📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིནཡཔིཊཀེ

སཱརཏྠདཱིཔནཱི-ཊཱིཀཱ (ཏཏིཡོ བྷཱགོ)

༥. པཱཙིཏྟིཡཀཎྜཾ

༡. མུསཱཝཱདཝགྒོ

༡. མུསཱཝཱདསིཀྑཱཔདཝཎྞནཱ

༡. མུསཱཝཱདཝགྒསྶ ¶ ¶ པཋམསིཀྑཱཔདེ ཁུདྡཀཱནནྟི ཨེཏྠ ‘‘ཁུདྡཀ-སདྡོ བཧུ-སདྡཔརིཡཱཡོ ¶ . བཧུབྷཱཝཏོ ཨིམཱནི ཁུདྡཀཱནི ནཱམ ཛཱཏཱནཱི’’ཏི ཝདནྟི. ཏཏྠཱཏི ཏེསུ ནཝསུ ཝགྒེསུ, ཏེསུ ཝཱ ཁུདྡཀེསུ. ཀཱརཎེན ཀཱརཎནྟརཔཊིཙྪཱདནམེཝ ཝིབྷཱཝེཏུཾ ‘‘རཱུཔཾ ཨནིཙྩ’’ནྟིཨཱདིམཱཧ. རཱུཔཾ ཨནིཙྩནྟི པཊིཛཱནིཏྭཱ ཏཏྠ ཀཱརཎཾ ཝདནྟོ ‘‘ཛཱནིཏབྦཏོ’’ཏི ཨཱཧ. ‘‘ཡདི ཨེཝཾ ནིབྦཱནསྶཔི ཨནིཙྩཏཱ ཨཱཔཛྫཏཱི’’ཏི པརེན ཝུཏྟོ ཏཾ ཀཱརཎཾ པཊིཙྪཱདེཏུཾ པུན ‘‘ཛཱཏིདྷམྨཏོ’’ཏི ཨཉྙཾ ཀཱརཎཾ ཝདཏི.

‘‘སམྤཛཱནཾ མུསཱ བྷཱསཏཱི’’ཏི ཝཏྟབྦེ སམྤཛཱན མུསཱ བྷཱསཏཱིཏི ཨནུནཱསིཀལོཔེན ནིདྡེསོཏི ཨཱཧ ‘‘ཛཱནནྟོ མུསཱ བྷཱསཏཱི’’ཏི.

༢. ཛཱནིཏྭཱ ཛཱནནྟསྶ ཙ མུསཱ བྷཎནེཏི པུབྦབྷཱགེཔི ཛཱནིཏྭཱ ཝཙནཀྑཎེཔི ཛཱནནྟསྶ མུསཱ བྷཎནེ. བྷཎནཉྩ ནཱམ ཨིདྷ ཨབྷཱུཏསྶ ཝཱ བྷཱུཏཏཾ བྷཱུཏསྶ ཝཱ ཨབྷཱུཏཏཾ ཀཏྭཱ ཀཱཡེན ཝཱ ཝཱཙཱཡ ཝཱ ཝིཉྙཱཔནཔཡོགོ. སམྤཛཱནམུསཱཝཱདེཏི ཙ ནིམིཏྟཏྠེ བྷུམྨཝཙནཾ, ཏསྨཱ ¶ ཡོ སམྤཛཱན མུསཱ ཝདཏི, ཏསྶ ཏཾནིམིཏྟཾ ཏཾཧེཏུ ཏཔྤཙྩཡཱ པཱཙིཏྟིཡཾ ཧོཏཱིཏི ཨེཝམེཏྠ ཨཉྙེསུ ཙ ཨཱིདིསེསུ ཨཏྠོ ཝེདིཏབྦོ.

༣. ཝིསཾཝཱདེནྟི ཨེཏེནཱཏི ཝིསཾཝཱདནཾ, ཝཉྩནཱདྷིཔྤཱཡཝསཔྤཝཏྟཾ ཙིཏྟཾ. ཏེནཱཧ ‘‘ཝིསཾཝཱདནཙིཏྟཾ པུརཏོ ཀཏྭཱ ཝདནྟསྶཱ’’ཏི. ཝདཏི ཨེཏཱཡཱཏི ཝཱཙཱ, ཝཙནསམུཊྛཱཔིཀཱ ཙེཏནཱ. ཏེནཱཧ ‘‘མིཙྪཱཝཱཙཱ…པེ… ཙེཏནཱ’’ཏི. པབྷེདགཏཱ ཝཱཙཱཏི ཨནེཀབྷེདབྷིནྣཱ. ཨེཝཾ པཋམཔདེན སུདྡྷཙེཏནཱ…པེ… ཀཐིཏཱཏི ཝེདིཏབྦཱཏི ཨིམིནཱ ཨིམཾ དཱིཔེཏི – སུདྡྷཙེཏནཱ ཝཱ སུདྡྷསདྡོ ཝཱ སུདྡྷཝིཉྙཏྟི ཝཱ མུསཱཝཱདོ ནཱམ ན ཧོཏི, ཝིཉྙཏྟིཡཱ སདྡེན ཙ སཧིཏཱ ཏཾསམུཊྛཱཔིཀཱ ཙེཏནཱ མུསཱཝཱདོཏི. ཙཀྑུཝསེན ཨགྒཧིཏཱརམྨཎནྟི ཙཀྑུསནྣིསྶིཏེན ཝིཉྙཱཎེན ཨགྒཧིཏམཱརམྨཎཾ. གྷཱནཱདཱིནཾ ཏིཎྞཾ ཨིནྡྲིཡཱནཾ སམྤཏྟཝིསཡགྒཱཧཀཏྟཱ ཝུཏྟཾ ‘‘ཏཱིཧི ཨིནྡྲིཡེཧི ཨེཀཱབདྡྷཾ ཝིཡ ཀཏྭཱ’’ཏི. ‘‘དྷནུནཱ ཝིཛ྄ཛྷཏཱི’’ཏིཨཱདཱིསུ ཝིཡ ‘‘ཙཀྑུནཱ དིཊྛ’’ནྟི ཨཡཾ ཝོཧཱརོ ལོཀེ པཱཀཊོཏི ཨཱཧ ‘‘ཨོལཱ༹རིཀེནེཝ ནཡེནཱ’’ཏི.

༡༡. ཨཝཱིམཾསིཏྭཱཏི ཨནུཔཔརིཀྑིཏྭཱ. ཨནུཔདྷཱརེཏྭཱཏི ཨཝིནིཙྪིནིཏྭཱ. ཛལ༹ཏྟཱཏི ཨཉྙཱཎཏཱཡ. དཱརུསཀཊཾ ཡོཛེཏྭཱ གཏོཏི དཱརུསཀཊཾ ཡོཛེཏྭཱ ཏཏྠ ནིསཱིདིཏྭཱ གཏོཏི ཨདྷིཔྤཱཡོ. གཏོ བྷཝིསྶཏཱིཏི ཏཐེཝ སནྣིཊྛཱནཾ ཀཏྭཱ ཝུཏྟཏྟཱ མུསཱཝཱདོ ཛཱཏོ. ཀེཙི པན ‘‘ཀེལི༹ཾ ཀུརུམཱནོཏི ཝུཏྟཏྟཱ ཨེཝཾ ཝདནྟོ དུབྦྷཱསིཏཾ ཨཱཔཛྫཏཱི’’ཏི ཝདནྟི, ཏཾ ན གཧེཏབྦཾ ¶ . ཛཱཏིཨཱདཱིཧིཡེཝ ཧི དསཧི ཨཀྐོསཝཏྠཱུཧི དཝཀམྱཏཱཡ ཝདནྟསྶ དུབྦྷཱསིཏཾ ཝུཏྟཾ. ཝུཏྟཉྷེཏཾ –

‘‘ཧཱིནུཀྐཊྛེཧི ཨུཀྐཊྛཾ, ཧཱིནཾ ཝཱ ཛཱཏིཨཱདིཧི;

ཨུཛུཾ ཝཱཉྙཱཔདེསེན, ཝདེ དུབྦྷཱསིཏཾ དཝཱ’’ཏི.

ཙིཏྟེན ཐོཀཏརབྷཱཝཾཡེཝ ཨགྒཧེཏྭཱ བཧུབྷཱཝཾཡེཝ གཧེཏྭཱ ཝུཏྟཏྟཱ ‘‘གཱམོ ཨེཀཏེལོ’’ཏིཨཱདིནཱཔི མུསཱཝཱདོ ཛཱཏོ. ཙཱརེསུནྟི ཨུཔནེསུཾ. ཝིསཾཝཱདནཔུརེཀྑཱརཏཱ, ཝིསཾཝཱདནཙིཏྟེན ཡམཏྠཾ ཝཏྟུཀཱམོ, ཏསྶ པུགྒལསྶ ཝིཉྙཱཔནཔཡོགོ ཙཱཏི ཨིམཱནེཏྠ དྭེ ཨངྒཱནི ¶ . ཨུཏྟརིམནུསྶདྷམྨཱརོཙནཏྠཾ མུསཱ བྷཎནྟསྶ པཱརཱཛིཀཾ, ཨམཱུལཀེན པཱརཱཛིཀེན ཨནུདྡྷཾསནཏྠཾ སངྒྷཱདིསེསོ, སངྒྷཱདིསེསེན ཨནུདྡྷཾསནཏྠཾ པཱཙིཏྟིཡཾ, ཨཱཙཱརཝིཔཏྟིཡཱ དུཀྐཊཾ, ‘‘ཡོ ཏེ ཝིཧཱརེ ཝསཏཱི’’ཏིཨཱདིཔརིཡཱཡེན ཨུཏྟརིམནུསྶདྷམྨཱརོཙནཏྠཾ པཊིཝིཛཱནནྟསྶ མུསཱ བྷཎིཏེ ཐུལླཙྩཡཾ, ཨཔྤཊིཝིཛཱནནྟསྶ དུཀྐཊཾ, ཀེཝལཾ མུསཱ བྷཎནྟསྶ ཨིདྷ པཱཙིཏྟིཡཾ ཝུཏྟཾ.

མུསཱཝཱདསིཀྑཱཔདཝཎྞནཱ ནིཊྛིཏཱ.

༢. ཨོམསཝཱདསིཀྑཱཔདཝཎྞནཱ

༡༢. དུཏིཡེ ཀཎྞཀཊུཀཏཱཡ ཨམནཱཔཾ ཝདནྟཱ ཀཎྞེསུ ཝིཛ྄ཛྷནྟཱ ཝིཡ ཧོནྟཱིཏི ཨཱཧ ‘‘ཨོམསནྟཱིཏི ཨོཝིཛ྄ཛྷནྟཱི’’ཏི. པདྷཾསེནྟཱིཏི ཨབྷིབྷཝནྟི.

༡༣. བོདྷིསཏྟོ ཏེན སམཡེན ཧོཏཱིཏི ཏེན སམཡེན བོདྷིསཏྟོ ནནྡིཝིསཱལོ ནཱམ ཨཧོསཱིཏི ཨཏྠོ. ཨཏཱིཏཏྠེ ཝཏྟམཱནཝཙནཾ, ཀིརིཡཱཀཱལཝཙནིཙྪཱཡ ཝཱ ཝཏྟམཱནཔྤཡོགོ སདྡནྟརསནྣིདྷཱནེན བྷཱུཏཏཱཝགམོ སིཡཱཏི. པཙྩེསཱིཏི ‘‘ཨམནཱཔཾ ཨིད’’ནྟི ཨཉྙཱསི. ཧེཊྛཱརུཀྑེ དཏྭཱཏི ཨུཔཏྠམྦྷཀེ དཏྭཱ. པུབྦེ པཏིཊྛིཏཱརཔྤདེསཾ པུན ཨརེ པཏྟེཏི པུབྦེ ཨུཛུཀཾ ཧེཊྛཱམུཁཾ པཏིཊྛིཏཨརསྶ བྷཱུམིཔྤདེསཾ པུན ཏསྨིཾཡེཝ ཨརེ པརིཝཏྟེཏྭཱ ཧེཊྛཱམུཁབྷཱཝེན སམྤཏྟེ, པཋམཾ བྷཱུམིཡཾ པཏིཊྛིཏནེམིཔྤདེསེ པརིཝཏྟེཏྭཱ པུན བྷཱུམིཡཾ པཏིཊྛིཏེཏི ཝུཏྟཾ ཧོཏི. སིཐིལཀརཎནྟི སིཐིལཀིརིཡཱ.

༡༥. པུབྦེཏི ཨཊྛུཔྤཏྟིཡཾ. ཏཙྪཀཀམྨནྟི ཝཌྜྷཀཱིཀམྨཾ. ཀོཊྚཀཀམྨནྟི ཝཱ པཱསཱཎཀོཊྚཀཀམྨཾ ¶ . ཧཏྠམུདྡཱགཎནཱཏི ཨངྒུལིསངྐོཙེནེཝ གཎནཱ. པཱདསིཀམིལཀྑཀཱདཡོ ཝིཡ ནཝནྟཝསེན གཎནཱ ཨཙྪིདྡཀགཎནཱ. ཨཱདི-སདྡེན སངྐལནཔཊུཔྤཱདནཝོཀླནབྷཱགཧཱརཱདིཝསེན པཝཏྟཱ པིཎྜགཎནཱ གཧིཏཱ. ཡསྶ སཱ པགུཎཱ ཧོཏི, སོ རུཀྑམྤི དིསྭཱ ‘‘ཨེཏྟཀཱནི ཨེཏྠ པཎྞཱནཱི’’ཏི ཛཱནཱཏི. ཡབྷ མེཐུནེཏི ཝཙནཏོ ཡ-ཀཱར བྷ-ཀཱརེ ཨེཀཏོ ཡོཛིཏེ ཨསདྡྷམྨཝཙནཾ ཧོཏི.

༡༦-༢༦. ཨཱཔཏྟིཡཱ ¶ ཀཱརེཏབྦོཏི པཱཙིཏྟིཡེན ཀཱརེཏབྦོ ཨུཔསགྒཱདིམཏྟཝིསིཊྛཱནཾ ཨཏིཙཎྜཱལཱདིཔདཱནཾ པཱལི༹ཡཾ ཨཱགཏེསུཡེཝ སངྒཧིཏཏྟཱ. ཙོརོསཱིཏིཨཱདཱིནཾ པན ཀེནཙི པརིཡཱཡེན པཱལི༹ཡཾ ཨནཱགཏཏྟཱ དུཀྐཊཾ ཝུཏྟཾ. ཧསཱདྷིཔྤཱཡཏཱཏི པུརིམཔདསྶ ཨཏྠཝིཝརཎཾ. པཱལི༹ཡཾ ཨཝུཏྟེཔི ‘‘ཛཱཏིཨཱདཱིཧི ཨཀྐོསཝཏྠཱུཧི པརམྨུཁཱ ཨཀྐོསནྟསྶ ཝཏྠཱུནཾ ཨནཉྙབྷཱཝཏོ ཡཐཱ དུཀྐཊཾ, ཏཐཱ དཝཀམྱཏཱཡ པརམྨུཁཱ ཝདནྟསྶཔི དུབྦྷཱསིཏམེཝཱ’’ཏི ཨཱཙརིཡཱ ཝདནྟི. སབྦསཏྟཱཏི ཨེཏྠ ཝཙནཏྠཝིཛཱནནཔཀཏིཀཱ ཏིརཙྪཱནགཏཱཔི གཧེཏབྦཱ.

༣༥. ཨནུསཱསནིཔུརེཀྑཱརཏཱཡ ཋཏྭཱ ཝདནྟསྶ ཙིཏྟསྶ ལཧུཔརིཝཏྟིབྷཱཝཏོ ཨནྟརཱ ཀོཔེ ཨུཔྤནྣེཔི ཨནཱཔཏྟི. ཡཾ ཨཀྐོསཏི, ཏསྶ ཨུཔསམྤནྣཏཱ, ཨནཉྙཱཔདེསེན ཛཱཏིཨཱདཱིཧི ཨཀྐོསནཾ, ‘‘མཾ ཨཀྐོསཏཱི’’ཏི ཛཱནནཱ, ཨཏྠཔུརེཀྑཱརཏཱདཱིནཾ ཨབྷཱཝཏཱཏི ཨིམཱནེཏྠ ཙཏྟཱརི ཨངྒཱནི.

ཨོམསཝཱདསིཀྑཱཔདཝཎྞནཱ ནིཊྛིཏཱ.

༣. པེསུཉྙསིཀྑཱཔདཝཎྞནཱ

༣༦. ཏཏིཡེ བྷཎྜནཾ ཛཱཏཾ ཨེཏེསནྟི བྷཎྜནཛཱཏཱ. སམྨནྟནནྟི རཧོ སཾསནྡནཾ. ཧཏྠཔརཱམཱསཱདིཝསེན མཏྠཀཾ པཏྟོ ཀལཧོ ཛཱཏོ ཨེཏེསནྟི ཀལཧཛཱཏཱ. ཨནཱཔཏྟིགཱམིཀཾ ཝིརུདྡྷཝཱདབྷཱུཏཾ ཝིཝཱདཾ ཨཱཔནྣཱཏི ཝིཝཱདཱཔནྣཱ. ཝིགྒཧསཾཝཏྟནིཀཱ ཀཐཱ ཝིགྒཱཧིཀཀཐཱ. པིསཏཱིཏི པིསུཎཱ, ཝཱཙཱ, སམགྒེ སཏྟེ ཨཝཡཝབྷཱུཏེ ཝགྒེ བྷིནྣེ ཀརོཏཱིཏི ཨཏྠོ. པིསུཎཱ ཨེཝ པེསུཉྙཾ. ཏཱཡ ཝཱཙཱཡ ཝཱ སམནྣཱགཏོ པིསུཎོ, ཏསྶ ཀམྨཾ པེསུཉྙཾ. པིཡབྷཱཝསྶ སུཉྙཀརཎཝཱཙནྟི ཨིམིནཱ པན ‘‘པིཡསུཉྙཀརཎཏོ པིསུཎཱ’’ཏི ནིརུཏྟིནཡེན ཨཏྠཾ ཝདཏི.

ཨིདྷཱཔི ‘‘དསཧཱཀཱརེཧི པེསུཉྙཾ ཨུཔསཾཧརཏཱི’’ཏི ཝཙནཏོ དསཝིདྷཨཀྐོསཝཏྠུཝསེནེཝ པེསུཉྙཾ ཨུཔསཾཧརནྟསྶ པཱཙིཏྟིཡཾ. པཱལི༹མུཏྟཀཱནཾ ཙོརོཏིཨཱདཱིནཾ ཝསེན པན དུཀྐཊམེཝཱཏི ཝེདིཏབྦཾ ¶ . ‘‘ཨནཀྐོསཝཏྠུབྷཱུཏཾ ¶ པན པེསུཉྙཀརཾ ཏསྶ ཀིརིཡཾ ཝཙནཾ ཝཱ པིཡཀམྱཏཱཡ ཨུཔསཾཧརནྟསྶ ཀིཉྩཱཔི ཨིམིནཱ སིཀྑཱཔདེན ཨཱཔཏྟི ན དིསྶཏི, ཏཐཱཔི དུཀྐཊེནེཏྠ བྷཝིཏབྦ’’ནྟི ཝདནྟི. ཛཱཏིཨཱདཱིཧི ཨནཉྙཱཔདེསེན ཨཀྐོསནྟསྶ བྷིཀྑུནོ སུཏྭཱ བྷིཀྑུསྶ ཨུཔསཾཧརཎཾ, པིཡཀམྱཏཱབྷེདཱདྷིཔྤཱཡེསུ ཨཉྙཏརཏཱ, ཏསྶ ཝིཛཱནནཱཏི ཨིམཱནེཏྠ ཏཱིཎི ཨངྒཱནི.

པེསུཉྙསིཀྑཱཔདཝཎྞནཱ ནིཊྛིཏཱ.

༤. པདསོདྷམྨསིཀྑཱཔདཝཎྞནཱ

༤༥. ཙཏུཏྠེ ཨེཀཏོཏི ཨནུཔསམྤནྣེན སདྡྷིཾ. པུརིམབྱཉྫནེན སདིསཾ པཙྪཱབྱཉྫནནྟི ‘‘རཱུཔཾ ཨནིཙྩ’’ནྟི ཨེཏྠ ཨནིཙྩ-སདྡེན སདིསཾ ‘‘ཝེདནཱ ཨནིཙྩཱ’’ཏི ཨེཏྠ ཨནིཙྩ-སདྡཾ ཝདཏི. ཨཀྑརསམཱུཧོཏི ཨཝིབྷཏྟིཀོ ཨཀྑརསམཱུཧོ. ཨཀྑརཱནུབྱཉྫནསམཱུཧོ པདནྟི ཝིབྷཏྟིཨནྟཾ པདམཱཧ. ཝིབྷཏྟིཨནྟམེཝ པདཾ གཧེཏྭཱ ‘‘པཋམཔདཾ པདམེཝ, དུཏིཡཾ ཨནུཔད’’ནྟི ཝུཏྟཾ.

ཨེཀཾ པདནྟི གཱཐཱཔདཾ སནྡྷཱཡ ཝདཏི. པདགཎནཱཡཱཏི གཱཐཱཔདགཎནཱཡ. ཨཔཱཔུཎིཏྭཱཏི སདྡྷིཾ ཨཀཐེཏྭཱ. རུནྟི ཨོཔཱཏེཏཱིཏི ཨེཏྠ ཨནུནཱསིཀོ ཨཱགམཝསེན ཝུཏྟོ, སཾཡོགཔུབྦསྶ རསྶཏྟཾ ཀཏནྟི ཝེདིཏབྦཾ. ཏེནཱཧ ‘‘རཱུ-ཀཱརམཏྟམེཝཱ’’ཏི. ཨེཏྠ ཙ ‘‘རཱུཔཾ ཨནིཙྩནྟི བྷཎ སཱམཎེརཱ’’ཏི ཝུཙྩམཱནོ སཙེ རཱུ-ཀཱརཾ ཨཝཏྭཱ རུ-ཨིཏི རསྶཾ ཀཏྭཱ ཝདཏི, ཨཉྙཾ བྷཎིཏཾ ནཱམ ཧོཏི, ཏསྨཱ ཨནཱཔཏྟི. ཨེཝཉྩ ཀཏྭཱ ‘‘ཝེདནཱ ཨནིཙྩཱ’’ཏི ཨེཏྠཱཔི ཨནིཙྩ-སདྡམཏྟེནེཝ ཨཱཔཏྟི ཧོཏཱིཏི ཝེདིཏབྦཾ. ཨེས ནཡོཏི ཨེཀམེཝཀྑརཾ ཝཏྭཱ ཋཱནཾ. ‘‘མནོཔུབྦངྒམཱ དྷམྨཱ’’ཏི ཝུཙྩམཱནོ ཧི མ-ཀཱརམཏྟམེཝ ཝཏྭཱ ཏིཊྛཏི. ‘‘ཨེཝཾ མེ སུཏ’’ནྟིཨཱདིསུཏྟཾ བྷཎཱཔིཡམཱནོ ཨེ-ཀཱརཾ ཝཏྭཱ ཏིཊྛཏི ཙེ, ཨནྭཀྑརེན པཱཙིཏྟིཡཾ, ཨཔརིཔུཎྞཔདཾ ཝཏྭཱ ཋིཏེ ཨནུབྱཉྫནེན. པདེསུ ཨེཀཾ པཋམཔདཾ ཝིརཛ྄ཛྷཏི, དུཏིཡེན ཨནུཔདེན པཱཙིཏྟིཡཾ.

ཨནངྒཎསུཏྟཾ (མ. ནི. ༡.༥༧ ཨཱདཡོ) སམྨཱདིཊྛིསུཏྟཾ (མ. ནི. ༡.༨༩ ཨཱདཡོ) མཧཱཝེདལླཉྩ (མ. ནི. ༡.༤༤༩ ཨཱདཡོ) དྷམྨསེནཱཔཏིནཱ བྷཱསིཏཾ, ཨནུམཱནསུཏྟཾ (མ. ནི. ༡.༡༨༡ ཨཱདཡོ) མཧཱམོགྒལླཱནཏྠེརེན, ཙཱུལ༹ཝེདལླསུཏྟཾ (མ. ནི. ༡.༤༦༠ ཨཱདཡོ) དྷམྨདིནྣཱཡ ¶ ཐེརིཡཱ བྷཱསིཏཾ. པཙྩེཀབུདྡྷབྷཱསིཏམྤི བུདྡྷབྷཱསིཏེཡེཝ སངྒཧཾ གཙྪཏི. ཨཊྛཀཐཱནིསྶིཏོཏི ¶ པུབྦེ མགདྷབྷཱསཱཡ ཝུཏྟཾ དྷམྨསངྒཧཱརུལ༹ྷཾ ཨཊྛཀཐཾ སནྡྷཱཡ ཝདཏི. ཨིདཱནིཔི ‘‘ཡཐཱཔི དཱིཔིཀོ ནཱམ, ནིལཱིཡིཏྭཱ གཎྷཏེ མིགེ’’ཏི (མི. པ. ༦.༡.༥) ཨེཝམཱདིཀཾ སངྒཧཱརུལ༹ྷཾ ཨཊྛཀཐཱཝཙནཾ གཧེཏབྦནྟི ཝདནྟི. པཱལི༹ནིསྶིཏོཏི ‘‘མཀྐཊཱི ཝཛྫིཔུཏྟཱ ཙཱ’’ཏིཨེཝམཱདིནཱ (པཱརཱ. ༦༦) པཱལི༹ཡཾཡེཝ ཨཱགཏོ. ཝིཝཊྚཱུཔནིསྶིཏནྟི ནིབྦཱནུཔནིསྶིཏཾ. ཝིཝཊྚནིསྶིཏཾ པན སཱམཉྙཏོ གཧེཏབྦནྟི ཨཱཧ ‘‘ཀིཉྩཱཔཱི’’ཏིཨཱདི. ཐེརསྶཱཏི ནཱགསེནཏྠེརསྶ. མགྒཀཐཱདཱིནི པཀརཎཱནི. ‘‘ཨཀྑརེན ཝཱཙེཏི, ཨཀྑརཀྑརེ ཨཱཔཏྟི པཱཙིཏྟིཡསྶཱ’’ཏི ཝཏྟབྦེ ‘‘ཨཀྑརཱཡ ཝཱཙེཏི, ཨཀྑརཀྑརཱཡ ཨཱཔཏྟི པཱཙིཏྟིཡསྶཱ’’ཏི པཱལི༹ཡཾ ཝུཏྟཾ.

༤༨. ཨནུཔསམྤནྣེན སདྡྷིཾ གཎྷནྟསྶ ཨནཱཔཏྟཱིཏི ཨནུཔསམྤནྣེན སཧ ནིསཱིདིཏྭཱ ཨུདྡེསཾ གཎྷནྟསྶ ཨནཱཔཏྟི ཝུཏྟཱ. དཧརབྷིཀྑུ ནིསིནྣོ…པེ… བྷཎཏོ ཨནཱཔཏྟཱིཏི ཨེཏྠ དྭཱིསུཔི ཋིཏེསུ ནིསིནྣེསུ ཝཱ ཨུཔསམྤནྣསྶ བྷཎཱམཱིཏི བྷཎནྟསྶ ཨནཱཔཏྟིཡེཝ. ཨུཔཙཱརཾ མུཉྩིཏྭཱཏི པརིསཔརིཡནྟཏོ དྭཱདསཧཏྠཾ མུཉྩིཏྭཱ. ‘‘ནིསིནྣེ ཝཱཙེམཱི’’ཏི བྷཎནྟསྶཔི ཨུཔཙཱརཾ མུཉྩིཏྭཱ ནིསིནྣཏྟཱ ཨནཱཔཏྟི. སཙེ པན དཱུརེ ནིསིནྣམྤི ཝཱཙེམཱིཏི ཝིསུཾ སལླཀྑེཏྭཱ བྷཎཏི, ཨཱཔཏྟིཡེཝ. ཨེཀོ པཱདོ ན ཨཱགཙྪཏཱིཏི པུབྦེ པགུཎོཡེཝ པཙྪཱ ཨསརནྟསྶ ན ཨཱགཙྪཏི, ཏཾ ‘‘ཨེཝཾ བྷཎཱཧཱི’’ཏི ཨེཀཏོ བྷཎནྟསྶ ཨནཱཔཏྟི. ཨོཔཱཏེཏཱིཏི སདྡྷིཾ ཀཐེཏི. སེསམེཏྠ ཨུཏྟཱནམེཝ. ཨནུཔསམྤནྣཏཱ, ཝུཏྟལཀྑཎདྷམྨཾ པདསོ ཝཱཙནཏཱ, ཨེཀཏོ བྷཎནཉྩཱཏི ཨིམཱནེཏྠ ཏཱིཎི ཨངྒཱནི.

པདསོདྷམྨསིཀྑཱཔདཝཎྞནཱ ནིཊྛིཏཱ.

༥. སཧསེཡྻསིཀྑཱཔདཝཎྞནཱ

༤༩-༥༠. པཉྩམེ ཝིཀཱུཛམཱནཱཏི ནིཏྠུནནྟཱ. ཀཱཀཙྪམཱནཱཏི རོདནྟཱ. ཏཏྲིདཾ ཝཏྠུནིདསྶནཾ ཝཱ. ཏེན ནུ ཁོ པཱཏིཏནྟི པུཙྪཱཝསེན ཀཐིཏཏྟཱ ནཏྠི མུསཱཝཱདོ. ཀེཙི པན ‘‘སནྡེཧཝསེན ཝཙནཾ མུསཱ ནཱམ ¶ ན ཧོཏི, ཏསྨཱ ཨེཝཾ ཝུཏྟ’’ནྟི ཝདནྟི. སནྟིཀཾ ཨགནྟྭཱཏི ‘‘ཡཾ ཨེཏེསཾ ན ཀཔྤཏི, ཏཾ ཏེསམྤི ན ཀཔྤཏཱི’’ཏི ཨདྷིཔྤཱཡེན ཨགནྟྭཱ.

༥༡. དིརཏྟཏིརཏྟནྟི ཨེཏྠ ཝཙནསིལིཊྛཏཱམཏྟེན དིརཏྟ-གྒཧཎཾ ཀཏནྟི ཝེདིཏབྦཾ. ཏིརཏྟཉྷི སཧཝཱསེ ལབྦྷམཱནེ དིརཏྟེ ཝཏྟབྦམེཝ ནཏྠཱིཏི དིརཏྟགྒཧཎཾ ཝིསུཾ ན ཡོཛེཏི. ཏེནེཝཱཧ ¶ ‘‘ཨུཏྟརིདིརཏྟཏིརཏྟནྟི བྷགཝཱ སཱམཎེརཱནཾ སངྒཧཀརཎཏྠཱཡ ཏིརཏྟཔརིཧཱརཾ ཨདཱསཱི’’ཏི. ནིརནྟརཾ ཏིརཏྟདསྶནཏྠཾ ཝཱ དིརཏྟགྒཧཎཾ ཀཏཾ. ཀེཝལཉྷི ཏིརཏྟནྟི ཝུཏྟེ ཨཉྙཏྠ ཝཱསེན ཨནྟརིཀམྤི ཏིརཏྟཾ གཎྷེཡྻ, དིརཏྟཝིསིཊྛཾ པན ཏིརཏྟཾ ཝུཙྩམཱནཾ ཏེན ཨནནྟརིཀམེཝ ཏིརཏྟཾ དཱིཔེཏི. སཡནཾ སེཡྻཱ, སཡནྟི ཨེཏྠཱཏིཔི སེཡྻཱཏི ཨཱཧ ‘‘ཀཱཡཔྤསཱརཎསངྑཱཏ’’ནྟིཨཱདི. ཏསྨཱཏི ཡསྨཱ ཨུབྷཡམྤི པརིགྒཧིཏཾ, ཏསྨཱ. པཉྩཧི ཚདནེཧཱིཏི ཨིཊྛཀསིལཱསུདྷཱཏིཎཔཎྞསངྑཨཱཏེཧི པཉྩཧི ཚདནེཧི. ཝཱཙུགྒཏཝསེནཱཏི པགུཎཝསེན. དིཡཌྜྷཧཏྠུབྦེདྷོ ཝཌྜྷཀཱིཧཏྠེན གཧེཏབྦོ. ཨེཀཱུཔཙཱརོཏི ཝལ༹ཉྫནདྭཱརསྶ ཨེཀཏྟཾ སནྡྷཱཡ ཝུཏྟཾ. སཏགབྦྷཾ ཝཱ ཙཏུསྶཱལཾ ཨེཀཱུཔཙཱརཾ ཧོཏཱིཏི སམྦནྡྷོ.

ཨུཔརིམཏལེན སདྡྷིཾ ཨསམྦདྡྷབྷིཏྟིཀསྶཱཏི ཨིདཾ ཏུལཱཡ ཨབྦྷནྟརེ སཡིཏྭཱ པུན ཏེནེཝ སུསིརེན ནིཀྑམིཏྭཱ བྷིཏྟིཨནྟརེན ཧེཊྛིམཏལཾ པཝིསིཏུཾ ཡོགྒེཔི ཨུཔརིམཏལེན ཨསམྦདྡྷབྷིཏྟིཀེ སེནཱསནེ ཨནཱཔཏྟིཡཱ ཝུཏྟཱཡ ཏཐཱ པཝིསིཏུཾ ཨསཀྐུཎེཡྻེ སམྦདྡྷབྷིཏྟིཀེ ཝཏྟབྦམེཝ ནཏྠཱིཏི དསྶནཏྠཾ ཝུཏྟཾ, ན པན སམྦདྡྷབྷིཏྟིཀེ ཨཱཔཏྟཱིཏི དསྶནཏྠཾ ཝུཏྟཾ. ཧེཊྛཱཔཱསཱདེ སཡིཏབྷིཀྑུསྶ ཨནཱཔཏྟཱིཏི ཨིདམྤི ཏཱདིསེ སེནཱསནེ ཧེཊྛིམཏལེ སཡིཏསྶེཝ ཨཱཔཏྟིཔྤསངྐཱ སིཡཱཏི ཏཾནིཝཱརཎཏྠཾ ཝུཏྟཾ, ན པན ཨུཔརིམཏལེ སཡིཏསྶ ཨཱཔཏྟཱིཏི དསྶནཏྠཾ. ནཱནཱུཔཙཱརེཏི ཡཏྠ བཧི ནིསྶེཎིཾ ཀཏྭཱ ཨུཔརིམཏལཾ ཨཱརོཧནྟི, ཏཱདིསཾ སནྡྷཱཡ ཝུཏྟཾ. ཨུཔརིམཏལེཔི ཨཱཀཱསངྒཎེ ནིཔཛྫནྟསྶ ཨཱཔཏྟིཡཱ ཨབྷཱཝཏོ ‘‘ཚདནབྦྷནྟརེ’’ཏི ཝུཏྟཾ.

སབྷཱསངྑེཔེནཱཏི སབྷཱཀཱརེན. ཨཌྜྷཀུཊྚཀེ སེནཱསནེཏི ཨེཏྠ ‘‘ཨཌྜྷཀུཊྚཀཾ ནཱམ ཡཏྠ ཨེཀཾ པསྶཾ མུཉྩིཏྭཱ ཏཱིསུ པསྶེསུ བྷིཏྟིཡོ བདྡྷཱ ¶ ཧོནྟི, ཡཏྠ ཝཱ ཨེཀསྨིཾ པསྶེ བྷིཏྟིཾ ཨུཊྛཱཔེཏྭཱ ཨུབྷོསུ པསྶེསུ ཨུཔཌྜྷཾ ཨུཔཌྜྷཾ ཀཏྭཱ བྷིཏྟིཡོ ཨུཊྛཱཔེནྟི, ཏཱདིསཾ སེནཱསན’’ནྟི ཏཱིསུཔི གཎྛིཔདེསུ ཝུཏྟཾ. གཎྛིཔདེ པན ‘‘ཨཌྜྷཀུཊྚཀེཏི ཚདནཾ ཨཌྜྷེན ཨསམྤཏྟཀུཊྚཀེ’’ཏི ཝུཏྟཾ, ཏམྤི ནོ ན ཡུཏྟཾ. ‘‘ཝཱལ༹སངྒྷཱཊོ ནཱམ ཐམྦྷཱནཾ ཨུཔརི ཝཱལ༹རཱུཔེཧི ཀཏསངྒྷཱཊོ ཝུཙྩཏཱི’’ཏི ཝདནྟི. པརིཀྑེཔསྶ བཧིགཏེཏི ཨེཏྠ ཡསྨིཾ པསྶེ པརིཀྑེཔོ ནཏྠི, ཏཏྠཱཔི པརིཀྑེཔཱརཧཔྤདེསཏོ བཧིགཏེ ཨནཱཔཏྟིཡེཝཱཏི དཊྛབྦཾ. ཨཔརིཙྪིནྣགབྦྷཱུཔཙཱརེཏི ཨེཏྠ མཛ྄ཛྷེ ཝིཝཊངྒཎཝནྟཱསུ པམུཁམཧཱཙཏུསྶཱལཱསུ ཡཐཱ ཨཱཀཱསངྒཎཾ ཨནོཏརིཏྭཱ པམུཁེནེཝ གནྟྭཱ སབྦགབྦྷེ པཝིསིཏུཾ ན སཀྐཱ ཧོཏི, ཨེཝཾ ཨེཀེཀགབྦྷསྶ དྭཱིསུ པསྶེསུ ཀུཊྚཾ ནཱིཧརིཏྭཱ ཀཏཾ པརིཙྪིནྣགབྦྷཱུཔཙཱརཾ ནཱམ, ཨིདཾ པན ཏཱདིསཾ ན ཧོཏཱིཏི ‘‘ཨཔརིཙྪིནྣགབྦྷཱུཔཙཱརེ’’ཏི ཝུཏྟཾ. སབྦགབྦྷེ པཝིསནྟཱིཏི གབྦྷཱུཔཙཱརསྶ ཨཔརིཙྪིནྣཏྟཱ ཨཱཀཱསངྒཎཾ ཨནོཏརིཏྭཱ པམུཁེནེཝ གནྟྭཱ ཏཾ ཏཾ གབྦྷཾ པཝིསནྟི. ཨཐ ཀུཏོ ཏསྶ པརིཀྑེཔོཡེཝ སབྦཔརིཙྪནྣཏྟཱཏི ¶ ཝུཏྟནྟི ཨཱཧ ‘‘གབྦྷཔརིཀྑེཔོཡེཝ ཧིསྶ པརིཀྑེཔོ’’ཏི. ཨིདཉྩ སམནྟཱ གབྦྷབྷིཏྟིཡོ སནྡྷཱཡ ཝུཏྟཾ. ཙཏུསྶཱལཝསེན སནྣིཝིཊྛེཔི སེནཱསནེ གབྦྷཔམུཁཾ ཝིསུཾ ཨཔརིཀྑིཏྟམྤི སམནྟཱ ཋིཏགབྦྷབྷིཏྟཱིནཾ ཝསེན པརིཀྑིཏྟཾ ནཱམ ཧོཏི.

‘‘ནནུ ཙ ‘ཨཔརིཀྑིཏྟེ པམུཁེ ཨནཱཔཏྟཱི’ཏི ཨནྡྷཀཊྛཀཐཱཡཾ ཨཝིསེསེན ཝུཏྟཾ, ཏསྨཱ ཙཏུསྶཱལཝསེན སནྣིཝིཊྛེཔི སེནཱསནེ ཝིསུཾ ཨཔརིཀྑིཏྟེ པམུཁེ ཨནཱཔཏྟིཡེཝཱ’’ཏི ཡོ ཝདེཡྻ, ཏསྶ ཝཱདཔརིམོཙནཏྠཾ ཨིདཾ ཝུཏྟཾ ‘‘ཡཾ པན…པེ… པཱཊེཀྐསནྣིཝེསཱ ཨེཀཙྪདནཱ གབྦྷཔཱལི༹ཡོ སནྡྷཱཡ ཝུཏྟ’’ནྟི. ཨིདཾ ཝུཏྟཾ ཧོཏི – ‘‘ཨཔརིཀྑིཏྟེ པམུཁེ ཨནཱཔཏྟཱིཏི ཡཾ ཝུཏྟཾ, ཏཾ ན ཙཏུསྶཱལཝསེན སནྣིཝིཊྛཱ གབྦྷཔཱལི༹ཡོ སནྡྷཱཡ ཝུཏྟཾ, ཀིཉྩརཧི ཝིསུཾ སནྣིཝིཊྛཾ ཨེཀམེཝ གབྦྷཔཱལི༹ཾ སནྡྷཱཡ. ཏཱདིསཱཡ ཧི གབྦྷཔཱལི༹ཡཱ ཨཔརིཀྑིཏྟེ པམུཁེ ཨནཱཔཏྟི, ན ཙཏུསྶཱལཝསེན སནྣིཝིཊྛཱཡཱ’’ཏི. ཨེཀཱཡ ཙ གབྦྷཔཱལི༹ཡཱ ཏསྶ ཏསྶ གབྦྷསྶ ཨུཔཙཱརཾ པརིཙྪིནྡིཏྭཱ ཨནྟམསོ ཨུབྷོསུ པསྶེསུ ཁུདྡཀབྷིཏྟཱིནཾ ཨུཊྛཱཔནམཏྟེནཔི པམུཁཾ པརིཀྑིཏྟཾ ནཱམ ཧོཏི, ཙཏུསྶཱལཝསེན སནྣིཝིཊྛཱསུ པན གབྦྷཔཱལཱི༹སུ ཨུབྷོསུ པསྶེསུ གབྦྷབྷིཏྟཱིནཾ ཝསེནཔི པམུཁཾ པརིཀྑིཏྟཾ ནཱམ ཧོཏི. ཏསྨཱ ¶ ཡཾ ཨིམིནཱ ལཀྑཎེན པརིཀྑིཏྟཾ པམུཁཾ, ཏཏྠ ཨཱཔཏྟི, ཨིཏརཏྠ ཨནཱཔཏྟཱིཏི ཨིདམེཏྠ སནྣིཊྛཱནཾ.

ཨིདཱནི ‘‘ཨཔརིཀྑིཏྟེ པམུཁེ ཨནཱཔཏྟཱི’’ཏི ཝཏྭཱ ཏསྶེཝ ཝཙནསྶ ཨདྷིཔྤཱཡཾ པཀཱསེནྟེན ཡཾ ཝུཏྟཾ ‘‘བྷཱུམིཡཾ ཝིནཱ ཛགཏིཡཱ པམུཁཾ སནྡྷཱཡ ཀཐིཏ’’ནྟི, ཏསྶ ཨཡུཏྟཏཱཝིབྷཱཝནཏྠཾ ‘‘ཡཉྩ ཏཏྠཱ’’ཏིཨཱདི ཨཱརདྡྷཾ. བྷཱུམིཡཾ ཝིནཱ ཛགཏིཡཱ པམུཁཾ སནྡྷཱཡ ཀཐིཏནྟི ཧི ཨིམསྶ ཝཙནསྶ ཨཡམདྷིཔྤཱཡོ – ‘‘ཨཔརིཀྑིཏྟེ པམུཁེ ཨནཱཔཏྟཱི’’ཏི ཡཾ ཝུཏྟཾ, ཏཾ ཝིནཱ ཝཏྠུཾ བྷཱུམིཡཾ ཀཏགེཧསྶ པམུཁཾ སནྡྷཱཡ ཀཐིཏཾ. སཙེ པན ཨུཙྩཝཏྠུཀཾ པམུཁཾ ཧོཏི, པརིཀྑིཏྟསངྑྱཾ ན གཙྪཏཱིཏི. ཏེནེཝཱཧ ‘‘དསཧཏྠུབྦེདྷཱཔི ཧི ཛགཏི པརིཀྑེཔསངྑྱཾ ན གཙྪཏཱི’’ཏི. ཧེཊྛཱཔི ཨིདམེཝ མནསི སནྣིདྷཱཡ ཝུཏྟཾ ‘‘ཨུཙྩཝཏྠུཀཾ ཙེཔི ཧོཏི, པམུཁེ སཡིཏོ གབྦྷེ སཡིཏཱནཾ ཨཱཔཏྟིཾ ན ཀརོཏཱི’’ཏི. ཏཏྠཱཏི ཨནྡྷཀཊྛཀཐཱཡཾ. ཛགཏིཡཱ པམཱཎཾ ཝཏྭཱཏི ‘‘སཙེ ཛགཏིཡཱ ཨོཏརིཏྭཱ བྷཱུམིཡཾ སཡིཏོ, ཛགཏིཡཱ ཨུཔརི སཡིཏཾ ན པསྶཏཱི’’ཏི ཨེཝཾ ཛགཏིཡཱ ཨུབྦེདྷེན པམཱཎཾ ཝཏྭཱ. ཨེཀསཱལཱདཱིསུ ཨུཛུཀམེཝ དཱིགྷཾ ཀཏྭཱ སནྣིཝེསིཏོ པཱསཱདོ ཨེཀསཱལསནྣིཝེསོ. དྭིསཱལསནྣིཝེསཱདཡོཔི ཝུཏྟཱནུསཱརཏོ ཝེདིཏབྦཱ. སཱལཔྤབྷེདདཱིཔནམེཝ ཙེཏྠ ཧེཊྛཱ ཝུཏྟཏོ ཝིསེསོ.

མཛ྄ཛྷེཔཱཀཱརཾ ཀརོནྟཱིཏི ཨེཏྠཱཔི པརིཀྑེཔསྶ ཧེཊྛིམཔརིཙྪེདེན དིཡཌྜྷཧཏྠུབྦེདྷཏྟཱ དིཡཌྜྷཧཏྠཾ ཙེཔི ¶ མཛ྄ཛྷེ པཱཀཱརཾ ཀརོནྟི, ནཱནཱུཔཙཱརམེཝ ཧོཏཱིཏི ཝེདིཏབྦཾ. ན ཧི ཚིདྡེན གེཧཾ ཨེཀཱུཔཙཱརཾ ནཱམ ཧོཏཱིཏི ཨེཏྠ སཙེ ཨུབྦེདྷེན དིཡཌྜྷཧཏྠབྦྷནྟརེ མནུསྶཱནཾ སཉྩཱརཔྤཧོནཀཾ ཚིདྡཾ ཧོཏི, ཏམྤི དྭཱརམེཝཱཏི ཨེཀཱུཔཙཱརཾ ཧོཏི. ཀིཾ པརིཀྑེཔོཝིདྡྷསྟོཏི པམུཁསྶ པརིཀྑེཔཾ སནྡྷཱཡ ཝདཏི. སབྦཏྠ པཉྩནྣཾཡེཝ ཚདནཱནཾ ཨཱགཏཏྟཱ ཝདཏི ‘‘པཉྩནྣཾ ཨཉྙཏརེན ཚདནེན ཚནྣཱ’’ཏི.

༥༣. པཱལི༹ཡཾ ‘‘སེཡྻཱ ནཱམ སབྦཙྪནྣཱ སབྦཔརིཙྪནྣཱ ཡེབྷུཡྻེནཙྪནྣཱ ཡེབྷུཡྻེནཔརིཙྪནྣཱ’’ཏི ཝདནྟེན ཡེབྷུཡྻེནཙྪནྣཡེབྷུཡྻེནཔརིཙྪནྣསེནཱསནཾ པཱཙིཏྟིཡསྶ ཨཝསཱནཾ ཝིཡ ཀཏྭཱ དསྶིཏཾ, ‘‘ཨུཔཌྜྷཙྪནྣེ ཨུཔཌྜྷཔརིཙྪནྣེ ཨཱཔཏྟི དུཀྐཊསྶཱ’’ཏི ཝདནྟེན ཙ ཨུཔཌྜྷཙྪནྣཨུཔཌྜྷཔརིཙྪནྣསེནཱསནཾ དུཀྐཊསྶ ཨཱདིཾ ཀཏྭཱ དསྶིཏཾ, ཨུབྷིནྣམནྟརཱ ཀེན བྷཝིཏབྦཾ ¶ པཱཙིཏྟིཡེན, ཨུདཱཧུ དུཀྐཊེནཱཏི? ལོཀཝཛྫསིཀྑཱཔདསྶེཝ ཨནཝསེསཾ ཀཏྭཱ པཉྙཱཔནཏོ ཨིམསྶ ཙ པཎྞཏྟིཝཛྫཏྟཱ ཡེབྷུཡྻེནཙྪནྣཡེབྷུཡྻེནཔརིཙྪནྣསྶ ཨུཔཌྜྷཙྪནྣཨུཔཌྜྷཔརིཙྪནྣསྶ ཙ ཨནྟརཱ པཱཙིཏྟིཡཾ ཨནིཝཱརིཏམེཝ, ཏསྨཱ ཝིནཡཝིནིཙྪཡེ ཙ གརུཀེཡེཝ ཋཱཏབྦཏྟཱ ཨཊྛཀཐཱཡམྤི པཱཙིཏྟིཡམེཝ དསྶིཏཾ. སཏྟ པཱཙིཏྟིཡཱནཱིཏི པཱལི༹ཡཾ ཝུཏྟཔཱཙིཏྟིཡཾ སཱམཉྙཏོ ཨེཀཏྟེན གཧེཏྭཱ ཝུཏྟཾ. ཝིསུཾ པན གཡ྄ཧམཱནེ ‘‘སབྦཙྪནྣེ སབྦཔརིཙྪནྣེ པཱཙིཏྟིཡཾ, ཡེབྷུཡྻེནཙྪནྣེ ཡེབྷུཡྻེནཔརིཙྪནྣེ པཱཙིཏྟིཡ’’ནྟི ཨཊྛེཝ པཱཙིཏྟིཡཱནི ཧོནྟི.

སེནམྦམཎྜཔཝཎྞཾ ཧོཏཱིཏི སཱིཧལ༹དཱིཔེ ཀིར ཨུཙྩཝཏྠུཀོ སབྦཙྪནྣོ སབྦཨཔརིཙྪནྣོ ཨེཝཾནཱམཀོ སནྣིཔཱཏམཎྜཔོ ཨཏྠི, ཏཾ སནྡྷཱཡེཏཾ ཝུཏྟཾ. ཡདི ཛགཏིཔརིཀྑེཔསངྑྱཾ གཙྪཏི, ཨུཙྩཝཏྠུཀཏྟཱ མཎྜཔསྶ སབྦཨཔརིཙྪནྣཏཱ ན ཡུཛྫཏཱིཏི ཨཱཧ ‘‘ཨིམིནཱཔེཏཾ ཝེདིཏབྦ’’ནྟིཨཱདི. ཙཱུལ༹ཀཙྪནྣཱདཱིནི ཙེཏྠ ཨེཝཾ ཝེདིཏབྦཱནི – ཡསྶ ཙཏཱུསུ བྷཱགེསུ ཨེཀོ ཚནྣོ, སེསཱ ཨཙྪནྣཱ, ཨིདཾ ཙཱུལ༹ཀཙྪནྣཾ. ཡསྶ ཏཱིསུ བྷཱགེསུ དྭེ ཚནྣཱ, ཨེཀོ ཨཙྪནྣོ, ཨིདཾ ཡེབྷུཡྻེནཙྪནྣཾ. ཡསྶ དྭཱིསུ བྷཱགེསུ ཨེཀོ ཚནྣོ, ཨེཀོ ཨཙྪནྣོ, ཨིདཾ ཨུཔཌྜྷཙྪནྣཾ ནཱམ སེནཱསནཾ. ཙཱུལ༹ཀཔརིཙྪནྣཱདཱིནིཔི ཨིམིནཱཝ ནཡེན ཝེདིཏབྦཱནི. སེསཾ ཨུཏྟཱནམེཝ. པཱཙིཏྟིཡཝཏྠུཀསེནཱསནཾ, ཏཏྠ ཏཏྠ ཨནུཔསམྤནྣེན སཧ ནིཔཛྫནཾ, ཙཏུཏྠདིཝསེ སཱུརིཡཏྠངྒམནནྟི ཨིམཱནེཏྠ ཏཱིཎི ཨངྒཱནི.

སཧསེཡྻསིཀྑཱཔདཝཎྞནཱ ནིཊྛིཏཱ.

༦. དུཏིཡསཧསེཡྻསིཀྑཱཔདཝཎྞནཱ

༥༥. ཚཊྛེ ‘‘པཋམསིཀྑཱཔདེ ‘བྷིཀྑུཾ ཋཔེཏྭཱ ཨཝསེསོ ཨནུཔསམྤནྣོ ནཱམཱ’ཏི ཝུཏྟཏྟཱ ¶ ‘མཱཏུགཱམོཔི ཨནུཔསམྤནྣགྒཧཎེན གཧིཏོཡེཝཱ’ཏི ཙཏུཏྠདིཝསེ མཱཏུགཱམེན སདྡྷིཾ སཡནྟསྶ དྭཱིཧི སིཀྑཱཔདེཧི དྭེ པཱཙིཏྟིཡཱནི ཧོནྟཱི’’ཏི ཝདནྟི. གཎྛིཔདེསུ པན ཏཱིསུཔི ‘‘ཨིམསྨིཾ སིཀྑཱཔདེ མཱཏུགཱམསྶ ཝིསུཾ ཝུཙྩམཱནཏྟཱ པཋམསིཀྑཱཔདེ ‘བྷིཀྑུཾ ཋཔེཏྭཱ ཨཝསེསོ ཨནུཔསམྤནྣོ ནཱམཱ’ཏི པུརིསསྶེཝ གཧཎཾ ཨནུཙྪཝིཀ’’ནྟི ཝུཏྟཾ, ཏདེཝ ཙ ཡུཏྟཏརཾ.

ཡཉྩ ¶ ཨིདྷ ‘‘པཋམདིཝསེཔཱིཏི པི-སདྡེན ཙཏུཏྠདིཝསེཔཱིཏི ཝུཏྟཾ ཧོཏཱི’’ཏི ཀཱརཎཾ ཝདནྟི, ཏམྤི ཨཀཱརཎཾ པི-སདྡོ སམྤིཎྜནཏྠོཡེཝཱཏི ནིཡམཱབྷཱཝཏོ ཨཝདྷཱརཎཏྠསྶ ཙ སམྦྷཝཏོ. སམྦྷཱཝནེ ཝཱ པི-སདྡོ དཊྛབྦོ. ཏེན ཨིདྷ པཋམདིཝསེཔི ཏཱཝ ཨཱཔཏྟི, དུཏིཡཱདིདིཝསེ ཀིམེཝ ཝཏྟབྦནྟི ཨིམམཏྠཾ དཱིཔེཏི. སམྤིཎྜནཏྠེཔི པི-སདྡེ གཡ྄ཧམཱནེ ཨིམིནཱཝ སིཀྑཱཔདེན ཨཱཔཛྫིཏབྦཱཔཏྟིཡཱ ཨཉྙསྨིམྤི དིཝསེ ཨཱཔཛྫནཾ དཱིཔེཏི, ན པཋམསིཀྑཱཔདེན ཨཱཔཛྫིཏབྦཱཔཏྟིཡཱཏི ཨཀཱརཎམེཝ ཏནྟི དཊྛབྦཾ. ‘‘མཏིཏྠཱི པཱརཱཛིཀཝཏྠུབྷཱུཏཱཔི ཨནུཔཱདིནྣཔཀྑེ ཋིཏཏྟཱ སཧསེཡྻཱཔཏྟིཾ ན ཛནེཏཱི’’ཏི ཝདནྟི. ‘‘ཨཏྠངྒཏེ སཱུརིཡེ མཱཏུགཱམེ ནིཔནྣེ བྷིཀྑུ ནིཔཛྫཏཱི’’ཏི ཝཙནཏོ དིཝཱ སཡནྟསྶ སཧསེཡྻཱཔཏྟི ན ཧོཏིཡེཝཱཏི དཊྛབྦཾ. པཱཙིཏྟིཡཝཏྠུཀསེནཱསནཾ, ཏཏྠ མཱཏུགཱམེན སཧ ནིཔཛྫནཾ, སཱུརིཡཏྠངྒམནནྟི ཨིམཱནེཏྠ ཏཱིཎི ཨངྒཱནི.

དུཏིཡསཧསེཡྻསིཀྑཱཔདཝཎྞནཱ ནིཊྛིཏཱ.

༧. དྷམྨདེསནཱསིཀྑཱཔདཝཎྞནཱ

༦༠-༦༤. སཏྟམེ གྷརཾ ནཡཏཱིཏི གྷརཎཱི, གྷརནཱཡིཀཱ. ཏེནཱཧ ‘‘གྷརསཱམིནཱི’’ཏི. སུཎྷཱཏི སུཎིསཱ. ན ཡཀྑེནཱཏིཨཱདཱིནཾ ‘‘ཨཉྙཏྲཱ’’ཏི ཨིམིནཱ སམྦནྡྷོ. པུརིསཝིགྒཧཾ གཧེཏྭཱ ཋིཏེན ཡཀྑེན ཝཱ པེཏེན ཝཱ ཏིརཙྪཱནེན ཝཱ སདྡྷིཾ ཋིཏཱཡཔི དེསེཏུཾ ན ཝཊྚཏི. ཨཀྑརཱཡ དེསེཏཱིཏི ཨེཏྠ ‘‘ཚཔྤཉྩཝཱཙཏོ ཨུཏྟརི ‘ཨིམཾ པདཾ བྷཱསིསྶཱམཱི’ཏི ཨེཀམྤི ཨཀྑརཾ ཝཏྭཱ ཏིཊྛཏི, ཨཱཔཏྟིཡེཝཱ’’ཏི ཝདནྟི.

༦༦. ‘‘ཨེཀོ གཱཐཱཔཱདོཏི ཨིདཾ གཱཐཱབནྡྷམེཝ སནྡྷཱཡ ཝུཏྟཾ, ཨཉྙཏྠ པན ཝིབྷཏྟིཨནྟཔདམེཝ གཧེཏབྦ’’ནྟི ཝདནྟི. ‘‘ཨཊྛཀཐཾ དྷམྨཔདཾ ཛཱཏཀཱདིཝཏྠུཾ ཝཱཏི ཨིམིནཱཔི པོརཱཎཾ སངྒཱིཏིཨཱརུལ༹ྷམེཝ ཨཊྛཀཐཱདི ཝུཏྟ’’ནྟི ཝདནྟི. ཨཊྛཀཐཱདིཔཱཋཾ ཋཔེཏྭཱ དམིལཱ༹དིབྷཱསནྟརེན ¶ ཡཐཱརུཙི ཀཐེཏུཾ ཝཊྚཏི. པདསོདྷམྨེ ཝུཏྟཔྤབྷེདོཏི ཨིམིནཱ ཨཉྙཏྠ ཨནཱཔཏྟཱིཏི དཱིཔེཏི. ཨུཊྛཧིཏྭཱ པུན ནིསཱིདིཏྭཱཏི ཨིརིཡཱཔཐཔརིཝཏྟནནཡེན ནཱནཱཨིརིཡཱཔཐེནཔི ¶ ཨནཱཔཏྟཱིཏི དཱིཔེཏི. སབྦཾ ཙེཔི དཱིགྷནིཀཱཡཾ ཀཐེཏཱིཏི ཡཱཝ ན ནིཊྛཱཏི, ཏཱཝ པུནདིཝསེཔི ཀཐེཏི.

དུཏིཡསྶ ཝིཉྙཱུཔུརིསསྶ ཨགྒཧཎཾ ཨཀིརིཡཱ. མཱཏུགཱམེན སདྡྷིཾ ཋིཏསྶ ཙ ཝིཉྙཱུཔུརིསསྶ ཙ ཨུཔཙཱརོ ཨནིཡཏེསུ ཝུཏྟནཡེནེཝ གཧེཏབྦོ. སེསཾ ཨུཏྟཱནམེཝ. ཝུཏྟལཀྑཎསྶ དྷམྨསྶ ཚནྣཾ ཝཱཙཱནཾ ཨུཔརི དེསནཱ, ཝུཏྟལཀྑཎོ མཱཏུགཱམོ, ཨིརིཡཱཔཐཔཨཝཏྟནཱབྷཱཝོ, ཝིཉྙཱུཔུརིསཱབྷཱཝོ, ཨཔཉྷཝིསྶཛྫནཱཏི ཨིམཱནི པནེཏྠ པཉྩ ཨངྒཱནི.

དྷམྨདེསནཱསིཀྑཱཔདཝཎྞནཱ ནིཊྛིཏཱ.

༨. བྷཱུཏཱརོཙནསིཀྑཱཔདཝཎྞནཱ

༧༧. ཨཊྛམེ ཨནྟརཱཏི པརིནིབྦཱནསམཡཏོ ཨཉྙསྨིཾ ཀཱལེ. ཨཏིཀཌྜྷིཡམཱནེནཱཏི ‘‘ཝདཐ, བྷནྟེ, ཀིཾ ཏུམྷེཧི ཨདྷིགཏ’’ནྟི ཨེཝཾ ནིཔྤཱིལི༹ཡམཱནེན. ཨནཏིཀཌྜྷིཡམཱནེནཔི པུཙྪིཏེ ཝཱ ཨཔུཙྪིཏེ ཝཱ ཏཐཱརཱུཔེ ཀཱརཎེ སཏི ཨཱརོཙེཏུཾ ཝཊྚཏིཡེཝ. ཏེནེཝ ཨཉྙཏརེན དཧརབྷིཀྑུནཱ ཨུཔཝདིཏོ ཨཉྙཏརོ ཐེརོ ‘‘ཨཱཝུསོ, ཨུཔརིམགྒཏྠཱཡ ཝཱཡཱམཾ མཱ ཨཀཱསི, ཁཱིཎཱསཝོ ཏཡཱ ཨུཔཝདིཏོ’’ཏི ཨཱཧ. ཐེརེན ཙ ‘‘ཨཏྠི ཏེ, ཨཱཝུསོ, ཨིམསྨིཾ སཱསནེ པཏིཊྛཱ’’ཏི ཝུཏྟོ དཧརབྷིཀྑུ ‘‘ཨཱམ, བྷནྟེ, སོཏཱཔནྣོ ཨཧ’’ནྟི ཨཝོཙ. ‘‘ཀཱརཀོ ཨཡ’’ནྟི ཉཏྭཱཔི པཊིཔཏྟིཡཱ ཨམོགྷབྷཱཝདསྶནེན སམུཏྟེཛནཱཡ སམྤཧཾསནཱཡ ཙ ཨརིཡཱ ཨཏྟཱནཾ པཀཱསེནྟིཡེཝ. སུཏཔརིཡཏྟིསཱིལགུཎནྟི སུཏགུཎཾ པརིཡཏྟིགུཎཾ སཱིལགུཎཉྩ. ཨུམྨཏྟཀསྶ ཨིདྷ ཨཝཙནེ ཀཱརཎཾ ཝདནྟེན ཁིཏྟཙིཏྟཝེདནཊྚཱནམྤི ཨཝཙནེ ཀཱརཎཾ ཝུཏྟམེཝཱཏི དཊྛབྦཾ. ཨིཏི-སདྡེན ཝཱ ཨཱདིཨཏྠེན ཁིཏྟཙིཏྟཝེདནཊྚེ སངྒཎྷཱཏི. ཏེནེཝ ཝདཏི ‘‘ཙིཏྟཀྑེཔསྶ ཝཱ ཨབྷཱཝཱ’’ཏི. དིཊྛིསམྤནྣཱནནྟི མགྒཕལདིཊྛིཡཱ སམནྣཱགཏཱནཾ. ཨརིཡཱནམེཝ ཧི ཨུམྨཏྟཀཱདིབྷཱཝོ ནཏྠི. ཛྷཱནལཱབྷིནོ པན ཏསྨིཾ སཏི ཛྷཱནཱ པརིཧཱཡནྟི, ཏསྨཱ ཏེསཾ ཨབྷཱུཏཱརོཙནཔཙྩཡཱ ཨནཱཔཏྟི ཝཏྟབྦཱ, ན བྷཱུཏཱརོཙནཔཙྩཡཱ. ཏེནེཝཱཧ ‘‘བྷཱུཏཱརོཙནཔཙྩཡཱ ཨནཱཔཏྟི ན ཝཏྟབྦཱ’’ཏི.

པུབྦེ ཨཝུཏྟེཧཱིཏི ཙཏུཏྠཔཱརཱཛིཀེ ཨཝུཏྟེཧི. ཨིདཉྩ སིཀྑཱཔདཾ པཎྞཏྟིཨཛཱནནཝསེན ཨཙིཏྟཀསམུཊྛཱནཾ ¶ ཧོཏི. ཨརིཡཱ ཙེཏྠ པཎྞཏྟིཾ ཛཱནནྟཱ ¶ ཝཱིཏིཀྐམཾ ན ཀརོནྟི, པུཐུཛྫནཱ པན པཎྞཏྟིཾ ཛཱནིཏྭཱཔི ཝཱིཏིཀྐམཾ ཀརོནྟི, ཏེ ཙ སཏྠུནོ ཨཱཎཱཝཱིཏིཀྐམཙེཏནཱཡ བལཝཨཀུསལབྷཱཝཏོ ཛྷཱནཱ པརིཧཱཡནྟཱིཏི དཊྛབྦཾ, ཨུཀྐཊྛཔརིཙྪེདེན ཨརིཡཔུགྒལེ ཨེཝ སནྡྷཱཡ ‘‘ཀུསལཱབྱཱཀཏཙིཏྟེཧི དྭིཙིཏྟ’’ནྟི ཝུཏྟཾ. པཎྞཏྟིཾ ཨཛཱནནྟཱ པན ཛྷཱནལཱབྷཱི པུཐུཛྫནཱ ཝཏྠུམྷི ལོབྷཝསེན ཨཀུསལཙིཏྟེནཔི ན ཨཱརོཙེནྟཱིཏི ནཏྠི. ཨིདྷ དུཀྑཝེདནཱཡ ཨབྷཱཝཏོ ‘‘དྭིཝེདན’’ནྟི ཨིམསྶ ཨནུརཱུཔཾ ཀཏྭཱ དྭིཙིཏྟནྟི ཨིདཾ ཝུཏྟནྟི ཨེཝཾ ཝཱ ཨེཏྠ ཨདྷིཔྤཱཡོ གཧེཏབྦོ. སེསཾ ཨུཏྟཱནམེཝ. ཨུཏྟརིམནུསྶདྷམྨསྶ བྷཱུཏཏཱ, ཨནུཔསམྤནྣསྶ ཨཱརོཙནཾ, ཏངྑཎཝིཛཱནནཱ, ཨནཉྙཔྤདེསོཏི ཨིམཱནི པནེཏྠ ཙཏྟཱརི ཨངྒཱནི.

བྷཱུཏཱརོཙནསིཀྑཱཔདཝཎྞནཱ ནིཊྛིཏཱ.

༩. དུཊྛུལླཱརོཙནསིཀྑཱཔདཝཎྞནཱ

༧༨. ནཝམེ དུཊྛུལླསདྡཏྠདསྶནཏྠནྟི དུཊྛུལླསདྡསྶ ཨཏྠདསྶནཏྠཾ. ཨཏྠེ ཧི དསྶིཏེ སདྡོཔི ‘‘ཨཡཾ ཨེཏེསུ ཨཏྠེསུ ཝཏྟཏཱི’’ཏི དསྶིཏོཡེཝ ཧོཏི. ‘‘ཡཾ ཡཾ དུཊྛུལླསདྡེན ཨབྷིདྷཱིཡཏི, ཏཾ སབྦཾ དསྶེཏུཾ པཱརཱཛིཀཱནི ཝུཏྟཱནཱི’’ཏི ཨཡཉྷེཏྠ ཨདྷིཔྤཱཡོ. ཏཏྲཱཡཾ ཝིཙཱརཎཱཏི ཏཏྲ པཱལི༹ཡཾ ཨཡཾ ཝིཙཱརཎཱ, ཏཏྲ པཱལི༹ཨཊྛཀཐཱསུ ཝཱ ཨཡཾ ཝིཙཱརཎཱ. ཏཏྠ བྷཝེཡྻཱཏི ཏཏྠ ཀསྶཙི ཝིམཏི ཨེཝཾ བྷཝེཡྻ. ཨནུཔསམྤནྣསྶ དུཊྛུལླཱརོཙནེ ཝིཡ དུཀྐཊེན བྷཝིཏབྦནྟི ཨཱཧ ‘‘དུཀྐཊཾ ཨཱཔཛྫཏཱི’’ཏི. ཨཀྐོསནྟོཔི དུཀྐཊཾ ཨཱཔཛྫེཡྻཱཏི ཨོམསཝཱདེན དུཀྐཊཾ ཨཱཔཛྫེཡྻ. ཨདྷིཔྤཱཡཾ ཨཛཱནནྟེནཔི ཨཊྛཀཐཱཙརིཡཱནཾ ཝཙནེཡེཝ ཋཱཏབྦནྟི དཱིཔནཏྠཾ ‘‘ཨཊྛཀཐཱཙརིཡཱཝ ཨེཏྠ པམཱཎ’’ནྟི ཝུཏྟཾ. པུནཔི ཨཊྛཀཐཱཝཙནམེཝ ཨུཔཔཏྟིཏོ དལ༹ྷཾ ཀཏྭཱ པཏིཊྛཔེནྟོ ‘‘ཨིམིནཱཔི ཙེཏ’’ནྟིཨཱདིམཱཧ.

༨༠. ‘‘ཨཉྙཏྲ བྷིཀྑུསམྨུཏིཡཱ’’ཏི ཝུཏྟཏྟཱ སམྨུཏི ཨཏྠཱིཏི གཧེཏབྦཱཏི ཨཱཧ ‘‘ཨིདྷ ཝུཏྟཏྟཱཡེཝཱ’’ཏིཨཱདི.

༨༢. ཨཱདིཏོ པཉྩ སིཀྑཱཔདཱནཱིཏི པཱཎཱཏིཔཱཏཱདཱིནི པཉྩ སིཀྑཱཔདཱནི. ‘‘སེསཱནཱིཏི ཝིཀཱལབྷོཛནཱདཱིནི པཉྩཱ’’ཏི ཝདནྟི. ཀེཙི པན ¶ ‘‘ཨཱདིཏོ པཊྛཱཡ པཉྩ སིཀྑཱཔདཱནཱིཏི སུཀྐཝིསྶཊྛིཨཱདཱིནི པཉྩཱ’’ཏི ཝདནྟི, ཏཾ ན གཧེཏབྦཾ. པཱཎཱཏིཔཱཏཱདཱིནི ཧི དསེཝ སིཀྑཱཔདཱནི སཱམཎེརཱནཾ པཉྙཏྟཱནི. ཝུཏྟཉྷེཏཾ –

‘‘ཨཐ ¶ ཁོ སཱམཎེརཱནཾ ཨེཏདཧོསི ‘ཀཏི ནུ ཁོ ཨམྷཱཀཾ སིཀྑཱཔདཱནི, ཀཏྠ ཙ ཨམྷེཧི སིཀྑིཏབྦ’ནྟི? བྷགཝཏོ ཨེཏམཏྠཾ ཨཱརོཙེསུཾ. ཨནུཛཱནཱམི, བྷིཀྑཝེ, སཱམཎེརཱནཾ དས སིཀྑཱཔདཱནི, ཏེསུ ཙ སཱམཎེརེཧི སིཀྑིཏུཾ, པཱཎཱཏིཔཱཏཱ ཝེརམཎཱི ཨདིནྣཱདཱནཱ ཝེརམཎཱི’’ཏིཨཱདི (མཧཱཝ. ༡༠༦).

ཏེསཾ པཉྙཏྟེསུཡེཝ སིཀྑཱཔདེསུ དུཊྛུལླཱདུཊྛུལླཝིཙཱརཎཱ ཀཱཏབྦཱ, ན ཙ སུཀྐཝིསྶཊྛིཨཱདཱིནི ཝིསུཾ ཏེསཾ པཉྙཏྟཱནི ཨཏྠཱིཏི. ཨཐ བྷིཀྑུནོ དུཊྛུལླསངྑཱཏཱནི སུཀྐཝིསྶཊྛིཨཱདཱིནི ཨནུཔསམྤནྣསྶ ཀིཾ ནཱམ ཧོནྟཱིཏི ཨཱཧ ‘‘སུཀྐཝིསྶཊྛི…པེ… ཨཛ྄ཛྷཱཙཱརོ ནཱམཱཏི ཝུཏྟ’’ནྟི. ཨིམིནཱཔི ཙེཏཾ སིདྡྷཾ ‘‘ཨནུཔསམྤནྣསྶ སུཀྐཝིསྶཊྛིཨཱདི དུཊྛུལླཾ ནཱམ ན ཧོཏཱི’’ཏི. ཨཛ྄ཛྷཱཙཱརོ ནཱམཱཏི ཧི ཝདནྟོ ཨནུཔསམྤནྣསྶ སུཀྐཝིསྶཊྛིཨཱདི ཀེཝལཾ ཨཛ྄ཛྷཱཙཱརོ ནཱམ ཧོཏི, ན པན དུཊྛུལློ ནཱམ ཨཛ྄ཛྷཱཙཱརོཏི དཱིཔེཏི. ‘‘ཨཛ྄ཛྷཱཙཱརོ ནཱམཱཏི ཙ ཨཊྛཀཐཱཡཾ ཝུཏྟཏྟཱ ཨཀཏྟབྦརཱུཔཏྟཱ ཙ ཨནུཔསམྤནྣསྶ སུཀྐཝིསྶཊྛིཨཱདཱིནི དཎྜཀམྨཝཏྠུཔཀྑཾ བྷཛནྟི, ཏཱནི ཙ ཨཉྙསྶ ཨནུཔསམྤནྣསྶ ཨཝཎྞཀཱམཏཱཡ ཨཱརོཙེནྟོ བྷིཀྑུ དུཀྐཊཾ ཨཱཔཛྫཏཱི’’ཏི ཝདནྟི. ཨིདྷ པན ཨནུཔསམྤནྣགྒཧཎེན སཱམཎེརསཱམཎེརཱིསིཀྑམཱནཱནཾ གཧཎཾ ཝེདིཏབྦཾ. སེསམེཏྠ ཨུཏྟཱནམེཝ. ཨནྟིམཝཏྠུཾ ཨནཛ྄ཛྷཱཔནྣསྶ བྷིཀྑུནོ སཝཏྠུཀོ སངྒྷཱདིསེསོ, ཨནུཔསམྤནྣསྶ ཨཱརོཙནཾ, བྷིཀྑུསམྨུཏིཡཱ ཨབྷཱཝོཏི ཨིམཱནི པནེཏྠ ཏཱིཎི ཨངྒཱནི.

དུཊྛུལླཱརོཙནསིཀྑཱཔདཝཎྞནཱ ནིཊྛིཏཱ.

༡༠. པཐཝཱིཁཎནསིཀྑཱཔདཝཎྞནཱ

༨༤-༨༦. དསམེ ཨེཀིནྡྲིཡནྟི ‘‘ཀཱཡིནྡྲིཡཾ ཨཏྠཱི’’ཏི མཉྙམཱནཱ ཝདནྟི. མུཊྛིཔྤམཱཎཱཏི མུཊྛིནཱ སངྒཧེཏབྦཔྤམཱཎཱ. ཨེཏྠ ཀིཉྩཱཔི ཡེབྷུཡྻཔཾསུཾ ཨཔྤཔཾསུཉྩ ¶ པཐཝིཾ ཝཏྭཱ ཨུཔཌྜྷཔཾསུཀཱ པཐཝཱི ན ཝུཏྟཱ, ཏཐཱཔི པཎྞཏྟིཝཛྫསིཀྑཱཔདེསུ སཱཝསེསཔཉྙཏྟིཡཱཔི སམྦྷཝཏོ ཨུཔཌྜྷཔཾསུཀཱཡཔི པཐཝིཡཱ པཱཙིཏྟིཡམེཝཱཏི གཧེཏབྦཾ. ཀེཙི པན ‘‘སབྦཙྪནྣཱདཱིསུ ཨུཔཌྜྷེ དུཀྐཊསྶ ཝུཏྟཏྟཱ ཨིདྷཱཔི དུཀྐཊཾ ཡུཏྟ’’ནྟི ཝདནྟི, ཏཾ ན ཡུཏྟཾ པཱཙིཏྟིཡཝཏྠུཀཉྩ ཨནཱཔཏྟིཝཏྠུཀཉྩ དུཝིདྷཾ པཐཝིཾ ཋཔེཏྭཱ ཨཉྙིསྶཱ དུཀྐཊཝཏྠུཀཱཡ ཏཏིཡཱཡ པཐཝིཡཱ ཨབྷཱཝཏོ. དྭེཡེཝ ཧི པཐཝིཡོ ཝུཏྟཱ ‘‘ཛཱཏཱ ཙ པཐཝཱི ཨཛཱཏཱ ཙ པཐཝཱི’’ཏི. ཏསྨཱ དྭཱིསུ ཨཉྙཏརཱཡ པཐཝིཡཱ བྷཝིཏབྦཾ, ཝིནཡཝིནིཙྪཡེ ཙ སམྤཏྟེ གརུཀེཡེཝ ཋཱཏབྦཏྟཱ ན སཀྐཱ ¶ ཨེཏྠ ཨནཱཔཏྟིཡཱ བྷཝིཏུཾ. སབྦཙྪནྣཱདཱིསུ པན ཨུཔཌྜྷེ དུཀྐཊཾ ཡུཏྟཾ ཏཏྠ ཏཱདིསསྶ དུཀྐཊཝཏྠུནོ སབྦྷཱཝཱ.

‘‘པོཀྑརཎིཾ ཁཎཱ’’ཏི ཝདཏི, ཝཊྚཏཱིཏི ‘‘ཨིམསྨིཾ ཨོཀཱསེ’’ཏི ཨནིཡམེཏྭཱ ཝུཏྟཏྟཱ ཝཊྚཏི. ‘‘ཨིམཾ ཝལླིཾ ཁཎཱ’’ཏི ཝུཏྟེཔི པཐཝཱིཁཎནཾ སནྡྷཱཡ པཝཏྟཝོཧཱརཏྟཱ ཨིམིནཱཝ སིཀྑཱཔདེན ཨཱཔཏྟི, ན བྷཱུཏགཱམཔཱཏབྱཏཱཡ. ཀུཊེཧཱིཏི གྷཊེཧི. ཏནུཀཀདྡམོཏི ཨུདཀམིསྶཀཀདྡམོ. སོ ཙ ཨུདཀགཏིཀཏྟཱ ཝཊྚཏི. ཨོམཀཙཱཏུམཱསནྟི ཨཱུནཙཱཏུམཱསཾ. ཨོཝཊྛནྟི དེཝེན ཨོཝཊྛཾ. ཨཀཏཔབྦྷཱརེཏི ཨཝལ༹ཉྫནཊྛཱནདསྶནཏྠཾ ཝུཏྟཾ. ཏཱདིསེ ཧི ཝམྨིཀསྶ སབྦྷཱཝོཏི. མཱུསིཀུཀྐུརཾ ནཱམ མཱུསིཀཱཧི ཁཎིཏྭཱ བཧི ཀཏཔཾསུརཱསི. ཨེསེཝ ནཡོཏི ཨོམཀཙཱཏུམཱསཨོཝཊྛོཡེཝ ཝཊྚཏཱིཏི ཨཏྠོ.

ཨེཀདིཝསམྤི ན ཝཊྚཏཱིཏི ཨོཝཊྛཨེཀདིཝསཱཏིཀྐནྟོཔི ཝིཀོཔེཏུཾ ན ཝཊྚཏི. ‘‘ཧེཊྛཱབྷཱུམིསམྦནྡྷེཔི ཙ གོཀཎྚཀེ བྷཱུམིཏོ ཚིནྡིཏྭཱ ཨུདྡྷཾ ཋིཏཏྟཱ ཨཙྩུགྒཏམཏྠཀཏོ ཚིནྡིཏྭཱ གཧེཏུཾ ཝཊྚཏཱི’’ཏི ཝདནྟི. སཀཊྛཱནེ ཨཏིཊྛམཱནཾ ཀཏྭཱ པཱདེཧི མདྡིཏྭཱ ཚིནྡིཏྭཱ ཨཱལོལི༹ཏཀདྡམམྤི གཧེཏུཾ ཝཊྚཏི. ཏཏོཏི ཏཏོ པུརཱཎསེནཱསནཏོ. ཨིཊྛཀཾ གཎྷཱམཱིཏིཨཱདི སུདྡྷཙིཏྟཾ སནྡྷཱཡ ཝུཏྟཾ. ཨུདཀེནཱཏི ཨུཛུཀཾ ཨཱཀཱསཏོཡེཝ པཏནཀཨུདཀེན. ‘‘སཙེ པན ཨཉྙཏྠ པཧརིཏྭཱ པཏིཏེན ཨུདཀེན ཏེམིཏཾ ཧོཏི, ཝཊྚཏཱི’’ཏི ཝདནྟི. ཨུཙྩཱལེཏྭཱཏི ཨུཀྑིཔིཏྭཱ. ཏེན ཨཔདེསེནཱཏི ཏེན ལེསེན.

༨༧-༨༨. ཨཝིསཡཏྟཱ ¶ ཨནཱཔཏྟཱིཏི ཨེཏྠ སཙེཔི ནིབྦཱཔེཏུཾ སཀྐཱ ཧོཏི, པཋམཾ སུདྡྷཙིཏྟེན དིནྣཏྟཱ ‘‘དཧཏཱུ’’ཏི སལླཀྑེཏྭཱཔི ཏིཊྛཏི, ཨནཱཔཏྟི. ཨོཝཊྛཾ ཚནྣནྟི པཋམཾ ཨོཝཊྛཾ པཙྪཱ ཚནྣཾ. སེསཾ ཨུཏྟཱནམེཝ. ཛཱཏཔཐཝཱི, པཐཝཱིསཉྙིཏཱ, ཁཎནཁཎཱཔནཱནཾ ཨཉྙཏརནྟི ཨིམཱནི པནེཏྠ ཏཱིཎི ཨངྒཱནི.

པཐཝཱིཁཎནསིཀྑཱཔདཝཎྞནཱ ནིཊྛིཏཱ.

ནིཊྛིཏོ མུསཱཝཱདཝགྒོ པཋམོ.

༢. བྷཱུཏགཱམཝགྒོ

༡. བྷཱུཏགཱམསིཀྑཱཔདཝཎྞནཱ

༨༩. སེནཱསནཝགྒསྶ ¶ པཋམེ ནིགྒཧེཏུཾ ཨསཀྐོནྟོཏི སནྡྷཱརེཏུཾ ཨསཀྐོནྟོ. ཨིམིནཱ པན ཝཙནེན དཱརཀསྶ ཏཏྠ ཨུཔནཱིཏབྷཱཝོ ཏེན ཙ དིཊྛབྷཱཝོ ཝུཏྟོཡེཝཱཏི དཊྛབྦཾ. ཏེན ཧི བྷིཀྑུནཱ ཏཾ རུཀྑཾ ཚིནྡིཏུཾ ཨཱརདྡྷེ ཏཏྠ ནིབྦཏྟཱ ཨེཀཱ ཏརུཎཔུཏྟཱ དེཝདྷཱིཏཱ པུཏྟཾ ཨངྐེནཱདཱཡ ཋིཏཱ ཏཾ ཡཱཙི ‘‘མཱ མེ སཱམི ཝིམཱནཾ ཚིནྡི, ན སཀྑིསྶཱམི པུཏྟཀཾ ཨཱདཱཡ ཨནཱཝཱསཱ ཝིཙརིཏུ’’ནྟི. སོ ‘‘ཨཧཾ ཨཉྙཏྠ ཨཱིདིསཾ རུཀྑཾ ན ལབྷིསྶཱམཱི’’ཏི ཏསྶཱ ཝཙནཾ ནཱདིཡི. སཱ ‘‘ཨིམམྤི ཏཱཝ དཱརཀཾ ཨོལོཀེཏྭཱ ཨོརམིསྶཏཱི’’ཏི པུཏྟཾ རུཀྑསཱཁཱཡ ཋཔེསི. སོ བྷིཀྑུ ཨུཀྑིཏྟཾ ཕརསུཾ སནྡྷཱརེཏུཾ ཨསཀྐོནྟོ དཱརཀསྶ བཱཧཾ ཚིནྡི. ཨེཝཉྩ སཡིཏོ ཝིམཱནེ སཡིཏོ ནཱམ ཧོཏཱིཏི ཀཏྭཱ ཝུཏྟཾ ‘‘རུཀྑཊྛཀདིབྦཝིམཱནེ ནིཔནྣསྶཱ’’ཏི.

རུཀྑཊྛཀདིབྦཝིམཱནེཏི ཙ སཱཁཊྛཀཝིམཱནཾ སནྡྷཱཡ ཝུཏྟཾ. རུཀྑསྶ ཨུཔརི ནིབྦཏྟཉྷི ཝིམཱནཾ རུཀྑཔཊིབདྡྷཏྟཱ ‘‘རུཀྑཊྛཀཝིམཱན’’ནྟི ཝུཙྩཏི. སཱཁཊྛཀཝིམཱནཾ པན སབྦསཱཁཱསནྣིསྶིཏཾ ཧུཏྭཱ ཏིཊྛཏི. ཏཏྠ ཡཾ རུཀྑཊྛཀཝིམཱནཾ ཧོཏི, ཏཾ ཡཱཝ རུཀྑསྶ མཱུལམཏྟམྤི ཏིཊྛཏི, ཏཱཝ ན ནསྶཏི. སཱཁཊྛཀཝིམཱནཾ པན སཱཁཱསུ བྷིཛྫམཱནཱསུ ཏཏྠ ཏཏྠེཝ བྷིཛྫིཏྭཱ སབྦསཱཁཱསུ བྷིནྣཱསུ སབྦཾ བྷིཛྫཏི, ཨིདམྤི ཙ ཝིམཱནཾ སཱཁཊྛཀཾ, ཏསྨཱ རུཀྑེ ཚིནྣེ ཏཾ ཝིམཱནཾ སབྦསོ ཝིནཊྛཾ, ཏེནེཝ སཱ དེཝཏཱ བྷགཝཏོ སནྟིཀཱ ལདྡྷེ ཨཉྙསྨིཾ ཝིམཱནེ ཝསི. བཱཧུཾ ཐནམཱུལེཡེཝ ཚིནྡཱིཏི ཨཾསེན སདྡྷིཾ ¶ བཱཧཾ ཚིནྡི. ཨིམིནཱ ཙ རུཀྑདེཝཏཱནཾ གཏྟཱནི ཚིཛྫནྟི, ན ཙཱཏུམཧཱརཱཛིཀཱདཱིནཾ ཝིཡ ཨཙྪེཛྫཱནཱིཏི དཊྛབྦཾ. རུཀྑདྷམྨེཏི རུཀྑཔཀཏིཡཾ, རུཀྑསབྷཱཝེཏི ཨཏྠོ. རུཀྑཱནཾ ཝིཡ ཚེདནཱདཱིསུ ཨཀུཔྤནཉྷི རུཀྑདྷམྨོ ནཱམ.

ཨུཔྤཏིཏནྟི ཨུཔྤནྣཾ. བྷནྟནྟི དྷཱཝནྟཾ. ཝཱརཡེཏི ནིགྒཎྷེཡྻ. ཨིདཾ ཝུཏྟཾ ཧོཏི – ཡཐཱ ནཱམ ཚེཀོ སཱརཐི ཨཏིཝེགེན དྷཱཝནྟཾ རཐཾ ནིགྒཧེཏྭཱ ཡཐིཙྪཀཾ པེསེཏི, ཨེཝཾ ཡོ པུགྒལོ ཨུཔྤནྣཾ ¶ ཀོདྷཾ ཝཱརཡེ ནིགྒཎྷིཏུཾ སཀྐོཏི, ཏམཧཾ སཱརཐིཾ བྲཱུམི. ཨིཏརོ པན རཱཛཨུཔརཱཛཱདཱིནཾ རཐསཱརཐིཛནོ རསྨིགྒཱཧོ ནཱམ ཧོཏི, ན ཨུཏྟམསཱརཐཱིཏི.

དུཏིཡགཱཐཱཡ པན ཨཡམཏྠོ – ཡོཏི (སུ. ནི. ཨཊྛ. ༡.༡) ཡོ ཡཱདིསོ ཁཏྟིཡཀུལཱ ཝཱ པབྦཛིཏོ བྲཱཧྨཎཀུལཱ ཝཱ པབྦཛིཏོ ནཝོ ཝཱ མཛ྄ཛྷིམོ ཝཱ ཐེརོ ཝཱ. ཨུཔྤཏིཏནྟི ཨུདྡྷམུདྡྷཾ པཏིཏཾ, གཏཾ པཝཏྟནྟི ཨཏྠོ, ཨུཔྤནྣནྟི ཝུཏྟཾ ཧོཏི. ཀོདྷནྟི ‘‘ཨནཏྠཾ མེ ཙརཏཱིཏི ཨཱགྷཱཏོ ཛཱཡཏཱི’’ཏིཨཱདིནཱ (དཱི. ནི. ༣.༣༤༠; ཨ. ནི. ༩.༢༩) ནཡེན སུཏྟེ ཝུཏྟཱནཾ ནཝནྣཾ, ‘‘ཨཏྠཾ མེ ན ཙརཏཱི’’ཏིཨཱདཱིནཉྩ ཏཔྤཊིཔཀྑཏོ སིདྡྷཱནཾ ནཝནྣམེཝཱཏི ཨཊྛཱརསནྣཾ ཁཱཎུཀཎྚཀཱདིནཱ ཨཊྛཱནེན སདྡྷིཾ ཨེཀཱུནཝཱིསཏིཡཱ ཨཱགྷཱཏཝཏྠཱུནཾ ཨཉྙཏརཱགྷཱཏཝཏྠུསམྦྷཝཾ ཨཱགྷཱཏཾ. ཝིསཊནྟི ཝིཏྠཏཾ. སཔྤཝིསནྟི སཔྤསྶ ཝིསཾ. ཨིཝཱཏི ཨོཔམྨཝཙནཾ. ཨི-ཀཱརལོཔཾ ཀཏྭཱ ཝ-ཨིཙྩེཝ ཝུཏྟཾ. ཨོསདྷེཧཱིཏི ཨགདེཧི. ཨིདཾ ཝུཏྟཾ ཧོཏི – ཡཐཱ ཝིསཏིཀིཙྪཀོ ཝེཛྫོ སཔྤེན དཊྛོ སབྦཾ ཀཱཡཾ ཕརིཏྭཱ ཋིཏཾ ཝིསཊཾ སཔྤཝིསཾ མཱུལཁནྡྷཏཙཔཏྟཔུཔྥཱདཱིནཾ ཨཉྙཏརེཧི, ནཱནཱབྷེསཛྫེཧི པཡོཛེཏྭཱ ཀཏེཧི ཝཱ ཨོསདྷེཧི ཁིཔྤམེཝ ཝིནེཡྻ, ཨེཝམེཝ ཡོ ཡཐཱཝུཏྟེན ཨཱགྷཱཏཝཏྠུནཱ ཨུཔྤཏིཏཾ ཙིཏྟསནྟཱནཾ བྱཱཔེཏྭཱ ཋིཏཾ ཀོདྷཾ ཝིནཡནུཔཱཡེསུ ཏདངྒཝིནཡཱདཱིསུ ཡེན ཀེནཙི ཨུཔཱཡེན ཝིནེཏི ནཱདྷིཝཱསེཏི པཛཧཏི ཝིནོདེཏི བྱནྟིཾ ཀརོཏི, སོ བྷིཀྑུ ཛཧཱཏི ཨོརཔཱརཾ. སོ ཨེཝཾ ཀོདྷཾ ཝིནེནྟོ བྷིཀྑུ ཡསྨཱ ཀོདྷོ ཏཏིཡམགྒེན སབྦསོ པཧཱིཡཏི, ཏསྨཱ ཨོརཔཱརསཉྙིཏཱནི པཉྩོརམྦྷཱགིཡསཾཡོཛནཱནི ཛཧཱཏཱིཏི. ཨཝིསེསེན ཧི པཱརནྟི ཏཱིརསྶ ནཱམཾ, ཏསྨཱ ཨོརཱནི ཙ ཏཱནི སཾསཱརསཱགརསྶ པཱརབྷཱུཏཱནི ཙཱཏི ཀཏྭཱ ‘‘ཨོརཔཱར’’ནྟི ཝུཙྩཏི.

ཨཐ ¶ ཝཱ ཡོ ཨུཔྤཏིཏཾ ཝིནེཏི ཀོདྷཾ ཝིསཊཾ སཔྤཝིསཾཝ ཨོསདྷེཧི, སོ ཏཏིཡམགྒེན སབྦསོ ཀོདྷཾ ཝིནེཏྭཱ ཨནཱགཱམིཕལེ ཋིཏོ བྷིཀྑུ ཛཧཱཏི ཨོརཔཱརཾ. ཏཏྠ ཨོརནྟི སཀཏྟབྷཱཝོ. པཱརནྟི པརཏྟབྷཱཝོ. ཨོརཾ ཝཱ ཚ ཨཛ྄ཛྷཏྟིཀཱནི ཨཱཡཏནཱནི, པཱརཾ ཚ བཱཧིརཱཡཏནཱནི. ཏཐཱ ཨོརཾ མནུསྶལོཀོ, པཱརཾ དེཝལོཀོ. ཨོརཾ ཀཱམདྷཱཏུ, པཱརཾ རཱུཔཱརཱུཔདྷཱཏུ. ཨོརཾ ཀཱམརཱུཔབྷཝོ, པཱརཾ ཨརཱུཔབྷཝོ. ཨོརཾ ཨཏྟབྷཱཝོ, པཱརཾ ཨཏྟབྷཱཝསུཁུཔཀརཎཱནི. ཨེཝམེཏསྨིཾ ཨོརཔཱརེ ཙཏུཏྠམགྒེན ཚནྡརཱགཾ པཛཧནྟོ ‘‘ཛཧཱཏི ཨོརཔཱར’’ནྟི ཝུཙྩཏི. ཨེཏྠ ཙ ཀིཉྩཱཔི ཨནཱགཱམིནོ ཀཱམརཱགསྶ པཧཱིནཏྟཱ ཨིདྷཏྟབྷཱཝཱདཱིསུ ཚནྡརཱགོ ཨེཝ ནཏྠི, ཨཔིཙ ཁོ པནསྶ ཝཎྞཔྤཀཱསནཏྠཾ སབྦམེཏཾ ཨོརཔཱརབྷེདཾ སངྒཧེཏྭཱ ཏཏྠ ཚནྡརཱགཔྤཧཱནེན ‘‘ཛཧཱཏི ཨོརཔཱར’’ནྟི ཝུཏྟཾ.

ཨིདཱནི ¶ ཏསྶཏྠསྶ ཝིབྷཱཝནཏྠཱཡ ཨུཔམཾ ཨཱཧ ‘‘ཨུརགོ ཛིཎྞམིཝཏྟཙཾ པུརཱཎ’’ནྟི. ཏཏྠ ཨུརེན གཙྪཏཱིཏི ཨུརགོ, སཔྤསྶེཏཾ ཨདྷིཝཙནཾ. སོ དུཝིདྷོ ཀཱམརཱུཔཱི ཙ ཨཀཱམརཱུཔཱི ཙ. ཀཱམརཱུཔཱིཔི དུཝིདྷོ ཛལཛོ ཐལཛོ ཙ. ཛལཛོ ཛལེ ཨེཝ ཀཱམརཱུཔཾ ལབྷཏི, ན ཐལེ སངྑཔཱལཛཱཏཀེ (ཛཱ. ༢.༡༧.༡༤༣ ཨཱདཡོ) སངྑཔཱལནཱགརཱཛཱ ཝིཡ. ཐལཛོ ཐལེ ཨེཝ, ན ཛལེ. སོ ཛཛྫརབྷཱཝེན ཛིཎྞཾ, ཙིརཀཱལཏཱཡ པུརཱཎཉྩཱཏི སངྑཾ གཏཾ ཏཙཾ ཛཧནྟོ ཙཏུབྦིདྷེན ཛཧཏི སཛཱཏིཡཾ ཋིཏོ ཛིགུཙྪནྟོ ནིསྶཱཡ ཐཱམེནཱཏི. སཛཱཏི ནཱམ སཔྤཛཱཏི དཱིགྷཏྟབྷཱཝོ. ཨུརགཱ ཧི པཉྩསུ ཋཱནེསུ སཛཱཏིཾ ནཱཏིཝཏྟནྟི ཨུཔཔཏྟིཡཾ ཙུཏིཡཾ ཝིསྶཊྛནིདྡོཀྐམནེ སཛཱཏིཡཱ མེཐུནཔཊིསེཝནེ ཛིཎྞཏཙཱཔནཡནེ ཙཱཏི. ཏསྨཱ ཡདཱ ཏཙཾ ཛཧཏི, ཏདཱ སཛཱཏིཡཾཡེཝ ཋཏྭཱ ཛཧཏི. སཛཱཏིཡཾ ཋིཏོཔི ཙ ཛིགུཙྪནྟོ ཛཧཏི. ཛིགུཙྪནྟོ ནཱམ ཡདཱ ཨུཔཌྜྷཊྛཱནེ མུཏྟོ ཧོཏི, ཨུཔཌྜྷཊྛཱནེ ཨམུཏྟོ ཨོལམྦཏི, ཏདཱ ནཾ ཨཊྚཱིཡནྟོ ཛཧཏི, ཨེཝཾ ཛིགུཙྪནྟོཔི ཙ དཎྜནྟརཾ ཝཱ མཱུལནྟརཾ ཝཱ པཱསཱཎནྟརཾ ཝཱ ནིསྶཱཡ ཛཧཏི. ནིསྶཱཡ ཛཧནྟོཔི ཙ ཐཱམཾ ཛནེཏྭཱ ཨུསྶཱཧཾ ཀརིཏྭཱ ཝཱིརིཡེན ཝངྐཾ ནངྒུཊྛཾ ཀཏྭཱ པསྶསནྟོཝ ཕཎཾ ཀརིཏྭཱ ཛཧཏི. ཨེཝཾ ཛཧིཏྭཱ ཡེནཀཱམཾ པཀྐམཏི.

ཨེཝམེཝ ཨཡམྤི བྷིཀྑུ ཨོརཔཱརཾ ཛཧིཏུཀཱམོ ཙཏུབྦིདྷེན ཛཧཏི སཛཱཏིཡཾ ཋིཏོ ཛིགུཙྪནྟོ ནིསྶཱཡ ཐཱམེནཱཏི. སཛཱཏི ནཱམ བྷིཀྑུནོ ‘‘ཨརིཡཱཡ ཛཱཏིཡཱ ཛཱཏོ’’ཏི (མ. ནི. ༢.༣༥༡) ཝཙནཏོ སཱིལཾ. ཏེནེཝཱཧ ‘‘སཱིལེ པཏིཊྛཱཡ ¶ ནརོ སཔཉྙོ’’ཏི (སཾ. ནི. ༡.༢༣, ༡༩༢). ཨེཝམེཏིསྶཾ སཛཱཏིཡཾ ཋིཏོ བྷིཀྑུ ཏཾ སཀཏྟབྷཱཝཱདིབྷེདཾ ཨོརཔཱརཾ ཛིཎྞཔུརཱཎཏྟཙམིཝ ཏཾ དུཀྑཾ ཛནེནྟཾ ཏཏྠ ཏཏྠ ཨཱདཱིནཝདསྶནེན ཛིགུཙྪནྟོ ཀལྱཱཎམིཏྟེ ནིསྶཱཡ ཨདྷིམཏྟསམྨཱཝཱཡཱམསངྑཱཏཾ ཐཱམཾ ཛནེཏྭཱ ‘‘དིཝསཾ ཙངྐམེན ནིསཛྫཱཡ ཨཱཝརཎཱིཡེཧི དྷམྨེཧི ཙིཏྟཾ པརིསོདྷེཏཱི’’ཏི (ཨ. ནི. ༣.༡༦; ༤.༣༧) ཝུཏྟནཡེན རཏྟིནྡིཝཾ ཚདྷཱ ཝིབྷཛིཏྭཱ གྷཊེནྟོ ཝཱཡམནྟོ ཨུརགོ ཝིཡ ཝངྐཾ ནངྒུཊྛཾ པལླངྐཾ ཨཱབྷུཛིཏྭཱ ཨུརགོ ཝིཡ པསྶསནྟོ ཨཡམྤི ཨསིཐིལཔརཀྐམཏཱཡ ཝཱཡམནྟོ ཨུརགོཝ ཕཎཾ ཀརིཏྭཱ ཨཡམྤི ཉཱཎཝིཔྥཱརཾ ཛནེཏྭཱ ཨུརགོཝ ཏཙཾ ཨོརཔཱརཾ ཛཧཏི, ཛཧིཏྭཱ ཙ ཨུརགོ ཝིཡ ཨོཧིཏཏཙོ ཡེནཀཱམཾ པཀྐམཏི, ཨཡམྤི ཨོཧིཏབྷཱརོ ཨནུཔཱདིསེསནིབྦཱནདྷཱཏུདིསཾ པཀྐམཏཱིཏི.

༩༠. བྷཝནྟཱིཏི ཨིམིནཱ ཝིརུལ༹ྷམཱུལེ ནཱིལབྷཱཝཾ ཨཱཔཛྫིཏྭཱ ཝཌྜྷམཱནཀེ ཏརུཎགཙྪེ དསྶེཏི. ཨཧུཝུནྟི ཨིམིནཱ པན ཝཌྜྷིཏྭཱ ཋིཏེ མཧནྟེ རུཀྑགཙྪཱདིཀེ དསྶེཏི. བྷཝནྟཱིཏི ཨིམསྶ ཝིཝརཎཾ ‘‘ཛཱཡནྟི ཝཌྜྷནྟཱི’’ཏི, ཨཧུཝུནྟི ཨིམསྶ ‘‘ཛཱཏཱ ཝཌྜྷིཏཱ’’ཏི. རཱསཱིཏི སུདྡྷཊྛཀདྷམྨསམཱུཧོ. བྷཱུཏཱནནྟི ཏཐཱལདྡྷསམཉྙཱནཾ ཨཊྛདྷམྨཱནཾ. ‘‘བྷཱུཏཱནཾ གཱམོ’’ཏི ཝུཏྟེཔི ཨཝཡཝཝིནིམུཏྟསྶ ¶ སམུདཱཡསྶ ཨབྷཱཝཏོ བྷཱུཏསཉྙིཏཱ ཏེཡེཝ ཏིཎརུཀྑལཏཱདཡོ གཡ྄ཧནྟི. ‘‘བྷཱུམིཡཾ པཏིཊྛཧིཏྭཱ ཧརིཏབྷཱཝམཱཔནྣཱ རུཀྑགཙྪཱདཡོ དེཝཏཱཧི པརིགྒཡ྄ཧནྟི, ཏསྨཱ བྷཱུཏཱནཾ ནིཝཱསཊྛཱནཏཱཡ བྷཱུཏཱནཾ གཱམོ’’ཏིཔི ཝདནྟི. རུཀྑཱདཱིནནྟི ཨཱདི-སདྡེན ཨོསདྷིགཙྪལཏཱདཡོ ཝེདིཏབྦཱ.

ནནུ ཙ རུཀྑཱདཡོ ཙིཏྟརཧིཏཏཱཡ ན ཛཱིཝཱ, ཙིཏྟརཧིཏཏཱ ཙ པརིཔྥནྡཱབྷཱཝཏོ ཚིནྣེཔི རུཧནཏོ ཝིསདིསཛཱཏིཀབྷཱཝཏོ ཙཏུཡོནིཨཔརིཡཱཔནྣཏོ ཙ ཝེདིཏབྦཱ, ཝུཌྜྷི པན པཝཱལ༹སིལཱལཝཎཱནམྤི ཝིཛྫཏཱིཏི ན ཏེསཾ ཛཱིཝབྷཱཝེ ཀཱརཎཾ, ཝིསཡགྒཧཎཉྩ ནེསཾ པརིཀཔྤནཱམཏྟཾ སུཔནཾ ཝིཡ ཙིཉྩཱདཱིནཾ, ཏཐཱ དོཧལཱ༹དཡོ, ཏཏྠ ཀསྨཱ བྷཱུཏགཱམསྶ ཚེདནཱདིཔཙྩཡཱ པཱཙིཏྟིཡཾ ཝུཏྟནྟི? སམཎསཱརུཔྤཏོ ཏཾནིཝཱསསཏྟཱནུརཀྑཎཏོ ¶ ཙ. ཏེནེཝཱཧ ‘‘ཛཱིཝསཉྙིནོ ཧི མོགྷཔུརིསཱ མནུསྶཱ རུཀྑསྨི’’ནྟིཨཱདི.

༩༡. ‘‘མཱུལེ ཛཱཡནྟཱི’’ཏིཨཱདཱིསུ ཨཏྠོ ཨུཔརི ཨཏྟནཱ ཝུཙྩམཱནཔྤཀཱརེན སཱིཧལ༹ཊྛཀཐཱཡཾ ཝུཏྟོཏི ཨཱཧ ‘‘ཨེཝཾ སནྟེཔི…པེ… ན སམེནྟཱི’’ཏི. ཝིཛཱཏ-སདྡོ ཨིདྷ ཝི-སདྡལོཔཾ ཀཏྭཱ ནིདྡིཊྛོཏི ཨཱཧ ‘‘ཝིཛཱཏཱནཱི’’ཏི. ཝིཛཱཏ-སདྡོ ཙ ‘‘ཝིཛཱཏཱ ཨིཏྠཱི’’ཏིཨཱདཱིསུ ཝིཡ པསཱུཏཝཙནོཏི ཨཱཧ ‘‘པསཱུཏཱནཱི’’ཏི. པསཱུཏི ཙ ནཱམེཏྠ ནིབྦཏྟཔཎྞམཱུལཏཱཏི ཨཱཧ ‘‘ནིབྦཏྟཔཎྞམཱུལཱནཱི’’ཏི. ཨིམིནཱ ཨིམཾ དཱིཔེཏི ‘‘ནིབྦཏྟཔཎྞམཱུལཱནི བཱིཛཱནི བྷཱུཏགཱམསངྑམེཝ གཙྪནྟི, ཏེསུ ཙ ཝཏྟམཱནོ བཱིཛཛཱཏ-སདྡོ རུལ༹ྷཱིཝསེན རུཀྑཱདཱིསུཔི ཝཏྟཏཱི’’ཏི. པུརིམསྨིཾ ཨཏྠཝིཀཔྤེ པན བཱིཛེཧི ཛཱཏཱནཾ རུཀྑལཏཱདཱིནཾཡེཝ བྷཱུཏགཱམཏཱ ཝུཏྟཱ.

ཏཱནི དསྶེནྟོཏི ཏཱནི བཱིཛཱནི དསྶེནྟོ. མཱུལབཱིཛནྟིཨཱདཱིསུ མཱུལམེཝ བཱིཛཾ མཱུལབཱིཛཾ. སེསེསུཔི ཨེསེཝ ནཡོ. ཕལུ༹བཱིཛནྟི པབྦབཱིཛཾ. པཙྩཡནྟརསམཝཱཡེ སདིསཕལུཔྤཏྟིཡཱ ཝིསེསཀཱརཎབྷཱཝཏོ ཝིརུཧནསམཏྠེ སཱརཕལེ ནིརུལ༹ྷོ བཱིཛ-སདྡོ. ཏདཏྠསཾསིདྡྷིཡཱ མཱུལཱདཱིསུཔི ཀེསུཙི པཝཏྟཏཱིཏི མཱུལཱདིཏོ ནིཝཏྟནཏྠཾ ཨེཀེན བཱིཛསདྡེན ཝིསེསེཏྭཱ ཝུཏྟཾ ‘‘བཱིཛབཱིཛ’’ནྟི ‘‘རཱུཔརཱུཔཾ, དུཀྑདུཀྑ’’ནྟི ཙ ཡཐཱ. བཱིཛཏོ ནིབྦཏྟེན བཱིཛཾ དསྶིཏནྟི ཀཱརིཡོཔཙཱརེན ཀཱརཎཾ དསྶིཏནྟི དཱིཔེཏི.

༩༢. བཱིཛེ བཱིཛསཉྙཱིཏི ཨེཏྠ ཀཱརཎཱུཔཙཱརེན ཀཱརིཡཾ ཝུཏྟནྟི དསྶེནྟོ ‘‘ཏཏྠ ཡཐཱ’’ཏིཨཱདིམཱཧ. བྷཱུཏགཱམཔརིམོཙནཾ ཀཏྭཱཏི བྷཱུཏགཱམཏོ མོཙེཏྭཱ, ཝིཡོཛེཏྭཱཏི ཨཏྠོ. ཡཾ བཱིཛཾ བྷཱུཏགཱམོ ནཱམ ཧོཏཱིཏི བཱིཛཱནི ཙ ཏཱནི ཛཱཏཱནི ཙཱཏི ཝུཏྟམཏྠཾ སནྡྷཱཡ ཝདཏི. ཏཏྠ ¶ ཡཾ བཱིཛནྟི ཡཾ ནིབྦཏྟཔཎྞམཱུལཾ བཱིཛཾ. ཏསྨིཾ བཱིཛེཏི ཏསྨིཾ བྷཱུཏགཱམསཉྙིཏེ བཱིཛེ. ཨེཏྠ ཙ བཱིཛཛཱཏ-སདྡསྶ ཝིཡ རུལ༹ྷཱིཝསེན རུཀྑཱདཱིསུ བཱིཛ-སདྡསྶཔི པཝཏྟི ཝེདིཏབྦཱ. ཡཐཱརུཏནྟི ཡཐཱཔཱལི༹.

ཡཏྠ ཀཏྠཙཱིཏི མཱུལེ ཨགྒེ མཛ྄ཛྷེ ཝཱ. སཉྩིཙྩ ཨུཀྑིཔིཏུཾ ན ཝཊྚཏཱིཏི ཨེཏྠ སཙེཔི སརཱིརེ ལགྒབྷཱཝཾ ཛཱནནྟོཝ ཨུདཀཏོ ཨུཊྛཧཏི, ‘‘ཏཾ ཨུདྡྷརིསྶཱམཱི’’ཏི སཉྙཱཡ ཨབྷཱཝཏོ ཝཊྚཏི. ཨུཔྤཱཊིཏཱནཱིཏི ཨུདྡྷཊཱནི. བཱིཛགཱམེ སངྒཧཾ གཙྪནྟཱིཏི བྷཱུཏགཱམཏོ པརིམོཙིཏཏྟཱ ཝུཏྟཾ. ཨནནྟཀ-གྒཧཎེན སཱསཔམཏྟིཀཱ གཧིཏཱ. ནཱམཉྷེཏཾ ཏསྶཱ སེཝཱལཛཱཏིཡཱ ¶ . མཱུལཔཎྞཱནཾ ཨསམྤུཎྞཏྟཱ ‘‘ཨསམྤུཎྞབྷཱུཏགཱམོ ནཱམཱ’’ཏི ཝུཏྟཾ. ཨབྷཱུཏགཱམམཱུལཏྟཱཏི ཨེཏྠ བྷཱུཏགཱམོ མཱུལཾ ཀཱརཎཾ ཨེཏསྶཱཏི བྷཱུཏགཱམམཱུལོ, བྷཱུཏགཱམསྶ ཝཱ མཱུལཾ ཀཱརཎནྟི བྷཱུཏགཱམམཱུལཾ. བཱིཛགཱམོ ཧི ནཱམ བྷཱུཏགཱམཏོ སམྦྷཝཏི, བྷཱུཏགཱམསྶ ཙ ཀཱརཎཾ ཧོཏི, ཨཡཾ པན ཏཱདིསོ ན ཧོཏཱིཏི ‘‘ཨབྷཱུཏགཱམམཱུལཏྟཱ’’ཏི ཝུཏྟཾ. ཏཏྲཊྛཀཏྟཱ ཝུཏྟཾ ‘‘སོ བཱིཛགཱམེན སངྒཧིཏོ’’ཏི. ཨིདཉྩ ‘‘ཨབྷཱུཏགཱམམཱུལཏྟཱ’’ཏི ཨེཏྠ པཋམཾ ཝུཏྟཨཏྠསམྦྷཝཏོ ཝུཏྟཾ. ཀིཉྩཱཔི ཧི ཏཱལནཱལི༹ཀེརཱདཱིནཾ ཁཱཎུ ཨུདྡྷཾ ཨཝཌྜྷནཏོ བྷཱུཏགཱམསྶ ཀཱརཎཾ ན ཧོཏི, ཏཐཱཔི བྷཱུཏགཱམསངྑྱུཔགཏནིབྦཏྟཔཎྞམཱུལབཱིཛཏོ སམྦྷཱུཏཏྟཱ བྷཱུཏགཱམཏོ ཨུཔྤནྣོ ནཱམ ཧོཏཱིཏི བཱིཛགཱམེན སངྒཧཾ གཙྪཏི.

‘‘ཨངྐུརེ ཧརིཏེ’’ཏི ཝཏྭཱ ཏམེཝ ཝིབྷཱཝེཏི ‘‘ནཱིལཔཎྞཝཎྞེ ཛཱཏེ’’ཏི, ནཱིལཔཎྞསྶ ཝཎྞསདིསེ ཝཎྞེ ཛཱཏེཏི ཨཏྠོ. ‘‘ནཱིལཝཎྞེ ཛཱཏེ’’ཏི ཝཱ པཱཋོ གཧེཏབྦོ. ཨམཱུལཀབྷཱུཏགཱམེ སངྒཧཾ གཙྪཏཱིཏི ནཱལི༹ཀེརསྶ ཨཱཝེཎིཀཾ ཀཏྭཱ ཝདཏི. ‘‘པཱནཱིཡགྷཊཱདཱིནཾ བཧི སེཝཱལོ ཨུདཀེ ཨཊྛིཏཏྟཱ བཱིཛགཱམཱནུལོམཏྟཱ ཙ དུཀྐཊཝཏྠཱུ’’ཏི ཝདནྟི. ཀཎྞཀམྤི ཨབྦོཧཱརིཀམེཝཱཏི ནཱིལཝཎྞམྤི ཨབྦོཧཱརིཀམེཝ. སེལེཡྻཀཾ ནཱམ སིལཱཡ སམྦྷཱུཏཱ ཨེཀཱ སུགནྡྷཛཱཏི. ‘‘རུཀྑཏྟཙཾ ཝིཀོཔེཏཱིཏི ཝུཏྟཏྟཱ རུཀྑེ ཛཱཏཾ ཡཾ ཀིཉྩི ཚཏྟཀཾ རུཀྑཏྟཙཾ ཨཝིཀོཔེཏྭཱ མཏྠཀཏོ ཚིནྡིཏྭཱ གཧེཏུཾ ཝཊྚཏཱི’’ཏི ཝདནྟི. རུཀྑཏོ མུཙྩིཏྭཱ ཏིཊྛཏཱིཏི ཨེཏྠ ‘‘ཡདིཔི ཀིཉྩིམཏྟཾ རུཀྑེ ཨལླཱིནཱ ཧུཏྭཱ ཏིཊྛཏི, རུཀྑཏོ གཡ྄ཧམཱནོ པན རུཀྑཙྪཝིཾ ན ཝིཀོཔེཏི, ཝཊྚཏཱི’’ཏི ཝདནྟི. ཨལླརུཀྑཏོ ན ཝཊྚཏཱིཏི ཨེཏྠཱཔི རུཀྑཏྟཙཾ ཨཝིཀོཔེཏྭཱ མཏྠཀཏོ ཏཙྪེཏྭཱ གཧེཏུཾ ཝཊྚཏཱིཏི ཝེདིཏབྦཾ. ཧཏྠཀུཀྐུཙྩེནཱཏི ཧཏྠཱནཾ ཨསཾཡཏབྷཱཝེན, ཧཏྠཙཱཔལླེནཱཏི ཝུཏྟཾ ཧོཏི. པཱནཱིཡཾ ན ཝཱསེཏབྦནྟི ཨིདཾ ཨཏྟནོ ཨཏྠཱཡ ནཱམིཏཾ སནྡྷཱཡ ཝུཏྟཾ. ཀེཝལཾ ཨནུཔསམྤནྣསྶ ཨཏྠཱཡ ནཱམིཏེ པན པཙྪཱ ཏཏོ ལབྷིཏྭཱ ན ཝཱསེཏབྦནྟི ¶ ནཏྠི. ‘‘ཡེསཾ རུཀྑཱནཾ སཱཁཱ རུཧཏཱིཏི ཝུཏྟཏྟཱ ཡེསཾ སཱཁཱ ན རུཧཏི, ཏཏྠ ཀཔྤིཡཀརཎཀིཙྩཾ ནཏྠཱི’’ཏི ཝདནྟི.

༩༣. པཉྩཧི ¶ སམཎཀཔྤེཧཱིཏི པཉྩཧི སམཎཝོཧཱརེཧི. ཀིཉྩཱཔི ཧི བཱིཛཱནཾ ཨགྒིནཱ ཕུཊྛམཏྟེན ནཁཱདཱིཧི ཝིལིཁནམཏྟེན ཙ ཨཝིརུལ༹ྷཱིདྷམྨཏཱ ན ཧོཏི, ཏཐཱཔི ཨེཝཾ ཀཏེཡེཝ སམཎཱནཾ ཀཔྤཏཱིཏི ཨགྒིཔརིཛིཏཱདཡོ སམཎཝོཧཱརཱ ནཱམ ཛཱཏཱ, ཏསྨཱ ཏེཧི སམཎཝོཧཱརེཧི ཀརཎབྷཱུཏེཧི ཕལཾ པརིབྷུཉྫིཏུཾ ཨནུཛཱནཱམཱིཏི ཨདྷིཔྤཱཡོ. ཨབཱིཛནིབྦཊྚབཱིཛཱནིཔི སམཎཱནཾ ཀཔྤནྟཱིཏི པཉྙཏྟཔཎྞཏྟིབྷཱཝཏོ སམཎཝོཧཱརཱཨིཙྩེཝ སངྑཾ གཏཱནི. ཨཐ ཝཱ ཨགྒིཔརིཛིཏཱདཱིནཾ པཉྩནྣཾ ཀཔྤིཡབྷཱཝཏོཡེཝ པཉྩཧི སམཎཀཔྤིཡབྷཱཝསངྑཱཏེཧི ཀཱརཎེཧི ཕལཾ པརིབྷུཉྫིཏུཾ ཨནུཛཱནཱམཱིཏི ཨེཝམེཏྠ ཨདྷིཔྤཱཡོ ཝེདིཏབྦོ. ཨགྒིཔརིཛིཏནྟིཨཱདཱིསུ ‘‘པརིཙིཏ’’ནྟིཔི པཋནྟི. ཨབཱིཛཾ ནཱམ ཏརུཎམྦཕལཱདི. ནིབྦཊྚབཱིཛཾ ནཱམ ཨམྦཔནསཱདི, ཡཾ བཱིཛཾ ནིབྦཊྚེཏྭཱ ཝིསུཾ ཀཏྭཱ པརིབྷུཉྫིཏུཾ སཀྐཱ ཧོཏི. ‘‘ཀཔྤིཡ’’ནྟི ཝཏྭཱཝ ཀཱཏབྦནྟི ཡོ ཀཔྤིཡཾ ཀརོཏི, ཏེན ཀཏྟབྦཱཀཱརསྶེཝ ཝུཏྟཏྟཱ བྷིཀྑུནཱ ཨཝུཏྟེཔི ཀཱཏུཾ ཝཊྚཏཱིཏི ན གཧེཏབྦཾ. པུན ‘‘ཀཔྤིཡཾ ཀཱརེཏབྦ’’ནྟི ཀཱརཱཔནསྶ པཋམམེཝ ཀཐིཏཏྟཱ བྷིཀྑུནཱ ‘‘ཀཔྤིཡཾ ཀརོཧཱི’’ཏི ཝུཏྟེཡེཝ ཨནུཔསམྤནྣེན ‘‘ཀཔྤིཡ’’ནྟི ཝཏྭཱ ཨགྒིཔརིཛིཏཱདི ཀཱཏབྦནྟི གཧེཏབྦཾ. ‘‘ཀཔྤིཡནྟི ཝཙནཾ པན ཡཱཡ ཀཱཡཙི བྷཱསཱཡ ཝཏྟུཾ ཝཊྚཏཱི’’ཏི ཝདནྟི. ‘‘ཀཔྤིཡནྟི ཝཏྭཱཝ ཀཱཏབྦ’’ནྟི ཝཙནཏོ པཋམཾ ‘‘ཀཔྤིཡ’’ནྟི ཝཏྭཱ པཙྪཱ ཨགྒིཨཱདིནཱ ཕུསནཱདི ཀཱཏབྦནྟི ཝེདིཏབྦཾ. ‘‘པཋམཾ ཨགྒིཾ ནིཀྑིཔིཏྭཱ ནཁཱདིནཱ ཝཱ ཝིཛ྄ཛྷིཏྭཱ ཏཾ ཨནུདྡྷརིཏྭཱཝ ‘ཀཔྤིཡ’ནྟི ཝཏྟུམྤི ཝཊྚཏཱི’’ཏི ཝདནྟི.

ཨེཀསྨིཾ བཱིཛེ ཝཱཏིཨཱདཱིསུ ‘‘ཨེཀཾཡེཝ ཀཱརེམཱིཏི ཨདྷིཔྤཱཡེ སཏིཔི ཨེཀཱབདྡྷཏྟཱ སབྦཾ ཀཏམེཝ ཧོཏཱི’’ཏི ཝདནྟི. དཱརུཾ ཝིཛ྄ཛྷཏཱིཏི ཨེཏྠ ‘‘ཛཱནིཏྭཱཔི ཝིཛ྄ཛྷཏི ཝཱ ཝིཛ྄ཛྷཱཔེཏི ཝཱ, ཝཊྚཏིཡེཝཱ’’ཏི ཝདནྟི. བྷཏྟསིཏྠེ ཝིཛ྄ཛྷཏཱིཏི ཨེཏྠཱཔི ཨེསེཝ ནཡོ. ‘‘ཏཾ ཝིཛ྄ཛྷཏི, ན ཝཊྚཏཱིཏི རཛྫུཨཱདཱིནཾ བྷཱཛནགཏིཀཏྟཱ’’ཏི ཝདནྟི. མརིཙཔཀྐཱདཱིཧི མིསྶེཏྭཱཏི ཨེཏྠ བྷཏྟསིཏྠསམྦནྡྷཝསེན ཨེཀཱབདྡྷཏཱ ཝེདིཏབྦཱ, ན ཕལཱནཾཡེཝ ཨཉྙམཉྙཾ སམྦནྡྷཝསེན. བྷིནྡཱཔེཏྭཱ ཀཔྤིཡཾ ཀཱརཱཔེཏབྦནྟི བཱིཛཏོ མུཏྟསྶ ཀཊཱཧསྶ བྷཱཛནགཏིཀཏྟཱ ཝུཏྟཾ.

ནིཀྑཱམེཏུནྟི ཏཾ བྷིཀྑུཾ ནིཀྑཱམེཏུཾ. ‘‘སཙེ ཨེཏསྶ ཨནུལོམ’’ནྟི སེནཱསནརཀྑཎཏྠཱཡ ཨནུཉྙཱཏམྤི པཊགྒིདཱནཱདིཾ ཨཏྟནཱཔི ཀཱཏུཾ ཝཊྚཏཱིཏི ¶ ཨེཏྟཀེནེཝ ཨིདམྤི ཨེཏསྶ ཨནུལོམནྟི ཨེཝམདྷིཔྤཱཡོ སིཡཱ. པཊགྒིདཱནཾ པརིཏྟཀརཎཉྩ ཨཏྟནོ པརསྶ ཝཱ ¶ སེནཱསནརཀྑཎཏྠཱཡ ཝཊྚཏིཡེཝ. ཏསྨཱ སཙེ ཏསྶ སུཏྟསྶ ཨེཏཾ ཨནུལོམཾ སིཡཱ, ཨཏྟནོ ན ཝཊྚཏི, ཨཉྙསྶ ཝཊྚཏཱིཏི ཨཡཾ ཝིསེསོ ཀུཏོ ལབྦྷཏཱིཏི ཨཱཧ ‘‘ཨཏྟནོ ན ཝཊྚཏི…པེ… ན སཀྐཱ ལདྡྷུ’’ནྟི. སེསམེཏྠ ཨུཏྟཱནམེཝ. བྷཱུཏགཱམོ, བྷཱུཏགཱམསཉྙིཏཱ, ཝིཀོཔནཾ ཝཱ ཝིཀོཔཱཔནཾ ཝཱཏི ཨིམཱནི པནེཏྠ ཏཱིཎི ཨངྒཱནི.

བྷཱུཏགཱམསིཀྑཱཔདཝཎྞནཱ ནིཊྛིཏཱ.

༢. ཨཉྙཝཱདཀསིཀྑཱཔདཝཎྞནཱ

༩༤-༩༨. དུཏིཡེ ཨཉྙཾ ཝཙནནྟི ཡཾ ཙོདཀེན ཙུདིཏཀསྶ དོསཝིབྷཱཝནཝཙནཾ ཝུཏྟཾ, ཏཾ ཏཏོ ཨཉྙེནེཝ ཝཙནེན པཊིཙརཏི. ཨཐ ཝཱ ཨཉྙེནཉྙཾ པཊིཙརཏཱིཏི ཨཉྙེན ཀཱརཎེན ཨཉྙཾ ཀཱརཎཾ པཊིཙརཏཱིཏི ཨེཝམེཏྠ ཨཏྠོ ཝེདིཏབྦོ, ཡཾ ཙོདཀེན ཙུདིཏཀསྶ དོསཝིབྷཱཝནཀཱརཎཾ ཝུཏྟཾ, ཏཏོ ཨཉྙེན ཙོདནཱཡ ཨམཱུལཀབྷཱཝདཱིཔཀེན ཀཱརཎེན པཊིཙརཏཱིཏི ཝུཏྟཾ ཧོཏི. པཊིཙརཏཱིཏི ཙ པཊིཙྪཱདནཝསེན ཙརཏི, པཝཏྟཏཱིཏི ཨཏྠོ. པཊིཙྪཱདནཏྠོ ཨེཝ ཝཱ ཙརཏི-སདྡོ ཨནེཀཏྠཏྟཱ དྷཱཏཱུནཾ. ཏེནཱཧ ‘‘པཊིཙྪཱདེཏཱི’’ཏི. ཀོ ཨཱཔནྣོཏིཨཱདིནཱ པཱལི༹ཡཾ ཙོདནཾ ཨཝིསྶཛྫེཏྭཱ ཝིཀྑེཔཱཔཛྫནཝསེན ཨཉྙེན ཨཉྙཾ པཊིཙརཎཾ དསྶིཏཾ. ཨཔརམྤི པན ཙོདནཾ ཝིསྶཛྫེཏྭཱ བཧིདྡྷཱ ཀཐཱཨཔནཱམཝསེན པཝཏྟཾ པཱལི༹མུཏྟཀཾ ཨཉྙེནཉྙཾ པཊིཙརཎཾ ཝེདིཏབྦཾ. ‘‘ཨིཏྠནྣཱམཾ ཨཱཔཏྟིཾ ཨཱཔནྣོསཱི’’ཏི པུཊྛོ ‘‘པཱཊལིཔུཏྟཾ གཏོམྷཱི’’ཏི ཝཏྭཱ པུན ‘‘ན ཏཝ པཱཊལིཔུཏྟགམནཾ པུཙྪཱམ, ཨཱཔཏྟིཾ པུཙྪཱམཱ’’ཏི ཝུཏྟེ ‘‘ཏཏོ རཱཛགཧཾ གཏོམྷཱི’’ཏི ཝཏྭཱ ‘‘རཱཛགཧཾ ཝཱ ཡཱཧི བྲཱཧྨཎགཧཾ ཝཱ, ཨཱཔཏྟིཾ ཨཱཔནྣོསཱི’’ཏི ཝུཏྟེ ‘‘ཏཏྠ མེ སཱུཀརམཾསཾ ལདྡྷ’’ནྟིཨཱདཱིནི ཝཏྭཱཝ ཀཐཾ བཧིདྡྷཱ ཝིཀྑིཔནྟོཔི ཧི ‘‘ཨཉྙེནཉྙཾ པཊིཙརཏི’’ཙྩེཝ སངྑཾ གཙྪཏི.

ཡདེཏཾ ཨཉྙེན ཨཉྙཾ པཊིཙརཎཝསེན པཝཏྟཝཙནཾ, ཏདེཝ པུཙྪིཏམཏྠཾ ཋཔེཏྭཱ ཨཉྙཾ ཝདཏཱིཏི ཨཉྙཝཱདཀནྟི ཨཱཧ ‘‘ཨཉྙེནཉྙཾ པཊིཙརཎསྶེཏཾ ནཱམ’’ནྟི. ཏུཎྷཱིབྷཱུཏསྶེཏཾ ནཱམནྟི ཏུཎྷཱིབྷཱཝསྶེཏཾ ནཱམཾ, ཨཡམེཝ ཝཱ པཱཋོ. ཨཉྙཝཱདཀཾ ཨཱརོཔེཏཱུཏི ཨཉྙཝཱདཀཀམྨཾ ཨཱརོཔེཏུ, ཨཉྙཝཱདཀཏྟཾ ¶ ཝཱ ཨིདཱནི ཀརིཡམཱནེན ཀམྨེན ཨཱརོཔེཏཱུཏི ཨཏྠོ. ཝིཧེསཀཾ ཨཱརོཔེཏཱུཏི ཨེཏྠཱཔི ཝིཧེསཀཀམྨཾ ཝིཧེསཀབྷཱཝཾ ཝཱ ཨཱརོཔེཏཱུཏི ཨེཝམཏྠོ དཊྛབྦོ.

ཨནཱརོཔིཏེ ཨཉྙཝཱདཀེ ཝུཏྟདུཀྐཊཾ པཱལི༹ཡཾ ཨཱགཏཨཉྙེནཉྙཾཔཊིཙརཎཝསེན ཡུཛྫཏི ¶ . ཨཊྛཀཐཱཡཾ ཨཱགཏེན པན པཱལི༹མུཏྟཀཨཉྙེནཉྙཾཔཊིཙརཎཝསེན ཨནཱརོཔིཏེ ཨཉྙཝཱདཀེ མུསཱཝཱདེན པཱཙིཏྟིཡཾ, ཨཱརོཔིཏེ ཨིམིནཱཝ པཱཙིཏྟིཡནྟི ཝེདིཏབྦཾ. ཀེཙི པན ‘‘ཨཱརོཔིཏེ ཨཉྙཝཱདཀེ མུསཱཝཱདེན ཨིམིནཱ ཙ པཱཙིཏྟིཡདྭཡཾ ཧོཏཱི’’ཏི ཝདནྟི, ཏཾ ཝཱིམཾསིཏྭཱ གཧེཏབྦཾ. ཡཱ སཱ ཨཱདིཀམྨིཀསྶ ཨནཱཔཏྟི ཝུཏྟཱ, སཱཔི པཱལི༹ཡཾ ཨཱགཏཨཉྙེནཉྙཾཔཊིཙརཎཝསེན ཝུཏྟཱཏི དཊྛབྦཱ, ཨིམིནཱ སིཀྑཱཔདེན ཨནཱཔཏྟིདསྶནཏྠཾ ཝཱ. སེསཾ ཨུཏྟཱནམེཝ. དྷམྨཀམྨེན ཨཱརོཔིཏཏཱ, ཨཱཔཏྟིཡཱ ཝཱ ཝཏྠུནཱ ཝཱ ཨནུཡུཉྫིཡམཱནཏཱ, ཚཱདེཏུཀཱམཏཱཡ ཨཉྙེནཉྙཾ པཊིཙརཎཾ ཝཱ ཏུཎྷཱིབྷཱཝོ ཝཱཏི ཨིམཱནི པནེཏྠ ཏཱིཎི ཨངྒཱནི.

ཨཉྙཝཱདཀསིཀྑཱཔདཝཎྞནཱ ནིཊྛིཏཱ.

༣. ཨུཛ྄ཛྷཱཔནཀསིཀྑཱཔདཝཎྞནཱ

༡༠༣. ཏཏིཡེ དྷཱཏུཔཱཋེ ཛྷེ-སདྡོ ཙིནྟཱཡཾ པཋིཏོཏི ཨཱཧ ‘‘ལཱམཀཏོ ཝཱ ཙིནྟཱཔེནྟཱི’’ཏིཨཱདི. ཨཡམེཝ ཙ ཨནེཀཏྠཏྟཱ དྷཱཏཱུནཾ ཨོལོཀནཏྠོཔི ཧོཏཱིཏི དཊྛབྦཾ. ‘‘ཨཀྑརཱཡ ཝཱཙེཏཱི’’ཏིཨཱདཱིསུ (པཱཙི. ༤༦) ཝིཡ ‘‘ཚནྡཱཡཱ’’ཏི ལིངྒཝིཔལླཱསཝསེན ཝུཏྟནྟི ཨཱཧ ‘‘ཚནྡེནཱ’’ཏི.

༡༠༥. ཡེན ཝཙནེནཱཏི ཡེན ‘‘ཚནྡཱཡ ཨིཏྠནྣཱམོ ཨིདཾ ནཱམ ཀརོཏཱི’’ཏིཨཱདིཝཙནེན. ཡེན ཙ ཁིཡྻནྟཱིཏི ཡེན ‘‘ཚནྡཱཡ ཨིཏྠནྣཱམོ’’ཏིཨཱདིཝཙནེན ཏཏྠ ཏཏྠ བྷིཀྑཱུནཾ སཝནཱུཔཙཱརེ ཋཏྭཱ ཨཝཎྞཾ པཀཱསེནྟི.

༡༠༦. ཨཉྙཾ ཨནུཔསམྤནྣཾ ཨུཛ྄ཛྷཱཔེཏཱིཏི ཨཉྙེན ཨནུཔསམྤནྣེན ཨུཛ྄ཛྷཱཔེཏི. ཏསྶ ཝཱ ཏཾ སནྟིཀེ ཁིཡྻཏཱིཏི ཏསྶ ཨནུཔསམྤནྣསྶ སནྟིཀེ ¶ ཏཾ སངྒྷེན སམྨཏཾ ཨུཔསམྤནྣཾ ཁིཡྻཏི, ཨཝཎྞཾ ཝདནྟོ ཝཱ པཀཱསེཏི. ཨནུཔསམྤནྣཾ སངྒྷེན སམྨཏནྟི ཨེཏྠ སམྨཏཔུབྦོ སམྨཏོཏི ཝུཏྟོ. ཏེནཱཧ ‘‘ཀིཉྩཱཔཱི’’ཏིཨཱདི. ཡསྨཱ ཨུཛ྄ཛྷཱཔནཾ ཁིཡྻནཉྩ མུསཱཝཱདཝསེནེཝ པཝཏྟཾ, ཏསྨཱ ཨཱདིཀམྨིཀསྶ ཨནཱཔཏྟཱིཏི པཱཙིཏྟིཡཊྛཱནེ དུཀྐཊཊྛཱནེ ཙ ཨིམིནཱཝ ཨནཱཔཏྟིདསྶནཏྠཾ ཝུཏྟནྟི གཧེཏབྦཾ. ཨེཝཉྩ ཀཏྭཱ ཨུཛ྄ཛྷཱཔེནྟསྶ ཁིཡྻནྟསྶ ཙ ཨེཀཀྑཎེ དྭེ དྭེ ཨཱཔཏྟིཡོ ཧོནྟཱིཏི ཨཱཔནྣཾ. ཨཐ ཝཱ ཨཱིདིསཾ སིཀྑཱཔདཾ མུསཱཝཱདཏོ པཋམཾ པཉྙཏྟནྟི གཧེཏབྦཾ. སེསམེཏྠ ཨུཏྟཱནམེཝ. དྷམྨཀམྨེན སམྨཏཏཱ, ཨུཔསམྤནྣཏཱ, ཨགཏིགམནཱབྷཱཝོ ¶ , ཏསྶ ཨཝཎྞཀཱམཏཱ, ཡསྶ སནྟིཀེ ཝདཏི, ཏསྶ ཨུཔསམྤནྣཏཱ, ཨུཛ྄ཛྷཱཔནཾ ཝཱ ཁིཡྻནཾ ཝཱཏི ཨིམཱནི པནེཏྠ ཚ ཨངྒཱནི.

ཨུཛ྄ཛྷཱཔནཀསིཀྑཱཔདཝཎྞནཱ ནིཊྛིཏཱ.

༤. པཋམསེནཱསནསིཀྑཱཔདཝཎྞནཱ

༡༠༨-༡༡༠. ཙཏུཏྠེ ཧིམཝསྶེནཱཏི ཧིམམེཝ ཝུཏྟཾ. ཨཔཉྙཱཏེཏི ཨཔྤཏཱིཏེ, ཨཔྤསིདྡྷེཏི ཨཏྠོ. ‘‘མཎྜཔེ ཝཱ རུཀྑམཱུལེ ཝཱཏི ཝཙནཏོ ཝིཝཊངྒཎེཔི ནིཀྑིཔིཏུཾ ཝཊྚཏཱི’’ཏི ཏཱིསུཔི གཎྛིཔདེསུ ཝུཏྟཾ. གོཙརཔྤསུཏཱཏི གོཙརཊྛཱནཾ པཊིཔནྣཱ. ‘‘ཨཊྛ མཱསེ’’ཏི ཨིམིནཱ ཝསྶཱནཾ ཙཱཏུམཱསཾ ཙེཔི དེཝོ ན ཝསྶཏི, པཊིཀྑིཏྟམེཝཱཏི ཨཱཧ ‘‘ཨཊྛ མཱསེཏི ཝཙནཏོ…པེ… ནིཀྑིཔིཏུཾ ན ཝཊྚཏིཡེཝཱ’’ཏི. ཏཏྠ ཙཏྟཱརོ མཱསེཏི ཝསྶཱནསྶ ཙཏྟཱརོ མཱསེ. ཨཝསྶིཀསངྐེཏེཏི ཨིམིནཱ ཨནུཉྙཱཏེཔི ཨཊྛ མཱསེ ཡཏྠ ཧེམནྟེ དེཝོ ཝསྶཏི, ཏཏྠ ཨཔརེཔི ཙཏྟཱརོ མཱསཱ པཊིཀྑིཏྟཱཏི ཨཱཧ ‘‘ཨཝསྶིཀསངྐེཏེཏི ཝཙནཏོ’’ཏིཨཱདི. ཨིམིནཱ ཨིམཾ དཱིཔེཏི ‘‘ཡསྨིཾ དེསེ ཧེམནྟེ དེཝོ ཝསྶཏི, ཏཏྠ ཨཊྛ མཱསེ པཊིཀྑིཔིཏྭཱ ཙཏྟཱརོ མཱསཱ ཨནུཉྙཱཏཱ. ཡཏྠ པན ཝསྶཱནེཡེཝ ཝསྶཏི, ཏཏྠ ཙཏྟཱརོ མཱསེ པཊིཀྑིཔིཏྭཱ ཨཊྛ མཱསཱ ཨནུཉྙཱཏཱ’’ཏི.

ཨིམིནཱཝ ནཡེན མཛ྄ཛྷིམཔདེསེ ཡཏྠ ཧེམནྟེ ཧིམཝསྶཾ ཝསྶཏི, ཏཏྠཱཔི ཨཊྛེཝ མཱསཱ པཊིཀྑིཏྟཱཏི ཝེདིཏབྦཱ. ཏསྨཱ ཝསྶཱནཀཱལེ པཀཏིཨཛ྄ཛྷོཀཱསེ ཨོཝསྶཀམཎྜཔེ རུཀྑམཱུལེ ཙ སནྠརིཏུཾ ན ཝཊྚཏི, ཧེམནྟཀཱལེ པཀཏིཨཛ྄ཛྷོཀཱསེ ཨོཝསྶཀམཎྜཔཱདཱིསུཔི ཝཊྚཏི. ཏཉྩ ¶ ཁོ ཡཏྠ ཧིམཝསྶེན སེནཱསནཾ ན ཏེམཏི, གིམྷཀཱལེཔི པཀཏིཨཛ྄ཛྷོཀཱསཱདཱིསུ ཝཊྚཏིཡེཝ, ཏཉྩ ཁོ ཨཀཱལམེགྷཱདསྶནེ, ཀཱཀཱདཱིནཾ ནིབདྡྷཝཱསརུཀྑམཱུལེ པན ཀདཱཙིཔི ན ཝཊྚཏཱིཏི ཨེཝམེཏྠ ཝིནིཙྪཡོ ཝེདིཏབྦོ.

ཨིམཉྩ པན ཨཏྠཝིསེསཾ གཧེཏྭཱ བྷགཝཏཱ པཋམམེཝ སིཀྑཱཔདཾ པཉྙཏྟནྟི ཝིསུཾ ཨནུཔཉྙཏྟི ན ཝུཏྟཱ. ཏེནེཝ ཧི མཱཏིཀཱཊྛཀཐཱཡཾ (ཀངྑཱ. ཨཊྛ. པཋམསེནཱསནསིཀྑཱཔདཝཎྞནཱ) ཝུཏྟཾ ‘‘ཨིཏི ཡཏྠ ཙ ཡདཱ ཙ སནྠརིཏུཾ ན ཝཊྚཏི, ཏཾ སབྦམིདྷ ཨཛ྄ཛྷོཀཱསསངྑམེཝ གཏ’’ནྟི. ཨཐ ཝཱ ཨཝིསེསེན ཨཛ྄ཛྷོཀཱསེ སནྠརཎསནྠརཱཔནཱནི པཊིཀྑིཔིཏྭཱ ‘‘ཨཱིདིསེ ཀཱལེ ཨཱིདིསེ ཙ པདེསེ ཋཔེཐཱ’’ཏི ཨནུཛཱནནམཏྟེནེཝ ཨལནྟི ན སིཀྑཱཔདེ ¶ ཝིསུཾ ཨནུཔཉྙཏྟི ཨུདྡྷཊཱཏི ཝེདིཏབྦཱ. པརིཝཱརེ (པརི. ༦༥-༦༧) པན ཨིམསྶེཝ སིཀྑཱཔདསྶ ཨནུརཱུཔཝསེན པཉྙཏྟཏྟཱ ‘‘ཨེཀཱ ཨནུཔཉྙཏྟཱི’’ཏི ཝུཏྟཾ.

ནཝཝཱཡིམོ སཱིགྷཾ ན ནསྶཏཱིཏི ཨཱཧ ‘‘ནཝཝཱཡིམོ ཝཱ’’ཏི. ཨོནདྡྷཀོཏི ཙམྨེན ཨོནདྡྷོ. ཨུཀྐཊྛཨབྦྷོཀཱསིཀོཏི ཨིདཾ ཏསྶ པརིཝིཏཀྐདསྶནམཏྟཾ, ཨུཀྐཊྛཨབྦྷོཀཱསིཀསྶ པན ཙཱིཝརཀུཊི ན ཝཊྚཏཱིཏི ནཏྠི. ཀཱཡཱནུགཏིཀཏྟཱཏི བྷིཀྑུནོ ཏཏྠེཝ སནྣིཧིཏབྷཱཝཾ སནྡྷཱཡ ཝུཏྟཾ. ཨིམིནཱ ཙ ཏསྨིཾཡེཝ ཀཱལེ ཨནཱཔཏྟི ཝུཏྟཱ, ཙཱིཝརཀུཊིཏོ ནིཀྑམིཏྭཱ པན ཨཉྙཏྠ གཙྪནྟསྶ པིཎྜཱཡ པཝིསནྟསྶཔི ཨཱཔཏྟིཡེཝ. ‘‘ཡསྨཱ པན དཱཡཀེཧི དཱནཀཱལེཡེཝ སཧསྶགྒྷནཀམྤི ཀམྦལཾ ‘པཱདཔུཉྪནིཾ ཀཏྭཱ པརིབྷུཉྫཐཱ’ཏི དིནྣཾ ཏཐེཝ པརིབྷུཉྫིཏུཾ ཝཊྚཏི, ཏསྨཱ ‘ཨིམཾ མཉྩཔཱིཋཱདིསེནཱསནཾ ཨབྦྷོཀཱསེཔི ཡཐཱསུཁཾ པརིབྷུཉྫཐཱ’ཏི དཱཡཀེཧི དིནྣཾ ཙེ, སབྦསྨིམྤི ཀཱལེ ཨབྦྷོཀཱསེ ནིཀྑིཔིཏུཾ ཝཊྚཏཱི’’ཏི ཝདནྟི. པེསེཏྭཱ གནྟབྦནྟི ཨེཏྠ ‘‘ཡོ བྷིཀྑུ ཨིམཾ ཋཱནཾ ཨཱགནྟྭཱ ཝསཏི, ཏསྶ དེཐཱ’’ཏི ཝཏྭཱ པེསེཏབྦཾ.

ཝལཱཧཀཱནཾ ཨནུཊྛིཏབྷཱཝཾ སལླཀྑེཏྭཱཏི ཨིམིནཱ ཙ གིམྷཱནེཔི མེགྷེ ཨུཊྛིཏེ མཉྩཔཱིཋཱདིཾ ཡཾཀིཉྩི སེནཱསནཾ ཨཛ྄ཛྷོཀཱསེ ནིཀྑིཔིཏུཾ ན ཝཊྚཏཱིཏི དཱིཔིཏནྟི ཝེདིཏབྦཾ. ‘‘པཱདཊྛཱནཱབྷིམུཁཱཏི ནིསཱིདནྟཱནཾ པཱདཔཏནཊྛཱནཱབྷིམུཁ’’ནྟི ཀེཙི. ‘‘སམྨཛྫནྟསྶ པཱདཊྛཱནཱབྷིམུཁ’’ནྟི ཨཔརེ. ‘‘བཧི ཝཱལུཀཱཡ ཨགམནནིམིཏྟཾ པཱདཊྛཱནཱབྷིམུཁཱ ཝཱལིཀཱ ཧརིཏབྦཱཏི ཝུཏྟ’’ནྟི ཨེཀེ ¶ . ཀཙཝརཾ ཧཏྠེཧི གཧེཏྭཱ བཧི ཚཊྚེཏབྦནྟི ཨིམིནཱ ཀཙཝརཾ ཚཌྜེསྶཱམཱིཏི ཝཱལིཀཱ ན ཚཌྜེཏབྦཱཏི དཱིཔེཏི.

༡༡༡. ཨནྟོ སཾཝེཋེཏྭཱ བདྡྷནྟི ཨེརཀཔཏྟཱདཱིཧི ཝེཎིཾ ཀཏྭཱ ཏཱཡ ཝེཎིཡཱ ཨུབྷོསུ པསྶེསུ ཝིཏྠཏཊྛཱནེསུ བཧུཾ ཝེཋེཏྭཱ ཏཏོ པཊྛཱཡ ཡཱཝ མཛ྄ཛྷཊྛཱནཾ, ཏཱཝ ཨནྟོ ཨཱཀཌྜྷནཝསེན ཝེཋེཏྭཱ མཛ྄ཛྷེ སངྑིཔིཏྭཱ ཏིརིཡཾ ཏཏྠ ཏཏྠ བནྡྷིཏྭཱ ཀཏཾ. ཀཔྤཾ ལབྷིཏྭཱཏི གཙྪཱཏི ཝུཏྟཝཙནེན ཀཔྤཾ ལབྷིཏྭཱ. ཐེརསྶ ཧི ཨཱཎཏྟིཡཱ གཙྪནྟསྶ ཨནཱཔཏྟི. པུརིམནཡེནེཝཱཏི ‘‘ནིསཱིདིཏྭཱ སཡཾ གཙྪནྟོ’’ཏིཨཱདིནཱ པུབྦེ ཝུཏྟནཡེནེཝ. ཨཉྙཏྠ གཙྪཏཱིཏི ཏཾ མགྒཾ ཨཏིཀྐམིཏྭཱ ཨཉྙཏྠ གཙྪཏི. ལེཌྜུཔཱཏུཔཙཱརཏོ བཧི ཋིཏཏྟཱ ‘‘པཱདུདྡྷཱརེན ཀཱརེཏབྦོ’’ཏི ཝུཏྟཾ, ཨཉྙཏྠ གཙྪནྟསྶ པཋམཔཱདུདྡྷཱརེ དུཀྐཊཾ, དུཏིཡཔཱདུདྡྷཱརེ པཱཙིཏྟིཡནྟི ཨཏྠོ. པཱཀཏིཀཾ ཨཀཏྭཱཏི ཨཔྤཊིསཱམེཏྭཱ. ཨནྟརསནྣིཔཱཏེཏི ཨནྟརནྟརཱ སནྣིཔཱཏེ.

ཨཱཝཱསིཀཱནཾཡེཝ པལིབོདྷོཏི ཨེཏྠ ཨཱགནྟུཀེཧི ཨཱགནྟྭཱ ཀིཉྩི ཨཝཏྭཱ ཏཏྠ ནིསིནྣེཔི ¶ ཨཱཝཱསིཀཱནཾཡེཝ པལིབོདྷོཏི ཨདྷིཔྤཱཡོ. མཧཱཔཙྩརིཝཱདེ པན ‘‘ཨཉྙེསུ ཨཱགནྟྭཱ ནིསིནྣེསཱུ’’ཏི ཨིདཾ ཨམྷཱཀནྟི ཝཏྭཱ ཝཱ ཨཝཏྭཱ ཝཱ ནིསིནྣེསཱུཏི ཨདྷིཔྤཱཡོ. མཧཱཨཊྛཀཐཱཝཱདེ ‘‘ཨཱཔཏྟཱི’’ཏི པཱཙིཏྟིཡམེཝ ཝུཏྟཾ. མཧཱཔཙྩརིཡཾ པན སནྠརཎསནྠརཱཔནེ སཏི པཱཙིཏྟིཡེན བྷཝིཏབྦནྟི ཨནཱཎཏྟིཡཱ པཉྙཏྟཏྟཱ དུཀྐཊཾ ཝུཏྟཾ. ‘‘ཨིདཾ ཨུསྶཱརཀསྶ, ཨིདཾ དྷམྨཀཐིཀསྶཱ’’ཏི ཝིསུཾ པཉྙཏྟཏྟཱ ཨནཱཎཏྟིཡཱ པཉྙཏྟེཔི པཱཙིཏྟིཡེནེཝ བྷཝིཏབྦནྟི ཨདྷིཔྤཱཡེན ‘‘ཏསྨིཾ ཨཱགནྟྭཱ ནིསིནྣེ ཏསྶ པལིབོདྷོ’’ཏི ཝུཏྟཾ. ཀེཙི པན ཝདནྟི ‘‘ཨནཱཎཏྟིཡཱ པཉྙཏྟེཔི དྷམྨཀཐིཀསྶ ཨནུཊྛཱཔནཱིཡཏྟཱ པཱཙིཏྟིཡེན བྷཝིཏབྦཾ, ཨཱགནྟུཀསྶ པན པཙྪཱ ཨཱགཏེཧི ཝུཌྜྷཏརེཧི ཨུཊྛཱཔེཏབྦཏྟཱ དུཀྐཊཾ ཝུཏྟ’’ནྟི.

༡༡༢. བྷཱུམིཡཾ ཨཏྠརིཏབྦཱཏི ཙིམིལིཀཱཡ སཏི ཏསྶཱ ཨུཔརི, ཨསཏི སུདྡྷབྷཱུམིཡཾ ཨཏྠརིཏབྦཱ. སཱིཧཙམྨཱདཱིནཾ པརིཧརཎེཡེཝ པཊིཀྑེཔོ ཝེདིཏབྦོཏི ཨིམིནཱ –

‘‘ན ¶ , བྷིཀྑཝེ, མཧཱཙམྨཱནི དྷཱརེཏབྦཱནི སཱིཧཙམྨཾ བྱགྒྷཙམྨཾ དཱིཔིཙམྨཾ, ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༢༥༥) –

ཨེཝཾ ཝུཏྟཱཡ ཁནྡྷཀཔཱལི༹ཡཱ ཨདྷིཔྤཱཡཾ ཝིབྷཱཝེཏི. ཨིདཾ ཝུཏྟཾ ཧོཏི – ‘‘ཨནྟོཔི མཉྩེ པཉྙཏྟཱནི ཧོནྟི, བཧིཔི མཉྩེ པཉྙཏྟཱནི ཧོནྟཱི’’ཏི ཨིམསྨིཾ ཝཏྠུསྨིཾ སིཀྑཱཔདསྶ པཉྙཏྟཏྟཱ མཉྩཔཱིཋེསུ ཨཏྠརིཏྭཱ པརིབྷོགོཡེཝ པཊིཀྑིཏྟོ, བྷཱུམཏྠརཎཝསེན པརིབྷོགོ པན ཨཔྤཊིཀྑིཏྟོཏི. ཡདི ཨེཝཾ ‘‘པརིཧརཎེཡེཝ པཊིཀྑེཔོ’’ཏི ཨིདཾ ཀསྨཱ ཝུཏྟནྟི? ཡཐཱ ‘‘ཨནུཛཱནཱམི, བྷིཀྑཝེ, སབྦཾ པཱསཱདཔརིབྷོག’’ནྟི (ཙཱུལ༹ཝ. ༣༢༠) ཝཙནཏོ པུགྒལིཀེཔི སེནཱསནེ སེནཱསནཔརིབྷོགཝསེན ནིཡམིཏཾ སུཝཎྞགྷཊཱདིཀཾ པརིབྷུཉྫིཏུཾ ཝཊྚམཱནམྤི ཀེཝལཾ ཨཏྟནོ སནྟཀཾ ཀཏྭཱ པརིབྷུཉྫིཏུཾ ན ཝཊྚཏི, ཨེཝམིདཾ བྷཱུམཏྠརཎཝསེན པརིབྷུཉྫིཡམཱནམྤི ཨཏྟནོ སནྟཀཾ ཀཏྭཱ ཏཾ ཏཾ ཝིཧཱརཾ ཧརིཏྭཱ པརིབྷུཉྫིཏུཾ ན ཝཊྚཏཱིཏི དསྶནཏྠཾ ‘‘པརིཧརཎེཡེཝ པཊིཀྑེཔོ ཝེདིཏབྦོ’’ཏི ཝུཏྟཾ. དཱརུམཡཔཱིཋནྟི ཕལཀམཡམེཝ པཱིཋཾ ཝུཏྟཾ. པཱདཀཐལིཀནྟི ཨདྷོཏཔཱདཊྛཔནཀཾ. ཨཛ྄ཛྷོཀཱསེ རཛནཾ པཙིཏྭཱ…པེ… པཊིསཱམེཏབྦནྟི ཨེཏྠ ཐེཝེ ཨསཏི རཛནཀམྨེ ནིཊྛིཏེ པཊིསཱམེཏབྦཾ.

༡༡༣. ‘‘བྷིཀྑུ ཝཱ སཱམཎེརོ ཝཱ ཨཱརཱམིཀོ ཝཱ ལཛྫཱི ཧོཏཱིཏི ཝུཏྟཏྟཱ ཨལཛྫིཾ ཨཱཔུཙྪིཏྭཱ གནྟུཾ ན ཝཊྚཏཱི’’ཏི ཝདནྟི. ཨོཏཱཔེནྟོ གཙྪཏཱིཏི ཨེཏྠ ‘‘ཀིཉྩཱཔི ‘ཨེཏྟཀཾ དཱུརཾ གནྟབྦ’ནྟི པརིཙྪེདོ ནཏྠི, ཏཐཱཔི ལེཌྜུཔཱཏཾ ཨཏིཀྐམྨ ནཱཏིདཱུརཾ གནྟབྦ’’ནྟི ཝདནྟི. སེསམེཏྠ ¶ ཨུཏྟཱནམེཝ. མཉྩཱདཱིནཾ སངྒྷིཀཏཱ, ཝུཏྟལཀྑཎེ དེསེ སནྠརཎཾ ཝཱ སནྠརཱཔནཾ ཝཱ, ཨཔལིབུདྡྷཏཱ, ཨཱཔདཱཡ ཨབྷཱཝོ, ལེཌྜུཔཱཏཱཏིཀྐམོཏི ཨིམཱནི པནེཏྠ པཉྩ ཨངྒཱནི.

མཱཏིཀཱཊྛཀཐཱཡཾ (ཀངྑཱ. ཨཊྛ. པཋམསེནཱསནསིཀྑཱཔདཝཎྞནཱ) པན ཨནཱཔུཙྪཾ ཝཱ གཙྪེཡྻཱཏི ཨེཏྠ ‘‘ཡོ བྷིཀྑུ ཝཱ སཱམཎེརོ ཝཱ ཨཱརཱམིཀོ ཝཱ ལཛྫཱི ཧོཏི, ཨཏྟནོ པལིབོདྷཾ ཝིཡ མཉྙཏི, ཏཐཱརཱུཔཾ ཨནཱཔུཙྪིཏྭཱ ཏཾ སེནཱསནཾ ཏསྶ ཨནིཡྻཱཏེཏྭཱ ནིརཔེཀྑོ གཙྪཏི, ཐཱམམཛ྄ཛྷིམསྶ པུརིསསྶ ལེཌྜུཔཱཏཾ ཨཏིཀྐམེཡྻ, ཨེཀེན པཱདེན ལེཌྜུཔཱཏཱཏིཀྐམེ དུཀྐཊཾ, དུཏིཡཔཱདཱཏིཀྐམེ པཱཙིཏྟིཡ’’ནྟི ཝཏྭཱ ཨངྒེསུཔི ནིརཔེཀྑཏཱཡ སདྡྷིཾ ཚ ཨངྒཱནི ¶ ཝུཏྟཱནི. པཱལི༹ཡཾ པན ཨཊྛཀཐཱཡཉྩ ‘‘ནིརཔེཀྑོ གཙྪཏཱི’’ཏི ཨཡཾ ཝིསེསོ ན དིསྶཏི. ‘‘ཨོཏཱཔེནྟོ གཙྪཏཱི’’ཏི ཙ ཨོཏཱཔནཝིསཡེ ཨེཝ སཱཔེཀྑགམནེ ཨནཱཔཏྟི ཝུཏྟཱ. ཡདི ཨཉྙཏྠཱཔི སཱཔེཀྑགམནེ ཨནཱཔཏྟི སིཡཱ, ‘‘ཨནཱཔཏྟི སཱཔེཀྑོ གཙྪཏཱི’’ཏི ཨཝིསེསེན ཝཏྟབྦཾ བྷཝེཡྻ, ཏསྨཱ ཝཱིམཾསིཏྭཱ ཡུཏྟཏརཾ གཧེཏབྦནྟི.

པཋམསེནཱསནསིཀྑཱཔདཝཎྞནཱ ནིཊྛིཏཱ.

༥. དུཏིཡསེནཱསནསིཀྑཱཔདཝཎྞནཱ

༡༡༦. དུཏིཡསེནཱསནསིཀྑཱཔདེ ཨེཏྟཀམེཝ ཝུཏྟནྟི ཨཊྛཀཐཱསུ ཝུཏྟཾ. ‘‘ཨིདཉྩ ཨཊྛཀཐཱསུ ཏཐཱཝུཏྟབྷཱཝདསྶནཏྠཾ ཝུཏྟཾ, ཨཉྙམྤི ཏཱདིསཾ མཉྩཔཱིཋེསུ ཨཏྠརིཏཾ པཙྩཏྠརཎམེཝཱ’’ཏི ཏཱིསུཔི གཎྛིཔདེསུ ཝུཏྟཾ. མཱཏིཀཱཊྛཀཐཱཡཾ པན ‘‘པཙྩཏྠརཎཾ ནཱམ པཱཝཱརོ ཀོཛཝོཏི ཨེཏྟཀམེཝཱ’’ཏི ནིཡམེཏྭཱ ཝུཏྟཾ, ཏསྨཱ གཎྛིཔདེསུ ཝུཏྟཾ ཨིམིནཱ ན སམེཏི, ཝཱིམཾསིཏྭཱ གཧེཏབྦཾ. སེནཱསནཏོཏི སབྦཔཙྪིམསེནཱསནཏོ. ཡོ ཀོཙཱིཏི ཏསྶ ཉཱཏཀོ ཝཱ ཨཉྙཱཏཀོ ཝཱ ཡོ ཀོཙི.

༡༡༧. པརིཝེཎནྟི ཨེཀེཀསྶ ཝིཧཱརསྶ པརིཀྑེཔབྦྷནྟརཾ. ཀུརུནྡཊྛཀཐཱཡཾ ཝུཏྟམེཝཏྠཾ སཝིསེསཾ ཀཏྭཱ དསྶེཏུཾ ‘‘ཀིཉྩཱཔི ཝུཏྟོ’’ཏིཨཱདི ཨཱརདྡྷཾ. ‘‘ཨཔརིཙྪནྣེ མཎྜཔེ’’ཏི ཝིསུཾ ཡོཛེཏབྦཾ. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. དུཏིཡསེནཱསནསིཀྑཱཔདཝཎྞནཱ) ‘‘ཨཔརིཙྪནྣམཎྜཔེ ཝཱ པརིཙྪནྣེ ཝཱཔི བཧཱུནཾ སནྣིཔཱཏབྷཱུཏེ’’ཏི ཝུཏྟཾ. བྷོཛནསཱལཱཡམྤི ཨཡཾ ཝིསེསོ ལབྦྷཏིཡེཝ. ཝཏྟབྦཾ ནཏྠཱིཏི ཝིསེསེཏྭཱ ཀིཉྩི ཝཏྟབྦཾ ནཏྠི. པལུཛྫཏཱིཏི ཝིནསྶཏི. ནསྶེཡྻཱཏི ཙོརཱདཱིཧི ཝིནསྶེཡྻ.

༡༡༨. ཡེན ¶ མཉྩཾ ཝཱ པཱིཋཾ ཝཱ ཝིནནྟི, ཏཾ མཉྩཔཱིཋཀཝཱནཾ. སིལུཙྩཡལེཎནྟི སིལུཙྩཡེ ལེཎཾ, པབྦཏགུཧཱཏི ཨཏྠོ. ‘‘སེནཱསནཾ ཨུཔཙིཀཱཧི ཁཱཡིཏ’’ནྟི ཨིམསྨིཾ ཝཏྠུསྨིཾ པཉྙཏྟཏྟཱ ཝཏྠུཨནུརཱུཔཝསེན ཨཊྛཀཐཱཡཾ ཨུཔཙིཀཱསངྐཱཡ ཨབྷཱཝེ ཨནཱཔཏྟི ཝུཏྟཱ. ཝཏྟཀྑནྡྷཀེ གམིཀཝཏྟཾ པཉྙཔེནྟེན ¶ ‘‘སེནཱསནཾ ཨཱཔུཙྪིཏབྦ’’ནྟི ཝུཏྟཏྟཱ ཀེཝལཾ ཨིཏིཀཏྟབྦཱཀཱརམཏྟདསྶནཏྠཾ ‘‘ཨཱཔུཙྪནཾ པན ཝཏྟ’’ནྟི ཝུཏྟཾ, ན པན ཝཏྟབྷེདེན དུཀྐཊནྟི དསྶནཏྠཾ. ཏེནེཝ ཨནྡྷཀཊྛཀཐཱཡཾ ‘‘སེནཱསནཾ ཨཱཔུཙྪིཏབྦ’’ནྟི ཨེཏྠ ‘‘ཡཾ པཱསཱཎཔིཊྛིཡཾ ཝཱ པཱསཱཎཏྠམྦྷེསུ ཝཱ ཀཏསེནཱསནཾ ཡཏྠ ཨུཔཙིཀཱ ནཱརོཧནྟི, ཏཾ ཨནཱཔུཙྪནྟསྶཔི ཨནཱཔཏྟཱི’’ཏི ཝཀྑཏི, ཏསྨཱ ཡཾ ཝུཏྟཾ གཎྛིཔདེ ‘‘ཏཱདིསེ སེནཱསནེ ཨནཱཔུཙྪཱ གཙྪནྟསྶ པཱཙིཏྟིཡཾ ནཏྠི, གམིཀཝཏྟཝསེན པན ཨནཱཔུཙྪཱ གཙྪཏོ ཝཏྟབྷེདོ ཧོཏི, ཏསྨཱ དུཀྐཊཾ ཨཱཔཛྫཏཱི’’ཏི, ཏཾ ན གཧེཏབྦཾ.

