📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིནཡཔིཊཀེ

པརིཝཱར-ཨཊྛཀཐཱ

སོལ༹སམཧཱཝཱརོ

པཉྙཏྟིཝཱརཝཎྞནཱ

ཝིསུདྡྷཔརིཝཱརསྶ ¶ ¶ ¶ , པརིཝཱརོཏི སཱསནེ;

དྷམྨཀྑནྡྷསརཱིརསྶ, ཁནྡྷཀཱནཾ ཨནནྟརཱ.

སངྒཧཾ ཡོ སམཱརུལ༹ྷོ, ཏསྶ པུབྦཱགཏཾ ནཡཾ;

ཧིཏྭཱ དཱནི ཀརིསྶཱམི, ཨནུཏྟཱནཏྠཝཎྞནཾ.

༡. ཏཏྠ ¶ ཡཾ ཏེན བྷགཝཏཱ…པེ… པཉྙཏྟནྟི ཨཱདིནཡཔྤཝཏྟཱཡ ཏཱཝ པུཙྪཱཡ ཨཡཾ སངྑེཔཏྠོ – ཡོ སོ བྷགཝཱ སཱསནསྶ ཙིརཊྛིཏིཀཏྠཾ དྷམྨསེནཱཔཏིནཱ སདྡྷམྨགཱརཝབཧུམཱནཝེགསམུསྶིཏཾ ཨཉྫལིཾ སིརསྨིཾ པཏིཊྛཱཔེཏྭཱ ཡཱཙིཏོ དས ཨཏྠཝསེ པཊིཙྩ ཝིནཡཔཉྙཏྟིཾ པཉྙཔེསི, ཏེན བྷགཝཏཱ ཏསྶ ཏསྶ སིཀྑཱཔདསྶ པཉྙཏྟིཀཱལཾ ཛཱནཏཱ, ཏསྶཱ ཏསྶཱ སིཀྑཱཔདཔཉྙཏྟིཡཱ དས ཨཏྠཝསེ པསྶཏཱ; ཨཔིཙ པུབྦེནིཝཱསཱདཱིཧི ཛཱནཏཱ, དིབྦེན ཙཀྑུནཱ པསྶཏཱ, ཏཱིཧི ཝིཛྫཱཧི ཚཧི ཝཱ པན ཨབྷིཉྙཱཧི ཛཱནཏཱ, སབྦཏྠ ཨཔྤཊིཧཏེན སམནྟཙཀྑུནཱ པསྶཏཱ, སབྦདྷམྨཛཱནནསམཏྠཱཡ པཉྙཱཡ ཛཱནཏཱ, སབྦསཏྟཱནཾ ཙཀྑུཝིསཡཱཏཱིཏཱནི ཏིརོཀུཊྚཱདིགཏཱནི ཙཱཔི རཱུཔཱནི ཨཏིཝིསུདྡྷེན མཾསཙཀྑུནཱ ཙ པསྶཏཱ, ཨཏྟཧིཏསཱདྷིཀཱཡ སམཱདྷིཔདཊྛཱནཱཡ པཊིཝེདྷཔཉྙཱཡ ཛཱནཏཱ, པརཧིཏསཱདྷིཀཱཡ ཀརུཎཱཔདཊྛཱནཱཡ ¶ དེསནཱཔཉྙཱཡ པསྶཏཱ, ཨརཧཏཱ སམྨཱསམྦུདྡྷེན ‘‘ཡཾ པཋམཾ པཱརཱཛིཀཾ པཉྙཏྟཾ, ཏཾ ཀཏྠ པཉྙཏྟཾ, ཀཾ ཨཱརབྦྷ པཉྙཏྟཾ, ཀིསྨིཾ ཝཏྠུསྨིཾ པཉྙཏྟཾ, ཨཏྠི ཏཏྠ པཉྙཏྟི…པེ… ཀེནཱབྷཏ’’ནྟི.

༢. པུཙྪཱཝིསྶཛྫནེ ¶ པན ‘‘ཡཾ ཏེན བྷགཝཏཱ ཛཱནཏཱ པསྶཏཱ ཨརཧཏཱ སམྨཱསམྦུདྡྷེན པཋམཾ པཱརཱཛིཀ’’ནྟི ཨིདཾ ཀེཝལཾ པུཙྪཱཡ ཨཱགཏསྶ ཨཱདིཔདསྶ པཙྩུདྡྷརཎམཏྟམེཝ, ‘‘ཀཏྠ པཉྙཏྟནྟི ཝེསཱལིཡཱ པཉྙཏྟཾ; ཀཾ ཨཱརབྦྷཱཏི སུདིནྣཾ ཀལནྡཔུཏྟཾ ཨཱརབྦྷཱ’’ཏི ཨེཝམཱདིནཱ པན ནཡེན པུནཔི ཨེཏྠ ཨེཀེཀཾ པདཾ པུཙྪིཏྭཱཝ ཝིསྶཛྫིཏཾ. ཨེཀཱ པཉྙཏྟཱིཏི ‘‘ཡོ པན བྷིཀྑུ མེཐུནཾ དྷམྨཾ པཊིསེཝེཡྻ པཱརཱཛིཀོ ཧོཏི ཨསཾཝཱསོ’’ཏི ཨཡཾ ཨེཀཱ པཉྙཏྟི. དྭེ ཨནུཔཉྙཏྟིཡོཏི ‘‘ཨནྟམསོ ཏིརཙྪཱནགཏཱཡཔཱི’’ཏི ཙ, ‘‘སིཀྑཾ ཨཔཙྩཀྑཱཡཱ’’ཏི ཙ མཀྐཊིཝཛྫིཔུཏྟཀཝཏྠཱུནཾ ཝསེན ཝུཏྟཱ – ཨིམཱ དྭེ ཨནུཔཉྙཏྟིཡོ. ཨེཏྟཱཝཏཱ ‘‘ཨཏྠི ཏཏྠ པཉྙཏྟི ཨནུཔཉྙཏྟི ཨནུཔྤནྣཔཉྙཏྟཱི’’ཏི ཨིམིསྶཱ པུཙྪཱཡ དྭེ ཀོཊྛཱསཱ ཝིསྶཛྫིཏཱ ཧོནྟི. ཏཏིཡཾ ཝིསྶཛྫེཏུཾ པན ‘‘ཨནུཔྤནྣཔཉྙཏྟི ཏསྨིཾ ནཏྠཱི’’ཏི ཝུཏྟཾ. ཨཡཉྷི ཨནུཔྤནྣཔཉྙཏྟི ནཱམ ཨནུཔྤནྣེ དོསེ པཉྙཏྟཱ; སཱ ཨཊྛགརུདྷམྨཝསེན བྷིཀྑུནཱིནཾཡེཝ ཨཱགཏཱ, ཨཉྙཏྲ ནཏྠི. ཏསྨཱ ཝུཏྟཾ ‘‘ཨནུཔྤནྣཔཉྙཏྟི ཏསྨིཾ ནཏྠཱི’’ཏི. སབྦཏྠཔཉྙཏྟཱིཏི མཛ྄ཛྷིམདེསེ ཙེཝ པཙྩནྟིམཛནཔདེསུ ཙ སབྦཏྠཔཉྙཏྟི. ཝིནཡདྷརཔཉྩམེན གཎེན ‘‘ཨུཔསམྤདཱ, གུཎངྒུཎཱུཔཱཧནཱ, དྷུཝནཧཱནཾ, ཙམྨཏྠརཎ’’ནྟི ཨིམཱནི ཧི ཙཏྟཱརི སིཀྑཱཔདཱནི མཛ྄ཛྷིམདེསེཡེཝ པཉྙཏྟི. ཨེཏྠེཝ ཨེཏེཧི ཨཱཔཏྟི ཧོཏི, ན པཙྩནྟིམཛནཔདེསུ. སེསཱནི སབྦཱནེཝ སབྦཏྠཔཉྙཏྟི ནཱམ.

སཱདྷཱརཎཔཉྙཏྟཱིཏི ¶ བྷིཀྑཱུནཉྩེཝ བྷིཀྑུནཱིནཉྩ སཱདྷཱརཎཔཉྙཏྟི; སུདྡྷབྷིཀྑཱུནམེཝ ཧི སུདྡྷབྷིཀྑུནཱིནཾ ཝཱ པཉྙཏྟཾ སིཀྑཱཔདཾ ཨསཱདྷཱརཎཔཉྙཏྟི ནཱམ ཧོཏི. ཨིདཾ པན བྷིཀྑུཾ ཨཱརབྦྷ ཨུཔྤནྣེ ཝཏྠུསྨིཾ ‘‘ཡཱ པན བྷིཀྑུནཱི ཚནྡསོ མེཐུནཾ དྷམྨཾ པཊིསེཝེཡྻ, ཨནྟམསོ ཏིརཙྪཱནགཏེནཔི པཱརཱཛིཀཱ ཧོཏི ཨསཾཝཱསཱ’’ཏི བྷིཀྑུནཱིནམྤི ¶ པཉྙཏྟཾ, ཝིནཱིཏཀཐཱམཏྟམེཝ ཧི ཏཱསཾ ནཏྠི, སིཀྑཱཔདཾ པན ཨཏྠི, ཏེན ཝུཏྟཾ ‘‘སཱདྷཱརཎཔཉྙཏྟཱི’’ཏི. ཨུབྷཏོཔཉྙཏྟིཡམྤི ཨེསེཝ ནཡོ. བྱཉྫནམཏྟམེཝ ཧི ཨེཏྠ ནཱནཾ, བྷིཀྑཱུནཾ བྷིཀྑུནཱིནམྤི སཱདྷཱརཎཏྟཱ སཱདྷཱརཎཔཉྙཏྟི, ཨུབྷིནྣམྤི པཉྙཏྟཏྟཱ ཨུབྷཏོཔཉྙཏྟཱིཏི. ཨཏྠེ པན བྷེདོ ནཏྠི.

ནིདཱནོགདྷནྟི ‘‘ཡསྶ སིཡཱ ཨཱཔཏྟི སོ ཨཱཝིཀརེཡྻཱ’’ཏི ཨེཏྠ སབྦཱཔཏྟཱིནཾ ཨནུཔཝིཊྛཏྟཱ ནིདཱནོགདྷཾ; ནིདཱནེ ཨནུཔཝིཊྛནྟི ཨཏྠོ. དུཏིཡེན ཨུདྡེསེནཱཏི ནིདཱནོགདྷཾ ནིདཱནཔརིཡཱཔནྣམྤི སམཱནཾ ‘‘ཏཏྲིམེ ཙཏྟཱརོ ¶ པཱརཱཛིཀཱ དྷམྨཱ’’ཏིཨཱདིནཱ དུཏིཡེནེཝ ཨུདྡེསེན ཨུདྡེསཾ ཨཱགཙྪཏི. ཙཏུནྣཾ ཝིཔཏྟཱིནནྟི སཱིལཝིཔཏྟིཨཱདཱིནཾ. པཋམཱ ཧི དྭེ ཨཱཔཏྟིཀྑནྡྷཱ སཱིལཝིཔཏྟི ནཱམ, ཨཝསེསཱ པཉྩ ཨཱཙཱརཝིཔཏྟི ནཱམ. མིཙྪཱདིཊྛི ཙ ཨནྟགྒཱཧིཀདིཊྛི ཙ དིཊྛིཝིཔཏྟི ནཱམ, ཨཱཛཱིཝཧེཏུ པཉྙཏྟཱནི ཚ སིཀྑཱཔདཱནི ཨཱཛཱིཝཝིཔཏྟི ནཱམ. ཨིཏི ཨིམཱསཾ ཙཏུནྣཾ ཝིཔཏྟཱིནཾ ཨིདཾ པཱརཱཛིཀཾ སཱིལཝིཔཏྟི ནཱམ ཧོཏི.

ཨེཀེན སམུཊྛཱནེནཱཏི དྭངྒིཀེན ཨེཀེན སམུཊྛཱནེན. ཨེཏྠ ཧི ཙིཏྟཾ ཨངྒཾ ཧོཏི, ཀཱཡེན པན ཨཱཔཏྟིཾ ཨཱཔཛྫཏི. ཏེན ཝུཏྟཾ ‘‘ཀཱཡཏོ ཙ ཙིཏྟཏོ ཙ སམུཊྛཱཏཱི’’ཏི. དྭཱིཧི སམཐེཧི སམྨཏཱིཏི ‘‘ཨཱཔནྣོསཱི’’ཏི སམྨུཁཱ པུཙྪིཡམཱནོ ‘‘ཨཱམ ཨཱཔནྣོམྷཱི’’ཏི པཊིཛཱནཱཏི, ཏཱཝདེཝ བྷཎྜནཀལཧཝིགྒཧཱ ཝཱུཔསནྟཱ ཧོནྟི, སཀྐཱ ཙ ཧོཏི ཏཾ པུགྒལཾ ཨཔནེཏྭཱ ཨུཔོསཐོ ཝཱ པཝཱརཎཱ ཝཱ ཀཱཏུཾ. ཨིཏི སམྨུཁཱཝིནཡེན ཙ པཊིཉྙཱཏཀརཎེན ཙཱཏི དྭཱིཧི སམཐེཧི སམྨཏི, ན ཙ ཏཔྤཙྩཡཱ ཀོཙི ཨུཔདྡཝོ ཧོཏི. ཡཾ པན ཨུཔརི པཉྙཏྟིཝགྒེ ‘‘ན ཀཏམེན སམཐེན སམྨཏཱི’’ཏི ཝུཏྟཾ, ཏཾ སམཐཾ ཨོཏཱརེཏྭཱ ཨནཱཔཏྟི ཀཱཏུཾ ན སཀྐཱཏི ཨིམམཏྠཾ སནྡྷཱཡ ཝུཏྟཾ.

པཉྙཏྟི ཝིནཡོཏི ‘‘ཡོ པན བྷིཀྑཱུ’’ཏིཨཱདིནཱ ནཡེན ཝུཏྟམཱཏིཀཱ པཉྙཏྟི ཝིནཡོཏི ཨཏྠོ. ཝིབྷཏྟཱིཏི པདབྷཱཛནཾ ཝུཙྩཏི; ཝིབྷཏྟཱིཏི ཧི ཝིབྷངྒསྶེཝེཏཾ ནཱམཾ. ཨསཾཝརོཏི ¶ ཝཱིཏིཀྐམོ. སཾཝརོཏི ཨཝཱིཏིཀྐམོ. ཡེསཾ ཝཏྟཏཱིཏི ཡེསཾ ཝིནཡཔིཊཀཉྩ ཨཊྛཀཐཱ ཙ སབྦཱ པགུཎཱཏི ཨཏྠོ. ཏེ དྷཱརེནྟཱིཏི ཏེ ཨེཏཾ པཋམཔཱརཱཛིཀཾ ¶ པཱལི༹ཏོ ཙ ཨཏྠཏོ ཙ དྷཱརེནྟི; ན ཧི སཀྐཱ སབྦཾ ཝིནཡཔིཊཀཾ ཨཛཱནནྟེན ཨེཏསྶ ཨཏྠོ ཛཱནིཏུནྟི. ཀེནཱབྷཏནྟི ཨིདཾ པཋམཔཱརཱཛིཀཾ པཱལི༹ཝསེན ཙ ཨཏྠཝསེན ཙ ཡཱཝ ཨཛྫཏནཀཱལཾ ཀེན ཨཱནཱིཏནྟི. པརམྤརཱབྷཏནྟི པརམྤརཱཡ ཨཱནཱིཏཾ.

༣. ཨིདཱནི ཡཱཡ པརམྤརཱཡ ཨཱནཱིཏཾ, ཏཾ དསྶེཏུཾ ‘‘ཨུཔཱལི དཱསཀོ ཙེཝཱ’’ཏིཨཱདིནཱ ནཡེན པོརཱཎཀེཧི མཧཱཐེརེཧི གཱཐཱཡོ ཋཔིཏཱ ¶ . ཏཏྠ ཡཾ ཝཏྟབྦཾ, ཏཾ ནིདཱནཝཎྞནཱཡམེཝ ཝུཏྟཾ. ཨིམིནཱ ནཡེན དུཏིཡཔཱརཱཛིཀཱདིཔུཙྪཱཝིསྶཛྫནེསུཔི ཝིནིཙྪཡོ ཝེདིཏབྦོཏི.

མཧཱཝིབྷངྒེ པཉྙཏྟིཝཱརཝཎྞནཱ ནིཊྛིཏཱ.

ཀཏཱཔཏྟིཝཱརཱདིཝཎྞནཱ

༡༥༧. ཨིཏོ པརཾ ‘‘མེཐུནཾ དྷམྨཾ པཊིསེཝནྟོ ཀཏི ཨཱཔཏྟིཡོ ཨཱཔཛྫཏཱི’’ཏི ཨཱདིཔྤབྷེདོ ཀཏཱཔཏྟིཝཱརོ, ‘‘མེཐུནཾ དྷམྨཾ པཊིསེཝནྟསྶ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟཱི’’ཏི ཨཱདིཔྤབྷེདོ ཝིཔཏྟིཝཱརོ, ‘‘མེཐུནཾ དྷམྨཾ པཊིསེཝནྟསྶ ཨཱཔཏྟིཡོ སཏྟནྣཾ ཨཱཔཏྟིཀྑནྡྷཱནཾ ཀཏིཧི ཨཱཔཏྟིཀྑནྡྷེཧི སངྒཧིཏཱ’’ཏི ཨཱདིཔྤབྷེདོ སངྒཧཝཱརོ, ‘‘མེཐུནཾ དྷམྨཾ པཊིསེཝནྟསྶ ཨཱཔཏྟིཡོ ཚནྣཾ ཨཱཔཏྟིསམུཊྛཱནཱནཾ ཀཏིཧི སམུཊྛཱནེཧི སམུཊྛཧནྟཱི’’ཏི ཨཱདིཔྤབྷེདོ སམུཊྛཱནཝཱརོ, ‘‘མེཐུནཾ དྷམྨཾ པཊིསེཝནྟསྶ ཨཱཔཏྟིཡོ ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎ’’ནྟི ཨཱདིཔྤབྷེདོ ཨདྷིཀརཎཝཱརོ, ‘‘མེཐུནཾ དྷམྨཾ པཊིསེཝནྟསྶ ཨཱཔཏྟིཡོ སཏྟནྣཾ སམཐཱནཾ ཀཏིཧི སམཐེཧི སམྨནྟཱི’’ཏི ཨཱདིཔྤབྷེདོ སམཐཝཱརོ, ཏདནནྟརོ སམུཙྩཡཝཱརོ ཙཱཏི ཨིམེ སཏྟ ཝཱརཱ ཨུཏྟཱནཏྠཱ ཨེཝ.

༡༨༨. ཏཏོ པརཾ ‘‘མེཐུནཾ དྷམྨཾ པཊིསེཝནཔཙྩཡཱ པཱརཱཛིཀཾ ཀཏྠ པཉྙཏྟ’’ནྟིཨཱདིནཱ ནཡེན པུན པཙྩཡཝསེན ཨེཀོ པཉྙཏྟིཝཱརོ, ཏསྶ ཝསེན པུརིམསདིསཱ ཨེཝ ཀཏཱཔཏྟིཝཱརཱདཡོ སཏྟ ཝཱརཱཏི ཨེཝཾ ཨཔརེཔི ཨཊྛ ཝཱརཱ ཝུཏྟཱ, ཏེཔི ཨུཏྟཱནཏྠཱ ཨེཝ. ཨིཏི ཨིམེ ཨཊྛ, པུརིམཱ ཨཊྛཱཏི མཧཱཝིབྷངྒེ སོལ༹ས ཝཱརཱ དསྶིཏཱ. ཏཏོ པརཾ ཏེནེཝ ནཡེན བྷིཀྑུནིཝིབྷངྒེཔི ¶ སོལ༹ས ཝཱརཱ ཨཱགཏཱཏི ཨེཝམིམེ ཨུབྷཏོཝིབྷངྒེ དྭཏྟིཾས ཝཱརཱ པཱལི༹ནཡེནེཝ ¶ ཝེདིཏབྦཱ. ན ཧེཏྠ ཀིཉྩི པུབྦེ ཨཝིནིཙྪིཏཾ ནཱམ ཨཏྠི.

མཧཱཝིབྷངྒེ ཙ བྷིཀྑུནིཝིབྷངྒེ ཙ

སོལ༹སམཧཱཝཱརཝཎྞནཱ ནིཊྛིཏཱ.

སམུཊྛཱནསཱིསཝཎྞནཱ

༢༥༧. ཏདནནྟརཱཡ ¶ ¶ པན སམུཊྛཱནཀཐཱཡ ཨནཏྟཱ ཨིཏི ནིཙྪཡཱཏི ཨནཏྟཱ ཨིཏི ནིཙྪིཏཱ. སབྷཱགདྷམྨཱནནྟི ཨནིཙྩཱཀཱརཱདཱིཧི སབྷཱགཱནཾ སངྑཏདྷམྨཱནཾ. ནཱམམཏྟཾ ན ནཱཡཏཱིཏི ནཱམམཏྟམྤི ན པཉྙཱཡཏི. དུཀྑཧཱནིནྟི དུཀྑགྷཱཏནཾ. ཁནྡྷཀཱ ཡཱ ཙ མཱཏིཀཱཏི ཁནྡྷཀཱ ཡཱ ཙ མཱཏིཀཱཏི ཨཏྠོ. ཨཡམེཝ ཝཱ པཱཋོ. སམུཊྛཱནཾ ནིཡཏོ ཀཏནྟི སམུཊྛཱནཾ ནིཡཏོཀཏཾ ནིཡཏཀཏཾ; ནིཡཏསམུཊྛཱནནྟི ཨཏྠོ. ཨེཏེན བྷཱུཏཱརོཙནཙོརིཝུཊྛཱཔནཨནནུཉྙཱཏསིཀྑཱཔདཏྟཡསྶ སངྒཧོ པཙྩེཏབྦོ. ཨེཏཱནེཝ ཧི ཏཱིཎི སིཀྑཱཔདཱནི ནིཡཏསམུཊྛཱནཱནི, ཨཉྙེཧི སདྡྷིཾ ཨསམྦྷིནྣསམུཊྛཱནཱནི.

སམྦྷེདཾ ནིདཱནཉྩཉྙནྟི ཨཉྙམྤི སམྦྷེདཉྩ ནིདཱནཉྩ. ཏཏྠ སམྦྷེདཝཙནེན སམུཊྛཱནསམྦྷེདསྶ གཧཎཾ པཙྩེཏབྦཾ, ཏཱནི ཧི ཏཱིཎི སིཀྑཱཔདཱནི ཋཔེཏྭཱ སེསཱནི སམྦྷིནྣསམུཊྛཱནཱནི. ནིདཱནཝཙནེན སིཀྑཱཔདཱནཾ པཉྙཏྟིདེསསངྑཱཏཾ ནིདཱནཾ པཙྩེཏབྦཾ. སུཏྟེ དིསྶནྟི ཨུཔརཱིཏི སིཀྑཱཔདཱནཾ སམུཊྛཱནནིཡམོ སམྦྷེདོ ནིདཱནནྟི ཨིམཱནི ཏཱིཎི སུཏྟམྷི ཨེཝ དིསྶནྟི; པཉྙཱཡནྟཱིཏི ཨཏྠོ. ཏཏྠ ‘‘ཨེཀེན སམུཊྛཱནེན སམུཊྛཱཏི, ཀཱཡཏོ ཙ ཙིཏྟཏོ ཙཱ’’ཏིཨཱདིམྷི ཏཱཝ པུརིམནཡེ སམུཊྛཱནནིཡམོ ཙ སམྦྷེདོ ཙ དིསྶནྟི. ཨིཏརཾ པན ནིདཱནཾ ནཱམ –

‘‘ཝེསཱལིཡཱ རཱཛགཧེ, སཱཝཏྠིཡཱ ཙ ཨཱལ༹ཝཱི;

ཀོསམྦིཡཱ ཙ སཀྐེསུ, བྷགྒེསུ ཙེཝ པཉྙཏྟཱ’’ཏི.

ཨེཝཾ ཨུཔརི དིསྶཏི, པརཏོ ཨཱགཏེ སུཏྟེ དིསྶཏཱིཏི ཝེདིཏབྦཾ.

‘‘ཝིབྷངྒེ ¶ དྭཱིསཱུ’’ཏི གཱཐཱཡ ཨཡམཏྠོ – ཡཾ སིཀྑཱཔདཾ དྭཱིསུ ཝིབྷངྒེསུ པཉྙཏྟཾ ཨུཔོསཐདིཝསེ བྷིཀྑཱུ ཙ བྷིཀྑུནིཡོ ཙ ཨུདྡིསནྟི, ཏསྶ ཡཐཱཉཱཡཾ སམུཊྛཱནཾ པཝཀྑཱམི, ཏཾ མེ སུཎཱཐཱཏི.

སཉྩརིཏྟཱནུབྷཱསནཉྩཱཏི སཉྩརིཏྟཉྩ སམནུབྷཱསནཉྩ. ཨཏིརེཀཉྩ ཙཱིཝརནྟི ཨཏིརེཀཙཱིཝརཾ ¶ ; ཀཐིནནྟི ཨཏྠོ. ལོམཱནི པདསོདྷམྨོཏི ཨེལ༹ཀལོམཱནི ¶ ཙ པདསོདྷམྨོ ཙ. བྷཱུཏཾ སཾཝིདྷཱནེན ཙཱཏི བྷཱུཏཱརོཙནཉྩ སཾཝིདཧིཏྭཱ ཨདྡྷཱནཔྤཊིཔཛྫནཉྩ. ཐེཡྻདེསནཱ ཙོརིཾ ཙཱཏི ཐེཡྻསཏྠོ ཙ ཚཏྟཔཱཎིསྶ ཨགིལཱནསྶ དྷམྨདེསནཱ ཙ ཙོརིཝུཊྛཱཔནཉྩ. ཨནནུཉྙཱཏཱཡ ཏེརསཱཏི མཱཏཱཔིཏུསཱམིཀེཧི ཨནནུཉྙཱཏཱཡ སདྡྷིཾ ཨིམཱནི ཏེརས སམུཊྛཱནཱནི ཧོནྟི. སདིསཱ ཨིདྷ དིསྶརེཏི ཨིདྷ ཨུབྷཏོཝིབྷངྒེ ཨེཏེསུ ཏེརསསུ སམུཊྛཱནསཱིསེསུ ཨེཀེཀསྨིཾ ཨཉྙཱནིཔི སདིསཱནི སམུཊྛཱནཱནི དིསྶནྟི.

པཋམཔཱརཱཛིཀསམུཊྛཱནཝཎྞནཱ

༢༥༨. ཨིདཱནི ཏཱནི དསྶེཏུཾ ‘‘མེཐུནཾ སུཀྐསཾསགྒོ’’ཏིཨཱདི ཝུཏྟཾ. ཏཏྠ མེཐུནནྟི ཨིདཾ ཏཱཝ པཋམཔཱརཱཛིཀཾ ནཱམ ཨེཀཾ སམུཊྛཱནསཱིསཾ, སེསཱནི ཏེན སདིསཱནི. ཏཏྠ སུཀྐསཾསགྒོཏི སུཀྐཝིསྶཊྛི ཙེཝ ཀཱཡསཾསགྒོ ཙ. ཨནིཡཏཱ པཋམིཀཱཏི པཋམཾ ཨནིཡཏསིཀྑཱཔདཾ. པུབྦཱུཔཔརིཔཱཙིཏཱཏི ‘‘ཛཱནཾ པུབྦཱུཔགཏཾ བྷིཀྑུ’’ནྟི སིཀྑཱཔདཉྩ བྷིཀྑུནིཔརིཔཱཙིཏཔིཎྜཔཱཏསིཀྑཱཔདཉྩ. རཧོ བྷིཀྑུནིཡཱ སཧཱཏི བྷིཀྑུནིཡཱ སདྡྷིཾ རཧོ ནིསཛྫསིཀྑཱཔདཉྩ.

སབྷོཛནེ རཧོ དྭེ ཙཱཏི སབྷོཛནེ ཀུལེ ཨནུཔཁཛྫནིསཛྫསིཀྑཱཔདཉྩ དྭེ རཧོནིསཛྫསིཀྑཱཔདཱནི ཙ. ཨངྒུལི ཨུདཀེ ཧསནྟི ཨངྒུལིཔཏོདཀཉྩ ཨུདཀེ ཧསདྷམྨསིཀྑཱཔདཉྩ. པཧཱརེ ཨུགྒིརེ ཙེཝཱཏི པཧཱརདཱནསིཀྑཱཔདཉྩ ཏལསཏྟིཀཨུགྒིརཎསིཀྑཱཔདཉྩ. ཏེཔཉྙཱསཱ ཙ སེཁིཡཱཏི པརིམཎྜལནིཝཱསནཱདཱིནི ཁུདྡཀཝཎྞནཱཝསཱནེ ཝུཏྟཱནི ཏེཔཉྙཱས སེཁིཡསིཀྑཱཔདཱནི ཙ.

ཨདྷཀྑགཱམཱཝསྶུཏཱཏི བྷིཀྑུནཱིནཾ ཨདྷཀྑཀསིཀྑཱཔདཉྩ གཱམནྟརགམནཾ ཨཝསྶུཏཱ ཨཝསྶུཏསྶ ¶ ཧཏྠཏོ ཁཱདནཱིཡབྷོཛནཱིཡགྒཧཎསིཀྑཱཔདཉྩ. ཏལམཊྛཉྩ སུདྡྷིཀཱཏི ཏལགྷཱཏཀཾ ཛཏུམཊྛཾ ཨུདཀསུདྡྷིཀཱདིཡནཉྩ. ཝསྶཾཝུཊྛཱ ཙ ཨོཝཱདནྟི ཝསྶཾཝུཊྛཱ ཚཔྤཉྩཡོཛནཱནི སིཀྑཱཔདཉྩ ཨོཝཱདཱཡ ཨགམནསིཀྑཱཔདཉྩ. ནཱནུབནྡྷེ པཝཏྟིནིནྟི ཡཱ པན བྷིཀྑུནཱི ཝུཊྛཱཔིཏཾ པཝཏྟིནིཾ དྭེ ཝསྶཱནི ནཱནུབནྡྷེཡྻཱཏི ཝུཏྟསིཀྑཱཔདཾ.

ཨིམེ ¶ སིཀྑཱཏི ཨིམཱ སིཀྑཱཡོ; ལིངྒཝིཔརིཡཱཡོ ཀཏོ. ཀཱཡམཱནསིཀཱ ཀཏཱཏི ཀཱཡཙིཏྟསམུཊྛཱནཱ ཀཏཱ.

དུཏིཡཔཱརཱཛིཀསམུཊྛཱནཝཎྞནཱ

༢༥༩. ཨདིནྣནྟི ¶ ཨིདཾ ཏཱཝ ཨདིནྣཱདཱནནྟི ཝཱ དུཏིཡཔཱརཱཛིཀནྟི ཝཱ ཨེཀཾ སམུཊྛཱནསཱིསཾ, སེསཱནི ཏེན སདིསཱནི. ཏཏྠ ཝིགྒཧུཏྟརཱིཏི མནུསྶཝིགྒཧཨུཏྟརིམནུསྶདྷམྨསིཀྑཱཔདཱནི. དུཊྛུལླཱ ཨཏྟཀཱམིནནྟི དུཊྛུལླཝཱཙཱཨཏྟཀཱམཔཱརིཙརིཡསིཀྑཱཔདཱནི. ཨམཱུལཱ ཨཉྙབྷཱགིཡཱཏི དྭེ དུཊྛདོསསིཀྑཱཔདཱནི. ཨནིཡཏཱ དུཏིཡིཀཱཏི དུཏིཡཾ ཨནིཡཏསིཀྑཱཔདཾ.

ཨཙྪིནྡེ པརིཎཱམནེཏི སཱམཾ ཙཱིཝརཾ དཏྭཱ ཨཙྪིནྡནཉྩ སངྒྷིཀལཱབྷསྶ ཨཏྟནོ པརིཎཱམནཉྩ. མུསཱ ཨོམསཔེསུཎཱཏི མུསཱཝཱདོ ཙ ཨོམསཝཱདོ ཙ བྷིཀྑུཔེསུཉྙཉྩ. དུཊྛུལླཱ པཐཝཱིཁཎེཏི དུཊྛུལླཱཔཏྟིཨཱརོཙནཉྩ པཐཝཱིཁཎཉྩ. བྷཱུཏཾ ཨཉྙཱཡ ཨུཛ྄ཛྷཱཔེཏི བྷཱུཏགཱམཨཉྙཝཱདཀཨུཛ྄ཛྷཱཔནཀསིཀྑཱཔདཱནི.

ནིཀྐཌྜྷནཾ སིཉྩནཉྩཱཏི ཝིཧཱརཏོ ནིཀྐཌྜྷནཉྩ ཨུདཀེན ཏིཎཱདིསིཉྩནཉྩ. ཨཱམིསཧེཏུ བྷུཏྟཱཝཱིཏི ‘‘ཨཱམིསཧེཏུ བྷིཀྑུནིཡོ ཨོཝདནྟཱི’’ཏི སིཀྑཱཔདཉྩ, བྷུཏྟཱཝིཾ ཨནཏིརིཏྟེན ཁཱདནཱིཡཱདིནཱ པཝཱརཎཱསིཀྑཱཔདཉྩ. ཨེཧི ཨནཱདརི བྷིཾསཱཏི ‘‘ཨེཧཱཝུསོ གཱམཾ ཝཱ’’ཏི སིཀྑཱཔདཉྩ, ཨནཱདརིཡཉྩ བྷིཀྑུབྷིཾསཱཔནཀཉྩ. ཨཔནིདྷེ ཙ ཛཱིཝིཏནྟི པཏྟཱདཱིནཾ ཨཔནིདྷཱནསིཀྑཱཔདཉྩ, སཉྩིཙྩ པཱཎཾ ཛཱིཝིཏཱཝོརོཔནཉྩ.

ཛཱནཾ སཔྤཱཎཀཾ ཀམྨནྟི ཛཱནཾ སཔྤཱཎཀཨུདཀསིཀྑཱཔདཉྩ པུནཀམྨཱཡ ཨུཀྐོཊནཉྩ. ཨཱུནསཾཝཱསནཱསནཱཏི ¶ ཨཱུནཝཱིསཏིཝསྶསིཀྑཱཔདཉྩ ཨུཀྑིཏྟཀེན སདྡྷིཾ སཾཝཱསསིཀྑཱཔདཉྩ ནཱསིཏཀསཱམཎེརསམྦྷོགསིཀྑཱཔདཉྩ. སཧདྷམྨིཀཾ ཝིལེཁཱཏི སཧདྷམྨིཀཾ ཝུཙྩམཱནསིཀྑཱཔདཉྩ, ཝིལེཁཱཡ སཾཝཏྟནྟཱིཏི ཨཱགཏསིཀྑཱཔདཉྩ. མོཧོ ཨམཱུལཀེན ཙཱཏི མོཧནཀེ པཱཙིཏྟིཡསིཀྑཱཔདཉྩ, ཨམཱུལཀེན སངྒྷཱདིསེསེན ཨནུདྡྷཾསནསིཀྑཱཔདཉྩ.

ཀུཀྐུཙྩཾ དྷམྨིཀཾ ཙཱིཝརཾ དཏྭཱཏི ཀུཀྐུཙྩཨུཔདཧནཉྩ, དྷམྨིཀཱནཾ ཀམྨཱནཾ ཚནྡཾ དཏྭཱ ཁཱིཡནཉྩ, ཙཱིཝརཾ དཏྭཱ ཁཱིཡནཉྩ. པརིཎཱམེཡྻ པུགྒལེཏི སངྒྷིཀཾ ལཱབྷཾ ¶ པུགྒལསྶ པརིཎཱམནསིཀྑཱཔདཾ. ཀིཾ ཏེ ཨཀཱལཾ ཨཙྪིནྡེཏི ‘‘ཀིཾ ཏེ ཨཡྻེ ཨེསོ པུརིསཔུགྒལོ ཀརིསྶཏཱི’’ཏི ཨཱགཏསིཀྑཱཔདཉྩ, ‘‘ཨཀཱལཙཱིཝརཾ ཀཱལཙཱིཝར’’ནྟི ཨདྷིཊྛཧིཏྭཱ བྷཱཛནསིཀྑཱཔདཉྩ, བྷིཀྑུནིཡཱ སདྡྷིཾ ཙཱིཝརཾ པརིཝཏྟེཏྭཱ ཨཙྪིནྡནསིཀྑཱཔདཉྩ. དུགྒཧཱི ནིརཡེན ¶ ཙཱཏི དུགྒཧིཏེན དུཔྤདྷཱརིཏེན པརཾ ཨུཛ྄ཛྷཱཔནསིཀྑཱཔདཉྩ, ནིརཡེན ཝཱ བྲཧྨཙརིཡེན ཝཱ ཨབྷིསཔནསིཀྑཱཔདཉྩ.

གཎཾ ཝིབྷངྒ དུབྦལནྟི ‘‘གཎསྶ ཙཱིཝརལཱབྷཾ ཨནྟརཱཡཾ ཀརེཡྻཱ’’ཏི ཙ ‘‘དྷམྨིཀཾ ཙཱིཝརཝིབྷངྒཾ པཊིབཱཧེཡྻཱ’’ཏི ཙ ‘‘དུབྦལཙཱིཝརཔཙྩཱསཱཡ ཙཱིཝརཀཱལསམཡཾ ཨཏིཀྐཱམེཡྻཱ’’ཏི ཙ ཝུཏྟསིཀྑཱཔདཱནི. ཀཐིནཱ ཕཱསུ པསྶཡནྟི ‘‘དྷམྨིཀཾ ཀཐིནུདྡྷཱརཾ པཊིབཱཧེཡྻ, བྷིཀྑུནིཡཱ སཉྩིཙྩ ཨཕཱསུཾ ཀརེཡྻ, བྷིཀྑུནིཡཱ ཨུཔསྶཡཾ དཏྭཱ ཀུཔིཏཱ ཨནཏྟམནཱ ནིཀྐཌྜྷེཡྻ ཝཱ’’ཏི ཝུཏྟསིཀྑཱཔདཱནི. ཨཀྐོསཙཎྜཱི མཙྪརཱིཏི ‘‘བྷིཀྑུཾ ཨཀྐོསེཡྻ ཝཱ པརིབྷཱསེཡྻ ཝཱ, ཙཎྜིཀཏཱ གཎཾ པརིབྷཱསེཡྻ, ཀུལེ མཙྪརིནཱི ཨསྶཱ’’ཏི ཝུཏྟསིཀྑཱཔདཱནི. གབྦྷིནིཉྩ པཱཡནྟིཡཱཏི ‘‘གབྦྷིནིཾ ཝུཊྛཱཔེཡྻ, པཱཡནྟིཾ ཝུཊྛཱཔེཡྻཱ’’ཏི ཝུཏྟསིཀྑཱཔདཱནི.

དྭེཝསྶཾ སིཀྑཱ སངྒྷེནཱཏི ‘‘དྭེ ཝསྶཱནི ཚསུ དྷམྨེསུ ཨསིཀྑིཏསིཀྑཾ སིཀྑམཱནཾ ཝུཊྛཱཔེཡྻ, སིཀྑིཏསིཀྑཾ སིཀྑམཱནཾ སངྒྷེན ཨསམྨཏཾ ཝུཊྛཱཔེཡྻཱ’’ཏི ཝུཏྟསིཀྑཱཔདཱནི. ཏཡོ ཙེཝ གིཧཱིགཏཱཏི ཨཱུནདྭཱདསཝསྶཾ གིཧིགཏཾ, པརིཔུཎྞདྭཱདསཝསྶཾ གིཧིགཏཾ ‘‘དྭེ ཝསྶཱནི ཚསུ དྷམྨེསུ ཨསིཀྑིཏསིཀྑཾ དྭེ ཝསྶཱནི སིཀྑིཏསིཀྑཾ སངྒྷེན ཨསམྨཏ’’ནྟི ཝུཏྟསིཀྑཱཔདཱནི. ཀུམཱརིབྷཱུཏཱ ཏིསྶོཏི ‘‘ཨཱུནཝཱིསཏིཝསྶཾ ཀུམཱརིབྷཱུཏ’’ནྟིཨཱདིནཱ ནཡེན ཝུཏྟཱ ¶ ཏིསྶོ. ཨཱུནདྭཱདསསམྨཏཱཏི ‘‘ཨཱུནདྭཱདསཝསྶཱ ཝུཊྛཱཔེཡྻ, པརིཔུཎྞདྭཱདསཝསྶཱ སངྒྷེན ཨསམྨཏཱ ཝུཊྛཱཔེཡྻཱ’’ཏི ཝུཏྟསིཀྑཱཔདདྭཡཾ.

ཨལཾ ཏཱཝ སོཀཱཝཱསནྟི ‘‘ཨལཾ ཏཱཝ ཏེ ཨཡྻེ ཝུཊྛཱཔིཏེནཱ’’ཏི ཙ, ‘‘ཙཎྜིཾ སོཀཱཝཱསཾ སིཀྑམཱནཾ ཝུཊྛཱཔེཡྻཱ’’ཏི ཙ ཝུཏྟསིཀྑཱཔདདྭཡཾ. ཚནྡཱ ཨནུཝསྶཱ ཙ དྭེཏི ‘‘པཱརིཝཱསིཀཚནྡདཱནེན སིཀྑམཱནཾ ཝུཊྛཱཔེཡྻ, ཨནུཝསྶཾ ཝུཊྛཱཔེཡྻ, ཨེཀཾ ཝསྶཾ དྭེ ཝུཊྛཱཔེཡྻཱ’’ཏི ཝུཏྟསིཀྑཱཔདཏྟཡཾ. སམུཊྛཱནཱ ཏིཀཱ ཀཏཱཏི ཏིཀསམུཊྛཱནཱ ཀཏཱ.

སཉྩརིཏྟསམུཊྛཱནཝཎྞནཱ

༢༦༠. སཉྩརཱི ¶ ཀུཊི ཝིཧཱརོཏི སཉྩརིཏྟཾ སཉྙཱཙིཀཱཡ ཀུཊིཀརཎཾ མཧལླཀཝིཧཱརཀརཎཉྩ. དྷོཝནཉྩ པཊིགྒཧོཏི ཨཉྙཱཏིཀཱཡ ¶ བྷིཀྑུནིཡཱ པུརཱཎཙཱིཝརདྷོཝཱཔནཉྩ ཙཱིཝརཔཊིགྒཧཎཉྩ. ཝིཉྙཏྟུཏྟརི ཨབྷིཧཊྛུནྟི ཨཉྙཱཏཀཾ གཧཔཏིཾ ཙཱིཝརཝིཉྙཱཔནཾ ཏཏུཏྟརིསཱདིཡནསིཀྑཱཔདཉྩ. ཨུབྷིནྣཾ དཱུཏཀེན ཙཱཏི ‘‘ཙཱིཝརཙེཏཱཔནྣཾ ཨུཔཀྑཊཾ ཧོཏཱི’’ཏི ཨཱགཏསིཀྑཱཔདདྭཡཉྩ དཱུཏེན ཙཱིཝརཙེཏཱཔནྣཔཧིཏསིཀྑཱཔདཉྩ.

ཀོསིཡཱ སུདྡྷདྭེབྷཱགཱ, ཚབྦསྶཱནི ནིསཱིདནནྟི ‘‘ཀོསིཡམིསྶཀཾ སནྠཏ’’ནྟིཨཱདཱིནི པཉྩ སིཀྑཱཔདཱནི. རིཉྩནྟི རཱུཔིཀཱ ཙེཝཱཏི ཝིབྷངྒེ ‘‘རིཉྩནྟི ཨུདྡེས’’ནྟི ཨཱགཏཾ ཨེལ༹ཀལོམདྷོཝཱཔནཾ རཱུཔིཡཔྤཊིགྒཧཎསིཀྑཱཔདཉྩ. ཨུབྷོ ནཱནཔྤཀཱརཀཱཏི རཱུཔིཡསཾཝོཧཱརཀཡཝིཀྐཡསིཀྑཱཔདདྭཡཾ.

ཨཱུནབནྡྷནཝསྶིཀཱཏི ཨཱུནཔཉྩབནྡྷནཔཏྟསིཀྑཱཔདཉྩ ཝསྶིཀསཱཊིཀསིཀྑཱཔདཉྩ. སུཏྟཾ ཝིཀཔྤནེན ཙཱཏི སུཏྟཾ ཝིཉྙཱཔེཏྭཱ ཙཱིཝརཝཱཡཱཔནཉྩ ཏནྟཝཱཡེ ཨུཔསངྐམིཏྭཱ ཙཱིཝརེ ཝིཀཔྤཱཔཛྫནཉྩ. དྭཱརདཱནསིབྦཱནི ཙཱཏི ཡཱཝ དྭཱརཀོསཱ ཨགྒལ༹ཊྛཔནཱཡ, ‘‘ཨཉྙཱཏིཀཱཡ བྷིཀྑུནིཡཱ ཙཱིཝརཾ དདེཡྻ, ཙཱིཝརཾ སིབྦེཡྻཱ’’ཏི ཝུཏྟསིཀྑཱཔདཏྟཡཾ. པཱུཝཔཙྩཡཛོཏི ཙཱཏི པཱུཝེཧི ཝཱ མནྠེཧི ཝཱ ཨབྷིཧཊྛུཾ པཝཱརཎཱསིཀྑཱཔདཾ ཙཱཏུམཱསཔཙྩཡཔྤཝཱརཎཱཛོཏིསམཱདཧནསིཀྑཱཔདཱནི ཙ.

རཏནཾ ¶ སཱུཙི མཉྩོ ཙ, ཏཱུལཾ ནིསཱིདནཀཎྜུ ཙ, ཝསྶིཀཱ ཙ སུགཏེནཱཏི རཏནསིཀྑཱཔདཉྩེཝ སཱུཙིགྷརསིཀྑཱཔདཱདཱིནི ཙ སཏྟ སིཀྑཱཔདཱནི. ཝིཉྙཏྟི ཨཉྙཾ ཙེཏཱཔནཱ, དྭེ སངྒྷིཀཱ མཧཱཛནིཀཱ, དྭེ པུགྒལལཧུཀཱ གརཱུཏི ‘‘ཡཱ པན བྷིཀྑུནཱི ཨཉྙཾ ཝིཉྙཱཔེཏྭཱ ཨཉྙཾ ཝིཉྙཱཔེཡྻཱ’’ཏིཨཱདཱིནི ནཝ སིཀྑཱཔདཱནི. དྭེ ཝིགྷཱསཱ སཱཊིཀཱ ཙཱཏི ‘‘ཨུཙྩཱརཾ ཝཱ པསྶཱཝཾ ཝཱ སངྐཱརཾ ཝཱ ཝིགྷཱསཾ ཝཱ ཏིརོཀུཊྚེ ཝཱ ཏིརོཔཱཀཱརེ ཝཱ ཚཌྜེཡྻ ཝཱ ཚཌྜཱཔེཡྻ ཝཱ, ཧརིཏེ ཚཌྜེཡྻ ཝཱ ཚཌྜཱཔེཡྻ ཝཱ’’ཏི ཨེཝཾ ཝུཏྟཱནི དྭེ ཝིགྷཱསསིཀྑཱཔདཱནི ཙ ཨུདཀསཱཊིཀཱསིཀྑཱཔདཉྩ. སམཎཙཱིཝརེན ཙཱཏི ‘‘སམཎཙཱིཝརཾ དདེཡྻཱ’’ཏི ཨིདམེཏཾ སནྡྷཱཡ ཝུཏྟཾ.

སམནུབྷཱསནཱསམུཊྛཱནཝཎྞནཱ

༢༦༡. བྷེདཱནུཝཏྟདུབྦཙདཱུསདུཊྛུལླདིཊྛི ¶ ཙཱཏི སངྒྷབྷེདཱནུཝཏྟཀདུབྦཙཀུལདཱུསཀདུཊྛུལླཔྤཊིཙྪཱདནདིཊྛིཨཔྤཊིནིསྶཛྫནསིཀྑཱཔདཱནི. ཚནྡཾ ཨུཛྫགྒྷིཀཱ དྭེ ཙཱཏི ¶ ཚནྡཾ ཨདཏྭཱ གམནསིཀྑཱཔདཾ ཨུཛྫགྒྷིཀཱཡ ཨནྟརགྷརེ གམནནིསཱིདནསིཀྑཱཔདདྭཡཉྩ. དྭེ ཙ སདྡཱཏི ‘‘ཨཔྤསདྡོ ཨནྟརགྷརེ གམིསྶཱམི, ནིསཱིདིསྶཱམཱི’’ཏི སིཀྑཱཔདདྭཡཉྩ. ན བྱཱཧརེཏི ‘‘ན སཀབལེ༹ན མུཁེན བྱཱཧརིསྶཱམཱི’’ཏི སིཀྑཱཔདཾ.

ཚམཱ ནཱིཙཱསནེ ཋཱནཾ, པཙྪཏོ ཨུཔྤཐེན ཙཱཏི ཚམཱཡཾ ནིསཱིདིཏྭཱ, ནཱིཙེ ཨཱསནེ ནིསཱིདིཏྭཱ; ཋིཏེན ནིསིནྣསྶ, པཙྪཏོ གཙྪནྟེན པུརཏོ གཙྪནྟསྶ, ཨུཔྤཐེན གཙྪནྟེན པཐེན གཙྪནྟསྶ དྷམྨདེསནཱསིཀྑཱཔདཱནི. ཝཛྫཱནུཝཏྟིགཧཎཱཏི ཝཛྫཔྤཊིཙྪཱདན, ཨུཀྑིཏྟཱནུཝཏྟཀ, ཧཏྠགྒཧཎཱདིསངྑཱཏཱནི ཏཱིཎི པཱརཱཛིཀཱནི. ཨོསཱརེ པཙྩཱཙིཀྑནཱཏི ‘‘ཨནཔལོཀེཏྭཱ ཀཱརཀསངྒྷཾ ཨནཉྙཱཡ གཎསྶ ཚནྡཾ ཨོསཱརེཡྻཱ’’ཏི ཙ ‘‘བུདྡྷཾ པཙྩཀྑཱམཱི’’ཏི ཙ ཝུཏྟསིཀྑཱཔདདྭཡཾ.

ཀིསྨིཾ སཾསཊྛཱ དྭེ ཝདྷཱིཏི ‘‘ཀིསྨིཉྩིདེཝ ཨདྷིཀརཎེ པཙྩཱཀཏཱ’’ཏི ཙ ‘‘བྷིཀྑུནིཡོ པནེཝ སཾསཊྛཱ ཝིཧརནྟཱི’’ཏི ཙ ‘‘ཡཱ པན བྷིཀྑུནཱི ཨེཝཾ ཝདེཡྻ སཾསཊྛཱཝ ཨཡྻེ ཏུམྷེ ཝིཧརཐཱ’’ཏི ཙ ‘‘ཨཏྟཱནཾ ཝདྷིཏྭཱ ཝདྷིཏྭཱ རོདེཡྻཱ’’ཏི ཙ ཝུཏྟསིཀྑཱཔདཱནི. ཝིསིབྦེ དུཀྑིཏཱཡ ཙཱཏི ‘‘བྷིཀྑུནིཡཱ ཙཱིཝརཾ ཝིསིབྦེཏྭཱ ཝཱ ཝིསིབྦཱཔེཏྭཱ ཝཱ’’ཏི ཙ ‘‘དུཀྑིཏཾ ¶ སཧཛཱིཝིནི’’ནྟི ཙ ཝུཏྟསིཀྑཱཔདདྭཡཾ. པུན སཾསཊྛཱ ན ཝཱུཔསམེཏི ‘‘སཾསཊྛཱ ཝིཧརེཡྻ གཧཔཏིནཱ ཝཱ གཧཔཏིཔུཏྟེན ཝཱ’’ཏི ཨེཝཾ པུན ཝུཏྟསཾསཊྛསིཀྑཱཔདཉྩ ‘‘ཨེཧཡྻེ, ཨིམཾ ཨདྷིཀརཎཾ ཝཱུཔསམེཧཱི’’ཏི ཝུཙྩམཱནཱ, ‘‘སཱདྷཱུ’’ཏི པཊིསྶུཎིཏྭཱ ‘‘སཱ པཙྪཱ ཨནནྟརཱཡིཀིནཱི ནེཝ ཝཱུཔསམྨེཡྻཱ’’ཏི ཝུཏྟསིཀྑཱཔདཉྩ. ཨཱརཱམཉྩ པཝཱརཎཱཏི ‘‘ཛཱནཾ སབྷིཀྑུཀཾ ཨཱརཱམཾ ཨནཱཔུཙྪཱ པཝིསེཡྻཱ’’ཏི ཙ ‘‘ཨུབྷཏོསངྒྷེ ཏཱིཧི ཋཱནེཧི ན པཝཱརེཡྻཱ’’ཏི ཙ ཝུཏྟསིཀྑཱཔདདྭཡཾ.

ཨནྭདྡྷཾ སཧཛཱིཝིནིཾ དྭེཏི ‘‘ཨནྭདྡྷམཱསཾ བྷིཀྑུནིཡཱ བྷིཀྑུསངྒྷཏོ དྭེ དྷམྨཱ པཙྩཱསཱིསིཏབྦཱ’’ཏི ཝུཏྟསིཀྑཱཔདཉྩ, ‘‘སཧཛཱིཝིནིཾ ཝུཊྛཱཔེཏྭཱ དྭེ ཝསྶཱནི ནེཝ ཨནུགྒཎྷེཡྻ, སཧཛཱིཝིནིཾ ཝུཊྛཱཔེཏྭཱ ནེཝ ཝཱུཔཀཱསེཡྻཱ’’ཏི ཝུཏྟསིཀྑཱཔདདྭཡཉྩ. ཙཱིཝརཾ ཨནུབནྡྷནཱཏི ‘‘སཙེ མེ ཏྭཾ, ཨཡྻེ, ཙཱིཝརཾ དསྶསི, ཨེཝཱཧཾ ¶ ཏཾ ཝུཊྛཱཔེསྶཱམཱི’’ཏི ཙ ‘‘སཙེ མཾ ཏྭཾ, ཨཡྻེ, དྭེ ཝསྶཱནི ཨནུབནྡྷིསྶསི, ཨེཝཱཧཾ ཏཾ ཝུཊྛཱཔེསྶཱམཱི’’ཏི ཙ ཝུཏྟསིཀྑཱཔདདྭཡཾ.

ཀཐིནསམུཊྛཱནཝཎྞནཱ

༢༦༢. ཨུབྦྷཏཾ ¶ ཀཐིནཾ ཏཱིཎཱིཏི ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ’’ཏི ཝུཏྟཱནི ཨཱདིཏོཝ ཏཱིཎི སིཀྑཱཔདཱནི. པཋམཾ པཏྟབྷེསཛྫནྟི ‘‘དསཱཧཔརམཾ ཨཏིརེཀཔཏྟོ’’ཏི ཝུཏྟཾ པཋམཔཏྟསིཀྑཱཔདཉྩ ‘‘པཊིསཱཡནཱིཡཱནི བྷེསཛྫཱནཱི’’ཏི ཝུཏྟསིཀྑཱཔདཉྩ. ཨཙྩེཀཉྩཱཔི སཱསངྐནྟི ཨཙྩེཀཙཱིཝརསིཀྑཱཔདཉྩ ཏདནནྟརམེཝ སཱསངྐསིཀྑཱཔདཉྩ. པཀྐམནྟེན ཝཱ དུཝེཏི ‘‘ཏཾ པཀྐམནྟོ ནེཝ ཨུདྡྷརེཡྻཱ’’ཏི བྷཱུཏགཱམཝགྒེ ཝུཏྟསིཀྑཱཔདདྭཡཾ.

ཨུཔསྶཡཾ པརམྤརཱཏི ‘‘བྷིཀྑུནུཔསྶཡཾ གནྟྭཱ བྷིཀྑུནིཡོ ཨོཝདེཡྻཱ’’ཏི ཙ ‘‘པརམྤརབྷོཛནེ པཱཙིཏྟིཡ’’ནྟི ཙ ཝུཏྟསིཀྑཱཔདདྭཡཾ. ཨནཏིརིཏྟཾ ནིམནྟནཱཏི ‘‘ཨནཏིརིཏྟཾ ཁཱདནཱིཡཾ ཝཱ བྷོཛནཱིཡཾ ཝཱ’’ཏི ཙ ‘‘ནིམནྟིཏོ སབྷཏྟོ སམཱནོ’’ཏི ཙ ཝུཏྟསིཀྑཱཔདདྭཡཾ. ཝིཀཔྤཾ རཉྙོ ཝིཀཱལེཏི ‘‘སཱམཾ ཙཱིཝརཾ ཝིཀཔྤེཏྭཱ’’ཏི ཙ ‘‘རཉྙོ ཁཏྟིཡསྶཱ’’ཏི ཙ ‘‘ཝིཀཱལེ གཱམཾ པཝིསེཡྻཱ’’ཏི ཙ ཝུཏྟསིཀྑཱཔདཏྟཡཾ. ཝོསཱསཱརཉྙཀེན ཙཱཏི ¶ ‘‘ཝོསཱསམཱནརཱུཔཱ ཋིཏཱ’’ཏི ཙ ‘‘ཏཐཱརཱུཔེསུ ཨཱརཉྙཀེསུ སེནཱསནེསུ པུབྦེ ཨཔྤཊིསཾཝིདིཏ’’ནྟི ཙ ཝུཏྟསིཀྑཱཔདདྭཡཾ.

ཨུསྶཡཱ སནྣིཙཡཉྩཱཏི ‘‘ཨུསྶཡཝཱདིཀཱ’’ཏི ཙ ‘‘པཏྟསནྣིཙཡཾ ཀརེཡྻཱ’’ཏི ཙ ཝུཏྟསིཀྑཱཔདདྭཡཾ. པུརེ པཙྪཱ ཝིཀཱལེ ཙཱཏི ‘‘ཡཱ པན བྷིཀྑུནཱི པུརེབྷཏྟཾ ཀུལཱནི ཨུཔསངྐམིཏྭཱ’’ཏི ཙ, ‘‘པཙྪཱབྷཏྟཾ ཀུལཱནི ཨུཔསངྐམིཏྭཱ’’ཏི ཙ, ‘‘ཝིཀཱལེ ཀུལཱནི ཨུཔསངྐམིཏྭཱ’’ཏི ཙ ཝུཏྟསིཀྑཱཔདཏྟཡཾ. པཉྩཱཧིཀཱ སངྐམནཱིཏི ‘‘པཉྩཱཧིཀཱ སངྒྷཱཊིཙཱརཾ ཨཏིཀྐམེཡྻཱ’’ཏི ཙ ‘‘ཙཱིཝརསངྐམནཱིཡཾ དྷཱརེཡྻཱ’’ཏི ཙ ཝུཏྟསིཀྑཱཔདདྭཡཾ. དྭེཔི ཨཱཝསཐེན ཙཱཏི ‘‘ཨཱཝསཐཙཱིཝརཾ ཨནིསྶཛྫིཏྭཱ པརིབྷུཉྫེཡྻ, ཨཱཝསཐཾ ཨནིསྶཛྫིཏྭཱ ཙཱརིཀཾ པཀྐམེཡྻཱ’’ཏི ཙ ཨེཝཾ ཨཱཝསཐེན སདྡྷིཾ ཝུཏྟསིཀྑཱཔདཱནི ཙ དྭེ.

པསཱཁེ ཨཱསནེ ཙེཝཱཏི ‘‘པསཱཁེ ཛཱཏཾ གཎྜཾ ཝཱ’’ཏི ཙ ‘‘བྷིཀྑུསྶ པུརཏོ ཨནཱཔུཙྪཱ ཨཱསནེ ནིསཱིདེཡྻཱ’’ཏི ཙ ཝུཏྟསིཀྑཱཔདདྭཡཾ.

ཨེལ༹ཀལོམསམུཊྛཱནཝཎྞནཱ

༢༦༣. ཨེལ༹ཀལོམཱ ¶ དྭེ སེཡྻཱཏི ཨེལ༹ཀལོམསིཀྑཱཔདཉྩེཝ དྭེ ཙ སཧསེཡྻསིཀྑཱཔདཱནི. ཨཱཧཙྩ པིཎྜབྷོཛནནྟི ཨཱཧཙྩཔཱདཀསིཀྑཱཔདཉྩ ཨཱཝསཐཔིཎྜབྷོཛནསིཀྑཱཔདཉྩ. གཎཝིཀཱལསནྣིདྷཱིཏི གཎབྷོཛནཝིཀཱལབྷོཛནསནྣིདྷིཀཱརཀསིཀྑཱཔདཏྟཡཾ ¶ . དནྟཔོནེན ཙེལཀཱཏི དནྟཔོནསིཀྑཱཔདཉྩ ཨཙེལཀསིཀྑཱཔདཉྩ. ཨུཡྻུཏྟཾ སེནཾ ཨུཡྻོདྷཱིཏི ‘‘ཨུཡྻུཏྟཾ སེནཾ དསྶནཱཡ གཙྪེཡྻ, སེནཱཡ ཝསེཡྻ, ཨུཡྻོདྷིཀཾ ཝཱ…པེ… ཨནཱིཀདསྶནཾ ཝཱ གཙྪེཡྻཱ’’ཏི ཝུཏྟསིཀྑཱཔདཏྟཡཾ. སུརཱ ཨོརེན ནྷཱཡནཱཏི སུརཱཔཱནསིཀྑཱཔདཉྩ ཨོརེནདྡྷམཱསནཧཱནསིཀྑཱཔདཉྩ. དུབྦཎྞེ དྭེ དེསནིཀཱཏི ‘‘ཏིཎྞཾ དུབྦཎྞཀརཎཱན’’ནྟི ཝུཏྟསིཀྑཱཔདཉྩ ཝུཏྟཱཝསེསཔཱཊིདེསནཱིཡདྭཡཉྩ. ལསུཎུཔཏིཊྛེ ནཙྩནཱཏི ལསུཎསིཀྑཱཔདཾ, ‘‘བྷིཀྑུསྶ བྷུཉྫནྟསྶ པཱནཱིཡེན ཝཱ ཝིདྷཱུཔནེན ཝཱ ཨུཔཏིཊྛེཡྻཱ’’ཏི ཝུཏྟསིཀྑཱཔདཾ, ‘‘ནཙྩཾ ཝཱ གཱིཏཾ ཝཱ ཝཱདིཏཾ ཝཱ དསྶནཱཡ གཙྪེཡྻཱ’’ཏི ཝུཏྟསིཀྑཱཔདཉྩ. ཨིཏོ པརཾ པཱལི༹ཾ ཝིརཛ྄ཛྷིཏྭཱ ལིཁནྟི. ཡཐཱ པན ཨཏྠཾ ཝཎྞཡིསྶཱམ; ཨེཝམེཏྠ ཨནུཀྐམོ ཝེདིཏབྦོ.

ནྷཱནམཏྠརཎཾ ¶ སེཡྻཱཏི ‘‘ནགྒཱ ནཧཱཡེཡྻ, ཨེཀཏྠརཎཔཱཝུརཎཱ ཏུཝཊྚེཡྻུཾ, ཨེཀམཉྩེ ཏུཝཊྚེཡྻུ’’ནྟི ཝུཏྟསིཀྑཱཔདཏྟཡཾ. ཨནྟོརཊྛེ ཏཐཱ བཧཱིཏི ‘‘ཨནྟོརཊྛེ སཱསངྐསམྨཏེ, ཏིརོརཊྛེ སཱསངྐསམྨཏེ’’ཏི ཝུཏྟསིཀྑཱཔདདྭཡཾ. ཨནྟོཝསྶཾ ཙིཏྟཱགཱརནྟི ‘‘ཨནྟོཝསྶཾ ཙཱརིཀཾ པཀྐམེཡྻ, རཱཛཱགཱརཾ ཝཱ ཙིཏྟཱགཱརཾ ཝཱ…པེ… པོཀྑརཎིཾ ཝཱ དསྶནཱཡ གཙྪེཡྻཱ’’ཏི ཙ ཝུཏྟསིཀྑཱཔདདྭཡཾ. ཨཱསནྡིཾ སུཏྟཀནྟནཱཏི ‘‘ཨཱསནྡིཾ ཝཱ པལླངྐཾ ཝཱ པརིབྷུཉྫེཡྻ, སུཏྟཾ ཀནྟེཡྻཱ’’ཏི ཝུཏྟསིཀྑཱཔདདྭཡཾ.

ཝེཡྻཱཝཙྩཾ སཧཏྠཱ ཙཱཏི ‘‘གིཧིཝེཡྻཱཝཙྩཾ ཀརེཡྻ, ཨགཱརིཀསྶ ཝཱ པརིབྦཱཛཀསྶ ཝཱ པརིབྦཱཛིཀཱཡ ཝཱ སཧཏྠཱ ཁཱདནཱིཡཾ ཝཱ བྷོཛནཱིཡཾ ཝཱ དདེཡྻཱ’’ཏི ཝུཏྟསིཀྑཱཔདདྭཡཾ. ཨབྷིཀྑུཀཱཝཱསེན ཙཱཏི ‘‘ཨབྷིཀྑུཀེ ཨཱཝཱསེ ཝསྶཾ ཝསེཡྻཱ’’ཏི ཨིདམེཏཾ སནྡྷཱཡ ཝུཏྟཾ. ཚཏྟཾ ཡཱནཉྩ སངྒྷཱཎིནྟི ‘‘ཚཏྟུཔཱཧནཾ དྷཱརེཡྻ, ཡཱནེན ཡཱཡེཡྻ, སངྒྷཱཎིཾ དྷཱརེཡྻཱ’’ཏི ཝུཏྟསིཀྑཱཔདཏྟཡཾ. ཨལངྐཱརགནྡྷཝཱསིཏནྟི ‘‘ཨིཏྠཱལངྐཱརཾ དྷཱརེཡྻ, གནྡྷཙུཎྞཀེན ནཧཱཡེཡྻ, ཝཱསིཏཀེན པིཉྙཱཀེན ནཧཱཡེཡྻཱ’’ཏི ཝུཏྟསིཀྑཱཔདཏྟཡཾ. བྷིཀྑུནཱིཏིཨཱདིནཱ ‘‘བྷིཀྑུནིཡཱ ཨུམྨདྡཱཔེཡྻཱ’’ཏིཨཱདཱིནི ཙཏྟཱརི སིཀྑཱཔདཱནི ཝུཏྟཱནི. ཨསངྐཙྩིཀཱ ཨཱཔཏྟཱིཏི ‘‘ཨསངྐཙྩིཀཱ ¶ གཱམཾ པཝིསེཡྻ པཱཙིཏྟིཡ’’ནྟི ཨེཝཾ ཝུཏྟཨཱཔཏྟི ཙ. ཙཏྟཱརཱིསཱ ཙཏུཏྟརཱིཏི ¶ ཨེཏཱནི སབྦཱནིཔི ཙཏུཙཏྟཱལཱིས སིཀྑཱཔདཱནི ཝུཏྟཱནི.

ཀཱཡེན ན ཝཱཙཱཙིཏྟེན, ཀཱཡཙིཏྟེན ན ཝཱཙཏོཏི ཀཱཡེན ཙེཝ ཀཱཡཙིཏྟེན ཙ སམུཊྛཧནྟི; ན ཝཱཙཱཙིཏྟེན ན ཝཱཙཏོཏི ཨཏྠོ. དྭིསམུཊྛཱནིཀཱ སབྦེ, སམཱ ཨེལ༹ཀལོམིཀཱཏི ཨིདཾ ཨུཏྟཱནཏྠམེཝ.

པདསོདྷམྨསམུཊྛཱནཝཎྞནཱ

༢༦༤. པདཉྙཏྲ ཨསམྨཏཱཏི ‘‘པདསོ དྷམྨཾ, མཱཏུགཱམསྶ ཨུཏྟརིཚཔྤཉྩཝཱཙཱཧི དྷམྨཾ དེསེཡྻ, ཨཉྙཏྲ ཝིཉྙུནཱ པུརིསཝིགྒཧེན, ཨསམྨཏོ བྷིཀྑུནིཡོ ཨོཝདེཡྻཱ’’ཏི ཝུཏྟསིཀྑཱཔདཏྟཡཾ. ཏཐཱ ཨཏྠངྒཏེན ཙཱཏི ‘‘ཨཏྠངྒཏེ སཱུརིཡེ ཨོཝདེཡྻཱ’’ཏི ཨིདམེཏཾ སནྡྷཱཡ ཝུཏྟཾ. ཏིརཙྪཱནཝིཛྫཱ དྭེཏི ‘‘ཏིརཙྪཱནཝིཛྫཾ པརིཡཱཔུཎེཡྻ, ཝཱཙེཡྻཱ’’ཏི ཨེཝཾ ཝུཏྟསིཀྑཱཔདདྭཡཾ ¶ . ཨནོཀཱསོ ཙ པུཙྪནཱཏི ‘‘ཨནོཀཱསཀཏཾ བྷིཀྑུཾ པཉྷཾ པུཙྪེཡྻཱ’’ཏི ཨིདམེཏཾ སནྡྷཱཡ ཝུཏྟཾ.

ཨདྡྷཱནསམུཊྛཱནཝཎྞནཱ

༢༦༥. ཨདྡྷཱནནཱཝཾ པཎཱིཏནྟི ‘‘བྷིཀྑུནིཡཱ སདྡྷིཾ སཾཝིདྷཱཡ ཨེཀདྡྷཱནམགྒཾ པཊིཔཛྫེཡྻ, ཨེཀཾ ནཱཝཾ ཨབྷིརུཧེཡྻ, པཎཱིཏབྷོཛནཱནི ཨགིལཱནོ ཨཏྟནོ ཨཏྠཱཡ ཝིཉྙཱཔེཏྭཱ བྷུཉྫེཡྻཱ’’ཏི ཝུཏྟསིཀྑཱཔདཏྟཡཾ. མཱཏུགཱམེན སཾཧརེཏི མཱཏུགཱམེན སདྡྷིཾ སཾཝིདྷཱཡ གམནཉྩ ‘‘སམྦཱདྷེ ལོམཾ སཾཧརཱཔེཡྻཱ’’ཏི ཝུཏྟསིཀྑཱཔདཉྩ. དྷཉྙཾ ནིམནྟིཏཱ ཙེཝཱཏི ‘‘དྷཉྙཾ ཝིཉྙཱཔེཏྭཱ ཝཱ’’ཏི ཙ ‘‘ནིམནྟིཏཱ ཝཱ པཝཱརིཏཱ ཝཱ ཁཱདནཱིཡཾ ཝཱ བྷོཛནཱིཡཾ ཝཱ ཁཱདེཡྻ ཝཱ བྷུཉྫེཡྻ ཝཱ’’ཏི ཝུཏྟསིཀྑཱཔདཉྩ. ཨཊྛ ཙཱཏི བྷིཀྑུནཱིནཾ ཝུཏྟཱ ཨཊྛ པཱཊིདེསནཱིཡཱ ཝཱ.

ཐེཡྻསཏྠསམུཊྛཱནཝཎྞནཱ

༢༦༦. ཐེཡྻསཏྠཾ ཨུཔསྶུཏཱིཏི ཐེཡྻསཏྠེན སདྡྷིཾ སཾཝིདྷཱཡ ཨེཀདྡྷཱནམགྒགམནཉྩ ཨུཔསྶུཏིཏིཊྛནཉྩ. སཱུཔཝིཉྙཱཔནེན ཙཱཏི ཨིདཾ སཱུཔོདནཝིཉྙཏྟིཾ སནྡྷཱཡ ཝུཏྟཾ. རཏྟིཚནྣཉྩ ཨོཀཱསནྟི ‘‘རཏྟནྡྷཀཱརེ ཨཔྤདཱིཔེ, པཊིཙྪནྣེ ¶ ཨོཀཱསེ, ཨཛ྄ཛྷོཀཱསེ པུརིསེན སདྡྷི’’ནྟི ཨེཝཾ ཝུཏྟསིཀྑཱཔདཏྟཡཾ. བྱཱུཧེན སཏྟམཱཏི ཨིདཾ ཏདནནྟརམེཝ ‘‘རཐིཀཱཡ ཝཱ བྱཱུཧེ ཝཱ སིངྒྷཱཊཀེ ཝཱ པུརིསེན སདྡྷི’’ནྟི ཨཱགཏསིཀྑཱཔདཾ སནྡྷཱཡ ཝུཏྟཾ.

དྷམྨདེསནཱསམུཊྛཱནཝཎྞནཱ

༢༦༧. དྷམྨདེསནཱསམུཊྛཱནཱནི ཨེཀཱདས ¶ ཨུཏྟཱནཱནེཝ. ཨེཝཾ ཏཱཝ སམྦྷིནྣསམུཊྛཱནཾ ཝེདིཏབྦཾ. ནིཡཏསམུཊྛཱནཾ པན ཏིཝིདྷཾ, ཏཾ ཨེཀེཀསྶེཝ སིཀྑཱཔདསྶ ཧོཏི, ཏཾ ཝིསུཾཡེཝ དསྶེཏུཾ ‘‘བྷཱུཏཾ ཀཱཡེན ཛཱཡཏཱི’’ཏིཨཱདི ཝུཏྟཾ, ཏཾ ཨུཏྟཱནམེཝ. ནེཏྟིདྷམྨཱནུལོམིཀནྟི ཝིནཡཔཱལི༹དྷམྨསྶ ཨནུལོམནྟི.

སམུཊྛཱནསཱིསཝཎྞནཱ ནིཊྛིཏཱ.

ཨནྟརཔེཡྻཱལཾ

ཀཏིཔུཙྪཱཝཱརཝཎྞནཱ

༢༧༡. ཨིདཱནི ¶ ¶ ཨཱཔཏྟིཨཱདིཀོཊྛཱསེསུ ཀོསལླཛནནཏྠཾ ‘‘ཀཏི ཨཱཔཏྟིཡོ’’ཏིཨཱདིནཱ ནཡེན མཱཏིཀཾ ཋཔེཏྭཱ ནིདྡེསཔྤཊིནིདྡེསཝསེན ཝིབྷངྒོ ཝུཏྟོ.

ཏཏྠ ཀཏི ཨཱཔཏྟིཡོཏི མཱཏིཀཱཡ ཙ ཝིབྷངྒེ ཙ ཨཱགཏཱཔཏྟིཔུཙྪཱ. ཨེས ནཡོ དུཏིཡཔདེཔི. ཀེཝལཉྷེཏྠ ཨཱཔཏྟིཡོ ཨེཝ རཱསིཝསེན ཁནྡྷཱཏི ཝུཏྟཱ. ཝིནཱིཏཝཏྠཱུནཱིཏི ཏཱསཾ ཨཱཔཏྟཱིནཾ ཝིནཡཔུཙྪཱ; ‘‘ཝིནཱིཏཾ ཝིནཡོ ཝཱུཔསམོ’’ཏི ཨིདཉྷི ཨཏྠཏོ ཨེཀཾ, ཝིནཱིཏཱནིཡེཝ ཝིནཱིཏཝཏྠཱུནཱིཏི ཨཡམེཏྠ པདཏྠོ. ཨིདཱནི ཡེསུ སཏི ཨཱཔཏྟིཡོ ཧོནྟི, ཨསཏི ན ཧོནྟི, ཏེ དསྶེཏུཾ ‘‘ཀཏི ཨགཱརཝཱ’’ཏི པུཙྪཱདྭཡཾ. ཝིནཱིཏཝཏྠཱུནཱིཏི ཨཡཾ པན ཏེསཾ ཨགཱརཝཱནཾ ཝིནཡཔུཙྪཱ. ཡསྨཱ པན ཏཱ ཨཱཔཏྟིཡོ ཝིཔཏྟིཾ ཨཱཔཏྟཱ ནཱམ ནཏྠི, ཏསྨཱ ‘‘ཀཏི ཝིཔཏྟིཡོ’’ཏི ཨཡཾ ཨཱཔཏྟཱིནཾ ཝིཔཏྟིབྷཱཝཔུཙྪཱ. ཀཏི ཨཱཔཏྟིསམུཊྛཱནཱནཱིཏི ཏཱསཾཡེཝ ཨཱཔཏྟཱིནཾ སམུཊྛཱནཔུཙྪཱ. ཝིཝཱདམཱུལཱནི ཨནུཝཱདམཱུལཱནཱིཏི ཨིམཱ ‘‘ཝིཝཱདཱདྷིཀརཎཾ ཨནུཝཱདཱདྷིཀརཎ’’ནྟི ཨཱགཏཱནཾ ཝིཝཱདཱནུཝཱདཱནཾ མཱུལཔུཙྪཱ. སཱརཎཱིཡཱ དྷམྨཱཏི ཝིཝཱདཱནུཝཱདམཱུལཱནཾ ཨབྷཱཝཀརདྷམྨཔུཙྪཱ. བྷེདཀརཝཏྠཱུནཱིཏི ཨཡཾ ‘‘བྷེདནསཾཝཏྟནིཀཾ ཝཱ ཨདྷིཀརཎ’’ནྟིཨཱདཱིསུ ཝུཏྟབྷེདཀརཎཔུཙྪཱ. ཨདྷིཀརཎཱནཱིཏི བྷེདཀརཝཏྠཱུསུ སཏི ཨུཔྤཛྫནདྷམྨཔུཙྪཱ. སམཐཱཏི ཏེསཾཡེཝ ཝཱུཔསམནདྷམྨཔུཙྪཱ. པཉྩ ཨཱཔཏྟིཡོཏི མཱཏིཀཱཡ ཨཱགཏཝསེན ཝུཏྟཱ. སཏྟཱཏི ཝིབྷངྒེ ཨཱགཏཝསེན.

ཨཱརཀཱ ཨེཏེཧི རམཏཱིཏི ཨཱརཏི; བྷུསཱ ཝཱ རཏི ཨཱརཏི. ཝིནཱ ཨེཏེཧི རམཏཱིཏི ཝིརཏི ¶ . པཙྩེཀཾ པཙྩེཀཾ ཝིརམཏཱིཏི པཊིཝིརཏི. ཝེརཾ མཎཏི ཝིནཱསེཏཱིཏི ཝེརམཎཱི. ན ཨེཏཱཡ ཨེཏེ ཨཱཔཏྟིཀྑནྡྷཱ ¶ ཀརཱིཡནྟཱིཏི ཨཀིརིཡཱ. ཡཾ ཨེཏཱཡ ཨསཏི ཨཱཔཏྟིཀྑནྡྷཀརཎཾ ཨུཔྤཛྫེཡྻ, ཏསྶ པཊིཔཀྑཏོ ཨཀརཎཾ. ཨཱཔཏྟིཀྑནྡྷཨཛ྄ཛྷཱཔཏྟིཡཱ པཊིཔཀྑཏོ ཨནཛ྄ཛྷཱཔཏྟི. ཝེལནཏོ ཝེལཱ; ཙལཡནཏོ ཝིནཱསནཏོཏི ཨཏྠོ ¶ . ནིཡྻཱནཾ སིནོཏི བནྡྷཏི ནིཝཱརེཏཱིཏི སེཏུ. ཨཱཔཏྟིཀྑནྡྷཱནམེཏཾ ཨདྷིཝཙནཾ. སོ སེཏུ ཨེཏཱཡ པཉྙཏྟིཡཱ ཧཉྙཏཱིཏི སེཏུགྷཱཏོ. སེསཝིནཱིཏཝཏྠུནིདྡེསེསུཔི ཨེསེཝ ནཡོ.

བུདྡྷེ ཨགཱརཝཱདཱིསུ ཡོ བུདྡྷེ དྷརམཱནེ ཨུཔཊྛཱནཾ ན གཙྪཏི, པརིནིབྦུཏེ ཙེཏིཡཊྛཱནཾ བོདྷིཊྛཱནཾ ན གཙྪཏི, ཙེཏིཡཾ ཝཱ བོདྷིཾ ཝཱ ན ཝནྡཏི, ཙེཏིཡངྒཎེ སཚཏྟོ སཨུཔཱཧནོ ཙརཏི, ནཏྠེཏསྶ བུདྡྷེ གཱརཝོཏི ཝེདིཏབྦོ. ཡོ པན སཀྐོནྟོཡེཝ དྷམྨསྶཝནཾ ན གཙྪཏི, སརབྷཉྙཾ ན བྷཎཏི, དྷམྨཀཐཾ ན ཀཐེཏི, དྷམྨསྶཝནགྒཾ བྷིནྡིཏྭཱ གཙྪཏི, ཝིཀྑིཏྟོ ཝཱ ཨནཱདརོ ཝཱ ནིསཱིདཏི, ནཏྠེཏསྶ དྷམྨེ གཱརཝོ. ཡོ ཐེརནཝམཛ྄ཛྷིམེསུ ཙིཏྟཱིཀཱརཾ ན པཙྩུཔཊྛཱཔེཏི, ཨུཔོསཐཱགཱརཝིཏཀྐམཱལ༹ཀཱདཱིསུ ཀཱཡཔྤཱགབྦྷིཡཾ དསྶེཏི, ཡཐཱཝུཌྜྷཾ ན ཝནྡཏི, ནཏྠེཏསྶ སངྒྷེ གཱརཝོ. ཏིསྶོ སིཀྑཱ སམཱདཱཡ ཨསིཀྑམཱནོཡེཝ པན སིཀྑཱཡ ཨགཱརཝོཏི ཝེདིཏབྦོ. པམཱདེ ཙ སཏིཝིཔྤཝཱསེ ཏིཊྛམཱནོཡེཝ ཨཔྤམཱདལཀྑཎཾ ཨབྲཱུཧཡམཱནོ ཨཔྤམཱདེ ཨགཱརཝོཏི ཝེདིཏབྦོ. ཏཐཱ ཨཱམིསཔྤཊིསནྠཱརཾ དྷམྨཔྤཊིསནྠཱརནྟི ཨིམཾ དུཝིདྷཾ པཊིསནྠཱརཾ ཨཀརོནྟོཡེཝ པཊིསནྠཱརེ ཨགཱརཝོཏི ཝེདིཏབྦོ. གཱརཝནིདྡེསེ ཝུཏྟཝིཔརིཡཱཡེན ཨཏྠོ ཝེདིཏབྦོ.

༢༧༢. ཝིཝཱདམཱུལནིདྡེསེ ‘‘སཏྠརིཔི ཨགཱརཝོ’’ཏིཨཱདཱིནཾ བུདྡྷེ ཨགཱརཝཱདཱིསུ ཝུཏྟནཡེནེཝ ཨཏྠོ ཝེདིཏབྦོ. ཨཔྤཏིསྶོཏི ཨནཱིཙཝུཏྟི; ན སཏྠཱརཾ ཛེཊྛཀཾ ཀཏྭཱ ཝིཧརཏི. ཨཛ྄ཛྷཏྟཾ ཝཱཏི ཨཏྟནོ སནྟཱནེ ཝཱ ཨཏྟནོ པཀྑེ ཝཱ; སཀཱཡ པརིསཱཡཱཏི ཨཏྠོ. བཧིདྡྷཱ ཝཱཏི པརསནྟཱནེ ཝཱ པརཔཀྑེ ཝཱ. ཏཏྲ ཏུམྷེཏི ཏསྨིཾ ཨཛ྄ཛྷཏྟབཧིདྡྷཱབྷེདེ སཔརསནྟཱནེ ཝཱ སཔརཔརིསཱཡ ཝཱ. པཧཱནཱཡ ཝཱཡམེཡྻཱཐཱཏི མེཏྟཱབྷཱཝནཱདཱིཧི ནཡེཧི པཧཱནཏྠཾ ཝཱཡམེཡྻཱཐ; མེཏྟཱབྷཱཝནཱདིནཡེན ཧི ཏཾ ཨཛ྄ཛྷཏྟམྤི བཧིདྡྷཱཔི པཧཱིཡཏི. ཨནཝསྶཝཱཡཱཏི ཨཔྤཝཏྟིབྷཱཝཱཡ.

