ཋཔེཏྭཱ ཨཝསེསོ ཨནུཔསམྤནྣོ ནཱམཱ’’ཏི ཝཙནཏོ ཏིརཙྪཱནགཏེནཔི སདྡྷིཾ ཧོཏི, ཏཏྲ ཏིརཙྪཱནགཏསྶ པརིཙྪེདོ མེཐུནདྷམྨཱཔཏྟིཡཱ ཝུཏྟནཡེནེཝ ཝེདིཏབྦོ. ཏསྨཱ སཙེཔི གོདྷཱབིལཱ༹ལམངྒུསཱདཱིསུ ཀོཙི པཝིསིཏྭཱ བྷིཀྑུནོ ཝསནསེནཱསནེ ཨེཀཱུཔཙཱརཊྛཱནེ སཡཏི, སཧསེཡྻཱཝ ཧོཏི.

ཡདི པན ཐམྦྷཱནཾ ཨུཔརི ཀཏཔཱསཱདསྶ ཨུཔརིམཏལེན སདྡྷིཾ ཨསམྦདྡྷབྷིཏྟིཀསྶ བྷིཏྟིཡཱ ཨུཔརི ཋིཏསུསིརཏུལཱསཱིསསྶ སུསིརེན པཝིསིཏྭཱ ཏུལཱཡ ཨབྦྷནྟརེ སཡིཏྭཱ ཏེནེཝ སུསིརེན ནིཀྑམིཏྭཱ གཙྪཏི ¶ , ཧེཊྛཱཔཱསཱདེ ¶ སཡིཏབྷིཀྑུསྶ ཨནཱཔཏྟི. སཙེ ཚདནེ ཚིདྡཾ ཧོཏི, ཏེན པཝིསིཏྭཱ ཨནྟོཚདནེ ཝསིཏྭཱ ཏེནེཝ པཀྐམཏི, ནཱནཱུཔཙཱརེ ཨུཔརིམཏལེ ཚདནབྦྷནྟརེ སཡིཏསྶ ཨཱཔཏྟི, ཧེཊྛིམཏལེ སཡིཏསྶ ཨནཱཔཏྟི. སཙེ ཨནྟོཔཱསཱདེནེཝ ཨཱརོཧིཏྭཱ ¶ སབྦཏལཱནི པརིབྷུཉྫནྟི, ཨེཀཱུཔཙཱརཱནི ཧོནྟི, ཏེསུ ཡཏྠ ཀཏྠཙི སཡིཏསྶ ཨཱཔཏྟི.

སབྷཱསངྑེཔེན ཀཏེ ཨཌྜྷཀུཊྚཀསེནཱསནེ སཡིཏསྶ ཝཱལ༹སངྒྷཱཊཱདཱིསུ ཀཔོཏཱདཡོ པཝིསིཏྭཱ སཡནྟི, ཨཱཔཏྟིཡེཝ. པརིཀྑེཔསྶ བཧིགཏེ ནིབྦཀོསབྦྷནྟརེ སཡནྟི, ཨནཱཔཏྟི. པརིམཎྜལཾ ཝཱ ཙཏུརསྶཾ ཝཱ ཨེཀཙྪདནཱཡ གབྦྷམཱལཱཡ སཏགབྦྷཾ ཙེཔི སེནཱསནཾ ཧོཏི, ཏཏྲ ཙེ ཨེཀེན སཱདྷཱརཎདྭཱརེན པཝིསིཏྭཱ ཝིསུཾ པཱཀཱརེན ཨཔརིཙྪིནྣགབྦྷཱུཔཙཱརེ སབྦགབྦྷེ པཝིསནྟི, ཨེཀགབྦྷེཔི ཨནུཔསམྤནྣེ ནིཔནྣེ སབྦགབྦྷེསུ ནིཔནྣཱནཾ ཨཱཔཏྟི. སཙེ སཔམུཁཱ གབྦྷཱ ཧོནྟི, པམུཁསྶ ཨུཔརི ཨཙྪནྣཾ ཨུཙྩཝཏྠུཀཾ ཙེཔི ཧོཏི, པམུཁེ སཡིཏོ གབྦྷེ སཡིཏཱནཾ ཨཱཔཏྟིཾ ན ཀརོཏི. སཙེ པན གབྦྷཙྪདནེནེཝ སདྡྷིཾ སམྦདྡྷཙྪདནཾ ཧོཏི, ཏཏྲ སཡིཏོ སབྦེསཾ ཨཱཔཏྟིཾ ཀརོཏི. ཀསྨཱ? སབྦཙྪནྣཏྟཱ སབྦཔརིཙྪནྣཏྟཱ ཙ, གབྦྷཔརིཀྑེཔོཡེཝ ཧིསྶ པརིཀྑེཔོཏི. ཨེཏེནེཝ ཧི ནཡེན ཨཊྛཀཐཱསུ ལོཧཔཱསཱདཔརིཀྑེཔསྶ ཙཏཱུསུ དྭཱརཀོཊྛཀེསུ ཨཱཔཏྟི ཝུཏྟཱ.

ཡཾ པན ཨནྡྷཀཊྛཀཐཱཡཾ ‘‘ཨཔརིཀྑིཏྟེ པམུཁེ ཨནཱཔཏྟཱིཏི བྷཱུམིཡཾ ཝིནཱ ཛགཏིཡཱ པམུཁཾ སནྡྷཱཡ ཀཐིན’’ནྟི ཝུཏྟཾ, ཏཾ ཨནྡྷཀརཊྛེ པཱཊེཀྐསནྣིཝེསཱ ཨེཀཙྪདནཱ གབྦྷཔཱལི༹ཡོ སནྡྷཱཡ ཝུཏྟཾ. ཡཉྩ ཏཏྠ ‘‘བྷཱུམིཡཾ ཝིནཱ ཛགཏིཡཱ’’ཏི ཝུཏྟཾ, ཏཾ ནེཝ ཨཊྛཀཐཱསུ ཨཏྠི; ན པཱལི༹ཡཱ སམེཏི. དསཧཏྠུབྦེདྷཱཔི ཧི ཛགཏི པརིཀྑེཔསངྑྱཾ ན གཙྪཏི. ཏསྨཱ ཡམྤི ཏཏྠ དུཏིཡསིཀྑཱཔདེ ཛགཏིཡཱ པམཱཎཾ ཝཏྭཱ ‘‘ཨེཏཾ ཨེཀཱུཔཙཱརཾ པརིཙྪནྣཾ ནཱམ ཧོཏཱི’’ཏི ཝུཏྟཾ, ཏཾ ན གཧེཏབྦཾ. ཡེཔི ཨེཀསཱལདྭིསཱལཏིསཱལཙཏུསྶཱལསནྣིཝེསཱ མཧཱཔཱསཱདཱ ཨེཀསྨིཾ ཨོཀཱསེ པཱདེ དྷོཝིཏྭཱ པཝིཊྛེན སཀྐཱ ཧོནྟི སབྦཏྠ ཨནུཔརིགནྟུཾ ¶ , ཏེསུཔི སཧསེཡྻཱཔཏྟིཡཱ ན མུཙྩཏི. སཙེ ཏསྨིཾ ཏསྨིཾ ཋཱནེ ཨུཔཙཱརཾ པརིཙྪིནྡིཏྭཱ ཀཏཱ ཧོནྟི, ཨེཀཱུཔཙཱརཊྛཱནེཡེཝ ཨཱཔཏྟི.

དྭཱིཧི ¶ དྭཱརེཧི ཡུཏྟསྶ སུདྷཱཚདནམཎྜཔསྶ མཛ྄ཛྷེ པཱཀཱརཾ ཀརོནྟི, ཨེཀེན དྭཱརེན པཝིསིཏྭཱ ཨེཀསྨིཾ པརིཙྪེདེ ཨནུཔསམྤནྣོ སཡཏི, ཨེཀསྨིཾ བྷིཀྑུ, ཨནཱཔཏྟི. པཱཀཱརེ གོདྷཱདཱིནཾ པཝིསནམཏྟམྤི ཚིདྡཾ ཧོཏི, ཨེཀསྨིཉྩ པརིཙྪེདེ གོདྷཱ སཡནྟི, ཨནཱཔཏྟིཡེཝ. ན ཧི ཚིདྡེན གེཧཾ ཨེཀཱུཔཙཱརཾ ནཱམ ཧོཏི. སཙེ པཱཀཱརམཛ྄ཛྷེ ཚིནྡིཏྭཱ དྭཱརཾ ཡོཛེནྟི, ཨེཀཱུཔཙཱརཏཱཡ ཨཱཔཏྟི. ཏཾ དྭཱརཾ ཀཝཱཊེན པིདཧིཏྭཱ སཡནྟི, ཨཱཔཏྟིཡེཝ. ན ཧི དྭཱརཔིདཧནེན གེཧཾ ནཱནཱུཔཙཱརཾ ནཱམ ཧོཏི, དྭཱརཾ ཝཱ ཨདྭཱརཾ. ཀཝཱཊཉྷི སཾཝརཎཝིཝརཎེཧི ཡཐཱསུཁཾ ¶ ཝལ༹ཉྫནཏྠཱཡ ཀཏཾ, ན ཝལ༹ཉྫནཱུཔཙྪེདནཏྠཱཡ. སཙེ པན ཏཾ དྭཱརཾ པུན ཨིཊྛཀཱཧི པིདཧནྟི, ཨདྭཱརཾ ཧོཏི, པུརིམེ ནཱནཱུཔཙཱརབྷཱཝེཡེཝ ཏིཊྛཏི. དཱིགྷཔམུཁཾ ཙེཏིཡགྷརཾ ཧོཏི. ཨེཀཾ ཀཝཱཊཾ ཨནྟོ, ཨེཀཾ བཧི, དྭིནྣཾ ཀཝཱཊཱནཾ ཨནྟརེ ཨནུཔསམྤནྣོ ཨནྟོཙེཏིཡགྷརེ སཡནྟསྶ ཨཱཔཏྟིཾ ཀརོཏི, ཨེཀཱུཔཙཱརཏྟཱ.

ཏཏྲ ཡསྶ ‘‘སིཡཱ ཨཡཾ ཨེཀཱུཔཙཱརནཱནཱུཔཙཱརཏཱ ནཱམ ཨུདོསིཏསིཀྑཱཔདེ ཝུཏྟཱ, ཨིདྷ པན ‘སེཡྻཱ ནཱམ སབྦཙྪནྣཱ སབྦཔརིཙྪནྣཱ ཡེབྷུཡྻེན ཚནྣཱ ཡེབྷུཡྻེན པརིཙྪནྣཱ’ཏི ཨེཏྟཀམེཝ ཝུཏྟཾ, པིཧིཏདྭཱརོ ཙ གབྦྷོ སབྦཔརིཙྪནྣོཝ ཧོཏི. ཏསྨཱ ཏཏྠ ཨནྟོ སཡིཏེནེཝ སདྡྷིཾ ཨཱཔཏྟི, བཧི སཡིཏེན ཨནཱཔཏྟཱི’’ཏི. སོ ཨེཝཾ ཝཏྟབྦོ – ‘‘ཨཔིཧིཏདྭཱརེ པན ཀསྨཱ བཧི སཡིཏེན ཨཱཔཏྟཱི’’ཏི? པམུཁསྶ གབྦྷེན སདྡྷིཾ སབྦཙྪནྣཏྟཱ. ‘‘ཀིཾ པན གབྦྷེ པིཧིཏེ ཚདནཾ ཝིདྡྷསྟཾ ཧོཏཱི’’ཏི? ན ཝིདྡྷསྟཾ, གབྦྷེན སདྡྷིཾ པམུཁསྶ སབྦཔརིཙྪནྣཏཱ ན ཧོཏི. ‘‘ཀིཾ པརིཀྑེཔོ ཝིདྡྷསྟོ’’ཏི? ཨདྡྷཱ ཝཀྑཏི ‘‘ན ཝིདྡྷསྟོ, ཀཝཱཊེན ཨུཔཙཱརོ པརིཙྪནྣོ’’ཏི. ཨེཝཾ དཱུརམྤི གནྟྭཱ པུན ཨེཀཱུཔཙཱརནཱནཱུཔཙཱརཏཾཡེཝ པཙྩཱགམིསྶཏི.

ཨཔིཙ ཡདི བྱཉྫནམཏྟེཡེཝ ཨཏྠོ སུཝིཉྙེཡྻོ སིཡཱ, སབྦཙྪནྣཱཏི ཝཙནཏོ པཉྩནྣཾ ཨཉྙཏརེན ཚདནེན ཚནྣཱ ཨེཝ སེཡྻཱ སིཡཱ, ན ཨཉྙེན. ཨེཝཉྩ སཏི པདརཙྪནྣཱདཱིསུ ཨནཱཔཏྟི སིཡཱ. ཏཏོ ཡདཏྠཾ སིཀྑཱཔདཾ པཉྙཏྟཾ, སྭེཝ ཨཏྠོ པརིཧཱཡེཡྻ ¶ . པརིཧཱཡཏུ ཝཱ མཱ ཝཱ, ཀཐཾ ཨཝུཏྟཾ གཧེཏབྦནྟི; ཀོ ཝཱ ཝདཏི ‘‘ཨཝུཏྟཾ གཧེཏབྦ’’ནྟི? ཝུཏྟཉྷེཏཾ ཨནིཡཏེསུ – ‘‘པཊིཙྪནྣཾ ནཱམ ཨཱསནཾ ཀུཊྚེན ཝཱ ཀཝཱཊེན ཝཱ ཀིལཉྫེན ¶ ཝཱ སཱཎིཔཱཀཱརེན ཝཱ རུཀྑེན ཝཱ ཐམྦྷེན ཝཱ ཀོཊྛལིཀཱཡ ཝཱ ཡེན ཀེནཙི པཊིཙྪནྣཾ ཧོཏཱི’’ཏི. ཏསྨཱ ཡཐཱ ཏཏྠ ཡེན ཀེནཙི པཊིཙྪནྣཾ པཊིཙྪནྣམེཝ, ཨེཝམིདྷཱཔི གཧེཏབྦཾ. ཏསྨཱ སེནཱསནཾ ཁུདྡཀཾ ཝཱ ཧོཏུ མཧནྟཾ ཝཱ ཨཉྙེན སདྡྷིཾ སམྦདྡྷཾ ཝཱ ཨསམྦདྡྷཾ ཝཱ དཱིགྷཾ ཝཱ ཝཊྚཾ ཝཱ ཙཏུརསྶཾ ཝཱ ཨེཀབྷཱུམཀཾ ཝཱ, ཨནེཀབྷཱུམཀཾ ཝཱ, ཡཾ ཡཾ ཨེཀཱུཔཙཱརཾ སབྦཏྠ ཡེན ཀེནཙི པཊིཙྪཱདནེན སབྦཙྪནྣེ སབྦཔརིཙྪནྣེ ཡེབྷུཡྻེན ཝཱ ཚནྣེ ཡེབྷུཡྻེན ཝཱ པརིཙྪནྣེ སཧསེཡྻཱཔཏྟི ཧོཏཱིཏི.

༥༣. ཨུཔཌྜྷཙྪནྣེ ཨུཔཌྜྷཔརིཙྪནྣེ ཨཱཔཏྟི དུཀྐཊསྶཱཏི ཨེཏྠ སབྦཙྪནྣེ ཨུཔཌྜྷཔརིཙྪནྣེཏི ཨེཝམཱདཱིསུཔི མཧཱཔཙྩརིཡཾ དུཀྐཊམེཝཱཏི ཝུཏྟཾ. མཧཱཨཊྛཀཐཱཡཾ པན ‘‘སབྦཙྪནྣེ ཡེབྷུཡྻེནཔརིཙྪནྣེ པཱཙིཏྟིཡཾ, སབྦཙྪནྣེ ཨུཔཌྜྷཔརིཙྪནྣེ པཱཙིཏྟིཡཾ, ཡེབྷུཡྻེནཚནྣེ ཨུཔཌྜྷཔརིཙྪནྣེ ¶ པཱཙིཏྟིཡཾ, སབྦཔརིཙྪནྣེ ཡེབྷུཡྻེནཚནྣེ པཱཙིཏྟིཡཾ, སབྦཔརིཚནྣེ ཨུཔཌྜྷཙྪནྣེ པཱཙིཏྟིཡཾ, ཡེབྷུཡྻེནཔརིཙྪནྣེ ཨུཔཌྜྷཙྪནྣེ པཱཙིཏྟིཡཾ, པཱལི༹ཡཾ ཝུཏྟཔཱཙིཏྟིཡེན སདྡྷིཾ སཏྟ པཱཙིཏྟིཡཱནཱི’’ཏི ཝུཏྟཾ. ‘‘སབྦཙྪནྣེ ཙཱུལ༹ཀཔརིཙྪནྣེ དུཀྐཊཾ, ཡེབྷུཡྻེནཚནྣེ ཙཱུལ༹ཀཔརིཙྪནྣེ དུཀྐཊཾ, སབྦཔརིཙྪནྣེ ཙཱུལ༹ཀཙྪནྣེ དུཀྐཊཾ, ཡེབྷུཡྻེནཔརིཙྪནྣེ ཙཱུལ༹ཀཙྪནྣེ དུཀྐཊཾ, པཱལི༹ཡཾ དུཀྐཊེན སཧ པཉྩ དུཀྐཊཱནཱི’’ཏི ཝུཏྟཾ.

‘‘ཨུཔཌྜྷཙྪནྣེ ཙཱུལ༹ཀཔརིཙྪནྣེ ཨནཱཔཏྟི, ཨུཔཌྜྷཔརིཙྪནྣེ ཙཱུལ༹ཀཙྪནྣེ ཨནཱཔཏྟི, ཙཱུལ༹ཀཙྪནྣེ ཙཱུལ༹ཀཔརིཙྪནྣེ ཨནཱཔཏྟི, སབྦཙྪནྣེ སབྦཨཔརིཙྪནྣེཏི ཙ ཨེཏྠ སེནམྦམཎྜཔཝཎྞཾ ¶ ཧོཏཱི’’ཏི ཝུཏྟཾ. ཨིམིནཱཔེཏཾ ཝེདིཏབྦཾ – ‘‘ཡཐཱ ཛགཏི པརིཀྑེཔསངྑཡ ན གཙྪཏཱི’’ཏི. སེསཾ ཨུཏྟཱནཏྠམེཝ.

ཨེལ༹ཀལོམསམུཊྛཱནཾ – ཀཱཡཏོ ཙ ཀཱཡཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

སཧསེཡྻསིཀྑཱཔདཾ པཉྩམཾ.

༦. དུཏིཡསཧསེཡྻསིཀྑཱཔདཝཎྞནཱ

༥༥. དུཏིཡསཧསེཡྻསིཀྑཱཔདེ ¶ – ཨཱཝསཐཱགཱརནྟི ཨཱགནྟུཀཱནཾ ཝསནཱགཱརཾ. པཉྙཏྟཾ ཧོཏཱིཏི པུཉྙཀཱམཏཱཡ ཀཏྭཱ ཋཔིཏཾ ཧོཏི. ཡེན སཱ ཨིཏྠཱི ཏེནུཔསངྐམཱིཏི ཨསུཀསྨིཾ ནཱམ ཋཱནེ ཨཱཝསཐཱགཱརཾ པཉྙཏྟཾ ཨཏྠཱིཏི མནུསྶཱནཾ སུཏྭཱ ཨུཔསངྐམི. གནྡྷགནྡྷིནཱིཏི ཨགརུཀུངྐུམཱདཱིནཾ གནྡྷཱནཾ གནྡྷོ གནྡྷགནྡྷོ, སོ ཨསྶཱ ཨཏྠཱིཏི གནྡྷགནྡྷིནཱི. སཱཊཀཾ ནིཀྑིཔིཏྭཱཏི ཨཔྤེཝ ནཱམསྶ ཨིམམྤི ཝིཔྤཀཱརཾ པསྶནྟསྶ རཱགོ ཨུཔྤཛྫེཡྻཱཏི ཙིནྟེཏྭཱ ཨེཝམཀཱསི. ཨོཀྑིཔིཏྭཱཏི ཨདྷོ ཁིཔིཏྭཱ. ཨཙྩཡོཏི ཨཔརཱདྷོ. མཾ ཨཙྩགམཱཏི མཾ ཨཏིཀྐམྨ ཨབྷིབྷཝིཏྭཱ པཝཏྟོ. སེསཾ པཋམསིཀྑཱཔདེ ཝུཏྟནཡེནེཝ ཝེདིཏབྦཾ. ཨཡམེཝ ཧི ཝིསེསོ – པཋམསིཀྑཱཔདེ ཙཏུཏྠདིཝསེ ཨཱཔཏྟི ཨིདྷ པཋམདིཝསེཔི. ཡཀྑཱིཔེཏཱིཧི དིསྶམཱནཀརཱུཔཱཧི ཏིརཙྪཱནགཏིཏྠིཡཱ ཙ མེཐུནདྷམྨཝཏྠུབྷཱུཏཱཡ ཨེཝ དུཀྐཊཾ. སེསཱཧི ཨནཱཔཏྟི. སམུཊྛཱནཱདཱིནི པཋམསདིསཱནེཝཱཏི.

དུཏིཡསཧསེཡྻསིཀྑཱཔདཾ ཚཊྛཾ.

༧. དྷམྨདེསནཱསིཀྑཱཔདཝཎྞནཱ

༦༠. སཏྟམསིཀྑཱཔདེ ¶ – གྷརཎཱིཏི གྷརསཱམིནཱི. ནིཝེསནདྭཱརེཏི ནིཝེསནསྶ མཧཱདྭཱརེ. གྷརསུཎྷཱཏི ཏསྨིཾ གྷརེ སུཎྷཱ. ཨཱཝསཐདྭཱརེཏི ཨོཝརཀདྭཱརེ. ཝིསྶཊྛེནཱཏི སུནིགྒཏེན སདྡེན. ཝིཝཊེནཱཏི སུཊྛུ པཀཱསེན ཨསཾཝུཏེན. དྷམྨོ དེསེཏབྦོཏི ཨཡཾ སརཎསཱིལཱདིབྷེདོ དྷམྨོ ཀཐེཏབྦོ. ཨཉྙཱཏུནྟི ཨཱཛཱནིཏུཾ. ཝིཉྙུནཱ པུརིསཝིགྒཧེནཱཏི ཝིཉྙུནཱ པུརིསེན, པུརིསཝིགྒཧཾ གཧེཏྭཱཔི ཋིཏེན ན ཡཀྑེན ན པེཏེན ན ཏིརཙྪཱནགཏེན.

༦༦. ཨནཱཔཏྟི ཝིཉྙུནཱ པུརིསཝིགྒཧེནཱཏི ཝིཉྙུནཱ པུརིསཝིགྒཧེན སདྡྷིཾ ཋིཏཱཡ བཧུམྤི དྷམྨཾ དེསེནྟསྶ ཨནཱཔཏྟི. ཚཔྤཉྩཝཱཙཱཧཱིཏི ¶ ཚཧི པཉྩཧི ཝཱཙཱཧི ཡོ དེསེཏི, ཏསྶཔི ཨནཱཔཏྟི. ཏཏྠ ཨེཀོ གཱཐཱཔཱདོ ཨེཀཝཱཙཱཏི ཨེཝཾ སབྦཏྠ ཝཱཙཱཔམཱཎཾ ཝེདིཏབྦཾ. སཙེ ཨཊྛཀཐཾ དྷམྨཔདཾ ཛཱཏཀཱདིཝཏྠུཾ ཝཱ ཀཐེཏུཀཱམོ ཧོཏི, ཚཔྤཉྩཔདམཏྟམེཝ ཀཐེཏུཾ ¶ ཝཊྚཏི. པཱལི༹ཡཱ སདྡྷིཾ ཀཐེནྟེན ཨེཀཔདཾ པཱལི༹ཏོ པཉྩ ཨཊྛཀཐཱཏོཏི ཨེཝཾ ཚ པདཱནི ཨནཏིཀྐཱམེཏྭཱཝ ཀཐེཏབྦོ. པདསོདྷམྨེ ཝུཏྟཔྤབྷེདོ ཧི ཨིདྷཱཔི སབྦོ དྷམྨོཡེཝ. ཏསྨིཾ དེསེཏཱིཏི ཏསྨིཾ ཁཎེ དེསེཏི. སམྤདཱནཏྠེ ཝཱ ཨེཏཾ བྷུམྨཝཙནཾ. ཏསྶཱ དེསེཏཱིཏི ཨཏྠོ. ཨཉྙིསྶཱ མཱཏུགཱམསྶཱཏི ཨེཀིསྶཱ དེསེཏྭཱ པུན ཨཱགཏཱགཏཱཡ ཨཉྙིསྶཱཔི དེསེཏཱིཏི ཨེཝཾ ཨེཀཱསནེ ནིསིནྣོ མཱཏུགཱམསཏསཧསྶནྣམྤི དེསེཏཱིཏི ཨཏྠོ. མཧཱཔཙྩརིཡཊྛཀཐཱཡཾ ཝུཏྟཾ སམཾ ནིསིནྣཱནཾ མཱཏུགཱམཱནཾ ‘‘ཏུམྷཱཀཾ ཨེཀེཀིསྶཱ ཨེཀེཀཾ གཱཐཾ དེསེསྶཱམི, ཏཾ སུཎཱཐཱཏི དེསེཏི, ཨནཱཔཏྟི. པཋམཾ ཨེཀེཀིསྶཱ ཨེཀེཀཾ གཱཐཾ ཀཐེསྶཱམཱིཏི ཨཱབྷོགཾ ཀཏྭཱ ཛཱནཱཔེཏྭཱ ཀཐེཏུཾ ཝཊྚཏི, ན པཙྪཱཏི. པཉྷཾ པུཙྪཏི པཉྷཾ པུཊྛོ ཀཐེཏཱིཏི མཱཏུགཱམོ ‘‘དཱིགྷནིཀཱཡོ ནཱམ བྷནྟེ ཀིམཏྠཾ དཱིཔེཏཱི’’ཏི པུཙྪཏི. ཨེཝཾ པཉྷཾ པུཊྛོ བྷིཀྑུ སབྦཾ ཙེཔི དཱིགྷནིཀཱཡཾ ཀཐེཏི, ཨནཱཔཏྟི. སེསམེཏྠ ཨུཏྟཱནཏྠམེཝ.

པདསོདྷམྨསམུཊྛཱནཾ – ཝཱཙཏོ ཙ ཝཱཙཱཙིཏྟཏོ ཙ སམུཊྛཱཏི, ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

དྷམྨདེསནཱསིཀྑཱཔདཾ སཏྟམཾ.

༨. བྷཱུཏཱརོཙནསིཀྑཱཔདཝཎྞནཱ

༦༧. ཨཊྛམསིཀྑཱཔདེ ¶ – ཝཏྠུཀཐཱཡ ཏཱཝ ཡཾ ཝཏྟབྦཾ སིཡཱ, ཏཾ སབྦཾ ཙཏུཏྠཔཱརཱཛིཀཝཎྞནཱཡཾ ཝུཏྟནཡམེཝ. ཨཡམེཝ ཧི ཝིསེསོ – ཏཏྠ ཨབྷཱུཏཾ ཨཱརོཙེསུཾ, ཨིདྷ བྷཱུཏཾ. བྷཱུཏམྤི པུཐུཛྫནཱ ཨཱརོཙེསུཾ, ན ཨརིཡཱ. ཨརིཡཱནཉྷི པཡུཏྟཝཱཙཱ ནཱམ ནཏྠི, ཨཏྟནོ གུཎེ ཨཱརོཙཡམཱནེ པན ཨཉྙེ ¶ ན པཊིསེདྷེསུཾ, ཏཐཱཨུཔྤནྣེ ཙ པཙྩཡེ སཱདིཡིཾསུ, ཏཐཱཨུཔྤནྣབྷཱཝཾ ཨཛཱནནྟཱ.

‘‘ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུ’’ནྟིཨཱདིམྷི པན ཡེ ཨུཏྟརིམནུསྶདྷམྨསྶ ཝཎྞཾ བྷཱསིཾསུ, ཏེ ཨཱརོཙེསུནྟི ཝེདིཏབྦཾ. ‘‘ཀཙྩི པན ཝོ བྷིཀྑཝེ བྷཱུཏ’’ནྟི པུཙྪིཏེ པན སབྦེཔི ‘‘བྷཱུཏཾ བྷགཝཱ’’ཏི པཊིཛཱནིཾསུ. ཨརིཡཱནམྤི ཧི ཨབྦྷནྟརེ བྷཱུཏོ ཨུཏྟརིམནུསྶདྷམྨོཏི. ཨཐ བྷགཝཱ ¶ ཨརིཡམིསྶཀཏྟཱ ‘‘མོགྷཔུརིསཱ’’ཏི ཨཝཏྭཱ ‘‘ཀཐཉྷི ནཱམ ཏུམྷེ བྷིཀྑཝེ’’ཏི ཝཏྭཱ ‘‘ཨུདརསྶ ཀཱརཎཱ’’ཏིཨཱདིམཱཧ. ཏཏྠ ཡསྨཱ ཨརིཡཱ ཨཉྙེསཾ སུཏྭཱ ‘‘ཨཡྻོ ཀིར, བྷནྟེ, སོཏཱཔནྣོ’’ཏིཨཱདིནཱ ནཡེན པསནྣེཧི མནུསྶེཧི པུཙྪིཡམཱནཱ ཨཔཉྙཏྟེ སིཀྑཱཔདེ ཨནཱདཱིནཝདསྶིནོ སུདྡྷཙིཏྟཏཱཡ ཨཏྟནོ ཙ པརེསཉྩ ཝིསེསཱདྷིགམཾ པཊིཛཱནིཾསུ. ཨེཝཾ པཊིཛཱནནྟེཧི ཙ ཏེཧི ཡཾ ཨཉྙེ ཨུདརསྶ ཀཱརཎཱ ཨུཏྟརིམནུསྶདྷམྨསྶ ཝཎྞཾ བྷཱསིཏྭཱ པིཎྜཔཱཏཾ ཨུཔྤཱདེསུཾ, ཏཾ སུདྡྷཙིཏྟཏཱཡ སཱདིཡནྟེཧིཔི ཨུདརསྶ ཀཱརཎཱ ཨུཏྟརིམནུསྶདྷམྨསྶ ཝཎྞོ བྷཱསིཏོ ཝིཡ ཧོཏི. ཏསྨཱ སབྦསངྒཱཧིཀེནེཝ ནཡེན ‘‘ཀཐཉྷི ནཱམ ཏུམྷེ, བྷིཀྑཝེ, ཨུདརསྶ ཀཱརཎཱ གིཧཱིནཾ ཨཉྙམཉྙཾ ཨུཏྟརིམནུསྶདྷམྨསྶ ཝཎྞཾ བྷཱསིསྶཐཱ’’ཏི ཨཱཧ. སེསཾ ཙཏུཏྠཔཱརཱཛིཀཝཏྠུསདིསམེཝ. སིཀྑཱཔདཝིབྷངྒེཔི ཀེཝལཾ ཏཏྠ པཱརཱཛིཀཉྩེཝ ཐུལླཙྩཡཉྩ ཨིདྷ བྷཱུཏཏྟཱ པཱཙིཏྟིཡཉྩེཝ དུཀྐཊཉྩ ཨཡཾ ཝིསེསོ. སེསཾ ཝུཏྟནཡམེཝ.

༧༧. ‘‘ཨུཔསམྤནྣསྶ བྷཱུཏཾ ཨཱརོཙེཏཱི’’ཏི ཨུཏྟརིམནུསྶདྷམྨམེཝ སནྡྷཱཡ ཝུཏྟཾ. པརིནིབྦཱནཀཱལེ ཧི ཨནྟརཱ ཝཱ ཨཏིཀཌྜྷིཡམཱནེན ཨུཔསམྤནྣསྶ བྷཱུཏཾ ཨཱརོཙེཏུཾ ཝཊྚཏི. སུཏཔརིཡཏྟིསཱིལགུཎཾ པན ཨནུཔསམྤནྣསྶཱཔི ཨཱརོཙེཏུཾ ཝཊྚཏི. ཨཱདིཀམྨིཀསྶ ཨནཱཔཏྟི. ‘‘ཨུམྨཏྟཀསྶཱ’’ཏི ཨིདཾ པན ཨིདྷ ན ཝུཏྟཾ. ཀསྨཱ? དིཊྛིསམྤནྣཱནཾ ཨུམྨཱདསྶ ཝཱ ཙིཏྟཀྑེཔསྶ ཝཱ ཨབྷཱཝཱཏི. མཧཱཔཙྩརིཡམྤི ཧི ཝིཙཱརིཏཾ ‘‘ཛྷཱནལཱབྷཱི པན པརིཧཱིནེ ཛྷཱནེ ཨུམྨཏྟཀོ བྷཝེཡྻ, ཏསྶཔི བྷཱུཏཱརོཙནཔཙྩཡཱ ཨནཱཔཏྟི ན ཝཏྟབྦཱ, བྷཱུཏསྶེཝ ཨབྷཱཝཏོ’’ཏི. སེསཾ ཨུཏྟཱནམེཝ.

བྷཱུཏཱརོཙནཾ ¶ ནཱམེཏཾ པུབྦེ ཨཝུཏྟེཧི ཏཱིཧི སམུཊྛཱནེཧི སམུཊྛཱཏི – ཀཱཡཏོ ཝཱཙཏོ ཀཱཡཝཱཙཏོ ཙཱཏི. ཀིརིཡཾ ¶ , ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཀུསལཱབྱཱཀཏཙིཏྟེཧི དྭིཙིཏྟཾ, སུཁམཛ྄ཛྷཏྟཝེདནཱཧི དྭིཝེདནནྟི.

བྷཱུཏཱརོཙནསིཀྑཱཔདཾ ཨཊྛམཾ.

༩. དུཊྛུལླཱརོཙནསིཀྑཱཔདཝཎྞནཱ

༧༨. ནཝམསིཀྑཱཔདེ ¶ – དུཊྛུལླཱ ནཱམ ཨཱཔཏྟི ཙཏྟཱརི ཙ པཱརཱཛིཀཱནི ཏེརས ཙ སངྒྷཱདིསེསཱཏི ཨིམིསྶཱ པཱལི༹ཡཱ ‘‘པཱརཱཛིཀཱནི དུཊྛུལླསདྡཏྠདསྶནཏྠཾ ཝུཏྟཱནི, སངྒྷཱདིསེསཾ པན ཨིདྷ ཨདྷིཔྤེཏ’’ནྟི ཨཊྛཀཐཱསུ ཝུཏྟཾ. ཏཏྲཱཡཾ ཝིཙཱརཎཱ – སཙེ པཱརཱཛིཀཾ ཨཱརོཙེནྟསྶ པཱཙིཏྟིཡཾ ན བྷཝེཡྻ, ཡཐཱ སམཱནེཔི བྷིཀྑུ-བྷིཀྑུནཱིནཾ ཨུཔསམྤནྣསདྡེ ཡཏྠ བྷིཀྑུནཱི ཨནདྷིཔྤེཏཱ ཧོཏི, ཏཏྠ བྷིཀྑུཾ ཋཔེཏྭཱ ཨཝསེསོ ཨནུཔསམྤནྣོཏི ཝུཙྩཏི; ཨེཝམིདྷ སམཱནེཔི པཱརཱཛིཀསངྒྷཱདིསེསཱནཾ དུཊྛུལླསདྡེ ཡདི པཱརཱཛིཀཾ ཨནདྷིཔྤེཏཾ, ‘‘དུཊྛུལླཱ ནཱམ ཨཱཔཏྟི ཏེརས སངྒྷཱདིསེསཱ’’ཏི ཨེཏདེཝ ཝཏྟབྦཾ སིཡཱ. ཏཏྠ བྷཝེཡྻ ‘‘ཡོ པཱརཱཛིཀཾ ཨཱཔནྣོ, སོ བྷིཀྑུབྷཱཝཏོ ཙུཏོ, ཏསྨཱ ཏསྶ ཨཱཔཏྟིཾ ཨཱརོཙེནྟོ དུཀྐཊཾ ཨཱཔཛྫཏཱི’’ཏི. ཨེཝཾ སཏི ཨཀྐོསནྟོཔི དུཀྐཊཾ ཨཱཔཛྫེཡྻ, པཱཙིཏྟིཡམེཝ ཙ ཨཱཔཛྫཏི. ཝུཏྟཉྷེཏཾ – ‘‘ཨསུདྡྷོ ཧོཏི པུགྒལོ ཨཉྙཏརཾ པཱརཱཛིཀཾ དྷམྨཾ ཨཛ྄ཛྷཱཔནྣོ, ཏཉྩེ ཨསུདྡྷདིཊྛི སམཱནོ ཨོཀཱསཾ ཀཱརཱཔེཏྭཱ ཨཀྐོསཱདྷིཔྤཱཡོ ཝདཏི, ཨཱཔཏྟི ཨོམསཝཱདསྶཱ’’ཏི (པཱརཱ. ༣༨༩). ཨེཝཾ པཱལི༹ཡཱ ཝིཙཱརིཡམཱནཱཡ པཱརཱཛིཀཾ ཨཱརོཙེནྟསྶཱཔི པཱཙིཏྟིཡམེཝ དིསྶཏི. ཀིཉྩཱཔི དིསྶཏི, ཨཐ ཁོ སབྦཨཊྛཀཐཱསུ ཝུཏྟཏྟཱ ཨཊྛཀཐཱཙརིཡཱཝ ཨེཏྠ པམཱཎཾ, ན ཨཉྙཱ ཝིཙཱརཎཱ. པུབྦེཔི ཙ ཨཱཝོཙུམྷ – ‘‘བུདྡྷེན དྷམྨོ ཝིནཡོ ཙ ཝུཏྟོ, ཡོ ཏསྶ པུཏྟེཧི ཏཐེཝ ཉཱཏོ’’ཏིཨཱདི (པཱརཱ. ཨཊྛ. ༡.གནྠཱརམྦྷཀཐཱ). ཨཊྛཀཐཱཙརིཡཱ ཧི བུདྡྷསྶ ཨདྷིཔྤཱཡཾ ཛཱནནྟི.

ཨིམིནཱཔི ཙེཏཾ པརིཡཱཡེན ཝེདིཏབྦཾ. ཨཉྙཏྲ བྷིཀྑུསམྨུཏིཡཱཏི ཧི ཝུཏྟཾ. བྷིཀྑུསམྨུཏིཡཱ ཙ ཨཱརོཙནཾ ཨཱཡཏིཾ སཾཝརཏྠཱཡ པུན ཏཐཱརཱུཔཾ ཨཱཔཏྟིཾ ཨནཱཔཛྫནཏྠཱཡ བྷགཝཏཱ ཨནུཉྙཱཏཾ, ན ཏསྶ བྷིཀྑུནོ ཨཝཎྞམཏྟཔྤཀཱསནཏྠཱཡ, སཱསནེ ཙསྶ པཏིཊྛཱནིསེདྷནཏྠཱཡ ¶ , ན ཙ པཱརཱཛིཀཾ ཨཱཔནྣསྶ པུན ཏཐཱརཱུཔཱཡ ཨཱཔཏྟིཡཱ ཨནཱཔཛྫནེན བྷིཀྑུབྷཱཝོ ¶ ནཱམ ཨཏྠི. ཏསྨཱ ‘‘པཱརཱཛིཀཱནི དུཊྛུལླསདྡཏྠདསྶནཏྠཾ ཝུཏྟཱནི, སངྒྷཱདིསེསཾ པན ཨིདྷཱདྷིཔྤེཏ’’ནྟི ཡཾ ཨཊྛཀཐཱསུ ཝུཏྟཾ, ཏཾ སུཝུཏྟམེཝ.

༨༠. ཨཏྠི ¶ བྷིཀྑུསམྨུཏི ཨཱཔཏྟིཔརིཡནྟཱཏིཨཱདཱིསུ པན ཡཱ ཨཡཾ བྷིཀྑུསམྨུཏི ཝུཏྟཱ, སཱ ན ཀཏྠཙི ཨཱགཏཱ, ཨིདྷ ཝུཏྟཏྟཱཡེཝ པན ཨབྷིཎྷཱཔཏྟིཀཾ བྷིཀྑུཾ དིསྭཱ ཨེཝམེས པརེསུ ཧིརོཏྟཔྤེནཱཔི ཨཱཡཏིཾ སཾཝརཾ ཨཱཔཛྫིསྶཏཱིཏི ཏསྶ བྷིཀྑུནོ ཧིཏེསིཏཱཡ ཏིཀྑཏྟུཾ ཨཔལོཀེཏྭཱ སངྒྷེན ཀཱཏབྦཱཏི ཝེདིཏབྦཱཏི.

༨༢. ཨདུཊྛུལླཾ ཨཱཔཏྟིཾ ཨཱརོཙེཏི ཨཱཔཏྟི དུཀྐཊསྶཱཏི པཉྩཔི ཨཱཔཏྟིཀྑནྡྷེ ཨཱརོཙེནྟསྶ དུཀྐཊཾ. མཧཱཔཙྩརིཡཾ པན པཱརཱཛིཀཾ ཨཱརོཙེནྟསྶཱཔི དུཀྐཊམེཝ ཝུཏྟཾ. ཨནུཔསམྤནྣསྶ དུཊྛུལླཾ ཝཱ ཨདུཊྛུལླཾ ཝཱ ཨཛ྄ཛྷཱཙཱརནྟི ཨེཏྠ ཨཱདིཏོ པཉྩ སིཀྑཱཔདཱནི དུཊྛུལློ ནཱམ ཨཛ྄ཛྷཱཙཱརོ, སེསཱནི ཨདུཊྛུལློ. སུཀྐཝིསྶཊྛིཀཱཡསཾསགྒདུཊྛུལླཨཏྟཀཱམཱ པནསྶ ཨཛ྄ཛྷཱཙཱརོ ནཱམཱཏི ཝུཏྟཾ.

༨༣. ཝཏྠུཾ ཨཱརོཙེཏཱིཏི ‘‘ཨཡཾ སུཀྐཝིསྶཊྛིཾ ཨཱཔནྣོ, དུཊྛུལླཾ ཨཱཔནྣོ, ཨཏྟཀཱམཾ ཨཱཔནྣོ’’ ཀཱཡསཾསགྒཾ ཨཱཔནྣོཏི ཨེཝཾ ཝདནྟསྶ ཨནཱཔཏྟི. ཨཱཔཏྟིཾ ཨཱརོཙེཏཱིཏི ཨེཏྠ ‘‘ཨཡཾ པཱརཱཛིཀཾ ཨཱཔནྣོ, སངྒྷཱདིསེསཾ ཐུལླཙྩཡཾ པཱཙིཏྟིཡཾ པཱཊིདེསནཱིཡཾ དུཀྐཊཾ དུབྦྷཱསིཏཾ ཨཱཔནྣོ’’ཏི ཝདཏི ཨནཱཔཏྟི. ‘‘ཨཡཾ ཨསུཙིཾ མོཙེཏྭཱ སངྒྷཱདིསེསཾ ཨཱཔནྣོ’’ཏིཨཱདིནཱ པན ནཡེན ཝཏྠུནཱ སདྡྷིཾ ཨཱཔཏྟིཾ གྷཊེཏྭཱ ཨཱརོཙེནྟསྶེཝ ཨཱཔཏྟི. སེསམེཏྠ ཨུཏྟཱནམེཝ.

ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

དུཊྛུལླཱརོཙནསིཀྑཱཔདཾ ནཝམཾ.

༡༠. པཐཝཱིཁཎནསིཀྑཱཔདཝཎྞནཱ

༨༦. དསམསིཀྑཱཔདེ – ཛཱཏཱ ཙ པཐཝཱི ཨཛཱཏཱ ཙ པཐཝཱིཏི ཨིམེཧི པདེཧི ཛཱཏཔཐཝིཉྩ ཨཛཱཏཔཐཝིཉྩ དསྶེཏི. ཨཔྤཔཱསཱཎཱདཱིསུ ཨཔྤཱ པཱསཱཎཱ ཨེཏྠཱཏི ཨཔྤཔཱསཱཎཱཏི ཨེཝམཏྠོ ¶ དཊྛབྦོ. ཏཏྠ མུཊྛིཔྤམཱཎཏོ ¶ ཨུཔརི པཱསཱཎཱཏི ཝེདིཏབྦཱ, མུཊྛིཔྤམཱཎཱ ¶ སཀྑརཱ. ཀཐལཱཏི ཀཔཱལཁཎྜཱནི. མརུམྦཱཏི ཀཊསཀྑརཱ. ཝཱལིཀཱཏི ཝཱལུཀཱཡེཝ. ཡེབྷུཡྻེན པཾསུཀཱཏི ཏཱིསུ ཀོཊྛཱསེསུ དྭེ ཀོཊྛཱསཱ པཾསུ, ཨེཀོ པཱསཱཎཱདཱིསུ ཨཉྙཏརོ. ཨདཌྜྷཱཔཱིཏི ཨུདྡྷནཔཏྟཔཙནཀུམྦྷཀཱརཱཝཱཔཱདིཝསེན ཏཐཱ ཏཐཱ ཨདཌྜྷཱ. སཱ པན ཝིསུཾ ནཏྠི, སུདྡྷཔཾསུཨཱདཱིསུ ཨཉྙཏརཱཝ ཝེདིཏབྦཱ. ཡེབྷུཡྻེནསཀྑརཱཏི བཧུཏརཱ སཀྑརཱ. ཧཏྠིཀུཙྪིཡཾ ཀིར ཨེཀཔཙྪིཔཱུརཾ ཨཱཧརཱཔེཏྭཱ དོཎིཡཾ དྷོཝིཏྭཱ པཐཝིཡཱ ཡེབྷུཡྻེན སཀྑརབྷཱཝཾ ཉཏྭཱ སཡཾ བྷིཀྑཱུ པོཀྑརཎིཾ ཁཎིཾསུ. ཡཱནི པན མཛ྄ཛྷེ ‘‘ཨཔྤཔཾསུ ཨཔྤམཏྟིཀཱ’’ཏི དྭེ པདཱནི, ཏཱནི ཡེབྷུཡྻེནཔཱསཱཎཱདིཔཉྩཀམེཝ པཝིསནྟི ཏེསཾཡེཝ ཧི དྭིནྣཾ པབྷེདདསྶནམེཏཾ. སཡཾ ཁཎཏི ཨཱཔཏྟི པཱཙིཏྟིཡསྶཱཏི ཨེཏྠ པཧཱརེ པཧཱརེ པཱཙིཏྟིཡཾ ཝེདིཏབྦཾ. སཀིཾ ཨཱཎཏྟོ བཧུཀམྤི ཁཎཏཱིཏི སཙེཔི སཀལདིཝསཾ ཁཎཏི, ཨཱཎཱཔཀསྶ ཨེཀཾཡེཝ པཱཙིཏྟིཡཾ. སཙེ པན ཀུསིཏོ ཧོཏི, པུནཔྤུནཾ ཨཱཎཱཔེཏབྦོ. ཏཾ ཨཱཎཱཔེཏྭཱ ཁཎཱཔེནྟསྶ ཝཱཙཱཡ ཝཱཙཱཡ པཱཙིཏྟིཡཾ. ཨཡཾ ཏཱཝ པཱལི༹ཝཎྞནཱ.

ཨཡཾ པན པཱལི༹མུཏྟཀཝིནིཙྪཡོ – ‘‘པོཀྑརཎིཾ ཁཎཱ’’ཏི ཝདཏི, ཝཊྚཏི. ཁཏཱཡེཝ ཧི པོཀྑརཎཱི ནཱམ ཧོཏི, ཏསྨཱ ཨཡཾ ཀཔྤིཡཝོཧཱརོ. ཨེས ནཡོ ‘‘ཝཱཔིཾ ཏལཱ༹ཀཾ ཨཱཝཱཊཾ ཁཎཱ’’ཏིཨཱདཱིསུཔི. ‘‘ཨིམཾ ཨོཀཱསཾ ཁཎ, ཨིམསྨིཾ ཨོཀཱསེ པོཀྑརཎིཾ ཁཎཱ’’ཏི ཝཏྟུཾ པན ན ཝཊྚཏི. ‘‘ཀནྡཾ ཁཎ, མཱུལཾ ཁཎཱ’’ཏི ཨནིཡཱམེཏྭཱ ཝཏྟུཾ ཝཊྚཏི. ‘‘ཨིམཾ ཝལླིཾ ཁཎ, ཨིམསྨིཾ ཨོཀཱསེ ཀནྡཾ ཝཱ མཱུལཾ ཝཱ ཁཎཱ’’ཏི ཝཏྟུཾ ན ཝཊྚཏི. པོཀྑརཎིཾ སོདྷེནྟེཧི ཡོ ཀུཊེཧི ཨུསྶིཉྩིཏུཾ སཀྐཱ ཧོཏི ཏནུཀཀདྡམོ, ཏཾ ཨཔནེཏུཾ ཝཊྚཏི, བཧལཾ ན ཝཊྚཏི. ཨཱཏཔེན སུཀྑཀདྡམོ ཕལཏི, ཏཏྲ ཡོ ཧེཊྛཱ པཐཝིཡཱ ཨསམྦདྡྷོ, ཏམེཝ ཨཔནེཏུཾ ཝཊྚཏི. ཨུདཀེན གཏཊྛཱནེ ཨུདཀཔཔྤཊཀོ ནཱམ ཧོཏི, ཝཱཏཔྤཧཱརེན ཙལཏི, ཏཾ ཨཔནེཏུཾ ཝཊྚཏི.

པོཀྑརཎཱིཨཱདཱིནཾ ཏཊཾ ¶ བྷིཛྫིཏྭཱ ཨུདཀསཱམནྟཱ པཏཏི, སཙེ ཨོམཀཙཱཏུམཱསཾ ཨོཝཊྛཾ, ཚིནྡིཏུཾ ཝཱ བྷིནྡིཏུཾ ཝཱ ཝཊྚཏི, ཙཱཏུམཱསཏོ ཨུདྡྷཾ ན ¶ ཝཊྚཏི. སཙེ པན ཨུདཀེཡེཝ པཏཏི, དེཝེ ཨཏིརེཀཙཱཏུམཱསཾ ཨོཝཊྛེཔི ཨུདཀེཡེཝ ཨུདཀསྶ པཏིཏཏྟཱ ཝཊྚཏི. པཱསཱཎཔིཊྛིཡཾ སོཎྜིཾ ཁཎནྟི, སཙེ ཏཏྠ པཋམམེཝ སུཁུམརཛཾ པཏཏི, ཏཉྩེ དེཝེན ཨོཝཊྛཾ ཧོཏི, ཙཱཏུམཱསཙྩཡེན ཨཀཔྤིཡཔཐཝཱིསངྑྱཾ གཙྪཏི. ཨུདཀེ པརིཡཱདིཎྞེ སོཎྜིཾ སོདྷེནྟེཧི ཏཾ ཝིཀོཔེཏུཾ ན ཝཊྚཏི. སཙེ པཋམམེཝ ཨུདཀེན པཱུརཏི, པཙྪཱ རཛཾ པཏཏི, ཏཾ ཝིཀོཔེཏུཾ ཝཊྚཏི. ཏཏྠ ཧི དེཝེ ཝསྶནྟེཔི ཨུདཀེཡེཝ ཨུདཀཾ པཏཏཱིཏི. པིཊྛིཔཱསཱཎེ སུཁུམརཛཾ ཧོཏི, དེཝེ ཕུསཱཡནྟེ ཨལླཱིཡཏི, ཏམྤི ཙཱཏུམཱསཙྩཡེན ཝིཀོཔེཏུཾ ན ཝཊྚཏི. སཙེ པན ཨཀཏཔབྦྷཱརེ ཝམྨིཀོ ཨུཊྛིཏོ ཧོཏི, ཡཐཱསུཁཾ ཝིཀོཔེཏུཾ ཝཊྚཏི. སཙེ ཨབྦྷོཀཱསེ ཨུཊྛཧཏི, ཨོམཀཙཱཏུམཱསཾ ¶ ཨོཝཊྛོཡེཝ ཝཊྚཏི. རུཀྑཱདཱིསུ ཨཱརུལ༹ྷཨུཔཙིཀཱམཏྟིཀཱཡཔི ཨེསེཝ ནཡོ. གཎྜུཔྤཱདགཱུཐམཱུསིཀུཀྐརགོཀཎྚཀཱདཱིསུཔི ཨེསེཝ ནཡོ.

གོཀཎྚཀོ ནཱམ གཱཝཱིནཾ ཁུརཙྪིནྣཀདྡམོ ཝུཙྩཏི. སཙེ པན ཧེཊྛིམཏལེན བྷཱུམིསམྦནྡྷོ ཧོཏི, ཨེཀདིཝསམྤི ན ཝཊྚཏི. ཀསིཏཊྛཱནེཔི ནངྒལཙྪིནྣམཏྟིཀཱཔིཎྜཾ གཎྷནྟསྶ ཨེསེཝ ནཡོ. པུརཱཎསེནཱསནཾ ཧོཏི ཨཙྪདནཾ ཝཱ ཝིནཊྛཙྪདནཾ ཝཱ, ཨཏིརེཀཙཱཏུམཱསཾ ཨོཝཊྛཾ ཛཱཏཔཐཝཱིསངྑྱམེཝ གཙྪཏི. ཏཏོ ཨཝསེསཾ ཚདནིཊྛཀཾ ཝཱ གོཔཱནསཱིཨཱདིཀཾ ཨུཔཀརཎཾ ཝཱ ‘‘ཨིཊྛཀཾ གཎྷཱམི གོཔནསིཾ བྷིཏྟིཔཱདཾ པདརཏྠརཎཾ པཱསཱཎཏྠམྦྷཾ གཎྷཱམཱི’’ཏི སཉྙཱཡ གཎྷིཏུཾ ཝཊྚཏི. ཏེན སདྡྷིཾ མཏྟིཀཱ པཏཏི, ཨནཱཔཏྟི. བྷིཏྟིམཏྟིཀཾ གཎྷནྟསྶ པན ཨཱཔཏྟི. སཙེ ཡཱ ཡཱ ཨཏིནྟཱ ཏཾ ཏཾ གཎྷཱཏི, ཨནཱཔཏྟི.

ཨནྟོགེཧེ མཏྟིཀཱཔུཉྫོ ཧོཏི, ཏསྨིཾ ¶ ཨེཀདིཝསཾ ཨོཝཊྛེ གེཧཾ ཚཱདེནྟི, སཙེ སབྦོ ཏིནྟོ ཙཱཏུམཱསཙྩཡེན ཛཱཏཔཐཝཱིཡེཝ. ཨཐསྶ ཨུཔརིབྷཱགོཡེཝ ཏིནྟོ, ཨནྟོ ཨཏིནྟོ, ཡཏྟཀཾ ཏིནྟཾ ཏཾ ཀཔྤིཡཀཱརཀེཧི ཀཔྤིཡཝོཧཱརེན ཨཔནཱམེཏྭཱ སེསཾ ཡཐཱསུཁཾ ཝལ༹ཉྫེཏུཾ ཝཊྚཏི. ཨུདཀེན ཏེམེཏྭཱ ཨེཀཱབདྡྷཱཡེཝ ཧི ཛཱཏཔཐཝཱི ཧོཏི, ན ཨིཏརཱཏི.

ཨབྦྷོཀཱསེ ¶ མཏྟིཀཱཔཱཀཱརོ ཧོཏི, ཨཏིརེཀཙཱཏུམཱསཾ ཙེ ཨོཝཊྛོ ཛཱཏཔཐཝཱིསངྑྱཾ གཙྪཏི. ཏཏྠ ལགྒཔཾསུཾ པན ཨལླཧཏྠེན ཚུཔིཏྭཱ གཧེཏུཾ ཝཊྚཏི. སཙེ ཨིཊྛཀཔཱཀཱརོ ཧོཏི, ཡེབྷུཡྻེནཀཐལཊྛཱནེ ཏིཊྛཏི, ཡཐཱསུཁཾ ཝིཀོཔེཏུཾ ཝཊྚཏི. ཨབྦྷོཀཱསེ ཋིཏམཎྜཔཏྠམྦྷཾ ཨིཏོ ཙིཏོ ཙ སཉྩཱལེཏྭཱ པཐཝིཾ ཝིཀོཔེནྟེན གཧེཏུཾ ན ཝཊྚཏི, ཨུཛུཀམེཝ ཨུདྡྷརིཏུཾ ཝཊྚཏི. ཨཉྙམྤི སུཀྑརུཀྑཾ ཝཱ སུཀྑཁཱཎུཀཾ ཝཱ གཎྷནྟསྶ ཨེསེཝ ནཡོ. ནཝཀམྨཏྠཾ པཱསཱཎཾ ཝཱ རུཀྑཾ ཝཱ དཎྜཀེཧི ཨུཙྩཱལེཏྭཱ པཝཊྚེནྟཱ གཙྪནྟི, ཏཏྠ པཐཝཱི བྷིཛྫཏི, སཙེ སུདྡྷཙིཏྟཱ པཝཊྚེནྟི, ཨནཱཔཏྟི. ཨཐ པན ཏེན ཨཔདེསེན པཐཝིཾ བྷིནྡིཏུཀཱམཱཡེཝ ཧོནྟི, ཨཱཔཏྟི. སཱཁཱདཱིནི ཀཌྜྷནྟཱནམྤི པཐཝིཡཾ དཱརཱུནི ཕཱལེནྟཱནམྤི ཨེསེཝ ནཡོ.

པཐཝིཡཾ ཨཊྛིསཱུཙིཀཎྚཀཱདཱིསུཔི ཡཾཀིཉྩི ཨཱཀོཊེཏུཾ ཝཱ པཝེསེཏུཾ ཝཱ ན ཝཊྚཏི. པསྶཱཝདྷཱརཱཡ ཝེགེན པཐཝིཾ བྷིནྡིསྶཱམཱིཏི ཨེཝཾ པསྶཱཝམྤི ཀཱཏུཾ ན ཝཊྚཏི, ཀརོནྟསྶ བྷིཛྫཏི, ཨཱཔཏྟི. ཝིསམབྷཱུམིཾ སམཾ ཀརིསྶཱམཱིཏི སམྨུཉྫནིཡཱ གྷཾསིཏུམྤི ན ཝཊྚཏི, ཝཏྟསཱིསེནེཝ ཧི སམྨཛྫིཏབྦཾ. ཀེཙི ཀཏྟརཡཊྛིཡཱ བྷཱུམིཾ ཀོཊྚེནྟི, པཱདངྒུཊྛཀེན ཝིལིཁནྟི, ‘‘ཙངྐམིཏཊྛཱནཾ དསྶེསྶཱམཱ’’ཏི པུནཔྤུནཾ བྷཱུམིཾ བྷིནྡནྟཱ ཙངྐམནྟི, སབྦཾ ན ཝཊྚཏི. ཝཱིརིཡསམྤགྒཧཏྠཾ ¶ པན སམཎདྷམྨཾ ཀརོནྟེན སུདྡྷཙིཏྟེན ཙངྐམིཏུཾ ཝཊྚཏི, ‘‘ཧཏྠཾ དྷོཝིསྶཱམཱ’’ཏི པཐཝིཡཾ གྷཾསནྟི, ན ¶ ཝཊྚཏི. ཨགྷཾསནྟེན པན ཨལླཧཏྠཾ པཐཝིཡཾ ཋཔེཏྭཱ རཛཾ གཧེཏུཾ ཝཊྚཏི. ཀེཙི ཀཎྜུཀཙྪུཨཱདཱིཧི ཨཱབཱདྷིཀཱ ཚིནྣཏཊཱདཱིསུ ཨངྒཔཙྩངྒཱནི གྷཾསནྟི ན ཝཊྚཏི.

༨༧. ཁཎཏི ཝཱ ཁཎཱཔེཏི ཝཱཏི ཨནྟམསོ པཱདངྒུཊྛཀེནཔི སམྨཛྫནཱིསལཱཀཱཡཔི སཡཾ ཝཱ ཁཎཏི, ཨཉྙེན ཝཱ ཁཎཱཔེཏི. བྷིནྡཏི ཝཱ བྷེདཱཔེཏི ཝཱཏི ཨནྟམསོ ཨུདཀམྤི ཚཌྜེནྟོ སཡཾ ཝཱ བྷིནྡཏི, ཨཉྙེན ཝཱ བྷིནྡཱཔེཏི. དཧཏི ཝཱ དཧཱཔེཏི ཝཱཏི ཨནྟམསོ པཏྟམྤི པཙནྟོ སཡཾ ཝཱ དཧཏི, ཨཉྙེན ཝཱ དཧཱཔེཏི. ཡཏྟཀེསུ ཋཱནེསུ ཨགྒིཾ དེཏི ཝཱ དཱཔེཏི ཝཱ ཏཏྟཀཱནི པཱཙིཏྟིཡཱནི. པཏྟཾ པཙནྟེནཔི ཧི པུབྦེ པཀྐཊྛཱནེཡེཝ ཧི པཙིཏབྦོ. ཨདཌྜྷཱཡ པཐཝིཡཱ ཨགྒིཾ ཋཔེཏུཾ ན ཝཊྚཏི. པཏྟཔཙནཀཔཱལསྶ པན ཨུཔརི ཨགྒིཾ ཋཔེཏུཾ ཝཊྚཏི. དཱརཱུནཾ ཨུཔརི ཋཔེཏི ¶ , སོ ཨགྒི ཏཱནི དཧནྟོ གནྟྭཱ པཐཝིཾ དཧཏི, ན ཝཊྚཏི. ཨིཊྛཀཀཔཱལཱདཱིསུཔི ཨེསེཝ ནཡོ.

ཏཏྲཱཔི ཧི ཨིཊྛཀཱདཱིནཾཡེཝ ཨུཔརི ཋཔེཏུཾ ཝཊྚཏི. ཀསྨཱ? ཏེསཾ ཨནུཔཱདཱནཏྟཱ. ན ཧི ཏཱནི ཨགྒིསྶ ཨུཔཱདཱནསངྑྱཾ གཙྪནྟི. སུཀྑཁཱཎུསུཀྑརུཀྑཱདཱིསུཔི ཨགྒིཾ དཱཏུཾ ན ཝཊྚཏི. སཙེ པན པཐཝིཾ ཨཔྤཏྟམེཝ ནིབྦཱཔེཏྭཱ གམིསྶཱམཱིཏི དེཏི, ཝཊྚཏི. པཙྪཱ ནིབྦཱཔེཏུཾ ན སཀྐོཏི, ཨཝིསཡཏྟཱ ཨནཱཔཏྟི. ཏིཎུཀྐཾ གཧེཏྭཱ གཙྪནྟོ ཧཏྠེ ཌཡ྄ཧམཱནེ བྷཱུམིཡཾ པཱཏེཏི, ཨནཱཔཏྟི. པཏིཏཊྛཱནེཡེཝ ཨུཔཱདཱནཾ དཏྭཱ ཨགྒིཾ ཀཱཏུཾ ཝཊྚཏཱིཏི མཧཱཔཙྩརིཡཾ ཝུཏྟཾ. དཌྜྷཔཐཝིཡཱ ཙ ཡཏྟཀཾ ཋཱནཾ ཨུསུམཱཡ ཨནུགཏཾ, སབྦཾ ཝིཀོཔེཏུཾ ཝཊྚཏཱིཏི ཏཏྠེཝ ཝུཏྟཾ. ཡོ པན ཨཛཱནནཀོ བྷིཀྑུ ཨརཎཱིསཧིཏེན ཨགྒིཾ ནིབྦཏྟེཏྭཱ ཧཏྠེན ཨུཀྑིཔིཏྭཱ ‘‘ཀིཾ ཀརོམཱི’’ཏི ཝདཏི, ‘‘ཛཱལེཧཱི’’ཏི ཝཏྟབྦོ, ‘‘ཧཏྠོ ཌཡ྄ཧཏཱི’’ཏི ཝདཏི, ‘‘ཡཐཱ ན ཌཡ྄ཧཏི ཏཐཱ ཀརོཧཱི’’ཏི ཝཏྟབྦོ. ‘‘བྷཱུམིཡཾ པཱཏེཧཱི’’ཏི པན ན ཝཏྟབྦོ. སཙེ ཧཏྠེ ཌཡ྄ཧམཱནེ པཱཏེཏི ‘‘པཐཝིཾ དཧིསྶཱམཱི’’ཏི ཨཔཱཏིཏཏྟཱ ཨནཱཔཏྟི. པཏིཏཊྛཱནེ པན ཨགྒིཾ ཀཱཏུཾ ཝཊྚཏཱིཏི ཀུརུནྡིཡཾ ཝུཏྟཾ.

༨༨. ཨནཱཔཏྟི ཨིམཾ ཛཱནཱཏིཨཱདཱིསུ ‘‘ཨིམསྶ ཐམྦྷསྶ ཨཱཝཱཊཾ ཛཱན, མཧཱམཏྟིཀཾ ཛཱན, ཐུསམཏྟིཀཾ ཛཱན, མཧཱམཏྟིཀཾ དེཧི, ཐུསམཏྟིཀཾ དེཧི, མཏྟིཀཾ ཨཱཧར, པཾསུཾ ཨཱཧར, མཏྟིཀཱཡ ¶ ཨཏྠོ, པཾསུནཱ ཨཏྠོ, ཨིམསྶ ཐམྦྷསྶ ཨཱཝཱཊཾ ཀཔྤིཡཾ ཀརོཧི, ཨིམཾ མཏྟིཀཾ ཀཔྤིཡཾ ཀརོཧི, ཨིམཾ པཾསུཾ ཀཔྤིཡཾ ཀརོཧཱི’’ཏི ཨེཝམཏྠོ ཝེདིཏབྦོ.

ཨསཉྩིཙྩཱཏི ¶ པཱསཱཎརུཀྑཱདཱིནི ཝཱ པཝཊྚེནྟསྶ ཀཏྟརདཎྜེན ཝཱ ཨཱཧཙྩ ཨཱཧཙྩ གཙྪནྟསྶ པཐཝཱི བྷིཛྫཏི, སཱ ‘‘ཏེན བྷིནྡིསྶཱམཱི’’ཏི ཨེཝཾ སཉྩིཙྩ ཨབྷིནྣཏྟཱ ཨསཉྩིཙྩ བྷིནྣཱ ནཱམ ཧོཏི. ཨིཏི ཨསཉྩིཙྩ བྷིནྡནྟསྶ ཨནཱཔཏྟི. ཨསཏིཡཱཏི ཨཉྙཝིཧིཏོ ཀེནཙི སདྡྷིཾ ཀིཉྩི ཀཐེནྟོ པཱདངྒུཊྛཀེན ཝཱ ཀཏྟརཡཊྛིཡཱ ཝཱ པཐཝིཾ ཝིལིཁནྟོ ཏིཊྛཏི, ཨེཝཾ ཨསཏིཡཱ ཝིལིཁནྟསྶ ཝཱ བྷིནྡནྟསྶ ཝཱ ཨནཱཔཏྟི. ཨཛཱནནྟསྶཱཏི ཨནྟོགེཧེ ཨོཝཊྛཾ ཚནྣཾ པཐཝིཾ ‘‘ཨཀཔྤིཡཔཐཝཱི’’ཏི ན ཛཱནཱཏི, ‘‘ཀཔྤིཡཔཐཝཱི’’ཏི སཉྙཱཡ ཝིཀོཔེཏི, ‘‘ཁཎཱམི བྷིནྡཱམི དཧཱམཱི’’ཏི ཝཱ ན ཛཱནཱཏི ¶ , ཀེཝལཾ སངྒོཔནཏྠཱཡ ཁཎིཏྟཱདཱིནི ཝཱ ཋཔེཏི, ཌཡ྄ཧམཱནཧཏྠོ ཝཱ ཨགྒིཾ པཱཏེཏི, ཨེཝཾ ཨཛཱནནྟསྶ ཨནཱཔཏྟི. སེསཾ ཨུཏྟཱནམེཝ.

ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི. ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པཐཝཱིཁཎནསིཀྑཱཔདཾ དསམཾ.

སམཏྟོ ཝཎྞནཱཀྐམེན མུསཱཝཱདཝགྒོ པཋམོ.

༢. བྷཱུཏགཱམཝགྒོ

༡. བྷཱུཏགཱམསིཀྑཱཔདཝཎྞནཱ

༨༩. སེནཱསནཝགྒསྶ པཋམསིཀྑཱཔདེ – ཨནཱདིཡནྟོཏི ཏསྶཱ ཝཙནཾ ཨགཎྷནྟོ. དཱརཀསྶ བཱཧུཾ ཨཱཀོཊེསཱིཏི ཨུཀྑིཏྟཾ ཕརསུཾ ནིགྒཧེཏུཾ ཨསཀྐོནྟོ མནུསྶཱནཾ ཙཀྑུཝིསཡཱཏཱིཏེ མཧཱརཱཛསནྟིཀཱ ལདྡྷེ རུཀྑཊྛཀདིབྦཝིམཱནེ ནིཔནྣསྶ དཱརཀསྶ བཱཧུཾ ཐནམཱུལེཡེཝ ཚིནྡི. ན ཁོ མེཏཾ པཏིརཱུཔནྟིཨཱདིམྷི ཨཡཾ སངྑེཔཝཎྞནཱ – ཧིམཝནྟེ ཀིར པཀྑདིཝསེསུ དེཝཏཱསནྣིཔཱཏོ ཧོཏི, ཏཏྠ རུཀྑདྷམྨཾ པུཙྪནྟི – ‘‘ཏྭཾ རུཀྑདྷམྨེ ཋིཏཱ ན ཋིཏཱ’’ཏི? རུཀྑདྷམྨོ ནཱམ རུཀྑེ ཚིཛྫམཱནེ རུཀྑདེཝཏཱཡ མནོཔདོསསྶ ཨཀརཎཾ. ཏཏྠ ཡཱ དེཝཏཱ རུཀྑདྷམྨེ ཨཊྛིཏཱ ཧོཏི, སཱ དེཝཏཱསནྣིཔཱཏཾ པཝིསིཏུཾ ན ལབྷཏི. ཨིཏི སཱ དེཝཏཱ ¶ ཨིམཉྩ རུཀྑདྷམྨེ ཨཊྛཱནཔཙྩཡཾ ¶ ཨཱདཱིནཝཾ ཨདྡས, བྷགཝཏོ ཙ སམྨུཁཱ སུཏཔུབྦདྷམྨདེསནཱནུསཱརེན ཏཐཱགཏསྶ ཚདྡནྟཱདིཀཱལེ པུབྦཙརིཏཾ ཨནུསྶརི. ཏེནསྶཱ ཨེཏདཧོསི – ‘‘ན ཁོ མེཏཾ པཏིརཱུཔཾ…པེ… ཝོརོཔེཡྻ’’ནྟི. ཡཾནཱུནཱཧཾ བྷགཝཏོ ཨེཏམཏྠཾ ཨཱརོཙེཡྻནྟི ཨིདཾ པནསྶཱ ‘‘ཨཡཾ བྷིཀྑུ སཔིཏིཀོ པུཏྟོ, ཨདྡྷཱ བྷགཝཱ ཨིམཾ ཨིམསྶ ཨཛ྄ཛྷཱཙཱརཾ སུཏྭཱ མརིཡཱདཾ བནྡྷིསྶཏི, སིཀྑཱཔདཾ པཉྙཔེསྶཏཱི’’ཏི པཊིསཉྩིཀྑནྟིཡཱ ཨཧོསི. སཙཛྫ ཏྭཾ དེཝཏེཏི སཙེ ཨཛྫ ཏྭཾ དེཝཏེ. པསཝེཡྻཱསཱིཏི ཛནེཡྻཱསི ཨུཔྤཱདེཡྻཱསི. ཨེཝཉྩ པན ཝཏྭཱ བྷགཝཱ ཏཾ དེཝཏཾ སཉྙཱཔེནྟོ –

‘‘ཡོ ¶ ཝེ ཨུཔྤཏིཏཾ ཀོདྷཾ, རཐཾ བྷནྟཾཝ ཝཱརཡེ;

ཏམཧཾ སཱརཐིཾ བྲཱུམི, རསྨིགྒཱཧོ ཨིཏརོ ཛནོ’’ཏི. (དྷ. པ. ༢༢༢);

ཨིམཾ གཱཐམབྷཱསི. གཱཐཱཔརིཡོསཱནེ སཱ དེཝཏཱ སོཏཱཔཏྟིཕལེ པཏིཊྛཱསི. པུན བྷགཝཱ སམྤཏྟཔརིསཱཡ དྷམྨཾ དེསེནྟོ –

‘‘ཡོ ཨུཔྤཏིཏཾ ཝིནེཏི ཀོདྷཾ, ཝིསཊཾ སཔྤཝིསཾཝ ཨོསདྷེཧི;

སོ བྷིཀྑུ ཛཧཱཏི ཨོརཔཱརཾ, ཨུརགོ ཛིཎྞམིཝཏྟཙཾ པུརཱཎ’’ནྟི. (སུ. ནི. ༡);

ཨིམཾ གཱཐམབྷཱསི. ཏཏྲ པཋམགཱཐཱ དྷམྨཔདེ སངྒཧཾ ཨཱརུལ༹ྷཱ, དུཏིཡཱ སུཏྟནིཔཱཏེ, ཝཏྠུ པན ཝིནཡེཏི. ཨཐ བྷགཝཱ དྷམྨཾ དེསེནྟོཡེཝ ཏསྶཱ དེཝཏཱཡ ཝསནཊྛཱནཾ ཨཱཝཛྫནྟོ པཏིརཱུཔཾ ཋཱནཾ དིསྭཱ ‘‘གཙྪ, དེཝཏེ, ཨསུཀསྨིཾ ཨོཀཱསེ རུཀྑོ ཝིཝིཏྟོ, ཏསྨིཾ ཨུཔགཙྪཱ’’ཏི ཨཱཧ. སོ ཀིར རུཀྑོ ན ཨཱལ༹ཝིརཊྛེ, ཛེཏཝནསྶ ཨནྟོཔརིཀྑེཔེ, ཡསྶ དེཝཔུཏྟསྶ པརིགྒཧོ ཨཧོསི, སོ ཙུཏོ; ཏསྨཱ ‘‘ཝིཝིཏྟོ’’ཏི ཝུཏྟོ. ཏཏོ པཊྛཱཡ ཙ པན སཱ དེཝཏཱ སམྨཱསམྦུདྡྷཏོ ལདྡྷཔརིཧཱརཱ བུདྡྷུཔཊྛཱཡིཀཱ ཨཧོསི. ཡདཱ དེཝཏཱསམཱགམོ ཧོཏི, ཏདཱ མཧེསཀྑདེཝཏཱསུ ཨཱགཙྪནྟཱིསུ ¶ ཨཉྙཱ ཨཔྤེསཀྑཱ དེཝཏཱ ཡཱཝ མཧཱསམུདྡཙཀྐཝཱལ༹པབྦཏཱ ཏཱཝ པཊིཀྐམནྟི. ཨཡཾ པན ཨཏྟནོ ཝསནཊྛཱནེ ནིསཱིདིཏྭཱཝ དྷམྨཾ སུཎཱཏི. ཡམྤི པཋམཡཱམེ བྷིཀྑཱུ པཉྷཾ པུཙྪནྟི, མཛ྄ཛྷིམཡཱམེ དེཝཏཱ, ཏཾ སབྦཾ ཏཏྠེཝ ནིསཱིདིཏྭཱ སུཎཱཏི. ཙཏྟཱརོ ཙ མཧཱརཱཛཱནོཔི བྷགཝཏོ ཨུཔཊྛཱནཾ ཨཱགནྟྭཱ གཙྪནྟཱ ཏཾ དེཝཏཾ དིསྭཱཝ གཙྪནྟི.

༩༠. བྷཱུཏགཱམཔཱཏབྱཏཱཡཱཏི ¶ ཨེཏྠ བྷཝནྟི ཨཧུཝུཉྩཱཏི བྷཱུཏཱ; ཛཱཡནྟི ཝཌྜྷནྟི ཛཱཏཱ ཝཌྜྷིཏཱ ཙཱཏི ཨཏྠོ. གཱམོཏི རཱསི; བྷཱུཏཱནཾ གཱམོཏི བྷཱུཏགཱམོ; བྷཱུཏཱ ཨེཝ ཝཱ གཱམོ བྷཱུཏགཱམོ; པཏིཊྛིཏཧརིཏཏིཎརུཀྑཱདཱིནམེཏཾ ཨདྷིཝཙནཾ. པཱཏབྱསྶ བྷཱཝོ པཱཏབྱཏཱ; ཚེདནབྷེདནཱདཱིཧི ཡཐཱརུཙི པརིབྷུཉྫིཏབྦཏཱཏི ཨཏྠོ. ཏསྶཱ བྷཱུཏགཱམཔཱཏབྱཏཱཡ; ནིམིཏྟཏྠེ བྷུམྨཝཙནཾ, བྷཱུཏགཱམཔཱཏབྱཏཱཧེཏུ, བྷཱུཏགཱམསྶ ཚེདནཱདིཔཙྩཡཱ པཱཙིཏྟིཡནྟི ཨཏྠོ.

༩༡. ཨིདཱནི ¶ ཏཾ བྷཱུཏགཱམཾ ཝིབྷཛིཏྭཱ དསྶེནྟོ བྷཱུཏགཱམོ ནཱམ པཉྩ བཱིཛཛཱཏཱནཱིཏིཨཱདིམཱཧ. ཏཏྠ བྷཱུཏགཱམོ ནཱམཱཏི བྷཱུཏགཱམཾ ཨུདྡྷརིཏྭཱ ཡསྨིཾ སཏི བྷཱུཏགཱམོ ཧོཏི, ཏཾ དསྶེཏུཾ ‘‘པཉྩ བཱིཛཛཱཏཱནཱི’’ཏི ཨཱཧཱཏི ཨཊྛཀཐཱསུ ཝུཏྟཾ. ཨེཝཾ སནྟེཔི ‘‘ཡཱནི ཝཱ པནཉྙཱནིཔི ཨཏྠི མཱུལེ ཛཱཡནྟཱི’’ཏིཨཱདཱིནི ན སམེནྟི. ན ཧི མཱུལབཱིཛཱདཱིནི མཱུལཱདཱིསུ ཛཱཡནྟི, མཱུལཱདཱིསུ ཛཱཡམཱནཱནི པན ཏཱནི བཱིཛཱཀཏཱནི, ཏསྨཱ ཨེཝམེཏྠ ཝཎྞནཱ ཝེདིཏབྦཱ – བྷཱུཏགཱམོ ནཱམཱཏི ཝིབྷཛིཏབྦཔདཾ. པཉྩཱཏི ཏསྶ ཝིབྷཱགཔརིཙྪེདོ. བཱིཛཛཱཏཱནཱིཏི པརིཙྪིནྣདྷམྨནིདསྶནཾ. ཏསྶཏྠོ – བཱིཛེཧི ཛཱཏཱནི བཱིཛཛཱཏཱནི; རུཀྑཱདཱིནམེཏཾ ཨདྷིཝཙནཾ. ཨཔརོ ནཡོ – བཱིཛཱནི ཙ ཏཱནི ཝིཛཱཏཱནི ཙ པསཱུཏཱནི ནིབྦཏྟཔཎྞམཱུལཱནཱིཏི བཱིཛཛཱཏཱནི. ཨེཏེན ཨལླཝཱལིཀཱདཱིསུ ཋཔིཏཱནཾ ནིབྦཏྟཔཎྞམཱུལཱནཾ སིངྒིཝེརཱདཱིནཾ སངྒཧོ ཀཏོ ཧོཏི.

ཨིདཱནི ཡེཧི བཱིཛེཧི ཛཱཏཏྟཱ རུཀྑཱདཱིནི བཱིཛཛཱཏཱནཱིཏི ཝུཏྟཱནི, ཏཱནི དསྶེནྟོ ‘‘མཱུལབཱིཛ’’ནྟིཨཱདིམཱཧ. ཏེསཾ ཨུདྡེསོ པཱཀཊོ ཨེཝ. ནིདྡེསེ ཡཱནི ཝཱ པནཉྙཱནིཔི ཨཏྠི མཱུལེ ཛཱཡནྟི མཱུལེ སཉྫཱཡནྟཱིཏི ཨེཏྠ བཱིཛཏོ ནིབྦཏྟེན བཱིཛཾ དསྶིཏཾ ¶ , ཏསྨཱ ཨེཝམེཏྠ ཨཏྠོ དཊྛབྦོ, ཡཱནི ཝཱ པནཉྙཱནིཔི ཨཏྠི ཨཱལུཝཀསེརུཀམལུཔྤལཔུཎྜརཱིཀཀུཝལཡཀནྡཔཱཊལིམཱུལཱདིབྷེདེ མཱུལེ གཙྪཝལླིརུཀྑཱདཱིནི ཛཱཡནྟི སཉྫཱཡནྟི, ཏཱནི ཡམྷི མཱུལེ ཛཱཡནྟི ཙེཝ སཉྫཱཡནྟི ཙ ཏཉྩ, པཱལི༹ཡཾ ཝུཏྟཾ ཧལིདྡཱདི ཙ སབྦམྤི ཨེཏཾ མཱུལབཱིཛཾ ནཱམ. ཨེསེཝ ནཡོ ཁནྡྷབཱིཛཱདཱིསུ. ཡེཝཱཔནཀཁནྡྷབཱིཛེསུ པནེཏྠ ཨམྦཱཊཀཨིནྡསཱལནུཧཱིཔཱལི༹བྷདྡཀཎིཀཱརཱདཱིནི ཁནྡྷབཱིཛཱནི, ཨམཱུལཝལླི ཙཏུརསྶཝལླིཀཎཝཱིརཱདཱིནི ཕལུ༹བཱིཛཱནི མཀཙིསུམནཛཡསུམནཱདཱིནི ཨགྒབཱིཛཱནི, ཨམྦཛམྦཱུཔནསཊྛིཨཱདཱིནི བཱིཛབཱིཛཱནཱིཏི དཊྛབྦཱནི.

༩༢. ཨིདཱནི ཡཾ ཝུཏྟཾ ‘‘བྷཱུཏགཱམཔཱཏབྱཏཱཡ པཱཙིཏྟིཡ’’ནྟི ཏཏྠ སཉྙཱཝསེན ཨཱཔཏྟཱནཱཔཏྟིབྷེདཾ པཱཏབྱཏཱབྷེདཉྩ དསྶེནྟོ བཱིཛེ བཱིཛསཉྙཱིཏིཨཱདིམཱཧ. ཏཏྠ ཡཐཱ ‘‘སཱལཱིནཾ ¶ ཙེཔི ཨོདནཾ བྷུཉྫཏཱི’’ཏིཨཱདཱིསུ (མ. ནི. ༡.༧༦) སཱལིཏཎྜུལཱནཾ ཨོདནོ ‘‘སཱལཱིནཾ ཨོདནོ’’ཏི ཝུཙྩཏི, ཨེཝཾ བཱིཛཏོ སམྦྷཱུཏོ བྷཱུཏགཱམོ ‘‘བཱིཛ’’ནྟི ཝུཏྟོཏི ཝེདིཏབྦོ. ཡཾ ¶ པན ‘‘བཱིཛགཱམབྷཱུཏགཱམསམཱརམྦྷཱ པཊིཝིརཏོ’’ཏིཨཱདཱིསུ (དཱི. ནི. ༡.༡༠) ཝུཏྟཾ བྷཱུཏགཱམཔརིམོཙནཾ ཀཏྭཱ ཋཔིཏཾ བཱིཛཾ, ཏཾ དུཀྐཊཝཏྠུ. ཨཐ ཝཱ ཡདེཏཾ ‘‘བྷཱུཏགཱམོ ནཱམཱ’’ཏི སིཀྑཱཔདཝིབྷངྒསྶ ཨཱདིཔདཾ, ཏེན སདྡྷིཾ ཡོཛེཏྭཱ ཡཾ བཱིཛཾ བྷཱུཏགཱམོ ནཱམ ཧོཏི, ཏསྨིཾ བཱིཛེ བཱིཛསཉྙཱི སཏྠཀཱདཱིནི གཧེཏྭཱ སཡཾ ཝཱ ཚིནྡཏི ཨཉྙེན ཝཱ ཚེདཱཔེཏི, པཱསཱཎཱདཱིནི གཧེཏྭཱ སཡཾ ཝཱ བྷིནྡཏི ཨཉྙེན ཝཱ བྷེདཱཔེཏི, ཨགྒིཾ ཨུཔསཾཧརིཏྭཱ སཡཾ ཝཱ པཙཏི ཨཉྙེན ཝཱ པཙཱཔེཏི, ཨཱཔཏྟི པཱཙིཏྟིཡསྶཱཏི ཨེཝམེཏྠ ཨཏྠོ ཝེདིཏབྦོ. ཡཐཱརུཏཾ པན གཧེཏྭཱ བྷཱུཏགཱམཝིནིམུཏྟསྶ བཱིཛསྶ ཚིནྡནཱདིབྷེདཱཡ པཱཏབྱཏཱཡ པཱཙིཏྟིཡཾ ན ཝཏྟབྦཾ.

ཨཡཉྷེཏྠ ཝིནིཙྪཡཀཐཱ – བྷཱུཏགཱམཾ ཝིཀོཔེནྟསྶ པཱཙིཏྟིཡཾ བྷཱུཏགཱམཔརིམོཙིཏཾ པཉྩཝིདྷམྤི བཱིཛགཱམཾ ཝིཀོཔེནྟསྶ དུཀྐཊཾ. བཱིཛགཱམབྷཱུཏགཱམོ ནཱམེས ཨཏྠི ཨུདཀཊྛོ, ཨཏྠི ཐལཊྛོ ¶ . ཏཏྠ ཨུདཀཊྛོ སཱསཔམཏྟིཀཱ ཏིལབཱིཛཀཱདིབྷེདཱ སཔཎྞིཀཱ ཨཔཎྞིཀཱ ཙ སབྦཱ སེཝཱལཛཱཏི ཨནྟམསོ ཨུདཀཔཔྤཊཀཾ ཨུཔཱདཱཡ ‘‘བྷཱུཏགཱམོ’’ཏི ཝེདིཏབྦོ. ཨུདཀཔཔྤཊཀོ ནཱམ ཨུཔརི ཐདྡྷོ ཕརུསཝཎྞོ, ཧེཊྛཱ མུདུ ནཱིལཝཎྞོ ཧོཏི. ཏཏྠ ཡསྶ སེཝཱལསྶ མཱུལཾ ཨོརཱུཧིཏྭཱ པཐཝིཡཾ པཏིཊྛིཏཾ, ཏསྶ པཐཝཱི ཋཱནཾ. ཡོ ཨུདཀེ སཉྩརཏི, ཏསྶ ཨུདཀཾ. པཐཝིཡཾ པཏིཊྛིཏཾ ཡཏྠ ཀཏྠཙི ཝིཀོཔེནྟསྶ ཨུདྡྷརིཏྭཱ ཝཱ ཋཱནནྟརཾ སངྐཱམེནྟསྶ པཱཙིཏྟིཡཾ. ཨུདཀེ སཉྩརནྟཾ ཝིཀོཔེནྟསྶེཝ པཱཙིཏྟིཡཾ. ཧཏྠེཧི པན ཨིཏོ ཙིཏོ ཙ ཝིཡཱུཧིཏྭཱ ནྷཱཡིཏུཾ ཝཊྚཏི, སཀལཉྷི ཨུདཀཾ ཏསྶ ཋཱནཾ. ཏསྨཱ ན སོ ཨེཏྟཱཝཏཱ ཋཱནནྟརཾ སངྐཱམིཏོ ཧོཏི. ཨུདཀཏོ པན ཨུདཀེན ཝིནཱ སཉྩིཙྩ ཨུཀྑིཔིཏུཾ ན ཝཊྚཏི, ཨུདཀེན སདྡྷིཾ ཨུཀྑིཔིཏྭཱ པུན ཨུདཀེ པཀྑིཔིཏུཾ ཝཊྚཏི. པརིསྶཱཝནནྟརེན ནིཀྑམཏི, ཀཔྤིཡཾ ཀཱརཱཔེཏྭཱཝ ཨུདཀཾ པརིབྷུཉྫིཏབྦཾ. ཨུཔྤལིནཱིཔདུམིནཱིཨཱདཱིནི ཛལཛཝལླིཏིཎཱནི ཨུདཀཏོ ཨུདྡྷརནྟསྶ ཝཱ ཏཏྠེཝ ཝིཀོཔེནྟསྶ ཝཱ པཱཙིཏྟིཡཾ. པརེཧི ཨུཔྤཱཊིཏཱནི ཝིཀོཔེནྟསྶ དུཀྐཊཾ. ཏཱནི ཧི བཱིཛགཱམེ སངྒཧཾ གཙྪནྟི. ཏིལབཱིཛཀསཱསཔམཏྟཀསེཝཱལོཔི ཨུདཀཏོ ཨུདྡྷཏོ ཨམིལཱཏོ ཨགྒབཱིཛསངྒཧཾ གཙྪཏི. མཧཱཔཙྩརིཡཱདཱིསུ ¶ ‘‘ཨནནྟཀཏིལབཱིཛཀཨུདཀཔཔྤཊཀཱདཱིནི དུཀྐཊཝཏྠུཀཱནཱི’’ཏི ཝུཏྟཾ, ཏཏྠ ཀཱརཎཾ ན དིསྶཏི. ཨནྡྷཀཊྛཀཐཱཡཾ ‘‘སམྤུཎྞབྷཱུཏགཱམོ ན ཧོཏི, ཏསྨཱ དུཀྐཊ’’ནྟི ཝུཏྟཾ, ཏམྤི ན སམེཏི, བྷཱུཏགཱམེ ཧི པཱཙིཏྟིཡཾ, བཱིཛགཱམེ དུཀྐཊཾ ཝུཏྟཾ. ཨསམྤུཎྞབྷཱུཏགཱམོ ནཱམ ཏཏིཡོ ཀོཊྛཱསོ ནེཝ པཱལི༹ཡཾ ན ཨཊྛཀཐཱསུ ཨཱགཏོ. ཨཐ ཨེཏཾ བཱིཛགཱམསངྒཧཾ གཙྪིསྶཏཱིཏི ¶ , ཏམྤི ན ཡུཏྟཾ, ཨབྷཱུཏགཱམམཱུལཏྟཱ ཏཱདིསསྶ བཱིཛགཱམསྶཱཏི. ཨཔིཙ ‘‘གརུཀལཧུཀེསུ གརུཀེ ཋཱཏབྦ’’ནྟི ཨེཏཾ ཝིནཡལཀྑཎཾ.

ཐལཊྛེ – ཚིནྣརུཀྑཱནཾ ཨཝསིཊྛོ ཧརིཏཁཱཎུ ནཱམ ཧོཏི. ཏཏྠ ཀཀུདྷཀརཉྫཔིཡངྒུཔནསཱདཱིནཾ ཁཱཎུ ཨུདྡྷཾ ¶ ཝཌྜྷཏི, སོ བྷཱུཏགཱམེན སངྒཧིཏོ. ཏཱལནཱལི༹ཀེརཱདཱིནཾ ཁཱཎུ ཨུདྡྷཾ ན ཝཌྜྷཏི, སོ བཱིཛགཱམེན སངྒཧིཏོ. ཀདལིཡཱ པན ཨཕལིཏཱཡ ཁཱཎུ བྷཱུཏགཱམེན སངྒཧིཏོ, ཕལིཏཱཡ བཱིཛགཱམེན. ཀདལཱི པན ཕལིཏཱ ཡཱཝ ནཱིལཔཎྞཱ, ཏཱཝ བྷཱུཏགཱམེནེཝ སངྒཧིཏཱ, ཏཐཱ ཕལིཏོ ཝེལུ༹. ཡདཱ པན ཨགྒཏོ པཊྛཱཡ སུསྶཏི, ཏདཱ བཱིཛགཱམེན སངྒཧཾ གཙྪཏི. ཀཏརབཱིཛགཱམེན? ཕལུ༹བཱིཛགཱམེན. ཀིཾ ཏཏོ ནིབྦཏྟཏི? ན ཀིཉྩི. ཡདི ཧི ནིབྦཏྟེཡྻ, བྷཱུཏགཱམེནེཝ སངྒཧཾ གཙྪེཡྻ. ཨིནྡསཱལཱདིརུཀྑེ ཚིནྡིཏྭཱ རཱསིཾ ཀརོནྟི, ཀིཉྩཱཔི རཱསིཀཏདཎྜཀེཧི རཏནཔྤམཱཎཱཔི སཱཁཱ ནིཀྑམནྟི, བཱིཛགཱམེནེཝ སངྒཧཾ གཙྪནྟི. ཏཏྠ མཎྜཔཏྠཱཡ ཝཱ ཝཏིཨཏྠཱཡ ཝཱ ཝལླིཨཱརོཔནཏྠཱཡ ཝཱ བྷཱུམིཡཾ ནིཁཎནྟི, མཱུལེསུ ཙེཝ པཎྞེསུ ཙ ནིགྒཏེསུ པུན བྷཱུཏགཱམསངྑྱཾ གཙྪནྟི. མཱུལམཏྟེསུ པན པཎྞམཏྟེསུ ཝཱ ནིགྒཏེསུ བཱིཛགཱམེན སངྒཧིཏཱ ཨེཝ.

ཡཱནི ཀཱནིཙི བཱིཛཱནི པཐཝིཡཾ ཝཱ ཨུདཀེན སིཉྩིཏྭཱ ཋཔིཏཱནི, ཀཔཱལཱདཱིསུ ཝཱ ཨལླཔཾསུཾ པཀྑིཔིཏྭཱ ནིཀྑིཏྟཱནི ཧོནྟི, སབྦཱནི མཱུལམཏྟེ པཎྞམཏྟེ ཝཱ ནིགྒཏེཔི བཱིཛཱནིཡེཝ. སཙེཔི མཱུལཱནི ཙ ཨུཔརི ཨངྐུརོ ཙ ནིགྒཙྪཏི, ཡཱཝ ཨངྐུརོ ཧརིཏོ ན ཧོཏི, ཏཱཝ བཱིཛཱནིཡེཝ. མུགྒཱདཱིནཾ པན པཎྞེསུ ཨུཊྛིཏེསུ ཝཱིཧིཨཱདཱིནཾ ཝཱ ཨངྐུརེ ཧརིཏེ ནཱིལཔཎྞཝཎྞེ ཛཱཏེ བྷཱུཏགཱམསངྒཧཾ གཙྪནྟི. ཏཱལཊྛཱིནཾ པཋམཾ སཱུཀརདཱཋཱ ཝིཡ མཱུལཾ ནིགྒཙྪཏི. ནིགྒཏེཔི ཡཱཝ ཨུཔརི པཏྟཝཊྚི ན ནིགྒཙྪཏི, ཏཱཝ བཱིཛགཱམོཡེཝ. ནཱལི༹ཀེརསྶ ཏཙཾ བྷིནྡིཏྭཱ དནྟསཱུཙི ཝིཡ ཨངྐུརོ ནིགྒཙྪཏི ¶ , ཡཱཝ མིགསིངྒསདིསཱ ནཱིལཔཏྟཝཊྚི ན ཧོཏི, ཏཱཝ བཱིཛགཱམོཡེཝ. མཱུལེ ཨནིགྒཏེཔི ཏཱདིསཱཡ པཏྟཝཊྚིཡཱ ཛཱཏཱཡ ཨམཱུལཀབྷཱུཏགཱམེ སངྒཧཾ གཙྪཏི.

ཨམྦཊྛིཨཱདཱིནི ཝཱིཧིཨཱདཱིཧི ཝིནིཙྪིནིཏབྦཱནི. ཝནྡཱཀཱ ཝཱ ཨཉྙཱ ཝཱ ཡཱ ཀཱཙི རུཀྑེ ཛཱཡིཏྭཱ རུཀྑཾ ཨོཏྠརཏི, རུཀྑོཝ ཏསྶཱ ཋཱནཾ, ཏཾ ཝིཀོཔེནྟསྶ ཝཱ ཏཏོ ཨུདྡྷརནྟསྶ ཝཱ པཱཙིཏྟིཡཾ. ཨེཀཱ ཨམཱུལིཀཱ ལཏཱ ཧོཏི, ཨངྒུལིཝེཋཀོ ཝིཡ ཝནཔྤགུམྦདཎྜཀེ ཝེཋེཏི, ཏསྶཱཔི ཨཡམེཝ ཝིནིཙྪཡོ. གེཧམུཁཔཱཀཱརཝེདིཀཱཙེཏིཡཱདཱིསུ ནཱིལཝཎྞོ ¶ སེཝཱལོ ཧོཏི, ཡཱཝ དྭེ ཏཱིཎི པཏྟཱནི ན སཉྫཱཡནྟི ཏཱཝ ཨགྒབཱིཛསངྒཧཾ གཙྪཏི ¶ . པཏྟེསུ ཛཱཏེསུ པཱཙིཏྟིཡཝཏྠུ. ཏསྨཱ ཏཱདིསེསུ ཋཱནེསུ སུདྷཱལེཔམྤི དཱཏུཾ ན ཝཊྚཏི. ཨནུཔསམྤནྣེན ལིཏྟསྶ ཨུཔརིསྣེཧལེཔོ དཱཏུཾ ཝཊྚཏི. སཙེ ནིདཱགྷསམཡེ སུཀྑསེཝཱལོ ཏིཊྛཏི, ཏཾ སམྨུཉྫནཱིཨཱདཱིཧི གྷཾསིཏྭཱ ཨཔནེཏུཾ ཝཊྚཏི. པཱནཱིཡགྷཊཱདཱིནཾ བཧི སེཝཱལོ དུཀྐཊཝཏྠུ, ཨནྟོ ཨབྦོཧཱརིཀོ. དནྟཀཊྛཔཱུཝཱདཱིསུ ཀཎྞཀམྤི ཨབྦོཧཱརིཀམེཝ. ཝུཏྟཉྷེཏཾ – ‘‘སཙེ གེརུཀཔརིཀམྨཀཏཱ བྷིཏྟི ཀཎྞཀིཏཱ ཧོཏི, ཙོལ༹ཀཾ ཏེམེཏྭཱ པཱིལེ༹ཏྭཱ པམཛྫིཏབྦཱ’’ཏི (མཧཱཝ. ༦༦).

པཱསཱཎཛཱཏིཔཱསཱཎདདྡུསེཝཱལསེལེཡྻཀཱདཱིནི ཨཧརིཏཝཎྞཱནི ཨཔཏྟཀཱནི ཙ དུཀྐཊཝཏྠུཀཱནི. ཨཧིཙྪཏྟཀཾ ཡཱཝ མཀུལ༹ཾ ཧོཏི, ཏཱཝ དུཀྐཊཝཏྠུ. པུཔྥིཏཀཱལཏོ པཊྛཱཡ ཨབྦོཧཱརིཀཾ. ཨལླརུཀྑཏོ པན ཨཧིཙྪཏྟཀཾ གཎྷནྟོ རུཀྑཏྟཙཾ ཝིཀོཔེཏི, ཏསྨཱ ཏཏྠ པཱཙིཏྟིཡཾ. རུཀྑཔཔྤཊིཀཱཡཔི ཨེསེཝ ནཡོ. ཡཱ པན ཨིནྡསཱལཀཀུདྷཱདཱིནཾ པཔྤཊིཀཱ རུཀྑཏོ མུཙྩིཏྭཱ ཏིཊྛཏི, ཏཾ གཎྷནྟསྶ ཨནཱཔཏྟི. ནིཡྻཱསམྤི རུཀྑཏོ མུཙྩིཏྭཱ ཋིཏཾ སུཀྑརུཀྑེ ཝཱ ལགྒཾ གཎྷིཏུཾ ཝཊྚཏི. ཨལླརུཀྑཏོ ན ཝཊྚཏི. ལཱཁཱཡཔི ཨེསེཝ ནཡོ. རུཀྑཾ ཙཱལེཏྭཱ པཎྜུཔལཱསཾ ཝཱ པརིཎཏཀཎིཀཱརཱདིཔུཔྥཾ ཝཱ པཱཏེནྟསྶ པཱཙིཏྟིཡམེཝ. ཧཏྠཀུཀྐུཙྩེན མུདུཀེསུ ཨིནྡསཱལནུཧཱིཁནྡྷཱདཱིསུ ཝཱ ཏཏྠཛཱཏཀཏཱལཔཎྞཱདཱིསུ ཝཱ ཨཀྑརཾ ཚིནྡནྟསྶཱཔི ཨེསེཝ ནཡོ.

སཱམཎེརཱནཾ ¶ པུཔྥཾ ཨོཙིནནྟཱནཾ སཱཁཾ ཨོནཱམེཏྭཱ དཱཏུཾ ཝཊྚཏི. ཏེཧི པན པུཔྥེཧི པཱནཱིཡཾ ན ཝཱསེཏབྦཾ. པཱནཱིཡཝཱསཏྠིཀེན སཱམཎེརཾ ཨུཀྑིཔིཏྭཱ ཨོཙིནཱཔེཏབྦཱནི. ཕལསཱཁཱཔི ཨཏྟནཱ ཁཱདིཏུཀཱམེན ན ཨོནཱམེཏབྦཱ. སཱམཎེརཾ ཨུཀྑིཔིཏྭཱ ཕལཾ གཱཧཱཔེཏབྦཾ. ཡཾཀིཉྩི གཙྪཾ ཝཱ ལཏཾ ཝཱ ཨུཔྤཱཊེནྟེཧི སཱམཎེརེཧི སདྡྷིཾ གཧེཏྭཱ ཨཱཀཌྜྷིཏུཾ ན ཝཊྚཏི. ཏེསཾ པན ཨུསྶཱཧཛནནཏྠཾ ཨནཱཀཌྜྷནྟེན ཀཌྜྷནཱཀཱརཾ དསྶེནྟེན ཝིཡ ཨགྒེ གཧེཏུཾ ཝཊྚཏི. ཡེསཾ རུཀྑཱནཾ སཱཁཱ རུཧཏི, ཏེསཾ སཱཁཾ མཀྑིཀཱབཱིཛནཱདཱིནཾ ཨཏྠཱཡ ཀཔྤིཡཾ ཨཀཱརཱཔེཏྭཱ གཧིཏཾ ཏཙེ ¶ ཝཱ པཏྟེ ཝཱ ཨནྟམསོ ནཁེནཔི ཝིལིཁནྟསྶ དུཀྐཊཾ. ཨལླསིངྒིཝེརཱདཱིསུཔི ཨེསེཝ ནཡོ. སཙེ པན ཀཔྤིཡཾ ཀཱརཱཔེཏྭཱ སཱིཏལེ པདེསེ ཋཔིཏསྶ མཱུལཾ སཉྫཱཡཏི, ཨུཔརིབྷཱགེ ཚིནྡིཏུཾ ཝཊྚཏི. སཙེ ཨངྐུརོ ཛཱཡཏི, ཧེཊྛཱབྷཱགེ ཚིནྡིཏུཾ ཝཊྚཏི. མཱུལེ ཙ ནཱིལངྐུརེ ཙ ཛཱཏེ ན ཝཊྚཏི.

ཚིནྡཏི ཝཱ ཚེདཱཔེཏི ཝཱཏི ཨནྟམསོ སམྨུཉྫནོསལཱཀཱཡཔི ཏིཎཱནི ཚིནྡིསྶཱམཱིཏི བྷཱུམིཾ སམྨཛྫནྟོ སཡཾ ཝཱ ཚིནྡཏི, ཨཉྙེན ཝཱ ཚེདཱཔེཏི. བྷིནྡཏི ཝཱ བྷེདཱཔེཏི ཝཱཏི ཨནྟམསོ ¶ ཙངྐམནྟོཔི ཚིཛྫནཀཾ ཚིཛྫཏུ, བྷིཛྫནཀཾ བྷིཛྫཏུ, ཙངྐམིཏཊྛཱནཾ དསྶེསྶཱམཱིཏི སཉྩིཙྩ པཱདེཧི ཨཀྐམནྟོ ཏིཎཝལླིཨཱདཱིནི སཡཾ ཝཱ བྷིནྡཏི ཨཉྙེན ཝཱ བྷེདཱཔེཏི. སཙེཔི ཧི ཏིཎཾ ཝཱ ལཏཾ ཝཱ གཎྛིཾ ཀརོནྟསྶ བྷིཛྫཏི, གཎྛིཔི ན ཀཱཏབྦོ. ཏཱལརུཀྑཱདཱིསུ པན ཙོརཱནཾ ཨནཱརུཧནཏྠཱཡ དཱརུམཀྐཊཀཾ ཨཱཀོཊེནྟི, ཀཎྚཀེ བནྡྷནྟི, བྷིཀྑུསྶ ཨེཝཾ ཀཱཏུཾ ན ཝཊྚཏི. སཙེ དཱརུམཀྐཊཀོ རུཀྑེ ཨལླཱིནམཏྟོཝ ཧོཏི, རུཀྑཾ ན པཱིལེ༹ཏི, ཝཊྚཏི. ‘‘རུཀྑཾ ཚིནྡ, ལཏཾ ཚིནྡ, ཀནྡཾ ཝཱ མཱུལཾ ཝཱ ཨུཔྤཱཊེཧཱི’’ཏི ཝཏྟུམྤི ཝཊྚཏི, ཨནིཡཱམིཏཏྟཱ. ནིཡཱམེཏྭཱ པན ‘‘ཨིམཾ རུཀྑཾ ཚིནྡཱ’’ཏིཨཱདི ཝཏྟུཾ ན ཝཊྚཏི. ནཱམཾ གཧེཏྭཱཔི ‘‘ཨམྦརུཀྑཾ ཙཏུརསྶཝལླིཾ ཨཱལུཝཀནྡཾ མུཉྫཏིཎཾ ཨསུཀརུཀྑཙྪལླིཾ ཚིནྡ བྷིནྡ ཨུཔྤཱཊེཧཱི’’ཏིཨཱདིཝཙནམྤི ཨནིཡཱམིཏམེཝ ཧོཏི. ‘‘ཨིམཾ ཨམྦརུཀྑ’’ནྟིཨཱདིཝཙནམེཝ ཧི ནིཡཱམིཏཾ ནཱམ, ཏཾ ན ཝཊྚཏི.

པཙཏི ཝཱ པཙཱཔེཏི ཝཱཏི ཨནྟམསོ པཏྟམྤི པཙིཏུཀཱམོ ཏིཎཱདཱིནཾ ཨུཔརི སཉྩིཙྩ ཨགྒིཾ ཀརོནྟོ སཡཾ ཝཱ པཙཏི, ཨཉྙེན ཝཱ པཙཱཔེཏཱིཏི ¶ སབྦཾ པཐཝཱིཁཎནསིཀྑཱཔདེ ཝུཏྟནཡེན ཝེདིཏབྦཾ. ཨནིཡཱམེཏྭཱ པན ‘‘མུགྒེ པཙ, མཱསེ པཙཱ’’ཏིཨཱདི ཝཏྟུཾ ཝཊྚཏི. ‘‘ཨིམེ མུགྒེ པཙ, ཨིམེ མཱསེ པཙཱ’’ཏི ཨེཝཾ ཝཏྟུཾ ན ཝཊྚཏི.

ཨནཱཔཏྟི ཨིམཾ ཛཱནཱཏིཨཱདཱིསུ ‘‘ཨིམཾ མཱུལབྷེསཛྫཾ ཛཱན, ཨིམཾ མཱུལཾ ཝཱ པཎྞཾ ཝཱ དེཧི, ཨིམཾ རུཀྑཾ ཝཱ ལཏཾ ཝཱ ཨཱཧར, ཨིམིནཱ པུཔྥེན ཝཱ ཕལེན ཝཱ པཎྞེན ཝཱ ཨཏྠོ, ཨིམཾ རུཀྑཾ ཝཱ ལཏཾ ཝཱ ཕལཾ ¶ ཝཱ ཀཔྤིཡཾ ཀརོཧཱི’’ཏི ཨེཝམཏྠོ དཊྛབྦོ. ཨེཏྟཱཝཏཱ བྷཱུཏགཱམཔརིམོཙནཾ ཀཏཾ ཧོཏི. པརིབྷུཉྫནྟེན པན བཱིཛགཱམཔརིམོཙནཏྠཾ པུན ཀཔྤིཡཾ ཀཱརེཏབྦཾ.

ཀཔྤིཡཀརཎཉྩེཏྠ ཨིམིནཱ སུཏྟཱནུསཱརེན ཝེདིཏབྦཾ – ‘‘ཨནུཛཱནཱམི, བྷིཀྑཝེ, པཉྩཧི སམཎཀཔྤེཧི ཕལཾ པརིབྷུཉྫིཏུཾ ཨགྒིཔརིཛིཏཾ སཏྠཔརིཛིཏཾ ནཁཔརིཛིཏཾ ཨབཱིཛཾ ནིབྦཊྚབཱིཛམེཝ པཉྩམ’’ནྟི. ཏཏྠ ‘‘ཨགྒིཔརིཛིཏ’’ནྟི ཨགྒིནཱ པརིཛིཏཾ ཨདྷིབྷཱུཏཾ དཌྜྷཾ ཕུཊྛནྟི ཨཏྠོ. ‘‘སཏྠཔརིཛིཏ’’ནྟི སཏྠེན པརིཛིཏཾ ཨདྷིབྷཱུཏཾ ཚིནྣཾ ཝིདྡྷཾ ཝཱཏི ཨཏྠོ. ཨེས ནཡོ ནཁཔརིཛིཏེ. ཨབཱིཛནིབྦཊྚབཱིཛཱནི སཡམེཝ ཀཔྤིཡཱནི. ཨགྒིནཱ ཀཔྤིཡཾ ཀརོནྟེན ཀཊྛགྒིགོམཡགྒིཨཱདཱིསུ ཡེན ཀེནཙི ཨནྟམསོ ལོཧཁཎྜེནཔི ཨཱདིཏྟེན ཀཔྤིཡཾ ཀཱཏབྦཾ. ཏཉྩ ཁོ ཨེཀདེསེ ཕུསནྟེན ‘‘ཀཔྤིཡ’’ནྟི ཝཏྭཱཝ ཀཱཏབྦཾ. སཏྠེན ཀརོནྟེན ཡསྶ ཀསྶཙི ལོཧམཡསཏྠསྶ ཨནྟམསོ སཱུཙིནཁཙྪེདནཱནམྤི ཏུཎྜེན ཝཱ དྷཱརཱཡ ཝཱ ཚེདཾ ཝཱ ¶ ཝེདྷཾ ཝཱ དསྶེནྟེན ‘‘ཀཔྤིཡ’’ནྟི ཝཏྭཱཝ ཀཱཏབྦཾ. ནཁེན ཀཔྤིཡཾ ཀརོནྟེན པཱུཏིནཁེན ན ཀཱཏབྦཾ. མནུསྶཱནཾ པན སཱིཧབྱགྒྷདཱིཔིམཀྐཊཱདཱིནཾ སཀུནྟཱནཉྩ ནཁཱ ཏིཁིཎཱ ཧོནྟི, ཏེཧི ཀཱཏབྦཾ. ཨསྶམཧིཾསསཱུཀརམིགགོརཱུཔཱདཱིནཾ ཁུརཱ ཨཏིཁིཎཱ, ཏེཧི ན ཀཱཏབྦཾ, ཀཏམྤི ཨཀཏཾ ཧོཏི. ཧཏྠིནཁཱ པན ཁུརཱ ན ཧོནྟི, ཏེཧི ཝཊྚཏི. ཡེཧི པན ཀཱཏུཾ ཝཊྚཏི, ཏེཧི ཏཏྠཛཱཏཀེཧིཔི ཨུདྡྷརིཏྭཱ གཧིཏཀེཧིཔི ཚེདཾ ཝཱ ཝེདྷཾ ཝཱ དསྶེནྟེན ‘‘ཀཔྤིཡ’’ནྟི ཝཏྭཱཝ ཀཱཏབྦཾ.

ཏཏྠ སཙེཔི བཱིཛཱནཾ པབྦཏམཏྟོ རཱསི རུཀྑསཧསྶཾ ཝཱ ཚིནྡིཏྭཱ ཨེཀཱབདྡྷཾ ཀཏྭཱ ཨུཙྪཱུནཾ ཝཱ མཧཱབྷཱརོ བནྡྷིཏྭཱ ཋཔིཏོ ཧོཏི, ཨེཀསྨིཾ བཱིཛེ ཝཱ རུཀྑསཱཁཱཡ ཝཱ ཨུཙྪུམྷི ཝཱ ཀཔྤིཡེ ཀཏེ སབྦཾ ཀཏཾ ཧོཏི. ཨུཙྪཱུ ཙ དཱརཱུནི ཙ ཨེཀཏོ བདྡྷཱནི ཧོནྟི, ཨུཙྪུཾ ཀཔྤིཡཾ ཀརིསྶཱམཱིཏི དཱརུཾ ¶ ཝིཛ྄ཛྷཏི, ཝཊྚཏིཡེཝ. སཙེ པན ཡཱཡ རཛྫུཡཱ ཝཱ ཝལླིཡཱ ཝཱ བདྡྷཱནི, ཏཾ ཝིཛ྄ཛྷཏི, ན ¶ ཝཊྚཏི. ཨུཙྪུཁཎྜཱནཾ པཙྪིཾ པཱུརེཏྭཱ ཨཱཧརནྟི, ཨེཀསྨིཾ ཁཎྜེ ཀཔྤིཡེ ཀཏེ སབྦཾ ཀཏམེཝ ཧོཏི. མརིཙཔཀྐཱདཱིཧི མིསྶེཏྭཱ བྷཏྟཾ ཨཱཧརནྟི, ‘‘ཀཔྤིཡཾ ཀརོཧཱི’’ཏི ཝུཏྟེ སཙེཔི བྷཏྟསིཏྠེ ཝིཛ྄ཛྷཏི, ཝཊྚཏིཡེཝ. ཏིལཏཎྜུལཱདཱིསུཔི ཨེསེཝ ནཡོ. ཡཱགུཡཱ པཀྑིཏྟཱནི པན ཨེཀཱབདྡྷཱནི ཧུཏྭཱ ན སནྟིཊྛནྟི, ཏཏྠ ཨེཀམེཀཾ ཝིཛ྄ཛྷིཏྭཱ ཀཔྤིཡཾ ཀཱཏབྦམེཝ. ཀཔིཏྠཕལཱདཱིནཾ ཨནྟོ མིཉྫཾ ཀཊཱཧཾ མུཉྩིཏྭཱ སཉྩརཏི, བྷིནྡཱཔེཏྭཱ ཀཔྤིཡཾ ཀཱརཱཔེཏབྦཾ. ཨེཀཱབདྡྷཾ ཧོཏི, ཀཊཱཧེཔི ཀཱཏུཾ ཝཊྚཏི.

ཨསཉྩིཙྩཱཏི པཱསཱཎརུཀྑཱདཱིནི ཝཱ པཝཊྚེནྟསྶ སཱཁཾ ཝཱ ཀཌྜྷནྟསྶ ཀཏྟརདཎྜེན ཝཱ བྷཱུམིཾ པཧརིཏྭཱ གཙྪནྟསྶ ཏིཎཱནི ཚིཛྫནྟི, ཏཱནི ཏེན ཚིནྡིསྶཱམཱིཏི ཨེཝཾ སཉྩིཙྩ ཨཙྪིནྣཏྟཱ ཨསཉྩིཙྩ ཚིནྣཱནི ནཱམ ཧོནྟི. ཨིཏི ཨསཉྩིཙྩ ཚིནྡནྟསྶ ཨནཱཔཏྟི.

ཨསཏིཡཱཏི ཨཉྙཝིཧིཏོ ཀེནཙི སདྡྷིཾ ཀིཉྩི ཀཐེནྟོ པཱདངྒུཊྛཀེན ཝཱ ཧཏྠེན ཝཱ ཏིཎཾ ཝཱ ལཏཾ ཝཱ ཚིནྡནྟོ ཏིཊྛཏི, ཨེཝཾ ཨསཏིཡཱ ཚིནྡནྟསྶ ཨནཱཔཏྟི.

ཨཛཱནནྟསྶཱཏི ཨེཏྠབྦྷནྟརེ བཱིཛགཱམོཏི ཝཱ བྷཱུཏགཱམོཏི ཝཱ ན ཛཱནཱཏི, ཚིནྡཱམཱིཏིཔི ན ཛཱནཱཏི, ཀེཝལཾ ཝཏིཡཱ ཝཱ པལཱལཔུཉྫེ ཝཱ ནིཁཱདནཾ ཝཱ ཁཎིཏྟིཾ ཝཱ ཀུདཱལཾ ཝཱ སངྒོཔནཏྠཱཡ ཋཔེཏི, ཌཡ྄ཧམཱནཧཏྠོ ཝཱ ཨགྒིཾ པཱཏེཏི, ཏཏྲ ཙེ ཏིཎཱནི ཚིཛྫནྟི ཝཱ ཌཡ྄ཧནྟི ཝཱ ཨནཱཔཏྟི. མནུསྶཝིགྒཧཔཱརཱཛིཀཝཎྞནཱཡཾ པན སབྦཨཊྛཀཐཱསུ ‘‘སཙེ ¶ བྷིཀྑུ རུཀྑེན ཝཱ ཨཛ྄ཛྷོཏྠཊོ ཧོཏི, ཨོཔཱཏེ ཝཱ པཏིཏོ སཀྐཱ ཙ ཧོཏི རུཀྑཾ ཚིནྡིཏྭཱ བྷཱུམིཾ ཝཱ ཁཎིཏྭཱ ནིཀྑམིཏུཾ, ཛཱིཝིཏཧེཏུཔི ཨཏྟནཱ ན ཀཱཏབྦཾ. ཨཉྙེན པན བྷིཀྑུནཱ བྷཱུམིཾ ཝཱ ཁཎིཏྭཱ རུཀྑཾ ཝཱ ཚིནྡིཏྭཱ ཨལླརུཀྑཏོ ཝཱ དཎྜཀཾ ཚིནྡིཏྭཱ ཏཾ རུཀྑཾ པཝཊྚེཏྭཱ ནིཀྑཱམེཏུཾ ཝཊྚཏི, ཨནཱཔཏྟཱི’’ཏི ཝུཏྟཾ. ཏཏྠ ཀཱརཎཾ ¶ ན དིསྶཏི – ‘‘ཨནུཛཱནཱམི, བྷིཀྑཝེ, དཝཌཱཧེ ཌཡ྄ཧམཱནེ པཊགྒིཾ དཱཏུཾ, པརིཏྟཾ ཀཱཏུ’’ནྟི (ཙཱུལ༹ཝ. ༢༨༣) ཨིདཾ པན ཨེཀམེཝ སུཏྟཾ དིསྶཏི. སཙེ ཨེཏསྶ ཨནུལོམཾ ‘‘ཨཏྟནོ ན ཝཊྚཏི, ཨཉྙསྶ ཝཊྚཏཱི’’ཏི ¶ ཨིདཾ ནཱནཱཀརཎཾ ན སཀྐཱ ལདྡྷུཾ. ཨཏྟནོ ཨཏྠཱཡ ཀརོནྟོ ཨཏྟསིནེཧེན ཨཀུསལཙིཏྟེནེཝ ཀརོཏི, པརོ པན ཀཱརུཉྙེན, ཏསྨཱ ཨནཱཔཏྟཱིཏི ཙེ. ཨེཏམྤི ཨཀཱརཎཾ. ཀུསལཙིཏྟེནཱཔི ཧི ཨིམཾ ཨཱཔཏྟིཾ ཨཱཔཛྫཏི. སབྦཨཊྛཀཐཱསུ པན ཝུཏྟཏྟཱ ན སཀྐཱ པཊིསེདྷེཏུཾ. གཝེསིཏབྦཱ ཨེཏྠ ཡུཏྟི. ཨཊྛཀཐཱཙརིཡཱནཾ ཝཱ སདྡྷཱཡ གནྟབྦནྟི. སེསཾ ཨུཏྟཱནམེཝ.

ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི. ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

བྷཱུཏགཱམསིཀྑཱཔདཾ པཋམཾ.

༢. ཨཉྙཝཱདཀསིཀྑཱཔདཝཎྞནཱ

༩༤. དུཏིཡསིཀྑཱཔདེ – ཨནཱཙཱརཾ ཨཱཙརིཏྭཱཏི ཨཀཱཏབྦཾ ཀཏྭཱ; ཀཱཡཝཙཱིདྭཱརེསུ ཨཱཔཏྟིཾ ཨཱཔཛྫིཏྭཱཏི ཝུཏྟཾ ཧོཏི. ཨཉྙེནཉྙཾ པཊིཙརཏཱིཏི ཨཉྙེན ཝཙནེན ཨཉྙཾ ཝཙནཾ པཊིཙརཏི པཊིཙྪཱདེཏི ཨཛ྄ཛྷོཏྠརཏི; ཨིདཱནི ཏཾ པཊིཙརཎཝིདྷིཾ དསྶེནྟོ ‘‘ཀོ ཨཱཔནྣོ’’ཏིཨཱདིམཱཧ. ཏཏྲཱཡཾ ཝཙནསམྦནྡྷོ – སོ ཀིར ཀིཉྩི ཝཱིཏིཀྐམཾ དིསྭཱ ‘‘ཨཱཝུསོ, ཨཱཔཏྟིཾ ཨཱཔནྣོསཱི’’ཏི སངྒྷམཛ྄ཛྷེ ཨཱཔཏྟིཡཱ ཨནུཡུཉྫིཡམཱནོ ‘‘ཀོ ཨཱཔནྣོ’’ཏི ཝདཏི. ‘‘ཏཏོ ཏྭ’’ནྟི ཝུཏྟེ ‘‘ཨཧཾ ཀིཾ ཨཱཔནྣོ’’ཏི ཝདཏི. ཨཐ ‘‘པཱཙིཏྟིཡཾ ཝཱ དུཀྐཊཾ ཝཱ’’ཏི ཝུཏྟེ ཝཏྠུཾ པུཙྪནྟོ ‘‘ཨཧཾ ཀིསྨིཾ ཨཱཔནྣོ’’ཏི ཝདཏི. ཏཏོ ‘‘ཨསུཀསྨིཾ ནཱམ ཝཏྠུསྨི’’ནྟི ཝུཏྟེ ‘‘ཨཧཾ ཀཐཾ ཨཱཔནྣོ, ཀིཾ ཀརོནྟོ ཨཱཔནྣོམྷཱི’’ཏི པུཙྪཏི. ཨཐ ‘‘ཨིདཾ ནཱམ ཀརོནྟོ ཨཱཔནྣོ’’ཏི ཝུཏྟེ ‘‘ཀཾ བྷཎཐཱ’’ཏི ཝདཏི. ཏཏོ ‘‘ཏཾ བྷཎཱམཱ’’ཏི ཝུཏྟེ ‘‘ཀིཾ བྷཎཐཱ’’ཏི ཝདཏི.

ཨཔིཙེཏྠ ¶ ཨཡཾ པཱལི༹མུཏྟཀོཔི ཨཉྙེནཉྙཾ པཊིཙརཎཝིདྷི – བྷིཀྑཱུཧི ‘‘ཏཝ སིཔཱཊིཀཱཡ ཀཧཱཔཎོ དིཊྛོ, ཀིསྶེཝམསཱརུཔྤཾ ཀརོསཱི’’ཏི ཝུཏྟོ ‘‘སུདིཊྛཾ, བྷནྟེ, ན པནེསོ ཀཧཱཔཎོ; ཏིཔུམཎྜལཾ ཨེཏ’’ནྟི བྷཎནྟོ ཝཱ ‘‘ཏྭཾ སུརཾ པིཝནྟོ དིཊྛོ, ཀིསྶེཝཾ ཀརོསཱི’’ཏི ཝུཏྟོ ¶ ‘‘སུདིཊྛོ ¶ , བྷནྟེ, ན པནེསཱ སུརཱ, བྷེསཛྫཏྠཱཡ སམྤཱདིཏཾ ཨརིཊྛ’’ནྟི བྷཎནྟོ ཝཱ ‘‘ཏྭཾ པཊིཙྪནྣེ ཨཱསནེ མཱཏུགཱམེན སདྡྷིཾ ནིསིནྣོ དིཊྛོ, ཀིསྶེཝམསཱརུཔྤཾ ཀརོསཱི’’ཏི ཝུཏྟོ ‘‘ཡེན དིཊྛཾ སུདིཊྛཾ, ཝིཉྙཱུ པནེཏྠ དུཏིཡོ ཨཏྠི, སོ ཀིསྶ ན དིཊྛོ’’ཏི བྷཎནྟོ ཝཱ, ‘‘ཨཱིདིསཾ ཏཡཱ ཀིཉྩི དིཊྛ’’ནྟི པུཊྛོ ‘‘ན སུཎཱམཱི’’ཏི སོཏམུཔནེནྟོ ཝཱ, སོཏདྭཱརེ པུཙྪནྟཱནཾ ཙཀྑུཾ ཨུཔནེནྟོ ཝཱ, ཨཉྙེནཉྙཾ པཊིཙརཏཱིཏི ཝེདིཏབྦོ. ཨཉྙཝཱདཀཾ རོཔེཏཱུཏི ཨཉྙཝཱདཀཾ ཨཱརོཔེཏུ; པཏིཊྛཱཔེཏཱུཏི ཨཏྠོ. ཝིཧེསཀཾ རོཔེཏཱུཏི ཨེཏསྨིམྤི ཨེསེཝ ནཡོ.

༩༨. ཨཉྙཝཱདཀེ ཝིཧེསཀེ པཱཙིཏྟིཡནྟི ཨེཏྠ ཨཉྙཾ ཝདཏཱིཏི ཨཉྙཝཱདཀཾ; ཨཉྙེནཉྙཾ པཊིཙརཎསྶེཏཾ ནཱམཾ. ཝིཧེསེཏཱིཏི ཝིཧེསཀཾ; ཏུཎྷཱིབྷཱུཏསྶེཏཾ ནཱམཾ, ཏསྨིཾ ཨཉྙཝཱདཀེ ཝིཧེསཀེ. པཱཙིཏྟིཡནྟི ཝཏྠུདྭཡེ པཱཙིཏྟིཡདྭཡཾ ཝུཏྟཾ.

༡༠༠. ཨརོཔིཏེ ཨཉྙཝཱདཀེཏི ཀམྨཝཱཙཱཡ ཨནཱརོཔིཏེ ཨཉྙཝཱདཀེ. ཨརོཔིཏེ ཝིཧེསཀེཏི ཨེཏསྨིམྤི ཨེསེཝ ནཡོ.

༡༠༡. དྷམྨཀམྨེ དྷམྨཀམྨསཉྙཱིཏིཨཱདཱིསུ ཡཾ ཏཾ ཨཉྙཝཱདཀཝིཧེསཀརོཔནཀམྨཾ ཀཏཾ, ཏཉྩེ དྷམྨཀམྨཾ ཧོཏི, སོ ཙ བྷིཀྑུ ཏསྨིཾ དྷམྨཀམྨསཉྙཱི ཨཉྙཝཱདཀཉྩ ཝིཧེསཀཉྩ ཀརོཏི, ཨཐསྶ ཏསྨིཾ ཨཉྙཝཱདཀེ ཙ ཝིཧེསཀེ ཙ ཨཱཔཏྟི པཱཙིཏྟིཡསྶཱཏི ཨིམིནཱ ནཡེན ཨཏྠོ ཝེདིཏབྦོ.

༡༠༢. ཨཛཱནནྟོ པུཙྪཏཱིཏི ཨཱཔཏྟིཾ ཝཱ ཨཱཔནྣབྷཱཝཾ ཨཛཱནནྟོཡེཝ ‘‘ཀིཾ ཏུམྷེ བྷཎཐ, ཨཧཾ ན ཛཱནཱམཱི’’ཏི པུཙྪཏི. གིལཱནོ ཝཱ ན ཀཐེཏཱིཏི མུཁེ ཏཱདིསོ བྱཱདྷི ཧོཏི, ཡེན ཀཐེཏུཾ ན སཀྐོཏི. སངྒྷསྶ བྷཎྜནཾ ཝཱཏིཨཱདཱིསུ སངྒྷམཛ྄ཛྷེ ཀཐིཏེ ཏཔྤཙྩཡཱ སངྒྷསྶ བྷཎྜནཾ ཝཱ ཀལཧོ ཝཱ ཝིཝཱདོ ཝཱ བྷཝིསྶཏི, སོ མཱ ཨཧོསཱིཏི མཉྙམཱནོ ན ཀཐེཏཱིཏི ཨིམིནཱ ནཡེན ཨཏྠོ ཝེདིཏབྦོ. སེསཾ ཨུཏྟཱནམེཝཱཏི.

ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, སིཡཱ ཀིརིཡཾ ¶ , སིཡཱ ཨཀིརིཡཾ, ཨཉྙེནཉྙཾ པཊིཙརནྟསྶ ཧི ཀིརིཡཾ ¶ ཧོཏི, ཏུཎྷཱིབྷཱཝེན ཝིཧེསནྟསྶ ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཨཉྙཝཱདཀསིཀྑཱཔདཾ དུཏིཡཾ.