པཙྪིམསྶ ཨཱབྷོགེན མུཏྟི ནཏྠཱིཏི ཏསྶ པཙྪཏོ གཙྪནྟསྶ ཨཉྙསྶ ཨབྷཱཝཏོ ཝུཏྟཾ. ཨེཀཾ ཝཱ པེསེཏྭཱ ཨཱཔུཙྪིཏབྦནྟི ཨེཏྠ གམནཙིཏྟསྶ ཨུཔྤནྣཊྛཱནཏོ ཨནཱཔུཙྪིཏྭཱ གཙྪཏོ དུཏིཡཔཱདུདྡྷཱརེ པཱཙིཏྟིཡཾ. ཀིཉྩཱཔི མཉྩཾ ཝཱ པཱིཋཾ ཝཱ ཨཛ྄ཛྷོཀཱསེ ནིཀྑིཔིཏྭཱ གཙྪནྟསྶ ཨིདྷ ཝིསུཾ ཨཱཔཏྟི ན ཝུཏྟཱ, ཏཐཱཔི ཨཀཱལེ ཨཛ྄ཛྷོཀཱསེ མཉྩཔཱིཋཱནི པཉྙཔེཏྭཱ གཙྪནྟསྶ ལེཌྜུཔཱཏཱཏིཀྐམེ པུརིམསིཀྑཱཔདེན པཱཙིཏྟིཡཾ, པརིཀྑེཔཱཏིཀྐམེ ཨིམིནཱ དུཀྐཊནྟི ཝེདིཏབྦཾ. ‘‘མཎྜཔེ ཝཱ རུཀྑམཱུལེ ཝཱ’’ཏི ཨིམིནཱ ཨཛ྄ཛྷོཀཱསོཔི སངྒཧིཏོཡེཝཱཏི ཏཏྠཱཔི དུཀྐཊཾ ཨིདྷ ཝུཏྟམེཝཱཏི དཊྛབྦཾ. སེཡྻཾ པན ཨཛ྄ཛྷོཀཱསེ སནྠརིཏྭཱ གཙྪནྟསྶ ཨུབྷཡེནཔི དུཀྐཊམེཝ. ‘‘སངྒྷིཀེ ཝིཧཱརེ སངྒྷིཀཾཡེཝ སེཡྻཾ སནྠརིཏྭཱ པཀྐམནྟསྶ པཱཙིཏྟིཡཾ ཝུཏྟནྟི ཨུབྷོསུ ཨེཀེཀསྨིཾ སངྒྷིཀེ དུཀྐཊ’’ནྟི ཝདནྟི. སེསམེཏྠ ཨུཏྟཱནམེཝ. ཝུཏྟལཀྑཎསེཡྻཱ, ཏསྶཱ སངྒྷིཀཏཱ, ཝུཏྟལཀྑཎེ ཝིཧཱརེ སནྠརཎཾ ཝཱ སནྠརཱཔནཾ ཝཱ, ཨཔལིབུདྡྷཏཱ, ཨཱཔདཱཡ ཨབྷཱཝོ, ཨནཔེཀྑསྶ དིསཱཔཀྐམནཾ, ཨུཔཙཱརསཱིམཱཏིཀྐམོཏི ཨིམཱནི པནེཏྠ སཏྟ ཨངྒཱནི.

དུཏིཡསེནཱསནསིཀྑཱཔདཝཎྞནཱ ནིཊྛིཏཱ.

༦. ཨནུཔཁཛྫསིཀྑཱཔདཝཎྞནཱ

༡༡༩-༡༢༡. ཚཊྛེ ཨནུཔཝིསིཏྭཱཏི སམཱིཔཾ པཝིསིཏྭཱ. བཧཱུཔཀཱརཏཾ གུཎཝིསིཊྛཏཉྩ སལླཀྑེནྟོཏི ¶ བྷཎྜཱགཱརིཀསྶ བཧཱུཔཀཱརཏཾ དྷམྨཀཐིཀཱདཱིནཾ གུཎཝིསིཊྛཏཉྩ སལླཀྑེནྟོ. སམནྟཱ དིཡཌྜྷོ ཧཏྠོཏི མཛ྄ཛྷེ པཉྙཏྟམཉྩཔཱིཋཾ སནྡྷཱཡ ཝུཏྟཾ.

༡༢༢. ཨུཔཙཱརཾ ¶ ཋཔེཏྭཱཏི ཝུཏྟལཀྑཎཾ ཨུཔཙཱརཾ ཋཔེཏྭཱ. ཨེཀཝིཧཱརེཏི ཨེཀསྨིཾ སེནཱསནེ. ཨེཀཔརིཝེཎེཏི ཏསྶ ཝིཧཱརསྶ པརིཀྑེཔབྦྷནྟརེ. ‘‘གིལཱནོ པཝིསཏཱིཏིཨཱདཱིསུ ཨནཱཔཏྟིཀཱརཎསབྦྷཱཝཏོ གིལཱནཱདིཏཱཡ པཝིསིསྶཱམཱིཏི ཨུཔཙཱརཾ པཝིསནྟསྶ སཏིཔི སམྦཱདྷེཏུཀཱམཏཱཡ ཨནཱཔཏྟི ཝུཏྟཱཡེཝཱ’’ཏི ཏཱིསུཔི གཎྛིཔདེསུ ཝུཏྟཾ. ཨེཝཉྩ སཏི ཨགིལཱནཱདིབྷཱཝོཔི ཝིསུཾ ཨངྒེསུ ཝཏྟབྦོ སིཡཱ, མཱཏིཀཱཊྛཀཐཱཡཾ (ཀངྑཱ. ཨཊྛ. ཨནུཔཁཛྫསིཀྑཱཔདཝཎྞནཱ) པན ‘‘སངྒྷིཀཝིཧཱརཏཱ, ཨནུཊྛཱཔནཱིཡབྷཱཝཛཱནནཾ, སམྦཱདྷེཏུཀཱམཏཱ, ཨུཔཙཱརེ ནིསཱིདནཾ ཝཱ ནིཔཛྫནཾ ཝཱཏི ཨིམཱནི པནེཏྠ ཙཏྟཱརི ཨངྒཱནཱི’’ཏི ཨེཏྟཀམེཝ ཝུཏྟཾ, ཏསྨཱ ཝཱིམཾསིཏབྦཾ.

ཨནུཔཁཛྫསིཀྑཱཔདཝཎྞནཱ ནིཊྛིཏཱ.

༧. ནིཀྐཌྜྷནསིཀྑཱཔདཝཎྞནཱ

༡༢༦. སཏྟམེ ཀོཊྛཀཱནཱིཏི དྭཱརཀོཊྛཀཱནི. ‘‘ནིཀྑམཱཏི ཝཙནཾ སུཏྭཱཔི ཨཏྟནོ རུཙིཡཱ ནིཀྑམཏི, ཨནཱཔཏྟཱི’’ཏི ཝདནྟི.

༡༢༨. ཨལཛྫིཾ ནིཀྐཌྜྷཏཱིཏིཨཱདཱིསུ པཋམཾ ཨལཛྫཱིཨཱདིབྷཱཝེན ནིཀྐཌྜྷིསྶཱམཱིཏི ཙིནྟེཏྭཱ ནིཀྐཌྜྷནྟསྶ ཙིཏྟསྶ ལཧུཔརིཝཏྟིཏཱཡ ཀོཔེ ཨུཔྤནྣེཔི ཨནཱཔཏྟི. སེསམེཏྠ ཨུཏྟཱནམེཝ. སངྒྷིཀཝིཧཱརོ, ཨུཔསམྤནྣསྶ བྷཎྜནཀཱརཀབྷཱཝཱདིཝིནིམུཏྟཏཱ, ཀོཔེན ནིཀྐཌྜྷནཾ ཝཱ ནིཀྐཌྜྷཱཔནཾ ཝཱཏི ཨིམཱནི པནེཏྠ ཏཱིཎི ཨངྒཱནི.

ནིཀྐཌྜྷནསིཀྑཱཔདཝཎྞནཱ ནིཊྛིཏཱ.

༨. ཝེཧཱསཀུཊིསིཀྑཱཔདཝཎྞནཱ

༡༢༩-༡༣༡. ཨཊྛམེ ཨུཔརིམཏལེ པདརཱནཾ ཨསནྠརིཏཏྟཱ ‘‘ཨུཔརིཨཙྪནྣཏལཱཡཱ’’ཏི ཝུཏྟཾ. པུབྦེ ཝུཏྟནཡེནེཝཱཏི ཨནུཔཁཛྫསིཀྑཱཔདེ ཝུཏྟནཡེནེཝ. སེསཾ སུཝིཉྙེཡྻམེཝ. སངྒྷིཀོ ཝིཧཱརོ ¶ , ཨསཱིསགྷཊྚཱ ཝེཧཱསཀུཊི ¶ , ཧེཊྛཱ སཔརིབྷོགཏཱ, ཨཔཊཱཎིདིནྣེ ཨཱཧཙྩཔཱདཀེ ནིསཱིདནཾ ཝཱ ནིཔཛྫནཾ ཝཱཏི ཨིམཱནི པནེཏྠ ཙཏྟཱརི ཨངྒཱནི.

ཝེཧཱསཀུཊིསིཀྑཱཔདཝཎྞནཱ ནིཊྛིཏཱ.

༩. མཧལླཀཝིཧཱརསིཀྑཱཔདཝཎྞནཱ

༡༣༥. ནཝམེ ‘‘མཧལླཀོ ནཱམ ཝིཧཱརོ སསཱམིཀོ’’ཏི ཝུཏྟཏྟཱ སཉྙཱཙིཀཱཡ ཀུཊིཡཱ ཨནཱཔཏྟི. ‘‘ཨཌྜྷཏེཡྻཧཏྠམྤཱི’’ཏི ཨུཀྐཊྛཔརིཙྪེདེན ཝུཏྟཝཙནཾ པཱལི༹ཡཱ སམེཏཱིཏི ཨཱཧ ‘‘ཏཾ སུཝུཏྟ’’ནྟི. ‘‘པཱལི༹ཡཾ ཨཊྛཀཐཱཡཉྩ ཨུཀྐཊྛཔརིཙྪེདེན ཨཌྜྷཏེཡྻཧཏྠཔྤམཱཎསྶ ཨོཀཱསསྶ དསྶིཏཏྟཱ ཀཝཱཊཾ ཨཌྜྷཏེཡྻཧཏྠཝིཏྠཱརཏོ ཨཱུནཀཾ ཝཱ ཧོཏུ ཨདྷིཀཾ ཝཱ, ཨཌྜྷཏེཡྻཧཏྠཔྤམཱཎཾཡེཝ ཨོཀཱསོ’’ཏི ཝདནྟི.

ཡསྶ ཝེམཛ྄ཛྷེཏི ཡསྶ ཝིཧཱརསྶ ཝེམཛ྄ཛྷེ. སཱ ཨཔརིཔཱུརཨུཔཙཱརཱཔི ཧོཏཱིཏི ཝིཝརིཡམཱནཾ ཀཝཱཊཾ ཡཾ བྷིཏྟིཾ ཨཱཧནཏི, སཱ སམནྟཱ ཀཝཱཊཝིཏྠཱརཔྤམཱཎཨུཔཙཱརརཧིཏཱཔི ཧོཏཱིཏི ཨཏྠོ. ཨཱལོཀཾ སནྡྷེཏི པིདྷེཏཱིཏི ཨཱལོཀསནྡྷི. ‘‘པུནཔྤུནཾ ཚཱདཱཔེསི, པུནཔྤུནཾ ལིམྤཱཔེསཱིཏི ཨིམསྨིཾ ཝཏྠུསྨིཾ ཨུཔྤནྣདོསེན སིཀྑཱཔདསྶ པཉྙཏྟཏྟཱ ལེཔཾ ཨནུཛཱནནྟེན ཙ དྭཱརབནྡྷསྶ སམནྟཱ ཨཌྜྷཏེཡྻཧཏྠཔྤམཱཎེཡེཝ པདེསེ པུནཔྤུནཾ ལེཔསྶ ཨནུཉྙཱཏཏྟཱ ཏཏོ ཨཉྙཏྠ པུནཔྤུནཾ ལིམྤེནྟསྶ ཝཱ ལིམྤཱཔེནྟསྶ ཝཱ བྷིཏྟིཡཾ མཏྟིཀཱཡ ཀཏྟབྦཀིཙྩཾ ནིཊྛཱཔེཏྭཱ པུན ཙཏུཏྠལེཔེ དིནྣེ པཱཙིཏྟིཡེན བྷཝིཏབྦ’’ནྟི ཝདནྟི. གཎྛིཔདེསུ པན ཏཱིསུཔི ‘‘པུནཔྤུནཾ ལེཔདཱནསྶ ཝུཏྟཔྤམཱཎཏོ ཨཉྙཏྠ པཊིཀྑིཏྟམཏྟཾ ཋཔེཏྭཱ པཱཙིཏྟིཡསྶ ཨཝུཏྟཏྟཱ དུཀྐཊཾ ཨནུརཱུཔ’’ནྟི ཝུཏྟཾ.

ཨདྷིཊྛཱཏབྦནྟི སཾཝིདྷཱཏབྦཾ. ཨཔྤཧརིཏེཏི ཨེཏྠ ཨཔྤ-སདྡོ ‘‘ཨཔྤིཙྪོ’’ཏིཨཱདཱིསུ ཝིཡ ཨབྷཱཝཏྠོཏི ཨཱཧ ‘‘ཨཧརིཏེ’’ཏི. པཏནོཀཱསོཏི པཏནོཀཱསཏྟཱ ཏཏྲ ཋིཏསྶ བྷིཀྑུནོ ཨུཔརི པཏེཡྻཱཏི ཨདྷིཔྤཱཡོ. སཙེ ཧརིཏེ ཋིཏོ ཨདྷིཊྛེཏི, ཨཱཔཏྟི དུཀྐཊསྶཱཏི ཝཙནེན ཨིམམཏྠཾ དཱིཔེཏི – སཙེ ཝིཧཱརསྶ སམནྟཱ ཝུཏྟཔྤམཱཎེ པརིཙྪེདེ པུབྦཎྞཱདཱིནི ན སནྟི, ཏཏྠ ཝིཧཱརོ ཀཱརེཏབྦོ. ཡཏྠ པན སནྟི, ཏཏྠ ཀཱརཱཔེནྟསྶ དུཀྐཊནྟི.

༡༣༦. ཨེཀེཀཾ ¶ མགྒཾ ཨུཛུཀམེཝ ཨུཊྛཔེཏྭཱ ཚཱདནཾ མགྒེན ཚཱདནཾ ནཱམ ཧོཏཱིཏི དསྶེཏུཾ ¶ ‘‘མགྒེན ཚཱདེནྟསྶཱ’’ཏི ཝུཏྟཾ. ཨིམིནཱ པན ནཡེན སབྦསྨིཾ ཝིཧཱརེ ཨེཀཝཱརཾ ཚཱདིཏེ ཏཾ ཚདནཾ ཨེཀམགྒནྟི གཧེཏྭཱ ‘‘དྭེ མགྒེ’’ཏིཨཱདི ཝུཏྟཾ. ‘‘པརིཡཱཡེན ཚཱདནེཔི ཨིམིནཱཝ ནཡེན ཡོཛེཏབྦ’’ནྟི ཏཱིསུཔི གཎྛིཔདེསུ ཝུཏྟཾ, ཏཾ ‘‘པུནཔྤུནཾ ཚཱདཱཔེསཱི’’ཏི ཨིམཱཡ པཱལི༹ཡཱ ‘‘སབྦམྤི ཙེཏཾ ཚདནཾ ཚདནཱུཔརི ཝེདིཏབྦ’’ནྟི ཨིམིནཱ ཨཊྛཀཐཱཝཙནེན ཙ སམེཏི, ཏསྨཱ དྭེ མགྒེ ཨདྷིཊྛཧིཏྭཱ ཏཏིཡཱཡ མགྒཾ ཨཱཎཱཔེཏྭཱ པཀྐམིཏབྦནྟི ཨེཏྠ དྭེ ཚདནཱནི ཨདྷིཊྛཧིཏྭཱ ཏཏིཡཾ ཚདནཾ ‘‘ཨེཝཾ ཚཱདེཧཱི’’ཏི ཨཱཎཱཔེཏྭཱ པཀྐམིཏབྦནྟི ཨེཝམཏྠོ གཧེཏབྦོ.

ཀེཙི པན ‘‘པཋམཾ ཏཱཝ ཨེཀཝཱརཾ ཨཔརིསེསཾ ཚཱདེཏྭཱ པུན ཚདནདཎྜཀེ བནྡྷིཏྭཱ དུཏིཡཝཱརཾ ཏཐེཝ ཚཱདེཏབྦཾ, ཏཏིཡཝཱརཙཏུཏྠཝཱརེ སམྤཏྟེ དྭེ མགྒེ ཨདྷིཊྛཧིཏྭཱ ཨཱཎཱཔེཏྭཱ པཀྐམིཏབྦ’’ནྟི ཝདནྟི. ཨཔརེ པན ‘‘པཋམཝཱརེཡེཝ ཏཡོཔི མགྒེ ཨདྷིཊྛཱཏུཾ ཝཊྚཏི, ཙཏུཏྠཏོ པཊྛཱཡ ཨཱཔཏྟི པཱཙིཏྟིཡ’’ནྟི ཝདནྟི. ཏདུབྷཡམྤི པཱལི༹ཡཱ ཨཊྛཀཐཱཡ ཙ ན སམེཏི. ཏཏིཡཱཡ མགྒནྟི ཨེཏྠ ཏཏིཡཱཡཱཏི ཨུཔཡོགཏྠེ སམྤདཱནཝཙནཾ, ཏཏིཡཾ མགྒནྟི ཨཏྠོ. ཏིཎྞཾ མགྒཱནནྟི མགྒཝསེན ཚཱདིཏཱནཾ ཏིཎྞཾ ཚདནཱནཾ. ཏིཎྞཾ པརིཡཱཡཱནནྟི ཨེཏྠཱཔི ཨེསེཝ ནཡོ. ཙཏུཏྠེ མགྒེ ཝཱ པརིཡཱཡེ ཝཱཏི ཙ ཏཐཱ ཚཱདེནྟཱནཾ ཙཏུཏྠཾ ཚཱདནམེཝ ཝུཏྟཾ. སེསཾ ཨུཏྟཱནམེཝ. མཧལླཀཝིཧཱརཏཱ, ཨཏྟནོ ཝཱསཱགཱརཏཱ, ཨུཏྟརི ཨདྷིཊྛཱནནྟི ཨིམཱནི པནེཏྠ ཏཱིཎི ཨངྒཱནི.

མཧལླཀཝིཧཱརསིཀྑཱཔདཝཎྞནཱ ནིཊྛིཏཱ.

༡༠. སཔྤཱཎཀསིཀྑཱཔདཝཎྞནཱ

༡༤༠. དསམེ ཨིམསྶ སིཀྑཱཔདསྶ ‘‘སིཉྩེཡྻ ཝཱ སིཉྩཱཔེཡྻ ཝཱ’’ཏི བཱཧིརཔརིབྷོགཝསེན པཋམཾ པཉྙཏྟཏྟཱ ‘‘སཔྤཱཎཀཾ ཨུདཀཾ པརིབྷུཉྫེཡྻཱ’’ཏི སིཀྑཱཔདཾ ཨཏྟནོ ནཧཱནཔཱནཱདིཔརིབྷོགཝསེན པཉྙཏྟནྟི ཝེདིཏབྦཾ. ཏསྨིཾ ཝཱ པཋམཾ པཉྙཏྟེཔི ཨཏྟནོ པརིབྷོགཝསེནེཝ པཉྙཏྟཏྟཱ ¶ པུན ཨིམཾ སིཀྑཱཔདཾ བཱཧིརཔརིབྷོགཝསེནེཝ པཉྙཏྟནྟི གཧེཏབྦཾ.

སཔྤཱཎཀསཉྙིསྶ ‘‘པརིབྷོགེན པཱཎཀཱ མརིསྶནྟཱི’’ཏི པུབྦབྷཱགེ ཛཱནནྟསྶཔི སིཉྩནསིཉྩཱཔནཾ ‘‘པདཱིཔེ ནིཔཏིཏྭཱ པཊངྒཱདིཔཱཎཀཱ མརིསྶནྟཱི’’ཏི ཛཱནནྟསྶ པདཱིཔུཛྫལནཾ ཝིཡ ཝིནཱཔི ཝདྷཀཙེཏནཱཡ ཧོཏཱིཏི ཨཱཧ ‘‘པཎྞཏྟིཝཛྫ’’ནྟི. སེསཾ ཨུཏྟཱནཏྠམེཝ ¶ . ཨུདཀསྶ སཔྤཱཎཀཏཱ, ‘‘སིཉྩནེན པཱཎཀཱ མརིསྶནྟཱི’’ཏི ཛཱནནཾ, ཏཱདིསམེཝ ཙ ཨུདཀཾ, ཝིནཱ ཝདྷཀཙེཏནཱཡ ཀེནཙིདེཝ ཀརཎཱིཡེན ཏིཎཱདཱིནཾ སིཉྩནནྟི ཨིམཱནི པནེཏྠ ཙཏྟཱརི ཨངྒཱནི.

སཔྤཱཎཀསིཀྑཱཔདཝཎྞནཱ ནིཊྛིཏཱ.

ནིཊྛིཏོ སེནཱསནཝགྒོ དུཏིཡོ.

བྷཱུཏགཱམཝགྒོཏིཔི ཨིམསྶེཝ ནཱམཾ.

༣. ཨོཝཱདཝགྒོ

༡. ཨོཝཱདསིཀྑཱཔདཝཎྞནཱ

༡༤༤. བྷིཀྑུནིཝགྒསྶ པཋམསིཀྑཱཔདེ ཀཐཱནུསཱརེནཱཏི ‘‘སོ ཐེརོ ཀིཾསཱིལོ ཀིཾསམཱཙཱརོ ཀཏརཀུལཱ པབྦཛིཏོ’’ཏིཨཱདིནཱ པུཙྪནྟཱནཾ པུཙྪཱཀཐཱནུསཱརེན. ཀཐེཏུཾ ཝཊྚནྟཱིཏི ནིརཱམིསེནེཝ ཙིཏྟེན ཀཐེཏུཾ ཝཊྚནྟི. ཨནིཡྻཱནིཀཏྟཱ སགྒམོཀྑམགྒཱནཾ ཏིརཙྪཱནབྷཱུཏཱ ཀཐཱ ཏིརཙྪཱནཀཐཱཏི ཨཱཧ ‘‘སགྒམགྒགམནེཔཱི’’ཏིཨཱདི. ཨཔི-སདྡེན པགེཝ མོཀྑམགྒགམནེཏི དཱིཔེཏི. ཏིརཙྪཱནབྷཱུཏནྟི ཏིརོཀརཎབྷཱུཏཾ, བཱདྷིཀནྟི ཝུཏྟཾ ཧོཏི. ལདྡྷཱསེཝནཱ ཧི ཏིརཙྪཱནཀཐཱ སགྒམོཀྑཱནཾ བཱདྷིཀཱཝ ཧོཏི. སམིདྡྷོཏི པརིཔུཎྞོ. སཧིཏཏྠོཏི ཡུཏྟཏྠོ. ཨཏྠགམྦྷཱིརཏཱདིཡོགཏོ གམྦྷཱིརོ. བཧུརསོཏི ཨཏྠརསཱདིབཧུརསོ. ལཀྑཎཔཊིཝེདྷསཾཡུཏྟོཏི ཨནིཙྩཱདིལཀྑཎཔཊིཝེདྷརསཨཱཝཧནཏོ ལཀྑཎཔཊིཝེདྷསཾཡུཏྟོ.

༡༤༥-༡༤༧. པརཏོཏི པརཏྠ, ཨུཏྟརིནྟི ཨཏྠོ. ཀརོནྟོཝཱཏི པརིབཱཧིརེ ཀརོནྟོཡེཝ. པཱཏིམོཀྑོཏི ཙཱརིཏྟཝཱརིཏྟཔྤབྷེདཾ སིཀྑཱཔདསཱིལཾ ¶ . ཏཉྷི ཡོ ནཾ པཱཏི རཀྑཏི, ཏཾ མོཀྑེཏི མོཙེཏི ཨཱཔཱཡིཀཱདཱིཧི དུཀྑེཧི, ཏསྨཱ ‘‘པཱཏིམོཀྑ’’ནྟི ཝུཙྩཏི. སཾཝརཎཾ སཾཝརོ, ཀཱཡཝཙཱིདྭཱརཱནཾ པིདཧནཾ. ཡེན ཧི ཏེ སཾཝུཏཱ པིཧིཏཱ ཧོནྟི, སོ སཾཝརོ, ཀཱཡིཀཝཱཙསིཀསྶ ཨཝཱིཏིཀྐམསྶེཏཾ ནཱམཾ. པཱཏིམོཀྑསཾཝརེན སཾཝུཏོཏི པཱཏིམོཀྑསཾཝརེན པིཧིཏཀཱཡཝཙཱིདྭཱརོ. ཏཐཱབྷཱུཏོ ཙ ཡསྨཱ ཏེན སམངྒཱི ནཱམ ཧོཏི, ཏསྨཱ ཝུཏྟཾ ‘‘སམནྣཱགཏོ’’ཏི ¶ . ཝཏྟཏཱིཏི ཨཏྟབྷཱཝཾ པཝཏྟེཏི. ཝིཧརཏཱིཏི ཨིམིནཱ པཱཏིམོཀྑསཾཝརསཱིལེ ཋིཏསྶ བྷིཀྑུནོ ཨིརིཡཱཔཐཝིཧཱརོ དསྶིཏོ.

སངྑེཔཏོ ཝུཏྟམཏྠཾ ཝིཏྠཱརཏོ པཱལི༹ཡཱ ཝིབྷཱཝེཏུཾ ‘‘ཝུཏྟཉྷེཏ’’ནྟིཨཱདི ཨཱརདྡྷཾ. ཏཏྠ ཝིབྷངྒེཏི ཛྷཱནཝིབྷངྒེ. སཱིལཾ པཏིཊྛཱཏིཨཱདཱིནི པཱཏིམོཀྑསྶེཝ ཝེཝཙནཱནི. ཏཏྠ (ཝིབྷ. ཨཊྛ. ༥༡༡) སཱིལནྟི ཀཱམཉྩེཏཾ སཧ ཀམྨཝཱཙཱཔརིཡོསཱནེན ཨིཛ྄ཛྷནཀསྶ པཱཏིམོཀྑསྶེཝ ཝེཝཙནཾ, ཨེཝཾ སནྟེཔི དྷམྨཏོ ཨེཏཾ སཱིལཾ ནཱམ པཱཎཱཏིཔཱཏཱདཱིཧི ཝཱ ཝིརམནྟསྶ ཝཏྟཔཊིཔཏྟིཾ ཝཱ པཱུརེནྟསྶ ཙེཏནཱདཡོ དྷམྨཱ ཝེདིཏབྦཱ. ཡསྨཱ པན པཱཏིམོཀྑསཱིལེན བྷིཀྑུ སཱསནེ པཏིཊྛཱཏི ནཱམ, ཏསྨཱ ཏཾ ‘‘པཏིཊྛཱ’’ཏི ཝུཏྟཾ. པཏིཊྛཧཏི ཝཱ ཨེཏྠ བྷིཀྑུ, ཀུསལདྷམྨཱ ཨེཝ ཝཱ ཨེཏྠ པཏིཊྛཧནྟཱིཏི པཏིཊྛཱ. ཨཡམཏྠོ ‘‘སཱིལེ པཏིཊྛཱཡ ནརོ སཔཉྙོ’’ཏི (སཾ. ནི. ༡.༢༣, ༡༩༢) ཙ ‘‘པཏིཊྛཱ, མཧཱརཱཛ, སཱིལཾ སབྦེསཾ ཀུསལཱནཾ དྷམྨཱན’’ནྟི (མི. པ. ༢.༡.༩) ཙ ‘‘སཱིལེ པཏིཊྛིཏསྶ ཁོ, མཧཱརཱཛ, སབྦེ ཀུསལཱ དྷམྨཱ ན པརིཧཱཡནྟཱི’’ཏི ཙ ཨཱདིསུཏྟཝསེན ཝེདིཏབྦོ.

ཏདེཏཾ པུབྦུཔྤཏྟིཨཏྠེན ཨཱདི. ཝུཏྟམྤི ཙེཏཾ –

‘‘ཏསྨཱཏིཧ ཏྭཾ, ཨུཏྟིཡ, ཨཱདིམེཝ ཝིསོདྷེཧི ཀུསལེསུ དྷམྨེསུ. ཀོ ཙཱདི ཀུསལཱནཾ དྷམྨཱནཾ? སཱིལཉྩ སུཝིསུདྡྷཾ དིཊྛི ཙ ཨུཛུཀཱ’’ཏི (སཾ. ནི. ༥.༣༨༢).

ཡཐཱ ཧི ནགརཝཌྜྷཀཱི ནགརཾ མཱཔེཏུཀཱམོ པཋམཾ ནགརཊྛཱནཾ སོདྷེཏི, ཏཏོ ཨཔརབྷཱགེ ཝཱིཐིཙཏུཀྐསིངྒྷཱཊཀཱདིཔརིཙྪེདེན ཝིབྷཛིཏྭཱ ནགརཾ མཱཔེཏི, ཨེཝམེཝ ཡོགཱཝཙརོ ཨཱདིམྷི སཱིལཾ སོདྷེཏི, ཏཏོ ཨཔརབྷཱགེ ¶ སམཱདྷིཝིཔསྶནཱམགྒཕལནིབྦཱནཱནི སཙྪིཀརོཏི. ཡཐཱ ཝཱ པན རཛཀོ པཋམཾ ཏཱིཧི ཁཱརེཧི ཝཏྠཾ དྷོཝིཏྭཱ པརིསུདྡྷེ ཝཏྠེ ཡདིཙྪཀཾ རངྒཛཱཏཾ ཨུཔནེཏི, ཡཐཱ ཝཱ པན ཚེཀོ ཙིཏྟཀཱརོ རཱུཔཾ ལིཁིཏུཀཱམོ ཨཱདིཏོ བྷིཏྟིཔརིཀམྨཾ ཀརོཏི, ཏཏོ ཨཔརབྷཱགེ རཱུཔཾ སམུཊྛཱཔེཏི, ཨེཝམེཝ ཡོགཱཝཙརོ ཨཱདིཏོཝ སཱིལཾ ཝིསོདྷེཏྭཱ ཨཔརབྷཱགེ སམཐཝིཔསྶནཱདཡོ དྷམྨེ སཙྪིཀརོཏི. ཏསྨཱ སཱིལཾ ‘‘ཨཱདཱི’’ཏི ཝུཏྟཾ.

ཏདེཏཾ ཙརཎསརིཀྑཏཱཡ ཙརཎཾ. ‘‘ཙརཎཱ’’ཏི པཱདཱ ཝུཙྩནྟི. ཡཐཱ ཧི ཚིནྣཙརཎསྶ པུརིསསྶ དིསཾགམནཱབྷིསངྑཱརོ ན ཛཱཡཏི, པརིཔུཎྞཔཱདསྶེཝ ཛཱཡཏི, ཨེཝམེཝ ཡསྶ སཱིལཾ བྷིནྣཾ ¶ ཧོཏི ཁཎྜཾ ཨཔརིཔུཎྞཾ, ཏསྶ ནིབྦཱནགམནཱཡ ཉཱཎགམནཾ ན སམྤཛྫཏི. ཡསྶ པན ཏཾ ཨབྷིནྣཾ ཧོཏི ཨཁཎྜཾ པརིཔུཎྞཾ, ཏསྶ ནིབྦཱནགམནཱཡ ཉཱཎགམནཾ སམྤཛྫཏི. ཏསྨཱ སཱིལཾ ‘‘ཙརཎ’’ནྟི ཝུཏྟཾ.

ཏདེཏཾ སཾཡམནཝསེན སཾཡམོ, སཾཝརཎཝསེན སཾཝརོཏི ཨུབྷཡེནཔི སཱིལསཾཡམོ ཙེཝ སཱིལསཾཝརོ ཙ ཀཐིཏོ. ཝཙནཏྠོ པནེཏྠ སཾཡམེཏི ཝཱིཏིཀྐམཝིཔྥནྡནཾ, པུགྒལཾ ཝཱ སཾཡམེཏི ཝཱིཏིཀྐམཝསེན ཏསྶ ཝིཔྥནྡིཏུཾ ན དེཏཱིཏི སཾཡམོ, ཝཱིཏིཀྐམསྶ པཝེསནདྭཱརཾ སཾཝརཏི པིདཧཏཱིཏི སཾཝརོ. མོཀྑནྟི ཨུཏྟམཾ མུཁབྷཱུཏཾ ཝཱ. ཡཐཱ ཧི སཏྟཱནཾ ཙཏུབྦིདྷོ ཨཱཧཱརོ མུཁེན པཝིསིཏྭཱ ཨངྒམངྒཱནི ཕརཏི, ཨེཝཾ ཡོགིནོཔི ཙཏུབྷཱུམཀཀུསལཾ སཱིལམུཁེན པཝིསིཏྭཱ ཨཏྠསིདྡྷིཾ སམྤཱདེཏི. ཏེན ཝུཏྟཾ ‘‘མོཀྑ’’ནྟི. པམུཁེ སཱདྷཱུཏི པམོཀྑཾ, པུབྦངྒམཾ སེཊྛཾ པདྷཱནནྟི ཨཏྠོ. ཀུསལཱནཾ དྷམྨཱནཾ སམཱཔཏྟིཡཱཏི ཙཏུབྷཱུམཀཀུསལཱནཾ པཊིལཱབྷཏྠཱཡ པམོཀྑཾ པུབྦངྒམཾ སེཊྛཾ པདྷཱནནྟི ཝེདིཏབྦཾ.

ཀཱཡིཀོ ཨཝཱིཏིཀྐམོཏི ཏིཝིདྷཾ ཀཱཡསུཙརིཏཾ. ཝཱཙསིཀོཏི ཙཏུབྦིདྷཾ ཝཙཱིསུཙརིཏཾ. ཀཱཡིཀཝཱཙསིཀོཏི ཏདུབྷཡཾ. ཨིམིནཱ ཨཱཛཱིཝཊྛམཀསཱིལཾ པརིཡཱདཱཡ དསྶེཏི. སཾཝུཏོཏི པིཧིཏོ, སཾཝུཏིནྡྲིཡོ པིཧིཏིནྡྲིཡོཏི ཨཏྠོ. ཡཐཱ ཧི སཾཝུཏདྭཱརཾ གེཧཾ ‘‘སཾཝུཏགེཧཾ པིཧིཏགེཧ’’ནྟི ཝུཙྩཏི, ཨེཝམིདྷ སཾཝུཏིནྡྲིཡོ ‘‘སཾཝུཏོ’’ཏི ཝུཏྟོ. པཱཏིམོཀྑསཾཝརེནཱཏི པཱཏིམོཀྑསངྑཱཏེན སཾཝརེན. ཨུཔེཏོཏིཨཱདཱིནི སབྦཱནི ཨཉྙམཉྙཝེཝཙནཱནི.

ཨིརིཡཏཱིཏིཨཱདཱིཧི ¶ སཏྟཧིཔི པདེཧི པཱཏིམོཀྑསཾཝརསཱིལེ ཋིཏསྶ བྷིཀྑུནོ ཨིརིཡཱཔཐཝིཧཱརོ ཀཐིཏོ. ཏཏྠ ཨིརིཡཏཱིཏི ཙཏུནྣཾ ཨིརིཡཱཔཐཱནཾ ཨཉྙཏརསམངྒིབྷཱཝཏོ ཨིརིཡཏི. ཏེཧི ཨིརིཡཱཔཐཙཏུཀྐེཧི ཀཱཡསཀཊཝཏྟནེན ཝཏྟཏི. ཨེཀཾ ཨིརིཡཱཔཐདུཀྑཾ ཨཔརེན ཨིརིཡཱཔཐེན ཝིཙྪིནྡིཏྭཱ ཙིརཊྛིཏིབྷཱཝེན སརཱིརརཀྑཎཏོ པཱལེཏི. ཨེཀསྨིཾ ཨིརིཡཱཔཐེ ཨསཎྛཧིཏྭཱ སབྦཨིརིཡཱཔཐེ ཝཏྟནཏོ ཡཔེཏི. ཏེན ཏེན ཨིརིཡཱཔཐེན ཏཐཱ ཏཐཱ ཀཱཡསྶ ཡཱཔནཏོ ཡཱཔེཏི. ཙིརཀཱལཝཏྟཱཔནཏོ ཙརཏི. ཨིརིཡཱཔཐེན ཨིརིཡཱཔཐཾ ཝིཙྪིནྡིཏྭཱ ཛཱིཝིཏཧརཎཏོ ཝིཧརཏི.

མིཙྪཱཛཱིཝཔཊིསེདྷཀེནཱཏི –

‘‘ཨིདྷེཀཙྩོ ཝེལུ༹དཱནེན ཝཱ པཏྟདཱནེན ཝཱ པུཔྥ ཕལ སིནཱནདནྟཀཊྛདཱནེན ཝཱ ཙཱཊུཀམྱཏཱཡ ¶ ཝཱ མུགྒསཱུཔྱཏཱཡ ཝཱ པཱརིབྷཊཡཏཱཡ ཝཱ ཛངྒྷཔེསནིཀེན ཝཱ ཨཉྙཏརཉྙཏརེན ཝཱ བུདྡྷཔཊིཀུཊྛེན མིཙྪཱཨཱཛཱིཝེན ཛཱིཝིཀཾ ཀཔྤེཏི, ཨཡཾ ཝུཙྩཏི ཨནཱཙཱརོ’’ཏི (ཝིབྷ. ༥༡༣) –

ཨེཝཾ ཝུཏྟཨནཱཙཱརསངྑཱཏམིཙྪཱཛཱིཝཔཊིཔཀྑེན.

ན ཝེལུ༹དཱནཱདིནཱ ཨཱཙཱརེནཱཏི –

‘‘ཨིདྷེཀཙྩོ ན ཝེལུ༹དཱནེན ན པཏྟ ན པུཔྥ ན ཕལ ན སིནཱན ན དནྟཀཊྛ ན ཙཱཊུཀམྱཏཱཡ ན མུགྒསཱུཔྱཏཱཡ ན པཱརིབྷཊཡཏཱཡ ན ཛངྒྷཔེསནིཀེན ན ཨཉྙཏརཉྙཏརེན བུདྡྷཔཊིཀུཊྛེན མིཙྪཱཨཱཛཱིཝེན ཛཱིཝིཀཾ ཀཔྤེཏི, ཨཡཾ ཝུཙྩཏི ཨཱཙཱརོ’’ཏི (ཝིབྷ. ༥༡༣) –

ཨེཝཾ ཝུཏྟེན ན ཝེལུ༹དཱནཱདིནཱ ཨཱཙཱརེན.

ཝེསིཡཱདིཨགོཙརཾ པཧཱཡཱཏི –

‘‘ཨིདྷེཀཙྩོ ཝེསིཡགོཙརོ ཝཱ ཧོཏི ཝིདྷཝ ཐུལླཀུམཱརི པཎྜཀ བྷིཀྑུནི པཱནཱགཱརགོཙརོ ཝཱ, སཾསཊྛོ ཝིཧརཏི རཱཛཱུཧི རཱཛམཧཱམཏྟེཧི ཏིཏྠིཡེཧི ཏིཏྠིཡསཱཝཀེཧི ཨནནུལོམིཀེན སཾསགྒེན, ཡཱནི པན ཏཱནི ཀུལཱནི ཨསྶདྡྷཱནི ¶ ཨཔྤསནྣཱནི ཨནོཔཱནབྷཱུཏཱནི ཨཀྐོསཀཔརིབྷཱསཀཱནི ཨནཏྠཀཱམཱནི ཨཧིཏཀཱམཱནི ཨཕཱསུཀཀཱམཱནི ཨཡོགཀྑེམཀཱམཱནི བྷིཀྑཱུནཾ བྷིཀྑུནཱིནཾ ཨུཔཱསཀཱནཾ ཨུཔཱསིཀཱནཾ, ཏཐཱརཱུཔཱནི ཀུལཱནི སེཝཏི བྷཛཏི པཡིརུཔཱསཏི, ཨཡཾ ཝུཙྩཏི ཨགོཙརོ’’ཏི (ཝིབྷ. ༥༡༤) –

ཨེཝམཱགཏཾ ཝེསིཡཱདིཨགོཙརཾ པཧཱཡ.

སདྡྷཱསམྤནྣཀུལཱདིནཱཏི ཨེཏྠ ཨཱདི-སདྡེན ཨུཔནིསྶཡགོཙརཱདིཾ སངྒཎྷཱཏི. ཏིཝིདྷོ ཧི གོཙརོ ཨུཔནིསྶཡགོཙརོ ཨཱརཀྑགོཙརོ ཨུཔནིབནྡྷགོཙརོཏི. ཀཏམོ ཨུཔནིསྶཡགོཙརོ? དསཀཐཱཝཏྠུགུཎསམནྣཱགཏོ ཀལྱཱཎམིཏྟོ, ཡཾ ནིསྶཱཡ ཨསུཏཾ སུཎཱཏི, སུཏཾ པརིཡོདཔེཏི, ཀངྑཾ ¶ ཝིཏརཏི, དིཊྛིཾ ཨུཛུཾ ཀརོཏི, ཙིཏྟཾ པསཱདེཏི. ཡསྶ ཝཱ པན ཨནུསིཀྑམཱནོ སདྡྷཱཡ ཝཌྜྷཏི, སཱིལེན སུཏེན ཙཱགེན པཉྙཱཡ ཝཌྜྷཏི, ཨཡཾ ཨུཔནིསྶཡགོཙརོ. ཀཏམོ ཨཱརཀྑགོཙརོ? ཨིདྷ བྷིཀྑུ ཨནྟརགྷརཾ པཝིཊྛོ ཝཱིཐིཾ པཊིཔནྣོ ཨོཀྑིཏྟཙཀྑུ ཡུགམཏྟདསྶཱཝཱི སཾཝུཏོ གཙྪཏི, ན ཧཏྠིཾ ཨོལོཀེནྟོ, ན ཨསྶཾ, ན རཐཾ, ན པཏྟིཾ, ན ཨིཏྠིཾ, ན པུརིསཾ ཨོལོཀེནྟོ, ན ཨུདྡྷཾ ཨོལོཀེནྟོ, ན ཨདྷོ ཨོལོཀེནྟོ, ན དིསཱཝིདིསཾ ཝིཔེཀྑམཱནོ གཙྪཏི, ཨཡཾ ཨཱརཀྑགོཙརོ. ཀཏམོ ཨུཔནིབནྡྷགོཙརོ? ཙཏྟཱརོ སཏིཔཊྛཱནཱ, ཡཏྠ ཙིཏྟཾ ཨུཔནིབནྡྷཏི. ཝུཏྟཉྷེཏཾ བྷགཝཏཱ ‘‘ཀོ ཙ, བྷིཀྑཝེ, བྷིཀྑུནོ གོཙརོ སཀོ པེཏྟིཀོ ཝིསཡོ? ཡདིདཾ ཙཏྟཱརོ སཏིཔཊྛཱནཱ’’ཏི (སཾ. ནི. ༥.༣༧༢), ཨཡཾ ཨུཔནིབནྡྷགོཙརོ. ཨིཏི ཨཡཾ ཏིཝིདྷོ གོཙརོ ཨིདྷ ཨཱདི-སདྡེན སངྒཧིཏོཏི དཊྛབྦོ.

ཨཔྤམཏྟཀེསུ ཝཛྫེསཱུཏི ཨསཉྩིཙྩ ཨཱཔནྣསེཁིཡཨཀུསལཙིཏྟུཔྤཱདཱདིབྷེདེསུ ཝཛྫེསུ. བྷཡཏོ དསྶནསཱིལོཏི པརམཱཎུམཏྟཾ ཝཛྫཾ ཨཊྛསཊྛིཡོཛནསཏསཧསྶུབྦེདྷསིནེརུཔབྦཏསདིསཾ ཀཏྭཱ དསྶནསབྷཱཝོ, སབྦལཧུཀཾ ཝཱ དུབྦྷཱསིཏམཏྟཾ པཱརཱཛིཀསདིསཾ ཀཏྭཱ དསྶནསབྷཱཝོ. སམྨཱ ཨཱདཱཡཱཏི སམྨདེཝ སཀྐཙྩཾ སབྦསོ ཝཱ ཨཱདིཡིཏྭཱ.

ཝཊྚདུཀྑནིསྶརཎཏྠིཀེཧི ¶ སོཏབྦཏོ སུཏཾ, པརིཡཏྟིདྷམྨོ. ཏཾ དྷཱརེཏཱིཏི སུཏདྷརོ, སུཏསྶ ཨཱདྷཱརབྷཱུཏོ. ཡསྶ ཧི ཨིཏོ གཧིཏཾ ཨེཏྟོ པལཱཡཏི, ཚིདྡགྷཊེ ཨུདཀཾ ཝིཡ ན ཏིཊྛཏི, པརིསམཛ྄ཛྷེ ཨེཀཾ སུཏྟཾ ཝཱ ཛཱཏཀཾ ཝཱ ཀཐེཏུཾ ཝཱ ཝཱཙེཏུཾ ཝཱ ན སཀྐོཏི, ཨཡཾ ན སུཏདྷརོ ནཱམ. ཡསྶ པན ཨུགྒཧིཏཾ བུདྡྷཝཙནཾ ཨུགྒཧིཏཀཱལསདིསམེཝ ཧོཏི, དསཔི ཝཱིསཏིཔི ཝསྶཱནི སཛ྄ཛྷཱཡཾ ཨཀརོནྟསྶ ན ནསྶཏི, ཨཡཾ སུཏདྷརོ ནཱམ. ཏེནེཝཱཧ ‘‘ཡདསྶ ཏ’’ནྟིཨཱདི. ཨེཀཔདམྤི ཨེཀཀྑརམྤི ཨཝིནཊྛཾ ཧུཏྭཱ སནྣིཙིཡཏཱིཏི སནྣིཙཡོ, སུཏཾ སནྣིཙཡོ ཨེཏསྨིནྟི སུཏསནྣིཙཡོཏི ཨཱཧ ‘‘སུཏཾ སནྣིཙིཏཾ ཨསྨིནྟི སུཏསནྣིཙཡོ’’ཏི. ཡསྶ ཧི སུཏཾ ཧདཡམཉྫུསཱཡཾ སནྣིཙིཏཾ སིལཱཡ ལེཁཱ ཝིཡ སུཝཎྞགྷཊེ པཀྑིཏྟཱ སཱིཧཝསཱ ཝིཡ ཙ སཱདྷུ ཏིཊྛཏི, ཨཡཾ སུཏསནྣིཙཡོ ནཱམ. ཏེནཱཧ ‘‘ཨེཏེན…པེ… ཨཝིནཱསཾ དསྶེཏཱི’’ཏི.

དྷཱཏཱཏི པགུཎཱ ཝཱཙུགྒཏཱ. ཨེཀསྶ ཧི ཨུགྒཧིཏབུདྡྷཝཙནཾ ནིཙྩཀཱལིཀཾ ན ཧོཏི, ‘‘ཨསུཀསུཏྟཾ ཝཱ ཛཱཏཀཾ ཝཱ ཀཐེཧཱི’’ཏི ཝུཏྟེ ‘‘སཛ྄ཛྷཱཡིཏྭཱ ཨཉྙེཧི སཾསནྡིཏྭཱ པརིཔུཙྪཱཝསེན ཨཏྠཾ ཨོགཱཧིཏྭཱ ཛཱནིསྶཱམཱི’’ཏི ཝདཏི. ཨེཀསྶ པགུཎཾ པབནྡྷཝིཙྪེདཱབྷཱཝཏོ གངྒཱསོཏསདིསཾ བྷཝངྒསོཏསདིསཉྩ ཨཀིཏྟིམཾ སུཁཔྤཝཏྟི ཧོཏི, ‘‘ཨསུཀསུཏྟཾ ¶ ཝཱ ཛཱཏཀཾ ཝཱ ཀཐེཧཱི’’ཏི ཝུཏྟེ ཨུདྡྷརིཏྭཱ ཏམེཝ ཀཐེཏི. ཏཾ སནྡྷཱཡ ཝུཏྟཾ ‘‘དྷཱཏཱ’’ཏི. ཝཱཙཱཡ པགུཎཱ ཀཏཱཏི སུཏྟདསཀཝགྒདསཀཔཎྞཱསདསཀཝསེན ཝཱཙཱཡ སཛ྄ཛྷཱཡིཏཱ, དས སུཏྟཱནི གཏཱནི, དས ཝགྒཱནི གཏཱནཱིཏིཨཱདིནཱ སལླཀྑེཏྭཱ ཝཱཙཱཡ སཛ྄ཛྷཱཡིཏཱཏི ཨཏྠོ. སུཏྟེཀདེསསྶ ཧི སུཏྟམཏྟསྶ ཙ ཝཙསཱ པརིཙཡོ ཨིདྷ ནཱདྷིཔྤེཏོ, ཨཐ ཁོ ཝགྒཱདིཝསེནེཝ. མནསཱ ཨནུཔེཀྑིཏཱཏི མནསཱ ཨནུ ཨནུ པེཀྑིཏཱ, བྷཱགསོ ནིཛ྄ཛྷཱཡིཏཱ ཙིནྟིཏཱཏི ཨཏྠོ. ཨཱཝཛྫནྟསྶཱཏི ཝཱཙཱཡ སཛ྄ཛྷཱཡིཏུཾ བུདྡྷཝཙནཾ མནསཱ ཙིནྟེནྟསྶ. སུཊྛུ པཊིཝིདྡྷཱཏི ནིཛྫཊཾ ནིགྒུམྦཾ ཀཏྭཱ སུཊྛུ ཡཱཐཱཝཏོ པཊིཝིདྡྷཱ.

དྭེ མཱཏིཀཱཏི བྷིཀྑུམཱཏིཀཱ བྷིཀྑུནཱིམཱཏིཀཱ ཙ. ཝཱཙུགྒཏཱཏི པུརིམསྶེཝ ཝེཝཙནཾ. ཏིསྶོ ཨནུམོདནཱཏི སངྒྷབྷཏྟེ དཱནཱནིསཾསཔཊིསཾཡུཏྟཨནུམོདནཱ, ཝིཧཱརཱདིམངྒལེ མངྒལསུཏྟཱདིཨནུམོདནཱ, མཏཀབྷཏྟཱདིཨཝམངྒལེ ཏིརོཀུཊྚཱདིཨནུམོདནཱཏི ཨིམཱ ཏིསྶོ ཨནུམོདནཱ ¶ . ཀམྨཱཀམྨཝིནིཙྪཡོཏི པརིཝཱརཱཝསཱནེ ཀམྨཝགྒེ ཝུཏྟཝིནིཙྪཡོ. ‘‘ཝིཔསྶནཱཝསེན ཨུགྒཎྷནྟེན ཙཏུདྷཱཏུཝཝཏྠཱནམུཁེན ཨུགྒཧེཏབྦ’’ནྟི ཏཱིསུཔི གཎྛིཔདེསུ ཝུཏྟཾ. ཙཏཱུསུ དིསཱསུ ཨཔྤཊིཧཏཏྟཱ ཙཏསྶོ དིསཱ ཨེཏསྶཱཏི ཙཏུདྡིསོ, ཙཏུདྡིསོཡེཝ ཙཱཏུདྡིསོ, ཙཏསྶོ ཝཱ དིསཱ ཨརཧཏི, ཙཏཱུསུ ཝཱ དིསཱསུ སཱདྷཱུཏི ཙཱཏུདྡིསོ.

ཨབྷིཝིནཡེཏི སཀལེ ཝིནཡཔིཊཀེ. ཝིནེཏུནྟི སིཀྑཱཔེཏུཾ. ‘‘དྭེ ཝིབྷངྒཱ པགུཎཱ ཝཱཙུགྒཏཱ ཀཱཏབྦཱཏི ཨིདཾ པརིཔུཙྪཱཝསེན ཨུགྒཧཎམྤི སནྡྷཱཡ ཝུཏྟ’’ནྟི ཝདནྟི. ཨེཀསྶ པམུཊྛཾ, ཨིཏརསྶ པགུཎཾ ཧོཏཱིཏི ཨཱཧ ‘‘ཏཱིཧི ཛནེཧི སདྡྷིཾ པརིཝཏྟནཀྑམཱ ཀཱཏབྦཱ’’ཏི. ཨབྷིདྷམྨེཏི ནཱམརཱུཔཔརིཙྪེདེ. ཧེཊྛིམཱ ཝཱ ཏཡོ ཝགྒཱཏི མཧཱཝགྒཏོ ཧེཊྛཱ སགཱཐཀཝགྒོ ནིདཱནཝགྒོ ཁནྡྷཀཝགྒོཏི ཨིམེ ཏཡོ ཝགྒཱ. ‘‘དྷམྨཔདམྤི སཧ ཝཏྠུནཱ ཨུགྒཧེཏུཾ ཝཊྚཏཱི’’ཏི མཧཱཔཙྩརིཡཾ ཝུཏྟཏྟཱ ཛཱཏཀབྷཱཎཀེན སཱཊྛཀཐཾ ཛཱཏཀཾ ཨུགྒཧེཏྭཱཔི དྷམྨཔདམྤི སཧ ཝཏྠུནཱ ཨུགྒཧེཏབྦམེཝ.

ཀལྱཱཎཱ སུནྡརཱ པརིམཎྜལཔདབྱཉྫནཱ ཝཱཙཱ ཨསྶཱཏི ཀལྱཱཎཝཱཙོ. ཏེནཱཧ ‘‘སིཐིལདྷནིཏཱདཱིནཾ…པེ… ཝཱཙཱཡ སམནྣཱགཏོ’’ཏི. ཏཏྠ པརིམཎྜལཔདབྱཉྫནཱཡཱཏི ཋཱནཀརཎསམྤཏྟིཡཱ སིཀྑཱསམྤཏྟིཡཱ ཙ ཀཏྠཙིཔི ཨནཱུནཏཱཡ པརིམཎྜལཔདཱནི བྱཉྫནཱནི ཨཀྑརཱནི ཨེཏིསྶཱཏི པརིམཎྜལཔདབྱཉྫནཱ, པདམེཝ ཝཱ ཨཏྠསྶ བྱཉྫནཏོ པདབྱཉྫནཾ, ཏཾ ཨཀྑརཔཱརིཔཱུརིཾ ཀཏྭཱ སིཐིལདྷནིཏཱདིདསཝིདྷཾ བྱཉྫནབུདྡྷིཾ ཨཔརིཧཱཔེཏྭཱ ཝུཏྟཾ པརིམཎྜལཾ ནཱམ ཧོཏི. ཨཀྑརཔཱརིཔཱུརིཡཱ ཧི པདབྱཉྫནསྶ པརིམཎྜལཏཱ. ཏེན ཝུཏྟཾ ‘‘སིཐིལདྷནིཏཱདཱིནཾ ¶ ཡཐཱཝིདྷཱནཝཙནེནཱ’’ཏི, པརིམཎྜལཾ པདབྱཉྫནཾ ཨེཏིསྶཱཏི པརིམཎྜལཔདབྱཉྫནཱ. ཨཐ ཝཱ པཛྫཏི ཉཱཡཏི ཨཏྠོ ཨེཏེནཱཏི པདཾ, ནཱམཱདི. ཡཐཱདྷིཔྤེཏམཏྠཾ བྱཉྫེཏཱིཏི བྱཉྫནཾ, ཝཱཀྱཾ. ཏེསཾ པརིཔུཎྞཏཱཡ པརིམཎྜལཔདབྱཉྫནཱ.

ཨཔིཙ ཡོ བྷིཀྑུ པརིསཏི དྷམྨཾ དེསེནྟོ སུཏྟཾ ཝཱ ཛཱཏཀཾ ཝཱ ནིཀྑིཔིཏྭཱ ཨཉྙཾ ཨུཔཱརམྦྷཀརཾ སུཏྟཾ ཨཱཧརཏི, ཏསྶ ཨུཔམཾ ཀཐེཏི, ཏདཏྠཾ ཨོཏཱརེཏི, ཨེཝཾ ཨིདཾ གཧེཏྭཱ ཨེཏྠ ཁིཔནྟོ ཨེཀཔསྶེནེཝ པརིཧརནྟོ ཀཱལཾ ཉཏྭཱ ཝུཊྛཧཏི, ནིཀྑིཏྟསུཏྟཾ པན ནིཀྑིཏྟམཏྟམེཝ ཧོཏི, ཏསྶ ཀཐཱ ཨཔརིམཎྜལཱ ནཱམ ཧོཏི ཨཏྠསྶ ཨཔརིཔུཎྞབྷཱཝཏོ. ཡོ པན སུཏྟཾ ཝཱ ཛཱཏཀཾ ཝཱ ནིཀྑིཔིཏྭཱ བཧི ཨེཀཔདམྤི ཨགནྟྭཱ ¶ ཡཐཱནིཀྑིཏྟསྶ སུཏྟསྶ ཨཏྠསཾཝཎྞནཱཝསེནེཝ སུཏྟནྟརམྤི ཨཱནེནྟོ པཱལི༹ཡཱ ཨནུསནྡྷིཉྩ པུབྦཱཔརཉྩ ཨཔེཀྑནྟོ ཨཱཙརིཡེཧི དིནྣནཡེ ཋཏྭཱ ཏུལིཀཱཡ པརིཙྪིནྡནྟོ ཝིཡ ཏཾ ཏཾ ཨཏྠཾ སུཝཝཏྠིཏཾ ཀཏྭཱ དསྶེནྟོ གམྦྷཱིརམཱཏིཀཱཡ ཨུདཀཾ པེསེནྟོ ཝིཡ གམྦྷཱིརམཏྠཾ གམེནྟོ ཝགྒིཧཱརིགཏིཡཱ པདེ པདཾ ཀོཊྚེནྟོ སིནྡྷཝཱཛཱནཱིཡོ ཝིཡ ཨེཀཾཡེཝ པདཾ ཨནེཀེཧི པརིཡཱཡེཧི པུནཔྤུནཾ སཾཝཎྞནྟོ གཙྪཏི, ཏསྶ ཀཐཱ པརིམཎྜལཱ ནཱམ ཧོཏི དྷམྨཏོ ཨཏྠཏོ ཨནུསནྡྷིཏོ པུབྦཱཔརཏོ ཨཱཙརིཡུགྒཧཏོཏི སབྦསོ པརིཔུཎྞབྷཱཝཏོ. ཨེཝརཱུཔམྤི ཀཐཾ སནྡྷཱཡ ‘‘པརིམཎྜལཔདབྱཉྫནཱཡཱ’’ཏི ཝུཏྟཾ.

གུཎཔརིཔུཎྞབྷཱཝེན པུརེ བྷཝཱཏི པོརཱི, ཏསྶ བྷིཀྑུནོ ཏེནེཏཾ བྷཱསིཏབྦཾ ཨཏྠསྶ གུཎཔརིཔུཎྞབྷཱཝེན པུརེ པུཎྞབྷཱཝེ བྷཝཱཏི ཨཏྠོ. པུརེ ཝཱ བྷཝཏྟཱ པོརིཡཱ ནཱགརིཀིཏྠིཡཱ སུཁུམཱལཏྟནེན སདིསཱཏི པོརཱི, པུརེ སཾཝཌྜྷནཱརཱི ཝིཡ སུཀུམཱརཱཏི ཨཏྠོ. པུརསྶ ཨེསཱཏིཔི པོརཱི, པུརསྶ ཨེསཱཏི ནགརཝཱསཱིནཾ ཀཐཱཏི ཨཏྠོ. ནགརཝཱསིནོ ཧི ཡུཏྟཀཐཱ ཧོནྟི པིཏིམཏྟཾ ‘‘པིཏཱ’’ཏི, བྷཱཏིམཏྟཾ ‘‘བྷཱཏཱ’’ཏི ཝདནྟི. ཨེཝརཱུཔཱི ཧི ཀཐཱ བཧུནོ ཛནསྶ ཀནྟཱ ཧོཏི མནཱཔཱ, ཏཱཡ པོརིཡཱ.

ཝིསྶཊྛཱཡཱཏི པིཏྟསེམྷཱདཱིཧི ཨཔལིབུདྡྷཱཡ སནྡིཊྛཝིལམྦིཏཱདིདོསརཧིཏཱཡ. ཨཐ ཝཱ ནཱཏིསཱིགྷཾ ནཱཏིསཎིཀཾ ནིརནྟརཾ ཨེཀརསཉྩ ཀཏྭཱ པརིསཱཡ ཨཛ྄ཛྷཱསཡཱནུརཱུཔཾ དྷམྨཾ ཀཐེནྟསྶ ཝཱཙཱ ཝིསྶཊྛཱ ནཱམ. ཡོ ཧི བྷིཀྑུ དྷམྨཾ ཀཐེནྟོ སུཏྟཾ ཝཱ ཛཱཏཀཾ ཝཱ ཨཱརབྷིཏྭཱ ཨཱརདྡྷཀཱལཏོ པཊྛཱཡ ཏུརིཏཏུརིཏོ ཨརཎིཾ མནྠེནྟོ ཝིཡ ཨུཎྷཁཱདནཱིཡཾ ཁཱདནྟོ ཝིཡ པཱལི༹ཡཱ ཨནུསནྡྷིཔུབྦཱཔརེསུ གཧིཏཾ གཧིཏམེཝ, ཨགྒཧིཏཾ ཨགྒཧིཏམེཝ ཀཏྭཱ པུརཱཎཔཎྞནྟརེསུ ཙརམཱནཾ གོདྷཾ ཨུཊྛཱཔེནྟོ ཝིཡ ཏཏྠ ཏཏྠ པཧརནྟོ ཨོསཱཔེཏྭཱ ཨུཊྛཱཡ གཙྪཏི ¶ . པུརཱཎཔཎྞནྟརེསུ ཧི པརིཔཱཏིཡམཱནཱ གོདྷཱ ཀདཱཙི དིསྶཏི ཀདཱཙི ན དིསྶཏི, ཨེཝམེཀཙྩསྶ ཨཏྠཝཎྞནཱ ཀཏྠཙི དིསྶཏི ཀཏྠཙི ན དིསྶཏི. ཡོཔི དྷམྨཾ ཀཐེནྟོ ཀཱལེན སཱིགྷཾ, ཀཱལེན སཎིཀཾ, ཀཱལེན མནྡཾ, ཀཱལེན མཧཱསདྡཾ, ཀཱལེན ཁུདྡཀསདྡཾ ཀརོཏི, ཡཐཱ ནིཛ྄ཛྷཱམཏཎྷིཀཔེཏསྶ ¶ མུཁཏོ ནིཙྪརཎཀཨགྒི ཀཱལེན ཛལཏི ཀཱལེན ནིབྦཱཡཏི, ཨེཝཾ པེཏདྷམྨཀཐིཀོ ནཱམ ཧོཏི, པརིསཱཡ ཨུཊྛཱཏུཀཱམཱཡ པུན ཨཱརབྷཏི. ཡོཔི ཀཐེནྟོ ཏཏྠ ཏཏྠ ཝིཏྠཱཡཏི, ཨཔྤཊིབྷཱནཏཱཡ ཨཱཔཛྫཏི, ཀེནཙི རོགེན ནིཏྠུནནྟོ ཝིཡ ཀནྡནྟོ ཝིཡ ཀཐེཏི, ཨིམེསཾ སབྦེསམྤི ཀཐཱ ཝིསྶཊྛཱ ནཱམ ན ཧོཏི སུཁེན ཨཔྤཝཏྟབྷཱཝཏོ. ཡོ པན སུཏྟཾ ཨཱཧརིཏྭཱ ཨཱཙརིཡེཧི དིནྣནཡེ ཋིཏོ ཨཱཙརིཡུགྒཧཾ ཨམུཉྩནྟོ ཡཐཱ ཙ ཨཱཙརིཡཱ ཏཾ ཏཾ སུཏྟཾ སཾཝཎྞེསུཾ, ཏེནེཝ ནཡེན སཾཝཎྞེནྟོ ནཱཏིསཱིགྷཾ ནཱཏིསཎིཀནྟིཨཱདིནཱ ཝུཏྟནཡེན ཀཐཱཔབནྡྷཾ ཨཝིཙྪིནྣཾ ཀཏྭཱ ནདཱིསོཏོ ཝིཡ པཝཏྟེཏི, ཨཱཀཱསགངྒཱཏོ བྷསྶམཱནཨུདཀཾ ཝིཡ ནིརནྟརཀཐཾ པཝཏྟེཏི, ཏསྶ ཀཐཱ ཝིསྶཊྛཱ ནཱམ ཧོཏི. ཏཾ སནྡྷཱཡ ཝུཏྟཾ ‘‘ཝིསྶཊྛཱཡཱ’’ཏི.

ཨནེལགལཱ༹ཡཱཏི ཨེལགལ༹ཝིརཧིཏཱཡ. ཀསྶཙི ཧི ཀཐེནྟསྶ ཨེལཾ གལ༹ཏི, ལཱལཱ པགྒྷརཏི, ཁེལ༹ཕུསིཏཱནི ཝཱ ནིཀྑམནྟི, ཏསྶ ཝཱཙཱ ཨེལགལཱ༹ ནཱམ ཧོཏི, ཏབྦིཔརཱིཏཱཡཱཏི ཨཏྠོ. ཨཏྠསྶ ཝིཉྙཱཔནིཡཱཏི ཨཱདིམཛ྄ཛྷཔརིཡོསཱནཾ པཱཀཊཾ ཀཏྭཱ བྷཱསིཏཏྠསྶ ཝིཉྙཱཔནསམཏྠཏཱཡ ཨཏྠཉཱཔནེ སཱདྷནཱཡ.

ཝཱཙཱཝ ཀརཎནྟི ཝཱཀྐརཎཾ, ཨུདཱཧཱརགྷོསོ. ཀལྱཱཎཾ མདྷུརཾ ཝཱཀྐརཎཾ ཨསྶཱཏི ཀལྱཱཎཝཱཀྐརཎོ. ཏེནེཝཱཧ ‘‘མདྷུརསྶརོ’’ཏི. ཧཱིལེ༹ཏཱིཏི ཨཝཛཱནཱཏི. མཱཏུགཱམོཏི སམྦནྡྷོ. མནཾ ཨཔཱཡཏི ཝཌྜྷེཏཱིཏི མནཱཔོ. ཏེནཱཧ ‘‘མནཝཌྜྷནཀོ’’ཏི. ཝཊྚབྷཡེན ཏཛྫེཏྭཱཏི ཡོབྦནམདཱདིམཏྟཱ བྷིཀྑུནིཡོ སཾསཱརབྷཡེན ཏཱསེཏྭཱ. གིཧིཀཱལེཏི ཨཏྟནོ གིཧིཀཱལེ. བྷིཀྑུནིཡཱ མེཐུནེན བྷིཀྑུནཱིདཱུསཀོ ཧོཏཱིཏི བྷིཀྑུནིཡཱ ཀཱཡསཾསགྒམེཝ ཝདཏི. སིཀྑམཱནཱསཱམཎེརཱིསུ པན མེཐུནེནཔི བྷིཀྑུནཱིདཱུསཀོ ན ཧོཏཱིཏི ཨཱཧ ‘‘སིཀྑམཱནཱསཱམཎེརཱིསུ མེཐུནདྷམྨ’’ནྟི. ‘‘ཀཱསཱཡཝཏྠཝསནཱཡཱ’’ཏི ཝཙནཏོ དུསྶཱིལཱསུ བྷིཀྑུནཱིསིཀྑམཱནཱསཱམཎེརཱིསུ གརུདྷམྨཾ ཨཛ྄ཛྷཱཔནྣཔུབྦོ པཊིཀྑིཏྟོཡེཝཱཏི དཊྛབྦཾ. ཏསྶཱ བྷིཀྑུནིཡཱ ཨབྷཱཝེཔི ཡཱ ཡཱ ཏསྶཱ ཝཙནཾ ཨསྶོསུཾ, ཏཱ ཏཱ ཏཐེཝ མཉྙནྟཱིཏི ཨཱཧ ‘‘མཱཏུགཱམོ ཧཱི’’ཏིཨཱདི.

ཨིདཱནི ¶ ཨཊྛ ཨངྒཱནི སམོདྷཱནེཏྭཱ དསྶེཏུཾ ‘‘ཨེཏྠ ཙཱ’’ཏིཨཱདི ཨཱརདྡྷཾ. ཨིམེཧི པན ཨཊྛཧངྒེཧི ¶ ཨསམནྣཱགཏཾ ཉཏྟིཙཏུཏྠེན ཀམྨེན སམྨནྣེནྟོ དུཀྐཊཾ ཨཱཔཛྫཏི, བྷིཀྑུ པན སམྨཏོཡེཝ ཧོཏི.

༡༤༨. གརུཀེཧཱིཏི གརུཀཱཏབྦེཧི. ཨེཀཏོཨུཔསམྤནྣཱཡཱཏི ཨུཔཡོགཏྠེ བྷུམྨཝཙནཾ. ‘‘ཨོཝདཏཱི’’ཏི ཝཱ ཨིམསྶ ‘‘ཝདཏཱི’’ཏི ཨཏྠེ སཏི སམྤདཱནཝཙནམྤི ཡུཛྫཏི. བྷིཀྑཱུནཾ སནྟིཀེ ཨུཔསམྤནྣཱ ནཱམ པརིཝཏྟལིངྒཱ ཝཱ པཉྩསཏསཱཀིཡཱནིཡོ ཝཱ.

༡༤༩. ཨཱསནཾ པཉྙཔེཏྭཱཏི ཨེཏྠ ‘‘སཙེ བྷཱུམི མནཱཔཱ ཧོཏི, ཨཱསནཾ ཨཔཉྙཱཔེཏུམྤི ཝཊྚཏཱི’’ཏི ཏཱིསུཔི གཎྛིཔདེསུ ཝུཏྟཾ. མཱཏུགཱམགྒཧཎེན བྷིཀྑུནཱིཔི སངྒཧིཏཱཏི ཨཱཧ ‘‘དྷམྨདེསནཱཔཏྟིམོཙནཏྠ’’ནྟི. སམྨཏསྶ བྷིཀྑུནོ སནྟིཀཾ པཱཊིཔདེ ཨོཝཱདཏྠཱཡ སབྦཱཧི བྷིཀྑུནཱིཧི ཨཱགནྟབྦཏོ ‘‘སམགྒཱཏྠ བྷགིནིཡོ’’ཏི ཨིམིནཱ སབྦཱསཾ ཨཱགམནཾ པུཙྪཏཱིཏི ཨཱཧ ‘‘སབྦཱ ཨཱགཏཱཏྠཱ’’ཏི. གིལཱནཱསུ ཨནཱགཏཱསུཔི གིལཱནཱནཾ ཨནཱགམནསྶ ཨནུཉྙཱཏཏྟཱ ཨཱགནྟུཾ སམཏྠཱཧི ཙ སབྦཱཧི ཨཱགཏཏྟཱ ‘‘སམགྒཱམྷཡྻཱ’’ཏི ཝཏྟུཾ ཝཊྚཏི. ཨནྟོགཱམེ ཝཱཏིཨཱདཱིསུ ཡཏྠ པཉྩ ཨངྒཱནི བྷཱུམིཡཾ པཏིཊྛཱཔེཏྭཱ ཝནྡིཏུཾ ན སཀྐཱ ཧོཏི, ཏཏྠ ཋིཏཱཡ ཨེཝ ཀཱཡཾ པུརཏོ ནཱམེཏྭཱ ‘‘ཝནྡཱམི ཨཡྻཱ’’ཏི ཨཉྫལིཾ པགྒཡ྄ཧ གནྟུམྤི ཝཊྚཏི. ཨནྟརགྷརནྟི ཀཏྠཙི ནགརདྭཱརསྶ བཧིཨིནྡཁཱིལཏོ པཊྛཱཡ ཨནྟོགཱམོ ཝུཙྩཏི, ཀཏྠཙི གྷརུམྨཱརཏོ པཊྛཱཡ ཨནྟོགེཧཾ. ཨིདྷ པན ‘‘ཨནྟོགཱམེ ཝཱ’’ཏི ཝིསུཾ ཝུཏྟཏྟཱ ‘‘ཨནྟརགྷརེ ཝཱ’’ཏི ཨནྟོགེཧཾ སནྡྷཱཡ ཝུཏྟནྟི དཊྛབྦཾ. ཡཏྠ ཀཏྠཙཱིཏི ཨནྟོགཱམཱདཱིསུ ཡཏྠ ཀཏྠཙི.

ཝཊྚཏཱིཏི ‘‘ཝསཐ ཨཡྻེ, མཡཾ བྷིཀྑཱུ ཨཱནེསྶཱམཱ’’ཏི ཝུཏྟཝཙནཾ སདྡཧནྟཱིཧི ཝསིཏུཾ ཝཊྚཏི. ན ནིམནྟིཏཱ ཧུཏྭཱ གནྟུཀཱམཱཏི མནུསྶེཧི ནིམནྟིཏཱ ཧུཏྭཱ གནྟུཀཱམཱ ན ཧོནྟཱིཏི ཨཏྠོ, ཏཏྠེཝ ཝསྶཾ ཨུཔགནྟུཀཱམཱ ཧོནྟཱིཏི ཨདྷིཔྤཱཡོ. ཡཏོཏི བྷིཀྑུནུཔསྶཡཏོ. ཡཱཙིཏྭཱཏི ‘‘ཏུམྷེཧི ཨཱནཱིཏཨོཝཱདེནེཝ མཡམྤི ཝསིསྶཱམཱ’’ཏི ཡཱཙིཏྭཱ. ཏཏྠཱཏི ཏསྨིཾ བྷིཀྑུནུཔསྶཡེ. ཨཱགཏཱནཾ སནྟིཀེ ཨོཝཱདེན ཝསིཏབྦནྟི པཙྪིམིཀཱཡ ཝསྶཾ ཝསིཏབྦཾ. ཨབྷིཀྑུཀཱཝཱསེ ཝསནྟིཡཱ ཨཱཔཏྟཱིཏི ཙོདནཱམུཁེན སཱམཉྙཏོ ཨཱཔཏྟིཔྤསངྒཾ ཝདཏི, ན པན ཏསྶཱ ¶ ཨཱཔཏྟི. ཝསྶཙྪེདཾ ཀཏྭཱ གཙྪནྟིཡཱཔི ཨཱཔཏྟཱིཏི ཝསྶཱནུཔགམམཱུལཾ ཨཱཔཏྟིཾ ཝདཏི. ཨིཏརཱཡ ཨཱཔཏྟིཡཱ ཨནཱཔཏྟིཀཱརཎསབྦྷཱཝཏོ ‘‘སཱ རཀྑིཏབྦཱ’’ཏི ཝུཏྟཾ, སཱ ཝསྶཱནུཔགམམཱུལཱ ཨཱཔཏྟི རཀྑིཏབྦཱཏི ཨཏྠོ, ཨབྷིཀྑུཀེཔི ཨཱཝཱསེ ཨཱིདིསཱསུ ཨཱཔདཱསུ ཝསྶཾ ཨུཔགནྟབྦནྟི ཨདྷིཔྤཱཡོ. ཏེནཱཧ ‘‘ཨཱཔདཱསུ ཧི…པེ… ཨནཱཔཏྟི ཝུཏྟཱ’’ཏི. ཨིཏརཱཡ ¶ པན ཨཱཔཏྟིཡཱ ཨནཱཔཏྟི, ཀཱརཎེ ཨསཏི པཙྪིམིཀཱཡཔི ཝསྶཾ ན ཨུཔགནྟབྦཾ. སནྟེསུ ཧི བྷིཀྑཱུསུ ཝསྶཾ ཨནུཔགཙྪནྟིཡཱ ཨཱཔཏྟི. ཏཏྠ གནྟྭཱ པཝཱརེཏབྦནྟི ཨེཏྠ ཨཔཝཱརེནྟཱིནཾ ཨཱཔཏྟིསམྦྷཝཏོ. སཙེ དཱུརེཔི བྷིཀྑཱུནཾ ཝསནཊྛཱནཾ ཧོཏི, སཀྐཱ ཙ ཧོཏི ནཝམིཡཾ གནྟྭཱ པཝཱརེཏུཾ, ཏཏྠ གནྟྭཱ པཝཱརེཏབྦཾ. སཙེ པན ནཝམིཡཾ ནིཀྑམིཏྭཱ སམྤཱཔུཎིཏུཾ ན སཀྐཱ ཧོཏི, ཨགཙྪནྟཱིནཾ ཨནཱཔཏྟི.

ཨུཔོསཐསྶ པུཙྪནཾ ཨུཔོསཐཔུཙྪཱ, སཱཡེཝ ཀ-པྤཙྩཡཾ རསྶཏྟཉྩ ཀཏྭཱ ཨུཔོསཐཔུཙྪཀནྟི ཝུཏྟཱཏི ཨཱཧ ‘‘ཨུཔོསཐཔུཙྪན’’ནྟི. ཨུཔོསཐོ པུཙྪིཏབྦོཏི ‘‘ཀདཱ, ཨཡྻ, ཨུཔོསཐོ’’ཏི པུཙྪིཏབྦོ. བྷིཀྑུནཱཔི ‘‘སྭེ, བྷགིནི, ཨུཔོསཐོ’’ཏི ཝཏྟབྦཾ. བྷིཀྑཱུ ཀདཱཙི ཀེནཙི ཀཱརཎེན པནྣརསིཀཾ ཝཱ ཙཱཏུདྡསཱིཨུཔོསཐཾ, ཙཱཏུདྡསིཀཾ ཝཱ པནྣརསཱིཨུཔོསཐཾ ཀརོནྟི, ཡསྨིཉྩ དིཝསེ བྷིཀྑཱུཧི ཨུཔོསཐོ ཀཏོ, ཏསྨིཾཡེཝ བྷིཀྑུནཱིཧིཔི ཨུཔོསཐོ ཀཱཏབྦོཏི ཨདྷིཔྤཱཡེན ‘‘པཀྑསྶ ཏེརསིཡཾཡེཝ གནྟྭཱ’’ཏིཨཱདི ཝུཏྟཾ. ཨེཝཾ པུཙྪིཏེན བྷིཀྑུནཱ སཙེ ཙཱཏུདྡསིཡཾ ཨུཔོསཐཾ ཀརོནྟི, ‘‘ཙཱཏུདྡསིཀོ བྷགིནཱི’’ཏི ཝཏྟབྦཾ. སཙེ པན པནྣརསིཡཾ ཀརོནྟི, ‘‘པནྣརསིཀོ བྷགིནཱི’’ཏི ཨཱཙིཀྑིཏབྦཾ. ཨོཝཱདཏྠཱཡཱཏི ཨོཝཱདཡཱཙནཏྠཱཡ. པཱཊིཔདདིཝསཏོ པན པཊྛཱཡ དྷམྨསཝནཏྠཱཡ གནྟབྦནྟི པཱཊིཔདདིཝསེ ཨོཝཱདགྒཧཎཏྠཱཡ དུཏིཡདིཝསཏོ པཊྛཱཡ ཨནྟརནྟརཱ དྷམྨསཝནཏྠཱཡ གནྟབྦཾ. ཨོཝཱདགྒཧཎམྤི ཧི ‘‘དྷམྨསཝནམེཝཱ’’ཏི ཨབྷེདེན ཝུཏྟཾ. ནིརནྟརཾ ཝིཧཱརཾ ཨུཔསངྐམིཾསཱུཏི ཡེབྷུཡྻེན ཨུཔསངྐམནཾ སནྡྷཱཡ ཝུཏྟཾ. ཝུཏྟཉྷེཏནྟིཨཱདིནཱ ཡཐཱནུསིཊྛཾ པཊིཔཛྫིསྶཱམཱཏི སབྦཱསཾཡེཝ བྷིཀྑུནཱིནཾ ཨུཔསངྐམནདཱིཔནཏྠཾ པཱལི༹ ནིདསྶིཏཱ. ཨོཝཱདཾ གཙྪཏཱིཏི ཨོཝཱདཾ ཡཱཙིཏུཾ གཙྪཏི. དྭེ ཏིསྶོཏི དྭཱིཧི ཏཱིཧི. ཀརཎཏྠེ ཙེཏཾ པཙྩཏྟཝཙནཾ.

པཱསཱདིཀེནཱཏི པསཱདཛནཀེན ནིདྡོསེན ཀཱཡཀམྨཱདིནཱ. སམྤཱདེཏཱུཏི ཏིཝིདྷཾ སིཀྑཾ སམྤཱདེཏུ. སཙེ པཱཏིམོཀྑུདྡེསཀཾཡེཝ དིསྭཱ ¶ ཏཱཧི བྷིཀྑུནཱིཧི ཨོཝཱདོ ཡཱཙིཏོ བྷཝེཡྻ, ཏེན ཀིཾ ཀཱཏབྦནྟི? ཨུཔོསཐགྒེ སནྣིཔཏིཏེ བྷིཀྑུསངྒྷེ པུབྦཀིཙྩཝསེན ‘‘ཨཏྠི ཀཱཙི བྷིཀྑུནིཡོ ཨོཝཱདཾ ཡཱཙམཱནཱ’’ཏི པུཙྪིཡམཱནེ ‘‘ཨེཝཾ ཝདེཧཱི’’ཏི ཨོཝཱདཔཊིགྒཱཧཀེན ཝཏྟབྦཝཙནཾ ཨཉྙེན བྷིཀྑུནཱ ཀཐཱཔེཏྭཱ པཱཏིམོཀྑུདྡེསཀེན ཝཏྟབྦཝཙནཾ ཨཏྟནཱ ཝཏྭཱ པུན སཡམེཝ གནྟྭཱ བྷིཀྑུནཱིནཾ ཨཱརོཙེཏབྦཾ, ཨཉྙེན ཝཱ བྷིཀྑུནཱ ཏསྨིཾ དིཝསེ པཱཏིམོཀྑཾ ཨུདྡིསཱཔེཏབྦཾ. ཨེཏཾ ཝུཏྟནྟི ‘‘ཏཱཧཱི’’ཏི ཨེཏཾ བཧུཝཙནཾ ཝུཏྟཾ.

ཨེཀཱ བྷིཀྑུནཱི ཝཱཏི ཨིདཾ བཧཱུཧི བྷིཀྑུནུཔསྶཡེཧི ཨེཀཱཡ ཨེཝ བྷིཀྑུནིཡཱ སཱསནཔཊིགྒཧཎཾ ¶ སནྡྷཱཡ ཝུཏྟཾ, ན པན དུཏིཡིཀཱཡ ཨབྷཱཝཾ སནྡྷཱཡ. བཧཱུཧི བྷིཀྑུནུཔསྶཡེཧཱིཏི ཨནྟརཱམགྒེ ཝཱ ཏསྨིཾཡེཝ ཝཱ གཱམེ བཧཱུཧི བྷིཀྑུནུཔསྶཡེཧི. ‘‘བྷིཀྑུནིསངྒྷོ ཙ ཨཡྻ བྷིཀྑུནིཡོ ཙ བྷིཀྑུནཱི ཙཱ’’ཏི ཨིམིནཱ ནཱནཱཨུཔསྶཡེཧི སཱསནཾ གཧེཏྭཱ ཨཱགཏབྷིཀྑུནིཡཱ ཝཏྟབྦཝཙནཾ དསྶེཏི. ཨིདཉྩ ཨེཀེན པཀཱརེན མུཁམཏྟནིདསྶནཏྠཾ ཝུཏྟཾ, ཏསྨིཾ ཏསྨིཾ པན བྷིཀྑུནུཔསྶཡེ བྷིཀྑུནཱིནཾ པམཱཎཾ སལླཀྑེཏྭཱ ཏདནུརཱུཔེན ནཡེན ཝཏྟབྦཾ. བྷིཀྑུསངྒྷསྶ ཨཡྻཱནཾ ཨཡྻསྶཱཏི ཨིདཾ སངྑིཔིཏྭཱ ཝུཏྟཾ.

པཱཏིམོཀྑུདྡེསཀེནཔཱིཏི ཨིདཾ སངྒྷུཔོསཐཝསེནེཝ དསྶིཏཾ. ཡཏྠ པན ཏིཎྞཾ དྭིནྣཾ ཝཱ ཝསནཊྛཱནེ པཱཏིམོཀྑུདྡེསོ ནཏྠི, ཏཏྠཱཔི ཉཏྟིཋཔནཀེན ཨིཏརེན ཝཱ བྷིཀྑུནཱ ཨིམིནཱཝ ནཡེན ཝཏྟབྦཾ. ཨེཀཔུགྒལེནཔི ཨུཔོསཐདིཝསེ ཨོཝཱདཡཱཙནཾ སམྤཊིཙྪིཏྭཱ པཱཊིཔདེ ཨཱགཏཱནཾ བྷིཀྑུནཱིནཾ ‘‘ནཏྠི ཀོཙཱི’’ཏིཨཱདི ཝཏྟབྦམེཝ. སཙེ སཡམེཝ, ‘‘སམྨཏོ ཨཧ’’ནྟི ཝཏྟབྦཾ. ཨིམཾ ཝིདྷིཾ ཨཛཱནནྟོ ཨིདྷ བཱལོཏི ཨདྷིཔྤེཏོ.

༡༥༠. ཨདྷམྨཀམྨེ ཨདྷམྨཀམྨསཉྙཱི ཝགྒཾ བྷིཀྑུནིསངྒྷཾ ཝགྒསཉྙཱི ཨོཝདཏི, ཨཱཔཏྟི པཱཙིཏྟིཡསྶཱཏིཨཱདཱིསུ ཝིཛྫམཱནེསུཔི ཝགྒཱདིབྷཱཝནིམིཏྟེསུ དུཀྐཊེསུ ཨདྷམྨཀམྨམཱུལཀཾ པཱཙིཏྟིཡམེཝ པཱལི༹ཡཾ སབྦཏྠ ཝུཏྟནྟི ཨཱཧ ‘‘ཨདྷམྨཀམྨེ དྭིནྣཾ ནཝཀཱནཾ ཝསེན ཨཊྛཱརས པཱཙིཏྟིཡཱནཱི’’ཏི. སེསམེཏྠ ཨུཏྟཱནམེཝ. ཨསམྨཏཏཱ, བྷིཀྑུནིཡཱ པརིཔུཎྞཱུཔསམྤནྣཏཱ, ཨོཝཱདཝསེན ཨཊྛགརུདྷམྨབྷཎནནྟི ཨིམཱནི པནེཏྠ ཏཱིཎི ཨངྒཱནི.

ཨོཝཱདསིཀྑཱཔདཝཎྞནཱ ནིཊྛིཏཱ.

༢. ཨཏྠངྒཏསིཀྑཱཔདཝཎྞནཱ

༡༥༣. དུཏིཡེ ¶ ཀུསལཱནཾ དྷམྨཱནཾ སཱཏཙྩཀིརིཡཱཡཱཏི པུབྦབྷཱགཔྤཊིཔཏྟིཝསེན ཝུཏྟཾ. མུནཱཏཱིཏི ཛཱནཱཏི. ཏེན ཉཱཎེནཱཏི ཏེན ཨརཧཏྟཕལཔཉྙཱསངྑཱཏེན ཉཱཎེན. པཐེསཱུཏི ཨུཔཱཡམགྒེསུ. ཨརཧཏོ པརིནིཊྛིཏསིཀྑཏྟཱ ཨཱཧ ‘‘ཨིདཉྩ…པེ… ཝུཏྟ’’ནྟི. ཨཐ ཝཱ ‘‘ཨཔྤམཛྫཏོ སིཀྑཏོ’’ཏི ཨིམེསཾ པདཱནཾ ཧེཏུཨཏྠཏཱ དཊྛབྦཱ, ཏསྨཱ ཨཔྤམཛྫནཧེཏུ སིཀྑནཧེཏུ ཙ ཨདྷིཙེཏསོཏི ཨཏྠོ. སོཀཱཏི ཙིཏྟསནྟཱཔཱ. ཨེཏྠ ཙ ཨདྷིཙེཏསོཏི ཨིམིནཱ ཨདྷིཙིཏྟསིཀྑཱ, ཨཔྤམཛྫཏོཏི ཨིམིནཱ ཨདྷིསཱིལསིཀྑཱ, མུནིནོ མོནཔཐེསུ སིཀྑཏོཏི ཨེཏེཧི ཨདྷིཔཉྙཱསིཀྑཱ, མུནིནོཏི ཝཱ ཨེཏེན ཨདྷིཔཉྙཱསིཀྑཱ, མོནཔཐེསུ སིཀྑཏོཏི ཨེཏེན ¶ ཏཱསཾ ལོཀུཏྟརསིཀྑཱནཾ པུབྦབྷཱགཔྤཊིཔདཱ, སོཀཱ ན བྷཝནྟཱིཏིཨཱདཱིཧི སིཀྑཱཔཱརིཔཱུརིཡཱ ཨཱནིསཾསཱ པཀཱསིཏཱཏི ཝེདིཏབྦཾ.

ཀོཀནུདནྟི པདུམཝིསེསནཾ ཡཐཱ ‘‘ཀོཀཱསཡ’’ནྟི, ཏཾ ཀིར བཧུཔཏྟཾ ཝཎྞསམྤནྣཾ ཨཏིཝིཡ སུགནྡྷཉྩ ཧོཏི. ‘‘ཀོཀནུདཾ ནཱམ སེཏཔདུམ’’ནྟིཔི ཝདནྟི. པཱཏོཏི པགེཝ. ཨཡཉྷེཏྠ ཨཏྠོ – ཡཐཱ ཀོཀནུདསངྑཱཏཾ པདུམཾ པཱཏོ སཱུརིཡུགྒམནཝེལཱཡཾ ཕུལླཾ ཝིཀསིཏཾ ཨཝཱིཏགནྡྷཾ སིཡཱ ཝིརོཙམཱནཾ, ཨེཝཾ སརཱིརགནྡྷེན གུཎགནྡྷེན ཙ སུགནྡྷཾ སརདཀཱལེ ཨནྟལིཀྑེ ཨཱདིཙྩམིཝ ཨཏྟནོ ཏེཛསཱ ཏཔནྟཾ ཨངྒེཧི ནིཙྪརཎཛུཏིཏཱཡ ཨངྒཱིརསཾ སམྨཱསམྦུདྡྷཾ པསྶཱཏི.

ཨབྷབྦོཏི པཊིཔཏྟིསཱརམིདཾ སཱསནཾ, པཊིཔཏྟི ཙ པརིཡཏྟིམཱུལིཀཱ, ཏྭཉྩ པརིཡཏྟིཾ ཨུགྒཧེཏུཾ ཨསམཏྠོ, ཏསྨཱ ཨབྷབྦོཏི ཨདྷིཔྤཱཡོ. སུདྡྷཾ པིལོཏིཀཁཎྜནྟི ཨིདྡྷིཡཱ ཨབྷིསངྑཏཾ པརིསུདྡྷཾ ཙོལ༹ཁཎྜཾ. ཏདཱ ཀིར བྷགཝཱ ‘‘ན སཛ྄ཛྷཱཡཾ ཀཱཏུཾ ཨསཀྐོནྟོ མམ སཱསནེ ཨབྷབྦོ ནཱམ ཧོཏི, མཱ སོཙི བྷིཀྑཱུ’’ཏི ཏཾ བཱཧཱཡཾ གཧེཏྭཱ ཝིཧཱརཾ པཝིསིཏྭཱ ཨིདྡྷིཡཱ པིལོཏིཀཁཎྜཾ ཨབྷིནིམྨིནིཏྭཱ ‘‘ཧནྡ, བྷིཀྑུ, ཨིམཾ པརིམཛྫནྟོ ‘རཛོཧརཎཾ རཛོཧརཎ’ནྟི པུནཔྤུནཾ སཛ྄ཛྷཱཡཾ ཀརོཧཱི’’ཏི ཝཏྭཱ ཨདཱསི ཏཏྠ པུབྦེཀཏཱདྷིཀཱརཏྟཱ.

སོ ཀིར པུབྦེ རཱཛཱ ཧུཏྭཱ ནགརཾ པདཀྑིཎཾ ཀརོནྟོ ནལཱཊཏོ སེདེ མུཙྩནྟེ པརིསུདྡྷེན སཱཊཀེན ནལཱཊཾ པུཉྪི, སཱཊཀོ ཀིལིཊྛོ ཨཧོསི ¶ . སོ ‘‘ཨིམཾ སརཱིརཾ ནིསྶཱཡ ཨེཝརཱུཔོ པརིསུདྡྷསཱཊཀོ པཀཏིཾ ཛཧིཏྭཱ ཀིལིཊྛོ ཛཱཏོ, ཨནིཙྩཱ ཝཏ སངྑཱརཱ’’ཏི ཨནིཙྩསཉྙཾ པཊིལབྷཏི, ཏེན ཀཱརཎེནསྶ རཛོཧརཎམེཝ པཙྩཡོ ཛཱཏོ. རཛཾ ཧརཏཱིཏི རཛོཧརཎཾ. སཾཝེགཾ པཊིལབྷིཏྭཱཏི ཨསུབྷསཉྙཾ ཨནིཙྩསཉྙཉྩ ཨུཔཊྛཔེནྟོ སཾཝེགཾ པཊིལབྷིཏྭཱ. སོ ཧི ཡོནིསོ ཨུམྨཛྫནྟོ ‘‘པརིསུདྡྷཾ ཝཏྠཾ, ནཏྠེཏྠ དོསོ, ཨཏྟབྷཱཝསྶ པནཱཡཾ དོསོ’’ཏི ཨསུབྷསཉྙཾ ཨནིཙྩསཉྙཉྩ པཊིལབྷིཏྭཱ ནཱམརཱུཔཔརིགྒཧཱདིནཱ པཉྩསུ ཁནྡྷེསུ ཉཱཎཾ ཨོཏཱརེཏྭཱ ཀལཱཔསམྨསནཱདིཀྐམེན ཝིཔསྶནཾ ཝཌྜྷེཏྭཱ ཨུདཡབྦཡཉཱཎཱདིཔཨཔཱཊིཡཱ ཝིཔསྶནཾ ཨནུལོམགོཏྲབྷུསམཱིཔཾ པཱཔེསི. ཏཾ སནྡྷཱཡ ཝུཏྟཾ ‘‘ཝིཔསྶནཾ ཨཱརབྷཱི’’ཏི. ཨོབྷཱསགཱཐཾ ཨབྷཱསཱིཏི ཨོབྷཱསཝིསྶཛྫནཔུབྦཀབྷཱསིཏགཱཐཱ ཨོབྷཱསགཱཐཱ, ཏཾ ཨབྷཱསཱིཏི ཨཏྠོ.

ཨེཏྠ ཙ ‘‘ཨདྷིཙེཏསོཏི ཨིམཾ ཨོབྷཱསགཱཐཾ ཨབྷཱསཱི’’ཏི ཨིདྷེཝ ཝུཏྟཾ. ཝིསུདྡྷིམགྒེ (ཝིསུདྡྷི. ༢.༣༨༦) པན ¶ དྷམྨཔདཊྛཀཐཱཡཾ (དྷ. པ. ཨཊྛ. ༡.ཙཱུལ༹པནྠཀཏྠེརཝཏྠུ) ཐེརགཱཐཱསཾཝཎྞནཱཡཉྩ (ཐེརགཱ. ཨཊྛ. ༢.༥༦༦) –

‘‘རཱགོ རཛོ ན ཙ པན རེཎུ ཝུཙྩཏི;

རཱགསྶེཏཾ ཨདྷིཝཙནཾ རཛོཏི;

ཨེཏཾ རཛཾ ཝིཔྤཛཧིཏྭཱ པཎྜིཏཱ;

ཝིཧརནྟི ཏེ ཝིགཏརཛསྶ སཱསནེ.

‘‘དོསོ…པེ… སཱསནེ.

‘‘མོཧོ རཛོ ན ཙ པན རེཎུ ཝུཙྩཏི;

མོཧསྶེཏཾ ཨདྷིཝཙནཾ རཛོཏི;

ཨེཏཾ རཛཾ ཝིཔྤཛཧིཏྭཱ པཎྜིཏཱ;

ཝིཧརནྟི ཏེ ཝིགཏརཛསྶ སཱསནེཏི. –

ཨིམཱ ཏིསྶོ ཨོབྷཱསགཱཐཱ ཨབྷཱསཱི’’ཏི ཝུཏྟཾ. ཨདྷིཙེཏསོཏི ཙ ཨཡཾ ཙཱུལ༹པནྠཀཏྠེརསྶ ཨུདཱནགཱཐཱཏི ཨིམིསྶཱཡེཝ པཱལི༹ཡཱ ཨཱགཏཾ. ཐེརགཱཐཱཡཾ པན ཙཱུལ༹པནྠཀཏྠེརསྶ ཨུདཱནགཱཐཱསུ ཨཡཾ ཨནཱརུལ༹ྷཱ, ‘‘ཨེཀུདཱནིཡཏྠེརསྶ པན ཨཡཾ ཨུདཱནགཱཐཱ’’ཏི (ཐེརགཱ. ཨཊྛ. ༡.ཨེཀུདཱནིཡཏྠེརགཱཐཱཝཎྞནཱ) ཏཏྠ ཝུཏྟཾ. ཨེཝཾ སནྟེཔི ཨིམིསྶཱ པཱལི༹ཡཱ ཨཊྛཀཐཱཡ ཙ ཨེཝམཱགཏཏྟཱ ཙཱུལ༹པནྠཀཏྠེརསྶཔི ཨཡཾ ¶ ཨུདཱནགཱཐཱ ཨོབྷཱསགཱཐཱཝསེན ཙ བྷགཝཏཱ བྷཱསིཏཱཏི གཧེཏབྦཾ. ཨརཧཏྟཾ པཱཔུཎཱིཏི ཨབྷིཉྙཱཔཊིསམྦྷིདཱཔརིཝཱརཾ ཨརཧཏྟཾ པཱཔུཎི. ཨབྷབྦོ ཏྭནྟིཨཱདིཝཙནཏོ ཨནུཀམྤཱཝསེན སདྡྷིཝིཧཱརིཀཱདིཾ སངྒྷིཀཝིཧཱརཱ ནིཀྐཌྜྷཱཔེནྟསྶ ཨནཱཔཏྟི ཝིཡ དིསྶཏི. ཨབྷབྦོ ཧི ཐེརོ སཉྩིཙྩ ཏཾ ཀཱཏུཾ, ནིཀྐཌྜྷནསིཀྑཱཔདེ ཝཱ ཨཔཉྙཏྟེ ཐེརེན ཨེཝཾ ཀཏནྟི གཧེཏབྦཾ.

༡༥༦. ཨོཝདནྟསྶ པཱཙིཏྟིཡནྟི ཨཏྠངྒཏེ སཱུརིཡེ གརུདྷམྨེཧི ཝཱ ཨཉྙེན ཝཱ དྷམྨེནེཝ ཨོཝདནྟསྶ སམྨཏསྶཔི པཱཙིཏྟིཡཾ. སེསམེཏྠ ཨུཏྟཱནམེཝ. ཨཏྠངྒཏསཱུརིཡཏཱ, པརིཔུཎྞཱུཔསམྤནྣཏཱ, ཨོཝདནནྟི ཨིམཱནི པནེཏྠ ཏཱིཎི ཨངྒཱནི.

ཨཏྠངྒཏསིཀྑཱཔདཝཎྞནཱ ནིཊྛིཏཱ.

༣. བྷིཀྑུནུཔསྶཡསིཀྑཱཔདཝཎྞནཱ

༡༦༢. ཏཏིཡཾ ¶ ཨུཏྟཱནཏྠམེཝ. ཨུཔསྶཡཱུཔགམནཾ, པརིཔུཎྞཱུཔསམྤནྣཏཱ, སམཡཱབྷཱཝོ, གརུདྷམྨེཧི ཨོཝདནནྟི ཨིམཱནི པནེཏྠ ཙཏྟཱརི ཨངྒཱནི.

བྷིཀྑུནུཔསྶཡསིཀྑཱཔདཝཎྞནཱ ནིཊྛིཏཱ.

༤. ཨཱམིསསིཀྑཱཔདཝཎྞནཱ

༡༦༤. ཙཏུཏྠེ ‘‘ཨུཔསམྤནྣཾ…པེ… བྷིཀྑུནོཝཱདཀ’’ནྟི ཨིམེསཾ ‘‘མངྐུཀཏྟུཀཱམོ’’ཏི ཨིམིནཱ སམྦནྡྷོ. ‘‘ཨཝཎྞཾ ཀཏྟུཀཱམོ ཨཡསཾ ཀཏྟུཀཱམོ’’ཏི ཨིམེསཾ པན ཝསེན ‘‘ཨུཔསམྤནྣ’’ནྟིཨཱདཱིསུ ‘‘ཨུཔསམྤནྣསྶཱ’’ཏི ཝིབྷཏྟིཝིཔརིཎཱམོ ཀཱཏབྦོཏི ཨིམམཏྠཾ སནྡྷཱཡ ‘‘ཨུཛ྄ཛྷཱཔནཀེ ཝུཏྟནཡེནེཝཏྠོ ཝེདིཏབྦོ’’ཏི ཝུཏྟཾ. ‘‘ཙཱིཝརཧེཏུ ཨོཝདཏཱི’’ཏིཨཱདིནཱ བྷཎནྟསྶ ཨེཀེཀསྨིཾ ཝཙནེ ནིཊྛིཏེ པཱཙིཏྟིཡཾ ཝེདིཏབྦཾ. ‘‘ཨུཔསམྤནྣཾ སངྒྷེན ཨསམྨཏ’’ནྟི པཱལི༹ཝཙནཏོ ‘‘སམྨཏེན ཝཱ སངྒྷེན ཝཱ བྷཱརཾ ཀཏྭཱ ཋཔིཏོ’’ཏི ཨཊྛཀཐཱཝཙནཏོ ཙ ཨཊྛཧི ཨངྒེཧི སམནྣཱགཏོ སམྨཏེན ཝཱ ཝིཔྤཝསིཏུཀཱམེན ‘‘ཡཱཝཱཧཾ ཨཱགམིསྶཱམི, ཏཱཝ ¶ ཏེ བྷཱརོ ཧོཏཱུ’’ཏི ཡཱཙིཏྭཱ ཋཔིཏོ ཏསྶཱབྷཱཝཏོ སངྒྷེན ཝཱ ཏཐེཝ བྷཱརཾ ཀཏྭཱ ཋཔིཏོ ཨཊྛཧི གརུདྷམྨེཧི ཨཉྙེན ཝཱ དྷམྨེན ཨོཝདིཏུཾ ལབྷཏཱིཏི ཝེདིཏབྦཾ. ཏསྨཱ ‘‘ཡོ པན, བྷིཀྑུ, ཨསམྨཏོ བྷིཀྑུནིཡོ ཨོཝདེཡྻ, པཱཙིཏྟིཡ’’ནྟི ཨིདཾ པགེཝ བྷཱརཾ ཀཏྭཱ ཨཊྛཔིཏཾ སནྡྷཱཡ ཝུཏྟནྟི གཧེཏབྦཾ.

༡༦༨. ཨནཱཔཏྟི པཀཏིཡཱ ཙཱིཝརཧེཏུ…པེ… ཨོཝདནྟཾ བྷཎཏཱིཏི ཨེཏྠ ཨཱམིསཧེཏུ ཨོཝདནྟཾ ‘‘ཨཱམིསཧེཏུ ཨོཝདཏཱི’’ཏི སཉྙཱཡ ཨེཝཾ བྷཎནྟསྶ ཨནཱཔཏྟི, ‘‘ན ཨཱམིསཧེཏུ ཨོཝདཏཱི’’ཏི སཉྙིནོ པན དུཀྐཊཾ, ན ཨཱམིསཧེཏུ ཨོཝདནྟཾ པན ‘‘ཨཱམིསཧེཏུ ཨོཝདཏཱི’’ཏི སཉྙཱཡ བྷཎནྟསྶཔི ཨནཱཔཏྟི སཙིཏྟཀཏྟཱ སིཀྑཱཔདསྶ. སེསམེཏྠ ཨུཏྟཱནམེཝ. ཨུཔསམྤནྣཏཱ, དྷམྨེན ལདྡྷསམྨུཏིཏཱ, ཨནཱམིསནྟརཏཱ, ཨཝཎྞཀཱམཏཱཡ ཨེཝཾ བྷཎནནྟི ཨིམཱནི པནེཏྠ ཙཏྟཱརི ཨངྒཱནི.

ཨཱམིསསིཀྑཱཔདཝཎྞནཱ ནིཊྛིཏཱ.

༡༦༩. པཉྩམཾ ཨུཏྟཱནཏྠམེཝ.

༦. ཙཱིཝརསིབྦཱཔནསིཀྑཱཔདཝཎྞནཱ

༡༧༥. ཚཊྛེ ¶ སཙེ སཱ བྷིཀྑུནཱི ཏཾ ཙཱིཝརཾ ཨཱདིཏོཝ པཱརུཔེཡྻ, ཨཉྙཱ བྷིཀྑུནིཡོ དིསྭཱ ཨུཛ྄ཛྷཱཔེཡྻུཾ, ཏཏོ མཧཱཛནོ པསྶིཏུཾ ན ལབྷཏཱིཏི མཉྙམཱནོ ‘‘ཡཐཱསཾཧཊཾ ཧརིཏྭཱ ནིཀྑིཔིཏྭཱ’’ཏིཨཱདིམཱཧ.

༡༧༦. ནཱིཧརཏཱིཏི སཀིཾ ནཱིཧརཏི. ཡེཔི ཏེསཾ ནིསྶིཏཀཱཏི སམྦནྡྷོ. ཀཐིནཝཏྟནྟི ‘‘སབྲཧྨཙཱརཱིནཾ ཀཱཏུཾ ཝཊྚཏཱི’’ཏི ཨིཏིཀཏྟབྦཏཱཝསེན སཱུཙིཀམྨཀརཎཾ. ཨཱཙརིཡུཔཛ྄ཛྷཱཡཱནཾ དུཀྐཊནྟི ཨཀཔྤིཡསམཱདཱནཝསེན དུཀྐཊཾ. ཝཉྩེཏྭཱཏི ‘‘ཏཝ ཉཱཏིཀཱཡཱ’’ཏི ཨཝཏྭཱ ‘‘ཨེཀིསྶཱ བྷིཀྑུནིཡཱ’’ཏི ཨེཏྟཀམེཝ ཝཏྭཱ. ‘‘ཨེཀིསྶཱ བྷིཀྑུནིཡཱ’’ཏི སུཏྭཱ ཏེ ཨཉྙཱཏིཀསཉྙིནོ བྷཝེཡྻུནྟི ཨཱཧ ‘‘ཨཀཔྤིཡེ ནིཡོཛིཏཏྟཱ’’ཏི ¶ . ‘‘ཨིདཾ ཏེ མཱཏུ ཙཱིཝར’’ནྟིཨཱདཱིནི ཨཝཏྭཱཔི ‘‘ཨིདཾ ཙཱིཝརཾ སིབྦེཧཱི’’ཏི སུདྡྷཙིཏྟེན སིབྦཱཔེནྟསྶཔི ཨནཱཔཏྟི.

༡༧༩. ཨུཔཱཧནཏྠཝིཀཱདིནྟི ཨཱདི-སདྡེན ཡཾ ཙཱིཝརཾ ནིཝཱསེཏུཾ ཝཱ པཱརུཔིཏུཾ ཝཱ ན སཀྐཱ ཧོཏི, ཏམྤི སངྒཎྷཱཏི. སེསམེཏྠ ཨུཏྟཱནམེཝ. ཨཉྙཱཏིཀཱཡ བྷིཀྑུནིཡཱ སནྟཀཏཱ, ནིཝཱསནཔཱརུཔནཱུཔགཏཱ, ཝུཏྟནཡེན སིབྦནཾ ཝཱ སིབྦཱཔནཾ ཝཱཏི ཨིམཱནི པནེཏྠ ཏཱིཎི ཨངྒཱནི.

ཙཱིཝརསིབྦཱཔནསིཀྑཱཔདཝཎྞནཱ ནིཊྛིཏཱ.

༧. སཾཝིདཧནསིཀྑཱཔདཝཎྞནཱ

༡༨༡. སཏྟམེ ‘‘པཙྪཱ གཙྪནྟཱིནཾ ཙོརཱ ཨཙྪིནྡིཾསཱུ’’ཏི ཨེཏྠ ‘‘པཏྟཙཱིཝར’’ནྟི པཱཋསེསོཏི ཨཱཧ ‘‘པཙྪཱ གཙྪནྟཱིནཾ པཏྟཙཱིཝར’’ནྟི. ཏཱ བྷིཀྑུནིཡོཏི པཙྪཱ གཙྪནྟིཡོ བྷིཀྑུནིཡོ. ‘‘པཙྪཱ གཙྪནྟཱིན’’ནྟི ཙ ཝིབྷཏྟིཝིཔརིཎཱམེནེཏྠ སམྦནྡྷོ ཝེདིཏབྦོ. པཱལི༹ཡཾ ‘‘གཙྪཱམ བྷགིནི, གཙྪཱམ ཨཡྻཱ’’ཏི བྷིཀྑུཔུབྦཀཾ སཾཝིདྷཱནཾ ཝུཏྟཾ, ‘‘གཙྪཱམ ཨཡྻ, གཙྪཱམ བྷགིནཱི’’ཏི བྷིཀྑུནཱིཔུབྦཀཾ. ཨེཀདྡྷཱནམགྒནྟི ཨེཀཾ ཨདྡྷཱནསངྑཱཏཾ མགྒཾ, ཨེཀཏོ ཝཱ ཨདྡྷཱནམགྒཾ. ཧིཡྻོཏི སུཝེ. པརེཏི ཏཏིཡདིཝསེ.

༡༨༢-༡༨༣. དྭིདྷཱ ཝུཏྟཔྤཀཱརོཏི པཱདགམནཝསེན པཀྑགམནཝསེན ཝཱཏི དྭིདྷཱ ཝུཏྟཔྤབྷེདོ ¶ . ཙཏུནྣཾ མགྒཱནཾ སམྦནྡྷཊྛཱནཾ ཙཏུཀྐཾ, ཏིཎྞཾ མགྒཱནཾ སམྦནྡྷཊྛཱནཾ སིངྒྷཱཊཀཾ. ‘‘གཱམནྟརེ གཱམནྟརེ’’ཏི ཨེཏྠ ཨཉྙོ གཱམོ གཱམནྟརནྟི ཨཱཧ ‘‘ནིཀྑམནེ ཨནཱཔཏྟི…པེ… བྷིཀྑུནོ པཱཙིཏྟིཡ’’ནྟི. ‘‘སཾཝིདྷཱཡཱ’’ཏི པཱལི༹ཡཾ ཨཝིསེསེན ཝུཏྟཏྟཱ ‘‘ནེཝ པཱལི༹ཡཱ སམེཏཱི’’ཏི ཝུཏྟཾ, ‘‘ཨེཏྠནྟརེ སཾཝིདཧིཏེཔི བྷིཀྑུནོ དུཀྐཊ’’ནྟི ཝུཏྟཏྟཱ ‘‘ན སེསཨཊྛཀཐཱཡ སམེཏཱི’’ཏི ཝུཏྟཾ. ཨདྡྷཡོཛནཾ ཨཏིཀྐམནྟསྶཱཏི ཨསཏི གཱམེ ཨདྡྷཡོཛནཾ ཨཏིཀྐམནྟསྶ. ཡཏྠ ཧི ཨདྡྷཡོཛནབྦྷནྟརེ ཨཉྙོ གཱམོ ན ཧོཏི, ཏཾ ཨིདྷ ཨགཱམཀཾ ཨརཉྙནྟི ཨདྷིཔྤེཏཾ, ཨདྡྷཡོཛནབྦྷནྟརེ པན གཱམེ སཏི གཱམནྟརགཎནཱཡ ཨེཝ ཨཱཔཏྟི.

༡༨༥. རཊྛབྷེདེཏི རཊྛཝིལོཔེ. ཙཀྐསམཱརུལ༹ྷཱཏི ཨིརིཡཱཔཐཙཀྐཾ སཀཊཙཀྐཾ ཝཱ སམཱརུལ༹ྷཱ. སེསཾ ཨུཏྟཱནམེཝ. དྭིནྣམྤི སཾཝིདཧིཏྭཱ མགྒཔྤཊིཔཏྟི ¶ , ཨཝིསངྐེཏཾ, སམཡཱབྷཱཝོ, ཨནཱཔདཱ, གཱམནྟརོཀྐམནཾ ཝཱ ཨདྡྷཡོཛནཱཏིཀྐམོ ཝཱཏི ཨིམཱནི པནེཏྠ པཉྩ ཨངྒཱནི. ཨེཀཏོཨུཔསམྤནྣཱདཱིཧི སདྡྷིཾ གཙྪནྟསྶ པན མཱཏུགཱམསིཀྑཱཔདེན ཨཱཔཏྟི.

སཾཝིདཧནསིཀྑཱཔདཝཎྞནཱ ནིཊྛིཏཱ.

༨. ནཱཝཱབྷིརུཧནསིཀྑཱཔདཝཎྞནཱ

༡༨༨. ཨཊྛམེ ལོཀསྶཱདམིཏྟསནྠཝཝསེན ཀཱིལཱ༹པུརེཀྑཱརཱ སཾཝིདཧིཏྭཱཏི ཨཡཾ ཝིསེསོ ‘‘ཨེཝམིམེ…པེ… བྷིཀྑུནཱིཧི སདྡྷིཾ ནཱཝཱཡ ཀཱིལ༹ནྟཱི’’ཏི ཨིམིནཱ ‘‘ཨུདྡྷཾགཱམིནིཾ ཝཱ ཨདྷོགཱམིནིཾ ཝཱ’’ཏི ཨིམིནཱ ཙ སིདྡྷོ.

༡༨༩. ནདིཡཱ ཀུཏོ གཱམནྟརནྟི ཨཱཧ ‘‘ཡསྶཱ ནདིཡཱ’’ཏིཨཱདི. ‘‘ཏསྶཱ སགཱམཀཏཱིརཔསྶེན…པེ… ཨདྡྷཡོཛནགཎནཱཡཱཏི ཨེཀེཀཔསྶེནེཝ གམནཾ སནྡྷཱཡ ཝུཏྟཏྟཱ ཏཱདིསིཀཱཡ ནདིཡཱ མཛ྄ཛྷེན གཙྪནྟསྶ གཱམནྟརགཎནཱཡ ཨདྡྷཡོཛནགཎནཱཡ ཙ ཨཱཔཏྟཱི’’ཏི ཝདནྟི. སབྦཨཊྛཀཐཱསཱུཏིཨཱདིནཱ ཨཏྟནཱ ཝུཏྟམེཝཏྠཾ སམཏྠེཏི. ‘‘ཀཱིལཱ༹པུརེཀྑཱརཏཱཡ བྷིཀྑུནིཡཱ སདྡྷིཾ སཾཝིདྷཱཡ ནཱཝཾ ཨབྷིརུཧནྟསྶ ནདིཡཾཡེཝ པཱཙིཏྟིཡསྶ ཝུཏྟཏྟཱ ཝཱཔིསམུདྡཱདཱིསུ ཀཱིལཱ༹པུརེཀྑཱརཏཱཡ དུཀྐཊམེཝ, ན པཱཙིཏྟིཡ’’ནྟི ཝདནྟི. ‘‘ལོཀསྶཱདམིཏྟསནྠཝཝསེན ཀཱིལཱ༹པུརེཀྑཱརཱ སཾཝིདཧིཏྭཱ’’ཏི ཝཙནཏོ ཀེཙི ‘‘ཨིམཾ སིཀྑཱཔདཾ ཨཀུསལཙིཏྟཾ ལོཀཝཛྫ’’ནྟི ཝདནྟི, ཏཾ ན གཧེཏབྦཾ. ཀཱིལཱ༹པུརེཀྑཱརཏཱཡ ཧི ཨབྷིརུཧིཏྭཱཔི གཱམནྟརོཀྐམནེ ཨདྡྷཡོཛནཱཏིཀྐམེ ཝཱ ཀུསལཱབྱཱཀཏཙིཏྟསམངྒཱིཔི ཧུཏྭཱ ཨཱཔཏྟིཾ ཨཱཔཛྫཏི ¶ . ཡདི ཧི སོ སཾཝེགཾ པཊིལབྷིཏྭཱ ཨརཧཏྟཾ ཝཱ སཙྪིཀརེཡྻ, ནིདྡཾ ཝཱ ཨོཀྐམེཡྻ, ཀམྨཊྛཱནཾ ཝཱ མནསི ཀརོནྟོ གཙྪེཡྻ, ཀུཏོ ཏསྶ ཨཀུསལཙིཏྟསམངྒིཏཱ, ཡེནིདཾ སིཀྑཱཔདཾ ཨཀུསལཙིཏྟཾ ལོཀཝཛྫནྟི ཝུཙྩཏི, ཏསྨཱ པཎྞཏྟིཝཛྫཾ ཏིཙིཏྟནྟི སིདྡྷཾ. སེསམེཏྠ ཨུཏྟཱནམེཝ.

ནཱཝཱབྷིརུཧནསིཀྑཱཔདཝཎྞནཱ ནིཊྛིཏཱ.

༩. པརིཔཱཙིཏསིཀྑཱཔདཝཎྞནཱ

༡༩༤. ནཝམེ ¶ པཊིཡཱདིཏནྟི བྷིཀྑཱུནཾ ཨཏྠཱཡ སམྤཱདིཏཾ. ཉཱཏཀཱ ཝཱ ཧོནྟི པཝཱརིཏཱ ཝཱཏི ཨེཏྠ སཙེཔི བྷིཀྑུནོ ཨཉྙཱཏཀཱ ཨཔྤཝཱརིཏཱ ཙ སིཡུཾ, བྷིཀྑུནིཡཱ ཉཱཏཀཱ པཝཱརིཏཱ ཙེ, ཝཊྚཏི.

༡༩༧. པཱཔབྷིཀྑཱུནཾ པཀྑུཔཙྪེདཱཡ ཨིདཾ པཉྙཏྟཾ, ཏསྨཱ པཉྩབྷོཛནེཡེཝ ཨཱཔཏྟི ཝུཏྟཱ. པཉྩ བྷོཛནཱནི ཋཔེཏྭཱ སབྦཏྠ ཨནཱཔཏྟཱིཏི ཨིདཾ པན ཨིམིནཱ སིཀྑཱཔདེན ཨནཱཔཏྟིདསྶནཏྠཾ ཝུཏྟཾ. ཝིཉྙཏྟིཡཱ ཨུཔྤནྣཾ པརིབྷུཉྫནྟསྶ ཧི ཨཉྙཏྠ ཝུཏྟནཡེན དུཀྐཊཾ. སེསཾ ཨུཏྟཱནམེཝ. བྷིཀྑུནིཔརིཔཱཙིཏབྷཱཝོ, ཛཱནནཾ, གིཧིསམཱརམྦྷཱབྷཱཝོ, ཨོདནཱདཱིནཾ ཨཉྙཏརཏཱ, ཏསྶ ཨཛ྄ཛྷོཧརཎནྟི ཨིམཱནི པནེཏྠ པཉྩ ཨངྒཱནི.

པརིཔཱཙིཏསིཀྑཱཔདཝཎྞནཱ ནིཊྛིཏཱ.

༡༠. རཧོནིསཛྫསིཀྑཱཔདཝཎྞནཱ

༡༩༨. དསམེ ཨུཔནནྡསྶ ཙཏུཏྠསིཀྑཱཔདེནཱཏི ཨཔྤཊིཙྪནྣེ མཱཏུགཱམེན སདྡྷིཾ རཧོནིསཛྫསིཀྑཱཔདཾ སནྡྷཱཡ ཝུཏྟཾ. ཀིཉྩཱཔི ཏཾ ཨཙེལཀཝགྒེ པཉྩམསིཀྑཱཔདཾ ཧོཏི, ཨུཔནནྡཏྠེརཾ ཨཱརབྦྷ པཉྙཏྟེསུ པན ཙཏུཏྠབྷཱཝཏོ ‘‘ཨུཔནནྡསྶ ཙཏུཏྠསིཀྑཱཔདེནཱ’’ཏི ཝུཏྟཾ. ཙཏུཏྠསིཀྑཱཔདསྶ ཝཏྠུཏོ ཨིམསྶ སིཀྑཱཔདསྶ ཝཏྠུནོ པཋམཾ ཨུཔྤནྣཏྟཱ ཨིདཾ སིཀྑཱཔདཾ པཋམཾ པཉྙཏྟཾ. ཨིམིནཱ ཙ སིཀྑཱཔདེན ཀེཝལཾ བྷིཀྑུནིཡཱ ཨེཝ རཧོནིསཛྫཱཡ ཨཱཔཏྟི པཉྙཏྟཱ, ཨུཔརི མཱཏུགཱམེན སདྡྷིཾ རཧོནིསཛྫཱཡ ཨཱཔཏྟི ཝིསུཾ པཉྙཏྟཱཏི དཊྛབྦཾ.

རཧོནིསཛྫསིཀྑཱཔདཝཎྞནཱ ནིཊྛིཏཱ.

ནིཊྛིཏོ བྷིཀྑུནིཝགྒོ ཏཏིཡོ.

༤. བྷོཛནཝགྒོ

༡. ཨཱཝསཐཔིཎྜསིཀྑཱཔདཝཎྞནཱ

༢༠༦. བྷོཛནཝགྒསྶ ¶ ¶ པཋམསིཀྑཱཔདེ ཨདྡྷཡོཛནཾ ཝཱ ཡོཛནཾ ཝཱ གནྟུཾ སཀྐོཏཱིཏི ཨེཏྠ ཏཏྟཀཾ གནྟུཾ སཀྐོནྟསྶཔི ཏཱཝཏཀཾ གནྟྭཱ ཨལདྡྷབྷིཀྑསྶ ཨིཏོ བྷུཉྫིཏུཾ ཝཊྚཏི. ཨིམེསཾཡེཝཱཏི ཨིམེསཾ པཱསཎྜཱནཾཡེཝ. ཨེཏྟཀཱནནྟི ཨིམསྨིཾ པཱསཎྜེ ཨེཏྟཀཱནཾ. ཨེཀདིཝསཾ བྷུཉྫིཏབྦནྟི ཨེཀདིཝསཾ སཀིཾཡེཝ བྷུཉྫིཏབྦཾ. ‘‘ཨེཀདིཝསཾ བྷུཉྫིཏབྦ’’ནྟི ཝཙནཏོ པན ཨེཀསྨིཾ དིཝསེ པུནཔྤུནཾ བྷུཉྫིཏུཾ ཝཊྚཏཱིཏི ན གཧེཏབྦཾ. པུན ཨཱདིཏོ པཊྛཱཡ བྷུཉྫིཏུཾ ན ཝཊྚཏཱིཏི ཨིམིནཱ པཋམཾ བྷུཏྟཊྛཱནེསུ པུན ཨེཀསྨིམྤི ཋཱནེ བྷུཉྫིཏུཾ ན ཝཊྚཏཱིཏི དསྶེཏི.

༢༠༨. ‘‘གཙྪནྟོ ཝཱ ཨཱགཙྪནྟོ ཝཱཏི ཨིདཾ ཨདྡྷཡོཛནཝསེན གཧེཏབྦ’’ནྟི ཝདནྟི. ཨནྟརཱམགྒེ གཏཊྛཱནེཏི ཨེཀསྶེཝ སནྟཀཾ སནྡྷཱཡ ཝུཏྟཾ. ‘‘ཨཱགཙྪནྟེཔི ཨེསེཝ ནཡོ’’ཏི སངྑེཔེན ཝུཏྟམེཝཏྠཾ ཝིབྷཱཝེནྟོ ‘‘གནྟྭཱ པཙྩཱགཙྪནྟོ’’ཏིཨཱདིམཱཧ. ཨཱཔཏྟིཊྛཱནེཡེཝ པུན བྷུཉྫནྟསྶ ཨནཱཔཏྟི ཝཏྟབྦཱཏི གམནེ ཨཱགམནེ ཙ པཋམཾ བྷོཛནཾ ཨཝཏྭཱ ཨནྟརཱམགྒེ ཨེཀདིཝསཾ གཏཊྛཱནེ ཙ ཨེཀདིཝསནྟི པུནཔྤུནཾ བྷོཛནམེཝ དསྶིཏཾ, གམནདིཝསེ པན ཨཱགམནདིཝསེ ཙ ‘‘གམིསྶཱམི ཨཱགམིསྶཱམཱི’’ཏི བྷུཉྫིཏུཾ ཝཊྚཏིཡེཝ. སུདྡྷཙིཏྟེན པུནཔྤུནཾ བྷུཉྫནྟསྶཔི པུནཔྤུནཾ བྷོཛནེ ཨནཱཔཏྟི. ཨཉྙསྶཏྠཱཡ ཨུདྡིསིཏྭཱ པཉྙཏྟཾ བྷིཀྑུནོ གཧེཏུམེཝ ན ཝཊྚཏཱིཏི ཨཱཧ ‘‘བྷིཀྑཱུནཾཡེཝ ཨཏྠཱཡཱ’’ཏི. སེསམེཏྠ ཨུཏྟཱནམེཝ. ཨཱཝསཐཔིཎྜཏཱ, ཨགིལཱནཏཱ, ཨནུཝསིཏྭཱ བྷོཛནནྟི ཨིམཱནི པནེཏྠ ཏཱིཎི ཨངྒཱནི.

ཨཱཝསཐཔིཎྜསིཀྑཱཔདཝཎྞནཱ ནིཊྛིཏཱ.

༢. གཎབྷོཛནསིཀྑཱཔདཝཎྞནཱ

༢༠༩. དུཏིཡེ ཨབྷིམཱརེཏི ཨབྷིགནྟྭཱ བྷགཝཏོ མཱརཎཏྠཱཡ ནིཡོཛིཏེ དྷནུདྡྷརེ. གུལ༹ྷཔཊིཙྪནྣོཏི ཨཔཱཀཊོ. པཝིཛ྄ཛྷཱིཏི ཝིསྶཛྫེསི. ནནུ རཱཛཱནམྤི མཱརཱཔེསཱིཏི ཝཙནཏོ ཨིདཾ སིཀྑཱཔདཾ ཨཛཱཏསཏྟུནོ ཀཱལེ པཉྙཏྟནྟི སིདྡྷཾ, ཨེཝཉྩ སཏི པརཏོ ཨནུཔཉྙཏྟིཡཾ –

‘‘ཏེན ¶ ¶ ཁོ པན སམཡེན རཉྙོ མཱགདྷསྶ སེནིཡསྶ བིམྦིསཱརསྶ ཉཱཏིསཱལོཧིཏོ ཨཱཛཱིཝཀེསུ པབྦཛིཏོ ཧོཏི. ཨཐ ཁོ སོ ཨཱཛཱིཝཀོ ཡེན རཱཛཱ མཱགདྷོ སེནིཡོ བིམྦིསཱརོ ཏེནུཔསངྐམི, ཨུཔསངྐམིཏྭཱ རཱཛཱནཾ མཱགདྷཾ སེནིཡཾ བིམྦིསཱརཾ ཨེཏདཝོཙ…པེ… ཀུཀྐུཙྩཱཡནྟཱ ནཱདྷིཝཱསེནྟཱི’’ཏི –

ཨིདཾ ཀསྨཱ ཝུཏྟནྟི? སོ ཀིར ཨཱཛཱིཝཀོ ཏཾ དཱནཾ དེནྟོ བིམྦིསཱརཀཱལཏོ པཊྛཱཡ ཨདཱསི, པཙྪཱ ཨཛཱཏསཏྟུཀཱལེ སིཀྑཱཔདཔཉྙཏྟིཏོ པཊྛཱཡ བྷིཀྑཱུ ཀུཀྐུཙྩཱཡནྟཱ ཏཾ དཱནཾ ན པཊིགྒཎྷིཾསུ, ཏསྨཱ ཨཱདིཏོ པཊྛཱཡ ཏཾ ཝཏྠུ དསྶིཏནྟི ཝེདིཏབྦཾ. ‘‘ཨཐ ཁོ སོ ཨཱཛཱིཝཀོ བྷིཀྑཱུནཾ སནྟིཀེ དཱུཏཾ པཱཧེསཱི’’ཏི ཨིདཉྩ ཏཏོ པབྷུཏི སོ ཨཱཛཱིཝཀོ ཨནྟརནྟརཱ བྷིཀྑཱུ ནིམནྟེཏྭཱ དཱནཾ དེནྟོ ཨཛཱཏསཏྟུཀཱལེ སིཀྑཱཔདེ པཉྙཏྟེ ཡཾ བྷིཀྑཱུནཾ སནྟིཀེ དཱུཏཾ པཱཧེསི, ཏཾ སནྡྷཱཡ ཝུཏྟཾ.

༢༡༥. ཨཉྙམཉྙཝིསིཊྛཏྟཱ ཝིསདིསཾ རཛྫཾ ཝིརཛྫཾ, ཏཏོ ཨཱགཏཱ, ཏཏྠ ཝཱ ཛཱཏཱ, བྷཝཱཏི ཝཱ ཝེརཛྫཱ, ཏེ ཨེཝ ཝེརཛྫཀཱ. ཏེ པན ཡསྨཱ གོཏྟཙརཎཱདིཝིབྷཱགེན ནཱནཔྤཀཱརཱ, ཏསྨཱ ཝུཏྟཾ ‘‘ནཱནཱཝེརཛྫཀེ’’ཏི. ཨཊྛཀཐཱཡཾ པན ནཱནཱཝིདྷེཧི ཨཉྙརཛྫེཧི ཨཱགཏེཏི རཛྫཱནཾཡེཝ ཝསེན ནཱནཔྤཀཱརཏཱ ཝུཏྟཱ.

༢༡༧-༢༡༨. ཨིམསྶ སིཀྑཱཔདསྶ ཝིཉྙཏྟིཾ ཀཏྭཱ བྷུཉྫནཝཏྠུསྨིཾ པཉྙཏྟཏྟཱ ཝིཉྙཏྟིཏོ གཎབྷོཛནཾ ཝཏྠུཝསེནེཝ པཱཀཊནྟི ཏཾ ཨཝཏྭཱ ‘‘གཎབྷོཛནཾ ནཱམ ཡཏྠ…པེ… ནིམནྟིཏཱ བྷུཉྫནྟཱི’’ཏི ནིམནྟནཝསེནེཝ པདབྷཱཛནེ གཎབྷོཛནཾ ཝུཏྟཾ. ‘‘ཀིཉྩི པན སིཀྑཱཔདཾ ཝཏྠུཨནནུརཱུཔམྤི སིཡཱཏི པདབྷཱཛནེ ཝུཏྟནཡེན ནིམནྟནཝསེནེཝ གཎབྷོཛནཾ ཧོཏཱིཏི ཀེསཉྩི ཨཱསངྐཱ བྷཝེཡྻཱ’’ཏི ཏཾནིཝཏྟནཏྠཾ ‘‘ཏཾ པནེཏཾ གཎབྷོཛནཾ དྭཱིཧཱཀཱརེཧི པསཝཏཱི’’ཏི ཝུཏྟཾ. པཉྩནྣཾ བྷོཛནཱནཾ ནཱམཾ གཧེཏྭཱཏི ཨེཏྠ ‘‘བྷོཛནཾ གཎྷཐཱཏི ཝུཏྟེཔི གཎབྷོཛནཾ ཧོཏིཡེཝཱ’’ཏི ཝདནྟི. ‘‘ཧེཊྛཱ ཨདྡྷཱནགམནཝཏྠུསྨིཾ ནཱཝཱབྷིརུཧནཝཏྠུསྨིཉྩ ‘ཨིདྷེཝ, བྷནྟེ, བྷུཉྫཐཱ’ཏི ཝུཏྟེ ཡསྨཱ ཀུཀྐུཙྩཱཡནྟཱ ན པཊིགྒཎྷིཾསུ, ཏསྨཱ ‘བྷུཉྫཐཱ’ཏི ཝུཏྟེཔི ¶ གཎབྷོཛནཾ ན ཧོཏིཡེཝཱ’’ཏི ཏཱིསུཔི གཎྛིཔདེསུ ཝུཏྟཾ. ‘‘པཉྩནྣཾ བྷོཛནཱནཾ ནཱམཾ གཧེཏྭཱ ནིམནྟེཏཱི’’ཏི ཝུཏྟཏྟཱ པན ‘‘ཨོདནཾ བྷུཉྫཐཱ’’ཏི ཝཱ ‘‘བྷཏྟཾ བྷུཉྫཐཱ’’ཏི ཝཱ བྷོཛནནཱམཾ གཧེཏྭཱཝ ཝུཏྟེ གཎབྷོཛནཾ ཧོཏི, ན ཨཉྙཐཱ. ‘‘ཨིདྷེཝ, བྷནྟེ, བྷུཉྫཐཱ’’ཏི ཨེཏྠཱཔི ‘‘ཨོདན’’ནྟི ཝཱ ‘‘བྷཏྟ’’ནྟི ཝཱ ཝཏྭཱཝ ཏེ ཨེཝཾ ནིམནྟེསུནྟི གཧེཏབྦཾ. གཎཝསེན ཝཱ ¶ ནིམནྟིཏཏྟཱ ཏེ བྷིཀྑཱུ ཨཔཀཏཉྙུཏཱཡ ཀུཀྐུཙྩཱཡནྟཱ ན པཊིགྒཎྷིཾསཱུཏི ཨཡཾ ཨམྷཱཀཾ ཁནྟི, ཝཱིམཾསིཏྭཱ ཡུཏྟཏརཾ གཧེཏབྦཾ.

ཨེཀཏོ གཎྷནྟཱིཏི ཨེཏྠ ཨཉྙམཉྙསྶ དྭཱདསཧཏྠཾ ཨམུཉྩིཏྭཱ ཋིཏཱ ཨེཀཏོ གཎྷནྟི ནཱམཱཏི གཧེཏབྦཾ. ‘‘ཨམྷཱཀཾ ཙཏུནྣམྤི བྷཏྟཾ དེཧཱིཏི ཝཱ ཝིཉྙཱཔེཡྻུ’’ནྟི ཝཙནཏོ ཧེཊྛཱ ‘‘ཏྭཾ ཨེཀསྶ བྷིཀྑུནོ བྷཏྟཾ དེཧི, ཏྭཾ དྭིནྣནྟི ཨེཝཾ ཝིཉྙཱཔེཏྭཱ’’ཏི ཝཙནཏོ ཙ ཨཏྟནོ ཨཏྠཱཡ ཨཉྙེཧི ཝིཉྙཏྟམྤི སཱདིཡནྟསྶ གཎབྷོཛནཾ ཧོཏིཡེཝཱཏི དཊྛབྦཾ. ཨེཝཾ ཝིཉྙཏྟིཏོ པསཝཏཱིཏི ཨེཏྠ ཝིཉྙཏྟིཡཱ སཏི གཎྷནྟསྶ ཨེཀཏོ ཧུཏྭཱ གཧཎེ ཨིམིནཱ སིཀྑཱཔདེན ཨཱཔཏྟི, ཝིསུཾ གཧཎེ པཎཱིཏབྷོཛནསཱུཔོདནཝིཉྙཏྟཱིཧི ཨཱཔཏྟི ཝེདིཏབྦཱ.

ཝིཙཱརེཏཱིཏི པཉྩཁཎྜཱདིཝསེན སཾཝིདཧཏི. གྷཊྚེཏཱིཏི ཨནུཝཱཏཾ ཚིནྡིཏྭཱ ཧཏྠེན དཎྜཀེན ཝཱ གྷཊྚེཏི. སུཏྟཾ ཀརོཏཱིཏི སུཏྟཾ ཝཊྚེཏི. ཝལེཏཱིཏི དཎྜཀེ ཝཱ ཧཏྠེ ཝཱ ཨཱཝཊྚེཏི. ‘‘ཨབྷིནཝསྶེཝ ཙཱིཝརསྶ ཀརཎཾ ཨིདྷ ཙཱིཝརཀམྨཾ ནཱམ, པུརཱཎཙཱིཝརེ སཱུཙིཀམྨཾ ནཱམ ན ཧོཏཱི’’ཏི ཝདནྟི. ‘‘ཙཏུཏྠེ ཨཱགཏེ ན ཡཱཔེནྟཱིཏི ཝཙནཏོ སཙེ ཨཉྙོ ཀོཙི ཨཱགཙྪནྟོ ནཏྠི, ཙཏྟཱརོཡེཝ ཙ ཏཏྠ ནིསིནྣཱ ཡཱཔེཏུཾ ན སཀྐོནྟི, ན ཝཊྚཏཱི’’ཏི ཝདནྟི.

༢༢༠. གཎབྷོཛནཱཔཏྟིཛནཀནིམནྟནབྷཱཝཏོ ‘‘ཨཀཔྤིཡནིམནྟན’’ནྟི ཝུཏྟཾ. སམྤཝེསེཏྭཱཏི ནིསཱིདཱཔེཏྭཱ. གཎོ བྷིཛྫཏཱིཏི གཎོ ཨཱཔཏྟིཾ ན ཨཱཔཛྫཏཱིཏི ཨདྷིཔྤཱཡོ. ‘‘ཡཏྠ ཙཏྟཱརོ བྷིཀྑཱུ…པེ… བྷུཉྫནྟཱི’’ཏི ཨིམཱཡ པཱལི༹ཡཱ སཾསནྡནཏོ ‘‘ཨིཏརེསཾ པན གཎཔཱུརཀོ ཧོཏཱི’’ཏི ཝུཏྟཾ. ཨཝིསེསེནཱཏི ‘‘གིལཱནོ ཝཱ ཙཱིཝརཀཱརཀོ ཝཱ’’ཏི ཨཝིསེསེཏྭཱ སབྦསཱདྷཱརཎཝཙནེན. ཏསྨཱཏི ཨཝིསེསིཏཏྟཱ. བྷུཏྭཱ གཏེསཱུཏི ཨེཏྠ ཨགཏེསུཔི བྷོཛནཀིཙྩེ ནིཊྛིཏེ གཎྷིཏུཾ ཝཊྚཏི ¶ . ཏཱནི ཙ ཏེཧི ཨེཀཏོ ན གཧིཏཱནཱིཏི ཡེཧི བྷོཛནེཧི ཝིསངྐེཏོ ནཏྠི, ཏཱནི བྷོཛནཱནི ཏེཧི བྷིཀྑཱུཧི ཨེཀཏོ ན གཧིཏཱནི ཨེཀེན པཙྪཱ གཧིཏཏྟཱ. མཧཱཐེརེཏི བྷིཀྑཱུ སནྡྷཱཡ ཝུཏྟཾ. དཱུཏསྶ པུན པཊིཔཐཾ ཨཱགནྟྭཱ ‘‘བྷཏྟཾ གཎྷཐཱ’’ཏི ཝཙནབྷཡེན ‘‘གཱམདྭཱརེ ཨཊྛཏྭཱཝཱ’’ཏི ཝུཏྟཾ. ཏཏྠ ཏཏྠ གནྟྭཱཏི ཨནྟརཝཱིཐིཨཱདཱིསུ ཏཏྠ ཏཏྠ ཋིཏཱནཾ སནྟིཀཾ གནྟྭཱ. བྷིཀྑཱུནཾ ཨཏྠཱཡ གྷརདྭཱརེ ཋཔེཏྭཱ དིཡྻམཱནེཔི ཨེསེཝ ནཡོ. ནིཝཏྟཐཱཏི ཝུཏྟཔདེ ནིཝཏྟིཏུཾ ཝཊྚཏཱིཏི ‘‘ནིཝཏྟཐཱ’’ཏི ཝིཙྪིནྡིཏྭཱ པཙྪཱ ‘‘བྷཏྟཾ གཎྷཐཱ’’ཏི ཝུཏྟཏྟཱ ཝཊྚཏི. སེསམེཏྠ ཨུཏྟཱནམེཝ. གཎབྷོཛནཏཱ, སམཡཱབྷཱཝོ, ཨཛ྄ཛྷོཧརཎནྟི ཨིམཱནི པནེཏྠ ཏཱིཎི ཨངྒཱནི.

གཎབྷོཛནསིཀྑཱཔདཝཎྞནཱ ནིཊྛིཏཱ.

༣. པརམྤརབྷོཛནསིཀྑཱཔདཝཎྞནཱ

༢༢༡. ཏཏིཡེ ¶ ཀུལཔཊིཔཱཊིཡཱ ཨབྦོཙྪིནྣཾ ཀཏྭཱ ནིརནྟརཾ དིཡྻམཱནཏྟཱ ‘‘བྷཏྟཔཊིཔཱཊི ཨཊྛིཏཱ ཧོཏཱི’’ཏི པཱལི༹ཡཾ ཝུཏྟཾ, ཨནྟརཱ ཨཊྛཏྭཱ ནིརནྟརཾ པཝཏྟཱཏི ཝུཏྟཾ ཧོཏི. ཨུཔཙཱརཝསེནཱཏི ཝོཧཱརཝསེན. ན ཧི སོ བདརམཏྟམེཝ དེཏི, ཨུཔཙཱརཝསེན པན ཨེཝཾ ཝདཏི. བདརཙུཎྞསཀྑརཱདཱིཧི པཡོཛིཏཾ ‘‘བདརསཱལ༹ཝ’’ནྟི ཝུཙྩཏི.

༢༢༦. ཝིཀཔྤནཱཝསེནེཝ ཏཾ བྷཏྟཾ ཨསནྟཾ ནཱམ ཧོཏཱིཏི ཨནུཔཉྙཏྟིཝསེན ཝིཀཔྤནཾ ཨཊྛཔེཏྭཱ ཡཐཱཔཉྙཏྟཾ སིཀྑཱཔདམེཝ ཋཔིཏཾ. པརིཝཱརེ པན ཝིཀཔྤནཱཡ ཨནུཛཱནནམྤི ཨནུཔཉྙཏྟིསམཱནནྟི ཀཏྭཱ ‘‘ཙཏསྶོ ཨནུཔཉྙཏྟིཡོ’’ཏི ཝུཏྟཾ. མཧཱཔཙྩརིཨཱདཱིསུ ཝུཏྟནཡཾ པཙྪཱ ཝདནྟོ པཱལི༹ཡཱ སཾསནྡནཏོ པརམྨུཁཱཝིཀཔྤནམེཝ པཏིཊྛཱཔེསི. ཀེཙི པན ‘‘ཏདཱ ཨཏྟནོ སནྟིཀེ ཋཔེཏྭཱ བྷགཝནྟཾ ཨཉྙསྶ ཨབྷཱཝཏོ ཐེརོ སམྨུཁཱཝིཀཔྤནཾ ནཱཀཱསི, བྷགཝཏཱ ཙ ཝིསུཾ སམྨུཁཱཝིཀཔྤནཱ ན ཝུཏྟཱ, ཏཐཱཔི སམྨུཁཱཝིཀཔྤནཱཔི ཝཊྚཏཱི’’ཏི ཝདནྟི. ཏེནེཝ མཱཏིཀཱཨཊྛཀཐཱཡམྤི (ཀངྑཱ. ཨཊྛ. པརམྤརབྷོཛནསིཀྑཱཔདཝཎྞནཱ) ‘‘ཡོ བྷིཀྑུ པཉྩསུ སཧདྷམྨིཀེསུ ཨཉྙཏརསྶ ‘མཡ྄ཧཾ བྷཏྟཔཙྩཱསཾ ཏུཡ྄ཧཾ དམྨཱི’ཏི ཝཱ ‘ཝིཀཔྤེམཱི’ཏི ཝཱ ཨེཝཾ སམྨུཁཱ ཝཱ ‘ཨིཏྠནྣཱམསྶ དམྨཱི’ཏི ¶ ཝཱ ‘ཝིཀཔྤེམཱི’ཏི ཝཱ ཨེཝཾ པརམྨུཁཱ ཝཱ པཋམནིམནྟནཾ ཨཝིཀཔྤེཏྭཱ པཙྪཱ ནིམནྟིཏཀུལེ ལདྡྷབྷིཀྑཏོ ཨེཀསིཏྠམྤི ཨཛ྄ཛྷོཧརཏི, པཱཙིཏྟིཡ’’ནྟི ཝུཏྟཾ.

༢༢༩. པཉྩཧི བྷོཛནེཧི ནིམནྟིཏསྶ ཡེན ཡེན པཋམཾ ནིམནྟིཏོ, ཏསྶ ཏསྶ བྷོཛནཏོ ཨུཔྤཊིཔཱཊིཡཱ ཨཝིཀཔྤེཏྭཱ ཝཱ པརསྶ པརསྶ བྷོཛནཾ པརམྤརབྷོཛནནྟི ཨཱཧ ‘‘སཙེ པན མཱུལནིམནྟནཾ ཧེཊྛཱ ཧོཏི, པཙྪིམཾ པཙྪིམཾ ཨུཔརི, ཏཾ ཨུཔརིཏོ པཊྛཱཡ བྷུཉྫནྟསྶ ཨཱཔཏྟཱི’’ཏི. ཧཏྠཾ ཨནྟོ པཝེསེཏྭཱ སབྦཧེཊྛིམཾ གཎྷནྟསྶ མཛ྄ཛྷེ ཋིཏམྤི ཨནྟོཧཏྠགཏཾ ཧོཏཱིཏི ཨཱཧ ‘‘ཧཏྠཾ པན…པེ… ཡཐཱ ཏཐཱ ཝཱ བྷུཉྫནྟསྶ ཨནཱཔཏྟཱི’’ཏི. ཁཱིརསྶ རསསྶ ཙ བྷཏྟེན ཨམིསྶཾ ཧུཏྭཱ ཨུཔརི ཋིཏཏྟཱ ‘‘ཁཱིརཾ ཝཱ རསཾ ཝཱ པིཝཏོ ཨནཱཔཏྟཱི’’ཏི ཝུཏྟཾ.

མཧཱཨུཔཱསཀོཏི གེཧསཱམིཀོ. ‘‘མཧཱཨཊྛཀཐཱཡཾ ‘ཨཱཔཏྟཱི’ཏི ཝཙནེན ཀུརུནྡིཡཾ ‘ཝཊྚཏཱི’ཏི ཝཙནཾ ཝིརུདྡྷཾ ཝིཡ དིསྶཏི, དྭིནྣམྤི ཨདྷིཔྤཱཡོ མཧཱཔཙྩརིཡཾ ཝིབྷཱཝིཏོ’’ཏི མཧཱགཎྛིཔདེསུ ཝུཏྟཾ. སབྦེ ནིམནྟེནྟཱིཏི ཨཀཔྤིཡནིམནྟནེན ནིམནྟེནྟི. ‘‘པརམྤརབྷོཛནཾ ནཱམ ¶ པཉྩནྣཾ བྷོཛནཱནཾ ཨཉྙཏརེན བྷོཛནེན ནིམནྟིཏོ, ཏཾ ཋཔེཏྭཱ ཨཉྙཾ པཉྩནྣཾ བྷོཛནཱནཾ ཨཉྙཏརཾ བྷོཛནཾ བྷུཉྫཏི, ཨེཏཾ པརམྤརབྷོཛནཾ ནཱམཱ’’ཏི ཝུཏྟཏྟཱ སཏིཔི བྷིཀྑཱཙརིཡཱཡ པཋམཾ ལདྡྷབྷཱཝེ ‘‘པིཎྜཱཡ ཙརིཏྭཱ ལདྡྷབྷཏྟཾ བྷུཉྫཏི, ཨཱཔཏྟཱི’’ཏི ཝུཏྟཾ. ཨཝིཀཔྤཝསེན ‘‘ཝཙཱིཀམྨ’’ནྟི ཝུཏྟཾ. སེསམེཏྠ ཨུཏྟཱནམེཝ. པརམྤརབྷོཛནཏཱ, སམཡཱབྷཱཝོ, ཨཛ྄ཛྷོཧརཎནྟི ཨིམཱནི པནེཏྠ ཏཱིཎི ཨངྒཱནི.

པརམྤརབྷོཛནསིཀྑཱཔདཝཎྞནཱ ནིཊྛིཏཱ.

༤. ཀཱཎམཱཏཱསིཀྑཱཔདཝཎྞནཱ

༢༣༠-༢༣༡. ཙཏུཏྠེ ཀཱཎཱཡ མཱཏཱཏི ཀཱཎཱཏི ལདྡྷནཱམཱཡ དཱརིཀཱཡ མཱཏཱ. ཀསྨཱ པནེསཱ ཀཱཎཱ ནཱམ ཛཱཏཱཏི ཨཱཧ ‘‘སཱ ཀིརསྶཱ’’ཏིཨཱདི. ཨིམིསྶཱ དཧརཀཱལེ མཱཏཱཔིཏརོ སིནེཧཝསེན ‘‘ཨམྨ ཀཱཎེ, ཨམྨ ཀཱཎེ’’ཏི ཝོཧརིཾསུ, སཱ ཏདུཔཱདཱཡ ཀཱཎཱ ནཱམ ཛཱཏཱ, ཏསྶཱ ཙ མཱཏཱ ‘‘ཀཱཎམཱཏཱ’’ཏི པཱཀཊཱ ཨཧོསཱིཏི ¶ ཨེཝམེཏྠ ཀཱརཎཾ ཝདནྟི. པཊིཡཱལོཀནྟི པཙྪིམཾ དིསཾ, པཙྩཱདིཙྩནྟི ཝུཏྟཾ ཧོཏི.

༢༣༣. པཱུཝགཎནཱཡ པཱཙིཏྟིཡནྟི མུཁཝཊྚིཡཱ ཧེཊྛིམལེཁཏོ ཨུཔརིཊྛིཏཔཱུཝགཎནཱཡ པཱཙིཏྟིཡཾ. ‘‘དྭཏྟིཔཏྟཔཱུརཱ པཊིགྒཧེཏབྦཱ’’ཏི ཧི ཝཙནཏོ མུཁཝཊྚིཡཱ ཧེཊྛིམལེཁཾ ཨནཏིཀྐནྟེ དྭེ ཝཱ ཏཡོ ཝཱ པཏྟཔཱུརེ གཧེཏུཾ ཝཊྚཏི.

༢༣༥. ཨཊྛཀཐཱསུ པན…པེ… ཝུཏྟནྟི ཨིདཾ ཨཊྛཀཐཱསུ ཏཐཱ ཨཱགཏབྷཱཝམཏྟདཱིཔནཏྠཾ ཝུཏྟཾ, ན པན ཏསྶ ཝཱདསྶ པཏིཊྛཱཔནཏྠཾ. ཨཊྛཀཐཱསུ ཝུཏྟཉྷི པཱལི༹ཡཱ ན སམེཏི. ཏཏུཏྟརིགཧཎེ ཨནཱཔཏྟིདསྶནཏྠཉྷི ‘‘ཉཱཏཀཱནཾ པཝཱརིཏཱན’’ནྟི ཝུཏྟཾ. ཨཉྙཐཱ ‘‘ཨནཱཔཏྟི དྭཏྟིཔཏྟཔཱུརེ པཊིགྒཎྷཱཏཱི’’ཏི ཨིམིནཱཝ པམཱཎཡུཏྟགྒཧཎེ ཨནཱཔཏྟིསིདྡྷིཏོ ‘‘ཉཱཏཀཱནཾ པཝཱརིཏཱན’’ནྟི ཝིསུཾ ན ཝཏྟབྦཾ. ཡདི ཨེཝཾ ‘‘ཏཾ པཱལི༹ཡཱ ན སམེཏཱི’’ཏི ཀསྨཱ ན ཝུཏྟནྟི? ཧེཊྛཱ ཏཏུཏྟརིསིཀྑཱཔདེ ཝུཏྟནཡེནེཝ སཀྐཱ ཝིཉྙཱཏུནྟི ན ཝུཏྟཾ. ཝུཏྟཉྷི ཏཏྠ (པཱརཱ. ཨཊྛ. ༢.༥༢༦) ‘‘ཨཊྛཀཐཱསུ པན ཉཱཏཀཔཝཱརིཏཊྛཱནེ པཀཏིཡཱཝ བཧུམྤི ཝཊྚཏི, ཨཙྪིནྣཀཱརཎཱ པམཱཎམེཝ ཝཊྚཏཱིཏི ཝུཏྟཾ, ཏཾ པཱལི༹ཡཱ ན སམེཏཱི’’ཏི. ‘‘ཨཔཱཐེཡྻཱདིཨཏྠཱཡ པཊིཡཱདིཏ’’ནྟི སཉྙཱཡ གཎྷནྟསྶཔི ཨཱཔཏྟིཡེཝ ཨཙིཏྟཀཏྟཱ སིཀྑཱཔདསྶ. ཨཏྟནོཡེཝ གཧཎཏྠཾ ‘‘ཨིམསྶ ཧཏྠེ དེཧཱི’’ཏི ཝཙནེནཔི ཨཱཔཛྫནཏོ ‘‘ཝཙཱིཀམྨ’’ནྟི ཝུཏྟཾ. སེསཾ ཨུཏྟཱནམེཝ ¶ . ཝུཏྟལཀྑཎཔཱུཝམནྠཏཱ, ཨསེསཀཏཱ, ཨཔཊིཔྤསྶདྡྷགམནཏཱ, ན ཉཱཏཀཱདིཏཱ, ཨཏིརེཀཔཊིགྒཧཎནྟི ཨིམཱནི པནེཏྠ པཉྩ ཨངྒཱནི.

ཀཱཎམཱཏཱསིཀྑཱཔདཝཎྞནཱ ནིཊྛིཏཱ.

༥. པཋམཔཝཱརཎཱསིཀྑཱཔདཝཎྞནཱ

༢༣༦. པཉྩམེ བྷུཏྟཱཝཱིཏི བྷུཏྟཱཝིནོ བྷུཏྟཝནྟོ, ཀཏབྷཏྟཀིཙྩཱཏི ཝུཏྟཾ ཧོཏི. པཝཱརིཏཱཏི ཨེཏྠ ཙཏཱུསུ པཝཱརཎཱསུ ཡཱཝདཏྠཔཝཱརཎཱ པཊིཀྑེཔཔཝཱརཎཱ ཙ ལབྦྷཏཱིཏི ཨཱཧ ‘‘བྲཱཧྨཎེན…པེ… པཊིཀྑེཔཔཝཱརཎཱཡ པཝཱརིཏཱ’’ཏི. ཙཏུབྦིདྷཱ ཧི པཝཱརཎཱ ཝསྶཾཝུཏྠཔཝཱརཎཱ, པཙྩཡཔཝཱརཎཱ ¶ , པཊིཀྑེཔཔཝཱརཎཱ, ཡཱཝདཏྠཔཝཱརཎཱཏི. ཏཏྠ ‘‘ཨནུཛཱནཱམི, བྷིཀྑཝེ, ཝསྶཾཝུཏྠཱནཾ བྷིཀྑཱུནཾ ཏཱིཧི ཋཱནེཧི པཝཱརེཏུ’’ནྟི (མཧཱཝ. ༢༠༩) ཨཡཾ ཝསྶཾཝུཏྠཔཝཱརཎཱ. པཀཱརེཧི དིཊྛཱདཱིཧི ཝཱརེཏི སངྒྷཱདིཀེ བྷཛཱཔེཏི བྷཏྟེ ཀརོཏི ཨེཏཱཡཱཏི པཝཱརཎཱ, ཨཱཔཏྟིཝིསོདྷནཱཡ ཨཏྟཝོསྶགྒོཀཱསདཱནཾ. སཱ པན ཡསྨཱ ཡེབྷུཡྻེན ཝསྶཾཝུཏྠེཧི ཀཱཏབྦཱ ཝུཏྟཱ, ཏསྨཱ ‘‘ཝསྶཾཝུཏྠཔཝཱརཎཱ’’ཏི ཝུཙྩཏི. ‘‘ཨིཙྪཱམཧཾ, བྷནྟེ, སངྒྷཾ ཙཱཏུམཱསཾ བྷེསཛྫེན པཝཱརེཏུ’’ནྟི (པཱཙི. ༣༠༣) ཙ, ‘‘ཨཉྙཏྲ པུན པཝཱརཎཱཡ ཨཉྙཏྲ ནིཙྩཔཝཱརཎཱཡཱ’’ཏི (པཱཙི. ༣༠༦) ཙ ཨཡཾ པཙྩཡཔཝཱརཎཱ པཝཱརེཏི པཙྩཡེ ཨིཙྪཱཔེཏི ཨེཏཱཡཱཏི ཀཏྭཱ, ཙཱིཝརཱདཱིཧི ཨུཔནིམནྟནཱཡེཏཾ ཨདྷིཝཙནཾ. ‘‘པཝཱརིཏོ ནཱམ ཨསནཾ པཉྙཱཡཏི, བྷོཛནཾ པཉྙཱཡཏི, ཧཏྠཔཱསེ ཋིཏོ ཨབྷིཧརཏི, པཊིཀྑེཔོ པཉྙཱཡཏི, ཨེསོ པཝཱརིཏོ ནཱམཱ’’ཏི (པཱཙི. ༢༣༩) ཨཡཾ པཊིཀྑེཔཔཝཱརཎཱ. ཝིཔྤཀཏབྷོཛནཏཱདིཔཉྩངྒསཧིཏོ བྷོཛནཔཊིཀྑེཔོཡེཝ ཧེཏྠ པཀཱརཡུཏྟཱ ཝཱརཎཱཏི པཝཱརཎཱ. ‘‘པཎཱིཏེན ཁཱདནཱིཡེན བྷོཛནཱིཡེན སཧཏྠཱ སནྟཔྤེསི སམྤཝཱརེསཱི’’ཏི (མ. ནི. ༡.༣༦༣) ཨཡཾ ཡཱཝདཏྠཔཝཱརཎཱ. ཡཱཝདཏྠཾ བྷོཛནསྶ པཝཱརཎཱ ཡཱཝདཏྠཔཝཱརཎཱ.

༢༣༧. ཏི-ཀཱརཾ ཨཝཏྭཱ…པེ… ཝཏྟུཾ ཝཊྚཏཱིཏི ཨིདཾ ཝཏྟབྦཱཀཱརདསྶནཏྠཾ ཝུཏྟཾ. ‘‘ཏི-ཀཱརེ པན ཝུཏྟེཔི ཨཀཏཾ ནཱམ ན ཧོཏཱི’’ཏི ཏཱིསུཔི གཎྛིཔདེསུ ཝུཏྟཾ.

༢༣༨-༢༣༩. པཝཱརིཏོཏི པཊིཀྑེཔིཏོ. ཡོ ཧི བྷུཉྫནྟོ པརིཝེསཀེན ཨུཔནཱིཏཾ བྷོཛནཾ ཨནིཙྪནྟོ པཊིཀྑིཔཏི, སོ ཏེན པཝཱརིཏོ པཊིཀྑེཔིཏོ ནཱམ ཧོཏི. བྱཉྫནཾ པན ཨནཱདིཡིཏྭཱ ཨཏྠམཏྟམེཝ དསྶེཏུཾ ‘‘ཀཏཔཝཱརཎོ ཀཏཔཊིཀྑེཔོ’’ཏི ཝུཏྟཾ. ཡསྨཱ ‘‘ཨསན’’ནྟི ¶ ཨིམིནཱཝ པདེན ‘‘བྷུཏྟཱཝཱི’’ཏི ཨིམསྶ ཨཏྠོ ཝུཏྟོ, ཏསྨཱ ན ཏསྶ ཀིཉྩི པཡོཛནཾ ཝིསུཾ ཨུཔལབྦྷཏི. ཡདི ཧི ཨུཔལབྦྷེཡྻ, པཝཱརཎཱ ཚལ༹ངྒསམནྣཱགཏཱ ཨཱཔཛྫེཡྻཱཏི མནསི ཀཏྭཱ པཉྩསམནྣཱགཏཏྟཾཡེཝ དསྶེཏུཾ ‘‘ཝུཏྟམྤི ཙེཏ’’ནྟིཨཱདིནཱ པཱལི༹ཾ ཨཱཧརཏི. ཀེཙི པན ‘‘ཧཏྠཔཱསེ ཋིཏོ ཨབྷིཧརཏཱི’’ཏི ཨེཀམེཝ ཨངྒཾ ཀཏྭཱ ‘‘ཙཏུརངྒསམནྣཱགཏཱ པཝཱརཎཱ’’ཏིཔི ཝདནྟི.

ཨམྦིལཔཱཡཱསཱདཱིསཱུཏི ¶ ཨཱདི-སདྡེན ཁཱིརཔཱཡཱསཱདིཾ སངྒཎྷཱཏི. ཏཏྠ ཨམྦིལཔཱཡཱསགྒཧཎེན ཏཀྐཱདིཨམྦིལསཾཡུཏྟཱ གྷནཡཱགུ ཝུཏྟཱ. ཁཱིརཔཱཡཱསགྒཧཎེན ཁཱིརསཾཡུཏྟཱ ཡཱགུ སངྒཡ྄ཧཏི. པཝཱརཎཾ ན ཛནེཏཱིཏི ཨནཏིརིཏྟབྷོཛནཱཔཏྟིནིབནྡྷནཾ པཊིཀྑེཔཾ ན སཱདྷེཏི. ཀཏོཔི པཊིཀྑེཔོ ཨནཏིརིཏྟབྷོཛནཱཔཏྟིནིབནྡྷནོ ན ཧོཏཱིཏི ཨཀཏཊྛཱནེཡེཝ ཏིཊྛཏཱིཏི ཨཱཧ ‘‘པཝཱརཎཾ ན ཛནེཏཱི’’ཏི. ‘‘ཡཱགུ-སདྡསྶ པཝཱརཎཛནཀཡཱགུཡཱཔི སཱདྷཱརཎཏྟཱ ‘ཡཱགུཾ གཎྷཐཱ’ཏི ཝུཏྟེཔི པཝཱརཎཱ ཧོཏཱིཏི པཝཱརཎཾ ཛནེཏིཡེཝཱཏི ཝུཏྟ’’ནྟི ཏཱིསུཔི གཎྛིཔདེསུ ཝུཏྟཾ, ཏཾ པརཏོ ཏཏྠེཝ ‘‘བྷཏྟམིསྶཀཾ ཡཱགུཾ ཨཱཧརིཏྭཱ’’ཏི ཨེཏྠ ཝུཏྟཀཱརཎེན ན སམེཏི. ཝུཏྟཉྷི ཏཏྠ ‘‘ཧེཊྛཱ ཨཡཱགུཀེ ནིམནྟནེ ཨུདཀཀཉྫིཀཁཱིརཱདཱིཧི སདྡྷིཾ མདྡིཏཾ བྷཏྟམེཝ སནྡྷཱཡ ‘ཡཱགུཾ གཎྷཐཱ’ཏི ཝུཏྟཏྟཱ པཝཱརཎཱ ཧོཏི, ‘བྷཏྟམིསྶཀཾ ཡཱགུཾ ཨཱཧརིཏྭཱ’ཏི ཨེཏྠ པན ཝིསུཾ ཡཱགུཡཱ ཝིཛྫམཱནཏྟཱ པཝཱརཎཱ ན ཧོཏཱི’’ཏི. ཏསྨཱ ཏཏྠ ཝུཏྟནཡེནེཝ ཁཱིརཱདཱིཧི སཾམདྡིཏཾ བྷཏྟམེཝ སནྡྷཱཡ ‘‘ཡཱགུཾ གཎྷཐཱ’’ཏི ཝུཏྟཏྟཱ ཡཱགུཡཱ ཙ ཏཏྠ ཨབྷཱཝཏོ པཝཱརཎཱ ཧོཏཱིཏི ཨེཝམེཏྠ ཀཱརཎཾ ཝཏྟབྦཾ. ཨེཝཉྷི སཏི པརཏོ ‘‘ཡེནཱཔུཙྪིཏོ, ཏསྶ ཨཏྠིཏཱཡཱ’’ཏི ཨཊྛཀཐཱཡཾ ཝུཏྟཀཱརཎེནཔི སཾསནྡཏི, ཨཉྙཐཱ གཎྛིཔདེསུཡེཝ པུབྦཱཔརཝིརོདྷོ ཨཱཔཛྫཏི. ཨཊྛཀཐཱཝཙནེན ཙ ན སམེཏི. སཙེ…པེ… པཉྙཱཡཏཱིཏི ཨིམིནཱ ཝུཏྟཔྤམཱཎསྶ མཙྪམཾསཁཎྜསྶ ནཧཱརུནོ ཝཱ སབྦྷཱཝམཏྟཾ དསྶེཏི. ཏཱཧཱིཏི པུཐུཀཱཧི.