སནྡིཊྛིཔརཱམཱསཱིཏི ¶ སཀམེཝ དིཊྛིཾ པརཱམསཏི; ཡཾ ཨཏྟནཱ དིཊྛིགཏཾ གཧིཏཾ, ཨིདམེཝ སཙྩནྟི གཎྷཱཏི ¶ . ཨཱདྷཱནགྒཱཧཱིཏི དལ༹ྷགྒཱཧཱི.

༢༧༣. ཨནུཝཱདམཱུལནིདྡེསོ ¶ ཀིཉྩཱཔི ཝིཝཱདམཱུལནིདྡེསེནེཝ སམཱནོ, ཨཐ ཁོ ཨཊྛཱརས བྷེདཀརཝཏྠཱུནི ནིསྶཱཡ ཝིཝདནྟཱནཾ ཀོདྷཱུཔནཱཧཱདཡོ ཝིཝཱདམཱུལཱནི. ཏཐཱ ཝིཝདནྟཱ པན སཱིལཝིཔཏྟིཨཱདཱིསུ ཨཉྙཏརཝིཔཏྟིཾ ཨཱཔཛྫིཏྭཱ ‘‘ཨསུཀོ བྷིཀྑུ ཨསུཀཾ ནཱམ ཝིཔཏྟིཾ ཨཱཔནྣོ’’ཏི ཝཱ, ‘‘པཱརཱཛིཀཾ ཨཱཔནྣོསི, སངྒྷཱདིསེསཾ ཨཱཔནྣོསཱི’’ཏི ཝཱ ཨནུཝདནྟི. ཨེཝཾ ཨནུཝདནྟཱནཾ ཀོདྷཱུཔནཱཧཱདཡོ ཨནུཝཱདམཱུལཱནཱིཏི ཨཡམེཏྠ ཝིསེསོ.

༢༧༤. སཱརཎཱིཡདྷམྨནིདྡེསེ མེཏྟཙིཏྟེན ཀཏཾ ཀཱཡཀམྨཾ མེཏྟཾ ཀཱཡཀམྨཾ ནཱམ. ཨཱཝི ཙེཝ རཧོ ཙཱཏི སམྨུཁཱ ཙ པརམྨུཁཱ ཙ. ཏཏྠ ནཝཀཱནཾ ཙཱིཝརཀམྨཱདཱིསུ སཧཱཡབྷཱཝགམནཾ སམྨུཁཱ མེཏྟཾ ཀཱཡཀམྨཾ ནཱམ. ཐེརཱནཾ པན པཱདདྷོཝནབཱིཛནཝཱཏདཱནཱདིབྷེདམྤི སབྦཾ སཱམཱིཙིཀམྨཾ སམྨུཁཱ མེཏྟཾ ཀཱཡཀམྨཾ ནཱམ. ཨུབྷཡེཧིཔི དུནྣིཀྑིཏྟཱནཾ དཱརུབྷཎྜཱདཱིནཾ ཏེསུ ཨཝམཉྙཾ ཨཀཏྭཱ ཨཏྟནཱ དུནྣིཀྑིཏྟཱནཾ ཝིཡ པཊིསཱམནཾ པརམྨུཁཱ མེཏྟཾ ཀཱཡཀམྨཾ ནཱམ. ཨཡམྤི དྷམྨོ སཱརཎཱིཡོཏི ཨཡཾ མེཏྟཱཀཱཡཀམྨསངྑཱཏོ དྷམྨོ སརིཏབྦོ སཏིཛནཀོ; ཡོ ནཾ ཀརོཏི, ཏཾ པུགྒལཾ; ཡེསཾ ཀཏོ ཧོཏི, ཏེ པསནྣཙིཏྟཱ ‘‘ཨཧོ སཔྤུརིསོ’’ཏི ཨནུསྶརནྟཱིཏི ཨདྷིཔྤཱཡོ. པིཡཀརཎོཏི ཏཾ པུགྒལཾ སབྲཧྨཙཱརཱིནཾ པིཡཾ ཀརོཏི. གརུཀརཎོཏི ཏཾ པུགྒལཾ སབྲཧྨཙཱརཱིནཾ གརུཾ ཀརོཏི. སངྒཧཱཡཱཏིཨཱདཱིསུ སབྲཧྨཙཱརཱིཧི སངྒཧེཏབྦབྷཱཝཱཡ. ཏེཧི སདྡྷིཾ ཨཝིཝཱདཱཡ སམགྒབྷཱཝཱཡ ཨེཀཱིབྷཱཝཱཡ ཙ སཾཝཏྟཏི.

མེཏྟཾ ཝཙཱིཀམྨནྟིཨཱདཱིསུ དེཝཏྠེརོ ཏིསྶཏྠེརོཏི ཨེཝཾ པགྒཡ྄ཧ ཝཙནཾ སམྨུཁཱ མེཏྟཾ ཝཙཱིཀམྨཾ ནཱམ. ཝིཧཱརེ ཨསནྟེ པན ཏཾ པཊིཔུཙྪནྟསྶ ‘‘ཀུཧིཾ ཨམྷཱཀཾ དེཝཏྠེརོ, ཀུཧིཾ ཨམྷཱཀཾ ཏིསྶཏྠེརོ, ཀདཱ ནུ ཁོ ཨཱགམིསྶཏཱི’’ཏི ཨེཝཾ མམཱཡནཝཙནཾ པརམྨུཁཱ མེཏྟཾ ཝཙཱིཀམྨཾ ནཱམ. མེཏྟཱསིནེཧསིནིདྡྷཱནི པན ནཡནཱནི ཨུམྨཱིལེཏྭཱ པསནྣེན མུཁེན ཨོལོཀནཾ སམྨུཁཱ མེཏྟཾ མནོཀམྨཾ ནཱམ. ‘‘དེཝཏྠེརོ ཏིསྶཏྠེརོ ཨརོགོ ཧོཏུ, ཨཔྤཱབཱདྷོ’’ཏི སམནྣཱཧརཎཾ པརམྨུཁཱ མེཏྟཾ མནོཀམྨཾ ནཱམ.

ཨཔྤཊིཝིབྷཏྟབྷོགཱིཏི ནེཝ ཨཱམིསཾ པཊིཝིབྷཛིཏྭཱ བྷུཉྫཏི, ན པུགྒལཾ. ཡོ ཧི ‘‘ཨེཏྟཀཾ ¶ པརེསཾ དསྶཱམི, ཨེཏྟཀཾ ཨཏྟནཱ ¶ བྷུཉྫིསྶཱམི, ཨེཏྟཀཾ ཝཱ ཨསུཀསྶ ¶ ཙ ཨསུཀསྶ ཙ དསྶཱམི, ཨེཏྟཀཾ ཨཏྟནཱ བྷུཉྫིསྶཱམཱི’’ཏི ཝིབྷཛིཏྭཱ བྷུཉྫཏི, ཨཡཾ པཊིཝིབྷཏྟབྷོགཱི ནཱམ. ཨཡཾ པན ཨེཝཾ ཨཀཏྭཱ ཨཱབྷཏཾ པིཎྜཔཱཏཾ ཐེརཱསནཏོ པཊྛཱཡ དཏྭཱ གཧིཏཱཝསེསཾ བྷུཉྫཏི. ‘‘སཱིལཝནྟེཧཱི’’ཏི ཝཙནཏོ དུསྶཱིལསྶ ཨདཱཏུམྤི ཝཊྚཏི, སཱརཎཱིཡདྷམྨཔཱུརཀེན པན སབྦེསཾ དཱཏབྦམེཝཱཏི ཝུཏྟཾ. གིལཱན-གིལཱནུཔཊྛཱཀ-ཨཱགནྟུཀ-གམིཀཙཱིཝརཀམྨཱདིཔསུཏཱནཾ ཝིཙེཡྻ དཱཏུམྤི ཝཊྚཏི. ན ཧི ཨེཏེ ཝིཙིནིཏྭཱ དེནྟེན པུགྒལཝིབྷཱགོ ཀཏོ ཧོཏི, ཨཱིདིསཱནཉྷི ཀིཙྪལཱབྷཏྟཱ ཝིསེསོ ཀཱཏབྦོཡེཝཱཏི ཨཡཾ ཀརོཏི.

ཨཁཎྜཱནཱིཏིཨཱདཱིསུ ཡསྶ སཏྟསུ ཨཱཔཏྟིཀྑནྡྷེསུ ཨཱདིམྷི ཝཱ ཨནྟེ ཝཱ སིཀྑཱཔདཾ བྷིནྣཾ ཧོཏི, ཏསྶ སཱིལཾ པརིཡནྟེ ཚིནྣསཱཊཀོ ཝིཡ ཁཎྜཾ ནཱམ. ཡསྶ པན ཝེམཛ྄ཛྷེ བྷིནྣཾ, ཏསྶ མཛ྄ཛྷེ ཚིདྡསཱཊཀོ ཝིཡ ཚིདྡཾ ནཱམ ཧོཏི. ཡསྶ པཊིཔཱཊིཡཱ དྭེ ཏཱིཎི བྷིནྣཱནི, ཏསྶ པིཊྛིཡཾ ཝཱ ཀུཙྪིཡཾ ཝཱ ཨུཊྛིཏེན ཝིསབྷཱགཝཎྞེན ཀཱལ༹རཏྟཱདཱིནཾ ཨཉྙཏརསརཱིརཝཎྞཱ གཱཝཱི ཝིཡ སབལཾ ནཱམ ཧོཏི. ཡསྶ ཨནྟརནྟརཱ བྷིནྣཱནི, ཏསྶ ཨནྟརནྟརཱ ཝིསབྷཱགཝཎྞབིནྡུཝིཙིཏྲཱ གཱཝཱི ཝིཡ ཀམྨཱསཾ ནཱམ ཧོཏི. ཡསྶ པན སབྦེན སབྦཾ ཨབྷིནྣཱནི སཱིལཱནི, ཏསྶ ཏཱནི སཱིལཱནི ཨཁཎྜཱནི ཨཙྪིདྡཱནི ཨསབལཱནི ཨཀམྨཱསཱནི ནཱམ ཧོནྟི. ཏཱནི པནེཏཱནི བྷུཛིསྶབྷཱཝཀརཎཏོ བྷུཛིསྶཱནི. ཝིཉྙཱུཧི པསཏྠཏྟཱ ཝིཉྙུཔྤསཏྠཱནི. ཏཎྷཱདིཊྛཱིཧི ཨཔརཱམཊྛཏྟཱ ཨཔརཱམཊྛཱནི. ཨུཔཙཱརསམཱདྷིཾ ཨཔྤནཱསམཱདྷིཾ ཝཱ སཾཝཏྟཡནྟཱིཏི སམཱདྷིསཾཝཏྟནིཀཱནཱིཏི ཝུཙྩནྟི. སཱིལསཱམཉྙགཏོ ཝིཧརཏཱིཏི ཏེསུ ཏེསུ དིསཱབྷཱགེསུ ཝིཧརནྟེཧི ཀལྱཱཎསཱིལེཧི བྷིཀྑཱུཧི སདྡྷིཾ སམཱནབྷཱཝཱུཔགཏསཱིལོ ཝིཧརཏི.

ཡཱཡཾ དིཊྛཱིཏི མགྒསམྤཡུཏྟཱ སམྨཱདིཊྛི. ཨརིཡཱཏི ནིདྡོསཱ. ནིཡྻཱཏཱིཏི ནིཡྻཱནིཀཱ. ཏཀྐརསྶཱཏི ཡོ ཏཐཱཀཱརཱི ཧོཏི, ཏསྶ. དུཀྑཀྑཡཱཡཱཏི སབྦདུཀྑསྶ ཁཡཏྠཾ. སེསཾ ཡཱཝ སམཐབྷེདཔརིཡོསཱནཱ ཨུཏྟཱནཏྠམེཝ.

ཀཏིཔུཙྪཱཝཱརཝཎྞནཱ ནིཊྛིཏཱ.

ཁནྡྷཀཔུཙྪཱཝཱརོ

པུཙྪཱཝིསྶཛྫནཱཝཎྞནཱ

༣༢༠. ཨུཔསམྤདཾ ¶ ¶ པུཙྪིསྶནྟི ཨུཔསམྤདཀྑནྡྷཀཾ པུཙྪིསྶཾ. སནིདཱནཾ སནིདྡེསནྟི ནིདཱནེན ཙ ནིདྡེསེན ཙ ¶ སདྡྷིཾ པུཙྪིསྶཱམི. སམུཀྐཊྛཔདཱནཾ ཀཏི ཨཱཔཏྟིཡོཏི ཡཱནི ཏཏྠ སམུཀྐཊྛཱནི ཨུཏྟམཱནི པདཱནི ཝུཏྟཱནི, ཏེསཾ སམུཀྐཊྛཔདཱནཾ ཨུཏྟམཔདཱནཾ སངྑེཔཏོ ཀཏི ཨཱཔཏྟིཡོ ཧོནྟཱིཏི. ཡེན ཡེན ཧི པདེན ཡཱ ཡཱ ཨཱཔཏྟི པཉྙཏྟཱ, སཱ སཱ ཏསྶ ཏསྶ པདསྶ ཨཱཔཏྟཱིཏི ཝུཙྩཏི. ཏེན ཝུཏྟཾ ‘‘སམུཀྐཊྛཔདཱནཾ ཀཏི ཨཱཔཏྟིཡོ’’ཏི. དྭེ ཨཱཔཏྟིཡོཏི ཨཱུནཝཱིསཏིཝསྶཾ ཨུཔསམྤཱདེནྟསྶ པཱཙིཏྟིཡཾ, སེསེསུ སབྦཔདེསུ དུཀྐཊཾ.

ཏིསྶོཏི ‘‘ནསྶནྟེཏེ ཝིནསྶནྟེཏེ, ཀོ ཏེཧི ཨཏྠོ’’ཏི བྷེདཔུརེཀྑཱརཱནཾ ཨུཔོསཐཀརཎེ ཐུལླཙྩཡཾ, ཨུཀྑིཏྟཀེན སདྡྷིཾ ཨུཔོསཐཀརཎེ པཱཙིཏྟིཡཾ, སེསེསུ དུཀྐཊནྟི ཨེཝཾ ཨུཔོསཐཀྑནྡྷཀེ ཏིསྶོ ཨཱཔཏྟིཡོ. ཨེཀཱཏི ཝསྶཱུཔནཱཡིཀཀྑནྡྷཀེ ཨེཀཱ དུཀྐཊཱཔཏྟིཡེཝ.

ཏིསྶོཏི བྷེདཔུརེཀྑཱརསྶ པཝཱརཡཏོ ཐུལླཙྩཡཾ, ཨུཀྑིཏྟཀེན སདྡྷིཾ པཱཙིཏྟིཡཾ, སེསེསུ དུཀྐཊནྟི ཨེཝཾ པཝཱརཎཱཀྑནྡྷཀེཔི ཏིསྶོ ཨཱཔཏྟིཡོ.

ཏིསྶོཏི ཝཙྪཏརིཾ ཨུགྒཧེཏྭཱ མཱརེནྟཱནཾ པཱཙིཏྟིཡཾ, རཏྟེན ཙིཏྟེན ཨངྒཛཱཏཚུཔནེ ཐུལླཙྩཡཾ, སེསེསུ དུཀྐཊནྟི ཨེཝཾ ཙམྨསཾཡུཏྟེཔི ཏིསྶོ ཨཱཔཏྟིཡོ. བྷེསཛྫཀྑནྡྷཀེཔི སམནྟཱ དྭངྒུལེ ཐུལླཙྩཡཾ, བྷོཛྫཡཱགུཡཱ པཱཙིཏྟིཡཾ, སེསེསུ དུཀྐཊནྟི ཨེཝཾ ཏིསྶོ ཨཱཔཏྟིཡོ.

ཀཐིནཾ ¶ ཀེཝལཾ པཉྙཏྟིམེཝ, ནཏྠི ཏཏྠ ཨཱཔཏྟི. ཙཱིཝརསཾཡུཏྟེ ཀུསཙཱིརཝཱཀཙཱིརེསུ ཐུལླཙྩཡཾ, ཨཏིརེཀཙཱིཝརེ ནིསྶགྒིཡཾ, སེསེསུ དུཀྐཊནྟི ཨིམཱ ཏིསྶོ ཨཱཔཏྟིཡོ.

ཙམྤེཡྻཀེ ཨེཀཱ དུཀྐཊཱཔཏྟིཡེཝ. ཀོསམྦཀ-ཀམྨཀྑནྡྷཀ-པཱརིཝཱསིཀསམུཙྩཡཀྑནྡྷཀེསུཔི ཨེཀཱ དུཀྐཊཱཔཏྟིཡེཝ.

སམཐཀྑནྡྷཀེ ¶ ཚནྡདཱཡཀོ ཁིཡྻཏི, ཁིཡྻནཀཾ པཱཙིཏྟིཡཾ, སེསེསུ དུཀྐཊནྟི ཨིམཱ དྭེ ཨཱཔཏྟིཡོ. ཁུདྡཀཝཏྠུཀེ ཨཏྟནོ ཨངྒཛཱཏཾ ཚིནྡཏི, ཐུལླཙྩཡཾ, རོམཊྛེ པཱཙིཏྟིཡཾ, སེསེསུ དུཀྐཊནྟི ཨིམཱ ཏིསྶོ ཨཱཔཏྟིཡོ. སེནཱསནཀྑནྡྷཀེ གརུབྷཎྜཝིསྶཛྫནེ ཐུལླཙྩཡཾ, སངྒྷིཀཱ ཝིཧཱརཱ ནིཀྐཌྜྷནེ པཱཙིཏྟིཡཾ, སེསེསུ དུཀྐཊནྟི ཨིམཱ ཏིསྶོ ཨཱཔཏྟིཡོ.

སངྒྷབྷེདེབྷེདཀཱནུཝཏྟཀཱནཾ ཐུལླཙྩཡཾ, གཎབྷོཛནེ པཱཙིཏྟིཡནྟི ཨིམཱ དྭེ ཨཱཔཏྟིཡོ. སམཱཙཱརཾ པུཙྪིསྶནྟི ཝུཏྟེ ཝཏྟཀྑནྡྷཀེ ཨེཀཱ དུཀྐཊཱཔཏྟིཡེཝ. སཱ སབྦཝཏྟེསུ ཨནཱདརིཡེན ཧོཏི. ཏཐཱ པཱཏིམོཀྑཊྛཔནེ. བྷིཀྑུནིཀྑནྡྷཀེ ¶ ཨཔྤཝཱརཎཱཡ པཱཙིཏྟིཡཾ, སེསེསུ དུཀྐཊནྟི དྭེ ཨཱཔཏྟིཡོ. པཉྩསཏིཀསཏྟསཏིཀེསུ ཀེཝལཾ དྷམྨོ སངྒཧཾ ཨཱརོཔིཏོ, ནཏྠི ཏཏྠ ཨཱཔཏྟཱིཏི.

ཁནྡྷཀཔུཙྪཱཝཱརཝཎྞནཱ ནིཊྛིཏཱ.

ཨེཀུཏྟརིཀནཡོ

ཨེཀཀཝཱརཝཎྞནཱ

༣༢༡. ཨཱཔཏྟིཀརཱ ¶ ¶ དྷམྨཱ ཛཱནིཏབྦཱཏིཨཱདིམྷི ཨེཀུཏྟརིཀནཡེ ཨཱཔཏྟིཀརཱ དྷམྨཱ ནཱམ ཚ ཨཱཔཏྟིསམུཊྛཱནཱནི. ཨེཏེསཉྷི ཝསེན པུགྒལོ ཨཱཔཏྟིཾ ཨཱཔཛྫཏི, ཏསྨཱ ‘‘ཨཱཔཏྟིཀརཱ’’ཏི ཝུཏྟཱ. ཨནཱཔཏྟིཀརཱ ནཱམ སཏྟ སམཐཱ. ཨཱཔཏྟི ཛཱནིཏབྦཱཏི ཏསྨིཾ ཏསྨིཾ སིཀྑཱཔདེ ཙ ཝིབྷངྒེ ཙ ཝུཏྟཱ ཨཱཔཏྟི ཛཱནིཏབྦཱ. ཨནཱཔཏྟཱིཏི ‘‘ཨནཱཔཏྟི བྷིཀྑུ ཨསཱདིཡནྟསྶཱ’’ཏིཨཱདིནཱ ནཡེན ཨནཱཔཏྟི ཛཱནིཏབྦཱ. ལཧུཀཱཏི ལཧུཀེན ཝིནཡཀམྨེན ཝིསུཛ྄ཛྷནཏོ པཉྩཝིདྷཱ ཨཱཔཏྟི. གརུཀཱཏི གརུཀེན ཝིནཡཀམྨེན ཝིསུཛ྄ཛྷནཏོ སངྒྷཱདིསེསཱ ཨཱཔཏྟི. ཀེནཙི ཨཱཀཱརེན ཨནཱཔཏྟིབྷཱཝཾ ཨུཔནེཏུཾ ཨསཀྐུཎེཡྻཏོ པཱརཱཛིཀཱཔཏྟི ཙ. སཱཝསེསཱཏི ཋཔེཏྭཱ པཱརཱཛིཀཾ སེསཱ. ཨནཝསེསཱཏི པཱརཱཛིཀཱཔཏྟི. དྭེ ཨཱཔཏྟིཀྑནྡྷཱ དུཊྛུལླཱ; ཨཝསེསཱ ཨདུཊྛུལླཱ. སཔྤཊིཀམྨདུཀཾ སཱཝསེསདུཀསདིསཾ. དེསནཱགཱམིནིདུཀཾ ལཧུཀདུཀསངྒཧིཏཾ.

ཨནྟརཱཡིཀཱཏི སཏྟཔི ཨཱཔཏྟིཡོ སཉྩིཙྩ ཝཱིཏིཀྐནྟཱ སགྒནྟརཱཡཉྩེཝ མོཀྑནྟརཱཡཉྩ ཀརོནྟཱིཏི ཨནྟརཱཡིཀཱ. ཨཛཱནནྟེན ཝཱིཏིཀྐནྟཱ པན པཎྞཏྟིཝཛྫཱཔཏྟི ནེཝ སགྒནྟརཱཡཾ ན མོཀྑནྟརཱཡཾ ཀརོཏཱིཏི ཨནནྟརཱཡིཀཱ. ཨནྟརཱཡིཀཾ ཨཱཔནྣསྶཱཔི དེསནཱགཱམིནིཾ དེསེཏྭཱ ཝུཊྛཱནགཱམིནིཏོ ཝུཊྛཱཡ སུདྡྷིཔཏྟསྶ སཱམཎེརབྷཱུམིཡཾ ཋིཏསྶ ཙ ཨཝཱརིཏོ སགྒམོཀྑམགྒོཏི. སཱཝཛྫཔཉྙཏྟཱིཏི ལོཀཝཛྫཱ. ཨནཝཛྫཔཉྙཏྟཱིཏི པཎྞཏྟིཝཛྫཱ. ཀིརིཡཏོ སམུཊྛིཏཱ ནཱམ ཡཾ ཀརོནྟོ ཨཱཔཛྫཏི པཱརཱཛིཀཱཔཏྟི ཝིཡ. ཨཀིརིཡཏོཏི ¶ ཡཾ ཨཀརོནྟོ ཨཱཔཛྫཏི, ཙཱིཝརཨནདྷིཊྛཱནཱཔཏྟི ཝིཡ. ཀིརིཡཱཀིརིཡཏོཏི ཡཾ ཀརོནྟོ ཙ ཨཀརོནྟོ ཙ ཨཱཔཛྫཏི, ཀུཊིཀཱརཱཔཏྟི ཝིཡ.

པུབྦཱཔཏྟཱིཏི པཋམཾ ཨཱཔནྣཱཔཏྟི. ཨཔརཱཔཏྟཱིཏི པཱརིཝཱསིཀཱདཱིཧི པཙྪཱ ཨཱཔནྣཱཔཏྟི. པུབྦཱཔཏྟཱིནཾ ཨནྟརཱཔཏྟི ནཱམ མཱུལཝིསུདྡྷིཡཱ ཨནྟརཱཔཏྟི. ཨཔརཱཔཏྟཱིནཾ ཨནྟརཱཔཏྟི ནཱམ ཨགྒྷཝིསུདྡྷིཡཱ ¶ ཨནྟརཱཔཏྟི. ཀུརུནྡིཡཾ པན ‘‘པུབྦཱཔཏྟི ནཱམ པཋམཾ ཨཱཔནྣཱ. ཨཔརཱཔཏྟི ནཱམ མཱནཏྟཱརཧཀཱལེ ཨཱཔནྣཱ. པུབྦཱཔཏྟཱིནཾ ཨནྟརཱཔཏྟི ནཱམ པརིཝཱསེ ཨཱཔནྣཱ. ཨཔརཱཔཏྟཱིནཾ ཨནྟརཱཔཏྟི ¶ ནཱམ མཱནཏྟཙཱརེ ཨཱཔནྣཱ’’ཏི ཝུཏྟཾ. ཨིདམྤི ཨེཀེན པརིཡཱཡེན ཡུཛྫཏི.

དེསིཏཱ གཎནཱུཔགཱ ནཱམ ཡཱ དྷུརནིཀྑེཔཾ ཀཏྭཱ པུན ན ཨཱཔཛྫིསྶཱམཱིཏི དེསིཏཱ ཧོཏི. ཨགཎནཱུཔགཱ ནཱམ ཡཱ དྷུརནིཀྑེཔཾ ཨཀཏྭཱ སཨུསྶཱཧེནེཝ ཙིཏྟེན ཨཔརིསུདྡྷེན དེསིཏཱ ཧོཏི. ཨཡཉྷི དེསིཏཱཔི དེསིཏགཎནཾ ན ཨུཔེཏི. ཨཊྛམེ ཝཏྠུསྨིཾ བྷིཀྑུནིཡཱ པཱརཱཛིཀམེཝ ཧོཏི. པཉྙཏྟི ཛཱནིཏབྦཱཏིཨཱདཱིསུ ནཝསུ པདེསུ པཋམཔཱརཱཛིཀཔུཙྪཱཡ ཝུཏྟནཡེནེཝ ཝིནིཙྪཡོ ཝེདིཏབྦོ.

ཐུལླཝཛྫཱཏི ཐུལླདོསེ པཉྙཏྟཱ གརུཀཱཔཏྟི. ཨཐུལླཝཛྫཱཏི ལཧུཀཱཔཏྟི. གིཧིཔཊིསཾཡུཏྟཱཏི སུདྷམྨཏྠེརསྶ ཨཱཔཏྟི, ཡཱ ཙ དྷམྨིཀསྶ པཊིསྶཝསྶ ཨསཙྩཱཔནེ ཨཱཔཏྟི, ཨཝསེསཱ ན གིཧིཔཊིསཾཡུཏྟཱ. པཉྩཱནནྟརིཡཀམྨཱཔཏྟི ནིཡཏཱ, སེསཱ ཨནིཡཏཱ. ཨཱདིཀརོཏི སུདིནྣཏྠེརཱདི ཨཱདིཀམྨིཀོ. ཨནཱདིཀརོཏི མཀྐཊིསམཎཱདི ཨནུཔཉྙཏྟིཀཱརཀོ. ཨདྷིཙྩཱཔཏྟིཀོ ནཱམ ཡོ ཀདཱཙི ཀརཧཙི ཨཱཔཏྟིཾ ཨཱཔཛྫཏི. ཨབྷིཎྷཱཔཏྟིཀོ ནཱམ ཡོ ནིཙྩཾ ཨཱཔཛྫཏི.

ཙོདཀོ ནཱམ ཡོ ཝཏྠུནཱ ཝཱ ཨཱཔཏྟིཡཱ ཝཱ པརཾ ཙོདེཏི. ཡོ པན ཨེཝཾ ཙོདིཏོ ཨཡཾ ཙུདིཏཀོ ནཱམ. པཉྩདསསུ དྷམྨེསུ ཨཔྤཏིཊྛཧིཏྭཱ ཨབྷཱུཏེན ཝཏྠུནཱ ཙོདེནྟོ ཨདྷམྨཙོདཀོ ནཱམ, ཏེན ཏཐཱ ཙོདིཏོ ཨདྷམྨཙུདིཏཀོ ནཱམ. ཝིཔརིཡཱཡེན དྷམྨཙོདཀཙུདིཏཀཱ ཝེདིཏབྦཱ. མིཙྪཏྟནིཡཏེཧི ཝཱ སམྨཏྟནིཡཏེཧི ཝཱ དྷམྨེཧི སམནྣཱགཏོ ནིཡཏོ, ཝིཔརཱིཏོ ཨནིཡཏོ.

སཱཝཀཱ ¶ བྷབྦཱཔཏྟིཀཱ ནཱམ, བུདྡྷཱ ཙ པཙྩེཀབུདྡྷཱ ཙ ཨབྷབྦཱཔཏྟིཀཱ ནཱམ. ཨུཀྑེཔནཱིཡཀམྨཀཏོ ཨུཀྑིཏྟཀོ ནཱམ, ཨཝསེསཙཏུབྦིདྷཏཛྫནཱིཡཱདིཀམྨཀཏོ ཨནུཀྑིཏྟཀོ ནཱམ. ཨཡཉྷི ཨུཔོསཐཾ ཝཱ པཝཱརཎཾ ཝཱ དྷམྨཔརིབྷོགཾ ཝཱ ཨཱམིསཔརིབྷོགཾ ཝཱ ན ཀོཔེཏི. ‘‘མེཏྟིཡཾ བྷིཀྑུནིཾ ནཱསེཐ, དཱུསཀོ ནཱསེཏབྦོ, ཀཎྚཀོ སམཎུདྡེསོ ནཱསེཏབྦོ’’ཏི ཨེཝཾ ལིངྒདཎྜཀམྨ-སཾཝཱསནཱསནཱཧི ནཱསིཏབྦོ ནཱསིཏཀོ ནཱམ. སེསཱ སབྦེ ཨནཱསིཏཀཱ. ཡེན སདྡྷིཾ ཨུཔོསཐཱདིཀོ སཾཝཱསོ ཨཏྠི, ཨཡཾ སམཱནསཾཝཱསཀོ, ཨིཏརོ ¶ ནཱནཱསཾཝཱསཀོ ¶ . སོ ཀམྨནཱནཱསཾཝཱསཀོ ལདྡྷིནཱནཱསཾཝཱསཀོཏི དུཝིདྷོ ཧོཏི. ཋཔནཾ ཛཱནིཏབྦནྟི ‘‘ཨེཀཾ བྷིཀྑཝེ ཨདྷམྨིཀཾ པཱཏིམོཀྑཊྛཔན’’ནྟིཨཱདིནཱ ནཡེན ཝུཏྟཾ པཱཏིམོཀྑཊྛཔནཾ ཛཱནིཏབྦནྟི ཨཏྠོ.

ཨེཀཀཝཱརཝཎྞནཱ ནིཊྛིཏཱ.

དུཀཝཱརཝཎྞནཱ

༣༢༢. དུཀེསུ སཙིཏྟཀཱ ཨཱཔཏྟི སཉྙཱཝིམོཀྑཱ, ཨཙིཏྟཀཱ ནོསཉྙཱཝིམོཀྑཱ. ལདྡྷསམཱཔཏྟིཀསྶ ཨཱཔཏྟི ནཱམ བྷཱུཏཱརོཙནཱཔཏྟི, ཨལདྡྷསམཱཔཏྟིཀསྶ ཨཱཔཏྟི ནཱམ ཨབྷཱུཏཱརོཙནཱཔཏྟི. སདྡྷམྨཔཊིསཉྙུཏྟཱ ནཱམ པདསོདྷམྨཱདིཀཱ, ཨསདྡྷམྨཔཊིསཉྙུཏྟཱ ནཱམ དུཊྛུལླཝཱཙཱཔཏྟི. སཔརིཀྑཱརཔཊིསཉྙུཏྟཱ ནཱམ ནིསྶགྒིཡཝཏྠུནོ ཨནིསྶཛྫིཏྭཱ པརིབྷོགེ, པཏྟཙཱིཝརཱནཾ ནིདཧནེ, ཀིལིཊྛཙཱིཝརཱནཾ ཨདྷོཝནེ, མལགྒཧིཏཔཏྟསྶ ཨཔཙནེཏི ཨེཝཾ ཨཡུཏྟཔརིབྷོགེ ཨཱཔཏྟི. པརཔརིཀྑཱརཔཊིསཉྙུཏྟཱ ནཱམ སངྒྷིཀམཉྩཔཱིཋཱདཱིནཾ ཨཛ྄ཛྷོཀཱསེ སནྠརཎཨནཱཔུཙྪཱགམནཱདཱིསུ ཨཱཔཛྫིཏབྦཱ ཨཱཔཏྟི. སཔུགྒལཔཊིསཉྙུཏྟཱ ནཱམ ‘‘མུདུཔིཊྛིཀསྶ ལམྦིསྶ ཨཱུརུནཱ ཨངྒཛཱཏཾ པཱིལེ༹ནྟསྶཱ’’ཏིཨཱདིནཱ ནཡེན ཝུཏྟཱཔཏྟི. པརཔུགྒལཔཊིསཉྙུཏྟཱ ནཱམ མེཐུནདྷམྨཀཱཡསཾསགྒཔཧཱརདཱནཱདཱིསུ ཝུཏྟཱཔཏྟི, ‘‘སིཁརཎཱིསཱི’’ཏི སཙྩཾ བྷཎནྟོ གརུཀཾ ཨཱཔཛྫཏི, ‘‘སམྤཛཱནམུསཱཝཱདེ པཱཙིཏྟིཡ’’ནྟི མུསཱ བྷཎནྟོ ལཧུཀཾ. ཨབྷཱུཏཱརོཙནེ མུསཱ བྷཎནྟོ གརུཀཾ. བྷཱུཏཱརོཙནེ སཙྩཾ བྷཎནྟོ ལཧུཀཾ.

‘‘སངྒྷཀམྨཾ ཝགྒཾ ཀརིསྶཱམཱི’’ཏི ཨནྟོསཱིམཱཡ ཨེཀམནྟེ ནིསཱིདནྟོ བྷཱུམིགཏོ ཨཱཔཛྫཏི ནཱམ. སཙེ པན ཨངྒུལིམཏྟམྤི ཨཱཀཱསེ ཏིཊྛེཡྻ, ན ཨཱཔཛྫེཡྻ, ཏེན ཝུཏྟཾ ‘‘ནོ ཝེཧཱསགཏོ’’ཏི. ཝེཧཱསཀུཊིཡཱ ཨཱཧཙྩཔཱདཀཾ མཉྩཾ ཝཱ པཱིཋཾ ཝཱ ཨབྷིནིསཱིདནྟོ ཝེཧཱསགཏོ ¶ ཨཱཔཛྫཏི ནཱམ. སཙེ པན ཏཾ བྷཱུམིཡཾ པཉྙཱཔེཏྭཱ ནིཔཛྫེཡྻ ན ཨཱཔཛྫེཡྻ, ཏེན ཝུཏྟཾ – ‘‘ནོ བྷཱུམིགཏོ’’ཏི. གམིཡོ གམིཡཝཏྟཾ ཨཔཱུརེཏྭཱ གཙྪནྟོ ནིཀྑམནྟོ ཨཱཔཛྫཏི ནཱམ, ནོ པཝིསནྟོ. ཨཱགནྟུཀོ ཨཱགནྟུཀཝཏྟཾ ཨཔཱུརེཏྭཱ སཚཏྟུཔཱཧནོ པཝིསནྟོ པཝིསནྟོ ཨཱཔཛྫཏི ནཱམ, ནོ ནིཀྑམནྟོ.

ཨཱདིཡནྟོ ¶ ཨཱཔཛྫཏི ནཱམ བྷིཀྑུནཱི ཨཏིགམྦྷཱིརཾ ཨུདཀསུདྡྷིཀཾ ¶ ཨཱདིཡམཱནཱ; དུབྦཎྞཀརཎཾ ཨནཱདིཡིཏྭཱ ཙཱིཝརཾ པརིབྷུཉྫནྟོ པན ཨནཱདིཡནྟོ ཨཱཔཛྫཏི ནཱམ. མཱུགབྦཏཱདཱིནི ཏིཏྠིཡཝཏྟཱནི སམཱདིཡནྟོ སམཱདིཡནྟོ ཨཱཔཛྫཏི ནཱམ. པཱརིཝཱསིཀཱདཡོ པན ཏཛྫནཱིཡཱདིཀམྨཀཏཱ ཝཱ ཨཏྟནོ ཝཏྟཾ ཨསམཱདིཡནྟཱ ཨཱཔཛྫནྟི, ཏེ སནྡྷཱཡ ཝུཏྟཾ ‘‘ཨཏྠཱཔཏྟི ན སམཱདིཡནྟོ ཨཱཔཛྫཏཱི’’ཏི. ཨཉྙཱཏིཀཱཡ བྷིཀྑུནིཡཱ ཙཱིཝརཾ སིབྦནྟོ ཝེཛྫཀམྨབྷཎྜཱགཱརིཀཀམྨཙིཏྟཀམྨཱདཱིནི ཝཱ ཀརོནྟོ ཀརོནྟོ ཨཱཔཛྫཏི ནཱམ. ཨུཔཛ྄ཛྷཱཡཝཏྟཱདཱིནི ཨཀརོནྟོ ཨཀརོནྟོ ཨཱཔཛྫཏི ནཱམ. ཨཉྙཱཏིཀཱཡ བྷིཀྑུནིཡཱ ཙཱིཝརཾ དདམཱནོ དེནྟོ ཨཱཔཛྫཏི ནཱམ. སདྡྷིཝིཧཱརིཀཨནྟེཝཱསིཀཱནཾ ཙཱིཝརཱདཱིནི ཨདེནྟོ ཨདེནྟོ ཨཱཔཛྫཏི ནཱམ. ཨཉྙཱཏིཀཱཡ བྷིཀྑུནིཡཱ ཙཱིཝརཾ གཎྷནྟོ པཊིགྒཎྷནྟོ ཨཱཔཛྫཏི ནཱམ. ‘‘ན བྷིཀྑཝེ ཨོཝཱདོ ན གཧེཏབྦོ’’ཏི ཝཙནཏོ ཨོཝཱདཾ ཨགཎྷནྟོ ན པཊིགྒཎྷནྟོ ཨཱཔཛྫཏི ནཱམ.

ནིསྶགྒིཡཝཏྠུཾ ཨནིསྶཛྫིཏྭཱ པརིབྷུཉྫནྟོ པརིབྷོགེན ཨཱཔཛྫཏི ནཱམ. པཉྩཱཧིཀཾ སངྒྷཱཊིཙཱརཾ ཨཏིཀྐཱམཡམཱནཱ ཨཔརིབྷོགེན ཨཱཔཛྫཏི ནཱམ. སཧགཱརསེཡྻཾ རཏྟིཾ ཨཱཔཛྫཏི ནཱམ, ནོ དིཝཱ, དྭཱརཾ ཨསཾཝརིཏྭཱ པཊིསལླཱིཡནྟོ དིཝཱ ཨཱཔཛྫཏི, ནོ རཏྟིཾ. ཨེཀརཏྟཚཱརཏྟསཏྟཱཧདསཱཧམཱསཱཏིཀྐམེསུ ཝུཏྟཨཱཔཏྟིཾ ཨཱཔཛྫནྟོ ཨརུཎུགྒེ ཨཱཔཛྫཏི ནཱམ, པཝཱརེཏྭཱ བྷུཉྫནྟོ ན ཨརུཎུགྒེ ཨཱཔཛྫཏི ནཱམ.

བྷཱུཏགཱམཉྩེཝ ཨངྒཛཱཏཉྩ ཚིནྡནྟོ ཚིནྡནྟོ ཨཱཔཛྫཏི ནཱམ, ཀེསེ ཝཱ ནཁེ ཝཱ ན ཚིནྡནྟོ ན ཚིནྡནྟོ ཨཱཔཛྫཏི ནཱམ. ཨཱཔཏྟིཾ ཚཱདེནྟོ ཚཱདེནྟོ ཨཱཔཛྫཏི ནཱམ, ‘‘ཏིཎེན ཝཱ པཎྞེན ཝཱ པཊིཙྪཱདེཏྭཱ ཨཱགནྟབྦཾ, ནཏྭེཝ ནགྒེན ཨཱགནྟབྦཾ, ཡོ ཨཱགཙྪེཡྻ ཨཱཔཏྟི དུཀྐཊསྶཱ’’ཏི ཨིམཾ པན ཨཱཔཏྟིཾ ན ཚཱདེནྟོ ཨཱཔཛྫཏི ནཱམ. ཀུསཙཱིརཱདཱིནི ¶ དྷཱརེནྟོ དྷཱརེནྟོ ཨཱཔཛྫཏི ནཱམ, ‘‘ཨཡཾ ཏེ བྷིཀྑུ པཏྟོ ཡཱཝ བྷེདནཱཡ དྷཱརེཏབྦོ’’ཏི ཨིམཾ ཨཱཔཏྟིཾ ན དྷཱརེནྟོ ཨཱཔཛྫཏི ནཱམ.

‘‘ཨཏྟནཱ ཝཱ ཨཏྟཱནཾ ནཱནཱསཾཝཱསཀཾ ཀརོཏཱི’’ཏི ཨེཀསཱིམཱཡཾ དྭཱིསུ སངྒྷེསུ ནིསིནྣེསུ ཨེཀསྨིཾ པཀྑེ ནིསཱིདིཏྭཱ པརཔཀྑསྶ ལདྡྷིཾ གཎྷནྟོ ཡསྨིཾ ¶ པཀྑེ ནིསིནྣོ ཏེསཾ ཨཏྟནཱཝ ཨཏྟཱནཾ ནཱནཱསཾཝཱསཀཾ ཀརོཏི ནཱམ. ཡེསཾ སནྟིཀེ ནིསིནྣོ ཏེསཾ གཎཔཱུརཀོ ཧུཏྭཱ ཀམྨཾ ཀོཔེཏི, ཨིཏརེསཾ ཧཏྠཔཱསཾ ཨནཱགཏཏྟཱ. སམཱནསཾཝཱསཀེཔི ཨེསེཝ ¶ ནཡོ. ཡེསཉྷི སོ ལདྡྷིཾ རོཙེཏི, ཏེསཾ སམཱནསཾཝཱསཀོ ཧོཏི, ཨིཏརེསཾ ནཱནཱསཾཝཱསཀོ. སཏྟ ཨཱཔཏྟིཡོ སཏྟ ཨཱཔཏྟིཀྑནྡྷཱཏི ཨཱཔཛྫིཏབྦཏོ ཨཱཔཏྟིཡོ, རཱསཊྛེན ཁནྡྷཱཏི ཨེཝཾ དྭེཡེཝ ནཱམཱནི ཧོནྟཱིཏི ནཱམཝསེན དུཀཾ དསྶིཏཾ. ཀམྨེན ཝཱ སལཱཀགྒཱཧེན ཝཱཏི ཨེཏྠ ཨུདྡེསོ ཙེཝ ཀམྨཉྩ ཨེཀཾ, ཝོཧཱརོ ཙེཝ ཨནུསྶཱཝནཱ ཙ སལཱཀགྒཱཧོ ཙ ཨེཀཾ, ཝོཧཱརཱནུསྶཱཝནསལཱཀགྒཱཧཱ པུབྦབྷཱགཱ, ཀམྨཉྩེཝ ཨུདྡེསོ ཙ པམཱཎཾ.

ཨདྡྷཱནཧཱིནོ ནཱམ ཨཱུནཝཱིསཏིཝསྶོ. ཨངྒཧཱིནོ ནཱམ ཧཏྠཙྪིནྣཱདིབྷེདོ. ཝཏྠུཝིཔནྣོ ནཱམ པཎྜཀོ ཏིརཙྪཱནགཏོ ཨུབྷཏོབྱཉྫནཀོ ཙ. ཨཝསེསཱ ཐེཡྻསཾཝཱསཀཱདཡོ ཨཊྛ ཨབྷབྦཔུགྒལཱ ཀརཎདུཀྐཊཀཱ ནཱམ. དུཀྐཊཀིརིཡཱ དུཀྐཊཀམྨཱ, ཨིམསྨིཾཡེཝ ཨཏྟབྷཱཝེ ཀཏེན ཨཏྟནོ ཀམྨེན ཨབྷབྦཊྛཱནཾ པཏྟཱཏི ཨཏྠོ. ཨཔརིཔཱུརོ ནཱམ ཨཔརིཔུཎྞཔཏྟཙཱིཝརོ. ནོ ཙ ཡཱཙཏི ནཱམ ཨུཔསམྤདཾ ན ཡཱཙཏི. ཨལཛྫིསྶ ཙ བཱལསྶ ཙཱཏི ཨལཛྫཱི སཙེཔི ཏེཔིཊཀོ ཧོཏི, བཱལོ ཙ སཙེཔི སཊྛིཝསྶོ ཧོཏི, ཨུབྷོཔི ནིསྶཱཡ ན ཝཏྠབྦཾ. བཱལསྶ ཙ ལཛྫིསྶ ཙཱཏི ཨེཏྠ བཱལསྶ ‘‘ཏྭཾ ནིསྶཡཾ གཎྷཱ’’ཏི ཨཱཎཱཡཔི ནིསྶཡོ དཱཏབྦོ, ལཛྫིསྶ པན ཡཱཙནྟསྶེཝ. སཱཏིསཱརནྟི སདོསཾ; ཡཾ ཨཛ྄ཛྷཱཙརནྟོ ཨཱཔཏྟིཾ ཨཱཔཛྫཏི.

ཀཱཡེན པཊིཀྐོསནཱ ནཱམ ཧཏྠཝིཀཱརཱདཱིཧི པཊིཀྐོསནཱ. ཀཱཡེན པཊིཛཱནཱཏཱིཏི ཧཏྠཝིཀཱརཱདཱིཧི པཊིཛཱནཱཏི. ཨུཔགྷཱཏིཀཱ ནཱམ ཨུཔགྷཱཏཱ. སིཀྑཱུཔགྷཱཏིཀཱ ནཱམ སིཀྑཱུཔགྷཱཏོ. བྷོགཱུཔགྷཱཏིཀཱ ནཱམ པརིབྷོགཱུཔགྷཱཏོ, ཏཏྠ ཏིསྶོ སིཀྑཱ ཨསིཀྑཏོ སིཀྑཱུཔགྷཱཏིཀཱཏི ཝེདིཏབྦཱ. སངྒྷིཀཾ ཝཱ པུགྒལིཀཾ ཝཱ དུཔྤརིབྷོགཾ བྷུཉྫཏོ བྷོགཱུཔགྷཱཏིཀཱཏི ཝེདིཏབྦཱ. དྭེ ཝེནཡིཀཱཏི དྭེ ཨཏྠཱ ཝིནཡསིདྡྷཱ. པཉྙཏྟཾ ནཱམ སཀལེ ཝིནཡཔིཊཀེ ཀཔྤིཡཱཀཔྤིཡཝསེན པཉྙཏྟཾ. པཉྙཏྟཱནུལོམཾ ནཱམ ཙཏཱུསུ མཧཱཔདེསེསུ དཊྛབྦཾ. སེཏུགྷཱཏོཏི ¶ པཙྩཡགྷཱཏོ; ཡེན ཙིཏྟེན ཨཀཔྤིཡཾ ཀརེཡྻ, ཏསྶ ཙིཏྟསྶཱཔི ཨནུཔྤཱདནནྟི ཨཏྠོ. མཏྟཀཱརིཏཱཏི མཏྟཱཡ ¶ པམཱཎེན ཀརཎཾ; པམཱཎེ ཋཱནནྟི ཨཏྠོ. ཀཱཡེན ཨཱཔཛྫཏཱིཏི ཀཱཡདྭཱརིཀཾ ཀཱཡེན ཨཱཔཛྫཏི; ཝཙཱིདྭཱརིཀཾ ཝཱཙཱཡ. ཀཱཡེན ཝུཊྛཱཏཱིཏི ཏིཎཝཏྠཱརཀསམཐེ ¶ ཝིནཱཔི དེསནཱཡ ཀཱཡེནེཝ ཝུཊྛཱཏི; དེསེཏྭཱ ཝུཊྛཧནྟོ པན ཝཱཙཱཡ ཝུཊྛཱཏི. ཨབྦྷནྟརཔརིབྷོགོ ནཱམ ཨཛ྄ཛྷོཧརཎཔརིབྷོགོ. བཱཧིརཔརིབྷོགོ ནཱམ སཱིསམཀྑནཱདི.

ཨནཱགཏཾ བྷཱརཾ ཝཧཏཱིཏི ཨཐེརོཝ སམཱནོ ཐེརེཧི ཝཧིཏབྦཾ བཱིཛནགཱཧདྷམྨཛ྄ཛྷེསནཱདིབྷཱརཾ ཝཧཏི; ཏཾ ནིཏྠརིཏུཾ ཝཱིརིཡཾ ཨཱརབྷཏི. ཨཱགཏཾ བྷཱརཾ ན ཝཧཏཱིཏི ཐེརོ ཐེརཀིཙྩཾ ན ཀརོཏི, ‘‘ཨནུཛཱནཱམི བྷིཀྑཝེ ཐེརེན བྷིཀྑུནཱ སཱམཾ ཝཱ དྷམྨཾ བྷཱསིཏུཾ, པརཾ ཝཱ ཨཛ྄ཛྷེསིཏུཾ, ཨནུཛཱནཱམི བྷིཀྑཝེ ཐེརཱདྷེཡྻཾ པཱཏིམོཀྑ’’ནྟི ཨེཝམཱདི སབྦཾ པརིཧཱཔེཏཱིཏི ཨཏྠོ. ན ཀུཀྐུཙྩཱཡིཏབྦཾ ཀུཀྐུཙྩཱཡཏཱིཏི ན ཀུཀྐུཙྩཱཡིཏབྦཾ ཀུཀྐུཙྩཱཡིཏྭཱ ཀརོཏི. ཀུཀྐུཙྩཱཡིཏབྦཾ ན ཀུཀྐུཙྩཱཡཏཱིཏི ཀུཀྐུཙྩཱཡིཏབྦཾ ན ཀུཀྐུཙྩཱཡིཏྭཱ ཀརོཏི. ཨེཏེསཾ དྭིནྣཾ དིཝཱ ཙ རཏྟོ ཙ ཨཱསཝཱ ཝཌྜྷནྟཱིཏི ཨཏྠོ. ཨནནྟརདུཀེཔི ཝུཏྟཔཊིཔཀྑཝསེན ཨཏྠོ ཝེདིཏབྦོ. སེསཾ ཏཏྠ ཏཏྠ ཝུཏྟནཡཏྟཱ ཨུཏྟཱནམེཝཱཏི.

དུཀཝཱརཝཎྞནཱ ནིཊྛིཏཱ.

ཏིཀཝཱརཝཎྞནཱ

༣༢༣. ཏིཀེསུ ཨཏྠཱཔཏྟི ཏིཊྛནྟེ བྷགཝཏི ཨཱཔཛྫཏཱིཏི ཨཏྠི ཨཱཔཏྟི, ཡཾ ཏིཊྛནྟེ བྷགཝཏི ཨཱཔཛྫཏཱིཏི ཨཏྠོ. ཨེསེཝ ནཡོ སབྦཏྠ. ཏཏྠ ལོཧིཏུཔྤཱདཱཔཏྟིཾ ཏིཊྛནྟེ ཨཱཔཛྫཏི. ‘‘ཨེཏརཧི ཁོ པནཱནནྡ, བྷིཀྑཱུ ཨཉྙམཉྙཾ ཨཱཝུསོཝཱདེན སམུདཱཙརནྟི, ན ཝོ མམཙྩཡེན ཨེཝཾ སམུདཱཙརིཏབྦཾ, ནཝཀེན, ཨཱནནྡ, བྷིཀྑུནཱ ཐེརོ བྷིཀྑཱུ ‘བྷནྟེ’ཏི ཝཱ ‘ཨཱཡསྨཱ’ཏི ཝཱ སམུདཱཙརིཏབྦོ’’ཏི ཝཙནཏོ ཐེརཾ ཨཱཝུསོཝཱདེན སམུདཱཙརཎཔཙྩཡཱ ཨཱཔཏྟིཾ པརིནིབྦུཏེ བྷགཝཏི ཨཱཔཛྫཏི, ནོ ཏིཊྛནྟེ. ཨིམཱ དྭེ ཨཱཔཏྟིཡོ ཋཔེཏྭཱ ཨཝསེསཱ དྷརནྟེཔི བྷགཝཏི ཨཱཔཛྫཏི, པརིནིབྦུཏེཔི.

པཝཱརེཏྭཱ ཨནཏིརིཏྟཾ བྷུཉྫནྟོ ཨཱཔཏྟིཾ ཀཱལེ ཨཱཔཛྫཏི ནོ ཝིཀཱལེ. ཝིཀཱལབྷོཛནཱཔཏྟིཾ ¶ པན ཝིཀཱལེ ཨཱཔཛྫཏི ནོ ཀཱལེ. ཨཝསེསཱ ¶ ཀཱལེ ཙེཝ ཨཱཔཛྫཏི ཝིཀཱལེ ཙ. སཧགཱརསེཡྻཾ རཏྟིཾ ཨཱཔཛྫཏི, དྭཱརཾ ཨསཾཝརིཏྭཱ པཊིསལླཱིཡནཾ དིཝཱ. སེསཱ རཏྟིཉྩེཝ དིཝཱ ཙ. ‘‘དསཝསྶོམྷི ཨཏིརེཀདསཝསྶོམྷཱི’’ཏི བཱལོ ཨབྱཏྟོ པརིསཾ ཨུཔཊྛཱཔེནྟོ དསཝསྶོ ཨཱཔཛྫཏི ནོ ཨཱུནདསཝསྶོ ¶ . ‘‘ཨཧཾ པཎྜིཏོ བྱཏྟོ’’ཏི ནཝོ ཝཱ མཛ྄ཛྷིམོ ཝཱ པརིསཾ ཨུཔཊྛཱཔེནྟོ ཨཱུནདསཝསྶོ ཨཱཔཛྫཏི ནོ དསཝསྶོ. སེསཱ དསཝསྶོ ཙེཝ ཨཱཔཛྫཏི ཨཱུནདསཝསྶོ ཙ. ‘‘པཉྩཝསྶོམྷཱི’’ཏི བཱལོ ཨབྱཏྟོ ཨནིསྶཱཡ ཝསནྟོ པཉྩཝསྶོ ཨཱཔཛྫཏི. ‘‘ཨཧཾ པཎྜིཏོ བྱཏྟོ’’ཏི ནཝཀོ ཨནིསྶཱཡ ཝསནྟོ ཨཱུནཔཉྩཝསྶོ ཨཱཔཛྫཏི. སེསཾ པཉྩཝསྶོ ཙེཝ ཨཱཔཛྫཏི ཨཱུནཔཉྩཝསྶོ ཙ. ཨནུཔསམྤནྣཾ པདསོདྷམྨཾ ཝཱཙེནྟོ, མཱཏུགཱམསྶ དྷམྨཾ དེསེནྟོ ཨེཝརཱུཔཾ ཨཱཔཏྟིཾ ཀུསལཙིཏྟོ ཨཱཔཛྫཏི, པཱརཱཛིཀ-སུཀྐཝིསྶཊྛི-ཀཱཡསཾསགྒ-དུཊྛུལླ-ཨཏྟཀཱམཔཱརིཙརིཡ-དུཊྛདོས-སངྒྷབྷེདཔཧཱརདཱན-ཏལསཏྟིཀཱདིབྷེདཾ ཨཀུསལཙིཏྟོ ཨཱཔཛྫཏི, ཨསཉྩིཙྩ སཧགཱརསེཡྻཱདིཾ ཨབྱཱཀཏཙིཏྟོ ཨཱཔཛྫཏི, ཡཾ ཨརཧཱཝ ཨཱཔཛྫཏི, སབྦཾ ཨབྱཱཀཏཙིཏྟོཝ ཨཱཔཛྫཏི, མེཐུནདྷམྨཱདིབྷེདམཱཔཏྟིཾ སུཁཝེདནཱསམངྒཱི ཨཱཔཛྫཏི, དུཊྛདོསཱདིབྷེདཾ དུཀྑཝེདནཱསམངྒཱི, ཡཾ སུཁཝེདནཱསམངྒཱི ཨཱཔཛྫཏི, ཏཾཡེཝ མཛ྄ཛྷཏྟོ ཧུཏྭཱ ཨཱཔཛྫནྟོ ཨདུཀྑམསུཁཝེདནཱསམངྒཱི ཨཱཔཛྫཏི.

ཏཡོ པཊིཀྑེཔཱཏི བུདྡྷསྶ བྷགཝཏོ ཏཡོ པཊིཀྑེཔཱ. ཙཏཱུསུ པཙྩཡེསུ མཧིཙྪཏཱ ཨསནྟུཊྛིཏཱ ཀིལེསསལླེཁནཔཊིཔཏྟིཡཱ ཨགོཔཱཡནཱ, ཨིམེ ཧི ཏཡོ དྷམྨཱ བུདྡྷེན བྷགཝཏཱ པཊིཀྑིཏྟཱ. ཨཔྤིཙྪཏཱདཡོ པན ཏཡོ བུདྡྷེན བྷགཝཏཱ ཨནུཉྙཱཏཱ, ཏེན ཝུཏྟཾ ‘‘ཏཡོ ཨནུཉྙཱཏཱ’’ཏི.

‘‘དསཝསྶོམྷཱི’’ཏི པརིསཾ ཨུཔཊྛཱཔེནྟོ ‘‘པཉྩཝསྶོམྷཱི’’ཏི ནིསྶཡཾ ཨགཎྷནྟོ བཱལོ ཨཱཔཛྫཏི ནོ པཎྜིཏོ, ཨཱུནདསཝསྶོ ‘‘བྱཏྟོམྷཱི’’ཏི བཧུསྶུཏཏྟཱ པརིསཾ ཨུཔཊྛཱཔེནྟོ ཨཱུནཔཉྩཝསྶོ ཙ ནིསྶཡཾ ཨགཎྷནྟོ པཎྜིཏོ ཨཱཔཛྫཏི ནོ བཱལོ; ཨཝསེསཾ པཎྜིཏོ ཙེཝ ཨཱཔཛྫཏི བཱལོ ཙ. ཝསྶཾ ཨནུཔགཙྪནྟོ ཀཱལེ༹ ཨཱཔཛྫཏི ནོ ཛུཎྷེ; མཧཱཔཝཱརཎཱཡ ཨཔྤཝཱརེནྟོ ཛུཎྷེ ཨཱཔཛྫཏི ནོ ཀཱལེ༹; ཨཝསེསཾ ཀཱལེ༹ ཙེཝ ཨཱཔཛྫཏི ཛུཎྷེ ཙ. ཝསྶཱུཔགམནཾ ཀཱལེ༹ ¶ ཀཔྤཏི ནོ ཛུཎྷེ; མཧཱཔཝཱརཎཱཡ པཝཱརཎཱ ཛུཎྷེ ཀཔྤཏི ནོ ཀཱལེ༹; སེསཾ ཨནུཉྙཱཏཀཾ ཀཱལེ༹ ཙེཝ ཀཔྤཏི ཛུཎྷེ ཙ.

ཀཏྟིཀཔུཎྞམཱསིཡཱ ¶ པཙྪིམེ པཱཊིཔདདིཝསེ ཝིཀཔྤེཏྭཱ ཋཔིཏཾ ཝསྶིཀསཱཊིཀཾ ནིཝཱསེནྟོ ཧེམནྟེ ཨཱཔཛྫཏི. ཀུརུནྡིཡཾ པན ‘‘ཀཏྟིཀཔུཎྞམདིཝསེ ཨཔཙྩུདྡྷརིཏྭཱ ཧེམནྟེ ཨཱཔཛྫཏཱི’’ཏི ¶ ཝུཏྟཾ, ཏམྤི སུཝུཏྟཾ. ‘‘ཙཱཏུམཱསཾ ཨདྷིཊྛཱཏུཾ ཏཏོ པརཾ ཝིཀཔྤེཏུ’’ནྟི ཧི ཝུཏྟཾ. ཨཏིརེཀམཱསེ སེསེ གིམྷཱནེ པརིཡེསནྟོ ཨཏིརེཀཌྜྷམཱསེ སེསེ ཀཏྭཱ ནིཝཱསེནྟོ ཙ གིམྷེ ཨཱཔཛྫཏི ནཱམ. སཏིཡཱ ཝསྶིཀསཱཊིཀཱཡ ནགྒོ ཀཱཡཾ ཨོཝསྶཱཔེནྟོ ཝསྶེ ཨཱཔཛྫཏི ནཱམ. པཱརིསུདྡྷིཨུཔོསཐཾ ཝཱ ཨདྷིཊྛཱནུཔོསཐཾ ཝཱ ཀརོནྟོ སངྒྷོ ཨཱཔཛྫཏི. སུཏྟུདྡེསཉྩ ཨདྷིཊྛཱནུཔོསཐཉྩ ཀརོནྟོ གཎོ ཨཱཔཛྫཏི. ཨེཀཀོ སུཏྟུདྡེསཾ པཱརིསུདྡྷིཨུཔོསཐཉྩ ཀརོནྟོ པུགྒལོ ཨཱཔཛྫཏི. པཝཱརཎཱཡཔི ཨེསེཝ ནཡོ.

སངྒྷུཔོསཐོ ཙ སངྒྷཔཝཱརཎཱ ཙ སངྒྷསྶེཝ ཀཔྤཏི. གཎུཔོསཐོ ཙ གཎཔཝཱརཎཱ ཙ གཎསྶེཝ ཀཔྤཏི. ཨདྷིཊྛཱནུཔོསཐོ ཙ ཨདྷིཊྛཱནཔཝཱརཎཱ ཙ པུགྒལསྶེཝ ཀཔྤཏི. ‘‘པཱརཱཛིཀཾ ཨཱཔནྣོམྷཱི’’ཏིཨཱདཱིནི བྷཎནྟོ ཝཏྠུཾ ཚཱདེཏི ན ཨཱཔཏྟིཾ, ‘‘མེཐུནཾ དྷམྨཾ པཊིསེཝི’’ནྟིཨཱདཱིནི བྷཎནྟོ ཨཱཔཏྟིཾ ཚཱདེཏི ནོ ཝཏྠུཾ, ཡོ ནེཝ ཝཏྠུཾ ན ཨཱཔཏྟིཾ ཨཱརོཙེཏི, ཨཡཾ ཝཏྠུཉྩེཝ ཚཱདེཏི ཨཱཔཏྟིཉྩ.

པཊིཙྪཱདེཏཱིཏི པཊིཙྪཱདི. ཛནྟཱགྷརམེཝ པཊིཙྪཱདི ཛནྟཱགྷརཔཊིཙྪཱདི. ཨིཏརཱསུཔི ཨེསེཝ ནཡོ. དྭཱརཾ པིདཧིཏྭཱ ཨནྟོཛནྟཱགྷརེ ཋིཏེན པརིཀམྨཾ ཀཱཏུཾ ཝཊྚཏི. ཨུདཀེ ཨོཏིཎྞེནཱཔི ཨེཏདེཝ ཝཊྚཏི. ཨུབྷཡཏྠ ཁཱདིཏུཾ བྷུཉྫིཏུཾ ཝཱ ན ཝཊྚཏི. ཝཏྠཔཊིཙྪཱདི སབྦཀཔྤིཡཏཱཡ པཊིཙྪནྣེན སབྦཾ ཀཱཏུཾ ཝཊྚཏི. ཝཧནྟཱིཏི ཡནྟི ནིཡྻནྟི; ནིནྡཾ ཝཱ པཊིཀྐོསཾ ཝཱ ན ལབྷནྟི. ཙནྡམཎྜལཾ ཨབྦྷཱམཧིཀཱདྷཱུམརཛརཱཧུཝིམུཏྟཾ ཝིཝཊཾཡེཝ ཝིརོཙཏི, ན ཏེསུ ཨཉྙཏརེན པཊིཙྪནྣཾ. ཏཐཱ སཱུརིཡམཎྜལཾ, དྷམྨཝིནཡོཔི ཝིཝརིཏྭཱ ཝིབྷཛིཏྭཱ དེསིཡམཱནོཝ ཝིརོཙཏི ནོ པཊིཙྪནྣོ.

ཨཉྙེན ¶ བྷེསཛྫེན ཀརཎཱིཡེན ཨཉྙཾ ཝིཉྙཱཔེནྟོ གིལཱནོ ཨཱཔཛྫཏི, ན བྷེསཛྫེན ཀརཎཱིཡེན བྷེསཛྫཾ ཝིཉྙཱཔེནྟོ ཨགིལཱནོ ཨཱཔཛྫཏི, ཨཝསེསཾ ཨཱཔཏྟིཾ གིལཱནོ ཙེཝ ཨཱཔཛྫཏི ཨགིལཱནོ ཙ.

ཨནྟོ ཨཱཔཛྫཏི ནོ བཧཱིཏི ཨནུཔཁཛྫ སེཡྻཾ ཀཔྤེནྟོ ཨནྟོ ཨཱཔཛྫཏི ནོ བཧི, བཧི ¶ ཨཱཔཛྫཏི ནོ ཨནྟོཏི སངྒྷིཀཾ མཉྩཱདིཾ ཨཛ྄ཛྷོཀཱསེ སནྠརིཏྭཱ པཀྐམནྟོ བཧི ཨཱཔཛྫཏི ནོ ཨནྟོ, ཨཝསེསཾ པན ཨནྟོ ཙེཝ ཨཱཔཛྫཏི བཧི ཙ. ཨནྟོསཱིམཱཡཱཏི ཨཱགནྟུཀོ ཨཱགནྟུཀཝཏྟཾ ཨདསྶེཏྭཱ སཚཏྟུཔཱཧནོ ཝིཧཱརཾ པཝིསནྟོ ཨུཔཙཱརསཱིམཾ ཨོཀྐནྟམཏྟོཝ ཨཱཔཛྫཏི. བཧིསཱིམཱཡཱཏི གམིཀོ ¶ དཱརུབྷཎྜཔཊིསཱམནཱདིགམིཀཝཏྟཾ ཨཔཱུརེཏྭཱ པཀྐམནྟོ ཨུཔཙཱརསཱིམཾ ཨཏིཀྐནྟམཏྟོཝ ཨཱཔཛྫཏི. ཨཝསེསཾ ཨནྟོསཱིམཱཡ ཙེཝ ཨཱཔཛྫཏི བཧིསཱིམཱཡ ཙ. སཏི ཝུཌྜྷཏརེ ཨནཛ྄ཛྷིཊྛོ དྷམྨཾ བྷཱསནྟོ སངྒྷམཛ྄ཛྷེ ཨཱཔཛྫཏི ནཱམ. གཎམཛ྄ཛྷེཔི པུགྒལསནྟིཀེཔི ཨེསེཝ ནཡོ. ཀཱཡེན ཝུཊྛཱཏཱིཏི ཏིཎཝཏྠཱརཀསམཐེན ཝུཊྛཱཏི. ཀཱཡཾ ཨཙཱལེཏྭཱ ཝཱཙཱཡ དེསེནྟསྶ ཝཱཙཱཡ ཝུཊྛཱཏི. ཝཙཱིསམྤཡུཏྟཾ ཀཱཡཀིརིཡཾ ཀཏྭཱ དེསེནྟསྶ ཀཱཡེན ཝཱཙཱཡ ཝུཊྛཱཏི ནཱམ. སངྒྷམཛ྄ཛྷེ དེསནཱགཱམིནཱིཔི ཝུཊྛཱནགཱམིནཱིཔི ཝུཊྛཱཏི. གཎཔུགྒལམཛ྄ཛྷེ པན དེསནཱགཱམིནཱིཡེཝ ཝུཊྛཱཏི.

ཨཱགཱལ༹ྷཱཡ ཙེཏེཡྻཱཏི ཨཱགཱལ༹ྷཱཡ དལ༹ྷབྷཱཝཱཡ ཙེཏེཡྻ; ཏཛྫནཱིཡཀམྨཱདིཀཏསྶ ཝཏྟཾ ན པཱུརཡཏོ ཨིཙྪམཱནོ སངྒྷོ ཨུཀྑེཔནཱིཡཀམྨཾ ཀརེཡྻཱཏི ཨཏྠོ. ཨལཛྫཱི ཙ ཧོཏི བཱལོ ཙ ཨཔཀཏཏྟོ ཙཱཏི ཨེཏྠ བཱལོ ‘‘ཨཡཾ དྷམྨཱདྷམྨཾ ན ཛཱནཱཏི’’ ཨཔཀཏཏྟོ ཝཱ ‘‘ཨཱཔཏྟཱནཱཔཏྟིཾ ན ཛཱནཱཏཱི’’ཏི ན ཨེཏྟཱཝཏཱ ཀམྨཾ ཀཱཏབྦཾ; བཱལབྷཱཝམཱུལཀཾ པན ཨཔཀཏཏྟབྷཱཝམཱུལཀཉྩ ཨཱཔཏྟིཾ ཨཱཔནྣསྶ ཀམྨཾ ཀཱཏབྦནྟི ཨཏྠོ. ཨདྷིསཱིལེ སཱིལཝིཔནྣོ ནཱམ དྭེ ཨཱཔཏྟིཀྑནྡྷེ ཨཱཔནྣོ; ཨཱཙཱརཝིཔནྣོ ནཱམ པཉྩ ཨཱཔཏྟིཀྑནྡྷེ ཨཱཔནྣོ; དིཊྛིཝིཔནྣོ ནཱམ ཨནྟགྒཱཧིཀཱཡ དིཊྛིཡཱ སམནྣཱགཏོ. ཏེསཾ ཨཱཔཏྟིཾ ཨཔསྶནྟཱནཾ ཨཔྤཊིཀརོནྟཱནཾ དིཊྛིཉྩ ཨནིསྶཛྫནྟཱནཾཡེཝ ཀམྨཾ ཀཱཏབྦཾ.

ཀཱཡིཀོ དཝོ ནཱམ པཱསཀཱདཱིཧི ཛཱུཏཀཱིལ༹ནཱདིབྷེདོ ཨནཱཙཱརོ; ཝཱཙསིཀོ དཝོ ནཱམ མུཁཱལམྦརཀརཎཱདིབྷེདོ ཨནཱཙཱརོ; ཀཱཡིཀཝཱཙསིཀོ ནཱམ ནཙྩནགཱཡནཱདིབྷེདོ དྭཱིཧིཔི དྭཱརེཧི ཨནཱཙཱརོ ¶ . ཀཱཡིཀོ ཨནཱཙཱརོ ནཱམ ཀཱཡདྭཱརེ པཉྙཏྟསིཀྑཱཔདཝཱིཏིཀྐམོ; ཝཱཙསིཀོ ཨནཱཙཱརོ ནཱམ ཝཙཱིདྭཱརེ པཉྙཏྟསིཀྑཱཔདཝཱིཏིཀྐམོ; ཀཱཡིཀཝཱཙསིཀོ ནཱམ དྭཱརདྭཡེཔི པཉྙཏྟསིཀྑཱཔདཝཱིཏིཀྐམོ. ཀཱཡིཀེན ཨུཔགྷཱཏིཀེནཱཏི ཀཱཡདྭཱརེ པཉྙཏྟསྶ སིཀྑཱཔདསྶ ཨསིཀྑནེན, ཡོ ཧི ཏཾ ན སིཀྑཏི, སོ ནཾ ཨུཔགྷཱཏེཏི, ཏསྨཱ ཏསྶ ཏཾ ཨསིཀྑནཾ ‘‘ཀཱཡིཀཾ ཨུཔགྷཱཏིཀ’’ནྟི ཝུཙྩཏི. སེསཔདདྭཡེཔི ཨེསེཝ ནཡོ. ཀཱཡིཀེན མིཙྪཱཛཱིཝེནཱཏི ཛངྒྷཔེསནིཀཱདིནཱ ཝཱ གཎྜཕཱལནཱདིནཱ ཝཱ ཝེཛྫཀམྨེན ¶ ; ཝཱཙསིཀེནཱཏི སཱསནཨུགྒཧཎཨཱརོཙནཱདིནཱ; ཏཏིཡཔདཾ ཨུབྷཡསམྤཡོགཝསེན ¶ ཝུཏྟཾ.

ཨལཾ བྷིཀྑུ མཱ བྷཎྜནནྟི ཨལཾ བྷིཀྑུ མཱ བྷཎྜནཾ ཀརི, མཱ ཀལཧཾ, མཱ ཝིཝཱདཾ ཀརཱིཏི ཨཏྠོ. ན ཝོཧརིཏབྦནྟི ན ཀིཉྩི ཝཏྟབྦཾ; ཝདཏོཔི ཧི ཏཱདིསསྶ ཝཙནཾ ན སོཏབྦཾ མཉྙནྟི. ན ཀིསྨིཉྩི པཙྩེཀཊྛཱནེཏི ཀིསྨིཉྩི བཱིཛནགྒཱཧཱདིཀེ ཨེཀསྨིམྤི ཛེཊྛཀཊྛཱནེ ན ཋཔེཏབྦོཏི ཨཏྠོ. ཨོཀཱསཀམྨཾ ཀཱརེནྟསྶཱཏི ‘‘ཀརོཏུ ཨཱཡསྨཱ ཨོཀཱསཾ, ཨཧཾ ཏཾ ཝཏྟུཀཱམོ’’ཏི ཨེཝཾ ཨོཀཱསཾ ཀཱརེནྟསྶ. ནཱལཾ ཨོཀཱསཀམྨཾ ཀཱཏུནྟི ‘‘ཀིཾ ཏྭཾ ཀརིསྶསཱི’’ཏི ཨོཀཱསོ ན ཀཱཏབྦོ. སཝཙནཱིཡཾ ནཱདཱཏབྦནྟི ཝཙནཾ ན ཨཱདཱཏབྦཾ, ཝཙནམྤི ན སོཏབྦཾ; ཡཏྠ གཧེཏྭཱ གནྟུཀཱམོ ཧོཏི, ན ཏཏྠ གནྟབྦནྟི ཨཏྠོ.

ཏཱིཧངྒེཧི སམནྣཱགཏསྶ བྷིཀྑུནོ ཝིནཡོཏི ཡཾ སོ ཛཱནཱཏི, སོ ཏསྶ ཝིནཡོ ནཱམ ཧོཏི; སོ ན པུཙྪིཏབྦོཏི ཨཏྠོ. ཨནུཡོགོ ན དཱཏབྦོཏི ‘‘ཨིདཾ ཀཔྤཏཱི’’ཏི པུཙྪནྟསྶ པུཙྪཱཡ ཨོཀཱསོ ན དཱཏབྦོ, ‘‘ཨཉྙཾ པུཙྪཱ’’ཏི ཝཏྟབྦོ. ཨིཏི སོ ནེཝ པུཙྪིཏབྦོ ནཱསྶ པུཙྪཱ སོཏབྦཱཏི ཨཏྠོ. ཝིནཡོ ན སཱཀཙྪཱཏབྦོཏི ཝིནཡཔཉྷོ ན སཱཀཙྪིཏབྦོ, ཀཔྤིཡཱཀཔྤིཡཀཐཱ ན སཾསནྡེཏབྦཱ.

ཨིདམཔྤཧཱཡཱཏི ཨེཏཾ བྲཧྨཙཱརིཔཊིཉྙཱཏཱདིཀཾ ལདྡྷིཾ ཨཝིཛཧིཏྭཱ. སུདྡྷཾ བྲཧྨཙཱརིནྟི ཁཱིཎཱསཝཾ བྷིཀྑུཾ. ‘‘པཱཏབྱཏཾ ཨཱཔཛྫཏཱི’’ཏི པཱཏབྱབྷཱཝཾ པཊིསེཝནཾ ཨཱཔཛྫཏི. ‘‘ཨིདམཔྤཧཱཡཱ’’ཏི ཝཙནཏོ པན ཏཾ བྲཧྨཙཱརིཔཊིཉྙཱཏཾ པཧཱཡ ཁཱིཎཱསཝཾ ‘‘མུསཱ མཡཱ བྷཎིཏཾ, ཁམཐ མེ’’ཏི ¶ ཁམཱཔེཏྭཱ ‘‘ནཏྠི ཀཱམེསུ དོསོ’’ཏི ལདྡྷིཾ ཝིཛཧིཏྭཱ གཏིཝིསོདྷནཾ ཀརེཡྻ. ཨཀུསལམཱུལཱནཱིཏི ཨཀུསལཱནི ཙེཝ མཱུལཱནི ཙ, ཨཀུསལཱནཾ ཝཱ མཱུལཱནི ཨཀུསལམཱུལཱནི. ཀུསལམཱུལེསུཔི ཨེསེཝ ནཡོ. དུཊྛུ ཙརིཏཱནི ཝིརཱུཔཱནི ཝཱ ཙརིཏཱནི དུཙྩརིཏཱནི. སུཊྛུ ཙརིཏཱནི སུནྡརཱནི ཝཱ ཙརིཏཱནི སུཙརིཏཱནི. ཀཱཡེན ཀརཎབྷཱུཏེན ཀཏཾ དུཙྩརིཏཾ ཀཱཡདུཙྩརིཏཾ. ཨེས ནཡོ སབྦཏྠ. སེསཾ ཏཏྠ ཏཏྠ ཝུཏྟནཡཏྟཱ ཨུཏྟཱནམེཝཱཏི.

ཏིཀཝཱརཝཎྞནཱ ནིཊྛིཏཱ.

ཙཏུཀྐཝཱརཝཎྞནཱ

༣༢༤. ཙཏུཀྐེསུ ¶ སཀཝཱཙཱཡ ཨཱཔཛྫཏི པརཝཱཙཱཡ ཝུཊྛཱཏཱིཏི ཝཙཱིདྭཱརིཀཾ པདསོདྷམྨཱདིབྷེདཾ ཨཱཔཏྟིཾ ཨཱཔཛྫིཏྭཱ ཏིཎཝཏྠཱརཀསམཐཊྛཱནཾ གཏོ པརསྶ ཀམྨཝཱཙཱཡ ཝུཊྛཱཏི ¶ . པརཝཱཙཱཡ ཨཱཔཛྫཏི སཀཝཱཙཱཡ ཝུཊྛཱཏཱིཏི པཱཔིཀཱཡ དིཊྛིཡཱ ཨཔྤཊིནིསྶགྒེ པརསྶ ཀམྨཝཱཙཱཡ ཨཱཔཛྫཏི, པུགྒལསྶ སནྟིཀེ དེསེནྟོ སཀཝཱཙཱཡ ཝུཊྛཱཏི. སཀཝཱཙཱཡ ཨཱཔཛྫཏི སཀཝཱཙཱཡ ཝུཊྛཱཏཱིཏི ཝཙཱིདྭཱརིཀཾ པདསོདྷམྨཱདིབྷེདཾ ཨཱཔཏྟིཾ སཀཝཱཙཱཡ ཨཱཔཛྫཏི, དེསེཏྭཱ ཝུཊྛཧནྟོཔི སཀཝཱཙཱཡ ཝུཊྛཱཏི. པརཝཱཙཱཡ ཨཱཔཛྫཏི པརཝཱཙཱཡ ཝུཊྛཱཏཱིཏི ཡཱཝཏཏིཡཀཾ སངྒྷཱདིསེསཾ པརསྶ ཀམྨཝཱཙཱཡ ཨཱཔཛྫཏི, ཝུཊྛཧནྟོཔི པརསྶ པརིཝཱསཀམྨཝཱཙཱདཱིཧི ཝུཊྛཱཏི. ཏཏོ པརེསུ ཀཱཡདྭཱརིཀཾ ཀཱཡེན ཨཱཔཛྫཏི, དེསེནྟོ ཝཱཙཱཡ ཝུཊྛཱཏི. ཝཙཱིདྭཱརིཀཾ ཝཱཙཱཡ ཨཱཔཛྫཏི, ཏིཎཝཏྠཱརཀེ ཀཱཡེན ཝུཊྛཱཏི. ཀཱཡདྭཱརིཀཾ ཀཱཡེན ཨཱཔཛྫཏི, ཏམེཝ ཏིཎཝཏྠཱརཀེ ཀཱཡེན ཝུཊྛཱཏི. ཝཙཱིདྭཱརིཀཾ ཝཱཙཱཡ ཨཱཔཛྫཏི, ཏམེཝ དེསེནྟོ ཝཱཙཱཡ ཝུཊྛཱཏི. སངྒྷིཀམཉྩསྶ ཨཏྟནོ པཙྩཏྠརཎེན ཨནཏྠརཏོ ཀཱཡསམྥུསནེ ལོམགཎནཱཡ ཨཱཔཛྫིཏབྦཱཔཏྟིཾ སཧགཱརསེཡྻཱཔཏྟིཉྩ པསུཏྟོ ཨཱཔཛྫཏི, པབུཛ྄ཛྷིཏྭཱ པན ཨཱཔནྣབྷཱཝཾ ཉཏྭཱ དེསེནྟོ པཊིབུདྡྷོ ཝུཊྛཱཏི. ཛགྒནྟོ ཨཱཔཛྫིཏྭཱ པན ཏིཎཝཏྠཱརཀསམཐཊྛཱནེ སཡནྟོ པཊིབུདྡྷོ ཨཱཔཛྫཏི པསུཏྟོ ཝུཊྛཱཏི ནཱམ. པཙྪིམཔདདྭཡམྤི ཝུཏྟཱནུསཱརེནེཝ ཝེདིཏབྦཾ.

ཨཙིཏྟཀཱཔཏྟིཾ ¶ ཨཙིཏྟཀོ ཨཱཔཛྫཏི ནཱམ. པཙྪཱ དེསེནྟོ སཙིཏྟཀོ ཝུཊྛཱཏི. སཙིཏྟཀཱཔཏྟིཾ སཙིཏྟཀོ ཨཱཔཛྫཏི ནཱམ. ཏིཎཝཏྠཱརཀཊྛཱནེ སཡནྟོ ཨཙིཏྟཀོ ཝུཊྛཱཏི. སེསཔདདྭཡམྤི ཝུཏྟཱནུསཱརེནེཝ ཝེདིཏབྦཾ. ཡོ སབྷཱགཾ ཨཱཔཏྟིཾ དེསེཏི, ཨཡཾ དེསནཱཔཙྩཡཱ དུཀྐཊཾ ཨཱཔཛྫནྟོ པཱཙིཏྟིཡཱདཱིསུ ཨཉྙཏརཾ དེསེཏི, ཏཉྩ དེསེནྟོ དུཀྐཊཾ ཨཱཔཛྫཏི. ཏཾ པན དུཀྐཊཾ ཨཱཔཛྫནྟོ པཱཙིཏྟིཡཱདིཏོ ཝུཊྛཱཏི. པཱཙིཏྟིཡཱདིཏོ ཙ ཝུཊྛཧནྟོ ཏཾ ཨཱཔཛྫཏི. ཨིཏི ཨེཀསྶ པུགྒལསྶ ཨེཀམེཝ པཡོགཾ སནྡྷཱཡ ‘‘ཨཱཔཏྟིཾ ཨཱཔཛྫནྟོ དེསེཏཱི’’ཏི ཨིདཾ ཙཏུཀྐཾ ཝུཏྟནྟི ཝེདིཏབྦཾ.

ཀམྨཙཏུཀྐེ པཱཔིཀཱཡ དིཊྛིཡཱ ཨཔྤཊིནིསྶགྒཱཔཏྟིཾ ཀམྨེན ཨཱཔཛྫཏི, དེསེནྟོ ཨཀམྨེན ཝུཊྛཱཏི. ཝིསྶཊྛིཨཱདིཀཾ ཨཀམྨེན ཨཱཔཛྫཏི, པརིཝཱསཱདིནཱ ཀམྨེན ཝུཊྛཱཏི. སམནུབྷཱསནཾ ¶ ཀམྨེནེཝ ཨཱཔཛྫཏི, ཀམྨེན ཝུཊྛཱཏི. སེསཾ ཨཀམྨེན ཨཱཔཛྫཏི, ཨཀམྨེན ཝུཊྛཱཏི.

པརིཀྑཱརཙཏུཀྐེ པཋམོ ¶ སཀཔརིཀྑཱརོ, དུཏིཡོ སངྒྷིཀོཝ ཏཏིཡོ ཙེཏིཡསནྟཀོ, ཙཏུཏྠོ གིཧིཔརིཀྑཱརོ. སཙེ པན སོ པཏྟཙཱིཝརནཝཀམྨབྷེསཛྫཱནཾ ཨཏྠཱཡ ཨཱཧཊོ ཧོཏི, ཨཝཱཔུརཎཾ དཱཏུཾ ཨནྟོ ཋཔཱཔེཏུཉྩ ཝཊྚཏི.