༣. ཨུཛ྄ཛྷཱཔནཀསིཀྑཱཔདཝཎྞནཱ

༡༠༣. ཏཏིཡསིཀྑཱཔདེ – དབྦཾ མལླཔུཏྟཾ བྷིཀྑཱུ ཨུཛ྄ཛྷཱཔེནྟཱིཏི ‘‘ཚནྡཱཡ དབྦོ མལླཔུཏྟོ’’ཏིཨཱདཱིནི ཝདནྟཱ ཏཾ ཨཱཡསྨནྟཾ ཏེཧི བྷིཀྑཱུཧི ཨཝཛཱནཱཔེནྟི, ཨཝཉྙཱཡ ཨོལོཀཱཔེནྟི, ལཱམཀཏོ ཝཱ ཙིནྟཱཔེནྟཱི’’ཏི ཨཏྠོ. ལཀྑཎཾ པནེཏྠ སདྡསཏྠཱནུསཱརེན ཝེདིཏབྦཾ. ཨོཛ྄ཛྷཱཔེནྟཱིཏིཔི པཱཋོ. ཨཡམེཝཏྠོ ¶ . ཚནྡཱཡཱཏི ཚནྡེན པཀྑཔཱཏེན; ཨཏྟནོ ཨཏྟནོ སནྡིཊྛསམྦྷཏྟཱནཾ པཎཱིཏཱནི པཉྙཔེཏཱིཏི ཨདྷིཔྤཱཡོ. ཁིཡྻནྟཱིཏི ‘‘ཚནྡཱཡ དབྦོ མལླཔུཏྟོ’’ཏིཨཱདཱིནི ཝདནྟཱ པཀཱསེནྟི.

༡༠༥. ཨུཛ྄ཛྷཱཔནཀེ ཁིཡྻནཀེ པཱཙིཏྟིཡནྟི ཨེཏྠ ཡེན ཝཙནེན ཨུཛ྄ཛྷཱཔེནྟི, ཏཾ ཨུཛ྄ཛྷཱཔནཀཾ. ཡེན ཙ ཁིཡྻནྟི ཏཾ ཁིཡྻནཀཾ. ཏསྨིཾ ཨུཛ྄ཛྷཱཔནཀེ ཁིཡྻནཀེ. པཱཙིཏྟིཡནྟི ཝཏྠུདྭཡེ པཱཙིཏྟིཡདྭཡཾ ཝུཏྟཾ.

༡༠༦. ཨུཛ྄ཛྷཱཔནཀཾ ནཱམ ཨུཔསམྤནྣཾ སངྒྷེན སམྨཏཾ སེནཱསནཔཉྙཱཔཀཾ ཝཱ…པེ… ཨཔྤམཏྟཀཝིསྶཛྫནཀཾ ཝཱཏི ཨེཏེསཾ པདཱནཾ ‘‘མངྐུཀཏྟུཀཱམོ’’ཏི ཨིམིནཱ སམྦནྡྷོ. ཨཝཎྞཾ ཀཏྟུཀཱམོ ཨཡསཾ ཀཏྟུཀཱམོཏི ཨིམེསཾ པན ཝསེན ཨུཔསམྤནྣནྟིཨཱདཱིསུ ‘‘ཨུཔསམྤནྣསྶཱ’’ཏི ཨེཝཾ ཝིབྷཏྟིཝིཔརིཎཱམོ ཀཱཏབྦོ. ཨུཛ྄ཛྷཱཔེཏི ཝཱ ཁིཡྻཏི ཝཱ ཨཱཔཏྟི པཱཙིཏྟིཡསྶཱཏི ཨེཏྠ པན ཡསྨཱ ‘‘ཁིཡྻནཀཾ ནཱམཱ’’ཏི ཨེཝཾ མཱཏིཀཱཔདཾ ཨུདྡྷརིཏྭཱཔི ‘‘ཨུཛ྄ཛྷཱཔནཀཾ ནཱམཱ’’ཏི ཨིམསྶ པདསྶ ཝུཏྟཝིབྷངྒོཡེཝ ཝཏྟབྦོ ཧོཏི, ཨཉྙཝཱདཀསིཀྑཱཔདེ ཝིཡ ཨཉྙོ ཝིསེསོ ནཏྠི, ཏསྨཱ ཏཾ ཝིསུཾ ཨནུདྡྷརིཏྭཱ ཨཝིབྷཛིཏྭཱ ནིགམནམེཝ ཨེཀཏོ ཀཏནྟི ཝེདིཏབྦཾ. དྷམྨཀམྨེ དྷམྨཀམྨསཉྙཱིཏིཨཱདཱིསུ ཡཾ ཏསྶ ཨུཔསམྤནྣསྶ སམྨུཏིཀམྨཾ ཀཏཾ ཏཉྩེ དྷམྨཀམྨཾ ཧོཏི, སོ ཙ བྷིཀྑུ ཏསྨིཾ དྷམྨཀམྨསཉྙཱི ཨུཛ྄ཛྷཱཔནཀཉྩ ཁིཡྻནཀཉྩ ཀརོཏི, ཨཐསྶ ཏསྨིཾ ཨུཛ྄ཛྷཱཔནཀེ ཙ ཁིཡྻནཀེ ཙ ཨཱཔཏྟི པཱཙིཏྟིཡསྶཱཏི ཨིམིནཱ ནཡེན ཨཏྠོ ཝེདིཏབྦོ.

ཨནུཔསམྤནྣཾ ¶ ¶ ཨུཛ྄ཛྷཱཔེཏི ཝཱ ཁིཡྻཏི ཝཱཏི ཨེཏྠ ཨུཔསམྤནྣཾ སངྒྷེན སམྨཏཾ ཨཉྙཾ ཨནུཔསམྤནྣཾ ཨུཛ྄ཛྷཱཔེཏི ཨཝཛཱནཱཔེཏི, ཏསྶ ཝཱ ཏཾ སནྟིཀེ ཁིཡྻཏཱིཏི ཨཏྠོ. ཨུཔསམྤནྣཾ སངྒྷེན ཨསམྨཏནྟི ཀམྨཝཱཙཱཡ ཨསམྨཏཾ ཀེཝལཾ ‘‘ཏཝེསོ བྷཱརོ’’ཏི སངྒྷེན ཨཱརོཔིཏབྷཱརཾ བྷིཀྑཱུནཾ ཝཱ ཕཱསུཝིཧཱརཏྠཱཡ སཡམེཝ ཏཾ བྷཱརཾ ཝཧནྟཾ, ཡཏྲ ཝཱ དྭེ ཏཡོ བྷིཀྑཱུ ཝིཧརནྟི, ཏཏྲ ཝཱ ཏཱདིསཾ ཀམྨཾ ཀརོནྟནྟི ཨདྷིཔྤཱཡོ. ཨནུཔསམྤནྣཾ སངྒྷེན སམྨཏཾ ཝཱ ཨསམྨཏཾ ཝཱཏི ཨེཏྠ པན ཀིཉྩཱཔི ཨནུཔསམྤནྣསྶ ཏེརས སམྨུཏིཡོ དཱཏུཾ ན ཝཊྚནྟི. ཨཐ ཁོ ཨུཔསམྤནྣཀཱལེ ལདྡྷསམྨུཏིཀོ པཙྪཱ ཨནུཔསམྤནྣབྷཱཝེ ཋིཏོ, ཏཾ སནྡྷཱཡ ‘‘སངྒྷེན ¶ སམྨཏཾ ཝཱ’’ཏི ཝུཏྟཾ. ཡསྶ པན བྱཏྟསྶ སཱམཎེརསྶ ཀེཝལཾ སངྒྷེན ཝཱ སམྨཏེན ཝཱ བྷིཀྑུནཱ ‘‘ཏྭཾ ཨིདཾ ཀམྨཾ ཀརོཧཱི’’ཏི བྷཱརོ ཀཏོ, ཏཱདིསཾ སནྡྷཱཡ ‘‘ཨསམྨཏཾ ཝཱ’’ཏི ཝུཏྟཾ. སེསམེཏྠ ཨུཏྟཱནམེཝཱཏི.

ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཨུཛ྄ཛྷཱཔནཀསིཀྑཱཔདཾ ཏཏིཡཾ.

༤. པཋམསེནཱསནསིཀྑཱཔདཝཎྞནཱ

༡༠༨. ཙཏུཏྠསིཀྑཱཔདེ – ཧེམནྟིཀེ ཀཱལེཏི ཧེམནྟཀཱལེ ཧིམཔཱཏསམཡེ. ཀཱཡཾ ཨོཏཱཔེནྟཱཏི མཉྩཔཱིཋཱདཱིསུ ནིསིནྣཱ བཱལཱཏཔེན ཀཱཡཾ ཨོཏཱཔེནྟཱ. ཀཱལེ ཨཱརོཙིཏེཏི ཡཱགུབྷཏྟཱདཱིསུ ཡསྶ ཀསྶཙི ཀཱལེ ཨཱརོཙིཏེ. ཨོཝཊྛཾ ཧོཏཱིཏི ཧིམཝསྶེན ཨོཝཊྛཾ ཏིནྟཾ ཧོཏི.

༡༡༠. ཨཝསྶིཀསངྐེཏེཏི ཝསྶིཀཝསྶཱནམཱསཱཏི ཨེཝཾ ཨཔཉྙཏྟེ ཙཏྟཱརོ ཧེམནྟིཀེ ཙཏྟཱརོ ཙ གིམྷིཀེ ཨཊྛ མཱསེཏི ཨཏྠོ. མཎྜཔེ ཝཱཏི སཱཁཱམཎྜཔེ ཝཱ པདརམཎྜཔེ ཝཱ. རུཀྑམཱུལེ ཝཱཏི ¶ ཡསྶ ཀསྶཙི རུཀྑསྶ ཧེཊྛཱ. ཡཏྠ ཀཱཀཱ ཝཱ ཀུལལཱ ཝཱ ན ཨཱུཧདནྟཱིཏི ཡཏྠ དྷུཝནིཝཱསེན ཀུལཱཝཀེ ཀཏྭཱ ཝསམཱནཱ ཨེཏེ ཀཱཀཀུལལཱ ཝཱ ཨཉྙེ ཝཱ སཀུནྟཱ ཏཾ སེནཱསནཾ ན ཨཱུཧདནྟི, ཏཱདིསེ རུཀྑམཱུལེ ནིཀྑིཔིཏུཾ ཨནུཛཱནཱམཱིཏི. ཏསྨཱ ཡཏྠ གོཙརཔྤསུཏཱ སཀུནྟཱ ཝིསྶམིཏྭཱ གཙྪནྟི, ཏསྶ རུཀྑསྶ མཱུལེ ནིཀྑིཔིཏུཾ ཝཊྚཏི. ཡསྨིཾ པན དྷུཝནིཝཱསེན ཀུལཱཝཀེ ཀཏྭཱ ཝསནྟི, ཏསྶ རུཀྑསྶ མཱུལེ ན ནིཀྑིཔིཏབྦཾ. ‘‘ཨཊྛ ¶ མཱསེ’’ཏི ཝཙནཏོ ཡེསུ ཛནཔདེསུ ཝསྶཀཱལེ ན ཝསྶཏི, ཏེསུཔི ཙཏྟཱརོ མཱསེ ནིཀྑིཔིཏུཾ ན ཝཊྚཏིཡེཝ. ‘‘ཨཝསྶིཀསངྐེཏེ’’ཏི ཝཙནཏོ ཡཏྠ ཧེམནྟེ དེཝོ ཝསྶཏི, ཏཏྠ ཧེམནྟེཔི ཨཛ྄ཛྷོཀཱསེ ནིཀྑིཔིཏུཾ ན ཝཊྚཏི. གིམྷེ པན སབྦཏྠ ཝིགཏཝལཱཧཀཾ ཝིསུདྡྷཾ ནབྷཾ ཧོཏི, ཨེཝརཱུཔེ ཀཱལེ ཀེནཙིདེཝ ཀརཎཱིཡེན ཨཛ྄ཛྷོཀཱསེ མཉྩཔཱིཋཾ ནིཀྑིཔིཏུཾ ཝཊྚཏི.

ཨབྦྷོཀཱསིཀེནཱཔི ཝཏྟཾ ཛཱནིཏབྦཾ, ཏསྶ ཧི སཙེ པུགྒལིཀམཉྩཀོ ཨཏྠི, ཏཏྠེཝ སཡིཏབྦཾ. སངྒྷིཀཾ གཎྷནྟེན ¶ ཝེཏྟེན ཝཱ ཝཱཀེན ཝཱ ཝཱིཏམཉྩཀོ གཧེཏབྦོ. ཏསྨིཾ ཨསཏི པུརཱཎམཉྩཀོ གཧེཏབྦོ. ཏསྨིམྤི ཨསཏི ནཝཝཱཡིམོ ཝཱ ཨོནདྡྷཀོ ཝཱ གཧེཏབྦོ. གཧེཏྭཱ ཙ པན ‘‘ཨཧཾ ཨུཀྐཊྛརུཀྑམཱུལིཀོ ཨུཀྐཊྛཨབྦྷོཀཱསིཀོ’’ཏི ཙཱིཝརཀུཊིམྤི ཨཀཏྭཱ ཨསམཡེ ཨཛ྄ཛྷོཀཱསེ རུཀྑམཱུལེ ཝཱ པཉྙཔེཏྭཱ ནིཔཛྫིཏུཾ ན ཝཊྚཏི. སཙེ པན ཙཏུགྒུཎེནཔི ཙཱིཝརེན ཀཏཀུཊི ཨཏེམེནྟཾ རཀྑིཏུཾ ན སཀྐོཏི, སཏྟཱཧཝདྡལིཀཱདཱིནི བྷཝནྟི, བྷིཀྑུནོ ཀཱཡཱནུགཏིཀཏྟཱ ཝཊྚཏི.

ཨརཉྙེ པཎྞཀུཊཱིསུ ཝསནྟཱནཾ སཱིལསམྤདཱཡ པསནྣཙིཏྟཱ མནུསྶཱ ནཝཾ མཉྩཔཱིཋཾ དེནྟི ‘‘སངྒྷིཀཔརིབྷོགེན པརིབྷུཉྫཐཱ’’ཏི ཝསིཏྭཱ གཙྪནྟེཧི སཱམནྟཝིཧཱརེ སབྷཱགབྷིཀྑཱུནཾ པེསེཏྭཱ གནྟབྦཾ, སབྷཱགཱནཾ ཨབྷཱཝེ ཨནོཝསྶཀེ ནིཀྑིཔིཏྭཱ གནྟབྦཾ, ཨནོཝསྶཀེ ཨསཏི རུཀྑེ ལགྒེཏྭཱ གནྟབྦཾ. ཙེཏིཡངྒཎེ སམྨཛྫནིཾ གཧེཏྭཱ བྷོཛནསཱལངྒཎཾ ཝཱ ཨུཔོསཐཱགཱརངྒཎཾ ཝཱ པརིཝེཎདིཝཱཊྛཱནཨགྒིསཱལཱདཱིསུ ཝཱ ཨཉྙཏརཾ སམྨཛྫིཏྭཱ དྷོཝིཏྭཱ པུན སམྨཛྫནཱིམཱལ༹ཀེཡེཝ ཋཔེཏབྦཱ. ཨུཔོསཐཱགཱརཱདཱིསུ ཨཉྙཏརསྨིཾ གཧེཏྭཱ ཨཝསེསཱནི སམྨཛྫནྟསྶཱཔི ཨེསེཝ ནཡོ.

ཡོ ¶ པན བྷིཀྑཱཙཱརམགྒཾ སམྨཛྫནྟོཝ གནྟུཀཱམོ ཧོཏི, ཏེན སམྨཛྫིཏྭཱ སཙེ ཨནྟརཱམགྒེ སཱལཱ ཨཏྠི, ཏཏྠ ཋཔེཏབྦཱ. སཙེ ནཏྠི, ཝལཱཧཀཱནཾ ཨནུཊྛིཏབྷཱཝཾ སལླཀྑེཏྭཱ ‘‘ཡཱཝཱཧཾ གཱམཏོ ནིཀྑམཱམི, ཏཱཝ ན ཝསྶིསྶཏཱི’’ཏི ཛཱནནྟེན ཡཏྠ ཀཏྠཙི ནིཀྑིཔིཏྭཱ པུན པཙྩཱགཙྪནྟེན པཱཀཏིཀཊྛཱནེ ཋཔེཏབྦཱ. སཙེ ཝསྶིསྶཏཱིཏི ཛཱནནྟོ ཨཛ྄ཛྷོཀཱསེ ཋཔེཏི, དུཀྐཊནྟི མཧཱཔཙྩརིཡཾ ཝུཏྟཾ. སཙེ པན ཏཏྲ ཏཏྲེཝ སམྨཛྫནཏྠཱཡ སམྨཛྫནཱི ནིཀྑིཏྟཱ ཧོཏི, ཏཾ ཏཾ ཋཱནཾ སམྨཛྫིཏྭཱ ཏཏྲ ཏཏྲེཝ ནིཀྑིཔིཏུཾ ཝཊྚཏི. ཨཱསནསཱལཾ སམྨཛྫནྟེན ཝཏྟཾ ཛཱནིཏབྦཾ. ཏཏྲིདཾ ཝཏྟཾ – མཛ྄ཛྷཏོ པཊྛཱཡ པཱདཊྛཱནཱབྷིམུཁཱ ཝཱལིཀཱ ཧརིཏབྦཱ. ཀཙཝརཾ ཧཏྠེཧི གཧེཏྭཱ བཧི ཚཌྜེཏབྦཾ.

༡༡༡. མསཱརཀོཏི ¶ མཉྩཔཱདེ ཝིཛ྄ཛྷིཏྭཱ ཏཏྠ ཨཊནིཡོ པཝེསེཏྭཱ ཀཏོ. བུནྡིཀཱབདྡྷོཏི ཨཊནཱིཧི མཉྩཔཱདེ ཌཾསཱཔེཏྭཱ པལླངྐསངྑེཔེན ཀཏོ. ཀུལཱི༹རཔཱདཀོཏི ¶ ཨསྶམེཎྜཀཱདཱིནཾ པཱདསདིསེཧི པཱདེཧི ཀཏོ. ཡོ ཝཱ པན ཀོཙི ཝངྐཔཱདཀོ, ཨཡཾ ཝུཙྩཏི ཀུལཱི༹རཔཱདཀོ. ཨཱཧཙྩཔཱདཀོཏི ཨཡཾ པན ‘‘ཨཱཧཙྩཔཱདཀོ ནཱམ མཉྩོ ཨངྒེ ཝིཛ྄ཛྷིཏྭཱ ཀཏོ ཧོཏཱི’’ཏི ཨེཝཾ པརཏོ པཱལི༹ཡཾཡེཝ ཝུཏྟོ, ཏསྨཱ ཨཊནིཡོ ཝིཛ྄ཛྷིཏྭཱ ཏཏྠ པཱདསིཁཾ པཝེསེཏྭཱ ཨུཔརི ཨཱཎིཾ དཏྭཱ ཀཏམཉྩོ ‘‘ཨཱཧཙྩཔཱདཀོ’’ཏི ཝེདིཏབྦོ. པཱིཋེཔི ཨེསེཝ ནཡོ. ཨནྟོ སཾཝེཋེཏྭཱ བདྡྷཾ ཧོཏཱིཏི ཧེཊྛཱ ཙ ཨུཔརི ཙ ཝིཏྠཏཾ མཛ྄ཛྷེ སངྑིཏྟཾ པཎཝསཎྛཱནཾ ཀཏྭཱ བདྡྷཾ ཧོཏི, ཏཾ ཀིར མཛ྄ཛྷེ སཱིཧབྱགྒྷཙམྨཔརིཀྑིཏྟམྤི ཀརོནྟི. ཨཀཔྤིཡཙམྨཾ ནཱམེཏྠ ནཏྠི. སེནཱསནཉྷི སོཝཎྞམཡམྤི ཝཊྚཏི, ཏསྨཱ ཏཾ མཧགྒྷཾ ཧོཏི. ཨནུཔསམྤནྣཾ སནྠརཱཔེཏི ཏསྶ པལིབོདྷོཏི ཡེན སནྠརཱཔིཏཾ, ཏསྶ པལིབོདྷོ. ལེཌྜུཔཱཏཾ ཨཏིཀྐམནྟསྶ ཨཱཔཏྟི པཱཙིཏྟིཡསྶཱཏི ཐཱམམཛ྄ཛྷིམསྶ པུརིསསྶ ལེཌྜུཔཱཏཾ ཨཏིཀྐམནྟསྶ པཱཙིཏྟིཡཾ.

ཨཡཾ པནེཏྠ ཝིནིཙྪཡོ – ཐེརོ བྷོཛནསཱལཱཡཾ བྷཏྟཀིཙྩཾ ཀཏྭཱ དཧརཾ ཨཱཎཱཔེཏི ‘‘གཙྪ དིཝཱཊྛཱནེ མཉྩཔཱིཋཾ པཉྙཔེཧཱི’’ཏི. སོ ཏཐཱ ཀཏྭཱ ནིསིནྣོ. ཐེརོ ཡཐཱརུཙིཾ ཝིཙརིཏྭཱ ཏཏྠ གནྟྭཱ ཐཝིཀཾ ཝཱ ཨུཏྟརཱསངྒཾ ཝཱ ཋཔེཏི, ཏཏོ པཊྛཱཡ ཐེརསྶ པལིབོདྷོ. ནིསཱིདིཏྭཱ སཡཾ ¶ གཙྪནྟོ ནེཝ ཨུདྡྷརཏི, ན ཨུདྡྷརཱཔེཏི, ལེཌྜུཔཱཏཱཏིཀྐམེ པཱཙིཏྟིཡཾ. སཙེ པན ཐེརོ ཏཏྠ ཐཝིཀཾ ཝཱ ཨུཏྟརཱསངྒཾ ཝཱ ཨཊྛཔེཏྭཱ ཙངྐམནྟོཝ དཧརཾ ‘‘གཙྪ ཏྭ’’ནྟི བྷཎཏི, ཏེན ‘‘ཨིདཾ བྷནྟེ མཉྩཔཱིཋ’’ནྟི ཨཱཙིཀྑིཏབྦཾ. སཙེ ཐེརོ ཝཏྟཾ ཛཱནཱཏི ‘‘ཏྭཾ གཙྪ, ཨཧཾ པཱཀཏིཀཾ ཀརིསྶཱམཱི’’ཏི ཝཏྟབྦཾ. སཙེ བཱལོ ཧོཏི ཨནུགྒཧིཏཝཏྟོ ‘‘གཙྪ, མཱ ཨིདྷ ཏིཊྛ, ནེཝ ནིསཱིདིཏུཾ ན ནིཔཛྫིཏུཾ དེམཱི’’ཏི དཧརཾ ཏཛྫེཏིཡེཝ. དཧརེན ‘‘བྷནྟེ སུཁཾ སཡཐཱ’’ཏི ཀཔྤཾ ལབྷིཏྭཱ ཝནྡིཏྭཱ གནྟབྦཾ. ཏསྨིཾ གཏེ ཐེརསྶེཝ པལིབོདྷོ. པུརིམནཡེནེཝ ཙསྶ ཨཱཔཏྟི ཝེདིཏབྦཱ.

ཨཐ པན ཨཱཎཏྟིཀྑཎེཡེཝ དཧརོ ‘‘མཡ྄ཧཾ བྷནྟེ བྷཎྜཀདྷོཝནཱདི ཀིཉྩི ཀརཎཱིཡཾ ཨཏྠཱི’’ཏི ཝདཏི, ཐེརོ ཙ ནཾ ‘‘ཏྭཾ པཉྙཔེཏྭཱ གཙྪཱཧཱི’’ཏི ཝཏྭཱ བྷོཛནསཱལཏོ ནིཀྑམིཏྭཱ ཨཉྙཏྠ གཙྪཏི, པཱདུདྡྷཱརེན ཀཱརེཏབྦོ. སཙེ ཏཏྠེཝ གནྟྭཱ ནིསཱིདཏི པུརིམནཡེནེཝ ཙསྶ ལེཌྜུཔཱཏཱཏིཀྐམེ ཨཱཔཏྟི. སཙེ པན ཐེརོ སཱམཎེརཾ ཨཱཎཱཔེཏི ¶ , སཱམཎེརེ ཏཏྠ མཉྩཔཱིཋཾ པཉྙཔེཏྭཱ ནིསིནྣེཔི བྷོཛནསཱལཏོ ཨཉྙཏྠ གཙྪནྟོ པཱདུདྡྷཱརེན ཀཱརེཏབྦོ. གནྟྭཱ ནིསིནྣོ པུན གམནཀཱལེ ལེཌྜུཔཱཏཱཏིཀྐམེ ཨཱཔཏྟིཡཱ ཀཱརེཏབྦོ. སཙེ པན ¶ ཨཱཎཱཔེནྟོ མཉྩཔཱིཋཾ པཉྙཔེཏྭཱ ཏཏྠེཝ ནིསཱིདཱཏི ཨཱཎཱཔེཏི, ཡཏྲིཙྪཏི ཏཏྲ གནྟྭཱ ཨཱགནྟུཾ ལབྷཏི. སཡཾ པན པཱཀཏིཀཾ ཨཀཏྭཱ གཙྪནྟསྶ ལེཌྜུཔཱཏཱཏིཀྐམེ པཱཙིཏྟིཡཾ. ཨནྟརསནྣིཔཱཏེ མཉྩཔཱིཋཱནི པཉྙཔེཏྭཱ ནིསིནྣེཧི གམནཀཱལེ ཨཱརཱམིཀཱནཾ ཨིམཾ པཊིསཱམེཐཱཏི ཝཏྟབྦཾ, ཨཝཏྭཱ གཙྪནྟཱནཾ ལེཌྜུཔཱཏཱཏིཀྐམེ ཨཱཔཏྟི.

མཧཱདྷམྨསཝནཾ ནཱམ ཧོཏི ཏཏྠ ཨུཔོསཐཱགཱརཏོཔི བྷོཛནསཱལཏོཔི ཨཱཧརིཏྭཱ མཉྩཔཱིཋཱནི པཉྙཔེནྟི. ཨཱཝཱསིཀཱནཾཡེཝ པལིབོདྷོ. སཙེ ཨཱགནྟུཀཱ ‘‘ཨིདཾ ཨམྷཱཀཾ ཨུཔཛ྄ཛྷཱཡསྶ ཨིདཾ ཨཱཙརིཡསྶཱ’’ཏི གཎྷནྟི, ཏཏོ པཊྛཱཡ ཏེསཾཡེཝ པལིབོདྷོ. གམནཀཱལེ པཱཀཏིཀཾ ཨཀཏྭཱ ལེཌྜུཔཱཏཾ ཨཏིཀྐམནྟཱནཾ ཨཱཔཏྟི. མཧཱཔཙྩརིཡཾ པུན ཝུཏྟཾ – ‘‘ཡཱཝ ཨཉྙེ ན ནིསཱིདནྟི, ཏཱཝ ཡེཧི པཉྙཏྟཾ, ཏེསཾ བྷཱརོ. ཨཉྙེསུ ཨཱགནྟྭཱ ནིསིནྣེསུ ནིསིནྣཀཱནཾ བྷཱརོ. སཙེ ཏེ ཨནུདྡྷརིཏྭཱ ཝཱ ཨནུདྡྷརཱཔེཏྭཱ ཝཱ གཙྪནྟི, དུཀྐཊཾ. ཀསྨཱ? ཨནཱཎཏྟིཡཱ པཉྙཔིཏཏྟཱ’’ཏི. དྷམྨཱསནེ པཉྙཏྟེ ཡཱཝ ཨུསྶཱརཀོ ཝཱ ¶ དྷམྨཀཐིཀོ ཝཱ ནཱགཙྪཏི, ཏཱཝ པཉྙཱཔཀཱནཾ པལིབོདྷོ, ཏསྨིཾ ཨཱགནྟྭཱ ནིསིནྣེ ཏསྶ པལིབོདྷོ. སཀལཾ ཨཧོརཏྟཾ དྷམྨསཝནཾ ཧོཏི, ཨཉྙོ ཨུསྶཱརཀོ ཝཱ དྷམྨཀཐིཀོ ཝཱ ཨུཊྛཧཏི, ཨཉྙོ ནིསཱིདཏི, ཡོ ཡོ ཨཱགནྟྭཱ ནིསཱིདཏི, ཏསྶ ཏསྶ བྷཱརོ. ཨུཊྛཧནྟེན པན ‘‘ཨིདམཱསནཾ ཏུམྷཱཀཾ བྷཱརོ’’ཏི ཝཏྭཱ གནྟབྦཾ. སཙེཔི ཨིཏརསྨིཾ ཨནཱགཏེཡེཝ པཋམཾ ནིསིནྣོ ཨུཊྛཱཡ གཙྪཏི, ཏསྨིཉྩ ཨནྟོཨུཔཙཱརཊྛེཡེཝ ཨིཏརོ ཨཱགནྟྭཱ ནིསཱིདཏི, ཨུཊྛཱཡ གཏོ ཨཱཔཏྟིཡཱ ན ཀཱརེཏབྦོ. སཙེ པན ཨིཏརསྨིཾ ཨནཱགཏེཡེཝ པཋམཾ ནིསིནྣོ ཨུཊྛཱཡཱསནཱ ལེཌྜུཔཱཏཾ ཨཏིཀྐམཏི, ཨཱཔཏྟིཡཱ ཀཱརེཏབྦོ. སབྦཏྠ ཙ ‘‘ལེཌྜུཔཱཏཱཏིཀྐམེ པཋམཔཱདེ དུཀྐཊཾ, དུཏིཡེ པཱཙིཏྟིཡ’’ནྟི ཨཡཾ ནཡོ མཧཱཔཙྩརིཡཾ ཝུཏྟོ.

༡༡༢. ཙིམིལིཀཾ ཝཱཏིཨཱདཱིསུ ཙིམིལིཀཱ ནཱམ སུདྷཱདིཔརིཀམྨཀཏཱཡ བྷཱུམིཡཱ ཝཎྞཱནུརཀྑཎཏྠཾ ཀཏཱ ཧོཏི ¶ , ཏཾ ཧེཊྛཱ པཏྠརིཏྭཱ ཨུཔརི ཀཊསཱརཀཾ པཏྠརནྟི. ཨུཏྟརཏྠརཎཾ ནཱམ མཉྩཔཱིཋཱནཾ ཨུཔརི ཨཏྠརིཏབྦཀཾ པཙྩཏྠརཎཾ. བྷཱུམཏྠརཎཾ ནཱམ བྷཱུམིཡཾ ཨཏྠརིཏབྦཱ ཀཊསཱརཀཱདིཝིཀཏི. ཏཊྚིཀཾ ནཱམ ཏཱལཔཎྞེཧི ཝཱ ཝཱཀེཧི ཝཱ ཀཏཏཊྚིཀཱ. ཙམྨཁཎྜོ ནཱམ སཱིཧབྱགྒྷདཱིཔིཏརཙྪཙམྨཱདཱིསུཔི ཡཾཀིཉྩི ཙམྨཾ. ཨཊྛཀཐཱསུ ཧི སེནཱསནཔརིབྷོགེ པཊིཀྑིཏྟཙམྨཾ ནཱམ ན དིསྶཏི, ཏསྨཱ སཱིཧཙམྨཱདཱིནཾ པརིཧརཎེཡེཝ པཊིཀྑེཔོ ཝེདིཏབྦོ. པཱདཔུཉྪནཱི ནཱམ རཛྫུཀེཧི ཝཱ པིལོཏིཀཱཧི ཝཱ པཱདཔུཉྪནཏྠཾ ཀཏཱ. ཕལཀཔཱིཋཾ ནཱམ ཕལཀམཡཾ པཱིཋཾ. ཨཐ ཝཱ ཕལཀཉྩེཝ དཱརུམཡཔཱིཋཉྩ; ཨེཏེན སབྦམྤི དཱརུབྷཎྜཱདི སངྒཧིཏཾ. མཧཱཔཙྩརིཡཾ པན ཝིཏྠཱརེནེཝ ཝུཏྟཾ – ‘‘ཨཱདྷཱརཀཾ པཏྟཔིདྷཱནཾ པཱདཀཐལིཀཾ ཏཱལཝཎྚཾ བཱིཛནཱིཔཏྟཀཾ ¶ ཡཾཀིཉྩི དཱརུབྷཎྜཾ ཨནྟམསོ པཱནཱིཡཨུལུ༹ངྐཾ པཱནཱིཡསངྑཾ ཨཛ྄ཛྷོཀཱསེ ནིཀྑིཔིཏྭཱ གཙྪནྟསྶ དུཀྐཊ’’ནྟི. མཧཱཨཊྛཀཐཱཡཾ པན ཨེས ནཡོ དུཏིཡསིཀྑཱཔདེ དསྶིཏོ. ཨཛ྄ཛྷོཀཱསེ རཛནཾ པཙིཏྭཱ རཛནབྷཱཛནཾ རཛནཨུལུ༹ངྐོ རཛནདོཎིཀཱཏི སབྦཾ ཨགྒིསཱལཱཡ པཊིསཱམེཏབྦཾ. སཙེ ཨགྒིསཱལཱ ནཏྠི, ཨནོཝསྶཀེ པབྦྷཱརེ ནིཀྑིཔིཏབྦཾ. ཏསྨིམྤི ཨསཏི ཡཏྠ ཨོལོཀེནྟཱ བྷིཀྑཱུ པསྶནྟི, ཏཱདིསེ ཋཱནེ ཋཔེཏྭཱཔི གནྟུཾ ཝཊྚཏི.

ཨཉྙསྶ ¶ པུགྒལིཀེཏི ཡསྨིཾ ཝིསྶཱསགྒཱཧོ ན རུཧཏི, ཏསྶ སནྟཀེ དུཀྐཊཾ. ཡསྨིཾ པན ཝིསྶཱསོ རུཧཏི, ཏསྶ སནྟཀཾ ཨཏྟནོ པུགྒལིཀམིཝ ཧོཏཱིཏི མཧཱཔཙྩརིཡཱདཱིསུ ཝུཏྟཾ.

༡༡༣. ཨཱཔུཙྪཾ གཙྪཏཱིཏི ཡོ བྷིཀྑུ ཝཱ སཱམཎེརོ ཝཱ ཨཱརཱམིཀོ ཝཱ ལཛྫཱི ཧོཏི, ཨཏྟནོ པལིབོདྷཾ ཝིཡ མཉྙཏི, ཡོ ཏཐཱརཱུཔཾ ཨཱཔུཙྪིཏྭཱ གཙྪཏི, ཏསྶ ཨནཱཔཏྟི. ཨོཏཱཔེནྟོ གཙྪཏཱིཏི ཨཱཏཔེ ཨོཏཱཔེནྟོ ཨཱགནྟྭཱ ཨུདྡྷརིསྶཱམཱིཏི གཙྪཏི; ཨེཝཾ གཙྪཏོ ཨནཱཔཏྟི. ཀེནཙི པལིབུདྡྷཾ ཧོཏཱིཏི སེནཱསནཾ ཀེནཙི ཨུཔདྡུཏཾ ཧོཏཱིཏི ཨཏྠོ. སཙེཔི ཧི ཝུཌྜྷཏརོ བྷིཀྑུ ཨུཊྛཱཔེཏྭཱ གཎྷཱཏི, སཙེཔི ཡཀྑོ ཝཱ པེཏོ ཝཱ ཨཱགནྟྭཱ ནིསཱིདཏི, ཀོཙི ཝཱ ཨིསྶརོ ཨཱགནྟྭཱ གཎྷཱཏི, སེནཱསནཾ པལིབུདྡྷཾ ཧོཏི, སཱིཧབྱགྒྷཱདཱིསུ ཝཱ པན ཏཾ པདེསཾ ཨཱགནྟྭཱ ¶ ཋིཏེསུཔི སེནཱསནཾ པལིབུདྡྷཾ ཧོཏིཡེཝ. ཨེཝཾ ཀེནཙི པལིབུདྡྷེ ཨནུདྡྷརིཏྭཱཔི གཙྪཏོ ཨནཱཔཏྟི. ཨཱཔདཱསཱུཏི ཛཱིཝིཏབྲཧྨཙརིཡནྟརཱཡེསུ. སེསཾ ཨུཏྟཱནམེཝཱཏི.

ཀཐིནསམུཊྛཱནཾ – ཀཱཡཝཱཙཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པཋམསེནཱསནསིཀྑཱཔདཾ ཙཏུཏྠཾ.

༥. དུཏིཡསེནཱསནསིཀྑཱཔདཝཎྞནཱ

༡༡༦. དུཏིཡསེནཱསནསིཀྑཱཔདེ – བྷིསཱིཏི མཉྩཀབྷིསི ཝཱ པཱིཋཀབྷིསི ཝཱ. ཙིམིལིཀཱདཱིནིཔི པུརིམསིཀྑཱཔདེ ཝུཏྟཔྤཀཱརཱནིཡེཝ. ནིསཱིདནནྟི སདསཾ ཝེདིཏབྦཾ. པཙྩཏྠརཎནྟི པཱཝཱརོ ཀོཛཝོཏི ཨེཏྟཀམེཝ ཝུཏྟཾ. ཏིཎསནྠཱརོཏི ཡེསཾ ཀེསཉྩི ཏིཎཱནཾ སནྠཱརོ ¶ . ཨེས ནཡོ པཎྞསནྠཱརེ. པརིཀྑེཔཾ ཨཏིཀྐམནྟསྶཱཏི ཨེཏྠ པཋམཔཱདཾ ཨཏིཀྐཱམེནྟསྶ དུཀྐཊཾ, དུཏིཡཱཏིཀྐམེ པཱཙིཏྟིཡཾ. ཨཔརིཀྑིཏྟསྶ ཨུཔཙཱརོ ནཱམ སེནཱསནཏོ དྭེ ལེཌྜུཔཱཏཱ.

ཨནཱཔུཙྪཾ ¶ ཝཱ གཙྪེཡྻཱཏི ཨེཏྠ བྷིཀྑུམྷི སཏི བྷིཀྑུ ཨཱཔུཙྪིཏབྦོ. ཏསྨིཾ ཨསཏི སཱམཎེརོ, ཏསྨིཾ ཨསཏི ཨཱརཱམིཀོ, ཏསྨིམྤི ཨསཏི ཡེན ཝིཧཱརོ ཀཱརིཏོ སོ ཝིཧཱརསཱམིཀོ, ཏསྶ ཝཱ ཀུལེ ཡོ ཀོཙི ཨཱཔུཙྪིཏབྦོ. ཏསྨིམྤི ཨསཏི ཙཏཱུསུ པཱསཱཎེསུ མཉྩཾ ཋཔེཏྭཱ མཉྩེ ཨཝསེསམཉྩཔཱིཋཱནི ཨཱརོཔེཏྭཱ ཨུཔརི བྷིསིཨཱདིཀཾ དསཝིདྷམྤི སེཡྻཾ རཱསིཾ ཀརིཏྭཱ དཱརུབྷཎྜཾ མཏྟིཀཱབྷཎྜཾ པཊིསཱམེཏྭཱ དྭཱརཝཱཏཔཱནཱནི པིདཧིཏྭཱ གམིཡཝཏྟཾ པཱུརེཏྭཱ གནྟབྦཾ. སཙེ པན སེནཱསནཾ ཨོཝསྶཏི, ཚདནཏྠཉྩ ཏིཎཾ ཝཱ ཨིཊྛཀཱ ཝཱ ཨཱནཱིཏཱ ཧོནྟི, སཙེ ཨུསྶཧཏི, ཚཱདེཏབྦཾ. ནོ ཙེ སཀྐོཏི, ཡོ ཨོཀཱསོ ཨནོཝསྶཀོ, ཏཏྠ མཉྩཔཱིཋཱདཱིནི ནིཀྑིཔིཏྭཱ གནྟབྦཾ. སཙེ སབྦམྤི ཨོཝསྶཏི, ཨུསྶཧནྟེན ཨནྟོགཱམེ ཨུཔཱསཀཱནཾ གྷརེ ཋཔེཏབྦཾ. སཙེ ཏེཔི ‘‘སངྒྷིཀཾ ནཱམ བྷནྟེ བྷཱརིཡཾ, ཨགྒིདཱཧཱདཱིནཾ བྷཱཡཱམཱ’’ཏི ན སམྤཊིཙྪནྟི, ཨཛ྄ཛྷོཀཱསེཔི པཱསཱཎཱནཾ ཨུཔརི མཉྩཾ ཋཔེཏྭཱ སེསཾ པུབྦེ ཝུཏྟནཡེནེཝ ནིཀྑིཔིཏྭཱ ཏིཎེཧི ཙ པཎྞེཧི ཙ པཊིཙྪཱདེཏྭཱ གནྟུཾ ཝཊྚཏི. ཡཉྷི ཏཏྠ ཨངྒམཏྟམྤི ཨཝསིསྶཏི, ཏཾ ཨཉྙེསཾ ཏཏྠ ཨཱགཏཱནཾ བྷིཀྑཱུནཾ ཨུཔཀཱརཾ བྷཝིསྶཏཱིཏི ¶ .

༡༡༧. ཝིཧཱརསྶ ཨུཔཙཱརེཏིཨཱདཱིསུ ཝིཧཱརསྶཱུཔཙཱརོ ནཱམ པརིཝེཎཾ. ཨུཔཊྛཱནསཱལཱཏི པརིཝེཎབྷོཛནསཱལཱ. མཎྜཔོཏི པརིཝེཎམཎྜཔོ. རུཀྑམཱུལནྟི པརིཝེཎརུཀྑམཱུལཾ. ཨཡཾ ཏཱཝ ནཡོ ཀུརུནྡཊྛཀཐཱཡཾ ཝུཏྟོ. ཀིཉྩཱཔི ཝུཏྟོ, ཨཐ ཁོ ཝིཧཱརོཏི ཨནྟོགབྦྷོ ཝཱ ཨཉྙཾ ཝཱ སབྦཔརིཙྪནྣཾ གུཏྟསེནཱསནཾ ཝེདིཏབྦཾ. ཝིཧཱརསྶ ཨུཔཙཱརེཏི ཏསྶ བཧི ཨཱསནྣེ ཨོཀཱསེ. ཨུཔཊྛཱནསཱལཱཡཾ ཝཱཏི བྷོཛནསཱལཱཡཾ ཝཱ. མཎྜཔེ ཝཱཏི ཨཔརིཙྪནྣེ པརིཙྪནྣེ ཝཱཔི བཧཱུནཾ སནྣིཔཱཏམཎྜཔེ. རུཀྑམཱུལེ ཝཏྟབྦཾ ནཏྠི. ཨཱཔཏྟི དུཀྐཊསྶཱཏི ཝུཏྟཔྤཀཱརཉྷི དསཝིདྷཾ སེཡྻཾ ཨནྟོགབྦྷཱདིམྷི གུཏྟཊྛཱནེ པཉྙཔེཏྭཱ གཙྪནྟསྶ ཡསྨཱ སེཡྻཱཔི སེནཱསནམྤི ཨུཔཙིཀཱཧི པལུཛྫཏི, ཝམྨིཀརཱསིཡེཝ ཧོཏི, ཏསྨཱ པཱཙིཏྟིཡཾ ཝུཏྟཾ. བཧི པན ཨུཔཊྛཱནསཱལཱདཱིསུ པཉྙཔེཏྭཱ གཙྪནྟསྶ སེཡྻཱམཏྟམེཝ ནསྶེཡྻ, ཋཱནསྶ ཨགུཏྟཏཱཡ ¶ ན སེནཱསནཾ, ཏསྨཱ ཨེཏྠ དུཀྐཊཾ ཝུཏྟཾ. མཉྩཾ ཝཱ པཱིཋཾ ཝཱཏི ཨེཏྠ ཡསྨཱ ན སཀྐཱ མཉྩཔཱིཋཾ སཧསཱ ཨུཔཙིཀཱཧི ཁཱཡིཏུཾ, ཏསྨཱ ཏཾ ཝིཧཱརེཔི སནྠརིཏྭཱ གཙྪནྟསྶ དུཀྐཊཾ ཝུཏྟཾ. ཝིཧཱརཱུཔཙཱརེ པན ཏཾ ཝིཧཱརཙཱརིཀཾ ཨཱཧིཎྜནྟཱཔི དིསྭཱ པཊིསཱམེསྶནྟི.

༡༡༨. ཨུདྡྷརིཏྭཱ ¶ གཙྪཏཱིཏི ཨེཏྠ ཨུདྡྷརིཏྭཱ གཙྪནྟེན མཉྩཔཱིཋཀཝཱཊཾ སབྦཾ ཨཔནེཏྭཱ སཾཧརིཏྭཱ ཙཱིཝརཝཾསེ ལགྒེཏྭཱ གནྟབྦཾ. པཙྪཱ ཨཱགནྟྭཱ ཝསནཀབྷིཀྑུནཱཔི པུན མཉྩཔཱིཋཾ ཝཱ པཉྙཔེཏྭཱ སཡིཏྭཱ གཙྪནྟེན ཏཐེཝ ཀཱཏབྦཾ. ཨནྟོཀུཊྚཏོ སེཡྻཾ བཧིཀུཊྚེ པཉྙཔེཏྭཱ ཝསནྟེན གམནཀཱལེ གཧིཏཊྛཱནེཡེཝ པཊིསཱམེཏབྦཾ. ཨུཔརིཔཱསཱདཏོ ཨོརོཔེཏྭཱ ཧེཊྛཱཔཱསཱདེ ཝསནྟསྶཔི ཨེསེཝ ནཡོ. རཏྟིཊྛཱནདིཝཱཊྛཱནེསུ མཉྩཔཱིཋཾ པཉྙཔེཏྭཱཔི གམནཀཱལེ པུན གཧིཏཊྛཱནེཡེཝ ཋཔེཏབྦཾ.

ཨཱཔུཙྪཾ གཙྪཏཱིཏི ཨེཏྠཱཡཾ ཨཱཔུཙྪིཏབྦཱནཱཔུཙྪིཏབྦཝིནིཙྪཡོ – ཡཱ ཏཱཝ བྷཱུམིཡཾ དཱིགྷསཱལཱ ཝཱ པཎྞསཱལཱ ¶ ཝཱ ཧོཏི, ཡཾ ཝཱ རུཀྑཏྠམྦྷེསུ, ཀཏགེཧཾ ཨུཔཙིཀཱནཾ ཨུཊྛཱནཊྛཱནཾ ཧོཏི, ཏཏོ པཀྐམནྟེན ཏཱཝ ཨཱཔུཙྪིཏྭཱཝ པཀྐམིཏབྦཾ. ཏསྨིཉྷི ཀཏིཔཡཱནི དིཝསཱནི ཨཛགྒིཡམཱནེ ཝམྨིཀཱཝ སནྟིཊྛནྟི. ཡཾ པན པཱསཱཎཔིཊྛིཡཾ ཝཱ པཱསཱཎཏྠམྦྷེསུ ཝཱ ཀཏསེནཱསནཾ སིལུཙྩཡལེཎཾ ཝཱ སུདྷཱལིཏྟསེནཱསནཾ ཝཱ ཡཏྠ ཨུཔཙིཀཱསངྐཱ ནཏྠི, ཏཏོ པཀྐམནྟསྶ ཨཱཔུཙྪིཏྭཱཔི ཨནཱཔུཙྪིཏྭཱཔི གནྟུཾ ཝཊྚཏི, ཨཱཔུཙྪནཾ པན ཝཏྟཾ. སཙེ ཏཱདིསེཔི སེནཱསནེ ཨེཀེན པསྶེན ཨུཔཙིཀཱ ཨཱརོཧནྟི, ཨཱཔུཙྪིཏྭཱཝ གནྟབྦཾ. ཡོ པན ཨཱགནྟུཀོ བྷིཀྑུ སངྒྷིཀཾ སེནཱསནཾ གཧེཏྭཱ ཝསནྟཾ བྷིཀྑུཾ ཨནུཝཏྟནྟོ ཨཏྟནོ སེནཱསནཾ ཨགྒཧེཏྭཱ ཝསཏི, ཡཱཝ སོ ན གཎྷཱཏི, ཏཱཝ ཏཾ སེནཱསནཾ པུརིམབྷིཀྑུསྶེཝ པལིབོདྷོ. ཡདཱ པན སོ སེནཱསནཾ གཧེཏྭཱ ཨཏྟནོ ཨིསྶརིཡེན ཝསཏི, ཏཏོ པཊྛཱཡ ཨཱགནྟུཀསྶེཝ པལིབོདྷོ. སཙེ ཨུབྷོཔི ཝིབྷཛིཏྭཱ གཎྷནྟི, ཨུབྷིནྣམྤི པལིབོདྷོ. མཧཱཔཙྩརིཡཾ པན ཝུཏྟཾ – ‘‘སཙེ དྭེ ཏཡོ ཨེཀཏོ ཧུཏྭཱ པཉྙཔེནྟི, གམནཀཱལེ སབྦེཧིཔི ཨཱཔུཙྪིཏབྦཾ. ཏེསུ ཙེ པཋམཾ གཙྪནྟོ ‘པཙྪིམོ ཛགྒིསྶཏཱི’ཏི ཨཱབྷོགཾ ཀཏྭཱ གཙྪཏི ཝཊྚཏི. པཙྪིམསྶ ཨཱབྷོགེན མུཏྟི ནཏྠི. བཧཱུ ཨེཀཾ པེསེཏྭཱ སནྠརཱཔེནྟི, གམནཀཱལེ སབྦེཧི ཝཱ ཨཱཔུཙྪིཏབྦཾ ¶ , ཨེཀཾ ཝཱ པེསེཏྭཱ ཨཱཔུཙྪིཏབྦཾ. ཨཉྙཏོ མཉྩཔཱིཋཱདཱིནི ཨཱནེཏྭཱ ཨཉྙཏྲ ཝསིཏྭཱཔི གམནཀཱལེ ཏཏྠེཝ ནེཏབྦཱནི. སཙེ ཨཉྙཱཝཱསཏོ ཨཱནེཏྭཱ ཝསམཱནསྶ ཨཉྙོ ཝུཌྜྷཏརོ ཨཱགཙྪཏི, ན པཊིབཱཧིཏབྦོ, ‘མཡཱ བྷནྟེ ཨཉྙཱཝཱསཏོ ཨཱནཱིཏཾ, པཱཀཏིཀཾ ཀརེཡྻཱཐཱ’ཏི ཝཏྟབྦཾ. ཏེན ‘ཨེཝཾ ཀརིསྶཱམཱི’ཏི སམྤཊིཙྪིཏེ ཨིཏརསྶ གནྟུཾ ཝཊྚཏི. ཨེཝམཉྙཏྠ ཧརིཏྭཱཔི སངྒྷིཀཔརིབྷོགེན པརིབྷུཉྫནྟསྶ ནཊྛཾ ཝཱ ཛིཎྞཾ ཝཱ ཙོརེཧི ཝཱ ཧཊཾ གཱིཝཱ ན ཧོཏི, པུགྒལིཀཔརིབྷོགེན པརིབྷུཉྫནྟསྶ པན གཱིཝཱ ཧོཏི. ཨཉྙསྶ མཉྩཔཱིཋཾ པན སངྒྷིཀཔརིབྷོགེན ཝཱ པུགྒལིཀཔརིབྷོགེན ཝཱ པརིབྷུཉྫནྟསྶ ནཊྛཾ གཱིཝཱཡེཝ’’.

ཀེནཙི པལིབུདྡྷཾ ཧོཏཱིཏི ཝུཌྜྷཏརབྷིཀྑཱུཨིསྶརིཡཡཀྑསཱིཧཝཱལ༹མིགཀཎྷསཔྤཱདཱིསུ ཡེན ཀེནཙི ¶ སེནཱསནཾ པལིབུདྡྷཾ ཧོཏི. སཱཔེཀྑོ གནྟྭཱ ཏཏྠ ཋིཏོ ཨཱཔུཙྪཏི, ཀེནཙི པལིབུདྡྷོ ཧོཏཱིཏི ཨཛྫེཝ ཨཱགནྟྭཱ པཊིཛགྒིསྶཱམཱིཏི ཨེཝཾ སཱཔེཀྑོ ¶ ནདཱིཔཱརཾ ཝཱ གཱམནྟརཾ ཝཱ གནྟྭཱ ཡཏྠསྶ གམནཙིཏྟཾ ཨུཔྤནྣཾ, ཏཏྠེཝ ཋིཏོ ཀཉྩི པེསེཏྭཱ ཨཱཔུཙྪཏི, ནདཱིཔཱུརརཱཛཙོརཱདཱིསུ ཝཱ ཀེནཙི པལིབུདྡྷོ ཧོཏི ཨུཔདྡུཏོ, ན སཀྐོཏི པཙྩཱགནྟུཾ, ཨེཝཾབྷཱུཏསྶཔི ཨནཱཔཏྟི. སེསཾ པཋམསིཀྑཱཔདེ ཝུཏྟནཡམེཝ སདྡྷིཾ སམུཊྛཱནཱདཱིཧཱིཏི.

དུཏིཡསེནཱསནསིཀྑཱཔདཾ པཉྩམཾ.

༦. ཨནུཔཁཛྫསིཀྑཱཔདཝཎྞནཱ

༡༡༩. ཚཊྛསིཀྑཱཔདེ – པལིབུནྡྷེནྟཱིཏི པཋམཏརཾ གནྟྭཱ པཏྟཙཱིཝརཾ ཨཏིཧརིཏྭཱ རུམྦྷིཏྭཱ ཏིཊྛནྟི. ཐེརཱ བྷིཀྑཱུ ཝུཊྛཱཔེནྟཱིཏི ‘‘ཨམྷཱཀཾ ཨཱཝུསོ པཱཔུཎཱཏཱི’’ཏི ཝསྶགྒེན གཧེཏྭཱ ཝུཊྛཱཔེནྟི. ཨནུཔཁཛྫ སེཡྻཾ ཀཔྤེནྟཱིཏི ‘‘ཏུམྷཱཀཾ བྷནྟེ མཉྩཊྛཱནཾཡེཝ པཱཔུཎཱཏི, ན སབྦོ ཝིཧཱརོ. ཨམྷཱཀཾ དཱནི ཨིདཾ ཋཱནཾ པཱཔུཎཱཏཱི’’ཏི ཨནུཔཝིསིཏྭཱ མཉྩཔཱིཋཾ པཉྙཔེཏྭཱ ནིསཱིདནྟིཔི ནིཔཛྫནྟིཔི སཛ྄ཛྷཱཡམྤི ཀརོནྟི.

༡༢༠. ཛཱནནྟི ‘‘ཨནུཊྛཱཔནཱིཡོ ཨཡ’’ནྟི ཛཱནནྟོ; ཏེནེཝསྶ ཝིབྷངྒེ ‘‘ཝུཌྜྷོཏི ཛཱནཱཏཱི’’ཏིཨཱདི ཝུཏྟཾ. ཝུཌྜྷོ ཧི ཨཏྟནོ ཝུཌྜྷཏཱཡ ཨནུཊྛཱཔནཱིཡོ ¶ , གིལཱནོ གིལཱནཏཱཡ, སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརཱདཱིནཾ ཝཱ གཎཝཱཙཀཨཱཙརིཡསྶ ཝཱ བཧཱུཔཀཱརཏཾ གུཎཝིསིཊྛཏཉྩ སལླཀྑེནྟོ དྷུཝཝཱསཏྠཱཡ ཝིཧཱརཾ སམྨནྣིཏྭཱ དེཏི, ཏསྨཱ ཡསྶ སངྒྷེན དིནྣོ, སོཔི ཨནུཊྛཱཔནཱིཡོ. ཀཱམཉྩེཏྠ གིལཱནསྶཱཔི སངྒྷོཡེཝ ཨནུཙྪཝིཀཾ སེནཱསནཾ དེཏི, གིལཱནོ པན ‘‘ཨཔལོཀེཏྭཱ སངྒྷེན ཨདིནྣསེནཱསནོཔི ན པཱིལེ༹ཏབྦོ ཨནུཀམྤིཏབྦོ’’ཏི དསྶེཏུཾ ཝིསུཾ ཝུཏྟོ.

༡༢༡. ཨུཔཙཱརེཏི ཨེཏྠ མཉྩཔཱིཋཱནཾ ཏཱཝ མཧལླཀེ ཝིཧཱརེ སམནྟཱ དིཡཌྜྷོ ཧཏྠོ ཨུཔཙཱརོ, ཁུདྡཀེ ཡཏོ པཧོཏི ཏཏོ དིཡཌྜྷོ ཧཏྠོ, པཱདེ དྷོཝིཏྭཱ པཝིསནྟསྶ པསྶཱཝཏྠཱཡ ནིཀྑམནྟསྶ ཙ ཡཱཝ དྭཱརེ ནིཀྑིཏྟཔཱདདྷོཝནཔཱསཱཎཏོ པསྶཱཝཊྛཱནཏོ ཙ མཉྩཔཱིཋཾ, ཏཱཝ དིཡཌྜྷཧཏྠཝིཏྠཱརོ མགྒོ ཨུཔཙཱརོ ནཱམ. ཏསྨིཾ མཉྩསྶ ཝཱ པཱིཋསྶ ཝཱ ཨུཔཙཱརེ ཋིཏསྶ ཝཱ བྷིཀྑུནོ པཝིསནྟསྶ ཝཱ ནིཀྑམནྟསྶ ཝཱ ཨུཔཙཱརེ ཡོ ཨནུཔཁཛྫ སེཡྻཾ ཀཔྤེཏུཀཱམོ སེཡྻཾ སནྠརཏི ཝཱ སནྠརཱཔེཏི ཝཱ, ཨཱཔཏྟི དུཀྐཊསྶ.

ཨབྷིནིསཱིདཏི ¶ ¶ ཝཱ ཨབྷིནིཔཛྫཏི ཝཱཏི ཨེཏྠ ཨབྷིནིསཱིདནམཏྟེན ཨབྷིནིཔཛྫནམཏྟེནེཝ ཝཱ པཱཙིཏྟིཡཾ. སཙེ པན དྭེཔི ཀརོཏི, དྭེ པཱཙིཏྟིཡཱནི. ཨུཊྛཱཡུཊྛཱཡ ནིསཱིདཏོ ཝཱ ནིཔཛྫཏོ ཝཱ པཡོགེ པཡོགེ པཱཙིཏྟིཡཾ.

༡༢༢. ཨུཔཙཱརཾ ཋཔེཏྭཱ སེཡྻཾ སནྠརཏི ཝཱ སནྠརཱཔེཏི ཝཱཏི ཨིམསྨིཾ ཨིཏོ པརེ ཙ ‘‘ཝིཧཱརསྶ ཨུཔཙཱརེ’’ཏིཨཱདིཀེ དུཀྐཊཝཱརེཔི ཡཐཱ ཨིདྷ ཨབྷིནིསཱིདནམཏྟེ ཨབྷིནིཔཛྫནམཏྟེ ཨུབྷཡཀརཎེ པཡོགབྷེདེ ཙ པཱཙིཏྟིཡཔྤབྷེདོ ཝུཏྟོ, ཨེཝཾ དུཀྐཊཔྤབྷེདོ ཝེདིཏབྦོ. ཨེཝརཱུཔེན ཧི ཝིསབྷཱགཔུགྒལེན ཨེཀཝིཧཱརེ ཝཱ ཨེཀཔརིཝེཎེ ཝཱ ཝསནྟེན ཨཏྠོ ནཏྠི, ཏསྨཱ སབྦཏྠེཝསྶ ནིཝཱསོ ཝཱརིཏོ. ཨཉྙསྶ པུགྒལིཀེཏི ཨིདྷཱཔི ཝིསྶཱསིཀསྶ པུགྒལིཀཾ ཨཏྟནོ པུགྒལིཀསདིསམེཝ, ཏཏྠ ཨནཱཔཏྟི.

༡༢༣. ཨཱཔདཱསཱུཏི ¶ སཙེ བཧི ཝསནྟསྶ ཛཱིཝིཏབྲཧྨཙརིཡནྟརཱཡོ ཧོཏི, ཨེཝརཱུཔཱསུ ཨཱཔདཱསུ ཡོ པཝིསཏི, ཏསྶཱཔི ཨནཱཔཏྟི. སེསཾ ཨུཏྟཱནམེཝཱཏི. པཋམཔཱརཱཛིཀསམུཊྛཱནཾ, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, དུཀྑཝེདནནྟི.

ཨནུཔཁཛྫསིཀྑཱཔདཾ ཚཊྛཾ.

༧. ནིཀྐཌྜྷནསིཀྑཱཔདཝཎྞནཱ

༡༢༦. སཏྟམསིཀྑཱཔདེ – ཨེཀེན པཡོགེན བཧུཀེཔི དྭཱརེ ཨཏིཀྐཱམེཏཱིཏི ཡེ ཙཏུབྷཱུམཀཔཉྩབྷཱུམཀཱ པཱསཱདཱ ཚསཏྟཀོཊྛཀཱནི ཝཱ ཙཏུསྶཱལཱནི, ཏཱདིསེསུ སེནཱསནེསུ ཧཏྠེསུ ཝཱ གཱིཝཱཡ ཝཱ གཧེཏྭཱ ཨནྟརཱ ཨཊྛཔེནྟོ ཨེཀེན པཡོགེན ཨཏིཀྐཱམེཏི, ཨེཀམེཝ པཱཙིཏྟིཡཾ. ཋཔེཏྭཱ ཋཔེཏྭཱ ནཱནཱཔཡོགེཧི ཨཏིཀྐཱམེནྟསྶ དྭཱརགཎནཱཡ པཱཙིཏྟིཡཱནི. ཧཏྠེན ཨནཱམསིཏྭཱ ‘‘ནིཀྑམཱ’’ཏི ཝཏྭཱ ཝཱཙཱཡ ནིཀྐཌྜྷནྟསྶཱཔི ཨེསེཝ ནཡོ.

ཨཉྙཾ ཨཱཎཱཔེཏཱིཏི ཨེཏྠ ‘‘ཨིམཾ ནིཀྐཌྜྷཱ’’ཏི ཨཱཎཏྟིམཏྟེ དུཀྐཊཾ. སཙེ སོ སཀིཾ ཨཱཎཏྟོ བཧུཀེཔི དྭཱརེ ཨཏིཀྐཱམེཏི, ཨེཀཾ པཱཙིཏྟིཡཾ. སཙེ པན ‘‘ཨེཏྟཀཱནི དྭཱརཱནི ནིཀྐཌྜྷཱཧཱི’’ཏི ཝཱ ‘‘ཡཱཝ མཧཱདྭཱརཾ ཏཱཝ ནིཀྐཌྜྷཱཧཱི’’ཏི ཝཱ ཨེཝཾ ནིཡཱམེཏྭཱ ཨཱཎཏྟོ ཧོཏི, དྭཱརགཎནཱཡ པཱཙིཏྟིཡཱནི.

ཏསྶ ¶ པརིཀྑཱརནྟི ཡཾཀིཉྩི ཏསྶ སནྟཀཾ པཏྟཙཱིཝརཔརིསྶཱཝནདྷམཀརཎམཉྩཔཱིཋབྷིསིབིམྦོཧནཱདིབྷེདཾ, ཨནྟམསོ རཛནཚལླིམྤི; ཡོ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ; ཏསྶ ཝཏྠུགཎནཱཡ དུཀྐཊཱནི ¶ . གཱལ༹ྷཾ བནྡྷིཏྭཱ ཋཔིཏེསུ པན ཨེཀཱཝ ཨཱཔཏྟཱིཏི མཧཱཔཙྩརིཡཾ ཝུཏྟཾ.

༡༢༧. ཨཉྙསྶ པུགྒལིཀེཏི ཨིདྷཱཔི ཝིསྶཱསིཀཔུགྒལིཀཾ ཨཏྟནོ པུགྒལིཀསདིསམེཝ. ཡཐཱ ཙ ཨིདྷ; ཨེཝཾ སབྦཏྠ. ཡཏྲ པན ཝིསེསོ བྷཝིསྶཏི, ཏཏྲ ཝཀྑཱམ.

༡༢༨. ཨལཛྫིཾ ནིཀྐཌྜྷཏི ཝཱཏིཨཱདཱིསུ བྷཎྜནཀཱརཀཀལཧཀཱརཀམེཝ སཀལསངྒྷཱརཱམཏོ ནིཀྐཌྜྷིཏུཾ ལབྷཏི, སོ ཧི པཀྑཾ ལབྷིཏྭཱ སངྒྷམྤི ¶ བྷིནྡེཡྻ. ཨལཛྫཱིཨཱདཡོ པན ཨཏྟནོ ཝསནཊྛཱནཏོཡེཝ ནིཀྐཌྜྷིཏབྦཱ, སཀལསངྒྷཱརཱམཏོ ནིཀྐཌྜྷིཏུཾ ན ཝཊྚཏི. ཨུམྨཏྟཀསྶཱཏི སཡཾ ཨུམྨཏྟཀསྶ ཨནཱཔཏྟི. སེསཾ ཨུཏྟཱནམེཝཱཏི.

ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ནིཀྐཌྜྷནསིཀྑཱཔདཾ སཏྟམཾ.

༨. ཝེཧཱསཀུཊིསིཀྑཱཔདཝཎྞནཱ

༡༢༩. ཨཊྛམསིཀྑཱཔདེ – ཨུཔརིཝེཧཱསཀུཊིཡཱཏི ཨུཔརི ཨཙྪནྣཏལཱཡ དྭིབྷཱུམིཀཀུཊིཡཱ ཝཱ ཏིབྷཱུམིཀཱདིཀུཊིཡཱ ཝཱ. མཉྩཾ སཧསཱ ཨབྷིནིསཱིདཱིཏི མཉྩཾ སཧསཱ ཨབྷིབྷཝིཏྭཱ ཨཛ྄ཛྷོཏྠརིཏྭཱ ནིསཱིདི. བྷུམྨཏྠེ ཝཱ ཨེཏཾ ཨུཔཡོགཝཙནཾ; མཉྩེ ནིསཱིདཱིཏི ཨཏྠོ. ཨབྷཱིཏི ཨིདཾ པན པདསོབྷནཏྠཾ ཨུཔསགྒམཏྟམེཝ. ནིཔྤཏིཏྭཱཏི ནིཔཏིཏྭཱ ནིཀྑམིཏྭཱ ཝཱ. ཏསྶ ཧི ཨུཔརི ཨཱཎཱིཔི ན དིནྣཱ, ཏསྨཱ ནིཀྑནྟོ. ཝིསྶརམཀཱསཱིཏི ཝིརཱུཔཾ ཨཱཏུརསྶརམཀཱསི.

༡༣༡. ཝེཧཱསཀུཊི ནཱམ མཛ྄ཛྷིམསྶ པུརིསསྶ ཨསཱིསགྷཊྚཱཏི ཡཱ པམཱཎམཛ྄ཛྷིམསྶ པུརིསསྶ སབྦཧེཊྛིམཱཧི ཏུལཱཧི སཱིསཾ ན གྷཊྚེཏི, ཨེཏེན ཨིདྷ ཨདྷིཔྤེཏཱ ཝེཧཱསཀུཊི དསྶིཏཱ ཧོཏི, ན ཝེཧཱསཀུཊིལཀྑཎཾ. ཡཱ ཧི ཀཱཙི ཨུཔརི ཨཙྪིནྣཏལཱ དྭིབྷཱུམིཀཱ ཀུཊི ཏིབྷཱུམིཀཱདིཀུཊི ¶ ཝཱ ‘‘ཝེཧཱསཀུཊཱི’’ཏི ཝུཙྩཏི. ཨིདྷ པན ཨསཱིསགྷཊྚཱ ཨདྷིཔྤེཏཱ. ཨབྷིནིསཱིདནཱདཱིསུ པུབྦེ ཝུཏྟནཡེནེཝ པཡོགཝསེན ཨཱཔཏྟིབྷེདོ ཝེདིཏབྦོ.

༡༣༣. ཨཝེཧཱསཀུཊིཡཱཏི བྷཱུམིཡཾ ཀཏཔཎྞསཱལཱདཱིསུ ཨནཱཔཏྟི. ན ཧི སཀྐཱ ¶ ཏཏྠ པརསྶ པཱིལཱ༹ ཀཱཏུཾ. སཱིསགྷཊྚཱཡཱཏི ཡཱཡཾ སཱིསགྷཊྚཱ ཧོཏི, ཏཏྠཱཔི ཨནཱཔཏྟི. ན ཧི སཀྐཱ ཏཏྠ ཧེཊྛཱཔཱསཱདེ ཨནོཎཏེན ཝིཙརིཏུཾ, ཏསྨཱ ཨསཉྩརཎཊྛཱནཏྟཱ པརཔཱིལཱ༹ ན བྷཝིསྶཏི ¶ . ཧེཊྛཱ ཨཔརིབྷོགཾ ཧོཏཱིཏི ཡསྶཱ ཧེཊྛཱ དབྦསམྦྷཱརཱདཱིནཾ ནིཀྑིཏྟཏྟཱ ཨཔརིབྷོགཾ ཧོཏི, ཏཏྠཱཔི ཨནཱཔཏྟི. པདརསཉྩིཏཾ ཧོཏཱིཏི ཡསྶཱ ཨུཔརིམཏལཾ དཱརུཕལཀེཧི ཝཱ གྷནསནྠཏཾ ཧོཏི, སུདྷཱདིཔརིཀམྨཀཏཾ ཝཱ ཏཏྠཱཔི ཨནཱཔཏྟི. པཊཱཎི དིནྣཱ ཧོཏཱིཏི མཉྩཔཱིཋཱནཾ པཱདསིཁཱསུ ཨཱཎཱི དིནྣཱ ཧོཏི, ཡཏྠ ནིསཱིདནྟེཔི ན ནིཔྤཏནྟི, ཏཱདིསེ མཉྩཔཱིཋེ ནིསཱིདཏོཔི ཨནཱཔཏྟི. ཏསྨིཾ ཋིཏོཏི ཨཱཧཙྩཔཱདཀེ མཉྩེ ཝཱ པཱིཋེ ཝཱ ཋིཏོ ཨུཔརི ནཱགདནྟཀཱདཱིསུ ལགྒིཏཀཾ ཙཱིཝརཾ ཝཱ ཀིཉྩི ཝཱ གཎྷཱཏི ཝཱ, ཨཉྙཾ ཝཱ ལགྒེཏི, ཏསྶཱཔི ཨནཱཔཏྟི. སེསཾ ཨུཏྟཱནམེཝ. ཨེལ༹ཀལོམསམུཊྛཱནཾ – ཀཱཡཏོ ཙ ཀཱཡཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

ཝེཧཱསཀུཊིསིཀྑཱཔདཾ ཨཊྛམཾ.

༩. མཧལླཀཝིཧཱརསིཀྑཱཔདཝཎྞནཱ

༡༣༥. ནཝམསིཀྑཱཔདེ – ཡཱཝ དྭཱརཀོསཱཏི ཨེཏྠ དྭཱརཀོསོ ནཱམ པིཊྛསངྒྷཱཊསྶ སམནྟཱ ཀཝཱཊཝིཏྠཱརཔྤམཱཎོ ཨོཀཱསོ. མཧཱཔཙྩརིཡཾ པན ‘‘དྭཱརབཱཧཏོ པཊྛཱཡ དིཡཌྜྷོ ཧཏྠོ’’ཏི ཝུཏྟཾ. ཀུརུནྡིཡཾ པན ‘‘དྭཱརསྶ ཨུབྷོསུ པསྶེསུ ཀཝཱཊཔྤམཱཎ’’ནྟི. མཧཱཨཊྛཀཐཱཡཾ ‘‘ཀཝཱཊཾ ནཱམ དིཡཌྜྷཧཏྠམྤི ཧོཏི དྭིཧཏྠམྤི ཨཌྜྷཏེཡྻཧཏྠམྤཱི’’ཏི ཝུཏྟཾ, ཏཾ སུཝུཏྟཾ. ཏདེཝ ཧི སནྡྷཱཡ བྷགཝཏཱཔི ‘‘པིཊྛསངྒྷཱཊསྶ སམནྟཱ ཧཏྠཔཱསཱ’’ཏི ཨཡཾ ཨུཀྐཊྛནིདྡེསོ ཀཏོ. ཨགྒལ༹ཊྛཔནཱཡཱཏི སཀཝཱཊཀདྭཱརབནྡྷཊྛཔནཱཡ; སཀཝཱཊཀསྶ དྭཱརབནྡྷསྶ ནིཙྩལབྷཱཝཏྠཱཡཱཏི ཨཏྠོ. དྭཱརཊྛཔནཱཡཱཏི ཨིདམྤི ཧི པདབྷཱཛནཾ ཨིམམེཝཏྠཾ སནྡྷཱཡ བྷཱསིཏཾ. ཨཡཾ པནེཏྠ ཨདྷིཔྤཱཡོ – ཀཝཱཊཉྷི ལཧུཔརིཝཊྚཀཾ ཝིཝརཎཀཱལེ བྷིཏྟིཾ ཨཱཧནཏི, པིདཧནཀཱལེ དྭཱརབནྡྷཾ. ཏེན ཨཱཧནནེན བྷིཏྟི ¶ ཀམྤཏི, ཏཏོ མཏྟིཀཱ ཙལཏི, ཙལིཏྭཱ སིཐིལཱ ཝཱ ཧོཏི པཏཏི ཝཱ. ཏེནཱཧ བྷགཝཱ ‘‘ཡཱཝ དྭཱརཀོསཱ ཨགྒལ༹ཊྛཔནཱཡཱ’’ཏི. ཏཏྠ ཀིཉྩཱཔི ‘‘ཨིདཾ ནཱམ ཀཏྟབྦ’’ནྟི ¶ ནེཝ མཱཏིཀཱཡཾ ན པདབྷཱཛནེ ཝུཏྟཾ, ཨཊྛུཔྤཏྟིཡཾ པན ‘‘པུནཔྤུནཾ ཚཱདཱཔེསི པུནཔྤུནཾ ལེཔཱཔེསཱི’’ཏི ཨདྷིཀཱརཏོ ཡཱཝ དྭཱརཀོསཱ ཨགྒལ༹ཊྛཔནཱཡ པུནཔྤུནཾ ལིམྤིཏབྦོ ཝཱ ལེཔཱཔེཏབྦོ ཝཱཏི ཨེཝམཏྠོ དཊྛབྦོ.

ཡཾ ¶ པན པདབྷཱཛནེ ‘‘པིཊྛསངྒྷཱཊསྶ སམནྟཱ ཧཏྠཔཱསཱ’’ཏི ཝུཏྟཾ. ཏཏྠ ཡསྶ ཝེམཛ྄ཛྷེ དྭཱརཾ ཧོཏི, ཨུཔརིབྷཱགེ ཨུཙྩཱ བྷིཏྟི, ཏསྶ ཏཱིསུ དིསཱསུ སམནྟཱ ཧཏྠཔཱསཱ ཨུཔཙཱརོ ཧོཏི, ཁུདྡཀསྶ ཝིཧཱརསྶ དྭཱིསུ དིསཱསུ ཨུཔཙཱརོ ཧོཏི. ཏཏྲཱཔི ཡཾ བྷིཏྟིཾ ཝིཝརིཡམཱནཾ ཀཝཱཊཾ ཨཱཧནཏི, སཱ ཨཔརིཔཱུརཨུཔཙཱརཱཔི ཧོཏི. ཨུཀྐཊྛཔརིཙྪེདེན པན ཏཱིསུ དིསཱསུ སམནྟཱ ཧཏྠཔཱསཱ དྭཱརསྶ ནིཙྩལབྷཱཝཏྠཱཡ ལེཔོ ཨནུཉྙཱཏོ. སཙེ པནསྶ དྭཱརསྶ ཨདྷོབྷཱགེཔི ལེཔོཀཱསོ ཨཏྠི, ཏམྤི ལིམྤིཏུཾ ཝཊྚཏི. ཨཱལོཀསནྡྷིཔརིཀམྨཱཡཱཏི ཨེཏྠ ཨཱལོཀསནྡྷཱིཏི ཝཱཏཔཱནཀཝཱཊཀཱ ཝུཙྩནྟི, ཏེཔི ཝིཝརཎཀཱལེ ཝིདཏྠིམཏྟམྤི ཨཏིརེཀམྤི བྷིཏྟིཔྤདེསཾ པཧརནྟི. ཨུཔཙཱརོ པནེཏྠ སབྦདིསཱསུ ལབྦྷཏི, ཏསྨཱ སབྦདིསཱསུ ཀཝཱཊཝིཏྠཱརཔྤམཱཎོ ཨོཀཱསོ ཨཱལོཀསནྡྷིཔརིཀམྨཏྠཱཡ ལིམྤིཏབྦོ ཝཱ ལེཔཱཔེཏབྦོ ཝཱཏི ཨཡམེཏྠ ཨདྷིཔྤཱཡོ.

སེཏཝཎྞནྟིཨཱདིཀཾ ན མཱཏིཀཱཡ པདབྷཱཛནཾ. ཨིམིནཱ ཧི ཝིཧཱརསྶ བྷཱརིཀཏྟཾ ནཱམ ནཏྠཱིཏི པདབྷཱཛནེཡེཝ ཨནུཉྙཱཏཾ, ཏསྨཱ སབྦམེཏཾ ཡཐཱསུཁཾ ཀཏྟབྦཾ.

ཨེཝཾ ལེཔཀམྨེ ཡཾ ཀཏྟབྦཾ, ཏཾ དསྶེཏྭཱ པུན ཚདནེ ཀཏྟབྦཾ དསྶེཏུཾ ‘‘དྭཏྟིཙྪདནསྶཱ’’ཏིཨཱདི ཝུཏྟཾ. ཏཏྠ དྭཏྟིཙྪདནསྶ པརིཡཱཡནྟི ཚདནསྶ དྭཏྟིཔརིཡཱཡཾ; པརིཡཱཡོ ཝུཙྩཏི པརིཀྑེཔོ, པརིཀྑེཔདྭཡཾ ཝཱ པརིཀྑེཔཏྟཡཾ ཝཱ ཨདྷིཊྛཱཏབྦནྟི ཨཏྠོ. ཨཔྤཧརིཏེ ཋིཏེནཱཏི ཨཧརིཏེ ཋིཏེན. ཧརིཏནྟི ཙེཏྠ སཏྟདྷཉྙབྷེདཾ པུབྦཎྞཾ མུགྒམཱསཏིལཀུལཏྠཨལཱབུཀུམྦྷཎྜཱདིབྷེདཉྩ ཨཔརཎྞཾ ཨདྷིཔྤེཏཾ. ཏེནེཝཱཧ – ‘‘ཧརིཏཾ ནཱམ པུབྦཎྞཾ ཨཔརཎྞ’’ནྟི.

སཙེ ཧརིཏེ ཋིཏོ ¶ ཨདྷིཊྛཱཏི, ཨཱཔཏྟི དུཀྐཊསྶཱཏི ཨེཏྠ པན ཡསྨིམྤི ཁེཏྟེ ཝུཏྟཾ བཱིཛཾ ན ཏཱཝ སམྤཛྫཏི, ཝསྶེ ཝཱ པན པཏིཏེ སམྤཛྫིསྶཏི, ཏམྤི ཧརིཏསངྑྱམེཝ གཙྪཏི. ཏསྨཱ ཨེཝརཱུཔེ ཁེཏྟེཔི ཋིཏེན ན ཨདྷིཊྛཱཏབྦཾ, ཨཧརིཏེཡེཝ ཋིཏེན ཨདྷིཊྛཱཏབྦཾ. ཏཏྲཱཔི ཨཡཾ པརིཙྪེདོ, པིཊྛིཝཾསསྶ ཝཱ ཀཱུཊཱགཱརཀཎྞིཀཱཡ ཝཱ ཨུཔརི ཐུཔིཀཱཡ ཝཱ པསྶེ ནིསིནྣོ ཚདནམུཁཝཊྚིཨནྟེན ཨོལོཀེནྟོ ཡསྨིཾ བྷཱུམིབྷཱགེ ཋིཏཾ པསྶཏི, ཡསྨིཉྩ བྷཱུམིབྷཱགེ ¶ ཋིཏོ, ཏཾ ཨུཔརི ནིསིནྣཀཾ པསྶཏི, ཏསྨིཾ ¶ ཋཱནེ ཨདྷིཊྛཱཏབྦཾ. ཏསྶ ཨནྟོ ཨཧརིཏེཔི ཋཏྭཱ ཨདྷིཊྛཱཏུཾ ན ལབྦྷཏི. ཀསྨཱ? ཝིཧཱརསྶ ཧི པཏནྟསྶ ཨཡཾ པཏནོཀཱསོཏི.

༡༣༦. མགྒེན ཚཱདེནྟསྶཱཏི ཨེཏྠ མགྒེན ཚཱདནཾ ནཱམ ཨཔརིཀྑིཔིཏྭཱ ཨུཛུཀམེཝ ཚཱདནཾ; ཏཾ ཨིཊྛཀསིལཱསུདྷཱཧི ལབྦྷཏི. དྭེ མགྒེ ཨདྷིཊྛཧིཏྭཱཏི དྭེ མགྒཱ སཙེ དུཙྪནྣཱ ཧོནྟི, ཨཔནེཏྭཱཔི པུནཔྤུནཾ ཚཱདེཏུཾ ལབྦྷཏི, ཏསྨཱ ཡཐཱ ཨིཙྪཏི; ཏཐཱ དྭེ མགྒེ ཨདྷིཊྛཧིཏྭཱ ཏཏིཡཾམགྒཾ ‘‘ཨིདཱནི ཨེཝཾ ཚཱདེཧཱི’’ཏི ཨཱཎཱཔེཏྭཱ པཀྐམིཏབྦཾ. པརིཡཱཡེནཱཏི པརིཀྑེཔེན. ཨེཝཾཚདནཾ པན ཏིཎཔཎྞེཧི ལབྦྷཏི. ཏསྨཱ ཨིདྷཱཔི ཡཐཱ ཨིཙྪཏི ཏཐཱ དྭེ པརིཡཱཡེ ཨདྷིཊྛཧིཏྭཱ ཏཏིཡཾ པརིཡཱཡཾ ‘‘ཨིདཱནི ཨེཝཾ ཚཱདེཧཱི’’ཏི ཨཱཎཱཔེཏྭཱ པཀྐམིཏབྦཾ. སཙེ ན པཀྐམཏི, ཏུཎྷཱིབྷཱུཏེན ཋཱཏབྦཾ. སབྦམྤི ཙེཏཾ ཚདནཾ ཚདནཱུཔརི ཝེདིཏབྦཾ. ཨུཔརཱུཔརིཙྪནྣོ ཧི ཝིཧཱརོ ཙིརཾ ཨནོཝསྶཀོ ཧོཏཱིཏི མཉྙམཱནཱ ཨེཝཾ ཚཱདེནྟི. ཏཏོ ཙེ ཨུཏྟརིནྟི ཏིཎྞཾ མགྒཱནཾ ཝཱ པརིཡཱཡཱནཾ ཝཱ ཨུཔརི ཙཏུཏྠེ མགྒེ ཝཱ པརིཡཱཡེ ཝཱ.

༡༣༧. ཀརལེ༹ ཀརལེ༹ཏི ཏིཎམུཊྛིཡཾ ཏིཎམུཊྛིཡཾ. སེསམེཏྠ ཨུཏྟཱནམེཝཱཏི. ཚསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

མཧལླཀཝིཧཱརསིཀྑཱཔདཾ ནཝམཾ.

༡༠. སཔྤཱཎཀསིཀྑཱཔདཝཎྞནཱ

༡༤༠. དསམསིཀྑཱཔདེ – ཛཱནཾ སཔྤཱཎཀནྟི སཔྤཱཎཀཾ ཨེཏནྟི ཡཐཱ ཏཐཱ ཝཱ ཛཱནནྟོ. སིཉྩེཡྻ ཝཱ སིཉྩཱཔེཡྻ ཝཱཏི ཏེན ¶ ཨུདཀེན སཡཾ ཝཱ སིཉྩེཡྻ, ཨཉྙཾ ཝཱ ཨཱཎཱཔེཏྭཱ སིཉྩཱཔེཡྻ. པཱལི༹ཡཾ པན ‘‘སིཉྩེཡྻཱཏི སཡཾ སིཉྩཏཱི’’ཏི ཨཱིདིསཱནཾ ཝཙནཱནཾ ཨཏྠོ པུབྦེ ཝུཏྟནཡེནེཝ ཝེདིཏབྦོ.

ཏཏྠ དྷཱརཾ ཨཝིཙྪིནྡིཏྭཱ སིཉྩནྟསྶ ཨེཀསྨིཾ ཨུདཀགྷཊེ ཨེཀཱཝ ཨཱཔཏྟི. ཨེས ནཡོ སབྦབྷཱཛནེསུ. དྷཱརཾ ཝིཙྪིནྡནྟསྶ པན པཡོགེ པཡོགེ ཨཱཔཏྟི ¶ . མཱཏིཀཾ སམྨུཁཾ ཀརོཏི, དིཝསམྤི སནྡཏུ, ཨེཀཱཝ ཨཱཔཏྟི. སཙེ ཏཏྠ ཏཏྠ བནྡྷིཏྭཱ ཨཉྙཏོ ཨཉྙཏོ ནེཏི, པཡོགེ ¶ པཡོགེ ཨཱཔཏྟི. སཀཊབྷཱརམཏྟཉྩེཔི ཏིཎཾ ཨེཀཔཡོགེན ཨུདཀེ པཀྑིཔཏི, ཨེཀཱཝ ཨཱཔཏྟི. ཨེཀེཀཾ ཏིཎཾ ཝཱ པཎྞཾ ཝཱ པཀྑིཔནྟསྶ པཡོགེ པཡོགེ ཨཱཔཏྟི. མཏྟིཀཱཡཔི ཨཉྙེསུཔི ཀཊྛགོམཡཱདཱིསུ ཨེསེཝ ནཡོ. ཨིདཾ པན མཧཱཨུདཀཾ སནྡྷཱཡ ན ཝུཏྟཾ, ཡཾ ཏིཎེ ཝཱ མཏྟིཀཱཡ ཝཱ པཀྑིཏྟཱཡ པརིཡཱདཱནཾ གཙྪཏི, ཨཱཝིལཾ ཝཱ ཧོཏི, ཡཏྠ པཱཎཀཱ མརནྟི, ཏཱདིསཾ ཨུདཀཾ སནྡྷཱཡ ཝུཏྟནྟི ཝེདིཏབྦཾ. སེསམེཏྠ ཨུཏྟཱནམེཝཱཏི.

ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ ཏིཝེདནནྟི.

སཔྤཱཎཀསིཀྑཱཔདཾ དསམཾ.

སམཏྟོ ཝཎྞནཱཀྐམེན སེནཱསནཝགྒོ དུཏིཡོ.

༣. ཨོཝཱདཝགྒོ

༡. ཨོཝཱདསིཀྑཱཔདཝཎྞནཱ

༡༤༡-༡༤༤. བྷིཀྑུནིཝགྒསྶ པཋམསིཀྑཱཔདེ – ལཱབྷིནོ ཧོནྟཱིཏི ཨེཏྠ ན ཏེསཾ བྷིཀྑུནིཡོ དེནྟི, ན དཱཔེནྟི, མཧཱཀུལེཧི པབྦཛིཏཱ པན ཀུལདྷཱིཏརོ ཨཏྟནོ སནྟིཀཾ ཨཱགཏཱནཾ ཉཱཏིམནུསྶཱནཾ ‘‘ཀུཏོ ཨཡྻེ ཨོཝཱདཾ ཨུདྡེསཾ པརིཔུཙྪཾ ལབྷཐཱ’’ཏི པུཙྪནྟཱནཾ ‘‘ཨསུཀོ ཙ ཨསུཀོ ཙ ཐེརོ ཨོཝདཏཱི’’ཏི ཨསཱིཏིམཧཱསཱཝཀེ ཨུདྡིསིཏྭཱ ཀཐཱནུསཱརེན ཏེསཾ སཱིལསུཏཱཙཱརཛཱཏིགོཏྟཱདིབྷེདཾ ཝིཛྫམཱནགུཎཾ ཀཐཡནྟི. ཨེཝརཱུཔཱ ཧི ཝིཛྫམཱནགུཎཱ ཀཐེཏུཾ ཝཊྚནྟི. ཏཏོ པསནྣཙིཏྟཱ མནུསྶཱ ཐེརཱནཾ ཙཱིཝརཱདིབྷེདཾ མཧནྟཾ ལཱབྷསཀྐཱརཾ ཨབྷིཧརིཾསུ. ཏེན ཝུཏྟཾ – ‘‘ལཱབྷིནོ ཧོནྟི ཙཱིཝར…པེ… པརིཀྑཱརཱན’’ནྟི.

བྷིཀྑུནིཡོ ¶ ཨུཔསངྐམིཏྭཱཏི ཏེསཾ ཀིར སནྟིཀེ ཏཱསུ ཨེཀཱ བྷིཀྑུནཱིཔི ན ཨཱགཙྪཏི, ལཱབྷཏཎྷཱཡ པན ཨཱཀཌྜྷིཡམཱནཧདཡཱ ཏཱསཾ ཨུཔསྶཡཾ ཨགམཾསུ. ཏཾ ¶ སནྡྷཱཡ ཝུཏྟཾ – ‘‘བྷིཀྑུནིཡོ ཨུཔསངྐམིཏྭཱ’’ཏི. ཏཱཔི བྷིཀྑུནིཡོ ཙལཙིཏྟཏཱཡ ཏེསཾ ཝཙནཾ ཨཀཾསུཡེཝ ¶ . ཏེན ཝུཏྟཾ – ‘‘ཨཐ ཁོ ཏཱ བྷིཀྑུནིཡོ…པེ… ནིསཱིདིཾསཱུ’’ཏི. ཏིརཙྪཱནཀཐནྟི སགྒམགྒགམནེཔི ཏིརཙྪཱནབྷཱུཏཾ རཱཛཀཐཱདིམནེཀཝིདྷཾ ནིརཏྠཀཀཐཾ. ཨིདྡྷོཏི སམིདྡྷོ, སཧིཏཏྠོ གམྦྷཱིརོ བཧུརསོ ལཀྑཎཔཊིཝེདྷསཾཡུཏྟོཏི ཨདྷིཔྤཱཡོ.

༡༤༥-༡༤༧. ཨནུཛཱནཱམི བྷིཀྑཝེཏི ཨེཏྠ ཡསྨཱ ཏེ བྷིཀྑཱུ ‘‘མཱ ཏུམྷེ བྷིཀྑཝེ བྷིཀྑུནིཡོ ཨོཝདིཏྠཱ’’ཏི ཝུཙྩམཱནཱ ཨདིཊྛསཙྩཏྟཱ ཏཐཱགཏེ ཨཱགྷཱཏཾ བནྡྷིཏྭཱ ཨཔཱཡུཔགཱ བྷཝེཡྻུཾ, ཏསྨཱ ནེསཾ ཏཾ ཨཔཱཡུཔགཏཾ པརིཧརནྟོ བྷགཝཱ ཨཉྙེནེཝ ཨུཔཱཡེན ཏེ བྷིཀྑུནོཝཱདཏོ པརིབཱཧིརེ ཀཏྟུཀཱམོ ཨིམཾ བྷིཀྑུནོཝཱདཀསམྨུཏིཾ ཨནུཛཱནཱིཏི ཝེདིཏབྦོ. ཨེཝཾ ཨིདྷ པརིབཱཧིརེ ཀཏྟུཀཱམཏཱཡ ཨནུཛཱནིཏྭཱ པརཏོ ཀརོནྟོཝ ‘‘ཨནུཛཱནཱམི བྷིཀྑཝེ ཨཊྛཧངྒེཧི སམནྣཱགཏ’’ནྟིཨཱདིམཱཧ. ཨིམཱནི ཧི ཨཊྛངྒཱནི ཚབྦགྒིཡཱནཾ སུཔིནནྟེནཔི ན བྷཱུཏཔུབྦཱནཱིཏི.

ཏཏྠ སཱིལམསྶ ཨཏྠཱིཏི སཱིལཝཱ. ཨིདཱནི ཡཉྩ ཏཾ སཱིལཾ, ཡཐཱ ཙ ཏཾ ཏསྶ ཨཏྠི ནཱམ ཧོཏི, ཏཾ དསྶེནྟོ ‘‘པཱཏིམོཀྑསཾཝརསཾཝུཏོ’’ཏིཨཱདིམཱཧ. ཏཏྠ པཱཏིམོཀྑོཝ སཾཝརོ པཱཏིམོཀྑསཾཝརོ. པཱཏིམོཀྑསཾཝརེན སཾཝུཏོ སམནྣཱགཏོཏི པཱཏིམོཀྑསཾཝརསཾཝུཏོ.

ཝིཧརཏཱིཏི ཝཏྟཏི. ཝུཏྟཉྷེཏཾ ཝིབྷངྒེ –

‘‘པཱཏིམོཀྑནྟི སཱིལཾ པཏིཊྛཱ ཨཱདི ཙརཎཾ སཾཡམོ སཾཝརོ མོཀྑཾ པམོཀྑཾ ཀུསལཱནཾ དྷམྨཱནཾ སམཱཔཏྟིཡཱ; སཾཝརོཏི ཀཱཡིཀོ ཨཝཱིཏིཀྐམོ ཝཱཙསིཀོ ཨཝཱིཏིཀྐམོ ཀཱཡིཀཝཱཙསིཀོ ཨཝཱིཏིཀྐམོ. སཾཝུཏོཏི ཨིམིནཱ པཱཏིམོཀྑསཾཝརེན ཨུཔེཏོ ཧོཏི སམུཔེཏོ ཨུཔགཏོ སམུཔགཏོ ཨུཔཔནྣོ སམུཔཔནྣོ སམྤནྣོ སམནྣཱགཏོ, ཏེན ཝུཙྩཏི ‘པཱཏིམོཀྑསཾཝརསཾཝུཏོ’ཏི. ཝིཧརཏཱིཏི ཨིརིཡཏི ཝཏྟཏི པཱལེཏི ཡཔེཏི ཡཱཔེཏི ཙརཏི ཝིཧརཏི, ཏེན ཝུཙྩཏི ‘ཝིཧརཏཱི’’’ཏི ¶ (ཝིབྷ. ༥༡༡-༥༡༢).

ཨཱཙཱརགོཙརསམྤནྣོཏི ¶ མིཙྪཱཛཱིཝཔཊིསེདྷཀེན ན ཝེལུ༹དཱནཱདིནཱ ཨཱཙཱརེན, ཝེསིཡཱདིཨགོཙརཾ པཧཱཡ སདྡྷཱསམྤནྣཀུལཱདིནཱ ཙ གོཙརེན སམྤནྣོ. ཨཎུམཏྟེསུ ཝཛྫེསུ བྷཡདསྶཱཝཱིཏི ཨཔྤམཏྟཀེསུ ཝཛྫེསུ བྷཡདསྶཱཝཱི, ཏཱནི ཝཛྫཱནི བྷཡཏོ དསྶནསཱིལོཏི ཝུཏྟཾ ཧོཏི. སམཱདཱཡ སིཀྑཏི སིཀྑཱཔདེསཱུཏི ཨདྷིསཱིལསིཀྑཱདིབྷཱཝེན ཏིདྷཱ ཋིཏེསུ སིཀྑཱཔདེསུ ཏཾ ཏཾ སིཀྑཱཔདཾ སམཱདཱཡ སམྨཱ ཨཱདཱཡ སཱདྷུཀཾ གཧེཏྭཱ ཨཝིཛཧནྟོ སིཀྑཏཱིཏི ¶ ཨཏྠོ. ཨཡམེཏྠ སངྑེཔོ, ཝིཏྠཱརོ པན ཡོ ཨིཙྪཏི, ཏེན ཝིསུདྡྷིམགྒཏོ གཧེཏབྦོ.

བཧུ སུཏམསྶཱཏི བཧུསྶུཏོ. སུཏཾ དྷཱརེཏཱིཏི སུཏདྷརོ; ཡདསྶ ཏཾ བཧུ སུཏཾ ནཱམ, ཏཾ ན སུཏམཏྟམེཝ; ཨཐ ཁོ ནཾ དྷཱརེཏཱིཏི ཨཏྠོ. མཉྫཱུསཱཡཾ ཝིཡ རཏནཾ སུཏཾ སནྣིཙིཏམསྨིནྟི སུཏསནྣིཙཡོ. ཨེཏེན ཡཾ སོ སུཏཾ དྷཱརེཏི, ཏསྶ མཉྫཱུསཱཡ གོཔེཏྭཱ སནྣིཙིཏརཏནསྶེཝ ཙིརཀཱལེནཱཔི ཨཝིནཱསནཾ དསྶེཏི. ཨིདཱནི ཏཾ སུཏཾ སརཱུཔཏོ དསྶེནྟོ ‘‘ཡེ ཏེ དྷམྨཱ’’ཏིཨཱདིམཱཧ, ཏཾ ཝེརཉྫཀཎྜེ ཝུཏྟནཡམེཝ. ཨིདཾ པནེཏྠ ནིགམནཾ – ཏཐཱརཱུཔཱསྶ དྷམྨཱ བཧུསྶུཏཱ ཧོནྟི, ཏསྨཱ བཧུསྶུཏོ. དྷཱཏཱ, ཏསྨཱ སུཏདྷརོ. ཝཙསཱ པརིཙིཏཱ མནསཱནུཔེཀྑིཏཱ, དིཊྛིཡཱ སུཔྤཊིཝིདྡྷཱ; ཏསྨཱ སུཏསནྣིཙཡོ. ཏཏྠ ཝཙསཱ པརིཙིཏཱཏི ཝཱཙཱཡ པགུཎཱ ཀཏཱ. མནསཱནུཔེཀྑིཏཱཏི མནསཱ ཨནུཔེཀྑིཏཱ, ཨཱཝཛྫནྟསྶ དཱིཔསཧསྶེན ཨོབྷཱསིཏཱ ཝིཡ ཧོནྟི. དིཊྛིཡཱ སུཔྤཊིཝིདྡྷཱཏི ཨཏྠཏོ ཙ ཀཱརཎཏོ ཙ པཉྙཱཡ སུཊྛུ པཊིཝིདྡྷཱ སུཔཙྩཀྑཀཏཱ ཧོནྟི.

ཨཡཾ པན བཧུསྶུཏོ ནཱམ ཏིཝིདྷོ ཧོཏི – ནིསྶཡམུཙྩནཀོ, པརིསུཔཊྛཱཔཀོ, བྷིཀྑུནོཝཱདཀོཏི. ཏཏྠ ནིསྶཡམུཙྩནཀེན ཨུཔསམྤདཱཡ པཉྩཝསྶེན སབྦནྟིམེན པརིཙྪེདེན དྭེ མཱཏིཀཱ པགུཎཱ ཝཱཙུགྒཏཱ ཀཱཏབྦཱ པཀྑདིཝསེསུ དྷམྨསཱཝནཏྠཱཡ སུཏྟནྟཏོ ཙཏྟཱརོ བྷཱཎཝཱརཱ, སམྤཏྟཱནཾ ¶ པརིཀཐནཏྠཱཡ ཨནྡྷཀཝིནྡམཧཱརཱཧུལོཝཱདཨམྦཊྛསདིསོ ཨེཀོ ཀཐཱམགྒོ, སངྒྷབྷཏྟམངྒལཱམངྒལེསུ ཨནུམོདནཏྠཱཡ ཏིསྶོ ཨནུམོདནཱ, ཨུཔོསཐཔཝཱརཎཱདིཛཱནནཏྠཾ ཀམྨཱཀམྨཝིནིཙྪཡོ ¶ , སམཎདྷམྨཀརཎཏྠཾ སམཱདྷིཝསེན ཝཱ ཝིཔསྶནཱཝསེན ཝཱ ཨརཧཏྟཔརིཡོསཱནམེཀཾ ཀམྨཊྛཱནཾ, ཨེཏྟཀཾ ཨུགྒཧེཏབྦཾ. ཨེཏྟཱཝཏཱ ཧི ཨཡཾ བཧུསྶུཏོ ཧོཏི ཙཱཏུདྡིསོ, ཡཏྠ ཀཏྠཙི ཨཏྟནོ ཨིསྶརིཡེན ཝསིཏུཾ ལབྷཏི.

པརིསུཔཊྛཱཔཀེན ཨུཔསམྤདཱཡ དསཝསྶེན སབྦནྟིམེན པརིཙྪེདེན པརིསཾ ཨབྷིཝིནཡེ ཝིནེཏུཾ དྭེ ཝིབྷངྒཱ པགུཎཱ ཝཱཙུགྒཏཱ ཀཱཏབྦཱ, ཨསཀྐོནྟེན ཏཱིཧི ཛནེཧི སདྡྷིཾ པརིཝཏྟནཀྑམཱ ཀཱཏབྦཱ, ཀམྨཱཀམྨཉྩ ཁནྡྷཀཝཏྟཉྩ ཨུགྒཧེཏབྦཾ. པརིསཱཡ པན ཨབྷིདྷམྨེ ཝིནཡནཏྠཾ སཙེ མཛ྄ཛྷིམབྷཱཎཀོ ཧོཏི མཱུལཔཎྞཱསཀོ ཨུགྒཧེཏབྦོ, དཱིགྷབྷཱཎཀེན མཧཱཝགྒོ, སཾཡུཏྟབྷཱཎཀེན ཧེཊྛིམཱ ཝཱ ཏཡོ ཝགྒཱ མཧཱཝགྒོ ཝཱ, ཨངྒུཏྟརབྷཱཎཀེན ཧེཊྛཱ ཝཱ ཨུཔརི ཝཱ ཨུཔཌྜྷནིཀཱཡོ ཨུགྒཧེཏབྦོ, ཨསཀྐོནྟེན ཏིཀནིཔཱཏཏོ པཊྛཱཡ ཧེཊྛཱ ཨུགྒཧེཏུམྤི ཝཊྚཏི. མཧཱཔཙྩརིཡཾ པན ‘‘ཨེཀཾ ཨུགྒཎྷནྟེན ཙཏུཀྐནིཔཱཏཾ ཝཱ པཉྩཀནིཔཱཏཾ ཝཱ གཧེཏུཾ ཝཊྚཏཱི’’ཏི ¶ ཝུཏྟཾ. ཛཱཏཀབྷཱཎཀེན སཱཊྛཀཐཾ ཛཱཏཀཾ ཨུགྒཧེཏབྦཾ, ཏཏོ ཨོརཾ ན ཝཊྚཏི. དྷམྨཔདམྤི སཧ ཝཏྠུནཱ ཨུགྒཧེཏུཾ ཝཊྚཏཱིཏི མཧཱཔཙྩརིཡཾ ཝུཏྟཾ. ཏཏོ ཏཏོ སམུཙྩཡཾ ཀཏྭཱ མཱུལཔཎྞཱསཀམཏྟཾ ཝཊྚཏི, ན ཝཊྚཏཱིཏི? ‘‘ན ཝཊྚཏཱི’’ཏི ཀུརུནྡཊྛཀཐཱཡཾ པཊིཀྑིཏྟཾ, ཨིཏརཱསུ ཝིཙཱརཎཱཡེཝ ནཏྠི. ཨབྷིདྷམྨེ ཀིཉྩི ཨུགྒཧེཏབྦནྟི ན ཝུཏྟཾ. ཡསྶ པན སཱཊྛཀཐམྤི ཝིནཡཔིཊཀཾ ཨབྷིདྷམྨཔིཊཀཉྩ པགུཎཾ, སུཏྟནྟེ ཙ ཝུཏྟཔྤཀཱརོ གནྠོ ནཏྠི, པརིསཾ ཨུཔཊྛཱཔེཏུཾ ན ལབྷཏི. ཡེན པན སུཏྟནྟཏོ ཝིནཡཏོ ཙ ཝུཏྟཔྤམཱཎོ གནྠོ ཨུགྒཧིཏོ, ཨཡཾ པརིསུཔཊྛཱཔཀོ བཧུསྶུཏོ ཧོཏི དིསཱཔཱམོཀྑོ ཡེནཀཱམངྒམོ, པརིསཾ ཨུཔཊྛཱཔེཏུཾ ལབྷཏི.

བྷིཀྑུནོཝཱདཀེན ¶ པན སཱཊྛཀཐཱནི ཏཱིཎི པིཊཀཱནི ཨུགྒཧེཏབྦཱནི, ཨསཀྐོནྟེན ཙཏཱུསུ ནིཀཱཡེསུ ཨེཀསྶ ཨཊྛཀཐཱ པགུཎཱ ཀཱཏབྦཱ, ཨེཀནིཀཱཡེན ཧི སེསནིཀཱཡེསུཔི པཉྷཾ ཀཐེཏུཾ སཀྑིསྶཏི. སཏྟསུ པཀརཎེསུ ཙཏུཔྤཀརཎསྶ ཨཊྛཀཐཱ པགུཎཱ ཀཱཏབྦཱ, ཏཏྠ ལདྡྷནཡེན ཧི སེསཔཀརཎེསུ པཉྷཾ ཀཐེཏུཾ སཀྑིསྶཏི. ཝིནཡཔིཊཀཾ པན ནཱནཏྠཾ ནཱནཱཀཱརཎཾ, ཏསྨཱ ཏཾ སདྡྷིཾ ཨཊྛཀཐཱཡ པགུཎཾ ཀཱཏབྦམེཝ. ཨེཏྟཱཝཏཱ ཧི བྷིཀྑུནོཝཱདཀོ བཧུསྶུཏོ ནཱམ ཧོཏཱིཏི.

ཨུབྷཡཱནི ¶ ཁོ པནསྶཱཏིཨཱདི པན ཡསྨཱ ཨཉྙསྨིཾ སཀལེ ནཝངྒེཔི བཱཧུསྶཙྩེ སཏི སཱཊྛཀཐཾ ཝིནཡཔིཊཀཾ ཝིནཱ ན ཝཊྚཏིཡེཝ, ཏསྨཱ ཝིསུཾ ཝུཏྟཾ. ཏཏྠ ཝིཏྠཱརེནཱཏི ཨུབྷཏོཝིབྷངྒེན སདྡྷིཾ. སྭཱགཏཱནཱིཏི སུཊྛུ ཨཱགཏཱནི. ཡཐཱ ཨཱགཏཱནི པན སྭཱགཏཱནི ཧོནྟི, ཏཾ དསྶེཏུཾ ‘‘སུཝིབྷཏྟཱནཱི’’ཏིཨཱདི ཝུཏྟཾ. ཏཏྠ སུཝིབྷཏྟཱནཱིཏི སུཊྛུ ཝིབྷཏྟཱནི པདཔཙྩཱབྷཊྛསངྐརདོསཝིརཧིཏཱནི. སུཔྤཝཏྟཱིནཱིཏི པགུཎཱནི ཝཱཙུགྒཏཱནི. སུཝིནིཙྪིཏཱནི སུཏྟསོཏི ཁནྡྷཀཔརིཝཱརཏོ ཨཱཧརིཏབྦསུཏྟཝསེན སུཊྛུ ཝིནིཙྪིཏཱནི. ཨནུབྱཉྫནསོཏི ཨཀྑརཔདཔཱརིཔཱུརིཡཱ ཙ སུཝིནིཙྪིཏཱནི ཨཁཎྜཱནི ཨཝིཔརཱིཏཀྑརཱནི. ཨེཏེན ཨཊྛཀཐཱ དཱིཔིཏཱ, ཨཊྛཀཐཱཏོ ཧི ཨེས ཝིནིཙྪཡོ ཧོཏཱིཏི.

ཀལྱཱཎཝཱཙོཏི སིཐིལདྷནིཏཱདཱིནཾ ཡཐཱཝིདྷཱནཝཙནེན པརིམཎྜལཔདབྱཉྫནཱཡ པོརིཡཱ ཝཱཙཱཡ སམནྣཱགཏོ ཝིསྶཊྛཱཡ ཨནེལགལཱ༹ཡ ཨཏྠསྶ ཝིཉྙཱཔནིཡཱ. ཀལྱཱཎཝཱཀྐརཎོཏི མདྷུརསྶརོ, མཱཏུགཱམོ ཧི སརསམྤཏྟིརཏོ, ཏསྨཱ པརིམཎྜལཔདབྱཉྫནམྤི ཝཙནཾ སརསམྤཏྟིརཧིཏཾ ཧཱིལེ༹ཏི. ཡེབྷུཡྻེན བྷིཀྑུནཱིནཾ པིཡོ ཧོཏི མནཱཔོཏི སབྦཱསཾ པིཡོ ནཱམ དུལླབྷོ, བཧུཏརཱནཾ པན པཎྜིཏཱནཾ བྷིཀྑུནཱིནཾ སཱིལཱཙཱརསམྤཏྟིཡཱ པིཡོ ཧོཏི མནཝཌྜྷནཀོ. པཊིབལོ ཧོཏི བྷིཀྑུནིཡོ ཨོཝདིཏུནྟི སུཏྟཉྩ ཀཱརཎཉྩ དསྶེནྟོ ཝཊྚབྷཡེན ཏཛྫེཏྭཱ ¶ བྷིཀྑུནིཡོ ཨོཝདིཏུཾ ཏཱདིསཾ དྷམྨཾ དེསེཏུཾ སམཏྠོ ཧོཏི. ཀཱསཱཡཝཏྠཝསནཱཡཱཏི ཀཱསཱཡཝཏྠནིཝཏྠཱཡ. གརུདྷམྨནྟི གིཧིཀཱལེ བྷིཀྑུནིཡཱ ཀཱཡསཾསགྒཾ ¶ ཝཱ སིཀྑམཱནཱསཱམཎེརཱིསུ མེཐུནདྷམྨཾ ཝཱ ཨནཛ྄ཛྷཱཔནྣཔུབྦོ ཧོཏི. མཱཏུགཱམོ ཧི པུབྦེ ཀཏམནུསྶརནྟོ སཾཝརེ ཋིཏསྶཱཔི དྷམྨདེསནཱཡ གཱརཝཾ ན ཀརོཏི. ཨཐ ཝཱ ཏསྨིཡེཝ ཨསདྡྷམྨེ ཙིཏྟཾ ཨུཔྤཱདེཏི. ཝཱིསཏིཝསྶོ ཝཱཏི ཨུཔསམྤདཱཡ ཝཱིསཏིཝསྶོ ཏཏོ ཨཏིརེཀཝསྶོ ཝཱ. ཨེཝརཱུཔོ ཧི ཝིསབྷཱགེཧི ཝཏྠཱུཧི པུནཔྤུནཾ སམཱགཙྪནྟོཔི དཧརོ ཝིཡ སཧསཱ སཱིལཝིནཱསཾ ན པཱཔུཎཱཏི, ཨཏྟནོ ཝཡཾ པཙྩཝེཀྑིཏྭཱ ཨཡུཏྟཊྛཱནེ ཚནྡརཱགཾ ཝིནེཏུཾ པཊིབལོ ཧོཏི, ཏེན ཝུཏྟཾ – ‘‘ཝཱིསཏིཝསྶོ ཝཱ ཧོཏི ཨཏིརེཀཝཱིསཏིཝསྶོ ཝཱ’’ཏི.

ཨེཏྠ ¶ ཙ ‘‘སཱིལཝཱ’’ཏིཨཱདི ཨེཀམངྒཾ, ‘‘བཧུསྶུཏོ ཧོཏཱི’’ཏིཨཱདི དུཏིཡཾ, ‘‘ཨུབྷཡཱནི ཁོ པནསྶཱ’’ཏིཨཱདི ཏཏིཡཾ, ‘‘ཀལྱཱཎཝཱཙོ ཧོཏི ཀལྱཱཎཝཱཀྐརཎོ’’ཏི ཙཏུཏྠཾ, ‘‘ཡེབྷུཡྻེན བྷིཀྑུནཱིནཾ པིཡོ ཧོཏི མནཱཔོ’’ཏི པཉྩམཾ, ‘‘པཊིབལོ ཧོཏི བྷིཀྑུནིཡོ ཨོཝདིཏུ’’ནྟི ཚཊྛཾ, ‘‘ན ཁོ པནེཏ’’ནྟིཨཱདི སཏྟམཾ, ‘‘ཝཱིསཏིཝསྶོ’’ཏིཨཱདི ཨཊྛམནྟི ཝེདིཏབྦཾ.

༡༤༨. ཉཏྟིཙཏུཏྠེནཱཏི པུབྦེ ཝཏྠུསྨིཾ ཝུཏྟེནེཝ. གརུདྷམྨེཧཱིཏི གརུཀེཧི དྷམྨེཧི, ཏེ ཧི གཱརཝཾ ཀཏྭཱ བྷིཀྑུནཱིཧི སམྤཊིཙྪིཏབྦཏྟཱ གརུདྷམྨཱཏི ཝུཙྩནྟི. ཨེཀཏོཨུཔསམྤནྣཱཡཱཏི ཨེཏྠ བྷིཀྑུནཱིནཾ སནྟིཀེ ཨེཀཏོཨུཔསམྤནྣཱཡ, ཡོ གརུདྷམྨེན ཨོཝདཏི, ཏསྶ དུཀྐཊཾ. བྷིཀྑཱུནཾ སནྟིཀེ ཨུཔསམྤནྣཱཡ པན ཡཐཱཝཏྠུཀམེཝ.

༡༤༩. པརིཝེཎཾ སམྨཛྫིཏྭཱཏི སཙེ པཱཏོ ཨསམྨཊྛཾ སམྨཊྛམྤི ཝཱ པུན ཏིཎཔཎྞཱདཱིཧི ཨུཀླཱཔཾ པཱདཔྤཧཱརེཧི ཙ ཝིཀིཎྞཝཱལིཀཾ ཛཱཏཾ, སམྨཛྫིཏབྦཾ. ཨསམྨཊྛཉྷི ཏཾ དིསྭཱ ‘‘ཨཡྻོ ཨཏྟནོ ནིསྶིཏཀེ དཧརབྷིཀྑཱུཔི ཝཏྟཔཊིཔཏྟིཡཾ ན ཡོཛེཏི, དྷམྨཾཡེཝ ཀཐེཏཱི’’ཏི ཏཱ བྷིཀྑུནིཡོ ཨསོཏུཀཱམཱ ཝིཡ བྷཝེཡྻུཾ. ཏེན ཝུཏྟཾ – ‘‘པརིཝེཎཾ སམྨཛྫིཏྭཱ’’ཏི. ཨནྟོགཱམཏོ པན བྷིཀྑུནིཡོ ཨཱགཙྪནྟིཡོ པིཔཱསིཏཱ ཙ ཀིལནྟཱ ཙ ཧོནྟི, ཏཱ པཱནཱིཡཉྩ ཧཏྠཔཱདམུཁསཱིཏལཀརཎཉྩ པཙྩཱསཱིསནྟི, ཏསྨིཉྩ ཨསཏི པུརིམནཡེནེཝ ཨགཱརཝཾ ཛནེཏྭཱ ཨསོཏུཀཱམཱཔི ཧོནྟི ¶ . ཏེན ཝུཏྟཾ – ‘‘པཱནཱིཡཾ པརིབྷོཛནཱིཡཾ ཨུཔཊྛཔེཏྭཱ’’ཏི.

ཨཱསནནྟི ནཱིཙཔཱིཋཀཕལཀཏཊྚིཀཀཊསཱརཀཱདིབྷེདཾ ཨནྟམསོ སཱཁཱབྷངྒམྤི ‘‘ཨིདཾ ཏཱསཾ ཨཱསནཾ ¶ བྷཝིསྶཏཱི’’ཏི ཨེཝཾ ཨཱསནཾ པཉྙཔེཏྭཱ. དྷམྨདེསནཱཔཏྟིམོཙནཏྠཾ པན དུཏིཡོ ཨིཙྪིཏབྦོ. ཏེན ཝུཏྟཾ – ‘‘དུཏིཡཾ གཧེཏྭཱ ནིསཱིདིཏབྦ’’ནྟི. ནིསཱིདིཏབྦནྟི ན ཝིཧཱརཔཙྩནྟེ, ཨཐ ཁོ ཝིཧཱརམཛ྄ཛྷེ ཨུཔོསཐཱགཱརསྶ ཝཱ བྷོཛནསཱལཱཡ ཝཱ དྭཱརེ སབྦེསཾ ཨོསརཎཊྛཱནེ ནིསཱིདིཏབྦཾ. སམགྒཱཏྠཱཏི སབྦཱ ཨཱགཏཏྠཱཏི ཨཏྠོ. ཝཏྟནྟཱིཏི ཨཱགཙྪནྟི; པགུཎཱ ཝཱཙུགྒཏཱཏི ཨཏྠོ. ནིཡྻཱདེཏབྦོཏི ཨཔྤེཏབྦོ. ཨོསཱརེཏབྦོཏི པཱལི༹ ཝཏྟབྦཱ. ཝསྶསཏཱུཔསམྤནྣཱཡཱཏིཨཱདི ཝཏྟབྦཔཱལི༹དསྶནཾ.

ཏཏྠ ¶ སཱམཱིཙིཀམྨནྟི མགྒསམྤདཱནབཱིཛནཔཱནཱིཡཱཔུཙྪནཱདིཀཾ ཨནུཙྪཝིཀཝཏྟཾ. ཨེཏྠ ཙ བྷིཀྑུནིཡཱ བྷིཀྑུསྶ ཨབྷིཝཱདནཾ ནཱམ ཨནྟོགཱམེ ཝཱ བཧིགཱམེ ཝཱ ཨནྟོཝིཧཱརེ ཝཱ བཧིཝིཧཱརེ ཝཱ ཨནྟརགྷརེ ཝཱ རཐིཀཱཡ ཝཱ ཨནྟམསོ རཱཛུསྶཱརཎཱཡཔི ཝཏྟམཱནཱཡ དེཝེ ཝསྶམཱནེ སཀདྡམཱཡ བྷཱུམིཡཱ ཚཏྟཔཏྟཧཏྠཱཡཔི ཧཏྠིཨསྶཱདཱིཧི ཨནུབདྡྷཱཡཔི ཀཱཏབྦམེཝ. ཨེཀཱབདྡྷཱཡ པཱལི༹ཡཱ བྷིཀྑཱཙཱརཾ པཝིསནྟེ དིསྭཱ ཨེཀསྨིཾ ཋཱནེ ‘‘ཝནྡཱམི ཨཡྻཱ’’ཏི ཝནྡིཏུཾ ཝཊྚཏི. སཙེ ཨནྟརནྟརཱ དྭཱདསཧཏྠེ མུཉྩིཏྭཱ གཙྪནྟི, ཝིསུཾ ཝིསུཾ ཝནྡིཏབྦཱ. མཧཱསནྣིཔཱཏེ ནིསིནྣེ ཨེཀསྨིཾཡེཝ ཋཱནེ ཝནྡིཏུཾ ཝཊྚཏི. ཨེས ནཡོ ཨཉྫལིཀམྨེཔི. ཡཏྠ ཀཏྠཙི ནིསིནྣཱཡ པན པཙྩུཊྛཱནཾ ཀཱཏབྦཾ, ཏསྶ ཏསྶ སཱམཱིཙིཀམྨསྶ ཨནུརཱུཔེ པདེསེ ཙ ཀཱལེ ཙ ཏཾ ཏཾ ཀཱཏབྦཾ.

སཀྐཏྭཱཏི ཡཐཱ ཀཏོ སུཀཏོ ཧོཏི, ཨེཝཾ ཀཏྭཱ. གརུཾཀཏྭཱཏི ཏཏྠ གཱརཝཾ ཛནེཏྭཱ. མཱནེཏྭཱཏི མནེན པིཡཾ ཀཏྭཱ. པཱུཛེཏྭཱཏི ཨིམེསཾཡེཝ ཏིཎྞཾ ཀིཙྩཱནཾ ཀརཎེན པཱུཛེཏྭཱ. ཨནཏིཀྐམནཱིཡོཏི ན ཨཏིཀྐམིཏབྦོ.

ཨབྷིཀྑུཀེ ཨཱཝཱསེཏི ཨེཏྠ སཙེ བྷིཀྑུནུཔསྶཡཏོ ཨཌྜྷཡོཛནབྦྷནྟརེ ཨོཝཱདདཱཡཀཱ བྷིཀྑཱུ ན ཝསནྟི, ཨཡཾ ཨབྷིཀྑུཀོ ¶ ཨཱཝཱསོ ནཱམ. ཨེཏྠ ཝསྶཾ ན ཝསིཏབྦཾ. ཝུཏྟཉྷེཏཾ – ‘‘ཨབྷིཀྑུཀོ ནཱམ ཨཱཝཱསོ ན སཀྐཱ ཧོཏི ཨོཝཱདཱཡ ཝཱ སཾཝཱསཱཡ ཝཱ གནྟུ’’ནྟི (པཱཙི. ༡༠༤༨). ན ཙ སཀྐཱ ཏཏོ པརཾ པཙྪཱབྷཏྟཾ གནྟྭཱ དྷམྨཾ སུཏྭཱ ཨཱགནྟུཾ. སཙེ ཏཏྠ ཝསྶཾ ཝསིཏུཾ ཨནིཙྪམཱནཱ བྷིཀྑུནིཡོ ཉཱཏཀཱ ཝཱ ཨུཔཊྛཱཀཱ ཝཱ ཨེཝཾཝདནྟི – ‘‘ཝསཐ, ཨཡྻེ, མཡཾ བྷིཀྑཱུ ཨཱནེསྶཱམཱ’’ཏི ཝཊྚཏི. སཙེ པན ཝུཏྟཔྤམཱཎེ པདེསེ ཝསྶཾ ཨུཔགནྟུཀཱམཱ བྷིཀྑཱུ ཨཱགནྟྭཱ སཱཁཱམཎྜཔེཔི ཨེཀརཏྟཾ ཝུཏྠཱ ཧོནྟི; ན ནིམནྟིཏཱ ཧུཏྭཱ གནྟུཀཱམཱ. ཨེཏྟཱཝཏཱཔི སབྷིཀྑུཀོ ཨཱཝཱསོ ཧོཏི, ཨེཏྠ ཝསྶཾ ཨུཔགནྟུཾ ཝཊྚཏི. ཨུཔགཙྪནྟཱིཧི ཙ པཀྑསྶ ཏེརསིཡཾཡེཝ བྷིཀྑཱུ ཡཱཙིཏབྦཱ – ‘‘མཡཾ ཨཡྻཱ ཏུམྷཱཀཾ ཨོཝཱདེན ¶ ཝསིསྶཱམཱ’’ཏི. ཡཏོ པན ཨུཛུནཱ མགྒེན ཨཌྜྷཡོཛནེ བྷིཀྑཱུནཾ ཝསནཊྛཱནཾ, ཏེན པན མགྒེན གཙྪནྟཱིནཾ ཛཱིཝིཏནྟརཱཡོ ཝཱ བྲཧྨཙརིཡནྟརཱཡོ ཝཱ ཧོཏི, ཨཉྙེན མགྒེན གཙྪནྟཱིནཾ ¶ ཨཏིརེཀཌྜྷཡོཛནཾ ཧོཏི, ཨཡཾ ཨབྷིཀྑུཀཱཝཱསཊྛཱནེཡེཝ ཏིཊྛཏི. སཙེ པན ཏཏོ གཱཝུཏམཏྟེ ཨཉྙོ བྷིཀྑུནུཔསྶཡོ ཁེམཊྛཱནེ ཧོཏི, ཏཱཧི བྷིཀྑུནཱིཧི ཏཱ བྷིཀྑུནིཡོ ཡཱཙིཏྭཱ པུན གནྟྭཱ བྷིཀྑཱུ ཡཱཙིཏབྦཱ ‘‘ཨཡྻཱ ཨམྷཱཀཾ ཨུཛུམགྒེ ཨནྟརཱཡོ ཨཏྠི, ཨཉྙེན མགྒེན ཨཏིརེཀཌྜྷཡོཛནཾ ཧོཏི. ཨནྟརཱམགྒེ པན ཨམྷཱཀཾ ཨུཔསྶཡཏོ གཱཝུཏམཏྟེ ཨཉྙོ བྷིཀྑུནུཔསྶཡོ ཨཏྠི, ཨཡྻཱནཾ སནྟིཀཱ ཏཏྠ ཨཱགཏཨོཝཱདེན ཝསིསྶཱམཱ’’ཏི. ཏེཧི བྷིཀྑཱུཧི སམྤཊིཙྪིཏབྦཾ. ཏཏོ ཏཱཧི བྷིཀྑུནཱིཧི ཏཾ བྷིཀྑུནུཔསྶཡཾ ཨཱགནྟྭཱ ཨུཔོསཐོ ཀཱཏབྦོ, ཏཱ ཝཱ བྷིཀྑུནིཡོ དིསྭཱ ཨཏྟནོ ཨུཔསྶཡམེཝ གནྟྭཱ ཀཱཏུམྤི ཝཊྚཏི.

སཙེ པན ཝསྶཾ ཨུཔགནྟུཀཱམཱ བྷིཀྑཱུ ཙཱཏུདྡསེ ཝིཧཱརཾ ཨཱགཙྪནྟི, བྷིཀྑུནཱིཧི ཙ ‘‘ཨིདྷ ཨཡྻཱ ཝསྶཾ ཝསིསྶཐཱ’’ཏི པུཙྪིཏཱ ‘‘ཨཱམཱ’’ཏི ཝཏྭཱ པུན ཏཱཧི ‘‘ཏེནཧི ཨཡྻཱ མཡམྤི ཏུམྷཱཀཾ ཨོཝཱདཾ ཨནུཛཱིཝནྟིཡོ ཝསིསྶཱམཱ’’ཏི ཝུཏྟཱ དུཏིཡདིཝསེ གཱམེ བྷིཀྑཱཙཱརསམྤདཾ ཨཔསྶནྟཱ ‘‘ན སཀྐཱ ཨིདྷ ཝསིཏུ’’ནྟི པཀྐམནྟི. ཨཐ ཏཱ བྷིཀྑུནིཡོ ཨུཔོསཐདིཝསེ ཝིཧཱརཾ གནྟྭཱ བྷིཀྑཱུ ན པསྶནྟི, ཨེཏྠ ཀིཾ ཀཱཏབྦནྟི? ཡཏྠ བྷིཀྑཱུ ཝསནྟི, ཏཏྠ གནྟྭཱ པཙྪིམིཀཱཡ ཝསྶཾ ཨུཔགནྟབྦཾ. ‘‘པཙྪིམིཀཱཡ ཝསྶཾ ཨུཔགནྟུཾ ཨཱགམིསྶནྟཱི’’ཏི ཝཱ ཨཱབྷོགཾ ཀཏྭཱ ཨཱགཏཱནཾ ¶ སནྟིཀེ ཨོཝཱདེན ཝསིཏབྦཾ. སཙེ པན པཙྪིམིཀཱཡཔི ན ཀེཙི ཨཱགཙྪནྟི, ཨནྟརཱམགྒེ ཙ རཱཛབྷཡཾ ཝཱ ཙོརབྷཡཾ ཝཱ དུབྦྷིཀྑཾ ཝཱ ཧོཏི, ཨབྷིཀྑུཀཱཝཱསེ ཝསནྟིཡཱ ཨཱཔཏྟི, ཝསྶཙྪེདཾ ཀཏྭཱ གཙྪནྟིཡཱཔི ཨཱཔཏྟི, སཱ རཀྑིཏབྦཱ. ཨཱཔདཱསུ ཧི ཨབྷིཀྑུཀེ ཨཱཝཱསེ ཝསནྟིཡཱ ཨནཱཔཏྟི ཝུཏྟཱ. སཙེ ཨཱགནྟྭཱ ཝསྶཾ ཨུཔགཏཱ བྷིཀྑཱུ པུན ཀེནཙི ཀཱརཎེན པཀྐམནྟི, ཝསིཏབྦམེཝ. ཝུཏྟཉྷེཏཾ – ‘‘ཨནཱཔཏྟི ཝསྶཱུཔགཏཱ བྷིཀྑཱུ པཀྐནྟཱ ཝཱ ཧོནྟི ཝིབྦྷནྟཱ ཝཱ ཀཱལངྐཏཱ ཝཱ པཀྑསངྐནྟཱ ཝཱ ཨཱཔདཱསུ ཨུམྨཏྟིཀཱཡ ཨཱདིཀམྨིཀཱཡཱ’’ཏི. པཝཱརེནྟིཡཱ པན ཡཏྠ བྷིཀྑཱུ ཨཏྠི, ཏཏྠ གནྟྭཱ པཝཱརེཏབྦཾ.