སཱལིཝཱིཧིཡཝེཧི ཀཏསཏྟཱུཏི ཡེབྷུཡྻནཡེན ཝུཏྟཾ, སཏྟ དྷཉྙཱནི པན བྷཛྫིཏྭཱ ཀཏོཔི སཏྟུཡེཝ. ཏེནེཝཱཧ ‘‘ཀངྒུཝརཀ…པེ… སཏྟུསངྒཧམེཝ གཙྪཏཱི’’ཏི. སཏྟུམོདཀོཏི སཏྟུཡོ པིཎྜེཏྭཱ ཀཏོ ཨཔཀྐོ སཏྟུགུལོ༹. པཉྩནྣཾ བྷོཛནཱནཾ ཨཉྙཏརཝསེན ཝིཔྤཀཏབྷོཛནབྷཱཝསྶ ཨུཔཙྪིནྣཏྟཱ ‘‘མུཁེ སཱསཔམཏྟམྤི…པེ… ན པཝཱརེཏཱི’’ཏི ཝུཏྟཾ. ‘‘ཨཀཔྤིཡམཾསཾ པཊིཀྑིཔཏི, ན པཝཱརེཏཱི’’ཏི ཝཙནཏོ སཙེ སངྒྷིཀཾ ལཱབྷཾ ཨཏྟནོ ཨཔཱཔུཎནྟཾ ཛཱནིཏྭཱ ཝཱ ཨཛཱནིཏྭཱ ཝཱ པཊིཀྑིཔཏི, ན པཝཱརེཏི པཊིཀྑིཔིཏབྦསྶེཝ པཊིཀྑིཏྟཏྟཱ. ཨལཛྫིསནྟཀཾ པཊིཀྑིཔནྟོཔི ན པཝཱརེཏི. ཨཝཏྠུཏཱཡཱཏི ཨནཏིརིཏྟཱཔཏྟིསཱདྷིཀཱཡ པཝཱརཎཱཡ ཨཝཏྠུབྷཱཝཏོ. ཨེཏེན པཊིཀྑིཔིཏབྦསྶེཝ པཊིཀྑིཏྟབྷཱཝཾ དཱིཔེཏི ¶ . ཡཉྷི པཊིཀྑིཔིཏབྦཾ ¶ ཧོཏི, ཏསྶ པཊིཀྑེཔོ ཨཱཔཏྟིཨངྒཾ ན ཧོཏཱིཏི ཏཾ ‘‘པཝཱརཎཱཡ ཨཝཏྠཱུ’’ཏི ཝུཙྩཏི.

ཨུཔནཱམེཏཱིཏི ཨིམིནཱ ཀཱཡཱབྷིཧཱརཾ དསྶེཏི. ཧཏྠཔཱསཏོ བཧི ཋིཏསྶ སཏིཔི དཱཏུཀཱམཱབྷིཧཱརེ པཊིཀྑིཔནྟསྶ དཱུརབྷཱཝེནེཝ པཝཱརཎཱཡ ཨབྷཱཝཏོ ཐེརསྶཔི དཱུརབྷཱཝམཏྟཾ གཧེཏྭཱ པཝཱརཎཱཡ ཨབྷཱཝཾ དསྶེནྟོ ‘‘ཐེརསྶ དཱུརབྷཱཝཏོ’’ཏི ཨཱཧ, ན པན ཐེརསྶ ཨབྷིཧཱརསབྦྷཱཝཏོ. སཙེཔི གཧེཏྭཱ གཏོ ཧཏྠཔཱསེ ཋིཏོ ཧོཏི, ཀིཉྩི པན ཨཝཏྭཱ ཨཱདྷཱརཀཊྛཱནེ ཋིཏཏྟཱ ཨབྷིཧཱརོ ནཱམ ན ཧོཏཱིཏི ‘‘དཱུཏསྶ ཙ ཨནབྷིཧརཎཏོ’’ཏི ཝུཏྟཾ. ‘‘གཧེཏྭཱ གཏེན ‘བྷཏྟཾ གཎྷཐཱ’ཏི ཝུཏྟེ ཨབྷིཧཱརོ ནཱམ ཧོཏཱིཏི ‘སཙེ པན གཧེཏྭཱ ཨཱགཏོ བྷིཀྑུ…པེ… པཝཱརཎཱ ཧོཏཱི’ཏི ཝུཏྟ’’ནྟི ཏཱིསུཔི གཎྛིཔདེསུ ཝུཏྟཾ. ཀེཙི པན ‘‘པཏྟཾ ཀིཉྩི ཨུཔནཱམེཏྭཱ ‘ཨིམཾ བྷཏྟཾ གཎྷཐཱ’ཏི ཝུཏྟནྟི གཧེཏབྦ’’ནྟི ཝདནྟི, ཏཾ ཡུཏྟཾ ཝིཡ དིསྶཏི ཝཱཙཱབྷིཧཱརསྶ ཨིདྷ ཨནདྷིཔྤེཏཏྟཱ.

པརིཝེསནཱཡཱཏི བྷཏྟགྒེ. ཨབྷིཧཊཱཝ ཧོཏཱིཏི པརིཝེསཀེནེཝ ཨབྷིཧཊཱ ཧོཏི. ཏཏོ དཱཏུཀཱམཏཱཡ གཎྷནྟཾ པཊིཀྑིཔནྟསྶ པཝཱརཎཱ ཧོཏཱིཏི ཨེཏྠ ཨགཎྷནྟམྤི པཊིཀྑིཔཏོ པཝཱརཎཱ ཧོཏིཡེཝ. ཀསྨཱ? དཱཏུཀཱམཏཱཡ ཨབྷིཧཊཏྟཱ. ‘‘ཏསྨཱ སཱ ཨབྷིཧཊཱཝ ཧོཏཱི’’ཏི ཧི ཝུཏྟཾ. ཏེནེཝ ཏཱིསུཔི གཎྛིཔདེསུ ‘‘དཱཏུཀཱམཱབྷིཧཱརེ སཏི ཀེཝལཾ ‘དསྶཱམཱི’ཏི གཧཎམེཝ ཨབྷིཧཱརོ ནཱམ ན ཧོཏི, ‘དསྶཱམཱི’ཏི གཎྷནྟེཔི ཨགཎྷནྟེཔི དཱཏུཀཱམཱབྷིཧཱརོཝ ཨབྷིཧཱརོ ནཱམ ཧོཏི, ཏསྨཱ གཧཎསམཡེ ཝཱ ཨགྒཧཎསམཡེ ཝཱ ཏཾ པཊིཀྑིཔཏོ པཝཱརཎཱ ཧོཏཱི’’ཏི ཝུཏྟཾ. ཨིདཱནི ཨསཏི ཏསྶ དཱཏུཀཱམཱབྷིཧཱརེ གཧཎསམཡེཔི པཊིཀྑིཔཏོ པཝཱརཎཱ ན ཧོཏཱིཏི དསྶེཏུཾ ‘‘སཙེ པནཱ’’ཏིཨཱདི ཝུཏྟཾ.

‘‘རསཾ གཎྷཐཱ’’ཏི ཨཔཝཱརཎཛནཀསྶ ནཱམཾ གཧེཏྭཱ ཝུཏྟཏྟཱ ‘‘ཏཾ སུཏྭཱ པཊིཀྑིཔཏོ པཝཱརཎཱ ནཏྠཱི’’ཏི ཝུཏྟཾ. མཙྪརསཾ མཾསརསནྟི ཨེཏྠ པན ན ཀེཝལཾ མཙྪསྶ རསཾ མཙྪརསམིཙྩེཝ ཝིཉྙཱཡཏི, ཨཐ ཁོ མཙྪོ ཙ མཙྪརསཉྩ མཙྪརསནྟི ཨེཝཾ པཝཱརཎཛནཀསཱདྷཱརཎནཱམཝསེནཔི ཝིཉྙཱཡམཱནཏྟཱ ¶ ཏཾ པཊིཀྑིཔཏོ པཝཱརཎཱཝ ཧོཏི. པརཏོ མཙྪསཱུཔནྟི ཨེཏྠཱཔི ཨེསེཝ ནཡོ. ‘‘ཨིདཾ གཎྷཐཱ’’ཏི ཝུཏྟེཔཱིཏི ཨེཏྠ ཨེཝཾ ཨཝཏྭཱཔི པཝཱརཎཔཧོནཀཾ ཡཾཀིཉྩི ཨབྷིཧཊཾ པཊིཀྑིཔཏོ པཝཱརཎཱ ཧོཏིཡེཝཱཏི དཊྛབྦཾ. ཀརམྦཀོཏི མིསྶཀཱདྷིཝཙནམེཏཾ. ཡཉྷི ཨཉྙེནཉྙེན མིསྶེཏྭཱ ཀརོནྟི, སོ ‘‘ཀརམྦཀོ’’ཏི ཝུཙྩཏི. སོ སཙེཔི མཾསེན མིསྶེཏྭཱ ཀཏོཝ ཧོཏི, ‘‘ཀརམྦཀཾ གཎྷཐཱ’’ཏི ཨཔཝཱརཎཱརཧསྶ ནཱམེན ཝུཏྟཏྟཱ ¶ པཊིཀྑིཔཏོ པཝཱརཎཱ ན ཧོཏི. ‘‘མཾསཀརམྦཀཾ གཎྷཐཱ’’ཏི ཝུཏྟེ པན མཾསམིསྶཀཾ གཎྷཐཱཏི ཝུཏྟཾ ཧོཏི, ཏསྨཱ པཝཱརཎཱཝ ཧོཏི.

‘‘ཨུདྡིསྶཀཏ’’ནྟི མཉྙམཱནོཏི ཨེཏྠ ‘‘ཝཏྠུནོ ཀཔྤིཡཏྟཱ ཨཀཔྤིཡསཉྙཱཡ པཊིཀྑིཔཏོཔི ཨཙིཏྟཀཏྟཱ ཨིམསྶ སིཀྑཱཔདསྶ པཝཱརཎཱ ཧོཏཱི’’ཏི ཝདནྟི. ‘‘ཧེཊྛཱ ཨཡཱགུཀེ ནིམནྟནེ ཨུདཀཀཉྫིཀཁཱིརཱདཱིཧི སདྡྷིཾ མདྡིཏཾ བྷཏྟམེཝ སནྡྷཱཡ ‘ཡཱགུཾ གཎྷཐཱ’ཏི ཝུཏྟཏྟཱ པཝཱརཎཱ ཧོཏི, ‘བྷཏྟམིསྶཀཾ ཡཱགུཾ ཨཱཧརིཏྭཱ’ཏི ཨེཏྠ པན ཝིསུཾ ཡཱགུཡཱ ཝིཛྫམཱནཏྟཱ པཝཱརཎཱ ན ཧོཏཱི’’ཏི ཝདནྟི. ཨཡམེཏྠ ཨདྷིཔྤཱཡོཏི ‘‘ཡེནཱཔུཙྪིཏོ’’ཏིཨཱདིནཱ ཝུཏྟམེཝཏྠཾ སནྡྷཱཡ ཝདཏི. ཀཱརཎཾ པནེཏྠ དུདྡསནྟི ཨེཏྠ ཨེཀེ ཏཱཝ ཝདནྟི ‘‘ཡསྨཱ ཡཱགུམིསྶཀཾ ནཱམ བྷཏྟམེཝ ན ཧོཏི, ཁཱིརཱདིཀམྤི ཧོཏིཡེཝ, ཏསྨཱ ཀརམྦཀེ ཝིཡ པཝཱརཎཱཡ ན བྷཝིཏབྦཾ. ཨེཝཉྩ སཏི ཡཱགུ བཧུཏརཱ ཝཱ ཧོཏི སམསམཱ ཝཱ, ན པཝཱརེཏི. ‘ཡཱགུ མནྡཱ, བྷཏྟཾ བཧུཏརཾ, པཝཱརེཏཱི’ཏི ཨེཏྠ ཀཱརཎཾ དུདྡས’’ནྟི. ཀེཙི པན ཝདནྟི ‘‘ཡཱགུམིསྶཀཾ ནཱམ བྷཏྟཾ, ཏསྨཱ ཏཾ པཊིཀྑིཔཏོ པཝཱརཎཱཡ ཨེཝ བྷཝིཏབྦཾ. ཨེཝཉྩ སཏི ‘ཨིདྷ པཝཱརཎཱ ཧོཏི ན ཧོཏཱི’ཏི ཨེཏྠ ཀཱརཎཾ དུདྡས’’ནྟི.

ཡཐཱ ཙེཏྠ ཀཱརཎཾ དུདྡསཾ, ཨེཝཾ པརཏོ ‘‘མིསྶཀཾ གཎྷཐཱ’’ཏི ཨེཏྠཱཔི ཀཱརཎཾ དུདྡསམེཝཱཏི ཝེདིཏབྦཾ. ན ཧི པཝཱརཎཔྤཧོནཀསྶ ཨཔྤབཧུབྷཱཝོ པཝཱརཎཱཡ བྷཱཝཱབྷཱཝནིམིཏྟཾ, ཀིཉྩརཧི པཝཱརཎཛནཀསྶ ནཱམགྒཧཎམེཝེཏྠ པམཱཎཾ, ཏསྨཱ ‘‘ཨིདཉྩ ཀརམྦཀེན ན སམཱནེཏབྦ’’ནྟིཨཱདིནཱ ཡམྤི ཀཱརཎཾ ཝུཏྟཾ, ཏམྤི པུབྦེ ཝུཏྟེན སཾསནྡིཡམཱནཾ ན སམེཏི. ཡདི ཧི ‘‘མིསྶཀ’’ནྟི བྷཏྟམིསྶཀེཡེཝ རུལ༹ྷཾ སིཡཱ, ཨེཝཾ སཏི ཡཐཱ ‘‘བྷཏྟམིསྶཀཾ གཎྷཐཱ’’ཏི ཝུཏྟེ བྷཏྟཾ བཧུཏརཾ ཝཱ སམཾ ཝཱ ཨཔྤཏརཾ ཝཱ ཧོཏི, པཝཱརེཏིཡེཝ, ཨེཝཾ ‘‘མིསྶཀཾ གཎྷཐཱ’’ཏི ཝུཏྟེཔི ཨཔྤཏརེཔི ¶ བྷཏྟེ པཝཱརཎཱཡ བྷཝིཏབྦཾ མིསྶཀནྟི བྷཏྟམིསྶཀེཡེཝ རུལ༹ྷཏྟཱ. ཏཐཱ ཧི ‘‘མིསྶཀནྟི བྷཏྟམིསྶཀེཡེཝ རུལ༹ྷཝོཧཱརཏྟཱ ཨིདཾ པན ‘བྷཏྟམིསྶཀམེཝཱ’ཏི ཝུཏྟ’’ནྟི ཏཱིསུཔི གཎྛིཔདེསུ ཝུཏྟཾ. ཨཐ ‘‘མིསྶཀ’’ནྟི བྷཏྟམིསྶཀེ རུལ༹ྷཾ ན ཧོཏི, མིསྶཀབྷཏྟཾ པན སནྡྷཱཡ ‘‘མིསྶཀཾ གཎྷཐཱ’’ཏི ཝུཏྟནྟི. ཨེཝམྤི ཡཐཱ ཨཡཱགུཀེ ནིམནྟནེ ཁཱིརཱདཱིཧི སདྡྷིཾ མདྡིཏཾ བྷཏྟམེཝ སནྡྷཱཡ ‘‘ཡཱགུཾ གཎྷཐཱ’’ཏི ཝུཏྟེ པཝཱརཎཱ ཧོཏི, ཨེཝམིདྷཱཔི མིསྶཀབྷཏྟམེཝ སནྡྷཱཡ ‘‘མིསྶཀཾ གཎྷཐཱ’’ཏི ཝུཏྟེ བྷཏྟཾ ཨཔྤཾ ཝཱ ཧོཏུ བཧུ ཝཱ, པཝཱརཎཱ ཨེཝ སིཡཱ. ཏསྨཱ ‘‘མིསྶཀ’’ནྟི བྷཏྟམིསྶཀེ རུལ༹ྷཾ ཝཱ ཧོཏུ སནྡྷཱཡབྷཱསིཏཾ ཝཱ, ཨུབྷཡཏྠཱཔི པུབྦེནཱཔརཾ ན སམེཏཱིཏི ཀིམེཏྠ ཀཱརཎཙིནྟཱཡ, ཨཱིདིསེསུ པན ཋཱནེསུ ཨཊྛཀཐཱཔམཱཎེནེཝ གནྟབྦནྟི ཨཡཾ ཨམྷཱཀཾ ཁནྟི.

‘‘ཝིསུཾ ¶ ཀཏྭཱ དེཏཱིཏི བྷཏྟསྶ ཨུཔརི ཋིཏཾ རསཱདིཾ ཝིསུཾ གཧེཏྭཱ དེཏཱི’’ཏི ཏཱིསུཔི གཎྛིཔདེསུ ཝུཏྟཾ. ཀེནཙི པན ‘‘ཡཐཱ བྷཏྟསིཏྠཾ ན པཏཏི, ཏཐཱ གཱལ༹ྷཾ ཧཏྠེན པཱིལེ༹ཏྭཱ པརིསྶཱཝེཏྭཱ དེཏཱི’’ཏི ཝུཏྟཾ. ཏཐཱཔི ཀཱརཎཾ ན དིསྶཏི. ཡཐཱ ཧི བྷཏྟམིསྶཀཾ ཡཱགུཾ ཨཱཧརིཏྭཱ ‘‘ཡཱགུཾ གཎྷཐཱ’’ཏི ཝཏྭཱ ཡཱགུམིསྶཀཾ བྷཏྟམྤི དེནྟཾ པཊིཀྑིཔཏོ པཝཱརཎཱ ན ཧོཏི, ཨེཝམིདྷཱཔི བཧུཁཱིརརསཱདཱིསུ བྷཏྟེསུ ‘‘ཁཱིརཾ གཎྷཐཱ’’ཏིཨཱདཱིནི ཝཏྭཱ ཁཱིརཱདཱིནི ཝཱ དེཏུ ཁཱིརཱདིམིསྶཀབྷཏྟཾ ཝཱ, ཨུབྷཡཐཱཔི པཝཱརཎཱཡ ན བྷཝིཏབྦཾ, ཏསྨཱ ‘‘ཝིསུཾ ཀཏྭཱ དེཏཱི’’ཏི ཏེནཱཀཱརེན དེནྟཾ སནྡྷཱཡ ཝུཏྟཾ, ན པན བྷཏྟམིསྶཀཾ ཀཏྭཱ དིཡྻམཱནཾ པཊིཀྑིཔཏོ པཝཱརཎཱ ཧོཏཱིཏི དསྶནཏྠནྟི གཧེཏབྦཾ. ཡདི པན བྷཏྟམིསྶཀཾ ཀཏྭཱ དིཡྻམཱནེ པཝཱརཎཱ ཧོཏཱིཏི ཨདྷིཔྤཱཡེན ཨཊྛཀཐཱཡཾ ‘‘ཝིསུཾ ཀཏྭཱ དེཏཱི’’ཏི ཝུཏྟཾ, ཨེཝཾ སཏི ཨཊྛཀཐཱཡེཝེཏྠ པམཱཎནྟི གཧེཏབྦཾ, ན པན ཀཱརཎནྟརཾ གཝེསིཏབྦཾ.

སཙེ ཨུཀྐུཊིཀཾ ནིསིནྣོ པཱདེ ཨམུཉྩིཏྭཱཔི བྷཱུམིཡཾ ནིསཱིདཏི, ཨིརིཡཱཔཐཾ ཝིཀོཔེནྟོ ནཱམ ཧོཏཱིཏི ཨུཀྐུཊིཀཱསནཾ ཨཝིཀོཔེཏྭཱཝ སུཁེན ནིསཱིདིཏུཾ ‘‘ཏསྶ པན ཧེཊྛཱ…པེ… ནིསཱིདནཀཾ དཱཏབྦ’’ནྟི ཝུཏྟཾ. ‘‘ཨཱསནཾ ཨཙཱལེཏྭཱཏི པཱིཋེ ཕུཊྛོཀཱསཏོ ཨཱནིསདམཾསཾ ཨམོཙེཏྭཱ, ཨནུཊྛཧིཏྭཱཏི ཝུཏྟཾ ཧོཏི, ཨདིནྣཱདཱནེ ཝིཡ ཋཱནཱཙཱཝནཾ ན གཧེཏབྦ’’ནྟི ཏཱིསུཔི གཎྛིཔདེསུ ཝུཏྟཾ.

ཨཀཔྤིཡཀཏནྟི ¶ ཨེཏྠ ཨཀཔྤིཡཀཏསྶེཝ ཨནཏིརིཏྟབྷཱཝཏོ ཀཔྤིཡཾ ཨཀཱརཱཔེཏྭཱ ཏསྨིཾ པཏྟེ པཀྑིཏྟམཱུལཕལཱདིཡེཝ ཨཏིརིཏྟཾ ན ཧོཏི, སེསཾ པན པཏྟཔརིཡཱཔནྣཾ ཨཏིརིཏྟམེཝ ཧོཏི, པརིབྷུཉྫིཏུཾ ཝཊྚཏི. ཏཾ པན མཱུལཕལཱདིཾ པརིབྷུཉྫིཏུཀཱམེན ཏཏོ ནཱིཧརིཏྭཱ ཀཔྤིཡཾ ཀཱརཱཔེཏྭཱ ཨཉྙསྨིཾ བྷཱཛནེ ཋཔེཏྭཱ ཨཏིརིཏྟཾ ཀཱརཱཔེཏྭཱ བྷུཉྫིཏབྦཾ.

སོ པུན ཀཱཏུཾ ན ལབྷཏཱིཏི ཏསྨིཾཡེཝ བྷཱཛནེ ཀརིཡམཱནཾ པཋམཾ ཀཏེན སདྡྷིཾ ཀཏཾ ཧོཏཱིཏི པུན སོཡེཝ ཀཱཏུཾ ན ལབྷཏི, ཨཉྙོ ལབྷཏི. ཨཉྙསྨིཾ པན བྷཱཛནེ ཏེན ཝཱ ཨཉྙེན ཝཱ ཀཱཏུཾ ཝཊྚཏི. ཏེནཱཧ ‘‘ཡེན ཨཀཏཾ, ཏེན ཀཱཏབྦཾ. ཡཉྩ ཨཀཏཾ, ཏཾ ཀཱཏབྦ’’ནྟི. ཏེནཔཱིཏི ཨེཏྠ པི-སདྡོ ན ཀེཝལཾ ཨཉྙེན ཝཱཏི ཨིམམཏྠཾ དཱིཔེཏི. ཨེཝཾ ཀཏནྟི ཨཉྙསྨིཾ བྷཱཛནེ ཀཏཾ. པེསེཏྭཱཏི ཨནུཔསམྤནྣསྶ ཧཏྠེ པེསེཏྭཱ. ཨིམསྶ ཝིནཡཀམྨབྷཱཝཏོ ‘‘ཨནུཔསམྤནྣསྶ ཧཏྠེ ཋིཏཾ ན ཀཱརེཏབྦ’’ནྟི ཝུཏྟཾ.

སཙེ པན ཨཱམིསསཾསཊྛཱནཱིཏི ཨེཏྠ སཙེ མུཁགཏེནཔི ཨནཏིརིཏྟེན ཨཱམིསེན སཾསཊྛཱནི ཧོནྟི ¶ , པཱཙིཏྟིཡམེཝཱཏི ཝེདིཏབྦཾ. ཏསྨཱ པཝཱརིཏེན བྷོཛནཾ ཨཏིརིཏྟཾ ཀཱརཱཔེཏྭཱ བྷུཉྫནྟེནཔི ཡཐཱ ཨཀཏེན མིསྶཾ ན ཧོཏི, ཨེཝཾ མུཁཉྩ ཧཏྠཉྩ སུདྡྷཾ ཀཏྭཱ བྷུཉྫིཏབྦཾ. ཀིཉྩཱཔི ཨཔྤཝཱརིཏསྶ པུརེབྷཏྟཾ ཡཱམཀཱལིཀཱདཱིནི ཨཱཧཱརཏྠཱཡ པརིབྷུཉྫཏོཔི ཨནཱཔཏྟི, པཝཱརིཏསྶ པན པཝཱརཎམཱུལཀཾ དུཀྐཊཾ ཧོཏིཡེཝཱཏི ‘‘ཡཱམཀཱལིཀཾ…པེ… ཨཛ྄ཛྷོཧཱརེ ཨཱཔཏྟི དུཀྐཊསྶཱ’’ཏི པཱལི༹ཡཾ ཝུཏྟཾ.

༢༤༡. ཀཱཡེན བྷུཉྫནཏོ ཝཱཙཱཡ ཨཱཎཱཔེཏྭཱ ཨཏིརིཏྟཾ ཨཀཱརཱཔནཏོ ཙ ཨཱཔཛྫཏཱིཏི ‘‘ཀཱཡཝཱཙཏོ’’ཏི ཝུཏྟཾ. སེསམེཏྠ ཨུཏྟཱནམེཝ. པཝཱརིཏབྷཱཝོ, ཨཱམིསསྶ ཨནཏིརིཏྟཏཱ, ཀཱལེ ཨཛ྄ཛྷོཧརཎནྟི ཨིམཱནི པནེཏྠ ཏཱིཎི ཨངྒཱནི.

པཋམཔཝཱརཎཱསིཀྑཱཔདཝཎྞནཱ ནིཊྛིཏཱ.

༦. དུཏིཡཔཝཱརཎཱསིཀྑཱཔདཝཎྞནཱ

༢༤༣. ཚཊྛེ ¶ སཱདྷཱརཎམེཝཱཏི ‘‘ཧནྡ བྷིཀྑུ ཁཱད ཝཱ’’ཏིཨཱདིནཱ ཝུཏྟཔཝཱརཎཱཡ སཱདྷཱརཎཾ. ‘‘བྷུཏྟསྨིཾ པཱཙིཏྟིཡ’’ནྟི མཱཏིཀཱཡཾ ཝུཏྟཏྟཱ བྷོཛནཔརིཡོསཱནེ ཨཱཔཏྟི, ན ཨཛ྄ཛྷོཧཱརེ ཨཛ྄ཛྷོཧཱརེ. ཨབྷིཧཊྛུཾ པཝཱརེཏི, ཨཱཔཏྟི པཱཙིཏྟིཡསྶཱཏི ཨིདཉྩ བྷོཛནཔརིཡོསཱནཾཡེཝ སནྡྷཱཡ ཝུཏྟནྟི ཝེདིཏབྦཾ. སེསམེཏྠ ཨུཏྟཱནམེཝ. པཝཱརིཏཏཱ, པཝཱརིཏསཉྙིཏཱ, ཨཱསཱདནཱཔེཀྑཏཱ, ཨནཏིརིཏྟེན ཨབྷིཧཊྛུཾ པཝཱརཎཱ, བྷོཛནཔརིཡོསཱནནྟི ཨིམཱནི པནེཏྠ པཉྩ ཨངྒཱནི.

དུཏིཡཔཝཱརཎཱསིཀྑཱཔདཝཎྞནཱ ནིཊྛིཏཱ.

༧. ཝིཀཱལབྷོཛནསིཀྑཱཔདཝཎྞནཱ

༢༤༧. སཏྟམེ ཨགྒསམཛྫོཏི ཨུཏྟམཾ ནཙྩཾ. ཏཾ ཀིར པབྦཏམཏྠཀེ ཋཏྭཱ ཨེཀཾ དེཝཏཾ ཨུདྡིསྶ ཀརོནྟི. ནཊཱནཾ ནཱཊཀཱནི ནཊནཱཊཀཱནི, སཱིཏཱཧརཎཱདཱིནི. ཨཔཉྙཏྟེ སིཀྑཱཔདེཏི ཨཱུནཝཱིསཏིཝསྶསིཀྑཱཔདེ ཨཔཉྙཏྟེ. ཨདཾསཱུཏི ‘‘ཝིཧཱརཾ ནེཏྭཱ ཁཱདིསྶཐཱ’’ཏི ཨདཾསུ.

༢༤༨-༢༤༩. མཱུལཀམཱུལཱདཱིནི ཨུཔདེསཏོཡེཝ ཝེདིཏབྦཱནི. ན ཧི ཏཱནི པརིཡཱཡནྟརེན ཝུཙྩམཱནཱནིཔི ¶ སཀྐཱ ཝིཉྙཱཏུཾ. པརིཡཱཡནྟརེཔི ཧི ཝུཙྩམཱནེ ཏཾ ཏཾ ནཱམཾ ཨཛཱནནྟཱནཾ སམྨོཧོཡེཝ སིཡཱ, ཏསྨཱ ཏཏྠ ན ཀིཉྩི ཝཀྑཱམ. ཁཱདནཱིཡཏྠནྟི ཁཱདནཱིཡེན ཀཏྟབྦཀིཙྩཾ. ནེཝ ཕརནྟཱིཏི ན ནིཔྥཱདེནྟི. ཏེསུ ཏེསུ ཛནཔདེསཱུཏི ཨེཏྠ ‘‘ཨེཀསྨིཾ ཛནཔདེ ཨཱཧཱརཀིཙྩཾ སཱདྷེནྟཾ སེསཛནཔདེསུཔི ན ཀཔྤཏཱི’’ཏི ཝདནྟི. རུཀྑཝལླིཨཱདཱིནནྟི ཧེཊྛཱ ཝུཏྟམེཝ སམྤིཎྜེཏྭཱ ཝུཏྟཾ. ཨནྟོཔཐཝཱིགཏོཏི སཱལཀལྱཱཎཱིཁནྡྷཾ སནྡྷཱཡ ཝུཏྟཾ. སབྦཀཔྤིཡཱནཱིཏི མཱུལཁནྡྷཏཙཔཏྟཱདིཝསེན སབྦསོ ཀཔྤིཡཱནི. ཏེསམྤི ནཱམཝསེན ན སཀྐཱ པརིཡནྟཾ དསྶེཏུནྟི སམྦནྡྷོ. ཨཙྪིཝཱདཱིནཾ ཨཔརིཔཀྐཱནེཝ ཕལཱནི ཡཱཝཛཱིཝིཀཱནཱིཏི དསྶེཏུཾ ‘‘ཨཔརིཔཀྐཱནཱི’’ཏི ཝུཏྟཾ.

ཧརཱིཏཀཱདཱིནཾ ཨཊྛཱིནཱིཏི ཨེཏྠ མིཉྫཾ པཊིཙྪཱདེཏྭཱ ཋིཏཀཔཱལཱནི ཡཱཝཛཱིཝིཀཱནཱིཏི ཨཱཙརིཡཱ. མིཉྫམྤི ཡཱཝཛཱིཝིཀནྟི ཨེཀེ. ཧིངྒཱུཏི ཧིངྒུརུཀྑཏོ པགྒྷརིཏནིཡྻཱསོ. ཧིངྒུཛཏུཨཱདཡོཔི ཧིངྒུཝིཀཏིཡོ ཨེཝ. ཏཏྠ ཧིངྒུཛཏུ ¶ ནཱམ ཧིངྒུརུཀྑསྶ དཎྜཔཏྟཱནི པཙིཏྭཱ ཀཏནིཡྻཱསོ, ཧིངྒུསིཔཱཊིཀཾ ནཱམ ཧིངྒུཔཏྟཱནི པཙིཏྭཱ ཀཏནིཡྻཱསོ. ‘‘ཨཉྙེན མིསྶེཏྭཱ ཀཏོ’’ཏིཔི ཝདནྟི. ཏཀནྟི ཨགྒཀོཊིཡཱ ནིཀྑནྟསིལེསོ. ཏཀཔཏྟིནྟི པཏྟཏོ ནིཀྑནྟསིལེསོ. ཏཀཔཎྞིནྟི པལཱསེ བྷཛྫིཏྭཱ ཀཏསིལེསོ. ‘‘དཎྜཏོ ནིཀྑནྟསིལེསོ ཏིཔི ཝདནྟི. སེསམེཏྠ ཨུཏྟཱནམེཝ. ཝིཀཱལཏཱ, ཡཱཝཀཱལིཀཏཱ, ཨཛ྄ཛྷོཧརཎནྟི ཨིམཱནི པནེཏྠ ཏཱིཎི ཨངྒཱནི.

ཝིཀཱལབྷོཛནསིཀྑཱཔདཝཎྞནཱ ནིཊྛིཏཱ.

༨. སནྣིདྷིཀཱརཀསིཀྑཱཔདཝཎྞནཱ

༢༥༢-༣. ཨཊྛམེ ཏཱདིསནྟི ཨསཱུཔབྱཉྫནཾ. ཡཾཀིཉྩི ཡཱཝཀཱལིཀཾ ཝཱ ཡཱམཀཱལིཀཾ ཝཱཏི ཨེཏྠ ‘‘ཡཱམཀཱལིཀ’’ནྟི ཨིམིནཱ ན ཀེཝལཾ ཡཱཝཀཱལིཀེ ཨེཝ སནྣིདྷིཔཙྩཡཱ པཱཙིཏྟིཡཾ, ཨཐ ཁོ ཡཱམཀཱལིཀེཔཱིཏི དསྶེཏི. ནནུ ཙ ཡཱམཀཱལིཀཾ ནེཝ ཁཱདནཱིཡེསུ ཨནྟོགདྷཾ, ན བྷོཛནཱིཡེསུ. ཏེནེཝ པདབྷཱཛནཱིཡེ ‘‘ཁཱདནཱིཡཾ ནཱམ པཉྩ བྷོཛནཱནི ཡཱམཀཱལིཀཾ སཏྟཱཧཀཱལིཀཾ ཡཱཝཛཱིཝིཀཾ ཋཔེཏྭཱ ཨཝསེསཾ ཁཱདནཱིཡཾ ནཱམ. བྷོཛནཱིཡཾ ནཱམ པཉྩ བྷོཛནཱནཱི’’ཏི ཝུཏྟཾ, ‘‘ཡོ པན བྷིཀྑུ སནྣིདྷིཀཱརཀཾ ཁཱདནཱིཡཾ ཝཱ བྷོཛནཱིཡཾ ཝཱ ཁཱདེཡྻ ཝཱ བྷུཉྫེཡྻ ཝཱ, པཱཙིཏྟིཡ’’ནྟི ཙ ཝུཏྟཾ, ཏསྨཱ ཡཱམཀཱལིཀེ པཱཙིཏྟིཡེན བྷཝིཏབྦནྟི ཀཐཾ ཝིཉྙཱཡཏཱིཏི? ཝུཙྩཏེ – པདབྷཱཛནེ ཁཱདནཱིཡ-སདྡསྶ ཨཏྠདསྶནཏྠཾ ‘‘ཡཱམཀཱལིཀཾ ¶ ཋཔེཏྭཱ’’ཏི ཝུཏྟཾ, ན པན སནྣིདྷིཔཙྩཡཱ ཨནཱཔཏྟིདསྶནཏྠཾ. ཁཱདིཏབྦཉྷི ཡཾཀིཉྩི ཁཱདནཱིཡནྟི ཨདྷིཔྤེཏཾ, ན ཙ ཡཱམཀཱལིཀེསུ ཀིཉྩི ཁཱདིཏབྦཾ ཨཏྠི པཱཏབྱབྷཱཝཏོ. ཏསྨཱ ཀིཉྩཱཔི ཡཱམཀཱལིཀཾ ཁཱདནཱིཡབྷོཛནཱིཡེཧི ན སངྒཧིཏཾ, ཏཐཱཔི ཨནཱཔཏྟིཾ དསྶེནྟེན ‘‘ཨནཱཔཏྟི ཡཱམཀཱལིཀཾ ཡཱམེ ནིདཧིཏྭཱ བྷུཉྫཏཱི’’ཏི ཝཙནཏོ ཡཱམཱཏིཀྐམེ སནྣིདྷིཔཙྩཡཱ པཱཙིཏྟིཡེན བྷཝིཏབྦནྟི ཝིཉྙཱཡཏི. ‘‘ཡཱམཀཱལིཀེན, བྷིཀྑཝེ, སཏྟཱཧཀཱལིཀཾ ཡཱཝཛཱིཝིཀཾ ཏདཧུཔཊིགྒཧིཏཾ ཡཱམེ ཀཔྤཏི, ཡཱམཱཏིཀྐནྟེ ན ཀཔྤཏཱི’’ཏི (མཧཱཝ. ༣༠༥) ཨིམིནཱཔི ¶ ཙཱཡམཏྠོ སིདྡྷོ. ཏེནེཝ བྷགཝཏོ ཨདྷིཔྤཱཡཉྙཱུཧི ཨཊྛཀཐཱཙརིཡེཧི ཡཱམཀཱལིཀེ པཱཙིཏྟིཡམེཝ ཝུཏྟཾ.

པཊིགྒཧཎེཏི གཧཎམེཝ སནྡྷཱཡ ཝུཏྟཾ. པཊིགྒཧིཏམེཝ ཧི ཏཾ, པུན པཊིགྒཧཎཀིཙྩཾ ནཏྠི. ཏེནེཝ ‘‘ཨཛ྄ཛྷོཧརིཏུཀཱམཏཱཡ གཎྷནྟསྶ པཊིགྒཧཎེ’’ཏི ཝུཏྟཾ. མཱཏིཀཱཊྛཀཐཱཡཾ (ཀངྑཱ. ཨཊྛ. སནྣིདྷིཀཱརཀསིཀྑཱཔདཝཎྞནཱ) པན ‘‘ཨཛ྄ཛྷོཧརིསྶཱམཱིཏི གཎྷནྟསྶ པཊིགྒཧཎེ’’ཨིཙྩེཝ ཝུཏྟཾ. ཡནྟི ཡཾ པཏྟཾ. སནྡིསྶཏཱིཏི ཡཱགུཡཱ ཨུཔརི སནྡིསྶཏི. ཏེལཝཎྞེ པཏྟེ སཏིཔི ནིསྣེཧབྷཱཝེ ཨངྒུལིཡཱ གྷཾསནྟསྶ ཝཎྞཝསེནེཝ ལེཁཱ པཉྙཱཡཏི, ཏསྨཱ ཏཏྠ ཨནཱཔཏྟཱིཏི དསྶནཏྠཾ ‘‘སཱ ཨབྦོཧཱརིཀཱ’’ཏི ཝུཏྟཾ. སཡཾ པཊིགྒཧེཏྭཱ ཨཔརིཙྩཏྟམེཝ ཧི དུཏིཡདིཝསེ ན ཝཊྚཏཱིཏི ཨེཏྠ པཊིགྒཧཎེ ཨནཔེཀྑཝིསྶཛྫནེན ཨནུཔསམྤནྣསྶ ནིརཔེཀྑདཱནེན ཝཱ ཝིཛཧིཏཔཊིགྒཧཎཾ པརིཙྩཏྟམེཝ ཧོཏཱིཏི ‘‘ཨཔརིཙྩཏྟ’’ནྟི ཨིམིནཱ ཨུབྷཡཐཱཔི ཨཝིཛཧིཏཔཊིགྒཧཎམེཝ ཝུཏྟཾ. ཏསྨཱ ཡཾ པརསྶ པརིཙྩཛིཏྭཱ ཨདིནྣམྤི སཙེ པཊིགྒཧཎེ ནིརཔེཀྑཝིསྶཛྫནེན ཝིཛཧིཏཔཊིགྒཧཎཾ ཧོཏི, ཏམྤི དུཏིཡདིཝསེ ཝཊྚཏཱིཏི ཝེདིཏབྦཾ.

ཡདི ཨེཝཾ ‘‘པཏྟོ དུདྡྷོཏོ ཧོཏཱི’’ཏིཨཱདཱིསུ ཀསྨཱ ཨཱཔཏྟི ཝུཏྟཱཏི? ‘‘པཊིགྒཧཎཾ ཨཝིསྶཛྫེཏྭཱཝ སཡཾ ཝཱ ཨཉྙེན ཝཱ ཏུཙྪཾ ཀཏྭཱ ན སམྨཱ དྷོཝིཏྭཱ ནིཊྛཱཔིཏེ པཏྟེ ལགྒམྤི ཨཝིཛཧིཏཔཊིགྒཧཎམེཝ ཧོཏཱིཏི ཏཏྠ ཨཱཔཏྟཱི’’ཏི ཏཱིསུཔི གཎྛིཔདེསུ ཝུཏྟཾ. ཀེཙི པན ‘‘སཱམཎེརཱནཾ པརིཙྩཛནྟཱིཏི ཨིམསྨིཾ ཨདྷིཀཱརེ ཋཏྭཱ ‘ཨཔརིཙྩཏྟམེཝཱ’ཏི ཝུཏྟཏྟཱ ཨནུཔསམྤནྣསྶ པརིཙྩཏྟམེཝ ཝཊྚཏི, ཨཔརིཙྩཏྟཾ ན ཝཊྚཏཱིཏི ཨཱཔནྣཾ, ཏསྨཱ ནིརཱལཡབྷཱཝེན པཊིགྒཧཎེ ཝིཛཧིཏེཔི ཨནུཔསམྤནྣསྶ ཨཔརིཙྩཏྟཾ ན ཝཊྚཏཱི’’ཏི ཝདནྟི, ཏཾ ཡུཏྟཾ ཝིཡ ན དིསྶཏི. ཡདགྒེན ཧི པཊིགྒཧཎཾ ཝིཛཧཏི, ཏདགྒེན སནྣིདྷིམྤི ན ཀརོཏི ཝིཛཧིཏཔཊིགྒཧཎསྶ ཨཔྤཊིགྒཧིཏསདིསཏྟཱ. པཊིགྒཧེཏྭཱ ནིདཧིཏེཡེཝ ཙ སནྣིདྷིཔཙྩཡཱ ཨཱཔཏྟི ཝུཏྟཱ. ‘‘པཊིགྒཧེཏྭཱ ཨེཀརཏྟཾ ཝཱིཏིནཱམིཏསྶེཏཾ ཨདྷིཝཙན’’ནྟི ཧི ཝུཏྟཾ.

པཱལི༹ཡཾ ¶ ‘‘སཏྟཱཧཀཱལིཀཾ ཡཱཝཛཱིཝིཀཾ ཨཱཧཱརཏྠཱཡ པཊིགྒཎྷཱཏི, ཨཱཔཏྟི དུཀྐཊསྶཱ’’ཏིཨཱདིནཱ སནྣིཧིཏེསུ སཏྟཱཧཀཱལིཀཡཱཝཛཱིཝིཀེསུ པུརེབྷཏྟམྤི ཨཱཧཱརཏྠཱཡ ཨཛ྄ཛྷོཧརཎེཔི དུཀྐཊསྶ ཝུཏྟཏྟཱ ¶ ཡཱམཀཱལིཀེཔི ཨཱཧཱརཏྠཱཡ ཨཛ྄ཛྷོཧརཎེ ཝིསུཾ དུཀྐཊེནཔི བྷཝིཏབྦནྟི ཨཱཧ ‘‘ཨཱཧཱརཏྠཱཡ ཨཛ྄ཛྷོཧརཏོ དུཀྐཊེན སདྡྷིཾ པཱཙིཏྟིཡ’’ནྟི. པཀཏིཨཱམིསེཏི ཨོདནཱདིཀཔྤིཡཱམིསེ. ཡཱམཀཱལིཀཾ སཏི པཙྩཡེ སཱམིསེན མུཁེན ཨཛ྄ཛྷོཧརཏོ དྭེཏི ཧིཡྻོ པཊིགྒཧིཏཡཱམཀཱལིཀཾ ཨཛྫ པུརེབྷཏྟཾ སཱམིསེན མུཁེན བྷུཉྫཏོ སནྣིཧིཏཡཱམཀཱལིཀཔཙྩཡཱ ཨེཀཾ པཱཙིཏྟིཡཾ, སནྣིཧིཏེན སཾསཊྛཨཱམིསཔཙྩཡཱ ཨེཀནྟི དྭེ པཱཙིཏྟིཡཱནི. ཝིཀཔྤདྭཡེཔཱིཏི སཱམིསེན ནིརཱམིསེནཱཏི ཝུཏྟཝིདྷཱནདྭཡེ. དུཀྐཊཾ ཝཌྜྷཏཱིཏི ཨཱཧཱརཏྠཱཡ ཨཛ྄ཛྷོཧརཎཔཙྩཡཱ དུཀྐཊཾ ཝཌྜྷཏི. ཐུལླཙྩཡཉྩ དུཀྐཊཉྩ ཝཌྜྷཏཱིཏི མནུསྶམཾསེ ཐུལླཙྩཡཾ, སེསཨཀཔྤིཡམཾསེསུ དུཀྐཊཾ ཝཌྜྷཏི.

༢༥༥. པཊིགྒཧཎཔཙྩཡཱ ཏཱཝ དུཀྐཊནྟི ཨེཏྠ སནྣིཧིཏཏྟཱ པུརེབྷཏྟམྤི དུཀྐཊམེཝ. སཏི པཙྩཡེ པན སནྣིཧིཏམྤི སཏྟཱཧཀཱལིཀཾ ཡཱཝཛཱིཝིཀཾ བྷེསཛྫཏྠཱཡ གཎྷནྟསྶ པརིབྷུཉྫནྟསྶ ཙ ཨནཱཔཏྟིཡེཝ. སེསམེཏྠ ཨུཏྟཱནམེཝ. ཡཱཝཀཱལིཀཡཱམཀཱལིཀཏཱ, སནྣིདྷིབྷཱཝོ, ཏསྶ ཨཛ྄ཛྷོཧརཎནྟི ཨིམཱནི པནེཏྠ ཏཱིཎི ཨངྒཱནི.

སནྣིདྷིཀཱརཀསིཀྑཱཔདཝཎྞནཱ ནིཊྛིཏཱ.

༩. པཎཱིཏབྷོཛནསིཀྑཱཔདཝཎྞནཱ

༢༥༧-༢༥༩. ནཝམེ པཎཱིཏསཾསཊྛཱནི བྷོཛནཱནི པཎཱིཏབྷོཛནཱནི. ཡཐཱ ཧི ཨཱཛཉྙཡུཏྟོ རཐོ ‘‘ཨཱཛཉྙརཐོ’’ཏི ཝུཙྩཏི, ཨེཝམིདྷཱཔི པཎཱིཏསཾསཊྛཱནི སཏྟདྷཉྙནིབྦཏྟཱནི བྷོཛནཱནི ‘‘པཎཱིཏབྷོཛནཱནཱི’’ཏི ཝུཏྟཱནི. ཡེཧི པན པཎཱིཏེཧི སཾསཊྛཱནི, ཏཱནི ‘‘པཎཱིཏབྷོཛནཱནཱི’’ཏི ཝུཙྩནྟི, ཏེསཾ པབྷེདདསྶནཏྠཾ ‘‘སེཡྻཐིདཾ, སཔྤི ནཝནཱིཏ’’ནྟིཨཱདི པཱལི༹ཡཾ ཝུཏྟཾ. ‘‘ཡེསཾ མཾསཾ ཀཔྤཏཱི’’ཏི ཨིདཉྩ པཱཙིཏྟིཡཝཏྠུཔརིཙྪེདདསྶནཏྠཾ ཝུཏྟཾ, ན པན ཀཔྤིཡཝཏྠུཔརིཙྪེདདསྶནཏྠཾ. ན ཧི ཨཀཔྤིཡམཾསསཏྟཱནཾ སཔྤིཨཱདཱིནི ན ཀཔྤནྟི. ཨེཀཉྷི མནུསྶཝསཱཏེལཾ ཋཔེཏྭཱ སབྦེསཾ ཁཱིརསཔྤིནཝནཱིཏཝསཱཏེལེསུ ཨཀཔྤིཡཾ ནཱམ ནཏྠི. སཔྤིབྷཏྟནྟི ཨེཏྠ ཀིཉྩཱཔི སཔྤིསཾསཊྛཾ བྷཏྟཾ སཔྤིབྷཏྟཾ, སཔྤི ཙ བྷཏྟཉྩ སཔྤིབྷཏྟནྟིཔི ཝིཉྙཱཡཏི, ཨཊྛཀཐཱསུ པན ‘‘སཱལིབྷཏྟཾ ཝིཡ སཔྤིབྷཏྟཾ ནཱམ ནཏྠཱི’’ཏི ཀཱརཎཾ ཝཏྭཱ དུཀྐཊསྶེཝ ¶ དལ༹ྷཏརཾ ¶ ཀཏྭཱ ཝུཏྟཏྟཱ ན སཀྐཱ ཨཉྙཾ ཝཏྟུཾ. ཨཊྛཀཐཱཙརིཡཱ ཨེཝ ཧི ཨཱིདིསེསུ ཋཱནེསུ པམཱཎཾ.

མཱུལནྟི ཀཔྤིཡབྷཎྜཾ སནྡྷཱཡ ཝུཏྟཾ. ཨནཱཔཏྟཱིཏི ཝིསངྐེཏཏྟཱ སབྦཱཧིཡེཝ ཨཱཔཏྟཱིཧི ཨནཱཔཏྟི. ཀེཙི པན ‘‘པཱཙིཏྟིཡེནེཝ ཨནཱཔཏྟི ཝུཏྟཱ, སཱུཔོདནཝིཉྙཏྟིདུཀྐཊཾ པན ཧོཏིཡེཝཱ’’ཏི ཝདནྟི, ཏཾ ན གཧེཏབྦཾ. ཀཔྤིཡསཔྤིནཱ ཨཀཔྤིཡསཔྤིནཱཏི ཙ ཨིདཾ ཀཔྤིཡཱཀཔྤིཡམཾསཱནཾ ཝསེན ཝུཏྟཾ, ཏསྨཱ ཀཔྤིཡམཾསསཔྤིནཱ ཨཀཔྤིཡམཾསསཔྤིནཱཏི ཨེཝམེཏྠ ཨཏྠོ གཧེཏབྦོ. ནཱནཱཝཏྠུཀཱནཱིཏི སཔྤིནཝནཱིཏཱདཱིནཾ ཝསེན ཝུཏྟཾ.

༢༦༡. མཧཱནཱམསིཀྑཱཔདེན ཀཱརེཏབྦོཏི ཨེཏྠ –

‘‘ཨགིལཱནེན བྷིཀྑུནཱ ཙཏུམཱསཔཙྩཡཔཝཱརཎཱ སཱདིཏབྦཱ ཨཉྙཏྲ པུནཔཝཱརཎཱཡ ཨཉྙཏྲ ནིཙྩཔཝཱརཎཱཡ, ཏཏོ ཙེ ཨུཏྟརི སཱདིཡེཡྻ, པཱཙིཏྟིཡ’’ནྟི (པཱཙི. ༣༠༦) –

ཨིདཾ མཧཱནཱམསིཀྑཱཔདཾ ནཱམ. ཨིམིནཱ ཙ སིཀྑཱཔདེན སངྒྷཝསེན གིལཱནཔཙྩཡཔཝཱརཎཱཡ པཝཱརིཏཊྛཱནེ སཙེ ཏཏྠ རཏྟཱིཧི ཝཱ བྷེསཛྫེཧི ཝཱ པརིཙྪེདོ ཀཏོ ཧོཏི, ཨེཏྟཀཱཡེཝ རཏྟིཡོ ཨེཏྟཀཱནི ཝཱ བྷེསཛྫཱནི ཝིཉྙཱཔེཏབྦཱནཱིཏི. ཨཐ ཏཏོ རཏྟིཔརིཡནྟཏོ ཝཱ བྷེསཛྫཔརིཡནྟཏོ ཝཱ ཨུཏྟརི ན བྷེསཛྫཀརཎཱིཡེན ཝཱ བྷེསཛྫཾ ཨཉྙབྷེསཛྫཀརཎཱིཡེན ཝཱ ཨཉྙཾ བྷེསཛྫཾ ཝིཉྙཱཔེནྟསྶ པཱཙིཏྟིཡཾ ཝུཏྟཾ. ཏསྨཱ ཨགིལཱནོ གིལཱནསཉྙཱི ཧུཏྭཱ པཉྩ བྷེསཛྫཱནི ཝིཉྙཱཔེནྟོ ན བྷེསཛྫཀརཎཱིཡེན བྷེསཛྫཾ ཝིཉྙཱཔེནྟོ ནཱམ ཧོཏཱིཏི ‘‘མཧཱནཱམསིཀྑཱཔདེན ཀཱརེཏབྦོ’’ཏི ཝུཏྟཾ. ཨེཏཱནི པཱཊིདེསནཱིཡཝཏྠཱུནཱིཏི པཱལི༹ཡཾ ཨཱགཏསཔྤིཨཱདཱིནི སནྡྷཱཡ ཝུཏྟཾ. པཱལི༹ཡཾ ཨནཱགཏཱནི པན ཨཀཔྤིཡསཔྤིཨཱདཱིནི བྷིཀྑུནཱིནམྤི དུཀྐཊཝཏྠཱུནཱིཏི ཝེདིཏབྦཾ. སཱུཔོདནཝིཉྙཏྟིཡནྟི བྷིཀྑཱུནཾ པཱཙིཏྟིཡཝཏྠཱུནི བྷིཀྑུནཱིནཾ པཱཊིདེསནཱིཡཝཏྠཱུནི ཙ ཋཔེཏྭཱ ཨཝསེསཝིཉྙཏྟིཾ སནྡྷཱཡ ཝུཏྟཾ. སེསམེཏྠ ཨུཏྟཱནམེཝ. པཎཱིཏབྷོཛནཏཱ, ཨགིལཱནཏཱ, ཨཀཏཝིཉྙཏྟིཡཱ པཊིལཱབྷོ, ཨཛ྄ཛྷོཧརཎནྟི ཨིམཱནི པནེཏྠ ཙཏྟཱརི ཨངྒཱནི.

པཎཱིཏབྷོཛནསིཀྑཱཔདཝཎྞནཱ ནིཊྛིཏཱ.

༡༠. དནྟཔོནསིཀྑཱཔདཝཎྞནཱ

༢༦༣. དསམེ ¶ ¶ ཨཡྻཝོསཱཊིཏཀཱནཱིཏི པིཏུཔིཎྜསྶེཏཾ ཨདྷིཝཙནཾ. ཨུམྨཱརེཏི སུསཱནེ ཀཏགེཧསྶ ཨཏྟནོ གེཧསྶ ཝཱ ཨུམྨཱརེ. གྷནབདྡྷོཏི གྷནམཾསེན སམྦདྡྷོ, ཀཐིནསཾཧཏསརཱིརོཏི ཝུཏྟཾ ཧོཏི.

༢༦༤. མུཁདྭཱརནྟི གལནཱལི༹ཀཾ. ཨཱཧཱརནྟི ཨཛ྄ཛྷོཧརིཏབྦཾ ཡཾཀིཉྩི ཡཱཝཀཱལིཀཱདིཾ. ཨཱཧརེཡྻཱཏི མུཁདྭཱརཾ པཝེསེཡྻ. མུཁེན ཝཱ པཝིཊྛཾ ཧོཏུ ནཱསིཀཱཡ ཝཱ, གལེན ཨཛ྄ཛྷོཧརཎཱིཡཏྟཱ སབྦམྤི ཏཾ མུཁདྭཱརཾ པཝེསིཏམེཝ ཧོཏི. ཡསྨཱ པན ཏེ བྷིཀྑཱུ ཨནཱཧཱརེཔི ཨུདཀེ ཨཱཧཱརསཉྙཱཡ དནྟཔོནེ ཙ མུཁདྭཱརཾ ཨཱཧཊཾ ཨིདནྟི སཉྙཱཡ ཀུཀྐུཙྩཱཡིཾསུ, ཏསྨཱ ཝུཏྟཾ ‘‘ཏེ བྷིཀྑཱུ ཨདིནྣཾ…པེ… སམྨཱ ཨཏྠཾ ཨསལླཀྑེཏྭཱ ཀུཀྐུཙྩཱཡིཾསཱུ’’ཏི. ཨུདཀཉྷི ཡཐཱསུཁཾ པཱཏུཾ དནྟཀཊྛཉྩ དནྟཔོནཔརིབྷོགེན པརིབྷུཉྫིཏུཾ ཝཊྚཏི, ཏསྶ པན རསཾ གིལིཏུཾ ན ཝཊྚཏི. སཙེཔི དནྟཀཊྛརསོ ཨཛཱནནྟསྶ ཨནྟོ པཝིསཏི, པཱཙིཏྟིཡམེཝ. ཨནཛ྄ཛྷོཧརནྟེན པན དནྟཀཊྛཾ ཝཱ ཧོཏུ ཨཉྙཾ ཝཱ, ཀིཉྩི མུཁེ པཀྑིཔིཏུཾ ཝཊྚཏི.

༢༦༥. ཨཀལླཀོཏི གིལཱནོ སཧཏྠཱ པརིབྷུཉྫིཏུཾ ཨསཀྐོནྟོ མུཁེན པཊིགྒཎྷཱཏི. ཨུཙྩཱརཎམཏྟནྟི ཨུཀྑིཔནམཏྟཾ. ཨེཀདེསེནཔཱིཏི ཨངྒུལིཡཱཔི ཕུཊྛམཏྟེན. ཏཾ ཙེ པཊིགྒཎྷཱཏི, སབྦཾ པཊིགྒཧིཏམེཝཱཏི ཝེཎུཀོཊིཡཱ བནྡྷིཏྭཱ ཋཔིཏཏྟཱ. སཙེཔི བྷཱུམིཡཾ ཋིཏམེཝ གྷཊཾ དཱཡཀེན ཧཏྠཔཱསེ ཋཏྭཱ གྷཊཾ དསྶཱམཱིཏི དིནྣཝེཎུཀོཊིགྒཧཎཝསེན པཊིགྒཎྷཱཏི, ཨུབྷཡཀོཊིབདྡྷཾ སབྦམྤི པཊིགྒཧིཏམེཝ ཧོཏི. བྷིཀྑུསྶ ཨཏྠཱཡ ཨཔཱིལེ༹ཏྭཱ པཀཏིཡཱ པཱིལི༹ཡམཱནཨུཙྪུརསཾ སནྡྷཱཡ ‘‘གཎྷཐཱ’’ཏི ཝུཏྟཏྟཱ ‘‘ཨབྷིཧཱརོ ན པཉྙཱཡཏཱི’’ཏི ཝུཏྟཾ. ཧཏྠཔཱསེ ཋིཏསྶ པན བྷིཀྑུསྶ ཨཏྠཱཡ པཱིལི༹ཡམཱནཱ ཨུཙྪུཏོ པགྒྷརནྟཾ རསཾ གཎྷིཏུཾ ཝཊྚཏི, དོཎིཀཱཡ སཡཾ པགྒྷརནྟཾ ཨུཙྪུརསཾ མཛ྄ཛྷེ ཨཱཝརིཏྭཱ ཨཱཝརིཏྭཱ ཝིསྶཛྫིཏམྤི གཎྷིཏུཾ ཝཊྚཏི. ཀཏྠཙི ཨཊྛཀཐཱསུ.

ཨསཾཧཱརིམེཏི ཐཱམམཛ྄ཛྷིམེན པུརིསེན ཨསཾཧཱརིཡེ. ‘‘ཏིནྟིཎིཀཱདིཔཎྞེསཱུ’’ཏི ཝཙནཏོ སཱཁཱསུ པཊིགྒཧཎཾ རུཧཏཱིཏི དཊྛབྦཾ. པུཉྪིཏྭཱ པཊིགྒཧེཏྭཱཏི ཨེཏྠ ‘‘པུཉྪིཏེ པཊིགྒཧཎཀིཙྩཾ ནཏྠི, ཏསྨཱ པུཉྪིཏྭཱ གཧེཏྭཱཏི ¶ ཨེཝམཏྠོ གཧེཏབྦོ’’ཏི ཝདནྟི. པུཉྪིཏྭཱ པཊིགྒཧེཏྭཱ ཝཱཏི ཨེཝམེཏྠ ཨཏྠོ དཊྛབྦོ. པཏྟེ པཏིཏརཛནཙུཎྞཉྷི ཨབྦྷནྟརཔརིབྷོགཏྠཱཡ ¶ ཨཔརིཧཊབྷཱཝཏོ པཊིགྒཧེཏྭཱ པརིབྷུཉྫིཏུཾ ཝཊྚཏི. པུབྦཱབྷོགསྶ ཨནུརཱུཔེན ‘‘ཨནུཔསམྤནྣསྶ དཏྭཱ…པེ… ཝཊྚཏཱི’’ཏི ཝུཏྟཾ. ཡསྨཱ པན ཏཾ ‘‘ཨཉྙསྶ དསྶཱམཱི’’ཏི ཙིཏྟུཔྤཱདམཏྟེན པརསནྟཀཾ ནཱམ ན ཧོཏི, ཏསྨཱ ཏསྶ ཨདཏྭཱཔི པཊིགྒཧེཏྭཱ པརིབྷུཉྫིཏུཾ ཝཊྚཏི.

བྷིཀྑུསྶ དེཏཱིཏི ཨཉྙསྶ བྷིཀྑུསྶ དེཏི. ཀཉྫིཀནྟི ཁཱིརརསཱདིཾ ཡཾཀིཉྩི དྲཝཾ སནྡྷཱཡ ཝུཏྟཾ. ཧཏྠཏོ མོཙེཏྭཱ པུན གཎྷཱཏི, ཨུགྒཧིཏཀཾ ཧོཏཱིཏི ཨཱཧ ‘‘ཧཏྠཏོ ཨམོཙེནྟེནེཝཱ’’ཏི. ཨཱལུལེནྟཱནནྟི ཨཱལོལེནྟཱནཾ, ཨཡམེཝ ཝཱ པཱཋོ. ཨཱཧརིཏྭཱ བྷཱུམིཡཾ ཋཔིཏཏྟཱ ཨབྷིཧཱརོ ནཏྠཱིཏི ཨཱཧ ‘‘པཏྟོ པཊིགྒཧེཏབྦོ’’ཏི. པཋམཏརཾ ཨུལུ༹ངྐཏོ ཐེཝཱ པཏྟེ པཏནྟཱིཏི ཨེཏྠ ‘‘ཡཐཱ པཋམཏརཾ པཏིཏཐེཝེ དོསོ ནཏྠི, ཏཐཱ ཨཱཀིརིཏྭཱ ཨཔནེནྟཱནཾ པཙྪཱ པཏིཏཐེཝེཔི ཨབྷིཧཊཏྟཱ ནེཝཏྠི དོསོ’’ཏི ཝདནྟི. ཙརུཀེནཱཏི ཁུདྡཀབྷཱཛནེན. མུཁཝཊྚིཡཱཔི གཧེཏུཾ ཝཊྚཏཱིཏི མུཁཝཊྚིཾ ཨུཀྑིཔིཏྭཱ ཧཏྠེ ཕུསཱཔིཏེ གཎྷིཏུཾ ཝཊྚཏི. ཀེཙཱིཏི ཨབྷཡགིརིཝཱསིནོ. ཨེས ནཡོཏི ཀཱཡཔཊིབདྡྷཔཊིབདྡྷམྤི ཀཱཡཔཊིབདྡྷམེཝཱཏི ཨཡཾ ནཡོ. ཏཐཱ ཙ ཏཏྠ ཀཱཡཔཊིབདྡྷེ ཏཾཔཊིབདྡྷེ ཙ ཐུལླཙྩཡམེཝ ཝུཏྟཾ.

ཏེནཱཏི ཡསྶ བྷིཀྑུནོ སནྟིཀཾ གཏཾ, ཏེན. ཏསྨཱཏི ཡསྨཱ མཱུལཊྛསྶེཝ པརིབྷོགོ ཨནུཉྙཱཏོ, ཏསྨཱ. ཏཾ དིཝསཾ ཧཏྠེན གཧེཏྭཱ དུཏིཡདིཝསེ པཊིགྒཧེཏྭཱ པརིབྷུཉྫནྟསྶ ཨུགྒཧིཏཀཔཊིགྒཧིཏཾ ཧོཏཱིཏི ཨཱཧ ‘‘ཨནཱམསིཏྭཱ’’ཏི. ཨཔྤཊིགྒཧིཏཏྟཱ ‘‘སནྣིདྷིཔཙྩཡཱ ཨནཱཔཏྟཱི’’ཏི ཝུཏྟཾ. ཨཔྤཊིགྒཧེཏྭཱ པརིབྷུཉྫནྟསྶ ཨདིནྣམུཁདྭཱརཱཔཏྟི ཧོཏཱིཏི ཨཱཧ ‘‘པཊིགྒཧེཏྭཱ པན པརིབྷུཉྫིཏབྦ’’ནྟི. ‘‘ཏཾ དིཝསཾ…པེ… ན ཏཏོ པར’’ནྟི ཝཙནཏོ ཏཾ དིཝསཾ ཧཏྠེན གཧེཏྭཱ ཝཱ ཨགྒཧེཏྭཱ ཝཱ ཋཔིཏཾ དུཏིཡདིཝསེ ཨཔྤཊིགྒཧེཏྭཱ པརིབྷུཉྫནྟསྶ ཨདིནྣམུཁདྭཱརཱཔཏྟི ཧོཏི, ཧཏྠེན གཧེཏྭཱ ཋཔིཏཾ དུཏིཡདིཝསེ པཊིགྒཧེཏྭཱ པརིབྷུཉྫནྟསྶ པན ཨུགྒཧིཏཀཔཊིགྒཧིཏཾ ཧོཏི. ཨཔྤཊིགྒཧིཏམེཝ ཧི ཧཏྠེན གཧེཏྭཱ ཋཔིཏཾ. ‘‘སཱམཾ གཧེཏྭཱ པརིབྷུཉྫིཏུ’’ནྟི ཧི ཝཙནཏོ ཨཔྤཊིགྒཧིཏསྶེཝ ཏསྨིཾ དིཝསེ པརིབྷོགོ ཨནུཉྙཱཏོ. ཏསྨཱ ཡཾ ཝུཏྟཾ གཎྛིཔདེ ‘‘ཏཾ དིཡྻམཱནཾ པཏཏཱིཏི ཨེཏྠ ཡཐཱ གཎབྷོཛནཱདཱིསུ གིལཱནཱདཱིནཾ ¶ ཀུཀྐུཙྩཱཡནྟཱནཾ གཎབྷོཛནཾ ཨནུཉྙཱཏཾ, ཨེཝམིདྷཱཔི བྷགཝཏཱ པཊིགྒཧིཏམེཝ ཀུཀྐུཙྩཝིནོདནཏྠཾ ཨནུཉྙཱཏ’’ནྟི, ཏཾ ན གཧེཏབྦཾ. ‘‘ཏཾ དིཡྻམཱནཾ པཏཏཱི’’ཏི ཨཝིསེསེན ཝུཏྟཏྟཱ ཙཏཱུསུཔི ཀཱལིཀེསུ ཨཡཾ ནཡོ ཝེདིཏབྦོ.

སཏྠཀེནཱཏི པཊིགྒཧིཏསཏྠཀེན. ཀསྨཱ པནེཏྠ ཨུགྒཧིཏཔཙྩཡཱ སནྣིདྷིཔཙྩཡཱ ཝཱ དོསོ ¶ ན སིཡཱཏི ཨཱཧ ‘‘ན ཧི ཏཾ པརིབྷོགཏྠཱཡ པརིཧརནྟཱི’’ཏི. ཨིམིནཱཝ བཱཧིརཔརིབྷོགཏྠཾ སཱམཾ གཧེཏྭཱ ཨནུཔསམྤནྣེན དིནྣཾ ཝཱ གཧེཏྭཱ པརིཧརིཏུཾ ཝཊྚཏཱིཏི དཱིཔེཏི. ཏསྨཱ པཏྟསམྨཀྑནཱདིཨཏྠཾ སཱམཾ གཧེཏྭཱ པརིཧཊཏེལཱདིཾ སཙེ པརིབྷུཉྫིཏུཀཱམོ ཧོཏི, པཊིགྒཧེཏྭཱ པརིབྷུཉྫནྟསྶ ཨནཱཔཏྟི. ཨབྦྷནྟརཔརིབྷོགཏྠཾ པན སཱམཾ གཧིཏཾ པཊིགྒཧེཏྭཱ པརིབྷུཉྫནྟསྶ ཨུགྒཧིཏཀཔཊིགྒཧིཏཾ ཧོཏི, ཨཔྤཊིགྒཧེཏྭཱ པརིབྷུཉྫནྟསྶ ཨདིནྣམུཁདྭཱརཱཔཏྟི ཧོཏི, ཨབྦྷནྟརཔརིབྷོགཏྠམེཝ ཨནུཔསམྤནྣེན དིནྣཾ གཧེཏྭཱ པརིཧརནྟསྶ སིངྒཱིལོཎཀཔྤོ ཝིཡ སནྣིདྷིཔཙྩཡཱ ཨཱཔཏྟི ཧོཏི. ཀེཙི པན ‘‘ཐཱམམཛ྄ཛྷིམསྶ པུརིསསྶ ཨུཙྩཱརཎམཏྟཾ ཧོཏཱིཏིཨཱདིནཱ ཝུཏྟཔཉྩངྒསམྤཏྟིཡཱ པཊིགྒཧཎསྶ རུཧནཏོ བཱཧིརཔརིབྷོགཏྠམྤི སཙེ ཨནུཔསམྤནྣེན དིནྣཾ གཎྷཱཏི, པཊིགྒཧིཏམེཝཱ’’ཏི ཝདནྟི. ཨེཝཾ སཏི ཨིདྷ བཱཧིརཔརིབྷོགཏྠཾ ཨནུཔསམྤནྣེན དིནྣཾ གཧེཏྭཱ པརིཧརནྟསྶ སནྣིདྷིཔཙྩཡཱ ཨཱཔཏྟི ཝཏྟབྦཱ སིཡཱ, ‘‘ན ཧི ཏཾ པརིབྷོགཏྠཱཡ པརིཧརནྟཱི’’ཏི ཙ ན ཝཏྟབྦཾ, ཏསྨཱ བཱཧིརཔརིབྷོགཏྠཾ གཧིཏཾ པཊིགྒཧིཏཾ ནཱམ ན ཧོཏཱིཏི ཝེདིཏབྦཾ. ཡདི ཨེཝཾ པཉྩསུ པཊིགྒཧཎངྒེསུ ‘‘པརིབྷོགཏྠཱཡཱ’’ཏི ཝིསེསནཾ ཝཏྟབྦནྟི? ན ཝཏྟབྦཾ. པཊིགྒཧཎཉྷི པརིབྷོགཏྠམེཝ ཧོཏཱིཏི ‘‘པརིབྷོགཏྠཱཡཱ’’ཏི ཝིསུཾ ཨཝཏྭཱ ‘‘ཏཉྩེ བྷིཀྑུ ཀཱཡེན ཝཱ ཀཱཡཔཊིབདྡྷེན ཝཱ པཊིགྒཎྷཱཏཱི’’ཏི ཨེཏྟཀམེཝ ཝུཏྟཾ. ཨཔརེ པན ‘‘སཏིཔི པཊིགྒཧཎེ ‘ན ཧི ཏཾ པརིབྷོགཏྠཱཡ པརིཧརནྟཱི’ཏི ཨིདྷ ཨཔརིབྷོགཏྠཱཡ པརིཧརཎེ ཨནཱཔཏྟི ཝུཏྟཱ’’ཏི ཝདནྟི. ཨུདུཀྑལམུསལཱནི ཁིཡྻནྟཱིཏི ཨེཏྠ ཨུདུཀྑལམུསལཱནཾ ཁཡེན པིསིཏཀོཊྚིཏབྷེསཛྫེསུ སཙེ ཨཱགནྟུཀཝཎྞོ པཉྙཱཡཏི, ན ཝཊྚཏི.

སུདྡྷཾ ཨུདཀཾ ཧོཏཱིཏི རུཀྑསཱཁཱདཱིཧི གལི༹ཏྭཱ པཏནཨུདཀཾ སནྡྷཱཡ ཝུཏྟཾ. པཏྟོ ཝཱསྶ པཊིགྒཧེཏབྦོཏི ཨེཏྠཱཔི པཏྟགཏཾ ཚུཔིཏྭཱ དེནྟསྶ ཧཏྠལགྒེན ¶ ཨཱམིསེན དོསཱབྷཱཝཏྠཾ པཏྟཔཊིགྒཧཎནྟི ཨབྦྷནྟརཔརིབྷོགཏྠམེཝ པཊིགྒཧཎཾ ཝེདིཏབྦཾ. ཡཾ སཱམཎེརསྶ པཏྟེ པཏཏི…པེ… པཊིགྒཧཎཾ ན ཝིཛཧཏཱིཏི ཨེཏྠ པུནཔྤུནཾ གཎྷནྟསྶ ཨཏྟནོ པཏྟེ པཀྑིཏྟམེཝ ‘‘ཨཏྟནོ སནྟཀ’’ནྟི སནྣིཊྛཱནཀརཎཏོ ཧཏྠགཏཾ པཊིགྒཧཎཾ ན ཝིཛཧཏི, པརིཙྪིནྡིཏྭཱ དིནྣཾ པན གཎྷནྟསྶ གཧཎསམཡེཡེཝ ‘‘ཨཏྟནོ སནྟཀ’’ནྟི སནྣིཊྛཱནསྶ ཀཏཏྟཱ ཧཏྠགཏཾ པཊིགྒཧཎཾ ཝིཛཧཏི. ཀེསཉྩི ཨཏྠཱཡ ཨོདནཾ པཀྑིཔཏཱིཏི ཨེཏྠ ཨནུཔསམྤནྣསྶ ཨཏྠཱཡ པཀྑིཔནྟེཔི ‘‘ཨཱགནྟྭཱ གཎྷིསྶཏཱི’’ཏི སཡམེཝ པཀྑིཔིཏྭཱ ཋཔནཏོ པཊིགྒཧཎཾ ན ཝིཛཧཏི, ཨནུཔསམྤནྣསྶ ཧཏྠེ པཀྑིཏྟཾ པན ཨནུཔསམྤནྣེནེཝ ཋཔིཏཾ ནཱམ ཧོཏཱིཏི པཊིགྒཧཎཾ ཝིཛཧཏི པརིཙྩཏྟབྷཱཝཏོ. ཏེན ཝུཏྟཾ ‘‘སཱམཎེར…པེ… པརིཙྩཏྟཏྟཱ’’ཏི.

པཊིགྒཧཎཱུཔགཾ བྷཱརཾ ནཱམ ཐཱམམཛ྄ཛྷིམསྶ པུརིསསྶ ཨུཀྑེཔཱརཧཾ. ཀིཉྩཱཔི ཨཝིསྶཛྫེཏྭཱཝ ¶ ཨཉྙེན ཧཏྠེན པིདཧནྟསྶ དོསོ ནཏྠི, ཏཐཱཔི ན པིདཧིཏབྦནྟི ཨཊྛཀཐཱཔམཱཎེནེཝ གཧེཏབྦཾ. མཙྪིཀཝཱརཎཏྠནྟི ཨེཏྠ ‘‘སཙེཔི སཱཁཱཡ ལགྒརཛཾ པཏྟེ པཏཏི, སུཁེན པརིབྷུཉྫིཏུཾ སཀྐཱཏི སཱཁཱཡ པཊིགྒཧིཏཏྟཱ ཨབྦྷནྟརཔརིབྷོགཏྠམེཝིདྷ པཊིགྒཧཎནྟི མཱུལཔཊིགྒཧཎམེཝ ཝཊྚཏཱི’’ཏི ཝུཏྟཾ. ཨཔརེ པན ‘‘མཙྪིཀཝཱརཎཏྠནྟི ཨེཏྠ ཝཙནམཏྟཾ གཧེཏྭཱ བཱཧིརཔརིབྷོགཏྠཾ གཧིཏ’’ནྟི ཝདནྟི. ཏསྨིམྤི ཨསཏཱིཏི ཙཱཊིཡཱ ཝཱ ཀུཎྜཀེ ཝཱ ཨསཏི. ཨནུཔསམྤནྣཾ གཱཧཱཔེཏྭཱཏི ཏཾཡེཝ ཨཛ྄ཛྷོཧརཎཱིཡབྷཎྜཾ ཨནུཔསམྤནྣེན གཱཧཱཔེཏྭཱ. ཐེརསྶ པཏྟཾ ཨནུཐེརསྶཱཏི ཐེརསྶ པཏྟཾ ཨཏྟནཱ གཧེཏྭཱ ཨནུཐེརསྶ དེཏི. ཏུཡ྄ཧཾ ཡཱགུཾ མཡ྄ཧཾ དེཧཱིཏི ཨེཏྠ ཨེཝཾ ཝཏྭཱ སཱམཎེརསྶ པཏྟཾ གཧེཏྭཱ ཨཏྟནོཔི པཏྟཾ ཏསྶ དེཏི. ཨེཏྠ པནཱཏི པཎྜིཏོ སཱམཎེརོཏིཨཱདིཔཏྟཔརིཝཏྟནཀཐཱཡ. ཀཱརཎཾ ཨུཔཔརིཀྑིཏབྦནྟི ཡཐཱ མཱཏུཨཱདཱིནཾ ཏེལཱདཱིནི ཧརནྟོ ཏཐཱརཱུཔེ ཀིཙྩེ ཨནུཔསམྤནྣེན ཨཔརིཝཏྟེཏྭཱཝ པརིབྷུཉྫིཏུཾ ལབྷཏི, ཨེཝམིདྷ པཏྟཔརིཝཏྟནཾ ཨཀཏྭཱ པརིབྷུཉྫིཏུཾ ན ལབྷཏཱིཏི ཨེཏྠ ཀཱརཎཾ ཝཱིམཾསིཏབྦནྟི ཨཏྠོ.

ཨེཏྠ པན ‘‘སཱམཎེརེཧི གཧིཏཏཎྜུལེསུ པརིཀྑཱིཎེསུ ཨཝསྶཾ ཨམྷཱཀཾ སཱམཎེརཱ སངྒཧཾ ཀརོནྟཱིཏི ཝིཏཀྐུཔྤཏྟི སམྦྷཝཏི, ཏསྨཱ ཏཾ པརིཝཏྟེཏྭཱཝ པརིབྷུཉྫིཏབྦཾ. མཱཏཱཔིཏཱུནཾ ཨཏྠཱཡ པན ཚཱཡཏྠཱཡ ཝཱ གཧཎེ ¶ པརིབྷོགཱསཱ ནཏྠི, ཏསྨཱ ཏཾ ཝཊྚཏཱི’’ཏི ཀཱརཎཾ ཝདནྟི. ཏེནེཝ ཨཱཙརིཡབུདྡྷདཏྟཏྠེརེནཔི ཝུཏྟཾ –

‘‘མཱཏཱཔིཏཱུནམཏྠཱཡ, ཏེལཱདིཧརཏོཔི ཙ;

སཱཁཾ ཚཱཡཱདིཨཏྠཱཡ, ཨིམེསཾ ན ཝིསེསཏི.

‘‘ཏསྨཱ ཧིསྶ ཝིསེསསྶ, ཙིནྟེཏབྦཾ ཏུ ཀཱརཎཾ;

ཏསྶ སཱལཡབྷཱཝཾ ཏུ, ཝིསེསཾ ཏཀྐཡཱམ ཏ’’ནྟི.

ཨིདམེཝེཏྠ ཡུཏྟཏརཾ ཨཝསྶཾ ཏཐཱཝིདྷཝིཏཀྐུཔྤཏྟིཡཱ སམྦྷཝཏོ. ན སཀྐཱ ཧི ཨེཏྠ ཝིཏཀྐཾ སོདྷེཏུནྟི. མཱཏཱདཱིནཾ ཨཏྠཱཡ ཧརཎེ པན ནཱཝསྶཾ ཏཐཱཝིདྷཝིཏཀྐུཔྤཏྟཱིཏི སཀྐཱ ཝིཏཀྐཾ སོདྷེཏུཾ. ཡཏྠ ཧི ཝིཏཀྐཾ སོདྷེཏུཾ སཀྐཱ, ཏཏྠ ནེཝཏྠི དོསོ. ཏེནེཝ ཝཀྑཏི ‘‘སཙེ པན སཀྐོཏི ཝིཏཀྐཾ སོདྷེཏུཾ, ཏཏོ ལདྡྷཾ ཁཱདིཏུམྤི ཝཊྚཏཱི’’ཏི.

ནིཙྩཱལེཏུཾ ན སཀྐོཏཱིཏི ནིཙྩཱལེཏྭཱ སཀྑརཱ ཨཔནེཏུཾ ན སཀྐོཏི. ཨཱདྷཱརཀེ པཏྟོ ཋཔིཏོ ¶ ཧོཏཱིཏི པཊིགྒཧེཏབྦཔཏྟཾ སནྡྷཱཡ ཝུཏྟཾ. ཙཱལེཏཱིཏི ཝིནཱ ཀཱརཎཾ ཙཱལེཏི. སཏིཔི ཀཱརཎེ བྷིཀྑཱུནཾ པརིབྷོགཱརཧཾ ཙཱལེཏུཾ ན ཝཊྚཏི. ཀིཉྩཱཔི ‘‘ཨནུཛཱནཱམི, བྷིཀྑཝེ, ཨམནུསྶིཀཱབཱདྷེ ཨཱམཀམཾསཾ ཨཱམཀལོཧིཏ’’ནྟི (མཧཱཝ. ༢༦༤) ཏཱདིསེ ཨཱབཱདྷེ ཨཏྟནོ ཨཏྠཱཡ ཨཱམཀམཾསཔཊིགྒཧཎཾ ཨནུཉྙཱཏཾ, ‘‘ཨཱམཀམཾསཔཊིགྒཧཎཱ པཊིཝིརཏོ ཧོཏཱི’’ཏི ཙ སཱམཉྙཏོ པཊིཀྑིཏྟཾ, ཏཐཱཔི ཨཏྟནོ ཨཉྙསྶ ཝཱ བྷིཀྑུནོ ཨཏྠཱཡ ཨགྒཧིཏཏྟཱ ‘‘སཱིཧཝིགྷཱསཱདིཾ…པེ… ཝཊྚཏཱི’’ཏི ཝུཏྟཾ. སཀྐོཏི ཝིཏཀྐཾ སོདྷེཏུནྟི མཡ྄ཧམྤི དེཏཱིཏི ཝིཏཀྐསྶ ཨནུཔྤནྣབྷཱཝཾ སལླཀྑེཏུཾ སཀྐོཏི, སཱམཎེརསྶ དསྶཱམཱིཏི སུདྡྷཙིཏྟེན མཡཱ གཧིཏནྟི ཝཱ སལླཀྑེཏུཾ སཀྐོཏི.

སཙེ པན མཱུལེཔི པཊིགྒཧིཏཾ ཧོཏཱིཏི ཨེཏྠ ‘‘གཧེཏྭཱ གཏེ མཡ྄ཧམྤི དདེཡྻུནྟི སཉྙཱཡ སཙེ པཊིགྒཧིཏཾ ཧོཏཱི’’ཏི ཝདནྟི. ཀོཊྛཱསེ ཀརོཏཱིཏི བྷིཀྑུསཱམཎེརཱ ཙ ཨཏྟནོ ཨཏྟནོ ཨབྷིརུཙིཏཾ ཀོཊྛཱསཾ གཎྷནྟཱུཏི སབྦེསཾ སམཀེ ཀོཊྛཱསེ ཀརོཏི. གཧིཏཱཝསེསནྟི ¶ སཱམཎེརེཧི གཧིཏཀོཊྛཱསཏོ ཨཝསེསཾ. གཎྷིཏྭཱཏི ‘‘མཡ྄ཧཾ ཨིདཾ གཎྷིསྶཱམཱི’’ཏི གཧེཏྭཱ. ཨིདྷ གཧིཏཱཝསེསཾ ནཱམ ཏེན གཎྷིཏྭཱ པུན ཋཔིཏཾ. པཊིགྒཧེཏྭཱཏི ཏདཧུ པཊིགྒཧེཏྭཱ. ཏེནེཝ ‘‘ཡཱཝཀཱལིཀེན ཡཱཝཛཱིཝིཀསཾསགྒེ དོསོ ནཏྠཱི’’ཏི ཝུཏྟཾ. སཙེ པན པུརིམདིཝསེ པཊིགྒཧེཏྭཱ ཋཔིཏཱ ཧོཏི, སཱམིསེན མུཁེན ཏསྶཱ ཝཊྚིཡཱ དྷཱུམཾ པིཝིཏུཾ ན ཝཊྚཏི. སམུདྡོདཀེནཱཏི ཨཔྤཊིགྒཧིཏསམུདྡོདཀེན. ཡསྨཱ ཀཏཀཊྛི ཨུདཀཾ པསཱདེཏྭཱ ཝིསུཾ ཏིཊྛཏི, ཏསྨཱ ‘‘ཨབྦོཧཱརིཀ’’ནྟི ཝུཏྟཾ. ལགྒཏཱིཏི མུཁེ ཧཏྠེ ཙ ཨུདཀེ སུཀྑེ སེཏཝཎྞཾ དསྶེནྟཾ ལགྒཏི. པཱནཱིཡཾ གཧེཏྭཱཏི ཨཏྟནོཡེཝ ཨཏྠཱཡ གཧེཏྭཱ. སཙེ པན པཱིཏཱཝསེསཾ ཏཏྠེཝ ཨཱཀིརིསྶཱམཱིཏི གཎྷཱཏི, པུན པཊིགྒཧཎཀིཙྩཾ ནཏྠི. ཝིཀྑམྦྷེཏྭཱཏི ཝིཡཱུཧིཏྭཱ, ཨཔནེཏྭཱཏི ཨཏྠོ.

མཧཱབྷཱུཏེསཱུཏི སརཱིརནིསྶིཏེསུ མཧཱབྷཱུཏེསུ. པཏཏཱིཏི ཝིཙྪིནྡིཏྭཱ པཏཏི. ཝིཙྪིནྡིཏྭཱ པཏིཏམེཝ ཧི པཊིགྒཧེཏབྦཾ, ན ཨིཏརཾ. ཨལླདཱརུཾ རུཀྑཏོ ཚིནྡིཏྭཱཔི ཀཱཏུཾ ཝཊྚཏཱིཏི ཨེཏྠ མཏྟིཀཏྠཱཡ པཐཝིཾ ཁཎིཏུམྤི ཝཊྚཏཱིཏི ཝེདིཏབྦཾ. སཔྤདཊྛཀྑཎེཡེཝ ཝཊྚཏཱིཏི ཨསཏི ཀཔྤིཡཀཱརཀེ སཱམཾ གཧེཏྭཱ པརིབྷུཉྫིཏུཾ ཝཊྚཏི, ཨཉྙདཱ པཊིགྒཧཱཔེཏྭཱ པརིབྷུཉྫིཏབྦཾ. སེསམེཏྠ ཨུཏྟཱནམེཝ. ཨཔྤཊིགྒཧིཏཏཱ, ཨནནུཉྙཱཏཏཱ, དྷཱུམཱདིཨབྦོཧཱརིཀཱབྷཱཝོ, ཨཛ྄ཛྷོཧརཎནྟི ཨིམཱནི པནེཏྠ ཙཏྟཱརི ཨངྒཱནི.

དནྟཔོནསིཀྑཱཔདཝཎྞནཱ ནིཊྛིཏཱ.

ནིཊྛིཏོ བྷོཛནཝགྒོ ཙཏུཏྠོ.

༥. ཨཙེལཀཝགྒོ

༡. ཨཙེལཀསིཀྑཱཔདཝཎྞནཱ

༢༧༣. ཨཙེལཀཝགྒསྶ ¶ པཋམསིཀྑཱཔདེ ཏེསནྟི ཏིཏྠིཡཱནཾ. ཏཏྠཱཏི བྷཱཛནེ. ཨིཏོཏི པཏྟཏོ. སཙེ ཏིཏྠིཡོ ཝདཏཱིཏི ‘‘པཋམམེཝ མཾ སནྡྷཱཡ ཨབྷིཧརིཏྭཱ ཋཔིཏཾ མཡ྄ཧཾ སནྟཀཾ ཧོཏི, ཨིམསྨིཾ བྷཱཛནེ ཨཱཀིརཐཱ’’ཏི ཝདཏི, ཝཊྚཏི. སེསམེཏྠ ཨུཏྟཱནམེཝ. ཨཉྙཏིཏྠིཡཏཱ, ཨཛ྄ཛྷོཧརཎཱིཡཏཱ ¶ , ཨཛ྄ཛྷོཧརཎཏྠཱཡ སཧཏྠཱ ཨནིཀྑིཏྟབྷཱཛནེ དཱནནྟི ཨིམཱནི པནེཏྠ ཏཱིཎི ཨངྒཱནི.

ཨཙེལཀསིཀྑཱཔདཝཎྞནཱ ནིཊྛིཏཱ.

༢. ཨུཡྻོཛནསིཀྑཱཔདཝཎྞནཱ

༢༧༤. དུཏིཡཾ ཨུཏྟཱནཏྠམེཝ. ཨནཱཙཱརཾ ཨཱཙརིཏུཀཱམཏཱ, ཏདཏྠམེཝ ཨུཔསམྤནྣསྶ ཨུཡྻོཛནཱ, ཨེཝཾ ཨུཡྻོཛེནྟསྶ ཨུཔཙཱརཱཏིཀྐམོཏི ཨིམཱནི པནེཏྠ ཏཱིཎི ཨངྒཱནི.

ཨུཡྻོཛནསིཀྑཱཔདཝཎྞནཱ ནིཊྛིཏཱ.

༣. སབྷོཛནསིཀྑཱཔདཝཎྞནཱ

༢༨༠. ཏཏིཡེ པིཊྛསངྒྷཱཊོཏི དྭཱརབཱཧཱཡེཏཾ ཨདྷིཝཙནཾ. ཁུདྡཀཾ ནཱམ སཡནིགྷརཾ ཝིཏྠཱརཏོ པཉྩཧཏྠཔྤམཱཎཾ ཧོཏི, ཏསྶ ཙ མཛ྄ཛྷིམཊྛཱནཾ པིཊྛསངྒྷཱཊཏོ ཨཌྜྷཏེཡྻཧཏྠཔྤམཱཎམེཝ ཧོཏི, ཏསྨཱ ཏཱདིསེ སཡནིགྷརེ པིཊྛསངྒྷཱཊཏོ ཧཏྠཔཱསཾ ཝིཛཧིཏྭཱ ནིསིནྣོ པིཊྛིཝཾསཾ ཨཏིཀྐམིཏྭཱ ནིསིནྣོ ནཱམ ཧོཏི. ཨེཝཾ ནིསིནྣོ ཙ མཛ྄ཛྷཾ ཨཏིཀྐམིཏྭཱ ནིསིནྣོ ནཱམ ཧོཏཱིཏི ཨཱཧ ‘‘ཨིམིནཱ མཛ྄ཛྷཱཏིཀྐམཾ དསྶེཏཱི’’ཏི. ཡཐཱ ཝཱ ཏཐཱ ཝཱ ཀཏསྶཱཏི པིཊྛིཝཾསཾ ཨཱརོཔེཏྭཱ ཝཱ ཨནཱརོཔེཏྭཱ ཝཱ ཀཏསྶ. སཙིཏྟཀནྟི ཨནུཔཝིསིཏྭཱ ནིསཱིདནཙིཏྟེན སཙིཏྟཀཾ. སེསམེཏྠ ཨུཏྟཱནམེཝ. པརིཡུཊྛིཏརཱགཛཱཡམྤཏིཀཱནཾ སནྣིཧིཏཏཱ, སཡནིགྷརཏཱ, དུཏིཡསྶ བྷིཀྑུནོ ཨབྷཱཝོ, ཨནུཔཁཛྫ ནིསཱིདནནྟི ཨིམཱནི པནེཏྠ ཙཏྟཱརི ཨངྒཱནི.

སབྷོཛནསིཀྑཱཔདཝཎྞནཱ ནིཊྛིཏཱ.

༢༨༤-༢༨༩. ཙཏུཏྠཔཉྩམེསུ ¶ ནཏྠི ཀིཉྩི ཝཏྟབྦཾ.

༦. ཙཱརིཏྟསིཀྑཱཔདཝཎྞནཱ

༢༩༨. ཚཊྛེ ¶ པཀཏིཝཙནེནཱཏི ཨེཏྠ ཡཾ དྭཱདསཧཏྠབྦྷནྟརེ ཋིཏེན སོཏུཾ སཀྐཱ བྷཝེཡྻ, ཏཾ པཀཏིཝཙནཾ ནཱམ. ཨཱཔུཙྪིཏབྦོཏི ‘‘ཨཧཾ ཨིཏྠནྣཱམསྶ གྷརཾ གཙྪཱམཱི’’ཏི ཝཱ ‘‘ཙཱརིཏྟཾ ཨཱཔཛྫཱམཱི’’ཏི ཝཱ ཨཱིདིསེན ཝཙནེན ཨཱཔུཙྪིཏབྦོ. སེསམེཏྠ ཨུཏྟཱནམེཝ. པཉྩནྣཾ བྷོཛནཱནཾ ཨཉྙཏརེན ནིམནྟནསཱདིཡནཾ, སནྟཾ བྷིཀྑུཾ ཨནཱཔུཙྪནཱ, བྷཏྟིཡགྷརཏོ ཨཉྙགྷརཔྤཝེསནཾ, མཛ྄ཛྷནྷིཀཱནཏིཀྐམོ, སམཡསྶ ཝཱ ཨཱཔདཱནཾ ཝཱ ཨབྷཱཝོཏི ཨིམཱནི པནེཏྠ པཉྩ ཨངྒཱནི.

ཙཱརིཏྟསིཀྑཱཔདཝཎྞནཱ ནིཊྛིཏཱ.

༧. མཧཱནཱམསིཀྑཱཔདཝཎྞནཱ

༣༠༣. སཏྟམེ མཧཱནཱམོ ནཱམཱཏི ཨནུརུདྡྷཏྠེརསྶ བྷཱཏཱ བྷགཝཏོ ཙཱུལ༹པིཏུ པུཏྟོ. སུདྡྷོདནོ སཀྐོདནོ སུཀྐོདནོ དྷོཏོདནོ ཨམིཏོདནོཏི ཨིམེ ཧི པཉྩ ཛནཱ བྷཱཏརོ. ཨམིཏཱ ནཱམ དེཝཱི ཏེསཾ བྷགིནཱི, ཏིསྶཏྠེརོ ཏསྶཱ པུཏྟོ. ཏཐཱགཏོ ཙ ནནྡཏྠེརོ ཙ སུདྡྷོདནསྶ པུཏྟཱ, མཧཱནཱམོ ཙ ཨནུརུདྡྷཏྠེརོ ཙ སུཀྐོདནསྶ, ཨཱནནྡཏྠེརོ ཨམིཏོདནསྶ. སོ བྷགཝཏོ ཀནིཊྛོ, མཧཱནཱམོ མཧལླཀཏརོ སཀདཱགཱམཱི ཨརིཡསཱཝཀོ. ཏེན ཝུཏྟཾ ‘‘མཧཱནཱམོ ནཱམ…པེ… ཨརིཡསཱཝཀོ’’ཏི.

༣༠༥-༣༠༦. པཱལི༹ཡཾ ཨཛྫཎྷོཏི ཨཛྫ ཨེཀདིཝསནྟི ཨཏྠོ, ‘‘ཨཛྫནོ’’ཏི ཝཱ ཨཏྠོ གཧེཏབྦོ, ནོ ཨམྷཱཀཾ. ཀཱལཾ ཨཱཧརིསྶཐཱཏི སྭེ ཧརིསྶཐ. ཏཏོ ཙེ ཨུཏྟརི སཱདིཡེཡྻཱཏི སཙེ ཏཏྠ རཏྟཱིཧི ཝཱ བྷེསཛྫེཧི ཝཱ པརིཙྪེདོ ཀཏོ ཧོཏི ‘‘ཨེཏྟཀཱཡེཝ ཝཱ རཏྟིཡོ ཨེཏྟཀཱནི ཝཱ བྷེསཛྫཱནི ཝིཉྙཱཔེཏབྦཱནཱི’’ཏི, ཏཏོ རཏྟིཔརིཡནྟཏོ ཝཱ བྷེསཛྫཔརིཡནྟཏོ ཝཱ ཨུཏྟརི ཝིཉྙཱཔེནྟོ སཱདིཡེཡྻ. ‘‘ཨིམེཧི ཏཡཱ བྷེསཛྫེཧི པཝཱརིཏམྷ, ཨམྷཱཀཉྩ ཨིམིནཱཝ བྷེསཛྫེན ཨཏྠོ’’ཏི ཨཱཙིཀྑིཏྭཱ ཝིཉྙཱཔེཏུམྤི གིལཱནོཝ ལབྷཏི.

༣༡༠. ཡསྨཱ སངྒྷཔཝཱརཎཱཡམེཝཱཡཾ ཝིདྷི, ཏསྨཱ ‘‘ཡེ ཨཏྟནོ པུགྒལིཀཱཡ པཝཱརཎཱཡ པཝཱརིཏཱ’’ཏི ¶ ཝུཏྟཾ. སེསཾ ཨུཏྟཱནམེཝ. སངྒྷཔཝཱརཎཏཱ ¶ , བྷེསཛྫཝིཉྙཏྟི, ཨགིལཱནཏཱ, པརིཡནྟཱཏིཀྐམོཏི ཨིམཱནི པནེཏྠ ཙཏྟཱརི ཨངྒཱནི.

མཧཱནཱམསིཀྑཱཔདཝཎྞནཱ ནིཊྛིཏཱ.

༨. ཨུཡྻུཏྟསེནཱསིཀྑཱཔདཝཎྞནཱ

༣༡༡. ཨཊྛམཾ ཨུཏྟཱནཏྠམེཝ. ཨུཡྻུཏྟསེནཱ, དསྶནཏྠཱཡ གམནཾ, ཨནུཉྙཱཏོཀཱསཏོ ཨཉྙཏྲ དསྶནཾ, ཏཐཱརཱུཔཔཙྩཡསྶ ཨཱཔདཱཡ ཝཱ ཨབྷཱཝོཏི ཨིམཱནི པནེཏྠ ཙཏྟཱརི ཨངྒཱནི.

ཨུཡྻུཏྟསེནཱསིཀྑཱཔདཝཎྞནཱ ནིཊྛིཏཱ.

༩. སེནཱཝཱསསིཀྑཱཔདཝཎྞནཱ

༣༡༧. ནཝམསིཀྑཱཔདམྤི ཨུཏྟཱནམེཝ. ཏིརཏྟཱཏིཀྐམོ, སེནཱཡ སཱུརིཡསྶ ཨཏྠངྒམོ, གིལཱནཏཱདཱིནཾ ཨབྷཱཝོཏི ཨིམཱནི པནེཏྠ ཏཱིཎི ཨངྒཱནི.

སེནཱཝཱསསིཀྑཱཔདཝཎྞནཱ ནིཊྛིཏཱ.

༡༠. ཨུཡྻོདྷིཀསིཀྑཱཔདཝཎྞནཱ

༣༢༢. དསམེ ཀཏི ཏེ ལཀྑཱནི ལདྡྷཱནཱིཏི ཏཝ སརཔྤཧཱརསྶ ལཀྑཎབྷཱུཏཱ ཀིཏྟཀཱ ཛནཱ ཏཡཱ ལདྡྷཱཏི ཨཏྠོ, ཀིཏྟཀཱ ཏཡཱ ཝིདྡྷཱཏི ཝུཏྟཾ ཧོཏི. སེསམེཏྠ ཨུཏྟཱནམེཝ. ཨུཡྻོདྷིཀཱདིདསྶནཏྠཱཡ གམནཾ, ཨནུཉྙཱཏོཀཱསཏོ ཨཉྙཏྲ དསྶནཾ, ཏཐཱརཱུཔཔཙྩཡསྶ ཨཱཔདཱཡ ཝཱ ཨབྷཱཝོཏི ཨིམཱནི པནེཏྠ ཏཱིཎི ཨངྒཱནི.

ཨུཡྻོདྷིཀསིཀྑཱཔདཝཎྞནཱ ནིཊྛིཏཱ.

ནིཊྛིཏོ ཨཙེལཀཝགྒོ པཉྩམོ.

༦. སུརཱཔཱནཝགྒོ

༡. སུརཱཔཱནསིཀྑཱཔདཝཎྞནཱ

༣༢༦-༣༢༨. སུརཱཔཱནཝགྒསྶ ¶ ¶ པཋམསིཀྑཱཔདེ ཝཏིཡཱཏི གཱམཔརིཀྑེཔཝཏིཡཱ. པཱལི༹ཡཾ པིཊྛསུརཱདཱིསུ པིཊྛཾ བྷཱཛནེ པཀྑིཔིཏྭཱ ཏཛྫཾ ཨུདཀཾ དཏྭཱ མདྡིཏྭཱ ཀཏཱ པིཊྛསུརཱ. ཨེཝཾ པཱུཝེ ཨོདནེ ཙ བྷཱཛནེ པཀྑིཔིཏྭཱ ཏཛྫཾ ཨུདཀཾ དཏྭཱ མདྡིཏྭཱ ཀཏཱ པཱུཝསུརཱ ཨོདནསུརཱཏི ཙ ཝུཙྩཏི. ‘‘ཀིཎྞཱ’’ཏི པན ཏསྶཱ སུརཱཡ བཱིཛཾ ཝུཙྩཏི. ཡེ སུརཱམོདཀཱཏིཔི ཝུཙྩནྟི, ཏེ པཀྑིཔིཏྭཱ ཀཏཱ ཀིཎྞཔཀྑིཏྟཱ. ཧརཱིཏཀཱིསཱསཔཱདིནཱནཱསམྦྷཱརེཧི སཾཡོཛིཏཱ སམྦྷཱརསཾཡུཏྟཱ.

མདྷུཀཏཱལནཱལི༹ཀེརཱདིཔུཔྥརསོ ཙིརཔརིཝཱསིཏོ པུཔྥཱསཝོ. པནསཱདིཕལརསོ ཕལཱསཝོ. མུདྡིཀཱརསོ མདྷྭཱསཝོ. ཨུཙྪུརསོ གུལཱ༹སཝོ. ཧརཱིཏཀཱམལཀཀཊུཀབྷཎྜཱདིནཱནཱསམྦྷཱརཱནཾ རསོ ཙིརཔརིཝཱསིཏོ སམྦྷཱརསཾཡུཏྟོ. བཱིཛཏོ པཊྛཱཡཱཏི སམྦྷཱརེ པཊིཡཱདེཏྭཱ ཙཱཊིཡཾ པཀྑིཏྟཀཱལཏོ, ཏཱལནཱལི༹ཀེརཱདཱིནཾ པུཔྥརསསྶ གཧིཏཨབྷིནཝཀཱལཏོཡེཝ ཙ པཊྛཱཡ.

༣༢༩. ལོཎསོཝཱིརཀཾ སུཏྟཉྩ ཨནེཀེཧི བྷེསཛྫེཧི ཨབྷིསངྑཏོ ཨམཛྫབྷཱུཏོ ཨཱསཝཝིསེསོ. ཝཱསགྒཱཧཱཔནཏྠནྟི སུགནྡྷིབྷཱཝགྒཱཧཱཔནཏྠཾ. ཨཙིཏྟཀཾ ལོཀཝཛྫནྟི ཨེཏྠ ཡཾ ཝཏྟབྦཾ, ཏཾ པཋམཔཱརཱཛིཀཝཎྞནཱཡཾ ཝུཏྟནཡེན ཝེདིཏབྦཾ. སེསམེཏྠ ཨུཏྟཱནམེཝ. མཛྫབྷཱཝོ, ཏསྶ པཱནཉྩཱཏི ཨིམཱནི པནེཏྠ དྭེ ཨངྒཱནི.

སུརཱཔཱནསིཀྑཱཔདཝཎྞནཱ ནིཊྛིཏཱ.

༢. ཨངྒུལིཔཏོདཀསིཀྑཱཔདཝཎྞནཱ

༣༣༠. དུཏིཡེ བྷིཀྑུནཱིཔི ཨནུཔསམྤནྣཊྛཱནེ ཋིཏཱཏི ཨེཏྠ བྷིཀྑུཔི བྷིཀྑུནིཡཱ ཨནུཔསམྤནྣཊྛཱནེ ¶ ཋིཏོཏི ཝེདིཏབྦོ. སེསམེཏྠ ཨུཏྟཱནམེཝ. ཧསཱདྷིཔྤཱཡཏཱ, ཨུཔསམྤནྣསྶ ཀཱཡེན ཀཱཡཱམསནནྟི ཨིམཱནི པནེཏྠ དྭེ ཨངྒཱནི.

ཨངྒུལིཔཏོདཀསིཀྑཱཔདཝཎྞནཱ ནིཊྛིཏཱ.

༣. ཧསདྷམྨསིཀྑཱཔདཝཎྞནཱ

༣༣༥. ཏཏིཡཾ ¶ ཨུཏྟཱནཏྠམེཝ. ཨུཔརིགོཔྥཀཏཱ, ཧསཱདྷིཔྤཱཡེན ཀཱིལ༹ནནྟི ཨིམཱནི པནེཏྠ དྭེ ཨངྒཱནི.

ཧསདྷམྨསིཀྑཱཔདཝཎྞནཱ ནིཊྛིཏཱ.

༤. ཨནཱདརིཡསིཀྑཱཔདཝཎྞནཱ

༣༤༤. ཙཏུཏྠེ གཱརཡ྄ཧོ ཨཱཙརིཡུགྒཧོ ན གཧེཏབྦོཏི ཡསྨཱ ཨུཙྪུརསོ སཏྟཱཧཀཱལིཀོ, ཏསྶ ཀསཊོ ཡཱཝཛཱིཝིཀོ, དྭིནྣཾཡེཝ སམཝཱཡོ ཨུཙྪུཡཊྛི, ཏསྨཱ ཝིཀཱལེ ཨུཙྪུཡཊྛིཾ ཁཱདིཏུཾ ཝཊྚཏི གུལ༹ཧརཱིཏཀཾ ཝིཡཱཏི ཨེཝམཱདིཀོ གཱརཡ྄ཧཱཙརིཡཝཱདོ ན གཧེཏབྦོ. ལོཀཝཛྫེ ཨཱཙརིཡུགྒཧོ ན ཝཊྚཏཱིཏི ལོཀཝཛྫསིཀྑཱཔདེ ཨཱཔཏྟིཊྛཱནེ ཡོ ཨཱཙརིཡཝཱདོ, སོ ན གཧེཏབྦོ, ལོཀཝཛྫཾ ཨཏིཀྐམིཏྭཱ ‘‘ཨིདཾ ཨམྷཱཀཾ ཨཱཙརིཡུགྒཧོ’’ཏི ཝདནྟསྶ ཨུགྒཧོ ན ཝཊྚཏཱིཏི ཨདྷིཔྤཱཡོ. སུཏྟཱནུལོམཾ ནཱམ ཨཊྛཀཐཱ. པཝེཎིཡཱ ཨཱགཏསམོདྷཱནཾ གཙྪཏཱིཏི ‘‘པཝེཎིཡཱ ཨཱགཏོ ཨཱཙརིཡུགྒཧོཝ གཧེཏབྦོ’’ཏི ཨེཝཾ ཝུཏྟེ མཧཱཨཊྛཀཐཱཝཱདེཡེཝ སངྒཧཾ གཙྪཏཱིཏི ཨདྷིཔྤཱཡོ. སེསམེཏྠ ཨུཏྟཱནམེཝ. ཨུཔསམྤནྣསྶ པཉྙཏྟེན ཝཙནཾ, ཨནཱདརིཡཀརཎནྟི ཨིམཱནི པནེཏྠ དྭེ ཨངྒཱནི.

ཨནཱདརིཡསིཀྑཱཔདཝཎྞནཱ ནིཊྛིཏཱ.

༥. བྷིཾསཱཔནསིཀྑཱཔདཝཎྞནཱ

༣༤༥. པཉྩམཾ ཨུཏྟཱནཏྠམེཝ. ཨུཔསམྤནྣཏཱ, ཏསྶ དསྶནསཝནཝིསཡེ བྷིཾསཱཔེཏུཀཱམཏཱཡ ཝཱཡམནནྟི ཨིམཱནི པནེཏྠ དྭེ ཨངྒཱནི.

བྷིཾསཱཔནསིཀྑཱཔདཝཎྞནཱ ནིཊྛིཏཱ.

༦. ཛོཏིསིཀྑཱཔདཝཎྞནཱ

༣༥༠. ཚཊྛེ ¶ ¶ བྷགྒཱ ནཱམ ཛནཔདིནོ རཱཛཀུམཱརཱ, ཏེསཾ ནིཝཱསོ ཨེཀོཔི ཛནཔདོ རུལ༹ྷཱིསདྡེན ‘‘བྷགྒཱ’’ཏི ཝུཙྩཏི. ཏེན ཝུཏྟཾ ‘‘བྷགྒཱཏི ཛནཔདསྶ ནཱམ’’ནྟི. སུསུམཱརགིརེཏི ཨེཝཾནཱམཀེ ནགརེ. ཏསྶ ཀིར ནགརསྶ མཱཔནཏྠཾ ཝཏྠུཝིཛྫཱཙརིཡེན ནགརཊྛཱནསྶ པརིགྒཎྷནདིཝསེ ཨཝིདཱུརེ སུསུམཱརོ སདྡམཀཱསི གིརཾ ནིཙྪཱརེསི. ཨཐ ཨནནྟརཱཡེན ནགརེ མཱཔིཏེ ཏམེཝ སུསུམཱརགིརཎཾ སུབྷནིམིཏྟཾ ཀཏྭཱ སུསུམཱརགིརཾཏྭེཝསྶ ནཱམཾ ཨཀཾསུ. ཀེཙི པན ‘‘སུསུམཱརསཎྛཱནཏྟཱ སུསུམཱརོ ནཱམ ཨེཀོ གིརི, སོ ཏསྶ ནགརསྶ སམཱིཔེ, ཏསྨཱ ཏཾ སུསུམཱརགིརི ཨེཏསྶ ཨཏྠཱིཏི ‘སུསུམཱརགིརཱི’ཏི ཝུཙྩཏཱི’’ཏི ཝདནྟི. ཏཐཱ ཝཱ ཧོཏུ ཨཉྙཐཱ ཝཱ, ནཱམམེཏཾ ཏསྶ ནགརསྶཱཏི ཨཱཧ ‘‘སུསུམཱརགིརནྟི ནགརསྶ ནཱམ’’ནྟི. བྷེསཀལཱ༹ཏི གྷམྤཎྜནཱམཀོ གཙྪཝིསེསོ. ཀེཙི ‘‘སེཏརུཀྑོ’’ཏིཔི ཝདནྟི. ཏེསཾ བཧུལཏཱཡ པན ཏཾ ཝནཾ བྷེསཀལཱ༹ཝནནྟྭེཝ པཉྙཱཡིཏྠ. ‘‘བྷེསགལཱ༹ཝནེ’’ཏིཔི པཱཋོ. ‘‘བྷེསོ ནཱམ ཨེཀོ ཡཀྑོ ཨཡུཏྟཀཱརཱི, ཏསྶ ཏཏོ གལི༹ཏཊྛཱནཏཱཡ ཏཾ ཝནཾ བྷེསགལཱ༹ཝནཾ ནཱམ ཛཱཏ’’ནྟི ཧི ཀེཙི.

༣༥༢. ཛོཏིཀརཎེཏི ཨགྒིཀརཎེ. སེསམེཏྠ ཨུཏྟཱནམེཝ. ཨགིལཱནཏཱ, ཨནུཉྙཱཏཀརཎཱབྷཱཝོ, ཝིསིབྦེཏུཀཱམཏཱ, སམཱདཧནནྟི ཨིམཱནི པནེཏྠ ཙཏྟཱརི ཨངྒཱནི.

ཛོཏིསིཀྑཱཔདཝཎྞནཱ ནིཊྛིཏཱ.

༧. ནཧཱནསིཀྑཱཔདཝཎྞནཱ

༣༥༧. སཏྟམསིཀྑཱཔདསྶ པཱལི༹ཡཾ ཨསམྦྷིནྣེནཱཏི ཨམཀྑིཏེན, ཨནཊྛེནཱཏི ཨཏྠོ. ཨོརེནདྡྷམཱསཾ ནཧཱཡེཡྻཱཏི ནཧཱཏདིཝསཏོ པཊྛཱཡ ཨདྡྷམཱསེ ཨཔརིཔུཎྞེ ནཧཱཡེཡྻ. སེསམེཏྠ ཨུཏྟཱནམེཝ. མཛ྄ཛྷིམདེསོ, ཨཱུནཀདྡྷམཱསེ ནཧཱནཾ, སམཡཱནཾ ཝཱ ནདཱིཔཱརགམནསྶ ཝཱ ཨཱཔདཱནཾ ཝཱ ཨབྷཱཝོཏི ཨིམཱནི པནེཏྠ ཏཱིཎི ཨངྒཱནི.

ནཧཱནསིཀྑཱཔདཝཎྞནཱ ནིཊྛིཏཱ.

༨. དུབྦཎྞཀརཎསིཀྑཱཔདཝཎྞནཱ

༣༦༨. ཨཊྛམེ ¶ ¶ ‘‘ཙམྨཀཱརནཱིལཾ ནཱམ པཀཏིནཱིལ’’ནྟི ཏཱིསུཔི གཎྛིཔདེསུ ཝུཏྟཾ. གཎྛིཔདེ པན ‘‘ཙམྨཀཱརཱ ཨུདཀེ ཏིཔུམལཾ ཨཡགཱུཐཉྩ པཀྑིཔིཏྭཱ ཙམྨཾ ཀཱལ༹ཾ ཀརོནྟི, ཏཾ ཙམྨཀཱརནཱིལ’’ནྟི ཝུཏྟཾ. སེསམེཏྠ ཨུཏྟཱནམེཝ. ཝུཏྟཔྤཀཱརསྶ ཙཱིཝརསྶ ཨཀཏཀཔྤཏཱ, ཨནཊྛཙཱིཝརཱདིཏཱ, ནིཝཱསནཾ ཝཱ པཱརུཔནཾ ཝཱཏི ཨིམཱནི པནེཏྠ ཏཱིཎི ཨངྒཱནི.

དུབྦཎྞཀརཎསིཀྑཱཔདཝཎྞནཱ ནིཊྛིཏཱ.

༩. ཝིཀཔྤནསིཀྑཱཔདཝཎྞནཱ

༣༧༤. ནཝམེ ཨཔཙྩུདྡྷཱརཎནྟི ‘‘མཡ྄ཧཾ སནྟཀཾ པརིབྷུཉྫ ཝཱ ཝིསྶཛྫེཧི ཝཱ’’ཏིཨཱདིནཱ ཨཀཏཔཙྩུདྡྷཱརཾ. ཡེན ཝིནཡཀམྨཾ ཀཏནྟི ཡེན སདྡྷིཾ ཝིནཡཀམྨཾ ཀཏཾ. ཏིཾསཀཝཎྞནཱཡནྟི ནིསྶགྒིཡཝཎྞནཱཡཾ. པརིབྷོགེན ཀཱཡཀམྨཾ, ཨཔཙྩུདྡྷཱརཱཔནེན ཝཙཱིཀམྨཾ. སེསམེཏྠ ཨུཏྟཱནམེཝ. སཱམཾ ཝིཀཔྤིཏསྶ ཨཔཙྩུདྡྷཱརོ, ཝིཀཔྤནུཔགཙཱིཝརཏཱ, པརིབྷོགོཏི ཨིམཱནི པནེཏྠ ཏཱིཎི ཨངྒཱནི.

ཝིཀཔྤནསིཀྑཱཔདཝཎྞནཱ ནིཊྛིཏཱ.

༡༠. ཙཱིཝརཨཔནིདྷཱནསིཀྑཱཔདཝཎྞནཱ

༣༧༧. དསམཾ ཨུཏྟཱནཏྠམེཝ. ཨུཔསམྤནྣསྶ སནྟཀཱནཾ པཏྟཱདཱིནཾ ཨཔནིདྷཱནཾ, ཝིཧེསེཏུཀཱམཏཱ ཝཱ ཧསཱདྷིཔྤཱཡཏཱ ཝཱཏི ཨིམཱནི པནེཏྠ དྭེ ཨངྒཱནི.

ཙཱིཝརཨཔནིདྷཱནསིཀྑཱཔདཝཎྞནཱ ནིཊྛིཏཱ.

ནིཊྛིཏོ སུརཱཔཱནཝགྒོ ཚཊྛོ.

༧. སཔྤཱཎཀཝགྒོ

༡. སཉྩིཙྩསིཀྑཱཔདཝཎྞནཱ

༣༨༢. སཔྤཱཎཀཝགྒསྶ ¶ ¶ པཋམསིཀྑཱཔདེ ཨུསུཾ སརཾ ཨསྶཏི ཁིཔཏཱིཏི ཨིསྶཱསོ, དྷནུསིཔྤཀུསལོཏི ཨཱཧ ‘‘དྷནུགྒཧཱཙརིཡོ’’ཏི. པཊིསཏྟུཝིདྷམནཏྠཾ དྷནུཾ གཎྷནྟཱིཏི དྷནུགྒཧཱ, ཏེསཾ ཨཱཙརིཡོ དྷནུགྒཧཱཙརིཡོ. ཨཔྤམཏྟེན ཝཏྟཾ ཀཱཏབྦནྟི ཡཐཱ ཏེ པཱཎཱ ན མརནྟི, ཨེཝཾ སཱུཔཊྛིཏསྶཏིནཱ སེནཱསནེ ཝཏྟཾ ཀཱཏབྦཾ. སེསམེཏྠ ཨུཏྟཱནམེཝ. ཨངྒཱནིཔི མནུསྶཝིགྒཧེ ཝུཏྟནཡེན ཝེདིཏབྦཱནཱིཏི.

སཉྩིཙྩསིཀྑཱཔདཝཎྞནཱ ནིཊྛིཏཱ.

༢. སཔྤཱཎཀསིཀྑཱཔདཝཎྞནཱ

༣༨༧. དུཏིཡེ ཨུདཀསཎྛཱནཀཔྤདེསེཏི ཡཏྠ བྷཱུམིབྷཱགེ ཨུདཀཾ ནིཀྑིཏྟཾ སནྟིཊྛཏི, ན སཧསཱ པརིཀྑཡཾ གཙྪཏི, ཏཱདིསེ པདེསེ. སེསམེཏྠ ཨུཏྟཱནམེཝ. ཨངྒཱནི སིཉྩནསིཀྑཱཔདེ ཝུཏྟནཡཱནེཝ.

སཔྤཱཎཀསིཀྑཱཔདཝཎྞནཱ ནིཊྛིཏཱ.

༣. ཨུཀྐོཊནསིཀྑཱཔདཝཎྞནཱ

༣༩༢. ཏཏིཡེ ཡཐཱཔཏིཊྛིཏབྷཱཝེན པཏིཊྛཱཏུཾ ན དེནྟཱིཏི ཏེསཾ པཝཏྟིཨཱཀཱརདསྶནཏྠཾ ཝུཏྟཾ. ཡཾ པན དྷམྨེན ཨདྷིཀརཎཾ ནིཧཏཾ, ཏཾ སུནིཧཏམེཝ. སཙེ ཝིཔྤཀཏེ ཀམྨེ པཊིཀྐོསཏི, ཏཾ སཉྙཱཔེཏྭཱཝ ཀཱཏབྦཾ. ཨིཏརཐཱ ཀམྨཉྩ ཀུཔྤཏི, ཀཱརཀཱནཉྩ ཨཱཔཏྟི. སེསམེཏྠ ཨུཏྟཱནམེཝ. ཡཐཱདྷམྨཾ ནིཧཏབྷཱཝོ, ཛཱནནཱ, ཨུཀྐོཊནཱཏི ཨིམཱནི པནེཏྠ ཏཱིཎི ཨངྒཱནི.

ཨུཀྐོཊནསིཀྑཱཔདཝཎྞནཱ ནིཊྛིཏཱ.

༤. དུཊྛུལླསིཀྑཱཔདཝཎྞནཱ

༣༩༩. ཙཏུཏྠེ ¶ ¶ ཏསྶེཝཱཏི ཡོ ཨཱཔནྣོ, ཏསྶེཝ. ཨཱརོཙེཏཱིཏི པཊིཙྪཱདནཏྠམེཝ མཱ ཀསྶཙི ཨཱརོཙེསཱིཏི ཝདཏི. ཝཏྠུཔུགྒལོཏི ཨཱཔནྣཔུགྒལོ. ཡེནསྶ ཨཱརོཙིཏནྟི ཡེན དུཏིཡེན ཨསྶ ཏཏིཡསྶ ཨཱརོཙིཏཾ. ཀོཊི ཚིནྣཱ ཧོཏཱིཏི ཡསྨཱ པཊིཙྪཱདནཔཙྩཡཱ ཨཱཔཏྟིཾ ཨཱཔཛྫིཏྭཱཝ དུཏིཡེན ཏཏིཡསྶ ཨཱརོཙིཏཾ, ཏསྨཱ ཏཔྤཙྩཡཱ པུན ཏེན ཨཱཔཛྫིཏབྦཱཔཏྟིཡཱ ཨབྷཱཝཏོ ཨཱཔཏྟིཡཱ ཀོཊི ཚིནྣཱ ནཱམ ཧོཏི.

༤༠༠. ‘‘ཨནུཔསམྤནྣསྶ སུཀྐཝིསྶཊྛི ཙ ཀཱཡསཾསགྒོ ཙཱཏི ཨཡཾ དུཊྛུལླཨཛ྄ཛྷཱཙཱརོ ནཱམཱ’’ཏི ཨིདཾ དུཊྛུལླཱརོཙནསིཀྑཱཔདཊྛཀཐཱཡ ན སམེཏི. ཝུཏྟཉྷི ཏཏྠ (པཱཙི. ཨཊྛ. ༨༢) ‘‘ཨནུཔསམྤནྣསྶ དུཊྛུལླཾ ཝཱ ཨདུཊྛུལླཾ ཝཱ ཨཛ྄ཛྷཱཙཱརནྟི ཨེཏྠ ཨཱདིཏོ པཉྩ སིཀྑཱཔདཱནི དུཊྛུལློ ནཱམ ཨཛ྄ཛྷཱཙཱརོ, སེསཱནི ཨདུཊྛུལློ, སུཀྐཝིསྶཊྛིཀཱཡསཾསགྒདུཊྛུལླཨཏྟཀཱམཱ པནསྶ ཨཛ྄ཛྷཱཙཱརོ ནཱམཱ’’ཏི. ‘‘ཨཱརོཙནེ ཨནུཔསམྤནྣསྶ དུཊྛུལླཾ ཨཉྙཐཱ ཨདྷིཔྤེཏཾ, པཊིཙྪཱདནེ ཨཉྙཐཱ’’ཏི ཨེཏྠཱཔི ཝིསེསཀཱརཎཾ ན དིསྶཏི, ཏསྨཱ ཨཊྛཀཐཱཡ པུབྦེནཱཔརཾ ན སམེཏི. ཨཝིརོདྷཾ ཨིཙྪནྟེན པན ཝཱིམཾསིཏབྦམེཏྠ ཀཱརཎཾ. སེསམེཏྠ ཨུཏྟཱནམེཝ. ཨུཔསམྤནྣསྶ དུཊྛུལླཱཔཏྟིཛཱནནཾ, པཊིཙྪཱདེཏུཀཱམཏཱཡ ནཱརོཙེསྶཱམཱིཏི དྷུརནིཀྑེཔོཏི ཨིམཱནི པནེཏྠ དྭེ ཨངྒཱནི.

དུཊྛུལླསིཀྑཱཔདཝཎྞནཱ ནིཊྛིཏཱ.

༥. ཨཱུནཝཱིསཏིཝསྶསིཀྑཱཔདཝཎྞནཱ

༤༠༢. པཉྩམེ རཱུཔསུཏྟནྟི ཧེརཉྙིཀཱནཾ སུཏྟཾ. དུརུཏྟཱནནྟི ཨཀྐོསཝསེན དུརུཏྟཱནཾ, དུརུཏྟཏྟཱཡེཝ དུརཱགཏཱནཾ. ཝཙནཔཐཱནནྟི ཨེཏྠ ཝཙནམེཝ ཏདཏྠཾ ཉཱཏུཀཱམཱནཾ ཉཱཔེཏུཀཱམཱནཉྩ པཐོཏི ཝཙནཔཐོ. དུཀྑམཱནནྟི དུཀྑེན ཁམིཏབྦཱནཾ.

༤༠༤. གབྦྷེ ¶ སཡིཏཀཱལེན སདྡྷིཾ ཝཱིསཏིམཾ ཝསྶཾ ཨསྶཱཏི གབྦྷཝཱིསོ. ཧཱཡནཝཌྜྷནནྟི གབྦྷམཱསེསུ ཨདྷིཀེསུ ཨུཏྟརིཧཱཡནཾ, ཨཱུནེསུ ཝཌྜྷནནྟི ཝེདིཏབྦཾ. ཨེཀཱུནཝཱིསཏིཝསྶནྟི དྭཱདསམཱསེ མཱཏུཀུཙྪིསྨིཾ ཝསིཏྭཱ མཧཱཔཝཱརཎཱཡ ཛཱཏཀཱལཏོ པཊྛཱཡ ཨེཀཱུནཝཱིསཏིཝསྶཾ. པཱཊིཔདདིཝསེཏི པཙྪིམིཀཱཡ ཝསྶཱུཔགམནདིཝསེ. ‘‘ཏིཾསརཏྟིདིཝོ མཱསོ’’ཏི ¶ (ཨ. ནི. ༣.༧༡; ༨.༤༣; ཝིབྷ. ༡༠༢༣) ཝཙནཏོ ‘‘ཙཏྟཱརོ མཱསཱ པརིཧཱཡནྟཱི’’ཏི ཝུཏྟཾ. ཝསྶཾ ཨུཀྐཌྜྷནྟཱིཏི ཝསྶཾ ཨུདྡྷཾ ཀཌྜྷནྟི, ཏཏིཡེ སཾཝཙྪརེ ཨེཀམཱསཾ ཨདྷིཀམཱསཝསེན པརིཙྩཛནྟཱ ཝསྶཾ ཨུདྡྷཾ ཀཌྜྷནྟཱིཏི ཨཏྠོ, ཏསྨཱ ཏཏིཡོ སཾཝཙྪརོ ཏེརསམཱསིཀོ ཧོཏི, སཾཝཙྪརསྶ པན དྭཱདསམཱསིཀཏྟཱ ཨཊྛཱརསསུ ཝསྶེསུ ཨདྷིཀམཱསེ ཝིསུཾ གཧེཏྭཱ ‘‘ཚ མཱསཱ ཝཌྜྷནྟཱི’’ཏི ཝུཏྟཾ. ཏཏོཏི ཚམཱསཏོ. ནིཀྐངྑཱ ཧུཏྭཱཏི ཨདྷིཀམཱསེཧི སདྡྷིཾ པརིཔུཎྞཝཱིསཏིཝསྶཏྟཱ ནིབྦེམཏིཀཱ ཧུཏྭཱ. ཡཾ པན ཝུཏྟཾ ཏཱིསུ གཎྛིཔདེསུ ‘‘ཨཊྛཱརསནྣཾཡེཝ ཝསྶཱནཾ ཨདྷིཀམཱསེ གཧེཏྭཱ གཎིཏཏྟཱ སེསཝསྶདྭཡསྶཔི ཨདྷིཀཱནི དིཝསཱནི ཧོནྟེཝ, ཏཱནི ཨདྷིཀདིཝསཱནི སནྡྷཱཡ ‘ནིཀྐངྑཱ ཧུཏྭཱ’ཏི ཝུཏྟ’’ནྟི, ཏཾ ན གཧེཏབྦཾ. ན ཧི དྭཱིསུ ཝསྶེསུ ཨདྷིཀདིཝསཱནི ནཱམ ཝིསུཾ ཨུཔལབྦྷནྟི ཏཏིཡེ ཝསྶེ ཝསྶུཀྐཌྜྷནཝསེན ཨདྷིཀམཱསེ པརིཙྩཏྟེཡེཝ ཨཏིརེཀམཱསསམྦྷཝཏོ. ཏསྨཱ དྭཱིསུ ཝསྶེསུ ཨཏིརེཀདིཝསཱནི ནཱམ ཝིསུཾ ན སམྦྷཝནྟི.

ནནུ ཙ ‘‘ཏེ དྭེ མཱསེ གཧེཏྭཱ ཝཱིསཏིཝསྶཱནི པརིཔུཎྞཱནི ཧོནྟཱི’’ཏི ཀསྨཱ ཝུཏྟཾ, ཨེཀཱུནཝཱིསཏིཝསྶམྷི པུན ཨཔརསྨིཾ ཝསྶེ པཀྑིཏྟེ ཝཱིསཏིཝསྶཱནི པརིཔུཎྞཱནི ཧོནྟཱིཏི ཨཱཧ ‘‘ཨེཏྠ པན…པེ… ཝུཏྟ’’ནྟི. ཨནེཀཏྠཏྟཱ ནིཔཱཏཱནཾ པན-སདྡོ ཧི-སདྡཏྠེ, ཨེཏྠ ཧཱིཏི ཝུཏྟཾ ཧོཏི. ཨིདཉྷི ཝུཏྟསྶེཝཏྠསྶ སམཏྠནཝསེན ཝུཏྟཾ. ཨིམིནཱ ཙ ཨིམཾ དཱིཔེཏི ‘‘ཡཾ ཝུཏྟཾ ‘ཨེཀཱུནཝཱིསཏིཝསྶཾ སཱམཎེརཾ ནིཀྑམནཱིཡཔུཎྞམཱསིཾ ཨཏིཀྐམྨ པཱཊིཔདདིཝསེ ཨུཔསམྤཱདེནྟཱི’ཏི, ཏཏྠ གབྦྷམཱསེཔི ཨགྒཧེཏྭཱ དྭཱིཧི མཱསེཧི ཨཔརིཔུཎྞཝཱིསཏིཝསྶཾ སནྡྷཱཡ ‘ཨེཀཱུནཝཱིསཏིཝསྶ’ནྟི ཝུཏྟཾ, ཏསྨཱ ཨདྷིཀམཱསེསུ དྭཱིསུ གཧིཏེསུ ཝཱིསཏིཝསྶཱནི པརིཔུཎྞཱནི ནཱམ ཧོནྟཱི’’ཏི. ཏསྨཱཏི ཡསྨཱ གབྦྷམཱསཱཔི གཎནཱུཔགཱ ཧོནྟི, ཏསྨཱ. ཨེཀཝཱིསཏིཝསྶོ ཧོཏཱིཏི ཛཱཏདིཝསཏོ པཊྛཱཡ ཝཱིསཏིཝསྶོ སམཱནོ གབྦྷམཱསེཧི སདྡྷིཾ ཨེཀཝཱིསཏིཝསྶོ ཧོཏི.

༤༠༦. ཨཉྙཾ ¶ ཨུཔསམྤཱདེཏཱིཏི ཨུཔཛ྄ཛྷཱཡོ ཀམྨཝཱཙཱཙརིཡོ ཝཱ ཧུཏྭཱ ཨུཔསམྤཱདེཏི. སེསམེཏྠ ཨུཏྟཱནམེཝ. ཨཱུནཝཱིསཏིཝསྶཏཱ, ཨཱུནཀསཉྙིཏཱ, ཨུཔསམྤཱདནནྟི ཨིམཱནི པནེཏྠ ཏཱིཎི ཨངྒཱནི.

ཨཱུནཝཱིསཏིཝསྶསིཀྑཱཔདཝཎྞནཱ ནིཊྛིཏཱ.

༦. ཐེཡྻསཏྠསིཀྑཱཔདཝཎྞནཱ

༤༠༧. ཚཊྛསིཀྑཱཔདཾ ¶ ཨུཏྟཱནཏྠམེཝ. ཐེཡྻསཏྠཀབྷཱཝོ, ཛཱནནཾ, སཾཝིདྷཱནཾ, ཨཝིསངྐེཏེན གམནནྟི ཨིམཱནི པནེཏྠ ཙཏྟཱརི ཨངྒཱནི.

ཐེཡྻསཏྠསིཀྑཱཔདཝཎྞནཱ ནིཊྛིཏཱ.

༤༡༢. སཏྟམེ ནཏྠི ཀིཉྩི ཝཏྟབྦཾ.

༨. ཨརིཊྛསིཀྑཱཔདཝཎྞནཱ

༤༡༧. ཨཊྛམེ བཱདྷཡིཾསཱུཏི ཧནིཾསུ. ཏཾཏཾསམྤཏྟིཡཱ ཝིབནྡྷནཝསེན སཏྟསནྟཱནསྶ ཨནྟརེ ཝེམཛ྄ཛྷེ ཨེཏི ཨཱགཙྪཏཱིཏི ཨནྟརཱཡོ, དིཊྛདྷམྨིཀཱདིཨནཏྠོ. ཨནཏིཀྐམནཊྛེན ཏསྨིཾ ཨནྟརཱཡེ ནིཡུཏྟཱ, ཨནྟརཱཡཾ ཝཱ ཕལཾ ཨརཧནྟི, ཨནྟརཱཡསྶ ཝཱ ཀརཎསཱིལཱཏི ཨནྟརཱཡིཀཱ. ཏེནཱཧ ‘‘ཨནྟརཱཡཾ ཀརོནྟཱིཏི ཨནྟརཱཡིཀཱ’’ཏི. ཨཱནནྟརིཡདྷམྨཱཏི ཨཱནནྟརིཀསབྷཱཝཱ ཙེཏནཱདྷམྨཱ. ཏཏྲཱཡཾ ཝཙནཏྠོ – ཙུཏིཨནནྟརཕལཾ ཨནནྟརཾ ནཱམ, ཏསྨིཾ ཨནནྟརེ ནིཡུཏྟཱ, ཏཾནིབྦཏྟནེན ཨནནྟརཀརཎསཱིལཱ, ཨནནྟརཔྤཡོཛནཱཏི ཝཱ ཨཱནནྟརིཀཱ, ཏེ ཨེཝ ཨཱནནྟརིཡཱཏི ཝུཏྟཱ. ཀམྨཱནི ཨེཝ ཨནྟརཱཡིཀཱཏི ཀམྨནྟརཱཡིཀཱ. མོཀྑསྶེཝ ཨནྟརཱཡཾ ཀརོཏི, ན སགྒསྶཱཏི མིཙྪཱཙཱརལཀྑཎཱབྷཱཝཏོ ཝུཏྟཾ. ན ཧི བྷིཀྑུནིཡཱ དྷམྨརཀྑིཏབྷཱཝོ ཨཏྠི. པཱཀཏིཀབྷིཀྑུནཱིཝསེན ཙེཏཾ ཝུཏྟཾ. ཨརིཡཱཡ པན པཝཏྟཾ ཨཔཱཡསཾཝཏྟནིཀམེཝ, ནནྡམཱཎཝཀོ ཙེཏྠ ནིདསྶནཾ. ཨུབྷིནྣཾ སམཱནཙྪནྡཏཱཝསེན ཝཱ ན སགྒནྟརཱཡིཀཏཱ ¶ , མོཀྑནྟརཱཡིཀཏཱ པན མོཀྑཏྠཱཡ པཊིཔཏྟིཡཱ ཝིདཱུསནཏོ. ཨབྷིབྷཝིཏྭཱ པན པཝཏྟིཡཾ སགྒནྟརཱཡིཀཏཱཔི ན སཀྐཱ ནིཝཱརེཏུནྟི.

ཨཧེཏུཀདིཊྛིཨཀིརིཡདིཊྛིནཏྠིཀདིཊྛིཡོཝ ནིཡཏབྷཱཝཾ པཏྟཱ ནིཡཏམིཙྪཱདིཊྛིདྷམྨཱ. པཊིསནྡྷིདྷམྨཱཏི པཊིསནྡྷིཙིཏྟུཔྤཱདམཱཧ. པཎྜཀཱདིགྒཧཎཉྩེཏྠ ནིདསྶནམཏྟཾ སབྦཱཡཔི ཨཧེཏུཀཔཊིསནྡྷིཡཱ ཝིཔཱཀནྟརཱཡིཀབྷཱཝཏོ. ཡཱཧི ཨརིཡེ ཨུཔཝདཏི, ཏཱ ཙེཏནཱ ཨརིཡཱུཔཝཱདཱ ཛཱཏཱ. ཏཏོ པརནྟི ཁམཱཔནཏོ ཨུཔརི. ཡཾ པནེཏྠ ཝཏྟབྦཾ, ཏཾ དིབྦཙཀྑུཀཐཱཡཾ ཝུཏྟམེཝ. སཉྩིཙྩ ཨཱཔནྣཱ ཨཱཔཏྟིཡོཏི སཉྩིཙྩ ཝཱིཏིཀྐནྟཱ སཏྟ ཨཱཔཏྟིཀྑནྡྷཱ. སཉྩིཙྩ ཝཱིཏིཀྐནྟཉྷི ཨནྟམསོ དུཀྐཊདུབྦྷཱསིཏམྤི སགྒམགྒཕལཱནཾ ཨནྟརཱཡཾ ¶ ཀརོཏི. ཡཱཝ བྷིཀྑུབྷཱཝཾ པཊིཛཱནཱཏི པཱརཱཛིཀཾ ཨཱཔནྣོ, ན ཝུཊྛཱཏི སེསགརུཀཱཔཏྟིཾ ཨཱཔནྣོ, ན དེསེཏི ལཧུཀཱཔཏྟིཾ ཨཱཔནྣོ.

ཨཡཾ བྷིཀྑཱུཏི ཨརིཊྛོ བྷིཀྑུ. རསེན རསཾ སཾསནྡིཏྭཱཏི ཨནཝཛྫེན པཙྩཡཔརིབྷུཉྫནརསེན སཱཝཛྫཀཱམགུཎཔརིབྷོགརསཾ སམཱནེཏྭཱ. ཡོནིསོ པཙྩཝེཀྑཎེན ནཏྠི ཨེཏྠ ཚནྡརཱགོཏི ནིཙྪནྡརཱགོ, པཙྩཡཔརིབྷོགོ. ཨུཔནེནྟོ ཝིཡཱཏི བནྡྷནཾ ཨུཔནེནྟོ ཝིཡ. ‘‘གྷཊེནྟོ ཝིཡཱ’’ཏིཔི པཱཋོ. ཨུཔསཾཧརནྟོ ཝིཡཱཏི སདིསཏཾ ཨུཔསཾཧརནྟོ ཝིཡ ཨེཀནྟསཱཝཛྫེ ཨནཝཛྫབྷཱཝཔཀྑེཔནཏོ. པཱཔཀནྟི ལཱམཀཊྛེན དུགྒཏིསམྤཱཔནཊྛེན ཙ པཱཔཀཾ. མཧཱསམུདྡཾ བནྡྷནྟེན ཝིཡཱཏི སེཏུཀརཎཝསེན མཧཱསཱགརཾ བནྡྷནྟེན ཝིཡ. སབྦཉྙུཏཉྙཱཎེན སདྡྷིཾ པཊིཝིརུཛ྄ཛྷནྟོཏི སབྦཉྙུཏཉྙཱཎེན ‘‘སཱཝཛྫ’’ནྟི དིཊྛཾ ‘‘ཨནཝཛྫ’’ནྟི གཧཎེན ཏེན སཧ པཊིཝིརུཛ྄ཛྷནྟོ. ཨཱཎཱཙཀྐེཏི པཋམཔཱརཱཛིཀསིཀྑཱཔདསངྑཱཏེ, ‘‘ཨབྲཧྨཙརིཡཾ པཧཱཡཱ’’ཏིཨཱདིདེསནཱསངྑཱཏེ ཙ ཨཱཎཱཙཀྐེ.

ཨཊྛིཀངྐལཾ ནཱམ ཨུརཊྛི ཝཱ པིཊྛིཀཎྚཀཾ ཝཱ སཱིསཊྛི ཝཱ. ཏཉྷི ནིམྨཾསཏྟཱ ‘‘ཀངྐལ’’ནྟི ཝུཙྩཏི. ཝིགཏམཾསཱཡ ཧི ཨཊྛིསངྑལིཀཱཡ ཨེཀཊྛིམྷི ཝཱ ཀངྐལ-སདྡོ ནིརུལ༹ྷོ. ཨནུདཧནཊྛེནཱཏི ཨནུཔཱཡཔཊིཔཏྟིཡཱ སམྤཏི ཨཱཡཏིཉྩ ཨནུདཧནཊྛེན. མཧཱབྷིཏཱཔནཊྛེན ཨནཝཊྛིཏསབྷཱཝཏཱཡ, ཨིཏྟརཔཙྩུཔཊྛཱནཊྛེན ¶ མུཧུཏྟཀརཎཱིཡཏཱཡ, ཏཱཝཀཱལིཀཊྛེན པརེཧི ཨབྷིབྷཝནཏཱཡ, སབྦངྒཔཙྩངྒཔལིབྷཉྫནཊྛེན བྷེདནཱདིཨདྷིཀརཎབྷཱཝེན, ཨུགྒྷཱཊསདིསཏཱཡ ཨདྷིཀུཊྚནཊྛེན, ཨཝཎེ ཝཎཾ ཨུཔྤཱདེཏྭཱ ཨནྟོ ཨནུཔཝིསནབྷཱཝཏཱཡ ཝིནིཝིཛ྄ཛྷནཊྛེན, དིཊྛདྷམྨིཀསམྤརཱཡིཀཨནཏྠནིམིཏྟཏཱཡ སཱསངྐསཔྤཊིབྷཡཊྛེན.

པཱལི༹ཡཾ ‘‘ཐཱམསཱ པརཱམཱསཱ’’ཏིཨཱདཱིསུ ཨེཝམཏྠོ ཝེདིཏབྦོ. ཐཱམསཱཏི དིཊྛིཐཱམེན, ཏསྶཱ དིཊྛིཡཱ ཐཱམགཏབྷཱཝེནཱཏི ཨཏྠོ. པརཱམཱསཱཏི དིཊྛིཔརཱམཱསེན, དིཊྛིསངྑཱཏཔརཱམཱསེནཱཏི ཨཏྠོ. དིཊྛིཡེཝ ཧི དྷམྨསབྷཱཝཾ ཨཏིཀྐམིཏྭཱ པརཏོ ཨཱམསནེན པརཱམཱསོ. ཨབྷིནིཝིསྶཱཏི ཏཎྷཱབྷིནིཝེསཔུབྦངྒམེན དིཊྛཱབྷིནིཝེསེན ‘‘ཨིདམེཏྠ སཙྩ’’ནྟི ཨབྷིནིཝིསིཏྭཱ. ཝོཧརཏཱིཏི ཀཐེཏི. ཡཏོ ཙ ཁོ ཏེ བྷིཀྑཱུཏི ཡདཱ ཏེ བྷིཀྑཱུ. ཨེཝཾབྱཱཁོ ཨཧཾ, བྷནྟེ, བྷགཝཏཱཏི ཨིདཾ ཨེས ཨཏྟནོ ལདྡྷིཾ ནིགཱུཧིཏུཀཱམཏཱཡ ནཏྠཱིཏི ཝཏྟུཀཱམོཔི བྷགཝཏོ ཨཱནུབྷཱཝེན སམྤཊིཙྪཏི. བུདྡྷཱནཾ ཀིར སམྨུཁཱ དྭེ ཀཐཱ ཀཐེཏུཾ སམཏྠོ ནཱམ ནཏྠི. ཀསྶ ནུ ཁོ ནཱམ ཏྭཾ མོགྷཔུརིསཱཏི ཏྭཾ མོགྷཔུརིས ཀསྶ ཁཏྟིཡསྶ ཝཱ བྲཱཧྨཎསྶ ཝཱ ཝེསྶསྶ ཝཱ སུདྡསྶ ཝཱ གཧཊྛསྶ ཝཱ པབྦཛིཏསྶ ཝཱ དེཝསྶ ཝཱ མནུསྶསྶ ཝཱ མཡཱ ཨེཝཾ ¶ དྷམྨཾ དེསིཏཾ ཨཱཛཱནཱསི. སེསམེཏྠ ཨུཏྟཱནམེཝ. དྷམྨཀམྨཏཱ, སམནུབྷཱསནཱ, ཨཔྤཊིནིསྶཛྫནནྟི ཨིམཱནི པནེཏྠ ཏཱིཎི ཨངྒཱནི.

ཨརིཊྛསིཀྑཱཔདཝཎྞནཱ ནིཊྛིཏཱ.

༩. ཨུཀྑིཏྟསམྦྷོགསིཀྑཱཔདཝཎྞནཱ

༤༢༤. ནཝམེ པཡོགགཎནཱཡཱཏི དཱནགྒཧཎཔྤཡོགགཎནཱཡ. སཾཝཱསེ ཀམྨཔརིཡོསཱནཝསེན, སཧསེཡྻཱཡ ཨེཀསྨིཾ ནིཔནྣེ ཨིཏརསྶ ནིཔཛྫནཔཡོགཝསེན ཨཱཔཏྟིཔརིཙྪེདོ ཝེདིཏབྦོ. ཨེཏྠ ཙ པདབྷཱཛནེ ‘‘ཨེཀཙྪནྣེ’’ཏི ཨཝིསེསེན ཝུཏྟཏྟཱ ནཱནཱུཔཙཱརེཔི ཨེཀཙྪནྣེ ནིཔཛྫནྟསྶ ཨཱཔཏྟི. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. ཨུཀྑིཏྟསམྦྷོགསིཀྑཱཔདཝཎྞནཱ) ཝུཏྟཾ ‘‘སཧ ¶ ཝཱ སེཡྻཾ ཀཔྤེཡྻཱཏི ནཱནཱུཔཙཱརེཔི ཨེཀཙྪནྣེ ནིཔཛྫེཡྻཱ’’ཏི. པཎྞཏྟིཾ ཨཛཱནནྟེན ཨརཧཏཱཔི ཀིརིཡཱབྱཱཀཏཙིཏྟེན ཨཱཔཛྫིཏབྦཏྟཱ ‘‘ཏིཙིཏྟ’’ནྟི ཝུཏྟཾ. ཡཾ པན ཀེནཙི ཝུཏྟཾ ‘‘ཏིཙིཏྟནྟི ཨེཏྠ ཝིཔཱཀཱབྱཱཀཏཙིཏྟེན སཧ ཝཱ སེཡྻཾ ཀཔྤེཡྻཱཏི ཨེཝམཏྠོ དཊྛབྦོ, ཨཉྙཐཱ སཙིཏྟཀཏྟཱ སིཀྑཱཔདསྶ ཀིརིཡཱབྱཱཀཏཾ སནྡྷཱཡ ན ཡུཛྫཏཱི’’ཏི, ཏཾ ན གཧེཏབྦཾ. ན ཧི སཙིཏྟཀསིཀྑཱཔདཝཱིཏིཀྐམོ ཨརཧཏོ ན སམྦྷཝཏི. ཏེནེཝ པཐཝཱིཁཎནཱདཱིསུ སཙིཏྟཀསིཀྑཱཔདེསུ ཏིཙིཏྟམེཝ ཝུཏྟཾ. སེསམེཏྠ ཨུཏྟཱནམེཝ. ཨཀཏཱནུདྷམྨཏཱ, ཛཱནནཱ, སམྦྷོགཱདིཀརཎནྟི ཨིམཱནི པནེཏྠ ཏཱིཎི ཨངྒཱནི.

ཨུཀྑིཏྟསམྦྷོགསིཀྑཱཔདཝཎྞནཱ ནིཊྛིཏཱ.

༡༠. ཀཎྚཀསིཀྑཱཔདཝཎྞནཱ

༤༢༨. དསམེ པིརེཏི ནིཔཱཏཔདཾ. སམྦོདྷནེ ཝཏྟམཱནཾ པར-སདྡེན སམཱནཏྠཾ ཝདནྟཱིཏི ཨཱཧ ‘‘པར ཨམཱམཀཱ’’ཏི, ཨམྷཱཀཾ ཨནཛ྄ཛྷཏྟིཀབྷཱུཏཱཏི ཨཏྠོ. པིརེཏི ཝཱ ‘‘པརཏོ’’ཏི ཨིམིནཱ སམཱནཏྠཾ ནིཔཱཏཔདཾ, ཏསྨཱ ཙར པིརེཏི པརཏོ གཙྪ, མཱ ཨིདྷ ཏིཊྛཱཏི ཨེཝམྤེཏྠ ཨཏྠོ ཝེདིཏབྦོ. སེསམེཏྠ པུརིམསིཀྑཱཔདདྭཡེ ཝུཏྟནཡམེཝ.

ཀཎྚཀསིཀྑཱཔདཝཎྞནཱ ནིཊྛིཏཱ.

ནིཊྛིཏོ སཔྤཱཎཀཝགྒོ སཏྟམོ.

༨. སཧདྷམྨིཀཝགྒོ

༡. སཧདྷམྨིཀསིཀྑཱཔདཝཎྞནཱ

༤༣༤. སཧདྷམྨིཀཝགྒསྶ ¶ པཋམསིཀྑཱཔདེ ཝཱཙཱཡ ཝཱཙཱཡ ཨཱཔཏྟཱིཏི ཨནཱདརིཡབྷཡཱ ལེསེན ཨེཝཾ ཝདནྟསྶ ཨཱཔཏྟི. སེསམེཏྠ ཨུཏྟཱནམེཝ. ཨུཔསམྤནྣསྶ པཉྙཏྟེན ཝཙནཾ, ཨསིཀྑིཏུཀཱམཏཱཡ ཨེཝཾ ཝཙནནྟི ཨིམཱནི པནེཏྠ དྭེ ཨངྒཱནི.

སཧདྷམྨིཀསིཀྑཱཔདཝཎྞནཱ ནིཊྛིཏཱ.

༢. ཝིལེཁནསིཀྑཱཔདཝཎྞནཱ

༤༣༨. དུཏིཡེ ¶ ཝིནཡསྶ པརིཡཱཔུཎནཾ ཝིནཡཔརིཡཏྟཱིཏི ཨཱཧ ‘‘ཝིནཡཾ པརིཡཱཔུཎནྟཱན’’ནྟིཨཱདི. སུགུཏྟོཏི ཡཐཱ ཀརཎྜཀེ པཀྑིཏྟམཎིཀྑནྡྷོ ཝིཡ ན ནསྶཏི ཝིཔཏྟིཾ ན པཱཔུཎཱཏི, ཨེཝཾ སུཊྛུ གོཔིཏོ. སུརཀྑིཏོཏི ཏསྶེཝ པརིཡཱཡཝཙནཾ. ཡཐཱ ཧི ཀིལེསཙོརེཧི ཨཝིལུམྤནཱིཡོ ཧོཏི, ཨེཝཾ སབྦདཱ སཱུཔཊྛིཏསྶཏིཏཱཡ སུཊྛུ རཀྑིཏོ. ཀུཀྐུཙྩཔཀཏཱནནྟི ཀཔྤིཡཱཀཔྤིཡཾ ནིསྶཱཡ ཨུཔྤནྣཀུཀྐུཙྩེན ཨབྷིབྷཱུཏཱནཾ. སཱརཛྫནཾ སཱརདོ, བྱཱམོཧབྷཡཾ. ཝིགཏོ སཱརདོ ཨེཏསྶཱཏི ཝིསཱརདོ. སཧདྷམྨེནཱཏི སཀཱརཎེན ཝཙནེན. སུནིགྒཧིཏཾ ནིགྒཎྷཱཏཱིཏི ཡཐཱ ན པུན སཱིསཾ ཨུཀྑིཔནྟི, ཨཐ ཁོ ཨཔྤཊིབྷཱནཱ མངྐུབྷཱུཏཱཡེཝ ཧོནྟི, ཨེཝཾ སུཊྛུ ནིགྒཎྷཱཏི.

ཨལཛྫིཏཱཏི ཡ-ཀཱརལོཔེན ནིདྡེསོ, ཨལཛྫིཏཱཡཱཏི ཝུཏྟཾ ཧོཏི. ཨཉྙཱཎཏཱཏིཨཱདཱིསུཔི ཨེསེཝ ནཡོ. མནྡོ མོམཱུཧོཏི ཨཉྙཱཎབྷཱཝེན མནྡོ, ཨཝིསཡཏོ མོམཱུཧོ, མཧཱམཱུལ༹ྷོཏི ཨཏྠོ.

ཨཏྟཔཙྩཏྠིཀཱཏི ཨཏྟནོ པཙྩཏྠིཀཱ. ཝཛྫིཔུཏྟཀཱ དསཝཏྠུདཱིཔཀཱ. པརཱུཔཧཱརཨཉྙཱཎཀངྑཱཔརཝིཏཱརཎཱདིཝཱདཱཏི ཨེཏྠ ཡེ ཨརཧཏྟཾ པཊིཛཱནནྟཱནཾ ཨཔྤཏྟེ པཏྟསཉྙཱིནཾ ཨདྷིམཱནིཀཱནཾ ཀུཧཀཱནཾ ཝཱ ཨརཧཏྟཾ པཊིཛཱནནྟཱནཾ སུཀྐཝིསྶཊྛིཾ དིསྭཱ མཱརཀཱཡིཀཱ དེཝཏཱ ‘‘ཨརཧཏོ ཨསུཙིཾ ¶ ཨུཔསཾཧརནྟཱི’’ཏི མཉྙནྟི སེཡྻཐཱཔི པུབྦསེལིཡཱ ཨཔརསེལིཡཱ ཙ, ཏེ པརཱུཔཧཱརཝཱདཱ. ཡེསཾ པན ཨརཧཏོ ཨིཏྠིཔུརིསཱདཱིནཾ ནཱམགོཏྟཱདཱིསུ ཉཱཎཔྤཝཏྟིཡཱ ཨབྷཱཝེན ཨཏྠི ཨརཧཏོ ཨཉྙཱཎཾ, ཏཏྠེཝ སནྣིཊྛཱནཱབྷཱཝེན ཨཏྠི ཨརཧཏོ ཀངྑཱ, ཡསྨཱ ཙསྶ ཏཱནི ཝཏྠཱུནི པརེ ཝིཏཱརེནྟི པཀཱསེནྟི ཨཱཙིཀྑནྟི, ཏསྨཱ ཨཏྠི ཨརཧཏོ པརཝིཏཱརཎཱཏི ཨིམཱ ཏིསྶོ ལདྡྷིཡོ སེཡྻཐཱཔི ཨེཏརཧི པུབྦསེལིཡཱནཾ, ཏེ ཨཉྙཱཎཀངྑཱཔརཝིཏཱརཎཝཱདཱ. ནིགྒཧོ པན ནེསཾ ཀཐཱཝཏྠུཔྤཀརཎེ ཝུཏྟནཡེནེཝ ཝེདིཏབྦོ.

ཙཏྟཱརོ མགྒཱ ཙ ཕལཱནི ཙཱཏི ཨུཀྐཊྛནིདྡེསཝསེན ཝུཏྟཾ, ཙཏསྶོ པཊིསམྦྷིདཱ ཏིསྶོ ཝིཛྫཱ ཚ ཨབྷིཉྙཱཏི ཨཡམྤི ཨདྷིགམསདྡྷམྨོཡེཝ. ཙ-ཀཱརོ ¶ ཝཱ ཨཝུཏྟསམྤིཎྜནཏྠོ དཊྛབྦོ. ཀེཙི ཐེརཱཏི དྷམྨཀཐིཀཱ. ཨཱཧཾསཱུཏི པཾསུཀཱུལིཀཏྠེརཱ ཨེཝཾ ཨཱཧཾསུ.

ཀདཱ པནཱཡཾ ཀཐཱ ཨུདཔཱདཱིཏི? ཨཡཉྷེཏྠ ཨནུཔུབྦིཀཐཱ (ཨ. ནི. ཨཊྛ. ༡.༡.༡༣༠) – ཨིམསྨིཾ ཀིར དཱིཔེ ཙཎྜཱལཏིསྶམཧཱབྷཡེ སཀྐོ དེཝརཱཛཱ མཧཱཨུལུ༹མྤཾ མཱཔེཏྭཱ བྷིཀྑཱུནཾ ཨཱརོཙཱཔེསི ‘‘མཧནྟཾ བྷཡཾ བྷཝིསྶཏི, ན སམྨཱ དེཝོ ཝསྶིསྶཏི, བྷིཀྑཱུ པཙྩཡེཧི ཀིལམནྟཱ པརིཡཏྟིཾ སནྡྷཱརེཏུཾ ན སཀྑིསྶནྟི, པརཏཱིརཾ གནྟྭཱ ཨཡྻེཧི ཛཱིཝིཏཾ རཀྑིཏུཾ ཝཊྚཏི. ཨིམཾ མཧཱཨུལུ༹མྤཾ ཨཱརུཡ྄ཧ གཙྪཐ བྷནྟེ, ཡེསཾ ཨེཏྠ ནིསཛྫཊྛཱནཾ ནཔྤཧོཏི, ཏེ ཀཊྛཁཎྜེཔི ཨུརཾ ཋཔེཏྭཱ གཙྪནྟུ, སབྦེསཾ བྷཡཾ ན བྷཝིསྶཏཱི’’ཏི. ཏདཱ སམུདྡཏཱིརཾ པཏྭཱ སཊྛི བྷིཀྑཱུ ཀཏིཀཾ ཀཏྭཱ ‘‘ཨམྷཱཀཾ ཨེཏྠ གམནཀིཙྩཾ ནཏྠི, མཡཾ ཨིདྷེཝ ཧུཏྭཱ ཏེཔིཊཀཾ རཀྑིསྶཱམཱ’’ཏི ཏཏོ ནིཝཏྟིཏྭཱ དཀྑིཎམལཡཛནཔདཾ གནྟྭཱ ཀནྡམཱུལཔཎྞེཧི ཛཱིཝིཀཾ ཀཔྤེནྟཱ ཝསིཾསུ, ཀཱཡེ ཝཧནྟེ ནིསཱིདིཏྭཱ སཛ྄ཛྷཱཡཾ ཀརོནྟི, ཨཝཧནྟེ ཝཱལིཀཾ ཨུསྶཱརེཏྭཱ པརིཝཱརེཏྭཱ སཱིསཱནི ཨེཀཊྛཱནེ ཀཏྭཱ པརིཡཏྟིཾ སམྨསནྟི. ཨིམིནཱ ནིཡཱམེན དྭཱདས སཾཝཙྪརཱནི སཱཊྛཀཐཾ ཏེཔིཊཀཾ པརིཔུཎྞཾ ཀཏྭཱ དྷཱརཡིཾསུ.

བྷཡེ ཝཱུཔསནྟེ སཏྟསཏཱ བྷིཀྑཱུ ཨཏྟནོ གཏཊྛཱནེ སཱཊྛཀཐེ ཏེཔིཊཀེ ཨེཀཀྑརམྤི ཨེཀབྱཉྫནམྤི ཨཝིནཱསེཏྭཱ ཨིམམེཝ དཱིཔམཱགམྨ ཀལླགཱམཛནཔདེ མཎྜལཱརཱམཝིཧཱརཾ པཝིསིཾསུ. ཐེརཱནཾ ཨཱགཏཔཝཏྟིཾ སུཏྭཱ ཨིམསྨིཾ དཱིཔེ ཨོཧཱིནཱ སཊྛི བྷིཀྑཱུ ‘‘ཐེརེ པསྶིསྶཱམཱ’’ཏི གནྟྭཱ ཐེརེཧི སདྡྷིཾ ཏེཔིཊཀཾ སོདྷེནྟཱ ཨེཀཀྑརམྤི ཨེཀབྱཉྫནམྤི ཨསམེནྟཾ ནཱམ ན པསྶིཾསུ. ཏསྨིཾ ཋཱནེ ཐེརཱནཾ ཨཡཾ ཀཐཱ ཨུདཔཱདི ‘‘པརིཡཏྟི ནུ ཁོ སཱསནསྶ མཱུལཾ, ཨུདཱཧུ པཊིཔཏྟཱི’’ཏི. པཾསུཀཱུལིཀཏྠེརཱ ‘‘པཊིཔཏྟི མཱུལ’’ནྟི ཨཱཧཾསུ, དྷམྨཀཐིཀཱ ‘‘པརིཡཏྟཱི’’ཏི ¶ . ཨཐ ནེ ཐེརཱ ‘‘ཏུམྷཱཀཾ དྭིནྣམྤི ཛནཱནཾ ཝཙནམཏྟེནེཝ ན སཀྐཱ ཝིཉྙཱཏུཾ, ཛིནབྷཱསིཏཾ སུཏྟཾ ཨཱཧརཐཱ’’ཏི ཨཱཧཾསུ. སུཏྟཾ ཨཱཧརིཏུཾ ན བྷཱརོཏི –

‘‘ཨིམེ ཙ, སུབྷདྡ, བྷིཀྑཱུ སམྨཱ ཝིཧརེཡྻུཾ, ཨསུཉྙོ ལོཀོ ཨརཧནྟེཧི ཨསྶཱ’’ཏི (དཱི. ནི. ༢.༢༡༤). ‘‘པཊིཔཏྟིམཱུལཀཾ, མཧཱརཱཛ, སཏྠུསཱསནཾ ¶ , པཊིཔཏྟིསཱརཀཾ, མཧཱརཱཛ, སཏྠུསཱསནཾ, པཊིཔཏྟི ཏིཊྛནྟཱི ཏིཊྛཏཱི’’ཏི (མི. པ. ༤.༡.༧) –

སུཏྟཾ ཨཱཧརིཾསུ.

ཨིམཾ སུཏྟཾ སུཏྭཱ དྷམྨཀཐིཀཱ ཨཏྟནོ ཝཱདཊྛཔནཏྠཱཡ ཨིམཾ སུཏྟཾ ཨཱཧརིཾསུ –

‘‘ཡཱཝ ཏིཊྛནྟི སུཏྟནྟཱ, ཝིནཡོ ཡཱཝ དིཔྤཏི;

ཏཱཝ དཀྑནྟི ཨཱལོཀཾ, སཱུརིཡེ ཨབྦྷུཊྛིཏེ ཡཐཱ.

‘‘སུཏྟནྟེསུ ཨསནྟེསུ, པམུཊྛེ ཝིནཡམྷི ཙ;

ཏམོ བྷཝིསྶཏི ལོཀེ, སཱུརིཡེ ཨཏྠངྒཏེ ཡཐཱ.

‘‘སུཏྟནྟེ རཀྑིཏེ སནྟེ, པཊིཔཏྟི ཧོཏི རཀྑིཏཱ;

པཊིཔཏྟིཡཾ ཋིཏོ དྷཱིརོ, ཡོགཀྑེམཱ ན དྷཾསཏཱི’’ཏི.

ཨིམསྨིཾ སུཏྟེ ཨཱཧཊེ པཾསུཀཱུལིཀཏྠེརཱ ཏུཎྷཱི ཨཧེསུཾ. དྷམྨཀཐིཀཏྠེརཱནཾཡེཝ ཝཙནཾ པུརཏོ ཨཧོསི. ཡཐཱ ཧི གཝསཏསྶ གཝསཧསྶསྶ ཝཱ ཨནྟརེ པཝེཎིཔཱལིཀཱཡ དྷེནུཡཱ ཨསཏི སོ ཝཾསོ སཱ པཝེཎཱི ན གྷཊཱིཡཏི, ཨེཝམེཝ ཨཱརདྡྷཝིཔསྶཀཱནཾ བྷིཀྑཱུནཾ སཏེཔི སཧསྶེཔི ཝིཛྫམཱནེ པརིཡཏྟིཡཱ ཨསཏི ཨརིཡམགྒཔཊིཝེདྷོ ནཱམ ན ཧོཏི. ཡཐཱ ཙ ནིདྷིཀུམྦྷིཡཱ ཛཱནནཏྠཱཡ པཱསཱཎཔིཊྛེ ཨཀྑརེསུ ཨུཔནིབདྡྷེསུ ཡཱཝ ཨཀྑརཱནི དྷརནྟི, ཏཱཝ ནིདྷིཀུམྦྷཱི ནཊྛཱ ནཱམ ན ཧོཏི, ཨེཝམེཝ པརིཡཏྟིཡཱ དྷརམཱནཱཡ སཱསནཾ ཨནྟརཧིཏཾ ནཱམ ན ཧོཏཱིཏི. ཏསྶཱདྷེཡྻོཏི ཏསྶཱཡཏྟོ.