སམྨུཁཱཙཏུཀྐེ པཱཔིཀཱཡ དིཊྛིཡཱ ཨཔྤཊིནིསྶགྒཱཔཏྟིཾ སངྒྷསྶ སམྨུཁཱ ཨཱཔཛྫཏི, ཝུཊྛཱནཀཱལེ པན སངྒྷེན ཀིཙྩཾ ནཏྠཱིཏི པརམྨུཁཱ ཝུཊྛཱཏི. ཝིསྶཊྛིཨཱདིཀཾ པརམྨུཁཱ ཨཱཔཛྫཏི, སངྒྷསྶ སམྨུཁཱ ཝུཊྛཱཏི. སམནུབྷཱསནཾ སངྒྷསྶ སམྨུཁཱ ཨེཝ ཨཱཔཛྫཏི, སམྨུཁཱ ཝུཊྛཱཏི. སེསཾ སམྤཛཱནམུསཱཝཱདཱདིབྷེདཾ པརམྨུཁཱཝ ཨཱཔཛྫཏི, པརམྨུཁཱཝ ཝུཊྛཱཏི. ཨཛཱནནྟཙཏུཀྐཾ ཨཙིཏྟཀཙཏུཀྐསདིསཾ.

ལིངྒཔཱཏུབྷཱཝེནཱཏི སཡིཏསྶེཝ བྷིཀྑུསྶ ཝཱ བྷིཀྑུནིཡཱ ཝཱ ལིངྒཔརིཝཏྟེ ཛཱཏེ སཧགཱརསེཡྻཱཔཏྟི ཧོཏི ཨིདམེཝ ཏཾ པཊིཙྩ ཝུཏྟཾ. ཨུབྷིནྣམྤི པན ཨསཱདྷཱརཎཱཔཏྟི ལིངྒཔཱཏུབྷཱཝེན ཝུཊྛཱཏི. སཧཔཊིལཱབྷཙཏུཀྐེ ཡསྶ བྷིཀྑུནོ ལིངྒཾ པརིཝཏྟཏི, སོ སཧ ལིངྒཔཊིལཱབྷེན པཋམཾ ཨུཔྤནྣཝསེན སེཊྛབྷཱཝེན ཙ པུརིམཾ པུརིསལིངྒཾ ཛཧཏི, པཙྪིམེ ཨིཏྠིལིངྒེ པཏིཊྛཱཏི, པུརིསཀུཏྟཔུརིསཱཀཱརཱདིཝསེན པཝཏྟཱ ཀཱཡཝཙཱིཝིཉྙཏྟིཡོ པཊིཔྤསྶམྦྷནྟི, བྷིཀྑཱུཏི ཝཱ པུརིསོཏི ཝཱ ཨེཝཾ པཝཏྟཱ པཎྞཏྟིཡོ ¶ ནིརུཛ྄ཛྷནྟི, ཡཱནི བྷིཀྑུནཱིཧི ཨསཱདྷཱརཎཱནི ཚཙཏྟཱལཱིས སིཀྑཱཔདཱནི ཏེཧི ཨནཱཔཏྟིཡེཝ ཧོཏི. དུཏིཡཙཏུཀྐེ པན ཡསྶཱ བྷིཀྑུནིཡཱ ལིངྒཾ པརིཝཏྟཏི, སཱ པཙྪཱསམུཔྤཏྟིཡཱ ཝཱ ཧཱིནབྷཱཝེན ཝཱ པཙྪིམནྟི སངྑྱཾ གཏཾ ཨིཏྠིལིངྒཾ ཛཧཏི, ཝུཏྟཔྤཀཱརེན པུརིམནྟི སངྑྱཾ གཏེ པུརིསལིངྒེ པཏིཊྛཱཏི. ཝུཏྟཝིཔརཱིཏཱ ཝིཉྙཏྟིཡོ པཊིཔྤསྶམྦྷནྟི, བྷིཀྑུནཱིཏི ཝཱ ཨིཏྠཱིཏི ཝཱ ཨེཝཾ པཝཏྟཱ པཎྞཏྟིཡོཔི ནིརུཛ྄ཛྷནྟི, ཡཱནི བྷིཀྑཱུཧི ཨསཱདྷཱརཎཱནི སཏཾ ཏིཾསཉྩ སིཀྑཱཔདཱནི, ཏེཧི ཨནཱཔཏྟིཡེཝ ཧོཏི.

ཙཏྟཱརོ སཱམུཀྐཾསཱཏི ཙཏྟཱརོ མཧཱཔདེསཱ, ཏེ ཧི བྷགཝཏཱ ཨནུཔྤནྣེ ཝཏྠུམྷི སཡཾ ཨུཀྐཾསིཏྭཱ ཨུཀྑིཔིཏྭཱ ཋཔིཏཏྟཱ ‘‘སཱམུཀྐཾསཱ’’ཏི ཝུཙྩནྟི. པརིབྷོགཱཏི ཨཛ྄ཛྷོཧརཎཱིཡཔརིབྷོགཱ ¶ , ཨུདཀཾ པན ཨཀཱལིཀཏྟཱ ཨཔྤཊིགྒཧིཏཀཾ ཝཊྚཏི. ཡཱཝཀཱལིཀཱདཱིནི ཨཔྤཊིགྒཧིཏཀཱནི ཨཛ྄ཛྷོཧརིཏུཾ ན ཝཊྚནྟི. ཙཏྟཱརི མཧཱཝིཀཊཱནི ཀཱལོདིསྶཏྟཱ ཡཐཱཝུཏྟེ ཀཱལེ ཝཊྚནྟི. ཨུཔཱསཀོ སཱིལཝཱཏི པཉྩ ཝཱ དས ¶ ཝཱ སཱིལཱནི གོཔཡམཱནོ.

ཨཱགནྟུཀཱདིཙཏུཀྐེ སཚཏྟུཔཱཧནོ སསཱིསཾ པཱརུཏོ ཝིཧཱརཾ པཝིསནྟོ ཏཏྠ ཝིཙརནྟོ ཙ ཨཱགནྟུཀོཝ ཨཱཔཛྫཏི, ནོ ཨཱཝཱསིཀོ. ཨཱཝཱསིཀཝཏྟཾ ཨཀརོནྟོ པན ཨཱཝཱསིཀོ ཨཱཔཛྫཏི, ནོ ཨཱགནྟུཀོ. སེསཾ ཀཱཡཝཙཱིདྭཱརིཀཾ ཨཱཔཏྟིཾ ཨུབྷོཔི ཨཱཔཛྫནྟི, ཨསཱདྷཱརཎཾ ཨཱཔཏྟིཾ ནེཝ ཨཱགནྟུཀོ ཨཱཔཛྫཏི, ནོ ཨཱཝཱསིཀོ. གམིཡཙཏུཀྐེཔི གམིཡཝཏྟཾ ཨཔཱུརེཏྭཱ གཙྪནྟོ གམིཀོ ཨཱཔཛྫཏི, ནོ ཨཱཝཱསིཀོ. ཨཱཝཱསིཀཝཏྟཾ ཨཀརོནྟོ པན ཨཱཝཱསིཀོ ཨཱཔཛྫཏི, ནོ གམིཀོ. སེསཾ ཨུབྷོཔི ཨཱཔཛྫནྟི, ཨསཱདྷཱརཎཾ ཨུབྷོཔི ནཱཔཛྫནྟི. ཝཏྠུནཱནཏྟཏཱདིཙཏུཀྐེ ཙཏུནྣཾ པཱརཱཛིཀཱནཾ ཨཉྙམཉྙཾ ཝཏྠུནཱནཏྟཏཱཝ ཧོཏི,ན ཨཱཔཏྟིནཱནཏྟཏཱ. སབྦཱཔི ཧི སཱ པཱརཱཛིཀཱཔཏྟིཡེཝ. སངྒྷཱདིསེསཱདཱིསུཔི ཨེསེཝ ནཡོ. བྷིཀྑུསྶ ཙ བྷིཀྑུནིཡཱ ཙ ཨཉྙམཉྙཾ ཀཱཡསཾསགྒེ བྷིཀྑུསྶ སངྒྷཱདིསེསོ བྷིཀྑུནིཡཱ པཱརཱཛིཀནྟི ཨེཝཾ ཨཱཔཏྟིནཱནཏྟཏཱཝ ཧོཏི, ན ཝཏྠུནཱནཏྟཏཱ, ཨུབྷིནྣམྤི ཧི ཀཱཡསཾསགྒོཝ ཝཏྠུ. ཏཐཱ ‘‘ལསུཎཀྑཱདནེ བྷིཀྑུནིཡཱ པཱཙིཏྟིཡཾ, བྷིཀྑུསྶ དུཀྐཊ’’ནྟི ཨེཝམཱདིནཱཔེཏྠ ནཡེན ཡོཛནཱ ཝེདིཏབྦཱ. ཙཏུནྣཾ པཱརཱཛིཀཱནཾ ཏེརསཧི སངྒྷཱདིསེསེཧི སདྡྷིཾ ཝཏྠུནཱནཏྟཏཱ ཙེཝ ཨཱཔཏྟིནཱནཏྟཏཱ ¶ ཙ. ཨེཝཾ སངྒྷཱདིསེསཱདཱིནཾ ཨནིཡཏཱདཱིཧི. ཨཱདིཏོ པཊྛཱཡ ཙཏྟཱརི པཱརཱཛིཀཱནི ཨེཀཏོ ཨཱཔཛྫནྟཱནཾ བྷིཀྑུབྷིཀྑུནཱིནཾ ནེཝ ཝཏྠུནཱནཏྟཏཱ ནོ ཨཱཔཏྟིནཱནཏྟཏཱ. ཝིསུཾ ཨཱཔཛྫནྟེསུཔི སེསཱ སཱདྷཱརཎཱཔཏྟིཡོ ཨཱཔཛྫནྟེསུཔི ཨེསེཝ ནཡོ.

ཝཏྠུསབྷཱགཱདིཙཏུཀྐེ བྷིཀྑུསྶ ཙ བྷིཀྑུནིཡཱ ཙ ཀཱཡསཾསགྒེ ཝཏྠུསབྷཱགཏཱ, ནོ ཨཱཔཏྟིསབྷཱགཏཱ, ཙཏཱུསུ པཱརཱཛིཀེསུ ཨཱཔཏྟིསབྷཱགཏཱ, ནོ ཝཏྠུསབྷཱགཏཱ. ཨེས ནཡོ སངྒྷཱདིསེསཱདཱིསུ. བྷིཀྑུསྶ ཙ བྷིཀྑུནིཡཱ ཙ ཙཏཱུསུ པཱརཱཛིཀེསུ ཝཏྠུསབྷཱགཏཱ ཙེཝ ཨཱཔཏྟིསབྷཱགཏཱ ཙ. ཨེས ནཡོ སབྦཱསུ སཱདྷཱརཎཱཔཏྟཱིསུ. ཨསཱདྷཱརཎཱཔཏྟིཡཾ ནེཝ ཝཏྠུསབྷཱགཏཱ ནོ ཨཱཔཏྟིསབྷཱགཏཱ. ཡོ ཧི པུརིམཙཏུཀྐེ པཋམོ པཉྷོ, སོ ཨིདྷ དུཏིཡོ; ཡོ ཙ ཏཏྠ དུཏིཡོ, སོ ཨིདྷ པཋམོ. ཏཏིཡཙཏུཏྠེསུ ནཱནཱཀརཎཾ ནཏྠི.

ཨུཔཛ྄ཛྷཱཡཙཏུཀྐེ སདྡྷིཝིཧཱརིཀསྶ ཨུཔཛ྄ཛྷཱཡེན ཀཏྟབྦཝཏྟསྶ ཨཀརཎེ ཨཱཔཏྟིཾ ཨུཔཛ྄ཛྷཱཡོ ¶ ཨཱཔཛྫཏི, ནོ སདྡྷིཝིཧཱརིཀོ ཨུཔཛ྄ཛྷཱཡསྶ ཀཏྟབྦཝཏྟཾ ཨཀརོནྟོ སདྡྷིཝིཧཱརིཀོ ཨཱཔཛྫཏི, ནོ ཨུཔཛ྄ཛྷཱཡོ; སེསཾ ཨུབྷོཔི ¶ ཨཱཔཛྫནྟི, ཨསཱདྷཱརཎཾ ཨུབྷོཔི ནཱཔཛྫནྟི. ཨཱཙརིཡཙཏུཀྐེཔི ཨེསེཝ ནཡོ.

ཨཱདིཡནྟཙཏུཀྐེ པཱདཾ ཝཱ ཨཏིརེཀཔཱདཾ ཝཱ སཧཏྠཱ ཨཱདིཡནྟོ གརུཀཾ ཨཱཔཛྫཏི, ཨཱུནཀཔཱདཾ གཎྷཱཧཱིཏི ཨཱཎཏྟིཡཱ ཨཉྙཾ པཡོཛེནྟོ ལཧུཀཾ ཨཱཔཛྫཏི. ཨེཏེན ནཡེན སེསཔདཏྟཡཾ ཝེདིཏབྦཾ.

ཨབྷིཝཱདནཱརཧཙཏུཀྐེ བྷིཀྑུནཱིནཾ ཏཱཝ བྷཏྟགྒེ ནཝམབྷིཀྑུནིཏོ པཊྛཱཡ ཨུཔཛ྄ཛྷཱཡཱཔི ཨབྷིཝཱདནཱརཧཱ ནོ པཙྩུཊྛཱནཱརཧཱ. ཨཝིསེསེན ཙ ཝིཔྤཀཏབྷོཛནསྶ བྷིཀྑུསྶ ཡོ ཀོཙི ཝུཌྜྷཏརོ. སཊྛིཝསྶསྶཱཔི པཱརིཝཱསིཀསྶ སམཱིཔགཏོ ཏདཧུཔསམྤནྣོཔི པཙྩུཊྛཱནཱརཧོ ནོ ཨབྷིཝཱདནཱརཧོ. ཨཔྤཊིཀྑིཏྟེསུ ཋཱནེསུ ཝུཌྜྷོ ནཝཀསྶ ཨབྷིཝཱདནཱརཧོ ཙེཝ པཙྩུཊྛཱནཱརཧོ ཙ. ནཝཀོ པན ཝུཌྜྷསྶ ནེཝ ཨབྷིཝཱདནཱརཧོ ན པཙྩུཊྛཱནཱརཧོ. ཨཱསནཱརཧཙཏུཀྐསྶ པཋམཔདཾ པུརིམཙཏུཀྐེ དུཏིཡཔདེན, དུཏིཡཔདཉྩ པཋམཔདེན ཨཏྠཏོ སདིསཾ.

ཀཱལཙཏུཀྐེ ¶ པཝཱརེཏྭཱ བྷུཉྫནྟོ ཀཱལེ ཨཱཔཛྫཏི ནོ ཝིཀཱལེ, ཝིཀཱལབྷོཛནཱཔཏྟིཾ ཝིཀཱལེ ཨཱཔཛྫཏི ནོ ཀཱལེ, སེསཾ ཀཱལེ ཙེཝ ཨཱཔཛྫཏི ཝིཀཱལེ ཙ, ཨསཱདྷཱརཎཾ ནེཝ ཀཱལེ ནོ ཝིཀཱལེ. པཊིགྒཧིཏཙཏུཀྐེ པུརེབྷཏྟཾ པཊིགྒཧིཏཱམིསཾ ཀཱལེ ཀཔྤཏི ནོ ཝིཀཱལེ. པཱནཀཾ ཝིཀཱལེ ཀཔྤཏི, པུནདིཝསམྷི ནོ ཀཱལེ. སཏྟཱཧཀཱལིཀཾ ཡཱཝཛཱིཝིཀཾ ཀཱལེ ཙེཝ ཀཔྤཏི ཝིཀཱལེ ཙ. ཨཏྟནོ ཨཏྟནོ ཀཱལཱཏཱིཏཾ ཡཱཝཀཱལིཀཱདིཏྟཡཾ ཨཀཔྤིཡམཾསཾ ཨུགྒཧིཏཀམཔྤཊིགྒཧིཏཀཉྩ ནེཝ ཀཱལེ ཀཔྤཏི ནོ ཝིཀཱལེ.

པཙྩནྟིམཙཏུཀྐེ སམུདྡེ སཱིམཾ བནྡྷནྟོ པཙྩནྟིམེསུ ཛནཔདེསུ ཨཱཔཛྫཏི, ནོ མཛ྄ཛྷིམེསུ; པཉྩཝགྒེན གཎེན ཨུཔསམྤཱདེནྟོ གུཎངྒུཎཱུཔཱཧནཾ དྷུཝནཧཱནཾ ཙམྨཏྠརཎཱནི ཙ མཛ྄ཛྷིམེསུ ཛནཔདེསུ ཨཱཔཛྫཏི ནོ པཙྩནྟིམེསུ. ཨིམཱནི ཙཏྟཱརི ‘‘ཨིདྷ ན ཀཔྤནྟཱི’’ཏི ཝདནྟོཔི པཙྩནྟིམེསུ ཨཱཔཛྫཏི, ‘‘ཨིདྷ ཀཔྤནྟཱི’’ཏི ཝདནྟོ པན མཛ྄ཛྷིམེསུ ཨཱཔཛྫཏི. སེསཱཔཏྟིཾ ཨུབྷཡཏྠ ཨཱཔཛྫཏི, ཨསཱདྷཱརཎཾ ན ཀཏྠཙི ཨཱཔཛྫཏི. དུཏིཡཙཏུཀྐེ པཉྩཝགྒེན གཎེན ཨུཔསམྤདཱདི ཙཏུབྦིདྷམྤི ཝཏྠུ པཙྩནྟིམེསུ ཛནཔདེསུ ཀཔྤཏི. ‘‘ཨིདཾ ཀཔྤཏཱི’’ཏི ¶ དཱིཔེཏུམྤི ཏཏྠེཝ ཀཔྤཏི ནོ མཛ྄ཛྷིམེསུ. ‘‘ཨིདཾ ན ཀཔྤཏཱི’’ཏི དཱིཔེཏུཾ པན མཛ྄ཛྷིམེསུ ཛནཔདེསུ ཀཔྤཏི ནོ པཙྩནྟིམེསུ ¶ . སེསཾ ‘‘ཨནུཛཱནཱམི བྷིཀྑཝེ པཉྩ ལོཎཱནཱི’’ཏིཨཱདི ཨནུཉྙཱཏཀཾ ཨུབྷཡཏྠ ཀཔྤཏི. ཡཾ པན ཨཀཔྤིཡནྟི པཊིཀྑིཏྟཾ, ཏཾ ཨུབྷཡཏྠཱཔི ན ཀཔྤཏི.

ཨནྟོཨཱདིཙཏུཀྐེ ཨནུཔཁཛྫ སེཡྻཱདིཾ ཨནྟོ ཨཱཔཛྫཏི ནོ བཧི, ཨཛ྄ཛྷོཀཱསེ སངྒྷིཀམཉྩཱདཱིནི ནིཀྑིཔིཏྭཱ པཀྐམནྟོ བཧི ཨཱཔཛྫཏི ནོ ཨནྟོ, སེསཾ ཨནྟོ ཙེཝ བཧི ཙ, ཨསཱདྷཱརཎཾ ནེཝ ཨནྟོ ན བཧི. ཨནྟོསཱིམཱདིཙཏུཀྐེ ཨཱགནྟུཀོ ཝཏྟཾ ཨཔཱུརེནྟོ ཨནྟོསཱིམཱཡ ཨཱཔཛྫཏི, གམིཡོ བཧིསཱིམཱཡ མུསཱཝཱདཱདིཾ ཨནྟོསཱིམཱཡ ཙ བཧིསཱིམཱཡ ཙ ཨཱཔཛྫཏི,ཨསཱདྷཱརཎཾ ན ཀཏྠཙི. གཱམཙཏུཀྐེ ཨནྟརགྷརཔཊིསཾཡུཏྟཾ སེཁིཡཔཉྙཏྟིཾ གཱམེ ཨཱཔཛྫཏི ནོ ཨརཉྙེ. བྷིཀྑུནཱི ཨརུཎཾ ཨུཊྛཱཔཡམཱནཱ ཨརཉྙེ ཨཱཔཛྫཏི ནོ གཱམེ. མུསཱཝཱདཱདིཾ གཱམེ ཙེཝ ཨཱཔཛྫཏི ཨརཉྙེ ཙ, ཨསཱདྷཱརཎཾ ན ཀཏྠཙི.

ཙཏྟཱརོ ¶ པུབྦཀིཙྩཱཏི ‘‘སམྨཛྫནཱི པདཱིཔོ ཙ ཨུདཀཾ ཨཱསནེན ཙཱ’’ཏི ཨིདཾ ཙཏུབྦིདྷཾ པུབྦཀརཎནྟི ཝུཙྩཏཱིཏི ཝུཏྟཾ. ‘‘ཚནྡཔཱརིསུདྡྷིཨུཏུཀྑཱནཾ བྷིཀྑུགཎནཱ ཙ ཨོཝཱདོ’’ཏི ཨིམེ པན ‘‘ཙཏྟཱརོ པུབྦཀིཙྩཱ’’ཏི ཝེདིཏབྦཱ. ཙཏྟཱརོ པཏྟཀལླཱཏི ཨུཔོསཐོ ཡཱཝཏིཀཱ ཙ བྷིཀྑཱུ ཀམྨཔྤཏྟཱ ཏེ ཨཱགཏཱ ཧོནྟི, སབྷཱགཱཔཏྟིཡོ ན ཝིཛྫནྟི, ཝཛྫནཱིཡཱ ཙ པུགྒལཱ ཏསྨིཾ ན ཧོནྟི, པཏྟཀལླནྟི ཝུཙྩཏཱིཏི. ཙཏྟཱརི ཨནཉྙཔཱཙིཏྟིཡཱནཱིཏི ‘‘ཨེཏདེཝ པཙྩཡཾ ཀརིཏྭཱ ཨནཉྙཾ པཱཙིཏྟིཡ’’ནྟི ཨེཝཾ ཝུཏྟཱནི ཨནུཔཁཛྫསེཡྻཱཀཔྤནསིཀྑཱཔདཾ ‘‘ཨེཧཱཝུསོ གཱམཾ ཝཱ ནིགམཾ ཝཱ’’ཏི སིཀྑཱཔདཾ, སཉྩིཙྩ ཀུཀྐུཙྩཨུཔདཧནཾ, ཨུཔསྶུཏིཏིཊྛནནྟི ཨིམཱནི ཙཏྟཱརི. ཙཏསྶོ བྷིཀྑུསམྨུཏིཡོཏི ‘‘ཨེཀརཏྟམྤི ཙེ བྷིཀྑུ ཏིཙཱིཝརེན ཝིཔྤཝསེཡྻ ཨཉྙཏྲ བྷིཀྑུསམྨུཏིཡཱ, ཨཉྙཾ ནཝཾ སནྠཏཾ ཀཱརཱཔེཡྻ ཨཉྙཏྲ བྷིཀྑུསམྨུཏིཡཱ, ཏཏོ ཙེ ཨུཏྟརི ཝིཔྤཝསེཡྻ ཨཉྙཏྲ བྷིཀྑུསམྨུཏིཡཱ, དུཊྛུལླཾ ཨཱཔཏྟིཾ ཨནུཔསམྤནྣསྶ ཨཱརོཙེཡྻ ཨཉྙཏྲ བྷིཀྑུསམྨུཏིཡཱ’’ཏི ཨེཝཾ ཨཱགཏཱ ཏེརསཧི སམྨུཏཱིཧི མུཏྟཱ སམྨུཏིཡོ. གིལཱནཙཏུཀྐེ ཨཉྙབྷེསཛྫེན ཀརཎཱིཡེན ལོལཏཱཡ ཨཉྙཾ ཝིཉྙཱཔེནྟོ གིལཱནོ ཨཱཔཛྫཏི, ཨབྷེསཛྫཀརཎཱིཡེན བྷེསཛྫཾ ཝིཉྙཱཔེནྟོ ཨགིལཱནོ ཨཱཔཛྫཏི, མུསཱཝཱདཱདིཾ ཨུབྷོཔི ཨཱཔཛྫནྟི, ཨསཱདྷཱརཎཾ ཨུབྷོཔི ནཱཔཛྫནྟི. སེསཾ སབྦཏྠ ཨུཏྟཱནམེཝཱཏི.

ཙཏུཀྐཝཱརཝཎྞནཱ ནིཊྛིཏཱ.

པཉྩཀཝཱརཝཎྞནཱ

༣༢༥. པཉྩཀེསུ ¶ ¶ པཉྩ པུགྒལཱ ནིཡཏཱཏི ཨཱནནྟརིཡཱནམེཝེཏཾ གཧཎཾ. པཉྩ ཚེདནཀཱ ཨཱཔཏྟིཡོ ནཱམ པམཱཎཱཏིཀྐནྟེ མཉྩཔཱིཋེ ནིསཱིདནཀཎྜུཔྤཊིཙྪཱདིཝསྶིཀསཱཊིཀཱསུ སུགཏཙཱིཝརེ ཙ ཝེདིཏབྦཱ. པཉྩཧཱཀཱརེཧཱིཏི ཨལཛྫིཏཱ, ཨཉྙཱཎཏཱ, ཀུཀྐུཙྩཔྤཀཏཏཱ, ཨཀཔྤིཡེ ཀཔྤིཡསཉྙིཏཱ, ཀཔྤིཡེ ཨཀཔྤིཡསཉྙིཏཱཏི ཨིམེཧི པཉྩཧི. པཉྩ ཨཱཔཏྟིཡོ མུསཱཝཱདཔཙྩཡཱཏི པཱརཱཛིཀཐུལླཙྩཡདུཀྐཊསངྒྷཱདིསེསཔཱཙིཏྟིཡཱ. ཨནཱམནྟཙཱརོཏི ‘‘སནྟཾ བྷིཀྑུཾ ཨནཱཔུཙྪཱ པུརེབྷཏྟཾ པཙྪཱབྷཏྟཾ ཀུལེསུ ཙཱརིཏྟཾ ཨཱཔཛྫེཡྻཱ’’ཏི ཨིམསྶ ཨཱཔུཙྪིཏྭཱ ཙཱརསྶ ཨབྷཱཝོ. ཨནདྷིཊྛཱནནྟི ‘‘གཎབྷོཛནེ ཨཉྙཏྲ སམཡཱ’’ཏི ཝུཏྟཾ ¶ སམཡཾ ཨདྷིཊྛཧིཏྭཱ བྷོཛནཾ ཨདྷིཊྛཱནཾ ནཱམ; ཏཐཱ ཨཀརཎཾ ཨནདྷིཊྛཱནཾ. ཨཝིཀཔྤནཱ ནཱམ ཡཱ པརམྤརབྷོཛནེ ཝིཀཔྤནཱ ཝུཏྟཱ, ཏསྶཱ ཨཀརཎཾ. ཨིམཱནི ཧི པཉྩ པིཎྜཔཱཏིཀསྶ དྷུཏངྒེནེཝ པཊིཀྑིཏྟཱནི. ཨུསྶངྐིཏཔརིསངྐིཏོཏི ཡེ པསྶནྟི, ཡེ སུཎནྟི, ཏེཧི ཨུསྶངྐིཏོ ཙེཝ པརིསངྐིཏོ ཙ. ཨཔི ཨཀུཔྤདྷམྨོ ཁཱིཎཱསཝོཔི སམཱནོ, ཏསྨཱ ཨགོཙརཱ པརིཧརིཏབྦཱ. ན ཧི ཨེཏེསུ སནྡིསྶམཱནོ ཨཡསཏོ ཝཱ གརཧཏོ ཝཱ མུཙྩཏི. སོསཱནིཀནྟི སུསཱནེ པཏིཏཀཾ. པཱཔཎིཀནྟི ཨཱཔཎདྭཱརེ པཏིཏཀཾ. ཐཱུཔཙཱིཝརནྟི ཝམྨིཀཾ པརིཀྑིཔིཏྭཱ བལིཀམྨཀཏཾ. ཨཱབྷིསེཀིཀནྟི ནཧཱནཊྛཱནེ ཝཱ རཉྙོ ཨབྷིསེཀཊྛཱནེ ཝཱ ཚཌྜིཏཙཱིཝརཾ. བྷཏཔཊིཡཱབྷཏནྟི སུསཱནཾ ནེཏྭཱ པུན ཨཱནཱིཏཀཾ. པཉྩ མཧཱཙོརཱ ཨུཏྟརིམནུསྶདྷམྨེ ཝུཏྟཱ.

པཉྩཱཔཏྟིཡོ ཀཱཡཏོ སམུཊྛནྟཱིཏི པཋམེན ཨཱཔཏྟིསམུཊྛཱནེན པཉྩ ཨཱཔཏྟིཡོ ཨཱཔཛྫཏི, ‘‘བྷིཀྑུ ཀཔྤིཡསཉྙཱི སཉྙཱཙིཀཱཡ ཀུཊིཾ ཀརོཏཱི’’ཏི ཨེཝཾ ཨནྟརཔེཡྻཱལེ ཝུཏྟཱཔཏྟིཡོ. པཉྩ ཨཱཔཏྟིཡོ ཀཱཡཏོ ཙ ཝཱཙཏོ ཙཱཏི ཏཏིཡེན ཨཱཔཏྟིསམུཊྛཱནེན པཉྩ ཨཱཔཏྟིཡོ ཨཱཔཛྫཏི, ‘‘བྷིཀྑུ ཀཔྤིཡསཉྙཱི སཾཝིདཧིཏྭཱ ཀུཊིཾ ཀརོཏཱི’’ཏི ཨེཝཾ ཏཏྠེཝ ཝུཏྟཱ ཨཱཔཏྟིཡོ. དེསནཱགཱམིནིཡོཏི ཋཔེཏྭཱ པཱརཱཛིཀཉྩ སངྒྷཱདིསེསཉྩ ཨཝསེསཱ.

པཉྩ ཀམྨཱནཱིཏི ཏཛྫནཱིཡནིཡསྶཔབྦཱཛནཱིཡཔཊིསཱརཎཱིཡཱནི ཙཏྟཱརི ཨུཀྑེཔནཱིཡཉྩ ཏིཝིདྷམྤི ཨེཀནྟི པཉྩ. ཡཱཝཏཏིཡཀེ པཉྩཱཏི ཨུཀྑིཏྟཱནུཝཏྟིཀཱཡ བྷིཀྑུནིཡཱ ཡཱཝཏཏིཡཾ སམནུབྷཱསནཱཡ ཨཔྤཊིནིསྶཛྫནྟིཡཱ པཱརཱཛིཀཾ ཐུལླཙྩཡཾ དུཀྐཊནྟི ཏིསྶོ ¶ , བྷེདཀཱནུཝཏྟཀཱདིསམནུབྷཱསནཱསུ སངྒྷཱདིསེསོ, པཱཔིཀཱཡ དིཊྛིཡཱ ཨཔྤཊིནིསྶགྒེ པཱཙིཏྟིཡཾ. ཨདིནྣནྟི ¶ ཨཉྙེན ཨདིནྣཾ. ཨཝིདིཏནྟི པཊིགྒཎྷཱམཱིཏི ཙེཏནཱཡ ཨབྷཱཝེན ཨཝིདིཏཾ. ཨཀཔྤིཡནྟི པཉྩཧི སམཎཀཔྤེཧི ཨཀཔྤིཡཀཏཾ; ཡཾ ཝཱ པནཉྙམྤི ཨཀཔྤིཡམཾསཾ ཨཀཔྤིཡབྷོཛནཾ. ཨཀཏཱཏིརིཏྟནྟི པཝཱརེཏྭཱ ཨཏིརིཏྟཾ ཨཀཏཾ. སམཛྫདཱནནྟི ནཊསམཛྫཱདིདཱནཾ. ཨུསབྷདཱནནྟི གོགཎསྶ ཨནྟརེ ཨུསབྷཝིསྶཛྫནཾ. ཙིཏྟཀམྨདཱནནྟི ཨཱཝཱསཾ ཀཱརེཏྭཱ ཏཏྠ ཙིཏྟཀམྨཾ ཀཱརེཏུཾ ཝཊྚཏི. ཨིདཾ པན པཊིབྷཱནཙིཏྟཀམྨདཱནཾ སནྡྷཱཡ ཝུཏྟཾ. ཨིམཱནི ཧི པཉྩ ཀིཉྩཱཔི ལོཀསྶ པུཉྙསམྨཏཱནི, ཨཐ ཁོ ཨཔུཉྙཱནི ཨཀུསལཱནིཡེཝ ¶ . ཨུཔྤནྣཾ པཊིབྷཱནནྟི ཨེཏྠ པཊིབྷཱནནྟི ཀཐེཏུཀམྱཏཱ ཝུཙྩཏི. ཨིམེ པཉྩ དུཔྤཊིཝིནོདཡཱཏི ན སུཔཊིཝིནོདཡཱ; ཨུཔཱཡེན པན ཀཱརཎེན ཨནུརཱུཔཱཧི པཙྩཝེཀྑནཱཨནུསཱསནཱདཱིཧི སཀྐཱ པཊིཝིནོདེཏུནྟི ཨཏྠོ.

སཀཙིཏྟཾ པསཱིདཏཱིཏི ཨེཏྠ ཨིམཱནི ཝཏྠཱུནི – ཀཊཨནྡྷཀཱརཝཱསཱི ཕུསྶདེཝཏྠེརོ ཀིར ཙེཏིཡངྒཎཾ སམྨཛྫིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ སིནྡུཝཱརཀུསུམསནྠཏམིཝ སམཝིཔྤཀིཎྞཝཱལིཀཾ ཙེཏིཡངྒཎཾ ཨོལོཀེནྟོ བུདྡྷཱརམྨཎཾ པཱིཏིཔཱམོཛྫཾ ཨུཔྤཱདེཏྭཱ ཨཊྛཱསི. ཏསྨིཾ ཁཎེ མཱརོ པབྦཏཔཱདེ ནིབྦཏྟཀཱལ༹མཀྐཊོ ཝིཡ ཧུཏྭཱ ཙེཏིཡངྒཎེ གོམཡཾ ཝིཔྤཀིརནྟོ གཏོ. ཐེརོ ནཱསཀྑི ཨརཧཏྟཾ པཱཔུཎིཏུཾ, སམྨཛྫིཏྭཱ ཨགམཱསི. དུཏིཡདིཝསེཔི ཛརགྒཝོ ཧུཏྭཱ ཏཱདིསམེཝ ཝིཔྤཀཱརཾ ཨཀཱསི. ཏཏིཡདིཝསེ ཝངྐཔཱདཾ མནུསྶཏྟབྷཱཝཾ ནིམྨིནིཏྭཱ པཱདེན པརིཀསནྟོ ཨགམཱསི. ཐེརོ ‘‘ཨེཝརཱུཔོ བཱིབྷཙྪཔུརིསོ སམནྟཱ ཡོཛནཔྤམཱཎེསུ གོཙརགཱམེསུ ནཏྠི, སིཡཱ ནུ ཁོ མཱརོ’’ཏི ཙིནྟེཏྭཱ ‘‘མཱརོསི ཏྭ’’ནྟི ཨཱཧ. ‘‘ཨཱམ, བྷནྟེ, མཱརོམྷི, ན དཱནི ཏེ ཝཉྩེཏུཾ ཨསཀྑི’’ནྟི. ‘‘དིཊྛཔུབྦོ ཏཡཱ ཏཐཱགཏོ’’ཏི? ‘‘ཨཱམ, དིཊྛཔུབྦོ’’ཏི. ‘‘མཱརོ ནཱམ མཧཱནུབྷཱཝོ ཧོཏི, ཨིངྒྷ ཏཱཝ བུདྡྷསྶ བྷགཝཏོ ཨཏྟབྷཱཝསདིསཾ ཨཏྟབྷཱཝཾ ནིམྨིནཱཧཱི’’ཏི? ‘‘ན སཀྐཱ, བྷནྟེ, ཏཱདིསཾ རཱུཔཾ ནིམྨིནིཏུཾ; ཨཔིཙ ཁོ པན ཏཾསརིཀྑཀཾ པཏིརཱུཔཀཾ ནིམྨིནིསྶཱམཱི’’ཏི སཀབྷཱཝཾ ཝིཛཧིཏྭཱ བུདྡྷརཱུཔསདིསེན ཨཏྟབྷཱཝེན ཨཊྛཱསི ¶ . ཐེརོ མཱརཾ ཨོལོཀེཏྭཱ ‘‘ཨཡཾ ཏཱཝ སརཱགདོསམོཧོ ཨེཝཾ སོབྷཏི, ཀཐཾ ནུ ཁོ བྷགཝཱ ན སོབྷཏི སབྦསོ ཝཱིཏརཱགདོསམོཧོ’’ཏི བུདྡྷཱརམྨཎཾ པཱིཏིཾ པཊིལབྷིཏྭཱ ཝིཔསྶནཾ ཝཌྜྷེཏྭཱ ཨརཧཏྟཾ པཱཔུཎི. མཱརོ ‘‘ཝཉྩིཏོམྷི ཏཡཱ, བྷནྟེ’’ཏི ཨཱཧ. ཐེརོཔི ‘‘ཀིཾ ཨཏྠི ཛརམཱར, ཏཱདིསཾ ཝཉྩེཏུ’’ནྟི ཨཱཧ. ལོཀནྟརཝིཧཱརེཔི དཏྟོ ནཱམ དཧརབྷིཀྑུ ཙེཏིཡངྒཎཾ སམྨཛྫིཏྭཱ ཨོལོཀེནྟོ ཨོདཱཏཀསིཎཾ པཊིལབྷི. ཨཊྛ སམཱཔཏྟིཡོ ནིབྦཏྟེསི. ཏཏོ ཝིཔསྶནཾ ཝཌྜྷེཏྭཱ ཕལཏྟཡཾ སཙྪཱཀཱསི.

པརཙིཏྟཾ ¶ པསཱིདཏཱིཏི ཨེཏྠ ཨིམཱནི ཝཏྠཱུནི – ཏིསྶོ ནཱམ དཧརབྷིཀྑུ ཛམྦུཀོལཙེཏིཡངྒཎཾ སམྨཛྫིཏྭཱ སངྐཱརཚཌྜནིཾ ཧཏྠེན གཧེཏྭཱཝ ཨཊྛཱསི ¶ . ཏསྨིཾ ཁཎེ ཏིསྶདཏྟཏྠེརོ ནཱམ ནཱཝཱཏོ ཨོརུཡ྄ཧ ཙེཏིཡངྒཎཾ ཨོལོཀེནྟོ བྷཱཝིཏཙིཏྟེན སམྨཊྛཊྛཱནནྟི ཉཏྭཱ པཉྷཱསཧསྶཾ པུཙྪི, ཨིཏརོ སབྦཾ ཝིསྶཛྫེསི. ཨཉྙཏརསྨིམྤི ཝིཧཱརེ ཐེརོ ཙེཏིཡངྒཎཾ སམྨཛྫིཏྭཱ ཝཏྟཾ པརིཙྪིནྡི. ཡོནཀཝིསཡཏོ ཙེཏིཡཝནྡཀཱ ཙཏྟཱརོ ཐེརཱ ཨཱགནྟྭཱ ཙེཏིཡངྒཎཾ དིསྭཱ ཨནྟོ ཨཔྤཝིསིཏྭཱ དྭཱརེཡེཝ ཋཏྭཱ ཨེཀོ ཐེརོ ཨཊྛ ཀཔྤེ ཨནུསྶརི, ཨེཀོ སོལ༹ས, ཨེཀོ ཝཱིསཏི, ཨེཀོ ཏིཾས ཀཔྤེ ཨནུསྶརི.

དེཝཏཱ ཨཏྟམནཱ ཧོནྟཱིཏི ཨེཏྠ ཨིདཾ ཝཏྠུ – ཨེཀསྨིཾ ཀིར ཝིཧཱརེ ཨེཀོ བྷིཀྑུ ཙེཏིཡངྒཎཉྩ བོདྷིཡངྒཎཉྩ སམྨཛྫིཏྭཱ ནཧཱཡིཏུཾ གཏོ. དེཝཏཱ ‘‘ཨིམསྶ ཝིཧཱརསྶ ཀཏཀཱལཏོ པཊྛཱཡ ཨེཝཾ ཝཏྟཾ པཱུརེཏྭཱ སམྨཊྛཔུབྦོ བྷིཀྑུ ནཏྠཱི’’ཏི པསནྣཙིཏྟཱ པུཔྥཧཏྠཱ ཨཊྛཾསུ. ཐེརོ ཨཱགནྟྭཱ ‘‘ཀཏརགཱམཝཱསིཀཱཏྠཱ’’ཏི ཨཱཧ. ‘‘བྷནྟེ, ཨིདྷེཝ ཝསཱམ, ཨིམསྶ ཝིཧཱརསྶ ཀཏཀཱལཏོ པཊྛཱཡ ཨེཝཾ ཝཏྟཾ པཱུརེཏྭཱ སམྨཊྛཔུབྦོ བྷིཀྑུ ནཏྠཱིཏི ཏུམྷཱཀཾ, བྷནྟེ, ཝཏྟེ པསཱིདིཏྭཱ པུཔྥཧཏྠཱ ཋིཏཱམྷཱ’’ཏི དེཝཏཱ ཨཱཧཾསུ.

པཱསཱདིཀསཾཝཏྟནིཀནྟི ཨེཏྠ ཨིདཾ ཝཏྠུ – ཨེཀཾ ཀིར ཨམཙྩཔུཏྟཾ ཨབྷཡཏྠེརཉྩ ཨཱརབྦྷ ཨཡཾ ཀཐཱ ཨུདཔཱདི ‘‘ཀིཾ ནུ ཁོ ཨམཙྩཔུཏྟོ པཱསཱདིཀོ, ཨབྷཡཏྠེརོཏི ཨུབྷོཔི ནེ ཨེཀསྨིཾ ཋཱནེ ཨོལོཀེསྶཱམཱ’’ཏི. ཉཱཏཀཱ ཨམཙྩཔུཏྟཾ ཨལངྐརིཏྭཱ མཧཱཙེཏིཡཾ ཝནྡཱཔེསྶཱམཱཏི ཨགམཾསུ. ཐེརམཱཏཱཔི པཱསཱདིཀཾ ཙཱིཝརཾ ཀཱརེཏྭཱ པུཏྟསྶ པཧིཎི, ‘‘པུཏྟོ མེ ཀེསེ ཚིནྡཱཔེཏྭཱ ཨིམཾ ཙཱིཝརཾ པཱརུཔིཏྭཱ བྷིཀྑུསངྒྷཔརིཝུཏོ མཧཱཙེཏིཡཾ ཝནྡཏཱུ’’ཏི. ཨམཙྩཔུཏྟོ ¶ ཉཱཏིཔརིཝུཏོ པཱཙཱིནདྭཱརེན ཙེཏིཡངྒཎཾ ཨཱརུལ༹ྷོ, ཨབྷཡཏྠེརོ བྷིཀྑུསངྒྷཔརིཝུཏོ དཀྑིཎདྭཱརེན ཙེཏིཡངྒཎཾ ཨཱརུཧིཏྭཱ ཙེཏིཡངྒཎེ ཏེན སདྡྷིཾ སམཱགནྟྭཱ ཨཱཧ – ‘‘ཀིཾ ཏྭཾ, ཨཱཝུསོ, མཧལླཀཏྠེརསྶ སམྨཊྛཊྛཱནེ ཀཙཝརཾ ཚཌྜེཏྭཱ མཡཱ སདྡྷིཾ ཡུགགྒཱཧཾ གཎྷཱསཱི’’ཏི. ཨཏཱིཏཏྟབྷཱཝེ ཀིར ཨབྷཡཏྠེརོ མཧལླཀཏྠེརོ ནཱམ ཧུཏྭཱ གོཙརགཱམེ ཙེཏིཡངྒཎཾ སམྨཛྫི, ཨམཙྩཔུཏྟོ མཧཱཨུཔཱསཀོ ཧུཏྭཱ སམྨཊྛཊྛཱནེ ཀཙཝརཾ གཧེཏྭཱ ཚཌྜེསི.

སཏྠུསཱསནཾ ཀཏཾ ཧོཏཱིཏི ཨིདཾ སམྨཛྫནཝཏྟཾ ནཱམ བུདྡྷེཧི ཝཎྞིཏཾ, ཏསྨཱ ཏཾ ཀརོནྟེན སཏྠུསཱསནཾ ཀཏཾ ཧོཏི. ཏཏྲིདཾ ཝཏྠུ – ཨཱཡསྨཱ ¶ ཀིར སཱརིཔུཏྟོ ཧིམཝནྟཾ གནྟྭཱ ཨེཀསྨིཾ ¶ པབྦྷཱརེ ཨསམྨཛྫིཏྭཱཝ ནིརོདྷཾ སམཱཔཛྫིཏྭཱ ནིསཱིདི. བྷགཝཱ ཨཱཝཛྫནྟོ ཐེརསྶ ཨསམྨཛྫིཏྭཱ ནིསིནྣབྷཱཝཾ ཉཏྭཱ ཨཱཀཱསེན གནྟྭཱ ཐེརསྶ པུརཏོ ཨསམྨཊྛཊྛཱནེ པཱདཱནི དསྶེཏྭཱ པཙྩཱགཉྪི. ཐེརོ སམཱཔཏྟིཏོ ཝུཊྛིཏོ བྷགཝཏོ པཱདཱནི དིསྭཱ བལཝཧིརོཏྟཔྤཾ པཙྩུཔཊྛཱཔེཏྭཱ ཛཎྞུཀེཧི པཏིཊྛཱཡ ‘‘ཨསམྨཛྫིཏྭཱ ནིསིནྣབྷཱཝཾ ཝཏ མེ སཏྠཱ ཨཉྙཱསི, སངྒྷམཛ྄ཛྷེ དཱནི ཙོདནཾ ཀཱརེསྶཱམཱི’’ཏི དསབལསྶ སནྟིཀཾ གནྟྭཱ ཝནྡིཏྭཱ ནིསཱིདི. བྷགཝཱ ‘‘ཀུཧིཾ གཏོསི, སཱརིཔུཏྟཱ’’ཏི ཝཏྭཱ ‘‘ན པཏིརཱུཔཾ དཱནི ཏེ མཡ྄ཧཾ ཨནནྟརེ ཋཱནེ ཋཏྭཱ ཝིཙརནྟསྶ ཨསམྨཛྫིཏྭཱ ནིསཱིདིཏུ’’ནྟི ཨཱཧ. ཏཏོ པཊྛཱཡ ཐེརོ གཎྛིཀཔཊིམུཉྩནཊྛཱནེཔི ཏིཊྛནྟོ པཱདེན ཀཙཝརཾ ཝིཡཱུཧིཏྭཱཝ ཏིཊྛཏི.

ཨཏྟནོ བྷཱསཔརིཡནྟཾ ན ཨུགྒཎྷཱཏཱིཏི ‘‘ཨིམསྨིཾ ཝཏྠུསྨིཾ ཨེཏྟཀཾ སུཏྟཾ ཨུཔལབྦྷཏི, ཨེཏྟཀོ ཝིནིཙྪཡོ, ཨེཏྟཀཾ སུཏྟཉྩ ཝིནིཙྪཡཉྩ ཝཀྑཱམཱི’’ཏི ཨེཝཾ ཨཏྟནོ བྷཱསཔརིཡནྟཾ ན ཨུགྒཎྷཱཏི. ‘‘ཨཡཾ ཙོདཀསྶ པུརིམཀཐཱ, ཨཡཾ པཙྪིམཀཐཱ, ཨཡཾ ཙུདིཏཀསྶ པུརིམཀཐཱ, ཨཡཾ པཙྪིམཀཐཱ, ཨེཏྟཀཾ གཡ྄ཧཱུཔགཾ, ཨེཏྟཀཾ ན གཡ྄ཧཱུཔག’’ནྟི ཨེཝཾ ཨནུགྒཎྷནྟོ པན པརསྶ བྷཱསཔརིཡནྟཾ ན ཨུགྒཎྷཱཏི ནཱམ. ཨཱཔཏྟིཾ ན ཛཱནཱཏཱིཏི པཱརཱཛིཀཾ ཝཱ སངྒྷཱདིསེསཾ ཝཱཏི སཏྟནྣཾ ཨཱཔཏྟིཀྑནྡྷཱནཾ ནཱནཱཀརཎཾ ན ཛཱནཱཏི. མཱུལནྟི དྭེ ཨཱཔཏྟིཡཱ མཱུལཱནི ཀཱཡོ ཙ ཝཱཙཱ ཙ, ཏཱནི ན ཛཱནཱཏི. སམུདཡནྟི ཚ ཨཱཔཏྟིསམུཊྛཱནཱནི ཨཱཔཏྟིསམུདཡོ ¶ ནཱམ, ཏཱནི ན ཛཱནཱཏི. པཱརཱཛིཀཱདཱིནཾ ཝཏྠུཾ ན ཛཱནཱཏཱིཏིཔི ཝུཏྟཾ ཧོཏི. ནིརོདྷནྟི ཨཡཾ ཨཱཔཏྟི དེསནཱཡ ནིརུཛ྄ཛྷཏི, ཝཱུཔསམྨཏི, ཨཡཾ ཝུཊྛཱནེནཱཏི ཨེཝཾ ཨཱཔཏྟིནིརོདྷཾ ན ཛཱནཱཏི. སཏྟ སམཐེ ཨཛཱནནྟོ པན ཨཱཔཏྟིནིརོདྷགཱམིནིཔཊིཔདཾ ན ཛཱནཱཏི.

ཨདྷིཀརཎཔཉྩཀེ ཨདྷིཀརཎཾ ནཱམ ཙཏྟཱརི ཨདྷིཀརཎཱནི. ཨདྷིཀརཎསྶ མཱུལཾ ནཱམ ཏེཏྟིཾས མཱུལཱནི – ཝིཝཱདཱདྷིཀརཎསྶ དྭཱདས མཱུལཱནི, ཨནུཝཱདཱདྷིཀརཎསྶ ཙུདྡས, ཨཱཔཏྟཱདྷིཀརཎསྶ ཚ, ཀིཙྩཱདྷིཀརཎསྶ ཨེཀཾ; ཏཱནི པརཏོ ཨཱཝི བྷཝིསྶནྟི. ཨདྷིཀརཎསམུདཡོ ནཱམ ཨདྷིཀརཎསམུཊྛཱནཾ. ཝིཝཱདཱདྷིཀརཎཾ ཨཊྛཱརས བྷེདཀརཝཏྠཱུནི ནིསྶཱཡ ཨུཔྤཛྫཏི; ཨནུཝཱདཱདྷིཀརཎཾ ཙཏསྶོ ཝིཔཏྟིཡོ; ཨཱཔཏྟཱདྷིཀརཎཾ སཏྟཱཔཏྟིཀྑནྡྷེ; ཀིཙྩཱདྷིཀརཎཾ ཙཏྟཱརི སངྒྷཀིཙྩཱནཱིཏི ཨིམཾ ཝིབྷཱགཾ ན ཛཱནཱཏཱིཏི ཨཏྠོ ¶ . ཨདྷིཀརཎནིརོདྷཾ ན ཛཱནཱཏཱིཏི དྷམྨེན ཝིནཡེན སཏྠུསཱསནེན མཱུལཱམཱུལཾ གནྟྭཱ ཝིནིཙྪཡསམཐཾ པཱཔེཏུཾ ན སཀྐོཏི ¶ ; ‘‘ཨིདཾ ཨདྷིཀརཎཾ དྭཱིཧི, ཨིདཾ ཙཏཱུཧི, ཨིདཾ ཏཱིཧི ཨིདཾ ཨེཀེན སམཐེན སམྨཏཱི’’ཏི ཨེཝཾ སཏྟ སམཐེ ཨཛཱནནྟོ པན ཨདྷིཀརཎནིརོདྷགཱམིནིཔཊིཔདཾ ན ཛཱནཱཏི ནཱམ. ཝཏྠུཾ ན ཛཱནཱཏཱིཏི ‘‘ཨིདཾ པཱརཱཛིཀསྶ ཝཏྠུ, ཨིདཾ སངྒྷཱདིསེསསྶཱ’’ཏི ཨེཝཾ སཏྟནྣཾ ཨཱཔཏྟིཀྑནྡྷཱནཾ ཝཏྠུཾ ན ཛཱནཱཏི. ནིདཱནནྟི ‘‘སཏྟནྣཾ ནིདཱནཱནཾ ཨིདཾ སིཀྑཱཔདཾ ཨེཏྠ པཉྙཏྟཾ, ཨིདཾ ཨེཏྠཱ’’ཏི ན ཛཱནཱཏི. པཉྙཏྟིཾ ན ཛཱནཱཏཱིཏི ཏསྨིཾ ཏསྨིཾ སིཀྑཱཔདེ པཋམཔཉྙཏྟིཾ ན ཛཱནཱཏི. ཨནུཔཉྙཏྟིནྟི པུནཔྤུནཾ པཉྙཏྟིཾ ན ཛཱནཱཏི. ཨནུསནྡྷིཝཙནཔཐནྟི ཀཐཱནུསནྡྷི-ཝིནིཙྪཡཱནུསནྡྷིཝསེན ཝཏྠུཾ ན ཛཱནཱཏི. ཉཏྟིཾ ན ཛཱནཱཏཱིཏི སབྦེན སབྦཾ ཉཏྟིཾ ན ཛཱནཱཏི. ཉཏྟིཡཱ ཀརཎཾ ན ཛཱནཱཏཱིཏི ཉཏྟིཀིཙྩཾ ན ཛཱནཱཏི, ཨོསཱརཎཱདཱིསུ ནཝསུ ཋཱནེསུ ཉཏྟིཀམྨཾ ནཱམ ཧོཏི, ཉཏྟིདུཏིཡཉཏྟིཙཏུཏྠཀམྨེསུ ཉཏྟིཡཱ ཀམྨཔྤཏྟོ ཧུཏྭཱ ཏིཊྛཏཱིཏི ན ཛཱནཱཏི. ན པུབྦཀུསལོ ཧོཏི ན ཨཔརཀུསལོཏི པུབྦེ ཀཐེཏབྦཉྩ པཙྪཱ ཀཐེཏབྦཉྩ ན ཛཱནཱཏི, ཉཏྟི ནཱམ པུབྦེ ཋཔེཏབྦཱ, པཙྪཱ ན ཋཔེཏབྦཱཏིཔི ན ཛཱནཱཏི. ཨཀཱལཉྙཱུ ཙ ཧོཏཱིཏི ཀཱལཾ ན ཛཱནཱཏི, ཨནཛ྄ཛྷིཊྛོ ཨཡཱཙིཏོ བྷཱསཏི, ཉཏྟིཀཱལམྤི ཉཏྟིཁེཏྟམྤི ¶ ཉཏྟིཨོཀཱསམྤི ན ཛཱནཱཏི.

མནྡཏྟཱ མོམཱུཧཏྟཱཏི ཀེཝལཾ ཨཉྙཱཎེན མོམཱུཧབྷཱཝེན དྷུཏངྒེ ཨཱནིསཾསཾ ཨཛཱནིཏྭཱ. པཱཔིཙྪོཏི ཏེན ཨརཉྙཝཱསེན པཙྩཡལཱབྷཾ པཏྠཡམཱནོ. པཝིཝེཀནྟི ཀཱཡཙིཏྟཨུཔདྷིཝིཝེཀཾ. ཨིདམཏྠིཏནྟི ཨིམཱཡ ཀལྱཱཎཱཡ པཊིཔཏྟིཡཱ ཨཏྠོ ཨེཏསྶཱཏི ཨིདམཏྠི, ཨིདམཏྠིནོ བྷཱཝོ ཨིདམཏྠིཏཱ; ཏཾ ཨིདམཏྠིཏཾཡེཝ ནིསྶཱཡ ན ཨཉྙཾ ཀིཉྩི ལོཀཱམིསནྟི ཨཏྠོ.

ཨུཔོསཐཾ ན ཛཱནཱཏཱིཏི ནཝཝིདྷཾ ཨུཔོསཐཾ ན ཛཱནཱཏི. ཨུཔོསཐཀམྨནྟི ཨདྷམྨེནཝགྒཱདིབྷེདཾ ཙཏུབྦིདྷཾ ཨུཔོསཐཀམྨཾ ན ཛཱནཱཏི. པཱཏིམོཀྑནྟི དྭེ མཱཏིཀཱ ན ཛཱནཱཏི. པཱཏིམོཀྑུདྡེསནྟི སབྦམྤི ནཝཝིདྷཾ པཱཏིམོཀྑུདྡེསཾ ན ཛཱནཱཏི. པཝཱརཎནྟི ནཝཝིདྷཾ པཝཱརཎཾ ན ཛཱནཱཏི. པཝཱརཎཱཀམྨཾ ཨུཔོསཐཀམྨསདིསམེཝ.

ཨཔཱསཱདིཀཔཉྩཀེ ¶ – ཨཔཱསཱདིཀནྟི ཀཱཡདུཙྩརིཏཱདི ཨཀུསལཀམྨཾ ཝུཙྩཏི. པཱསཱདིཀནྟི ཀཱཡསུཙརིཏཱདི ཀུསལཀམྨཾ ཝུཙྩཏི. ཨཏིཝེལནྟི ཝེལཾ ཨཏིཀྐམྨ བཧུཏརཾ ཀཱལཾ ཀུལེསུ ཨཔྤཾ ཝིཧཱརེཏི ཨཏྠོ. ཨོཏཱརོཏི ཀིལེསཱནཾ ཨནྟོ ཨོཏརཎཾ. སཾཀིལིཊྛནྟི དུཊྛུལླཱཔཏྟིཀཱཡསཾསགྒཱདིབྷེདཾ ¶ . ཝིསུདྡྷིཔཉྩཀེཔཝཱརཎཱགྒཧཎེན ནཝཝིདྷཱཔི པཝཱརཎཱ ཝེདིཏབྦཱ. སེསཾ སབྦཏྠ ཨུཏྟཱནམེཝཱཏི.

པཉྩཀཝཱརཝཎྞནཱ ནིཊྛིཏཱ.

ཚཀྐཝཱརཝཎྞནཱ

༣༢༦. ཚཀྐེསུ – ཚ སཱམཱིཙིཡོཏི ‘‘སོ ཙ བྷིཀྑུ ཨནབྦྷིཏོ, ཏེ ཙ བྷིཀྑཱུ གཱརཡ྄ཧཱ, ཨཡཾ ཏཏྠ སཱམཱིཙི’’, ‘‘ཡུཉྫནྟཱཡསྨནྟོ སཀཾ, མཱ ཝོ སཀཾ ཝིནསྶཱཏི ཨཡཾ ཏཏྠ སཱམཱིཙི’’, ‘‘ཨཡཾ ཏེ བྷིཀྑུ པཏྟོ ཡཱཝ བྷེདནཱཡ དྷཱརེཏབྦོཏི ཨཡཾ ཏཏྠ སཱམཱིཙི’’, ‘‘ཏཏོ ནཱིཧརིཏྭཱ བྷིཀྑཱུཧི སདྡྷིཾ སཾཝིབྷཛིཏབྦཾ, ཨཡཾ ཏཏྠ སཱམཱིཙི’’, ‘‘ཨཉྙཱཏབྦཾ པརིཔུཙྪིཏབྦཾ པརིཔཉྷིཏབྦཾ, ཨཡཾ ཏཏྠ སཱམཱིཙི’’, ‘‘ཡསྶ བྷཝིསྶཏི སོ ཧརིསྶཏཱིཏི ཨཡཾ ཏཏྠ སཱམཱིཙཱི’’ཏི ཨིམཱ བྷིཀྑུཔཱཏིམོཀྑེཡེཝ ཚ སཱམཱིཙིཡོ. ཚ ཚེདནཀཱཏི པཉྩཀེ ཝུཏྟཱ པཉྩ བྷིཀྑུནཱིནཾ ཨུདཀསཱཊིཀཱཡ སདྡྷིཾ ཚ. ཚཧཱཀཱརེཧཱིཏི ཨལཛྫིཏཱ ཨཉྙཱཎཏཱ ཀུཀྐུཙྩཔཀཏཏཱ ཨཀཔྤིཡེ ཀཔྤིཡསཉྙིཏཱ ཀཔྤིཡེ ཨཀཔྤིཡསཉྙིཏཱ སཏིསམྨོསཱཏི. ཏཏྠ ཨེཀརཏྟཚཱརཏྟསཏྟཱཧཱཏིཀྐམཱདཱིསུ ཨཱཔཏྟིཾ སཏིསམྨོསེན ¶ ཨཱཔཛྫཏི. སེསཾ ཝུཏྟནཡམེཝ. ཚ ཨཱནིསཾསཱ ཝིནཡདྷརེཏི པཉྩཀེ ཝུཏྟཱ པཉྩ ཏསྶཱདྷེཡྻོ ཨུཔོསཐོཏི ཨིམིནཱ སདྡྷིཾ ཚ.

ཚ པརམཱནཱིཏི ‘‘དསཱཧཔརམཾ ཨཏིརེཀཙཱིཝརཾ དྷཱརེཏབྦཾ, མཱསཔརམཾ ཏེན བྷིཀྑུནཱ ཏཾ ཙཱིཝརཾ ནིཀྑིཔིཏབྦཾ, སནྟརུཏྟརཔརམཾ ཏེན བྷིཀྑུནཱ ཏཏོ ཙཱིཝརཾ སཱདིཏབྦཾ, ཚཀྑཏྟུཔརམཾ ཏུཎྷཱིབྷཱུཏེན ཨུདྡིསྶ ཋཱཏབྦཾ, ནཝཾ པན བྷིཀྑུནཱ སནྠཏཾ ཀཱརཱཔེཏྭཱ ཚབྦསྶཱནི དྷཱརེཏབྦཾ ཚབྦསྶཔརམཏཱ དྷཱརེཏབྦཾ, ཏིཡོཛནཔརམཾ སཧཏྠཱ དྷཱརེཏབྦཱནི, དསཱཧཔརམཾ ཨཏིརེཀཔཏྟོ དྷཱརེཏབྦོ, སཏྟཱཧཔརམཾ སནྣིདྷིཀཱརཀཾ པརིབྷུཉྫིཏབྦཱནི, ཚཱརཏྟཔརམཾ ཏེན བྷིཀྑུནཱ ཏེན ཙཱིཝརེན ཝིཔྤཝསིཏབྦཾ, ཙཏུཀྐཾསཔརམཾ, ཨཌྜྷཏེཡྻཀཾསཔརམཾ, དྭངྒུལཔབྦཔརམཾ ཨཱདཱཏབྦཾ, ཨཊྛངྒུལཔརམཾ མཉྩཔཊིཔཱདཀཾ ¶ , ཨཊྛངྒུལཔརམཾ དནྟཀཊྛ’’ནྟི ཨིམཱནི ཙུདྡས པརམཱནི. ཏཏྠ པཋམཱནི ཚ ཨེཀཾ ཚཀྐཾ, ཏཏོ ཨེཀཾ ཨཔནེཏྭཱ སེསེསུ ཨེཀེཀཾ པཀྑིཔིཏྭཱཏིཨཱདིནཱ ནཡེན ཨཉྙཱནིཔི ཚཀྐཱནི ཀཱཏབྦཱནི.

ཚ ¶ ཨཱཔཏྟིཡོཏི ཏཱིཎི ཚཀྐཱནི ཨནྟརཔེཡྻཱལེ ཝུཏྟཱནི. ཚ ཀམྨཱནཱིཏི ཏཛྫནཱིཡ-ནིཡསྶ-པབྦཱཛནཱིཡ-པཊིསཱརཎཱིཡཱནི ཙཏྟཱརི, ཨཱཔཏྟིཡཱ ཨདསྶནེ ཙ ཨཔྤཊིཀམྨེ ཙ ཝུཏྟདྭཡམྤི ཨེཀཾ, པཱཔིཀཱཡ དིཊྛིཡཱ ཨཔྤཊིནིསྶགྒེ ཨེཀནྟི ཚ. ནཧཱནེཏི ཨོརེནཌྜྷམཱསཾ ནཧཱནེ; ཝིཔྤཀཏཙཱིཝརཱདིཚཀྐདྭཡཾ ཀཐིནཀྑནྡྷཀེ ནིདྡིཊྛཾ. སེསཾ སབྦཏྠ ཨུཏྟཱནམེཝཱཏི.

ཚཀྐཝཱརཝཎྞནཱ ནིཊྛིཏཱ.

སཏྟཀཝཱརཝཎྞནཱ

༣༢༧. སཏྟཀེསུ – སཏྟ སཱམཱིཙིཡོཏི པུབྦེ ཝུཏྟེསུ ཚསུ ‘‘སཱ ཙ བྷིཀྑུནཱི ཨནབྦྷིཏཱ, ཏཱ ཙ བྷིཀྑུནིཡོ གཱརཡ྄ཧཱ, ཨཡཾ ཏཏྠ སཱམཱིཙཱི’’ཏི ཨིམཾ པཀྑིཔིཏྭཱ སཏྟ ཝེདིཏབྦཱ. སཏྟ ཨདྷམྨིཀཱ པཊིཉྙཱཏཀརཎཱཏི ‘‘བྷིཀྑུ པཱརཱཛིཀཾ ཨཛ྄ཛྷཱཔནྣོ ཧོཏི, པཱརཱཛིཀེན ཙོདིཡམཱནོ ‘སངྒྷཱདིསེསཾ ཨཛ྄ཛྷཱཔནྣོམྷཱི’ཏི པཊིཛཱནཱཏི, ཏཾ སངྒྷོ སངྒྷཱདིསེསེན ཀཱརེཏི, ཨདྷམྨིཀཾ པཊིཉྙཱཏཀརཎ’’ནྟི ཨེཝཾ སམཐཀྑནྡྷཀེ ནིདྡིཊྛཱ. དྷམྨིཀཱཔི ཏཏྠེཝ ནིདྡིཊྛཱ. སཏྟནྣཾ ཨནཱཔཏྟི སཏྟཱཧཀརཎཱིཡེན གནྟུནྟི ཝསྶཱུཔནཱཡིཀཀྑནྡྷཀེ ཝུཏྟཾ ¶ . སཏྟཱནིསཾསཱ ཝིནཡདྷརེཏི ‘‘ཏསྶཱདྷེཡྻོ ཨུཔོསཐོ པཝཱརཎཱ’’ཏི ཨིམེཧི སདྡྷིཾ པཉྩཀེ ཝུཏྟཱ པཉྩ སཏྟ ཧོནྟི. སཏྟ པརམཱནཱིཏི ཚཀྐེ ཝུཏྟཱནིཡེཝ སཏྟཀཝསེན ཡོཛེཏབྦཱནི. ཀཏཙཱིཝརནྟིཨཱདཱིནི དྭེ སཏྟཀཱནི ཀཐིནཀྑནྡྷཀེ ནིདྡིཊྛཱནི.

བྷིཀྑུསྶ ན ཧོཏི ཨཱཔཏྟི དཊྛབྦཱ, བྷིཀྑུསྶ ཧོཏི ཨཱཔཏྟི དཊྛབྦཱ, བྷིཀྑུསྶ ཧོཏི ཨཱཔཏྟི པཊིཀཱཏབྦཱཏི ཨིམཱནི ཏཱིཎི སཏྟཀཱནི, དྭེ ཨདྷམྨིཀཱནི, ཨེཀཾ དྷམྨིཀཾ; ཏཱནི ཏཱིཎིཔི ཙམྤེཡྻཀེ ནིདྡིཊྛཱནི. ཨསདྡྷམྨཱཏི ཨསཏཾ དྷམྨཱ, ཨསནྟོ ཝཱ དྷམྨཱ; ཨསོབྷནཱ ཧཱིནཱ ལཱམཀཱཏི ཨཏྠོ. སདྡྷམྨཱཏི སཏཾ བུདྡྷཱདཱིནཾ དྷམྨཱ; སནྟོ ཝཱ དྷམྨཱ སུནྡརཱ ཨུཏྟམཱཏི ཨཏྠོ. སེསཾ སབྦཏྠ ཨུཏྟཱནམེཝཱཏི.

སཏྟཀཝཱརཝཎྞནཱ ནིཊྛིཏཱ.

ཨཊྛཀཝཱརཝཎྞནཱ

༣༢༨. ཨཊྛཀེསུ ¶ ¶ – ཨཊྛཱནིསཾསེཏི ‘‘ན མཡཾ ཨིམིནཱ བྷིཀྑུནཱ སདྡྷིཾ ཨུཔོསཐཾ ཀརིསྶཱམ, ཝིནཱ ཨིམིནཱ བྷིཀྑུནཱ ཨུཔོསཐཾ ཀརིསྶཱམ, ན མཡཾ ཨིམིནཱ བྷིཀྑུནཱ སདྡྷིཾ པཝཱརེསྶཱམ, སངྒྷཀམྨཾ ཀརིསྶཱམ, ཨཱསནེ ནིསཱིདིསྶཱམ, ཡཱགུཔཱནེ ནིསཱིདིསྶཱམ, བྷཏྟགྒེ ནིསཱིདིསྶཱམ, ཨེཀཙྪནྣེ ཝསིསྶཱམ, ཡཐཱཝུཌྜྷཾ ཨབྷིཝཱདནཾ པཙྩུཊྛཱནཾ ཨཉྫལིཀམྨཾ སཱམཱིཙིཀམྨཾ ཀརིསྶཱམ, ཝིནཱ ཨིམིནཱ བྷིཀྑུནཱ ཀརིསྶཱམཱ’’ཏི ཨེཝཾ ཀོསམྦཀཀྑནྡྷཀེ ཝུཏྟེ ཨཱནིསཾསེ. དུཏིཡཨཊྛཀེཔི ཨེསེཝ ནཡོ, ཏམྤི ཧི ཨེཝམེཝ ཀོསམྦཀཀྑནྡྷཀེ ཝུཏྟཾ.

ཨཊྛ ཡཱཝཏཏིཡཀཱཏི བྷིཀྑཱུནཾ ཏེརསཀེ ཙཏྟཱརོ, བྷིཀྑུནཱིནཾ སཏྟརསཀེ བྷིཀྑཱུཧི ཨསཱདྷཱརཎཱ ཙཏྟཱརོཏི ཨཊྛ. ཨཊྛཧཱཀཱརེཧི ཀུལཱནི དཱུསེཏཱིཏི ཀུལཱནི དཱུསེཏི པུཔྥེན ཝཱ ཕལེན ཝཱ ཙུཎྞེན ཝཱ མཏྟིཀཱཡ ཝཱ དནྟཀཊྛེན ཝཱ ཝེལུ༹ཡཱ ཝཱ ཝེཛྫིཀཱཡ ཝཱ ཛངྒྷཔེསནིཀེན ཝཱཏི ཨིམེཧི ཨཊྛཧི. ཨཊྛ མཱཏིཀཱ ཙཱིཝརཀྑནྡྷཀེ, ཨཔརཱ ཨཊྛ ཀཐིནཀྑནྡྷཀེ ཝུཏྟཱ. ཨཊྛཧི ཨསདྡྷམྨེཧཱིཏི ལཱབྷེན ཨལཱབྷེན ཡསེན ཨཡསེན སཀྐཱརེན ཨསཀྐཱརེན པཱཔིཙྪཏཱཡ པཱཔམིཏྟཏཱཡ. ཨཊྛ ལོཀདྷམྨཱ ནཱམ ལཱབྷེ སཱརཱགོ, ཨལཱབྷེ པཊིཝིརོདྷོ; ཨེཝཾ ཡསེ ཨཡསེ, པསཾསཱཡ ནིནྡཱཡ, སུཁེ སཱརཱགོ, དུཀྑེ པཊིཝིརོདྷོཏི. ཨཊྛངྒིཀོ མུསཱཝཱདོཏི ‘‘ཝིནིདྷཱཡ སཉྙ’’ནྟི ¶ ཨིམིནཱ སདྡྷིཾ པཱལི༹ཡཾ ཨཱགཏེཧི སཏྟཧཱིཏི ཨཊྛཧི ཨངྒེཧི ཨཊྛངྒིཀོ.

ཨཊྛ ཨུཔོསཐངྒཱནཱིཏི –

‘‘པཱཎཾ ན ཧནེ ན ཙཱདིནྣམཱདིཡེ,

མུསཱ ན བྷཱསེ ན ཙ མཛྫཔོ སིཡཱ;

ཨབྲཧྨཙརིཡཱ ཝིརམེཡྻ མེཐུནཱ,

རཏྟིཾ ན བྷུཉྫེཡྻ ཝིཀཱལབྷོཛནཾ.

‘‘མཱལཾ ན དྷཱརེ ན ཙ གནྡྷམཱཙརེ,

མཉྩེ ཚམཱཡཾཝ སཡེཐ སནྠཏེ;

ཨེཏཉྷི ¶ ཨཊྛངྒིཀམཱཧུཔོསཐཾ,

བུདྡྷེན དུཀྑནྟགུནཱ པཀཱསིཏ’’ནྟི. (ཨ. ནི. ༣.༧༡);

ཨེཝཾ ¶ ཝུཏྟཱནི ཨཊྛ. ཨཊྛ དཱུཏེཡྻངྒཱནཱིཏི ‘‘ཨིདྷ, བྷིཀྑཝེ, བྷིཀྑུ སོཏཱ ཙ ཧོཏི སཱཝེཏཱ ཙཱ’’ཏིཨཱདིནཱ ནཡེན སངྒྷབྷེདཀེ ཝུཏྟཱནི. ཏིཏྠིཡཝཏྟཱནི མཧཱཁནྡྷཀེ ནིདྡིཊྛཱནི. ཨནཏིརིཏྟཱ ཙ ཨཏིརིཏྟཱ ཙ པཝཱརཎཱསིཀྑཱཔདེ ནིདྡིཊྛཱ. ཨཊྛནྣཾ པཙྩུཊྛཱཏབྦནྟི བྷཏྟགྒེ ཝུཌྜྷབྷིཀྑུནཱིནཾ, ཨཱསནམྤི ཏཱསཾཡེཝ དཱཏབྦཾ. ཨུཔཱསིཀཱཏི ཝིསཱཁཱ. ཨཊྛཱནིསཾསཱ ཝིནཡདྷརེཏི པཉྩཀེ ཝུཏྟེསུ པཉྩསུ ‘‘ཏསྶཱདྷེཡྻོ ཨུཔོསཐོ, པཝཱརཎཱ, སངྒྷཀམྨ’’ནྟི ཨིམེ ཏཡོ པཀྑིཔིཏྭཱ ཨཊྛ ཝེདིཏབྦཱ. ཨཊྛ པརམཱནཱིཏི པུབྦེ ཝུཏྟཔརམཱནེཝ ཨཊྛཀཝསེན ཡོཛེཏྭཱ ཝེདིཏབྦཱནི. ཨཊྛསུ དྷམྨེསུ སམྨཱ ཝཏྟིཏབྦནྟི ‘‘ན པཀཏཏྟསྶ བྷིཀྑུནོ ཨུཔོསཐོ ཋཔེཏབྦོ, ན པཝཱརཎཱ ཋཔེཏབྦཱ’’ཏིཨཱདིནཱ ནཡེན སམཐཀྑནྡྷཀེ ནིདྡིཊྛེསུ ཨཊྛསུ. སེསཾ སབྦཏྠ ཨུཏྟཱནམེཝཱཏི.

ཨཊྛཀཝཱརཝཎྞནཱ ནིཊྛིཏཱ.

ནཝཀཝཱརཝཎྞནཱ

༣༢༩. ནཝཀེསུ – ནཝ ཨཱགྷཱཏཝཏྠཱུནཱིཏི ‘‘ཨནཏྠཾ མེ ཨཙརཱི’’ཏིཨཱདཱིནི ནཝ. ནཝ ཨཱགྷཱཏཔཊིཝིནཡཱཏི ‘‘ཨནཏྠཾ མེ ཨཙརི, ཏཾ ཀུཏེཏྠ ལབྦྷཱཏི ཨཱགྷཱཏཾ པཊིཝིནེཏཱི’’ཏིཨཱདཱིནི ནཝ. ནཝ ཝིནཱིཏཝཏྠཱུནཱིཏི ནཝཧི ཨཱགྷཱཏཝཏྠཱུཧི ཨཱརཏི ཝིརཏི པཊིཝིརཏི སེཏུགྷཱཏོ. ནཝཧི སངྒྷོ བྷིཛྫཏཱིཏི ‘‘ནཝནྣཾ ཝཱ, ཨུཔཱལི, ཨཏིརེཀནཝནྣཾ ཝཱ སངྒྷརཱཛི ཙེཝ ཧོཏི སངྒྷབྷེདོ ཙཱ’’ཏི. ནཝ པརམཱནཱིཏི པུབྦེ ཝུཏྟཔརམཱནེཝ ནཝཀཝསེན ཡོཛེཏྭཱ ཝེདིཏབྦཱནི. ནཝ ཏཎྷཱམཱུལཀཱ ནཱམ ཏཎྷཾ པཊིཙྩ པརིཡེསནཱ, པརིཡེསནཾ པཊིཙྩ ལཱབྷོ, ལཱབྷཾ པཊིཙྩ ཝིནིཙྪཡོ, ཝིནིཙྪཡཾ པཊིཙྩ ཚནྡརཱགོ, ཚནྡརཱགཾ ¶ པཊིཙྩ ཨཛ྄ཛྷོསཱནཾ, ཨཛ྄ཛྷོསཱནཾ པཊིཙྩ པརིགྒཧོ, པརིགྒཧཾ པཊིཙྩ མཙྪརིཡཾ, མཙྪརིཡཾ པཊིཙྩ ཨཱརཀྑཱ, ཨཱརཀྑཱདྷིཀརཎཾ དཎྜཱདཱནསཏྠཱདཱནཀལཧཝིགྒཧཝིཝཱདཏུཝཾཏུཝཾཔེསུཉྙམུསཱཝཱདཱ. ནཝ ཝིདྷམཱནཱཏི ‘‘སེཡྻསྶ སེཡྻོཧམསྨཱི’’ཏིམཱནཱདཡོ. ནཝ ཙཱིཝརཱནཱིཏི ཏིཙཱིཝརནྟི ཝཱ ཝསྶིཀསཱཊིཀཱཏི ཝཱཏིཨཱདིནཱ ནཡེན ཝུཏྟཱནི. ན ཝིཀཔྤེཏབྦཱནཱིཏི ཨདྷིཊྛིཏཀཱལཏོ པཊྛཱཡ ན ཝིཀཔྤེཏབྦཱནི ¶ . ནཝ ཨདྷམྨིཀཱནི དཱནཱནཱིཏི སངྒྷསྶ པརིཎཏཾ ཨཉྙསངྒྷསྶ ཝཱ ཙེཏིཡསྶ ཝཱ པུགྒལསྶ ཝཱ པརིཎཱམེཏི, ཙེཏིཡསྶ པརིཎཏཾ ཨཉྙཙེཏིཡསྶ ཝཱ སངྒྷསྶ ཝཱ པུགྒལསྶ ཝཱ པརིཎཱམེཏི ¶ , པུགྒལསྶ པརིཎཏཾ ཨཉྙཔུགྒལསྶ ཝཱ སངྒྷསྶ ཝཱ ཙེཏིཡསྶ ཝཱ པརིཎཱམེཏཱིཏི ཨེཝཾ ཝུཏྟཱནི.

ནཝ པཊིགྒཧཔརིབྷོགཱཏི ཨེཏེསཾཡེཝ དཱནཱནཾ པཊིགྒཧཱ ཙ པརིབྷོགཱ ཙ. ཏཱིཎི དྷམྨིཀཱནི དཱནཱནཱིཏི སངྒྷསྶ ནིནྣཾ སངྒྷསྶེཝ དེཏི, ཙེཏིཡསྶ ནིནྣཾ ཙེཏིཡསྶེཝ, པུགྒལསྶ ནིནྣཾ པུགྒལསྶེཝ དེཏཱིཏི ཨིམཱནི ཏཱིཎི. པཊིགྒཧཔཊིབྷོགཱཔི ཏེསཾཡེཝ པཊིགྒཧཱ ཙ པརིབྷོགཱ ཙ. ནཝ ཨདྷམྨིཀཱ སཉྙཏྟིཡོཏི ཨདྷམྨཝཱདིཔུགྒལོ, ཨདྷམྨཝཱདིསམྦཧུལཱ, ཨདྷམྨཝཱདིསངྒྷོཏི ཨེཝཾ ཏཱིཎི ཏིཀཱནི སམཐཀྑནྡྷཀེ ནིདྡིཊྛཱནི. དྷམྨིཀཱ སཉྙཏྟིཡོཔི དྷམྨཝཱདཱི པུགྒལོཏིཨཱདིནཱ ནཡེན ཏཏྠེཝ ནིདྡིཊྛཱ. ཨདྷམྨཀམྨེ དྭེ ནཝཀཱནི ཨོཝཱདཝགྒསྶ པཋམསིཀྑཱཔདནིདྡེསེ པཱཙིཏྟིཡཝསེན ཝུཏྟཱནི. དྷམྨཀམྨེ དྭེ ནཝཀཱནི ཏཏྠེཝ དུཀྐཊཝསེན ཝུཏྟཱནི. སེསཾ སབྦཏྠ ཨུཏྟཱནམེཝཱཏི.

ནཝཀཝཱརཝཎྞནཱ ནིཊྛིཏཱ.

དསཀཝཱརཝཎྞནཱ

༣༣༠. དསཀེསུ – དས ཨཱགྷཱཏཝཏྠཱུནཱིཏི ནཝཀེསུ ཝུཏྟཱནི ནཝ ‘‘ཨཊྛཱནེ ཝཱ པན ཨཱགྷཱཏོ ཛཱཡཏཱི’’ཏི ཨིམིནཱ སདྡྷིཾ དས ཧོནྟི. ཨཱགྷཱཏཔཊིཝིནཡཱཔི ཏཏྠ ཝུཏྟཱ ནཝ ‘‘ཨཊྛཱནེ ཝཱ པན ཨཱགྷཱཏོ ཛཱཡཏི, ཏཾ ཀུཏེཏྠ ལབྦྷཱཏི ཨཱགྷཱཏཾ པཊིཝིནེཏཱི’’ཏི ཨིམིནཱ སདྡྷིཾ དས ཝེདིཏབྦཱ. དས ཝིནཱིཏཝཏྠཱུནཱིཏི དསཧི ཨཱགྷཱཏཝཏྠཱུཧི ཝིརཏིསངྑཱཏཱནི དས. དསཝཏྠུཀཱ མིཙྪཱདིཊྛཱིཏི ‘‘ནཏྠི དིནྣ’’ནྟིཨཱདིཝསེན ཝེདིཏབྦཱ, ‘‘ཨཏྠི དིནྣ’’ནྟིཨཱདིཝསེན སམྨཱདིཊྛི, ‘‘སསྶཏོ ལོཀོ’’ཏིཨཱདིནཱ ཝསེན པན ཨནྟགྒཱཧིཀཱ དིཊྛི ཝེདིཏབྦཱ. དས མིཙྪཏྟཱཏི མིཙྪཱདིཊྛིཨཱདཡོ ¶ མིཙྪཱཝིམུཏྟིཔརིཡོསཱནཱ, ཝིཔརཱིཏཱ སམྨཏྟཱ. སལཱཀགྒཱཧཱ སམཐཀྑནྡྷཀེ ནིདྡིཊྛཱ.