ཨནྭདྡྷམཱསནྟི ཨདྡྷམཱསེ ཨདྡྷམཱསེ. དྭེ དྷམྨཱ པཙྩཱསཱིསིཏབྦཱཏི དྭེ དྷམྨཱ ཨིཙྪིཏབྦཱ. ཨུཔོསཐཔུཙྪཀནྟི ཨུཔོསཐཔུཙྪནཾ, ཏཏྠ པནྣརསིཀེ ཨུཔོསཐེ པཀྑསྶ ཙཱཏུདྡསིཡཾ ཙཱཏུདྡསིཀེ ཏེརསིཡཾ གནྟྭཱ ཨུཔོསཐོ ¶ པུཙྪིཏབྦོ. མཧཱཔཙྩརིཡཾ པན ‘‘པཀྑསྶ ཏེརསིཡཾཡེཝ གནྟྭཱ ‘ཨཡཾ ཨུཔོསཐོ ཙཱཏུདྡསིཀོ པནྣརསིཀོ’ཏི པུཙྪིཏབྦ’’ནྟི ཝུཏྟཾ. ཨུཔོསཐདིཝསེ ¶ ཨོཝཱདཏྠཱཡ ཨུཔསངྐམིཏབྦཾ. པཱཊིཔདདིཝསཏོ པན པཊྛཱཡ དྷམྨསཝནཏྠཱཡ གནྟབྦཾ. ཨིཏི བྷགཝཱ ཨཉྙསྶ ཀམྨསྶ ཨོཀཱསཾ ཨདཏྭཱ ནིརནྟརཾ བྷིཀྑུནཱིནཾ བྷིཀྑཱུནཾ སནྟིཀེ གམནམེཝ པཉྙཔེསི. ཀསྨཱ? མནྡཔཉྙཏྟཱ མཱཏུགཱམསྶ. མནྡཔཉྙོ ཧི མཱཏུགཱམོ, ཏསྨཱ ནིཙྩཾ དྷམྨསཝནཾ བཧཱུཔཀཱརཾ. ཨེཝཉྩ སཏི ‘‘ཡཾ མཡཾ ཛཱནཱམ, ཏམེཝ ཨཡྻཱ ཛཱནནྟཱི’’ཏི མཱནཾ ཨཀཏྭཱ བྷིཀྑུསངྒྷཾ པཡིརཱུཔཱསམཱནཱ སཱཏྠིཀཾ པབྦཛྫཾ ཀརིསྶནྟི, ཏསྨཱ བྷགཝཱ ཨེཝམཀཱསི. བྷིཀྑུནིཡོཔི ‘‘ཡཐཱནུསིཊྛཾ པཊིཔཛྫིསྶཱམཱ’’ཏི སབྦཱཡེཝ ནིརནྟརཾ ཝིཧཱརཾ ཨུཔསངྐམིཾསུ. ཝུཏྟཉྷེཏཾ –

‘‘ཏེན ཁོ པན སམཡེན སབྦོ བྷིཀྑུནིསངྒྷོ ཨོཝཱདཾ གཙྪཏི. མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི ‘ཛཱཡཱཡོ ཨིམཱ ཨིམེསཾ, ཛཱརིཡོ ཨིམཱ ཨིམེསཾ, ཨིདཱནིམེ ཨིམཱཧི སདྡྷིཾ ཨབྷིརམིསྶནྟཱི’ཏི. བྷགཝཏོ ཨེཏམཏྠཾ ཨཱརོཙེསུཾ – ‘ན, བྷིཀྑཝེ, སབྦེན བྷིཀྑུནིསངྒྷེན ཨོཝཱདོ གནྟབྦོ, གཙྪེཡྻ ཙེ, ཨཱཔཏྟི དུཀྐཊསྶ. ཨནུཛཱནཱམི བྷིཀྑཝེ ཙཏཱུཧི པཉྩཧི བྷིཀྑུནཱིཧི ¶ ཨོཝཱདཾ གནྟུ’ནྟི. པུནཔི ཏཐེཝ ཨུཛ྄ཛྷཱཡིཾསུ. པུན བྷགཝཱ ‘ཨནུཛཱནཱམི, བྷིཀྑཝེ, དྭེ ཏིསྶོ བྷིཀྑུནིཡོ ཨོཝཱདཾ གནྟུ’’’ནྟི ཨཱཧ.

ཏསྨཱ བྷིཀྑུནིསངྒྷེན དྭེ ཏིསྶོ བྷིཀྑུནིཡོ ཡཱཙིཏྭཱ པེསེཏབྦཱ – ‘‘ཨེཐཡྻེ, བྷིཀྑུསངྒྷཾ ཨོཝཱདཱུཔསངྐམནཾ ཡཱཙཐ, བྷིཀྑུནིསངྒྷོ ཨཡྻཱ…པེ… ཨོཝཱདཱུཔསངྐམན’’ནྟི (ཙཱུལ༹ཝ. ༤༡༣). ཏཱཧི བྷིཀྑུནཱིཧི ཨཱརཱམཾ གནྟབྦཾ. ཏཏོ ཨོཝཱདཔཊིགྒཱཧཀཾ ཨེཀཾ བྷིཀྑུཾ ཨུཔསངྐམིཏྭཱ ཝནྡིཏྭཱ སོ བྷིཀྑུ ཨེཀཱཡ བྷིཀྑུནིཡཱ ཨེཝམསྶ ཝཙནཱིཡོ ‘‘བྷིཀྑུནིསངྒྷོ, ཨཡྻ, བྷིཀྑུསངྒྷསྶ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར ཨཡྻ བྷིཀྑུནིསངྒྷོ ཨོཝཱདཱུཔསངྐམན’’ནྟི. ཏེན བྷིཀྑུནཱ པཱཏིམོཀྑུདྡེསཀོ བྷིཀྑུ ཨུཔསངྐམིཏྭཱ ཨེཝམསྶ ཝཙནཱིཡོ ‘‘བྷིཀྑུནིསངྒྷོ བྷནྟེ བྷིཀྑུསངྒྷསྶ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར བྷནྟེ བྷིཀྑུནིསངྒྷོ ཨོཝཱདཱུཔསངྐམན’’ནྟི. པཱཏིམོཀྑུདྡེསཀེན ཝཏྟབྦོ ‘‘ཨཏྠི ཀོཙི བྷིཀྑུ བྷིཀྑུནོཝཱདཀོ སམྨཏོ’’ཏི. སཙེ ཧོཏི ཀོཙི བྷིཀྑུ ¶ བྷིཀྑུནོཝཱདཀོ སམྨཏོ, པཱཏིམོཀྑུདྡེསཀེན ཝཏྟབྦོ ‘‘ཨིཏྠནྣཱམོ བྷིཀྑུ བྷིཀྑུནོཝཱདཀོ སམྨཏོ, ཏཾ བྷིཀྑུནིསངྒྷོ ཨུཔསངྐམཏཱུ’’ཏི.

སཙེ ན ཧོཏི ཀོཙི བྷིཀྑུ བྷིཀྑུནོཝཱདཀོ སམྨཏོ, པཱཏིམོཀྑུདྡེསཀེན ཝཏྟབྦོ – ‘‘ཀོ ¶ ཨཱཡསྨཱ ཨུསྶཧཏི བྷིཀྑུནིཡོ ཨོཝདིཏུ’’ནྟི. སཙེ ཀོཙི བྷིཀྑུ ཨུསྶཧཏི བྷིཀྑུནིཡོ ཨོཝདིཏུཾ, སོ ཙ ཧོཏི ཨཊྛཧངྒེཧི སམནྣཱགཏོ, སམྨནྣིཏྭཱ ཝཏྟབྦོ – ‘‘ཨིཏྠནྣཱམོ བྷིཀྑུ བྷིཀྑུནོཝཱདཀོ སམྨཏོ, ཏཾ བྷིཀྑུནིསངྒྷོ ཨུཔསངྐམཏཱུ’’ཏི.

སཙེ པན ཀོཙི ན ཨུསྶཧཏི བྷིཀྑུནིཡོ ཨོཝདིཏུཾ, པཱཏིམོཀྑུདྡེསཀེན ཝཏྟབྦོ – ‘‘ནཏྠི ཀོཙི བྷིཀྑུ བྷིཀྑུནོཝཱདཀོ སམྨཏོ, པཱསཱདིཀེན བྷིཀྑུནིསངྒྷོ སམྤཱདེཏཱུ’’ཏི. ཨེཏྟཱཝཏཱ ཧི སཀལཾ སིཀྑཏྟཡསངྒཧཾ སཱསནམཱརོཙིཏཾ ཧོཏི. ཏེན བྷིཀྑུནཱ ‘‘སཱདྷཱུ’’ཏི སམྤཊིཙྪིཏྭཱ པཱཊིཔདེ བྷིཀྑུནཱིནཾ ཨཱརོཙེཏབྦཾ. བྷིཀྑུནིསངྒྷེནཔི ཏཱ བྷིཀྑུནིཡོ པེསེཏབྦཱ ‘‘གཙྪཐཡྻེ, པུཙྪཐ ‘ཀིཾ ¶ ཨཡྻ ལབྷཏི བྷིཀྑུནིསངྒྷོ ཨོཝཱདཱུཔསངྐམན’’’ནྟི. ཏཱཧི ‘‘སཱདྷུ ཨཡྻེ’’ཏི སམྤཊིཙྪིཏྭཱ ཨཱརཱམཾ གནྟྭཱ ཏཾ བྷིཀྑུཾ ཨུཔསངྐམིཏྭཱ ཨེཝཾ ཝཏྟབྦཾ – ‘‘ཀིཾ ཨཡྻ ལབྷཏི བྷིཀྑུནིསངྒྷོ ཨོཝཱདཱུཔསངྐམན’’ནྟི. ཏེན ཝཏྟབྦཾ – ‘‘ནཏྠི ཀོཙི བྷིཀྑུ བྷིཀྑུནོཝཱདཀོ སམྨཏོ, པཱསཱདིཀེན བྷིཀྑུནིསངྒྷོ སམྤཱདེཏཱུ’’ཏི. ཏཱཧི ‘‘སཱདྷུ ཨཡྻཱ’’ཏི སམྤཊིཙྪིཏབྦཾ. ཨེཀཏོ ཨཱགཏཱནཾ ཝསེན ཙེཏཾ ཝུཏྟཾ, ཏཱསུ པན ཨེཀཱཡ བྷིཀྑུནིཡཱ ཝཏྟབྦཉྩ སམྤཊིཙྪིཏབྦཉྩ, ཨིཏརཱ ཏསྶཱ སཧཱཡིཀཱ.

སཙེ པན བྷིཀྑུནིསངྒྷོ ཝཱ བྷིཀྑུསངྒྷོ ཝཱ ན པཱུརཏི, ཨུབྷཡཏོཔི ཝཱ གཎམཏྟམེཝ པུགྒལམཏྟཾ ཝཱ ཧོཏི, ཨེཀཱ བྷིཀྑུནཱི ཝཱ བཧཱུཧི བྷིཀྑུནུཔསྶཡེཧི ཨོཝཱདཏྠཱཡ པེསིཏཱ ཧོཏི, ཏཏྲཱཡཾ ཝཙནཀྐམོ – ‘‘བྷིཀྑུནིཡོ ཨཡྻ བྷིཀྑུསངྒྷསྶ པཱདེ ཝནྡནྟི, ཨོཝཱདཱུཔསངྐམནཉྩ ཡཱཙནྟི, ལབྷནྟུ ཀིར ཨཡྻ བྷིཀྑུནིཡོ ཨོཝཱདཱུཔསངྐམན’’ནྟི. ‘‘ཨཧཾ ཨཡྻ བྷིཀྑུསངྒྷསྶ པཱདེ ཝནྡཱམི; ཨོཝཱདཱུཔསངྐམནཉྩ ཡཱཙཱམི, ལབྷཱམཧཾ ཨཡྻ ཨོཝཱདཱུཔསངྐམན’’ནྟི.

‘‘བྷིཀྑུནིསངྒྷོ ¶ ཨཡྻ ཨཡྻཱནཾ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར ཨཡྻ བྷིཀྑུནཱིསངྒྷོ ཨོཝཱདཱུཔསངྐམན’’ནྟི. ‘‘བྷིཀྑུནིཡོ ཨཡྻ ཨཡྻཱནཾ པཱདེ ཝནྡནྟི, ཨོཝཱདཱུཔསངྐམནཉྩ ཡཱཙནྟི, ལབྷནྟུ ཀིར ཨཡྻ བྷིཀྑུནིཡོ ཨོཝཱདཱུཔསངྐམན’’ནྟི. ‘‘ཨཧཾ ཨཡྻ ཨཡྻཱནཾ པཱདེ ཝནྡཱམི, ཨོཝཱདཱུཔསངྐམནཉྩ ཡཱཙཱམི, ལབྷཱམཧཾ ཨཡྻ ཨོཝཱདཱུཔསངྐམན’’ནྟི.

‘‘བྷིཀྑུནིསངྒྷོ ཨཡྻ ཨཡྻསྶ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར ཨཡྻ བྷིཀྑུནིསངྒྷོ ཨོཝཱདཱུཔསངྐམན’’ནྟི. ‘‘བྷིཀྑུནིཡོ ཨཡྻ ཨཡྻསྶ པཱདེ ཝནྡནྟི ¶ ; ཨོཝཱདཱུཔསངྐམནཉྩ ཡཱཙནྟི, ལབྷནྟུ ཀིར ཨཡྻ བྷིཀྑུནིཡོ ཨོཝཱདཱུཔསངྐམན’’ནྟི. ‘‘ཨཧཾ ཨཡྻ ཨཡྻསྶ པཱདེ ཝནྡཱམི, ཨོཝཱདཱུཔསངྐམནཉྩ ཡཱཙཱམི, ལབྷཱམཧཾ ཨཡྻ ཨོཝཱདཱུཔསངྐམན’’ནྟི.

‘‘བྷིཀྑུནིསངྒྷོ ཙ ཨཡྻ བྷིཀྑུནིཡོ ཙ བྷིཀྑུནཱི ཙ བྷིཀྑུསངྒྷསྶ ཨཡྻཱནཾ ཨཡྻསྶ པཱདེ ཝནྡཏི ཝནྡནྟི ཝནྡཏི, ཨོཝཱདཱུཔསངྐམནཉྩ ཡཱཙཏི ཡཱཙནྟི ཡཱཙཏི, ལབྷཏུ ཀིར ལབྷནྟུ ཀིར ལབྷཏུ ཀིར ཨཡྻ བྷིཀྑུནིསངྒྷོ ཙ བྷིཀྑུནིཡོ ཙ བྷིཀྑུནཱི ཙ ཨོཝཱདཱུཔསངྐམན’’ནྟི.

ཏེནཔི བྷིཀྑུནཱ ཨུཔོསཐཀཱལེ ཨེཝཾ ཝཏྟབྦཾ – ‘‘བྷིཀྑུནིཡོ བྷནྟེ བྷིཀྑུསངྒྷསྶ པཱདེ ཝནྡནྟི, ཨོཝཱདཱུཔསངྐམནཉྩ ཡཱཙནྟི, ལབྷནྟུ ཀིར བྷནྟེ བྷིཀྑུནིཡོ ཨོཝཱདཱུཔསངྐམན’’ནྟི. ‘‘བྷིཀྑུནཱི བྷནྟེ བྷིཀྑུསངྒྷསྶ པཱདེ ¶ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར བྷནྟེ བྷིཀྑུནཱི ཨོཝཱདཱུཔསངྐམན’’ནྟི.

‘‘བྷིཀྑུནིསངྒྷོ བྷནྟེ, བྷིཀྑུནིཡོ བྷནྟེ, བྷིཀྑུནཱི བྷནྟེ ཨཱཡསྨནྟཱནཾ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར བྷནྟེ བྷིཀྑུནཱི ཨོཝཱདཱུཔསངྐམན’’ནྟི.

‘‘བྷིཀྑུནིསངྒྷོ ཙ བྷནྟེ, བྷིཀྑུནིཡོ ཙ བྷིཀྑུནཱི ཙ བྷིཀྑུསངྒྷསྶ ཨཱཡསྨནྟཱནཾ པཱདེ ཝནྡཏི ཝནྡནྟི ཝནྡཏི, ཨོཝཱདཱུཔསངྐམནཉྩ ཡཱཙཏི ཡཱཙནྟི ཡཱཙཏི, ལབྷཏུ ཀིར ལབྷནྟུ ཀིར ལབྷཏུ ཀིར བྷནྟེ བྷིཀྑུནིསངྒྷོ ཙ བྷིཀྑུནིཡོ ཙ བྷིཀྑུནཱི ཙ ཨོཝཱདཱུཔསངྐམན’’ནྟི.

པཱཏིམོཀྑུདྡེསཀེནཱཔི སཙེ སམྨཏོ བྷིཀྑུ ཨཏྠི, པུརིམནཡེནེཝ ཏཾ བྷིཀྑུནིཡོ, ཏཾ བྷིཀྑུནཱི, ཏཾ བྷིཀྑུནིསངྒྷོ ཙ བྷིཀྑུནིཡོ ཙ བྷིཀྑུནཱི ཙ ཨུཔསངྐམནྟུ ཨུཔསངྐམཏུ ཨུཔསངྐམཏཱུཏི ཝཏྟབྦཾ. སཙེ ནཏྠི, པཱསཱདིཀེན ¶ བྷིཀྑུནིསངྒྷོ ཙ བྷིཀྑུནིཡོ ཙ བྷིཀྑུནཱི ཙ སམྤཱདེཏུ སམྤཱདེནྟུ སམྤཱདེཏཱུཏི ཝཏྟབྦཾ.

ཨོཝཱདཔཊིགྒཱཧཀེན པཱཊིཔདེ པཙྩཱཧརིཏྭཱ ཏཐེཝ ཝཏྟབྦཾ. ཨོཝཱདཾ པན བཱལགིལཱནགམིཀེ ཋཔེཏྭཱ ཨཉྙོ སཙེཔི ཨཱརཉྙཀོ ཧོཏི, ཨཔྤཊིགྒཧེཏུཾ ན ལབྷཏི. ཝུཏྟཉྷེཏཾ བྷགཝཏཱ –

‘‘ཨནུཛཱནཱམི ¶ , བྷིཀྑཝེ, ཋཔེཏྭཱ བཱལཾ ཋཔེཏྭཱ གིལཱནཾ ཋཔེཏྭཱ གམིཀཾ ཨཝསེསེཧི ཨོཝཱདཾ གཧེཏུ’’ནྟི (ཙཱུལ༹ཝ. ༤༡༤).

ཏཏྠ ཡོ ཙཱཏུདྡསིཀཔནྣརསིཀེསུ ཝཱ ཨུཔོསཐེསུ པཱཊིཔདེ ཝཱ གནྟུཀཱམོ, སོ གམིཀོ དུཏིཡཔཀྑདིཝསེ གཙྪནྟོཔི ཨགྒཧེཏུཾ ན ལབྷཏི, ‘‘ན, བྷིཀྑཝེ, ཨོཝཱདོ ན གཧེཏབྦོ, ཡོ ན གཎྷེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༤༡༤) ཝུཏྟཾ ཨཱཔཏྟིཾ ཨཱཔཛྫཏིཡེཝ. ཨོཝཱདཾ གཧེཏྭཱ ཙ ཨུཔོསཐགྒེ ཨནཱརོཙེཏུཾ ཝཱ པཱཊིཔདེ བྷིཀྑུནཱིནཾ ཨཔཙྩཱཧརིཏུཾ ཝཱ ན ཝཊྚཏི. ཝུཏྟཉྷེཏཾ ¶ –

‘‘ན, བྷིཀྑཝེ, ཨོཝཱདོ ན ཨཱརོཙེཏབྦོ. ཡོ ན ཨཱརོཙེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༤༡༥).

ཨཔརམྤི ཝུཏྟཾ –

‘‘ན, བྷིཀྑཝེ, ཨོཝཱདོ ན པཙྩཱཧརིཏབྦོ. ཡོ ན པཙྩཱཧརེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༤༡༥).

ཏཏྠ ཨཱརཉྙཀེན པཙྩཱཧརཎཏྠཾ སངྐེཏོ ཀཱཏབྦོ. ཝུཏྟཉྷེཏཾ – ‘‘ཨནུཛཱནཱམི, བྷིཀྑཝེ, ཨཱརཉྙཀེན བྷིཀྑུནཱ ཨོཝཱདཾ གཧེཏུཾ, སངྐེཏཉྩ ཀཱཏུཾ, ཨཏྲ པཊིཧརིསྶཱམཱི’’ཏི. ཏསྨཱ ཨཱརཉྙཀོ བྷིཀྑུ སཙེ བྷིཀྑུནཱིནཾ ཝསནགཱམེ བྷིཀྑཾ ལབྷཏི, ཏཏྠེཝ ཙརིཏྭཱ བྷིཀྑུནིཡོ དིསྭཱ ཨཱརོཙེཏྭཱ གནྟབྦཾ. ནོ ཙསྶ ཏཏྠ བྷིཀྑཱ སུལབྷཱ ཧོཏི, སཱམནྟགཱམེ ཙརིཏྭཱ བྷིཀྑུནཱིནཾ གཱམཾ ཨཱགམྨ ཏཐེཝ ཀཱཏབྦཾ. སཙེ དཱུརཾ གནྟབྦཾ ཧོཏི, སངྐེཏོ ཀཱཏབྦོ – ‘‘ཨཧཾ ཨམུཀཾ ནཱམ ཏུམྷཱཀཾ གཱམདྭཱརེ སབྷཾ ཝཱ མཎྜཔཾ ཝཱ རུཀྑམཱུལཾ ཝཱ ཨུཔསངྐམིསྶཱམི, ཏཏྠ ཨཱགཙྪེཡྻཱཐཱ’’ཏི ¶ . བྷིཀྑུནཱིཧི ཏཏྠ གནྟབྦཾ, ཨགནྟུཾ ན ལབྦྷཏི. ཝུཏྟཉྷེཏཾ – ‘‘ན, བྷིཀྑཝེ, བྷིཀྑུནིཡཱ སངྐེཏཾ ན གནྟབྦཾ. ཡཱ ན གཙྪེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༤༡༥).

ཨུབྷཏོསངྒྷེ ཏཱིཧི ཋཱནེཧི པཝཱརེཏབྦནྟི ཨེཏྠ བྷིཀྑུནཱིཧི ཙཱཏུདྡསེ ཨཏྟནཱ པཝཱརེཏྭཱ ཨུཔོསཐེ བྷིཀྑུསངྒྷེ པཝཱརེཏབྦཾ. ཝུཏྟཉྷེཏཾ –

‘‘ཨནུཛཱནཱམི ¶ , བྷིཀྑཝེ, ཨཛྫཏནཱཡ པཝཱརེཏྭཱ ཨཔརཛྫུ བྷིཀྑུསངྒྷཾ པཝཱརེཏུ’’ནྟི (ཙཱུལ༹ཝ. ༤༢༧).

བྷིཀྑུནིཁནྡྷཀེ ཝུཏྟནཡེནེཝ ཙེཏྠ ཝིནིཙྪཡོ ཝེདིཏབྦོ. ཝུཏྟཉྷེཏཾ –

‘‘ཏེན ཁོ པན སམཡེན སབྦོ བྷིཀྑུནིསངྒྷོ པཝཱརེནྟོ ཀོལཱཧལམཀཱསི. བྷགཝཏོ ཨེཏམཏྠཾ ཨཱརོཙེསུཾ. ཨནུཛཱནཱམི, བྷིཀྑཝེ, ཨེཀཾ བྷིཀྑུནིཾ བྱཏྟཾ པཊིབལཾ སམྨནྣིཏུཾ བྷིཀྑུནིསངྒྷསྶ ཨཏྠཱཡ བྷིཀྑུསངྒྷཾ པཝཱརེཏུཾ. ཨེཝཉྩ པན, བྷིཀྑཝེ, སམྨནྣིཏབྦཱ. པཋམཾ བྷིཀྑུནཱི ཡཱཙིཏབྦཱ, ཡཱཙིཏྭཱ བྱཏྟཱཡ བྷིཀྑུནིཡཱ པཊིབལཱཡ སངྒྷོ ཉཱཔེཏབྦོ –

‘‘སུཎཱཏུ མེ, ཨཡྻེ སངྒྷོ, ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཾ བྷིཀྑུནིཾ སམྨནྣེཡྻ བྷིཀྑུནིསངྒྷསྶ ཨཏྠཱཡ བྷིཀྑུསངྒྷཾ པཝཱརེཏུཾ. ཨེསཱ ཉཏྟི.

‘‘སུཎཱཏུ མེ, ཨཡྻེ སངྒྷོ, སངྒྷོ ཨིཏྠནྣཱམཾ བྷིཀྑུནིཾ སམྨནྣེཡྻ བྷིཀྑུནིསངྒྷསྶ ཨཏྠཱཡ བྷིཀྑུསངྒྷཾ པཝཱརེཏུཾ. ཡསྶཱ ཨཡྻཱཡ ཁམཏི ཨིཏྠནྣཱམཱཡ བྷིཀྑུནིཡཱ སམྨུཏི བྷིཀྑུནིསངྒྷསྶ ཨཏྠཱཡ བྷིཀྑུསངྒྷཾ ¶ པཝཱརེཏུཾ, སཱ ཏུཎྷསྶ; ཡསྶཱ ནཀྑམཏི, སཱ བྷཱསེཡྻ.

‘‘སམྨཏཱ སངྒྷེན ཨིཏྠནྣཱམཱ བྷིཀྑུནཱི བྷིཀྑུནིསངྒྷསྶ ཨཏྠཱཡ བྷིཀྑུསངྒྷཾ པཝཱརེཏུཾ. ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི (ཙཱུལ༹ཝ. ༤༢༧).

ཏཱཡ ¶ སམྨཏཱཡ བྷིཀྑུནིཡཱ བྷིཀྑུནིསངྒྷཾ ཨཱདཱཡ བྷིཀྑུསངྒྷཾ ཨུཔསངྐམིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ ཨཉྫལིཾ པགྒཧེཏྭཱ ཨེཝམསྶ ཝཙནཱིཡོ – ‘‘བྷིཀྑུནིསངྒྷོ ཨཡྻ, བྷིཀྑུསངྒྷཾ པཝཱརེཏི – དིཊྛེན ཝཱ སུཏེན ཝཱ པརིསངྐཱཡ ཝཱ. ཝདཏཡྻ བྷིཀྑུསངྒྷོ བྷིཀྑུནིསངྒྷཾ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཏི. དུཏིཡམྤི ཨཡྻ, ཏཏིཡམྤི ཨཡྻ, བྷིཀྑུནིསངྒྷོ…པེ… པཊིཀརིསྶཏཱི’’ཏི.

སཙེ བྷིཀྑུནིསངྒྷོ ན པཱུརཏི, ‘‘བྷིཀྑུནིཡོ ཨཡྻ བྷིཀྑུསངྒྷཾ པཝཱརེནྟི – དིཊྛེན ཝཱ སུཏེན ཝཱ པརིསངྐཱཡ ཝཱ, ཝདཏཡྻ བྷིཀྑུསངྒྷོ བྷིཀྑུནིཡོ ཨནུཀམྤཾ ཨུཔཱདཱཡ, པསྶནྟིཡོ ¶ པཊིཀརིསྶནྟཱི’’ཏི ཙ, ‘‘ཨཧཾ ཨཡྻ བྷིཀྑུསངྒྷཾ པཝཱརེམི – དིཊྛེན ཝཱ སུཏེན ཝཱ པརིསངྐཱཡ ཝཱ, ཝདཏུ མཾ ཨཡྻ བྷིཀྑུསངྒྷོ ཨནུཀམྤཾ ཨུཔཱདཱཡ, པསྶནྟཱི པཊིཀརིསྶཱམཱི’’ཏི ཙ ཨེཝཾ ཏིཀྑཏྟུཾ ཝཏྟབྦཾ.

སཙེ བྷིཀྑུསངྒྷོ ན པཱུརཏི, ‘‘བྷིཀྑུནིསངྒྷོ ཨཡྻཱ ཨཡྻེ པཝཱརེཏི – དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟཡྻཱ བྷིཀྑུནིསངྒྷཾ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཏཱི’’ཏི ཙ, ‘‘བྷིཀྑུནིསངྒྷོ ཨཡྻ ཨཡྻཾ པཝཱརེཏི – དིཊྛེན ཝཱ སུཏེན ཝཱ པརིསངྐཱཡ ཝཱ, ཝདཏཡྻོ བྷིཀྑུནིསངྒྷཾ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཏཱི’’ཏི ཙ ཨེཝཾ ཏིཀྑཏྟུཾ ཝཏྟབྦཾ.

ཨུབྷིནྣཾ ཨཔཱརིཔཱུརིཡཱ ‘‘བྷིཀྑུནིཡོ ཨཡྻཱ ཨཡྻེ པཝཱརེནྟི – དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟཡྻཱ བྷིཀྑུནིཡོ ཨནུཀམྤཾ ཨུཔཱདཱཡ, པསྶནྟིཡོ པཊིཀརིསྶནྟཱི’’ཏི ཙ, ‘‘བྷིཀྑུནིཡོ ཨཡྻ ཨཡྻཾ པཝཱརེནྟི – དིཊྛེན ཝཱ སུཏེན ཝཱ པརིསངྐཱཡ ཝཱ, ཝདཏཡྻོ བྷིཀྑུནིཡོ ཨནུཀམྤཾ ཨུཔཱདཱཡ, པསྶནྟིཡོ པཊིཀརིསྶནྟཱི’’ཏི ཙ, ‘‘ཨཧཾ ཨཡྻཱ ཨཡྻེ པཝཱརེམི – དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཡྻཱ ཨནུཀམྤཾ ཨུཔཱདཱཡ, པསྶནྟཱི པཊིཀརིསྶཱམཱི’’ཏི ཙ, ‘‘ཨཧཾ ཨཡྻ ཨཡྻཾ པཝཱརེམི – དིཊྛེན ¶ ཝཱ སུཏེན ཝཱ པརིསངྐཱཡ ཝཱ, ཝདཏུ མཾ ཨཡྻོ ཨནུཀམྤཾ ཨུཔཱདཱཡ, པསྶནྟཱི པཊིཀརིསྶཱམཱི’’ཏི ཙ ཨེཝཾ ཏིཀྑཏྟུཾ ཝཏྟབྦཾ.

མཱནཏྟཙརཎཉྩ ཨུཔསམྤདཱཔརིཡེསནཱ ཙ ཡཐཱཋཱནེཡེཝ ཨཱཝི བྷཝིསྶཏི.

ན ¶ བྷིཀྑུནིཡཱ ཀེནཙི པརིཡཱཡེནཱཏི དསཧི ཝཱ ཨཀྐོསཝཏྠཱུཧི ཨཉྙེན ཝཱ ཀེནཙི པརིཡཱཡེན བྷིཀྑུ ནེཝ ཨཀྐོསིཏབྦོ, ན པརིབྷཱསིཏབྦོ, ན བྷཡེན ཏཛྫེཏབྦོ. ཨོཝཊོཏི པིཧིཏོ ཝཱརིཏོ པཊིཀྑིཏྟོ. ཝཙནཡེཝ ཝཙནཔཐོ. ཨནོཝཊོཏི ཨཔིཧིཏོ ཨཝཱརིཏོ ཨཔྤཊིཀྑིཏྟོ. ཏསྨཱ བྷིཀྑུནིཡཱ ཨཱདྷིཔཙྩཊྛཱནེ ཛེཊྛཀཊྛཱནེ ཋཏྭཱ ‘‘ཨེཝཾ ཨབྷིཀྐམ, ཨེཝཾ པཊིཀྐམ, ཨེཝཾ ནིཝཱསེཧི, ཨེཝཾ པཱརུཔཱཧཱི’’ཏི ཀེནཙི པརིཡཱཡེན ནེཝ བྷིཀྑུ ཨོཝདིཏབྦོ, ན ཨནུསཱསིཏབྦོ. དོསཾ པན དིསྭཱ ‘‘པུབྦེ མཧཱཐེརཱ ན ཨེཝཾ ཨབྷིཀྐམནྟི, ན པཊིཀྐམནྟི, ན ནིཝཱསེནྟི, ན པཱརུཔནྟི, ཨཱིདིསཾ ཀཱསཱཝམྤི ན དྷཱརེནྟི, ན ཨེཝཾ ཨཀྑཱིནི ཨཉྫེནྟཱི’’ཏིཨཱདིནཱ ནཡེན ཝིཛྫམཱནདོསཾ དསྶེཏུཾ ཝཊྚཏི. བྷིཀྑཱུཧི པན ‘‘ཨཡཾ ཝུཌྜྷསམཎཱི ཨེཝཾ ནིཝཱསེཏི, ཨེཝཾ པཱརུཔཏི, མཱ ཨེཝཾ ནིཝཱསེཧི, མཱ ཨེཝཾ ¶ པཱརུཔཱཧི, མཱ ཏིལཀམྨཔཎྞཀམྨཱདཱིནི ཀརོཧཱི’’ཏི ཡཐཱསུཁཾ བྷིཀྑུནིཾ ཨོཝདིཏུཾ ཨནུསཱསིཏུཾ ཝཊྚཏི.

སམགྒམྷཡྻཱཏི བྷཎནྟནྟི ‘‘སམགྒཱ ཨམྷ ཨཡྻ’’ ཨིཏི བྷཎནྟཾ བྷིཀྑུནིསངྒྷཾ. ཨཉྙཾ དྷམྨཾ བྷཎཏཱིཏི ཨཉྙཾ སུཏྟནྟཾ ཝཱ ཨབྷིདྷམྨཾ ཝཱ. སམགྒམྷཡྻཱཏི ཝཙནེན ཧི ཨོཝཱདཾ པཙྩཱསཱིསནྟི, ཏསྨཱ ཋཔེཏྭཱ ཨོཝཱདཾ ཨཉྙཾ དྷམྨཾ བྷཎནྟསྶ དུཀྐཊཾ. ཨོཝཱདཾ ཨནིཡྻཱདེཏྭཱཏི ཨེསོ བྷགིནིཡོ ཨོཝཱདོཏི ཨཝཏྭཱ.

༡༥༠. ཨདྷམྨཀམྨེཏིཨཱདཱིསུ བྷིཀྑུནོཝཱདཀསམྨུཏིཀམྨཾ ཀམྨནྟི ཝེདིཏབྦཾ. ཏཏྠ ཨདྷམྨཀམྨེ དྭིནྣཾ ནཝཀཱནཾ ཝསེན ཨཊྛཱརས པཱཙིཏྟིཡཱནི. དྷམྨཀམྨེ དུཏིཡསྶ ནཝཀསྶ ཨཝསཱནཔདེ ཨནཱཔཏྟི, སེསེསུ སཏྟརས དུཀྐཊཱནི.

༡༥༢. ཨུདྡེསཾ དེནྟོཏི ཨཊྛནྣཾ གརུདྷམྨཱནཾ པཱལི༹ཾ ཨུདྡིསནྟོ. པརིཔུཙྪཾ དེནྟོཏི ཏསྶཱཡེཝ པགུཎཱཡ གརུདྷམྨཔཱལི༹ཡཱ ཨཊྛཀཐཾ ཀཐེནྟོཏི ཨཏྠོ. ཨོསཱརེཧི ཨཡྻཱཏི ཝུཙྩམཱནོ ཨོསཱརེཏཱིཏི ཨེཝཾ ཝུཙྩམཱནོ ཨཊྛགརུདྷམྨཔཱལི༹ཾ ¶ ཨོསཱརེཏཱིཏི ཨཏྠོ. ཨེཝཾ ཨུདྡེསཾ དེནྟོ, པརིཔུཙྪཾ དེནྟོ, ཡོ ཙ ཨོསཱརེཧཱིཏི ཝུཙྩམཱནོ ཨཊྛ གརུདྷམྨེ བྷཎཏི, ཏསྶ པཱཙིཏྟིཡེན ཨནཱཔཏྟི. ཨཉྙཾ དྷམྨཾ བྷཎནྟསྶ དུཀྐཊེན ཨནཱཔཏྟི. པཉྷཾ པུཙྪཏི, པཉྷཾ པུཊྛོ ཀཐེཏཱིཏི བྷིཀྑུནཱི གརུདྷམྨནིསྶིཏཾ ཝཱ ཁནྡྷཱདིནིསྶིཏཾ ཝཱ པཉྷཾ པུཙྪཏི, ཏཾ ཡོ བྷིཀྑུ ཀཐེཏི, ཏསྶཱཔི ¶ ཨནཱཔཏྟི. ཨཉྙསྶཏྠཱཡ བྷཎནྟནྟི ཙཏུཔརིསཏིཾ དྷམྨཾ དེསེནྟཾ བྷིཀྑུཾ ཨུཔསངྐམིཏྭཱ བྷིཀྑུནིཡོ སུཎནྟི, ཏཏྲཱཔི བྷིཀྑུསྶ ཨནཱཔཏྟི. སིཀྑམཱནཱཡ སཱམཎེརིཡཱཏི ཨེཏཱསཾ དེསེནྟསྶཱཔི ཨནཱཔཏྟི. སེསཾ ཨུཏྟཱནཏྠམེཝ.

པདསོདྷམྨསམུཊྛཱནཾ – ཝཱཙཏོ ཙ ཝཱཙཱཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཝཙཱིཀམྨཾ, ཏིཙིཏྟཾ ཏིཝེདནནྟི.

ཨོཝཱདསིཀྑཱཔདཾ པཋམཾ.

༢. ཨཏྠངྒཏསིཀྑཱཔདཝཎྞནཱ

༡༥༣. དུཏིཡསིཀྑཱཔདེ – པརིཡཱཡེནཱཏི ཝཱརེན, པཊིཔཱཊིཡཱཏི ཨཏྠོ. ཨདྷིཙེཏསོཏི ཨདྷིཙིཏྟཝཏོ ¶ , སབྦཙིཏྟཱནཾ ཨདྷིཀེན ཨརཧཏྟཕལཙིཏྟེན སམནྣཱགཏསྶཱཏི ཨཏྠོ. ཨཔྤམཛྫཏོཏི ནཔྤམཛྫཏོ, ཨཔྤམཱདེན ཀུསལཱནཾ དྷམྨཱནཾ སཱཏཙྩཀིརིཡཱཡ སམནྣཱགཏསྶཱཏི ཝུཏྟཾ ཧོཏི. མུནིནོཏི ‘‘ཡོ མུནཱཏི ཨུབྷོ ལོཀེ, མུནི ཏེན པཝུཙྩཏཱི’’ཏི (དྷ. པ. ༢༦༩) ཨེཝཾ ཨུབྷཡལོཀམུནནེན ཝཱ, མོནཾ ཝུཙྩཏི ཉཱཎཾ, ཏེན ཉཱཎེན སམནྣཱགཏཏྟཱ ཝཱ ཁཱིཎཱསཝོ མུནི ནཱམ ཝུཙྩཏི, ཏསྶ མུནིནོ. མོནཔཐེསུ སིཀྑཏོཏི ཨརཧཏྟཉཱཎསངྑཱཏསྶ མོནསྶ པཐེསུ སཏྟཏིཾསབོདྷིཔཀྑིཡདྷམྨེསུ ཏཱིསུ ཝཱ སིཀྑཱསུ སིཀྑཏོ. ཨིདཉྩ པུབྦབྷཱགཔཊིཔདཾ གཧེཏྭཱ ཝུཏྟཾ, ཏསྨཱ ཨེཝཾ པུབྦབྷཱགེ སིཀྑཏོ ཨིམཱཡ སིཀྑཱཡ མུནིབྷཱཝཾ པཏྟསྶ མུནིནོཏི ཨེཝམེཏྠ ཨཏྠོ དཊྛབྦོ. སོཀཱ ན བྷཝནྟི ཏཱདིནོཏི ཏཱདིསསྶ ཁཱིཎཱསཝམུནིནོ ཨབྦྷནྟརེ ཨིཊྛཝིཡོགཱདིཝཏྠུཀཱ སོཀཱ ན སནྟི. ཨཐ ཝཱ ཏཱདིནོཏི ཏཱདིལཀྑཎསམནྣཱགཏསྶ ཨེཝརཱུཔསྶ མུནིནོ སོཀཱ ན བྷཝནྟཱིཏི ཨཡམེཏྠ ཨཏྠོ. ཨུཔསནྟསྶཱཏི རཱགཱདཱིནཾ ཨུཔསམེན ཨུཔསནྟསྶ. སདཱ སཏཱིམཏོཏི སཏིཝེཔུལླཔྤཏྟཏྟཱ ནིཙྩཀཱལཾ སཏིཡཱ ཨཝིརཧིཏསྶ ¶ . ཨཱཀཱསེ ཨནྟལིཀྑེཏི ཨནྟལིཀྑསངྑཱཏེ ཨཱཀཱསེ, ན ཀསིཎུགྒྷཱཊིམེ, ན པན རཱུཔཔརིཙྪེདེ. ཙངྐམཏིཔི ཏིཊྛཏིཔཱིཏི ཏཱསཾ བྷིཀྑུནཱིནཾ ཀཐཾ ¶ སུཏྭཱ ‘‘ཨིམཱ བྷིཀྑུནིཡོ མཾ ‘ཨེཏྟཀམེཝ ཨཡཾ ཛཱནཱཏཱི’ཏི ཨཝམཉྙནྟི, ཧནྡ དཱནི ཨེཏཱསཾ ཨཏྟནོ ཨཱནུབྷཱཝཾ དསྶེམཱི’’ཏི དྷམྨབཧུམཱནཾ ཨུཔྤཱདེཏྭཱ ཨབྷིཉྙཱཔཱདཀཾ ཙཏུཏྠཛ྄ཛྷཱནཾ སམཱཔཛྫིཏྭཱ ཝུཊྛཱཡ ཨེཝརཱུཔཾ ཨིདྡྷིཔཱཊིཧཱརིཡཾ དསྶེསི – ‘‘ཨཱཀཱསེ ཨནྟལིཀྑེ ཙངྐམཏིཔི…པེ… ཨནྟརདྷཱཡཏིཔཱི’’ཏི. ཏཏྠ ཨནྟརདྷཱཡཏིཔཱིཏི ཨནྟརདྷཱཡཏིཔི ཨདསྶནམྤི གཙྪཏཱིཏི ཨཏྠོ. ཏཉྩེཝ ཨུདཱནཾ བྷཎཏི ཨཉྙཉྩ བཧུཾ བུདྡྷཝཙནནྟི ཐེརོ ཀིར ཨཏྟནོ བྷཱཏུཐེརསྶ སནྟིཀེ –

‘‘པདུམཾ ཡཐཱ ཀོཀནུདཾ སུགནྡྷཾ,

པཱཏོ སིཡཱ ཕུལླམཝཱིཏགནྡྷཾ;

ཨངྒཱིརསཾ པསྶ ཝིརོཙམཱནཾ,

ཏཔནྟམཱདིཙྩམིཝནྟལིཀྑེ’’ཏི. (སཾ. ནི. ༡.༡༢༣);

ཨིམཾ གཱཐཾ ཨུདྡིསཱཔེཏྭཱ ཙཏྟཱརོ མཱསེ སཛ྄ཛྷཱཡི. ན ཙ པགུཎཾ ཀཏྟུམསཀྑི. ཏཏོ ནཾ ཐེརོ ‘‘ཨབྷབྦོ ཏྭཾ ཨིམསྨིཾ སཱསནེ’’ཏི ཝིཧཱརཱ ནིཀྐཌྜྷཱཔེསི, སོ རོདམཱནོ དྭཱརཀོཊྛཀེ ཨཊྛཱསི. ཨཐ བྷགཝཱ བུདྡྷཙཀྑུནཱ ཝེནེཡྻསཏྟེ ཨོལོཀེནྟོ ཏཾ དིསྭཱ ཝིཧཱརཙཱརིཀཾ ཙརམཱནོ ཝིཡ ཏསྶ སནྟིཀཾ གནྟྭཱ ‘‘ཙཱུལ༹པནྠཀ, ཀསྨཱ རོདསཱི’’ཏི ཨཱཧ. སོ ཏམཏྠཾ ཨཱརོཙེསི. ཨཐསྶ བྷགཝཱ སུདྡྷཾ པིལོཏིཀཁཎྜཾ དཏྭཱ ‘‘ཨིདཾ ‘རཛོཧརཎཾ རཛོཧརཎ’ནྟི པརིམཛྫཱཧཱི’’ཏི ¶ ཨཱཧ. སོ ‘‘སཱདྷཱུ’’ཏི སམྤཊིཙྪིཏྭཱ ཨཏྟནོ ནིཝཱསཊྛཱནེ ནིསཱིདིཏྭཱ ཏསྶ ཨེཀམནྟཾ པརིམཛྫི, པརིམཛྫིཏཊྛཱནཾ ཀཱལ༹ཀམཧོསི. སོ ‘‘ཨེཝཾ པརིསུདྡྷམྤི ནཱམ ཝཏྠཾ ཨིམཾ ཨཏྟབྷཱཝཾ ནིསྶཱཡ ཀཱལ༹ཀཾ ཛཱཏ’’ནྟི སཾཝེགཾ པཊིལབྷིཏྭཱ ཝིཔསྶནཾ ཨཱརབྷི. ཨཐསྶ བྷགཝཱ ཨཱརདྡྷཝཱིརིཡབྷཱཝཾ ཉཏྭཱ ‘‘ཨདྷིཙེཏསོ’’ཏི ཨིམཾ ཨོབྷཱསགཱཐཾ ཨབྷཱསི. ཐེརོ གཱཐཱཔརིཡོསཱནེ ཨརཧཏྟཾ པཱཔུཎི. ཏསྨཱ ཐེརོ པཀཏིཡཱཝ ཨིམཾ གཱཐཾ མམཱཡཏི, སོ ཏཾ ཨིམིསྶཱ གཱཐཱཡ མམཱཡནབྷཱཝཾ ཛཱནཱཔེཏུཾ ¶ ཏཾཡེཝ བྷཎཏི. ཨཉྙཉྩ ཨནྟརནྟརཱ ཨཱཧརིཏྭཱ བཧུཾ བུདྡྷཝཙནཾ. ཏེན ཝུཏྟཾ – ‘‘ཏཉྩེཝ ཨུདཱནཾ བྷཎཏི, ཨཉྙཉྩ བཧུཾ བུདྡྷཝཙན’’ནྟི.

༡༥༦. ཨེཀཏོ ཨུཔསམྤནྣཱཡཱཏི ¶ བྷིཀྑུནིསངྒྷེ ཨུཔསམྤནྣཱཡ, བྷིཀྑུསངྒྷེ པན ཨུཔསམྤནྣཾ ཨོཝདནྟསྶ པཱཙིཏྟིཡཾ. སེསམེཏྠ ཨུཏྟཱནམེཝ. ཨིདམྤི ཙ པདསོདྷམྨསམུཊྛཱནམེཝ.

ཨཏྠངྒཏསིཀྑཱཔདཾ དུཏིཡཾ.

༣. བྷིཀྑུནུཔསྶཡསིཀྑཱཔདཝཎྞནཱ

༡༦༢. ཏཏིཡསིཀྑཱཔདེ – ཨཉྙཏྲ སམཡཱ ཨོཝདཏི ཨཱཔཏྟི པཱཙིཏྟིཡསྶཱཏིཨཱདཱིསུ ཨཊྛཧི གརུདྷམྨེཧི ཨོཝདནྟསྶེཝ པཱཙིཏྟིཡཾ, ཨཉྙེན དྷམྨེན དུཀྐཊནྟི ཝེདིཏབྦཾ. ཨེཀཏོཨུཔསམྤནྣཱཡཱཏི བྷིཀྑུནིསངྒྷེ ཨུཔསམྤནྣཱཡ, བྷིཀྑུསངྒྷེ ཨུཔསམྤནྣཱཡ པན ཨོཝདཏོ པཱཙིཏྟིཡམེཝ. ཨིཏོ པརམྤི ཡཏྠ ཡཏྠ ‘‘ཨེཀཏོཨུཔསམྤནྣཱ’’ཏི ཝུཙྩཏི, སབྦཏྠ ཨཡམེཝ ཨཏྠོ དཊྛབྦོ. སེསཾ ཨུཏྟཱནམེཝ.

ཀཐིནསམུཊྛཱནཾ – ཀཱཡཝཱཙཏོ, ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

བྷིཀྑུནུཔསྶཡསིཀྑཱཔདཾ ཏཏིཡཾ.

ཨིདཾ པནེཏྠ མཧཱཔཙྩརིཡཾ ཝུཏྟཾ པཀིཎྞཀཾ – ཨསམྨཏོ ཙེ བྷིཀྑུ ཨཏྠངྒཏེ སཱུརིཡེ བྷིཀྑུནུཔསྶཡཾ ཨུཔསངྐམིཏྭཱ ཨཊྛཧི གརུདྷམྨེཧི ཨོཝདཏི, ཏཱིཎི པཱཙིཏྟིཡཱནི. ཨཉྙེན དྷམྨེན ཨོཝདཏོ དྭེ དུཀྐཊཱནི, ཨེཀཾ པཱཙིཏྟིཡཾ. ཀཐཾ? ཨསམྨཏམཱུལཀཾ དུཀྐཊཾ, ཨུཔསྶཡཾ གནྟྭཱ ཨཉྙེན དྷམྨེན ཨོཝདནམཱུལཀཾ དུཀྐཊཾ, ཨཏྠངྒཏེ སཱུརིཡེ ཨོཝདནམཱུལཀཾ པཱཙིཏྟིཡནྟི. སམྨཏསྶ ཨཏྠངྒཏེ སཱུརིཡེ ཏཏྠ གནྟྭཱ ཨཊྛཧི གརུདྷམྨེཧི ཨོཝདནྟསྶ ཨེཀཱ ཨནཱཔཏྟི, དྭེ པཱཙིཏྟིཡཱནི. ཀཐཾ? སམྨཏཏྟཱ ¶ ཨནཱཔཏྟི, ཨཏྠངྒཏེ སཱུརིཡེ ཨོཝདནམཱུལཀཾ ཨེཀཾ, གནྟྭཱ གརུདྷམྨེཧི ཨོཝདནམཱུལཀཾ ཨེཀནྟི དྭེ པཱཙིཏྟིཡཱནི. ཏསྶེཝ ཨཉྙེན དྷམྨེན ཨོཝདཏོ ཨེཀཱ ཨནཱཔཏྟི, ཨེཀཾ དུཀྐཊཾ, ཨེཀཾ པཱཙིཏྟིཡཾ. ཀཐཾ? སམྨཏཏྟཱ ཨནཱཔཏྟི, གནྟྭཱ ཨཉྙེན དྷམྨེན ཨོཝདནམཱུལཀཾ དུཀྐཊཾ, ཨཏྠངྒཏེ སཱུརིཡེ ཨོཝདནམཱུལཀཾ པཱཙིཏྟིཡནྟི. དིཝཱ ¶ ¶ པན གནྟྭཱ ཨོཝདཏོ སམྨཏསྶ ཙ ཨསམྨཏསྶ ཙ རཏྟིཾ ཨོཝདནམཱུལཀཾ ཨེཀཾ པཱཙིཏྟིཡཾ ཨཔནེཏྭཱ ཨཝསེསཱ ཨཱཔཏྟཱནཱཔཏྟིཡོ ཝེདིཏབྦཱཏི.

པཀིཎྞཀཀཐཱ ནིཊྛིཏཱ.

༤. ཨཱམིསསིཀྑཱཔདཝཎྞནཱ

༡༦༤. ཙཏུཏྠསིཀྑཱཔདེ – ན བཧུཀཏཱཏི ན ཀཏབཧུམཱནཱ, ན དྷམྨེ བཧུམཱནཾ ཀཏྭཱ ཨོཝདནྟཱིཏི ཨདྷིཔྤཱཡོ. ‘‘བྷིཀྑུནོཝཱདཀཾ ཨཝཎྞཾ ཀཏྟུཀཱམོ’’ཏིཨཱདཱིནཾ ཨུཛ྄ཛྷཱཔནཀེ ཝུཏྟནཡེནེཝཏྠོ ཝེདིཏབྦོ.

ཨུཔསམྤནྣཾ སངྒྷེན ཨསམྨཏནྟི ཨེཏྠ ཨསམྨཏོ ནཱམ སམྨཏེན ཝཱ སངྒྷེན ཝཱ བྷཱརཾ ཀཏྭཱ ཋཔིཏོ ཝེདིཏབྦོ. ཨནུཔསམྤནྣཾ སམྨཏཾ ཝཱ ཨསམྨཏཾ ཝཱཏི ཨེཏྠ པན བྷིཀྑུཀཱལེ སམྨུཏིཾ ལབྷིཏྭཱ སཱམཎེརབྷཱུམིཡཾ ཋིཏོ སམྨཏོ, སམྨཏེན ཝཱ སངྒྷེན ཝཱ ཋཔིཏོ བཧུསྶུཏོ སཱམཎེརོ ཨསམྨཏོཏི ཝེདིཏབྦོ. སེསཾ ཝུཏྟནཡཏྟཱ ཨུཏྟཱནམེཝ.

ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཨཱམིསསིཀྑཱཔདཾ ཙཏུཏྠཾ.

༥. ཙཱིཝརདཱནསིཀྑཱཔདཝཎྞནཱ

༡༦༩. པཉྩམསིཀྑཱཔདེ – ཝིསིཁཱཡཱཏི རཐིཀཱཡ. པིཎྜཱཡ ཙརཏཱིཏི ནིབདྡྷཙཱརཝསེན ཨབྷིཎྷཾ ཙརཏི. སནྡིཊྛཱཏི སནྡིཊྛམིཏྟཱ ཨཧེསུཾ. སེསམེཏྠ པདཏོ ཨུཏྟཱནཏྠཾ, ཝིནིཙྪཡཏོ ཙཱིཝརཔཊིགྒཧཎསིཀྑཱཔདེ ¶ ཝུཏྟནཡེནེཝ ཝེདིཏབྦཾ སདྡྷིཾ སམུཊྛཱནཱདཱིཧི. ཏཏྲ ཧི བྷིཀྑུ པཊིགྒཱཧཀོ, ཨིདྷ བྷིཀྑུནཱི, ཨཡཾ ཝིསེསོ. སེསཾ ཏཱདིསམེཝཱཏི.

ཙཱིཝརདཱནསིཀྑཱཔདཾ པཉྩམཾ.

༦. ཙཱིཝརསིབྦནསིཀྑཱཔདཝཎྞནཱ

༡༧༥. ཚཊྛསིཀྑཱཔདེ ¶ – ཨུདཱཡཱིཏི ལཱལུ༹དཱཡཱི. པཊྛོཏི པཊིབལོ, ནིཔུཎོ ཙེཝ སམཏྠོ ཙཱཏི ཝུཏྟཾ ཧོཏི. ཨཉྙཏརཱ བྷིཀྑུནཱིཏི ཏསྶེཝ པུརཱཎདུཏིཡིཀཱ. པཊིབྷཱནཙིཏྟནྟི ཨཏྟནོ པཊིབྷཱནེན ཀཏཙིཏྟཾ, སོ ཀིར ཙཱིཝརཾ རཛིཏྭཱ ཏསྶ མཛ྄ཛྷེ ནཱནཱཝཎྞེཧི ཝིཔྤཀཏམེཐུནཾ ཨིཏྠིཔུརིསརཱུཔམཀཱསི. ཏེན ཝུཏྟཾ – ‘‘མཛ྄ཛྷེ པཊིབྷཱནཙིཏྟཾ ཝུཊྛཱཔེཏྭཱ’’ཏི. ཡཐཱསཾཧཊནྟི ཡཐཱསཾཧརིཏམེཝ.

༡༧༦. ཙཱིཝརནྟི ཡཾ ནིཝཱསིཏུཾ ཝཱ པཱརུཔིཏུཾ ཝཱ སཀྐཱ ཧོཏི, ཨེཝཉྷི མཧཱཔཙྩརིཡཱདཱིསུ ¶ ཝུཏྟཾ. སཡཾ སིབྦཏཱིཏི ཨེཏྠ སིབྦིསྶཱམཱིཏི ཝིཙཱརེནྟསྶཱཔི ཚིནྡནྟསྶཱཔི དུཀྐཊཾ, སིབྦནྟསྶ པན པཱཙིཏྟིཡཾ. ཨཱརཱཔཐེ ཨཱརཱཔཐེཏི སཱུཙིཾ པཝེསེཏྭཱ པཝེསེཏྭཱ ནཱིཧརཎེ. སཙེ པན སཀལསཱུཙིཾ ཨནཱིཧརནྟོ དཱིགྷསུཏྟཔྤཝེསནཏྠཾ སཏཀྑཏྟུམྤི ཝིཛ྄ཛྷིཏྭཱ ནཱིཧརཏི, ཨེཀམེཝ པཱཙིཏྟིཡཾ. སཀིཾ ཨཱཎཏྟོཏི སཀིཾ ‘‘ཙཱིཝརཾ སིབྦཱ’’ཏི ཝུཏྟོ. བཧུཀམྤི སིབྦཏཱིཏི སཙེཔི སབྦཾ སཱུཙིཀམྨཾ པརིཡོསཱཔེཏྭཱ ཙཱིཝརཾ ནིཊྛཱཔེཏི, ཨེཀམེཝ པཱཙིཏྟིཡཾ. ཨཐ པན ‘‘ཨིམསྨིཾ ཙཱིཝརེ ཀཏྟབྦཀམྨཾ ཏཝ བྷཱརོ’’ཏི ཝུཏྟོ ཀརོཏི, ཨཱཎཏྟསྶ ཨཱརཱཔཐེ ཨཱརཱཔཐེ ཨེཀམེཀཾ པཱཙིཏྟིཡཾ, ཨཱཎཱཔཀསྶ ཨེཀཝཱཙཱཡ སམྦཧུལཱནིཔི. པུནཔྤུནཾ ཨཱཎཏྟིཡཾ པན ཝཏྟབྦམེཝ ནཏྠི.

ཡེཔི སཙེ ཨཱཙརིཡུཔཛ྄ཛྷཱཡེསུ ཨཏྟནོ ཉཱཏིཀཱནཾ ཙཱིཝརཾ སིབྦནྟེསུ ཏེསཾ ནིསྶིཏཀཱ ‘‘ཨཱཙརིཡུཔཛ྄ཛྷཱཡཝཏྟཾ ཝཱ ཀཐིནཝཏྟཾ ཝཱ ཀརོམཱ’’ཏི སིབྦནྟི, ཏེསམྤི ཨཱརཱཔཐགཎནཱཡ ཨཱཔཏྟིཡོ. ཨཱཙརིཡུཔཛ྄ཛྷཱཡཱ ཨཏྟནོ ཉཱཏིཀཱནཾ ཙཱིཝརཾ ཨནྟེཝཱསིཀེཧི སིབྦཱཔེནྟི, ཨཱཙརིཡུཔཛ྄ཛྷཱཡཱནཾ དུཀྐཊཾ, ཨནྟེཝཱསིཀཱནཾ པཱཙིཏྟིཡཾ. ཨནྟེཝཱསིཀཱ ཨཏྟནོ ཉཱཏིཀཱནཾ ཨཱཙརིཡུཔཛ྄ཛྷཱཡེཧི སིབྦཱཔེནྟི, ཏཏྲཱཔི ཨེསེཝ ནཡོ. ཨནྟེཝཱསིཀཱནམྤི ཨཱཙརིཡུཔཛ྄ཛྷཱཡཱནམྤི ཉཱཏིཀཱཡ ཙཱིཝརཾ ཧོཏི, ཨཱཙརིཡུཔཛ྄ཛྷཱཡཱ པན ཨནྟེཝཱསིཀེ ཝཉྩེཏྭཱ སིབྦཱཔེནྟི, ཨུབྷིནྣམྤི དུཀྐཊཾ. ཀསྨཱ? ཨནྟེཝཱསིཀཱནཾ ཨཉྙཱཏིཀསཉྙཱཡ སིབྦིཏཏྟཱ ¶ , ཨིཏརེསཾ ཨཀཔྤིཡེ ནིཡོཛིཏཏྟཱ. ཏསྨཱ ‘‘ཨིདཾ ཏེ མཱཏུ ཙཱིཝརཾ, ཨིདཾ བྷགིནིཡཱ’’ཏི ཨཱཙིཀྑིཏྭཱ སིབྦཱཔེཏབྦཾ.

༡༧༩. ཨཉྙཾ ¶ པརིཀྑཱརནྟི ཡཾཀིཉྩི ཨུཔཱཧནཏྠཝིཀཱདིཾ. སེསཾ ཨུཏྟཱནམེཝ. ཚསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཙཱིཝརསིབྦནསིཀྑཱཔདཾ ཚཊྛཾ.

༧. སཾཝིདྷཱནསིཀྑཱཔདཝཎྞནཱ

༡༨༡. སཏྟམསིཀྑཱཔདེ – པཙྪཱ གཙྪནྟཱིནཾ ཙོརཱ ཨཙྪིནྡིཾསཱུཏི པཙྪཱ གཙྪནྟཱིནཾ པཏྟཙཱིཝརཾ ཙོརཱ ཧརིཾསུ. དཱུསེསུནྟི ཏཱ བྷིཀྑུནིཡོ ཙོརཱ དཱུསཡིཾསུ, སཱིལཝིནཱསཾ པཱཔཡིཾསཱུཏི ཨཏྠོ ¶ .

༡༨༢-༣. སཾཝིདྷཱཡཱཏི སཾཝིདཧིཏྭཱ, གམནཀཱལེ སངྐེཏཾ ཀཏྭཱཏི ཨཏྠོ. ཀུཀྐུཊསམྤཱདེཏི ཨེཏྠ ཡསྨཱ གཱམཱ ནིཀྑམིཏྭཱ ཀུཀྐུཊོ པདསཱཝ ཨཉྙཾ གཱམཾ གཙྪཏི, ཨཡཾ ཀུཀྐུཊསམྤཱདོཏི ཝུཙྩཏི. ཏཏྲཱཡཾ ཝཙནཏྠོ – སམྤདནྟི ཨེཏྠཱཏི སམྤཱདོ. ཀེ སམྤདནྟི? ཀུཀྐུཊཱ. ཀུཀྐུཊཱནཾ སམྤཱདོ ཀུཀྐུཊསམྤཱདོ. ཨཐ ཝཱ སམྤཱདོཏི གམནཾ, ཀུཀྐུཊཱནཾ སམྤཱདོ ཨེཏྠ ཨཏྠཱིཏིཔི ཀུཀྐུཊསམྤཱདོ. ཀུཀྐུཊསམྤཱཏེ ཨིཏིཔི པཱཋོ, ཏཏྠ ཡསྶ གཱམསྶ གེཧཙྪདནཔིཊྛིཏོ ཀུཀྐུཊོ ཨུཔྤཏིཏྭཱ ཨཉྙསྶ གེཧཙྪདནཔིཊྛིཡཾ པཏཏི, ཨཡཾ ཀུཀྐུཊསམྤཱཏོཏི ཝུཙྩཏི. ཝཙནཏྠོ པནེཏྠ ཝུཏྟནཡེནེཝ ཝེདིཏབྦོ. དྭིདྷཱ ཝུཏྟཔྤཀཱརོཔི ཙེས གཱམོ ཨཙྩཱསནྣོ ཧོཏི, ཨུཔཙཱརོ ན ལབྦྷཏི. ཡསྨིཾ པན གཱམེ པཙྩཱུསེ ཝསྶནྟསྶ ཀུཀྐུཊསྶ སདྡོ ཨནནྟརེ གཱམེ སུཡྻཏི, ཏཱདིསེཧི གཱམེཧི སམྤུཎྞརཊྛེ གཱམནྟརེ གཱམནྟརེ པཱཙིཏྟིཡནྟི ཨཊྛཀཐཱཡཾ ཝུཏྟཾ. ཀིཉྩཱཔི ཝུཏྟཾ, ‘‘གཱམནྟརེ གཱམནྟརེ ཨཱཔཏྟི པཱཙིཏྟིཡསྶཱ’’ཏི ཝཙནཏོ པན སཙེཔི རཏནམཏྟནྟརོ གཱམོ ཧོཏི, ཡོ ཏསྶ མནུསྶེཧི ཋཔིཏཨུཔཙཱརོ, ཏཾ ཨོཀྐམནྟསྶ ཨཱཔཏྟིཡེཝ.

ཏཏྲཱཡཾ ཨཱཔཏྟིཝིནིཙྪཡོ – སཾཝིདྷཱནཀཱལེ ཧི སཙེ ཨུབྷོཔི བྷིཀྑུནུཔསྶཡེ ཝཱ ཨནྟརཱརཱམེ ཝཱ ཨཱསནསཱལཱཡ ཝཱ ཏིཏྠིཡསེཡྻཱཡ ཝཱ ཋཏྭཱ སཾཝིདཧནྟི, ཨནཱཔཏྟི ཀཔྤིཡབྷཱུམི ¶ ཀིརཱཡཾ. ཏསྨཱ ཨེཏྠ སཾཝིདཧནཔཙྩཡཱ ¶ དུཀྐཊཱཔཏྟིཾ ན ཝདནྟི, གཙྪནྟསྶ ཡཐཱཝཏྠུཀམེཝ. སཙེ པན ཨནྟོགཱམེ བྷིཀྑུནུཔསྶཡདྭཱརེ རཐིཀཱཡ ཨཉྙེསུ ཝཱ ཙཏུཀྐསིངྒྷཱཊཀཧཏྠིསཱལཱདཱིསུ སཾཝིདཧནྟི, བྷིཀྑུནོ ཨཱཔཏྟི དུཀྐཊསྶ. ཨེཝཾ སཾཝིདཧིཏྭཱ གཱམཏོ ནིཀྑམནྟི, ནིཀྑམནེ ཨནཱཔཏྟི, ཨནནྟརགཱམསྶ ཨུཔཙཱརོཀྐམནེ པན བྷིཀྑུནོ པཱཙིཏྟིཡཾ. ཏཏྲཱཔི ‘‘པཋམཔཱདེ དུཀྐཊཾ, དུཏིཡཔཱདེ པཱཙིཏྟིཡ’’ནྟི མཧཱཔཙྩརིཡཾ ཝུཏྟཾ. གཱམཏོ ནིཀྑམིཏྭཱ པན ཡཱཝ ཨནནྟརགཱམསྶ ཨུཔཙཱརཾ ན ཨོཀྐམནྟི ¶ , ཨེཏྠནྟརེ སཾཝིདཧིཏེཔི བྷིཀྑུནོ དུཀྐཊཾ, ཨནནྟརགཱམསྶ ཨུཔཙཱརོཀྐམནེ པུརིམནཡེནེཝ ཨཱཔཏྟི. སཙེ དཱུརཾ གནྟུཀཱམཱ ཧོནྟི, གཱམཱུཔཙཱརགཎནཱཡ ཨོཀྐམནེ ཨོཀྐམནེ ཨཱཔཏྟི, ཏསྶ ཏསྶ པན གཱམསྶ ཨཏིཀྐམནེ ཨནཱཔཏྟི. སཙེ པན བྷིཀྑུནཱི ‘‘ཨསུཀཾ ནཱམ གཱམཾ གམིསྶཱམཱི’’ཏི ཨུཔསྶཡཏོ ནིཀྑམཏི, བྷིཀྑུཔི ཏམེཝ གཱམཾ སནྡྷཱཡ ‘‘ཨསུཀཾ ནཱམ གཱམཾ གམིསྶཱམཱི’’ཏི ཝིཧཱརཏོ ནིཀྑམཏི. ཨཐ དྭེཔི གཱམདྭཱརེ སམཱགནྟྭཱ ‘‘ཏུམྷེ ཀུཧིཾ གཙྪཐ, ཨསུཀཾ ནཱམ གཱམཾ ཏུམྷེ ཀུཧིནྟི, མཡམྤི ཏཏྠེཝཱ’’ཏི ཝཏྭཱ ‘‘ཨེཧི དཱནི, གཙྪཱམཱ’’ཏི སཾཝིདྷཱཡ གཙྪནྟི, ཨནཱཔཏྟི. ཀསྨཱ? པུབྦམེཝ གམིསྶཱམཱཏི ནིཀྑནྟཏྟཱཏི མཧཱཔཙྩརིཡཾ ཝུཏྟཾ. ཏཾ ནེཝ པཱལི༹ཡཱ ན སེསཨཊྛཀཐཱཡ སམེཏི.

ཨདྡྷཡོཛནེ ཨདྡྷཡོཛནེཏི ཨེཀམེཀཾ ཨདྡྷཡོཛནཾ ཨཏིཀྐམནྟསྶ ཨིདཱནི ཨཏིཀྐམིསྶཏཱིཏི པཋམཔཱདེ དུཀྐཊཾ, དུཏིཡཔཱདེ པཱཙིཏྟིཡཾ. ཨིམསྨིཉྷི ནཡེ ཨཏིཀྐམནེ ཨཱཔཏྟི, ཨོཀྐམནེ ཨནཱཔཏྟི.

༡༨༤. བྷིཀྑུ སཾཝིདཧཏཱིཏི ནགརདྭཱརེ ཝཱ རཐིཀཱཡ ཝཱ བྷིཀྑུནིཾ དིསྭཱ ‘‘ཨསུཀཾ གཱམཾ ནཱམ གཏཔུབྦཏྠཱ’’ཏི ཝདཏི, ‘‘ནཱམྷི ཨཡྻ གཏཔུབྦཱ’’ཏི ‘‘ཨེཧི གཙྪཱམཱ’’ཏི ཝཱ ‘‘སྭེ ཨཧཾ གམིསྶཱམི, ཏྭམྤི ཨཱགཙྪེཡྻཱསཱི’’ཏི ཝཱ ཝདཏི. བྷིཀྑུནཱི སཾཝིདཧཏཱིཏི གཱམནྟརེ ཙེཏིཡཝནྡནཏྠཾ གཱམཏོ ནིཀྑམནྟཾ བྷིཀྑུཾ དིསྭཱ ‘‘ཨཡྻ ཀུཧིཾ གཙྪཐཱ’’ཏི ཝདཏི. ‘‘ཨསུཀཾ ནཱམ གཱམཾ ཙེཏིཡཝནྡནཏྠ’’ནྟི. ‘‘ཨཧམྤི ཨཡྻ ཨཱགཙྪཱམཱི’’ཏི ཨེཝཾ བྷིཀྑུནཱིཡེཝ སཾཝིདཧཏི, ན བྷིཀྑུ.

༡༨༥. ཝིསངྐེཏེནཱཏི ཨེཏྠ ‘‘པུརེབྷཏྟཾ གཙྪིསྶཱམཱ’’ཏི ཝཏྭཱ པཙྪཱབྷཏྟཾ གཙྪནྟི, ‘‘ཨཛྫ ཝཱ གམིསྶཱམཱ’’ཏི ཝཏྭཱ སྭེ གཙྪནྟི. ཨེཝཾ ཀཱལཝིསངྐེཏེཡེཝ ¶ ཨནཱཔཏྟི, དྭཱརཝིསངྐེཏེ པན མགྒཝིསངྐེཏེ ཝཱ སཏིཔི ཨཱཔཏྟིཡེཝ. ཨཱཔདཱསཱུཏི རཊྛབྷེདེ ཙཀྐསམཱརུལ༹ྷཱ ཛནཔདཱ པརིཡཱཡནྟི ཨེཝརཱུཔཱསུ ཨཱཔདཱསུ ཨནཱཔཏྟི. སེསཾ ཨུཏྟཱནམེཝཱཏི.

ཙཏུསམུཊྛཱནཾ ¶ – ཀཱཡཏོ ཀཱཡཝཱཙཏོ ཀཱཡཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

སཾཝིདྷཱནསིཀྑཱཔདཾ སཏྟམཾ.

༨. ནཱཝཱབྷིརུཧནསིཀྑཱཔདཝཎྞནཱ

༡༨༨. ཨཊྛམསིཀྑཱཔདེ ¶ – སཾཝིདྷཱཡཱཏི ལོཀསྶཱདམིཏྟསནྠཝཝསེན ཀཱིལཱ༹པུརེཀྑཱརཱ སཾཝིདཧིཏྭཱ. ཨུདྡྷཾགཱམིནིནྟི ཨུདྡྷཾ ནདིཡཱ པཊིསོཏཾ གཙྪནྟིཾ. ཡསྨཱ པན ཡོ ཨུདྡྷཾ ཛཝནཏོ ཨུཛྫཝནིཀཱཡ ནཱཝཱཡ ཀཱིལ༹ཏི, སོ ‘‘ཨུདྡྷཾགཱམིནིཾ ཨབྷིརུཧཏཱི’’ཏི ཝུཙྩཏི. ཏེནསྶ པདབྷཱཛནེ ཨཏྠམེཝ དསྶེཏུཾ ‘‘ཨུཛྫཝནིཀཱཡཱ’’ཏི ཝུཏྟཾ. ཨདྷོགཱམིནིནྟི ཨདྷོ ཨནུསོཏཾ གཙྪནྟིཾ. ཡསྨཱ པན ཡོ ཨདྷོ ཛཝནཏོ ཨོཛཝནིཀཱཡ ནཱཝཱཡ ཀཱིལ༹ཏི, སོ ‘‘ཨདྷོགཱམིནིཾ ཨབྷིརུཧཏཱི’’ཏི ཝུཙྩཏི. ཏེནསྶཱཔི པདབྷཱཛནེ ཨཏྠམེཝ དསྶེཏུཾ ‘‘ཨོཛཝནིཀཱཡཱ’’ཏི ཝུཏྟཾ. ཏཏྠ ཡཾ ཏིཏྠསམྤཊིཔཱདནཏྠཾ ཨུདྡྷཾ ཝཱ ཨདྷོ ཝཱ ཧརནྟི, ཨེཏྠ ཨནཱཔཏྟི. ཏིརིཡཾ ཏརཎཱཡཱཏི ཨུཔཡོགཏྠེ ནིསྶཀྐཝཙནཾ.

༡༨༩. གཱམནྟརེ གཱམནྟརེཏི ཨེཏྠ ཡསྶཱ ནདིཡཱ ཨེཀཾ ཏཱིརཾ ཀུཀྐུཊསམྤཱདགཱམེཧི ནིརནྟརཾ, ཨེཀཾ ཨགཱམཀཾ ཨརཉྙཾ, ཏསྶཱ སགཱམཀཏཱིརཔསྶེན གམནཀཱལེ གཱམནྟརགཎནཱཡ པཱཙིཏྟིཡཱནི, ཨགཱམཀཏཱིརཔསྶེན གམནཀཱལེ ཨདྡྷཡོཛནགཎནཱཡ. ཡཱ པན ཡོཛནཝིཏྠཏཱ ཧོཏི, ཏསྶཱ མཛ྄ཛྷེན གམནེཔི ཨདྡྷཡོཛནགཎནཱཡ པཱཙིཏྟིཡཱནི ཝེདིཏབྦཱནི. ཨནཱཔཏྟི ཏིརིཡཾ ཏརཎཱཡཱཏི ཨེཏྠ ན ཀེཝལཾ ནདིཡཱ, ཡོཔི མཧཱཏིཏྠཔཊྚནཏོ ཏཱམལིཏྟིཾ ཝཱ སུཝཎྞབྷཱུམིཾ ཝཱ གཙྪཏི, ཏསྶཱཔི ཨནཱཔཏྟི. སབྦཨཊྛཀཐཱསུ ཧི ནདིཡཾཡེཝ ཨཱཔཏྟི ཝིཙཱརིཏཱ, ན སམུདྡེ.

༡༩༡. ཝིསངྐེཏེནཱཏི ¶ ཨིདྷཱཔི ཀཱལཝིསངྐེཏེནེཝ ཨནཱཔཏྟི, ཏིཏྠཝིསངྐེཏེན པན ནཱཝཱཝིསངྐེཏེན ཝཱ གཙྪནྟསྶ ཨཱཔཏྟིཡེཝ. སེསཾ པཋམསིཀྑཱཔདསདིསམེཝ སདྡྷིཾ སམུཊྛཱནཱདཱིཧཱིཏི.

ནཱཝཱབྷིརུཧནསིཀྑཱཔདཾ ཨཊྛམཾ.

༩. པརིཔཱཙིཏསིཀྑཱཔདཝཎྞནཱ

༡༩༢. ནཝམསིཀྑཱཔདེ ¶ – མཧཱནཱགེ ཏིཊྛམཱནེཏི བྷུམྨཏྠེ ཨུཔཡོགཝཙནཾ, མཧཱནཱགེསུ ཏིཊྛམཱནེསཱུཏི ཨཏྠོ. ཨཐ ཝཱ མཧཱནཱགེ ཏིཊྛམཱནེ ‘‘ཨདིསྭཱ’’ཏི ཨཡམེཏྠ པཱཋསེསོ དཊྛབྦོ. ཨིཏརཐཱ ཧི ཨཏྠོ ན ཡུཛྫཏི. ཨནྟརཱཀཐཱཏི ཨཝསཱནཾ ཨཔྤཏྭཱ ཨཱརམྦྷསྶ ཙ ཨཝསཱནསྶ ཙ ཝེམཛ྄ཛྷཊྛཱནཾ པཏྟཀཐཱ. ཝིཔྤཀཏཱཏི ཀཡིརམཱནཱ ཧོཏི. སཙྩཾ མཧཱནཱགཱ ཁོ ཏཡཱ གཧཔཏཱིཏི ཨདྡྷཙྪིཀེན ཨོལོཀཡམཱནཱ ¶ ཐེརེ པཝིསནྟེ དིསྭཱ ཏེཧི སུཏབྷཱཝཾ ཉཏྭཱ ཨེཝམཱཧ.

༡༩༤. བྷིཀྑུནིཔརིཔཱཙིཏནྟི བྷིཀྑུནིཡཱ པརིཔཱཙིཏཾ, གུཎཔྤཀཱསནེན ནིཔྥཱདིཏཾ; ལདྡྷབྦཾ ཀཏནྟི ཨཏྠོ. པདབྷཱཛནེ པནསྶ བྷིཀྑུནིཉྩ ཏསྶཱ པརིཔཱཙནཱཀཱརཉྩ དསྶེཏུཾ ‘‘བྷིཀྑུནཱི ནཱམ ཨུབྷཏོསངྒྷེ ཨུཔསམྤནྣཱ, པརིཔཱཙེཏི ནཱམ པུབྦེ ཨདཱཏུཀཱམཱན’’ནྟིཨཱདི ཝུཏྟཾ. པུབྦེ གིཧིསམཱརམྦྷཱཏི ཨེཏྠ པུབྦེཏི པཋམཾ. སམཱརམྦྷོཏི སམཱརདྡྷཾ ཝུཙྩཏི, པཊིཡཱདིཏསྶེཏཾ ཨདྷིཝཙནཾ. གིཧཱིནཾ སམཱརམྦྷོ གིཧིསམཱརམྦྷོ. བྷིཀྑུནིཡཱ པརིཔཱཙནཏོ པཋམམེཝ ཡཾ གིཧཱིནཾ པཊིཡཱདིཏཾ བྷཏྟཾ, ཏཏོ ཨཉྙཏྲ ཏཾ པིཎྜཔཱཏཾ ཋཔེཏྭཱ ཨཉྙཾ བྷུཉྫནྟསྶ ཨཱཔཏྟི, ཏཾ པན བྷུཉྫནྟསྶ ཨནཱཔཏྟཱིཏི ཝུཏྟཾ ཧོཏི. པདབྷཱཛནེ པན ཡསྨཱ ཉཱཏཀཔཝཱརིཏེཧི བྷིཀྑུསྶཏྠཱཡ ཨསམཱརདྡྷོཔི པིཎྜཔཱཏོ ཨཏྠཏོ སམཱརདྡྷོཝ ཧོཏི, ཡཐཱསུཁཾ ཨཱཧརཱཔེཏབྦཏོ, ཏསྨཱ བྱཉྫནཾ ཨནཱདིཡིཏྭཱ ཨཏྠམེཝ དསྶེཏུཾ ‘‘གིཧིསམཱརམྦྷོ ནཱམ ཉཱཏཀཱ ཝཱ ཧོནྟི པཝཱརིཏཱ ཝཱ’’ཏི ཝུཏྟཾ.

༡༩༥. པཀཏིཔཊིཡཏྟནྟི ¶ པཀཏིཡཱ ཏསྶེཝ བྷིཀྑུནོ ཨཏྠཱཡ པཊིཡཱདིཏཾ ཧོཏི ‘‘ཐེརསྶ དསྶཱམཱ’’ཏི. མཧཱཔཙྩརིཡཾ པན ‘‘ཏསྶ ཨཉྙསྶཱ’’ཏི ཨཝཏྭཱ ‘‘བྷིཀྑཱུནཾ དསྶཱམཱཏི པཊིཡཏྟཾ ཧོཏཱི’’ཏི ཨཝིསེསེན ཝུཏྟཾ.

༡༩༧. པཉྩ བྷོཛནཱནི ཋཔེཏྭཱ སབྦཏྠ ཨནཱཔཏྟཱིཏི ཡཱགུཁཛྫཀཕལཱཕལེ སབྦཏྠ བྷིཀྑུནིཔརིཔཱཙིཏེཔི ཨནཱཔཏྟི. སེསཾ ཨུཏྟཱནམེཝ. པཋམཔཱརཱཛིཀསམུཊྛཱནཾ – ཀཱཡཙིཏྟཏོ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

པརིཔཱཙིཏསིཀྑཱཔདཾ ནཝམཾ.

༡༠. རཧོནིསཛྫསིཀྑཱཔདཝཎྞནཱ

༡༩༨. དསམསིཀྑཱཔདེ ¶ – སབྦོ པཱལི༹ཨཏྠོ ཙ ཝིནིཙྪཡོ ཙ དུཏིཡཨནིཡཏེ ཝུཏྟནཡེནེཝ ཝེདིཏབྦོ. ཨིདཉྷི སིཀྑཱཔདཾ དུཏིཡཱནིཡཏེན ཙ ཨུཔརི ཨུཔནནྡྷསྶ ཙཏུཏྠསིཀྑཱཔདེན ཙ སདྡྷིཾ ཨེཀཔརིཙྪེདཾ, ཨཊྛུཔྤཏྟིཝསེན པན ཝིསུཾ པཉྙཏྟནྟི.

རཧོནིསཛྫསིཀྑཱཔདཾ དསམཾ.

སམཏྟོ ཝཎྞནཱཀྐམེན བྷིཀྑུནིཝགྒོ ཏཏིཡོ.

༤. བྷོཛནཝགྒོ

༡. ཨཱཝསཐཔིཎྜསིཀྑཱཔདཝཎྞནཱ

༢༠༣. བྷོཛནཝགྒསྶ པཋམསིཀྑཱཔདེ – ཨཱཝསཐཔིཎྜོཏི ཨཱཝསཐེ པིཎྜོ. སམནྟཱ པརིཀྑིཏྟཾ ཨདྡྷིཀགིལཱནགབྦྷིནིཔབྦཛིཏཱནཾ ¶ ཡཐཱནུརཱུཔཾ པཉྙཏྟམཉྩཔཱིཋཾ ཨནེཀགབྦྷཔམུཁཔརིཙྪེདཾ ཨཱཝསཐཾ ཀཏྭཱ ཏཏྠ པུཉྙཀཱམཏཱཡ པིཎྜོ པཉྙཏྟོ ཧོཏི, ཡཱགུབྷཏྟབྷེསཛྫཱདི སབྦཾ ཏེསཾ ཏེསཾ དཱནཏྠཱཡ ཋཔིཏཾ ཧོཏཱིཏི ཨཏྠོ. ཧིཡྻོཔཱིཏི སྭེཔི. ཨཔསཀྐནྟཱིཏི ¶ ཨཔགཙྪནྟི. མནུསྶཱ ཨུཛ྄ཛྷཱཡནྟཱིཏི ཏིཏྠིཡེ ཨཔསྶནྟཱ ‘‘ཏིཏྠིཡཱ ཀུཧིཾ གཏཱ’’‘‘ཨིམེ པསྶིཏྭཱ པཀྐནྟཱ’’ཏི སུཏྭཱ ཨུཛ྄ཛྷཱཡནྟི. ཀུཀྐུཙྩཱཡནྟོཏི ཀུཀྐུཙྩཾ ཀརོནྟོ, ཨཀཔྤིཡསཉྙཾ ཨུཔྤཱདེནྟོཏི ཨཏྠོ.

༢༠༦. སཀྐོཏི ཏམྷཱ ཨཱཝསཐཱ པཀྐམིཏུནྟི ཨདྡྷཡོཛནཾ ཝཱ ཡོཛནཾ ཝཱ གནྟུཾ སཀྐོཏི. ན སཀྐོཏཱིཏི ཨེཏྟཀམེཝ ན སཀྐོཏི. ཨནོདིསྶཱཏི ཨིམེསཾཡེཝ ཝཱ ཨེཏྟཀཱནཾཡེཝ ཝཱཏི ཨེཀཾ པཱསཎྜཾ ཨནུདྡིསིཏྭཱ སབྦེསཾ པཉྙཏྟོ ཧོཏི. ཡཱཝདཏྠོཏི བྷོཛནམྤི ཨེཏྟཀནྟི ཨཔརིཙྪིནྡིཏྭཱ ཡཱཝདཏྠོ པཉྙཏྟོ ཧོཏི. སཀིཾ བྷུཉྫིཏབྦནྟི ཨེཀདིཝསཾ བྷུཉྫིཏབྦཾ, དུཏིཡདིཝསཏོ པཊྛཱཡ པཊིགྒཧཎེ དུཀྐཊཾ, ཨཛ྄ཛྷོཧཱརེ ཨཛ྄ཛྷོཧཱརེ པཱཙིཏྟིཡཾ.

ཨཡཾ ¶ པནེཏྠ ཝིནིཙྪཡོ – ཨེཀཀུལེན ཝཱ ནཱནཱཀུལེཧི ཝཱ ཨེཀཏོ ཧུཏྭཱ ཨེཀསྨིཾ ཋཱནེ ཝཱ ནཱནཱཋཱནེསུ ཝཱ ‘‘ཨཛྫ ཨེཀསྨིཾ; སྭེ ཨེཀསྨི’’ནྟི ཨེཝཾ ཨནིཡམིཏཊྛཱནེ ཝཱ པཉྙཏྟཾ ཨེཀསྨིཾ ཋཱནེ ཨེཀདིཝསཾ བྷུཉྫིཏྭཱ དུཏིཡདིཝསེ ཏསྨིཾ ཋཱནེ ཨཉྙསྨིཾ ཝཱ བྷུཉྫིཏུཾ ན ཝཊྚཏི. ནཱནཱཀུལེཧི པན ནཱནཱཋཱནེསུ པཉྙཏྟཾ ཨེཀསྨིཾ ཋཱནེ ཨེཀདིཝསཾ བྷུཉྫིཏྭཱ དུཏིཡདིཝསེ ཨཉྙཏྠ བྷུཉྫིཏུཾ ཝཊྚཏི. པཊིཔཱཊིཾ པན ཁེཔེཏྭཱ པུན ཨཱདིཏོ པཊྛཱཡ བྷུཉྫིཏུཾ ན ཝཊྚཏཱིཏི མཧཱཔཙྩརིཡཾ ཝུཏྟཾ. ཨེཀཔཱུགནཱནཱཔཱུགཨེཀགཱམནཱནཱགཱམེསུཔི ཨེསེཝ ནཡོ. ཡོཔི ཨེཀཀུལསྶ ཝཱ ནཱནཱཀུལཱནཾ ཝཱ ཨེཀཏོ པཉྙཏྟོ ཏཎྜུལཱདཱིནཾ ཨབྷཱཝེན ཨནྟརནྟརཱ ཚིཛྫཏི, སོཔི ན བྷུཉྫིཏབྦོ. སཙེ པན ‘‘ན སཀྐོམ དཱཏུ’’ནྟི ཨུཔཙྪིནྡིཏྭཱ པུན ཀལྱཱཎཙིཏྟེ ཨུཔྤནྣེ དཱཏུཾ ཨཱརབྷནྟི, ཨེཏཾ པུན ཨེཀདིཝསཾ བྷུཉྫིཏུཾ ཝཊྚཏཱིཏི མཧཱཔཙྩརིཡཾ ཝུཏྟཾ.

༢༠༨. ཨནཱཔཏྟི གིལཱནསྶཱཏི གིལཱནསྶ ཨནུཝསིཏྭཱ བྷུཉྫནྟསྶ ཨནཱཔཏྟི. གཙྪནྟོ ཝཱཏི ཡོ གཙྪནྟོ ཨནྟརཱམགྒེ ཨེཀདིཝསཾ གཏཊྛཱནེ ཙ ཨེཀདིཝསཾ བྷུཉྫཏི, ཏསྶཱཔི ཨནཱཔཏྟི. ཨཱགཙྪནྟེཔི ཨེསེཝ ནཡོ. གནྟྭཱ པཙྩཱགཙྪནྟོཔི ཨནྟརཱམགྒེ ཨེཀདིཝསཾ ཨཱགཏཊྛཱནེ ཙ ཨེཀདིཝསཾ བྷུཉྫིཏུཾ ལབྷཏི. གཙྪིསྶཱམཱིཏི བྷུཉྫིཏྭཱ ནིཀྑནྟསྶ ¶ ནདཱི ཝཱ པཱུརཏི ཙོརཱདིབྷཡཾ ཝཱ ཧོཏི, སོ ནིཝཏྟིཏྭཱ ཁེམབྷཱཝཾ ཉཏྭཱ གཙྪནྟོ པུན ཨེཀདིཝསཾ བྷུཉྫིཏུཾ ལབྷཏཱིཏི སབྦམིདཾ མཧཱཔཙྩརིཡཱདཱིསུ ཝུཏྟཾ ¶ . ཨོདིསྶ པཉྙཏྟོ ཧོཏཱིཏི བྷིཀྑཱུནཾཡེཝ ཨཏྠཱཡ ཨུདྡིསིཏྭཱ པཉྙཏྟོ ཧོཏི. ན ཡཱཝདཏྠོཏི ཡཱཝདཏྠཾ པཉྙཏྟོ ན ཧོཏི, ཐོཀཾ ཐོཀཾ ལབྦྷཏི, ཏཱདིསཾ ནིཙྩམྤི བྷུཉྫིཏུཾ ཝཊྚཏི. པཉྩ བྷོཛནཱནི ཋཔེཏྭཱ སབྦཏྠཱཏི ཡཱགུཁཛྫཀཕལཱཕལཱདིབྷེདེ སབྦཏྠ ཨནཱཔཏྟི. ཡཱགུཨཱདཱིནི ཧི ནིཙྩམྤི བྷུཉྫིཏུཾ ཝཊྚཏི. སེསཾ ཨུཏྟཱནམེཝ. ཨེལ༹ཀལོམསམུཊྛཱནཾ – ཀཱཡཏོ ཙ ཀཱཡཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ ཏིཙིཏྟཾ, ཏིཝེདནནྟི.

ཨཱཝསཐཔིཎྜསིཀྑཱཔདཾ པཋམཾ.

༢. གཎབྷོཛནསིཀྑཱཔདཝཎྞནཱ

༢༠༩. དུཏིཡསིཀྑཱཔདེ – པརིཧཱིནལཱབྷསཀྐཱརོཏི སོ ཀིར ཨཛཱཏསཏྟུནཱ རཱཛཱནཾ མཱརཱཔེཏྭཱཔི ཨབྷིམཱརེ ཡོཛེཏྭཱཔི རུཧིརུཔྤཱདཾ ཀཏྭཱཔི གུལ༹ྷཔཊིཙྪནྣོ ཨཧོསི. ཡདཱ པན དིཝཱཡེཝ ¶ དྷནཔཱལཀཾ པཡོཛེསི, ཏདཱ པཱཀཊོ ཛཱཏོ. ‘‘ཀཐཾ དེཝདཏྟོ ཧཏྠིཾ པཡོཛེསཱི’’ཏི པརིཀཐཱཡ ཨུཔྤནྣཱཡ ‘‘ན ཀེཝལཾ ཧཏྠིཾ པཡོཛེསི, རཱཛཱནམྤི མཱརཱཔེསི, ཨབྷིམཱརེཔི པེསེསི, སིལམྤི པཝིཛ྄ཛྷི, པཱཔོ དེཝདཏྟོ’’ཏི པཱཀཊོ ཨཧོསི. ‘‘ཀེན སདྡྷིཾ ཨིདཾ ཀམྨམཀཱསཱི’’ཏི ཙ ཝུཏྟེ ‘‘རཉྙཱ ཨཛཱཏསཏྟུནཱ’’ཏི ཨཱཧཾསུ. ཏཏོ ནཱགརཱ ‘‘ཀཐཉྷི ནཱམ རཱཛཱ ཨེཝརཱུཔཾ ཙོརཾ སཱསནཀཎྚཀཾ གཧེཏྭཱ ཝིཙརིསྶཏཱི’’ཏི ཨུཊྛཧིཾསུ. རཱཛཱ ནགརསངྑོབྷཾ ཉཏྭཱ དེཝདཏྟཾ ནཱིཧརི. ཏཏོ པཊྛཱཡ ཙསྶ པཉྩཐཱལིཔཱཀསཏཱནི ཨུཔཙྪིནྡི, ཨུཔཊྛཱནམྤིསྶ ན ཨགམཱསི, ཨཉྙེཔིསྶ མནུསྶཱ ན ཀིཉྩི དཱཏབྦཾ ཝཱ ཀཱཏབྦཾ ཝཱ མཉྙིཾསུ. ཏེན ཝུཏྟཾ – ‘‘པརིཧཱིནལཱབྷསཀྐཱརོ’’ཏི. ཀུལེསུ ཝིཉྙཱཔེཏྭཱ ཝིཉྙཱཔེཏྭཱ བྷུཉྫཏཱིཏི ‘‘མཱ མེ གཎོ བྷིཛྫཱི’’ཏི པརིསཾ པོསེནྟོ ‘‘ཏྭཾ ཨེཀསྶ བྷིཀྑུནོ བྷཏྟཾ དེཧི, ཏྭཾ དྭིནྣ’’ནྟི ཨེཝཾ ཝིཉྙཱཔེཏྭཱ སཔརིསོ ཀུལེསུ བྷུཉྫཏི.

༢༡༡. ཙཱིཝརཾ པརིཏྟཾ ཨུཔྤཛྫཏཱིཏི བྷཏྟཾ ཨགཎྷནྟཱནཾ ཙཱིཝརཾ ན དེནྟི, ཏསྨཱ པརིཏྟཾ ཨུཔྤཛྫཏི.

༢༡༢. ཙཱིཝརཀཱརཀེ ¶ བྷིཀྑཱུ བྷཏྟེན ནིམནྟེནྟཱིཏི གཱམེ པིཎྜཱཡ ཙརིཏྭཱ ཙིརེན ཙཱིཝརཾ ནིཊྛཱཔེནྟེ དིསྭཱ ‘‘ཨེཝཾ ལཧུཾ ནིཊྛཱཔེཏྭཱ ¶ ཙཱིཝརཾ པརིབྷུཉྫིསྶནྟཱི’’ཏི པུཉྙཀཱམཏཱཡ ནིམནྟེནྟི.

༢༡༥. ནཱནཱཝེརཛྫཀེཏི ནཱནཱཝིདྷེཧི ཨཉྙརཛྫེཧི ཨཱགཏེ. ‘‘ནཱནཱཝིརཛྫཀེ’’ཏིཔི པཱཋོ, ཨཡམེཝཏྠོ.

༢༡༧-༨. གཎབྷོཛནེཏི གཎསྶ བྷོཛནེ. ཨིདྷ ཙ གཎོ ནཱམ ཙཏྟཱརོ བྷིཀྑཱུ ཨཱདིཾ ཀཏྭཱ ཏཏུཏྟརིཾ བྷིཀྑཱུ ཨདྷིཔྤེཏཱ, ཏེནེཝ སབྦནྟིམཾ པརིཙྪེདཾ དསྶེནྟོ ཨཱཧ ‘‘ཡཏྠ ཙཏྟཱརོ བྷིཀྑཱུ…པེ… ཨེཏཾ གཎབྷོཛནཾ ནཱམཱ’’ཏི. ཏཾ པནེཏཾ གཎབྷོཛནཾ དྭཱིཧཱཀཱརེཧི པསཝཏི ནིམནྟནཏོ ཝཱ ཝིཉྙཏྟིཏོ ཝཱ. ཀཐཾ ནིམནྟནཏོ པསཝཏི? ཙཏྟཱརོ བྷིཀྑཱུ ཨུཔསངྐམིཏྭཱ ‘‘ཏུམྷེ, བྷནྟེ, ཨོདནེན ནིམནྟེམི, ཨོདནཾ མེ གཎྷཐ ཨཱཀངྑཐ ཨོལོཀེཐ ཨདྷིཝཱསེཐ པཊིམཱནེཐཱ’’ཏི ཨེཝཾ ཡེན ཀེནཙི ཝེཝཙནེན ཝཱ བྷཱསནྟརེན ཝཱ པཉྩནྣཾ བྷོཛནཱནཾ ནཱམཾ གཧེཏྭཱ ནིམནྟེཏི. ཨེཝཾ ཨེཀཏོ ནིམནྟིཏཱ པརིཙྪིནྣཀཱལཝསེན ཨཛྫཏནཱཡ ཝཱ སྭཱཏནཱཡ ཝཱ ཨེཀཏོ གཙྪནྟི, ཨེཀཏོ གཎྷནྟི, ཨེཀཏོ བྷུཉྫནྟི, གཎབྷོཛནཾ ཧོཏི, སབྦེསཾ ཨཱཔཏྟི. ཨེཀཏོ ནིམནྟིཏཱ ཨེཀཏོ ཝཱ ནཱནཏོ ཝཱ གཙྪནྟི, ཨེཀཏོ གཎྷནྟི, ནཱནཏོ བྷུཉྫནྟི ¶ , ཨཱཔཏྟིཡེཝ. པཊིགྒཧཎམེཝ ཧི ཨེཏྠ པམཱཎཾ. ཨེཀཏོ ནིམནྟིཏཱ ཨེཀཏོ ཝཱ ནཱནཏོ ཝཱ གཙྪནྟི, ནཱནཏོ གཎྷནྟི, ཨེཀཏོ ཝཱ ནཱནཏོ ཝཱ བྷུཉྫནྟི, ཨནཱཔཏྟི. ཙཏྟཱརི པརིཝེཎཱནི ཝཱ ཝིཧཱརེ ཝཱ གནྟྭཱ ནཱནཏོ ནིམནྟིཏཱ ཨེཀཊྛཱནེ ཋིཏེསུཡེཝ ཝཱ ཨེཀོ པུཏྟེན ཨེཀོ པིཏརཱཏི ཨེཝམྤི ནཱནཏོ ནིམནྟིཏཱ ཨེཀཏོ ཝཱ ནཱནཏོ ཝཱ གཙྪནྟུ, ཨེཀཏོ ཝཱ ནཱནཏོ ཝཱ བྷུཉྫནྟུ, སཙེ ཨེཀཏོ གཎྷནྟི, གཎབྷོཛནཾ ཧོཏི, སབྦེསཾ ཨཱཔཏྟི. ཨེཝཾ ཏཱཝ ནིམནྟནཏོ པསཝཏི.

ཀཐཾ ཝིཉྙཏྟིཏོ? ཙཏྟཱརོ བྷིཀྑཱུ ཨེཀཏོ ཋིཏཱ ཝཱ ནིསིནྣཱ ཝཱ ཨུཔཱསཀཾ དིསྭཱ ‘‘ཨམྷཱཀཾ ཙཏུནྣམྤི བྷཏྟཾ དེཧཱི’’ཏི ཝཱ ཝིཉྙཱཔེཡྻུཾ, པཱཊེཀྐཾ ཝཱ པསྶིཏྭཱ ‘‘མཡ྄ཧཾ དེཧི, མཡ྄ཧཾ དེཧཱི’’ཏི ཨེཝཾ ཨེཀཏོ ཝཱ ནཱནཏོ ཝཱ ཝིཉྙཱཔེཏྭཱ ཨེཀཏོ ཝཱ གཙྪནྟུ ནཱནཏོ ཝཱ, བྷཏྟཾ གཧེཏྭཱཔི ཨེཀཏོ ཝཱ བྷུཉྫནྟུ ནཱནཏོ ཝཱ, སཙེ ཨེཀཏོ གཎྷནྟི, གཎབྷོཛནཾ ཧོཏི, སབྦེསཾ ཨཱཔཏྟི. ཨེཝཾ ཝིཉྙཏྟིཏོ པསཝཏི.

པཱདཱཔི ¶ ཕལིཏཱཏི ཡཐཱ མཧཱཙམྨསྶ པརཏོ མཾསཾ དིསྶཏི; ཨེཝཾ ཕཱལིཏཱ, ཝཱལིཀཱཡ ཝཱ སཀྑརཱཡ ཝཱ པཧཊམཏྟེ དུཀྑཾ ཨུཔྤཱདེནྟི, ན སཀྐཱ ཧོཏི ཨནྟོགཱམེ པིཎྜཱཡ ཙརིཏུཾ. ཨཱིདིསེ ¶ གེལཉྙེ གིལཱནསམཡོཏི བྷུཉྫིཏབྦཾ, ན ལེསཀཔྤིཡཾ ཀཱཏབྦཾ.

ཙཱིཝརེ ཀཡིརམཱནེཏི ཡདཱ སཱཊཀཉྩ སུཏྟཉྩ ལབྷིཏྭཱ ཙཱིཝརཾ ཀརོནྟི ཏདཱ; ཝིསུཉྷི ཙཱིཝརཀཱརསམཡོ ནཱམ ནཏྠི. ཏསྨཱ ཡོ ཏཏྠ ཙཱིཝརེ ཀཏྟབྦཾ ཡཾཀིཉྩི ཀམྨཾ ཀརོཏི, མཧཱཔཙྩརིཡཉྷི ‘‘ཨནྟམསོ སཱུཙིཝེདྷནཀོ’’ཏིཔི ཝུཏྟཾ, ཏེན ཙཱིཝརཀཱརསམཡོཏི བྷུཉྫིཏབྦཾ. ཀུརུནྡིཡཾ པན ཝིཏྠཱརེནེཝ ཝུཏྟཾ. ཡོ ཙཱིཝརཾ ཝིཙཱརེཏི, ཚིནྡཏི, མོགྷསུཏྟཾ ཋཔེཏི, ཨཱགནྟུཀཔཊྚཾ ཋཔེཏི, པཙྩཱགཏཾ སིབྦཏི, ཨཱགནྟུཀཔཊྚཾ བནྡྷཏི, ཨནུཝཱཏཾ ཚིནྡཏི གྷཊྚེཏི ཨཱརོཔེཏི, ཏཏྠ པཙྩཱགཏཾ སིབྦཏི, སུཏྟཾ ཀརོཏི ཝལེཏི, པིཔྥལིཀཾ ནིསེཏི, པརིཝཏྟནཾ ཀརོཏི, སབྦོཔི ཙཱིཝརཾ ཀརོཏིཡེཝཱཏི ཝུཙྩཏི. ཡོ པན སམཱིཔེ ནིསིནྣོ ཛཱཏཀཾ ཝཱ དྷམྨཔདཾ ཝཱ ཀཐེཏི, ཨཡཾ ན ཙཱིཝརཀཱརཀོ. ཨེཏཾ ཋཔེཏྭཱ སེསཱནཾ གཎབྷོཛནེ ཨནཱཔཏྟཱིཏི.

ཨདྡྷཡོཛནནྟི ཨེཏྟཀམྤི ཨདྡྷཱནཾ གནྟུཀཱམེན. ཡོ པན དཱུརཾ གནྟུཀཱམོ, ཏཏྠ ཝཏྟབྦམེཝ ནཏྠི. གཙྪནྟེནཱཏི ཨདྡྷཱནཾ གཙྪནྟེན, ཨདྡྷཡོཛནབྦྷནྟརེ གཱཝུཏེཔི བྷུཉྫིཏུཾ ཝཊྚཏི. གཏེན བྷུཉྫིཏབྦནྟི གཏེན ཨེཀདིཝསཾ བྷུཉྫིཏབྦཾ. ནཱཝཱབྷིརུཧནེཔི ཨེསེཝ ནཡོ. ཨཡཾ པན ཝིསེསོ – ཨབྷིརུལ༹ྷེན ཨིཙྪིཏཊྛཱནཾ གནྟྭཱཔི ཡཱཝ ན ཨོརོཧཏི ཏཱཝ བྷུཉྫིཏབྦནྟི ¶ མཧཱཔཙྩརིཡཾ ཝུཏྟཾ. ཙཏུཏྠེ ཨཱགཏེཏི ཨཡཾ ཨནྟིམཔརིཙྪེདོ, ཙཏུཏྠེཔི ཨཱགཏེ ཡཏྠ ན ཡཱཔེནྟི; སོ མཧཱསམཡོ. ཡཏྠ པན སཏཾ ཝཱ སཧསྶཾ ཝཱ སནྣིཔཏནྟི, ཏཏྠ ཝཏྟབྦམེཝ ནཏྠི. ཏསྨཱ ཏཱདིསེ ཀཱལེ ‘‘མཧཱསམཡོ’’ཏི ཨདྷིཊྛཧིཏྭཱ བྷུཉྫིཏབྦཾ. ཡོ ཀོཙི པརིབྦཱཛཀསམཱཔནྣོཏི སཧདྷམྨིཀེསུ ཝཱ ཏིཏྠིཡེསུ ཝཱ ཨཉྙཏརོ, ཨེཏེསཉྷི ཡེན ཀེནཙི ཀཏེ བྷཏྟེ ‘‘སམཎབྷཏྟསམཡོ’’ཏི བྷུཉྫིཏབྦཾ.

༢༢༠. ཨནཱཔཏྟི སམཡེཏི སཏྟསུ སམཡེསུ ཨཉྙཏརསྨིཾ ཨནཱཔཏྟི. དྭེ ཏཡོ ཨེཀཏོཏི ཡེཔི ཨཀཔྤིཡནིམནྟནཾ སཱདིཡིཏྭཱ དྭེ ཝཱ ཏཡོ ཝཱ ཨེཀཏོ གཧེཏྭཱ བྷུཉྫནྟི, ཏེསམྤི ཨནཱཔཏྟི.

ཏཏྠ ¶ ཨནིམནྟིཏཙཏུཏྠཾ, པིཎྜཔཱཏིཀཙཏུཏྠཾ, ཨནུཔསམྤནྣཙཏུཏྠཾ, པཏྟཙཏུཏྠཾ, གིལཱནཙཏུཏྠནྟི པཉྩནྣཾ ཙཏུཀྐཱནཾ ཝསེན ཝིནིཙྪཡོ ཝེདིཏབྦོ ¶ . ཀཐཾ? ཨིདྷེཀཙྩོ ཙཏྟཱརོ བྷིཀྑཱུ ‘‘བྷཏྟཾ གཎྷཐཱ’’ཏི ནིམནྟེཏི. ཏེསུ ཏཡོ གཏཱ, ཨེཀོ ན གཏོ. ཨུཔཱསཀོ ‘‘ཨེཀོ བྷནྟེ ཐེརོ ཀུཧི’’ནྟི པུཙྪཏི. ནཱགཏོ ཨུཔཱསཀཱཏི. སོ ཨཉྙཾ ཏངྑཎཔྤཏྟཾ ཀཉྩི ‘‘ཨེཧི བྷནྟེ’’ཏི པཝེསེཏྭཱ ཙཏུནྣམྤི བྷཏྟཾ དེཏི, སབྦེསཾ ཨནཱཔཏྟི. ཀསྨཱ? གཎཔཱུརཀསྶ ཨནིམནྟིཏཏྟཱ. ཏཡོ ཨེཝ ཧི ཏཏྠ ནིམནྟིཏཱ གཎྷིཾསུ, ཏེཧི གཎོ ན པཱུརཏི, གཎཔཱུརཀོ ཙ ཨནིམནྟིཏོ, ཏེན གཎོ བྷིཛྫཏཱིཏི ཨིདཾ ཨནིམནྟིཏཙཏུཏྠཾ.

པིཎྜཔཱཏིཀཙཏུཏྠེ – ནིམནྟནཀཱལེ ཨེཀོ པིཎྜཔཱཏིཀོ ཧོཏི, སོ ནཱདྷིཝཱསེཏི. གམནཝེལཱཡ པན ‘‘ཨེཧི བྷནྟེ’’ཏི ཝུཏྟེ ཨནདྷིཝཱསིཏཏྟཱ ཨནཱགཙྪནྟམྤི ‘‘ཨེཐ བྷིཀྑཾ ལཙྪཐཱ’’ཏི གཧེཏྭཱ གཙྪནྟི, སོ ཏཾ གཎཾ བྷིནྡཏི. ཏསྨཱ སབྦེསཾ ཨནཱཔཏྟི.

ཨནུཔསམྤནྣཙཏུཏྠེ – སཱམཎེརེན སདྡྷིཾ ནིམནྟིཏཱ ཧོནྟི, སོཔི གཎཾ བྷིནྡཏི.

པཏྟཙཏུཏྠེ – ཨེཀོ སཡཾ ཨགནྟྭཱ པཏྟཾ པེསེཏི; ཨེཝམྤི གཎོ བྷིཛྫཏི. ཏསྨཱ སབྦེསཾ ཨནཱཔཏྟི.

གིལཱནཙཏུཏྠེ – གིལཱནེན སདྡྷིཾ ནིམནྟིཏཱ ཧོནྟི, ཏཏྠ གིལཱནསྶེཝ ཨནཱཔཏྟི, ཨིཏརེསཾ པན གཎཔཱུརཀོ ཧོཏི. ན ཧི གིལཱནེན གཎོ བྷིཛྫཏི. ཏསྨཱ ཏེསཾ ཨཱཔཏྟིཡེཝ. མཧཱཔཙྩརིཡཾ པན ཨཝིསེསེན ཝུཏྟཾ.

སམཡལདྡྷཀོ ¶ སཡམེཝ མུཙྩཏི, སེསཱནཾ གཎཔཱུརཀཏྟཱ ཨཱཔཏྟིཀརོ ཧོཏི. ཏསྨཱ ཙཱིཝརདཱནསམཡལདྡྷཀཱདཱིནམྤི ཝསེན ཙཏུཀྐཱནི ཝེདིཏབྦཱནི. སཙེ པན ཨདྷིཝཱསེཏྭཱ གཏེསུཔི ཙཏཱུསུ ཛནེསུ ཨེཀོ པཎྜིཏོ བྷིཀྑུ ‘‘ཨཧཾ ཏུམྷཱཀཾ གཎཾ བྷིནྡིསྶཱམི, ནིམནྟནཾ སཱདིཡཐཱ’’ཏི ཝཏྭཱ ཡཱགུཁཛྫཀཱཝསཱནེ བྷཏྟཏྠཱཡ པཏྟཾ གཎྷནྟཱནཾ ཨདཏྭཱ ‘‘ཨིམེ ཏཱཝ བྷིཀྑཱུ བྷོཛེཏྭཱ ཝིསྶཛྫེཐ, ཨཧཾ པཙྪཱ ཨནུམོདནཾ ཀཏྭཱ གམིསྶཱམཱི’’ཏི ནིསིནྣོ. ཏེསུ བྷུཏྭཱ གཏེསུ ‘‘དེཐ བྷནྟེ པཏྟ’’ནྟི ཨུཔཱསཀེན པཏྟཾ གཧེཏྭཱ བྷཏྟེ དིནྣེ བྷུཉྫིཏྭཱ ཨནུམོདནཾ ¶ ཀཏྭཱ གཙྪཏི, སབྦེསཾ ཨནཱཔཏྟི. པཉྩནྣཉྷི བྷོཛནཱནཾཡེཝ ཝསེན གཎབྷོཛནེ ཝིསངྐེཏཾ ནཏྠི. ཨོདནེན ནིམནྟིཏཱ ཀུམྨཱསཾ གཎྷནྟཱཔི ཨཱཔཏྟིཾ ཨཱཔཛྫནྟི. ཏཱནི ཙ ཏེཧི ཨེཀཏོ ན གཧིཏཱནི. ཡཱགུཨཱདཱིསུ པན ཝིསངྐེཏཾ ཧོཏི, ཏཱནི ཏེཧི ཨེཀཏོ གཧིཏཱནཱིཏི. ཨེཝཾ ཨེཀོ པཎྜིཏོ ཨཉྙེསམྤི ཨནཱཔཏྟིཾ ཀརོཏི.

ཏསྨཱ སཙེ ཀོཙི སངྒྷབྷཏྟཾ ཀཏྟུཀཱམེན ནིམནྟནཏྠཱཡ ¶ པེསིཏོ ཝིཧཱརཾ ཨཱགམྨ ‘‘བྷནྟེ, སྭེ ཨམྷཱཀཾ གྷརེ བྷིཀྑཾ གཎྷཐཱ’’ཏི ཨཝཏྭཱ ‘‘བྷཏྟཾ གཎྷཐཱ’’ཏི ཝཱ ‘‘སངྒྷབྷཏྟཾ གཎྷཐཱ’’ཏི ཝཱ ‘‘སངྒྷོ བྷཏྟཾ གཎྷཱཏཱུ’’ཏི ཝཱ ཝདཏི, བྷཏྟུདྡེསཀེན པཎྜིཏེན བྷཝིཏབྦཾ, ནེམནྟནིཀཱ གཎབྷོཛནཏོ པིཎྜཔཱཏིཀཱ ཙ དྷུཏངྒབྷེདཏོ མོཙེཏབྦཱ. ཀཐཾ? ཨེཝཾ ཏཱཝ ཝཏྟབྦཾ – ‘‘སྭེ ན སཀྐཱ ཨུཔཱསཀཱ’’ཏི. ‘‘པུནདིཝསེ, བྷནྟེ’’ཏི. ‘‘པུནདིཝསེཔི ན སཀྐཱ’’ཏི. ཨེཝཾ ཡཱཝ ཨདྡྷམཱསམྤི ཧརིཏྭཱ པུན ཝཏྟབྦོ – ‘‘ཏྭཾ ཀིཾ ཨཝཙཱ’’ཏི? སཙེ པུནཔི ‘‘སངྒྷབྷཏྟཾ གཎྷཐཱ’’ཏི ཝདཏི, ཏཏོ ‘‘ཨིམཾ ཏཱཝ ཨུཔཱསཀ པུཔྥཾ ཀཔྤིཡཾ ཀརོཧི, ཨིམཾ ཏིཎ’’ནྟི ཨེཝཾ ཝིཀྑེཔཾ ཀཏྭཱ པུན ‘‘ཀིཾ ཀཐཡིཏྠཱ’’ཏི པུཙྪིཏབྦོ. སཙེ པུནཔི ཏཐེཝ ཝདཏི, ‘‘ཨཱཝུསོ, ཏྭཾ པིཎྜཔཱཏིཀེ ཝཱ མཧཱཐེརེ ཝཱ ན ལཙྪསི, སཱམཎེརེ ལཙྪསཱི’’ཏི ཝཏྟབྦོ. ‘‘ནནུ, བྷནྟེ ཨསུཀསྨིཉྩ ཨསུཀསྨིཉྩ གཱམེ བྷདནྟེ བྷོཛེསུཾ, ཨཧཾ ཀསྨཱ ན ལབྷཱམཱི’’ཏི ཙ ཝུཏྟེ ‘‘ཏེ ནིམནྟེཏུཾ ཛཱནནྟི, ཏྭཾ ན ཛཱནཱསཱི’’ཏི. ཏེ ཀཐཾ ནིམནྟེསུཾ བྷནྟེཏི? ཏེ ཨེཝམཱཧཾསུ – ‘‘ཨམྷཱཀཾ, བྷནྟེ, བྷིཀྑཾ གཎྷཐཱ’’ཏི. སཙེ སོཔི ཏཐེཝ ཝདཏི, ཝཊྚཏི. ཨཐ པུནཔི ‘‘བྷཏྟཾ གཎྷཐཱ’’ཏི ཝདཏི, ‘‘ན དཱནི ཏྭཾ, ཨཱཝུསོ, བཧཱུ བྷིཀྑཱུ ལཙྪསི, ཏཡོ ཨེཝ ལཙྪསཱི’’ཏི ཝཏྟབྦོ. ‘‘ནནུ, བྷནྟེ, ཨསུཀསྨིཉྩ ཨསུཀསྨིཉྩ གཱམེ སཀལཾ བྷིཀྑུསངྒྷཾ བྷོཛེསུཾ, ཨཧཾ ཀསྨཱ ན ལབྷཱམཱི’’ཏི? ‘‘ཏྭཾ ནིམནྟེཏུཾ ན ཛཱནཱསཱི’’ཏི. ‘‘ཏེ ཀཐཾ ནིམནྟེསུ’’ནྟི? ཏེ ‘‘བྷིཀྑཾ གཎྷཐཱ’’ཏི ཨཱཧཾསཱུཏི. སཙེ སོཔི ‘‘བྷིཀྑཾ གཎྷཐཱ’’ཏི ཝདཏི, ཝཊྚཏི. ཨཐ པུནཔི ‘‘བྷཏྟམེཝཱ’’ཏི ཝདཏི, ཏཏོ ཝཏྟབྦོ – ‘‘གཙྪ ཏྭཾ, ནཏྠམྷཱཀཾ ཏཝ བྷཏྟེནཏྠོ, ནིབདྡྷགོཙརོ ཨེས ཨམྷཱཀཾ, མཡམེཏྠ པིཎྜཱཡ ཙརིསྶཱམཱ’’ཏི. ཏཾ ‘‘ཙརཐ, བྷནྟེ’’ཏི ཝཏྭཱ ཨཱགཏཾ པུཙྪནྟི – ‘‘ཀིཾ བྷོ ལདྡྷཱ བྷིཀྑཱུ’’ཏི ¶ . ‘‘ཀིཾ ཨེཏེན བཧུ ཨེཏྠ ཝཏྟབྦཾ, ‘ཐེརཱ སྭེ པིཎྜཱཡ ཙརིསྶཱམཱ’ཏི ཨཱཧཾསུ. མཱ དཱནི ཏུམྷེ པམཛྫིཏྠཱ’’ཏི. དུཏིཡདིཝསེ ཙེཏིཡཝཏྟཾ ཀཏྭཱ ཋིཏཱ བྷིཀྑཱུ སངྒྷཏྠེརེན ¶ ཝཏྟབྦཱ – ‘‘ཨཱཝུསོ, དྷུརགཱམེ སངྒྷབྷཏྟཾ ཨཔཎྜིཏམནུསྶོ པན ཨགམཱསི ¶ , གཙྪཱམ དྷུརགཱམེ པིཎྜཱཡ ཙརིསྶཱམཱ’’ཏི. བྷིཀྑཱུཧི ཐེརསྶ ཝཙནཾ ཀཱཏབྦཾ, ན དུབྦཙེཧི བྷཝིཏབྦཾ, གཱམདྭཱརེ ཨཊྛཏྭཱཝ པིཎྜཱཡ ཙརིཏབྦཾ. ཏེསུ པཏྟཱནི གཧེཏྭཱ ནིསཱིདཱཔེཏྭཱ བྷོཛེནྟེསུ བྷུཉྫིཏབྦཾ. སཙེ ཨཱསནསཱལཱཡ བྷཏྟཾ ཋཔེཏྭཱ རཐིཀཱསུ ཨཱཧིཎྜནྟཱ ཨཱརོཙེནྟི – ‘‘ཨཱསནསཱལཱཡ, བྷནྟེ, བྷཏྟཾ གཎྷཐཱ’’ཏི ན ཝཊྚཏི.

ཨཐ པན བྷཏྟཾ ཨཱདཱཡ ཏཏྠ ཏཏྠ གནྟྭཱ ‘‘བྷཏྟཾ གཎྷཐཱ’’ཏི ཝདནྟི, པཊིཀཙྩེཝ ཝཱ ཝིཧཱརཾ ཨབྷིཧརིཏྭཱ པཏིརཱུཔེ ཋཱནེ ཋཔེཏྭཱ ཨཱགཏཱགཏཱནཾ དེནྟི, ཨཡཾ ཨབྷིཧཊབྷིཀྑཱ ནཱམ ཝཊྚཏི. སཙེ པན བྷཏྟསཱལཱཡ དཱནཾ སཛྫེཏྭཱ ཏཾ ཏཾ པརིཝེཎཾ པཧིཎནྟི ‘‘བྷཏྟསཱལཱཡ བྷཏྟཾ གཎྷཐཱ’’ཏི, ན ཝཊྚཏི. ཡེ པན མནུསྶཱ པིཎྜཙཱརིཀེ བྷིཀྑཱུ དིསྭཱ ཨཱསནསཱལཾ སམྨཛྫིཏྭཱ ཏཏྠ ནིསཱིདཱཔེཏྭཱ བྷོཛེནྟི, ན ཏེ པཊིཀྑིཔིཏབྦཱ. ཡེ པན གཱམེ བྷིཀྑཾ ཨལབྷིཏྭཱ གཱམཏོ ནིཀྑམནྟེ བྷིཀྑཱུ དིསྭཱ ‘‘བྷནྟེ བྷཏྟཾ གཎྷཐཱ’’ཏི ཝདནྟི, ཏེ པཊིཀྑིཔིཏབྦཱ, ན ཝཱ ནིཝཏྟིཏབྦཾ. སཙེ ‘‘ནིཝཏྟཐ, བྷནྟེ, བྷཏྟཾ གཎྷཐཱ’’ཏི ཝདནྟི, ‘‘ནིཝཏྟཐཱ’’ཏི ཝུཏྟཔདེ ནིཝཏྟིཏུཾ ཝཊྚཏི. ‘‘ནིཝཏྟཐ བྷནྟེ, གྷརེ བྷཏྟཾ ཀཏཾ, གཱམེ བྷཏྟཾ ཀཏ’’ནྟི ཝདནྟི, གེཧེ ཙ གཱམེ ཙ བྷཏྟཾ ནཱམ ཡསྶ ཀསྶཙི ཧོཏཱིཏི ནིཝཏྟིཏུཾ ཝཊྚཏི. ‘‘ནིཝཏྟཐ, བྷཏྟཾ གཎྷཐཱ’’ཏི སམྦནྡྷཾ ཀཏྭཱ ཝདནྟི, ནིཝཏྟིཏུཾ ན ཝཊྚཏི. ཨཱསནསཱལཏོ པིཎྜཱཡ ཙརིཏུཾ ནིཀྑམནྟེ དིསྭཱ ‘‘ནིསཱིདཐ བྷནྟེ བྷཏྟཾ གཎྷཐཱ’’ཏི ཝུཏྟེཔི ཨེསེཝ ནཡོ. ནིཙྩབྷཏྟནྟི དྷུཝབྷཏྟཾ ཝུཙྩཏི. ‘‘ནིཙྩབྷཏྟཾ གཎྷཐཱ’’ཏི ཝདནྟི, བཧཱུནམྤི ཨེཀཏོ གཧེཏུཾ ཝཊྚཏི. སལཱཀབྷཏྟཱདཱིསུཔི ཨེསེཝ ནཡོ. སེསམེཏྠ ཨུཏྟཱནམེཝ.

ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

གཎབྷོཛནསིཀྑཱཔདཾ དུཏིཡཾ.

༣. པརམྤརབྷོཛནསིཀྑཱཔདཝཎྞནཱ

༢༢༡. ཏཏིཡསིཀྑཱཔདེ – ན ཁོ ཨིདཾ ཨོརཀཾ བྷཝིསྶཏི, ཡཐཡིམེ མནུསྶཱ སཀྐཙྩཾ བྷཏྟཾ ཀརོནྟཱིཏི, ཡེན ནིཡཱམེན ཨིམེ མནུསྶཱ ¶ སཀྐཙྩཾ བྷཏྟཾ ¶ ¶ ཀརོནྟི, ཏེན ཉཱཡཏི – ‘‘ཨིདཾ སཱསནཾ ཨིདཾ ཝཱ བུདྡྷཔྤམུཁེ སངྒྷེ དཱནཾ ན ཁོ ཨོརཀཾ བྷཝིསྶཏི, པརིཏྟཾ ལཱམཀཾ ནེཝ བྷཝིསྶཏཱི’’ཏི. ཀིརཔཏིཀོཏི ཨེཏྠ ‘‘ཀིརོ’’ཏི ཏསྶ ཀུལཔུཏྟསྶ ནཱམཾ; ཨདྷིཔཙྩཊྛེན པན ‘‘ཀིརཔཏིཀོ’’ཏི ཝུཙྩཏི. སོ ཀིར ཨིསྶརོ ཨདྷིཔཏི མཱསཨུཏུསཾཝཙྪརནིཡཱམེན ཝེཏནཾ དཏྭཱ ཀམྨཀཱརཀེ ཀམྨཾ ཀཱརེཏི. བདརཱ པཊིཡཏྟཱཏི ཨུཔཙཱརཝསེན ཝདཏི. བདརམིསྶེནཱཏི བདརསཱལ༹ཝེན.

༢༢༢. ཨུསྶཱུརེ ཨཱཧརིཡིཏྠཱཏི ཨཏིདིཝཱ ཨཱཧརིཡིཏྠ.

༢༢༦. མཡ྄ཧཾ བྷཏྟཔཙྩཱསཾ ཨིཏྠནྣཱམསྶ དམྨཱིཏི ཨཡཾ བྷཏྟཝིཀཔྤནཱ ནཱམ སམྨུཁཱཔི པརམྨུཁཱཔི ཝཊྚཏི. སམྨུཁཱ དིསྭཱ ‘‘ཏུཡ྄ཧཾ ཝིཀཔྤེམཱི’’ཏི ཝཏྭཱ བྷུཉྫིཏབྦཾ, ཨདིསྭཱ པཉྩསུ སཧདྷམྨིཀེསུ ‘‘ཨིཏྠནྣཱམསྶ ཝིཀཔྤེམཱི’’ཏི ཝཏྭཱ བྷུཉྫིཏབྦཾ. མཧཱཔཙྩརིཡཱདཱིསུ པན པརམྨུཁཱཝིཀཔྤནཱཝ ཝུཏྟཱ. སཱ ཙཱཡཾ ཡསྨཱ ཝིནཡཀམྨེན སངྒཧིཏཱ, ཏསྨཱ བྷགཝཏོ ཝིཀཔྤེཏུཾ ན ཝཊྚཏི. བྷགཝཏི ཧི གནྡྷཀུཊིཡཾ ནིསིནྣེཔི སངྒྷམཛ྄ཛྷེ ནིསིནྣེཔི སངྒྷེན གཎཔྤཧོནཀེ བྷིཀྑཱུ གཧེཏྭཱ ཏཾ ཏཾ ཀམྨཾ ཀཏཾ སུཀཏམེཝ ཧོཏི, བྷགཝཱ ནེཝ ཀམྨཾ ཀོཔེཏི; ན སམྤཱདེཏི. ན ཀོཔེཏི དྷམྨིསྶརཏྟཱ, ན སམྤཱདེཏི ཨགཎཔཱུརཀཏྟཱ.

༢༢༩. དྭེ ཏཡོ ནིམནྟནེ ཨེཀཏོ བྷུཉྫཏཱིཏི དྭེ ཏཱིཎི ནིམནྟནཱནི ཨེཀཔཏྟེ པཀྑིཔིཏྭཱ མིསྶེཏྭཱ ཨེཀཾ ཀཏྭཱ བྷུཉྫཏཱིཏི ཨཏྠོ. དྭེ ཏཱིཎི ཀུལཱནི ནིམནྟེཏྭཱ ཨེཀསྨིཾ ཋཱནེ ནིསཱིདཱཔེཏྭཱ ཨིཏོ ཙིཏོ ཙ ཨཱཧརིཏྭཱ བྷཏྟཾ ཨཱཀིརནྟི, སཱུཔབྱཉྫནཾ ཨཱཀིརནྟི, ཨེཀམིསྶཀཾ ཧོཏི, ཨེཏྠ ཨནཱཔཏྟཱིཏི མཧཱཔཙྩརིཡཾ ཝུཏྟཾ. སཙེ པན མཱུལནིམནྟནཾ ཧེཊྛཱ ཧོཏི, པཙྪིམཾ པཙྪིམཾ ཨུཔརི, ཏཾ ཨུཔརིཏོ པཊྛཱཡ བྷུཉྫནྟསྶ ཨཱཔཏྟི. ཧཏྠཾ པན ཨནྟོ པཝེསེཏྭཱ པཋམནིམནྟནཏོ ཨེཀམྤི ཀབལ༹ཾ ཨུདྡྷརིཏྭཱ བྷུཏྟཀཱལཏོ པཊྛཱཡ ཡཐཱ ཏཐཱ ཝཱ བྷུཉྫནྟསྶ ཨནཱཔཏྟི. སཙེཔི ཏཏྠ ཁཱིརཾ ཝཱ རསཾ ཝཱ ཨཱཀིརནྟི, ཡེན ཨཛ྄ཛྷོཏྠཏཾ བྷཏྟཾ ཨེཀརསཾ ཧོཏི, ཀོཊིཏོ པཊྛཱཡ བྷུཉྫནྟསྶ ཨནཱཔཏྟཱིཏི མཧཱཔཙྩརིཡཾ ཝུཏྟཾ. མཧཱཨཊྛཀཐཱཡཾ པན ཝུཏྟཾ – ‘‘ཁཱིརབྷཏྟཾ ཝཱ ¶ རསབྷཏྟཾ ཝཱ ལབྷིཏྭཱ ནིསིནྣསྶ ཏཏྠེཝ ཨཉྙེཔི ཁཱིརབྷཏྟཾ ཝཱ རསབྷཏྟཾ ཝཱ ཨཱཀིརནྟི, ཁཱིརཾ ཝཱ རསཾ ཝཱ པིཝཏོ ཨནཱཔཏྟི. བྷུཉྫནྟེན པན པཋམཾ ལདྡྷམཾསཁཎྜཾ ཝཱ བྷཏྟཔིཎྜཾ ¶ ཝཱ མུཁེ པཀྑིཔིཏྭཱ ཀོཊིཏོ པཊྛཱཡ བྷུཉྫིཏུཾ ཝཊྚཏི. སཔྤིཔཱཡཱསེཔི ཨེསེཝ ནཡོ’’ཏི.