༤༣༩. སོ ¶ པནཱཏི སོ པཱཏིམོཀྑོ. སེསམེཏྠ ཨུཏྟཱནམེཝ. གརཧིཏུཀཱམཏཱ, ཨུཔསམྤནྣསྶ སནྟིཀེ སིཀྑཱཔདཝིཝཎྞནཉྩཱཏི ཨིམཱནི པནེཏྠ དྭེ ཨངྒཱནི.

ཝིལེཁནསིཀྑཱཔདཝཎྞནཱ ནིཊྛིཏཱ.

༣. མོཧནསིཀྑཱཔདཝཎྞནཱ

༤༤༣. ཏཏིཡཾ ¶ ཨུཏྟཱནམེཝ. མོཧཱརོཔནཾ, མོཧེཏུཀཱམཏཱ, ཝུཏྟནཡེན སུཏབྷཱཝོ, མོཧནནྟི ཨིམཱནི པནེཏྠ ཙཏྟཱརི ཨངྒཱནི.

མོཧནསིཀྑཱཔདཝཎྞནཱ ནིཊྛིཏཱ.

༤. པཧཱརསིཀྑཱཔདཝཎྞནཱ

༤༥༢. ཙཏུཏྠེ རཏྟཙིཏྟོཏི ཀཱཡསཾསགྒརཱགེན རཏྟཙིཏྟོ. སཙེ པན མེཐུནརཱགེན རཏྟོ པཧཱརཾ དེཏི, དུཀྐཊམེཝ. སེསམེཏྠ ཨུཏྟཱནམེཝ. ཀུཔིཏཏཱ, ན མོཀྑཱདྷིཔྤཱཡཏཱ, ཨུཔསམྤནྣསྶ པཧཱརདཱནནྟི ཨིམཱནི པནེཏྠ ཏཱིཎི ཨངྒཱནི.

པཧཱརསིཀྑཱཔདཝཎྞནཱ ནིཊྛིཏཱ.

༥. ཏལསཏྟིཀསིཀྑཱཔདཝཎྞནཱ

༤༥༧. པཉྩམེ ན པཧརིཏུཀཱམཏཱཡ དིནྣཏྟཱ དུཀྐཊནྟི ཨེཏྠ པཧརིཏུཀཱམཏཱཡ པཧཊེ པུརིམསིཀྑཱཔདེན པཱཙིཏྟིཡཾ, ཨུཙྩཱརེཏུཀཱམཏཱཡ ཀེཝལཾ ཨུགྒིརཎམཏྟེ ཀཏེ ཨིམིནཱ པཱཙིཏྟིཡཾ. ཨིམིནཱ པན ཝིརཛ྄ཛྷིཏྭཱ པཧཱརོ དིནྣོ, ཏསྨཱ དུཀྐཊཾ. ཀིམིདཾ དུཀྐཊཾ པཧཱརཔཙྩཡཱ, ཨུདཱཧུ ཨུགྒིརཎཔཙྩཡཱཏི? ཏཏྠ ཀེཙི ཏཱཝ ཝདནྟི ‘‘པཧཱརཔཙྩཡཱ ཨེཝ དུཀྐཊཾ, ཨུགྒིརཎཔཙྩཡཱ པཱཙིཏྟིཡནྟི སདུཀྐཊཾ པཱཙིཏྟིཡཾ ཡུཛྫཏི. པུརིམཉྷི ཨུགྒིརཎཾ, པཙྪཱ པཧཱརོ, ན ཙ པཙྪཱ པཧཱརཾ ནིསྶཱཡ པུརིམཾ ཨུགྒིརཎཾ ཨནཱཔཏྟིཝཏྠུཀཾ བྷཝིཏུམརཧཏཱི’’ཏི.

མཡཾ ¶ པནེཏྠ ཨེཝཾ ཏཀྐཡཱམ ‘‘ཨུགྒིརཎསྶ ཨཏྟནོ སབྷཱཝེནེཝ ཨསཎྛིཏཏྟཱ ཏཔྤཙྩཡཱ པཱཙིཏྟིཡེན ན བྷཝིཏབྦཾ, ཨསུདྡྷཙིཏྟེན ཀཏཔཡོགཏྟཱ པན ན སཀྐཱ ཨེཏྠ ཨནཱཔཏྟིཡཱ བྷཝིཏུནྟི དུཀྐཊཾ ཝུཏྟཾ. ‘ན པཧརིཏུཀཱམཏཱཡ དིནྣཏྟཱ’ཏི ཨིམིནཱ ཙ པཧཱརཔཙྩཡཱ པུརིམསིཀྑཱཔདེན པཱཙིཏྟིཡཱསམྦྷཝེ ཀཱརཎཾ ཝུཏྟཾ, ན པན པཧཱརཔཙྩཡཱ དུཀྐཊསམྦྷཝེ. ན ཧི ཨཔཧརིཏུཀཱམཏཱཡ པཧཱརེ དིནྣེ ¶ པུརིམསིཀྑཱཔདེན པཧཱརཔཙྩཡཱ པཱཙིཏྟིཡེན དུཀྐཊེན ཝཱ བྷཝིཏུཾ ཡུཏྟ’’ནྟི. ‘‘ཏིརཙྪཱནཱདཱིནཾ ཨསུཙིཀརཎཱདིཾ དིསྭཱ ཀུཛ྄ཛྷིཏྭཱཔི ཨུགྒིརནྟསྶ མོཀྑཱདྷིཔྤཱཡོ ཨེཝཱ’’ཏི ཝདནྟི. སེསམེཏྠ ཨུཏྟཱནམེཝ. ཀུཔིཏཏཱ, ན མོཀྑཱདྷིཔྤཱཡཏཱ, ཨུཔསམྤནྣསྶ ཏལསཏྟིཨུགྒིརཎནྟི ཨིམཱནི པནེཏྠ ཏཱིཎི ཨངྒཱནི.

ཏལསཏྟིཀསིཀྑཱཔདཝཎྞནཱ ནིཊྛིཏཱ.

༦. ཨམཱུལཀསིཀྑཱཔདཝཎྞནཱ

༤༥༩. ཚཊྛཾ ཨུཏྟཱནཏྠམེཝ. ཨུཔསམྤནྣཏཱ, སངྒྷཱདིསེསསྶ ཨམཱུལཀཏཱ, ཨནུདྡྷཾསནཱ, ཏངྑཎཝིཛཱནནཱཏི ཨིམཱནི པནེཏྠ ཙཏྟཱརི ཨངྒཱནི.

ཨམཱུལཀསིཀྑཱཔདཝཎྞནཱ ནིཊྛིཏཱ.

༧. སཉྩིཙྩསིཀྑཱཔདཝཎྞནཱ

༤༦༤. སཏྟམམྤི ཨུཏྟཱནཏྠམེཝ. ཨུཔསམྤནྣཏཱ, ཨཕཱསུཀཱམཏཱ, ཀུཀྐུཙྩུཔྤཱདནནྟི ཨིམཱནི པནེཏྠ ཏཱིཎི ཨངྒཱནི.

སཉྩིཙྩསིཀྑཱཔདཝཎྞནཱ ནིཊྛིཏཱ.

༨. ཨུཔསྶུཏིསིཀྑཱཔདཝཎྞནཱ

༤༧༡. ཨཊྛམེ སུཏིསམཱིཔནྟི སདྡསམཱིཔཾ. སུཡྻཏཱིཏི ཧི སུཏི, སདྡསྶེཏཾ ཨདྷིཝཙནཾ. ཏསྶ སམཱིཔཾ ཨུཔསྶུཏི, སདྡསམཱིཔནྟི ཝུཏྟཾ ཧོཏི. གཎྛིཔདེསུ ཙ སུཡྻཏཱིཏི སུཏཱིཏི སདྡོཝ ཝུཏྟོ. ཡཏྠ པན ཋིཏེན སཀྐཱ ཧོཏི སདྡཾ སོཏུཾ, ཏཏྠ ཏིཊྛནྟོ སདྡསམཱིཔེ ཋིཏོ ནཱམ ཧོཏཱིཏི ¶ ཨཱཧ ‘‘ཡཏྠ ཋཏྭཱ’’ཏིཨཱདི. ཀེཙི པན ‘‘སུཎཱཏི ཨེཏྠཱཏི སུཏི. ཡཏྠ ཋིཏོ སུཎཱཏི, ཏསྶ ཋཱནསྶེཏཾ ནཱམཾ. ཏསྶ སམཱིཔཾ ཨུཔསྶུཏཱི’’ཏི ཝདནྟི, ཨེཝཾ པན གཡ྄ཧམཱནེ ཡསྨིཾ ཋཱནེ ཋིཏོ སུཎཱཏི, ཏསྶ ¶ ཨཱསནྣེ ཨཉྙསྨིཾ པདེསེ ཏིཊྛཏཱིཏི ཨཱཔཛྫཏི. ཨཊྛཀཐཱཡཉྩ ཨུཔསྶུཏི-སདྡསྶེཝ ཨཏྠཾ དསྶེཏུཾ ‘‘ཡཏྠ ཋཏྭཱ སཀྐཱ ཧོཏི, ཏེསཾ ཝཙནཾ སོཏུ’’ནྟི ཝུཏྟཾ, ན སུཏི-སདྡསྶ. ཏསྨཱ པུབྦནཡོཝེཏྠ པསཏྠཏརོ. ཨཐ ཝཱ ཨུཔེཙྩ སུཡྻཏི ཨེཏྠཱཏི ཨུཔསྶུཏི, ཋཱནཾ. ཡཾ ཋཱནཾ ཨུཔགཏེན སཀྐཱ ཧོཏི ཀཐེནྟཱནཾ སདྡཾ སོཏུཾ, ཏཏྠཱཏི ཨེཝམཏྠོ གཧེཏབྦོ. མནྟེནྟནྟི བྷུམྨཏྠེ ཨུཔཡོགཝཙནནྟི ཨཱཧ ‘‘མནྟཡམཱནེ’’ཏི.

༤༧༣. ཨེཀཔརིཙྪེདཱནཱིཏི ‘‘སིཡཱ ཀིརིཡཾ, སིཡཱ ཨཀིརིཡ’’ནྟི ཨིམིནཱ ནཡེན ཨེཀཔརིཙྪེདཱནི. ཨིམཱནི ཧི ཏཱིཎི སིཀྑཱཔདཱནི ཀདཱཙི ཀིརིཡཏོ སམུཊྛཧནྟི, ཀདཱཙི ཨཀིརིཡཏོ, ན ཨེཀཀྑཎེཡེཝ ཀིརིཡཱཀིརིཡཏོ སམུཊྛཧནྟི. སེསམེཏྠ ཨུཏྟཱནམེཝ. ཨུཔསམྤནྣཏཱ, ཙོདནཱདྷིཔྤཱཡོ, སཝནནྟི ཨིམཱནི པནེཏྠ ཏཱིཎི ཨངྒཱནི.

ཨུཔསྶུཏིསིཀྑཱཔདཝཎྞནཱ ནིཊྛིཏཱ.

༩. ཀམྨཔཊིབཱཧནསིཀྑཱཔདཝཎྞནཱ

༤༧༤. ནཝམཾ ཨུཏྟཱནཏྠམེཝ. དྷམྨཀམྨཏཱ, དྷམྨཀམྨནྟི སཉྙཱ, ཚནྡཾ དཏྭཱ ཁིཡྻནནྟི ཨིམཱནི པནེཏྠ ཏཱིཎི ཨངྒཱནི.

ཀམྨཔཊིབཱཧནསིཀྑཱཔདཝཎྞནཱ ནིཊྛིཏཱ.

༡༠. ཚནྡཾ ཨདཏྭཱ གམནསིཀྑཱཔདཝཎྞནཱ

༤༧༩. དསམཾ ཨུཏྟཱནཏྠམེཝ. ཝིནིཙྪཡཀཐཱཡ པཝཏྟམཱནཏཱ, དྷམྨཀམྨཏཱ, དྷམྨཀམྨསཉྙིཏཱ, སམཱནསཱིམཱཡཾ ཋིཏཏཱ, སམཱནསཾཝཱསཀཏཱ, ཀོཔེཏུཀཱམཏཱཡ ཧཏྠཔཱསཝིཛཧནནྟི ཨིམཱནི པནེཏྠ ཚ ཨངྒཱནི.

ཚནྡཾ ཨདཏྭཱ གམནསིཀྑཱཔདཝཎྞནཱ ནིཊྛིཏཱ.

༡༡. དུབྦལསིཀྑཱཔདཝཎྞནཱ

༤༨༤. ཨེཀཱདསམམྤི ¶ ¶ ཨུཏྟཱནཏྠམེཝ. ཨུཔསམྤནྣཏཱ, དྷམྨེན ལདྡྷསམྨུཏིཏཱ, སངྒྷེན སདྡྷིཾ ཝིཀཔྤནུཔགཙཱིཝརདཱནཾ, པཙྪཱ ཁཱིཡིཏུཀཱམཏཱཡ ཁིཡྻནཱཏི ཨིམཱནི པནེཏྠ ཙཏྟཱརི ཨངྒཱནི.

དུབྦལསིཀྑཱཔདཝཎྞནཱ ནིཊྛིཏཱ.

༤༨༩. དྭཱདསམེ ནཏྠི ཀིཉྩི ཝཏྟབྦཾ.

ནིཊྛིཏོ སཧདྷམྨིཀཝགྒོ ཨཊྛམོ.

༩. རཱཛཝགྒོ

༡. ཨནྟེཔུརསིཀྑཱཔདཝཎྞནཱ

༤༩༧-༤༩༩. རཱཛཝགྒསྶ པཋམསིཀྑཱཔདེ ཨཊྛཀཐཱཡཾ སབྦཾ ཨུཏྟཱནཏྠམེཝ. པཱལི༹ཡཾ པན ཨཡམནུཏྟཱནཔདཏྠོ. ཀཏཾ ཝཱ ཀརིསྶནྟི ཝཱཏི མེཐུནཝཱིཏིཀྐམནཾ ཀཏཾ ཝཱ ཀརིསྶནྟི ཝཱ. ཨིམེསནྟི པདཾ ཝིབྷཏྟིཝིཔརིཎཱམཾ ཀཏྭཱ ཨུབྷཡཏྠ ཡོཛེཏབྦཾ ‘‘ཨིམེཧི ཀཏཾ ཨིམེ ཀརིསྶནྟཱི’’ཏི. རཏནནྟི མཎིརཏནཱདཱིསུ ཡཾཀིཉྩི. ཨུབྷཏོཏི དྭཱིཧི པཀྑེཧི. ‘‘ཨུབྷཏོ སུཛཱཏོ’’ཏི ཨེཏྟཀེ ཝུཏྟེ ཡེཧི ཀེཧིཙི དྭཱིཧི བྷཱགེཧི སུཛཱཏཏཱ ཝིཉྙཱཡེཡྻ, སུཛཱཏ-སདྡོ ཙ ‘‘སུཛཱཏོ ཙཱརུདསྶནོ’’ཏིཨཱདཱིསུ ཨཱརོཧསམྤཏྟིཔརིཡཱཡོཏི ཛཱཏིཝསེནེཝ སུཛཱཏཏཾ ཝིབྷཱཝེཏུཾ ‘‘མཱཏིཏོ ཙ པིཏིཏོ ཙཱ’’ཏི ཝུཏྟཾ. ཨནོརསཔུཏྟཝསེནཔི ལོཀེ མཱཏུཔིཏུསམཉྙཱ དིསྶཏི, ཨིདྷ པན སཱ ཨོརསཔུཏྟཝསེནེཝ ཨིཙྪིཏཱཏི དསྶེཏུཾ ‘‘སཾསུདྡྷགཧཎིཀོ’’ཏི ཝུཏྟཾ. གབྦྷཾ གཎྷཱཏི དྷཱརེཏཱིཏི གཧཎཱི, གབྦྷཱསཡསཉྙིཏོ མཱཏུཀུཙྪིཔྤདེསོ. སཾསུདྡྷཱ གཧཎཱི ཨསྶཱཏི སཾསུདྡྷགཧཎིཀོ, སཾསུདྡྷཱ ཏསྶ མཱཏུཀུཙྪཱིཏི ཝུཏྟཾ ཧོཏི. ‘‘སམཝེཔཱཀིནིཡཱ གཧཎིཡཱ’’ཏི ¶ ཨེཏྠ པན ཡཐཱབྷུཏྟསྶ ཨཱཧཱརསྶ ཝིཔཱཙནཝསེན གཎྷནཏོ ཨཚཌྜནཏོ ཀམྨཛཏེཛོདྷཱཏུ ‘‘གཧཎཱི’’ཏི ཝུཙྩཏི.

ཡཱཝ ¶ སཏྟམཱ པིཏཱམཧཡུགཱཏི ཨེཏྠ པིཏུ པིཏཱ པིཏཱམཧོ, པིཏཱམཧསྶ ཡུགཾ པིཏཱམཧཡུགཾ. ‘‘ཡུག’’ནྟི ཨཱཡུཔྤམཱཎཾ ཝུཙྩཏི. ཨབྷིལཱཔམཏྟམེཝ ཙེཏཾ, ཨཏྠཏོ པན པིཏཱམཧོཡེཝ པིཏཱམཧཡུགཾ. པིཏཱ ཙ མཱཏཱ ཙ པིཏརོ, པིཏཱུནཾ པིཏརོ པིཏཱམཧཱ, ཏེསཾ ཡུགོ པིཏཱམཧཡུགོ, ཏསྨཱ ཡཱཝ སཏྟམཱ པིཏཱམཧཡུགཱ, པིཏཱམཧདྭནྡཱཏི ཨེཝམེཏྠ ཨཏྠོ དཊྛབྦོ. ཨེཝཉྷི པིཏཱམཧགྒཧཎེནེཝ མཱཏཱམཧོཔི གཧིཏོ ཧོཏི. ཡུག-སདྡོ ཙེཏྠ ཨེཀསེསེན དཊྛབྦོ ཡུགོ ཙ ཡུགོ ཙ ཡུགོཏི. ཨེཝཉྷི ཏཏྠ ཏཏྠ དྭནྡཾ གཧིཏམེཝ ཧོཏི, ཏསྨཱ ཏཏོ ཨུདྡྷཾ སབྦེཔི པུབྦཔུརིསཱ པིཏཱམཧཡུགགྒཧཎེནེཝ གཧིཏཱ. ཨེཝཾ ཡཱཝ སཏྟམོ པིཏཱམཧཡུགོ, ཏཱཝ སཾསུདྡྷགཧཎིཀོ.

ཨཀྑིཏྟོཏི ‘‘ཨཔནེཐ ཨེཏཾ, ཀིཾ ཨིམིནཱ’’ཏི ཨེཝཾ ཨཀྑིཏྟོ ཨནཝཀྑིཏྟོ. ཨནུཔཀུཊྛོཏི ན ཨུཔཀུཊྛོ, ན ཨཀྐོསཾ ཝཱ ནིནྡཾ ཝཱ པཏྟཔུབྦོ. ཀེན ཀཱརཎེནཱཏི ཨཱཧ ‘‘ཛཱཏིཝཱདེནཱ’’ཏི. ཨེཏྠ ཙ ‘‘ཨུབྷཏོ…པེ… པིཏཱམཧཡུགཱ’’ཏི ཨེཏེན ཏསྶ ཡོནིདོསཱབྷཱཝོ དསྶིཏོ སཾསུདྡྷགཧཎིཀབྷཱཝཀིཏྟནཏོ, ‘‘ཨཀྑིཏྟོ’’ཏི ཨིམིནཱ ཀིརིཡཱཔརཱདྷཱབྷཱཝོ. ཀིརིཡཱཔརཱདྷེན ཧི སཏྟཱ ཁེཔཾ པཱཔུཎནྟི. ‘‘ཨནུཔཀུཊྛོ’’ཏི ཨིམིནཱ ཨཡུཏྟསཾསགྒཱབྷཱཝོ. ཨཡུཏྟསཾསགྒཉྷི པཊིཙྩ སཏྟཱ ཨཀྐོསཾ ལབྷནྟི. སེསམེཏྠ ཨུཏྟཱནམེཝ. ཁཏྟིཡཏཱ, ཨབྷིསིཏྟཏཱ, ཨུབྷིནྣམྤི སཡནིགྷརཏོ ཨནིཀྑནྟཏཱ, ཨཔྤཊིསཾཝིདིཏཏཱ, ཨིནྡཁཱིལཱཏིཀྐམོཏི ཨིམཱནི པནེཏྠ པཉྩ ཨངྒཱནི.

ཨནྟེཔུརསིཀྑཱཔདཝཎྞནཱ ནིཊྛིཏཱ.

༢. རཏནསིཀྑཱཔདཝཎྞནཱ

༥༠༢. དུཏིཡེ མཧཱལཏཾ ནཱམཱཏི པཏིཀུལཾ གཙྪནྟིཡཱ ཀིར ཏསྶཱ པིཏཱ མཧཱལཏཱཔིལ༹ནྡྷནཾ ནཱམ ཀཱརཱཔེསི. ཏསྨིཾ པིལ༹ནྡྷནེ ཙཏསྶོ ཝཛིརནཱལི༹ཡོ ཏཏྠ ཏཏྠ ཨཔྤེཏབྦཊྛཱནེ ཨཔྤནཝསེན ཝིནིཡོགཾ ཨགམཾསུ, མུཏྟཱནཾ ཨེཀཱདས ནཱལི༹ཡོ, པཝཱལ༹སྶ དྭཱཝཱིསཏི ནཱལི༹ཡོ, མཎཱིནཾ ཏེཏྟིཾས ནཱལི༹ཡོ. ཨིཏི ཨེཏེཧི ཙ ཨཉྙེཧི ཙ ཝེལུ༹རིཡལོཧིཏངྐམསཱརགལླཱདཱིཧི སཏྟཝཎྞེཧི ཙ རཏནེཧི ནིཊྛཱནཾ ཨགམཱསི ¶ . ཏཾ སཱིསེ པཊིམུཀྐཾ ¶ ཡཱཝ པཱདཔིཊྛིཡཱ བྷསྶཏི, པཉྩནྣཾ ཧཏྠཱིནཾ བལཾ དྷཱརཡམཱནཱཝ ཨིཏྠཱི ནཾ དྷཱརེཏུཾ སཀྐོཏི. ཏཾ སནྡྷཱཡེཏཾ ཝུཏྟཾ.

༥༠༦. ཨཱཝསཐསྶ པན སུཔྤཔཱཏོ ཝཱ མུསལཔཱཏོ ཝཱ ཨུཔཙཱརོ ནཱམཱཏི ཡོཛེཏབྦཾ. ཨཱཝསཐོཏི ཙེཏྠ ཨནྟོཨཱརཱམེ ཝཱ ཧོཏུ ཨཉྙཏྠ ཝཱ, ཨཏྟནོ ཝསནཊྛཱནཾ ཝུཙྩཏི. ཚནྡེནཔི བྷཡེནཔཱིཏི ཝཌྜྷཀཱིཨཱདཱིསུ ཚནྡེན, རཱཛཝལླབྷེསུ བྷཡེན. ཏམེཝ བྷིཀྑུཾ ཨཱསངྐནྟཱིཏི ཝིསྶརིཏྭཱ གམནཀཱལེ ཨཏྟནོ པཙྪཏོ ཨཉྙསྶཱབྷཱཝཱ ཨཱསངྐནྟི. པཏིརཱུཔཾ ནཱམ རཏནསམྨཏེ པཾསུཀཱུལགྒཧཎཾ ཝཱ རཏནེ ནིརུསྶུཀྐགམནཾ ཝཱ. ཡདི ཧི ཏཾ རཏནསམྨཏཾ ཨཱམཱསཾ ཙེ, ‘‘ནཏྠི ཨེཏསྶ སཱམཱི’’ཏི པཾསུཀཱུལཾ གཧེསྶཏི. ཨནཱམཱསཾ ཙེ, ‘‘ནཏྠི ཨེཏསྶ སཱམཱི’’ཏི པཾསུཀཱུལཚིནྣཔལིབོདྷོ ནིརཔེཀྑོ གམིསྶཏི. སམཱདཔེཏྭཱཏི ཨཉྙཾ སམཱདཔེཏྭཱ, ‘‘ཨུདྡིསྶ ཨརིཡཱ ཏིཊྛནྟི, ཨེསཱ ཨརིཡཱནཡཱཙནཱ’’ཏི (ཛཱ. ༡.༧.༥༩) ཝུཏྟནཡེན ཡཱཙིཏྭཱཏི ཨཏྠོ. སེསམེཏྠ ཨུཏྟཱནམེཝ. ཨནནུཉྙཱཏཀརཎཾ, པརསནྟཀཏཱ, ཝིསྶཱསགྒཱཧཔཾསུཀཱུལསཉྙཱནཾ ཨབྷཱཝོ, ཨུགྒཧཎཾ ཝཱ ཨུགྒཧཱཔནཾ ཝཱཏི ཨིམཱནི པནེཏྠ ཙཏྟཱརི ཨངྒཱནི.

རཏནསིཀྑཱཔདཝཎྞནཱ ནིཊྛིཏཱ.

༣. ཝིཀཱལགཱམཔྤཝིསནསིཀྑཱཔདཝཎྞནཱ

༥༠༨. ཏཏིཡེ ཨརིཡམགྒསྶཱཏི ཨེཏྠ སགྒམགྒོཔི སངྒཧེཏབྦོ. ཨནིཡྻཱནིཀཏྟཱ སགྒམོཀྑམགྒཱནཾ ཏིརཙྪཱནབྷཱུཏཱ ཧི ཀཐཱ ཏིརཙྪཱནཀཐཱ. ཏིརཙྪཱནབྷཱུཏནྟི ཏིརོཀརཎབྷཱུཏཾ ཝིབནྡྷནབྷཱུཏཾ. རཱཛཔཊིསཾཡུཏྟཾ ཀཐནྟི (དཱི. ནི. ཨཊྛ. ༡.༡༧; མ. ནི. ཨཊྛ. ༢.༢༢༣; སཾ. ནི. ཨཊྛ. ༣.༥.༡༠༨༠; ཨ. ནི. ཨཊྛ. ༣.༡༠.༦༩-༧༠) རཱཛཱནཾ ཨཱརབྦྷ ‘‘མཧཱསམྨཏོ མནྡྷཱཏཱ དྷམྨཱསོཀོ ཨེཝཾམཧཱནུབྷཱཝོ’’ཏིཨཱདིནཱ ནཡེན པཝཏྟཀཐཾ. ཨེཏྠ ཙ ‘‘ཨསུཀོ རཱཛཱ ཨབྷིརཱུཔོ དསྶནཱིཡོ’’ཏིཨཱདིནཱ ནཡེན གེཧསྶིཏཀཐཱཝ ཏིརཙྪཱནཀཐཱ ཧོཏི. ‘‘སོཔི ནཱམ ཨེཝཾམཧཱནུབྷཱཝོ ཁཡཾ གཏོ’’ཏི ཨེཝཾ པཝཏྟཱ པན ཨནིཙྩཏཱཔཊིསཾཡུཏྟཱ ཀམྨཊྛཱནབྷཱཝེ ཏིཊྛཏི. ཙོརེསུཔི ‘‘མཱུལདེཝོ ཨེཝཾམཧཱནུབྷཱཝོ, མེགྷམཱལོ ཨེཝཾམཧཱནུབྷཱཝོ’’ཏི ¶ ཏེསཾ ཀམྨཾ པཊིཙྩ ‘‘ཨཧོ སཱུརཱ’’ཏི གེཧསྶིཏཀཐཱཝ ཏིརཙྪཱནཀཐཱ. ཡུདྡྷེཔི བྷརཏཡུདྡྷཱདཱིསུ ‘‘ཨསུཀེན ཨསུཀོ ཨེཝཾ མཱརིཏོ ཨེཝཾ ཝིདྡྷོ’’ཏི ཀཱམསྶཱདཝསེནེཝ ཀཐཱ ཏིརཙྪཱནཀཐཱ. ‘‘ཏེཔི ནཱམ ཁཡཾ གཏཱ’’ཏི ཨེཝཾ པཝཏྟཱ པན སབྦཏྠ ཀམྨཊྛཱནམེཝ ཧོཏི.

ཨཔིཙ ¶ ཨནྣཱདཱིསུ ‘‘ཨེཝཾ ཝཎྞཝནྟཾ གནྡྷཝནྟཾ རསཝནྟཾ ཕསྶསམྤནྣཾ ཁཱདིམྷ བྷུཉྫིམྷ པིཝིམྷ པརིབྷུཉྫིམྷཱ’’ཏི ཀཱམསྶཱདཝསེན ཀཐེཏུཾ ན ཝཊྚཏི, སཱཏྠཀཾ པན ཀཏྭཱ ‘‘པུབྦེ ཨེཝཾ ཝཎྞཱདིསམྤནྣཾ ཨནྣཾ པཱནཾ ཝཏྠཾ སཡནཾ མཱལཱགནྡྷཾ སཱིལཝནྟཱནཾ ཨདམྷ, ཙེཏིཡཔཱུཛཾ ཨཀརིམྷཱ’’ཏི ཀཐེཏུཾ ཝཊྚཏི. ཉཱཏིཀཐཱདཱིསུཔི ‘‘ཨམྷཱཀཾ ཉཱཏཀཱ སཱུརཱ སམཏྠཱ’’ཏི ཝཱ ‘‘པུབྦེ མཡཾ ཨེཝཾ ཝིཙིཏྲེཧི ཡཱནེཧི ཝིཙརིམྷཱ’’ཏི ཝཱ ཨསྶཱདཝསེན ཝཏྟུཾ ན ཝཊྚཏི, སཱཏྠཀཾ པན ཀཏྭཱ ‘‘ཏེཔི ནོ ཉཱཏཀཱ ཁཡཾ གཏཱ’’ཏི ཝཱ ‘‘པུབྦེ མཡཾ ཨེཝརཱུཔཱ ཨུཔཱཧནཱ སངྒྷསྶ ཨདམྷཱ’’ཏི ཝཱ ཀཐེཏབྦཾ. གཱམཀཐཱཔི སུནིཝིཊྛདུནྣིཝིཊྛསུབྷིཀྑདུབྦྷིཀྑཱདིཝསེན ཝཱ ‘‘ཨསུཀགཱམཝཱསིནོ སཱུརཱ སམཏྠཱ’’ཏི ཝཱ ཨེཝཾ ཨསྶཱདཝསེན ན ཝཊྚཏི, སཱཏྠཀཾ པན ཀཏྭཱ ‘‘སདྡྷཱ པསནྣཱ’’ཏི ཝཱ ‘‘ཁཡཝཡཾ གཏཱ’’ཏི ཝཱ ཝཏྟུཾ ཝཊྚཏི. ནིགམནགརཛནཔདཀཐཱསུཔི ཨེསེཝ ནཡོ.

ཨིཏྠིཀཐཱཔི ཝཎྞསཎྛཱནཱདཱིནི པཊིཙྩ ཨསྶཱདཝསེན ན ཝཊྚཏི, ‘‘སདྡྷཱ པསནྣཱ, ཁཡཾ གཏཱ’’ཏི ཨེཝཾ ཝཏྟུཾ ཝཊྚཏི. སཱུརཀཐཱཔི ‘‘ནནྡིམིཏྟོ ནཱམ ཡོདྷོ སཱུརོ ཨཧོསཱི’’ཏི ཨསྶཱདཝསེན ན ཝཊྚཏི, ‘‘སདྡྷོ ཨཧོསི, ཁཡཾ གཏོ’’ཏི ཨེཝམེཝ ཝཊྚཏི. ཝིསིཁཱཀཐཱཔི ‘‘ཨསུཀཱ ཝིསིཁཱ སུནིཝིཊྛཱ དུནྣིཝིཊྛཱ སཱུརཱ སམཏྠཱ’’ཏི ཨསྶཱདཝསེནེཝ ན ཝཊྚཏི, ‘‘སདྡྷཱ པསནྣཱ, ཁཡཾ གཏཱ’’ཨིཙྩེཝ ཝཊྚཏི.

ཀུམྦྷཊྛཱནཀཐཱཏི ཀུཊཊྛཱནཀཐཱ ཨུདཀཏིཏྠཀཐཱ ཝུཙྩཏི, ཀུམྦྷདཱསཱིཀཐཱ ཝཱ. སཱཔི ‘‘པཱསཱདིཀཱ ནཙྩིཏུཾ གཱཡིཏུཾ ཚེཀཱ’’ཏི ཨསྶཱདཝསེན ན ཝཊྚཏི, ‘‘སདྡྷཱ པསནྣཱ’’ཏིཨཱདིནཱ ནཡེནེཝ ཝཊྚཏི. པུབྦཔེཏཀཐཱཏི ཨཏཱིཏཉཱཏིཀཐཱ. ཏཏྠ ཝཏྟམཱནཉཱཏིཀཐཱསདིསོཝ ཝིནིཙྪཡོ.

ནཱནཏྟཀཐཱཏི པུརིམཔཙྪིམཀཐཱཝིམུཏྟཱ ཨཝསེསཱ ནཱནཱསབྷཱཝཱ ནིརཏྠཀཀཐཱ. ལོཀཀྑཱཡིཀཱཏི ‘‘ཨཡཾ ལོཀོ ཀེན ནིམྨིཏོ, ཨསུཀེན ¶ པཛཱཔཏིནཱ བྲཧྨུནཱ ཨིསྶརེན ཝཱ ནིམྨིཏོ, ཀཱཀོ སེཏོ ཨཊྛཱིནཾ སེཏཏྟཱ, བཀཱ རཏྟཱ ལོཧིཏསྶ རཏྟཏྟཱ’’ཏི ཨེཝམཱདིཀཱ ལོཀཱཡཏཝིཏཎྜསལླཱཔཀཐཱ. ཨུཔྤཏྟིཋིཏིསཾཧཱརཱདིཝསེན ལོཀཾ ཨཀྑཱཡཏཱིཏི ལོཀཀྑཱཡིཀཱ. སམུདྡཀྑཱཡིཀཱ ནཱམ ཀསྨཱ སམུདྡོ སཱགརོ, སཱགརསྶ རཉྙོ པུཏྟེཧི ཁཏཏྟཱ སཱགརོ. ཁཏོ ཨམྷེཧཱིཏི ཧཏྠམུདྡཱཡ ནིཝེདིཏཏྟཱ སམུདྡོཏི ཨེཝམཱདིཀཱ ནིརཏྠཀཱ སམུདྡཀྑཱཡིཀཀཐཱ.

ཨིཏི བྷཝོ ཨིཏི ཨབྷཝོཏི ཡཾ ཝཱ ཏཾ ཝཱ ནིརཏྠཀཀཱརཎཾ ཝཏྭཱ པཝཏྟིཏཀཐཱ ཨིཏིབྷཝཱབྷཝཀཐཱ. ཨེཏྠ ཙ བྷཝོཏི སསྶཏཾ, ཨབྷཝོཏི ཨུཙྪེདཾ. བྷཝོཏི ཝུདྡྷི, ཨབྷཝོཏི ཧཱནི ¶ . བྷཝོཏི ཀཱམསུཁཾ, ཨབྷཝོཏི ཨཏྟཀིལམཐོ. ཨིཏི ཨིམཱཡ ཚབྦིདྷཱཡ ཨིཏིབྷཝཱབྷཝཀཐཱཡ སདྡྷིཾ བཱཏྟིཾས ཏིརཙྪཱནཀཐཱ ནཱམ ཧོཏི. ཨཐ ཝཱ པཱལི༹ཡཾ སརཱུཔཏོ ཨནཱགཏཱཔི ཨརཉྙཔབྦཏནདཱིདཱིཔཀཐཱ ཨིཏི-སདྡེན སངྒཧེཏྭཱ ཚཏྟིཾས ཏིརཙྪཱནཀཐཱཏི ཝུཙྩཏི. ཨིཏི ཝཱཏི ཧི ཨེཏྠ ཨིཏི-སདྡོ པཀཱརཏྠེ, ཝཱ-སདྡོ ཝིཀཔྤཏྠེ. ཨིདཾ ཝུཏྟཾ ཧོཏི – ‘‘ཨེཝཾཔཀཱརཾ ཨིཏོ ཨཉྙཾ ཝཱ ཏཱདིསཾ ནིརཏྠཀཀཐཾ ཀཐེནྟཱི’’ཏི. ཨཱདིཨཏྠེ ཝཱ ཨིཏི-སདྡོ ‘‘ཨིཏི ཝཱ ཨིཏི ཨེཝརཱུཔཱ ནཙྩགཱིཏཝཱདིཏཝིསཱུཀདསྶནཱ པཊིཝིརཏོ’’ཏིཨཱདཱིསུ (དཱི. ནི. ༡.༡༠, ༡༩༤) ཝིཡ, ཨེཝམཱདིཾ ཨཉྙམྤི ཏཱདིསཾ ཀཐཾ ཀཐེནྟཱིཏི ཨཏྠོ.

༥༡༢. ཨཔརིཀྑིཏྟསྶ གཱམསྶ ཨུཔཙཱརོ ཨདིནྣཱདཱནེ ཝུཏྟནཡེནེཝ ཝེདིཏབྦོཏི ཨིམིནཱ དུཏིཡལེཌྜུཔཱཏོ ཨིདྷ ཨུཔཙཱརོཏི དསྶེཏི. སེསམེཏྠ ཨུཏྟཱནམེཝ. སནྟཾ བྷིཀྑུཾ ཨནཱཔུཙྪནཱ, ཨནུཉྙཱཏཀཱརཎཱབྷཱཝོ, ཝིཀཱལེ གཱམཔྤཝིསནནྟི ཨིམཱནི པནེཏྠ ཏཱིཎི ཨངྒཱནི.

ཝིཀཱལགཱམཔྤཝིསནསིཀྑཱཔདཝཎྞནཱ ནིཊྛིཏཱ.

༤. སཱུཙིགྷརསིཀྑཱཔདཝཎྞནཱ

༥༡༧. ཙཏུཏྠེ ཏཾ ཨསྶ ཨཏྠཱིཏི པཋམཾ བྷིནྡིཏྭཱ པཙྪཱ དེསེཏབྦཏྟཱ ཏཾ བྷེདནཀཾ ཏསྶ པཱཙིཏྟིཡསྶ ཨཏྠཱིཏི བྷེདནཀཾ, པཱཙིཏྟིཡཾ. ཨསྶཏྠིཨཏྠེ ¶ ཨ-ཀཱརཔཙྩཡོ དཊྛབྦོ. ཝཱསིཛཊེཏི ཝཱསིདཎྜཀེ. སེསམེཏྠ ཨུཏྟཱནམེཝ. སཱུཙིགྷརཏཱ, ཨཊྛིམཡཱདིཏཱ, ཨཏྟནོ ཨཏྠཱཡ ཀརཎཾ ཝཱ ཀཱརཱཔེཏྭཱ ཝཱ པཊིལཱབྷོཏི ཨིམཱནི པནེཏྠ ཏཱིཎི ཨངྒཱནི.

སཱུཙིགྷརསིཀྑཱཔདཝཎྞནཱ ནིཊྛིཏཱ.

༥. མཉྩཔཱིཋསིཀྑཱཔདཝཎྞནཱ

༥༢༢. པཉྩམེ ཚེདནཀཾ ཝུཏྟནཡམེཝཱཏི ཚེདནམེཝ ཚེདནཀཾ, ཏཾ ཏསྶ ཨཏྠཱིཏི ཚེདནཀནྟི ཨིམམཏྠཾ ཨཏིདིསྶཏི. སེསམེཏྠ ཨུཏྟཱནམེཝ. པམཱཎཱཏིཀྐནྟམཉྩཔཱིཋཏཱ, ཨཏྟནོ ཨཏྠཱཡ ཀརཎཾ ཝཱ ཀཱརཱཔེཏྭཱ ཝཱ པཊིལཱབྷོཏི ཨིམཱནི པནེཏྠ དྭེ ཨངྒཱནི.

མཉྩཔཱིཋསིཀྑཱཔདཝཎྞནཱ ནིཊྛིཏཱ.

༦. ཏཱུལོནདྡྷསིཀྑཱཔདཝཎྞནཱ

༥༢༦. ཚཊྛེ ¶ ཏཱུལཾ པཀྑིཔིཏྭཱཏི ཧེཊྛཱ ཙིམིལིཀཾ པཏྠརིཏྭཱ ཏསྶ ཨུཔརི ཏཱུལཾ པཀྑིཔིཏྭཱཏི ཨཏྠོ. པོཊཀིཏཱུལནྟི ཨེརཀཏཱུལཱདི ཡཾཀིཉྩི ཏིཎཛཱཏཱིནཾ ཏཱུལཾ. སེསམེཏྠ ཨུཏྟཱནམེཝ. ཏཱུལོནདྡྷམཉྩཔཱིཋཏཱ, ཨཏྟནོ ཨཏྠཱཡ ཀརཎཾ ཝཱ ཀཱརཱཔེཏྭཱ ཝཱ པཊིལཱབྷོཏི ཨིམཱནི པནེཏྠ དྭེ ཨངྒཱནི. ཨཏྟནཱ ཀཱརཱཔིཏསྶ ཧི པཊིལཱབྷམཏྟེནེཝ པཱཙིཏྟིཡཾ. ཏེནེཝ པདབྷཱཛནེ ‘‘པཊིལཱབྷེན ཨུདྡཱལེཏྭཱ པཱཙིཏྟིཡཾ དེསེཏབྦ’’ནྟི ཝུཏྟཾ. ཀེནཙི པན ‘‘པཊིལཱབྷེན ཨུདྡཱལེཏྭཱ པཱཙིཏྟིཡཾ དེསེཏབྦནྟི ཨེཏྠ ཀིཉྩཱཔི པཊིལཱབྷམཏྟེནེཝ པཱཙིཏྟིཡཾ ཝིཡ དིསྶཏི, པརིབྷོགེཡེཝ ཨཱཔཏྟི དཊྛབྦཱ. ‘ཨཉྙེན ཀཏཾ པཊིལབྷིཏྭཱ པརིབྷུཉྫཏི, ཨཱཔཏྟི དུཀྐཊསྶཱ’ཏི ཝཙནཾ ཨེཏྠ སཱདྷཀ’’ནྟི ཝུཏྟཾ, ཏཾ ཏསྶ མཏིམཏྟཾ. ན ཧི ‘‘ཨཉྙེན ཀཏཾ པཊིལབྷིཏྭཱ པརིབྷུཉྫཏི, ཨཱཔཏྟི དུཀྐཊསྶཱ’’ཏི ཨིདཾ ཨཏྟནཱ ཀཱརཱཔིཏཾ སནྡྷཱཡ ཝུཏྟཾ, ཀརཎཀཱརཱཔནཔཙྩཡཱ ཙ ཨིམིནཱ སིཀྑཱཔདེན པཱཙིཏྟིཡཾ ཝུཏྟཾ, ན པརིབྷོགཔཙྩཡཱ. ‘‘ན, བྷིཀྑཝེ, ཏཱུལོནདྡྷཾ མཉྩཾ ཝཱ པཱིཋཾ ཝཱ པརིབྷུཉྫིཏབྦཾ, ཡོ པརིབྷུཉྫེཡྻ, ཨཱཔཏྟི དུཀྐཊསྶཱ’’ཏི ཧི ཁནྡྷཀེ ¶ ཝུཏྟཏྟཱ ཨཏྟནཱ ཝཱ ཀཏཾ ཧོཏུ ཨཉྙེན ཝཱ, པརིབྷུཉྫནྟསྶ པརིབྷོགཔཙྩཡཱ དུཀྐཊམེཝ, ན པཱཙིཏྟིཡཾ.

ཏཱུལོནདྡྷསིཀྑཱཔདཝཎྞནཱ ནིཊྛིཏཱ.

༧. ནིསཱིདནསིཀྑཱཔདཝཎྞནཱ

༥༣༡. སཏྟམེ ཡཾ ཝཏྟབྦཾ, ཏཾ ནིསཱིདནསནྠཏསིཀྑཱཔདེ ཝུཏྟམེཝ. ནིསཱིདནསྶ པམཱཎཱཏིཀྐནྟཏཱ, ཨཏྟནོ ཨཏྠཱཡ ཀརཎཾ ཝཱ ཀཱརཱཔེཏྭཱ ཝཱ པཊིལཱབྷོཏི ཨིམཱནི པནེཏྠ དྭེ ཨངྒཱནི.

ནིསཱིདནསིཀྑཱཔདཝཎྞནཱ ནིཊྛིཏཱ.

༥༣༧-༥༤༢. ཨཊྛམནཝམདསམེསུ ¶ ནཏྠི ཝཏྟབྦཾ, ཨངྒཱནིཔི སཏྟམེཝ ཝུཏྟནཡེནེཝ ཝེདིཏབྦཱནི.

ནིཊྛིཏོ རཱཛཝགྒོ ནཝམོ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ སཱརཏྠདཱིཔནིཡཾ

ཁུདྡཀཝཎྞནཱ སམཏྟཱ.

པཱཙིཏྟིཡཀཎྜཾ ནིཊྛིཏཾ.

༦. པཱཊིདེསནཱིཡཀཎྜཾ

པཱཊིདེསནཱིཡསིཀྑཱཔདཝཎྞནཱ

༥༥༢. པཱཊིདེསནཱིཡེསུ ¶ ¶ པཋམེ ‘‘གཱརཡ྄ཧཾ ཨཱཝུསོཏིཨཱདི པཊིདེསེཏབྦཱཀཱརདསྶན’’ནྟི ཝཙནཏོ པཱལི༹ཡཾ ཨཱགཏནཡེནེཝ ཨཱཔཏྟི དེསེཏབྦཱ. ཨསཔྤཱཡནྟི སགྒམོཀྑཱནཾ ཨཧིཏཾ ཨནནུཀཱུལཾ. སེསམེཏྠ ཨུཏྟཱནམེཝ. པརིཔུཎྞཱུཔསམྤནྣཏཱ, ཨཉྙཱཏིཀཏཱ, ཨནྟརགྷརེ ཋིཏཱཡ ཧཏྠཏོ སཧཏྠཱ པཊིགྒཧཎཾ, ཡཱཝཀཱལིཀཏཱ, ཨཛ྄ཛྷོཧརཎནྟི ཨིམཱནི པནེཏྠ པཉྩ ཨངྒཱནི.

༥༥༧-༥༦༢. དུཏིཡཏཏིཡཙཏུཏྠེསུ ནཏྠི ཝཏྟབྦཾ, ཨངྒེསུ པན དུཏིཡེ པརིཔུཎྞཱུཔསམྤནྣཏཱ, པཉྩབྷོཛནཏཱ, ཨནྟརགྷརེ ཋིཏཱཡ ཨནུཉྙཱཏཔྤཀཱརཏོ ཨཉྙཐཱ ཝོསཱསནཱ, ཨནིཝཱརཎཱ, ཨཛ྄ཛྷོཧཱརོཏི ཨིམཱནི པཉྩ ཨངྒཱནི.

ཏཏིཡེ སེཀྑསམྨཏཏཱ, པུབྦེ ཨནིམནྟིཏཏཱ, ཨགིལཱནཏཱ, གྷརཱུཔཙཱརོཀྐམནཾ, ཋཔེཏྭཱ ནིཙྩབྷཏྟཱདཱིནི ཨཉྙཾ ཨཱམིསཾ གཧེཏྭཱ བྷུཉྫནནྟི ཨིམཱནི པཉྩ ཨངྒཱནི.

ཙཏུཏྠེ ཡཐཱཝུཏྟཨཱརཉྙཀསེནཱསནཏཱ, ཡཱཝཀཱལིཀསྶ ཨཏཏྠཛཱཏཀཏཱ, ཨགིལཱནཏཱ, ཨགིལཱནཱཝསེསཀཏཱ, ཨཔྤཊིསཾཝིདིཏཏཱ, ཨཛ྄ཛྷཱརཱམེ པཊིགྒཧཎཾ, ཨཛ྄ཛྷོཧརཎནྟི ཨིམཱནི སཏྟ ཨངྒཱནི.

པཱཊིདེསནཱིཡསིཀྑཱཔདཝཎྞནཱ ནིཊྛིཏཱ.

པཱཊིདེསནཱིཡཀཎྜཾ ནིཊྛིཏཾ.

༧. སེཁིཡཀཎྜཾ

༡. པརིམཎྜལཝགྒཝཎྞནཱ

སེཁིཡེསུ ¶ ¶ སིཀྑིཏསིཀྑེནཱཏི ཙཏཱུཧི མགྒེཧི ཏིསྶོ སིཀྑཱ སིཀྑིཏྭཱ ཋིཏེན, སབྦསོ པརིནིཊྛིཏཀིཙྩེནཱཏི ཝུཏྟཾ ཧོཏི. ཏཱདིནཱཏི ཨཊྛཧི ལོཀདྷམྨེཧི ཨཀམྤིཡཊྛེན ཏཱདིནཱ.

༥༧༦. སིཀྑཱ ཀརཎཱིཡཱཏི ‘‘ཨེཝཾ ནིཝཱསེསྶཱམཱི’’ཏི ཨཱརཱམེཔི ཨནྟརགྷརེཔི སབྦཏྠ སིཀྑཱ ཀཏྟབྦཱ. ཨེཏྠ ཙ ཡསྨཱ ཝཏྟཀྑནྡྷཀེ ཝུཏྟཝཏྟཱནིཔི སིཀྑིཏབྦཏྟཱ སེཁིཡཱནེཝ ཧོནྟི, ཏསྨཱ པཱརཱཛིཀཱདཱིསུ ཝིཡ པརིཙྪེདོ ན ཀཏོ, ཙཱརིཏྟནཡདསྶནཏྠཉྩ ‘‘ཡོ པན བྷིཀྑུ ཨོལམྦེནྟོ ནིཝཱསེཡྻ, དུཀྐཊ’’ནྟི ཨེཝཾ ཨཱཔཏྟིནཱམེན ཨཝཏྭཱ ‘‘སིཀྑཱ ཀརཎཱིཡཱ’’ཏི ཨེཝཾ སབྦསིཀྑཱཔདེསུ པཱལི༹ ཨཱརོཔིཏཱ. པདབྷཱཛནེ པན ‘‘ཨཱཔཏྟི དུཀྐཊསྶཱ’’ཏི ཝུཏྟཏྟཱ སབྦཏྠ ཨནཱདརིཡཀརཎེ དུཀྐཊཾ ཝེདིཏབྦཾ. ཝུཏྟནྟི མཧཱཨཊྛཀཐཱཡཾ ཝུཏྟཾ. ཡསྨཱ ཨཊྛངྒུལམཏྟཾ ཨོཏཱརེཏྭཱ ནིཝཏྠམེཝ ནིསིནྣསྶ ཙཏུརངྒུལམཏྟཾ ཧོཏི, ཏསྨཱ ཨུབྷོཔེཏེ ཨཊྛཀཐཱཝཱདཱ ཨེཀཔརིཙྪེདཱ. ཏེ སབྦེཏི ནིཝཱསནདོསཱ.

ཏཾ པནཱཏི ཏཾ ཨནཱདརིཡཾ. ཀིཉྩཱཔི ཀུརུནྡིཝཱདཾ པཙྪཱ ཝདནྟེན ‘‘པརིམཎྜལཾ ནིཝཱསེཏུཾ ཨཛཱནནྟསྶ ཨནཱཔཏྟཱི’’ཏི ཨཡམཏྠོ པཏིཊྛཱཔིཏོ, ཏཐཱཔི ནིཝཱསནཝཏྟཾ སཱདྷུཀཾ ཨུགྒཧེཏབྦམེཝ. སཉྩིཙྩ ཨནུགྒཎྷནྟསྶ ཨནཱདརིཡཾ སིཡཱ. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. པརིམཎྜལསིཀྑཱཔདཝཎྞནཱ) ཝུཏྟཾ ‘‘ཨཛཱནནྟསྶཱཏི པརིམཎྜལཾ ནིཝཱསེཏུཾ ཨཛཱནནྟསྶ ཨནཱཔཏྟི, ཨཔིཙ ནིཝཱསནཝཏྟཾ ཨུགྒཧེཏབྦ’’ནྟི.

སཙིཏྟཀནྟི ཝཏྠུཝིཛཱནནཙིཏྟེན པཎྞཏྟིཝིཛཱནནཙིཏྟེན ཙ སཙིཏྟཀཾ ‘‘ཨནཱདརིཡཾ པཊིཙྩཱ’’ཏི ཝུཏྟཏྟཱ. ‘‘པཱཎཱཏིཔཱཏཱདི ཝིཡ ནིཝཱསནདོསོ ལོཀགརཧིཏོ ན ཧོཏཱིཏི པཎྞཏྟིཝཛྫ’’ནྟི ¶ ཕུསྶདེཝཏྠེརོ ཨཱཧ. ཨུཔཏིསྶཏྠེརོ པན ‘‘ཡསྨཱ ཨནཱདརིཡཝསེནེཝ ཨཱཔཛྫིཏབྦཏྟཱ ཀེཝལཾ ཨཀུསལམེཝ, ཏཉྩ པཀཏིཡཱ ཝཛྫཾ, སཉྩིཙྩ ཝཱིཏིཀྐམནཉྩ ¶ དོམནསྶིཏསྶེཝ ཧོཏི, ཏསྨཱ ལོཀཝཛྫཾ ཨཀུསལཙིཏྟཾ དུཀྑཝེདན’’ནྟི ཨཱཧ. ཨནཱདརིཡཾ, ཨནཱཔཏྟིཀཱརཎཱབྷཱཝོ, ཨཔརིམཎྜལནིཝཱསནནྟི ཨིམཱནི པནེཏྠ ཏཱིཎི ཨངྒཱནི. ཡཐཱ ཙེཏྠ, ཨེཝཾ སབྦཏྠ པུརིམཱནི དྭེ ཏཏྠ ཏཏྠ ཝུཏྟཔཊིཔཀྑཀརཎཉྩཱཏི ཏཱིཎིཡེཝ ཧོནྟི.

༥༧༧. དུཏིཡཱདཱིསུ ཨནེཀཔྤཀཱརཾ གིཧིཔཱརུཏནྟི སེཏཔཊཔཱརུཏཾ པརིབྦཱཛཀཔཱརུཏཾ ཨེཀསཱཊཀཔཱརུཏནྟིཨཱདི ཨནེཀཔྤབྷེདཾ གིཧིཔཱརུཏཾ. ཏསྶཏྠོ ཁནྡྷཀེཡེཝ ཨཱཝི བྷཝིསྶཏི. ཝིཧཱརེཔཱིཏི བུདྡྷུཔཊྛཱནཱདིཀཱལཾ སནྡྷཱཡ ཝུཏྟཾ.

༥༧༨. ‘‘སུཔྤཊིཙྪནྣོ’’ཏི ཝུཏྟཏྟཱ ‘‘སསཱིསཾ པཱརུཏོ སབྦཐཱ སུཔྤཊིཙྪནྣཏྟཱ སུཔྤཊིཙྪནྣོ ནཱམ ཧོཏཱི’’ཏི ཡསྶ སིཡཱ, ཏཾ སནྡྷཱཡཱཧ ‘‘ན སསཱིསཾ པཱརུཏེནཱ’’ཏིཨཱདི.

༥༨༢. ཨེཀསྨིཾ པན ཋཱནེ ཋཏྭཱཏི ཨེཏྠ ‘‘གཙྪནྟོཔི པརིསྶཡཱབྷཱཝཾ ཨོལོཀེཏུཾ ལབྷཏིཡེཝ, ཏཐཱ གཱམེ པཱུཛ’’ནྟི ཏཱིསུཔི གཎྛིཔདེསུ ཝུཏྟཾ.

པརིམཎྜལཝགྒཝཎྞནཱ ནིཊྛིཏཱ.

༢. ཨུཛྫགྒྷིཀཝགྒཝཎྞནཱ

༥༨༦. དུཏིཡཝགྒེ ཧསནཱིཡསྨིཾ ཝཏྠུསྨིནྟི ཧཱསཛནཀེ ཀཱརཎེ.

ཨུཛྫགྒྷིཀཝགྒཝཎྞནཱ ནིཊྛིཏཱ.

༣. ཁམྦྷཀཏཝགྒཝཎྞནཱ

༦༠༣. ཏཏིཡཝགྒེ པཏྟེ སཉྙཱ པཏྟསཉྙཱ, སཱ ཨསྶ ཨཏྠཱིཏི པཏྟསཉྙཱི, ཨཏྟནོ བྷཱཛནེ ཨུཔནིབནྡྷསཉྙཱི ཧུཏྭཱཏི ཨཏྠོ. བྱཉྫནཾ པན ཨནཱདིཡིཏྭཱ ཨཏྠམཏྟམེཝ དསྶེཏུཾ ‘‘པཏྟེ སཉྙཾ ཀཏྭཱ’’ཏི ཝུཏྟཾ.

༦༠༤. ཨོལོཎཱིཏི ¶ ཨེཀཱ བྱཉྫནཝིཀཏི. ‘‘ཡོ ཀོཙི སུདྡྷོ ཀཉྫིཀཏཀྐཱདིརསཨོ’’ཏི ཀེཙི. སཱཀསཱུཔེཡྻ-གྒཧཎེན ཡཱ ཀཱཙི སཱུཔེཡྻསཱཀེཧི ¶ ཀཏཱ བྱཉྫནཝིཀཏི ཝུཏྟཱ. མཾསརསཱདཱིནཱིཏི ཨཱདི-སདྡེན ཨཝསེསཱ སབྦཱཔི བྱཉྫནཝིཀཏི སངྒཧིཏཱཏི དཊྛབྦཾ. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. སམསཱུཔཀཔཊིགྒཧཎསིཀྑཱཔདཝཎྞནཱ) ཝུཏྟཾ ‘‘ཋཔེཏྭཱ པན སཱུཔཾ ཨཝསེསཱ སབྦཱཔི སཱུཔེཡྻཱ བྱཉྫནཝིཀཏི རསརསོ ནཱམ ཧོཏཱི’’ཏི.

༦༠༥. སམཔུཎྞནྟི ཨདྷིཊྛཱནུཔགསྶ པཏྟསྶ ཨནྟོམུཁཝཊྚིལེཁཾ ཨནཏིཀྐཱམེཏྭཱ རཙིཏཾ. སམབྷརིཏནྟི ཏསྶེཝ ཝེཝཙནཾ. ཕལཱཕལཱདཱིཏི ཨཱདི-སདྡེན ཨོདནཱདིམྤི སངྒཎྷཱཏི. ཧེཊྛཱ ཨོརོཧཏཱིཏི སམནྟཱ ཨོཀཱསསབྦྷཱཝཏོ ཙཱལིཡམཱནཾ ཧེཊྛཱ བྷསྶཏི. མཏྠཀེ ཐཱུཔཱིཀཏཾ པཱུཝམེཝ ཝཊཾསཀསདིསཏྟཱ ‘‘པཱུཝཝཊཾསཀ’’ནྟི ཝུཏྟཾ. པུཔྥཝཊཾསཀཱདཱིསུཔི ཨེསེཝ ནཡོ.

ཡསྨཱ ‘‘སམཏིཏྟིཀོ པིཎྜཔཱཏོ པཊིགྒཧེཏབྦོ’’ཏི ཝཙནཾ པིཎྜཔཱཏོ སམྤུཎྞོ པཊིགྒཧེཏབྦོཏི དཱིཔེཏི, ཏསྨཱ ཨཏྟནོ ཧཏྠགཏེ པཏྟེ པིཎྜཔཱཏོ དིཡྻམཱནོ ཐཱུཔཱིཀཏོཔི ཙེ ཧོཏི, ཝཊྚཏཱིཏི དཱིཔེཏི. ‘‘ཐཱུཔཱིཀཏཾ པིཎྜཔཱཏཾ པཊིགྒཎྷཱཏི, ཨཱཔཏྟི དུཀྐཊསྶཱ’’ཏི ཧི ཝཙནཾ པཋམཾ ཐཱུཔཱིཀཏཾ པིཎྜཔཱཏཾ པཙྪཱ པཊིགྒཎྷཏོ ཨཱཔཏྟཱིཏི དཱིཔེཏི. ‘‘པཏྟེ པཊིགྒཎྷཏོ ཙ ཐཱུཔཱིཀཏཾ ཧོཏི, ཝཊྚཏི ཨཐཱུཔཱིཀཏསྶ པཊིགྒཧིཏཏྟཱ, པཡོགོ པན ནཏྠི ཨཉྙཏྲ པུབྦདེསཱ’’ཏི ཀེནཙི ཝུཏྟཾ, ཏཾ ན སཱརཏོ པཙྩེཏབྦཾ. ‘‘ན ཐཱུཔཱིཀཏཾ པིཎྜཔཱཏཾ པཊིགྒཎྷཱཏཱི’’ཏི ཝཙནཾ པཋམཾ ཐཱུཔཱིཀཏསྶེཝ པཙྪཱ པཊིགྒཎྷནཾ དཱིཔེཏི. ན ཧི ཧཏྠགཏེཔི པཏྟེ དིཡྻམཱནཾ ཐཱུཔཱིཀཏཾ གཎྷནྟོ ཐཱུཔཱིཀཏཾ པིཎྜཔཱཏཾ པཊིགྒཎྷནྟོ ནཱམ ན ཧོཏི, ན ཙ ཏེན སམཏིཏྟིཀོ པིཎྜཔཱཏོ པཊིགྒཧིཏོཏི སཀྐཱ ཝིཉྙཱཏུཾ. ‘‘ཐཱུཔཱིཀཏ’’ནྟི ཙ བྷཱཝནཔུཾསཀནིདྡེསེ གཡ྄ཧམཱནེ ཨཡམཏྠོ སུཊྛུཏརཾ པཱཀཊོཡེཝཱཏི.

ཁམྦྷཀཏཝགྒཝཎྞནཱ ནིཊྛིཏཱ.

༤. སཀྐཙྩཝགྒཝཎྞནཱ

༦༠༨. ཙཏུཏྠཝགྒེ སཔདཱནནྟི ཨེཏྠ དཱནཾ ཝུཙྩཏི ཨཝཁཎྜནཾ, ཨཔེཏཾ དཱནཏོ ཨཔདཱནཾ, ཨནཝཁཎྜནནྟི ཨཏྠོ. སཧ ཨཔདཱནེན སཔདཱནཾ, ཨཝཁཎྜནཝིརཧིཏཾ ¶ , ཨནུཔཊིཔཱཊིཡཱཏི ཝུཏྟཾ ཧོཏི. ཏེནཱཧ ‘‘ཏཏྠ ཏཏྠ ཨོདྷིཾ ཨཀཏྭཱ ཨནུཔཊིཔཱཊིཡཱ’’ཏི.

༦༡༡. ཡསྨིཾ ¶ སམཡེ ‘‘པཱཎོ ན ཧནྟབྦོ’’ཏི རཱཛཱནོ བྷེརིཾ ཙརཱཔེནྟི, ཨཡཾ མཱགྷཱཏསམཡོ ནཱམ. ཨིདྷ ཨནཱཔཏྟིཡཾ གིལཱནོ ན ཨཱགཏོ, ཏསྨཱ གིལཱནསྶཔི ཨཱཔཏྟི. སཱུཔོདནཝིཉྙཏྟིསིཀྑཱཔདེ ཨསཉྩིཙྩ ཨསྶཏིཡཱཏི ཨེཏྠ ‘‘མུཁེ པཀྑིཔིཏྭཱ པུན ཝིཔྤཊིསཱརཱི ཧུཏྭཱ ཚཌྜེནྟསྶ ཨརུཙིཡཱ པཝིསནྟེ ‘ཨསཉྩིཙྩཱ’ཏི ཝུཙྩཏི, ཝིཉྙཏྟིམྤི ཨཝིཉྙཏྟིམྤི ཨེཏསྨིཾ ཋཱནེ ཋིཏཾ སཧསཱ གཧེཏྭཱ བྷུཉྫནྟེ ‘ཨསྶཏིཡཱ’ཏི ཝུཙྩཏཱི’’ཏི ཏཱིསུཔི གཎྛིཔདེསུ ཝུཏྟཾ.

༦༡༤-༦༡༥. ཨུཛ྄ཛྷཱནེ སཉྙཱ ཨུཛ྄ཛྷཱནསཉྙཱ, སཱ ཨསྶ ཨཏྠཱིཏི ཨུཛ྄ཛྷཱནསཉྙཱི. ‘‘མཡཱུརཎྜཾ ཨཏིམཧནྟ’’ནྟི ཝཙནཏོ མཡཱུརཎྜཔྤམཱཎོ ཀབལོ༹ ན ཝཊྚཏི. ཀེཙི པན ‘‘མཡཱུརཎྜཏོ མཧནྟོ ན ཝཊྚཏཱི’’ཏི ཝདནྟི, ཏཾ ན གཧེཏབྦཾ, ‘‘ནཱཏིམཧནྟ’’ནྟི ཙ ཨཏིམཧནྟསྶེཝ པཊིཀྑིཏྟཏྟཱ ཁུདྡཀེ ཨཱཔཏྟི ན དིསྶཏི. ‘‘མཡཱུརཎྜཾ ཨཏིམཧནྟཾ, ཀུཀྐུཊཎྜཾ ཨཏིཁུདྡཀཾ, ཏེསཾ ཝེམཛ྄ཛྷཔྤམཱཎོ’’ཏི ཨིམིནཱ པན སཱརུཔྤཝསེན ཁུདྡཀམྤི པཊིཀྑིཔིཏྭཱ པརིཙྪེདོ ན དསྶིཏོཏི ཝེདིཏབྦཾ.

སཀྐཙྩཝགྒཝཎྞནཱ ནིཊྛིཏཱ.

༥. ཀབལ༹ཝགྒཝཎྞནཱ

༦༡༨. པཉྩམཝགྒེ སབྦཾ ཧཏྠནྟི ཨེཏྠ ཧཏྠ-སདྡོ ཏདེཀདེསེསུ ཨངྒུལཱིསུ དཊྛབྦོ ‘‘ཧཏྠམུདྡཱ’’ཏིཨཱདཱིསུ ཝིཡ, སམུདཱཡེ པཝཏྟཝོཧཱརསྶ ཨཝཡཝེཔི ཝཏྟནཏོ ཨེཀངྒུལིམྤི མུཁེ པཀྑིཔིཏུཾ ན ཝཊྚཏི.

ཀབལ༹ཝགྒཝཎྞནཱ ནིཊྛིཏཱ.

༦. སུརུསུརུཝགྒཝཎྞནཱ

༦༢༧. ཚཊྛཝགྒེ སཱིཏཱིཀཏོཏི སཱིཏཊྚོ, སཱིཏཔཱིལི༹ཏོཏི ཝུཏྟཾ ཧོཏི. སིལཀབུདྡྷོཏི པརིཧཱསཝཙནམེཏཾ. སིལཀཉྷི ཀཉྩི དིསྭཱ ‘‘བུདྡྷོ ཨཡ’’ནྟི ཝོཧརནྟི.

༦༣༤. ཝིལཱིཝཙྪཏྟནྟི ¶ ཝེཎུཝིལཱིཝེཧི ཀཏཾ ཚཏྟཾ. ཏཏྠཛཱཏཀདཎྜཀེན ཀཏནྟི ཏཱལཔཎྞཾ སཧ དཎྜཀེན ཚིནྡིཏྭཱ ཏམེཝ ཚཏྟདཎྜཾ ཀརོནྟི གོཔཱལཀཱདཡོ ཝིཡ, ཏཾ སནྡྷཱཡེཏཾ ¶ ཝུཏྟཾ. ཚཏྟཔཱདུཀཱཡ ཝཱ ཋིཏཾ ཧོཏཱིཏི ཨེཏྠ ཚཏྟཔཱདུཀཱ ཝུཙྩཏི ཚཏྟཱདྷཱརོ. ཡསྨིཾ ཚཏྟཾ ཨཔཏམཱནཾ ཀཏྭཱ ཋཔེནྟི, ཏཱདིསིཀཱཡ ཚཏྟཔཱདུཀཱཡ ཋིཏཾ ཚཏྟཾ ‘‘ཚཏྟ’’ནྟི ཨཛ྄ཛྷཱཧརིཏབྦཾ. ‘‘ཚཏྟཾ ཚཏྟཔཱདུཀཱཡ ཋིཏ’’ནྟིཔི པཋནྟི, ཏཏྠཱཔི ཨཡམེཝཏྠོ.

༦༣༧. ཙཱཔོཏི མཛ྄ཛྷེ ཝངྐཱ ཀཱཙདཎྜསདིསཱ དྷནུཝིཀཏི. ཀོདཎྜོཏི ཝཊྚལདཎྜཱ དྷནུཝིཀཏི. པཊིམུཀྐནྟི པཝེསིཏཾ ལགྒིཏཾ.

སུརུསུརུཝགྒཝཎྞནཱ ནིཊྛིཏཱ.

༧. པཱདུཀཝགྒཝཎྞནཱ

༦༤༧. སཏྟམཝགྒེ པཊིཙྪནྣོ ཧུཏྭཱཏི སོ ཀིར རཏྟིབྷཱགེ ཨུཡྻཱནཾ གནྟྭཱ ཨམྦཾ ཨབྷིརུཧིཏྭཱ སཱཁཱཡ སཱཁཾ ཨམྦཾ ཨོལོཀེནྟོ ཝིཙརི. ཏསྶ ཏཐཱ ཀརོནྟསྶེཝ རཏྟི ཝིབྷཱཡི. སོ ཙིནྟེསི ‘‘སཙེ ཨིདཱནི ཨོཏརིཏྭཱ གམིསྶཱམི, དིསྭཱ མཾ ཙོརོཏི གཧེསྶནྟི, རཏྟིབྷཱགེ གམིསྶཱམཱི’’ཏི. ཨཐེཀཾ ཝིཊཔཾ ཨབྷིརུཧིཏྭཱ ནིལཱིནོ ཨཙྪི. ཏཾ སནྡྷཱཡེཏཾ ཝུཏྟཾ. སོ རུཀྑཏོ ཨོཏརནྟོ ཨེཀཾ ཨོལམྦིནིསཱཁཾ གཧེཏྭཱ ཏེསཾ ཨུབྷིནྣམྤི ཨནྟརེ པཏིཊྛཱསི. ཏཾ སནྡྷཱཡ ཝུཏྟཾ ‘‘ཏེསཾ དྭིནྣམྤི ཨནྟརཱ རུཀྑཏོ པཏིཏོ’’ཏི. པཱལི༹ཡཱ ཨཏྠཾ ན ཛཱནནྟཱིཏི ཨཏྟནོ གཧཎསྶ ཨཏྠཾ ན ཛཱནནྟི.

ཛཱཏཀཔཱལི༹ཡཾ (ཛཱ. ༡.༤.༣༣) པན ཨཡཾ གཱཐཱ –

‘‘སབྦམིདཾ ཙརིམཾ ཀཏཾ, ཨུབྷོ དྷམྨཾ ན པསྶརེ;

ཨུབྷོ པཀཏིཡཱ ཙུཏཱ, ཡོ ཙཱཡཾ མནྟེཛ྄ཛྷཱཔེཏི;

ཡོ ཙ མནྟཾ ཨདྷཱིཡཏཱི’’ཏི. –

ཨེཝམཱགཏཱ. ཏསྶཱཡམཏྠོ (ཛཱ. ཨཊྛ. ༣.༤.༣༣) – སབྦམིདཾ ཙརིམཾ ཀཏནྟི ཡཾ ཨམྷེཧི ཏཱིཧི ཛནེཧི ཀཏཾ, སབྦམིདཾ ཀིཙྩཾ ལཱམཀཾ ནིམྨརིཡཱདཾ ཨདྷམྨིཀཾ. ཨེཝཾ ཨཏྟནོ ¶ ཙོརབྷཱཝཾ ཏེསཉྩ མནྟེསུ ཨགཱརཝཾ གརཧིཏྭཱ པུན ཨིཏརེ དྭེཡེཝ གརཧནྟོ ‘‘ཨུབྷོ དྷམྨཾ ན པསྶརེ’’ཏིཨཱདིམཱཧ. ཏཏྠ ཨུབྷོཏི ཨིམེ དྭེཔི ཛནཱ གརུཀཱརཱརཧཾ པོརཱཎཀདྷམྨཾ ན པསྶནྟི, ཏཏོཝ དྷམྨཔཀཏིཏོ ཙུཏཱ. དྷམྨོ ཧི པཋམུཔྤཏྟིཝསེན པཀཏི ནཱམ. ཝུཏྟམྤི ཙེཏཾ –

‘‘དྷམྨོ ¶ ཧཝེ པཱཏུརཧོསི པུབྦེ,

པཙྪཱ ཨདྷམྨོ ཨུདཔཱདི ལོཀེ’’ཏི. (ཛཱ. ༡.༡༡.༢༨);

ཡོ ཙཱཡནྟི ཡོ ཙ ཨཡཾ ནཱིཙེ ནིསཱིདིཏྭཱ མནྟེ ཨཛ྄ཛྷཱཔེཏི, ཡོ ཙ ཨུཙྩེ ནིསཱིདིཏྭཱ ཨདྷཱིཡཏཱིཏི.

སཱལཱིནནྟི ཨཡཾ གཱཐཱཔི –

‘‘སཱལཱིནཾ ཨོདནཾ བྷུཉྫེ, སུཙིཾ མཾསཱུཔསེཙནཾ;

ཏསྨཱ ཨེཏཾ ན སེཝཱམི, དྷམྨཾ ཨིསཱིཧི སེཝིཏ’’ནྟི. (ཛཱ. ༡.༤.༣༤) –

ཨེཝཾ ཛཱཏཀེ ཨཱགཏཱ. ཏཏྠ སུཙིནྟི པཎྜརཾ པརིསུདྡྷཾ. མཾསཱུཔསེཙནནྟི ནཱནཔྤཀཱརཱཡ མཾསཝིཀཏིཡཱ སིཏྟཾ བྷུཉྫེ, བྷུཉྫཱམཱིཏི ཨཏྠོ. སེསཾ པཱཀཊམེཝ.

དྷིརཏྠཱུཏི དྷི ཨཏྠུ, ནིནྡཱ བྷཝཏཱུཏི ཨཏྠོ, གརཧཱམ ཏཾ མཡནྟི ཝུཏྟཾ ཧོཏི. ལདྡྷལཱབྷོཏི དྷནལཱབྷཾ ཡསལཱབྷཉྩ སནྡྷཱཡ ཝདཏི. ཝིནིཔཱཏནཧེཏུནཱཏི ཝིནིཔཱཏནསྶ ཧེཏུབྷཱཝེན. ཝུཏྟི ནཱམ ཧོཏཱིཏི ཡཐཱཝུཏྟོ དུཝིདྷོཔི ལཱབྷོ ཨཔཱཡསཾཝཏྟནིཀཏཱཡ སམྤརཱཡེ ཝིནིཔཱཏནཧེཏུབྷཱཝེན པཝཏྟནཏོ སམྤཏི ཨདྷམྨཙརཎེན པཝཏྟནཏོ ཙ ཝུཏྟི ནཱམ ཧོཏཱིཏི ཨཏྠོ. ཨེཝརཱུཔཱ ཡཱ ཝུཏྟཱིཏི ཨེཝརཱུཔཱ དྷནལཱབྷཡསལཱབྷསངྑཱཏཱ ཡཱ ཝུཏྟི. ཨདྷམྨཙརཎེན ཝཱཏི ཝཱ-སདྡོ སམྤིཎྜནཏྠོ. ཏྭནྟི ཨུཔཡོགཏྠེ པཙྩཏྟཝཙནཾ, ཏཾ ཨིཙྩེཝ ཝཱ པཱཋོ. ཨསྨཱཏི པཱསཱཎཱདྷིཝཙནམེཏཾ.

པཱདུཀཝགྒཝཎྞནཱ ནིཊྛིཏཱ.

སེསཾ ཨུཏྟཱནམེཝ.

སེཁིཡཀཎྜཾ ནིཊྛིཏཾ.

ཨདྷིཀརཎསམཐེསུ ¶ ¶ ཡཾ ཝཏྟབྦཾ, ཏཾ ཨཊྛཀཐཱཡཾ ཨཱགཏཊྛཱནེཡེཝ དསྶཡིསྶཱམ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ སཱརཏྠདཱིཔནིཡཾ

བྷིཀྑུཝིབྷངྒཝཎྞནཱ ནིཊྛིཏཱ.

མཧཱཝིབྷངྒོ ནིཊྛིཏོ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

བྷིཀྑུནཱིཝིབྷངྒཝཎྞནཱ

༡. པཱརཱཛིཀཀཎྜཾ (བྷིཀྑུནཱིཝིབྷངྒཝཎྞནཱ)

༡. པཋམཔཱརཱཛིཀསིཀྑཱཔདཝཎྞནཱ

༦༥༦. བྷིཀྑུནཱིཝིབྷངྒེ ¶ ¶ ཡོཏི ཡོ བྷིཀྑུནཱིནཾ ཝིབྷངྒོ. མིགཱརནཏྟཱཏི མཛ྄ཛྷཔདལོཔེནེཏཾ ཝུཏྟནྟི ཨཱཧ ‘‘མིགཱརམཱཏུཡཱ པན ནཏྟཱ ཧོཏཱི’’ཏི. མིགཱརམཱཏཱཏི ཝིསཱཁཱཡེཏཾ ཨདྷིཝཙནཾ. ནཝཀམྨཱདྷིཊྛཱཡིཀནྟི ནཝཀམྨསཾཝིདྷཱཡིཀཾ. བྱཉྫནཱནཾ པཊིཝིཛ྄ཛྷིཏབྦོ ཨཱཀཱརོ ནཱཏིགམྦྷཱིརོ, ཡཐཱསུཏཾ དྷཱརཎམེཝ ཏཏྠ ཀརཎཱིཡནྟི སཏིཡཱ བྱཱཔཱརོ ཨདྷིཀོ, པཉྙཱ ཏཏྠ གུཎཱིབྷཱུཏཱཏི ཝུཏྟཾ ‘‘སཏིཔུབྦངྒམཱཡ པཉྙཱཡཱ’’ཏི. སཏི པུབྦངྒམཱ ཨེཏིསྶཱཏི སཏིཔུབྦངྒམཱ. པུབྦངྒམཏཱ ཙེཏྠ པདྷཱནབྷཱཝོ ‘‘མནོཔུབྦངྒམཱ’’ཏིཨཱདཱིསུ ཝིཡ. ཨཏྠགྒཧཎེ པན པཉྙཱཡ བྱཱཔཱརོ ཨདྷིཀོ པཊིཝིཛ྄ཛྷིཏབྦསྶ ཨཏྠསྶ ཨཏིགམྦྷཱིརཏྟཱཏི ཨཱཧ ‘‘པཉྙཱཔུབྦངྒམཱཡ སཏིཡཱ’’ཏི. ཨཱལསིཡཝིརཧིཏཱཏི ཀོསཛྫརཧིཏཱ. ཡཐཱ ¶ ཨཉྙཱ ཀུསཱིཏཱ ནིསིནྣཊྛཱནེ ནིསིནྣཱཝ ཧོནྟི, ཋིཏཊྛཱནེ ཋིཏཱཝ, ཨེཝཾ ཨཧུཏྭཱ ཝིཔྥཱརིཀེན ཙིཏྟེན སབྦཀིཙྩཾ ནིཔྥཱདེཏི.

སབྦཱ བྷིཀྑུནིཡོ སཏྠུལདྡྷཱུཔསམྤདཱ སངྒྷཏོ ལདྡྷཱུཔསམྤདཱཏི དུཝིདྷཱ. གརུདྷམྨཔཨགྒཧཎེན ཧི ལདྡྷཱུཔསམྤདཱ མཧཱཔཛཱཔཏིགོཏམཱི སཏྠུསནྟིཀཱཝ ལདྡྷཱུཔསམྤདཏྟཱ སཏྠུལདྡྷཱུཔསམྤདཱ ནཱམ. སེསཱ སབྦཱཔི སངྒྷཏོ ལདྡྷཱུཔསམྤདཱ. ཏཱཔི ཨེཀཏོཨུཔསམྤནྣཱ ཨུབྷཏོཨུཔསམྤནྣཱཏི དུཝིདྷཱ. ཏཏྠ ཡཱ ཏཱ མཧཱཔཛཱཔཏིགོཏམིཡཱ སདྡྷིཾ ནིཀྑནྟཱ པཉྩསཏཱ སཱཀིཡཱནིཡོ, ཏཱ ཨེཀཏོཨུཔསམྤནྣཱ བྷིཀྑུསངྒྷཏོ ཨེཝ ལདྡྷཱུཔསམྤདཏྟཱ, ཨིཏརཱ ཨུབྷཏོཨུཔསམྤནྣཱ ཨུབྷཏོསངྒྷེ ཨུཔསམྤནྣཏྟཱ. ཨེཧིབྷིཀྑུནཱིབྷཱཝེན ཨུཔསམྤནྣཱ པན བྷིཀྑུནིཡོ ན སནྟི ཏཱསཾ ཏཐཱ ¶ ཨུཔསམྤདཱཡ ཨབྷཱཝཏོ. ཡདི ཨེཝཾ ‘‘ཨེཧི བྷིཀྑུནཱི’’ཏི ཨིདྷ ཀསྨཱ ཝུཏྟནྟི? དེསནཱཡ སོཏཔཏིཏབྷཱཝཏོ. ཨཡཉྷི སོཏཔཏིཏཏཱ ནཱམ ཀཏྠཙི ལབྦྷམཱནསྶཔི ཨགྒཧཎེན ཧོཏི, ཡཐཱ ཨབྷིདྷམྨེ མནོདྷཱཏུནིདྡེསེ (དྷ. ས. ༡༦༠-༡༦༡) ལབྦྷམཱནམྤི ཛྷཱནངྒཾ པཉྩཝིཉྙཱཎསོཏེ པཏིཏཱཡ ན ཨུདྡྷཊཾ ཀཏྠཙི དེསནཱཡ ཨསམྦྷཝཏོ, ཡཐཱ ཏཏྠེཝ ཝཏྠུནིདྡེསེ (དྷ. ས. ༩༨༤ ཨཱདཡོ) ཧདཡཝཏྠུ. ཀཏྠཙི ཨལབྦྷམཱནསྶཔི གཧཎཝསེན ཡཐཱཋིཏཀཔྤཱིནིདྡེསེ. ཡཐཱཧ –

‘‘ཀཏམོ ཙ པུགྒལོ ཋིཏཀཔྤཱི? ཨཡཉྩ པུགྒལོ སོཏཱཔཏྟིཕལསཙྪིཀིརིཡཱཡ པཊིཔནྣོ ཨསྶ, ཀཔྤསྶ ཙ ཨུཌྜཡ྄ཧནཝེལཱ ཨསྶ, ནེཝ ཏཱཝ ཀཔྤོ ཨུཌྜཡ྄ཧེཡྻ, ཡཱཝཱཡཾ པུགྒལོ ན སོཏཱཔཏྟིཕལཾ སཙྪིཀརེཡྻཱ’’ཏི (པུ. པ. ༡༧).

ཨེཝམིདྷཱཔི ཨལབྦྷམཱནགཧཎཝསེན ཝེདིཏབྦཾ. པརིཀཔྤཝཙནཉྷེཏཾ ‘‘སཙེ བྷགཝཱ བྷིཀྑུནཱིབྷཱཝཡོགྱཾ ཀཉྩི མཱཏུགཱམཾ ‘ཨེཧི བྷིཀྑུནཱི’ཏི ཝདེཡྻ, ཨེཝཾ བྷིཀྑུནཱིབྷཱཝོ སིཡཱ’’ཏི.

ཀསྨཱ པན བྷགཝཱ ཨེཝཾ ན ཀཐེསཱིཏི? ཏཐཱ ཀཏཱདྷིཀཱརཱནཾ ཨབྷཱཝཏོ. ཡེ པན ‘‘ཨནཱསནྣཱསནྣིཧིཏབྷཱཝཏོ’’ཏི ཀཱརཎཾ ཝཏྭཱ ‘‘བྷིཀྑཱུ ཨེཝ ཧི སཏྠུ ཨཱསནྣཙཱརིནོ སདཱ སནྣིཧིཏཱ ཙ ཧོནྟི, ཏསྨཱ ཏེ ཨེཝ ‘ཨེཧིབྷིཀྑཱུ’ཏི ཝཏྟབྦཏཾ ཨརཧནྟི, ན བྷིཀྑུནིཡོ’’ཏི ཝདནྟི, ཏཾ ཏེསཾ མཏིམཏྟཾ སཏྠུ ཨཱསནྣདཱུརབྷཱཝསྶ བྷབྦཱབྷབྦབྷཱཝསིདྡྷཏྟཱ. ཝུཏྟཉྷེཏཾ བྷགཝཏཱ –

‘‘སངྒྷཱཊིཀཎྞེ ¶ ཙེཔི མེ, བྷིཀྑཝེ, བྷིཀྑུ གཧེཏྭཱ པིཊྛིཏོ པིཊྛིཏོ ཨནུབནྡྷོ ཨསྶ པཱདེ པཱདཾ ནིཀྑིཔནྟོ, སོ ཙ ཧོཏི ཨབྷིཛ྄ཛྷཱལུ ཀཱམེསུ ཏིབྦསཱརཱགོ བྱཱཔནྣཙིཏྟོ པདུཊྛམནསངྐཔྤོ མུཊྛསྶཏི ཨསམྤཛཱནོ ཨསམཱཧིཏོ ཝིབྦྷནྟཙིཏྟོ པཱཀཏིནྡྲིཡོ, ཨཐ ཁོ སོ ཨཱརཀཱཝ མཡ྄ཧཾ, ཨཧཉྩ ཏསྶ. ཏཾ ཀིསྶ ཧེཏུ? དྷམྨཉྷི སོ, བྷིཀྑཝེ, བྷིཀྑུ ན པསྶཏི, དྷམྨཾ ཨཔསྶནྟོ ན མཾ པསྶཏི. ཡོཛནསཏེ ཙེཔི སོ, བྷིཀྑཝེ, བྷིཀྑུ ཝིཧརེཡྻ, སོ ཙ ཧོཏི ཨནབྷིཛ྄ཛྷཱལུ ཀཱམེསུ ན ཏིབྦསཱརཱགོ ཨབྱཱཔནྣཙིཏྟོ ཨཔྤདུཊྛམནསངྐཔྤོ ཨུཔཊྛིཏསྶཏི ¶ སམྤཛཱནོ སམཱཧིཏོ ཨེཀགྒཙིཏྟོ སཾཝུཏིནྡྲིཡོ, ཨཐ ཁོ སོ སནྟིཀེཝ མཡ྄ཧཾ, ཨཧཉྩ ཏསྶ. ཏཾ ཀིསྶ ཧེཏུ? དྷམྨཉྷི སོ, བྷིཀྑཝེ, བྷིཀྑུ པསྶཏི, དྷམྨཾ པསྶནྟོ མཾ པསྶཏཱི’’ཏི (ཨིཏིཝུ. ༩༢).

ཏསྨཱ ཨཀཱརཎཾ དེསཏོ སཏྠུ ཨཱསནྣཱནཱསནྣཏཱ. ཨཀཏཱདྷིཀཱརཏཱཡ པན བྷིཀྑུནཱིནཾ ཨེཧིབྷིཀྑུནཱུཔསམྤདཱཡ ཨཡོགྱཏཱ ཝེདིཏབྦཱ.

ཡདི ཨེཝཾ ཡཾ ཏཾ ཐེརཱིགཱཐཱསུ བྷདྡཱཡ ཀུཎྜལཀེསཱཡ ཝུཏྟཾ –

‘‘ནིཧཙྩ ཛཱཎུཾ ཝནྡིཏྭཱ, སམྨུཁཱ ཨཉྫལིཾ ཨཀཾ;

ཨེཧི བྷདྡེཏི མཾ ཨཝཙ, སཱ མེ ཨཱསཱུཔསམྤདཱ’’ཏི. (ཐེརཱིགཱ. ༡༠༩);

ཏཐཱ ཨཔདཱནེཔི –

‘‘ཨཱཡཱཙིཏོ ཏདཱ ཨཱཧ, ཨེཧི བྷདྡེཏི ནཱཡཀོ;

ཏདཱཧཾ ཨུཔསམྤནྣཱ, པརིཏྟཾ ཏོཡམདྡས’’ནྟི. (ཨཔ. ཐེརཱི ༢.༣.༤༤);

ཏཾ ཀཐནྟི? ནཡིདཾ ཨེཧིབྷིཀྑུནཱིབྷཱཝེན ཨུཔསམྤདཾ སནྡྷཱཡ ཝུཏྟཾ, ཨུཔསམྤདཱཡ པན ཧེཏུབྷཱཝཏོ ‘‘ཡཱ སཏྠུ ཨཱཎཏྟི, སཱ མེ ཨཱསཱུཔསམྤདཱ’’ཏི ཝུཏྟཱ. ཏཐཱ ཧི ཝུཏྟཾ ཨཊྛཀཐཱཡཾ (ཐེརཱིགཱ. ཨཊྛ. ༡༡༡) ‘‘ཨེཧི བྷདྡེ བྷིཀྑུནུཔསྶཡཾ གནྟྭཱ བྷིཀྑུནཱིནཾ སནྟིཀེ པབྦཛ ཨུཔསམྤཛྫསྶཱུཏི མཾ ཨཝཙ ཨཱཎཱཔེསི, སཱ སཏྠུ ཨཱཎཱ མཡ྄ཧཾ ཨུཔསམྤདཱཡ ཀཱརཎཏྟཱ ཨུཔསམྤདཱ ཨཱསི ཨཧོསཱི’’ཏི. ཨཔདཱནགཱཐཱཡམྤི ཨེཝམེཝ ཨཏྠོ གཧེཏབྦོ. ཏསྨཱ བྷིཀྑུནཱིནཾ ཨེཧིབྷིཀྑུནཱུཔསམྤདཱ ནཏྠིཡེཝཱཏི ནིཊྛམེཏྠ གནྟབྦཾ. ཡཐཱ ཙེཏཾ སོཏཔཏིཏཝསེན ‘‘ཨེཧི ¶ བྷིཀྑུནཱི’’ཏི ཝུཏྟཾ, ཨེཝཾ ‘‘ཏཱིཧི སརཎགམནེཧི ཨུཔསམྤནྣཱཏི བྷིཀྑུནཱི’’ཏི ཨིདམྤི སོཏཔཏིཏཝསེནེཝ ཝུཏྟནྟི དཊྛབྦཾ སརཎགམནཱུཔསམྤདཱཡཔི བྷིཀྑུནཱིནཾ ཨསམྦྷཝཏོ.

༦༥༩. བྷིཀྑུཝིབྷངྒེ ‘‘ཀཱཡསཾསགྒཾ སཱདིཡེཡྻཱ’’ཏི ཨཝཏྭཱ ‘‘སམཱཔཛྫེཡྻཱ’’ཏི ཝུཏྟཏྟཱ ‘‘བྷིཀྑུ ཨཱཔཏྟིཡཱ ན ཀཱརེཏབྦོ’’ཏི ཝུཏྟཾ. ཏབྦཧུལནཡེནཱཏི ཀིརིཡཱསམུཊྛཱནསྶེཝ བཧུལབྷཱཝཏོ. དིསྶཏི ཧི ཏབྦཧུལནཡེན ཏབྦོཧཱརོ ཡཐཱ ‘‘བྲཱཧྨཎགཱམོ’’ཏི. བྲཱཧྨཎགཱམེཔི ¶ ཧི ཨནྟམསོ རཛཀཱདཱིནི པཉྩ ཀུལཱནི སནྟི. སཱཏི ཀིརིཡཱསམུཊྛཱནཏཱ.

༦༦༢. ཏཐེཝཱཏི ཀཱཡསཾསགྒརཱགེན ཨཝསྶུཏོཡེཝཱཏི ཨཏྠོ. སེསམེཏྠ ཨུཏྟཱནམེཝ.

པཋམཔཱརཱཛིཀསིཀྑཱཔདཝཎྞནཱ ནིཊྛིཏཱ.

༢. དུཏིཡཔཱརཱཛིཀསིཀྑཱཔདཝཎྞནཱ

༦༦༦. དུཏིཡེ ‘‘ཀིསྶ པན ཏྭཾ ཨཡྻེ ཛཱནཾ པཱརཱཛིཀཾ དྷམྨཾ ཨཛ྄ཛྷཱཔནྣ’’ནྟི ཝཙནཏོ ‘‘ཨུདྡིཊྛཱ ཁོ ཨཡྻཱཡོ ཨཊྛ པཱརཱཛིཀཱ དྷམྨཱ’’ཏིཨཱདིཝཙནཏོ ཙ བྷིཀྑུནཱིཝིབྷངྒཾ པཏྭཱ སཱདྷཱརཎཱནི སིཀྑཱཔདཱནི བྷིཀྑཱུནཾ ཨུཔྤནྣཝཏྠུསྨིཾཡེཝ ‘‘ཡཱ པན བྷིཀྑུནཱི ཚནྡསོ མེཐུནཾ དྷམྨཾ པཊིསེཝེཡྻ, ཨནྟམསོ ཏིརཙྪཱནགཏེནཔི, པཱརཱཛིཀཱ ཧོཏི ཨསཾཝཱསཱ’’ཏིཨཱདིནཱ ནཡེན སཝིསེསམྤི ཨཝིསེསམྤི མཱཏིཀཾ ཋཔེཏྭཱ ཨནུཀྐམེན པདབྷཱཛནཾ ཨཱཔཏྟིབྷེདཾ ཏིཀཙྪེདཾ ཨནཱཔཏྟིཝཱརཉྩ ཨནཝསེསཾ ཝཏྭཱ ཝིཏྠཱརེསི. སངྒཱིཏིཀཱརཀེཧི པན ཨསཱདྷཱརཎཔཉྙཏྟིཡོཡེཝ ཨིདྷ ཝིཏྠཱརིཏཱཏི ཝེདིཏབྦཱ.

ཨཐ ཨུཔརིམེསུ དྭཱིསུ ཨཔཉྙཏྟེསུ ཨཊྛནྣཾ པཱརཱཛིཀཱནཾ ཨཉྙཏརནྟི ཨིདཾ ཝཙནཾ ན ཡུཛྫཏཱིཏི ཨཱཧ ‘‘ཨིདཉྩ པཱརཱཛིཀཾ པཙྪཱ པཉྙཏྟ’’ནྟིཨཱདི. ཡདི ཨེཝཾ ཨིམསྨིཾ ཨོཀཱསེ ཀསྨཱ ཋཔིཏནྟི ཨཱཧ ‘‘པུརིམེན པན སདྡྷིཾ ཡུགལ༹ཏྟཱ’’ཏིཨཱདི, པུརིམེན སདྡྷིཾ ཨེཀསམྦནྡྷབྷཱཝཏོ ཨིདྷ ཝུཏྟནྟི ཨདྷིཔྤཱཡོ. ‘‘ཨཊྛནྣཾ པཱརཱཛིཀཱནཾ ཨཉྙཏར’’ནྟི ཝཙནཏོ ཙ ཝཛྫཔཊིཙྪཱདིཀཾ ཡཱ པཊིཙྪཱདེཏི, སཱཔི ཝཛྫཔཊིཙྪཱདིཀཱཡེཝཱཏི དཊྛབྦཾ. ཀིཉྩཱཔི ཝཛྫཔཊིཙྪཱདནཾ པེམཝསེན ཧོཏི, ཏཐཱཔི སིཀྑཱཔདཝཱིཏིཀྐམཙིཏྟཾ དོམནསྶིཏམེཝ ཧོཏཱིཏི ཀཏྭཱ ‘‘དུཀྑཝེདན’’ནྟི ཝུཏྟཾ. སེསམེཏྠ ཨུཏྟཱནམེཝ.

དུཏིཡཔཱརཱཛིཀསིཀྑཱཔདཝཎྞནཱ ནིཊྛིཏཱ.

༦༦༨. ཏཏིཡཾ ¶ ¶ ཨུཏྟཱནཏྠམེཝ.

༤. ཙཏུཏྠཔཱརཱཛིཀསིཀྑཱཔདཝཎྞནཱ

༦༧༥. ཙཏུཏྠེ ལོཀསྶཱདམིཏྟསནྠཝཝསེནཱཏི ལོཀསྶཱདསངྑཱཏསྶ མིཏྟསནྠཝསྶ ཝསེན. ཝུཏྟམེཝཏྠཾ པརིཡཱཡནྟརེན ཝིབྷཱཝེཏུཾ ‘‘ཀཱཡསཾསགྒརཱགེནཱ’’ཏི ཝུཏྟཾ.

ཏིསྶིཏྠིཡོ མེཐུནཾ ཏཾ ན སེཝེཏི (པརི. ཨཊྛ. ༤༨༡) ཡཱ ཏིསྶོ ཨིཏྠིཡོ ཝུཏྟཱ, ཏཱསུཔི ཡཾ ཏཾ མེཐུནཾ ནཱམ, ཏཾ ན སེཝཏི. ཏཡོ པུརིསེཏི ཏཡོ པུརིསེཔི ཨུཔགནྟྭཱ མེཐུནཾ ན སེཝཏི. ཏཡོ ཙ ཨནརིཡཔཎྜཀེཏི ཨུབྷཏོབྱཉྫནསངྑཱཏེ ཏཡོ ཨནརིཡེ, ཏཡོ ཙ པཎྜཀེཏི ཨིམེཔི ཚ ཛནེ ཨུཔགནྟྭཱ མེཐུནཾ ན སེཝཏི. ན ཙཱཙརེ མེཐུནཾ བྱཉྫནསྨིནྟི ཨནུལོམཔཱརཱཛིཀཝསེནཔི ཨཏྟནོ ནིམིཏྟེ མེཐུནཾ ནཱཙརཏི. ཚེཛྫཾ སིཡཱ མེཐུནདྷམྨཔཙྩཡཱཏི སིཡཱ མེཐུནདྷམྨཔཙྩཡཱ པཱརཱཛིཀནྟི ཨཡཾ པཉྷོ ཨཊྛཝཏྠུཀཾཝ སནྡྷཱཡ ཝུཏྟོ. ཏསྶཱ ཧི མེཐུནདྷམྨསྶ པུབྦབྷཱགཀཱཡསཾསགྒཾ ཨཱཔཛྫིཏུཾ ཝཱཡམནྟིཡཱ མེཐུནདྷམྨཔཙྩཡཱ ཚེཛྫཾ ཧོཏི. ཚེདོཡེཝ ཚེཛྫཾ.

མེཐུནདྷམྨསྶ པུབྦབྷཱགཏྟཱཏི ཨིམིནཱ མེཐུནདྷམྨསྶ པུབྦབྷཱགབྷཱུཏོ ཀཱཡསཾསགྒོཡེཝ ཏཏྠ མེཐུནདྷམྨ-སདྡེན ཝུཏྟོ, ན དྭཡཾདྭཡསམཱཔཏྟཱིཏི དཱིཔེཏི. ཝཎྞཱཝཎྞོཏི དྭཱིཧི སུཀྐཝིསྶཊྛི ཝུཏྟཱ. གམནུཔྤཱདནནྟི སཉྩརིཏྟཾ. སབྦཔདེསཱུཏི ‘‘སངྒྷཱཊིཀཎྞགྒཧཎཾ སཱདིཡེཡྻཱ’’ཏིཨཱདཱིསུ. སེསམེཏྠ ཨུཏྟཱནམེཝ. ཀཱཡསཾསགྒརཱགོ, སཨུསྶཱཧཏཱ, ཨཊྛམསྶ ཝཏྠུསྶ པཱུརཎནྟི ཨིམཱནི པནེཏྠ ཏཱིཎི ཨངྒཱནི.

ཙཏུཏྠཔཱརཱཛིཀསིཀྑཱཔདཝཎྞནཱ ནིཊྛིཏཱ.

བྷིཀྑུནཱིཝིབྷངྒེ པཱརཱཛིཀཀཎྜཝཎྞནཱ ནིཊྛིཏཱ.

པཱརཱཛིཀཀཎྜཾ ནིཊྛིཏཾ.

༢. སངྒྷཱདིསེསཀཎྜཾ (བྷིཀྑུནཱིཝིབྷངྒཝཎྞནཱ)

༡. པཋམསངྒྷཱདིསེསསིཀྑཱཔདཝཎྞནཱ

༦༧༩. སངྒྷཱདིསེསཀཎྜསྶ ¶ ¶ པཋམསིཀྑཱཔདེ དྭཱིསུ ཛནེསཱུཏི ཨཌྜཀཱརཀེསུ དྭཱིསུ ཛནེསུ. ཡོ ཀོཙཱིཏི ཏེསུཡེཝ དྭཱིསུ ཡོ ཀོཙི, ཨཉྙོ ཝཱ ཏེཧི ཨཱཎཏྟོ. དུཏིཡསྶ ཨཱརོཙེཏཱིཏི ཨེཏྠཱཔི དྭཱིསུ ཛནེསུ ཡསྶ ཀསྶཙི དུཏིཡསྶ ཀཐཾ ཡོ ཀོཙི ཨཱརོཙེཏཱིཏི ཨེཝམཏྠོ གཧེཏབྦོཏི ཨཱཧ ‘‘དུཏིཡསྶ ཨཱརོཙེཏཱིཏི ཨེཏྠཱཔི ཨེསེཝ ནཡོ’’ཏི. གཏིགཏནྟི ཙིརཀཱལཔཝཏྟཾ.

ཨཱཔཏྟཱིཏི ཨཱཔཛྫནཾ. སཧ ཝཏྠུཛ྄ཛྷཱཙཱརཱཏི ཝཏྠུཝཱིཏིཀྐམེན སཧ. སཧཡོགེ ཀརཎཝཙནཔྤསངྒེ ཨིདཾ ནིསྶཀྐཝཙནཾ. ཡནྟི ཡཾ དྷམྨཾ. ནིསྶཱརེཏཱིཏི ཨཱཔནྣཾ བྷིཀྑུནིསངྒྷམྷཱ ནིསྶཱརེཏི. ཧེཏུམྷི ཙཱཡཾ ཀཏྟུཝོཧཱརོ. ནིསྶཱརཎཧེཏུབྷཱུཏོ ཧི དྷམྨོ ནིསྶཱརཎཱིཡོཏི ཝུཏྟོ. གཱིཝཱཡེཝ ཧོཏི, ན པཱརཱཛིཀཾ ཨནཱཎཏྟིཡཱ གཧིཏཏྟཱ. ཡཐཱ དཱསདཱསཱིཝཱཔཱིཨཱདཱིནི སམྤཊིཙྪིཏུཾ ན ཝཊྚཏི, ཨེཝཾ ཏེསཾ ཨཏྠཱཡ ཨཌྜཀརཎམྤི ན ཝཊྚཏཱིཏི ཨཱཧ ‘‘ཨཡཾ ཨཀཔྤིཡཨཌྜོ ནཱམ, ན ཝཊྚཏཱི’’ཏི.

ཨེཏྠ ཙ སཙེ ཨདྷིཀརཎཊྛཱནཾ གནྟྭཱ ‘‘ཨམྷཱཀཾ ཨེསོ དཱསོ, དཱསཱི, ཝཱཔཱི, ཁེཏྟཾ, ཨཱརཱམོ, ཨཱརཱམཝཏྠུ, གཱཝོ, ཨཛཱ, ཀུཀྐུཊཱ’’ཏིཨཱདིནཱ ཝོཧརཏི, ཨཀཔྤིཡཾ. ‘‘ཨཡཾ ཨམྷཱཀཾ ཨཱརཱམིཀོ, ཨཡཾ ཝཱཔཱི ཨིཏྠནྣཱམེན སངྒྷསྶ བྷཎྜདྷོཝནཏྠཱཡ དིནྣཱ, ཨིཏོ ཁེཏྟཏོ ཨཱརཱམཏོ ཨུཔྤཛྫནཀཙཏུཔཙྩཡཱ ཨིཏོ གཱཝིཏོ མཧིཾསིཏོ ཨཛཱཏོ ཨུཔྤཛྫནཀགོརསཱ ཨིཏྠནྣཱམེན སངྒྷསྶ དིནྣཱཏི པུཙྪིཏེ ཝཱ ཨཔུཙྪིཏེ ཝཱ ཝཏྟུཾ ཝཊྚཏཱི’’ཏི ཝདནྟི. སེསམེཏྠ ཨུཏྟཱནམེཝ. ཨནཱཀཌྜྷིཏཱཡ ཨཌྜཀརཎཾ, ཨཌྜཔརིཡོསཱནནྟི ཨིམཱནི པནེཏྠ དྭེ ཨངྒཱནི.

པཋམསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༢. དུཏིཡསངྒྷཱདིསེསསིཀྑཱཔདཝཎྞནཱ

༦༨༣. དུཏིཡེ ¶ ¶ མལླགཎབྷཊིཔུཏྟགཎཱདིཀནྟིཨཱདཱིསུ མལླགཎོ ནཱམ ནཱརཱཡནབྷཏྟིཀོ ཏཏྠ ཏཏྠ པཱནཱིཡཊྛཔནཔོཀྑརཎཱིཁཎནཱདིཔུཉྙཀམྨཀཱརཀོ གཎོ, བྷཊིཔུཏྟགཎོ ནཱམ ཀུམཱརབྷཏྟིཀགཎོ. དྷམྨགཎོཏི སཱསནབྷཏྟིགཎོ ཨནེཀཔྤཀཱརཔུཉྙཀམྨཀཱརཀགཎོ ཝུཙྩཏི. གནྡྷིཀསེཎཱིཏི ཨནེཀཔྤཀཱརསུགནྡྷིཝིཀཏིཀཱརཀོ གཎོ. དུསྶིཀསེཎཱིཏི པེསཀཱརཀགཎོ. ཀཔྤགཏིཀནྟི ཀཔྤིཡབྷཱཝཾ གཏཾ.

ཝུཊྛཱཔེནྟིཡཱཏི ཨུཔསམྤཱདེནྟིཡཱ. ‘‘ཙོརིཾ ཝུཏྟནཡེན ཨནཱཔུཙྪཱ པབྦཱཛེནྟིཡཱ དུཀྐཊ’’ནྟི ཝདནྟི. པཎྞཏྟིཾ ཨཛཱནནྟཱ ཨརིཡཱཔི ཝུཊྛཱཔེནྟཱིཏི ཝཱ ཀམྨཝཱཙཱཔརིཡོསཱནེ ཨཱཔཏྟིཀྑཎེ ཝིཔཱཀཱབྱཱཀཏསམངྒིཏཱཝསེན ཝཱ ‘‘ཏིཙིཏྟ’’ནྟི ཝུཏྟནྟི ཝེདིཏབྦཾ. སེསམེཏྠ ཨུཏྟཱནམེཝ. ཙོརིཏཱ, ཙོརིསཉྙཱ, ཨཉྙཏྲ ཨནུཉྙཱཏཀཱརཎཱ ཝུཊྛཱཔནནྟི ཨིམཱནི པནེཏྠ ཏཱིཎི ཨངྒཱནི.

དུཏིཡསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༣. ཏཏིཡསངྒྷཱདིསེསསིཀྑཱཔདཝཎྞནཱ

༦༩༢. ཏཏིཡེ པརིཀྑེཔཾ ཨཏིཀྐཱམེནྟིཡཱཏི སཀགཱམཏོ ཨཉྙསྶ གཱམསྶ པརིཀྑེཔཾ ཨཏིཀྐཱམེནྟིཡཱ. ‘‘གཱམནྟརཾ གཙྪེཡྻཱ’’ཏི ཧི ཝཙནཏོ ཨཉྙསྶ གཱམསྶ པརིཀྑེཔཾ ཨཏིཀྐཱམེནྟིཡཱ ཨེཝ ཨཱཔཏྟི, ན སཀགཱམསྶ. ཨཉྙོ ཧི གཱམོ གཱམནྟརཾ. ཨཔརིཀྑིཏྟསྶ གཱམསྶ ཨུཔཙཱརནྟི ཨེཏྠ ཨུཔཙཱར-སདྡེན གྷརཱུཔཙཱརཏོ པཋམལེཌྜུཔཱཏསངྑཱཏཾ པརིཀྑེཔཱརཧཊྛཱནཾ གཧིཏཾ, ན ཏཏོ དུཏིཡལེཌྜུཔཱཏསངྑཱཏོ ཨུཔཙཱརོཏི ཨཱཧ ‘‘པརིཀྑེཔཱརཧཊྛཱན’’ནྟི. ཏེནེཝ པཱལི༹ཡཾ ‘‘ཨུཔཙཱརཾ ཨཏིཀྐཱམེནྟིཡཱ’’ཏི ཝུཏྟཾ. ཨཉྙཐཱ ཡཐཱ ཝིཀཱལགཱམཔྤཝིསནསིཀྑཱཔདེ ‘‘པརིཀྑིཏྟསྶ གཱམསྶ པརིཀྑེཔཾ ཨཏིཀྐམནྟསྶ, ཨཔརིཀྑིཏྟསྶ གཱམསྶ ཨུཔཙཱརཾ ཨོཀྐམནྟསྶཱ’’ཏི (པཱཙི. ༥༡༣) ཝུཏྟཾ, ཨེཝམིདྷཱཔི ‘‘པརིཀྑིཏྟསྶ གཱམསྶ པརིཀྑེཔཾ ཨཏིཀྐཱམེནྟིཡཱ ཨཔརིཀྑིཏྟསྶ གཱམསྶ ཨུཔཙཱརཾ ཨོཀྐམནྟིཡཱ’’ཏི ཝདེཡྻ. སངྑེཔཏོ ཝུཏྟམཏྠཾ ཝིབྷཛིཏྭཱ དསྶེནྟོ ‘‘ཨཔིཙེཏྠཱ’’ཏིཨཱདིམཱཧ. ཝིཧཱརསྶ ¶ ཙཏུགཱམསཱདྷཱརཎཏྟཱཏི ཨིམིནཱ ‘‘ཝིཧཱརཏོ ཨེཀཾ གཱམཾ གནྟུཾ ཝཊྚཏཱི’’ཏི ཨེཏྠ ¶ ཀཱརཎམཱཧ. ཝིཧཱརསྶ ཙཏུགཱམསཱདྷཱརཎཏྟཱཡེཝ ཧི ཙཏཱུསུ གཱམེསུ ཡཾཀིཉྩི ཨེཀཾ གཱམཾ གནྟུཾ ཝཊྚཏི.

ཡཏྠཱཏི ཡསྶཾ ནདིཡཾ. ‘‘པཋམཾ པཱདཾ ཨུཏྟཱརེནྟིཡཱ ཨཱཔཏྟི ཐུལླཙྩཡསྶ, དུཏིཡཾ པཱདཾ ཨུཏྟཱརེནྟིཡཱ ཨཱཔཏྟི སངྒྷཱདིསེསསྶཱ’’ཏི ཝཙནཏོ ནདིཾ ཨོཏརིཏྭཱ པདསཱ ཨུཏྟརནྟིཡཱ ཨེཝ ཨཱཔཏྟཱིཏི ཨཱཧ ‘‘སེཏུནཱ གཙྪཏི, ཨནཱཔཏྟཱི’’ཏིཨཱདི. པརཏཱིརམེཝ ཨཀྐམནྟིཡཱ ཨནཱཔཏྟཱིཏི ནདིཾ ཨནོཏརིཏྭཱ ཡཱནནཱཝཱདཱིསུ ཨཉྙཏརེན གནྟྭཱ པརཏཱིརམེཝ ཨཀྐམནྟིཡཱ ཨནཱཔཏྟི. ཨུབྷཡཏཱིརེསུ ཝིཙརནྟི, ཝཊྚཏཱིཏི ཨིདཾ ཨསཏིཔི ནདཱིཔཱརགམནེ ཨུཔརི ཝཀྑམཱནསྶ ཝིནིཙྪཡསྶ ཕལམཏྟདསྶནཏྠཾ ཝུཏྟནྟི ཝེདིཏབྦཾ. ཨོརིམཏཱིརམེཝ ཨཱགཙྪཏི, ཨཱཔཏྟཱིཏི པརཏཱིརཾ གནྟུཀཱམཏཱཡ ཨོཏིཎྞཏྟཱ ཝུཏྟཾ. ཏམེཝ ཏཱིརནྟི ཏམེཝ ཨོརིམཏཱིརཾ. ཨནཱཔཏྟཱིཏི པརཏཱིརཾ གནྟུཀཱམཏཱཡ ཨབྷཱཝཏོ ཨནཱཔཏྟི.

ཏཱདིསེ ཨརཉྙེཏི ‘‘བཧིཨིནྡཁཱིལཱ སབྦམེཏཾ ཨརཉྙ’’ནྟི (ཝིབྷ. ༥༢༩) ཨེཝཾ ཝུཏྟལཀྑཎེ ཨརཉྙེ. ཨཐ ཏཱདིསསྶེཝ ཨརཉྙསྶ གཧིཏབྷཱཝོ ཀཐཾ ཝིཉྙཱཡཏཱིཏི ཨཱཧ ‘‘ཏེནེཝཱ’’ཏིཨཱདི. ཨིམིནཱ ཧི ཨཊྛཀཐཱཝཙནེན ཨཱིདིསེཔི གཱམསམཱིཔེ དསྶནཱུཔཙཱརེ ཝིཛཧིཏེ སཏིཔི སཝནཱུཔཙཱརེ ཨཱཔཏྟི ཧོཏཱིཏི ཝིཉྙཱཡཏི. མགྒམཱུལ༹ྷཱ ཨུཙྩཱསདྡཾ ཀརོནྟཱིཏི ཨཱཧ ‘‘མགྒམཱུལ༹ྷསདྡེན ཝིཡཱ’’ཏི. སདྡཱཡནྟིཡཱཏི སདྡཾ ཀརོནྟིཡཱ. པུརིམཱཡོཏི པུརེཏརཾ གཙྪནྟིཡོ. ཨཉྙཾ མགྒཾ གཎྷཱཏཱིཏི མགྒམཱུལ༹ྷཏྟཱ, ན ཨོཧཱཏུཾ, ཏསྨཱ དྭིནྣམྤི ཨནཱཔཏྟི. སེསམེཏྠ ཨུཏྟཱནམེཝ. ཨནནྟརཱཡེན ཨེཀབྷཱཝོ, གཱམནྟརགམནཱདཱིསུ ཨཉྙཏརཏཱཔཛྫནཾ, ཨཱཔདཱཡ ཨབྷཱཝོཏི ཨིམཱནི པནེཏྠ ཏཱིཎི ཨངྒཱནི.

ཏཏིཡསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༤. ཙཏུཏྠསངྒྷཱདིསེསསིཀྑཱཔདཝཎྞནཱ

༦༩༤. ཙཏུཏྠེ ཀཱརཀགཎསྶཱཏི ཨུཀྑེཔནཱིཡཀམྨཀཱརཀགཎསྶ. ཏེཙཏྟཱལཱིསཔྤབྷེདཾ ཝཏྟཾ ཁནྡྷཀེ ཨཱཝི བྷཝིསྶཏི. ནེཏྠཱརཝཏྟེཏི ནིཏྠརཎཧེཏུམྷི ¶ ཝཏྟེ. སེསཾ ཨུཏྟཱནམེཝ. དྷམྨེན ཀམྨེན ཨུཀྑིཏྟཏཱ, ཨཉྙཏྲ ཨནུཉྙཱཏཀཱརཎཱ ཨོསཱརཎནྟི ཨིམཱནི པནེཏྠ དྭེ ཨངྒཱནི.

ཙཏུཏྠསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༥. པཉྩམསངྒྷཱདིསེསསིཀྑཱཔདཝཎྞནཱ

༧༠༡. པཉྩམེ ¶ ཨེཏཾ ན ཝུཏྟནྟི ‘‘བྷིཀྑུནིཡཱ ཨཝསྶུཏབྷཱཝོ དཊྛབྦོ’’ཏི ཨེཏཾ ནིཡམནཾ ན ཝུཏྟཾ. ཏནྟི ཏཾ ནིཡམེཏྭཱ ཨཝཙནཾ. པཱལི༹ཡཱ སམེཏཱིཏི ‘‘ཨེཀཏོ ཨཝསྶུཏེ’’ཏི ཨཝིསེསེཏྭཱ ཝུཏྟཔཱལི༹ཡཱ ‘‘ཨནཝསྶུཏོཏི ཛཱནནྟཱི པཊིགྒཎྷཱཏཱི’’ཏི ཨིམཱཡ ཙ པཱལི༹ཡཱ སམེཏི. ཡདི ཧི པུགྒལསྶ ཨཝསྶུཏབྷཱཝོ ནཔྤམཱཎཾ, ཀིཾ ‘‘ཨནཝསྶུཏོཏི ཛཱནནྟཱི’’ཏི ཨིམིནཱ ཝཙནེན, ‘‘ཨནཱཔཏྟི ཨུབྷཏོཨནཝསྶུཏཱ ཧོནྟི, ཨནཝསྶུཏཱ པཊིགྒཎྷཱཏཱི’’ཏི ཨེཏྟཀམེཝ ཝཏྟབྦཾ སིཡཱ. ‘‘ཨུབྷཏོཨནཝསྶུཏཱ ཧོནྟི, ཨནཝསྶུཏོཏི ཛཱནནྟཱི པཊིགྒཎྷཱཏཱི’’ཏི ཨིམསྶ ཙ ཨནཱཔཏྟིཝཱརསྶ ཨཡམཏྠོ. ཨུབྷོ ཙེ ཨནཝསྶུཏཱ, སབྦཐཱཔི ཨནཱཔཏྟི. ཨཐ བྷིཀྑུནཱི ཨནཝསྶུཏཱ སམཱནཱ ཨཝསྶུཏམྤི ‘‘ཨནཝསྶུཏོ’’ཏི སཉྙཱཡ ཏསྶ ཧཏྠཏོ པཊིགྒཎྷཱཏི, ཨེཝམྤི ཨནཱཔཏྟི. ཨཐ སཡཾ ཨནཝསྶུཏཱཔི ཨཉྙཾ ཨནཝསྶུཏཾ ཝཱ ཨཝསྶུཏཾ ཝཱ ‘‘ཨཝསྶུཏོ’’ཏི ཛཱནཱཏི, དུཀྐཊམེཝ. ཝུཏྟཉྷེཏཾ ཨནནྟརསིཀྑཱཔདེ ‘‘ཀིསྶ ཏྭཾ ཨཡྻེ ན པཊིགྒཎྷཱསཱིཏི. ཨཝསྶུཏཱ ཨཡྻེཏི. ཏྭཾ པན ཨཡྻེ ཨཝསྶུཏཱཏི. ནཱཧཾ ཨཡྻེ ཨཝསྶུཏཱ’’ཏི. སེསམེཏྠ ཨུཏྟཱནམེཝ. ཨུདཀདནྟཔོནཏོ ཨཉྙཾ ཨཛ྄ཛྷོཧརཎཱིཡཾ, ཨུབྷཏོཨཝསྶུཏཏཱ, སཧཏྠཱ གཧཎཾ, ཨཛ྄ཛྷོཧརཎནྟི ཨིམཱནི པནེཏྠ ཙཏྟཱརི ཨངྒཱནི.

པཉྩམསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༦. ཚཊྛསངྒྷཱདིསེསསིཀྑཱཔདཝཎྞནཱ

༧༠༥. ཚཊྛེ པརིཝཱརགཱཐཱཡ ཨཡམཏྠོ. ན དེཏི ན པཊིགྒཎྷཱཏཱིཏི (པརི. ཨཊྛ. ༤༨༡) ན ཨུཡྻོཛིཀཱ དེཏི, ནཱཔི ཨུཡྻོཛིཏཱ ཏསྶཱ ཧཏྠཏོ གཎྷཱཏི ¶ . པཊིགྒཧོ ཏེན ན ཝིཛྫཏཱིཏི ཏེནེཝ ཀཱརཎེན ཨུཡྻོཛིཀཱཡ ཧཏྠཏོ ཨུཡྻོཛིཏཱཡ པཊིགྒཧོ ན ཝིཛྫཏི. ཨཱཔཛྫཏི གརུཀནྟི ཨེཝཾ སནྟེཔི ཨཝསྶུཏསྶ ཧཏྠཏོ པིཎྜགྒཧཎེ ཨུཡྻོཛེནྟཱི སངྒྷཱདིསེསཱཔཏྟིཾ ཨཱཔཛྫཏི. ཏཉྩ པརིབྷོགཔཙྩཡཱཏི ཏཉྩ པན ཨཱཔཏྟིཾ ཨཱཔཛྫམཱནཱ ཏསྶཱ ཨུཡྻོཛིཏཱཡ པརིབྷོགཔཙྩཡཱ ཨཱཔཛྫཏི. ཏསྶཱ ཧི བྷོཛནཔརིཡོསཱནེ ཨུཡྻོཛིཀཱཡ སངྒྷཱདིསེསོ ཧོཏི. སེསམེཏྠ ཨུཏྟཱནམེཝ. མནུསྶཔུརིསཏཱ, ཨཉྙཏྲ ཨནུཉྙཱཏཀཱརཎཱ ཁཱདནཱིཡཾ བྷོཛནཱིཡཾ གཧེཏྭཱ བྷུཉྫཱཏི ཨུཡྻོཛནཱ, ཏེན ཝཙནེན གཧེཏྭཱ ཨིཏརིསྶཱ བྷོཛནཔརིཡོསཱནནྟི ཨིམཱནི པནེཏྠ ཏཱིཎི ཨངྒཱནི.

ཚཊྛསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༧. སཏྟམསངྒྷཱདིསེསསིཀྑཱཔདཝཎྞནཱ

༧༠༩. སཏྟམེ ¶ ཀིནྣུམཱཝ སམཎིཡོཏི ཀིཾ ནུ ཨིམཱ ཨེཝ སམཎིཡོ. ཏཱསཱཧནྟི ཏཱསཾ ཨཧཾ. སེསཾ ཨུཏྟཱནམེཝ.

སཏྟམསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༧༡༥. ཨཊྛམཾ ཨུཏྟཱནཏྠམེཝ.

༩. ནཝམསངྒྷཱདིསེསསིཀྑཱཔདཝཎྞནཱ

༧༢༡. ནཝམེ ཝཛྫཔྤཊིཙྪཱདིཀཱཏི ཁུདྡཱནུཁུདྡཀཝཛྫསྶ པཊིཙྪཱདིཀཱ. སམནུབྷཱསནཀམྨཀཱལེ ཙེཏྠ དྭེ ཏིསྶོ ཨེཀཏོ སམནུབྷཱསིཏབྦཱ.

ནཝམསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༧༢༧. དསམཾ ཨུཏྟཱནཏྠམེཝ.

བྷིཀྑུནཱིཝིབྷངྒེ སངྒྷཱདིསེསཝཎྞནཱ ནིཊྛིཏཱ.

སངྒྷཱདིསེསཀཎྜཾ ནིཊྛིཏཾ.

༣. ནིསྶགྒིཡཀཎྜཾ (བྷིཀྑུནཱིཝིབྷངྒཝཎྞནཱ)

༧༣༣. ནིསྶགྒིཡེསུ ¶ ¶ པཋམཾ ཨུཏྟཱནམེཝ.

༧༤༠. དུཏིཡེ ‘‘ཨཡྻཱཡ དམྨཱིཏི ཨེཝཾ པཊིལདྡྷནྟི ནིསྶཊྛཔཊིལདྡྷཾ. ཏེནེཝ མཱཏིཀཱཊྛཀཐཱཡམྤི ‘‘ནིསྶཊྛཾ པཊིལབྷིཏྭཱཔི ཡཐཱདཱནེཡེཝ ཨུཔནེཏབྦ’’ནྟི ཝུཏྟཾ. ཡཐཱདཱནེཡེཝ ཨུཔནེཏབྦནྟི ཡཐཱ དཱཡཀེན དིནྣཾ, ཏཐཱ ཨུཔནེཏབྦཾ, ཨཀཱལཙཱིཝརཔཀྑེཡེཝ ཋཔེཏབྦནྟི ཝུཏྟཾ ཧོཏི. ཨེཏྠ ཙ བྷཱཛཱཔིཏཱཡ ལདྡྷཙཱིཝརམེཝ ནིསྶགྒིཡཾ ཧོཏི, ཏཾ ཝིནཡཀམྨཾ ཀཏྭཱཔི ཨཏྟནཱ ན ལབྷཏི. སེསམེཏྠ ཨུཏྟཱནམེཝ. ཨཀཱལཙཱིཝརཏཱ, ཏཐཱསཉྙིཏཱ, ཀཱལཙཱིཝརནྟི ཨདྷིཊྛཱཡ ལེསེན བྷཱཛཱཔནཾ, པཊིལཱབྷོཏི ཨིམཱནི པནེཏྠ ཙཏྟཱརི ཨངྒཱནི.

༧༤༣. ཏཏིཡེ མེཏནྟི མེ ཨེཏཾ. སཀསཉྙཱཡ གཧིཏཏྟཱ པཱཙིཏྟིཡཾ དུཀྐཊཉྩ ཝུཏྟཾ. ཨིཏརཐཱ བྷཎྜགྒྷེན ཀཱརེཏབྦཾ. ཨུཔསམྤནྣཏཱ, པརིཝཏྟིཏཙཱིཝརསྶ ཝིཀཔྤནུཔགཏཱ, སཀསཉྙཱཡ ཨཙྪིནྡནཾ ཝཱ ཨཙྪིནྡཱཔནཾ ཝཱཏི ཨིམཱནི པནེཏྠ ཏཱིཎི ཨངྒཱནི.

༧༤༨-༧༥༢. ཙཏུཏྠེ ཨཱཧཊསཔྤིཾ དཏྭཱཏི ཨཏྟནོ དཏྭཱ. ཡམཀཾ པཙིཏབྦནྟི སཔྤིཉྩ ཏེལཉྩ ཨེཀཏོ ཀཏྭཱ པཙིཏབྦཾ. ལེསེན གཧེཏུཀཱམཏཱ, ཨཉྙསྶ ཝིཉྙཱཔནཾ, པཊིལཱབྷོཏི ཨིམཱནི པནེཏྠ ཏཱིཎི ཨངྒཱནི.

༧༥༣. པཉྩམེ སཱཏི ཐུལླནནྡཱ. ཨཡནྟི ཨཡཾ སིཀྑམཱནཱ. ཙེཏཱཔེཏྭཱཏི ཛཱནཱཔེཏྭཱ ཨིཙྩེཝ ཨཏྠོཏི ཨིདྷ ཝུཏྟཾ, མཱཏིཀཱཊྛཀཐཱཡཾ (ཀངྑཱ. ཨཊྛ. ཨཉྙཙེཏཱཔནསིཀྑཱཔདཝཎྞནཱ) པན ‘‘ཨཉྙཾ ཙེཏཱཔེཏྭཱཏི ཨཏྟནོ ཀཔྤིཡབྷཎྜེན ཨིདཾ ནཱམ ཨཱཧརཱཏི ཨཉྙཾ པརིཝཏྟཱཔེཏྭཱ’’ཏི ཝུཏྟཾ, ཏསྨཱ ‘‘ཙེཏཱཔེཏྭཱ’’ཏི ཨིམསྶ པརིཝཏྟཱཔེཏྭཱཏིཔི ཨཏྠོ དཊྛབྦོ. ཨཉྙཾ ཙེཏཱཔེཡྻཱཏི ‘‘ཨེཝཾ མེ ཨིདཾ དཏྭཱ ཨཉྙམྤི ཨཱཧརིསྶཏཱི’’ཏི མཉྙམཱནཱ ‘‘ན མེ ཨིམིནཱ ཨཏྠོ, ཨིདཾ ནཱམ མེ ཨཱཧརཱ’’ཏི ཏཏོ ཨཉྙཾ ཙེཏཱཔེཡྻ.

༧༥༨. ཚཊྛེ ¶ ¶ དྷམྨཀིཙྩནྟི པུཉྙཀམྨཾ. པཱཝཱརིཀསྶཱཏི དུསྶཝཱཎིཛཀསྶ. ཡཱཡ ཙེཏཱཔིཏཾ, ཏསྶཱཡེཝ ནིསྶགྒིཡཾ ནིསྶཊྛཔཊིལཱབྷོ ཙ, ཏསྨཱ ཏཱཡ བྷིཀྑུནིཡཱ ནིསྶཊྛཾ པཊིལབྷིཏྭཱ ཡཐཱདཱནེ ཨུཔནེཏབྦཾ, ན ཨཏྟནཱ གཧེཏབྦཾ. ཨཉྙསྶཏྠཱཡཱཏི ཙཱིཝརཱདཱིསུ ཨཉྙཏརསྶཏྠཱཡ. ཨཉྙུདྡིསིཀེནཱཏི པུརིམསྶེཝཏྠདཱིཔནཾ. པརིཀྑཱརེནཱཏི ཀཔྤིཡབྷཎྜེན.

༧༦༤. སཏྟམེ སཡཾ ཡཱཙིཏཀེནཱཏི སཡཾ ཡཱཙིཏཀེནཱཔཱིཏི ཨཏྠོ. ཏེནེཝ པཱལི༹ཡཾ ‘‘ཏེན ཙ པརིཀྑཱརེན སཡམྤི ཡཱཙིཏྭཱ’’ཏི ཝུཏྟཾ, ཏཏོཡེཝ མཱཏིཀཱཊྛཀཐཱཡཾ ‘‘སཉྙཱཙིཀེནཱཏི སཡཾ ཡཱཙིཏཀེནཱཔཱི’’ཏི ཨཏྠོ ཝུཏྟོ.

༧༦༨-༧༧༣. ཨཊྛམནཝམདསམཱནི ཨུཏྟཱནཏྠཱནེཝ.

༧༨༤. ཨེཀཱདསམེ ཡསྨཱ པཝཱརིཏཊྛཱནེ ཝིཉྙཏྟི ནཱམ ན པཊིསེདྷེཏབྦཱ, ཏསྨཱ བྷགཝཱ དྷམྨནིམནྟནཝསེན པཝཱརིཏཊྛཱནེ ‘‘ཝདེཡྻཱསི ཡེནཏྠོ’’ཏི ཝུཏྟཱཡ ‘‘ཙཏུཀྐཾསཔརམཾ ཝིཉྙཱཔེཏབྦ’’ནྟི པརིཙྪེདཾ དསྶེཏཱིཏི ཝེདིཏབྦཾ. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. གརུཔཱཝུརཎསིཀྑཱཔདཝཎྞནཱ) ‘‘ཙེཏཱཔེཏབྦནྟི ཋཔེཏྭཱ སཧདྷམྨིཀེ ཙ ཉཱཏཀཔཝཱརིཏེ ཙ ཨཉྙེན ཀིསྨིཉྩིདེཝ གུཎེ པརིཏུཊྛེན ཝདེཡྻཱསི ཡེནཏྠོཏི ཝུཏྟཱཡ ཝིཉྙཱཔེཏབྦ’’ནྟི ཝུཏྟཾ.

༧༨༨. དྭཱདསམཾ ཨུཏྟཱནཏྠམེཝ.

བྷིཀྑུནཱིཝིབྷངྒེ ནིསྶགྒིཡཔཱཙིཏྟིཡསིཀྑཱཔདཝཎྞནཱ ནིཊྛིཏཱ.

ནིསྶགྒིཡཀཎྜཾ ནིཊྛིཏཾ.

༤. པཱཙིཏྟིཡཀཎྜཾ (བྷིཀྑུནཱིཝིབྷངྒཝཎྞནཱ)

༡. ལསུཎཝགྒཝཎྞནཱ

༧༩༣-༧༩༧. པཱཙིཏྟིཡེསུ ¶ ¶ ལསུཎཝགྒསྶ པཋམེ ཛཱཏིཾ སརཏཱིཏི ཛཱཏིསྶརོ. སབྷཱཝེནེཝཱཏི སཱུཔསམྤཱཀཱདིཾ ཝིནཱཝ. བདརསཱལ༹ཝཾ ནཱམ བདརཕལཱནི སུཀྑཱཔེཏྭཱ ཙུཎྞེཏྭཱ ཀཏྟབྦཱ ཁཱདནཱིཡཝིཀཏི. སེསམེཏྠ ཨུཏྟཱནམེཝ. ཨཱམཀལསུཎཉྩེཝ ཨཛ྄ཛྷོཧརཎཉྩཱཏི ཨིམཱནི པནེཏྠ དྭེ ཨངྒཱནི.

༧༩༨-༨༠༢. དུཏིཡཏཏིཡཙཏུཏྠཱནི ཨུཏྟཱནཏྠཱནེཝ.

༨༡༢. པཉྩམེ དྭིནྣཾ པབྦཱནཾ ཨུཔརཱིཏི ཨེཏྠ དྭིནྣཾ ཨངྒུལཱིནཾ སཧ པཝེསནེ ཨེཀེཀཱཡ ཨངྒུལིཡཱ ཨེཀེཀཾ པབྦཾ ཀཏྭཱ དྭིནྣཾ པབྦཱནཾ ཨུཔརི. ཨེཀངྒུལིཔཝེསནེ དྭིནྣཾ པབྦཱནཾ ཨུཔརི ན ཝཊྚཏཱིཏི ཝེདིཏབྦཾ. མཧཱཔཙྩརིཡམྤི ཨཡམེཝ ནཡོ དསྶིཏོ. ཨུདཀསུདྡྷིཔཙྩཡེན པན སཏིཔི ཕསྶསཱདིཡནེ ཡཐཱཝུཏྟཔརིཙྪེདེ ཨནཱཔཏྟི.

༨༡༥-༨༡༧. ཚཊྛེ ཨཱསུམྦྷིཏྭཱཏི པཱཏེཏྭཱ. དདྷིམཏྠཱུཏི དདྷིམཎྜཾ དདྷིམྷི པསནྣོདཀཾ. བྷུཉྫནྟསྶ བྷིཀྑུནོ ཧཏྠཔཱསེ ཋཱནཾ, པཱནཱིཡསྶ ཝཱ ཝིདྷཱུཔནསྶ ཝཱ གཧཎནྟི ཨིམཱནི པནེཏྠ དྭེ ཨངྒཱནི.

༨༢༢. སཏྟམེ ‘‘པཊིགྒཎྷཱཏི, ཨཱཔཏྟི དུཀྐཊསྶཱ’’ཏི ཨིདཾ པུབྦཔཡོགདུཀྐཊསྶ ནིདསྶནམཏྟནྟི ཨཱཧ ‘‘ན ཀེཝལཾ པཊིགྒཧཎེཡེཝ ཧོཏཱི’’ཏིཨཱདི. པམཱཎནྟི པཱཙིཏྟིཡཱཔཏྟིཡཱ པམཱཎཾ. ཨིམེཧིཡེཝ དྭཱིཧི པཱཙིཏྟིཡཾ ཧོཏི, ནཱཉྙེཧི བྷཛྫནཱདཱིཧཱིཏི ཨཏྠོ. ཝུཏྟམེཝཏྠཾ ཝིཏྠཱརཏོ དསྶེཏུཾ ‘‘ཏསྨཱ’’ཏིཨཱདིམཱཧ. ཏཾ པུབྦཱཔརཝིརུདྡྷནྟི པུནཔི ཝུཏྟནྟི ཝུཏྟཝཱདཾ སནྡྷཱཡཱཧ. ཨཉྙཱཡ ཝིཉྙཏྟིཡཱ ལདྡྷམྤི ཧི ཨནཱཎཏྟིཡཱ ཝིཉྙཏྟིཡཱ ཨིམིསྶཱ ¶ ཨཝིཉྙཏྟིཡཱ ལདྡྷཔཀྑཾ བྷཛཏི, ཏསྨཱ ཧེཊྛཱ ཨཝིཉྙཏྟིཡཱ ལདྡྷེ ཀརཎཀཱརཱཔནེསུ ཝིསེསཾ ཨཝཏྭཱ ཨིདྷ ཝིསེསཝཙནཾ པུབྦཱཔརཝིརུདྡྷཾ. ཡདི ཙེཏྠ ཀརཎེ པཱཙིཏྟིཡཾ, ཀཱརཱཔནེཔི པཱཙིཏྟིཡེནེཝ བྷཝིཏབྦཾ. ཨཐ ཀཱརཱཔནེ དུཀྐཊཾ, ཀརཎེཔི དུཀྐཊེནེཝ བྷཝིཏབྦཾ. ན ཧི ཀརཎེ ཝཱ ཀཱརཱཔནེ ཝཱ ཝིསེསོ ཨཏྠི, ཏསྨཱ ཨཉྙཱཡ ཝིཉྙཏྟིཡཱ ¶ ལདྡྷཾ སཡཾ བྷཛྫནཱདཱིནི ཀཏྭཱཔི ཀཱརཱཔེཏྭཱཔི བྷུཉྫནྟིཡཱ དུཀྐཊམེཝཱཏི ཨིདམེཏྠ སནྣིཊྛཱནཾ. ཨཝིསེསེན ཝུཏྟནྟི ཀརཎཀཱརཱཔནཱནཾ སཱམཉྙཏོ ཝུཏྟཾ. སེསམེཏྠ ཨུཏྟཱནམེཝ. སཏྟནྣཾ དྷཉྙཱནཾ ཨཉྙཏརསྶ ཝིཉྙཱཔནཾ ཝཱ ཝིཉྙཱཔཱཔནཾ ཝཱ, པཊིལཱབྷོ, བྷཛྫནཱདཱིནི ཀཏྭཱ ཝཱ ཀཱརེཏྭཱ ཝཱ ཨཛ྄ཛྷོཧརཎནྟི ཨིམཱནི པནེཏྠ ཏཱིཎི ཨངྒཱནི.

༨༢༤. ཨཊྛམེ ནིབྦིཊྛོཏི པཏིཊྛཱཔིཏོ. ཀེཎཱིཏི རཉྙོ དཱཏབྦསྶ ཨཱཡསྶེཏཾ ཨདྷིཝཙནཾ. ཋཱནནྟརནྟི གཱམཛནཔདཱདིཋཱནནྟརཾ. སེསམེཏྠ ཨུཏྟཱནམེཝ. ཨུཙྩཱརཱདིབྷཱཝོ, ཨནཝལོཀནཾ, ཝལ༹ཉྫནཊྛཱནཾ, ཏིརོཀུཊྚཔཱཀཱརཏཱ, ཚཌྜནཾ ཝཱ ཚཌྜཱཔནཾ ཝཱཏི ཨིམཱནི པནེཏྠ པཉྩ ཨངྒཱནི.

༨༣༠. ནཝམེ སབྦེསནྟི བྷིཀྑུསྶ བྷིཀྑུནིཡཱ ཙ. ཨིདྷ ཁེཏྟཔཱལཀཱ ཨཱརཱམཱདིགོཔཀཱ ཙ སཱམིཀཱ ཨེཝ.

༨༣༦. དསམེ ཨེཀཔཡོགེནཱཏི ཨེཀདིསཱཝལོཀནཔཡོགེན. ཏེསཾཡེཝཱཏི ཡེསཾ ནཙྩཾ པསྶཏི. ཀིཉྩཱཔི སཡཾ ནཙྩནཱདཱིསུ པཱཙིཏྟིཡཾ པཱལི༹ཡཾ ན ཝུཏྟཾ, ཏཐཱཔི ཨཊྛཀཐཱཔམཱཎེན གཧེཏབྦནྟི དསྶེཏུཾ ‘‘སབྦཨཊྛཀཐཱསུ ཝུཏྟ’’ནྟི ཨཱཧ. ‘‘ཨཱརཱམེ ཋཏྭཱཏི ན ཀེཝལཾ ཋཏྭཱ, ཏཏོ ཏཏོ གནྟྭཱཔི སབྦིརིཡཱཔཐེཧི ལབྷཏི, ‘ཨཱརཱམེ ཋིཏཱ’ཏི པན ཨཱརཱམཔརིཡཱཔནྣབྷཱཝདསྶནཏྠཾ ཝུཏྟཾ. ཨིཏརཐཱ ནིསིནྣཱཔི ན ལབྷེཡྻཱ’’ཏི ཏཱིསུཔི གཎྛིཔདེསུ ཝུཏྟཾ. སེསམེཏྠ ཨུཏྟཱནམེཝ. ནཙྩཱདཱིནཾ ཨཉྙཏརཏཱ, ཨཉྙཏྲ ཨནུཉྙཱཏཀཱརཎཱ གམནཾ, དསྶནཾ ཝཱ སཝནཾ ཝཱཏི ཨིམཱནི པནེཏྠ ཏཱིཎི ཨངྒཱནི.

ལསུཎཝགྒཝཎྞནཱ ནིཊྛིཏཱ.

༢. ཨནྡྷཀཱརཝགྒཝཎྞནཱ

༨༤༡. ཨནྡྷཀཱརཝགྒསྶ པཋམེ དཱནེ ཝཱ པཱུཛཱཡ ཝཱཏི དཱནནིམིཏྟཾ ཝཱ པཱུཛཱནིམིཏྟཾ ཝཱ. ¶ མནྟེཏཱིཏི ཀཐེཏི. རཏྟནྡྷཀཱརཏཱ, པུརིསསྶ ཧཏྠཔཱསེ ཋཱནཾ ཝཱ སལླཔནཾ ཝཱ, སཧཱཡཱབྷཱཝོ, རཧོཔེཀྑཏཱཏི ཨིམཱནི པནེཏྠ ཙཏྟཱརི ཨངྒཱནི.

༨༤༢-༨༤༦. དུཏིཡཏཏིཡཙཏུཏྠཱནི ཨུཏྟཱནཏྠཱནེཝ.

༨༥༦-༨༥༧. པཉྩམེ ¶ ཨནོཝསྶཀཾ ཨཏིཀྐཱམེནྟིཡཱཏི ཚནྣསྶ ཨནྟོ ནིསཱིདིཏྭཱ པཀྐམནྟིཾ སནྡྷཱཡ ཝུཏྟཾ. ‘‘ཨུཔཙཱརོ དྭཱདསཧཏྠོ’’ཏི ཝདནྟི. པལླངྐསྶ ཨནོཀཱསེཏི ཨཱུརུབདྡྷཱསནསྶ ཨནོཀཱསེ ཨཔྤཧོནྟེ. པུརེབྷཏྟཏཱ, ཨནྟརགྷརེ ནིསཛྫཱ, ཨཱསནསྶ པལླངྐོཀཱསཏཱ, ཨཉྙཏྲ ཨནུཉྙཱཏཀཱརཎཱ ཨནཱཔུཙྪནཾ, ཝུཏྟཔརིཙྪེདཱཏིཀྐམོཏི ཨིམཱནི པནེཏྠ པཉྩ ཨངྒཱནི.

༨༥༩-༨༦༤. ཚཊྛསཏྟམཱདཱིནི ཨུཏྟཱནཏྠཱནེཝ.

ཨནྡྷཀཱརཝགྒཝཎྞནཱ ནིཊྛིཏཱ.

༣. ནགྒཝགྒཝཎྞནཱ

༨༨༣-༨༨༧. ནགྒཝགྒསྶ པཋམདུཏིཡཱནི ཨུཏྟཱནཏྠཱནེཝ.

༨༩༣. ཏཏིཡེ ཝིསིབྦེཏྭཱཏི དུསྶིབྦིཏཾ པུན སིབྦནཏྠཱཡ ཝིསིབྦེཏྭཱ ཝིཛཊེཏྭཱ. ཨཉྙཏྲ ཙཏཱུཧཔཉྩཱཧཱཏི ཝིསིབྦིཏདིཝསཏོ པཉྩ དིཝསེ ཨཏིཀྐམིཏྭཱ. ནིཝཱསནཔཱཝུརཎཱུཔགཙཱིཝརཏཱ, ཨུཔསམྤནྣཱཡ སནྟཀཏཱ, སིབྦནཏྠཱཡ ཝིསིབྦནཾ ཝཱ ཝིསིབྦཱཔནཾ ཝཱ, ཨཉྙཏྲ ཨནུཉྙཱཏཀཱརཎཱ པཉྩཱཧཱཏིཀྐམོ, དྷུརནིཀྑེཔོཏི ཨིམཱནི པནེཏྠ པཉྩ ཨངྒཱནི.

༨༩༨. ཙཏུཏྠེ པཉྩནྣཾ ཙཱིཝརཱནནྟི ཏིཙཱིཝརཾ ཨུདཀསཱཊིཀཱ སངྐཙྩིཀཱཏི ཨིམེསཾ པཉྩནྣཾ ཙཱིཝརཱནཾ. པཉྩནྣཾ ཙཱིཝརཱནཾ ཨཉྙཏརཏཱ, པཉྩཱཧཱཏིཀྐམོ, ཨནུཉྙཱཏཀཱརཎཱབྷཱཝོ, ཨཔརིཝཏྟནནྟི ཨིམཱནི པནེཏྠ ཙཏྟཱརི ཨངྒཱནི.

༩༠༢. པཉྩམཾ ཨུཏྟཱནཏྠམེཝ.

༩༠༧. ཚཊྛེ ¶ ཙཱིཝརལཱབྷནྟི ལབྷིཏབྦཙཱིཝརཾ. ཝིཀཔྤནུཔགཔཙྪིམཏཱ, སངྒྷསྶ པརིཎཏབྷཱཝོ, ཝིནཱ ཨཱནིསཾསདསྶནེན ཨནྟརཱཡཀརཎནྟི ཨིམཱནི པནེཏྠ ཏཱིཎི ཨངྒཱནི.

༩༡༡. སཏྟམཾ ཨུཏྟཱནཏྠམེཝ.

༩༡༦. ཨཊྛམེ ¶ ཀུམྦྷཐཱུཎཾ ནཱམ ཀུམྦྷསདྡོ, ཏེན ཙརནྟི ཀཱིལ༹ནྟི, ཏཾ ཝཱ སིཔྤཾ ཨེཏེསནྟི ཀུམྦྷཐཱུཎིཀཱ. ཏེནཱཧ ‘‘གྷཊཀེན ཀཱིལ༹ནཀཱ’’ཏི. དཱིགྷནིཀཱཡཊྛཀཐཱཡཾ (དཱི. ནི. ཨཊྛ. ༡.༡༣) པན ‘‘ཀུམྦྷཐཱུཎཾ ནཱམ ཙཏུརསྶཨམྦཎཀཏཱལ༹’’ནྟི ཝུཏྟཾ. ཙཏུརསྶཨམྦཎཀཏཱལ༹ཾ ནཱམ རུཀྑསཱརདནྟཱདཱིསུ ཡེན ཀེནཙི ཙཏུརསྶཨམྦཎཾ ཀཏྭཱ ཙཏཱུསུ པསྶེསུ ཙམྨེན ཨོནནྡྷིཏྭཱ ཀཏཝཱདིཏབྷཎྜཾ. བིམྦིསཀནྟིཔི ཏསྶེཝ ཝེཝཙནཾ, ཏཾ ཝཱདེནྟི, ཏཾ ཝཱ སིཔྤཾ ཨེཏེསནྟི ཀུམྦྷཐཱུཎིཀཱ. ཏེནཱཧ ‘‘བིམྦིསཀཝཱདཀཱཏིཔི ཝདནྟཱི’’ཏི. སམཎཙཱིཝརཏཱ, ཋཔེཏྭཱ སཧདྷམྨིཀེ མཱཏཱཔིཏརོ ཙ ཨཉྙེསཾ དཱནཾ, ཨཏཱཝཀཱལིཀཏཱཏི ཨིམཱནི པནེཏྠ ཏཱིཎི ཨངྒཱནི.

༩༢༠. ནཝམཾ ཨུཏྟཱནཏྠམེཝ.

༩༢༧. དསམེ དྷམྨིཀཾ ཀཐིནུདྡྷཱརནྟི སབྦཱསཾ བྷིཀྑུནཱིནཾ ཨཀཱལཙཱིཝརཾ དཱཏུཀཱམེན ཨུཔཱསཀེན ཡཏྟཀོ ཨཏྠཱརམཱུལཀོ ཨཱནིསཾསོ, ཏཏོ ཨདྷིཀཾ ཝཱ སམཀཾ ཝཱ དཏྭཱ ཡཱཙིཏཀེན སམགྒེན བྷིཀྑུནིསངྒྷེན ཡཾ ཀཐིནཾ ཉཏྟིདུཏིཡེན ཀམྨེན ཨནྟརཱ ཨུདྡྷརཱིཡཏི, ཏསྶ སོ ཨུདྡྷཱརོ དྷམྨིཀོཏི ཝུཙྩཏི, ཨེཝརཱུཔཾ ཀཐིནུདྡྷཱརནྟི ཨཏྠོ. སེསཾ ཨུཏྟཱནཏྠམེཝ.

ནགྒཝགྒཝཎྞནཱ ནིཊྛིཏཱ.

༩༣༢. ཏུཝཊྚཝགྒེ སབྦཾ ཨུཏྟཱནམེཝ.

༥. ཙིཏྟཱགཱརཝགྒཝཎྞནཱ

༩༧༨. ཙིཏྟཱགཱརཝགྒསྶ པཋམེ ཀཱིལ༹ནཨུཔཝནནྟི ཨནྟོནགརེ ཋིཏཾ སནྡྷཱཡ ཝུཏྟཾ, ཀཱིལ༹ནུཡྻཱནནྟི བཧིནགརེ ཋིཏཾ སནྡྷཱཡ. པཱཊེཀྐཱ ཨཱཔཏྟིཡོཏི གཱིཝཱཡ པརིཝཊྚནཔྤཡོགགཎནཱཡ ཨཱཔཏྟིཡོ, ན ཨུམྨཱིལནགཎནཱཡ. ‘‘ཨཛ྄ཛྷཱརཱམེ རཱཛཱགཱརཱདཱིནི ཀརོནྟི ¶ , ཏཱནི པསྶནྟིཡཱ ཨནཱཔཏྟཱི’’ཏི ཝཙནཏོ ‘‘ཨནྟོཨཱརཱམེ ཏཏྠ ཏཏྠ གནྟྭཱ ནཙྩཱདཱིནི པསྶིཏུཾ ལབྷཏཱི’’ཏིཔི སིདྡྷཾ.

༩༨༢. དུཏིཡཱདཱིནི ¶ ཨུཏྟཱནཏྠཱནེཝ.

༡༠༡༥. ནཝམེ ཧཏྠིཨཱདཱིསུ སིཔྤ-སདྡོ པཙྩེཀཾ ཡོཛེཏབྦོ, ཏཐཱ ཨཱཐབྦཎཱདཱིསུ མནྟ-སདྡོ. ཏཏྠ ཨཱཐབྦཎམནྟོ ནཱམ ཨཱཐབྦཎཝེདཝིཧིཏོ པརཱུཔགྷཱཏཀརོ མནྟོ, ཁཱིལནམནྟོ ནཱམ དཱརུསཱརཁཱིལཾ མནྟེཏྭཱ པཐཝིཡཾ པཝེསེཏྭཱ མཱརཎམནྟོ, ཨགདཔྤཡོགོ ཝིསཡོཛནཾ. ནཱགམཎྜལནྟི སཔྤཱནཾ པཝེསནིཝཱརཎཏྠཾ མཎྜལབདྡྷམནྟོ.

༡༠༡༨. དསམཾ ཨུཏྟཱནཏྠམེཝ.

ཙིཏྟཱགཱརཝགྒཝཎྞནཱ ནིཊྛིཏཱ.

༡༠༢༡. ཨཱརཱམཝགྒེ སབྦཾ ཨུཏྟཱནཏྠམེཝ.

༡༠༦༧. གབྦྷིནིཝགྒེཔི སབྦཾ སུཝིཉྙེཡྻམེཝ.

༨. ཀུམཱརིབྷཱུཏཝགྒཝཎྞནཱ

༡༡༡༩. ཀུམཱརིབྷཱུཏཝགྒསྶ པཋམེ སབྦཔཋམཱ དྭེ མཧཱསིཀྑམཱནཱཏི གབྦྷིནིཝགྒེ སབྦཔཋམཾ ཝུཏྟཱ དྭེ སིཀྑམཱནཱ. སིཀྑམཱནཱ ཨིཙྩེཝ ཝཏྟབྦཱཏི སམྨུཏིཀམྨཱདཱིསུ ཨེཝཾ ཝཏྟབྦཱ. གིཧིགཏཱཏི ཝཱ ཀུམཱརིབྷཱུཏཱཏི ཝཱ ན ཝཏྟབྦཱཏི སཙེ ཝདནྟི, ཀམྨཾ ཀུཔྤཏཱིཏི ཨདྷིཔྤཱཡོ. ཨིཏོ པརཾ ནཝམཔརིཡོསཱནཾ ཨུཏྟཱནཏྠམེཝ.

༡༡༦༣. དསམེ ཨཔུབྦསམུཊྛཱནསཱིསནྟི པཋམཔཱརཱཛིཀསམུཊྛཱནཱདཱིསུ ཏེརསསུ སམུཊྛཱནེསུ ཨནནུཉྙཱཏསམུཊྛཱནཾ སནྡྷཱཡ ཝུཏྟཾ. ཏཉྷི ཨིཏོ པུབྦེ ཏཱདིསསྶ སམུཊྛཱནསཱིསསྶ ཨནཱགཏཏྟཱ ‘‘ཨཔུབྦསམུཊྛཱནསཱིས’’ནྟི ཝུཏྟཾ.

༡༡༦༦. ཨེཀཱདསམཱདཱིནི ¶ ཨུཏྟཱནཏྠཱནེཝ.

ཀུམཱརིབྷཱུཏཝགྒཝཎྞནཱ ནིཊྛིཏཱ.

༩. ཚཏྟུཔཱཧནཝགྒཝཎྞནཱ

༡༢༡༤. ཚཏྟུཔཱཧནཝགྒསྶ ¶ ཨེཀཱདསམེ ཨུཔཙཱརཾ སནྡྷཱཡཱཏི སམནྟཱ དྭཱདསཧཏྠུཔཙཱརཾ སནྡྷཱཡ. སེསཾ སབྦཏྠ ཨུཏྟཱནམེཝ.

ཚཏྟུཔཱཧནཝགྒཝཎྞནཱ ནིཊྛིཏཱ.

གིརགྒསམཛྫཱདཱིནི ཨཙིཏྟཀཱནི ལོཀཝཛྫཱནཱིཏི ཝུཏྟཏྟཱ ནཙྩནྟི ཝཱ ཝཎྞཀནྟི ཝཱ ཨཛཱནིཏྭཱཝ པསྶནྟིཡཱ ཝཱ ནཧཱཡནྟིཡཱ ཝཱ ཨཱཔཏྟིསམྦྷཝཏོ ཝཏྠུཨཛཱནནཙིཏྟེན ཨཙིཏྟཀཱནི, ནཙྩནྟི ཝཱ ཝཎྞཀནྟི ཝཱ ཛཱནིཏྭཱ པསྶནྟིཡཱ ཝཱ ནཧཱཡནྟིཡཱ ཝཱ ཨཀུསལེནེཝ ཨཱཔཛྫནཏོ ལོཀཝཛྫཱནཱིཏི ཝེདིཏབྦཱནི. ཙོརཱིཝུཊྛཱཔནཱདཱིནི ཙོརཱིཏིཨཱདིནཱ ཝཏྠུཾ ཛཱནིཏྭཱ ཀརཎེ ཨེཝ ཨཱཔཏྟིསམྦྷཝཏོ སཙིཏྟཀཱནི, ཨུཔསམྤདཱདཱིནཾ ཨེཀནྟཨཀུསལཙིཏྟེནེཝ ཨཀཏྟབྦཏྟཱ པཎྞཏྟིཝཛྫཱནི. ‘‘ཨིདྷ སཙིཏྟཀཱཙིཏྟཀཏཱ པཎྞཏྟིཛཱནནཱཛཱནནཏཱཡ ཨགྒཧེཏྭཱ ཝཏྠུཛཱནནཱཛཱནནཏཱཡ གཧེཏབྦཱ’’ཏི ཏཱིསུཔི གཎྛིཔདེསུ ཝུཏྟཾ. སེསམེཏྠ ཨུཏྟཱནཏྠམེཝ.

བྷིཀྑུནཱིཝིབྷངྒེ ཁུདྡཀཝཎྞནཱ ནིཊྛིཏཱ.

པཱཙིཏྟིཡཀཎྜཾ ནིཊྛིཏཾ.

༥. པཱཊིདེསནཱིཡཀཎྜཾ (བྷིཀྑུནཱིཝིབྷངྒཝཎྞནཱ)

པཱཊིདེསནཱིཡསིཀྑཱཔདཝཎྞནཱ

༡༢༢༨. པཱཊིདེསནཱིཡཱ ¶ ¶ ནཱམ ཡེ ཨཊྛ དྷམྨཱ སངྑེཔེནེཝ སངྒཧཾ ཨཱརུལ༹ྷཱཏི སམྦནྡྷོ. པཱལི༹ཝིནིམུཏྟཀེསཱུཏི པཱལི༹ཡཾ ཨནཱགཏེསུ སཔྤིཨཱདཱིསུ.

པཱཊིདེསནཱིཡསིཀྑཱཔདཝཎྞནཱ ནིཊྛིཏཱ.

པཱཊིདེསནཱིཡཀཎྜཾ ནིཊྛིཏཾ.

ཡེ པན པཉྩསཏྟཏི སེཁིཡཱ དྷམྨཱ ཨུདྡིཊྛཱ, ཡེ ཙ ཏེསཾ ཨནནྟརཱ སཏྟཱདྷིཀརཎཝ྄ཧཡཱ དྷམྨཱ ཨུདྡིཊྛཱཏི སམྦནྡྷོ. ཏཏྠ ཏེསནྟི ཏེསཾ སེཁིཡཱནཾ. སཏྟཱདྷིཀརཎཝ྄ཧཡཱཏི སཏྟཱདྷིཀརཎསམཐསངྑཱཏཱ. ཏཾ ཨཏྠཝིནིཙྪཡཾ ཏཱདིསཾཡེཝ ཡསྨཱ ཝིདཱུ ཝདནྟཱིཏི ཨཏྠོ.

ཡཐཱ ནིཊྛིཏཱཏི སམྦནྡྷོ. སབྦཱསཝཔཧཾ མགྒནྟི སབྦཱསཝཝིགྷཱཏཀཾ ཨརཧཏྟམགྒཾ པཏྭཱ སསནྟཱནེ ཨུཔྤཱདེཏྭཱ. པསྶནྟུ ནིབྦུཏིནྟི མགྒཉཱཎལོཙནེན ནིབྦཱནཾ སཙྪིཀརོནྟུ, པཔྤོནྟཱུཏི ཝཱ པཱཋོ. ཏཏྠ ནིབྦུཏིནྟི ཁནྡྷཔརིནིབྦཱནཾ གཧེཏབྦཾ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ སཱརཏྠདཱིཔནིཡཾ.

བྷིཀྑུནཱིཝིབྷངྒཝཎྞནཱ ནིཊྛིཏཱ.

ཨུབྷཏོཝིབྷངྒཊྛཀཐཱཝཎྞནཱ ནིཊྛིཏཱ.

པཱཙིཏྟིཡཝཎྞནཱ ནིཊྛིཏཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

མཧཱཝགྒ-ཊཱིཀཱ

༡. མཧཱཁནྡྷཀཾ

བོདྷིཀཐཱཝཎྞནཱ

ཨིདཱནི ¶ ¶ ཨུབྷཏོཝིབྷངྒཱནནྟརཾ སངྒཧམཱརོཔིཏསྶ མཧཱཝགྒཙཱུལ༹ཝགྒསངྒཧིཏསྶ ཁནྡྷཀསྶ ཨཏྠསཾཝཎྞནཾ ཨཱརབྷིཏུཀཱམོ ‘‘ཨུབྷིནྣཾ པཱཏིམོཀྑཱན’’ནྟིཨཱདིམཱཧ. ཏཏྠ ཨུབྷིནྣཾ པཱཏིམོཀྑཱནནྟི ཨུབྷིནྣཾ པཱཏིམོཀྑཝིབྷངྒཱནཾ. པཱཏིམོཀྑགྒཧཎེན ཧེཏྠ ཏེསཾ ཝིབྷངྒོ ཨབྷེདེན གཧིཏོ. ཡཾ ཁནྡྷཀཾ སངྒཱཡིཾསཱུཏི སམྦནྡྷོ. ཁནྡྷཱནཾ སམཱུཧོ ཁནྡྷཀོ, ཁནྡྷཱནཾ ཝཱ པཀཱསནཏོ དཱིཔནཏོ ཁནྡྷཀོ. ‘‘ཁནྡྷཱ’’ཏི ཙེཏྠ པབྦཛྫུཔསམྤདཱདིཝིནཡཀམྨསངྑཱཏཱ ཙཱརིཏྟཝཱརིཏྟསིཀྑཱཔདསངྑཱཏཱ ཙ པཉྙཏྟིཡོ ཨདྷིཔྤེཏཱ. པབྦཛྫཱདཱིནི ཧི བྷགཝཏཱ པཉྙཏྟཏྟཱ ‘‘པཉྙཏྟིཡོ’’ཏི ཝུཙྩནྟི. པཉྙཏྟིཡཉྩ ཁནྡྷསདྡོ དིསྶཏི ‘‘དཱརུཀྑནྡྷོ ཨགྒིཀྑནྡྷོ’’ཏིཨཱདཱིསུ ཝིཡ. ཨཔིཙ བྷཱགརཱསཊྛཏཱཔེཏྠ ཡུཛྫཏིཡེཝ ཏཱསཾ པཉྙཏྟཱིནཾ བྷཱགཏོ རཱསིཏོ ཙ ཝིབྷཏྟཏྟཱ. ཁནྡྷཀོཝིདཱཏི པཉྙཏྟིབྷཱགརཱསཊྛཝསེན ཁནྡྷཊྛེ ཀོཝིདཱ.

པདབྷཱཛནཱིཡེ ¶ ཡེསཾ པདཱནཾ ཨཏྠཱ ཡེཧི ཨཊྛཀཐཱནཡེཧི པཀཱསིཏཱཏི ཡོཛེཏབྦཾ. ཏེ ཙེ པུན ཝདེཡྻཱམཱཏི ཏེ ཙེ ཨཊྛཀཐཱནཡེ པུནཔི ཝདེཡྻཱམ. ཨཐ ཝཱ པདབྷཱཛནཱིཡེ ཡེསཾ པདཱནཾ ཡེ ཨཏྠཱ ཧེཊྛཱ པཀཱསིཏཱ, ཏེ ཙེ ཨཏྠེ པུན ཝདེཡྻཱམཱཏི ཡོཛེཏབྦཾ. ཨིམསྨིཾ པཀྑེ ཧི-སདྡོ པདཔཱུརཎེ དཊྛབྦོ. པརིཡོསཱནནྟི སཾཝཎྞནཱཔརིཡོསཱནཾ. ཨུཏྟཱནཱ ཙེཝ ཡེ ཨཏྠཱཏི ཡེ ཨཏྠཱ པུབྦེ ཨཔཀཱསིཏཱཔི ཨུཏྟཱནཱ ཨགམྦྷཱིརཱ.

༡. ཝིསེསཀཱརཎཾ ནཏྠཱིཏི ‘‘ཡེན སམཡེན ཨཱཡསྨཏོ སཱརིཔུཏྟཏྠེརསྶ སིཀྑཱཔདཔཉྙཏྟིཡཱཙནཧེཏུབྷཱུཏོ པརིཝིཏཀྐོ ཨུདཔཱདི, ཏེན ¶ སམཡེནཱ’’ཏིཨཱདིནཱ ཝུཏྟཀཱརཎཾ ཝིཡ ཨིདྷ ཝིསེསཀཱརཎཾ ནཏྠི. ཨཡམབྷིལཱཔོཏི ‘‘ཏེན སམཡེནཱ’’ཏི ཨཡམབྷིལཱཔོ. ཀིཾ པནེཏསྶ ཝཙནེ པཡོཛནནྟི ཡདི ཝིསེསཀཱརཎཾ ནཏྠི, ཨེཏསྶ ཝཙནེ ཀིཾ པཡོཛནནྟི ཨདྷིཔྤཱཡོ. ནིདཱནདསྶནཾ པཡོཛནནྟི ཡོཛེཏབྦཾ. ཏམེཝ ཝིབྷཱཝེཏུཾ ‘‘ཡཱ ཧི བྷགཝཏཱ’’ཏིཨཱདི ཝུཏྟཾ.