དསཧངྒེཧི སམནྣཱགཏོ བྷིཀྑུ ཨུབྦཱཧིཀཱཡ སམྨནྣིཏབྦོཏི ‘‘སཱིལཝཱ ཧོཏཱི’’ཏིཨཱདིནཱ ནཡེན ¶ སམཐཀྑནྡྷཀེ ཝུཏྟེཧི དསཧི. དས ཨཱདཱིནཝཱ རཱཛནྟེཔུརཔྤཝེསནེ རཱཛསིཀྑཱཔདེ ནིདྡིཊྛཱ. དས དཱནཝཏྠཱུནཱིཏི ཨནྣཾ པཱནཾ ཝཏྠཾ ཡཱནཾ མཱལཱ གནྡྷཾ ཝིལེཔནཾ སེཡྻཱཝསཐཾ པདཱིཔེཡྻཾ. དས རཏནཱནཱིཏི མུཏྟཱམཎིཝེལུ༹རིཡཱདཱིནི. དས པཾསུཀཱུལཱནཱིཏི སོསཱནིཀཾ, པཱཔཎིཀཾ ¶ , ཨུནྡཱུརཀྑཱཡིཏཾ, ཨུཔཙིཀཀྑཱཡིཏཾ, ཨགྒིདཌྜྷཾ, གོཁཱཡིཏཾ, ཨཛིཀཀྑཱཡིཏཾ, ཐཱུཔཙཱིཝརཾ, ཨཱབྷིསེཀིཡཾ, བྷཏཔཊིཡཱབྷཏནྟི ཨེཏེསུ ཨུཔསམྤནྣེན ཨུསྶུཀྐཾ ཀཱཏབྦཾ. དས ཙཱིཝརདྷཱརཎཱཏི ‘‘སབྦནཱིལཀཱནི ཙཱིཝརཱནི དྷཱརེནྟཱི’’ཏི ཝུཏྟཝསེན དསཱཏི ཀུརུནྡིཡཾ ཝུཏྟཾ. མཧཱཨཊྛཀཐཱཡཾ པན ‘‘ནཝསུ ཀཔྤིཡཙཱིཝརེསུ ཨུདཀསཱཊིཀཾ ཝཱ སངྐཙྩིཀཾ ཝཱ པཀྑིཔིཏྭཱ དསཱ’’ཏི ཝུཏྟཾ.

ཨཝནྡནཱིཡཔུགྒལཱ སེནཱསནཀྑནྡྷཀེ ནིདྡིཊྛཱ. དས ཨཀྐོསཝཏྠཱུནི ཨོམསཝཱདེ ནིདྡིཊྛཱནི. དས ཨཱཀཱརཱ པེསུཉྙསིཀྑཱཔདེ ནིདྡིཊྛཱ. དས སེནཱསནཱནཱིཏི མཉྩོ, པཱིཋཾ, བྷིསི, བིམྦོཧནཾ, ཙིམིལིཀཱ, ཨུཏྟརཏྠརཎཾ, ཏཊྚིཀཱ, ཙམྨཁཎྜོ, ནིསཱིདནཾ, ཏིཎསནྠཱརོ, པཎྞསནྠཱརོཏི. དས ཝརཱནི ཡཱཙིཾསཱུཏི ཝིསཱཁཱ ཨཊྛ, སུདྡྷོདནམཧཱརཱཛཱ ཨེཀཾ, ཛཱིཝཀོ ཨེཀཾ. ཡཱགུཨཱནིསཾསཱ ཙ ཨཀཔྤིཡམཾསཱནི ཙ བྷེསཛྫཀྑནྡྷཀེ ནིདྡིཊྛཱནི. སེསཾ སབྦཏྠ ཨུཏྟཱནམེཝཱཏི.

དསཀཝཱརཝཎྞནཱ ནིཊྛིཏཱ.

ཨེཀཱདསཀཝཱརཝཎྞནཱ

༣༣༡. ཨེཀཱདསཀེསུ – ཨེཀཱདསཱཏི པཎྜཀཱདཡོ ཨེཀཱདས. ཨེཀཱདས པཱདུཀཱཏི དས རཏནམཡཱ, ཨེཀཱ ཀཊྛཔཱདུཀཱ. ཏིཎཔཱདུཀམུཉྫཔཱདུཀཔབྦཛཔཱདུཀཱདཡོ པན ཀཊྛཔཱདུཀསངྒཧམེཝ གཙྪནྟི. ཨེཀཱདས པཏྟཱཏི ཏམྦལོཧམཡེན ཝཱ དཱརུམཡེན ཝཱ སདྡྷིཾ དས རཏནམཡཱ. ཨེཀཱདས ཙཱིཝརཱནཱིཏི སབྦནཱིལཀཱདཱིནི ཨེཀཱདས. ཡཱཝཏཏིཡཀཱཏི ཨུཀྑིཏྟཱནུཝཏྟིཀཱ བྷིཀྑུནཱི, སངྒྷཱདིསེསཱ ཨཊྛ, ཨརིཊྛོ, ཙཎྜཀཱལཱི༹ཏི. ཨེཀཱདས ཨནྟརཱཡིཀཱ ནཱམ ‘‘ནསི ཨནིམིཏྟཱ’’ཏི ཨཱདཡོ. ཨེཀཱདས ¶ ཙཱིཝརཱནི ཨདྷིཊྛཱཏབྦཱནཱིཏི ཏིཙཱིཝརཾ, ཝསྶིཀསཱཊིཀཱ, ནིསཱིདནཾ, པཙྩཏྠརཎཾ, ཀཎྜུཔྤཊིཙྪཱདི, མུཁཔུཉྪནཙོལ༹ཾ, པརིཀྑཱརཙོལ༹ཾ, ཨུདཀསཱཊིཀཱ, སངྐཙྩིཀཱཏི. ན ཝིཀཔྤེཏབྦཱནཱིཏི ཨེཏཱནེཝ ཨདྷིཊྛིཏཀཱལཏོ པཊྛཱཡ ན ཝིཀཔྤེཏབྦཱནི. གཎྛིཀཱ ¶ ཙ ཝིདྷཱ ཙ སུཏྟམཡེན སདྡྷིཾ ཨེཀཱདས ཧོནྟི, ཏེ སབྦེ ཁུདྡཀཀྑནྡྷཀེ ནིདྡིཊྛཱ. པཐཝིཡོ པཐཝིསིཀྑཱཔདེ ནིདྡིཊྛཱ. ནིསྶཡཔཊིཔསྶདྡྷིཡོ ཨུཔཛ྄ཛྷཱཡམྷཱ པཉྩ, ཨཱཙརིཡམྷཱ ཚ; ཨེཝཾ ཨེཀཱདས. ཨཝནྡིཡཔུགྒལཱ ནགྒེན སདྡྷིཾ ཨེཀཱདས, ཏེ སབྦེ སེནཱསནཀྑནྡྷཀེ ནིདྡིཊྛཱ ¶ . ཨེཀཱདས པརམཱནི པུབྦེ ཝུཏྟེསུ ཙུདྡསསུ ཨེཀཱདསཀཝསེན ཡོཛེཏྭཱ ཝེདིཏབྦཱནི. ཨེཀཱདས ཝརཱནཱིཏི མཧཱཔཛཱཔཏིཡཱ ཡཱཙིཏཝརེན སདྡྷིཾ པུབྦེ ཝུཏྟཱནི དས. ཨེཀཱདས སཱིམཱདོསཱཏི ‘‘ཨཏིཁུདྡཀཾ སཱིམཾ སམྨནྣནྟཱི’’ཏིཨཱདིནཱ ནཡེན ཀམྨཝགྒེ ཨཱགམིསྶནྟི.

ཨཀྐོསཀཔརིབྷཱསཀེ པུགྒལེ ཨེཀཱདསཱདཱིནཝཱ ནཱམ ‘‘ཡོ སོ, བྷིཀྑཝེ, བྷིཀྑུ ཨཀྐོསཀོ པརིབྷཱསཀོ ཨརིཡཱུཔཝཱདཱི, སབྲཧྨཙཱརཱིནཾ ཨཊྛཱནམེཏཾ ཨནཝཀཱསོ ཡཾ སོ ཨེཀཱདསནྣཾ བྱསནཱནཾ ཨཉྙཏརཾ བྱསནཾ ན ནིགཙྪེཡྻ. ཀཏམེསཾ ཨེཀཱདསནྣཾ? ཨནདྷིགཏཾ ནཱདྷིགཙྪཏི, ཨདྷིགཏཱ པརིཧཱཡཏི, སདྡྷམྨསྶ ན ཝོདཱཡནྟི, སདྡྷམྨེསུ ཝཱ ཨདྷིམཱནིཀོ ཧོཏི, ཨནབྷིརཏོ ཝཱ བྲཧྨཙརིཡཾ ཙརཏི, ཨཉྙཏརཾ ཝཱ སཾཀིལིཊྛཾ ཨཱཔཏྟིཾ ཨཱཔཛྫཏི, སིཀྑཾ ཝཱ པཙྩཀྑཱཡ ཧཱིནཱཡཱཝཏྟཏི, གཱལ༹ྷཾ ཝཱ རོགཱཏངྐཾ ཕུསཏི, ཨུམྨཱདཾ ཝཱ པཱཔུཎཱཏི ཙིཏྟཀྑེཔཾ ཝཱ, སམྨཱུལ༹ྷོ ཀཱལཾ ཀརོཏི, ཀཱཡསྶ བྷེདཱ པརམྨརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫཏཱི’’ཏི (ཨ. ནི. ༡༡.༦). ཨེཏྠ ཙ སདྡྷམྨོཏི བུདྡྷཝཙནཾ ཨདྷིཔྤེཏཾ.

ཨཱསེཝིཏཱཡཱཏི ཨཱདིཏོ པཊྛཱཡ སེཝིཏཱཡ. བྷཱཝིཏཱཡཱཏི ནིཔྥཱདིཏཱཡ ཝཌྜྷིཏཱཡ

ཝཱ. བཧུལཱིཀཏཱཡཱཏི པུནཔྤུནཾ ཀཏཱཡ. ཡཱནཱིཀཏཱཡཱཏི སུཡུཏྟཡཱནསདིསཱཡ ཀཏཱཡ. ཝཏྠུཀཏཱཡཱཏི ཡཐཱ པཏིཊྛཱ ཧོཏི; ཨེཝཾ ཀཏཱཡ. ཨནུཊྛིཏཱཡཱཏི ཨནུ ཨནུ པཝཏྟིཏཱཡ; ནིཙྩཱདྷིཊྛིཏཱཡཱཏི ཨཏྠོ. པརིཙིཏཱཡཱཏི སམནྟཏོ ཙིཏཱཡ; སབྦདིསཱསུ ཙིཏཱཡ ཨཱཙིཏཱཡ བྷཱཝིཏཱཡ ཨབྷིཝཌྜྷིཏཱཡཱཏི ཨཏྠོ. སུསམཱརདྡྷཱཡཱཏི སུཊྛུ སམཱརདྡྷཱཡ; ཝསཱིབྷཱཝཾ ཨུཔནཱིཏཱཡཱཏི ཨཏྠོ. ན པཱཔཀཾ སུཔིནནྟི པཱཔཀམེཝ ན པསྶཏི, བྷདྲཀཾ པན ཝུཌྜྷིཀཱརཎབྷཱུཏཾ ¶ པསྶཏི. དེཝཏཱ རཀྑནྟཱིཏི ཨཱརཀྑདེཝཏཱ དྷམྨིཀཾ རཀྑཾ པཙྩུཔཊྛཱཔེནྟི. ཏུཝཊཾ ཙིཏྟཾ སམཱདྷིཡཏཱིཏི ཁིཔྤཾ ཙིཏྟཾ སམཱདྷིཡཏི. ཨུཏྟརི ཨཔྤཊིཝིཛ྄ཛྷནྟོཏི མེཏྟཱཛྷཱནཏོ ཨུཏྟརིཾ ཨརཧཏྟཾ ཨསཙྪིཀརོནྟོ སེཁོ ཝཱ པུཐུཛྫནོ ཝཱ ཧུཏྭཱ ཀཱལཾ ཀརོནྟོ བྲཧྨལོཀཱུཔགོ ཧོཏི. སེསཾ སབྦཏྠ ཨུཏྟཱནམེཝཱཏི.

ཨེཀཱདསཀཝཱརཝཎྞནཱ པརིཡོསཱནཱ

ཨེཀུཏྟརིཀཝཎྞནཱ ནིཊྛིཏཱ.

ཨུཔོསཐཱདིཔུཙྪཱཝིསྶཛྫནཱ

༣༣༢. ‘‘ཨུཔོསཐཀམྨསྶ ¶ ¶ ཀོ ཨཱདཱི’’ཏིཨཱདཱིནཾ པུཙྪཱནཾ ཝིསྶཛྫནེ སཱམགྒཱི ཨཱདཱིཏི ‘‘ཨུཔོསཐཾ ཀརིསྶཱམཱ’’ཏི སཱིམཾ སོདྷེཏྭཱ ཚནྡཔཱརིསུདྡྷིཾ ཨཱཧརིཏྭཱ སནྣིཔཏིཏཱནཾ ཀཱཡསཱམགྒཱི ཨཱདི. ཀིརིཡཱ མཛ྄ཛྷེཏི པུབྦཀིཙྩཾ ཀཏྭཱ པཱཏིམོཀྑཨོསཱརཎཀིརིཡཱ མཛ྄ཛྷེ. ནིཊྛཱནཾ པརིཡོསཱནནྟི ‘‘ཏཏྠ སབྦེཧེཝ སམགྒེཧི སམྨོདམཱནེཧི ཨཝིཝདམཱནེཧི སིཀྑིཏབྦ’’ནྟི ཨིདཾ པཱཏིམོཀྑནིཊྛཱནཾ པརིཡོསཱནཾ. པཝཱརཎཱཀམྨསྶ སཱམགྒཱི ཨཱདཱིཏི ‘‘པཝཱརཎཾ ཀརིསྶཱམཱ’’ཏི སཱིམཾ སོདྷེཏྭཱ ཚནྡཔཝཱརཎཾ ཨཱཧརིཏྭཱ སནྣིཔཏིཏཱནཾ ཀཱཡསཱམགྒཱི ཨཱདི. ཀིརིཡཱ མཛ྄ཛྷེཏི པཝཱརཎཱཉཏྟི ཙ པཝཱརཎཱཀཐཱ ཙ མཛ྄ཛྷེ, སངྒྷནཝཀསྶ ‘‘པསྶནྟོ པཊིཀརིསྶཱམཱི’’ཏི ཝཙནཾ པརིཡོསཱནཾ. ཏཛྫནཱིཡཀམྨཱདཱིསུ ཝཏྠུ ནཱམ ཡེན ཝཏྠུནཱ ཀམྨཱརཧོ ཧོཏི, ཏཾ ཝཏྠུ. པུགྒལོཏི ཡེན ཏཾ ཝཏྠུ ཀཏཾ, སོ པུགྒལོ. ཀམྨཝཱཙཱ པརིཡོསཱནནྟི ‘‘ཀཏཾ སངྒྷེན ཨིཏྠནྣཱམསྶ བྷིཀྑུནོ ཏཛྫནཱིཡཀམྨཾ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི ཨེཝཾ ཏསྶཱ ཏསྶཱ ཀམྨཝཱཙཱཡ ཨཝསཱནཝཙནཾ པརིཡོསཱནཾ. སེསཾ སབྦཏྠ ཨུཏྟཱནམེཝཱཏི

ཨུཔོསཐཱདིཔུཙྪཱཝིསྶཛྫནཱཝཎྞནཱ ནིཊྛིཏཱ.

ཨཏྠཝསཔཀརཎཱཝཎྞནཱ

༣༣༤. ཨཏྠཝསཔཀརཎེ – དས ཨཏྠཝསེཏིཨཱདཱིསུ ཡཾ ཝཏྟབྦཾ ཏཾ པཋམཔཱརཱཛིཀཝཎྞནཱཡམེཝ ཝུཏྟཾ. ཡཾ སངྒྷསུཊྛུ ཏཾ སངྒྷཕཱསཱུཏིཨཱདཱིསུ ཨུཔརིམཾ ཨུཔརིམཾ པདཾ ཧེཊྛིམསྶ ཧེཊྛིམསྶ པདསྶ ཨཏྠོ.

ཨཏྠསཏཾ ¶ དྷམྨསཏནྟིཨཱདིམྷི པན ཡདེཏཾ དསསུ པདེསུ ཨེཀེཀཾ མཱུལཾ ཀཏྭཱ དསཀྑཏྟུཾ ཡོཛནཱཡ པདསཏཾ ¶ ཝུཏྟཾ. ཏཏྠ པཙྪིམསྶ པཙྪིམསྶ པདསྶ ཝསེན ཨཏྠསཏཾ པུརིམསྶ པུརིམསྶ ཝསེན དྷམྨསཏཾ ཝེདིཏབྦཾ. ཨཐ ཝཱ ཡེ དས ཨཏྠཝསེ པཊིཙྩ ཏཐཱགཏེན སཱཝཀཱནཾ སིཀྑཱཔདཾ པཉྙཏྟཾ, ཡེ པུབྦེ པཋམཔཱརཱཛིཀཝཎྞནཱཡཾ ‘‘ཏཏྠ སངྒྷསུཊྛུཏཱ ནཱམ སངྒྷསྶ སུཊྛུབྷཱཝོ ‘སུཊྛུ དེཝཱ’ཏི ཨཱགཏཊྛཱནེ ཝིཡ ‘སུཊྛུ བྷནྟེ’ཏི ཝཙནསམྤཊིཙྪནབྷཱཝོ, ཡོ ཙ ཏཐཱགཏསྶ ཝཙནཾ སམྤཊིཙྪཏི, ཏསྶ ཏཾ དཱིགྷརཏྟཾ ¶ ཧིཏཱཡ སུཁཱཡ ཧོཏི, ཏསྨཱ སངྒྷསྶ ‘སུཊྛུ བྷནྟེ’ཏི མམ ཝཙནསམྤཊིཙྪནཏྠཾ པཉྙཔེསྶཱམི ཨསམྤཊིཙྪནེ ཨཱདཱིནཝཾ སམྤཊིཙྪནེ ཙ ཨཱནིསཾསཾ དསྶེཏྭཱ ན བལཀྐཱརེན ཨབྷིབྷཝིཏྭཱཏི ཨེཏམཏྠཾ ཨཱཝིཀརོནྟོ ཨཱཧ – སངྒྷསུཊྛུཏཱཡཱ’’ཏི ཨེཝམཱདིནཱ ནཡེན ཝཎྞིཏཱ, ཏེསཾ ཨིདྷ དསཀྑཏྟུཾ ཨཱགཏཏྟཱ ཨཏྠསཏཾ ཏདཏྠཛོཏཀཱནཉྩ པདཱནཾ ཝསེན དྷམྨསཏཾ ཝེདིཏབྦཾ. ཨིདཱནི ཨཏྠཛོཏཀཱནཾ ནིརུཏྟཱིནཾ ཝསེན ནིརུཏྟིསཏཾ, དྷམྨབྷཱུཏཱནཾ ནིརུཏྟཱིནཾ ཝསེན ནིརུཏྟིསཏནྟི དྭེ ནིརུཏྟིསཏཱནི, ཨཏྠསཏེ ཉཱཎསཏཾ, དྷམྨསཏེ ཉཱཎསཏཾ, དྭཱིསུ ནིརུཏྟིསཏེསུ དྭེ ཉཱཎསཏཱནཱིཏི ཙཏྟཱརི ཉཱཎསཏཱནི ཙ ཝེདིཏབྦཱནི.

‘‘ཨཏྠསཏཾ དྷམྨསཏཾ, དྭེ ནིརུཏྟིསཏཱནི;

ཙཏྟཱརི ཉཱཎསཏཱནི, ཨཏྠཝསེ པཀརཎེ’’ཏི.

ཨིཏི ཧི ཡཾ ཝུཏྟཾ, ཨིདམེཏཾ པཊིཙྩ ཝུཏྟནྟི.

ཨིཏི སམནྟཔཱསཱདིཀཱཡ ཝིནཡསཾཝཎྞནཱཡ

མཧཱཝགྒཝཎྞནཱ ནིཊྛིཏཱ.

པཋམགཱཐཱསངྒཎིཀཾ

སཏྟནགརེསུ པཉྙཏྟསིཀྑཱཔདཝཎྞནཱ

༣༣༥. ཨེཀཾསཾ ¶ ¶ ཙཱིཝརཾ ཀཏྭཱཏི ཨེཀསྨིཾ ཨཾསཀཱུཊེ ཙཱིཝརཾ ཀཏྭཱ; སཱདྷུཀཾ ཨུཏྟརཱསངྒཾ ཀཏྭཱཏི ཨཏྠོ. པགྒཎྷིཏྭཱན ཨཉྫལིནྟི དསནཁསམོདྷཱནསམུཛྫལཾ ཨཉྫལིཾ ཨུཀྑིཔིཏྭཱ. ཨཱསཱིསམཱནརཱུཔོ ཝཱཏི པཙྩཱསཱིསམཱནརཱུཔོ ཝིཡ. ཀིསྶ ཏྭཾ ཨིདྷ མཱགཏོཏི ཀེན ཀཱརཎེན ཀིམཏྠཾ པཏྠཡམཱནོ ཏྭཾ ཨིདྷ ཨཱགཏོ. ཀོ ཨེཝམཱཧ? སམྨཱསམྦུདྡྷོ. ཀཾ ཨེཝམཱཧ? ཨཱཡསྨནྟཾ ཨུཔཱལིཾ. ཨིཏི ཨཱཡསྨཱ ཨུཔཱལི བྷགཝནྟཾ ¶ ཨུཔསངྐམིཏྭཱ ‘‘དྭཱིསུ ཝིནཡེསཱུ’’ཏི ཨིམཾ གཱཐཾ པུཙྪི. ཨཐསྶ བྷགཝཱ ‘‘བྷདྡཀོ ཏེ ཨུམྨངྒོ’’ཏིཨཱདཱིནི ཝཏྭཱ ཏཾ ཝིསྶཛྫེསི. ཨེས ནཡོ སབྦཏྠ. ཨིཏི ཨིམེ སབྦཔཉྷེ བུདྡྷཀཱལེ ཨུཔཱལིཏྠེརོ པུཙྪི. བྷགཝཱ བྱཱཀཱསི. སངྒཱིཏིཀཱལེ པན མཧཱཀསྶཔཏྠེརོ པུཙྪི. ཨུཔཱལིཏྠེརོ བྱཱཀཱསི.

ཏཏྠ བྷདྡཀོ ཏེ ཨུམྨངྒོཏི བྷདྡཀཱ ཏེ པཉྷཱ; པཉྷཱ ཧི ཨཝིཛྫནྡྷཀཱརཏོ ཨུམྨུཛྫིཏྭཱ ཋིཏཏྟཱ ‘‘ཨུམྨངྒོ’’ཏི ཝུཙྩཏི. ཏགྒྷཱཏི ཀཱརཎཏྠེ ནིཔཱཏོ. ཡསྨཱ མཾ པུཙྪསི, ཏསྨཱ ཏེ ཨཧམཀྑིསྶནྟི ཨཏྠོ. སམྤཊིཙྪནཏྠེ ཝཱ, ‘‘ཏགྒྷཱ’’ཏི ཧི ཨིམིནཱ ཝཙནཾ སམྤཊིཙྪིཏྭཱ ཨཀྑིསྶནྟི ཨཱཧ. ‘‘སམཱདཧིཏྭཱ ཝིསིབྦེནྟི, སཱམིསེན, སསིཏྠཀ’’ནྟི ཨིམཱནི ཏཱིཎིཡེཝ སིཀྑཱཔདཱནི བྷགྒེསུ པཉྙཏྟཱནི.

ཙཏུཝིཔཏྟིཝཎྞནཱ

༣༣༦. ཡཾ ཏཾ པུཙྪིམྷཱཏི ཡཾ ཏྭཾ ཨཔུཙྪིམྷཱ. ཨཀིཏྟཡཱིཏི ཨབྷཱསི. ནོཏི ཨམྷཱཀཾ ¶ . ཏཾ ཏཾ བྱཱཀཏནྟི ཡཾ ཡཾ པུཊྛཾ, ཏཾ ཏདེཝ བྱཱཀཏཾ. ཨནཉྙཐཱཏི ཨཉྙཐཱ ཨཀཏྭཱ བྱཱཀཏཾ.

ཡེ དུཊྛུལླཱ སཱ སཱིལཝིཔཏྟཱིཏི ཨེཏྠ ཀིཉྩཱཔི སཱིལཝིཔཏྟི ནཱམ པཉྷེ ནཏྠི, ཨཐ ཁོ དུཊྛུལླཾ ཝིསྶཛྫེཏུཀཱམཏཱཡེཏཾ ཝུཏྟཾ. ཙཏཱུསུ ཧི ཝིཔཏྟཱིསུ དུཊྛུལླཾ ཨེཀཱཡ ཝིཔཏྟིཡཱ སངྒཧིཏཾ, ཨདུཊྛུལླཾ ཏཱིཧི ཝིཔཏྟཱིཧི སངྒཧིཏཾ. ཏསྨཱ ‘‘ཡེ དུཊྛུལླཱ སཱ སཱིལཝིཔཏྟཱི’’ཏི ཝཏྭཱ ཏམེཝ ཝིཏྠཱརཏོ དསྶེཏུཾ ‘‘པཱརཱཛིཀཾ སངྒྷཱདིསེསོ སཱིལཝིཔཏྟཱིཏི ཝུཙྩཏཱི’’ཏི ཨཱཧ.

ཨིདཱནི ¶ ཏིསྶནྣཾ ཝིཔཏྟཱིནཾ ཝསེན ཨདུཊྛུལླཾ དསྶེཏུཾ ‘‘ཐུལླཙྩཡ’’ནྟིཨཱདིམཱཧ. ཏཏྠ ཡོ ཙཱཡཾ, ཨཀྐོསཏི ཧསཱདྷིཔྤཱཡོཏི ཨིདཾ དུབྦྷཱསིཏསྶ ཝཏྠུདསྶནཏྠཾ ཝུཏྟཾ.

ཨབྦྷཱཙིཀྑནྟཱིཏི ‘‘ཏཐཱཧཾ བྷགཝཏཱ དྷམྨཾ དེསིཏཾ ཨཱཛཱནཱམཱི’’ཏི ཝདནྟཱ ཨབྦྷཱཙིཀྑནྟི.

ཨཡཾ སཱ ཨཱཛཱིཝཝིཔཏྟིསམྨཏཱཏི ཨཡཾ ཚཧི སིཀྑཱཔདེཧི སངྒཧིཏཱ ཨཱཛཱིཝཝིཔཏྟི ནཱམ ཙཏུཏྠཱ ཝིཔཏྟི སམྨཏཱཏི ཨེཏྟཱཝཏཱ ‘‘ཨདུཊྛུལླ’’ནྟི ཨིདཾ ཝིསྶཛྫིཏཾ ཧོཏི.

ཨིདཱནི ‘‘ཡེ ཙ ཡཱཝཏཏིཡཀཱ’’ཏི པཉྷཾ ཝིསྶཛྫེཏུཾ ‘‘ཨེཀཱདསཱ’’ཏིཨཱདིམཱཧ.

ཚེདནཀཱདིཝཎྞནཱ

༣༣༧. ཡསྨཱ པན ‘‘ཡེ ཙ ཡཱཝཏཏིཡཀཱ’’ཏི ཨཡཾ པཉྷོ ‘‘ཨེཀཱདས ཡཱཝཏཏིཡཀཱ’’ཏི ཨེཝཾ སངྑཱཝསེན ཝིསྶཛྫིཏོ, ཏསྨཱ སངྑཱནུསནྡྷིཝསེནེཝ ‘‘ཀཏི ཚེདནཀཱནཱི’’ཏིཨཱདིཀེ ཨཉྙེ ཨནྟརཱཔཉྷེ པུཙྪི. ཏེསཾ ཝིསྶཛྫནཏྠཾ ‘‘ཚ ཚེདནཀཱནཱི’’ཏིཨཱདི ཝུཏྟཾ. ཏཏྠ ‘‘ཨེཀཾ ¶ བྷེདནཀཾ, ཨེཀཾ ཨུདྡཱལནཀཾ, སོདས ཛཱནནྟི པཉྙཏྟཱ’’ཏི ཨིདམེཝ ཨཔུབྦཾ. སེསཾ མཧཱཝགྒེ ཝིབྷཏྟམེཝ. ཡཾ པནེཏཾ ཨཔུབྦཾ ཏཏྠ ཨེཀཾ བྷེདནཀནྟི སཱུཙིགྷརཾ. ཨེཀཾ ཨུདྡཱལནཀནྟི ཏཱུལོནདྡྷམཉྩཔཱིཋཾ. སོདསཱཏི སོལ༹ས. ཛཱནནྟི པཉྙཏྟཱཏི ‘‘ཛཱན’’ནྟི ཨེཝཾ ཝཏྭཱ པཉྙཏྟཱ, ཏེ ཨེཝཾ ཝེདིཏབྦཱ – ‘‘ཛཱནཾ སངྒྷིཀཾ ལཱབྷཾ པརིཎཏཾ ¶ ཨཏྟནོ པརིཎཱམེཡྻ, ཛཱནཾ པུབྦུཔགཏཾ བྷིཀྑུཾ ཨནུཔཁཛྫ ནིསཛྫཾ ཀཔྤེཡྻ, ཛཱནཾ སཔྤཱཎཀཾ ཨུདཀཾ ཏིཎཾ ཝཱ མཏྟིཀཾ ཝཱ སིཉྩེཡྻ ཝཱ སིཉྩཱཔེཡྻ ཝཱ, ཛཱནཾ བྷིཀྑུནིཔརིཔཱཙིཏཾ པིཎྜཔཱཏཾ བྷུཉྫེཡྻ, ཛཱནཾ ཨཱསཱདནཱཔེཀྑོ བྷུཏྟསྨིཾ པཱཙིཏྟིཡཾ, ཛཱནཾ སཔྤཱཎཀཾ ཨུདཀཾ པརིབྷུཉྫེཡྻ, ཛཱནཾ ཡཐཱདྷམྨཾ ནིཧཏཱདྷིཀརཎཾ, ཛཱནཾ དུཊྛུལླཾ ཨཱཔཏྟིཾ པཊིཙྪཱདེཡྻ, ཛཱནཾ ཨཱུནཝཱིསཏིཝསྶཾ པུགྒལཾ ཨུཔསམྤཱདེཡྻ, ཛཱནཾ ཐེཡྻསཏྠེན སདྡྷིཾ, ཛཱནཾ ཏཐཱཝཱདིནཱ བྷིཀྑུནཱ ཨཀཏཱནུདྷམྨེན, ཛཱནཾ ཏཐཱནཱསིཏཾ སམཎུདྡེསཾ, ཛཱནཾ སངྒྷིཀཾ ལཱབྷཾ པརིཎཏཾ པུགྒལསྶ པརིཎཱམེཡྻ, ཛཱནཾ པཱརཱཛིཀཾ དྷམྨཾ ཨཛ྄ཛྷཱཔནྣཾ བྷིཀྑུནིཾ ནེཝ ཨཏྟནཱ པཊིཙོདེཡྻ, ཛཱནཾ ཙོརིཾ ཝཛ྄ཛྷཾ ཝིདིཏཾ ཨནཔལོཀེཏྭཱ, ཛཱནཾ སབྷིཀྑུཀཾ ཨཱརཱམཾ ཨནཱཔུཙྪཱ པཝིསེཡྻཱ’’ཏི.

ཨསཱདྷཱརཎཱདིཝཎྞནཱ

༣༣༨. ཨིདཱནི ¶ ‘‘སཱདྷཱརཎཾ ཨསཱདྷཱརཎ’’ནྟི ཨིམཾ པུརིམཔཉྷཾ ཝིསྶཛྫེནྟོ ‘‘ཝཱིསཾ དྭེ སཏཱནཱི’’ཏིཨཱདིམཱཧ. ཏཏྠ བྷིཀྑུནཱིཧི ཨསཱདྷཱརཎེསུ ཚ སངྒྷཱདིསེསཱཏི ཝིསྶཊྛི, ཀཱཡསཾསགྒོ, དུཊྛུལླཾ, ཨཏྟཀཱམ, ཀུཊི, ཝིཧཱརོཏི. དྭེ ཨནིཡཏེཧི ཨཊྛཱཏི དྭཱིཧི ཨནིཡཏེཧི སདྡྷིཾ ཨཊྛ ཨིམེ.

ནིསྶགྒིཡཱནི དྭཱདསཱཏི –

དྷོཝནཉྩ པཊིགྒཧོ, ཀོསེཡྻསུདྡྷདྭེབྷཱགཱ;

ཚབྦསྶཱནི ནིསཱིདནཾ, དྭེ ལོམཱ པཋམོ པཏྟོ;

ཝསྶིཀཱ ཨཱརཉྙཀེན ཙཱཏི – ཨིམེ དྭཱདས.

དྭེཝཱིསཏི ཁུདྡཀཱཏི –

སཀལོ བྷིཀྑུནཱིཝགྒོ, པརམྤརཉྩ བྷོཛནཾ;

ཨནཏིརིཏྟཾ ཨབྷིཧཊཾ, པཎཱིཏཉྩ ཨཙེལཀཾ;

ཨཱུནཾ དུཊྛུལླཚཱདནཾ.

མཱཏུགཱམེན ¶ སདྡྷིཉྩ, ཡཱ ཙ ཨནིཀྑནྟརཱཛཀེ;

སནྟཾ ¶ བྷིཀྑུཾ ཨནཱཔུཙྪཱ, ཝིཀཱལེ གཱམཔྤཝེསནཱ.

ནིསཱིདནེ ཙ ཡཱ སིཀྑཱ, ཝསྶིཀཱ ཡཱ ཙ སཱཊིཀཱ;

དྭཱཝཱིསཏི ཨིམཱ སིཀྑཱ, ཁུདྡཀེསུ པཀཱསིཏཱཏི.

བྷིཀྑཱུཧི ཨསཱདྷཱརཎེསུཔི སངྒྷམྷཱ དས ནིསྶརེཏི ‘‘སངྒྷམྷཱ ནིསྶཱརཱིཡཏཱི’’ཏི ཨེཝཾ ཝིབྷངྒེ ཝུཏྟཱ, མཱཏིཀཱཡཾ པན ‘‘ནིསྶཱརཎཱིཡཾ སངྒྷཱདིསེས’’ནྟི ཨེཝཾ ཨཱགཏཱ དས. ནིསྶགྒིཡཱནི དྭཱདསཱཏི བྷིཀྑུནིཝིབྷངྒེ ཝིབྷཏྟཱནི ནིསྶགྒིཡཱནེཝ. ཁུདྡཀཱཔི ཏཏྠ ཝིབྷཏྟཁུདྡཀཱ ཨེཝ. ཏཐཱ ཙཏྟཱརོ པཱཊིདེསནཱིཡཱ, ཨིཏི སཏཉྩེཝ ཏིཾསཉྩ སིཀྑཱ ཝིབྷངྒེ བྷིཀྑུནཱིནཾ བྷིཀྑཱུཧི ཨསཱདྷཱརཎཱ. སེསཾ ཨིམསྨིཾ སཱདྷཱརཎཱསཱདྷཱརཎཝིསྶཛྫནེ ཨུཏྟཱནམེཝ.

ཨིདཱནི ཝིཔཏྟིཡོ ཙ ‘‘ཡེཧི སམཐེཧི སམྨནྟཱི’’ཏི ཨིདཾ པཉྷཾ ཝིསྶཛྫེནྟོ ཨཊྛེཝ པཱརཱཛིཀཱཏིཨཱདིམཱཧ. ཏཏྠ དུརཱསདཱཏི ཨིམིནཱ ཏེསཾ སཔྤཊིབྷཡཏཾ ¶ དསྶེཏི. ཀཎྷསཔྤཱདཡོ ཝིཡ ཧི ཨེཏེ དུརཱསདཱ དུརཱུཔགམནཱ དུརཱསཛྫནཱ, ཨཱཔཛྫིཡམཱནཱ མཱུལཙྪེདཱཡ སཾཝཏྟནྟི. ཏཱལཝཏྠུསམཱུཔམཱཏི སབྦཾ ཏཱལཾ ཨུདྡྷརིཏྭཱ ཏཱལསྶ ཝཏྠུམཏྟཀརཎེན སམཱུཔམཱ. ཡཐཱ ཝཏྠུམཏྟཀཏོ ཏཱལོ ན པུན པཱཀཏིཀོ ཧོཏི, ཨེཝཾ ན པུན པཱཀཏིཀཱ ཧོནྟི.

ཨེཝཾ སཱདྷཱརཎཾ ཨུཔམཾ དསྶེཏྭཱ པུན ཨེཀེཀསྶ ཝུཏྟཾ ཨུཔམཾ དསྶེནྟོ པཎྜུཔལཱསོཏིཨཱདིམཱཧ. ཨཝིརུལ༹ྷཱི བྷཝནྟི ཏེཏི ཡཐཱ ཨེཏེ པཎྜུཔལཱསཱདཡོ པུནཧརིཏཱདིབྷཱཝེན ཨཝིརུལ༹ྷིདྷམྨཱ ཧོནྟི; ཨེཝཾ པཱརཱཛིཀཱཔི པུན པཀཏིསཱིལཱབྷཱཝེན ཨཝིརུལ༹ྷིདྷམྨཱ ཧོནྟཱིཏི ཨཏྠོ. ཨེཏྟཱཝཏཱ ‘‘ཝིཔཏྟིཡོ ཙ ཡེཧི སམཐེཧི སམྨནྟཱི’’ཏི ཨེཏྠ ཨིམཱ ཏཱཝ ཨཊྛ པཱརཱཛིཀཝིཔཏྟིཡོ ཀེཧིཙི སམཐེཧི ན སམྨནྟཱིཏི ཨེཝཾ དསྶིཏཾ ཧོཏི. ཡཱ པན ཝིཔཏྟིཡོ སམྨནྟི, ཏཱ དསྶེཏུཾ ཏེཝཱིསཏི སངྒྷཱདིསེསཱཏིཨཱདི ཝུཏྟཾ. ཏཏྠ ཏཱིཧི སམཐེཧཱིཏི སབྦསངྒཱཧིཀཝཙནམེཏཾ. སངྒྷཱདིསེསཱ ཧི དྭཱིཧི སམཐེཧི སམྨནྟི, ན ཏིཎཝཏྠཱརཀེན. སེསཱ ཏཱིཧིཔི སམྨནྟི.

དྭེ ཨུཔོསཐཱ དྭེ པཝཱརཎཱཏི ཨིདཾ བྷིཀྑཱུནཉྩ བྷིཀྑུནཱིནཉྩ ཝསེན ཝུཏྟཾ. ཝིབྷཏྟིམཏྟདསྶནེནེཝ ¶ ཙེཏཾ ཝུཏྟཾ, ན སམཐེཧི ཝཱུཔསམནཝསེན. བྷིཀྑུཨུཔོསཐོ, བྷིཀྑུནིཨུཔོསཐོ, བྷིཀྑུཔཝཱརཎཱ, བྷིཀྑུནིཔཝཱརཎཱཏི ཨིམཱཔི ཧི ཙཏསྶོ ཝིབྷཏྟིཡོ ¶ ; ཝིབྷཛནཱནཱིཏི ཨཏྠོ. ཙཏྟཱརི ཀམྨཱནཱིཏི ཨདྷམྨེནཝགྒཱདཱིནི ཨུཔོསཐཀམྨཱནི. པཉྩེཝ ཨུདྡེསཱ ཙཏུརོ བྷཝནྟི ཨནཉྙཐཱཏི བྷིཀྑཱུནཾ པཉྩ ཨུདྡེསཱ བྷིཀྑུནཱིནཾ ཙཏུརོ བྷཝནྟི, ཨཉྙཐཱ ན བྷཝནྟི; ཨིམཱ ཨཔརཱཔི ཝིབྷཏྟིཡོ. ཨཱཔཏྟིཀྑནྡྷཱ ཙ བྷཝནྟི སཏྟ, ཨདྷིཀརཎཱནི ཙཏྟཱརཱིཏི ཨིམཱ པན ཝིབྷཏྟིཡོ སམཐེཧི སམྨནྟི, ཏསྨཱ སཏྟཧི སམཐེཧཱིཏིཨཱདིམཱཧ. ཨཐ ཝཱ ‘‘དྭེ ཨུཔོསཐཱ དྭེ པཝཱརཎཱ ཙཏྟཱརི ཀམྨཱནི པཉྩེཝ ཨུདྡེསཱ ཙཏུརོ བྷཝནྟི, ཨནཉྙཐཱ’’ཏི ཨིམཱཔི ཙཏསྶོ ཝིབྷཏྟིཡོ ནིསྶཱཡ ‘‘ནསྶནྟེཏེ ཝིནསྶནྟེཏེ’’ཏིཨཱདིནཱ ནཡེན ཡཱ ཨཱཔཏྟིཡོ ཨཱཔཛྫནྟི, ཏཱ ཡསྨཱ ཝུཏྟཔྤཀཱརེཧེཝ སམཐེཧི སམྨནྟི, ཏསྨཱ ཏཾམཱུལཀཱནཾ ཨཱཔཏྟཱིནཾ སམཐདསྶནཏྠམྤི ཏཱ ཝིབྷཏྟིཡོ ཝུཏྟཱཏི ཝེདིཏབྦཱ. ཀིཙྩཾ ཨེཀེནཱཏི ཀིཙྩཱདྷིཀརཎཾ ཨེཀེན སམཐེན སམྨཏི.

པཱརཱཛིཀཱདིཨཱཔཏྟིཝཎྞནཱ

༣༣༩. ཨེཝཾ ¶ པུཙྪཱནུཀྐམེན སབྦཔཉྷེ ཝིསྶཛྫེཏྭཱ ཨིདཱནི ‘‘ཨཱཔཏྟིཀྑནྡྷཱ ཙ བྷཝནྟི སཏྟཱ’’ཏི ཨེཏྠ སངྒཧིཏཨཱཔཏྟིཀྑནྡྷཱནཾ པཙྩེཀཾ ནིབྦཙནམཏྟཾ དསྶེནྟོ པཱརཱཛིཀནྟིཨཱདིམཱཧ. ཏཏྠ པཱརཱཛིཀནྟི གཱཐཱཡ ཨཡམཏྠོ – ཡདིདཾ པུགྒལཱཔཏྟིསིཀྑཱཔདཔཱརཱཛིཀེསུ ཨཱཔཏྟིཔཱརཱཛིཀཾ ནཱམ ཝུཏྟཾ, ཏཾ ཨཱཔཛྫནྟོ པུགྒལོ ཡསྨཱ པརཱཛིཏོ པརཱཛཡམཱཔནྣོ སདྡྷམྨཱ ཙུཏོ པརདྡྷོ བྷཊྛོ ནིརངྐཏོ ཙ ཧོཏི, ཨནིཧཏེ ཏསྨིཾ པུགྒལེ པུན ཨུཔོསཐཔྤཝཱརཎཱདིབྷེདོ སཾཝཱསོ ནཏྠི. ཏེནེཏཾ ཨིཏི ཝུཙྩཏཱིཏི ཏེན ཀཱརཎེན ཨེཏཾ ཨཱཔཏྟིཔཱརཱཛིཀནྟི ཝུཙྩཏི. ཨཡཉྷེཏྠ སངྑེཔཏྠོ – ཡསྨཱ པརཱཛིཏོ ཧོཏི ཏེན, ཏསྨཱ ཨེཏཾ པཱརཱཛིཀནྟི ཝུཙྩཏི.

དུཏིཡགཱཐཱཡཔི བྱཉྫནཾ ཨནཱདིཡིཏྭཱ ཨཏྠམཏྟམེཝ དསྶེཏུཾ སངྒྷོཝ དེཏི པརིཝཱསནྟིཨཱདི ཝུཏྟཾ. ཨཡཾ པནེཏྠ ཨཏྠོ – ཨིམཾ ཨཱཔཏྟིཾ ཨཱཔཛྫིཏྭཱ ཝུཊྛཱཏུཀཱམསྶ ཡཾ ཏཾ ཨཱཔཏྟིཝུཊྛཱནཾ ཏསྶ ཨཱདིམྷི ཙེཝ པརིཝཱསདཱནཏྠཱཡ ཨཱདིཏོ སེསེ མཛ྄ཛྷེ མཱནཏྟདཱནཏྠཱཡ མཱུལཱཡཔཊིཀསྶནེན ཝཱ སཧ མཱནཏྟདཱནཏྠཱཡ, ཨཝསཱནེ ཨབྦྷཱནཏྠཱཡ ཙ སངྒྷོ ཨིཙྪིཏབྦོ, ན ¶ ཧེཏྠ ཨེཀམྤི ཀམྨཾ ཝིནཱ སངྒྷེན སཀྐཱ ཀཱཏུནྟི སངྒྷོ, ཨཱདིམྷི ཙེཝ སེསེ ཙ ཨིཙྪིཏབྦོ ཨསྶཱཏི སངྒྷཱདིསེསོ.

ཏཏིཡགཱཐཱཡ ཨནིཡཏོ ན ནིཡཏོཏི ཡསྨཱ ན ནིཡཏོ, ཏསྨཱ ཨནིཡཏོ ཨཡམཱཔཏྟིཀྑནྡྷོཏི ཨཏྠོ. ཀིཾ ཀཱརཎཱ ན ནིཡཏོཏི? ཨནེཀཾསིཀཏཾ ¶ པདཾ, ཡསྨཱ ཨིདཾ སིཀྑཱཔདཾ ཨནེཀཾསེན ཀཏནྟི ཨཏྠོ. ཀཐཾ ཨནེཀཾསེན? ཏིཎྞམཉྙཏརཾ ཋཱནཾ, ཏིཎྞཾ དྷམྨཱནཾ ཨཉྙཏརེན ཀཱརེཏབྦོཏི ཧི ཏཏྠ ཝུཏྟཾ, ཏསྨཱ ‘‘ཨནིཡཏོ’’ཏི པཝུཙྩཏི, སོ ཨཱཔཏྟིཀྑནྡྷོ ཨནིཡཏོཏི ཝུཙྩཏི. ཡཐཱ ཙ ཏིཎྞཾ ཨཉྙཏརཾ ཋཱནཾ, ཨེཝཾ དྭིནྣཾ དྷམྨཱནཾ ཨཉྙཏརཾ ཋཱནཾ ཡཏྠ ཝུཏྟཾ, སོཔི ཨནིཡཏོ ཨེཝ.

ཙཏུཏྠགཱཐཱཡ ཨཙྩཡོ ཏེན སམོ ནཏྠཱིཏི དེསནཱགཱམིནཱིསུ ཨཙྩཡེསུ ཏེན སམོ ཐཱུལོ ཨཙྩཡོ ནཏྠི, ཏེནེཏཾ ཨིཏི ཝུཙྩཏི; ཐཱུལཏྟཱ ཨཙྩཡསྶ ཨེཏཾ ཐུལླཙྩཡནྟི ཝུཙྩཏཱིཏི ཨཏྠོ.

པཉྩམགཱཐཱཡ ¶ ནིསྶཛྫིཏྭཱན དེསེཏི ཏེནེཏནྟི ནིསྶཛྫིཏྭཱ དེསེཏབྦཏོ ནིསྶགྒིཡནྟི ཝུཙྩཏཱིཏི ཨཏྠོ.

ཚཊྛགཱཐཱཡ པཱཏེཏི ཀུསལཾ དྷམྨནྟི སཉྩིཙྩ ཨཱཔཛྫནྟསྶ ཀུསལདྷམྨསངྑཱཏཾ ཀུསལཙིཏྟཾ པཱཏེཏི, ཏསྨཱ པཱཏེཏི ཙིཏྟནྟི པཱཙིཏྟིཡཾ. ཡཾ པན ཙིཏྟཾ པཱཏེཏི, ཏཾ ཡསྨཱ ཨརིཡམགྒཾ ཨཔརཛ྄ཛྷཏི, ཙིཏྟསམྨོཧཀཱརཎཉྩ ཧོཏི, ཏསྨཱ ‘‘ཨརིཡམགྒཾ ཨཔརཛ྄ཛྷཏི, ཙིཏྟསམྨོཧནཊྛཱན’’ནྟི ཙ ཝུཏྟཾ.

པཱཊིདེསནཱིཡགཱཐཱསུ ‘‘གཱརཡ྄ཧཾ ཨཱཝུསོ དྷམྨཾ ཨཱཔཛྫི’’ནྟི ཝུཏྟགཱརཡ྄ཧབྷཱཝཀཱརཎདསྶནཏྠམེཝ བྷིཀྑུ ཨཉྙཱཏཀོ སནྟོཏིཨཱདི ཝུཏྟཾ. པཊིདེསེཏབྦཏོ པན སཱ ཨཱཔཏྟི པཱཊིདེསནཱིཡཱཏི ཝུཙྩཏི.

དུཀྐཊགཱཐཱཡ ཨཔརདྡྷཾ ཝིརདྡྷཉྩ ཁལིཏནྟི སབྦམེཏཾ ‘‘ཡཉྩ དུཀྐཊ’’ནྟི ཨེཏྠ ཝུཏྟསྶ དུཀྐཊསྶ པརིཡཱཡཝཙནཾ. ཡཉྷི དུཊྛུ ཀཏཾ ཝིརཱུཔཾ ཝཱ ཀཏཾ, ཏཾ དུཀྐཊཾ. ཏཾ པནེཏཾ ཡཐཱ སཏྠཱརཱ ཝུཏྟཾ; ཨེཝཾ ཨཀཏཏྟཱ ཨཔརདྡྷཾ, ཀུསལཾ ཝིརཛ྄ཛྷིཏྭཱ པཝཏྟཏྟཱ ཝིརདྡྷཾ, ཨརིཡཝཏྟཔཊིཔདཾ ཨནཱརུལ༹ྷཏྟཱ ¶ ཁལིཏཾ. ཡཾ མནུསྶོ ཀརེཏི ཨིདཾ པནསྶ ཨོཔམྨནིདསྶནཾ. ཏསྶཏྠོ – ཡཐཱ ཧི ཡཾ ལོཀེ མནུསྶོ ཨཱཝི ཝཱ ཡདི ཝཱ རཧོ པཱཔཾ ཀརོཏི, ཏཾ དུཀྐཊནྟི པཝེདེནྟི; ཨེཝམིདམྤི བུདྡྷཔྤཊིཀུཊྛེན ལཱམཀབྷཱཝེན པཱཔཾ, ཏསྨཱ དུཀྐཊནྟི ཝེདིཏབྦཾ.

དུབྦྷཱསིཏགཱཐཱཡ དུབྦྷཱསིཏཾ དུརཱབྷཊྛནྟི དུཊྛུ ཨཱབྷཊྛཾ བྷཱསིཏཾ ལཔིཏནྟི དུརཱབྷཊྛཾ. ཡཾ དུརཱབྷཊྛཾ, ཏཾ དུབྦྷཱསིཏནྟི ཨཏྠོ. ཀིཉྩ བྷིཡྻོ? སཾཀིལིཊྛཉྩ ཡཾ པདཾ, སཾཀིལིཊྛཾ ཡསྨཱ ཏཾ པདཾ ཧོཏཱིཏི ཨཏྠོ. ཏཐཱ ཡཉྩ ཝིཉྙཱུ གརཧནྟི, ཡསྨཱ ཙ ནཾ ¶ ཝིཉྙཱུ གརཧནྟཱིཏི ཨཏྠོ. ཏེནེཏཾ ཨིཏི ཝུཙྩཏཱིཏི ཏེན སཾཀིལིཊྛབྷཱཝེན ཙ ཝིཉྙུགརཧནེནཱཔི ཙ ཨེཏཾ ཨིཏི ཝུཙྩཏི; ‘‘དུབྦྷཱསིཏ’’ནྟི ཨེཝཾ ཝུཙྩཏཱིཏི ཨཏྠོ.

སེཁིཡགཱཐཱཡ ‘‘ཨཱདི ཙེཏཾ ཙརཎཉྩཱ’’ཏིཨཱདིནཱ ནཡེན སེཁསྶ སནྟཀབྷཱཝཾ དཱིཔེཏི. ཏསྨཱ སེཁསྶ ཨིདཾ སེཁིཡནྟི ཨཡམེཏྠ སངྑེཔཏྠོ. ཨིདཾ ‘‘གརུཀལཧུཀཉྩཱཔཱི’’ཏིཨཱདིཔཉྷེཧི ཨསངྒཧིཏསྶ ‘‘ཧནྡ ཝཱཀྱཾ སུཎོམ ཏེ’’ཏི ཨིམིནཱ པན ཨཱཡཱཙནཝཙནེན སངྒཧིཏསྶ ཨཏྠསྶ དཱིཔནཏྠཾ ཝུཏྟནྟི ཝེདིཏབྦཾ.

ཚནྣམཏིཝསྶཏཱིཏིཨཱདིམྷིཔི ¶ ཨེསེཝ ནཡོ. ཏཏྠ ཚནྣམཏིཝསྶཏཱིཏི གེཧཾ ཏཱཝ ཏིཎཱདཱིཧི ཨཙྪནྣཾ ཨཏིཝསྶཏི. ཨིདཾ པན ཨཱཔཏྟིསངྑཱཏཾ གེཧཾ ཚནྣཾ ཨཏིཝསྶཏི; མཱུལཱཔཏྟིཉྷི ཚཱདེནྟོ ཨཉྙཾ ནཝཾ ཨཱཔཏྟིཾ ཨཱཔཛྫཏི. ཝིཝཊཾ ནཱཏིཝསྶཏཱིཏི གེཧཾ ཏཱཝ ཨཝིཝཊཾ སུཙྪནྣཾ ནཱཏིཝསྶཏི. ཨིདཾ པན ཨཱཔཏྟིསངྑཱཏཾ གེཧཾ ཝིཝཊཾ ནཱཏིཝསྶཏི; མཱུལཱཔཏྟིཉྷི ཝིཝརནྟོ དེསནཱགཱམིནིཾ དེསེཏྭཱ ཝུཊྛཱནགཱམིནིཏོ ཝུཊྛཧིཏྭཱ སུདྡྷནྟེ པཏིཊྛཱཏི. ཨཱཡཏིཾ སཾཝརནྟོ ཨཉྙཾ ཨཱཔཏྟིཾ ནཱཔཛྫཏི. ཏསྨཱ ཚནྣཾ ཝིཝརེཐཱཏི ཏེན ཀཱརཎེན དེསནཱགཱམིནིཾ དེསེནྟོ ཝུཊྛཱནགཱམིནིཏོ ཙ ཝུཊྛཧནྟོ ཚནྣཾ ཝིཝརེཐ. ཨེཝཾ ཏཾ ནཱཏིཝསྶཏཱིཏི ཨེཝཉྩེཏཾ ཝིཝཊཾ ནཱཏིཝསྶཏཱིཏི ཨཏྠོ.

གཏི མིགཱནཾ པཝནནྟི ཨཛ྄ཛྷོཀཱསེ བྱགྒྷཱདཱིཧི པརིཔཱཏིཡམཱནཱནཾ མིགཱནཾ པཝནཾ རུཀྑཱདིགཧནཾ ཨརཉྙཾ གཏི པཊིསརཎཾ ཧོཏི, ཏཾ པཏྭཱ ཏེ ཨསྶཱསནྟི. ཨེཏེནེཝ ནཡེན ཨཱཀཱསོ པཀྑཱིནཾ གཏི. ཨཝསྶཾ ཨུཔགམནཊྛེན པན ཝིབྷཝོ གཏི དྷམྨཱནཾ, སབྦེསམྤི སངྑཏདྷམྨཱནཾ ཝིནཱསོཝ ཏེསཾ གཏི. ན ཧི ཏེ ཝིནཱསཾ ཨགཙྪནྟཱ ཋཱཏུཾ སཀྐོནྟི. སུཙིརམྤི ¶ ཋཏྭཱ པན ནིབྦཱནཾ ཨརཧཏོ གཏི, ཁཱིཎཱསཝསྶ ཨརཧཏོ ཨནུཔཱདིསེསནིབྦཱནདྷཱཏུ ཨེཀཾསེན གཏཱིཏི ཨཏྠོ.

པཋམགཱཐཱསངྒཎིཀཝཎྞནཱ ནིཊྛིཏཱ.

ཨདྷིཀརཎབྷེདཾ

ཨུཀྐོཊནབྷེདཱདིཝཎྞནཱ

༣༤༠. ཨདྷིཀརཎབྷེདེ ¶ ¶ ¶ ཨིམེ དས ཨུཀྐོཊཱཏི ཨདྷིཀརཎཱནཾ ཨུཀྐོཊེཏྭཱ པུན ཨདྷིཀརཎཨུཀྐོཊེན སམཐཱནཾ ཨུཀྐོཊཾ དསྶེཏུཾ ‘‘ཝིཝཱདཱདྷིཀརཎཾ ཨུཀྐོཊེནྟོ ཀཏི སམཐེ ཨུཀྐོཊེཏཱི’’ཏིཨཱདིམཱཧ. ཏཏྠ ཝིཝཱདཱདྷིཀརཎཾ ཨུཀྐོཊེནྟོ དྭེ སམཐེ ཨུཀྐོཊེཏཱིཏི སམྨུཁཱཝིནཡཉྩ ཡེབྷུཡྻསིཀཉྩ ཨིམེ དྭེ ཨུཀྐོཊེཏི, པཊིསེདྷེཏི; པཊིཀྐོསཏཱིཏི ཨཏྠོ. ཨནུཝཱདཱདྷིཀརཎཾ ཨུཀྐོཊེནྟོ ཙཏྟཱརོཏི སམྨུཁཱཝིནཡཾ, སཏིཝིནཡཾ, ཨམཱུལ༹ྷཝིནཡཾ, ཏསྶཔཱཔིཡསིཀནྟི ཨིམེ ཙཏྟཱརོ སམཐེ ཨུཀྐོཊེཏི. ཨཱཔཏྟཱདྷིཀརཎཾ ཨུཀྐོཊེནྟོ ཏཡོཏི སམྨུཁཱཝིནཡཾ, པཊིཉྙཱཏཀརཎཾ, ཏིཎཝཏྠཱརཀནྟི ཨིམེ ཏཡོ སམཐེ ཨུཀྐོཊེཏི. ཀིཙྩཱདྷིཀརཎཾ ཨུཀྐོཊེནྟོ ཨེཀནྟི སམྨུཁཱཝིནཡཾ ཨིམཾ ཨེཀཾ སམཐཾ ཨུཀྐོཊེཏི.

༣༤༡. ཀཏི ཨུཀྐོཊཱཏིཨཱདིཔུཙྪཱནཾ ཝིསྶཛྫནེ པན དྭཱདསསུ ཨུཀྐོཊེསུ ཨཀཏཾ ཀམྨནྟིཨཱདཡོ ཏཱཝ ཏཡོ ཨུཀྐོཊཱ ཝིསེསཏོ དུཏིཡེ ཨནུཝཱདཱདྷིཀརཎེ ལབྦྷནྟི. ཨནིཧཏཾ ཀམྨནྟིཨཱདཡོ ཏཡོ པཋམེ ཝིཝཱདཱདྷིཀརཎེ ལབྦྷནྟི. ཨཝིནིཙྪིཏནྟིཨཱདཡོ ཏཡོ ཏཏིཡེ ཨཱཔཏྟཱདྷིཀརཎེ ལབྦྷནྟི. ཨཝཱུཔསནྟནྟིཨཱདཡོ ཏཡོ ཙཏུཏྠེ ཀིཙྩཱདྷིཀརཎེ ལབྦྷནྟི; ཨཔིཙ དྭཱདསཱཔི ཙ ཨེཀེཀསྨིཾ ཨདྷིཀརཎེ ལབྦྷནྟིཡེཝ.

ཏཏྠཛཱཏཀཾ ཨདྷིཀརཎཾ ཨུཀྐོཊེཏཱིཏི ཡསྨིཾ ཝིཧཱརེ ‘‘མཡ྄ཧཾ ཨིམིནཱ པཏྟོ གཧིཏོ, ཙཱིཝརཾ གཧིཏ’’ནྟིཨཱདིནཱ ནཡེན པཏྟཙཱིཝརཱདཱིནཾ ཨཏྠཱཡ ཨདྷིཀརཎཾ ཨུཔྤནྣཾ ཧོཏི, ཏསྨིཾཡེཝ ཙ ནཾ ཝིཧཱརེ ཨཱཝཱསིཀཱ སནྣིཔཏིཏྭཱ ‘‘ཨལཾ ཨཱཝུསོ’’ཏི ཨཏྟཔཙྩཏྠིཀེ སཉྙཱཔེཏྭཱ པཱལི༹མུཏྟཀཝིནིཙྪཡེནེཝ ¶ ཝཱུཔསམེནྟི, ཨིདཾ ཏཏྠཛཱཏཀཾ ཨདྷིཀརཎཾ ནཱམ. ཡེནཱཔི ཝིནིཙྪཡེན སམིཏཾ, སོཔི ཨེཀོ སམཐོཡེཝ. ཨིམཾ ཨུཀྐོཊེནྟསྶཱཔི པཱཙིཏྟིཡཾ.

ཏཏྠཛཱཏཀཾ ཝཱུཔསནྟནྟི སཙེ པན ཏཾ ཨདྷིཀརཎཾ ནེཝཱསིཀཱ ཝཱུཔསམེཏུཾ ན སཀྐོནྟི, ཨཐཉྙོ ཝིནཡདྷརོ ཨཱགནྟྭཱ ‘‘ཀིཾ ཨཱཝུསོ ཨིམསྨིཾ ¶ ཝིཧཱརེ ཨུཔོསཐོ ཝཱ པཝཱརཎཱ ཝཱ ཋིཏཱ’’ཏི པུཙྪཏི, ཏེཧི ཙ ཏསྨིཾ ཀཱརཎེ ཀཐིཏེ ཏཾ ཨདྷིཀརཎཾ ཁནྡྷཀཏོ ཙ པརིཝཱརཏོ ཙ སུཏྟེན ཝིནིཙྪིནིཏྭཱ ཝཱུཔསམེཏི, ཨིདཾ ཏཏྠཛཱཏཀཾ ཝཱུཔསནྟཾ ནཱམ ཨདྷིཀརཎཾ. ཨེཏཾ ཨུཀྐོཊེནྟསྶཱཔི པཱཙིཏྟིཡམེཝ.

ཨནྟརཱམགྒེཏི ཏེ ཨཏྟཔཙྩཏྠིཀཱ ‘‘ན མཡཾ ཨེཏསྶ ཝིནིཙྪཡེ ཏིཊྛཱམ, ནཱཡཾ ཝིནཡེ ཀུསལོ, ཨསུཀསྨིཾ ¶ ནཱམ གཱམེ ཝིནཡདྷརཱ ཐེརཱ ཝསནྟི, ཏཏྠ གནྟྭཱ ཝིནིཙྪིནིསྶཱམཱ’’ཏི གཙྪནྟཱ ཨནྟརཱམགྒེཡེཝ ཀཱརཎཾ སལླཀྑེཏྭཱ ཨཉྙམཉྙཾ ཝཱ སཉྙཱཔེནྟི, ཨཉྙེ ཝཱ ཏེ བྷིཀྑཱུ ནིཛ྄ཛྷཱཔེནྟི, ཨིདམྤི ཝཱུཔསནྟམེཝ ཧོཏི. ཨེཝཾ ཝཱུཔསནྟཾ ཨནྟརཱམགྒེ ཨདྷིཀརཎཾ ཨུཀྐོཊེཏི ཡོ, ཏསྶཱཔི པཱཙིཏྟིཡམེཝ.

ཨནྟརཱམགྒེ ཝཱུཔསནྟནྟི ན ཧེཝ ཁོ པན ཨཉྙམཉྙཾ སཉྙཏྟིཡཱ ཝཱ སབྷཱགབྷིཀྑུནིཛ྄ཛྷཱཔནེན ཝཱ ཝཱུཔསནྟཾ ཧོཏི; ཨཔིཙ ཁོ པཊིཔཐཾ ཨཱགཙྪནྟོ ཨེཀོ ཝིནཡདྷརོ དིསྭཱ ‘‘ཀཏྠ ཨཱཝུསོ གཙྪཐཱ’’ཏི པུཙྪིཏྭཱ ‘‘ཨསུཀཾ ནཱམ གཱམཾ, ཨིམིནཱ ནཱམ ཀཱརཎེནཱ’’ཏི ཝུཏྟེ ‘‘ཨལཾ, ཨཱཝུསོ, ཀིཾ ཏཏྠ གཏེནཱ’’ཏི ཏཏྠེཝ དྷམྨེན ཝིནཡེན ཏཾ ཨདྷིཀརཎཾ ཝཱུཔསམེཏི, ཨིདཾ ཨནྟརཱམགྒེ ཝཱུཔསནྟཾ ནཱམ. ཨེཏཾ ཨུཀྐོཊེནྟསྶཱཔི པཱཙིཏྟིཡམེཝ.

ཏཏྠ གཏནྟི སཙེ པན ‘‘ཨལཾ, ཨཱཝུསོ, ཀིཾ ཏཏྠ གཏེནཱ’’ཏི ཝུཙྩམཱནཱཔི ‘‘མཡཾ ཏཏྠེཝ གནྟྭཱ ཝིནིཙྪཡཾ པཱཔེསྶཱམཱ’’ཏི ཝིནཡདྷརསྶ ཝཙནཾ ཨནཱདིཡིཏྭཱ གཙྪནྟིཡེཝ, གནྟྭཱ སབྷཱགཱནཾ བྷིཀྑཱུནཾ ཨེཏམཏྠཾ ཨཱརོཙེནྟི. སབྷཱགཱ བྷིཀྑཱུ ‘‘ཨལཾ, ཨཱཝུསོ, སངྒྷསནྣིཔཱཏཾ ནཱམ གརུཀ’’ནྟི ཏཏྠེཝ ནིསཱིདཱཔེཏྭཱ ཝིནིཙྪིནིཏྭཱ སཉྙཱཔེནྟི, ཨིདམྤི ཝཱུཔསནྟམེཝ ཧོཏི. ཨེཝཾ ཝཱུཔསནྟཾ ཏཏྠ གཏཾ ཨདྷིཀརཎཾ ཨུཀྐོཊེཏི ཡོ, ཏསྶཱཔི པཱཙིཏྟིཡམེཝ.

ཏཏྠ ¶ གཏཾ ཝཱུཔསནྟནྟི ན ཧེཝ ཁོ པན སབྷཱགབྷིཀྑཱུནཾ སཉྙཏྟིཡཱ ཝཱུཔསནྟཾ ཧོཏི; ཨཔིཙ ཁོ སངྒྷཾ སནྣིཔཱཏེཏྭཱ ཨཱརོཙིཏཾ སངྒྷམཛ྄ཛྷེ ཝིནཡདྷརཱ ཝཱུཔསམེནྟི, ཨིདཾ ཏཏྠ གཏཾ ཝཱུཔསནྟཾ ནཱམ. ཨེཏཾ ཨུཀྐོཊེནྟསྶཱཔི པཱཙིཏྟིཡམེཝ.

སཏིཝིནཡནྟི ཁཱིཎཱསཝསྶ དིནྣཾ སཏིཝིནཡཾ ཨུཀྐོཊེཏི, པཱཙིཏྟིཡམེཝ. ཨུམྨཏྟཀསྶ དིནྣེ ཨམཱུལ༹ྷཝིནཡེ པཱཔུསྶནྣསྶ དིནྣཱཡ ཏསྶཔཱཔིཡསིཀཱཡཔི ཨེསེཝ ནཡོ.

ཏིཎཝཏྠཱརཀཾ ¶ ཨུཀྐོཊེཏཱིཏི སངྒྷེན ཏིཎཝཏྠཱརཀསམཐེན ཝཱུཔསམིཏེ ཨདྷིཀརཎེ ‘‘ཨཱཔཏྟི ནཱམ ཨེཀཾ བྷིཀྑུཾ ཨུཔསངྐམིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ དེསིཡམཱནཱ ཝུཊྛཱཏི, ཡཾ པནེཏཾ ནིདྡཱཡནྟསྶཱཔི ཨཱཔཏྟིཝུཊྛཱནཾ ནཱམ, ཨེཏཾ མཡ྄ཧཾ ན ཁམཏཱི’’ཏི ཨེཝཾ ཝདནྟོཔི ཏིཎཝཏྠཱརཀཾ ཨུཀྐོཊེཏི ནཱམ, ཏསྶཱཔི པཱཙིཏྟིཡམེཝ.

ཚནྡཱགཏིཾ གཙྪནྟོ ཨདྷིཀརཎཾ ཨུཀྐོཊེཏཱིཏི ཝིནཡདྷརོ ཧུཏྭཱ ཨཏྟནོ ཨུཔཛ྄ཛྷཱཡཱདཱིནཾ ¶ ཨཏྠཱཡ ‘‘ཨདྷམྨཾ དྷམྨོ’’ཏིཨཱདཱིནི དཱིཔེཏྭཱ པུབྦེ ཝིནིཙྪིཏཾ ཨདྷིཀརཎཾ དྭཱདསསུ ཨུཀྐོཊེསུ ཡེན ཀེནཙི ཨུཀྐོཊེནྟོ ཚནྡཱགཏིཾ གཙྪནྟོ ཨདྷིཀརཎཾ ཨུཀྐོཊེཏི ནཱམ. དྭཱིསུ པན ཨཏྟཔཙྩཏྠིཀེསུ ཨེཀསྨིཾ ‘‘ཨནཏྠཾ མེ ཨཙརཱི’’ཏིཨཱདིནཱ ནཡེན སམུཔྤནྣཱགྷཱཏོ, ཏསྶ པརཱཛཡཾ ཨཱརོཔནཏྠཾ ‘‘ཨདྷམྨཾ དྷམྨོ’’ཏིཨཱདཱིནི དཱིཔེཏྭཱ པུབྦེ ཝིནིཙྪིཏཾ ཨདྷིཀརཎཾ དྭཱདསསུ ཨུཀྐོཊེསུ ཡེན ཀེནཙི ཨུཀྐོཊེནྟོ དོསཱགཏིཾ གཙྪནྟོ ཨདྷིཀརཎཾ ཨུཀྐོཊེཏི ནཱམ. མནྡོ པན མོམཱུཧོ མོམཱུཧཏྟཱ ཨེཝ ‘‘ཨདྷམྨཾ དྷམྨོ’’ཏིཨཱདཱིནི དཱིཔེཏྭཱ ཝུཏྟནཡེནེཝ ཨུཀྐོཊེནྟོ མོཧཱགཏིཾ གཙྪནྟོ ཨདྷིཀརཎཾ ཨུཀྐོཊེཏི ནཱམ. སཙེ པན དྭཱིསུ ཨཏྟཔཙྩཏྠིཀེསུ ཨེཀོ ཝིསམཱནི ཀཱཡཀམྨཱདཱིནི གཧནམིཙྪཱདིཊྛིཾ བལཝནྟེ ཙ པཀྑནྟརིཡེ ཨབྷིཉྙཱཏེ བྷིཀྑཱུ ནིསྶིཏཏྟཱ ཝིསམནིསྶིཏོ གཧནནིསྶིཏོ བལཝནིསྶིཏོ ཙ ཧོཏི, ཏསྶ བྷཡེན ‘‘ཨཡཾ མེ ཛཱིཝིཏནྟརཱཡཾ ཝཱ བྲཧྨཙརིཡནྟརཱཡཾ ཝཱ ཀརེཡྻཱ’’ཏི ‘‘ཨདྷམྨཾ དྷམྨོ’’ཏིཨཱདཱིནི དཱིཔེཏྭཱ ཝུཏྟནཡེནེཝ ཨུཀྐོཊེནྟོ བྷཡཱགཏིཾ གཙྪནྟོ ཨདྷིཀརཎཾ ཨུཀྐོཊེཏི ནཱམ.

ཏདཧུཔསམྤནྣོཏི ཨེཀོ སཱམཎེརོ བྱཏྟོ ཧོཏི བཧུསྶུཏོ, སོ ཝིནིཙྪཡེ པརཱཛཡཾ པཏྭཱ མངྐུབྷཱུཏེ བྷིཀྑཱུ དིསྭཱ པུཙྪཏི ‘‘ཀསྨཱ མངྐུབྷཱུཏཱཏྠཱ’’ཏི? ཏེ ཏསྶ ཏཾ ཨདྷིཀརཎཾ ཨཱརོཙེནྟི. སོ ཏེ ཨེཝཾ ཝདེཏི ‘‘ཧོཏུ, བྷནྟེ, མཾ ཨུཔསམྤཱདེཐ, ཨཧཾ ཏཾ ཨདྷིཀརཎཾ ཝཱུཔསམེསྶཱམཱི’’ཏི ¶ . ཏེ ཏཾ ཨུཔསམྤཱདེནྟི. སོ དུཏིཡདིཝསེ བྷེརིཾ པཧརིཏྭཱ སངྒྷཾ སནྣིཔཱཏེཏི. ཏཏོ བྷིཀྑཱུཧི ‘‘ཀེན སངྒྷོ སནྣིཔཱཏིཏོ’’ཏི ཝུཏྟེ ‘‘མཡཱ’’ཏི ཝདཏི. ‘‘ཀསྨཱ སནྣིཔཱཏིཏོ’’ཏི? ‘‘ཧིཡྻོ ཨདྷིཀརཎཾ དུབྦིནིཙྪིཏཾ, ཏམཧཾ ཝིནིཙྪིནིསྶཱམཱི’’ཏི. ‘‘ཏྭཾ པན ཧིཡྻོ ཀུཧིཾ གཏོ’’ཏི? ‘‘ཨནུཔསམྤནྣོམྷི, བྷནྟེ, ཨཛྫ པན ཨུཔསམྤནྣོམྷཱི’’ཏི. སོ ཝཏྟབྦོ ‘‘ཨིདཾ ཨཱཝུསོ ཏུམྷཱདིསཱནཾ བྷགཝཏཱ སིཀྑཱཔདཾ པཉྙཏྟཾ, ‘ཏདཧུཔསམྤནྣོ ¶ ཨུཀྐོཊེཏི, ཨུཀྐོཊནཀཾ པཱཙིཏྟིཡ’ནྟི, གཙྪ ཨཱཔཏྟིཾ དེསེཧཱི’’ཏི. ཨཱགནྟུཀེཔི ཨེསེཝ ནཡོ.

ཀཱརཀོཏི ཨེཀཾ སངྒྷེན སདྡྷིཾ ཨདྷིཀརཎཾ ཝིནིཙྪིནིཏྭཱ པརིཝེཎགཏཾ པརཱཛིཏཱ བྷིཀྑཱུ ཝདནྟི ‘‘ཀིསྶ, བྷནྟེ, ཏུམྷེཧི ཨེཝཾ ཝིནིཙྪིཏཾ ཨདྷིཀརཎཾ, ནནུ ཨེཝཾ ཝིནིཙྪིནིཏབྦ’’ནྟི. སོ ‘‘ཀསྨཱ པཋམཾཡེཝ ཨེཝཾ ན ཝདིཏྠཱ’’ཏི ཏཾ ¶ ཨདྷིཀརཎཾ ཨུཀྐོཊེཏི. ཨེཝཾ ཡོ ཀཱརཀོ ཨུཀྐོཊེཏི, ཏསྶཱཔི ཨུཀྐོཊནཀཾ པཱཙིཏྟིཡཾ. ཚནྡདཱཡཀོཏི ཨེཀོ ཨདྷིཀརཎཝིནིཙྪཡེ ཚནྡཾ དཏྭཱ སབྷཱགེ བྷིཀྑཱུ པརཱཛཡཾ པཏྭཱ ཨཱགཏེ མངྐུབྷཱུཏེ དིསྭཱ ‘‘སྭེ དཱནི ཨཧཾ ཝིནིཙྪིནིསྶཱམཱི’’ཏི སངྒྷཾ སནྣིཔཱཏེཏྭཱ ‘‘ཀསྨཱ སནྣིཔཱཏེསཱི’’ཏི ཝུཏྟེ ‘‘ཧིཡྻོ ཨདྷིཀརཎཾ དུབྦིནིཙྪིཏཾ, ཏམཧཾ ཨཛྫ ཝིནིཙྪིནིསྶཱམཱི’’ཏི. ‘‘ཧིཡྻོ པན ཏྭཾ ཀཏྠ གཏོ’’ཏི. ‘‘ཚནྡཾ དཏྭཱ ནིསིནྣོམྷཱི’’ཏི. སོ ཝཏྟབྦོ ‘‘ཨིདཾ ཨཱཝུསོ ཏུམྷཱདིསཱནཾ བྷགཝཏཱ སིཀྑཱཔདཾ པཉྙཏྟཾ, ‘ཚནྡདཱཡཀོ ཨུཀྐོཊེཏི, ཨུཀྐོཊནཀཾ པཱཙིཏྟིཡ’ནྟི, གཙྪ ཨཱཔཏྟིཾ དེསེཧཱི’’ཏི.

ཨདྷིཀརཎནིདཱནཱདིཝཎྞནཱ

༣༤༢. ཝིཝཱདཱདྷིཀརཎཾ ཀིཾནིདཱནནྟིཨཱདཱིསུ ཀིཾ ནིདཱནམསྶཱཏི ཀིཾནིདཱནཾ. ཀོ སམུདཡོ ཨསྶཱཏི ཀིཾསམུདཡཾ. ཀཱ ཛཱཏི ཨསྶཱཏི ཀིཾཛཱཏིཀཾ. ཀོ པབྷཝོ ཨསྶཱཏི ཀིཾཔབྷཝཾ. ཀོ སམྦྷཱརོ ཨསྶཱཏི ཀིཾསམྦྷཱརཾ. ཀིཾ སམུཊྛཱནཾ ཨསྶཱཏི ཀིཾསམུཊྛཱནཾ. སབྦཱནེཏཱནི ཀཱརཎཝེཝཙནཱནིཡེཝ.

ཝིཝཱདནིདཱནནྟིཨཱདཱིསུཔི ཨཊྛཱརསབྷེདཀརཝཏྠུསངྑཱཏོ ཝིཝཱདོ ནིདཱནམེཏསྶཱཏི ཝིཝཱདནིདཱནཾ. ཝིཝཱདཾ ནིསྶཱཡ ཨུཔྤཛྫནཀཝིཝཱདཝསེནེཏཾ ཝུཏྟཾ. ཨནུཝཱདོ ནིདཱནཾ ཨསྶཱཏི ཨནུཝཱདནིདཱནཾ ¶ . ཨིདམྤི ཨནུཝཱདཾ ནིསྶཱཡ ཨུཔྤཛྫནཀཨནུཝཱདཝསེན ཝུཏྟཾ. ཨཱཔཏྟི ནིདཱནཾ ཨསྶཱཏི ཨཱཔཏྟིནིདཱནཾ. ཨཱཔཏྟཱདྷིཀརཎཔཙྩཡཱ ཙཏསྶོ ཨཱཔཏྟིཡོ ཨཱཔཛྫཏཱིཏི ཨེཝཾ ཨཱཔཏྟིཾ ནིསྶཱཡ ཨུཔྤཛྫནཀཨཱཔཏྟིཝསེནེཏཾ ཝུཏྟཾ. ཀིཙྩཡཾ ནིདཱནམསྶཱཏི ཀིཙྩཡནིདཱནཾ; ཙཏུབྦིདྷཾ སངྒྷཀམྨཾ ཀཱརཎམསྶཱཏི ཨཏྠོ. ཨུཀྑིཏྟཱནུཝཏྟིཀཱཡ བྷིཀྑུནིཡཱ ཡཱཝཏཏིཡཾ སམནུབྷཱསནཱདཱིནཾ ཀིཙྩཾ ནིསྶཱཡ ཨུཔྤཛྫནཀཀིཙྩཱནཾ ཝསེནེཏཾ ཝུཏྟཾ. ཨཡཾ ཙཏུནྣམྤི ཨདྷིཀརཎཱནཾ ཝིསྶཛྫནཔཀྑེ ཨེཀཔདཡོཛནཱ. ཨེཏེནཱནུསཱརེན སབྦཔདཱནི ཡོཛེཏབྦཱནི.

དུཏིཡཔུཙྪཱཡ ¶ ཧེཏུནིདཱནནྟིཨཱདིམྷི ཝིསྶཛྫནེ ནཝནྣཾ ཀུསལཱཀུསལཱབྱཱཀཏཧེཏཱུནཾ ཝསེན ཧེཏུནིདཱནཱདིཏཱ ཝེདིཏབྦཱ. ཏཏིཡཔུཙྪཱཡ ཝིསྶཛྫནེ བྱཉྫནམཏྟཾ ནཱནཾ. ཧེཏུཡེཝ ཧི ཨེཏྠ པཙྩཡོཏི ཝུཏྟོ.

༣༤༣. མཱུལཔུཙྪཱཡ ཝིསྶཛྫནེ དྭཱདས མཱུལཱནཱིཏི ཀོདྷཨུཔནཱཧཡུགལ༹ཀཱདཱིནི ཚ ཝིཝཱདཱམཱུལཱནི, ལོབྷདོསམོཧཱ ཏཡོ, ཨལོབྷཱདོསཱམོཧཱ ཏཡོཏི ཨིམཱནི ཨཛ྄ཛྷཏྟསནྟཱནཔྤཝཏྟཱནི དྭཱདས མཱུལཱནི. ཙུདྡས མཱུལཱནཱིཏི ཏཱནེཝ དྭཱདས ¶ ཀཱཡཝཱཙཱཧི སདྡྷིཾ ཙུདྡས ཧོནྟི. ཚ མཱུལཱནཱིཏི ཀཱཡཱདཱིནི ཚ སམུཊྛཱནཱནི.

སམུཊྛཱནཔུཙྪཱཡ ཝིསྶཛྫནེ ཨཊྛཱརས བྷེདཀརཝཏྠཱུནི སམུཊྛཱནཱནི, ཏཉྷི ཨེཏེསུ ཨཊྛཱརསསུ བྷེདཀརཝཏྠཱུསུ སམུཊྛཱཏི, ཨེཏེཧི ཝཱ ཀཱརཎབྷཱུཏེཧི སམུཊྛཱཏི. ཏེནསྶེཏཱནི སམུཊྛཱནཱནི ཝུཙྩནྟི. ཨེས ནཡོ སབྦཏྠ.

༣༤༤. ཝིཝཱདཱདྷིཀརཎཾ ཨཱཔཏྟཱིཏིཨཱདིབྷེདེ ཨེཀེན ཨདྷིཀརཎེན ཀིཙྩཱདྷིཀརཎེནཱཏི ཨིདཾ ཡེན ཨདྷིཀརཎེན སམྨནྟི, ཏཾ དསྶེཏུཾ ཝུཏྟཾ, ན པནེཏཱནི ཨེཀཾསཏོ ཀིཙྩཱདྷིཀརཎེནེཝ སམྨནྟི. ན ཧི པུགྒལསྶ སནྟིཀེ དེསེནྟསྶ ཀིཙྩཱདྷིཀརཎཾ ནཱམ ཨཏྠི.

ན ཀཏམེན སམཐེནཱཏི སཱཝསེསཱཔཏྟི ཝིཡ ན སམྨཏི. ན ཧི སཀྐཱ སཱ དེསེཏུཾ, ན ཏཏོ ཝུཊྛཱཡ སུདྡྷནྟེ པཏིཊྛཱཏུཾ.

༣༤༨. ཝིཝཱདཱདྷིཀརཎཾ ཧོཏི ཨནུཝཱདཱདྷིཀརཎནྟིཨཱདི ནཡོ ཨུཏྟཱནོཡེཝ.

༣༤༩. ཏཏོ ¶ པརཾ ཡཏྠ སཏིཝིནཡོཏིཨཱདིཀཱ སམྨུཁཱཝིནཡཾ ཨམུཉྩིཏྭཱ ཚ ཡམཀཔུཙྪཱ ཝུཏྟཱ, ཏཱསཾ ཝིསྶཛྫནེནེཝ ཨཏྠོ པཀཱསིཏོ.