མཧཱཨུཔཱསཀོ ¶ བྷིཀྑུཾ ནིམནྟེཏི, ཏསྶ ཀུལཾ ཨུཔགཏསྶ ཨུཔཱསཀོཔི ཏསྶ པུཏྟདཱརབྷཱཏིཀབྷགིནིཨཱདཡོཔི ཨཏྟནོ ཨཏྟནོ ཀོཊྛཱསཾ ཨཱཧརིཏྭཱ པཏྟེ པཀྑིཔནྟི, ཨུཔཱསཀེན པཋམཾ དིནྣཾ ཨབྷུཉྫིཏྭཱ པཙྪཱ ལདྡྷཾ བྷུཉྫནྟསྶ ‘‘ཨནཱཔཏྟཱི’’ཏི མཧཱཨཊྛཀཐཱཡཾ ཝུཏྟཾ. ཀུརུནྡཊྛཀཐཱཡཾ པན ཝཊྚཏཱིཏི ཝུཏྟཾ. མཧཱཔཙྩརིཡཾ ‘‘སཙེ པཱཊེཀྐཾ པཙནྟི, ཨཏྟནོ ཨཏྟནོ པཀྐབྷཏྟཏོ ཨཱཧརིཏྭཱ དེནྟི, ཏཏྠ པཙྪཱ ཨཱཧཊཾ པཋམཾ བྷུཉྫནྟསྶ པཱཙིཏྟིཡཾ. ཡདི པན སབྦེསཾ ཨེཀོཝ པཱཀོ ཧོཏི, པརམྤརབྷོཛནཾ ན ཧོཏཱི’’ཏི ཝུཏྟཾ. མཧཱཨུཔཱསཀོ ནིམནྟེཏྭཱ ནིསཱིདཱཔེཏི, ཨཉྙོ མནུསྶོ པཏྟཾ གཎྷཱཏི, ན དཱཏབྦཾ. ཀིཾ བྷནྟེ ན དེཐཱཏི? ནནུ ཨུཔཱསཀ ཏཡཱ ནིམནྟིཏམྷཱཏི! ཧོཏུ བྷནྟེ, ལདྡྷཾ ལདྡྷཾ བྷུཉྫཐཱཏི ཝདཏི, བྷུཉྫིཏུཾ ཝཊྚཏི. ཨཉྙེན ཨཱཧརིཏྭཱ བྷཏྟེ དིནྣེ ཨཱཔུཙྪིཏྭཱཔི བྷུཉྫིཏུཾ ཝཊྚཏཱིཏི ཀུརུནྡིཡཾ ཝུཏྟཾ.

ཨནུམོདནཾ ཀཏྭཱ གཙྪནྟཾ དྷམྨཾ སོཏུཀཱམཱ ‘‘སྭེཔི བྷནྟེ ཨཱགཙྪེཡྻཱཐཱ’’ཏི སབྦེ ནིམནྟེནྟི, པུནདིཝསེ ཨཱགནྟྭཱ ལདྡྷཾ ལདྡྷཾ བྷུཉྫིཏུཾ ཝཊྚཏི. ཀསྨཱ? སབྦེཧི ནིམནྟིཏཏྟཱ. ཨེཀོ བྷིཀྑུ པིཎྜཱཡ ཙརནྟོ བྷཏྟཾ ལབྷཏི, ཏམཉྙོ ཨུཔཱསཀོ ནིམནྟེཏྭཱ གྷརེ ནིསཱིདཱཔེཏི, ན ཙ ཏཱཝ བྷཏྟཾ སམྤཛྫཏི. སཙེ སོ བྷིཀྑུ པིཎྜཱཡ ཙརིཏྭཱ ལདྡྷབྷཏྟཾ བྷུཉྫཏི, ཨཱཔཏྟི. ཨབྷུཏྭཱ ནིསིནྣེ ‘‘ཀིཾ བྷནྟེ ན བྷུཉྫསཱི’’ཏི ཝུཏྟེ ‘‘ཏཡཱ ནིམནྟིཏཏྟཱ’’ཏི ཝཏྭཱ ལདྡྷཾ ལདྡྷཾ བྷུཉྫཐ བྷནྟེ’’ཏི ཝུཏྟོ བྷུཉྫཏི, ཝཊྚཏི.

སཀལེན གཱམེནཱཏི སཀལེན གཱམེན ཨེཀཏོ ཧུཏྭཱ ནིམནྟིཏསྶེཝ ཡཏྠ ཀཏྠཙི བྷུཉྫཏོ ཨནཱཔཏྟི. པཱུགེཔི ཨེསེཝ ནཡོ. ནིམནྟིཡམཱནོ བྷིཀྑཾ གཧེསྶཱམཱིཏི བྷཎཏཱིཏི ‘‘བྷཏྟཾ གཎྷཱ’’ཏི ནིམནྟིཡམཱནོ ¶ ‘‘ན མཡ྄ཧཾ ཏཝ བྷཏྟེནཏྠོ, བྷིཀྑཾ གཎྷིསྶཱམཱི’’ཏི ཝདཏི. ཨེཏྠ པན མཧཱཔདུམཏྠེརོ ཨཱཧ – ‘‘ཨེཝཾ ཝདནྟོ ཨིམསྨིཾ སིཀྑཱཔདེ ཨནིམནྟནཾ ཀཱཏུཾ སཀྐོཏི, བྷུཉྫནཏྠཱཡ པན ཨོཀཱསོ ཀཏོ ཧོཏཱིཏི ནེཝ གཎབྷོཛནཏོ ན ཙཱརིཏྟཏོ མུཙྩཏཱི’’ཏི. མཧཱསུམཏྠེརོ ཨཱཧ – ‘‘ཡདགྒེན ཨནིམནྟནཾ ཀཱཏུཾ སཀྐོཏི, ཏདགྒེན ནེཝ གཎབྷོཛནཾ ན ཙཱརིཏྟཾ ཧོཏཱི’’ཏི. སེསཾ ཨུཏྟཱནམེཝ.

ཀཐིནསམུཊྛཱནཾ ¶ – ཀཱཡཝཱཙཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཱཀིརིཡཾ ཨེཏྠ ཧི བྷོཛནཾ ཀིརིཡཱ, ཨཝིཀཔྤནཾ ཨཀིརིཡཱ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པརམྤརབྷོཛནསིཀྑཱཔདཾ ཏཏིཡཾ.

༤. ཀཱཎམཱཏཱསིཀྑཱཔདཝཎྞནཱ

༢༣༠. ཙཏུཏྠསིཀྑཱཔདེ ¶ – ཀཱཎམཱཏཱཏི ཀཱཎཱཡ མཱཏཱ. སཱ ཀིརསྶཱ དྷཱིཏཱ ཨབྷིརཱུཔཱ ཨཧོསི, ཡེ ཡེ ཏཾ པསྶནྟི, ཏེ ཏེ རཱགེན ཀཱཎཱ ཧོནྟི, རཱགནྡྷཱ ཧོནྟཱིཏི ཨཏྠོ. ཏསྨཱ པརེསཾ ཀཱཎབྷཱཝཀརཎཏོ ‘‘ཀཱཎཱ’’ཏི ཝིསྶུཏཱ ཨཧོསི. ཏསྶཱ ཝསེན མཱཏཱཔིསྶཱ ‘‘ཀཱཎམཱཏཱ’’ཏི པཱཀཊཱ ཛཱཏཱ. ཨཱགཏནྟི ཨཱགམནཾ. ཀིསྨིཾ ཝིཡཱཏི ཀཱིདིསཾ ཝིཡ; ལཛྫནཀཾ ཝིཡ ཧོཏཱིཏི ཨདྷིཔྤཱཡོ. རིཏྟཧཏྠཾ གནྟུནྟི རིཏྟཱ ཧཏྠཱ ཨསྨིཾ གམནེ ཏདིདཾ རིཏྟཧཏྠཾ, ཏཾ རིཏྟཧཏྠཾ གམནཾ གནྟུཾ ལཛྫནཀཾ ཝིཡ ཧོཏཱིཏི ཝུཏྟཾ ཧོཏི. པརིཀྑཡཾ ཨགམཱསཱིཏི ཨུཔཱསིཀཱ ཨརིཡསཱཝིཀཱ བྷིཀྑཱུ དིསྭཱ སནྟཾ ཨདཱཏུཾ ན སཀྐོཏི, ཏསྨཱ ཏཱཝ དཱཔེསི, ཡཱཝ སབྦཾ པརིཀྑཡཾ ཨགམཱསི. དྷམྨིཡཱ ཀཐཱཡཱཏི ཨེཏྠ ཀཱཎཱཔི མཱཏུ ཨཏྠཱཡ དེསིཡམཱནཾ དྷམྨཾ སུཎནྟཱི དེསནཱཔརིཡོསཱནེ སོཏཱཔནྣཱ ཨཧོསི. ཨུཊྛཱཡཱསནཱ པཀྐཱམཱིཏི ཨཱསནཏོ ཨུཊྛཧིཏྭཱ གཏོ. སོཔི པུརིསོ ‘‘སཏྠཱ ཀིར ཀཱཎམཱཏཱཡ ནིཝེསནཾ ཨགམཱསཱི’’ཏི སུཏྭཱ ཀཱཎཾ ཨཱནེཏྭཱ པཀཏིཊྛཱནེཡེཝ ཋཔེསི.

༢༣༡. ཨིམསྨིཾ པན ཝཏྠུསྨིཾ ཨུཔྤནྣམཏྟེ ཨཔྤཉྙཏྟེཡེཝ སིཀྑཱཔདེ པཱཐེཡྻཝཏྠུ ཨུདཔཱདི, ཏསྨཱ ཨནནྟརམེཝ ཙེཏཾ དསྶེཏུཾ ‘‘ཏེན ཁོ པན སམཡེནཱ’’ཏིཨཱདི ཝུཏྟཾ. སོཔི ཙ ཨུཔཱསཀོ ཨརིཡསཱཝཀཏྟཱ སབྦམེཝ དཱཔེསི. ཏེན ཝུཏྟཾ – ‘‘པརིཀྑཡཾ ཨགམཱསཱི’’ཏི.

༢༣༣. ཡཾཀིཉྩི པཧེཎཀཏྠཱཡཱཏི པཎྞཱཀཱརཏྠཱཡ པཊིཡཏྟཾ ཡཾཀིཉྩི ཨཏིརསཀམོདཀསཀྑལིཀཱདི སབྦཾ ཨིདྷ པཱུཝོཏྭེཝ སངྑྱཾ གཙྪཏི. ཡཾཀིཉྩི ¶ ¶ པཱཐེཡྻཏྠཱཡཱཏི མགྒཾ གཙྪནྟཱནཾ ཨནྟརཱམགྒཏྠཱཡ པཊིཡཏྟཾ ཡཾཀིཉྩི བདྡྷསཏྟུཨབདྡྷསཏྟུཏིལཏཎྜུལཱདི སབྦཾ ཨིདྷ མནྠོཏྭེཝ སངྑྱཾ གཙྪཏི. ཏཏོ ཙེ ཨུཏྟརིནྟི སཙེཔི ཏཏིཡཾ པཏྟཾ ཐཱུཔཱིཀཏཾ གཎྷཱཏི, པཱུཝགཎནཱཡ པཱཙིཏྟིཡཾ.

དྭཏྟིཔཏྟཔཱུརེ པཊིགྒཧེཏྭཱཏི མུཁཝཊྚིཡཱ ཧེཊྛིམལེཁཱཡ སམཔཱུརེ པཏྟེ གཧེཏྭཱ. ཨམུཏྲ མཡཱ དྭཏྟིཔཏྟཔཱུརཱཏི ཨེཏྠ སཙེ དྭེ གཧིཏཱ, ‘‘ཨཏྲ མཡཱ དྭེ པཏྟཔཱུརཱ པཊིགྒཧིཏཱ, ཏྭཾ ཨེཀཾ གཎྷེཡྻཱསཱི’’ཏི ཝཏྟབྦཾ. ཏེནཱཔི ཨཉྙཾ པསྶིཏྭཱ ‘‘པཋམཾ ཨཱགཏེན དྭེ པཏྟཔཱུརཱ གཧིཏཱ, མཡཱ ཨེཀོ, མཱ ཏྭཾ གཎྷཱི’’ཏི ཝཏྟབྦཾ. ཡེན པཋམཾ ཨེཀོ གཧིཏོ, ཏསྶཱཔི པརམྤརཱརོཙནེ ཨེསེཝ ནཡོ. ཡེན པན སཡམེཝ ཏཡོ གཧིཏཱ, ཏེན ཨཉྙཾ དིསྭཱ ‘‘མཱ ཁོ ཨེཏྠ པཊིགྒཎྷི’’ ཙྩེཝ ཝཏྟབྦཾ. པཊིཀྐམནཾ ནཱིཧརིཏྭཱཏི ཨཱསནསཱལཾ ཧརིཏྭཱ, ཨཱསནསཱལཾ གཙྪནྟེན ¶ ཙ ཚཌྜིཏསཱལཱ ན གནྟབྦཱ. ཡཏྠ མཧཱ བྷིཀྑུསངྒྷོ ནིསཱིདཏི, ཏཏྠ གནྟབྦཾ. མཧཱཔཙྩརིཡཾ པན ཝུཏྟཾ ‘‘ཡཱ ལདྡྷཊྛཱནཏོ ཨཱསནྣཱ ཨཱསནསཱལཱ, ཏཏྠ གནྟབྦཾ. ཨཏྟནོ ‘སནྡིཊྛཱནཾ ཝཱ སམྦྷཏྟཱནཾ ཝཱ ཨེཀནིཀཱཡིཀཱནཾ ཝཱ དསྶཱམཱི’ཏི ཨཉྙཏྠ གནྟུཾ ན ལབྦྷཏི. སཙེ པནསྶ ནིབདྡྷནིསཱིདནཊྛཱནཾ ཧོཏི, དཱུརམྤི གནྟུཾ ཝཊྚཏཱི’’ཏི.

སཾཝིབྷཛིཏབྦནྟི སཙེ ཏཡོ པཏྟཔཱུརཱ གཧིཏཱ, ཨེཀཾ ཨཏྟནོ ཋཔེཏྭཱ དྭེ བྷིཀྑུསངྒྷསྶ དཱཏབྦཱ. སཙྩེ དྭེ གཧིཏཱ, ཨེཀཾ ཨཏྟནོ ཋཔེཏྭཱ ཨེཀོ སངྒྷསྶ དཱཏབྦོ, ཡཐཱམིཏྟཾ པན དཱཏུཾ ན ལབྦྷཏི. ཡེན ཨེཀོ གཧིཏོ, ན ཏེན ཀིཉྩི ཨཀཱམཱ དཱཏབྦཾ, ཡཐཱརུཙི ཀཱཏབྦཾ.

༢༣༥. གམནེ པཊིཔྤསྶདྡྷེཏི ཨནྟརཱམགྒེ ཨུཔདྡཝཾ ཝཱ དིསྭཱ ཨནཏྠིཀཏཱཡ ཝཱ ‘‘མཡཾ ཨིདཱནི ན པེསིསྶཱམ, ན གམིསྶཱམཱ’’ཏི ཨེཝཾ གམནེ པཊིཔྤསྶདྡྷེ ཨུཔཙྪིནྣེ. ཉཱཏཀཱནཾ པཝཱརིཏཱནནྟི ཨེཏེསཾ བཧུམྤི དེནྟཱནཾ པཊིགྒཎྷནྟསྶ ཨནཱཔཏྟི. ཨཊྛཀཐཱསུ པན ‘‘ཏེསམྤི པཱཐེཡྻཔཧེཎཀཏྠཱཡ པཊིཡཏྟཏོ པམཱཎམེཝ ཝཊྚཏཱི’’ཏི ཝུཏྟཾ. སེསཾ ཨུཏྟཱནམེཝ.

ཚསམུཊྛཱནཾ ¶ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཀཱཎམཱཏཱསིཀྑཱཔདཾ ཙཏུཏྠཾ.

༥. པཋམཔཝཱརཎསིཀྑཱཔདཝཎྞནཱ

༢༣༦. པཉྩམསིཀྑཱཔདེ ¶ – བྷིཀྑཱུ བྷུཏྟཱཝཱི པཝཱརིཏཱཏི བྲཱཧྨཎེན ‘‘གཎྷཐ, བྷནྟེ, ཡཱཝ ཨིཙྪཐཱ’’ཏི ཨེཝཾ ཡཱཝདཏྠཔཝཱརཎཱཡ, སཡཉྩ ‘‘ཨལཾ, ཨཱཝུསོ, ཐོཀཾ ཐོཀཾ དེཧཱི’’ཏི ཨེཝཾ པཊིཀྑེཔཔཝཱརཎཱཡ པཝཱརིཏཱ. པཊིཝིསྶཀེཏི སཱམནྟགྷརཝཱསིཀེ.

༢༣༧. ཀཱཀོརཝསདྡནྟི ཀཱཀཱནཾ ཨོརཝསདྡཾ; སནྣིཔཏིཏྭཱ ཝིརཝནྟཱནཾ སདྡཾ. ཨལམེཏཾ སབྦནྟི ཨེཏྠ ཏིཀཱརཾ ཨཝཏྭཱཝ ‘‘ཨལམེཏཾ སབྦཾ’’ ཨེཏྟཀཾ ཝཏྟུཾ ཝཊྚཏི.

༢༣༨-༩. བྷུཏྟཱཝཱིཏི བྷུཏྟཝཱ. ཏཏྠ ཙ ཡསྨཱ ཡེན ཨེཀམྤི སིཏྠཾ སངྑཱདིཏྭཱ ཝཱ ཨསངྑཱདིཏྭཱ ¶ ཝཱ ཨཛ྄ཛྷོཧརིཏཾ ཧོཏི, སོ ‘‘བྷུཏྟཱཝཱི’’ཏི སངྑྱཾ གཙྪཏི, ཏེནསྶ པདབྷཱཛནེ ‘‘བྷུཏྟཱཝཱི ནཱམ པཉྩནྣཾ བྷོཛནཱན’’ནྟིཨཱདི ཝུཏྟཾ. པཝཱརིཏོཏི ཀཏཔཝཱརཎོ, ཀཏཔཊིཀྑེཔོ. སོཔི ཙ ཡསྨཱ ན པཊིཀྑེཔམཏྟེན, ཨཐ ཁོ པཉྩངྒཝསེན, ཏེནསྶ པདབྷཱཛནེ ‘‘པཝཱརིཏོ ནཱམ ཨསནཾ པཉྙཱཡཏཱི’’ཏིཨཱདི ཝུཏྟཾ. ཏཏྠ ཡསྨཱ ‘‘ཨསནཾ པཉྙཱཡཏཱི’’ཏི ཨིམིནཱ ཝིཔྤཀཏབྷོཛནོ, ‘‘པཝཱརིཏོ’’ཏི ཝུཏྟོ. ཡོ ཙ ཝིཔྤཀཏབྷོཛནོ, ཏེན ཀིཉྩི བྷུཏྟཾ, ཀིཉྩི ཨབྷུཏྟཾ, ཡཉྩ བྷུཏྟཾ; ཏཾ སནྡྷཱཡ ‘‘བྷུཏྟཱཝཱི’’ཏིཔི སངྑྱཾ གཙྪཏི, ཏསྨཱ བྷུཏྟཱཝཱིཝཙནེན ཝིསུཾ ཀཉྩི ཨཏྠསིདྡྷིཾ ན པསྶཱམ. ‘‘དིརཏྟཏིརཏྟཾ, ཚཔྤཉྩཝཱཙཱཧཱི’’ཏིཨཱདཱིསུ (པཱཙི. ༦༡-༦༢) པན དིརཏྟཱདིཝཙནཾ ཝིཡ པཝཱརིཏཔདསྶ པརིཝཱརཀབྷཱཝེན བྱཉྫནསིལིཊྛཏཱཡ ཙེཏཾ ཝུཏྟནྟི ཝེདིཏབྦཾ.

ཨསནཾ པཉྙཱཡཏཱིཏིཨཱདཱིསུ ཝིཔྤཀཏབྷོཛནཾ དིསྶཏི, བྷུཉྫམཱནོ ཙེསོ པུགྒལོ ཧོཏཱིཏི ཨཏྠོ. བྷོཛནཾ པཉྙཱཡཏཱིཏི པཝཱརཎཔྤཧོནཀབྷོཛནཾ དིསྶཏི. ཨོདནཱདཱིནཾ ཙེ ཨཉྙཏརཾ པཊིཀྑིཔིཏབྦཾ བྷོཛནཾ ཧོཏཱིཏི ཨཏྠོ. ཧཏྠཔཱསེ ཋིཏོཏི པཝཱརཎཔྤཧོནཀཾ བྷོཛནཾ གཎྷིཏྭཱ དཱཡཀོ ཨཌྜྷཏེཡྻཧཏྠཔྤམཱཎེ ཨོཀཱསེ ཧོཏཱིཏི ཨཏྠོ. ཨབྷིཧརཏཱིཏི སོ ཙེ དཱཡཀོ ཏསྶ ཏཾ བྷཏྟཾ ཀཱཡེན ཨབྷིཧརཏཱིཏི ཨཏྠོ. པཊིཀྑེཔོ པཉྙཱཡཏཱིཏི པཊིཀྑེཔོ དིསྶཏི; ཏཉྩེ ཨབྷིཧཊཾ སོ བྷིཀྑུ ཀཱཡེན ཝཱ ཝཱཙཱཡ ¶ ཝཱ པཊིཀྑིཔཏཱིཏི ཨཏྠོ. ཨེཝཾ པཉྩནྣཾ ཨངྒཱནཾ ཝསེན པཝཱརིཏོ ནཱམ ཧོཏཱིཏི. ཝུཏྟམྤི ཙེཏཾ –

‘‘པཉྩཧི ¶ ཨུཔཱལི ཨཱཀཱརེཧི པཝཱརཎཱ པཉྙཱཡཏི – ཨསནཾ པཉྙཱཡཏི, བྷོཛནཾ པཉྙཱཡཏི, ཧཏྠཔཱསེ ཋིཏོ, ཨབྷིཧརཏི, པཊིཀྑེཔོ པཉྙཱཡཏཱི’’ཏི (པརི. ༤༢༨).

ཏཏྲཱཡཾ ཝིནིཙྪཡོ – ‘‘ཨསན’’ནྟིཨཱདཱིསུ ཏཱཝ ཡཉྩ ཨསྣཱཏི ཡཉྩ བྷོཛནཾ ཧཏྠཔཱསེ ཋིཏེན ཨབྷིཧཊཾ པཊིཀྑིཔཏི, ཏཾ ‘‘ཨོདནོ, ཀུམྨཱསོ, སཏྟུ, མཙྪོ, མཾས’’ནྟི ཨིམེསཾ ཨཉྙཏརམེཝ ཝེདིཏབྦཾ. ཏཏྠ ཨོདནོ ནཱམ – སཱལི, ཝཱིཧི, ཡཝོ, གོདྷུམོ, ཀངྒུ, ཝརཀོ, ཀུདྲཱུསཀོཏི སཏྟནྣཾ དྷཉྙཱནཾ ཏཎྜུལེཧི ནིབྦཏྟོ. ཏཏྠ ‘‘སཱལཱི’’ཏི ཨནྟམསོ ནཱིཝཱརཾ ཨུཔཱདཱཡ སབྦཱཔི སཱལིཛཱཏི. ‘‘ཝཱིཧཱི’’ཏི སབྦཱཔི ཝཱིཧིཛཱཏི. ‘‘ཡཝགོདྷུམེསུ’’ བྷེདོ ནཏྠི. ‘‘ཀངྒཱུ’’ཏི སེཏརཏྟཀཱལ༹བྷེདཱ སབྦཱཔི ཀངྒུཛཱཏི. ‘‘ཝརཀོ’’ཏི ཨནྟམསོ ཝརཀཙོརཀཾ ཨུཔཱདཱཡ སབྦཱ སེཏཝཎྞཱ ཝརཀཛཱཏི. ‘‘ཀུདྲཱུསཀོ’’ཏི ཀཱལ༹ཀོ དྲཝོ ཙེཝ སཱམཱཀཱདིབྷེདཱ ཙ སབྦཱཔི ཏིཎདྷཉྙཛཱཏི.

ནཱིཝཱརཝརཀཙོརཀཱ ¶ ཙེཏྠ ‘‘དྷཉྙཱནུལོམཱ’’ཏི ཝདནྟི. དྷཉྙཱནི ཝཱ ཧོནྟུ དྷཉྙཱནུལོམཱནི ཝཱ, ཨེཏེསཾ ཝུཏྟཔྤབྷེདཱནཾ སཏྟནྣཾ དྷཉྙཱནཾ ཏཎྜུལེ གཧེཏྭཱ ‘‘བྷཏྟཾ པཙིསྶཱམཱ’’ཏི ཝཱ ‘‘ཡཱགུཾ པཙིསྶཱམཱ’’ཏི ཝཱ ‘‘ཨམྦིལཔཱཡཱསཱདཱིསུ ཨཉྙཏརཾ པཙིསྶཱམཱ’’ཏི ཝཱ ཡཾཀིཉྩི སནྡྷཱཡ པཙནྟུ, སཙེ ཨུཎྷཾ སཱིཏལཾ ཝཱ བྷུཉྫནྟཱནཾ བྷོཛནཀཱལེ གཧིཏགཧིཏཊྛཱནེ ཨོདྷི པཉྙཱཡཏི, ཨོདནསངྒཧམེཝ གཙྪཏི, པཝཱརཎཾ ཛནེཏི. སཙེ ཨོདྷི ན པཉྙཱཡཏི, ཡཱགུསངྒཧཾ གཙྪཏི, པཝཱརཎཾ ན ཛནེཏི.

ཡོཔི པཱཡཱསོ ཝཱ པཎྞཕལཀལཱི༹རམིསྶཀཱ ཨམྦིལཡཱགུ ཝཱ ཨུདྡྷནཏོ ཨོཏཱརིཏམཏྟཱ ཨབྦྷུཎྷཱ ཧོཏི, ཨཱཝཛྫིཏྭཱ པིཝིཏུཾ སཀྐཱ, ཧཏྠེན གཧིཏོཀཱསེཔི ཨོདྷིཾ ན དསྶེཏི, པཝཱརཎཾ ན ཛནེཏི. སཙེ པན ཨུསུམཱཡ ཝིགཏཱཡ སཱིཏལཱིབྷཱུཏཱ གྷནབྷཱཝཾ གཙྪཏི, ཨོདྷིཾ དསྶེཏི, པུན པཝཱརཎཾ ཛནེཏི. པུབྦེ ཏནུབྷཱཝོ ན རཀྑཏི. སཙེཔི དདྷིཏཀྐཱདཱིནི ཨཱརོཔེཏྭཱ བཧུཔཎྞཕལཀལཱི༹རེ པཀྑིཔིཏྭཱ མུཊྛིམཏྟཱཔི ཏཎྜུལཱ པཀྑིཏྟཱ ཧོནྟི, བྷོཛནཀཱལེ ཙེ ཨོདྷི པཉྙཱཡཏི, པཝཱརཎཾ ཛནེཏི. ཨཡཱགུཀེ ¶ ནིམནྟནེ ‘‘ཡཱགུཾ དསྶཱམཱ’’ཏི བྷཏྟེ ཨུདཀཀཉྫིཀཁཱིརཱདཱིནི ཨཱཀིརིཏྭཱ ‘‘ཡཱགུཾ གཎྷཐཱ’’ཏི དེནྟི. ཀིཉྩཱཔི ཏནུཀཱ ཧོནྟི, པཝཱརཎཾ ཛནེཏིཡེཝ ¶ . སཙེ པན པཀྐུཐིཏེསུ ཨུདཀཱདཱིསུ པཀྑིཔིཏྭཱ པཙིཏྭཱ དེནྟི, ཡཱགུསངྒཧམེཝ གཙྪཏི. ཡཱགུསངྒཧཾ གཏེཔི ཏསྨིཾ ཝཱ ཨཉྙསྨིཾ ཝཱ ཡཏྠ མཙྪམཾསཾ པཀྑིཔནྟི, སཙེ སཱསཔམཏྟམྤི མཙྪམཾསཁཎྜཾ ཝཱ ནྷཱརུ ཝཱ པཉྙཱཡཏི, པཝཱརཎཾ ཛནེཏི.

སུདྡྷརསཀོ པན རསཀཡཱགུ ཝཱ ན ཛནེཏི. ཋཔེཏྭཱ ཝུཏྟདྷཉྙཱནཾ ཏཎྜུལེ ཨཉྙེཧི ཝེཎུཏཎྜུལཱདཱིཧི ཝཱ ཀནྡམཱུལཕལེཧི ཝཱ ཡེཧི ཀེཧིཙི ཀཏཾ བྷཏྟམྤི པཝཱརཎཾ ན ཛནེཏི, པགེཝ གྷནཡཱགུ. སཙེ པནེཏྠ མཙྪམཾསཾ པཀྑིཔནྟི, ཛནེཏི. མཧཱཔཙྩརིཡཾ ‘‘པུཔྥཨཏྠཱཡ བྷཏྟམྤི པཝཱརཎཾ ཛནེཏཱི’’ཏི ཝུཏྟཾ. པུཔྥིཨཏྠཱཡ བྷཏྟཾ ནཱམ པུཔྥིཁཛྫཀཏྠཱཡ ཀུཐིཏཏཱུདཀེ པཀྑིཔིཏྭཱ སེདིཏཏཎྜུལཱ ཝུཙྩནྟི. སཙེ པན ཏེ ཏཎྜུལེ སུཀྑཱཔེཏྭཱ ཁཱདནྟི, ཝཊྚཏི; ནེཝ སཏྟུསངྑྱཾ ན བྷཏྟསངྑྱཾ གཙྪནྟི. པུན ཏེཧི ཀཏབྷཏྟཾ པཝཱརེཏིཡེཝ. ཏེ ཏཎྜུལེ སཔྤིཏེལཱདཱིསུ ཝཱ པཙནྟི, པཱུཝཾ ཝཱ ཀརོནྟི, ན པཝཱརེནྟི. པུཐུཀཱ ཝཱ ཏཱཧི ཀཏསཏྟུབྷཏྟཱདཱིནི ཝཱ ན པཝཱརེནྟི.

ཀུམྨཱསོ ནཱམ ཡཝེཧི ཀཏཀུམྨཱསོ. ཨཉྙེཧི པན མུགྒཱདཱིཧི ཀཏཀུམྨཱསོ པཝཱརཎཾ ན ཛནེཏི. སཏྟུ ནཱམ སཱལིཝཱིཧིཡཝེཧི ཀཏསཏྟུ. ཀངྒུཝརཀཀུདྲཱུསཀསཱིསཱནིཔི བྷཛྫིཏྭཱ ཨཱིསཀཾ ¶ ཀོཊྚེཏྭཱ ཐུསེ པལཱཔེཏྭཱ པུན དལ༹ྷཾ ཀོཊྚེཏྭཱ ཙུཎྞཾ ཀརོནྟི. སཙེཔི ཏཾ ཨལླཏྟཱ ཨེཀཱབདྡྷཾ ཧོཏི, སཏྟུསངྒཧམེཝ གཙྪཏི. ཁརཔཱཀབྷཛྫིཏཱནཾ ཝཱིཧཱིནཾ ཏཎྜུལེ ཀོཊྚེཏྭཱ དེནྟི, ཏམྤི ཙུཎྞཾ སཏྟུསངྒཧམེཝ གཙྪཏི. སམཔཱཀབྷཛྫིཏཱནཾ པན ཝཱིཧཱིནཾ ཝཱ ཝཱིཧིཔལཱཔཱནཾ ཝཱ ཏཎྜུལཱ བྷཛྫིཏཏཎྜུལཱ ཨེཝ ཝཱ ན པཝཱརེནྟི. ཏེསཾ པན ཏཎྜུལཱདཱིནཾ ཙུཎྞཾ པཝཱརེཏི. ཁརཔཱཀབྷཛྫིཏཱནཾ ཝཱིཧཱིནཾ ¶ ཀུཎྜཀམྤི པཝཱརེཏི. སམཔཱཀབྷཛྫིཏཱནཾ པན ཨཱཏཔསུཀྑཱནཾ ཝཱ ཀུཎྜཀཾ ན པཝཱརེཏི. ལཱཛཱ ཝཱ ཏེཧི ཀཏབྷཏྟསཏྟུཨཱདཱིནི ཝཱ ན པཝཱརེནྟི. བྷཛྫིཏཔིཊྛཾ ཝཱ ཡཾཀིཉྩི སུདྡྷཁཛྫཀཾ ཝཱ ན པཝཱརེཏི. མཙྪམཾསཔཱུརིཏཁཛྫཀཾ པན སཏྟུམོདཀོ ཝཱ པཝཱརེཏི. མཙྪོ མཾསཉྩ པཱཀཊམེཝ. ཨཡཾ པན ཝིསེསོ – སཙེཔི ཡཱགུཾ པིཝནྟསྶ ཡཱགུསིཏྠམཏྟཱནེཝ དྭེ མཙྪཁཎྜཱནི ཝཱ མཾསཁཎྜཱནི ཝཱ ཨེཀབྷཱཛནེ ཝཱ ནཱནཱབྷཱཛནེ ཝཱ དེནྟི, ཏཱནི ཙེ ཨཁཱདནྟོ ཨཉྙཾ ཡཾཀིཉྩི པཝཱརཎཔྤཧོནཀཾ པཊིཀྑིཔཏི ¶ , ན པཝཱརེཏི. ཏཏོ ཨེཀཾ ཁཱདིཏཾ, ཨེཀཾ ཧཏྠེ ཝཱ པཏྟེ ཝཱ ཧོཏི, སོ ཙེ ཨཉྙཾ པཊིཀྑིཔཏི, པཝཱརེཏི. དྭེཔི ཁཱདིཏཱནི ཧོནྟི, མུཁེ སཱསཔམཏྟམྤི ཨཝསིཊྛཾ ནཏྠི, སཙེཔི ཨཉྙཾ པཊིཀྑིཔཏི, ན པཝཱརེཏི.

ཀཔྤིཡམཾསཾ ཁཱདནྟོ ཀཔྤིཡམཾསཾ པཊིཀྑིཔཏི, པཝཱརེཏི. ཀཔྤིཡམཾསཾ ཁཱདནྟོ ཨཀཔྤིཡམཾསཾ པཊིཀྑིཔཏི, ན པཝཱརེཏི. ཀསྨཱ? ཨཝཏྠུཏཱཡ. ཡཉྷི བྷིཀྑུནོ ཁཱདིཏུཾ ཝཊྚཏི, ཏཾཡེཝ པཊིཀྑིཔཏོ པཝཱརཎཱ ཧོཏི. ཨིདཾ པན ཛཱནནྟོ ཨཀཔྤིཡཏྟཱ པཊིཀྑིཔཏི, ཨཛཱནནྟོཔི པཊིཀྑིཔིཏབྦཊྛཱནེ ཋིཏམེཝ པཊིཀྑིཔཏི ནཱམ, ཏསྨཱ ན པཝཱརེཏི. སཙེ པན ཨཀཔྤིཡམཾསཾ ཁཱདནྟོ ཀཔྤིཡམཾསཾ པཊིཀྑིཔཏི, པཝཱརེཏི. ཀསྨཱ? ཝཏྠུཏཱཡ. ཡཉྷི ཏེན པཊིཀྑིཏྟཾ, ཏཾ པཝཱརཎཱཡ ཝཏྠུ. ཡཾ པན ཁཱདཏི, ཏཾ ཀིཉྩཱཔི པཊིཀྑིཔིཏབྦཊྛཱནེ ཋིཏཾ, ཁཱདིཡམཱནཾ པན མཾསབྷཱཝཾ ན ཛཧཏི, ཏསྨཱ པཝཱརེཏི. ཨཀཔྤིཡམཾསཾ ཁཱདནྟོ ཨཀཔྤིཡམཾསཾ པཊིཀྑིཔཏི, པུརིམནཡེནེཝ ན པཝཱརེཏི. ཀཔྤིཡམཾསཾ ཝཱ ཨཀཔྤིཡམཾསཾ ཝཱ ཁཱདནྟོ པཉྩནྣཾ བྷོཛནཱནཾ ཡཾཀིཉྩི ཀཔྤིཡབྷོཛནཾ པཊིཀྑིཔཏི, པཝཱརེཏི. ཀུལདཱུསཀཝེཛྫཀམྨཨུཏྟརིམནུསྶདྷམྨཱརོཙནསཱདིཏརཱུཔིཡཱདཱིཧི ནིབྦཏྟཾ བུདྡྷཔཊིཀུཊྛཾ ཨནེསནཱཡ ཨུཔྤནྣཾ ཨཀཔྤིཡབྷོཛནཾ པཊིཀྑིཔཏི, ན པཝཱརེཏི. ཀཔྤིཡབྷོཛནཾ ཝཱ ཨཀཔྤིཡབྷོཛནཾ ཝཱ བྷུཉྫནྟོཔི ཀཔྤིཡབྷོཛནཾ པཊིཀྑིཔཏི, པཝཱརེཏི. ཨཀཔྤིཡབྷོཛནཾ པཊིཀྑིཔཏི, ན པཝཱརེཏཱིཏི སབྦཏྠ ཝུཏྟནཡེནེཝ ཀཱརཎཾ ཝེདིཏབྦཾ.

ཨེཝཾ ¶ ‘‘ཨསན’’ནྟིཨཱདཱིསུ ཡཉྩ ཨསྣཱཏི, ཡཉྩ བྷོཛནཾ ཧཏྠཔཱསེ ཋིཏེན ཨབྷིཧཊཾ པཊིཀྑིཔནྟོ པཝཱརཎཾ ཨཱཔཛྫཏི, ཏཾ ཉཏྭཱ ཨིདཱནི ཡཐཱ ཨཱཔཛྫཏི, ཏསྶ ཛཱནནཏྠཾ ཨཡཾ ཝིནིཙྪཡོ ¶ – ‘‘‘ཨསནཾ བྷོཛན’ནྟི ཨེཏྠ ཏཱཝ ཡེན ཨེཀསིཏྠམྤི ཨཛ྄ཛྷོཧཊཾ ཧོཏི, སོ སཙེ པཏྟམུཁཧཏྠཱནཾ ཡཏྠ ཀཏྠཙི པཉྩསུ བྷོཛནེསུ ཨེཀསྨིམྤི སཏི ཨཉྙཾ པཉྩསུ བྷོཛནེསུ ཨེཀམྤི པཊིཀྑིཔཏི, པཝཱརེཏི. ཀཏྠཙི བྷོཛནཾ ནཏྠི, ཨཱམིསགནྡྷམཏྟཾ པཉྙཱཡཏི, ན པཝཱརེཏི. མུཁེ ཙ ཧཏྠེ ཙ བྷོཛནཾ ནཏྠི, པཏྟེ ཨཏྠི, ཏསྨིཾ པན ཨཱསནེ ན བྷུཉྫིཏུཀཱམོ, ཝིཧཱརཾ པཝིསིཏྭཱ བྷུཉྫིཏུཀཱམོ, ཨཉྙསྶ ཝཱ དཱཏུཀཱམོ, ཏསྨིཾ ཙེ ཨནྟརེ བྷོཛནཾ པཊིཀྑིཔཏི, ན པཝཱརེཏི. ཀསྨཱ? ཝིཔྤཀཏབྷོཛནབྷཱཝསྶ ཨུཔཙྪིནྣཏྟཱ. ཡོཔི ཨཉྙཏྲ གནྟྭཱ བྷུཉྫིཏུཀཱམོ མུཁེ བྷཏྟཾ ¶ གིལིཏྭཱ སེསཾ ཨཱདཱཡ གཙྪནྟོ ཨནྟརཱམགྒེ ཨཉྙཾ བྷོཛནཾ པཊིཀྑིཔཏི, ཏསྶཱཔི པཝཱརཎཱ ན ཧོཏཱི’’ཏི མཧཱཔཙྩརིཡཾ ཝུཏྟཾ. ཡཐཱ ཙ པཏྟེ; ཨེཝཾ ཧཏྠེཔི. མུཁེཔི ཝཱ ཝིཛྫམཱནབྷོཛནཾ སཙེ ཨནཛ྄ཛྷོཧརིཏུཀཱམོ ཧོཏི, ཏསྨིཉྩ ཁཎེ ཨཉྙཾ པཊིཀྑིཔཏི, ན པཝཱརེཏི. ཨེཀསྨིཉྷི པདེ ཝུཏྟལཀྑཎཾ སབྦཏྠ ཝེདིཏབྦཾ ཧོཏི. ཨཔིཙ ཀུརུནྡིཡཾ ཨེས ནཡོ དསྶིཏོཡེཝ. ཝུཏྟཉྷི ཏཏྠ ‘‘མུཁེ བྷཏྟཾ གིལིཏཾ, ཧཏྠེ བྷཏྟཾ ཝིགྷཱསཱདསྶ དཱཏུཀཱམོ, པཏྟེ བྷཏྟཾ བྷིཀྑུསྶ དཱཏུཀཱམོ, སཙེ ཏསྨིཾ ཁཎེ པཊིཀྑིཔཏི, ན པཝཱརེཏཱི’’ཏི. ཧཏྠཔཱསེ ཋིཏོཏི ཨེཏྠ པན སཙེ བྷིཀྑུ ནིསིནྣོ ཧོཏི, ཨཱསནསྶ པཙྪིམནྟཏོ པཊྛཱཡ, སཙེ ཋིཏོ, པཎྷིཨནྟཏོ པཊྛཱཡ, སཙེ ནིཔནྣོ, ཡེན པསྶེན ནིཔནྣོ, ཏསྶ པཱརིམནྟཏོ པཊྛཱཡ, དཱཡཀསྶ ནིསིནྣསྶ ཝཱ ཋིཏསྶ ཝཱ ནིཔནྣསྶ ཝཱ ཋཔེཏྭཱ པསཱརིཏཧཏྠཾ ཡཾ ཨཱསནྣཏརཾ ཨངྒཾ, ཏསྶ ཨོརིམནྟེན པརིཙྪིནྡིཏྭཱ ཨཌྜྷཏེཡྻཧཏྠོ ‘‘ཧཏྠཔཱསོ’’ཏི ཝེདིཏབྦོ. ཏསྨིཾ ཋཏྭཱ ཨབྷིཧཊཾ པཊིཀྑིཔནྟསྶེཝ པཝཱརཎཱ ཧོཏི, ན ཏཏོ པརཾ.

ཨབྷིཧརཏཱིཏི ཧཏྠཔཱསབྦྷནྟརེ ཋིཏོ གཧཎཏྠཾ ཨུཔནཱམེཏི. སཙེ པན ཨནནྟརནིསིནྣོཔི བྷིཀྑུ ཧཏྠེ ཝཱ ཨཱུརཱུསུ ཝཱ ཨཱདྷཱརཀེ ཝཱ ཋིཏཔཏྟཾ ཨནབྷིཧརིཏྭཱཝ ‘‘བྷཏྟཾ གཎྷཱ’’ཏི ཝདཏི, ཏཾ པཊིཀྑིཔཏོ ¶ པཝཱརཎཱ ནཏྠི. བྷཏྟཔཙྪིཾ ཨཱནེཏྭཱ པུརཏོ བྷཱུམིཡཾ ཋཔེཏྭཱ ‘‘གཎྷཱཧཱི’’ཏི ཝུཏྟེཔི ཨེསེཝ ནཡོ. ཨཱིསཀཾ པན ཨུདྡྷརིཏྭཱ ཝཱ ཨཔནཱམེཏྭཱ ཝཱ ‘‘གཎྷཐཱ’’ཏི ཝུཏྟེ པཊིཀྑིཔཏོ པཝཱརཎཱ ཧོཏི. ཐེརཱསནེ ནིསིནྣོ ཐེརོ དཱུརེ ནིསིནྣསྶ དཧརབྷིཀྑུསྶ པཏྟཾ པེསེཏྭཱ ‘‘ཨིཏོ ཨོདནཾ གཎྷཱཧཱི’’ཏི ཝདཏི, གཎྷིཏྭཱ པན གཏོ ཏུཎྷཱི ཏིཊྛཏི, དཧརོ ‘‘ཨལཾ མཡ྄ཧ’’ནྟི པཊིཀྑིཔཏི, ན པཝཱརེཏི. ཀསྨཱ? ཐེརསྶ དཱུརབྷཱཝཏོ དཱུཏསྶ ཙ ཨནབྷིཧརཎཏོཏི. སཙེ པན གཧེཏྭཱ ཨཱགཏོ བྷིཀྑུ ‘‘ཨིདཾ བྷཏྟཾ གཎྷཱ’’ཏི ཝདཏི, ཏཾ པཊིཀྑིཔཏོ པཝཱརཎཱ ཧོཏི.

པརིཝེསནཱཡ ཨེཀོ ཨེཀེན ཧཏྠེན ཨོདནཔཙྪིཾ ཨེཀེན ཀཊཙྪུཾ གཧེཏྭཱ བྷིཀྑཱུ པརིཝིསཏི, ¶ ཏཏྲ ཙེ ཨཉྙོ ཨཱགནྟྭཱ ‘‘ཨཧཾ པཙྪིཾ དྷཱརེསྶཱམི, ཏྭཾ ཨོདནཾ དེཧཱི’’ཏི ཝཏྭཱ གཧིཏམཏྟཀམེཝ ཀརོཏི, པརིཝེསཀོ ཨེཝ པན ཏཾ དྷཱརེཏི, ཏསྨཱ སཱ ཨབྷིཧཊཱཝ ཧོཏི. ཏཏོ དཱཏུཀཱམཏཱཡ གཎྷནྟཾ པཊིཀྑིཔནྟསྶ པཝཱརཎཱ ཧོཏི. སཙེ ¶ པན པརིཝིསཀེན ཕུཊྛམཏྟཱཝ ཧོཏི, ཨིཏརོཝ ནཾ དྷཱརེཏི, ཏཏོ དཱཏུཀཱམཏཱཡ གཎྷནྟཾ པཊིཀྑིཔནྟསྶ པཝཱརཎཱ ན ཧོཏི. ཀཊཙྪུནཱ ཨུདྡྷཊབྷཏྟེ པན ཧོཏི. ཀཊཙྪུཨབྷིཧཱརོཡེཝ ཧི ཏསྶ ཨབྷིཧཱརོ. དྭིནྣཾ སམབྷཱརེཔི པཊིཀྑིཔནྟོ པཝཱརེཏིཡེཝཱཏི མཧཱཔཙྩརིཡཾ ཝུཏྟཾ. ཨནནྟརསྶ བྷིཀྑུནོ བྷཏྟེ དིཡྻམཱནེ ཨིཏརོ པཏྟཾ ཧཏྠེཧི པིདཧཏི, པཝཱརཎཱ ནཏྠི. ཀསྨཱ? ཨཉྙསྶ ཨབྷིཧཊེ པཊིཀྑིཏྟཏྟཱ.

པཊིཀྑེཔོ པཉྙཱཡཏཱིཏི ཨེཏྠ ཝཱཙཱཡ ཨབྷིཧཊཾ པཊིཀྑིཔཏོ པཝཱརཎཱ ནཏྠི. ཀཱཡེན ཨབྷིཧཊཾ པན ཀཱཡེན ཝཱ ཝཱཙཱཡ ཝཱ པཊིཀྑིཔནྟསྶ པཝཱརཎཱ ཧོཏཱིཏི ཝེདིཏབྦོ.

ཏཏྠ ཀཱཡེན པཊིཀྑེཔོ ནཱམ ཨངྒུལིཾ ཝཱ ཧཏྠཾ ཝཱ མཙྪིཀབཱིཛནིཾ ཝཱ ཙཱིཝརཀཎྞཾ ཝཱ ཙཱལེཏི, བྷམུཀཱཡ ཝཱ ཨཱཀཱརཾ ཀརོཏི, ཀུདྡྷོ ཝཱ ཨོལོཀེཏི, ཝཱཙཱཡ པཊིཀྑེཔོ ནཱམ ‘‘ཨལ’’ནྟི ཝཱ, ‘‘ན གཎྷཱམཱི’’ཏི ཝཱ, ‘‘མཱ ཨཱཀིརཱ’’ཏི ཝཱ, ‘‘ཨཔགཙྪཱ’’ཏི ཝཱ ཝདཏི; ཨེཝཾ ཡེན ཀེནཙི ཨཱཀཱརེན ཀཱཡེན ཝཱ ཝཱཙཱཡ ཝཱ པཊིཀྑིཏྟེ པཝཱརཎཱ ཧོཏི.

ཨེཀོ ཨབྷིཧཊེ བྷཏྟེ པཝཱརཎཱཡ བྷཱིཏོ ཧཏྠ ཨཔནེཏྭཱ པུནཔྤུནཾ པཏྟེ ཨོདནཾ ཨཱཀིརནྟཾ ‘‘ཨཱཀིར ཨཱཀིར ¶ ཀོཊྚེཏྭཱ པཱུརེཧཱི’’ཏི ཝདཏི, ཨེཏྠ ཀཐནྟི? མཧཱསུམཏྠེརོ ཏཱཝ ‘‘ཨནཱཀིརཎཏྠཱཡ ཝུཏྟཏྟཱ པཝཱརཎཱ ཧོཏཱི’’ཏི ཨཱཧ. མཧཱཔདུམཏྠེརོ པན ‘‘‘ཨཱཀིར པཱུརེཧཱི’ཏི ཝདནྟསྶ ནཱམ ‘ཀསྶཙི པཝཱརཎཱ ཨཏྠཱི’ཏི ཝཏྭཱ ‘ན པཝཱརེཏཱི’’’ཏི ཨཱཧ. ཨཔརོ བྷཏྟཾ ཨབྷིཧརནྟཾ བྷིཀྑུཾ སལླཀྑེཏྭཱ ‘‘ཀིཾ ཨཱཝུསོ ཨིཏོཔི ཀིཉྩི གཎྷིསྶསི, དམྨི ཏེ ཀིཉྩཱི’’ཏི ཨཱཧ. ཏཏྲཱཔི ‘‘‘ཨེཝཾ ནཱགམིསྶཏཱི’ཏི ཝུཏྟཏྟཱ ‘པཝཱརཎཱ ཧོཏཱི’’’ཏི མཧཱསུམཏྠེརོ ཨཱཧ. མཧཱཔདུམཏྠེརོ པན ‘‘‘གཎྷིསྶསཱི’ཏི ཝདནྟསྶ ནཱམ ‘ཀསྶཙི པཝཱརཎཱ ཨཏྠཱི’ཏི ཝཏྭཱ ‘ན པཝཱརེཏཱི’’’ཏི ཨཱཧ.

ཨེཀོ སམཾསཀཾ རསཾ ཨབྷིཧརིཏྭཱ ‘‘རསཾ གཎྷཐཱ’’ཏི ཝདཏི, ཏཾ སུཏྭཱ པཊིཀྑིཔཏོ པཝཱརཎཱ ནཏྠི. ‘‘མཙྪརསཾ མཾསརས’’ནྟི ཝུཏྟེ པཊིཀྑིཔཏོ ཧོཏི, ‘‘ཨིདཾ གཎྷཐཱ’’ཏི ཝུཏྟེཔི ཧོཏིཡེཝ. མཾསཾ ཝིསུཾ ཀཏྭཱ ‘‘མཾསརསཾ གཎྷཐཱ’’ཏི ཝདཏི, ཏཏྠ ཙེ སཱསཔམཏྟམྤི མཾསཁཎྜཾ ཨཏྠི ¶ ¶ , ཏཾ པཊིཀྑིཔཏོ པཝཱརཎཱ ཧོཏི. སཙེ པན པརིསྶཱཝིཏོ ཧོཏི, ‘‘ཝཊྚཏཱི’’ཏི ཨབྷཡཏྠེརོ ཨཱཧ.

མཾསརསེན ཨཱཔུཙྪནྟཾ མཧཱཐེརོ ‘‘མུཧུཏྟཾ ཨཱགམེཧཱི’’ཏི ཝཏྭཱ ‘‘ཐཱལཀཾ ཨཱཝུསོ ཨཱཧརཱ’’ཏི ཨཱཧ. ཨེཏྠ ཀཐནྟི? མཧཱསུམཏྠེརོ ཏཱཝ ‘‘ཨབྷིཧཱརཀསྶ གམནཾ པཋམཾ ཨུཔཙྪིནྣཾ, ཏསྨཱ པཝཱརེཏཱི’’ཏི ཨཱཧ. མཧཱཔདུམཏྠེརོ པན ‘‘ཨཡཾ ཀུཧིཾ གཙྪཏི, ཀཱིདིསཾ ཨེཏསྶ གམནཾ, གཎྷནྟསྶཱཔི ནཱམ པཝཱརཎཱ ཨཏྠཱི’’ཏི ཝཏྭཱ ‘‘ན པཝཱརེཏཱི’’ཏི ཨཱཧ. ཀལཱི༹རཔནསཱདཱིཧི མིསྶེཏྭཱ མཾསཾ པཙནྟི, ཏཾ གཧེཏྭཱ ‘‘ཀལཱི༹རསཱུཔཾ གཎྷཐ, པནསབྱཉྫནཾ གཎྷཐཱ’’ཏི ཝདནྟི, ཨེཝམྤི ན པཝཱརེཏི. ཀསྨཱ? ཨཔཝཱརཎཱརཧསྶ ནཱམེན ཝུཏྟཏྟཱ. སཙེ པན ‘‘མཙྪསཱུཔཾ མཾསསཱུཔ’’ནྟི ཝཱ ‘‘ཨིམཾ གཎྷཐཱ’’ཏི ཝཱ ཝདནྟི, པཝཱརེཏི. མཾསཀརམྦཀོ ནཱམ ཧོཏི, ཏཾ དཱཏུཀཱམོཔི ‘‘ཀརམྦཀཾ གཎྷཐཱ’’ཏི ཝདཏི, ཝཊྚཏི; ན པཝཱརེཏི. ‘‘མཾསཀརམྦཀ’’ནྟི ཝཱ ‘‘ཨིད’’ནྟི ཝཱ ཝུཏྟེ པན པཝཱརེཏི. ཨེསེཝ ནཡོ སབྦེསུ མཙྪམཾསམིསྶཀེསུ.

ཡོ པན ནིམནྟནེ བྷུཉྫམཱནོ མཾསཾ ཨབྷིཧཊཾ ‘‘ཨུདྡིསྶ ¶ ཀཏ’’ནྟི མཉྙམཱནོ པཊིཀྑིཔཏི, པཝཱརིཏོཝ ཧོཏཱིཏི མཧཱཔཙྩརིཡཾ ཝུཏྟཾ. མིསྶཀཀཐཱ པན ཀུརུནྡིཡཾ སུཊྛུ ཝུཏྟཱ. ཨེཝཉྷི ཏཏྠ ཝུཏྟཾ – པིཎྜཔཱཏཙཱརིཀོ བྷིཀྑུ བྷཏྟམིསྶཀཾ ཡཱགུཾ ཨཱཧརིཏྭཱ ‘‘ཡཱགུཾ གཎྷཐཱ’’ཏི ཝདཏི, ན པཝཱརེཏི. ‘‘བྷཏྟཾ གཎྷཐཱ’’ཏི ཝུཏྟེ པཝཱརེཏི. ཀསྨཱ? ཡེནཱཔུཙྪིཏོ, ཏསྶ ཨཏྠིཏཱཡ. ཨཡམེཏྠ ཨདྷིཔྤཱཡོ – ‘‘ཡཱགུམིསྶཀཾ གཎྷཐཱ’’ཏི ཝདཏི, ཏཏྲ ཙེ ཡཱགུ བཧུཏརཱ ཝཱ ཧོཏི སམསམཱ ཝཱ, ན པཝཱརེཏི. ཡཱགུ མནྡཱ, བྷཏྟཾ བཧུཏརཾ, པཝཱརེཏི. ཨིདཉྩ སབྦཨཊྛཀཐཱསུ ཝུཏྟཏྟཱ ན སཀྐཱ པཊིཀྑིཔིཏུཾ, ཀཱརཎཾ པནེཏྠ དུདྡསཾ. ‘‘བྷཏྟམིསྶཀཾ གཎྷཐཱ’’ཏི ཝདཏི, བྷཏྟཾ བཧུཀཾ ཝཱ སམཾ ཝཱ ཨཔྤཏརཾ ཝཱ ཧོཏི, པཝཱརེཏིཡེཝ. བྷཏྟཾ ཝཱ ཡཱགུཾ ཝཱ ཨནཱམསིཏྭཱ ‘‘མིསྶཀཾ གཎྷཐཱ’’ཏི ཝདཏི, ཏཏྲ ཙེ བྷཏྟཾ བཧུཏརཾ ཝཱ སམཀཾ ཝཱ ཧོཏི, པཝཱརེཏི. ཨཔྤཏརཾ ན པཝཱརེཏི. ཨིདཉྩ ཀརམྦཀེན ན སམཱནེཏབྦཾ. ཀརམྦཀོ ཧི མཾསམིསྶཀོཔི ཧོཏི ཨམཾསམིསྶཀོཔི, ཏསྨཱ ‘‘ཀརམྦཀ’’ནྟི ཝུཏྟེ པཝཱརཎཱ ནཏྠི. ཨིདཾ པན བྷཏྟམིསྶཀམེཝ. ཨེཏྠ ཝུཏྟནཡེནེཝ པཝཱརཎཱ ཧོཏི. བཧུརསེ བྷཏྟེ རསཾ, བཧུཁཱིརེ ཁཱིརཾ བཧུསཔྤིམྷི ཙ ¶ པཱཡཱསེ སཔྤིཾ གཎྷཐཱཏི ཝིསུཾ ཀཏྭཱ དེཏི, ཏཾ པཊིཀྑིཔཏོ པཝཱརཎཱ ནཏྠི.

ཡོ པན གཙྪནྟོ པཝཱརེཏི, སོ གཙྪནྟོཝ བྷུཉྫིཏུཾ ལབྷཏི. ཀདྡམཾ ཝཱ ཨུདཀཾ ཝཱ པཏྭཱ ¶ ཋིཏེན ཨཏིརིཏྟཾ ཀཱརེཏབྦཾ. སཙེ ཨནྟརཱ ནདཱི པཱུརཱ ཧོཏི, ནདཱིཏཱིརེ གུམྦཾ ཨནུཔརིཡཱཡནྟེན བྷུཉྫིཏབྦཾ. ཨཐ ནཱཝཱ ཝཱ སེཏུ ཝཱ ཨཏྠི, ཏཾ ཨབྷིརུཧིཏྭཱཔི ཙངྐམནྟེནཝ བྷུཉྫིཏབྦཾ, གམནཾ ན ཨུཔཙྪིནྡིཏབྦཾ. ཡཱནེ ཝཱ ཧཏྠིཨསྶཔིཊྛེ ཝཱ ཙནྡམཎྜལེ ཝཱ སཱུརིཡམཎྜལེ ཝཱ ནིསཱིདིཏྭཱ པཝཱརིཏེན ཡཱཝ མཛ྄ཛྷནྷིཀཾ, ཏཱཝ ཏེསུ གཙྪནྟེསུཔི ནིསིནྣེནེཝ བྷུཉྫིཏབྦཾ. ཡོ ཋིཏོ པཝཱརེཏི, ཋིཏེནེཝ, ཡོ ནིསིནྣོ པཝཱརེཏི, ནིསིནྣེནེཝ བྷུཉྫིཏབྦཾ. ཏཾ ཏཾ ཨིརིཡཱཔཐཾ ཀོཔེནྟེན ཨཏིརིཏྟཾ ཀཱརེཏབྦཾ. ཡོ ཨུཀྐུཊིཀོ ནིསཱིདིཏྭཱ པཝཱརེཏི, ཏེན ཨུཀྐུཊིཀེནེཝ བྷུཉྫིཏབྦཾ. ཏསྶ པན ཧེཊྛཱ པལཱལཔཱིཋཾ ཝཱ ཀིཉྩི ཝཱ ནིསཱིདནཀཾ དཱཏབྦཾ. པཱིཋཀེ ནིསཱིདིཏྭཱ པཝཱརིཏེན ཨཱསནཾ ཨཙཱལེཏྭཱཝ ཙཏསྶོ དིསཱ པརིཝཏྟནྟེན བྷུཉྫིཏུཾ ལབྦྷཏི. མཉྩེ ནིསཱིདིཏྭཱ ¶ པཝཱརིཏེན ཨིཏོ ཝཱ ཨེཏྟོ ཝཱ སཾསརིཏུཾ ན ལབྦྷཏི. སཙེ པན ནཾ སཧ མཉྩེན ཨུཀྑིཔིཏྭཱ ཨཉྙཏྲ ནེནྟི, ཝཊྚཏི. ནིཔཛྫིཏྭཱ པཝཱརིཏེན ནིཔནྣེནེཝ བྷུཉྫིཏབྦཾ. པརིཝཏྟནྟེན ཡེན པསྶེན ནིཔནྣོ, ཏསྶ ཋཱནཾ ནཱཏིཀྐམེཏབྦཾ.

ཨནཏིརིཏྟནྟི ན ཨཏིརིཏྟཾ; ན ཨདྷིཀནྟི ཨཏྠོ. ཏཾ པན ཡསྨཱ ཀཔྤིཡཀཏཱདཱིཧི སཏྟཧི ཝིནཡཀམྨཱཀཱརེཧི ཨཀཏཾ ཝཱ གིལཱནསྶ ཨནདྷིཀཾ ཝཱ ཧོཏི, ཏསྨཱ པདབྷཱཛནེ ‘‘ཨཀཔྤིཡཀཏ’’ནྟིཨཱདི ཝུཏྟཾ. ཏཏྠ ཨཀཔྤིཡཀཏནྟི ཡཾ ཏཏྠ ཕལཾ ཝཱ ཀནྡམཱུལཱདི ཝཱ པཉྩཧི སམཎཀཔྤེཧི ཀཔྤིཡཾ ཨཀཏཾ; ཡཉྩ ཨཀཔྤིཡམཾསཾ ཝཱ ཨཀཔྤིཡབྷོཛནཾ ཝཱ, ཨེཏཾ ཨཀཔྤིཡཾ ནཱམ. ཏཾ ཨཀཔྤིཡཾ ‘‘ཨལམེཏཾ སབྦ’’ནྟི ཨེཝཾ ཨཏིརིཏྟཾ ཀཏམྤི ཨཀཔྤིཡཀཏནྟི ཝེདིཏབྦཾ. ཨཔྤཊིགྒཧིཏཀཏནྟི བྷིཀྑུནཱ ཨཔྤཊིགྒཧིཏཾཡེཝ པུརིམནཡེནེཝ ཨཏིརིཏྟཾ ཀཏཾ. ཨནུཙྩཱརིཏཀཏནྟི ཀཔྤིཡཾ ཀཱརཱཔེཏུཾ ཨཱགཏེན བྷིཀྑུནཱ ཨཱིསཀམྤི ཨནུཀྑིཏྟཾ ཝཱ ཨནཔནཱམིཏཾ ཝཱ ཀཏཾ. ཨཧཏྠཔཱསེ ཀཏནྟི ཀཔྤིཡཾ ཀཱརཱཔེཏུཾ ཨཱགཏསྶ ཧཏྠཔཱསཏོ བཧི ཋིཏེན ཀཏཾ. ཨབྷུཏྟཱཝིནཱ ཀཏནྟི ཡོ ‘‘ཨལམེཏཾ སབྦ’’ནྟི ཨཏིརིཏྟཾ ཀརོཏི, ཏེན པཝཱརཎཔྤཧོནཀཾ བྷོཛནཾ ཨབྷུཏྟེན ཀཏཾ. བྷུཏྟཱཝིནཱ པཝཱརིཏེན ཨཱསནཱ ཝུཊྛིཏེན ཀཏནྟི ཨིདཾ ཨུཏྟཱནམེཝ. ཨལམེཏཾ སབྦནྟི ཨཝུཏྟནྟི ཝཙཱིབྷེདཾ ཀཏྭཱ ཨེཝཾ ཨཝུཏྟཾ ཧོཏི. ཨིཏི ཨིམེཧི ¶ སཏྟཧི ཝིནཡཀམྨཱཀཱརེཧི ཡཾ ཨཏིརིཏྟཾ ཀཔྤིཡཾ ཨཀཏཾ, ཡཉྩ ན གིལཱནཱཏིརིཏྟཾ, ཏདུབྷཡམྤི ཨནཏིརིཏྟནྟི ཝེདིཏབྦཾ.

ཨཏིརིཏྟཾ པན ཏསྶེཝ པཊིཔཀྑནཡེན ཝེདིཏབྦཾ. ཨཔིཙེཏྠ བྷུཏྟཱཝིནཱ ཀཏཾ ཧོཏཱིཏི ཨནནྟརེ ནིསིནྣསྶ སབྷཱགསྶ བྷིཀྑུནོ པཏྟཏོ ཨེཀམྤི སིཏྠཾ ཝཱ མཾསཧཱིརཾ ཝཱ ཁཱདིཏྭཱ ཀཏམྤི བྷུཏྟཱཝིནཱཝ ཀཏཾ ཧོཏཱིཏི ཝེདིཏབྦཾ. ཨཱསནཱ ཨཝུཊྛིཏེནཱཏི ཨེཏྠ པན ཨསམྨོཧཏྠཾ ཨཡཾ ¶ ཝིནིཙྪཡོ – དྭེ བྷིཀྑཱུ པཱཏོཝ བྷུཉྫམཱནཱ པཝཱརིཏཱ ཧོནྟི – ཨེཀེན ཏཏྠེཝ ནིསཱིདིཏབྦཾ, ཨིཏརེན ནིཙྩབྷཏྟཾ ཝཱ སལཱཀབྷཏྟཾ ཝཱ ཨཱནེཏྭཱ ཨུཔཌྜྷཾ ཏསྶ བྷིཀྑུནོ པཏྟེ ཨཱཀིརིཏྭཱ ¶ ཧཏྠཾ དྷོཝིཏྭཱ སེསཾ ཏེན བྷིཀྑུནཱ ཀཔྤིཡཾ ཀཱརཱཔེཏྭཱ བྷུཉྫིཏབྦཾ. ཀསྨཱ? ཡཉྷི ཏསྶ ཧཏྠེ ལགྒཾ, ཏཾ ཨཀཔྤིཡཾ ཧོཏི. སཙེ པན པཋམཾ ནིསིནྣོ བྷིཀྑུ སཡམེཝ ཏསྶ པཏྟཏོ ཧཏྠེན གཎྷཱཏི, ཧཏྠདྷོཝནཀིཙྩཾ ནཏྠི. སཙེ པན ཨེཝཾ ཀཔྤིཡཾ ཀཱརཱཔེཏྭཱ བྷུཉྫནྟསྶ པུན ཀིཉྩི བྱཉྫནཾ ཝཱ ཁཱདནཱིཡཾ ཝཱ པཏྟེ ཨཱཀིརནྟི, ཡེན པཋམཾ ཀཔྤིཡཾ ཀཏཾ, སོ པུན ཀཱཏུཾ ན ལབྷཏི. ཡེན ཨཀཏཾ, ཏེན ཀཱཏབྦཾ. ཡཉྩ ཨཀཏཾ, ཏཾ ཀཱཏབྦཾ. ‘‘ཡེན ཨཀཏ’’ནྟི ཨཉྙེན བྷིཀྑུནཱ ཡེན པཋམཾ ན ཀཏཾ, ཏེན ཀཱཏབྦཾ. ‘‘ཡཉྩ ཨཀཏ’’ནྟི ཡེན པཋམཾ ཀཔྤིཡཾ ཀཏཾ, ཏེནཱཔི ཡཾ ཨཀཏཾ ཏཾ ཀཱཏབྦཾ. པཋམབྷཱཛནེ པན ཀཱཏུཾ ན ལབྦྷཏི. ཏཏྠ ཧི ཀརིཡམཱནཾ པཋམཾ ཀཏེན སདྡྷིཾ ཀཏཾ ཧོཏི, ཏསྨཱ ཨཉྙསྨིཾ བྷཱཛནེ ཀཱཏུཾ ཝཊྚཏཱིཏི ཨདྷིཔྤཱཡོ. ཨེཝཾ ཀཏཾ པན ཏེན བྷིཀྑུནཱ པཋམཾ ཀཏེན སདྡྷིཾ བྷུཉྫིཏུཾ ཝཊྚཏི.

ཀཔྤིཡཾ ཀརོནྟེན ཙ ན ཀེཝལཾ པཏྟེཡེཝ, ཀུཎྜེཔི པཙྪིཡམྤི ཡཏྠ ཀཏྠཙི པུརཏོ ཋཔེཏྭཱ ཨོནཱམིཏབྷཱཛནེ ཀཱཏབྦཾ. ཏཾ སཙེཔི བྷིཀྑུསཏཾ པཝཱརིཏཾ ཧོཏི, སབྦེསཾ བྷུཉྫིཏུཾ ཝཊྚཏི, ཨཔྤཝཱརིཏཱནམྤི ཝཊྚཏི. ཡེན པན ཀཔྤིཡཾ ཀཏཾ, ཏསྶ ན ཝཊྚཏི. སཙེཔི པཝཱརེཏྭཱ པིཎྜཱཡ པཝིཊྛཾ བྷིཀྑུཾ པཏྟཾ གཧེཏྭཱ ཨཝསྶཾ བྷུཉྫནཀེ མངྒལནིམནྟནེ ནིསཱིདཱཔེནྟི, ཨཏིརིཏྟཾ ཀཱརེཏྭཱཝ བྷུཉྫིཏབྦཾ. སཙེ ཏཏྠ ཨཉྙོ བྷིཀྑུ ནཏྠི, ཨཱསནསཱལཾ ཝཱ ཝིཧཱརཾ ཝཱ པཏྟཾ པེསེཏྭཱ ཀཱརེཏབྦཾ. ཀཔྤིཡཾ ཀརོནྟེན པན ཨནུཔསམྤནྣསྶ ཧཏྠེ ཋིཏཾ ན ཀཱཏབྦཾ. སཙེ ཨཱསནསཱལཱཡཾ ཨབྱཏྟོ བྷིཀྑུ ཧོཏི, སཡཾ གནྟྭཱ ཀཔྤིཡཾ ཀཱརཱཔེཏྭཱ ཨཱནེཏྭཱ བྷུཉྫིཏབྦཾ.

གིལཱནཱཏིརིཏྟནྟི ¶ ཨེཏྠ ན ཀེཝལཾ ཡཾ གིལཱནསྶ བྷུཏྟཱཝསེསཾ ཧོཏི, ཏཾ གིལཱནཱཏིརིཏྟཾ; ཨཐ ཁོ ཡཾཀིཉྩི གིལཱནཾ ཨུདྡིསྶ ཨཛྫ ཝཱ སྭེ ཝཱ ཡདཱ ཝཱ ཨིཙྪཏི, ཏདཱ ཁཱདིསྶཏཱིཏི ཨཱཧཊཾ, ཏཾ སབྦཾ ‘‘གིལཱནཱཏིརིཏྟ’’ནྟི ཝེདིཏབྦཾ. ཡཾ ཡཱམཀཱལིཀཱདཱིསུ ཨཛ྄ཛྷོཧཱརེ ཨཛ྄ཛྷོཧཱརེ དུཀྐཊཾ, ཏཾ ཨསཾསཊྛཝསེན ¶ ཝུཏྟཾ. སཙེ པན ཨཱམིསསཾསཊྛཱནི ཧོནྟི, ཨཱཧཱརཏྠཱཡཔི ཨནཱཧཱརཏྠཱཡཔི པཊིགྒཧེཏྭཱ ཨཛ྄ཛྷོཧརནྟསྶ པཱཙིཏྟིཡམེཝ.

༢༤༡. སཏི པཙྩཡེཏི ཡཱམཀཱལིཀཾ པིཔཱསཱཡ སཏི པིཔཱསཙྪེདནཏྠཾ, སཏྟཱཧཀཱལིཀཾ ཡཱཝཛཱིཝིཀཉྩ ¶ ཏེན ཏེན ཨུཔསམེཏབྦཀེ ཨཱབཱདྷེ སཏི ཏསྶ ཨུཔསམནཏྠཾ པརིབྷུཉྫཏོ ཨནཱཔཏྟི. སེསམེཏྠ ཨུཏྟཱནམེཝ.

ཀཐིནསམུཊྛཱནཾ – ཀཱཡཝཱཙཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པཋམཔཝཱརཎསིཀྑཱཔདཾ པཉྩམཾ.

༦. དུཏིཡཔཝཱརཎསིཀྑཱཔདཝཎྞནཱ

༢༤༢. ཚཊྛསིཀྑཱཔདེ – ཨནཱཙཱརཾ ཨཱཙརཏཱིཏི པཎྞཏྟིཝཱིཏིཀྐམཾ ཀརོཏི. ཨུཔནནྡྷཱིཏི ཨུཔནཱཧཾ ཛནེནྟོ ཏསྨིཾ པུགྒལེ ཨཏྟནོ ཀོདྷཾ བནྡྷི; པུནཔྤུནཾ ཨཱགྷཱཏཾ ཛནེསཱིཏི ཨཏྠོ. ཨུཔནདྡྷོ བྷིཀྑཱུཏི སོ ཛནིཏཨུཔནཱཧོ བྷིཀྑུ.

༢༤༣. ཨབྷིཧཊྛུཾ པཝཱརེཡྻཱཏི ཨབྷིཧརིཏྭཱ ‘‘ཧནྡ བྷིཀྑུ ཁཱད ཝཱ བྷུཉྫ ཝཱ’’ཏི ཨེཝཾ པཝཱརེཡྻ. པདབྷཱཛནེ པན ‘‘ཧནྡ བྷིཀྑཱུ’’ཏིཨཱདིཾ ཨནུདྡྷརིཏྭཱ སཱདྷཱརཎམེཝ ཨབྷིཧཊྛུཾ པཝཱརཎཱཡ ཨཏྠཾ དསྶེཏུཾ ‘‘ཡཱཝཏཀཾ ཨིཙྪསི ཏཱཝཏཀཾ གཎྷཱཧཱི’’ཏི ཝུཏྟཾ. ཛཱནནྟི པཝཱརིཏབྷཱཝཾ ཛཱནནྟོ. ཏཾ པནསྶ ཛཱནནཾ ཡསྨཱ ཏཱིཧཱཀཱརེཧི ཧོཏི, ཏསྨཱ ‘‘ཛཱནཱཏི ནཱམ སཱམཾ ཝཱ ཛཱནཱཏཱི’’ཏིཨཱདིནཱ ནཡེན པདབྷཱཛནཾ ཝུཏྟཾ. ཨཱསཱདནཱཔེཀྑོཏི ཨཱསཱདནཾ ཙོདནཾ མངྐུཀརཎབྷཱཝཾ ཨཔེཀྑམཱནོ.

པཊིགྒཎྷཱཏི ¶ ཨཱཔཏྟི དུཀྐཊསྶཱཏི ཡསྶ ཨབྷིཧཊཾ ཏསྨིཾ པཊིགྒཎྷནྟེ ཨབྷིཧཱརཀསྶ བྷིཀྑུནོ དུཀྐཊཾ. ཨིཏརསྶ པན སབྦོ ཨཱཔཏྟིབྷེདོ པཋམསིཀྑཱཔདེ ཝུཏྟོ, ཨིམསྨིཾ པན སིཀྑཱཔདེ སབྦཱ ཨཱཔཏྟིཡོ ཨབྷིཧཱརཀསྶེཝ ཝེདིཏབྦཱ. སེསཾ པཋམསིཀྑཱཔདེ ཝུཏྟནཡཏྟཱ པཱཀཊམེཝ.

ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

དུཏིཡཔཝཱརཎསིཀྑཱཔདཾ ཚཊྛཾ.

༧. ཝིཀཱལབྷོཛནསིཀྑཱཔདཝཎྞནཱ

༢༤༧. སཏྟམསིཀྑཱཔདེ ¶ – གིརགྒསམཛྫོཏི གིརིམྷི ཨགྒསམཛྫོ, གིརིསྶ ཝཱ ཨགྒདེསེ སམཛྫོ. སོ ཀིར སཏྟམེ དིཝསེ བྷཝིསྶཏཱིཏི ¶ ནགརེ གྷོསནཱ ཀརིཡཏི, ནགརསྶ བཧིདྡྷཱ སམེ བྷཱུམིབྷཱགེ པབྦཏཙྪཱཡཱཡ མཧཱཛནཀཱཡོ སནྣིཔཏཏི, ཨནེཀཔྤཀཱརཱནི ནཊནཱཊཀཱནི པཝཏྟནྟི, ཏེསཾ དསྶནཏྠཾ མཉྩཱཏིམཉྩེ བནྡྷནྟི. སཏྟརསཝགྒིཡཱ ཨཔཉྙཏྟེ སིཀྑཱཔདེ དཧརཱཝ ཨུཔསམྤནྣཱ, ཏེ ‘‘ནཱཊཀཱནི ཨཱཝུསོ པསྶིསྶཱམཱ’’ཏི ཏཏྠ ཨགམཾསུ. ཨཐ ནེསཾ ཉཱཏཀཱ ‘‘ཨམྷཱཀཾ ཨཡྻཱ ཨཱགཏཱ’’ཏི ཏུཊྛཙིཏྟཱ ནྷཱཔེཏྭཱ ཝིལིམྤེཏྭཱ བྷོཛེཏྭཱ ཨཉྙམྤི པཱུཝཁཱདནཱིཡཱདིཾ ཧཏྠེ ཨདཾསུ. ཏེ སནྡྷཱཡ ཝུཏྟཾ – ‘‘མནུསྶཱ སཏྟརསཝགྒིཡེ བྷིཀྑཱུ པསྶིཏྭཱ’’ཏིཨཱདི.

༢༤༨-༩. ཝིཀཱལེཏི ཝིགཏེ ཀཱལེ. ཀཱལོཏི བྷིཀྑཱུནཾ བྷོཛནཀཱལོ ཨདྷིཔྤེཏོ, སོ ཙ སབྦནྟིམེན པརིཙྪེདེན མཛ྄ཛྷནྷིཀོ, ཏསྨིཾ ཝཱིཏིཝཏྟེཏི ཨདྷིཔྤཱཡོ. ཏེནེཝསྶ པདབྷཱཛནེ ‘‘ཝིཀཱལོ ནཱམ མཛ྄ཛྷནྷིཀེ ཝཱིཏིཝཏྟེ ཡཱཝ ཨརུཎུགྒམནཱ’’ཏི ཝུཏྟཾ, ཋིཏམཛ྄ཛྷནྷིཀོཔི ཀཱལསངྒཧཾ གཙྪཏི. ཏཏོ པཊྛཱཡ པན ཁཱདིཏུཾ ཝཱ བྷུཉྫིཏུཾ ཝཱ ན སཀྐཱ, སཧསཱ པིཝིཏུཾ སཀྐཱ བྷཝེཡྻ, ཀུཀྐུཙྩཀེན པན ན ཀཏྟབྦཾ. ཀཱལཔརིཙྪེདཛཱནནཏྠཉྩ ཀཱལཏྠམྦྷོ ཡོཛེཏབྦོ, ཀཱལནྟརེཝ བྷཏྟཀིཙྩཾ ཀཱཏབྦཾ.

ཨཝསེསཾ ¶ ཁཱདནཱིཡཾ ནཱམཱཏི ཨེཏྠ ཡཾ ཏཱཝ སཀྑལིམོདཀཱདིཔུབྦཎྞཱཔརཎྞམཡཾ, ཏཏྠ ཝཏྟབྦམེཝ ནཏྠི. ཡམྤི ཝནམཱུལཱདིཔྤབྷེདཾ ཨཱམིསགཏིཀཾ ཧོཏི, སེཡྻཐིདཾ – མཱུལཁཱདནཱིཡཾ ཀནྡཁཱདནཱིཡཾ མཱུལཱ༹ལཁཱདནཱིཡཾ མཏྠཀཁཱདནཱིཡཾ ཁནྡྷཁཱདནཱིཡཾ ཏཙཁཱདནཱིཡཾ པཏྟཁཱདནཱིཡཾ པུཔྥཁཱདནཱིཡཾ ཕལཁཱདནཱིཡཾ ཨཊྛིཁཱདནཱིཡཾ པིཊྛཁཱདནཱིཡཾ ནིཡྻཱསཁཱདནཱིཡནྟི, ཨིདམྤི ཁཱདནཱིཡསངྑྱམེཝ གཙྪཏི.

ཏཏྠ པན ཨཱམིསགཏིཀསལླཀྑཎཏྠཾ ཨིདཾ མུཁམཏྟནིདསྶནཾ – མཱུལཁཱདནཱིཡེ ཏཱཝ མཱུལཀམཱུལཾ ཁཱརཀམཱུལཾ ཙཙྩུམཱུལཾ ཏམྦཀམཱུལཾ ཏཎྜུལེཡྻཀམཱུལཾ ཝཏྠུལེཡྻཀམཱུལཾ ཝཛཀལིམཱུལཾ ཛཛ྄ཛྷརཱིམཱུལནྟི ཨེཝམཱདཱིནི སཱུཔེཡྻཔཎྞམཱུལཱནི ¶ ཨཱམིསགཏིཀཱནི. ཨེཏྠ ཙ ཝཛཀལིམཱུལེ ཛརཊྛཾ ཚིནྡིཏྭཱ ཚཌྜེནྟི, ཏཾ ཡཱཝཛཱིཝིཀཾ ཧོཏི. ཨཉྙམྤི ཨེཝརཱུཔཾ ཨེཏེནེཝ ནཡེན ཝེདིཏབྦཾ. མཱུལཀཁཱརཀཛཛ྄ཛྷརཱིམཱུལཱནཾ པན ཛརཊྛཱནིཔི ཨཱམིསགཏིཀཱནེཝཱཏི ཝུཏྟཾ. ཡཱནི པན པཱལི༹ཡཾ –

‘‘ཨནུཛཱནཱམི ¶ , བྷིཀྑཝེ, མཱུལཱནི བྷེསཛྫཱནི ཧལིདྡིཾ སིངྒིཝེརཾ ཝཙཾ ཝཙཏྟཾ ཨཏིཝིསཾ ཀཊུཀརོཧིཎིཾ ཨུསཱིརཾ བྷདྡམུཏྟཀཾ, ཡཱནི ཝཱ པནཉྙཱནིཔི ཨཏྠི མཱུལཱནི བྷེསཛྫཱནི ནེཝ ཁཱདནཱིཡེ ཁཱདནཱིཡཏྠཾ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟཱི’’ཏི (མཧཱཝ. ༢༦༣) –

ཝུཏྟཱནི, ཏཱནི ཡཱཝཛཱིཝིཀཱནི. ཏེསཾ ཙཱུལ༹པཉྩམཱུལཾ མཧཱཔཉྩམཱུལནྟིཨཱདིནཱ ནཡེན གཎིཡམཱནཱནཾ གཎནཱཡ ཨནྟོ ནཏྠི. ཁཱདནཱིཡཏྠཾ བྷོཛནཱིཡཏྠཉྩ ཕརཎཱབྷཱཝོཡེཝ པན ཏེསཾ ལཀྑཎཾ. ཏསྨཱ ཡཾཀིཉྩི མཱུལཾ ཏེསུ ཏེསུ ཛནཔདེསུ པཀཏིཨཱཧཱརཝསེན མནུསྶཱནཾ ཁཱདནཱིཡཏྠཾ བྷོཛནཱིཡཏྠཉྩ ཕརཏི, ཏཾ ཡཱཝཀཱལིཀཾ; ཨིཏརཾ ཡཱཝཛཱིཝིཀནྟི ཝེདིཏབྦཾ. ཏེསུ བཧུཾ ཝཏྭཱཔི ཧི ཨིམསྨིཾཡེཝ ལཀྑཎེ ཋཱཏབྦཾ. ནཱམསཉྙཱསུ པན ཝུཙྩམཱནཱསུ ཏཾ ཏཾ ནཱམཾ ཨཛཱནནྟཱནཾ སམྨོཧོཡེཝ ཧོཏི, ཏསྨཱ ནཱམསཉྙཱཡ ཨཱདརཾ ཨཀཏྭཱ ལཀྑཎམེཝ དསྶིཏཾ.

ཡཐཱ ཙ མཱུལེ; ཨེཝཾ ཀནྡཱདཱིསུཔི ཡཾ ལཀྑཎཾ དསྶིཏཾ, ཏསྶེཝ ཝསེན ཝིནིཙྪཡོ ཝེདིཏབྦོ. ཡཉྩ ཏཾ པཱལི༹ཡཾ ཧལིདྡཱདི ཨཊྛཝིདྷཾ ཝུཏྟཾ, ཏསྶ ཁནྡྷཏཙཔུཔྥཕལམྤི སབྦཾ ཡཱཝཛཱིཝིཀནྟི ཝུཏྟཾ.

ཀནྡཁཱདནཱིཡེ ¶ དུཝིདྷོ ཀནྡོ – དཱིགྷོ ཙ རསྶོ ཙ བྷིསཀིཾསུཀཀནྡཱདི ཝཊྚོ ཨུཔྤལཀསེརུཀཀནྡཱདི, ཡཾ ‘‘གཎྛཱི’’ཏིཔི ཝདནྟི. ཏཏྠ སབྦེསཾ ཀནྡཱནཾ ཛིཎྞཛརཊྛཱནཉྩ ཚལླི ཙ སུཁུམམཱུལཱནི ཙ ཡཱཝཛཱིཝིཀཱནི. ཏརུཎོ པན སུཁཁཱདནཱིཡོ, སཱལཀལྱཱཎཱིཔོཏཀཀནྡོ ཀིཾསུཀཔོཏཀཀནྡོ ཨམྦཱཊཀཀནྡོ ཀེཏཀཀནྡོ མཱལུཝཀནྡོ བྷིསསངྑཱཏོ པདུམཔུཎྜརཱིཀཀནྡོ པིཎྜཱལུམསཱལུཨཱདཡོ ཙ ¶ ཁཱིརཝལླིཀནྡོ ཨཱལུཝཀནྡོ སིགྒུཀནྡོ ཏཱལཀནྡོ ནཱིལུཔྤལརཏྟུཔྤལཀུམུདསོགནྡྷིཀཱནཾ ཀནྡཱ ཀདལིཀནྡོ ཝེལུ༹ཀནྡོ ཀསེརུཀཀནྡོཏི ཨེཝམཱདཡོ ཏེསུ ཏེསུ ཛནཔདེསུ པཀཏིཨཱཧཱརཝསེན མནུསྶཱནཾ ཁཱདནཱིཡཏྠཉྩ བྷོཛནཱིཡཏྠཉྩ ཕརཎཀཀནྡཱ ཡཱཝཀཱལིཀཱ.

ཁཱིརཝལླིཀནྡོ ཨདྷོཏོ ཡཱཝཛཱིཝིཀོ, དྷོཏོ ཡཱཝཀཱལིཀོ. ཁཱིརཀཱཀོལཱིཛཱིཝིཀཨུསབྷཀལསུཎཱདིཀནྡཱ པན ཡཱཝཛཱིཝིཀཱ. ཏེ པཱལི༹ཡཾ – ‘‘ཡཱནི ཝཱ པནཉྙཱནིཔི ཨཏྠི མཱུལཱནི བྷེསཛྫཱནཱི’’ཏི ཨེཝཾ མཱུལབྷེསཛྫསངྒཧེནེཝ སངྒཧིཏཱ.

མཱུལཱ༹ལཁཱདནཱིཡེ པན པདུམམཱུལཱ༹ལཾ པུཎྜརཱིཀམུལཱ༹ལསདིསམེཝ. ཨེརཀམཱུལཾ ཀནྡུལམཱུལནྟི ཨེཝམཱདི ¶ ཏེསུ ཏེསུ ཛནཔདེསུ པཀཏིཨཱཧཱརཝསེན མནུསྶཱནཾ ཁཱདནཱིཡཏྠཉྩ བྷོཛནཱིཡཏྠཉྩ ཕརཎཀམུལཱ༹ལཾ ཡཱཝཀཱལིཀཾ. ཧལིདྡིསིངྒིཝེརམཀཙིཙཏུརསྶཝལླིཀེཏཀཏཱལཧིནྟཱལཀུནྟཱལནཱལི༹ཀེརཔཱུགརུཀྑཱདིམུལཱ༹ལཾ པན ཡཱཝཛཱིཝིཀཾ, ཏཾ སབྦམྤི པཱལི༹ཡཾ – ‘‘ཡཱནི ཝཱ པནཉྙཱནིཔི ཨཏྠི མཱུལཱནི བྷེསཛྫཱནཱི’’ཏི (མཧཱཝ. ༢༦༣) ཨེཝཾ མཱུལབྷེསཛྫསངྒཧེནེཝ སངྒཧིཏཾ.

མཏྠཀཁཱདནཱིཡེ ཏཱལཧིནྟཱལཀུནྟཱལཀེཏཀནཱལི༹ཀེརཔཱུགརུཀྑཁཛྫཱུརཱིཝེཏྟཨེརཀཀདལཱིནཾ ཀལཱི༹རསངྑཱཏཱ མཏྠཀཱ ཝེཎུཀལཱི༹རོ ནལ༹ཀལཱི༹རོ ཨུཙྪུཀལཱི༹རོ མཱུལཀཀལཱི༹རོ སཱསཔཀལཱི༹རོ སཏཱཝརིཀལཱི༹རོ སཏྟནྣཾ དྷཉྙཱནཾ ཀལཱི༹རཱཏི ཨེཝམཱདི ཏེསུ ཏེསུ ཛནཔདེསུ པཀཏིཨཱཧཱརཝསེན མནུསྶཱནཾ ཁཱདནཱིཡཏྠཾ བྷོཛནཱིཡཏྠཉྩ ཕརཎཀོ རུཀྑཝལླིཨཱདཱིནཾ མཏྠཀོ ཡཱཝཀཱལིཀོ. ཧལིདྡིསིངྒིཝེརཝཙམཀཙིལསུཎཱནཾཀལཱི༹རཱ ཏཱལཧིནྟཱལཀུནྟཱལནཱལི༹ཀེརཀལཱི༹རཱནཉྩ ཚིནྡིཏྭཱ པཱཏིཏོ ཛརཊྛབུནྡོ ཡཱཝཛཱིཝིཀོ.

ཁནྡྷཁཱདནཱིཡེ ¶ ཨནྟོཔཐཝཱིགཏོ སཱལཀལྱཱཎཱིཁནྡྷོ ཨུཙྪུཁནྡྷོ ནཱིལུཔྤལརཏྟུཔྤལཀུམུདསོགནྡྷིཀཱནཾ ཁནྡྷཀཱཏི ཨེཝམཱདི ཏེསུ ཏེསུ ཛནཔདེསུ པཀཏིཨཱཧཱརཝསེན མནུསྶཱནཾ ཁཱདནཱིཡཏྠཾ བྷོཛནཱིཡཏྠཉྩ ཕརཎཀོ ཁནྡྷོ ཡཱཝཀཱལིཀོ. ཨུཔྤལཛཱཏཱིནཾ པཎྞདཎྜཀོ པདུམཛཱཏཱིནཾ སབྦོཔི དཎྜཀོ ཀཱརཝིནྡཀདཎྜཱདཡོ ཙ ཨཝསེསསབྦཁནྡྷཱ ¶ ཡཱཝཛཱིཝིཀཱ.

ཏཙཁཱདནཱིཡེ ཨུཙྪུཏཙོཝ ཨེཀོ ཡཱཝཀཱལིཀོ, སོཔི སརསོ. སེསོ སབྦོ ཡཱཝཛཱིཝིཀོ. ཏེསཾ པན མཏྠཀཁནྡྷཏཙཱནཾ ཏིཎྞཾ པཱལི༹ཡཾ ཀསཱཝབྷེསཛྫེན སངྒཧོ ཝེདིཏབྦོ. ཝུཏྟཉྷེཏཾ –

‘‘ཨནུཛཱནཱམི, བྷིཀྑཝེ, ཀསཱཝཱནི བྷེསཛྫཱནི ནིམྦཀསཱཝཾ, ཀུཊཛཀསཱཝཾ, པཊོལཀསཱཝཾ, ཕགྒཝཀསཱཝཾ ནཏྟམཱལཀསཱཝཾ, ཡཱནི ཝཱ པནཉྙཱནིཔི ཨཏྠི ཀསཱཝཱནི བྷེསཛྫཱནི ནེཝ ཁཱདནཱིཡེ ཁཱདནཱིཡཏྠཾ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟཱི’’ཏི (མཧཱཝ. ༢༦༣).

ཨེཏྠ ཧི ཨེཏེསམྤི སངྒཧོ སིཛ྄ཛྷཏི. ཝུཏྟཀསཱཝཱནི ཙ སབྦཱནི ཀཔྤིཡཱནཱིཏི ཝེདིཏབྦཱནི.

པཏྟཁཱདནཱིཡེ ¶ མཱུལཀཾ ཁཱརཀོ ཙཙྩུ ཏམྦཀོ ཏཎྜུལེཡྻཀོ པཔུནྣཱགོ ཝཏྠུལེཡྻཀོ ཝཛཀལི ཛཛ྄ཛྷརཱི སེལླུ སིགྒུ ཀཱསམདྡཀོ ཨུམྨཱ ཙཱིནམུགྒོ མཱསོ རཱཛམཱསོ ཋཔེཏྭཱ མཧཱནིཔྥཱཝཾ ཨཝསེསནིཔྥཱཝོ ཨགྒིམནྠོ སུནིསནྣཀོ སེཏཝརཎོ ནཱལི༹ཀཱ བྷཱུམིཡཾ ཛཱཏལོཎཱིཏི ཨེཏེསཾ པཏྟཱནི ཨཉྙཱནི ཙ ཨེཝརཱུཔཱནི ཏེསུ ཏེསུ ཛནཔདེསུ པཀཏིཨཱཧཱརཝསེན མནུསྶཱནཾ ཁཱདནཱིཡཏྠཾ བྷོཛནཱིཡཏྠཉྩ ཕརཎཀཱནི པཏྟཱནི ཨེཀཾསེན ཡཱཝཀཱལིཀཱནི. ཡཱ པནཉྙཱ མཧཱནཁཔིཊྛིམཏྟཱ པཎྞལོཎི རུཀྑེ ཙ གཙྪེ ཙ ཨཱརོཧཏི, ཏསྶཱ པཏྟཾ ཡཱཝཛཱིཝིཀཾ. བྲཧྨཱིཔཏྟཉྩ ཡཱཝཀཱལིཀནྟི དཱིཔཝཱསིནོ ཝདནྟི. ཨམྦཔལླཝཾ ཡཱཝཀཱལིཀཾ, ཨསོཀཔལླཝཾ པན ཡཱཝཛཱིཝིཀཾ.

ཡཱནི ཝཱ པནཉྙཱནི པཱལི༹ཡཾ –

‘‘ཨནུཛཱནཱམི, བྷིཀྑཝེ, པཎྞཱནི བྷེསཛྫཱནི ནིམྦཔཎྞཾ ཀུཊཛཔཎྞཾ པཊོལཔཎྞཾ སུལསིཔཎྞཾ ཀཔྤཱསཀཔཎྞཾ ཡཱནི ཝཱ པནཉྙཱནིཔི ཨཏྠི ¶ པཎྞཱནི བྷེསཛྫཱནི ནེཝ ཁཱདནཱིཡེ ཁཱདནཱིཡཏྠཾ ཕརནྟི ན བྷོཛནཱིཡེ བྷོཛནཱིཡཏྠཾ ཕརནྟཱི’’ཏི (མཧཱཝ. ༢༦༣) –

ཝུཏྟཱནི, ཏཱནི ཡཱཝཛཱིཝིཀཱནི. ན ཀེཝལཉྩ པཎྞཱནིཡེཝ ཏེསཾ ¶ པུཔྥཕལཱདཱིནིཔི ཡཱཝཛཱིཝིཀཱནི. པཎྞཱནཾ ཕགྒཝཔཎྞཾ ཨཛྫུཀཔཎྞཾ ཕཎིཛྫཀཔཎྞཾ པཊོལཔཎྞཾ ཏམྦཱུལཔཎྞཾ པདུམིནིཔཎྞནྟི ཨེཝཾ གཎནཝསེན ཨནྟོ ནཏྠི.

པུཔྥཁཱདནཱིཡེ མཱུལཀཔུཔྥཾ ཁཱརཀཔུཔྥཾ ཙཙྩུཔུཔྥཾ ཏམྦཀཔུཔྥཾ ཝཛཀལིཔུཔྥཾ ཛཛ྄ཛྷརཱིཔུཔྥཾ ཙཱུལ༹ནིཔྥཱཝཔུཔྥཾ མཧཱནིཔྥཱཝཔུཔྥཾ ཀསེརུཀཔུཔྥཾ ནཱལི༹ཀེརཏཱལཀེཏཀཱནཾ ཏརུཎཔུཔྥཱནི སེཏཝརཎཔུཔྥཾ སིགྒུཔུཔྥཾ ཨུཔྤལཔདུམཛཱཏིཀཱནཾ པུཔྥཱནི ཀཎྞིཀམཏྟཾ ཨགནྡྷིཀཔུཔྥཾ ཀལཱི༹རཔུཔྥཾ ཛཱིཝནྟཱིཔུཔྥནྟི ཨེཝམཱདི ཏེསུ ཏེསུ ཛནཔདེསུ པཀཏིཨཱཧཱརཝསེན མནུསྶཱནཾ ཁཱདནཱིཡཏྠཾ བྷོཛནཱིཡཏྠཉྩ ཕརཎཀཔུཔྥཾ ཡཱཝཀཱལིཀཾ. ཨསོཀབཀུལཀུཡྻཀཔུནྣཱགཙམྤཀཛཱཏིཀཎཝཱིརཀཎིཀཱརཀུནྡནཝམཱལིཀམལླིཀཱདཱིནཾ པན པུཔྥཾ ཡཱཝཛཱིཝིཀཾ ཏསྶ གཎནཱཡ ཨནྟོ ནཏྠི. པཱལི༹ཡཾ པནསྶ ཀསཱཝབྷེསཛྫེནེཝ སངྒཧོ ཝེདིཏབྦོ.

ཕལཁཱདནཱིཡེ པནསལབུཛཏཱལནཱལི༹ཀེརཨམྦཛམྦཱུཨམྦཱཊཀཏིནྟིཎིཀམཱཏུལུངྒཀཔིཏྠལཱབུཀུམྦྷཎྜཔུསྶཕལཏིམྦརཱུསཀཏིཔུསཝཱཏིངྒཎཙོཙམོཙམདྷུཀཱདཱིནཾ ཕལཱནི ཡཱནི ལོཀེ ཏེསུ ¶ ཏེསུ ཛནཔདེསུ པཀཏིཨཱཧཱརཝསེན མནུསྶཱནཾ ཁཱདནཱིཡཏྠཾ བྷོཛནཱིཡཏྠཉྩ ཕརནྟི, སབྦཱནི ཏཱནི ཡཱཝཀཱལིཀཱནི. ནཱམགཎནཝསེན ནེསཾ ན སཀྐཱ པརིཡནྟཾ དསྶེཏུཾ. ཡཱནི པན པཱལི༹ཡཾ –

‘‘ཨནུཛཱནཱམི, བྷིཀྑཝེ, ཕལཱནི བྷེསཛྫཱནི – བིལངྒཾ, པིཔྥལིཾ, མརིཙཾ, ཧརཱིཏཀཾ, ཝིབྷཱིཏཀཾ, ཨཱམལཀཾ, གོཊྛཕལཾ, ཡཱནི ¶ ཝཱ པནཉྙཱནིཔི ཨཏྠི ཕལཱནི བྷེསཛྫཱནི ནེཝ ཁཱདནཱིཡེ ཁཱདནཱིཡཏྠཾ ཕརནྟི ན བྷོཛནཱིཡེ བྷོཛནཱིཡཏྠཾ ཕརནྟཱི’’ཏི (མཧཱཝ. ༢༦༣) –

ཝུཏྟཱནི, ཏཱནི ཡཱཝཛཱིཝིཀཱནི. ཏེསམྤི ཨཔརིཔཀྐཱནི ཨཙྪིཝ བིམྦཝརཎཀེཏཀཀཱསྨརཱིཨཱདཱིནཾ ཕལཱནི ཛཱཏིཕལཾ ཀཊུཀཕལཾ ཨེལཱ༹ ཏཀྐོལནྟི ཨེཝཾ ནཱམཝསེན ན སཀྐཱ པརིཡནྟཾ དསྶེཏུཾ.

ཨཊྛིཁཱདནཱིཡེ ¶ ལབུཛཊྛི པནསཊྛི ཨམྦཱཊཀཊྛི སཱལཊྛི ཁཛྫཱུརཱིཀེཏཀཏིམྦརཱུསཀཱནཾ ཏརུཎཕལཊྛི ཏིནྟིཎིཀཊྛི བིམྦཕལཊྛི ཨུཔྤལ པདུམཛཱཏཱིནཾ པོཀྑརཊྛཱིཏི ཨེཝམཱདཱིནི ཏེསུ ཏེསུ ཛནཔདེསུ མནུསྶཱནཾ པཀཏིཨཱཧཱརཝསེན ཁཱདནཱིཡཏྠཾ བྷོཛནཱིཡཏྠཉྩ ཕརཎཀཱནི ཨཊྛཱིནི ཡཱཝཀཱལིཀཱནི. མདྷུཀཊྛི པུནྣཱགཊྛི ཧརཱིཏཀཱདཱིནཾ ཨཊྛཱིནི སིདྡྷཏྠཀཊྛི རཱཛིཀཊྛཱིཏི ཨེཝམཱདཱིནི ཨཊྛཱིནི ཡཱཝཛཱིཝིཀཱནི. ཏེསཾ པཱལི༹ཡཾ ཕལབྷེསཛྫེནེཝ སངྒཧོ ཝེདིཏབྦོ.

པིཊྛཁཱདནཱིཡེ སཏྟནྣཾ ཏཱཝ དྷཉྙཱནཾ དྷཉྙཱནུལོམཱནཾ ཨཔརཎྞཱནཉྩ པིཊྛཾ པནསཔིཊྛཾ ལབུཛཔིཊྛཾ ཨམྦཱཊཀཔིཊྛཾ སཱལཔིཊྛཾ དྷོཏཀཏཱལཔིཊྛཉྩ ཁཱིརཝལླིཔིཊྛཉྩཱཏི ཨེཝམཱདཱིནི ཏེསུ ཏེསུ ཛནཔདེསུ པཀཏིཨཱཧཱརཝསེན མནུསྶཱནཾ ཁཱདནཱིཡཏྠཾ བྷོཛནཱིཡཏྠཉྩ ཕརཎཀཱནི པིཊྛཱནི ཡཱཝཀཱལིཀཱནི. ཨདྷོཏཀཾ ཏཱལཔིཊྛཾ ཁཱིརཝལླིཔིཊྛཾ ཨསྶགནྡྷཱདིཔིཊྛཱནི ཙ ཡཱཝཛཱིཝིཀཱནི. ཏེསཾ པཱལི༹ཡཾ ཀསཱཝེཧི ཙ མཱུལཕལེཧི ཙ སངྒྷཧོ ཝེདིཏབྦོ.

ནིཡྻཱསཁཱདནཱིཡེ ཨེཀོ ཨུཙྪུནིཡྻཱསོཝ སཏྟཱཧཀཱལིཀོ. སེསཱ ‘‘ཨནུཛཱནཱམི, བྷིཀྑཝེ, ཛཏཱུནི བྷེསཛྫཱནི – ཧིངྒུཾ ཧིངྒུཛཏུཾ ཧིངྒུསིཔཱཊིཀཾ ཏཀཾ ཏཀཔཏྟིཾ ཏཀཔཎྞིཾ སཛྫུལསཾ ཡཱནི ཝཱ པནཉྙཱནིཔི ཨཏྠི ཛཏཱུནི བྷེསཛྫཱནཱི’’ཏི (མཧཱཝ. ༢༦༣) ཨེཝཾ པཱལི༹ཡཾ ཝུཏྟནིཡྻཱསཱ ཡཱཝཛཱིཝིཀཱ. ཏཏྠ ཡེཝཱཔནཀཝསེན སངྒཧིཏཱནཾ ཨམྦནིཡྻཱསོ ཀཎིཀཱརནིཡྻཱསོཏི ཨེཝཾ ནཱམཝསེན ན སཀྐཱ པརིཡནྟཾ དསྶེཏུཾ. ཨེཝཾ ཨིམེསུ མཱུལཁཱདནཱིཡཱདཱིསུ ¶ ཡཾཀིཉྩི ཡཱཝཀཱལིཀཾ, སབྦམྤི ཨིམསྨིཾ ཨཏྠེ ‘‘ཨཝསེསཾ ཁཱདནཱིཡཾ ནཱམཱ’’ཏི སངྒཧིཏཾ ¶ .

བྷོཛནཱིཡཾ ནཱམ པཉྩ བྷོཛནཱནཱིཏིཨཱདིམྷི ཡཾ ཝཏྟབྦཾ ཏཾ ཝུཏྟམེཝ. ཁཱདིསྶཱམི བྷུཉྫིསྶཱམཱིཏི, པཊིགྒཎྷཱཏཱིཏི ཡོ བྷིཀྑུ ཝིཀཱལེ ཨེཏཾ ཁཱདནཱིཡཾ བྷོཛནཱིཡཉྩ པཊིགྒཎྷཱཏི, ཏསྶ པཊིགྒཧཎེ ཏཱཝ ཨཱཔཏྟི དུཀྐཊསྶ. སེསམེཏྠ ཨུཏྟཱནམེཝ.

ཨེལ༹ཀལོམསམུཊྛཱནཾ – ཀཱཡཏོ ཙ ཀཱཡཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

ཝིཀཱལབྷོཛནསིཀྑཱཔདཾ སཏྟམཾ.

༨. སནྣིདྷིཀཱརཀསིཀྑཱཔདཝཎྞནཱ

༢༥༢. ཨཊྛམསིཀྑཱཔདེ ¶ – བེལཊྛསཱིསོ ནཱམ ཛཊིལསཧསྶབྦྷནྟརོ མཧཱཐེརོ. ཨརཉྙེ ཝིཧརཏཱིཏི ཛེཏཝནསྶ ཨཝིདཱུརེ པདྷཱནགྷརེ ཨེཀསྨིཾ ཨཱཝཱསེ ཝསཏི. སུཀྑཀུརནྟི ཨསཱུཔབྱཉྫནཾ ཨོདནཾ. སོ ཀིར ཨནྟོགཱམེ བྷུཉྫིཏྭཱ པཙྪཱ པིཎྜཱཡ ཙརིཏྭཱ ཏཱདིསཾ ཨོདནཾ ཨཱཧརཏི, ཏཉྩ ཁོ ཨཔྤིཙྪཏཱཡ, ན པཙྩཡགིདྡྷཏཱཡ. ཐེརོ ཀིར སཏྟཱཧཾ ནིརོདྷསམཱཔཏྟིཡཱ ཝཱིཏིནཱམེཏྭཱ སམཱཔཏྟིཏོ ཝུཊྛཱཡ ཏཾ པིཎྜཔཱཏཾ ཨུདཀེན ཏེམེཏྭཱ བྷུཉྫཏི, ཏཏོ པུན སཏྟཱཧཾ སམཱཔཏྟིཡཱ ནིསཱིདཏི. ཨེཝཾ དྭེཔི ཏཱིཎིཔི ཙཏྟཱརིཔི སཏྟཱཧཱནི ཝཱིཏིནཱམེཏྭཱ གཱམཾ པིཎྜཱཡ པཝིསཏི. ཏེན ཝུཏྟཾ – ‘‘ཙིརེན གཱམཾ པིཎྜཱཡ པཝིསཏཱི’’ཏི.

༢༥༣. ཀཱརོ ཀརཎཾ ཀིརིཡཱཏི ཨཏྠཏོ ཨེཀཾ, སནྣིདྷིཀཱརོ ཨསྶཱཏི སནྣིདྷིཀཱརཾ; སནྣིདྷིཀཱརམེཝ སནྣིདྷིཀཱརཀཾ. པཊིགྒཧེཏྭཱ ཨེཀརཏྟཾ ཝཱིཏིནཱམིཏསྶེཏཾ ཨདྷིཝཙནཾ. ཏེནེཝསྶ པདབྷཱཛནེ ཝུཏྟཾ – ‘‘སནྣིདྷིཀཱརཀཾ ནཱམ ཨཛྫ པཊིགྒཧིཏཾ ཨཔརཛྫཱུ’’ཏི.

པཊིགྒཎྷཱཏི ཨཱཔཏྟི དུཀྐཊསྶཱཏི ཨེཝཾ སནྣིདྷིཀཏཾ ཡཾཀིཉྩི ཡཱཝཀཱལིཀཾ ཝཱ ཡཱམཀཱལིཀཾ ཝཱ ཨཛ྄ཛྷོཧརིཏུཀཱམཏཱཡ གཎྷནྟསྶ པཊིགྒཧཎེ ཏཱཝ ཨཱཔཏྟི དུཀྐཊསྶ. ཨཛ྄ཛྷོཧརཏོ པན ཨེཀམེཀསྨིཾ ཨཛ྄ཛྷོཧཱརེ པཱཙིཏྟིཡཾ. སཙེཔི པཏྟོ དུདྡྷོཏོ ཧོཏི, ཡཾ ཨངྒུལིཡཱ གྷཾསནྟསྶ ལེཁཱ པཉྙཱཡཏི, གཎྛིཀཔཏྟསྶ ཝཱ གཎྛིཀནྟརེ སྣེཧོ པཝིཊྛོ ཧོཏི, སོ ¶ ཨུཎྷེ ཨོཏཱཔེནྟསྶ པགྒྷརཏི, ཨུཎྷཡཱགུཡཱ ཝཱ གཧིཏཱཡ སནྡིསྶཏི, ཏཱདིསེ པཏྟེཔི པུནདིཝསེ བྷུཉྫནྟསྶ པཱཙིཏྟིཡཾ. ཏསྨཱ པཏྟཾ དྷོཝིཏྭཱ པུན ཏཏྠ ཨཙྪོདཀཾ ཝཱ ཨཱསིཉྩིཏྭཱ ཨངྒུལིཡཱ ཝཱ གྷཾསིཏྭཱ ནིསྣེཧབྷཱཝོ ¶ ཛཱནིཏབྦོ. སཙེ ཧི ཨུདཀེ ཝཱ སྣེཧབྷཱཝོ པཏྟེ ཝཱ ཨངྒུལིལེཁཱ པཉྙཱཡཏི, དུདྡྷོཏོ ཧོཏི. ཏེལཝཎྞཔཏྟེ པན ཨངྒུལིལེཁཱ པཉྙཱཡཏི, སཱ ཨབྦོཧཱརིཀཱ. ཡཾ བྷིཀྑཱུ ནིརཔེཀྑཱ སཱམཎེརཱནཾ པརིཙྩཛནྟི, ཏཉྩེ སཱམཎེརཱ ནིདཧིཏྭཱ དེནྟི, སབྦཾ ཝཊྚཏི. སཡཾ པཊིགྒཧེཏྭཱ ཨཔརིཙྩཏྟམེཝ ཧི དུཏིཡདིཝསེ ན ཝཊྚཏི. ཏཏོ ཧི ཨེཀསིཏྠམྤི ཨཛ྄ཛྷོཧརཏོ པཱཙིཏྟིཡམེཝ.

ཨཀཔྤིཡམཾསེསུ ¶ མནུསྶམཾསེ ཐུལླཙྩཡེན སདྭིཾ པཱཙིཏྟིཡཾ, ཨཝསེསེསུ དུཀྐཊེན སདྡྷིཾ. ཡཱམཀཱལིཀཾ སཏི པཙྩཡེ ཨཛ྄ཛྷོཧརཏོ པཱཙིཏྟིཡཾ. ཨཱཧཱརཏྠཱཡ ཨཛ྄ཛྷོཧརཏོ དུཀྐཊེན སདྡྷིཾ པཱཙིཏྟིཡཾ. སཙེ པཝཱརིཏོ ཧུཏྭཱ ཨནཏིརིཏྟཀཏཾ ཨཛ྄ཛྷོཧརཏི, པཀཏིཨཱམིསེ དྭེ པཱཙིཏྟིཡཱནི, མནུསྶམཾསེ ཐུལླཙྩཡེན སདྡྷིཾ དྭེ, སེསཨཀཔྤིཡམཾསེ དུཀྐཊེན སདྡྷིཾ, ཡཱམཀཱལིཀཾ སཏི པཙྩཡེ སཱམིསེན མུཁེན ཨཛ྄ཛྷོཧརཏོ དྭེ, ནིརཱམིསེན ཨེཀམེཝ. ཨཱཧཱརཏྠཱཡ ཨཛ྄ཛྷོཧརཏོ ཝིཀཔྤདྭཡེཔི དུཀྐཊཾ ཝཌྜྷཏི. སཙེ ཝིཀཱལེ ཨཛ྄ཛྷོཧརཏི, པཀཏིབྷོཛནེ སནྣིདྷིཔཙྩཡཱ ཙ ཝིཀཱལབྷོཛནཔཙྩཡཱ ཙ དྭེ པཱཙིཏྟིཡཱནི, ཨཀཔྤིཡམཾསེསུ ཐུལླཙྩཡཉྩ དུཀྐཊཉྩ ཝཌྜྷཏི. ཡཱམཀཱལིཀེསུ ཝིཀཱལཔཙྩཡཱ ཨནཱཔཏྟི, ཨནཏིརིཏྟཔཙྩཡཱ པན ཝིཀཱལེ སབྦཝིཀཔྤེསུ ཨནཱཔཏྟི.

༢༥༥. སཏྟཱཧཀཱལིཀཾ ཡཱཝཛཱིཝིཀཾ ཨཱཧཱརཏྠཱཡཱཏི ཨཱཧཱརཏྠཱཡ པཊིགྒཎྷཏོ པཊིགྒཧཎཔཙྩཡཱ ཏཱཝ དུཀྐཊཾ, ཨཛ྄ཛྷོཧརཏོ པན སཙེ ནིརཱམིསཾ ཧོཏི, ཨཛ྄ཛྷོཧཱརེ ཨཛ྄ཛྷོཧཱརེ དུཀྐཊཾ. ཨཐ ཨཱམིསསཾསཊྛཾ པཊིགྒཧེཏྭཱ ཋཔིཏཾ ཧོཏི, ཡཐཱཝཏྠུཀཾ པཱཙིཏྟིཡམེཝ.

༢༥༦. ཨནཱཔཏྟི ཡཱཝཀཱལིཀནྟིཨཱདིམྷི ཝིཀཱལབྷོཛནསིཀྑཱཔདེ ནིདྡིཊྛཾ ཁཱདནཱིཡབྷོཛནཱིཡཾ ཡཱཝ མཛ྄ཛྷནྟིཀསངྑཱཏོ ཀཱལོ, ཏཱཝ བྷུཉྫིཏབྦཏོ ཡཱཝཀཱལིཀཾ. སདྡྷིཾ ཨནུལོམཔཱནེཧི ཨཊྛཝིདྷཾ པཱནཾ ཡཱཝ རཏྟིཡཱ པཙྪིམཡཱམསངྑཱཏོ ཡཱམོ, ཏཱཝ པརིབྷུཉྫིཏབྦཏོ ཡཱམོ ཀཱལོ ཨསྶཱཏི ཡཱམཀཱལིཀཾ. སཔྤིཨཱདི པཉྩཝིདྷཾ བྷེསཛྫཾ སཏྟཱཧཾ ནིདྷེཏབྦཏོ སཏྟཱཧོ ཀཱལོ ཨསྶཱཏི སཏྟཱཧཀཱལིཀཾ. ཋཔེཏྭཱ ཨུདཀཾ ཨཝསེསཾ སབྦམྤི ཡཱཝཛཱིཝཾ པརིཧརིཏྭཱ སཏི པཙྩཡེ པརིབྷུཉྫིཏབྦཏོ ཡཱཝཛཱིཝཀནྟི ཝུཙྩཏི ¶ .

ཏཏྠ ཨརུཎོདཡེཝ པཊིགྒཧིཏཾ ཡཱཝཀཱལིཀཾ སཏཀྑཏྟུམྤི ནིདཧིཏྭཱ ཡཱཝཀཱལོ ནཱཏིཀྐམཏི ¶ ཏཱཝ, ཡཱམཀཱལིཀཾ ཨེཀཾ ཨཧོརཏྟཾ, སཏྟཱཧཀཱལིཀཾ སཏྟརཏྟཾ, ཨིཏརཾ སཏི པཙྩཡེ, ཡཱཝཛཱིཝམྤི པརིབྷུཉྫནྟསྶ ཨནཱཔཏྟི. སེསམེཏྠ ཨུཏྟཱནམེཝ. ཨཊྛཀཐཱསུ པན ཨིམསྨིཾ ཋཱནེ པཱནཀཐཱ ཀཔྤིཡཱནུལོམཀཐཱ ‘‘ཀཔྤཏི ནུ ཁོ ཡཱཝཀཱལིཀེན ཡཱམཀཱལིཀ’’ནྟིཨཱདིཀཐཱ ཙ ཀཔྤིཡབྷཱུམིཀཐཱ ཙ ཝིཏྠཱརིཏཱ, ཏཾ མཡཾ ཨཱགཏཊྛཱནེཡེཝ ཀཐཡིསྶཱམ.

ཨེལ༹ཀལོམསམུཊྛཱནཾ ¶ – ཀཱཡཏོ ཙ ཀཱཡཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

སནྣིདྷིཀཱརཀསིཀྑཱཔདཾ ཨཊྛམཾ.

༩. པཎཱིཏབྷོཛནསིཀྑཱཔདཝཎྞནཱ

༢༥༧. ནཝམསིཀྑཱཔདེ – པཎཱིཏབྷོཛནཱནཱིཏི ཨུཏྟམབྷོཛནཱནི. ཀསྶ སམྤནྣཾ ན མནཱཔནྟི སམྤཏྟིཡུཏྟཾ ཀསྶ ན པིཡཾ. སཱདུནྟི སུརསཾ.

༢༥༩. ཡོ པན བྷིཀྑུ ཨེཝརཱུཔཱནི པཎཱིཏབྷོཛནཱནི ཨགིལཱནོ ཨཏྟནོ ཨཏྠཱཡ ཝིཉྙཱཔེཏྭཱ བྷུཉྫེཡྻཱཏི ཨེཏྠ སུདྡྷཱནི སཔྤིཨཱདཱིནི ཝིཉྙཱཔེཏྭཱ བྷུཉྫནྟོ པཱཙིཏྟིཡཾ ནཱཔཛྫཏི, སེཁིཡེསུ སཱུཔོདནཝིཉྙཏྟིདུཀྐཊཾ ཨཱཔཛྫཏི, ཨོདནསཾསཊྛཱནི པན ཝིཉྙཱཔེཏྭཱ བྷུཉྫནྟོ པཱཙིཏྟིཡཾ ཨཱཔཛྫཏཱིཏི ཝེདིཏབྦོ, ཨཡཾ ཀིརེཏྠ ཨདྷིཔྤཱཡོ. ཏེནེཝ ཙ ‘‘པཎཱིཏཱནཱི’’ཏི ཨཝཏྭཱ ‘‘པཎཱིཏབྷོཛནཱནཱི’’ཏི སུཏྟེ ཝུཏྟཾ. ‘‘པཎཱིཏཱནཱི’’ཏི ཧི ཝུཏྟེ སཔྤིཨཱདཱིནཾཡེཝ གཧཎཾ ཧོཏི, ‘‘པཎཱིཏབྷོཛནཱནཱི’’ཏི ཝུཏྟེ པན པཎཱིཏསཾསཊྛཱནི སཏྟདྷཉྙནིབྦཏྟཱནི བྷོཛནཱནི པཎཱིཏབྷོཛནཱནཱིཏི ཨཡམཏྠོ པཉྙཱཡཏི.

ཨིདཱནི ཝིཉྙཱཔེཏི པཡོགེ དུཀྐཊནྟིཨཱདཱིསུ ཨཡཾ ཝིནིཙྪཡོ – ‘‘སཔྤིནཱ བྷཏྟཾ དེཧི, སཔྤིཾ ཨཱཀིརིཏྭཱ དེཧི, སཔྤིམིསྶཀཾ ཀཏྭཱ དེཧི, སཧསཔྤིནཱ དེཧི, སཔྤིཉྩ བྷཏྟཉྩ དེཧཱི’’ཏི ཝིཉྙཱཔེནྟསྶ ཝིཉྙཏྟིཡཱ དུཀྐཊཾ, པཊིགྒཧཎེ དུཀྐཊཾ, ཨཛ྄ཛྷོཧཱརེ པཱཙིཏྟིཡཾ. ‘‘སཔྤིབྷཏྟཾ དེཧཱི’’ཏི ཝུཏྟེ པན ཡསྨཱ སཱལིབྷཏྟཾ ཝིཡ སཔྤིབྷཏྟཾ ནཱམ ནཏྠི; ཏསྨཱ སཱུཔོདནཝིཉྙཏྟིདུཀྐཊམེཝ ཝེདིཏབྦཾ.

སཙེ ¶ པན ‘‘སཔྤིནཱ བྷཏྟཾ དེཧཱི’’ཏི ཝུཏྟེ བྷཏྟཾ དཏྭཱ ‘‘སཔྤིཾ ཀཏྭཱ བྷུཉྫཱ’’ཏི ནཝནཱིཏཾ ཝཱ ཁཱིརཾ ཝཱ དདྷིཾ ཝཱ དེཏི, མཱུལཾ ཝཱ ¶ པན དེཏི, ‘‘ཨིམིནཱ སཔྤིཾ གཧེཏྭཱ བྷུཉྫཱ’’ཏི ཡཐཱཝཏྠུཀམེཝ. ‘‘གོསཔྤིནཱ བྷཏྟཾ དེཧཱི’’ཏི ཝུཏྟེ པན གོསཔྤིནཱ ཝཱ དེཏུ, གོསཔྤིམྷི ཨསཏི, པུརིམནཡེནེཝ གོནཝནཱིཏཱདཱིནི ཝཱ གཱཝིཾཡེཝ ཝཱ དེཏུ ‘‘ཨིཏོ སཔྤིནཱ བྷུཉྫཱ’’ཏི ཡཐཱཝཏྠུཀམེཝ. སཙེ ¶ པན གོསཔྤིནཱ ཡཱཙིཏོ ཨཛིཡཱ སཔྤིཨཱདཱིཧི དེཏི, ཝིསངྐེཏཾ. ཨེཝཉྷི སཏི ཨཉྙཾ ཡཱཙིཏེན ཨཉྙཾ དིནྣཾ ནཱམ ཧོཏི, ཏསྨཱ ཨནཱཔཏྟི. ཨེས ནཡོ ཨཛིཡཱ སཔྤིནཱ དེཧཱིཏི ཨཱདཱིསུཔི.

‘‘ཀཔྤིཡསཔྤིནཱ དེཧཱི’’ཏི ཝུཏྟེ ཨཀཔྤིཡསཔྤིནཱ དེཏི, ཝིསངྐེཏམེཝ. ‘‘ཨཀཔྤིཡསཔྤིནཱཏི ཝུཏྟེ ཨཀཔྤིཡསཔྤིནཱ དེཏི, པཊིགྒཧཎེཔི པརིབྷོགེཔི དུཀྐཊམེཝ. ཨཀཔྤིཡསཔྤིམྷི ཨསཏི པུརིམནཡེནེཝ ཨཀཔྤིཡནཝནཱིཏཱདཱིནི དེཏི ‘‘སཔྤིཾ ཀཏྭཱ བྷུཉྫཱ’’ཏི ཨཀཔྤིཡསཔྤིནཱཝ དིནྣཾ ཧོཏི. ‘‘ཨཀཔྤིཡསཔྤིནཱ’’ཏི ཝུཏྟེ ཀཔྤིཡེན དེཏི, ཝིསངྐེཏཾ. ‘‘སཔྤིནཱ’’ཏི ཝུཏྟེ སེསེསུ ནཝནཱིཏཱདཱིསུ ཨཉྙཏརེན དེཏི, ཝིསངྐེཏམེཝ. ཨེས ནཡོ ནཝནཱིཏེན དེཧཱིཏིཨཱདཱིསུཔི. ཡེན ཡེན ཧི ཝིཉྙཏྟི ཧོཏི, ཏསྨིཾ ཝཱ ཏསྶ མཱུལེ ཝཱ ལདྡྷེ, ཏཾ ཏཾ ལདྡྷམེཝ ཧོཏི.

སཙེ པན ཨཉྙཾ པཱལི༹ཡཱ ཨཱགཏཾ ཝཱ ཨནཱགཏཾ ཝཱ དེནྟི, ཝིསངྐེཏཾ. པཱལི༹ཡཾ ཨཱགཏནཝནཱིཏཱདཱིནི ཋཔེཏྭཱ ཨཉྙེཧི ནཝནཱིཏཱདཱིཧི ཝིཉྙཱཔེནྟསྶ དུཀྐཊཾ. ཡཐཱ ཙ ‘‘སཔྤིབྷཏྟཾ དེཧཱི’’ཏི ཝུཏྟེ སཱལིབྷཏྟསྶ ཝིཡ སཔྤིབྷཏྟསྶ ཨབྷཱཝཱ སཱུཔོདནཝིཉྙཏྟིདུཀྐཊམེཝ ཧོཏཱིཏི ཝུཏྟཾ. ཨེཝཾ ནཝནཱིཏབྷཏྟཾ དེཧཱིཏིཨཱདཱིསུཔི. པཊིཔཱཊིཡཱ ཨེཀམེཀཾ ཝིཏྠཱརེཏྭཱ ཝུཙྩམཱནེཔི ཧི ཨཡམེཝཏྠོ ཝཏྟབྦོ སིཡཱ, སོ ཙ སངྑེཔེནཔི སཀྐཱ ཉཱཏུཾ, ཀིཾ ཏཏྠ ཝིཏྠཱརེན? ཏེན ཝུཏྟཾ – ‘‘ཨེས ནཡོ ནཝནཱིཏེན དེཧཱིཏིཨཱདཱིསུཔཱི’’ཏི.

སཙེ པན སབྦེཧིཔི སཔྤིཨཱདཱིཧི ཨེཀཊྛཱནེ ཝཱ ནཱནཱཊྛཱནེ ཝཱ ཝིཉྙཱཔེཏྭཱ པཊིལདྡྷཾ ཨེཀབྷཱཛནེ ཨཱཀིརིཏྭཱ ཨེཀརསཾ ཀཏྭཱ ཏཏོ ཀུསགྒེནཱཔི ཛིཝ྄ཧགྒེ བིནྡུཾ ཋཔེཏྭཱ ཨཛ྄ཛྷོཧརཏི, ནཝ པཱཙིཏྟིཡཱནི ཨཱཔཛྫཏི. ཝུཏྟམྤི ཙེཏཾ པརིཝཱརེ –

‘‘ཀཱཡིཀཱནི ན ཝཱཙསིཀཱནི,

སབྦཱནི ནཱནཱཝཏྠུཀཱནི;

ཨཔུབྦཾ ¶ ཨཙརིམཾ ཨཱཔཛྫེཡྻ ཨེཀཏོ,

པཉྷཱམེསཱ ཀུསལེཧི ཙིནྟིཏཱ’’ཏི. (པརི. ༤༨༡);

༢༦༡. ཨགིལཱནོ ¶ གིལཱནསཉྙཱིཏི ཨེཏྠ སཙེ གིལཱནསཉྙཱིཔི ཧུཏྭཱ བྷེསཛྫཏྠཱཡ པཉྩ བྷེསཛྫཱནི ཝིཉྙཱཔེཏི, མཧཱནཱམསིཀྑཱཔདེན ཀཱརེཏབྦོ ¶ . ནཝ པཎཱིཏབྷོཛནཱནི ཝིཉྙཱཔེནྟོ པན ཨིམིནཱ སིཀྑཱཔདེན ཀཱརེཏབྦོ. བྷིཀྑུནཱིནཾ པན ཨེཏཱནི པཱཊིདེསནཱིཡཝཏྠཱུནི ཧོནྟི, སཱུཔོདནཝིཉྙཏྟིཡཾ ཨུབྷཡེསམྤི སེཁཔཎྞཏྟིདུཀྐཊམེཝ. སེསམེཏྠ ཨུཏྟཱནམེཝ.

ཙཏུསམུཊྛཱནཾ – ཀཱཡཏོ ཀཱཡཝཱཙཏོ ཀཱཡཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི,

ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པཎཱིཏབྷོཛནསིཀྑཱཔདཾ ནཝམཾ.