མཧཱཝེལཱ ཝིཡ མཧཱཝེལཱ, ཝིཔུལཝཱལུཀཔུཉྫཏཱཡ མཧནྟོ ཝེལཱཏཊོ ཝིཡཱཏི ཨཏྠོ. ཏེནཱཧ ‘‘མཧནྟེ ཝཱལིཀརཱསིམྷཱིཏི ཨཏྠོ’’ཏི. ཨུརུ མརུ སིཀཏཱ ཝཱལུཀཱ ཝཎྞུ ཝཱལིཀཱཏི ཨིམེ སདྡཱ སམཱནཏྠཱ, བྱཉྫནམེཝ ནཱནཾ. ཏེནཱཧ ‘‘ཨུརཱུཏི ཝཱལིཀཱ ཝུཙྩཏཱི’’ཏི.

ཨིཏོ པཊྛཱཡ ཙ –

ཡསྨཱ སུཏྟནྟཔཱལཱི༹ནཾ, ཨཏྠོ སངྑེཔཝཎྞིཏོ;

ཏསྨཱ མཡཾ ཀརིསྶཱམ, ཏཱསཾ ཨཏྠསྶ དཱིཔནཾ.

ནཛྫཱཏི (ཨུདཱ. ཨཊྛ. ༡) ནདཏི སནྡཏཱིཏི ནདཱི, ཏསྶཱ ནཛྫཱ, ནདིཡཱ ནིནྣགཱཡཱཏི ཨཏྠོ. ནེརཉྫརཱཡཱཏི ‘‘ནེལཉྫལཱཡཱ’’ཏི ཝཏྟབྦེ ལ-ཀཱརསྶ ར-ཀཱརཾ ཀཏྭཱ ‘‘ནེརཉྫརཱཡཱ’’ཏི ཝུཏྟཾ, ཀདྡམསེཝཱལཔཎཀཱདིདོསརཧིཏསལིལཱཡཱཏི ཨཏྠོ. ཀེཙི ‘‘ནཱིལཾཛལཱཡཱཏི ཝཏྟབྦེ ནེརཉྫརཱཡཱཏི ཝུཏྟ’’ནྟི ཝདནྟི, ནཱམམེཝ ཝཱ ཨེཏཾ ཏསྶཱ ནདིཡཱཏི ཝེདིཏབྦཾ. ཏསྶཱ ནདིཡཱ ཏཱིརེ ཡཏྠ བྷགཝཱ ཝིཧཱསི, ཏཾ དསྶེཏུཾ ‘‘བོདྷིརུཀྑམཱུལེ’’ཏི ཝུཏྟཾ. ‘‘བོདྷི ཝུཙྩཏི ཙཏཱུསུ མགྒེསུ ཉཱཎ’’ནྟི (ཙཱུལ༹ཝ. ཁགྒཝིསཱཎསུཏྟནིདྡེས ༡༢༡) ཨེཏྠ མགྒཉཱཎཾ བོདྷཱིཏི ཝུཏྟཾ, ‘‘པཔྤོཏི བོདྷིཾ ཝརབྷཱུརིམེདྷསོ’’ཏི (དཱི. ནི. ༣.༢༡༧) ཨེཏྠ སབྦཉྙུཏཉྙཱཎཾ. ཏདུབྷཡམྤི བོདྷིཾ བྷགཝཱ ཨེཏྠ པཏྟོཏི རུཀྑོཔི ‘‘བོདྷིརུཀྑོ’’ཏྭེཝ ནཱམཾ ལབྷི. ཨཐ ཝཱ སཏྟ བོཛ྄ཛྷངྒེ བུཛ྄ཛྷཏཱིཏི བྷགཝཱ བོདྷི. ཏེན བུཛ྄ཛྷནྟེན སནྣིསྶིཏཏྟཱ སོ རུཀྑོ ¶ ‘‘བོདྷིརུཀྑོ’’ཏི ནཱམཾ ལབྷི. ཨཊྛཀཐཱཡཾ པན ཨེཀདེསེནེཝ ཨཏྠཾ དསྶེཏུཾ ‘‘བོདྷི ཝུཙྩཏི ཙཏཱུསུ མགྒེསུ ཉཱཎ’’ནྟིཨཱདི ཝུཏྟཾ. མཱུལེཏི སམཱིཔེ. པཋམཱབྷིསམྦུདྡྷོཏི ཨནུནཱསིཀལོཔེནཱཡཾ ནིདྡེསོཏི ཨཱཧ ‘‘པཋམཾ ཨབྷིསམྦུདྡྷོ’’ཏི. པཋམནྟི ཙ བྷཱཝནཔུཾསཀནིདྡེསོ, ཏསྨཱ ཨབྷིསམྦུདྡྷོ ཧུཏྭཱ སབྦཔཋམཾ བོདྷིརུཀྑམཱུལེ ཝིཧརཏཱིཏི ཨེཝམེཏྠ སམྦནྡྷོ ཝེདིཏབྦོ.

ཨཐ ¶ ཁོ བྷགཝཱཏི ཨེཏྠ ཨཐཱཏི ཏསྨིཾ སམཡེཏི ཨེཝམཏྠོ གཧེཏབྦོ ཨནེཀཏྠཏྟཱ ནིཔཱཏཱནཾ, ཡསྨིཾ སམཡེ ཨབྷིསམྦུདྡྷོ ཧུཏྭཱ བོདྷིརུཀྑམཱུལེ ཝིཧརཏི, ཏསྨིཾ སམཡེཏི ཨཏྠོ. ཏེནེཝ ཨུདཱནཔཱལི༹ཡཾ (ཨུདཱ. ༢) ‘‘ཏེན ཁོ པན སམཡེན བྷགཝཱ སཏྟཱཧཾ ཨེཀཔལླངྐེན ནིསིནྣོ ཧོཏི ཝིམུཏྟིསུཁཔཊིསཾཝེདཱི’’ཏི ཝུཏྟཾ. ཨཐཱཏི ཝཱ པཙྪཱཏི ཨིམསྨིཾ ཨཏྠེ ནིཔཱཏོ, ཏསྨཱ ཨབྷིསམྦོདྷིཏོ པཙྪཱཏི ཨེཝམཏྠོ གཧེཏབྦོ. ཁོཏི པདཔཱུརཎེ ནིཔཱཏོ. སཏྟ ཨཧཱནི སཏྟཱཧཾ. ཨཙྩནྟསཾཡོགེ ཙེཏཾ ཨུཔཡོགཝཙནཾ. ཡསྨཱ བྷགཝཱ ཏཾ སཏྟཱཧཾ ནིརནྟརཏཱཡ ཨཙྩནྟམེཝ ཕལསམཱཔཏྟིསུཁེན ཝིཧཱསི, ཏསྨཱ ‘‘སཏྟཱཧ’’ནྟི ཨཙྩནྟསཾཡོགཝསེན ཨུཔཡོགཝཙནཾ ཝུཏྟཾ. ཨེཀཔལླངྐེནཱཏི ཝིསཱཁཔུཎྞམཱཡ ཨནཏྠངྒཏེཡེཝ སཱུརིཡེ ཨཔརཱཛིཏཔལླངྐཝསེན ཝཛིརཱསནེ ནིསིནྣཀཱལཏོ པཊྛཱཡ སཀིམྤི ཨནུཊྛཧིཏྭཱ ཡཐཱབྷུཛིཏེན ཨེཀེནེཝ པལླངྐེན.

ཝིམུཏྟིསུཁཔཊིསཾཝེདཱིཏི ཨེཏྠ ཏདངྒཝིཀྑམྦྷནསམུཙྪེདཔཊིཔྤསྶདྡྷིནིསྶརཎཝིམུཏྟཱིསུ པཉྩསུ པཊིཔྤསྶདྡྷིཝིམུཏྟིསངྑཱཏཱ བྷགཝཏོ ཕལཝིམུཏྟི ཨདྷིཔྤེཏཱཏི ཨཱཧ ‘‘ཝིམུཏྟིསུཁཾ ཕལསམཱཔཏྟིསུཁཾ པཊིསཾཝེདཡམཱནོ’’ཏི. ཝིམུཏྟཱིཏི ཙ ཨུཔཀྐིལེསེཧི པཊིཔྤསྶདྡྷིཝསེན ཙིཏྟསྶ ཝིམུཏྟབྷཱཝོ, ཙིཏྟམེཝ ཝཱ ཏཐཱ ཝིམུཏྟཾ ཝེདིཏབྦཾ. ཏཱཡ ཝིམུཏྟིཡཱ ཛཱཏཾ, སམྤཡུཏྟཾ ཝཱ སུཁཾ ཝིམུཏྟིསུཁཾ. ‘‘ཡཱཡཾ, བྷནྟེ, ཨུཔེཀྑཱ སནྟེ སུཁེ ཝུཏྟཱ བྷགཝཏཱ’’ཏི (མ. ནི. ༢.༨༨) ཝཙནཏོ ཨུཔེཀྑཱཔི ཙེཏྠ སུཁམིཙྩེཝ ཝེདིཏབྦཱ. ཏཐཱ ཧི ཝུཏྟཾ སམྨོཧཝིནོདནིཡཾ (ཝིབྷ. ཨཊྛ. ༢༣༢) ‘‘ཨུཔེཀྑཱ པན སནྟཏྟཱ, སུཁམིཙྩེཝ བྷཱསིཏཱ’’ཏི. བྷགཝཱ ཧི ཙཏུཏྠཛ྄ཛྷཱནིཀཾ ཨརཧཏྟཕལསམཱཔཏྟིཾ སམཱཔཛྫཏི, ན ཨིཏརཾ. ཨཐ ཝཱ ‘‘ཏེསཾ ཝཱུཔསམོ སུཁོ’’ཏིཨཱདཱིསུ (དཱི. ནི. ༢.༢༢༡, ༢༧༢) ཡཐཱ སངྑཱརདུཀྑཝཱུཔསམོ ‘‘སུཁོ’’ཏི ཝུཙྩཏི, ཨེཝཾ སཀལཀིལེསདུཀྑཱུཔསམབྷཱཝཏོ ཨགྒཕལེ ལབྦྷམཱནཱ པཊིཔྤསྶདྡྷིཝིམུཏྟི ཨེཝ ཨིདྷ ‘‘སུཁ’’ནྟི ཝེདིཏབྦཱ.

ཨཐཱཏི ཨདྷིཀཱརཏྠེ ནིཔཱཏོ, ཁོཏི པདཔཱུརཎེ. ཏེསུ ཨདྷིཀཱརཏྠེན ‘‘ཨཐཱ’’ཏི ཨིམིནཱ ཝིམུཏྟིསུཁཔཊིསཾཝེདནཏོ ¶ ཨཉྙཾ ཨདྷིཀཱརཾ དསྶེཏི. ཀོ པནེསོཏི? པཊིཙྩསམཨུཔྤཱདམནསིཀཱརོ. རཏྟིཡཱཏི ཨཝཡཝསམྦནྡྷེ སཱམིཝཙནཾ. པཋམནྟི ཨཙྩནྟསཾཡོགཏྠེ ཨུཔཡོགཝཙནཾ ¶ . བྷགཝཱ ཧི ཏསྶཱ རཏྟིཡཱ སཀལམྤི པཋམཾ ཡཱམཾ ཏེནེཝ མནསིཀཱརེན ཡུཏྟོ ཨཧོསཱིཏི.

པཙྩཡཱཀཱརནྟི ཨཝིཛྫཱདིཔཙྩཡདྷམྨཾ. པཊིཙྩཱཏི པཊིམུཁཾ གནྟྭཱ, ཀཱརཎསཱམགྒིཾ ཨཔཊིཀྑིཔིཏྭཱཏི ཨཏྠོ. པཊིམུཁགམནཉྩ པཙྩཡསྶ ཀཱརཎསཱམགྒིཡཱ ཨངྒབྷཱཝེན ཕལསྶ ཨུཔྤཱདནམེཝ. ཨཔཊིཀྑིཔིཏྭཱཏི པན ཝིནཱ ཏཱཡ ཀཱརཎསཱམགྒིཡཱ ཨངྒབྷཱཝཾ ཨགནྟྭཱ སཡམེཝ ན ཨུཔྤཱདེཏཱིཏི ཨཏྠོ. ཨེཏེན ཀཱརཎབཧུཏཱ དསྶིཏཱ. ཨཝིཛྫཱདིཨེཀེཀཧེཏུསཱིསེན ཧི ཧེཏུསམཱུཧོ ནིདྡིཊྛོ. སཧིཏེཏི སམུདིཏེ, ཨཝིནིབྦྷུཏྟེཏི ཨཏྠོ. ཨཝིཛྫཱདིཀོ ཧི པཙྩཡདྷམྨོ སཧིཏེཡེཝ ཨཉྙམཉྙཾ ཨཝིནིབྦྷོགཝུཏྟིདྷམྨེ ཨུཔྤཱདེཏི. ཨིམིནཱ པཙྩཡུཔྤནྣདྷམྨབཧུཏཱ དསྶིཏཱ. ཨུབྷཡེནཔི ‘‘ཨེཀཾ ན ཨེཀཏོ’’ཏིཨཱདིནཡོ (ཝིབྷ. ཨཊྛ. ༢༢༦ སངྑཱརཔདནིདྡེས; ཝིསུདྡྷི. ༢.༦༡༧) དཱིཔིཏོ ཧོཏི. ཨེཀཏོ ཧི ཀཱརཎཏོ ན ཨིདྷ ཀིཉྩི ཨེཀཾ ཕལམཏྠི, ན ཨནེཀཾ, ནཱཔི ཨནེཀེཧི ཀཱརཎེཧི ཨེཀཾ, ཨནེཀེཧི པན ཀཱརཎེཧི ཨནེཀམེཝ ཧོཏི. ཏཐཱ ཧི ཨནེཀེཧི ཨུཏུཔཐཝཱིབཱིཛསལིལསངྑཱཏེཧི ཀཱརཎེཧི ཨནེཀམེཝ རཱུཔགནྡྷརསཱདིཨངྐུརསངྑཱཏཾ ཕལམུཔྤཛྫམཱནཾ དིསྶཏི. ཡཾ པནེཏཾ ‘‘ཨཝིཛྫཱཔཙྩཡཱ སངྑཱརཱ, སངྑཱརཔཙྩཡཱ ཝིཉྙཱཎ’’ནྟི ཨེཀེཀཧེཏུཕལདཱིཔནཾ ཀཏཾ, ཏཏྠ པཡོཛནཾ ན ཝིཛྫཏི.

བྷགཝཱ ཧི ཀཏྠཙི པདྷཱནཏྟཱ ཀཏྠཙི པཱཀཊཏྟཱ ཀཏྠཙི ཨསཱདྷཱརཎཏྟཱ དེསནཱཝིལཱསསྶ ཙ ཝེནེཡྻཱནཉྩ ཨནུརཱུཔཏོ ཨེཀམེཝ ཧེཏུཾ ཝཱ ཕལཾ ཝཱ དཱིཔེཏི. ‘‘ཕསྶཔཙྩཡཱ ཝེདནཱ’’ཏི ཧི ཨེཀམེཝ ཧེཏུཾ ཕལཉྩཱཧ. ཕསྶོ ཧི ཝེདནཱཡ པདྷཱནཧེཏུ ཡཐཱཕསྶཾ ཝེདནཱཝཝཏྠཱནཏོ. ཝེདནཱ ཙ ཕསྶསྶ པདྷཱནཕལཾ ཡཐཱཝེདནཾ ཕསྶཝཝཏྠཱནཏོ. ‘‘སེམྷསམུཊྛཱནཱ ཨཱབཱདྷཱ’’ཏི (མཧཱནི. ༥) པཱཀཊཏྟཱ ཨེཀཾ ཧེཏུཾ ཨཱཧ. པཱཀཊོ ཧི ཨེཏྠ སེམྷོ, ན ཀམྨཱདཡོ. ‘‘ཡེ ཀེཙི, བྷིཀྑཝེ, ཨཀུསལཱ དྷམྨཱ, སབྦེཏེ ཨཡོནིསོམནསིཀཱརམཱུལཀཱ’’ཏི ཨསཱདྷཱརཎཏྟཱ ཨེཀཾ ཧེཏུཾ ཨཱཧ. ཨསཱདྷཱརཎོ ཧི ཨཡོནིསོམནསིཀཱརོ ཨཀུསལཱནཾ, སཱདྷཱརཎཱནི ཝཏྠཱརམྨཎཱདཱིནཱིཏི. ཏསྨཱ ཨཝིཛྫཱ ཏཱཝེཏྠ ཝིཛྫམཱནེསུཔི ཨཉྙེསུ ཝཏྠཱརམྨཎསཧཛཱཏདྷམྨཱདཱིསུ སངྑཱརཀཱརཎེསུ ‘‘ཨསྶཱདཱནུཔསྶིནོ ཏཎྷཱ པཝཌྜྷཏཱི’’ཏི (སཾ. ནི. ༢.༥༢) ཙ ‘‘ཨཝིཛྫཱསམུདཡཱ ཨཱསཝསམུདཡོ’’ཏི ¶ (མ. ནི. ༡.༡༠༤) ཙ ཝཙནཏོ ཨཉྙེསམྤི ཏཎྷཱདཱིནཾ སངྑཱརཧེཏཱུནཾ ཧེཏཱུཏི པདྷཱནཏྟཱ, ‘‘ཨཝིདྭཱ, བྷིཀྑཝེ, ཨཝིཛྫཱགཏོ པུཉྙཱབྷིསངྑཱརམྤི ཨབྷིསངྑརོཏཱི’’ཏི པཱཀཊཏྟཱ ཨསཱདྷཱརཎཏྟཱ ཙ སངྑཱརཱནཾ ཧེཏུབྷཱཝེན དཱིཔིཏཱཏི ¶ ཝེདིཏབྦཱ. ཨེཝཾ སབྦཏྠ ཨེཀེཀཧེཏུཕལདཱིཔནེ ཡཐཱསམྦྷཝཾ ནཡོ ནེཏབྦོ. ཏེནཱཧུ པོརཱཎཱ –

‘‘ཨེཀཾ ན ཨེཀཏོ ཨིདྷ, ནཱནེཀམནེཀཏོཔི ནོ ཨེཀཾ;

ཕལམཏྠི ཨཏྠི པན ཨེཀ-ཧེཏུཕལདཱིཔནེ ཨཏྠོ’’ཏི.

པཙྩེཏུམརཧཏཱིཏི པཊིཙྩོ. ཡོ ཧི ནཾ པཙྩེཏི ཨབྷིསམེཏི, ཏསྶ ཨཙྩནྟམེཝ དུཀྑཝཱུཔསམཱཡ སཾཝཏྟཏི. སམྨཱ སཧ ཙ ཨུཔྤཱདེཏཱིཏི སམུཔྤཱདོ. པཙྩཡདྷམྨོ ཧི ཨཏྟནོ ཕལཾ ཨུཔྤཱདེནྟོ སམྤུཎྞམེཝ ཨུཔྤཱདེཏི, ན ཝིཀལཾ. ཡེ ཙ དྷམྨེ ཨུཔྤཱདེཏི, ཏེ སབྦེ སཧེཝ ཨུཔྤཱདེཏི, ན ཨེཀེཀཾ. ཨིཏི པཊིཙྩོ ཙ སོ སམུཔྤཱདོ ཙཱཏི པཊིཙྩསམུཔྤཱདོཏི ཨེཝམྤེཏྠ ཨཏྠོ དཊྛབྦོ. ཝིཏྠཱརོཏི པཊིཙྩསམུཔྤཱདཔདཝཎྞནཱཔཔཉྩོ. མཡམྤི ཏཾ ཨཏིཔཔཉྩབྷཡཱ ཨིདྷ ན དསྶཡིསྶཱམ, ཨེཝཾ པརཏོ ཝཀྑམཱནམྤི ཝིཏྠཱརཾ. ཨནུལོམཔཊིལོམནྟི བྷཱཝནཔུཾསཀནིདྡེསོ ‘‘ཝིསམཾ ཙནྡིམསཱུརིཡཱ པརིཝཏྟནྟཱི’’ཏིཨཱདཱིསུ (ཨ. ནི. ༤.༧༠) ཝིཡ. སྭེཝཱཏི སོ ཨེཝ པཙྩཡཱཀཱརོ. པུརིམནཡེན ཝཱ ཝུཏྟོཏི ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིནཱ ནཡེན ཝུཏྟོ པཙྩཡཱཀཱརོ. པཝཏྟིཡཱཏི སཾསཱརཔྤཝཏྟིཡཱ. མནསི ཨཀཱསཱིཏི ཡོ ཡོ པཙྩཡདྷམྨོ ཡསྶ ཡསྶ པཙྩཡུཔྤནྣདྷམྨསྶ ཡཐཱ ཡཐཱ ཧེཏུཔཙྩཡཱདིནཱ པཙྩཡབྷཱཝེན པཙྩཡོ ཧོཏི, ཏཾ སབྦཾ ཨཝིཔརཱིཏཾ ཨཔརིཧཱཔེཏྭཱ ཨནཝསེསཏོ པཙྩཝེཀྑཎཝསེན ཙིཏྟེ ཨཀཱསཱིཏི ཨཏྠོ.

ཨཝིཛྫཱཔཙྩཡཱཏིཨཱདཱིསུ (ཝིབྷ. ཨཊྛ. ༢༢༥; ཝིསུདྡྷི. ༢.༥༨༦-༥༨༧; ཨུདཱ. ཨཊྛ. ༡) ཨཝིནྡིཡཾ ཀཱཡདུཙྩརིཏཱདིཾ ཝིནྡཏཱིཏི ཨཝིཛྫཱ, ཝིནྡིཡཾ ཀཱཡསུཙརིཏཱདིཾ ན ཝིནྡཏཱིཏི ཨཝིཛྫཱ, དྷམྨཱནཾ ཨཝིཔརཱིཏསབྷཱཝཾ ཨཝིདིཏཾ ཀརོཏཱིཏི ཨཝིཛྫཱ, ཨནྟཝིརཧིཏེ སཾསཱརེ བྷཝཱདཱིསུ སཏྟེ ཛཝཱཔེཏཱིཏི ཨཝིཛྫཱ, ཨཝིཛྫམཱནེསུ ཛཝཏི, ཝིཛྫམཱནེསུ ན ཛཝཏཱིཏི ཨཝིཛྫཱ, ཝིཛྫཱཔཊིཔཀྑཱཏི ཝཱ ཨཝིཛྫཱ. སཱ ‘‘དུཀྑེ ཨཉྙཱཎ’’ནྟིཨཱདིནཱ ཙཏུབྦིདྷཱ ཝེདིཏབྦཱ. པཊིཙྩ ནཾ ན ཝིནཱ ཕལཾ ཨེཏི ཨུཔྤཛྫཏི ཙེཝ པཝཏྟཏི ཙཱཏི པཙྩཡོ, ཨུཔཀཱརཊྛོ ཝཱ པཙྩཡོ. ཨཝིཛྫཱ ཙ སཱ པཙྩཡོ ཙཱཏི ཨཝིཛྫཱཔཙྩཡོ ¶ , ཏསྨཱ ཨཝིཛྫཱཔཙྩཡཱ. སངྑརོནྟཱིཏི སངྑཱརཱ, ལོཀིཡཱ ཀུསལཱཀུསལཙེཏནཱ. ཏེ པུཉྙཱཔུཉྙཱནེཉྩཱབྷིསངྑཱརཝསེན ཏིཝིདྷཱ ཝེདིཏབྦཱ. ཝིཛཱནཱཏཱིཏི ཝིཉྙཱཎཾ, ཏཾ ལོཀིཡཝིཔཱཀཝིཉྙཱཎཝསེན བཱཏྟིཾསཝིདྷཾ. ནམཏཱིཏི ནཱམཾ, ཝེདནཱདིཀྑནྡྷཏྟཡཾ. རུཔྤཏཱིཏི རཱུཔཾ, བྷཱུཏརཱུཔཾ ཙཀྑཱདིཨུཔཱདཱརཱུཔཉྩ. ཨཱཡཏནྟི, ཨཱཡཏཉྩ སཾསཱརདུཀྑཾ ནཡཏཱིཏི ཨཱཡཏནཾ ¶ . ཕུསཏཱིཏི ཕསྶོ. ཝེདཡཏཱིཏི ཝེདནཱ. ཨིདམྤི དྭཡཾ དྭཱརཝསེན ཚབྦིདྷཾ, ཝིཔཱཀཝསེན གཧཎེ བཱཏྟིཾསཝིདྷཾ. ཏསྶཏི པརིཏསྶཏཱིཏི ཏཎྷཱ, སཱ ཀཱམཏཎྷཱདིཝསེན སངྑེཔཏོ ཏིཝིདྷཱ, ཝིཏྠཱརཏོ ཨཊྛསཏཝིདྷཱ ཙ. ཨུཔཱདིཡཏཱིཏི ཨུཔཱདཱནཾ, ཏཾ ཀཱམུཔཱདཱནཱདིཝསཨེན ཙཏུབྦིདྷཾ.

བྷཝཏི བྷཱཝཡཏི ཙཱཏི བྷཝོ, སོ ཀམྨོཔཔཏྟིབྷེདཏོ དུཝིདྷོ. ཛནནཾ ཛཱཏི. ཛཱིརཎཾ ཛརཱ. མརནྟི ཏེནཱཏི མརཎཾ. སོཙནཾ སོཀོ. པརིདེཝནཾ པརིདེཝོ. དུཀྑཡཏཱིཏི དུཀྑཾ. ཨུཔྤཱདཊྛིཏིཝསེན དྭེདྷཱ ཁནཏཱིཏི ཝཱ དུཀྑཾ. དུམྨནསྶ བྷཱཝོ དོམནསྶཾ. བྷུསོ ཨཱཡཱསོ ཨུཔཱཡཱསོ. སམྦྷཝནྟཱིཏི ནིབྦཏྟནྟི. ན ཀེཝལཉྩ སོཀཱདཱིཧེཝ, ཨཐ ཁོ སབྦཔདེཧི ‘‘སམྦྷཝནྟཱི’’ཏི པདསྶ ཡོཛནཱ ཀཱཏབྦཱ. ཨེཝཉྷི ཨཝིཛྫཱཔཙྩཡཱ སངྑཱརཱ སམྦྷཝནྟཱིཏི པཙྩཡཔཙྩཡུཔྤནྣཝཝཏྠཱནཾ དསྶིཏཾ ཧོཏི. ཏེནེཝཱཧ ‘‘ཨཝིཛྫཱཔཙྩཡཱ སངྑཱརཱ སམྦྷཝནྟཱིཏི ཨིམིནཱ ནཡེན སབྦཔདེསུ ཨཏྠོ ཝེདིཏབྦོ’’ཏི. ཨེཝམེཏསྶ…པེ… སམུདཡོ ཧོཏཱིཏི ཨེཏྠ པན ཨཡམཏྠོ. ཨེཝནྟི ནིདྡིཊྛནཡནིདསྶནཾ. ཏེན ཨཝིཛྫཱདཱིཧེཝ ཀཱརཎེཧི, ན ཨིསྶརནིམྨཱནཱདཱིཧཱིཏི དསྶེཏི. ཨེཏསྶཱཏི ཡཐཱཝུཏྟསྶ. ཀེཝལསྶཱཏི ཨསམྨིསྶསྶ, སཀལསྶ ཝཱ. དུཀྑཀྑནྡྷསྶཱཏི དུཀྑསམཱུཧསྶ, ན སཏྟསྶ ནཱཔི སུབྷསུཁཱདཱིནཾ. སམུདཡོ ཧོཏཱིཏི ནིབྦཏྟི སམྦྷཝཏི.

ཨཙྩནྟམེཝ སངྑཱརེཧི ཝིརཛྫཏི ཨེཏེནཱཏི ཝིརཱགོ, ཨརིཡམགྒོཏི ཨཱཧ ‘‘ཝིརཱགསངྑཱཏེན མགྒེནཱ’’ཏི. ཨསེསཾ ནིརོདྷཱ ཨསེསནིརོདྷཱ, ཨསེསེཏྭཱ ནིསྶེསེཏྭཱ ནིརོདྷཱ སམུཙྪིནྡནཱ ཨནུསཡཔྤཧཱནཝསེན ཨགྒམགྒེན ཨཝིཛྫཱཡ ཨཙྩནྟསམུགྒྷཱཏཏོཏི ཨཏྠོ. ཡདིཔི ཧེཊྛིམམགྒེཧིཔི པཧཱིཡམཱནཱ ཨཝིཛྫཱ ཨཙྩནྟསམུགྒྷཱཏཝསེནེཝ པཧཱིཡཏི, ཏཐཱཔི ན ཨནཝསེསཏོ པཧཱིཡཏི. ཨཔཱཡགམནཱིཡཱ ཧི ཨཝིཛྫཱ པཋམམགྒེན པཧཱིཡཏི, ཏཐཱ སཀིདེཝ ཨིམསྨིཾ ལོཀེ སབྦཏྠ ཙ ཨནརིཡབྷཱུམིཡཾ ཨུཔཔཏྟིཡཱ པཙྩཡབྷཱུཏཱ ཨཝིཛྫཱ ཡཐཱཀྐམཾ དུཏིཡཏཏིཡམགྒེཧི པཧཱིཡཏི, ན ཨིཏརཱཏི, ཨརཧཏྟམགྒེནེཝ པན སཱ ཨནཝསེསཾ ¶ པཧཱིཡཏཱིཏི. ཨནུཔྤཱདནིརོདྷོ ཧོཏཱིཏི སབྦེསཾ སངྑཱརཱནཾ ཨནཝསེསཾ ཨནུཔྤཱདནིརོདྷོ ཧོཏི. ཧེཊྛིམེན ཧི མགྒཏྟཡེན ཀེཙི སངྑཱརཱ ནིརུཛ྄ཛྷནྟི, ཀེཙི ན ནིརུཛ྄ཛྷནྟི ཨཝིཛྫཱཡ སཱཝསེསནིརོདྷཱ, ཨགྒམགྒེན པནསྶཱ ཨནཝསེསནིརོདྷཱ ན ཀེཙི སངྑཱརཱ ན ནིརུཛ྄ཛྷནྟཱིཏི. ཨེཝཾ ནིརུདྡྷཱནནྟི ཨེཝཾ ཨནུཔྤཱདནིརོདྷེན ནིརུདྡྷཱནཾ. ཀེཝལ-སདྡོ ནིརཝསེསཝཱཙཀོ ཙ ཧོཏི ‘‘ཀེཝལཱ ཨངྒམགདྷཱ’’ཏིཨཱདཱིསུ. ཨསམྨིསྶཝཱཙཀོ ཙ ‘‘ཀེཝལཱ སཱལཡོ’’ཏིཨཱདཱིསུ. ཏསྨཱ ཨུབྷཡཐཱཔི ¶ ཨཏྠཾ ཝདཏི ‘‘སཀལསྶ, སུདྡྷསྶ ཝཱ’’ཏི. ཏཏྠ སཀལསྶཱཏི ཨནཝསེསསྶ སབྦབྷཝཱདིགཏསྶ. སཏྟཝིརཧིཏསྶཱཏི པརཔརིཀཔྤིཏཛཱིཝརཧིཏསྶ.

ཨཔིཙེཏྠ ཀིཉྩཱཔི ‘‘ཨཝིཛྫཱནིརོདྷཱ སངྑཱརནིརོདྷོ, སངྑཱརནིརོདྷཱ ཝིཉྙཱཎནིརོདྷོ’’ཏི ཨེཏྟཱཝཏཱཔི སཀལསྶ དུཀྑཀྑནྡྷསྶ ཨནཝསེསཏོ ནིརོདྷོ ཝུཏྟོ ཧོཏི, ཏཐཱཔི ཡཐཱ ཨནུལོམེ ཡསྶ ཡསྶ པཙྩཡདྷམྨསྶ ཨཏྠིཏཱཡ ཡོ ཡོ པཙྩཡུཔྤནྣདྷམྨོ ན ནིརུཛ྄ཛྷཏི པཝཏྟཏི ཨེཝཱཏི ཨིམསྶ ཨཏྠསྶ དསྶནཏྠཾ ‘‘ཨཝིཛྫཱཔཙྩཡཱ སངྑཱརཱ…པེ… སམུདཡོ ཧོཏཱི’’ཏི ཝུཏྟཾ. ཨེཝཾ ཏཔྤཊིཔཀྑཏོ ཏསྶ ཏསྶ པཙྩཡསྶ ཨབྷཱཝེ སོ སོ པཙྩཡུཔྤནྣདྷམྨོ ནིརུཛ྄ཛྷཏི ན པཝཏྟཏཱིཏི དསྶནཏྠཾ ཨིདྷ ‘‘ཨཝིཛྫཱནིརོདྷཱ སངྑཱརནིརོདྷོ, སངྑཱརནིརོདྷཱ ཝིཉྙཱཎནིརོདྷོ, ཝིཉྙཱཎནིརོདྷཱ ནཱམརཱུཔནིརོདྷོ…པེ… དུཀྑཀྑནྡྷསྶ ནིརོདྷོ ཧོཏཱི’’ཏི ཝུཏྟཾ, ན པན ཨནུལོམེ ཝིཡ ཀཱལཏྟཡཔརིཡཱཔནྣསྶ དུཀྑཀྑནྡྷསྶ ནིརོདྷདསྶནཏྠཾ. ཨནཱགཏསྶེཝ ཧི ཨརིཡམགྒབྷཱཝནཱཡ ཨསཏི ཨུཔྤཛྫནཱརཧསྶ དུཀྑཀྑནྡྷསྶ ཨརིཡམགྒབྷཱཝནཱཡ ནིརོདྷོ ཨིཙྪིཏོཏི ཨཡམྤི ཝིསེསོ ཝེདིཏབྦོ.

ཡདཱ ཧཝེཏི ཨེཏྠ ཧཝེཏི བྱཏྟནྟི ཨིམསྨིཾ ཨཏྠེ ནིཔཱཏོ. ཀེཙི པན ‘‘ཧཝེཏི ཨཱཧཝེ ཡུདྡྷེ’’ཏི ཨཏྠཾ ཝདནྟི, ‘‘ཡོདྷེཐ མཱརཾ པཉྙཱཝུདྷེནཱ’’ཏི (དྷ. པ. ༤༠) ཧི ཝཙནཏོ ཀིལེསམཱརེན ཡུཛ྄ཛྷནསམཡེཏི ཏེསཾ ཨདྷིཔྤཱཡོ. ཨཱརམྨཎཱུཔནིཛ྄ཛྷཱནལཀྑཎེནཱཏི ཨཱརམྨཎཱུཔནིཛ྄ཛྷཱནསབྷཱཝེན. ལཀྑཎཱུཔནིཛ྄ཛྷཱནལཀྑཎེནཱཏི ཨེཏྠཱཔི ཨེསེཝ ནཡོ. ཏཏྠ ཨཱརམྨཎཱུཔནིཛ྄ཛྷཱནཾ ནཱམ ཨཊྛ སམཱཔཏྟིཡོ ཀསིཎཱརམྨཎསྶ ཨུཔནིཛ྄ཛྷཱཡནཏོ. ལཀྑཎཱུཔནིཛ྄ཛྷཱནཾ ནཱམ ཝིཔསྶནཱམགྒཕལཱནི. ཝིཔསྶནཱ ཧི ཏཱིཎི ལཀྑཎཱནི ཨུཔནིཛ྄ཛྷཱཡཏཱིཏི ལཀྑཎཱུཔནིཛ྄ཛྷཱནཾ, མགྒོ ¶ ཝིཔསྶནཱཡ ཨཱགཏཀིཙྩཾ སཱདྷེཏཱིཏི ལཀྑཎཱུཔནིཛ྄ཛྷཱནཾ, ཕལཾ ཏཐལཀྑཎཾ ནིརོདྷསཙྩཾ ཨུཔནིཛ྄ཛྷཱཡཏཱིཏི ལཀྑཎཱུཔནིཛ྄ཛྷཱནཾ. ནོ ཀལློ པཉྷོཏི ཨཡུཏྟོ པཉྷོ, དུཔྤཉྷོ ཨེསོཏི ཨཏྠོ. ཨཱདིསདྡེན –

‘‘ཕུསཏཱིཏི ཨཧཾ ན ཝདཱམི. ཕུསཏཱིཏི ཙཱཧཾ ཝདེཡྻཾ, ཏཏྲསྶ ཀལློ པཉྷོ ‘ཀོ ནུ ཁོ, བྷནྟེ, ཕུསཏཱི’ཏི? ཨེཝཉྩཱཧཾ ན ཝདཱམི, ཨེཝཾ མཾ ཨཝདནྟཾ ཡོ ཨེཝཾ པུཙྪེཡྻ ‘ཀིཾཔཙྩཡཱ ནུ ཁོ, བྷནྟེ, ཕསྶོ’ཏི, ཨེས ཀལློ པཉྷོ. ཏཏྲ ཀལླཾ ཝེཡྻཱཀརཎཾ ‘སལཱ༹ཡཏནཔཙྩཡཱ ཕསྶོ, ཕསྶཔཙྩཡཱ ཝེདནཱ’ཏི. ཀོ ནུ ཁོ, བྷནྟེ, ཝེདཡཏཱིཏི? ནོ ཀལློ པཉྷོཏི བྷགཝཱ ཨཝོཙ, ཝེདཡཏཱིཏི ཨཧཾ ན ཝདཱམི, ཝེདཡཏཱིཏི ཙཱཧཾ ཝདེཡྻཾ, ཏཏྲསྶ ཀལློ པཉྷོ ‘ཀོ ནུ ཁོ, བྷནྟེ, ཝེདཡཏཱི’ཏི? ཨེཝཉྩཱཧཾ ¶ ན ཝདཱམི. ཨེཝཾ མཾ ཨཝདནྟཾ ཡོ ཨེཝཾ པུཙྪེཡྻ ‘ཀིཾཔཙྩཡཱ ནུ ཁོ, བྷནྟེ, ཝེདནཱ’ཏི, ཨེས ཀལློ པཉྷོ. ཏཏྲ ཀལླཾ ཝེཡྻཱཀརཎཾ ‘ཕསྶཔཙྩཡཱ ཝེདནཱ, ཝེདནཱཔཙྩཡཱ ཏཎྷཱ’’’ཏི (སཾ. ནི. ༢.༡༢) –

ཨེཝམཱདིཾ པཱལི༹སེསཾ སངྒཎྷཱཏི.

ཨཱདིནཱ ཙ ནཡེནཱཏི ཨེཏྠ ཨཱདི-སདྡེན པན ‘‘ཀཏམཱ ནུ ཁོ, བྷནྟེ, ཛཱཏི, ཀསྶ ཙ པནཱཡཾ ཛཱཏཱིཏི. ‘ནོ ཀལློ པཉྷོ’ཏི བྷགཝཱ ཨཝོཙཱ’’ཏི ཨེཝམཱདིཾ སངྒཎྷཱཏི. ནནུ ཙེཏྠ ‘‘ཀཏམཾ ནུ ཁོ, བྷནྟེ, ཛརཱམརཎ’’ནྟི (སཾ. ནི. ༢.༣༥) ཨིདཾ སུཔུཙྪིཏནྟི? ཀིཉྩཱཔི སུཔུཙྪིཏཾ, ཡཐཱ པན སཏསཧསྶགྒྷནཀེ སུཝཎྞཐཱལཀེ ཝཌྜྷིཏསྶ སུབྷོཛནསྶ མཏྠཀེ ཨཱམལཀམཏྟེ གཱུཐཔིཎྜེ ཋཔིཏེ སབྦཾ བྷོཛནཾ དུབྦྷོཛནཾ ཧོཏི ཚཌྜེཏབྦཾ, ཨེཝམེཝ ‘‘ཀསྶ ཙ པནིདཾ ཛརཱམརཎ’’ནྟི ཨིམིནཱ སཏྟཱུཔལདྡྷིཝཱདཔདེན གཱུཐཔིཎྜེན ཏཾ བྷོཛནཾ དུབྦྷོཛནཾ ཝིཡ ཨཡམྤི སབྦོ དུཔྤཉྷོ ཛཱཏོཏི.

སོལ༹ས ཀངྑཱཏི ‘‘ཨཧོསིཾ ནུ ཁོ ཨཧཾ ཨཏཱིཏམདྡྷཱནཾ, ན ནུ ཁོ ཨཧོསིཾ, ཀིཾ ནུ ཁོ ཨཧོསིཾ, ཀཐཾ ནུ ཁོ ཨཧོསིཾ, ཀིཾ ཧུཏྭཱ ཀིཾ ཨཧོསིཾ ནུ ཁོ ཨཧཾ ཨཏཱིཏམདྡྷཱནཾ, བྷཝིསྶཱམི ནུ ཁོ ཨཧཾ ཨནཱགཏམདྡྷཱནཾ, ན ནུ ཁོ བྷཝིསྶཱམི, ཀིཾ ནུ ཁོ བྷཝིསྶཱམི, ཀཐཾ ནུ ཁོ བྷཝིསྶཱམི, ཀིཾ ཧུཏྭཱ ཀིཾ བྷཝིསྶཱམི ནུ ཁོ ཨཧཾ ཨནཱགཏམདྡྷཱནཾ, ཨཧཾ ¶ ནུ ཁོསྨི, ནོ ནུ ཁོསྨི, ཀིཾ ནུ ཁོསྨི, ཀཐཾ ནུ ཁོསྨི, ཨཡཾ ནུ ཁོ སཏྟོ ཀུཏོ ཨཱགཏོ, སོ ཀུཧིཾ གཱམཱི བྷཝིསྶཏཱི’’ཏི (སཾ. ནི. ༢.༢༠; མ. ནི. ༡.༡༨) ཨེཝམཱགཏཱ ཨཏཱིཏཱནཱགཏཔཙྩུཔྤནྣཝིསཡཱ སོལ༹སཝིདྷཱ ཀངྑཱ.

ཏཏྠ (མ. ནི. ཨཊྛ. ༡.༡༨; སཾ. ནི. ཨཊྛ. ༢.༢.༢༠) ཨཧོསིཾ ནུ ཁོ, ན ནུ ཁོཏི སསྶཏཱཀཱརཉྩ ཨདྷིཙྩསམུཔྤཏྟིཨཱཀཱརཉྩ ནིསྶཱཡ ཨཏཱིཏེ ཨཏྟནོ ཝིཛྫམཱནཏཉྩ ཨཝིཛྫམཱནཏཉྩ ཀངྑཏི, ཀིཾ ཀཱརཎནྟི ན ཝཏྟབྦཾ. ཨུམྨཏྟཀོ ཝིཡ ཧི བཱལཔུཐུཛྫནོ ཡཐཱ ཏཐཱ ཝཱ པཝཏྟཏི. ཨཔིཙ ཨཡོནིསོམནསིཀཱརོཡེཝེཏྠ ཀཱརཎཾ. ཨེཝཾ ཨཡོནིསོམནསིཀཱརསྶ པན ཀིཾ ཀཱརཎནྟི? སྭེཝ པུཐུཛྫནབྷཱཝོ ཨརིཡཱནཾ ཨདསྶནཱདཱིནི ཝཱ. ནནུ ཙ པུཐུཛྫནོཔི ཡོནིསོ མནསི ཀརོཏཱིཏི. ཀོ ཝཱ ཨེཝམཱཧ ‘‘ན མནསི ཀརོཏཱི’’ཏི. ན པན ཏཏྠ པུཐུཛྫནབྷཱཝོ ཀཱརཎཾ, སདྡྷམྨསཝནཀལྱཱཎམིཏྟཱདཱིནི ཏཏྠ ཀཱརཎཱནི ¶ . ན ཧི མཙྪམཾསཱདཱིནི ཨཏྟནོ པཀཏིཡཱ སུགནྡྷཱནི, ཨབྷིསངྑཱརཔཙྩཡཱ པན སུགནྡྷཱནིཔི ཧོནྟི.

ཀིཾ ནུ ཁོ ཨཧོསིནྟི ཛཱཏིལིངྒུཔཔཏྟིཡོ ནིསྶཱཡ ‘‘ཁཏྟིཡོ ནུ ཁོ ཨཧོསིཾ, བྲཱཧྨཎཝེསྶསུདྡགཧཊྛཔབྦཛིཏདེཝམནུསྶཱནཾ ཨཉྙཏརོ’’ཏི ཀངྑཏི.

ཀཐཾ ནུ ཁོཏི སཎྛཱནཱཀཱརཾ ནིསྶཱཡ ‘‘དཱིགྷོ ནུ ཁོ ཨཧོསིཾ, རསྶཨོདཱཏཀཎྷཔྤམཱཎིཀཨཔྤམཱཎིཀཱདཱིནཾ ཨཉྙཏརོ’’ཏི ཀངྑཏི. ཀེཙི པན ‘‘ཨིསྶརནིམྨཱནཱདིཾ ནིསྶཱཡ ‘ཀེན ནུ ཁོ ཀཱརཎེན ཨཧོསི’ནྟི ཧེཏུཏོ ཀངྑཏཱི’’ཏི ཝདནྟི.

ཀིཾ ཧུཏྭཱ ཀིཾ ཨཧོསིནྟི ཛཱཏིཨཱདཱིནི ནིསྶཱཡ ‘‘ཁཏྟིཡོ ཧུཏྭཱ ནུ ཁོ བྲཱཧྨཎོ ཨཧོསིཾ…པེ… དེཝོ ཧུཏྭཱ མནུསྶོ’’ཏི ཨཏྟནོ པརམྤརཾ ཀངྑཏི. སབྦཏྠེཝ པན ཨདྡྷཱནནྟི ཀཱལཱདྷིཝཙནམེཏཾ, ཏཉྩ བྷུམྨཏྠེ ཨུཔཡོགཝཙནཾ དཊྛབྦཾ.

བྷཝིསྶཱམི ནུ ཁོ, ན ནུ ཁོཏི སསྶཏཱཀཱརཉྩ ཨུཙྪེདཱཀཱརཉྩ ནིསྶཱཡ ཨནཱགཏེ ཨཏྟནོ ཝིཛྫམཱནཏཉྩ ཨཝིཛྫམཱནཏཉྩ ཀངྑཏི. སེསམེཏྠ ཝུཏྟནཡམེཝ.

ཨཧཾ ¶ ནུ ཁོསྨཱིཏི ཨཏྟནོ ཨཏྠིབྷཱཝཾ ཀངྑཏི. ཡུཏྟཾ པནེཏནྟི? ཡུཏྟཾ ཨཡུཏྟནྟི ཀཱ ཨེཏྠ ཙིནྟཱ. ཨཔིཙེཏྠ ཨིདཾ ཝཏྠུམྤི ཨུདཱཧརནྟི, ཙཱུལ༹མཱཏཱཡ ཀིར པུཏྟོ མུཎྜོ, མཧཱམཱཏཱཡ པུཏྟོ ཨམུཎྜོ. ཏཾ སུཏྟཾ མུཎྜེསུཾ. སོ ཨུཊྛཱཡ ‘‘ཨཧཾ ནུ ཁོ ཙཱུལ༹མཱཏཱཡ པུཏྟོ’’ཏི ཙིནྟེསི. ཨེཝཾ ‘‘ཨཧཾ ནུ ཁོསྨཱི’’ཏི ཀངྑཱ ཧོཏི.

ནོ ནུ ཁོསྨཱིཏི ཨཏྟནོ ནཏྠིབྷཱཝཾ ཀངྑཏི. ཏཏྲཱཔི ཨིདཾ ཝཏྠུ – ཨེཀོ ཀིར མཙྪེ གཎྷནྟོ ཨུདཀེ ཙིརཊྛཱནེན སཱིཏིབྷཱུཏཾ ཨཏྟནོ ཨཱུརུཾ ‘‘མཙྪོ’’ཏི ཙིནྟེཏྭཱ པཧརི. ཨཔརོ སུསཱནཔསྶེ ཁེཏྟཾ རཀྑནྟོ བྷཱིཏོ སངྐུཊིཏོ སཡི. སོ པཊིབུཛ྄ཛྷིཏྭཱ ཨཏྟནོ ཛཎྞུཀཱནི ‘‘དྭེ ཡཀྑཱ’’ཏི ཙིནྟེཏྭཱ པཧརི, ཨེཝཾ ‘‘ནོ ནུ ཁོསྨཱི’’ཏི ཀངྑཏི.

ཀིཾ ནུ ཁོསྨཱིཏི ཁཏྟིཡོཝ སམཱནོ ཨཏྟནོ ཁཏྟིཡབྷཱཝཾ ཀངྑཏི ཀཎྞོ ཝིཡ སཱུཏཔུཏྟསཉྙཱི. ཨེས ནཡོ སེསེསུ. དེཝོ པན སམཱནོ དེཝབྷཱཝཾ ཨཛཱནནྟོ ནཱམ ནཏྠི. སོཔི པན ‘‘ཨཧཾ རཱུཔཱི ནུ ཁོ ཨརཱུཔཱི ནུ ཁོ’’ཏིཨཱདིནཱ ནཡེན ཀངྑཏི. ཁཏྟིཡཱདཡོ ཀསྨཱ ¶ ན ཛཱནནྟཱིཏི ཙེ? ཨཔྤཙྩཀྑཱ ཏེསཾ ཏཏྠ ཏཏྠ ཀུལེ ཨུཔྤཏྟི. གཧཊྛཱཔི ཙ པཱཏལིཀཱདཡོ པབྦཛིཏསཉྙིནོ. པབྦཛིཏཱཔི ‘‘ཀུཔྤཾ ནུ ཁོ མེ ཀམྨ’’ནྟིཨཱདིནཱ ནཡེན གཧཊྛསཉྙིནོ. མནུསྶཱཔི ཙ ཨེཀཙྩེ རཱཛཱནོ ཝིཡ ཨཏྟནི དེཝསཉྙིནོ ཧོནྟི.

ཀཐཾ ནུ ཁོསྨཱིཏི ཝུཏྟནཡམེཝ. ཀེཝལཉྷེཏྠ ཨབྦྷནྟརེ ཛཱིཝོ ནཱམ ཨཏྠཱིཏི གཧེཏྭཱ ཏསྶ སཎྛཱནཱཀཱརཾ ནིསྶཱཡ ‘‘དཱིགྷོ ནུ ཁོསྨི, རསྶཙཏུརསྶཚལ༹ཾསཨཊྛཾསསོལ༹སཾསཱདཱིནཾ ཨཉྙཏརཔྤཀཱརོ’’ཏི ཀངྑནྟོ ‘‘ཀཐཾ ནུ ཁོསྨཱི’’ཏི ཀངྑཏཱིཏི ཝེདིཏབྦོ. སརཱིརསཎྛཱནཾ པན པཙྩུཔྤནྣཾ ཨཛཱནནྟོ ནཱམ ནཏྠི.

ཀུཏོ ཨཱགཏོ, སོ ཀུཧིཾ གཱམཱི བྷཝིསྶཏཱིཏི ཨཏྟབྷཱཝསྶ ཨཱགཏིགཏིཊྛཱནཾ ཀངྑཏི.

ཝཔཡནྟཱིཏི ཝིཨཔཡནྟི, ཨིཀཱརལོཔེནཱཡཾ ནིདྡེསོ. བྱཔཡནྟཱིཏི ཝུཏྟཾ ཧོཏི. ཏེནཱཧ ‘‘ཝཔཡནྟི ཨཔགཙྪནྟཱི’’ཏི. ཨཔགམནཉྩ ཨནུཔྤཏྟིནིརོདྷཝསེནཱཏི ཨཱཧ ‘‘ནིརུཛ྄ཛྷནྟཱི’’ཏི.

༣. ཀདཱ ¶ པནསྶ བོདྷིཔཀྑིཡདྷམྨཱ ཙཏུསཙྩདྷམྨཱ ཝཱ པཱཏུབྷཝནྟི ཨུཔྤཛྫནྟི པཀཱསནྟཱིཏི? ཝིཔསྶནཱམགྒཉཱཎེསུ པཝཏྟམཱནེསུ. ཏཏྠ ཝིཔསྶནཱཉཱཎེ ཏཱཝ ཝིཔསྶནཱཉཱཎསམྤཡུཏྟཱ སཏིཨཱདཡོ ཝིཔསྶནཱཉཱཎཉྩ ཡཐཱརཧཾ ཨཏྟནོ ཨཏྟནོ ཝིསཡེསུ ཏདངྒཔྤཧཱནཝསེན སུབྷསཉྙཱདིཀེ པཛཧནྟཱ ཀཱཡཱནུཔསྶནཱདིཝསེན ཝིསུཾ ཝིསུཾ ཨུཔྤཛྫནྟི. མགྒཀྑཎེ པན ཏེ ནིབྦཱནམཱལམྦིཏྭཱ སམུཙྪེདཝསེན པཊིཔཀྑེ པཛཧནྟཱ ཙཏཱུསུཔི ཨརིཡསཙྩེསུ ཨསམྨོཧཔཊིཝེདྷསཱདྷནཝསེན སཀིདེཝ ཨུཔྤཛྫནྟི. ཨེཝཾ ཏཱཝེཏྠ བོདྷིཔཀྑིཡདྷམྨཱནཾ ཨུཔྤཛྫནཊྛེན པཱཏུབྷཱཝོ ཝེདིཏབྦོ. ཨརིཡསཙྩདྷམྨཱནཾ པན ལོཀིཡཱནཾ ཝིཔསྶནཱཀྑཎེ ཝིཔསྶནཱཡ ཨཱརམྨཎཀརཎཝསེན ལོཀུཏྟརཱནཾ ཏདདྷིམུཏྟཏཱཝསེན མགྒཀྑཎེ ནིརོདྷསཙྩསྶ ཨཱརམྨཎཱབྷིསམཡཝསེན སབྦེསམྤི ཀིཙྩཱབྷིསམཡཝསེན པཱཀཊབྷཱཝཏོ པཀཱསནཊྛེན པཱཏུབྷཱཝོ ཝེདིཏབྦོ.

ཨིཏི བྷགཝཱ སཏིཔི སབྦཱཀཱརེན སབྦདྷམྨཱནཾ ཨཏྟནོ ཉཱཎསྶ པཱཀཊབྷཱཝེ པཊིཙྩསམུཔྤཱདམུཁེན ཝིཔསྶནཱབྷིནིཝེསསྶ ཀཏཏྟཱ ནིཔུཎགམྦྷཱིརསུདུདྡསཏཱཡ པཙྩཡཱཀཱརསྶ ཏཾ པཙྩཝེཀྑིཏྭཱ ཨུཔྤནྣབལཝསོམནསྶོ པཊིཔཀྑསམུཙྪེདཝིབྷཱཝནེན སདྡྷིཾ ཨཏྟནོ ཏདབྷིསམཡཱནུབྷཱཝདཱིཔཀམེཝེཏྠ ཨུདཱནཾ ཨུདཱནེསི.

‘‘ཀཱམཱ ¶ ཏེ པཋམཱ སེནཱ’’ཏིཨཱདིནཱ ནཡེན ཝུཏྟཔྤཀཱརཾ མཱརསེནནྟི –

‘‘ཀཱམཱ ཏེ པཋམཱ སེནཱ, དུཏིཡཱ ཨརཏི ཝུཙྩཏི;

ཏཏིཡཱ ཁུཔྤིཔཱསཱ ཏེ, ཙཏུཏྠཱི ཏཎྷཱ པཝུཙྩཏི.

‘‘པཉྩམཱི ཐིནམིདྡྷཾ ཏེ, ཚཊྛཱ བྷཱིརཱུ པཝུཙྩཏི;

སཏྟམཱི ཝིཙིཀིཙྪཱ ཏེ, མཀྑོ ཐམྦྷོ ཙ ཨཊྛམཱ.

‘‘ལཱབྷོ སིལོཀོ སཀྐཱརོ, མིཙྪཱལདྡྷོ ཙ ཡོ ཡསོ;

ཡོ ཙཏྟཱནཾ སམུཀྐཾསེ, པརེ ཙ ཨཝཛཱནཏི.

‘‘ཨེསཱ ¶ ནམུཙི ཏེ སེནཱ, ཀཎྷསྶཱབྷིཔྤཧཱརིནཱི;

ན ནཾ ཨསཱུརོ ཛིནཱཏི, ཛེཏྭཱ ཙ ལབྷཏེ སུཁ’’ནྟི. (སུ. ནི. ༤༣༨-༤༤༡; མཧཱནི. ༢༨) –

ཨིམིནཱ ནཡེན ཝུཏྟཔྤཀཱརཾ མཱརསེནཾ.

ཏཏྠ (སུ. ནི. ཨཊྛ. ༢.༤༣༩-༤༡; མཧཱནི. ཨཊྛ. ༢༨) ཡསྨཱ ཨཱདིཏོཝ ཨགཱརིཡབྷཱུཏེ སཏྟེ ཝཏྠུཀཱམེསུ ཀིལེསཀཱམཱ མོཧཡནྟི, ཏེ ཨབྷིབྷུཡྻ ཨནགཱརིཡབྷཱཝཾ ཨུཔགཏཱནཾ པནྟེསུ ཝཱ སེནཱསནེསུ ཨཉྙཏརཉྙཏརེསུ ཝཱ ཨདྷིཀུསལེསུ དྷམྨེསུ ཨརཏི ཨུཔྤཛྫཏི. ཝུཏྟམྤི ཙེཏཾ ‘‘པབྦཛིཏེན ཁོ, ཨཱཝུསོ, ཨབྷིརཏི དུཀྐརཱ’’ཏི (སཾ. ནི. ༤.༣༣༡). ཏཏོ ཏེ པརཔཊིབདྡྷཛཱིཝིཀཏྟཱ ཁུཔྤིཔཱསཱ བཱདྷཏི, ཏཱཡ བཱདྷིཏཱནཾ པརིཡེསན ཏཎྷཱ ཙིཏྟཾ ཀིལམཡཏི, ཨཐ ནེསཾ ཀིལནྟཙིཏྟཱནཾ ཐིནམིདྡྷཾ ཨོཀྐམཏི, ཏཏོ ཝིསེསམནདྷིགཙྪནྟཱནཾ དུརབྷིསམྦྷཝེསུ ཨརཉྙཝནཔཏྠེསུ སེནཱསནེསུ ཝིཧརཏཾ ཨུཏྲཱསསཉྙིཏཱ བྷཱིརུ ཛཱཡཏི, ཏེསཾ ཨུསྶངྐིཏཔརིསངྐིཏཱནཾ དཱིགྷརཏྟཾ ཝིཝེཀརསམནསྶཱདཡམཱནཱནཾ ཝིཧརཏཾ ‘‘ན སིཡཱ ནུ ཁོ ཨེས མགྒོ’’ཏི པཊིཔཏྟིཡཾ ཝིཙིཀིཙྪཱ ཨུཔྤཛྫཏི, ཏཾ ཝིནོདེཏྭཱ ཝིཧརཏཾ ཨཔྤམཏྟཀེན ཝིསེསཱདྷིགམེན མཱནམཀྑཐམྦྷཱ ཛཱཡནྟི, ཏེཔི ཝིནོདེཏྭཱ ཝིཧརཏཾ ཏཏོ ཨདྷིཀཏརཾ ཝིསེསཱདྷིགམཾ ནིསྶཱཡ ལཱབྷསཀྐཱརསིལོཀཱ ཨུཔྤཛྫནྟི, ལཱབྷཱདིམུཙྪིཏཱ དྷམྨཔཏིརཱུཔཀཱནི པཀཱསེནྟཱ མིཙྪཱཡསཾ ཨདྷིགནྟྭཱ ཏཏྠ ཋིཏཱ ཛཱཏིཨཱདཱིཧི ཨཏྟཱནཾ ཨུཀྐཾསེནྟི པརཾ ཝམྦྷེནྟི, ཏསྨཱ ཀཱམཱདཱིནཾ པཋམསེནཱདིབྷཱཝོ ཝེདིཏབྦོ.

ཨེཝམེཏཾ ¶ དསཝིདྷཾ སེནཾ ཨུདྡིསིཏྭཱ ཡསྨཱ སཱ ཀཎྷདྷམྨསམནྣཱགཏཏྟཱ ཀཎྷསྶ ནམུཙིནོ ཨུཔཀཱརཱཡ སཾཝཏྟཏི, ཏསྨཱ ནཾ ‘‘ཏཝ སེནཱ’’ཏི ནིདྡིསནྟེན ‘‘ཨེསཱ ནམུཙི ཏེ སེནཱ, ཀཎྷསྶཱབྷིཔྤཧཱརིནཱི’’ཏི ཝུཏྟཾ. ཏཏྠ ཨབྷིཔྤཧཱརིནཱིཏི སམཎབྲཱཧྨཎཱནཾ གྷཱཏནཱི ནིཔྤོཐནཱི, ཨནྟརཱཡཀརཱིཏི ཨཏྠོ. ན ནཾ ཨསཱུརོ ཛིནཱཏི, ཛེཏྭཱ ཙ ལབྷཏེ སུཁནྟི ཨེཝཾ ཏཝ སེནཾ ཨསཱུརོ ཀཱཡེ ཙ ཛཱིཝིཏེ ཙ སཱཔེཀྑོ པུརིསོ ན ཛིནཱཏི, སཱུརོ པན ཛིནཱཏི, ཛེཏྭཱ ཙ མགྒསུཁཾ ཕལསུཁཉྩ ཨདྷིགཙྪཏཱིཏི ཨཏྠོ. སོཔི བྲཱཧྨཎོཏི སོཔི ཁཱིཎཱསཝབྲཱཧྨཎོ.

ཨིདཱནི ¶ ‘‘ཏེན ཁོ པན སམཡེན བྷགཝཱ སཏྟཱཧཾ ཨེཀཔལླངྐེན ནིསིནྣོ ཧོཏི ཝིམུཏྟིསུཁཔཊིསཾཝེདཱི. ཨཐ ཁོ བྷགཝཱ ཏསྶ སཏྟཱཧསྶ ཨཙྩཡེན ཏམྷཱ སམཱདྷིམྷཱ ཝུཊྛཧིཏྭཱ རཏྟིཡཱ པཋམཾ ཡཱམཾ པཊིཙྩསམུཔྤཱདཾ ཨནུལོམཾ སཱདྷུཀཾ མནསཱཀཱསི. རཏྟིཡཱ མཛ྄ཛྷིམཾ ཡཱམཾ པཊིཙྩསམུཔྤཱདཾ པཊིལོམཾ སཱདྷུཀཾ མནསཱཀཱསི. རཏྟིཡཱ པཙྪིམཾ ཡཱམཾ པཊིཙྩསམུཔྤཱདཾ ཨནུལོམཔཊིལོམཾ སཱདྷུཀཾ མནསཱཀཱསཱི’’ཏི ཨེཝཾ ཝུཏྟཱཡ ཨུདཱནཔཱལི༹ཡཱ (ཨུདཱ. ༡) ཨིམིསྶཱ ཙ ཁནྡྷཀཔཱལི༹ཡཱ ཨཝིརོདྷཾ དསྶེཏུཾ ‘‘ཨུདཱནེ པནཱ’’ཏིཨཱདི ཨཱརདྡྷཾ. ཨེཏྠ ཏསྶ ཝསེནཱཏི ཏསྶ པཙྩཡཱཀཱརཔཛཱནནསྶ པཙྩཡཀྑཡཱདྷིགམསྶ ཙ ཝསེན. ཨེཀེཀམེཝ ཀོཊྛཱསནྟི ཨནུལོམཔཊིལོམེསུ ཨེཀེཀམེཝ ཀོཊྛཱསཾ. པཱཊིཔདརཏྟིཡཱ ཨེཝཾ མནསཱཀཱསཱིཏི རཏྟིཡཱ ཏཱིསུཔི ཡཱམེསུ ཨནུལོམཔཊིལོམཾཡེཝ མནསཱཀཱསི. བྷགཝཱ ཀིར ཋཔེཏྭཱ རཏནགྷརསཏྟཱཧཾ སེསེསུ ཚསུ སཏྟཱཧེསུ ཨནྟརནྟརཱ དྷམྨཾ པཙྩཝེཀྑིཏྭཱ ཡེབྷུཡྻེན ཝིམུཏྟིསུཁཔཊིསཾཝེདཱི ཝིཧཱསི, རཏནགྷརསཏྟཱཧེ པན ཨབྷིདྷམྨཔཝིཙཡཝསེནེཝ ཝིཧཱསི. ཏསྨཱ ཨནྟརནྟརཱ དྷམྨཔཙྩཝེཀྑཎཝསེན ཨུཔྤཱདིཏམནསིཀཱརེསུ པཱཊིཔདརཏྟིཡཱ ཨུཔྤཱདིཏཾ མནསིཀཱརཾ སནྡྷཱཡ ཨིམིསྶཾ ཁནྡྷཀཔཱལི༹ཡཾ ཨེཝཾ ཝུཏྟནྟི ཨདྷིཔྤཱཡོ.

བོདྷིཀཐཱཝཎྞནཱ ནིཊྛིཏཱ.

ཨཛཔཱལཀཐཱཝཎྞནཱ

༤. ཏསྶ སཏྟཱཧསྶ ཨཙྩཡེནཱཏི པལླངྐསཏྟཱཧསྶ ཨཔགམནེན. ཏམྷཱ སམཱདྷིམྷཱ ཝུཊྛཧིཏྭཱཏི ཏཏོ ཨརཧཏྟཕལསམཱཔཏྟིསམཱདྷིཏོ ཡཐཱཀཱལཔརིཙྪེདཾ ཝུཊྛཧིཏྭཱ. ཨཉྙེཔི བུདྡྷཏྟཀརཱཏི ཝིསཱཁཔུཎྞམིཏོ པཊྛཱཡ རཏྟིནྡིཝཾ ཨེཝཾ ནིཙྩསམཱཧིཏབྷཱཝཧེཏུབྷཱུཏཱནཾ བུདྡྷགུཎཱནཾ ཨུཔརི ཨཉྙེཔི བུདྡྷཏྟསཱདྷཀཱ. ‘‘ཨཡཾ བུདྡྷོ’’ཏི བུདྡྷབྷཱཝསྶ པརེསཾ ཝིབྷཱཝནཱ དྷམྨཱ ཀིཾ ནུ ཁོ སནྟཱིཏི ཡོཛནཱ. ཨེཀཙྩཱནཾ དེཝཏཱནནྟི ཡཱ ཨདྷིགཏམགྒཱ སཙྪིཀཏནིརོདྷཱ ཨེཀཔདེསེན ¶ བུདྡྷགུཎེ ཛཱནནྟི, ཏཱ ཋཔེཏྭཱ ཏདཉྙཱསཾ དེཝཏཱནཾ. ཨནིམིསེཧཱིཏི དྷམྨཔཱིཏིཝིཔྥཱརཝསེན ¶ པསཱདཝིབྷཱཝནིཙྩལདལཏཱཡ ནིམེསརཧིཏེཧི. རཏནཙངྐམེཏི དེཝཏཱཧི མཱཔིཏེ རཏནམཡཙངྐམེ. ‘‘རཏནབྷཱུཏཱནཾ སཏྟནྣཾ པཀརཎཱནཾ ཏཏྠ ཙ ཨནུཏྟརསྶ དྷམྨརཏནསྶ སམྨསནེན ཏཾ ཋཱནཾ རཏནགྷརཙེཏིཡཾ ནཱམ ཛཱཏ’’ནྟིཔི ཝདནྟི. ཏེནེཝ ཨཊྛསཱལིནིཡཾ (དྷ. ས. ཨཊྛ. ནིདཱནཀཐཱ) ‘‘རཏནགྷརཾ ནཱམ ན རཏནམཡཾ གེཧཾ, སཏྟནྣཾ པན པཀརཎཱནཾ སམྨསིཏཊྛཱནཾ རཏནགྷརནྟི ཝེདིཏབྦ’’ནྟི ཝུཏྟཾ.

ཀསྨཱ པནཱཡཾ ཨཛཔཱལནིགྲོདྷོ ནཱམ ཛཱཏོཏི ཨཱཧ ‘‘ཏསྶ ཀིརཱ’’ཏིཨཱདི. ཀེཙི པན ‘‘ཡསྨཱ ཏཏྠ ཝེདེ སཛ྄ཛྷཱཡིཏུཾ ཨསམཏྠཱ མཧལླཀབྲཱཧྨཎཱ པཱཀཱརཔརིཀྑེཔཡུཏྟཱནི ནིཝེསནཱནི ཀཏྭཱ སབྦེ ཝསིཾསུ, ཏསྨཱསྶ ‘ཨཛཔཱལནིགྲོདྷོ’ཏི ནཱམཾ ཛཱཏ’’ནྟི ཝདནྟི. ཏཏྲཱཡཾ ཝཙནཏྠོ – ན ཛཔནྟཱིཏི ཨཛཔཱ, མནྟཱནཾ ཨནཛ྄ཛྷཱཡཀཱཏི ཨཏྠོ. ཨཛཔཱ ལནྟི ཨཱདིཡནྟི ནིཝཱསཾ ཨེཏྠཱཏི ཨཛཔཱལོཏི. ཨཔརེ པན ཝདནྟི ‘‘ཡསྨཱ མཛ྄ཛྷནྷིཀེ སམཡེ ཨནྟོ པཝིཊྛེ ཨཛེ ཨཏྟནོ ཚཱཡཱཡ པཱལེཏི རཀྑཏི, ཏསྨཱ ‘ཨཛཔཱལོ’ཏིསྶ ནཱམཾ རུལ༹ྷ’’ནྟི. སབྦཐཱཔི ནཱམམེཏཾ ཏསྶ རུཀྑསྶ.

ཝིམུཏྟིསུཁཾ པཊིསཾཝེདེནྟོཏི དྷམྨཾ ཝིཙིནནྟོཡེཝ ཨནྟརནྟརཱ ཝིམུཏྟིསུཁཉྩ པཊིསཾཝེདེནྟོ. ‘‘དྷམྨཾ ཝིཙིནནྟོ ཝིམུཏྟིསུཁཉྩ པཊིསཾཝེདེནྟོ’’ཏི ཨེཝཾ ཝཱ ཨེཏྠ པཱཋོ གཧེཏབྦོ. ཨུདཱནཊྛཀཐཱཡམྤི (ཨུདཱ. ཨཊྛ. ༤) ཧི ཨཡམེཝ པཱཋོ. དྷམྨཾ ཝིཙིནནྟོ ཙེཏྠ ཨེཝཾ ཨབྷིདྷམྨེ ནཡམགྒཾ སམྨསི པཋམཾ དྷམྨསངྒཎཱིཔཀརཎཾ ནཱམ, ཏཏོ ཝིབྷངྒཔྤཀརཎཾ, དྷཱཏུཀཐཱཔཀརཎཾ, པུགྒལཔཉྙཏྟིཔྤཀརཎཾ, ཀཐཱཝཏྠུཾ ནཱམ, ཡམཀཾ ནཱམ, ཏཏོ མཧཱཔཀརཎཾ པཊྛཱནཾ ནཱམཱཏི. ཏཏྠསྶ སཎྷསུཁུམཊྛཱནམྷི ཙིཏྟེ ཨོཏིཎྞེ པཱིཏི ཨུཔྤཛྫི, པཱིཏིཡཱ ཨུཔྤནྣཱཡ ལོཧིཏཾ པསཱིདི, ལོཧིཏེ པསནྣེ ཚཝི པསཱིདི, ཚཝིཡཱ པསནྣཱཡ པུརཏྠིམཀཱཡཏོ ཀཱུཊཱགཱརཱདིཔྤམཱཎཱ རསྨིཡོ ཨུཊྛཧིཏྭཱ ཨཱཀཱསེ པཀྑནྡཾ ཚདྡནྟནཱགཀུལཾ ཝིཡ པཱཙཱིནདིསཱཡ ཨནནྟཱནི ཙཀྐཝཱལཱ༹ནི པཀྑནྡཱ. པཙྪིམཀཱཡཏོ ཨུཊྛཧིཏྭཱ པཙྪིམདིསཱཡ, དཀྑིཎཾསཀཱུཊཏོ ཨུཊྛཧིཏྭཱ དཀྑིཎདིསཱཡ, ཝཱམཾསཀཱུཊཏོ ཨུཊྛཧིཏྭཱ ཨུཏྟརདིསཱཡ ཨནནྟཱནི ཙཀྐཝཱལཱ༹ནི པཀྑནྡཱ. པཱདཏལེཧི ¶ པཝཱལ༹ངྐུརཝཎྞཱ རསྨིཡོ ནིཀྑམིཏྭཱ མཧཱཔཐཝིཾ ཝིནིབྦིཛ྄ཛྷ ཨུདཀཾ དྭིདྷཱ བྷིནྡིཏྭཱ ཝཱཏཀྑནྡྷཾ པདཱལེཏྭཱ ཨཛཊཱཀཱསཾ པཀྑནྡཱ. སཱིསཏོ སཾཔརིཝཏྟིཡམཱནཾ མཎིདཱམཾ ཝིཡ ནཱིལཝཎྞརསྨིཝཊྚི ཨུཊྛཧིཏྭཱ ཚ དེཝལོཀེ ཝིནིཝིཛ྄ཛྷིཏྭཱ ནཝ བྲཧྨལོཀེ ཨཏིཀྐམྨ ཨཛཊཱཀཱསཾ པཀྑནྡཱ. ཏསྨིཾ དིཝསེ ཨཔརིམཱཎེསུ ཙཀྐཝཱལེ༹སུ ཨཔརིམཱཎཱ སཏྟཱ སབྦེ སུཝཎྞཝཎྞཱཝ ཨཧེསུཾ. ཏཾ དིཝསཉྩ པན བྷགཝཏོ སརཱིརཱ ནིཀྑནྟཱ ¶ ཡཱཝཛྫདིཝསཱཔི ཀིར ཏཱ རསྨིཡོ ཨནནྟལོཀདྷཱཏུཡོ གཙྪནྟིཡེཝ. ན ཀེཝལཉྩ ཨིམསྨིཾཡེཝ སཏྟཱཧེ དྷམྨཾ ཝིཙིནནྟསྶ སརཱིརཏོ རསྨིཡོ ནིཀྑམིཾསུ, ཨཐ ཁོ རཏནགྷརསཏྟཱཧེཔི པཊྛཱནཾ སམྨསནྟསྶ ཨེཝམེཝ སརཱིརཏོ རསྨིཡོ ནིཀྑནྟཱ ཨེཝཱཏི ཝེདིཏབྦཾ.

ཝུཏྟཉྷེཏཾ ཨཊྛསཱལིནིཡཾ (དྷ. ས. ཨཊྛ. ནིདཱནཀཐཱ) –

‘‘ཨིམེསུ ཙ ཨེཀཝཱིསཏིཡཱ དིཝསེསུ ཨེཀདིཝསེཔི སཏྠུ སརཱིརཏོ རསྨིཡོ ན ནིཀྑནྟཱ, ཙཏུཏྠེ པན སཏྟཱཧེ པཙྪིམུཏྟརཱཡ དིསཱཡ རཏནགྷརེ ནིསཱིདི. ཏཏྠ དྷམྨསངྒཎིཾ སམྨསནྟསྶཔི སརཱིརཏོ རསྨིཡོ ན ནིཀྑནྟཱ. ཝིབྷངྒཔྤཀརཎཾ, དྷཱཏུཀཐཾ, པུགྒལཔཉྙཏྟིཾ, ཀཐཱཝཏྠུཔྤཀརཎཾ, ཡམཀཔྤཀརཎཾ སམྨསནྟསྶཔི རསྨིཡོ ན ནིཀྑནྟཱ. ཡདཱ པན མཧཱཔཀརཎཾ ཨོརུཡ྄ཧ ‘ཧེཏུཔཙྩཡོ ཨཱརམྨཎཔཙྩཡོ…པེ… ཨཝིགཏཔཙྩཡོ’ཏི སམྨསནཾ ཨཱརབྷི, ཨཐསྶ ཙཏུཝཱིསཏིསམནྟཔཊྛཱནཾ སམྨསནྟསྶ ཨེཀནྟཏོ སབྦཉྙུཏཉྙཱཎཾ མཧཱཔཀརཎེ ཨོཀཱསཾ ལབྷི. ཡཐཱ ཧི ཏིམིརཔིངྒལམཧཱམཙྪོ ཙཏུརཱསཱིཏིཡོཛནསཧསྶགམྦྷཱིརེ མཧཱསམུདྡེཡེཝ ཨོཀཱསཾ ལབྷཏི, ཨེཝམེཝ སབྦཉྙུཏཉྙཱཎཾ ཨེཀནྟཏོ མཧཱཔཀརཎེཡེཝ ཨོཀཱསཾ ལབྷི.

‘‘སཏྠུ ཨེཝཾ ལདྡྷོཀཱསེན སབྦཉྙུཏཉྙཱཎེན ཡཐཱསུཁཾ སཎྷསུཁུམདྷམྨཾ སམྨསནྟསྶ སརཱིརཏོ ནཱིལཔཱིཏལོཧིཏོདཱཏམཉྫིཊྛཔབྷསྶརཝསེན ཚབྦཎྞརསྨིཡོ ནིཀྑམིཾསུ. ཀེསམསྶཱུཧི ཙེཝ ཨཀྑཱིནཉྩ ནཱིལཊྛཱནེཧི ནཱིལརསྨིཡོ ནིཀྑམིཾསུ, ཡཱསཾ ཝསེན གགནཏལཾ ཨཉྫནཙུཎྞསམོཀིཎྞཾ ཝིཡ ཨུམཱཔུཔྥནཱིལུཔྤལདལསཉྪནྣཾ ཝིཡ ཝཱིཏིཔཏནྟམཎིཏཱལཝཎྚཾ ཝིཡ སམྤསཱརིཏམེཙཀཔཊཾ ¶ ཝིཡ ཙ ཨཧོསི. ཚཝིཏོ ཙེཝ ཨཀྑཱིནཉྩ པཱིཏཊྛཱནེཧི པཱིཏརསྨིཡོ ནིཀྑམིཾསུ, ཡཱསཾ ཝསེན དིསཱབྷཱགཱ སུཝཎྞརསནིསིཉྩམཱནཱ ཝིཡ སུཝཎྞཔཊཔསཱརིཏཱ ཝིཡ ཀུངྐུམཙུཎྞཀཎིཀཱརཔུཔྥསམྤརིཀིཎྞཱ ཝིཡ ཙ ཝིརོཙིཾསུ. མཾསལོཧིཏེཧི ཙེཝ ཨཀྑཱིནཉྩ རཏྟཊྛཱནེཧི ལོཧིཏརསྨིཡོ ནིཀྑམིཾསུ, ཡཱསཾ ཝསེན དིསཱབྷཱགཱ ཙཱིནཔིཊྛཙུཎྞརཉྫིཏཱ ཝིཡ སུཔཀྐལཱཁཱརསནིསིཉྩམཱནཱ ཝིཡ རཏྟཀམྦལཔརིཀྑིཏྟཱ ཝིཡ ཛཡསུམནཔཱརིབདྡྷཀབནྡྷུཛཱིཝཀཀུསུམསམྤརིཀིཎྞཱ ཝིཡ ཙ ཝིརོཙིཾསུ. ཨཊྛཱིཧི ཙེཝ དནྟེཧི ཙ ཨཀྑཱིནཉྩ སེཏཊྛཱནེཧི ཨོདཱཏརསྨིཡོ ནིཀྑམིཾསུ, ཡཱསཾ ཝསེན དིསཱབྷཱགཱ རཛཏཀུཊེཧི ཨཱསིཉྩམཱནཁཱིརདྷཱརཱསམྤརིཀིཎྞཱ ཝིཡ པསཱརིཏརཛཏཔཊཝིཏཱནཱ ཝིཡ ཝཱིཏིཔཏནྟརཛཏཏཱལཝཎྚཱ ¶ ཝིཡ ཀུནྡཀུམུདསིནྡྷུཝཱརསུམནམལླིཀཱདིཀུསུམསཉྪནྣཱ ཝིཡ ཙ ཝིརོཙིཾསུ. མཉྫིཊྛཔབྷསྶརཱ པན ཏམྷཱ ཏམྷཱ སརཱིརཔྤདེསཱ ནིཀྑམིཾསུ. ཨིཏི ཏཱ ཚབྦཎྞརསྨིཡོ ནིཀྑམིཏྭཱ གྷནམཧཱཔཐཝིཾ གཎྷིཾསུ.

‘‘ཙཏུནཧུཏཱདྷིཀདྭིཡོཛནསཏསཧསྶབཧལཱ མཧཱཔཐཝཱི ནིདྡྷནྟསུཝཎྞཔིཎྜི ཝིཡ ཨཧོསི. པཐཝིཾ བྷིནྡིཏྭཱ ཧེཊྛཱ ཨུདཀཾ གཎྷིཾསུ. པཐཝཱིསནྡྷཱརཀཾ ཨཊྛནཧུཏཱདྷིཀཙཏུཡོཛནསཏསཧསྶབཧལཾ ཨུདཀཾ སུཝཎྞཀལསེཧི ཨཱསིཉྩམཱནཝིལཱིནསུཝཎྞཾ ཝིཡ ཨཧོསི. ཨུདཀཾ ཝིནིཝིཛ྄ཛྷིཏྭཱ ཝཱཏཾ ཨགྒཧེསུཾ. ཚནྣཝུཏཱདྷིཀནཝཡོཛནསཏསཧསྶབཧལོ ཝཱཏོ སམུསྶིཏསུཝཎྞཀྑནྡྷོ ཝིཡ ཨཧོསི. ཝཱཏཾ ཝིནིཝིཛ྄ཛྷིཏྭཱ ཧེཊྛཱ ཨཛཊཱཀཱསཾ པཀྑནྡིཾསུ. ཨུཔརིབྷཱགེན ཨུགྒནྟྭཱཔི ཙཏུམཧཱརཱཛིཀེ གཎྷིཾསུ. ཏེ ཝིནིཝིཛ྄ཛྷིཏྭཱ ཏཱཝཏིཾསེ, ཏཏོ ཡཱམེ, ཏཏོ ཏུསིཏེ, ཏཏོ ནིམྨཱནརཏཱི, ཏཏོ པརནིམྨིཏཝསཝཏྟཱི, ཏཏོ ནཝ བྲཧྨལོཀེ, ཏཏོ ཝེཧཔྥལེ, ཏཏོ པཉྩ སུདྡྷཱཝཱསེ ཝིནིཝིཛ྄ཛྷིཏྭཱ ཙཏྟཱརོ ཨཱརུཔྤེ གཎྷིཾསུ. ཙཏྟཱརོ ཙ ཨཱརུཔྤེ ཝིནིཝིཛ྄ཛྷིཏྭཱ ཨཛཊཱཀཱསཾ པཀྑནྡིཾསུ.

‘‘ཏིརིཡབྷཱགེཧི ¶ ཨནནྟཱ ལོཀདྷཱཏུཡོ པཀྑནྡིཾསུ, ཨེཏྟཀེ ཋཱནེ ཙནྡམྷི ཙནྡཔྤབྷཱ ནཏྠི, སཱུརིཡེ སཱུརིཡཔྤབྷཱ ནཏྠི, ཏཱརཀརཱུཔེསུ ཏཱརཀརཱུཔཔྤབྷཱ ནཏྠི, དེཝཏཱནཾ ཨུཡྻཱནཝིམཱནཀཔྤརུཀྑེསུ སརཱིརེ ཨཱབྷརཎེསཱུཏི སབྦཏྠ པབྷཱ ནཏྠི. ཏིསཧསྶིམཧཱསཧསྶིལོཀདྷཱཏུཡཱ ཨཱལོཀཕརཎསམཏྠོ མཧཱབྲཧྨཱཔི སཱུརིཡུགྒམནེ ཁཛྫོཔནཀོ ཝིཡ ཨཧོསི, ཙནྡསཱུརིཡཏཱརཀརཱུཔདེཝཏུཡྻཱནཝིམཱནཀཔྤརུཀྑཱནཾ པརིཙྪེདམཏྟཀམེཝ པཉྙཱཡིཏྠ. ཨེཏྟཀཾ ཋཱནཾ བུདྡྷརསྨཱིཧིཡེཝ ཨཛ྄ཛྷོཏྠཊཾ ཨཧོསི. ཨཡཉྩ ནེཝ བུདྡྷཱནཾ ཨདྷིཊྛཱནིདྡྷི, ན བྷཱཝནཱམཡིདྡྷི. སཎྷསུཁུམདྷམྨཾ པན སམྨསཏོ ལོཀནཱཐསྶ ལོཧིཏཾ པསཱིདི, ཝཏྠུརཱུཔཾ པསཱིདི, ཚཝིཝཎྞོ པསཱིདི. ཙིཏྟསམུཊྛཱནཱ ཝཎྞདྷཱཏུ སམནྟཱ ཨསཱིཏིཧཏྠམཏྟེ པདེསེ ནིཙྩལཱ ཨཊྛཱསཱི’’ཏི.

ཨེཝཾ ནིསིནྣེཏི ཏམྷཱ སམཱདྷིམྷཱ ཝུཊྛཧིཏྭཱ ནིསིནྣེ. ཨེཀོ བྲཱཧྨཎོཏི ནཱམགོཏྟཝསེན ཨནབྷིཉྙཱཏོ ཨཔཱཀཊོ ཨེཀོ བྲཱཧྨཎོ. ‘‘ཧུཾ ཧུ’’ནྟི ཀརོནྟོ ཝིཙརཏཱིཏི སབྦཾ ཨཙོཀྑཛཱཏིཀཾ པསྶིཏྭཱ ཛིགུཙྪནྟོ ‘‘ཧུཾ ཧུ’’ནྟི ཀརོནྟོ ཝིཙརཏི. ཨེཏདཝོཙཱཏི (ཨུདཱ. ཨཊྛ. ༤) ཨེཏཾ ཨིདཱནི ཝཏྟབྦཾ ‘‘ཀིཏྟཱཝཏཱ ནུ ཁོ’’ཏིཨཱདིཝཙནཾ ཨཝོཙ. ཏཏྠ ཀིཏྟཱཝཏཱཏི ཀིཏྟཀེན པམཱཎེན. ནུ-ཏི སཾསཡཏྠེ ནིཔཱཏོ, ཁོ-ཏི པདཔཱུརཎེ. བྷོ-ཏི ¶ བྲཱཧྨཎཱནཾ ཛཱཏིསམུདཱགཏཾ ཨཱལཔནཾ. ཏཐཱ ཧི ཝུཏྟཾ ‘‘བྷོཝཱདི ནཱམ སོ ཧོཏི, སཙེ ཧོཏི སཀིཉྩནོ’’ཏི (དྷ. པ. ༣༩༦; སུ. ནི. ༦༢༥). གོཏམཱཏི བྷགཝནྟཾ གོཏྟེན ཨཱལཔཏི. ཀཐཾ པནཱཡཾ བྲཱཧྨཎོ སམྤཏི སམཱགཏོ བྷགཝཏོ གོཏྟཾ ཛཱནཱཏཱིཏི? ནཱཡཾ སམྤཏི སམཱགཏོ, ཚབྦསྶཱནི པདྷཱནཀརཎཀཱལེ ཨུཔཊྛཧནྟེཧི པཉྩཝགྒིཡེཧི སདྡྷིཾ ཙརམཱནོ ཨཔརབྷཱགེ ཏཾ ཝཏཾ ཚཌྜེཏྭཱ ཨུརུཝེལཱཡཾ སེནནིགམེ ཨེཀོ ཨདུཏིཡོ ཧུཏྭཱ པིཎྜཱཡ ཙརམཱནོཔི ཏེན བྲཱཧྨཎེན དིཊྛཔུབྦོ ཙེཝ སལླཔིཏཔུབྦོ ཙ, ཏེན སོ པུབྦེ པཉྩཝགྒིཡེཧི གཡ྄ཧམཱནཾ བྷགཝཏོ གོཏྟཾ ཨནུསྶརནྟོ ‘‘བྷོ གོཏམཱ’’ཏི བྷགཝནྟཾ གོཏྟེན ཨཱལཔཏི. ཡཏོ པཊྛཱཡ ཝཱ བྷགཝཱ མཧཱབྷིནིཀྑམནཾ ནིཀྑནྟོ ཨནོམཱནདཱིཏཱིརེ པབྦཛི, ཏཏོ པབྷུཏི ‘‘སམཎོ ¶ གོཏམོ’’ཏི ཙནྡོ ཝིཡ སཱུརིཡོ ཝིཡ པཱཀཊོ པཉྙཱཏོ ཧོཏི, ན ཙ ཏསྶ གོཏྟཛཱནནེ ཀཱརཎཾ གཝེསིཏབྦཾ. བྲཱཧྨཎཀརཎཱཏི བྲཱཧྨཎཾ ཀརོནྟཱིཏི བྲཱཧྨཎཀརཎཱ, བྲཱཧྨཎབྷཱཝཀརཱཏི ཨཏྠོ. ཨེཏྠ ཙ ‘‘ཀིཏྟཱཝཏཱ’’ཏི ཨེཏེན ཡེཧི དྷམྨེཧི བྲཱཧྨཎོ ཧོཏི, ཏེསཾ དྷམྨཱནཾ པརིམཱཎཾ པུཙྪཏི. ‘‘ཀཏམེ’’ཏི པན ཨིམིནཱ ཏེསཾ སརཱུཔཾ པུཙྪཏི.

ཨུདཱནཾ ཨུདཱནེསཱིཏི ‘‘ཡོ བྲཱཧྨཎོ’’ཏིཨཱདིཀཾ ཨུདཱནཾ ཨུདཱནེསི, ན པན ཏསྶ བྲཱཧྨཎསྶ དྷམྨཾ དེསེསི. ཀསྨཱ? དྷམྨདེསནཱཡ ཨབྷཱཛནབྷཱཝཏོ. ཏཐཱ ཧི ཏསྶ བྲཱཧྨཎསྶ ཨིམཾ གཱཐཾ སུཏྭཱ ན སཙྩཱབྷིསམཡོ ཨཧོསི. ཡཐཱ ཙ ཨིམསྶ, ཨེཝཾ ཨུཔཀསྶ ཨཱཛཱིཝཀསྶ བུདྡྷགུཎཔྤཀཱསནཾ སུཏྭཱ. དྷམྨཙཀྐཔྤཝཏྟནཏོ ཧི པུབྦབྷཱགེ བྷགཝཏཱ བྷཱསིཏཾ པརེསཾ སུཎནྟཱནམྤི ཏཔུསྶབྷལླིཀཱནཾ སརཎདཱནཾ ཝིཡ ཝཱསནཱབྷཱགིཡམེཝ ཛཱཏཾ, ན ཨསེཀྑབྷཱགིཡཾ ཝཱ ནིབྦེདྷབྷཱགིཡཾ ཝཱ. ཨེསཱ ཧི དྷམྨཏཱཏི. ཝེདེཧི ཝཱ ཨནྟནྟི ཨེཏྠ ཨནྟཾ ནཱམ སབྦསངྑཱརཔརིཡོསཱནཾ ནིབྦཱནཾ. ཨིམེ ཨུསྶདཱ ནཏྠཱིཏི སབྦསོ ཨིམེ པཧཱིནཏྟཱ ན སནྟི.

ཨཛཔཱལཀཐཱཝཎྞནཱ ནིཊྛིཏཱ.

མུཙལིནྡཀཐཱཝཎྞནཱ

༥. མུཙལིནྡམཱུལེཏི (ཨུདཱ. ཨཊྛ. ༡༡) ཨེཏྠ མུཙལིནྡོ ཝུཙྩཏི ནཱིཔརུཀྑོ, ཡོ ‘‘ནིཙུལོ’’ཏིཔི ཝུཙྩཏི, ཏསྶ སམཱིཔེཏི ཨཏྠོ. ཀེཙི པན ‘‘མུཙལོཏི ཏསྶ རུཀྑསྶ ནཱམཾ, ཝནཛེཊྛཀཏཱཡ པན མུཙལིནྡོཏི ཝུཏྟ’’ནྟི ཝདནྟི. ཨུདཔཱདཱིཏི སཀལཙཀྐཝཱལ༹གབྦྷཾ པཱུརེནྟོ མཧཱམེགྷོ ཨུདཔཱདི. ཨེཝརཱུཔོ ཀིར མེགྷོ དྭཱིསུཡེཝ ཀཱལེསུ ཝསྶཏི ཙཀྐཝཏྟིམྷི ཝཱ ཨུཔྤནྣེ བུདྡྷེ ཝཱ, ཨིདྷ བུདྡྷུཔྤཱདཀཱལེ ཨུདཔཱདི. པོཀྑརཎིཡཱ ནིབྦཏྟོཏི པོཀྑརཎིཡཱ ཧེཊྛཱ ¶ ནཱགབྷཝནཾ ཨཏྠི, ཏཏྠ ནིབྦཏྟོ. སཀབྷཝནཱཏི ཨཏྟནོ ནཱགབྷཝནཏོ. ཨེཝཾ བྷོགེཧི པརིཀྑིཔིཏྭཱཏི སཏྟ ཝཱརེ ཨཏྟནོ སརཱིརབྷོགེཧི བྷགཝཏོ ཀཱཡཾ པརིཝཱརེཏྭཱ. ཨུཔརིམུདྡྷནི མཧནྟཾ ཕཎཾ ¶ ཝིཧཙྩཱཏི བྷགཝཏོ མུདྡྷཔྤདེསསྶ ཨུཔརི ཨཏྟནོ མཧནྟཾ ཕཎཾ པསཱརེཏྭཱ. ‘‘ཕཎཾ ཀརིཏྭཱ’’ཏིཔི པཱཋོ, སོཡེཝཏྠོ.

ཏསྶ ཀིར ནཱགརཱཛསྶ ཨེཏདཧོསི ‘‘བྷགཝཱ ཙ མཡ྄ཧཾ བྷཝནསམཱིཔེ རུཀྑམཱུལེ ནིསིནྣོ, ཨཡཉྩ སཏྟཱཧཝདྡལིཀཱ ཝཏྟཏི, ཝཱསཱགཱརམསྶ ལདྡྷུཾ ཝཊྚཏཱི’’ཏི. སོ སཏྟརཏནམཡཾ པཱསཱདཾ ནིམྨིནིཏུཾ སཀྐོནྟོཔི ‘‘ཨེཝཾ ཀཏེ ཀཱཡསཱརོ གཧིཏོ ན བྷཝིསྶཏི, དསབལསྶ ཀཱཡཝེཡྻཱཝཙྩཾ ཀརིསྶཱམཱི’’ཏི མཧནྟཾ ཨཏྟབྷཱཝཾ ཀཏྭཱ སཏྠཱརཾ སཏྟཀྑཏྟུཾ བྷོགེཧི པརིཀྑིཔིཏྭཱ ཨུཔརི ཕཎཾ དྷཱརེསི. ‘‘ཏསྶ པརིཀྑེཔབྦྷནྟརཾ ལོཧཔཱསཱདེ བྷཎྜཱགཱརགབྦྷཔྤམཱཎཾ ཨཧོསཱི’’ཏི ཨིདྷ ཝུཏྟཾ. མཛ྄ཛྷིམཊྛཀཐཱཡཾ (མ. ནི. ཨཊྛ. ༡.༢༨༤) པན –

‘‘པརིཀྑེཔསྶ ཨནྟོ ཨོཀཱསོ ཧེཊྛཱ ལོཧཔཱསཱདཔྤམཱཎོ ཨཧོསི, ‘ཨིཙྪིཏིཙྪིཏེན ཨིརིཡཱཔཐེན སཏྠཱ ཝིཧརིསྶཏཱི’ཏི ནཱགརཱཛསྶ ཨཛ྄ཛྷཱསཡོ ཨཧོསི, ཏསྨཱ ཨེཝཾ མཧནྟཾ ཨོཀཱསཾ པརིཀྑིཔི, མཛ྄ཛྷེ རཏནཔལླངྐོ པཉྙཏྟོ ཧོཏི, ཨུཔརི སུཝཎྞཏཱརཀཝིཙིཏྟཾ སམོསརིཏགནྡྷདཱམཀུསུམཙེལཝིཏཱནཾ ཨཧོསི, ཙཏཱུསུ ཀོཎེསུ གནྡྷཏེལེན དཱིཔཱ ཛལིཏཱ, ཙཏཱུསུ དིསཱསུ ཝིཝརིཏྭཱ ཙནྡནཀརཎྜཀཱ ཋཔིཏཱ’’ཏི –

ཝུཏྟཾ. ཨིཙྪིཏིཙྪིཏེན ཨིརིཡཱཔཐེན ཝིཧརིསྶཏཱིཏི ཙ ནཱགརཱཛསྶ ཨཛ྄ཛྷཱསཡམཏྟམེཏཾ, བྷགཝཱ པན ཡཐཱནིསིནྣོཝ སཏྟཱཧཾ ཝཱིཏིནཱམེསི.

ཀིཉྩཱཔི…པེ… ཙིནྟེཏུཾ ཡུཏྟནྟི ཨེཏྠ ཀེཙི ཝདནྟི ‘‘ཨུཎྷགྒཧཎཾ བྷོགཔརིཀྑེཔསྶ ཝིཔུལབྷཱཝཀརཎེ ཀཱརཎཀིཏྟནཾ. ཁུདྡཀེ ཧི ཏསྨིཾ བྷགཝནྟཾ ནཱགརཱཛསྶ སརཱིརསམྦྷཱུཏཱ ཨུསྨཱ བཱདྷེཡྻ, ཝིཔུལབྷཱཝཀརཎེན པན ཏཱདིསཾ མཱ ཨུཎྷཾ བཱདྷཡིཏྠཱ’’ཏི. སཨུཔསགྒཔདསྶ ཨཏྠོ ཨུཔསགྒེན ཝིནཱཔི ཝིཉྙཱཡཏཱིཏི ཨཱཧ ‘‘ཝིདྡྷནྟི ཨུབྦིདྡྷ’’ནྟི, སཱ ཙསྶ ཨུབྦིདྡྷཏཱ ཨུཔཀྐིལེསཝིགམེན དཱུརབྷཱཝེན ཨུཔཊྛཱནནྟི ཨཱཧ ‘‘མེགྷཝིགམེན དཱུརཱིབྷཱུཏ’’ནྟི. ཨིནྡནཱིལམཎི ཝིཡ དིབྦཏི ཛོཏཏཱིཏི དེཝོ, ཨཱཀཱསོ. ཝིདིཏྭཱཏི ‘‘ཨིདཱནི ཝིགཏཝལཱཧཀོ ཨཱཀཱསོ, ནཏྠི བྷགཝཏོ སཱིཏཱདིཨུཔདྡཝོ’’ཏི ཉཏྭཱ. ཝིནིཝེཋེཏྭཱཏི ཨཔནེཏྭཱ. ཨཏྟནོ ¶ རཱུཔནྟི ཨཏྟནོ ནཱགརཱུཔཾ. པཊིསཾཧརིཏྭཱཏི ཨནྟརདྷཱཔེཏྭཱ. མཱཎཝཀཝཎྞནྟི ཀུམཱརཀརཱུཔཾ.

ཨེཏམཏྠཾ ¶ ཝིདིཏྭཱཏི ‘‘ཝིཝེཀསུཁཔཊིསཾཝེདིནོ ཡཏྠ ཀཏྠཙི སུཁམེཝ ཧོཏཱི’’ཏི ཨེཏཾ ཨཏྠཾ སབྦཱཀཱརེན ཛཱནིཏྭཱ. ཨིམཾ ཨུདཱནནྟི ཨིམཾ ཝིཝེཀསུཁཱནུབྷཱཝདཱིཔཀཾ ཨུདཱནཾ ཨུདཱནེསི. སུཏདྷམྨསྶཱཏི ཝིསྶུཏདྷམྨསྶ. ཏེནཱཧ ‘‘པཀཱསིཏདྷམྨསྶཱ’’ཏི. ཨཀུཔྤནབྷཱཝོཏི ཨཀུཔྤནསབྷཱཝོ.

མུཙལིནྡཀཐཱཝཎྞནཱ ནིཊྛིཏཱ.

རཱཛཱཡཏནཀཐཱཝཎྞནཱ

༦. ཨོསདྷཧརཱིཏཀཾ ཨུཔནེསཱིཏི ན ཀེཝལཾ ཨོསདྷཧརཱིཏཀམེཝ, དནྟཀཊྛམྤི ཨུཔནེསི. པཙྩགྒྷེཏི ཨེཏྠ པུརིམཾ ཨཏྠཝིཀཔྤཾ ཀེཙི ན ཨིཙྪནྟི, ཏེནེཝ ཨཱཙརིཡདྷམྨཔཱལཏྠེརེན ཝུཏྟཾ ‘‘པཙྩགྒྷེཏི ཨབྷིནཝེ. པཙྩེཀཾ མཧགྒྷཏཱཡ པཙྩགྒྷེཏི ཀེཙི, ཏཾ ན སུནྡརཾ. ན ཧི བུདྡྷཱ བྷགཝནྟོ མཧགྒྷཾ པཊིགྒཎྷནྟི པརིབྷུཉྫནྟི ཝཱ’’ཏི.

རཱཛཱཡཏནཀཐཱཝཎྞནཱ ནིཊྛིཏཱ.

བྲཧྨཡཱཙནཀཐཱཝཎྞནཱ

༧. ཨཱཙིཎྞསམཱཙིཎྞོཏི ཨཱཙརིཏོ ཙེཝ ཨཱཙརནྟེཧི ཙ སམྨདེཝ ཨཱཙརིཏོཏི ཨཏྠོ. ཨེཏེན ཨཡཾ པརིཝིཏཀྐོ སབྦབུདྡྷཱནཾ པཋམཱབྷིསམྦོདྷིཡཾ ཨུཔྤཛྫཏེཝཱཏི ཨཡམེཏྠ དྷམྨཏཱཏི དསྶེཏི. གམྦྷཱིརོཔི དྷམྨོ པཊིཔཀྑཝིདྷམནེན སུཔཱཀཊོ བྷཝེཡྻ, པཊིཔཀྑཝིདྷམནཾ པན སམྨཱཔཊིཔཏྟིཔཊིབདྡྷཾ, སཱ སདྡྷམྨསཝནཱདྷཱིནཱ, ཏཾ སཏྠརི དྷམྨེ ཙ པསཱདཱཡཏྟཾ. སོ ཝིསེསཏོ ལོཀེ སམྦྷཱཝནཱིཡསྶ གརུཀཱཏབྦསྶ ཨབྷིཔཏྠནཱཧེཏུཀོཏི པརམྤརཱཡ སཏྟཱནཾ དྷམྨསམྤཊིཔཏྟིཡཱ བྲཧྨུནོ ཡཱཙནཱནིམིཏྟནྟི ཏཾ དསྶེནྟོ ‘‘བྲཧྨུནཱ ཡཱཙིཏེ དེསེཏུཀཱམཏཱཡཱ’’ཏིཨཱདིམཱཧ.

ཨདྷིགཏོཏི ¶ པཊིཝིདྡྷོ, སཡམྦྷཱུཉཱཎེན ‘‘ཨིདཾ དུཀྑ’’ནྟིཨཱདིནཱ ཡཐཱབྷཱུཏཾ ཨཝབུདྡྷོཏི ཨཏྠོ. དྷམྨོཏི ཙཏུསཙྩདྷམྨོ ཏབྦིནིམུཏྟསྶ པཊིཝིཛ྄ཛྷིཏབྦདྷམྨསྶ ཨབྷཱཝཏོ. གམྦྷཱིརོཏི མཧཱསམུདྡོ ཝིཡ མཀསཏུཎྜསཱུཙིཡཱ ཨཉྙཏྲ སམུཔཙིཏཔརིཔཀྐཉཱཎསམྦྷཱརེཧི ཨཉྙེསཾ ཉཱཎེན ཨལབྦྷནེཡྻཔཏིཊྛོ. གམྦྷཱིརཏྟཱཝ དུདྡསོ དུཀྑེན དཊྛབྦོ, ན སཀྐཱ སུཁེན དཊྛུཾ. ཡོ ¶ ཧི ཨལབྦྷནེཡྻཔཏིཊྛོ, སོ ཨོགཱཧིཏུཾ ཨསཀྐུཎེཡྻཏཱཡ སརཱུཔཏོ ཙ ཝིསེསཏོ ཙ སུཁེན པསྶིཏུཾ ན སཀྐཱ, ཨཐ ཁོ ཀིཙྪེན ཀེནཙི ཀདཱཙིདེཝ དཊྛབྦོ. དུདྡསཏྟཱཝ དུརནུབོདྷོ དུཀྑེན ཨཝབུཛ྄ཛྷིཏབྦོ, ན སཀྐཱ སུཁེན ཨཝབུཛ྄ཛྷིཏུཾ. ཡཉྷི དཊྛུམེཝ ན སཀྐཱ, ཏསྶ ཨོགཱཧེཏྭཱ ཨནུབུཛ྄ཛྷནེ ཀཐཱ ཨེཝ ནཏྠི ཨཝབོདྷསྶ དུཀྐརབྷཱཝཏོ. ཨིམསྨིཾ ཋཱནེ ‘‘ཏཾ ཀིཾ མཉྙཐ, བྷིཀྑཝེ, ཀཏམཾ ནུ ཁོ དུཀྐརཏརཾ ཝཱ དུརབྷིསམྦྷཝཏརཾ ཝཱ’’ཏི (སཾ. ནི. ༥.༡༡༡༥) སུཏྟཔདཾ ཝཏྟབྦཾ.

སནྟོཏི ཨནུཔསནྟསབྷཱཝཱནཾ ཀིལེསཱནཾ སངྑཱརཱནཉྩ ཨབྷཱཝཏོ ཝཱུཔསནྟསབྦཔརིལཱ༹ཧཏཱཡ སནྟོ ནིབྦུཏོ, སནྟཱརམྨཎཏཱཡ ཝཱ སནྟོ. ཨེཏྠ ཙ ནིརོདྷསཙྩཾ སནྟཾ ཨཱརམྨཎནྟི སནྟཱརམྨཎཾ, མགྒསཙྩཾ སནྟཾ སནྟཱརམྨཎཉྩཱཏི སནྟཱརམྨཎཾ. པདྷཱནབྷཱཝཾ ནཱིཏོཏི པཎཱིཏོ. ཨཐ ཝཱ པཎཱིཏོཏི ཨཏིཏྟིཀརཎཊྛེན ཨཏཔྤཀོ སཱདུརསབྷོཛནཾ ཝིཡ. སནྟཔཎཱིཏབྷཱཝེནེཝ ཙེཏྠ ཨསེཙནཀཏཱཡ ཨཏཔྤཀཏཱ དཊྛབྦཱ. ཨིདཉྷི དྭཡཾ ལོཀུཏྟརམེཝ སནྡྷཱཡ ཝུཏྟཾ. ཨཏཀྐཱཝཙརོཏི ཨུཏྟམཉཱཎཝིསཡཏྟཱ ཏཀྐེན ཨཝཙརིཏབྦོ ཨོགཱཧིཏབྦོ ན ཧོཏི, ཉཱཎེནེཝ ཨཝཙརིཏབྦོ. ཏཏོ ཨེཝ ནིཔུཎཉཱཎགོཙརཏཱཡ སཎྷསུཁུམསབྷཱཝཏྟཱ ཙ ནིཔུཎོ སཎྷོ. པཎྜིཏཝེདནཱིཡོཏི བཱལཱནཾ ཨཝིསཡཏྟཱ སམྨཱཔཊིཔདཾ པཊིཔནྣེཧི པཎྜིཏེཧི ཨེཝ ཝེདིཏབྦོ.

ཨལླཱིཡནྟི ཨབྷིརམིཏབྦཊྛེན སེཝིཡནྟཱིཏི ཨཱལཡཱ, པཉྩ ཀཱམགུཎཱཏི ཨཱཧ ‘‘སཏྟཱ པཉྩཀཱམགུཎེ ཨལླཱིཡནྟི, ཏསྨཱ ཏེ ཨཱལཡཱཏི ཝུཙྩནྟཱི’’ཏི. ཏཏྠ པཉྩཀཱམགུཎེ ཨལླཱིཡནྟཱིཏི པཉྩཀཱམགུཎེ སེཝནྟཱིཏི ཨཏྠོ. ཏེཏི པཉྩ ཀཱམགུཎཱ. རམནྟཱིཏི རཏིཾ ཝིནྡནྟི ཀཱིལ༹ནྟི ལལ༹ནྟི. ཨཱལཱིཡནྟི ཨབྷིརམཎཝསེན སེཝནྟཱིཏི ཨཱལཡཱ, ཨཊྛསཏཾ ཏཎྷཱཝིཙརིཏཱནི, ཏེཧི ཨཱལཡེཧི རམནྟཱིཏི ཨཱལཡརཱམཱཏི ཨེཝམྤེཏྠ ཨཏྠོ དཊྛབྦོ. ཨིམེ ཧི སཏྟཱ ཡཐཱ ཀཱམགུཎེ, ཨེཝཾ རཱགམྤི ཨསྶཱདེནྟི ¶ ཨབྷིནནྡནྟིཡེཝ. ཡཐེཝ ཧི སུསཛྫིཏཔུཔྥཕལབྷརིཏརུཀྑཱདིསམྤནྣཾ ཨུཡྻཱནཾ པཝིཊྛོ རཱཛཱ ཏཱཡ ཏཱཡ སམྤཏྟིཡཱ རམཏི, སམྨུདིཏོ ཨཱམོདིཏཔམོདིཏོ ཧོཏི, ན ཨུཀྐཎྛཏི, སཱཡམྤི ནིཀྑམིཏུཾ ན ཨིཙྪཏི, ཨེཝམིམེཧི ཀཱམཱལཡཏཎྷཱལཡེཧི སཏྟཱ རམནྟི, སཾསཱརཝཊྚེ སམྨོདིཏཱ ཨནུཀྐཎྛིཏཱ ཝསནྟི. ཏེན ནེསཾ བྷགཝཱ དུཝིདྷམྤི ཨཱལཡཾ ཨུཡྻཱནབྷཱུམིཾ ཝིཡ དསྶེནྟོ ‘‘ཨཱལཡརཱམཱ’’ཏིཨཱདིམཱཧ. རཏཱཏི ནིརཏཱ. སུཊྛུ མུདིཏཱཏི ཨཏིཝིཡ མུདིཏཱ ཨནུཀྐཎྛནཏོ.

ཋཱནཾ སནྡྷཱཡཱཏི ཋཱནསདྡཾ སནྡྷཱཡ. ཨཏྠཏོ པན ཋཱནནྟི ཙ པཊིཙྩསམུཔྤཱདོ ཨེཝ ཨདྷིཔྤེཏོ ¶ . ཏིཊྛཏི ཨེཏྠ ཕལཾ ཏདཱཡཏྟཝུཏྟིཏཱཡཱཏི ཋཱནཾ, སངྑཱརཱདཱིནཾ པཙྩཡབྷཱུཏཱ ཨཝིཛྫཱདཡོ. ཨིམེསཾ སངྑཱརཱདཱིནཾ པཙྩཡཱཏི ཨིདཔྤཙྩཡཱ, ཨཝིཛྫཱདཡོཝ. ཨིདཔྤཙྩཡཱ ཨེཝ ཨིདཔྤཙྩཡཏཱ ཡཐཱ དེཝོ ཨེཝ དེཝཏཱ. ཨིདཔྤཙྩཡཱནཾ ཝཱ ཨཝིཛྫཱདཱིནཾ ཨཏྟནོ ཕལཾ པཊིཙྩ པཙྩཡབྷཱཝོ ཨུཔྤཱདནསམཏྠཏཱ ཨིདཔྤཙྩཡཏཱ. ཏེན སམཏྠཔཙྩཡལཀྑཎོ པཊིཙྩསམུཔྤཱདོ དསྶིཏོ ཧོཏི. པཊིཙྩ སམུཔྤཛྫཏི ཕལཾ ཨེཏསྨཱཏི པཊིཙྩསམུཔྤཱདོ. པདདྭཡེནཔི དྷམྨཱནཾ པཙྩཡཊྛོ ཨེཝ ཝིབྷཱཝིཏོ. སངྑཱརཱདིཔཙྩཡཱནཉྷི ཨཝིཛྫཱདཱིནཾ ཨེཏཾ ཨདྷིཝཙནཾ ཨིདཔྤཙྩཡཏཱཔཊིཙྩསམུཔྤཱདོཏི. སབྦསངྑཱརསམཐོཏིཨཱདི སབྦཾ ཨཏྠཏོ ནིབྦཱནམེཝ. ཡསྨཱ ཧི ཏཾ ཨཱགམྨ པཊིཙྩ ཨརིཡམགྒསྶ ཨཱརམྨཎཔཙྩཡབྷཱཝཧེཏུ སབྦསངྑཱརཝིཔྥནྡིཏཱནི སམྨནྟི ཝཱུཔསམྨནྟི, ཏསྨཱ ‘‘སབྦསངྑཱརསམཐོ’’ཏི ཝུཙྩཏི. སབྦསངྑཏཝིསཾཡུཏྟེ ཧི ནིབྦཱནེ སངྑཱརཝཱུཔསམཔརིཡཱཡོ ཉཱཡཱགཏོཡེཝཱཏི. ཨིདཾ པནེཏྠ ནིབྦཙནཾ – སབྦེ སངྑཱརཱ སམྨནྟི ཨེཏྠཱཏི སབྦསངྑཱརསམཐོཏི.

ཡསྨཱ ཙ ཏཾ ཨཱགམྨ སབྦེ ཨུཔདྷཡོ པཊིནིསྶཊྛཱ སམུཙྪེདཝསེན པརིཙྩཏྟཱ ཧོནྟི, ཨཊྛསཏཔྤབྷེདཱ སབྦཱཔི ཏཎྷཱ ཁཱིཡནྟི, སབྦེ ཀིལེསརཱགཱ ཝིརཛྫནྟི, ཛརཱམརཎཱདིབྷེདཾ སབྦཾ ཝཊྚདུཀྑཾ ནིརུཛ྄ཛྷཏི, ཏསྨཱ ‘‘སབྦཱུཔདྷིཔཊིནིསྶགྒོ ཏཎྷཱཀྑཡོ ཝིརཱགོ ནིརོདྷོ’’ཏི ཝུཙྩཏི, ཡཱ པནེསཱ ཏཎྷཱ ཏེན ཏེན བྷཝེན བྷཝནྟརཾ བྷཝནིཀནྟིབྷཱཝེན ཝིནཏི སཾསིབྦཏི, ཕལེན ཝཱ སདྡྷིཾ ཀམྨཾ ཝིནཏི སཾསིབྦཏཱིཏི ཀཏྭཱ ཝཱནནྟི ཝུཙྩཏི, ཏཏོ ནིཀྑནྟཾ ཝཱནཏོཏི ནིབྦཱནཾ. ཀིལམཐོཏི ཀཱཡཀིལམཐོ. ཝིཧེསཱཔི ཀཱཡཝིཧེསཱཡེཝ, ཙིཏྟེ པན ཨུབྷཡམྤེཏཾ བུདྡྷཱནཾ ནཏྠི བོདྷིམཱུལེཡེཝ སམུཙྪིནྣཏྟཱ. ཨེཏྠ ཙ ཙིརནིསཛྫཱཙིརབྷཱསནེཧི ¶ པིཊྛིཨཱགིལཱཡནཏཱལུགལསོསཱདིཝསེན ཀཱཡཀིལམཐོ ཙེཝ ཀཱཡཝིཧེསཱ ཙ ཝེདིཏབྦཱ, སཱ ཙ ཁོ དེསནཱཡ ཨཏྠཾ ཨཛཱནནྟཱནཉྩ ཨཔྤཊིཔཛྫནྟཱནཉྩ ཝསེན. ཛཱནནྟཱནཾ པན པཊིཔཛྫནྟཱནཉྩ དེསནཱཡ ཀཱཡཔརིསྶམོཔི སཏྠུ ཨཔརིསྶམོཝ, ཏེནཱཧ བྷགཝཱ ‘‘ན ཙ མཾ དྷམྨཱདྷིཀརཎཾ ཝིཧེསེཏཱི’’ཏི. ཏེནེཝ ཝུཏྟཾ ‘‘ཡཱ ཨཛཱནནྟཱནཾ དེསནཱ ནཱམ, སོ མམ ཀིལམཐོ ཨསྶཱ’’ཏི.

ཨཔིསྶཱུཏི སམྤིཎྜནཏྠེ ནིཔཱཏོ. སོ ན ཀེཝལཾ ཨེཏདཧོསི, ཨིམཱཔི གཱཐཱ པཊིབྷཾསཱུཏི དཱིཔེཏི. བྷགཝནྟནྟི པཊིསདྡཡོགེན སཱམིཨཏྠེ ཨུཔཡོགཝཙནནྟི ཨཱཧ ‘‘བྷགཝཏོ’’ཏི. ཝུདྡྷིཔྤཏྟཱ ཨཙྪརིཡཱ ཝཱ ཨནཙྪརིཡཱ. ཝུདྡྷིཨཏྠོཔི ཧི ཨ-ཀཱརོ ཧོཏི ཡཐཱ ‘‘ཨསེཀྑཱ དྷམྨཱ’’ཏི. ཀཔྤཱནཾ ཙཏྟཱརི ཨསངྑྱེཡྻཱནི སཏསཧསྶཉྩ སདེཝཀསྶ ལོཀསྶ དྷམྨསཾཝིབྷཱགཀརཎཏྠམེཝ པཱརམིཡོ པཱུརེཏྭཱ ཨིདཱནི སམདྷིགཏདྷམྨརཛྫསྶ ཏཏྠ ཨཔྤོསྶུཀྐཏཱཔཏྟིདཱིཔནཏྟཱ གཱཐཱཏྠསྶ ¶ ཨནུཨཙྪརིཡཏཱ ཏསྶ ཝུདྡྷིཔྤཏྟི ཙ ཝེདིཏབྦཱ. ཨཏྠདྭཱརེན ཧི གཱཐཱནཾ ཨནཙྪརིཡཏཱ. གོཙརཱ ཨཧེསུནྟི ཨུཔཊྛཧཾསུ, ཨུཔཊྛཱནཉྩ ཝིཏཀྐཡིཏབྦཏཱཏི ཨཱཧ ‘‘པརིཝིཏཀྐཡིཏབྦབྷཱཝཾ པཱཔུཎིཾསཱུ’’ཏི.

ཀིཙྪེནཱཏི ན དུཀྑཔྤཊིཔདཱཡ. བུདྡྷཱནཉྷི ཙཏྟཱརོཔི མགྒཱ སུཁཔྤཊིཔདཱཝ ཧོནྟི. པཱརམཱིཔཱུརཎཀཱལེ པན སརཱགསདོསསམོཧསྶེཝ སཏོ ཨཱགཏཱགཏཱནཾ ཡཱཙཀཱནཾ ཨལངྐཏཔྤཊིཡཏྟཾ སཱིསཾ ཀནྟིཏྭཱ གལལོཧིཏཾ ནཱིཧརིཏྭཱ སུཨཉྫིཏཱནི ཨཀྑཱིནི ཨུཔྤཱཊེཏྭཱ ཀུལཝཾསཔྤདཱིཔཾ པུཏྟཾ མནཱཔཙཱརིནིཾ བྷརིཡནྟི ཨེཝམཱདཱིནི དེནྟསྶ ཨཉྙཱནི ཙ ཁནྟིཝཱདིསདིསེསུ ཨཏྟབྷཱཝེསུ ཚེཛྫབྷེཛྫཱདཱིནི པཱཔུཎནྟསྶ ཨཱགམནཱིཡཔཊིཔདཾ སནྡྷཱཡེཏཾ ཝུཏྟཾ. ཧ-ཨིཏི ཝཱ བྱཏྟནྟི ཨེཏསྨིཾ ཨཏྠེ ནིཔཱཏོ. ཨེཀཾསཏྠེཏི ཀེཙི. ཧ བྱཏྟཾ ཨེཀཾསེན ཝཱ ཨལཾ ནིཔྤཡོཛནཾ ཨེཝཾ ཀིཙྪེན ཨདྷིགཏཾ དྷམྨཾ དེསེཏུནྟི ཡོཛནཱ. ཧལནྟི ཝཱ ཨལནྟི ཨིམིནཱ སམཱནཏྠཾ པདཾ ‘‘ཧལནྟི ཝདཱམཱི’’ཏིཨཱདཱིསུ ཝིཡ. ‘‘པཀཱསིཏ’’ནྟིཔི པཋནྟི, དེསིཏནྟི ཨཏྠོ. ཨེཝཾ ཀིཙྪེན ཨདྷིགཏསྶ དྷམྨསྶ ཨལཾ དེསིཏཾ པརིཡཏྟཾ དེསིཏཾ, ཀོ ཨཏྠོ དེསིཏེནཱཏི ཝུཏྟཾ ཧོཏི. རཱགདོསཔརེཏེཧཱིཏི རཱགདོསཕུཊྛེཧི, ཕུཊྛཝིསེན ཝིཡ སཔྤེན རཱགེན དོསེན ཙ སམྥུཊྛེཧི ཨབྷིབྷཱུཏེཧཱིཏི ¶ ཨཏྠོ. ཨཐ ཝཱ རཱགདོསཔརེཏེཧཱིཏི རཱགདོསཱནུགཏེཧི, རཱགེན ཙ དོསེན ཙ ཨནུབནྡྷེཧཱིཏི ཨཏྠོ.

པཊིསོཏགཱམིནྟི (དཱི. ནི. ཨཊྛ. ༢.༦༥; མ. ནི. ཨཊྛ. ༡.༢༨༡; སཾ. ནི. ཨཊྛ. ༡.༡.༡༧༢) ནིཙྩགཱཧཱདཱིནཾ པཊིསོཏཾ ཨནིཙྩཾ དུཀྑམནཏྟཱ ཨསུབྷནྟི ཨེཝཾ གཏཾ པཝཏྟཾ ཙཏུསཙྩདྷམྨནྟི ཨཏྠོ. རཱགརཏྟཱཏི ཀཱམརཱགེན བྷཝརཱགེན དིཊྛིརཱགེན ཙ རཏྟཱ. ན དཀྑནྟཱིཏི ཨནིཙྩཾ དུཀྑམནཏྟཱ ཨསུབྷནྟི ཨིམིནཱ སབྷཱཝེན ན པསྶིསྶནྟི, ཏེ ཨཔསྶནྟེ ཀོ སཀྑིསྶཏི ཨནིཙྩནྟིཨཱདིནཱ སབྷཱཝེན ཡཱཐཱཝཏོ དྷམྨཾ ཛཱནཱཔེཏུནྟི ཨདྷིཔྤཱཡོ. རཱགདོསཔརེཏཏཱཔི ནེསཾ སམྨུལ༹ྷབྷཱཝེནེཝཱཏི ཨཱཧ ‘‘ཏམོཁནྡྷེན ཨཱཝུཊཱ’’ཏི, ཨཝིཛྫཱརཱསིནཱ ཨཛ྄ཛྷོཏྠཊཱཏི ཨཏྠོ.

ཨཔྤོསྶུཀྐཏཱཡ ཙིཏྟཾ ནམཏཱིཏི ཀསྨཱ པནསྶ ཨེཝཾ ཙིཏྟཾ ནམི, ནནུ ཨེས ‘‘མུཏྟོཧཾ མོཙེསྶཱམི, ཏིཎྞོཧཾ ཏཱརེསྶཱམི,

ཀིཾ མེ ཨཉྙཱཏཝེསེན, དྷམྨཾ སཙྪིཀཏེནིདྷ;

སབྦཉྙུཏཾ པཱཔུཎིཏྭཱ, ཏཱརཡིསྶཾ སདེཝཀ’’ནྟི. (བུ. ཝཾ. ༢.༥༥) –

པཏྠནཾ ¶ ཀཏྭཱ པཱརམིཡོ པཱུརེཏྭཱ སབྦཉྙུཏཾ པཏྟོཏི? སཙྩམེཝ, ཏདེཝ པཙྩཝེཀྑཎཱནུབྷཱཝེན པནསྶ ཨེཝཾ ཙིཏྟཾ ནམི. ཏསྶ ཧི སབྦཉྙུཏཾ པཏྭཱ སཏྟཱནཾ ཀིལེསགཧནཏཾ དྷམྨསྶ ཙ གམྦྷཱིརཏཾ པཙྩཝེཀྑནྟསྶ སཏྟཱནཾ ཀིལེསགཧནཏཱ ཙ དྷམྨགམྦྷཱིརཏཱ ཙ སབྦཱཀཱརེན པཱཀཊཱ ཛཱཏཱ. ཨཐསྶ ‘‘ཨིམེ སཏྟཱ ཀཉྫིཡཔུཎྞལཱབུ ཝིཡ ཏཀྐབྷརིཏཙཱཊི ཝིཡ ཝསཱཏེལཔཱིཏཔིལོཏིཀཱ ཝིཡ ཨཉྫནམཀྑིཏཧཏྠོ ཝིཡ ཙ ཀིལེསབྷརིཏཱ ཨཏིསཾཀིལིཊྛཱ རཱགརཏྟཱ དོསདུཊྛཱ མོཧམུལ༹ྷཱ, ཏེ ཀིཾ ནཱམ པཊིཝིཛ྄ཛྷིསྶནྟཱི’’ཏི ཙིནྟཡཏོ ཀིལེསགཧནཔཙྩཝེཀྑཎཱནུབྷཱཝེནཔི ཨེཝཾ ཙིཏྟཾ ནམི.

‘‘ཨཡཾ དྷམྨོ པཐཝཱིསནྡྷཱརཀཨུདཀཀྑནྡྷོ ཝིཡ གམྦྷཱིརོ, པབྦཏེན པཊིཙྪཱདེཏྭཱ ཋཔིཏོ སཱསཔོ ཝིཡ དུདྡསོ, སཏདྷཱ བྷིནྣསྶ ཝཱལསྶ ཀོཊི ཝིཡ ཨཎུ. མཡཱ ཧི ཨིམཾ དྷམྨཾ པཊིཝིཛ྄ཛྷིཏུཾ ཝཱཡམནྟེན ཨདིནྣཾ དཱནཾ ནཱམ ནཏྠི, ཨརཀྑིཏཾ སཱིལཾ ནཱམ ནཏྠི, ཨཔརིཔཱུརིཏཱ ཀཱཙི པཱརམཱི ནཱམ ནཏྠི, ཏསྶ མེ ནིརུསྶཱཧཾ ཝིཡ མཱརབལཾ ཝིདྷམནྟསྶཔི པཐཝཱི ¶ ན ཀམྤིཏྠ, པཋམཡཱམེ པུབྦེནིཝཱསཾ ཨནུསྶརནྟསྶཔི ན ཀམྤིཏྠ, མཛ྄ཛྷིམཡཱམེ དིབྦཙཀྑུཾ ཝིསོདྷེནྟསྶཔི ན ཀམྤིཏྠ, པཙྪིམཡཱམེ པན པཊིཙྩསམུཔྤཱདཾ པཊིཝིཛ྄ཛྷནྟསྶེཝ མེ དསསཧསྶིལོཀདྷཱཏུ ཀམྤིཏྠ. ཨིཏི མཱདིསེནཔི ཏིཀྑཉཱཎེན ཀིཙྪེནེཝཱཡཾ དྷམྨོ པཊིཝིདྡྷོ, ཏཾ ལོཀིཡམཧཱཛནཱ ཀཐཾ པཊིཝིཛ྄ཛྷིསྶནྟཱི’’ཏི དྷམྨགམྦྷཱིརཏཱཡ པཙྩཝེཀྑཎཱནུབྷཱཝེནཔི ཨེཝཾ ཙིཏྟཾ ནམཱིཏི ཝེདིཏབྦཾ.

ཨཔིཙ བྲཧྨུནཱ ཡཱཙིཏེ དེསེཏུཀཱམཏཱཡཔིསྶ ཨེཝཾ ཙིཏྟཾ ནམི. ཛཱནཱཏི ཧི བྷགཝཱ ‘‘མམ ཨཔྤོསྶུཀྐཏཱཡ ཙིཏྟེ ནམམཱནེ མཧཱབྲཧྨཱ དྷམྨདེསནཾ ཡཱཙིསྶཏི, ཨིམེ ཙ སཏྟཱ བྲཧྨགརུཀཱ, ཏེ ‘སཏྠཱ ཀིར དྷམྨཾ ན དེསེཏུཀཱམོ ཨཧོསི, ཨཐ ནཾ མཧཱབྲཧྨཱ ཡཱཙིཏྭཱ དེསཱཔེཏི, སནྟོ ཝཏ བྷོ དྷམྨོ པཎཱིཏོ’ཏི མཉྙམཱནཱ སུསྶཱུསིསྶནྟཱི’’ཏི. ཨིདམྤིསྶ ཀཱརཎཾ པཊིཙྩ ཨཔྤོསྶུཀྐཏཱཡ ཙིཏྟཾ ནམི, ནོ དྷམྨདེསནཱཡཱཏི ཝེདིཏབྦཾ.

༨. སཧམྤཏིསྶཱཏི སོ ཀིར ཀསྶཔསྶ བྷགཝཏོ སཱསནེ སཧཀོ ནཱམ ཐེརོ པཋམཛ྄ཛྷཱནཾ ནིབྦཏྟེཏྭཱ པཋམཛ྄ཛྷཱནབྷཱུམིཡཾ ཀཔྤཱཡུཀབྲཧྨཱ ཧུཏྭཱ ནིབྦཏྟོ, ཏཏྲ ནཾ སཧམྤཏི བྲཧྨཱཏི སཉྫཱནནྟི. ཏཾ སནྡྷཱཡཱཧ ‘‘བྲཧྨུནོ སཧམྤཏིསྶཱ’’ཏི. ནསྶཏི ཝཏཱཏི སོ ཀིར ཨིམཾ སདྡཾ ཏཐཱ ནིཙྪཱརེཏི, ཡཐཱ དསསཧསྶིལོཀདྷཱཏུབྲཧྨཱནོ སུཏྭཱ སབྦེ སནྣིཔཏིཾསུ. ཨཔྤརཛཀྑཛཱཏིཀཱཏི པཉྙཱམཡེ ཨཀྑིམྷི ཨཔྤཾ པརིཏྟཾ རཱགདོསམོཧརཛཾ ཨེཏེསཾ ཨེཝཾསབྷཱཝཱཏི ཨཔྤརཛཀྑཛཱཏིཀཱ. ཨཔྤཾ རཱགཱདིརཛཾ ཡེསཾ ཏེ སབྷཱཝཱ ཨཔྤརཛཀྑཛཱཏིཀཱཏི ¶ ཨེཝམེཏྠ ཨཏྠོ དཊྛབྦོ. ཨསྶཝནཏཱཏི ‘‘སཡཾ ཨབྷིཉྙཱ’’ཏིཨཱདཱིསུ ཝིཡ ཀརཎཏྠེ པཙྩཏྟཝཙནཾ, ཨསྶཝནཏཱཡཱཏི ཨཏྠོ. བྷཝིསྶནྟཱིཏི པུརིམབུདྡྷེསུ དསཔུཉྙཀིརིཡཝསེན ཀཏཱདྷིཀཱརཱ པརིཔཱཀགཏཔདུམཱནི ཝིཡ སཱུརིཡརསྨིསམྥསྶཾ དྷམྨདེསནཾཡེཝ ཨཱཀངྑམཱནཱ ཙཏུཔྤདིཀགཱཐཱཝསཱནེ ཨརིཡབྷཱུམིཾ ཨོཀྐམནཱརཧཱ ན ཨེཀོ, ན དྭེ, ཨནེཀསཏསཧསྶཱ དྷམྨསྶ ཨཉྙཱཏཱརོ བྷཝིསྶནྟཱིཏི དསྶེཏི.

པཱཏུརཧོསཱིཏི པཱཏུབྷཝི. སམལེཧི ཙིནྟིཏོཏི སམལེཧི པཱུརཎཀསྶཔཱདཱིཧི ཚཧི སཏྠཱརེཧི ཙིནྟིཏོ. ཏེ ཧི པུརེཏརཾ ཨུཔྤཛྫིཏྭཱ སཀལཛམྦུདཱིཔེ ཀཎྚཀེ པཏྠརམཱནཱ ཝིཡ ཝིསཾ སིཉྩམཱནཱ ཝིཡ ¶ ཙ སམལཾ མིཙྪཱདིཊྛིདྷམྨཾ དེསཡིཾསུ. ཏེ ཀིར བུདྡྷཀོལཱཧལཱནུསྶཝེན སཉྫཱཏཀུཏཱུཧལཱ ལོཀཾ ཝཉྩེཏྭཱ ཀོཧཉྙེ ཋཏྭཱ སབྦཉྙུཏཾ པཊིཛཱནནྟཱ ཡཾ ཀིཉྩི ཨདྷམྨཾཡེཝ དྷམྨོཏི དཱིཔེསུཾ. ཨཔཱཔུརེཏནྟི ཝིཝར ཨེཏཾ. ཨམཏསྶ དྭཱརནྟི ཨམཏསྶ ནིབྦཱནསྶ དྭཱརབྷཱུཏཾ ཨརིཡམགྒཾ. ཨིདཾ ཝུཏྟཾ ཧོཏི – ཨེཏཾ ཀསྶཔསྶ བྷགཝཏོ སཱསནནྟརདྷཱནཏོ པབྷུཏི པིཧིཏཾ ནིབྦཱནནགརསྶ མཧཱདྭཱརཾ ཨརིཡམགྒཾ སདྡྷམྨདེསནཱཧཏྠེན ཨཔཱཔུར ཝིཝར ཨུགྒྷཱཊེཧཱིཏི. སུཎནྟུ དྷམྨཾ ཝིམལེནཱནུབུདྡྷནྟི ཨིམེ སཏྟཱ རཱགཱདིམལཱནཾ ཨབྷཱཝཏོ ཝིམལེན སམྨཱསམྦུདྡྷེན ཨནུབུདྡྷཾ ཙཏུསཙྩདྷམྨཾ སུཎནྟུ ཏཱཝ བྷགཝཱཏི ཡཱཙཏི.

སེལཔབྦཏོ ཨུཙྩོ ཧོཏི ཐིརོ ཙ, ན པཾསུཔབྦཏོ མིསྶཀཔབྦཏོ ཝཱཏི ཨཱཧ ‘‘སེལེ ཡཐཱ པབྦཏམུདྡྷནིཊྛིཏོ’’ཏི. ཏསྶཏྠོ ‘‘སེལམཡེ ཨེཀགྒྷནེ པབྦཏམུདྡྷནི ཡཐཱཋིཏོཝ. ན ཧི ཏཏྠ ཋིཏསྶ དསྶནཏྠཾ གཱིཝུཀྑིཔནཔསཱརཎཱདིཀིཙྩཾ ཨཏྠཱི’’ཏི. ཏཐཱུཔམནྟི ཏཔྤཊིབྷཱགཾ སེལཔབྦཏཱུཔམཾ. དྷམྨམཡཾ པཱསཱདནྟི ལོཀུཏྟརདྷམྨམཱཧ. སོ ཧི སབྦསོ པསཱདཱཝཧོ སབྦདྷམྨེ ཨཏིཀྐམྨ ཨབྦྷུགྒཏཊྛེན པཱསཱདསདིསོ ཙ, པཉྙཱཔརིཡཱཡོ ཝཱ ཨིདྷ དྷམྨ-སདྡོ. པཉྙཱ ཧི ཨབྦྷུགྒཏཊྛེན པཱསཱདོཏི ཨབྷིདྷམྨེ ནིདྡིཊྛཱ. ཏཐཱ ཙཱཧ –

‘‘པཉྙཱཔཱསཱདམཱརུཡ྄ཧ, ཨསོཀོ སོཀིནིཾ པཛཾ;

པབྦཏཊྛོཝ བྷཱུམཊྛེ, དྷཱིརོ བཱལེ ཨཝེཀྑཏཱི’’ཏི. (དྷ. པ. ༢༨);

ཨཡཾ པནེཏྠ སངྑེཔཏྠོ – ཡཐཱ སེལཔབྦཏམུདྡྷནི ཡཐཱཋིཏོཝ ཙཀྑུམཱ པུརིསོ སམནྟཏོ ཛནཏཾ པསྶེཡྻ, ཏཐཱ ཏྭམྤི སུམེདྷ སུནྡརཔཉྙ སབྦཉྙུཏཉྙཱཎེན སམནྟཙཀྑུ བྷགཝཱ དྷམྨམཡཾ པཉྙཱམཡཾ པཱསཱདམཱརུཡ྄ཧ སཡཾ ཨཔེཏསོཀོ སོཀཱཝཏིཎྞཾ ཛཱཏིཛརཱབྷིབྷཱུཏཾ ཛནཏཾ ཨཝེཀྑསྶུ ¶ ཨུཔདྷཱརཡ ཨུཔཔརིཀྑཱཏི. ཨཡཾ པནེཏྠ ཨདྷིཔྤཱཡོ – ཡཐཱ ཧི པབྦཏཔཱདེ སམནྟཱ མཧནྟཾ ཁེཏྟཾ ཀཏྭཱ ཏཏྠ ཀེདཱརཔཱལཱི༹སུ ཀུཊིཀཱཡོ ཀཏྭཱ རཏྟིཾ ཨགྒིཾ ཛཱལེཡྻུཾ, ཙཏུརངྒསམནྣཱགཏཉྩ ཨནྡྷཀཱརཾ ཨསྶ, ཨཐ ཏསྶ པབྦཏསྶ མཏྠཀེ ཋཏྭཱ ཙཀྑུམཏོ པུརིསསྶ བྷཱུམིཾ ཨོལོཀཡཏོ ནེཝ ཁེཏྟཾ, ན ཀེདཱརཔཱལི༹ཡོ, ན ཀུཊིཡོ, ན ཏཏྠ སཡིཏམནུསྶཱ པཉྙཱཡེཡྻུཾ ཨནུཛྫལབྷཱཝཏོ, ཀུཊིཀཱསུ པན ཨགྒིཛཱལཱམཏྟམེཝ ¶ པཉྙཱཡེཡྻ ཨུཛྫལབྷཱཝཏོ, ཨེཝཾ དྷམྨཔཱསཱདཾ ཨཱརུཡ྄ཧ སཏྟནིཀཱཡཾ ཨོལོཀཡཏོ ཏཐཱགཏསྶ ཡེ ཏེ ཨཀཏཀལྱཱཎཱ སཏྟཱ, ཏེ ཨེཀཝིཧཱརེ དཀྑིཎཛཱཎུཔསྶེ ནིསིནྣཱཔི བུདྡྷཙཀྑུསྶ ཨཱཔཱཐཾ ནཱགཙྪནྟི ཉཱཎགྒིནཱ ཨནུཛྫལབྷཱཝཏོ ཨནུལཱ༹རབྷཱཝཏོ ཙ, རཏྟིཾ ཁིཏྟཱ སརཱ ཝིཡ ཧོནྟི. ཡེ པན ཀཏཀལྱཱཎཱ ཝེནེཡྻཔུགྒལཱ, ཏེ ཨེཝསྶ དཱུརེཔི ཋིཏཱ ཨཱཔཱཐམཱགཙྪནྟི པརིཔཀྐཉཱཎགྒིཏཱཡ སམུཛྫལབྷཱཝཏོ ཨུལཱ༹རསནྟཱནཏཱཡ ཙ, སོ ཨགྒི ཝིཡ ཧིམཝནྟཔབྦཏོ ཝིཡ ཙ. ཝུཏྟམྤི ཙེཏཾ –

‘‘དཱུརེ སནྟོ པཀཱསེནྟི, ཧིམཝནྟོཝ པབྦཏོ;

ཨསནྟེཏྠ ན དིསྶནྟི, རཏྟིཾ ཁིཏྟཱ ཡཐཱ སརཱ’’ཏི. (དྷ. པ. ༣༠༤);

ཨུཊྛེཧཱིཏི བྷགཝཏོ དྷམྨདེསནཏྠཾ ཙཱརིཀཙརཎཾ ཡཱཙནྟོ བྷཎཏི. ཨུཊྛེཧཱིཏི ཝཱ དྷམྨདེསནཱཡ ཨཔྤོསྶུཀྐཏཱསངྑཱཏསངྐོཙཱཔཏྟིཏོ ཀིལཱསུབྷཱཝཏོ ཨུཊྛཧ. ཝཱིརཱཏིཨཱདཱིསུ བྷགཝཱ སཱཏིསཡཙཏུབྦིདྷསམྨཔྤདྷཱནཝཱིརིཡཝནྟཏཱཡ ཝཱིརོ, དེཝཔུཏྟམཙྩུཀིལེསཱབྷིསངྑཱརཱནཾ ཝིཛིཏཏྟཱ ཝིཛིཏསངྒཱམོ, ཛཱཏིཀནྟཱརཱདིཏོ ཝེནེཡྻསཏྠཾ ཝཱཧནསམཏྠཏཱཡ ནིབྦཱནསངྑཱཏཾ ཁེམཔྤདེསཾ སམྤཱཔནསམཏྠཏཱཡ སཏྠཝཱཧོ, ཀཱམཙྪནྡཨིཎསྶ ཨབྷཱཝཏོ ཨཎཎོཏི ཝེདིཏབྦོ. ཡོ ཧི པརེསཾ ཨིཎཾ གཧེཏྭཱ ཝིནཱསེཏི, སོ ཏེཧི ‘‘ཨིཎཾ དེཧཱི’’ཏི ཏཛྫམཱནོཔི ཕརུསཾ ཝུཙྩམཱནོཔི ཝམྦྷམཱནོཔི ཝདྷིཡམཱནོཔི ཀིཉྩི པཊིཔྤཧརིཏུཾ ན སཀྐོཏི, སབྦཾ ཏིཏིཀྑཏི. ཏིཏིཀྑཀཱརཎཉྷིསྶ ཏཾ ཨིཎཾ ཧོཏི, ཨེཝམེཝ ཡོ ཡམྷི ཀཱམཙྪནྡེན རཛྫཏི, ཏཎྷཱགཧཎེན ཏཾ ཝཏྠུཾ གཎྷཱཏི, སོ ཏེན ཕརུསཾ ཝུཙྩམཱནོཔི ཝམྦྷམཱནོཔི ཝདྷིཡམཱནོཔི ཀིཉྩི པཊིཔྤཧརིཏུཾ ན སཀྐོཏི, སབྦཾ ཏིཏིཀྑཏི. ཏིཏིཀྑཀཱརཎཉྷིསྶ སོ ཀཱམཙྪནྡོ ཧོཏི གྷརསཱམིཀེཧི ཝིཧེཋིཡམཱནཱནཾ ཨིཏྠཱིནཾ ཝིཡ. ཀསྨཱ? ཨིཎསདིསཏྟཱ ཀཱམཙྪནྡསྶ.

༩. ཨཛ྄ཛྷེསནནྟི གརུཊྛཱནཱིཡཾ པཡིརུཔཱསིཏྭཱ གརུཏརཾ པཡོཛནཾ ཨུདྡིསྶ ཨབྷིཔཏྠནཱ ཨཛ྄ཛྷེསནཱ, སཱཔི ཨཏྠཏོ ཡཱཙནཱ ཨེཝ. བུདྡྷཙཀྑུནཱཏི ཨིནྡྲིཡཔརོཔརིཡཏྟཉཱཎེན ཙ ཨཱསཡཱནུསཡཉཱཎེན ཙ. ཨིམེསཉྷི དྭིནྣཾ ཉཱཎཱནཾ བུདྡྷཙཀྑཱུཏི ནཱམཾ, སབྦཉྙུཏཉྙཱཎསྶ སམནྟཙཀྑཱུཏི ¶ . ཧེཊྛིམཱནཾ ¶ ཏིཎྞཾ མགྒཉཱཎཱནཾ དྷམྨཙཀྑཱུཏི. ཨཔྤརཛཀྑེཏིཨཱདཱིསུ ཡེསཾ ཝུཏྟནཡེནེཝ པཉྙཱཙཀྑུམྷི རཱགཱདིརཛཾ ཨཔྤཾ, ཏེ ཨཔྤརཛཀྑཱ. ཡེསཾ ཏཾ མཧནྟཾ, ཏེ མཧཱརཛཀྑཱ. ཡེསཾ སདྡྷཱདཱིནི ཨིནྡྲིཡཱནི ཏིཀྑཱནི, ཏེ ཏིཀྑིནྡྲིཡཱ. ཡེསཾ ཏཱནི མུདཱུནི, ཏེ མུདིནྡྲིཡཱ. ཡེསཾ ཏེཡེཝ སདྡྷཱདཡོ ཨཱཀཱརཱ སུནྡརཱ, ཏེ སྭཱཀཱརཱ. ཡེ ཀཐིཏཀཱརཎཾ སལླཀྑེནྟི, སུཁེན སཀྐཱ ཧོནྟི ཝིཉྙཱཔེཏུཾ, ཏེ སུཝིཉྙཱཔཡཱ. ཡེ པརལོཀཉྩེཝ ཝཛྫཉྩ བྷཡཏོ པསྶནྟི, ཏེ པརལོཀཝཛྫབྷཡདསྶཱཝིནོ ནཱམ.

ཨུཔྤལཱནི ཨེཏྠ སནྟཱིཏི ཨུཔྤལིནཱི, གཙྪོཔི ཛལཱསཡོཔི, ཨིདྷ པན ཛལཱསཡོ ཨདྷིཔྤེཏོ, ཏསྨཱ ཨུཔྤལིནིཡནྟི ཨུཔྤལཝནེཏི ཨེཝམཏྠོ གཧེཏབྦོ. ཨིཏོ པརེསུཔི ཨེསེཝ ནཡོ. ཨནྟོནིམུགྒཔོསཱིནཱིཏི ཡཱནི ཨུདཀསྶ ཨནྟོ ནིམུགྒཱནེཝ ཧུཏྭཱ པུསྶནྟི ཝཌྜྷནྟི, ཏཱནི ཨནྟོནིམུགྒཔོསཱིནི. ཨུདཀཾ ཨཙྩུགྒམྨ ཏིཊྛནྟཱིཏི ཨུདཀཾ ཨཏིཀྐམིཏྭཱ ཏིཊྛནྟི. ཏཏྠ ཡཱནི ཨཙྩུགྒམྨ ཋིཏཱནི སཱུརིཡརསྨིསམྥསྶཾ ཨཱགམཡམཱནཱནི, ཏཱནི ཨཛྫ པུཔྥནཀཱནི. ཡཱནི སམོདཀཾ ཋིཏཱནི, ཏཱནི སྭེ པུཔྥནཀཱནི. ཡཱནི ཨུདཀཱ ཨནུགྒཏཱནི ཨནྟོནིམུགྒཔོསཱིནི, ཏཱནི ཏཏིཡདིཝསེ པུཔྥནཀཱནི. ཨུདཀཱ པན ཨནུགྒཏཱནི ཨཉྙཱནིཔི སརོགཨུཔྤལཱདཱིནི ནཱམ ཨཏྠི, ཡཱནི ནེཝ པུཔྥིསྶནྟི མཙྪཀཙྪཔབྷཀྑཱནེཝ བྷཝིསྶནྟི, ཏཱནི པཱལི༹ཾ ནཱརུལ༹ྷཱནི, ཨཱཧརིཏྭཱ པན དཱིཔེཏབྦཱནཱིཏི ཨཊྛཀཐཱཡཾ པཀཱསིཏཱནི. ཡཐེཝ ཧི ཏཱནི ཙཏུབྦིདྷཱནི པུཔྥཱནི, ཨེཝམེཝ ཨུགྒྷཊིཏཉྙཱུ ཝིཔཉྩིཏཉྙཱུ ནེཡྻོ པདཔརམོཏི ཙཏྟཱརོ པུགྒལཱ.

ཏཏྠ ཡསྶ པུགྒལསྶ སཧ ཨུདཱཧཊཝེལཱཡ དྷམྨཱབྷིསམཡོ ཧོཏི, ཨཡཾ ‘‘ཙཏྟཱརོ སཏིཔཊྛཱནཱ’’ཏིཨཱདིནཱ ནཡེན སངྑིཏྟེན མཱཏིཀཱཡ ཋཔིཡམཱནཱཡ དེསནཱནུསཱརེན ཉཱཎཾ པེསེཏྭཱ ཨརཧཏྟཾ གཎྷིཏུཾ སམཏྠོ པུགྒལོ ཨུགྒྷཊིཏཉྙཱུཏི ཝུཙྩཏི. ཡསྶ པུགྒལསྶ སངྑིཏྟེན བྷཱསིཏསྶ ཝིཏྠཱརེན ཨཏྠེ ཝིབྷཛིཡམཱནེ དྷམྨཱབྷིསམཡོ ཧོཏི, ཨཡཾ ཝུཙྩཏི པུགྒལོ ཝིཔཉྩིཏཉྙཱུ. ཡསྶ པུགྒལསྶ ཨུདྡེསཏོ པརིཔུཙྪཏོ ཡོནིསོ མནསིཀརོཏོ ཀལྱཱཎམིཏྟེ སེཝཏོ བྷཛཏོ པཡིརུཔཱསཏོ ཨནུཔུབྦེན དྷམྨཱབྷིསམཡོ ཧོཏི, ཨཡཾ ཝུཙྩཏི པུགྒལོ ནེཡྻོ. ཡསྶ པུགྒལསྶ བཧུམྤི སུཎཏོ བཧུམྤི བྷཎཏོ བཧུམྤི དྷཱརཡཏོ ¶ བཧུམྤི ཝཱཙཡཏོ ན ཏཱཡ ཛཱཏིཡཱ དྷམྨཱབྷིསམཡོ ཧོཏི, ཏེན ཨཏྟབྷཱཝེན མགྒཾ ཝཱ ཕལཾ ཝཱ ཨནྟམསོ ཛྷཱནཾ ཝཱ ཝིཔསྶནཾ ཝཱ ནིབྦཏྟེཏུཾ ན སཀྐོཏི, ཨཡཾ ཝུཙྩཏི པུགྒལོ པདཔརམོ. ཏཏྠ བྷགཝཱ ཨུཔྤལཝནཱདིསདིསཾ དསསཧསྶིལོཀདྷཱཏུཾ ཨོལོཀེནྟོ ཨཛྫ པུཔྥནཀཱནི ཝིཡ ཨུགྒྷཊིཏཉྙཱུ, སྭེ པུཔྥནཀཱནི ཝིཡ ཝིཔཉྩིཏཉྙཱུ, ཏཏིཡདིཝསེ པུཔྥནཀཱནི ཝིཡ ནེཡྻེ, མཙྪཀཙྪཔབྷཀྑཔུཔྥཱནི ¶ ཝིཡ པདཔརམེ ཙ ཨདྡས, པསྶནྟོ ཙ ‘‘ཨེཏྟཀཱ ཨཔྤརཛཀྑཱ, ཨེཏྟཀཱ མཧཱརཛཀྑཱ, ཏཏྲཱཔི ཨེཏྟཀཱ ཨུགྒྷཊིཏཉྙཱུ’’ཏི ཨེཝཾ སབྦཱཀཱརཏོཝ ཨདྡས.

ཏཏྠ ཏིཎྞཾ པུགྒལཱནཾ ཨིམསྨིཉྙེཝ ཨཏྟབྷཱཝེ བྷགཝཏོ དྷམྨདེསནཱ ཨཏྠཾ སཱདྷེཏི. པདཔརམཱནཾ ཨནཱགཏཏྠཱཡ ཝཱསནཱ ཧོཏི. ཨཐ བྷགཝཱ ཨིམེསཾ ཙཏུནྣཾ པུགྒལཱནཾ ཨཏྠཱཝཧཾ དྷམྨདེསནཾ ཝིདིཏྭཱ དེསེཏུཀམྱཏཾ ཨུཔྤཱདེཏྭཱ པུན སབྦེཔི ཏཱིསུ བྷཝེསུ སཏྟེ བྷབྦཱབྷབྦཝསེན དྭེ ཀོཊྛཱསེ ཨཀཱསི. ཡེ སནྡྷཱཡ ཝུཏྟཾ ‘‘ཡེ ཏེ སཏྟཱ ཀམྨཱཝརཎེན སམནྣཱགཏཱ ཝིཔཱཀཱཝརཎེན སམནྣཱགཏཱ ཀིལེསཱཝརཎེན སམནྣཱགཏཱ ཨསྶདྡྷཱ ཨཙྪནྡིཀཱ དུཔྤཉྙཱ ཨབྷབྦཱ ནིཡཱམཾ ཨོཀྐམིཏུཾ ཀུསལེསུ དྷམྨེསུ སམྨཏྟཾ, ཨིམེ ཏེ སཏྟཱ ཨབྷབྦཱ. ཀཏམེ ཏེ སཏྟཱ བྷབྦཱ? ཡེ ཏེ སཏྟཱ ན ཀམྨཱཝརཎེན…པེ… ཨིམེ ཏེ སཏྟཱ བྷབྦཱ’’ཏི (ཝིབྷ. ༨༢༦-༨༢༧). ཏཏྠ སབྦེཔི ཨབྷབྦཔུགྒལེ པཧཱཡ བྷབྦཔུགྒལེཡེཝ ཉཱཎེན པརིགྒཧེཏྭཱ ‘‘ཨེཏྟཀཱ རཱགཙརིཏཱ, ཨེཏྟཀཱ དོས, མོཧ, ཝིཏཀྐ, སདྡྷཱ, བུདྡྷིཙརིཏཱ’’ཏི ཚ ཀོཊྛཱསེ ཨཀཱསི, ཨེཝཾ ཀཏྭཱ དྷམྨཾ དེསེསྶཱམཱིཏི ཙིནྟེསི. ཨེཏྠ ཙ ཨཔྤརཛཀྑཱདིབྷབྦཱདིཝསེན ཨཱཝཛྫེནྟསྶ བྷགཝཏོ ཏེ སཏྟཱ པུཉྫཔུཉྫཱཝ ཧུཏྭཱ ཨུཔཊྛཧནྟི, ན ཨེཀེཀཱཏི དཊྛབྦཾ.

པཙྩབྷཱསཱིཏི པཏིཨབྷཱསི. ཨཔཱརུཏཱཏི ཝིཝཊཱ. ཨམཏསྶ དྭཱརཱཏི ཨརིཡམགྒོ. སོ ཧི ཨམཏསངྑཱཏསྶ ནིབྦཱནསྶ དྭཱརཾ, སོ མཡཱ ཝིཝརིཏྭཱ ཋཔིཏོ མཧཱཀརུཎཱུཔནིསྶཡེན སཡམྦྷཱུཉཱཎེན ཨདྷིགཏཏྟཱཏི དསྶེཏི. ‘‘ཨཔཱརུཏཾ ཏེསཾ ཨམཏསྶ དྭཱར’’ནྟི ཀེཙི པཋནྟི. པམུཉྩནྟུ སདྡྷནྟི སབྦེ ཨཏྟནོ སདྡྷཾ མུཉྩནྟུ ཝིསྶཛྫེནྟུ པཝེདེནྟུ, མཡཱ དེསིཏེ དྷམྨེ མཡི ཙ ཨཏྟནོ སདྡཧནཱཀཱརཾ ཨུཊྛཱཔེནྟཱུཏི ཨཏྠོ. པཙྪིམཔདདྭཡེ ཨཡམཏྠོ – ཨཧཉྷི ཨཏྟནོ པགུཎཾ སུཔྤཝཏྟིཏམྤི ཨིམཾ པཎཱིཏཾ ¶ ཨུཏྟམཾ དྷམྨཾ ཀཱཡཝཱཙཱཀིལམཐསཉྙཱི ཧུཏྭཱ ན བྷཱསིཾ, ན བྷཱསིསྶཱམཱིཏི ཙིནྟེསིཾ, ཨིདཱནི པན སབྦོ ཛནོ སདྡྷཱབྷཱཛནཾ ཨུཔནེཏུ, པཱུརེསྶཱམི ནེསཾ སངྐཔྤནྟི. ཨནྟརདྷཱཡཱིཏི སཏྠཱརཾ གནྡྷམཱལཱདཱིཧི པཱུཛེཏྭཱ ཨནྟརཧིཏོ, སཀཊྛཱནམེཝ གཏོཏི ཨཏྠོ. སཏྠུསནྟིཀཉྷི ཨུཔགཏཱནཾ དེཝཱནཾ བྲཧྨཱནཉྩ ཏསྶ པུརཏོ ཨནྟརདྷཱནཾ ནཱམ སཀཊྛཱནགམནམེཝ.

བྲཧྨཡཱཙནཀཐཱཝཎྞནཱ ནིཊྛིཏཱ.

པཉྩཝགྒིཡཀཐཱཝཎྞནཱ

༡༠. ཨེཏདཧོསཱིཏི ¶ ཨེཏཾ ཨཧོསི, ‘‘ཀསྶ ནུ ཁོ ཨཧཾ པཋམཾ དྷམྨཾ དེསེཡྻ’’ནྟི ཨཡཾ དྷམྨདེསནཱཔཊིསཾཡུཏྟོ ཝིཏཀྐོ ཨུདཔཱདཱིཏི ཨཏྠོ. ཨཱལཱ༹རོཏི ཏསྶ ནཱམཾ. དཱིགྷཔིངྒལོ ཀིརེས. སོ ཧི ཏུངྒསརཱིརཏཱཡ དཱིགྷོ, པིངྒལཙཀྑུཏཱཡ པིངྒལོ, ཏེནསྶ ‘‘ཨཱལཱ༹རོ’’ཏི ནཱམཾ ཨཧོསི. ཀཱལཱམོཏི གོཏྟཾ. པཎྜིཏོཏི (མ. ནི. ཨཊྛ. ༡.༢༨༤) པཎྜིཙྩེན སམནྣཱགཏོ, སམཱཔཏྟིཔཊིལཱབྷསཾསིདྡྷེན ཨདྷིགམབཱཧུསཙྩསངྑཱཏེན པཎྜིཏབྷཱཝེན སམནྣཱགཏོཏི ཨཏྠོ. བྱཏྟོཏི ཝེཡྻཏྟིཡེན སམནྣཱགཏོ, སམཱཔཏྟིཔཊིལཱབྷཔཙྩཡེན པཱརིཧཱརིཀཔཉྙཱསངྑཱཏེན བྱཏྟབྷཱཝེན སམནྣཱགཏོཏི ཨཏྠོ. མེདྷཱཝཱིཏི ཋཱནུཔྤཏྟིཡཱ པཉྙཱཡ སམནྣཱགཏོ. ཨཐ ཝཱ མེདྷཱཝཱིཏི ཏིཧེཏུཀཔཊིསནྡྷིཔཉྙཱསངྑཱཏཱཡ ཏཾཏཾཨིཏིཀཏྟབྦཏཱཔཉྙཱསངྑཱཏཱཡ ཙ མེདྷཱཡ སམནྣཱགཏོཏི ཨེཝམེཏྠ ཨཏྠོ དཊྛབྦོ. ཨཔྤརཛཀྑཛཱཏིཀོཏི སམཱཔཏྟིཡཱ ཝིཀྑམྦྷིཏཏྟཱ ནིཀྐིལེསཛཱཏིཀོ ཝིསུདྡྷསཏྟོ. ཨཱཛཱནིསྶཏཱིཏི སལླཀྑེསྶཏི པཊིཝིཛ྄ཛྷིསྶཏི.

བྷགཝཏོཔི ཁོ ཉཱཎཾ ཨུདཔཱདཱིཏི བྷགཝཏོཔི སབྦཉྙུཏཉྙཱཎཾ ཨུཔྤཛྫི. བྷགཝཱ ཀིར དེཝཏཱཡ ཀཐིཏེནེཝ ནིཊྛཾ ཨགནྟྭཱ སཡམྤི སབྦཉྙུཏཉྙཱཎེན ཨོལོཀེནྟོ ཨིཏོ སཏྟམདིཝསམཏྠཀེ ཀཱལཾ ཀཏྭཱ ཨཱཀིཉྩཉྙཱཡཏནེ ནིབྦཏྟོཏི ཨདྡས. ཏཾ སནྡྷཱཡཱཧ ‘‘བྷགཝཏོཔི ཁོ ཉཱཎཾ ཨུདཔཱདཱི’’ཏི. མཧཱཛཱནིཡོཏི སཏྟདིཝསབྦྷནྟརེ པཏྟབྦམགྒཕལཏོ ¶ པརིཧཱིནཏྟཱ མཧཏཱི ཛཱནི པརིཧཱནི ཨསྶཱཏི མཧཱཛཱནིཡོ. ཨཀྑཎེ ནིབྦཏྟཏྠཱ ཨིདྷ དྷམྨདེསནཊྛཱནཾ ཨཱགམནཔཱདཱཔི ནཏྠི, ཨཐཱཧཾ ཏཏྠ གཙྪེཡྻཾ, གནྟྭཱ དེསིཡམཱནཾ དྷམྨམྤིསྶ སོཏུཾ སོཏཔསཱདོཔི ནཏྠི, ཨེཝཾ མཧཱཛཱནིཡོ ཛཱཏོཏི དསྶེཏི. ཀིཾ པན བྷགཝཏཱ ཏཾ ཨཏྟནོ བུདྡྷཱནུབྷཱཝེན དྷམྨཾ ཉཱཔེཏུཾ ན སཀྐཱཏི? ཨཱམ ན སཀྐཱ, ན ཧི པརཏོགྷོསམནྟརེན སཱཝཀཱནཾ དྷམྨཱབྷིསམཡོ སམྦྷཝཏི, ཨཉྙཐཱ ཨིཏརཔཙྩཡརཧིཏསྶཔི དྷམྨཱབྷིསམཡེན བྷཝིཏབྦཾ, ན ཙ ཏཾ ཨཏྠི. ཝུཏྟཉྷེཏཾ – ‘‘དྭེམེ, བྷིཀྑཝེ, པཙྩཡཱ སམྨཱདིཊྛིཡཱ ཨུཔྤཱདཱཡ པརཏོ ཙ གྷོསོ ཨཛ྄ཛྷཏྟཉྩ ཡོནིསོམནསིཀཱརོ’’ཏི (ཨ. ནི. ༢.༡༢༧).

ཨུདཀོཏི ཏསྶ ནཱམཾ, རཱམསྶ པན པུཏྟཏཱཡ རཱམཔུཏྟོ. ཨབྷིདོསཀཱལཀཏོཏི ཨཌྜྷརཏྟེ ཀཱལཀཏོ. བྷགཝཏོཔི ཁོ ཉཱཎཾ ཨུདཔཱདཱིཏི ཨིདྷཱཔི ཀིར བྷགཝཱ དེཝཏཱཡ ཀཐིཏཝཙནེན སནྣིཊྛཱནཾ ཨཀཏྭཱ སབྦཉྙུཏཉྙཱཎེན ཨོལོཀེནྟོ ‘‘ཧིཡྻོ ཨཌྜྷརཏྟེ ཀཱལཾ ཀཏྭཱ ཨུདཀོ རཱམཔུཏྟོ ¶ ནེཝསཉྙཱནཱསཉྙཱཡཏནེ ནིབྦཏྟོ’’ཏི ཨདྡས, ཏསྨཱ ཨེཝཾ ཝུཏྟཾ. སེསཾ པུརིམསདིསམེཝ.