༣༥༡. སཾསཊྛཱདིཔུཙྪཱནཾ ཝིསྶཛྫནེ སཾསཊྛཱཏི སཏིཝིནཡཀམྨཝཱཙཱཀྑཎསྨིཾཡེཝ དྭིནྣམྤི སམཐཱནཾ སིདྡྷཏྟཱ སམྨུཁཱཝིནཡོཏི ཝཱ སཏིཝིནཡོཏི ཝཱ ཨིམེ དྷམྨཱ སཾསཊྛཱ, ནོ ཝིསཾསཊྛཱ. ཡསྨཱ པན ཀདལིཀྑནྡྷེ པཏྟཝཊྚཱིནཾ ཝིཡ ན སཀྐཱ ཏེསཾ ཝིནིབྦྷུཛིཏྭཱ ནཱནཱཀརཎཾ དསྶེཏུཾ, ཏེན ཝུཏྟཾ ¶ ‘‘ན ཙ ལབྦྷཱ ཨིམེསཾ དྷམྨཱནཾ ཝིནིབྦྷུཛིཏྭཱ ཝིནིབྦྷུཛིཏྭཱ ནཱནཱཀརཎཾ པཉྙཱཔེཏུ’’ནྟི. ཨེས ནཡོ སབྦཏྠ.

སཏྟསམཐནིདཱནཝཎྞནཱ

༣༥༢. ཀིཾནིདཱནོཏི པུཙྪཱཝིསྶཛྫནེ ནིདཱནཾ ནིདཱནམསྶཱཏི ནིདཱནནིདཱནོ. ཏཏྠ སངྒྷསམྨུཁཏཱ, དྷམྨསམྨུཁཏཱ, ཝིནཡསམྨུཁཏཱ, པུགྒལསམྨུཁཏཱཏི ཨིདཾ སམྨུཁཱཝིནཡསྶ ནིདཱནཾ. སཏིཝེཔུལླཔཏྟོ ཁཱིཎཱསཝོ ལདྡྷུཔཝཱདོ སཏིཝིནཡསྶ ནིདཱནཾ. ཨུམྨཏྟཀོ བྷིཀྑུ ཨམཱུལ༹ྷཝིནཡསྶ ནིདཱནཾ. ཡོ ཙ དེསེཏི, ཡསྶ ཙ དེསེཏི, ཨུབྷིནྣཾ སམྨུཁཱིབྷཱཝོ པཊིཉྙཱཏཀརཎསྶ ནིདཱནཾ. བྷཎྜནཛཱཏཱནཾ ཨདྷིཀརཎཾ ཝཱུཔསམེཏུཾ ཨསཀྐུཎེཡྻཏཱ ཡེབྷུཡྻསིཀཱཡ ནིདཱནཾ. པཱཔུསྶནྣོ པུགྒལོ ཏསྶཔཱཔིཡསིཀཱཡ ནིདཱནཾ. བྷཎྜནཛཱཏཱནཾ བཧུ ཨསྶཱམཎཀཨཛ྄ཛྷཱཙཱརོ ཏིཎཝཏྠཱརཀསྶ ནིདཱནཾ. ཧེཏུཔཙྩཡཝཱརཱ ཝུཏྟནཡཱ ཨེཝ.

༣༥༣. མཱུལཔུཙྪཱཡ ཝིསྶཛྫནཾ ཨུཏྟཱནམེཝ. སམུཊྛཱནཔུཙྪཱཡ ཀིཉྩཱཔི ¶ ‘‘སཏྟནྣཾ སམཐཱནཾ ཀཏམེ ཚཏྟིཾས སམུཊྛཱནཱ’’ཏི ཝུཏྟཾ, སམྨུཁཱཝིནཡསྶ པན ཀམྨསངྒཧཱབྷཱཝེན སམུཊྛཱནཱབྷཱཝཏོ ཚནྣཾཡེཝ སམཐཱནཾ ཚ སམུཊྛཱནཱནི ཝིབྷཏྟཱནི. ཏཏྠ ཀམྨསྶ ཀིརིཡཱཏི ཉཏྟི ཝེདིཏབྦཱ. ཀརཎནྟི ཏསྶཱཡེཝ ཉཏྟིཡཱ ཋཔེཏབྦཀཱལེ ཋཔནཾ. ཨུཔགམནནྟི སཡཾ ཨུཔགམནཾ; ཨཏྟནཱཡེཝ ཏསྶ ཀམྨསྶ ཀརཎནྟི ཨཏྠོ. ཨཛ྄ཛྷུཔགམནནྟི ཨཛ྄ཛྷེསནུཔགམནཾ; ཨཉྙཾ སདྡྷིཝིཧཱརིཀཱདིཀཾ ‘‘ཨིདཾ ཀམྨཾ ཀརོཧཱི’’ཏི ཨཛ྄ཛྷེསནནྟི ཨཏྠོ. ཨདྷིཝཱསནཱཏི ‘‘རུཙྩཏི མེ ཨེཏཾ, ཀརོཏུ སངྒྷོ’’ཏི ཨེཝཾ ཨདྷིཝཱསནཱ; ཚནྡདཱནནྟི ཨཏྠོ. ཨཔྤཊིཀྐོསནཱཏི ‘‘ན མེཏཾ ཁམཏི, མཱ ཨེཝཾ ཀརོཐཱ’’ཏི ཨཔྤཊིསེདྷནཱ. ཨིཏི ཚནྣཾ ཚཀྐཱནཾ ཝསེན ཚཏྟིཾས སམུཊྛཱནཱ ཝེདིཏབྦཱ.

སཏྟསམཐནཱནཱཏྠཱདིཝཎྞནཱ

༣༥༤. ནཱནཱཏྠཔུཙྪཱཝིསྶཛྫནཾ ¶ ཨུཏྟཱནམེཝ. ཨདྷིཀརཎཔུཙྪཱཝིསྶཛྫནེ ཨཡཾ ཝིཝཱདོ ནོ ཨདྷིཀརཎནྟི ཨཡཾ མཱཏཱཔུཏྟཱདཱིནཾ ཝིཝཱདོ ཝིརུདྡྷཝཱདཏྟཱ ཝིཝཱདོ ནཱམ ཧོཏི, སམཐེཧི པན ཨདྷིཀརཎཱིཡཏཱཡ ཨབྷཱཝཏོ ཨདྷིཀརཎཾ ན ཧོཏི. ཨནུཝཱདཱདཱིསུཔི ཨེསེཝ ནཡོ. སེསཾ སབྦཏྠ ཨུཏྟཱནམེཝཱཏི.

ཨདྷིཀརཎབྷེདཝཎྞནཱ ནིཊྛིཏཱ.

དུཏིཡགཱཐཱསངྒཎིཀཾ

ཙོདནཱདིཔུཙྪཱཝིསྶཛྫནཱཝཎྞནཱ

༣༥༩. དུཏིཡགཱཐཱསངྒཎིཡཾ ¶ ¶ ཙོདནཱཏི ཝཏྠུཉྩ ཨཱཔཏྟིཉྩ དསྶེཏྭཱ ཙོདནཱ. སཱརཎཱཏི དོསསཱརཎཱ. སངྒྷོ ཀིམཏྠཱཡཱཏི སངྒྷསནྣིཔཱཏོ ཀིམཏྠཱཡ. མཏིཀམྨཾ པན ཀིསྶ ཀཱརཎཱཏི མཏིཀམྨཾ ཝུཙྩཏི མནྟགྒཧཎཾ; ཏཾ ཀིསྶ ཀཱརཎཱཏི ཨཏྠོ.

ཙོདནཱ སཱརཎཏྠཱཡཱཏི ཝུཏྟཔྤཀཱརཱ ཙོདནཱ, ཏེན ཙུདིཏཀཔུགྒལེན ཙོདཀདོསསཱརཎཏྠཱཡ. ནིགྒཧཏྠཱཡ སཱརཎཱཏི དོསསཱརཎཱ པན ཏསྶ པུགྒལསྶ ནིགྒཧཏྠཱཡ. སངྒྷོ པརིགྒཧཏྠཱཡཱཏི ཏཏྠ སནྣིཔཏིཏོ སངྒྷོ ཝིནིཙྪཡཔརིགྒཧཎཏྠཱཡ; དྷམྨཱདྷམྨཾ ཏུལནཏྠཱཡ སུཝིནིཙྪིཏདུབྦིནིཙྪིཏཾ ཛཱནནཏྠཱཡཱཏི ཨཏྠོ. མཏིཀམྨཾ པན པཱཊིཡེཀྐནྟི སུཏྟནྟིཀཏྠེརཱནཉྩ ཝིནཡདྷརཏྠེརཱནཉྩ མནྟགྒཧཎཾ ¶ པཱཊེཀྐཾ པཱཊེཀྐཾ ཝིནིཙྪཡསནྣིཊྛཱཔནཏྠཾ.

མཱ ཁོ པཊིགྷནྟི ཙུདིཏཀེ ཝཱ ཙོདཀེ ཝཱ ཀོཔཾ མཱ ཛནཡི. སཙེ ཨནུཝིཛྫཀོ ཏུཝནྟི སཙེ ཏྭཾ སངྒྷམཛ྄ཛྷེ ཨོཏིཎྞཾ ཨདྷིཀརཎཾ ཝིནིཙྪིཏུཾ ནིསིནྣོ ཝིནཡདྷརོ.

ཝིགྒཱཧིཀནྟི ‘‘ན ཏྭཾ ཨིམཾ དྷམྨཝིནཡཾ ཨཱཛཱནཱསཱི’’ཏིཨཱདིནཡཔྤཝཏྟཾ. ཨནཏྠསཾཧིཏནྟི ཡཱ ཨནཏྠཾ ཛནཡཏི, པརིསཾ ཁོབྷེཏྭཱ ཨུཊྛཱཔེཏི, ཨེཝརཱུཔིཾ ཀཐཾ མཱ ཨབྷཎི. སུཏྟེ ཝིནཡེ ཝཱཏིཨཱདཱིསུ སུཏྟཾ ནཱམ ཨུབྷཏོཝིབྷངྒོ. ཝིནཡོ ནཱམ ཁནྡྷཀོ. ཨནུལོམོ ནཱམ པརིཝཱརོ. པཉྙཏྟཾ ནཱམ སཀལཾ ཝིནཡཔིཊཀཾ. ཨནུལོམིཀཾ ནཱམ ཙཏྟཱརོ མཧཱཔདེསཱ.

ཨནུཡོགཝཏྟཾ ¶ ནིསཱམཡཱཏི ཨནུཡུཉྫནཝཏྟཾ ནིསཱམེཧི. ཀུསལེན བུདྡྷིམཏཱ ཀཏནྟི ཚེཀེན པཎྜིཏེན ཉཱཎཔཱརམིཔྤཏྟེན བྷགཝཏཱ ནཱིཧརིཏྭཱ ཋཔིཏཾ. སུཝུཏྟནྟི སུཔཉྙཱཔིཏཾ. སིཀྑཱཔདཱནུལོམིཀནྟི སིཀྑཱཔདཱནཾ ཨནུལོམཾ. ཨཡཾ ཏཱཝ པདཏྠོ, ཨཡཾ པནེཏྠ སཱདྷིཔྤཱཡསངྑེཔཝཎྞནཱ – ‘‘སཙེ ཏྭཾ ཨནུཝིཛྫཀོ, མཱ སཧསཱ བྷཎི, མཱ ཨནཏྠསཾཧིཏཾ ཝིགྒཱཧིཀཀཐཾ ¶ བྷཎི. ཡཾ པན ཀུསལེན བུདྡྷིམཏཱ ལོཀནཱཐེན ཨེཏེསུ སུཏྟཱདཱིསུ ཨནུཡོགཝཏྟཾ ཀཐཾ སུཔཉྙཏྟཾ སབྦསིཀྑཱཔདཱནཾ ཨནུལོམཾ, ཏཾ ནིསཱམཡ ཏཾ ཨུཔདྷཱརེཧཱི’’ཏི. གཏིཾ ན ནཱསེནྟོ སམྤརཱཡིཀནྟི ཨཏྟནོ སམྤརཱཡེ སུགཏིནིབྦཏྟིཾ ཨནཱསེནྟོ ཨནུཡོགཝཏྟཾ ནིསཱམཡ. ཡོ ཧི ཏཾ ཨནིསཱམེཏྭཱ ཨནུཡུཉྫཏི, སོ སམྤརཱཡིཀཾ ཨཏྟནོ གཏིཾ ནཱསེཏི, ཏསྨཱ ཏྭཾ ཨནཱསེནྟོ ནིསཱམཡཱཏི ཨཏྠོ. ཨིདཱནི ཏཾ ཨནུཡོགཝཏྟཾ དསྶེཏུཾ ཧིཏེསཱིཏིཨཱདིམཱཧ. ཏཏྠ ཧིཏེསཱིཏི ཧིཏཾ ཨེསནྟོ གཝེསནྟོ; མེཏྟཉྩ མེཏྟཱཔུབྦབྷཱགཉྩ ཨུཔཊྛཔེཏྭཱཏི ཨཏྠོ. ཀཱལེནཱཏི ཡུཏྟཔཏྟཀཱལེན; ཨཛ྄ཛྷེསིཏཀཱལེཡེཝ ཏཝ བྷཱརེ ཀཏེ ཨནུཡུཉྫཱཏི ཨཏྠོ.

སཧསཱ ཝོཧཱརཾ མཱ པདྷཱརེསཱིཏི ཡོ ཨེཏེསཾ སཧསཱ ཝོཧཱརོ ཧོཏི, སཧསཱ བྷཱསིཏཾ, ཏཾ མཱ པདྷཱརེསི, མཱ གཎྷིཏྠ.

པཊིཉྙཱནུསནྡྷིཏེན ཀཱརཡེཏི ཨེཏྠ ཨནུསནྡྷིཏནྟི ཀཐཱནུསནྡྷི ཝུཙྩཏི, ཏསྨཱ པཊིཉྙཱནུསནྡྷིནཱ ཀཱརཡེ; ཀཐཱནུསནྡྷིཾ སལླཀྑེཏྭཱ པཊིཉྙཱཡ ཀཱརཡེཏི ཨཏྠོ. ཨཐ ཝཱ པཊིཉྙཱཡ ཙ ཨནུསནྡྷིཏེན ཙ ཀཱརཡེ, ལཛྫིཾ པཊིཉྙཱཡ ཀཱརཡེ; ཨལཛྫིཾ ཝཏྟཱནུསནྡྷིནཱཏི ཨཏྠོ. ཏསྨཱ ཨེཝ ¶ པཊིཉྙཱ ལཛྫཱིསཱུཏི གཱཐམཱཧ. ཏཏྠ ཝཏྟཱནུསནྡྷིཏེན ཀཱརཡེཏི ཝཏྟཱནུསནྡྷིནཱ ཀཱརཡེ, ཡཱ ཨསྶ ཝཏྟེན སདྡྷིཾ པཊིཉྙཱ སནྡྷིཡཏི, ཏཱཡ པཊིཉྙཱཡ ཀཱརཡེཏི ཨཏྠོ.

སཉྩིཙྩཱཏི ཛཱནནྟོ ཨཱཔཛྫཏི. པརིགཱུཧཏཱིཏི ནིགཱུཧཏི ན དེསེཏི ན ཝུཊྛཱཏི.

སཱ ཨཧམྤི ཛཱནཱམཱིཏི ཡཾ ཏུམྷེཧི ཝུཏྟཾ, ཏཾ སཙྩཾ, ཨཧམྤི ནཾ ཨེཝམེཝ ཛཱནཱམི. ཨཉྙཉྩ ཏཱཧནྟི ཨཉྙཉྩ ཏཾ ཨཧཾ པུཙྪཱམི.

པུབྦཱཔརཾ ¶ ན ཛཱནཱཏཱིཏི པུརེཀཐིཏཉྩ པཙྪཱཀཐིཏཉྩ ན ཛཱནཱཏི. ཨཀོཝིདོཏི ཏསྨིཾ པུབྦཱཔརེ ཨཀུསལོ. ཨནུསནྡྷིཝཙནཔཐཾ ན ཛཱནཱཏཱིཏི ཀཐཱནུསནྡྷིཝཙནཾ ཝིནིཙྪཡཱནུསནྡྷིཝཙནཉྩ ན ཛཱནཱཏི.

སཱིལཝིཔཏྟིཡཱ ཙོདེཏཱིཏི དྭཱིཧི ཨཱཔཏྟིཀྑནྡྷེཧི ཙོདེཏི. ཨཱཙཱརདིཊྛིཡཱཏི ཨཱཙཱརཝིཔཏྟིཡཱ ཙེཝ དིཊྛིཝིཔཏྟིཡཱ ཙ. ཨཱཙཱརཝིཔཏྟིཡཱ ཙོདེནྟོ པཉྩཧཱཔཏྟིཀྑནྡྷེཧི ཙོདེཏི, དིཊྛིཝིཔཏྟིཡཱ ཙོདེནྟོ ¶ མིཙྪཱདིཊྛིཡཱ ཙེཝ ཨནྟགྒཱཧིཀདིཊྛིཡཱ ཙ ཙོདེཏི. ཨཱཛཱིཝེནཔི ཙོདེཏཱིཏི ཨཱཛཱིཝཧེཏུཔཉྙཏྟེཧི ཚཧི སིཀྑཱཔདེཧི ཙོདེཏི. སེསཾ སབྦཏྠ ཨུཏྟཱནམེཝཱཏི.

དུཏིཡགཱཐཱསངྒཎིཀཝཎྞནཱ ནིཊྛིཏཱ.

ཙོདནཱཀཎྜཾ

ཨནུཝིཛྫཀཀིཙྩཝཎྞནཱ

༣༦༠-༣༦༡. ཨིདཱནི ¶ ¶ ཨེཝཾ ཨུཔྤནྣཱཡ ཙོདནཱཡ ཝིནཡདྷརེན ཀཏྟབྦཀིཙྩཾ དསྶེཏུཾ ཨནུཝིཛྫཀེནཱཏིཨཱདི ཨཱརདྡྷཾ. ཏཏྠ དིཊྛཾ དིཊྛེནཱཏི གཱཐཱཡ ཨཡམཏྠོ – ཨེཀེནེཀོ མཱཏུགཱམེན སདྡྷིཾ ཨེཀཊྛཱནཏོ ནིཀྑམནྟོ ཝཱ པཝིསནྟོ ཝཱ དིཊྛོ, སོ ཏཾ པཱརཱཛིཀེན ཙོདེཏི, ཨིཏརོ ཏསྶ དསྶནཾ ཨནུཛཱནཱཏི. ཏཾ པན དསྶནཾ པཊིཙྩ པཱརཱཛིཀཾ ན ཨུཔེཏི, ན པཊིཛཱནཱཏི. ཨེཝམེཏྠ ཡཾ ཏེན དིཊྛཾ, ཏཾ ཏསྶ ‘‘དིཊྛོ མཡཱ’’ཏི ཨིམིནཱ དིཊྛཝཙནེན སམེཏི. ཡསྨཱ པན ཨིཏརོ ཏཾ དསྶནཾ པཊིཙྩ དོསཾ ན པཊིཛཱནཱཏི, ཏསྨཱ ཨསུདྡྷཔརིསངྐིཏོ ཧོཏི; ཨམཱུལཀཔརིསངྐིཏོཏི ཨཏྠོ. ཏསྶ པུགྒལསྶ ‘‘སུདྡྷོ ཨཧ’’ནྟི པཊིཉྙཱཡ ཏེན སདྡྷིཾ ཨུཔོསཐོ ཀཱཏབྦོ. སེསགཱཐཱདྭཡེཔི ཨེསེཝ ནཡོ. སེསཾ སབྦཏྠ ཨུཏྟཱནམེཝཱཏི.

ཨནུཝིཛྫཀཀིཙྩཝཎྞནཱ ནིཊྛིཏཱ.

ཙོདཀཔུཙྪཱཝིསྶཛྫནཱཝཎྞནཱ

༣༦༢-༣༦༣. ཙོདནཱཡ ¶ ཀོ ཨཱདཱིཏིཨཱདིཔུཙྪཱནཾ ཝིསྶཛྫནེ སཙྩེ ཙ ཨཀུཔྤེ ཙཱཏི སཙྩེ པཏིཊྛཱཏབྦཾ ཨཀུཔྤེ ཙ. ཡཾ ཀཏཾ ཝཱ ན ཀཏཾ ཝཱ, ཏདེཝ ཝཏྟབྦཾ, ན ཙ ཙོདཀེ ཝཱ ཨནུཝིཛྫཀེ ཝཱ སངྒྷེ ཝཱ ཀོཔོ ཨུཔྤཱདེཏབྦོ. ཨོཏིཎྞཱནོཏིཎྞཾ ཛཱནིཏབྦནྟི ཨོཏིཎྞཉྩ ཨནོཏིཎྞཉྩ ཝཙནཾ ཛཱནིཏབྦཾ. ཏཏྲཱཡཾ ཛཱནནཝིདྷི – ཨེཏྟཀཱ ཙོདཀསྶ པུབྦཀཐཱ, ཨེཏྟཀཱ པཙྪིམཀཐཱ, ཨེཏྟཀཱ ཙུདིཏཀསྶ པུབྦཀཐཱ, ཨེཏྟཀཱ པཙྪིམཀཐཱཏི ཛཱནིཏབྦཱ ¶ . ཙོདཀསྶ པམཱཎཾ གཎྷིཏབྦཾ, ཙུདིཏཀསྶ པམཱཎཾ གཎྷིཏབྦཾ, ཨནུཝིཛྫཀསྶ པམཱཎཾ གཎྷིཏབྦཾ, ཨནུཝིཛྫཀོ ཨཔྤམཏྟཀམྤི ཨཧཱཔེནྟོ ‘‘ཨཱཝུསོ སམནྣཱཧརིཏྭཱ ཨུཛུཾ ཀཏྭཱ ཨཱཧརཱ’’ཏི ཝཏྟབྦོ, སངྒྷེན ཨེཝཾ པཊིཔཛྫིཏབྦཾ. ཡེན དྷམྨེན ཡེན ཝིནཡེན ཡེན སཏྠུསཱསནེན ཏཾ ཨདྷིཀརཎཾ ཝཱུཔསམྨཏཱིཏི ཨེཏྠ དྷམྨོཏི བྷཱུཏཾ ཝཏྠུ. ཝིནཡོཏི ཙོདནཱ ཙེཝ སཱརཎཱ ཙ. སཏྠུསཱསནནྟི ཉཏྟིསམྤདཱ ཙེཝ ཨནུསྶཱཝནསམྤདཱ ¶ ཙ. ཨེཏེན ཧི དྷམྨེན ཙ ཝིནཡེན ཙ སཏྠུསཱསནེན ཙ ཨདྷིཀརཎཾ ཝཱུཔསམཏི, ཏསྨཱ ཨནུཝིཛྫཀེན བྷཱུཏེན ཝཏྠུནཱ ཙོདེཏྭཱ ཨཱཔཏྟིཾ སཱརེཏྭཱ ཉཏྟིསམྤདཱཡ ཙེཝ ཨནུསྶཱཝནསམྤདཱཡ ཙ ཏཾ ཨདྷིཀརཎཾ ཝཱུཔསམེཏབྦཾ, ཨནུཝིཛྫཀེན ཨེཝཾ པཊིཔཛྫིཏབྦཾ. སེསམེཏྠ ཨུཏྟཱནམེཝ.

༣༦༤. ཨུཔོསཐོ ཀིམཏྠཱཡཱཏིཨཱདིཔུཙྪཱཝིསྶཛྫནམྤི ཨུཏྟཱནམེཝ. ཨཝསཱནགཱཐཱསུ ཐེརེ ཙ པརིབྷཱསཏཱིཏི ཨཝམཉྙཾ ཀརོནྟོ ‘‘ཀིཾ ཨིམེ ཛཱནནྟཱི’’ཏི པརིབྷཱསཏི. ཁཏོ ཨུཔཧཏིནྡྲིཡོཏི ཏཱཡ ཚནྡཱདིགཱམིཏཱཡ ཏེན ཙ པརིབྷཱསནེན ཨཏྟནཱ ཨཏྟནོ ཁཏཏྟཱ ཁཏོ. སདྡྷཱདཱིནཉྩ ཨིནྡྲིཡཱནཾ ཨུཔཧཏཏྟཱ ཨུཔཧཏིནྡྲིཡོ. ནིརཡཾ གཙྪཏི དུམྨེདྷོ, ན ཙ སིཀྑཱཡ གཱརཝོཏི སོ ཁཏོ ཨུཔཧཏིནྡྲིཡོ པཉྙཱཡ ཨབྷཱཝཏོ དུམྨེདྷོ ཏཱིསུ སིཀྑཱསུ ཨསིཀྑནཏོ ན ཙ སིཀྑཱཡ གཱརཝོ ཀཱཡསྶ བྷེདཱ ནིརཡམེཝ ཨུཔགཙྪཏི, ཏསྨཱ ན ཙ ཨཱམིསཾ ནིསྶཱཡ…པེ… ཡཐཱ དྷམྨོ ཏཐཱ ཀརེཏི. ཏསྶཏྠོ ན ཙ ཨཱམིསཾ ནིསྶཱཡ ཀརེ, ཙུདིཏཀཙོདཀེསུ ཧི ཨཉྙཏརེན དིནྣཾ ཙཱིཝརཱདིཨཱམིསཾ གཎྷནྟོ ཨཱམིསཾ ནིསྶཱཡ ཀརོཏི, ཨེཝཾ ན ཀརེཡྻ. ན ཙ ནིསྶཱཡ པུགྒལནྟི ‘‘ཨཡཾ མེ ཨུཔཛ྄ཛྷཱཡོ ཝཱ ཨཱཙརིཡོ ཝཱ’’ཏིཨཱདིནཱ ནཡེན ཚནྡཱདཱིཧི གཙྪནྟོ པུགྒལཾ ནིསྶཱཡ ཀརོཏི, ཨེཝཾ ན ཀརེཡྻ. ཨཐ ཁོ ཨུབྷོཔེཏེ ཝིཝཛྫེཏྭཱ ཡཐཱ དྷམྨོ ཋིཏོ, ཏཐེཝ ཀརེཡྻཱཏི.

ཨུཔཀཎྞཀཾ ཛཔྤཏཱིཏི ¶ ‘‘ཨེཝཾ ཀཐེཧི, མཱ ཨེཝཾ ཀཐཡིཏྠཱ’’ཏི ཀཎྞམཱུལེ མནྟེཏི. ཛིམྷཾ པེཀྑཏཱིཏི དོསམེཝ གཝེསཏི. ཝཱིཏིཧརཏཱིཏི ཝིནིཙྪཡཾ ཧཱཔེཏི. ཀུམྨགྒཾ པཊིསེཝཏཱིཏི ཨཱཔཏྟིཾ དཱིཔེཏི.

ཨཀཱལེན ཙ ཙོདེཏཱིཏི ཨནོཀཱསེ ཨནཛ྄ཛྷིཊྛོཝ ཙོདེཏི. པུབྦཱཔརཾ ན ཛཱནཱཏཱིཏི པུརིམཀཐཉྩ པཙྪིམཀཐཉྩ ན ཛཱནཱཏི.

ཨནུསནྡྷིཝཙནཔཐཾ ¶ ན ཛཱནཱཏཱིཏི ཀཐཱནུསནྡྷིཝིནིཙྪཡཱནུསནྡྷིཝསེན ཝཙནཾ ན ཛཱནཱཏི. སེསཾ སབྦཏྠ ཨུཏྟཱནམེཝཱཏི.

ཙོདནཱཀཎྜཝཎྞནཱ ནིཊྛིཏཱ.

ཙཱུལ༹སངྒཱམོ

ཨནུཝིཛྫཀསྶ པཊིཔཏྟིཝཎྞནཱ

༣༦༥. ཙཱུལ༹སངྒཱམེ ¶ ¶ སངྒཱམཱཝཙརེན བྷིཀྑུནཱཏི སངྒཱམོ ཝུཙྩཏི ཨདྷིཀརཎཝིནིཙྪཡཏྠཱཡ སངྒྷསནྣིཔཱཏོ. ཏཏྲ ཧི ཨཏྟཔཙྩཏྠིཀཱ ཙེཝ སཱསནཔཙྩཏྠིཀཱ ཙ ཨུདྡྷམྨཾ ཨུབྦིནཡཾ སཏྠུ སཱསནཾ དཱིཔེནྟཱ སམོསརནྟི ཝེསཱལིཀཱ ཝཛྫིཔུཏྟཀཱ ཝིཡ. ཡོ བྷིཀྑུ ཏེསཾ པཙྩཏྠིཀཱནཾ ལདྡྷིཾ མདྡིཏྭཱ སཀཝཱདདཱིཔནཏྠཱཡ ཏཏྠ ཨཝཙརཏི, ཨཛ྄ཛྷོགཱཧེཏྭཱ ཝིནིཙྪཡཾ པཝཏྟེཏི, སོ སངྒཱམཱཝཙརོ ནཱམ ཡསཏྠེརོ ཝིཡ. ཏེན སངྒཱམཱཝཙརེན བྷིཀྑུནཱ སངྒྷཾ ཨུཔསངྐམནྟེན ནཱིཙཙིཏྟེན སངྒྷོ ཨུཔསངྐམིཏབྦོ. ནཱིཙཙིཏྟེནཱཏི མཱནདྡྷཛཾ ནིཔཱཏེཏྭཱ ནིཧཏམཱནཙིཏྟེན. རཛོཧརཎསམེནཱཏི པཱདཔུཉྪནསམེན; ཡཐཱ རཛོཧརཎསྶ སཾཀིལིཊྛེ ཝཱ ཨསཾཀིལིཊྛེ ཝཱ པཱདེ པུཉྪིཡམཱནེ ནེཝ རཱགོ ན དོསོ; ཨེཝཾ ཨིཊྛཱནིཊྛེསུ ཨརཛྫནྟེན ཨདུསྶནྟེནཱཏི ཨཏྠོ. ཡཐཱཔཏིརཱུཔེ ཨཱསནེཏི ཡཐཱཔཏིརཱུཔཾ ཨཱསནཾ ཉཏྭཱ ཨཏྟནོ པཱཔུཎནཊྛཱནེ ཐེརཱནཾ བྷིཀྑཱུནཾ པིཊྛིཾ ཨདསྶེཏྭཱ ནིསཱིདིཏབྦཾ. ཨནཱནཱཀཐིཀེནཱཏི ནཱནཱཝིདྷཾ ཏཾ ཏཾ ཨནཏྠཀཐཾ ཨཀཐེནྟེན. ཨཏིརཙྪཱནཀཐིཀེནཱཏི དིཊྛསུཏམུཏམྤི རཱཛཀཐཱདིཀཾ ཏིརཙྪཱནཀཐཾ ཨཀཐེནྟེན. སཱམཾ ཝཱ དྷམྨོ བྷཱསིཏབྦོཏི སངྒྷསནྣིཔཱཏཊྛཱནེ ཀཔྤིཡཱཀཔྤིཡནིསྶིཏཱ ཝཱ རཱུཔཱརཱུཔཔརིཙྪེདསམཐཱཙཱརཝིཔསྶནཱཙཱརཊྛཱནནིསཛྫཝཏྟཱདིནིསྶིཏཱ ཝཱ ཀཐཱ དྷམྨོ ནཱམ. ཨེཝརཱུཔོ དྷམྨོ སཡཾ ཝཱ བྷཱསིཏབྦོ, པརོ ཝཱ ཨཛ྄ཛྷེསིཏབྦོ. ཡོ བྷིཀྑུ ཏཐཱརཱུཔིཾ ཀཐཾ ཀཐེཏུཾ པཧོཏི, སོ ཝཏྟབྦོ – ‘‘ཨཱཝུསོ སངྒྷམཛ྄ཛྷམྷི ¶ པཉྷེ ཨུཔྤནྣེ ཏྭཾ ཀཐེཡྻཱསཱི’’ཏི. ཨརིཡོ ཝཱ ཏུཎྷཱིབྷཱཝོ ནཱཏིམཉྙིཏབྦོཏི ཨརིཡཱ ཏུཎྷཱི ནིསཱིདནྟཱ ན བཱལཔུཐུཛྫནཱ ཝིཡ ནིསཱིདནྟི. ཨཉྙཏརཾ ཀམྨཊྛཱནཾ གཧེཏྭཱཝ ནིསཱིདནྟི. ཨིཏི ཀམྨཊྛཱནམནསིཀཱརཝསེན ཏུཎྷཱིབྷཱཝོ ¶ ཨརིཡོ ཏུཎྷཱིབྷཱཝོ ནཱམ, སོ ནཱཏིམཉྙིཏབྦོ, ཀིཾ ཀམྨཊྛཱནཱནུཡོགེནཱཏི ནཱཝཛཱནིཏབྦོ; ཨཏྟནོ པཏིརཱུཔཾ ཀམྨཊྛཱནཾ གཧེཏྭཱཝ ནིསཱིདིཏབྦནྟི ཨཏྠོ.

ན ཨུཔཛ྄ཛྷཱཡོ པུཙྪིཏབྦོཏི ‘‘ཀོ ནཱམོ ཏུཡ྄ཧཾ ཨུཔཛ྄ཛྷཱཡོ’’ཏི ན པུཙྪིཏབྦོ. ཨེས ནཡོ སབྦཏྠ. ན ཛཱཏཱིཏི ‘‘ཁཏྟིཡཛཱཏིཡོ ཏྭཾ བྲཱཧྨཎཛཱཏིཡོ’’ཏི ¶ ཨེཝཾ ཛཱཏི ན པུཙྪིཏབྦཱ. ན ཨཱགམོཏི ‘‘དཱིགྷབྷཱཎཀོསི ཏྭཾ མཛ྄ཛྷིམབྷཱཎཀོ’’ཏི ཨེཝཾ ཨཱགམོ ན པུཙྪིཏབྦོ. ཀུལཔདེསོཏི ཁཏྟིཡཀུལཱདིཝསེནེཝ ཝེདིཏབྦོ. ཨཏྲསྶ པེམཾ ཝཱ དོསོ ཝཱཏི ཨཏྲ པུགྒལེ ཨེཏེསཾ ཀཱརཎཱནཾ ཨཉྙཏརཝསེན པེམཾ ཝཱ བྷཝེཡྻ དོསོ ཝཱ.

ནོ པརིསཀཔྤིཀེནཱཏི པརིསཀཔྤཀེན པརིསཱནུཝིདྷཱཡཀེན ན བྷཝིཏབྦཾ; ཡཾ པརིསཱཡ རུཙྩཏི, ཏདེཝ ཙེཏེཏྭཱ ཀཔྤེཏྭཱ ན ཀཐེཏབྦནྟི ཨཏྠོ. ན ཧཏྠམུདྡཱ དསྶེཏབྦཱཏི ཀཐེཏབྦེ ཙ ཨཀཐེཏབྦེ ཙ སཉྙཱཛནནཏྠཾ ཧཏྠཝིཀཱརོ ན ཀཱཏབྦོ.

ཨཏྠཾ ཨནུཝིདྷིཡནྟེནཱཏི ཝིནིཙྪཡཔཊིཝེདྷམེཝ སལླཀྑེནྟེན ‘‘ཨིདཾ སུཏྟཾ ཨུཔལབྦྷཏི, ཨིམསྨིཾ ཝིནིཙྪཡེ ཨིདཾ ཝཀྑཱམཱི’’ཏི ཨེཝཾ པརིཏུལཡནྟེན ནིསཱིདིཏབྦནྟི ཨཏྠོ. ན ཙ ཨཱསནཱ ཝུཊྛཱཏབྦནྟི ན ཨཱསནཱ ཝུཊྛཱཡ སནྣིཔཱཏམཎྜལེ ཝིཙརིཏབྦཾ, ཝིནཡདྷརེ ཨུཊྛིཏེ སབྦཱ པརིསཱ ཨུཊྛཧཏི. ན ཝཱིཏིཧཱཏབྦནྟི ན ཝིནིཙྪཡོ ཧཱཔེཏབྦོ. ན ཀུམྨགྒོ སེཝིཏབྦོཏི ན ཨཱཔཏྟི དཱིཔེཏབྦཱ. ཨསཱཧསིཀེན བྷཝིཏབྦནྟི ན སཧསཱཀཱརིནཱ བྷཝིཏབྦཾ; སཧསཱ དུརུཏྟཝཙནཾ ན ཀཐེཏབྦནྟི ཨཏྠོ. ཝཙནཀྑམེནཱཏི དུརུཏྟཝཱཙཾ ཁམནསཱིལེན. ཧིཏཔརིསཀྐིནཱཏི ཧིཏེསིནཱ ཧིཏགཝེསིནཱ ཀརུཎཱ ཙ ཀརུཎཱཔུབྦབྷཱགོ ཙ ཨུཔཊྛཱཔེཏབྦོཏི ཨཡཾ པདདྭཡེཔི ཨདྷིཔྤཱཡོ. ཨནསུརུཏྟེནཱཏི ན ཨསུརུཏྟེན. ཨསུརུཏྟཾ ཝུཙྩཏི ཝིགྒཱཧིཀཀཐཱསངྑཱཏཾ ཨསུནྡརཝཙནཾ; ཏཾ ན ཀཐེཏབྦནྟི ཨཏྠོ. ཨཏྟཱ པརིགྒཧེཏབྦོཏི ‘‘ཝིནིཙྪིནིཏུཾ ཝཱུཔསམེཏུཾ སཀྑིསྶཱམི ནུ ཁོ ནོ’’ཏི ཨེཝཾ ཨཏྟཱ པརིགྒཧེཏབྦོ; ཨཏྟནོ པམཱཎཾ ཛཱནིཏབྦནྟི ཨཏྠོ. པརོ པརིགྒཧེཏབྦོཏི ‘‘ལཛྫིཡཱ ནུ ཁོ ཨཡཾ པརིསཱ, སཀྐཱ སཉྙཱཔེཏུཾ ¶ ཨུདཱཧུ ནོ’’ཏི ཨེཝཾ པརོ པརིགྒཧེཏབྦོ.

ཙོདཀོ པརིགྒཧེཏབྦོཏི ‘‘དྷམྨཙོདཀོ ནུ ཁོ ནོ’’ཏི ཨེཝཾ པརིགྒཧེཏབྦོ. ཙུདིཏཀོ པརིགྒཧེཏབྦོཏི ‘‘དྷམྨཙུདིཏཀོ ནུ ཁོ ནོ’’ཏི ཨེཝཾ པརིགྒཧེཏབྦོ. ཨདྷམྨཙོདཀོ པརིགྒཧེཏབྦོཏི ¶ ཏསྶ པམཱཎཾ ཛཱནིཏབྦཾ. སེསེསུཔི ཨེསེཝ ནཡོ. ཝུཏྟཾ ¶ ཨཧཱཔེནྟེནཱཏི ཙོདཀཙུདིཏཀེཧི ཝུཏྟཝཙནཾ ཨཧཱཔེནྟེན. ཨཝུཏྟཾ ཨཔཀཱསེནྟེནཱཏི ཨནོསཊཾ ཝཏྠུཾ ཨཔྤཀཱསེནྟེན. མནྡོ ཧཱསེཏབྦོཏི མནྡོ མོམཱུཧོ པགྒཎྷིཏབྦོ, ‘‘ནནུ ཏྭཾ ཀུལཔུཏྟོ’’ཏི ཨུཏྟེཛེཏྭཱ ཨནུཡོགཝཏྟཾ ཀཐཱཔེཏྭཱ ཏསྶ ཨནུཡོགོ གཎྷིཏབྦོ. བྷཱིརཱུ ཨསྶཱསེཏབྦོཏི ཡསྶ སངྒྷམཛ྄ཛྷཾ ཝཱ གཎམཛ྄ཛྷཾ ཝཱ ཨནོསཊཔུབྦཏྟཱ སཱརཛྫཾ ཨུཔྤཛྫཏི, ཏཱདིསོ ‘‘མཱ བྷཱཡི, ཝིསྶཊྛོ ཀཐེཧི, མཡཾ ཏེ ཨུཔཏྠམྦྷཱ བྷཝིསྶཱམཱ’’ཏི ཝཏྭཱཔི ཨནུཡོགཝཏྟཾ ཀཐཱཔེཏབྦོ. ཙཎྜོ ནིསེདྷེཏབྦོཏི ཨཔསཱདེཏབྦོ ཏཛྫེཏབྦོ. ཨསུཙི ཝིབྷཱཝེཏབྦོཏི ཨལཛྫིཾ པཀཱསེཏྭཱ ཨཱཔཏྟིཾ དེསཱཔེཏབྦོ. ཨུཛུམདྡཝེནཱཏི ཡོ བྷིཀྑུ ཨུཛུ སཱིལཝཱ ཀཱཡཝངྐཱདིརཧིཏོ, སོ མདྡཝེནེཝ ཨུཔཙརིཏབྦོ. དྷམྨེསུ ཙ པུགྒལེསུ ཙཱཏི ཨེཏྠ ཡོ དྷམྨགརུཀོ ཧོཏི ན པུགྒལགརུཀོ, ཨཡམེཝ དྷམྨེསུ ཙ པུགྒལེསུ ཙ མཛ྄ཛྷཏྟོཏི ཝེདིཏབྦོ.

༣༦༦. སུཏྟཾ སཾསནྡནཏྠཱཡཱཏིཨཱདཱིསུ ཏེན ཙ པན ཨེཝཾ སབྲཧྨཙཱརཱིནཾ པིཡམནཱཔགརུབྷཱཝནཱིཡེན ཨནུཝིཛྫཀེན སམུདཱཧཊེསུ སུཏྟཱདཱིསུ སུཏྟཾ སཾསནྡནཏྠཱཡ; ཨཱཔཏྟཱནཱཔཏྟཱིནཾ སཾསནྡནཏྠནྟི ཝེདིཏབྦཾ. ཨོཔམྨཾ ནིདསྶནཏྠཱཡཱཏི ཨོཔམྨཾ ཨཏྠདསྶནཏྠཱཡ. ཨཏྠོ ཝིཉྙཱཔནཏྠཱཡཱཏི ཨཏྠོ ཛཱནཱཔནཏྠཱཡ. པཊིཔུཙྪཱ ཋཔནཏྠཱཡཱཏི པུཙྪཱ པུགྒལསྶ ཋཔནཏྠཱཡ. ཨོཀཱསཀམྨཾ ཙོདནཏྠཱཡཱཏི ཝཏྠུནཱ ཝཱ ཨཱཔཏྟིཡཱ ཝཱ ཙོདནཏྠཱཡ. ཙོདནཱ སཱརཎཏྠཱཡཱཏི དོསཱདོསཾ སརཱཔནཏྠཱཡ. སཱརཎཱ སཝཙནཱིཡཏྠཱཡཱཏི དོསཱདོསསཱརཎཱ སཝཙནཱིཡཀརཎཏྠཱཡ. སཝཙནཱིཡཾ པལིབོདྷཏྠཱཡཱཏི སཝཙནཱིཡཾ ‘‘ཨིམམྷཱ ཨཱཝཱསཱ པརཾ མཱ པཀྐམཱི’’ཏི ཨེཝཾ པལིབོདྷཏྠཱཡ. པལིབོདྷོ ཝིནིཙྪཡཏྠཱཡཱཏི ཝིནིཙྪཡཾ པཱཔནཏྠཱཡ. ཝིནིཙྪཡོ སནྟཱིརཎཏྠཱཡཱཏི དོསཱདོསཾ སནྟཱིརཎཏྠཱཡ ཏུལནཏྠཱཡ. སནྟཱིརཎཾ ཋཱནཱཊྛཱནགམནཏྠཱཡཱཏི ཨཱཔཏྟིཨནཱཔཏྟིགརུཀལཧུཀཱཔཏྟིཛཱནནཏྠཱཡ ¶ . སངྒྷོ སམྤརིགྒཧསམྤཊིཙྪནཏྠཱཡཱཏི ཝིནིཙྪཡསམྤཊིགྒཧཎཏྠཱཡ ཙ; སུཝིནིཙྪིཏདུབྦིནིཙྪིཏབྷཱཝཛཱནནཏྠཱཡ ཙཱཏི ཨཏྠོ. པཙྩེཀཊྛཱཡིནོ ཨཝིསཾཝཱདཀཊྛཱཡིནོཏི ཨིསྶརིཡཱདྷིཔཙྩཛེཊྛཀཊྛཱནེ ¶ ཙ ཨཝིསཾཝཱདཀཊྛཱནེ ཙ ཋིཏཱ; ན ཏེ ཨཔསཱདེཏབྦཱཏི ཨཏྠོ.

ཨིདཱནི ཡེ མནྡཱ མནྡབུདྡྷིནོ ཨེཝཾ ཝདེཡྻུཾ ‘‘ཝིནཡོ ནཱམ ཀིམཏྠཱཡཱ’’ཏི ཏེསཾ ཝཙནོཀཱསཔིདཧནཏྠམཏྟཾ དསྶེཏུཾ ཝིནཡོ སཾཝརཏྠཱཡཱཏིཨཱདིམཱཧ. ཏཏྠ ཝིནཡོ སཾཝརཏྠཱཡཱཏི སཀལཱཔི ཝིནཡཔཉྙཏྟི ཀཱཡཝཙཱིདྭཱརསཾཝརཏྠཱཡ. ཨཱཛཱིཝཝིསུདྡྷིཔརིཡོསཱནསྶ སཱིལསྶ ཨུཔནིསྶཡོ ¶ ཧོཏི; པཙྩཡོ ཧོཏཱིཏི ཨཏྠོ. ཨེས ནཡོ སབྦཏྠ. ཨཔིཙེཏྠ ཨཝིཔྤཊིསཱརོཏི པཱཔཔུཉྙཱནཾ ཀཏཱཀཏཝསེན ཙིཏྟཝིཔྤཊིསཱརཱབྷཱཝོ. པཱམུཛྫནྟི དུབྦལཱ ཏརུཎཔཱིཏི. པཱིཏཱིཏི བལཝཱ བཧལཔཱིཏི. པསྶདྡྷཱིཏི ཀཱཡཙིཏྟདརཐཔཊིཔྤསྶདྡྷི. སུཁནྟི ཀཱཡིཀཙེཏསིཀསུཁཾ. ཏཉྷི དུཝིདྷམྤི སམཱདྷིསྶ ཨུཔནིསྶཡཔཙྩཡོ ཧོཏི. སམཱདྷཱིཏི ཙིཏྟེཀགྒཏཱ. ཡཐཱབྷཱུཏཉཱཎདསྶནནྟི ཏརུཎཝིཔསྶནཱ; ཨུདཡབྦཡཉཱཎསྶེཏཾ ཨདྷིཝཙནཾ. ཙིཏྟེཀགྒཏཱ ཧི ཏརུཎཝིཔསྶནཱཡ ཨུཔནིསྶཡཔཙྩཡོ ཧོཏི. ནིབྦིདཱཏི སིཁཱཔཏྟཱ ཝུཊྛཱནགཱམིནིབལཝཝིཔསྶནཱ. ཝིརཱགོཏི ཨརིཡམགྒོ. ཝིམུཏྟཱིཏི ཨརཧཏྟཕལཾ. ཙཏུབྦིདྷོཔི ཧི ཨརིཡམགྒོ ཨརཧཏྟཕལསྶ ཨུཔནིསྶཡཔཙྩཡོ ཧོཏི. ཝིམུཏྟིཉཱཎདསྶནནྟི པཙྩཝེཀྑཎཱཉཱཎཾ. ཝིམུཏྟིཉཱཎདསྶནཾ ཨནུཔཱདཱཔརིནིབྦཱནཏྠཱཡཱཏི ཨཔཙྩཡཔརིནིབྦཱནཏྠཱཡ. ཨཔཙྩཡཔརིནིབྦཱནསྶ ཧི ཏཾ པཙྩཡོ ཧོཏི, ཏསྨིཾ ཨནུཔྤཏྟེ ཨཝསྶཾ པརིནིབྦཱཡིཏབྦཏོཏི. ཨེཏདཏྠཱ ཀཐཱཏི ཨཡཾ ཝིནཡཀཐཱ ནཱམ ཨེཏདཏྠཱ. མནྟནཱཏི ཝིནཡམནྟནཱ ཨེཝ. ཨུཔནིསཱཏི ཨཡཾ ‘‘ཝིནཡོ སཾཝརཏྠཱཡཱ’’ཏིཨཱདིཀཱ པརམྤརཔཙྩཡཏཱཔི ཨེཏདཏྠཱཡ. སོཏཱཝདྷཱནནྟི ཨིམིསྶཱ པརམྤརཔཙྩཡཀཐཱཡ སོཏཱཝདྷཱནཾ. ཨིམཾ ཀཐཾ སུཏྭཱ ཡཾ ཨུཔྤཛྫཏི ཉཱཎཾ, ཏམྤི ཨེཏདཏྠཱཡ. ཡདིདཾ ཨནུཔཱདཱ ཙིཏྟསྶ ཝིམོཀྑོཏི ཡོ ཨཡཾ ཙཏཱུཧི ཨུཔཱདཱནེཧི ཨནུཔཱདིཡིཏྭཱ ཙིཏྟསྶ ཨརཧཏྟཕལསངྑཱཏོ ཝིམོཀྑོ, སོཔི ཨེཏདཏྠཱཡ; ཨཔཙྩཡཔརིནིབྦཱནཏྠཱཡ ཨེཝཱཏི ཨཏྠོ.

༣༦༧. ཨནུཡོགཝཏྟགཱཐཱསུ ¶ པཋམགཱཐཱ ཝུཏྟཏྠཱ ཨེཝ.

ཝཏྠུཾ ཝིཔཏྟིཾ ཨཱཔཏྟིཾ, ནིདཱནཾ ཨཱཀཱརཨཀོཝིདོ པུབྦཱཔརཾ ན ཛཱནཱཏཱིཏི ‘‘ཝཏྠུ’’ནྟིཨཱདཱིནི ‘‘ན ཛཱནཱཏཱི’’ཏི པདེན སམྦནྡྷོ. ‘‘ཨཀོཝིདོ’’ཏི ¶ པདསྶ ‘‘ས ཝེ ཏཱདིསཀོ’’ཏི ཨིམིནཱ སམྦནྡྷོ. ཏསྨཱ ཨཡམེཏྠ ཡོཛནཱ – ཡོ བྷིཀྑུ པཱརཱཛིཀཱདཱིནཾ ཝཏྠུཾ ན ཛཱནཱཏི, ཙཏུབྦིདྷཾ ཝིཔཏྟིཾ ན ཛཱནཱཏི, སཏྟཝིདྷཾ ཨཱཔཏྟིཾ ན ཛཱནཱཏི, ‘‘ཨིདཾ སིཀྑཱཔདཾ ཨསུཀསྨིཾ ནཱམ ནགརེ པཉྙཏྟ’’ནྟི ཨེཝཾ ནིདཱནཾ ན ཛཱནཱཏི, ‘‘ཨིདཾ པུརིམཝཙནཾ ཨིདཾ པཙྪིམཝཙན’’ནྟི པུབྦཱཔརཾ ན ཛཱནཱཏི, ‘‘ཨིདཾ ཀཏཾ ཨིདཾ ཨཀཏ’’ནྟི ཀཏཱཀཏཾ ན ཛཱནཱཏི. སམེན ཙཱཏི ཏེནེཝ པུབྦཱཔརཾ ཨཛཱནནསྶ སམེན ཨཉྙཱཎེན, ‘‘ཀཏཱཀཏཾ ན ཛཱནཱཏཱི’’ཏི ཝུཏྟཾ ཧོཏི; ཨེཝཾ ཏཱཝ ནཛཱནཱཏི-པདེན སདྡྷིཾ སམྦནྡྷོ ཝེདིཏབྦོ. ཡཾ པནེཏཾ ‘‘ཨཱཀཱརཨཀོཝིདོ’’ཏི ཝུཏྟཾ, ཏཏྠ ཨཱཀཱརཨཀོཝིདོཏི ཀཱརཎཱཀཱརཎེ ཨཀོཝིདོ. ཨིཏི ཡྭཱཡཾ ¶ ཝཏྠུཨཱདཱིནིཔི ན ཛཱནཱཏི, ཨཱཀཱརསྶ ཙ ཨཀོཝིདོ, ས ཝེ ཏཱདིསཀོ བྷིཀྑུ ཨཔཊིཀྑོཏི ཝུཙྩཏི.

ཀམྨཉྩ ཨདྷིཀརཎཉྩཱཏི ཨིམེསམྤི པདཱནཾ ‘‘ན ཛཱནཱཏཱི’’ཏི པདེནེཝ སམྦནྡྷོ. ཨཡཾ པནེཏྠ ཡོཛནཱ – ཏཐེཝ ཨིཏི ཡྭཱཡཾ ཀམྨཉྩ ན ཛཱནཱཏི, ཨདྷིཀརཎཉྩ ན ཛཱནཱཏི, སཏྟཔྤཀཱརེ སམཐེ ཙཱཔི ཨཀོཝིདོ, རཱགཱདཱིཧི པན རཏྟོ དུཊྛོ ཙ མཱུལ༹ྷོ ཙ, བྷཡེན བྷཡཱ གཙྪཏི, སམྨོཧེན མོཧཱ གཙྪཏི, རཏྟཏྟཱ པན དུཊྛཏྟཱ ཙ ཚནྡཱ དོསཱ ཙ གཙྪཏི, པརཾ སཉྙཱཔེཏུཾ ཨསམཏྠཏཱཡ ན ཙ སཉྙཏྟིཀུསལོ, ཀཱརཎཱཀཱརཎདསྶནེ ཨསམཏྠཏཱཡ ནིཛ྄ཛྷཏྟིཡཱ ཙ ཨཀོཝིདོ ཨཏྟནོ སདིསཱཡ པརིསཱཡ ལདྡྷཏྟཱ ལདྡྷཔཀྑོ, ཧིརིཡཱ པརིབཱཧིརཏྟཱ ཨཧིརིཀོ, ཀཱལ༹ཀེཧི ཀམྨེཧི སམནྣཱགཏཏྟཱ ཀཎྷཀམྨོ, དྷམྨཱདརིཡཔུགྒལཱདརིཡཱནཾ ཨབྷཱཝཏོ ཨནཱདརོ, ས ཝེ ཏཱདིསཀོ བྷིཀྑུ ཨཔཊིཀྑོཏི ཝུཙྩཏི, ན པཊིཀྑིཏབྦོ ན ཨོལོཀེཏབྦོ, ན སམྨནྣིཏྭཱ ཨིསྶརིཡཱདྷིཔཙྩཛེཊྛཀཊྛཱནེ ཋཔེཏབྦོཏི ཨཏྠོ. སུཀྐཔཀྑགཱཐཱནམྤི ཡོཛནཱནཡོ ཝུཏྟནཡེནེཝ ཝེདིཏབྦོཏི.

ཙཱུལ༹སངྒཱམཝཎྞནཱ ནིཊྛིཏཱ.

མཧཱསངྒཱམོ

ཝོཧརནྟེན ཛཱནིཏབྦཱདིཝཎྞནཱ

༣༦༨-༣༧༤. མཧཱསངྒཱམེ ¶ ¶ ¶ – ཝཏྠུཏོ ཝཱ ཝཏྠུཾ སངྐམཏཱིཏི ‘‘པཋམཔཱརཱཛིཀཝཏྠུ མཡཱ དིཊྛཾ ཝཱ སུཏཾ ཝཱ’’ཏི ཝཏྭཱ པུན པུཙྪིཡམཱནོ ནིགྷཾསིཡམཱནོ ‘‘ན མཡཱ པཋམཔཱརཱཛིཀསྶ ཝཏྠུ དིཊྛཾ, ན སུཏཾ; དུཏིཡཔཱརཱཛིཀསྶ ཝཏྠུ དིཊྛཾ ཝཱ སུཏཾ ཝཱ’’ཏི ཝདཏི. ཨེཏེནེཝ ནཡེན སེསཝཏྠུསངྐམནཾ, ཝིཔཏྟིཏོ ཝིཔཏྟིསངྐམནཾ ཨཱཔཏྟིཏོ ཨཱཔཏྟིསངྐམནཉྩ ཝེདིཏབྦཾ. ཡོ པན ‘‘ནེཝ མཡཱ དིཊྛཾ, ན སུཏ’’ནྟི ཝཏྭཱ པཙྪཱ ‘‘མཡཱཔེཏཾ དིཊྛཾ ཝཱ སུཏཾ ཝཱ’’ཏི ཝདཏི, ‘‘དིཊྛཾ ཝཱ སུཏཾ ཝཱ’’ཏི ཝཏྭཱ པཙྪཱ ‘‘ན དིཊྛཾ ཝཱ ན སུཏཾ ཝཱ’’ཏི ཝདཏི, ཨཡཾ ཨཝཛཱནིཏྭཱ པཊིཛཱནཱཏི, པཊིཛཱནིཏྭཱ ཨཝཛཱནཱཏཱིཏི ཝེདིཏབྦོ. ཨེསེཝ ཨཉྙེནཉྙཾ པཊིཙརཏི ནཱམ.

༣༧༥. ཝཎྞཱཝཎྞོཏི ནཱིལཱདིཝཎྞཱཝཎྞཝསེན སུཀྐཝིསྶཊྛིསིཀྑཱཔདཾ ཝུཏྟཾ. ཝཙནམནུཔྤདཱནནྟི སཉྩརིཏྟཾ ཝུཏྟཾ. ཀཱཡསཾསགྒཱདིཏྟཡཾ སརཱུཔེནེཝ ཝུཏྟཾ. ཨིཏི ཨིམཱནི པཉྩ མེཐུནདྷམྨསྶ པུབྦབྷཱགོ པུབྦཔཡོགོཏི ཝེདིཏབྦཱནི.

༣༧༦. ཙཏྟཱརི ཨཔལོཀནཀམྨཱནཱིཏི ཨདྷམྨེནཝགྒཱདཱིནི. སེསེསུཔི ཨེསེཝ ནཡོ. ཨིཏི ཙཏྟཱརི ཙཏུཀྐཱནི སོལ༹ས ཧོནྟི.

ཨགཏིཨགནྟབྦཝཎྞནཱ

༣༧༩. བཧུཛནཨཧིཏཱཡ ¶ པཊིཔནྣོ ཧོཏཱིཏི ཝིནཡདྷརེན ཧི ཨེཝཾ ཚནྡཱདིགཏིཡཱ ཨདྷིཀརཎེ ཝིནིཙྪིཏེ ཏསྨིཾ ཝིཧཱརེ སངྒྷོ དྭིདྷཱ བྷིཛྫཏི. ཨོཝཱདཱུཔཛཱིཝིནིཡོ བྷིཀྑུནིཡོཔི དྭེ བྷཱགཱ ཧོནྟི. ཨུཔཱསཀཱཔི ཨུཔཱསིཀཱཡོཔི དཱརཀཱཔི དཱརིཀཱཡོཔི ཏེསཾ ཨཱརཀྑདེཝཏཱཔི ཏཐེཝ དྭིདྷཱ བྷིཛྫནྟི. ཏཏོ བྷུམྨདེཝཏཱ ཨཱདིཾ ཀཏྭཱ ཡཱཝ ཨཀནིཊྛབྲཧྨཱནོ དྭིདྷཱཝ ཧོནྟི. ཏེན ཝུཏྟཾ – ‘‘བཧུཛནཨཧིཏཱཡ པཊིཔནྣོ ཧོཏི…པེ… དུཀྑཱཡ དེཝམནུསྶཱན’’ནྟི.

༣༨༢. ཝིསམནིསྶིཏོཏི ¶ ཝིསམཱནི ཀཱཡཀམྨཱདཱིནི ནིསྶིཏོ. གཧནནིསྶིཏོཏི མིཙྪཱདིཊྛིཨནྟགྒཱཧིཀདིཊྛིསངྑཱཏཾ གཧནཾ ནིསྶིཏོ. བལཝནིསྶིཏོཏི བལཝནྟེ ཨབྷིཉྙཱཏེ བྷིཀྑཱུ ནིསྶིཏོ.

༣༩༣. ཏསྶ ཨཝཛཱནནྟོཏི ཏསྶ ཝཙནཾ ཨཝཛཱནནྟོ. ཨུཔཡོགཏྠེ ཝཱ སཱམིཝཙནཾ, ཏཾ ཨཝཛཱནནྟོཏི ཨཏྠོ.

༣༩༤. ཡཾ ཨཏྠཱཡཱཏི ཡདཏྠཱཡ. ཏཾ ཨཏྠནྟི སོ ཨཏྠོ. སེསཾ སབྦཏྠ ཨུཏྟཱནམེཝཱཏི.

མཧཱསངྒཱམཝཎྞནཱ ནིཊྛིཏཱ.

ཀཐིནབྷེདཾ

ཀཐིནཨཏྠཏཱདིཝཎྞནཱ

༤༠༣. ཀཐིནེ ¶ ¶ ¶ – ཨཊྛ མཱཏིཀཱཏི ཁནྡྷཀེ ཝུཏྟཱ པཀྐམནནྟིཀཱདིཀཱ ཨཊྛ. པལིབོདྷཱནིསཾསཱཔི པུབྦེ ཝུཏྟཱ ཨེཝ.

༤༠༤. པཡོགསྶཱཏི ཙཱིཝརདྷོཝནཱདིནོ སཏྟཝིདྷསྶ པུབྦཀརཎསྶཏྠཱཡ ཡོ ཨུདཀཱཧརཎཱདིཀོ པཡོགོ ཀཡིརཏི, ཏསྶ པཡོགསྶ. ཀཏམེ དྷམྨཱ ཨནནྟརཔཙྩཡེན པཙྩཡོཏི ཨནཱགཏཝསེན ཨནནྟརཱ ཧུཏྭཱ ཀཏམེ དྷམྨཱ པཙྩཡཱ ཧོནྟཱིཏི ཨཏྠོ. སམནནྟརཔཙྩཡེནཱཏི སུཊྛུ ཨནནྟརཔཙྩཡེན, ཨནནྟརཔཙྩཡམེཝ ཨཱསནྣཏརཾ ཀཏྭཱ པུཙྪཏི. ནིསྶཡཔཙྩཡེནཱཏི ཨུཔྤཛྫམཱནསྶ པཡོགསྶ ནིསྶཡཾ ཨཱདྷཱརབྷཱཝཾ ཨུཔགཏཱ ཝིཡ ཧུཏྭཱ ཀཏམེ དྷམྨཱ པཙྩཡཱ ཧོནྟཱིཏི ཨཏྠོ. ཨུཔནིསྶཡཔཙྩཡེནཱཏི ཨུཔེཏེན ནིསྶཡཔཙྩཡེན; ནིསྶཡཔཙྩཡམེཝ ཨུཔགཏཏརཾ ཀཏྭཱ པུཙྪཏི. པུརེཛཱཏཔཙྩཡེནཱཏི ཨིམིནཱ པཋམཾ ཨུཔྤནྣསྶ པཙྩཡབྷཱཝཾ པུཙྪཏི. པཙྪཱཛཱཏཔཙྩཡེནཱཏི ཨིམིནཱ པཙྪཱ ཨུཔྤཛྫནཀསྶ པཙྩཡབྷཱཝཾ པུཙྪཏི. སཧཛཱཏཔཙྩཡེནཱཏི ཨིམིནཱ ཨཔུབྦཾ ཨཙརིམཾ ཨུཔྤཛྫམཱནཱནཾ པཙྩཡབྷཱཝཾ པུཙྪཏི. པུབྦཀརཎསྶཱཏི དྷོཝནཱདིནོ པུབྦཀརཎསྶ. པཙྩུདྡྷཱརསྶཱཏི པུརཱཎསངྒྷཱཊིཨཱདཱིནཾ པཙྩུདྡྷརཎསྶ. ཨདྷིཊྛཱནསྶཱཏི ཀཐིནཙཱིཝརཱདྷིཊྛཱནསྶ. ཨཏྠཱརསྶཱཏི ཀཐིནཏྠཱརསྶ. མཱཏིཀཱནཉྩ པལིབོདྷཱནཉྩཱཏི ཨཊྛནྣཾ མཱཏིཀཱནཾ དྭིནྣཉྩ པལིབོདྷཱནཾ. ཝཏྠུསྶཱཏི སངྒྷཱཊིཨཱདིནོ ཀཐིནཝཏྠུསྶ; སེསཾ ཝུཏྟནཡམེཝ.

ཨེཝཾ ཡཉྩ ལབྦྷཏི ཡཉྩ ན ལབྦྷཏི, སབྦཾ པུཙྪིཏྭཱ ཨིདཱནི ཡཾ ཡསྶ ལབྦྷཏི, ཏདེཝ དསྶེནྟོ པུབྦཀརཎཾ པཡོགསྶཱཏིཨཱདིནཱ ནཡེན ཝིསྶཛྫནམཱཧ. ཏསྶཏྠོ – ཡཾ ཝུཏྟཾ ‘‘པཡོགསྶ ¶ ཀཏམེ དྷམྨཱ’’ཏིཨཱདི, ཏཏྠ ཝུཙྩཏེ, པུབྦཀརཎཾ པཡོགསྶ ཨནནྟརཔཙྩཡེན པཙྩཡོ, སམནནྟརནིསྶཡཨུཔནིསྶཡཔཙྩཡེན པཙྩཡོ. པཡོགསྶ ཧི སཏྟཝིདྷམྤི པུབྦཀརཎཾ ཡསྨཱ ཏེན པཡོགེན ནིཔྥཱདེཏབྦསྶ པུབྦཀརཎསྶཏྠཱཡ སོ པཡོགོ ཀཡིརཏི, ཏསྨཱ ཨིམེཧི ཙཏཱུཧི པཙྩཡེཧི པཙྩཡོ ཧོཏི. པུརེཛཱཏཔཙྩཡེ པནེས ཨུདྡིཊྛདྷམྨེསུ ཨེཀདྷམྨམྤི ན ¶ ལབྷཏི, ཨཉྙདཏྠུ པུབྦཀརཎསྶ སཡཾ པུརེཛཱཏཔཙྩཡོ ཧོཏི, པཡོགེ སཏི པུབྦཀརཎསྶ ནིཔྥཛྫནཏོ ¶ . ཏེན ཝུཏྟཾ – ‘‘པཡོགོ པུབྦཀརཎསྶ པུརེཛཱཏཔཙྩཡེན པཙྩཡོ’’ཏི. པཙྪཱཛཱཏཔཙྩཡཾ པན ལབྷཏི, ཏེན ཝུཏྟཾ – ‘‘པུབྦཀརཎཾ པཡོགསྶ པཙྪཱཛཱཏཔཙྩཡེན པཙྩཡོ’’ཏི. པཙྪཱ ཨུཔྤཛྫནཀསྶ ཧི པུབྦཀརཎསྶ ཨཏྠཱཡ སོ པཡོགོ ཀཡིརཏི. སཧཛཱཏཔཙྩཡཾ པན མཱཏིཀཱཔལིབོདྷཱནིསཾསསངྑཱཏེ པནྣརས དྷམྨེ ཋཔེཏྭཱ ཨཉྙོ པཡོགཱདཱིསུ ཨེཀོཔི དྷམྨོ ན ལབྷཏི, ཏེ ཨེཝ ཧི པནྣརས དྷམྨཱ སཧ ཀཐིནཏྠཱརེན ཨེཀཏོ ནིཔྥཛྫནྟཱིཏི ཨཉྙམཉྙཾ སཧཛཱཏཔཙྩཡཱ ཧོནྟི. ཏེན ཝུཏྟཾ – ‘‘པནྣརས དྷམྨཱ སཧཛཱཏཔཙྩཡེན པཙྩཡོ’’ཏི. ཨེཏེནུཔཱཡེན སབྦཔདཝིསྶཛྫནཱནི ཝེདིཏབྦཱནི.

པུབྦཀརཎནིདཱནཱདིཝིབྷཱགཝཎྞནཱ

༤༠༥. པུབྦཀརཎཾ ཀིཾནིདཱནནྟིཨཱདིཔུཙྪཱཝིསྶཛྫནཾ ཨུཏྟཱནམེཝ.

༤༠༦-༧. ‘‘པཡོགོ ཀིཾནིདཱནོ’’ཏིཨཱདཱིསུ པུཙྪཱདྭཡཝིསྶཛྫནེསུ ཧེཏུནིདཱནོ པཙྩཡནིདཱནོཏི ཨེཏྠ ཚ ཙཱིཝརཱནི ཧེཏུ ཙེཝ པཙྩཡོ ཙཱཏི ཝེདིཏབྦཱནི. པུབྦཔཡོགཱདཱིནཉྷི སབྦེསཾ ཏཱནིཡེཝ ཧེཏུ, ཏཱནི པཙྩཡོ. ན ཧི ཚབྦིདྷེ ཙཱིཝརེ ཨསཏི པཡོགོ ཨཏྠི, ན པུབྦཀརཎཱདཱིནི, ཏསྨཱ ‘‘པཡོགོ ཧེཏུནིདཱནོ’’ཏིཨཱདི ཝུཏྟཾ.

༤༠༨. སངྒཧཝཱརེ – ཝཙཱིབྷེདེནཱཏི ‘‘ཨིམཱཡ སངྒྷཱཊིཡཱ, ཨིམིནཱ ཨུཏྟརཱསངྒེན, ཨིམིནཱ ཨནྟརཝཱསཀེན ཀཐིནཾ ཨཏྠརཱམཱི’’ཏི ཨེཏེན ཝཙཱིབྷེདེན. ཀཏིམཱུལཱདིཔུཙྪཱཝིསྶཛྫནེ – ཀིརིཡཱ མཛ྄ཛྷེཏི པཙྩུདྡྷཱརོ ཙེཝ ཨདྷིཊྛཱནཉྩ.

༤༡༡. ཝཏྠུཝིཔནྣཾ ཧོཏཱིཏི ཨཀཔྤིཡདུསྶཾ ཧོཏི. ཀཱལཝིཔནྣཾ ནཱམ ཨཛྫ དཱཡཀེཧི དིནྣཾ སྭེ སངྒྷོ ཀཐིནཏྠཱརཀསྶ དེཏི. ཀརཎཝིཔནྣཾ ནཱམ ཏདཧེཝ ཚིནྡིཏྭཱ ཨཀཏཾ.

ཀཐིནཱདིཛཱནིཏབྦཝིབྷཱགཝཎྞནཱ

༤༡༢. ཀཐིནཾ ¶ ¶ ཛཱནིཏབྦནྟིཨཱདིཔུཙྪཱཡ ཝིསྶཛྫནེ – ཏེསཉྙེཝ དྷམྨཱནནྟི ཡེསུ རཱུཔཱདིདྷམྨེསུ སཏི ཀཐིནཾ ནཱམ ཧོཏི, ཏེསཾ སམོདྷཱནཾ མིསྶཱིབྷཱཝོ. ནཱམཾ ནཱམཀམྨནྟིཨཱདིནཱ པན ‘‘ཀཐིན’’ནྟི ཨིདཾ བཧཱུསུ དྷམྨེསུ ནཱམམཏྟཾ, ན པརམཏྠཏོ ཨེཀོ དྷམྨོ ཨཏྠཱིཏི དསྶེཏི.

ཙཏུཝཱིསཏིཡཱ ཨཱཀཱརེཧཱིཏི ‘‘ན ཨུལླིཁིཏམཏྟེནཱ’’ཏིཨཱདཱིཧི པུབྦེ ཝུཏྟཀཱརཎེཧི. སཏྟརསཧི ཨཱཀཱརེཧཱིཏི ‘‘ཨཧཏེན ཨཏྠཏཾ ཧོཏི ཀཐིན’’ནྟིཨཱདཱིཧི པུབྦེ ཝུཏྟཀཱརཎེཧི. ནིམིཏྟཀམྨཱདཱིསུ ཡཾ ཝཏྟབྦཾ སབྦཾ ཀཐིནཀྑནྡྷཀཝཎྞནཱཡཾ ཝུཏྟཾ.

༤༡༦. ཨེཀུཔྤཱདཱ ཨེཀནིརོདྷཱཏི ཨུཔྤཛྫམཱནཱཔི ཨེཀཏོ ཨུཔྤཛྫནྟི, ནིརུཛ྄ཛྷམཱནཱཔི ཨེཀཏོ ནིརུཛ྄ཛྷནྟི. ཨེཀུཔྤཱདཱ ནཱནཱནིརོདྷཱཏི ཨུཔྤཛྫམཱནཱ ཨེཀཏོ ཨུཔྤཛྫནྟི, ནིརུཛ྄ཛྷམཱནཱ ནཱནཱ ནིརུཛ྄ཛྷནྟི. ཀིཾ ཝུཏྟཾ ཧོཏི ¶ ? སབྦེཔི ཨཏྠཱརེན སདྡྷིཾ ཨེཀཏོ ཨུཔྤཛྫནྟི, ཨཏྠཱརེ ཧི སཏི ཨུདྡྷཱརོ ནཱམ. ནིརུཛ྄ཛྷམཱནཱ པནེཏྠ པུརིམཱ དྭེ ཨཏྠཱརེན སདྡྷིཾ ཨེཀཏོ ནིརུཛ྄ཛྷནྟི, ཨུདྡྷཱརབྷཱཝཾ པཱཔུཎནྟི. ཨཏྠཱརསྶ ཧི ནིརོདྷོ ཨེཏེསཉྩ ཨུདྡྷཱརབྷཱཝོ ཨེཀཀྑཎེ ཧོཏི, ཨིཏརེ ནཱནཱ ནིརུཛ྄ཛྷནྟི. ཏེསུ ཨུདྡྷཱརབྷཱཝཾ པཏྟེསུཔི ཨཏྠཱརོ ཏིཊྛཏིཡེཝ. སེསཾ སབྦཏྠ ཨུཏྟཱནམེཝཱཏི.

སམནྟཔཱསཱདིཀཱཡ ཝིནཡསཾཝཎྞནཱཡ

ཀཐིནབྷེདཝཎྞནཱ ནིཊྛིཏཱ.

པཉྙཏྟིཝགྒཝཎྞནཱ ནིཊྛིཏཱ.

ཨུཔཱལིཔཉྩཀཾ

ཨནིསྶིཏཝགྒཝཎྞནཱ

༤༡༧. ཨུཔཱལིཔཉྷེསུ ¶ ¶ ཀཏིཧི ནུ ཁོ བྷནྟེཏི པུཙྪཱཡ ཨཡཾ སམྦནྡྷོ. ཐེརོ ཀིར རཧོགཏོ སབྦཱནི ཨིམཱནི པཉྩཀཱནི ཨཱཝཛྫེཏྭཱ ‘‘བྷགཝནྟཾ དཱནི པུཙྪིཏྭཱ ཨིམེསཾ ནིསྶཱཡ ཝསནཀཱདཱིནཾ ཨཏྠཱཡ ཏནྟིཾ ཋཔེསྶཱམཱི’’ཏི བྷགཝནྟཾ ཨུཔསངྐམིཏྭཱ ‘‘ཀཏིཧི ནུ ཁོ བྷནྟེ’’ཏིཨཱདིནཱ ནཡེན པཉྷེ པུཙྪི. ཏེསཾ ཝིསྶཛྫནེ ཨུཔོསཐཾ ན ཛཱནཱཏཱིཏི ནཝཝིདྷཾ ཨུཔོསཐཾ ན ཛཱནཱཏི. ཨུཔོསཐཀམྨཾ ན ཛཱནཱཏཱིཏི ཨདྷམྨེནཝགྒཱདིབྷེདཾ ཙཏུབྦིདྷཾ ཨུཔོསཐཀམྨཾ ན ཛཱནཱཏི. པཱཏིམོཀྑཾ ན ཛཱནཱཏཱིཏི དྭེ མཱཏིཀཱ ན ཛཱནཱཏི. པཱཏིམོཀྑུདྡེསཾ ན ཛཱནཱཏཱིཏི བྷིཀྑཱུནཾ པཉྩཝིདྷཾ བྷིཀྑུནཱིནཾ ཙཏུབྦིདྷནྟི ནཝཝིདྷཾ པཱཏིམོཀྑུདྡེསཾ ན ཛཱནཱཏི.

པཝཱརཎཾ ན ཛཱནཱཏཱིཏི ནཝཝིདྷཾ པཝཱརཎཾ ན ཛཱནཱཏི. པཝཱརཎཱཀམྨཾ ན ཛཱནཱཏཱིཏི ཨདྷམྨེནཝགྒཱདིབྷེདཾ ཙཏུབྦིདྷཾ པཝཱརཎཱཀམྨཾ ན ཛཱནཱཏི.

ཨཱཔཏྟཱནཱཔཏྟིཾ ན ཛཱནཱཏཱིཏི ཏསྨིཾ ཏསྨིཾ སིཀྑཱཔདེ ནིདྡིཊྛཾ ཨཱཔཏྟིཉྩ ཨནཱཔཏྟིཉྩ ན ཛཱནཱཏི.

ཨཱཔནྣོ ཀམྨཀཏོཏི ཨཱཔཏྟིཾ ཨཱཔནྣོ ཏཔྤཙྩཡཱཝ སངྒྷེན ཀམྨཾ ཀཏཾ ཧོཏི.

ནཔྤཊིཔྤསྶམྦྷནཝགྒཝཎྞནཱ

༤༢༠. ཀམྨཾ ¶ ནཔྤཊིཔྤསྶམྦྷེཏབྦནྟི ཨཡཾ ཡསྨཱ ཨནུལོམཝཏྟེ ན ཝཏྟཏི, ཏསྨཱ ནཱསྶ ཀམྨཾ པཊིཔྤསྶམྦྷེཏབྦཾ; སརཛྫུཀོཝ ཝིསྶཛྫེཏབྦོཏི ཨཏྠོ.

༤༢༡. སཙེ ཨུཔཱལི སངྒྷོ སམགྒཀརཎཱིཡཱནི ཀམྨཱནི ཀརོཏཱིཏི སཙེ སམགྒེཧི ཀརཎཱིཡཱནི ཨུཔོསཐཱདཱིནི ཀམྨཱནི ཀརོཏི, ཨུཔོསཐཔཝཱརཎཱདཱིསུ ཧི ཋིཏཱསུ ཨུཔཏྠམྦྷོ ན དཱཏབྦོ. སཙེ ཧི སངྒྷོ ཨཙྩཡཾ དེསཱཔེཏྭཱ སངྒྷསཱམགྒིཾ ཀརོཏི, ཏིཎཝཏྠཱརཀསམཐཾ ཝཱ ཀཏྭཱ ཨུཔོསཐཔཝཱརཎཾ ཀརོཏི ¶ , ཨེཝརཱུཔཾ སམགྒཀརཎཱིཡཾ ནཱམ ཀམྨཾ ཧོཏི. ཏཏྲ ཙེཏི སཙེ ཏཱདིསེ ཀམྨེ བྷིཀྑུནོ ནཀྑམཏི, དིཊྛཱཝིཀམྨམྤི ¶ ཀཏྭཱ ཏཐཱརཱུཔཱ སཱམགྒཱི ཨུཔེཏབྦཱ, ཨེཝཾ ཝིལོམགྒཱཧོ ན གཎྷིཏབྦོ. ཡཏྲ པན ཨུདྡྷམྨཾ ཨུབྦིནཡཾ སཏྠུ སཱསནཾ དཱིཔེནྟི, ཏཏྠ དིཊྛཱཝིཀམྨཾ ན ཝཊྚཏི, པཊིབཱཧིཏྭཱ པཀྐམིཏབྦཾ.

ཨུསྶིཏམནྟཱི ཙཱཏི ལོབྷདོསམོཧམཱནུསྶནྣཾ ཝཱཙཾ བྷཱསིཏཱ ཀཎྷཝཱཙོ ཨནཏྠཀདཱིཔནོ. ནིསྶིཏཛཔྤཱིཏི ཨཏྟནོ དྷམྨཏཱཡ ཨུསྶདཡུཏྟཾ བྷཱསིཏུཾ ན སཀྐོཏི; ཨཐ ཁོ ‘‘མཡཱ སདྡྷིཾ རཱཛཱ ཨེཝཾ ཀཐེསི, ཨསུཀམཧཱམཏྟོ ཨེཝཾ ཀཐེསི, ཨསུཀོ ནཱམ མཡ྄ཧཾ ཨཱཙརིཡོ ཝཱ ཨུཔཛ྄ཛྷཱཡོ ཝཱ ཏེཔིཊཀོ མཡཱ སདྡྷིཾ ཨེཝཾ ཀཐེསཱི’’ཏི ཨེཝཾ ཨཉྙཾ ནིསྶཱཡ ཛཔྤཏི. ན ཙ བྷཱསཱནུསནྡྷིཀུསལོཏི ཀཐཱནུསནྡྷིཝཙནེ ཙ ཝིནིཙྪཡཱནུསནྡྷིཝཙནེ ཙ ཨཀུསལོ ཧོཏི. ན ཡཐཱདྷམྨེ ཡཐཱཝིནཡེཏི ན བྷཱུཏེན ཝཏྠུནཱ ཨཱཔཏྟིཾ སཱརེཏྭཱ ཙོདེཏཱ ཧོཏི.

ཨུསྶཱདེཏཱ ཧོཏཱིཏི ‘‘ཨམྷཱཀཾ ཨཱཙརིཡོ མཧཱཏེཔིཊཀོ པརམདྷམྨཀཐིཀོ’’ཏིཨཱདིནཱ ནཡེན ཨེཀཙྩཾ ཨུསྶཱདེཏི. དུཏིཡཔདེ ‘‘ཨཱཔཏྟིཾ ཀིཾ སོ ན ཛཱནཱཏཱི’’ཏིཨཱདིནཱ ཨེཀཙྩཾ ཨཔསཱདེཏི. ཨདྷམྨཾ གཎྷཱཏཱིཏི ཨནིཡྻཱནིཀཔཀྑཾ གཎྷཱཏི. དྷམྨཾ པཊིབཱཧཏཱིཏི ནིཡྻཱནིཀཔཀྑཾ པཊིབཱཧཏི. སམྥཉྩ བཧུཾ བྷཱསཏཱིཏི བཧུཾ ནིརཏྠཀཀཐཾ ཀཐེཏི.

པསཡ྄ཧ པཝཏྟཱ ཧོཏཱིཏི ཨནཛ྄ཛྷིཊྛོ བྷཱརེ ཨནཱརོཔིཏེ ཀེཝལཾ མཱནཾ ནིསྶཱཡ ཨཛ྄ཛྷོཏྠརིཏྭཱ ཨནདྷིཀཱརེ ཀཐེཏཱ ཧོཏི. ཨནོཀཱསཀམྨཾ ཀཱརེཏྭཱཏི ཨོཀཱསཀམྨཾ ཨཀཱརེཏྭཱ པཝཏྟཱ ཧོཏི. ན ཡཐཱདིཊྛིཡཱ བྱཱཀཏཱ ཧོཏཱིཏི ཡསྶ ཨཏྟནོ དིཊྛི ཏཾ པུརཀྑཏྭཱ ན བྱཱཀཏཱ ¶ ; ལདྡྷིཾ ནིཀྑིཔིཏྭཱ ཨཡཐཱབྷུཙྩཾ ཨདྷམྨཱདཱིསུ དྷམྨཱདིལདྡྷིཀོ ཧུཏྭཱ ཀཐེཏཱ ཧོཏཱིཏི ཨཏྠོ.

ཝོཧཱརཝགྒཝཎྞནཱ

༤༢༤. ཨཱཔཏྟིཡཱ པཡོགཾ ན ཛཱནཱཏཱིཏི ‘‘ཨཡཾ ཨཱཔཏྟི ཀཱཡཔྤཡོགཱ, ཨཡཾ ཝཙཱིཔཡོགཱ’’ཏི ན ཛཱནཱཏི. ཨཱཔཏྟིཡཱ ཝཱུཔསམཾ ན ཛཱནཱཏཱིཏི ‘‘ཨཡཾ ཨཱཔཏྟི དེསནཱཡ ཝཱུཔསམཏི, ཨཡཾ ཝུཊྛཱནེན, ཨཡཾ ནེཝ དེསནཱཡ ན ཝུཊྛཱནེནཱ’’ཏི ན ཛཱནཱཏི. ཨཱཔཏྟིཡཱ ན ཝིནིཙྪཡཀུསལོ ¶ ཧོཏཱིཏི ‘‘ཨིམསྨིཾ ཝཏྠུསྨིཾ ཨཡཾ ཨཱཔཏྟཱི’’ཏི ན ཛཱནཱཏི, དོསཱནུརཱུཔཾ ཨཱཔཏྟིཾ ཨུདྡྷརིཏྭཱ པཏིཊྛཱཔེཏུཾ ¶ ན སཀྐོཏི.