༡༠. དནྟཔོནསིཀྑཱཔདཝཎྞནཱ

༢༦༣. དསམསིཀྑཱཔདེ – ཙཏཱུསུ པཙྩཡེསུ ཨནྟམསོ དནྟཀཊྛམྤི སབྦཾ པཾསུཀཱུལམེཝ ཨསྶཱཏི སབྦཔཾསུཀཱུལིཀོ. སོ ཀིར སུསཱནེ ཚཌྜིཏབྷཱཛནམེཝ པཏྟཾ ཀཏྭཱ ཏཏྠ ཚཌྜིཏཙོལ༹ཀེཧེཝ ཙཱིཝརཾ ཀཏྭཱ ཏཏྠ ཚཌྜིཏམཉྩཔཱིཋཀཱནིཡེཝ གཧེཏྭཱ པརིབྷུཉྫཏི. ཨཡྻཝོསཱཊིཏཀཱནཱིཏི ཨེཏྠ ཨཡྻཱ ཝུཙྩནྟི ཀཱལངྐཏཱ པིཏིཔིཏཱམཧཱ. ཝོསཱཊིཏཀཱནི ཝུཙྩནྟི ཏེསཾ ཨཏྠཱཡ སུསཱནཱདཱིསུ ཚཌྜིཏཀཱནི ཁཱདནཱིཡབྷོཛནཱིཡཱནི; མནུསྶཱ ཀིར ཀཱལངྐཏེ ཉཱཏཀེ ཨུདྡིསྶ ཡཾ ཏེསཾ སཛཱིཝཀཱལེ པིཡཾ ཧོཏི, ཏཾ ཨེཏེསུ སུསཱནཱདཱིསུ པིཎྜཾ པིཎྜཾ ཀཏྭཱ ‘‘ཉཱཏཀཱ ནོ པརིབྷུཉྫནྟཱུཏི ཋཔེནྟི. སོ བྷིཀྑུ ཏཾ གཧེཏྭཱ བྷུཉྫཏི, ཨཉྙཾ པཎཱིཏམྤི དིཡྻམཱནཾ ན ཨིཙྪཏི. ཏེན ཝུཏྟཾ – ‘‘སུསཱནེཔི རུཀྑམཱུལེཔི ཨུམྨཱརེཔི ཨཡྻཝོསཱཊིཏཀཱནི སཱམཾ གཧེཏྭཱ པརིབྷུཉྫཏཱི’’ཏི. ཐེརོཏི ཐིརོ གྷནབདྡྷོ. ཝཋརོཏི ཐཱུལོ; ཐཱུལོ ཙ གྷནསརཱིརོ ཙཱཡཾ བྷིཀྑཱུཏི ཝུཏྟཾ ཧོཏི. མནུསྶམཾསཾ མཉྙེ ཁཱདཏཱིཏི མནུསྶམཾསཾ ཁཱདཏཱིཏི ནཾ སལླཀྑེམ; མནུསྶམཾསཾ ཁཱདནྟཱ ཧི ཨཱིདིསཱ བྷཝནྟཱིཏི ཨཡཾ ཏེསཾ ཨདྷིཔྤཱཡོ.

༢༦༤. ཨུདཀདནྟཔོནེ ཀུཀྐུཙྩཱཡནྟཱིཏི ཨེཏྠ ཏེ བྷིཀྑཱུ ‘‘ཨདིནྣཾ མུཁདྭཱརཾ ཨཱཧཱརཾ ཨཱཧརེཡྻཱ’’ཏི ¶ པདསྶ སམྨཱ ཨཏྠཾ ཨསལླཀྑེཏྭཱ ཀུཀྐུཙྩཱཡིསུཾ, བྷགཝཱ པན ཡཐཱཨུཔྤནྣསྶ ཝཏྠུསྶ ཝསེན པིཏཱ ཝིཡ དཱརཀེ ཏེ བྷིཀྑཱུ སཉྙཱཔེནྟོ ཨནུཔཉྙཏྟིཾ ཋཔེསི.

༢༦༥. ཨདིནྣནྟི ¶ ཀཱཡེན ཝཱ ཀཱཡཔཊིབདྡྷེན ¶ ཝཱ གཎྷནྟསྶ ཀཱཡཀཱཡཔཊིབདྡྷནིསྶགྒིཡཱནཾ ཨཉྙཏརཝསེན ན དིནྣཾ. ཨེཏདེཝ ཧི སནྡྷཱཡ པདབྷཱཛནེ ‘‘ཨདིནྣཾ ནཱམ ཨཔྤཊིགྒཧིཏཀཾ ཝུཙྩཏཱི’’ཏི ཝུཏྟཾ. དུཏིཡཔཱརཱཛིཀེ པན ‘‘ཨདིནྣཾ ནཱམ པརཔརིགྒཧིཏཀཾ ཝུཙྩཏཱི’’ཏི ཝུཏྟཾ. དིནྣནྟི ཨིདཾ པན ཏསྶེཝ ཨདིནྣསྶ པཊིཔཀྑཝསེན ལཀྑཎདསྶནཏྠཾ ཨུདྡྷཊཾ. ནིདྡེསེ ཙསྶ ‘‘ཀཱཡེན ཝཱ ཀཱཡཔཊིབདྡྷེན ཝཱ ནིསྶགྒིཡེན ཝཱ དེནྟེ’’ཏི ཨེཝཾ ཨཉྙསྨིཾ དདམཱནེ ‘‘ཧཏྠཔཱསེ ཋིཏོ ཀཱཡེན ཝཱ ཀཱཡཔཊིབདྡྷེན ཝཱ པཊིགྒཎྷཱཏཱིཏི ཏཾ ཨེཝཾ དིཡྻམཱནཾ ཨནྟམསོ རཐརེཎུམྤི སཙེ པུབྦེ ཝུཏྟལཀྑཎེ ཧཏྠཔཱསེ ཋིཏོ ཀཱཡེན ཝཱ ཀཱཡཔཊིབདྡྷེན ཝཱ པཊིགྒཎྷཱཏི, ཨེཏཾ ཨེཝཾ པཊིགྒཧིཏཾ དིནྣཾ ནཱམ ཝུཙྩཏི. ན ‘‘ཨིདཾ གཎྷ, ཨིདཾ ཏཝ ཧོཏཱུ’’ཏིཨཱདིཝཙནེན ནིསྶཊྛཾ.

ཏཏྠ ཀཱཡེནཱཏི ཧཏྠཱདཱིསུ ཡེན ཀེནཙི སརཱིརཱཝཡཝེན; ཨནྟམསོ པཱདངྒུལིཡཱཔི དིཡྻམཱནཾ ཀཱཡེན དིནྣཾ ནཱམ ཧོཏི, པཊིགྒཧཎེཔི ཨེསེཝ ནཡོ. ཡེན ཀེནཙི ཧི སརཱིརཱཝཡཝེན གཧིཏཾ ཀཱཡེན གཧིཏམེཝ ཧོཏི. སཙེཔི ནཏྠུཀརཎིཡཱ དིཡྻམཱནཾ ནཱསཱཔུཊེན ཨཀལླཀོ ཝཱ མུཁེན པཊིགྒཎྷཱཏི. ཨཱབྷོགམཏྟམེཝ ཧི ཨེཏྠ པམཱཎནྟི ཨཡཾ ནཡོ མཧཱཔཙྩརིཡཾ ཝུཏྟོ. ཀཱཡཔཊིབདྡྷེནཱཏི ཀཊཙྪུཨཱདཱིསུ ཡེན ཀེནཙི ཨུཔཀརཎེན དིནྣཾ ཀཱཡཔཊིབདྡྷེན དིནྣཾ ནཱམ ཧོཏི. པཊིགྒཧཎེཔི ཨེསེཝ ནཡོ. ཡེན ཀེནཙི སརཱིརཔཊིབདྡྷེན པཏྟཐཱལཀཱདིནཱ གཧིཏཾ ཀཱཡཔཊིབདྡྷེན གཧིཏམེཝ ཧོཏི. ནིསྶགྒིཡེནཱཏི ཀཱཡཏོ ཙ ཀཱཡཔཊིབདྡྷཏོ ཙ མོཙེཏྭཱ ཧཏྠཔཱསེ ཋིཏསྶ ཀཱཡེན ཝཱ ཀཱཡཔཊིབདྡྷེན ཝཱ པཱཏིཡམཱནམྤི ནིསྶགྒིཡེན པཡོགེན དིནྣཾ ནཱམ ཧོཏི. ཨཡཾ ཏཱཝ པཱལི༹ཝཎྞནཱ.

ཨཡཾ པནེཏྠ པཱལི༹མུཏྟཀཝིནིཙྪཡོ – པཉྩངྒེཧི པཊིགྒཧཎཾ རུཧཏི – ཐཱམམཛ྄ཛྷིམསྶ པུརིསསྶ ཨུཙྩཱརཎམཏྟཾ ཧོཏི, ཧཏྠཔཱསོ པཉྙཱཡཏི, ཨབྷིཧཱརོ པཉྙཱཡཏི, དེཝོ ཝཱ མནུསྶོ ཝཱ ཏིརཙྪཱནགཏོ ཝཱ ཀཱཡེན ཝཱ ཀཱཡཔཊིབདྡྷེན ཝཱ ནིསྶགྒིཡེན ཝཱ དེཏི, ཏཾ ཙེ བྷིཀྑུ ཀཱཡེན ¶ ཝཱ ཀཱཡཔཊིབདྡྷེན ཝཱ པཊིགྒཎྷཱཏི. ཨེཝཾ པཉྩཧངྒེཧི པཊིགྒཧཎཾ རུཧཏི.

ཏཏྠ ཋིཏནིསིནྣནིཔནྣཱནཾ པཝཱརཎསིཀྑཱཔདེ ཝུཏྟནཡེནེཝ ཧཏྠཔཱསོ ཝེདིཏབྦོ. སཙེ པན ¶ དཱཡཀཔཊིགྒཱཧཀེསུ ཨེཀོ ཨཱཀཱསེ ཧོཏི, ཨེཀོ ¶ བྷཱུམིཡཾ, བྷཱུམཊྛསྶ ཙ སཱིསེན ཨཱཀཱསཊྛསྶ ཙ ཋཔེཏྭཱ དཱཏུཾ ཝཱ གཧེཏུཾ ཝཱ པསཱརིཏཧཏྠཾ, ཡཾ ཨཱསནྣཏརཾ ཨངྒཾ, ཏསྶ ཨོརིམནྟེན ཧཏྠཔཱསཔྤམཱཎཾ པརིཙྪིནྡིཏབྦཾ. སཙེཔི ཨེཀོ ཀཱུཔེ ཧོཏི, ཨེཀོ ཀཱུཔཏཊེ, ཨེཀོ ཝཱ པན རུཀྑེ, ཨེཀོ པཐཝིཡཾ, ཝུཏྟནཡེནེཝ ཧཏྠཔཱསཔྤམཱཎཾ པརིཙྪིནྡིཏབྦཾ. ཨེཝརཱུཔེ ཧཏྠཔཱསེ ཋཏྭཱ སཙེཔི པཀྑཱི མུཁཏུཎྜཀེན ཝཱ ཧཏྠཱི ཝཱ སོཎྜཱཡ གཧེཏྭཱ པུཔྥཾ ཝཱ ཕལཾ ཝཱ དེཏི, པཊིགྒཧཎཾ རུཧཏི. སཙེ པན ཨདྡྷཊྛམརཏནསྶཱཔི ཧཏྠིནོ ཁནྡྷེ ནིསིནྣོ, ཏེན སོཎྜཱཡ དིཡྻམཱནཾ གཎྷཱཏི, ཝཊྚཏིཡེཝ.

ཨེཀོ བཧཱུནི བྷཏྟབྱཉྫནབྷཱཛནཱནི སཱིསེ ཀཏྭཱ བྷིཀྑུསྶ སནྟིཀཾ ཨཱགནྟྭཱ ཋིཏཀོཝ གཎྷཐཱཏི ཝདཏི, ན ཏཱཝ ཨབྷིཧཱརོ པཉྙཱཡཏི, ཏསྨཱ ན གཧེཏབྦཾ. སཙེ པན ཨཱིསཀམྤི ཨོནམཏི, བྷིཀྑུནཱ ཧཏྠཾ པསཱརེཏྭཱ ཧེཊྛིམབྷཱཛནཾ ཨེཀདེསེནཱཔི སམྤཊིཙྪིཏབྦཾ. ཨེཏྟཱཝཏཱ སབྦབྷཱཛནཱནི པཊིགྒཧིཏཱནི ཧོནྟི, ཏཏོ པཊྛཱཡ ཨོརོཔེཏྭཱ ཝཱ ཨུགྒྷཱཊེཏྭཱ ཝཱ ཡཾ ཨིཙྪཏི, ཏཾ གཧེཏྭཱ བྷུཉྫིཏུཾ ཝཊྚཏི. སབྷཏྟཔཙྪིཨཱདིམྷི པན ཨེཀབྷཱཛནེ ཝཏྟབྦམེཝ ནཏྠི, ཀཱཛེན བྷཏྟཾ ཧརནྟོཔི སཙེ ཀཱཛཾ ཨོནཱམེཏྭཱ དེཏི, ཝཊྚཏི. ཏིཾསཧཏྠོ ཝེཎུ ཧོཏི, ཨེཀསྨིཾ ཨནྟེ གུལ༹ཀུམྦྷོ བདྡྷོ, ཨེཀསྨིཾ སཔྤིཀུམྦྷོ, ཏཉྩེ པཊིགྒཎྷཱཏི, སབྦཾ པཊིགྒཧིཏམེཝ. ཨུཙྪུཡནྟདོཎིཏོ པགྒྷརནྟམེཝ རསཾ གཎྷཐཱཏི ཝདཏི, ཨབྷིཧཱརོ ན པཉྙཱཡཏཱིཏི ན གཧེཏབྦོ. སཙེ པན ཀསཊཾ ཚཌྜེཏྭཱ ཧཏྠེན ཨུསྶིཉྩིཏྭཱ ཨུསྶིཉྩིཏྭཱ དེཏི, ཝཊྚཏི.

བཧཱུ པཏྟཱ མཉྩེ ཝཱ པཱིཋེ ཝཱ ཀཊསཱརཀེ ཝཱ དོཎིཡཾ ཝཱ ཕལཀེ ཝཱ ཋཔིཏཱ ཧོནྟི, ཡཏྠ ཋིཏསྶ དཱཡཀོ ཧཏྠཔཱསེ ཧོཏི, ཏཏྠ ཋཏྭཱ པཊིགྒཧཎསཉྙཱཡ མཉྩཱདཱིནི ཨངྒུལིཡཱཔི ཕུསིཏྭཱ ཋིཏེན ཝཱ ནིསིནྣེན ཝཱ ནིཔནྣེན ཝཱ ཡཾ ཏེསུ པཏྟེསུ དིཡྻཏི, ཏཾ སབྦཾ པཊིགྒཧིཏཾ ཧོཏི. སཙེཔི པཊིགྒཧེསྶཱམཱིཏི མཉྩཱདཱིནི ཨཱརུཧིཏྭཱ ནིསཱིདཏི, ཝཊྚཏིཡེཝ ¶ . སཙེ པན མཉྩཱདཱིནི ཧཏྠེན གཧེཏྭཱ མཉྩེ ནིསཱིདཏི, ཝཏྟབྦམེཝ ནཏྠི.

པཐཝིཡཾ པན སཙེཔི ཀུཙྪིཡཱ ཀུཙྪིཾ ཨཱཧཙྩ ཋིཏཱ ཧོནྟི, ཡཾ ཡཾ ཨངྒུལིཡཱ ཝཱ སཱུཙིཡཱ ཝཱ ཕུསིཏྭཱ ནིསིནྣོ ཧོཏི, ཏཏྠ ཏཏྠ དིཡྻམཱནམེཝ པཊིགྒཧིཏཾ ཧོཏི. ‘‘ཡཏྠ ཀཏྠཙི མཧཱཀཊསཱརཧཏྠཏྠརཎཱདཱིསུ ཋཔིཏཔཏྟེ པཊིགྒཧཎཾ ན རུཧཏཱི’’ཏི ཝུཏྟཾ, ཏཾ ཧཏྠཔཱསཱཏིཀྐམཾ སནྡྷཱཡ ¶ ཝུཏྟནྟི ཝེདིཏབྦཾ. ཧཏྠཔཱསེ པན སཏི ཡཏྠ ཀཏྠཙི ཝཊྚཏི ཨཉྙཏྲ ཏཏྠཛཱཏཀཱ.

ཏཏྠཛཱཏཀེ ¶ པན པདུམིནིཔཎྞེ ཝཱ ཀིཾསུཀཔཎྞཱདིམྷི ཝཱ ན ཝཊྚཏི. ན ཧི ཏཾ ཀཱཡཔཊིབདྡྷསངྑྱཾ གཙྪཏི. ཡཐཱ ཙ ཏཏྠཛཱཏཀེ; ཨེཝཾ ཁཱཎུཀེ བནྡྷིཏྭཱ ཋཔིཏམཉྩཱདིམྷི ཨསཾཧཱརིམེ ཕལཀེ ཝཱ པཱསཱཎེ ཝཱ ན རུཧཏིཡེཝ, ཏེཔི ཧི ཏཏྠཛཱཏཀསངྑེཔུཔགཱ ཧོནྟི. བྷཱུམིཡཾ ཨཏྠཏེསུ སུཁུམེསུ ཏིནྟིཎིཀཱདིཔཎྞེསུཔི པཊིགྒཧཎཾ ན རུཧཏི, ན ཧི ཏཱནི སནྡྷཱརེཏུཾ སམཏྠཱནཱིཏི. མཧནྟེསུ པན པདུམིནིཔཎྞཱདཱིསུ རུཧཏི. སཙེ ཧཏྠཔཱསཾ ཨཏིཀྐམྨ ཋིཏོ དཱིགྷདཎྜཀེན ཨུལུ༹ངྐེན དེཏི, ཨཱགནྟྭཱ དེཧཱིཏི ཝཏྟབྦོ. ཝཙནཾ ཨསུཏྭཱ ཝཱ ཨནཱདིཡིཏྭཱ ཝཱ པཏྟེ ཨཱཀིརཏིཡེཝ, པུན པཊིགྒཧེཏབྦཾ. དཱུརེ ཋཏྭཱ བྷཏྟཔིཎྜཾ ཁིཔནྟེཔི ཨེསེཝ ནཡོ.

སཙེ པཏྟཏྠཝིཀཏོ ནཱིཧརིཡམཱནེ པཏྟེ རཛནཙུཎྞཱནི ཧོནྟི, སཏི ཨུདཀེ དྷོཝིཏབྦོ, ཨསཏི རཛནཙུཎྞཾ པུཙྪིཏྭཱ པཊིགྒཧེཏྭཱ ཝཱ པིཎྜཱཡ ཙརིཏབྦཾ. སཙེ པིཎྜཱཡ ཙརནྟསྶ རཛཾ པཏཏི, པཊིགྒཧེཏྭཱ བྷིཀྑཱ གཎྷིཏབྦཱ. ཨཔྤཊིགྒཧེཏྭཱ གཎྷཏོ ཝིནཡདུཀྐཊཾ. ཏཾ པན པུན པཊིགྒཧེཏྭཱ བྷུཉྫཏོ ཨནཱཔཏྟི. སཙེ པན ‘‘པཊིགྒཧེཏྭཱ དེཐཱ’’ཏི ཝུཏྟེ ཝཙནཾ ཨསུཏྭཱ ཝཱ ཨནཱདིཡིཏྭཱ ཝཱ བྷིཀྑཾ དེནྟིཡེཝ, ཝིནཡདུཀྐཊཾ ནཏྠི, པུན པཊིགྒཧེཏྭཱ ཨཉྙཱ བྷིཀྑཱ གཧེཏབྦཱ.

སཙེ མཧཱཝཱཏོ ཏཏོ ཏཏོ རཛཾ པཱཏེཏི, ན སཀྐཱ ཧོཏི བྷིཀྑཾ གཧེཏུཾ, ‘‘ཨནུཔསམྤནྣསྶ དསྶཱམཱི’’ཏི སུདྡྷཙིཏྟེན ཨཱབྷོགཾ ཀཏྭཱ གཎྷིཏུཾ ཝཊྚཏི. ཨེཝཾ པིཎྜཱཡ ཙརིཏྭཱ ཝིཧཱརཾ ཝཱ ཨཱསནསཱལཾ ཝཱ གནྟྭཱ ཏཾ ཨནུཔསམྤནྣསྶ དཏྭཱ པུན ཏེན དིནྣཾ ཝཱ ཏསྶ ཝིསྶཱསེན ཝཱ པཊིགྒཧེཏྭཱ བྷུཉྫིཏུཾ ཝཊྚཏི.

སཙེ བྷིཀྑཱཙཱརེ སརཛཾ པཏྟཾ བྷིཀྑུསྶ དེཏི, སོ ཝཏྟབྦོ – ‘‘ཨིམཾ པཊིགྒཧེཏྭཱ བྷིཀྑཾ ཝཱ གཎྷེཡྻཱསི, པརིབྷུཉྫེཡྻཱསི ཝཱ’’ཏི ཏེན ཏཐཱ ཀཱཏབྦཾ. སཙེ ¶ རཛཾ ཨུཔརི ཨུཔྤིལཝཏི, ཀཉྫིཀཾ པཝཱཧེཏྭཱ སེསཾ བྷུཉྫིཏབྦཾ. སཙེ ཨནྟོ པཝིཊྛཾ ཧོཏི, པཊིགྒཧེཏབྦཾ. ཨནུཔསམྤནྣེ ཨསཏི ཧཏྠཏོ ཨམོཙེནྟེན, ཡཏྠ ཨནུཔསམྤནྣོ ཨཏྠི ཏཏྠ ནེཏྭཱ པཊིགྒཧེཏབྦཾ ¶ . སུཀྑབྷཏྟེ པཏིཏརཛཾ ཨཔནེཏྭཱ བྷུཉྫིཏུཾ ཝཊྚཏི. སཙེ ཨཏིསུཁུམཾ ཧོཏི, ཨུཔརིབྷཏྟེན སདྡྷིཾ ཨཔནེཏབྦཾ, པཊིགྒཧེཏྭཱ ཝཱ བྷུཉྫིཏབྦཾ. ཡཱགུཾ ཝཱ སཱུཔཾ ཝཱ པུརཏོ ཋཔེཏྭཱ ཨཱལུལེནྟཱནཾ བྷཱཛནཏོ ཕུསིཏཱནི ཨུགྒནྟྭཱ པཏྟེ པཏནྟི, པཏྟོ པཊིགྒཧེཏབྦོ.

ཨུལུ༹ངྐེན ཨཱཧརིཏྭཱ དེནྟཱནཾ པཋམཏརཾ ཨུལུ༹ངྐཏོ ཐེཝཱ པཏྟེ པཏནྟི, སུཔཏིཏཱ, ཨབྷིཧཊཏྟཱ ¶ དོསོ ནཏྠི. སཙེཔི ཙརུཀེན བྷཏྟེ ཨཱཀིརིཡམཱནེ ཙརུཀཏོ མསི ཝཱ ཚཱརིཀཱ ཝཱ པཏཏི, ཨབྷིཧཊཏྟཱ ནེཝཏྠི དོསོ. ཨནནྟརསྶ བྷིཀྑུནོ དིཡྻམཱནཾ པཏྟཏོ ཨུཔྤཏིཏྭཱ ཨིཏརསྶ པཏྟེ པཏཏི, སུཔཏིཏཾ. པཊིགྒཧིཏམེཝ ཧི ཏཾ ཧོཏི.

སཙེ ཛཛ྄ཛྷརིསཱཁཱདིཾ ཕཱལེཏྭཱ ཨེཀསྶ བྷིཀྑུནོ དེནྟཱནཾ སཱཁཏོ ཕུསིཏཱནི ཨཉྙསྶ པཏྟེ པཏནྟི, པཏྟོ པཊིགྒཧེཏབྦོ. ཡསྶ པཏྟསྶ ཨུཔརི ཕཱལེནྟི, ཏསྶ པཏྟེ པཏིཏེསུ དཱཏུཀཱམཏཱཡ ཨབྷིཧཊཏྟཱ དོསོ ནཏྠི. པཱཡཱསསྶ པཱུརེཏྭཱ པཏྟཾ དེནྟི, ཨུཎྷཏྟཱ ཧེཊྛཱ གཧེཏུཾ ན སཀྐོཏི, མུཁཝཊྚིཡཱཔི གཧེཏུཾ ཝཊྚཏི. སཙེ ཏཐཱཔི ན སཀྐོཏི, ཨཱདྷཱརཀེན གཎྷིཏབྦོ.

ཨཱསནསཱལཱཡ པཏྟཾ གཧེཏྭཱ ནིསིནྣོ བྷིཀྑུ ནིདྡཾ ཨོཀྐནྟོ ཧོཏི, ནེཝ ཨཱཧརིཡམཱནཾ ན དིཡྻམཱནཾ ཛཱནཱཏི, ཨཔྤཊིགྒཧིཏཾ ཧོཏི. སཙེ པན ཨཱབྷོགཾ ཀཏྭཱ ནིསིནྣོ ཧོཏི, ཝཊྚཏི. སཙེཔི སོ ཧཏྠེན ཨཱདྷཱརཀཾ མུཉྩིཏྭཱ པཱདེན པེལླེཏྭཱ ནིདྡཱཡཏི, ཝཊྚཏིཡེཝ. པཱདེན ཨཱདྷཱརཀཾ ཨཀྐམིཏྭཱ པཊིགྒཎྷནྟསྶ པན ཛཱགརནྟསྶཔི ཨནཱདརཔཊིགྒཧཎཾ ཧོཏི, ཏསྨཱ ན ཀཱཏབྦཾ. ཀེཙི ཨེཝཾ ཨཱདྷཱརཀེན པཊིགྒཧཎཾ ཀཱཡཔཊིབདྡྷཔཊིབདྡྷེན པཊིགྒཧཎཾ ནཱམ ཧོཏི, ཏསྨཱ ན ཝཊྚཏཱིཏི ཝདནྟི. ཏཾ ཏེསཾ ཝཙནམཏྟམེཝ. ཨཏྠཏོ པན སབྦམྤེཏཾ ཀཱཡཔཊིབདྡྷམེཝ ཧོཏི. ཀཱཡསཾསགྒེཔི ཙེས ནཡོ དསྶིཏོཝ. ཡམྤི བྷིཀྑུསྶ དིཡྻམཱནཾ པཏཏི, ཏམྤི སཱམཾ གཧེཏྭཱ པརིབྷུཉྫིཏུཾ ཝཊྚཏི. ཏཏྲིདཾ ¶ སུཏྟཾ –

‘‘ཨནུཛཱནཱམི, བྷིཀྑཝེ, ཡཾ དིཡྻམཱནཾ པཏཏི, ཏཾ སཱམཾ གཧེཏྭཱ པརིབྷུཉྫིཏུཾ པརིཙྩཏྟཾ ཏཾ, བྷིཀྑཝེ, དཱཡཀེཧཱི’’ཏི (ཙཱུལ༹ཝ. ༢༧༣).

ཨིདཉྩ ¶ པན སུཏྟཾ ནེཡྻཏྠཾ. ཏསྨཱ ཨེཝམེཏྠ ཨདྷིཔྤཱཡོ ཝེདིཏབྦོ – ཡཾ དིཡྻམཱནཾ དཱཡཀསྶ ཧཏྠཏོ པརིགལི༹ཏྭཱ སུདྡྷཱཡ ཝཱ བྷཱུམིཡཱ པདུམིནིཔཎྞཝཏྠཀཊསཱརཀཱདཱིསུ ཝཱ པཏཏི, ཏཾ སཱམཾ གཧེཏྭཱ པརིབྷུཉྫིཏུཾ ཝཊྚཏི. ཡཾ པན སརཛཱཡ བྷཱུམིཡཱ པཏཏི, ཏཾ རཛཾ པུཉྪིཏྭཱ ཝཱ དྷོཝིཏྭཱ ཝཱ པཊིགྒཧེཏྭཱ ཝཱ པརིབྷུཉྫིཏབྦཾ. སཙེ པན པཝཊྚནྟཾ ཨཉྙསྶ བྷིཀྑུནོ སནྟིཀཾ གཙྪཏི, ཏེན ཨཱཧརཱཔེཏུམྤི ཝཊྚཏི. སཙེ ཏཾ བྷིཀྑུཾ ཝདཏི ‘‘ཏྭཾཡེཝ ཁཱདཱ’’ཏི ཏསྶཱཔི ཁཱདིཏུཾ ཝཊྚཏི. ཨནཱཎཏྟེན པན ཏེན ན གཧེཏབྦཾ. ཨནཱཎཏྟེནཱཔི ‘‘ཨིཏརསྶ དསྶཱམཱི’’ཏི གཧེཏུཾ ཝཊྚཏཱིཏི ཀུརུནྡིཡཾ ཝུཏྟཾ. ཀསྨཱ པནེཏཾ ཨིཏརསྶ བྷིཀྑུནོ གཧེཏུཾ ¶ ན ཝཊྚཏཱིཏི? བྷགཝཏཱ ཨནནུཉྙཱཏཏྟཱ. བྷགཝཏཱ ཧི ‘‘སཱམཾ གཧེཏྭཱ པརིབྷུཉྫིཏུ’’ནྟི ཝདནྟེན ཡསྶེཝ ཏཾ དིཡྻམཱནཾ པཏཏི, ཏསྶ ཨཔྤཊིགྒཧིཏཀམྤི ཏཾ གཧེཏྭཱ པརིབྷོགོ ཨནུཉྙཱཏོ. ‘‘པརིཙྩཏྟཾ ཏཾ བྷིཀྑཝེ དཱཡཀེཧཱི’’ཏི ཝཙནེན པནེཏྠ པརསནྟཀཱབྷཱཝོ དཱིཔིཏོ. ཏསྨཱ ཨཉྙསྶ སཱམཾ གཧེཏྭཱ པརིབྷུཉྫིཏུཾ ན ཝཊྚཏི, ཏསྶ པན ཨཱཎཏྟིཡཱ ཝཊྚཏཱིཏི ཨཡཾ ཀིརེཏྠ ཨདྷིཔྤཱཡོ.

ཡསྨཱ ཙ ཏཾ ཨཔྤཊིགྒཧིཏཀཏྟཱ ཨནུཉྙཱཏཾ, ཏསྨཱ ཡཐཱཋིཏཾཡེཝ ཨནཱམསིཏྭཱ ཀེནཙི པིདཧིཏྭཱ ཋཔིཏཾ དུཏིཡདིཝསེཔི པརིབྷུཉྩིཏུཾ ཝཊྚཏི, སནྣིདྷིཔཙྩཡཱ ཨནཱཔཏྟི. པཊིགྒཧེཏྭཱ པན པརིབྷུཉྫིཏབྦཾ. ཏཾདིཝསཾཡེཝ ཧི ཏསྶ སཱམཾ གཧེཏྭཱ པརིབྷོགོ ཨནུཉྙཱཏོ, ན ཏཏོ པརནྟི ཨཡམྤི ཀིརེཏྠ ཨདྷིཔྤཱཡོ.

ཨིདཱནི ཨབྦོཧཱརིཀནཡོ ཝུཙྩཏི – བྷུཉྫནྟཱནཉྷི དནྟཱ ཁིཡྻནྟི, ནཁཱ ཁིཡྻནྟི, པཏྟསྶ ཝཎྞོ ཁིཡྻཏི, སབྦཾ ཨབྦོཧཱརིཀཾ. ཡམྤི སཏྠཀེན ཨུཙྪུཨཱདཱིསུ ཕཱལིཏེསུ མལཾ པཉྙཱཡཏི, ཨེཏཾ ནཝསམུཊྛིཏཾ ནཱམ པཊིགྒཧེཏྭཱ པརིབྷུཉྫིཏབྦཾ. སཏྠཀཾ དྷོཝིཏྭཱ ཕཱལིཏེསུ མལཾ ན པཉྙཱཡཏི, ལོཧགནྡྷམཏྟཾ ཧོཏི, ཏཾ ཨབྦོཧཱརིཀཾ. ཡམྤི སཏྠཀཾ གཧེཏྭཱ པརིཧརནྟི, ཏེན ཕཱལིཏེཔི ཨེསེཝ ནཡོ. ན ཧི ཏཾ པརིབྷོགཏྠཱཡ པརིཧརནྟཱིཏི. མཱུལབྷེསཛྫཱདཱིནི པིསནྟཱནཾ ཝཱ ¶ ཀོཊྚེནྟཱནཾ ཝཱ ནིསདནིསདཔོཏཀཨུདུཀྑལམུསལཱདཱིནི ཁིཡྻནྟི, པརིཧརཎཀཝཱསིཾ ཏཱཔེཏྭཱ བྷེསཛྫཏྠཱཡ ཏཀྐེ ཝཱ ཁཱིརེ ཝཱ པཀྑིཔནྟི, ཏཏྠ ནཱིལིཀཱ པཉྙཱཡཏི. སཏྠཀེ ཝུཏྟསདིསོཝ ཝིནིཙྪཡོ. ཨཱམཀཏཀྐཱདཱིསུ པན སཡཾ ན པཀྑིཔིཏབྦཱ. པཀྑིཔཏི ཙེ, སཱམཔཱཀཏོ ན མུཙྩཏི.

དེཝེ ¶ ཝསྶནྟེ པིཎྜཱཡ ཙརནྟསྶ སརཱིརཏོ ཝཱ ཙཱིཝརཏོ ཝཱ ཀིལིཊྛཨུདཀཾ པཏྟེ པཏཏི, ཏཾ པཊིགྒཧེཏབྦཾ. རུཀྑམཱུལཱདཱིསུ བྷུཉྫནྟསྶ པཏིཏེཔི ཨེསེཝ ནཡོ. སཙེ པན སཏྟཱཧཾ ཝསྶནྟེ དེཝེ སུདྡྷཾ ཨུདཀཾ ཧོཏི, ཨབྦྷོཀཱསཏོ ཝཱ པཏཏི, ཝཊྚཏི. སཱམཎེརསྶ ཨོདནཾ དེནྟེན ཏསྶ པཏྟགཏཾ ཨཙྪུཔནྟེནེཝ དཱཏབྦོ. པཏྟོ ཝཱསྶ པཊིགྒཧེཏབྦོ. ཨཔྤཊིགྒཧིཏེ ཨོདནཾ ཚུཔིཏྭཱ པུན ཨཏྟནོ པཏྟེ ཨོདནཾ གཎྷནྟསྶ ཨུགྒཧིཏཀོ ཧོཏི.

སཙེ པན དཱཏུཀཱམོ ཧུཏྭཱ ‘‘ཨཱཧར སཱམཎེར པཏྟཾ, ཨོདནཾ གཎྷཱ’’ཏི ཝདཏི, ཨིཏརོ ཙ ‘‘ཨལཾ མཡ྄ཧ’’ནྟི པཊིཀྑིཔཏི, པུན ཏཝེཝེཏཾ མཡཱ པརིཙྩཏྟ’’ནྟི ཙ ཝུཏྟེཔི ‘‘ན མཡ྄ཧཾ ཨེཏེནཏྠོ’’ཏི ཝདཏི. སཏཀྑཏྟུམྤི པརིཙྩཛཏུ, ཡཱཝ ཨཏྟནོ ཧཏྠགཏཾ པཊིགྒཧིཏམེཝ ཧོཏི.

སཙེ ¶ པན ཨཱདྷཱརཀེ ཋིཏཾ ནིརཔེཀྑོ ‘‘གཎྷཱ’’ཏི ཝདཏི, པུན པཊིགྒཧེཏབྦཾ. སཱཔེཀྑོ ཨཱདྷཱརཀེ པཏྟཾ ཋཔེཏྭཱ ‘‘ཨེཏྟོ པཱུཝཾ ཝཱ བྷཏྟཾ ཝཱ གཎྷཱ’’ཏི སཱམཎེརཾ ཝདཏི, སཱམཎེརོ ཧཏྠཾ དྷོཝིཏྭཱ སཙེཔི སཏཀྑཏྟུཾ གཧེཏྭཱ ཨཏྟནོ པཏྟགཏཾ ཨཕུསནྟོཝ ཨཏྟནོ པཏྟེ པཀྑིཔཏི, པུན པཊིགྒཧཎཀིཙྩཾ ནཏྠི. ཡདི པན ཨཏྟནོ པཏྟགཏཾ ཕུསིཏྭཱ ཏཏོ གཎྷཱཏི, སཱམཎེརསནྟཀེན སཾསཊྛཾ ཧོཏི, པུན པཊིགྒཧེཏབྦཾ. ཀེཙི པན ‘‘སཙེཔི གཡ྄ཧམཱནཾ ཚིཛྫིཏྭཱ ཏཏྠ པཏཏི, པུན པཊིགྒཧེཏབྦ’’ནྟི ཝདནྟི. ཏཾ ‘‘ཨེཀཾ བྷཏྟཔིཎྜཾ གཎྷ, ཨེཀཾ པཱུཝཾ གཎྷ, ཨིམསྶ གུལ༹པིཎྜསྶ ཨེཏྟཀཾ པདེསཾ གཎྷཱ’’ཏི ཨེཝཾ པརིཙྪིནྡིཏྭཱ ཝུཏྟེ ཝེདིཏབྦཾ. ཨིདྷ པན པརིཙྪེདོ ནཏྠི. ཏསྨཱ ཡཾ སཱམཎེརསྶ པཏྟེ པཏཏི, ཏདེཝ པཊིགྒཧཎཾ ཝིཛཧཏི. ཧཏྠགཏཾ པན ཡཱཝ སཱམཎེརོ ཝཱ ‘‘ཨལ’’ནྟི ན ཨོརམཏི, བྷིཀྑུ ཝཱ ན ཝཱརེཏི, ཏཱཝ བྷིཀྑུསྶེཝ སནྟཀཾ, ཏསྨཱ པཊིགྒཧཎཾ ན ཝིཛཧཏི.

སཙེ ཨཏྟནོ ཝཱ བྷིཀྑཱུནཾ ཝཱ ཡཱགུཔཙནཀབྷཱཛནེ ¶ ཀེསཉྩི ཨཏྠཱཡ ཨོདནཾ པཀྑིཔཏི, ‘‘སཱམཎེར, བྷཱཛནསྶ ཨུཔརི ཧཏྠཾ ཀརོཧཱི’’ཏི ཝཏྭཱ ཏསྶ ཧཏྠེ པཀྑིཔིཏབྦཾ, ཏསྶ ཧཏྠཏོ བྷཱཛནེ པཏིཏཉྷི དུཏིཡདིཝསེ བྷཱཛནསྶ ཨཀཔྤིཡབྷཱཝཾ ན ཀརོཏི, པརིཙྩཏྟཏྟཱ. སཙེ ཨེཝཾ ཨཀཏྭཱ པཀྑིཔཏི, པཏྟམིཝ བྷཱཛནཾ ནིརཱམིསཾ ཀཏྭཱ པརིབྷུཉྫིཏབྦཾ. དཱཡཀཱ ཡཱགུཀུཊཾ ཋཔེཏྭཱ གཏཱ, ཏཾ དཧརསཱམཎེརོ པཊིགྒཎྷཱཔེཏུཾ ན སཀྐོཏི, བྷིཀྑུ པཏྟཾ ཨུཔནཱམེཏི, སཱམཎེརོ ཀུཊསྶ གཱིཝཾ པཏྟསྶ མུཁཝཊྚིཡཾ ¶ ཋཔེཏྭཱ ཨཱཝཛྫེཏི, པཏྟགཏཱ ཡཱགུ པཊིགྒཧིཏཱཝ ཧོཏི. ཨཐ ཝཱ བྷིཀྑུ བྷཱུམིཡཾ ཧཏྠཾ ཋཔེཏི, སཱམཎེརོ པཝཊྚེཏྭཱ ཏཏྠ ཨཱརོཔེཏི, ཝཊྚཏི. པཱུཝཔཙྪིབྷཏྟཔཙྪིཨུཙྪུབྷཱརཱདཱིསུཔི ཨེསེཝ ནཡོ.

སཙེ པཊིགྒཧཎཱུཔགཾ བྷཱརཾ དྭེ ཏཡོ སཱམཎེརཱ དེནྟི, ཨེཀེན ཝཱ བལཝཏཱ ཨུཀྑིཏྟཾ དྭེ ཏཡོ བྷིཀྑཱུ གཎྷནྟི, ཝཊྚཏི. མཉྩསྶ ཝཱ པཱིཋསྶ ཝཱ པཱདེ ཏེལགྷཊཾ ཝཱ ཕཱཎིཏགྷཊཾ ཝཱ ནཝནཱིཏགྷཊཾ ཝཱ ལགྒེནྟི, བྷིཀྑུསྶ མཉྩེཔི པཱིཋེཔི ནིསཱིདིཏུཾ ཝཊྚཏི. ཨུགྒཧིཏཀཾ ནཱམ ན ཧོཏི.

ནཱགདནྟཀེ ཝཱ ཨངྐུསཀེ ཝཱ དྭེ ཏེལགྷཊཱ ལགྒིཏཱ ཧོནྟི, ཨུཔརི པཊིགྒཧིཏཀོ ཧེཊྛཱ ཨཔྤཊིགྒཧིཏཀོ, ཨུཔརིམཾ གཧེཏུཾ ཝཊྚཏི. ཧེཊྛཱ པཊིགྒཧིཏཀོ ཨུཔརི ཨཔྤཊིགྒཧིཏཀོ, ཨུཔརིམཾ གཧེཏྭཱ ཨིཏརཾ གཎྷཏོ ཨུཔརིམོ ཨུགྒཧིཏཀོ ཧོཏི. ཧེཊྛཱམཉྩེ ཨཔྤཊིགྒཧིཏཀཾ ཏེལཐཱལཀཾ ཧོཏི, ཏཾ ཙེ སམྨཛྫནྟོ སམྨུཉྫནིཡཱ གྷཊྚེཏི, ཨུགྒཧིཏཀཾ ན ཧོཏི. པཊིགྒཧིཏཀཾ གཎྷིསྶཱམཱིཏི ཨཔྤཊིགྒཧིཏཀཾ གཧེཏྭཱ ཉཏྭཱ པུན ཋཔེཏི, ཨུགྒཧིཏཀཾ ན ཧོཏི. བཧི ¶ ནཱིཧརིཏྭཱ སཉྫཱནཱཏི, བཧི ཨཊྛཔེཏྭཱ ཧརིཏྭཱ ཏཏྠེཝ ཋཔེཏབྦཾ, ནཏྠི དོསོ. སཙེ པན པུབྦེ ཝིཝརིཏྭཱ ཋཔིཏཾ ན པིདཧིཏབྦཾ; ཡཐཱ པུབྦེ ཋིཏཾ ཏཐེཝ ཋཔེཏབྦཾ. སཙེ བཧི ཋཔེཏི, པུན ན ཚུཔིཏབྦཾ.

ཧེཊྛཱཔཱསཱདཾ ཨོརོཧནྟོ ནིསྶེཎིམཛ྄ཛྷེ སཉྫཱནཱཏི, ཨནོཀཱསཏྟཱ ཨུདྡྷཾ ཝཱ ཨདྷོ ཝཱ ཧརིཏྭཱ ཋཔེཏབྦཾ. པཊིགྒཧིཏཀེ ཏེལཱདིམྷི ཀཎྞཀཾ ཨུཊྛེཏི, སིངྒིཝེརཱདིམྷི གྷནཙུཎྞཾ, ཏཾསམུཊྛཱནམེཝ ¶ ནཱམེཏཾ, པུན པཊིགྒཧཎཀིཙྩཾ ནཏྠི.

ཏཱལཾ ཝཱ ནཱལི༹ཀེརཾ ཝཱ ཨཱརུལ༹ྷོ ཡོཏྟེན ཕལཔིཎྜིཾ ཨོཏཱརེཏྭཱ ཨུཔརི ཋིཏོཝ གཎྷཐཱཏི ཝདཏི, ན གཧེཏབྦཾ. སཙེ ཨཉྙོ བྷཱུམིཡཾ ཋིཏོ ཡོཏྟཔཱསཀེ གཧེཏྭཱ ཨུཀྑིཔིཏྭཱ དེཏི, ཝཊྚཏི. སཕལཾ མཧཱསཱཁཾ ཀཔྤིཡཾ ཀཱརེཏྭཱ པཊིགྒཎྷཱཏི, ཕལཱནི པཊིགྒཧིཏཱནེཝ ཧོནྟི, ཡཐཱསུཁཾ པརིབྷུཉྫིཏུཾ ཝཊྚཏི.

ཨནྟོཝཏིཡཾ ཋཏྭཱ ཝཏིཾ ཚིནྡིཏྭཱ ཨུཙྪུཾ ཝཱ ཏིམྦརཱུསཀཾ ཝཱ དེནྟི, ཧཏྠཔཱསེ སཏི ཝཊྚཏི. ཝཏིདཎྜཀེསུ ཨཔྤཧརིཏྭཱ ནིགྒཏཾ གཎྷནྟསྶ ཝཊྚཏི. པཧརིཏྭཱ ནིགྒཏེ ཨཊྛཀཐཱསུ དོསོ ན དསྶིཏོ. མཡཾ པན ཡཾ ¶ ཋཱནཾ པཧཊཾ, ཏཏོ སཡཾཔཏིཏམེཝ ཧོཏཱིཏི ཏཀྐཡཱམ. ཏསྨིམྤི ཨཊྛཏྭཱ གཙྪནྟེ ཡུཛྫཏི, སུངྐགྷཱཏཏོ པཝཊྚེཏྭཱ བཧིཔཏིཏབྷཎྜཾ ཝིཡ. ཝཏིཾ ཝཱ པཱཀཱརཾ ཝཱ ལངྒྷཱཔེཏྭཱ དེནྟི, སཙེ པན ན པུཐུལོ པཱཀཱརོ, ཨནྟོཔཱཀཱརེ ཙ བཧིཔཱཀཱརེ ཙ ཋིཏསྶ ཧཏྠཔཱསོ པཧོཏི, ཧཏྠསཏམྤི ཨུདྡྷཾ གནྟྭཱ སམྤཏྟཾ གཧེཏུཾ ཝཊྚཏི.

བྷིཀྑུ གིལཱནཾ སཱམཎེརཾ ཁནྡྷེན ཝཧཏི, སོ ཕལཱཕལཾ དིསྭཱ གཧེཏྭཱ ཁནྡྷེ ནིསིནྣོཝ དེཏི, ཝཊྚཏི. ཨཔརོ བྷིཀྑུཾ ཝཧནྟོ ཁནྡྷེ ནིསིནྣསྶ བྷིཀྑུནོ དེཏི, ཝཊྚཏིཡེཝ.

བྷིཀྑུ ཕལིནིཾ སཱཁཾ ཚཱཡཏྠཱཡ གཧེཏྭཱ གཙྪཏི, ཕལཱནི ཁཱདིཏུཾ ཙིཏྟེ ཨུཔྤནྣེ པཊིགྒཧཱཔེཏྭཱ ཁཱདིཏུཾ ཝཊྚཏི. མཙྪིཀཝཱརཎཏྠཾ ཀཔྤིཡཾ ཀཱརེཏྭཱ པཊིགྒཎྷཱཏི, ཁཱདིཏུཀཱམོ ཙེ ཧོཏི, མཱུལཔཊིགྒཧཎམེཝ ཝཊྚཏི, ཁཱདནྟསྶ ནཏྠི དོསོ.

བྷིཀྑུ པཊིགྒཧཎཱརཧཾ བྷཎྜཾ མནུསྶཱནཾ ཡཱནེ ཋཔེཏྭཱ མགྒཾ གཙྪཏི, ཡཱནཾ ཀདྡམེ ལགྒཏི, དཧརོ ཙཀྐཾ གཧེཏྭཱ ཨུཀྑིཔཏི, ཝཊྚཏི, ཨུགྒཧིཏཀཾ ནཱམ ན ཧོཏི. ནཱཝཱཡ ཋཔེཏྭཱ ནཱཝཾ ཨརིཏྟེན ཝཱ པཱཛེཏི, ཧཏྠེན ཝཱ ཀཌྜྷཏི, ཝཊྚཏི. ཨུལུ༹མྤེཔི ཨེསེཝ ནཡོ. ཙཱཊིཡཾ ¶ ཀུཎྜཀེ ཝཱ ཋཔེཏྭཱཔི ཏཾ ཨནུཔསམྤནྣེན གཱཧཱཔེཏྭཱ ཨནུཔསམྤནྣཾ བཱཧཱཡཾ གཧེཏྭཱ ཏརིཏུཾ ཝཊྚཏི. ཏསྨིམྤི ཨསཏི ཨནུཔསམྤནྣཾ གཱཧཱཔེཏྭཱ ཏཾ བཱཧཱཡཾ གཧེཏྭཱ ཏརིཏུཾ ཝཊྚཏི.

ཨུཔཱསཀཱ གམིཀབྷིཀྑཱུནཾ པཱཐེཡྻཏཎྜུལེ ¶ དེནྟི. སཱམཎེརཱ བྷིཀྑཱུནཾ ཏཎྜུལེ གཧེཏྭཱ ཨཏྟནོ ཏཎྜུལེ གཧེཏུཾ ན སཀྐོནྟི, བྷིཀྑཱུ ཏེསཾ ཏཎྜུལེ གཎྷནྟི. སཱམཎེརཱ ཨཏྟནཱ གཧིཏཏཎྜུལེསུ ཁཱིཎེསུ ཨིཏརེཧི ཏཎྜུལེཧི ཡཱགུཾ པཙིཏྭཱ སབྦེསཾ པཏྟཱནི པཊིཔཱཊིཡཱ ཋཔེཏྭཱ ཡཱགུཾ ཨཱཀིརནྟི. པཎྜིཏོ སཱམཎེརོ ཨཏྟནོ པཏྟཾ གཧེཏྭཱ ཐེརསྶ དེཏི, ཐེརསྶ པཏྟཾ ཨནུཐེརསྶཱཏི ཨེཝཾ སབྦཱནི པརིཝཏྟེཏི, སབྦེཧི སཱམཎེརསྶ སནྟཀཾ བྷུཏྟཾ ཧོཏི, ཝཊྚཏི.

སཙེཔི སཱམཎེརོ ཨཔཎྜིཏོ ཧོཏི, ཨཏྟནོ པཏྟེ ཡཱགུཾ སཡམེཝ པཱཏུཾ ཨཱརབྷཏི, ‘‘ཨཱཝུསོ ཏུཡ྄ཧཾ ཡཱགུཾ མཡ྄ཧཾ དེཧཱི’’ཏི ཨེཝཾ ཐེརེཧི པཊིཔཱཊིཡཱ ཡཱཙིཏྭཱཔི པིཝིཏུཾ ཝཊྚཏི, སབྦེཧི སཱམཎེརསྶ སནྟཀམེཝ ¶ བྷུཏྟཾ ཧོཏི, ནེཝ ཨུགྒཧིཏཔཙྩཡཱ ན སནྣིདྷིཔཙྩཡཱ ཝཛྫཾ ཕུསནྟི. ཨེཏྠ པན མཱཏཱཔིཏཱུནཾ ཏེལཱདཱིནི ཚཱཡཱདཱིནཾ ཨཏྠཱཡ སཱཁཱདཱིནི ཙ ཧརནྟཱནཾ ཨིམེསཉྩ ཝིསེསོ ན དིསྶཏི. ཏསྨཱ ཀཱརཎཾ ཨུཔཔརིཀྑིཏབྦཾ.

སཱམཎེརོ བྷཏྟཾ པཙིཏུཀཱམོ ཏཎྜུལེ དྷོཝིཏྭཱ ནིཙྩཱལེཏུཾ ན སཀྐོཏི. བྷིཀྑུནཱ ཏཎྜུལེ ཙ བྷཱཛནཉྩ པཊིགྒཧེཏྭཱ ཏཎྜུལེ དྷོཝིཏྭཱ ནིཙྩཱལེཏྭཱ བྷཱཛནཾ ཨུདྡྷནཾ ཨཱརོཔེཏབྦཾ, ཨགྒི ན ཀཱཏབྦོ, པཀྐཀཱལེ ཝིཝརིཏྭཱ པཀྐབྷཱཝོ ཛཱནིཏབྦོ. སཙེ དུཔྤཀྐཾ ཧོཏི, པཱཀཏྠཱཡ པིདཧིཏུཾ ན ཝཊྚཏི. རཛསྶ ཝཱ ཚཱརིཀཱཡ ཝཱ ཨཔཏནཏྠཱཡ ཝཊྚཏི, པཀྐཀཱལེ ཨཱརོཔེཏུམྤི བྷུཉྫིཏུམྤི ཝཊྚཏི, པུན པཊིགྒཧཎཀིཙྩཾ ནཏྠི.

སཱམཎེརོ པཊིབལོ པཙིཏུཾ, ཁཎོ པནསྶ ནཏྠི, ཀཏྠཙི གནྟུཀཱམོ. བྷིཀྑུནཱ སཏཎྜུལོདཀབྷཱཛནཾ པཊིགྒཧེཏྭཱ ཨུདྡྷནཾ ཨཱརོཔེཏྭཱ ཨགྒིཾ ཛཱལེཏྭཱ གཙྪཱཧཱིཏི ཝཏྟབྦོ. ཏཏོ པརཾ པུརིམནཡེནེཝ སབྦཾ ཀཱཏུཾ ཝཊྚཏི.

བྷིཀྑུ ཡཱགུཨཏྠཱཡ སུདྡྷཾ བྷཱཛནཾ ཨཱརོཔེཏྭཱ ཨུདཀཾ ཏཱཔེཏི, ཝཊྚཏི. ཏཏྟེ ཨུདཀེ སཱམཎེརོ ཏཎྜུལེ པཀྑིཔཏི, ཏཏོ པཊྛཱཡ བྷིཀྑུནཱ ཨགྒི ན ཀཱཏབྦོ. པཀྐཡཱགུཾ པཊིགྒཧེཏྭཱ པཱཏུཾ ཝཊྚཏི.

སཱམཎེརོ ཡཱགུཾ པཙཏི, ཧཏྠཀུཀྐུཙྩཀོ བྷིཀྑུ ཀཱིལ༹ནྟོ བྷཱཛནཾ ཨཱམསཏི, པིདྷཱནཾ ཨཱམསཏི ¶ , ཨུགྒཏཾ ཕེཎཾ ཚིནྡིཏྭཱ ཧརཏི, ཏསྶེཝ པཱཏུཾ ན ཝཊྚཏི, དུརུཔཙིཎྞཾ ནཱམ ཧོཏི. སཙེ པན དབྦིཾ ཝཱ ཨུལུ༹ངྐཾ ཝཱ གཧེཏྭཱ ཨནུཀྑིཔནྟོ ཨཱལུལེ༹ཏི, སབྦེསཾ ན ཝཊྚཏི, སཱམཔཱཀཉྩེཝ ¶ ཧོཏི དུརུཔཙིཎྞཉྩ. སཙེ ཨུཀྑིཔཏི, ཨུགྒཧིཏཀམྤི ཧོཏི.

བྷིཀྑུནཱ པིཎྜཱཡ ཙརིཏྭཱ ཨཱདྷཱརཀེ པཏྟོ ཋཔིཏོ ཧོཏི, ཏཏྲ ཙེ ཨཉྙོ ལོལབྷིཀྑུ ཀཱིལ༹ནྟོ པཏྟཾ ཨཱམསཏི, པཏྟཔིདྷཱནཾ ཨཱམསཏི, ཏསྶེཝ ཏཏོ ལདྡྷཾ བྷཏྟཾ ན ཝཊྚཏི. སཙེ པན པཏྟཾ ཨུཀྑིཔིཏྭཱ ཋཔེཏི, སབྦེསཾ ན ཝཊྚཏི. ཏཏྠཛཱཏཀཕལཱནི སཱཁཱཡ ཝཱ ཝལླིཡཱ ཝཱ གཧེཏྭཱ ཙཱལེཏི, ཏསྶེཝ ཏཏོ ལདྡྷཾ ཕལཾ ན ཝཊྚཏི, དུརུཔཙིཎྞདུཀྐཊཉྩ ཨཱཔཛྫཏི. ཕལརུཀྑཾ པན ཨཔསྶཡིཏུཾ ཝཱ ཏཏྠ ཀཎྜཀེ ཝཱ བནྡྷིཏུཾ ཝཊྚཏི, དུརུཔཙིཎྞཾ ན ཧོཏཱིཏི མཧཱཔཙྩརིཡཾ ཝུཏྟཾ.

ཨརཉྙེ ¶ པཏིཏཾ པན ཨམྦཕལཱདིཾ དིསྭཱ སཱམཎེརསྶ དསྶཱམཱིཏི ཨཱཧརིཏྭཱ དཱཏུཾ ཝཊྚཏི. སཱིཧཝིགྷཱསཱདིཾ དིསྭཱཔི སཱམཎེརསྶ དསྶཱམཱིཏི པཊིགྒཧེཏྭཱ ཝཱ ཨཔྤཊིགྒཧེཏྭཱ ཝཱ ཨཱཧརིཏྭཱ དཱཏུཾ ཝཊྚཏི. སཙེ པན སཀྐོཏི ཝིཏཀྐཾ སོདྷེཏུཾ, ཏཏོ ལདྡྷཾ ཁཱདིཏུམྤི ཝཊྚཏི, ནེཝ ཨཱམཀམཾསཔཊིགྒཧཎཔཙྩཡཱ ན ཨུགྒཧིཏཀཔཙྩཡཱ ཝཛྫཾ ཕུསཏི.

མཱཏཱཔིཏཱུནཾ ཨཏྠཱཡ ཏེལཱདཱིནི གཧེཏྭཱ གཙྪཏོ ཨནྟརཱམགྒེ བྱཱདྷི ཨུཔྤཛྫཏི, ཏཏོ ཡཾ ཨིཙྪཏི, ཏཾ པཊིགྒཧེཏྭཱ པརིབྷུཉྫིཏུཾ ཝཊྚཏི. སཙེ པན མཱུལེཔི པཊིགྒཧིཏཾ ཧོཏི, པུན པཊིགྒཧཎཀིཙྩཾ ནཏྠི. མཱཏཱཔིཏཱུནཾ ཏཎྜུལེ ཨཱཧརིཏྭཱ དེཏི, ཏེ ཏཏོཡེཝ ཡཱགུཨཱདཱིནི སམྤཱདེཏྭཱ ཏསྶ དེནྟི, ཝཊྚཏི སནྣིདྷིཔཙྩཡཱ ཝཱ ཨུགྒཧིཏཀཔཙྩཡཱ ཝཱ དོསོ ནཏྠི.

བྷིཀྑུ པིདཧིཏྭཱ ཨུདཀཾ ཏཱཔེཏི, ཡཱཝ པརིཀྑཡཱ པརིབྷུཉྫིཏུཾ ཝཊྚཏི. སཙེ པནེཏྠ ཚཱརིཀཱ པཏཏི, པཊིགྒཧེཏབྦཾ. དཱིགྷསཎྜཱསེན ཐཱལཀཾ གཧེཏྭཱ ཏེལཾ པཙནྟསྶ ཚཱརིཀཱ པཏཏི, ཧཏྠེན ཨམུཉྩནྟེནེཝ པཙིཏྭཱ ཨོཏཱརེཏྭཱ པཊིགྒཧེཏབྦཾ. སཙེ ཨངྒཱརཱཔི དཱརཱུནི ཝཱ པཊིགྒཧེཏྭཱ ཋཔིཏཱནི, མཱུལཔཊིགྒཧཎམེཝ ཝཊྚཏི.

བྷིཀྑུ ཨུཙྪུཾ ཁཱདཏི, སཱམཎེརོ ‘‘མཡ྄ཧམྤི དེཐཱ’’ཏི ཝདཏི. ‘‘ཨིཏོ ཚིནྡིཏྭཱ གཎྷཱ’’ཏི ཝུཏྟོ གཎྷཱཏི, ཨཝསེསེ པུན པཊིགྒཧཎཀིཙྩཾ ནཏྠི. གུལ༹པིཎྜཀཾ ཁཱདནྟསྶཱཔི ཨེསེཝ ནཡོ. ཝུཏྟོཀཱསཏོ ཚིནྡིཏྭཱ གཧིཏཱཝསེསཉྷི ཨཛཧིཏཔཊིགྒཧཎམེཝ ཧོཏི.

བྷིཀྑུ ¶ གུལ༹ཾ བྷཱཛེནྟོ པཊིགྒཧེཏྭཱ ཀོཊྛཱསེ ཀརོཏི, བྷིཀྑཱུཔི སཱམཎེརཱཔི ཨཱགནྟྭཱ ཨེཀགཧཎེནེཝ ཨེཀམེཀཾ ཀོཊྛཱསཾ གཎྷནྟི ¶ , གཧིཏཱཝསེསཾ པཊིགྒཧིཏམེཝ ཧོཏི. སཙེ ལོལསཱམཎེརོ གཎྷིཏྭཱ གཎྷིཏྭཱ པུན ཋཔེཏི, ཏསྶ གཧིཏཱཝསེསཾ ཨཔྤཊིགྒཧིཏཀཾ ཧོཏི.

བྷིཀྑུ དྷཱུམཝཊྚིཾ པཊིགྒཧེཏྭཱ དྷཱུམཾ པིཝཏི, མུཁཉྩ ཀཎྛོ ཙ མནོསིལཱཡ ལིཏྟོ ཝིཡ ཧོཏི, ཡཱཝཀཱལིཀཾ བྷུཉྫིཏུཾ ཝཊྚཏི, ཡཱཝཀཱལིཀེན ཡཱཝཛཱིཝིཀསཾསགྒེ དོསོ ནཏྠི.

པཏྟཾ ¶ ཝཱ རཛནཾ ཝཱ པཙནྟསྶ ཀཎྞནཱསམུཁཙྪིདྡེཧི དྷཱུམོ པཝིསཏི, བྱཱདྷིཔཙྩཡཱ པུཔྥཾ ཝཱ ཕལཾ ཝཱ ཨུཔསིངྒྷཏི, ཨབྦོཧཱརིཀཏྟཱ ཝཊྚཏི. བྷཏྟུགྒཱརོ ཏཱལུཾ ཨཱཧཙྩ ཨནྟོཡེཝ པཝིསཏི, ཨཝིསཡཏྟཱ ཝཊྚཏི. མུཁཾ པཝིཊྛཾ པན ཨཛ྄ཛྷོཧརཏོ ཝིཀཱལེ ཨཱཔཏྟི. དནྟནྟརེ ལགྒསྶ ཨཱམིསསྶ རསོ པཝིསཏི, ཨཱཔཏྟིཡེཝ. སཙེ སུཁུམཾ ཨཱམིསཾ ཧོཏི, རསོ ན པཉྙཱཡཏི, ཨབྦོཧཱརིཀཔཀྑཾ བྷཛཏི.

ཨུཔཀཊྛེ ཀཱལེ ནིརུདཀཊྛཱནེ བྷཏྟཾ བྷུཉྫིཏྭཱ ཀཀྑཱརེཏྭཱ དྭེ ཏཡོ ཁེལ༹པིཎྜེ པཱཏེཏྭཱ ཨུདཀཊྛཱནཾ གནྟྭཱ མུཁཾ ཝིཀྑཱལེཏབྦཾ. པཊིགྒཧེཏྭཱ ཋཔིཏསིངྒིཝེརཱདཱིནཾ ཨངྐུརཱ ནིཀྑམནྟི, པུན པཊིགྒཧཎཀིཙྩཾ ནཏྠི. ལོཎེ ཨསཏི སམུདྡོདཀེན ལོཎཀིཙྩཾ ཀཱཏུཾ ཝཊྚཏི. པཊིགྒཧེཏྭཱ ཋཔིཏཾ ལོཎོདཀཾ ལོཎཾ ཧོཏི, ལོཎཾ ཝཱ ཨུདཀཾ ཧོཏི, རསོ ཝཱ ཕཱཎིཏཾ ཧོཏི, ཕཱཎིཏཾ ཝཱ རསོ ཧོཏི, མཱུལཔཊིགྒཧཎམེཝ ཝཊྚཏི. ཧིམཀརཀཱ ཨུདཀགཏིཀཱ ཨེཝ. པརིཧཱརིཀེན ཀཏཀཊྛིནཱ ཨུདཀཾ པསཱདེནྟི, ཏཾ ཨབྦོཧཱརིཀཾ, ཨཱམིསེན སདྡྷིཾ ཝཊྚཏི. ཨཱམིསགཏིཀེཧི ཀཔིཏྠཕལཱདཱིཧི པསཱདིཏཾ པུརེབྷཏྟམེཝ ཝཊྚཏི.

པོཀྑརཎཱིཨཱདཱིསུ ཨུདཀཾ བཧལཾ ཧོཏི, ཝཊྚཏི. སཙེ པན མུཁེ ཙ ཧཏྠེ ཙ ལགྒཏི, ན ཝཊྚཏི, པཊིགྒཧེཏྭཱ པརིབྷུཉྫིཏབྦཾ. ཁེཏྟེསུ ཀསིཏཊྛཱནེ བཧལཾ ཨུདཀཾ ཧོཏི, པཊིགྒཧེཏབྦཾ. སཙེ སནྡིཏྭཱ ཀནྡརཱདཱིནི པཝིསིཏྭཱ ནདིཾ པཱུརེཏི, ཝཊྚཏི. ཀཀུདྷསོབྦྷཱདཡོ ཧོནྟི, རུཀྑཏོ པཏིཏེཧི པུཔྥེཧི སཉྪནྣོདཀཱ, སཙེ པུཔྥརསོ ན པཉྙཱཡཏི, པཊིགྒཧཎཀིཙྩཾ ནཏྠི. པརིཏྟཾ ཨུདཀཾ ཧོཏི, རསོ པཉྙཱཡཏི, པཊིགྒཧེཏབྦཾ. པབྦཏཀནྡརཱདཱིསུ ཀཱལ༹ཝཎྞཔཎྞསཉྪནྣཨུདཀེཔི ཨེསེཝ ནཡོ.

པཱནཱིཡགྷཊེ སརེཎུཀཱནི ཝཱ སཝཎྚཁཱིརཱནི ཝཱ པུཔྥཱནི པཀྑིཏྟཱནི ཧོནྟི, པཊིགྒཧེཏབྦཾ. པུཔྥཱནི ཝཱ པཊིགྒཧེཏྭཱ ¶ པཀྑིཔིཏབྦཱནི. པཱཊལིཙམྤཀམལླིཀཱ པཀྑིཏྟཱ ཧོནྟི ¶ , ཝཱསམཏྟཾ ཏིཊྛཏི ཏཾ ཨབྦོཧཱརིཀཾ, དུཏིཡདིཝསེཔི ཨཱམིསེན སདྡྷིཾ ཝཊྚཏི. བྷིཀྑུནཱ ཋཔིཏཔུཔྥཝཱསིཏཀཔཱནཱིཡཏོ སཱམཎེརོ པཱནཱིཡཾ གཧེཏྭཱ པཱིཏཱཝསེསཾ ཏཏྠེཝ ཨཱཀིརཏི, པཊིགྒཧེཏབྦཾ. པདུམསརཱདཱིསུ ཨུདཀཾ སནྠརིཏྭཱ ཋིཏཾ པུཔྥརེཎུཾ གྷཊེན ¶ ཝིཀྑམྦྷེཏྭཱ ཨུདཀཾ གཧེཏུཾ ཝཊྚཏི. ཀཔྤིཡཾ ཀཱརཱཔེཏྭཱ པཊིགྒཧེཏྭཱ ཋཔིཏཾ དནྟཀཊྛཾ ཧོཏི, སཙེ ཏསྶ རསཾ པིཝིཏུཀཱམོ, མཱུལཔཊིགྒཧཎམེཝ ཝཊྚཏི. ཨཔྤཊིགྒཧེཏྭཱ ཋཔིཏཾ པཊིགྒཧེཏབྦཾ. ཨཛཱནནྟསྶ རསེ པཝིཊྛེཔི ཨཱཔཏྟིཡེཝ. ཨཙིཏྟཀཉྷི ཨིདཾ སིཀྑཱཔདཾ.

མཧཱབྷཱུཏེསུ ཀིཾ ཝཊྚཏི, ཀིཾ ན ཝཊྚཏཱིཏི? ཁཱིརཾ ཏཱཝ ཝཊྚཏི, ཀཔྤིཡམཾསཁཱིརཾ ཝཱ ཨཀཔྤིཡམཾསཁཱིརཾ ཝཱ ཧོཏུ, པིཝནྟསྶ ཨནཱཔཏྟི. ཨསྶུ ཁེལོ༹ སིངྒྷཱཎིཀཱ མུཏྟཾ ཀརཱིསཾ སེམྷཾ དནྟམལཾ ཨཀྑིགཱུཐཀོ ཀཎྞགཱུཐཀོ སརཱིརེ ཨུཊྛིཏལོཎནྟི ཨིདཾ སབྦཾ ཝཊྚཏི. ཡཾ པནེཏྠ ཋཱནཏོ ཙཝིཏྭཱ པཏྟེ ཝཱ ཧཏྠེ ཝཱ པཏཏི, ཏཾ པཊིགྒཧེཏབྦཾ. ཨངྒལགྒཾ པཊིགྒཧིཏཀམེཝ. ཨུཎྷཾཔཱཡཱསཾ བྷུཉྫནྟསྶ སེདོ ཨངྒུལིཨནུསཱརེན ཨེཀཱབདྡྷོཝ ཧུཏྭཱ པཱཡཱསེ སནྟིཊྛཏི, པིཎྜཱཡ ཝཱ ཙརནྟསྶ ཧཏྠཏོ པཏྟསྶ མུཁཝཊྚིཾཏོ ཝཱ པཏྟཏལཾ ཨོརོཧཏི, ཨེཏྠ པཊིགྒཧཎཀིཙྩཾ ནཏྠི. ཛྷཱམམཧཱབྷཱུཏེསུ ཨིདཾ ནཱམ ན ཝཊྚཏཱིཏི ནཏྠི, དུཛ྄ཛྷཱཔིཏཾ པན ན ཝཊྚཏི. སུཛ྄ཛྷཱཔིཏཾ མནུསྶཊྛིམྤི ཙུཎྞཾ ཀཏྭཱ ལེཧེ ཨུཔནེཏུཾ ཝཊྚཏི.

ཙཏྟཱརི མཧཱཝིཀཊཱནི ཨསཏི ཀཔྤིཡཀཱརཀེ སཱམམྤི གཧེཏྭཱ པརིབྷུཉྫིཏུཾ ཝཊྚཏི. ཨེཏྠ ཙ དུབྦཙོཔི ཨསམཏྠོཔི ཀཔྤིཡཀཱརཀོ ཨསནྟཔཀྑེཡེཝ ཏིཊྛཏི. ཚཱརིཀཱཡ ཨསཏི སུཀྑདཱརུཾ ཛྷཱཔེཏྭཱ ཚཱརིཀཱ གཧེཏབྦཱ. སུཀྑདཱརུམྷི ཨསཏི ཨལླདཱརུཾ རུཀྑཏོ ཚིནྡིཏྭཱཔི ཀཱཏུཾ ཝཊྚཏི. ཨིདཾ པན ཙཏུབྦིདྷམྤི མཧཱཝིཀཊཾ ཀཱལོདིསྶཾ ནཱམ སཔྤདཊྛཀྑཎེཡེཝ ཝཊྚཏི. སེསམེཏྠ ཨུཏྟཱནམེཝ.

ཨེལ༹ཀལོམསམུཊྛཱནཾ – ཀཱཡཏོ ཙ ཀཱཡཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ ¶ , ཏིཝེདནནྟི.

དནྟཔོནསིཀྑཱཔདཾ དསམཾ.

སམཏྟོ ཝཎྞནཱཀྐམེན བྷོཛནཝགྒོ ཙཏུཏྠོ.

༥. ཨཙེལཀཝགྒོ

༡. ཨཙེལཀསིཀྑཱཔདཝཎྞནཱ

༢༦༩. ཨཙེལཀཝགྒསྶ ¶ ¶ ༩ པཋམསིཀྑཱཔདེ – པརིཝེསནནྟི པརིཝིསནཊྛཱནཾ. པརིབྦཱཛཀསམཱཔནྣོཏི པབྦཛྫཾ སམཱཔནྣོ. དེཏི ཨཱཔཏྟི པཱཙིཏྟིཡསྶཱཏི སམཏིཏྟིཀཾ ཡཱགུཔཏྟཾ ཨེཀཔཡོགེན དེཏི, ཨེཀཾ པཱཙིཏྟིཡཾ. ཨཝཙྪིནྡིཏྭཱ ཨཝཙྪིནྡིཏྭཱ དེཏི, པཡོགེ པཡོགེ པཱཙིཏྟིཡཾ. ཨེསེཝ ནཡོ པཱུཝབྷཏྟཱདཱིསུ. ཏིཏྠིཡེ ཨཏིཏྠིཡསཉྙཱིཏི མཱཏཱ ཝཱ པིཏཱ ཝཱ ཏིཏྠིཡེསུ པབྦཛཏི, ཏེསཾ མཱཏཱཔིཏུསཉྙཱཡ དེནྟསྶཱཔི པཱཙིཏྟིཡམེཝ ཧོཏི. དཱཔེཏཱིཏི ཨནུཔསམྤནྣེན དཱཔེཏི.

༢༧༣. ཨུཔནིཀྑིཔིཏྭཱ དེཏཱིཏི ཏཐཱརཱུཔེ བྷཱཛནེ ཋཔེཏྭཱ ཏཾ བྷཱཛནཾ ཏེསཾ སནྟིཀེ བྷཱུམིཡཾ ནིཀྑིཔིཏྭཱ དེཏི, ཏེསཾ ཝཱ བྷཱཛནཾ ནིཀྑིཔཱཔེཏྭཱ ཏཏྠ དེཏི, པཏྟཾ ཨཱདྷཱརཀེ ཝཱ བྷཱུམིཡཾ ཝཱ ཋཔེཏྭཱཔི ‘‘ཨིཏོ གཎྷཐཱ’’ཏི ཝཏྟུཾ ཝཊྚཏི. སཙེ ཏིཏྠིཡོ ཝདཏི ‘‘མཡ྄ཧཾ ནཱམ ཨིདཾ སནྟཀཾ, ཨིདྷ ན ཨཱཀིརཐཱ’’ཏི ཨཱཀིརིཏབྦཾ. ཏསྶ སནྟཀཏྟཱ སཧཏྠཱ དཱནཾ ནཱམ ན ཧོཏི. སེསམེཏྠ ཨུཏྟཱནམེཝ.

ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

ཨཙེལཀསིཀྑཱཔདཾ པཋམཾ.

༢. ཨུཡྻོཛནསིཀྑཱཔདཝཎྞནཱ

༢༧༤. དུཏིཡསིཀྑཱཔདེ – པཊིཀྐམནེཔཱིཏི ཨཱསནསཱལཱཡམྤི. བྷཏྟཝིསྶགྒནྟི བྷཏྟཀིཙྩཾ. ན སམྦྷཱཝེསཱིཏི ན པཱཔུཎི.

༢༧༦. ཨནཱཙཱརནྟི ཝུཏྟཱཝསེསཾ ཀཱཡཝཙཱིདྭཱརཝཱིཏིཀྐམཾ. དསྶནཱུཔཙཱརཾ ཝཱ སཝནཱུཔཙཱརཾ ཝཱ ¶ ཝིཛཧནྟསྶཱཏི ཨེཏྠ ཡདི ཋིཏོ ཝཱ ནིསིནྣོ ཝཱ ཨུཡྻོཛེཏི; ཡོ ཨུཡྻོཛིཏོ, སོ ཝིཛཧཏི, ཏསྶ ཙ ཨཱཔཏྟི ནཱམ ནཏྠི. ཏསྨིཾ པན ཝིཛཧནྟེཔི ཨཏྠཏོ ཨིཏརེན ཝིཛཧིཏམེཝ ཧོཏི. ཏསྨཱ ཡོ ཨུཡྻོཛེཏི, ཏསྶེཝཱཡཾ ཨཱཔཏྟི. ཏཏྠ སཙེ ¶ ཨུཔཙཱརབྦྷནྟརེ ཨེཀོ པཱདོ ཧོཏི, དུཀྐཊཾ. སཱིམཱཏིཀྐམེ པཱཙིཏྟིཡཾ. ཨེཏྠ ཙ དསྶནཱུཔཙཱརསྶ ཨབྦྷོཀཱསེ དྭཱདསཧཏྠཔྤམཱཎཾ, ཏཐཱ སཝནཱུཔཙཱརསྶ. སཙེ པན ཨནྟརཱ ཀུཊྚདྭཱརཔཱཀཱརཱདཡོ ཧོནྟི, ཏེཧི ཨནྟརིཏབྷཱཝོ དསྶནཱུཔཙཱརཱཏིཀྐམོ, ཏསྶ ཝསེན ཨཱཔཏྟི ¶ ཝེདིཏབྦཱ. ན ཨཉྙོ ཀོཙི པཙྩཡོ ཧོཏཱིཏི ཋཔེཏྭཱ ཝུཏྟཔྤཀཱརམནཱཙཱརཾ ཨཉྙཾ ཀིཉྩི ཀཱརཎཾ ན ཧོཏི.

༢༧༧. ཀལིསཱསནཾ ཨཱརོཔེཏཱིཏི ‘‘ཀལཱི’’ཏི ཀོདྷོ; ཏསྶ སཱསནཾ ཨཱརོཔེཏི; ཀོདྷསྶ ཨཱཎཾ ཨཱརོཔེཏི; ཀོདྷཝསེན ཋཱནནིསཛྫཱདཱིསུ དོསཾ དསྶེཏྭཱ ‘‘པསྶཐ བྷོ ཨིམསྶ ཋཱནཾ, ནིསཛྫཾ ཨཱལོཀིཏཾ ཝིལོཀིཏཾ ཁཱཎུཀོ ཝིཡ ཏིཊྛཏི, སུནཁོ ཝིཡ ནིསཱིདཏི, མཀྐཊོ ཝིཡ ཨིཏོ ཙིཏོ ཙ ཝིལོཀེཏཱི’’ཏི ཨེཝཾ ཨམནཱཔཝཙནཾ ཝདཏི ‘‘ཨཔྤེཝ ནཱམ ཨིམིནཱཔི ཨུབྦཱལ༹ྷོ པཀྐམེཡྻཱ’’ཏི. སེསཾ ཨུཏྟཱནམེཝ.

ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, ཏིཝེདནནྟི.

ཨུཡྻོཛནསིཀྑཱཔདཾ དུཏིཡཾ.

༣. སབྷོཛནསིཀྑཱཔདཝཎྞནཱ

༢༧༩. ཏཏིཡསིཀྑཱཔདེ – སཡནིགྷརེཏི སཡནིཡགྷརེ. ཡཏོ ཨཡྻསྶ བྷིཀྑཱ དིནྣཱཏི ཡསྨཱ བྷིཀྑཱ དིནྣཱ, ཡཾ ཨཱགཏེན ལདྡྷབྦཾ ཏཾ ཝོ ལདྡྷཾ; གཙྪཐཱཏི ཨདྷིཔྤཱཡོ. པརིཡུཊྛིཏོཏི རཱགཔརིཡུཊྛིཏོ; མེཐུནཱདྷིཔྤཱཡོཏི ཨཏྠོ.

༢༨༠. སཧ ཨུབྷོཧི ཛནེཧཱིཏི སབྷོཛནཾ; ཏསྨིཾ སབྷོཛནེ. ཨཐ ཝཱ སབྷོཛནེཏི སབྷོགེ. རཱགཔརིཡུཊྛིཏསྶ ཧི པུརིསསྶ ཨིཏྠཱི བྷོགོ ཨིཏྠིཡཱ ཙ པུརིསོ. ཏེནེཝསྶ པདབྷཱཛནེ – ‘‘ཨིཏྠཱི ཙེཝ ཧོཏི པུརིསོ ཙཱ’’ཏིཨཱདི ཝུཏྟཾ. མཧལླཀེ གྷརེཏི མཧལླཀེ སཡནིགྷརེ. པིཊྛསངྒྷཱཊསྶ ཧཏྠཔཱསཾ ཝིཛཧིཏྭཱཏི ཏསྶ སཡནིགྷརེ གབྦྷསྶ ཡོ པིཊྛསངྒྷཱཊོ, ཏསྶ ཧཏྠཔཱསཾ ཝིཛཧིཏྭཱ; ཨནྟོསཡནསྶ ཨཱསནྣེ ¶ ཋཱནེ ནིསཱིདཏཱིཏི ཨཏྠོ. ཨཱིདིསཉྩ སཡནིགྷརཾ ¶ མཧཱཙཏུསྶཱལཱདཱིསུ ཧོཏི. པིཊྛིཝཾསཾ ཨཏིཀྐམིཏྭཱཏི ཨིམིནཱ མཛ྄ཛྷཱཏིཀྐམཾ དསྶེཏི. ཏསྨཱ ཡཐཱ ཝཱ ཏཐཱ ཝཱ ཀཏསྶ ཁུདྡཀསྶ སཡནིགྷརསྶ མཛ྄ཛྷཱཏིཀྐམེ ཨཱཔཏྟི ཝེདིཏབྦཱ. སེསམེཏྠ ཨུཏྟཱནམེཝ.

པཋམཔཱརཱཛིཀསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, དྭིཝེདནནྟི.

སབྷོཛནསིཀྑཱཔདཾ ཏཏིཡཾ.

༢༨༤. ཙཏུཏྠཔཉྩམསིཀྑཱཔདེསུ ཡཾ ཝཏྟབྦཾ སིཡཱ, ཏཾ སབྦཾ ཨནིཡཏདྭཡེ ཝུཏྟནཡམེཝ. ཡཐཱ ཙ སབྷོཛནསིཀྑཱཔདཾ ¶ , ཨེཝམེཏཱནིཔི པཋམཔཱརཱཛིཀསམུཊྛཱནཱནེཝཱཏི.

རཧོཔཊིཙྪནྣསིཀྑཱཔདཾ ཙཏུཏྠཾ, རཧོནིསཛྫསིཀྑཱཔདཾ པཉྩམཾ.

༦. ཙཱརིཏྟསིཀྑཱཔདཝཎྞནཱ

༢༩༤. ཚཊྛསིཀྑཱཔདེ – དེཐཱཝུསོ བྷཏྟནྟི ཨེཏྠ ཏཾ ཀིར བྷཏྟཾ ཨབྷིཧཊཾ ཨཧོསི, ཏསྨཱ ཨེཝམཱཧཾསུ. ཨནབྷིཧཊེ པན ཨེཝཾ ཝཏྟུཾ ན ལབྦྷཏི, པཡུཏྟཝཱཙཱ ཧོཏི.

༢༩༥. ཏེན ཧི བྷིཀྑཝེ པཊིགྒཧེཏྭཱ ནིཀྑིཔཐཱཏི ཨིདཾ པན བྷགཝཱ ཀུལསྶ སདྡྷཱནུརཀྑཎཏྠཱཡ ཨཱཧ. ཡདི ‘‘བྷཱཛེཏྭཱ ཁཱདཐཱ’’ཏི ཝདེཡྻ, མནུསྶཱནཾ པསཱདཉྙཐཏྟཾ སིཡཱ. ཨུསྶཱརིཡིཏྠཱཏི པཊིཧརིཡིཏྠ; གྷརཾཡེཝ ནཾ གཧེཏྭཱ ཨགམཾསཱུཏི ཝུཏྟཾ ཧོཏི.

༢༩༨. སནྟཾ བྷིཀྑུནྟི ཨེཏྠ ཀིཏྟཱཝཏཱ སནྟོ ཧོཏི, ཀིཏྟཱཝཏཱ ཨསནྟོཏི? ཨནྟོཝིཧཱརེ ཡཏྠ ཋིཏསྶ ཀུལཱནི པཡིརུཔཱསནཙིཏྟཾ ཨུཔྤནྣཾ, ཏཏོ པཊྛཱཡ ཡཾ པསྶེ ཝཱ ཨབྷིམུཁེ ཝཱ པསྶཏི, ཡསྶ སཀྐཱ ཧོཏི པཀཏིཝཙནེན ཨཱརོཙེཏུཾ, ཨཡཾ སནྟོ ནཱམ. ཨིཏོ ཙིཏོ ཙ པརིཡེསིཏྭཱ ཨཱརོཙནཀིཙྩཾ ནཱམ ནཏྠི. ཡོ ཧི ཨེཝཾ པརིཡེསིཏབྦོ, སོ ཨསནྟོཡེཝ. ཨཔིཙ ཨནྟོཨུཔཙཱརསཱིམཱཡ བྷིཀྑུཾ དིསྭཱ ཨཱཔུཙྪིསྶཱམཱིཏི གནྟྭཱ ཏཏྠ ཡཾ པསྶཏི, སོ ¶ ཨཱཔུཙྪིཏབྦོ. ནོ ཙེ པསྶཏི, ཨསནྟཾ བྷིཀྑུཾ ཨནཱཔུཙྪཱ པཝིཊྛོ ནཱམ ཧོཏི.

༣༠༢. ཨནྟརཱརཱམནྟི ¶ ཨནྟོགཱམེ ཝིཧཱརོ ཧོཏི, ཏཾ གཙྪཏི. བྷཏྟིཡགྷརནྟི ནིམནྟིཏགྷརཾ ཝཱ སལཱཀབྷཏྟཱདིདཱཡཀཱནཾ ཝཱ གྷརཾ. ཨཱཔདཱསཱུཏི ཛཱིཝིཏབྲཧྨཙརིཡནྟརཱཡེསུ སཏི གནྟུཾ ཝཊྚཏི. སེསམེཏྠ ཨུཏྟཱནམེཝ.

ཀཐིནསམུཊྛཱནཾ – ཀཱཡཝཱཙཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཱཀིརཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཙཱརིཏྟསིཀྑཱཔདཾ ཚཊྛཾ.

༧. མཧཱནཱམསིཀྑཱཔདཝཎྞནཱ

༣༠༣. སཏྟམསིཀྑཱཔདེ – མཧཱནཱམོ ནཱམ བྷགཝཏོ ཙཱུལ༹པིཏུཔུཏྟོ མཱསམཏྟེན མཧལླཀཏརོ དྭཱིསུ ཕལེསུ པཏིཊྛིཏོ ཨརིཡསཱཝཀོ. བྷེསཛྫཾ ཨུསྶནྣཾ ཧོཏཱིཏི ཝཛཏོ ཨཱཧརིཏྭཱ ཋཔིཏསཔྤི བཧུ ཧོཏི.

༣༠༦. སཱདིཏབྦཱཏི ཏསྨིཾ སམཡེ རོགོ ནཏྠཱིཏི ན པཊིཀྑིཔིཏབྦཱ; རོགེ སཏི ཝིཉྙཱཔེསྶཱམཱིཏི ཨདྷིཝཱསེཏབྦཱ. ཨེཏྟཀེཧི བྷེསཛྫེཧི པཝཱརེམཱིཏི ནཱམཝསེན སཔྤིཏེལཱདཱིསུ དྭཱིཧི ཏཱིཧི ཝཱ པརིམཱཎཝསེན པཏྠེན ནཱལི༹ཡཱ ཨཱལ༹ྷཀེནཱཏི ¶ ཝཱ.ཨཉྙཾ བྷེསཛྫཾ ཝིཉྙཱཔེཏཱིཏི སཔྤིནཱ པཝཱརིཏོ ཏེལཾ ཝིཉྙཱཔེཏི, ཨཱལ༹ྷཀེན པཝཱརིཏོ དོཎཾ. ན བྷེསཛྫེན ཀརཎཱིཡེནཱཏི མིསྶཀབྷཏྟེནཔི ཙེ ཡཱཔེཏུཾ སཀྐོཏི, ན བྷེསཛྫཀརཎཱིཡཾ ནཱམ ཧོཏི.

༣༡༠. པཝཱརིཏཱནནྟི ཡེ ཨཏྟནོ པུགྒལིཀཱཡ པཝཱརཎཱཡ པཝཱརིཏཱ; ཏེསཾ པཝཱརིཏཱནུརཱུཔེན ཝིཉྙཏྟིཡཱ ཨནཱཔཏྟི. སངྒྷཝསེན པཝཱརིཏེསུ པན པམཱཎཾ སལླཀྑེཏབྦམེཝཱཏི. སེསཾ ཨུཏྟཱནམེཝ.

ཚསམུཊྛཱནཾ ¶ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

མཧཱནཱམསིཀྑཱཔདཾ སཏྟམཾ.

༨. ཨུཡྻུཏྟསེནཱསིཀྑཱཔདཝཎྞནཱ

༣༡༡. ཨཊྛམེ ¶ – ཨབྦྷུཡྻཱཏོཏི ཨབྷིཨུཡྻཱཏོ; པརསེནཾ ཨབྷིམུཁོ གམིསྶཱམཱིཏི ནགརཏོ ནིགྒཏོཏི ཨཏྠོ. ཨུཡྻུཏྟནྟི ཀཏཨུཡྻོགཾ; གཱམཏོ ནིཀྑནྟནྟི ཨཏྠོ.

༣༡༤. དྭཱདསཔུརིསོ ཧཏྠཱིཏི ཙཏྟཱརོ ཨཱརོཧཀཱ ཨེཀེཀཔཱདརཀྑཀཱ དྭེ དྭེཏི ཨེཝཾ དྭཱདསཔུརིསོ ཧོཏི. ཏིཔུརིསོ ཨསྶོཏི ཨེཀོ ཨཱརོཧཀོ དྭེ པཱདརཀྑཀཱཏི ཨེཝཾ ཏིཔུརིསོ ཧོཏི. ཙཏུཔུརིསོ རཐོཏི ཨེཀོ སཱརཐི ཨེཀོ ཡོདྷོ དྭེ ཨཱཎིརཀྑཀཱཏི ཨེཝཾ ཙཏུཔུརིསོ ཧོཏི. ཙཏྟཱརོ པུརིསཱ སརཧཏྠཱཏི ཨཱཝུདྷཧཏྠཱ ཙཏྟཱརོ པུརིསཱཏི ཨཡཾ པཙྪིམཀོཊིཡཱ ཙཏུརངྒསམནྣཱགཏཱ སེནཱ ནཱམ. ཨཱིདིསཾ སེནཾ དསྶནཱཡ གཙྪཏོ པདེ པདེ དུཀྐཊཾ. དསྶནཱུཔཙཱརཾ ཝིཛཧིཏྭཱཏི ཀེནཙི ཨནྟརིཏཱ ཝཱ ནིནྣཾ ཨོརུལ༹ྷཱ ཝཱ ན དིསྶཏི; ཨིདྷ ཋཏྭཱ ན སཀྐཱ དཊྛུནྟི ཨཉྙཾ ཋཱནཾ གནྟྭཱ པསྶཏོ པཡོགེ པཡོགེ པཱཙིཏྟིཡནྟི ཨཏྠོ.

༣༡༥. ཨེཀམེཀནྟི ཧཏྠིཨཱདཱིསུ ཙཏཱུསུ ཨངྒེསུ ཨེཀམེཀཾ; ཨནྟམསོ ཨེཀཔུརིསཱརུལ༹ྷཀཧཏྠིམྤི ཨེཀམྤི སརཧཏྠཾ པུརིསཾ. ཨནུཡྻུཏྟཱ ནཱམ རཱཛཱ ཨུཡྻཱནཾ ཝཱ ནདིཾ ཝཱ གཙྪཏི; ཨེཝཾ ཨནུཡྻུཏྟཱ ཧོཏི.

༣༡༦. ཨཱཔདཱསཱུཏི ཛཱིཝིཏབྲཧྨཙརིཡནྟརཱཡེསུ སཏི ཨེཏྠ གཏོ མུཉྩིསྶཱམཱིཏི གཙྪཏོ ཨནཱཔཏྟི. སེསམེཏྠ ཨུཏྟཱནམེཝ. ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, ཏིཝེདནནྟི.

ཨུཡྻུཏྟསེནཱསིཀྑཱཔདཾ ཨཊྛམཾ.

༩. སེནཱཝཱསསིཀྑཱཔདཝཎྞནཱ

༣༡༩. ནཝམེ ¶ ¶ – ཨཏྠངྒཏེ སཱུརིཡེ སེནཱཡ ཝསཏཱིཏི ཏིཊྛཏུ ཝཱ ནིསཱིདཏུ ཝཱ སཡཏུ ཝཱ སཙེཔི ཨཱཀཱསེ ཨིདྡྷིཡཱ ཀཉྩི ཨིརིཡཱཔཐཾ ཀཔྤེཏི, པཱཙིཏྟིཡམེཝ. སེནཱ ཝཱ པཊིསེནཱཡ རུདྡྷཱ ཧོཏཱིཏི ཡཐཱ སཉྩཱརོ ཚིཛྫཏི; ཨེཝཾ ¶ རུདྡྷཱ ཧོཏི. པལིབུདྡྷོཏི ཝེརིཀེན ཝཱ ཨིསྶརེན ཝཱ རུདྡྷོ. སེསཾ ཨུཏྟཱནམེཝ. ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

སེནཱཝཱསསིཀྑཱཔདཾ ནཝམཾ.

༡༠. ཨུཡྻོདྷིཀསིཀྑཱཔདཝཎྞནཱ

༣༢༢. དསམེ – ཨུགྒནྟྭཱ ཨུགྒནྟྭཱ ཨེཏྠ ཡུཛ྄ཛྷནྟཱིཏི ཨུཡྻོདྷིཀཾ; སམྤཧཱརཊྛཱནསྶེཏཾ ཨདྷིཝཙནཾ. བལསྶ ཨགྒཾ ཛཱནནྟི ཨེཏྠཱཏི བལགྒཾ; བལགཎནཊྛཱནནྟི ཨཏྠོ. སེནཱཡ ཝིཡཱུཧཾ སེནཱབྱཱུཧཾ; སེནཱནིཝེསསྶེཏཾ ཨདྷིཝཙནཾ. ཏཡོ ཧཏྠཱི པཙྪིམཾ ཧཏྠཱནཱིཀནྟི ཡོ པུབྦེ ཝུཏྟོ དྭཱདསཔུརིསོ ཧཏྠཱིཏི ཏེན ཧཏྠིནཱ ཏཡོ ཧཏྠཱི. སེསེསུཔི ཨེསེཝ ནཡོ. སེསཾ ཨུཡྻུཏྟསེནཱསིཀྑཱཔདེ ཝུཏྟནཡེནེཝ ཝེདིཏབྦཾ སདྡྷིཾ སམུཊྛཱནཱདཱིཧཱིཏི.

ཨུཡྻོདྷིཀསིཀྑཱཔདཾ དསམཾ.

སམཏྟོ ཝཎྞནཱཀྐམེན ཨཙེལཀཝགྒོ པཉྩམོ.

༦. སུརཱཔཱནཝགྒོ

༡. སུརཱཔཱནསིཀྑཱཔདཝཎྞནཱ

༣༢༦. སུརཱཔཱནཝགྒསྶ པཋམསིཀྑཱཔདེ – བྷདྡཝཏིཀཱཏི ཨེཀོ གཱམོ, སོ བྷདྡིཀཱཡ ཝཏིཡཱ སམནྣཱགཏཏྟཱ ཨེཏཾ ནཱམ ལབྷི. པཐཱཝིནོཏི ཨདྡྷིཀཱ. ཏེཛསཱ ཏེཛནྟི ཨཏྟནོ ཏེཛསཱ ཨཱནུབྷཱཝེན ནཱགསྶ ཏེཛཾ. ཀཱཔོཏིཀཱཏི ཀཔོཏཔཱདསམཝཎྞརཏྟོབྷཱསཱ. པསནྣཱཏི སུརཱམཎྜསྶེཏཾ ¶ ཨདྷིཝཙནཾ. ཨནནུཙྪཝིཡཾ བྷིཀྑཝེ སཱགཏསྶཱཏི པཉྩཱབྷིཉྙསྶ སཏོ མཛྫཔཱནཾ ནཱམ ན ཨནུཙྪཝིཡནྟི ཝུཏྟཾ ཧོཏི.

༣༢༨. པུཔྥཱསཝོ ནཱམ མདྷུཀཔུཔྥཱདཱིནཾ རསེན ཀཏོ. ཕལཱསཝོ ནཱམ མུདྡིཀཕལཱདཱིནི མདྡིཏྭཱ ཏེསཾ རསེན ཀཏོ. མདྷྭཱསཝོ ནཱམ མུདྡིཀཱནཾ ཛཱཏིརསེན ཀཏོ; མཀྑིཀམདྷུནཱཔི ཀརིཡཏཱིཏི ¶ ཝདནྟི. གུལཱ༹སཝོ ནཱམ ཨུཙྪུརསཱདཱིཧི ཀརིཡཏི. སུརཱ ནཱམ པིཊྛཀིཎྞཔཀྑིཏྟཱ; ནཱལི༹ཀེརཱདཱིནམྤི རསེན ཀཏཱ སུརཱཏྭེཝ སངྑྱཾ གཙྪཏི, ཏསྶཱཡེཝ ཀིཎྞཔཀྑིཏྟཱཡ མཎྜེ གཧིཏེ མེརཡོཏྭེཝ སངྑྱཾ གཙྪཏཱིཏི ཝདནྟི. ཨནྟམསོ ཀུསགྒེནཔི པིཝཏཱིཏི ཨེཏཾ སུརཾ ཝཱ མེརཡཾ ཝཱ བཱིཛཏོ པཊྛཱཡ ཀུསགྒེན པིཝཏོཔི པཱཙིཏྟིཡནྟི ¶ ཨཏྠོ. ཨེཀེན པན པཡོགེན བཧུམྤི པིཝནྟསྶ ཨེཀཱ ཨཱཔཏྟི. ཝིཙྪིནྡིཏྭཱ ཝིཙྪིནྡིཏྭཱ པིཝཏོ པཡོགགཎནཱཡ ཨཱཔཏྟིཡོ.

༣༢༩. ཨམཛྫཉྩ ཧོཏི མཛྫཝཎྞཾ མཛྫགནྡྷཾ མཛྫརསནྟི ལོཎསོཝཱིརཀཾ ཝཱ སུཏྟཾ ཝཱ ཧོཏི. སཱུཔསམྤཱཀེཏི ཝཱསགཱཧཱཔནཏྠཾ ཨཱིསཀཾ མཛྫཾ པཀྑིཔིཏྭཱ སཱུཔཾ པཙནྟི, ཏསྨིཾ ཨནཱཔཏྟི. མཾསསམྤཱཀེཔི ཨེསེཝ ནཡོ. ཏེལཾ པན ཝཱཏབྷེསཛྫཏྠཾ མཛྫེན སདྡྷིཾ པཙནྟི, ཏསྨིམྤི ཨནཏིཀྑིཏྟམཛྫེཡེཝ ཨནཱཔཏྟི, ཡཾ པན ཨཏིཀྑིཏྟམཛྫཾ ཧོཏི, ཨེཏྠ མཛྫསྶ ཝཎྞགནྡྷརསཱ པཉྙཱཡནྟི, ཏསྨིཾ ཨཱཔཏྟིཡེཝ. ཨམཛྫཾ ཨརིཊྛནྟི ཡོ ཨརིཊྛོ མཛྫཾ ན ཧོཏི, ཏསྨིཾ ཨནཱཔཏྟི. ཨཱམལཀཱདཱིནཾཡེཝ ཀིར རསེན ཨརིཊྛཾ ཀརོནྟི, སོ མཛྫཝཎྞགནྡྷརསོཡེཝ ཧོཏི, ན ཙ མཛྫཾ; ཏཾ སནྡྷཱཡེཏཾ ཝུཏྟཾ. ཡོ པན སམྦྷཱརཔཀྑིཏྟོ, སོ མཛྫཾ ཧོཏི, བཱིཛཏོ པཊྛཱཡ ན ཝཊྚཏི. སེསམེཏྠ ཨུཏྟཱནམེཝ. ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, ལོཀཝཛྫཾ, ཀཱཡཀམྨཾ ཨཀུསལཙིཏྟཾ, ཏིཝེདནནྟི. ཝཏྠུཨཛཱནནཏཱཡ ཙེཏྠ ཨཙིཏྟཀཏཱ ཝེདིཏབྦཱ, ཨཀུསལེནེཝ པཱཏབྦཏཱཡ ལོཀཝཛྫཏཱཏི.

སུརཱཔཱནསིཀྑཱཔདཾ པཋམཾ.

༢. ཨངྒུལིཔཏོདཀསིཀྑཱཔདཝཎྞནཱ

༣༣༠. དུཏིཡེ ¶ – ཨངྒུལིཔཏོདཀེནཱཏི ཨངྒུལཱིཧི ཨུཔཀཙྪཀཱདིགྷཊྚནཾ ཝུཙྩཏི. ཨུཏྟསནྟོཏི ཨཏིཧཱསེན ཀིལམནྟོ. ཨནསྶཱསཀོཏི ཨུཔཙྪིནྣཨསྶཱསཔསྶཱསསཉྩཱརོ ཧུཏྭཱ. ཨནུཔསམྤནྣཾ ཀཱཡེན ཀཱཡནྟི ཨེཏྠ བྷིཀྑུནཱིཔི ཨནུཔསམྤནྣཊྛཱནེ ཋིཏཱ, ཏམྤི ཁིཌྜཱདྷིཔྤཱཡེན ཕུསནྟསྶ དུཀྐཊཾ. སེསམེཏྠ ཨུཏྟཱནམེཝ.

པཋམཔཱརཱཛིཀསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, དྭིཝེདནནྟི.

ཨངྒུལིཔཏོདཀསིཀྑཱཔདཾ དུཏིཡཾ.

༣. ཧསདྷམྨསིཀྑཱཔདཝཎྞནཱ

༣༣༥. ཏཏིཡེ ¶ – ཨཔྤཀཏཉྙུནོཏི ཡཾ བྷགཝཏཱ པཀཏཾ པཉྙཏྟཾ, ཏཾ ན ཛཱནནྟཱིཏི ཨཏྠོ.

༣༣༦. ཨུདཀེ ཧསདྷམྨེཏི ཨུདཀཀཱིལི༹ཀཱ ¶ ཝུཙྩཏི. ཨུཔརིགོཔྥཀེཏི གོཔྥཀཱནཾ ཨུཔརིབྷཱགཔྤམཱཎེ. ཧསཱདྷིཔྤཱཡོཏི ཀཱིལཱ༹དྷིཔྤཱཡོ. ནིམུཛྫཏི ཝཱཏིཨཱདཱིསུ ནིམུཛྫནཏྠཱཡ ཨོརོཧནྟསྶ པདཝཱརེ པདཝཱརེ དུཀྐཊཾ. ནིམུཛྫནུམྨུཛྫནེསུ པཡོགེ པཡོགེ པཱཙིཏྟིཡཾ. ནིམུཛྫིཏྭཱ ཨནྟོཨུདཀེཡེཝ གཙྪནྟསྶ ཧཏྠཝཱརཔདཝཱརེསུ སབྦཏྠ པཱཙིཏྟིཡཾ. པལཝཏཱིཏི ཏརཏི. ཧཏྠེཧི ཏརནྟསྶ ཧཏྠཝཱརེ ཧཏྠཝཱརེ པཱཙིཏྟིཡཾ. པཱདེསུཔི ཨེསེཝ ནཡོ. ཡེན ཡེན ཨངྒེན ཏརཏི, ཏསྶ ཏསྶ པཡོགེ པཡོགེ པཱཙིཏྟིཡཾ. ཏཱིརཏོ ཝཱ རུཀྑཏོ ཝཱ ཨུདཀེ པཏཏི, པཱཙིཏྟིཡམེཝ. ནཱཝཱཡ ཀཱིལ༹ཏཱིཏི ཕིཡཱརིཏྟཱདཱིཧི ནཱཝཾ པཱཛེནྟོ ཝཱ ཏཱིརེ ཨུསྶཱརེནྟོ ཝཱ ནཱཝཱཡ ཀཱིལ༹ཏི, དུཀྐཊཾ.

ཧཏྠེན ཝཱཏིཨཱདཱིསུཔི པཡོགེ པཡོགེ དུཀྐཊཾ. ཀེཙི ཧཏྠེན ཨུདཀེ ཁིཏྟཱཡ ཀཐལཱཡ པཏནུཔྤཏནཝཱརེསུ དུཀྐཊཾ ཝདནྟི, ཏཾ ན གཧེཏབྦཾ. ཏཏྠ ཧི ཨེཀཔཡོགཏྟཱ ཨེཀམེཝ དུཀྐཊཾ, ཨཔིཙ ཨུཔརིགོཔྥཀེ ཝུཏྟཱནི ཨུམྨུཛྫནཱདཱིནི ཋཔེཏྭཱ ཨཉྙེན ཡེན ཀེནཙི ཨཱཀཱརེན ཨུདཀཾ ཨོཏརིཏྭཱ ཝཱ ཨནོཏརིཏྭཱ ཝཱ ཡཏྠ ཀཏྠཙི ཋིཏཾ ཨུདཀཾ ¶ ཨནྟམསོ བིནྡུཾ གཧེཏྭཱ ཁིཔནཀཱིལཱ༹ཡཔི ཀཱིལ༹ནྟསྶ དུཀྐཊམེཝ, ཨཏྠཛོཏཀཾ པན ཨཀྑརཾ ལིཁིཏུཾ ཝཊྚཏི, ཨཡམེཏྠ ཝིནིཙྪཡོ. སེསམེཏྠ ཨུཏྟཱནམེཝ.

པཋམཔཱརཱཛིཀསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, ཏིཝེདནནྟི.

ཧསདྷམྨསིཀྑཱཔདཾ ཏཏིཡཾ.

༤. ཨནཱདརིཡསིཀྑཱཔདཝཎྞནཱ

༣༤༢. ཙཏུཏྠེ – ཀཐཱཡཾ ནསྶེཡྻཱཏི ཀཐཾ ཨཡཾ དྷམྨོ ཏནྟི པཝེཎཱི ནསྶེཡྻ. ཏཾ ཝཱ ན སིཀྑིཏུཀཱམོཏི ཡེན པཉྙཏྟེན ཝུཙྩཏི, ཏཾ པཉྙཏྟཾ ན སིཀྑིཏུཀཱམོ. ཨཔཉྙཏྟེནཱཏི སུཏྟེ ཝཱ ཨབྷིདྷམྨེ ཝཱ ཨཱགཏེན.

༣༤༤. ཨེཝཾ ¶ ཨམྷཱཀཾ ཨཱཙརིཡཱནཾ ཨུགྒཧོཏི ཨེཏྠ གཱརཡ྄ཧོ ཨཱཙརིཡུགྒཧོ ན གཧེཏབྦོ; པཝེཎིཡཱ ཨཱགཏོ ཨཱཙརིཡུགྒཧོཝ གཧེཏབྦོ. ཀུརུནྡིཡཾ པན ‘‘ལོཀཝཛྫེ ཨཱཙརིཡུགྒཧོ ན ཝཊྚཏི, པཎྞཏྟིཝཛྫེ པན ཝཊྚཏཱི’’ཏི ཝུཏྟཾ. མཧཱཔཙྩརིཡཾ ‘‘སུཏྟཾ སུཏྟཱནུལོམཉྩ ཨུགྒཧིཏཀཱནཾཡེཝ ཨཱཙརིཡཱནཾ ཨུགྒཧོ པམཱཎཾ, ཨཛཱནནྟཱནཾ ཀཐཱ ཨཔྤམཱཎནྟི ཝུཏྟཾ. ཏཾ སབྦཾ པཝེཎིཡཱ ཨཱགཏེསམོདྷཱནཾ གཙྪཏི. སེསཾ ཨུཏྟཱནམེཝཱཏི.

ཏིསམུཊྛཱནཾ ¶ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཨནཱདརིཡསིཀྑཱཔདཾ ཙཏུཏྠཾ.

༥. བྷིཾསཱཔནསིཀྑཱཔདཝཎྞནཱ

༣༤༥. པཉྩམེ – རཱུཔཱུཔཧཱརཱདཡོ མནུསྶཝིགྒཧེ ཝུཏྟནཡེནེཝ ཝེདིཏབྦཱ. སེསཾ ཨུཏྟཱནམེཝ. སམུཊྛཱནཱདཱིནི ཨནཱདརིཡསདིསཱནེཝཱཏི.

བྷིཾསཱཔནསིཀྑཱཔདཾ པཉྩམཾ.

༦. ཛོཏིསིཀྑཱཔདཝཎྞནཱ

༣༥༠. ཚཊྛེ ¶ – བྷགྒཱཏི ཛནཔདསྶ ནཱམཾ. སཾསུམཱརགིརནྟི ནགརསྶ. བྷེསཀལཱ༹ཝནནྟི ཏནྣིསྶིཏཝནསྶ. ཏཾ པན མིགཱནཾ ཕཱསུཝིཧཱརཏྠཱཡ དིནྣཏྟཱ མིགདཱཡོཏི ཝུཙྩཏི. སམཱདཧིཏྭཱཏི ཛཱལེཏྭཱ. པརིཔཱཏེསཱིཏི ཨནུབནྡྷི.

༣༥༢. པདཱིཔེཔཱིཏི པདཱིཔུཛྫལནེཔི. ཛོཏིཀེཔཱིཏི པཏྟཔཙནསེདཀམྨཱདཱིསུ ཛོཏིཀརཎེ. ཏཐཱརཱུཔཔཙྩཡཱཏི པདཱིཔཱདིཔཙྩཡཱ.

༣༥༤-༥. སཡཾ སམཱདཧཏཱིཏི ཨེཏྠ ཛོཏིཾ སམཱདཧིཏུཀཱམཏཱཡ ཨརཎིསཎྛཔནཏོ པཊྛཱཡ ཡཱཝ ཛཱལཱ ན ཨུཊྛཧཏི, ཏཱཝ སབྦཔཡོགེསུ དུཀྐཊཾ. པཊིལཱཏཾ ཨུཀྑིཔཏཱིཏི དཡ྄ཧམཱནཾ ཨལཱཏཾ ¶ པཏིཏཾ ཨུཀྑིཔཏི, པུན ཡཐཱཋཱནེ ཋཔེཏཱིཏི ཨཏྠོ. ཨེཝཾ ཨཝིཛ྄ཛྷཱཏཾ ཨུཀྑིཔིཏྭཱ པཀྑིཔནྟསྶེཝ དུཀྐཊཾ, ཝིཛ྄ཛྷཱཏཾ པུན ཛཱལཱཔེནྟསྶ པཱཙིཏྟིཡམེཝ.

༣༥༦. ཏཐཱརཱུཔཔཙྩཡཱཏི ཋཔེཏྭཱ པདཱིཔཱདཱིནི ཨཉྙེནཔི ཏཐཱརཱུཔེན པཙྩཡེན སམཱདཧནྟསྶ ཨནཱཔཏྟི. ཨཱཔདཱསཱུཏི དུཊྛཝཱལ༹མིགཨམནུསྶེཧི ཨུཔདྡཝོ ཧོཏི, ཏཏྠ སམཱདཧནྟསྶཱཔི ཨནཱཔཏྟི. སེསཾ ཨུཏྟཱནམེཝཱཏི. ཚསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཛོཏིསིཀྑཱཔདཾ ཚཊྛཾ.

༧. ནཧཱནསིཀྑཱཔདཝཎྞནཱ

༣༦༤. སཏྟམེ – ཙུཎྞེན ཝཱ མཏྟིཀཱཡ ཝཱཏི ཨེཏྠ ཙུཎྞམཏྟིཀཱནཾ ཨབྷིསངྑརཎཀཱལཏོ པཊྛཱཡ སབྦཔཡོགེསུ དུཀྐཊཾ.

༣༦༦. པཱརཾ གཙྪནྟོ ནྷཱཡཏཱིཏི ཨེཏྠ སུཀྑཱཡ ནདིཡཱ ཝཱལིཀཾ ཨུཀྐིརིཏྭཱ ཀཏཨཱཝཱཊཀེསུཔི ནྷཱཡིཏུཾ ཝཊྚཏི. ཨཱཔདཱསཱུཏི བྷམརཱདཱིཧི ¶ ཨནུབདྡྷསྶ ཨུདཀེ ནིམུཛྫིཏུཾ ཝཊྚཏཱིཏི. སེསམེཏྠ ཨུཏྟཱནམེཝ. ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

ནཧཱནསིཀྑཱཔདཾ སཏྟམཾ.

༨. དུབྦཎྞཀརཎསིཀྑཱཔདཝཎྞནཱ

༣༦༨-༩. ཨཊྛམེ ¶ – ནཝཾ པན བྷིཀྑུནཱ ཙཱིཝརལཱབྷེནཱཏི ཨེཏྠ ཨལབྷཱིཏི ལབྷོ; ལབྷོཡེཝ ལཱབྷོ. ཀིཾ ཨལབྷི? ཙཱིཝརཾ. ཀཱིདིསཾ? ནཝཾ. ཨིཏི ‘‘ནཝཙཱིཝརལཱབྷེནཱ’’ཏི ཝཏྟབྦེ ཨནུནཱསིཀལོཔཾ ཨཀཏྭཱ ‘‘ནཝཙཱིཝརལཱབྷེནཱ’’ཏི ཝུཏྟཾ; པཊིལདྡྷནཝཙཱིཝརེནཱཏི ཨཏྠོ. མཛ྄ཛྷེ ཋིཏཔདདྭཡེ པནཱཏི ནིཔཱཏོ. བྷིཀྑུནཱཏི ཡེན ལདྡྷཾ ཏསྶ ནིདསྶནཾ. པདབྷཱཛནེ པན བྱཉྫནཾ ཨནཱདིཡིཏྭཱ ཡཾ ལདྡྷཾ ཏཾ དསྶེཏུཾ ‘‘ཙཱིཝརཾ ནཱམ ཚནྣཾ ཙཱིཝརཱན’’ནྟིཨཱདི ཝུཏྟཾ. ཙཱིཝརནྟི ཨེཏྠ ཡཾ ནིཝཱསེཏུཾ ཝཱ པཱརུཔིཏུཾ ཝཱ སཀྐཱ ཧོཏི, ཏདེཝ ཝེདིཏབྦཾ. ཏེནེཝ ‘‘ཝིཀཔྤནུཔགཔཙྪིམ’’ནྟི ¶ ན ཝུཏྟཾ. ཀཾསནཱིལནྟི ཙམྨཀཱརནཱིལཾ. མཧཱཔཙྩརིཡཾ པན ‘‘ཨཡོམལཾ ལོཧམལཾ ཨེཏཾ ཀཾསནཱིལཾ ནཱམཱ’’ཏི ཝུཏྟཾ. པལཱསནཱིལནྟི ཡོ ཀོཙི ནཱིལཝཎྞོ པཎྞརསོ. དུབྦཎྞཀརཎཾ ཨཱདཱཏབྦནྟི ཨེཏཾ ཀཔྤབིནྡུཾ སནྡྷཱཡ ཝུཏྟཾ; ན ནཱིལཱདཱིཧི སཀལཙཱིཝརསྶ དུབྦཎྞཀརཎཾ. ཏཉྩ པན ཀཔྤཾ ཨཱདིཡནྟེན ཙཱིཝརཾ རཛིཏྭཱ ཙཏཱུསུ ཝཱ ཀོཎེསུ ཏཱིསུ ཝཱ དྭཱིསུ ཝཱ ཨེཀསྨིཾ ཝཱ ཀོཎེ མོརསྶ ཨཀྑིམཎྜལམཏྟཾ ཝཱ མངྐུལཔིཊྛིམཏྟཾ ཝཱ ཨཱདཱཏབྦཾ. མཧཱཔཙྩརིཡཾ ‘‘པཏྟེ ཝཱ གཎྛིཡཾ ཝཱ ན ཝཊྚཏཱི’’ཏི ཝུཏྟཾ. མཧཱཨཊྛཀཐཱཡཾ པན ‘‘ཝཊྚཏིཡེཝཱ’’ཏི ཝུཏྟཾ. པཱལི༹ཀཔྤཀཎྞིཀཀཔྤཱདཡོ པན སབྦཏྠ པཊིསིདྡྷཱ, ཏསྨཱ ཋཔེཏྭཱ ཨེཀཾ ཝཊྚབིནྡུཾ ཨཉྙེན ཀེནཙིཔི ཝིཀཱརེན ཀཔྤོ ན ཀཱཏབྦོ.

༣༧༡. ཨགྒལེ༹ཏིཨཱདཱིསུ ཨེཏཱནི ཨགྒལཱ༹དཱིནི ཀཔྤཀཏཙཱིཝརེ པཙྪཱ ཨཱརོཔེཏྭཱ ཀཔྤཀརཎཀིཙྩཾ ནཏྠི. སེསཾ ཨུཏྟཱནམེཝ. ཨེལ༹ཀལོམསམུཊྛཱནཾ – ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ; ཀཱཡཀམྨཾ, ཏིཙིཏྟཾ, ཏིཝེདནནྟི.

དུབྦཎྞཀརཎསིཀྑཱཔདཾ ཨཊྛམཾ.

༩. ཝིཀཔྤནསིཀྑཱཔདཝཎྞནཱ

༣༧༤. ནཝམེ ¶ – ཏསྶ ཝཱ ཨདིནྣནྟི ཙཱིཝརསཱམིཀསྶ ‘‘པརིབྷུཉྫ ཝཱ ཝིསྶཛྫེཧི ཝཱ ཡཐཱཔཙྩཡཾ ཝཱ ཀརོཧཱི’’ཏི ཨེཝཾ ཝཏྭཱ ཨདིནྣཾ. ཏསྶ ཝཱ ཨཝིསྶསནྟོཏི ཡེན ཝིནཡཀམྨཾ ཀཏཾ, ཏསྶ ཨཝིསྶཱསེན ཝཱ. ཏེན ¶ པན དིནྣཾ ཝཱ ཏསྶ ཝིསྶཱསེན ཝཱ པརིབྷུཉྫནྟསྶ ཨནཱཔཏྟི. སེསམེཏྠ ཏིཾསཀཝཎྞནཱཡཾ ཝུཏྟནཡཏྟཱ ཨུཏྟཱནམེཝཱཏི. ཀཐིནསམུཊྛཱནཾ – ཀཱཡཝཱཙཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཝིཀཔྤནསིཀྑཱཔདཾ ནཝམཾ.

༡༠. ཙཱིཝརཱཔནིདྷཱནསིཀྑཱཔདཝཎྞནཱ

༣༧༧-༨༡. དསམེ – ཨཔནིདྷེནྟཱིཏི ཨཔནེཏྭཱ ནིདྷེནྟི. ཧསཱཔེཀྑོཏི ཧསཱདྷིཔྤཱཡོ. ཨཉྙཾ པརིཀྑཱརནྟི པཱལི༹ཡཱ ཨནཱགཏཾ པཏྟཏྠཝིཀཱདིཾ. དྷམྨིཾ ཀཐཾ ཀཏྭཱཏི ‘‘སམཎེན ནཱམ ཨནིཧིཏཔརིཀྑཱརེན ¶ བྷཝིཏུཾ ན ཝཊྚཏཱི’’ཏི ཨེཝཾ དྷམྨཀཐཾ ཀཐེཏྭཱ དསྶཱམཱིཏི ནིཀྑིཔཏོ ཨནཱཔཏྟི. སེསམེཏྠ ཨུཏྟཱནམེཝ. ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, ཏིཝེདནནྟི.

ཙཱིཝརཱཔནིདྷཱནསིཀྑཱཔདཾ དསམཾ.

སམཏྟོ ཝཎྞནཱཀྐམེན སུརཱཔཱནཝགྒོ ཚཊྛོ.

༧. སཔྤཱཎཀཝགྒོ

༡. སཉྩིཙྩཔཱཎསིཀྑཱཔདཝཎྞནཱ

༣༨༢. སཔྤཱཎཀཝགྒསྶ པཋམསིཀྑཱཔདེ – ཨིསྶཱསོ ཧོཏཱིཏི གིཧིཀཱལེ དྷནུགྒཧཱཙརིཡོ ཧོཏི. ཛཱིཝིཏཱ ཝོརོཔིཏཱཏི ཛཱིཝིཏཱ ཝིཡོཛིཏཱ.

སིཀྑཱཔདེཔི ཝོརོཔེཡྻཱཏི ཝིཡོཛེཡྻ. ཡསྨཱ པན ཝོཧཱརམཏྟམེཝེཏཾ; ན ཧེཏྠ ཀིཉྩི ཝིཡོཛིཏེ སཱིསཱལངྐཱརེ སཱིསཾ ཝིཡ ཛཱིཝིཏཱ ཝོརོཔིཏེ པཱཎེཔི ཛཱིཝིཏཾ ནཱམ ཝིསུཾ ཏིཊྛཏི, ཨཉྙདཏྠུ ཨནྟརདྷཱནམེཝ ¶ གཙྪཏི, ཏསྨཱ ཏམཏྠཾ དསྶེཏུཾ པདབྷཱཛནེ ‘‘ཛཱིཝིཏིནྡྲིཡཾ ཨུཔཙྪིནྡཏཱི’’ཏིཨཱདི ཝུཏྟཾ. ཨིམསྨིཉྩ སིཀྑཱཔདེ ཏིརཙྪཱནགཏོཡེཝ ‘‘པཱཎོ’’ཏི ཝེདིཏབྦོ. ཏཾ ཁུདྡཀམྤི མཧནྟམྤི མཱརེནྟསྶ ཨཱཔཏྟིནཱནཱཀརཎཾ ནཏྠི. མཧནྟེ པན ཨུཔཀྐམམཧནྟཏྟཱ ཨཀུསལམཧཏྟཾ ཧོཏི. པཱཎེ པཱཎསཉྙཱིཏི ཨནྟམསོ མཉྩཔཱིཋཾ སོདྷེནྟོ མངྒུལབཱིཛཀེཔི པཱཎསཉྙཱི ནིཀྐཱརུཎིཀཏཱཡ ¶ ཏཾ བྷིནྡནྟོ ཨཔནེཏི, པཱཙིཏྟིཡཾ. ཏསྨཱ ཨེཝརཱུཔེསུ ཋཱནེསུ ཀཱརུཉྙཾ ཨུཔཊྛཔེཏྭཱ ཨཔྤམཏྟེན ཝཏྟཾ ཀཱཏབྦཾ. སེསཾ མནུསྶཝིགྒཧེ ཝུཏྟནཡེནེཝ ཝེདིཏབྦཾ སདྡྷིཾ སམུཊྛཱནཱདཱིཧཱིཏི.

སཉྩིཙྩཔཱཎསིཀྑཱཔདཾ པཋམཾ.

༢. སཔྤཱཎཀསིཀྑཱཔདཝཎྞནཱ

༣༨༧. དུཏིཡེ ¶ – སཔྤཱཎཀནྟི ཡེ པཱཎཀཱ པརིབྷོགེན མརནྟི, ཏེཧི པཱཎཀེཧི སཔྤཱཎཀཾ, ཏཱདིསཉྷི ཛཱནཾ པརིབྷུཉྫཏོ པཡོགེ པཡོགེ པཱཙིཏྟིཡཾ. པཏྟཔཱུརམྤི ཨཝིཙྪིནྡིཏྭཱ ཨེཀཔཡོགེན པིཝཏོ ཨེཀཱ ཨཱཔཏྟི. ཏཱདིསེན ཨུདཀེན སཱམིསཾ པཏྟཾ ཨཱཝིཉྪིཏྭཱ དྷོཝཏོཔི ཏཱདིསེ ཨུདཀེ ཨུཎྷཡཱགུཔཏྟཾ ནིབྦཱཔཡཏོཔི ཏཾ ཨུདཀཾ ཧཏྠེན ཝཱ ཨུལུ༹ངྐེན ཝཱ གཧེཏྭཱ ནྷཱཡཏོཔི པཡོགེ པཡོགེ པཱཙིཏྟིཡཾ. ཨུདཀསོཎྜིཾ ཝཱ པོཀྑརཎིཾ ཝཱ པཝིསིཏྭཱ བཧིནིཀྑམནཏྠཱཡ ཝཱིཙིཾ ཨུཊྛཱཔཡཏོཔི. སོཎྜིཾ ཝཱ པོཀྑརཎིཾ ཝཱ སོདྷེནྟེཧི ཏཏོ གཧིཏཨུདཀཾ ཨུདཀེཡེཝ ཨཱསིཉྩིཏབྦཾ. སམཱིཔམྷི ཨུདཀེ ཨསཏི ཀཔྤིཡཨུདཀསྶ ཨཊྛ ཝཱ དས ཝཱ གྷཊེ ཨུདཀསཎྛཱནཀཔྤདེསེ ཨཱསིཉྩིཏྭཱ ཏཏྠ ཨཱསིཉྩིཏབྦཾ. ‘‘པཝཊྚིཏྭཱ ཨུདཀེ པཏིསྶཏཱི’’ཏི ཨུཎྷཔཱསཱཎེ ཨུདཀཾ ནཱསིཉྩིཏབྦཾ. ཀཔྤིཡཨུདཀེན པན པཱསཱཎཾ ནིབྦཱཔེཏྭཱ ཨཱསིཉྩིཏུཾ ཝཊྚཏི. སེསམེཏྠ ཨུཏྟཱནམེཝ.

ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ,

ཝཙཱིཀམྨཾ, ཏིཙིཏྟཾ, ཏིཝེདནནྟི. ཨེཏྠ ཙ པཊངྒཔཱཎཀཱནཾ པཏནཾ ཉཏྭཱཔི སུདྡྷཙིཏྟཏཱཡ དཱིཔཛཱལནེ ཝིཡ སཔྤཱཎཀབྷཱཝཾ ཉཏྭཱཔི ཨུདཀསཉྙཱཡ པརིབྷུཉྫིཏབྦཏོ པཎྞཏྟིཝཛྫཏཱ ཝེདིཏབྦཱཏི.

སཔྤཱཎཀསིཀྑཱཔདཾ དུཏིཡཾ.

༣. ཨུཀྐོཊནསིཀྑཱཔདཝཎྞནཱ

༣༩༢. ཏཏིཡསིཀྑཱཔདེ ¶ – ཨུཀྐོཊེནྟཱིཏི ཏསྶ ཏསྶ བྷིཀྑུནོ སནྟིཀཾ གནྟྭཱ ‘‘ཨཀཏཾ ཀམྨ’’ནྟིཨཱདཱིནི ཝདནྟཱ ཨུཙྩཱལེནྟི; ཡཐཱཔཏིཊྛིཏབྷཱཝེན པཏིཊྛཱཏུཾ ན དེནྟི.

༣༩༣. ཡཐཱདྷམྨནྟི ཡོ ཡསྶ ཨདྷིཀརཎསྶ ཝཱུཔསམནཱཡ དྷམྨོ ཝུཏྟོ, ཏེནེཝ དྷམྨེནཱཏི ཨཏྠོ. ནིཧཏཱདྷིཀརཎནྟི ནིཧཏཾ ཨདྷིཀརཎཾ; སཏྠཱརཱ ཝུཏྟདྷམྨེནེཝ ཝཱུཔསམིཏཾ ཨདྷིཀརཎནྟི ཨཏྠོ.

༣༩༥. དྷམྨཀམྨེ དྷམྨཀམྨསཉྙཱིཏི ཡེན ཀམྨེན ཏཾ ¶ ཨདྷིཀརཎཾ ཝཱུཔསམིཏཾ, ཏཉྩེ དྷམྨཀམྨཾ ཧོཏི, ཏསྨིཾ དྷམྨཀམྨེ ཨཡམྤི དྷམྨཀམྨསཉྙཱི ཧུཏྭཱ ཡདི ཨུཀྐོཊེཏི, པཱཙིཏྟིཡཾ ཨཱཔཛྫཏཱིཏི ¶ ཨཏྠོ. ཨེཏེན ནཡེན སེསཔདཱནིཔི ཝེདིཏབྦཱནི. ཨཡམེཏྠ སངྑེཔོ, ཝིཏྠཱརོ པན ‘‘ཨིམེསཾ ཙཏུནྣཾ ཨདྷིཀརཎཱནཾ ཀཏི ཨུཀྐོཊནཱ’’ཏིཨཱདིནཱ ནཡེན པརིཝཱརེ ཝུཏྟོ. ཨཊྛཀཐཱསུ ཏཾ སབྦཾ ཨཱཧརིཏྭཱ ཏསྶེཝཏྠོ ཝཎྞིཏོ. མཡཾ པན ཏཾ ཏཏྠེཝ ཝཎྞཡིསྶཱམ. ཨིདྷ ཨཱཧརིཏྭཱ ཝཎྞིཡམཱནེ ཧི སུཊྛུཏརཾ སམྨོཧོ བྷཝེཡྻཱཏི ན ཝཎྞཡིམྷ. སེསམེཏྠ ཨུཏྟཱནམེཝ. ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཨུཀྐོཊནསིཀྑཱཔདཾ ཏཏིཡཾ.