བཧཱུཔཀཱརཱཏི བཧུཨུཔཀཱརཱ. པདྷཱནཔཧིཏཏྟཾ ཨུཔཊྛཧིཾསཱུཏི པདྷཱནཏྠཱཡ པེསིཏཏྟབྷཱཝཾ ཝསནཊྛཱནེ པརིཝེཎསམྨཛྫནེན པཏྟཙཱིཝརཾ གཧེཏྭཱ ཨནུབནྡྷནེན མུཁོདཀདནྟཀཊྛདཱནཱདིནཱ ཙ ཨུཔཊྛཧིཾསུ. ཀེ པནེཏེ པཉྩཝགྒིཡཱ ནཱམ? ཡེ ཏེ –

རཱམོ དྷཛོ ལཀྑཎོ ཙཱཔི མནྟཱི;

ཀོཎྜཉྙོ ཙ བྷོཛོ སུཡཱམོ སུདཏྟོ;

ཨེཏེ ཏདཱ ཨཊྛ ཨཧེསུཾ བྲཱཧྨཎཱ;

ཚལ༹ངྒཝཱ མནྟཾ ཝིཡཱཀརིཾསཱུཏི. (མ. ནི. ཨཊྛ. ༡.༢༨༤; ཛཱ. ཨཊྛ. ༡.ནིདཱནཀཐཱ; ཨཔ. ཨཊྛ. ༡.ཨཝིདཱུརེནིདཱནཀཐཱ);

བོདྷིསཏྟསྶ ཛཱཏཀཱལེ སུཔིནཔཊིགྒཱཧཀཱ ཙེཝ ལཀྑཎཔཊིགྒཱཧཀཱ ཙ ཨཊྛ བྲཱཧྨཎཱ. ཏེསུ ཏཡོ དྭེདྷཱ བྱཱཀརིཾསུ ‘‘ཨིམེཧི ལཀྑཎེཧི སམནྣཱགཏོ ཨགཱརཾ ཨཛ྄ཛྷཱཝསམཱནོ རཱཛཱ ཧོཧིཏི ཙཀྐཝཏྟཱི, པབྦཛམཱནོ བུདྡྷོ’’ཏི. པཉྩ བྲཱཧྨཎཱ ཨེཀཾསབྱཱཀརཎཱ ཨཧེསུཾ ¶ ‘‘ཨིམེཧི ལཀྑཎེཧི སམནྣཱགཏོ ཨགཱརེ ན ཏིཊྛཏི, བུདྡྷོཝ ཧོཏཱི’’ཏི. ཏེསུ པུརིམཱ ཏཡོ ཡཐཱམནྟཔདཾ གཏཱ. ཨེཏེ ཧི ལཀྑཎམནྟསངྑཱཏཝེདཝཙནཱནུརཱུཔཾ པཊིཔནྣཱ དྭེ གཏིཡོ བྷཝནྟི ཨནཉྙཱཏི ཝུཏྟནིཡཱམེན ནིཙྪིནིཏུཾ ཨསཀྐོནྟཱ ཝུཏྟམེཝ པཊིཔཛྫིཾསུ, ན མཧཱཔུརིསསྶ བུདྡྷབྷཱཝཔྤཏྟིཾ པཙྩཱསཱིསིཾསུ. ཨིམེ པན ཀོཎྜཉྙཱདཡོ པཉྩ ‘‘ཨེཀཾསཏོ བུདྡྷོ བྷཝིསྶཏཱི’’ཏི ཛཱཏནིཙྪཡཏྟཱ མནྟཔདཾ ཨཏིཀྐནྟཱ. ཏེ ཨཏྟནཱ ལདྡྷཾ ཏུཊྛིདཱནཾ ཉཱཏཀཱནཾ ཝིསྶཛྫེཏྭཱ ‘‘ཨཡཾ མཧཱཔུརིསོ ཨགཱརེ ན ཨཛ྄ཛྷཱཝསིསྶཏི, ཨེཀནྟེན བུདྡྷོ བྷཝིསྶཏཱི’’ཏི ནིབྦེམཏིཀཱ བོདྷིསཏྟཾ ཨུདྡིསྶ སམཎཔབྦཛྫཾ པབྦཛིཏཱ, ཏེསཾ པུཏྟཱཏིཔི ཝདནྟི, ཏཾ ཨཊྛཀཐཱཡཾ པཊིཀྑིཏྟཾ. ཨེཏེ ཀིར དཧརཀཱལེཝ བཧཱུ མནྟེ ཛཱནིཾསུ, ཏསྨཱ ནེ བྲཱཧྨཎཱ ཨཱཙརིཡཊྛཱནེ ཋཔཡིཾསུ. ཏེ ‘‘པཙྪཱ ཨམྷེཧི པུཏྟདཱརཛཊཾ ཚིནྡིཏྭཱ ན སཀྐཱ བྷཝིསྶཏི པབྦཛིཏུ’’ནྟི དཧརཀཱལེཡེཝ པབྦཛིཏྭཱ རམཎཱིཡཱནི སེནཱསནཱནི པརིབྷུཉྫནྟཱ ཝིཙརིཾསུ. ཀཱལེན ཀཱལཾ པན ‘‘ཀིཾ བྷོ མཧཱཔུརིསོ མཧཱབྷིནིཀྑམནཾ ནིཀྑནྟོ’’ཏི པུཙྪནྟི. མནུསྶཱ ‘‘ཀུཧིཾ ཏུམྷེ མཧཱཔུརིསཾ པསྶིསྶཐ, ཏཱིསུ པཱསཱདེསུ ཝིཝིདྷནཱཊཀམཛ྄ཛྷེ དེཝོ ཝིཡ སམྤཏྟིཾ ཨནུབྷོཏཱི’’ཏི ཝདནྟི. ཏེ སུཏྭཱ ‘‘ན ཏཱཝ མཧཱཔུརིསསྶ ཉཱཎཾ པརིཔཱཀཾ གཙྪཏཱི’’ཏི ཨཔྤོསྶུཀྐཱ ཝིཧརིཾསུཡེཝ.

ཀསྨཱ ¶ པནེཏྠ བྷགཝཱ ‘‘བཧུཀཱརཱ ཁོ མེ པཉྩཝགྒིཡཱ’’ཏི ཨཱཧ. ཀིཾ ཨུཔཀཱརཀཱནཾཡེཝ ཨེས དྷམྨཾ དེསེཏི, ཨནུཔཀཱརཀཱནཾ ན དེསེཏཱིཏི? ནོ ན དེསེཏི. པརིཙཡཝསེན ཧེས ཨཱལཱ༹རཉྩེཝ ཀཱལཱམཾ ཨུདཀཉྩ རཱམཔུཏྟཾ ཨོལོཀེསི. ཨེཏསྨིཾ པན བུདྡྷཀྑེཏྟེ ཋཔེཏྭཱ ཨཉྙཱསིཀོཎྜཉྙཾ ཨཉྙོ པཋམཾ དྷམྨཾ སཙྪིཀཱཏུཾ སམཏྠོ ནཱམ ནཏྠི. ཀསྨཱ? ཏཐཱཝིདྷཨུཔནིསྶཡཏྟཱ. པུབྦེ ཀིར པུཉྙཀརཎཀཱལེ དྭེ བྷཱཏརོ ཨཧེསུཾ. ཏེ ཙ ཨེཀཏོ སསྶཾ ཨཀཾསུ. ཏཏྠ ཛེཊྛསྶ ‘‘ཨེཀསྨིཾ སསྶེ ནཝ ཝཱརེ ཨགྒསསྶདཱནཾ མཡཱ དཱཏབྦ’’ནྟི ཨཧོསི. སོ ཝཔྤཀཱལེ བཱིཛགྒཾ ནཱམ དཏྭཱ གབྦྷཀཱལེ ཀནིཊྛེན སདྡྷིཾ མནྟེསི ‘‘གབྦྷཀཱལེ གབྦྷཾ ཕཱལེཏྭཱ དསྶཱམཱི’’ཏི. ཀནིཊྛོ ‘‘ཏརུཎསསྶཾ ནཱསེཏུཀཱམོསཱི’’ཏི ཨཱཧ. ཛེཊྛོ ཀནིཊྛསྶ ཨནནུཝཏྟནབྷཱཝཾ ཉཏྭཱ ཁེཏྟཾ ཝིབྷཛིཏྭཱ ཨཏྟནོ ཀོཊྛཱསཏོ གབྦྷཾ ཕཱལེཏྭཱ ཁཱིརཾ ནཱིཧརིཏྭཱ སཔྤིཕཱཎིཏེན ཡོཛེཏྭཱ ཨདཱསི, པུཐུཀཀཱལེ པུཐུཀཾ ཀཱརེཏྭཱ ཨདཱསི ¶ , ལཱཡནེ ལཱཡནགྒཾ, ཝེཎིཀརཎེ ཝེཎགྒཾ, ཝེཎིཡོ པུརིསབྷཱརཝསེན བནྡྷིཏྭཱ ཀལཱཔཀརཎེ ཀལཱཔགྒཾ, ཁལེ ཀལཱཔཱནཾ ཋཔནདིཝསེ ཁལགྒཾ, མདྡིཏྭཱ ཝཱིཧཱིནཾ རཱསིཀརཎདིཝསེ ཁལབྷཎྜགྒཾ, ཀོཊྛཱགཱརེ དྷཉྙསྶ པཀྑིཔནདིཝསེ ཀོཊྛགྒནྟི ཨེཝཾ ཨེཀསྨིཾ སསྶེ ནཝ ཝཱརེ ཨགྒདཱནཾ ཨདཱསི. ཀནིཊྛོ པན ཁལཏོ དྷཉྙཾ ཨུདྡྷརིཏྭཱ གཧཎདིཝསེ ཨདཱསི. ཏེསུ ཛེཊྛོ ཨཉྙཱསིཀོཎྜཉྙཏྠེརོ ཛཱཏོ, ཀནིཊྛོ སུབྷདྡཔརིབྦཱཛཀོ. ཨིཏི ཨེཀསྨིཾ སསྶེ ནཝནྣཾ ཨགྒདཱནཱནཾ དིནྣཏྟཱ ཋཔེཏྭཱ ཐེརཾ ཨཉྙོ པཋམཾ དྷམྨཾ སཙྪིཀཱཏུཾ སམཏྠོ ནཱམ ནཏྠི. ‘‘ནཝནྣཾ ཨགྒདཱནཱནཾ དིནྣཏྟཱ’’ཏི ཨིདཉྩ ཏསྶ རཏྟཉྙཱུནཾ ཨགྒབྷཱཝཏྠཱཡ ཀཏཱབྷིནཱིཧཱརཱནུརཱུཔཾ པཝཏྟིཏསཱཝཀཔཱརམིཡཱ ཙིཎྞནྟེ པཝཏྟིཏཏྟཱ ཝུཏྟཾ. ཏིཎྞམྤི ཧི བོདྷིསཏྟཱནཾ ཏཾཏཾཔཱརམིཡཱ སིཁཱཔྤཏྟཀཱལེ པཝཏྟིཏཾ པུཉྙཾ ཨཔུཉྙཾ ཝཱ གརུཏརཝིཔཱཀམེཝ ཧོཏི, དྷམྨསྶ ཙ སབྦཔཋམཾ སཙྪིཀིརིཡཱཡ ཝིནཱ ཀཐཾ རཏྟཉྙཱུནཾ ཨགྒབྷཱཝསིདྡྷཱིཏི? ‘‘བཧུཀཱརཱ ཁོ མེ པཉྩཝགྒིཡཱ’’ཏི ཨིདཾ པན ཨུཔཀཱརཱནུསྶརཎམཏྟཀེནེཝ ཝུཏྟཾ.

ཨིསིཔཏནེ མིགདཱཡེཏི ཏསྨིཾ ཀིར པདེསེ ཨནུཔྤནྣེ བུདྡྷེ པཙྩེཀསམྦུདྡྷཱ གནྡྷམཱདནཔབྦཏེ སཏྟཱཧཾ ནིརོདྷསམཱཔཏྟིཡཱ ཝཱིཏིནཱམེཏྭཱ ནིརོདྷཱ ཝུཊྛཱཡ ནཱགལཏཱདནྟཀཊྛཾ ཁཱདིཏྭཱ ཨནོཏཏྟདཧེ མུཁཾ དྷོཝིཏྭཱ པཏྟཙཱིཝརམཱདཱཡ ཨཱཀཱསེན ཨཱགནྟྭཱ ནིཔཏནྟི. ཏཏྠ ཙཱིཝརཾ པཱརུཔིཏྭཱ ནགརེ པིཎྜཱཡ ཙརིཏྭཱ ཀཏབྷཏྟཀིཙྩཱ གམནཀཱལེཔི ཏཏོཡེཝ ཨུཔྤཏིཏྭཱ གཙྪནྟི. ཨིཏི ཨིསཡོ ཨེཏྠ ནིཔཏནྟི ཨུཔྤཏནྟི ཙཱཏི ཏཾ ཋཱནཾ ‘‘ཨིསིཔཏན’’ནྟི སངྑཾ གཏཾ, མིགཱནཾ པན ཨབྷཡཏྠཱཡ དིནྣཏྟཱ ‘‘མིགདཱཡོ’’ཏི ཝུཙྩཏི. ཏེན ཝུཏྟཾ ‘‘ཨིསིཔཏནེ མིགདཱཡེ’’ཏི. ཨཉྙེ བུདྡྷཱ པཋམཾ དྷམྨདེསནཏྠཱཡ གཙྪནྟཱ ཨཱཀཱསེན གནྟྭཱ ཏཏྠེཝ ཨོཏརནྟི, ཨམྷཱཀཾ པན བྷགཝཱ ཨུཔཀསྶ ཨཱཛཱིཝཀསྶ ཨུཔནིསྶཡཾ དིསྭཱ ‘‘ཨུཔཀོ ཨིམཾ ཨདྡྷཱནཾ ¶ པཊིཔནྣོ, སོ མཾ དིསྭཱ སལླཔིཏྭཱ གམིསྶཏི, ཨཐ པུན ནིབྦིནྣོ ཨཱགམྨ ཨརཧཏྟཾ སཙྪིཀརིསྶཏཱི’’ཏི ཉཏྭཱ ཨཊྛཱརསཡོཛནཾ མགྒཾ པདསཱཝ ཨགམཱསི. ཏེན ཝུཏྟཾ ‘‘ཡེན བཱརཱཎསཱི, ཏེན ཙཱརིཀཾ པཀྐཱམཱི’’ཏི.

༡༡. ཨནྟརཱ ཙ གཡཾ ཨནྟརཱ ཙ བོདྷིནྟི གཡཱཡ ཙ བོདྷིསྶ ཙ ཝིཝརེ ཏིགཱཝུཏནྟརེ ཋཱནེ. བོདྷིམཎྜཏོ ཧི གཡཱ ཏཱིཎི གཱཝུཏཱནི, བཱརཱཎསཱི ¶ ཨཊྛཱརས ཡོཛནཱནི. ཨུཔཀོ བོདྷིམཎྜསྶ ཙ གཡཱཡ ཙ ཨནྟརེ བྷགཝནྟཾ ཨདྡས. ཨནྟརཱ-སདྡེན པན ཡུཏྟཏྟཱ ཨུཔཡོགཝཙནཾ ཀཏཾ. ཨཱིདིསེསུ ཙ ཋཱནེསུ ཨཀྑརཙིནྟཀཱ ‘‘ཨནྟརཱ གཱམཉྩ ནདིཉྩ ཡཱཏཱི’’ཏི ཨེཝཾ ཨེཀམེཝ ཨནྟརཱ-སདྡཾ པཡུཛྫནྟི, སོ དུཏིཡཔདེནཔི ཡོཛེཏབྦོ ཧོཏི, ཨཡོཛིཡམཱནེ ཨུཔཡོགཝཙནཾ ན པཱཔུཎཱཏི སཱམིཝཙནསྶ པསངྒེ ཨནྟརཱ-སདྡཡོགེན ཨུཔཡོགཝཙནསྶ ཨིཙྪིཏཏྟཱ. ཨིདྷ པན ཡོཛེཏྭཱ ཨེཝ ཝུཏྟོ. ཨདྡྷཱནམགྒནྟི ཨདྡྷཱནསངྑཱཏཾ མགྒཾ, དཱིགྷམགྒནྟི ཨཏྠོ. ཨདྡྷཱནགམནསམཡསྶ ཝིབྷངྒེ ‘‘ཨདྡྷཡོཛནཾ གཙྪིསྶཱམཱིཏི བྷུཉྫིཏབྦ’’ནྟིཨཱདིཝཙནཏོ (པཱཙི. ༢༡༨) ཨདྡྷཡོཛནམྤི ཨདྡྷཱནམགྒོ ཧོཏི. བོདྷིམཎྜཏོ པན གཡཱ ཏིགཱཝུཏཾ. ཝིཔྤསནྣཱནཱིཏི སུཊྛུ པསནྣཱནི. ཨིནྡྲིཡཱནཱིཏི མནཙྪཊྛཱནི ཨིནྡྲིཡཱནི. པརིསུདྡྷོཏི ནིདྡོསོ. པརིཡོདཱཏོཏི ཏསྶེཝ ཝེཝཙནཾ. ནིརུཔཀྐིལེསཏཱཡེཝ ཧི ཨེས ‘‘པརིཡོདཱཏོ’’ཏི ཝུཏྟོ, ན སེཏབྷཱཝེན. ཨེཏསྶ པརིཡོདཱཏཏཾ དིསྭཱཝ ཨིནྡྲིཡཱནཾ ཝིཔྤསནྣཏཾ ཨཉྙཱསི, ནཡགྒཱཧཱིཔཉྙཱ ཀིརེསཱ ཏསྶ ཨཱཛཱིཝཀསྶ.

སབྦཱབྷིབྷཱུཏི སབྦཾ ཏེབྷཱུམཀདྷམྨཾ ཨབྷིབྷཝིཏྭཱ ཋིཏོ. སབྦཝིདཱུཏི སབྦཾ ཙཏུབྷཱུམཀདྷམྨཾ ཨཝེདིཾ ཨཉྙཱསིཾ སབྦསོ ཉེཡྻཱཝརཎསྶ པཧཱིནཏྟཱ. སབྦེསུ དྷམྨེསུ ཨནཱུཔལིཏྟོཏི སབྦེསུ ཏེབྷཱུམཀདྷམྨེསུ རཛྫནདུསྶནམུཡ྄ཧནཱདིནཱ ཀིལེསལེཔེན ཨལིཏྟོ. སབྦཉྫཧོཏི སབྦཾ ཏེབྷཱུམཀདྷམྨཾ ཛཧིཏྭཱ ཋིཏོ. ཨཔྤཧཱཏབྦམྤི ཧི ཀུསལཱབྱཱཀཏཾ ཏཔྤཊིབདྡྷཀིལེསཔྤཧཱནེན པཧཱིནཏྟཱ ན ཧོཏཱིཏི ཛཧིཏམེཝ ཧོཏི. ཏཎྷཀྑཡེ ཝིམུཏྟོཏི ཏཎྷཀྑཡེ ནིབྦཱནེ ཨཱརམྨཎཀརཎཝསེན ཝིམུཏྟོ. སཡཾ ཨབྷིཉྙཱཡཱཏི སབྦཾ ཙཏུབྷཱུམཀདྷམྨཾ ཨཏྟནཱཝ ཛཱནིཏྭཱ. ཀམུདྡིསེཡྻནྟི ཀཾ ཨཉྙཾ ‘‘ཨཡཾ མེ ཨཱཙརིཡོ’’ཏི ཨུདྡིསེཡྻཾ.

ན མེ ཨཱཙརིཡོ ཨཏྠཱིཏི ལོཀུཏྟརདྷམྨེ མཡ྄ཧཾ ཨཱཙརིཡོ ནཱམ ནཏྠི. ཀིཉྩཱཔི ཧི ལོཀིཡདྷམྨཱནམྤི ཡཱདིསོ ལོཀནཱཐསྶ ཨདྷིགམོ, ན ཏཱདིསོ ཨདྷིགམོ པརཱུཔདེསོ ཨཏྠི, ལོཀུཏྟརདྷམྨེ པནསྶ ལེསོཔི ནཏྠི. ནཏྠི མེ པཊིཔུགྒལོཏི མཡ྄ཧཾ སཱིལཱདཱིཧི གུཎེཧི པཊིནིདྷིབྷཱུཏོ པུགྒལོ ནཱམ ནཏྠི. སམྨཱསམྦུདྡྷོཏི ཧེཏུནཱ ནཡེན ཙཏྟཱརི སཙྩཱནི སཡཾ བུདྡྷོ ¶ . སཱིཏིབྷཱུཏོཏི སབྦཀིལེསགྒིནིབྦཱཔནེན སཱིཏིབྷཱུཏོ, ཀིལེསཱནཾ ཡེཝ ནིབྦུཏཏྟཱ ནིབྦུཏོ.

ཀཱསིནཾ ¶ པུརནྟི ཀཱསིརཊྛེ ནགརཾ. ཨཱཧཉྪནྟི ཨཱཧནིསྶཱམི. ཨམཏདུནྡུབྷིནྟི ཝེནེཡྻཱནཾ ཨམཏཱདྷིགམཱཡ ཨུགྒྷོསནཱདིཾ ཀཏྭཱ སཏྠུ དྷམྨདེསནཱ ‘‘ཨམཏདུནྡུབྷཱི’’ཏི ཝུཏྟཱ, དྷམྨཙཀྐཔཊིལཱབྷཱཡ ཏཾ ཨམཏབྷེརིཾ པཧརིསྶཱམཱིཏི གཙྪཱམཱིཏི ཝུཏྟཾ ཧོཏི.

ཨརཧསི ཨནནྟཛིནོཏི ཨནནྟཛིནོཔི བྷཝིཏུཾ ཡུཏྟོཏི ཨཏྠོ. ཨནནྟཉཱཎོ ཛིཏཀིལེསོཏི ཨནནྟཛིནོ. ཧུཔེཡྻཔཱཝུསོཏི ཨཱཝུསོ ཨེཝམྤི ནཱམ བྷཝེཡྻ, ཨེཝཾཝིདྷེ ནཱམ རཱུཔརཏནེ ཨཱིདིསེན ཉཱཎེན བྷཝིཏབྦནྟི ཨདྷིཔྤཱཡོ. ཨཡཉྷིསྶ པབྦཛྫཱཡ པཙྩཡོ ཛཱཏོ. ཀཏཱདྷིཀཱརོ ཧེས. ཏཐཱ ཧི བྷགཝཱ ཏེན སམཱགམནཏྠཾ པདསཱཝ ཏཾ མགྒཾ པཊིཔཛྫི. པཀྐཱམཱིཏི ཝངྐཧཱརཛནཔདཾ ནཱམ ཨགམཱསི.

ཏཏྠེཀཾ མིགལུདྡཀགཱམཀཾ ནིསྶཱཡ ཝཱསཾ ཀཔྤེསི, ཛེཊྛཀལུདྡཀོ ཏཾ ཨུཔཊྛཱསི. ཏསྨིཉྩ ཛནཔདེ ཙཎྜཱ མཀྑིཀཱ ཧོནྟི. ཨཐ ནཾ ཨེཀཱཡ ཙཱཊིཡཱ ཝསཱཔེསུཾ. མིགལུདྡཀོ དཱུརཾ མིགཝཾ གཙྪནྟོ ‘‘ཨམྷཱཀཾ ཨརཧནྟེ མཱ པམཛྫཱི’’ཏི ཙཱཔཾ ནཱམ དྷཱིཏརཾ ཨཱཎཱཔེཏྭཱ ཨགམཱསི སདྡྷིཾ པུཏྟབྷཱཏུཀེཧི. སཱ ཙསྶ དྷཱིཏཱ དསྶནཱིཡཱ ཧོཏི ཀོཊྛཱསསམྤནྣཱ. དུཏིཡདིཝསེ ཨུཔཀོ གྷརཾ ཨཱགཏོ ཏཾ དཱརིཀཾ སབྦཾ ཨུཔཙཱརཾ ཀཏྭཱ པརིཝིསིཏུཾ ཨུཔགཏཾ དིསྭཱ རཱགེན ཨབྷིབྷཱུཏོ བྷུཉྫིཏུམྤི ཨསཀྐོནྟོ བྷཱཛནེན བྷཏྟཾ ཨཱདཱཡ ཝསནཊྛཱནཾ གནྟྭཱ བྷཏྟཾ ཨེཀམནྟཾ ནིཀྑིཔིཏྭཱ ‘‘སཙེ ཙཱཔཾ ལབྷཱམི, ཛཱིཝཱམི. ནོ ཙེ, མརཱམཱི’’ཏི ནིརཱཧཱརོ སཡི. སཏྟམེ དིཝསེ མཱགཝིཀོ ཨཱགནྟྭཱ དྷཱིཏརཾ ཨུཔཀསྶ པཝཏྟིཾ པུཙྪི. སཱ ‘‘ཨེཀདིཝསམེཝ ཨཱགནྟྭཱ པུན ནཱགཏཔུབྦོ’’ཏི ཨཱཧ.

མཱགཝིཀོ ཨཱགཏཝེསེནེཝ ནཾ ཨུཔསངྐམིཏྭཱ པུཙྪིསྶཱམཱིཏི ཏངྑཎཾཡེཝ གནྟྭཱ ‘‘ཀིཾ, བྷནྟེ, ཨཕཱསུཀ’’ནྟི པཱདེ པརཱམསནྟོ པུཙྪི. ཨུཔཀོ ནིཏྠུནནྟོ པརིཝཏྟཏིཡེཝ. སོ ‘‘ཝད བྷནྟེ, ཡཾ མཡཱ སཀྐཱ ཀཱཏུཾ, སབྦཾ ཀརིསྶཱམཱི’’ཏི ཨཱཧ. ཨུཔཀོ ‘‘སཙེ ཙཱཔཾ ལབྷཱམི, ཛཱིཝཱམི, ནོ ཙེ, མཡ྄ཧམེཝ མརཎཾ སེཡྻོ’’ཏི ཨཱཧ. ཛཱནཱསི ཀིར, བྷནྟེ, ཀིཉྩི སིཔྤནྟི? ན ཛཱནཱམཱིཏི. ན, བྷནྟེ, ཀིཉྩི སིཔྤཾ ཨཛཱནནྟེན སཀྐཱ གྷརཱཝཱསཾ ཨདྷིཊྛཱཏུནྟི. སོ ཨཱཧ ‘‘ནཱཧཾ ཀིཉྩི སིཔྤཾ ཛཱནཱམི, ཨཔིཙ ¶ ཏུམྷཱཀཾ མཾསཧཱརཀོ བྷཝིསྶཱམི, མཾསཉྩ ཝིཀྐིཎིསྶཱམཱི’’ཏི. མཱགཝིཀོ ‘‘ཨམྷཱཀམྤི ཨེཏདེཝ རུཙྩཏཱི’’ཏི ཨུཏྟརསཱཊཀཾ ¶ དཏྭཱ གྷརཾ ཨཱནེཏྭཱ དྷཱིཏརཾ ཨདཱསི. ཏེསཾ སཾཝཱསམནྭཱཡ པུཏྟོ ཝིཛཱཡི, ‘‘སུབྷདྡོ’’ཏིསྶ ནཱམཾ ཨཀཾསུ. ཙཱཔཱ ཏསྶ རོདནཀཱལེ ‘‘མཾསཧཱརཀསྶ པུཏྟ མིགལུདྡཀསྶ པུཏྟ མཱ རོདི མཱ རོདཱི’’ཏིཨཱདཱིནི ཝདམཱནཱ པུཏྟཏོསནགཱིཏེན ཨུཔཀཾ ཨུཔྤཎྜེསི. ‘‘བྷདྡེ ཏྭཾ མཾ ཨནཱཐོཏི མཉྙསི, ཨཏྠི མེ ཨནནྟཛིནོ ནཱམ སཧཱཡོ, ཏསྶཱཧཾ སནྟིཀཾ གམིསྶཱམཱི’’ཏི ཨཱཧ. ཙཱཔཱ ‘‘ཨེཝམཡཾ ཨཊྚཱིཡཏཱི’’ཏི ཉཏྭཱ པུནཔྤུནཾ ཀཐེསི. སོ ཨེཀདིཝསཾ ཨནཱརོཙེཏྭཱཝ མཛ྄ཛྷིམདེསཱབྷིམུཁོ པཀྐཱམི.

བྷགཝཱ ཙ ཏེན སམཡེན སཱཝཏྠིཡཾ ཝིཧརཏི ཛེཏཝནེ, ཨཐ ཁོ བྷགཝཱ པཊིཀཙྩེཝ བྷིཀྑཱུ ཨཱཎཱཔེསི ‘‘ཡོ, བྷིཀྑཝེ, ཨནནྟཛིནོཏི པུཙྪམཱནོ ཨཱགཙྪཏི, ཏསྶ མཾ དསྶེཡྻཱཐཱ’’ཏི. ཨུཔཀོཔི ཁོ ‘‘ཀུཧིཾ ཨནནྟཛིནོ ཝསཏཱི’’ཏི པུཙྪནྟོ ཨནུཔུབྦེན སཱཝཏྠིཾ ཨཱགནྟྭཱ ཝིཧཱརམཛ྄ཛྷེ ཋཏྭཱ ‘‘ཀུཧིཾ ཨནནྟཛིནོ’’ཏི པུཙྪི. ཏཾ བྷིཀྑཱུ བྷགཝཏོ སནྟིཀཾ ནཡིཾསུ. སོ ཙ བྷགཝནྟཾ དིསྭཱ ‘‘སཉྫཱནཱཐ མཾ བྷགཝཱ’’ཏི ཨཱཧ. ཨཱམ ཨུཔཀ སཉྫཱནཱམི, ཀུཧིཾ པན ཏྭཾ ཝསིཏྠཱཏི. ཝངྐཧཱརཛནཔདེ, བྷནྟེཏི. ཨུཔཀ མཧལླཀོསི ཛཱཏོ, པབྦཛིཏུཾ སཀྑིསྶསཱིཏི. པབྦཛིསྶཱམི, བྷནྟེཏི. བྷགཝཱ པབྦཱཛེཏྭཱ ཏསྶ ཀམྨཊྛཱནཾ ཨདཱསི. སོ ཀམྨཊྛཱནེ ཀམྨཾ ཀརོནྟོ ཨནཱགཱམིཕལེ པཏིཊྛཱཡ ཀཱལཾ ཀཏྭཱ ཨཝིཧེསུ ནིབྦཏྟོ, ནིབྦཏྟིཀྑཎེཡེཝ ཙ ཨརཧཏྟཾ པཱཔུཎི. ཨཝིཧེ ནིབྦཏྟམཏྟཱ ཧི སཏྟ ཛནཱ ཨརཧཏྟཾ པཱཔུཎིཾསུ, ཏེསཾ སོ ཨཉྙཏརོ. ཝུཏྟཉྷེཏཾ –

‘‘ཨཝིཧཾ ཨུཔཔནྣཱསེ, ཝིམུཏྟཱ སཏྟ བྷིཀྑཝོ;

རཱགདོསཔརིཀྑཱིཎཱ, ཏིཎྞཱ ལོཀེ ཝིསཏྟིཀཾ.

‘‘ཨུཔཀོ པལགཎྜོ ཙ, པུཀྐུསཱཏི ཙ ཏེ ཏཡོ;

བྷདྡིཡོ ཁཎྜདེཝོ ཙ, བཱཧུརགྒི ཙ སངྒིཡོ;

ཏེ ཧིཏྭཱ མཱནུསཾ དེཧཾ, དིབྦཡོགཾ ཨུཔཙྩགུ’’ནྟི. (སཾ. ནི. ༡.༥༠, ༡༠༥);

༡༢. སཎྛཔེསུནྟི ‘‘ནེཝ ཨབྷིཝཱདེཏབྦོ’’ཏིཨཱདིནཱ ཀཏིཀཾ ཨཀཾསུ. བཱཧུལླིཀོཏི ཙཱིཝརབཱཧུལླཱདཱིནཾ ཨཏྠཱཡ པཊིཔནྣོ. པདྷཱནཝིབྦྷནྟོཏི ¶ པདྷཱནཏོ པུབྦེ ཨནུཊྛིཏདུཀྐརཙརཎཏོ ཝིབྦྷནྟོ བྷཊྛོ པརིཧཱིནོ. ཨཱཝཏྟོ བཱཧུལླཱཡཱཏི ཙཱིཝརཱདིབཧུབྷཱཝཏྠཱཡ ཨཱཝཏྟོ. ཨཔིཙ ཁོ ཨཱསནཾ ཋཔེཏབྦནྟི ཨཔིཙ ཁོ པནསྶ ཨུཙྩཀུལེ ནིབྦཏྟསྶ ཨཱསནམཏྟཾ ¶ ཋཔེཏབྦནྟི ཝདིཾསུ. ཨསཎྛཧནྟཱཏི བུདྡྷཱནུབྷཱཝེན བུདྡྷཏེཛེན ཨབྷིབྷཱུཏཱ ཨཏྟནོ ཀཏིཀཱཡ ཋཱཏུཾ ཨསཀྐོནྟཱ. ནཱམེན ཙ ཨཱཝུསོཝཱདེན ཙ སམུདཱཙརནྟཱིཏི ‘‘གོཏམཱ’’ཏི ཙ ‘‘ཨཱཝུསོ’’ཏི ཙ ཝདནྟི, ‘‘ཨཱཝུསོ གོཏམ, མཡཾ ཨུརུཝེལཱཡཾ པདྷཱནཀཱལེ ཏུཡ྄ཧཾ པཏྟཙཱིཝརཾ གཧེཏྭཱ ཝིཙརིམྷ, མུཁོདཀཾ དནྟཀཊྛཾ ཨདམྷ, ཝུཏྠཔརིཝེཎཾ སམྨཛྫིམྷ, པཙྪཱ ཏེ ཀོ ཝཏྟཔཊིཔཏྟིཾ ཨཀཱསི, ཀཙྩི ཨམྷེསུ པཀྐནྟེསུ ན ཙིནྟཡིཏྠཱ’’ཏི ཨེཝརཱུཔཾ ཀཐཾ ཀཐེནྟཱིཏི ཨཏྠོ.

ན ཙིརསྶེཝཱཏི ཨཙིརེནེཝ. ཀུལཔུཏྟཱཏི དུཝིདྷཱ ཀུལཔུཏྟཱ ཛཱཏིཀུལཔུཏྟཱ ཨཱཙཱརཀུལཔུཏྟཱ ཙ, ཨེཏེ པན ཨུབྷཡཐཱཔི ཀུལཔུཏྟཱཡེཝ. ཨགཱརསྨཱཏི གྷརཱ. ཨགཱརཱཡ ཧིཏཾ ཨགཱརིཡཾ, ཀསིགོརཀྑཱདི ཀུཊུམྦཔོསནཀམྨཾ ཝུཙྩཏི. ནཏྠི ཨེཏྠ ཨགཱརིཡནྟི ཨནགཱརིཡཾ. པབྦཛྫཱཡེཏཾ ཨདྷིཝཙནཾ. པབྦཛནྟཱིཏི ཨུཔགཙྪནྟི ཨུཔསངྐམནྟི. ཏདནུཏྟརནྟི ཏཾ ཨནུཏྟརཾ. བྲཧྨཙརིཡཔརིཡོསཱནནྟི མགྒབྲཧྨཙརིཡསྶ པརིཡོསཱནཾ, ཨརཧཏྟཕལནྟི ཝུཏྟཾ ཧོཏི. ཏསྶ ཧི ཨཏྠཱཡ ཀུལཔུཏྟཱ པབྦཛནྟི. དིཊྛེཝ དྷམྨེཏི ཏསྨིཾཡེཝ ཨཏྟབྷཱཝེ. སཡཾ ཨབྷིཉྙཱ སཙྪིཀཏྭཱཏི ཨཏྟནོཡེཝ པཉྙཱཡ པཙྩཀྑཾ ཀཏྭཱ, ཨཔརཔྤཙྩཡཾ ཀཏྭཱཏི ཨཏྠོ. ཨུཔསམྤཛྫ ཝིཧརིསྶཐཱཏི པཱཔུཎིཏྭཱ སམྤཱདེཏྭཱ ཝིཧརིསྶཐ.

ཨིརིཡཱཡཱཏི དུཀྐརཨིརིཡཱཡ. པཊིཔདཱཡཱཏི དུཀྐརཔཊིཔཏྟིཡཱ. དུཀྐརཀཱརིཀཱཡཱཏི པསཏཔསཏམུགྒཡཱུསཱདིཨཱཧརཎཱདིནཱ དུཀྐརཀརཎེན. ཨུཏྟརི མནུསྶདྷམྨཱཏི མནུསྶདྷམྨཏོ ཨུཔརི. ཨལཾ ཨརིཡཾ ཀཱཏུནྟི ཨལམརིཡོ, ཨརིཡབྷཱཝཱཡ སམཏྠོཏི ཝུཏྟཾ ཧོཏི, ཉཱཎདསྶནམེཝ ཉཱཎདསྶནཝིསེསོ, ཨལམརིཡོ ཙ སོ ཉཱཎདསྶནཝིསེསོ ཙཱཏི ཨལམརིཡཉཱཎདསྶནཝིསེསོ. ཉཱཎདསྶནནྟི ཙ དིབྦཙཀྑུཔི ཝིཔསྶནཱཔི མགྒོཔི ཕལམྤི པཙྩཝེཀྑཎཉཱཎམྤི སབྦཉྙུཏཉྙཱཎམྤི ཝུཙྩཏི. ‘‘ཨཔྤམཏྟོ སམཱནོ ཉཱཎདསྶནཾ ཨཱརཱདྷེཏཱི’’ཏི (མ. ནི. ༡.༣༡༡) ཧི ཨེཏྠ དིབྦཙཀྑུ ཉཱཎདསྶནཾ ནཱམ. ‘‘ཉཱཎདསྶནཱཡ ཙིཏྟཾ ཨབྷིནཱིཧརཏི ཨབྷིནིནྣཱམེཏཱི’’ཏི (དཱི. ནི. ༡.༢༣༥) ཨེཏྠ ¶ ཝིཔསྶནཱཉཱཎཾ. ‘‘ཨབྷབྦཱ ཏེ ཉཱཎདསྶནཱཡ ཨནུཏྟརཱཡ སམྦོདྷཱཡཱ’’ཏི (ཨ. ནི. ༤.༡༩༦) ཨེཏྠ མགྒོ. ‘‘ཨཡམཉྙོ ཨུཏྟརིམནུསྶདྷམྨཱ ཨལམརིཡཉཱཎདསྶནཝིསེསོ ཨདྷིགཏོ ཕཱསུཝིཧཱརོ’’ཏི (མ. ནི. ༡.༣༢༨) ཨེཏྠ ཕལཾ. ‘‘ཉཱཎཉྩ པན མེ དསྶནཾ ཨུདཔཱདི ‘ཨཀུཔྤཱ མེ ཙེཏོཝིམུཏྟི, ཨཡམནྟིམཱ ཛཱཏི, ནཏྠི དཱནི པུནབྦྷཝོ’’’ཏི (སཾ. ནི. ༥.༡༠༨༡; མཧཱཝ. ༡༦) ཨེཏྠ པཙྩཝེཀྑཎཉཱཎཾ. ‘‘ཉཱཎཉྩ པན མེ དསྶནཾ ཨུདཔཱདི ‘སཏྟཱཧཀཱལཀཏོ ཨཱལཱ༹རོ ཀཱལཱམོ’’’ཏི (མ. ནི. ༡.༢༨༤; ༢.༣༤༠; མཧཱཝ. ༡༠) ¶ ཨེཏྠ སབྦཉྙུཏཉྙཱཎཾ. ཨིདྷ པན སབྦཉྙུཏཉྙཱཎཔདཊྛཱནོ ཨརིཡམགྒོ སབྦཉྙུཏཉྙཱཎམེཝ ཝཱ ཨདྷིཔྤེཏཾ.

ཨབྷིཛཱནཱཐ མེ ནོཏི ཨབྷིཛཱནཱཐ ནུ མེ. ཨེཝརཱུཔཾ པབྷཱཝིཏམེཏནྟི ཨེཏྠ ཨེཝརཱུཔཾ ཝཱཀྱབྷེདནྟི ཨཏྠོ, ཨཔི ནུ ཨཧཾ ཨུརུཝེལཱཡཾ པདྷཱནེ ཏུམྷཱཀཾ སངྒཎྷནཏྠཾ ཨནུཀྐཎྛནཏྠཾ རཏྟིཾ ཝཱ དིཝཱ ཝཱ ཨཱགནྟྭཱ ‘‘ཨཱཝུསོ, མཡཾ ཡཏྠ ཀཏྠཙི གམིསྶཱམཱཏི མཱ ཝིཏཀྐཡིཏྠ, མཡ྄ཧཾ ཨོབྷཱསོ ཝཱ ཀམྨཊྛཱནནིམིཏྟཾ ཝཱ པཉྙཱཡཏཱི’’ཏི ཨེཝརཱུཔཾ ཀཉྩི ཝཙནབྷེདཾ ཨཀཱསིནྟི ཨདྷིཔྤཱཡོ. ཏེ ཨེཀཔདེནེཝ སཏིཾ ལབྷིཏྭཱ ཨུཔྤནྣགཱརཝཱ ‘‘ཨདྡྷཱ ཨེས བུདྡྷོ ཛཱཏོ’’ཏི སདྡཧིཏྭཱ ‘‘ནོ ཧེཏཾ བྷནྟེ’’ཏི ཨཱཧཾསུ. ཨསཀྑི ཁོ བྷགཝཱ པཉྩཝགྒིཡེ བྷིཀྑཱུ སཉྙཱཔེཏུནྟི བྷགཝཱ པཉྩཝགྒིཡེ བྷིཀྑཱུ ‘‘བུདྡྷོ ཨཧ’’ནྟི ཛཱནཱཔེཏུཾ ཨསཀྑི. ཨཉྙཱ ཙིཏྟཾ ཨུཔཊྛཱཔེསུནྟི ཨཉྙཱཡ ཨརཧཏྟཔྤཏྟིཡཱ ཙིཏྟཾ ཨུཔཊྛཔེསུཾ ཨབྷིནཱིཧརིཾསུ.

དྷམྨཙཀྐཔྤཝཏྟནསུཏྟཝཎྞནཱ

༡༣. དྭེམེ, བྷིཀྑཝེ, ཨནྟཱཏི དྭེ ཨིམེ, བྷིཀྑཝེ, ཀོཊྛཱསཱ, དྭེ བྷཱགཱཏི ཨཏྠོ. བྷཱགཝཙནོ ཧེཏྠ ཨནྟ-སདྡོ ‘‘པུབྦནྟེ ཉཱཎཾ ཨཔརནྟེ ཉཱཎ’’ནྟིཨཱདཱིསུ (དྷ. ས. ༡༠༦༣) ཝིཡ. ཨིམསྶ པན པདསྶ ཨུཙྩཱརཎསམཀཱལཾ པཝཏྟནིགྒྷོསོ བུདྡྷཱནུབྷཱཝེན ཧེཊྛཱ ཨཝཱིཙིཾ ཨུཔརི བྷཝགྒཾ པཏྭཱ དསསཧསྶིལོཀདྷཱཏུཾ ཕརིཏྭཱ ཨཊྛཱསི. ཏསྨིཾཡེཝ སམཡེ པརིཔཀྐཀུསལམཱུལཱ སཙྩཱབྷིསམྦོདྷཱཡ ཀཏཱདྷིཀཱརཱ ཨཊྛཱརསཀོཊིསངྑཱ བྲཧྨཱནོ སམཱགཙྪིཾསུ. པཙྪིམདིསཱཡ སཱུརིཡོ ཨཏྠམེཏི, པཱཙཱིནདིསཱཡ ཨཱསཱལ༹ྷནཀྑཏྟེན ཡུཏྟོ པུཎྞཙནྡོ ཨུགྒཙྪཏི. ཏསྨིཾ སམཡེ བྷགཝཱ ¶ དྷམྨཙཀྐཔྤཝཏྟནསུཏྟཾ ཨཱརབྷནྟོ ‘‘དྭེམེ, བྷིཀྑཝེ, ཨནྟཱ’’ཏིཨཱདིམཱཧ.

ཏཏྠ པབྦཛིཏེནཱཏི གིཧིབནྡྷནཾ ཚེཏྭཱ པབྦཛྫུཔགཏེན. ན སེཝིཏབྦཱཏི ན ཝལ༹ཉྫེཏབྦཱ ནཱནུཡུཉྫིཏབྦཱ. ཡོ ཙཱཡཾ ཀཱམེསུ ཀཱམསུཁལླིཀཱནུཡོགོཏི ཡོ ཙ ཨཡཾ ཝཏྠུཀཱམེསུ ཀིལེསཀཱམསུཁསྶ ཨནུཡོགོ, ཀིལེསཀཱམསཾཡུཏྟསྶ སུཁསྶ ཨནུགཏོཏི ཨཏྠོ. ཧཱིནོཏི ལཱམཀོ. གམྨོཏི གཱམཝཱསཱིནཾ སནྟཀོ ཏེཧི སེཝིཏབྦཏཱཡ. པོཐུཛྫནིཀོཏི པུཐུཛྫནེན ཨནྡྷབཱལཛནེན ཨཱཙིཎྞོ. ཨནརིཡོཏི ན ཨརིཡོ ན ཝིསུདྡྷོ ན ཨུཏྟམོ, ན ཝཱ ཨརིཡཱནཾ སནྟཀོ. ཨནཏྠསཾཧིཏོཏི ན ཨཏྠསཾཧིཏོ, ཧིཏསུཁཱཝཧཀཱརཎཾ ཨནིསྶིཏོཏི ཨཏྠོ. ཨཏྟཀིལམཐཱནུཡོགོཏི ཨཏྟནོ ཀིལམཐསྶ ཨནུཡོགོ, དུཀྑཀརཎཾ དུཀྑུཔྤཱདནནྟི ཨཏྠོ. དུཀྑོཏི ¶ ཀཎྚཀཱཔསྶཡསེཡྻཱདཱིཧི ཨཏྟབཱདྷནེཧི དུཀྑཱཝཧོ. མཛ྄ཛྷིམཱ པཊིཔདཱཏི ཨརིཡམགྒཾ སནྡྷཱཡ ཝུཏྟཾ. མགྒོ ཧི ཀཱམསུཁལླིཀཱནུཡོགོ ཨེཀོ ཨནྟོ, ཨཏྟཀིལམཐཱནུཡོགོ ཨེཀོ ཨནྟོ, ཨེཏེ དྭེ ཨནྟེ ན ཨུཔེཏི ན ཨུཔགཙྪཏི, ཝིམུཏྟོ ཨེཏེཧི ཨནྟེཧི, ཏསྨཱ ‘‘མཛ྄ཛྷིམཱ པཊིཔདཱ’’ཏི ཝུཙྩཏི. ཨེཏེསཾ མཛ྄ཛྷེ བྷཝཏྟཱ མཛ྄ཛྷིམཱ, ཝཊྚདུཀྑནིསྶརཎཏྠིཀེཧི པཊིཔཛྫིཏབྦཏོ ཙ པཊིཔདཱཏི, ཏཐཱ ལོབྷོ ཨེཀོ ཨནྟོ, དོསོ ཨེཀོ ཨནྟོ. སསྶཏཾ ཨེཀཾ ཨནྟཾ, ཨུཙྪེདོ ཨེཀོ ཨནྟོཏི པུརིམནཡེནེཝ ཝིཏྠཱརེཏབྦཾ.

ཙཀྑུཀརཎཱིཏིཨཱདཱིཧི ཏམེཝ པཊིཔདཾ ཐོམེཏི. པཉྙཱཙཀྑུཾ ཀརོཏཱིཏི ཙཀྑུཀརཎཱི. སཱ ཧི ཙཏུནྣཾ སཙྩཱནཾ དསྶནཱཡ སཾཝཏྟཏི པརིཉྙཱབྷིསམཡཱདིབྷེདསྶ དསྶནསྶ པཝཏྟནཊྛེནཱཏི ‘‘ཙཀྑུཀརཎཱི’’ཏི ཝུཙྩཏི. ཏཡིདཾ སཏིཔི པཊིཔདཱཡ ཨནཉྙཏྟེ ཨཝཡཝཝསེན སིཛ྄ཛྷམཱནོ ཨཏྠོ སམུདཱཡེན ཀཏོ ནཱམ ཧོཏཱིཏི ཨུཔཙཱརཝསེན ཝུཏྟནྟི དཊྛབྦཾ. དུཏིཡཔདཾ ཏསྶེཝ ཝེཝཙནཾ. ཨུཔསམཱཡཱཏི ཀིལེསུཔསམཏྠཱཡ. ཨབྷིཉྙཱཡཱཏི ཙཏུནྣཾ སཙྩཱནཾ ཨབྷིཛཱནནཏྠཱཡ. སམྦོདྷཱཡཱཏི ཏེསཾཡེཝ སམྦུཛ྄ཛྷནཏྠཱཡ. ནིབྦཱནཱཡཱཏི ནིབྦཱནསཙྪིཀིརིཡཱཡ. ཨཐ ཝཱ ནིབྦཱནཱཡཱཏི ཨནུཔཱདིསེསནིབྦཱནཱཡ. ‘‘ཨུཔསམཱཡཱ’’ཏི ཧི ཨིམིནཱ སཨུཔཱདིསེསནིབྦཱནཾ གཧིཏཾ.

ཨིདཱནི ¶ ཏཾ མཛ྄ཛྷིམཔྤཊིཔདཾ སརཱུཔཏོ དསྶེཏུཀཱམོ ‘‘ཀཏམཱ ཙ སཱ’’ཏི པུཙྪིཏྭཱ ‘‘ཨཡམེཝཱ’’ཏིཨཱདིནཱ ནཡེན ཝིསྶཛྫེསི. ཏཏྠ ཨཡམེཝཱཏི ཨཝདྷཱརཎཝཙནཾ ཨཉྙསྶ ནིབྦཱནགཱམིམགྒསྶ ཨཏྠིབྷཱཝཔཊིསེདྷནཏྠཾ. སཏྟཱཔཊིཀྑེཔོ ཧི ཨིདྷ པཊིསེདྷནཾ ཨལབྦྷམཱནཏྟཱ ཨཉྙསྶ མགྒསྶ. ཨརིཡོཏི ཀིལེསཱནཾ ཨཱརཀཏྟཱ ཨརིཡོ ནིརུཏྟིནཡེན. ཨརིཔཧཱནཱཡ སཾཝཏྟཏཱིཏིཔི ཨརིཡོ ཨརཡོ པཱཔདྷམྨཱ ཡནྟི ཨཔགཙྪནྟི ཨེཏེནཱཏི ཀཏྭཱ. ཨརིཡེན བྷགཝཏཱ དེསིཏཏྟཱ ཨརིཡསྶ ཨཡནྟིཔི ཨརིཡོ, ཨརིཡབྷཱཝཔྤཊིལཱབྷཱཡ སཾཝཏྟཏཱིཏིཔི ཨརིཡོ. ཨེཏྠ པན ཨརིཡཀརོ ཨརིཡོཏིཔི ཨུཏྟརཔདལོཔེན ཨརིཡ-སདྡསིདྡྷི ཝེདིཏབྦཱ. ཨཊྛཧི ཨངྒེཧི ཨུཔེཏཏྟཱ ཨཊྛངྒིཀོ. མགྒངྒསམུདཱཡེ ཧི མགྒཝོཧཱརོ, སམུདཱཡོ ཙ སམུདཱཡཱིཧི སམནྣཱགཏོ ནཱམ ཧོཏི. ཨཡཾ པནེཏྠ ཝཙནཏྠོ – ཨཏྟནོ ཨཝཡཝབྷཱུཏཱནི ཨཊྛངྒཱནི ཨེཏསྶ སནྟཱིཏི ཨཊྛངྒིཀོཏི. པརམཏྠཏོ པན ཨངྒཱནིཡེཝ མགྒོ པཉྩངྒིཀཏཱུརིཡཱདཱིནི ཝིཡ, ན ཙ ཨངྒཝིནིམུཏྟོ ཚལ༹ངྒོ ཝེདོ ཝིཡ. ཀིལེསེ མཱརེནྟོ གཙྪཏཱིཏི མགྒོ ནིརུཏྟིནཡེན, ནིབྦཱནཾ མགྒཏི གཝེསཏཱིཏི ཝཱ མགྒོ. ཨརིཡམགྒོ ཧི ནིབྦཱནཾ ཨཱརམྨཎཾ ཀརོནྟོ གཝེསནྟོ ཝིཡ ཧོཏི. ནིབྦཱནཏྠིཀེཧི མགྒཱིཡཏཱིཏི ཝཱ མགྒོ ཝིཝཊྚཱུཔནིསྶཡཔུཉྙཀརཎཏོ ¶ པཊྛཱཡ ཏདཏྠཔཊིཔཏྟིཏོ. གམྨཏི ཝཱ ཏེཧི པཊིཔཛྫཱིཡཏཱིཏི མགྒོ. ཨེཏྠ པན ཨཱདིཨནྟཝིཔརིཡཱཡེན སདྡསིདྡྷི ཝེདིཏབྦཱ.

སེཡྻཐིདནྟི ནིཔཱཏོ, ཏསྶ ཀཏམོ སོ ཨིཏི ཙེཏི ཨཏྠོ, ཀཏམཱནི ཝཱ ཏཱནི ཨཊྛངྒཱནཱིཏི. སབྦལིངྒཝིབྷཏྟིཝཙནསཱདྷཱརཎོ ཧི ཨཡཾ ནིཔཱཏོ. ཨེཀམེཀམྤི ཨངྒཾ མགྒོཡེཝ. ཡཐཱཧ ‘‘སམྨཱདིཊྛི མགྒོ ཙེཝ ཧེཏུ ཙཱ’’ཏི (དྷ. ས. ༡༠༣༩). པོརཱཎཱཔི བྷཎནྟི ‘‘དསྶནམགྒོ སམྨཱདིཊྛི, ཨབྷིནིརོཔནམགྒོ སམྨཱསངྐཔྤོ…པེ… ཨཝིཀྑེཔམགྒོ སམྨཱསམཱདྷཱི’’ཏི. ནནུ ཙ ཨངྒཱནི སམུདིཏཱནི མགྒོ ཨནྟམསོ སཏྟངྒཝིཀལསྶ ཨརིཡམགྒསྶ ཨབྷཱཝཏོཏི? སཙྩམེཏཾ སཙྩསམྤཊིཝེདྷེ, མགྒཔྤཙྩཡཏཱཡ པན ཡཐཱསཀཾ ཀིཙྩཀརཎེན པཙྩེཀམྤི ཏཱནི མགྒོཡེཝ, ཨཉྙཐཱ སམུདིཏཱནམྤི ཏེསཾ མགྒཀིཙྩཾ ན སམྦྷཝེཡྻཱཏི. སམྨཱདིཊྛིཨཱདཱིསུ སམྨཱ པསྶཏཱིཏི སམྨཱདིཊྛི, སམྨཱ སངྐཔྤེཏི སམྤཡུཏྟདྷམྨེ ¶ ནིབྦཱནསངྑཱཏེ ཨཱརམྨཎེ ཨབྷིནིརོཔེཏཱིཏི སམྨཱསངྐཔྤོ, སམྨཱ ཝདཏི ཨེཏཱཡཱཏི སམྨཱཝཱཙཱ, སམྨཱ ཀརོཏི ཨེཏེནཱཏི སམྨཱཀམྨཾ, ཏདེཝ སམྨཱཀམྨནྟོ, སམྨཱ ཨཱཛཱིཝཏི ཨེཏེནཱཏི སམྨཱཨཱཛཱིཝོ, སམྨཱ ཝཱཡམཏི ཨུསྶཧཏཱིཏི སམྨཱཝཱཡཱམོ, སམྨཱ སརཏི ཨནུསྶརཏཱིཏི སམྨཱསཏི, སམྨཱ སམཱདྷིཡཏི ཙིཏྟཾ ཨེཏེནཱཏི སམྨཱསམཱདྷཱིཏི ཨེཝཾ ནིབྦཙནཾ ཝེདིཏབྦཾ. ཨིདཱནི ཨཡཾ ཁོ སཱ བྷིཀྑཝེཏི ཏམེཝ པཊིཔདཾ ནིགམེནྟོ ཨཱཧ. ཏསྶཏྠོ – ཡྭཱཡཾ ཙཏྟཱརོཔི ལོཀུཏྟརམགྒེ ཨེཀཏོ ཀཏྭཱ ཀཐིཏོ ཨཊྛངྒིཀོ མགྒོ, ཨཡཾ ཁོ སཱ བྷིཀྑཝེ…པེ… ནིབྦཱནཱཡ སཾཝཏྟཏཱིཏི.

༡༤. ཨེཝཾ མཛ྄ཛྷིམཔཊིཔདཾ སརཱུཔཏོ དསྶེཏྭཱ ཨིདཱནི ཙཏྟཱརི ཨརིཡསཙྩཱནི དསྶེཏུཾ ‘‘ཨིདཾ ཁོ པན, བྷིཀྑཝེ’’ཏིཨཱདིམཱཧ. ཏཏྠ (ཝིསུདྡྷི. ༢.༥༣༠) དུཀྑནྟི ཨེཏྠ དུ-ཨིཏི ཨཡཾ སདྡོ ཀུཙྪིཏེ དིསྶཏི. ཀུཙྪིཏཉྷི པུཏྟཾ ‘‘དུཔུཏྟོ’’ཏི ཝདནྟི, ཁཾ-སདྡོ པན ཏུཙྪེ. ཏུཙྪཉྷི ཨཱཀཱསཾ ‘‘ཁ’’ནྟི ཝུཙྩཏི. ཨིདཉྩ པཋམསཙྩཾ ཀུཙྪིཏཾ ཨནེཀཨུཔདྡཝཱདྷིཊྛཱནཏོ, ཏུཙྪཾ བཱལཛནཔརིཀཔྤིཏདྷུཝསུབྷསུཁཏྟབྷཱཝཝིརཧིཏཏོ, ཏསྨཱ ཀུཙྪིཏཏྟཱ ཏུཙྪཏྟཱ ཙ ‘‘དུཀྑ’’ནྟི ཝུཙྩཏི. ཡསྨཱ པནེཏཾ བུདྡྷཱདཡོ ཨརིཡཱ པཊིཝིཛ྄ཛྷནྟི, ཏསྨཱ ‘‘ཨརིཡསཙྩ’’ནྟི ཝུཙྩཏི. ཨརིཡཔཊིཝིཛ྄ཛྷིཏབྦཉྷི སཙྩཾ པུརིམཔདེ ཨུཏྟརཔདལོཔེན ‘‘ཨརིཡསཙྩ’’ནྟི ཝུཏྟཾ. ཨརིཡསྶ ཏཐཱགཏསྶ སཙྩནྟིཔི ཨརིཡསཙྩཾ. ཏཐཱགཏེན ཧི སཡཾ ཨདྷིགཏཏྟཱ པཝེདིཏཏྟཱ ཏཏོ ཨེཝ ཙ ཨཉྙེཧི ཨདྷིགམནཱིཡཏྟཱ ཏཾ ཏསྶ ཧོཏཱིཏི. ཨཐ ཝཱ ཨེཏསྶ ཨབྷིསམྦུདྡྷཏྟཱ ཨརིཡབྷཱཝསིདྡྷིཏོ ཨརིཡསཱདྷཀཾ སཙྩནྟིཔི ཨརིཡསཙྩཾ པུབྦེ ཝིཡ ཨུཏྟརཔདལོཔེན ¶ . ཨཝིཏཐབྷཱཝེན ཝཱ ཨརཎཱིཡཏྟཱ ཨདྷིགནྟབྦཏྟཱ ཨརིཡཾ སཙྩནྟིཔི ཨརིཡསཙྩཾ. སཙྩཏྠཾ པན ཙཏུནྣམྤི སཙྩཱནཾ པརཏོ ཨེཀཛ྄ཛྷཾ དསྶཡིསྶཱམ.

ཨིདཱནི ཏཾ དུཀྑཾ ཨརིཡསཙྩཾ སརཱུཔཏོ དསྶེཏུཾ ‘‘ཛཱཏིཔི དུཀྑཱ’’ཏིཨཱདིམཱཧ. ཏཏྲཱཡཾ ཛཱཏི-སདྡོ ཨནེཀཏྠོ. ཏཐཱ ཧེས ‘‘ཨེཀམྤི ཛཱཏིཾ དྭེཔི ཛཱཏིཡོ’’ཏི (དཱི. ནི. ༡.༣༡; མ. ནི. ༡.༡༤༨) ཨེཏྠ བྷཝེ ཨཱགཏོ. ‘‘ཨཏྠི, ཝིསཱཁེ, ནིགཎྛཱ ནཱམ སམཎཛཱཏཱི’’ཏི (ཨ. ནི. ༣.༧༡) ཨེཏྠ ནིཀཱཡེ. ‘‘ཛཱཏི དྭཱིཧི ཁནྡྷེཧི སངྒཧིཏཱ’’ཏི (དྷཱཏུ. ༧༡) ཨེཏྠ སངྑཏལཀྑཎེ. ‘‘ཡཾ མཱཏུཀུཙྪིསྨིཾ པཋམཾ ཙིཏྟཾ ¶ ཨུཔྤནྣཾ པཋམཾ ཝིཉྙཱཎཾ པཱཏུབྷཱུཏཾ, ཏདུཔཱདཱཡ སཱཝསྶ ཛཱཏཱི’’ཏི (མཧཱཝ. ༡༢༤) ཨེཏྠ པཊིསནྡྷིཡཾ. ‘‘སམྤཏིཛཱཏོ, ཨཱནནྡ, བོདྷིསཏྟོ’’ཏི (དཱི. ནི. ༢.༣༡; མ. ནི. ༣.༢༠༧) ཨེཏྠ པསཱུཏིཡཾ. ‘‘ཨཀྑིཏྟོ ཨནུཔཀུཊྛོ ཛཱཏིཝཱདེནཱ’’ཏི (དཱི. ནི. ༡.༣༠༣) ཨེཏྠ ཀུལེ. སྭཱཡམིདྷ གབྦྷསེཡྻཀཱནཾ པཊིསནྡྷིཏོ པཊྛཱཡ ཡཱཝ མཱཏུཀུཙྪིམྷཱ ནིཀྑམནཾ, ཏཱཝ པཝཏྟེསུ ཁནྡྷེསུ, ཨིཏརེསཾ པཊིསནྡྷིཀྑཎེསྭེཝཱཏི དཊྛབྦོ. ཨཡམྤི ཙ པརིཡཱཡཀཐཱཝ, ནིཔྤརིཡཱཡཏོ པན ཏཏྠ ཏཏྠ ནིབྦཏྟམཱནཱནཾ སཏྟཱནཾ ཡེ ཁནྡྷཱ པཱཏུབྷཝནྟི, ཏེསཾ པཋམཔཱཏུབྷཱཝོ ཛཱཏི ནཱམ.

ཀསྨཱ པནེསཱ དུཀྑཱཏི ཙེ? ཨནེཀེསཾ དུཀྑཱནཾ ཝཏྠུབྷཱཝཏོ. ཨནེཀཱནི ཧི དུཀྑཱནི. སེཡྻཐིདཾ – དུཀྑདུཀྑཾ ཝིཔརིཎཱམདུཀྑཾ སངྑཱརདུཀྑཾ པཊིཙྪནྣདུཀྑཾ ཨཔྤཊིཙྪནྣདུཀྑཾ པརིཡཱཡདུཀྑཾ ནིཔྤརིཡཱཡདུཀྑནྟི. ཏཏྠ ཀཱཡིཀཙེཏསིཀཱ དུཀྑཱ ཝེདནཱ སབྷཱཝཏོ ཙ ནཱམཏོ ཙ དུཀྑཏྟཱ དུཀྑདུཀྑནྟི ཝུཙྩཏི. སུཁཱ ཝེདནཱ ཝིཔརིཎཱམདུཀྑུཔྤཏྟིཧེཏུཏོ ཝིཔརིཎཱམདུཀྑཾ. ཨུཔེཀྑཱ ཝེདནཱ ཙེཝ སེསཱ ཙ ཏེབྷཱུམཀཱ སངྑཱརཱ ཨུདཡབྦཡཔཱིལི༹ཏཏྟཱ སངྑཱརདུཀྑཾ. ཀཎྞསཱུལདནྟསཱུལརཱགཛཔརིལཱ༹ཧདོསཛཔརིལཱ༹ཧཱདིཀཱཡིཀཙེཏསིཀཱ ཨཱབཱདྷཱ པུཙྪིཏྭཱ ཛཱནིཏབྦཏོ ཨུཔཀྐམསྶ ཙ ཨཔཱཀཊབྷཱཝཏོ པཊིཙྪནྣདུཀྑཾ. དྭཏྟིཾསཀམྨཀཱརཎཱདིསམུཊྛཱནོ ཨཱབཱདྷོ ཨཔུཙྪིཏྭཱཝ ཛཱནིཏབྦཏོ ཨུཔཀྐམསྶ ཙ པཱཀཊབྷཱཝཏོ ཨཔྤཊིཙྪནྣདུཀྑཾ. ཋཔེཏྭཱ དུཀྑདུཀྑཾ སེསདུཀྑཾ སཙྩཝིབྷངྒེ ཨཱགཏཾ ཛཱཏིཨཱདི སབྦམྤི ཏསྶ ཏསྶ དུཀྑསྶ ཝཏྠུབྷཱཝཏོ པརིཡཱཡདུཀྑཾ. དུཀྑདུཀྑཾ པན ནིཔྤརིཡཱཡདུཀྑནྟི ཝུཙྩཏི. ཏཏྲཱཡཾ ཛཱཏི ཡཾ ཏཾ བཱལཔཎྜིཏསུཏྟཱདཱིསུ (མ. ནི. ༣.༢༤༦ ཨཱདཡོ) བྷགཝཏཱཔི ཨུཔམཱཝསེན པཀཱསིཏཾ ཨཱཔཱཡིཀཾ དུཀྑཾ, ཡཉྩ སུགཏིཡམྤི མནུསྶལོཀེ གབྦྷོཀྐནྟིམཱུལཀཱདིབྷེདཾ དུཀྑཾ ཨུཔྤཛྫཏི, ཏསྶ ཝཏྠུབྷཱཝཏོ དུཀྑཱ. ཏེནཱཧུ པོརཱཎཱ –

‘‘ཛཱཡེཐ ¶ ནོ ཙེ ནརཀེསུ སཏྟོ;

ཏཏྠགྒིདཱཧཱདིཀམཔྤསཡ྄ཧཾ;

ལབྷེཐ དུཀྑཾ ན ཀུཧིཾ པཏིཊྛཾ;

ཨིཙྩཱཧ དུཀྑཱཏི མུནཱིདྷ ཛཱཏིཾ.

‘‘དུཀྑཾ ¶ ཏིརཙྪེསུ ཀསཱཔཏོད-

དཎྜཱབྷིགྷཱཏཱདིབྷཝཾ ཨནེཀཾ;

ཡཾ ཏཾ ཀཐཾ ཏཏྠ བྷཝེཡྻ ཛཱཏིཾ;

ཝིནཱ ཏཧིཾ ཛཱཏི ཏཏོཔི དུཀྑཱ.

‘‘པེཏེསུ དུཀྑཾ པན ཁུཔྤིཔཱསཱ-

ཝཱཏཱཏཔཱདིཔྤབྷཝཾ ཝིཙིཏྟཾ;

ཡསྨཱ ཨཛཱཏསྶ ན ཏཏྠ ཨཏྠི;

ཏསྨཱཔི དུཀྑཾ མུནི ཛཱཏིམཱཧ.

‘‘ཏིབྦནྡྷཀཱརེ ཙ ཨསཡ྄ཧ སཱིཏེ;

ལོཀནྟརེ ཡཾ ཨསུརེསུ དུཀྑཾ;

ན ཏཾ བྷཝེ ཏཏྠ ན ཙསྶ ཛཱཏི;

ཡཏོ ཨཡཾ ཛཱཏི ཏཏོཔི དུཀྑཱ.

‘‘ཡཉྩཱཔི གཱུཐནརཀེ ཝིཡ མཱཏུ གབྦྷེ;

སཏྟོ ཝསཾ ཙིརམཏོ བཧི ནིཀྑམཉྩ;

པཔྤོཏི དུཀྑམཏིགྷོརམིདམྤི ནཏྠི;

ཛཱཏིཾ ཝིནཱ ཨིཏིཔི ཛཱཏི ཨཡཉྷི དུཀྑཱ.

‘‘ཀིཾ བྷཱསིཏེན བཧུནཱ ནནུ ཡཾ ཀུཧིཉྩི;

ཨཏྠཱིདྷ ཀིཉྩིདཔི དུཀྑམིདཾ ཀདཱཙི;

ནེཝཏྠི ཛཱཏིཝིརཧེན ཡཏོ མཧེསི;

དུཀྑཱཏི སབྦཔཋམཾ ཨིམམཱཧ ཛཱཏི’’ནྟི. (ཝིསུདྡྷི. ༢.༥༤༡; ཝིབྷ. ཨཊྛ. ༡༩༡; མཧཱནི. ཨཊྛ. ༥; པཊི. མ. ཨཊྛ. ༡.༡.༣༢-༣༣);

ཛརཱཔི ¶ དུཀྑཱཏི ཨེཏྠ པན དུཝིདྷཱ ཛརཱ སངྑཏལཀྑཎཉྩ ཁཎྜིཙྩཱདིསམྨཏོ སནྟཏིཡཾ ཨེཀབྷཝཔརིཡཱཔནྣཀྑནྡྷཔུརཱཎབྷཱཝོ ཙ, སཱ ཨིདྷ ཨདྷིཔྤེཏཱ. སཱ པནེསཱ ཛརཱ སངྑཱརདུཀྑབྷཱཝཏོ ཙེཝ དུཀྑཝཏྠུཏོ ཙ དུཀྑཱ. ཡཉྷི ཨངྒཔཙྩངྒསིཐིལབྷཱཝཨིནྡྲིཡཝིཀཱརཝིརཱུཔཏཱཡོབྦནཝིནཱསཝཱིརིཡཱཝིསཱདསཏིམཏིཝིཔྤཝཱསཔརཔརིབྷཝཱདིཨནེཀཔཙྩཡཾ ཀཱཡིཀཙེཏསིཀཾ དུཀྑམུཔྤཛྫཏི, ཛརཱ ཏསྶ ཝཏྠུ. ཏེནཱཧུ པོརཱཎཱ –

‘‘ཨངྒཱནཾ སིཐིལཱིབྷཱཝཱ, ཨིནྡྲིཡཱནཾ ཝིཀཱརཏོ;

ཡོབྦནསྶ ཝིནཱསེན, བལསྶ ཨུཔགྷཱཏཏོ.

‘‘ཝིཔྤཝཱསཱ ¶ སཏཱདཱིནཾ, པུཏྟདཱརེཧི ཨཏྟནོ;

ཨཔྤསཱདནཱིཡཏོ ཙེཝ, བྷིཡྻོ བཱལཏྟཔཏྟིཡཱ.

‘‘པཔྤོཏི དུཀྑཾ ཡཾ མཙྩོ, ཀཱཡིཀཾ མཱནསཾ ཏཐཱ;

སབྦམེཏཾ ཛརཱཧེཏུ, ཡསྨཱ ཏསྨཱ ཛརཱ དུཁཱ’’ཏི. (ཝིསུདྡྷི. ༢.༥༤༢; ཝིབྷ. ཨཊྛ. ༡༩༢; མཧཱནི. ཨཊྛ. ༥; པཊི. མ. ཨཊྛ. ༡.༡.༣༢-༣༣);

བྱཱདྷིཔི དུཀྑོཏི ཨིདཾ པདཾ ཝིབྷངྒེ དུཀྑསཙྩནིདྡེསཔཱལི༹ཡཾ ན ཨཱགཏཾ, ཏེནེཝ ཝིསུདྡྷིམགྒེཔི དུཀྑསཙྩནིདྡེསེ ཏཾ ན ཨུདྡྷཊཾ, དྷམྨཙཀྐཔཝཏྟནསུཏྟནྟཔཱལི༹ཡཾཡེཝ པན ཨུཔལབྦྷཏི, ཏསྨཱ ཏཏྠེཝིམསྶ ཝཙནེ ཨཉྙཏྠ ཙ ཨཝཙནེ ཀཱརཎཾ ཝཱིམཾསིཏབྦཾ.

མརཎམྤི དུཀྑནྟི ཨེཏྠཱཔི དུཝིདྷཾ མརཎཾ སངྑཏལཀྑཎཉྩ. ཡཾ སནྡྷཱཡ ཝུཏྟཾ ‘‘ཛརཱམརཎཾ དྭཱིཧི ཁནྡྷེཧི སངྒཧིཏ’’ནྟི (དྷཱཏུ. ༧༡). ཨེཀབྷཝཔརིཡཱཔནྣཛཱིཝིཏིནྡྲིཡཔྤབནྡྷཝིཙྪེདོ ཙ. ཡཾ སནྡྷཱཡ ཝུཏྟཾ ‘‘ནིཙྩཾ མརཎཏོ བྷཡ’’ནྟི (སུ. ནི. ༥༨༡; ཛཱ. ༡.༡༡.༨༨), ཏཾ ཨིདྷ ཨདྷིཔྤེཏཾ. ཛཱཏིཔཙྩཡམརཎཾ ཨུཔཀྐམམརཎཾ སརསམརཎཾ ཨཱཡུཀྑཡམརཎཾ པུཉྙཀྑཡམརཎནྟིཔི ཏསྶེཝ ནཱམཾ. ཏཡིདཾ དུཀྑསྶ ཝཏྠུབྷཱཝཏོ དུཀྑནྟི ཝེདིཏབྦཾ. ཏེནཱཧུ པོརཱཎཱ –

‘‘པཱཔསྶ ¶ པཱཔཀམྨཱདི-ནིམིཏྟམནུཔསྶཏོ;

བྷདྡསྶཱཔསཧནྟསྶ, ཝིཡོགཾ པིཡཝཏྠུཀཾ;

མཱིཡམཱནསྶ ཡཾ དུཀྑཾ, མཱནསཾ ཨཝིསེསཏོ.

‘‘སབྦེསཉྩཱཔི ཡཾ སནྡྷི-བནྡྷནཙྪེདནཱདིཀཾ;

ཝིཏུཛྫམཱནམམྨཱནཾ, ཧོཏི དུཀྑཾ སརཱིརཛཾ.

‘‘ཨསཡ྄ཧམཔྤཊིཀཱརཾ, དུཀྑསྶེཏསྶིདཾ ཡཏོ;

མརཎཾ ཝཏྠུ ཏེནེཏཾ, དུཀྑམིཙྩེཝ བྷཱསིཏ’’ནྟི. (ཝིསུདྡྷི. ༢.༥༤༣; ཝིབྷ. ཨཊྛ. ༡༩༣; མཧཱནི. ཨཊྛ. ༥; པཊི. མ. ཨཊྛ. ༡.༡.༣༢-༣༣);

ཨིམསྨིཉྩ ཋཱནེ ‘‘སོཀཔརིདེཝདུཀྑདོམནསྶུཔཱཡཱསཱཔི དུཀྑཱ’’ཏི ཝིབྷངྒེ དུཀྑསཙྩནིདྡེསེ ཨཱགཏཾ, ཨིདྷ པན ཏཾ ནཏྠི, ཏཏྠཱཔི ཀཱརཎཾ པརིཡེསིཏབྦཾ.

ཨཔྤིཡེཧི སམྤཡོགོ དུཀྑོཏི ཨེཏྠ ཨཔྤིཡསམྤཡོགོ ནཱམ ཨམནཱཔེཧི སཏྟསངྑཱརེཧི སམོདྷཱནཾ. སོཔི དུཀྑཝཏྠུཏོ དུཀྑོ. ཏེནཱཧུ པོརཱཎཱ –

‘‘དིསྭཱཝ ¶ ཨཔྤིཡེ དུཀྑཾ, པཋམཾ ཧོཏི ཙེཏསི;

ཏདུཔཀྐམསམྦྷཱུཏ-མཐ ཀཱཡེ ཡཏོ ཨིདྷ.

‘‘ཏཏོ དུཀྑདྭཡསྶཱཔི, ཝཏྠུཏོ སོ མཧེསིནཱ;

དུཀྑོ ཝུཏྟོཏི ཝིཉྙེཡྻོ, ཨཔྤིཡེཧི སམཱགམོ’’ཏི.

པིཡེཧི ཝིཔྤཡོགོ དུཀྑོཏི ཨེཏྠ པན པིཡཝིཔྤཡོགོ ནཱམ མནཱཔེཧི སཏྟསངྑཱརེཧི ཝིནཱབྷཱཝོ. སོཔི སོཀདུཀྑསྶ ཝཏྠུཏོ དུཀྑོ. ཏེནཱཧུ པོརཱཎཱ –

‘‘ཉཱཏིདྷནཱདིཝིཡོགཱ;

སོཀསརསམཔྤིཏཱ ཝིཏུཛྫནྟི;

བཱལཱ ¶ ཡཏོ ཏཏོཡཾ;

དུཀྑོཏི མཏོ པིཡཝིཔྤཡོགོ’’ཏི.

ཡམྤིཙྪཾ ན ལབྷཏཱིཏི ཨེཏྠ ‘‘ཨཧོ ཝཏ མཡཾ ན ཛཱཏིདྷམྨཱ ཨསྶཱམཱ’’ཏིཨཱདཱིསུ ཨལབྦྷནེཡྻཝཏྠཱུསུ ཨིཙྪཱཝ ‘‘ཡམྤིཙྪཾ ན ལབྷཏི, ཏམྤི དུཀྑ’’ནྟི ཝུཏྟཱ, སཱཔི དུཀྑཝཏྠུཏོ དུཀྑཱ. ཏེནཱཧུ པོརཱཎཱ –

‘‘ཏཾ ཏཾ པཏྠཡམཱནཱནཾ, ཏསྶ ཏསྶ ཨལཱབྷཏོ;

ཡཾ ཝིགྷཱཏམཡཾ དུཀྑཾ, སཏྟཱནཾ ཨིདྷ ཛཱཡཏི.

‘‘ཨལབྦྷནེཡྻཝཏྠཱུནཾ, པཏྠནཱ ཏསྶ ཀཱརཎཾ;

ཡསྨཱ ཏསྨཱ ཛིནོ དུཀྑཾ, ཨིཙྪིཏཱལཱབྷམབྲཝཱི’’ཏི.

སཾཁིཏྟེན པཉྩུཔཱདཱནཀྑནྡྷཱ དུཀྑཱཏི ཨེཏྠ པན ཡསྨཱ ཨིནྡྷནམིཝ པཱཝཀོ, ལཀྑམིཝ པཧརཎཱནི, གོརཱུཔཾ ཝིཡ ཌཾསམཀསཱདཡོ, ཁེཏྟམིཝ ལཱཡཀཱ, གཱམཾ ཝིཡ གཱམགྷཱཏཀཱ, ཨུཔཱདཱནཀྑནྡྷཔཉྩཀམེཝ ཛཱཏིཨཱདཡོ ནཱནཔྤཀཱརེཧི ཝིབཱདྷེནྟཱ ཏིཎལཏཱདཱིནི ཝིཡ བྷཱུམིཡཾ, པུཔྥཕལཔལླཝཱནི ཝིཡ རུཀྑེསུ ཨུཔཱདཱནཀྑནྡྷེསུཡེཝ ནིབྦཏྟནྟི, ཨུཔཱདཱནཀྑནྡྷཱནཉྩ ཨཱདིདུཀྑཾ ཛཱཏི, མཛ྄ཛྷེདུཀྑཾ ཛརཱ, པརིཡོསཱནདུཀྑཾ མརཎཾ, མནོརཐཝིགྷཱཏཔྤཏྟཱནཉྩ ཨིཙྪཱཝིགྷཱཏདུཀྑཾ ཨིཙྪིཏཱལཱབྷོཏི ཨེཝཾ ནཱནཔྤཀཱརཏོ ཨུཔཔརིཀྑིཡམཱནཱ ཨུཔཱདཱནཀྑནྡྷཱཝ དུཀྑཱཏི ཡདེཏཾ ཨེཀམེཀཾ དསྶེཏྭཱ ཝུཙྩམཱནཾ ཨནེཀེཧིཔི ཀཔྤེཧི ན སཀྐཱ ཨནཝསེསཏོ ཝཏྟུཾ, ཏསྨཱ ཏཾ སབྦམྤི དུཀྑཾ ཨེཀཛལབིནྡུམྷི སཀལསམུདྡཛལརསཾ ཝིཡ ཡེསུ ཀེསུཙི པཉྩུཔཱདཱནཀྑནྡྷེསུ སངྑིཔིཏྭཱ དསྶེཏུཾ ‘‘སཾཁིཏྟེན ¶ པཉྩུཔཱདཱནཀྑནྡྷཱ དུཀྑཱ’’ཏི བྷགཝཱ ཨཝོཙ. ཏེནཱཧུ པོརཱཎཱ –

‘‘ཛཱཏིཔྤབྷུཏིཀཾ དུཀྑཾ, ཡཾ ཝུཏྟམིདྷ ཏཱདིནཱ;

ཨཝུཏྟཾ ཡཉྩ ཏཾ སབྦཾ, ཝིནཱ ཨེཏེ ན ཝིཛྫཏི.

‘‘ཡསྨཱ ཏསྨཱ ཨུཔཱདཱན-ཀྑནྡྷཱ སངྑེཔཏོ ཨིམེ;

དུཀྑཱཏི ཝུཏྟཱ དུཀྑནྟ-དེསཀེན མཧེསིནཱ’’ཏི.

ཨེཝཾ ¶ སརཱུཔཏོ དུཀྑསཙྩཾ དསྶེཏྭཱ ཨིདཱནི སམུདཡསཙྩཾ དསྶེཏུཾ ‘‘ཨིདཾ ཁོ པན, བྷིཀྑཝེ, དུཀྑསམུདཡ’’ནྟིཨཱདིམཱཧ. ཏཏྠ སཾ-ཨིཏི ཨཡཾ སདྡོ ‘‘སམཱགམོ སམེཏ’’ནྟིཨཱདཱིསུ སཾཡོགཾ དཱིཔེཏི, ཨུ-ཨིཏི ཨཡཾ ‘‘ཨུཔྤནྣཾ ཨུདིཏ’’ནྟིཨཱདཱིསུ ཨུཔྤཏྟིཾ. ཨཡ-སདྡོ པན ཀཱརཎཾ དཱིཔེཏི. ཨིདཉྩཱཔི དུཏིཡསཙྩཾ ཨཝསེསཔཙྩཡསམཱཡོགེ སཏི དུཀྑསྶུཔྤཏྟིཀཱརཎནྟི དུཀྑསྶ སཾཡོགེ ཨུཔྤཏྟིཀཱརཎཏྟཱ ‘‘དུཀྑསམུདཡ’’ནྟི ཝུཙྩཏི. ཡཱཡཾ ཏཎྷཱཏི ཡཱ ཨཡཾ ཏཎྷཱ. པོནོབྦྷཝིཀཱཏི པུནབྦྷཝཀརཎཾ པུནབྦྷཝོ ཨུཏྟརཔདལོཔེན, པུནབྦྷཝོ སཱིལམེཏིསྶཱཏི པོནོབྦྷཝིཀཱ. ནནྡཱིརཱགེན སཧགཏཱཏི ནནྡཱིརཱགསཧགཏཱ. ཨིདཾ ཝུཏྟཾ ཧོཏི ‘‘ནནྡནཏོ རཛྫནཏོ ཙ ནནྡཱིརཱགབྷཱཝཾ སབྦཱསུ ཨཝཏྠཱསུ ཨཔྤཙྩཀྑཱཡ ཝུཏྟིཡཱ ནནྡཱིརཱགསཧགཏཱ’’ཏི. ཏཏྲཏཏྲཱབྷིནནྡིནཱིཏི ཡཏྲ ཡཏྲ ཨཏྟབྷཱཝོ ནིབྦཏྟཏི, ཏཏྲཏཏྲཱབྷིནནྡིནཱི.

སེཡྻཐིདནྟི ནིཔཱཏོ, ཏསྶ སཱ ཀཏམཱཏི ཙེཏི ཨཡམཏྠོ. རཱུཔཏཎྷཱདིབྷེདེན ཚབྦིདྷཱཡེཝ ཏཎྷཱ པཝཏྟིཨཱཀཱརབྷེདཏོ ཀཱམཏཎྷཱདིཝསེན ཏིཝིདྷཱ ཝུཏྟཱ. རཱུཔཏཎྷཱཡེཝ ཧི ཡདཱ ཙཀྑུསྶ ཨཱཔཱཐམཱགཏཾ རཱུཔཱརམྨཎཾ ཀཱམསྶཱདཝསེན ཨསྶཱདཡམཱནཱ པཝཏྟཏི, ཏདཱ ཀཱམཏཎྷཱ ནཱམ ཧོཏི. ཡདཱ ཏདེཝཱརམྨཎཾ དྷུཝཾ སསྶཏནྟི པཝཏྟཱཡ སསྶཏདིཊྛིཡཱ སདྡྷིཾ པཝཏྟཏི, ཏདཱ བྷཝཏཎྷཱ ནཱམ ཧོཏི. སསྶཏདིཊྛིསཧགཏོ ཧི རཱགོ ‘‘བྷཝཏཎྷཱ’’ཏི ཝུཙྩཏི. ཡདཱ པན ཏདེཝཱརམྨཎཾ ཨུཙྪིཛྫཏི ཝིནསྶཏཱིཏི པཝཏྟཱཡ ཨུཙྪེདདིཊྛིཡཱ སདྡྷིཾ པཝཏྟཏི, ཏདཱ ཝིབྷཝཏཎྷཱ ནཱམ ཧོཏི. ཨུཙྪེདདིཊྛིསཧགཏོ ཧི རཱགོ ‘‘ཝིབྷཝཏཎྷཱ’’ཏི ཝུཙྩཏི. ཨེས ནཡོ སདྡཏཎྷཱདཱིསུཔི.

ཀསྨཱ ¶ པནེཏྠ ཏཎྷཱཝ སམུདཡསཙྩཾ ཝུཏྟཱཏི? ཝིསེསཧེཏུབྷཱཝཏོ. ཨཝིཛྫཱ ཧི བྷཝེསུ ཨཱདཱིནཝཾ པཊིཙྪཱདེནྟཱི དིཊྛིཨཱདིཨུཔཱདཱནཉྩ ཏཏྠ ཏཏྠ ཨབྷིནིཝིསམཱནཾ ཏཎྷཾ ཨབྷིཝཌྜྷེཏི, དོསཱདཡོཔི ཀམྨསྶ ཀཱརཎཾ ཧོནྟི, ཏཎྷཱ པན ཏཾཏཾབྷཝཡོནིགཏིཝིཉྙཱཎཊྛིཏིསཏྟཱཨཱཝཱསསཏྟནིཀཱཡཀུལབྷོགིསྶརིཡཱདིཝིཙིཏྟཏཾ ཨབྷིཔཏྠེནྟཱི ཀམྨཝིཙིཏྟཏཱཡ ཨུཔནིསྶཡཏཾ ཀམྨསྶ ཙ སཧཱཡབྷཱཝཾ ཨུཔགཙྪནྟཱི བྷཝཱདིཝིཙིཏྟཏཾ ནིཡམེཏི, ཏསྨཱ དུཀྑསྶ ཝིསེསཧེཏུབྷཱཝཏོ ཨཉྙེསུཔི ཨཝིཛྫཱཨུཔཱདཱནཀམྨཱདཱིསུ སུཏྟེ ཨབྷིདྷམྨེ ཙ ཨཝསེསཀིལེསཱཀུསལམཱུལཱདཱིསུ ཝུཏྟེསུ དུཀྑཧེཏཱུསུ ཝིཛྫམཱནེསུ ཏཎྷཱཝ ‘‘སམུདཡསཙྩ’’ནྟི ཝུཏྟཱཏི ཝེདིཏབྦཾ.

ཨིདཱནི དུཀྑནིརོདྷཾ ཨརིཡསཙྩཾ དསྶེཏུཾ ‘‘ཨིདཾ ཁོ པན, བྷིཀྑཝེ, དུཀྑནིརོདྷ’’ནྟིཨཱདིམཱཧ. ཏཏྠ ཡསྨཱ ནི-སདྡོ ཨབྷཱཝཾ, རོདྷ-སདྡོ ཙ ཙཱརཀཾ དཱིཔེཏི, ཏསྨཱ ཨབྷཱཝོ ཨེཏྠ སཾསཱརཙཱརཀསངྑཱཏསྶ དུཀྑརོདྷསྶ སབྦགཏིསུཉྙཏྟཱ, སམདྷིགཏེ ཝཱ ཏསྨིཾ སཾསཱརཙཱརཀསངྑཱཏསྶ ¶ དུཀྑརོདྷསྶ ཨབྷཱཝོ ཧོཏི ཏཔྤཊིཔཀྑཏྟཱཏིཔི ‘‘དུཀྑནིརོདྷ’’ནྟི ཝུཙྩཏི. དུཀྑསྶ ཝཱ ཨནུཔྤཱདནིརོདྷཔཙྩཡཏྟཱ དུཀྑནིརོདྷཾ. དུཀྑནིརོདྷཾ དསྶེནྟེན ཙེཏྠ ‘‘ཡོ ཏསྶཱཡེཝ ཏཎྷཱཡཱ’’ཏིཨཱདིནཱ ནཡེན སམུདཡནིརོདྷོ ཝུཏྟོ, སོ ཀསྨཱ ཝུཏྟོཏི ཙེ? སམུདཡནིརོདྷེན དུཀྑནིརོདྷོ. བྱཱདྷིནིམིཏྟཝཱུཔསམེན བྱཱདྷིཝཱུཔསམོ ཝིཡ ཧི ཧེཏུནིརོདྷེན ཕལནིརོདྷོ, ཏསྨཱ སམུདཡནིརོདྷེནེཝ དུཀྑཾ ནིརུཛ྄ཛྷཏི, ན ཨཉྙཐཱ. ཏེནཱཧ –

‘‘ཡཐཱཔི མཱུལེ ཨནུཔདྡཝེ དལ༹ྷེ;

ཚིནྣོཔི རུཀྑོ པུནརེཝ རཱུཧཏི;

ཨེཝམྤི ཏཎྷཱནུསཡེ ཨནཱུཧཏེ;

ནིབྦཏྟཏཱི དུཀྑམིདཾ པུནཔྤུན’’ནྟི. (དྷ. པ. ༣༣༨);

ཨིཏི ཡསྨཱ སམུདཡནིརོདྷེནེཝ དུཀྑཾ ནིརུཛ྄ཛྷཏི, ཏསྨཱ བྷགཝཱ དུཀྑནིརོདྷཾ དསྶེནྟོ སམུདཡནིརོདྷེན དེསེསི. སཱིཧསམཱནཝུཏྟིནོ ཧི ཏཐཱགཏཱ. ཏེ དུཀྑཾ ནིརོདྷེནྟཱ དུཀྑནིརོདྷཉྩ དེསེནྟཱ ཧེཏུམྷི པཊིཔཛྫནྟི, ན ཕལེ. ཡཐཱ ཧི སཱིཧོ ཡེནཏྟནི སརོ ཁིཏྟོ, ཏཏྠེཝ ཨཏྟནོ ¶ བལཾ དསྶེཏི, ན སརེ, ཏཐཱ བུདྡྷཱནཾ ཀཱརཎེ པཊིཔཏྟི, ན ཕལེ. ཏིཏྠིཡཱ པན སུཝཱནཝུཏྟིནོ. ཏེ དུཀྑཾ ནིརོདྷེནྟཱ དུཀྑནིརོདྷཉྩ དེསེནྟཱ ཨཏྟཀིལམཐཱནུཡོགདེསནཱདཱིཧི ཕལེ པཊིཔཛྫནྟི, ན ཧེཏུམྷི. ཡཐཱ ཧི སུནཁཱ ཀེནཙི ལེཌྜུཔྤཧཱརེ དིནྣེ བྷུསྶནྟཱ ལེཌྜུཾ ཁཱདནྟི, ན པཧཱརདཱཡཀེ ཨུཊྛཧནྟི, ཨེཝཾ ཨཉྙཏིཏྠིཡཱ དུཀྑཾ ནིརོདྷེཏུཀཱམཱ ཀཱཡཁེདམནུཡུཛྫནྟི, ན ཀིལེསནིརོདྷནཾ, ཨེཝཾ ཏཱཝ དུཀྑནིརོདྷསྶ སམུདཡནིརོདྷཝསེན དེསནཱཡ པཡོཛནཾ ཝེདིཏབྦཾ.

ཨཡཾ པནེཏྠ ཨཏྠོ. ཏསྶཱཡེཝ ཏཎྷཱཡཱཏི ཏསྶཱ ‘‘པོནོབྦྷཝིཀཱ’’ཏི ཝཏྭཱ ཀཱམཏཎྷཱདིཝསེན ཝིབྷཏྟཏཎྷཱཡ. ཝིརཱགོ ཝུཙྩཏི མགྒོ. ‘‘ཝིརཱགཱ ཝིམུཙྩཏཱི’’ཏི (མ. ནི. ༡.༢༤༥; སཾ. ནི. ༣.༡༢, ༥༩) ཧི ཝུཏྟཾ. ཝིརཱགེན ནིརོདྷོ ཝིརཱགནིརོདྷོ, ཨནུསཡསམུགྒྷཱཏཏོ ཨསེསོ ཝིརཱགནིརོདྷོ ཨསེསཝིརཱགནིརོདྷོ. ཨཐ ཝཱ ཝིརཱགོཏི པཧཱནཾ ཝུཙྩཏི, ཏསྨཱ ཨནུསཡསམུགྒྷཱཏཏོ ཨསེསོ ཝིརཱགོ ཨསེསོ ནིརོདྷོཏི ཨེཝམྤེཏྠ ཡོཛནཱ དཊྛབྦཱ, ཨཏྠཏོ པན སབྦཱནེཝ ཨེཏཱནི ནིབྦཱནསྶ ཝེཝཙནཱནི. པརམཏྠཏོ ཧི དུཀྑནིརོདྷོ ཨརིཡསཙྩནྟི ནིབྦཱནཾ ཝུཙྩཏི. ཡསྨཱ པན ཏཾ ཨཱགམྨ ཏཎྷཱ ཝིརཛྫཏི ཙེཝ ནིརུཛ྄ཛྷཏི ཙ, ཏསྨཱ ‘‘ཝིརཱགོ’’ཏི ཙ ‘‘ནིརོདྷོ’’ཏི ཙ ཝུཙྩཏི. ཡསྨཱ ཙ ཏདེཝ ཨཱགམྨ ཏསྶཱ ཙཱགཱདཡོ ¶ ཧོནྟི, ཀཱམགུཎཱལཡཱདཱིསུ ཙེཏྠ ཨེཀོཔི ཨཱལཡོ ནཏྠི, ཏསྨཱ ཙཱགོ པཊིནིསྶགྒོ མུཏྟི ཨནཱལཡོཏི ཝུཙྩཏི.

ཨིདཱནི དུཀྑནིརོདྷགཱམིནིཔཊིཔདཱཨརིཡསཙྩཾ དསྶེཏུཾ ‘‘ཨིདཾ ཁོ པན, བྷིཀྑཝེ, དུཀྑནིརོདྷགཱམིནཱི’’ཏིཨཱདིམཱཧ. ཡསྨཱ པནེཏཾ ཨརིཡསཙྩཾ དུཀྑནིརོདྷཾ གཙྪཏི ཨཱརམྨཎཝསཨེན ཏདབྷིམུཁབྷཱུཏཏྟཱ, པཊིཔདཱ ཙ ཧོཏི དུཀྑནིརོདྷཔྤཏྟིཡཱ, ཏསྨཱ ‘‘དུཀྑནིརོདྷགཱམིནཱི པཊིཔདཱ’’ཏི ཝུཙྩཏི. སེསམེཏྠ ཝུཏྟནཡམེཝ. ཀོ པན ནེསཾ དུཀྑཱདཱིནཾ སཙྩཊྛོཏི? ཡོ པཉྙཱཙཀྑུནཱ ཨུཔཔརིཀྑིཡམཱནཱནཾ མཱཡཱཝ ཝིཔརཱིཏོ, མརཱིཙིཝ ཝིསཾཝཱདཀོ, ཏིཏྠིཡཱནཾ ཨཏྟཱ ཝིཡ ཨནུཔལབྦྷསབྷཱཝོ ཙ ན ཧོཏི, ཨཐ ཁོ བཱདྷནཔྤབྷཝསནྟིནིཡྻཱནཔྤཀཱརེན ཏཙྪཱཝིཔརཱིཏབྷཱུཏབྷཱཝེན ཨརིཡཉཱཎསྶ གོཙརོ ཧོཏིཡེཝ, ཨེས ཨགྒིལཀྑཎཾ ཝིཡ ལོཀཔཀཏི ཝིཡ ཙ ཏཙྪཱཝིཔརཱིཏབྷཱུཏབྷཱཝོ སཙྩཊྛོཏི ཝེདིཏབྦོ. ཨེཏྠ ཙ ཨགྒིལཀྑཎཾ ནཱམ ཨུཎྷཏྟཾ. ཏཉྷི ཀཏྠཙི ཀཊྛཱདིཨུཔཱདཱནབྷེདེ ཝིསཾཝཱདཀཾ ཝིཔརཱིཏཾ ¶ ཨབྷཱུཏཾ ཝཱ ཀདཱཙིཔི ན ཧོཏི, ‘‘ཛཱཏིདྷམྨཱ ཛརཱདྷམྨཱ, ཨཐོ མརཎདྷམྨིནོ’’ཏི (ཨ. ནི. ༥.༥༧) ཨེཝཾ ཝུཏྟཛཱཏིཨཱདིཀཱ ལོཀཔཀཏཱིཏི ཝེདིཏབྦཱ. ‘‘ཨེཀཙྩཱནཾ ཏིརཙྪཱནཱནཾ ཏིརིཡཾ དཱིགྷཏཱ, མནུསྶཱདཱིནཾ ཨུདྡྷཾ དཱིགྷཏཱ, ཝུདྡྷིནིཊྛཔྤཏྟཱནཾ པུན ཨཝཌྜྷནནྟི ཨེཝམཱདིཀཱ ཙ ལོཀཔཀཏཱི’’ཏི ཝདནྟི.

ཨཔིཙ –

ནཱབཱདྷཀཾ ཡཏོ དུཀྑཾ, དུཀྑཱ ཨཉྙཾ ན བཱདྷཀཾ;

བཱདྷཀཏྟནིཡཱམེན, ཏཏོ སཙྩམིདཾ མཏཾ.

ཏཾ ཝིནཱ ནཱཉྙཏོ དུཀྑཾ, ན ཧོཏི ན ཙ ཏཾ ཏཏོ;

དུཀྑཧེཏུནིཡཱམེན, ཨིཏི སཙྩཾ ཝིསཏྟིཀཱ.

ནཱཉྙཱ ནིབྦཱནཏོ སནྟི, སནྟཾ ན ཙ ན ཏཾ ཡཏོ;

སནྟབྷཱཝནིཡཱམེན, ཏཏོ སཙྩམིདཾ མཏཾ.

མགྒཱ ཨཉྙཾ ན ནིཡྻཱནཾ, ཨནིཡྻཱནོ ན ཙཱཔི སོ;

ཏཙྪནིཡྻཱནབྷཱཝཏྟཱ, ཨིཏི སོ སཙྩསམྨཏོ.

ཨིཏི ¶ ཏཙྪཱཝིཔལླཱས-བྷཱུཏབྷཱཝཾ ཙཏཱུསུཔི;

དུཀྑཱདཱིསྭཝིསེསེན, སཙྩཊྛཾ ཨཱཧུ པཎྜིཏཱཏི. (ཝིབྷ. ཨཊྛ. ༡༨༩);

༡༥. པུབྦེ ཨནནུསྶུཏེསཱུཏི ཨིཏོ པུབྦེ ‘‘ཨིདཾ དུཀྑ’’ནྟིཨཱདིནཱ ན ཨནུསྶུཏེསུ ཨསྶུཏཔུབྦེསུ ཙཏུསཙྩདྷམྨེསུ. ཙཀྑུནྟིཨཱདཱིནི ཉཱཎཝེཝཙནཱནེཝ. ཉཱཎམེཝ ཧེཏྠ པཙྩཀྑཏོ དསྶནཊྛེན ཙཀྑུ ཝིཡཱཏི ཙཀྑུ, ཉཱཎཊྛེན ཉཱཎཾ, པཀཱརཏོ ཛཱནནཊྛེན པཉྙཱ, པཊིཝིཛ྄ཛྷནཊྛེན ཝིཛྫཱ, སཙྩཔྤཊིཙྪཱདཀསྶ མོཧནྡྷཀཱརསྶ ཝིདྷམནཏོ ཨོབྷཱསནཊྛེན ཨཱལོཀོཏི ཝུཏྟཾ. ཏཾ པནེཏཾ ཙཏཱུསུ སཙྩེསུ ལོཀིཡལོཀུཏྟརམིསྶཀཾ ནིདྡིཊྛནྟི ཝེདིཏབྦཾ.

༡༦. ཡཱཝཀཱིཝཉྩཱཏི ཡཏྟཀཾ ཀཱལཾ. ཏིཔརིཝཊྚནྟི སཙྩཉཱཎཀིཙྩཉཱཎཀཏཉཱཎསངྑཱཏཱནཾ ཏིཎྞཾ པརིཝཊྚཱནཾ ཝསེན ཏིཔརིཝཊྚཾ. སཙྩཉཱཎཱདིཝསེན ཧི ཏཡོ པརིཝཊྚཱ ཨེཏསྶཱཏི ཏིཔརིཝཊྚནྟི ཝུཙྩཏི ཉཱཎདསྶནཾ. ཨེཏྠ ཙ ‘‘ཨིདཾ དུཀྑཾ ཨརིཡསཙྩཾ, ཨིདཾ དུཀྑསམུདཡ’’ནྟི ཨེཝཾ ཙཏཱུསུ སཙྩེསུ ཡཐཱབྷཱུཏཉཱཎཾ སཙྩཉཱཎཾ ནཱམ. ཏེསུཡེཝ ‘‘པརིཉྙེཡྻཾ ¶ པཧཱཏབྦཾ སཙྪིཀཱཏབྦཾ བྷཱཝེཏབྦ’’ནྟི ཨེཝཾ ཀཏྟབྦཀིཙྩཛཱནནཉཱཎཾ ཀིཙྩཉཱཎཾ ནཱམ. ‘‘པརིཉྙཱཏཾ པཧཱིནཾ སཙྪིཀཏཾ བྷཱཝིཏ’’ནྟི ཨེཝཾ ཏསྶ ཀཏབྷཱཝཛཱནནཉཱཎཾ ཀཏཉཱཎཾ ནཱམ. དྭཱདསཱཀཱརནྟི ཏེསཾཡེཝ ཨེཀེཀསྨིཾ སཙྩེ ཏིཎྞཾ ཏིཎྞཾ ཨཱཀཱརཱནཾ ཝསེན དྭཱདསཱཀཱརཾ. ཉཱཎདསྶནནྟི ཨེཏེསཾ ཏིཔརིཝཊྚཱནཾ དྭཱདསནྣཾ ཨཱཀཱརཱནཾ ཝསེན ཨུཔྤནྣཉཱཎསངྑཱཏཾ དསྶནཾ.

ཨནུཏྟརཾ སམྨཱསམྦོདྷིནྟི ཨུཏྟརཝིརཧིཏཾ སབྦསེཊྛཾ སམྨཱ སཱམཉྩ བོདྷིཾ. ཨཐ ཝཱ པསཏྠཾ སུནྡརཉྩ བོདྷིཾ. བོདྷཱིཏི ཙ བྷགཝཏོ ཨརཧཏྟམགྒོ ཨིདྷཱདྷིཔྤེཏོ. སཱཝཀཱནཾ ཨརཧཏྟམགྒོ ཨནུཏྟརཱ བོདྷི ཧོཏི, ན ཧོཏཱིཏི? ན ཧོཏི. ཀསྨཱ? ཨསབྦགུཎདཱཡཀཏྟཱ. ཏེསཉྷི ཀསྶཙི ཨརཧཏྟམགྒོ ཨརཧཏྟཕལམེཝ དེཏི, ཀསྶཙི ཏིསྶོ ཝིཛྫཱ, ཀསྶཙི ཚ ཨབྷིཉྙཱ, ཀསྶཙི ཙཏསྶོ པཊིསམྦྷིདཱ, ཀསྶཙི སཱཝཀཔཱརམཱིཉཱཎཾ. པཙྩེཀབུདྡྷཱནམྤི པཙྩེཀབོདྷིཉཱཎམེཝ དེཏི, བུདྡྷཱནཾ པན སབྦགུཎསམྤཏྟིཾ དེཏི ཨབྷིསེཀོ ཝིཡ རཉྙོ སབྦལོཀིསྶརིཡབྷཱཝཾ. ཏསྨཱ ཨཉྙསྶ ཀསྶཙིཔི ཨནུཏྟརཱ བོདྷི ན ཧོཏཱིཏི. ཨབྷིསམྦུདྡྷོཏི པཙྩཉྙཱསིནྟི ཨབྷིསམྦུདྡྷོ ཨཧཾ པཏྟོ པཊིཝིཛ྄ཛྷིཏྭཱ ཋིཏོཏི ཨེཝཾ པཊིཛཱནིཾ. ཉཱཎཉྩ པན མེ དསྶནཾ ཨུདཔཱདཱིཏི ཨདྷིགཏགུཎཱནཾ ཡཱཐཱཝཏོ དསྶནསམཏྠཾ པཙྩཝེཀྑཎཉཱཎཉྩ པན མེ ཨུདཔཱདི. ཨཀུཔྤཱ མེ ཝིམུཏྟཱིཏི ཨཡཾ མཡ྄ཧཾ ཨརཧཏྟཕལཝིམུཏྟི ཨཀུཔྤཱ པཊིཔཀྑེཧི ན ཀོཔེཏབྦཱཏི ཨེཝཾ ཉཱཎཾ ཨུདཔཱདི. ཏཏྠ དྭཱིཧཱཀཱརེཧི ཨཀུཔྤཏཱ ཝེདིཏབྦཱ མགྒསངྑཱཏཀཱརཎཏོ ཙ ཨཱརམྨཎཏོ ཙ. སཱ ཧི ཙཏཱུཧི མགྒེཧི སམུཙྪིནྣཀིལེསཱནཾ ¶ པུན ཨནིཝཏྟནཏཱཡ ཀཱརཎཏོཔི ཨཀུཔྤཱ, ཨཀུཔྤདྷམྨཾ ནིབྦཱནཾ ཨཱརམྨཎཾ ཀཏྭཱ པཝཏྟཏཱཡ ཨཱརམྨཎཏོཔི ཨཀུཔྤཱ ཨནཱཀུཔྤཱརམྨཎཱནཾ ལོཀིཡསམཱཔཏྟཱིནཾ ཏདབྷཱཝཏོ. ཨནྟིམཱཏི པཙྪིམཱ. ནཏྠི དཱནི པུནབྦྷཝོཏི ཨིདཱནི པུན ཨཉྙོ བྷཝོ ནཱམ ནཏྠཱིཏི.

ཨིམསྨིཉྩ པན ཝེཡྻཱཀརཎསྨིནྟི ཨིམསྨིཾ ནིགྒཱཐཀེ སུཏྟེ. ནིགྒཱཐཀཉྷི སུཏྟཾ པུཙྪཱཝིསྶཛྫནསཧིཏཾ ‘‘ཝེཡྻཱཀརཎ’’ནྟི ཝུཙྩཏི. བྷཉྙམཱནེཏི བྷཎིཡམཱནེ, དེསིཡམཱནེཏི ཨཏྠོ. ཝིརཛནྟི ཨཔཱཡགམནཱིཡརཱགརཛཱདཱིནཾ ཝིགམེན ཝིརཛཾ. ཝཱིཏམལནྟི ཨནཝསེསདིཊྛིཝིཙིཀིཙྪཱམལཱཔགམེན ཝཱིཏམལཾ ¶ . པཋམམགྒཝཛ྄ཛྷཀིལེསརཛཱབྷཱཝེན ཝཱ ཝིརཛཾ, པཉྩཝིདྷདུསྶཱིལྱམལཱཔགམེན ཝཱིཏམལཾ. དྷམྨཙཀྑུནྟི བྲཧྨཱཡུསུཏྟེ (མ. ནི. ༢.༣༨༣ ཨཱདཡོ) ཧེཊྛིམཱ ཏཡོ མགྒཱ ཝུཏྟཱ, ཙཱུལ༹རཱཧུལོཝཱདེ (མ. ནི. ༣.༤༡༦ ཨཱདཡོ) ཨཱསཝཀྑཡོ, ཨིདྷ པན སོཏཱཔཏྟིམགྒོ ཨདྷིཔྤེཏོ. ཙཏུསཙྩསངྑཱཏེསུ དྷམྨེསུ ཏེསཾ དསྶནཊྛེན ཙཀྑཱུཏི དྷམྨཙཀྑུ, ཧེཊྛིམེསུ ཝཱ ཏཱིསུ མགྒདྷམྨེསུ ཨེཀཾ སོཏཱཔཏྟིམགྒསངྑཱཏཾ ཙཀྑཱུཏི དྷམྨཙཀྑུ, སམཐཝིཔསྶནཱདྷམྨནིབྦཏྟཏཱཡ སཱིལཱདིཏིཝིདྷདྷམྨཀྑནྡྷབྷཱུཏཏཱཡ ཝཱ དྷམྨམཡཾ ཙཀྑཱུཏིཔི དྷམྨཙཀྑུ, ཏསྶ ཨུཔྤཏྟིཨཱཀཱརདསྶནཏྠཾ ‘‘ཡཾ ཀིཉྩི སམུདཡདྷམྨཾ, སབྦཾ ཏཾ ནིརོདྷདྷམྨ’’ནྟི ཨཱཧ. ནནུ ཙ མགྒཉཱཎཾ ཨསངྑཏདྷམྨཱརམྨཎཾ, ན སངྑཏདྷམྨཱརམྨཎནྟི? སཙྩམེཏཾ, ཡསྨཱ ཏཾ ནིརོདྷཾ ཨཱརམྨཎཾ ཀཏྭཱ ཀིཙྩཝསེན སབྦསངྑཏཾ ཨསམྨོཧཔྤཊིཝེདྷཝསེན པཊིཝིཛ྄ཛྷནྟཾ ཨུཔྤཛྫཏི, ཏསྨཱ ཏཐཱ ཝུཏྟཾ.

༡༧. དྷམྨཙཀྐེཏི པཊིཝེདྷཉཱཎཉྩེཝ དེསནཱཉཱཎཉྩ པཝཏྟནཊྛེན ཙཀྐནྟི དྷམྨཙཀྐཾ. བོདྷིཔལླངྐེ ནིསིནྣསྶ ཧི ཙཏཱུསུ སཙྩེསུ ཨུཔྤནྣཾ དྭཱདསཱཀཱརཾ པཊིཝེདྷཉཱཎམྤི, ཨིསིཔཏནེ ནིསིནྣསྶ དྭཱདསཱཀཱརཱཡ སཙྩདེསནཱཡ པཝཏྟཀཾ དེསནཱཉཱཎམྤི དྷམྨཙཀྐཾ ནཱམ. ཨུབྷཡམྤི ཧེཏཾ དསབལསྶ ཨུརེ པཝཏྟཉཱཎམེཝ. ཏདུབྷཡཾ ཨིམཱཡ དེསནཱཡ པཀཱསེནྟེན བྷགཝཏཱ དྷམྨཙཀྐཾ པཝཏྟིཏཾ ནཱམ. ཏཾ པནེཏཾ དྷམྨཙཀྐཾ ཡཱཝ ཨཉྙཱསིཀོཎྜཉྙཏྠེརོ ཨཊྛཱརསཧི བྲཧྨཀོཊཱིཧི སདྡྷིཾ སོཏཱཔཏྟིཕལེ པཏིཊྛཱཏི, ཏཱཝ བྷགཝཱ པཝཏྟེཏི ནཱམ པཝཏྟནཀིཙྩསྶ ཨནིཊྛིཏཏྟཱ. པཏིཊྛིཏེ པཝཏྟིཏཾ ནཱམ ཀསྶཔསམྨཱསམྦུདྡྷསྶ སཱསནནྟརདྷཱནཏོ པཊྛཱཡ ཡཱཝ བུདྡྷུཔྤཱདོ, ཨེཏྟཀཾ ཀཱལཾ ཨཔྤཝཏྟཔུབྦསྶ པཝཏྟིཏཏྟཱ. ཏཾ སནྡྷཱཡ ‘‘པཝཏྟིཏེ ཙ པན བྷགཝཏཱ དྷམྨཙཀྐེ བྷུམྨཱ དེཝཱ སདྡམནུསྶཱཝེསུ’’ནྟིཨཱདི ཝུཏྟཾ. ཏཏྠ བྷུམྨཱཏི བྷཱུམཊྛཀདེཝཏཱ. སདྡམནུསྶཱཝེསུནྟི ཨེཀཔྤཧཱརེནེཝ སཱདྷུཀཱརཾ དཏྭཱ ‘‘ཨེཏཾ བྷགཝཏཱ’’ཏིཨཱདཱིནི ཝདནྟཱ ཨནུསྶཱཝཡིཾསུ. ཨོབྷཱསོཏི སབྦཉྙུཏཉྙཱཎཱནུབྷཱཝེན པཝཏྟོ ཙིཏྟཔཙྩཡཨུཏུསམུཊྛཱནོ ཨོབྷཱསོ. སོ ཧི ཏདཱ དེཝཱནཾ དེཝཱནུབྷཱཝཾ ཨཏིཀྐམིཏྭཱ ཝིརོཙིཏྠ. ཨཉྙཱསི ཝཏ བྷོ ཀོཎྜཉྙོཏི ¶ ཨིམསྶཔི ཨུདཱནསྶ ཨུདཱཧརཎགྷོསོ དསསཧསྶིལོཀདྷཱཏུཾ ཕརིཏྭཱ ཨཊྛཱསི. བྷགཝཏོ ཧི དྷམྨཙཀྐཔྤཝཏྟནསྶ ཨཱརམྦྷེ ཝིཡ པརིསམཱཔནེཔི ཨཏིཝིཡ ཨུལཱ༹རཏམཾ པཱིཏིསོམནསྶཾ ཨུདཔཱདི.

༡༨. དིཊྛོ ¶ ཨརིཡསཙྩདྷམྨོ ཨེཏེནཱཏི དིཊྛདྷམྨོ. ཨེས ནཡོ སེསཔདེསུཔི. ཨེཏྠ ཙ དསྶནཾ ནཱམ ཉཱཎདསྶནཏོ ཨཉྙམྤི ཨཏྠཱིཏི ཏཾནིཝཏྟནཏྠཾ ‘‘པཏྟདྷམྨོ’’ཏི ཝུཏྟཾ. པཏྟི ཙ ཉཱཎསམྤཏྟིཏོ ཨཉྙཱཔི ཝིཛྫཏཱིཏི ཏཏོ ཝིསེསནཏྠཾ ‘‘ཝིདིཏདྷམྨོ’’ཏི ཝུཏྟཾ. སཱ པནེསཱ ཝིདིཏདྷམྨཏཱ ཨེཀདེསཏོཔི ཧོཏཱིཏི ནིཔྤདེསཏོ ཝིདིཏབྷཱཝཾ དསྶེཏུཾ ‘‘པརིཡོགཱལ༹ྷདྷམྨོ’’ཏི ཝུཏྟཾ. ཏེནསྶ སཙྩཱབྷིསམྦོདྷིཾཡེཝ དཱིཔེཏི. མགྒཉཱཎཉྷི ཨེཀཱབྷིསམཡཝསེན པརིཉྙཱདིཀིཙྩཾ སཱདྷེནྟཾ ནིཔྤདེསེན ཙཏུསཙྩདྷམྨཾ སམནྟཏོ ཨོགཱལ༹ྷཾ ནཱམ ཧོཏི. སཔྤཊིབྷཡཀནྟཱརསདིསཱ སོལ༹སཝཏྠུཀཱ ཨཊྛཝཏྠུཀཱ ཙ ཏིཎྞཱ ཝིཙིཀིཙྪཱ ཨནེནཱཏི ཏིཎྞཝིཙིཀིཙྪོ. པཝཏྟིཨཱདཱིསུ ‘‘ཨེཝཾ ནུཁོ ན ནུཁོ’’ཏི ཨེཝཾ པཝཏྟིཀཱ ཝིགཏཱ སམུཙྪིནྣཱ ཀཐཾཀཐཱ ཨསྶཱཏི ཝིགཏཀཐཾཀཐོ. ཝེསཱརཛྫཔྤཏྟོཏི སཱརཛྫཀརཱནཾ པཱཔདྷམྨཱནཾ པཧཱིནཏྟཱ ཏཔྤཊིཔཀྑེསུ ཙ སཱིལཱདཱིསུ གུཎེསུ སུཔྤཏིཊྛིཏཏྟཱ ཝིསཱརདབྷཱཝཾ ཝེཡྻཏྟིཡཾ པཏྟོ ཨདྷིགཏོ. སྭཱཡཾ ཝེསཱརཛྫཔྤཏྟིསུཔྤཏིཊྛིཏབྷཱཝོ ཀཏྠཱཏི ཨཱཧ ‘‘སཏྠུསཱསནེ’’ཏི. ཨཏྟནཱ པཙྩཀྑཏོ ཨདྷིགཏཏྟཱ ན པརཾ པཙྩེཏི, པརསྶ སདྡྷཱཡ ཨེཏྠ ནཔྤཝཏྟཏི, ན ཏསྶ པརོ པཙྩེཏབྦོ ཨཏྠཱིཏི ཨཔརཔྤཙྩཡོ.

ལབྷེཡྻཱཧནྟི ལབྷེཡྻཾ ཨཧཾ, ཨཱཡཱཙནཝཙནམེཏཾ. ཨེཧཱིཏི ཨཱཡཱཙིཏཱནཾ པབྦཛྫཱུཔསམྤདཱནཾ ཨནུམཏབྷཱཝཔྤཀཱསནཝཙནཾ, ཏསྨཱ ཨེཧི སམྤཊིཙྪཱཧི ཡཐཱཡཱཙིཏཾ པབྦཛྫཱུཔསམྤདཝིསེསནྟི ཨཏྠོ. ཨིཏི-སདྡོ ཏསྶ ཨེཧིབྷིཀྑཱུཔསམྤདཱཔཊིལཱབྷནིམིཏྟཝཙནཔརིཡོསཱནདསྶནོ. ཏདཝསཱནོ ཧི ཏསྶ བྷིཀྑུབྷཱཝོ. ཏེནེཝཱཧ ‘‘ཨེཧི བྷིཀྑཱུཏི བྷགཝཏོ ཝཙནེན ཨབྷིནིཔྥནྣཱ སཱཝ ཏསྶ ཨཱཡསྨཏོ ཨེཧིབྷིཀྑཱུཔསམྤདཱ ཨཧོསཱི’’ཏི. ཙར བྲཧྨཙརིཡནྟི ཨུཔརིམགྒཏྟཡསངྑཱཏཾ བྲཧྨཙརིཡཾ སམདྷིགཙྪ. ཀིམཏྠཾ? སམྨཱ དུཀྑསྶ ཨནྟཀིརིཡཱཡ. ཨིདྷཱཔི ‘‘ཨཝོཙཱ’’ཏི སམྦནྡྷིཏབྦཾ. ‘‘ནཝ ཀོཊིསཧསྶཱནཱི’’ཏིཨཱདིནཱ (ཝིསུདྡྷི. ༡.༢༠; པཊི. མ. ཨཊྛ. ༡.༡.༣༧) ཝུཏྟཔྤབྷེདཱནཾ ཨནེཀསཧསྶཱནཾ སཾཝརཝིནཡཱནཾ སམཱདིཡིཏྭཱ ཝཏྟནེན ཨུཔརིབྷཱུཏཱ ཨགྒབྷཱུཏཱ སམྤདཱཏི ཨུཔསམྤདཱ.

༡༩. ནཱིཧཱརབྷཏྟོཏི ནཱིཧཊབྷཏྟོ, གཱམཏོ བྷིཀྑཾ ནཱིཧརིཏྭཱ བྷིཀྑཱུཧི དིནྣབྷཏྟོཏི ཨཏྠོ ¶ . བྷགཝཱ ཧི དཧརཀུམཱརཀེ ཝིཡ ཏེ བྷིཀྑཱུ ¶ པརིཧརནྟོ པཱཊིཔདདིཝསཏོ པཊྛཱཡ པིཎྜཔཱཏཏྠཱཡཔི གཱམཾ ཨཔཝིསིཏྭཱ ཨནྟོཝིཧཱརེཡེཝ ཝསི.

དྷམྨཙཀྐཔྤཝཏྟནསུཏྟཝཎྞནཱ ནིཊྛིཏཱ.

ཨནཏྟལཀྑཎསུཏྟཝཎྞནཱ

༢༠. ཨཱམནྟེསཱིཏི ཨཱསཱལ༹ྷཱིཔུཎྞམདིཝསེ དྷམྨཙཀྐཔྤཝཏྟནཏོ པཊྛཱཡ ཨནུཀྐམེན སོཏཱཔཏྟིཕལེ པཏིཊྛིཏེ ཨཉྙཱསིཀོཎྜཉྙཔྤམུཁེ པཉྩཝགྒིཡེ ‘‘ཨིདཱནི ཏེསཾ ཨཱསཝཀྑཡཱཡ དྷམྨཾ དེསེསྶཱམཱི’’ཏི པཉྩམིཡཱ པཀྑསྶ ཨཱམནྟེསི. ཨནཏྟཱཏི ཨཝསཝཏྟནཊྛེན ཨསཱམིཀཊྛེན སུཉྙཏཊྛེན ཨཏྟཔཊིཀྑེཔཊྛེནཱཏི ཨེཝཾ ཙཏཱུཧི ཀཱརཎེཧི ཨནཏྟཱ. ཏཏྠ ‘‘ཨུཔྤནྣཾ རཱུཔཾ ཋིཏིཾ མཱ པཱཔུཎཱཏུ, ཋཱནཔྤཏྟཾ མཱ ཛཱིརཏུ, ཛརཔྤཏྟཾ མཱ བྷིཛྫཏུ, ཨུདཡབྦཡེཧི མཱ ཀིལམཡཏཱུ’’ཏི ན ཨེཏྠ ཀསྶཙི ཝསཱིབྷཱཝོ ཨཏྠི, སྭཱཡམསྶ ཨཝསཝཏྟནཊྛོ. སཱམིབྷཱུཏསྶ ཀསྶཙི ཨབྷཱཝོ ཨསཱམིཀཊྛོ. ནིཝཱསཱིཀཱརཀཝེདཀཨདྷིཊྛཱཡཀཝིརཧེན ཏཏོ སུཉྙཏཱ སུཉྙཏཊྛོ. པརཔརིཀཔྤིཏཨཏྟསབྷཱཝཱབྷཱཝོ ཨེཝ ཨཏྟཔཊིཀྑེཔཊྛོ. ཨིདཱནི ཨནཏྟཏཾཡེཝ ཝིབྷཱཝེཏུཾ ‘‘རཱུཔཉྩ ཧིདཾ བྷིཀྑཝེ’’ཏིཨཱདིམཱཧ. ཏཏྠ ཨཏྟཱ ཨབྷཝིསྶཱཏི ཀཱརཀོ ཝེདཀོ སཡཾཝསཱིཏི ཨེཝཾབྷཱུཏོ ཨཏྟཱ ཨབྷཝིསྶཱཏི ཨདྷིཔྤཱཡོ. ཨེཝཉྷི སཏི རཱུཔསྶ ཨཱབཱདྷཱཡ སཾཝཏྟནཾ ཨཡུཛྫམཱནཀཾ སིཡཱ. ཀཱམཉྩེཏྠ ‘‘ཡསྨཱ ཙ ཁོ, བྷིཀྑཝེ, རཱུཔཾ ཨནཏྟཱ, ཏསྨཱ རཱུཔཾ ཨཱབཱདྷཱཡ སཾཝཏྟཏཱི’’ཏི རཱུཔསྶ ཨནཏྟཏཱཡ དུཀྑཏཱ ཝིབྷཱཝིཏཱ ཝིཡ དིསྶཏི, ཏཐཱཔི ‘‘ཡསྨཱ རཱུཔཾ ཨཱབཱདྷཱཡ སཾཝཏྟཏི, ཏསྨཱ ཨནཏྟཱ’’ཏི པཱཀཊཱཡ སཱབཱདྷཏཱཡ རཱུཔསྶ ཨཏྟསཱརཱབྷཱཝོ ཝིབྷཱཝིཏོ, ཏཏོ ཨེཝ ཙ ‘‘ན ཙ ལབྦྷཏི རཱུཔེ ‘ཨེཝཾ མེ རཱུཔཾ ཧོཏུ, ཨེཝཾ མེ རཱུཔཾ མཱ ཨཧོསཱི’ཏི’’ རཱུཔེ ཀསྶཙི ཨནིསྶརཏཱ ཏསྶ ཙ ཨཝསཝཏྟནཱཀཱརོ དསྶིཏོ. ཝེདནཱདཱིསུཔི ཨེསེཝ ནཡོ.

༢༡. ཏཾ ཀིཾམཉྙཐ བྷིཀྑཝེཏི ཨིདཾ ཀསྨཱ ཨཱརདྡྷཾ? ཨེཏྟཀེན ཋཱནེན ཨནཏྟལཀྑཎམེཝ ཀཐིཏཾ, ན ཨནིཙྩདུཀྑལཀྑཎཱནི, ཨིདཱནི ཏཱནི དསྶེཏྭཱ ¶ སམོདྷཱནེཏྭཱ ཏཱིཎིཔི ལཀྑཎཱནི དསྶེཏུཾ ཨིདམཱརདྡྷནྟི ཝེདིཏབྦཾ. ཨནིཙྩཾ བྷནྟེཏི བྷནྟེ ཡསྨཱ ཧུཏྭཱ ན ཧོཏི, ཏསྨཱ ཨནིཙྩཾ. ཡསྨཱ པུབྦེ ཨསནྟཾ པཙྩཡསམཝཱཡེན ཧུཏྭཱ ཨུཔྤཛྫིཏྭཱ པུན བྷངྒུཔགམནེན ན ཧོཏི, ཏསྨཱ ན ནིཙྩནྟི ཨནིཙྩཾ, ཨདྡྷུཝནྟི ཨདྷིཔྤཱཡོ. ཨཐ ཝཱ ཨུཔྤཱདཝཡཝནྟཏཱཡ ཏཱཝཀཱལིཀཏཱཡ ཝིཔརིཎཱམཀོཊིཡཱ ནིཙྩཔྤཊིཀྑེཔཏོཏི ཨིམེཧིཔི ཀཱརཎེཧི ¶ ཨནིཙྩཾ. ཨེཏྠ ཁཎེ ཁཎེ ཨུཔྤཛྫནཝསེན ནིརུཛ྄ཛྷནཝསེན ཙ པཝཏྟནཏོ ཨུཔྤཱདཝཡཝནྟཏཱ. ཏངྑཎིཀཏཱཡ ཏཱཝཀཱལིཀཏཱ. ཝིཔརིཎཱམཝནྟཏཱཡ ཝིཔརིཎཱམཀོཊི. རཱུཔཉྷི ཨུཔྤཱདཱདིཝིཀཱརཱཔཛྫནེན ཝིཔརིཎཱམནྟཾ ཝིནཱསཾ པཱཔུཎཱཏི. ནིཙྩསབྷཱཝཱབྷཱཝོ ཨེཝ ནིཙྩཔཊིཀྑེཔོ. ཨནིཙྩཱ ཧི དྷམྨཱ, ཏེནེཝ ཨཏྟནོ ཨནིཙྩབྷཱཝེན ཨཏྠཏོ ནིཙྩཏཾ པཊིཀྑིཔནྟི ནཱམ.

དུཀྑཾ བྷནྟེཏི བྷནྟེ པཊིཔཱིལ༹ནཱཀཱརེན དུཀྑཾ. ཨུཔྤཱདཛརཱབྷངྒཝསེན ཧི རཱུཔསྶ ནིརནྟརཾ བཱདྷཏི, པཊིཔཱིལ༹ནཱཀཱརེནསྶ དུཀྑཏཱ. ཨཐ ཝཱ སནྟཱཔཊྛེན དུཀྑམཊྛེན དུཀྑཝཏྠུཀཊྛེན སུཁཔཊིཀྑེཔཊྛེན ཙཱཏི ཙཏཱུཧི ཀཱརཎེཧི དུཀྑཾ. ཨེཏྠ ཙ སནྟཱཔོ ནཱམ དུཀྑདུཀྑཏཱདིཝསེན སནྟཱཔནཾ པརིདཧནཾ. ཏཏོ ཨེཝསྶ དུསྶཧཏཱཡ དུཀྑམཏཱ. ཏིསྶནྣཾ དུཀྑཏཱནཾ སཾསཱརདུཀྑསྶ ཙ ཨདྷིཊྛཱནཏཱཡ དུཀྑཝཏྠུཀཏཱ. སུཁསབྷཱཝཱབྷཱཝོ ཨེཝ སུཁཔཊིཀྑེཔོ. ཝིཔརིཎཱམདྷམྨནྟི ཛརཱཡ མརཎེན ཙ ཝིཔརིཎཱམསབྷཱཝཾ. ཀལླཾ ནཱུཏི ཡུཏྟཾ ནུ. ཏནྟི ཨེཝཾ ཨནིཙྩཾ དུཀྑཾ ཝིཔརིཎཱམདྷམྨཾ རཱུཔཾ. ཨེཏཾ མམཱཏི ཏཎྷཱགཱཧོ མམངྐཱརབྷཱཝཏོ. ཨེསོཧམསྨཱིཏི མཱནགཱཧོ ཨཧངྐཱརབྷཱཝཏོ. ཨེསོ མེ ཨཏྟཱཏི དིཊྛིགཱཧོ ཨཏྟབྷཱཝཝིཔལླཱསགྒཱཧཏོ. ཏཎྷཱགཱཧོ ཙེཏྠ ཨཊྛསཏཏཎྷཱཝིཙརིཏཝསེན, མཱནགཱཧོ ནཝཝིདྷམཱནཝསེན, དིཊྛིགཱཧོ དྭཱསཊྛིདིཊྛིཝསེན ཝེདིཏབྦོ. ཨིམེསཾ ཏིཎྞཾ ཏཎྷཱམཱནདིཊྛིགཱཧཱནཾ ཝསེན ཡུཏྟཾ ནུ ཏཾ སམནུཔསྶིཏུནྟི ཝུཏྟཾ ཧོཏི.

ཨིཏི བྷགཝཱ ཨནིཙྩདུཀྑཝསེན ཨནཏྟལཀྑཎཾཡེཝ དསྶེསི. བྷགཝཱ ཧི ཀཏྠཙི ཨནིཙྩཝསེན ཨནཏྟཏཾ དསྶེཏི, ཀཏྠཙི དུཀྑཝསེན, ཀཏྠཙི ཨུབྷཡཝསེན. ཏཐཱ ཧི ‘‘ཙཀྑུ ཨཏྟཱཏི ཡོ ཝདེཡྻ, ཏཾ ན ཨུཔཔཛྫཏི, ཙཀྑུསྶ ཨུཔྤཱདོཔི ཝཡོཔི པཉྙཱཡཏི. ཡསྶ ཁོ པན ཨུཔྤཱདོཔི ཝཡོཔི པཉྙཱཡཏི, ‘ཨཏྟཱ མེ ཨུཔྤཛྫཏི ཙེཝ ཝེཏི ཙཱ’ཏི ཨིཙྩསྶ ཨེཝམཱགཏཾ ཧོཏི, ཏསྨཱ ཏཾ ན ཨུཔཔཛྫཏི. ‘ཙཀྑུ ཨཏྟཱ’ཏི ¶ ཡོ ཝདེཡྻ, ཨིཏི ཙཀྑུ ཨནཏྟཱ’’ཏི ཨིམསྨིཉྩ ཚཚཀྐསུཏྟེ (མ. ནི. ༣.༤༢༢) ཨནིཙྩཝསེན ཨནཏྟཏཾ དསྶེསི. ‘‘རཱུཔཉྩ ཧིདཾ, བྷིཀྑཝེ, ཨཏྟཱ ཨབྷཝིསྶ…པེ… ཨེཝཾ མེ རཱུཔཾ མཱ ཨཧོསཱི’’ཏི ཨིམསྨིཾཡེཝ ཨནཏྟལཀྑཎསུཏྟེ དུཀྑཝསེན ཨནཏྟཏཾ དསྶེསི. ‘‘རཱུཔཾ, བྷིཀྑཝེ, ཨནིཙྩཾ, ཡདནིཙྩཾ ཏཾ དུཀྑཾ, ཡཾ དུཀྑཾ ཏདནཏྟཱ, ཡདནཏྟཱ, ཏཾ ‘ནེཏཾ མམ, ནེསོཧམསྨི, ན མེ སོ ཨཏྟཱ’ཏི ཨེཝམེཏཾ ཡཐཱབྷཱུཏཾ སམྨཔྤཉྙཱཡ དཊྛབྦ’’ནྟི ཨིམསྨིཾ ཨརཧནྟསུཏྟེ (སཾ. ནི. ༣.༧༦-༧༧) ཨུབྷཡཝསེན ཨནཏྟཏཾ དསྶེསི. ཀསྨཱ? ཨནིཙྩཾ དུཀྑཉྩ པཱཀཊཾ, ཨནཏྟཱ ཨཔཱཀཊཾ. པརིབྷོགབྷཱཛནཱདཱིསུ ཧི བྷིནྣེསུ ‘‘ཨཧོ ཨནིཙྩ’’ནྟི ཝདནྟི, ‘‘ཨཧོ ཨནཏྟཱ’’ཏི ¶ པན ཝཏྟཱ ནཱམ ནཏྠི. སརཱིརེ གཎྜཔིལ༹ཀཱསུ ཝཱ ཨུཊྛིཏཱསུ ཀཎྚཀེན ཝཱ ཝིདྡྷཱ ‘‘ཨཧོ དུཀྑ’’ནྟི ཝདནྟི, ‘‘ཨཧོ ཨནཏྟཱ’’ཏི པན ཝཏྟཱ ནཱམ ནཏྠི. ཀསྨཱ? ཨིདཉྷི ཨནཏྟལཀྑཎཾ ནཱམ ཨཝིབྷཱུཏཾ དུདྡསཾ དུཔྤཉྙཱཔནཾ. ཏཐཱ ཧི སརབྷངྒཱདཡོཔི སཏྠཱརོ ནཱདྡསཾསུ, ཀུཏོ པཉྙཱཔནཱ, ཏེན ནཾ བྷགཝཱ ཨནིཙྩཝསེན ཝཱ དུཀྑཝསེན ཝཱ ཨུབྷཡཝསེན ཝཱ དསྶེསི. ཏཡིདཾ ཨིམསྨིམྤི ཏེཔརིཝཊྚེ ཨནིཙྩདུཀྑཝསེནེཝ དསྶིཏཾ. ཝེདནཱདཱིསུཔི ཨེསེཝ ནཡོ.

༢༢. ཏསྨཱཏིཧཱཏི ཏསྨཱ ཨིཙྩེཝ ཝུཏྟཾ. ཏི-ཀཱར ཧ-ཀཱརཱ ནིཔཱཏཱ, ཡསྨཱ ཨིམེ པཉྩཀྑནྡྷཱ ཨནིཙྩཱ དུཀྑཱ ཨནཏྟཱ, ཏསྨཱཏི ཨཏྠོ. ཡཾ ཀིཉྩཱིཏི ཨནཝསེསཔརིཡཱདཱནམེཏཾ. ཡནྟི ཧི སཱམཉྙེན ཨནིཡམདསྶནཾ, ཀིཉྩཱིཏི པཀཱརཏོ བྷེདཾ ཨཱམསིཏྭཱ ཨནིཡམདསྶནཾ. ཨུབྷཡེནཔི ཨཏཱིཏཾ ཝཱ…པེ… སནྟིཀེ ཝཱ ཨཔྤཾ ཝཱ བཧུཾ ཝཱ ཡཱདིསཾ ཝཱ ཏཱདིསཾ ཝཱ ནཔུཾསཀནིདྡེསཱརཧཾ སབྦཾ བྱཱཔེཏྭཱ སངྒཎྷཱཏི, ཏསྨཱ ཨནཝསེསཔརིཡཱདཱནམེཏཾ ‘‘ཡཾ ཀིཉྩཱི’’ཏི. ཨེཝཉྩ སཏི ཨཉྙེསུཔི ནཔུཾསཀནིདྡེསཱརཧེསུ པསངྒཾ དིསྭཱ ཏཏྠ ཨདྷིཔྤེཏཏྠཾ ཨདྷིཙྩ པཝཏྟནཏོ ཨཏིཔྤསངྒསྶ ནིཡམནཏྠཾ ‘‘རཱུཔ’’ནྟི ཝུཏྟཾ. ཨེཝཾ པདདྭཡེནཔི རཱུཔསྶ ཨསེསཔརིགྒཧོ ཀཏོ ཧོཏི. ཨཐསྶ ཨཏཱིཏཱདིཝིབྷཱགཾ ཨཱརབྷཏི ‘‘ཨཏཱིཏཱནཱགཏཔཙྩུཔྤནྣ’’ནྟིཨཱདིནཱ. ཏཉྷི ཀིཉྩི ཨཏཱིཏཾ ཀིཉྩི ཨནཱགཏཱདིབྷེདནྟི. ཨེས ནཡོ ཝེདནཱདཱིསུཔི.

ཏཏྠ རཱུཔཾ ཏཱཝ ཨདྡྷཱསནྟཏིསམཡཁཎཝསེན ཙཏུདྷཱ ཨཏཱིཏཾ ནཱམ ཧོཏི, ཏཐཱ ཨནཱགཏཔཙྩུཔྤནྣཾ. ཏཏྠ ཨདྡྷཱཝསེན ཏཱཝ ཨེཀསྶ ཨེཀསྨིཾ ¶ བྷཝེ པཊིསནྡྷིཏོ པུབྦེ ཨཏཱིཏཾ, ཙུཏིཏོ ཨུདྡྷམནཱགཏཾ, ཨུབྷིནྣམནྟརེ པཙྩུཔྤནྣཾ. སནྟཏིཝསེན སབྷཱགེཀཨུཏུསམུཊྛཱནཨེཀཱཧཱརསམཨུཊྛཱནཉྩ པུབྦཱཔརིཡཝསེན ཝཏྟམཱནམྤི པཙྩུཔྤནྣཾ, ཏཏོ པུབྦེ ཝིསབྷཱགཨུཏུཨཱཧཱརསམུཊྛཱནཾ ཨཏཱིཏཾ, པཙྪཱ ཨནཱགཏཾ. ཙིཏྟཛཾ ཨེཀཝཱིཐིཨེཀཛཝནཨེཀསམཱཔཏྟིསམུཊྛཱནཾ པཙྩུཔྤནྣཾ, ཏཏོ པུབྦེ ཨཏཱིཏཾ, པཙྪཱ ཨནཱགཏཾ. ཀམྨསམུཊྛཱནསྶ པཱཊིཡེཀྐཾ སནྟཏིཝསེན ཨཏཱིཏཱདིབྷེདོ ནཏྠི. ཏེསཾཡེཝ པན ཨུཏུཨཱཧཱརཙིཏྟསམུཊྛཱནཱནཾ ཨུཔཏྠམྦྷཀཝསེན ཏསྶ ཨཏཱིཏཱདིབྷཱཝོ ཝེདིཏབྦོ. སམཡཝསེན ཨེཀམུཧུཏྟཔུབྦཎྷསཱཡནྷརཏྟིདིཝཱདཱིསུ སམཡེསུ སནྟཱནཝསེན པཝཏྟམཱནཾ ཏཾཏཾསམཡཝནྟཾ རཱུཔཾ པཙྩུཔྤནྣཾ ནཱམ, ཏཏོ པུབྦེ ཨཏཱིཏཾ, པཙྪཱ ཨནཱགཏཾ. ཁཎཝསེན ཨུཔྤཱདཱདིཀྑཎཏྟཡཔརིཡཱཔནྣཾ པཙྩུཔྤནྣཾ, ཏཏོ པུབྦེ ཨཏཱིཏཾ, པཙྪཱ ཨནཱགཏཾ, ཨིདམེཝེཏྠ ནིཔྤརིཡཱཡཾ, སེསཱ པརིཡཱཡཀཐཱ.

ཨཛ྄ཛྷཏྟཾ ¶ ཝཱ བཧིདྡྷཱ ཝཱཏི ཙཀྑཱདིཔཉྩཝིདྷཾ རཱུཔཾ ཨཏྟབྷཱཝཾ ཨདྷིཀིཙྩ པཝཏྟཏྟཱ ཨཛ྄ཛྷཏྟཾ, སེསཾ ཏཏོ བཱཧིརཏྟཱ བཧིདྡྷཱ. ཨཔིཙ ནིཡཀཛ྄ཛྷཏྟམྤི ཨིདྷ ཨཛ྄ཛྷཏྟཾ, པརཔུགྒལིཀམྤི ཙ བཧིདྡྷཱཏི ཝེདིཏབྦཾ. ཨོལཱ༹རིཀཾ ཝཱ སུཁུམཾ ཝཱཏི ཙཀྑཱདཱིནི ནཝ, ཨཱཔོདྷཱཏུཝཛྫཱ ཏིསྶོ དྷཱཏུཡོ ཙཱཏི དྭཱདསཝིདྷཾ རཱུཔཾ གྷཊྚནཝསེན གཧེཏབྦཏོ ཨོལཱ༹རིཀཾ, སེསཾ ཏཏོ ཝིཔརཱིཏཏྟཱ སུཁུམཾ. ཧཱིནཾ ཝཱ པཎཱིཏཾ ཝཱཏི ཨེཏྠ ཧཱིནཔཎཱིཏབྷཱཝོ པརིཡཱཡཏོ ནིཔྤརིཡཱཡཏོ ཙ. ཏཏྠ ཨཀནིཊྛཱནཾ རཱུཔཏོ སུདསྶཱིནཾ རཱུཔཾ ཧཱིནཾ, ཏདེཝ སུདསྶཱནཾ རཱུཔཏོ པཎཱིཏཾ. ཨེཝཾ ཡཱཝ ནརཀསཏྟཱནཾ རཱུཔཾ, ཏཱཝ པརིཡཱཡཏོ ཧཱིནཔཎཱིཏཏཱ ཝེདིཏབྦཱ. ནིཔྤརིཡཱཡཏོ པན ཡཾ ཨཱརམྨཎཾ ཀཏྭཱ ཨཀུསལཝིཔཱཀཝིཉྙཱཎཾ ཨུཔྤཛྫཏི, ཏཾ ཧཱིནཾ ཨནིཊྛབྷཱཝཏོ. ཡཾ པན ཨཱརམྨཎཾ ཀཏྭཱ ཀུསལཝིཔཱཀཝིཉྙཱཎཾ ཨུཔྤཛྫཏི, ཏཾ པཎཱིཏཾ ཨིཊྛབྷཱཝཏོ. ཡཐཱ ཧི ཨཀུསལཝིཔཱཀོ སཡཾ ཨནིཊྛོ ཨནིཊྛེ ཨེཝ ཨུཔྤཛྫཏི, ན ཨིཊྛེ, ཨེཝཾ ཀུསལཝིཔཱཀོཔི སཡཾ ཨིཊྛོ ཨིཊྛེཡེཝ ཨུཔྤཛྫཏི, ན ཨནིཊྛེ. ཡཾ དཱུརེ སནྟིཀེ ཝཱཏི ཡཾ སུཁུམཾ, ཏདེཝ དུཔྤཊིཝིཛ྄ཛྷསབྷཱཝཏྟཱ དཱུརེ, ཨིཏརཾ སུཔྤཊིཝིཛ྄ཛྷསབྷཱཝཏྟཱ སནྟིཀེ. ཨཔིཙེཏྠ ཨོཀཱསཏོཔི ཨུཔཱདཱཡུཔཱདཱཡ དཱུརསནྟིཀཏཱ ཝེདིཏབྦཱ. ཏཾ སབྦནྟི ཏཾ ཨཏཱིཏཱདཱིཧི པདེཧི ཝིསུཾ ནིདྡིཊྛཾ སབྦཾ རཱུཔཾ. སམྨཔྤཉྙཱཡ དཊྛབྦནྟི སཧཝིཔསྶནཱཡ མགྒཔཉྙཱཡ དཊྛབྦཾ.

ཡཱ ¶ ཀཱཙི ཝེདནཱཏིཨཱདཱིསུ པན སནྟཏིཝསེན ཙ ཁཎཝསེན ཙ ཝེདནཱཡ ཨཏཱིཏཱནཱགཏཔཙྩུཔྤནྣབྷཱཝོ ཝེདིཏབྦོ. ཏཏྠ (ཝིསུདྡྷི. ༢.༤༩༧ ཨཱདཡོ) སནྟཏིཝསེན ཨེཀཝཱིཐིཨེཀཛཝནཨེཀསམཱཔཏྟིཔརིཡཱཔནྣཱ ཨེཀཝིདྷཝིསཡསམཱཡོགཔྤཝཏྟཱ ཙ དིཝསམྤི བུདྡྷརཱུཔཾ པསྶནྟསྶ དྷམྨཾ སུཎནྟསྶ པཝཏྟསདྡྷཱདིསཧིཏཝེདནཱ པཙྩུཔྤནྣཱ, ཏཏོ པུབྦེ ཨཏཱིཏཱ, པཙྪཱ ཨནཱགཏཱ. ཁཎཝསེན ཁཎཏྟཡཔརིཡཱཔནྣཱ པཙྩུཔྤནྣཱ, ཏཏོ པུབྦེ ཨཏཱིཏཱ, པཙྪཱ ཨནཱགཏཱ. ཨཛ྄ཛྷཏྟབཧིདྡྷཱབྷེདོ ནིཡཀཛ྄ཛྷཏྟཝསེན ཝེདིཏབྦོ. ཨོལཱ༹རིཀསུཁུམབྷེདོ ‘‘ཨཀུསལཱ ཝེདནཱ ཨོལཱ༹རིཀཱ, ཀུསལཱབྱཱཀཏཱ ཝེདནཱ སུཁུམཱ’’ཏིཨཱདིནཱ ནཡེན ཝིབྷངྒེ (ཝིབྷ. ༡༡) ཝུཏྟེན ཛཱཏིསབྷཱཝཔུགྒལལོཀིཡལོཀུཏྟརཝསེན ཝེདིཏབྦོ. ཛཱཏིཝསེན ཏཱཝ ཨཀུསལཝེདནཱ སཱཝཛྫཀིརིཡཧེཏུཏོ ཀིལེསསནྟཱཔསབྷཱཝཏོ ཙ ཨཝཱུཔསནྟཝུཏྟཱིཏི ཀུསལཝེདནཱཡ ཨོལཱ༹རིཀཱ, སབྱཱཔཱརཏོ སཨུསྶཱཧཏོ སཝིཔཱཀཏོ ཀིལེསསནྟཱཔསབྷཱཝཏོ སཱཝཛྫཏོ ཙ ཝིཔཱཀཱབྱཱཀཏཱཡ ཨོལཱ༹རིཀཱ, སཝིཔཱཀཏོ ཀིལེསསནྟཱཔསབྷཱཝཏོ སབྱཱཔཛྫཏོ སཱཝཛྫཏོ ཙ ཀིརིཡཱབྱཱཀཏཱཡ ཨོལཱ༹རིཀཱ, ཀུསལཱབྱཱཀཏཱ པན ཝུཏྟཝིཔརིཡཱཡཏོ ཨཀུསལཱཡ སུཁུམཱ. དྭེཔི ཀུསལཱཀུསལཝེདནཱ སབྱཱཔཱརཏོ སཨུསྶཱཧཏོ སཝིཔཱཀཏོ ཙ ཡཐཱཡོགཾ དུཝིདྷཱཡཔི ཨབྱཱཀཏཱཡ ཨོལཱ༹རིཀཱ, ཝུཏྟཝིཔརིཡཱཡེན དུཝིདྷཱཔི ཨབྱཱཀཏཱ ཏཱཧི སུཁུམཱ. ཨེཝཾ ཏཱཝ ཛཱཏིཝསེན ཨོལཱ༹རིཀསུཁུམཏཱ ཝེདིཏབྦཱ.

སབྷཱཝཝསེན ¶ པན དུཀྑཝེདནཱ ནིརསྶཱདཏོ སཝིཔྥཱརཏོ ཨུབྦེཛནཱིཡཏོ ཨབྷིབྷཝནཏོ ཙ ཨིཏརཱཧི དྭཱིཧི ཨོལཱ༹རིཀཱ, ཨིཏརཱ པན དྭེ སཱཏཏོ སནྟཏོ པཎཱིཏཏོ མནཱཔཏོ མཛ྄ཛྷཏྟཏོ ཙ ཡཐཱཡོགཾ དུཀྑཱཡ སུཁུམཱ. ཨུབྷོ པན སུཁདུཀྑཱ སཝིཔྥཱརཏོ ཁོབྷཀརཎཏོ པཱཀཊཏོ ཙ ཨདུཀྑམསུཁཱཡ ཨོལཱ༹རིཀཱ, སཱ ཝུཏྟཝིཔརིཡཱཡེན ཏདུབྷཡཏོ སུཁུམཱ. ཨེཝཾ སབྷཱཝཝསེན ཨོལཱ༹རིཀསུཁུམཏཱ ཝེདིཏབྦཱ. པུགྒལཝསེན པན ཨསམཱཔནྣསྶ ཝེདནཱ ནཱནཱརམྨཎཝིཀྑིཏྟབྷཱཝཏོ སམཱཔནྣསྶ ཝེདནཱཡ ཨོལཱ༹རིཀཱ, ཝིཔརིཡཱཡེན ཨིཏརཱ སུཁུམཱ. ཨེཝཾ པུགྒལཝསེན ཨོལཱ༹རིཀསུཁུམཏཱ ཝེདིཏབྦཱ. ལོཀིཡལོཀུཏྟརཝསེན པན སཱསཝཱ ཝེདནཱ ལོཀིཡཱ. སཱ ཨཱསཝུཔྤཏྟིཧེཏུཏོ ¶ ཨོགྷནིཡཏོ ཡོགནིཡཏོ གནྠནིཡཏོ ནཱིཝརཎིཡཏོ ཨུཔཱདཱནིཡཏོ སཾཀིལེསིཀཏོ པུཐུཛྫནསཱདྷཱརཎཏོ ཙ ཨནཱསཝཱཡ ཨོལཱ༹རིཀཱ, སཱ ཝིཔརིཡཱཡེན སཱསཝཱཡ སུཁུམཱ. ཨེཝཾ ལོཀིཡལོཀུཏྟརཝསེན ཨོལཱ༹རིཀསུཁུམཏཱ ཝེདིཏབྦཱ.

ཏཏྠ ཛཱཏིཨཱདིཝསེན སམྦྷེདོ པརིཧརིཏབྦོ. ཨཀུསལཝིཔཱཀཀཱཡཝིཉྙཱཎསམྤཡུཏྟཱ ཧི ཝེདནཱ ཛཱཏིཝསེན ཨབྱཱཀཏཏྟཱ སུཁུམཱཔི སམཱནཱ སབྷཱཝཱདིཝསེན ཨོལཱ༹རིཀཱ ཧོཏི. ཝུཏྟཉྷེཏཾ ‘‘ཨབྱཱཀཏཱ ཝེདནཱ སུཁུམཱ, དུཀྑཱ ཝེདནཱ ཨོལཱ༹རིཀཱ. ཨསམཱཔནྣསྶ ཝེདནཱ ཨོལཱ༹རིཀཱ, སཱསཝཱ ཝེདནཱ ཨོལཱ༹རིཀཱ’’ཏི (ཝིབྷ. ༡༡). ཡཐཱ ཙ དུཀྑཝེདནཱ, ཨེཝཾ སུཁཱདཡོཔི ཛཱཏིཝསེན ཨོལཱ༹རིཀཱ, སབྷཱཝཱདིཝསེན སུཁུམཱ ཧོནྟི. ཏསྨཱ ཡཐཱ ཛཱཏིཨཱདིཝསེན སམྦྷེདོ ན ཧོཏི, ཏཐཱ ཝེདནཱནཾ ཨོལཱ༹རིཀསུཁུམཏཱ ཝེདིཏབྦཱ. སེཡྻཐིདཾ – ཨབྱཱཀཏཱ ཛཱཏིཝསེན ཀུསལཱཀུསལཱཧི སུཁུམཱ. ན ཏཏྠ ‘‘ཀཏམཱ ཨབྱཱཀཏཱ, ཀིཾ དུཀྑཱ, ཀིཾ སུཁཱ, ཀིཾ སམཱཔནྣསྶ, ཀིཾ ཨསམཱཔནྣསྶ, ཀིཾ སཱསཝཱ, ཀིཾ ཨནཱསཝཱ’’ཏི ཨེཝཾ སབྷཱཝཱདིབྷེདོ པརཱམསིཏབྦོ. ཨེས ནཡོ སབྦཏྠ.

ཨཔིཙ ‘‘ཏཾ ཏཾ ཝཱ པན ཝེདནཾ ཨུཔཱདཱཡུཔཱདཱཡ ཝེདནཱ ཨོལཱ༹རིཀཱ སུཁུམཱ དཊྛབྦཱ’’ཏི ཝཙནཏོ ཨཀུསལཱདཱིསུཔི ལོབྷསཧགཏཱཡ དོསསཧགཏཝེདནཱ ཨགྒི ཝིཡ ཨཏྟནོ ནིསྶཡདཧནཏོ ཨོལཱ༹རིཀཱ, ལོབྷསཧགཏཱ སུཁུམཱ. དོསསཧགཏཱཔི ནིཡཏཱ ཨོལཱ༹རིཀཱ, ཨནིཡཏཱ སུཁུམཱ. ནིཡཏཱཔི ཀཔྤཊྛིཏིཀཱ ཨོལཱ༹རིཀཱ, ཨིཏརཱ སུཁུམཱ. ཀཔྤཊྛིཏིཀཱསུཔི ཨསངྑཱརིཀཱ ཨོལཱ༹རིཀཱ, ཨིཏརཱ སུཁུམཱ. ལོབྷསཧགཏཱ པན དིཊྛིསམྤཡུཏྟཱ ཨོལཱ༹རིཀཱ, ཨིཏརཱ སུཁུམཱ. སཱཔི ནིཡཏཱ ཀཔྤཊྛིཏིཀཱ ཨསངྑཱརིཀཱ ཨོལཱ༹རིཀཱ, ཨིཏརཱ སུཁུམཱ, ཨཝིསེསེན ཨཀུསལཱ བཧུཝིཔཱཀཱ ཨོལཱ༹རིཀཱ, ཨཔྤཝིཔཱཀཱ སུཁུམཱ. ཀུསལཱ པན ཨཔྤཝིཔཱཀཱ ཨོལཱ༹རིཀཱ, བཧུཝིཔཱཀཱ སུཁུམཱ.

ཨཔིཙ ¶ ཀཱམཱཝཙརཀུསལཱ ཨོལཱ༹རིཀཱ, རཱུཔཱཝཙརཱ སུཁུམཱ, ཏཏོ ཨརཱུཔཱཝཙརཱ, ཏཏོ ལོཀུཏྟརཱ. ཀཱམཱཝཙརཱ ཙ དཱནམཡཱ ཨོལཱ༹རིཀཱ, སཱིལམཡཱ སུཁུམཱ, ཏཏོ བྷཱཝནཱམཡཱ. བྷཱཝནཱམཡཱཔི དུཧེཏུཀཱ ཨོལཱ༹རིཀཱ ¶ , ཏིཧེཏུཀཱ སུཁུམཱ. ཏིཧེཏུཀཱཔི སསངྑཱརིཀཱ ཨོལཱ༹རིཀཱ, ཨསངྑཱརིཀཱ སུཁུམཱ. རཱུཔཱཝཙརཱ པཋམཛ྄ཛྷཱནིཀཱ ཨོལཱ༹རིཀཱ…པེ… པཉྩམཛ྄ཛྷཱནིཀཱ སུཁུམཱཝ. ཨརཱུཔཱཝཙརཱ ཨཱཀཱསཱནཉྩཱཡཏནསམྤཡུཏྟཱ ཨོལཱ༹རིཀཱ…པེ… ནེཝསཉྙཱནཱསཉྙཱཡཏནསམྤཡུཏྟཱ སུཁུམཱཝ. ལོཀུཏྟརཱ ཙ སོཏཱཔཏྟིམགྒསམྤཡུཏྟཱ ཨོལཱ༹རིཀཱ…པེ… ཨརཧཏྟམགྒསམྤཡུཏྟཱ སུཁུམཱཝ. ཨེས ནཡོ ཏཾཏཾབྷཱུམིཝིཔཱཀཀིརིཡཝེདནཱསུ དུཀྑཱདིཨསམཱཔནྣཱདིསཱསཝཱདིཝསེན ཝུཏྟཝེདནཱསུ ཙ.

ཨོཀཱསཝསེན ཙཱཔི ནིརཡེ དུཀྑཱ ཨོལཱ༹རིཀཱ, ཏིརཙྪཱནཡོནིཡཾ སུཁུམཱ…པེ… པརནིམྨིཏཝསཝཏྟཱི སུཁུམཱཝ. ཡཐཱ ཙ དུཀྑཱ, ཨེཝཾ སུཁཱཔི སབྦཏྠ ཡཐཱནུརཱུཔཾ ཡོཛེཏབྦཱ. ཝཏྠུཝསེན ཙཱཔི ཧཱིནཝཏྠུཀཱ ཡཱ ཀཱཙི ཝེདནཱ ཨོལཱ༹རིཀཱ, པཎཱིཏཝཏྠུཀཱ སུཁུམཱ. ཧཱིནཔྤཎཱིཏབྷེདེ ཡཱ ཨོལཱ༹རིཀཱ, སཱ ཧཱིནཱ. ཡཱ ཙ སུཁུམཱ, སཱ པཎཱིཏཱཏི ཝེདིཏབྦཱ. དཱུརཔདཾ པན ཨཀུསལཱ ཝེདནཱ ཀུསལཱབྱཱཀཏཱཧི ཝེདནཱཧི དཱུརེ, སནྟིཀཔདཾ ཨཀུསལཱ ཝེདནཱ ཨཀུསལཱཡ ཝེདནཱཡ སནྟིཀེཏིཨཱདིནཱ ནཡེན ཝིབྷཏྟཾ. ཏསྨཱ ཨཀུསལཱ ཝེདནཱ ཝིསབྷཱགཏོ ཨསཾསཊྛཏོ ཨསརིཀྑཏོ ཙ ཀུསལཱབྱཱཀཏཱཧི དཱུརེ, ཏཐཱ ཀུསལཱབྱཱཀཏཱ ཨཀུསལཱཡ. ཨེས ནཡོ སབྦཝཱརེསུ. ཨཀུསལཱ པན ཝེདནཱ སབྷཱགཏོ ཙ སཾསཊྛཏོ ཙ སརིཀྑཏོ ཙ ཨཀུསལཱཡ སནྟིཀེཏི. ཏཾཏཾཝེདནཱསམྤཡུཏྟཱནཾ པན སཉྙཱདཱིནམྤི ཨེཝམེཝ ཝེདིཏབྦཾ.

༢༣. སུཏཝཱཏི ཨཱགམཱདྷིགམསངྑཱཏེན བཱཧུསཙྩེན སམནྣཱགཏཏྟཱ སུཏཝཱ. ནིབྦིནྡཏཱིཏི ཨུཀྐཎྛཏི. ཨེཏྠ ཙ ནིབྦིདཱཏི ཝུཊྛཱནགཱམིནཱིཝིཔསྶནཱ ཨདྷིཔྤེཏཱ. ནིབྦིནྡཾ ཝིརཛྫཏཱིཏི ཨེཏྠ ཝིརཱགཝསེན ཙཏྟཱརོ མགྒཱ ཀཐིཏཱ. ཝིརཱགཱ ཝིམུཙྩཏཱིཏི ཝིརཱགེན མགྒེནེཝ ཧེཏུབྷཱུཏེན པཊིཔྤསྶདྡྷིཝིམུཏྟིཝསེན ཝིམུཙྩཏི. ཨིམིནཱ ཙཏྟཱརི སཱམཉྙཕལཱནི ཀཐིཏཱནི. ཝིམུཏྟསྨིཾ ཝིམུཏྟམིཏི ཉཱཎཾ ཧོཏཱིཏི ཨིམིནཱ པན པཙྩཝེཀྑཎཉཱཎཾ ཀཐིཏཾ. ཁཱིཎཱ ཛཱཏཱིཏིཨཱདཱིཧི ཏསྶ བྷཱུམི. ཏེན ཧི ཉཱཎེན ཨརིཡསཱཝཀོ པཙྩཝེཀྑནྟོ ‘‘ཁཱིཎཱ ཛཱཏཱི’’ཏིཨཱདཱིནི པཛཱནཱཏི. ཀཏམཱ པནསྶ ཛཱཏི ཁཱིཎཱ, ཀཐཉྩ ནཾ པཛཱནཱཏཱིཏི? ན ཏཱཝསྶ ཨཏཱིཏཱ ཛཱཏི ཁཱིཎཱ པུབྦེཝ ཁཱིཎཏྟཱ, ན ཨནཱགཏཱ ཨནཱགཏེ ཝཱཡཱམཱབྷཱཝཏོ, ན པཙྩུཔྤནྣཱ. ཡཱ པན མགྒསྶ ཨབྷཱཝིཏཏྟཱ ཨུཔྤཛྫེཡྻ ཨེཀཙཏུཔཉྩཝོཀཱརབྷཝེསུ ཨེཀཙཏུཔཉྩཀྑནྡྷཔྤབྷེདཱ ཛཱཏི, སཱ མགྒསྶ བྷཱཝིཏཏྟཱ ཨནུཔྤཱདདྷམྨཏཾ ¶ ཨཱཔཛྫནེན ཁཱིཎཱ, ཏཾ སོ མགྒབྷཱཝནཱཡ པཧཱིནཀིལེསེ ¶ པཙྩཝེཀྑིཏྭཱ ཀིལེསཱབྷཱཝེ ཝིཛྫམཱནམྤི ཀམྨཾ ཨཱཡཏིཾ ཨཔྤཊིསནྡྷིཀཾ ཧོཏཱིཏི ཛཱནནྟོ པཛཱནཱཏི.

ཝུསིཏནྟི ཝུཏྠཾ པརིཝུཏྠཾ, ཀཏཾ ཙརིཏཾ ནིཊྛིཏནྟི ཨཏྠོ. བྲཧྨཙརིཡནྟི མགྒབྲཧྨཙརིཡཾ. པུཐུཛྫནཀལྱཱཎཀེན ཧི སདྡྷིཾ སཏྟ སེཀྑཱ མགྒབྲཧྨཙརིཡཾ ཝསནྟི ནཱམ, ཁཱིཎཱསཝོ ཝུཏྠཝཱསོ, ཏསྨཱ ཨརིཡསཱཝཀོ ཨཏྟནོ བྲཧྨཙརིཡཝཱསཾ པཙྩཝེཀྑནྟོ ‘‘ཝུསིཏཾ བྲཧྨཙརིཡ’’ནྟི པཛཱནཱཏི. ཀཏཾ ཀརཎཱིཡནྟི ཙཏཱུསུ སཙྩེསུ ཙཏཱུཧི མགྒེཧི པརིཉྙཱཔཧཱནསཙྪིཀིརིཡཱབྷཱཝནཱཝསེན སོལ༹སཝིདྷམྤི ཀིཙྩཾ ནིཊྛཱཔིཏནྟི ཨཏྠོ. པུཐུཛྫནཀལྱཱཎཀཱདཡོ ཧི ཏཾ ཀིཙྩཾ ཀརོནྟི, ཁཱིཎཱསཝོ ཀཏཀརཎཱིཡོ. ཏསྨཱ ཨརིཡསཱཝཀོ ཨཏྟནོ ཀརཎཱིཡཾ པཙྩཝེཀྑནྟོ ‘‘ཀཏཾ ཀརཎཱིཡ’’ནྟི པཛཱནཱཏི. ནཱཔརཾ ཨིཏྠཏྟཱཡཱཏི ཨིདཱནི པུན ཨིཏྠབྷཱཝཱཡ ཨེཝཾསོལ༹སཀིཙྩབྷཱཝཱཡ, ཀིལེསཀྑཡཱཡ ཝཱ མགྒབྷཱཝནཱཀིཙྩཾ མེ ནཏྠཱིཏི པཛཱནཱཏི. ཨཐ ཝཱ ཨིཏྠཏྟཱཡཱཏི ཨིཏྠབྷཱཝཱ ཨིམསྨཱ ཨེཝཾཔཀཱརཱ ཨིདཱནི ཝཏྟམཱནཀྑནྡྷསནྟཱནཱ ཨཔརཾ ཁནྡྷསནྟཱནཾ མཡ྄ཧཾ ནཏྠི, ཨིམེ པན པཉྩཀྑནྡྷཱ པརིཉྙཱཏཱ ཏིཊྛནྟི ཚིནྣམཱུལཀཱ རུཀྑཱ ཝིཡ. ཏེ ཙརིམཀཝིཉྙཱཎནིརོདྷེན ཨནུཔཱདཱནོ ཝིཡ ཛཱཏཝེདོ ནིབྦཱཡིསྶནྟཱིཏི པཛཱནཱཏི.