ཨདྷིཀརཎསམུཊྛཱནཾ ན ཛཱནཱཏཱིཏི ‘‘ཨིདཾ ཨདྷིཀརཎཾ ཨཊྛཱརས བྷེདཀརཝཏྠཱུནི ནིསྶཱཡ སམུཊྛཱཏི, ཨིདཾ ཙཏསྶོ ཝིཔཏྟིཡོ, ཨིདཾ པཉྩ ཝཱ སཏྟ ཝཱ ཨཱཔཏྟིཀྑནྡྷེ, ཨིདཾ ཙཏྟཱརི སངྒྷཀིཙྩཱནི ནིསྶཱཡ སམུཊྛཱཏཱི’’ཏི ན ཛཱནཱཏི. པཡོགཾ ན ཛཱནཱཏཱིཏི ‘‘ཨིདཾ ཨདྷིཀརཎཾ དྭཱདསམཱུལཔྤཡོགཾ, ཨིདཾ ཙུདྡསམཱུལཔྤཡོགཾ, ཨིདཾ ཚམཱུལཔཡོགཾ, ཨིདཾ ཨེཀམཱུལཔཡོག’’ནྟི ན ཛཱནཱཏི. ཨདྷིཀརཎཱནཉྷི ཡཐཱསཀཾམཱུལམེཝ པཡོགཱ ནཱམ ཧོནྟི, ཏཾ སབྦམྤི ན ཛཱནཱཏཱིཏི ཨཏྠོ. ཝཱུཔསམཾ ན ཛཱནཱཏཱིཏི ‘‘ཨིདཾ ཨདྷིཀརཎཾ དྭཱིཧི སམཐེཧི ཝཱུཔསམཏི, ཨིདཾ ཏཱིཧི, ཨིདཾ ཙཏཱུཧི, ཨིདཾ ཨེཀེན སམཐེན ཝཱུཔསམཏཱི’’ཏི ན ཛཱནཱཏི. ན ཝིནིཙྪཡཀུསལོ ཧོཏཱིཏི ཨདྷིཀརཎཾ ཝིནིཙྪིནིཏྭཱ སམཐཾ པཱཔེཏུཾ ན ཛཱནཱཏི.

ཀམྨཾ ན ཛཱནཱཏཱིཏི ཏཛྫནཱིཡཱདི སཏྟཝིདྷཾ ཀམྨཾ ན ཛཱནཱཏི. ཀམྨསྶ ཀརཎཾ ན ཛཱནཱཏཱིཏི ‘‘ཨིདཾ ཀམྨཾ ཨིམིནཱ ནཱིཧཱརེན ཀཱཏབྦ’’ནྟི ན ཛཱནཱཏི. ཀམྨསྶ ཝཏྠུཾ ན ཛཱནཱཏཱིཏི ‘‘ཨིདཾ ཏཛྫནཱིཡསྶ ཝཏྠུ, ཨིདཾ ནིཡསྶཱདཱིན’’ནྟི ན ཛཱནཱཏི. ཝཏྟནྟི སཏྟསུ ཀམྨེསུ ཧེཊྛཱ ཙཏུནྣཾ ཀམྨཱནཾ ཨཊྛཱརསཝིདྷཾ ཏིཝིདྷསྶ ཙ ཨུཀྑེཔནཱིཡཀམྨསྶ ཏེཙཏྟཱལཱིསཝིདྷཾ ཝཏྟཾ ན ཛཱནཱཏི. ཀམྨསྶ ཝཱུཔསམཾ ན ཛཱནཱཏཱིཏི ‘‘ཡོ བྷིཀྑུ ཝཏྟེ ཝཏྟིཏྭཱ ཡཱཙཏི, ཏསྶ ཀམྨཾ པཊིཔྤསྶམྦྷེཏབྦཾ, ཨཙྩཡོ དེསཱཔེཏབྦོ’’ཏི ན ཛཱནཱཏི.

ཝཏྠུཾ ན ཛཱནཱཏཱིཏི སཏྟནྣཾ ཨཱཔཏྟིཀྑནྡྷཱནཾ ཝཏྠུཾ ན ཛཱནཱཏི. ནིདཱནཾ ན ཛཱནཱཏཱིཏི ‘‘ཨིདཾ ¶ སིཀྑཱཔདཾ ཨིམསྨིཾ ནགརེ པཉྙཏྟཾ, ཨིདཾ ཨིམསྨི’’ནྟི ན ཛཱནཱཏི. པཉྙཏྟིཾ ན ཛཱནཱཏཱིཏི པཉྙཏྟིཨནུཔཉྙཏྟིཨནུཔྤནྣཔཉྙཏྟིཝསེན ཏིཝིདྷཾ པཉྙཏྟིཾ ན ཛཱནཱཏི. པདཔཙྩཱབྷཊྛཾ ན ཛཱནཱཏཱིཏི སམྨུཁཱ ཀཱཏབྦཾ པདཾ ན ཛཱནཱཏི. ‘‘བུདྡྷོ བྷགཝཱ’’ཏི ཝཏྟབྦེ ‘‘བྷགཝཱ བུདྡྷོ’’ཏི ཧེཊྛུཔརིཡཾ ཀཏྭཱ པདཾ ཡོཛེཏི.

ཨཀུསལོ ཙ ཧོཏི ཝིནཡེཏི ཝིནཡཔཱལི༹ཡཉྩ ཨཊྛཀཐཱཡཉྩ ཨཀུསལོ ཧོཏི.

ཉཏྟིཾ ན ཛཱནཱཏཱིཏི སངྑེཔཏོ ཧི དུཝིདྷཱ ཉཏྟི – ‘‘ཨེསཱ ཉཏྟཱི’’ཏི ཨེཝཾ ནིདྡིཊྛཱ ཙ ཨནིདྡིཊྛཱ ཙ. ཏཏྠ ཡཱ ཨེཝཾ ཨནིདྡིཊྛཱ, སཱ ‘‘ཀམྨཉཏྟི’’ ནཱམ ཧོཏི. ཡཱ ནིདྡིཊྛཱ, སཱ ‘‘ཀམྨཔཱདཉཏྟི’’ ནཱམ, ཏཾ སབྦེན སབྦཾ ཉཏྟིཾ ན ཛཱནཱཏི. ཉཏྟིཡཱ ¶ ཀརཎཾ ན ཛཱནཱཏཱིཏི ནཝསུ ཋཱནེསུ ཀམྨཉཏྟིཡཱ ཀརཎཾ ན ཛཱནཱཏི, དྭཱིསུ ཋཱནེསུ ¶ ཀམྨཔཱདཉཏྟིཡཱ. ཉཏྟིཡཱ ཨནུསྶཱཝནནྟི ‘‘ཨིམིསྶཱ ཉཏྟིཡཱ ཨེཀཱ ཨནུསྶཱཝནཱ, ཨིམིསྶཱ ཏིསྶོ’’ཏི ན ཛཱནཱཏི. ཉཏྟིཡཱ སམཐཾ ན ཛཱནཱཏཱིཏི ཡྭཱཡཾ སཏིཝིནཡོ, ཨམཱུལ༹ྷཝིནཡོ, ཏསྶཔཱཔིཡསིཀཱ, ཏིཎཝཏྠཱརཀོཏི ཙཏུབྦིདྷོ སམཐོ ཉཏྟིཡཱ ཝིནཱ ན ཧོཏི, ཏཾ ཉཏྟིཡཱ སམཐོཏི ན ཛཱནཱཏི. ཉཏྟིཡཱ ཝཱུཔསམཾ ན ཛཱནཱཏཱིཏི ཡཾ ཨདྷིཀརཎཾ ཨིམིནཱ ཙཏུབྦིདྷེན ཉཏྟིསམཐེན ཝཱུཔསམཏི, ཏསྶ ཏཾ ཝཱུཔསམཾ ‘‘ཨཡཾ ཉཏྟིཡཱ ཝཱུཔསམོ ཀཏོ’’ཏི ན ཛཱནཱཏི.

སུཏྟཾ ན ཛཱནཱཏཱིཏི ཨུབྷཏོཝིབྷངྒཾ ན ཛཱནཱཏི. སུཏྟཱནུལོམཾ ན ཛཱནཱཏཱིཏི ཙཏྟཱརོ མཧཱཔདེསེ ན ཛཱནཱཏི. ཝིནཡཾ ན ཛཱནཱཏཱིཏི ཁནྡྷཀཔརིཝཱརཾ ན ཛཱནཱཏི. ཝིནཡཱནུལོམཾ ན ཛཱནཱཏཱིཏི ཙཏྟཱརོ མཧཱཔདེསེཡེཝ ན ཛཱནཱཏི. ན ཙ ཋཱནཱཋཱནཀུསལོཏི ཀཱརཎཱཀཱརཎཀུསལོ ན ཧོཏི.

དྷམྨཾ ན ཛཱནཱཏཱིཏི ཋཔེཏྭཱ ཝིནཡཔིཊཀཾ ཨཝསེསཾ པིཊཀདྭཡཾ ན ཛཱནཱཏི. དྷམྨཱནུལོམཾ ན ཛཱནཱཏཱིཏི སུཏྟནྟིཀེ ཙཏྟཱརོ མཧཱཔདེསེ ན ཛཱནཱཏི. ཝིནཡཾ ན ཛཱནཱཏཱིཏི ཁནྡྷཀཔརིཝཱརམེཝ ན ཛཱནཱཏི. ཝིནཡཱནུལོམཾ ན ཛཱནཱཏཱིཏི ཙཏྟཱརོ མཧཱཔདེསེ ན ཛཱནཱཏི. ཨུབྷཏོཝིབྷངྒཱ པནེཏྠ ཨསངྒཧིཏཱ ཧོནྟི, ཏསྨཱཡཾ ཀུརུནྡིཡཾ ཝུཏྟཾ – ‘‘ཝིནཡནྟི སཀལཾ ཝིནཡཔིཊཀཾ ན ཛཱནཱཏཱི’’ཏི ཏཾ ན གཧེཏབྦཾ. ན ཙ པུབྦཱཔརཀུསལོ ཧོཏཱིཏི པུརེཀཐཱཡ ཙ པཙྪཱཀཐཱཡ ¶ ཙ ཨཀུསལོ ཧོཏི. སེསཾ སབྦཏྠ ཝུཏྟཔཊིཔཀྑཝསེན ཉེཡྻཏྟཱ པུབྦེ པཀཱསིཏཏྟཱ ཙ ཨུཏྟཱནམེཝཱཏི.

ཨནིསྶིཏཝགྒནཔྤཊིཔྤསྶམྦྷནཝགྒཝོཧཱརཝགྒཝཎྞནཱ ནིཊྛིཏཱ.

དིཊྛཱཝིཀམྨཝགྒཝཎྞནཱ

༤༢༥. དིཊྛཱཝིཀམྨཝགྒེ – དིཊྛཱཝིཀམྨཱཏི དིཊྛཱིནཾ ཨཱཝིཀམྨཱནི; ལདྡྷིཔྤཀཱསནཱནི ཨཱཔཏྟིདེསནཱསངྑཱཏཱནཾ ཝིནཡཀམྨཱནམེཏཾ ཨདྷིཝཙནཾ. ཨནཱཔཏྟིཡཱ དིཊྛིཾ ཨཱཝི ཀརོཏཱིཏི ཨནཱཔཏྟིམེཝ ཨཱཔཏྟཱིཏི དེསེཏཱིཏི ཨཏྠོ ¶ . ཨདེསནཱགཱམིནིཡཱཏི གརུཀཱཔཏྟིཡཱ དིཊྛིཾ ཨཱཝིཀརོཏི; སངྒྷཱདིསེསཉྩ པཱརཱཛིཀཉྩ དེསེཏཱིཏི ཨཏྠོ. དེསིཏཱཡཱཏི ལཧུཀཱཔཏྟིཡཱཔི དེསིཏཱཡ དིཊྛིཾ ཨཱཝིཀརོཏི; དེསིཏཾ པུན དེསེཏཱིཏི ¶ ཨཏྠོ.

ཙཏཱུཧི པཉྩཧི དིཊྛིནྟི ཡཐཱ ཙཏཱུཧི པཉྩཧི དིཊྛི ཨཱཝིཀཏཱ ཧོཏི, ཨེཝཾ ཨཱཝིཀརོཏི; ཙཏྟཱརོ པཉྩ ཛནཱ ཨེཀཏོ ཨཱཔཏྟིཾ དེསེནྟཱིཏི ཨཏྠོ. མནོམཱནསེནཱཏི མནསངྑཱཏེན མཱནསེན དིཊྛིཾ ཨཱཝིཀརོཏི; ཝཙཱིབྷེདཾ ཨཀཏྭཱ ཙིཏྟེནེཝ ཨཱཔཏྟིཾ དེསེཏཱིཏི ཨཏྠོ.

ནཱནཱསཾཝཱསཀསྶཱཏི ལདྡྷིནཱནཱསཾཝཱསཀསྶ ཝཱ ཀམྨནཱནཱསཾཝཱསཀསྶ ཝཱ སནྟིཀེ དིཊྛིཾ ཨཱཝིཀརོཏི; ཨཱཔཏྟིཾ དེསེཏཱིཏི ཨཏྠོ. ནཱནཱསཱིམཱཡཱཏི སམཱནསཾཝཱསཀསྶཱཔི ནཱནཱསཱིམཱཡ ཋིཏསྶ སནྟིཀེ ཨཱཝིཀརོཏི. མཱལ༹ཀསཱིམཱཡ ཧི ཋིཏེན སཱིམནྟརིཀཱཡ ཋིཏསྶ སཱིམནྟརིཀཱཡ ཝཱ ཋིཏེན ཨཝིཔྤཝཱསསཱིམཱཡ ཋིཏསྶཱཔི ཨཱཔཏྟིཾ དེསེཏུཾ ན ཝཊྚཏི. ཨཔཀཏཏྟསྶཱཏི ཨུཀྑིཏྟཀསྶ ཝཱ, ཡསྶ ཝཱ ཨུཔོསཐཔཝཱརཎཱ ཋཔིཏཱ ཧོནྟི, ཏསྶ སནྟིཀེ དེསེཏཱིཏི ཨཏྠོ.

༤༣༠. ནཱལཾ ཨོཀཱསཀམྨཾ ཀཱཏུནྟི ན པརིཡཏྟཾ ཀཱཏུཾ; ན ཀཱཏབྦནྟི ཨཏྠོ. ཨིདྷཱཔི ཨཔཀཏཏྟོ ཨུཀྑིཏྟཀོ ཙ ཋཔིཏཨུཔོསཐཔཝཱརཎོ ཙ. ཙཱཝནཱདྷིཔྤཱཡོཏི སཱསནཏོ ཙཱཝེཏུཀཱམོ.

༤༣༢. མནྡཏྟཱ ¶ མོམཱུཧཏྟཱཏི མནྡབྷཱཝེན མོམཱུཧབྷཱཝེན ཝིསྶཛྫིཏམྤི ཛཱནིཏུཾ ཨསམཏྠོ, ཀེཝལཾ ཨཏྟནོ མོམཱུཧབྷཱཝཾ པཀཱསེནྟོཡེཝ པུཙྪཏི ཨུམྨཏྟཀོ ཝིཡ. པཱཔིཙྪོཏི ‘‘ཨེཝཾ མཾ ཛནོ སམྦྷཱཝེསྶཏཱི’’ཏི པཱཔིཀཱཡ ཨིཙྪཱཡ པུཙྪཏི. པརིབྷཝཱཏི པརིབྷཝཾ ཨཱརོཔེཏུཀཱམོ ཧུཏྭཱ པུཙྪཏི. ཨཉྙབྱཱཀརཎེསུཔི ཨེསེཝ ནཡོ. སེསཾ སབྦཏྠ ཨུཏྟཱནམེཝཱཏི. ཨཏྟཱདཱནཝགྒེ ཙ དྷུཏངྒཝགྒེ ཙ ཡཾ ཝཏྟབྦཾ སིཡཱ, ཏཾ སབྦཾ ཧེཊྛཱ ཝུཏྟམེཝ.

དིཊྛཱཝིཀམྨཝགྒཝཎྞནཱ ནིཊྛིཏཱ.

མུསཱཝཱདཝགྒཝཎྞནཱ

༤༤༤. མུསཱཝཱདཝགྒེ ¶ – པཱརཱཛིཀཾ གཙྪཏཱིཏི པཱརཱཛིཀགཱམཱི; པཱརཱཛིཀཱཔཏྟིབྷཱཝཾ པཱཔུཎཱཏཱིཏི ཨཏྠོ. ཨིཏརེསུཔི ཨེསེཝ ནཡོ. ཏཏྠ ཨསནྟཨུཏྟརིམནུསྶདྷམྨཱརོཙནམུསཱཝཱདོ པཱརཱཛིཀགཱམཱི, ཨམཱུལཀེན པཱརཱཛིཀེན ཨནུདྡྷཾསནམུསཱཝཱདོ སངྒྷཱདིསེསགཱམཱི, ‘‘ཡོ ཏེ ཝིཧཱརེ ཝསཏཱི’’ཏིཨཱདིནཱ པརིཡཱཡེན ཛཱནནྟསྶ ཝུཏྟམུསཱཝཱདོ ཐུལླཙྩཡགཱམཱི, ཨཛཱནནྟསྶ དུཀྐཊགཱམཱི, ‘‘སམྤཛཱནམུསཱཝཱདེ པཱཙིཏྟིཡ’’ནྟི ཨཱགཏོ པཱཙིཏྟིཡགཱམཱིཏི ཝེདིཏབྦོ.

ཨདསྶནེནཱཏི ཝིནཡདྷརསྶ ཨདསྶནེན. ཀཔྤིཡཱཀཔྤིཡེསུ ཧི ཀུཀྐུཙྩེ ཨུཔྤནྣེ ¶ ཝིནཡདྷརཾ དིསྭཱ ཀཔྤིཡཱཀཔྤིཡབྷཱཝཾ པཊིཔུཙྪིཏྭཱ ཨཀཔྤིཡཾ པཧཱཡ ཀཔྤིཡཾ ཀརེཡྻ, ཏཾ ཨཔསྶནྟོ པན ཨཀཔྤིཡམྤི ཀཔྤིཡནྟི ཀརོནྟོ ཨཱཔཛྫཏི. ཨེཝཾ ཨཱཔཛྫིཏབྦཾ ཨཱཔཏྟིཾ ཝིནཡདྷརསྶ དསྶནེན ནཱཔཛྫཏི, ཨདསྶནེནེཝ ཨཱཔཛྫཏི, ཏེན ཝུཏྟཾ ‘‘ཨདསྶནེནཱ’’ཏི. ཨསྶཝནེནཱཏི ཨེཀཝིཧཱརེཔི ཝསནྟོ པན ཝིནཡདྷརསྶ ཨུཔཊྛཱནཾ གནྟྭཱ ཀཔྤིཡཱཀཔྤིཡཾ ཨཔུཙྪིཏྭཱ ཝཱ ཨཉྙེསཉྩ ཝུཙྩམཱནཾ ཨསུཎནྟོ ཨཱཔཛྫཏིཡེཝ, ཏེན ཝུཏྟཾ ‘‘ཨསྶཝནེནཱ’’ཏི. པསུཏྟཀཏཱཏི པསུཏྟཀཏཱཡ. སཧགཱརསེཡྻཉྷི པསུཏྟཀབྷཱཝེནཔི ཨཱཔཛྫཏི. ཨཀཔྤིཡེ ཀཔྤིཡསཉྙིཏཱཡ ཨཱཔཛྫནྟོ པན ཏཐཱསཉྙཱི ཨཱཔཛྫཏི. སཏིསམྨོསཱ ཨེཀརཏྟཱཏིཀྐམཱདིཝསེན ཨཱཔཛྫིཏབྦཾ ཨཱཔཛྫཏི. སེསཾ སབྦཏྠ ཨུཏྟཱནམེཝཱཏི.

མུསཱཝཱདཝགྒཝཎྞནཱ ནིཊྛིཏཱ.

བྷིཀྑུནོཝཱདཝགྒཝཎྞནཱ

༤༥༠. བྷིཀྑུནིཝགྒེ ¶ – ཨལཱབྷཱཡཱཏི ཙཏུནྣཾ པཙྩཡཱནཾ ཨལཱབྷཏྠཱཡ; ཡཐཱ པཙྩཡེ ན ལབྷནྟི, ཏཐཱ པརིསཀྐཏི ཝཱཡམཏཱིཏི ཨཏྠོ. ཨནཏྠཱཡཱཏི ཨནཏྠཾ ཀལིསཱསནཾ ཨཱརོཔེནྟོ པརིསཀྐཏི. ཨཝཱསཱཡཱཏི ཨཝཱསཏྠཱཡ; ཡསྨིཾ གཱམཁེཏྟེ ཝསནྟི, ཏཏོ ནཱིཧརཎཏྠཱཡ. སམྤཡོཛེཏཱིཏི ཨསདྡྷམྨཔཊིསེཝནཏྠཱཡ སམྤཡོཛེཏི.

༤༥༡. ‘‘ཀཏིཧི ¶ ནུ ཁོ བྷནྟེ ཨངྒེཧི སམནྣཱགཏཱཡ བྷིཀྑུནིཡཱ ཀམྨཾ ཀཱཏབྦ’’ནྟི སཏྟནྣཾ ཀམྨཱནཾ ཨཉྙཏརཾ སནྡྷཱཡ པུཙྪཏི.

༤༥༤. ན སཱཀཙྪཱཏབྦོཏི ཀཔྤིཡཱཀཔྤིཡནཱམརཱུཔཔརིཙྪེདསམཐཝིཔསྶནཱདིབྷེདོ ཀཐཱམགྒོ ན ཀཐེཏབྦོ. ཡསྨཱ པན ཁཱིཎཱསཝོ བྷིཀྑུ ན ཝིསཾཝཱདེཏི, ཏཐཱརཱུཔསྶ ཀཐཱམགྒསྶ སཱམཱི ཧུཏྭཱ ཀཐེཏི, ན ཨིཏརོ; ཏསྨཱ པཋམཔཉྩཀེ ‘‘ན ཨསེཀྑེནཱ’’ཏི པཊིཀྑིཔིཏྭཱ དུཏིཡཔཉྩཀེ ‘‘ཨསེཀྑེནཱ’’ཏིཨཱདི ཝུཏྟཾ.

ན ཨཏྠཔཊིསམྦྷིདཱཔཏྟོཏི ཨཊྛཀཐཱཡ པཊིསམྦྷིདཱཔཏྟོ པབྷེདགཏཉཱཎཔྤཏྟོ ན ཧོཏི. ན དྷམྨཔཊིསམྦྷིདཱཔཏྟོཏི པཱལི༹དྷམྨེ པཊིསམྦྷིདཱཔཏྟོ ན ཧོཏི. ན ནིརུཏྟིཔཊིསམྦྷིདཱཔཏྟོཏི ཝོཧཱརནིརུཏྟིཡཾ པཊིསམྦྷིདཱཔཏྟོ ན ཧོཏི. ན པཊིབྷཱནཔཊིསམྦྷིདཱཔཏྟོཏི ཡཱནི ཏཱནི པཊིབྷཱནསངྑཱཏཱནི ཨཏྠཔཊིསམྦྷིདཱདཱིནི ཉཱཎཱནི, ཏེསུ པཊིསམྦྷིདཱཔཏྟོ ན ཧོཏི. ཡཐཱཝིམུཏྟཾ ¶ ཙིཏྟཾ ན པཙྩཝེཀྑིཏཱཏི ཙཏུནྣཾ ཕལཝིམུཏྟཱིནཾ ཝསེན ཡཐཱཝིམུཏྟཾ ཙིཏྟཾ ཨེཀཱུནཝཱིསཏིབྷེདཱཡ པཙྩཝེཀྑཎཱཡ ན པཙྩཝེཀྑིཏཱ ཧོཏི. སེསཾ སབྦཏྠ ཨུཏྟཱནམེཝཱཏི.

བྷིཀྑུནོཝཱདཝགྒཝཎྞནཱ ནིཊྛིཏཱ.

ཨུབྦཱཧིཀཝགྒཝཎྞནཱ

༤༥༥. ཨུབྦཱཧིཀཝགྒེ – ན ཨཏྠཀུསལོཏི ན ཨཊྛཀཐཱཀུསལོ; ཨཏྠུདྡྷཱརེ ཚེཀོ ན ཧོཏི. ན དྷམྨཀུསལོཏི ཨཱཙརིཡམུཁཏོ ཨནུགྒཧིཏཏྟཱ པཱལི༹ཡཾ ན ཀུསལོ, ན པཱལི༹སཱུརོ. ན ¶ ནིརུཏྟིཀུསལོཏི བྷཱསནྟརཝོཧཱརེ ན ཀུསལོ. ན བྱཉྫནཀུསལོཏི སིཐིལདྷནིཏཱདིཝསེན པརིམཎྜལབྱཉྫནཱརོཔནེ ཀུསལོ ན ཧོཏི; ན ཨཀྑརཔརིཙྪེདེ ནིཔུཎོཏི ཨཏྠོ. ན པུབྦཱཔརཀུསལོཏི ཨཏྠཔུབྦཱཔརེ དྷམྨཔུབྦཱཔརེ ནིརུཏྟིཔུབྦཱཔརེ བྱཉྫནཔུབྦཱཔརེ པུརེཀཐཱཔཙྪཱཀཐཱསུ ཙ ན ཀུསལོ ཧོཏི.

ཀོདྷནོཏིཨཱདཱིནི ཡསྨཱ ཀོདྷཱདཱིཧི ཨབྷིབྷཱུཏོ ཀཱརཎཱཀཱརཎཾ ན ཛཱནཱཏི, ཝིནིཙྪིཏུཾ ན སཀྐོཏི, ཏསྨཱ ཝུཏྟཱནི. པསཱརེཏཱ ཧོཏི ¶ ནོ སཱརེཏཱཏི མོཧེཏཱ ཧོཏི, ན སཏིཨུཔྤཱདེཏཱ; ཙོདཀཙུདིཏཀཱནཾ ཀཐཾ མོཧེཏི པིདཧཏི ན སཱརེཏཱིཏི ཨཏྠོ. སེསམེཏྠ ཨུབྦཱཧིཀཝགྒེ ཨུཏྟཱནམེཝཱཏི.

ཨུབྦཱཧིཀཝགྒཝཎྞནཱ ནིཊྛིཏཱ.

ཨདྷིཀརཎཝཱུཔསམཝགྒཝཎྞནཱ

༤༥༧. ཨདྷིཀརཎཝཱུཔསམཝགྒེ – པུགྒལགརུ ཧོཏཱིཏི ‘‘ཨཡཾ མེ ཨུཔཛ྄ཛྷཱཡོ, ཨཡཾ མེ ཨཱཙརིཡོ’’ཏིཨཱདཱིནི ཙིནྟེཏྭཱ ཏསྶ ཛཡཾ ཨཱཀངྑམཱནོ ‘‘ཨདྷམྨཾ དྷམྨོ’’ཏི དཱིཔེཏི. སངྒྷགརུ ཧོཏཱིཏི དྷམྨཉྩ ཝིནཡཉྩ ཨམུཉྩིཏྭཱ ཝིནིཙྪིནནྟོ སངྒྷགརུཀོ ནཱམ ཧོཏི. ཙཱིཝརཱདཱིནི གཧེཏྭཱ ཝིནིཙྪིནནྟོ ཨཱམིསགརུཀོ ནཱམ ཧོཏི, ཏཱནི ཨགྒཧེཏྭཱ ཡཐཱདྷམྨཾ ཝིནིཙྪིནནྟོ སདྡྷམྨགརུཀོ ནཱམ ཧོཏི.

༤༥༨. པཉྩཧུཔཱལི ཨཱཀཱརེཧཱིཏི པཉྩཧི ཀཱརཎེཧི སངྒྷོ བྷིཛྫཏི – ཀམྨེན, ཨུདྡེསེན, ཝོཧརནྟོ, ཨནུསྶཱཝནེན, སལཱཀགྒཱཧེནཱཏི. ཨེཏྠ ཀམྨེནཱཏི ཨཔལོཀནཱདཱིསུ ཙཏཱུསུ ཀམྨེསུ ཨཉྙཏརེན ཀམྨེན. ཨུདྡེསེནཱཏི པཉྩསུ པཱཏིམོཀྑུདྡེསེསུ ཨཉྙཏརེན ཨུདྡེསེན. ཝོཧརནྟོཏི ཀཐཡནྟོ; ཏཱཧི ཏཱཧི ཨུཔཔཏྟཱིཧི ‘‘ཨདྷམྨཾ དྷམྨོ’’ཏིཨཱདཱིནི ཨཊྛཱརས བྷེདཀརཝཏྠཱུནི དཱིཔེནྟོ ¶ . ཨནུསྶཱཝནེནཱཏི ‘‘ནནུ ཏུམྷེ ཛཱནཱཐ མཡ྄ཧཾ ཨུཙྩཱཀུལཱ པབྦཛིཏབྷཱཝཾ བཧུསྶུཏབྷཱཝཉྩ, མཱདིསོ ནཱམ ཨུདྡྷམྨཾ ཨུབྦིནཡཾ སཏྠུ སཱསནཾ གཱཧེཡྻཱཏི ཙིཏྟམྤི ཨུཔྤཱདེཏུཾ ཏུམྷཱཀཾ ཡུཏྟཾ, ཀིཾ མཡ྄ཧཾ ཨཝཱིཙི ནཱིལུཔྤལཝནམིཝ སཱིཏལོ, ཀིམཧཾ ཨཔཱཡཏོ ན བྷཱཡཱམཱི’’ཏིཨཱདིནཱ ནཡེན ཀཎྞམཱུལེ ཝཙཱིབྷེདཾ ཀཏྭཱ ཨནུསྶཱཝནེན. སལཱཀགྒཱཧེནཱཏི ཨེཝཾ ཨནུསྶཱཝེཏྭཱ ¶ ཏེསཾ ཙིཏྟཾ ཨུཔཏྠམྦྷེཏྭཱ ཨནིཝཏྟིདྷམྨེ ཀཏྭཱ ‘‘གཎྷཐ ཨིམཾ སལཱཀ’’ནྟི སལཱཀགྒཱཧེན.

ཨེཏྠ ཙ ཀམྨམེཝ ཨུདྡེསོ ཝཱ པམཱཎཾ, ཝོཧཱརཱནུསྶཱཝནསལཱཀགྒཱཧཱ པན པུབྦབྷཱགཱ. ཨཊྛཱརསཝཏྠུདཱིཔནཝསེན ཧི ཝོཧརནྟེ ཏཏྠ རུཙིཛནནཏྠཾ ¶ ཨནུསྶཱཝེཏྭཱ སལཱཀཱཡ གཱཧིཏཱཡཔི ཨབྷིནྣོཝ ཧོཏི སངྒྷོ. ཡདཱ པན ཨེཝཾ ཙཏྟཱརོ ཝཱ ཨཏིརེཀེ ཝཱ སལཱཀཾ གཱཧེཏྭཱ ཨཱཝེཎིཀཾ ཀམྨཾ ཝཱ ཨུདྡེསཾ ཝཱ ཀརོཏི, ཏདཱ སངྒྷོ བྷིནྣོ ནཱམ ཧོཏི. ཨིཏི ཡཾ སངྒྷབྷེདཀཀྑནྡྷཀཝཎྞནཱཡཾ ཨཝོཙུམྷཱ ‘‘ཨེཝཾ ཨཊྛཱརསསུ ཝཏྠཱུསུ ཡཾཀིཉྩི ཨེཀམྤི ཝཏྠུཾ དཱིཔེཏྭཱ ཏེན ཏེན ཀཱརཎེན ‘ཨིམཾ གཎྷཐ, ཨིམཾ རོཙེཐཱ’ཏི སཉྙཱཔེཏྭཱ སལཱཀཾ གཱཧེཏྭཱ ཝིསུཾ སངྒྷཀམྨེ ཀཏེ སངྒྷོ བྷིནྣོ ཧོཏི. པརིཝཱརེ པན ‘པཉྩཧི, ཨུཔཱལི, ཨཱཀཱརེཧི སངྒྷོ བྷིཛྫཏཱི’ཏིཨཱདི ཝུཏྟཾ. ཏསྶ ཨིམིནཱ ཨིདྷ ཝུཏྟེན སངྒྷབྷེདལཀྑཎེན ཨཏྠཏོ ནཱནཱཀརཎཾ ནཏྠི. ཏཾ པནསྶ ནཱནཱཀརཎཱབྷཱཝཾ ཏཏྠེཝ པཀཱསཡིསྶཱམཱ’’ཏི, སྭཱཡཾ པཀཱསིཏོ ཧོཏི.

པཉྙཏྟེཏནྟི པཉྙཏྟཾ ཨེཏཾ. ཀྭ པཉྙཏྟཾ? ཝཏྟཀྑནྡྷཀེ. ཏཏྲ ཧི ཙུདྡས ཁནྡྷཀཝཏྟཱནི པཉྙཏྟཱནི. ཏེནཱཧ – ‘‘པཉྙཏྟེཏཾ, ཨུཔཱལི, མཡཱ ཨཱགནྟུཀཱནཾ བྷིཀྑཱུནཾ ཨཱགནྟུཀཝཏྟ’’ནྟིཨཱདི. ཨེཝམྤི ཁོ ཨུཔཱལི སངྒྷརཱཛི ཧོཏི, ནོ ཙ སངྒྷབྷེདོཏི ཨེཏྟཱཝཏཱ ཧི སངྒྷརཱཛིམཏྟམེཝ ཧོཏི, ན ཏཱཝ སངྒྷབྷེདོ; ཨནུཔུབྦེན པན ཨཡཾ སངྒྷརཱཛི ཝཌྜྷམཱནཱ སངྒྷབྷེདཱཡ སཾཝཏྟཏཱིཏི ཨཏྠོ. ཡཐཱརཏྟནྟི རཏྟིཔརིམཱཎཱནུརཱུཔཾ; ཡཐཱཐེརནྟི ཨཏྠོ. ཨཱཝེནིབྷཱཝཾ ཀརིཏྭཱཏི ཝིསུཾ ཝཝཏྠཱནཾ ཀརིཏྭཱ. ཀམྨཱཀམྨཱནི ཀརོནྟཱིཏི ཨཔརཱཔརཾ སངྒྷཀམྨཾ ཨུཔཱདཱཡ ཁུདྡཀཱནི ཙེཝ མཧནྟཱནི ཙ ཀམྨཱནི ཀརོནྟི. སེསམེཏྠཱཔི ཨདྷིཀརཎཝཱུཔསམཝགྒེ ཨུཏྟཱནམེཝ.

སངྒྷབྷེདཀཝགྒདྭཡཝཎྞནཱ

༤༥༩. སངྒྷབྷེདཝགྒདྭཡེ ¶ – ཝིནིདྷཱཡ དིཊྛིཾ ཀམྨེནཱཏི ཏེསུ ཨདྷམྨཱདཱིསུ ཨདྷམྨཱདཡོ ཨེཏེཏི ཨེཝཾདིཊྛིཀོཝ ཧུཏྭཱ ཏཾ དིཊྛིཾ ཝིནིདྷཱཡ ཏེ དྷམྨཱདིཝསེན དཱིཔེཏྭཱ ཝིསུཾ ཀམྨཾ ཀརོཏི. ཨིཏི ཡཾ ཝིནིདྷཱཡ དིཊྛིཾ ཀམྨཾ ཀརོཏི, ཏེན ཨེཝཾ ཀཏེན ཝིནིདྷཱཡ དིཊྛིཾ ཀམྨེན སདྡྷིཾ པཉྩངྒཱནི ཧོནྟི, ‘‘ཨིམེཧི ཁོ ཨུཔཱལི པཉྩཧངྒེཧཱི’’ཏི ཨཡམེཀསྨིཾ པཉྩཀེ ཨཏྠཡོཛནཱ ¶ . ཨེཏེན ནཡེན སབྦཔཉྩཀཱནི ཝེདིཏབྦཱནི. ཨེཏྠཱཔི ཙ ཝོཧཱརཱདི ཨངྒཏྟཡཾ པུབྦབྷཱགཝསེནེཝ ཝུཏྟཾ. ཀམྨུདྡེསཝསེན པན ཨཏེཀིཙྪཏཱ ཝེདིཏབྦཱ. སེསཾ སབྦཏྠ ཨུཏྟཱནམེཝ. ན ཧེཏྠ ཀིཉྩི ཨཏྠི ཡཾ པུབྦེ ཨཝུཏྟནཡཾ.

ཨཱཝཱསིཀཝགྒཝཎྞནཱ

༤༦༡. ཨཱཝཱསིཀཝགྒེ ¶ – ཡཐཱབྷཏཾ ནིཀྑིཏྟོཏི ཡཐཱ ཨཱཧརིཏྭཱ ཋཔིཏོ.

༤༦༢. ཝིནཡབྱཱཀརཎཱཏི ཝིནཡཔཉྷེ ཝིསྶཛྫནཱ. པརིཎཱམེཏཱིཏི ནིཡཱམེཏི དཱིཔེཏི ཀཐེཏི. སེསམེཏྠ ཨུཏྟཱནམེཝ.

ཀཐིནཏྠཱརཝགྒཝཎྞནཱ

༤༦༧. ཀཐིནཏྠཱརཝགྒེ – ཨོཏམསིཀོཏི ཨནྡྷཀཱརགཏོ; ཏཉྷི ཝནྡནྟསྶ མཉྩཔཱདཱདཱིསུཔི ནལཱཊཾ པཊིཧཉྙེཡྻ. ཨསམནྣཱཧརནྟོཏི ཀིཙྩཡཔསུཏཏྟཱ ཝནྡནཾ ཨསམནྣཱཧརནྟོ. སུཏྟོཏི ནིདྡཾ ཨོཀྐནྟོ. ཨེཀཱཝཏྟོཏི ཨེཀཏོ ཨཱཝཏྟོ སཔཏྟཔཀྑེ ཋིཏོ ཝེརཱི ཝིསབྷཱགཔུགྒལོ ཝུཙྩཏི; ཨཡཾ ཨཝནྡིཡོ. ཨཡཉྷི ཝནྡིཡམཱནོ པཱདེནཔི པཧརེཡྻ. ཨཉྙཝིཧིཏོཏི ཨཉྙཾ ཙིནྟཡམཱནོ.

ཁཱདནྟོཏི པིཊྛཁཛྫཀཱདཱིནི ཁཱདནྟོ. ཨུཙྩཱརཉྩ པསྶཱཝཉྩ ཀརོནྟོ ཨནོཀཱསགཏཏྟཱ ཨཝནྡིཡོ. ཨུཀྑིཏྟཀོཏི ཏིཝིདྷེནཔི ཨུཀྑེཔནཱིཡཀམྨེན ཨུཀྑིཏྟཀོ ཨཝནྡིཡོ. ཏཛྫནཱིཡཱདིཀམྨཀཏཱ པན ཙཏྟཱརོ ཝནྡིཏབྦཱ. ཨུཔོསཐཔཝཱརཎཱཔི ཏེཧི སདྡྷིཾ ལབྦྷནྟི. ཨཱདིཏོ པཊྛཱཡ ཙ ཝུཏྟེསུ ཨཝནྡིཡེསུ ནགྒཉྩ ཨུཀྑིཏྟཀཉྩ ཝནྡནྟསྶེཝ ཨཱཔཏྟི. ཨིཏརེསཾ པན ཨསཱརུཔྤཊྛེན ཙ ཨནྟརཱ ཝུཏྟཀཱརཎེན ཙ ཝནྡནཱ པཊིཀྑིཏྟཱ. ཨིཏོ པརཾ པཙྪཱཨུཔསམྤནྣཱདཡོ དསཔི ཨཱཔཏྟིཝཏྠུབྷཱཝེནེཝ ཨཝནྡིཡཱ. ཏེ ཝནྡནྟསྶ ཧི ནིཡམེནེཝ ཨཱཔཏྟི. ཨིཏི ཨིམེསུ པཉྩསུ པཉྩཀེསུ ཏེརས ཛནེ ཝནྡནྟསྶ ཨནཱཔཏྟི, དྭཱདསནྣཾ ཝནྡནཱཡ ཨཱཔཏྟི.

༤༦༨. ཨཱཙརིཡོ ¶ ཝནྡིཡོཏི པབྦཛྫཱཙརིཡོ ཨུཔསམྤདཱཙརིཡོ ནིསྶཡཱཙརིཡོ ཨུདྡེསཱཙརིཡོ ཨོཝཱདཱཙརིཡོཏི ཨཡཾ པཉྩཝིདྷོཔི ཨཱཙརིཡོ ཝནྡིཡོ. སེསཾ སབྦཏྠ ཨུཏྟཱནམེཝཱཏི.

ཀཐིནཏྠཱརཝགྒཝཎྞནཱ ནིཊྛིཏཱ.

ནིཊྛིཏཱ ཙ ཨུཔཱལིཔཉྩཀཝཎྞནཱ.

ཨཱཔཏྟིསམུཊྛཱནཝཎྞནཱ

༤༧༠. ཨཙིཏྟཀོ ¶ ¶ ཨཱཔཛྫཏཱིཏིཨཱདཱིསུ སཧསེཡྻཱདིཔཎྞཏྟིཝཛྫཾ ཨསཉྩིཙྩ ཨཱཔཛྫནྟོ ཨཙིཏྟཀོ ཨཱཔཛྫཏི, དེསེནྟོ སཙིཏྟཀོ ཝུཊྛཱཏི. ཡཾཀིཉྩི སཉྩིཙྩ ཨཱཔཛྫནྟོ སཙིཏྟཀོ ཨཱཔཛྫཏི, ཏིཎཝཏྠཱརཀེན ཝུཊྛཧནྟོ ཨཙིཏྟཀོ ཝུཊྛཱཏི. པུབྦེ ཝུཏྟམེཝ ཏིཎཝཏྠཱརཀེན ཝུཊྛཧནྟོ ཨཙིཏྟཀོ ཨཱཔཛྫཏི, ཨཙིཏྟཀོ ཝུཊྛཱཏི. ཨིཏརཾ དེསེནྟོ སཙིཏྟཀོ ཨཱཔཛྫཏི, སཙིཏྟཀོ ཝུཊྛཱཏི. ‘‘དྷམྨདཱནཾ ཀརོམཱི’’ཏི པདསོདྷམྨཱདཱིནི ཀརོནྟོ ཀུསལཙིཏྟོ ཨཱཔཛྫཏི, ‘‘བུདྡྷཱནཾ ཨནུསཱསནིཾ ཀརོམཱི’’ཏི ཨུདགྒཙིཏྟོ དེསེནྟོ ཀུསལཙིཏྟོ ཝུཊྛཱཏི. དོམནསྶིཀོ ཧུཏྭཱ དེསེནྟོ ཨཀུསལཙིཏྟོ ཝུཊྛཱཏི, ཏིཎཝཏྠཱརཀེན ནིདྡཱགཏོཝ ཝུཊྛཧནྟོ ཨབྱཱཀཏཙིཏྟོ ཝུཊྛཱཏི. བྷིཾསཱཔནཱདཱིནི ཀཏྭཱ ‘‘བུདྡྷཱནཾ སཱསནཾ ཀརོམཱི’’ཏི སོམནསྶིཀོ དེསེནྟོ ཨཀུསལཙིཏྟོ ཨཱཔཛྫཏི, ཀུསལཙིཏྟོ ཝུཊྛཱཏི. དོམནསྶིཀོཝ དེསེནྟོ ཨཀུསལཙིཏྟོ ཝུཊྛཱཏི, ཝུཏྟནཡེནེཝ ཏིཎཝཏྠཱརཀེན ཝུཊྛཧནྟོ ཨབྱཱཀཏཙིཏྟོ ཝུཊྛཱཏི. ནིདྡོཀྐནྟསམཡེ སཧགཱརསེཡྻཾ ཨཱཔཛྫནྟོ ཨབྱཱཀཏཙིཏྟོ ཨཱཔཛྫཏི, ཝུཏྟནཡེནེཝ པནེཏྠ ‘‘ཀུསལཙིཏྟོ ཝུཊྛཱཏཱི’’ཏིཨཱདི ཝེདིཏབྦཾ.

པཋམཾ པཱརཱཛིཀཾ ཀཏིཧི སམུཊྛཱནེཧཱིཏིཨཱདི པུབྦེ ཝུཏྟནཡཏྟཱ ཨུཏྟཱནམེཝ.

༤༧༣. ཙཏྟཱརོ པཱརཱཛིཀཱ ཀཏིཧི སམུཊྛཱནེཧཱིཏིཨཱདཱིསུ ཨུཀྐཊྛཔརིཙྪེདཏོ ཡཾ ཡཾ སམུཊྛཱནཾ ཡསྶ ཡསྶ ལབྦྷཏི, ཏཾ སབྦཾ ཝུཏྟམེཝ ཧོཏི.

ཨཱཔཏྟིསམུཊྛཱནཝཎྞནཱ ནིཊྛིཏཱ.

ཨཔརདུཏིཡགཱཐཱསངྒཎིཀཾ

(༡) ཀཱཡིཀཱདིཨཱཔཏྟིཝཎྞནཱ

༤༧༤. ‘‘ཀཏི ¶ ¶ ཨཱཔཏྟིཡོ ཀཱཡིཀཱ’’ཏིཨཱདིགཱཐཱནཾ ཝིསྶཛྫནེ ཚ ཨཱཔཏྟིཡོ ཀཱཡིཀཱཏི ཨནྟརཔེཡྻཱལེ ཙཏུཏྠེན ཨཱཔཏྟིསམུཊྛཱནེན ཚ ཨཱཔཏྟིཡོ ཨཱཔཛྫཏི, ‘‘བྷིཀྑུ མེཐུནཾ དྷམྨཾ པཊིསེཝཏི, ཨཱཔཏྟི པཱརཱཛིཀསྶཱ’’ཏིཨཱདིནཱ ནཡེན ཝུཏྟཱཔཏྟིཡོ. ཀཱཡདྭཱརེ སམུཊྛིཏཏྟཱ ཧི ཨེཏཱ ཀཱཡིཀཱཏི ཝུཙྩནྟི. ཚ ཝཱཙསིཀཱཏི ཏསྨིཾཡེཝ ཨནྟརཔེཡྻཱལེ པཉྩམེན ཨཱཔཏྟིསམུཊྛཱནེན ཚ ཨཱཔཏྟིཡོ ཨཱཔཛྫཏི, ‘‘བྷིཀྑུ པཱཔིཙྪོ ཨིཙྪཱཔཀཏོ’’ཏིཨཱདིནཱ ནཡེན ཝུཏྟཱཔཏྟིཡོ. ཚཱདེནྟསྶ ཏིསྶོཏི ཝཛྫཔཊིཙྪཱདིཀཱཡ བྷིཀྑུནིཡཱ པཱརཱཛིཀཾ, བྷིཀྑུསྶ སངྒྷཱདིསེསཔཊིཙྪཱདནེ པཱཙིཏྟིཡཾ, ཨཏྟནོ དུཊྛུལླཱཔཏྟིཔཊིཙྪཱདནེ དུཀྐཊཾ. པཉྩ སཾསགྒཔཙྩཡཱཏི ¶ བྷིཀྑུནིཡཱ ཀཱཡསཾསགྒེ པཱརཱཛིཀཾ, བྷིཀྑུནོ སངྒྷཱདིསེསོ, ཀཱཡེན ཀཱཡཔཊིབདྡྷེ ཐུལླཙྩཡཾ, ནིསྶགྒིཡེན ཀཱཡཔཊིབདྡྷེ དུཀྐཊཾ, ཨངྒུལིཔཏོདཀེ པཱཙིཏྟིཡནྟི ཨིམཱ ཀཱཡསཾསགྒཔཙྩཡཱ པཉྩཱཔཏྟིཡོ.

ཨརུཎུགྒེ ཏིསྶོཏི ཨེཀརཏྟཚཱརཏྟསཏྟཱཧདསཱཧམཱསཱཏིཀྐམཝསེན ནིསྶགྒིཡཾ པཱཙིཏྟིཡཾ, བྷིཀྑུནིཡཱ རཏྟིཝིཔྤཝཱསེ སངྒྷཱདིསེསོ, ‘‘པཋམམྤི ཡཱམཾ ཚཱདེཏི, དུཏིཡམྤི ཏཏིཡམྤི ཡཱམཾ ཚཱདེཏི, ཨུདྡྷསྟེ ཨརུཎེ ཚནྣཱ ཧོཏི ཨཱཔཏྟི, ཡོ ཚཱདེཏི སོ དུཀྐཊཾ དེསཱཔེཏབྦོ’’ཏི ཨིམཱ ཨརུཎུགྒེ ཏིསྶོ ཨཱཔཏྟིཡོ ཨཱཔཛྫཏི. དྭེ ཡཱཝཏཏིཡཀཱཏི ཨེཀཱདས ཡཱཝཏཏིཡཀཱ ནཱམ, པཉྙཏྟིཝསེན པན དྭེ ཧོནྟི བྷིཀྑཱུནཾ ཡཱཝཏཏིཡཀཱ བྷིཀྑུནཱིནཾ ཡཱཝཏཏིཡཀཱཏི. ཨེཀེཏྠ ཨཊྛཝཏྠུཀཱཏི བྷིཀྑུནཱིནཾཡེཝ ཨེཀཱ ཨེཏྠ ཨིམསྨིཾ སཱསནེ ཨཊྛཝཏྠུཀཱ ནཱམ. ཨེཀེན སབྦསངྒཧོཏི ‘‘ཡསྶ སིཡཱ ཨཱཔཏྟི, སོ ཨཱཝིཀརེཡྻཱ’’ཏི ཨིམིནཱ ཨེཀེན ནིདཱནུདྡེསེན སབྦསིཀྑཱཔདཱནཉྩ སབྦཔཱཏིམོཀྑུདྡེསཱནཉྩ སངྒཧོ ཧོཏི.

ཝིནཡསྶ དྭེ མཱུལཱནཱིཏི ཀཱཡོ ཙེཝ ཝཱཙཱ ཙ. གརུཀཱ དྭེ ཝུཏྟཱཏི པཱརཱཛིཀསངྒྷཱདིསེསཱ ¶ . དྭེ དུཊྛུལླཙྪཱདནཱཏི ཝཛྫཔཊིཙྪཱདིཀཱཡ པཱརཱཛིཀཾ ¶ སངྒྷཱདིསེསཾ པཊིཙྪཱདཀསྶ པཱཙིཏྟིཡནྟི ཨིམཱ དྭེ དུཊྛུལླཙྪཱདནཱཔཏྟིཡོ ནཱམ.

གཱམནྟརེ ཙཏསྶོཏི ‘‘བྷིཀྑུ བྷིཀྑུནིཡཱ སདྡྷིཾ སཾཝིདཧཏི, དུཀྐཊཾ; ཨཉྙསྶ གཱམསྶ ཨུཔཙཱརཾ ཨོཀྐམཏི, པཱཙིཏྟིཡཾ; བྷིཀྑུནིཡཱ གཱམནྟརཾ གཙྪནྟིཡཱ པརིཀྑིཏྟེ གཱམེ པཋམཔཱདེ ཐུལླཙྩཡཾ, དུཏིཡཔཱདེ སངྒྷཱདིསེསོ; ཨཔརིཀྑིཏྟསྶ པཋམཔཱདེ ཨུཔཙཱརོཀྐམནེ ཐུལླཙྩཡཾ, དུཏིཡཔཱདེ སངྒྷཱདིསེསོ’’ཏི ཨིམཱ གཱམནྟརེ དུཀྐཊཔཱཙིཏྟིཡཐུལླཙྩཡསངྒྷཨཱདིསེསཝསེན ཙཏསྶོ ཨཱཔཏྟིཡོ. ཙཏསྶོ ནདིཔཱརཔཙྩཡཱཏི ‘‘བྷིཀྑུ བྷིཀྑུནིཡཱ སདྡྷིཾ སཾཝིདཧཏི, དུཀྐཊཾ; ནཱཝཾ ཨབྷིརུཧཏི, པཱཙིཏྟིཡཾ; བྷིཀྑུནིཡཱ ནདིཔཱརཾ གཙྪནྟིཡཱ ཨུཏྟརཎཀཱལེ པཋམཔཱདེ ཐུལླཙྩཡཾ, དུཏིཡཔཱདེ སངྒྷཱདིསེསོ’’ཏི ཨིམཱ ཙཏསྶོ. ཨེཀམཾསེ ཐུལླཙྩཡནྟི མནུསྶམཾསེ. ནཝམཾསེསུ དུཀྐཊནྟི སེསཨཀཔྤིཡམཾསེསུ.

དྭེ ཝཱཙསིཀཱ རཏྟིནྟི བྷིཀྑུནཱི རཏྟནྡྷཀཱརེ ཨཔྤདཱིཔེ པུརིསེན སདྡྷིཾ ཧཏྠཔཱསེ ཋིཏཱ སལླཔཏི ¶ , པཱཙིཏྟིཡཾ; ཧཏྠཔཱསཾ ཝིཛཧིཏྭཱ ཋིཏཱ སལླཔཏི, དུཀྐཊཾ. དྭེ ཝཱཙསིཀཱ དིཝཱཏི བྷིཀྑུནཱི དིཝཱ པཊིཙྪནྣེ ཨོཀཱསེ པུརིསེན སདྡྷིཾ ཧཏྠཔཱསེ ཋིཏཱ སལླཔཏི, པཱཙིཏྟིཡཾ; ཧཏྠཔཱསཾ ཝིཛཧིཏྭཱ སལླཔཏི, དུཀྐཊཾ. དདམཱནསྶ ཏིསྶོཏི མརཎཱདྷིཔྤཱཡོ མནུསྶསྶ ཝིསཾ དེཏི, སོ ཙེ ཏེན མརཏི, པཱརཱཛིཀཾ; ཡཀྑཔེཏཱནཾ དེཏི, ཏེ ཙེ མརནྟི, ཐུལླཙྩཡཾ; ཏིརཙྪཱནགཏསྶ དེཏི, སོ ཙེ མརཏི, པཱཙིཏྟིཡཾ; ཨཉྙཱཏིཀཱཡ བྷིཀྑུནིཡཱ ཙཱིཝརདཱནེ པཱཙིཏྟིཡནྟི ཨེཝཾ དདམཱནསྶ ཏིསྶོ ཨཱཔཏྟིཡོ. ཙཏྟཱརོ ཙ པཊིགྒཧེཏི ཧཏྠགྒཱཧ-ཝེཎིགྒཱཧེསུ སངྒྷཱདིསེསོ, མུཁེན ཨངྒཛཱཏགྒཧཎེ པཱརཱཛིཀཾ, ཨཉྙཱཏིཀཱཡ བྷིཀྑུནིཡཱ ཙཱིཝརཔཊིགྒཧཎེ ནིསྶགྒིཡཾ པཱཙིཏྟིཡཾ, ཨཝསྶུཏཱཡ ཨཝསྶུཏསྶ ཧཏྠཏོ ཁཱདནཱིཡཾ བྷོཛནཱིཡཾ པཊིགྒཎྷནྟིཡཱ ཐུལླཙྩཡཾ; ཨེཝཾ པཊིགྒཧེ ཙཏྟཱརོ ཨཱཔཏྟིཀྑནྡྷཱ ཧོནྟི.

(༢) དེསནཱགཱམིནིཡཱདིཝཎྞནཱ

༤༧༥. པཉྩ དེསནཱགཱམིནིཡོཏི ལཧུཀཱ པཉྩ. ཚ སཔྤཊིཀམྨཱཏི པཱརཱཛིཀཾ ཋཔེཏྭཱ ཨཝསེསཱ. ཨེཀེཏྠ ཨཔྤཊིཀམྨཱཏི ཨེཀཱ པཱརཱཛིཀཱཔཏྟི.

ཝིནཡགརུཀཱ ¶ དྭེ ཝུཏྟཱཏི པཱརཱཛིཀཉྩེཝ སངྒྷཱདིསེསཉྩ. ཀཱཡཝཱཙསིཀཱནི ཙཱཏི སབྦཱནེཝ སིཀྑཱཔདཱནི ཀཱཡཝཱཙསིཀཱནི, མནོདྭཱརེ པཉྙཏྟཾ ¶ ཨེཀསིཀྑཱཔདམྤི ནཏྠི. ཨེཀོ ཝིཀཱལེ དྷཉྙརསོཏི ལོཎསོཝཱིརཀཾ. ཨཡམེཝ ཧི ཨེཀོ དྷཉྙརསོ ཝིཀཱལེ ཝཊྚཏི. ཨེཀཱ ཉཏྟིཙཏུཏྠེན སམྨུཏཱིཏི བྷིཀྑུནོཝཱདཀསམྨུཏི. ཨཡམེཝ ཧི ཨེཀཱ ཉཏྟིཙཏུཏྠཀམྨེན སམྨུཏི ཨནུཉྙཱཏཱ.

པཱརཱཛིཀཱ ཀཱཡིཀཱ དྭེཏི བྷིཀྑཱུནཾ མེཐུནཔཱརཱཛིཀཾ བྷིཀྑུནཱིནཉྩ ཀཱཡསཾསགྒཔཱརཱཛིཀཾ. དྭེ སཾཝཱསབྷཱུམིཡོཏི ཨཏྟནཱ ཝཱ ཨཏྟཱནཾ སམཱནསཾཝཱསཀཾ ཀརོཏི, སམགྒོ ཝཱ སངྒྷོ ཨུཀྑིཏྟཾ ཨོསཱརེཏི. ཀུརུནྡིཡཾ པན ‘‘སམཱནསཾཝཱསཀབྷཱུམི ཙ ནཱནཱསཾཝཱསཀབྷཱུམི ཙཱ’’ཏི ཨེཝཾ དྭེ སཾཝཱསབྷཱུམིཡོ ཝུཏྟཱ. དྭིནྣཾ རཏྟིཙྪེདོཏི པཱརིཝཱསིཀསྶ ཙ མཱནཏྟཙཱརིཀསྶ ཙ པཉྙཏྟཱ. དྭངྒུལཱ དུཝེཏི དྭེ དྭངྒུལཔཉྙཏྟིཡོ, ‘‘དྭངྒུལཔབྦཔརམཾ ཨཱདཱཏབྦ’’ནྟི ཨཡམེཀཱ, ‘‘དྭངྒུལཾ ཝཱ དྭེམཱསཾ ཝཱ’’ཏི ཨཡམེཀཱ.

དྭེ ཨཏྟཱནཾ ཝདྷིཏྭཱནཱཏི བྷིཀྑུནཱི ཨཏྟཱནཾ ཝདྷིཏྭཱ དྭེ ཨཱཔཏྟིཡོ ཨཱཔཛྫཏི; ཝདྷཏི རོདཏི, ཨཱཔཏྟི པཱཙིཏྟིཡསྶ; ཝདྷཏི ན རོདཏི, ཨཱཔཏྟི དུཀྐཊསྶ. དྭཱིཧི སངྒྷོ བྷིཛྫཏཱིཏི ཀམྨེན ཙ སལཱཀགྒཱཧེན ཙ. དྭེཏྠ ¶ པཋམཱཔཏྟིཀཱཏི ཨེཏྠ སཀལེཔི ཝིནཡེ དྭེ པཋམཱཔཏྟིཀཱ ཨུབྷིནྣཾ པཉྙཏྟིཝསེན. ཨིཏརཐཱ པན ནཝ བྷིཀྑཱུནཾ ནཝ བྷིཀྑུནཱིནནྟི ཨཊྛཱརས ཧོནྟི. ཉཏྟིཡཱ ཀརཎཱ དུཝེཏི དྭེ ཉཏྟིཀིཙྩཱནི – ཀམྨཉྩ ཀམྨཔཱདཀཱ ཙ. ནཝསུ ཋཱནེསུ ཀམྨཾ ཧོཏི, དྭཱིསུ ཀམྨཔཱདབྷཱཝེན ཏིཊྛཏི.

པཱཎཱཏིཔཱཏེ ཏིསྶོཏི ‘‘ཨནོདིསྶ ཨོཔཱཏཾ ཁཎཏི, སཙེ མནུསྶོ མརཏི, པཱརཱཛིཀཾ; ཡཀྑཔེཏཱནཾ མརཎེ ཐུལླཙྩཡཾ; ཏིརཙྪཱནགཏསྶ མརཎེ པཱཙིཏྟིཡ’’ནྟི ཨིམཱ ཏིསྶོ ཧོནྟི. ཝཱཙཱ པཱརཱཛིཀཱ ཏཡོཏི ཝཛྫཔཊིཙྪཱདིཀཱཡ ཨུཀྑིཏྟཱནུཝཏྟིཀཱཡ ཨཊྛཝཏྠུཀཱཡཱཏི. ཀུརུནྡིཡཾ པན ‘‘ཨཱཎཏྟིཡཱ ཨདིནྣཱདཱནེ, མནུསྶམརཎེ, ཨུཏྟརིམནུསྶདྷམྨཨུལླཔནེ ཙཱ’’ཏི ཨེཝཾ ཏཡོ ཝུཏྟཱ. ཨོབྷཱསནཱ ཏཡོཏི ཝཙྩམགྒཾ པསྶཱཝམགྒཾ ཨཱདིསྶ ཝཎྞཱཝཎྞབྷཱསནེ སངྒྷཱདིསེསོ, ཝཙྩམགྒཾ པསྶཱཝམགྒཾ ཋཔེཏྭཱ ཨདྷཀྑཀཾ ཨུབྦྷཛཱཎུམཎྜལཾ ཨཱདིསྶ ཝཎྞཱཝཎྞབྷཎནེ ཐུལླཙྩཡཾ, ཨུབྦྷཀྑཀཾ ཨདྷོཛཱཎུམཎྜལཾ ཨཱདིསྶ ཝཎྞཱཝཎྞབྷཎནེ དུཀྐཊཾ. སཉྩརིཏྟེན ཝཱ ཏཡོཏི པཊིགྒཎྷཱཏི ཝཱིམཾསཏི པཙྩཱཧརཏི ¶ , ཨཱཔཏྟི སངྒྷཱདིསེསསྶ; ¶ པཊིགྒཎྷཱཏི ཝཱིམཾསཏི ན པཙྩཱཧརཏི, ཨཱཔཏྟི ཐུལླཙྩཡསྶ; པཊིགྒཎྷཱཏི ན ཝཱིམཾསཏི ན པཙྩཱཧརཏི, ཨཱཔཏྟི དུཀྐཊསྶཱཏི ཨིམེ སཉྩརིཏྟེན ཀཱརཎབྷཱུཏེན ཏཡོ ཨཱཔཏྟིཀྑནྡྷཱ ཧོནྟི.

ཏཡོ པུགྒལཱ ན ཨུཔསམྤཱདེཏབྦཱཏི ཨདྡྷཱནཧཱིནོ ཨངྒཧཱིནོ ཝཏྠུཝིཔནྣོ ཙ ཏེསཾ ནཱནཱཀརཎཾ ཝུཏྟམེཝ. ཨཔིཙེཏྠ ཡོ པཏྟཙཱིཝརེན ཨཔརིཔཱུརོ, པརིཔཱུརོ ཙ ན ཡཱཙཏི, ཨིམེཔི ཨངྒཧཱིནེནེཝ སངྒཧིཏཱ. མཱཏུགྷཱཏཀཱདཡོ ཙ ཀརཎདུཀྐཊཀཱ པཎྜཀཨུབྷཏོབྱཉྫནཀཏིརཙྪཱནགཏསངྑཱཏེན ཝཏྠུཝིཔནྣེནེཝ སངྒཧིཏཱཏི ཝེདིཏབྦཱ. ཨེས ནཡོ ཀུརུནྡིཡཾ ཝུཏྟོ. ཏཡོ ཀམྨཱནཾ སངྒཧཱཏི ཉཏྟིཀཔྤནཱ, ཝིཔྤཀཏཔཙྩཏྟཾ, ཨཏཱིཏཀརཎནྟི. ཏཏྠ ‘‘དདེཡྻ ཀརེཡྻཱ’’ཏིཨཱདིབྷེདཱ ཉཏྟིཀཔྤནཱ; ‘‘དེཏི ཀརོཏཱི’’ཏིཨཱདིབྷེདཾ ཝིཔྤཀཏཔཙྩཏྟཾ; ‘‘དིནྣཾ ཀཏ’’ནྟིཨཱདིབྷེདཾ ཨཏཱིཏཀརཎཾ ནཱམཱཏི ཨིམེཧི ཏཱིཧི ཀམྨཱནི སངྒཡ྄ཧནྟི. ཨཔརེཧིཔི ཏཱིཧི ཀམྨཱནི སངྒཡ྄ཧནྟི – ཝཏྠུནཱ, ཉཏྟིཡཱ, ཨནུསྶཱཝནཱཡཱཏི. ཝཏྠུསམྤནྣཉྷི ཉཏྟིསམྤནྣཾ ཨནུསྶཱཝནསམྤནྣཉྩ ཀམྨཾ ནཱམ ཧོཏི, ཏེན ཝུཏྟཾ ‘‘ཏཡོ ཀམྨཱནཾ སངྒཧཱ’’ཏི. ནཱསིཏཀཱ ཏཡོ ནཱམ མེཏྟིཡཾ ¶ བྷིཀྑུནིཾ ནཱསེཐ, དཱུསཀོ ནཱསེཏབྦོ, དསཧངྒེཧི སམནྣཱགཏོ སཱམཎེརོ ནཱསེཏབྦོ, ཀཎྚཀཾ སམཎུདྡེསཾ ནཱསེཐཱཏི ཨེཝཾ ལིངྒསཾཝཱསདཎྜཀམྨནཱསནཱཝསེན ཏཡོ ནཱསིཏཀཱ ཝེདིཏབྦཱ. ཏིཎྞནྣཾ ཨེཀཝཱཙིཀཱཏི ‘‘ཨནུཛཱནཱམི བྷིཀྑཝེ དྭེ ཏཡོ ཨེཀཱནུསྶཱཝནེ ཀཱཏུ’’ནྟི ཝཙནཏོ ཏིཎྞཾ ཛནཱནཾ ཨེཀུཔཛ྄ཛྷཱཡེན ནཱནཱཙརིཡེན ཨེཀཱནུསྶཱཝནཱ ཝཊྚཏི.

ཨདིནྣཱདཱནེ ཏིསྶོཏི པཱདེ ཝཱ ཨཏིརེཀཔཱདེ ཝཱ པཱརཱཛིཀཾ, ཨཏིརེཀམཱསཀེ ཐུལླཙྩཡཾ, མཱསཀེ ཝཱ ཨཱུནམཱསཀེ ཝཱ དུཀྐཊཾ. ཙཏསྶོ མེཐུནཔཙྩཡཱཏི ཨཀྑཡིཏེ པཱརཱཛིཀཾ, ཡེབྷུཡྻེན ཁཡིཏེ ཐུལླཙྩཡཾ, ཝིཝཊཀཏེ མུཁེ དུཀྐཊཾ, ཛཏུམཊྛཀེ པཱཙིཏྟིཡཾ. ཚིནྡནྟསྶ ཏིསྶོཏི ཝནཔྤཏིཾ ཚིནྡནྟསྶ པཱརཱཛིཀཾ, བྷཱུཏགཱམེ པཱཙིཏྟིཡཾ, ཨངྒཛཱཏེ ཐུལླཙྩཡཾ. པཉྩ ཚཌྜིཏཔཙྩཡཱཏི ཨནོདིསྶ ཝིསཾ ཚཌྜེཏི, སཙེ ཏེན མནུསྶོ མརཏི, པཱརཱཛིཀཾ; ཡཀྑཔེཏེསུ ཐུལླཙྩཡཾ; ཏིརཙྪཱནགཏེ པཱཙིཏྟིཡཾ; ཝིསྶཊྛིཚཌྜནེ སངྒྷཱདིསེསོ; སེཁིཡེསུ ཧརིཏེ ཨུཙྩཱརཔསྶཱཝཚཌྜནེ དུཀྐཊཾ – ཨིམཱ ཚཌྜིཏཔཙྩཡཱ པཉྩཱཔཏྟིཡོ ཧོནྟི.

པཱཙིཏྟིཡེན ¶ དུཀྐཊཱ ཀཏཱཏི བྷིཀྑུནོཝཱདཀཝགྒསྨིཾ དསསུ སིཀྑཱཔདེསུ པཱཙིཏྟིཡེན སདྡྷིཾ ¶ དུཀྐཊཱ ཀཏཱ ཨེཝཱཏི ཨཏྠོ. ཙཏུརེཏྠ ནཝཀཱ ཝུཏྟཱཏི པཋམསིཀྑཱཔདམྷིཡེཝ ཨདྷམྨཀམྨེ དྭེ, དྷམྨཀམྨེ དྭེཏི ཨེཝཾ ཙཏྟཱརོ ནཝཀཱ ཝུཏྟཱཏི ཨཏྠོ. དྭིནྣཾ ཙཱིཝརེན ཙཱཏི བྷིཀྑཱུནཾ སནྟིཀེ ཨུཔསམྤནྣཱཡ ཙཱིཝརཾ དེནྟསྶ པཱཙིཏྟིཡཾ, བྷིཀྑུནཱིནཾ སནྟིཀེ ཨུཔསམྤནྣཱཡ དེནྟསྶ དུཀྐཊནྟི ཨེཝཾ དྭིནྣཾ བྷིཀྑུནཱིནཾ ཙཱིཝརཾ དེནྟསྶ ཙཱིཝརེན ཀཱརཎབྷཱུཏེན ཨཱཔཏྟི ཧོཏཱིཏི ཨཏྠོ.

ཨཊྛ པཱཊིདེསནཱིཡཱཏི པཱལི༹ཡཾ ཨཱགཏཱ ཨེཝ. བྷུཉྫནྟཱམཀདྷཉྙེན པཱཙིཏྟིཡེན དུཀྐཊཱ ཀཏཱཏི ཨཱམཀདྷཉྙཾ ཝིཉྙཱཔེཏྭཱ བྷུཉྫནྟིཡཱ པཱཙིཏྟིཡེན སདྡྷིཾ དུཀྐཊཱ ཀཏཱཡེཝ.

གཙྪནྟསྶ ཙཏསྶོཏི བྷིཀྑུནིཡཱ ཝཱ མཱཏུགཱམེན ཝཱ སདྡྷིཾ སཾཝིདྷཱཡ གཙྪནྟསྶ དུཀྐཊཾ, གཱམཱུཔཙཱརོཀྐམནེ པཱཙིཏྟིཡཾ, ཡཱ བྷིཀྑུནཱི ཨེཀཱ གཱམནྟརཾ གཙྪཏི, ཏསྶཱ གཱམཱུཔཙཱརཾ ཨོཀྐམནྟིཡཱ པཋམཔཱདེ ཐུལླཙྩཡཾ, དུཏིཡཔཱདེ སངྒྷཱདིསེསོཏི གཙྪནྟསྶ ཨིམཱ ཙཏསྶོ ཨཱཔཏྟིཡོ ཧོནྟི. ཋིཏསྶ ཙཱཔི ཏཏྟཀཱཏི ¶ ཋིཏསྶཔི ཙཏསྶོ ཨེཝཱཏི ཨཏྠོ. ཀཐཾ? བྷིཀྑུནཱི ཨནྡྷཀཱརེ ཝཱ པཊིཙྪནྣེ ཝཱ ཨོཀཱསེ མིཏྟསནྠཝཝསེན པུརིསསྶ ཧཏྠཔཱསེ ཏིཊྛཏི, པཱཙིཏྟིཡཾ; ཧཏྠཔཱསཾ ཝིཛཧིཏྭཱ ཏིཊྛཏི, དུཀྐཊཾ; ཨརུཎུགྒམནཀཱལེ དུཏིཡིཀཱཡ ཧཏྠཔཱསཾ ཝིཛཧནྟཱི ཏིཊྛཏི, ཐུལླཙྩཡཾ; ཝིཛཧིཏྭཱ ཏིཊྛཏི, སངྒྷཱདིསེསོཏི ནིསིནྣསྶ ཙཏསྶོ ཨཱཔཏྟིཡོ. ནིཔནྣསྶཱཔི ཏཏྟཀཱཏི སཙེཔི ཧི སཱ ནིསཱིདཏི ཝཱ ནིཔཛྫཏི ཝཱ, ཨེཏཱཡེཝ ཙཏསྶོ ཨཱཔཏྟིཡོ ཨཱཔཛྫཏི.

(༣) པཱཙིཏྟིཡཝཎྞནཱ

༤༧༦. པཉྩ པཱཙིཏྟིཡཱནཱིཏི པཉྩ བྷེསཛྫཱནི པཊིགྒཧེཏྭཱ ནཱནཱབྷཱཛནེསུ ཝཱ ཨེཀབྷཱཛནེ ཝཱ ཨམིསྶེཏྭཱ ཋཔིཏཱནི ཧོནྟི, སཏྟཱཧཱཏིཀྐམེ སོ བྷིཀྑུ པཉྩ པཱཙིཏྟིཡཱནི སབྦཱནི ནཱནཱཝཏྠུཀཱནི ཨེཀཀྑཎེ ཨཱཔཛྫཏི, ‘‘ཨིམཾ པཋམཾ ཨཱཔནྣོ, ཨིམཾ པཙྪཱ’’ཏི ན ཝཏྟབྦོ.

ནཝ པཱཙིཏྟིཡཱནཱིཏི ཡོ བྷིཀྑུ ནཝ པཎཱིཏབྷོཛནཱནི ཝིཉྙཱཔེཏྭཱ ཏེཧི སདྡྷིཾ ཨེཀཏོ ཨེཀཾ ཀབལ༹ཾ ཨོམདྡིཏྭཱ མུཁེ པཀྑིཔིཏྭཱ པརགལ༹ཾ ཨཏིཀྐཱམེཏི, ཨཡཾ ནཝ པཱཙིཏྟིཡཱནི སབྦཱནི ¶ ནཱནཱཝཏྠུཀཱནི ཨེཀཀྑཎེ ཨཱཔཛྫཏི ¶ ‘‘ཨིམཾ པཋམཾ ཨཱཔནྣོ, ཨིམཾ པཙྪཱ’’ཏི ན ཝཏྟབྦོ. ཨེཀཝཱཙཱཡ དེསེཡྻཱཏི ‘‘ཨཧཾ, བྷནྟེ, པཉྩ བྷེསཛྫཱནི པཊིགྒཧེཏྭཱ སཏྟཱཧཾ ཨཏིཀྐཱམེཏྭཱ པཉྩ ཨཱཔཏྟིཡོ ཨཱཔནྣོ, ཏཱ ཏུམྷམཱུལེ པཊིདེསེམཱི’’ཏི ཨེཝཾ ཨེཀཝཱཙཱཡ དེསེཡྻ, དེསིཏཱཝ ཧོནྟི, དྭཱིཧི ཏཱིཧི ཝཱཙཱཧི ཀིཙྩཾ ནཱམ ནཏྠི. དུཏིཡཝིསྶཛྫནེཔི ‘‘ཨཧཾ, བྷནྟེ, ནཝ པཎཱིཏབྷོཛནཱནི ཝིཉྙཱཔེཏྭཱ བྷུཉྫིཏྭཱ ནཝ ཨཱཔཏྟིཡོ ཨཱཔནྣོ, ཏཱ ཏུམྷམཱུལེ པཊིདེསེམཱི’’ཏི ཝཏྟབྦཾ.

ཝཏྠུཾ ཀིཏྟེཏྭཱ དེསེཡྻཱཏི ‘‘ཨཧཾ, བྷནྟེ, པཉྩ བྷེསཛྫཱནི པཊིགྒཧེཏྭཱ སཏྟཱཧཾ ཨཏིཀྐཱམེསིཾ, ཡཐཱཝཏྠུཀཾ ཏཾ ཏུམྷམཱུལེ པཊིདེསེམཱི’’ཏི ཨེཝཾ ཝཏྠུཾ ཀིཏྟེཏྭཱ དེསེཡྻ, དེསིཏཱཝ ཧོནྟི ཨཱཔཏྟིཡོ, ཨཱཔཏྟིཡཱ ནཱམགྒཧཎེན ཀིཙྩཾ ནཏྠི. དུཏིཡཝིསྶཛྫནེཔི ‘‘ཨཧཾ, བྷནྟེ, ནཝ པཎཱིཏབྷོཛནཱནི ཝིཉྙཱཔེཏྭཱ བྷུཏྟོ, ཡཐཱཝཏྠུཀཾ ཏཾ ཏུམྷམཱུལེ པཊིདེསེམཱི’’ཏི ཝཏྟབྦཾ.

ཡཱཝཏཏིཡཀེ ཏིསྶོཏི ཨུཀྑིཏྟཱནུཝཏྟིཀཱཡ པཱརཱཛིཀཾ བྷེདཀཱནུཝཏྟཀཱནཾ ཀོཀཱལིཀཱདཱིནཾ སངྒྷཱདིསེསཾ, པཱཔིཀཱཡ དིཊྛིཡཱ ཨཔྤཊིནིསྶགྒེ ཙཎྜཀཱལི༹ཀཱཡ ཙ བྷིཀྑུནིཡཱ པཱཙིཏྟིཡནྟི ཨིམཱ ཡཱཝཏཏིཡཀཱ ཏིསྶོ ཨཱཔཏྟིཡོ. ཚ ཝོཧཱརཔཙྩཡཱཏི པཡུཏྟཝཱཙཱཔཙྩཡཱ ཚ ¶ ཨཱཔཏྟིཡོ ཨཱཔཛྫཏཱིཏི ཨཏྠོ. ཀཐཾ? ཨཱཛཱིཝཧེཏུ ཨཱཛཱིཝཀཱརཎཱ པཱཔིཙྪོ ཨིཙྪཱཔཀཏོ ཨསནྟཾ ཨབྷཱུཏཾ ཨུཏྟརིམནུསྶདྷམྨཾ ཨུལླཔཏི, ཨཱཔཏྟི པཱརཱཛིཀསྶ. ཨཱཛཱིཝཧེཏུ ཨཱཛཱིཝཀཱརཎཱ སཉྩརིཏྟཾ སམཱཔཛྫཏི, ཨཱཔཏྟི སངྒྷཱདིསེསསྶ. ཨཱཛཱིཝཧེཏུ ཨཱཛཱིཝཀཱརཎཱ ཡོ ཏེ ཝིཧཱརེ ཝསཏི སོ ཨརཧཱཏི ཝདཏི, ཨཱཔཏྟི ཐུལླཙྩཡསྶ. ཨཱཛཱིཝཧེཏུ ཨཱཛཱིཝཀཱརཎཱ བྷིཀྑུ པཎཱིཏབྷོཛནཱནི ཨཏྟནོ ཨཏྠཱཡ ཝིཉྙཱཔེཏྭཱ བྷུཉྫཏི, ཨཱཔཏྟི པཱཙིཏྟིཡསྶ. ཨཱཛཱིཝཧེཏུ ཨཱཛཱིཝཀཱརཎཱ བྷིཀྑུནཱི པཎཱིཏབྷོཛནཱནི ཨཏྟནོ ཨཏྠཱཡ ཝིཉྙཱཔེཏྭཱ བྷུཉྫཏི, ཨཱཔཏྟི པཱཊིདེསནཱིཡསྶ. ཨཱཛཱིཝཧེཏུ ཨཱཛཱིཝཀཱརཎཱ སཱུཔཾ ཝཱ ཨོདནཾ ཝཱ ཨགིལཱནོ ཨཏྟནོ ཨཏྠཱཡ ཝིཉྙཱཔེཏྭཱ བྷུཉྫཏི, ཨཱཔཏྟི དུཀྐཊསྶཱཏི.

ཁཱདནྟསྶ ཏིསྶོཏི མནུསྶམཾསེ ཐུལླཙྩཡཾ, ཨཝསེསེསུ ཨཀཔྤིཡམཾསེསུ དུཀྐཊཾ, བྷིཀྑུནིཡཱ ལསུཎེ པཱཙིཏྟིཡཾ. པཉྩ བྷོཛནཔཙྩཡཱཏི ཨཝསྶུཏཱ ཨཝསྶུཏསྶ པུརིསསྶ ཧཏྠཏོ བྷོཛནཾ གཧེཏྭཱ ཏཏྠེཝ ¶ མནུསྶམཾསཾ ལསུཎཾ ཨཏྟནོ ཨཏྠཱཡ ཝིཉྙཱཔེཏྭཱ གཧིཏཔཎཱིཏབྷོཛནཱནི ཨཝསེསཉྩ ཨཀཔྤིཡམཾསཾ པཀྑིཔིཏྭཱ ཝོམིསྶཀཾ ཨོམདྡིཏྭཱ ཨཛ྄ཛྷོཧརམཱནཱ ¶ སངྒྷཱདིསེསཾ, ཐུལླཙྩཡཾ, པཱཙིཏྟིཡཾ, པཱཊིདེསནཱིཡཾ, དུཀྐཊནྟི ཨིམཱ པཉྩ ཨཱཔཏྟིཡོ བྷོཛནཔཙྩཡཱ ཨཱཔཛྫཏི.

པཉྩ ཋཱནཱནཱིཏི ‘‘ཨུཀྑིཏྟཱནུཝཏྟིཀཱཡ བྷིཀྑུནིཡཱ ཡཱཝཏཏིཡཾ སམནུབྷཱསནཱཡ ཨཔྤཊིནིསྶཛྫནྟིཡཱ ཉཏྟིཡཱ དུཀྐཊཾ, དྭཱིཧི ཀམྨཝཱཙཱཧི ཐུལླཙྩཡཾ, ཀམྨཝཱཙཱཔརིཡོསཱནེ ཨཱཔཏྟི པཱརཱཛིཀསྶ, སངྒྷབྷེདཱཡ པརཀྐམནཱདཱིསུ སངྒྷཱདིསེསོ, པཱཔིཀཱཡ དིཊྛིཡཱ ཨཔྤཊིནིསྶགྒེ པཱཙིཏྟིཡ’’ནྟི ཨེཝཾ སབྦཱ ཡཱཝཏཏིཡཀཱ པཉྩ ཋཱནཱནི གཙྪནྟི. པཉྩནྣཉྩེཝ ཨཱཔཏྟཱིཏི ཨཱཔཏྟི ནཱམ པཉྩནྣཾ སཧདྷམྨིཀཱནཾ ཧོཏི, ཏཏྠ དྭིནྣཾ ནིཔྤརིཡཱཡེན ཨཱཔཏྟིཡེཝ, སིཀྑཱམཱནསཱམཎེརིསཱམཎེརཱནཾ པན ཨཀཔྤིཡཏྟཱ ན ཝཊྚཏི. ཨིམིནཱ པརིཡཱཡེན ཏེསཾ ཨཱཔཏྟི ན དེསཱཔེཏབྦཱ, དཎྜཀམྨཾ པན ཏེསཾ ཀཱཏབྦཾ. པཉྩནྣཾ ཨདྷིཀརཎེན ཙཱཏི ཨདྷིཀརཎཉྩ པཉྩནྣམེཝཱཏི ཨཏྠོ. ཨེཏེསཾཡེཝ ཧི པཉྩནྣཾ པཏྟཙཱིཝརཱདཱིནཾ ཨཏྠཱཡ ཝིནིཙྪཡཝོཧཱརོ ཨདྷིཀརཎནྟི ཝུཙྩཏི, གིཧཱིནཾ པན ཨཌྜཀམྨཾ ནཱམ ཧོཏི.

པཉྩནྣཾ ཝིནིཙྪཡོ ཧོཏཱིཏི པཉྩནྣཾ སཧདྷམྨིཀཱནཾཡེཝ ཝིནིཙྪཡོ ནཱམ ¶ ཧོཏི. པཉྩནྣཾ ཝཱུཔསམེན ཙཱཏི ཨེཏེསཾཡེཝ པཉྩནྣཾ ཨདྷིཀརཎཾ ཝིནིཙྪིཏཾ ཝཱུཔསནྟཾ ནཱམ ཧོཏཱིཏི ཨཏྠོ. པཉྩནྣཉྩེཝ ཨནཱཔཏྟཱིཏི ཨེཏེསཾཡེཝ པཉྩནྣཾ ཨནཱཔཏྟི ནཱམ ཧོཏཱིཏི ཨཏྠོ. ཏཱིཧི ཋཱནེཧི སོབྷཏཱིཏི སངྒྷཱདཱིཧི ཏཱིཧི ཀཱརཎེཧི སོབྷཏི. ཀཏཝཱིཏིཀྐམོ ཧི པུགྒལོ སཔྤཊིཀམྨཾ ཨཱཔཏྟིཾ སངྒྷམཛ྄ཛྷེ གཎམཛ྄ཛྷེ པུགྒལསནྟིཀེ ཝཱ པཊིཀརིཏྭཱ ཨབྦྷུཎྷསཱིལོ པཱཀཏིཀོ ཧོཏི, ཏསྨཱ ཏཱིཧི ཋཱནེཧི སོབྷཏཱིཏི ཝུཙྩཏི.