༤. དུཊྛུལླསིཀྑཱཔདཝཎྞནཱ

༣༩༩. ཙཏུཏྠེ – དུཊྛུལླཱ ནཱམ ཨཱཔཏྟཱིཏི ཨེཏྠ ཙཏྟཱརི པཱརཱཛིཀཱནི ཨཏྠུདྡྷཱརཝསེན དསྶིཏཱནི, སངྒྷཱདིསེསཱཔཏྟི པན ཨདྷིཔྤེཏཱ, ཏཾ ཚཱདེནྟསྶ པཱཙིཏྟིཡཾ. དྷུརཾ ནིཀྑིཏྟམཏྟེཏི དྷུརེ ནིཀྑིཏྟམཏྟེ. སཙེཔི དྷུརཾ ནིཀྑིཔིཏྭཱ པཙྪཱ ཨཱརོཙེཏི, ན རཀྑཏི; དྷུརཾ ནིཀྑིཏྟམཏྟེཡེཝ པཱཙིཏྟིཡནྟི ཝུཏྟཾ ཧོཏི. སཙེ པན ཨེཝཾ དྷུརཾ ནིཀྑིཔིཏྭཱ པཊིཙྪཱདནཏྠམེཝ ཨཉྙསྶ ཨཱརོཙེཏི, སོཔི ཨཉྙསྶཱཏི ཨེཏེནུཔཱཡེན སམཎསཏམྤི སམཎསཧསྶམྤི ཨཱཔཏྟིཾ ཨཱཔཛྫཏིཡེཝ ཏཱཝ, ཡཱཝ ཀོཊི ན ཚིཛྫཏི. ཀདཱ པན ཀོཊི ཚིཛྫཏཱིཏི? མཧཱསུམཏྠེརོ ཏཱཝ ཝདཏི – ‘‘ཨཱཔཏྟིཾ ཨཱཔནྣོ ཨེཀསྶ ¶ ཨཱརོཙེཏི, སོ པཊིནིཝཏྟིཏྭཱ ཏསྶེཝ ཨཱརོཙེཏི; ཨེཝཾ ཀོཊི ཚིཛྫཏཱི’’ཏི. མཧཱཔདུམཏྠེརོ པནཱཧ – ‘‘ཨཡཉྷི ཝཏྠུཔུགྒལོཡེཝ. ཨཱཔཏྟིཾ ཨཱཔནྣོ པན ཨེཀསྶ བྷིཀྑུནོ ཨཱརོཙེཏི, ཨཡཾ ཨཉྙསྶ ཨཱརོཙེཏི, སོ པཊིནིཝཏྟིཏྭཱ ཡེནསྶ ཨཱརོཙིཏཾ, ཏསྶེཝ ཨཱརོཙེཏི; ཨེཝཾ ཏཏིཡེན པུགྒལེན དུཏིཡསྶ ཨཱརོཙིཏེ ཀོཊི ཚིནྣཱ ཧོཏཱི’’ཏི.

༤༠༠. ཨདུཊྛུལླཾ ཨཱཔཏྟིནྟི ཨཝསེསེ པཉྩཱཔཏྟིཀྑནྡྷེ. ཨནུཔསམྤནྣསྶ དུཊྛུལླཾ ཝཱ ཨདུཊྛུལླཾ ཝཱ ཨཛ྄ཛྷཱཙཱརནྟི ཨེཏྠ ཨནུཔསམྤནྣསྶ སུཀྐཝིསྶཊྛི ཙ ཀཱཡསཾསགྒོ ཙཱཏི ཨཡཾ དུཊྛུལླཨཛ྄ཛྷཱཙཱརོ ནཱམ. སེསམེཏྠ ཨུཏྟཱནམེཝཱཏི. དྷུརནིཀྑེཔསམུཊྛཱནཾ – ཀཱཡཝཱཙཱཙིཏྟཏོ སམུཊྛཱཏི, ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ ¶ , དུཀྑཝེདནནྟི.

དུཊྛུལླསིཀྑཱཔདཾ ཙཏུཏྠཾ.

༥. ཨཱུནཝཱིསཏིཝསྶསིཀྑཱཔདཝཎྞནཱ

༤༠༢. པཉྩམསིཀྑཱཔདེ – ¶ ཨངྒུལིཡོ དུཀྑཱ བྷཝིསྶནྟཱིཏི ཨཀྑརཱནི ལིཁནྟསྶ ཨངྒུལིཡོ དུཀྑཱ བྷཝིསྶནྟཱིཏི ཙིནྟེསུཾ. ཨུརསྶ དུཀྑོཏི གཎནཾ སིཀྑནྟེན བཧུཾ ཙིནྟེཏབྦཾ ཧོཏི, ཏེནསྶ ཨུརོ དུཀྑོ བྷཝིསྶཏཱིཏི མཉྙིཾསུ. ཨཀྑཱིནི དུཀྑཱ བྷཝིསྶནྟཱིཏི རཱུཔསུཏྟཾ སིཀྑནྟེན ཀཧཱཔཎཱ པརིཝཏྟེཏྭཱ པརིཝཏྟེཏྭཱ པསྶིཏབྦཱ ཧོནྟི, ཏེནསྶ ཨཀྑཱིནི དུཀྑཱནི བྷཝིསྶནྟཱིཏི མཉྙིཾསུ. ཌཾསཱདཱིསུ ཌཾསཱཏི པིངྒལམཀྑིཀཱཡོ. དུཀྑཱནནྟི དུཀྑམཱནཾ. ཏིབྦཱནནྟི བཧལཱནཾ. ཁརཱནནྟི ཏིཁིཎཱནཾ. ཀཊུཀཱནནྟི ཕརུསཱནཾ; ཨམནཱཔཏཱཡ ཝཱ ཀཊུཀརསསདིསཱནཾ. ཨསཱཏཱནནྟི ཨམདྷུརཱནཾ. པཱཎཧརཱནནྟི ཛཱིཝིཏཧརཱནཾ.

༤༠༤. སཱིམཾ སམྨནྣཏཱིཏི ནཝཾ སཱིམཾ བནྡྷཏི. ཀུརུནྡིཡཾ པན ཨུདཀུཀྑེཔཔརིཙྪིནྡནེཔི དུཀྐཊཾ ཝུཏྟཾ. པརིཔུཎྞཝཱིསཏིཝསྶོཏི པཊིསནྡྷིགྒཧཎཏོ པཊྛཱཡ པརིཔུཎྞཝཱིསཏིཝསྶོ; གབྦྷཝཱིསོཔི ཧི པརིཔུཎྞཝཱིསཏིཝསྶོཏྭེཝ སངྑྱེ གཙྪཏི. ཡཐཱཧ –

‘‘ཏེན ¶ ཁོ པན སམཡེན ཨཱཡསྨཱ ཀུམཱརཀསྶཔོ གབྦྷཝཱིསོ ཨུཔསམྤནྣོ ཧོཏི. ཨཐ ཁོ ཨཱཡསྨཏོ ཀུམཱརཀསྶཔསྶ ཨེཏདཧོསི – ‘བྷགཝཏཱ པཉྙཏྟཾ, ན ཨཱུནཝཱིསཏིཝསྶོ པུགྒལོ ཨུཔསམྤཱདེཏབྦོཏི. ཨཧཉྩམྷི གབྦྷཝཱིསོ ཨུཔསམྤནྣོ. ཨུཔསམྤནྣོ ནུཁོམྷི, ནནུ ཁོ ཨུཔསམྤནྣོ’ཏི. བྷགཝཏོ ཨེཏམཏྠཾ ཨཱརོཙེསུཾ. ཡཾ བྷིཀྑཝེ མཱཏུཀུཙྪིམྷི པཋམཾ ཙིཏྟཾ ཨུཔྤནྣཾ, པཋམཾ ཝིཉྙཱཎཾ པཱཏུབྷཱུཏཾ ཏདུཔཱདཱཡ སཱཝསྶ ཛཱཏི. ཨནུཛཱནཱམི, བྷིཀྑཝེ, གབྦྷཝཱིསཾ ཨུཔསམྤཱདེཏུ’’ནྟི (མཧཱཝ. ༡༢༤).

ཏཏྠ ཡོ དྭཱདསམཱསེ མཱཏུཀུཙྪིསྨིཾ ཝསིཏྭཱ མཧཱཔཝཱརཎཱཡ ཛཱཏོ, སོ ཏཏོ པཊྛཱཡ ཡཱཝ ཨེཀཱུནཝཱིསཏིམེ ཝསྶེ མཧཱཔཝཱརཎཱ, ཏཾ ཨཏིཀྐམིཏྭཱ པཱཊིཔདེ ཨུཔསམྤཱདེཏབྦོ. ཨེཏེནུཔཱཡེན ཧཱཡནཝཌྜྷནཾ ཝེདིཏབྦཾ.

པོརཱཎཀཏྠེརཱ པན ཨེཀཱུནཝཱིསཏིཝསྶཾ སཱམཎེརཾ ནིཀྑམནཱིཡཔུཎྞམཱསིཾ ཨཏིཀྐམྨ པཱཊིཔདདིཝསེ ཨུཔསམྤཱདེནྟི, ཏཾ ཀསྨཱཏི? ཝུཙྩཏེ – ཨེཀསྨིཾ ¶ ཝསྶེ ཚ ཙཱཏུདྡསིཀཨུཔོསཐཱ ཧོནྟི. ཨིཏི ཝཱིསཏིཡཱ ཝསྶེསུ ཙཏྟཱརོ མཱསཱ པརིཧཱཡནྟི. རཱཛཱནོ ཏཏིཡེ ཏཏིཡེ ཝསྶེ ཝསྶཾ ཨུཀྐཌྜྷནྟི. ཨིཏི ཨཊྛཱརསསུ ཝསྶེསུ ཚ མཱསཱ ཝཌྜྷནྟི, ཏཏོ ཨུཔོསཐཝསེན ¶ པརིཧཱིནེ ཙཏྟཱརོ མཱསེ ཨཔནེཏྭཱ དྭེ མཱསཱ ཨཝསེསཱ ཧོནྟི, ཏེ དྭེ མཱསེ གཧེཏྭཱ ཝཱིསཏིཝསྶཱནི པརིཔུཎྞཱནི ཧོནྟཱིཏི ནིཀྐངྑཱ ཧུཏྭཱ ནིཀྑམནཱིཡཔུཎྞམཱསིཾ ཨཏིཀྐམྨ པཱཊིཔདེ ཨུཔསམྤཱདེནྟི. ཨེཏྠ པན ཡོ པཝཱརེཏྭཱ ཝཱིསཏིཝསྶོ བྷཝིསྶཏི, ཏཾ སནྡྷཱཡ ‘‘ཨེཀཱུནཝཱིསཏིཝསྶ’’ནྟི ཝུཏྟཾ. ཏསྨཱ ཡོ མཱཏུཀུཙྪིསྨིཾ དྭཱདསམཱསེ ཝསི, སོ ཨེཀཝཱིསཏིཝསྶོ ཧོཏི. ཡོ སཏྟམཱསེ ཝསི, སོ སཏྟམཱསཱདྷིཀཝཱིསཏིཝསྶོ. ཚམཱསཛཱཏོ པན ན ཛཱིཝཏི.

༤༠༦. ཨནཱཔཏྟི ཨཱུནཝཱིསཏིཝསྶཾ པརིཔུཎྞཝཱིསཏིཝསྶསཉྙཱིཏི ཨེཏྠ ཀིཉྩཱཔི ཨུཔསམྤཱདེནྟསྶ ཨནཱཔཏྟི, པུགྒལོ པན ཨནུཔསམྤནྣོཝ ཧོཏི. སཙེ པན སོ དསཝསྶཙྩཡེན ཨཉྙཾ ཨུཔསམྤཱདེཏི, ཏཉྩེ མུཉྩིཏྭཱ གཎོ པཱུརཏི, སཱུཔསམྤནྣོ. སོཔི ཙ ཡཱཝ ན ཛཱནཱཏི, ཏཱཝསྶ ནེཝ སགྒནྟརཱཡོ ¶ ན མོཀྑནྟརཱཡོ, ཉཏྭཱ པན པུན ཨུཔསམྤཛྫིཏབྦཾ. སེསཾ ཨུཏྟཱནམེཝ.

ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ,

ཝཙཱིཀམྨཾ, ཏིཙིཏྟཾ, ཏིཝེདནནྟི.

ཨཱུནཝཱིསཏིཝསྶསིཀྑཱཔདཾ པཉྩམཾ.

༦. ཐེཡྻསཏྠསིཀྑཱཔདཝཎྞནཱ

༤༠༧. ཚཊྛེ – པཊིཡཱལོཀནྟི སཱུརིཡཱལོཀསྶ པཊིམུཁཾ; པཙྪིམདིསནྟི ཨཏྠོ. ཀམྨིཡཱཏི སུངྐཊྛཱནེ ཀམྨིཀཱ.

༤༠༩. རཱཛཱནཾ ཝཱ ཐེཡྻཾ གཙྪནྟཱིཏི རཱཛཱནཾ ཝཱ ཐེནེཏྭཱ ཝཉྩེཏྭཱ རཉྙོ སནྟཀཾ ཀིཉྩི གཧེཏྭཱ ཨིདཱནི ན ཏསྶ དསྶཱམཱཏི གཙྪནྟི.

༤༡༡. ཝིསངྐེཏེནཱཏི ཀཱལཝིསངྐེཏེན དིཝསཝིསངྐེཏེན ཙ གཙྪཏོ ཨནཱཔཏྟི. མགྒཝིསངྐེཏེན པན ཨཊཝིཝིསངྐེཏེན ཝཱ ཨཱཔཏྟིཡེཝ. སེསམེཏྠ བྷིཀྑུནིཝགྒེ ཝུཏྟནཡཏྟཱ ཨུཏྟཱནཏྠམེཝ. ཐེཡྻསཏྠསམུཊྛཱནཾ – ཀཱཡཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཐེཡྻསཏྠསིཀྑཱཔདཾ ཚཊྛཾ.

༧. སཾཝིདྷཱནསིཀྑཱཔདཝཎྞནཱ

༤༡༢. སཏྟམེ ¶ ¶ – པདྷཱུཔེནྟོ ནིསཱིདཱིཏི པཛ྄ཛྷཱཡནྟོ ཨཏྟཱནཾཡེཝ པརིབྷཱསནྟོ ནིསཱིདི. ནཱཡྻོ སོ བྷིཀྑུ མཾ ནིཔྤཱཏེསཱིཏི ཨཡྻོ ཨཡཾ བྷིཀྑུ མཾ ན ནིཀྑཱམེསི; ན མཾ གཧེཏྭཱ ཨགམཱསཱིཏི ཨཏྠོ. སེསམེཏྠ བྷིཀྑུནིཡཱ སདྡྷིཾ སཾཝིདྷཱནསིཀྑཱཔདེ ཝུཏྟནཡེནེཝ ཝེདིཏབྦཾ སདྡྷིཾ སམུཊྛཱནཱདཱིཧཱིཏི.

སཾཝིདྷཱནསིཀྑཱཔདཾ སཏྟམཾ.

༨. ཨརིཊྛསིཀྑཱཔདཝཎྞནཱ

༤༡༧. ཨཊྛམེ ¶ – གདྡྷེ བཱདྷཡིཾསཱུཏི གདྡྷབཱདྷིནོ; གདྡྷབཱདྷིནོ པུབྦཔུརིསཱ ཨསྶཱཏི གདྡྷབཱདྷིཔུབྦོ, ཏསྶ གདྡྷབཱདྷིཔུབྦསྶ གིཛ྄ཛྷགྷཱཏཀཀུལཔྤསུཏསྶཱཏི ཨཏྠོ.

སགྒམོཀྑཱནཾ ཨནྟརཱཡཾ ཀརོནྟཱིཏི ཨནྟརཱཡིཀཱ. ཏེ ཀམྨཀིལེསཝིཔཱཀཨུཔཝཱདཨཱཎཱཝཱིཏིཀྐམཝསེན པཉྩཝིདྷཱ. ཏཏྠ པཉྩཱནནྟརིཡཀམྨཱ ཀམྨནྟརཱཡིཀཱ ནཱམ. ཏཐཱ བྷིཀྑུནཱིདཱུསཀཀམྨཾ, ཏཾ པན མོཀྑསྶེཝ ཨནྟརཱཡཾ ཀརོཏི, ན སགྒསྶ. ནིཡཏམིཙྪཱདིཊྛིདྷམྨཱ ཀིལེསནྟརཱཡིཀཱ ནཱམ. པཎྜཀཏིརཙྪཱནགཏཨུབྷཏོབྱཉྫནཀཱནཾ པཊིསནྡྷིདྷམྨཱ ཝིཔཱཀནྟརཱཡིཀཱ ནཱམ. ཨརིཡཱུཔཝཱདཱ ཨུཔཝཱདནྟརཱཡིཀཱ ནཱམ, ཏེ པན ཡཱཝ ཨརིཡེ ན ཁམཱཔེནྟི ཏཱཝདེཝ, ན ཏཏོ པརཾ. སཉྩིཙྩ ཨཱཔནྣཱ ཨཱཔཏྟིཡོ ཨཱཎཱཝཱིཏིཀྐམནྟརཱཡིཀཱ ནཱམ, ཏཱཔི ཡཱཝ བྷིཀྑུབྷཱཝཾ ཝཱ པཊིཛཱནཱཏི, ན ཝུཊྛཱཏི ཝཱ ན དེསེཏི ཝཱ ཏཱཝདེཝ, ན ཏཏོ པརཾ.

ཏཏྲཱཡཾ བྷིཀྑུ བཧུསྶུཏོ དྷམྨཀཐིཀོ སེསནྟརཱཡིཀེ ཛཱནཱཏི, ཝིནཡེ པན ཨཀོཝིདཏྟཱ པཎྞཏྟིཝཱིཏིཀྐམནྟརཱཡིཀེ ན ཛཱནཱཏི, ཏསྨཱ རཧོགཏོ ཨེཝཾ ཙིནྟེསི – ‘‘ཨིམེ ཨཱགཱརིཀཱ པཉྩ ཀཱམགུཎེ པརིབྷུཉྫནྟཱ སོཏཱཔནྣཱཔི སཀདཱགཱམིནོཔི ཨནཱགཱམིནོཔི ཧོནྟི, བྷིཀྑཱུཔི མནཱཔིཀཱནི ཙཀྑུཝིཉྙེཡྻཱནི རཱུཔཱནི པསྶནྟི…པེ… ཀཱཡཝིཉྙེཡྻེ ཕོཊྛབྦེ ཕུསནྟི, མུདུཀཱནི ཨཏྠརཎཔཱཝུརཎཱདཱིནི པརིབྷུཉྫནྟི, ཨེཏཾ སབྦཾ ཝཊྚཏི. ཀསྨཱ ཨིཏྠིརཱུཔཱ…པེ… ཨིཏྠིཕོཊྛབྦཱ ཨེཝ ན ཝཊྚནྟི, ཨེཏེཔི ཝཊྚནྟཱི’’ཏི. ཨེཝཾ རསེན རསཾ སཾསནྡིཏྭཱ སཙྪནྡརཱགཔརིབྷོགཉྩ ནིཙྪནྡརཱགཔརིབྷོགཉྩ ཨེཀཾ ཀཏྭཱ ཐཱུལཝཱཀེཧི སདྡྷིཾ ཨཏིསུཁུམསུཏྟཾ ¶ གྷཊེནྟོ ཝིཡ སཱསཔེན སདྡྷིཾ སིནེརུཾ ཨུཔསཾཧརནྟོ ཝིཡ པཱཔཀཾ དིཊྛིགཏཾ ཨུཔྤཱདེཏྭཱ ‘‘ཀིཾ བྷགཝཏཱ ¶ མཧཱསམུདྡཾ བནྡྷནྟེན ཝིཡ མཧཏཱ ཨུསྶཱཧེན པཋམཔཱརཱཛིཀཾ པཉྙཏྟཾ, ནཏྠི ཨེཏྠ དོསོ’’ཏི སབྦཉྙུཏཉྙཱཎེན སདྡྷིཾ པཊིཝིརུཛ྄ཛྷནྟོ བྷབྦཔུགྒལཱནཾ ཨཱསཾ ཚིནྡནྟོ ཛིནསྶ ཨཱཎཱཙཀྐེ པཧཱརམདཱསི. ཏེནཱཧ – ‘‘ཏཐཱཧཾ བྷགཝཏཱ དྷམྨཾ དེསིཏཾ ཨཱཛཱནཱམཱི’’ཏིཨཱདི.

ཨཊྛིཀངྐལཱུཔམཱཏིཨཱདིམྷི ¶ ཨཊྛིཀངྐལཱུཔམཱ ཨཔྤསྶཱདཊྛེན. མཾསཔེསཱུཔམཱ བཧུསཱདྷཱརཎཊྛེན. ཏིཎུཀྐཱུཔམཱ ཨནུདཧནཊྛེན. ཨངྒཱརཀཱསཱུཔམཱ མཧཱབྷིཏཱཔནཊྛེན. སུཔིནཀཱུཔམཱ ཨིཏྟརཔཙྩུཔཊྛཱནཊྛེན. ཡཱཙིཏཀཱུཔམཱ ཏཱཝཀཱལིཀཊྛེན. རུཀྑཕལཱུཔམཱ སབྦངྒཔཙྩངྒཔལིབྷཉྫནཊྛེན. ཨསིསཱུནཱུཔམཱ ཨདྷིཀུཊྚནཊྛེན. སཏྟིསཱུལཱུཔམཱ ཝིནིཝིཛ྄ཛྷནཊྛེན. སཔྤསིརཱུཔམཱ སཱསངྐསཔྤཊིབྷཡཊྛེནཱཏི ཨཡམེཏྠ སངྑེཔོ. ཝིཏྠཱརོ པན པཔཉྩསཱུདནིཡཾ མཛ྄ཛྷིམཊྛཀཐཱཡཾ (མ. ནི. ༡.༢༣༤ ཨཱདཡོ; ༢.༤༢ ཨཱདཡོ) གཧེཏབྦོ. ཨེཝཾ བྱཱཁོཏི ཨེཝཾ ཝིཡ ཁོ. སེསམེཏྠ པུབྦེ ཝུཏྟནཡཏྟཱ ཨུཏྟཱནམེཝ.

སམནུབྷཱསནསམུཊྛཱནཾ – ཀཱཡཝཱཙཱཙིཏྟཏོ སམུཊྛཱཏི, ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཨརིཊྛསིཀྑཱཔདཾ ཨཊྛམཾ.

༩. ཨུཀྑིཏྟསམྦྷོགསིཀྑཱཔདཝཎྞནཱ

༤༢༤-༥. ནཝམེ – ཨཀཊཱནུདྷམྨེནཱཏི ཨནུདྷམྨོ ཝུཙྩཏི ཨཱཔཏྟིཡཱ ཨདསྶནེ ཝཱ ཨཔྤཊིཀམྨེ ཝཱ པཱཔིཀཱཡ དིཊྛིཡཱ ཨཔྤཊིནིསྶགྒེ ཝཱ དྷམྨེན ཝིནཡེན སཏྠུསཱསནེན ཨུཀྑིཏྟཀསྶ ཨནུལོམཝཏྟཾ དིསྭཱ ཀཏཱ ཨོསཱརཎཱ; སོ ཨོསཱརཎསངྑཱཏོ ཨནུདྷམྨོ ཡསྶ ན ཀཏོ, ཨཡཾ ཨཀཊཱནུདྷམྨོ ནཱམ, ཏཱདིསེན སདྡྷིནྟི ཨཏྠོ. ཏེནེཝསྶ པདབྷཱཛནེ ‘‘ཨཀཊཱནུདྷམྨོ ནཱམ ཨུཀྑིཏྟོ ཨནོསཱརིཏོ’’ཏི ཝུཏྟཾ.

དེཏི ཝཱ པཊིགྒཎྷཱཏི ཝཱཏི ཨེཀཔཡོགེན བཧུམྤི དདཏོ ཝཱ གཎྷཏོ ཝཱ ཨེཀཾ པཱཙིཏྟིཡཾ. ཝིཙྪིནྡིཏྭཱ ཝིཙྪིནྡིཏྭཱ དེནྟསྶ ཙ གཎྷནྟསྶ ཙ པཡོགགཎནཱཡ པཱཙིཏྟིཡཱནི ¶ . སེསམེཏྠ ཨུཏྟཱནམེཝ. ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཨུཀྑིཏྟསམྦྷོགསིཀྑཱཔདཾ ནཝམཾ.

༡༠. ཀཎྚཀསིཀྑཱཔདཝཎྞནཱ

༤༢༨. དསམེ ¶ – དིཊྛིགཏཾ ཨུཔྤནྣནྟི ཨརིཊྛསྶ ཝིཡ ཨེཏསྶཱཔི ཨཡོནིསོ ཨུམྨུཛྫནྟསྶ ཨུཔྤནྣཾ. ནཱསེཏཱུཏི ཨེཏྠ ཏིཝིདྷཱ ནཱསནཱ – སཾཝཱསནཱསནཱ, ལིངྒནཱསནཱ, དཎྜཀམྨནཱསནཱཏི. ཏཏྠ ཨཱཔཏྟིཡཱ ཨདསྶནཱདཱིསུ ཨུཀྑེཔནཱ སཾཝཱསནཱསནཱ ¶ ནཱམ. ‘‘དཱུསཀོ ནཱསེཏབྦོ (པཱརཱ. ༦༦) མེཏྟིཡཾ བྷིཀྑུནིཾ ནཱསེཐཱ’’ཏི (པཱརཱ. ༣༨༤) ཨཡཾ ལིངྒནཱསནཱ ནཱམ. ‘‘ཨཛྫཏགྒེ ཏེ ཨཱཝུསོ སམཎུདྡེས ན ཙེཝ སོ བྷགཝཱ སཏྠཱ ཨཔདིསིཏབྦོ’’ཏི ཨཡཾ དཎྜཀམྨནཱསནཱ ནཱམ. ཨཡཾ ཨིདྷ ཨདྷིཔྤེཏཱ. ཏེནཱཧ – ‘‘ཨེཝཉྩ པན བྷིཀྑཝེ ནཱསེཏབྦོ…པེ… ཝིནསྶཱ’’ཏི. ཏཏྠ ཙརཱཏི གཙྪ. པིརེཏི པར ཨམཱམཀ. ཝིནསྶཱཏི ནསྶ; ཡཏྠ ཏེ ན པསྶཱམ, ཏཏྠ གཙྪཱཏི.

༤༢༩. ཨུཔལཱཔེཡྻཱཏི སངྒཎྷེཡྻ. ཨུཔཊྛཱཔེཡྻཱཏི ཏེན ཨཏྟནོ ཨུཔཊྛཱནཾ ཀཱརཱཔེཡྻ. སེསཾ ཨརིཊྛསིཀྑཱཔདེ ཝུཏྟནཡེནེཝ ཝེདིཏབྦཾ སདྡྷིཾ སམུཊྛཱནཱདཱིཧཱིཏི.

ཀཎྚཀསིཀྑཱཔདཾ དསམཾ.

སམཏྟོ ཝཎྞནཱཀྐམེན སཔྤཱཎཀཝགྒོ སཏྟམོ.

༨. སཧདྷམྨིཀཝགྒོ

༡. སཧདྷམྨིཀསིཀྑཱཔདཝཎྞནཱ

༤༣༤. སཧདྷམྨིཀཝགྒསྶ ¶ པཋམསིཀྑཱཔདེ – ཨེཏསྨིཾ སིཀྑཱཔདེཏི ཨེཏསྨིཾ སིཀྑཱཔདེ ཡཾ ཝུཏྟཾ, ཏཾ ན ཏཱཝ སིཀྑིསྶཱམི. ཨཱཔཏྟི པཱཙིཏྟིཡསྶཱཏི ཨེཏྠ པན ཝཱཙཱཡ ཝཱཙཱཡ ཨཱཔཏྟི ཝེདིཏབྦཱ. སིཀྑམཱནེན བྷིཀྑཝེ བྷིཀྑུནཱཏི ཨོཝཱདཾ སིརསཱ སམྤཊིཙྪིཏྭཱ སིཀྑིཏུཀཱམེནེཝ ཧུཏྭཱ ཨཱཛཱནིཏབྦཉྩེཝ པུཙྪིཏབྦཉྩ ཨུཔཔརིཀྑིཏབྦཉྩ. སེསམེཏྠ དུབྦཙསིཀྑཱཔདེ ཝུཏྟནཡེནེཝ པདཏྠཏོ ཝེདིཏབྦཾ. ཝིནིཙྪཡཏོ ཨུཏྟཱནམེཝ.

ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

སཧདྷམྨིཀསིཀྑཱཔདཾ པཋམཾ.

༢. ཝིལེཁནསིཀྑཱཔདཝཎྞནཱ

༤༣༨. དུཏིཡེ ¶ – ཝིནཡཀཐཾ ཀཐེཏཱིཏི ཝིནཡཀཐཱ ནཱམ ཀཔྤིཡཱཀཔྤིཡཨཱཔཏྟཱནཱཔཏྟིསཾཝརཔཧཱནཔཊིསཾཡུཏྟཀཐཱ, ཏཾ ཀཐེཏི. ཝིནཡསྶ ཝཎྞཾ བྷཱསཏཱིཏི ཝིནཡསྶ ཝཎྞོ ནཱམ པཉྩནྣམྤི སཏྟནྣམྤི ཨཱཔཏྟིཀྑནྡྷཱནཾ ཝསེན མཱཏིཀཾ ནིཀྑིཔིཏྭཱ པདབྷཱཛནེན ཝཎྞནཱ, ཏཾ བྷཱསཏི. ཝིནཡཔརིཡཏྟིཡཱ ཝཎྞཾ བྷཱསཏཱིཏི ཝིནཡཾ པརིཡཱཔུཎནྟཱནཾ ཝིནཡཔརིཡཏྟིམཱུལཀཾ ཝཎྞཾ གུཎཾ ཨཱནིསཾསཾ བྷཱསཏི. ཝིནཡདྷརོ ཧི ཝིནཡཔརིཡཏྟིམཱུལཀེ པཉྩཱནིསཾསེ ཚཱནིསཾསེ སཏྟཱནིསཾསེ ཨཊྛཱནིསཾསེ ནཝཱནིསཾསེ དསཱནིསཾསེ ཨེཀཱདསཱནིསཾསེ ཙ ལབྷཏི ཏེ སབྦེ བྷཱསཏཱིཏི ཨཏྠོ. ཀཏམེ པཉྩཱནིསཾསེ ལབྷཏཱིཏི? ཨཏྟནོ སཱིལཀྑནྡྷསུགུཏྟིཨཱདིཀེ ¶ . ཝུཏྟཉྷེཏཾ –

‘‘པཉྩིམེ, བྷིཀྑཝེ, ཨཱནིསཾསཱ ཝིནཡདྷརེ པུགྒལེ – ཨཏྟནོ སཱིལཀྑནྡྷོ སུགུཏྟོ ཧོཏི སུརཀྑིཏོ, ཀུཀྐུཙྩཔཀཏཱནཾ པཊིསརཎཾ ཧོཏི, ཝིསཱརདོ སངྒྷམཛ྄ཛྷེ ཝོཧརཏི, པཙྩཏྠིཀེ ¶ སཧདྷམྨེན སུནིགྒཧིཏཾ ནིགྒཎྷཱཏི, སདྡྷམྨཊྛིཏིཡཱ པཊིཔནྣོ ཧོཏཱི’’ཏི (པརི. ༣༢༥).

ཀཐམསྶ ཨཏྟནོ སཱིལཀྑནྡྷོ སུགུཏྟོ ཧོཏི སུརཀྑིཏོ? ཨིདྷེཀཙྩོ བྷིཀྑུ ཨཱཔཏྟིཾ ཨཱཔཛྫནྟོ ཚཧཱཀཱརེཧི ཨཱཔཛྫཏི – ཨལཛྫིཏཱ, ཨཉྙཱཎཏཱ, ཀུཀྐུཙྩཔཀཏཏཱ, ཨཀཔྤིཡེ ཀཔྤིཡསཉྙིཏཱ, ཀཔྤིཡེ ཨཀཔྤིཡསཉྙིཏཱ, སཏིསམྨོསཱཏི.

ཀཐཾ ཨལཛྫིཏཱཡ ཨཱཔཏྟིཾ ཨཱཔཛྫཏི? ཨཀཔྤིཡབྷཱཝཾ ཛཱནནྟོཡེཝ མདྡིཏྭཱ ཝཱིཏིཀྐམཾ ཀརོཏི. ཝུཏྟམྤི ཙེཏཾ –

‘‘སཉྩིཙྩ ཨཱཔཏྟིཾ ཨཱཔཛྫཏི, ཨཱཔཏྟིཾ པརིགཱུཧཏི;

ཨགཏིགམནཉྩ གཙྪཏི, ཨེདིསོ ཝུཙྩཏི ཨལཛྫིཔུགྒལོ’’ཏི. (པརི. ༣༥༩);

ཀཐཾ ཨཉྙཱཎཏཱཡ ཨཱཔཛྫཏི? ཨཉྙཱཎཔུགྒལོ ཧི མནྡོ མོམཱུཧོ ཀཏྟབྦཱཀཏྟབྦཾ ཨཛཱནནྟོ ཨཀཏྟབྦཾ ཀརོཏི, ཀཏྟབྦཾ ཝིརཱདྷེཏི; ཨེཝཾ ཨཉྙཱཎཏཱཡ ཨཱཔཛྫཏི.

ཀཐཾ ¶ ཀུཀྐུཙྩཔཀཏཏཱཡ ཨཱཔཛྫཏི? ཀཔྤིཡཱཀཔྤིཡཾ ནིསྶཱཡ ཀུཀྐུཙྩེ ཨུཔྤནྣེ ཝིནཡདྷརཾ པུཙྪིཏྭཱ ཀཔྤིཡཉྩེ ཀཏྟབྦཾ སིཡཱ, ཨཀཔྤིཡཉྩེ ན ཀཏྟབྦཾ, ཨཡཾ པན ‘‘ཝཊྚཏཱི’’ཏི མདྡིཏྭཱ ཝཱིཏིཀྐམཏིཡེཝ; ཨེཝཾ ཀུཀྐུཙྩཔཀཏཏཱཡ ཨཱཔཛྫཏི.

ཀཐཾ ཨཀཔྤིཡེ ཀཔྤིཡསཉྙིཏཱཡ ཨཱཔཛྫཏི? ཨཙྪམཾསཾ སཱུཀརམཾསནྟི ཁཱདཏི, དཱིཔིམཾསཾ མིགམཾསནྟི ཁཱདཏི, ཨཀཔྤིཡབྷོཛནཾ ཀཔྤིཡབྷོཛནནྟི བྷུཉྫཏི, ཝིཀཱལེ ཀཱལསཉྙཱཡ བྷུཉྫཏི, ཨཀཔྤིཡཔཱནཀཾ ཀཔྤིཡཔཱནཀནྟི པིཝཏི; ཨེཝཾ ཨཀཔྤིཡེ ཀཔྤིཡསཉྙིཏཱཡ ཨཱཔཛྫཏི.

ཀཐཾ ཀཔྤིཡེ ཨཀཔྤིཡསཉྙིཏཱཡ ཨཱཔཛྫཏི? སཱུཀརམཾསཾ ཨཙྪམཾསནྟི ཁཱདཏི, མིགམཾསཾ དཱིཔིམཾསནྟི ཁཱདཏི, ཀཔྤིཡབྷོཛནཾ ཨཀཔྤིཡབྷོཛནནྟི བྷུཉྫཏི, ཀཱལེ ཝིཀཱལསཉྙཱཡ བྷུཉྫཏི, ཀཔྤིཡཔཱནཀཾ ཨཀཔྤིཡཔཱནཀནྟི པིཝཏི; ཨེཝཾ ཀཔྤིཡེ ཨཀཔྤིཡསཉྙིཏཱཡ ཨཱཔཛྫཏི.

ཀཐཾ ¶ སཏིསམྨོསཱཡ ཨཱཔཛྫཏི? སཧསེཡྻཙཱིཝརཝིཔྤཝཱསབྷེསཛྫཙཱིཝརཀཱལཱཏིཀྐམནཔཙྩཡཱ ཨཱཔཏྟིཉྩ སཏིསམྨོསཱཡ ཨཱཔཛྫཏི; ཨེཝམིདྷེཀཙྩོ ¶ བྷིཀྑུ ཨིམེཧི ཚཧཱཀཱརེཧི ཨཱཔཏྟིཾ ཨཱཔཛྫཏི.

ཝིནཡདྷརོ པན ཨིམེཧི ཚཧཱཀཱརེཧི ཨཱཔཏྟིཾ ནཱཔཛྫཏི. ཀཐཾ ལཛྫིཏཱཡ ནཱཔཛྫཏི? སོ ཧི ‘‘པསྶཐ བྷོ, ཨཡཾ ཀཔྤིཡཱཀཔྤིཡཾ ཛཱནནྟོཡེཝ པཎྞཏྟིཝཱིཏིཀྐམཾ ཀརོཏཱི’’ཏི ཨིམཾ པརཱུཔཝཱདཾ རཀྑནྟོཔི ནཱཔཛྫཏི; ཨེཝཾ ལཛྫིཏཱཡ ནཱཔཛྫཏི. སཧསཱ ཨཱཔནྣམྤི དེསནཱགཱམིནིཾ དེསེཏྭཱ ཝུཊྛཱནགཱམིནིཡཱ ཝུཊྛཧིཏྭཱ སུདྡྷནྟེ པཏིཊྛཱཏི. ཏཏོ –

‘‘སཉྩིཙྩ ཨཱཔཏྟིཾ ན ཨཱཔཛྫཏི, ཨཱཔཏྟིཾ ན པརིགཱུཧཏི;

ཨགཏིགམནཉྩ ན གཙྪཏི, ཨེདིསོ ཝུཙྩཏི ལཛྫིཔུགྒལོ’’ཏི. (པརི. ༣༥༩)

ཨིམསྨིཾ ལཛྫིབྷཱཝེ པཏིཊྛིཏོཝ ཧོཏི.

ཀཐཾ ཉཱཎཏཱཡ ནཱཔཛྫཏི? སོ ཧི ཀཔྤིཡཱཀཔྤིཡཾ ཛཱནཱཏི, ཏསྨཱ ཀཔྤིཡམེཝ ཀརོཏི, ཨཀཔྤིཡཾ ན ཀརོཏི; ཨེཝཾ ཉཱཎཏཱཡ ནཱཔཛྫཏི.

ཀཐཾ ཨཀུཀྐུཙྩཔཀཏཏཱཡ ནཱཔཛྫཏི? སོ ཧི ཀཔྤིཡཱཀཔྤིཡཾ ནིསྶཱཡ ཀུཀྐུཙྩེ ཨུཔྤནྣེ ཝཏྠུཾ ཨོལོཀེཏྭཱ མཱཏིཀཾ པདབྷཱཛནཾ ཨནྟརཱཔཏྟིཾ ¶ ཨཱཔཏྟིཾ ཨནཱཔཏྟིཉྩ ཨོལོཀེཏྭཱ ཀཔྤིཡཉྩེ ཧོཏི ཀརོཏི, ཨཀཔྤིཡཉྩེ ན ཀརོཏི; ཨེཝཾ ཨཀུཀྐུཙྩཔཀཏཏཱཡ ནཱཔཛྫཏི.

ཀཐཾ ཨཀཔྤིཡཱདིསཉྙིཏཱཡ ནཱཔཛྫཏི? སོ ཧི ཀཔྤིཡཱཀཔྤིཡཾ ཛཱནཱཏི, ཏསྨཱ ཨཀཔྤིཡེ ཀཔྤིཡསཉྙཱི ན ཧོཏི, ཀཔྤིཡེ ཨཀཔྤིཡསཉྙཱི ན ཧོཏི; སུཔྤཏིཊྛིཏཱ ཙསྶ སཏི ཧོཏི, ཨདྷིཊྛཱཏབྦཾ ཨདྷིཊྛེཏི, ཝིཀཔྤེཏབྦཾ ཝིཀཔྤེཏི. ཨིཏི ཨིམེཧི ཚཧཱཀཱརེཧི ཨཱཔཏྟིཾ ནཱཔཛྫཏི. ཨཱཔཏྟིཾ ཨནཱཔཛྫནྟོ ཨཁཎྜསཱིལོ ཧོཏི པརིསུདྡྷསཱིལོ; ཨེཝམསྶ ཨཏྟནོ སཱིལཀྑནྡྷོ སུགུཏྟོ ཧོཏི སུརཀྑིཏོ.

ཀཐཾ ཀུཀྐུཙྩཔཀཏཱནཾ པཊིསརཎཾ ཧོཏི? ཏིརོརཊྛེསུ ཏིརོཛནཔདེསུ ཙ ཨུཔྤནྣཀུཀྐུཙྩཱ བྷིཀྑཱུ ‘‘ཨསུཀསྨིཾ ཀིར ཝིཧཱརེ ཝིནཡདྷརོ ཝསཏཱི’’ཏི དཱུརཏོཔི ཏསྶ སནྟིཀཾ ཨཱགནྟྭཱ ཀུཀྐུཙྩཾ ¶ པུཙྪནྟི, སོ ཏེཧི ཀཏསྶ ཀམྨསྶ ཝཏྠུཾ ཨོལོཀེཏྭཱ ཨཱཔཏྟཱནཱཔཏྟིགརུཀལཧུཀཱདིབྷེདཾ སལླཀྑེཏྭཱ དེསནཱགཱམིནིཾ དེསཱཔེཏྭཱ ཝུཊྛཱནགཱམིནིཡཱ ཝུཊྛཱཔེཏྭཱ སུདྡྷནྟེ པཏིཊྛཱཔེཏི; ཨེཝཾ ཀུཀྐུཙྩཔཀཏཱནཾ པཊིསརཎཾ ཧོཏི.

ཝིསཱརདོ སངྒྷམཛ྄ཛྷེ ཝོཧརཏཱིཏི ཨཝིནཡདྷརསྶ ཧི སངྒྷམཛ྄ཛྷེ ¶ ཀཐེནྟསྶ བྷཡཾ སཱརཛྫཾ ཨོཀྐམཏི, ཝིནཡདྷརསྶ ཏཾ ན ཧོཏི. ཀསྨཱ? ‘‘ཨེཝཾ ཀཐེནྟསྶ དོསོ ཧོཏི; ཨེཝཾ ན དོསོ’’ཏི ཉཏྭཱ ཀཐནཏོ.

པཙྩཏྠིཀེ སཧདྷམྨེན སུནིགྒཧིཏཾ ནིགྒཎྷཱཏཱིཏི ཨེཏྠ དྭིདྷཱ པཙྩཏྠིཀཱ ནཱམ – ཨཏྟཔཙྩཏྠིཀཱ ཙ སཱསནཔཙྩཏྠིཀཱ ཙ. ཏཏྠ མེཏྟིཡབྷུམྨཛཀཱ ཙ བྷིཀྑཱུ ཝཌྜྷོ ཙ ལིཙྪཝཱི ཨམཱུལཀེན ཨནྟིམཝཏྠུནཱ ཙོདེསུཾ, ཨིམེ ཨཏྟཔཙྩཏྠིཀཱ ནཱམ. ཡེ ཝཱ པནཉྙེཔི དུསྶཱིལཱ པཱཔདྷམྨཱ, སབྦེ ཏེ ཨཏྟཔཙྩཏྠིཀཱ. ཝིཔརཱིཏདསྶནཱ པན ཨརིཊྛབྷིཀྑུཀཎྚཀསཱམཎེརཝེསཱལིཀཝཛྫིཔུཏྟཀཱ པརཱུཔཧཱརཨཉྙཱཎཀངྑཱཔརཝིཏརཎཱདིཝཱདཱ མཧཱསངྒྷིཀཱདཡོ ཙ ཨབུདྡྷསཱསནཾ ‘‘བུདྡྷསཱསན’’ནྟི ཝཏྭཱ ཀཏཔགྒཧཱ སཱསནཔཙྩཏྠིཀཱ ནཱམ. ཏེ སབྦེཔི སཧདྷམྨེན སཀཱརཎེན ཝཙནེན ཡཐཱ ཏཾ ཨསདྡྷམྨཾ པཏིཊྛཱཔེཏུཾ ན སཀྐོནྟི, ཨེཝཾ སུནིགྒཧིཏཾ ཀཏྭཱ ནིགྒཎྷཱཏི.

སདྡྷམྨཊྛིཏིཡཱ ¶ པཊིཔནྣོ ཧོཏཱིཏི ཨེཏྠ པན ཏིཝིདྷོ སདྡྷམྨོ པརིཡཏྟིཔཊིཔཏྟིཨདྷིགམཝསེན. ཏཏྠ ཏེཔིཊཀཾ བུདྡྷཝཙནཾ པརིཡཏྟིསདྡྷམྨོ ནཱམ. ཏེརས དྷུཏངྒགུཎཱ ཙུདྡས ཁནྡྷཀཝཏྟཱནི དྭེཨསཱིཏི མཧཱཝཏྟཱནཱིཏི ཨཡཾ པཊིཔཏྟིསདྡྷམྨོ ནཱམ. ཙཏྟཱརོ མགྒཱ ཙ ཕལཱནི ཙཱཏི ཨཡཾ ཨདྷིགམསདྡྷམྨོ ནཱམ.

ཏཏྠ ཀེཙི ཐེརཱ ‘‘ཡོ ཝོ, ཨཱནནྡ, མཡཱ དྷམྨོ ཙ ཝིནཡོ ཙ དེསིཏོ པཉྙཏྟོ, སོ ཝོ མམཙྩཡེན སཏྠཱ’’ཏི (དཱི. ནི. ༢.༢༡༦) ཨིམིནཱ སུཏྟེན ‘‘སཱསནསྶ པརིཡཏྟི མཱུལ’’ནྟི ཝདནྟི. ཀེཙི ཐེརཱ ‘‘ཨིམེ ཙ སུབྷདྡ བྷིཀྑཱུ སམྨཱ ཝིཧརེཡྻུཾ, ཨསུཉྙོ ལོཀོ ཨརཧནྟེཧི ཨསྶཱ’’ཏི (དཱི. ནི. ༢.༢༡༤) ཨིམིནཱ སུཏྟེན ‘‘སཱསནསྶ པཊིཔཏྟིམཱུལ’’ནྟི ཝཏྭཱ ‘‘ཡཱཝ པཉྩ བྷིཀྑཱུ སམྨཱ པཊིཔནྣཱ སཾཝིཛྫནྟི, ཏཱཝ སཱསནཾ ཋིཏཾ ཧོཏཱི’’ཏི ཨཱཧཾསུ. ཨིཏརེ པན ཐེརཱ པརིཡཏྟིཡཱ ཨནྟརཧིཏཱཡ སུཔྤཊིཔནྣསྶཔི དྷམྨཱབྷིསམཡོ ནཏྠཱི’’ཏི ཨཱཧཾསུ. སཙེ པཉྩ བྷིཀྑཱུ ཙཏྟཱརི པཱརཱཛིཀཱནི རཀྑཎཀཱ ཧོནྟི, ཏེ སདྡྷེ ཀུལཔུཏྟེ པབྦཱཛེཏྭཱ པཙྩནྟིམེ ཛནཔདེ ཨུཔསམྤཱདེཏྭཱ དསཝགྒཾ གཎཾ པཱུརེཏྭཱ མཛ྄ཛྷིམེ ཛནཔདེཔི ཨུཔསམྤདཾ ¶ ཀརིསྶནྟི, ཨེཏེནུཔཱཡེན ཝཱིསཏིཝགྒགཎཾ སངྒྷཾ པཱུརེཏྭཱ ཨཏྟནོཔི ཨབྦྷཱནཀམྨཾ ཀཏྭཱ སཱསནཾ ཝུཌྜྷིཾ ཝིརཱུལ༹ྷིཾ ཝེཔུལླཾ གམཡིསྶནྟི. ཨེཝམཡཾ ཝིནཡདྷརོ ¶ ཏིཝིདྷསྶཱཔི སདྡྷམྨསྶ ཙིརཊྛིཏིཡཱ པཊིཔནྣོ ཧོཏཱིཏི ཨེཝམཡཾ ཝིནཡདྷརོ ཨིམེ ཏཱཝ པཉྩཱནིསཾསེ པཊིལབྷཏཱིཏི ཝེདིཏབྦོ.

ཀཏམེ ཚ ཨཱནིསཾསེ ལབྷཏཱིཏི? ཏསྶཱདྷེཡྻོ ཨུཔོསཐོ, པཝཱརཎཱ, སངྒྷཀམྨཾ, པབྦཛྫཱ, ཨུཔསམྤདཱ, ནིསྶཡཾ དེཏི སཱམཎེརཾ ཨུཔཊྛཱཔེཏི.

ཡེ ཨིམེ ཙཱཏུདྡསིཀོ, པནྣརསིཀོ, སཱམགྒིཨུཔོསཐོ, སངྒྷེ ཨུཔོསཐོ, གཎེ པུགྒལེ ཨུཔོསཐོ, སུཏྟུདྡེསོ, པཱརིསུདྡྷི, ཨདྷིཊྛཱནཨུཔོསཐོཏི ནཝ ཨུཔོསཐཱ, སབྦེ ཏེ ཝིནཡདྷརཱཡཏྟཱ.

ཡཱཔི ཙ ཨིམཱ ཙཱཏུདྡསིཀཱ པནྣརསིཀཱ, སཱམགྒིཔཝཱརཎཱ, སངྒྷེ པཝཱརཎཱ གཎེ པུགྒལེ པཝཱརཎཱ, ཏེཝཱཙིཀཱ, དྭེཝཱཙིཀཱ, སམཱནཝསྶིཀཱ པཝཱརཎཱཏི ནཝ པཝཱརཎཱཡོ, ཏཱཔི ཝིནཡདྷརཱཡཏྟཱ ཨེཝ, ཏསྶ སནྟཀཱ, སོ ཏཱསཾ སཱམཱི.

ཡཱནིཔི ¶ ཨིམཱནི ཨཔལོཀནཀམྨཾ ཉཏྟིཀམྨཾ ཉཏྟིདུཏིཡཀམྨཾ ཉཏྟིཙཏུཏྠཀམྨནྟི ཙཏྟཱརི སངྒྷཀམྨཱནི, ཏཱནི ཝིནཡདྷརཱཡཏྟཱནི.

ཡཱཔི ཙཱཡཾ ཨུཔཛ྄ཛྷཱཡེན ཧུཏྭཱ ཀུལཔུཏྟཱནཾ པབྦཛྫཱ ཙ ཨུཔསམྤདཱ ཙ ཀཱཏབྦཱ, ཨཡམྤི ཝིནཡདྷརཱཡཏྟཱཝ. ན ཧི ཨཉྙོ དྭིཔིཊཀདྷརོཔི ཨེཏཾ ཀཱཏུཾ ལབྷཏི. སོ ཨེཝ ནིསྶཡཾ དེཏི, སཱམཎེརཾ ཨུཔཊྛཱཔེཏི. ཨཉྙོ ནེཝ ནིསྶཡཾ དཱཏུཾ ལབྷཏི, ན སཱམཎེརཾ ཨུཔཊྛཱཔེཏུཾ. སཱམཎེརཱུཔཊྛཱནཾ པཙྩཱསཱིསནྟོ པན ཝིནཡདྷརསྶ སནྟིཀེ ཨུཔཛ྄ཛྷཾ གཱཧཱཔེཏྭཱ ཝཏྟཔཊིཔཏྟིཾ སཱདིཏུཾ ལབྷཏི. ཨེཏྠ ཙ ནིསྶཡདཱནཉྩེཝ སཱམཎེརཱུཔཊྛཱནཉྩ ཨེཀམངྒཾ.

ཨིཏི ཨིམེསུ ཚསུ ཨཱནིསཾསེསུ ཨེཀེན སདྡྷིཾ པུརིམཱ པཉྩ ཚ ཧོནྟི, དྭཱིཧི སདྡྷིཾ སཏྟ, ཏཱིཧི སདྡྷིཾ ཨཊྛ, ཙཏཱུཧི སདྡྷིཾ ནཝ, པཉྩཧི སདྡྷིཾ དས, སབྦེཧི པེཏེཧི སདྡྷིཾ ཨེཀཱདསཱཏི ཨེཝཾ ཝིནཡདྷརོ པུགྒལོ པཉྩ ཚ སཏྟ ཨཊྛ ནཝ དས ཨེཀཱདས ཙ ཨཱནིསཾསེ ལབྷཏཱིཏི ཝེདིཏབྦོ. ཨེཝཾ བྷགཝཱ ཨིམེ ཨཱནིསཾསེ དསྶེནྟོ ཝིནཡཔརིཡཏྟིཡཱ ཝཎྞཾ བྷཱསཏཱིཏི ཝེདིཏབྦོ.

ཨཱདིསྶ ¶ ཨཱདིསྶཱཏི པུནཔྤུནཾ ཝཝཏྠཔེཏྭཱ ཝིསུཾ ཝིསུཾ ཀཏྭཱ. ཨཱཡསྨཏོ ཨུཔཱལིསྶ ཝཎྞཾ བྷཱསཏཱིཏི ཝིནཡཔརིཡཏྟིཾ ནིསྶཱཡ ¶ ཨུཔཱལིཏྠེརསྶ གུཎཾ བྷཱསཏི ཐོམེཏི པསཾསཏི. ཀསྨཱ? ཨཔྤེཝ ནཱམ མམ ཝཎྞནཾ སུཏྭཱཔི བྷིཀྑཱུ ཨུཔཱལིསྶ སནྟིཀེ ཝིནཡཾ ཨུགྒཧེཏབྦཾ པརིཡཱཔུཎིཏབྦཾ མཉྙེཡྻུཾ, ཨེཝམིདཾ སཱསནཾ ཨདྡྷནིཡཾ བྷཝིསྶཏི, པཉྩཝསྶསཧསྶཱནི པཝཏྟིསྶཏཱིཏི.

ཏེདྷ བཧཱུ བྷིཀྑཱུཏི ཏེ ཨིམཾ བྷགཝཏོ ཝཎྞནཾ སུཏྭཱ ‘‘ཨིམེ ཀིརཱནིསཾསེ ནེཝ སུཏྟནྟིཀཱ ན ཨཱབྷིདྷམྨིཀཱ ལབྷནྟཱི’’ཏི ཡཐཱཔརིཀིཏྟིཏཱནིསཾསཱདྷིགམེ ཨུསྶཱཧཛཱཏཱ བཧཱུ བྷིཀྑཱུ ཐེརཱ ཙ ནཝཱ ཙ མཛ྄ཛྷིམཱ ཙ ཨཱཡསྨཏོ ཨུཔཱལིསྶ སནྟིཀེ ཝིནཡཾ པརིཡཱཔུཎནྟཱིཏི ཨཡམེཏྠ ཨཏྠོ. ཨིདྷཱཏི ནིཔཱཏམཏྟམེཝ.

༤༣༩-༤༠. ཨུདྡིསྶམཱནེཏི ཨཱཙརིཡེན ཨནྟེཝཱསིཀསྶ ཨུདྡིསྶམཱནེ, སོ པན ཡསྨཱ ཨཱཙརིཡེ ཨཏྟནོ རུཙིཡཱ ཨུདྡིསནྟེ ཝཱ ཨཱཙརིཡཾ ཡཱཙིཏྭཱ ¶ ཨནྟེཝཱསིཀེན ཨུདྡིསཱཔེནྟེ ཝཱ ཡོ ནཾ དྷཱརེཏི, ཏསྨིཾ སཛ྄ཛྷཱཡཾ ཀརོནྟེ ཝཱ ཨུདྡིསྶམཱནོ ནཱམ ཧོཏི, ཏསྨཱ ‘‘ཨུདྡིསནྟེ ཝཱ ཨུདྡིསཱཔེནྟེ ཝཱ སཛ྄ཛྷཱཡཾ ཝཱ ཀརོནྟེ’’ཏི པདབྷཱཛནཾ ཝུཏྟཾ. ཁུདྡཱནུཁུདྡཀེཧཱིཏི ཁུདྡཀེཧི ཙ ཨནུཁུདྡཀེཧི ཙ. ཡཱཝདེཝཱཏི ཏེསཾ སཾཝཏྟནམརིཡཱདཔརིཙྪེདཝཙནཾ. ཨིདཾ ཝུཏྟཾ ཧོཏི – ཨེཏཱནི ཧི ཡེ ཨུདྡིསནྟི, ཨུདྡིསཱཔེནྟི སཛ྄ཛྷཱཡནྟི ཝཱ, ཏེསཾ ཏཱཝ སཾཝཏྟནྟི ཡཱཝ ‘‘ཀཔྤཏི ནུ ཁོ, ན ཀཔྤཏི ནུ ཁོ’’ཏི ཀུཀྐུཙྩསངྑཱཏོ ཝིཔྤཊིསཱརོ ཝིཧེསཱ ཝིཙིཀིཙྪཱསངྑཱཏོ མནོཝིལེཁོ ཙ ཨུཔྤཛྫཏིཡེཝ. ཨཐ ཝཱ ཡཱཝདེཝཱཏི ཨཏིསཡཝཝཏྠཱཔནཾ; ཏསྶ སཾཝཏྟནྟཱིཏི ཨིམིནཱ སམྦནྡྷོ, ཀུཀྐུཙྩཱཡ ཝིཧེསཱཡ ཝིལེཁཱཡ ཨཏིཝིཡ སཾཝཏྟནྟིཡེཝཱཏི ཝུཏྟཾ ཧོཏི. ཨུཔསམྤནྣསྶ ཝིནཡཾ ཝིཝཎྞེཏཱིཏི ཨུཔསམྤནྣསྶ སནྟིཀེ ཏསྶ ཏསྨིཾ ཝིམཏིཾ ཨུཔྤཱདེཏུཀཱམོ ཝིནཡཾ ཝིཝཎྞེཏི ནིནྡཏི གརཧཏི. སེསམེཏྠ ཨུཏྟཱནམེཝ.

ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཝིལེཁནསིཀྑཱཔདཾ དུཏིཡཾ.

༣. མོཧནསིཀྑཱཔདཝཎྞནཱ

༤༤༤. ཏཏིཡེ ¶ – ཨནྭདྡྷམཱསནྟི ཨནུཔཊིཔཱཊིཡཱ ཨདྡྷམཱསེ ཨདྡྷམཱསེ; ཡསྨཱ པན སོ ཨུཔོསཐདིཝསེ ཨུདྡིསིཡཏི, ཏསྨཱ ‘‘ཨནུཔོསཐིཀ’’ནྟི པདབྷཱཛནེ ཝུཏྟཾ. ཨུདྡིསྶམཱནེཏི ཨུདྡིསིཡམཱནེ ¶ . ཡསྨཱ པན སོ པཱཏིམོཀྑུདྡེསཀེ ཨུདྡིསནྟེ ཨུདྡིསིཡམཱནོ ནཱམ ཧོཏི, ཏསྨཱ ‘‘ཨུདྡིསནྟེ’’ཏི པདབྷཱཛནེ ཝུཏྟཾ. ཡཉྩ ཏཏྠ ཨཱཔཏྟིཾ ཨཱཔནྣོཏི ཏསྨིཾ ཨནཱཙཱརེ ཙིཎྞེ ཡཾ ཨཱཔཏྟིཾ ཨཱཔནྣོ. ཡཐཱདྷམྨོ ཀཱརེཏབྦོཏི ཨཉྙཱཎེན ཨཱཔནྣཏྟཱ ཏསྶཱ ཨཱཔཏྟིཡཱ མོཀྑོ ནཏྠི, ཡཐཱ པན དྷམྨོ ཙ ཝིནཡོ ཙ ཋིཏོ, ཏཐཱ ཀཱརེཏབྦོ. དེསནཱགཱམིནིཉྩེ ཨཱཔནྣོ ཧོཏི, དེསཱཔེཏབྦོ, ཝུཊྛཱནགཱམིནིཉྩེ, ཝུཊྛཱཔེཏབྦོཏི ཨཏྠོ. སཱདྷུཀནྟི སུཊྛུ. ཨཊྛིཾཀཏྭཱཏི ཨཏྠིཀབྷཱཝཾ ཀཏྭཱ; ཨཏྠིཀོ ཧུཏྭཱཏི ཝུཏྟཾ ཧོཏི.

༤༤༧. དྷམྨཀམྨེཏིཨཱདཱིསུ ¶ མོཧཱརོཔནཀམྨཾ ཨདྷིཔྤེཏཾ. སེསམེཏྠ ཨུཏྟཱནམེཝ. ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

མོཧནསིཀྑཱཔདཾ ཏཏིཡཾ.

༤. པཧཱརསིཀྑཱཔདཝཎྞནཱ

༤༤༩. ཙཏུཏྠེ – པཧཱརཾ དེནྟཱིཏི ‘‘ཨཱཝུསོ པཱིཋཀཾ པཉྙཔེཐ, པཱདདྷོཝནཾ ཨཱཧརཐཱ’’ཏིཨཱདཱིནི ཝཏྭཱ ཏཐཱ ཨཀརོནྟཱནཾ པཧཱརཾ དེནྟི.

༤༥༡. པཧཱརཾ དེཏི ཨཱཔཏྟི པཱཙིཏྟིཡསྶཱཏི ཨེཏྠ པཧརིཏུཀཱམཏཱཡ པཧཱརེ དིནྣེ སཙེཔི མརཏི པཱཙིཏྟིཡམེཝ. པཧཱརེན ཧཏྠོ ཝཱ པཱདོ ཝཱ བྷིཛྫཏི, སཱིསཾ ཝཱ བྷིནྣཾ ཧོཏི, པཱཙིཏྟིཡམེཝ. ‘‘ཡཐཱཡཾ སངྒྷམཛ྄ཛྷེ ན ཝིརོཙཏི, ཏཐཱ ནཾ ཀརོམཱི’’ཏི ཨེཝཾ ཝིརཱུཔཀརཎཱདྷིཔྤཱཡེན ཀཎྞཾ ཝཱ ནཱསཾ ཝཱ ཚིནྡཏི, དུཀྐཊཾ.

༤༥༢. ཨནུཔསམྤནྣསྶཱཏི གཧཊྛསྶ ཝཱ པབྦཛིཏསྶ ཝཱ ཨིཏྠིཡཱ ཝཱ པུརིསསྶ ཝཱ ཨནྟམསོ ཏིརཙྪཱནགཏསྶཱཔི པཧཱརཾ དེཏི, དུཀྐཊཾ. སཙེ པན རཏྟཙིཏྟོ ཨིཏྠིཾ པཧརཏི, སངྒྷཱདིསེསོ.

༤༥༣. ཀེནཙི ¶ ཝིཧེཋིཡམཱནོཏི མནུསྶེན ཝཱ ཏིརཙྪཱནགཏེན ཝཱ ཝིཧེཋིཡམཱནོ. མོཀྑཱདྷིཔྤཱཡོཏི ཏཏོ ཨཏྟནོ མོཀྑཾ པཏྠཡམཱནོ. པཧཱརཾ དེཏཱིཏི ཀཱཡཀཱཡཔཊིབདྡྷནིསྶགྒིཡཱནཾ ཨཉྙཏརེན པཧཱརཾ དེཏི, ཨནཱཔཏྟི. སཙེཔི ཨནྟརཱམགྒེ ཙོརཾ ཝཱ པཙྩཏྠིཀཾ ཝཱ ཝིཧེཋེཏུཀཱམཾ དིསྭཱ ‘‘ཨུཔཱསཀ, ཨེཏྠེཝ ཏིཊྛ, མཱ ཨཱགམཱི’’ཏི ཝཏྭཱ ཝཙནཾ ཨནཱདིཡིཏྭཱ ཨཱགཙྪནྟཾ ‘‘གཙྪ རེ’’ཏི མུགྒརེན ཝཱ སཏྠཀེན ཝཱ པཧརིཏྭཱ ཡཱཏི, སོ ཙེ ཏེན པཧཱརེན མརཏི, ཨནཱཔཏྟིཡེཝ. ཝཱལ༹མིགེསུཔི ཨེསེཝ ནཡོ. སེསམེཏྠ ཨུཏྟཱནམེཝ. སམུཊྛཱནཱདཱིནི པནསྶ ¶ པཋམཔཱརཱཛིཀསདིསཱནི, ཨིདཾ པན དུཀྑཝེདནནྟི.

པཧཱརསིཀྑཱཔདཾ ཙཏུཏྠཾ.

༥. ཏལསཏྟིཀསིཀྑཱཔདཝཎྞནཱ

༤༥༤. པཉྩམེ ¶ – ཏལསཏྟིཀཾ ཨུགྒིརནྟཱིཏི པཧཱརདཱནཱཀཱརཾ དསྶེཏྭཱ ཀཱཡམྤི ཀཱཡཔཊིབདྡྷམྤི ཨུཙྩཱརེནྟི. ཏེ པཧཱརསམུཙྩིཏཱ རོདནྟཱིཏི ཏེ པཧཱརཔརིཙིཏཱ པུབྦེཔི ལདྡྷཔཧཱརཏྟཱ ཨིདཱནི ཙ པཧཱརཾ དསྶནྟཱིཏི མཉྙམཱནཱ རོདནྟཱིཏི ཨཏྠོ. ‘‘པཧཱརསྶ མུཙྩིཏཱ’’ཏིཔི སཛ྄ཛྷཱཡནྟི, ཏཏྠ ‘‘པཧཱརསྶ བྷཱིཏཱ’’ཏི ཨཏྠོ.

༤༥༧. ཨུགྒིརཏི ཨཱཔཏྟི པཱཙིཏྟིཡསྶཱཏི ཨེཏྠ སཙེ ཨུགྒིརིཏྭཱ ཝིརདྡྷོ པཧཱརཾ དེཏི, ཨཝསྶཾ དྷཱརེཏུཾ ཨསཀྐོནྟསྶ པཧཱརོ སཧསཱ པཏཏི, ན པཧརིཏུཀཱམཏཱཡ དིནྣཏྟཱ དུཀྐཊཾ. ཏེན པཧཱརེན ཧཏྠཱདཱིསུ ཡཾཀིཉྩི བྷིཛྫཏི, དུཀྐཊམེཝ.

༤༥༨. མོཀྑཱདྷིཔྤཱཡོ ཏལསཏྟིཀཾ ཨུགྒིརཏཱིཏི ཨེཏྠ པུབྦེ ཝུཏྟེསུ ཝཏྠཱུསུ པུརིམནཡེནེཝ ཏལསཏྟིཀཾ ཨུགྒིརནྟསྶ ཨནཱཔཏྟི. སཙེཔི ཝིརཛ྄ཛྷིཏྭཱ པཧཱརཾ དེཏི, ཨནཱཔཏྟིཡེཝ. སེསཾ པུརིམསདིསམེཝ སདྡྷིཾ སམུཊྛཱནཱདཱིཧཱིཏི.

ཏལསཏྟིཀསིཀྑཱཔདཾ པཉྩམཾ.

༦. ཨམཱུལཀསིཀྑཱཔདཝཎྞནཱ

༤༥༩. ཚཊྛེ – ཨནུདྡྷཾསེནྟཱིཏི ཏེ ཀིར སཡཾ ཨཱཀིཎྞདོསཏྟཱ ‘‘ཨེཝཾ བྷིཀྑཱུ ཨམྷེ ནེཝ ¶ ཙོདེསྶནྟི, ན སཱརེསྶནྟཱི’’ཏི ཨཏྟཔརིཏྟཱཎཾ ཀརོནྟཱ པཊིཀཙྩེཝ བྷིཀྑཱུ ཨམཱུལཀེན སངྒྷཱདིསེསེན ཙོདེནྟི. སེསམེཏྠ ཏེརསཀམྷི ཨམཱུལཀསིཀྑཱཔདེ ཝུཏྟནཡཏྟཱ ཨུཏྟཱནམེཝ.

ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཨམཱུལཀསིཀྑཱཔདཾ ཚཊྛཾ.

༧. སཉྩིཙྩསིཀྑཱཔདཝཎྞནཱ

༤༦༤. སཏྟམེ – ཨུཔདཧནྟཱིཏི ཨུཔྤཱདེནྟི. ཀུཀྐུཙྩཾ ཨུཔདཧཏི ཨཱཔཏྟི པཱཙིཏྟིཡསྶཱཏི ཝཱཙཱཡ ཝཱཙཱཡ ཨཱཔཏྟི. ཨནུཔསམྤནྣསྶཱཏི སཱམཎེརསྶ ¶ . མཱཏུགཱམེན སདྡྷིཾ རཧོ མཉྙེ ཏཡཱ ནིསིནྣཾ ནིཔནྣཾ བྷུཏྟཾ པཱིཏཾ, སངྒྷམཛ྄ཛྷེ ཨིདཉྩིདཉྩ ཀཏནྟིཨཱདིནཱ ནཡེན ཀུཀྐུཙྩཾ ཨུཔདཧཏི, ཝཱཙཱཡ ཝཱཙཱཡ དུཀྐཊཾ. སེསམེཏྠ ཨུཏྟཱནམེཝ. སམུཊྛཱནཱདཱིནིཔི ¶ ཨམཱུལཀསདིསཱནེཝཱཏི.

སཉྩིཙྩསིཀྑཱཔདཾ སཏྟམཾ.

༨. ཨུཔསྶུཏིསིཀྑཱཔདཝཎྞནཱ

༤༧༡. ཨཊྛམེ – ཨདྷིཀརཎཛཱཏཱནནྟི ཨེཏེཧི བྷཎྜནཱདཱིཧི ཨུཔྤནྣཝིཝཱདཱདྷིཀརཎཱནཾ. ཨུཔསྶུཏིནྟི སུཏིསམཱིཔཾ; ཡཏྠ ཋཏྭཱ སཀྐཱ ཧོཏི ཏེསཾ ཝཙནཾ སོཏུཾ, ཏཏྠཱཏི ཨཏྠོ. གཙྪཏི ཨཱཔཏྟི དུཀྐཊསྶཱཏི ཨེཏྠ པདཝཱརེ པདཝཱརེ དུཀྐཊཾ. མནྟེནྟནྟི ཨཉྙེན སདྡྷིཾ ཨཉྙསྨིཾ མནྟཡམཱནེ; ‘‘མནྟེནྟེ’’ཏི ཝཱ པཱཋོ, ཨཡམེཝཏྠོ.

༤༧༣. ཝཱུཔསམིསྶཱམཱིཏི ཨུཔསམཾ གམིསྶཱམི, ཀལཧཾ ན ཀརིསྶཱམི. ཨཏྟཱནཾ པརིམོཙེསྶཱམཱིཏི མམ ཨཀཱརཀབྷཱཝཾ ཀཐེཏྭཱ ཨཏྟཱནཾ མོཙེསྶཱམི. སེསམེཏྠ ཨུཏྟཱནམེཝ.

ཐེཡྻསཏྠསམུཊྛཱནཾ – ཀཱཡཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, སིཡཱ ཀིརིཡཾ སོཏུཀཱམཏཱཡ གམནཝསེན, སིཡཱ ཨཀིརིཡཾ ཋིཏཊྛཱནཾ ཨཱགནྟྭཱ མནྟཡམཱནཱནཾ ཨཛཱནཱཔནཝསེན, ¶ རཱུཔིཡཾ ཨཉྙཝཱདཀཾ ཨུཔསྶུཏཱིཏི ཨིམཱནི ཧི ཏཱིཎི སིཀྑཱཔདཱནི ཨེཀཔརིཙྪེདཱནི, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཨུཔསྶུཏིསིཀྑཱཔདཾ ཨཊྛམཾ.

༩. ཀམྨཔཊིབཱཧནསིཀྑཱཔདཝཎྞནཱ

༤༧༤. ནཝམེ – སཙེ ཙ མཡཾ ཛཱནེཡྻཱམཱཏི སཙེ མཡཾ ཛཱནེཡྻཱམ; ཙཀཱརོ པན ནིཔཱཏམཏྟམེཝ. དྷམྨིཀཱནནྟི དྷམྨེན ཝིནཡེན སཏྠུསཱསནེན ཀཏཏྟཱ དྷམྨཱ ཨེཏེསུ ཨཏྠཱིཏི དྷམྨིཀཱནི; ཏེསཾ དྷམྨིཀཱནཾ ཙཏུནྣཾ སངྒྷཀམྨཱནཾ. ཁིཡྻཏི ཨཱཔཏྟི པཱཙིཏྟིཡསྶཱཏི ཨེཏྠ ཝཱཙཱཡ ཝཱཙཱཡ པཱཙིཏྟིཡཾ ¶ . སེསཾ ཨུཏྟཱནམེཝ. ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཀམྨཔཊིབཱཧནསིཀྑཱཔདཾ ནཝམཾ.

༡༠. ཚནྡཾཨདཏྭཱགམནསིཀྑཱཔདཝཎྞནཱ

༤༨༡. དསམེ – ཝཏྠུ ཝཱ ཨཱརོཙིཏནྟི ཙོདཀེན ཙ ཙུདིཏཀེན ཙ ཨཏྟནོ ཀཐཱ ཀཐིཏཱ, ཨནུཝིཛྫཀོ སམྨཏོ, ཨེཏྟཱཝཏཱཔི ཝཏྠུམེཝ ཨཱརོཙིཏཾ ཧོཏི. སེསམེཏྠ ཨུཏྟཱནམེཝ.

དྷུརནིཀྑེཔསམུཊྛཱནཾ – ཀཱཡཝཱཙཱཙིཏྟཏོ སམུཊྛཱཏི, ཀིརིཡཱཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ ¶ , ཨཀུསལཙིཏྟཾ, དུཀྑཝེདནནྟི.

ཚནྡཾ ཨདཏྭཱ གམནསིཀྑཱཔདཾ དསམཾ.

༡༡. དུབྦལསིཀྑཱཔདཝཎྞནཱ

༤༨༤. ཨེཀཱདསམེ – ཡཐཱམིཏྟཏཱཏི ཡཐཱམིཏྟཏཱཡ; ཡོ ཡོ མིཏྟོ, ཏསྶ ཏསྶ དེཏཱིཏི ཝུཏྟཾ ཧོཏི. ཨེས ནཡོ སབྦཔདེསུ. སེསཾ ཨུཛ྄ཛྷཱཔནཀཱདཱིསུ ཝུཏྟནཡཏྟཱ ཨུཏྟཱནཏྠམེཝ.

ཏིསམུཊྛཱནཾ ¶ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ ཨཀུསལཙིཏྟཾ, དུཀྑཝེདནནྟི.

དུབྦལསིཀྑཱཔདཾ ཨེཀཱདསམཾ.

༡༢. པརིཎཱམནསིཀྑཱཔདཝཎྞནཱ

༤༨༩. དྭཱདསམེ – ཡཾ ཝཏྟབྦཾ སིཡཱ, ཏཾ སབྦཾ ཏིཾསཀེ པརིཎཱམནསིཀྑཱཔདེ ཝུཏྟནཡམེཝ. ཨཡམེཝ ཧི ཝིསེསོ – ཏཏྠ ཨཏྟནོ པརིཎཱམིཏཏྟཱ ནིསྶགྒིཡཾ པཱཙིཏྟིཡཾ, ཨིདྷ པུགྒལསྶ པརིཎཱམིཏཏྟཱ སུདྡྷིཀཔཱཙིཏྟིཡནྟི.

ཏིསམུཊྛཱནཾ ¶ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, ཏིཝེདནནྟི.

པརིཎཱམནསིཀྑཱཔདཾ དྭཱདསམཾ.

སམཏྟོ ཝཎྞནཱཀྐམེན སཧདྷམྨིཀཝགྒོ ཨཊྛམོ.

༩. རཏནཝགྒོ

༡. ཨནྟེཔུརསིཀྑཱཔདཝཎྞནཱ

༤༩༤. རཱཛཝགྒསྶ པཋམསིཀྑཱཔདེ – ཨོརཀོཏི པརིཏྟཀོ. ཨུཔརིཔཱསཱདཝརགཏོཏི པཱསཱདཝརསྶ ཨུཔརིགཏོ. ཨཡྻཱནཾ ཝཱཧསཱཏི ཨཡྻཱནཾ ཀཱརཎཱ; ཏེཧི ཛཱནཱཔིཏཏྟཱ ཛཱནཱམཱིཏི ཝུཏྟཾ ཧོཏི.

༤༩༧. པིཏརཾ པཏྠེཏཱིཏི ཨནྟརཾ པསྶིཏྭཱ གྷཱཏེཏུཾ ཨིཙྪཏི. རཱཛནྟེཔུརཾ ཧཏྠིསམྨདྡནྟིཨཱདཱིསུ ཧཏྠཱིཧི སམྨདྡོ ཨེཏྠཱཏི ཧཏྠིསམྨདྡཾ; ཧཏྠིསམྦཱདྷནྟི ཨཏྠོ. ཨསྶརཐསམྨདྡཔདེཔི ¶ ཨེསེཝ ནཡོ. ‘‘སམྨཏྟ’’ནྟི ཀེཙི པཋནྟི, ཏཾ ན གཧེཏབྦཾ. ‘‘རཉྙོ ཨནྟེཔུརེ ཧཏྠིསམྨདྡ’’ནྟིཔི པཱཋོ, ཏཏྠ ཧཏྠཱིནཾ སམྨདྡཾ ཧཏྠིསམྨདྡནྟི ཨཏྠོ, རཉྙོ ཨནྟེཔུརེ ཧཏྠིསམྨདྡོ ཨཏྠཱིཏི ཝུཏྟཾ ཧོཏི. ཨེས ནཡོ སེསཔདེསུཔི. རཛནཱིཡཱནཱིཏི ཏསྨིཾ ཨནྟེཔུརེ ཨེདིསཱནི རཱུཔཱདཱིནི.

༤༩༨. མུདྡྷཱཝསིཏྟསྶཱཏི མུདྡྷནི ཨཝསིཏྟསྶ. ཨནིཀྑནྟོ རཱཛཱ ཨིཏོཏི ཨནིཀྑནྟརཱཛཀཾ, ཏསྨིཾ ཨནིཀྑནྟརཱཛཀེ; སཡནིགྷརེཏི ཨཏྠོ. རཏནཾ ¶ ཝུཙྩཏི མཧེསཱི, ནིགྒཏནྟི ནིཀྑནྟཾ, ཨནིགྒཏཾ རཏནཾ ཨིཏོཏི ཨནིགྒཏརཏནཀཾ, ཏསྨིཾ ཨནིགྒཏརཏནཀེ; སཡནིགྷརེཏི ཨཏྠོ. སེསམེཏྠ ཨུཏྟཱནམེཝ.

ཀཐིནསམུཊྛཱནཾ – ཀཱཡཝཱཙཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཨནྟེཔུརསིཀྑཱཔདཾ པཋམཾ.

༢. རཏནསིཀྑཱཔདཝཎྞནཱ

༥༠༢-༣. དུཏིཡེ ¶ – ཝིསྶརིཏྭཱཏི པམུསྶིཏྭཱ. པུཎྞཔཏྟཾ ནཱམ སཏཏོ པཉྩ ཀཧཱཔཎཱ. ཀྱཱཧཾ ཀརིསྶཱམཱིཏི ཀིཾ ཨཧཾ ཀརིསྶཱམི. ཨཱབྷརཎཾ ཨོམུཉྩིཏྭཱཏི མཧཱལཏཾ ནཱམ ནཝཀོཊིཨགྒྷནཀཾ ཨལངྐཱརཾ ཨཔནེཏྭཱ.

༥༠༤. ཨནྟེཝཱསཱིཏི པརིཙཱརཀོ.

༥༠༦. ཨཔརིཀྑིཏྟསྶ ཨུཔཙཱརོཏི ཨེཏྠ ཨུཔཙཱརོ ནཱམ ཨཱརཱམསྶ དྭེ ལེཌྜུཔཱཏཱ – ‘‘ཨཱཝསཐསྶ པན སུཔྤཔཱཏོ ཝཱ མུསལཔཱཏོ ཝཱ’’ཏི མཧཱཔཙྩརིཡཾ ཝུཏྟཾ. ཨུགྒཎྷཱཏི ཨཱཔཏྟི པཱཙིཏྟིཡསྶཱཏི ཨེཏྠ ཛཱཏརཱུཔརཛཏཾ ཨཏྟནོ ཨཏྠཱཡ ཨུགྒཎྷནྟསྶ ཝཱ ཨུགྒཎྷཱཔེནྟསྶ ཝཱ ནིསྶགྒིཡཾ པཱཙིཏྟིཡཾ, སངྒྷགཎཔུགྒལཙེཏིཡནཝཀམྨཱནཾ ཨཏྠཱཡ དུཀྐཊཾ, ཨཝསེསཾ མུཏྟཱདིརཏནཾ ཨཏྟནོ ཝཱ སངྒྷཱདཱིནཾ ཝཱ ཨཏྠཱཡ ཨུགྒཎྷནྟསྶ ཝཱ ཨུགྒཎྷཱཔེནྟསྶ ཝཱ དུཀྐཊཾ. ཀཔྤིཡཝཏྠུ ཝཱ ཨཀཔྤིཡཝཏྠུ ཝཱ ཧོཏུ, ཨནྟམསོ མཱཏུ ཀཎྞཔིལ༹ནྡྷནཏཱལ༹པཎྞམྤི གིཧིསནྟཀཾ བྷཎྜཱགཱརིཀསཱིསེན པཊིསཱམེནྟསྶ པཱཙིཏྟིཡམེཝ.

སཙེ ¶ པན མཱཏཱཔིཏཱུནཾ སནྟཀཾ ཨཝསྶཾ པཊིསཱམེཏབྦཾ ཀཔྤིཡབྷཎྜཾ ཧོཏི, ཨཏྟནོ ཨཏྠཱཡ གཧེཏྭཱ པཊིསཱམེཏབྦཾ. ‘‘ཨིདཾ པཊིསཱམེཏྭཱ དེཧཱི’’ཏི ཝུཏྟེ པན ‘‘ན ཝཊྚཏཱི’’ཏི པཊིཀྑིཔིཏབྦཾ. སཙེ ‘‘པཊིསཱམེཧཱི’’ཏི པཱཏེཏྭཱ གཙྪནྟི, པལིབོདྷོ ནཱམ ཧོཏི, པཊིསཱམེཏུཾ ཝཊྚཏི. ཝིཧཱརེ ཀམྨཾ ཀརོནྟཱ ཝཌྜྷཀཱིཨཱདཡོ ཝཱ རཱཛཝལླབྷཱ ཝཱ ཨཏྟནོ ཨུཔཀརཎབྷཎྜཾ ཝཱ སཡནབྷཎྜཾ ཝཱ ‘‘པཊིསཱམེཏྭཱ དེཐཱ’’ཏི ཝདནྟི, ཚནྡེནཔི བྷཡེནཔི ན ཀཱཏབྦམེཝ, གུཏྟཊྛཱནཾ པན དསྶེཏུཾ ཝཊྚཏི. བལཀྐཱརེན པཱཏེཏྭཱ གཏེསུ ཙ པཊིསཱམེཏུཾ ཝཊྚཏི.

ཨཛ྄ཛྷཱརཱམེ ཝཱ ཨཛ྄ཛྷཱཝསཐེ ཝཱཏི ཨེཏྠ སཙེ མཧཱཝིཧཱརསདིསོ མཧཱརཱམོ ཧོཏི, ཏཏྠ པཱཀཱརཔརིཀྑིཏྟེ པརིཝེཎེ ཡཏྠ བྷིཀྑཱུཧི ¶ ཝཱ སཱམཎེརེཧི ཝཱ གཧིཏཾ བྷཝིསྶཏཱིཏི སངྐཱ ཨུཔྤཛྫཏི, ཏཱདིསེ ཨེཝ ཋཱནེ ཨུགྒཎྷིཏྭཱ ཝཱ ཨུགྒཎྷཱཔེཏྭཱ ཝཱ ཋཔེཏབྦཾ. མཧཱབོདྷིདྭཱརཀོཊྛཀཨམྦངྒཎསདིསེསུ པན མཧཱཛནསཉྩརཎཊྛཱནེསུ ན གཧེཏབྦཾ, པལིབོདྷོ ན ཧོཏི. ཀུརུནྡིཡཾ པན ཝུཏྟཾ ‘‘ཨེཀོ མགྒཾ གཙྪནྟོ ནིམནུསྶཊྛཱནེ ཀིཉྩི བྷཎྜཾ པསྶཏི, ཨཱཀིཎྞམནུསྶེཔི ཛཱཏེ མནུསྶཱ ཏམེཝ ¶ བྷིཀྑུཾ ཨཱསངྐནྟི, ཏསྨཱ མགྒཱ ཨོཀྐམྨ ནིསཱིདིཏབྦཾ. སཱམིཀེསུ ཨཱགཏེསུ ཏཾ ཨཱཙིཀྑིཏབྦཾ. སཙེ སཱམིཀེ ན པསྶཏི པཏིརཱུཔཾ ཀརིསྶཏཱི’’ཏི.

རཱུཔེན ཝཱ ནིམིཏྟེན ཝཱ སཉྙཱཎཾ ཀཏྭཱཏི ཨེཏྠ རཱུཔཾ ནཱམ ཨནྟོབྷཎྜིཀཱཡ བྷཎྜཾ; ཏསྨཱ བྷཎྜིཀཾ མུཉྩིཏྭཱ གཎེཏྭཱ ཨེཏྟཀཱ ཀཧཱཔཎཱ ཝཱ ཛཱཏརཱུཔརཛཏཾ ཝཱཏི སལླཀྑེཏབྦཾ. ནིམིཏྟནྟི ལཉྪནཱདི; ཏསྨཱ ལཉྪིཏཱཡ བྷཎྜིཀཱཡ མཏྟིཀཱལཉྪནནྟི ཝཱ ལཱཁཱལཉྪནནྟི ཝཱ ནཱིལཔིལོཏིཀཱཡ བྷཎྜིཀཱ ཀཏཱཏི ཝཱ སེཏཔིལོཏིཀཱཡ ཀཏཱཏི ཝཱ ཨེཝམཱདི སབྦཾ སལླཀྑེཏབྦཾ.

བྷིཀྑཱུ པཏིརཱུཔཱཏི ལཛྫིནོ ཀུཀྐུཙྩཀཱ. ལོལཛཱཏིཀཱནཉྷི ཧཏྠེ ཋཔེཏུཾ ན ལབྷཏི. ཡོ པན ནེཝ ཏམྷཱ ཨཱཝཱསཱ པཀྐམཏི, ན སཱམིཀེ པསྶཏི, ཏེནཱཔི ཨཏྟནོ ཙཱིཝརཱདིམཱུལཾ ན ཀཱཏབྦཾ; ཐཱཝརཾ པན སེནཱསནཾ ཝཱ ཙེཏིཡཾ ཝཱ པོཀྑརཎཱི ཝཱ ཀཱརེཏབྦཱ. སཙེ དཱིགྷསྶ ཨདྡྷུནོ ཨཙྩཡེན སཱམིཀོ ཨཱགཙྪཏི, ‘‘ཨུཔཱསཀ ཏཝ སནྟཀེན ཨིདཾ ནཱམ ཀཏཾ, ཨནུམོདཱཧཱི’’ཏི ཝཏྟབྦོ. སཙེ ཨནུམོདཏི, ཨིཙྩེཏཾ ཀུསལཾ; ནོ ཙེ ཨནུམོདཏི, ‘‘མམ དྷནཾ དེཐཱ’’ཏི ཙོདེཏིཡེཝ, ཨཉྙཾ སམཱདཔེཏྭཱ དཱཏབྦཾ.

༥༠༧. རཏནསམྨཏཾ ¶ ཝིསྶཱསཾ གཎྷཱཏཱིཏིཨཱདཱིསུ ཨཱམཱསམེཝ སནྡྷཱཡ ཝུཏྟཾ. ཨནཱམཱསཾ ན ཝཊྚཏིཡེཝ. སེསམེཏྠ ཨུཏྟཱནམེཝ. ཚསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

རཏནསིཀྑཱཔདཾ དུཏིཡཾ.

༣. ཝིཀཱལགཱམཔྤཝིསནསིཀྑཱཔདཝཎྞནཱ

༥༠༨. ཏཏིཡེ – ཏིརཙྪཱནཀཐནྟི ཨརིཡམགྒསྶ ཏིརཙྪཱནབྷཱུཏཾ ཀཐཾ. རཱཛཀཐནྟི རཱཛཔཊིསཾཡུཏྟ ཀཐཾ. ཙོརཀཐཱདཱིསུཔི ཨེསེཝ ནཡོ.

༥༡༢. སནྟཾ བྷིཀྑུནྟི ཨེཏྠ ཡཾ ཝཏྟབྦཾ ¶ , ཏཾ ཙཱརིཏྟསིཀྑཱཔདེ ཝུཏྟམེཝ. སཙེ སམྦཧུལཱ ཀེནཙི ཀམྨེན གཱམཾ པཝིསནྟི, ‘‘ཝིཀཱལེ གཱམཔྤཝེསནཾ ཨཱཔུཙྪཱམཱི’’ཏི ¶ སབྦེཧི ཨཉྙམཉྙཾ ཨཱཔུཙྪིཏབྦཾ. ཏསྨིཾ གཱམེ ཏཾ ཀམྨཾ ན སམྤཛྫཏཱིཏི ཨཉྙཾ གཱམཾ གཙྪནྟི, གཱམསཏམྤི ཧོཏུ, པུན ཨཱཔུཙྪནཀིཙྩཾ ནཏྠི. སཙེ པན ཨུསྶཱཧཾ པཊིཔྤསྶམྦྷེཏྭཱ ཝིཧཱརཾ གཙྪནྟཱ ཨནྟརཱ ཨཉྙཾ གཱམཾ པཝིསིཏུཀཱམཱ ཧོནྟི, པུན ཨཱཔུཙྪིཏབྦམེཝ.

ཀུལགྷརེ ཝཱ ཨཱསནསཱལཱཡ ཝཱ བྷཏྟཀིཙྩཾ ཀཏྭཱ ཏེལབྷིཀྑཱཡ ཝཱ སཔྤིབྷིཀྑཱཡ ཝཱ ཙརིཏུཀཱམོ ཧོཏི, སཙེ པསྶེ བྷིཀྑུ ཨཏྠི, ཨཱཔུཙྪིཏྭཱ གནྟབྦཾ. ཨསནྟེ ནཏྠཱིཏི གནྟབྦཾ. ཝཱིཐིཾ ཨོཏརིཏྭཱ བྷིཀྑུཾ པསྶཏི, ཨཱཔུཙྪནཀིཙྩཾ ནཏྠི, ཨནཱཔུཙྪིཏྭཱཔི ཙརིཏབྦམེཝ. གཱམམཛ྄ཛྷེན མགྒོ ཧོཏི, ཏེན གཙྪནྟསྶ ཏེལཱདིབྷིཀྑཱཡ ཙརིསྶཱམཱིཏི ཙིཏྟེ ཨུཔྤནྣེ སཙེ པསྶེ བྷིཀྑུ ཨཏྠི, ཨཱཔུཙྪིཏྭཱ ཙརིཏབྦཾ. མགྒཱ ཨནོཀྐམྨ བྷིཀྑཱཡ ཙརནྟསྶ པན ཨཱཔུཙྪནཀིཙྩཾ ནཏྠི, ཨཔརིཀྑིཏྟསྶ གཱམསྶ ཨུཔཙཱརོ ཨདིནྣཱདཱནེ ཝུཏྟནཡེནེཝ ཝེདིཏབྦོ.

༥༡༥. ཨནྟརཱརཱམནྟིཨཱདཱིསུ ན ཀེཝལཾ ཨནཱཔུཙྪཱ ཀཱཡབནྡྷནཾ ཨབནྡྷིཏྭཱ སངྒྷཱཊིཾ ཨཔཱརུཔིཏྭཱ གཙྪནྟསྶཔི ཨནཱཔཏྟི. ཨཱཔདཱསཱུཏི སཱིཧོ ཝཱ བྱགྒྷོ ཝཱ ཨཱགཙྪཏི, མེགྷོ ཝཱ ཨུཊྛེཏི, ཨཉྙོ ཝཱ ཀོཙི ཨུཔདྡཝོ ཨུཔྤཛྫཏི, ཨནཱཔཏྟི. ཨེཝརཱུཔཱསུ ཨཱཔདཱསུ བཧིགཱམཏོ ཨནྟོགཱམཾ པཝིསིཏུཾ ཝཊྚཏི. སེསམེཏྠ ཨུཏྟཱནམེཝ.

ཀཐིནསམུཊྛཱནཾ ¶ – ཀཱཡཝཱཙཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཝིཀཱལགཱམཔྤཝིསནསིཀྑཱཔདཾ ཏཏིཡཾ.

༤. སཱུཙིགྷརསིཀྑཱཔདཝཎྞནཱ

༥༡༧-༢༠. ཙཏུཏྠེ – བྷེདནམེཝ བྷེདནཀཾ; ཏཾ ཨསྶ ཨཏྠཱིཏི བྷེདནཀམེཝ. ཨརཎིཀེཏི ཨརཎིདྷནུཀེ. ཝིདྷེཏི ཝེདྷཀེ. སེསམེཏྠ ཨུཏྟཱནམེཝ. ཚསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

སཱུཙིགྷརསིཀྑཱཔདཾ ཙཏུཏྠཾ.

༥. མཉྩསིཀྑཱཔདཝཎྞནཱ

༥༢༢. པཉྩམེ ¶ – ཚེདནཀཾ ཝུཏྟནཡམེཝ.

༥༢༥. ཚིནྡིཏྭཱ པརིབྷུཉྫཏཱིཏི ཨེཏྠ སཙེ ན ཚིནྡིཏུཀཱམོ ཧོཏི, བྷཱུམིཡཾ ནིཁཎིཏྭཱ ¶ པམཱཎཾ ཨུཔརི དསྶེཏི, ཨུཏྟཱནཾ ཝཱ ཀཏྭཱ པརིབྷུཉྫཏི, ཨུཀྑིཔིཏྭཱ ཝཱ ཏུལཱསངྒྷཱཊེ ཋཔེཏྭཱ ཨཊྚཾ ཀཏྭཱ པརིབྷུཉྫཏི, སབྦཾ ཝཊྚཏི. སེསམེཏྠ ཨུཏྟཱནམེཝ. ཚསམུཊྛཱནཾ.

མཉྩསིཀྑཱཔདཾ པཉྩམཾ.

༦. ཏཱུལོནདྡྷསིཀྑཱཔདཝཎྞནཱ

༥༢༦. ཚཊྛེ – ཏཱུལཾ ཨོནདྡྷམེཏྠཱཏི ཏཱུལོནདྡྷཾ; ཏཱུལཾ པཀྑིཔིཏྭཱ ཨུཔརི ཙིམིལིཀཱཡ ཨོནདྡྷནྟི ཝུཏྟཾ ཧོཏི. སེསམེཏྠ ཨུཏྟཱནམེཝ. ཚསམུཊྛཱནཾ.

ཏཱུལོནདྡྷསིཀྑཱཔདཾ ཚཊྛཾ.

༧. ནིསཱིདནསིཀྑཱཔདཝཎྞནཱ

༥༣༡-༤. སཏྟམེ ¶ – ནིསཱིདནཾ ཨནུཉྙཱཏཾ ཧོཏཱིཏི ཀཏྠ ཨནུཉྙཱཏཾ? ཙཱིཝརཀྑནྡྷཀེ པཎཱིཏབྷོཛནཝཏྠུསྨིཾ. ཝུཏྟཉྷི ཏཏྠ – ‘‘ཨནུཛཱནཱམི, བྷིཀྑཝེ, ཀཱཡགུཏྟིཡཱ ཙཱིཝརགུཏྟིཡཱ སེནཱསནགུཏྟིཡཱ ནིསཱིདན’’ནྟི (མཧཱཝ. ༣༥༣). སེཡྻཐཱཔི པུརཱཎཱསིཀོཊྛོཏི ཡཐཱ ནཱམ པུརཱཎཙམྨཀཱརོཏི ཨཏྠོ. ཡཐཱ ཧི ཙམྨཀཱརོ ཙམྨཾ ཝིཏྠཏཾ ཀརིསྶཱམཱིཏི ཨིཏོ ཙིཏོ ཙ སམཉྪཏི, ཀཌྜྷཏི; ཨེཝཾ སོཔི ཏཾ ནིསཱིདནཾ. ཏེན ཏཾ བྷགཝཱ ཨེཝམཱཧ – ‘‘ནིསཱིདནཾ ནཱམ སདསཾ ཝུཙྩཏཱི’’ཏི སནྠཏསདིསཾ སནྠརིཏྭཱ ཨེཀསྨིཾ ཨནྟེ སུགཏཝིདཏྠིཡཱ ཝིདཏྠིམཏྟེ པདེསེ དྭཱིསུ ཋཱནེསུ ཕཱལེཏྭཱ ཏིསྶོ དསཱ ཀརིཡནྟི, ཏཱཧི དསཱཧི སདསཾ ནཱམ ཝུཙྩཏི. སེསམེཏྠ ཨུཏྟཱནམེཝ. ཚསམུཊྛཱནཾ.

ནིསཱིདནསིཀྑཱཔདཾ སཏྟམཾ.

༨. ཀཎྜུཔཊིཙྪཱདིསིཀྑཱཔདཝཎྞནཱ

༥༣༧. ཨཊྛམེ ¶ – ཀཎྜུཔཊིཙྪཱདི ཨནུཉྙཱཏཱ ཧོཏཱིཏི ཀཏྠ ཨནུཉྙཱཏཱ? ཙཱིཝརཀྑནྡྷཀེ བེལཊྛསཱིསཝཏྠུསྨིཾ. ཝུཏྟཉྷི ཏཏྠ – ‘‘ཨནུཛཱནཱམི, བྷིཀྑཝེ, ཡསྶ ཀཎྜུ ཝཱ པིལ༹ཀཱ ཝཱ ཨསྶཱཝོ ཝཱ ཐུལླཀཙྪུ ཝཱ ཨཱབཱདྷོ ཏསྶ ཀཎྜུཔཊིཙྪཱདི’’ནྟི (མཧཱཝ. ༣༥༤).

༥༣༩. ཡསྶ ཨདྷོནཱབྷི ཨུབྦྷཛཱཎུམཎྜལནྟི ཡསྶ བྷིཀྑུནོ ནཱབྷིཡཱ ཧེཊྛཱ ཛཱཎུམཎྜལཱནཾ ཨུཔརི. ཀཎྜཱུཏི ཀཙྪུ. པིལ༹ཀཱཏི ལོཧིཏཏུཎྜིཀཱ སུཁུམཔིལ༹ཀཱ. ཨསྶཱཝོཏི ཨརིསབྷགནྡརམདྷུམེཧཱདཱིནཾ ཝསེན ཨསུཙིཔགྒྷརཎཀཾ. ཐུལླཀཙྪུ ཝཱ ཨཱབཱདྷོཏི མཧཱཔིལ༹ཀཱབཱདྷོ ཝུཙྩཏི. སེསམེཏྠ ཨུཏྟཱནམེཝ. ཚསམུཊྛཱནཾ.

ཀཎྜུཔཊིཙྪཱདིསིཀྑཱཔདཾ ཨཊྛམཾ.

༩. ཝསྶིཀསཱཊིཀསིཀྑཱཔདཝཎྞནཱ

༥༤༢. ནཝམེ ¶ – ཝསྶིཀསཱཊིཀཱ ཨནུཉྙཱཏཱ ཧོཏཱིཏི ཀཏྠ ཨནུཉྙཱཏཱ? ཙཱིཝརཀྑནྡྷཀེ ¶ ཝིསཱཁཱཝཏྠུསྨིཾ. ཝུཏྟཉྷི ཏཏྠ – ‘‘ཨནུཛཱནཱམི, བྷིཀྑཝེ, ཝསྶིཀསཱཊིཀ’’ནྟི (མཧཱཝ. ༣༥༢). སེསམེཏྠ ཨུཏྟཱནམེཝ. ཚསམུཊྛཱནཾ.

ཝསྶིཀསཱཊིཀསིཀྑཱཔདཾ ནཝམཾ.

༡༠. ནནྡཏྠེརསིཀྑཱཔདཝཎྞནཱ

༥༤༧. དསམེ – ཙཏུརངྒུལོམཀོཏི ཙཏཱུཧི ཨངྒུལེཧི ཨཱུནཀཔྤམཱཎོ. སེསཾ ཨུཏྟཱནམེཝ. ཚསམུཊྛཱནཾ.

ནནྡཏྠེརསིཀྑཱཔདཾ དསམཾ.

སམཏྟོ ཝཎྞནཱཀྐམེན རཏནཝགྒོ ནཝམོ.

ཨུདྡིཊྛཱ ཁོཏིཨཱདི ཝུཏྟནཡམེཝཱཏི.

སམནྟཔཱསཱདིཀཱཡ ཝིནཡསཾཝཎྞནཱཡ

ཁུདྡཀཝཎྞནཱ སམཏྟཱ.

པཱཙིཏྟིཡཀཎྜཾ ནིཊྛིཏཾ.

༦. པཱཊིདེསནཱིཡཀཎྜཾ

༡. པཋམཔཱཊིདེསནཱིཡསིཀྑཱཔདཝཎྞནཱ

པཱཊིདེསནཱིཡཱ ¶ ¶ ¶ དྷམྨཱ, ཁུདྡཀཱནཾ ཨནནྟརཱ;

ཋཔིཏཱ ཡེ ཨཡཾ དཱནི, ཏེསཾ བྷཝཏི ཝཎྞནཱ.

༥༥༢. པཋམཔཱཊིདེསནཱིཡེ ཏཱཝ པཊིཀྐམནཀཱལེཏི པིཎྜཱཡ ཙརིཏྭཱ པཊིཨཱགམནཀཱལེ. སབྦེཝ ཨགྒཧེསཱིཏི སབྦམེཝ ཨགྒཧེསི. པཝེདྷེནྟཱིཏི ཀམྤམཱནཱ. ཨཔེཧཱིཏི ཨཔགཙྪ.

༥༥༣-༥. གཱརཡ྄ཧཾ ཨཱཝུསོཏིཨཱདི པཊིདེསེཏབྦཱཀཱརདསྶནཾ. རཐིཀཱཏི རཙྪཱ. བྱཱུཧནྟི ཨནིབྦིཛ྄ཛྷིཏྭཱ ཋིཏཱ གཏཔཙྩཱགཏརཙྪཱ. སིངྒྷཱཊཀནྟི ཙཏུཀྐོཎཾ ཝཱ ཏིཀོཎཾ ཝཱ མགྒསམོདྷཱནཊྛཱནཾ. གྷརནྟི ཀུལགྷརཾ. ཨེཏེསུ ཡཏྠ ཀཏྠཙི ཋཏྭཱ གཎྷནྟསྶ གཧཎེ དུཀྐཊཾ, ཨཛ྄ཛྷོཧཱརེ ཨཛ྄ཛྷོཧཱརགཎནཱཡ པཱཊིདེསནཱིཡཾ. ཧཏྠིསཱལཱདཱིསུ གཎྷནྟསྶཱཔི ཨེསེཝ ནཡོ. བྷིཀྑུནཱི རཐིཀཱཡ ཋཏྭཱ དེཏི, བྷིཀྑུ སཙེཔི ཨནྟརཱརཱམཱདཱིསུ ཋཏྭཱ གཎྷཱཏི, ཨཱཔཏྟིཡེཝ. ‘‘ཨནྟརགྷརཾ པཝིཊྛཱཡཱ’’ཏི ཧི ཝཙནཏོ བྷིཀྑུནིཡཱ ཨནྟརགྷརེ ཋཏྭཱ དདམཱནཱཡ ཝསེནེཏྠ ཨཱཔཏྟི ཝེདིཏབྦཱ, བྷིཀྑུསྶ ཋིཏཊྛཱནཾ པན ཨཔྤམཱཎཾ. ཏསྨཱ སཙེཔི ཝཱིཐིཨཱདཱིསུ ཋིཏོ བྷིཀྑུ ཨནྟརཱརཱམཱདཱིསུ ཋཏྭཱ དདམཱནཱཡ བྷིཀྑུནིཡཱ གཎྷཱཏི, ཨནཱཔཏྟིཡེཝ.

ཡཱམཀཱལིཀཾ སཏྟཱཧཀཱལིཀཾ ཡཱཝཛཱིཝིཀཾ ཨཱཧཱརཏྠཱཡ པཊིགྒཎྷཱཏི, ཨཱཔཏྟི དུཀྐཊསྶ. ཨཛ྄ཛྷོཧཱརེ ཨཛ྄ཛྷོཧཱརེ ཨཱཔཏྟི དུཀྐཊསྶཱཏི ཨིདཾ ཨཱམིསེན ཨསམྦྷིནྣཾ སནྡྷཱཡ ཝུཏྟཾ, སམྦྷིནྣེ པན ¶ ཨེཀརསེ པཱཊིདེསནཱིཡམེཝ. ཨེཀཏོ ཨུཔསམྤནྣཱཡཱཏི བྷིཀྑུནཱིནཾ སནྟིཀེ ཨུཔསམྤནྣཱཡ. བྷིཀྑཱུནཾ སནྟིཀེ ཨུཔསམྤནྣཱཡ པན ཡཐཱཝཏྠུཀམེཝ.

༥༥༦. དཱཔེཏི ན དེཏཱིཏི ཨཉྙཱཏིཀཱ ཨཉྙེན ཀེནཙི དཱཔེཏི ཏཾ གཎྷནྟསྶ ཨནཱཔཏྟི. ཨུཔནིཀྑིཔིཏྭཱ དེཏཱིཏི བྷཱུམིཡཾ ཋཔེཏྭཱ ‘‘ཨིདཾ ཨཡྻ ཏུམྷཱཀཾ དམྨཱི’’ཏི དེཏི, ཨེཝཾ དིནྣཾ ‘‘སཱདྷུ བྷགིནཱི’’ཏི སམྤཊིཙྪིཏྭཱ ཏཱཡ ཨེཝ ཝཱ བྷིཀྑུནིཡཱ ཨཉྙེན ཝཱ ཀེནཙི པཊིགྒཧཱཔེཏྭཱ བྷུཉྫིཏུཾ ཝཊྚཏི. སིཀྑམཱནཱཡ ¶ སཱམཎེརིཡཱཏི ཨེཏཱསཾ དདམཱནཱནཾ གཎྷནྟསྶ ཨནཱཔཏྟི. སེསམེཏྠ ཨུཏྟཱནམེཝ.

ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

པཋམཔཱཊིདེསནཱིཡཾ.

༢. དུཏིཡཔཱཊིདེསནཱིཡསིཀྑཱཔདཝཎྞནཱ

༥༥༨. དུཏིཡེ ¶ – ཨཔསཀྐ ཏཱཝ བྷགིནཱིཏིཨཱདི ཨཔསཱདེཏབྦཱཀཱརདསྶནཾ.

༥༦༡. ཨཏྟནོ བྷཏྟཾ དཱཔེཏི ན དེཏཱིཏི ཨེཏྠ སཙེཔི ཨཏྟནོ བྷཏྟཾ དེཏི, ཨིམིནཱ སིཀྑཱཔདེན ཨནཱཔཏྟིཡེཝ, པུརིམསིཀྑཱཔདེན ཨཱཔཏྟི. ཨཉྙེསཾ བྷཏྟཾ དེཏི ན དཱཔེཏཱིཏི ཨེཏྠ སཙེཔི དཱཔེཡྻ, ཨིམིནཱ སིཀྑཱཔདེན ཨཱཔཏྟི བྷཝེཡྻ. དེནྟིཡཱ པན ནེཝ ཨིམིནཱ ན པུརིམེན ཨཱཔཏྟི. སེསམེཏྠ ཨུཏྟཱནམེཝ. ཀཐིནསམུཊྛཱནཾ – ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

དུཏིཡཔཱཊིདེསནཱིཡཾ.

༣. ཏཏིཡཔཱཊིདེསནཱིཡསིཀྑཱཔདཝཎྞནཱ

༥༦༢. ཏཏིཡེ – ཨུབྷཏོཔསནྣནྟི དྭཱིཧི པསནྣཾ ཨུཔཱསཀེནཔི ཨུཔཱསིཀཱཡཔི. ཏསྨིཾ ཀིར ཀུལེ ཨུབྷོཔི ཏེ སོཏཱཔནྣཱཡེཝ. བྷོགེན ཧཱཡཏཱིཏི ཨེདིསཉྷི ཀུལཾ སཙེཔི ཨསཱིཏིཀོཊིདྷནཾ ¶ ཧོཏི, བྷོགེཧི ཧཱཡཏིཡེཝ. ཀསྨཱ? ཡསྨཱ ཏཏྠ ནེཝ ཨུཔཱསིཀཱ ན ཨུཔཱསཀོ བྷོགེ རཀྑཏི.

༥༦༩. གྷརཏོ ནཱིཧརིཏྭཱ དེནྟཱིཏི ཨཱསནསཱལཾ ཝཱ ཝིཧཱརཾ ཝཱ ཨཱནེཏྭཱ དེནྟི. སཙེཔི ཨནཱགཏེ བྷིཀྑུམྷི པཋམཾཡེཝ ནཱིཧརིཏྭཱ དྭཱརེ ཋཔེཏྭཱ པཙྪཱ སམྤཏྟསྶ དེནྟི, ཝཊྚཏི. བྷིཀྑུཾ པན དིསྭཱ ཨནྟོགེཧཏོ ནཱིཧརིཏྭཱ དིཡྻམཱནཾ ན ཝཊྚཏཱིཏི མཧཱཔཙྩརིཡཾ ཝུཏྟཾ. སེསམེཏྠ ཨུཏྟཱནམེཝ ¶ . ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ ཏིཙིཏྟཾ, ཏིཝེདནནྟི.

ཏཏིཡཔཱཊིདེསནཱིཡཾ.

༤. ཙཏུཏྠཔཱཊིདེསནཱིཡསིཀྑཱཔདཝཎྞནཱ

༥༧༠. ཙཏུཏྠེ – ཨཝརུདྡྷཱ ཧོནྟཱིཏི པཊིཝིརུདྡྷཱ ཧོནྟི.

༥༧༣. པཉྩནྣཾ པཊིསཾཝིདིཏནྟི པཉྩསུ སཧདྷམྨིཀེསུ ཡཾཀིཉྩི པེསེཏྭཱ ཁཱདནཱིཡཾ བྷོཛནཱིཡཾ ཨཱཧརིསྶཱམཱཏི པཊིསཾཝིདིཏཾ ཀཏམྤི ཨཔྤཊིསཾཝིདིཏམེཝཱཏི ཨཏྠོ. ཨཱརཱམཾ ཨཱརཱམཱུཔཙཱརཾ ཋཔེཏྭཱཏི ཨཱརཉྙཀསེནཱསནཱརཱམཉྩ ཏསྶ ཨུཔཙཱརཉྩ ¶ ཋཔེཏྭཱ; ཨུཔཙཱརཏོ ནིཀྑནྟཾ ཨནྟརཱམགྒེ བྷིཀྑུཾ དིསྭཱ ཝཱ གཱམཾ ཨཱགཏསྶ ཝཱ པཊིསཾཝིདིཏཾ ཀཏམྤི ཨཔྤཊིསཾཝིདིཏམེཝ ཧོཏཱིཏི ཝེདིཏབྦཾ. སཙེ སཱསངྐཾ ཧོཏི སཱསངྐནྟི ཨཱཙིཀྑིཏབྦནྟི ཀསྨཱ ཨཱཙིཀྑིཏབྦཾ? ཨཱརཱམེ ཙོརེ ཝསནྟེ ཨམྷཱཀཾ ནཱརོཙེནྟཱིཏི ཝཙནཔཊིམོཙནཏྠཾ. ཙོརཱ ཝཏྟབྦཱ མནུསྶཱ ཨིདྷཱུཔཙརནྟཱིཏི ཀསྨཱ ཝཏྟབྦཾ? ཨཏྟནོ ཨུཔཊྛཱཀེཧི ཨམྷེ གཎྷཱཔེནྟཱིཏི ཝཙནཔཊིམོཙནཏྠཾ.

ཡཱགུཡཱ པཊིསཾཝིདིཏེ ཏསྶཱ པརིཝཱརོ ཨཱཧརིཡྻཏཱིཏི ཡཱགུཡཱ པཊིསཾཝིདིཏཾ ཀཏྭཱ ‘‘ཀིཾ སུདྡྷཡཱགུཡཱ དིནྣཱཡ པཱུཝབྷཏྟཱདཱིནིཔི ཨེཏིསྶཱ ཡཱགུཡཱ པརིཝཱརཾ ཀཏྭཱ དསྶཱམཱ’’ཏི ཨེཝཾ ཡཾ ཀིཉྩི ཨཱཧརནྟི, སབྦཾ པཊིསཾཝིདིཏམེཝ ཧོཏི. བྷཏྟེན པཊིསཾཝིདིཏེཏིཨཱདཱིསུཔི ཨེསེཝ ནཡོ. ཨསུཀཾ ནཱམ ཀུལཾ པཊིསཾཝིདིཏཾ ཀཏྭཱ ཁཱདནཱིཡཱདཱིནི གཧེཏྭཱ གཙྪཏཱིཏི སུཏྭཱ ཨཉྙཱནིཔི ཏེན སདྡྷིཾ ཨཏྟནོ དེཡྻདྷམྨཾ ཨཱཧརནྟི, ཝཊྚཏི. ཡཱགུཡཱ པཊིསཾཝིདིཏཾ ཀཏྭཱ པཱུཝཾ ཝཱ བྷཏྟཾ ཝཱ ཨཱཧརནྟི, ཨེཏམྤི ཝཊྚཏཱིཏི ཀུརུནྡིཡཾ ཝུཏྟཾ.

༥༧༥. གིལཱནསྶཱཏི ¶ ཨཔྤཊིསཾཝིདིཏེཔི གིལཱནསྶ ཨནཱཔཏྟི. པཊིསཾཝིདིཏེ ཝཱ གིལཱནསྶ ཝཱ སེསཀནྟི ཨེཀསྶཏྠཱཡ པཊིསཾཝིདིཏཾ ཀཏྭཱ ཨཱཧཊཾ, ཏསྶ སེསཀཾ ཨཉྙསྶཱཔི བྷུཉྫིཏུཾ ཝཊྚཏི. ཙཏུནྣཾ པཉྩནྣཾ ཝཱ པཊིསཾཝིདིཏཾ ཀཏྭཱ བཧུཾ ཨཱཧཊཾ ཧོཏི, ཨཉྙེསམྤི དཱཏུཾ ཨིཙྪནྟི, ཨེཏམྤི ¶ པཊིསཾཝིདིཏསེསཀམེཝ, སབྦེསམྤི ཝཊྚཏི. ཨཐ ཨདྷིཀམེཝ ཧོཏི, སནྣིདྷིཾ མོཙེཏྭཱ ཋཔིཏཾ དུཏིཡདིཝསེཔི ཝཊྚཏི. གིལཱནསྶ ཨཱཧཊཱཝསེསེཔི ཨེསེཝ ནཡོ. ཡཾ པན ཨཔྤཊིསཾཝིདིཏམེཝ ཀཏྭཱ ཨཱབྷཏཾ, ཏཾ བཧིཨཱརཱམཾ པེསེཏྭཱ པཊིསཾཝིདིཏཾ ཀཱརེཏྭཱ ཨཱཧརཱཔེཏབྦཾ, བྷིཀྑཱུཧི ཝཱ གནྟྭཱ ཨནྟརཱམགྒེ གཧེཏབྦཾ. ཡམྤི ཝིཧཱརམཛ྄ཛྷེན གཙྪནྟཱ ཝཱ ཝནཙརཀཱདཡོ ཝཱ ཝནཏོ ཨཱཧརིཏྭཱ དེནྟི, པུརིམནཡེནེཝ པཊིསཾཝིདིཏཾ ཀཱརེཏབྦཾ. ཏཏྠཛཱཏཀནྟི ཨཱརཱམེ ཛཱཏཀམེཝ; མཱུལཁཱདནཱིཡཱདིཾ ཨཉྙེན ཀཔྤིཡཾ ཀཏྭཱ དིནྣཾ པརིབྷུཉྫཏོ ཨནཱཔཏྟི. སཙེ པན ཏཾ གཱམཾ ཧརིཏྭཱ པཙིཏྭཱ ཨཱཧརནྟི, ན ཝཊྚཏི. པཊིསཾཝིདིཏཾ ཀཱརེཏབྦཾ. སེསམེཏྠ ཨུཏྟཱནམེཝ.

ཀཐིནསམུཊྛཱནཾ – ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཙཏུཏྠཔཱཊིདེསནཱིཡཾ ¶ .

སམནྟཔཱསཱདིཀཱཡ ཝིནཡསཾཝཎྞནཱཡ

པཱཊིདེསནཱིཡཝཎྞནཱ ནིཊྛིཏཱ.

པཱཊིདེསནཱིཡཀཎྜཾ ནིཊྛིཏཾ.

༧. སེཁིཡཀཎྜཾ

༡. པརིམཎྜལཝགྒཝཎྞནཱ

ཡཱནི ¶ ¶ སིཀྑིཏསིཀྑེན, སེཁིཡཱནཱིཏི ཏཱདིནཱ;

བྷཱསིཏཱནི ཨཡཾ དཱནི, ཏེསམྤི ཝཎྞནཱཀྐམོ.

༥༧༦. ཏཏྠ པརིམཎྜལནྟི སམནྟཏོ མཎྜལཾ. ནཱབྷིམཎྜལཾ ཛཱཎུམཎྜལནྟི ཨུདྡྷཾ ནཱབྷིམཎྜལཾ ཨདྷོ ཛཱཎུམཎྜལཾ པཊིཙྪཱདེནྟེན ཛཱཎུམཎྜལསྶ ཧེཊྛཱ ཛངྒྷཊྛིཀཏོ པཊྛཱཡ ཨཊྛངྒུལམཏྟཾ ནིཝཱསནཾ ཨོཏཱརེཏྭཱ ནིཝཱསེཏབྦཾ, ཏཏོ པརཾ ཨོཏཱརེནྟསྶ དུཀྐཊནྟི ཝུཏྟཾ. ཡཐཱ ནིསིནྣསྶ ཛཱཎུམཎྜལཏོ ཧེཊྛཱ ཙཏུརངྒུལམཏྟཾ པཊིཙྪནྣཾ ཧོཏཱིཏི མཧཱཔཙྩརིཡཾ ཝུཏྟཾ; ཨེཝཾ ནིཝཱསེནྟསྶ པན ནིཝཱསནཾ པམཱཎིཀཾ ཝཊྚཏི. ཏཏྲིདཾ པམཱཎཾ – དཱིགྷཏོ མུཊྛིཔཉྩཀཾ, ཏིརིཡཾ ཨཌྜྷཏེཡྻཧཏྠཾ. ཏཱདིསསྶ པན ཨལཱབྷེ ཏིརིཡཾ དྭིཧཏྠཔམཱཎམྤི ཝཊྚཏི ཛཱཎུམཎྜལཔཊིཙྪཱདནཏྠཾ, ནཱབྷིམཎྜལཾ པན ཙཱིཝརེནཱཔི སཀྐཱ པཊིཙྪཱདེཏུནྟི. ཏཏྠ ཨེཀཔཊྚཙཱིཝརཾ ཨེཝཾ ནིཝཏྠམྤི ནིཝཏྠཊྛཱནེ ན ཏིཊྛཏི, དུཔཊྚཾ པན ཏིཊྛཏི.

ཨོལམྦེནྟོ ནིཝཱསེཏི ཨཱཔཏྟི དུཀྐཊསྶཱཏི ཨེཏྠ ན ཀེཝལཾ པུརཏོ ཙ པཙྪཏོ ཙ ཨོལམྦེཏྭཱ ནིཝཱསེནྟསྶེཝ དུཀྐཊཾ, ཡེ པནཉྙེ ‘‘ཏེན ཁོ པན སམཡེན ཚབྦགྒིཡཱ བྷིཀྑཱུ གིཧིནིཝཏྠཾ ནིཝཱསེནྟི ཧཏྠིསོཎྜཀཾ མཙྪཝཱལཀཾ ཙཏུཀྐཎྞཀཾ ཏཱལཝཎྚཀཾ སཏཝལིཀཾ ནིཝཱསེནྟཱི’’ཏིཨཱདིནཱ (ཙཱུལ༹ཝ. ༢༨༠) ནཡེན ཁནྡྷཀེ ནིཝཱསནདོསཱ ཝུཏྟཱ, ཏཐཱ ནིཝཱསེནྟསྶཱཔི དུཀྐཊམེཝ. ཏེ སབྦེ ཝུཏྟནཡེན པརིམཎྜལཾ ནིཝཱསེནྟསྶ ན ཧོནྟི. ཨཡམེཏྠ སངྑེཔོ, ཝིཏྠཱརཏོ པན ཏཏྠེཝ ཨཱཝི བྷཝིསྶཏི.

ཨསཉྩིཙྩཱཏི ¶ པུརཏོ ཝཱ པཙྪཏོ ཝཱ ཨོལམྦེཏྭཱ ནིཝཱསེསྶཱམཱིཏི ཨེཝཾ ཨསཉྩིཙྩ; ཨཐ ཁོ པརིམཎྜལཾཡེཝ ནིཝཱསེསྶཱམཱིཏི ཝིརཛ྄ཛྷིཏྭཱ ཨཔརིམཎྜལཾ ནིཝཱསེནྟསྶ ཨནཱཔཏྟི. ཨསྶཏིཡཱཏི ཨཉྙཝིཧིཏསྶཱཔི ཏཐཱ ནིཝཱསེནྟསྶ ཨནཱཔཏྟི. ཨཛཱནནྟསྶཱཏི ཨེཏྠ ནིཝཱསནཝཏྟཾ ཨཛཱནནྟསྶ མོཀྑོ ནཏྠི. ནིཝཱསནཝཏྟཉྷི སཱདྷུཀཾ ཨུགྒཧེཏབྦཾ, ཏསྶ ཨནུགྒཧཎམེཝསྶ ཨནཱདརིཡཾ. ཏཾ པན སཉྩིཙྩ ཨནུགྒཎྷནྟསྶ ཡུཛྫཏི, ཏསྨཱ ཨུགྒཧིཏཝཏྟོཔི ཡོ ཨཱརུལ༹ྷབྷཱཝཾ ¶ ཝཱ ཨོརུལ༹ྷབྷཱཝཾ ཝཱ ན ཛཱནཱཏི, ཏསྶ ¶ ཨནཱཔཏྟི. ཀུརུནྡིཡཾ པན ‘‘པརིམཎྜལཾ ནིཝཱསེཏུཾ ཨཛཱནནྟསྶ ཨནཱཔཏྟཱི’’ཏི ཝུཏྟཾ. ཡོ པན སུཀྑཛངྒྷོ ཝཱ མཧཱཔིཎྜིཀམཾསོ ཝཱ ཧོཏི, ཏསྶ སཱརུཔྤཏྠཱཡ ཛཱཎུམཎྜལཏོ ཨཊྛངྒུལཱདྷིཀམྤི ཨོཏཱརེཏྭཱ ནིཝཱསེཏུཾ ཝཊྚཏི.

གིལཱནསྶཱཏི ཛངྒྷཱཡ ཝཱ པཱདེ ཝཱ ཝཎོ ཧོཏི, ཨུཀྑིཔིཏྭཱ ཝཱ ཨོཏཱརེཏྭཱ ཝཱ ནིཝཱསེཏུཾ ཝཊྚཏི. ཨཱཔདཱསཱུཏི ཝཱལ༹མིགཱ ཝཱ ཙོརཱ ཝཱ ཨནུབནྡྷནྟི, ཨེཝརཱུཔཱསུ ཨཱཔདཱསུ ཨནཱཔཏྟི. སེསམེཏྠ ཨུཏྟཱནམེཝ.

པཋམཔཱརཱཛིཀསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, དུཀྑཝེདནནྟི. ཕུསྶདེཝཏྠེརོ ‘‘ཨཙིཏྟཀཾ, པཎྞཏྟིཝཛྫཾ, ཏིཝེདན’’ནྟི ཨཱཧ. ཨུཔཏིསྶཏྠེརོ པན ‘‘ཨནཱདརིཡཾ པཊིཙྩཱ’’ཏི ཝུཏྟཏྟཱ ‘‘ལོཀཝཛྫཾ, ཨཀུསལཙིཏྟཾ, དུཀྑཝེདན’’ནྟི ཨཱཧ.

༥༧༧. པརིམཎྜལཾ པཱརུཔིཏབྦནྟི ‘‘ཏེན ཁོ པན སམཡེན ཚབྦགྒིཡཱ བྷིཀྑཱུ གིཧིཔཱརུཏཾ པཱརུཔནྟཱི’’ཏི (ཙཱུལ༹ཝ. ༢༨༠) ཨེཝཾ ཝུཏྟཾ ཨནེཀཔྤཀཱརཾ གིཧིཔཱརུཔནཾ ཨཔཱརུཔིཏྭཱ ཨིདྷ ཝུཏྟནཡེནེཝ ཨུབྷོ ཀཎྞེ སམཾ ཀཏྭཱ པཱརུཔནཝཏྟཾ པཱུརེནྟེན པརིམཎྜལཾ པཱརུཔིཏབྦཾ. ཨིམཱནི ཙ དྭེ སིཀྑཱཔདཱནི ཨཝིསེསེན ཝུཏྟཱནི. ཏསྨཱ ཝིཧཱརེཔི ཨནྟརགྷརེཔི པརིམཎྜལམེཝ ནིཝཱསེཏབྦཉྩ པཱརུཔིཏབྦཉྩཱཏི. སམུཊྛཱནཱདཱིནི པཋམསིཀྑཱཔདེ ཝུཏྟནཡེནེཝ ཝེདིཏབྦཱནི སདྡྷིཾ ཐེརཝཱདེན.

༥༧༨. ཀཱཡཾ ཝིཝརིཏྭཱཏི ཛཏྟུམྤི ཨུརམྤི ཝིཝརིཏྭཱ. སུཔྤཊིཙྪནྣེནཱཏི ན སསཱིསཾ པཱརུཏེན; ཨཐ ཁོ གཎྛིཀཾ པཊིམུཉྩིཏྭཱ ཨནུཝཱཏནྟེན གཱིཝཾ པཊིཙྪཱདེཏྭཱ ཨུབྷོ ཀཎྞེ སམཾ ཀཏྭཱ པཊིསཾཧརིཏྭཱ ཡཱཝ མཎིབནྡྷཾ པཊིཙྪཱདེཏྭཱ ཨནྟརགྷརེ གནྟབྦཾ. དུཏིཡསིཀྑཱཔདེ ¶ – གལཝཱཊཀཏོ པཊྛཱཡ སཱིསཾ མཎིབནྡྷཏོ པཊྛཱཡ ཧཏྠེ པིཎྜིཀམཾསཏོ ཙ པཊྛཱཡ པཱདེ ཝིཝརིཏྭཱ ནིསཱིདིཏབྦཾ.

༥༧༩. ཝཱསཱུཔགཏསྶཱཏི ཝཱསཏྠཱཡ ཨུཔགཏསྶ རཏྟིབྷཱགེ ཝཱ དིཝསབྷཱགེ ཝཱ ཀཱཡཾ ཝིཝརིཏྭཱཔི ནིསཱིདཏོ ཨནཱཔཏྟི.

༥༨༠. སུསཾཝུཏོཏི ཧཏྠཾ ཝཱ པཱདཾ ཝཱ ཨཀཱིལཱ༹པེནྟོ; སུཝིནཱིཏོཏི ཨཏྠོ.

༥༨༢. ཨོཀྑིཏྟཙཀྑཱུཏི ¶ ཧེཊྛཱ ཁིཏྟཙཀྑུ ཧུཏྭཱ. ཡུགམཏྟཾ པེཀྑམཱནོཏི ¶ ཡུགཡུཏྟཀོ ཧི དནྟོ ཨཱཛཱནེཡྻོ ཡུགམཏྟཾ པེཀྑཏི, པུརཏོ ཙཏུཧཏྠཔྤམཱཎཾ བྷཱུམིབྷཱགཾ; ཨིམིནཱཔི ཨེཏྟཀཾ པེཀྑནྟེན གནྟབྦཾ. ཡོ ཨནཱདརིཡཾ པཊིཙྩ ཏཧཾ ཏཧཾ ཨོལོཀེནྟོཏི ཡོ ཏཾཏཾདིསཱབྷཱགཾ པཱསཱདཾ ཀཱུཊཱགཱརཾ ཝཱིཐིཾ ཨོལོཀེནྟོ གཙྪཏི, ཨཱཔཏྟི དུཀྐཊསྶ. ཨེཀསྨིཾ པན ཋཱནེ ཋཏྭཱ ཧཏྠིཨསྶཱདིཔརིསྶཡཱབྷཱཝཾ ཨོལོཀེཏུཾ ཝཊྚཏི. ནིསཱིདནྟེནཱཔི ཨོཀྑིཏྟཙཀྑུནཱཝ ནིསཱིདིཏབྦཾ.

༥༨༤. ཨུཀྑིཏྟཀཱཡཱཏི ཨུཀྑེཔེན; ཨིཏྠམྦྷཱུཏལཀྑཎེ ཀརཎཝཙནཾ ཨེཀཏོ ཝཱ ཨུབྷཏོ ཝཱ ཨུཀྑིཏྟཙཱིཝརོ ཧུཏྭཱཏི ཨཏྠོ. ཨནྟོཨིནྡཁཱིལཏོ པཊྛཱཡ ན ཨེཝཾ གནྟབྦཾ. ནིསིནྣཀཱལེ པན དྷམཀརཎཾ ནཱིཧརནྟེནཱཔི ཙཱིཝརཾ ཨནུཀྑིཔིཏྭཱཝ ནཱིཧརིཏབྦནྟི.

པཋམོ ཝགྒོ.

༢. ཨུཛྫགྒྷིཀཝགྒཝཎྞནཱ

༥༨༦. ཨུཛྫགྒྷིཀཱཡཱཏི མཧཱཧསིཏཾ ཧསནྟོ. ཝུཏྟནཡེནེཝེཏྠ ཀརཎཝཙནཾ.