༢༤. ཨཏྟམནཱ ཏེ བྷིཀྑཱུ བྷགཝཏོ བྷཱསིཏཾ ཨབྷིནནྡུནྟི ཏེ བྷིཀྑཱུ སཀམནཱ ཏུཊྛམནཱ, པཱིཏིསོམནསྶེཧི ཝཱ སམཏྟམནཱ ཧུཏྭཱ ཀརཝཱིཀརུཏམཉྫུནཱ ཀཎྞསུཁེན པཎྜིཏཛནཧདཡཱནཾ ཨམཏཱབྷིསེཀསདིསེན བྲཧྨསྶརེན བྷཱསཏོ བྷགཝཏོ ཝཙནཾ སུཀཐིཏཾ སུལཔིཏཾ ‘‘ཨེཝམེཏཾ བྷགཝཱ, ཨེཝམེཏཾ སུགཏཱ’’ཏི མཏྠཀེན སམྤཊིཙྪནྟཱ ཨནུམོདིཾསུ ཙེཝ སམྤཊིཙྪིཾསུ ཙཱཏི ཨཏྠོ. ཨཡཉྷི ཨབྷིནནྡ-སདྡོ ‘‘ཨབྷིནནྡཏི ཨབྷིཝདཏཱི’’ཏིཨཱདཱིསུ (སཾ. ནི. ༣.༥; ༤.༡༡༤, ༡༡༨) ཏཎྷཱཡཔི ཨཱགཏོ. ‘‘ཨནྣམེཝཱབྷིནནྡནྟི, ཨུབྷཡེ དེཝམཱནུསཱ’’ཏིཨཱདཱིསུ (སཾ. ནི. ༡.༤༣) ཨུཔགམནེཔི.

‘‘ཙིརཔྤཝཱསིཾ པུརིསཾ, དཱུརཏོ སོཏྠིམཱགཏཾ;

ཉཱཏིམིཏྟཱ སུཧཛྫཱ ཙ, ཨབྷིནནྡནྟི ཨཱགཏ’’ནྟི. (དྷ. པ. ༢༡༩; ཝི. ཝ. ༨༦༡) –

ཨཱདཱིསུ ¶ སམྤཊིཙྪནེཔི. ‘‘ཨབྷིནནྡིཏྭཱ ཨནུམོདིཏྭཱ’’ཏིཨཱདཱིསུ (མ. ནི. ༡.༢༠༥) ཨནུམོདནེཔི. སྭཱཡམིདྷ ཨནུམོདནསམྤཊིཙྪནེསུ ཡུཛྫཏི. ཏེན ཝུཏྟཾ ‘‘ཨནུམོདིཾསུ ཙེཝ སམྤཊིཙྪིཾསུ ¶ ཙཱ’’ཏི. ཨནུཔཱདཱཡ ཨཱསཝེཧི ཙིཏྟཱནི ཝིམུཙྩིཾསཱུཏི ཨནུཔྤཱདནིརོདྷེན ནིརུཛ྄ཛྷམཱནེཧི ཨཱསཝེཧི ཨནུཔཱདཱཡ ཨགྒཧེཏྭཱ ཀཉྩི དྷམྨཾ ‘‘ཨཧཾ མམཱ’’ཏི ཨནཱདིཡིཏྭཱཝ ཙིཏྟཱནི ཝིམུཙྩིཾསུ. ཚ ཨརཧནྟོཏི བྷགཝཏཱ སདྡྷིཾ ཚ ཛནཱ ཨརཧནྟོ. ཨཉྙེསཾ པན དེཝབྲཧྨཱནམྤི ཨརཧཏྟཔྤཏྟིསམྦྷཝཏོ ཨིདཾ མནུསྶཨརཧནྟེཡེཝ སནྡྷཱཡ ཝུཏྟནྟི ཨཱཧ ‘‘ཚ མནུསྶཱ ཨརཧནྟོ ཧོནྟཱི’’ཏི.

ཨནཏྟལཀྑཎསུཏྟཝཎྞནཱ ནིཊྛིཏཱ.

པཉྩཝགྒིཡཀཐཱ ནིཊྛིཏཱ.

ཡསསྶ པབྦཛྫཱཀཐཱཝཎྞནཱ

༢༥. ཨིདཱནི ཡསསྶ པབྦཛྫཾ དསྶེཏུཾ ‘‘ཏེན ཁོ པན སམཡེནཱ’’ཏིཨཱདི ཨཱརདྡྷཾ. ཏཏྲཱཡཾ ཨནུཏྟཱནཔདཝཎྞནཱ – ཧེམནྟིཀོཏིཨཱདཱིསུ (དཱི. ནི. ཨཊྛ. ༢.༤༢; ཨ. ནི. ཨཊྛ. ༢.༣.༣༩) ཡཏྠ སུཁཾ ཧོཏི ཧེམནྟཀཱལེ ཝསིཏུཾ, ཨཡཾ ཧེམནྟིཀོ. ཨིཏརེསུཔི ཨེསེཝ ནཡོ. ཨཡཾ པནེཏྠ ཝཙནཏྠོ – ཧེམནྟེ ཝཱསོ ཧེམནྟཾ ཨུཏྟརཔདལོཔེན, ཧེམནྟཾ ཨརཧཏཱིཏི ཧེམནྟིཀོ. ཨིཏརེསུཔི ཨེསེཝ ནཡོ. ཏཏྠ ཝསྶིཀོ པཱསཱདོ ནཱཏིཨུཙྩོ ཧོཏི ནཱཏིནཱིཙོ, དྭཱརཝཱཏཔཱནཱནིཔིསྶ ནཱཏིབཧཱུནི ནཱཏིཏནཱུནི, བྷཱུམཏྠརཎཔཙྩཏྠརཎཁཛྫབྷོཛྫཱནིཔེཏྠ མིསྶཀཱནེཝ ཝཊྚནྟི. ཧེམནྟིཀེ ཐམྦྷཱཔི བྷིཏྟིཡོཔི ནཱིཙཱ ཧོནྟི, དྭཱརཝཱཏཔཱནཱནི ཏནུཀཱནི སུཁུམཚིདྡཱནི, ཨུཎྷཔྤཝེསནཏྠཱཡ བྷིཏྟིནིཡྻཱུཧཱནི ཧརིཡནྟི, བྷཱུམཏྠརཎཔཙྩཏྠརཎནིཝཱསནཔཱརུཔནཱནི པནེཏྠ ཨུཎྷཝིཀིརིཡཱནི ཀམྦལཱདཱིནི ཝཊྚནྟི, ཁཛྫབྷོཛྫཾ སིནིདྡྷཾ ཀཊུཀསནྣིསྶིཏཉྩ. གིམྷིཀེ ཐམྦྷཱཔི བྷིཏྟིཡོཔི ཨུཙྩཱ ཧོནྟི, དྭཱརཝཱཏཔཱནཱནི པནེཏྠ བཧཱུནི ཝིཔུལཛཱཏཱནི ཧོནྟི, བྷཱུམཏྠརཎཱནི སཱིཏཝིཀིརིཡཱནི དུཀཱུལམཡཱནི ཝཊྚནྟི, ཁཛྫབྷོཛྫཱནི མདྷུརརསསཱིཏཝིཀིརིཡཱནི, ཝཱཏཔཱནསམཱིཔེསུ ཙེཏྠ ནཝཱ ཙཱཊིཡོ ཋཔེཏྭཱ ཨུདཀསྶ པཱུརེཏྭཱ ནཱིལུཔྤལཱདཱིཧི སཉྪཱདེནྟི, ཏེསུ ཏེསུ པདེསེསུ ཨུདཀཡནྟཱནི ཀརོནྟི, ཡེཧི དེཝེ ཝསྶནྟེ ཝིཡ ཨུདཀདྷཱརཱ ནིཀྑམནྟི.

ནིཔྤུརིསེཧཱིཏི ¶ པུརིསཝིརཧིཏེཧི. ན ཀེཝལཉྩེཏྠ ཏཱུརིཡཱནེཝ ནིཔྤུརིསཱནི, སབྦཊྛཱནཱནིཔི ནིཔྤུརིསཱནེཝ. དོཝཱརིཀཱཔི ཨིཏྠིཡོཝ, ནཧཱཔནཱདིཔརིཀམྨཀརཱཔི ཨིཏྠིཡོཝ. པིཏཱ ཀིར ‘‘ཏཐཱརཱུཔཾ ཨིསྶརིཡསུཁསམྤཏྟིཾ ཨནུབྷཝམཱནསྶ པུརིསཾ དིསྭཱ པརིསངྐཱ ཨུཔྤཛྫཏི, སཱ མེ པུཏྟསྶ མཱ ཨཧོསཱི’’ཏི སབྦཀིཙྩེསུ ཨིཏྠིཡོཝ ཋཔཱཔེསི. པཉྩཧི ཀཱམགུཎེཧཱིཏི ¶ རཱུཔསདྡཱདཱིཧི པཉྩཧི ཀཱམཀོཊྛཱསེཧི. སམཔྤིཏསྶཱཏི སམྨཱ ཨཔྤིཏསྶ, ཨུཔེཏསྶཱཏི ཨཏྠོ. སམངྒཱིབྷཱུཏསྶཱཏི ཏསྶེཝ ཝེཝཙནཾ. པརིཙཱརཡམཱནསྶཱཏི པརིཏོ ཙཱརཡམཱནསྶ, ཏསྨིཾ ཏསྨིཾ ཀཱམགུཎེ ཨིནྡྲིཡཱནི ཙཱརཡམཱནསྶཱཏི ཨཏྠོ. ཨཱལ༹མྦརནྟི པཎཝཾ. ཝིཀེསིཀནྟི མུཏྟཀེསཾ, ཝིཔྤཀིཎྞཀེསནྟི ཨཏྠོ. ཝིཀྑེལི༹ཀནྟི ཝིསྶནྡམཱནལཱལཾ. ཝིཔྤལཔནྟིཡོཏི ཝིརུདྡྷཾ པལཔནྟིཡོ ཝཱ རུདནྟིཡོ ཝཱ. སུསཱནཾ མཉྙེཏི ཨཱམཀསུསཱནཾ ཝིཡ ཨདྡས སཀཾ པརིཛནནྟི སམྦནྡྷོ. ཨུདཱནཾ ཨུདཱནེསཱིཏི སཾཝེགཝསེན ཨུདཱནཾ ཨུདཱནེསི, སཾཝེགཝསཔྤཝཏྟཾ ཝཱཙཾ ནིཙྪཱརེསཱིཏི ཨཏྠོ.

༢༦. ཨིདཾ ཁོ ཡསཱཏི བྷགཝཱ ནིབྦཱནཾ སནྡྷཱཡཱཧ. ཏཉྷི ཏཎྷཱདཱིཧི ཀིལེསེཧི ཨནུཔདྡུཏཾ ཨནུཔསྶཊྛཉྩ. ཨནུཔུབྦིཾ ཀཐནྟི (དཱི. ནི. ཨཊྛ. ༢.༧༥; མ. ནི. ཨཊྛ. ༢.༦༩) དཱནཱནནྟརཾ སཱིལཾ, སཱིལཱནནྟརཾ སགྒཾ, སགྒཱནནྟརཾ མགྒནྟི ཨེཝམནུཔཊིཔཱཊིཀཐཾ. ཏཏྠ དཱནཀཐཱ ནཱམ ‘‘ཨིདཾ དཱནཾ ནཱམ སུཁཱནཾ ནིདཱནཾ, སམྤཏྟཱིནཾ མཱུལཾ, བྷོགཱནཾ པཏིཊྛཱ, ཝིསམགཏསྶ ཏཱཎཾ ལེཎཾ གཏི པརཱཡཎཾ, ཨིདྷལོཀཔརལོཀེསུ དཱནསདིསོ ཨཝསྶཡོ པཏིཊྛཱ ཨཱརམྨཎཾ ཏཱཎཾ ལེཎཾ གཏི པརཱཡཎཾ ནཏྠི. ཨིདཉྷི ཨཝསྶཡཊྛེན རཏནམཡསཱིཧཱསནསདིསཾ, པཏིཊྛཱནཊྛེན མཧཱཔཐཝཱིསདིསཾ, ཨཱརམྨཎཊྛེན ཨཱལམྦནརཛྫུསདིསཾ, ཨིདཉྷི དུཀྑནིཏྠརཎཊྛེན ནཱཝཱ, སམསྶཱསནཊྛེན སངྒཱམསཱུརོ, བྷཡཔརིཏྟཱཎཊྛེན སུསངྑཏནགརཾ, མཙྪེརམལཱདཱིཧི ཨནུཔལིཏྟཊྛེན པདུམཾ, ཏེསཾ ནིདཧནཊྛེན ཨགྒི, དུརཱསདཊྛེན ཨཱསཱིཝིསོ, ཨསནྟཱསནཊྛེན སཱིཧོ, བལཝནྟཊྛེན ཧཏྠཱི, ཨབྷིམངྒལསམྨཏཊྛེན སེཏཨུསབྷོ, ཁེམནྟབྷཱུམིསམྤཱཔནཊྛེན ཝལཱཧཀོ ཨསྶརཱཛཱ. དཱནཾ ནཱམེཏཾ མཡཱ གཏམགྒོ, མཡ྄ཧེཝེསོ ཝཾསོ, མཡཱ དས པཱརམིཡོ པཱུརེནྟེན ཝེལཱམམཧཱཡཉྙཱ མཧཱགོཝིནྡམཧཱཡཉྙཱ མཧཱསུདསྶནམཧཱཡཉྙཱ ཝེསྶནྟརམཧཱཡཉྙཱཏི ཨནེཀེ མཧཱཡཉྙཱ པཝཏྟིཏཱ, སསབྷཱུཏེན ཛལིཏེ ¶ ཨགྒིཀྑནྡྷེ ཨཏྟཱནཾ ནིཡྻཱཏེནྟེན སམྤཏྟཡཱཙཀཱནཾ ཙིཏྟཾ གཧིཏཾ. དཱནཉྷི ལོཀེ སཀྐསམྤཏྟིཾ དེཏི, མཱརསམྤཏྟིཾ བྲཧྨསམྤཏྟིཾ ཙཀྐཝཏྟིསམྤཏྟིཾ སཱཝཀཔཱརམིཉཱཎཾ པཙྩེཀབོདྷིཉཱཎཾ ཨབྷིསམྦོདྷིཉཱཎཾ དེཏཱི’’ཏི ཨེཝམཱདིནཱ དཱནགུཎཔྤཊིསཾཡུཏྟཀཐཱ.

ཡསྨཱ པན དཱནཾ དདནྟོ སཱིལཾ སམཱདཱཏུཾ སཀྐོཏི, ཏསྨཱ ཏདནནྟརཾ སཱིལཀཐཾ ཀཐེསི. དཱནཉྷི ནཱམ དཀྑིཎེཡྻེསུ ཧིཏཛ྄ཛྷཱསཡེན པཱུཛནཛ྄ཛྷཱསཡེན ཝཱ ཨཏྟནོ སནྟཀསྶ པརེསཾ པརིཙྩཛནཾ, ཏསྨཱ དཱཡཀོ སཏྟེསུ ཨེཀནྟཧིཏཛ྄ཛྷཱསཡོ པུརིསཔུགྒལོ, པརེསཾ ཝཱ སནྟཀཾ ཧརཏཱིཏི ཨཊྛཱནམེཏཾ. ཏསྨཱ དཱནཾ དདནྟོ སཱིལཾ སམཱདཱཏུཾ སཀྐོཏཱིཏི དཱནཱནནྟརཾ སཱིལཾ ཝུཏྟཾ. ཨཔིཙ དཱནཀཐཱ ཏཱཝ པཙུརཛནེསུཔི པཝཏྟིཡཱ སབྦསཱདྷཱརཎཏྟཱ སུཀརཏྟཱ སཱིལེ པཏིཊྛཱནསྶ ¶ ཨུཔཱཡབྷཱཝཏོ ཙ ཨཱདིཏོ ཀཐིཏཱ. པརིཙྩཱགསཱིལོ ཧི པུགྒལོ པརིགྒཧཝཏྠཱུསུ ནིསྶངྒབྷཱཝཏོ སུཁེནེཝ སཱིལཱནི སམཱདིཡཏི, ཏཏྠ ཙ སུཔྤཏིཊྛིཏོ ཧོཏི. སཱིལེན དཱཡཀཔཊིགྒཱཧཀཝིསུདྡྷིཏོ པརཱནུགྒཧཾ ཝཏྭཱ པརཔཱིལཱ༹ནིཝཏྟིཝཙནཏོ ཀིརིཡདྷམྨཾ ཝཏྭཱ ཨཀིརིཡདྷམྨཝཙནཏོ བྷོགཡསསམྤཏྟིཧེཏུཾ ཝཏྭཱ བྷཝསམྤཏྟིཧེཏུཝཙནཏོ ཙ དཱནཀཐཱནནྟརཾ སཱིལཀཐཱ ཀཐིཏཱ.

སཱིལཀཐཱ ནཱམ ‘‘སཱིལཾ ནཱམེཏཾ ཨཝསྶཡོ པཏིཊྛཱ ཨཱརམྨཎཾ ཏཱཎཾ ལེཎཾ གཏི པརཱཡཎཾ. སཱིལཾ ནཱམེཏཾ མམ ཝཾསོ, ཨཧཾ སངྑཔཱལནཱགརཱཛཀཱལེ བྷཱུརིདཏྟནཱགརཱཛཀཱལེ ཙམྤེཡྻནཱགརཱཛཀཱལེ སཱིལཝརཱཛཀཱལེ མཱཏུཔོསཀཧཏྠིརཱཛཀཱལེ ཚདྡནྟཧཏྠིརཱཛཀཱལེཏི ཨནནྟེསུ ཨཏྟབྷཱཝེསུ སཱིལཾ པརིཔཱུརེསིཾ. ཨིདྷལོཀཔརལོཀསམྤཏྟཱིནཉྷི སཱིལསདིསོ ཨཝསྶཡོ སཱིལསདིསཱ པཏིཊྛཱ ཨཱརམྨཎཾ ཏཱཎཾ ལེཎཾ གཏི པརཱཡཎཾ ནཏྠི, སཱིལཱལངྐཱརསདིསོ ཨལངྐཱརོ ནཏྠི, སཱིལཔུཔྥསདིསཾ པུཔྥཾ ནཏྠི, སཱིལགནྡྷསདིསོ གནྡྷོ ནཏྠི. སཱིལཱལངྐཱརེན ཧི ཨལངྐཏཾ སཱིལཀུསུམཔིལ༹ནྡྷནཾ སཱིལགནྡྷཱནུལིཏྟཾ སདེཝཀོཔི ལོཀོ ཨོལོཀེནྟོ ཏིཏྟིཾ ན གཙྪཏཱི’’ཏི ཨེཝམཱདིསཱིལགུཎཔྤཊིསཾཡུཏྟཀཐཱ.

ཨིདཾ པན སཱིལཾ ནིསྶཱཡ ཨཡཾ སགྒོ ལབྦྷཏཱིཏི དསྶནཏྠཾ སཱིལཱནནྟརཾ སགྒཀཐཾ ཀཐེསི. སགྒཀཐཱ ནཱམ ‘‘ཨཡཾ སགྒོ ནཱམ ཨིཊྛོ ཀནྟོ མནཱཔོ ¶ , ནིཙྩམེཏྠ ཀཱིལཱ༹, ནིཙྩཾ སམྤཏྟིཡོ ལབྦྷནྟི, ཙཱཏུམཧཱརཱཛིཀཱ དེཝཱ ནཝུཏིཝསྶསཏསཧསྶཱནི དིབྦསུཁཾ དིབྦསམྤཏྟིཾ པཊིལབྷནྟི, ཏཱཝཏིཾསཱ ཏིསྶོ ཙ ཝསྶཀོཊིཡོ སཊྛི ཙ ཝསྶསཏསཧསྶཱནཱི’’ཏི ཨེཝམཱདིསགྒགུཎཔཊིསཾཡུཏྟཀཐཱ. སགྒསམྤཏྟིཾ ཀཐཡནྟཱནཉྷི བུདྡྷཱནཾ མུཁཾ ནཔྤཧོཏི. ཝུཏྟམྤི ཙེཏཾ ‘‘ཨནེཀཔརིཡཱཡེན ཁོ ཨཧཾ, བྷིཀྑཝེ, སགྒཀཐཾ ཀཐེཡྻ’’ནྟིཨཱདི.

ཨེཝཾ སགྒཀཐཱཡ པལོབྷེཏྭཱ པུན ཧཏྠིཾ ཨལངྐརིཏྭཱ ཏསྶ སོཎྜཾ ཚིནྡནྟོ ཝིཡ ཨཡམྤི སགྒོ ཨནིཙྩོ ཨདྡྷུཝོ, ན ཨེཏྠ ཚནྡརཱགོ ཀཱཏབྦོཏི དསྶནཏྠཾ ‘‘ཨཔྤསྶཱདཱ ཀཱམཱ བཧུདུཀྑཱ བཧུཔཱཡཱསཱ, ཨཱདཱིནཝོ ཨེཏྠ བྷིཡྻོ’’ཏིཨཱདིནཱ (མ. ནི. ༡.༡༧༧; པཱཙི. ༤༡༧) ནཡེན ཀཱམཱནཾ ཨཱདཱིནཝཾ ཨོཀཱརཾ སཾཀིལེསཾ ཀཐེསི. ཏཏྠ ཨཱདཱིནཝོཏི དོསོ, ཨནིཙྩཏཱདིནཱ ཨཔྤསྶཱདཏཱདིནཱ ཙ དཱུསིཏབྷཱཝོཏི ཨཏྠོ. ཨཐ ཝཱ ཨཱདཱིནཾ ཝཱཏི པཝཏྟཏཱིཏི ཨཱདཱིནཝོ, པརམཀཔཎཏཱ. ཏཐཱ ཙ ཀཱམཱ ཡཐཱབྷཱུཏཾ པཙྩཝེཀྑནྟཱནཾ པཙྩུཔཏིཊྛནྟི. ཨོཀཱརོཏི ལཱམཀབྷཱཝོ ནིཧཱིནབྷཱཝོ ཨསེཊྛེཧི སེཝིཏབྦཏཱ སེཊྛེཧི ན སེཝིཏབྦཏཱ ཙ. སཾཀིལེསོཏི ཏེཧི སཏྟཱནཾ སཾཀིལིསྶནཾ, ཝིབཱདྷེཏབྦཏཱ ཨུཔཏཱཔེཏབྦཏཱཏི ཨཏྠོ.

ཨེཝཾ ¶ ཀཱམཱདཱིནཝེན ཏཛྫེཏྭཱ ནེཀྑམྨེ ཨཱནིསཾསཾ པཀཱསེསི. ཡཏྟཀཱ ཙ ཀཱམེསུ ཨཱདཱིནཝཱ, པཊིཔཀྑཏོ ཏཏྟཀཱཝ ནེཀྑམྨེ ཨཱནིསཾསཱ. ཨཔིཙ ‘‘ནེཀྑམྨཾ ནཱམེཏཾ ཨསམྦཱདྷཾ ཨསཾཀིལིཊྛཾ, ནིཀྑནྟཾ ཀཱམེཧི, ནིཀྑནྟཾ ཀཱམསཉྙཱཡ, ནིཀྑནྟཾ ཀཱམཝིཏཀྐེཧི, ནིཀྑནྟཾ ཀཱམཔརིལཱ༹ཧེཧི, ནིཀྑནྟཾ བྱཱཔཱརཏོ’’ཏིཨཱདིནཱ ནཡེན ནེཀྑམྨེ ཨཱནིསཾསཾ པཀཱསེསི, པབྦཛྫཱཡ ཛྷཱནཱདཱིསུ ཙ གུཎེ ཝིབྷཱཝེསི ཝཎྞེསི. ཨེཏྠ ཙ སགྒཾ ཀཐེཏྭཱ སྭཱཡཾ སགྒོ རཱགཱདཱིཧི ཨུཔཀྐིལིཊྛོ, སབྦཐཱཔི ཨནུཔཀྐིལིཊྛོ ཨརིཡམགྒོཏི དསྶནཏྠཾ སགྒཱནནྟརཾ མགྒོ ཀཐེཏབྦོ. མགྒཉྩ ཀཐེནྟེན ཏདདྷིགམུཔཱཡསནྡསྶནཏྠཾ སགྒཔརིཡཱཔནྣཱཔི པགེཝ ཨིཏརེ སབྦེཔི ཀཱམཱ ནཱམ བཧྭཱདཱིནཝཱ ཨནིཙྩཱ ཨདྡྷུཝཱ ཝིཔརིཎཱམདྷམྨཱཏི ཀཱམཱནཾ ཨཱདཱིནཝོ, ཧཱིནཱ གམྨཱ པོཐུཛྫནིཀཱ ཨནརིཡཱ ཨནཏྠསཉྷིཏཱཏི ཏེསཾ ཨོཀཱརོ ལཱམཀབྷཱཝོ, སབྦེཔི བྷཝཱ ཀིལེསཱནཾ ཝཏྠུབྷཱུཏཱཏི ཏཏྠ སཾཀིལེསོ, སབྦསཾཀིལེསཝིཔྤམུཏྟཾ ནིབྦཱནནྟི ནེཀྑམྨེ ཨཱནིསཾསོ ¶ ཙ ཀཐེཏབྦོཏི ཀཱམེསུ ཨཱདཱིནཝོ ཨོཀཱརོ སཾཀིལེསོ ནེཀྑམྨེ ཙ ཨཱནིསཾསོ པཀཱསིཏོཏི དཊྛབྦཾ.

ཀལླཙིཏྟནྟི ཀམྨནིཡཙིཏྟཾ, ཧེཊྛཱ པཝཏྟིཏདེསནཱཡ ཨསྶདྡྷིཡཱདཱིནཾ ཙིཏྟདོསཱནཾ ཝིགཏཏྟཱ ཨུཔརིདེསནཱཡ བྷཱཛནབྷཱཝཱུཔགམནེན ཀམྨཀྑམཙིཏྟནྟི ཨཏྠོ. ཨསྶདྡྷིཡཱདཡོ ཝཱ ཡསྨཱ ཙིཏྟསྶ རོགབྷཱུཏཱ ཏདཱ ཏསྶ ཝིགཏཱ, ཏསྨཱ ཀལླཙིཏྟཾ ཨརོགཙིཏྟནྟི ཨཏྠོ. དིཊྛིམཱནཱདིཀིལེསཝིགམེན མུདུཙིཏྟཾ, ཀཱམཙྪནྡཱདིཝིགམེན ཝིནཱིཝརཎཙིཏྟཾ, སམྨཱཔཊིཔཏྟིཡཾ ཨུལཱ༹རཔཱིཏིཔཱམོཛྫཡོགེན ཨུདགྒཙིཏྟཾ. ཏཏྠ སདྡྷཱསམྤཏྟིཡཱ པསནྣཙིཏྟཾ ཡདཱ བྷགཝཱ ཨཉྙཱསཱིཏི སམྦནྡྷོ. ཨཐ ཝཱ ཀལླཙིཏྟནྟི ཀཱམཙྪནྡཝིགམེན ཨརོགཙིཏྟཾ. མུདུཙིཏྟནྟི བྱཱཔཱདཝིགམེན མེཏྟཱཝསེན ཨཀཋིནཙིཏྟཾ. ཝིནཱིཝརཎཙིཏྟནྟི ཨུདྡྷཙྩཀུཀྐུཙྩཝིགམེན ཝིཀྑེཔསྶ ཝིགཏཏྟཱ ཏེན ཨཔིཧིཏཙིཏྟཾ. ཨུདགྒཙིཏྟནྟི ཐིནམིདྡྷཝིགམེན སམྤགྒཧཝསེན ཨལཱིནཙིཏྟཾ. པསནྣཙིཏྟནྟི ཝིཙིཀིཙྪཱཝིགམེན སམྨཱཔཊིཔཏྟིཡཾ ཨདྷིམུཏྟཙིཏྟནྟི ཨེཝམྤེཏྠ ཨཏྠོ ཝེདིཏབྦོ. སཱམུཀྐཾསིཀཱཏི སཱམཾ ཨུཀྐཾསིཀཱ, ཨཏྟནཱཡེཝ ཨུདྡྷརིཏྭཱ གཧིཏཱ, སཡམྦྷཱུཉཱཎེན དིཊྛཱ ཨསཱདྷཱརཎཱ ཨཉྙེསནྟི ཨཏྠོ. ཀཱ ཙ པན སཱཏི? ཨརིཡསཙྩདེསནཱ. ཏེནེཝཱཧ ‘‘དུཀྑཾ སམུདཡཾ ནིརོདྷཾ མགྒ’’ནྟི.

སེཡྻཐཱཔཱིཏིཨཱདིནཱ ཨུཔམཱཝསེན ཏསྶ ཀིལེསཔྤཧཱནཾ ཨརིཡམགྒུཔྤཱདཉྩ དསྶེཏི. ཨཔགཏཀཱལ༹ཀནྟི ཝིགཏཀཱལ༹ཀཾ. སམྨདེཝཱཏི སུཊྛུ ཨེཝ. རཛནནྟི ནཱིལཔཱིཏཱདིརངྒཛཱཏཾ. པཊིགྒཎྷེཡྻཱཏི གཎྷེཡྻ, པབྷསྶརཾ བྷཝེཡྻ. ཏསྨིཾཡེཝ ཨཱསནེཏི ཏསྶཾཡེཝ ནིསཛྫཱཡཾ. ཨེཏེནསྶ ལཧུཝིཔསྶཀཏཱ ཏིཀྑཔཉྙཏཱ སུཁཔཊིཔདཁིཔྤཱབྷིཉྙཏཱ ཙ དསྶིཏཱ ཧོཏི. ཝིརཛནྟིཨཱདི ¶ ཝུཏྟནཡམེཝ. ཏཏྲིདཾ ཨུཔམཱསཾསནྡནཾ – ཝཏྠཾ ཝིཡ ཙིཏྟཾ, ཝཏྠསྶ ཨཱགནྟུཀམལེཧི ཀིལིཊྛབྷཱཝོ ཝིཡ ཙིཏྟསྶ རཱགཱདིམལེཧི སཾཀིལིཊྛབྷཱཝོ, དྷོཝནསིལཱ ཝིཡ ཨནུཔུབྦིཀཐཱ, ཨུདཀཾ ཝིཡ སདྡྷཱ, ཨུདཀེན ཏེམེཏྭཱ ཏེམེཏྭཱ ཨཱུསགོམཡཚཱརིཀཁཱརཀེཧི ཀཱལ༹ཀཔདེསེ སམྨདྡིཏྭཱ ཝཏྠསྶ དྷོཝནཔཡོགོ ཝིཡ སདྡྷཱསིནེཧེན ཏེམེཏྭཱ ཏེམེཏྭཱ སཏིསམཱདྷིཔཉྙཱཧི དོསེ སིཐིལེ ཀཏྭཱ སཱིལསུཏཱདིཝིདྷིནཱ ཙིཏྟསྶ སོདྷནེ ཝཱིརིཡཱརམྦྷོ, ཏེན པཡོགེན ཝཏྠེ ཀཱལ༹ཀཱཔགམོ ཝིཡ ཝཱིརིཡཱརམྦྷེན ཀིལེསཝིཀྑམྦྷནཾ, རངྒཛཱཏཾ ¶ ཝིཡ ཨརིཡམགྒོ, ཏེན སུདྡྷསྶ ཝཏྠསྶ པབྷསྶརབྷཱཝོ ཝིཡ ཝིཀྑམྦྷིཏཀིལེསསྶ ཙིཏྟསྶ མགྒེན པརིཡོདཔནནྟི.

༢༧. ཨསྶདཱུཏེཏི ཨཱརུལ༹ྷཨསྶེ དཱུཏེ. ཨིདྡྷཱབྷིསངྑཱརནྟི ཨིདྡྷིཀིརིཡཾ. ཨབྷིསངྑརེསཱིཏི ཨབྷིསངྑརི, ཨཀཱསཱིཏི ཨཏྠོ. ཀིམཏྠནྟི ཙེ? ཨུབྷིནྣཾ པཊིལབྷིཏབྦཝིསེསནྟརཱཡནིསེདྷནཏྠཾ. ཡདི ཧི སོ པུཏྟཾ པསྶེཡྻ, པུཏྟསྶཔི ཨརཧཏྟཔྤཏྟི སེཊྛིསྶཔི དྷམྨཙཀྑུཔཊིལཱབྷོ ན སིཡཱ. ཨདིཊྛསཙྩོཔི ཧི ‘‘དེཧི ཏེ མཱཏུཡཱ ཛཱིཝིཏ’’ནྟི ཡཱཙནྟོ ཀཐཉྷི ནཱམ ཝིཀྑེཔཾ པཊིབཱཧིཏྭཱ བྷགཝཏོ དྷམྨདེསནཱནུསཱརེན ཉཱཎཾ པེསེཏྭཱ དྷམྨཙཀྑུཾ པཊིལབྷེཡྻ, ཡསོ ཙ ཨེཝཾ ཏེན ཡཱཙིཡམཱནོ ཀཐཾ ཏཾ ཝིཀྑེཔཾ པཊིབཱཧིཏྭཱ ཨརཧཏྟེ པཏིཊྛཧེཡྻ.

ཨེཏདཝོཙཱཏི བྷགཝཏོ དྷམྨདེསནཾ ཨབྦྷནུམོདམཱནོ ཨེཏཾ ‘‘ཨབྷིཀྐནྟཾ བྷནྟེ’’ཏིཨཱདིཝཙནཾ ཨཝོཙ. ཨབྷིཀྐནྟ-སདྡོ ཙཱཡམིདྷ ཨབྦྷནུམོདནེ, ཏསྨཱ སཱདྷུ སཱདྷུ བྷནྟེཏི ཝུཏྟཾ ཧོཏི.

‘‘བྷཡེ ཀོདྷེ པསཾསཱཡཾ, ཏུརིཏེ ཀོཏཱུཧལཙྪརེ;

ཧཱསེ སོཀེ པསཱདེ ཙ, ཀརེ ཨཱམེཌིཏཾ བུདྷོ’’ཏི. –

ཨིམིནཱཝ ལཀྑཎེན ཨིདྷ པསཱདཝསེན པསཾསཱཝསེན ཙཱཡཾ དྭིཀྑཏྟུཾ ཝུཏྟོཏི ཝེདིཏབྦོ. སེཡྻཐཱཔཱིཏིཨཱདིནཱ ཙཏཱུཧི ཨུཔམཱཧི བྷགཝཏོ དེསནཾ ཐོམེཏི. ཏཏྠ ནིཀྐུཛྫིཏནྟི ཨདྷོམུཁཋཔིཏཾ, ཧེཊྛཱམུཁཛཱཏཾ ཝཱ. ཨུཀྐུཛྫེཡྻཱཏི ཨུཔརིམུཁཾ ཀརེཡྻ. པཊིཙྪནྣནྟི ཏིཎཔཎྞཱདིཚཱདིཏཾ. ཝིཝརེཡྻཱཏི ཨུགྒྷཱཊེཡྻ. མཱུལ༹ྷསྶཱཏི དིསཱམཱུལ༹ྷསྶ. མགྒཾ ཨཱཙིཀྑེཡྻཱཏི ཧཏྠེ གཧེཏྭཱ ‘‘ཨེས མགྒོ’’ཏི ཝདེཡྻ. ཨནྡྷཀཱརེཏི ཀཱལ༹པཀྑཙཱཏུདྡསཱི ཨཌྜྷརཏྟི གྷནཝནསཎྜམེགྷཔཊལེཧི ཙཏུརངྒཏམེ.

ཨེཝཾ ¶ དེསནཾ ཐོམེཏྭཱ ཨིམཱཡ དེསནཱཡ རཏནཏྟཡེ པསནྣཙིཏྟོ པསནྣཱཀཱརཾ ཀརོནྟོ ‘‘ཨེསཱཧ’’ནྟིཨཱདིམཱཧ. ཏཏྠ ཨེསཱཧནྟི ཨེསོ ཨཧཾ. ཨུཔཱསཀཾ མཾ བྷགཝཱ དྷཱརེཏཱུཏི མཾ བྷགཝཱ ‘‘ཨུཔཱསཀོ ཨཡ’’ནྟི ཨེཝཾ དྷཱརེཏུ, ཛཱནཱཏཱུཏི ཨཏྠོ. ཨཛྫཏགྒེཏི ཨེཏྠཱཡཾ ཨགྒ-སདྡོ ཨཱདིཨཏྠེ, ཏསྨཱ ཨཛྫཏགྒེཏི ཨཛྫཏཾ ཨཱདིཾ ཀཏྭཱཏི ¶ ཨེཝམཏྠོ ཝེདིཏབྦོ. ཨཛྫཏནྟི ཨཛྫབྷཱཝཾ. ‘‘ཨཛྫདགྒེ’’ཏི ཝཱ པཱཋོ, ད-ཀཱརོ པདསནྡྷིཀརོ, ཨཛྫ ཨགྒཾ ཀཏྭཱཏི ཨཏྠོ. པཱཎུཔེཏནྟི པཱཎེཧི ཨུཔེཏཾ. ཡཱཝ མེ ཛཱིཝིཏཾ པཝཏྟཏི, ཏཱཝ ཨུཔེཏཾ, ཨནཉྙསཏྠུཀཾ ཏཱིཧི སརཎགམནེཧི སརཎཾ གཏཾ ཨུཔཱསཀཾ ཀཔྤིཡཀཱརཀཾ མཾ བྷགཝཱ དྷཱརེཏུ ཛཱནཱཏུ. ཨཧཉྷི སཙེཔི མེ ཏིཁིཎེན ཨསིནཱ སཱིསཾ ཚིནྡེཡྻ, ནེཝ བུདྡྷཾ ‘‘ན བུདྡྷོ’’ཏི ཝཱ, དྷམྨཾ ‘‘ན དྷམྨོ’’ཏི ཝཱ, སངྒྷཾ ‘‘ན སངྒྷོ’’ཏི ཝཱ ཝདེཡྻནྟི ཨེཝཾ ཨཏྟསནྣིཡྻཱཏནེན སརཎཾ ཨགམཱསི. ཨེཝཾ ‘‘ཨབྷིཀྐནྟ’’ནྟིཨཱདཱིནཾ ཨནུཏྟཱནཔདཏྠོ ཝེདིཏབྦོ, ཝིཏྠཱརོ པན ཧེཊྛཱ ཝེརཉྫཀཎྜཝཎྞནཱཡཾ ཨཱགཏོཡེཝཱཏི ཨིདྷ ན དསྶིཏོ.

༢༨. བྷཱུམིཾ པཙྩཝེཀྑནྟསྶཱཏི ཨཏྟནཱ དིཊྛམཏྠཾ པཙྩཝེཀྑནྟསྶ. ཨིདྡྷཱབྷིསངྑཱརཾ པཊིཔྤསྶམྦྷེསཱིཏི ཡཐཱ ཏཾ སེཊྛི གཧཔཏི ཏཏྠ ནིསིནྣོཝ ཡསཾ ཀུལཔུཏྟཾ པསྶཏི, ཏཐཱ ཨདྷིཊྛཱསཱིཏི ཨཏྠོ. ཨདྷིཝཱསེཏཱུཏི སམྤཊིཙྪཏུ. ཨཛྫཏནཱཡཱཏི ཡཾ མེ ཏུམྷེསུ སཀྐཱརཾ ཀརོཏོ ཨཛྫ བྷཝིསྶཏི པུཉྙཉྩ པཱིཏིཔཱམོཛྫཉྩ, ཏདཏྠཱཡ. ཨདྷིཝཱསེསི བྷགཝཱ ཏུཎྷཱིབྷཱཝེནཱཏི བྷགཝཱ ཀཱཡངྒཾ ཝཱ ཝཱཙངྒཾ ཝཱ ཨཙོཔེཏྭཱ ཨབྦྷནྟརེཡེཝ ཁནྟིཾ ཀརོནྟོ ཏུཎྷཱིབྷཱཝེན ཨདྷིཝཱསེསི, སེཊྛིསྶ ཨནུགྒཧཏྠཾ མནསཱཝ སམྤཊིཙྪཱིཏི ཝུཏྟཾ ཧོཏི. ‘‘ཨེཧི བྷིཀྑཱུ’’ཏི བྷགཝཱ ཨཝོཙཱཏི ཏསྶ ཀིར ཨིདྡྷིམཡཔཏྟཙཱིཝརསྶ ཨུཔནིསྶཡཾ ཨོལོཀེནྟོ ཨནེཀཱསུ ཛཱཏཱིསུ ཙཱིཝརཱདིཨཊྛཔརིཀྑཱརདཱནཾ དིསྭཱ ‘‘ཨེཧི བྷིཀྑཱུ’’ཏི ཨཝོཙ. སོ ཏཱཝདེཝ བྷཎྜུ ཀཱསཱཝཝསནོ ཨཊྛཧི བྷིཀྑུཔརིཀྑཱརེཧི སརཱིརེ པཊིམུཀྐེཧེཝ ཝསྶསཊྛིཀཏྠེརོ ཝིཡ བྷགཝནྟཾ ནམསྶམཱནོཝ ནིསཱིདི. ཡོ ཧི ཙཱིཝརཱདིཀེ ཨཊྛ པརིཀྑཱརེ པཏྟཙཱིཝརམེཝ ཝཱ སོཏཱཔནྣཱདིཨརིཡསྶ པུཐུཛྫནསྶེཝ ཝཱ སཱིལསམྤནྣསྶ དཏྭཱ ‘‘ཨིདཾ པརིཀྑཱརདཱནཾ ཨནཱགཏེ ཨེཧིབྷིཀྑུབྷཱཝཱཡ པཙྩཡོ ཧོཏཱུ’’ཏི པཏྠནཾ པཊྛཔེཏི, ཏསྶ ཏཾ སཏི ཨདྷིཀཱརསམྤཏྟིཡཾ བུདྡྷཱནཾ སམྨུཁཱིབྷཱཝེ ཨིདྡྷིམཡཔརིཀྑཱརལཱབྷཱཡ སཾཝཏྟཏཱིཏི ཝེདིཏབྦཾ.

༢༩. པཎཱིཏེནཱཏི ཨུཏྟམེན. སཧཏྠཱཏི སཧཏྠེན. སནྟཔྤེཏྭཱཏི སུཊྛུ ཏཔྤེཏྭཱ, པརིཔུཎྞཾ སུཧིཏཾ ཡཱཝདཏྠཾ ཀཏྭཱ. སམྤཝཱརེཏྭཱཏི སུཊྛུ པཝཱརེཏྭཱ, ཨལཾ ཨལནྟི ཧཏྠསཉྙཱཡ པཊིཀྑིཔཱཔེཏྭཱ. བྷུཏྟཱཝིནྟི བྷུཏྟཝནྟཾ ¶ . ཨོནཱིཏཔཏྟཔཱཎིནྟི པཏྟཏོ ཨོནཱིཏཔཱཎིཾ, ཨཔནཱིཏཧཏྠནྟི ཝུཏྟཾ ཧོཏི. ‘‘ཨོནིཏྟཔཏྟཔཱཎི’’ནྟིཔི པཱཋོ, ཏསྶཏྠོ – ཨོནིཏྟཾ ནཱནཱབྷཱུཏཾ ཝིནཱབྷཱུཏཾ ¶ པཏྟཾ པཱཎིཏོ ཨསྶཱཏི ཨོནིཏྟཔཏྟཔཱཎི, ཏཾ ཨོནིཏྟཔཏྟཔཱཎིཾ, ཧཏྠེ ཙ པཏྟཉྩ དྷོཝིཏྭཱ ཨེཀམནྟཾ པཏྟཾ ནིཀྑིཔིཏྭཱ ནིསིནྣནྟི ཨཏྠོ. ཨེཀམནྟཾ ནིསཱིདིཾསཱུཏི བྷགཝནྟཾ ཨེཝཾབྷཱུཏཾ ཉཏྭཱ ཨེཀསྨིཾ ཨོཀཱསེ ནིསཱིདིཾསཱུཏི ཨཏྠོ. དྷམྨིཡཱ ཀཐཱཡཱཏིཨཱདཱིསུ ཏངྑཎཱནུརཱུཔཱཡ དྷམྨིཡཱ ཀཐཱཡ དིཊྛདྷམྨིཀསམྤརཱཡིཀཨཏྠཾ སནྡསྶེཏྭཱ ཀུསལེ ཙ དྷམྨེ སམཱདཔེཏྭཱ ཏཏྠ ཙ ནཾ སམུཏྟེཛེཏྭཱ སཨུསྶཱཧཾ ཀཏྭཱ ཏཱཡ ཙ སཨུསྶཱཧཏཱཡ ཨཉྙེཧི ཙ ཝིཛྫམཱནགུཎེཧི སམྤཧཾསེཏྭཱ དྷམྨརཏནཝསྶཾ ཝསྶིཏྭཱ ཨུཊྛཱཡཱསནཱ པཀྐཱམི.

ཡསསྶ པབྦཛྫཱཀཐཱཝཎྞནཱ ནིཊྛིཏཱ.

ཙཏུགིཧིསཧཱཡཔབྦཛྫཱཀཐཱཝཎྞནཱ

༣༠. ཨིདཱནི ཏསྶ སཧཱཡཱནཾ པབྦཛྫཾ དསྶེནྟོ ‘‘ཨསྶོསུཾ ཁོ’’ཏིཨཱདིམཱཧ. ཏཏྲཱཡཾ ཨནུཏྟཱནཔདཝཎྞནཱ – སེཊྛིནོ ཙ ཨནུསེཊྛིནོ ཙ ཡེསཾ ཀུལཱནཾ ཏཱནི སེཊྛཱནུསེཊྛཱིནི ཀུལཱནི, ཏེསཾ སེཊྛཱནུསེཊྛཱིནཾ ཀུལཱནཾ, པཝེཎིཝསེན ཨཱགཏེཧི སེཊྛཱིཧི ཙ ཨནུསེཊྛཱིཧི ཙ སམནྣཱགཏཱནཾ ཀུལཱནནྟི ཨཏྠོ. ཝིམལོཏིཨཱདཱིནི ཏེསཾ པུཏྟཱནཾ ནཱམཱནི. ཀེསམསྶུཾ ཨོཧཱརེཏྭཱཏི ཀེསཉྩ མསྶུཉྩ ཨོརོཔེཏྭཱ. ཀཱསཱཡཱནི ཝཏྠཱནཱིཏི ཀསཱཡརསཔཱིཏཱནི བྲཧྨཙརིཡཾ ཙརནྟཱནཾ ཨནུཙྪཝིཀཱནི ཝཏྠཱནི. ཨོརཀོཏི ཨཱུནཀོ ལཱམཀོ. སེསམེཏྠ ཝུཏྟནཡམེཝ.

ཙཏུགིཧིསཧཱཡཔབྦཛྫཱཀཐཱཝཎྞནཱ ནིཊྛིཏཱ.

པཉྙཱསགིཧིསཧཱཡཔབྦཛྫཱཀཐཱཝཎྞནཱ

༣༡. པཉྙཱསམཏྟཱནཾ གིཧིསཧཱཡཱནཾ པབྦཛྫཱཡཔི ཡཾ ཝཏྟབྦཾ, ཏཾ ཝུཏྟམེཝ. ཨིམེསཾ པན སབྦེསཾ པུབྦཡོགོ ཝཏྟབྦོཏི ཏཾ དསྶེཏུཾ ‘‘ཡསཨཱདཱིནཾ ¶ ཀུལཔུཏྟཱནཾ ཨཡཾ པུབྦཡོགོ’’ཏིཨཱདིམཱཧ. ཏཏྠ ཝགྒབནྡྷནེནཱཏི གཎབནྡྷནེན, ཨེཀཱིབྷཱུཏཱཏི ཝུཏྟཾ ཧོཏི. ཨནཱཐསརཱིརཱནཱིཏི ཨནཱཐཱནི མཏཀལེ༹ཝརཱནི. པཊིཛགྒནྟཱཏི བཧི ནཱིཧརིཏྭཱ ཛྷཱཔེནྟཱ.

པཉྙཱསགིཧིསཧཱཡཔབྦཛྫཱཀཐཱཝཎྞནཱ ནིཊྛིཏཱ.

མཱརཀཐཱཝཎྞནཱ

༣༢. ཨིདཱནི ¶ སརཎགམནཱུཔསམྤདཾ དསྶེཏུཾ ‘‘ཨཐ ཁོ བྷགཝཱ’’ཏིཨཱདི ཨཱརདྡྷཾ. ཏཏྲཱཡཾ ཨནུཔུབྦཔདཝཎྞནཱ (སཾ. ནི. ཨཊྛ. ༡.༡.༡༤༡) – མུཏྟཱཧནྟི མུཏྟོ ཨཧཾ. ཙཱརིཀནྟི ཨནུཔུབྦགམནཙཱརིཀཾ, གཱམནིགམརཱཛདྷཱནཱིསུ ཨནུཀྐམེན གམནསངྑཱཏཾ ཙཱརིཀནྟི ཨཏྠོ. ཙརཐཱཏི དིཝསཾ ཡོཛནཔརམཾ གཙྪནྟཱ ཙརཐ. མཱ ཨེཀེན དྭེ ཨགམིཏྠཱཏི ཨེཀེན མགྒེན དྭཱིསུ གཏེསུ ཨེཀསྨིཾ དྷམྨཾ དེསེནྟེ ཨེཀེན ཏུཎྷཱིབྷཱུཏེན ཋཱཏབྦཾ ཧོཏི, ཏསྨཱ ཨེཝམཱཧ. ཨཱདིཀལྱཱཎནྟི ཨཱདིམྷི ཀལྱཱཎཾ སུནྡརཾ བྷདྡཀཾ, ཏཐཱ མཛ྄ཛྷཔརིཡོསཱནེསུ. ཨཱདིམཛ྄ཛྷཔརིཡོསཱནཉྩ ནཱམེཏཾ སཱསནསྶ ཙ དེསནཱཡ ཙ ཝསེན དུབྦིདྷཾ. ཏཏྠ སཱསནསྶ སཱིལཾ ཨཱདི, སམཐཝིཔསྶནཱམགྒཱ མཛ྄ཛྷཾ, ཕལནིབྦཱནཱནི པརིཡོསཱནཾ. སཱིལསམཱདྷཡོ ཝཱ ཨཱདི, ཝིཔསྶནཱམགྒཱ མཛ྄ཛྷཾ, ཕལནིབྦཱནཱནི པརིཡོསཱནཾ. སཱིལསམཱདྷིཝིཔསྶནཱ ཝཱ ཨཱདི, མགྒོ མཛ྄ཛྷཾ, ཕལནིབྦཱནཱནི པརིཡོསཱནཾ. དེསནཱཡ པན ཙཏུཔྤདིཀགཱཐཱཡ ཏཱཝ པཋམཔཱདོ ཨཱདི, དུཏིཡཏཏིཡཱ མཛ྄ཛྷཾ, ཙཏུཏྠོ པརིཡོསཱནཾ. པཉྩཔདཚཔྤདཱནཾ པཋམཔཱདོ ཨཱདི, ཨཝསཱནཔཱདོ པརིཡོསཱནཾ, སེསཱ མཛ྄ཛྷཾ. ཨེཀཱནུསནྡྷིཀསྶ སུཏྟསྶ ནིདཱནཾ ཨཱདི, ཨིདམཝོཙཱཏི པརིཡོསཱནཾ, སེསཾ མཛ྄ཛྷཾ. ཨནེཀཱནུསནྡྷིཀསྶ སུཏྟསྶ མཛ྄ཛྷེ བཧུཀམྤི ཨནུསནྡྷི མཛ྄ཛྷམེཝ, ནིདཱནཾ ཨཱདི, ཨིདམཝོཙཱཏི པརིཡོསཱནཾ. སཱཏྠནྟི སཱཏྠཀཾ ཀཏྭཱ དེསེཐ. སབྱཉྫནནྟི བྱཉྫནེཧི ཙེཝ པདེཧི ཙ པརིཔཱུརཾ ཀཏྭཱ དེསེཐ. ཀེཝལཔརིཔུཎྞནྟི སཀལཔརིཔུཎྞཾ. པརིསུདྡྷནྟི ནིརུཔཀྐིལེསཾ. བྲཧྨཙརིཡནྟི སིཀྑཏྟཡསངྒཧཾ སཱསནབྲཧྨཙརིཡཾ. པཀཱསེཐཱཏི ཨཱཝི ཀརོཐ.

ཨཔྤརཛཀྑཛཱཏིཀཱཏི པཉྙཱཙཀྑུམྷི ཨཔྤཀིལེསརཛསབྷཱཝཱ, དུཀཱུལསཱཎིཡཱ པཊིཙྪནྣཱ ཝིཡ ཙཏུཔྤདིཀགཱཐཱཔརིཡོསཱནེ ཨརཧཏྟཾ པཏྟུཾ སམཏྠཱ ¶ སཏྟཱ སནྟཱིཏི ཨཏྠོ. པརིཧཱཡནྟཱིཏི ཨལཱབྷཔརིཧཱནིཡཱ དྷམྨཏོ པརིཧཱཡནྟི. ཏེནེཝཱཧ ‘‘ཨནདྷིགཏཾ ནཱདྷིགཙྪནྟཱ ཝིསེསཱདྷིགམཏོ པརིཧཱཡནྟཱི’’ཏི. སེནཱནིགམོཏི སེནཱཡ ནིགམོ. པཋམཀཔྤིཀཱནཾ ཀིར ཏསྨིཾ ཋཱནེ སེནཱནིཝེསོ ཨཧོསི, ཏསྨཱ སོ པདེསོ ‘‘སེནཱནིགམོ’’ཏི ཝུཙྩཏི. ‘‘སེནཱནིགཱམོ’’ཏིཔི པཱཋོ, སེནཱནི ནཱམ སུཛཱཏཱཡ པིཏཱ, ཏསྶ གཱམོཏི ཨཏྠོ. ཏེནུཔསངྐམིསྶཱམཱིཏི ནཱཧཾ ཏུམྷེ ཨུཡྻོཛེཏྭཱ པརིཝེཎཱདཱིནི ཀཱརེཏྭཱ ཨུཔཊྛཱཀཱདཱིཧི པརིཙརིཡམཱནོ ཝིཧརིསྶཱམི, ཏིཎྞཾ པན ཛཊིལཱནཾ ཨཌྜྷུཌྜྷཱནི པཱཊིཧཱརིཡསཧསྶཱནི དསྶེཏྭཱ དྷམྨམེཝ དེསེཏུཾ ཨུཔསངྐམིསྶཱམི.

༣༣. མཱརོ པཱཔིམཱཏི ཨཏྟནོ ཝིསཡཾ ཨཏིཀྐམིཏུཾ པཊིཔནྣེ སཏྟེ མཱརེཏཱིཏི མཱརོ, པརེ ¶ པཱཔེ ནིཡོཛེཏི, སཡཾ ཝཱ པཱཔེ ནིཡུཏྟོཏི པཱཔིམཱ. ཨཉྙཱནིཔིསྶ ཀཎྷོ ཨདྷིཔཏི ཝསཝཏྟཱི ཨནྟཀོ ནམུཙི པམཏྟབནྡྷཱུཏིཨཱདཱིནི བཧཱུནི ནཱམཱནི, ཨིདྷ པན ནཱམདྭཡམེཝ གཧིཏཾ. ཨུཔསངྐམཱིཏི ‘‘ཨཡཾ སམཎོ གོཏམོ མཧཱཡུདྡྷཾ ཝིཙཱརེནྟོ ཝིཡ ‘མཱ ཨེཀེན དྭེ ཨགམིཏྠ, དྷམྨཾ དེསེཐཱ’ཏི སཊྛི ཛནེ ཨུཡྻོཛེཏི, ཨིམསྨིཾ པན ཨེཀསྨིམྤི དྷམྨཾ དེསེནྟེ མཡ྄ཧཾ ཙིཏྟསྶ སཱཏཾ ནཏྠི, ཨེཝཾ བཧཱུསུ དེསེནྟེསུ ཀུཏོ བྷཝིསྶཏི, པཊིབཱཧཱམི ན’’ནྟི ཙིནྟེཏྭཱ ཨུཔསངྐམི.

སབྦཔཱསེཧཱིཏི སབྦེཧི ཀིལེསཔཱསེཧི. ཡེ དིབྦཱ ཡེ ཙ མཱནུསཱཏི ཡེ དིབྦཀཱམགུཎསངྑཱཏཱ མཱནུསཀཀཱམགུཎསངྑཱཏཱ ཙ ཀིལེསཔཱསཱ ནཱམ ཨཏྠི, སབྦེཧི ཏེཧི ཏྭཾ བདྡྷོཏི ཝདཏི. མཧཱབནྡྷནབདྡྷོཏི མཧཏཱ ཀིལེསབནྡྷནེན བདྡྷོ, མཧཏི ཝཱ བནྡྷནེ བདྡྷོ, ཀིལེསབནྡྷནསྶ ཋཱནབྷཱུཏེ བྷཝཙཱརཀེ བདྡྷོཏི ཨཏྠོ. ན མེ སམཎ མོཀྑསཱིཏི སམཎ ཏྭཾ མམ ཝིསཡཏོ ན མུཙྩིསྶསི. ‘‘ན མེ སམཎ མོཀྑསཱི’’ཏི ཙ ཨིདཾ མཱརོ ‘‘མུཏྟཱཧཾ, བྷིཀྑཝེ, སབྦཔཱསེཧཱི’’ཏི བྷགཝཏོ ཝཙནཾ ཨསདྡཧནྟོ ཝདཏི, སདྡཧནྟོཔི ཝཱ ‘‘ཨེཝམཡཾ པརེསཾ སཏྟཱནཾ མོཀྑཱཡ ཨུསྶཱཧཾ ན ཀརེཡྻཱ’’ཏི སནྟཛྫེནྟོ ཀོཧཉྙེ ཋཏྭཱ ཝདཏི.

ནིཧཏོཏི ཏྭཾ མཡཱ ནིཧཏོ, ནིབྦིསེཝནབྷཱཝཾ གམིཏོ པརཱཛིཏོཏི ཨཏྠོ. ཨནྟལིཀྑེ ཙརནྟེ པཉྩཱབྷིཉྙེཔི བནྡྷཏཱིཏི ཨནྟལིཀྑཙརོ. རཱགཔཱསོ ཧི ཨནྟལིཀྑཙརེསུཔི ཀིཙྩསཱདྷནཏོ ‘‘ཨནྟལིཀྑཙརོ’’ཏི ¶ ཝུཙྩཏི, ཏེནེཝ ནཾ མཱརོཔི ཨནྟལིཀྑཙརོཏི མཉྙཏི. མནསི ཛཱཏོཏི མཱནསོ, མནསམྤཡུཏྟོཏི ཨཏྠོ. སེསམེཏྠ ཨུཏྟཱནཏྠམེཝ.

མཱརཀཐཱཝཎྞནཱ ནིཊྛིཏཱ.

པབྦཛྫཱུཔསམྤདཱཀཐཱཝཎྞནཱ

༣༤. ‘‘ཨནུཛཱནཱམི བྷིཀྑཝེ’’ཏིཨཱདིཀཱཡ པན པཱལི༹ཡཱ ཡོ པབྦཛྫཱུཔསམྤདཱཝིནིཙྪཡོ ཝཏྟབྦོ, ཏཾ ཝིཏྠཱརཏོ དསྶེཏུཾ ‘‘པབྦཛྫཱཔེཀྑཾ ཀུལཔུཏྟཾ པབྦཱཛེནྟེནཱ’’ཏིཨཱདིམཱཧ. ཏཏྠ ཡེ པུགྒལཱ པཊིཀྑིཏྟཱཏི སམྦནྡྷོ. སཡཾ པབྦཱཛེཏབྦོཏི ཀེསཙྪེདནཱདཱིནི སཡཾ ཀརོནྟེན པབྦཱཛེཏབྦོ. ཀེསཙྪེདནཾ ཀཱསཱཡཙྪཱདནཾ སརཎདཱནནྟི ཧི ཨིམཱནི ཏཱིཎི ཀརོནྟོ ‘‘པབྦཱཛེཏཱི’’ཏི ཝུཙྩཏི. ཨེཏེསུ ཨེཀཾ དྭེ ཝཱཔི ཀརོནྟོ ཏཐཱ ཝོཧརཱིཡཏིཡེཝ, ཏསྨཱ ཨེཏཾ པབྦཱཛེཧཱིཏི ཀེསཙྪེདནཾ ཀཱསཱཡཙྪཱདནཉྩ སནྡྷཱཡ ཝུཏྟཾ. ཨུཔཛ྄ཛྷཱཡཾ ¶ ཨུདྡིསྶ པབྦཱཛེཏཱིཏི ཨེཏྠཱཔི ཨེསེཝ ནཡོ. ཁཎྜསཱིམཾ ནེཏྭཱཏི བྷཎྜུཀམྨཱརོཙནཔརིཧརཎཏྠཾ ཝུཏྟཾ. ཏེན སབྷིཀྑུཀེ ཝིཧཱརེ ཨཉྙམྤི ‘‘ཨེཏསྶ ཀེསེ ཚིནྡཱ’’ཏི ཝཏྟུཾ ན ཝཊྚཏི. པབྦཱཛེཏྭཱཏི ཀེསཙྪེདནཾ སནྡྷཱཡ ཝདཏི. བྷིཀྑུཏོ ཨཉྙོ པབྦཱཛེཏུཾ ན ལབྷཏཱིཏི སརཎདཱནཾ སནྡྷཱཡ ཝུཏྟཾ. ཏེནེཝཱཧ ‘‘སཱམཎེརོ པནཱ’’ཏིཨཱདི. བྷབྦརཱུཔོཏི བྷབྦསབྷཱཝོ. ཏམེཝཏྠཾ པརིཡཱཡནྟརེན ཝིབྷཱཝེཏི ‘‘སཧེཏུཀོ’’ཏི. ཉཱཏོཏི པཱཀཊོ. ཡསསྶཱིཏི པརིཝཱརསམྤཏྟིཡཱ སམནྣཱགཏོ.

ཝཎྞསཎྛཱནགནྡྷཱསཡོཀཱསཝསེན ཨསུཙིཛེགུཙྪཔཊིཀཱུལབྷཱཝཾ པཱཀཊཾ ཀརོནྟེནཱཏི སམྦནྡྷོ. ཏཏྠ ཀེསཱ ནཱམེཏེ ཝཎྞཏོཔི པཊིཀཱུལཱ, སཎྛཱནཏོཔི གནྡྷཏོཔི ཨཱསཡཏོཔི ཨོཀཱསཏོཔི པཊིཀཱུལཱ. མནུཉྙེཔི (ཝིསུདྡྷི. ༡.༡༨༣; ཝིབྷ. ཨཊྛ. ༣༥༦; སཱརཏྠ. ཊཱི. པཱརཱཛིཀཀཎྜ ༢.༡༦༢) ཧི ཡཱགུཔཏྟེ ཝཱ བྷཏྟཔཏྟེ ཝཱ ཀེསཝཎྞཾ ཀིཉྩི དིསྭཱ ‘‘ཀེསམིསྶཀམིདཾ, ཧརཐ ན’’ནྟི ཛིགུཙྪནྟི, ཨེཝཾ ཀེསཱ ཝཎྞཏོ པཊིཀཱུལཱ. རཏྟིཾ བྷུཉྫནྟཱཔི ཀེསསཎྛཱནཾ ཨཀྐཝཱཀཾ ཝཱ མཀཙིཝཱཀཾ ཝཱ ཚུཔིཏྭཱ ¶ ཏཐེཝ ཛིགུཙྪནྟི, ཨེཝཾ སཎྛཱནཏོ པཊིཀཱུལཱ. ཏེལམཀྑནཔུཔྥདྷཱུམཱདིསངྑཱརཝིརཧིཏཱནཉྩ ཀེསཱནཾ གནྡྷོ པརམཛེགུཙྪོ ཧོཏི, ཏཏོ ཛེགུཙྪཏརོ ཨགྒིམྷི པཀྑིཏྟཱནཾ. ཀེསཱ ཧི ཝཎྞསཎྛཱནཏོ ཨཔྤཊིཀཱུལཱཔི སིཡུཾ, གནྡྷེན པན པཊིཀཱུལཱཡེཝ. ཡཐཱ ཧི དཧརསྶ ཀུམཱརཀསྶ ཝཙྩཾ ཝཎྞཏོ ཧལིདྡིཝཎྞཾ, སཎྛཱནཏོཔི ཧལིདྡིཔིཎྜིསཎྛཱནཾ. སངྐཱརཊྛཱནེ ཚཌྜིཏཉྩ ཨུདྡྷུམཱཏཀཀཱལ༹སུནཁསརཱིརཾ ཝཎྞཏོ ཏཱལཔཀྐཝཎྞཾ, སཎྛཱནཏོ ཝཊྚེཏྭཱ ཝིསྶཊྛམུདིངྒསཎྛཱནཾ, དཱཋཱཔིསྶ སུམནམཀུལ༹སདིསཱ, ཏཾ ཨུབྷཡམྤི ཝཎྞསཎྛཱནཏོ སིཡཱ ཨཔྤཊིཀཱུལཾ, གནྡྷེན པན པཊིཀཱུལམེཝ, ཨེཝཾ ཀེསཱཔི སིཡུཾ ཝཎྞསཎྛཱནཏོ ཨཔྤཊིཀཱུལཱ, གནྡྷེན པན པཊིཀཱུལཱཡེཝཱཏི. ཡཐཱ པན ཨསུཙིཊྛཱནེ གཱམནིསྶནྡེན ཛཱཏཱནི སཱུཔེཡྻཔཎྞཱནི ནཱགརིཀམནུསྶཱནཾ ཛེགུཙྪཱནི ཧོནྟི ཨཔརིབྷོགཱནི, ཨེཝཾ ཀེསཱཔི པུབྦལོཧིཏམུཏྟཀརཱིསཔིཏྟསེམྷཱདིནིསྶནྡེན ཛཱཏཏྟཱ པརམཛེགུཙྪཱཏི ཨེཝཾ ཨཱསཡཏོ པཊིཀཱུལཱ. ཨིམེ ཙ ཀེསཱ ནཱམ གཱུཐརཱསིམྷི ཨུཊྛིཏཀཎྞཀཾ ཝིཡ ཨེཀཏིཾསཀོཊྛཱསརཱསིམྷི ཛཱཏཱ, ཏེ སུསཱནསངྐཱརཊྛཱནཱདཱིསུ ཛཱཏསཱཀཾ ཝིཡ པརིཁཱདཱིསུ ཛཱཏཀམལཀུཝལཡཱདིཔུཔྥཾ ཝིཡ ཙ ཨསུཙིཊྛཱནེ ཛཱཏཏྟཱ པརམཛེགུཙྪཱཏི ཨེཝཾ ཨོཀཱསཏོ པཊིཀཱུལཱཏིཨཱདིནཱ ནཡེན ཏཙཔཉྩཀསྶ ཝཎྞཱདིཝསེན པཊིཀཱུལབྷཱཝཾ པཀཱསེནྟེནཱཏི ཨཏྠོ.

ནིཛྫཱིཝནིསྶཏྟབྷཱཝཾ ཝཱ པཱཀཊཾ ཀརོནྟེནཱཏི ཨིམེ ཀེསཱ ནཱམ སཱིསཀཊཱཧཔལིཝེཋནཙམྨེ ཛཱཏཱ. ཏཏྠ ཡཐཱ ཝམྨིཀམཏྠཀེ ཛཱཏེསུ ཀུནྠཏིཎེསུ ན ཝམྨིཀམཏྠཀོ ཛཱནཱཏི ‘‘མཡི ཀུནྠཏིཎཱནི ཛཱཏཱནཱི’’ཏི, ནཱཔི ཀུནྠཏིཎཱནི ཛཱནནྟི ‘‘མཡཾ ཝམྨིཀམཏྠཀེ ཛཱཏཱནཱི’’ཏི, ཨེཝམེཝ ¶ ན སཱིསཀཊཱཧཔལིཝེཋནཙམྨཾ ཛཱནཱཏི ‘‘མཡི ཀེསཱ ཛཱཏཱ’’ཏི, ནཱཔི ཀེསཱ ཛཱནནྟི ‘‘མཡཾ སཱིསཀཊཱཧཔལིཝེཋནཙམྨེ ཛཱཏཱ’’ཏི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཀེསཱ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏིཨཱདིནཱ ནཡེན ནིཛྫཱིཝནིསྶཏྟབྷཱཝཾ པཀཱསེནྟེན. པུབྦེཏི པུརིམབུདྡྷཱནཾ སནྟིཀེ. མདྡིཏསངྑཱརོཏི ནཱམརཱུཔཝཝཏྠཱནེན ཙེཝ པཙྩཡཔརིགྒཧཝསེན ཙ ཉཱཎེན པརིམདྡིཏསངྑཱརོ. བྷཱཝིཏབྷཱཝནོཏི ཀལཱཔསམྨསནཱདིནཱ སབྦསོ ཀུསལབྷཱཝནཱཡ པཱུརཎེན བྷཱཝིཏབྷཱཝནོ.

ཨདིནྣཾ ¶ ན ཝཊྚཏཱིཏི ཨེཏྠ པབྦཛྫཱ ན རུཧཏཱིཏི ཝདནྟི. ཨནུཉྙཱཏཨུཔསམྤདཱཏི ཉཏྟིཙཏུཏྠཀམྨེན ཨནུཉྙཱཏཨུཔསམྤདཱ. ཋཱནཀརཎསམྤདནྟི ཨེཏྠ ཨུརཱདཱིནི ཋཱནཱནི, སཾཝུཏཱདཱིནི ཀརཎཱནཱིཏི ཝེདིཏབྦཱནི. ཨནུནཱསིཀནྟཾ ཀཏྭཱ དཱནཀཱལེ ཨནྟརཱ ཝིཙྪེདཾ ཨཀཏྭཱ དཱཏབྦཱནཱིཏི དསྶེཏུཾ ‘‘ཨེཀསམྦནྡྷཱནཱི’’ཏི ཝུཏྟཾ. ཝིཙྪིནྡིཏྭཱཏི མ-ཀཱརནྟཾ ཀཏྭཱ དཱནསམཡེ ཝིཙྪེདཾ ཀཏྭཱ. སབྦམསྶ ཀཔྤིཡཱཀཔྤིཡཾ ཨཱཙིཀྑིཏབྦནྟི དསསིཀྑཱཔདཝིནིམུཏྟཾ པརཱམཱསཱཔརཱམཱསཱདིབྷེདཾ ཀཔྤིཡཱཀཔྤིཡཾ ཨཱཙིཀྑིཏབྦཾ. ཨཱབྷིསམཱཙཱརིཀེསུ ཝིནེཏབྦོཏི ཨིམིནཱ སེཁིཡཨུཔཛ྄ཛྷཱཡཝཏྟཱདིཨཱབྷིསམཱཙཱརིཀསཱིལམནེན པཱུརེཏབྦཾ, ཏཏྠ ཙ ཀཏྟབྦསྶ ཨཀརཎེ ཨཀཏྟབྦསྶ ཙ ཀརཎེ དཎྜཀམྨཱརཧོ ཧོཏཱིཏི དཱིཔེཏི.

པབྦཛྫཱུཔསམྤདཱཀཐཱཝཎྞནཱ ནིཊྛིཏཱ.

དུཏིཡམཱརཀཐཱཝཎྞནཱ

༣༥. ཨཐ ཁོ བྷགཝཱ ཝསྶཾཝུཊྛོཏིཨཱདིཀཱཡ པན པཱལི༹ཡཱ ཨཡཾ ཨཔུབྦཔདཝཎྞནཱ. ཡོནིསོམནསིཀཱརཱཏི ཨུཔཱཡམནསིཀཱརེན, ཨནིཙྩཱདཱིསུ ཨནིཙྩཱདིཏོ མནསིཀརཎེནཱཏི ཨཏྠོ. ཡོནིསོ སམྨཔྤདྷཱནཱཏི ཨུཔཱཡཝཱིརིཡེན, ཨནུཔྤནྣཱཀུསལཱནུཔྤཱདནཱདིཝིདྷིནཱ པཝཏྟཝཱིརིཡེནཱཏི ཨཏྠོ. ཝིམུཏྟཱིཏི ཨུཀྐཊྛནིདྡེསེན ཨརཧཏྟཕལཝིམུཏྟི ཝུཏྟཱ. ཨཛ྄ཛྷབྷཱསཱིཏི ‘‘ཨཡཾ ཨཏྟནཱ ཝཱིརིཡཾ ཀཏྭཱ ཨརཧཏྟཾ པཏྭཱཔི ན ཏུསྶཏི, ཨིདཱནི ཨཉྙེསམྤི ‘པཱཔུཎཱཐཱ’ཏི ཨུསྶཱཧཾ ཀརོཏི, པཊིབཱཧེསྶཱམི ན’’ནྟི ཙིནྟེཏྭཱ ཨབྷཱསི. མཱརཔཱསེནཱཏི ཀིལེསཔཱསེན. སེསམེཏྠ ཝུཏྟནཡམེཝ.

དུཏིཡམཱརཀཐཱཝཎྞནཱ ནིཊྛིཏཱ.

བྷདྡཝགྒིཡཀཐཱཝཎྞནཱ

༣༦. ཏིཾསབྷདྡཝགྒིཡཝཏྠུམྷི ¶ ཡཐཱབྷིརནྟཾ ཝིཧརིཏྭཱཏི ཡཐཱཨཛ྄ཛྷཱསཡཾ ཝིཧརིཏྭཱ. བུདྡྷཱནཉྷི ཨེཀསྨིཾ ཋཱནེ ཝསནྟཱནཾ ཚཱཡཱུདཀཱདཱིནཾ ཝིཔཏྟིཾ ཝཱ ཨཕཱསུཀསེནཱསནཾ ཝཱ མནུསྶཱནཾ ཨསྶདྡྷཱདིབྷཱཝཾ ཝཱ ཨཱགམྨ ¶ ཨནབྷིརཏི ནཱམ ནཏྠི, ཏེསཾ སམྤཏྟིཡཱ ‘‘ཨིདྷ ཕཱསུཾ ཝིཧརཱམཱ’’ཏི ཨབྷིརམིཏྭཱ ཙིརཝིཧཱརོཔི ནཏྠི. ཡཏྠ པན ཏཐཱགཏེ ཝིཧརནྟེ སཏྟཱ སརཎེསུ ཝཱ ཏཱིསུ པཏིཊྛཧནྟི, སཱིལཱནི ཝཱ སམཱདིཡནྟི, པབྦཛནྟི ཝཱ, སོཏཱཔཏྟིམགྒཱདཱིནཾ ཝཱ པརེསཾ ཨུཔནིསྶཡོ ཧོཏི, ཏཏྠ བུདྡྷཱ སཏྟེ ཏཱསུ སམྤཏྟཱིསུ པཏིཊྛཱཔནཨཛ྄ཛྷཱསཡེན ཝསནྟི, ཏཱསཾ ཨབྷཱཝེ པཀྐམནྟི. ཏེན ཝུཏྟཾ ‘‘ཡཐཱཨཛ྄ཛྷཱསཡཾ ཝིཧརིཏྭཱ’’ཏི. ཨཛ྄ཛྷོགཱཧེཏྭཱཏི པཝིསིཏྭཱ. ཏིཾསམཏྟཱཏི ཏིཾསཔམཱཎཱ. སེསམེཏྠ ཝུཏྟནཡམེཝ.

བྷདྡཝགྒིཡཀཐཱཝཎྞནཱ ནིཊྛིཏཱ.

ཨུརུཝེལཔཱཊིཧཱརིཡཀཐཱཝཎྞནཱ

༣༧-༣༨. ཨུརུཝེལཀསྶཔཝཏྠུམྷི ཛཊིལོཏི ཛཊཱདྷརོ. ཛཊཱ ཨསྶ ཨཏྠཱིཏི ཧི ཛཊིལོ. ནེཏཱིཏི ནཱཡཀོ, སཱམཾ ཝིནེཏི ཨཏྟནོ ལདྡྷིཾ སིཀྑཱཔེཏཱིཏི ཝིནཱཡཀོ. སཙེ ཏེ ཀསྶཔ ཨགརཱུཏི ཀསྶཔ སཙེ ཏུཡ྄ཧཾ བྷཱརིཡཾ ཨཕཱསུཀཾ ཀིཉྩི ནཏྠི. ཨགྱཱགཱརེཏི ཨགྒིསཱལཱཡཾ. ཨུབྷིནྣཾ སཛོཏིབྷཱུཏཱནནྟི ཨུབྷོསུ སཛོཏིབྷཱུཏེསུ པཛྫལིཏེསུ. ཡཏྲ ཧི ནཱམཱཏི ཡོ ནཱམ.

༣༩. ཨཛྫཎྷོཏི ཨཛྫ ཨེཀདིཝསཾ. ཨགྒིསཱལམྷཱིཏི ཨགྱཱགཱརེ. སུམནམནསོཏི སུནྡརཙིཏྟསངྑཱཏམནོ. ཏེཛོདྷཱཏཱུསུ ཀུསལོཏི ཏེཛོཀསིཎསམཱཔཏྟཱིསུ ཀུསལོ. ཨུདིཙྪརེཏི ཨུལློཀེསུཾ, པརིཝཱརེསུནྟི ཝཱ ཨཏྠོ. པཏྟམྷི ཨོདཧིཏྭཱཏི པཏྟེ པཀྑིཔིཏྭཱ. དྷུཝབྷཏྟེནཱཏི ནིཙྩབྷཏྟེན.

༤༠. ཨབྷིཀྐནྟཱཡ རཏྟིཡཱཏི ཨེཏྠ ཨབྷིཀྐནྟ-སདྡོ ཁཡེ ཝཏྟཏི, ཏེན པརིཀྑཱིཎཱཡརཏྟིཡཱཏི ཨཏྠོ. ཨེཏེ ཧི ཙཏྟཱརོ མཧཱརཱཛཱནོ མཛ྄ཛྷིམཡཱམསམནནྟརེ ཨཱགཏཱ. ནིཡཱམོ ཀིརེས དེཝཏཱནཾ, ཡདིདཾ བུདྡྷཱནཾ ཝཱ བུདྡྷསཱཝཀཱནཾ ཝཱ ཨུཔཊྛཱནཾ ཨཱགཙྪནྟཱ མཛ྄ཛྷིམཡཱམསམནནྟརེ ཨཱགཙྪནྟི. ཨབྷིཀྐནྟཝཎྞཱཏི ཨབྷིརཱུཔཚཝིཝཎྞཱ, ཨིཊྛཝཎྞཱ མནཱཔཝཎྞཱཏི ¶ ཝུཏྟཾ ཧོཏི. དེཝཏཱ ཧི མནུསྶལོཀཾ ཨཱགཙྪམཱནཱ པཀཏིཝཎྞཾ པཀཏིཨིདྡྷིཾ ¶ ཛཧིཏྭཱ ཨོལཱ༹རིཀཾ ཨཏྟབྷཱཝཾ ཀཏྭཱ ཨཏིརེཀཝཎྞཝཏྠཱལངྐཱརཀཱཡཱདཱིཧི ཨོབྷཱསཾ མུཉྩམཱནཱདིཝསེན ཙ དིབྦཾ ཨིདྡྷཱནུབྷཱཝཉྩ ནིམྨིནིཏྭཱ ནཊསམཛྫཱདཱིནི གཙྪནྟཱ མནུསྶཱ ཝིཡ ཨབྷིསངྑཏེན ཀཱཡེན ཨཱགཙྪནྟི. ཏཏྠ ཀཱམཱཝཙརཱ ཨནབྷིསངྑཏེནཔི ཨཱགནྟུཾ སཀྐོནྟི ཨོལཱ༹རིཀརཱུཔཏྟཱ. ཏཐཱ ཧི ཏེ ཀབལཱི༹ཀཱརཱཧཱརབྷཀྑཱ, རཱུཔཱཝཙརཱ པན ཨནབྷིསངྑཏེན ཀཱཡེན ཨཱགནྟུཾ ན སཀྐོནྟི སུཁུམཏརརཱུཔཏྟཱ. ཏེསཉྷི ཨཏིསུཁུམོཝ ཨཏྟབྷཱཝོ, ན ཏེན ཨིརིཡཱཔཐཀཔྤནཾ ཧོཏི. ཏསྨཱ བྲཧྨལོཀེཔི བྲཧྨཱནོ ཡེབྷུཡྻེན ནིམྨིཏརཱུཔེནེཝ པཝཏྟནྟི. མཱུལཔཊིསནྡྷིརཱུཔཉྷི ནེསཾ ཨཏིཝིཡ སུཁུམམཧཱརཱུཔཾ, ཀེཝལཾ ཏཾ ཙིཏྟུཔྤཱདསྶ ནིསྶཡཱདྷིཊྛཱནབྷཱུཏཾ སཎྛཱནཝནྟཾ ཧུཏྭཱ ཏིཊྛཏི.

ཀེཝལཀཔྤནྟི ཨེཏྠ ཀེཝལ-སདྡསྶ ཨནཝསེསཏྟཾ ཨཏྠོ, ཀཔྤ-སདྡསྶ སམནྟབྷཱཝོ, ཏསྨཱ ཀེཝལཀཔྤཾ ཝནསཎྜནྟི ཨནཝསེསཾ སམནྟཏོ ཝནསཎྜནྟི ཨཏྠོ. ཨནཝསེསཾ ཕརིཏུཾ སམཏྠསྶཔི ཧི ཨོབྷཱསསྶ ཀེནཙི ཀཱརཎེན ཨེཀདེསཕརཎམྤི སིཡཱ, ཨཡཾ པན སབྦསོ ཕརཏཱིཏི དསྶེཏུཾ སམནྟཏྠོ ཀཔྤ-སདྡོ གཧིཏོ. ཨཐ ཝཱ ཨཱིསཾ ཨསམཏྠཾ ཀེཝལཀཔྤཾ. བྷགཝཏོ པབྷཱཡ ཨནོབྷཱསིཏམེཝ ཧི པདེསཾ དེཝཏཱ ཨཏྟནོ པབྷཱཡ ཨོབྷཱསེནྟི. ན ཧི བྷགཝཏོ པབྷཱ ཀཱཡཙི པབྷཱཡ ཨབྷིབྷཱུཡཏི, སཱུརིཡཱདཱིནམྤི པན པབྷཾ སཱ ཨབྷིབྷུཡྻ ཏིཊྛཏཱིཏི. ཨོབྷཱསེཏྭཱཏི ཝཏྠཱལངྐཱརསརཱིརསམུཊྛིཏཱཡ ཨཱབྷཱཡ ཕརིཏྭཱ, ཙནྡོ ཝིཡ སཱུརིཡོ ཝིཡ ཙ ཨེཀོབྷཱསཾ ཨེཀཔཛྫོཏཾ ཀརིཏྭཱཏི ཨཏྠོ. དེཝཏཱནཉྷི སརཱིརཱབྷཱ དསདྭཱདསཡོཛནམཏྟཊྛཱནཾ ཏཏོ བྷིཡྻོཔི ཕརིཏྭཱ ཏིཊྛཏི, ཏཐཱ ཝཏྠཱབྷརཎཱདཱིསུ སམུཊྛིཏཱ པབྷཱ. ཙཏུདྡིསཱཏི ཙཏཱུསུ དིསཱསུ. ཡཏྲ ཧི ནཱམཱཏི ཡཾ ནཱམ.

༤༣. ཨངྒམགདྷཱཏི ཨུབྷོ ཨངྒམགདྷརཊྛཝཱསིནོ. ཨིདྡྷིཔཱཊིཧཱརིཡནྟི ཨིདྡྷིབྷཱུཏཾ པཱཊིཧཱརིཡཾ, ན ཨཱདེསནཱནུསཱསནཱིཔཱཊིཧཱརིཡནྟི ཨཏྠོ. ཏིཝིདྷཉྷི པཱཊིཧཱརིཡཾ ཨིདྡྷིཔཱཊིཧཱརིཡཾ ཨཱདེསནཱཔཱཊིཧཱརིཡཾ ཨནུསཱསནཱིཔཱཊིཧཱརིཡནྟི. ཏཏྠ ‘‘ཨིདྷ བྷིཀྑུ ཨེཀོཔི ཧུཏྭཱ བཧུདྷཱ ཧོཏི, བཧུདྷཱཔི ཧུཏྭཱ ཨེཀོ ཧོཏི ཨཱཝིབྷཱཝཾ ཏིརོབྷཱཝ’’ནྟིཨཱདིནཡཔྤཝཏྟཾ (དཱི. ནི. ༡.༢༣༨-༢༣༩; མ. ནི. ༡.༡༤༧; སཾ. ནི. ༢.༧༠; ༥.༨༣༤) ཨིདྡྷིཝིདྷམེཝ ¶ ཨིདྡྷིཔཱཊིཧཱརིཡཾ. ‘‘ཨིདྷ བྷིཀྑུ པརསཏྟཱནཾ པརཔུགྒལཱནཾ ཙིཏྟམྤི ཨཱདིསཏི, ཙེཏསིཀམྤི ཨཱདིསཏི, ཝིཏཀྐིཏམྤི ཨཱདིསཏི, ཝིཙཱརིཏམྤི ཨཱདིསཏི ‘ཨེཝམྤི ཏེ མནོ, ཨིཏྠམྤི ཏེ མནོ’’’ཏིཨཱདིནཡཔྤཝཏྟཾ (པཊི. མ. ༣.༣༠) པརསྶ ཙིཏྟཾ ཉཏྭཱ ཀཐནཾ ཨཱདེསནཱཔཱཊིཧཱརིཡཾ. ‘‘ཨིདྷ བྷིཀྑུ ཨེཝམནུསཱསཏི ‘ཨེཝཾ ཝིཏཀྐེཐ, མཱ ཨེཝཾ ཝིཏཀྐཡིཏྠ, ཨེཝཾ ¶ མནསི ཀརོཐ, མཱ ཨེཝཾ མཱནསཱ ཀརིཏྠ, ཨིདཾ པཛཧཐ, ཨིདཾ ཨུཔསམྤཛྫ ཝིཧརཐཱ’’’ཏི (པཊི. མ. ༣.༣༠) ཨེཝམཱདིནཡཔྤཝཏྟཱ སཱཝཀཱནཾ བུདྡྷཱནཉྩ སབྦཀཱལཾ དེསེཏབྦདྷམྨདེསནཱ ཨནུསཱསནཱིཔཱཊིཧཱརིཡཾ.

ཏཏྠ (ཨུདཱ. ཨཊྛ. ༡) པཱཊིཧཱརིཡཔདསྶ ཝཙནཏྠཾ པཊིཔཀྑཧརཎཏོ རཱགཱདིཀིལེསཱཔནཡནཏོ པཱཊིཧཱརིཡནྟི ཝདནྟི. བྷགཝཏོ པན པཊིཔཀྑཱ རཱགཱདཡོ ན སནྟི ཡེ ཧརིཏབྦཱ, པུཐུཛྫནཱནམྤི ཝིགཏཱུཔཀྐིལེསེ ཨཊྛགུཎསམནྣཱགཏེ ཙིཏྟེ ཧཏཔཊིཔཀྑེ ཨིདྡྷིཝིདྷཾ ཝཏྟཏི, ཏསྨཱ ཏཏྠ པཝཏྟཝོཧཱརེན ཙ ན སཀྐཱ ཨིདྷ པཱཊིཧཱརིཡནྟི ཝཏྟུཾ. སཙེ པན མཧཱཀཱརུཎིཀསྶ བྷགཝཏོ ཝེནེཡྻགཏཱ ཙ ཀིལེསཱ པཊིཔཀྑཱ, ཏེསཾ ཧརཎཏོ པཱཊིཧཱརིཡནྟི ཝུཏྟཾ, ཨེཝཾ སཏི ཡུཏྟམེཏཾ. ཨཐ ཝཱ བྷགཝཏོ ཙ སཱསནསྶ ཙ པཊིཔཀྑཱ ཏིཏྠིཡཱ, ཏེསཾ ཧརཎཏོ པཱཊིཧཱརིཡཾ. ཏེ ཧི དིཊྛིཧརཎཝསེན དིཊྛིཔྤཀཱསནེ ཨསམཏྠབྷཱཝེན ཙ ཨིདྡྷིཨཱདེསནཱནུསཱསནཱིཧི ཧརིཏཱ ཨཔནཱིཏཱ ཧོནྟཱིཏི. པཊཱིཏི ཝཱ ཨཡཾ སདྡོ པཙྪཱཏི ཨེཏསྶ ཨཏྠཾ བོདྷེཏི ‘‘ཏསྨིཾ པཊིཔཝིཊྛམྷི, ཨཉྙོ ཨཱགཉྪི བྲཱཧྨཎོ’’ཏིཨཱདཱིསུ (ཙཱུལ༹ནི. ཝཏྠུགཱཐཱ ༤) ཝིཡ, ཏསྨཱ སམཱཧིཏེ ཙིཏྟེ ཝིགཏཱུཔཀྐིལེསེན ཀཏཀིཙྩེན པཙྪཱ ཧརིཏབྦཾ པཝཏྟེཏབྦནྟི པཊིཧཱརིཡཾ, ཨཏྟནོ ཝཱ ཨུཔཀྐིལེསེསུ ཙཏུཏྠཛ྄ཛྷཱནམགྒེཧི ཧརིཏེསུ པཙྪཱ ཧརཎཾ པཊིཧཱརིཡཾ, ཨིདྡྷིཨཱདེསནཱནུསཱསནིཡོ ཙ ཝིགཏཱུཔཀྐིལེསེན ཀཏཀིཙྩེན སཏྟཧིཏཏྠཾ པུན པཝཏྟེཏབྦཱ, ཧརིཏེསུ ཙ ཨཏྟནོ ཨུཔཀྐིལེསེསུ པརསཏྟཱནཾ ཨུཔཀྐིལེསཧརཎཱནི ཧོནྟཱིཏི པཊིཧཱརིཡཱནི བྷཝནྟི, པཊིཧཱརིཡམེཝ པཱཊིཧཱརིཡཾ. པཊིཧཱརིཡེ ཝཱ ཨིདྡྷིཨཱདེསནཱནུསཱསནཱིསམུདཱཡེ བྷཝཾ ཨེཀེཀཾ པཱཊིཧཱརིཡནྟི ཝུཙྩཏི. པཊིཧཱརིཡཾ ཝཱ ཙཏུཏྠཛ྄ཛྷཱནཾ མགྒོ ཙ པཊིཔཀྑཧརཎཏོ, ཏཏྠ ཛཱཏཾ ནིམིཏྟབྷཱུཏེ, ཏཏོ ཝཱ ཨཱགཏནྟི པཱཊིཧཱརིཡཾ. སྭཱཏནཱཡཱཏི སྭེ དཱཏབྦསྶ ཨཏྠཱཡ.

༤༤. པཾསུཀཱུལཾ ¶ ཨུཔྤནྣཾ ཧོཏཱིཏི པརིཡེསམཱནསྶ པཊིལཱབྷཝསེན ཨུཔྤནྣཾ ཧོཏི. ཝིཙིཏྟཔཱཊིཧཱརིཡདསྶནཏྠཱཝ སཱ པརིཡེསནཱ. ཡསྨཱ པཱཎིནཱ ཕུཊྛམཏྟེ སཱ པོཀྑརཎཱི ནིམྨིཏཱ ཨཧོསི, ཏསྨཱ ཝུཏྟཾ ‘‘པཱཎིནཱ པོཀྑརཎིཾ ཁཎིཏྭཱ’’ཏི.

༤༦-༤༩. ཛཊིལཱཏི ཏཱཔསཱ. ཏེ ཧི ཛཊཱདྷཱརིཏཱཡ ཨིདྷ ‘‘ཛཊིལཱ’’ཏི ཝུཏྟཱ. ཨནྟརཊྛཀཱསུ ཧིམཔཱཏསམཡེཏི ཧེམནྟསྶ ཨུཏུནོ ཨབྦྷནྟརབྷཱུཏེ མཱགྷམཱསསྶ ཨཝསཱནེ ཙཏསྶོ, ཕགྒུཎམཱསསྶ ཨཱདིམྷི ཙཏསྶོཏི ཨེཝཾ ཨུབྷིནྣམནྟརེ ཨཊྛརཏྟཱིསུ ཧིམཔཏནཀཱལེ. ནེརཉྫརཱཡ ཨུམྨུཛྫནྟཱིཏི ཀེཙི ཏསྨིཾ ཏིཏྠསམྨཏེ ཨུདཀེ པཋམཾ ནིམུགྒསཀལསརཱིརཱ ཏཏོ ཨུམྨུཛྫནྟཱ ཝུཊྛཧནྟི ¶ ཨུཔྤིལཝནྟི. ནིམུཛྫནྟཱིཏི སསཱིསཾ ཨུདཀེ ཨོསཱིདནྟི. ཨུམྨུཛྫནནིམུཛྫནམྤི ཀརོནྟཱིཏི པུནཔྤུནཾ ཨུམྨུཛྫནནིམུཛྫནཱནིཔི ཀརོནྟི. ཏཏྠ ཧི ཀེཙི ‘‘ཨེཀུམྨུཛྫནེནེཝ པཱཔསུདྡྷི ཧོཏཱི’’ཏི ཨེཝཾདིཊྛིཀཱ, ཏེ ཨུམྨུཛྫནམེཝ ཀཏྭཱ གཙྪནྟི. ཨུམྨུཛྫནཾ པན ནིམུཛྫནམནྟརེན ནཏྠཱིཏི ཨཝིནཱབྷཱཝཏོ ནིམུཛྫནམྤི ཏེ ཀརོནྟིཡེཝ. ཡེཔི ‘‘ཨེཀནིམུཛྫནེནེཝ པཱཔསུདྡྷི ཧོཏཱི’’ཏི ཨེཝཾདིཊྛིཀཱ, ཏེཔི ཨེཀཝཱརམེཝ ནིམུཛྫིཏྭཱ ཝུཏྟནཡེནེཝ ཨཝིནཱབྷཱཝཏོ ཨུམྨུཛྫནམྤི ཀཏྭཱ པཀྐམནྟི. ཨཔརེ ‘‘པུནཔྤུནཾ ཨུམྨུཛྫནནིམུཛྫནཱནི ཀཏྭཱ ནཧཱཏེ པཱཔསུདྡྷི ཧོཏཱི’’ཏི ཨེཝཾདིཊྛིཀཱ, ཏེ ཀཱལེན ཀཱལཾ ཨུམྨུཛྫནནིམུཛྫནཱནི ཀརོནྟི. ཏེ སབྦེཔི སནྡྷཱཡ ཝུཏྟཾ ‘‘ཨུམྨུཛྫནྟིཔི ནིམུཛྫནྟིཔི ཨུམྨུཛྫནནིམུཛྫནམྤི ཀརོནྟཱི’’ཏི. ཨེཏྠ ཙ ཀིཉྩཱཔི ནིམུཛྫནཔུབྦཀཾ ཨུམྨུཛྫནཾ, ནིམུཛྫནམེཝ པན ཀརོནྟཱ ཀཏིཔཡཱ, ཨུམྨུཛྫནཾ ཏདུབྷཡཉྩ ཀརོནྟཱ བཧཱུཏི ཏེསཾ ཡེབྷུཡྻབྷཱཝདསྶནཏྠཾ ཨུམྨུཛྫནཾ པཋམཾ ཝུཏྟཾ.

༥༠-༥༡. ཨུདཀཝཱཧཀོཏི ཨུདཀོགྷོ. རེཎུཧཏཱཡཱཏི རཛོགཏཱཡ, རཛོཀིཎྞཱཡཱཏི ཝུཏྟཾ ཧོཏི. ནེཝ ཙ ཁོ ཏྭཾ ཀསྶཔ ཨརཧཱཏི ཨེཏེན ཏདཱ ཀསྶཔསྶ ཨསེཀྑབྷཱཝཾ པཊིཀྑིཔཏི, ནཱཔི ཨརཧཏྟམགྒསམཱཔནྣོཏི ཨེཏེན སེཀྑབྷཱཝཾ. ཨུབྷཡེནཔིསྶ ཨནརིཡབྷཱཝམེཝ དཱིཔེཏི. སཱཔི ཏེ པཊིཔདཱ ནཏྠི, ཡཱཡ ཏྭཾ ཨརཧཱ ཝཱ ཨསྶསི ཨརཧཏྟམགྒཾ ཝཱ སམཱཔནྣོཏི ཨིམིནཱ པནསྶ ཀལྱཱཎཔུཐུཛྫནབྷཱཝམྤི པཊིཀྑིཔཏི. ཏཏྠ པཊིཔདཱཏི སཱིལཝིསུདྡྷིཨཱདཡོ ཚ ཝིསུདྡྷིཡོ. པཊིཔཛྫཏི ཨེཏཱཡ ཨརིཡམགྒོཏི པཊིཔདཱ. ཨསྶསཱིཏི ¶ བྷཝེཡྻཱསི. ཙིརཔཊིཀཱཏི ཙིརཀཱལཏོ པཊྛཱཡ, ནཱགདམནཏོ པཊྛཱཡཱཏི ཨཏྠོ. ཁཱརིཀཱཛམིསྶནྟི ཨེཏྠ ཁཱརཱིཏི ཨརཎཱིཀམཎྜལུསཱུཙིཨཱདཡོ ཏཱཔསཔརིཀྑཱརཱ, ཏཾ ཧརཎཀཱཛཾ ཁཱརིཀཱཛཾ. ཨགྒིཧུཏམིསྶནྟི དབྦིཨཱདིཨགྒིཔཱུཛོཔཀརཎཾ.

༥༢-༥༣. ཨུཔསགྒོཏི ཨུཔདྡཝོ. ཨིདཱནི ཨཌྜྷུཌྜྷཱནི པཱཊིཧཱརིཡསཧསྶཱནི ཨེཀཏོ གཎེཏྭཱ དསྶེཏུཾ ‘‘བྷགཝཏོ ཨདྷིཊྛཱནེན པཉྩ ཀཊྛསཏཱནི ན ཕཱལིཡིཾསཱུ’’ཏིཨཱདི ཨཱརདྡྷཾ. ནཱགདམནཱདཱིནི པན སོལ༹ས པཱཊིཧཱརིཡཱནི ཨིདྷ ན གཎིཏཱནི, ཏེཧི སདྡྷིཾ སོལ༹སཱཏིརེཀཨཌྜྷུཌྜྷཔཱཊིཧཱརིཡསཧསྶཱནཱིཏི ཝེདིཏབྦཾ.

ཨཱདིཏྟཔརིཡཱཡསུཏྟཝཎྞནཱ

༥༤. ཨིདཱནི ཏསྶ བྷིཀྑུསཧསྶསྶ ཨཱདིཏྟཔརིཡཱཡདེསནཱཡ ཨརཧཏྟཔྤཏྟིཾ དསྶེཏུཾ ‘‘ཨཐ ཁོ ¶ བྷགཝཱ’’ཏིཨཱདི ཨཱརདྡྷཾ. ཏཏྠ གཡཱཡཾ ཝིཧརཏི གཡཱསཱིསེཏི གཡཱནཱམིཀཱཡ ནདིཡཱ ཨཝིདཱུརེ བྷཝཏྟཱ གཱམོ གཡཱ ནཱམ, ཏསྶཾ གཡཱཡཾ ཝིཧརཏི. སམཱིཔཏྠེ ཙེཏཾ བྷུམྨཝཙནཾ. གཡཱགཱམསྶ ཧི ཨཝིདཱུརེ གཡཱཏི ཨེཀཱ པོཀྑརཎཱིཔི ཨཏྠི ནདཱིཔི གཡཱསཱིསནཱམཀོ ཧཏྠིཀུམྦྷསདིསོ པིཊྛིཔཱསཱཎོཔི. ཡཏྠ བྷིཀྑུསཧསྶསྶ ཨོཀཱསོ པཧོཏི, བྷགཝཱ ཏཏྠ ཝིཧརཏི. ཏེན ཝུཏྟཾ ‘‘གཡཱསཱིསེ’’ཏི, གཡཱགཱམསྶ ཨཱསནྣེ གཡཱསཱིསནཱམཀེ པིཊྛིཔཱསཱཎེ ཝིཧརཏཱིཏི ཝུཏྟཾ ཧོཏི. བྷིཀྑཱུ ཨཱམནྟེསཱིཏི ཏེསཾ སཔྤཱཡདྷམྨདེསནཾ ཝིཙིནིཏྭཱ ཏཾ དེསེསྶཱམཱིཏི ཨཱམནྟེསི. བྷགཝཱ ཧི ཏཾ ཨིདྡྷིམཡཔཏྟཙཱིཝརདྷརཾ སམཎསཧསྶཾ ཨཱདཱཡ གཡཱསཱིསཾ གནྟྭཱ ཏེན པརིཝཱརིཏོ ནིསཱིདིཏྭཱ ‘‘ཀཏརཱ ནུ ཁོ ཨེཏེསཾ དྷམྨཀཐཱ སཔྤཱཡཱ’’ཏི ཙིནྟེནྟོ ‘‘ཨིམེ སཱཡཾ པཱཏཾ ཨགྒིཾ པརིཙརནྟི, ཨིམེསཾ དྭཱདསཱཡཏནཱནི ཨཱདིཏྟཱནི སམྤཛྫལིཏཱནི ཝིཡ ཀཏྭཱ དསྶེསྶཱམི, ཨེཝཾ ཨིམེ ཨརཧཏྟཾ པཱཔུཎིཏུཾ སཀྑིསྶནྟཱི’’ཏི སནྣིཊྛཱནམཀཱསི. ཨཐ ནེསཾ ཏཐཱ དེསེཏུཾ ‘‘སབྦཾ, བྷིཀྑཝེ, ཨཱདིཏྟ’’ནྟིཨཱདིནཱ ཨིམཾ ཨཱདིཏྟཔརིཡཱཡཾ ཨབྷཱསི.

ཏཏྠ (སཾ. ནི. ཨཊྛ. ༣.༤.༢༣) སབྦཾ ནཱམ ཙཏུབྦིདྷཾ སབྦསབྦཾ ཨཱཡཏནསབྦཾ སཀྐཱཡསབྦཾ པདེསསབྦནྟི. ཏཏྠ –

‘‘ན ¶ ཏསྶ ཨདྡིཊྛམིདྷཏྠི ཀིཉྩི;

ཨཐོ ཨཝིཉྙཱཏམཛཱནིཏབྦཾ;

སབྦཾ ཨབྷིཉྙཱསི ཡདཏྠི ནེཡྻཾ;

ཏཐཱགཏོ ཏེན སམནྟཙཀྑཱུ’’ཏི (མཧཱནི. ༡༥༦; ཙཱུལ༹ནི. དྷོཏཀམཱཎཝཔུཙྪཱནིདྡེས ༣༢; པཊི. མ. ༡.༡༢༡) –

ཨིདཾ སབྦསབྦཾ ནཱམ. ‘‘སབྦཾ ཝོ, བྷིཀྑཝེ, དེསེསྶཱམི, ཏཾ སུཎཱཐཱ’’ཏི (སཾ. ནི. ༤.༢༣) ཨིདཾ ཨཱཡཏནསབྦཾ ནཱམ. ‘‘སབྦདྷམྨམཱུལཔརིཡཱཡཾ ཝོ, བྷིཀྑཝེ, དེསེསྶཱམཱི’’ཏི (མ. ནི. ༡.༡) ཨིདཾ སཀྐཱཡསབྦཾ ནཱམ. ‘‘སབྦདྷམྨེསུ ཝཱ པཋམསམནྣཱཧཱརོ ཨུཔྤཛྫཏི ཙིཏྟཾ མནོ མཱནསཾ ཏཛྫཱ མནོཝིཉྙཱཎདྷཱཏཱུ’’ཏི ཨིདཾ པདེསསབྦཾ ནཱམ. ཨིཏི པཉྩཱརམྨཎམཏྟཾ པདེསསབྦཾ, ཏེབྷཱུམཀཱ དྷམྨཱ སཀྐཱཡསབྦཾ, ཙཏུབྷཱུམཀཱ དྷམྨཱ ཨཱཡཏནསབྦཾ, ཡཾ ཀིཉྩི ནེཡྻཾ སབྦསབྦཾ. པདེསསབྦཾ སཀྐཱཡསབྦཾ ན པཱཔུཎཱཏི ཏསྶ ཏེབྷཱུམཀདྷམྨེསུཔི ཨེཀདེསསྶ ཨསངྒཎྷནཏོ. སཀྐཱཡསབྦཾ ཨཱཡཏནསབྦཾ ན པཱཔུཎཱཏི ལོཀུཏྟརདྷམྨཱནཾ ཨསངྒཎྷནཏོ. ཨཱཡཏནསབྦཾ སབྦསབྦཾ ན པཱཔུཎཱཏི. ཀསྨཱ? ཡསྨཱ ཨཱཡཏནསབྦེན ཙཏུབྷཱུམཀདྷམྨཱཝ པརིགྒཧིཏཱ ¶ , ན ལཀྑཎཔཉྙཏྟིཡོཏི. ཨིམསྨིཾ པན སུཏྟེ ཨཱཡཏནསབྦཾ ཨདྷིཔྤེཏཾ, ཏཏྠཱཔི ཨིདྷ ཝིཔསྶནུཔགདྷམྨཱཝ གཧེཏབྦཱ.

ཙཀྑཱུཏི (དྷ. ས. ཨཊྛ. ༥༩༦; སཾ. ནི. ཨཊྛ. ༣.༤.༡) དྭེ ཙཀྑཱུནི ཉཱཎཙཀྑུ ཙེཝ མཾསཙཀྑུ ཙ. ཏཏྠ ཉཱཎཙཀྑུ པཉྩཝིདྷཾ བུདྡྷཙཀྑུ དྷམྨཙཀྑུ སམནྟཙཀྑུ དིབྦཙཀྑུ པཉྙཱཙཀྑཱུཏི. ཏེསུ བུདྡྷཙཀྑུ ནཱམ ཨཱསཡཱནུསཡཉཱཎཉྩེཝ ཨིནྡྲིཡཔརོཔརིཡཏྟཉཱཎཉྩ, ཡཾ ‘‘བུདྡྷཙཀྑུནཱ ལོཀཾ ཝོལོཀེནྟོ’’ཏི (དཱི. ནི. ༢.༦༩; མ. ནི. ༡.༢༨༣) ཨཱགཏཾ. དྷམྨཙཀྑུ ནཱམ ཧེཊྛིམཱ ཏཡོ མགྒཱ ཏཱིཎི ཙ ཕལཱནི, ཡཾ ‘‘ཝིརཛཾ ཝཱིཏམལཾ དྷམྨཙཀྑུཾ ཨུདཔཱདཱི’’ཏི (དཱི. ནི. ༡.༣༥༥; སཾ. ནི. ༥.༡༠༨༡) ཨཱགཏཾ. སམནྟཙཀྑུ ནཱམ སབྦཉྙུཏཉྙཱཎཾ, ཡཾ ‘‘པཱསཱདམཱརུཡ྄ཧ སམནྟཙཀྑཱུ’’ཏི (དཱི. ནི. ༢.༧༠; མ. ནི. ༡.༢༨༢) ཨཱགཏཾ. དིབྦཙཀྑུ ནཱམ ཨཱལོཀཝཌྜྷནེན ཨུཔྤནྣཉཱཎཾ, ཡཾ ‘‘དིབྦེན ཙཀྑུནཱ ཝིསུདྡྷེནཱ’’ཏི (མ. ནི. ༡.༡༤༨, ༢༨༤) ཨཱགཏཾ. པཉྙཱཙཀྑུ ནཱམ ཙཏུསཙྩཔརིཙྪེདཀཉཱཎཾ, ཡཾ ‘‘ཙཀྑུཾ ཨུདཔཱདཱི’’ཏི (སཾ. ནི. ༥.༡༠༨༡; མཧཱཝ. ༡༥) ཨཱགཏཾ. མཾསཙཀྑུཔི དུཝིདྷཾ སསམྦྷཱརཙཀྑུ པསཱདཙཀྑཱུཏི. ཏེསུ ཡྭཱཡཾ ཨཀྑིཀཱུཔཀེ ཨཀྑིཔཊལེཧི པརིཝཱརིཏོ མཾསཔིཎྜོ, ཡཏྠ ཙཏསྶོ དྷཱཏུཡོ ཝཎྞགནྡྷརསོཛཱ སམྦྷཝོ ཛཱིཝིཏཾ ¶ བྷཱཝོ ཙཀྑུཔྤསཱདོ ཀཱཡཔྤསཱདོཏི སངྑེཔཏོ ཏེརས སམྦྷཱརཱ ཧོནྟི, ཝིཏྠཱརཏོ པན ཙཏསྶོ དྷཱཏུཡོ ཝཎྞགནྡྷརསོཛཱ སམྦྷཝོཏི ཨིམེ ནཝ ཙཏུསམུཊྛཱནཝསེན ཚཏྟིཾས, ཛཱིཝིཏཾ བྷཱཝོ ཙཀྑུཔྤསཱདོ ཀཱཡཔྤསཱདོཏི ཨིམེ ཀམྨསམུཊྛཱནཱ ཏཱཝ ཙཏྟཱརོཏི ཙཏྟཱལཱིས སམྦྷཱརཱ ཧོནྟི, ཨིདཾ སསམྦྷཱརཙཀྑུ ནཱམ. ཡཾ པནེཏྠ སེཏམཎྜལཔརིཙྪིནྣེན ཀཎྷམཎྜལེན པརིཝཱརིཏེ དིཊྛིམཎྜལེ སནྣིཝིཊྛཾ རཱུཔདསྶནསམཏྠཾ པསཱདམཏྟཾ, ཨིདཾ པསཱདཙཀྑུ ནཱམ. ཏསྶ ཏཏོ པརེསཉྩ སོཏཱདཱིནཾ ཝིཏྠཱརཀཐཱ ཝིསུདྡྷིམགྒེ (ཝིསུདྡྷི. ༢.༤༣༦) ཝུཏྟཱཝ.

ཏཏྠ ཡདིདཾ པསཱདཙཀྑུ, ཏཉྩ གཧེཏྭཱ བྷགཝཱ ‘‘ཙཀྑུ ཨཱདིཏྟ’’ནྟིཨཱདིམཱཧ. ཏཏྠ ཨཱདིཏྟནྟི པདིཏྟཾ, སམྤཛྫལིཏཾ ཨེཀཱདསཧི ཨགྒཱིཧི ཨེཀཛཱལཱིབྷཱུཏནྟི ཨཏྠོ. ཙཀྑུསནྣིསྶིཏཾ ཝིཉྙཱཎཾ ཙཀྑུཝིཉྙཱཎཾ, ཙཀྑུསྶ ཝཱ ཀཱརཎབྷཱུཏསྶ ཝིཉྙཱཎཾ ཙཀྑུཝིཉྙཱཎཾ. ཀཱམཾ རཱུཔཱལོཀམནསིཀཱརཱདཡོཔི ཏསྶ ཝིཉྙཱཎསྶ ཀཱརཎཾ, ཏེ པན སཱདྷཱརཎཀཱརཎཾ, ཙཀྑུ ཨསཱདྷཱརཎནྟི ཨསཱདྷཱརཎཀཱརཎེནཱཡཾ ནིདྡེསོ ཡཐཱ ‘‘ཡཝངྐུརོ’’ཏི. སོཏཝིཉྙཱཎཱདཱིསུཔི ཨེསེཝ ནཡོ. ཙཀྑུསནྣིསྶིཏོ ཕསྶོ ཙཀྑུསམྥསྶོ, ཙཀྑུཝིཉྙཱཎསམྤཡུཏྟཕསྶསྶེཏཾ ཨདྷིཝཙནཾ. སོཏསམྥསྶཱདཱིསུཔི ཨེསེཝ ནཡོ. ཙཀྑུསམྥསྶཔཙྩཡཱ ཨུཔྤཛྫཏི ¶ ཝེདཡིཏནྟི ཙཀྑུསམྥསྶཾ མཱུལཔཙྩཡཾ ཀཏྭཱ ཨུཔྤནྣཱ སམྤཊིཙྪནསནྟཱིརཎཝོཊྛབྦནཛཝནཝེདནཱ. ཙཀྑུཝིཉྙཱཎསམྤཡུཏྟཱཡ པན ཝེདནཱཡ ཙཀྑུསམྥསྶསྶ པཙྩཡབྷཱཝེ ཝཏྟབྦམེཝ ནཏྠི. ཙཀྑུསམྥསྶོ ཧི སཧཛཱཏཱཡ ཝེདནཱཡ སཧཛཱཏཱདིཝསེན, ཨསཧཛཱཏཱཡ ཨུཔནིསྶཡཱདིཝསེན པཙྩཡོ ཧོཏི. ཏེནེཝ ‘‘ཙཀྑུསམྥསྶཔཙྩཡཱ ཨུཔྤཛྫཏི ཝེདཡིཏཾ སུཁཾ ཝཱ དུཀྑཾ ཝཱ ཨདུཀྑམསུཁཾ ཝཱ’’ཏི ཝུཏྟཾ. སོཏདྭཱརཝེདནཱདཱིསུཔི ཨེསེཝ ནཡོ. ཨེཏྠ པན མནོཏི བྷཝངྒཙིཏྟཾ མནོདྭཱརསྶ ཨདྷིཔྤེཏཏྟཱ. དྷམྨཱཏི དྷམྨཱརམྨཎཾ. མནོཝིཉྙཱཎནྟི སཧཱཝཛྫནཀཾ ཛཝནཾ. མནོསམྥསྶོཏི བྷཝངྒསཧཛཱཏོ ཕསྶོ. ཝེདཡིཏནྟི ཨཱཝཛྫནཝེདནཱཡ སདྡྷིཾ ཛཝནཝེདནཱ. བྷཝངྒསམྤཡུཏྟཱཡ པན ཝེདནཱཡ གཧཎེ ཝཏྟབྦམེཝ ནཏྠི. ཨཱཝཛྫནཾ ཝཱ བྷཝངྒཏོ ཨམོཙེཏྭཱ མནོཏི སཱཝཛྫནཾ བྷཝངྒཾ དཊྛབྦཾ. དྷམྨཱཏི དྷམྨཱརམྨཎམེཝ. མནོཝིཉྙཱཎནྟི ཛཝནཝིཉྙཱཎཾ. མནོསམྥསྶོཏི ¶ བྷཝངྒཱཝཛྫནསཧཛཱཏོ ཕསྶོ. ཝེདཡིཏནྟི ཛཝནསཧཛཱཏཱ ཝེདནཱ, བྷཝངྒཱཝཛྫནསཧཛཱཏཱཔི ཝཊྚཏིཡེཝ.

རཱགགྒིནཱཏིཨཱདཱིསུ རཱགོཝ ཨནུདཧནཊྛེན ཨགྒཱིཏི རཱགགྒི. རཱགོ ཧི ཏིཁིཎཾ ཧུཏྭཱ ཨུཔྤཛྫམཱནོ སཏྟེ ཨནུདཧཏི ཛྷཱཔེཏི, ཏསྨཱ ‘‘ཨགྒཱི’’ཏི ཝུཙྩཏི. ཨིཏརེསུཔི དྭཱིསུ ཨེསེཝ ནཡོ. ཏཏྲིམཱནི ཝཏྠཱུནི (དཱི. ནི. ཨཊྛ. ༣.༣༠༥; ཝིབྷ. ཨཊྛ. ༩༢༤) – ཨེཀཱ དཧརབྷིཀྑུནཱི ཙིཏྟལཔབྦཏཝིཧཱརེ ཨུཔོསཐཱགཱརཾ གནྟྭཱ དྭཱརཔཱལརཱུཔཾ ཨོལོཀཡམཱནཱ ཋིཏཱ. ཨཐསྶཱ ཨནྟོ རཱགོ ཏིཁིཎཏརོ ཧུཏྭཱ ཨུཔྤནྣོ, ཏསྨཱ ཏཾསམུཊྛཱནཱ ཏེཛོདྷཱཏུ ཨཏིཝིཡ ཏིཁིཎབྷཱཝེན སདྡྷིཾ ཨཏྟནཱ སཧཛཱཏདྷམྨེཧི ཧདཡཔདེསཾ ཛྷཱཔེསི ཡཐཱ ཏཾ བཱཧིརཱ ཏེཛོདྷཱཏུ སནྣིསྶཡཾ, ཏེན སཱ བྷིཀྑུནཱི ཛྷཱཡིཏྭཱ ཀཱལམཀཱསི. བྷིཀྑུནིཡོ གཙྪམཱནཱ ‘‘ཨཡཾ དཧརཱ ཋིཏཱ, པཀྐོསཐ ན’’ནྟི ཨཱཧཾསུ. ཨེཀཱ གནྟྭཱ ‘‘ཀསྨཱ ཋིཏཱསཱི’’ཏི ཧཏྠེ གཎྷི. གཧིཏམཏྟཱ པརིཝཏྟིཏྭཱ པཔཏཱ. ཨིདཾ ཏཱཝ རཱགསྶ ཨནུདཧནཏཱཡ ཝཏྠུ.

དོསསྶ པན ཨནུདཧནཏཱཡ མནོཔདོསིཀཱ དེཝཱ དཊྛབྦཱ. ཏེསུ (དཱི. ནི. ཨཊྛ. ༡.༤༧-༤༨) ཀིར ཨེཀོ དེཝཔུཏྟོ ‘‘ནཀྑཏྟཾ ཀཱིལི༹སྶཱམཱི’’ཏི སཔརིཝཱརོ རཐེན ཝཱིཐིཾ པཊིཔཛྫཏི. ཨཐཉྙོ ནིཀྑམནྟོ ཏཾ པུརཏོ གཙྪནྟཾ དིསྭཱ ‘‘བྷོ ཨཡཾ ཀཔཎོ ཨདིཊྛཔུབྦཾ ཝིཡ ཨེཏཾ དིསྭཱ པཱིཏིཡཱ ཨུདྡྷུམཱཏོ ཝིཡ བྷིཛྫམཱནོ ཝིཡ ཙ གཙྪཏཱི’’ཏི ཀུཛ྄ཛྷཏི. པུརཏོ གཙྪནྟོཔི ནིཝཏྟིཏྭཱ ཏཾ ཀུདྡྷཾ དིསྭཱ ཀུདྡྷཱ ནཱམ སུཝིཛཱནཱ ཧོནྟཱིཏི ཀུདྡྷབྷཱཝམསྶ ཉཏྭཱ ‘‘ཏྭཾ ཀུདྡྷོ མཡ྄ཧཾ ཀིཾ ཀརིསྶསི, ཨཡཾ སམྤཏྟི མཡཱ དཱནསཱིལཱདཱིནཾ ཝསེན ལདྡྷཱ, ན ཏུཡ྄ཧཾ ཝསེནཱ’’ཏི པཊིཀུཛ྄ཛྷཏི. ཨེཀསྨིཉྷི ཀུདྡྷེ ཨིཏརོ ཨཀུདྡྷོ རཀྑཏི. ཀུདྡྷསྶ ཧི སོ ཀོདྷོ ཨིཏརསྨིཾ ཨཀུཛ྄ཛྷནྟེ ཨནུཔཱདཱནོ ཨེཀཝཱརམེཝ ཨུཔྤཏྟིཡཱ ཨནཱསེཝནོ ¶ ཙཱཝེཏུཾ ན སཀྐོཏི, ཨུདཀཾ པཏྭཱ ཨགྒི ཝིཡ ནིབྦཱཡཏི, ཏསྨཱ ཨཀུདྡྷོ ཏཾ ཙཝནཏོ རཀྑཏི. ཨུབྷོསུ པན ཀུདྡྷེསུ ཨེཀསྶ ཀོདྷོ ཨིཏརསྶ པཙྩཡོ ཧོཏི, ཏསྶཔི ཀོདྷོ ཨིཏརསྶ པཙྩཡོ ཧོཏཱིཏི ཨུབྷོ ཀནྡནྟཱནཾཡེཝ ཨོརོདྷཱནཾ ཙཝནྟི. ཨུབྷོསུ ཧི ཀུདྡྷེསུ བྷིཡྻོ བྷིཡྻོ ཨཉྙམཉྙམྷི པརིཝཌྜྷནཝསེན ཏིཁིཎསམུདཱཙཱརོ ནིསྶཡདཧནརསོ ¶ ཀོདྷོ ཨུཔྤཛྫམཱནོ ཧདཡཝཏྠུཾ ནིདྡཧནྟོ ཨཙྩནྟསུཁུམཱལཾ ཀརཛཀཱཡཾ ཝིནཱསེཏི, ཏཏོ སཀལོཔི ཨཏྟབྷཱཝོ ཨནྟརདྷཱཡཏི. ཨིདཾ དོསསྶ ཨནུདཧནཏཱཡ ཝཏྠུ.

མོཧསྶ པན ཨནུདཧནཏཱཡ ཁིཌྜཱཔདོསིཀཱ དེཝཱ དཊྛབྦཱ. མོཧཝསེན ཧི ཏེསཾ སཏིསམྨོསོ ཧོཏི, ཏསྨཱ ཁིཌྜཱཝསེན ཨཱཧཱརཀཱལཾ ཨཏིཝཏྟེཏྭཱ ཀཱལཾ ཀརོནྟི. ཏེ (དཱི. ནི. ཨཊྛ. ༡.༤༥-༤༦) ཀིར པུཉྙཝིསེསཱདྷིགཏེན མཧནྟེན ཨཏྟནོ སིརིཝིབྷཝེན ནཀྑཏྟཾ ཀཱིལ༹ནྟཱ ཏཱཡ སམྤཏྟིམཧནྟཏཱཡ ‘‘ཨཱཧཱརཾ པརིབྷུཉྫིམྷ, ན པརིབྷུཉྫིམྷཱ’’ཏིཔི ན ཛཱནནྟི. ཨཐ ཨེཀཱཧཱརཱཏིཀྐམནཏོ པཊྛཱཡ ནིརནྟརཾ ཁཱདནྟཱཔི པིཝནྟཱཔི ཙཝནྟིཡེཝ ན ཏིཊྛནྟི. ཀསྨཱ? ཀམྨཛཏེཛསྶ བལཝཏཱཡ. མནུསྶཱནཉྷི ཀམྨཛཏེཛོ མནྡོ, ཀརཛཀཱཡོ བལཝཱ. ཏེསཾ ཏེཛསྶ མནྡཏཱཡ ཀརཛཀཱཡསྶ བལཝཏཱཡ སཏྟཱཧམྤི ཨཏིཀྐམིཏྭཱ ཨུཎྷོདཀཨཙྪཡཱགུཨཱདཱིཧི སཀྐཱ ཝཏྠུཾ ཨུཔཏྠམྦྷེཏུཾ. དེཝཱནཾ པན ཏེཛོ བལཝཱ ཧོཏི ཨུལཱ༹རཔུཉྙནིབྦཏྟཏྟཱ ཨུལཱ༹རགརུསིནིདྡྷསུདྷཱཧཱརཛིརཎཏོ ཙ, ཀརཛཾ མནྡཾ མུདུསུཁུམཱལབྷཱཝཏོ. ཏེནེཝ ཧི བྷགཝཱ ཨིནྡསཱལགུཧཱཡཾ པཀཏིཔཐཝིཡཾ པཏིཊྛཱཏུཾ ཨསཀྐོནྟཾ སཀྐཾ དེཝརཱཛཱནཾ ‘‘ཨོལཱ༹རིཀཀཱཡཾ ཨདྷིཊྛཱཧཱི’’ཏི ཨཱཧ, ཏསྨཱ ཏེ ཨེཀཾ ཨཱཧཱརཝེལཾ ཨཏིཀྐམིཏྭཱ སཎྛཱཏུཾ ན སཀྐོནྟི. ཡཐཱ ནཱམ གིམྷཱནཾ མཛ྄ཛྷནྷིཀེ ཏཏྟཔཱསཱཎེ ཋཔིཏཾ པདུམཾ ཝཱ ཨུཔྤལཾ ཝཱ སཱཡནྷསམཡེ གྷཊསཏེནཔི སིཉྩིཡམཱནཾ པཱཀཏིཀཾ ན ཧོཏི ཝིནསྶཏིཡེཝ, ཨེཝམེཝ པཙྪཱ ནིརནྟརཾ ཁཱདནྟཱཔི པིཝནྟཱཔི ཙཝནྟིཡེཝ ན ཏིཊྛནྟི.

ཀོ པན ཏེསཾ ཨཱཧཱརོ, ཀཱ ཨཱཧཱརཝེལཱཏི? སབྦེསམྤི ཀཱམཱཝཙརདེཝཱནཾ སུདྷཱ ཨཱཧཱརོ, སོ ཧེཊྛིམེཧི ཧེཊྛིམེཧི ཨུཔརིམཱནཾ ཨུཔརིམཱནཾ པཎཱིཏཏམོ ཧོཏི. ཏཾ ཡཐཱསཀཾ དིཝསཝསེན དིཝསེ དིཝསེ བྷུཉྫནྟི. ཀེཙི པན ‘‘བིལཱ༹རཔདཔྤམཱཎཾ སུདྷཱཧཱརཾ བྷུཉྫནྟི. སོ ཛིཝ྄ཧཱཡ ཋཔིཏམཏྟོ ཡཱཝ ཀེསགྒནཁགྒཱ ཀཱཡཾ ཕརཏི, ཏེསཾཡེཝ དིཝསཝསེན སཏྟདིཝསཾ ཡཱཔནསམཏྠོཝ ཧོཏཱི’’ཏི ཝདནྟི.

ཀེ པན ཏེ ཁིཌྜཱཔདོསིཀཱ ནཱམ དེཝཱཏི? ཨིམེ ནཱམཱཏི ཨཊྛཀཐཱཡཾ ཝིཙཱརཎཱ ནཏྠི, ‘‘ཀམྨཛཏེཛོ བལཝཱ ཧོཏི, ཀརཛཾ མནྡ’’ནྟི ཨཝིསེསེན ¶ ཝུཏྟཏྟཱ པན ཡེ ཀེཙི ཀབལཱི༹ཀཱརཱཧཱརཱུཔཛཱིཝིནོ ¶ ཨེཝཾ ཀརོནྟི, ཏེ ཨེཝཾ ཙཝནྟཱིཏི ཝེདིཏབྦཱ. ཀེཙི པནཱཧུ ‘‘ནིམྨཱནརཏིཔརནིམྨིཏཝསཝཏྟིནོ ཏེ དེཝཱ. ཁིཌྜཱཡ པདུསྶནམཏྟེནེཝ ཧེཏེ ཁིཌྜཱཔདོསིཀཱཏི ཝུཏྟཱ’’ཏི. མནོཔདོསིཀཱ པན ཙཱཏུམཧཱརཱཛིཀཱཏི ཨཊྛཀཐཱཡམེཝ ཝུཏྟཾ. ཀེཙི པན ‘‘ཁིཌྜཱཔདོསིཀཱཔི ཙཱཏུམཧཱརཱཛིཀཱཡེཝཱ’’ཏི ཝདནྟི. ཨེཝཾ ཏཱཝ རཱགཱདཡོ ཏཡོ ཨནུདཧནཊྛེན ‘‘ཨགྒཱི’’ཏི ཝེདིཏབྦཱ. ཛཱཏིཨཱདིཏྟཡཾ པན ནཱནཔྤཀཱརདུཀྑཝཏྠུབྷཱཝེན ཨནུདཧནཏོ ཨགྒི. སོཀཱདཱིནཾ ཨནུདཧནཏཱ པཱཀཊཱཡེཝ. སེསམེཏྠ ཝུཏྟནཡམེཝ. ཨིཏི ཨིམསྨིཾ སུཏྟེ དུཀྑལཀྑཎཾ ཀཐིཏཾ ཙཀྑཱདཱིནཾ ཨེཀཱདསཧི ཨགྒཱིཧི ཨཱདིཏྟབྷཱཝེན དུཀྑམཏཱཡ དུཀྑབྷཱཝསྶ ཀཐིཏཏྟཱ.

ཨཱདིཏྟཔརིཡཱཡསུཏྟཝཎྞནཱ ནིཊྛིཏཱ.

ཨུརུཝེལཔཱཊིཧཱརིཡཀཐཱཝཎྞནཱ ནིཊྛིཏཱ.

བིམྦིསཱརསམཱགམཀཐཱཝཎྞནཱ

༥༥. ཨིདཱནི ‘‘ཨཐ ཁོ བྷགཝཱ གཡཱསཱིསེ ཡཐཱབྷིརནྟཾ ཝིཧརིཏྭཱ’’ཏིཨཱདཱིསུ ཡཱ སཱ ཨནུཏྟཱནཔདཝཎྞནཱ, ཏཾ དསྶེཏུཾ ‘‘ལཊྛིཝནེཏི ཏཱལུཡྻཱནེ’’ཏིཨཱདི ཨཱརདྡྷཾ. ཏཏྠ ཏཱལུཡྻཱནེཏི ཏཱལརུཀྑཱནཾ བཧུབྷཱཝཏོ ཨེཝཾལདྡྷནཱམེ ཨུཡྻཱནེ. ཨཔྤེཀཙྩེ ཡེན བྷགཝཱ ཏེནཉྫལིཾ པཎཱམེཏྭཱཏིཨཱདཱིསུ ཨཉྫལིཾ པཎཱམེཏྭཱཏི ཡེ ཨུབྷཏོཔཀྑིཀཱ, ཏེ སནྡྷཱཡེཏཾ ཝུཏྟཾ. ཏེ ཀིར ཨེཝཾ ཙིནྟཡིཾསུ ‘‘སཙེ ནོ མིཙྪཱདིཊྛིཀཱ ཙོདེསྶནྟི ‘ཀསྨཱ ཏུམྷེ སམཎཾ གོཏམཾ ཝནྡིཏྠཱ’ཏི, ཏེསཾ ‘ཀིཾ ཨཉྫལིམཏྟཀརཎེནཔི ཝནྡིཏཾ ཧོཏཱི’ཏི ཝཀྑཱམ. སཙེ ནོ སམྨཱདིཊྛིཀཱ ཙོདེསྶནྟི ‘ཀསྨཱ བྷགཝནྟཾ ན ཝནྡིཏྠཱ’ཏི, ‘ཀིཾ སཱིསེན བྷཱུམིཾ པཧརནྟེནེཝ ཝནྡིཏཾ ཧོཏི, ནནུ ཨཉྫལིཀམྨམྤི ཝནྡནཱ ཨེཝཱ’ཏི ཝཀྑཱམཱ’’ཏི. ནཱམགོཏྟཾ སཱཝེཏྭཱཏི ‘‘བྷོ གོཏམ, ཨཧཾ ཨསུཀསྶ པུཏྟོ དཏྟོ ནཱམ མིཏྟོ ནཱམ ཨིདྷ ཨཱགཏོ’’ཏི ཝདནྟཱ ནཱམཾ སཱཝེནྟི ནཱམ, ‘‘བྷོ གོཏམ, ཨཧཾ ཝཱསེཊྛོ ནཱམ ཀཙྩཱནོ ནཱམ ཨིདྷཱགཏོ’’ཏི ཝདནྟཱ གོཏྟཾ སཱཝེནྟི ནཱམ. ཨེཏེ ཀིར དལིདྡཱ ཛིཎྞཀུལཔུཏྟཱ པརིསམཛ྄ཛྷེ ནཱམགོཏྟཝསེན པཱཀཊཱ བྷཝིསྶཱམཱཏི ཨེཝཾ ¶ ཨཀཾསུ. ཡེ པན ཏུཎྷཱིབྷཱུཏཱ ནིསཱིདིཾསུ, ཏེ ཀེརཱཊིཀཱ ཙེཝ ཨནྡྷབཱལཱ ཙ. ཏཏྠ ཀེརཱཊིཀཱ ‘‘ཨེཀཾ དྭེ ཀཐཱསལླཱཔེ ཀརོནྟེ ཝིསྶཱསིཀོ ཧོཏི, ཨཐ ཝིསྶཱསེ སཏི ཨེཀཾ དྭེ བྷིཀྑཱ ཨདཱཏུཾ ན ཡུཏྟ’’ནྟི ཏཏོ ཨཏྟཱནཾ མོཙེནྟཱ ཏུཎྷཱི ནིསཱིདནྟི. ཨནྡྷབཱལཱ ཨཉྙཱཎཏཱཡེཝ ཨཝཀྑིཏྟཱ མཏྟིཀཱཔིཎྜོ ཝིཡ ཡཏྠ ཀཏྠཙི ཏུཎྷཱིབྷཱུཏཱ ནིསཱིདནྟི.

ཀིསཀོཝདཱནོཏི ¶ ཨེཏྠ ཀིསཀཱནཾ ཨོཝདཱནོ ཀིསཀོཝདཱནོཏི ཨིམཾ ཏཱཝ ཨཏྠཝིཀཔྤཾ དསྶེཏུཾ ‘‘ཏཱཔསཙརིཡཱཡ ཀིསསརཱིརཏྟཱ’’ཏིཨཱདི ཝུཏྟཾ. ཨགྒིཧུཏྟནྟི ཨགྒིཔརིཙརཎཾ. རཱུཔཱདཡོཝ ཨིདྷ ཀཱམནཱིཡཊྛེན ‘‘ཀཱམཱ’’ཏི ཝུཏྟཱཏི ཨཱཧ ‘‘ཨེཏེ རཱུཔཱདཡོ ཀཱམེ’’ཏི. ཡཉྙཱ ཨབྷིཝདནྟཱིཏི ཡཱགཧེཏུ ཨིཛ྄ཛྷནྟཱིཏི ཝདནྟི. ཨུཔདྷཱིསཱུཏི ཨེཏྠ ཙཏྟཱརོ ཨུཔདྷཱི ཀཱམུཔདྷི ཁནྡྷུཔདྷི ཀིལེསུཔདྷི ཨབྷིསངྑཱརུཔདྷཱིཏི. ཀཱམཱཔི ཧི ‘‘ཡཾ པཉྩ ཀཱམགུཎེ པཊིཙྩ ཨུཔྤཛྫཏི སུཁཾ སོམནསྶཾ, ཨཡཾ ཀཱམཱནཾ ཨསྶཱདོ’’ཏི (མ. ནི. ༡.༡༦༧) ཨེཝཾ ཝུཏྟསྶ སུཁསྶ ཨདྷིཊྛཱནབྷཱཝཏོ ཨུཔདྷཱིཡཏི ཨེཏྠ སུཁནྟི ཨིམིནཱ ཝཙནཏྠེན ‘‘ཨུཔདྷཱི’’ཏི ཝུཙྩནྟི. ཁནྡྷཱཔི ཁནྡྷམཱུལཀསྶ དུཀྑསྶ ཨདྷིཊྛཱནབྷཱཝཏོ, ཀིལེསཱཔི ཨཔཱཡདུཀྑསྶ ཨདྷིཊྛཱནབྷཱཝཏོ, ཨབྷིསངྑཱརཱཔི བྷཝདུཀྑསྶ ཨདྷིཊྛཱནབྷཱཝཏོ ‘‘ཨུཔདྷཱི’’ཏི ཝུཙྩནྟི, ཏེསུ ཁནྡྷུཔདྷི ཨིདྷཱདྷིཔྤེཏོཏི ཨཱཧ ‘‘ཁནྡྷུཔདྷཱིསུ མལནྟི ཉཏྭཱ’’ཏི. ཡཉྙཱ མལམེཝ ཝདནྟཱིཏི ཡཱགཧེཏུ མལམེཝ ཨིཛ྄ཛྷཏཱིཏི ཝདནྟི. ཡིཊྛེཏི མཧཱཡཱགེ. ཧུཏེཏི དིཝསེ དིཝསེ ཀཏྟབྦཨགྒིཔརིཙརཎེ. ཀཱམབྷཝེ ཨསཏྟནྟི ཀཱམབྷཝེ ཨལགྒཾ, ཏབྦིནིམུཏྟནྟི ཝུཏྟཾ ཧོཏི.

༥༧-༥༨. ཨཱསཱིསནཱཏི པཏྠནཱ. དིབྦསུཝཎྞེསུཔི སིངྒཱིསུཝཎྞསྶ སབྦསེཊྛཏྟཱ ‘‘སིངྒཱིནིཀྑསཝཎྞོ’’ཏི ཝུཏྟཾ. ཡཐེཝ ཧི མནུསྶཔརིབྷོགེ སུཝཎྞེ ཡུཏྟིཀཏཾ ཧཱིནཾ, ཏཏོ རསཝིདྡྷཾ སེཊྛཾ, རསཝིདྡྷཏོ ཨཱཀརུཔྤནྣཾ, ཏཏོ ཡཾ ཀིཉྩི དིབྦཾ སེཊྛཾ, ཨེཝཾ དིབྦསུཝཎྞེསུཔི ཙཱམཱིཀརཏོ སཱཏཀུམྦྷཾ, སཱཏཀུམྦྷཏོ ཛམྦུནདཾ, ཛམྦུནདཏོ སིངྒཱིསུཝཎྞཾ, ཏསྨཱ ཏཾ སབྦསེཊྛཾ. སིངྒཱིནིཀྑནྟི ཙ ནིཀྑཔརིམཱཎེན སིངྒཱིསུཝཎྞེན ཀཏཾ སུཝཎྞཔཊྚཾ. ཨཱུནཀནིཀྑེན ཀཏཉྷི གྷཊྚནམཛྫནཀྑམཾ ན ཧོཏི, ཨཏིརེཀེན ཀཏཾ གྷཊྚནམཛྫནཾ ཁམཏི, ཝཎྞཝནྟཾ པན ན ཧོཏི, ཕརུསདྷཱཏུཀཾ ཁཱཡཏི, ནིཀྑེན ཀཏཾ གྷཊྚནམཛྫནཉྩེཝ ཁམཏི ཝཎྞཝནྟཉྩ ཧོཏི. ནིཀྑཾ པན ཝཱིསཏིསུཝཎྞནྟི ཀེཙི ¶ . པཉྩཝཱིསཏིསུཝཎྞནྟི ཨཔརེ. མཛ྄ཛྷིམནིཀཱཡཊྛཀཐཱཡཾ པན ‘‘ནིཀྑཾ ནཱམ པཉྩསུཝཎྞཱ’’ཏི ཝུཏྟཾ. སུཝཎྞོ ནཱམ ཙཏུདྷརཎནྟི ཝདནྟི.

དསསུ ཨརིཡཝཱསེསུ ཝུཏྠཝཱསོཏི –

‘‘ཨིདྷ, (དཱི. ནི. ༣.༣༤༨; ཨ. ནི. ༡༠.༢༠) བྷིཀྑཝེ, བྷིཀྑུ པཉྩངྒཝིཔྤཧཱིནོ ཧོཏི ཚལ༹ངྒསམནྣཱགཏོ ཨེཀཱརཀྑོ ཙཏུརཱཔསྶེནོ པནུཎྞཔཙྩེཀསཙྩོ སམཝཡསཊྛེསནོ ཨནཱཝིལསངྐཔྤོ པསྶདྡྷཀཱཡསངྑཱརོ སུཝིམུཏྟཙིཏྟོ སུཝིམུཏྟཔཉྙོ.

‘‘ཀཐཉྩ ¶ , བྷིཀྑཝེ, བྷིཀྑུ པཉྩངྒཝིཔྤཧཱིནོ ཧོཏི? ཨིདྷ, བྷིཀྑཝེ, བྷིཀྑུནོ ཀཱམཙྪནྡོ པཧཱིནོ ཧོཏི, བྱཱཔཱདོ པཧཱིནོ ཧོཏི, ཐིནམིདྡྷཾ པཧཱིནཾ ཧོཏི, ཨུདྡྷཙྩཀུཀྐུཙྩཾ པཧཱིནཾ ཧོཏི, ཝིཙིཀིཙྪཱ པཧཱིནཱ ཧོཏི. ཨེཝཾ ཁོ, བྷིཀྑཝེ, བྷིཀྑུ པཉྩངྒཝིཔྤཧཱིནོ ཧོཏི.

‘‘ཀཐཉྩ, བྷིཀྑཝེ, བྷིཀྑུ ཚལ༹ངྒསམནྣཱགཏོ ཧོཏི? ཨིདྷ, བྷིཀྑཝེ, བྷིཀྑུ ཙཀྑུནཱ རཱུཔཾ དིསྭཱ ནེཝ སུམནོ ཧོཏི ན དུམྨནོ, ཨུཔེཀྑཀོ ཝིཧརཏི སཏོ སམྤཛཱནོ. སོཏེན སདྡཾ སུཏྭཱ…པེ… གྷཱནེན གནྡྷཾ གྷཱཡིཏྭཱ… ཛིཝ྄ཧཱཡ རསཾ སཱཡིཏྭཱ… ཀཱཡེན ཕོཊྛབྦཾ ཕུསིཏྭཱ… མནསཱ དྷམྨཾ ཝིཉྙཱཡ ནེཝ སུམནོ ཧོཏི ན དུམྨནོ, ཨུཔེཀྑཀོ ཝིཧརཏི སཏོ སམྤཛཱནོ. ཨེཝཾ ཁོ, བྷིཀྑཝེ, བྷིཀྑུ ཚལ༹ངྒསམནྣཱགཏོ ཧོཏི.

‘‘ཀཐཉྩ, བྷིཀྑཝེ, བྷིཀྑུ ཨེཀཱརཀྑོ ཧོཏི? ཨིདྷ, བྷིཀྑཝེ, བྷིཀྑུ སཏཱརཀྑེན ཙེཏསཱ སམནྣཱགཏོ ཧོཏི. ཨེཝཾ ཁོ, བྷིཀྑཝེ, བྷིཀྑུ ཨེཀཱརཀྑོ ཧོཏི.

‘‘ཀཐཉྩ, བྷིཀྑཝེ, བྷིཀྑུ ཙཏུརཱཔསྶེནོ ཧོཏི? ཨིདྷ, བྷིཀྑཝེ, བྷིཀྑུ སངྑཱཡེཀཾ པཊིསེཝཏི, སངྑཱཡེཀཾ ཨདྷིཝཱསེཏི, སངྑཱཡེཀཾ པརིཝཛྫེཏི, སངྑཱཡེཀཾ ཝིནོདེཏི. ཨེཝཾ ཁོ, བྷིཀྑཝེ, བྷིཀྑུ ཙཏུརཱཔསྶེནོ ཧོཏི.

‘‘ཀཐཉྩ, བྷིཀྑཝེ, བྷིཀྑུ པནུཎྞཔཙྩེཀསཙྩོ ཧོཏི? ཨིདྷ, བྷིཀྑཝེ, བྷིཀྑུ ཡཱནི ཏཱནི པུཐུསམཎབྲཱཧྨཎཱནཾ པུཐུཔཙྩེཀསཙྩཱནི ¶ , སབྦཱནི ཏཱནི ནུཎྞཱནི ཧོནྟི པནུཎྞཱནི ཙཏྟཱནི ཝནྟཱནི མུཏྟཱནི པཧཱིནཱནི པཊིནིསྶཊྛཱནི. ཨེཝཾ ཁོ, བྷིཀྑཝེ, བྷིཀྑུ པནུཎྞཔཙྩེཀསཙྩོ ཧོཏི.

‘‘ཀཐཉྩ, བྷིཀྑཝེ, བྷིཀྑུ སམཝཡསཊྛེསནོ ཧོཏི? ཨིདྷ, བྷིཀྑཝེ, བྷིཀྑུནོ ཀཱམེསནཱ པཧཱིནཱ ཧོཏི, བྷཝེསནཱ པཧཱིནཱ ཧོཏི, བྲཧྨཙརིཡེསནཱ པཊིཔྤསྶདྡྷཱ. ཨེཝཾ ཁོ, བྷིཀྑཝེ, བྷིཀྑུ སམཝཡསཊྛེསནོ ཧོཏི.

‘‘ཀཐཉྩ, བྷིཀྑཝེ, བྷིཀྑུ ཨནཱཝིལསངྐཔྤོ ཧོཏི? ཨིདྷ, བྷིཀྑཝེ, བྷིཀྑུནོ ¶ ཀཱམསངྐཔྤོ པཧཱིནོ ཧོཏི, བྱཱཔཱདསངྐཔྤོ པཧཱིནོ ཧོཏི, ཝིཧིཾསཱསངྐཔྤོ པཧཱིནོ ཧོཏི. ཨེཝཾ ཁོ, བྷིཀྑཝེ, བྷིཀྑུ ཨནཱཝིལསངྐཔྤོ ཧོཏི.

‘‘ཀཐཉྩ, བྷིཀྑཝེ, བྷིཀྑུ པསྶདྡྷཀཱཡསངྑཱརོ ཧོཏི? ཨིདྷ, བྷིཀྑཝེ, བྷིཀྑུ སུཁསྶ ཙ པཧཱནཱ དུཀྑསྶ ཙ པཧཱནཱ པུབྦེཝ སོམནསྶདོམནསྶཱནཾ ཨཏྠངྒམཱ ཨདུཀྑམསུཁཾ ཨུཔེཀྑཱསཏིཔཱརིསུདྡྷིཾ ཙཏུཏྠཾ ཛྷཱནཾ ཨུཔསམྤཛྫ ཝིཧརཏི. ཨེཝཾ ཁོ, བྷིཀྑཝེ, བྷིཀྑུ པསྶདྡྷཀཱཡསངྑཱརོ ཧོཏི.

‘‘ཀཐཉྩ, བྷིཀྑཝེ, བྷིཀྑུ སུཝིམུཏྟཙིཏྟོ ཧོཏི? ཨིདྷ, བྷིཀྑཝེ, བྷིཀྑུནོ རཱགཱཙིཏྟཾ ཝིམུཏྟཾ ཧོཏི, དོསཱ ཙིཏྟཾ ཝིམུཏྟཾ ཧོཏི, མོཧཱ ཙིཏྟཾ ཝིམུཏྟཾ ཧོཏི. ཨེཝཾ ཁོ, བྷིཀྑཝེ, བྷིཀྑུ སུཝིམུཏྟཙིཏྟོ ཧོཏི.

‘‘ཀཐཉྩ, བྷིཀྑཝེ, བྷིཀྑུ སུཝིམུཏྟཔཉྙོ ཧོཏི? ཨིདྷ, བྷིཀྑཝེ, བྷིཀྑུ ‘རཱགོ མེ པཧཱིནོ ཨུཙྪིནྣམཱུལོ ཏཱལཱཝཏྠུཀཏོ ཨནབྷཱཝཾཀཏོ ཨཱཡཏིཾ ཨནུཔྤཱདདྷམྨོ’ཏི པཛཱནཱཏི, ‘དོསོ མེ པཧཱིནོ…པེ… མོཧོ མེ པཧཱིནོ ཨུཙྪིནྣམཱུལོ ཏཱལཱཝཏྠུཀཏོ ཨནབྷཱཝཾཀཏོ ཨཱཡཏིཾ ཨནུཔྤཱདདྷམྨོ’ཏི པཛཱནཱཏི. ཨེཝཾ ཁོ, བྷིཀྑཝེ, བྷིཀྑུ སུཝིམུཏྟཔཉྙོ ཧོཏཱི’’ཏི (དཱི. ནི. ༣.༣༤༨; ཨ. ནི. ༡༠.༢༠) –

ཨེཝམཱགཏེསུ དསསུ ཨརིཡཝཱསེསུ ཝུཏྠཝཱསོ.

ཏཏྠ ཝསནྟི ཨེཏྠཱཏི ཝཱསཱ, ཨརིཡཱནཾ ཨེཝ ཝཱསཱཏི ཨརིཡཝཱསཱ ཨནརིཡཱནཾ ཏཱདིསཱནཾ ཝཱསཱནཾ ཨསམྦྷཝཏོ. ཨརིཡཱཏི ཙེཏྠ ཨུཀྐཊྛནིདྡེསེན ¶ ཁཱིཎཱསཝཱ གཧིཏཱ. ཨེཀཱརཀྑོཏི ཨེཀཱ སཏིསངྑཱཏཱ ཨཱརཀྑཱ ཨེཏསྶཱཏི ཨེཀཱརཀྑོ. ཁཱིཎཱསཝསྶ (དཱི. ནི. ཨཊྛ. ༣.༣༤༨; ཨ. ནི. ཨཊྛ. ༣.༡༠.༢༠) ཧི ཏཱིསུ དྭཱརེསུ སབྦཀཱལེ སཏི ཨཱརཀྑཀིཙྩཾ སཱདྷེཏི. ཏེནེཝསྶ ཙརཏོ ཙ ཏིཊྛཏོ ཙ སུཏྟསྶ ཙ ཛཱགརསྶ ཙ སཏཏཾ སམིཏཾ ཉཱཎདསྶནཾ པཙྩུཔཊྛིཏཾ ཧོཏཱིཏི ཝུཙྩཏི.

ཙཏུརཱཔསྶེནོཏི ཙཏྟཱརི ཨཔསྶེནཱནི ཨཔསྶཡཱ ཨེཏསྶཱཏི ཙཏུརཱཔསྶེནོ. སངྑཱཡཱཏི ཉཱཎེན (དཱི. ནི. ཨཊྛ. ༣.༣༠༨). པཊིསེཝཏཱིཏི ཉཱཎེན ཉཏྭཱ སེཝིཏབྦཡུཏྟཀམེཝ སེཝཏི. ཏསྶ ཝིཏྠཱརོ ‘‘པཊིསངྑཱ ཡོནིསོ ཙཱིཝརཾ པརིབྷུཉྫཏཱི’’ཏིཨཱདིནཱ (མ. ནི. ༡.༢༣; ཨ. ནི. ༦.༥༨) ནཡེན ཝེདིཏབྦོ. སངྑཱཡེཀཾ ཨདྷིཝཱསེཏཱིཏི ཉཱཎེན ཉཏྭཱ ཨདྷིཝཱསེཏབྦཡུཏྟཀམེཝ ཨདྷིཝཱསེཏི. ཝིཏྠཱརོ པནེཏྠ ‘‘པཊིསངྑཱ ཡོནིསོ ཁམོ ཧོཏི སཱིཏསྶཱ’’ཏིཨཱདིནཱ (མ. ནི. ༡.༢༤) ནཡེན ¶ ཝེདིཏབྦོ. པརིཝཛྫེཏཱིཏི ཉཱཎེན ཉཏྭཱ པརིཝཛྫེཏབྦཡུཏྟཀམེཝ པརིཝཛྫེཏི. ཏསྶ ཝིཏྠཱརོ ‘‘པཊིསངྑཱ ཡོནིསོ ཙཎྜཾ ཧཏྠིཾ པརིཝཛྫེཏཱི’’ཏིཨཱདིནཱ ནཡེན ཝེདིཏབྦོ. ཝིནོདེཏཱིཏི ཉཱཎེན ཉཏྭཱ ཝིནོདེཏབྦམེཝ ཝིནོདེཏི ནུདཏི ནཱིཧརཏི ཨནྟོ ཝསིཏུཾ ན དེཏི. ཏསྶ ཝིཏྠཱརོ ‘‘ཨུཔྤནྣཾ ཀཱམཝིཏཀྐཾ ནཱདྷིཝཱསེཏཱི’’ཏིཨཱདིནཱ ནཡེན ཝེདིཏབྦོ.

པནུཎྞཔཙྩེཀསཙྩོཏི (ཨ. ནི. ཨཊྛ. ༢.༤.༣༨; དཱི. ནི. ཨཊྛ. ༣.༣༤༨) ‘‘ཨིདམེཝ དསྶནཾ སཙྩཾ, ཨིདམེཝ སཙྩ’’ནྟི ཨེཝཾ པཱཊིཡེཀྐཾ གཧིཏཏྟཱ པཙྩེཀསངྑཱཏཱནི དིཊྛིསཙྩཱནི པནུཎྞཱནི ནཱིཧཊཱནི པཧཱིནཱནི ཨསྶཱཏི པནུཎྞཔཙྩེཀསཙྩོ. པུཐུསམཎབྲཱཧྨཎཱནནྟི བཧཱུནཾ སམཎབྲཱཧྨཎཱནཾ. ཨེཏྠ ཙ སམཎཱཏི པབྦཛྫུཔགཏཱ. བྲཱཧྨཎཱཏི བྷོཝཱདིནོ. པུཐུཔཙྩེཀསཙྩཱནཱིཏི བཧཱུནི པཱཊེཀྐསཙྩཱནི, ‘‘ཨིདམེཝ དསྶནཾ སཙྩཾ, ཨིདམེཝ སཙྩ’’ནྟི པཱཊིཡེཀྐཾ གཧིཏཱནི བཧཱུནི སཙྩཱནཱིཏི ཨཏྠོ. ནུཎྞཱནཱིཏི ནཱིཧཊཱནི. པནུཎྞཱནཱིཏི སུཊྛུ ནཱིཧཏཱནི. ཙཏྟཱནཱིཏི ཝིསྶཊྛཱནི. ཝནྟཱནཱིཏི ཝམིཏཱནི. མུཏྟཱནཱིཏི ཚིནྣབནྡྷནཱནི ཀཏཱནི. པཧཱིནཱནཱིཏི པཛཧིཏཱནི. པཊིནིསྶཊྛཱནཱིཏི ཡཐཱ ན པུན ཙིཏྟཾ ཨཱརོཧནྟི, ཨེཝཾ པཊིཝིསྶཛྫིཏཱནི. སབྦཱནེཝ ཙེཏཱནི ཨརིཡམགྒཱདྷིགམཏོ པུབྦེ གཧིཏསྶ དིཊྛིགྒཱཧསྶ ཝིསྶཊྛབྷཱཝཝེཝཙནཱནི.

སམཝཡསཊྛེསནོཏི ¶ (དཱི. ནི. ཨཊྛ. ༣.༣༤༨; ཨ. ནི. ཨཊྛ. ༣.༡༠.༢༠) ཨེཏྠ ཨཝཡཱཏི ཨནཱུནཱ. སཊྛཱཏི ནིསྶཊྛཱ. སམྨཱ ཨཝཡཱ སཊྛཱ ཨེསནཱ ཨསྶཱཏི སམཝཡསཊྛེསནོ, སམྨཱ ཝིསྶཊྛསབྦཨེསནོཏི ཨཏྠོ. ‘‘རཱགཱ ཙིཏྟཾ ཝིམུཏྟ’’ནྟིཨཱདཱིཧི མགྒསྶ ཀིཙྩནིཔྥཏྟི ཀཐིཏཱ རཱགཱདཱིནཾ པཧཱིནབྷཱཝདཱིཔནཏོ. ‘‘རཱགོ མེ པཧཱིནོ’’ཏིཨཱདཱིཧི པཙྩཝེཀྑཎཱམུཁེན ཨརིཡཕལཾ ཀཐིཏཾ. ཨདྷིགཏེ ཧི ཨགྒཕལེ སབྦསོ རཱགཱདཱིནཾ ཨནུཔྤཱདདྷམྨཏཾ པཛཱནཱཏི, ཏཉྩ པཛཱནནཾ པཙྩཝེཀྑཎཉཱཎནྟི. ཏཏྠ པཉྩངྒཝིཔྤཧཱནཔཙྩེཀསཙྩཱཔནོདནཨེསནཱསམཝཡསཛྫནཱནི ‘‘སངྑཱཡེཀཾ པཊིསེཝཏི ཨདྷིཝཱསེཏི པརིཝཛྫེཏི ཝིནོདེཏཱི’’ཏི ཝུཏྟེསུ ཨཔསྶེནེསུ ཝིནོདནཱ ཙ མགྒཀིཙྩཱནེཝ, ཨིཏརེ ཙ མགྒེནེཝ སམིཛ྄ཛྷནྟི.

དསབལོཏི ཀཱཡབལསངྑཱཏཱནི ཉཱཎབལསངྑཱཏཱནི ཙ དས བལཱནི ཨེཏསྶཱཏི དསབལོ. དུཝིདྷཉྷི ¶ ཏཐཱགཏསྶ བལཾ ཀཱཡབལཾ ཉཱཎབལཉྩ. ཏེསུ ཀཱཡབལཾ ཧཏྠིཀུལཱནུསཱརེན ཝེདིཏབྦཾ. ཝུཏྟཉྷེཏཾ པོརཱཎེཧི –

‘‘ཀཱལཱ༹ཝཀཉྩ གངྒེཡྻཾ, པཎྜརཾ ཏམྦཔིངྒལཾ;

གནྡྷམངྒལཧེམཉྩ, ཨུཔོསཐཚདྡནྟིམེ དསཱ’’ཏི. (མ. ནི. ཨཊྛ. ༡.༡༤༨; སཾ. ནི. ཨཊྛ. ༢.༢.༢༢; ཨ. ནི. ཨཊྛ. ༣.༡༠.༢༡; ཝིབྷ. ཨཊྛ ༧༦; ཨུདཱ. ཨཊྛ. ༧༥; བུ. ཝཾ. ཨཊྛ. ༡.༣༩; པཊི. མ. ཨཊྛ. ༢.༢.༤༤; ཙཱུལ༹ནི. ཨཊྛ. ༨༡);

ཨིམཱནི ཧི དས ཧཏྠིཀུལཱནི. ཏཏྠ ཀཱལཱ༹ཝཀནྟི པཀཏིཧཏྠིཀུལཾ དཊྛབྦཾ. ཡཾ དསནྣཾ པུརིསཱནཾ ཀཱཡབལཾ, ཏཾ ཨེཀསྶ ཀཱལཱ༹ཝཀསྶ ཧཏྠིནོ. ཡཾ དསནྣཾ ཀཱལཱ༹ཝཀཱནཾ བལཾ, ཏཾ ཨེཀསྶ གངྒེཡྻསྶ. ཡཾ དསནྣཾ གངྒེཡྻཱནཾ, ཏཾ ཨེཀསྶ པཎྜརསྶ. ཡཾ དསནྣཾ པཎྜརཱནཾ, ཏཾ ཨེཀསྶ ཏམྦསྶ. ཡཾ དསནྣཾ ཏམྦཱནཾ, ཏཾ ཨེཀསྶ པིངྒལསྶ. ཡཾ དསནྣཾ པིངྒལཱནཾ, ཏཾ ཨེཀསྶ གནྡྷཧཏྠིནོ. ཡཾ དསནྣཾ གནྡྷཧཏྠཱིནཾ, ཏཾ ཨེཀསྶ མངྒལསྶ. ཡཾ དསནྣཾ མངྒལཱནཾ, ཏཾ ཨེཀསྶ ཧེམཝཏསྶ. ཡཾ དསནྣཾ ཧེམཝཏཱནཾ, ཏཾ ཨེཀསྶ ཨུཔོསཐསྶ. ཡཾ དསནྣཾ ཨུཔོསཐཱནཾ, ཏཾ ཨེཀསྶ ཚདྡནྟསྶ. ཡཾ དསནྣཾ ཚདྡནྟཱནཾ, ཏཾ ཨེཀསྶ ཏཐཱགཏསྶ ཀཱཡབལཾ. ནཱརཱཡནསངྒྷཱཏབལནྟིཔི ཨིདམེཝ ཝུཙྩཏི. ཏཏྠ ནཱརཱ ཝུཙྩནྟི རསྨིཡོ, ཏཱ བཧཱུ ནཱནཱཝིདྷཱ ཏཏོ ཨུཔྤཛྫནྟཱིཏི ནཱརཱཡནཾ, ཝཛིརཾ, ཏསྨཱ ཝཛིརསངྒྷཱཏབལནྟི ཨཏྠོ. ཏདེཏཾ པཀཏིཧཏྠིགཎནཱཡ ཧཏྠཱིནཾ ཀོཊིསཧསྶཱནཾ, པུརིསགཎནཱཡ དསནྣཾ ¶ པུརིསཀོཊིསཧསྶཱནཾ བལཾ ཧོཏི. ཨིདཾ ཏཱཝ ཏཐཱགཏསྶ ཀཱཡབལཾ.

ཉཱཎབལཾ པན པཱལི༹ཡཾ ཨཱགཏམེཝ. ཏཏྲཱཡཾ པཱལི༹ (མ. ནི. ༡.༡༤༨; ཨ. ནི. ༡༠.༢༡) –

‘‘དས ཁོ པནིམཱནི, སཱརིཔུཏྟ, ཏཐཱགཏསྶ ཏཐཱགཏབལཱནི, ཡེཧི བལེཧི སམནྣཱགཏོ ཏཐཱགཏོ ཨཱསབྷཾ ཋཱནཾ པཊིཛཱནཱཏི, པརིསཱསུ སཱིཧནཱདཾ ནདཏི, བྲཧྨཙཀྐཾ པཝཏྟེཏི. ཀཏམཱནི དས? ཨིདྷ, སཱརིཔུཏྟ, ཏཐཱགཏོ ཋཱནཉྩ ཋཱནཏོ ཨཊྛཱནཉྩ ཨཊྛཱནཏོ ཡཐཱབྷཱུཏཾ པཛཱནཱཏི, ཡམྤི, སཱརིཔུཏྟ, ཏཐཱགཏོ ཋཱནཉྩ ཋཱནཏོ ཨཊྛཱནཉྩ ཨཊྛཱནཏོ ཡཐཱབྷཱུཏཾ པཛཱནཱཏི. ཨིདམྤི, སཱརིཔུཏྟ, ཏཐཱགཏསྶ ཏཐཱགཏབལཾ ཧོཏི, ཡཾ བལཾ ཨཱགམྨ ¶ ཏཐཱགཏོ ཨཱསབྷཾ ཋཱནཾ པཊིཛཱནཱཏི, པརིསཱསུ སཱིཧནཱདཾ ནདཏི, བྲཧྨཙཀྐཾ པཝཏྟེཏི. (༡)

‘‘པུན ཙཔརཾ, སཱརིཔུཏྟ, ཏཐཱགཏོ ཨཏཱིཏཱནཱགཏཔཙྩུཔྤནྣཱནཾ ཀམྨསམཱདཱནཱནཾ ཋཱནསོ ཧེཏུསོ ཝིཔཱཀཾ ཡཐཱབྷཱུཏཾ པཛཱནཱཏི…པེ…. (༢)

‘‘པུན ཙཔརཾ, སཱརིཔུཏྟ, ཏཐཱགཏོ སབྦཏྠགཱམིནིཾ པཊིཔདཾ ཡཐཱབྷཱུཏཾ པཛཱནཱཏི…པེ…. (༣)

‘‘པུན ཙཔརཾ, སཱརིཔུཏྟ, ཏཐཱགཏོ ཨནེཀདྷཱཏུཾ ནཱནཱདྷཱཏུཾ ལོཀཾ ཡཐཱབྷཱུཏཾ པཛཱནཱཏི…པེ…. (༤)

‘‘པུན ཙཔརཾ, སཱརིཔུཏྟ, ཏཐཱགཏོ སཏྟཱནཾ ནཱནཱདྷིམུཏྟིཀཏཾ ཡཐཱབྷཱུཏཾ པཛཱནཱཏི…པེ…. (༥)

‘‘པུན ཙཔརཾ, སཱརིཔུཏྟ, ཏཐཱགཏོ པརསཏྟཱནཾ པརཔུགྒལཱནཾ ཨིནྡྲིཡཔརོཔརིཡཏྟཾ ཡཐཱབྷཱུཏཾ པཛཱནཱཏི…པེ…. (༦)

‘‘པུན ཙཔརཾ, སཱརིཔུཏྟ, ཏཐཱགཏོ ཛྷཱནཝིམོཀྑསམཱདྷིསམཱཔཏྟཱིནཾ སཾཀིལེསཾ ཝོདཱནཾ ཝུཊྛཱནཾ ཡཐཱབྷཱུཏཾ པཛཱནཱཏི…པེ…. (༧)

‘‘པུན ¶ ཙཔརཾ, སཱརིཔུཏྟ, ཏཐཱགཏོ ཨནེཀཝིཧིཏཾ པུབྦེནིཝཱསཾ ཨནུསྶརཏི. སེཡྻཐིདཾ? ཨེཀམྤི ཛཱཏིཾ དྭེཔི ཛཱཏིཡོ…པེ… ཨིཏི སཱཀཱརཾ སཨུདྡེསཾ ཨནེཀཝིཧིཏཾ པུབྦེནིཝཱསཾ ཨནུསྶརཏི…པེ…. (༨)

‘‘པུན ཙཔརཾ, སཱརིཔུཏྟ, ཏཐཱགཏོ དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན སཏྟེ པསྶཏི ཙཝམཱནེ ཨུཔཔཛྫམཱནེ ཧཱིནེ པཎཱིཏེ སུཝཎྞེ དུབྦཎྞེ སུགཏེ དུགྒཏེ, ཡཐཱཀམྨཱུཔགེ སཏྟེ པཛཱནཱཏི…པེ…. (༩)

‘‘པུན ཙཔརཾ, སཱརིཔུཏྟ, ཏཐཱགཏོ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ ¶ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏི…པེ… ཨིདམྤི, སཱརིཔུཏྟ, ཏཐཱགཏསྶ ཏཐཱགཏབལཾ ཧོཏི, ཡཾ བལཾ ཨཱགམྨ ཏཐཱགཏོ ཨཱསབྷཾ ཋཱནཾ པཊིཛཱནཱཏི, པརིསཱསུ སཱིཧནཱདཾ ནདཏི, བྲཧྨཙཀྐཾ པཝཏྟེཏི. ཨིམཱནི ཁོ, སཱརིཔུཏྟ, དས ཏཐཱགཏསྶ ཏཐཱགཏབལཱནཱི’’ཏི. (༡༠)

ཏཏྠ (མ. ནི. ཨཊྛ. ༡.༡༤༨; ཨ. ནི. ཨཊྛ. ༣.༡༠.༢༡; ཝིབྷ. ཨཊྛ. ༧༦༠) ཋཱནཉྩ ཋཱནཏོཏི ཀཱརཎཉྩ ཀཱརཎཏོ. ‘‘ཡེ ཡེ དྷམྨཱ ཡེསཾ ཡེསཾ དྷམྨཱནཾ ཧེཏཱུ པཙྩཡཱ ཨུཔྤཱདཱཡ, ཏཾ ཏཾ ཋཱནཾ. ཡེ ཡེ དྷམྨཱ ཡེསཾ ཡེསཾ དྷམྨཱནཾ ན ཧེཏཱུ ན པཙྩཡཱ ཨུཔྤཱདཱཡ, ཏཾ ཏཾ ཨཊྛཱན’’ནྟི པཛཱནནྟོ ཋཱནཉྩ ཋཱནཏོ ཨཊྛཱནཉྩ ཨཊྛཱནཏོ ཡཐཱབྷཱུཏཾ པཛཱནཱཏི. ཡམྤཱིཏི ཡེན ཉཱཎེན.