དྭེ ཀཱཡིཀཱ རཏྟིནྟི བྷིཀྑུནཱི རཏྟནྡྷཀཱརེ པུརིསསྶ ཧཏྠཔཱསེ ཋཱནནིསཛྫསཡནཱནི ཀཔྤཡམཱནཱ པཱཙིཏྟིཡཾ, ཧཏྠཔཱསཾ ཝིཛཧིཏྭཱ ཋཱནཱདཱིནི ཀཔྤཡམཱནཱ དུཀྐཊནྟི དྭེ ཀཱཡདྭཱརསམྦྷཝཱ ཨཱཔཏྟིཡོ རཏྟིཾ ཨཱཔཛྫཏི. དྭེ ཀཱཡིཀཱ དིཝཱཏི ཨེཏེནེཝ ཨུཔཱཡེན དིཝཱ པཊིཙྪནྣེ ཨོཀཱསེ དྭེ ཨཱཔཏྟིཡོ ཨཱཔཛྫཏི. ནིཛ྄ཛྷཱཡནྟསྶ ཨེཀཱ ཨཱཔཏྟཱིཏི ‘‘ན ཙ, བྷིཀྑཝེ, སཱརཏྟེན མཱཏུགཱམསྶ ཨངྒཛཱཏཾ ཨུཔནིཛ྄ཛྷཱཡིཏབྦཾ ¶ . ཡོ ཨུཔནིཛ྄ཛྷཱཡེཡྻ, ཨཱཔཏྟི དུཀྐཊསྶཱ’’ཏི (པཱརཱ. ༢༦༦) ནིཛ྄ཛྷཱཡནྟསྶ ཨཡམེཀཱ ཨཱཔཏྟི. ཨེཀཱ པིཎྜཔཱཏཔཙྩཡཱཏི ‘‘ན ཙ, བྷིཀྑཝེ, བྷིཀྑཱདཱཡིཀཱཡ མུཁཾ ཨོལོཀེཏབྦ’’ནྟི (ཙཱུལ༹ཝ. ༣༦༦) ཨེཏྠ དུཀྐཊཱཔཏྟི, ཨནྟམསོ ཡཱགུཾ ཝཱ བྱཉྫནཾ ཝཱ དེནྟསྶ སཱམཎེརསྶཱཔི ཧི མུཁཾ ཨུལློཀཡཏོ ¶ དུཀྐཊམེཝ. ཀུརུནྡིཡཾ པན ‘‘ཨེཀཱ པིཎྜཔཱཏཔཙྩཡཱཏི བྷིཀྑུནིཔརིཔཱཙིཏཾ པིཎྜཔཱཏཾ བྷུཉྫནྟསྶ པཱཙིཏྟིཡ’’ནྟི ཝུཏྟཾ.

ཨཊྛཱནིསཾསེ སམྤསྶནྟི ཀོསམྦཀཀྑནྡྷཀེ ཝུཏྟཱནིསཾསེ. ཨུཀྑིཏྟཀཱ ཏཡོ ཝུཏྟཱཏི ཨཱཔཏྟིཡཱ ཨདསྶནེ ཨཔྤཊིཀམྨེ པཱཔིཀཱཡ ཙ དིཊྛིཡཱ ཨཔྤཊིནིསྶགྒེཏི. ཏེཙཏྟཱལཱིས སམྨཱཝཏྟནཱཏི ཏེསཾཡེཝ ཨུཀྑིཏྟཀཱནཾ ཨེཏྟཀེསུ ཝཏྟེསུ ཝཏྟནཱ.

པཉྩཋཱནེ མུསཱཝཱདོཏི པཱརཱཛིཀསངྒྷཱདིསེསཐུལླཙྩཡཔཱཙིཏྟིཡདུཀྐཊསངྑཱཏེ པཉྩཊྛཱནེ མུསཱཝཱདོ གཙྪཏི. ཙུདྡས པརམནྟི ཝུཙྩཏཱིཏི དསཱཧཔརམཱདིནཡེན ཧེཊྛཱ ཝུཏྟཾ. དྭཱདས པཱཊིདེསནཱིཡཱཏི བྷིཀྑཱུནཾ ཙཏྟཱརི བྷིཀྑུནཱིནཾ ཨཊྛ. ཙཏུནྣཾ དེསནཱཡ ཙཱཏི ཙཏུནྣཾ ཨཙྩཡདེསནཱཡཱཏི ཨཏྠོ. ཀཏམཱ པན སཱཏི? དེཝདཏྟེན པཡོཛིཏཱནཾ ཨབྷིམཱརཱནཾ ཨཙྩཡདེསནཱ, ཨནུརུདྡྷཏྠེརསྶ ཨུཔཊྛཱཡིཀཱཡ ཨཙྩཡདེསནཱ, ཝཌྜྷསྶ ལིཙྪཝིནོ ཨཙྩཡདེསནཱ, ཝཱསབྷགཱམིཡཏྠེརསྶ ཨུཀྑེཔནཱིཡཀམྨཾ ཀཏྭཱ ཨཱགཏཱནཾ བྷིཀྑཱུནཾ ཨཙྩཡདེསནཱཏི ཨཡཾ ཙཏུནྣཾ ཨཙྩཡདེསནཱ ¶ ནཱམ.

ཨཊྛངྒིཀོ མུསཱཝཱདོཏི ‘‘པུབྦེཝསྶ ཧོཏི མུསཱ བྷཎིསྶ’’ནྟི ཨཱདིཾ ཀཏྭཱ ‘‘ཝིནིདྷཱཡ སཉྙ’’ནྟི པརིཡོསཱནེཧི (པཱཙི. ༤-༥; པརི. ༤༥༩) ཨཊྛཧི ཨངྒེཧི ཨཊྛངྒིཀོ. ཨུཔོསཐངྒཱནིཔི པཱཎཾ ན ཧནེཏིཨཱདིནཱ ནཡེན ཝུཏྟཱནེཝ. ཨཊྛ དཱུཏེཡྻངྒཱནཱིཏི ‘‘ཨིདྷ, བྷིཀྑཝེ, བྷིཀྑུ སོཏཱ ཙ ཧོཏི སཱཝེཏཱ ཙཱ’’ཏིཨཱདིནཱ (ཙཱུལ༹ཝ. ༣༤༧) ནཡེན སངྒྷབྷེདཀེ ཝུཏྟཱནི. ཨཊྛ ཏིཏྠིཡཝཏྟཱནི མཧཱཁནྡྷཀེ ཝུཏྟཱནི.

ཨཊྛཝཱཙིཀཱ ཨུཔསམྤདཱཏི བྷིཀྑུནཱིནཾ ཨུཔསམྤདཾ སནྡྷཱཡ ཝུཏྟཾ. ཨཊྛནྣཾ པཙྩུཊྛཱཏབྦནྟི བྷཏྟགྒེ ཨཊྛནྣཾ བྷིཀྑུནཱིནཾ ཨིཏརཱཧི པཙྩུཊྛཱཡ ཨཱསནཾ དཱཏབྦཾ ¶ . བྷིཀྑུནོཝཱདཀོ ཨཊྛཧཱིཏི ཨཊྛཧངྒེཧི སམནྣཱགཏོ བྷིཀྑུ བྷིཀྑུནོཝཱདཀོ སམྨནྣིཏབྦོ.

ཨེཀསྶ ཚེཛྫནྟི གཱཐཱཡ ནཝསུ ཛནེསུ ཡོ སལཱཀཾ གཱཧེཏྭཱ སངྒྷཾ བྷིནྡཏི, ཏསྶེཝ ཚེཛྫཾ ཧོཏི, དེཝདཏྟོ ཝིཡ པཱརཱཛིཀཾ ཨཱཔཛྫཏི. བྷེདཀཱནུཝཏྟཀཱནཾ ཙཏུནྣཾ ཐུལླཙྩཡཾ ཀོཀཱལིཀཱདཱིནཾ ¶ ཝིཡ, དྷམྨཝཱདཱིནཾ ཙཏུནྣཾ ཨནཱཔཏྟི. ཨིམཱ པན ཨཱཔཏྟིཡོ ཙ ཨནཱཔཏྟིཡོ ཙ སབྦེསཾ ཨེཀཝཏྠུཀཱ སངྒྷབྷེདཝཏྠུཀཱ ཨེཝ.

ནཝ ཨཱགྷཱཏཝཏྠཱུནཱིཏི གཱཐཱཡ ནཝཧཱིཏི ནཝཧི བྷིཀྑཱུཧི སངྒྷོ བྷིཛྫཏི. ཉཏྟིཡཱ ཀརཎཱ ནཝཱཏི ཉཏྟིཡཱ ཀཱཏབྦཱནི ཀམྨཱནི ནཝཱཏི ཨཏྠོ. སེསཾ ཨུཏྟཱནམེཝ.

(༤) ཨཝནྡནཱིཡཔུགྒལཱདིཝཎྞནཱ

༤༧༧. དས པུགྒལཱ ནཱབྷིཝཱདེཏབྦཱཏི སེནཱསནཀྑནྡྷཀེ ཝུཏྟཱ དས ཛནཱ. ཨཉྫལི སཱམཱིཙེན ཙཱཏི སཱམཱིཙིཀམྨེན སདྡྷིཾ ཨཉྫལི ཙ ཏེསཾ ན ཀཱཏབྦོ, ནེཝ པཱནཱིཡཱཔུཙྪནཏཱལཝཎྚགྒཧཎཱདི ཁནྡྷཀཝཏྟཾ ཏེསཾ དསྶེཏབྦཾ, ན ཨཉྫལི པགྒཎྷིཏབྦོཏི ཨཏྠོ. དསནྣཾ དུཀྐཊནྟི ཏེསཾཡེཝ དསནྣཾ ཨེཝཾ ཀརོནྟསྶ དུཀྐཊཾ ཧོཏི. དས ཙཱིཝརདྷཱརཎཱཏི དས དིཝསཱནི ཨཏིརེཀཙཱིཝརསྶ དྷཱརཎཱ ཨནུཉྙཱཏཱཏི ཨཏྠོ.

པཉྩནྣཾ ཝསྶཾཝུཊྛཱནཾ, དཱཏབྦཾ ཨིདྷ ཙཱིཝརནྟི པཉྩནྣཾ སཧདྷམྨིཀཱནཾ སམྨུཁཱཝ དཱཏབྦཾ. སཏྟནྣཾ སནྟེཏི དིསཱཔཀྐནྟཨུམྨཏྟཀཁིཏྟཙིཏྟཝེདནཱཊྚཱནཾ ཏིཎྞཉྩ ཨུཀྑིཏྟཀཱནནྟི ཨིམེསཾ སཏྟནྣཾ སནྟེ པཏིརཱུཔེ གཱཧཀེ པརམྨུཁཱཔི དཱཏབྦཾ. སོལ༹སནྣཾ ན དཱཏབྦནྟི སེསཱནཾ ཙཱིཝརཀྑནྡྷཀེ ཝུཏྟཱནཾ པཎྜཀཱདཱིནཾ སོལ༹སནྣཾ ན དཱཏབྦཾ.

ཀཏིསཏཾ རཏྟིསཏཾ, ཨཱཔཏྟིཡོ ཚཱདཡིཏྭཱནཱཏི ¶ ཀཏིསཏཾ ཨཱཔཏྟིཡོ རཏྟིསཏཾ ཚཱདཡིཏྭཱན. དསསཏཾ རཏྟིསཏཾ, ཨཱཔཏྟིཡོ ཚཱདཡིཏྭཱནཱཏི དསསཏཾ ཨཱཔཏྟིཡོ རཏྟིསཏཾ ཚཱདཡིཏྭཱན. ཨཡཉྷེཏྠ སངྑེཔཏྠོ – ཡོ དིཝསེ སཏཾ སཏཾ སངྒྷཱདིསེསཱཔཏྟིཡོ ཨཱཔཛྫིཏྭཱ དས དས དིཝསེ པཊིཙྪཱདེཏི, ཏེན རཏྟིསཏཾ ཨཱཔཏྟིསཧསྶཾ པཊིཙྪཱདིཏཾ ཧོཏི, སོ སབྦཱཝ ཏཱ ཨཱཔཏྟིཡོ དསཱཧཔཊིཙྪནྣཱཏི ¶ པརིཝཱསཾ ཡཱཙིཏྭཱ དས རཏྟིཡོ ཝསིཏྭཱན མུཙྩེཡྻ པཱརིཝཱསིཀོཏི.

དྭཱདས ཀམྨདོསཱ ཝུཏྟཱཏི ཨཔལོཀནཀམྨཾ ཨདྷམྨེནཝགྒཾ, ཨདྷམྨེནསམགྒཾ, དྷམྨེནཝགྒཾ, ཏཐཱ ¶ ཉཏྟིཀམྨཉཏྟིདུཏིཡཀམྨཉཏྟིཙཏུཏྠཀམྨཱནིཔཱིཏི ཨེཝཾ ཨེཀེཀསྨིཾ ཀམྨེ ཏཡོ ཏཡོ ཀཏྭཱ དྭཱདས ཀམྨདོསཱ ཝུཏྟཱ.

ཙཏསྶོ ཀམྨསམྤཏྟིཡོཏི ཨཔལོཀནཀམྨཾ དྷམྨེནསམགྒཾ, ཏཐཱ སེསཱནིཔཱིཏི ཨེཝཾ ཙཏསྶོ ཀམྨསམྤཏྟིཡོ ཝུཏྟཱ.

ཚ ཀམྨཱནཱིཏི ཨདྷམྨེནཝགྒཀམྨཾ, ཨདྷམྨེནསམགྒཀམྨཾ, དྷམྨཔཏིརཱུཔཀེནཝགྒཀམྨཾ, དྷམྨཔཏིརཱུཔཀེནསམགྒཀམྨཾ, དྷམྨེནཝགྒཀམྨཾ, དྷམྨེནསམགྒཀམྨནྟི ཨེཝཾ ཚ ཀམྨཱནི ཝུཏྟཱནི. ཨེཀེཏྠ དྷམྨིཀཱ ཀཏཱཏི ཨེཀཾ དྷམྨེན སམགྒཀམྨམེཝེཏྠ དྷམྨིཀཾ ཀཏནྟི ཨཏྠོ. དུཏིཡགཱཐཱཝིསྶཛྫནེཔི ཨེཏདེཝ དྷམྨིཀཾ.

ཡཾ དེསིཏཱཏི ཡཱནི དེསིཏཱནི ཝུཏྟཱནི པཀཱསིཏཱནི. ཨནནྟཛིནེནཱཏིཨཱདཱིསུ པརིཡནྟཔརིཙྪེདབྷཱཝརཧིཏཏྟཱ ཨནནྟཾ ཝུཙྩཏི ནིབྦཱནཾ, ཏཾ བྷགཝཏཱ རཉྙཱ སཔཏྟགཎཾ ཨབྷིམདྡིཏྭཱ རཛྫཾ ཝིཡ ཀིལེསགཎཾ ཨབྷིམདྡིཏྭཱ ཛིཏཾ ཝིཛིཏཾ ཨདྷིགཏཾ སམྤཏྟཾ, ཏསྨཱ བྷགཝཱ ‘‘ཨནནྟཛིནོ’’ཏི ཝུཙྩཏི. སྭེཝ ཨིཊྛཱནིཊྛེསུ ནིབྦིཀཱརཏཱཡ ཏཱདི, ཝིཀྑམྦྷནཏདངྒསམུཙྪེདཔཊིཔསྶདྡྷིནིསྶརཎཝིཝེཀསངྑཱཏཾ ཝིཝེཀཔཉྩཀཾ ཨདྡསཱཏི ཝིཝེཀདསྶཱི; ཏེན ཨནནྟཛིནེན ཏཱདིནཱ ཝིཝེཀདསྶིནཱ ཡཱནི ཨཱཔཏྟིཀྑནྡྷཱནི དེསིཏཱནི ཝུཏྟཱནི. ཨེཀེཏྠ སམྨཏི ཝིནཱ སམཐེཧཱིཏི ཨཡམེཏྠ པདསམྦནྡྷོ, ཡཱནི སཏྠཱརཱ སཏྟ ཨཱཔཏྟིཀྑནྡྷཱནི དེསིཏཱནི, ཏཏྠ ཨེཀཱཔི ཨཱཔཏྟི ཝིནཱ སམཐེཧི ན སམྨཏི, ཨཐ ཁོ ཚ སམཐཱ ཙཏྟཱརི ཨདྷིཀརཎཱནཱིཏི སབྦེཔིམེ དྷམྨཱ སམྨུཁཱཝིནཡེན སམྨནྟི, སམཱཡོགཾ གཙྪནྟི. ཨེཏྠ པན ཨེཀོ སམྨུཁཱཝིནཡོཝ ཝིནཱ སམཐེཧི སམྨཏི, སམཐབྷཱཝཾ ¶ གཙྪཏི. ན ཧི ཏསྶ ཨཉྙེན སམཐེན ཝིནཱ ཨནིཔྥཏྟི ནཱམ ཨཏྠི. ཏེན ཝུཏྟཾ – ‘‘ཨེཀེཏྠ སམྨཏི ཝིནཱ སམཐེཧཱི’’ཏི. ཨིམིནཱ ཏཱཝ ཨདྷིཔྤཱཡེན ཨཊྛཀཐཱསུ ཨཏྠོ ཝུཏྟོ. མཡཾ པན ‘‘ཝིནཱ’’ཏི ནིཔཱཏསྶ པཊིསེདྷནམཏྟམཏྠཾ གཧེཏྭཱ ‘‘ཨེཀེཏྠ སམྨཏི ཝིནཱ སམཐེཧཱི’’ཏི ¶ ཨེཏེསུ སཏྟསུ ཨཱཔཏྟིཀྑནྡྷེསུ ཨེཀོ པཱརཱཛིཀཱཔཏྟིཀྑནྡྷོ ཝིནཱ སམཐེཧི སམྨཏཱིཏི ཨེཏམཏྠཾ རོཙེཡྻཱམ. ཝུཏྟམྤི ཙེཏཾ ‘‘ཡཱ སཱ ཨཱཔཏྟི ཨནཝསེསཱ, སཱ ཨཱཔཏྟི ན ཀཏམེན ཨདྷིཀརཎེན ཀཏམམྷི ཋཱནེ ན ཀཏམེན སམཐེན སམྨཏཱི’’ཏི.

ཚཨཱུནདིཡཌྜྷསཏཱཏི ¶ ‘‘ཨིདྷ, ཨུཔཱལི, བྷིཀྑུ ཨདྷམྨཾ དྷམྨོཏི དཱིཔེཏི, ཏསྨིཾ ཨདྷམྨདིཊྛི བྷེདེ ཨདྷམྨདིཊྛི, ཏསྨིཾ ཨདྷམྨདིཊྛི བྷེདེ དྷམྨདིཊྛི, ཏསྨིཾ ཨདྷམྨདིཊྛི བྷེདེ ཝེམཏིཀོ, ཏསྨིཾ དྷམྨདིཊྛི བྷེདེ ཨདྷམྨདིཊྛི, ཏསྨིཾ དྷམྨདིཊྛི བྷེདེ ཝེམཏིཀོ, ཏསྨིཾ ཝེམཏིཀོ བྷེདེ ཨདྷམྨདིཊྛི, ཏསྨིཾ ཝེམཏིཀོ བྷེདེ དྷམྨདིཊྛི, ཏསྨིཾ ཝེམཏིཀོ བྷེདེ ཝེམཏིཀོ’’ཏི ཨེཝཾ ཡཱནི ཨཊྛཱརསནྣཾ བྷེདཀརཝཏྠཱུནཾ ཝསེན ཨཊྛཱརས ཨཊྛཀཱནི སངྒྷབྷེདཀཀྑནྡྷཀེ ཝུཏྟཱནི, ཏེསཾ ཝསེན ཚཨཱུནདིཡཌྜྷསཏཾ ཨཱཔཱཡིཀཱ ཝེདིཏབྦཱ.

ཨཊྛཱརས ཨནཱཔཱཡིཀཱཏི ‘‘ཨིདྷ, ཨུཔཱལི, བྷིཀྑུ ཨདྷམྨཾ དྷམྨོཏི དཱིཔེཏི, ཏསྨིཾ དྷམྨདིཊྛི བྷེདེ དྷམྨདིཊྛི ཨཝིནིདྷཱཡ དིཊྛིཾ ཨཝིནིདྷཱཡ ཁནྟིཾ ཨཝིནིདྷཱཡ རུཙིཾ ཨཝིནིདྷཱཡ བྷཱཝཾ ཨནུསྶཱཝེཏི, སལཱཀཾ གཱཧེཏི ‘ཨཡཾ དྷམྨོ, ཨཡཾ ཝིནཡོ, ཨིདཾ སཏྠུསཱསནཾ, ཨིམཾ གཎྷཐ, ཨིམཾ རོཙེཐཱ’ཏི, ཨཡམྤི ཁོ, ཨུཔཱལི, སངྒྷབྷེདཀོ ན ཨཱཔཱཡིཀོ ན ནེརཡིཀོ ན ཀཔྤཊྛོ ན ཨཏེཀིཙྪོ’’ཏི ཨེཝཾ ཨེཀེཀསྨིཾ ཝཏྠུསྨིཾ ཨེཀེཀཾ ཀཏྭཱ སངྒྷབྷེདཀཀྑནྡྷཀཱཝསཱནེ ཝུཏྟཱ ཨཊྛཱརས ཛནཱ. ཨཊྛཱརས ཨཊྛཀཱ ཚཨཱུནདིཡཌྜྷསཏཝིསྶཛྫནེ ཝུཏྟཱཡེཝ.

(༥) སོལ༹སཀམྨཱདིཝཎྞནཱ

༤༧༨. ཀཏི ཀམྨཱནཱིཏིཨཱདཱིནཾ སབྦགཱཐཱནཾ ཝིསྶཛྫནཾ ཨུཏྟཱནམེཝཱཏི.

ཨཔརདུཏིཡགཱཐཱསངྒཎིཀཝཎྞནཱ ནིཊྛིཏཱ.

སེདམོཙནགཱཐཱ

(༡) ཨཝིཔྤཝཱསཔཉྷཱཝཎྞནཱ

༤༧༩. སེདམོཙནགཱཐཱསུ ¶ ¶ ¶ ཨསཾཝཱསོཏི ཨུཔོསཐཔཝཱརཎཱདིནཱ སཾཝཱསེན ཨསཾཝཱསོ. སམྦྷོགོ ཨེཀཙྩོ ཏཧིཾ ན ལབྦྷཏཱིཏི ཨཀཔྤིཡསམྦྷོགོ ན ལབྦྷཏི, ནཧཱཔནབྷོཛནཱདིཔཊིཛགྒནཾ པན མཱཏརཱཡེཝ ཀཱཏུཾ ལབྦྷཏི. ཨཝིཔྤཝཱསེན ཨནཱཔཏྟཱིཏི སཧགཱརསེཡྻཱཡ ཨནཱཔཏྟི. པཉྷཱ མེསཱ ཀུསལེཧི ཙིནྟིཏཱཏི ཨེསཱ པཉྷཱ ཀུསལེཧི པཎྜིཏེཧི ཙིནྟིཏཱ. ཨསྶཱ ཝིསྶཛྫནཾ དཱརཀམཱཏུཡཱ བྷིཀྑུནིཡཱ ཝེདིཏབྦཾ, ཏསྶཱ ཧི པུཏྟཾ སནྡྷཱཡེཏཾ ཝུཏྟནྟི.

ཨཝིསྶཛྫིཏགཱཐཱ གརུབྷཎྜཾ སནྡྷཱཡ ཝུཏྟཱ, ཨཏྠོ པནསྶཱ གརུབྷཎྜཝིནིཙྪཡེ ཝུཏྟོཡེཝ.

དས པུགྒལེ ན ཝདཱམཱིཏི སེནཱསནཀྑནྡྷཀེ ཝུཏྟེ དས པུགྒལེ ན ཝདཱམི. ཨེཀཱདས ཝིཝཛྫིཡཱཏི ཡེ མཧཱཁནྡྷཀེ ཨེཀཱདས ཝིཝཛྫནཱིཡཔུགྒལཱ ཝུཏྟཱ, ཏེཔི ན ཝདཱམི. ཨཡཾ པཉྷཱ ནགྒཾ བྷིཀྑུཾ སནྡྷཱཡ ཝུཏྟཱ.

ཀཐཾ ནུ སིཀྑཱཡ ཨསཱདྷཱརཎོཏི པཉྷཱ ནཧཱཔིཏཔུབྦཀཾ བྷིཀྑུཾ སནྡྷཱཡ ཝུཏྟཱ. ཨཡཉྷི ཁུརབྷཎྜཾ པརིཧརིཏུཾ ན ལབྷཏི, ཨཉྙེ ལབྷནྟི; ཏསྨཱ སིཀྑཱཡ ཨསཱདྷཱརཎོ.

ཏཾ པུགྒལཾ ཀཏམཾ ཝདནྟི བུདྡྷཱཏི ཨཡཾ པཉྷཱ ནིམྨིཏབུདྡྷཾ སནྡྷཱཡ ཝུཏྟཱ.

ཨདྷོནཱབྷིཾ ¶ ཝིཝཛྫིཡཱཏི ཨདྷོནཱབྷིཾ ཝིཝཛྫེཏྭཱ. ཨཡཾ པཉྷཱ ཡཾ ཏཾ ཨསཱིསཀཾ ཀབནྡྷཾ, ཡསྶ ཨུརེ ཨཀྑཱིནི ཙེཝ མུཁཉྩ ཧོཏི, ཏཾ སནྡྷཱཡ ཝུཏྟཱ.

བྷིཀྑུ སཉྙཱཙིཀཱཡ ཀུཊིནྟི ཨཡཾ པཉྷཱ ཏིཎཙྪཱདནཾ ཀུཊིཾ སནྡྷཱཡ ཝུཏྟཱ. དུཏིཡཔཉྷཱ སབྦམཏྟིཀཱམཡཾ ཀུཊིཾ སནྡྷཱཡ ཝུཏྟཱ.

ཨཱཔཛྫེཡྻ གརུཀཾ ཚེཛྫཝཏྠུནྟི ཨཡཾ པཉྷཱ ཝཛྫཔཊིཙྪཱདིཀཾ བྷིཀྑུནིཾ སནྡྷཱཡ ཝུཏྟཱ. དུཏིཡཔཉྷཱ པཎྜཀཱདཡོ ཨབྷབྦཔུགྒལེ སནྡྷཱཡ ཝུཏྟཱ. ཨེཀཱདསཔི ཧི ཏེ གིཧིབྷཱཝེཡེཝ པཱརཱཛིཀཾ པཏྟཱ.

ཝཱཙཱཏི ¶ ཝཱཙཱཡ ཨནཱལཔནྟོ. གིརཾ ནོ ཙ པརེ བྷཎེཡྻཱཏི ‘‘ཨིཏི ཨིམེ སོསྶནྟཱི’’ཏི པརཔུགྒལེ སནྡྷཱཡ སདྡམྤི ན ནིཙྪཱརེཡྻ. ཨཡཾ པཉྷཱ ‘‘སནྟིཾ ཨཱཔཏྟིཾ ནཱཝིཀརེཡྻ, སམྤཛཱནམུསཱཝཱདསྶ ཧོཏཱི’’ཏི ཨིམཾ མུསཱཝཱདཾ སནྡྷཱཡ ཝུཏྟཱ. ཏསྶ ཧི བྷིཀྑུནོ ཨདྷམྨིཀཱཡ པཊིཉྙཱཡ ཏུཎྷཱིབྷཱུཏསྶ ནིསིནྣསྶ མནོདྭཱརེ ཨཱཔཏྟི ནཱམ ནཏྠི. ཡསྨཱ པན ཨཱཝིཀཱཏབྦཾ ན ཨཱཝིཀརོཏི, ཏེནསྶ ¶ ཝཙཱིདྭཱརེ ཨཀིརིཡཏོ ཨཡཾ ཨཱཔཏྟི སམུཊྛཱཏཱིཏི ཝེདིཏབྦཱ.

སངྒྷཱདིསེསཱ ཙཏུརོཏི ཨཡཾ པཉྷཱ ཨརུཎུགྒེ གཱམནྟརཔརིཡཱཔནྣཾ ནདིཔཱརཾ ཨོཀྐནྟབྷིཀྑུནིཾ སནྡྷཱཡ ཝུཏྟཱ, སཱ ཧི སཀགཱམཏོ པཙྩཱུསསམཡེ ནིཀྑམིཏྭཱ ཨརུཎུགྒམནཀཱལེ ཝུཏྟཔྤཀཱརཾ ནདིཔཱརཾ ཨོཀྐནྟམཏྟཱཝ རཏྟིཝིཔྤཝཱསགཱམནྟརནདིཔཱརགཎམྷཱཨོཧཱིཡནལཀྑཎེན ཨེཀཔྤཧཱརེནེཝ ཙཏུརོ སངྒྷཱདིསེསེ ཨཱཔཛྫཏི.

སིཡཱ ཨཱཔཏྟིཡོ ནཱནཱཏི ཨཡཾ པཉྷཱ ཨེཀཏོཨུཔསམྤནྣཱ དྭེ བྷིཀྑུནིཡོ སནྡྷཱཡ ཝུཏྟཱ. ཏཱསུ ཧི བྷིཀྑཱུནཾ སནྟིཀེ ཨེཀཏོཨུཔསམྤནྣཱཡ ཧཏྠཏོ གཎྷནྟསྶ པཱཙིཏྟིཡཾ, བྷིཀྑུནཱིནཾ སནྟིཀེ ཨེཀཏོཨུཔསམྤནྣཱཡ ཧཏྠཏོ གཎྷནྟསྶ དུཀྐཊཾ.

ཙཏུརོ ཛནཱ སཾཝིདྷཱཡཱཏི ཨཱཙརིཡོ ཙ ཏཡོ ཙ ཨནྟེཝཱསིཀཱ ཚམཱསཀཾ བྷཎྜཾ ཨཝཧརིཾསུ, ཨཱཙརིཡསྶ སཱཧཏྠིཀཱ ཏཡོ མཱསཀཱ, ཨཱཎཏྟིཡཱཔི ཏཡོཝ ཏསྨཱ ཐུལླཙྩཡཾ ཨཱཔཛྫཏི ¶ , ཨིཏརེསཾ སཱཧཏྠིཀོ ཨེཀེཀོ, ཨཱཎཏྟིཀཱ པཉྩཱཏི ཏསྨཱ པཱརཱཛིཀཾ ཨཱཔཛྫིཾསུ. ཨཡམེཏྠ སངྑེཔོ. ཝིཏྠཱརོ པན ཨདིནྣཱདཱནཔཱརཱཛིཀེ སཾཝིདཱཝཧཱརཝཎྞནཱཡཾ ཝུཏྟོ.

(༢) པཱརཱཛིཀཱདིཔཉྷཱཝཎྞནཱ

༤༨༠. ཚིདྡཾ ཏསྨིཾ གྷརེ ནཏྠཱིཏི ཨཡཾ པཉྷཱ དུསྶཀུཊིཨཱདཱིནི སནྠཏཔེཡྻཱལཉྩ སནྡྷཱཡ ཝུཏྟཱ.

ཏེལཾ མདྷུཾ ཕཱཎིཏནྟི གཱཐཱ ལིངྒཔརིཝཏྟཾ སནྡྷཱཡ ཝུཏྟཱ.

ནིསྶགྒིཡེནཱཏི གཱཐཱ པརིཎཱམནཾ སནྡྷཱཡ ཝུཏྟཱ. ཡོ ཧི སངྒྷསྶ པརིཎཏལཱབྷཏོ ཨེཀཾ ཙཱིཝརཾ ཨཏྟནོ, ཨེཀཾ ཨཉྙསྶཱཏི དྭེ ཙཱིཝརཱནི ‘‘ཨེཀཾ ¶ མཡ྄ཧཾ, ཨེཀཾ ཏསྶ དེཧཱི’’ཏི ཨེཀཔཡཨོགེན པརིཎཱམེཏི, སོ ནིསྶགྒིཡཔཱཙིཏྟིཡཉྩེཝ སུདྡྷིཀཔཱཙིཏྟིཡཉྩ ཨེཀཏོ ཨཱཔཛྫཏི.

ཀམྨཉྩ ཏཾ ཀུཔྤེཡྻ ཝགྒཔཙྩཡཱཏི ཨཡཾ པཉྷཱ དྭཱདསཡོཛནཔམཱཎེསུ བཱརཱཎསིཨཱདཱིསུ ནགརེསུ གཱམསཱིམཾ སནྡྷཱཡ ཝུཏྟཱ.

པདཝཱིཏིཧཱརམཏྟེནཱཏི གཱཐཱ སཉྩརིཏྟཾ སནྡྷཱཡ ཝུཏྟཱ, ཨཏྠོཔི ཙསྶཱ སཉྩརིཏྟཝཎྞནཱཡམེཝ ཝུཏྟོ.

སབྦཱནི ཏཱནི ནིསྶགྒིཡཱནཱིཏི ཨཡཾ པཉྷཱ ཨཉྙཱཏིཀཱཡ བྷིཀྑུནིཡཱ དྷོཝཱཔནཾ སནྡྷཱཡ ཝུཏྟཱ. སཙེ ཧི ཏིཎྞམྤི ཙཱིཝརཱནཾ ཀཱཀཨཱུཧདནཾ ཝཱ ཀདྡམམཀྑིཏཾ ཝཱ ཀཎྞཾ གཧེཏྭཱ བྷིཀྑུནཱི ཨུདཀེན དྷོཝཏི, བྷིཀྑུསྶ ཀཱཡགཏཱནེཝ ནིསྶགྒིཡཱནི ཧོནྟི.

སརཎགམནམྤི ན ཏསྶ ཨཏྠཱིཏི སརཎགམནཨུཔསམྤདཱཔི ནཏྠི. ཨཡཾ པན ¶ པཉྷཱ མཧཱཔཛཱཔཏིཡཱ ཨུཔསམྤདཾ སནྡྷཱཡ ཝུཏྟཱ.

ཧནེཡྻ ¶ ཨནརིཡཾ མནྡོཏི ཏཉྷི ཨིཏྠིཾ ཝཱ པུརིསཾ ཝཱ ཨནརིཡཾ ཧནེཡྻ. ཨཡཾ པཉྷཱ ལིངྒཔརིཝཏྟེན ཨིཏྠིབྷཱུཏཾ པིཏརཾ པུརིསབྷཱུཏཉྩ མཱཏརཾ སནྡྷཱཡ ཝུཏྟཱ.

ན ཏེནཱནནྟརཾ ཕུསེཏི ཨཡཾ པཉྷཱ མིགསིངྒཏཱཔསསཱིཧཀུམཱརཱདཱིནཾ ཝིཡ ཏིརཙྪཱནམཱཏཱཔིཏརོ སནྡྷཱཡ ཝུཏྟཱ.

ཨཙོདཡིཏྭཱཏི གཱཐཱ དཱུཏེནུཔསམྤདཾ སནྡྷཱཡ ཝུཏྟཱ. ཙོདཡིཏྭཱཏི གཱཐཱ པཎྜཀཱདཱིནཾ ཨུཔསམྤདཾ སནྡྷཱཡ ཝུཏྟཱ. ཀུརུནྡིཡཾ པན ‘‘པཋམགཱཐཱ ཨཊྛ ཨསམྨུཁཱཀམྨཱནི, དུཏིཡཱ ཨནཱཔཏྟིཀསྶ ཀམྨཾ སནྡྷཱཡ ཝུཏྟཱ’’ཏི ཨཱགཏཾ.

ཚིནྡནྟསྶ ཨཱཔཏྟཱིཏི ཝནཔྤཏིཾ ཚིནྡནྟསྶ པཱརཱཛིཀཾ, ཏིཎལཏཱདིཾ ཚིནྡནྟསྶ པཱཙིཏྟིཡཾ, ཨངྒཛཱཏཾ ཚིནྡནྟསྶ ཐུལླཙྩཡཾ. ཚིནྡནྟསྶ ཨནཱཔཏྟཱིཏི ཀེསེ ཙ ནཁེ ཙ ཚིནྡནྟསྶ ཨནཱཔཏྟི. ཚཱདེནྟསྶ ཨཱཔཏྟཱིཏི ཨཏྟནོ ཨཱཔཏྟིཾ ཚཱདེནྟསྶ ཨཉྙེསཾ ཝཱ ཨཱཔཏྟིཾ. ཚཱདེནྟསྶ ཨནཱཔཏྟཱིཏི གེཧཱདཱིནི ཚཱདེནྟསྶ ཨནཱཔཏྟི.

སཙྩཾ ¶ བྷཎནྟོཏི གཱཐཱཡ ‘‘སིཁརཎཱིསི ཨུབྷཏོབྱཉྫནཱསཱི’’ཏི སཙྩཾ བྷཎནྟོ གརུཀཾ ཨཱཔཛྫཏི, སམྤཛཱནམུསཱཝཱདེ པན མུསཱ བྷཱསཏོ ལཧུཀཱཔཏྟི ཧོཏི, ཨབྷཱུཏཱརོཙནེ མུསཱ བྷཎནྟོ གརུཀཾ ཨཱཔཛྫཏི, བྷཱུཏཱརོཙནེ སཙྩཾ བྷཱསཏོ ལཧུཀཱཔཏྟི ཧོཏཱིཏི.

(༣) པཱཙིཏྟིཡཱདིཔཉྷཱཝཎྞནཱ

༤༨༡. ཨདྷིཊྛིཏནྟི གཱཐཱ ནིསྶགྒིཡཙཱིཝརཾ ཨནིསྶཛྫིཏྭཱ པརིབྷུཉྫནྟཾ སནྡྷཱཡ ཝུཏྟཱ.

ཨཏྠངྒཏེ སཱུརིཡེཏི གཱཐཱ རོམནྠཀཾ སནྡྷཱཡ ཝུཏྟཱ.

ན རཏྟཙིཏྟོཏི གཱཐཱཡ ཨཡམཏྠོ – རཏྟཙིཏྟོ མེཐུནདྷམྨཔཱརཱཛིཀཾ ཨཱཔཛྫཏི. ཐེཡྻཙིཏྟོ ཨདིནྣཱདཱནཔཱརཱཛིཀཾ, པརཾ མརཎཱཡ ཙེཏེནྟོ མནུསྶཝིགྒཧཔཱརཱཛིཀཾ, སངྒྷབྷེདཀོ པན ¶ ན རཏྟཙིཏྟོ ན ཙ པན ཐེཡྻཙིཏྟོ ན ཙཱཔི སོ པརཾ མརཎཱཡ ཙེཏཡི, སལཱཀཾ པནསྶ དེནྟསྶ ཧོཏི ཚེཛྫཾ, པཱརཱཛིཀཾ ཧོཏི, སལཱཀཾ པཊིགྒཎྷནྟསྶ བྷེདཀཱནུཝཏྟཀསྶ ཐུལླཙྩཡཾ.

གཙྪེཡྻ ཨཌྜྷཡོཛནནྟི ཨཡཾ པཉྷཱ སུཔྤཏིཊྛིཏནིགྲོདྷསདིསཾ ཨེཀཀུལསྶ རུཀྑམཱུལཾ སནྡྷཱཡ ཝུཏྟཱ.

ཀཱཡིཀཱནཱིཏི ཨཡཾ གཱཐཱ སམྦཧུལཱནཾ ཨིཏྠཱིནཾ ཀེསེ ཝཱ ཨངྒུལིཡོ ཝཱ ཨེཀཏོ གཎྷནྟཾ སནྡྷཱཡ ཝུཏྟཱ.

ཝཱཙསིཀཱནཱིཏི ཨཡཾ གཱཐཱ ‘‘སབྦཱ ཏུམྷེ སིཁརཎིཡོ’’ཏིཨཱདིནཱ ནཡེན དུཊྛུལླབྷཱཎིཾ སནྡྷཱཡ ཝུཏྟཱ.

ཏིསྶིཏྠིཡོ མེཐུནཾ ཏཾ ན སེཝེཏི ཏིསྶོ ཨིཏྠིཡོ ཝུཏྟཱ, ཏཱསུཔི ཡཾ ཏཾ མེཐུནཾ ནཱམ, ཏཾ ན ¶ སེཝཏི. ཏཡོ པུརིསེཏི ཏཡོ པུརིསེཔི ཨུཔགནྟྭཱ མེཐུནཾ ན སེཝཏི. ཏཡོ ཨནརིཡཔཎྜཀེཏི ཨུབྷཏོབྱཉྫནསངྑཱཏེ ཏཡོ ཨནརིཡེ ཏཡོ ཙ པཎྜཀེཏི ཨིམེཔི ཚ ཛནེ ཨུཔགནྟྭཱ མེཐུནཾ ན སེཝཏི. ན ཙཱཙརེ མེཐུནཾ བྱཉྫནསྨིནྟི ཨནུལོམཔཱརཱཛིཀཝསེནཔི མེཐུནཾ ནཱཙརཏི. ཚེཛྫཾ སིཡཱ མེཐུནདྷམྨཔཙྩཡཱཏི སིཡཱ མེཐུནདྷམྨཔཙྩཡཱ པཱརཱཛིཀནྟི. ཨཡཾ པཉྷཱ ཨཊྛཝཏྠུཀཾ སནྡྷཱཡ ¶ ཝུཏྟཱ, ཏསྶཱ ཧི མེཐུནདྷམྨསྶ པུབྦབྷཱགཾ ཀཱཡསཾསགྒཾ ཨཱཔཛྫིཏུཾ ཝཱཡམནྟིཡཱ མེཐུནདྷམྨཔཙྩཡཱ ཚེཛྫཾ ཧོཏི.

མཱཏརཾ ཙཱིཝརནྟི ཨཡཾ གཱཐཱ པིཊྛིསམཡེ ཝསྶིཀསཱཊིཀཏྠཾ སཏུཔྤཱདཀརཎཾ སནྡྷཱཡ ཝུཏྟཱ. ཝིནིཙྪཡོ པནསྶཱ ཝསྶིཀསཱཊིཀསིཀྑཱཔདཝཎྞནཱཡམེཝ ཝུཏྟོ.

ཀུདྡྷོ ཨཱརཱདྷཀོ ཧོཏཱིཏི གཱཐཱ ཏིཏྠིཡཝཏྟཾ སནྡྷཱཡ ཝུཏྟཱ. ཏིཏྠིཡོ ཧི ཝཏྟཾ པཱུརཡམཱནོ ཏིཏྠིཡཱནཾ ཝཎྞེ བྷཉྙམཱནེ ཀུདྡྷོ ཨཱརཱདྷཀོ ཧོཏི, ཝཏྠུཏྟཡསྶ ཝཎྞེ བྷཉྙམཱནེ ཀུདྡྷོ གཱརཡ྄ཧོ ཧོཏཱིཏི ཏཏྠེཝསྶཱ ཝིཏྠཱརོ ཝུཏྟོ. དུཏིཡགཱཐཱཔི ཏམེཝ སནྡྷཱཡ ཝུཏྟཱ.

སངྒྷཱདིསེསནྟིཨཱདི ¶ གཱཐཱ ཡཱ བྷིཀྑུནཱི ཨཝསྶུཏཱཝ ཨཝསྶུཏསྶ པུརིསསྶ ཧཏྠཏོ པིཎྜཔཱཏཾ གཧེཏྭཱ མནུསྶམཾསལསུཎཔཎཱིཏབྷོཛནསེསཨཀཔྤིཡམཾསེཧི སདྡྷིཾ ཨོམདྡིཏྭཱ ཨཛ྄ཛྷོཧརཏི, ཏཾ སནྡྷཱཡ ཝུཏྟཱ.

ཨེཀོ ཨུཔསམྤནྣོ ཨེཀོ ཨནུཔསམྤནྣོཏི གཱཐཱ ཨཱཀཱསགཏཾ སནྡྷཱཡ ཝུཏྟཱ. སཙེ ཧི དྭཱིསུ སཱམཎེརེསུ ཨེཀོ ཨིདྡྷིཡཱ ཀེསགྒམཏྟམྤི པཐཝིཾ མུཉྩིཏྭཱ ནིསིནྣོ ཧོཏི, སོ ཨནུཔསམྤནྣོ ནཱམ ཧོཏི. སངྒྷེནཱཔི ཨཱཀཱསེ ནིསཱིདིཏྭཱ བྷཱུམིགཏསྶ ཀམྨཾ ན ཀཱཏབྦཾ. སཙེ ཀརོཏི, ཀུཔྤཏི.

ཨཀཔྤཀཏནྟི གཱཐཱ ཨཙྪིནྣཙཱིཝརཀཾ བྷིཀྑུཾ སནྡྷཱཡ ཝུཏྟཱ. ཏསྨིཾཡེཝ ཙསྶཱ སིཀྑཱཔདེ ཝིཏྠཱརེན ཝིནིཙྪཡོཔི ཝུཏྟོ.

ན དེཏི ན པཊིགྒཎྷཱཏཱིཏི ནཱཔི ཨུཡྻོཛིཀཱ དེཏི, ན ཨུཡྻོཛིཏཱ ཏསྶཱ ཧཏྠཏོ གཎྷཱཏི. པཊིགྒཧོ ཏེན ན ཝིཛྫཏཱིཏི ཏེནེཝ ཀཱརཎེན ཨུཡྻོཛིཀཱཡ ཧཏྠཏོ ཨུཡྻོཛིཏཱཡ པཊིགྒཧོ ན ཝིཛྫཏི. ཨཱཔཛྫཏི གརུཀནྟི ཨེཝཾ སནྟེཔི ཨཝསྶུཏསྶ ཧཏྠཏོ པིཎྜཔཱཏགྒཧཎེ ཨུཡྻོཛེནྟཱི སངྒྷཱདིསེསཱཔཏྟིཾ ཨཱཔཛྫཏི. ཏཉྩ པརིབྷོགཔཙྩཡཱཏི ཏཉྩ པན ཨཱཔཏྟིཾ ཨཱཔཛྫམཱནཱ ཏསྶཱ ཨུཡྻོཛིཏཱཡ པརིབྷོགཔཙྩཡཱ ཨཱཔཛྫཏི ¶ ¶ . ཏསྶཱ ཧི བྷོཛནཔརིཡོསཱནེ ཨུཡྻོཛིཀཱཡ སངྒྷཱདིསེསོ ཧོཏཱིཏི. དུཏིཡགཱཐཱ ཏསྶཱཡེཝ ཨུདཀདནྟཔོནགྒཧཎེ ཨུཡྻོཛནཾ སནྡྷཱཡ ཝུཏྟཱ.

ན བྷིཀྑུནཱི ནོ ཙ ཕུསེཡྻ ཝཛྫནྟི སཏྟརསཀེསུ ཧི ཨཉྙཏརཾ ཨཱཔཏྟིཾ ཨཱཔཛྫིཏྭཱ ཨནཱདརིཡེན ཚཱདཡམཱནཱཔི བྷིཀྑུནཱི ཚཱདནཔཙྩཡཱ ཝཛྫཾ ན ཕུསཏི, ཨཉྙཾ ནཝཾ ཨཱཔཏྟིཾ ནཱཔཛྫཏི, པཊིཙྪནྣཱཡ ཝཱ ཨཔྤཊིཙྪནྣཱཡ ཝཱ ཨཱཔཏྟིཡཱ པཀྑམཱནཏྟམེཝ ལབྷཏི. ཨཡཾ པན བྷིཀྑུནཱིཔི ན ཧོཏི, སཱཝསེསཉྩ གརུཀཾ ཨཱཔཛྫིཏྭཱ ཚཱདེཏྭཱ ཝཛྫཾ ན ཕུསཏི. པཉྷཱ མེསཱ ཀུསལེཧི ཙིནྟིཏཱཏི ཨཡཾ ཀིར པཉྷཱ ཨུཀྑིཏྟཀབྷིཀྑུཾ སནྡྷཱཡ ཝུཏྟཱ. ཏེན ཧི སདྡྷིཾ ཝིནཡཀམྨཾ ནཏྠི, ཏསྨཱ སོ སངྒྷཱདིསེསཾ ཨཱཔཛྫིཏྭཱ ཚཱདེནྟོ ཝཛྫཾ ན ཕུསཏཱིཏི.

སེདམོཙནགཱཐཱཝཎྞནཱ ནིཊྛིཏཱ.

པཉྩཝགྒོ

ཀམྨཝགྒཝཎྞནཱ

༤༨༢. ཀམྨཝགྒེ ¶ ¶ ཙཏུནྣཾ ཀམྨཱནཾ ནཱནཱཀརཎཾ སམཐཀྑནྡྷཀེ ཝུཏྟམེཝ. ཀིཉྩཱཔི ཝུཏྟཾ, ཨཐ ཁོ ཨཡཾ ཀམྨཝིནིཙྪཡོ ནཱམ ཨཱདིཏོ པཊྛཱཡ ཝུཙྩམཱནོ པཱཀཊོ ཧོཏི, ཏསྨཱ ཨཱདིཏོ པཊྛཱཡེཝེཏྠ ཝཏྟབྦཾ ཝདིསྶཱམ. ཙཏྟཱརཱིཏི ཀམྨཱནཾ གཎནཔརིཙྪེདཝཙནམེཏཾ. ཀམྨཱནཱིཏི པརིཙྪིནྣཀམྨནིདསྶནཾ. ཨཔལོཀནཀམྨཾ ནཱམ སཱིམཊྛཀསངྒྷཾ སོདྷེཏྭཱ ཚནྡཱརཧཱནཾ ཚནྡཾ ཨཱཧརིཏྭཱ སམགྒསྶ སངྒྷསྶ ཨནུམཏིཡཱ ཏིཀྑཏྟུཾ སཱཝེཏྭཱ ཀཏྟབྦཾ ཀམྨཾ. ཉཏྟིཀམྨཾ ནཱམ ཝུཏྟནཡེནེཝ སམགྒསྶ སངྒྷསྶ ཨནུམཏིཡཱ ཨེཀཱཡ ཉཏྟིཡཱ ཀཏྟབྦཾ ཀམྨཾ. ཉཏྟིདུཏིཡཀམྨཾ ནཱམ ཝུཏྟནཡེནེཝ སམགྒསྶ སངྒྷསྶ ཨནུམཏིཡཱ ཨེཀཱཡ ཉཏྟིཡཱ ཨེཀཱཡ ཙ ཨནུསྶཱཝནཱཡཱཏི ཨེཝཾ ཉཏྟིདུཏིཡཱཡ ཨནུསྶཱཝནཱཡ ཀཏྟབྦཾ ཀམྨཾ. ཉཏྟིཙཏུཏྠཀམྨཾ ནཱམ ཝུཏྟནཡེནེཝ སམགྒསྶ སངྒྷསྶ ཨནུམཏིཡཱ ཨེཀཱཡ ཉཏྟིཡཱ ཏཱིཧི ཙ ཨནུསྶཱཝནཱཧཱིཏི ཨེཝཾ ཉཏྟིཙཏུཏྠཱཧི ཏཱིཧི ཨནུསྶཱཝནཱཧི ཀཏྟབྦཾ ཀམྨཾ.

ཏཏྠ ཨཔལོཀནཀམྨཾ ཨཔལོཀེཏྭཱཝ ཀཱཏབྦཾ, ཉཏྟིཀམྨཱདིཝསེན ན ཀཱཏབྦཾ. ཉཏྟིཀམྨམྤི ཨེཀཾ ཉཏྟིཾ ཋཔེཏྭཱཝ ཀཱཏབྦཾ, ཨཔལོཀནཀམྨཱདིཝསེན ¶ ན ཀཱཏབྦཾ. ཉཏྟིདུཏིཡཀམྨཾ པན ཨཔལོཀེཏྭཱ ཀཱཏབྦམྤི ཨཏྠི, ཨཀཱཏབྦམྤི ཨཏྠི.

ཏཏྠ སཱིམཱསམྨུཏི, སཱིམཱསམཱུཧནནཾ, ཀཐིནདཱནཾ, ཀཐིནུདྡྷཱརོ, ཀུཊིཝཏྠུདེསནཱ, ཝིཧཱརཝཏྠུདེསནཱཏི ཨིམཱནི ཚ ཀམྨཱནི གརུཀཱནི ཨཔལོཀེཏྭཱ ཀཱཏུཾ ན ཝཊྚནྟི, ཉཏྟིདུཏིཡཀམྨཝཱཙཾ སཱཝེཏྭཱཝ ཀཱཏབྦཱནི. ཨཝསེསཱ ཏེརས སམྨུཏིཡོ སེནཱསནགྒཱཧཀམཏཀཙཱིཝརདཱནཱདིསམྨུཏིཡོ ¶ ཙཱཏི ཨེཏཱནི ལཧུཀཀམྨཱནི ཨཔལོཀེཏྭཱཔི ཀཱཏུཾ ཝཊྚནྟི, ཉཏྟིཀམྨ-ཉཏྟིཙཏུཏྠཀམྨཝསེན པན ན ཀཱཏབྦམེཝ. ཉཏྟིཙཏུཏྠཀམྨཝསེན ཀཡིརམཱནཾ དལ༹ྷཏརཾ ཧོཏི, ཏསྨཱ ཀཱཏབྦནྟི ཨེཀཙྩེ ཝདནྟི. ཨེཝཾ པན སཏི ཀམྨསངྐརོ ཧོཏི, ཏསྨཱ ན ཀཱཏབྦནྟི པཊིཀྑིཏྟམེཝ. སཙེ པན ཨཀྑརཔརིཧཱིནཾ ཝཱ པདཔརིཧཱིནཾ ཝཱ དུརུཏྟཔདཾ ཝཱ ཧོཏི ¶ , ཏསྶ སོདྷནཏྠཾ པུནཔྤུནཾ ཝཏྟུཾ ཝཊྚཏི. ཨིདཾ ཨཀུཔྤཀམྨསྶ དལ༹ྷཱིཀམྨཾ ཧོཏི, ཀུཔྤཀམྨེ ཀམྨཾ ཧུཏྭཱ ཏིཊྛཏི.

ཉཏྟིཙཏུཏྠཀམྨཾ ཉཏྟིཉྩ ཏིསྶོ ཙ ཀམྨཝཱཙཱཡོ སཱཝེཏྭཱཝ ཀཱཏབྦཾ, ཨཔལོཀནཀམྨཱདིཝསེན ན ཀཱཏབྦཾ. པཉྩཧཱཀཱརེཧི ཝིཔཛྫནྟཱིཏི པཉྩཧི ཀཱརཎེཧི ཝིཔཛྫནྟི.

༤༨༣. སམྨུཁཱཀརཎཱིཡཾ ཀམྨཾ ཨསམྨུཁཱ ཀརོཏི, ཝཏྠུཝིཔནྣཾ ཨདྷམྨཀམྨནྟི ཨེཏྠ ཨཏྠི ཀམྨཾ སམྨུཁཱཀརཎཱིཡཾ; ཨཏྠི ཨསམྨུཁཱཀརཎཱིཡཾ; ཏཏྠ ཨསམྨུཁཱཀརཎཱིཡཾ ནཱམ དཱུཏེནུཔསམྤདཱ, པཏྟནིཀྐུཛྫནཾ, པཏྟུཀྐུཛྫནཾ, ཨུམྨཏྟཀསྶ བྷིཀྑུནོ ཨུམྨཏྟཀསམྨུཏི, སེཀྑཱནཾ ཀུལཱནཾ སེཀྑསམྨུཏི, ཚནྣསྶ བྷིཀྑུནོ བྲཧྨདཎྜོ, དེཝདཏྟསྶ པཀཱསནཱིཡཀམྨཾ, ཨཔྤསཱདནཱིཡཾ དསྶེནྟསྶ བྷིཀྑུནོ བྷིཀྑུནིསངྒྷེན ཀཱཏབྦཾ ཨཝནྡནཱིཡཀམྨནྟི ཨཊྛཝིདྷཾ ཧོཏི, ཏཾ སབྦཾ ཏཏྠ ཏཏྠ ཝུཏྟནཡེནེཝ ཝེདིཏབྦཾ. ཨིདཾ ཨཊྛཝིདྷམྤི ཀམྨཾ ཨསམྨུཁཱ ཀཏཾ སུཀཏཾ ཧོཏི ཨཀུཔྤཾ.

སེསཱནི སབྦཀམྨཱནི སམྨུཁཱ ཨེཝ ཀཱཏབྦཱནི – སངྒྷསམྨུཁཏཱ, དྷམྨསམྨུཁཏཱ, ཝིནཡསམྨུཁཏཱ, པུགྒལསམྨུཁཏཱཏི ཨིམཾ ཙཏུབྦིདྷཾ སམྨུཁཱཝིནཡཾ ཨུཔནེཏྭཱཝ ཀཱཏབྦཱནི. ཨེཝཾ ཀཏཱནི ཧི སུཀཏཱནི ཧོནྟི. ཨེཝཾ ཨཀཏཱནི པནེཏཱནི ཨིམཾ སམྨུཁཱཝིནཡསངྑཱཏཾ ཝཏྠུཾ ཝིནཱ ཀཏཏྟཱ ཝཏྠུཝིཔནྣཱནི ནཱམ ཧོནྟི. ཏེན ཝུཏྟཾ – ‘‘སམྨུཁཱཀརཎཱིཡཾ ¶ ཀམྨཾ ཨསམྨུཁཱ ཀརོཏི, ཝཏྠུཝིཔནྣཾ ཨདྷམྨཀམྨ’’ནྟི.

པཊིཔུཙྪཱཀརཎཱིཡཱདཱིསུཔི པཊིཔུཙྪཱདིཀརཎམེཝ ཝཏྠུ, ཏཾ ཝཏྠུཾ ཝིནཱ ཀཏཏྟཱ ཏེསམྤི ཝཏྠུཝིཔནྣཏཱ ཝེདིཏབྦཱ. ཨིདཾ པནེཏྠ ཝཙནཏྠམཏྟཾ. པཊིཔུཙྪཱ ཀརཎཱིཡཾ ཨཔྤཊིཔུཙྪཱ ཀརོཏཱིཏི པུཙྪིཏྭཱ ཙོདེཏྭཱ སཱརེཏྭཱ ཀཱཏབྦཾ ཨཔུཙྪིཏྭཱ ཨཙོདེཏྭཱ ཨསཱརེཏྭཱ ཀརོཏི. པཊིཉྙཱཡ ཀརཎཱིཡཾ ¶ ཨཔྤཊིཉྙཱཡ ཀརོཏཱིཏི པཊིཉྙཾ ཨཱརོཔེཏྭཱ ཡཐཱདིནྣཱཡ པཊིཉྙཱཡ ཀཱཏབྦཾ ཨཔྤཊིཉྙཱཡ ཀརོནྟསྶ ཝིཔྤལཔནྟསྶ བལཀྐཱརེན ཀརོཏི. སཏིཝིནཡཱརཧསྶཱཏི དབྦམལླཔུཏྟཏྠེརསདིསསྶ ཁཱིཎཱསཝསྶ. ཨམཱུལ༹ྷཝིནཡཱརཧསྶཱཏི གགྒབྷིཀྑུསདིསསྶ ཨུམྨཏྟཀསྶ. ཏསྶཔཱཔིཡསིཀཀམྨཱརཧསྶཱཏི ཨུཔཝཱལ༹བྷིཀྑུསདིསསྶ ཨུསྶནྣཔཱཔསྶ. ཨེས ནཡོ སབྦཏྠ.

ཨནུཔོསཐེ ¶ ཨུཔོསཐཾ ཀརོཏཱིཏི ཨནུཔོསཐདིཝསེ ཨུཔོསཐཾ ཀརོཏི. ཨུཔོསཐདིཝསོ ནཱམ ཋཔེཏྭཱ ཀཏྟིཀམཱསཾ ཨཝསེསེསུ ཨེཀཱདསསུ མཱསེསུ བྷིནྣསྶ སངྒྷསྶ སཱམགྒིདིཝསོ ཙ ཡཐཱཝུཏྟཙཱཏུདྡསཔནྣརསཱ ཙ. ཨེཏཾ ཏིཔྤཀཱརམྤི ཨུཔོསཐདིཝསཾ ཋཔེཏྭཱ ཨཉྙསྨིཾ དིཝསེ ཨུཔོསཐཾ ཀརོནྟོ ཨནུཔོསཐེ ཨུཔོསཐཾ ཀརོཏི ནཱམ. ཡཏྲ ཧི པཏྟཙཱིཝརཱདཱིནཾ ཨཏྠཱཡ ཨཔྤམཏྟཀེན ཀཱརཎེན ཝིཝདནྟཱ ཨུཔོསཐཾ ཝཱ པཝཱརཎཾ ཝཱ ཋཔེནྟི, ཏཏྠ ཏསྨིཾ ཨདྷིཀརཎེ ཝིནིཙྪིཏེ ‘‘སམགྒཱ ཛཱཏཱམྷཱ’’ཏི ཨནྟརཱ སཱམགྒིཨུཔོསཐཾ ཀཱཏུཾ ན ལབྷནྟི, ཀརོནྟེཧི ཨནུཔོསཐེ ཨུཔོསཐོ ཀཏོ ནཱམ ཧོཏི.

ཨཔཝཱརཎཱཡ པཝཱརེཏཱིཏི ཨཔཝཱརཎཱདིཝསེ པཝཱརེཏི; པཝཱརཎཱདིཝསོ ནཱམ ཨེཀསྨིཾ ཀཏྟིཀམཱསེ བྷིནྣསྶ སངྒྷསྶ སཱམགྒིདིཝསོ ཙ པཙྩུཀྐཌྜྷིཏྭཱ ཋཔིཏདིཝསོ ཙ དྭེ ཙ པུཎྞམཱསིཡོ. ཨེཝཾ ཙཏུབྦིདྷམྤི པཝཱརཎཱདིཝསཾ ཋཔེཏྭཱ ཨཉྙསྨིཾ དིཝསེ པཝཱརེནྟོ ཨཔཝཱརཎཱཡ པཝཱརེཏི ནཱམ. ཨིདྷཱཔི ཨཔྤམཏྟཀསྶ ཝིཝཱདསྶ ཝཱུཔསམེ སཱམགྒིཔཝཱརཎཾ ཀཱཏུཾ ན ལབྷནྟི, ཀརོནྟེཧི ཨཔཝཱརཎཱཡ པཝཱརཎཱ ཀཏཱ ཧོཏི. ཨཔིཙ ཨཱུནཝཱིསཏིཝསྶཾ ཝཱ ཨནྟིམཝཏྠུཾ ཨཛ྄ཛྷཱཔནྣཔུབྦཾ ཝཱ ཨེཀཱདསསུ ཝཱ ཨབྷབྦཔུགྒལེསུ ཨཉྙཏརཾ ཨུཔསམྤཱདེནྟསྶཔི ཝཏྠུཝིཔནྣཾ ཨདྷམྨཀམྨཾ ཧོཏི. ཨེཝཾ ཝཏྠུཏོ ཀམྨཱནི ཝིཔཛྫནྟི.

༤༨༤. ཉཏྟིཏོ ཝིཔཏྟིཡཾ པན ཝཏྠུཾ ན པརཱམསཏཱིཏི ཡསྶ ཨུཔསམྤདཱདིཀམྨཾ ¶ ཀརོཏི, ཏཾ ན པརཱམསཏི, ཏསྶ ནཱམཾ ན གཎྷཱཏི. ‘‘སུཎཱཏུ མེ བྷནྟེ སངྒྷོ, ཨཡཾ དྷམྨརཀྑིཏོ ཨཱཡསྨཏོ བུདྡྷརཀྑིཏསྶ ཨུཔསམྤདཱཔེཀྑོ’’ཏི ཝཏྟབྦེ ‘‘སུཎཱཏུ མེ བྷནྟེ སངྒྷོ, ཨཱཡསྨཏོ བུདྡྷརཀྑིཏསྶ ཨུཔསམྤདཱཔེཀྑོ’’ཏི ཝདཏི; ཨེཝཾ ཝཏྠུཾ ན པརཱམསཏི.

སངྒྷཾ ན པརཱམསཏཱིཏི སངྒྷསྶ ནཱམཾ ན གཎྷཱཏི. ‘‘སུཎཱཏུ མེ བྷནྟེ སངྒྷོ, ཨཡཾ དྷམྨརཀྑིཏོ’’ཏི ¶ ཝཏྟབྦེ ‘‘སུཎཱཏུ མེ བྷནྟེ, ཨཡཾ དྷམྨརཀྑིཏོ’’ཏི ཝདཏི; ཨེཝཾ སངྒྷཾ ན པརཱམསཏི.

པུགྒལཾ ན པརཱམསཏཱིཏི ཡོ ཨུཔསམྤདཱཔེཀྑསྶ ཨུཔཛ྄ཛྷཱཡོ, ཏཾ ན པརཱམསཏི, ཏསྶ ནཱམཾ ན གཎྷཱཏི. ‘‘སུཎཱཏུ མེ བྷནྟེ སངྒྷོ, ཨཡཾ དྷམྨརཀྑིཏོ ཨཱཡསྨཏོ བུདྡྷརཀྑིཏསྶ ཨུཔསམྤདཱཔེཀྑོ’’ཏི ཝཏྟབྦེ ¶ ‘‘སུཎཱཏུ མེ, བྷནྟེ སངྒྷོ, ཨཡཾ དྷམྨརཀྑིཏོ ཨུཔསམྤདཱཔེཀྑོ’’ཏི ཝདཏི; ཨེཝཾ པུགྒལཾ ན པརཱམསཏི.

ཉཏྟིཾ ན པརཱམསཏཱིཏི སབྦེན སབྦཾ ཉཏྟིཾ ན པརཱམསཏི. ཉཏྟིདུཏིཡཀམྨེ ཉཏྟིཾ ཨཊྛཔེཏྭཱ དྭིཀྑཏྟུཾ ཀམྨཝཱཙཱཡ ཨེཝ ཨནུསྶཱཝནཀམྨཾ ཀརོཏི. ཉཏྟིཙཏུཏྠཀམྨེཔི ཉཏྟིཾ ཨཊྛཔེཏྭཱ ཙཏུཀྑཏྟུཾ ཀམྨཝཱཙཱཡ ཨེཝ ཨནུསྶཱཝནཀམྨཾ ཀརོཏི; ཨེཝཾ ཉཏྟིཾ ན པརཱམསཏི.

པཙྪཱ ཝཱ ཉཏྟིཾ ཋཔེཏཱིཏི པཋམཾ ཀམྨཝཱཙཱཡ ཨནུསྶཱཝནཀམྨཾ ཀཏྭཱ ‘‘ཨེསཱ ཉཏྟཱི’’ཏི ཝཏྭཱ ‘‘ཁམཏི སངྒྷསྶ ཏསྨཱ ཏུཎྷཱི ཨེཝམེཏཾ དྷཱརཡཱམཱི’’ཏི ཝདཏི; ཨེཝཾ པཙྪཱ ཉཏྟིཾ ཋཔེཏི. ཨིཏི ཨིམེཧི པཉྩཧཱཀཱརེཧི ཉཏྟིཏོ ཀམྨཱནི ཝིཔཛྫནྟི.

༤༨༥. ཨནུསྶཱཝནཏོ ཝིཔཏྟིཡཾ པན ཝཏྠུཨཱདཱིནི ཝུཏྟནཡེནེཝ ཝེདིཏབྦཱནི. ཨེཝཾ པན ནེསཾ ཨཔརཱམསནཾ ཧོཏི – ‘‘སུཎཱཏུ མེ བྷནྟེ སངྒྷོ’’ཏི པཋམཱནུསྶཱཝནེ ‘‘དུཏིཡམྤི ཨེཏམཏྠཾ ཝདཱམི, ཏཏིཡམྤི ཨེཏམཏྠཾ ཝདཱམི, སུཎཱཏུ མེ བྷནྟེ སངྒྷོ’’ཏི དུཏིཡཏཏིཡཱནུསྶཱཝནཱསུ ཝཱ ‘‘ཨཡཾ དྷམྨརཀྑིཏོ ཨཱཡསྨཏོ བུདྡྷརཀྑིཏསྶ ཨུཔསམྤདཱཔེཀྑོ’’ཏི ཝཏྟབྦེ ‘‘སུཎཱཏུ མེ བྷནྟེ སངྒྷོ, ཨཱཡསྨཏོ བུདྡྷརཀྑིཏསྶཱ’’ཏི ཝདནྟོ ཝཏྠུཾ ན པརཱམསཏི ནཱམ. ‘‘སུཎཱཏུ མེ བྷནྟེ སངྒྷོ, ཨཡཾ དྷམྨརཀྑིཏོ’’ཏི ཝཏྟབྦེ ‘‘སུཎཱཏུ མེ བྷནྟེ, ཨཡཾ དྷམྨརཀྑིཏོ’’ཏི ཝདནྟོ སངྒྷཾ ན པརཱམསཏི ནཱམ. ‘‘སུཎཱཏུ མེ བྷནྟེ སངྒྷོ, ཨཡཾ དྷམྨརཀྑིཏོ ¶ ཨཱཡསྨཏོ བུདྡྷརཀྑིཏསྶཱ’’ཏི ཝཏྟབྦེ ‘‘སུཎཱཏུ མེ བྷནྟེ སངྒྷོ, ཨཡཾ དྷམྨརཀྑིཏོ ཨུཔསམྤདཱཔེཀྑོ’’ཏི ཝདནྟོ པུགྒལཾ ན པརཱམསཏི ནཱམ.

སཱཝནཾ ཧཱཔེཏཱིཏི སབྦེན སབྦཾ ཀམྨཝཱཙཱཡ ཨནུསྶཱཝནཾ ན ཀརོཏི, ཉཏྟིདུཏིཡཀམྨེ དྭིཀྑཏྟུཾ ཉཏྟིམེཝ ཋཔེཏི, ཉཏྟིཙཏུཏྠཀམྨེ ཙཏུཀྑཏྟུཾ ཉཏྟིམེཝ ཋཔེཏི; ཨེཝཾ ཨནུསྶཱཝནཾ ཧཱཔེཏི ¶ . ཡོཔི ཉཏྟིདུཏིཡཀམྨེ ཨེཀཾ ཉཏྟིཾ ཋཔེཏྭཱ ཨེཀཾ ཀམྨཝཱཙཾ ཨནུསྶཱཝེནྟོ ཨཀྑརཾ ཝཱ ཚཌྜེཏི, པདཾ ཝཱ དུརུཏྟཾ ཀརོཏི, ཨཡམྤི ཨནུསྶཱཝནཾ ཧཱཔེཏིཡེཝ. ཉཏྟིཙཏུཏྠཀམྨེ པན ཨེཀཾ ཉཏྟིཾ ཋཔེཏྭཱ སཀིམེཝ ཝཱ དྭིཀྑཏྟུཾ ཝཱ ཀམྨཝཱཙཱཡ ཨནུསྶཱཝནཾ ཀརོནྟོཔི ཨཀྑརཾ ཝཱ པདཾ ཝཱ ¶ ཚཌྜེནྟོཔི དུརུཏྟཾ ཀརོནྟོཔི ཨནུསྶཱཝནཾ ཧཱཔེཏིཡེཝཱཏི ཝེདིཏབྦོ.

དུརུཏྟཾ ཀརོཏཱིཏི ཨེཏྠ པན ཨཡཾ ཝིནིཙྪཡོ – ཡོ ཧི ཨཉྙསྨིཾ ཨཀྑརེ ཝཏྟབྦེ ཨཉྙཾ ཝདཏི, ཨཡཾ དུརུཏྟཾ ཀརོཏི ནཱམ. ཏསྨཱ ཀམྨཝཱཙཾ ཀརོནྟེན བྷིཀྑུནཱ ཡྭཱཡཾ –

‘‘སིཐིལཾ དྷནིཏཉྩ དཱིགྷརསྶཾ, གརུཀཾ ལཧུཀཉྩ ནིགྒཧིཏཾ;

སམྦནྡྷཾ ཝཝཏྠིཏཾ ཝིམུཏྟཾ, དསདྷཱ བྱཉྫནབུདྡྷིཡཱ པབྷེདོ’’ཏི.

ཝུཏྟོ, ཨཡཾ སུཊྛུ ཨུཔལཀྑེཏབྦོ. ཨེཏྠ ཧི ‘‘སིཐིལཾ’’ ནཱམ པཉྩསུ ཝགྒེསུ པཋམཏཏིཡཾ. ‘‘དྷནིཏཾ’’ ནཱམ ཏེསྭེཝ དུཏིཡཙཏུཏྠཾ. ‘‘དཱིགྷ’’ནྟི དཱིགྷེན ཀཱལེན ཝཏྟབྦཾ ཨཱཀཱརཱདི. ‘‘རསྶ’’ནྟི ཏཏོ ཨུཔཌྜྷཀཱལེན ཝཏྟབྦཾ ཨཀཱརཱདི. ‘‘གརུཀ’’ནྟི དཱིགྷམེཝ. ཡཾ ཝཱ ཨཱཡསྨཏོ བུདྡྷརཀྑིཏཏྠེརསྶ ཡསྶ ནཀྑམཏཱིཏི ཨེཝཾ སཾཡོགཔརཾ ཀཏྭཱ ཝུཙྩཏི. ‘‘ལཧུཀ’’ནྟི རསྶམེཝ. ཡཾ ཝཱ ཨཱཡསྨཏོ བུདྡྷརཀྑིཏཐེརསྶ ཡསྶ ན ཁམཏཱིཏི ཨེཝཾ ཨསཾཡོགཔརཾ ཀཏྭཱ ཝུཙྩཏི. ‘‘ནིགྒཧིཏ’’ནྟི ཡཾ ཀརཎཱནི ནིགྒཧེཏྭཱ ཨཝིསྶཛྫེཏྭཱ ཨཝིཝཊེན མུཁེན སཱནུནཱསིཀཾ ཀཏྭཱ ཝཏྟབྦཾ. ‘‘སམྦནྡྷ’’ནྟི ཡཾ པརཔདེན སམྦནྡྷིཏྭཱ ‘‘ཏུཎྷིསྶཱ’’ཏི ཝཱ ‘‘ཏུཎྷསྶཱ’’ཏི ཝཱ ཝུཙྩཏི. ‘‘ཝཝཏྠིཏ’’ནྟི ཡཾ པརཔདེན ཨསམྦནྡྷཾ ཀཏྭཱ ཝིཙྪིནྡིཏྭཱ ‘‘ཏུཎྷཱི ཨསྶཱ’’ཏི ཝཱ ‘‘ཏུཎྷ ཨསྶཱ’’ཏི ཝཱ ཝུཙྩཏི. ‘‘ཝིམུཏྟ’’ནྟི ཡཾ ཀརཎཱནི ཨནིགྒཧེཏྭཱ ཝིསྶཛྫེཏྭཱ ཝིཝཊེན མུཁེན ཨནུནཱསིཀཾ ཨཀཏྭཱ ¶ ཝུཙྩཏི.

ཏཏྠ ‘‘སུཎཱཏུ མེ’’ཏི ཝཏྟབྦེ ཏ-ཀཱརསྶ ཐ-ཀཱརཾ ཀཏྭཱ ‘‘སུཎཱཐུ མེ’’ཏི ཝཙནཾ སིཐིལསྶ དྷནིཏཀརཎཾ ནཱམ. ཏཐཱ ‘‘པཏྟཀལླཾ, ཨེསཱ ཉཏྟཱི’’ཏི ཝཏྟབྦེ ‘‘པཏྠཀལླཾ, ཨེསཱ ཉཏྠཱི’’ཏིཨཱདིཝཙནཉྩ. ‘‘བྷནྟེ སངྒྷོ’’ཏི ཝཏྟབྦེ བྷ-ཀཱར གྷ-ཀཱརཱནཾ བ-ཀཱར ག-ཀཱརེ ཀཏྭཱ ‘‘བནྟེ སངྒོ’’ཏི ཝཙནཾ དྷནིཏསྶ སིཐིལཀརཎཾ ནཱམ. ‘‘སུཎཱཏུ མེ’’ཏི ཝིཝཊེན མུཁེན ཝཏྟབྦེ པན ‘‘སུཎཾཏུ མེ’’ཏི ཝཱ ‘‘ཨེསཱ ཉཏྟཱི’’ཏི ཝཏྟབྦེ ‘‘ཨེསཾ ཉཏྟཱི’’ཏི ཝཱ ཨཝིཝཊེན ¶ མུཁེན ཨནུནཱསིཀཾ ཀཏྭཱ ཝཙནཾ ཝིམུཏྟསྶ ནིགྒཧིཏཝཙནཾ ནཱམ. ‘‘པཏྟཀལླ’’ནྟི ཨཝིཝཊེན མུཁེན ཨནུནཱསིཀཾ ཀཏྭཱ ཝཏྟབྦེ ‘‘པཏྟཀལླཱ’’ཏི ཝིཝཊེན མུཁེན ཨནུནཱསིཀཾ ཨཀཏྭཱ ཝཙནཾ ནིགྒཧིཏསྶ ཝིམུཏྟཝཙནཾ ནཱམ.

ཨིཏི ¶ སིཐིལེ ཀཏྟབྦེ དྷནིཏཾ, དྷནིཏེ ཀཏྟབྦེ སིཐིལཾ, ཝིམུཏྟེ ཀཏྟབྦེ ནིགྒཧིཏཾ, ནིགྒཧིཏེ ཀཏྟབྦེ ཝིམུཏྟནྟི ཨིམཱནི ཙཏྟཱརི བྱཉྫནཱནི ཨནྟོཀམྨཝཱཙཱཡ ཀམྨཾ དཱུསེནྟི. ཨེཝཾ ཝདནྟོ ཧི ཨཉྙསྨིཾ ཨཀྑརེ ཝཏྟབྦེ ཨཉྙཾ ཝདཏི, དུརུཏྟཾ ཀརོཏཱིཏི ཝུཙྩཏི. ཨིཏརེསུ པན དཱིགྷརསྶཱདཱིསུ ཚསུ བྱཉྫནེསུ དཱིགྷཊྛཱནེ དཱིགྷམེཝ, རསྶཊྛཱནེ ཙ རསྶམེཝཱཏི ཨེཝཾ ཡཐཱཋཱནེ ཏཾ ཏདེཝ ཨཀྑརཾ བྷཱསནྟེན ཨནུཀྐམཱགཏཾ པཝེཎིཾ ཨཝིནཱསེནྟེན ཀམྨཝཱཙཱ ཀཱཏབྦཱ. སཙེ པན ཨེཝཾ ཨཀཏྭཱ དཱིགྷེ ཝཏྟབྦེ རསྶཾ, རསྶེ ཝཱ ཝཏྟབྦེ དཱིགྷཾ ཝདཏི; ཏཐཱ གརུཀེ ཝཏྟབྦེ ལཧུཀཾ, ལཧུཀེ ཝཱ ཝཏྟབྦེ གརུཀཾ ཝདཏི; སམྦནྡྷེ ཝཱ པན ཝཏྟབྦེ ཝཝཏྠིཏཾ, ཝཝཏྠིཏེ ཝཱ ཝཏྟབྦེ སམྦནྡྷཾ ཝདཏི; ཨེཝཾ ཝུཏྟེཔི ཀམྨཝཱཙཱ ན ཀུཔྤཏི. ཨིམཱནི ཧི ཚ བྱཉྫནཱནི ཀམྨཾ ན ཀོཔེནྟི.

ཡཾ པན སུཏྟནྟིཀཏྠེརཱ ‘‘ད-ཀཱརོ ཏ-ཀཱརམཱཔཛྫཏི, ཏ-ཀཱརོ ད-ཀཱརམཱཔཛྫཏི, ཙ-ཀཱརོ ཛ-ཀཱརམཱཔཛྫཏི, ཛ-ཀཱརོ ཙ-ཀཱརམཱཔཛྫཏི, ཡ-ཀཱརོ ཀ-ཀཱརམཱཔཛྫཏི, ཀ-ཀཱརོ ཡ-ཀཱརམཱཔཛྫཏི; ཏསྨཱ ད-ཀཱརཱདཱིསུ ཝཏྟབྦེསུ ཏ-ཀཱརཱདིཝཙནཾ ན ཝིརུཛ྄ཛྷཏཱི’’ཏི ཝདནྟི, ཏཾ ཀམྨཝཱཙཾ པཏྭཱ ན ཝཊྚཏི. ཏསྨཱ ཝིནཡདྷརེན ནེཝ ད-ཀཱརོ ཏ-ཀཱརོ ཀཱཏབྦོ…པེ… ན ཀ-ཀཱརོ ཡ-ཀཱརོ. ཡཐཱཔཱལི༹ཡཱ ནིརུཏྟིཾ སོདྷེཏྭཱ དསཝིདྷཱཡ བྱཉྫནནིརུཏྟིཡཱ ཝུཏྟདོསེ པརིཧརནྟེན ཀམྨཝཱཙཱ ཀཱཏབྦཱ. ཨིཏརཐཱ ཧི སཱཝནཾ ཧཱཔེཏི ནཱམ.

ཨཀཱལེ ཝཱ སཱཝེཏཱིཏི སཱཝནཱཡ ཨཀཱལེ ཨནོཀཱསེ ཉཏྟིཾ ཨཊྛཔེཏྭཱ ¶ པཋམཾཡེཝ ཨནུསྶཱཝནཀམྨཾ ཀཏྭཱ པཙྪཱ ཉཏྟིཾ ཋཔེཏི. ཨིཏི ཨིམེཧི པཉྩཧཱཀཱརེཧི ཨནུསྶཱཝནཏོ ཀམྨཱནི ཝིཔཛྫནྟི.

༤༨༦. སཱིམཏོ ཝིཔཏྟིཡཾ པན ཨཏིཁུདྡཀསཱིམཱ ནཱམ ཡཱ ཨེཀཝཱིསཏི བྷིཀྑཱུ ན གཎྷཱཏི. ཀུརུནྡིཡཾ པན ‘‘ཡཏྠ ཨེཀཝཱིསཏི བྷིཀྑཱུ ནིསཱིདིཏུཾ ན སཀྐོནྟཱི’’ཏི ཝུཏྟཾ. ཏསྨཱ ཡཱ ཨེཝརཱུཔཱ སཱིམཱ, ཨཡཾ སམྨཏཱཔི ཨསམྨཏཱ, གཱམཁེཏྟསདིསཱཝ ཧོཏི, ཏཏྠ ཀཏཾ ཀམྨཾ ¶ ཀུཔྤཏི. ཨེས ནཡོ སེསསཱིམཱསུཔི. ཨེཏྠ པན ཨཏིམཧཏཱི ནཱམ ཡཱ ཀེསགྒམཏྟེནཱཔི ཏིཡོཛནཾ ཨཏིཀྐཱམེཏྭཱ སམྨཏཱ ཧོཏི. ཁཎྜནིམིཏྟཱ ནཱམ ཨགྷཊིཏནིམིཏྟཱ ཝུཙྩཏི. པུརཏྠིམཱཡ དིསཱཡ ནིམིཏྟཾ ཀིཏྟེཏྭཱ ཨནུཀྐམེནེཝ དཀྑིཎཱཡ པཙྪིམཱཡ ཨུཏྟརཱཡ དིསཱཡ ཀིཏྟེཏྭཱ པུན པུརཏྠིམཱཡ དིསཱཡ པུབྦཀིཏྟིཏཾ ནིམིཏྟཾ པཊིཀིཏྟེཏྭཱཝ ཋཔེཏུཾ ཝཊྚཏི; ཨེཝཾ ཨཁཎྜནིམིཏྟཱ ཧོཏི. སཙེ ¶ པན ཨནུཀྐམེན ཨཱཧརིཏྭཱ ཨུཏྟརཱཡ དིསཱཡ ནིམིཏྟཾ ཀིཏྟེཏྭཱ ཏཏྠེཝ ཋཔེཏི, ཁཎྜནིམིཏྟཱ ཧོཏི. ཨཔརཱཔི ཁཎྜནིམིཏྟཱ ནཱམ ཡཱ ཨནིམིཏྟུཔགཾ ཏཙསཱརརུཀྑཾ ཝཱ ཁཱཎུཀཾ ཝཱ པཾསུཔུཉྫཝཱལིཀཱཔུཉྫཱནཾ ཝཱ ཨཉྙཏརཾ ཨནྟརཱ ཨེཀཾ ནིམིཏྟཾ ཀཏྭཱ སམྨཏཱ ཧོཏི. ཚཱཡཱནིམིཏྟཱ ནཱམ ཡཱ པབྦཏཙྪཱཡཱདཱིནཾ ཡཾཀིཉྩི ཚཱཡཾ ནིམིཏྟཾ ཀཏྭཱ སམྨཏཱ ཧོཏི. ཨནིམིཏྟཱ ནཱམ ཡཱ སབྦེན སབྦཾ ནིམིཏྟཱནི ཨཀིཏྟེཏྭཱ སམྨཏཱ ཧོཏི.