༥༨༨. ཨཔྤསདྡོ ཨནྟརགྷརེཏི ཨེཏྠ ཀིཏྟཱཝཏཱ ཨཔྤསདྡོ ཧོཏི? དྭཱདསཧཏྠེ གེཧེ ཨཱདིམྷི སངྒྷཏྠེརོ, མཛ྄ཛྷེ དུཏིཡཏྠེརོ, ཨནྟེ ཏཏིཡཏྠེརོཏི ཨེཝཾ ནིསིནྣེསུ སངྒྷཏྠེརོ དུཏིཡེན སདྡྷིཾ མནྟེཏི, དུཏིཡཏྠེརོ ཏསྶ སདྡཉྩེཝ སུཎཱཏི, ཀཐཉྩ ཝཝཏྠཔེཏི. ཏཏིཡཏྠེརོ པན སདྡམེཝ སུཎཱཏི, ཀཐཾ ན ཝཝཏྠཔེཏི. ཨེཏྟཱཝཏཱ ཨཔྤསདྡོ ཧོཏི. སཙེ པན ཏཏིཡཏྠེརོ ཀཐཾ ཝཝཏྠཔེཏི, མཧཱསདྡོ ནཱམ ཧོཏི.

༥༩༠. ཀཱཡཾ ¶ པགྒཧེཏྭཱཏི ནིཙྩལཾ ཀཏྭཱ ཨུཛུཀེན ཀཱཡེན སམེན ཨིརིཡཱཔཐེན གནྟབྦཉྩེཝ ནིསཱིདིཏབྦཉྩ.

༥༩༢. བཱཧུཾ པགྒཧེཏྭཱཏི ནིཙྩལཾ ཀཏྭཱ.

༥༩༤. སཱིསཾ པགྒཧེཏྭཱཏི ནིཙྩལཾ ཨུཛུཾ ཋཔཡིཏྭཱ.

དུཏིཡོ ཝགྒོ.

༣. ཁམྦྷཀཏཝགྒཝཎྞནཱ

༥༩༦-༨. ཁམྦྷཀཏོ ¶ ནཱམ ཀཊིཡཾ ཧཏྠཾ ཋཔེཏྭཱ ཀཏཁམྦྷོ. ཨོགུཎྛིཏོཏི སསཱིསཾ པཱརུཏོ.

༦༠༠. ཨུཀྐུཊིཀཱཡཱཏི ཨེཏྠ ཨུཀྐུཊིཀཱ ཝུཙྩཏི པཎྷིཡོ ཨུཀྑིཔིཏྭཱ ཨགྒཔཱདེཧི ཝཱ, ཨགྒཔཱདེ ཝཱ ཨུཀྑིཔིཏྭཱ པཎྷཱིཧིཡེཝ ཝཱ བྷཱུམིཾ ཕུསནྟསྶ གམནཾ. ཀརཎཝཙནཾ པནེཏྠ ཝུཏྟལཀྑཎམེཝ.

༦༠༡. དུསྶཔལླཏྠིཀཱཡཱཏི ཨེཏྠ ཨཱཡོགཔལླཏྠིཀཱཔི དུསྶཔལླཏྠིཀཱ ཨེཝ.

༦༠༢. སཀྐཙྩནྟི སཏིཾ ཨུཔཊྛཔེཏྭཱ.

༦༠༣. ཨཱཀིརནྟེཔཱིཏི པིཎྜཔཱཏཾ དེནྟེཔི. པཏྟསཉྙཱིཏི པཏྟེ སཉྙཾ ཀཏྭཱ.

༦༠༤. སམསཱུཔཀོ ¶ ནཱམ ཡཏྠ བྷཏྟསྶ ཙཏུཏྠབྷཱགཔྤམཱཎོ སཱུཔོ ཧོཏི. མུགྒསཱུཔོ མཱསསཱུཔོཏི ཨེཏྠ ཀུལཏྠཱདཱིཧི ཀཏསཱུཔཱཔི སངྒཧཾ གཙྪནྟིཡེཝཱཏི མཧཱཔཙྩརིཡཾ ཝུཏྟཾ. རསརསེཏི ཨེཏྠ ཋཔེཏྭཱ དྭེ སཱུཔེ ཨཝསེསཱནི ཨོལོཎཱིསཱཀསཱུཔེཡྻམཙྪརསམཾསརསཱདཱིནི རསརསཱཏི ཝེདིཏབྦཱནི. ཏཾ རསརསཾ བཧུམྤི གཎྷནྟསྶ ཨནཱཔཏྟི.

༦༠༥. སམཏིཏྟིཀནྟི སམཔུཎྞཾ སམབྷརིཏཾ. ཐཱུཔཱིཀཏཾ པིཎྜཔཱཏཾ པཊིགྒཎྷཱཏི, ཨཱཔཏྟི དུཀྐཊསྶཱཏི ¶ ཨེཏྠ ཐཱུཔཱིཀཏོ ནཱམ པཏྟསྶ ཨནྟོམུཁཝཊྚིལེཁཾ ཨཏིཀྐམིཏྭཱ ཀཏོ; པཏྟེ པཀྑིཏྟོ རཙིཏོ པཱུརིཏོཏི ཨཏྠོ. ཨེཝཾ ཀཏཾ ཨགཧེཏྭཱ ཨནྟོམུཁཝཊྚིལེཁཱསམཔྤམཱཎོ གཧེཏབྦོ.

ཏཏྠ ཐཱུཔཱིཀཏཾ ནཱམ ‘‘པཉྩཧི བྷོཛནེཧི ཀཏ’’ནྟི ཨབྷཡཏྠེརོ ཨཱཧ. ཏིཔིཊཀཙཱུལ༹ནཱགཏྠེརོ པན ‘‘པིཎྜཔཱཏོ ནཱམ ཡཱགུཔི བྷཏྟམྤི ཁཱདནཱིཡམྤི ཙུཎྞཔིཎྜོཔི དནྟཀཊྛམྤི དསིཀསུཏྟམྤཱི’’ཏི ཨིདཾ སུཏྟཾ ཝཏྭཱ དསིཀསུཏྟམྤི ཐཱུཔཱིཀཏཾ ན ཝཊྚཏཱིཏི ཨཱཧ. ཏེསཾ ཝཱདཾ སུཏྭཱ བྷིཀྑཱུ རོཧཎཾ གནྟྭཱ ཙཱུལ༹སུམནཏྠེརཾ པུཙྪིཾསུ – ‘‘བྷནྟེ ཐཱུཔཱིཀཏཔིཎྜཔཱཏོ ཀེན པརིཙྪིནྣོ’’ཏི? ཏེསཉྩ ཐེརཱནཾ ཝཱདཾ ཨཱརོཙེསུཾ. ཐེརོ སུཏྭཱ ཨཱཧ ¶ – ‘‘ཨཧོ, ཙཱུལ༹ནཱགོ སཱསནཏོ བྷཊྛོ, ཨཧཾ ཨེཏསྶ སཏྟཀྑཏྟུཾ ཝིནཡཾ ཝཱཙེནྟོ ན ཀདཱཙི ཨེཝཾ ཨཝཙཾ, ཨཡཾ ཀུཏོ ལབྷིཏྭཱ ཨེཝཾ ཝདསཱི’’ཏི. བྷིཀྑཱུ ཐེརཾ ཡཱཙིཾསུ – ‘‘ཀཐེཐ དཱནི, བྷནྟེ, ཀེན པརིཙྪིནྣོ’’ཏི? ‘‘ཡཱཝཀཱལིཀེནཱཝུསོ’’ཏི ཐེརོ ཨཱཧ. ཏསྨཱ ཡཾཀིཉྩི ཡཱགུབྷཏྟཾ ཝཱ ཕལཱཕལཾ ཝཱ ཨཱམིསཛཱཏིཀཾ སམཏིཏྟིཀམེཝ གཧེཏབྦཾ. ཏཉྩ ཁོ ཨདྷིཊྛཱནུཔགེན པཏྟེན, ཨིཏརེན པན ཐཱུཔཱིཀཏམྤི ཝཊྚཏི. ཡཱམཀཱལིཀསཏྟཱཧཀཱལིཀཡཱཝཛཱིཝིཀཱནི པན ཨདྷིཊྛཱནུཔགཔཏྟེཔི ཐཱུཔཱིཀཏཱནི ཝཊྚནྟི. དྭཱིསུ པཏྟེསུ བྷཏྟཾ གཧེཏྭཱ ཨེཀསྨིཾ པཱུརེཏྭཱ ཝིཧཱརཾ པེསེཏུཾ ཝཊྚཏཱིཏི མཧཱཔཙྩརིཡཾ པན ཝུཏྟཾ. ཡཾ པཏྟེ པཀྑིཔིཡམཱནཾ པཱུཝཨུཙྪུཁཎྜཕལཱཕལཱདི ཧེཊྛཱ ཨོརོཧཏི, ཏཾ ཐཱུཔཱིཀཏཾ ནཱམ ན ཧོཏི. པཱུཝཝཊཾསཀཾ ཋཔེཏྭཱ པིཎྜཔཱཏཾ དེནྟི, ཐཱུཔཱིཀཏམེཝ ཧོཏི. པུཔྥཝཊཾསཀཏཀྐོལཀཊུཀཕལཱདིཝཊཾསཀེ པན ཋཔེཏྭཱ དིནྣཾ ཐཱུཔཱིཀཏཾ ན ཧོཏི. བྷཏྟསྶ ཨུཔརི ཐཱལཀཾ ཝཱ པཏྟཾ ཝཱ ཋཔེཏྭཱ པཱུརེཏྭཱ ¶ གཎྷཱཏི, ཐཱུཔཱིཀཏཾ ནཱམ ན ཧོཏི. ཀུརུནྡིཡམྤི ཝུཏྟཾ – ‘‘ཐཱལཀེ ཝཱ པཎྞེ ཝཱ པཀྑིཔིཏྭཱ ཏཾ པཏྟམཏྠཀེ ཋཔེཏྭཱ དེནྟི, པཱཊེཀྐབྷཱཛནཾ ཝཊྚཏཱི’’ཏི.

ཨིདྷ ཨནཱཔཏྟིཡཾ གིལཱནོ ན ཨཱགཏོ, ཏསྨཱ གིལཱནསྶཔི ཐཱུཔཱིཀཏཾ ན ཝཊྚཏི. སབྦཏྠ པན པཊིགྒཧེཏུམེཝ ན ཝཊྚཏི. པཊིགྒཧིཏཾ པན སུཔཊིགྒཧིཏམེཝ ཧོཏི, པརིབྷུཉྫིཏུཾ ཝཊྚཏཱིཏི.

ཏཏིཡོ ཝགྒོ.

༤. སཀྐཙྩཝགྒཝཎྞནཱ

༦༠༦. སཀྐཙྩནྟི ཨེཏྠཱཔི ཨསཀྐཙྩཾ པཊིགྒཧཎེཡེཝ ཨཱཔཏྟི, པཊིགྒཧིཏཾ པན སུཔཊིགྒཧིཏམེཝ. སཀྐཙྩནྟི ཙ པཏྟསཉྙཱིཏི ཙཱཏི ཨུབྷཡཾ ཝུཏྟནཡམེཝ.

༦༠༨. སཔདཱནནྟི ¶ ཏཏྠ ཏཏྠ ཨོདྷིཾ ཨཀཏྭཱ ཨནུཔཊིཔཱཊིཡཱ. སམསཱུཔཀེ ཝཏྟབྦཾ ཝུཏྟམེཝ.

༦༡༠. ཐཱུཔཀཏོཏི མཏྠཀཏོ; ཝེམཛ྄ཛྷཏོཏི ཨཏྠོ.

༦༡༡. པཊིཙྪཱདེཏྭཱ ¶ དེནྟཱིཏི མཱགྷཱཏསམཡཱདཱིསུ པཊིཙྪནྣཾ བྱཉྫནཾ ཀཏྭཱ དེནྟི. ཝིཉྙཏྟིཡཾ ཝཏྟབྦཾ ནཏྠི.

༦༡༤. ཨུཛ྄ཛྷཱནསཉྙཱིསིཀྑཱཔདེཔི གིལཱནོ ན མུཙྩཏི.

༦༡༥. ནཱཏིམཧནྟོ ཀབལོ༹ཏི མཡཱུརཎྜཾ ཨཏིམཧནྟཾ, ཀུཀྐུཊཎྜཾ ཨཏིཁུདྡཀཾ, ཏེསཾ ཝེམཛ྄ཛྷཔྤམཱཎོ. ཁཛྫཀེཏི ཨེཏྠ མཱུལཁཱདནཱིཡཱདི སབྦཾ གཧེཏབྦཾ.

ཙཏུཏྠོ ཝགྒོ.

༥. ཀབལ༹ཝགྒཝཎྞནཱ

༦༡༧. ཨནཱཧཊེཏི ཨནཱཧརིཏེ; མུཁདྭཱརཾ ཨསམྤཱཔིཏེཏི ཨཏྠོ.

༦༡༨. སབྦཾ ཧཏྠནྟི སཀལཧཏྠཾ.

༦༡༩. སཀབལེ༹ནཱཏི ཨེཏྠ དྷམྨཾ ཀཐེནྟོ ཧརཱིཏཀཾ ཝཱ ལཊྛིམདྷུཀཾ ཝཱ མུཁེ པཀྑིཔིཏྭཱ ཀཐེཏི. ཡཏྟཀེན ཝཙནཾ ཨཔརིཔུཎྞཾ ན ཧོཏི, ཏཏྟཀེ མུཁམྷི སནྟེ ཀཐེཏུཾ ཝཊྚཏི.

༦༢༠. པིཎྜུཀྑེཔཀནྟི པིཎྜཾ ཨུཀྑིཔིཏྭཱ ཨུཀྑིཔིཏྭཱ.

༦༢༡. ཀབལཱ༹ཝཙྪེདཀནྟི ཀབལ༹ཾ ཨཝཙྪིནྡིཏྭཱ ཨཝཙྪིནྡིཏྭཱ.

༦༢༢. ཨཝགཎྜཀཱརཀནྟི མཀྐཊོ ཝིཡ གཎྜེ ཀཏྭཱ ཀཏྭཱ.

༦༢༣. ཧཏྠནིདྡྷུནཀནྟི ¶ ཧཏྠཾ ནིདྡྷུནིཏྭཱ ནིདྡྷུནིཏྭཱ.

༦༢༤. སིཏྠཱཝཀཱརཀནྟི སིཏྠཱནི ཨཝཀིརིཏྭཱ ཨཝཀིརིཏྭཱ.

༦༢༥. ཛིཝ྄ཧཱནིཙྪཱརཀནྟི ཛིཝ྄ཧཾ ནིཙྪཱརེཏྭཱ ནིཙྪཱརེཏྭཱ.

༦༢༦. ཙཔུཙཔུཀཱརཀནྟི ཙཔུ ཙཔཱུཏི ཨེཝཾ སདྡཾ ཀཏྭཱ ཀཏྭཱ.

པཉྩམོ ཝགྒོ.

༦. སུརུསུརུཝགྒཝཎྞནཱ

༦༢༧. སུརུསུརུཀཱརཀནྟི ¶ སུརུསུརཱུཏི ཨེཝཾ སདྡཾ ཀཏྭཱ ཀཏྭཱ. དཝོཏི པརིཧཱསཝཙནཾ; ཏཾ ཡེན ཀེནཙི པརིཡཱཡེན ‘‘ཀིཾ བུདྡྷོ ¶ , སིལཀབུདྡྷོ, པཊིབུདྡྷོ; ཀིཾ དྷམྨོ, གོདྷམྨོ, ཨཛདྷམྨོ; ཀིཾ སངྒྷོ, མིགསངྒྷོ, པསུསངྒྷོ’’ཏིཨཱདིནཱ ནཡེན ཏཱིཎི རཏནཱནི ཨཱརབྦྷ ན ཀཱཏབྦནྟི ཨཏྠོ.

༦༢༨. ཧཏྠནིལླེཧཀནྟི ཧཏྠཾ ནིལླེཧིཏྭཱ ནིལླེཧིཏྭཱ. བྷུཉྫནྟེན ཧི ཨངྒུལིམཏྟམྤི ནིལླེཧིཏུཾ ན ཝཊྚཏི. གྷནཡཱགུཕཱཎིཏཔཱཡཱསཱདིཀེ པན ཨངྒུལཱིཧི གཧེཏྭཱ ཨངྒུལིཡོ མུཁེ པཝེསེཏྭཱ བྷུཉྫིཏུཾ ཝཊྚཏི. པཏྟནིལླེཧཀཨོཊྛནིལླེཧཀེསུཔི ཨེསེཝ ནཡོ. ཏསྨཱ ཨེཀངྒུལིཡཱཔི པཏྟོ ན ནིལླེཧིཏབྦོ, ཨེཀཨོཊྛོཔི ཛིཝ྄ཧཱཡ ན ནིལླེཧིཏབྦོ, ཨོཊྛམཾསེཧི ཨེཝ པན གཧེཏྭཱ ཨནྟོ པཝེསེཏུཾ ཝཊྚཏི.

༦༣༡. ཀོཀནདེཏི ཨེཝཾནཱམཀེ. ཀོཀནདནྟི པདུམཾ ཝུཙྩཏི, སོ ཙ པཱསཱདོ པདུམསཎྛཱནོ, ཏེནསྶ ཀོཀནདོཏྭེཝ ནཱམཾ ཨཀཾསུ. ན སཱམིསེན ཧཏྠེན པཱནཱིཡཐཱལཀནྟི ཨེཏཾ པཊིཀྐཱུལཝསེན པཊིཀྑིཏྟཾ, ཏསྨཱ སངྒྷིཀམྤི པུགྒལིཀམྤི གིཧིསནྟཀམྤི ཨཏྟནོ སནྟཀམྤི སངྑམྤི སརཱཝམྤི ཐཱལཀམྤི ན གཧེཏབྦམེཝ, གཎྷནྟསྶ དུཀྐཊཾ. སཙེ པན ཧཏྠསྶ ཨེཀདེསོ ཨཱམིསམཀྑིཏོ ན ཧོཏི, ཏེན པདེསེན གཧེཏུཾ ཝཊྚཏི.

༦༣༢. ཨུདྡྷརིཏྭཱ ཝཱཏི སིཏྠཱནི ཨུདཀཏོ ཨུདྡྷརིཏྭཱ ཨེཀསྨིཾ ཋཱནེ རཱསིཾ ཀཏྭཱ ཨུདཀཾ ¶ ཚཌྜེཏི. བྷིནྡིཏྭཱ ཝཱཏི སིཏྠཱནི བྷིནྡིཏྭཱ ཨུདཀགཏིཀཱནི ཀཏྭཱ ཚཌྜེཏི. པཊིགྒཧེ ཝཱཏི པཊིགྒཧེན པཊིཙྪནྟོ ནཾ པཊིགྒཧེ ཚཌྜེཏི. ནཱིཧརིཏྭཱཏི བཧི ནཱིཧརིཏྭཱ ཚཌྜེཏི; ཨེཝཾ ཚཌྜེནྟསྶ ཨནཱཔཏྟི.

༦༣༤. སེཏཙྪཏྟནྟི ཝཏྠཔལིགུཎྛིཏཾ པཎྜརཙྪཏྟཾ. ཀིལཉྫཙྪཏྟནྟི ཝིལཱིཝཙྪཏྟཾ. པཎྞཙྪཏྟནྟི ཏཱལཔཎྞཱདཱིཧི ཡེཧི ཀེཧིཙི ཀཏཾ. མཎྜལབདྡྷཾ སལཱཀབདྡྷནྟི ཨིདཾ པན ཏིཎྞམྤི ཚཏྟཱནཾ པཉྫརདསྶནཏྠཾ ཝུཏྟཾ. ཏཱནི ཧི མཎྜལབདྡྷཱནི ཙེཝ ཧོནྟི སལཱཀབདྡྷཱནི ཙ. ཡམྤི ཏཏྠཛཱཏཀདཎྜཀེན ཀཏཾ ཨེཀཔཎྞཙྪཏྟཾ ཧོཏི, ཏམྤི ཚཏྟམེཝ. ཨེཏེསུ ཡཾཀིཉྩི ཚཏྟཾ པཱཎིམྷི ¶ ཨསྶཱཏི ཚཏྟཔཱཎི. སོ ཏཾ ཚཏྟཾ དྷཱརཡམཱནོ ཝཱ ཨཾསེ ཝཱ ཀཏྭཱ ཨཱུརུམྷི ཝཱ ཋཔེཏྭཱ ཡཱཝ ཧཏྠེན ན མུཙྩཏི, ཏཱཝསྶ དྷམྨཾ དེསེཏུཾ ན ཝཊྚཏི, དེསེནྟསྶ ཝུཏྟནཡེན དུཀྐཊཾ. སཙེ པནསྶ ཨཉྙོ ཚཏྟཾ ¶ དྷཱརེཏི, ཚཏྟཔཱདུཀཱཡ ཝཱ ཋིཏཾ ཧོཏི, ཧཏྠཏོ ཨཔགཏམཏྟེ ཚཏྟཔཱཎི ནཱམ ན ཧོཏི. ཏསྶ དྷམྨཾ དེསེཏུཾ ཝཊྚཏི. དྷམྨཔརིཙྪེདོ པནེཏྠ པདསོདྷམྨེ ཝུཏྟནཡེནེཝ ཝེདིཏབྦོ.

༦༣༥. དཎྜཔཱཎིསྶཱཏི ཨེཏྠ དཎྜོ ནཱམ མཛ྄ཛྷིམསྶ པུརིསསྶ ཙཏུཧཏྠཔྤམཱཎོ དཎྜཔཱཎིབྷཱཝོ པནསྶ ཚཏྟཔཱཎིམྷི ཝུཏྟནཡེནེཝ ཝེདིཏབྦོ.

༦༣༦. སཏྠཔཱཎིམྷིཔི ཨེསེཝ ནཡོ. ཨསིཾ སནྣཧིཏྭཱ ཋིཏོཔི ཧི སཏྠཔཱཎིསངྑྱཾ ན གཙྪཏི.

༦༣༧. ཨཱཝུདྷཔཱཎིསྶཱཏི ཨེཏྠ ཀིཉྩཱཔི ཝུཏྟཾ – ‘‘ཨཱཝུདྷཾ ནཱམ ཙཱཔོ ཀོདཎྜོ’’ཏི, ཨཐ ཁོ སབྦཱཔི དྷནུཝིཀཏི སདྡྷིཾ སརཝིཀཏིཡཱ ཨཱཝུདྷནྟི ཝེདིཏབྦཾ. ཏསྨཱ སདྡྷིཾ ཝཱ སརེན དྷནུཾ གཧེཏྭཱ སུདྡྷདྷནུཾ ཝཱ སུདྡྷསརཾ ཝཱ སཛིཡདྷནུཾ ཝཱ ནིཛྫིཡདྷནུཾ ཝཱ གཧེཏྭཱ ཋིཏསྶ ཝཱ ནིསིནྣསྶ ཝཱ དྷམྨོ དེསེཏུཾ ན ཝཊྚཏི. སཙེ པནསྶ དྷནུཾ ཀཎྛེཔི པཊིམུཀྐཾ ཧོཏི, ཡཱཝ ཧཏྠེན ན གཎྷཱཏི, ཏཱཝ དྷམྨཾ དེསེཏུཾ ཝཊྚཏིཡེཝཱཏི.

ཚཊྛོ ཝགྒོ.

༧. པཱདུཀཝགྒཝཎྞནཱ

༦༣༨. ཨཀྐནྟསྶཱཏི ¶ ཚཏྟདཎྜཀེ ཨངྒུལནྟརཾ ཨཔྤཝེསེཏྭཱ ཀེཝལཾ པཱདུཀཾ ཨཀྐམིཏྭཱ ཋིཏསྶ. པཊིམུཀྐསྶཱཏི པཊིམུཉྩིཏྭཱ ཋིཏསྶ. ཨུཔཱཧནཱཡཔི ཨེསེཝ ནཡོ. ཨོམུཀྐོཏི པནེཏྠ པཎྷིཀབདྡྷཾ ཨོམུཉྩིཏྭཱ ཋིཏོ ཝུཙྩཏི.

༦༤༠. ཡཱནགཏསྶཱཏི ཨེཏྠ སཙེཔི དྭཱིཧི ཛནེཧི ཧཏྠསངྒྷཱཊེན གཧིཏོ, སཱཊཀེ ཝཱ ཋཔེཏྭཱ ཝཾསེན ཝཡ྄ཧཏི, ཨཡུཏྟེ ཝཱ ཝཡ྄ཧཱདིཀེ ཡཱནེ ¶ , ཝིསངྑརིཏྭཱ ཝཱ ཋཔིཏེ ཙཀྐམཏྟེཔི ནིསིནྣོ ཡཱནགཏོཏྭེཝ སངྑྱཾ གཙྪཏི. སཙེ པན དྭེཔི ཨེཀཡཱནེ ནིསིནྣཱ ཧོནྟི, ཝཊྚཏི. ཝིསུཾ ནིསིནྣེསུཔི ཨུཙྩེ ཡཱནེ ནིསིནྣེན ནཱིཙེ ནིསིནྣསྶ དེསེཏུཾ ཝཊྚཏི, སམཔྤམཱཎེཔི ཝཊྚཏི. པུརིམེ ཡཱནེ ནིསིནྣེན པཙྪིམེ ནིསིནྣསྶ ཝཊྚཏི. པཙྪིམེ པན ཨུཙྩཏརེཔི ནིསིནྣེན དེསེཏུཾ ན ཝཊྚཏི.

༦༤༡. སཡནགཏསྶཱཏི ཨནྟམསོ ཀཊསཱརཀེཔི པཀཏིབྷཱུམིཡམྤི ནིཔནྣསྶ ཨུཙྩེཔི མཉྩཔཱིཋེ ཝཱ བྷཱུམིཔདེསེ ཝཱ ཋིཏེན ནིསིནྣེན ཝཱ དེསེཏུཾ ན ཝཊྚཏི. སཡནགཏེན པན སཡནགཏསྶ ཨུཙྩཏརེ ཝཱ སམཔྤམཱཎེ ཝཱ ནིཔནྣེན དེསེཏུཾ ཝཊྚཏི. ནིཔནྣེན ཙ ཋིཏསྶ ཝཱ ནིསིནྣསྶ ཝཱ དེསེཏུཾ ཝཊྚཏི, ནིསིནྣེནཱཔི ཋིཏསྶ ཝཱ ནིསིནྣསྶ ཝཱ ཝཊྚཏི. ཋིཏེན ཋིཏསྶེཝ ¶ ཝཊྚཏི.

༦༤༢. པལླཏྠིཀཱཡཱཏི ཨཱཡོགཔལླཏྠིཀཱཡ ཝཱ ཧཏྠཔལླཏྠིཀཱཡ ཝཱ དུསྶཔལླཏྠིཀཱཡ ཝཱ ཡཱཡ ཀཱཡཙི པལླཏྠིཀཱཡ ནིསིནྣསྶ ཨགིལཱནསྶ དེསེཏུཾ ན ཝཊྚཏི.

༦༤༣. ཝེཋིཏསཱིསསྶཱཏི དུསྶཝེཋནེན ཝཱ མོལི༹ཨཱདཱིཧི ཝཱ ཡཐཱ ཀེསནྟོ ན དིསྶཏི; ཨེཝཾ ཝེཋིཏསཱིསསྶ.

༦༤༤. ཨོགུཎྛིཏསཱིསསྶཱཏི སསཱིསཾ པཱརུཏསྶ.

༦༤༥. ཚམཱཡཾ ནིསིནྣེནཱཏི བྷཱུམིཡཾ ནིསིནྣེན. ཨཱསནེ ནིསིནྣསྶཱཏི ཨནྟམསོ ཝཏྠམྤི ཏིཎཱནིཔི སནྠརིཏྭཱ ནིསིནྣསྶ.

༦༤༧. ཚཔཀསྶཱཏི ¶ ཙཎྜཱལསྶ. ཚཔཀཱིཏི ཙཎྜཱལཱི. ནིལཱིནོཏི པཊིཙྪནྣོ ཧུཏྭཱ. ཡཏྲ ཧི ནཱམཱཏི ཡོ ཧི ནཱམ. སབྦམིདཾ ཙརིམཾ ཀཏནྟི ཏཏྠེཝ པརིཔཏཱིཏི ‘‘སབྦོ ཨཡཾ ལོཀོ སངྐརཾ གཏོ ནིམྨརིཡཱདོ’’ཏི ཨིམཾ ཝཙནཾ ཝཏྭཱ ཏཏྠེཝ ཏེསཾ དྭིནྣམྤི ཨནྟརཱ རུཀྑཏོ པཏིཏོ. པཏིཏྭཱ ཙ པན ཨུབྷིནྣམྤི པུརཏོ ཋཏྭཱ ཨིམཾ གཱཐཾ ཨབྷཱསི –

‘‘ཨུབྷོ ཨཏྠཾ ན ཛཱནནྟི…པེ… ཨསྨཱ ཀུམྦྷམིཝཱབྷིདཱ’’ཏི.

ཏཏྠ ཨུབྷོ ཨཏྠཾ ན ཛཱནནྟཱིཏི དྭེཔི ཛནཱ པཱལི༹ཡཱ ཨཏྠཾ ན ཛཱནནྟི. དྷམྨཾ ན པསྶརེཏི པཱལི༹ཾ ན པསྶནྟི. ཀཏམེ ཏེ ཨུབྷོཏི? ‘‘ཡོ ཙཱཡཾ མནྟཾ ¶ ཝཱཙེཏི, ཡོ ཙཱདྷམྨེནདྷཱིཡཏཱི’’ཏི. ཨེཝཾ བྲཱཧྨཎཉྩ རཱཛཱནཉྩ ཨུབྷོཔི ཨདྷམྨིཀབྷཱཝེ ཋཔེསི.

ཏཏོ བྲཱཧྨཎོ སཱལཱིནནྟི གཱཐམཱཧ. ཏསྶཏྠོ – ཛཱནཱམཧཾ བྷོ ‘‘ཨཡཾ ཨདྷམྨོ’’ཏི; ཨཔི ཙ ཁོ མཡཱ དཱིགྷརཏྟཾ སཔུཏྟདཱརཔརིཛནེན རཉྙོ སནྟཀོ སཱལཱིནཾ ཨོདནོ བྷུཏྟོ. སུཙིམཾསཱུཔསེཙནོཏི ནཱནཔྤཀཱརཝིཀཏིསམྤཱདིཏཾ སུཙིམཾསཱུཔསེཙནཾ མིསྶཱིཀརཎམསྶཱཏི སུཙིམཾསཱུཔསེཙནོ. ཏསྨཱ དྷམྨེ ན ཝཏྟཱམཱིཏི ཡསྨཱ ཨེཝཾ མཡཱ རཉྙོ ཨོདནོ བྷུཏྟོ, ཨཉྙེ ཙ བཧཱུ ལཱབྷཱ ལདྡྷཱ, ཏསྨཱ དྷམྨེ ཨཧཾ ན ཝཏྟཱམི ཨུདརེ བདྡྷོ ཧུཏྭཱ, ན དྷམྨཾ ཨཛཱནནྟོ. ཨཡཉྷི དྷམྨོ ཨརིཡེཧི ཝཎྞིཏོ པསཏྠོ ཐོམིཏོཏི ཛཱནཱམི.

ཨཐ ནཾ ཚཔཀོ ‘‘དྷིརཏྠཱུ’’ཏིཨཱདིནཱ གཱཐཱདྭཡེན ཨཛ྄ཛྷབྷཱསི. ཏསྶཏྠོ – ཡོ ཏཡཱ དྷནལཱབྷོ ཙ ཡསལཱབྷོ ཙ ལདྡྷོ, དྷིརཏྠུ ཏཾ དྷནལཱབྷཾ ཡསལཱབྷཉྩ ¶ བྲཱཧྨཎ. ཀསྨཱ? ཡསྨཱ ཨཡཾ ཏཡཱ ལདྡྷོ ལཱབྷོ ཨཱཡཏིཾ ཨཔཱཡེསུ ཝིནིཔཱཏནཧེཏུནཱ སམྤཏི ཙ ཨདྷམྨཙརཎེན ཝུཏྟི ནཱམ ཧོཏི. ཨེཝརཱུཔཱ ཡཱ ཝུཏྟི ཨཱཡཏིཾ ཝིནིཔཱཏེན ཨིདྷ ཨདྷམྨཙརཎེན ཝཱ ནིཔྤཛྫཏི, ཀིཾ ཏཱཡ ཝུཏྟིཡཱ? ཏེན ཝུཏྟཾ –

‘‘དྷིརཏྠུ ཏཾ དྷནལཱབྷཾ, ཡསལཱབྷཉྩ བྲཱཧྨཎ;

ཡཱ ཝུཏྟི ཝིནིཔཱཏེན, ཨདྷམྨཙརཎེན ཝཱ’’ཏི.

པརིབྦཛ མཧཱབྲཧྨེཏི མཧཱབྲཱཧྨཎ ཨིཏོ དིསཱ སཱིགྷཾ པལཱཡསྶུ. པཙནྟཉྙེཔི པཱཎིནོཏི ཨཉྙེཔི སཏྟཱ པཙནྟི ཙེཝ བྷུཉྫནྟི ཙ; ན ཀེཝལཾ ཏྭཉྩེཝ རཱཛཱ ཙ. མཱ ཏྭཾ ཨདྷམྨོ ཨཱཙརིཏོ ཨསྨཱ ཀུམྦྷམིཝཱབྷིདཱཏི སཙེ ཧི ཏྭཾ ཨིཏོ ཨཔརིབྦཛིཏྭཱ ཨིམཾ ཨདྷམྨཾ ཨཱཙརིསྶསི ¶ , ཏཏོ ཏྭཾ སོ ཨདྷམྨོ ཨེཝཾ ཨཱཙརིཏོ ཡཐཱ ཨུདཀཀུམྦྷཾ པཱསཱཎོ བྷིནྡེཡྻ; ཨེཝཾ བྷེཙྪཏི, ཏེན མཡཾ ཏཾ ཝདཱམ –

‘‘པརིབྦཛ མཧཱབྲཧྨེ, པཙནྟཉྙེཔི པཱཎིནོ;

མཱ ཏྭཾ ཨདྷམྨོ ཨཱཙརིཏོ, ཨསྨཱ ཀུམྦྷམིཝཱབྷིདཱ’’ཏི.

ཨུཙྩེ ཨཱསནེཏི ཨནྟམསོ བྷཱུམིཔྤདེསེཔི ཨུནྣཏཊྛཱནེ ནིསིནྣསྶ དེསེཏུཾ ན ཝཊྚཏི.

༦༤༨. ན ¶ ཋིཏོ ནིསིནྣསྶཱཏི སཙེཔི ཐེརུཔཊྛཱནཾ གནྟྭཱ ཋིཏཾ དཧརབྷིཀྑུཾ ཨཱསནེ ནིསིནྣོ མཧཱཐེརོ པཉྷཾ པུཙྪཏི, ན ཀཐེཏབྦཾ. གཱརཝེན པན ཐེརཾ ཨུཊྛཧིཏྭཱ པུཙྪཐཱཏི ཝཏྟུཾ ན སཀྐཱ, པསྶེ ཋིཏབྷིཀྑུསྶ ཀཐེམཱིཏི ཀཐེཏུཾ ཝཊྚཏི.

༦༤༩. ན པཙྪཏོ གཙྪནྟེནཱཏི ཨེཏྠ སཙེ པུརཏོ གཙྪནྟོ པཙྪཏོ གཙྪནྟཾ པཉྷཾ པུཙྪཏི, ན ཀཐེཏབྦཾ. པཙྪིམསྶ བྷིཀྑུནོ ཀཐེམཱིཏི ཀཐེཏུཾ ཝཊྚཏི. སདྡྷིཾ ཨུགྒཧིཏདྷམྨཾ པན སཛ྄ཛྷཱཡིཏུཾ ཝཊྚཏི. སམདྷུརེན གཙྪནྟསྶ ཀཐེཏུཾ ཝཊྚཏི.

༦༥༠. ན ཨུཔྤཐེནཱཏི ཨེཏྠཱཔི སཙེ དྭེཔི སཀཊཔཐེ ཨེཀེཀཙཀྐཔཐེན ཝཱ ཨུཔྤཐེན ཝཱ སམདྷུརཾ གཙྪནྟི, ཝཊྚཏི.

༦༥༡. ཨསཉྩིཙྩཱཏི པཊིཙྪནྣཊྛཱནཾ གཙྪནྟསྶ སཧསཱ ཨུཙྩཱརོ ཝཱ པསྶཱཝོ ཝཱ ནིཀྑམཏི, ཨསཉྩིཙྩ ཀཏོ ནཱམ ཨནཱཔཏྟི.

༦༥༢. ན ཧརིཏེཏི ཨེཏྠ ཡམྤི ¶ ཛཱིཝརུཀྑསྶ མཱུལཾ པཐཝིཡཾ དིསྶམཱནཾ གཙྪཏི, སཱཁཱ ཝཱ བྷཱུམིལགྒཱ གཙྪཏི, སབྦཾ ཧརིཏསངྑཱཏམེཝ. ཁནྡྷེ ནིསཱིདིཏྭཱ ཨཔྤཧརིཏཊྛཱནེ པཱཏེཏུཾ ཝཊྚཏི. ཨཔྤཧརིཏཊྛཱནཾ ཨོལོཀེནྟསྶེཝ སཧསཱ ནིཀྑམཏི, གིལཱནཊྛཱནེ ཋིཏོ ཧོཏི, ཝཊྚཏི. ཨཔྤཧརིཏེ ཀཏོཏི ཨཔྤཧརིཏཾ ཨལབྷནྟེན ཏིཎཎྜུཔཀཾ ཝཱ པལཱལཎྜུཔཀཾ ཝཱ ཋཔེཏྭཱ ཀཏོཔི པཙྪཱ ཧརིཏཾ ཨོཏྠརཏི, ཝཊྚཏིཡེཝ. ཁེལེ༹ན ཙེཏྠ སིངྒྷཱཎིཀཱཔི སངྒཧིཏཱཏི མཧཱཔཙྩརིཡཾ ཝུཏྟཾ.

༦༥༣. ན ཨུདཀེཏི ཨེཏཾ པརིབྷོགཨུདཀམེཝ སནྡྷཱཡ ཝུཏྟཾ, ཝཙྩཀུཊིསམུདྡཱདིཨུདཀེསུ པན ¶ ཨཔརིབྷོགེསུ ཨནཱཔཏྟི. དེཝེ ཝསྶནྟེ སམནྟཏོ ཨུདཀོགྷོ ཧོཏི, ཨནུདཀཊྛཱནཾ ཨོལོཀེནྟསྶེཝ ནིཀྑམཏི, ཝཊྚཏི. མཧཱཔཙྩརིཡཾ ཝུཏྟཾ – ‘‘ཨེཏཱདིསེ ཀཱལེ ཨནུདཀཊྛཱནཾ ཨལབྷནྟེན ཀཱཏུཾ ཝཊྚཏཱི’’ཏི. སེསཾ སབྦསིཀྑཱཔདེསུ ཨུཏྟཱནཏྠམེཝ.

སཏྟམོ ཝགྒོ.

སམུཊྛཱནཱདིདཱིཔནཏྠཱཡ པནེཏྠ ཨིདཾ པཀིཎྞཀཾ – ཨུཛྫགྒྷིཀཨུཙྩཱསདྡཔཊིསཾཡུཏྟཱནི ཙཏྟཱརི, སཀབལེ༹ན མུཁེན བྱཱཧརཎཾ ཨེཀཾ, ཚམཱནཱིཙཱསནཋཱནཔཙྪཏོགམནཨུཔྤཐགམནཔཊིསཾཡུཏྟཱནི པཉྩཱཏི ཨིམཱནི དས སིཀྑཱཔདཱནི སམནུབྷཱསནསམུཊྛཱནཱནི ཀཱཡཝཱཙཱཙིཏྟཏོ སམུཊྛཧནྟི, ཀིརིཡཱནི, སཉྙཱཝིམོཀྑཱནི ¶ , སཙིཏྟཀཱནི, ལོཀཝཛྫཱནི, ཀཱཡཀམྨཝཙཱིཀམྨཱནི, ཨཀུསལཙིཏྟཱནི, དུཀྑཝེདནཱནཱིཏི.

སཱུཔོདནཝིཉྙཏྟིསིཀྑཱཔདཾ ཐེཡྻསཏྠསམུཊྛཱནཾ ཀཱཡཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཚཏྟཔཱཎིདཎྜཔཱཎིསཏྠཔཱཎིཨཱཝུདྷཔཱཎིཔཱདུཀཨུཔཱཧནཡཱནསཡནཔལླཏྠིཀཝེཋིཏཨོགུཎྛིཏནཱམཀཱནི ཨེཀཱདས སིཀྑཱཔདཱནི དྷམྨདེསནསམུཊྛཱནཱནི ཝཱཙཱཙིཏྟཏོ སམུཊྛཧནྟི, ཀིརིཡཱཀིརིཡཱནི, སཉྙཱཝིམོཀྑཱནི, སཙིཏྟཀཱནི, ལོཀཝཛྫཱནི, ཝཙཱིཀམྨཱནི, ཨཀུསལཙིཏྟཱནི, དུཀྑཝེདནཱནཱིཏི.

ཨཝསེསཱནི ཏེཔཎྞཱས སིཀྑཱཔདཱནི པཋམཔཱརཱཛིཀསམུཊྛཱནཱནཱིཏི.

སབྦསེཁིཡེསུ ཨཱབཱདྷཔཙྩཡཱ ཨནཱཔཏྟི, ཐཱུཔཱིཀཏཔིཎྜཔཱཏེ སཱུཔབྱཉྫནེན པཊིཙྪཱདནེ ཨུཛ྄ཛྷཱནསཉྙིམྷཱིཏི ཏཱིསུ སིཀྑཱཔདེསུ གིལཱནོ ནཏྠཱིཏི.

སེཁིཡཝཎྞནཱ ནིཊྛིཏཱ.

སེཁིཡཀཎྜཾ ནིཊྛིཏཾ.

༨. སཏྟཱདྷིཀརཎསམཐཱ

༦༥༥. ཨདྷིཀརཎསམཐེསུ ¶ ¶ – སཏྟཱཏི ཏེསཾ དྷམྨཱནཾ སངྑྱཱཔརིཙྪེདོ. ཙཏུབྦིདྷཾ ཨདྷིཀརཎཾ སམེནྟི ཝཱུཔསམེནྟཱིཏི ཨདྷིཀརཎསམཐཱ. ཏེསཾ ཝིཏྠཱརོ ཁནྡྷཀེ ཙ པརིཝཱརེ ཙ ཝུཏྟོ, ཏསྶཏྠཾ ཏཏྠེཝ ཝཎྞཡིསྶཱམ. སེསཾ སབྦཏྠ ཨུཏྟཱནམེཝཱཏི.

སམནྟཔཱསཱདིཀཱཡ ཝིནཡསཾཝཎྞནཱཡ

བྷིཀྑུཝིབྷངྒཝཎྞནཱ ནིཊྛིཏཱ.

ཨནནྟརཱཡེན ཡཐཱ, ནིཊྛིཏཱ ཝཎྞནཱ ཨཡཾ;

ཨནནྟརཱཡེན ཏཐཱ, སནྟིཾ པཔྤོནྟུ པཱཎིནོ.

ཙིརཾ ཏིཊྛཏུ སདྡྷམྨོ, ཀཱལེ ཝསྶཾ ཙིརཾ པཛཾ;

ཏཔྤེཏུ དེཝོ དྷམྨེན, རཱཛཱ རཀྑཏུ མེདནིནྟི.

མཧཱཝིབྷངྒོ ནིཊྛིཏོ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

བྷིཀྑུནཱིཝིབྷངྒཝཎྞནཱ

༡. པཱརཱཛིཀཀཎྜཾ (བྷིཀྑུནཱིཝིབྷངྒཝཎྞནཱ)

ཡོ ¶ ¶ ¶ བྷིཀྑཱུནཾ ཝིབྷངྒསྶ, སངྒཧིཏོ ཨནནྟརཾ;

བྷིཀྑུནཱིནཾ ཝིབྷངྒསྶ, ཏསྶ སཾཝཎྞནཱཀྐམོ.

པཏྟོ ཡཏོ ཏཏོ ཏསྶ, ཨཔུབྦཔདཝཎྞནཾ;

ཀཱཏུཾ པཱརཱཛིཀེ ཏཱཝ, ཧོཏི སཾཝཎྞནཱ ཨཡཾ.

༡. པཋམཔཱརཱཛིཀསིཀྑཱཔདཝཎྞནཱ

༦༥༦. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི…པེ… སཱལ༹ྷོ མིགཱརནཏྟཱཏི ཨེཏྠ སཱལ༹ྷོཏི ཏསྶ ནཱམཾ; མིགཱརམཱཏུཡཱ པན ནཏྟཱ ཧོཏི, ཏེན ཝུཏྟཾ – ‘‘མིགཱརནཏྟཱ’’ཏི. ནཝཀམྨིཀནྟི ནཝཀམྨཱདྷིཊྛཱཡིཀཾ. པཎྜིཏཱཏི པཎྜིཙྩེན སམནྣཱགཏཱ. བྱཏྟཱཏི ཝེཡྻཏྟིཀེན སམནྣཱགཏཱ. མེདྷཱཝིནཱིཏི པཱལི༹གྒཧཎེ སཏིཔུབྦངྒམཱཡ པཉྙཱཡ ཨཏྠགྒཧཎེ པཉྙཱཔུབྦངྒམཱཡ སཏིཡཱ སམནྣཱགཏཱ. དཀྑཱཏི ཚེཀཱ; ཨཝིརཛ྄ཛྷིཏྭཱ སཱིགྷཾ ཀཏྟབྦཀཱརིནཱིཏི ཨཏྠོ. ཨནལསཱཏི ཨཱལསིཡཝིརཧིཏཱ. ཏཏྲུཔཱཡཱཡཱཏི ཏེསུ ཏེསུ ཀམྨེསུ ཨུཔཱཡབྷཱུཏཱཡ. ཝཱིམཾསཱཡཱཏི ཀཏྟབྦཀམྨུཔཔརིཀྑཱཡ ¶ . སམནྣཱགཏཱཏི སམྤཡུཏྟཱ. ཨལཾ ཀཱཏུནྟི སམཏྠཱ ཏཾ ཏཾ ཀམྨཾ ཀཱཏུཾ. ཨལཾ སཾཝིདྷཱཏུནྟི ཨེཝཉྩ ཨེཝཉྩ ཨིདཾ ཧོཏཱུཏི ཨེཝཾ སཾཝིདཧིཏུམྤི སམཏྠཱ. ཀཏཱཀཏཾ ཛཱནིཏུནྟི ཀཏཉྩ ཨཀཏཉྩ ཛཱནིཏུཾ. ཏེཏི ཏེ ཨུབྷོ; སཱ ཙ སུནྡརཱིནནྡཱ སོ ཙ སཱལ༹ྷོཏི ཨཏྠོ. བྷཏྟགྒེཏི པརིཝེསནཊྛཱནེ. ནིཀཱུཊེཏི ཀོཎསདིསཾ ཀཏྭཱ དསྶིཏེ ¶ གམྦྷཱིརེ. ཝིསྶརོ མེ བྷཝིསྶཏཱིཏི ཝིརཱུཔོ མེ སརོ ¶ བྷཝིསྶཏི; ཝིཔྤཀཱརསདྡོ བྷཝིསྶཏཱིཏི ཨཏྠོ. པཏིམཱནེནྟཱིཏི ཨཔེཀྑམཱནཱ. ཀྱཱཧནྟི ཀིཾ ཨཧཾ. ཛརཱདུབྦལཱཏི ཛརཱཡ དུབྦལཱ. ཙརཎགིལཱནཱཏི པཱདརོགེན སམནྣཱགཏཱ.

༦༥༧-༨. ཨཝསྶུཏཱཏི ཀཱཡསཾསགྒརཱགེན ཨཝསྶུཏཱ; ཏིནྟཱ ཀིལིནྣཱཏི ཨཏྠོ. པདབྷཱཛནེ པནསྶ ཏམེཝ རཱགཾ གཧེཏྭཱ ‘‘སཱརཏྟཱ’’ཏིཨཱདི ཝུཏྟཾ. ཏཏྠ སཱརཏྟཱཏི ཝཏྠཾ ཝིཡ རངྒཛཱཏེན ཀཱཡསཾསགྒརཱགེན སུཊྛུ རཏྟཱ. ཨཔེཀྑཝཏཱིཏི ཏསྶེཝ རཱགསྶ ཝསེན ཏསྨིཾ པུརིསེ པཝཏྟཱཡ ཨཔེཀྑཱཡ སམནྣཱགཏཱ. པཊིབདྡྷཙིཏྟཱཏི ཏེན རཱགེན ཏསྨིཾ པུརིསེ བནྡྷིཏྭཱ ཋཔིཏཙིཏྟཱ ཝིཡ. ཨེས ནཡོ དུཏིཡཔདཝིབྷངྒེཔི. པུརིསཔུགྒལསྶཱཏི པུརིསསངྑཱཏསྶ པུགྒལསྶ. ཨདྷཀྑཀནྟི ཨཀྑཀཱནཾ ཨདྷོ. ཨུབྦྷཛཱཎུམཎྜལནྟི ཛཱཎུམཎྜལཱནཾ ཨུཔརི. པདབྷཱཛནེ པན པདཔཊིཔཱཊིཡཱ ཨེཝ ‘‘ཧེཊྛཀྑཀཾ ཨུཔརིཛཱཎུམཎྜལ’’ནྟི ཝུཏྟཾ. ཨེཏྠ ཙ ཨུབྦྷཀཔྤརམྤི ཨུབྦྷཛཱཎུམཎྜལེནེཝ སངྒཧིཏཾ. སེསཾ མཧཱཝིབྷངྒེ ཝུཏྟནཡེནེཝ ཝེདིཏབྦཾ. པུརིམཱཡོ ཨུཔཱདཱཡཱཏི སཱདྷཱརཎཔཱརཱཛིཀེཧི པཱརཱཛིཀཱཡོ ཙཏསྶོ ཨུཔཱདཱཡཱཏི ཨཏྠོ. ཨུབྦྷཛཱཎུམཎྜལིཀཱཏི ཨིདཾ པན ཨིམིསྶཱ པཱརཱཛིཀཱཡ ནཱམམཏྟཾ, ཏསྨཱ པདབྷཱཛནེ ན ཝིཙཱརིཏཾ.

༦༥༩. ཨེཝཾ ཨུདྡིཊྛསིཀྑཱཔདཾ པདཱནུཀྐམེན ཝིབྷཛིཏྭཱ ཨིདཱནི ཨཝསྶུཏཱདིབྷེདེན ཨཱཔཏྟིབྷེདཾ དསྶེཏུཾ ‘‘ཨུབྷཏོཨཝསྶུཏེ’’ཏིཨཱདིམཱཧ. ཏཏྠ ཨུབྷཏོཨཝསྶུཏེཏི ཨུབྷཏོཨཝསྶཝེ; བྷིཀྑུནིཡཱ ཙེཝ པུརིསསྶ ཙ ཀཱཡསཾསགྒརཱགེན ཨཝསྶུཏབྷཱཝེ སཏཱིཏི ཨཏྠོ. ཀཱཡེན ཀཱཡཾ ཨཱམསཏཱིཏི བྷིཀྑུནཱི ཡཐཱཔརིཙྪིནྣེན ཀཱཡེན པུརིསསྶ ཡཾཀིཉྩི ཀཱཡཾ པུརིསོ ཝཱ ཡེན ཀེནཙི ཀཱཡེན བྷིཀྑུནིཡཱ ཡཐཱཔརིཙྪིནྣཾ ཀཱཡཾ ཨཱམསཏི, ཨུབྷཡཐཱཔི བྷིཀྑུནིཡཱ པཱརཱཛིཀཾ. ཀཱཡེན ཀཱཡཔཊིབདྡྷནྟི ཝུཏྟཔྤཀཱརེནེཝ ཨཏྟནོ ཀཱཡེན པུརིསསྶ ཀཱཡཔཊིབདྡྷཾ. ཨཱམསཏཱིཏི ཨེཏྠ སཡཾ ཝཱ ཨཱམསཏུ, ཏསྶ ཝཱ ཨཱམསནཾ སཱདིཡཏུ, ཐུལླཙྩཡམེཝ. ཀཱཡཔཊིབདྡྷེན ཀཱཡནྟི ཨཏྟནོ ཝུཏྟཔྤཀཱརཀཱཡཔཊིབདྡྷེན པུརིསསྶ ཀཱཡཾ. ཨཱམསཏཱིཏི ཨིདྷཱཔི སཡཾ ཝཱ ཨཱམསཏུ, ཏསྶ ཝཱ ཨཱམསནཾ སཱདིཡཏུ, ཐུལླཙྩཡམེཝ. ཨཝསེསཔདེསུཔི ཨིམིནཱཝ ¶ ནཡེན ཝིནིཙྪཡོ ཝེདིཏབྦོ.

སཙེ ¶ ¶ པན བྷིཀྑུ ཙེཝ བྷིཀྑུནཱི ཙ ཧོཏི, ཏཏྲ ཙེ བྷིཀྑུནཱི ཨཱམསཏི, བྷིཀྑུ ནིཙྩལོ ཧུཏྭཱ ཙིཏྟེན སཱདིཡཏི, བྷིཀྑུ ཨཱཔཏྟིཡཱ ན ཀཱརེཏབྦོ. སཙེ བྷིཀྑུ ཨཱམསཏི, བྷིཀྑུནཱི ནིཙྩལཱ ཧུཏྭཱ ཙིཏྟེནེཝ ཨདྷིཝཱསེཏི, ཀཱཡངྒཾ ཨཙོཔཡམཱནཱཔི པཱརཱཛིཀཀྑེཏྟེ པཱརཱཛིཀེན, ཐུལླཙྩཡཀྑེཏྟེ ཐུལླཙྩཡེན, དུཀྐཊཀྑེཏྟེ དུཀྐཊེན ཀཱརེཏབྦཱ. ཀསྨཱ? ‘‘ཀཱཡསཾསགྒཾ སཱདིཡེཡྻཱ’’ཏི ཝུཏྟཏྟཱ. ཨཡཾ ཨཊྛཀཐཱསུ ཝིནིཙྪཡོ. ཨེཝཾ པན སཏི ཀིརིཡཱསམུཊྛཱནཏཱ ན དིསྶཏི, ཏསྨཱ ཏབྦཧུལནཡེན སཱ ཝུཏྟཱཏི ཝེདིཏབྦཱ.

༦༦༠. ཨུབྦྷཀྑཀནྟི ཨཀྑཀཱནཾ ཨུཔརི. ཨདྷོཛཱཎུམཎྜལནྟི ཛཱཎུམཎྜལཱནཾ ཧེཊྛཱ. ཨེཏྠ ཙ ཨདྷོཀཔྤརམྤི ཨདྷོཛཱཎུམཎྜལེནེཝ སངྒཧིཏཾ.

༦༦༢. ཨེཀཏོཨཝསྶུཏེཏི ཨེཏྠ ཀིཉྩཱཔི ཨེཀཏོཏི ཨཝིསེསེན ཝུཏྟཾ, ཏཐཱཔི བྷིཀྑུནིཡཱ ཨེཝ ཨཝསྶུཏེ སཏི ཨཡཾ ཨཱཔཏྟིབྷེདོ ཝུཏྟོཏི ཝེདིཏབྦོ.

ཏཏྲཱཡཾ ཨཱདིཏོ པཊྛཱཡ ཝིནིཙྪཡོ – བྷིཀྑུནཱི ཀཱཡསཾསགྒརཱགེན ཨཝསྶུཏཱ, པུརིསོཔི ཏཐེཝ. ཨདྷཀྑཀེ ཨུབྦྷཛཱཎུམཎྜལེ ཀཱཡཔྤདེསེ ཀཱཡསཾསགྒསཱདིཡནེ སཏི བྷིཀྑུནིཡཱ པཱརཱཛིཀཾ. བྷིཀྑུནིཡཱ ཀཱཡསཾསགྒརཱགོ, པུརིསསྶ མེཐུནརཱགོ ཝཱ གེཧསྶིཏཔེམཾ ཝཱ སུདྡྷཙིཏྟཾ ཝཱ ཧོཏུ, ཐུལླཙྩཡམེཝ. བྷིཀྑུནིཡཱ མེཐུནརཱགོ, པུརིསསྶ ཀཱཡསཾསགྒརཱགོ ཝཱ མེཐུནརཱགོ ཝཱ གཧེསྶིཏཔེམཾ ཝཱ སུདྡྷཙིཏྟཾ ཝཱ ཧོཏུ, དུཀྐཊཾ. བྷིཀྑུནིཡཱ གེཧསྶིཏཔེམཾ, པུརིསསྶ ཝུཏྟེསུ ཙཏཱུསུ ཡཾ ཝཱ ཏཾ ཝཱ ཧོཏུ, དུཀྐཊམེཝ. བྷིཀྑུནིཡཱ སུདྡྷཙིཏྟཾ, པུརིསསྶ ཝུཏྟེསུ ཙཏཱུསུ ཡཾ ཝཱ ཏཾ ཝཱ ཧོཏུ, ཨནཱཔཏྟི.

སཙེ པན བྷིཀྑུ ཙེཝ ཧོཏི བྷིཀྑུནཱི ཙ ཨུབྷིནྣཾ ཀཱཡསཾསགྒརཱགོ, བྷིཀྑུསྶ སངྒྷཱདིསེསོ, བྷིཀྑུནིཡཱ པཱརཱཛིཀཾ. བྷིཀྑུནིཡཱ ཀཱཡསཾསགྒརཱགོ, བྷིཀྑུསྶ མེཐུནརཱགོ ཝཱ གེཧསྶིཏཔེམཾ ཝཱ, བྷིཀྑུནིཡཱ ཐུལླཙྩཡཾ, བྷིཀྑུསྶ དུཀྐཊཾ. ཨུབྷིནྣཾ མེཐུནརཱགོ ཝཱ གེཧསྶིཏཔེམཾ ཝཱ, ཨུབྷིནྣམྤི དུཀྐཊམེཝ. ཡསྶ ཡཏྠ སུདྡྷཙིཏྟཾ, ཏསྶ ཏཏྠ ཨནཱཔཏྟི. ཨུབྷིནྣམྤི སུདྡྷཙིཏྟཾ, ཨུབྷིནྣམྤི ཨནཱཔཏྟི.

༦༦༣. ཨནཱཔཏྟི ¶ ཨསཉྩིཙྩཱཏིཨཱདཱིསུ ཝིརཛ྄ཛྷིཏྭཱ ཝཱ ཨཱམསནྟིཡཱ ཨཉྙཝིཧིཏཱཡ ཝཱ ‘‘ཨཡཾ པུརིསོ ཝཱ ཨིཏྠཱི ཝཱ’’ཏི ཨཛཱནནྟིཡཱ ཝཱ ཏེན ཕུཊྛཱཡཔི ཏཾ ཕསྶཾ ཨསཱདིཡནྟིཡཱ ཝཱ ཨཱམསནེཔི སཏི ཨནཱཔཏྟི. སེསཾ སབྦཏྠ ཨུཏྟཱནམེཝ ¶ .

པཋམཔཱརཱཛིཀསམུཊྛཱནཾ ¶ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, དྭིཝེདནནྟི.

པཋམཔཱརཱཛིཀཾ.

༢. དུཏིཡཔཱརཱཛིཀསིཀྑཱཔདཝཎྞནཱ

༦༦༤. དུཏིཡེ པཱརཱཛིཀེ – ཀཙྩི ནོ སཱཏི ཀཙྩི ནུ སཱ. ཨཝཎྞོཏི ཨགུཎོ. ཨཀིཏྟཱིཏི ནིནྡཱ. ཨཡསོཏི པརིཝཱརཝིཔཏྟི; པརམྨུཁགརཧཱ ཝཱ.

༦༦༥. ཝཛྫཔཊིཙྪཱདིཀཱཏི ཨིདམྤི ཨིམིསྶཱ པཱརཱཛིཀཱཡ ནཱམམཏྟམེཝ, ཏསྨཱ པདབྷཱཛནེ ན ཝིཙཱརིཏཾ. སེསམེཏྠ ཨུཏྟཱནམེཝ.

༦༦༦. སཱ ཝཱ ཨཱརོཙེཏཱིཏི ཡཱ པཱརཱཛིཀཾ ཨཱཔནྣཱ, སཱ སཡཾ ཨཱརོཙེཏི. ཨཊྛནྣཾ པཱརཱཛིཀཱནཾ ཨཉྙཏརནྟི བྷིཀྑཱུཧི སཱདྷཱརཎཱནཾ ཙཏུནྣཾ ཨསཱདྷཱརཎཱནཉྩ ཙཏུནྣམེཝ ཨཉྙཏརཾ. ཨིདཉྩ པཱརཱཛིཀཾ པཙྪཱ པཉྙཏྟཾ, ཏསྨཱ ‘‘ཨཊྛནྣ’’ནྟི ཝིབྷངྒེ ཝུཏྟཾ. པུརིམེན པན སདྡྷིཾ ཡུགལ༹ཏྟཱ ཨིམསྨིཾ ཨོཀཱསེ ཋཔིཏནྟི ཝེདིཏབྦཾ. དྷུརཾ ནིཀྑིཏྟམཏྟེཏི དྷུརེ ནིཀྑིཏྟམཏྟེ. ཝིཏྠཱརཀཐཱ པནེཏྠ སཔྤཱཎཀཝགྒམྷི དུཊྛུལླསིཀྑཱཔདེ ཝུཏྟནཡེནེཝ ཝེདིཏབྦཱ. ཏཏྲ ཧི པཱཙིཏྟིཡཾ, ཨིདྷ པཱརཱཛིཀནྟི ཨཡམེཝ ཝིསེསོ. སེསཾ ཏཱདིསམེཝ. ཝཛྫཔཊིཙྪཱདིཀཱཏི ཨིདམྤིཨིམིསྶཱ པཱརཱཛིཀཱཡ ནཱམམཏྠཱམེཝ, ཏསྨཱ པདབྷཱཛནེ ན ཝིཙཱརིཏཾ. སེསམེཏྠ ཨུཏྟཱནམེཝ.

དྷུརནིཀྑེཔསམུཊྛཱནཾ – ཀཱཡཝཱཙཱཙིཏྟཏོ སམུཊྛཱཏི, ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

དུཏིཡཔཱརཱཛིཀཾ.

༣. ཏཏིཡཔཱརཱཛིཀསིཀྑཱཔདཝཎྞནཱ

༦༦༩. ཏཏིཡེ ¶ – དྷམྨེནཱཏི བྷཱུཏེན ཝཏྠུནཱ. ཝིནཡེནཱཏི ཙོདེཏྭཱ སཱརེཏྭཱ. པདབྷཱཛནཾ པནསྶ ‘‘ཡེན དྷམྨེན ཡེན ཝིནཡེན ཨུཀྑིཏྟོ སུཨུཀྑིཏྟོ ཧོཏཱི’’ཏི ཨིམཾ ཨདྷིཔྤཱཡམཏྟཾ དསྶེཏུཾ ཝུཏྟཾ. སཏྠུསཱསནེནཱཏི ཉཏྟིསམྤདཱཡ ཙེཝ ཨནུསཱཝནསམྤདཱཡ ཙ. པདབྷཱཛནེ ¶ པནསྶ ‘‘ཛིནསཱསནེན བུདྡྷསཱསནེནཱ’’ཏི ཝེཝཙནམཏྟམེཝ ཝུཏྟཾ. སངྒྷཾ ཝཱ གཎཾ ཝཱཏིཨཱདཱིསུ ཡེན སངྒྷེན ཀམྨཾ ཀཏཾ, ཏཾ སངྒྷཾ ཝཱ ཏཏྠ སམྦཧུལཔུགྒལསངྑཱཏཾ ¶ གཎཾ ཝཱ, ཨེཀཔུགྒལཾ ཝཱ ཏཾ ཀམྨཾ ཝཱ ན ཨཱདིཡཏི, ན ཨནུཝཏྟཏི, ན ཏཏྠ ཨཱདརཾ ཛནེཏཱིཏི ཨཏྠོ. སམཱནསཾཝཱསཀཱ བྷིཀྑཱུ ཝུཙྩནྟི སཧཱཡཱ, སོ ཏེཧི སདྡྷིཾ ནཏྠཱིཏི ཨེཏྠ ‘‘ཨེཀཀམྨཾ ཨེཀུདྡེསོ སམསིཀྑཏཱ’’ཏི ཨཡཾ ཏཱཝ སཾཝཱསོ; སམཱནོ སཾཝཱསོ ཨེཏེསནྟི སམཱནསཾཝཱསཀཱ.ཨེཝརཱུཔཱ བྷིཀྑཱུ བྷིཀྑུསྶ ཏསྨིཾ སཾཝཱསེ སཧ ཨཡནབྷཱཝེན སཧཱཡཱཏི ཝུཙྩནྟི. ཨིདཱནི ཡེན སཾཝཱསེན ཏེ སམཱནསཾཝཱསཀཱཏི ཝུཏྟཱ, སོ སཾཝཱསོ ཏསྶ ཨུཀྑིཏྟཀསྶ ཏེཧི སདྡྷིཾ ནཏྠི. ཡེཧི ཙ སདྡྷིཾ ཏསྶ སོ སཾཝཱསོ ནཏྠི, ན ཏེན ཏེ བྷིཀྑཱུ ཨཏྟནོ སཧཱཡཱ ཀཏཱ ཧོནྟི. ཏསྨཱ ཝུཏྟཾ ‘‘སམཱནསཾཝཱསཀཱ བྷིཀྑཱུ ཝུཙྩནྟི སཧཱཡཱ, སོ ཏེཧི སདྡྷིཾ ནཏྠི, ཏེན ཝུཙྩཏི ཨཀཏསཧཱཡོ’’ཏི. སེསཾ སངྒྷབྷེདསིཀྑཱཔདཱདཱིསུ ཝུཏྟནཡཏྟཱ ཨུཏྟཱནཏྠམེཝ.

སམནུབྷཱསནསམུཊྛཱནཾ – ཀཱཡཝཱཙཱཙིཏྟཏོ སམུཊྛཱཏི, ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཏཏིཡཔཱརཱཛིཀཾ.

༤. ཙཏུཏྠཔཱརཱཛིཀསིཀྑཱཔདཝཎྞནཱ

༦༧༥. ཙཏུཏྠེ – ཨཝསྶུཏཱཏི ལོཀསྶཱདམིཏྟསནྠཝཝསེན ཀཱཡསཾསགྒརཱགེན ཨཝསྶུཏཱ. དུཏིཡཔདེཔི ཨེསེཝ ནཡོ. པུརིསཔུགྒལསྶ ཧཏྠགྒཧཎཾ ཝཱཏིཨཱདཱིསུ པན ཡཾ པུརིསཔུགྒལེན ཧཏྠེ གཧཎཾ ཀཏཾ, ཏཾ པུརིསཔུགྒལསྶ ཧཏྠགྒཧཎནྟི ཝུཏྟཾ. ཨེསེཝ ནཡོ སངྒྷཱཊིཀཎྞགྒཧཎེཔི. ཧཏྠགྒཧཎནྟི ཨེཏྠ ཙ ཧཏྠགྒཧཎཉྩ ཨཉྙམྤི ཨཔཱརཱཛིཀཀྑེཏྟེ གཧཎཉྩ ¶ ཨེཀཛ྄ཛྷཾ ཀཏྭཱ ཧཏྠགྒཧཎནྟི ཝུཏྟནྟི ཝེདིཏབྦཾ. ཏེནེཝསྶ པདབྷཱཛནེ ‘‘ཧཏྠགྒཧཎཾ ཝཱ སཱདིཡེཡྻཱཏི ཧཏྠོ ནཱམ ཀཔྤརཾ ཨུཔཱདཱཡ ཡཱཝ ཨགྒནཁཱ, ཨེཏསྶ ཨསདྡྷམྨསྶ པཊིསེཝནཏྠཱཡ ཨུབྦྷཀྑཀཾ ཨདྷོཛཱཎུམཎྜལཾ གཧཎཾ སཱདིཡཏི, ཨཱཔཏྟི ཐུལླཙྩཡསྶཱ’’ཏི ཝུཏྟཾ. ཨེཏྠ ཙ ཨསདྡྷམྨོཏི ཀཱཡསཾསགྒོ ཝེདིཏབྦོ, ན མེཐུནདྷམྨོ. ན ཧི མེཐུནསྶ སཱམནྟཱ ¶ ཐུལླཙྩཡཾ ཧོཏི. ‘‘ཝིཉྙཱུ པཊིབལོ ཀཱཡསཾསགྒཾ སམཱཔཛྫིཏུནྟི ཝཙནམྤི ཙེཏྠ སཱདྷཀཾ.

‘‘ཏིསྶིཏྠིཡོ མེཐུནཾ ཏཾ ན སེཝེ,

ཏཡོ པུརིསེ ཏཡོ ཙ ཨནརིཡཔཎྜཀེ;

ན ¶ ཙཱཙརེ མེཐུནཾ བྱཉྫནསྨིཾ,

ཚེཛྫཱ སིཡཱ མེཐུནདྷམྨཔཙྩཡཱ;

པཉྷཱ མེསཱ ཀུསལེཧི ཙིནྟིཏཱ’’ཏི. (པརི. ༤༨༡);

ཨིམཱཡ པརིཝཱརེ ཝུཏྟཱཡ སེདམོཙཀགཱཐཱཡ ཝིརུཛ྄ཛྷཏཱིཏི ཙེ? ན; མེཐུནདྷམྨསྶ པུབྦབྷཱགཏྟཱ. པརིཝཱརེཡེཝ ཧི ‘‘མེཐུནདྷམྨསྶ པུབྦབྷཱགོ ཛཱནིཏབྦོ’’ཏི ‘‘ཝཎྞཱཝཎྞོ ཀཱཡསཾསགྒོ དུཊྛུལླཝཱཙཱ ཨཏྟཀཱམཔཱརིཙརིཡཱགམནུཔྤཱདན’’ནྟི ཨེཝཾ སུཀྐཝིསྶཊྛིཨཱདཱིནི པཉྩ སིཀྑཱཔདཱནི མེཐུནདྷམྨསྶ པུབྦབྷཱགོཏི ཝུཏྟཱནི. ཏསྨཱ ཀཱཡསཾསགྒོ མེཐུནདྷམྨསྶ པུབྦབྷཱགཏྟཱ པཙྩཡོ ཧོཏི. ཨིཏི ཚེཛྫཱ སིཡཱ མེཐུནདྷམྨཔཙྩཡཱཏི ཨེཏྠ ཨིམིནཱ པརིཡཱཡེན ཨཏྠོ ཝེདིཏབྦོ. ཨེཏེནུཔཱཡེན སབྦཔདེསུ ཝིནིཙྪཡོ ཝེདིཏབྦོ. ཨཔིཙ ‘‘སངྐེཏཾ ཝཱ གཙྪེཡྻཱ’’ཏི ཨེཏསྶ པདབྷཱཛནེ ‘‘ཨིཏྠནྣཱམཾ ཨཱགཙྪཱ’’ཏི. ཨེཝཾནཱམཀཾ ཋཱནཾ ཨཱགཙྪཱཏི ཨཏྠོ.

༦༧༦. ཨཊྛམཾ ཝཏྠུཾ པརིཔཱུརེནྟཱི ཨསྶམཎཱི ཧོཏཱིཏི ཨནུལོམཏོ ཝཱ པཊིལོམཏོ ཝཱ ཨེཀནྟརིཀཱཡ ཝཱ ཡེན ཏེན ནཡེན ཨཊྛམཾ ཝཏྠུཾ པརིཔཱུརེནྟཱིཡེཝ ཨསྶམཎཱི ཧོཏི. ཡཱ པན ཨེཀཾ ཝཱ ཝཏྠུཾ སཏྟ ཝཱ ཝཏྠཱུནི སཏཀྑཏྟུམྤི པཱུརེཏི, ནེཝ ཨསྶམཎཱི ཧོཏི. ཨཱཔནྣཱ ཨཱཔཏྟིཡོ དེསེཏྭཱ མུཙྩཏི. ཨཔིཙེཏྠ གཎནཱུཔིཀཱ ཨཱཔཏྟི ཝེདིཏབྦཱ. ཝུཏྟཉྷེཏཾ ‘‘ཨཏྠཱཔཏྟི དེསིཏཱ གཎནཱུཔིཀཱ, ཨཏྠཱཔཏྟི དེསིཏཱ ན གཎནཱུཔིཀཱ’’ཏི. ཏཏྲཱཡཾ ཝིནིཙྪཡོ – ཨིདཱནི ནཱཔཛྫིསྶཱམཱིཏི དྷུརནིཀྑེཔཾ ཀཏྭཱ དེསིཏཱ གཎནཱུཔིཀཱ དེསིཏགཎནཾ ཨུཔེཏི པཱརཱཛིཀསྶ ཨངྒཾ ན ¶ ཧོཏི. ཏསྨཱ ཡཱ ཨེཀཾ ཨཱཔནྣཱ དྷུརནིཀྑེཔཾ ཀཏྭཱ དེསེཏྭཱ པུན ཀིལེསཝསེན ཨཱཔཛྫཏི, པུན དེསེཏི, ཨེཝཾ ཨཊྛ ཝཏྠཱུནི པཱུརེནྟཱིཔི པཱརཱཛིཀཱ ན ཧོཏི. ཡཱ པན ཨཱཔཛྫིཏྭཱ པུནཔི ཨཉྙཾ ཝཏྠུཾ ཨཱཔཛྫིསྶཱམཱིཏི ¶ སཨུསྶཱཧཱཝ དེསེཏི, ཏསྶཱ སཱ ཨཱཔཏྟི ནགཎནཱུཔིཀཱ, དེསིཏཱཔི ཨདེསིཏཱ ཧོཏི, དེསིཏགཎནཾ ན གཙྪཏི, པཱརཱཛིཀསྶེཝ ཨངྒཾ ཧོཏི. ཨཊྛམེ ཝཏྠུམྷི པརིཔུཎྞམཏྟེ པཱརཱཛིཀཱ ཧོཏི. སེསཾ ཨུཏྟཱནམེཝཱཏི.

དྷུརནིཀྑེཔསམུཊྛཱནཾ – ཀཱཡཝཱཙཱཙིཏྟཏོ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དྭིཝེདནནྟི.

ཙཏུཏྠཔཱརཱཛིཀཾ.

ཨུདྡིཊྛཱ ¶ ཁོ ཨཡྻཱཡོ ཨཊྛ པཱརཱཛིཀཱ དྷམྨཱཏི བྷིཀྑཱུ ཨཱརབྦྷ པཉྙཏྟཱ སཱདྷཱརཎཱ ཙཏྟཱརོ ཨིམེ ཙ ཙཏྟཱརོཏི ཨེཝཾ པཱཏིམོཀྑུདྡེསམགྒེན ཨུདྡིཊྛཱ ཁོ ཨཡྻཱཡོ ཨཊྛ པཱརཱཛིཀཱ དྷམྨཱཏི ཨེཝམེཏྠ ཨཏྠོ དཊྛབྦོ. སེསཾ མཧཱཝིབྷངྒེ ཝུཏྟནཡམེཝཱཏི.

སམནྟཔཱསཱདིཀཱཡ ཝིནཡསཾཝཎྞནཱཡ བྷིཀྑུནཱིཝིབྷངྒེ

པཱརཱཛིཀཀཎྜཝཎྞནཱ ནིཊྛིཏཱ.

པཱརཱཛིཀཀཎྜཾ ནིཊྛིཏཾ.

༢. སངྒྷཱདིསེསཀཎྜཾ (བྷིཀྑུནཱིཝིབྷངྒཝཎྞནཱ)

༡. པཋམསངྒྷཱདིསེསསིཀྑཱཔདཝཎྞནཱ

པཱརཱཛིཀཱནནྟརསྶ ¶ ¶ , ཨཡཾ དཱནི བྷཝིསྶཏི;

སངྒྷཱདིསེསཀཎྜསྶ, ཨནུཏྟཱནཏྠཝཎྞནཱ.

༦༧༨. ཨུདོསིཏནྟི བྷཎྜསཱལཱ. མཱཡྻོ ཨེཝཾ ཨཝཙཱཏི ཨཡྻོ མཱ ཨེཝཾ ཨཝཙ. ཨཔིནཱཡྻཱཏི ཨཔིནུ ཨཡྻཱ. ཨཙྩཱཝདཐཱཏི ཨཏིཀྐམིཏྭཱ ཝདཐ; ཨཀྐོསཐཱཏི ཝུཏྟཾ ཧོཏི.

༦༧༩. ཨུསྶཡཝཱདིཀཱཏི མཱནུསྶཡཝསེན ཀོདྷུསྶཡཝསེན ཝིཝདམཱནཱ. ཡསྨཱ པན སཱ ཨཏྠཏོ ཨཊྚཀཱརིཀཱ ཧོཏི, ཏསྨཱ ‘‘ཨུསྶཡཝཱདིཀཱ ནཱམ ཨཌྜཀཱརིཀཱ ཝུཙྩཏཱི’’ཏི པདབྷཱཛནེ ཝུཏྟཾ. ཨེཏྠ ཙ ཨཌྜོཏི ཝོཧཱརིཀཝིནིཙྪཡོ ཝུཙྩཏི, ཡཾ པབྦཛིཏཱ ‘‘ཨདྷིཀརཎ’’ནྟིཔི ཝདནྟི. དུཏིཡཾ ཝཱ པརིཡེསཏཱིཏི སཀྑིཾ ¶ ཝཱ སཧཱཡཾ ཝཱ པརིཡེསཏི, དུཀྐཊཾ. གཙྪཏི ཝཱཏི ཨུཔསྶཡོ ཝཱ ཧོཏུ བྷིཀྑཱཙཱརམགྒོ ཝཱ, ཡཏྠ ཋིཏཱཡ ‘‘ཨཌྜཾ ཀརིསྶཱམཱི’’ཏི ཙིཏྟཾ ཨུཔྤཛྫཏི, ཏཏོ ཝོཧཱརིཀཱནཾ སནྟིཀཾ གཙྪནྟིཡཱ པདཝཱརེ པདཝཱརེ དུཀྐཊཾ. ཨེཀསྶ ཨཱརོཙེཏཱིཏི དྭཱིསུ ཛནེསུ ཡསྶ ཀསྶཙི ཨེཀསྶ ཀཐཾ ཡོ ཀོཙི ཝོཧཱརིཀཱནཾ ཨཱརོཙེཏི. དུཏིཡསྶ ཨཱརོཙེཏཱིཏི ཨེཏྠཱཔི ཨེསེཝ ནཡོ.

ཨཡཾ པནེཏྠ ཨསམྨོཧཏྠཱཡ ཝིཏྠཱརཀཐཱ – ཡཏྠ ཀཏྠཙི ཨནྟམསོ བྷིཀྑུནུཔསྶཡཾ ཨཱགཏེཔི ཝོཧཱརིཀེ དིསྭཱ བྷིཀྑུནཱི ཨཏྟནོ ཀཐཾ ཨཱརོཙེཏི, བྷིཀྑུནིཡཱ དུཀྐཊཾ. ཨུཔཱསཀོ ཨཏྟནོ ཀཐཾ ཨཱརོཙེཏི, བྷིཀྑུནིཡཱ ཐུལླཙྩཡཾ. པཋམཾ ཨུཔཱསཀོ ཨཏྟནོ ཀཐཾ ཨཱརོཙེཏི ¶ , བྷིཀྑུནིཡཱ དུཀྐཊཾ. ཨཐ སཱ ཨཏྟནོ ཀཐཾ ཨཱརོཙེཏི, ཐུལླཙྩཡཾ. བྷིཀྑུནཱི ཨུཔཱསཀཾ ཝདཏི – ‘‘མམ ཙ ཏཝ ཙ ཀཐཾ ཏྭཾཡེཝ ཨཱརོཙེཧཱི’’ཏི, སོ ཨཏྟནོ ཝཱ ཀཐཾ པཋམཾ ཨཱརོཙེཏུ བྷིཀྑུནིཡཱ ཝཱ, པཋམཱརོཙནེ དུཀྐཊཾ, དུཏིཡཱརོཙནེ ཐུལླཙྩཡཾ. ཨུཔཱསཀོ བྷིཀྑུནིཾ ཝདཏི – ‘‘མམ ཙ ཏཝ ཙ ཀཐཾ ཏྭཾཡེཝ ཨཱརོཙེཧཱི’’ཏི, ཨེཏྠཱཔི ཨེསེཝ ནཡོ.

བྷིཀྑུནཱི ¶ ཀཔྤིཡཀཱརཀེན ཀཐཱཔེཏི, ཏཏྠ ཀཔྤིཡཀཱརཀོ ཝཱ བྷིཀྑུནིཡཱ ཀཐཾ པཋམཾ ཨཱརོཙེཏུ, ཨིཏརོ ཝཱ ཨཏྟནོ ཀཐཾ, ཀཔྤིཡཀཱརཀོ ཝཱ ཨུབྷིནྣམྤི ཀཐཾ, ཨིཏརོ ཝཱ ཨུབྷིནྣམྤི ཀཐཾ ཨཱརོཙེཏུ, ཡཐཱ ཝཱ ཏཐཱ ཝཱ ཨཱརོཙིཡམཱནེ པཋམེ ཨཱརོཙནེ བྷིཀྑུནིཡཱ དུཀྐཊཾ, དུཏིཡེ ཐུལླཙྩཡཾ. ཡཐཱ ཝཱ ཏཐཱ ཝཱ ཨཱརོཙིཏཾ པན ཨུབྷིནྣམྤི ཀཐཾ སུཏྭཱ ཝོཧཱརིཀེཧི ཝིནིཙྪཡེ ཀཏེ ཨཌྜཔརིཡོསཱནཾ ནཱམ ཧོཏི, ཏསྨིཾ ཨཌྜཔརིཡོསཱནེ བྷིཀྑུནིཡཱ ཛཡེཔི པརཱཛཡེཔི སངྒྷཱདིསེསོ. སཙེ པན གཏིགཏཾ ཨདྷིཀརཎཾ ཧོཏི, སུཏཔུབྦཾ ཝོཧཱརིཀེཧི. ཨཐ ཏེ བྷིཀྑུནིཉྩ ཨཌྜཀཱརཀཉྩ དིསྭཱཝ ‘‘ཏུམྷཱཀཾ ཀཐནཀིཙྩཾ ནཏྠི, ཛཱནཱམ མཡཾ ཨེཏྠ པཝཏྟི’’ནྟི སཡམེཝ ཝིནིཙྪིནིཏྭཱ དེནྟི, ཨེཝརཱུཔེ ཨཌྜཔརིཡོསཱནེཔི བྷིཀྑུནིཡཱ ཨནཱཔཏྟི.

པཋམཾ ཨཱཔཏྟི ཨེཏསྶཱཏི པཋམཱཔཏྟིཀོ; ཝཱིཏིཀྐམཀྑཎེཡེཝ ཨཱཔཛྫིཏབྦོཏི ཨཏྠོ, ཏཾ པཋམཱཔཏྟིཀཾ. པདབྷཱཛནེ པན ཨདྷིཔྤཱཡམཏྟཾ དསྶེཏུཾ ‘‘སཧ ཝཏྠུཛ྄ཛྷཱཙཱརཱ ¶ ཨཱཔཛྫཏི ཨསམནུབྷཱསནཱཡཱ’’ཏི ཝུཏྟཾ. ཨཡཉྷེཏྠ ཨཏྠོ – སཧ ཝཏྠུཛ྄ཛྷཱཙཱརཱ ཡཾ བྷིཀྑུནཱི ཨཱཔཛྫཏི, ན ཏཏིཡཱཡ སམནུབྷཱསནཱཡ, ཨཡཾ པཋམམེཝ སཧ ཝཏྠུཛ྄ཛྷཱཙཱརེན ཨཱཔཛྫིཏབྦཏྟཱ པཋམཱཔཏྟིཀོཏི. བྷིཀྑུནིསངྒྷཏོ ནིསྶཱརེཏཱིཏི ནིསྶཱརཎཱིཡོ; ཏཾ ནིསྶཱརཎཱིཡཾ. པདབྷཱཛནེ པན ཨདྷིཔྤཱཡམཏྟཾ དསྶེཏུཾ ‘‘སངྒྷམྷཱ ནིསྶཱརཱིཡཏཱིཏི ཝུཏྟཾ. ཏཏྠ ཡཾ ཨཱཔནྣཱ བྷིཀྑུནཱི སངྒྷཏོ ནིསྶཱརཱིཡཏི, སོ ནིསྶཱརཎཱིཡོཏི ཨེཝམཏྠོ དཊྛབྦོ. ན ཧི སོ ཨེཝ དྷམྨོ སངྒྷམྷཱ ཀེནཙི ནིསྶཱརཱིཡཏི. ཏེན པན དྷམྨེན བྷིཀྑུནཱི ནིསྶཱརཱིཡཏི, ཏསྨཱ སོ ནིསྶཱརེཏཱིཏི ནིསྶཱརཎཱིཡོ.

ཨཱཀཌྜྷིཡམཱནཱ གཙྪཏཱིཏི ཨཌྜཀཱརཀམནུསྶེཧི སཡཾ ཝཱ ཨཱགནྟྭཱ དཱུཏཾ ཝཱ པེསེཏྭཱ ཨེཧཱིཏི ཝུཙྩམཱནཱ ཝོཧཱརིཀཱནཾ སནྟིཀཾ གཙྪཏི, ཏཏོ ཨཌྜཀཱརཀོ ཨཏྟནོ ཝཱ ཀཐཾ པཋམཾ ཨཱརོཙེཏུ བྷིཀྑུནིཡཱ ཝཱ, ནེཝ པཋམཱརོཙནེ དུཀྐཊཾ, ན དུཏིཡཱརོཙནེ ཐུལླཙྩཡཾ. ཨམཙྩེཧི ཝིནིཙྪིནིཏྭཱ ཀཏེ ཨཌྜཔརིཡོསཱནེཔི ཨནཱཔཏྟིཡེཝ. སཙེཔི ཨཌྜཀཱརཀོ བྷིཀྑུནིཾ ¶ ཝདཏི ‘‘མམ ཙ ཏཝ ཙ ཀཐཾ ཏྭམེཝ ཀཐེཧཱི’’ཏི; ཀཐེནྟིཡཱཔི ཀཐཾ སུཏྭཱ ཀཏེ ཨཌྜཔརིཡོསཱནེཔི ཨནཱཔཏྟིཡེཝ.

རཀྑཾ ¶ ཡཱཙཏཱིཏི དྷམྨིཀཾ རཀྑཾ ཡཱཙཏི, ཨནཱཔཏྟི. ཨིདཱནི ཡཐཱཡཱཙིཏཱ རཀྑཱ དྷམྨིཀཱ ཧོཏི, ཏཾ དསྶེཏུཾ ཨནོདིསྶ ཨཱཙིཀྑཏཱིཏི ཨཱཧ. ཏཏྠ ཨཏཱིཏཾ ཨཱརབྦྷ ཨཏྠི ཨོདིསྶཨཱཙིཀྑནཱ, ཨཏྠི ཨནོདིསྶཨཱཙིཀྑནཱ, ཨནཱགཏཾ ཨཱརབྦྷཱཔི ཨཏྠི ཨོདིསྶཨཱཙིཀྑནཱ, ཨཏྠི ཨནོདིསྶཨཱཙིཀྑནཱ.

ཀཐཾ ཨཏཱིཏཾ ཨཱརབྦྷ ཨོདིསྶཨཱཙིཀྑནཱ ཧོཏི? བྷིཀྑུནུཔསྶཡེ གཱམདཱརཀཱ དྷུཏྟཱདཡོ ཝཱ ཡེ ཀེཙི ཨནཱཙཱརཾ ཝཱ ཨཱཙརནྟི, རུཀྑཾ ཝཱ ཚིནྡནྟི, ཕལཱཕལཾ ཝཱ ཧརནྟི, པརིཀྑཱརེ ཝཱ ཨཙྪིནྡནྟི. བྷིཀྑུནཱི ཝོཧཱརིཀེ ཨུཔསངྐམིཏྭཱ ‘‘ཨམྷཱཀཾ ཨུཔསྶཡེ ཨིདཾ ནཱམ ཀཏ’’ནྟི ཝདཏི. ‘‘ཀེནཱ’’ཏི ཝུཏྟེ ¶ ‘‘ཨསུཀེན ཙ ཨསུཀེན ཙཱ’’ཏི ཨཱཙིཀྑཏི. ཨེཝཾ ཨཏཱིཏཾ ཨཱརབྦྷ ཨོདིསྶཨཱཙིཀྑནཱ ཧོཏི, སཱ ན ཝཊྚཏི. ཏཉྩེ སུཏྭཱ ཏེ ཝོཧཱརིཀཱ ཏེསཾ དཎྜཾ ཀརོནྟི, སབྦཾ བྷིཀྑུནིཡཱ གཱིཝཱ ཧོཏི. དཎྜཾ གཎྷིསྶནྟཱིཏི ཨདྷིཔྤཱཡེཔི སཏི གཱིཝཱཡེཝ ཧོཏི. སཙེ པན ཏསྶ དཎྜཾ གཎྷཐཱཏི ཝདཏི, པཉྩམཱསཀམཏྟེ གཧིཏེ པཱརཱཛིཀཾ ཧོཏི.

‘‘ཀེནཱ’’ཏི ཝུཏྟེ པན ‘‘ཨསུཀེནཱཏི ཝཏྟུཾ ཨམྷཱཀཾ ན ཝཊྚཏི, ཏུམྷེཡེཝ ཛཱནིསྶཐ. ཀེཝལཉྷི མཡཾ རཀྑཾ ཡཱཙཱམ, ཏཾ ནོ དེཐ, ཨཝཧཊབྷཎྜཉྩ ཨཱཧརཱཔེཐཱ’’ཏི ཝཏྟབྦཾ. ཨེཝཾ ཨནོདིསྶ ཨཱཙིཀྑནཱ ཧོཏི, སཱ ཝཊྚཏི. ཨེཝཾ ཝུཏྟེ སཙེཔི ཏེ ཝོཧཱརིཀཱ ཀཱརཀེ གཝེསིཏྭཱ ཏེསཾ དཎྜཾ ཀརོནྟི, སབྦཾ སཱཔཏེཡྻམྤི གཧིཏཾ བྷིཀྑུནིཡཱ, ནེཝ གཱིཝཱ ན ཨཱཔཏྟི.

པརིཀྑཱརཾ ཧརནྟེ དིསྭཱ ཏེསཾ ཨནཏྠཀཱམཏཱཡ ཙོརོ ཙོརོཏི ཝཏྟུམྤི ན ཝཊྚཏི. ཨེཝཾ ཝུཏྟེཔི ཧི ཡཾ ཏེསཾ དཎྜཾ ཀརོནྟི, སབྦམྤི བྷིཀྑུནིཡཱ གཱིཝཱ ཧོཏི. ཨཏྟནོ ཝཙནཀརཾ པན ‘‘ཨིམིནཱ མེ པརིཀྑཱརོ གཧིཏོ, ཏཾ ཨཱཧརཱཔེཧི, མཱ ཙསྶ དཎྜཾ ཀརོཧཱི’’ཏི ཝཏྟུཾ ཝཊྚཏི. དཱསདཱསཱིཝཱཔིཨཱདཱིནཾ ཨཏྠཱཡ ཨཌྜཾ ཀརོནྟི, ཨཡཾ ཨཀཔྤིཡཨཌྜོ ནཱམ, ན ཝཊྚཏི.

ཀཐཾ ཨནཱགཏཾ ཨཱརབྦྷ ཨོདིསྶཨཱཙིཀྑནཱ ཧོཏི? ཝུཏྟནཡེནེཝ པརེཧི ཨནཱཙཱརཱདཱིསུ ཀཏེསུ བྷིཀྑུནཱི ཝོཧཱརིཀེ ཨེཝཾ ཝདཏི ‘‘ཨམྷཱཀཾ ཨུཔསྶཡེ ཨིདཉྩིདཉྩ ཀརོནྟི, རཀྑཾ ནོ ¶ དེཐ ཨཱཡཏིཾ ཨཀརཎཏྠཱཡཱ’’ཏི. ‘‘ཀེན ཨེཝཾ ཀཏ’’ནྟི ཝུཏྟེ ཙ ‘‘ཨསུཀེན ཨསུཀེན ཙཱ’’ཏི ¶ ཨཱཙིཀྑཏི. ཨེཝཾ ཨནཱགཏཾ ཨཱརབྦྷ ཨོདིསྶཨཱཙིཀྑནཱ ཧོཏི, སཱཔི ན ཝཊྚཏི. ཏེསཉྷི དཎྜེ ཀཏེ པུརིམནཡེནེཝ སབྦཾ བྷིཀྑུནིཡཱ གཱིཝཱ. སེསཾ པུརིམསདིསམེཝ.

སཙེ པན ཝོཧཱརིཀཱ ‘‘བྷིཀྑུནུཔསྶཡེ ཨེཝརཱུཔཾ ཨནཱཙཱརཾ ཀརོནྟཱནཾ ཨིམཾ ནཱམ དཎྜཾ ཀརོམཱ’’ཏི བྷེརིཾ ཙརཱཔེཏྭཱ ཨཱཎཱཡ ཨཏིཊྛམཱནེ པརིཡེསིཏྭཱ དཎྜཾ ཀརོནྟི, བྷིཀྑུནིཡཱ ནེཝ གཱིཝཱ ན ཨཱཔཏྟི.

ཡོ ཙཱཡཾ བྷིཀྑུནཱིནཾ ཝུཏྟོ, བྷིཀྑཱུནམྤི ཨེསེཝ ནཡོ. བྷིཀྑུནོཔི ཧི ཨོདིསྶཨཱཙིཀྑནཱ ན ཝཊྚཏི. ཡཾ ཏཐཱ ཨཱཙིཀྑིཏེ དཎྜཾ ཀརོནྟི, སབྦཾ ¶ གཱིཝཱ ཧོཏི. ཝུཏྟནཡེནེཝ དཎྜཾ གཎྷཱཔེནྟསྶ པཱརཱཛིཀཾ. ཡོ པན ‘‘དཎྜཾ ཀརིསྶནྟཱི’’ཏི ཛཱནནྟོཔི ཨནོདིསྶ ཀཐེཏི, ཏེ ཙ པརིཡེསིཏྭཱ དཎྜཾ ཀརོནྟིཡེཝ, ན དོསོ. ཝིཧཱརསཱིམཱཡ རུཀྑཱདཱིནི ཚིནྡནྟཱནཾ ཝཱསིཕརསུཨཱདཱིནི གཧེཏྭཱ པཱསཱཎེཧི ཀོཊྚེནྟི, ན ཝཊྚཏི. སཙེ དྷཱརཱ བྷིཛྫཏི, ཀཱརཱཔེཏྭཱ དཱཏབྦཱ. ཨུཔདྷཱཝིཏྭཱ ཏེསཾ པརིཀྑཱརེ གཎྷནྟི, ཏམྤི ན ཀཱཏབྦཾ, ལཧུཔརིཝཏྟཉྷི ཙིཏྟཾ, ཐེཡྻཙེཏནཱཡ ཨུཔྤནྣཱཡ མཱུལཙྪེཛྫམྤི གཙྪེཡྻ. སེསཾ ཨུཏྟཱནམེཝ.

ཀཐིནསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

སཏྟརསཀེ པཋམསིཀྑཱཔདཾ.

༢. དུཏིཡསངྒྷཱདིསེསསིཀྑཱཔདཝཎྞནཱ

༦༨༢. དུཏིཡེ – ཝརབྷཎྜནྟི མུཏྟཱམཎིཝེལུ༹རིཡཱདི མཧགྒྷབྷཎྜཾ.

༦༨༣. ཨནཔལོཀེཏྭཱཏི ཨནཱཔུཙྪིཏྭཱ. གཎཾ ཝཱཏི མལླགཎབྷཊིཔུཏྟགཎཱདིཀཾ. པཱུགནྟི དྷམྨགཎཾ. སེཎིནྟི གནྡྷིཀསེཎིདུསྶིཀསེཎིཨཱདིཀཾ. ཡཏྠ ཡཏྠ ཧི རཱཛཱནོ གཎཱདཱིནཾ གཱམནིགམེ ནིཡྻཱཏེནྟི ‘‘ཏུམྷེཝ ཨེཏྠ ཨནུསཱསཐཱ’’ཏི, ཏཏྠ ཏཏྠ ཏེ ཨེཝ ཨིསྶརཱ ཧོནྟི. ཏསྨཱ ཏེ སནྡྷཱཡ ཨིདཾ ཝུཏྟཾ. ཨེཏྠ ཙ རཱཛཱནཾ ཝཱ གཎཱདིཀེ ཝཱ ཨཱཔུཙྪིཏྭཱཔི བྷིཀྑུནིསངྒྷོ ¶ ཨཱཔུཙྪིཏབྦོཝ. ཋཔེཏྭཱ ཀཔྤནྟི ཏིཏྠིཡེསུ ཝཱ ¶ ཨཉྙབྷིཀྑུནཱིསུ ཝཱ པབྦཛིཏཔུབྦཾ ཀཔྤགཏིཀཾ ཋཔེཏྭཱཏི. སེསཾ ཨུཏྟཱནམེཝ.

ཙོརཱིཝུཊྛཱཔནསམུཊྛཱནཾ – ཀེནཙི ཀརཎཱིཡེན པཀྐནྟཱསུ བྷིཀྑུནཱིསུ ཨགནྟྭཱ ཁཎྜསཱིམཾ ཡཐཱནིསིནྣཊྛཱནེཡེཝ ཨཏྟནོ ནིསྶིཏཀཔརིསཱཡ སདྡྷིཾ ཝུཊྛཱཔེནྟིཡཱ ཝཱཙཱཙིཏྟཏོ སམུཊྛཱཏི, ཁཎྜསཱིམཾ ཝཱ ནདིཾ ཝཱ གནྟྭཱ ཝུཊྛཱཔེནྟིཡཱ ཀཱཡཝཱཙཱཙིཏྟཏོ སམུཊྛཱཏི, ཨནཱཔུཙྪཱ ཝུཊྛཱཔནཝསེན ཀིརིཡཱཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

དུཏིཡསིཀྑཱཔདཾ.

༣. ཏཏིཡསངྒྷཱདིསེསསིཀྑཱཔདཝཎྞནཱ

༦༩༢. ཏཏིཡེ ¶ – པརིཀྑེཔཾ ཨཏིཀྐཱམེནྟིཡཱཏི ཨེཏྠ ཨེཀཾ པཱདཾ ཨཏིཀྐཱམེནྟིཡཱ ཐུལླཙྩཡཾ, དུཏིཡེན ཨཏིཀྐནྟམཏྟེ སངྒྷཱདིསེསོ. ཨཔརིཀྑིཏྟསྶ གཱམསྶ ཨུཔཙཱརནྟི ཨེཏྠ པརིཀྑེཔཱརཧཊྛཱནཾ ཨེཀེན པཱདེན ཨཏིཀྐམཏི ཐུལླཙྩཡཾ, དུཏིཡེན ཨཏིཀྐནྟམཏྟེ སངྒྷཱདིསེསོ. ཨཔིཙེཏྠ སཀགཱམཏོ ནིཀྑམནྟིཡཱ གཱམནྟརཔཙྩཡཱ ཨནཱཔཏྟི, ནིཀྑམིཏྭཱ པན གཱམནྟརཾ གཙྪནྟིཡཱ པདཝཱརེ པདཝཱརེ དུཀྐཊཾ, ཨེཀེན པཱདེན ཨིཏརསྶ གཱམསྶ པརིཀྑེཔེ ཝཱ ཨུཔཙཱརེ ཝཱ ཨཏིཀྐནྟམཏྟེ ཐུལླཙྩཡཾ, དུཏིཡེན ཨཏིཀྐནྟམཏྟེ སངྒྷཱདིསེསོ. ཏཏོ ནིཀྑམིཏྭཱ པུན སཀགཱམཾ པཝིསནྟིཡཱཔི ཨེསེཝ ནཡོ. སཙེ པན ཁཎྜཔཱཀཱརེན ཝཱ ཝཏིཚིདྡེན ཝཱ བྷིཀྑུནིཝིཧཱརབྷཱུམིཡེཝ སཀྐཱ ཧོཏི པཝིསིཏུཾ, ཨེཝཾ པཝིསམཱནཱཡ ཀཔྤིཡབྷཱུམིཾ ནཱམ པཝིཊྛཱ ཧོཏི, ཏསྨཱ ཝཊྚཏི. སཙེཔི ཧཏྠིཔིཊྛིཨཱདཱིཧི ཝཱ ཨིདྡྷིཡཱ ཝཱ པཝིསཏི, ཝཊྚཏིཡེཝ. པདསཱ གམནམེཝ ཧི ཨིདྷཱདྷིཔྤེཏཾ. ཏེནེཝ ‘‘པཋམཾ པཱདཾ ཨཏིཀྐཱམེནྟིཡཱ’’ཏིཨཱདིམཱཧ.

དྭེ གཱམཱ བྷིཀྑུནིཝིཧཱརེན སམྦདྡྷཝཏིཀཱ ཧོནྟི, ཡསྨིཾ གཱམེ བྷིཀྑུནིཝིཧཱརོ, ཏཏྠ པིཎྜཱཡ ཙརིཏྭཱ པུན ཝིཧཱརཾ པཝིསིཏྭཱ སཙེ ཝིཧཱརམཛ྄ཛྷེན ཨིཏརསྶ གཱམསྶ མགྒོ ཨཏྠི, གནྟུཾ ཝཊྚཏི. ཏཏོ པན གཱམཏོ ཏེནེཝ མགྒེན པཙྩཱགནྟབྦཾ. སཙེ གཱམདྭཱརེན ནིཀྑམིཏྭཱ ཨཱགཙྪཏི, པུརིམནཡེནེཝ ཨཱཔཏྟིབྷེདོ ཝེདིཏབྦོ. སཀགཱམཏོ ཀེནཙི ¶ ཀརཎཱིཡེན བྷིཀྑུནཱིཧི སདྡྷིཾ ནིཀྑནྟཱཡ པུན པཝིསནཀཱལེ ཧཏྠི ཝཱ མུཙྩཏི, ཨུསྶཱརཎཱ ཝཱ ཧོཏི, ཨིཏརཱ ¶ བྷིཀྑུནིཡོ སཧསཱ གཱམཾ པཝིསནྟི, ཡཱཝ ཨཉྙཱ བྷིཀྑུནཱི ཨཱགཙྪཏི, ཏཱཝ བཧིགཱམདྭཱརེ ཋཱཏབྦཾ. སཙེ ན ཨཱགཙྪཏི, དུཏིཡིཀཱ བྷིཀྑུནཱི པཀྐནྟཱ ནཱམ ཧོཏི, པཝིསིཏུཾ ཝཊྚཏི.

པུབྦེ མཧཱགཱམོ ཧོཏི, མཛ྄ཛྷེ བྷིཀྑུནིཝིཧཱརོ. པཙྪཱ ཏཾ གཱམཾ ཙཏྟཱརོ ཛནཱ ལབྷིཏྭཱ ཝིསུཾ ཝིསུཾ ཝཏིཔརིཀྑེཔཾ ཀཏྭཱ ཝིབྷཛིཏྭཱ བྷུཉྫནྟི, ཝིཧཱརཏོ ཨེཀཾ གཱམཾ གནྟུཾ ཝཊྚཏི. ཏཏོ ཨཔརཾ གཱམཾ དྭཱརེན ཝཱ ཝཏིཚིདྡེན ¶ ཝཱ པཝིསིཏུཾ ན ཝཊྚཏི. པུན ཝིཧཱརམེཝ པཙྩཱགནྟུཾ ཝཊྚཏི. ཀསྨཱ? ཝིཧཱརསྶ ཙཏུགཱམསཱདྷཱརཎཏྟཱ.

ཨནྟརཝཱསཀོ ཏེམིཡཏཱིཏི ཡཏྠ ཡཐཱ ཏིམཎྜལཔཊིཙྪཱདནཾ ཧོཏི; ཨེཝཾ ནིཝཏྠཱཡ བྷིཀྑུནིཡཱ ཝསྶཀཱལེ ཏིཏྠེན ཝཱ ཨཏིཏྠེན ཝཱ ཨོཏརིཏྭཱ ཡཏྠ ཀཏྠཙི ཨུཏྟརནྟིཡཱ ཨེཀདྭངྒུལམཏྟམྤི ཨནྟརཝཱསཀོ ཏེམིཡཏི. སེསཾ ནདཱིལཀྑཎཾ ནདཱིནིམིཏྟཀཐཱཡ ཨཱཝི བྷཝིསྶཏི. ཨེཝརཱུཔཾ ནདིཾ ཏིཏྠེན ཝཱ ཨཏིཏྠེན ཝཱ ཨོཏརིཏྭཱ ཨུཏྟརཎཀཱལེ པཋམཾ པཱདཾ ཨུདྡྷརིཏྭཱ ཏཱིརེ ཋཔེནྟིཡཱ ཐུལླཙྩཡཾ, དུཏིཡཔཱདུདྡྷཱརེ སངྒྷཱདིསེསོ. སེཏུནཱ གཙྪཏི, ཨནཱཔཏྟི. པདསཱ ཨོཏརིཏྭཱ ཨུཏྟརཎཀཱལེ སེཏུཾ ཨཱརོཧིཏྭཱ ཨུཏྟརནྟིཡཱཔི ཨནཱཔཏྟི. སེཏུནཱ པན གནྟྭཱ ཨུཏྟརཎཀཱལེ པདསཱ གཙྪནྟིཡཱ ཨཱཔཏྟིཡེཝ. ཡཱནནཱཝཱཨཱཀཱསགམནཱདཱིསུཔི ཨེསེཝ ནཡོ. ཨོརིམཏཱིརཏོ པན པརཏཱིརམེཝ ཨཀྐམནྟིཡཱ ཨནཱཔཏྟི. རཛནཀམྨཏྠཾ གནྟྭཱ དཱརུསངྐཌྜྷནཱདིཀིཙྩེན དྭེ ཏིསྶོ ཨུབྷཡཏཱིརེསུ ཝིཙརནྟི, ཝཊྚཏི. སཙེ པནེཏྠ ཀཱཙི ཀལཧཾ ཀཏྭཱ ཨིཏརཾ ཏཱིརཾ གཙྪཏི, ཨཱཔཏྟི. དྭེ ཨེཀཏོ ཨུཏྟརནྟི, ཨེཀཱ མཛ྄ཛྷེ ནདིཡཱ ཀལཧཾ ཀཏྭཱ ནིཝཏྟིཏྭཱ ཨོརིམཏཱིརམེཝ ཨཱགཙྪཏི, ཨཱཔཏྟི. ཨིཏརིསྶཱ པན ཨཡཾ པཀྐནྟཊྛཱནེ ཋིཏཱ ཧོཏི, ཏསྨཱ པརཏཱིརཾ གཙྪནྟིཡཱཔི ཨནཱཔཏྟི. ནྷཱཡིཏུཾ ཝཱ པཱཏུཾ ཝཱ ཨོཏིཎྞཱ ཏམེཝ ཏཱིརཾ པཙྩུཏྟརཏི, ཨནཱཔཏྟི.

སཧ ཨརུཎུགྒམནཱཏི ཨེཏྠ སཙེ སཛ྄ཛྷཱཡཾ ཝཱ པདྷཱནཾ ཝཱ ཨཉྙཾ ཝཱ ཀིཉྩི ཀམྨཾ ཀུརུམཱནཱ པུརེཨརུཎེཡེཝ དུཏིཡིཀཱཡ སནྟིཀཾ གམིསྶཱམཱིཏི ཨཱབྷོགཾ ཀརོཏི, ཨཛཱནནྟིཡཱ ཨེཝ ཙསྶཱ ཨརུཎོ ཨུགྒཙྪཏི, ཨནཱཔཏྟི. ཨཐ པན ‘‘ཡཱཝ ཨརུཎུགྒམནཱ ཨིདྷེཝ བྷཝིསྶཱམཱི’’ཏི ཝཱ ཨནཱབྷོགེན ཝཱ ཝིཧཱརསྶ ཨེཀདེསེ ཨཙྪཏི, དུཏིཡིཀཱཡ ཧཏྠཔཱསཾ ན ¶ ཨོཏརཏི, ཨརུཎུགྒམནེ སངྒྷཱདིསེསོ. ཧཏྠཔཱསོཡེཝ ཧི ཨིདྷ པམཱཎཾ, ཧཏྠཔཱསཱཏིཀྐམེ ཨེཀགབྦྷོཔི ན རཀྑཏི.

ཨགཱམཀེ ¶ ཨརཉྙེཏི ཨེཏྠ ‘‘ནིཀྑམིཏྭཱ བཧི ཨིནྡཁཱིལཱ སབྦམེཏཾ ཨརཉྙ’’ནྟི ཨེཝཾ ཝུཏྟལཀྑཎམེཝ ཨརཉྙཾ. ཏཾ པནེཏཾ ཀེཝལཾ གཱམཱབྷཱཝེན ‘‘ཨགཱམཀ’’ནྟི ཝུཏྟཾ, ན ཝིཉྫྷཱཊཝིསདིསཏཱཡ. ཏཱདིསེ ¶ ཨརཉྙེ ཨོཀྐནྟེ དསྶནཱུཔཙཱརེ ཝིཛཧིཏེ སཙེཔི སཝནཱུཔཙཱརོ ཨཏྠི, ཨཱཔཏྟི. ཏེནེཝ ཝུཏྟཾ ཨཊྛཀཐཱཡཾ ‘‘སཙེ བྷིཀྑུནཱིསུ མཧཱབོདྷིཨངྒཎཾ པཝིསནྟཱིསུ ཨེཀཱ བཧི ཏིཊྛཏི, ཏསྶཱཔི ཨཱཔཏྟི. ལོཧཔཱསཱདཾ པཝིསནྟཱིསུཔི པརིཝེཎཾ པཝིསནྟཱིསུཔི ཨེསེཝ ནཡོ. མཧཱཙེཏིཡཾ ཝནྡམཱནཱསུ ཨེཀཱ ཨུཏྟརདྭཱརེན ནིཀྑམིཏྭཱ གཙྪཏི, ཏསྶཱཔི ཨཱཔཏྟི. ཐཱུཔཱརཱམཾ པཝིསནྟཱིསུ ཨེཀཱ བཧི ཏིཊྛཏི, ཏསྶཱཔི ཨཱཔཏྟཱི’’ཏི. ཨེཏྠ ཙ དསྶནཱུཔཙཱརོ ནཱམ ཡཏྠ ཋིཏཾ དུཏིཡིཀཱ པསྶཏི. སཙེ པན སཱཎིཔཱཀཱརནྟརིཀཱཔི ཧོཏི, དསྶནཱུཔཙཱརཾ ཝིཛཧཏི ནཱམ. སཝནཱུཔཙཱརོ ནཱམ ཡཏྠ ཋིཏཱ མགྒམཱུལ༹ྷསདྡེན ཝིཡ དྷམྨསཝནཱརོཙནསདྡེན ཝིཡ ཙ ‘‘ཨཡྻེ’’ཏི སདྡཱཡནྟིཡཱ སདྡཾ སུཎཱཏི. ཨཛ྄ཛྷོཀཱསེ དཱུརེཔི དསྶནཱུཔཙཱརོ ནཱམ ཧོཏི. སོ ཨེཝརཱུཔེ སཝནཱུཔཙཱརེ ཝིཛཧིཏེ ན རཀྑཏི, ཝིཛཧིཏམཏྟེཝ ཨཱཔཏྟི སངྒྷཱདིསེསསྶ.

ཨེཀཱ མགྒཾ གཙྪནྟཱི ཨོཧཱིཡཏི. སཨུསྶཱཧཱ ཙེ ཧུཏྭཱ ཨིདཱནི པཱཔུཎིསྶཱམཱིཏི ཨནུབནྡྷཏི, ཨནཱཔཏྟི. སཙེ པུརིམཱཡོ ཨཉྙེན མགྒེན གཙྪནྟི, པཀྐནྟཱ ནཱམ ཧོནྟི, ཨནཱཔཏྟིཡེཝ. དྭིནྣཾ གཙྪནྟཱིནཾ ཨེཀཱ ཨནུབནྡྷིཏུཾ ཨསཀྐོནྟཱི ‘‘གཙྪཏུ ཨཡ’’ནྟི ཨོཧཱིཡཏི, ཨིཏརཱཔི ‘‘ཨོཧཱིཡཏུ ཨཡ’’ནྟི, གཙྪཏི, དྭིནྣམྤི ཨཱཔཏྟི. སཙེ པན གཙྪནྟཱིསུ པུརིམཱཔི ཨཉྙཾ མགྒཾ གཎྷཱཏི, པཙྪིམཱཔི ཨཉྙཾ, ཨེཀཱ ཨེཀིསྶཱ པཀྐནྟཊྛཱནེ ཏིཊྛཏི, དྭིནྣམྤི ཨནཱཔཏྟི.

༦༩༣. པཀྑསངྐནྟཱ ཝཱཏི ཏིཏྠཱཡཏནཾ སངྐནྟཱ, སེསཾ ཨུཏྟཱནམེཝ. པཋམཔཱརཱཛིཀསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

ཏཏིཡསིཀྑཱཔདཾ.

༤. ཙཏུཏྠསངྒྷཱདིསེསསིཀྑཱཔདཝཎྞནཱ

༦༩༤-༨. ཙཏུཏྠེ ¶ – པཱདཔཱིཋཾ ནཱམ དྷོཏཔཱདཊྛཔནཀཾ. པཱདཀཋལིཀཱ ནཱམ ཨདྷོཏཔཱདཊྛཔནཀཾ ¶ . ཨནཉྙཱཡ གཎསྶ ཚནྡནྟི ཏསྶེཝ ཀཱརཀགཎསྶ ཚནྡཾ ཨཛཱནིཏྭཱ. ཝཏྟེ ཝཏྟནྟིནྟི ཏེཙཏྟཱལཱིསཔྤབྷེདེ ནེཏྠཱརཝཏྟེ ཝཏྟམཱནཾ. སེསཾ ཨུཏྟཱནམེཝ.

དྷུརནིཀྑེཔསམུཊྛཱནཾ – ཀཱཡཝཱཙཱཙིཏྟཏོ སམུཊྛཱཏི, ཀིརིཡཱཀིརིཡཾ, སཉྙཱཝིམོཀྑཾ, སཙིཏྟཀཾ ¶ , ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཙཏུཏྠསིཀྑཱཔདཾ.

༥. པཉྩམསངྒྷཱདིསེསསིཀྑཱཔདཝཎྞནཱ

༧༠༡. པཉྩམེ – ཨེཀཏོ ཨཝསྶུཏེཏི ཨེཏྠ ‘‘བྷིཀྑུནིཡཱ ཨཝསྶུཏབྷཱཝོ དཊྛབྦོ’’ཏི མཧཱཔཙྩརིཡཾ ཝུཏྟཾ. མཧཱཨཊྛཀཐཱཡཾ པནེཏཾ ན ཝུཏྟཾ, ཏཾ པཱལི༹ཡཱ སམེཏི. སེསཾ ཨུཏྟཱནམེཝ.

པཋམཔཱརཱཛིཀསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, དྭིཝེདནནྟི.

པཉྩམསིཀྑཱཔདཾ.

༦. ཚཊྛསངྒྷཱདིསེསསིཀྑཱཔདཝཎྞནཱ

༧༠༥-༦. ཚཊྛེ – ཡཏོ ཏྭནྟི ཡསྨཱ ཏྭཾ. ཨུཡྻོཛེཏི ཨཱཔཏྟི དུཀྐཊསྶཱཏིཨཱདིཀཱ སངྒྷཱདིསེསཔརིཡོསཱནཱ ཨཱཔཏྟིཡོ ཀསྶཱ ཧོནྟཱིཏི? ཨུཡྻོཛིཀཱཡ. ཝུཏྟཉྩེཏཾ པརིཝཱརེཔི –

‘‘ན དེཏི ན པཊིགྒཎྷཱཏི, པཊིགྒཧོ ཏེན ན ཝིཛྫཏི;

ཨཱཔཛྫཏི གརུཀཾ ན ལཧུཀཾ, ཏཉྩ པརིབྷོགཔཙྩཡཱ;

པཉྷཱ མེསཱ ཀུསལེཧི ཙིནྟིཏཱ’’ཏི. (པརི. ༤༨༡);

ཨཡཉྷི ¶ གཱཐཱ ཨིམཾ ཨུཡྻོཛིཀཾ སནྡྷཱཡ ཝུཏྟཱ. ཨིཏརིསྶཱ པན ཨཱཔཏྟིབྷེདོ པཋམསིཀྑཱཔདེ ཝིབྷཏྟོཏི. སེསཾ ཨུཏྟཱནམེཝ.

ཏིསམུཊྛཱནཾ ¶ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, ཏིཝེདནནྟི.

ཚཊྛསིཀྑཱཔདཾ.

༧. སཏྟམསངྒྷཱདིསེསསིཀྑཱཔདཝཎྞནཱ

༧༠༩. སཏྟམེ – ཡཱཝཏཏིཡཀཔདཏྠོ མཧཱཝིབྷངྒེ ཝུཏྟནཡེནེཝ ཝེདིཏབྦོ. སེསཾ ཨུཏྟཱནམེཝཱཏི.

སམནུབྷཱསནསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

སཏྟམསིཀྑཱཔདཾ.

༨. ཨཊྛམསངྒྷཱདིསེསསིཀྑཱཔདཝཎྞནཱ

༧༡༥. ཨཊྛམེ – ཀིསྨིཉྩིདེཝ ཨདྷིཀརཎེཏི ཙཏུནྣཾ ཨཉྙཏརསྨིཾ. པདབྷཱཛནེ པན ཀེཝལཾ ཨདྷིཀརཎཝིབྷཱགཾ དསྶེཏུཾ ¶ ‘‘ཨདྷིཀརཎཾ ནཱམ ཙཏྟཱརི ཨདྷིཀརཎཱནཱི’’ཏིཨཱདི ཝུཏྟཾ. སེསཾ ཨུཏྟཱནམེཝ སདྡྷིཾ སམུཊྛཱནཱདཱིཧཱིཏི.

ཨཊྛམསིཀྑཱཔདཾ.

༩. ནཝམསངྒྷཱདིསེསསིཀྑཱཔདཝཎྞནཱ

༧༢༣. ནཝམེ – སཾསཊྛཱཏི མིསྶཱིབྷཱུཏཱ. ཨནནུལོམིཀེནཱཏི པབྦཛིཏཱནཾ ཨནནུལོམེན ཀཱཡིཀཝཱཙསིཀེན. སཾསཊྛཱཏི གིཧཱིནཾ ཀོཊྚནཔཙནགནྡྷཔིསནམཱལཱགནྠནཱདིནཱ ཀཱཡིཀེན སཱསནཔཊིསཱསནཱཧརཎསཉྩརིཏྟཱདིནཱ ཝཱཙསིཀེན ཙ སཾསཊྛཱ. པཱཔོ ཀིཏྟིསདྡོ ཨེཏཱསནྟི པཱཔསདྡཱ ¶ . པཱཔོ ཨཱཛཱིཝསངྑཱཏོ སིལོཀོ ཨེཏཱསནྟི པཱཔསིལོཀཱ. སེསཾ ཨུཏྟཱནམེཝ སདྡྷིཾ སམུཊྛཱནཱདཱིཧཱིཏི.

ནཝམསིཀྑཱཔདཾ.

༡༠. དསམསངྒྷཱདིསེསསིཀྑཱཔདཝཎྞནཱ

༧༢༧. དསམེ ¶ – ཨེཝཱཙཱརཱཏི ཨེཝཾཨཱཙཱརཱ. ཡཱདིསོ ཏུམྷཱཀཾ ཨཱཙཱརོ, ཏཱདིསཱ ཨཱཙཱརཱཏི ཨཏྠོ. ཨེས ནཡོ སབྦཏྠ. ཨུཉྙཱཡཱཏི ཨཝཉྙཱཡ ནཱིཙཾ ཀཏྭཱ ཛཱནནཱཡ. པརིབྷཝེནཱཏི ཀིཾ ཨིམཱ ཀརིསྶནྟཱིཏི ཨེཝཾ པརིབྷཝིཏྭཱ ཛཱནནེན. ཨཀྑནྟིཡཱཏི ཨསཧནཏཱཡ; ཀོདྷེནཱཏི ཨཏྠོ. ཝེབྷསྶིཡཱཏི བལཝབྷསྶབྷཱཝེན; ཨཏྟནོ བལཔྤཀཱསནེན སམུཏྲཱསནེནཱཏི ཨཏྠོ. དུབྦལྱཱཏི ཏུམྷཱཀཾ དུབྦལབྷཱཝེན. སབྦཏྠ ཨུཉྙཱཡ ཙ པརིབྷཝེན ཙཱཏི ཨེཝཾ སམུཙྩཡཏྠོ དཊྛབྦོ. ཝིཝིཙྩཐཱཏི ཝིནཱ ཧོཐ. སེསཾ ཨུཏྟཱནམེཝ སདྡྷིཾ སམུཊྛཱནཱདཱིཧཱིཏི.

དསམསིཀྑཱཔདཾ.

ཨུདྡིཊྛཱ ཁོ ཨཡྻཱཡོ སཏྟརས སངྒྷཱདིསེསཱཏི ཨེཏྠ ཚནྣཾ པཋམཱཔཏྟིཀཱནཾ ཨནནྟརཱ སཉྩརིཏྟཾ, དྭེ དུཊྛདོསཱཏི ཨིམཱནི ཏཱིཎི སིཀྑཱཔདཱནི མཧཱཝིབྷངྒཏོ པཀྑིཔིཏྭཱ ནཝ པཋམཱཔཏྟིཀཱ, ཙཏུནྣཾ ཡཱཝཏཏིཡཀཱནཾ ཨནནྟརཱ མཧཱཝིབྷངྒཏོཔི ཙཏྟཱརོ ཡཱཝཏཏིཡཀེ པཀྑིཔིཏྭཱ ཨཊྛ ཡཱཝཏཏིཡཀཱ ཝེདིཏབྦཱ. ཨེཝཾ སབྦེཔི པཱཏིམོཀྑུདྡེསམགྒེན ¶ ཨུདྡིཊྛཱ ཁོ ཨཡྻཱཡོ སཏྟརས སངྒྷཱདིསེསཱ དྷམྨཱཏི ཨེཝམེཏྠ ཨཏྠོ དཊྛབྦོ. སེསཾ ཨུཏྟཱནམེཝ ཨཉྙཏྲ པཀྑམཱནཏྟཱ. ཏཾ པན ཁནྡྷཀེ ཝིཏྠཱརེན ཝཎྞཡིསྶཱམཱཏི.

སམནྟཔཱསཱདིཀཱཡ ཝིནཡསཾཝཎྞནཱཡ བྷིཀྑུནཱིཝིབྷངྒེ

སཏྟརསཀཝཎྞནཱ ནིཊྛིཏཱ.

སངྒྷཱདིསེསཀཎྜཾ ནིཊྛིཏཾ.

༣. ནིསྶགྒིཡཀཎྜཾ (བྷིཀྑུནཱིཝིབྷངྒཝཎྞནཱ)

པཋམནིསྶགྒིཡཔཱཙིཏྟིཡསིཀྑཱཔདཝཎྞནཱ

ཏིཾས ¶ ¶ ནིསྶགྒིཡཱ དྷམྨཱ, བྷིཀྑུནཱིནཾ པཀཱསིཏཱ;

ཡེ ཏེསཾ དཱནི བྷཝཏི, ཨཡཾ སཾཝཎྞནཱཀྐམོ.

༧༣༣. ཨཱམཏྟིཀཱཔཎནྟི ཨམཏྟཱནི ཝུཙྩནྟི བྷཱཛནཱནི; ཏཱནི ཡེ ཝིཀྐིཎནྟི, ཏེ ཝུཙྩནྟི ཨཱམཏྟིཀཱ; ཏེསཾ ཨཱཔཎོ ཨཱམཏྟིཀཱཔཎོ; ཏཾ ཝཱ པསཱརེསྶནྟཱིཏི ཨཏྠོ.

༧༣༤. པཏྟསནྣིཙཡཾ ཀརེཡྻཱཏི པཏྟསནྣིདྷིཾ ཀརེཡྻ; ཨེཀཱཧཾ ཨནདྷིཊྛཧིཏྭཱ ཝཱ ཨཝིཀཔྤེཏྭཱ ཝཱ པཏྟཾ ཋཔེཡྻཱཏི ཨཏྠོ. སེསཾ མཧཱཝིབྷངྒེ ཝུཏྟནཡེནེཝ ཝེདིཏབྦཾ. ཨཡམེཝ ཧི ཝིསེསོ – ཏཏྠ དསཱཧཾ པརིཧཱརོ, ཨིདྷ ཨེཀཱཧམྤི ནཏྠི. སེསཾ ཏཱདིསམེཝ.

ཨིདམྤི ཀཐིནསམུཊྛཱནཾ – ཀཱཡཝཱཙཏོ ཀཱཡཝཱཙཱཙིཏྟཏོ ཙ སམུཊྛཱཏི, ཨཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པཋམསིཀྑཱཔདཾ.

དུཏིཡནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༣༨. དུཏིཡེ – དུཙྩོལཱ༹ཏི ཝིརཱུཔཙོལཱ༹; ཛིཎྞཙོལཱ༹ཏི ཨཏྠོ. ཨཔཡྻཱཧཱིཏི ཨཔི ཨཡྻཱཧི.

༧༤༠. ཨཱདིསྶ ¶ དིནྣནྟི སམྤཏྟཱ བྷཱཛེནྟཱུཏི ཝཏྭཱཔི ཨིདཾ གཎསྶ ཨིདཾ ཏུམྷཱཀཾ དམྨཱིཏི ཝཏྭཱ ཝཱ དཱཏུཀམྱཏཱཡ པཱདམཱུལེ ཋཔེཏྭཱ ཝཱ དིནྣམྤི ཨཱདིསྶ དིནྣཾ ནཱམ ཧོཏི. ཨེཏཾ སབྦམྤི ཨཀཱལཙཱིཝརཾ. ཨཡྻཱཡ དམྨཱིཏི ཨེཝཾ པཊིལདྡྷཾ པན ཡཐཱདཱནེཡེཝ ཨུཔནེཏབྦཾ. སེསཾ ཨུཏྟཱནམེཝ.

ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, ཏིཝེདནནྟི.

དུཏིཡསིཀྑཱཔདཾ.

ཏཏིཡནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༤༣-༥. ཏཏིཡེ ¶ ¶ – ཧནྡཱཏི གཎྷ. སཡཾ ཨཙྪིནྡཏཱིཏི ཨེཀཾ དཏྭཱ ཨེཀཾ ཨཙྪིནྡནྟིཡཱ ཨེཀཾ ནིསྶགྒིཡཾ, བཧཱུསུ བཧཱུནི. སཙེ སཾཧརིཏྭཱ ཋཔིཏཱནི ཨེཀཏོ ཨཙྪིནྡཏི, ཝཏྠུགཎནཱཡ ཨཱཔཏྟིཡོ. བནྡྷིཏྭཱ ཋཔིཏེསུ པན ཨེཀཱཝ ཨཱཔཏྟི. སེསཾ ཨུཏྟཱནམེཝ.

ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཏཏིཡསིཀྑཱཔདཾ.

ཙཏུཏྠནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༤༨. ཙཏུཏྠེ – ཀཡེནཱཏི མཱུལེན. ན མེ ཨཱཝུསོ སཔྤིནཱ ཨཏྠོ; ཏེལེན མེ ཨཏྠོཏི ཨིདཾ ཀིར སཱ ཨཱཧཊསཔྤིཾ དཏྭཱ ཏེལམྤི ཨཱཧརིསྶཏཱིཏི མཉྙམཱནཱ ཨཱཧ. ཝིཉྙཱཔེཏྭཱཏི ཛཱནཱཔེཏྭཱ; ཨིདཾ ནཱམ ཨཱཧརཱཏི ཡཱཙིཏྭཱ ཝཱ.

༧༥༢. ཏཉྙེཝ ཝིཉྙཱཔེཏཱིཏི ཡཾ པཋམཾ ཝིཉྙཏྟཾ ཏཾ ཐོཀཾ ནཔྤཧོཏི, ཏསྨཱ པུན ཏཉྙེཝ ཝིཉྙཱཔེཏཱིཏི ཨཏྠོ. ཨཉྙཉྩ ཝིཉྙཱཔེཏཱིཏི སཙེ པཋམཾ སཔྤིཝིཉྙཏྟཾ, ཡམཀཾ པཙིཏབྦནྟི ཙ ཝེཛྫེན ཝུཏྟཏྟཱ ཏེལེན ཨཏྠོ ཧོཏི, ཏཏོ ཏེལེནཱཔི མེ ཨཏྠོཏི ཨེཝཾ ཨཉྙཉྩ ཝིཉྙཱཔེཏི. ཨཱནིསཾསཾ དསྶེཏྭཱཏི སཙེ ཀཧཱཔཎསྶ སཔྤི ཨཱབྷཏཾ ཧོཏི, ཨིམིནཱ ¶ མཱུལེན དིགུཎཾ ཏེལཾ ལབྦྷཏི, ཏེནཱཔི ཙ ཨིདཾ ཀིཙྩཾ ནིཔྥཛྫཏི, ཏསྨཱ ཏེལཾ ཨཱཧརཱཏི ཨེཝཾ ཨཱནིསཾསཾ དསྶེཏྭཱ ཝིཉྙཱཔེཏཱིཏི. སེསཾ ཨུཏྟཱནམེཝ.

ཚསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཙཏུཏྠསིཀྑཱཔདཾ.

པཉྩམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༥༣. པཉྩམེ ¶ – ན མེ སིཀྑམཱནེཏི ཨིདཾ ཀིར སཱ ཀུལདྷཱིཏཱ ‘‘ཨཡཾ ཨདྡྷཱ ཨེཝཾ ཝུཏྟཱ ཨིདཾ ཏེལཾ ཋཔེཏྭཱ སཔྤིམྤི མེ ཨཏྟནོ ཀུལགྷརཱ ཨཱཧརིསྶཏཱི’’ཏི མཉྙམཱནཱ ཨཱཧ. ཙེཏཱཔེཏྭཱཏི ཛཱནཱཔེཏྭཱ ཨིཙྩེཝ ཨཏྠོ. སེསཾ སབྦཏྠ ཙཏུཏྠསདིསམེཝཱཏི.

པཉྩམསིཀྑཱཔདཾ.

ཚཊྛནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༥༨. ཚཊྛེ ¶ – ཚནྡཀནྟི ‘‘ཨིདཾ ནཱམ དྷམྨཀིཙྩཾ ཀརིསྶཱམ, ཡཾ སཀྐོཐ; ཏཾ དེཐཱ’’ཏི ཨེཝཾ པརེསཾ ཚནྡཉྩ རུཙིཉྩ ཨུཔྤཱདེཏྭཱ གཧིཏཔརིཀྑཱརསྶེཏཾ ཨདྷིཝཙནཾ. ཨཉྙདཏྠིཀེནཱཏི ཨཉྙསྶཏྠཱཡ དིནྣེན. ཨཉྙུདྡིསིཀེནཱཏི ཨཉྙཾ ཨུདྡིསིཏྭཱ དིནྣེན. སངྒྷིཀེནཱཏི སངྒྷསྶ པརིཙྩཏྟེན.

༧༦༢. སེསཀཾ ཨུཔནེཏཱིཏི ཡདཏྠཱཡ དིནྣོ, ཏཾ ཙེཏཱཔེཏྭཱ ཨཝསེསཾ ཨཉྙསྶཏྠཱཡ ཨུཔནེཏི. སཱམིཀེ ཨཔལོཀེཏྭཱཏི ‘‘ཏུམྷེཧི ཙཱིཝརཏྠཱཡ དིནྣོ, ཨམྷཱཀཉྩ ཙཱིཝརཾ ཨཏྠི, ཏེལཱདཱིཧི པན ཨཏྠོ’’ཏི ཨེཝཾ ཨཱཔུཙྪིཏྭཱ ཨུཔནེཏི. ཨཱཔདཱསཱུཏི ཏཐཱརཱུཔེསུ ཨུཔདྡཝེསུ; བྷིཀྑུནིཡོ ཝིཧཱརཾ ཚཌྜེཏྭཱ པཀྐམནྟི, ཨེཝརཱུཔཱསུ ཨཱཔདཱསུ ཡཾ ཝཱ ཏཾ ཝཱ ཙེཏཱཔེཏུཾ ཝཊྚཏི. སེསཾ ཨུཏྟཱནམེཝ.

ཚསམུཊྛཱནཾ ¶ – ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཚཊྛསིཀྑཱཔདཾ.

སཏྟམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༦༤. སཏྟམེ – སཉྙཱཙིཀེནཱཏི སཡཾ ཡཱཙིཏཀེན. ཨེཏདེཝེཏྠ ནཱནཱཀརཎཾ. སེསཾ ཚཊྛསདིསམེཝཱཏི.

སཏྟམསིཀྑཱཔདཾ.

ཨཊྛམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༦༩. ཨཊྛམེ ¶ – མཧཱཛནིཀེནཱཏི གཎསྶ པརིཙྩཏྟེན. ཨེཏདེཝེཏྠ ནཱནཱཀརཎཾ.

ཨཊྛམསིཀྑཱཔདཾ.

ནཝམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༧༤. ནཝམསིཀྑཱཔདེ – སཉྙཱཙིཀེནཱཏི ཨིདཾ པདཾ ཨིཏོ ཨདྷིཀཏརཾ.

ནཝམསིཀྑཱཔདཾ.

དསམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༧༨. དསམེ – པརིཝེཎཾ ཨུནྡྲིཡཏཱིཏི པརིཝེཎཾ ཝིནསྶཏི; པརིཔཏཏཱིཏི ཨཏྠོ. ཨིདཉྩ པདཾ པུགྒལིཀེན སཉྙཱཙིཀེནཱཏི ཨིདཉྩ ཨེཏྟཀམེཝ ནཱནཱཀརཎཾ. སེསཾ པུབྦསདིསམེཝཱཏི.

དསམསིཀྑཱཔདཾ.

ཨེཀཱདསམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༨༤. ཨེཀཱདསམེ ¶ ¶ – གརུཔཱཝུརཎནྟི སཱིཏཀཱལེ པཱཝུརཎཾ. ཙཏུཀྐཾསཔརམནྟི ཨེཏྠ ཀཾསོ ནཱམ ཙཏུཀྐཧཱཔཎིཀོ ཧོཏི; ཏསྨཱ པདབྷཱཛནེ ‘‘སོལ༹སཀཧཱཔཎགྒྷནཀ’’ནྟི ཝུཏྟཾ.

ཨེཀཱདསམསིཀྑཱཔདཾ.

དྭཱདསམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༨༩. དྭཱདསམེ – ལཧུཔཱཝུརཎནྟི ཨུཎྷཀཱལེ པཱཝུརཎཾ. སེསཾ སིཀྑཱཔདདྭཡེཔི ཨུཏྟཱནམེཝ.

ཚསམུཊྛཱནཾ ¶ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

དྭཱདསམསིཀྑཱཔདཾ.

ཨུདྡིཊྛཱ ཁོ ཨཡྻཱཡོ ཏིཾས ནིསྶགྒིཡཱ པཱཙིཏྟིཡཱ དྷམྨཱཏི ཨེཏྠ མཧཱཝིབྷངྒེ ཙཱིཝརཝགྒཏོ དྷོཝནཉྩ པཊིགྒཧཎཉྩཱཏི དྭེ སིཀྑཱཔདཱནི ཨཔནེཏྭཱ ཨཀཱལཙཱིཝརཾ ཀཱལཙཱིཝརནྟི ཨདྷིཊྛཧིཏྭཱ བྷཱཛིཏསིཀྑཱཔདེན ཙ པརིཝཏྟེཏྭཱ ཨཙྪིནྣཙཱིཝརེན ཙ པཋམཝགྒོ པཱུརེཏབྦོ. པུན ཨེལ༹ཀལོམཝགྒསྶ ཨཱདིཏོ སཏྟ སིཀྑཱཔདཱནི ཨཔནེཏྭཱ སཏྟ ཨཉྙདཏྠིཀཱནི པཀྑིཔིཏྭཱ དུཏིཡཝགྒོ པཱུརེཏབྦོ. ཏཏིཡཝགྒཏོ པཋམཔཏྟཾ ཝསྶིཀསཱཊིཀཾ ཨཱརཉྙཀསིཀྑཱཔདནྟི ཨིམཱནི ཏཱིཎི ཨཔནེཏྭཱ པཏྟསནྣིཙཡགརུཔཱཝུརཎལཧུཔཱཝུརཎསིཀྑཱཔདེཧི ཏཏིཡཝགྒོ པཱུརེཏབྦོ. ཨིཏི བྷིཀྑུནཱིནཾ དྭཱདས སིཀྑཱཔདཱནི ཨེཀཏོཔཉྙཏྟཱནི, ཨཊྛཱརས ཨུབྷཏོཔཉྙཏྟཱནཱིཏི ཨེཝཾ སབྦེཔི པཱཏིམོཀྑུདྡེསམགྒེན ‘‘ཨུདྡིཊྛཱ ཁོ ཨཡྻཱཡོ ཏིཾས ནིསྶགྒིཡཱ པཱཙིཏྟིཡཱ དྷམྨཱ’’ཏི ཨེཝམེཏྠ ཨཏྠོ དཊྛབྦོ. སེསཾ ཝུཏྟནཡམེཝཱཏི.

སམནྟཔཱསཱདིཀཱཡ ཝིནཡསཾཝཎྞནཱཡ བྷིཀྑུནཱིཝིབྷངྒེ

ཏིཾསཀཝཎྞནཱ ནིཊྛིཏཱ.

ནིསྶགྒིཡཀཎྜཾ ནིཊྛིཏཾ.

༤. པཱཙིཏྟིཡཀཎྜཾ (བྷིཀྑུནཱིཝིབྷངྒཝཎྞནཱ)

༡. ལསུཎཝགྒོ

༡. པཋམལསུཎསིཀྑཱཔདཝཎྞནཱ

ཏིཾསཀཱནནྟརཾ ¶ ¶ དྷམྨཱ, ཚསཊྛིསཏསངྒཧཱ;

སངྒཱིཏཱ ཡེ ཨཡཾ དཱནི, ཧོཏི ཏེསམྤི ཝཎྞནཱ.

༧༩༣. ཏཏྠ ལསུཎཝགྒསྶ ཏཱཝ པཋམསིཀྑཱཔདེ – དྭེ ཏཡོ བྷཎྜིཀེཏི དྭེ ཝཱ ཏཡོ ཝཱ པོཊྚལིཀེ; སམྤུཎྞམིཉྫཱནམེཏཾ ¶ ཨདྷིཝཙནཾ. ན མཏྟཾ ཛཱནིཏྭཱཏི པམཱཎཾ ཨཛཱནིཏྭཱ ཁེཏྟཔཱལསྶ ཝཱརེནྟསྶ བཧུཾ ལསུཎཾ ཧརཱཔེསི.

ཨཉྙཏརཾ ཧཾསཡོནིནྟི སུཝཎྞཧཾསཡོནིཾ. སོ ཏཱསཾ ཨེཀེཀནྟི སོ ཧཾསོ ཛཱཏིསྶརོ ཨཧོསི, ཨཐ པུབྦསིནེཧེན ཨཱགནྟྭཱ ཏཱསཾ ཨེཀེཀཾ པཏྟཾ དེཏི, ཏཾ ཏཱཔནཏཱལནཙྪེདནཀྑམཾ སུཝཎྞམེཝ ཧོཏི.

༧༩༥. མཱགདྷཀནྟི མགདྷེསུ ཛཱཏཾ. མགདྷརཊྛེ ཛཱཏལསུཎམེཝ ཧི ཨིདྷ ལསུཎནྟི ཨདྷིཔྤེཏཾ, ཏམྤི བྷཎྜིཀལསུཎམེཝ, ན ཨེཀདྭིཏིམིཉྫཀཾ. ཀུརུནྡིཡཾ པན ཛཱཏདེསཾ ཨཝཏྭཱ ‘‘མཱགདྷཀཾ ནཱམ བྷཎྜིཀལསུཎ’’ནྟི ཝུཏྟཾ. ཨཛ྄ཛྷོཧཱརེ ཨཛ྄ཛྷོཧཱརེཏི ཨེཏྠ སཙེ དྭེ ཏཡོ བྷཎྜིཀེ ཨེཀཏོཡེཝ སངྑཱདིཏྭཱ ཨཛ྄ཛྷོཧརཏི, ཨེཀཾ པཱཙིཏྟིཡཾ. བྷིནྡིཏྭཱ ཨེཀེཀཾ མིཉྫཾ ཁཱདནྟིཡཱ པན པཡོགགཎནཱཡ པཱཙིཏྟིཡཱནཱིཏི.

༧༩༧. པལཎྜུཀཱདཱིནཾ ¶ ཝཎྞེན ཝཱ མིཉྫཱཡ ཝཱ ནཱནཏྟཾ ཝེདིཏབྦཾ – ཝཎྞེན ཏཱཝ པལཎྜུཀོ པཎྜུཝཎྞོ ཧོཏི. བྷཉྫནཀོ ལོཧིཏཝཎྞོ. ཧརིཏཀོ ཧརིཏཔཎྞཝཎྞོ. མིཉྫཱཡ པན པལཎྜུཀསྶ ཨེཀཱ མིཉྫཱ ཧོཏི, བྷཉྫནཀསྶ དྭེ, ཧརིཏཀསྶ ཏིསྶོ. ཙཱཔལསུཎོ ཨམིཉྫཀོ, ཨངྐུརམཏྟམེཝ ཧི ཏསྶ ཧོཏི. མཧཱཔཙྩརིཡཱདཱིསུ པན ‘‘པལཎྜུཀསྶ ཏཱིཎི མིཉྫཱནི, བྷཉྫནཀསྶ དྭེ, ཧརིཏཀསྶ ཨེཀ’’ནྟི ཝུཏྟཾ ¶ . ཨེཏེ པལཎྜུཀཱདཡོ སབྷཱཝེནེཝ ཝཊྚནྟི. སཱུཔསམྤཱཀཱདཱིསུ པན མཱགདྷཀམྤི ཝཊྚཏི. ཏཉྷི པཙྩམཱནེསུ མུགྒསཱུཔཱདཱིསུ ཝཱ མཙྪམཾསཝིཀཏིཡཱ ཝཱ ཏེལཱདཱིསུ ཝཱ བདརསཱལ༹ཝཱདཱིསུ ཝཱ ཨམྦིལསཱཀཱདཱིསུ ཝཱ ཨུཏྟརིབྷངྒེསུ ཝཱ ཡཏྠ ཀཏྠཙི ཨནྟམསོ ཡཱགུབྷཏྟེཔི པཀྑིཔིཏུཾ ཝཊྚཏི. སེསམེཏྠ ཨུཏྟཱནམེཝ.

ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

ལསུཎསིཀྑཱཔདཾ པཋམཾ.

༢. དུཏིཡསིཀྑཱཔདཝཎྞནཱ

༧༩༩. དུཏིཡེ – སམྦཱདྷེཏི པཊིཙྪནྣོཀཱསེ. ཏསྶ ཝིབྷཱགདསྶནཏྠཾ པན ‘‘ཨུབྷོ ཨུཔཀཙྪཀཱ མུཏྟཀརཎ’’ནྟི ཝུཏྟཾ. ཨེཀམྤི ¶ ལོམནྟི ཀཏྟརིཡཱ ཝཱ སཎྜཱསཀེན ཝཱ ཁུརེན ཝཱ ཡེན ཀེནཙི ཨེཀཔཡོགེན ཝཱ ནཱནཱཔཡོགེན ཝཱ ཨེཀཾ ཝཱ བཧཱུནི ཝཱ སཾཧརཱཔེནྟིཡཱ པཡོགགཎནཱཡ པཱཙིཏྟིཡཱནི, ན ལོམགཎནཱཡ.

༨༠༡. ཨཱབཱདྷཔཙྩཡཱཏི ཀཎྜུཀཙྪུཨཱདིཨཱབཱདྷཔཙྩཡཱ སཾཧརཱཔེནྟིཡཱ ཨནཱཔཏྟི. སེསཾ ཨུཏྟཱནམེཝ. ཙཏུསམུཊྛཱནཾ – ཀཱཡཏོ ཀཱཡཝཱཙཏོ ཀཱཡཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

དུཏིཡསིཀྑཱཔདཾ.

༣. ཏཏིཡསིཀྑཱཔདཝཎྞནཱ

༨༠༣-༤. ཏཏིཡེ ¶ – ཏལགྷཱཏཀེཏི མུཏྟཀརཎཏལགྷཱཏནེ. ཨནྟམསོ ཨུཔྤལཔཏྟེནཱཔཱིཏི ཨེཏྠ པཏྟཾ ཏཱཝ མཧནྟཾ, ཀེསརེནཱཔི པཧཱརཾ དེནྟིཡཱ ཨཱཔཏྟིཡེཝ.

༨༠༥. ཨཱབཱདྷཔཙྩཡཱཏི ¶ གཎྜཾ ཝཱ ཝཎཾ ཝཱ པཧརིཏུཾ ཝཊྚཏི. སེསཾ ཨུཏྟཱནམེཝ. པཋམཔཱརཱཛིཀསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, ཏིཝེདནནྟི.

ཏཏིཡསིཀྑཱཔདཾ.

༤. ཙཏུཏྠསིཀྑཱཔདཝཎྞནཱ

༨༠༦. ཙཏུཏྠེ – པུརཱཎརཱཛོརོདྷཱཏི པུརཱཎེ གིཧིབྷཱཝེ རཉྙོ ཨོརོདྷཱ. ཙིརཱཙིརཾ གཙྪཏཱིཏི ཙིརེན ཙིརེན གཙྪཏི. དྷཱརེཐཱཏི སཀྐོཐ. ཀསྶིདཾ ཀམྨནྟི ཝུཏྟེ ཨནཱརོཙིཏེཔི ཨེཏཱ མཡི ཨཱསངྐཾ ཀརིསྶནྟཱིཏི མཉྙམཱནཱ ཨེཝམཱཧ – ‘‘མཡ྄ཧིདཾ ཀམྨ’’ནྟི.

༨༠༧. ཛཏུམཊྛཀེཏི ཛཏུནཱ ཀཏེ མཊྛདཎྜཀེ. ཝཏྠུཝསེནེཝེཏཾ ཝུཏྟཾ, ཡཾཀིཉྩི པན དཎྜཀཾ པཝེསེནྟིཡཱ ཨཱཔཏྟིཡེཝ. ཏེནཱཧ – ‘‘ཨནྟམསོ ཨུཔྤལཔཏྟམྤི མུཏྟཀརཎཾ པཝེསེཏཱི’’ཏི. ཨེཏམྤི ཙ ཨཏིམཧནྟཾ, ཀེསརམཏྟམྤི པན པཝེསེནྟིཡཱ ཨཱཔཏྟི ཨེཝ. སེསཾ ཨུཏྟཱནམེཝ. སམུཊྛཱནཱདཱིནི ཏལགྷཱཏཀེ ཝུཏྟསདིསཱནེཝཱཏི.

ཙཏུཏྠསིཀྑཱཔདཾ.

༥. པཉྩམསིཀྑཱཔདཝཎྞནཱ

༨༡༠. པཉྩམེ ¶ – ཨཏིགམྦྷཱིརཾ ཨུདཀསུདྡྷིཀཾ ཨཱདིཡནྟཱིཏི ཨཏིཨནྟོ པཝེསེཏྭཱ ཨུདཀེན དྷོཝནཾ ཀུརུམཱནཱ.

༨༡༢. ཀེསགྒམཏྟམྤི ཨཏིཀྐཱམེཏཱིཏི ཝིཏྠཱརཏོ ཏཏིཡཾ ཝཱ ཙཏུཏྠཾ ཝཱ ཨངྒུལཾ གམྦྷཱིརཏོ དྭིནྣཾ པབྦཱནཾ ཨུཔརི ཀེསགྒམཏྟམྤི པཝེསེནྟིཡཱ པཱཙིཏྟིཡནྟི ཨཏྠོ. ཝུཏྟཉྷེཏཾ མཧཱཔཙྩརིཡཾ ¶ – ‘‘ཨེཀིསྶཱ ཨངྒུལིཡཱ ཏཱིཎི པབྦཱནི ཨཱདཱཏུཾ ན ལབྷཏི, ཏིཎྞཾ ཝཱ ཙཏུནྣཾ ཝཱ ཨེཀེཀམྤི པབྦཾ ཨཱདཱཏུཾ ན ¶ ལབྷཏཱི’’ཏི. སེསཾ ཨུཏྟཱནམེཝ. སམུཊྛཱནཱདཱིནིཔི ཏལགྷཱཏཀེ ཝུཏྟསདིསཱནེཝཱཏི.

པཉྩམསིཀྑཱཔདཾ.

༦. ཚཊྛསིཀྑཱཔདཝཎྞནཱ

༨༡༥. ཚཊྛེ – བྷཏྟཝིསྶགྒནྟི བྷཏྟཀིཙྩཾ. པཱནཱིཡེན ཙ ཝིདྷཱུཔནེན ཙ ཨུཔཏིཊྛིཏྭཱཏི ཨེཀེན ཧཏྠེན པཱནཱིཡཐཱལཀཾ ཨེཀེན བཱིཛནིཾ གཧེཏྭཱ བཱིཛམཱནཱ སམཱིཔེ ཋཏྭཱཏི ཨཏྠོ. ཨཙྩཱཝདཏཱིཏི པུབྦེཔི ཏུམྷེ ཨེཝཾ བྷུཉྫཐ, ཨཧཾ ཨེཝཾ ཨུཔཊྛཱནཾ ཀརོམཱི’’ཏི པབྦཛིཏཙཱརིཏྟཾ ཨཏིཀྐམིཏྭཱ གེཧསྶིཏཀཐཾ ཀཐེཏཱིཏི ཨཏྠོ.

༨༡༧. ཡཾཀིཉྩི པཱནཱིཡནྟི སུདྡྷཨུདཀཾ ཝཱ ཧོཏུ, ཏཀྐདདྷིམཏྠུརསཁཱིརཱདཱིནཾ ཝཱ ཨཉྙཏརཾ. ཡཱ ཀཱཙི བཱིཛནཱིཏི ཨནྟམསོ ཙཱིཝརཀཎྞོཔི. ཧཏྠཔཱསེ ཏིཊྛཏི ཨཱཔཏྟི པཱཙིཏྟིཡསྶཱཏི ཨིདྷ ཋཱནཔཙྩཡཱཝ པཱཙིཏྟིཡཾ ཝུཏྟཾ. པཧཱརཔཙྩཡཱ པན ཁནྡྷཀེ དུཀྐཊཾ པཉྙཏྟཾ.

༨༡༩. དེཏི དཱཔེཏཱིཏི པཱནཱིཡཾ ཝཱ སཱུཔཱདིཾ ཝཱ ཨིམཾ པིཝཐ, ཨིམིནཱ བྷུཉྫཐཱཏི དེཏི; ཏཱལཝཎྚཾ ཨིམིནཱ བཱིཛནྟཱ བྷུཉྫཐཱཏི དེཏི; ཨཉྙེན ཝཱ ཨུབྷཡམྤི དཱཔེཏི, ཨནཱཔཏྟི. ཨནུཔསམྤནྣཾ ཨཱཎཱཔེཏཱིཏི ཨུཔཏིཊྛནཏྠཾ སཱམཎེརིཾ ཨཱཎཱཔེཏི, ཨནཱཔཏྟི. སེསཾ ཨུཏྟཱནམེཝ.

ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

ཚཊྛསིཀྑཱཔདཾ.

༧. སཏྟམསིཀྑཱཔདཝཎྞནཱ

༨༢༢. སཏྟམེ ¶ – བྷུཉྫིསྶཱམཱིཏི པཊིགྒཎྷཱཏི ཨཱཔཏྟི དུཀྐཊསྶཱཏི ཨིདཾ པཡོགདུཀྐཊཾ ནཱམ, ཏསྨཱ ན ཀེཝལཾ པཊིགྒཧཎེཡེཝ ¶ ཧོཏི, པཊིགྒཎྷིཏྭཱ པན ཨརཉྙཏོ ཨཱཧརཎེཔི ¶ སུཀྑཱཔནེཔི ཝདྡལིདིཝསེ བྷཛྫནཏྠཱཡ ཨུདྡྷནསཛྫནེཔི ཀཔལླསཛྫནེཔི དབྦིསཛྫནེཔི དཱརཱུནི ཨཱདཱཡ ཨགྒིཀརཎེཔི ཀཔལླམྷི དྷཉྙཔཀྑིཔནེཔི དབྦིཡཱ སངྒྷཊྚནེསུཔི ཀོཊྚནཏྠཾ ཨུདུཀྑལམུསལཱདིསཛྫནེསུཔི ཀོཊྚནཔཔྥོཊནདྷོཝནཱདཱིསུཔི ཡཱཝ མུཁེ ཋཔེཏྭཱ ཨཛ྄ཛྷོཧརཎཏྠཾ དནྟེཧི སངྑཱདཏི, ཏཱཝ སབྦཔཡོགེསུ དུཀྐཊཱནི, ཨཛ྄ཛྷོཧརཎཀཱལེ པན ཨཛ྄ཛྷོཧརཎགཎནཱཡ པཱཙིཏྟིཡཱནི. ཨེཏྠ ཙ ཝིཉྙཏྟི ཙེཝ བྷོཛནཉྩ པམཱཎཾ. ཏསྨཱ སཡཾ ཝིཉྙཱཔེཏྭཱ ཨཉྙཱཡ བྷཛྫནཀོཊྚནཔཙནཱནི ཀཱརཱཔེཏྭཱ བྷུཉྫནྟིཡཱཔི ཨཱཔཏྟི. ཨཉྙཱཡ ཝིཉྙཱཔེཏྭཱ སཡཾ བྷཛྫནཱདཱིནི ཀཏྭཱ བྷུཉྫནྟིཡཱཔི ཨཱཔཏྟི. མཧཱཔཙྩརིཡཾ པན ཝུཏྟཾ – ‘‘ཨིདཾ ཨཱམཀདྷཉྙཾ ནཱམ མཱཏརམྤི ཝིཉྙཱཔེཏྭཱ བྷུཉྫནྟིཡཱ པཱཙིཏྟིཡམེཝ, ཨཝིཉྙཏྟིཡཱ ལདྡྷཾ སཡཾ བྷཛྫནཱདཱིནི ཀཏྭཱ ཝཱ ཀཱརཱཔེཏྭཱ ཝཱ བྷུཉྫནྟིཡཱ དུཀྐཊཾ. ཨཉྙཱཡ ཝིཉྙཏྟིཡཱ ལདྡྷཾ སཡཾ ཝཱ བྷཛྫནཱདཱིནི ཀཏྭཱ ཏཱཡ ཝཱ ཀཱརཱཔེཏྭཱ ཨཉྙཱཡ ཝཱ ཀཱརཱཔེཏྭཱ བྷུཉྫནྟིཡཱཔི དུཀྐཊམེཝཱ’’ཏི. པུནཔི ཝུཏྟཾ ‘‘ཨཉྙཱཡ ཝིཉྙཏྟིཡཱ ལདྡྷཾ, སཡཾ བྷཛྫནཱདཱིནི ཀཏྭཱ བྷུཉྫནྟིཡཱ པཱཙིཏྟིཡམེཝ. བྷཛྫནཱདཱིནི ཀཱརཱཔེཏྭཱ བྷུཉྫནྟིཡཱ པན དུཀྐཊ’’ནྟི. ཏཾ པུབྦཱཔརཝིརུདྡྷཾ ཧོཏི, ན ཧི བྷཛྫནཱདཱིནཾ ཀརཎེ ཝཱ ཀཱརཱཔནེ ཝཱ ཝིསེསོ ཨཏྠི. མཧཱཨཊྛཀཐཱཡཾ པན ‘‘ཨཉྙཱཡ ཝིཉྙཏྟཾ བྷུཉྫནྟིཡཱ དུཀྐཊ’’ནྟི ཨཝིསེསེན ཝུཏྟཾ.

༨༢༣. ཨཱབཱདྷཔཙྩཡཱཏི སེདཀམྨཱདཱིནཾ ཨཏྠཱཡ དྷཉྙཝིཉྙཏྟིཡཱ ཨནཱཔཏྟི. ‘‘ཨཝིཉྙཏྟིཡཱ ལབྦྷམཱནཾ པན ནཝཀམྨཏྠཱཡ སམྤཊིཙྪིཏུཾ ཝཊྚཏཱི’’ཏི མཧཱཔཙྩརིཡཾ ཝུཏྟཾ. ཨཔརཎྞཾ ཝིཉྙཱཔེཏཱིཏི ཋཔེཏྭཱ སཏྟ དྷཉྙཱནི མུགྒམཱསཱདིཾ ཝཱ ལཱབུཀུམྦྷཎྜཱདིཾ ཝཱ ཨཉྙཾ ཡཾཀིཉྩི ཉཱཏཀཔཝཱརིཏཊྛཱནེ ¶ ཝིཉྙཱཔེནྟིཡཱ ཨནཱཔཏྟི. ཨཱམཀདྷཉྙཾ པན ཉཱཏཀཔཝཱརིཏཊྛཱནེ ན ཝཊྚཏི. སེསཾ ཨུཏྟཱནམེཝ.

ཙཏུསམུཊྛཱནཾ – ཀཱཡཏོ ཀཱཡཝཱཙཏོ ཀཱཡཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

སཏྟམསིཀྑཱཔདཾ.

༨. ཨཊྛམསིཀྑཱཔདཝཎྞནཱ

༨༢༤. ཨཊྛམེ ¶ – ནིབྦིཊྛོ རཱཛབྷཊོ རཉྙོ བྷཏི ཀེཎི ཨེཏེནཱཏི ནིབྦིཊྛརཱཛབྷཊོ, ཨེཀཾ ¶ ཋཱནནྟརཾ ཀེཎིཡཱ གཧེཏྭཱ ཏཏོ ལདྡྷཨུདཡོཏི ཨཏྠོ. ཏཉྙེཝ བྷཊཔཐཾ ཡཱཙིསྶཱམཱིཏི རཉྙོ ཀེཎིཾ དཏྭཱ པུན ཏཾཡེཝ ཋཱནནྟརཾ ཡཱཙིསྶཱམཱིཏི ཙིནྟེནྟོ. པརིབྷཱསཱིཏི ཏཱ བྷིཀྑུནིཡོ ‘‘མཱ པུན ཨེཝཾ ཀརིཏྠཱ’’ཏི སནྟཛྫེསི.

༨༢༦. སཡཾ ཚཌྜེཏཱིཏི ཙཏྟཱརིཔི ཝཏྠཱུནི ཨེཀཔཡོགེན ཚཌྜེནྟིཡཱ ཨེཀཱཝ ཨཱཔཏྟི, པཱཊེཀྐཾ ཚཌྜེནྟིཡཱ ཝཏྠུགཎནཱཡ ཨཱཔཏྟིཡོ. ཨཱཎཏྟིཡམྤི ཨེསེཝ ནཡོ. དནྟཀཊྛཚཌྜནེཔི བྷིཀྑུནིཡཱ པཱཙིཏྟིཡམེཝ. བྷིཀྑུསྶ སབྦཏྠ དུཀྐཊཾ. སེསཾ ཨུཏྟཱནམེཝ.

ཚསམུཊྛཱནཾ – ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཨཊྛམསིཀྑཱཔདཾ.

༩. ནཝམསིཀྑཱཔདཝཎྞནཱ

༨༣༠-༢. ནཝམེ – ཡཾ མནུསྶཱནཾ ཨུཔབྷོགཔརིབྷོགཾ རོཔིམནྟི ཁེཏྟཾ ཝཱ ཧོཏུ ནཱལི༹ཀེརཱདིཨཱརཱམོ ཝཱ, ཡཏྠ ཀཏྠཙི རོཔིམཧརིཏཊྛཱནེ ཨེཏཱནི ཝཏྠཱུནི ཚཌྜེནྟིཡཱ པུརིམནཡེནེཝ ཨཱཔཏྟིབྷེདོ ཝེདིཏབྦོ. ཁེཏྟེ ཝཱ ཨཱརཱམེ ཝཱ ནིསཱིདིཏྭཱ བྷུཉྫམཱནཱ ཨུཙྪུཨཱདཱིནི ཝཱ ཁཱདནྟཱི; གཙྪམཱནཱ ཨུཙྪིཊྛོདཀཙལཀཱདཱིནི ཧརིཏཊྛཱནེ ཚཌྜེཏི, ཨནྟམསོ ཨུདཀཾ པིཝིཏྭཱ མཏྠཀཙྪིནྣནཱལི༹ཀེརམྤི ཚཌྜེཏི, པཱཙིཏྟིཡམེཝ. བྷིཀྑུནོ དུཀྐཊཾ. ཀསིཏཊྛཱནེ པན ནིཀྑིཏྟབཱིཛེ ཡཱཝ ཨངྐུརཾ ན ཨུཊྛཧཏི, ཏཱཝ སབྦེསཾ དུཀྐཊཾ ¶ . ཨནིཀྑིཏྟབཱིཛེསུ ཁེཏྟཀོཎཱདཱིསུ ཝཱ ཨསཉྫཱཏརོཔིམེསུ ཁེཏྟམརིཡཱདཱདཱིསུ ཝཱ ཚཌྜེཏུཾ ཝཊྚཏི. མནུསྶཱནཾ ཀཙཝརཚཌྜནཊྛཱནེཔི ཝཊྚཏི. ཚཌྜིཏཁེཏྟེཏི མནུསྶེསུ སསྶཾ ཨུདྡྷརིཏྭཱ གཏེསུ ཚཌྜིཏཁེཏྟཾ ནཱམ ཧོཏི, ཏཏྠ ཝཊྚཏི. ཡཏྠ པན ལཱཡིཏམྤི པུབྦཎྞཱདི པུན ཨུཊྛཧིསྶཏཱིཏི རཀྑནྟི, ཏཏྠ ཡཐཱཝཏྠུཀམེཝ. སེསཾ ཨུཏྟཱནམེཝ. ཚསམུཊྛཱནཾ – ཀིརིཡཱཀིརིཡཾ…པེ… ཏིཝེདནནྟི.

ནཝམསིཀྑཱཔདཾ.

༡༠. དསམསིཀྑཱཔདཝཎྞནཱ

༨༣༥. དསམེ ¶ ¶ – ཡཾཀིཉྩི ནཙྩནྟི ནཊཱདཡོ ཝཱ ནཙྩནྟུ སོཎྜཱ ཝཱ, ཨནྟམསོ མོརསུཝམཀྐཊཱདཡོཔི, སབྦམྤེཏཾ ནཙྩམེཝ. ཡཾཀིཉྩི གཱིཏནྟི ཡཾཀིཉྩི ནཊཱདཱིནཾ ཝཱ གཱིཏཾ ཧོཏུ, ཨརིཡཱནཾ པརིནིབྦཱནཀཱལེ རཏནཏྟཡགུཎཱུཔསཾཧིཏཾ སཱདྷུཀཱིལི༹ཏགཱིཏཾ ཝཱ ཨསཾཡཏབྷིཀྑཱུནཾ དྷམྨབྷཱཎཀགཱིཏཾ ཝཱ, སབྦམྤེཏཾ གཱིཏམེཝ. ཡཾཀིཉྩི ཝཱདིཏནྟི ཏནྟིབདྡྷཱདིཝཱདནཱིཡབྷཎྜཝཱདིཏཾ ཝཱ ཧོཏུ, ཀུཊབྷེརིཝཱདིཏཾ ཝཱ, ཨནྟམསོ ཨུདཀབྷེརིཝཱདིཏམྤི, སབྦམྤེཏཾ ཝཱདིཏམེཝ.

༨༣༦. དསྶནཱཡ གཙྪཏི ཨཱཔཏྟི དུཀྐཊསྶཱཏི པདཝཱརགཎནཱཡ ཨཱཔཏྟི དུཀྐཊསྶ. ཡཏྠ ཋིཏཱ པསྶཏི ཝཱ སུཎཱཏི ཝཱཏི ཨེཀཔཡོགེན ཨོལོཀེནྟཱི པསྶཏི, ཏེསཾཡེཝ གཱིཏཝཱདིཏཾ སུཎཱཏི, ཨེཀམེཝ པཱཙིཏྟིཡཾ. སཙེ པན ཨེཀཾ དིསཾ ཨོལོཀེཏྭཱ ནཙྩཾ པསྶཏི, པུན ཨཉྙཏོ ཨོལོཀེཏྭཱ གཱཡནྟེ པསྶཏི ཨཉྙཏོ ཝཱདེནྟེ, པཱཊེཀྐཱ ཨཱཔཏྟིཡོ. བྷིཀྑུནཱི སཡམྤི ནཙྩིཏུཾ ཝཱ གཱཡིཏུཾ ཝཱ ཝཱདིཏུཾ ཝཱ ན ལབྷཏི, ཨཉྙེ ‘‘ནཙྩ, གཱཡ, ཝཱདེཧཱི’’ཏི ཝཏྟུམྤི ན ལབྷཏི. ‘‘ཙེཏིཡསྶ ཨུཔཧཱརཾ དེཐ, ཨུཔཱསཀཱ’’ཏི ཝཏྟུམྤི ‘‘ཏུམྷཱཀཾ ཙེཏིཡསྶ ཨུཔཊྛཱནཾ ཀརོམཱ’’ཏི ཝུཏྟེ ‘‘སཱདྷཱུ’’ཏི སམྤཊིཙྪིཏུམྤི ¶ ན ལབྷཏི. སབྦཏྠ པཱཙིཏྟིཡནྟི སབྦཨཊྛཀཐཱསུ ཝུཏྟཾ. བྷིཀྑུནོ དུཀྐཊཾ. ‘‘ཏུམྷཱཀཾ ཙེཏིཡསྶ ཨུཔཊྛཱནཾ ཀརོམཱ’’ཏི ཝུཏྟེ པན ‘‘ཨུཔཊྛཱནཀརཎཾ ནཱམ སུནྡར’’ནྟི ཝཏྟུཾ ཝཊྚཏི.

༨༣༧. ཨཱརཱམེ ཋིཏཱཏི ཨཱརཱམེ ཋཏྭཱ ཨནྟརཱརཱམེ ཝཱ བཧིཨཱརཱམེ ཝཱ ནཙྩཱདཱིནི པསྶཏི ཝཱ སུཎཱཏི ཝཱ, ཨནཱཔཏྟི. སཏི ཀརཎཱིཡེཏི སལཱཀབྷཏྟཱདཱིནཾ ཝཱ ཨཏྠཱཡ ཨཉྙེན ཝཱ ཀེནཙི ཀརཎཱིཡེན གནྟྭཱ གཏཊྛཱནེ པསྶཏི ཝཱ སུཎཱཏི ཝཱ, ཨནཱཔཏྟི. ཨཱཔདཱསཱུཏི ཏཱདིསེན ཨུཔདྡཝེན ཨུཔདྡུཏཱ སམཛྫཊྛཱནཾ པཝིསཏི, ཨེཝཾ པཝིསིཏྭཱ པསྶནྟིཡཱ ཝཱ སུཎནྟིཡཱ ཝཱ ཨནཱཔཏྟི. སེསཾ ཨུཏྟཱནམེཝ.

ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, ཏིཝེདནནྟི.

དསམསིཀྑཱཔདཾ.

ལསུཎཝགྒོ པཋམོ.

༢. ཨནྡྷཀཱརཝགྒོ

༡. པཋམསིཀྑཱཔདཝཎྞནཱ

༨༣༩. ཨནྡྷཀཱརཝགྒསྶ ¶ ¶ པཋམསིཀྑཱཔདེ – ཨཔྤདཱིཔེཏི པདཱིཔཙནྡསཱུརིཡཨགྒཱིསུ ཨེཀེནཱཔི ཨནོབྷཱསིཏེ. ཏེནེཝསྶ པདབྷཱཛནེ ‘‘ཨནཱལོཀེ’’ཏི ཝུཏྟཾ. སལླཔེཡྻ ཝཱཏི གེཧསྶིཏཀཐཾ ཀཐེཡྻ.

༨༤༡. ཨརཧོཔེཀྑཱ ཨཉྙཝིཧིཏཱཏི ན རཧོཨསྶཱདཱཔེཀྑཱ རཧོཨསྶཱདཏོ ཨཉྙཝིཧིཏཱཝ ཧུཏྭཱ ཉཱཏིཾ ཝཱ པུཙྪཏི, དཱནེ ཝཱ པཱུཛཱཡ ཝཱ མནྟེཏི. སེསཾ ཨུཏྟཱནམེཝ. ཐེཡྻསཏྠསམུཊྛཱནཾ – ཀཱཡཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དྭིཝེདནནྟི.

པཋམསིཀྑཱཔདཾ.

༢. དུཏིཡསིཀྑཱཔདཝཎྞནཱ

༨༤༢. དུཏིཡེ – པཊིཙྪནྣེ ཨོཀཱསེཏི ཨིདམེཝ ནཱནཾ. སེསཾ སབྦཾ པུརིམསདིསམེཝཱཏི.

དུཏིཡསིཀྑཱཔདཾ.

༣. ཏཏིཡསིཀྑཱཔདཝཎྞནཱ

༨༤༦. ཏཏིཡེ ¶ – ཨཛ྄ཛྷོཀཱསེཏི ནཱནཾ, སེསཾ སབྦཾ ཏཱདིསམེཝཱཏི.

ཏཏིཡསིཀྑཱཔདཾ.

༤. ཙཏུཏྠསིཀྑཱཔདཝཎྞནཱ

༨༥༠-༣. ཙཏུཏྠེ ¶ – ནིཀཎྞིཀནྟི ཀཎྞམཱུལཾ ཝུཙྩཏི; ཀཎྞམཱུལེ ཛཔྤེཡྻཱཏི ཝུཏྟཾ ཧོཏི. སཏི ཀརཎཱིཡེཏི སལཱཀབྷཏྟཱདཱིནཾ ཨཱཧརཎཏྠཱཡ ཝིཧཱརེ ཝཱ དུནྣིཀྑིཏྟཾ པཊིསཱམནཏྠཱཡ. སེསཾ ཨུཏྟཱནམེཝ. སམུཊྛཱནཱདཱིནི པུརིམསདིསཱནེཝཱཏི.

ཙཏུཏྠསིཀྑཱཔདཾ.

༥. པཉྩམསིཀྑཱཔདཝཎྞནཱ

༨༥༤. པཉྩམེ ¶ – གྷརཾ སོདྷེནྟཱཏི ཏེསཾ ཀིར ཨེཏདཧོསི – ‘‘ཐེརིཡཱ ཀོཙི ཀཱཡིཀཝཱཙསིཀོ ཝཱིཏིཀྐམོ ན དིསྶཏི, གྷརམྤི ཏཱཝ སོདྷེམཱ’’ཏི, ཏཏོ གྷརཾ སོདྷེནྟཱ ནཾ ཨདྡསཾསུ.

༨༥༦. ཨནོཝསྶཀཾ ཨཏིཀྐཱམེནྟིཡཱཏི པཋམཾ པཱདཾ ཨཏིཀྐཱམེནྟིཡཱ དུཀྐཊཾ, དུཏིཡཾ ཨཏིཀྐཱམེནྟིཡཱ པཱཙིཏྟིཡཾ, ཨུཔཙཱརཱཏིཀྐམེ ཨེསེཝ ནཡོ.

༨༥༨. གིལཱནཱཡཱཏི ཡཱ ཏཱདིསེན གེལཉྙེན ཨཱཔུཙྪིཏུཾ ན སཀྐོཏི. ཨཱཔདཱསཱུཏི གྷརེ ཨགྒི ཝཱ ཨུཊྛིཏོ ཧོཏི, ཙོརཱ ཝཱ; ཨེཝརཱུཔེ ཨུཔདྡཝེ ཨནཱཔུཙྪཱ པཀྐམཏི, ཨནཱཔཏྟི. སེསམེཏྠ ཨུཏྟཱནམེཝ.

ཀཐིནསམུཊྛཱནཾ – ཀཱཡཝཱཙཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པཉྩམསིཀྑཱཔདཾ.

༦. ཚཊྛསིཀྑཱཔདཝཎྞནཱ

༨༦༠. ཚཊྛེ – ཨབྷིནིསཱིདེཡྻཱཏི ནིསཱིདེཡྻ. ནིསཱིདིཏྭཱ གཙྪནྟིཡཱ ཨེཀཱ ཨཱཔཏྟི, ཨནིསཱིདིཏྭཱ ནིཔཛྫིཏྭཱ གཙྪནྟིཡཱ ཨེཀཱ, ནིསཱིདིཏྭཱ ནིཔཛྫིཏྭཱ གཙྪནྟིཡཱ དྭེ.

༨༦༣. དྷུཝཔཉྙཏྟེཏི ¶ བྷིཀྑུནཱིནཾ ཨཏྠཱཡ ནིཙྩཔཉྙཏྟེ. སེསཾ ཨུཏྟཱནམེཝ. ཀཐིནསམུཊྛཱནཾ…པེ… ཏིཝེདནནྟི.

ཚཊྛསིཀྑཱཔདཾ.

༧. སཏྟམསིཀྑཱཔདཝཎྞནཱ

༨༦༤. སཏྟམེཔི ¶ – སབྦཾ ཚཊྛེ ཝུཏྟནཡེནེཝ ཝེདིཏབྦཾ.

སཏྟམསིཀྑཱཔདཾ.

༨. ཨཊྛམསིཀྑཱཔདཝཎྞནཱ

༨༦༩. ཨཊྛམེ ¶ – སབྦཾ ཨུཏྟཱནམེཝ. ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ ཨཀུསལཙིཏྟཾ, དུཀྑཝེདནནྟི.

ཨཊྛམསིཀྑཱཔདཾ.

༩. ནཝམསིཀྑཱཔདཝཎྞནཱ

༨༧༥. ནཝམེ – ཨབྷིསཔེཡྻཱཏི སཔཐཾ ཀརེཡྻ. ནིརཡེན ཨབྷིསཔཏི ནཱམ ‘‘ནིརཡེ ནིབྦཏྟཱམི, ཨཝཱིཙིམྷི ནིབྦཏྟཱམི, ནིརཡེ ནིབྦཏྟཏུ, ཨཝཱིཙིམྷི ནིབྦཏྟཏཱུ’’ཏི ཨེཝམཱདིནཱ ནཡེན ཨཀྐོསཏི. བྲཧྨཙརིཡེན ཨབྷིསཔཏི ནཱམ ‘‘གིཧིནཱི ཧོམི, ཨོདཱཏཝཏྠཱ ཧོམི, པརིབྦཱཛིཀཱ ཧོམི, ཨིཏརཱ ཝཱ ཨེདིསཱ ཧོཏཱུ’’ཏི ཨེཝམཱདིནཱ ནཡེན ཨཀྐོསཏི; ཝཱཙཱཡ ཝཱཙཱཡ པཱཙིཏྟིཡཾ. ཋཔེཏྭཱ པན ནིརཡཉྩ བྲཧྨཙརིཡཉྩ ‘‘སུནཁཱི སཱུཀརཱི ཀཱཎཱ ཀུཎཱི’’ཏིཨཱདིནཱ ནཡེན ཨཀྐོསནྟིཡཱ ཝཱཙཱཡ ཝཱཙཱཡ དུཀྐཊཾ.

༨༧༨. ཨཏྠཔུརེཀྑཱརཱཡཱཏི ཨཊྛཀཐཾ ཀཐེནྟིཡཱ. དྷམྨཔུརེཀྑཱརཱཡཱཏི པཱལི༹ཾ ཝཱཙེནྟིཡཱ. ཨནུསཱསནིཔུརེཀྑཱརཱཡཱཏི ‘‘ཨིདཱནིཔི ཏྭཾ ཨེདིསཱ, སཱདྷུ ཝིརམསྶུ, ནོ ཙེ ཝིརམསི, ཨདྡྷཱ པུན ¶ ཨེཝརཱུཔཱནི ཀམྨཱནི ཀཏྭཱ ནིརཡེ ཨུཔྤཛྫིསྶསི, ཏིརཙྪཱནཡོནིཡཱ ཨུཔྤཛྫིསྶསཱི’’ཏི ཨེཝཾ ཨནུསཱསནིཡཾ ཋཏྭཱ ཝདནྟིཡཱ ཨནཱཔཏྟི. སེསཾ ཨུཏྟཱནམེཝ.

ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ནཝམསིཀྑཱཔདཾ.

༡༠. དསམསིཀྑཱཔདཝཎྞནཱ

༨༧༩. དསམེ – སབྦཾ ཨུཏྟཱནམེཝ. དྷུརནིཀྑེཔསམུཊྛཱནཾ – ཀཱཡཝཱཙཱཙིཏྟཏོ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཀམྨཾ, དུཀྑཝེདནནྟི.

དསམསིཀྑཱཔདཾ.

ཨནྡྷཀཱརཝགྒོ དུཏིཡོ.

༣. ནགྒཝགྒོ

༡. པཋམསིཀྑཱཔདཝཎྞནཱ

༨༨༣-༦. ནགྒཝགྒསྶ ¶ ¶ པཋམསིཀྑཱཔདེ – བྲཧྨཙརིཡཾ ཙིཎྞེནཱཏི བྲཧྨཙརིཡེན ཙིཎྞེན; ཨཐ ཝཱ བྲཧྨཙརིཡསྶ ཙརཎེནཱཏི; ཨེཝཾ ཀརཎཏྠེ ཝཱ སཱམིཨཏྠེ ཝཱ ཨུཔཡོགཝཙནཾ ཝེདིཏབྦཾ. ཨཙྪིནྣཙཱིཝརིཀཱཡཱཏི ཨིདཾ ཨུདཀསཱཊིཀཾ སནྡྷཱཡ ཝུཏྟཾ, ན ཨཉྙཾ ཙཱིཝརཾ. ཏསྨཱ ཨུདཀསཱཊིཀཱཡ ཨཙྪིནྣཱཡ ཝཱ ནཊྛཱཡ ཝཱ ནགྒཱཡ ནྷཱཡནྟིཡཱ ཨནཱཔཏྟི. སཙེཔི ཨུདཀསཱཊིཀཙཱིཝརཾ མཧགྒྷཾ ཧོཏི, ན སཀྐཱ ནིཝཱསེཏྭཱ བཧི གནྟུཾ, ཨེཝམྤི ནགྒཱཡ ནྷཱཡིཏུཾ ཝཊྚཏི. སེསམེཏྠ ཨུཏྟཱནམེཝ.

ཨེལ༹ཀལོམསམུཊྛཱནཾ ¶ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

པཋམསིཀྑཱཔདཾ.

༢. དུཏིཡསིཀྑཱཔདཝཎྞནཱ

༨༨༧. དུཏིཡེ – སབྦཾ ཨུཏྟཱནམེཝ. ཚསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

དུཏིཡསིཀྑཱཔདཾ.

༣. ཏཏིཡསིཀྑཱཔདཝཎྞནཱ

༨༩༣-༤. ཏཏིཡེ – ཨནནྟརཱཡིཀིནཱིཏི དསསུ ཨནྟརཱཡེསུ ཨེཀེནཔི ཨནྟརཱཡེན ཨནནྟརཱཡཱ. དྷུརཾ ནིཀྑིཏྟམཏྟེཏི དྷུརཾ ནིཀྑིཔིཏྭཱ སཙེཔི པཙྪཱ སིབྦཏི, ཨཱཔཏྟིཡེཝཱཏི ཨཏྠོ. སེསཾ ཨུཏྟཱནམེཝ.

དྷུརནིཀྑེཔསམུཊྛཱནཾ – ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཏཏིཡསིཀྑཱཔདཾ.

༤. ཙཏུཏྠསིཀྑཱཔདཝཎྞནཱ

༨༩༨-༩. ཙཏུཏྠེ ¶ – པཉྩ ཨཧཱནི པཉྩཱཧཾ, པཉྩཱཧམེཝ པཉྩཱཧིཀཾ. སངྒྷཱཊཱིནཾ ཙཱརོ སངྒྷཱཊིཙཱརོ; པརིབྷོགཝསེན ཝཱ ཨོཏཱཔནཝསེན ཝཱ སངྒྷཊིཏཊྛེན སངྒྷཱཊཱིཏི ལདྡྷནཱམཱནཾ པཉྩནྣཾ ཙཱིཝརཱནཾ པརིཝཏྟནནྟི ཨཏྠོ. ཏསྨཱཡེཝ པདབྷཱཛནེ ‘‘པཉྩམཾ དིཝསཾ པཉྩ ཙཱིཝརཱནཱི’’ཏིཨཱདིམཱཧ. ཨཱཔཏྟི པཱཙིཏྟིཡསྶཱཏི ཨེཏྠ ཙ ཨེཀསྨིཾ ཙཱིཝརེ ཨེཀཱ ཨཱཔཏྟི; པཉྩསུ པཉྩ.

༩༠༠. ཨཱཔདཱསཱུཏི ¶ མཧགྒྷཾ ཙཱིཝརཾ, ན སཀྐཱ ཧོཏི ཙོརབྷཡཱདཱིསུ པརིབྷུཉྫིཏུཾ; ཨེཝརཱུཔེ ཨུཔདྡཝེ ཨནཱཔཏྟི. སེསཾ ཨུཏྟཱནམེཝ. ཀཐིནསམུཊྛཱནཾ ¶ – ཨཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཙཏུཏྠསིཀྑཱཔདཾ.

༥. པཉྩམསིཀྑཱཔདཝཎྞནཱ

༩༠༣. པཉྩམེ – ཙཱིཝརསངྐམནཱིཡནྟི སངྐམེཏབྦཾ ཙཱིཝརཾ; ཨཉྙིསྶཱ སནྟཀཾ ཨནཱཔུཙྪཱ གཧིཏཾ པུན པཊིདཱཏབྦཙཱིཝརནྟི ཨཏྠོ.

༩༠༦. ཨཱཔདཱསཱུཏི སཙེ ཨཔཱརུཏཾ ཝཱ ཨནིཝཏྠཾ ཝཱ ཙོརཱ ཧརནྟི, ཨེཝརཱུཔཱསུ ཨཱཔདཱསུ དྷཱརེནྟིཡཱ ཨནཱཔཏྟི. སེསཾ ཨུཏྟཱནམེཝ. ཀཐིནསམུཊྛཱནཾ – ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པཉྩམསིཀྑཱཔདཾ.

༦. ཚཊྛསིཀྑཱཔདཝཎྞནཱ

༩༠༩-༡༠. ཚཊྛེ – ཨཉྙཾ པརིཀྑཱརནྟི ཡཾཀིཉྩི ཐཱལཀཱདཱིནཾ ཝཱ སཔྤིཏེལཱདཱིནཾ ཝཱ ཨཉྙཏརཾ. ཨཱནིསཾསནྟི ‘‘ཀིཏྟཀཾ ཨགྒྷནཀཾ དཱཏུཀཱམཏྠཱ’’ཏི པུཙྪཏི, ‘‘ཨེཏྟཀཾ ནཱམཱ’’ཏི ཝདནྟི, ‘‘ཨཱགམེཐ ཏཱཝ, ཨིདཱནི ཝཏྠཾ མཧགྒྷཾ, ཀཏིཔཱཧེན ཀཔྤཱསེ ཨཱགཏེ སམགྒྷཾ བྷཝིསྶཏཱི’’ཏི ཨེཝཾ ཝཏྭཱ ནིཝཱརེནྟིཡཱ ཨནཱཔཏྟི. སེསཾ ཨུཏྟཱནམེཝ.

ཏིསམུཊྛཱནཾ ¶ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, ཏིཝེདནནྟི.

ཚཊྛསིཀྑཱཔདཾ.

༧. སཏྟམསིཀྑཱཔདཝཎྞནཱ

༩༡༡. སཏྟམེ ¶ – པཀྐམིཾསཱུཏི ཨཉྙཱསམྤི ཨཱགམནཾ ཨཱགམེནྟཱི ‘‘ཨདྡྷཱ ཨམྷཱཀམྤི ཨཱགམེསྶཏཱི’’ཏི ཏཏྠ ཏཏྠ ཨགམཾསུ. པཊིབཱཧེཡྻཱཏི པཊིསེདྷེཡྻ.

༩༡༥. ཨཱནིསཾསནྟི ‘‘ཨེཀིསྶཱ ཨེཀཾ སཱཊཀཾ ནཔྤཧོཏི, ཨཱགམེཐ ཏཱཝ, ཀཏིཔཱཧེན ཨུཔྤཛྫིསྶཏི, ཏཏོ བྷཱཛེསྶཱམཱི’’ཏི ཨེཝཾ ཨཱནིསཾསཾ དསྶེཏྭཱ པཊིབཱཧནྟིཡཱ ཨནཱཔཏྟི. སེསཾ ཨུཏྟཱནམེཝ.

ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

སཏྟམསིཀྑཱཔདཾ.

༨. ཨཊྛམསིཀྑཱཔདཝཎྞནཱ

༩༡༦-༨. ཨཊྛམེ ¶ – ནཊཱ ནཱམ ཡེ ནཱཊཀཾ ནཱཊེནྟི. ནཊཀཱ ནཱམ ཡེ ནཙྩནྟི. ལངྒྷཀཱ ནཱམ ཡེ ཝཾསཝརཏྟཱདཱིསུ ལངྒྷནཀམྨཾ ཀརོནྟི. སོཀཛ྄ཛྷཱཡིཀཱ ནཱམ མཱཡཱཀཱརཱ. ཀུམྦྷཐཱུཎིཀཱ ནཱམ གྷཊཀེན ཀཱིལ༹ནཀཱ; བིམྦིསཀཝཱདཀཱཏིཔི ཝདནྟི. དེཏི ཨཱཔཏྟི པཱཙིཏྟིཡསྶཱཏི ཨེཏྠ ཙཱིཝརགཎནཱཡ ཨཱཔཏྟིཡོ ཝེདིཏབྦཱ. སེསཾ ཨུཏྟཱནམེཝ.

ཚསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཨཊྛམསིཀྑཱཔདཾ.

༩. ནཝམསིཀྑཱཔདཝཎྞནཱ

༩༢༡-༤. ནཝམེ ¶ – དུབྦལཙཱིཝརཔཙྩཱསཱཡཱཏི དུབྦལཱཡ ཙཱིཝརཔཙྩཱསཱཡ. ཨཱནིསཾསནྟི ཀིཉྩཱཔི ‘‘ན མཡཾ ཨཡྻེ སཀྐོམཱ’’ཏི ཝདནྟི, ‘‘ཨིདཱནི པན ཏེསཾ ཀཔྤཱསོ ཨཱགམིསྶཏི ¶ , སདྡྷོ པསནྣོ པུརིསོ ཨཱགམིསྶཏི, ཨདྡྷཱ དསྶཏཱི’’ཏི ཨེཝཾ ཨཱནིསཾསཾ དསྶེཏྭཱ ནིཝཱརེནྟིཡཱ ཨནཱཔཏྟི. སེསཾ ཨུཏྟཱནམེཝ.

ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, ཏིཝེདནནྟི.

ནཝམསིཀྑཱཔདཾ.

༡༠. དསམསིཀྑཱཔདཝཎྞནཱ

༩༢༧. དསམེ – ཀཐིནུདྡྷཱརཾ ན དསྶནྟཱིཏི ཀཱིདིསོ ཀཐིནུདྡྷཱརོ དཱཏབྦོ, ཀཱིདིསོ ན དཱཏབྦོཏི? ཡསྶ ཨཏྠཱརམཱུལཀོ ཨཱནིསཾསོ མཧཱ, ཨུབྦྷཱརམཱུལཀོ ཨཔྤོ, ཨེཝརཱུཔོ ན དཱཏབྦོ. ཡསྶ པན ཨཏྠཱརམཱུལཀོ ཨཱནིསཾསོ ཨཔྤོ, ཨུབྦྷཱརམཱུལཀོ མཧཱ, ཨེཝརཱུཔོ དཱཏབྦོ. སམཱནིསཾསོཔི སདྡྷཱཔརིཔཱལནཏྠཾ དཱཏབྦོཝ.

༩༣༡. ཨཱནིསཾསནྟི བྷིཀྑུནིསངྒྷོ ཛིཎྞཙཱིཝརོ, ཀཐིནཱནིསཾསམཱུལཀོ མཧཱལཱབྷོཏི ¶ ཨེཝརཱུཔཾ ཨཱནིསཾསཾ དསྶེཏྭཱ པཊིབཱཧནྟིཡཱ ཨནཱཔཏྟི. སེསཾ ཨུཏྟཱནམེཝ.

ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, ཏིཝེདནནྟི.

དསམསིཀྑཱཔདཾ.

ནགྒཝགྒོ ཏཏིཡོ.

༤. ཏུཝཊྚཝགྒོ

༡. པཋམསིཀྑཱཔདཝཎྞནཱ

༩༣༣. ཏུཝཊྚཝགྒསྶ ¶ ¶ པཋམསིཀྑཱཔདེ – ཏུཝཊྚེཡྻུནྟི ནིཔཛྫེཡྻུཾ. སེསཾ ཨུཏྟཱནམེཝ. ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

པཋམསིཀྑཱཔདཾ.

༢. དུཏིཡསིཀྑཱཔདཝཎྞནཱ

༩༣༧. དུཏིཡེ – ཨེཀཾ ཨཏྠརཎཉྩེཝ པཱཝུརཎཉྩ ཨེཏཱསནྟི ཨེཀཏྠརཎཔཱཝུརཎཱ; སཾཧཱརིམཱནཾ པཱཝཱརཏྠརཎཀཊསཱརཀཱདཱིནཾ ཨེཀཾ ཨནྟཾ ཨཏྠརིཏྭཱ ཨེཀཾ པཱརུཔིཏྭཱ ཏུཝཊྚེནྟཱིནམེཏཾ ཨདྷིཝཙནཾ.

༩༤༠. ཝཝཏྠཱནཾ དསྶེཏྭཱཏི མཛ྄ཛྷེ ཀཱསཱཝཾ ཝཱ ཀཏྟརཡཊྛིཾ ཝཱ ཨནྟམསོ ཀཱཡབནྡྷནམྤི ཋཔེཏྭཱ ནིཔཛྫནྟཱིནཾ ཨནཱཔཏྟཱིཏི ཨཏྠོ. སེསཾ ཨུཏྟཱནམེཝ. ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

དུཏིཡསིཀྑཱཔདཾ.

༣. ཏཏིཡསིཀྑཱཔདཝཎྞནཱ

༩༤༡. ཏཏིཡེ – ཨུལཱ༹རསམྦྷཱཝིཏཱཏི ཨུལཱ༹རཀུལཱ པབྦཛིཏཏྟཱ གུཎེཧི ཙ ཨུལཱ༹རཏྟཱ ཨུལཱ༹རཱཏི སམྦྷཱཝིཏཱ. ཨིསྶཱཔཀཏཱཏི ཨིསྶཱཡ ཨཔཀཏཱ; ཨབྷིབྷཱུཏཱཏི ཨཏྠོ. སཉྙཏྟི བཧུལཱ ཨེཏཱསནྟི སཉྙཏྟིབཧུལཱ; དིཝསཾ མཧཱཛནཾ སཉྙཱཔཡམཱནཱཏི ཨཏྠོ. ཝིཉྙཏྟི བཧུལཱ ཨེཏཱསནྟི ཝིཉྙཏྟིབཧུལཱ. ཝིཉྙཏྟཱིཏི ཧེཏཱུདཱཧརཎཱདཱིཧི ཝིཝིདྷེཧི ནཡེཧི ཉཱཔནཱ ཝེདིཏབྦཱ, ན ཡཱཙནཱ.

༩༤༣. ཙངྐམནེ ¶ ¶ ནིཝཏྟནགཎནཱཡ ཨཱཔཏྟིཡོ ཝེདིཏབྦཱ. ཏིཊྛཏི ཝཱཏིཨཱདཱིསུ པཡོགགཎནཱཡ. ཨུདྡིསཏི ཝཱཏིཨཱདཱིསུ པདཱདིགཎནཱཡ. སེསཾ ཨུཏྟཱནམེཝ.

ཏིསམུཊྛཱནཾ – ཀིརིཡཱཀིརིཡཾ ¶ , སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཏཏིཡསིཀྑཱཔདཾ.

༤. ཙཏུཏྠསིཀྑཱཔདཝཎྞནཱ

༩༤༩. ཙཏུཏྠེ – སཏི ཨནྟརཱཡེཏི དསཝིདྷེ ཨནྟརཱཡེ སཏི. པརིཡེསིཏྭཱ ན ལབྷཏཱིཏི ཨཉྙཾ ཨུཔཊྛཱཡིཀཾ ན ལབྷཏི. གིལཱནཱཡཱཏི སཡཾ གིལཱནཱཡ. ཨཱཔདཱསཱུཏི ཏཐཱརཱུཔེ ཨུཔདྡཝེ སཏི ཨནཱཔཏྟི. སེསཾ ཨུཏྟཱནམེཝ.

དྷུརནིཀྑེཔསམུཊྛཱནཾ – ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཙཏུཏྠསིཀྑཱཔདཾ.

༥. པཉྩམསིཀྑཱཔདཝཎྞནཱ

༩༥༢. པཉྩམེ – ཨཉྙཾ ཨཱཎཱཔེཏཱིཏི ཨེཏྠ སཙེ ནིཀྐཌྜྷཱཏི ཨཱཎཏྟཱ ཨེཀཔཡོགེན བཧཱུནིཔི དྭཱརཱནི ཨཏིཀྐཱམེཏི, ཨེཀཱ ཨཱཔཏྟི. ཨཐ ཨིམཉྩིམཉྩ དྭཱརཾ ཨཏིཀྐཱམེཧཱིཏི ཨེཝཾ ཨཱཎཏྟཱ ཨཏིཀྐཱམེཏི, དྭཱརགཎནཱཡ ཨཱཔཏྟིཡོ. སེསཾ ཨུཏྟཱནམེཝ.

ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

པཉྩམསིཀྑཱཔདཾ.

༦. ཚཊྛསིཀྑཱཔདཝཎྞནཱ

༩༥༥. ཚཊྛེ ¶ ¶ – སབྦཾ ཨུཏྟཱནམེཝ. སམནུབྷཱསནསམུཊྛཱནཾ – ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཚཊྛསིཀྑཱཔདཾ.

༧-༨-༩. སཏྟམཨཊྛམནཝམསིཀྑཱཔདཝཎྞནཱ

༩༦༡. སཏྟམཨཊྛམནཝམེསུ སབྦཾ ཨུཏྟཱནམེཝ. སབྦཱནི ཨེལ༹ཀལོམསམུཊྛཱནཱནི, ཀིརིཡཱནི, ནོསཉྙཱཝིམོཀྑཱནི, ཨཙིཏྟཀཱནི, པཎྞཏྟིཝཛྫཱནི, ཀཱཡཀམྨཱནི, ཏིཙིཏྟཱནི ཏིཝེདནཱནཱིཏི.

སཏྟམཨཊྛམནཝམསིཀྑཱཔདཱནི.

༡༠. དསམསིཀྑཱཔདཝཎྞནཱ

༩༧༣. དསམེ – ཨཱཧུནྡརིཀཱཏི སམྦཱདྷཱ.

༩༧༥. དྷུརཾ ནིཀྑིཏྟམཏྟེཏི སཙེཔི དྷུརཾ ནིཀྑིཔིཏྭཱ པཙྪཱ པཀྐམཏི, ཨཱཔཏྟིཡེཝཱཏི ¶ ཨཏྠོ. པཝཱརེཏྭཱ པཉྩ ཡོཛནཱནི གཙྪནྟིཡཱཔི ཨནཱཔཏྟི. ཚསུ ཝཏྟབྦམེཝ ནཏྠི. སཙེ པན ཏཱིཎི གནྟྭཱ ཏེནེཝ མགྒེན པཙྩཱགཙྪཏི, ན ཝཊྚཏི. ཨཉྙེན མགྒེན ཨཱགནྟུཾ ཝཊྚཏི.

༩༧༦. ཨནྟརཱཡེཏི དསཝིདྷེ ཨནྟརཱཡེ – པརཾ གཙྪིསྶཱམཱིཏི ནིཀྑནྟཱ, ནདཱིཔཱུརོ པན ཨཱགཏོ, ཙོརཱ ཝཱ མགྒེ ཧོནྟི, མེགྷོ ཝཱ ཨུཊྛཱཏི, ནིཝཏྟིཏུཾ ཝཊྚཏི. སེསཾ ཨུཏྟཱནམེཝ. པཋམཔཱརཱཛིཀསམུཊྛཱནཾ – ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, དུཀྑཝེདནནྟི.

དསམསིཀྑཱཔདཾ.

ཏུཝཊྚཝགྒོ ཙཏུཏྠོ.

༥. ཙིཏྟཱགཱརཝགྒོ

༡. པཋམསིཀྑཱཔདཝཎྞནཱ

༩༧༨. ཙིཏྟཱགཱརཝགྒསྶ ¶ ¶ པཋམསིཀྑཱཔདེ – རཱཛཱགཱརནྟི རཉྙོ ཀཱིལ༹ནགྷརཾ. ཙིཏྟཱགཱརནྟི ཀཱིལ༹ནཙིཏྟསཱལཾ. ཨཱརཱམནྟི ཀཱིལ༹ནཨུཔཝནཾ. ཨུཡྻཱནནྟི ཀཱིལ༹ནུཡྻཱནཾ. པོཀྑརཎཱིནྟི ཀཱིལ༹ནཔོཀྑརཎིཾ. ཏསྨཱཡེཝ པདབྷཱཛནེ ‘‘ཡཏྠ ཀཏྠཙི རཉྙོ ཀཱིལི༹ཏུ’’ནྟིཨཱདི ཝུཏྟཾ. དསྶནཱཡ གཙྪཏི ཨཱཔཏྟི དུཀྐཊསྶཱཏི ཨེཏྠ པདཝཱརགཎནཱཡ དུཀྐཊཾ. ཡཏྠ ཋིཏཱ པསྶཏཱིཏི ཨེཏྠ པན སཙེ ཨེཀསྨིཾཡེཝ ཋཱནེ ཋིཏཱ པདཾ ཨནུདྡྷརམཱནཱ པཉྩཔི པསྶཏི, ཨེཀམེཝ པཱཙིཏྟིཡཾ. ཏཾ ཏཾ དིསཱབྷཱགཾ ཨོལོཀེཏྭཱ པསྶནྟིཡཱ པན པཱཊེཀྐཱ ཨཱཔཏྟིཡོ. བྷིཀྑུསྶ པན སབྦཏྠ དུཀྐཊཾ.

༩༨༡. ཨཱརཱམེ ཋིཏཱཏི ཨཛ྄ཛྷཱརཱམེ རཱཛཱགཱརཱདཱིནི ཀརོནྟི, ཏཱནི པསྶནྟིཡཱ ཨནཱཔཏྟི. གཙྪནྟཱི ཝཱ ཨཱགཙྪནྟཱི ཝཱཏི པིཎྜཔཱཏཱདཱིནཾ ཨཏྠཱཡ གཙྪནྟིཡཱ མགྒོ ཧོཏི, ཏཱནི པསྶཏི, ཨནཱཔཏྟི. སཏི ཀརཎཱིཡེ གནྟྭཱཏི རཉྙོ སནྟིཀཾ ཀེནཙི ཀརཎཱིཡེན གནྟྭཱ པསྶཏི, ཨནཱཔཏྟི. ཨཱཔདཱསཱུཏི ཀེནཙི ཨུཔདྡུཏཱ པཝིསིཏྭཱ པསྶཏི, ཨནཱཔཏྟི. སེསཾ ཨུཏྟཱནམེཝ.

ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, ཏིཝེདནནྟི.

པཋམསིཀྑཱཔདཾ.

༢. དུཏིཡསིཀྑཱཔདཝཎྞནཱ

༩༨༢. དུཏིཡེ ¶ – ཨབྷིནིསཱིདནཱབྷིནིཔཛྫནེསུ པཡོགགཎནཱཡ ཨཱཔཏྟིཡོ ཝེདིཏབྦཱ. སེསཾ ཨུཏྟཱནམེཝ.

ཨེལ༹ཀལོམསམུཊྛཱནཾ ¶ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

དུཏིཡསིཀྑཱཔདཾ.

༣. ཏཏིཡསིཀྑཱཔདཝཎྞནཱ

༩༨༨. ཏཏིཡེ ¶ – ཨུཛྫཝུཛྫཝེཏི ཡཏྟཀཾ ཧཏྠེན ཨཉྪིཏཾ ཧོཏི, ཏསྨིཾ ཏཀྐམྷི ཝེཋིཏེ ཨེཀཱ ཨཱཔཏྟི. ཀནྟནཏོ པན པུབྦེ ཀཔྤཱསཝིཙིནནཾ ཨཱདིཾ ཀཏྭཱ སབྦཔཡོགེསུ ཧཏྠཝཱརགཎནཱཡ དུཀྐཊཾ.

༩༨༩. ཀནྟིཏསུཏྟནྟི དསིཀསུཏྟཱདིཾ སངྒྷཱཊེཏྭཱ ཀནྟཏི, དུཀྐནྟིཏཾ ཝཱ པཊིཀནྟཏི. སེསཾ ཨུཏྟཱནམེཝ. ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

ཏཏིཡསིཀྑཱཔདཾ.

༤. ཙཏུཏྠསིཀྑཱཔདཝཎྞནཱ

༩༩༢. ཙཏུཏྠེ – ཡཱགུཾ ཝཱཏིཨཱདཱིསུ ཏཎྜུལཀོཊྚནཾ ཨཱདིཾ ཀཏྭཱ སབྦེསུ པུབྦཔཡོགེསུ པཡོགགཎནཱཡ དུཀྐཊཾ. ཡཱགུབྷཏྟེསུ བྷཱཛནགཎནཱཡ, ཁཱདནཱིཡཱདཱིསུ རཱུཔགཎནཱཡ པཱཙིཏྟིཡཱནི.

༩༩༣. ཡཱགུཔཱནེཏི མནུསྶེཧི སངྒྷསྶཏྠཱཡ ཀརིཡམཱནེ ཡཱགུཔཱནེ ཝཱ སངྒྷབྷཏྟེ ཝཱ ཏེསཾ སཧཱཡིཀབྷཱཝེན ཡཾཀིཉྩི པཙནྟིཡཱ ཨནཱཔཏྟི. ཙེཏིཡཔཱུཛཱཡ སཧཱཡིཀཱ ཧུཏྭཱ གནྡྷཱདཱིནི པཱུཛེཏི, ཝཊྚཏི. ཨཏྟནོ ཝེཡྻཱཝཙྩཀརསྶཱཏི སཙེཔི མཱཏཱཔིཏརོ ཨཱགཙྪནྟི, ཡཾཀིཉྩི བཱིཛནིཾ ཝཱ སམྨུཉྫནིདཎྜཀཾ ཝཱ ཀཱརཱཔེཏྭཱ ཝེཡྻཱཝཙྩཀརཊྛཱནེ ཋཔེཏྭཱཝ ཡཾཀིཉྩི པཙིཏུཾ ཝཊྚཏི. སེསཾ ཨུཏྟཱནམེཝ. སམུཊྛཱནཱདཱིནི ཏཏིཡསདིསཱནེཝཱཏི.

ཙཏུཏྠསིཀྑཱཔདཾ.

༥. པཉྩམསིཀྑཱཔདཝཎྞནཱ

༩༩༦. པཉྩམེ ¶ – ཨསཏི ཨནྟརཱཡེཏི དསཝིདྷེ ཨནྟརཱཡེ ཨསཏི. དྷུརཾ ནིཀྑིཔིཏྭཱ པཙྪཱ ཝིནིཙྪིནནྟཱི ཨཱཔཏྟིཾ ཨཱཔཛྫིཏྭཱཝ ཝིནིཙྪིནཱཏི.

༩༩༨. པརིཡེསིཏྭཱ ¶ ན ལབྷཏཱིཏི སཧཱཡིཀཱ བྷིཀྑུནིཡོ ¶ ན ལབྷཏི. སེསཾ ཨུཏྟཱནམེཝ. དྷུརནིཀྑེཔསམུཊྛཱནཾ – ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ དུཀྑཝེདནནྟི.

པཉྩམསིཀྑཱཔདཾ.

༦. ཚཊྛསིཀྑཱཔདཝཎྞནཱ

༩༩༩. ཚཊྛེ – སབྦཾ ནགྒཝགྒེ ཨཱགཱརིཀསིཀྑཱཔདེ ཝུཏྟནཡེནེཝ ཝེདིཏབྦཾ. ཨཡཾ པན ཝིསེསོ, ཏཾ ཚསམུཊྛཱནཾ. ཨིདཾ ‘‘སཧཏྠཱ’’ཏི ཝུཏྟཏྟཱ ཨེལ༹ཀལོམསམུཊྛཱནཾ, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

ཚཊྛསིཀྑཱཔདཾ.

༧. སཏྟམསིཀྑཱཔདཝཎྞནཱ

༡༠༠༧. སཏྟམེ – པུན པརིཡཱཡེནཱཏི པུནཝཱརེ. ཨཱཔདཱསཱུཏི མཧགྒྷཙཱིཝརཾ སརཱིརཏོ མོཙེཏྭཱ སུཔཊིསཱམིཏམྤི ཙོརཱ ཧརནྟི, ཨེཝརཱུཔཱསུ ཨཱཔདཱསུ ཨནིསྶཛྫིཏྭཱ ནིཝཱསེནྟིཡཱ ཨནཱཔཏྟི. སེསཾ ཨུཏྟཱནམེཝཱཏི.

ཀཐིནསམུཊྛཱནཾ – ཀཱཡཝཱཙཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

སཏྟམསིཀྑཱཔདཾ.

༨. ཨཊྛམསིཀྑཱཔདཝཎྞནཱ

༡༠༠༨. ཨཊྛམེ ¶ – ཨནིསྶཛྫིཏྭཱཏི རཀྑཎཏྠཱཡ ཨདཏྭཱ; ‘‘ཨིམཾ ཛགྒེཡྻཱསཱི’’ཏི ཨེཝཾ ཨནཱཔུཙྪིཏྭཱཏི ཨཏྠོ.

༡༠༡༢. པརིཡེསིཏྭཱ ན ལབྷཏཱིཏི པཊིཛགྒིཀཾ ན ལབྷཏི. གིལཱནཱཡཱཏི ཝཙཱིབྷེདཾ ཀཱཏུཾ ཨསམཏྠཱཡ. ཨཱཔདཱསཱུཏི རཊྛེ བྷིཛྫནྟེ ཨཱཝཱསེ ¶ ཚཌྜེཏྭཱ གཙྪནྟི, ཨེཝརཱུཔཱསུ ཨཱཔདཱསུ ཨནཱཔཏྟི. སེསཾ ཨུཏྟཱནམེཝ. སམུཊྛཱནཱདཱིནི ཨནནྟརསིཀྑཱཔདསདིསཱནེཝཱཏི.

ཨཊྛམསིཀྑཱཔདཾ.

༩. ནཝམསིཀྑཱཔདཝཎྞནཱ

༡༠༡༥-༦. ནཝམེ – བཱཧིརཀཾ ཨནཏྠསཾཧིཏནྟི ཧཏྠིཨསྶརཐདྷནུཐརུསིཔྤཨཱཐབྦཎཁཱིལནཝསཱིཀརཎསོསཱཔནམནྟཱགདཔྤཡོགཱདིབྷེདཾ ¶ པརཱུཔགྷཱཏཀརཾ. པརིཏྟནྟི ཡཀྑཔརིཏྟནཱགམཎྜལཱདིབྷེདཾ སབྦམྤི ཝཊྚཏི. སེསཾ ཨུཏྟཱནམེཝ.

པདསོདྷམྨསམུཊྛཱནཾ – ཝཱཙཏོ ཝཱཙཱཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ནཝམསིཀྑཱཔདཾ.

༡༠. དསམསིཀྑཱཔདཝཎྞནཱ

༡༠༡༨. དསམེ ཝཱཙེཡྻཱཏི པདཾ ཝིསེསོ, སེསཾ ནཝམེ ཝུཏྟནཡེནེཝ ཝེདིཏབྦཾ སདྡྷིཾ སམུཊྛཱནཱདཱིཧཱིཏི.

དསམསིཀྑཱཔདཾ.

ཙིཏྟཱགཱརཝགྒོ པཉྩམོ.

༦. ཨཱརཱམཝགྒོ

༡. པཋམསིཀྑཱཔདཝཎྞནཱ

༡༠༢༥. ཨཱརཱམཝགྒསྶ ¶ པཋམསིཀྑཱཔདེ – པརིཀྑེཔཾ ཨཏིཀྐཱམེནྟིཡཱ, ཨུཔཙཱརཾ ཨོཀྐམནྟིཡཱཏི ཨེཏྠ པཋམཔཱདེ དུཀྐཊཾ, དུཏིཡཔཱདེ པཱཙིཏྟིཡཾ.

༡༠༢༧. སཱིསཱནུལོཀིཀཱཏི པཋམཾ པཝིསནྟཱིནཾ བྷིཀྑུནཱིནཾ སཱིསཾ ཨནུལོཀེནྟཱི པཝིསཏི, ཨནཱཔཏྟི. ཡཏྠ བྷིཀྑུནིཡོཏི ཡཏྠ བྷིཀྑུནིཡོ པཋམཏརཾ པཝིསིཏྭཱ སཛ྄ཛྷཱཡཙེཏིཡཝནྡནཱདཱིནི ཀརོནྟི, ཏཏྠ ཏཱསཾ ¶ སནྟིཀཾ གཙྪཱམཱིཏི གནྟུཾ ཝཊྚཏི. ཨཱཔདཱསཱུཏི ཀེནཙི ཨུཔདྡུཏཱ ཧོཏི, ཨེཝརཱུཔཱསུ ཨཱཔདཱསུ པཝིསིཏུཾ ཝཊྚཏི. སེསཾ ཨུཏྟཱནམེཝ.

དྷུརནིཀྑེཔསམུཊྛཱནཾ – ཀིརིཡཱཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པཋམསིཀྑཱཔདཾ.

༢. དུཏིཡསིཀྑཱཔདཝཎྞནཱ

༡༠༢༨. དུཏིཡེ – ཨཱཡསྨཱ ཀཔྤིཏཀོཏི ཨཡཾ ཛཊིལསཧསྶབྦྷནྟརོ ཐེརོ. སཾཧརཱིཏི སངྐཱམེསི. སཾཧཊོཏི སངྐཱམིཏོ. ཀཱསཱཝཊོཏི ནྷཱཔིཏཱ ཀཱསཱཝཾ ནིཝཱསེཏྭཱ ཀམྨཾ ཀརོནྟི, ཏཾ སནྡྷཱཡཱཧཾསུ. སེསཾ ཨུཏྟཱནམེཝ.

ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

དུཏིཡསིཀྑཱཔདཾ.

༣. ཏཏིཡསིཀྑཱཔདཝཎྞནཱ

༡༠༣༦. ཏཏིཡེ ¶ ¶ – ཨནུསཱསནིཔུརེཀྑཱརཱཡཱཏི ཨིདཱནིཔི ཏྭཾ བཱལཱ ཨབྱཏྟཱཏིཨཱདིནཱ ནཡེན ཨནུསཱསནིཔཀྑེ ཋཏྭཱ ཝདནྟིཡཱ ཨནཱཔཏྟི. སེསཾ ཨུཏྟཱནམེཝ. སམུཊྛཱནཱདཱིནི ཨནནྟརསིཀྑཱཔདསདིསཱནེཝཱཏི.

ཏཏིཡསིཀྑཱཔདཾ.

༤. ཙཏུཏྠསིཀྑཱཔདཝཎྞནཱ

༡༠༣༧. ཙཏུཏྠེ – སབྦཾ ཨུཏྟཱནམེཝ. ཙཏུསམུཊྛཱནཾ – ཀཱཡཏོ ཀཱཡཝཱཙཏོ ཀཱཡཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི. ནིམནྟིཏཱཡ ཨནཱཔུཙྪཱ བྷུཉྫནྟིཡཱ ཨཱཔཏྟིསམྦྷཝཏོ སིཡཱ ཀིརིཡཱཀིརིཡཾ, པཝཱརིཏཱཡ ཀཔྤིཡཾ ཀཱརེཏྭཱཔི ཨཀཱརེཏྭཱཔི བྷུཉྫནྟིཡཱ ཨཱཔཏྟིསམྦྷཝཏོ ¶ སིཡཱ ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཙཏུཏྠསིཀྑཱཔདཾ.

༥. པཉྩམསིཀྑཱཔདཝཎྞནཱ

༡༠༤༣. པཉྩམེ – ཀུལེ མཙྪརོ ཀུལམཙྪརོ, ཀུལམཙྪརོ ཨེཏིསྶཱ ཨཏྠཱིཏི ཀུལམཙྪརིནཱི ཀུལཾ ཝཱ མཙྪརཱཡཏཱིཏི ཀུལམཙྪརིནཱི. ཀུལསྶ ཨཝཎྞནྟི ཏཾ ཀུལཾ ཨསྶདྡྷཾ ཨཔྤསནྣནྟི. བྷིཀྑུནཱིནཾ ཨཝཎྞནྟི བྷིཀྑུནིཡོ དུསྶཱིལཱ པཱཔདྷམྨཱཏི.

༡༠༤༥. སནྟཾཡེཝ ཨཱདཱིནཝནྟི ཀུལསྶ ཝཱ བྷིཀྑུནཱིནཾ ཝཱ སནྟཾ ཨགུཎཾ. སེསཾ ཨུཏྟཱནམེཝ. ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ དུཀྑཝེདནནྟི.

པཉྩམསིཀྑཱཔདཾ.

༦. ཚཊྛསིཀྑཱཔདཝཎྞནཱ

༡༠༤༨. ཚཊྛེ ¶ – ཨོཝཱདཱཡཱཏི གརུདྷམྨཏྠཱཡ. སཾཝཱསཱཡཱཏི ཨུཔོསཐཔཝཱརཎཱཔུཙྪནཏྠཱཡ. ཨཡམེཏྠ སངྑེཔོ. ཝིཏྠཱརོ པན བྷིཀྑུནོཝཱདཀསིཀྑཱཔདཝཎྞནཱཡཾ ཝུཏྟོཡེཝ.

ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

ཚཊྛསིཀྑཱཔདཾ.

༧. སཏྟམསིཀྑཱཔདཝཎྞནཱ

༡༠༥༣. སཏྟམེ ¶ – པརིཡེསིཏྭཱ ན ལབྷཏཱིཏི བྷིཀྑུནིཾ ན ལབྷཏི. སེསཾ ཨུཏྟཱནམེཝ. ཨིམསྶཱཔི ཝིཏྠཱརོ བྷིཀྑུནོཝཱདཀེ ཝུཏྟོཡེཝ.

དྷུརནིཀྑེཔསམུཊྛཱནཾ ¶ – ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

སཏྟམསིཀྑཱཔདཾ.

༨. ཨཊྛམསིཀྑཱཔདཝཎྞནཱ

༡༠༥༦. ཨཊྛམེ – ཨེཀཀམྨནྟིཨཱདཱིཧི ཨུཔོསཐཔཝཱརཎཱཡེཝ ཝུཏྟཱ. སེསཾ ཨུཏྟཱནམེཝ. ཨིམསྶཱཔི ཝིཏྠཱརོ བྷིཀྑུནོཝཱདཀེ ཝུཏྟོཡེཝ.

པཋམཔཱརཱཛིཀསམུཊྛཱནཾ – ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, དུཀྑཝེདནནྟི.

ཨཊྛམསིཀྑཱཔདཾ.

༩. ནཝམསིཀྑཱཔདཝཎྞནཱ

༡༠༥༨. ནཝམེ ¶ – སབྦཾ ཨུཏྟཱནམེཝ. ཨིམསྶཱཔི ཝིཏྠཱརོ བྷིཀྑུནོཝཱདཀེ ཝུཏྟོཡེཝ.

དྷུརནིཀྑེཔསམུཊྛཱནཾ – ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ནཝམསིཀྑཱཔདཾ.

༡༠. དསམསིཀྑཱཔདཝཎྞནཱ

༡༠༦༢. དསམེ – པསཱཁེཏི ཨདྷོཀཱཡེ. ཨདྷོཀཱཡོ ཧི ཡསྨཱ ཏཏོ རུཀྑསྶ སཱཁཱ ཝིཡ ཨུབྷོ ཨཱུརཱུ པབྷིཛྫིཏྭཱ གཏཱ, ཏསྨཱ པསཱཁོཏི ཝུཙྩཏི.

༡༠༦༥. བྷིནྡཱཏིཨཱདཱིསུ སཙེ ‘‘བྷིནྡ, ཕཱལེཧཱི’’ཏི སབྦཱནི ཨཱཎཱཔེཏི, སོ ཙ ཏཐེཝ ཀརོཏི, ཚ ཨཱཎཏྟིདུཀྐཊཱནི ཚ ཙ པཱཙིཏྟིཡཱནི ཨཱཔཛྫཏི. ཨཐཱཔི ཨེཝཾ ཨཱཎཱཔེཏི – ‘‘ཨུཔཱསཀ, ཡཾཀིཉྩི ཨེཏྠ ཀཱཏབྦཾ, ཏཾ སབྦཾ ཀརོཧཱི’’ཏི, སོ ཙ སབྦཱནིཔི བྷེདནཱདཱིནི ཀརོཏི; ཨེཀཝཱཙཱཡ ཚ ¶ དུཀྐཊཱནི ཚ པཱཙིཏྟིཡཱནཱིཏི དྭཱདས ཨཱཔཏྟིཡོ. སཙེ པན བྷེདནཱདཱིསུཔི ཨེཀཾཡེཝ ཝཏྭཱ ‘‘ཨིདཾ ཀརོཧཱི’’ཏི ཨཱཎཱཔེཏི, སོ ཙ སབྦཱནི ཀརོཏི, ཡཾ ཨཱཎཏྟཾ, ཏསྶེཝ ཀརཎེ པཱཙིཏྟིཡཾ. སེསེསུ ཨནཱཔཏྟི. སེསཾ ཨུཏྟཱནམེཝ.

ཀཐིནསམུཊྛཱནཾ – ཀིརིཡཱཀིརིཡཾ, ནོསཉྙཱཝིམོཀྑཾ ¶ , ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

དསམསིཀྑཱཔདཾ.

ཨཱརཱམཝགྒོ ཚཊྛོ.

༧. གབྦྷིནིཝགྒོ

༡. པཋམསིཀྑཱཔདཝཎྞནཱ

༡༠༦༩. གབྦྷིནིཝགྒསྶ ¶ པཋམསིཀྑཱཔདེ – ཨཱཔནྣསཏྟཱཏི ཀུཙྪིཔཝིཊྛསཏྟཱ.

པཋམསིཀྑཱཔདཾ.

༢. དུཏིཡསིཀྑཱཔདཝཎྞནཱ

༡༠༧༣-༤. དུཏིཡེ – པཱཡནྟིནྟི ཐཉྙཾ པཱཡམཱནཾ. མཱཏཱ ཝཱ ཧོཏཱིཏི ཡཾ དཱརཀཾ པཱཡེཏི, ཏསྶ མཱཏཱ ཝཱ ཧོཏི དྷཱཏི ཝཱ. སེསཾ ཨུཏྟཱནམེཝ. ཨུབྷཡམྤི ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

དུཏིཡསིཀྑཱཔདཾ.

༣. ཏཏིཡསིཀྑཱཔདཝཎྞནཱ

༡༠༧༧. ཏཏིཡེ – སིཀྑཱསམྨུཏིཾ དཱཏུནྟི ཀསྨཱ དཱཔེསི? ‘‘མཱཏུགཱམོ ནཱམ ལོལོ ཧོཏི དྭེ ཝསྶཱནི ཚསུ དྷམྨེསུ ཨསིཀྑིཏྭཱ སཱིལཱནི པཱུརཡམཱནོ ཀིལམཏི, སིཀྑིཏྭཱ པན པཙྪཱ ན ཀིལམིསྶཏི, ནིཏྠརིསྶཏཱི’’ཏི དཱཔེསི.

༡༠༧༩. པཱཎཱཏིཔཱཏཱ ¶ ཝེརམཎིཾ དྭེ ཝསྶཱནི ཨཝཱིཏིཀྐམྨ སམཱདཱནཾ སམཱདིཡཱམཱིཏི ཡཾ ཏཾ པཱཎཱཏིཔཱཏཱ ཝེརམཎཱིཏི པཉྙཏྟཾ སིཀྑཱཔདཾ, ཏཾ པཱཎཱཏིཔཱཏཱ ཝེརམཎིསིཀྑཱཔདཾ དྭེ ཝསྶཱནི ཨཝཱིཏིཀྐམིཏབྦསམཱདཱནཾ ཀཏྭཱ སམཱདིཡཱམཱིཏི ཨཏྠོ. ཨེས ནཡོ སབྦཏྠ. ཨིམཱ ཚ སིཀྑཱཡོ སཊྛིཝསྶཱཡཔི པབྦཛིཏཱཡ དཱཏབྦཱཡེཝ, ན ཨེཏཱསུ ཨསིཀྑིཏཱ ཨུཔསམྤཱདེཏབྦཱ.

ཏཏིཡསིཀྑཱཔདཾ.

༤. ཙཏུཏྠསིཀྑཱཔདཝཎྞནཱ

༡༠༨༤. ཙཏུཏྠེ ¶ – སབྦཾ ཨུཏྟཱནམེཝ. སཙེ པན པཋམཾ ཝུཊྛཱནསམྨུཏི ན དིནྣཱ ཧོཏི, ཨུཔསམྤདམཱལ༹ཀེཔི དཱཏབྦཱཡེཝ. ཨིམཱ དྭེཔི མཧཱསིཀྑམཱནཱ ནཱམ.

ཙཏུཏྠསིཀྑཱཔདཾ.

༥. པཉྩམསིཀྑཱཔདཝཎྞནཱ

༡༠༩༠. པཉྩམེ ¶ – ཀིཉྩཱཔི ཨཱུནདྭཱདསཝསྶཾ པརིཔུཎྞསཉྙཱཡ ཝུཊྛཱཔེནྟིཡཱ ཨནཱཔཏྟི, སཱ པན ཨནུཔསམྤནྣཱཝ ཧོཏི. སེསཾ ཨུཏྟཱནམེཝ.

པཉྩམསིཀྑཱཔདཾ.

༦. ཚཊྛསིཀྑཱཔདཝཎྞནཱ

༡༠༩༥. ཚཊྛེ – དསཝསྶཱཡ གིཧིགཏཱཡ སིཀྑཱསམྨུཏིཾ དཏྭཱ པརིཔུཎྞདྭཱདསཝསྶཾ ཨུཔསམྤཱདེཏུཾ ཝཊྚཏི.

ཚཊྛསིཀྑཱཔདཾ.

༧. སཏྟམསིཀྑཱཔདཝཎྞནཱ

༡༡༠༡. སཏྟམེ ¶ – སབྦཾ ཨུཏྟཱནམེཝ. སམུཊྛཱནཱདཱིནིཔི སབྦེསུ དུཏིཡེ ཝུཏྟསདིསཱནེཝ. ཨཡཾ པན ཝིསེསོ – ཡཏྠ སམྨུཏི ཨཏྠི, ཏཏྠ ཀིརིཡཱཀིརིཡཾ ཧོཏཱིཏི.

སཏྟམསིཀྑཱཔདཾ.

༨. ཨཊྛམསིཀྑཱཔདཝཎྞནཱ

༡༡༠༨. ཨཊྛམེ ¶ – ན ཨནུགྒཎྷཱཔེཡྻཱཏི ‘‘ཨིམིསྶཱ ཨཡྻེ ཨུདྡེསཱདཱིནི དེཧཱི’’ཏི ཨེཝཾ ཨུདྡེསཱདཱིཧི ན ཨནུགྒཎྷཱཔེཡྻ.

༡༡༡༠. པརིཡེསིཏྭཱཏི ཨཉྙཾ པརིཡེསིཏྭཱ ན ལབྷཏི, སཡཾ གིལཱནཱ ཧོཏི, ན སཀྐོཏི ཨུདྡེསཱདཱིནི དཱཏུཾ, ཏསྶཱ ཨནཱཔཏྟི. སེསཾ ཨུཏྟཱནམེཝ. དྷུརནིཀྑེཔསམུཊྛཱནཾ – ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཨཊྛམསིཀྑཱཔདཾ.

༩. ནཝམསིཀྑཱཔདཝཎྞནཱ

༡༡༡༣. ནཝམེ – ན ཨུཔཊྛཧེཡྻཱཏི ཙུཎྞེན མཏྟིཀཱཡ དནྟཀཊྛེན མུཁོདཀེནཱཏི ཨེཝཾ ཏེན ཏེན ཀརཎཱིཡེན ན ཨུཔཊྛཧེཡྻ. སེསཾ ཨུཏྟཱནམེཝ. པཋམཔཱརཱཛིཀསམུཊྛཱནཾ – ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, དུཀྑཝེདནནྟི.

ནཝམསིཀྑཱཔདཾ.

༡༠. དསམསིཀྑཱཔདཝཎྞནཱ

༡༡༡༦. དསམེ – ནེཝ ཝཱུཔཀཱསེཡྻཱཏི ན གཧེཏྭཱ གཙྪེཡྻ. ན ཝཱུཔཀཱསཱཔེཡྻཱཏི ‘‘ཨིམཾ ཨཡྻེ གཧེཏྭཱ གཙྪཱ’’ཏི ཨཉྙཾ ན ཨཱཎཱཔེཡྻ. སེསམེཏྠ ཨུཏྟཱནམེཝ. དྷུརནིཀྑེཔསམུཊྛཱནཾ – ཨཀིརིཡཾ, སཉྙཱཝིམོཀྑཾ ¶ , སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

དསམསིཀྑཱཔདཾ.

གབྦྷིནིཝགྒོ སཏྟམོ.

༨. ཀུམཱརིབྷཱུཏཝགྒོ

༡-༢-༣. པཋམདུཏིཡཏཏིཡསིཀྑཱཔདཝཎྞནཱ

༡༡༡༩. ཀུམཱརིབྷཱུཏཝགྒསྶ ¶ ¶ པཋམདུཏིཡཏཏིཡསིཀྑཱཔདཱནི ཏཱིཎི ཏཱིཧི གིཧིགཏསིཀྑཱཔདེཧི སདིསཱནི. ཡཱ པན ཏཱ སབྦཔཋམཱ དྭེ མཧཱསིཀྑམཱནཱ, ཏཱ ཨཏིཀྐནྟཝཱིསཏིཝསྶཱཏི ཝེདིཏབྦཱ. ཏཱ གིཧིགཏཱ ཝཱ ཧོནྟུ ཨགིཧིགཏཱ ཝཱ, སིཀྑམཱནཱ ཨིཙྩེཝ ཝཏྟབྦཱ, གིཧིགཏཱཏི ཝཱ ཀུམཱརིབྷཱུཏཱཏི ཝཱ ན ཝཏྟབྦཱ. གིཧིགཏཱཡ དསཝསྶཀཱལེ སིཀྑཱསམྨུཏིཾ དཏྭཱ དྭཱདསཝསྶཀཱལེ ཨུཔསམྤདཱ ཀཱཏབྦཱ. ཨེཀཱདསཝསྶཀཱལེ དཏྭཱ ཏེརསཝསྶཀཱལེ ཀཱཏབྦཱ, དྭཱདསཏེརསཙུདྡསཔནྣརསསོལ༹སསཏྟརསཨཊྛཱརསཝསྶཀཱལེ སམྨུཏིཾ དཏྭཱ ཝཱིསཏིཝསྶཀཱལེ ཨུཔསམྤདཱ ཀཱཏབྦཱ. ཨཊྛཱརསཝསྶཀཱལཏོ པཊྛཱཡ ཙ པནཱཡཾ གིཧིགཏཱཏིཔི ཀུམཱརིབྷཱུཏཱཏིཔི ཝཏྟུཾ ཝཊྚཏི, ཀུམཱརིབྷཱུཏཱ པན གིཧིགཏཱཏི ན ཝཏྟབྦཱ, ཀུམཱརིབྷཱུཏཱ ཨིཙྩེཝ ཝཏྟབྦཱ. མཧཱསིཀྑམཱནཱ པན གིཧིགཏཱཏིཔི ཝཏྟུཾ ན ཝཊྚཏི, ཀུམཱརིབྷཱུཏཱཏིཔི ཝཏྟུཾ ན ཝཊྚཏི, སིཀྑཱསམྨུཏིདཱནཝསེན པན ཏིསྶོཔི སིཀྑམཱནཱཏི ཝཏྟུཾ ཝཊྚཏི.

པཋམདུཏིཡཏཏིཡཱནི.

༤-༥-༦. ཙཏུཏྠཔཉྩམཚཊྛསིཀྑཱཔདཝཎྞནཱ

༡༡༣༦. ཙཏུཏྠཔཉྩམཚཊྛེསུ སབྦཾ ཨུཏྟཱནམེཝ. སབྦཱནི ཏིསམུཊྛཱནཱནི ཙཏུཏྠཾ ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི. པཉྩམཾ ཀིརིཡཱཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ ¶ , ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི. ཡཉྩེཏྠ སངྒྷེན པརིཙྪིནྡིཏབྦཱཏི ཝུཏྟཾ, ཏསྶ ཨུཔཔརིཀྑིཏབྦཱཏི ཨཏྠོ. ཚཊྛཾ ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ དུཀྑཝེདནནྟི. ཡཾ པནེཏྠ ‘‘པརིཙྪིནྡིཏྭཱ’’ཏི ཝུཏྟཾ, ཏསྶ ཨུཔཔརིཀྑིཏྭཱཏི ཨཏྠོ.

ཙཏུཏྠཔཉྩམཚཊྛསིཀྑཱཔདཱནི

༧. སཏྟམསིཀྑཱཔདཝཎྞནཱ

༡༡༥༠. སཏྟམེ ¶ – སབྦཾ ཨུཏྟཱནམེཝ. དྷུརནིཀྑེཔསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

སཏྟམསིཀྑཱཔདཾ.

༨. ཨཊྛམསིཀྑཱཔདཝཎྞནཱ

༡༡༥༤. ཨཊྛམེཔི ¶ – སབྦཾ ཨུཏྟཱནམེཝ. སམུཊྛཱནཱདཱིནིཔི ཨནནྟརསདིསཱནེཝཱཏི.

ཨཊྛམསིཀྑཱཔདཾ.

༩. ནཝམསིཀྑཱཔདཝཎྞནཱ

༡༡༥༨. ནཝམེ – སོཀཱཝཱསནྟི སངྐེཏཾ ཀཏྭཱ ཨགཙྪམཱནཱ པུརིསཱནཾ ཨནྟོ སོཀཾ པཝེསེཏཱིཏི སོཀཱཝཱསཱ, ཏཾ སོཀཱཝཱསཾ. ཏེནེཝཱཧ – ‘‘སོཀཱཝཱསཱ ནཱམ པརེསཾ དུཀྑཾ ཨུཔྤཱདེཏཱི’’ཏི. ཨཐ ཝཱ གྷརཾ ཝིཡ གྷརསཱམིཀཱ, ཨཡམྤི པུརིསསམཱགམཾ ཨལབྷམཱནཱ སོཀཾ ཨཱཝིསཏི. ཨིཏི ཡཾ ཨཱཝིསཏི, སྭཱསྶཱ ཨཱཝཱསོ ཧོཏཱིཏི སོཀཱཝཱསཱ. ཏེནཱཧ – ‘‘སོཀཾ ཨཱཝིསཏཱི’’ཏི. ཨཛཱནནྟཱིཏི ཨེདིསཱ ¶ ཨཡནྟི ཨཛཱནམཱནཱ. སེསཾ ཨུཏྟཱནམེཝ. ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ནཝམསིཀྑཱཔདཾ.

༡༠. དསམསིཀྑཱཔདཝཎྞནཱ

༡༡༦༤. དསམེ – ཨནཱཔུཙྪཱཏི ཨནཱཔུཙྪིཏྭཱ. བྷིཀྑུནཱིཧི དྭིཀྑཏྟུཾ ཨཱཔུཙྪིཏབྦཾ – པབྦཛྫཱཀཱལེ ཙ ཨུཔསམྤདཱཀཱལེ ཙ, བྷིཀྑཱུནཾ པན སཀིཾ ཨཱཔུཙྪིཏེཔི ཝཊྚཏི.

༡༡༦༥. ཨཛཱནནྟཱིཏི ¶ མཱཏཱདཱིནཾ ཨཏྠིབྷཱཝཾ ཨཛཱནནྟཱི. སེསཾ ཨུཏྟཱནམེཝ. ཨིདཾ ཨཔུབྦསམུཊྛཱནསཱིསཾ. ཙཏུསམུཊྛཱནཾ – ཝཱཙཏོ ཀཱཡཝཱཙཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི. ཀཐཾ? ཨབྦྷཱནཀམྨཱདཱིསུ ཀེནཙིདེཝ ཀརཎཱིཡེན ཁཎྜསཱིམཱཡཾ ནིསིནྣཱ ‘‘པཀྐོསཐ སིཀྑམཱནཾ, ཨིདྷེཝ ནཾ ཨུཔསམྤཱདེསྶཱམཱ’’ཏི ཨུཔསམྤཱདེཏི; ཨེཝཾ ཝཱཙཏོ སམུཊྛཱཏི. ཨུཔསྶཡཏོ པཊྛཱཡ ཨུཔསམྤཱདེསྶཱམཱིཏི ཝཏྭཱ ཁཎྜསཱིམཾ གཙྪནྟིཡཱ ཀཱཡཝཱཙཏོ སམུཊྛཱཏི. དྭཱིསུཔི ཋཱནེསུ པཎྞཏྟིབྷཱཝཾ ཛཱནིཏྭཱཝ ཝཱིཏིཀྐམཾ ཀརོནྟིཡཱ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི. ཨནནུཛཱནཱཔེཏྭཱ ཨུཔསམྤཱདནཏོ ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

དསམསིཀྑཱཔདཾ.

༡༡. ཨེཀཱདསམསིཀྑཱཔདཝཎྞནཱ

༡༡༦༧-༨. ཨེཀཱདསམེ – པཱརིཝཱསིཀཚནྡདཱནེནཱཏི པཱརིཝཱསིཡེན ཚནྡདཱནེན. ཏཏྠ ཙཏུབྦིདྷཾ པཱརིཝཱསིཡཾ – པརིསཔཱརིཝཱསིཡཾ ¶ , རཏྟིཔཱརིཝཱསིཡཾ, ཚནྡཔཱརིཝཱསིཡཾ, ཨཛ྄ཛྷཱསཡཔཱརིཝཱསིཡནྟི. ཏཏྠ པརིསཔཱརིཝཱསིཡཾ ནཱམ བྷིཀྑཱུ ཀེནཙིདེཝ ཀརཎཱིཡེན སནྣིཔཏིཏཱ ཧོནྟི, ཨཐ མེགྷོ ཝཱ ཨུཊྛཱཏི, ཨུསྶཱརཎཱ ཝཱ ཀརིཡཏི, མནུསྶཱ ཝཱ ཨཛ྄ཛྷོཏྠརནྟཱ ཨཱགཙྪནྟི, བྷིཀྑཱུ ¶ ‘‘ཨནོཀཱསཱ མཡཾ ཨཉྙཏྲ གཙྪཱམཱ’’ཏི ཚནྡཾ ཨཝིསྶཛྫེཏྭཱཝ ཨུཊྛཧནྟི. ཨིདཾ པརིསཔཱརིཝཱསིཡཾ. ཀིཉྩཱཔི པརིསཔཱརིཝཱསིཡཾ, ཚནྡསྶ པན ཨཝིསྶཊྛཏྟཱ ཀམྨཾ ཀཱཏུཾ ཝཊྚཏི.

པུན བྷིཀྑཱུ ‘‘ཨུཔོསཐཱདཱིནི ཀརིསྶཱམཱ’’ཏི རཏྟིཾ སནྣིཔཏིཏྭཱ ‘‘ཡཱཝ སབྦེ སནྣིཔཏནྟི, ཏཱཝ དྷམྨཾ སུཎིསྶཱམཱ’’ཏི ཨེཀཾ ཨཛ྄ཛྷེསནྟི, ཏསྨིཾ དྷམྨཀཐཾ ཀཐེནྟེཡེཝ ཨརུཎོ ཨུགྒཙྪཏི. སཙེ ‘‘ཙཱཏུདྡསིཀཾ ཨུཔོསཐཾ ཀརིསྶཱམཱ’’ཏི ནིསིནྣཱ ‘‘པནྣརསོ’’ཏི ཀཱཏུཾ ཝཊྚཏི. སཙེ པནྣརསིཀཾ ཀཱཏུཾ ནིསིནྣཱ པཱཊིཔདེ ཨནུཔོསཐེ ཨུཔོསཐཾ ཀཱཏུཾ ན ཝཊྚཏི, ཨཉྙཾ པན སངྒྷཀིཙྩཾ ཀཱཏུཾ ཝཊྚཏི. ཨིདཾ རཏྟིཔཱརིཝཱསིཡཾ ནཱམ.

པུན བྷིཀྑཱུ ‘‘ཀིཉྩིདེཝ ཨབྦྷཱནཱདིསངྒྷཀམྨཾ ཀརིསྶཱམཱ’’ཏི ནིསིནྣཱ ཧོནྟི, ཏཏྲེཀོ ནཀྑཏྟཔཱཋཀོ བྷིཀྑུ ཨེཝཾ ཝདཏི – ‘‘ཨཛྫ ནཀྑཏྟཾ དཱརུཎཾ, མཱ ཨིམཾ ཀམྨཾ ཀརོཐཱ’’ཏི. ཏེ ཏསྶ ཝཙནེན ཚནྡཾ ཝིསྶཛྫེཏྭཱ ཏཏྠེཝ ནིསིནྣཱ ཧོནྟི. ཨཐཉྙོ ཨཱགནྟྭཱ ‘‘ནཀྑཏྟཾ པཊིམཱནེནྟཾ ¶ ཨཏྠོ བཱལཾ ཨུཔཙྩགཱ’’ཏི (ཛཱ. ༡.༡.༤༩) ཝཏྭཱ ‘‘ཀིཾ ནཀྑཏྟེན ཀརོཐཱ’’ཏི ཝདཏི. ཨིདཾ ཚནྡཔཱརིཝཱསིཡཉྩེཝ ཨཛ྄ཛྷཱསཡཔཱརིཝཱསིཡཉྩ. ཨེཏསྨིཾ པཱརིཝཱསིཡེ པུན ཚནྡཔཱརིསུདྡྷིཾ ཨནཱནེཏྭཱ ཀམྨཾ ཀཱཏུཾ ན ཝཊྚཏི.

ཝུཊྛིཏཱཡ པརིསཱཡཱཏི ཚནྡཾ ཝིསྶཛྫེཏྭཱ ཀཱཡེན ཝཱ ཝཱཙཱཡ ཝཱ ཚནྡཝིསྶཛྫནམཏྟེནེཝ ཝཱ ཨུཊྛིཏཱཡ པརིསཱཡ.

༡༡༦༩. ཨནཱཔཏྟི ཨཝུཊྛིཏཱཡ པརིསཱཡཱཏི ཚནྡཾ ཨཝིསྶཛྫེཏྭཱ ཨཝུཊྛིཏཱཡ ཨནཱཔཏྟི. སེསཾ ཨུཏྟཱནམེཝ. ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, པཎྞཏྟིཝཛྫཾ ¶ , ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཨེཀཱདསམསིཀྑཱཔདཾ.

༡༢. དྭཱདསམསིཀྑཱཔདཝཎྞནཱ

༡༡༧༠. དྭཱདསམེ – ཨུཔསྶཡོ ན སམྨཏཱིཏི ཝསནོཀཱསོ ནཔྤཧོཏི. སེསཾ ཨུཏྟཱནམེཝ. སམུཊྛཱནཱདཱིནི ཨནནྟརསདིསཱནེཝཱཏི.

དྭཱདསམསིཀྑཱཔདཾ.

༡༣. ཏེརསམསིཀྑཱཔདཝཎྞནཱ

༡༡༧༥. ཏེརསམེ ¶ – ཨེཀཾ ཝསྶཾ དྭེཏི ཨེཀནྟརིཀེ ཨེཀསྨིཾ སཾཝཙྪརེ དྭེ ཝུཊྛཱཔེཏི. སེསཾ ཨུཏྟཱནམེཝ. སམུཊྛཱནཱདཱིནིཔི ཝུཏྟསདིསཱནེཝཱཏི.

ཏེརསམསིཀྑཱཔདཾ.

ཀུམཱརིབྷཱུཏཝགྒོ ཨཊྛམོ.

༩. ཚཏྟུཔཱཧནཝགྒོ

༡. པཋམསིཀྑཱཔདཝཎྞནཱ

༡༡༨༡. ཚཏྟཝགྒསྶ ¶ པཋམསིཀྑཱཔདེ – སཀིམྤི དྷཱརེཏི ཨཱཔཏྟི པཱཙིཏྟིཡསྶཱཏི མགྒགམནེ ཨེཀཔཡོགེནེཝ དིཝསམྤི དྷཱརེཏི, ཨེཀཱཝ ཨཱཔཏྟི. སཙེ ཀདྡམཱདཱིནི པཏྭཱ ཨུཔཱཧནཱ ཨོམུཉྩིཏྭཱ ཚཏྟམེཝ དྷཱརེནྟཱི གཙྪཏི, དུཀྐཊཾ. ཨཐཱཔི གཙྪཱདཱིནི དིསྭཱ ཚཏྟཾ ཨཔནཱམེཏྭཱ ཨུཔཱཧནཱརུལ༹ྷཱཝ གཙྪཏི, དུཀྐཊམེཝ. སཙེ ཚཏྟམྤི ཨཔནཱམེཏྭཱ ཨུཔཱཧནཱཔི ཨོམུཉྩིཏྭཱ པུན དྷཱརེཏི, པུན པཱཙིཏྟིཡཾ. ཨེཝཾ པཡོགགཎནཱཡ ཨཱཔཏྟིཡོ ཝེདིཏབྦཱ. སེསཾ ཨུཏྟཱནམེཝ. ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

པཋམསིཀྑཱཔདཾ.

༢. དུཏིཡསིཀྑཱཔདཝཎྞནཱ

༡༡༨༤. དུཏིཡེ – ཡཱནེན ཡཱཡནྟཱིཏི ཨེཏྠཱཔི ཨོརོཧིཏྭཱ པུནཔྤུནཾ ཨབྷིརུཧནྟིཡཱ པཡོགགཎནཱཡ ཨཱཔཏྟིཡོ ཝེདིཏབྦཱ. སེསཾ པཋམེ ཝུཏྟནཡམེཝཱཏི.

དུཏིཡསིཀྑཱཔདཾ.

༣. ཏཏིཡསིཀྑཱཔདཝཎྞནཱ

༡༡༩༠. ཏཏིཡེ ¶ – ཝིཔྤཀིརིཡིཾསཱུཏི མཎཡོ ཝིཔྤཀིཎྞཱ. ཨིདྷཱཔི ཨོམུཉྩིཏྭཱ དྷཱརེནྟིཡཱ པཡོགགཎནཱཡ ཨཱཔཏྟིཡོ. སམུཊྛཱནཱདཱིནི ཝུཏྟནཡཱནེཝ. ཀེཝལཾ ཨིདྷ ཨཀུསལཙིཏྟཾ ཧོཏཱིཏི.

ཏཏིཡསིཀྑཱཔདཾ.

༤. ཙཏུཏྠསིཀྑཱཔདཝཎྞནཱ

༡༡༩༤. ཙཏུཏྠེ ¶ ¶ – སཱིསཱུཔགཱདཱིསུ ཡཾ ཡཾ དྷཱརེཏི, ཏསྶ ཏསྶ ཝསེན ཝཏྠུགཎནཱཡ ཨཱཔཏྟིཡོ ཝེདིཏབྦཱ. སེསཾ ཏཏིཡེ ཝུཏྟནཡམེཝཱཏི.

ཙཏུཏྠསིཀྑཱཔདཾ.

༥. པཉྩམསིཀྑཱཔདཝཎྞནཱ

༡༡༩༩. པཉྩམེ – གནྡྷཝཎྞཀེནཱཏི གནྡྷེན ཙ ཝཎྞཀེན ཙ. སེསཾ ཨུཏྟཱནམེཝ. སམུཊྛཱནཱདཱིནི ཏཏིཡསདིསཱནེཝཱཏི.

པཉྩམསིཀྑཱཔདཾ.

༦. ཚཊྛསིཀྑཱཔདཝཎྞནཱ

༡༢༠༢. ཚཊྛེ – སབྦཾ པཉྩམེ ཝུཏྟསདིསམེཝཱཏི.

ཚཊྛསིཀྑཱཔདཾ.

༧. སཏྟམསིཀྑཱཔདཝཎྞནཱ

༡༢༠༨-༩. སཏྟམེ – ཨུམྨདྡཱཔེཏི ཨཱཔཏྟི པཱཙིཏྟིཡསྶཱཏི ཨེཏྠ ཧཏྠཾ ཨམོཙེཏྭཱ ཨུམྨདྡནེ ཨེཀཱཝ ཨཱཔཏྟི, མོཙེཏྭཱ མོཙེཏྭཱ ཨུམྨདྡནེ པཡོགགཎནཱཡ ¶ ཨཱཔཏྟིཡོ. སམྦཱཧནེཔི ཨེསེཝ ནཡོ. གིལཱནཱཡཱཏི ཨནྟམསོ མགྒགམནཔརིསྶམེནཱཔི སཱབཱདྷཱཡ. ཨཱཔདཱསཱུཏི ཙོརབྷཡཱདཱིཧི སརཱིརཀམྤནཱདཱིསུ. སེསཾ ཨུཏྟཱནམེཝ. སམུཊྛཱནཱདཱིནི ཏཏིཡསདིསཱནེཝཱཏི.

སཏྟམསིཀྑཱཔདཾ.

༨-༩-༡༠. ཨཊྛམནཝམདསམསིཀྑཱཔདཝཎྞནཱ

༡༢༡༠. ཨཊྛམཱདཱིསུ ¶ ཏཱིསུ སིཀྑམཱནཱཡ སཱམཎེརིཡཱ, གིཧིནིཡཱཏི ཨིདམེཝ ནཱནཱཀརཎཾ, སེསཾ སཏྟམེ ཝུཏྟསདིསམེཝཱཏི.

ཨཊྛམནཝམདསམསིཀྑཱཔདཱནི.

༡༡. ཨེཀཱདསམསིཀྑཱཔདཝཎྞནཱ

༡༢༡༤. ཨེཀཱདསམེ – བྷིཀྑུསྶ པུརཏོཏི ཨབྷིམུཁམེཝཱཏི ཨཏྠོ. ཨིདཾ པན ཨུཔཙཱརཾ སནྡྷཱཡ ཀཐིཏནྟི ཝེདིཏབྦཾ. སེསཾ ཨུཏྟཱནམེཝ. ཀཐིནསམུཊྛཱནཾ – ཀཱཡཝཱཙཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཨེཀཱདསམསིཀྑཱཔདཾ.

༡༢. དྭཱདསམསིཀྑཱཔདཝཎྞནཱ

༡༢༡༩-༢༣. དྭཱདསམེ – ཨནོཀཱསཀཏནྟི ཨསུཀསྨིཾ ནཱམ ཋཱནེ པུཙྪཱམཱིཏི ཨེཝཾ ཨཀཏཨོཀཱསཾ. ཏེནེཝཱཧ – ‘‘ཨནོཀཱསཀཏནྟི ཨནཱཔུཙྪཱ’’ཏི ¶ . ཨནོདིསྶཱཏི ཨསུཀསྨིཾ ནཱམ ཋཱནེ པུཙྪཱམཱིཏི ཨེཝཾ ཨནིཡམེཏྭཱ ཀེཝལཾ ‘‘པུཙྪིཏབྦཾ ཨཏྠི, པུཙྪཱམི ཨཡྻཱ’’ཏི ཨེཝཾ ཝཏྭཱ. སེསཾ ཨུཏྟཱནམེཝ. པདསོདྷམྨསམུཊྛཱནཾ – ཝཱཙཏོ ཝཱཙཱཙིཏྟཏོ ཙ སམུཊྛཱཏི, ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

དྭཱདསམསིཀྑཱཔདཾ.

༡༣. ཏེརསམསིཀྑཱཔདཝཎྞནཱ

༡༢༢༦. ཏེརསམེ ¶ ¶ – པརིཀྑེཔཾ ཨཏིཀྐཱམེནྟིཡཱཏི ཨེཀེན པཱདེན ཨཏིཀྐནྟེ དུཀྐཊཾ, དུཏིཡེན པཱཙིཏྟིཡཾ. ཨུཔཙཱརེཔི ཨེསེཝ ནཡོ.

༡༢༢༧. ཨཙྪིནྣཙཱིཝརིཀཱཡཱཏིཨཱདཱིསུ སངྐཙྩིཀཙཱིཝརམེཝ ཙཱིཝརནྟི ཝེདིཏབྦཾ. ཨཱཔདཱསཱུཏི མཧགྒྷཾ ཧོཏི སངྐཙྩིཀཾ, པཱརུཔིཏྭཱ གཙྪནྟིཡཱཝ ཨུཔདྡཝོ ཨུཔྤཛྫཏི, ཨེཝརཱུཔཱསུ ཨཱཔདཱསུ ཨནཱཔཏྟི. སེསཾ ཨུཏྟཱནམེཝ. ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

ཏེརསམསིཀྑཱཔདཾ.

ཚཏྟུཔཱཧནཝགྒོ ནཝམོ.

ཨུདྡིཊྛཱ ཁོ ཨཡྻཱཡོ ཚསཊྛིསཏཾ པཱཙིཏྟིཡཱ དྷམྨཱཏི ཨེཏྠ སབྦཱནེཝ བྷིཀྑུནཱིནཾ ཁུདྡཀེསུ ཚནྣཝུཏི, བྷིཀྑཱུནཾ དྭེནཝུཏཱིཏི ཨཊྛཱསཱིཏིསཏཾ སིཀྑཱཔདཱནི, ཏཏོ སཀལཾ བྷིཀྑུནཱིཝགྒཾ, པརམྤརབྷོཛནཾ, ཨནཏིརིཏྟབྷོཛནཾ, ཨནཏིརིཏྟེན ཨབྷིཧཊྛུཾ པཝཱརཎཾ, པཎཱིཏབྷོཛནཝིཉྙཏྟི, ཨཙེལཀསིཀྑཱཔདཾ, དུཊྛུལླཔཊིཙྪཱདནཾ, ཨཱུནཝཱིསཏིཝསྶུཔསམྤཱདནཾ, མཱཏུགཱམེན སདྡྷིཾ སཾཝིདྷཱཡ ཨདྡྷཱནགམནཾ, རཱཛནྟེཔུརཔྤཝེསནཾ, སནྟཾ བྷིཀྑུཾ ཨནཱཔུཙྪཱ ཝིཀཱལེ གཱམཔྤཝེསནཾ, ནིསཱིདནཾ ཝསྶིཀསཱཊིཀནྟི ཨིམཱནི དྭཱཝཱིསཏི སིཀྑཱཔདཱནི ཨཔནེཏྭཱ སེསཱནི སཏཉྩ ཚསཊྛི ཙ སིཀྑཱཔདཱནི པཱཏིམོཀྑུདྡེསམགྒེན ཨུདྡིཊྛཱནི ཧོནྟཱིཏི ཝེདིཏབྦཱནི. ཏེནཱཧ – ‘‘ཨུདྡིཊྛཱ ཁོ ¶ ཨཡྻཱཡོ ཚསཊྛིསཏཾ པཱཙིཏྟིཡཱ དྷམྨཱ…པེ… ཨེཝམེཏཾ དྷཱརཡཱམཱི’’ཏི.

ཏཏྲཱཡཾ སངྑེཔཏོ སམུཊྛཱནཝིནིཙྪཡོ – གིརགྒསམཛྫཾ, ཙིཏྟཱགཱརསིཀྑཱཔདཾ, སངྒྷཱཎི, ཨིཏྠཱལངྐཱརོ, གནྡྷཝཎྞཀོ, ཝཱསིཏཀཔིཉྙཱཀོ, བྷིཀྑུནཱིཨཱདཱིཧི ཨུམྨདྡནཔརིམདྡནཱནཱིཏི ཨིམཱནི དས སིཀྑཱཔདཱནི ཨཙིཏྟཀཱནི ལོཀཝཛྫཱནི. ཨཡཾ པནེཏྠ ཨདྷིཔྤཱཡོ – ཝིནཱཔི ཙིཏྟེན ཨཱཔཛྫིཏབྦཏྟཱ ཨཙིཏྟཀཱནི, ཙིཏྟེ པན སཏི ཨཀུསལེནེཝ ཨཱཔཛྫིཏབྦཏྟཱ ལོཀཝཛྫཱནི. ཨཝསེསཱནི ཨཙིཏྟཀཱནི, པཎྞཏྟིཝཛྫཱནེཝ. ཙོརཱིཝུཊྛཱཔནཾ, གཱམནྟརཾ, ཨཱརཱམསིཀྑཱཔདཾ ¶ གབྦྷིནིཝགྒེ ཨཱདིཏོ པཊྛཱཡ སཏྟ, ཀུམཱརིབྷཱུཏཝགྒེ ཨཱདིཏོ པཊྛཱཡ པཉྩ, པུརིསསཾསཊྛཾ པཱརིཝཱསིཡཚནྡདཱནཾ, ཨནུཝསྶཝུཊྛཱཔནཾ, ཨེཀནྟརིཀཝུཊྛཱཔནནྟི ¶ ཨིམཱནི ཨེཀཱུནཝཱིསཏི སིཀྑཱཔདཱནི སཙིཏྟཀཱནི པཎྞཏྟིཝཛྫཱནི, ཨཝསེསཱནི སཙིཏྟཀཱནི ལོཀཝཛྫཱནེཝཱཏི.

སམནྟཔཱསཱདིཀཱཡ ཝིནཡསཾཝཎྞནཱཡ བྷིཀྑུནཱིཝིབྷངྒེ

ཁུདྡཀཝཎྞནཱ ནིཊྛིཏཱ.

པཱཙིཏྟིཡཀཎྜཾ ནིཊྛིཏཾ.

༥. པཱཊིདེསནཱིཡཀཎྜཾ (བྷིཀྑུནཱིཝིབྷངྒཝཎྞནཱ)

པཱཊིདེསནཱིཡསིཀྑཱཔདཝཎྞནཱ

པཱཊིདེསནཱིཡཱ ¶ ནཱམ, ཁུདྡཀཱནཾ ཨནནྟརཱ;

ཡེ དྷམྨཱ ཨཊྛ ཨཱརུལ༹ྷཱ, སངྑེཔེནེཝ སངྒཧཾ;

ཏེསཾ པཝཏྟཏེ ཨེསཱ, སངྑེཔེནེཝ ཝཎྞནཱ.

༡༢༢༨. ཡཱནི ཧི ཨེཏྠ པཱལི༹ཡཾ སཔྤིཏེལཱདཱིནི ནིདྡིཊྛཱནི, ཏཱནིཡེཝ ཝིཉྙཱཔེཏྭཱ བྷུཉྫནྟིཡཱ པཱཊིདེསནཱིཡཱ. པཱལི༹ཝིནིམུཏྟཀེསུ པན སབྦེསུ དུཀྐཊཾ. སེསམེཏྠ ཨུཏྟཱནམེཝ. ཨཊྛཝིདྷམྤི པནེཏཾ པཱཊིདེསནཱིཡཾ ཙཏུསམུཊྛཱནཾ – ཀཱཡཏོ ཀཱཡཝཱཙཏོ ཀཱཡཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པཱཊིདེསནཱིཡཝཎྞནཱ ནིཊྛིཏཱ.

པཱཊིདེསནཱིཡཀཎྜཾ ནིཊྛིཏཾ.

སེཁིཡཱ པན ཨུདྡིཊྛཱ, ཡེ དྷམྨཱ པཉྩསཏྟཏི;

ཏེསཾ ཨནནྟརཱཡེཝ, སཏྟཱདྷིཀརཎཝ྄ཧཡཱ.

མཧཱཝིབྷངྒེ ¶ ཡོ ཝུཏྟོ, ཏེསཾ ཨཏྠཝིནིཙྪཡོ;

བྷིཀྑུནཱིནཾ ཝིབྷངྒེཔི, ཏཱདིསཾཡེཝ ཏཾ ཝིདཱུ.

ཡསྨཱ ¶ ¶ ཏསྨཱ ཝིསུཾ ཏེསཾ, དྷམྨཱནཾ ཨཏྠཝཎྞནཱ;

ན ཝུཏྟཱ ཏཏྠ ཡཱ ཝུཏྟཱ, ཝུཏྟཱཡེཝ ཧི སཱ ཨིདྷཱཏི.

སམནྟཔཱསཱདིཀཱཡ ཝིནཡསཾཝཎྞནཱཡ

བྷིཀྑུནཱིཝིབྷངྒཝཎྞནཱ ནིཊྛིཏཱ.

སབྦཱསཝཔཧཾ ཨེསཱ, ནིཊྛིཏཱ ཝཎྞནཱ ཡཐཱ;

སབྦཱསཝཔཧཾ མགྒཾ, པཏྭཱ པསྶནྟུ ནིབྦུཏིནྟི.

ཨུབྷཏོཝིབྷངྒཊྛཀཐཱ ནིཊྛིཏཱ.