བཧིསཱིམེ ཋིཏོ སཱིམཾ སམྨནྣཏི ནཱམ ནིམིཏྟཱནི ཀིཏྟེཏྭཱ ནིམིཏྟཱནཾ བཧི ཋིཏོ སམྨནྣཏི. ནདིཡཱ སམུདྡེ ཛཱཏསྶརེ སཱིམཾ སམྨནྣཏཱིཏི ཨེཏེསུ ནདིཨཱདཱིསུ ཡཾ སམྨནྣཏི, སཱ ཨེཝཾ སམྨཏཱཔི ‘‘སབྦཱ, བྷིཀྑཝེ, ནདཱི ཨསཱིམཱ, སབྦོ སམུདྡོ ཨསཱིམོ, སབྦོ ཛཱཏསྶརོ ཨསཱིམོ’’ཏི (མཧཱཝ. ༡༤༧) ཝཙནཏོ ཨསམྨཏཱཝ ཧོཏི. སཱིམཱཡ སཱིམཾ སམྦྷིནྡཏཱིཏི ཨཏྟནོ སཱིམཱཡ པརེསཾ སཱིམཾ སམྦྷིནྡཏི. ཨཛ྄ཛྷོཏྠརཏཱིཏི ཨཏྟནོ སཱིམཱཡ པརེསཾ སཱིམཾ ཨཛ྄ཛྷོཏྠརཏི. ཏཏྠ ཡཐཱ སམྦྷེདོ ཙ ཨཛ྄ཛྷོཏྠརཎཉྩ ཧོཏི, ཏཾ སབྦཾ ཨུཔོསཐཀྑནྡྷཀེ ཝུཏྟམེཝ. ཨིཏི ཨིམཱ ཨེཀཱདསཔི སཱིམཱ ཨསཱིམཱ གཱམཁེཏྟསདིསཱ ཨེཝ, ཏཱསུ ནིསཱིདིཏྭཱ ཀཏཾ ཀམྨཾ ཀུཔྤཏི. ཏེན ཝུཏྟཾ ‘‘ཨིམེཧི ཨེཀཱདསཧི ཨཱཀཱརེཧི སཱིམཏོ ཀམྨཱནི ཝིཔཛྫནྟཱི’’ཏི.

༤༨༧-༤༨༨. པརིསཏོ ཀམྨཝིཔཏྟིཡཾ པན ཀིཉྩི ཨནུཏྟཱནཾ ནཱམ ནཏྠི. ཡམྤི ཏཏྠ ཀམྨཔྤཏྟཚནྡཱརཧལཀྑཎཾ ཝཏྟབྦཾ སིཡཱ, ཏམྤི པརཏོ ‘‘ཙཏྟཱརོ བྷིཀྑཱུ ¶ པཀཏཏྟཱ ཀམྨཔྤཏྟཱ’’ཏིཨཱདིནཱ ནཡེན ཝུཏྟམེཝ. ཏཏྠ པཀཏཏྟཱ ཀམྨཔྤཏྟཱཏི ཙཏུཝགྒཀརཎེ ཀམྨེ ཙཏྟཱརོ པཀཏཏྟཱ ཨནུཀྑིཏྟཱ ཨནིསྶཱརིཏཱ པརིསུདྡྷསཱིལཱ ཙཏྟཱརོ བྷིཀྑཱུ ཀམྨཔྤཏྟཱ ཀམྨསྶ ཨརཧཱ ཨནུཙྪཝིཀཱ སཱམིནོ. ན ཏེཧི ཝིནཱ ཏཾ ཀམྨཾ ཀཡིརཏི, ན ཏེསཾ ཚནྡོ ཝཱ པཱརིསུདྡྷི ཝཱ ཨེཏི. ཨཝསེསཱ པན སཙེཔི སཧསྶམཏྟཱ ཧོནྟི, སཙེ སམཱནསཾཝཱསཀཱ, སབྦེ ཚནྡཱརཧཱཝ ཧོནྟི. ཚནྡཔཱརིསུདྡྷིཾ དཏྭཱ ཨཱགཙྪནྟུ ཝཱ མཱ ཝཱ, ཀམྨཾ པན ཏིཊྛཏི. ཡསྶ ¶ པན སངྒྷོ པརིཝཱསཱདིཀམྨཾ ཀརོཏི, སོ ནེཝ ཀམྨཔྤཏྟོ, ནཱཔི ཚནྡཱརཧོ. ཨཔིཙ ཡསྨཱ ཏཾ པུགྒལཾ ཝཏྠུཾ ཀཏྭཱ སངྒྷོ ཀམྨཾ ཀརོཏི, ཏསྨཱ ‘‘ཀམྨཱརཧོ’’ཏི ཝུཙྩཏི. སེསཀམྨེསུཔི ཨེསེཝ ནཡོ.

༤༨༩. པུན ¶ ཙཏྟཱརི ཀམྨཱནཱིཏིཨཱདིཀོ ནཡོ པཎྜཀཱདཱིནཾ ཨཝཏྠུབྷཱཝདསྶནཏྠཾ ཝུཏྟོ. སེསམེཏྠ ཨུཏྟཱནམེཝ.

ཨཔལོཀནཀམྨཀཐཱ

༤༩༥-༤༩༦. ཨིདཱནི ཏེསཾ ཀམྨཱནཾ པབྷེདདསྶནཏྠཾ ‘‘ཨཔལོཀནཀམྨཾ ཀཏི ཋཱནཱནི གཙྪཏཱི’’ཏིཨཱདིམཱཧ. ཏཏྠ ‘‘ཨཔལོཀནཀམྨཾ པཉྩ ཋཱནཱནི གཙྪཏི – ཨོསཱརཎཾ, ནིསྶཱརཎཾ, བྷཎྜུཀམྨཾ, བྲཧྨདཎྜཾ, ཀམྨལཀྑཎཉྙེཝ པཉྩམ’’ནྟི ཨེཏྠ ‘‘ཨོསཱརཎཾ ནིསྶཱརཎ’’ནྟི པདསིལིཊྛཏཱཡེཏཾ ཝུཏྟཾ. པཋམཾ པན ནིསྶཱརཎཱ ཧོཏི, པཙྪཱ ཨོསཱརཎཱ. ཏཏྠ ཡཱ ཀཎྚཀསཱམཎེརསྶ དཎྜཀམྨནཱསནཱ, སཱ ‘‘ནིསྶཱརཎཱ’’ཏི ཝེདིཏབྦཱ. ཏསྨཱ ཨེཏརཧི སཙེཔི སཱམཎེརོ བུདྡྷསྶ ཝཱ དྷམྨསྶ ཝཱ སངྒྷསྶ ཝཱ ཨཝཎྞཾ བྷཎཏི, ‘‘ཨཀཔྤིཡཾ ཀཔྤིཡ’’ནྟི དཱིཔེཏི, མིཙྪཱདིཊྛིཀོ ཧོཏི ཨནྟགྒཱཧིཀཱཡ དིཊྛིཡཱ སམནྣཱགཏོ, སོ ཡཱཝཏཏིཡཾ ནིཝཱརེཏྭཱ ཏཾ ལདྡྷིཾ ནིསྶཛྫཱཔེཏབྦོ. ནོ ཙེ ཝིསྶཛྫེཏི, སངྒྷཾ སནྣིཔཱཏེཏྭཱ ‘‘ཝིསྶཛྫེཧཱི’’ཏི ཝཏྟབྦོ. ནོ ཙེ ཝིསྶཛྫེཏི, བྱཏྟེན བྷིཀྑུནཱ ཨཔལོཀནཀམྨཾ ཀཏྭཱ ནིསྶཱརེཏབྦོ. ཨེཝཉྩ པན ཀམྨཾ ཀཱཏབྦཾ –

‘‘སངྒྷཾ, བྷནྟེ, པུཙྪཱམི – ‘ཨཡཾ ཨིཏྠནྣཱམོ སཱམཎེརོ བུདྡྷསྶ དྷམྨསྶ སངྒྷསྶ ཨཝཎྞཝཱདཱི མིཙྪཱདིཊྛིཀོ, ཡཾ ཨཉྙེ སཱམཎེརཱ ལབྷནྟི, དིརཏྟཏིརཏྟཾ བྷིཀྑཱུཧི སདྡྷིཾ སཧསེཡྻཾ, ཏསྶ ཨལཱབྷཱཡ ནིསྶཱརཎཱ རུཙྩཏི སངྒྷསྶཱ’ཏི. དུཏིཡམྤི… ཏཏིཡམྤི, བྷནྟེ, སངྒྷཾ པུཙྪཱམི – ‘ཨཡཾ ཨིཏྠནྣཱམོ སཱམཎེརོ བུདྡྷསྶ…པེ… རུཙྩཏི སངྒྷསྶཱ’ཏི ཙར པིརེ ཝིནསྶཱ’’ཏི.

སོ ཨཔརེན སམཡེན ‘‘ཨཧཾ, བྷནྟེ, བཱལཏཱཡ ཨཉྙཱཎཏཱཡ ཨལཀྑིཀཏཱཡ ¶ ཨེཝཾ ཨཀཱསིཾ, སྭཱཧཾ སངྒྷཾ ཁམཱཔེམཱི’’ཏི ཁམཱཔེནྟོ ཡཱཝཏཏིཡཾ ཡཱཙཱཔེཏྭཱ ཨཔལོཀནཀམྨེནེཝ ཨོསཱརེཏབྦོ ¶ . ཨེཝཾ པན ཨོསཱརེཏབྦོ, སངྒྷམཛ྄ཛྷེ བྱཏྟེན བྷིཀྑུནཱ སངྒྷསྶ ཨནུམཏིཡཱ སཱཝེཏབྦཾ –

‘‘སངྒྷཾ, བྷནྟེ, པུཙྪཱམི – ཨཡཾ ཨིཏྠནྣཱམོ སཱམཎེརོ བུདྡྷསྶ དྷམྨསྶ སངྒྷསྶ ཨཝཎྞཝཱདཱི མིཙྪཱདིཊྛིཀོ, ཡཾ ཨཉྙེ སཱམཎེརཱ ལབྷནྟི, བྷིཀྑཱུཧི སདྡྷིཾ དིརཏྟཏིརཏྟཾ སཧསེཡྻཾ, ཏསྶ ¶ ཨལཱབྷཱཡ ནིསྶཱརིཏོ, སྭཱཡཾ ཨིདཱནི སོརཏོ ནིཝཱཏཝུཏྟི ལཛྫིདྷམྨཾ ཨོཀྐནྟོ ཧིརོཏྟཔྤེ པཏིཊྛིཏོ ཀཏདཎྜཀམྨོ ཨཙྩཡཾ དེསེཏི, ཨིམསྶ སཱམཎེརསྶ ཡཐཱ པུརེ ཀཱཡསམྦྷོགསཱམགྒིདཱནཾ རུཙྩཏི སངྒྷསྶཱ’’ཏི.

ཨེཝཾ ཏིཀྑཏྟུཾ ཝཏྟབྦཾ. ཨེཝཾ ཨཔལོཀནཀམྨཾ ཨོསཱརཎཉྩ ནིསྶཱརཎཉྩ གཙྪཏི. བྷཎྜུཀམྨཾ མཧཱཁནྡྷཀཝཎྞནཱཡཾ ཝུཏྟམེཝ. བྲཧྨདཎྜོ པཉྩསཏིཀཀྑནྡྷཀེ ཝུཏྟོཡེཝ. ན ཀེཝལཾ པནེས ཚནྣསྶེཝ པཉྙཏྟོ, ཡོ ཨཉྙོཔི བྷིཀྑུ མུཁརོ ཧོཏི, བྷིཀྑཱུ དུརུཏྟཝཙནེཧི གྷཊྚེནྟོ ཁུཾསེནྟོ ཝམྦྷེནྟོ ཝིཧརཏི, ཏསྶཔི དཱཏབྦོ. ཨེཝཉྩ པན དཱཏབྦོ, སངྒྷམཛ྄ཛྷེ བྱཏྟེན བྷིཀྑུནཱ སངྒྷསྶ ཨནུམཏིཡཱ སཱཝེཏབྦཾ –

‘‘བྷནྟེ, ཨིཏྠནྣཱམོ བྷིཀྑུ མུཁརོ, བྷིཀྑཱུ དུརུཏྟཝཙནེཧི གྷཊྚེནྟོ ཝིཧརཏི. སོ བྷིཀྑུ ཡཾ ཨིཙྪེཡྻ, ཏཾ ཝདེཡྻ. བྷིཀྑཱུཧི ཨིཏྠནྣཱམོ བྷིཀྑུ ནེཝ ཝཏྟབྦོ, ན ཨོཝདིཏབྦོ, ན ཨནུསཱསིཏབྦོ. སངྒྷཾ, བྷནྟེ, པུཙྪཱམི – ‘ཨིཏྠནྣཱམསྶ བྷིཀྑུནོ བྲཧྨདཎྜསྶ དཱནཾ, རུཙྩཏི སངྒྷསྶཱ’ཏི. དུཏིཡམྤི པུཙྪཱམི, ཏཏིཡམྤི པུཙྪཱམི – ‘ཨིཏྠནྣཱམསྶ, བྷནྟེ, བྷིཀྑུནོ བྲཧྨདཎྜསྶ དཱནཾ, རུཙྩཏི སངྒྷསྶཱ’’’ཏི.

ཏསྶ ཨཔརེན སམཡེན སམྨཱ ཝཏྟིཏྭཱ ཁམཱཔེནྟསྶ བྲཧྨདཎྜོ པཊིཔྤསྶམྦྷེཏབྦོ. ཨེཝཉྩ པན པཊིཔྤསྶམྦྷེཏབྦོ, བྱཏྟེན བྷིཀྑུནཱ སངྒྷམཛ྄ཛྷེ སཱཝེཏབྦཾ –

‘‘བྷནྟེ, བྷིཀྑུསངྒྷོ ཨསུཀསྶ བྷིཀྑུནོ བྲཧྨདཎྜཾ ཨདཱསི, སོ བྷིཀྑུ སོརཏོ ནིཝཱཏཝུཏྟི ལཛྫིདྷམྨཾ ཨོཀྐནྟོ ཧིརོཏྟཔྤེ པཏིཊྛིཏོ, པཊིསངྑཱ ཨཱཡཏིཾ སཾཝརེ ཏིཊྛཏི, སངྒྷཾ, བྷནྟེ, པུཙྪཱམི, ཏསྶ བྷིཀྑུནོ བྲཧྨདཎྜསྶ པཊིཔྤསྶདྡྷི, རུཙྩཏི སངྒྷསྶཱ’’ཏི.

ཨེཝཾ ¶ ཡཱཝཏཏིཡཾ ཝཏྭཱ ཨཔལོཀནཀམྨེནེཝ ¶ བྲཧྨདཎྜོ པཊིཔྤསྶམྦྷེཏབྦོཏི.

ཀམྨལཀྑཎཉྙེཝ པཉྩམནྟི ཡཾ ཏཾ བྷགཝཏཱ བྷིཀྑུནིཀྑནྡྷཀེ ‘‘ཏེན ཁོ པན སམཡེན ཚབྦགྒིཡཱ བྷིཀྑཱུ བྷིཀྑུནིཡོ ཀདྡམོདཀེན ཨོསིཉྩནྟི, ‘ཨཔྤེཝ ནཱམ ཨམྷེསུ སཱརཛྫེཡྻུ’ནྟི, ཀཱཡཾ ཝིཝརིཏྭཱ བྷིཀྑུནཱིནཾ དསྶེནྟི ¶ , ཨཱུརུཾ ཝིཝརིཏྭཱ བྷིཀྑུནཱིནཾ དསྶེནྟི, ཨངྒཛཱཏཾ ཝིཝརིཏྭཱ བྷིཀྑུནཱིནཾ དསྶེནྟི, བྷིཀྑུནིཡོ ཨོབྷཱསེནྟི, བྷིཀྑུནཱིཧི སདྡྷིཾ སམྤཡོཛེནྟི, ‘ཨཔྤེཝ ནཱམ ཨམྷེསུ སཱརཛྫེཡྻུ’ནྟི. ཨིམེསུ ཝཏྠཱུསུ ཏེསཾ བྷིཀྑཱུནཾ དུཀྐཊཾ པཉྙཔེཏྭཱ ‘ཨནུཛཱནཱམི བྷིཀྑཝེ ཏསྶ བྷིཀྑུནོ དཎྜཀམྨཾ ཀཱཏུ’ནྟི. ཨཐ ཁོ བྷིཀྑུནཱིནཾ ཨེཏདཧོསི – ‘ཀིཾ ནུ ཁོ དཎྜཀམྨཾ ཀཱཏབྦ’ནྟི. བྷགཝཏོ ཨེཏམཏྠཾ ཨཱརོཙེསུཾ – ‘ཨཝནྡིཡོ སོ བྷིཀྑཝེ བྷིཀྑུ བྷིཀྑུནིསངྒྷེན ཀཱཏབྦོ’’’ཏི ཨེཝཾ ཨཝནྡིཡཀམྨཾ ཨནུཉྙཱཏཾ, ཏཾ ཀམྨལཀྑཎཉྙེཝ པཉྩམཾ ཨིམསྶ ཨཔལོཀནཀམྨསྶ ཋཱནཾ ཧོཏི. ཏསྶ ཧི ཀམྨཉྙེཝ ལཀྑཎཾ, ན ཨོསཱརཎཱདཱིནི; ཏསྨཱ ‘‘ཀམྨལཀྑཎ’’ནྟི ཝུཙྩཏི. ཏསྶ ཀརཎཾ ཏཏྠེཝ ཝུཏྟཾ. ཨཔིཙ ནཾ པཊིཔྤསྶདྡྷིཡཱ སདྡྷིཾ ཝིཏྠཱརཏོ དསྶེཏུཾ ཨིདྷཱཔི ཝདཱམ, བྷིཀྑུནུཔསྶཡེ སནྣིཔཏིཏསྶ བྷིཀྑུནིསངྒྷསྶ ཨནུམཏིཡཱ བྱཏྟཱཡ བྷིཀྑུནིཡཱ སཱཝེཏབྦཾ –

‘‘ཨཡྻེ ཨསུཀོ ནཱམ ཨཡྻོ བྷིཀྑུནཱིནཾ ཨཔཱསཱདིཀཾ དསྶེཏི, ཨེཏསྶ ཨཡྻསྶ ཨཝནྡིཡཀརཎཾ རུཙྩཏཱིཏི བྷིཀྑུནིསངྒྷཾ པུཙྪཱམི, དུཏིཡམྤི… ཏཏིཡམྤི བྷིཀྑུནིསངྒྷཾ པུཙྪཱམཱི’’ཏི.

ཨེཝཾ ཏིཀྑཏྟུཾ སཱཝེཏྭཱ ཨཔལོཀནཀམྨེན ཨཝནྡིཡཀམྨཾ ཀཱཏབྦཾ.

ཏཏོ པཊྛཱཡ སོ བྷིཀྑུ བྷིཀྑུནཱིཧི ན ཝནྡིཏབྦོ. སཙེ ཨཝནྡིཡམཱནོ ཧིརོཏྟཔྤཾ པཙྩུཔཊྛཔེཏྭཱ སམྨཱ ཝཏྟཏི, ཏེན བྷིཀྑུནིཡོ ཁམཱཔེཏབྦཱ. ཁམཱཔེནྟེན བྷིཀྑུནུཔསྶཡཾ ཨགནྟྭཱ ཝིཧཱརེཡེཝ སངྒྷཾ ཝཱ གཎཾ ཝཱ ཨེཀཾ བྷིཀྑུཾ ཝཱ ཨུཔསངྐམིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ‘‘ཨཧཾ བྷནྟེ པཊིསངྑཱ ཨཱཡཏིཾ སཾཝརེ ཏིཊྛཱམི, ན པུན ཨཔཱསཱདིཀཾ དསྶེསྶཱམི, བྷིཀྑུནིསངྒྷོ མཡ྄ཧཾ ཁམཏཱུ’’ཏི ཁམཱཔེཏབྦཾ. ཏེན སངྒྷེན ¶ ཝཱ གཎེན ཝཱ ཨེཀཾ བྷིཀྑུཾ པེསེཏྭཱ ཨེཀབྷིཀྑུནཱ ཝཱ སཡམེཝ གནྟྭཱ བྷིཀྑུནིཡོ ཝཏྟབྦཱ – ‘‘ཨཡཾ བྷིཀྑུ པཊིསངྑཱ ¶ ཨཱཡཏིཾ སཾཝརེ ཋིཏོ, ཨིམིནཱ ཨཙྩཡཾ དེསེཏྭཱ བྷིཀྑུནིསངྒྷོ ཁམཱཔིཏོ, བྷིཀྑུནིསངྒྷོ ཨིམཾ ཝནྡིཡཾ ཀརོཏཱུ’’ཏི. སོ ཝནྡིཡོ ཀཱཏབྦོ. ཨེཝཉྩ པན ཀཱཏབྦོ, བྷིཀྑུནུཔསྶཡེ སནྣིཔཏིཏསྶ བྷིཀྑུནིསངྒྷསྶ ཨནུམཏིཡཱ བྱཏྟཱཡ བྷིཀྑུནིཡཱ སཱཝེཏབྦཾ –

‘‘ཨཡཾ ཨཡྻེ ཨསུཀོ ནཱམ ཨཡྻོ བྷིཀྑུནཱིནཾ ཨཔཱསཱདིཀཾ དསྶེཏཱིཏི བྷིཀྑུནིསངྒྷེན ཨཝནྡིཡོ ཀཏོ, སོ ལཛྫིདྷམྨཾ ཨོཀྐམིཏྭཱ པཊིསངྑཱ ཨཱཡཏིཾ སཾཝརེ ཋིཏོ ཨཙྩཡཾ དེསེཏྭཱ བྷིཀྑུནིསངྒྷཾ ¶ ཁམཱཔེསི, ཏསྶ ཨཡྻསྶ ཝནྡིཡཀརཎཾ རུཙྩཏཱིཏི བྷིཀྑུནིསངྒྷཾ པུཙྪཱམཱི’’ཏི –

ཏིཀྑཏྟུཾ ཝཏྟབྦཾ ཨེཝཾ ཨཔལོཀནཀམྨེནེཝ ཝནྡིཡོ ཀཱཏབྦོ.

ཨཡཾ པནེཏྠ པཱལི༹མུཏྟཀོཔི ཀམྨལཀྑཎཝིནིཙྪཡོ. ཨིདཉྷི ཀམྨལཀྑཎཾ ནཱམ བྷིཀྑུནིསངྒྷམཱུལཀཾ པཉྙཏྟཾ, བྷིཀྑུསངྒྷསྶཱཔི པནེཏཾ ལབྦྷཏིཡེཝ. ཡཉྷི བྷིཀྑུསངྒྷོ སལཱཀགྒཡཱགགྒབྷཏྟགྒཨུཔོསཐགྒེསུ ཨཔལོཀནཀམྨཾ ཀརོཏི, ཨེཏམྤི ཀམྨལཀྑཎམེཝ. ཨཙྪིནྣཙཱིཝརཛིཎྞཙཱིཝརནཊྛཙཱིཝརཱནཉྷི སངྒྷཾ སནྣིཔཱཏེཏྭཱ བྱཏྟེན བྷིཀྑུནཱ ཡཱཝཏཏིཡཾ སཱཝེཏྭཱ ཨཔལོཀནཀམྨཾ ཀཏྭཱ ཙཱིཝརཾ དཱཏུཾ ཝཊྚཏི. ཨཔྤམཏྟཀཝིསྶཛྫཀེན པན ཙཱིཝརཾ ཀརོནྟསྶ སེནཱསནཀྑནྡྷཀཝཎྞནཱཡཾ ཝུཏྟཔྤབྷེདཱནི སཱུཙིཨཱདཱིནི ཨནཔལོཀེཏྭཱཔི དཱཏབྦཱནི. ཏེསཾ དཱནེ སོཡེཝ ཨིསྶརོ, ཏཏོ ཨཏིརེཀཾ དེནྟེན ཨཔལོཀེཏྭཱ དཱཏབྦཾ. ཏཏོ ཧི ཨཏིརེཀདཱནེ སངྒྷོ སཱམཱི. གིལཱནབྷེསཛྫམྤི ཏཏྠ ཝུཏྟཔྤཀཱརཾ སཡམེཝ དཱཏབྦཾ. ཨཏིརེཀཾ ཨིཙྪནྟསྶ ཨཔལོཀེཏྭཱ དཱཏབྦཾ. ཡོཔི ཙ དུབྦལོ ཝཱ ཚིནྣིརིཡཱཔཐོ ཝཱ པཙྪིནྣབྷིཀྑཱཙཱརཔཐོ ཝཱ མཧཱགིལཱནོ, ཏསྶ མཧཱཝཱསེསུ ཏཏྲུཔྤཱདཏོ དེཝསིཀཾ ནཱལི༹ ཝཱ ཨུཔཌྜྷནཱལི༹ ཝཱ ཨེཀདིཝསཾཡེཝ ཝཱ པཉྩ ཝཱ དས ཝཱ ཏཎྜུལནཱལི༹ཡོ དེནྟེན ཨཔལོཀནཀམྨཾ ཀཏྭཱཝ དཱཏབྦཱ. པེསལསྶ བྷིཀྑུནོ ཏཏྲུཔྤཱདཏོ ཨིཎཔལིབོདྷམྤི བཧུསྶུཏསྶ སངྒྷབྷཱརནིཏྠཱརཀསྶ བྷིཀྑུནོ ཨནུཊྛཱཔནཱིཡསེནཱསནམྤི སངྒྷཀིཙྩཾ ཀརོནྟཱནཾ ཀཔྤིཡཀཱརཀཱདཱིནཾ བྷཏྟཝེཏནམྤི ཨཔལོཀནཀམྨེན ¶ དཱཏུཾ ཝཊྚཏི.

ཙཏུཔཙྩཡཝསེན དིནྣཏཏྲུཔྤཱདཏོ སངྒྷིཀཾ ཨཱཝཱསཾ ཛགྒཱཔེཏུཾ ཝཊྚཏི. ‘‘ཨཡཾ བྷིཀྑུ ཨིསྶརཝཏཱཡ ཝིཙཱརེཏཱི’’ཏི ཀཐཱཔཙྪིནྡནཏྠཾ པན སལཱཀགྒཱདཱིསུ ཝཱ ཨནྟརསནྣིཔཱཏེ ཝཱ སངྒྷཾ པུཙྪིཏྭཱཝ ¶ ཛགྒཱཔེཏབྦོ. ཙཱིཝརཔིཎྜཔཱཏཏྠཱཡ ཨོདིསྶདིནྣཏཏྲུཔྤཱདཏོཔི ཨཔལོཀེཏྭཱ ཨཱཝཱསོ ཛགྒཱཔེཏབྦོ. ཨནཔལོཀེཏྭཱཔི ཝཊྚཏི. ‘‘སཱུརོ ཝཏཱཡཾ བྷིཀྑུ ཙཱིཝརཔིཎྜཔཱཏཏྠཱཡ དིནྣཏོ ཨཱཝཱསཾ ཛགྒཱཔེཏཱི’’ཏི ཨེཝཾ ཨུཔྤནྣཀཐཱཔཙྪེདནཏྠཾ པན ཨཔལོཀནཀམྨམེཝ ཀཏྭཱ ཛགྒཱཔེཏབྦོ.

ཙེཏིཡེ ¶ ཚཏྟཾ ཝཱ ཝེདིཀཾ ཝཱ བོདྷིགྷརཾ ཝཱ ཨཱསནགྷརཾ ཝཱ ཨཀཏཾ ཝཱ ཀརོནྟེན ཛིཎྞཾ ཝཱ པཊིསངྑརོནྟེན སུདྷཱཀམྨཾ ཝཱ ཀརོནྟེན མནུསྶེ སམཱདཔེཏྭཱ ཀཱཏུཾ ཝཊྚཏི. སཙེ ཀཱརཀོ ནཏྠི, ཙེཏིཡསྶ ཨུཔནིཀྑེཔཏོ ཀཱརེཏབྦཾ. ཨུཔནིཀྑེཔེཔི ཨསཏི ཨཔལོཀནཀམྨཾ ཀཏྭཱ ཏཏྲུཔྤཱདཏོ ཀཱརེཏབྦཾ, སངྒྷིཀེནཔི. སངྒྷིཀེན ཧི ཨཔལོཀེཏྭཱ ཙེཏིཡཀིཙྩཾ ཀཱཏུཾ ཝཊྚཏི. ཙེཏིཡསྶ སནྟཀེན ཨཔལོཀེཏྭཱཔི སངྒྷིཀཀིཙྩཾ ཀཱཏུཾ ན ཝཊྚཏི. ཏཱཝཀཱལིཀཾ པན གཧེཏྭཱ པཱཀཏིཀཾ ཀཱཏུཾ ཝཊྚཏི.

ཙེཏིཡེ སུདྷཱཀམྨཱདཱིནི ཀརོནྟེཧི པན བྷིཀྑཱཙཱརཏོ ཝཱ སངྒྷཏོ ཝཱ ཡཱཔནམཏྟཾ ཨལབྷནྟེཧི ཙེཏིཡསནྟཀཏོ ཡཱཔནམཏྟཾ གཧེཏྭཱ པརིབྷུཉྫནྟེཧི ཝཏྟཾ ཀཱཏུཾ ཝཊྚཏི, ‘‘ཝཏྟཾ ཀརོམཱ’’ཏི མཙྪམཾསཱདཱིཧི སངྒྷབྷཏྟཾ ཀཱཏུཾ ན ཝཊྚཏི. ཡེ ཝིཧཱརེ རོཔིཏཱ ཕལརུཀྑཱ སངྒྷེན པརིགྒཧིཏཱ ཧོནྟི, ཛགྒནཀམྨཾ ལབྷནྟི, ཡེསཾ ཕལཱནི གྷཎྚིཾ པཧརིཏྭཱ བྷཱཛེཏྭཱ པརིབྷུཉྫནྟི, ཏེསུ ཨཔལོཀནཀམྨཾ ན ཀཱཏབྦཾ. ཡེ པན ཨཔརིགྒཧིཏཱ, ཏེསུ ཨཔལོཀནཀམྨཾ ཀཱཏབྦཾ. ཏཾ པན སལཱཀགྒཡཱགགྒབྷཏྟགྒཨནྟརསནྣིཔཱཏེསུཔི ཀཱཏུཾ ཝཊྚཏི, ཨུཔོསཐགྒེ པན ཝཊྚཏིཡེཝ. ཏཏྠ ཧི ཨནཱགཏཱནམྤི ཚནྡཔཱརིསུདྡྷི ཨཱཧརིཡཏི, ཏསྨཱ ཏཾ སུཝིསོདྷིཏཾ ཧོཏི.

ཨེཝཉྩ པན ཀཱཏབྦཾ, བྱཏྟེན བྷིཀྑུནཱ བྷིཀྑུསངྒྷསྶ ཨནུམཏིཡཱ སཱཝེཏབྦཾ –

‘‘བྷནྟེ, ཡཾ ཨིམསྨིཾ ཝིཧཱརེ ཨནྟོསཱིམཱཡ སངྒྷསནྟཀཾ མཱུལཏཙཔཏྟཨངྐུརཔུཔྥཕལཁཱདནཱིཡཱདི ཨཏྠི, ཏཾ སབྦཾ ཨཱགཏཱགཏཱནཾ བྷིཀྑཱུནཾ ཡཐཱསུཁཾ པརིབྷུཉྫིཏུཾ རུཙྩཏཱིཏི ¶ སངྒྷཾ པུཙྪཱམཱི’’ཏི ཏིཀྑཏྟུཾ པུཙྪིཏབྦཾ.

ཙཏཱུཧི པཉྩཧི བྷིཀྑཱུཧི ཀཏཾ སུཀཏམེཝ. ཡསྨིཾ ཝིཧཱརེ དྭེ ཏཡོ ཛནཱ ཝསནྟི, ཏེཧི ¶ ནིསཱིདིཏྭཱ ཀཏམྤི སངྒྷེན ཀཏསདིསམེཝ. ཡསྨིཾ པན ཝིཧཱརེ ཨེཀོ བྷིཀྑུ ཧོཏི, ཏེན བྷིཀྑུནཱ ཨུཔོསཐདིཝསེ པུབྦཀརཎཔུབྦཀིཙྩཾ ཀཏྭཱ ནིསིནྣེན ཀཏམྤི ཀཏིཀཝཏྟཾ སངྒྷེན ཀཏསདིསམེཝ ཧོཏི.

ཀརོནྟེན ¶ པན ཕལཝཱརེན ཀཱཏུམྤི ཙཏྟཱརོ མཱསེ ཚ མཱསེ ཨེཀསཾཝཙྪརནྟི ཨེཝཾ པརིཙྪིནྡིཏྭཱཔི ཨཔརིཙྪིནྡིཏྭཱཔི ཀཱཏུཾ ཝཊྚཏི. པརིཙྪིནྣེ ཡཐཱཔརིཙྪེདཾ པརིབྷུཉྫིཏྭཱ པུན ཀཱཏབྦཾ. ཨཔརིཙྪིནྣེ ཡཱཝ རུཀྑཱ དྷརནྟི ཏཱཝ ཝཊྚཏིཡེཝ. ཡེཔི ཏེསཾ རུཀྑཱནཾ བཱིཛེཧི ཨཉྙེ རུཀྑཱ རོཔིཏཱ ཧོནྟི, ཏེསམྤི སཱ ཨེཝ ཀཏིཀཱ.

སཙེ པན ཨཉྙསྨིཾ ཝིཧཱརེ རོཔིཏཱ ཧོནྟི, ཏེསཾ ཡཏྠ རོཔིཏཱ, ཏསྨིཾཡེཝ ཝིཧཱརེ སངྒྷོ སཱམཱི. ཡེཔི ཨཉྙཏོ བཱིཛཱནི ཨཱཧརིཏྭཱ པུརིམཝིཧཱརེ པཙྪཱ རོཔིཏཱ, ཏེསུ ཨཉྙཱ ཀཏིཀཱ ཀཱཏབྦཱ. ཀཏིཀཱཡ ཀཏཱཡ པུགྒལིཀཊྛཱནེ ཏིཊྛནྟི, ཡཐཱསུཁཾ ཕལཱདཱིནི པརིབྷུཉྫིཏུཾ ཝཊྚཏི. སཙེ པནེཏྠ ཏཾ ཏཾ ཨོཀཱསཾ པརིཀྑིཔིཏྭཱ པརིཝེཎཱནི ཀཏྭཱ ཛགྒནྟི, ཏེསཾ བྷིཀྑཱུནཾ པུགྒལིཀཊྛཱནེ ཏིཊྛནྟི. ཨཉྙེ པརིབྷུཉྫིཏུཾ ན ལབྷནྟི, ཏེཧི པན སངྒྷསྶ དསབྷཱགཾ དཏྭཱ པརིབྷུཉྫིཏབྦཱནི. ཡོཔི མཛ྄ཛྷེཝིཧཱརེ རུཀྑཾ སཱཁཱཧི པརིཝཱརེཏྭཱ རཀྑཏི, ཏསྶཱཔི ཨེསེཝ ནཡོ.

པོརཱཎཝིཧཱརཾ གཏསྶ སམྦྷཱཝནཱིཡབྷིཀྑུནོ ‘‘ཐེརོ ཨཱགཏོ’’ཏི ཕལཱཕལཾ ཨཱཧརནྟི, སཙེ ཏཏྠ མཱུལེ སབྦཔརིཡཏྟིདྷརོ བཧུསྶུཏབྷིཀྑུ ཝིཧཱསི, ‘‘ཨདྡྷཱ ཨེཏྠ དཱིགྷཱ ཀཏིཀཱ ཀཏཱ བྷཝིསྶཏཱི’’ཏི ནིཀྐུཀྐུཙྩེན པརིབྷུཉྫིཏབྦཾ. ཝིཧཱརེ ཕལཱཕལཾ པིཎྜཔཱཏིཀཱནམྤི ཝཊྚཏི, དྷུཏངྒཾ ན ཀོཔེཏི. སཱམཎེརཱ ཨཏྟནོ ཨཱཙརིཡུཔཛ྄ཛྷཱཡཱནཾ བཧཱུནི ཕལཱནི དེནྟི, ཨཉྙེ བྷིཀྑཱུ ཨལབྷནྟཱ ཁིཡྻནྟི, ཁིཡྻནམཏྟམེཝ ཙེཏཾ ཧོཏི.

སཙེ པན དུབྦྷིཀྑཾ ཧོཏི, ཨེཀཾ པནསརུཀྑཾ ནིསྶཱཡ སཊྛིཔི ཛནཱ ཛཱིཝནྟི, ཏཱདིསེ ཀཱལེ སབྦེསཾ སངྒཧཀརཎཏྠཱཡ བྷཱཛེཏྭཱ ཁཱདིཏབྦཾ, ཨཡཾ སཱམཱིཙི. ཡཱཝ པན ཀཏིཀཝཏྟཾ ན པཊིཔྤསྶམྦྷཏི, ཏཱཝ ཏེཧི ཁཱཡིཏཾ སུཁཱཡིཏམེཝ. ཀདཱ པན ཀཏིཀཝཏྟཾ པཊིཔྤསྶམྦྷཏི? ཡདཱ སམགྒོ སངྒྷོ སནྣིཔཏིཏྭཱ ‘‘ཨིཏོ པཊྛཱཡ བྷཱཛེཏྭཱ ཁཱདནྟཱུ’’ཏི སཱཝེཏི. ཨེཀབྷིཀྑུཀེ པན ¶ ཝིཧཱརེ ཨེཀེན སཱཝིཏེཔི པུརིམཀཏིཀཱ པཊིཔྤསྶམྦྷཏིཡེཝ. སཙེ ¶ པཊིཔྤསྶདྡྷཱཡ ཀཏིཀཱཡ སཱམཎེརཱ ནེཝ རུཀྑཏོ པཱཏེནྟི, ན བྷཱུམིཏོ གཧེཏྭཱ བྷིཀྑཱུནཾ དེནྟི, པཏིཏཕལཱནི པཱདེཧི པཧརནྟཱ ཝིཙརནྟི, ཏེསཾ དསབྷཱགཏོ པཊྛཱཡ ཡཱཝ ཨུཔཌྜྷཕལབྷཱགེན ཕཱཏིཀམྨཾ ཀཱཏབྦཾ. ཨདྡྷཱ ཕཱཏིཀམྨལོབྷེན ཨཱཧརིཏྭཱ ¶ དསྶནྟི. པུན སུབྷིཀྑེ ཛཱཏེ ཀཔྤིཡཀཱརཀེསུ ཨཱགནྟྭཱ སཱཁཱཔརིཝཱརཱདཱིནི ཀཏྭཱ རུཀྑེ རཀྑནྟེསུ སཱམཎེརཱནཾ ཕཱཏིཀམྨཾ ན དཱཏབྦཾ, བྷཱཛེཏྭཱ པརིབྷུཉྫིཏབྦཾ.

‘‘ཝིཧཱརེ ཕལཱཕལཾ ཨཏྠཱི’’ཏི སཱམནྟགཱམེཧི མནུསྶཱ གིལཱནཱནཾ ཝཱ གབྦྷིནཱིནཾ ཝཱ ཨཏྠཱཡ ཨཱགནྟྭཱ ‘‘ཨེཀཾ ནཱལི༹ཀེརཾ དེཐ, ཨམྦཾ དེཐ, ལབུཛཾ དེཐཱ’’ཏི ཡཱཙནྟི, དཱཏབྦཾ ན དཱཏབྦནྟི? དཱཏབྦཾ. ཨདཱིཡམཱནེ ཧི ཏེ དོམནསྶིཀཱ ཧོནྟི, དེནྟེན པན སངྒྷཾ སནྣིཔཱཏེཏྭཱ ཡཱཝཏཏིཡཾ སཱཝེཏྭཱ ཨཔལོཀནཀམྨཾ ཀཏྭཱཝ དཱཏབྦཾ, ཀཏིཀཝཏྟཾ ཝཱ ཀཏྭཱ ཋཔེཏབྦཾ, ཨེཝཉྩ པན ཀཱཏབྦཾ, བྱཏྟེན བྷིཀྑུནཱ སངྒྷསྶ ཨནུམཏིཡཱ སཱཝེཏབྦཾ –

‘‘སཱམནྟགཱམེཧི མནུསྶཱ ཨཱགནྟྭཱ གིལཱནཱདཱིནཾ ཨཏྠཱཡ ཕལཱཕལཾ ཡཱཙནྟི, དྭེ ནཱལི༹ཀེརཱནི, དྭེ ཏཱལཕལཱནི, དྭེ པནསཱནི, པཉྩ ཨམྦཱནི, པཉྩ ཀདལིཕལཱནི གཎྷནྟཱནཾ ཨནིཝཱརཎཾ, ཨསུཀརུཀྑཏོ ཙ ཨསུཀརུཀྑཏོ ཙ ཕལཾ གཎྷནྟཱནཾ ཨནིཝཱརཎཾ རུཙྩཏི བྷིཀྑུསངྒྷསྶཱ’’ཏི ཏིཀྑཏྟུཾ ཝཏྟབྦཾ.

ཏཏོ པཊྛཱཡ གིལཱནཱདཱིནཾ ནཱམཾ གཧེཏྭཱ ཡཱཙནྟཱ ‘‘གཎྷཐཱ’’ཏི ན ཝཏྟབྦཱ, ཝཏྟཾ པན ཨཱཙིཀྑིཏབྦཾ – ‘‘ནཱལི༹ཀེརཱདཱིནི ཨིམིནཱ ནཱམ པརིཙྪེདེན གཎྷནྟཱནཾ ཨསུཀརུཀྑཏོ ཙ ཨསུཀརུཀྑཏོ ཙ ཕལཾ གཎྷནྟཱནཾ ཨནིཝཱརཎཾ ཀཏ’’ནྟི. ཨནུཝིཙརིཏྭཱ པན ‘‘ཨཡཾ མདྷུརཕལོ ཨམྦོ, ཨིཏོ གཎྷཐཱ’’ཏིཔི ན ཝཏྟབྦཱ. ཕལབྷཱཛནཀཱལེ པན ཨཱགཏཱནཾ སམྨཏེན ཨུཔཌྜྷབྷཱགོ དཱཏབྦོ, ཨསམྨཏེན ཨཔལོཀེཏྭཱ དཱཏབྦཾ.

ཁཱིཎཔརིབྦཡོ ཝཱ མགྒགམིཡསཏྠཝཱཧོ ཝཱ ཨཉྙོ ཝཱ ཨིསྶརོ ཨཱགནྟྭཱ ཡཱཙཏི, ཨཔལོཀེཏྭཱཝ དཱཏབྦཾ. བལཀྐཱརེན གཧེཏྭཱ ཁཱདནྟོ ན ཝཱརེཏབྦོ. ཀུདྡྷོ ཧི སོ རུཀྑེཔི ཚིནྡེཡྻ, ཨཉྙམྤི ཨནཏྠཾ ཀརེཡྻ. པུགྒལིཀཔརིཝེཎཾ ཨཱགནྟྭཱ གིལཱནསྶ གཱམེན ཡཱཙནྟོ ‘‘ཨམྷེཧི ཚཱཡཱདཱིནཾ ཨཏྠཱཡ རོཔིཏཾ, སཙེ ཨཏྠི, ཏུམྷེ ཛཱནཱཐཱ’’ཏི ཝཏྟབྦོ. ཡདི ¶ པན ཕལབྷརིཏཱཝ ¶ རུཀྑཱ ཧོནྟི, ཀཎྚཀེ བནྡྷིཏྭཱ ཕལཝཱརེན ཁཱདནྟི, ཨཔཙྩཱསཱིསནྟེན ཧུཏྭཱ དཱཏབྦཾ. བལཀྐཱརེན གཎྷནྟོ ན ཝཱརེཏབྦོ, པུབྦེ ཝུཏྟམེཝེཏྠ ཀཱརཎཾ.

སངྒྷསྶ ¶ ཕལཱརཱམོ ཧོཏི, པཊིཛགྒནཾ ན ལབྷཏི, སཙེ ཏཾ ཀོཙི ཝཏྟསཱིསེན ཛགྒཏི, སངྒྷསྶེཝ ཧོཏི. ཨཐཱཔི ཀསྶཙི པཊིབལསྶ བྷིཀྑུནོ ‘‘ཨིམཾ སཔྤུརིས ཛགྒིཏྭཱ དེཧཱི’’ཏི སངྒྷོ བྷཱརཾ ཀརོཏི, སོ ཙེ ཝཏྟསཱིསེན ཛགྒཏི, ཨེཝམྤི སངྒྷསྶེཝ ཧོཏི. ཕཱཏིཀམྨཾ པཙྩཱསཱིསནྟསྶ པན ཏཏིཡབྷཱགེན ཝཱ ཨུཔཌྜྷབྷཱགེན ཝཱ ཕཱཏིཀམྨཾ ཀཱཏབྦཾ. ‘‘བྷཱརིཡཾ ཀམྨ’’ནྟི ཝཏྭཱ ཨེཏྟཀེན ཨནིཙྪནྟོ པན སབྦཾ ཏཝེཝ སནྟཀཾ ཀཏྭཱ ‘‘མཱུལབྷཱགཾ དསབྷཱགམཏྟཾ དཏྭཱ ཛགྒཱཧཱི’’ཏིཔི ཝཏྟབྦོ. གརུབྷཎྜཏྟཱ པན མཱུལཙྪེཛྫཝསེན ན དཱཏབྦཾ. སོ མཱུལབྷཱགཾ དཏྭཱ ཁཱདནྟོ ཨཀཏཱཝཱསཾ ཝཱ ཀཏྭཱ ཀཏཱཝཱསཾ ཝཱ ཛགྒིཏྭཱ ནིསྶིཏཀཱནཾ ཨཱརཱམཾ ནིཡྻཱདེཏི, ཏེཧིཔི མཱུལབྷཱགོ དཱཏབྦོཝ. ཡདཱ པན བྷིཀྑཱུ སཡཾ ཛགྒིཏུཾ པཧོནྟི, ཨཐ ཏེསཾ ཛགྒིཏུཉྩ ན དཱཏབྦཾ, ཛགྒིཏཀཱལེ ཙ ན ཝཱརེཏབྦཱ, ཛགྒནཀཱལེཡེཝ ཝཱརེཏབྦཱ. ‘‘བཧུཾ ཏུམྷེཧི ཁཱཡིཏཾ, ཨིདཱནི མཱ ཛགྒིཏྠ, བྷིཀྑུསངྒྷོཡེཝ ཛགྒིསྶཏཱི’’ཏི ཝཏྟབྦཾ.

སཙེ པན ནེཝ ཝཏྟསཱིསེན ཛགྒནྟོ ཨཏྠི, ན ཕཱཏིཀམྨེན, ན སངྒྷོ ཛགྒིཏུཾ པཧོཏི, ཨེཀོ ཨནཱཔུཙྪིཏྭཱཝ ཛགྒིཏྭཱ ཕཱཏིཀམྨཾ ཝཌྜྷེཏྭཱ པཙྩཱསཱིསཏི, ཨཔལོཀནཀམྨེན ཕཱཏིཀམྨཾ ཝཌྜྷེཏྭཱ དཱཏབྦཾ. ཨིཏི ཨིམཾ སབྦམྤི ཀམྨལཀྑཎམེཝ ཧོཏི. ཨཔལོཀནཀམྨཾ ཨིམཱནི པཉྩ ཋཱནཱནི གཙྪཏི.

ཉཏྟིཀམྨཊྛཱནབྷེདེ པན ‘‘སུཎཱཏུ མེ བྷནྟེ སངྒྷོ, ཨིཏྠནྣཱམོ ཨིཏྠནྣཱམསྶ ཨཱཡསྨཏོ ཨུཔསམྤདཱཔེཀྑོ, ཨནུསིཊྛོ སོ མཡཱ. ཡདི སངྒྷསྶ པཏྟཀལླཾ, ཨིཏྠནྣཱམོ ཨཱགཙྪེཡྻཱཏི, ཨཱགཙྪཱཧཱིཏི ཝཏྟབྦོ’’ཏི ཨེཝཾ ཨུཔསམྤདཱཔེཀྑསྶ ཨོསཱརཎཱ ཨོསཱརཎཱ ནཱམ.

‘‘སུཎནྟུ མེ ཨཱཡསྨནྟཱ, ཨཡཾ ཨིཏྠནྣཱམོ བྷིཀྑུ དྷམྨཀཐིཀོ ཨིམསྶ ནེཝ སུཏྟཾ ཨཱགཙྪཏི, ནོ སུཏྟཝིབྷངྒོ, སོ ཨཏྠཾ ཨསལླཀྑེཏྭཱ བྱཉྫནཙྪཱཡཱཡ ཨཏྠཾ པཊིབཱཧཏི. ཡདཱཡསྨནྟཱནཾ པཏྟཀལླཾ, ཨིཏྠནྣཱམཾ བྷིཀྑུཾ ཝུཊྛཱཔེཏྭཱ ཨཝསེསཱ ཨིམཾ ཨདྷིཀརཎཾ ཝཱུཔསམེཡྻཱམཱ’’ཏི ཨེཝཾ ཨུབྦཱཧིཀཱཝིནིཙྪཡེ དྷམྨཀཐིཀསྶ བྷིཀྑུནོ ནིསྶཱརཎཱ ནིསྶཱརཎཱ ནཱམ.

‘‘སུཎཱཏུ མེ བྷནྟེ ¶ སངྒྷོ, ཨཛྫུཔོསཐོ པནྣརསོ. ཡདི སངྒྷསྶ པཏྟཀལླཾ, སངྒྷོ ཨུཔོསཐཾ ཀརེཡྻཱ’’ཏི ཨེཝཾ ཨུཔོསཐཀམྨཝསེན ཋཔིཏཱ ཉཏྟི ཨུཔོསཐོ ནཱམ.

‘‘སུཎཱཏུ ¶ མེ བྷནྟེ སངྒྷོ, ཨཛྫ པཝཱརཎཱ པནྣརསཱི. ཡདི སངྒྷསྶ པཏྟཀལླཾ, སངྒྷོ པཝཱརེཡྻཱ’’ཏི ཨེཝཾ པཝཱརཎཱཀམྨཝསེན ཋཔིཏཱ ཉཏྟི པཝཱརཎཱ ནཱམ.

‘‘སུཎཱཏུ ¶ མེ བྷནྟེ སངྒྷོ, ཨིཏྠནྣཱམོ ཨིཏྠནྣཱམསྶ ཨཱཡསྨཏོ ཨུཔསམྤདཱཔེཀྑོ. ཡདི སངྒྷསྶ པཏྟཀལླཾ, ཨཧཾ ཨིཏྠནྣཱམཾ ཨནུསཱསེཡྻ’’ནྟི. ‘‘ཡདི སངྒྷསྶ པཏྟཀལླཾ, ཨིཏྠནྣཱམོ ཨིཏྠནྣཱམཾ ཨནུསཱསེཡྻཱ’’ཏི. ‘‘ཡདི སངྒྷསྶ པཏྟཀལླཾ, ཨཧཾ ཨིཏྠནྣཱམཾ ཨནྟརཱཡིཀེ དྷམྨེ པུཙྪེཡྻ’’ནྟི. ‘‘ཡདི སངྒྷསྶ པཏྟཀལླཾ, ཨིཏྠནྣཱམོ ཨིཏྠནྣཱམཾ ཨནྟརཱཡིཀེ དྷམྨེ པུཙྪེཡྻཱ’’ཏི. ‘‘ཡདི སངྒྷསྶ པཏྟཀལླཾ, ཨཧཾ ཨིཏྠནྣཱམཾ ཝིནཡཾ པུཙྪེཡྻ’’ནྟི. ‘‘ཡདི སངྒྷསྶ པཏྟཀལླཾ, ཨིཏྠནྣཱམོ ཨིཏྠནྣཱམཾ ཝིནཡཾ པུཙྪེཡྻཱ’’ཏི. ‘‘ཡདི སངྒྷསྶ པཏྟཀལླཾ, ཨཧཾ ཨིཏྠནྣཱམེན ཝིནཡཾ པུཊྛོ ཝིསྶཛྫེཡྻ’’ནྟི. ‘‘ཡདི སངྒྷསྶ པཏྟཀལླཾ, ཨིཏྠནྣཱམོ ཨིཏྠནྣཱམེན ཝིནཡཾ པུཊྛོ ཝིསྶཛྫེཡྻཱ’’ཏི ཨེཝཾ ཨཏྟཱནཾ ཝཱ པརཾ ཝཱ སམྨནྣིཏུཾ ཋཔིཏཱ ཉཏྟི སམྨུཏི ནཱམ.

‘‘སུཎཱཏུ མེ བྷནྟེ སངྒྷོ, ཨིདཾ ཙཱིཝརཾ ཨིཏྠནྣཱམསྶ བྷིཀྑུནོ ནིསྶགྒིཡཾ སངྒྷསྶ ནིསྶཊྛཾ. ཡདི སངྒྷསྶ པཏྟཀལླཾ, སངྒྷོ ཨིམཾ ཙཱིཝརཾ ཨིཏྠནྣཱམསྶ བྷིཀྑུནོ དདེཡྻཱ’’ཏི. ‘‘ཡདཱཡསྨནྟཱནཾ པཏྟཀལླཾ, ཨཱཡསྨནྟཱ ཨིམཾ ཙཱིཝརཾ ཨིཏྠནྣཱམསྶ བྷིཀྑུནོ དདེཡྻུ’’ནྟི ཨེཝཾ ནིསྶཊྛཙཱིཝརཔཏྟཱདཱིནཾ དཱནཾ དཱནཾ ནཱམ.

‘‘སུཎཱཏུ མེ བྷནྟེ སངྒྷོ, ཨཡཾ ཨིཏྠནྣཱམོ བྷིཀྑུ ཨཱཔཏྟིཾ སརཏི, ཝིཝརཏི, ཨུཏྟཱནིཾ ཀརོཏི, དེསེཏི. ཡདི སངྒྷསྶ པཏྟཀལླཾ, ཨཧཾ ཨིཏྠནྣཱམསྶ བྷིཀྑུནོ ཨཱཔཏྟིཾ པཊིགྒཎྷེཡྻནྟི. ཡདཱཡསྨནྟཱནཾ པཏྟཀལླཾ, ཨཧཾ ཨིཏྠནྣཱམསྶ བྷིཀྑུནོ ཨཱཔཏྟིཾ པཊིགྒཎྷེཡྻ’’ནྟི. ཏེན ཝཏྟབྦོ ‘‘པསྶསཱི’’ཏི. ‘‘ཨཱམ པསྶཱམཱི’’ཏི. ཨཱཡཏིཾ སཾཝརེཡྻཱསཱིཏི ཨེཝཾ ཨཱཔཏྟིཔཊིགྒཧོ པཊིགྒཧོ ནཱམ.

‘‘སུཎནྟུ མེ, ཨཱཡསྨནྟཱ ཨཱཝཱསིཀཱ. ཡདཱཡསྨནྟཱནཾ པཏྟཀལླཾ, ཨིདཱནི ཨུཔོསཐཾ ཀརེཡྻཱམ, པཱཏིམོཀྑཾ ཨུདྡིསེཡྻཱམ, ཨཱགམེ ཀཱལེ༹ པཝཱརེཡྻཱམཱ’’ཏི. ཏེ ཙེ, བྷིཀྑཝེ, བྷིཀྑཱུ ¶ བྷཎྜནཀཱརཀཱ ¶ ཀལཧཀཱརཀཱ ཝིཝཱདཀཱརཀཱ བྷསྶཀཱརཀཱ སངྒྷེ ཨདྷིཀརཎཀཱརཀཱ ཏཾ ཀཱལ༹ཾ ཨནུཝསེཡྻུཾ, ཨཱཝཱསིཀེན བྷིཀྑུནཱ བྱཏྟེན པཊིབལེན ཨཱཝཱསིཀཱ བྷིཀྑཱུ ཉཱཔེཏབྦཱ – ‘‘སུཎནྟུ མེ, ཨཱཡསྨནྟཱ ཨཱཝཱསིཀཱ. ཡདཱཡསྨནྟཱནཾ ¶ པཏྟཀལླཾ, ཨིདཱནི ཨུཔོསཐཾ ཀརེཡྻཱམ, པཱཏིམོཀྑཾ ཨུདྡིསེཡྻཱམ, ཨཱགམེ ཛུཎྷེ པཝཱརེཡྻཱམཱ’’ཏི ཨེཝཾ ཀཏཱ པཝཱརཎཱཔཙྩུཀྐཌྜྷནཱ པཙྩུཀྐཌྜྷནཱ ནཱམ.

སབྦེཧེཝ ཨེཀཛ྄ཛྷཾ སནྣིཔཏིཏབྦཾ, སནྣིཔཏིཏྭཱ བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ – ‘‘སུཎཱཏུ མེ, བྷནྟེ, སངྒྷོ ཨམྷཱཀཾ བྷཎྜནཛཱཏཱནཾ ཀལཧཛཱཏཱནཾ ཝིཝཱདཱཔནྣཱནཾ ཝིཧརཏཾ བཧུཾ ཨསྶཱམཎཀཾ ཨཛ྄ཛྷཱཙིཎྞཾ བྷཱསིཏཔརིཀྐནྟཾ. སཙེ མཡཾ ཨིམཱཧི ཨཱཔཏྟཱིཧི ཨཉྙམཉྙཾ ཀཱརེསྶཱམ, སིཡཱཔི ཏཾ ཨདྷིཀརཎཾ ཀཀྑལ༹ཏྟཱཡ ཝཱལ༹ཏྟཱཡ བྷེདཱཡ སཾཝཏྟེཡྻ. ཡདི སངྒྷསྶ པཏྟཀལླཾ, སངྒྷོ ཨིམཾ ཨདྷིཀརཎཾ ཏིཎཝཏྠཱརཀེན ཝཱུཔསམེཡྻ ཋཔེཏྭཱ ཐུལླཝཛྫཾ, ཋཔེཏྭཱ གིཧིཔཊིསཡུཏྟ’’ནྟི ཨེཝཾ ཏིཎཝཏྠཱརཀསམཐེན ཀཏྭཱ སབྦཔཋམཱ སབྦསངྒཱཧིཀཉཏྟི ཀམྨལཀྑཎཾ ནཱམ.

ཏཐཱ ཏཏོ པརཱ ཨེཀེཀསྨིཾ པཀྑེ ཨེཀེཀཾ ཀཏྭཱ དྭེ ཉཏྟིཡོ ཨིཏི ཡཐཱཝུཏྟཔྤབྷེདཾ ཨོསཱརཎཾ ནིསྶཱརཎཾ…པེ… ཀམྨལཀྑཎཉྙེཝ ནཝམནྟི ཉཏྟིཀམྨཾ ཨིམཱནི ནཝ ཋཱནཱནི གཙྪཏི.

ཉཏྟིདུཏིཡཀམྨཊྛཱནབྷེདེ པན ཝཌྜྷསྶ ལིཙྪཝིནོ པཏྟནིཀྐུཛྫནཝསེན ཁནྡྷཀེ ཝུཏྟཱ ནིསྶཱརཎཱ. ཏསྶེཝ པཏྟུཀྐུཛྫནཝསེན ཝུཏྟཱ ཨོསཱརཎཱ ཙ ཝེདིཏབྦཱ.

སཱིམཱསམྨུཏི ཏིཙཱིཝརེན ཨཝིཔྤཝཱསསམྨུཏི, སནྠཏསམྨུཏི, བྷཏྟུདྡེསཀ-སེནཱསནགྒཱཧཱཔཀ-བྷཎྜཱགཱརིཀ-ཙཱིཝརཔཊིགྒཱཧཀ-ཙཱིཝརབྷཱཛཀ-ཡཱགུབྷཱཛཀཕལབྷཱཛཀ-ཁཛྫབྷཱཛཀ-ཨཔྤམཏྟཀཝིསྶཛྫཀ-སཱཊིཡགྒཱཧཱཔཀ-པཏྟགྒཱཧཱཔཀ-ཨཱརཱམིཀཔེསཀསཱམཎེརཔེསཀསམྨུཏཱིཏི ཨེཏཱསཾ སམྨུཏཱིནཾ ཝསེན སམྨུཏི ཝེདིཏབྦཱ. ཀཐིནཙཱིཝརདཱནམཏཀཙཱིཝརདཱནཝསེན དཱནཾ ཝེདིཏབྦཾ.

ཀཐིནུདྡྷཱརཝསེན ཨུདྡྷཱརོ ཝེདིཏབྦོ. ཀུཊིཝཏྠུཝིཧཱརཝཏྠུདེསནཱཝསེན དེསནཱ ཝེདིཏབྦཱ. ཡཱ ¶ པན ཏིཎཝཏྠཱརཀསམཐེ སབྦསངྒཱཧིཀཉཏྟིཉྩ ཨེཀེཀསྨིཾ པཀྑེ ཨེཀེཀཾ ཉཏྟིཉྩཱཏི ཏིསྶོ ཉཏྟིཡོ ཋཔེཏྭཱ པུན ཨེཀསྨིཾ པཀྑེ ཨེཀཱ, ཨེཀསྨིཾ པཀྑེ ཨེཀཱཏི དྭེ ཉཏྟིདུཏིཡཀམྨཝཱཙཱ ཝུཏྟཱ, ཏཱསཾ ཝསེན ཀམྨལཀྑཎཾ ཝེདིཏབྦཾ ¶ . ཨིཏི ཉཏྟིདུཏིཡཀམྨཾ ཨིམཱནི སཏྟ ཋཱནཱནི གཙྪཏི.

ཉཏྟིཙཏུཏྠཀམྨཊྛཱནབྷེདེ ¶ པན ཏཛྫནཱིཡཀམྨཱདཱིནཾ སཏྟནྣཾ ཀམྨཱནཾ ཝསེན ནིསྶཱརཎཱ, ཏེསཾཡེཝ ཙ ཀམྨཱནཾ པཊིཔྤསྶམྦྷནཝསེན ཨོསཱརཎཱ ཝེདིཏབྦཱ. བྷིཀྑུནོཝཱདཀསམྨུཏིཝསེན སམྨུཏི ཝེདིཏབྦཱ. པརིཝཱསདཱནམཱནཏྟདཱནཝསེན དཱནཾ ཝེདིཏབྦཾ. མཱུལཱཡཔཊིཀསྶནཀམྨཝསེན ནིགྒཧོ ཝེདིཏབྦོ. ‘‘ཨུཀྑིཏྟཱནུཝཏྟིཀཱ ཨཊྛ, ཡཱཝཏཏིཡཀཱ ཨརིཊྛོ ཙཎྜཀཱལཱི༹ ཙ ཨིམེ ཏེ ཡཱཝཏཏིཡཀཱ’’ཏི ཨིམཱསཾ ཨེཀཱདསནྣཾ སམནུབྷཱསནཱནཾ ཝསེན སམནུབྷཱསནཱ ཝེདིཏབྦཱ. ཨུཔསམྤདཱཀམྨཨབྦྷཱནཀམྨཝསེན པན ཀམྨལཀྑཎཾ ཝེདིཏབྦཾ. ཨིཏི ཉཏྟིཙཏུཏྠཀམྨཾ ཨིམཱནི སཏྟ ཋཱནཱནི གཙྪཏི.

༤༩༧. ཨིཏི ཀམྨཱནི ཙ ཀམྨཝིཔཏྟིཉྩ ཝིཔཏྟིཝིརཧིཏཱནཾ ཀམྨཱནཾ ཋཱནཔབྷེདགམནཉྩ དསྶེཏྭཱ ཨིདཱནི ཏེསཾ ཀམྨཱནཾ ཀཱརཀསྶ སངྒྷསྶ པརིཙྪེདཾ དསྶེནྟོ པུན ‘‘ཙཏུཝགྒཀརཎེ ཀམྨེ’’ཏིཨཱདིམཱཧ. ཏསྶཏྠོ པརིསཏོ ཀམྨཝིཔཏྟིཝཎྞནཱཡཾ ཝུཏྟནཡེནེཝ ཝེདིཏབྦོཏི.

ཀམྨཝགྒཝཎྞནཱ ནིཊྛིཏཱ.

ཨཏྠཝསཝགྒཱདིཝཎྞནཱ

༤༩༨. ཨིདཱནི ཡཱནི ཏཱནི ཏེསཾ ཀམྨཱནཾ ཝཏྠུབྷཱུཏཱནི སིཀྑཱཔདཱནི, ཏེསཾ པཉྙཏྟིཡཾ ཨཱནིསཾསཾ དསྶེཏུཾ ‘‘དྭེ ཨཏྠཝསེ པཊིཙྩཱ’’ཏིཨཱདི ཨཱརདྡྷཾ. ཏཏྠ དིཊྛདྷམྨིཀཱནཾ ཝེརཱནཾ སཾཝརཱཡཱཏི པཱཎཱཏིཔཱཏཱདཱིནཾ པཉྩནྣཾ དིཊྛདྷམྨིཀཝེརཱནཾ སཾཝརཏྠཱཡ པིདཧནཏྠཱཡ. སམྤརཱཡིཀཱནཾ ཝེརཱནཾ པཊིགྷཱཏཱཡཱཏི ཝིཔཱཀདུཀྑསངྑཱཏཱནཾ སམྤརཱཡིཀཝེརཱནཾ པཊིགྷཱཏཏྠཱཡ, སམུཙྪེདནཏྠཱཡ ཨནུཔྤཛྫནཏྠཱཡ. དིཊྛདྷམྨིཀཱནཾ ཝཛྫཱནཾ སཾཝརཱཡཱཏི ཏེསཾཡེཝ པཉྩནྣཾ ཝེརཱནཾ སཾཝརཏྠཱཡ. སམྤརཱཡིཀཱནཾ ཝཛྫཱནནྟི ཏེསཾཡེཝ ཝིཔཱཀདུཀྑཱནཾ. ཝིཔཱཀདུཀྑཱནེཝ ཧི ཨིདྷ ཝཛྫནཱིཡབྷཱཝཏོ ¶ ཝཛྫཱནཱིཏི ཝུཏྟཱནི. དིཊྛདྷམྨིཀཱནཾ བྷཡཱནནྟི གརཧཱ ཨུཔཝཱདོ ཏཛྫནཱིཡཱདཱིནི ཀམྨཱནི ཨུཔོསཐཔཝཱརཎཱནཾ ཋཔནཾ ཨཀིཏྟིཔཀཱསནཱིཡཀམྨནྟི ཨེཏཱནི དིཊྛདྷམྨིཀབྷཡཱནི ནཱམ, ཨེཏེསཾ སཾཝརཏྠཱཡ. སམྤརཱཡིཀབྷཡཱནི པན ཝིཔཱཀདུཀྑཱནིཡེཝ ¶ , ཏེསཾ པཊིགྷཱཏཏྠཱཡ. དིཊྛདྷམྨིཀཱནཾ ཨཀུསལཱནནྟི པཉྩཝེརདསཨཀུསལཀམྨཔཐཔྤབྷེདཱནཾ ¶ ཨཀུསལཱནཾ སཾཝརཏྠཱཡ. ཝིཔཱཀདུཀྑཱནེཝ པན ཨཀྑམཊྛེན སམྤརཱཡིཀཨཀུསལཱནཱིཏི ཝུཙྩནྟི, ཏེསཾ པཊིགྷཱཏཏྠཱཡ. གིཧཱིནཾ ཨནུཀམྤཱཡཱཏི ཨགཱརིཀཱནཾ སདྡྷཱརཀྑཎཝསེན ཨནུཀམྤནཏྠཱཡ. པཱཔིཙྪཱནཾ པཀྑུཔཙྪེདཱཡཱཏི པཱཔིཙྪཔུགྒལཱནཾ གཎབནྡྷབྷེདནཏྠཱཡ གཎབྷོཛནསིཀྑཱཔདཾ པཉྙཏྟཾ. སེསཾ སབྦཏྠ ཨུཏྟཱནམེཝ. ཡཉྷེཏྠ ཝཏྟབྦཾ སིཡཱ, ཏཾ སབྦཾ པཋམཔཱརཱཛིཀཝཎྞནཱཡམེཝ ཝུཏྟནྟི.

སིཀྑཱཔདེསུ ཨཏྠཝསེན ཝཎྞནཱ ནིཊྛིཏཱ.

༤༩༩. པཱཏིམོཀྑཱདཱིསུ པཱཏིམོཀྑུདྡེསོཏི བྷིཀྑཱུནཾ པཉྩཝིདྷོ བྷིཀྑུནཱིནཾ ཙཏུབྦིདྷོ. པརིཝཱསདཱནཱདཱིསུ ཨོསཱརཎཱིཡཾ པཉྙཏྟནྟི ཨཊྛཱརསསུ ཝཱ ཏེཙཏྟཱལཱིསཱཡ ཝཱ ཝཏྟེསུ ཝཏྟམཱནསྶ ཨོསཱརཎཱིཡཾ པཉྙཏྟཾ. ཡེན ཀམྨེན ཨོསཱརཱིཡཏི, ཏཾ ཀམྨཾ པཉྙཏྟནྟི ཨཏྠོ. ནིསྶཱརཎཱིཡཾ པཉྙཏྟནྟི བྷཎྜནཀཱརཀཱདཡོ ཡེན ཀམྨེན ནིསྶཱརཱིཡནྟི, ཏཾ ཀམྨཾ པཉྙཏྟནྟི ཨཏྠོ.

༥༠༠. ཨཔཉྙཏྟེཏིཨཱདཱིསུ ཨཔཉྙཏྟེ པཉྙཏྟནྟི སཏྟཱཔཏྟིཀྑནྡྷཱ ཀཀུསནྡྷཉྩ སམྨཱསམྦུདྡྷཾ ཀོཎཱགམནཉྩ ཀསྶཔཉྩ སམྨཱསམྦུདྡྷཾ ཋཔེཏྭཱ ཨནྟརཱ ཀེནཙི ཨཔཉྙཏྟེ སིཀྑཱཔདེ པཉྙཏྟཾ ནཱམ. མཀྐཊིཝཏྠུཨཱདིཝིནཱིཏཀཐཱ སིཀྑཱཔདེ པཉྙཏྟེ ཨནུཔཉྙཏྟཾ ནཱམ. སེསཾ སབྦཏྠ ཨུཏྟཱནམེཝཱཏི.

ཨཱནིསཾསཝགྒཝཎྞནཱ ནིཊྛིཏཱ.

༥༠༡. ཨིདཱནི སབྦསིཀྑཱཔདཱནཾ ཨེཀེཀེན ཨཱཀཱརེན ནཝདྷཱ སངྒཧཾ དསྶེཏུཾ ‘‘ནཝ སངྒཧཱ’’ཏིཨཱདིམཱཧ. ཏཏྠ ཝཏྠུསངྒཧོཏི ཝཏྠུནཱ སངྒཧོ. ཨེཝཾ སེསེསུཔི པདཏྠོ ཝེདིཏབྦོ. ཨཡཾ པནེཏྠ ཨཏྠཡོཛནཱ – ཡསྨཱ ཧི ཨེཀསིཀྑཱཔདམྤི ཨཝཏྠུསྨིཾ པཉྙཏྟཾ ནཏྠི, ཏསྨཱ སབྦཱནི ཝཏྠུནཱ སངྒཧིཏཱནཱིཏི ཨེཝཾ ཏཱཝ ཝཏྠུསངྒཧོ ཝེདིཏབྦོ.

ཡསྨཱ ¶ ¶ པན དྭེ ཨཱཔཏྟིཀྑནྡྷཱ སཱིལཝིཔཏྟིཡཱ སངྒཧིཏཱ, པཉྩཱཔཏྟིཀྑནྡྷཱ ཨཱཙཱརཝིཔཏྟིཡཱ, ཚ སིཀྑཱཔདཱནི ¶ ཨཱཛཱིཝཝིཔཏྟིཡཱ སངྒཧིཏཱནི, ཏསྨཱ སབྦཱནིཔི ཝིཔཏྟིཡཱ སངྒཧིཏཱནཱིཏི ཨེཝཾ ཝིཔཏྟིསངྒཧོ ཝེདིཏབྦོ.

ཡསྨཱ པན སཏྟཧཱཔཏྟཱིཧི མུཏྟཾ ཨེཀསིཀྑཱཔདམྤི ནཏྠི, ཏསྨཱ སབྦཱནི ཨཱཔཏྟིཡཱ སངྒཧིཏཱནཱིཏི ཨེཝཾ ཨཱཔཏྟིསངྒཧོ ཝེདིཏབྦོ.

སབྦཱནི ཙ སཏྟསུ ནགརེསུ པཉྙཏྟཱནཱིཏི ནིདཱནེན སངྒཧིཏཱནཱིཏི ཨེཝཾ ནིདཱནསངྒཧོ ཝེདིཏབྦོ.

ཡསྨཱ པན ཨེཀསིཀྑཱཔདམྤི ཨཛ྄ཛྷཱཙཱརིཀཔུགྒལེ ཨསཏི པཉྙཏྟཾ ནཏྠི, ཏསྨཱ སབྦཱནི པུགྒལེན སངྒཧིཏཱནཱིཏི ཨེཝཾ པུགྒལསངྒཧོ ཝེདིཏབྦོ.

སབྦཱནི པན པཉྩཧི ཙེཝ སཏྟཧི ཙ ཨཱཔཏྟིཀྑནྡྷེཧི སངྒཧིཏཱནི, སབྦཱནི ན ཝིནཱ ཚཧི སམུཊྛཱནེཧི སམུཊྛནྟཱིཏི སམུཊྛཱནེན སངྒཧིཏཱནི. སབྦཱནི ཙ ཙཏཱུསུ ཨདྷིཀརཎེསུ ཨཱཔཏྟཱདྷིཀརཎེན སངྒཧིཏཱནི. སབྦཱནི སཏྟཧི སམཐེཧི སམཐཾ གཙྪནྟཱིཏི སམཐེཧི སངྒཧིཏཱནི. ཨེཝམེཏྠ ཁནྡྷསམུཊྛཱནཨདྷིཀརཎསམཐསངྒཧཱཔི ཝེདིཏབྦཱ. སེསཾ པུབྦེ ཝུཏྟནཡམེཝཱཏི.

སམནྟཔཱསཱདིཀཱཡ ཝིནཡསཾཝཎྞནཱཡ

ནཝསངྒཧིཏཝགྒཝཎྞནཱ ནིཊྛིཏཱ.

ནིཊྛིཏཱ ཙ པརིཝཱརསྶ ཨནུཏྟཱནཏྠཔདཝཎྞནཱཏི.

ནིགམནཀཐཱ

ཨེཏྟཱཝཏཱ ¶ ཙ –

ཨུབྷཏོ ཝིབྷངྒཁནྡྷཀ-པརིཝཱརཝིབྷཏྟིདེསནཾ ནཱཐོ;

ཝིནཡཔིཊཀཾ ཝིནེནྟོ, ཝེནེཡྻཾ ཡཾ ཛིནོ ཨཱཧ.

སམདྷིཀསཏྟཝཱིསཏི-སཧསྶམཏྟེན ¶ ཏསྶ གནྠེན;

སཾཝཎྞནཱ སམཏྟཱ, སམནྟཔཱསཱདིཀཱ ནཱམ.

ཏཏྲིདཾ སམནྟཔཱསཱདིཀཱཡ སམནྟཔཱསཱདིཀཏྟསྨིཾ –

ཨཱཙརིཡཔརམྤརཏོ, ནིདཱནཝཏྠུཔྤབྷེདདཱིཔནཏོ;

པརསམཡཝིཝཛྫནཏོ, སཀསམཡཝིསུདྡྷིཏོ ཙེཝ.

བྱཉྫནཔརིསོདྷནཏོ, པདཏྠཏོ པཱལི༹ཡོཛནཀྐམཏོ;

སིཀྑཱཔདནིཙྪཡཏོ, ཝིབྷངྒནཡབྷེདདསྶནཏོ.

སམྤསྶཏཾ ན དིསྶཏི, ཀིཉྩི ཨཔཱསཱདིཀཾ ཡཏོ ཨེཏྠ;

ཝིཉྙཱུནམཡཾ ཏསྨཱ, སམནྟཔཱསཱདིཀཱཏྭེཝ.

སཾཝཎྞནཱ པཝཏྟཱ, ཝིནཡསྶ ཝིནེཡྻདམནཀུསལེན;

ཝུཏྟསྶ ལོཀནཱཐེན, ལོཀམནུཀམྤམཱནེནཱཏི.

མཧཱཨཊྛཀཐཉྩེཝ ¶ , མཧཱཔཙྩརིམེཝཙ;

ཀུརུནྡིཉྩཱཏི ཏིསྶོཔི, སཱིཧལ༹ཊྛཀཐཱ ཨིམཱ.

བུདྡྷམིཏྟོཏི ནཱམེན, ཝིསྶུཏསྶ ཡསསྶིནོ;

ཝིནཡཉྙུསྶ དྷཱིརསྶ, སུཏྭཱ ཐེརསྶ སནྟིཀེ.

མཧཱམེགྷཝནུཡྻཱནེ, བྷཱུམིབྷཱགེ པཏིཊྛིཏོ;

མཧཱཝིཧཱརོ ཡོ སཏྠུ, མཧཱབོདྷིཝིབྷཱུསིཏོ.

ཡཾ ཏསྶ དཀྑིཎེ བྷཱགེ, པདྷཱནགྷརམུཏྟམཾ;

སུཙིཙཱརིཏྟསཱིལེན, བྷིཀྑུསངྒྷེན སེཝིཏཾ.

ཨུལཱ༹རཀུལསམྦྷཱུཏོ ¶ , སངྒྷུཔཊྛཱཡཀོ སདཱ;

ཨནཱཀུལཱཡ སདྡྷཱཡ, པསནྣོ རཏནཏྟཡེ.

མཧཱནིགམསཱམཱིཏི ¶ , ཝིསྶུཏོ ཏཏྠ ཀཱརཡི;

ཙཱརུཔཱཀཱརསཉྩིཏཾ, ཡཾ པཱསཱདཾ མནོརམཾ.

སཱིཏཙྪཱཡཏརཱུཔེཏཾ, སམྤནྣསལིལཱསཡཾ;

ཝསཏཱ ཏཏྲ པཱསཱདེ, མཧཱནིགམསཱམིནོ.

སུཙིསཱིལསམཱཙཱརཾ, ཐེརཾ བུདྡྷསིརིཝ྄ཧཡཾ;

ཡཱ ཨུདྡིསིཏྭཱ ཨཱརདྡྷཱ, ཨིདྡྷཱ ཝིནཡཝཎྞནཱ.

པཱལཡནྟསྶ སཀལཾ, ལངྐཱདཱིཔཾ ནིརབྦུདཾ;

རཉྙོ སིརིནིཝཱསསྶ, སིརིཔཱལཡསསྶིནོ.

སམཝཱིསཏིམེ ཁེམེ, ཛཡསཾཝཙྪརེ ཨཡཾ;

ཨཱརདྡྷཱ ཨེཀཝཱིསམྷི, སམྤཏྟེ པརིནིཊྛིཏཱ.

ཨུཔདྡཝཱ ཀུལེ ལོཀེ, ནིརུཔདྡཝཏོ ཨཡཾ;

ཨེཀསཾཝཙྪརེནེཝ, ཡཐཱ ནིཊྛཾ ཨུཔཱགཏཱ.

ཨེཝཾ སབྦསྶ ལོཀསྶ, ནིཊྛཾ དྷམྨཱུཔསཾཧིཏཱ;

སཱིགྷཾ གཙྪནྟུ ཨཱརམྦྷཱ, སབྦེཔི ནིརུཔདྡཝཱ.

ཙིརཊྛིཏཏྠཾ དྷམྨསྶ, ཀརོནྟེན མཡཱ ཨིམཾ;

སདྡྷམྨབཧུམཱནེན, ཡཉྩ པུཉྙཾ སམཱཙིཏཾ.

སབྦསྶ ¶ ཨཱནུབྷཱཝེན, ཏསྶ སབྦེཔི པཱཎིནོ;

བྷཝནྟུ དྷམྨརཱཛསྶ, སདྡྷམྨརསསེཝིནོ.

ཙིརཾ ཏིཊྛཏུ སདྡྷམྨོ, ཀཱལེ ཝསྶཾ ཙིརཾ པཛཾ;

ཏཔྤེཏུ དེཝོ དྷམྨེན, རཱཛཱ རཀྑཏུ མེདིནིནྟི.

པརམཝིསུདྡྷསདྡྷཱབུདྡྷིཝཱིརིཡཔཊིམཎྜིཏེན ¶ སཱིལཱཙཱརཛྫཝམདྡཝཱདིགུཎསམུདཡསམུདིཏེན སཀསམཡསམཡནྟརགཧནཛ྄ཛྷོགཱཧཎསམཏྠེན པཉྙཱཝེཡྻཏྟིཡསམནྣཱགཏེན ཏིཔིཊཀཔརིཡཏྟིཔྤབྷེདེ སཱཊྛཀཐེ སཏྠུསཱསནེ ཨཔྤཊིཧཏཉྙཱཎཔྤབྷཱཝེན མཧཱཝེཡྻཱཀརཎེན ཀརཎསམྤཏྟིཛནིཏསུཁཝིནིགྒཏམདྷུརོདཱརཝཙནལཱཝཎྞཡུཏྟེན ཡུཏྟམུཏྟཝཱདིནཱ ཝཱདིཝརེན མཧཱཀཝིནཱ པབྷིནྣཔཨསམྦྷིདཱཔརིཝཱརེ ཚལ༹བྷིཉྙཱདིཔབྷེདགུཎཔཊིམཎྜིཏེ ཨུཏྟརིམནུསྶདྷམྨེ ¶ སུཔྤཏིཊྛིཏབུདྡྷཱིནཾ ཐེརཝཾསཔྤདཱིཔཱནཾ ཐེརཱནཾ མཧཱཝིཧཱརཝཱསཱིནཾ ཝཾསཱལངྐཱརབྷཱུཏེན ཝིཔུལཝིསུདྡྷབུདྡྷིནཱ བུདྡྷགྷོསོཏི གརཱུཧི གཧིཏནཱམདྷེཡྻེན ཐེརེན ཀཏཱ ཨཡཾ སམནྟཔཱསཱདིཀཱ ནཱམ ཝིནཡསཾཝཎྞནཱ –

ཏཱཝ ཏིཊྛཏུ ལོཀསྨིཾ, ལོཀནིཏྠརཎེསིནཾ;

དསྶེནྟཱི ཀུལཔུཏྟཱནཾ, ནཡཾ སཱིལཝིསུདྡྷིཡཱ.

ཡཱཝ བུདྡྷོཏི ནཱམམྤི, སུདྡྷཙིཏྟསྶ ཏཱདིནོ;

ལོཀམྷི ལོཀཛེཊྛསྶ, པཝཏྟཏི མཧེསིནོཏི.

སམནྟཔཱསཱདིཀཱ ནཱམ

ཝིནཡ-ཨཊྛཀཐཱ ནིཊྛིཏཱ.