ཀམྨསམཱདཱནཱནནྟི སམཱདིཡིཏྭཱ ཀཏཱནཾ ཀུསལཱཀུསལཀམྨཱནཾ, ཀམྨམེཝ ཝཱ ཀམྨསམཱདཱནཾ. ཋཱནསོ ཧེཏུསོཏི པཙྩཡཏོ ཙེཝ ཧེཏུཏོ ཙ. ཏཏྠ གཏིཨུཔདྷིཀཱལཔཡོགཱ ཝིཔཱཀསྶ ཋཱནཾ, ཀམྨཾ ཧེཏུ.

སབྦཏྠགཱམིནིནྟི སབྦགཏིགཱམིནིཉྩ ཨགཏིགཱམིནིཉྩ. པཊིཔདནྟི མགྒཾ. ཡཐཱབྷཱུཏཾ པཛཱནཱཏཱིཏི བཧཱུསུཔི མནུསྶེསུ ཨེཀམེཝ པཱཎཾ གྷཱཏེནྟེསུ ཀཱམཾ སབྦེསམྤི ཙེཏནཱ ཏསྶེཝེཀསྶ ཛཱིཝིཏིནྡྲིཡཱརམྨཎཱ, ཏཾ པན ཀམྨཾ ཏེསཾ ནཱནཱཀཱརཾ. ཏེསུ ཧི ཨེཀོ ཨཱདརེན ཚནྡཛཱཏོ ཀརོཏི, ཨེཀོ ‘‘ཨེཧི ཏྭམྤི ཀརོཧཱི’’ཏི པརེཧི ནིཔྤཱིལི༹ཏོ ཀརོཏི, ཨེཀོ སམཱནཙྪནྡོ ¶ ཝིཡ ཧུཏྭཱ ཨཔྤཊིབཱཧིཡམཱནོ ཝིཙརཏི, ཏསྨཱ ཏེསུ ཨེཀོ ཏེནེཝ ཀམྨེན ནིརཡེ ནིབྦཏྟཏི, ཨེཀོ ཏིརཙྪཱནཡོནིཡཾ, ཨེཀོ པེཏྟིཝིསཡེ. ཏཾ ཏཐཱགཏོ ཨཱཡཱུཧནཀྑཎེཡེཝ ‘‘ཨིམིནཱ ནཱིཧཱརེན ཨཱཡཱུཧིཏཏྟཱ ཨེས ནིརཡེ ནིབྦཏྟིསྶཏི, ཨེས ཏིརཙྪཱནཡོནིཡཾ, ཨེས པེཏྟིཝིསཡེ’’ཏི ཛཱནཱཏི. ནིརཡེ ནིབྦཏྟམཱནམྤི ‘‘ཨེས མཧཱནིརཡེ ནིབྦཏྟིསྶཏི, ཨེས ཨུསྶདནིརཡེ’’ཏི ཛཱནཱཏི. ཏིརཙྪཱནཡོནིཡཾ ནིབྦཏྟམཱནམྤི ‘‘ཨེས ཨཔཱདཀོ བྷཝིསྶཏི, ཨེས དྭིཔཱདཀོ, ཨེས ཙཏུཔྤཱདོ, ཨེས བཧུཔྤཱདོ’’ཏི ཛཱནཱཏི. པེཏྟིཝིསཡེ ནིབྦཏྟམཱནམྤི ‘‘ཨེས ནིཛ྄ཛྷཱམཏཎྷིཀོ བྷཝིསྶཏི, ཨེས ཁུཔྤིཔཱསིཀོ, ཨེས པརདཏྟཱུཔཛཱིཝཱི’’ཏི ཛཱནཱཏི. ཏེསུ ཙ ཀམྨེསུ ‘‘ཨིདཾ ཀམྨཾ པཊིསནྡྷིཾ ཨཱཀཌྜྷིསྶཏི, ཨེཏཾ ཨཉྙེན དིནྣཱཡ པཊིསནྡྷིཡཱ ཨུཔདྷིཝེཔཀྐཾ བྷཝིསྶཏཱི’’ཏི ཛཱནཱཏི.

ཏཐཱ སཀལགཱམཝཱསིཀེསུ ཨེཀཏོ པིཎྜཔཱཏཾ དདམཱནེསུ ཀཱམཾ སབྦེསམྤི ཙེཏནཱ པིཎྜཔཱཏཱརམྨཎཱཝ, ¶ ཏཾ པན ཀམྨཾ ཏེསཾ ནཱནཱཀཱརཾ. ཏེསུ ཧི ཨེཀོ ཨཱདརེན ཀརོཏཱིཏི སབྦཾ པུརིམསདིསཾ. ཏསྨཱ ཏེསུ ཙ ཀེཙི དེཝལོཀེ ནིབྦཏྟནྟི, ཀེཙི མནུསྶལོཀེ. ཏཾ ཏཐཱགཏོ ཨཱཡཱུཧནཀྑཎེཡེཝ ཛཱནཱཏི. ‘‘ཨིམིནཱ ནཱིཧཱརེན ཨཱཡཱུཧིཏཏྟཱ ཨེས མནུསྶལོཀེ ནིབྦཏྟིསྶཏི, ཨེས དེཝལོཀེ, ཏཏྠཱཔི ཨེས ཁཏྟིཡཀུལེ, ཨེས བྲཱཧྨཎཀུལེ, ཨེས ཝེསྶཀུལེ, ཨེས སུདྡཀུལེ, ཨེས པརནིམྨིཏཝསཝཏྟཱིསུ, ཨེས ནིམྨཱནརཏཱིསུ, ཨེས ཏུསིཏེསུ, ཨེས ཡཱམེསུ, ཨེས ཏཱཝཏིཾསེསུ, ཨེས ཙཱཏུམཧཱརཱཛིཀེསུ, ཨེས བྷུམྨདེཝེསཱུ’’ཏིཨཱདིནཱ ཏཏྠ ཏཏྠ ཧཱིནཔཎཱིཏསུཝཎྞདུབྦཎྞཨཔྤཔརིཝཱརམཧཱཔརིཝཱརཏཱདིབྷེདཾ ཏཾ ཏཾ ཝིསེསཾ ཨཱཡཱུཧནཀྑཎེཡེཝ ཛཱནཱཏི.

ཏཐཱ ཝིཔསྶནཾ པཊྛཔེནྟེསུཡེཝ ‘‘ཨིམིནཱ ནཱིཧཱརེན ཨེས ཀིཉྩི སལླཀྑེཏུཾ ན སཀྑིསྶཏི, ཨེས མཧཱབྷཱུཏམཏྟམེཝ ཝཝཏྠཔེསྶཏི, ཨེས རཱུཔཔརིགྒཧེ ཨེཝ ཋསྶཏི, ཨེས ཨརཱུཔཔརིགྒཧེཡེཝ, ཨེས ནཱམརཱུཔཔརིགྒཧེཡེཝ, ཨེས པཙྩཡཔརིགྒཧེཡེཝ, ཨེས ལཀྑཎཱརམྨཎིཀཝིཔསྶནཱཡམེཝ, ཨེས པཋམཕལེཡེཝ, ཨེས དུཏིཡཕལེ ཨེཝ, ཨེས ཏཏིཡཕལེ ཨེཝ, ཨེས ཨརཧཏྟཾ པཱཔུཎིསྶཏཱི’’ཏི ཛཱནཱཏི. ཀསིཎཔརིཀམྨཾ ཀརོནྟེསུཔི ‘‘ཨིམསྶ པརིཀམྨམཏྟམེཝ བྷཝིསྶཏི, ཨེས ནིམིཏྟཾ ཨུཔྤཱདེསྶཏི, ཨེས ཨཔྤནཾ ཨེཝ པཱཔུཎིསྶཏི, ཨེས ཛྷཱནཾ པཱདཀཾ ཀཏྭཱ ཝིཔསྶནཾ པཊྛཔེཏྭཱ ཨརཧཏྟཾ གཎྷིསྶཏཱི’’ཏི ཛཱནཱཏི.

ཨནེཀདྷཱཏུནྟི ¶ ཙཀྑུདྷཱཏུཨཱདཱིཧི, ཀཱམདྷཱཏུཨཱདཱིཧི ཝཱ དྷཱཏཱུཧི བཧུདྷཱཏུཾ. ནཱནཱདྷཱཏུནྟི ཏཱསཾཡེཝ དྷཱཏཱུནཾ ཝིལཀྑཎཏྟཱ ནཱནཔྤཀཱརདྷཱཏུཾ. ལོཀནྟི ཁནྡྷཱཡཏནདྷཱཏུལོཀཾ. ཡཐཱབྷཱུཏཾ པཛཱནཱཏཱིཏི ཏཱསཾ དྷཱཏཱུནཾ ཨཝིཔརཱིཏཏོ སབྷཱཝཾ པཊིཝིཛ྄ཛྷཏི.

ནཱནཱདྷིམུཏྟིཀཏནྟི ཧཱིནཱདཱིཧི ཨདྷིམུཏྟཱིཧི ནཱནཱདྷིམུཏྟིཀབྷཱཝཾ. པརསཏྟཱནནྟི པདྷཱནསཏྟཱནཾ. པརཔུགྒལཱནནྟི ཏཏོ པརེསཾ ཧཱིནསཏྟཱནཾ. ཨེཀཏྠམེཝ ཝཱ ཨེཏཾ པདདྭཡཾ, ཝེནེཡྻཝསེན པན དྭེདྷཱ ཝུཏྟཾ. ཨིནྡྲིཡཔརོཔརིཡཏྟནྟི སདྡྷཱདཱིནཾ ཨིནྡྲིཡཱནཾ པརབྷཱཝཉྩ ཨཔརབྷཱཝཉྩ, ཝུདྡྷིཉྩ ཧཱནིཉྩཱཏི ཨཏྠོ.

ཛྷཱནཝིམོཀྑསམཱདྷིསམཱཔཏྟཱིནནྟི པཋམཱདཱིནཾ ཙཏུནྣཾ ཛྷཱནཱནཾ, ‘‘རཱུཔཱི རཱུཔཱནི པསྶཏཱི’’ཏིཨཱདཱིནཾ ཨཊྛནྣཾ ཝིམོཀྑཱནཾ, སཝིཏཀྐསཝིཙཱརཱདཱིནཾ ཏིཎྞཾ སམཱདྷཱིནཾ, པཋམཛ྄ཛྷཱནསམཱཔཏྟིཨཱདཱིནཉྩ ནཝནྣཾ ཨནུཔུབྦསམཱཔཏྟཱིནཾ. སཾཀིལེསནྟི ཧཱནབྷཱགིཡདྷམྨཾ. ཝོདཱནནྟི ཝིསེསབྷཱགིཡདྷམྨཾ. ཝུཊྛཱནནྟི ‘‘ཝོདཱནམྤི ཝུཊྛཱནཾ, ཏམྷཱ ཏམྷཱ སམཱདྷིམྷཱ ཝུཊྛཱནམྤི ཝུཊྛཱན’’ནྟི (ཝིབྷ. ༨༢༨) ཨེཝཾ ཝུཏྟཾ པགུཎཛ྄ཛྷཱནཉྩེཝ བྷཝངྒཕལསམཱཔཏྟིཡོ ཙ. ཧེཊྛིམཾ ¶ ཧེཊྛིམཉྷི པགུཎཛ྄ཛྷཱནཾ ཨུཔརིམསྶ ཨུཔརིམསྶ པདཊྛཱནཾ ཧོཏི, ཏསྨཱ ‘‘ཝོདཱནམྤི ཝུཊྛཱན’’ནྟི ཝུཏྟཾ. བྷཝངྒེན སབྦཛྷཱནེཧི ཝུཊྛཱནཾ ཧོཏི, ཕལསམཱཔཏྟིཡཱ ནིརོདྷསམཱཔཏྟིཏོ ཝུཊྛཱནཾ ཧོཏི. ཏམེཏཾ སནྡྷཱཡ ‘‘ཏམྷཱ ཏམྷཱ སམཱདྷིམྷཱ ཝུཊྛཱནམྤི ཝུཊྛཱན’’ནྟི ཝུཏྟཾ. སབྦཉཱཎཱནཉྩ ཝིཏྠཱརཀཐཱཡ ཝིནིཙྪཡོ སམྨོཧཝིནོདནིཡཾ ཝིབྷངྒཊྛཀཐཱཡཾ (ཝིབྷ. ཨཊྛ. ༧༦༠) ཝུཏྟོ. པུབྦེནིཝཱསཱནུསྶཏིདིབྦཙཀྑུཨཱསཝཀྑཡཉཱཎཀཐཱ པན ཝེརཉྫཀཎྜེ (པཱརཱ. ༡༢) ཝིཏྠཱརིཏཱཡེཝ.

ཨིམཱནི ཁོ སཱརིཔུཏྟཱཏི ཡཱནི པུབྦེ ‘‘དས ཁོ པནིམཱནི, སཱརིཔུཏྟ, ཏཐཱགཏསྶ ཏཐཱགཏབལཱནཱི’’ཏི ཨཝོཙཾ, ཨིམཱནི ཏཱནཱིཏི ཨཔྤནཾ ཀརོཏི. ཏཏྠ པརཝཱདིཀཐཱ ཧོཏི ‘‘དསབལཉཱཎཾ ནཱམ པཱཊིཡེཀྐཾ ནཏྠི, སབྦཉྙུཏཉྙཱཎསྶེཝཱཡཾ པབྷེདོ’’ཏི, ཏཾ ན ཏཐཱ དཊྛབྦཾ. ཨཉྙམེཝ ཧི དསབལཉཱཎཾ, ཨཉྙཾ སབྦཉྙུཏཉྙཱཎཾ. དསབལཉཱཎཾ སཀསཀཀིཙྩམེཝ ཛཱནཱཏི, སབྦཉྙུཏཉྙཱཎཾ ཏམྤི ཏཏོ ཨཝསེསམྤི པཛཱནཱཏི. དསབལཉཱཎེསུ ཧི པཋམཾ ཀཱརཎཱཀཱརཎམེཝ ཛཱནཱཏི, དུཏིཡཾ ཀམྨནྟརཝིཔཱཀནྟརམེཝ, ཏཏིཡཾ ཀམྨཔརིཙྪེདམེཝ, ཙཏུཏྠཾ དྷཱཏུནཱནཏྟཀཱརཎམེཝ ¶ , པཉྩམཾ སཏྟཱནཾ ཨཛ྄ཛྷཱསཡཱདྷིམུཏྟིམེཝ, ཚཊྛཾ ཨིནྡྲིཡཱནཾ ཏིཀྑམུདུབྷཱཝམེཝ, སཏྟམཾ ཛྷཱནཱདཱིཧི སདྡྷིཾ ཏེསཾ སཾཀིལེསཱདིམེཝ, ཨཊྛམཾ པུབྦེནིཝུཏྠཀྑནྡྷསནྟཏིམེཝ, ནཝམཾ སཏྟཱནཾ ཙུཏིཔཊིསནྡྷིམེཝ, དསམཾ སཙྩཔརིཙྪེདམེཝ. སབྦཉྙུཏཉྙཱཎཾ པན ཨེཏེཧི ཛཱནིཏབྦཉྩ ཏཏོ ཨུཏྟརིཉྩ པཛཱནཱཏི, ཨེཏེསཾ པན ཀིཙྩཾ ན སབྦཾ ཀརོཏི. ཏཉྷི ཛྷཱནཾ ཧུཏྭཱ ཨཔྤེཏུཾ ན སཀྐོཏི, ཨིདྡྷི ཧུཏྭཱ ཝིཀུབྦིཏུཾ ན སཀྐོཏི, མགྒོ ཧུཏྭཱ ཀིལེསེ ཁེཔེཏུཾ ན སཀྐོཏི. ཨིཏི ཡཐཱཝུཏྟཀཱཡབལེན ཙེཝ ཉཱཎབལེན ཙ སམནྣཱགཏཏྟཱ བྷགཝཱ ‘‘དསབལོ’’ཏི ཝུཙྩཏི.

དསཧི ཨསེཀྑེཧི ཨངྒེཧི ཨུཔེཏོཏི ‘‘ཨསེཀྑཱ སམྨཱདིཊྛི, ཨསེཀྑོ སམྨཱསངྐཔྤོ, ཨསེཀྑཱ སམྨཱཝཱཙཱ, ཨསེཀྑོ སམྨཱཀམྨནྟོ, ཨསེཀྑོ སམྨཱཨཱཛཱིཝོ, ཨསེཀྑོ སམྨཱཝཱཡཱམོ, ཨསེཀྑཱ སམྨཱསཏི, ཨསེཀྑོ སམྨཱསམཱདྷི, ཨསེཀྑཾ སམྨཱཉཱཎཾ, ཨསེཀྑཱ སམྨཱཝིམུཏྟཱི’’ཏི (དཱི. ནི. ༣.༣༤༨, ༣༦༠) ཨེཝཾ ཝུཏྟེཧི དསཧི ཨསེཀྑདྷམྨེཧི སམནྣཱགཏོ. ཨསེཀྑཱ སམྨཱདིཊྛིཨཱདཡོ ཙ སབྦེ ཕལསམྤཡུཏྟདྷམྨཱ ཨེཝ. ཨེཏྠ ཙ སམྨཱདིཊྛི སམྨཱཉཱཎནྟི དྭཱིསུ ཋཱནེསུ པཉྙཱཝ ཀཐིཏཱ ‘‘སམྨཱ དསྶནཊྛེན སམྨཱདིཊྛི, སམྨཱ པཛཱནནཊྛེན སམྨཱཉཱཎ’’ནྟི. ཨཏྠི ཧི དསྶནཛཱནནཱནཾ ཝིསཡེ པཝཏྟིཨཱཀཱརཝིསེསོ. སམྨཱཝིམུཏྟཱིཏི ཨིམིནཱ པན པདེན ཝུཏྟཱཝསེསཱ ཕལསམཱཔཏྟིསཧགཏདྷམྨཱ སངྒཧིཏཱཏི ཝེདིཏབྦཱ ¶ . ཨརིཡཕལསམྤཡུཏྟདྷམྨཱཔི ཧི སབྦསོ པཊིཔཀྑཏོ ཝིམུཏྟཏཾ ཨུཔཱདཱཡ ཝིམུཏྟཱིཏི ཝཏྟབྦཏཾ ལབྷནྟི.

༥༩. ཝཙནསདྡེན ཨཔྤསདྡནྟི ཨཱརཱམུཔཙཱརེན གཙྪཏོ ཨདྡྷིཀཛནསྶཔི ཝཙནསདྡེན ཨཔྤསདྡཾ. ནགརནིགྒྷོསསདྡེནཱཏི ཨཝིབྷཱཝིཏཏྠེན ནགརེ མནུསྶཱནཾ ནིགྒྷོསསདྡེན. མནུསྶེཧི སམཱགམྨ ཨེཀཛ྄ཛྷཾ པཝཏྟིཏསདྡོ ཧི ནིགྒྷོསོ. ཨནུསཉྩརཎཛནསྶཱཏི ཨནྟོསཉྩཱརིནོ ཛནསྶ. མནུསྶཱནཾ རཧསྶཀིརིཡཊྛཱནིཡནྟི མནུསྶཱནཾ རཧསྶཀརཎསྶ ཡུཏྟཾ ཨནུཙྪཝིཀཾ. ཝིཝེཀཱནུརཱུཔནྟི ཨེཀཱིབྷཱཝསྶ ཨནུརཱུཔཾ. སེསམེཏྠ ཨུཏྟཱནམེཝ.

བིམྦིསཱརསམཱགམཀཐཱཝཎྞནཱ ནིཊྛིཏཱ.

སཱརིཔུཏྟམོགྒལླཱནཔབྦཛྫཱཀཐཱཝཎྞནཱ

༦༠. ཨིདཱནི ¶ ‘‘ཏེན ཁོ པན སམཡེན སཉྩཡོ པརིབྦཱཛཀོ’’ཏིཨཱདཱིསུ ཨཔུབྦཔདཝཎྞནཾ དསྶེནྟོ ‘‘སཱརིཔུཏྟམོགྒལླཱནཱ’’ཏིཨཱདིམཱཧ. ཏཏྠ སཱརཱིབྲཱཧྨཎིཡཱ པུཏྟོ སཱརིཔུཏྟོ, མོགྒལླཱིབྲཱཧྨཎིཡཱ པུཏྟོ མོགྒལླཱནོ. ཨམྷཱཀཾ ཀིར (ཨ. ནི. ཨཊྛ. ༡.༡.༡༨༩-༡༩༠; དྷ. པ. ཨཊྛ. ༡.༡༠ སཱརིཔུཏྟཏྠེརཝཏྠུ) བྷགཝཏོ ནིབྦཏྟིཏོ པུརེཏརམེཝ སཱརིཔུཏྟོ རཱཛགཧནགརསྶ ཨཝིདཱུརེ ཨུཔཏིསྶགཱམེ སཱརཱིབྲཱཧྨཎིཡཱ ནཱམ ཀུཙྪིཡཾ པཊིསནྡྷིཾ གཎྷི. ཏཾདིཝསམེཝསྶ སཧཱཡོཔི རཱཛགཧསྶེཝ ཨཝིདཱུརེ ཀོལིཏགཱམེ མོགྒལླཱིབྲཱཧྨཎིཡཱ ཀུཙྪིཡཾ པཊིསནྡྷིཾ གཎྷི. ཏཱནི ཀིར དྭེཔི ཀུལཱནི ཡཱཝ སཏྟམཱ ཀུལཔརིཝཊྚཱ ཨཱབདྡྷཔཊིབདྡྷསཧཱཡཱནེཝ. ཏེསཾ དྭིནྣཾ ཨེཀདིཝསམེཝ གབྦྷཔརིཧཱརཾ ཨདཾསུ. དསམཱསཙྩཡེན ཛཱཏཱནམྤི ཏེསཾ ཚསཊྛི དྷཱཏིཡོ ཨུཔནཡིཾསུ. ནཱམགྒཧཎདིཝསེ སཱརཱིབྲཱཧྨཎིཡཱ པུཏྟསྶ ཨུཔཏིསྶགཱམེ ཛེཊྛཀུལསྶ པུཏྟཏྟཱ ‘‘ཨུཔཏིསྶོ’’ཏི ནཱམཾ ཨཀཾསུ, ཨིཏརསྶ ཀོལིཏགཱམེ ཛེཊྛཀུལསྶ པུཏྟཏྟཱ ‘‘ཀོལིཏོ’’ཏི ནཱམཾ ཨཀཾསུ. ཏེན ཝུཏྟཾ ‘‘གིཧིཀཱལེ ཨུཔཏིསྶོ ཀོལིཏོཏི ཨེཝཾ པཉྙཱཡམཱནནཱམཱ’’ཏི.

ཨཌྜྷཏེཡྻསཏམཱཎཝཀཔརིཝཱརཱཏི ཨེཏྠ པཉྩཔཉྩསཏམཱཎཝཀཔརིཝཱརཱཏིཔི ཝདནྟི. ཝུཏྟཉྷེཏཾ ཨངྒུཏྟརནིཀཱཡཊྛཀཐཱཡཾ (ཨ. ནི. ཨཊྛ. ༡.༡.༡༨༩-༡༩༠) –

‘‘ཨུཔཏིསྶམཱཎཝཀསྶ ཀཱིལ༹ནཏྠཱཡ ནདིཾ ཝཱ ཨུཡྻཱནཾ ཝཱ གམནཀཱལེ པཉྩ སུཝཎྞསིཝིཀཱསཏཱནི ¶ པརིཝཱརཱནི ཧོནྟི, ཀོལིཏམཱཎཝཀསྶ པཉྩ ཨཱཛཉྙརཐསཏཱནི. དྭེཔི ཛནཱ པཉྩཔཉྩམཱཎཝཀསཏཔརིཝཱརཱ ཧོནྟཱི’’ཏི.

རཱཛགཧེ ཙ ཨནུསཾཝཙྪརཾ གིརགྒསམཛྫཾ ནཱམ ཧོཏི. ཏེསཾ དྭིནྣམྤི ཨེཀཊྛཱནེཡེཝ མཉྩཀཾ བནྡྷནྟི. དྭེཔི ཨེཀཏོཝ ནིསཱིདིཏྭཱ སམཛྫཾ པསྶིཏྭཱ ཧསིཏབྦཊྛཱནེ ཧསནྟི, སཾཝེགཊྛཱནེ སཾཝིཛྫནྟི, དཱཡཾ དཱཏུཾ ཡུཏྟཊྛཱནེ དཱཡཾ དེནྟི. ཏེསཾ ཨིམིནཱཝ ནིཡཱམེན ཨེཀདིཝསཾ སམཛྫཾ པསྶནྟཱནཾ པརིཔཱཀགཏཏྟཱ ཉཱཎསྶ པུརིམདིཝསེསུ ཝིཡ ཧསིཏབྦཊྛཱནེ ཧཱསོ ཝཱ སཾཝེགཊྛཱནེ སཾཝིཛྫནཾ ཝཱ དཱཡཾ དཱཏུཾ ཡུཏྟཊྛཱནེ དཱཡདཱནཾ ཝཱ ནཱཧོསི. དྭེཔི ¶ པན ཛནཱ ཨེཝཾ ཙིནྟཡིཾསུ ‘‘ཀིཾ ཨེཏྠ ཨོལོཀེཏབྦཾ ཨཏྠི, སབྦེཔིམེ ཨཔྤཏྟེ ཝསྶསཏེ ཨཔཎྞཏྟིཀབྷཱཝཾ གམིསྶནྟི, ཨམྷེཧི པན ཨེཀཾ མོཀྑདྷམྨཾ གཝེསིཏུཾ ཝཊྚཏཱི’’ཏི ཨཱརམྨཎཾ གཧེཏྭཱ ནིསཱིདིཾསུ. ཏཏོ ཀོལིཏོ ཨུཔཏིསྶཾ ཨཱཧ ‘‘སམྨ ཨུཔཏིསྶ, ན ཏྭཾ ཨཉྙདིཝསེསུ ཝིཡ ཧཊྛཔཧཊྛོ, ཨནཏྟམནདྷཱཏུཀོསི, ཀིཾ ཏེ སལླཀྑིཏ’’ནྟི. ‘‘སམྨ ཀོལིཏ, ཨེཏེསཾ ཨོལོཀནེ སཱརོ ནཏྠི, ནིརཏྠཀམེཏཾ, ཨཏྟནོ མོཀྑདྷམྨཾ གཝེསིཏུཾ ཝཊྚཏཱི’’ཏི ཨིདཾ ཙིནྟཡནྟོ ནིསིནྣོམྷཱིཏི. ཏྭཾ པན ཀསྨཱ ཨནཏྟམནོཏི. སོཔི ཏཐེཝ ཨཱཧ. ཨཐསྶ ཨཏྟནཱ སདྡྷིཾ ཨེཀཛ྄ཛྷཱསཡཏཾ ཉཏྭཱ ཨུཔཏིསྶོ ཨེཝམཱཧ ‘‘ཨམྷཱཀཾ ཨུབྷིནྣཾ སུཙིནྟིཏཾ, མོཀྑདྷམྨཾ པན གཝེསནྟེཧི ཨེཀཱ པབྦཛྫཱ ལདྡྷུཾ ཝཊྚཏི, ཀསྶ སནྟིཀེ པབྦཛཱམཱ’’ཏི.

ཏེན ཁོ པན སམཡེན སཉྩཡོ པརིབྦཱཛཀོ རཱཛགཧེ པཊིཝསཏི མཧཏིཡཱ པརིབྦཱཛཀཔརིསཱཡ སདྡྷིཾ. ཏེ ‘‘ཏསྶ སནྟིཀེ པབྦཛིསྶཱམཱ’’ཏི པཉྩཧི མཱཎཝཀསཏེཧི སདྡྷིཾ སཉྩཡསྶ སནྟིཀེ པབྦཛིཾསུ. ཏེསཾ པབྦཛིཏཀཱལཏོ པཊྛཱཡ སཉྩཡོ ཨཏིརེཀལཱབྷགྒཡསགྒཔྤཏྟོ ཨཧོསི. ཏེ ཀཏིཔཱཧེནེཝ སབྦཾ སཉྩཡསྶ སམཡཾ པརིམདྡིཏྭཱ ‘‘ཨཱཙརིཡ, ཏུམྷཱཀཾ ཛཱནནསམཡོ ཨེཏྟཀོཝ, ཨུདཱཧུ ཨུཏྟརིཔི ཨཏྠཱི’’ཏི པུཙྪིཾསུ. སཉྩཡོ ‘‘ཨེཏྟཀོཝ, སབྦཾ ཏུམྷེཧི ཉཱཏ’’ནྟི ཨཱཧ. ཏསྶ ཀཐཾ སུཏྭཱ ཙིནྟཡིཾསུ ‘‘ཨེཝཾ སཏི ཨིམསྶ སནྟིཀེ བྲཧྨཙརིཡཝཱསོ ནིརཏྠཀོ, མཡཾ མོཀྑདྷམྨཾ གཝེསིཏུཾ ནིཀྑནྟཱ, སོ ཨིམསྶ སནྟིཀེ ཨུཔྤཱདེཏུཾ ན སཀྐཱ, མཧཱ ཁོ པན ཛམྦུདཱིཔོ, གཱམནིགམརཱཛདྷཱནིཡོ ཙརནྟཱ ཨཝསྶཾ མོཀྑདྷམྨདེསཀཾ ཨཱཙརིཡཾ ལབྷིསྶཱམཱ’’ཏི. ཏེ ཏཏོ པཊྛཱཡ ‘‘ཡཏྠ ཡཏྠ པཎྜིཏཱ སམཎབྲཱཧྨཎཱ ཨཏྠཱི’’ཏི སུཎནྟི, ཏཏྠ ཏཏྠ གནྟྭཱ པཉྷསཱཀཙྪཾ ཀརོནྟི, ཏེཧི པུཊྛཾ པཉྷཾ ཨཉྙོ ཀཐེཏུཾ སམཏྠོ ནཱམ ནཏྠི, ཏེ པན ཏེསཾ པཉྷཾ ཝིསྶཛྫེནྟི. ཨེཝཾ སཀལཛམྦུདཱིཔཾ པརིགྒཎྷིཏྭཱ ནིཝཏྟིཏྭཱ སཀཊྛཱནམེཝ ཨཱགནྟྭཱ ‘‘སམྨ ཀོལིཏ, ཡོ པཋམཾ ཨམཏཾ ཨདྷིགཙྪཏི ¶ , སོ ཨཱརོཙེཏཱུ’’ཏི ཀཏིཀཾ ཨཀཾསུ. ཨིམམེཝ ཝཏྠུཾ སངྑིཔིཏྭཱ དསྶེནྟོ ‘‘ཏཏྲ ནེསཾ མཧཱཛནཾ དིསྭཱ…པེ… ཀཏིཀཾ ཨཀཾསཱུ’’ཏི ཨཱཧ.

ཏཏྠ ཚནྣཔརིབྦཱཛཀསྶཱཏི སེཏཔཊདྷརསྶ པརིབྦཱཛཀསྶ. ཏེན ནཱཡཾ ནགྒཔརིབྦཱཛཀོཏི དསྶེཏི. པཱསཱདིཀེན ཨབྷིཀྐནྟེནཱཏིཨཱདཱིསུ པཱསཱདིཀེནཱཏི པསཱདཱཝཧེན སཱརུཔྤེན སམཎཱནུཙྪཝིཀེན. ཨབྷིཀྐནྟེནཱཏི ¶ གམནེན. པཊིཀྐནྟེནཱཏི ནིཝཏྟནེན. ཨཱལོཀིཏེནཱཏི པུརཏོ དསྶནེན. ཝིལོཀིཏེནཱཏི ཨིཏོ ཙིཏོ དསྶནེན. སམིཉྫིཏེནཱཏི པབྦསངྐོཙནེན. པསཱརིཏེནཱཏི ཏེསཾཡེཝ པསཱརཎེན. སབྦཏྠ ཨིཏྠམྦྷཱུཏལཀྑཎེ ཀརཎཝཙནཾ, ཏསྨཱ སཏིསམྤཛཉྙཀེཧི ཝབྷིསངྑཏཏྟཱ པཱསཱདིཀཨབྷིཀྐནྟཔཊིཀྐནྟཨཱལོཀིཏཝིལོཀིཏསམིཉྫིཏཔསཱརིཏོ ཧུཏྭཱཏི ཝུཏྟཾ ཧོཏི. ཨོཀྑིཏྟཙཀྑཱུཏི ཧེཊྛཱཁིཏྟཙཀྑུ. ཨིརིཡཱཔཐསམྤནྣོཏི ཏཱཡ པཱསཱདིཀཨབྷིཀྐནྟཱདིཏཱཡ སམྤནྣཨིརིཡཱཔཐོ. ཨཏྠིཀེཧི ཨུཔཉྙཱཏནྟི ‘‘མརཎེ སཏི ཨམཏེནཔི བྷཝིཏབྦ’’ནྟི ཨེཝཾ ཨནུམཱནཉཱཎེན ‘‘ཨཏྠཱི’’ཏི ཨུཔགཏཾ ནིབྦཱནཾ ནཱམ, ཏཾ མགྒནྟོ པརིཡེསནྟོ ཡནྣཱུནཱཧཾ ཨིམཾ བྷིཀྑུཾ པིཊྛིཏོ པིཊྛིཏོ ཨནུབནྡྷེཡྻནྟི སམྦནྡྷོ. སུདིནྣཀཎྜེ ཝུཏྟཔྤཀཱརནྟི ‘‘དཱནཔཏཱིནཾ གྷརེསུ སཱལཱ ཧོནྟི, ཨཱསནཱནི ཙེཏྠ པཉྙཏྟཱནི ཧོནྟི, ཨུཔཊྛཱཔིཏཾ ཨུདཀཀཉྫིཡཾ, ཏཏྠ པབྦཛིཏཱ པིཎྜཱཡ ཙརིཏྭཱ ནིསཱིདིཏྭཱ བྷུཉྫནྟི. སཙེ ཨིཙྪནྟི, དཱནཔཏཱིནམྤི སནྟཀཾ གཎྷནྟི, ཏསྨཱ ཏམྤི ཨཉྙཏརསྶ ཀུལསྶ ཨཱིདིསཱཡ སཱལཱཡ ཨཉྙཏརཾ ཀུཊྚམཱུལནྟི ཝེདིཏབྦ’’ནྟི ཨེཝཾ ཝུཏྟཔྤཀཱརཾ.

ཨཔྤཾ ཝཱ བཧུཾ ཝཱ བྷཱསསྶཱུཏི པརིབྦཱཛཀོ ‘‘ཨཧཾ ཨུཔཏིསྶོ ནཱམ, ཏྭཾ ཡཐཱསཏྟིཡཱ ཨཔྤཾ ཝཱ བཧུཾ ཝཱ པཱཝད, ཨེཏཾ ནཡསཏེན ནཡསཧསྶེན པཊིཝིཛ྄ཛྷིཏུཾ མཡ྄ཧཾ བྷཱརོ’’ཏི ཙིནྟེཏྭཱ ཨེཝམཱཧ. ནིརོདྷོ ཙ ནིརོདྷུཔཱཡོ ཙ ཨེཀདེསསརཱུཔེཀསེསནཡེན ‘‘ནིརོདྷོ’’ཏི ཝུཏྟོཏི དསྶེནྟོ ‘‘ཨཐ ཝཱ’’ཏིཨཱདིམཱཧ. པཊིཔཱདེནྟོཏི ནིགམེནྟོ. ཨིམཾ དྷམྨཔརིཡཱཡཾ སུཏྭཱ ཝིརཛཾ ཝཱིཏམལཾ དྷམྨཙཀྑུཾ ཨུདཔཱདཱིཏི ཨེཏྠ པརིབྦཱཛཀོ པཋམཔདདྭཡམེཝ སུཏྭཱ སཧསྶནཡསམྤནྣེ སོཏཱཔཏྟིཕལེ པཏིཊྛཧི. ཨིཏརཔདདྭཡཾ སོཏཱཔནྣཀཱལེ ནིཊྛཱསཱིཏི ཝེདིཏབྦཾ.

བཧུཀེཧི ཀཔྤནཧུཏེཧཱིཏི ཨེཏྠ དས དསཀཱནི སཏཾ, དས སཏཱནི སཧསྶཾ, སཧསྶཱནཾ སཏཾ སཏསཧསྶཾ, སཏསཧསྶཱནཾ སཏཾ ཀོཊི, ཀོཊིསཏསཧསྶཱནཾ སཏཾ པཀོཊི, པཀོཊིསཏསཧསྶཱནཾ སཏཾ ཀོཊིཔཀོཊི, ཀོཊིཔཀོཊིསཏསཧསྶཱནཾ སཏཾ ཨེཀནཧུཏནྟི ཝེདིཏབྦཾ.

༦༡. ཨཐ ¶ ¶ ཁོ སཱརིཔུཏྟོ པརིབྦཱཛཀོ ཡེན མོགྒལླཱནོ པརིབྦཱཛཀོ ཏེནུཔསངྐམཱིཏི (ཨ. ནི. ཨཊྛ. ༡.༡.༡༨༩-༡༩༠; དྷ. པ. ཨཊྛ. ༡.༡༠ སཱརིཔུཏྟཏྠེརཝཏྠུ) སོཏཱཔནྣོ ཧུཏྭཱ ཨུཔརིཝིསེསེ ཨཔྤཝཏྟནྟེ ‘‘བྷཝིསྶཏི ཨེཏྠ ཀཱརཎ’’ནྟི སལླཀྑེཏྭཱ ཐེརཾ ཨཱཧ ‘‘བྷནྟེ, མཱ ཨུཔརི དྷམྨདེསནཾ ཝཌྜྷཡིཏྠ, ཨེཏྟཀམེཝ ཧོཏུ, ཀཧཾ ཨམྷཱཀཾ སཏྠཱ ཝསཏཱི’’ཏི. ཝེལུ༹ཝནེ པརིབྦཱཛཀཱཏི. ‘‘བྷནྟེ, ཏུམྷེ པུརཏོ ཡཱཐ, མཡ྄ཧཾ ཨེཀོ སཧཱཡཀོ ཨཏྠི, ཨམྷེཧི ཙ ཨཉྙམཉྙཾ ཀཏིཀཱ ཀཏཱ ‘ཡོ པཋམཾ ཨམཏཾ ཨདྷིགཙྪཏི, སོ ཨཱརོཙེཏཱུ’ཏི, ཨཧཾ ཏཾ པཊིཉྙཾ མོཙེཏྭཱ སཧཱཡཀཾ གཧེཏྭཱ ཏུམྷཱཀཾ གཏམགྒེནེཝ སཏྠུ སནྟིཀཾ ཨཱགམིསྶཱམཱི’’ཏི པཉྩཔཏིཊྛིཏེན ཐེརསྶ པཱདེསུ ནིཔཏིཏྭཱ ཏིཀྑཏྟུཾ པདཀྑིཎཾ ཀཏྭཱ ཐེརཾ ཨུཡྻོཛེཏྭཱ པརིབྦཱཛཀཱརཱམཱབྷིམུཁོ ཨགམཱསི.

༦༢. སཱརིཔུཏྟཾ པརིབྦཱཛཀཾ ཨེཏདཝོཙཱཏི ‘‘ཨཛྫ མཡ྄ཧཾ སཧཱཡསྶ མུཁཝཎྞོ ན ཨཉྙདིཝསེསུ ཝིཡ, ཨདྡྷཱ ཨནེན ཨམཏཾ ཨདྷིགཏཾ བྷཝིསྶཏཱི’’ཏི ཨམཏཱདྷིགམཾ པུཙྪནྟོ ཨེཏདཝོཙ. སོཔིསྶ ‘‘ཨཱམཱཝུསོ, ཨམཏཾ ཨདྷིགཏ’’ནྟི པཊིཛཱནིཏྭཱ སབྦཾ པཝཏྟིཾ ཨཱརོཙེཏྭཱ ཏམེཝ གཱཐཾ ཨབྷཱསི. གཱཐཱཔརིཡོསཱནེ མོགྒལླཱནོ པརིབྦཱཛཀོ སོཏཱཔཏྟིཕལེ པཏིཊྛཧི. ཏེན ཝུཏྟཾ ‘‘ཨཐ ཁོ མོགྒལླཱནསྶ པརིབྦཱཛཀསྶ…པེ… དྷམྨཙཀྑུཾ ཨུདཔཱདཱི’’ཏི. གཙྪཱམ མཡཾ, ཨཱཝུསོ, བྷགཝཏོ སནྟིཀེཏི ‘‘ཀཧཾ སམྨ སཏྠཱ ཝསཏཱི’’ཏི པུཙྪིཏྭཱ ‘‘ཝེལུ༹ཝནེ ཀིར སམྨ, ཨེཝཾ ནོ ཨཱཙརིཡེན ཨསྶཛིཏྠེརེན ཀཐིཏ’’ནྟི ཝུཏྟེ ཨེཝམཱཧ.

སཱརིཔུཏྟཏྠེརོ ཙ ནཱམེས སདཱཔི ཨཱཙརིཡཔཱུཛཀོཝ, ཏསྨཱ སཧཱཡཾ མོགྒལླཱནཾ པརིབྦཱཛཀཾ ཨེཝམཱཧ ‘‘ཨམྷེཧི ཨདྷིགཏཾ ཨམཏཾ ཨམྷཱཀཾ ཨཱཙརིཡསྶ སཉྩཡཔརིབྦཱཛཀསྶཔི ཀཐེསྶཱམ, བུཛ྄ཛྷམཱནོ པཊིཝིཛ྄ཛྷིསྶཏི, ཨཔྤཊིཝིཛ྄ཛྷནྟོ ཨམྷཱཀཾ སདྡཧིཏྭཱ སཏྠུ སནྟིཀཾ གམིསྶཏི, བུདྡྷཱནཾ དེསནཾ སུཏྭཱ མགྒཕལཔྤཊིཝེདྷཾ ཀརིསྶཏཱི’’ཏི. ཏཏོ དྭེཔི ཛནཱ སཉྩཡསྶ སནྟིཀཾ ཨགམཾསུ. ཏེན ཝུཏྟཾ ‘‘ཨཐ ཁོ སཱརིཔུཏྟམོགྒལླཱནཱ ཡེན སཉྩཡོ པརིབྦཱཛཀོ ཏེནུཔསངྐམིཾསཱུ’’ཏི. ཨུཔསངྐམིཏྭཱ ཙ ‘‘ཨཱཙརིཡ, ཏྭཾ ཀིཾ ཀརོསི, ལོཀེ བུདྡྷོ ¶ ཨུཔྤནྣོ, སྭཱཀྑཱཏོ དྷམྨོ, སུཔྤཊིཔནྣོ སངྒྷོ, ཨཱཡཱམ དསབལཾ པསྶིསྶཱམཱ’’ཏི. སོ ‘‘ཀིཾ ཝདཐ ཏཱཏཱ’’ཏི ཏེཔི ཝཱརེཏྭཱ ལཱབྷགྒཡསགྒཔྤཝཏྟིམེཝ ནེསཾ དཱིཔེཏི. ཏེ ‘‘ཨམྷཱཀཾ ཨེཝརཱུཔོ ཨནྟེཝཱསིཀཝཱསོ ནིཙྩམེཝ ཧོཏུ, ཏུམྷཱཀཾ པན གམནཾ ཝཱ ཨགམནཾ ཝཱ ཛཱནཱཐཱ’’ཏི ཨཱཧཾསུ. སཉྩཡོ ‘‘ཨིམེ ཨེཏྟཀཾ ཛཱནནྟཱ མམ ཝཙནཾ ན ཀརིསྶནྟཱི’’ཏི ཉཏྭཱ ‘‘གཙྪཐ ཏུམྷེ ཏཱཏཱ, ཨཧཾ མཧལླཀཀཱལེ ཨནྟེཝཱསིཀཝཱསཾ ཝསིཏུཾ ན སཀྐོམཱི’’ཏི ¶ ཨཱཧ. ཏེ ཨནེཀེཧིཔི ཀཱརཎསཏེཧི ཏཾ བོདྷེཏུཾ ཨསཀྐོནྟཱ ཨཏྟནོ ཨོཝཱདེ ཝཏྟམཱནཾ ཛནཾ ཨཱདཱཡ ཝེལུ༹ཝནཾ ཨགམཾསུ. པཉྩསུ ཨནྟེཝཱསིཀསཏེསུ ཨཌྜྷཏེཡྻསཏཱ ནིཝཏྟིཾསུ, ཨཌྜྷཏེཡྻསཏཱ ཏེཧི སདྡྷིཾ ཨགམཾསུ. ཏེན ཝུཏྟཾ ‘‘ཨཐ ཁོ སཱརིཔུཏྟམོགྒལླཱནཱ ཏཱནི ཨཌྜྷཏེཡྻཱནི པརིབྦཱཛཀསཏཱནི ཨཱདཱཡ ཡེན ཝེལུ༹ཝནཾ ཏེནུཔསངྐམིཾསཱུ’’ཏི.

ཝིམུཏྟེཏི ཡཐཱཝུཏྟལཀྑཎེ ནིབྦཱནེ ཏདཱརམྨཎཱཡ ཕལཝིམུཏྟིཡཱ ཨདྷིམུཏྟེ ནེ སཱརིཔུཏྟམོགྒལླཱནེ བྱཱཀཱསཱིཏི སམྦནྡྷོ.

ཨེཝཾ བྱཱཀརིཏྭཱ ཙ སཏྠཱ ཙཏུཔརིསམཛ྄ཛྷེ དྷམྨཾ དེསེནྟོ ནེསཾ པརིསཱཡ ཙརིཡཝསེན དྷམྨདེསནཾ ཝཌྜྷེསི, ཋཔེཏྭཱ དྭེ ཨགྒསཱཝཀེ སབྦེཔི ཨཌྜྷཏེཡྻསཏཱ པརིབྦཱཛཀཱ ཨརཧཏྟཾ པཱཔུཎིཾསུ. སཏྠཱ ‘‘ཨེཐ བྷིཀྑཝོ’’ཏི ཧཏྠཾ པསཱརེསི, སབྦེསཾ ཀེསམསྶུ ཨནྟརདྷཱཡི, ཨིདྡྷིམཡཔཏྟཙཱིཝརཾ ཀཱཡཔཊིབདྡྷཾ ཨཧོསི. ཨགྒསཱཝཀཱནམྤི ཨིདྡྷིམཡཔཏྟཙཱིཝརཾ ཨཱགཏཾ, ཨུཔརིམགྒཏྟཡཀིཙྩཾ པན ན ནིཊྛཱཏི. ཀསྨཱ? སཱཝཀཔཱརམཱིཉཱཎསྶ མཧནྟཏཱཡ. ཨཐཱཡསྨཱ མཧཱམོགྒལླཱནོ པབྦཛིཏདིཝསཏོ སཏྟམེ དིཝསེ མགདྷརཊྛེ ཀལླཝཱལ༹གཱམཀཾ ཨུཔནིསྶཱཡ སམཎདྷམྨཾ ཀརོནྟོ ཐིནམིདྡྷཾ ཨོཀྐམནྟོ སཏྠཱརཱ སཾཝེཛིཏོ ཐིནམིདྡྷཾ ཝིནོདེཏྭཱ ཏཐཱགཏེན དིནྣཾ དྷཱཏུཀམྨཊྛཱནཾ སུཎནྟོཝ ཨུཔརིམགྒཏྟཡཀིཙྩཾ ནིཊྛཱཔེཏྭཱ སཱཝཀཔཱརམཱིཉཱཎསྶ མཏྠཀཾ པཏྟོ. སཱརིཔུཏྟཏྠེརོཔི པབྦཛིཏདིཝསཏོ ཨདྡྷམཱསཾ ཨཏིཀྐམིཏྭཱ སཏྠཱརཱ སདྡྷིཾ ཏམེཝ རཱཛགཧཾ ཨུཔནིསྶཱཡ སཱུཀརཁཏལེཎེ ཝིཧརནྟོ ཨཏྟནོ བྷཱགིནེཡྻསྶ དཱིགྷནཁཔརིབྦཱཛཀསྶ ཝེདནཱཔརིགྒཧསུཏྟནྟེ དེསིཡམཱནེ སུཏྟཱནུསཱརེན ཉཱཎཾ པེསེཏྭཱ པརསྶ ཝཌྜྷིཏབྷཏྟཾ བྷུཉྫནྟོ ཝིཡ སཱཝཀཔཱརམཱིཉཱཎསྶ མཏྠཀཾ པཏྟོ. ཏེནེཝཱཧ ‘‘མཧཱམོགྒལླཱནཏྠེརོ སཏྟཧི དིཝསེཧི ཨརཧཏྟེ པཏིཊྛིཏོ, སཱརིཔུཏྟཏྠེརོ ཨདྡྷམཱསེནཱ’’ཏི.

ཡདིཔི ¶ མཧཱམོགྒལླཱནཏྠེརོ ན ཙིརསྶེཝ ཨརཧཏྟཾ པཏྟོ, དྷམྨསེནཱཔཏི ཏཏོ ཙིརེན, ཨེཝཾ སནྟེཔི སཱརིཔུཏྟཏྠེརོཝ མཧཱཔཉྙཏརོ. མཧཱམོགྒལླཱནཏྠེརོ ཧི སཱཝཀཱནཾ སམྨསནཙཱརཾ ཡཊྛིཀོཊིཡཱ ཨུཔྤཱིལེ༹ནྟོ ཝིཡ ཨེཀདེསམེཝ སམྨསནྟོ སཏྟ དིཝསེ ཝཱཡམིཏྭཱ ཨརཧཏྟཾ པཏྟོ. སཱརིཔུཏྟཏྠེརོ ཋཔེཏྭཱ བུདྡྷཱནཾ པཙྩེཀབུདྡྷཱནཉྩ སམྨསནཙཱརཾ སཱཝཀཱནཾ སམྨསནཙཱརཾ ནིཔྤདེསཾ སམྨསི, ཨེཝཾ སམྨསནྟོ ཨདྡྷམཱསཾ ཝཱཡམི. ཨུཀྐཾསགཏསྶ སཱཝཀཱནཾ སམྨསནཙཱརསྶ ནིཔྤདེསེན པཝཏྟིཡམཱནཏྟཱ སཱཝཀཔཱརམཱིཉཱཎསྶ ཙ ཏཐཱ པརིཔཱཙེཏབྦཏྟཱ. ཡཐཱ ཧི པུརིསོ ‘‘ཝེཎུཡཊྛིཾ གཎྷིསྶཱམཱི’’ཏི མཧཱཛཊཾ ཝེཎུཾ དིསྭཱ ‘‘ཛཊཾ ཚིནྡནྟསྶ པཔཉྩོ བྷཝིསྶཏཱི’’ཏི ཨནྟརེན ཧཏྠཾ པཝེསེཏྭཱ སམྤཏྟམེཝ ཡཊྛིཾ མཱུལེ ཙ ཨགྒེ ཙ ཚིནྡིཏྭཱ ཨཱདཱཡ པཀྐམེཡྻ, སོ ¶ ཀིཉྩཱཔི པཋམཏརཾ གཙྪཏི, ཡཊྛིཾ པན སཱརཾ ཝཱ ཨུཛུཾ ཝཱ ན ལབྷཏི. ཨཔརོ ཏཐཱརཱུཔམེཝ ཝེཎུཾ དིསྭཱ སཙེ སམྤཏྟཡཊྛིཾ གཎྷིསྶཱམི, སཱརཾ ཝཱ ཨུཛུཾ ཝཱ ན ལབྷིསྶཱམཱིཏི ཀཙྪཾ བནྡྷིཏྭཱ མཧནྟེན སཏྠེན ཝེཎུཛཊཾ ཚིནྡིཏྭཱ སཱརཱ ཙེཝ ཨུཛཱུ ཙ ཡཊྛིཡོ ཨུཙྩིནིཏྭཱ ཨཱདཱཡ པཀྐམེཡྻ, ཨཡཾ ཀིཉྩཱཔི པཙྪཱ གཙྪཏི, ཡཊྛིཡོ པན སཱརཱ ཙེཝ ཨུཛཱུ ཙ ལབྷཏི, ཨེཝཾསམྤདམིདཾ ཨིམེསཾ དྭིནྣཾ ཐེརཱནཾ པདྷཱནཾ.

སམྨསནཙཱརོ ཙ ནཱམེཏྠ ཝིཔསྶནཱབྷཱུམི ཝེདིཏབྦཱ སམྨསནཾ ཙརཏི ཨེཏྠཱཏི སམྨསནཙཱརོཏི ཀཏྭཱ. ཏཏྠ བུདྡྷཱནཾ སམྨསནཙཱརོ དསསཧསྶལོཀདྷཱཏུཡཾ སཏྟསནྟཱནགཏཱ ཨནིནྡྲིཡབདྡྷཱ ཙ སངྑཱརཱཏི ཝདནྟི. ཀོཊིསཏསཧསྶཙཀྐཝཱལེ༹སཱུཏི ཨཔརེ. ཏཐཱ ཧི ཨཏྟནིཡཝསེན པཊིཙྩསམུཔྤཱདནཡཾ ཨོཏརིཏྭཱ ཚཏྟིཾསཀོཊིསཏསཧསྶམུཁེན བུདྡྷཱནཾ མཧཱཝཛིརཉཱཎཾ པཝཏྟཾ. པཙྩེཀབུདྡྷཱནཾ སསནྟཱནགཏེཧི སདྡྷིཾ མཛ྄ཛྷིམདེསཝཱསཱིསཏྟསནྟཱནགཏཱ ཨནིནྡྲིཡབདྡྷཱ ཙ སངྑཱརཱ སམྨསནཙཱརོཏི ཝདནྟི. ཛམྦུདཱིཔཝཱསཱིསནྟཱནགཏཱཏི ཀེཙི. སསནྟཱནགཏེ སབྦདྷམྨེ པརསནྟཱནགཏེ ཙ སནྟཱནཝིབྷཱགཾ ཨཀཏྭཱ བཧིདྡྷཱབྷཱཝསཱམཉྙཏོ སམྨསནཾ, ཨཡཾ སཱཝཀཱནཾ སམྨསནཙཱརོ. མོགྒལླཱནཏྠེརོ པན བཧིདྡྷཱ དྷམྨེཔི སསནྟཱནཝིབྷཱགེན ཀེཙི ཀེཙི ཨུདྡྷརིཏྭཱ སམྨསི, ཏཉྩ ཁོ ཉཱཎེན ཕུཊྛམཏྟཾ ཀཏྭཱ. ཏེན ཝུཏྟཾ ‘‘ཡཊྛིཀོཊིཡཱ ཨུཔྤཱིལེ༹ནྟོ ཝིཡ ཨེཀདེསམེཝ སམྨསནྟོ’’ཏི. ཏཏྠ ཉཱཎེན ནཱམ ཡཱཝཏཱ ནེཡྻཾ ཝཏྟིཏབྦཾ, ཏཱཝཏཱ ཨཝཏྟནཏོ ‘‘ཡཊྛིཀོཊིཡཱ ཨུཔྤཱིལེ༹ནྟོ ¶ ཝིཡཱ’’ཏི ཝུཏྟཾ, ཨནུཔདདྷམྨཝིཔསྶནཱཡ ཨབྷཱཝཏོ ‘‘ཨེཀདེསམེཝ སམྨསནྟོ’’ཏི ཝུཏྟཾ. དྷམྨསེནཱཔཏིནོཔི ཡཐཱཝུཏྟསཱཝཀཱནཾ ཝིཔསྶནཱཡ བྷཱུམིཡེཝ སམྨསནཙཱརོ. ཏཏྠ པན ཐེརོ སཱཏིསཡཾ ནིརཝསེསཾ ཨནུཔདཉྩ སམྨཱ ཝིཔསྶི. ཏེན ཝུཏྟཾ ‘‘སཱཝཀཱནཾ སམྨསནཙཱརཾ ནིཔྤདེསཾ སམྨསཱི’’ཏི.

ཨེཏྠ ཙ སུཀྑཝིཔསྶཀཱ ལོཀིཡཱབྷིཉྙཔྤཏྟཱ པཀཏིསཱཝཀཱ མཧཱསཱཝཀཱ ཨགྒསཱཝཀཱ པཙྩེཀབུདྡྷཱ སམྨཱསམྦུདྡྷཱཏི ཚསུ ཛནེསུ སུཀྑཝིཔསྶཀཱནཾ ཛྷཱནཱབྷིཉྙཱཧི ཨནདྷིགཏཔཉྙཱནེཔུཉྙཏྟཱ ཨནྡྷཱནཾ ཝིཡ ཨིཙྪིཏཔདེསོཀྐམནཾ ཝིཔསྶནཱཀཱལེ ཨིཙྪིཏིཙྪིཏདྷམྨབྷཱཝནཱ ནཏྠི, ཏེ ཡཐཱཔརིགྒཧིཏདྷམྨམཏྟེཡེཝ ཝིཔསྶནཾ ཝཌྜྷེནྟི. ལོཀིཡཱབྷིཉྙཔྤཏྟཱ པན པཀཏིསཱཝཀཱ ཡེན མུཁེན ཝིཔསྶནཾ ཨཱརབྷནྟི, ཏཏོ ཨཉྙེནཔི ཝིཔསྶནཾ ཝིཏྠཱརིཀཾ ཀཱཏུཾ སཀྐོནྟི ཝིཔུལཉཱཎཏྟཱ. མཧཱསཱཝཀཱ ཨབྷིནཱིཧཱརསམྤནྣཏྟཱ ཏཏོ སཱཏིསཡཾ ཝིཔསྶནཾ ཝིཏྠཱརིཀཾ ཀཱཏུཾ སཀྐོནྟི. ཨགྒསཱཝཀེསུ དུཏིཡོ ཨབྷིནཱིཧཱརསམྤཏྟིཡཱ སམཱདྷཱནསྶ སཱཏིསཡཏྟཱ ཝིཔསྶནཾ ཏཏོཔི ཝིཏྠཱརིཀཾ ཀརོཏི. པཋམོ པན ཏཏོཔི མཧཱཔཉྙཏཱཡ སཱཝཀེཧི ཨསཱདྷཱརཎཾ ཀཏྭཱ ཝིཔསྶནཾ ཝིཏྠཱརིཀཾ ཀརོཏི. པཙྩེཀབུདྡྷཱ ཏེཧིཔི ¶ མཧཱབྷིནཱིཧཱརཏཱཡ ཨཏྟནོ ཨབྷིནཱིཧཱརཱནུརཱུཔཾ ཏཏོཔི ཝིཏྠཱརིཀཾ ཝིཔསྶནཾ ཀརོནྟི. བུདྡྷཱནཾ སམྨདེཝ པརིཔཱུརིཏཔཉྙཱཔཱརམཱིཔབྷཱཝིཏཱ སབྦཉྙུཏཉྙཱཎཱདྷིགམསྶ ཨནུརཱུཔཱ ཡཐཱ ནཱམ ཀཏཝཱལཝེདྷཔརིཙཡེན སརབྷངྒསདིསེན དྷནུགྒཧེན ཁིཏྟོ སརོ ཨནྟརཱ རུཀྑལཏཱདཱིསུ ཨསཛྫམཱནོ ལཀྑེཡེཝ པཏཏི, ན སཛྫཏི ན ཝིརཛྫཏི, ཨེཝཾ ཨནྟརཱ ཨསཛྫམཱནཱ ཨཝིརཛྫམཱནཱ ཝིཔསྶནཱ སམྨསནཱིཡདྷམྨེསུ ཡཱཐཱཝཏོ ནཱནཱནཡེཧི པཝཏྟཏི, ཡཾ ‘‘མཧཱཝཛིརཉཱཎ’’ནྟི ཝུཙྩཏི.

ཨེཏེསུ ཙ སུཀྑཝིཔསྶཀཱནཾ ཝིཔསྶནཱཙཱརོ ཁཛྫོཏཔྤབྷཱསདིསོ, ཨབྷིཉྙཔྤཏྟཔཀཏིསཱཝཀཱནཾ དཱིཔཔྤབྷཱསདིསོ, མཧཱསཱཝཀཱནཾ ཨུཀྐཱཔྤབྷཱསདིསོ, ཨགྒསཱཝཀཱནཾ ཨོསདྷིཏཱརཀཔྤབྷཱསདིསོ, པཙྩེཀབུདྡྷཱནཾ ཙནྡཔྤབྷཱསདིསོ, སམྨཱསམྦུདྡྷཱནཾ རསྨིསཧསྶཔཊིམཎྜིཏསརདསཱུརིཡམཎྜལསདིསོ ཧུཏྭཱ ཨུཔཊྛཱཏི. ཏཐཱ སུཀྑཝིཔསྶཀཱནཾ ཝིཔསྶནཱཙཱརོ ཨནྡྷཱནཾ ¶ ཡཊྛིཀོཊིཡཱ གམནསདིསོ, ལོཀིཡཱབྷིཉྙཔྤཏྟཔཀཏིསཱཝཀཱནཾ དཎྜཀསེཏུགམནསདིསོ, མཧཱསཱཝཀཱནཾ ཛངྒྷསེཏུགམནསདིསོ, ཨགྒསཱཝཀཱནཾ སཀཊསེཏུགམནསདིསོ, པཙྩེཀབུདྡྷཱནཾ མཧཱཛངྒྷམགྒགམནསདིསོ, སམྨཱསམྦུདྡྷཱནཾ མཧཱསཀཊམགྒགམནསདིསོ. ཏཐཱ བུདྡྷཱནཾ པཙྩེཀབུདྡྷཱནཉྩ ཝིཔསྶནཱ ཙིནྟཱམཡཉཱཎསཾཝཌྜྷིཏཏྟཱ སཡམྦྷཱུཉཱཎབྷཱུཏཱ, ཨིཏརེསཾ སུཏམཡཉཱཎསཾཝཌྜྷིཏཏྟཱ པརོཔདེསསམྦྷཱུཏཱཏི ཝེདིཏབྦཱ.

ཨིདཱནི ཨུབྷིནྣམྤི ཐེརཱནཾ པུབྦཡོགཾ དསྶེཏུཾ ‘‘ཨཏཱིཏེ ཀིརཱ’’ཏིཨཱདིམཱཧ. ཏཾ སབྦཾ ཨུཏྟཱནཏྠམེཝ.

༦༣. གིརིབྦཛནགརནྟི སམནྟཱ པབྦཏཔརིཀྑིཏྟཾ ཝཛསདིསཾ ཧུཏྭཱ ཏིཊྛཏཱིཏི གིརིབྦཛནྟི ཨེཝཾལདྡྷནཱམཾ རཱཛགཧནགརཾ. ཨུསཱུཡནཀིརིཡཱཡ ཀམྨབྷཱཝཾ སནྡྷཱཡ ‘‘ཨུཔཡོགཏྠེ ཝཱ’’ཏི ཝུཏྟཾ.

སཱརིཔུཏྟམོགྒལླཱནཔབྦཛྫཱཀཐཱཝཎྞནཱ ནིཊྛིཏཱ.

ཨུཔཛ྄ཛྷཱཡཝཏྟཀཐཱཝཎྞནཱ

༦༤. ཝཛྫཱཝཛྫཾ ཨུཔནིཛ྄ཛྷཱཡཏཱིཏི ཨུཔཛ྄ཛྷཱཡོ, ནཏྠི ཨུཔཛ྄ཛྷཱཡོ ཨེཏེསནྟི ཨནུཔཛ྄ཛྷཱཡཀཱ. ཏེནཱཧ ‘‘ཝཛྫཱཝཛྫཾ ཨུཔནིཛ྄ཛྷཱཡཀེན གརུནཱ ཝིརཧིཏཱ’’ཏི. ཏཏྠ ཝཛྫཱཝཛྫནྟི ཁུདྡཀཾ ¶ མཧནྟཉྩ ཝཛྫཾ. ཝུདྡྷིཨཏྠོ ཧི ཨཡམཀཱརོ ‘‘ཕལཱཕལ’’ནྟིཨཱདཱིསུ ཝིཡ. ཨུཏྟིཊྛཔཏྟནྟི ཨེཏྠ ཨུཙྪིཊྛ-སདྡསམཱནཏྠོ ཨུཏྟིཊྛ-སདྡོ. ཏེནེཝཱཧ ‘‘ཏསྨིཉྷི མནུསྶཱ ཨུཙྪིཊྛསཉྙིནོ, ཏསྨཱ ཨུཏྟིཊྛཔཏྟནྟི ཝུཏྟ’’ནྟི. པིཎྜཱཡ ཙརཎཀཔཏྟནྟི ཨིམིནཱ པན པཏྟསྶ སརཱུཔདསྶནམུཁེན ཨུཙྪིཊྛཀཔྤནཱཡ ཀཱརཎཾ ཝིབྷཱཝིཏཾ. ཏསྨིནྟི ཏསྨིཾ པིཎྜཱཡ ཙརཎཀཔཏྟེ.

༦༥. སགཱརཝཱ སཔྤཏིསྶཱཏི ཨེཏྠ གརུབྷཱཝོ གཱརཝཾ, པཱསཱཎཙྪཏྟཾ ཝིཡ གརུཀརཎཱིཡཏཱ. སཧ གཱརཝེནཱཏི སགཱརཝཱ. གརུནཱ ཀིསྨིཉྩི ཝུཏྟེ གཱརཝཝསེན པཏིསྶཝནཾ པཏིསྶོ, པཏིསྶཝབྷཱུཏཾ ཏཾསབྷཱགཉྩ ཡཾཀིཉྩི གཱརཝནྟི ཨཏྠོ. སཧ པཏིསྶེནཱཏི སཔྤཏིསྶཱ, ཨོཝཱདཾ སམྤཊིཙྪནྟཱཏི ཨཏྠོ ¶ . པཏིསྶཱིཡཏཱིཏི ཝཱ པཏིསྶོ, གརུཀཱཏབྦོ. ཏེན སཧ པཏིསྶེནཱཏི སཔྤཏིསྶཱ. ཨཊྛཀཐཱཡཾ པན བྱཉྫནཝིཙཱརཾ ཨཀཏྭཱ ཨཏྠམཏྟམེཝ དསྶེཏུཾ ‘‘གརུཀབྷཱཝཉྩེཝ ཛེཊྛཀབྷཱཝཉྩ ཨུཔཊྛཔེཏྭཱ’’ཏི ཝུཏྟཾ. སཱཧཱུཏི སཱདྷུ. ལཧཱུཏི ཨགརུ, མམ ཏུཡ྄ཧཾ ཨུཔཛ྄ཛྷཱཡབྷཱཝེ བྷཱརིཡཾ ནཱམ ནཏྠཱིཏི ཨཏྠོ. ཨོཔཱཡིཀནྟི ཨུཔཱཡཔཊིསཾཡུཏྟཾ ཏེ ཨུཔཛ྄ཛྷཱཡགྒཧཎཾ ཨིམིནཱ ཨུཔཱཡེན ཏྭཾ མེ ཨིཏོ པཊྛཱཡ བྷཱརོ ཛཱཏོསཱིཏི ཝུཏྟཾ ཧོཏི. པཏིརཱུཔནྟི ཨནུརཱུཔཾ ཏཝ ཨུཔཛ྄ཛྷཱཡགྒཧཎནྟི ཨཏྠོ. པཱསཱདིཀེནཱཏི པསཱདཱཝཧེན ཀཱཡཝཙཱིཔཡོགེན. སམྤཱདེཧཱིཏི ཏིཝིདྷསིཀྑཾ ནིཔྥཱདེཧཱིཏི ཨཏྠོ. ཀཱཡེན ཝཱཏི ཧཏྠམུདྡཱདིཾ དསྶེནྟོ ཀཱཡེན ཝཱ ཝིཉྙཱཔེཏི. གཧིཏོ ཏཡཱ…པེ… ཝིཉྙཱཔེཏཱིཏི ‘‘སཱཧཱུ’’ཏིཨཱདཱིསུ ཨེཀཾ ཝདནྟོཡེཝ ཨིམམཏྠཾ ཝིཉྙཱཔེཏཱིཏི ཝུཙྩཏི. ཏེནེཝཱཧ ‘‘ཨིདམེཝ ཧཱི’’ཏིཨཱདི. སཱདྷཱུཏི སམྤཊིཙྪནཾ སནྡྷཱཡཱཏི ཨུཔཛ྄ཛྷཱཡེན ‘‘སཱཧཱུ’’ཏི ཝུཏྟེ སདྡྷིཝིཧཱརིཀསྶ ‘‘སཱདྷཱུ’’ཏི སམྤཊིཙྪནཝཙནཾ སནྡྷཱཡ. ཀསྨཱ ནཔྤམཱཎནྟི ཨཱཧ ‘‘ཨཱཡཱཙནདཱནམཏྟེན ཧཱི’’ཏིཨཱདི, སདྡྷིཝིཧཱརིཀསྶ ‘‘ཨུཔཛ྄ཛྷཱཡོ མེ, བྷནྟེ, ཧོཧཱི’’ཏི ཨཱཡཱཙནམཏྟེན, ཨུཔཛ྄ཛྷཱཡསྶ ཙ ‘‘སཱཧཱུ’’ཏིཨཱདིནཱ དཱནཝཙནམཏྟེནཱཏི ཨཏྠོ. ན ཨེཏྠ སམྤཊིཙྪནཾ ཨངྒནྟི སདྡྷིཝིཧཱརིཀསྶ སམྤཊིཙྪནཝཙནཾ ཨེཏྠ ཨུཔཛ྄ཛྷཱཡགྒཧཎེ ཨངྒཾ ན ཧོཏི.

༦༦. སམྨཱཝཏྟནཱཏི སམྨཱཔཝཏྟི. ཨསྶཱཏི སདྡྷིཝིཧཱརིཀསྶ. ཏཱདིསམེཝ མུཁདྷོཝནོདཀཾ དཱཏབྦནྟི ཨུཏུམྷི སརཱིརསབྷཱཝེ ཙ ཨེཀཱཀཱརེ ཏཱདིསམེཝ དཱཏབྦཾ. དྭེ ཙཱིཝརཱནཱིཏི པཱརུཔནཾ སངྒྷཱཊིཉྩ སནྡྷཱཡ ཝདཏི. ཡདི ཨེཝཾ ‘‘སངྒྷཱཊིཡོ’’ཏི ཀསྨཱ ཝུཏྟནྟི ཨཱཧ ‘‘སབྦཉྷི ཙཱིཝརཾ སངྒྷཊིཏཏྟཱ སངྒྷཱཊཱིཏི ཝུཙྩཏཱི’’ཏི. པདཝཱིཏིཧཱརེཧཱིཏི ཨེཏྠ པདཾ ཝཱིཏིཧརཏི ཨེཏྠཱཏི པདཝཱིཏིཧཱརོ, པདཝཱིཏིཧརཎཊྛཱནཾ དཱུཏཝིལམྦིཏཾ ཨཀཏྭཱ སམགམནེ དྭིནྣཾ པདཱནཾ ཨནྟརེ མུཊྛིརཏནམཏྟཾ. པདཱནཾ ཝཱ ཝཱིཏིཧརཎཾ ཨབྷིམུཁཾ ཧརིཏྭཱ ནིཀྑེཔོ པདཝཱིཏིཧཱརོཏི ¶ ཨེཝམེཏྠ ཨཏྠོ དཊྛབྦོ. ཨིཏོ པཊྛཱཡཱཏི ‘‘ན ཨུཔཛ྄ཛྷཱཡསྶ བྷཎམཱནསྶཱ’’ཏི ཨེཏྠ ཝུཏྟ ན-ཀཱརཏོ པཊྛཱཡ. སབྦཏྠ དུཀྐཊཱཔཏྟི ཝེདིཏབྦཱཏི ‘‘ཨཱིདིསེསུ གིལཱནོཔི ན མུཙྩཏཱི’’ཏི དསྶནཏྠཾ ཝུཏྟཾ. ཨཉྙམྤི ཧི ཡཐཱཝུཏྟཾ ཨུཔཛ྄ཛྷཱཡཝཏྟཾ ཨནཱདརིཡེན ཨཀརོནྟསྶ ཨགིལཱནསྶ ཝཏྟབྷེདེ སབྦཏྠ དུཀྐཊམེཝ. ཏེནེཝ ཝཀྑཏི ‘‘ཨགིལཱནེན ཧི སདྡྷིཝིཧཱརིཀེན སཊྛིཝསྶེནཔི སབྦཾ ཨུཔཛ྄ཛྷཱཡཝཏྟཾ ¶ ཀཱཏབྦཾ, ཨནཱདརེན ཨཀརོནྟསྶ ཝཏྟབྷེདེ དུཀྐཊཾ. ན-ཀཱརཔཊིསཾཡུཏྟེསུ པན པདེསུ གིལཱནསྶཔི པཊིཀྑིཏྟཀིརིཡཾ ཀརོནྟསྶ དུཀྐཊམེཝཱ’’ཏི (མཧཱཝ. ཨཊྛ. ༦༤). ཨཱཔཏྟིཡཱ ཨཱསནྣཝཱཙནྟི ཨཱཔཏྟིཛནཀམེཝ ཝཙནཾ སནྡྷཱཡ ཝདཏི. ཡཱཡ ཧི ཝཱཙཱཡ ཨཱཔཏྟིཾ ཨཱཔཛྫཏི, སཱ ཝཱཙཱ ཏསྶཱ ཨཱཔཏྟིཡཱ ཨཱསནྣཱཏི ཝུཙྩཏི.

ཙཱིཝརེན པཏྟཾ ཝེཋེཏྭཱཏི ཨེཏྠ ‘‘ཨུཏྟརཱསངྒསྶ ཨེཀེན ཀཎྞེན ཝེཋེཏྭཱ’’ཏི གཎྛིཔདེསུ ཝུཏྟཾ. གཱམེཏི གཱམཔརིཡཱཔནྣེ ཏཱདིསེ ཀིསྨིཉྩི པདེསེ. ཨནྟརགྷརེཏི ཨནྟོགེཧེ. པཊིཀྐམནེཏི ཨཱསནསཱལཱཡཾ. ཏིཀྑཏྟུཾ པཱནཱིཡེན པུཙྪིཏབྦོཏི སམྦནྡྷོ, ཨཱདིམྷི མཛ྄ཛྷེ ཨནྟེཏི ཨེཝཾ ཏིཀྑཏྟུཾ པུཙྪིཏབྦོཏི ཨཏྠོ. ཨུཔཀཊྛོཏི ཨཱསནྣོ. དྷོཏཝཱལིཀཱཡཱཏི ནིརཛཱཡ པརིསུདྡྷཝཱལིཀཱཡ. སཙེ པཧོཏཱིཏི ཝུཏྟམེཝཏྠཾ ཝིབྷཱཝེཏི ‘‘ན ཀེནཙི གེལཉྙེན ཨབྷིབྷཱུཏོ ཧོཏཱི’’ཏི. པརིཝེཎཾ གནྟྭཱཏི ཨུཔཛ྄ཛྷཱཡསྶ པརིཝེཎཾ གནྟྭཱ.

ཨུཔཛ྄ཛྷཱཡཝཏྟཀཐཱཝཎྞནཱ ནིཊྛིཏཱ.

༦༧. སདྡྷིཝིཧཱརིཀཝཏྟཀཐཱ ཨུཏྟཱནཏྠཱཡེཝ.

ནསམྨཱཝཏྟནཱདིཀཐཱཝཎྞནཱ

༦༨. ནསམྨཱཝཏྟནཱདིཀཐཱཡཾ གེཧསྶིཏཔེམནྟི ‘‘པིཏཱ མེ ཨཡ’’ནྟི ཨེཝཾ ཨུཔྤནྣཔེམཾ. ཨུཔཛ྄ཛྷཱཡམྷི པིཏུཙིཏྟུཔཊྛཱནམེཝ ཧི ཨིདྷ གེཧསྶིཏཔེམཾ ནཱམ. ན ཧི ཨིདཾ ཨཀུསལཔཀྑིཡཾ གེཧསྶིཏཔེམཾ སནྡྷཱཡ ཝུཏྟཾ པཊིཝིདྡྷསཙྩཱནཾ པཧཱིནཱནུགེདྷཱནཾ ཏདསམྦྷཝཏོ, ན ཙ བྷགཝཱ བྷིཀྑཱུ སཾཀིལེསེ ནིཡོཛེཏི, གེཧསྶིཏཔེམསདིསཏྟཱ པན པེམམུཁེན མེཏྟཱསིནེཧོ ཨིདྷ ཝུཏྟོཏི ཝེདིཏབྦཾ. ‘‘ཏེསུ ཨེཀོ ཝཏྟསམྤནྣོ བྷིཀྑུ…པེ… ཏེསཾ ཨནཱཔཏྟཱི’’ཏི ཝཙནཏོ སཙེ ཨེཀོ ཝཏྟསམྤནྣོ བྷིཀྑུ ‘‘བྷནྟེ, ཏུམྷེ ཨཔྤོསྶུཀྐཱ ཧོཐ, ཨཧཾ ཏུམྷཱཀཾ སདྡྷིཝིཧཱརིཀཾ ཨནྟེཝཱསིཀཾ ཝཱ གིལཱནཾ ཨུཔཊྛཧིསྶཱམི, ཨོཝདིཏབྦཾ ཨོཝདིསྶཱམི, ཨིཏི ཀརཎཱིཡེསུ ཨུསྶུཀྐཾ ཨཱཔཛྫིསྶཱམཱི’’ཏི ཝདཏི, ཏེ ཨེཝ ཝཱ སདྡྷིཝིཧཱརིཀཱདཡོ ‘‘བྷནྟེ, ཏུམྷེ ཀེཝལཾ ཨཔྤོསྶུཀྐཱ ¶ ཧོཐཱ’’ཏི ཝདནྟི, ཝཏྟཾ ཝཱ ན སཱདིཡནྟི ¶ , ཏཏོ པཊྛཱཡ ཨཱཙརིཡུཔཛ྄ཛྷཱཡཱནཾ ཨནཱཔཏྟཱིཏི ཝདནྟི. སེསམེཏྠ ཨུཏྟཱནམེཝ.

ནསམྨཱཝཏྟནཱདིཀཐཱཝཎྞནཱ ནིཊྛིཏཱ.

རཱདྷབྲཱཧྨཎཝཏྠུཀཐཱཝཎྞནཱ

༦༩. རཱདྷབྲཱཧྨཎཝཏྠུམྷི ཀིསོ ཨཧོསཱིཏི ཁཱདིཏུཾ ཝཱ བྷུཉྫིཏུཾ ཝཱ ཨསཀྐོནྟོ ཏནུཀོ ཨཧོསི ཨཔྤམཾསལོཧིཏོ. ཨུཔྤཎྜུཔྤཎྜུཀཛཱཏོཏི སཉྫཱཏུཔྤཎྜུཔྤཎྜུཀབྷཱཝོ པཎྜུཔལཱསཔྤཊིབྷཱགོ. དྷམནིསནྠཏགཏྟོཏི པརིཡཱདིནྣམཾསལོཧིཏཏྟཱ སིརཱཛཱལེནེཝ སནྠརིཏགཏྟོ. ཨདྷིཀཱརནྟི ཨདྷིཀིརིཡཾ, སཀྐཱརནྟི ཝུཏྟཾ ཧོཏི. ཀཏཾ ཛཱནནྟཱིཏི ཀཏཉྙུནོ, ཀཏཾ པཱཀཊཾ ཀཏྭཱ ཛཱནནྟཱིཏི ཀཏཝེདིནོ. ཀིཾ པན ཐེརོ བྷགཝཏཱ བཱརཱཎསིཡཾ ཏཱིཧི སརཎགམནེཧི ཨནུཉྙཱཏཾ པབྦཛྫཾ ཨུཔསམྤདཉྩ ན ཛཱནཱཏཱིཏི? ནོ ན ཛཱནཱཏི. ཡདི ཨེཝཾ ‘‘ཀཐཱཧཾ, བྷནྟེ, ཏཾ བྲཱཧྨཎཾ པབྦཱཛེམི ཨུཔསམྤཱདེམཱི’’ཏི ཀསྨཱ ཨཱཧཱཏི ཨིམཾ ཨནུཡོགཾ སནྡྷཱཡཱཧ ‘‘ཀིཉྩཱཔི ཨཱཡསྨཱ སཱརིཔུཏྟོ’’ཏིཨཱདི. པརིམཎྜལེཧཱིཏི པརིཔུཎྞེཧི. ཨཉྙཐཱ ཝཱ ཝཏྟབྦཾ ཨཉྙཐཱ ཝདཏཱིཏི ‘‘བྷནྟེ’’ཏི ཝཏྟབྦཾ ‘‘བནྡྷེ’’ཏི ཝདཏི.

༧༡-༧༣. སམནནྟརཱཏི ཨནནྟརཾ. པཎྞཏྟིཝཱིཏིཀྐམཾ ཀརོཏཱིཏི སིཀྑཱཔདཝཱིཏིཀྐམཾ ཀརོཏི. ཨཏྟབྷཱཝཔརིཧརཎཏྠཾ ནིསྶཱིཡནྟཱིཏི ནིསྶཡཱ, པིཎྜིཡཱལོཔབྷོཛནཱདིཀཱ ཙཏྟཱརོ པཙྩཡཱ. ཏཏྠ པིཎྜིཡཱལོཔབྷོཛནནྟི ཛངྒྷཔིཎྜིཡབལེན ཙརིཏྭཱ ཨཱལོཔམཏྟཾ ལདྡྷབྷོཛནཾ. ཨཏིརེཀལཱབྷོཏི ‘‘པིཎྜིཡཱལོཔབྷོཛནཾ ནིསྶཱཡཱ’’ཏི ཨེཝཾ ཝུཏྟབྷིཀྑཱཧཱརལཱབྷཏོ ཨདྷིཀལཱབྷོ སངྒྷབྷཏྟཱདི. ཏཏྠ སཀལསྶ སངྒྷསྶ དཱཏབྦབྷཏྟཾ སངྒྷབྷཏྟཾ. ཀཏིཔཡེ བྷིཀྑཱུ ཨུདྡིསིཏྭཱ དཱཏབྦབྷཏྟཾ ཨུདྡེསབྷཏྟཾ. ནིམནྟེཏྭཱ དཱཏབྦབྷཏྟཾ ནིམནྟནཾ. སལཱཀཾ གཱཧཱཔེཏྭཱ དཱཏབྦབྷཏྟཾ སལཱཀབྷཏྟཾ. ཨེཀསྨིཾ པཀྑེ ཨེཀདིཝསཾ དཱཏབྦབྷཏྟཾ པཀྑིཀཾ. ཨུཔོསཐེ དཱཏབྦབྷཏྟཾ ཨུཔོསཐིཀཾ. པཱཊིཔདདིཝསེ དཱཏབྦབྷཏྟཾ པཱཊིཔདིཀཾ. ཝིཏྠཱརཀཐཱ ནེསཾ སེནཱསནཀྑནྡྷཀཝཎྞནཱཡཾ ཨཱཝི བྷཝིསྶཏི.

ཝིཧཱརོཏི ¶ པཱཀཱརཔརིཙྪིནྣོ སཀལོ ཨཱཝཱསོ. ཨཌྜྷཡོགོཏི

དཱིགྷཔཱསཱདོ. གརུལ༹སཎྛཱནཔཱསཱདོཏིཔི ཝདནྟི. པཱསཱདོཏི ཙཏུརསྶཔཱསཱདོ. ཧམྨིཡནྟི མུཎྜཙྪདནཔཱསཱདོ. ཨཔརེ པན བྷཎནྟི ‘‘ཝིཧཱརོ ནཱམ དཱིགྷམུཁཔཱསཱདོ, ཨཌྜྷཡོགོ ཨེཀཔསྶཙྪདནཀསེནཱསནཾ ¶ , ཏསྶ ཀིར ཨེཀཔསྶེ བྷིཏྟི ཨུཙྩཏརཱ ཧོཏི, ཨིཏརཔསྶེ ནཱིཙཱ, ཏེན ཏཾ ཨེཀཔསྶཙྪདནཀཾ ཧོཏི, པཱསཱདོ ཨཱཡཏཙཏུརསྶཔཱསཱདོ, ཧམྨིཡཾ མུཎྜཙྪདནཾ ཙནྡིཀངྒཎཡུཏྟ’’ནྟི. གུཧཱཏི པབྦཏགུཧཱ. པཱུཏིམུཏྟནྟི ཡཾ ཀིཉྩི མུཏྟཾ. ཡཐཱ སུཝཎྞཝཎྞོཔི ཀཱཡོ ‘‘པཱུཏིཀཱཡོ’’ཏི ཝུཙྩཏི, ཨེཝཾ ཨབྷིནཝམྤི མུཏྟཾ པཱུཏིམུཏྟམེཝ. སེསམེཏྠ ཨུཏྟཱནཏྠམེཝ.

རཱདྷབྲཱཧྨཎཝཏྠུཀཐཱཝཎྞནཱ ནིཊྛིཏཱ.

ཨཱཙརིཡཝཏྟཀཐཱཝཎྞནཱ

༧༥. ཨུཔསེནཝཏྠུམྷི ཨཱཙིཎྞནྟི ཙརིཏཾ ཝཏྟཾ ཨནུདྷམྨཏཱ. ཀཙྩི བྷིཀྑུ ཁམནཱིཡནྟི བྷིཀྑུ ཀཙྩི ཏུཡ྄ཧཾ ཨིདཾ ཙཏུཙཀྐཾ ནཝདྭཱརཾ སརཱིརཡནྟཾ ཁམནཱིཡཾ སཀྐཱ ཁམིཏུཾ སཧིཏུཾ པརིཧརིཏུཾ, ན ཀིཉྩི དུཀྑཾ ཨུཔྤཱདེཏཱིཏི. ཀཙྩི ཡཱཔནཱིཡནྟི ཀཙྩི སབྦཀིཙྩེསུ ཡཱཔེཏུཾ སཀྐཱ, ན ཀིཉྩི ཨནྟརཱཡཾ དསྶེཏཱིཏི. ཛཱནནྟཱཔི ཏཐཱགཏཱཏིཨེཝམཱདི ཡཾ པརཏོ ‘‘ཀཏི ཝསྶོསི ཏྭཾ བྷིཀྑཱུ’’ཏིཨཱདིནཱ པུཙྪི, ཏསྶ པརིཧཱརདསྶནཏྠཾ ཝུཏྟཾ. ཏཏྲཱཡཾ སངྑེཔཏྠོ – ཏཐཱགཏཱ ནཱམ ཛཱནནྟཱཔི སཙེ ཏཱདིསཾ པུཙྪཱཀཱརཎཾ ཧོཏི, པུཙྪནྟི. སཙེ པན ཏཱདིསཾ པུཙྪཱཀཱརཎཾ ནཏྠི, ཛཱནནྟཱཔི ན པུཙྪནྟི. ཡསྨཱ པན བུདྡྷཱནཾ ཨཛཱནནཾ ནཱམ ནཏྠི, ཏསྨཱ ‘‘ཨཛཱནནྟཱཔཱི’’ཏི ན ཝུཏྟཾ. ཀཱལཾ ཝིདིཏྭཱ པུཙྪནྟཱིཏི སཙེ ཏསྶཱ པུཙྪཱཡ སོ ཀཱལོ ཧོཏི, ཨེཝཾ ཏཾ ཀཱལཾ ཝིདིཏྭཱ པུཙྪནྟི. སཙེ ན ཧོཏི, ཨེཝམྤི ཀཱལཾ ཝིདིཏྭཱཝ ན པུཙྪནྟི. ཨེཝཾ པུཙྪནྟཱཔི ཙ ཨཏྠསཾཧིཏཾ ཏཐཱགཏཱ པུཙྪནྟི, ཡཾ ཨཏྠནིསྶིཏཾ ཀཱརཎནིསྶིཏཾ, ཏདེཝ པུཙྪནྟི, ནོ ཨནཏྠསཾཧིཏཾ. ཀསྨཱ? ཡསྨཱ ཨནཏྠསཾཧིཏེ སེཏུགྷཱཏོ ཏཐཱགཏཱནཾ. སེཏུ ཝུཙྩཏི མགྒོ, མགྒེནེཝ ཏཱདིསསྶ ཝཙནསྶ གྷཱཏོ སམུཙྪེདོཏི ཝུཏྟཾ ཧོཏི.

ཨིདཱནི ཨཏྠསཾཧིཏནྟི ཨེཏྠ ཡཾ ཨཏྠནིསྶིཏཾ ཝཙནཾ ཏཐཱགཏཱ པུཙྪནྟི, ཏཾ དསྶེནྟོ ‘‘དྭཱིཧི ཨཱཀཱརེཧཱི’’ཏིཨཱདིམཱཧ. ཏཏྠ ཨཱཀཱརེཧཱིཏི ཀཱརཎེཧི ¶ . དྷམྨཾ ཝཱ དེསེསྶཱམཱཏི ཨཊྛུཔྤཏྟིཡུཏྟཾ སུཏྟཾ ཝཱ པུབྦཙརིཏཀཱརཎཡུཏྟཾ ཛཱཏཀཾ ཝཱ ཀཐཡིསྶཱམ. སཱཝཀཱནཾ ཝཱ སིཀྑཱཔདཾ པཉྙཔེསྶཱམཱཏི སཱཝཀཱནཾ ཝཱ ཏཱཡ པུཙྪཱཡ ཝཱིཏིཀྐམཾ པཱཀཊཾ ཀཏྭཱ གརུཀཾ ཝཱ ལཧུཀཾ ཝཱ སིཀྑཱཔདཾ པཉྙཔེསྶཱམ ཨཱཎཾ ཋཔེསྶཱམ. ཨཏིལཧུནྟི ཨཏིསཱིགྷཾ.

༧༦. ཨཉྙཏིཏྠིཡཝཏྠུམྷི ཨཉྙཏིཏྠིཡཔུབྦོཏི པུབྦེ ཨཉྙཏིཏྠིཡོ བྷཱུཏོཏི ཨཉྙཏིཏྠིཡཔུབྦོ. ཨེཏྠ (ཨ. ནི. ཨཊྛ. ༢.༣.༦༢) ཙ ཏིཏྠཾ ཛཱནིཏབྦཾ, ཏིཏྠཀརོ ཛཱནིཏབྦོ ¶ , ཏིཏྠིཡཱ ཛཱནིཏབྦཱ, ཏིཏྠིཡསཱཝཀཱ ཛཱནིཏབྦཱ. ཏཏྠ ཏིཏྠཾ ནཱམ དྭཱསཊྛི དིཊྛིཡོ. ཨེཏྠ ཧི སཏྟཱ ཏརནྟི ཨུཔྤིལཝནྟི ཨུམྨུཛྫནིམུཛྫཾ ཀརོནྟི, ཏསྨཱ ‘‘ཏིཏྠ’’ནྟི ཝུཙྩནྟི. ཏཱསཾ དིཊྛཱིནཾ ཨུཔྤཱདེཏཱ ཏིཏྠཀརོ ནཱམ པཱུརཎཀསྶཔཱདིཀོ. ཏསྶ ལདྡྷིཾ གཧེཏྭཱ པབྦཛིཏཱ ཏིཏྠིཡཱ ནཱམ. ཏེ ཧི ཏིཏྠེ ཛཱཏཱཏི ཏིཏྠིཡཱ, ཡཐཱཝུཏྟཾ ཝཱ དིཊྛིགཏསངྑཱཏཾ ཏིཏྠཾ ཨེཏེསཾ ཨཏྠཱིཏི ཏིཏྠིཀཱ, ཏིཏྠིཀཱ ཨེཝ ཏིཏྠིཡཱ. ཏེསཾ པཙྩཡདཱཡཀཱ ཏིཏྠིཡསཱཝཀཱཏི ཝེདིཏབྦཱ. སཧདྷམྨིཀཾ ཝུཙྩམཱནོཏི སཧདྷམྨིཀེན ཝུཙྩམཱནོ, ཀརཎཏྠེ ཨུཔཡོགཝཙནཾ. པཉྩཧི སཧདྷམྨིཀེཧི སིཀྑིཏབྦཏྟཱ, ཏེསཾ ཝཱ སནྟཀཏྟཱ ‘‘སཧདྷམྨིཀ’’ནྟི ལདྡྷནཱམེན བུདྡྷཔཉྙཏྟེན སིཀྑཱཔདེན ཝུཙྩམཱནོཏི ཨཏྠོ. པསཱུརོཏི ཏསྶ ནཱམཾ. པརིབྦཱཛཀོཏི གིཧིབནྡྷནཾ པཧཱཡ པབྦཛྫུཔགཏོ.

ཏཾཡེཝ ཏིཏྠཱཡཏནནྟི ཨེཏྠ དྭཱསཊྛིདིཊྛིསངྑཱཏཾ ཏིཏྠམེཝ ཨཱཡཏནནྟི ཏིཏྠཱཡཏནཾ, ཏིཏྠཾ ཝཱ ཨེཏེསཾ ཨཏྠཱིཏི ཏིཏྠིནོ, ཏིཏྠིཡཱ, ཏེསཾ ཨཱཡཏནནྟིཔི ཏིཏྠཱཡཏནཾ. ཨཱཡཏནནྟི ཙ ‘‘ཨསྶཱནཾ ཀམྦོཛོ ཨཱཡཏནཾ, གུནྣཾ དཀྑིཎཔཐོ ཨཱཡཏན’’ནྟི ཨེཏྠ སཉྫཱཏིཊྛཱནཾ ཨཱཡཏནཾ ནཱམ.

‘‘མནོརམེ ཨཱཡཏནེ, སེཝནྟི ནཾ ཝིཧངྒམཱ;

ཚཱཡཾ ཚཱཡཏྠིནོ ཡནྟི, ཕལཏྠཾ ཕལབྷོཛིནོ’’ཏི. (ཨ. ནི. ༥.༣༨) –

ཨེཏྠ སམོསརཎཊྛཱནཾ. ‘‘པཉྩིམཱནི, བྷིཀྑཝེ, ཝིམུཏྟཱཡཏནཱནཱི’’ཏི (ཨ. ནི. ༥.༢༦) ཨེཏྠ ཀཱརཎཾ, ཏཾ ཨིདྷ སབྦམྤི ལབྦྷཏི. སབྦེཔི ཧི དིཊྛིགཏིཀཱ སཉྫཱཡམཱནཱ ཨིམཱསུཡེཝ དྭཱསཊྛིཡཱ དིཊྛཱིསུ སཉྫཱཡནྟི, སམོསརམཱནཱཔི ཨེཏཱསུཡེཝ སམོསརནྟི སནྣིཔཏནྟི, དིཊྛིགཏིཀབྷཱཝེ ཙ ནེསཾ ཨིམཱཡེཝ དྭཱསཊྛི དིཊྛིཡོ ¶ ཀཱརཎཾ, ཏསྨཱ ཡཐཱཝུཏྟཾ ཏིཏྠམེཝ སཉྫཱཏིཨཱདིནཱ ཨཏྠེན ཨཱཡཏནནྟི ཏིཏྠཱཡཏནཾ, ཏེནེཝཏྠེན ཏིཏྠཱིནཾ ཨཱཡཏནནྟིཔི ཏིཏྠཱཡཏནཾ.

ཨཱཡསྨཏོ ནིསྶཱཡ ཝཙྪཱམཱིཏི ཨེཏྠ ཨཱཡསྨཏོཏི ཨུཔཡོགཏྠེ སཱམིཝཙནཾ, ཨཱཡསྨནྟཾ ནིསྶཱཡ ཝསིསྶཱམཱིཏི ཨཏྠོ. བྱཏྟོ…པེ… ཝུཏྟལཀྑཎོཡེཝཱཏི པརིསུཔཊྛཱཔཀབཧུསྶུཏཾ སནྡྷཱཡ ཝདཏི. པཉྩཧུཔཱལི ཨངྒེཧཱིཏིཨཱདཱིསུ ཡཾ ཝཏྟབྦཾ, ཏཾ པརཏོ ཨཱཝི བྷཝིསྶཏི.

ཨཱཙརིཡཝཏྟཀཐཱཝཎྞནཱ ནིཊྛིཏཱ.

པཎཱམནཱཁམཱཔནཱཀཐཱཝཎྞནཱ

༨༠. ཡཾ ¶ པུབྦེ ལཀྑཎཾ ཝུཏྟནྟི སམྦནྡྷོ, ‘‘ཏེནེཝ ལཀྑཎེན ནིསྶཡནྟེཝཱསིཀསྶ ཨཱཔཏྟི ཝེདིཏབྦཱ’’ཏི པོཏྠཀེསུ པཱཋོ དིསྶཏི, ‘‘ན ཏེནེཝ ལཀྑཎེན ནིསྶཡནྟེཝཱསིཀསྶ ཨཱཔཏྟི ཝེདིཏབྦཱ’’ཏི ཨེཝཾ པནེཏྠ པཱཋོ ཝེདིཏབྦོ. སདྡྷིཝིཧཱརིཀསྶ ཝུཏྟལཀྑཎེན ནིསྶཡནྟེཝཱསིཀསྶ ཨཱཔཏྟི ན ཝེདིཏབྦཱཏི ཨེཝཾ པནེཏྠ ཨཏྠོཔི ཝེདིཏབྦོ. ཨཉྙཐཱ ‘‘ནིསྶཡནྟེཝཱསིཀེན ཧི ཡཱཝ ཨཱཙརིཡཾ ནིསྶཱཡ ཝསཏི, ཏཱཝ སབྦཾ ཨཱཙརིཡཝཏྟཾ ཀཱཏབྦ’’ནྟི ཨིདཾ ཝིརུཛ྄ཛྷེཡྻ. ཨིདཉྷི ཝཙནཾ ནིསྶཡནྟེཝཱསིཀསྶ ཨམུཏྟནིསྶཡསྶེཝ ཝཏྟཾ ཨཀརོནྟསྶ ཨཱཔཏྟཱིཏི དཱིཔེཏི. ཏསྨཱ སདྡྷིཝིཧཱརིཀསྶ ཡཐཱཝུཏྟཝཏྟཾ ཨཀརོནྟསྶ ནིསྶཡམུཏྟཀསྶ ཨམུཏྟཀསྶཔི ཨཱཔཏྟི, ནིསྶཡནྟེཝཱསིཀསྶ པན ཨམུཏྟནིསྶཡསྶེཝ ཨཱཔཏྟཱིཏི གཧེཏབྦཾ. ཏེནེཝ ཝིསུདྡྷིམགྒེཔི (ཝིསུདྡྷི. ༡.༤༡) ཉཱཏིཔལིབོདྷཀཐཱཡཾ –

‘‘ཉཱཏཱིཏི ཝིཧཱརེ ཨཱཙརིཡུཔཛ྄ཛྷཱཡསདྡྷིཝིཧཱརིཀཨནྟེཝཱསིཀསམཱནུཔཛ྄ཛྷཱཡཀསམཱནཱཙརིཡཀཱ, གྷརེ མཱཏཱ པིཏཱ བྷགིནཱི བྷཱཏཱཏི ཨེཝམཱདིཀཱ. ཏེ གིལཱནཱ ཨིམསྶ པལིབོདྷཱ ཧོནྟི, ཏསྨཱ སོ པལིབོདྷོ ཨུཔཊྛཧིཏྭཱ ཏེསཾ པཱཀཏིཀཀརཎེན ཨུཔཙྪིནྡིཏབྦོ. ཏཏྠ ཨུཔཛ྄ཛྷཱཡོ ཏཱཝ གིལཱནོ སཙེ ལཧུཾ ན ཝུཊྛཱཏི, ཡཱཝཛཱིཝཾ པཊིཛགྒིཏབྦོ. ཏཐཱ ¶ པབྦཛྫཱཙརིཡོ ཨུཔསམྤདཱཙརིཡོ སདྡྷིཝིཧཱརིཀོ ཨུཔསམྤཱདིཏཔབྦཱཛིཏཨནྟེཝཱསིཀསམཱནུཔཛ྄ཛྷཱཡཀཱ ཙ. ནིསྶཡཱཙརིཡ ཨུདྡེསཱཙརིཡ ནིསྶཡནྟེཝཱསིཀ ཨུདྡེསནྟེཝཱསིཀསམཱནཱཙརིཡཀཱ པན ཡཱཝ ནིསྶཡཨུདྡེསཱ ཨནུཔཙྪིནྣཱ, ཏཱཝ པཊིཛགྒིཏབྦཱ’’ཏི –

ཝིབྷཱགེན ཝུཏྟཾ. ཨཡཉྩ ཝིབྷཱགོ ‘‘ཏེནེཝ ལཀྑཎེན ནིསྶཡནྟེཝཱསིཀསྶ ཨཱཔཏྟི ཝེདིཏབྦཱ’’ཏི ཨེཝཾ པཱཋེ སཏི ན ཡུཛྫེཡྻ. ཨཡཉྷི པཱཋོ སདྡྷིཝིཧཱརིཀསྶ ཝིཡ ནིསྶཡནྟེཝཱསིཀསྶཔི ཡཐཱཝུཏྟཝཏྟཾ ཨཀརོནྟསྶ ནིསྶཡམུཏྟཀསྶ ཨམུཏྟཀསྶཔི ཨཱཔཏྟཱིཏི ཨིམམཏྠཾ དཱིཔེཏི, ཏསྨཱ ཝུཏྟནཡེནེཝེཏྠ པཱཋོ གཧེཏབྦོ.

པབྦཛྫཨུཔསམྤདདྷམྨནྟེཝཱསིཀེཧི པན…པེ… ཏཱཝ ཝཏྟཾ ཀཱཏབྦནྟི པབྦཛྫཱཙརིཡཨུཔསམྤདཱཙརིཡདྷམྨཱཙརིཡཱནཾ

ཨེཏེཧི ཡཐཱཝུཏྟཝཏྟཾ ཀཱཏབྦཾ. ཏཏྠ ཡེན སིཀྑཱཔདཱནི དིནྣཱནི, ཨཡཾ ¶ པབྦཛྫཱཙརིཡོ. ཡེན ཨུཔསམྤདཀམྨཝཱཙཱ ཝུཏྟཱ, ཨཡཾ ཨུཔསམྤདཱཙརིཡོ. ཡོ ཨུདྡེསཾ པརིཔུཙྪཾ ཝཱ དེཏི, ཨཡཾ དྷམྨཱཙརིཡོཏི ཝེདིཏབྦཾ. སེསམེཏྠ ཨུཏྟཱནམེཝ.

པཎཱམནཱཁམཱཔནཱཀཐཱཝཎྞནཱ ནིཊྛིཏཱ.

ནིསྶཡཔཊིཔྤསྶདྡྷིཀཐཱཝཎྞནཱ

༨༣. ནིསྶཡཔཊིཔྤསྶདྡྷིཀཐཱཡཾ དིསཾ གཏོཏི པུན ཨཱགནྟུཀཱམོ ཨནཱགནྟུཀཱམོ ཝཱ ཧུཏྭཱ ཝཱསཏྠཱཡ ཀཉྩི དིསཾ གཏོ. བྷིཀྑུནོ སབྷཱགཏནྟི པེསལབྷཱཝཾ. ཨོལོཀེཏྭཱཏི ཨུཔཔརིཀྑིཏྭཱ. ཝིབྦྷནྟེ…པེ… ཏཏྠ གནྟབྦནྟི ཨེཏྠ སཙེ ཀེནཙི ཀརཎཱིཡེན ཏདཧེཝ གནྟུཾ ཨསཀྐོནྟོ ཀཏིཔཱཧེན གམིསྶཱམཱིཏི གམནེ སཨུསྶཱཧོ ཧོཏི, རཀྑཏཱིཏི ཝདནྟི. མཱ ཨིདྷ པཊིཀྐམཱིཏི མཱ ཨིདྷ པཝིསི. ཏཏྲེཝ ཝསིཏབྦནྟི ཏཏྠེཝ ནིསྶཡཾ གཧེཏྭཱ ཝསིཏབྦཾ. ཏཾཡེཝ ཝིཧཱརཾ…པེ… ཝསིཏུཾ ཝཊྚཏཱིཏི ཨེཏྠ ཨུཔཛ྄ཛྷཱཡེན པརིཙྩཏྟཏྟཱ ཨུཔཛ྄ཛྷཱཡསམོདྷཱནཔརིཧཱརོ ནཏྠི, ཏསྨཱ ཨུཔཛ྄ཛྷཱཡེན སམོདྷཱནགཏསྶཔི ཨཱཙརིཡསྶ སནྟིཀེ གཧིཏནིསྶཡོ ན པཊིཔྤསྶམྦྷཏི.

ཨཱཙརིཡམྷཱ ¶ ནིསྶཡཔཊིཔྤསྶདྡྷཱིསུ ཨཱཙརིཡོ པཀྐནྟོ ཝཱ ཧོཏཱིཏི ཨེཏྠ ‘‘པཀྐནྟོཏི དིསཾ གཏོ’’ཏིཨཱདིནཱ ཨུཔཛ྄ཛྷཱཡསྶ པཀྐམནེ ཡོ ཝིནིཙྪཡོ ཝུཏྟོ, སོ ཏཏྠ ཝུཏྟནཡེནེཝ ཨིདྷཱཔི སཀྐཱ ཝིཉྙཱཏུནྟི ཏཾ ཨཝཏྭཱ ‘‘ཀོཙི ཨཱཙརིཡོ ཨཱཔུཙྪིཏྭཱ པཀྐམཏཱི’’ཏིཨཱདིནཱ ཨཉྙོཡེཝ ནཡོ ཨཱརདྡྷོ, ཨཡཉྩ ནཡོ ཨུཔཛ྄ཛྷཱཡཔཀྐམནེཔི ཝེདིཏབྦོཡེཝ. ཨཱིདིསེསུ ཧི ཋཱནེསུ ཨེཀཏྠ ཝུཏྟལཀྑཎཾ ཨཉྙཏྠཱཔི དཊྛབྦཾ. སཙེ དྭེ ལེཌྜུཔཱཏེ ཨཏིཀྐམིཏྭཱ ནིཝཏྟཏི, པཊིཔྤསྶདྡྷོ ཧོཏཱིཏི ཨེཏྠ ཨེཏྟཱཝཏཱ དིསཱཔཀྐནྟོ ནཱམ ཧོཏཱིཏི ཨནྟེཝཱསིཀེ ཨནིཀྑིཏྟདྷུརེཔི ནིསྶཡོ པཊིཔྤསྶམྦྷཏི. ཨཱཙརིཡུཔཛ྄ཛྷཱཡཱ དྭེ ལེཌྜུཔཱཏེ ཨཏིཀྐམྨ ཨཉྙསྨིཾ ཝིཧཱརེ ཝསནྟཱིཏི བཧིཨུཔཙཱརསཱིམཱཡཾ ཨནྟེཝཱསིཀསདྡྷིཝིཧཱརིཀཱནཾ ཝསནཊྛཱནཏོ དྭེ ལེཌྜུཔཱཏེ ཨཏིཀྐམྨ ཨཉྙསྨིཾ སེནཱསནེ ཝསནྟི, ཨནྟོཨུཔཙཱརསཱིམཱཡཾ པན དྭེ ལེཌྜུཔཱཏེ ཨཏིཀྐམིཏྭཱཔི ཝསཏོ ནིསྶཡོ ན པཊིཔྤསྶམྦྷཏི. ‘‘སཙེཔི ཨཱཙརིཡོ མུཉྩིཏུཀཱམོཝ ཧུཏྭཱ ནིསྶཡཔཎཱམནཱཡ པཎཱམེཏཱི’’ཏིཨཱདི སབྦཾ ཨུཔཛ྄ཛྷཱཡསྶ ཨཱཎཏྟིཡམྤི ཝེདིཏབྦཾ. སེསམེཏྠ ཨུཏྟཱནམེཝ.

ནིསྶཡཔཊིཔྤསྶདྡྷིཀཐཱཝཎྞནཱ ནིཊྛིཏཱ.

ཨུཔསམྤཱདེཏབྦཔཉྩཀཀཐཱཝཎྞནཱ

༨༤. པཉྩཧི ¶ , བྷིཀྑཝེ, ཨངྒེཧི སམནྣཱགཏེནཱཏིཨཱདཱིསུ ན སཱམཎེརོ ཨུཔཊྛཱཔེཏབྦོཏི ཨུཔཛ྄ཛྷཱཡེན ཧུཏྭཱ སཱམཎེརོ ན གཧེཏབྦོ. ཨཡམཏྠོ ཨངྒུཏྟརནིཀཱཡཊྛཀཐཱཡཾ (ཨ. ནི. ཨཊྛ. ༣.༥.༢༥༡-༢༥༣) ཝུཏྟོཡེཝ.

‘‘ཨཏྟཱནམེཝ པཋམཾ, པཏིརཱུཔེ ནིཝེསཡེ;

ཨཐཉྙམནུསཱསེཡྻ, ན ཀིལིསྶེཡྻ པཎྜིཏོ’’ཏི. (དྷ. པ. ༡༥༨) –

ཨིམསྶ ཨནུརཱུཔཝསེན པཋམཾ ཏཱཝ ཨཏྟསམྤཏྟིཡཾ ནིཡོཛེཏུཾ ‘‘ན ཨསེཀྑེན སཱིལཀྑནྡྷེནཱ’’ཏིཨཱདི ཝུཏྟཾ, ན ཨཱཔཏྟིཨངྒཝསེན. ཏཏྠ ཨསེཀྑེན སཱིལཀྑནྡྷེནཱཏི ཨསེཀྑསྶ སཱིལཀྑནྡྷོ ཨསེཀྑོ སཱིལཀྑནྡྷོ ནཱམ. ཨསེཀྑསྶ ཨཡནྟི ཧི ཨསེཀྑོ, སཱིལཀྑནྡྷོ. ཨེཝཾ ¶ སབྦཏྠ. ཨེཝཉྩ ཀཏྭཱ ཝིམུཏྟིཉཱཎདསྶནསངྑཱཏསྶ པཙྩཝེཀྑཎཉཱཎསྶཔི ཨསེཀྑཏཱ ཨུཔཔནྣཱ. ཨསེཀྑསཱིལནྟི ཙ ན མགྒཕལམེཝ ཨདྷིཔྤེཏཾ, ཨཐ ཁོ ཡཾཀིཉྩི ཨསེཀྑསནྟཱནེ པཝཏྟསཱིལཾ ལོཀིཡལོཀུཏྟརམིསྶཀསྶ སཱིལསྶ ཨིདྷཱདྷིཔྤེཏཏྟཱ. སམཱདྷིཀྑནྡྷཱདཱིསུཔི ཝིམུཏྟིཀྑནྡྷཔརིཡོསཱནེསུ ཨཡམེཝ ནཡོ. ཏསྨཱ ཡཐཱ སཱིལསམཱདྷིཔཉྙཀྑནྡྷཱ མིསྶཀཱ ཨདྷིཔྤེཏཱ, ཨེཝཾ ཝིམུཏྟིཀྑནྡྷོཔཱིཏི ཏདངྒཝིམུཏྟིཨཱདཡོཔི ཝེདིཏབྦཱ, ན པཊིཔྤསྶདྡྷིཝིམུཏྟི ཨེཝ. ཝིམུཏྟིཉཱཎདསྶནཾ པན ལོཀིཡམེཝ. ཏེནེཝ སཾཡུཏྟནིཀཱཡཊྛཀཐཱཡཾ (སཾ. ནི. ཨཊྛ. ༡.༡.༡༣༥) ཝུཏྟཾ ‘‘པུརིམེཧི ཙཏཱུཧི པདེཧི ལོཀིཡལོཀུཏྟརསཱིལསམཱདྷིཔཉྙཱཝིམུཏྟིཡོ ཀཐིཏཱ, ཝིམུཏྟིཉཱཎདསྶནཾ པཙྩཝེཀྑཎཉཱཎཾ ཧོཏི, ཏཾ ལོཀིཡམེཝཱ’’ཏི.

ཨསྶདྡྷོཏིཨཱདཱིསུ ཏཱིསུ ཝཏྠཱུསུ སདྡྷཱ ཨེཏསྶ ནཏྠཱིཏི ཨསྶདྡྷོ. སུཀྐཔཀྑེ སདྡཧཏཱིཏི སདྡྷོ, སདྡྷཱ ཝཱ ཨེཏསྶ ཨཏྠཱིཏིཔི སདྡྷོ. ནཏྠི ཨེཏསྶ ཧིརཱིཏི ཨཧིརིཀོ, ཨཀུསལསམཱཔཏྟིཡཱ ཨཛིགུཙྪམཱནསྶེཏཾ ཨདྷིཝཙནཾ. ཧིརཱི ཨེཏསྶ ཨཏྠཱིཏི ཧིརིམཱ. ན ཨོཏྟཔྤཏཱིཏི ཨནོཏྟཔྤཱི, ཨཀུསལསམཱཔཏྟིཡཱ ན བྷཱཡཏཱིཏི ཝུཏྟཾ ཧོཏི. ཏབྦིཔརཱིཏོ ཨོཏྟཔྤཱི. ཀུཙྪིཏཾ སཱིདཏཱིཏི ཀུསཱིཏོ, ཧཱིནཝཱིརིཡསྶེཏཾ ཨདྷིཝཙནཾ. ཨཱརདྡྷཾ ཝཱིརིཡཾ ཨེཏསྶཱཏི ཨཱརདྡྷཝཱིརིཡོ, སམྨཔྤདྷཱནཡུཏྟསྶེཏཾ ཨདྷིཝཙནཾ. མུཊྛཱ སཏི ཨེཏསྶཱཏི མུཊྛསྶཏི, ནཊྛསྶཏཱིཏི ཝུཏྟཾ ཧོཏི. ཨུཔཊྛིཏཱ སཏི ཨེཏསྶཱཏི ཨུཔཊྛིཏསྶཏི, ནིཙྩཾ ཨཱརམྨཎཱབྷིམུཁཔྤཝཏྟསཏིསྶེཏཾ ཨདྷིཝཙནཾ.

ཨདྷིསཱིལེ ¶ སཱིལཝིཔནྣོ ཙ ཨཛ྄ཛྷཱཙཱརེ ཨཱཙཱརཝིཔནྣོ ཙ ཨཱཔཛྫིཏྭཱ ཨཝུཊྛིཏོ. སསྶཏུཙྪེདསངྑཱཏཾ ཨནྟཾ གཎྷཱཏི གཱཧཡཏཱིཏི ཝཱ ཨནྟགྒཱཧིཀཱ, མིཙྪཱདིཊྛི. པུརིམཱནི དྭེ པདཱནཱིཏི ‘‘ན པཊིབལོ ཧོཏི ཨནྟེཝཱསིཾ ཝཱ སདྡྷིཝིཧཱརིཾ ཝཱ གིལཱནཾ ཨུཔཊྛཱཏུཾ ཝཱ ཨུཔཊྛཱཔེཏུཾ ཝཱ, ཨནབྷིརཏཾ ཝཱུཔཀཱསེཏུཾ ཝཱ ཝཱུཔཀཱསཱཔེཏུཾ ཝཱ’’ཏི ཨིམཱནི དྭེ པདཱནི.

ཨབྷིཝིསིཊྛོ ཨུཏྟམོ སམཱཙཱརོཏི ཨབྷིསམཱཙཱརོ, ཨབྷིསམཱཙཱརོཝ སིཀྑིཏབྦཏོ སིཀྑཱཏི ཨཱབྷིསམཱཙཱརིཀཱ སིཀྑཱ, ཨབྷིསམཱཙཱརཾ ཝཱ ཨཱརབྦྷ པཉྙཏྟཱ སིཀྑཱ ཨཱབྷིསམཱཙཱརིཀཱ. མགྒབྲཧྨཙརིཡསྶ ཨཱདིབྷཱུཏཱཏི ¶ ཨཱདིབྲཧྨཙརིཡཀཱ, ཨུབྷཏོཝིབྷངྒཔརིཡཱཔནྣསིཀྑཱཡེཏཾ ཨདྷིཝཙནཾ. ཏེནེཝ ‘‘ཨུབྷཏོཝིབྷངྒཔརིཡཱཔནྣཾ ཨཱདིབྲཧྨཙརིཡཀཾ, ཁནྡྷཀཝཏྟཔརིཡཱཔནྣཾ ཨཱབྷིསམཱཙཱརིཀ’’ནྟི ཝིསུདྡྷིམགྒེ (ཝིསུདྡྷི. ༡.༡༡) ཝུཏྟཾ. ཏསྨཱ སེཀྑཔཎྞཏྟིཡནྟི ཨེཏྠ སིཀྑིཏབྦཏོ སབྦཱཔི ཨུབྷཏོཝིབྷངྒཔརིཡཱཔནྣཱ པཎྞཏྟཱིཏི གཧེཏབྦཱ. ཏེནེཝ གཎྛིཔདེཔི ཝུཏྟཾ ‘‘སེཀྑཔཎྞཏྟིཡནྟི པཱརཱཛིཀམཱདིཾ ཀཏྭཱ སིཀྑིཏབྦསིཀྑཱཔདཔཉྙཏྟིཡ’’ནྟི. སེསམེཏྠ ཨུཏྟཱནཏྠམེཝ.

ཨུཔསམྤཱདེཏབྦཔཉྩཀཀཐཱཝཎྞནཱ ནིཊྛིཏཱ.

ཨཉྙཏིཏྠིཡཔུབྦཝཏྠུཀཐཱཝཎྞནཱ

༨༦. ཨཉྙཏིཏྠིཡཝཏྠུམྷི ཨཱཛཱིཝཀོ ཨཙེལཀོཏི དུཝིདྷོ ནགྒཔརིབྦཱཛཀོཏི ཨཱཧ ‘‘ནགྒཔརིབྦཱཛཀསྶེཝ ཨཱཛཱིཝཀསྶ ཝཱ’’ཏིཨཱདི. ཏཏྠ ཨཱཛཱིཝཀོ ཨུཔརི ཨེཀམེཝ ཝཏྠཾ ཨུཔཀཙྪཀེ པཝེསེཏྭཱ པརིདཧཏི, ཧེཊྛཱ ནགྒོ. ཨཙེལཀོ སབྦེན སབྦཾ ནགྒོཡེཝ.

༨༧. ཨཱམིསཀིཉྩིཀྑསམྤདཱནཾ ནཱམ ཨཔྤམཏྟཀསྶེཝ དེཡྻདྷམྨསྶ ཨནུཔྤདཱནཾ. རཱུཔཱུཔཛཱིཝིཀཱཏི ཨཏྟནོ རཱུཔཾཡེཝ ནིསྶཱཡ ཛཱིཝནྟིཡོ. ཝེསིཡཱ གོཙརོ མིཏྟསནྠཝཝསེན ཨུཔསངྐམིཏབྦཊྛཱནཾ ཨསྶཱཏི ཝེསིཡཱགོཙརོ. ཨེས ནཡོ སབྦཏྠ. ཡོབྦནཔྤཏྟཱ ཡོབྦནཱཏཱིཏཱ ཝཱཏི ཨུབྷཡེནཔི མཧལླིཀཱ ཨནིཝིདྡྷཀུམཱརིཡོཝ ཝདཏི. བྷིཀྑུནིཡོ ནཱམ ཨུསྶནྣབྲཧྨཙརིཡཱ, ཏཐཱ བྷིཀྑཱུཔི. ཏེསཾ ཨཉྙམཉྙཝིསབྷཱགཝཏྠུབྷཱཝཏོ སནྠཝཝསེན ཨུཔསངྐམནེ ཀཏིཔཱཧེནེཝ བྲཧྨཙརིཡནྟརཱཡོ སིཡཱཏི ཨཱཧ ‘‘ཏཱཧི སདྡྷིཾ ཁིཔྤམེཝ ཝིསྶཱསོ ཧོཏི, ཏཏོ སཱིལཾ བྷིཛྫཏཱི’’ཏི. སེསམེཏྠ ཨུཏྟཱནམེཝ.

ཨཉྙཏིཏྠིཡཔུབྦཝཏྠུཀཐཱཝཎྞནཱ ནིཊྛིཏཱ.

པཉྩཱབཱདྷཝཏྠུཀཐཱཝཎྞནཱ

༨༨. པཉྩཱབཱདྷཝཏྠུམྷི ¶ ནཁཔིཊྛིཔྤམཱཎནྟི ཨེཏྠ ‘‘ཀནིཊྛངྒུལིནཁཔིཊྛི ཨདྷིཔྤེཏཱ’’ཏི ཏཱིསུཔི གཎྛིཔདེསུ ཝུཏྟཾ. ‘‘ཏཉྩེ ནཁཔིཊྛིཔྤམཱཎམྤི ཝཌྜྷནཀཔཀྑེ ཋིཏཾ ¶ ཧོཏི, ན པབྦཱཛེཏབྦོ’’ཏི ཨིམིནཱ སཱམཉྙཏོ ལཀྑཎཾ དསྶིཏཾ, ཏསྨཱ ཡཏྠ ཀཏྠཙི སརཱིརཱཝཡཝེསུ ནཁཔིཊྛིཔྤམཱཎཾ ཝཌྜྷནཀཔཀྑེ ཋིཏཉྩེ, ན ཝཊྚཏཱིཏི སིདྡྷཾ. ཨེཝཉྩ སཏི ནཁཔིཊྛིཔྤམཱཎམྤི ཨཝཌྜྷནཀཔཀྑེ ཋིཏཉྩེ, སབྦཏྠ ཝཊྚཏཱིཏི ཨཱཔནྣཾ, ཏཉྩ ན སཱམཉྙཏོ ཨདྷིཔྤེཏནྟི པདེསཝིསེསེཡེཝ ནིཡམེཏྭཱ དསྶེནྟོ ‘‘སཙེ པནཱ’’ཏིཨཱདིམཱཧ. སཙེ ཧི ཨཝིསེསེན ནཁཔིཊྛིཔྤམཱཎཾ ཨཝཌྜྷནཀཔཀྑེ ཋིཏཾ ཝཊྚེཡྻ, ‘‘ནིཝཱསནཔཱརུཔནེཧི པཀཏིཔཨཙྪནྣེ ཋཱནེ’’ཏི པདེསནིཡམཾ ན ཀརེཡྻ, ཏསྨཱ ནིཝཱསནཔཱརུཔནེཧི པཀཏིཔཊིཙྪནྣཊྛཱནཏོ ཨཉྙཏྠ ནཁཔིཊྛིཔྤམཱཎཾ ཨཝཌྜྷནཀཔཀྑེ ཋིཏམྤི ན ཝཊྚཏཱིཏི སིདྡྷཾ, ནཁཔིཊྛིཔྤམཱཎཏོ ཁུདྡཀཏརཾ པན ཨཝཌྜྷནཀཔཀྑེ ཝཌྜྷནཀཔཀྑེ ཝཱ ཋིཏཾ ཧོཏུ, ཝཊྚཏི ནཁཔིཊྛིཔྤམཱཎཏོ ཁུདྡཀཏརསྶ ཝཌྜྷནཀཔཀྑེ ཨཝཌྜྷནཀཔཀྑེ ཝཱ ཋིཏསྶ མུཁཱདཱིསུཡེཝ པཊིཀྑིཏྟཏྟཱ.

གཎྜེཔི ཨིམིནཱཝ ནཡེན ཝིནིཙྪཡོ ཝེདིཏབྦོ. ཏཏྠ པན མུཁཱདཱིསུ ཀོལཊྛིམཏྟཏོ ཁུདྡཀཏརོཔི གཎྜོ ན ཝཊྚཏཱིཏི ཝིསུཾ ན དསྶིཏོ. ‘‘མུཁཱདིཀེ ཨཔྤཊིཙྪནྣཊྛཱནེ ཨཝཌྜྷནཀཔཀྑེ ཋིཏོཔི ན ཝཊྚཏཱི’’ཏི ཨེཏྟཀམེཝ ཧི ཏཏྠ ཝུཏྟཾ, ཏཐཱཔི ཀུཊྛེ ཝུཏྟནཡེན མུཁཱདཱིསུ ཀོལཊྛིཔྤམཱཎཏོ ཁུདྡཀཏརོཔི གཎྜོ ན ཝཊྚཏཱིཏི ཝིཉྙཱཡཏི, ཏསྨཱ ཨཝཌྜྷནཀཔཀྑེ ཋིཏོཔཱིཏི ཨེཏྠ པི-སདྡོ ཨཝུཏྟསམྤིཎྜནཏྠོ. ཏེན ཀོལཊྛིམཏྟཏོ ཁུདྡཀཏརོཔི ན ཝཊྚཏཱིཏི ཨཡམཏྠོ དསྶིཏོཡེཝཱཏི ཨཡམམྷཱཀཾ ཁནྟི. པཀཏིཝཎྞེ ཛཱཏེཏི རོགཧེཏུཀསྶ ཝིཀཱརཝཎྞསྶ ཨབྷཱཝཾ སནྡྷཱཡ ཝུཏྟཾ. ཀོལཊྛིམཏྟཀོཏི བདརཊྛིཔྤམཱཎོ. སུཚཝིཾ ཀཱརེཏྭཱཏི སཉྫཱཏཚཝིཾ ཀཱརེཏྭཱ. ‘‘སཉྪཝིཾ ཀཱརེཏྭཱ’’ཏིཔི པཱཋོ, ཝིཛྫམཱནཚཝིཾ ཀཱརེཏྭཱཏི ཨཏྠོ. པདུམཔུཎྜརཱིཀཔཏྟཝཎྞནྟི རཏྟཔདུམསེཏཔདུམཝསེན པདུམཔཏྟཝཎྞཾ. སོསབྱཱདྷཱིཏི ཁཡརོགོ.

པཉྩཱབཱདྷཝཏྠུཀཐཱཝཎྞནཱ ནིཊྛིཏཱ.

རཱཛབྷཊཱདིཝཏྠུཀཐཱཝཎྞནཱ

༩༠-༩༦. རཱཛབྷཊཱདིཝཏྠཱུསུ ¶ ཨཱཧཾསཱུཏི མནུསྶཱ ཝདིཾསུ. ཏསྨཱ…པེ… ཨེཝམཱཧཱཏི ཡསྨཱ སཡཾ དྷམྨསྶཱམཱི, ཏསྨཱ བྷིཀྑཱུཧི ཨཔབྦཱཛིཏབྦཾ ཙོརཾ ཨངྒུལིམཱལཾ པབྦཱཛེཏྭཱ ཨཱཡཏིཾ ¶ ཨཀརཎཏྠཱཡ བྷིཀྑཱུནཾ སིཀྑཱཔདཾ པཉྙཔེནྟོ ‘‘ན, བྷིཀྑཝེ, དྷཛབནྡྷོ ཙོརོ པབྦཱཛེཏབྦོ, ཡོ པབྦཱཛེཡྻ, ཨཱཔཏྟི དུཀྐཊསྶཱ’’ཏི ཨཱཧ. ཨུཔརམནྟཱིཏི ཝིརམནྟི ནིཝཏྟནྟི. བྷིནྡིཏྭཱཏི ཨནྡུབནྡྷནཾ བྷིནྡིཏྭཱ. ཚིནྡིཏྭཱཏི སངྑལིཀབནྡྷནཾ ཚིནྡིཏྭཱ. མུཉྩིཏྭཱཏི རཛྫུབནྡྷནཾ མུཉྩིཏྭཱ. ཝིཝརིཏྭཱཏི གཱམབནྡྷནཱདཱིསུ གཱམདྭཱརཱདཱིནི ཝིཝརིཏྭཱ. ཨཔསྶམཱནཱནཾ ཝཱ པལཱཡཏཱིཏི པུརིསགུཏྟིཡཾ པུརིསཱནཾ ཨཔསྶམཱནཱནཾ པལཱཡཏི. ཨུཔཌྜྷུཔཌྜྷནྟི ཐོཀཾ ཐོཀཾ.

༩༧. ཨབྷིསེཀཱདཱིསུ བནྡྷནཱགཱརཱདཱིནི སོདྷེནྟི, ཏཾ སནྡྷཱཡཱཧ ‘‘སབྦསཱདྷཱརཎེན ཝཱ ནཡེནཱ’’ཏི. སཙེ སཡམེཝ པཎྞཾ ཨཱརོཔེནྟི, ན ཝཊྚཏཱིཏི ཏཱ བྷུཛིསྶིཏྠིཡོ ‘‘མཡམྤི དཱསིཡོ ཧོམཱ’’ཏི སཡམེཝ དཱསིཔཎྞཾ ལིཁཱཔེནྟི, ན ཝཊྚཏི. ཏཀྐཾ སཱིསེ ཨཱསིཏྟཀསདིསཱཝ ཧོནྟཱིཏི ཡཐཱ ཨདཱསེ ཀརོནྟཱ ཏཀྐེན སཱིསཾ དྷོཝིཏྭཱ ཨདཱསཾ ཀརོནྟི, ཨེཝཾ ཨཱརཱམིཀཝཙནེན དིནྣཏྟཱ ཨདཱསཱཝ ཏེཏི ཨདྷིཔྤཱཡོ. ཏཀྐཱསིཉྩནཾ པན སཱིཧལ༹དཱིཔེ ཙཱརིཏྟནྟི ཝདནྟི. ནེཝ པབྦཱཛེཏབྦོཏི ཝུཏྟནྟི ཀཔྤིཡཝཙནེན དིནྣེཔི སངྒྷསྶ ཨཱརཱམིཀདཱསཏྟཱ ཨེཝཾ ཝུཏྟཾ. ནིསྶཱམིཀདཱསོ ནཱམ ཡསྶ སཱམིཀཱ སཔུཏྟདཱརཱདཡོ མཏཱ ཧོནྟི, ན ཀོཙི ཏསྶ པརིགྒཱཧཀོ, སོཔི པབྦཱཛེཏུཾ ན ཝཊྚཏི, ཏཾ པན ཨཏྟནཱཔི བྷུཛིསྶཾ ཀཱཏུཾ ཝཊྚཏི. ཡེ ཝཱ པན ཏསྨིཾ རཊྛེ སཱམིནོ, ཏེཧིཔི ཀཱརཱཔེཏུཾ ཝཊྚཏི. ‘‘དེཝདཱསིཔུཏྟཾ པབྦཱཛེཏུཾ ཝཊྚཏཱི’’ཏི ཏཱིསུ གཎྛིཔདེསུ ཝུཏྟཾ. དཱསསྶ པབྦཛིཏྭཱ ཨཏྟནོ སཱམིཀེ དིསྭཱ པལཱཡནྟསྶ ཨཱཔཏྟི ནཏྠཱིཏི ཝདནྟི. སེསཾ སབྦཏྠ ཨུཏྟཱནམེཝ.

རཱཛབྷཊཱདིཝཏྠུཀཐཱཝཎྞནཱ ནིཊྛིཏཱ.

ནིསྶཡམུཙྩནཀཀཐཱཝཎྞནཱ

༡༠༣. ནིསྶཡམུཙྩནཀསྶ ¶ ཝཏྟེསུ པཉྩཀཚཀྐེསུ པན ཨུབྷཡཱནི ཁོ པན…པེ… ཨནུབྱཉྫནསོཏི ཨེཏྠ ‘‘སབྦོཔི ཙཱཡཾ པབྷེདོ མཱཏིཀཱཊྛཀཐཱཡཾ ཉཱཏཱཡཾ ཉཱཏོ ཧོཏཱི’’ཏི ཏཱིསུཔི གཎྛིཔདེསུ ཝུཏྟཾ. ཨཱཔཏྟིཾ ཛཱནཱཏཱིཏིཨཱདཱིསུ ཙ ‘‘པཱཋེ ཨཝཏྟམཱནེཔི ‘ཨིདཾ ནཱམ ཀཏྭཱ ཨིདཾ ཨཱཔཛྫཏཱི’ཏི ཛཱནཱཏི ཙེ, ཝཊྚཏཱི’’ཏི ཏཏྠེཝ ཝུཏྟཾ. ཏཉྩ ཁོ པུབྦེ པཱཋེ པགུཎེ ཀཏེཏི གཧེཏབྦནྟི ཙ ཨཱཙརིཡུཔཛ྄ཛྷཱཡཱནམྤི ཨེསེཝ ནཡོཏི ཙ ཀེཙི ཝདནྟི. སེསམེཏྠ ཨུཏྟཱནམེཝ.

ནིསྶཡམུཙྩནཀཀཐཱཝཎྞནཱ ནིཊྛིཏཱ.

རཱཧུལཝཏྠུཀཐཱཝཎྞནཱ

༡༠༥. རཱཧུལཝཏྠུམྷི ¶ ཏཏྠེཝ ཝིཧརིཾསཱུཏི སབྦེཔི ཏེ ཨརཧཏྟཾ པཏྟཀཱལཏོ པཊྛཱཡ ཨརིཡཱ ནཱམ མཛ྄ཛྷཏྟཱཝ ཧོནྟཱིཏི རཉྙོ པཧིཏསཱསནཾ དསབལསྶ ཨནཱརོཙེཏྭཱཝ ཏཏྠ ཝིཧརིཾསུ. ཨེཀདིཝསཾ ཛཱཏཾ ཀཱལུ༹དཱཡིཾ ནཱམ ཨམཙྩནྟི ཨཡཾ ཀིར (ཨ. ནི. ཨཊྛ. ༡.༡.༢༢༥) པདུམུཏྟརབུདྡྷཀཱལེ ཧཾསཝཏཱིནགརེ ཀུལགེཧེ ནིབྦཏྟོ སཏྠུ དྷམྨདེསནཾ སུཎནྟོ སཏྠཱརཾ ཨེཀཾ བྷིཀྑུཾ ཀུལཔྤསཱདཀཱནཾ ཨགྒཊྛཱནེ ཋཔེནྟཾ དིསྭཱ ཨདྷིཀཱརཀམྨཾ ཀཏྭཱ ཏཾ ཋཱནནྟརཾ པཏྠེསི. སོ ཡཱཝཛཱིཝཾ ཀུསལཾ ཀཏྭཱ དེཝམནུསྶེསུ སཾསརནྟོ ཨམྷཱཀཾ བོདྷིསཏྟསྶ མཱཏུཀུཙྪིཡཾ པཊིསནྡྷིགྒཧཎདིཝསེ ཀཔིལཝཏྠུསྨིཾཡེཝ ཨམཙྩགེཧེ པཊིསནྡྷིཾ གཎྷི. ཛཱཏདིཝསེ བོདྷིསཏྟེན སདྡྷིཾཡེཝ ཛཱཏོཏི ཏཾ དིཝསཾཡེཝ དུཀཱུལཙུམྦཊཀེ ནིཔཛྫཱཔེཏྭཱ བོདྷིསཏྟསྶ ཨུཔཊྛཱནཏྠཱཡ ནཡིཾསུ. བོདྷིསཏྟེན ཧི སདྡྷིཾ བོདྷིརུཀྑོ རཱཧུལམཱཏཱ ཙཏསྶོ ནིདྷིཀུམྦྷིཡོ ཨཱརོཧནིཡཧཏྠཱི ཀཎྜཀོ ཚནྣོ ཀཱལུ༹དཱཡཱིཏི ཨིམེ སཏྟ ཨེཀདིཝསེ ཛཱཏཏྟཱ སཧཛཱཏཱ ནཱམ ཨཧེསུཾ. ཨཐསྶ ནཱམགྒཧཎདིཝསེ སཀལནགརསྶ ཨུདགྒཙིཏྟདིཝསེ ཛཱཏོཏི ཨུདཱཡཱིཏྭེཝ ནཱམཾ ཨཀཾསུ. ཐོཀཾ ཀཱལ༹དྷཱཏུཀཏྟཱ པན ཀཱལུ༹དཱཡཱི ནཱམ ཛཱཏོ. སོ བོདྷིསཏྟེན སདྡྷིཾ ཀུམཱརཀཱིལ༹ཾ ཀཱིལ༹ནྟོ ཝུདྡྷིཾ ཨགམཱསི.

སཊྛིམཏྟཱཧི ¶ གཱཐཱཧཱིཏི –

‘‘ཨངྒཱརིནོ དཱནི དུམཱ བྷདནྟེ;

ཕལེསིནོ ཚདནཾ ཝིཔྤཧཱཡ;

ཏེ ཨཙྩིམནྟོཝ པབྷཱསཡནྟི;

སམཡོ མཧཱཝཱིར བྷཱགཱིརསཱནཾ. (ཐེརགཱ. ༥༢༧)

‘‘ནཱཏིསཱིཏཾ ནཱཏིཨུཎྷཾ, ནཱཏིདུབྦྷིཀྑཚཱཏཀཾ;

སདྡལཱ ཧརིཏཱ བྷཱུམི, ཨེས ཀཱལོ མཧཱམུནཱི’’ཏི. –

ཨཱདིཀཱཧི སཊྛིམཏྟཱཧི གཱཐཱཧི. ‘‘པོཀྑརཝསྶནྟི པོཀྑརཔཏྟཝཎྞམུདཀ’’ནྟི གཎྛིཔདེསུ ཝུཏྟཾ. པོཀྑརཔཏྟཔྤམཱཎཾ མཛ྄ཛྷེ ཨུཊྛཧིཏྭཱ ཨནུཀྐམེན སཏཔཊལཾ སཧསྶཔཊལཾ ཧུཏྭཱ ཝསྶནཀཝསྶནྟིཔི ཝདནྟི. ཏསྨིཾ ཀིར ཝསྶནྟེ ཏེམེཏུཀཱམཱཝ ཏེམེནྟི, ན ཨིཏརེ. ཨེཀོཔི རཱཛཱ ཝཱ…པེ… གཏོ ནཏྠཱིཏི དྷམྨདེསནཾ སུཏྭཱ པཀྐནྟེསུ ཉཱཏཱིསུ ཨེཀོཔི རཱཛཱ ཝཱ རཱཛམཧཱམཏྟོ ¶ ཝཱ ‘‘སྭེ ཨམྷཱཀཾ བྷིཀྑཾ གཎྷཐཱ’’ཏི ནིམནྟེཏྭཱ གཏོ ནཏྠི. པིཏཱཔིསྶ སུདྡྷོདནམཧཱརཱཛཱ ‘‘མཡ྄ཧཾ པུཏྟོ མམ གེཧཾ ཨནཱགནྟྭཱ ཀཧཾ གམིསྶཏཱི’’ཏི ཨནིམནྟེཏྭཱཝ ཨགམཱསི, གནྟྭཱ པན གེཧེ ཝཱིསཏིཡཱ བྷིཀྑུསཧསྶཱནཾ ཡཱགུཨཱདཱིནི པཊིཡཱདཱཔེཏྭཱ ཨཱསནཱནི པཉྙཱཔེསི.

ཀུལནགརེཏི ཉཱཏིཀུལསྶ ནགརེ. ཨུཎྷཱིསཏོ པཊྛཱཡཱཏི སཱིསཏོ པཊྛཱཡ. ཨུཎྷཱིསནྟི ཧི ཨུཎྷཱིསསདིསཏྟཱ བྷགཝཏོ པརིཔུཎྞནལཱཊསྶ པརིཔུཎྞསཱིསསྶ ཙ ཨེཏཾ ཨདྷིཝཙནཾ. བྷགཝཏོ ཧི དཀྑིཎཀཎྞཙཱུལི༹ཀཏོ པཊྛཱཡ མཾསཔཊལཾ ཨུཊྛཧིཏྭཱ སཀལནལཱཊཾ ཚཱདཡམཱནཾ པཱུརཡམཱནཾ གནྟྭཱ ཝཱམཀཎྞཙཱུལི༹ཀཱཡ པཏིཊྛིཏཾ སཎྷཏམཏཱཡ སུཝཎྞཝཎྞཏཱཡ པབྷསྶརཏཱཡ པརིཔུཎྞཏཱཡ ཙ རཉྙོ བདྡྷཨུཎྷཱིསཔཊྚོ ཝིཡ ཝིརོཙཏི. བྷགཝཏོ ཀིར ཨིམཾ ལཀྑཎཾ དིསྭཱ རཱཛཱུནཾ ཨུཎྷཱིསཔཊྚཾ ཨཀཾསུ. ཨཉྙེ པན ཛནཱ ཨཔརིཔུཎྞསཱིསཱ ཧོནྟི, ཀེཙི ཀཔྤསཱིསཱ, ཀེཙི ཕལསཱིསཱ, ཀེཙི ཨཊྛིསཱིསཱ, ཀེཙི ཏུམྦསཱིསཱ, ཀེཙི ཀུམྦྷསཱིསཱ, ཀེཙི པབྦྷཱརསཱིསཱ, བྷགཝཏོ པན ཨཱརགྒེན ཝཊྚེཏྭཱ ཋཔིཏཾ ཝིཡ སུཔརིཔུཎྞཾ ཨུདཀཔུབྦུལ༹སདིསམྤི ཧོཏི. ཏེནེཝ ཨུཎྷཱིསཝེཋིཏསཱིསསདིསཏྟཱ ཨུཎྷཱིསཾ ཝིཡ སབྦཏྠ པརིམཎྜལསཱིསཏྟཱ ཙ ཨུཎྷཱིསསཱིསོཏི བྷགཝཱ ཝུཙྩཏི.

ནརསཱིཧགཱཐཱཧི ¶ ནཱམ ཨཊྛཧི གཱཐཱཧཱིཏི –

‘‘སིནིདྡྷནཱིལམུདུཀུཉྩིཏཀེསོ;

སཱུརིཡནིམྨལཏལཱབྷིནལཱཊོ;

ཡུཏྟཏུངྒམུདུཀཱཡཏནཱསོ;

རཾསིཛཱལཝིཏཏོ ནརསཱིཧོ’’ཏི. (ཛཱ. ཨཊྛ. ༡.སནྟིཀེནིདཱནཀཐཱ; ཨཔ. ཨཊྛ. ༡.སནྟིཀེནིདཱནཀཐཱ) –

ཨེཝམཱདིཀཱཧི ཨཊྛཧི གཱཐཱཧི. གཎྛིཔདེསུ པན –

‘‘ཙཀྐཝརངྐིཏརཏྟསུཔཱདོ;

ལཀྑཎམཎྜིཏཨཱཡཏཔཎྷི;

ཙཱམརཚཏྟཝིབྷཱུསིཏཔཱདོ;

ཨེས ཧི ཏུཡ྄ཧ པིཏཱ ནརསཱིཧོ.

‘‘སཀྱཀུམཱརཝརོ ¶ སུཁུམཱལོ;

ལཀྑཎཙིཏྟིཀཔུཎྞསརཱིརོ;

ལོཀཧིཏཱཡ གཏོ ནརཝཱིརོ;

ཨེས ཧི ཏུཡ྄ཧ པིཏཱ ནརསཱིཧོ.

‘‘པུཎྞསསངྐནིབྷོ མུཁཝཎྞོ;

དེཝནརཱན པིཡོ ནརནཱགོ;

མཏྟགཛིནྡཝིལཱསིཏགཱམཱི;

ཨེས ཧི ཏུཡ྄ཧ པིཏཱ ནརསཱིཧོ.

‘‘ཁཏྟིཡསམྦྷཝཨགྒཀུལཱིནོ;

དེཝམནུསྶནམསྶིཏཔཱདོ;

སཱིལསམཱདྷིཔཏིཊྛིཏཙིཏྟོ;

ཨེས ཧི ཏུཡ྄ཧ པིཏཱ ནརསཱིཧོ.

‘‘ཨཱཡཏཡུཏྟསུསཎྛིཏནཱསོ;

གོཔཁུམོ ཨབྷིནཱིལསུནེཏྟོ;

ཨིནྡདྷནཱུཨབྷིནཱིལབྷམཱུཀོ;

ཨེས ཧི ཏུཡ྄ཧ པིཏཱ ནརསཱིཧོ.

‘‘ཝཊྚསུཝཊྚསུསཎྛིཏགཱིཝོ ¶ ;

སཱིཧཧནཱུ མིགརཱཛསརཱིརོ;

ཀཉྩནསུཙྪཝིཨུཏྟམཝཎྞོ;

ཨེས ཧི ཏུཡ྄ཧ པིཏཱ ནརསཱིཧོ.

‘‘སིནིདྡྷསུགམྦྷིརམཉྫུསགྷོསོ;

ཧིངྒུལབནྡྷུཀརཏྟསུཛིཝ྄ཧོ;

ཝཱིསཏིཝཱིསཏིསེཏསུདནྟོ;

ཨེས ཧི ཏུཡ྄ཧ པིཏཱ ནརསཱིཧོ.

‘‘ཨཉྫནཝཎྞསུནཱིལསུཀེསོ ¶ ;

ཀཉྩནཔཊྚཝིསུདྡྷནལཱཊོ;

ཨོསདྷིཔཎྜརསུདྡྷསུཨུཎྞོ;

ཨེས ཧི ཏུཡ྄ཧ པིཏཱ ནརསཱིཧོ.

‘‘གཙྪཏིནིལཔཐེ ཝིཡ ཙནྡོ;

ཏཱརགཎཱཔརིཝེཋིཏརཱུཔོ;

སཱཝཀམཛ྄ཛྷགཏོ སམཎིནྡོ;

ཨེས ཧི ཏུཡ྄ཧ པིཏཱ ནརསཱིཧོ’’ཏི. (ཛཱ. ཨཊྛ. ༡.སནྟིཀེནིདཱནཀཐཱ) –

ཨིམཱ ནཝ གཱཐཱཡོཔི ཨེཏྠ དསྶིཏཱ, ཏཱ པན ‘‘ཨཊྛཧི གཱཐཱཧཱི’’ཏི ཝཙནེན ན སམེནྟི. ཨུཎྷཱིསཏོ པཊྛཱཡ ཡཱཝ པཱདཏལཱཏི ཝུཏྟཱནུཀྐམོཔི ཏཏྠ ན དིསྶཏི. བྷིཀྑཱཡ ཙརཏཱིཏི བྷིཀྑཱཙཱརོ.

ཨུཏྟིཊྛེཏི ཨུཏྟིཊྛིཏྭཱ པརེསཾ གྷརདྭཱརེ ཋཏྭཱ གཧེཏབྦཔིཎྜེ. ནཔྤམཛ྄ཛྷེཡྻཱཏི པིཎྜཙཱརིཀཝཏྟཾ ཧཱཔེཏྭཱ པཎཱིཏབྷོཛནཱནི པརིཡེསནྟོ ཨུཏྟིཊྛེ པམཛྫཏི ནཱམ, སཔདཱནཾ པིཎྜཱཡ ཙརནྟོ པན ནཔྤམཛྫཏི ནཱམ, ཨེཝཾ ཀརོནྟོ ཨུཏྟིཊྛེ ནཔྤམཛྫེཡྻ. དྷམྨནྟི ཨནེསནཾ པཧཱཡ སཔདཱནཾ ཙརནྟོ ཏམེཝ བྷིཀྑཱཙརིཡདྷམྨཾ སུཙརིཏཾ ཙརེ. སུཁཾ སེཏཱིཏི དེསནཱམཏྟམེཏཾ, ཨེཝཾ པནེཏཾ བྷིཀྑཱཡ ཙརིཡདྷམྨཾ ཙརནྟོ དྷམྨཙཱརཱི ཨིདྷལོཀེ ཙ པརལོཀེ ཙ ཙཏཱུཧིཔི ཨིརིཡཱཔཐེཧི སུཁཾ ཝིཧརཏཱིཏི ཨཏྠོ.

དུཏིཡགཱཐཱཡ ¶ ན ནཾ དུཙྩརིཏནྟི ཝེསིཡཱདིབྷེདེ ཨགོཙརེ ཙརནྟོ ནཾ བྷིཀྑཱཙརིཡདྷམྨཾ དུཙྩརིཏཾ ཙརཏི ནཱམ, ཨེཝཾ ཨཙརིཏྭཱ ཏཾ དྷམྨཾ ཙརེ སུཙརིཏཾ, ན ནཾ དུཙྩརིཏཾ ཙརེ. སེསམེཏྠ ཝུཏྟཏྠམེཝ. ཨིམཾ པན དུཏིཡགཱཐཾ པིཏུ ནིཝེསནཾ གནྟྭཱ ཨབྷཱསཱིཏི ཝེདིཏབྦཾ. ཏེནེཝ ཐེརགཱཐཱསཾཝཎྞནཱཡཾ (ཐེརགཱ. ཨཊྛ. ༡.༡༥༦ ནནྡཏྠེརགཱཐཱཝཎྞནཱ) ཨཱཙརིཡདྷམྨཔཱལཏྠེརེན ཝུཏྟཾ ‘‘དུཏིཡདིཝསེ པིཎྜཱཡ པཝིཊྛོ ‘ཨུཏྟིཊྛེ ནཔྤམཛྫེཡྻཱ’ཏི གཱཐཱཡ པིཏརཾ སོཏཱཔཏྟིཕལེ པཏིཊྛཱཔེཏྭཱ ནིཝེསནཾ གནྟྭཱ ‘དྷམྨཾ ཙརེ སུཙརིཏ’ནྟི གཱཐཱཡ མཧཱཔཛཱཔཏིཾ སོཏཱཔཏྟིཕལེ རཱཛཱནཉྩ སཀདཱགཱམིཕལེ པཏིཊྛཱཔེསཱི’’ཏི. དྷམྨཔདཊྛཀཐཱཡམྤི (དྷ. པ. ཨཊྛ. ༡.༡༢ ནནྡཏྠེརཝཏྠུ) ཝུཏྟཾ ‘‘པུནདིཝསེ པིཎྜཱཡ པཝིཊྛོ ‘ཨུཏྟིཊྛེ ནཔྤམཛྫེཡྻཱ’ཏི གཱཐཱཡ པིཏརཾ སོཏཱཔཏྟིཕལེ ¶ པཏིཊྛཱཔེཏྭཱ ‘དྷམྨཾ ཙརེ’ཏི གཱཐཱཡ མཧཱཔཛཱཔཏིཾ སོཏཱཔཏྟིཕལེ རཱཛཱནཉྩ སཀདཱགཱམིཕལེ པཏིཊྛཱཔེསཱི’’ཏི.

དྷམྨཔཱལཛཱཏཀཾ སུཏྭཱ ཨནཱགཱམིཕལེ པཏིཊྛཱསཱིཏི པུནེཀདིཝསཾ རཱཛནིཝེསནེ ཀཏཔཱཏརཱསོ ཨེཀམནྟཾ ནིསིནྣེན རཉྙཱ ‘‘བྷནྟེ, ཏུམྷཱཀཾ དུཀྐརཀཱརིཀཀཱལེ ཨེཀཱ དེཝཏཱ མཾ ཨུཔསངྐམིཏྭཱ ‘པུཏྟོ ཏེ ཀཱལཀཏོ’ཏི ཨཱཧ. ཨཧཾ ཏསྶཱ ཝཙནཾ ཨསདྡཧནྟོ ‘ན མཡ྄ཧཾ པུཏྟོ བོདྷིཾ ཨཔྤཏྭཱ ཀཱལཾ ཀརོཏཱི’ཏི པཊིཀྑིཔིནྟི ཝུཏྟེ ཨིདཱནི ཀཐཾ སདྡཧིསྶཐ, པུབྦེཔི ཨཊྛིཀཱནི དསྶེཏྭཱ ‘པུཏྟོ ཏེ མཏོ’ཏི ཝུཏྟེ ན སདྡཧིཏྠཱ’’ཏི ཨིམིསྶཱ ཨཊྛུཔྤཏྟིཡཱ མཧཱདྷམྨཔཱལཛཱཏཀཾ ཀཐེསི. ཏཾ སུཏྭཱ རཱཛཱ ཨནཱགཱམིཕལེ པཏིཊྛཧི.

ཀེསཝིསྶཛྫནནྟི ཀུལམརིཡཱདཝསེན ཀེསོརོཔནཾ. པཊྚབནྡྷོཏི ཡུཝརཱཛཔཊྚབནྡྷོ. ཨབྷིནཝགྷརཔྤཝེསནམཧོ གྷརམངྒལཾ, ཝིཝཱཧཀརཎམཧོ ཨཱཝཱཧམངྒལཾ. ཚཏྟམངྒལནྟི ཡུཝརཱཛཚཏྟམངྒལཾ. ཛནཔདཀལྱཱཎཱིཏི (ཨུདཱ. ཨཊྛ. ༢༢) ཛནཔདམྷི ཀལྱཱཎཱི ཨུཏྟམཱ ཚསརཱིརདོསརཧིཏཱ པཉྩཀལྱཱཎསམནྣཱགཏཱ. སཱ ཧི ཡསྨཱ ནཱཏིདཱིགྷཱ ནཱཏིརསྶཱ ནཱཏིཀིསཱ ནཱཏིཐཱུལཱ ནཱཏིཀཱལཱ༹ ནཱཙྩོདཱཏཱཏི ཨཏིཀྐནྟཱ མཱནུསཾ ཝཎྞཾ, ཨཔྤཏྟཱ དིབྦཾ ཝཎྞཾ, ཏསྨཱ ཚསརཱིརདོསརཧིཏཱ. ཚཝིཀལྱཱཎཾ མཾསཀལྱཱཎཾ ནཧཱརུཀལྱཱཎཾ ཨཊྛིཀལྱཱཎཾ ཝཡཀལྱཱཎནྟི ཨིམེཧི པན པཉྩཧི ཀལྱཱཎེཧི སམནྣཱགཏཏྟཱ པཉྩཀལྱཱཎསམནྣཱགཏཱ ནཱམ. ཏསྶཱ ཧི ཨཱགནྟུཀོབྷཱསཀིཙྩཾ ནཏྠི. ཨཏྟནོ སརཱིརོབྷཱསེནེཝ དྭཱདསཧཏྠཊྛཱནེ ¶ ཨཱལོཀཾ ཀརོཏི, པིཡངྒུསཱམཱ ཝཱ ཧོཏི སུཝཎྞསཱམཱ ཝཱ, ཨཡམསྶཱ ཚཝིཀལྱཱཎཏཱ. ཙཏྟཱརོ པནསྶཱ ཧཏྠཔཱདཱ མུཁཔརིཡོསཱནཉྩ ལཱཁཱརསཔརིཀམྨཀཏཾ ཝིཡ རཏྟཔཝཱལ༹རཏྟཀམྦལསདིསཾ ཧོཏི, ཨཡམསྶཱ མཾསཀལྱཱཎཏཱ. ཝཱིསཏི པན ནཁཔཏྟཱནི མཾསཏོ ཨམུཏྟཊྛཱནེ ལཱཁཱརསཔཱུརིཏཱནི ཝིཡ མུཏྟཊྛཱནེ ཁཱིརདྷཱརཱསདིསཱནི ཧོནྟི, ཨཡམསྶཱ ནཧཱརུཀལྱཱཎཏཱ. དྭཏྟིཾས དནྟཱ སུཕུསིཏཱ སུདྷོཏཝཛིརཔནྟི ཝིཡ ཁཱཡནྟི, ཨཡམསྶཱ ཨཊྛིཀལྱཱཎཏཱ. ཝཱིསཏིཝསྶསཏིཀཱཔི སམཱནཱ སོལ༹སཝསྶུདྡེསིཀཱ ཝིཡ ཧོཏི ནིཝལིཔལིཏཱ, ཨཡམསྶཱ ཝཡཀལྱཱཎཏཱ. ཨིཏི ཨིམེཧི པཉྩཧི ཀལྱཱཎེཧི སམནྣཱགཏཏྟཱ ཛནཔདཀལྱཱཎཱིཏི ཝུཙྩཏི.

ཏུཝཊནྟི སཱིགྷཾ. སོཔི བྷགཝནྟཾ ‘‘པཏྟཾ གཎྷཐཱ’’ཏི ཝཏྟུཾ ཨཝིསཧམཱནོ ཝིཧཱརཾཡེཝ ཨགམཱསཱིཏི. སོ ཀིར ཏཐཱགཏེ གཱརཝེན ‘‘པཏྟཾ ཝོ བྷནྟེ གཎྷཐཱ’’ཏི ཝཏྟུཾ ནཱསཀྑི. ཨེཝཾ པན ཙིནྟེསི ‘‘སོཔཱནསཱིསེ པཏྟཾ གཎྷིསྶཏཱི’’ཏི. སཏྠཱ ཏསྨིམྤི ཋཱནེ ན གཎྷི. ཨིཏརོ ‘‘སོཔཱནཔཱདམཱུལེ གཎྷིསྶཏཱི’’ཏི ཙིནྟེསི. སཏྠཱ ཏཏྠཱཔི ན གཎྷི. ཨིཏརོ ‘‘རཱཛངྒཎེ གཎྷིསྶཏཱི’’ཏི ¶ ཙིནྟེསི. སཏྠཱ ཏཏྠཱཔི ན གཎྷི. ཀུམཱརོ ནིཝཏྟིཏུཀཱམོ ཨརུཙིཡཱ གཙྪནྟོ སཏྠུ གཱརཝེན ‘‘པཏྟཾ གཎྷཐཱ’’ཏི ཝཏྟུམྤི ཨསཀྐོནྟོ ‘‘ཨིདྷ གཎྷིསྶཏི, ཨེཏྠ གཎྷིསྶཏཱི’’ཏི ཙིནྟེནྟོ གཙྪཏི. ཛནཔདཀལྱཱཎིཡཱ ཙ ཝུཏྟཝཙནཾ ཏསྶ ཧདཡེ ཏིརིཡཾ པཏིཏྭཱ ཝིཡ ཋིཏཾ. ནནྡཀུམཱརཉྷི ཨབྷིསེཀམངྒལཾ ན ཏཐཱ པཱིལེ༹སི, ཡཐཱ ཛནཔདཀལྱཱཎིཡཱ ཝུཏྟཝཙནཾ, ཏེནསྶ ཙིཏྟསནྟཱཔོ བལཝཱ ཨཧོསི. ཨཐ ནཾ ‘‘ཨིམསྨིཾ ཋཱནེ ནིཝཏྟིསྶཏི, ཨིམསྨིཾ ཋཱནེ ནིཝཏྟིསྶཏཱི’’ཏི ཙིནྟེནྟམེཝ སཏྠཱ ཝིཧཱརཾ ནེཏྭཱ ‘‘པབྦཛིསྶསི ནནྡཱ’’ཏི ཨཱཧ. སོ བུདྡྷགཱརཝེན ‘‘ན པབྦཛིསྶཱམཱི’’ཏི ཨཝཏྭཱ ‘‘ཨཱམ པབྦཛིསྶཱམཱི’’ཏི ཨཱཧ. སཏྠཱ ‘‘ཏེན ཧི ནནྡཾ པབྦཱཛེཐཱ’’ཏི ཝཏྭཱ པབྦཱཛེསི. ཏེན ཝུཏྟཾ ‘‘ཨནིཙྪམཱནཾཡེཝ བྷགཝཱ པབྦཱཛེསཱི’’ཏི. ‘‘སཏྠཱ ཀཔིལཔུརཾ གནྟྭཱ ཏཏིཡདིཝསེ ནནྡཾ པབྦཱཛེསཱི’’ཏི དྷམྨཔདཊྛཀཐཱཡཾ (དྷ. པ. ཨཊྛ. ༡.༡༢ ནནྡཏྠེརཝཏྠུ) ཝུཏྟཾ, ཨངྒུཏྟརནིཀཱཡཊྛཀཐཱཡཾ (ཨ. ནི. ཨཊྛ. ༡.༡.༢༣༠) པན –

‘‘མཧཱསཏྟོཔི སབྦཉྙུཏཾ པཏྭཱ པཝཏྟིཏཝརདྷམྨཙཀྐོ ལོཀཱནུགྒཧཾ ཀརོནྟོ རཱཛགཧཏོ ཀཔིལཝཏྠུཾ གནྟྭཱ པཋམདསྶནེནེཝ ¶ པིཏརཾ སོཏཱཔཏྟིཕལེ པཏིཊྛཱཔེསི, པུནདིཝསེ པིཏུ ནིཝེསནཾ གནྟྭཱ རཱཧུལམཱཏཱཡ ཨོཝཱདཾ ཀཏྭཱ སེསཛནསྶཔི དྷམྨཾ ཀཐེསི, པུནདིཝསེ ནནྡཀུམཱརསྶ ཨབྷིསེཀགེཧཔྤཝེསནཨཱཝཱཧམངྒལེསུ ཝཏྟམཱནེསུ ཏསྶ ནིཝེསནཾ གནྟྭཱ ཀུམཱརཾ པཏྟཾ གཱཧཱཔེཏྭཱ པབྦཱཛེཏུཾ ཝིཧཱརཱབྷིམུཁོ པཱཡཱསཱི’’ཏི –

ཝུཏྟཾ, ཨིདྷ པན ‘‘བྷགཝཱ ཀཔིལཔུརཾ ཨཱགནྟྭཱ དུཏིཡདིཝསེ ནནྡཾ པབྦཱཛེསཱི’’ཏི ཝུཏྟཾ, སབྦམྤེཏཾ ཨཱཙརིཡེན ཏཾཏཾབྷཱཎཀཱནཾ ཏཐཱ ཏཐཱ ཨནུསྶཝཝསེན པརིཧརིཏྭཱ ཨཱགཏབྷཱཝཏོ ཏཏྠ ཏཏྠ ཏཐཱ ཏཐཱ ཝུཏྟནྟི ནཏྠེཏྠ ཨཱཙརིཡཝཙནེ པུབྦཱཔརཝིརོདྷོ.

བྲཧྨརཱུཔཝཎྞནྟི བྲཧྨརཱུཔསམཱནརཱུཔཾ. ཏྱསྶཱཏི ཏེ ཨསྶ. ཝཊྚཱནུགཏནྟི ཝཊྚཔརིཡཱཔནྣཾ. སཝིགྷཱཏནྟི དུཀྑསཧིཏཏྟཱ སཝིགྷཱཏཾ, སདུཀྑནྟི ཨཏྠོ. སཏྟཝིདྷཾ ཨརིཡདྷནནྟི –

‘‘སདྡྷཱདྷནཾ སཱིལདྷནཾ, ཧིརིཨོཏྟཔྤིཡཾ དྷནཾ;

སུཏདྷནཉྩ ཙཱགོ ཙ, པཉྙཱ ཝེ སཏྟམཾ དྷན’’ནྟི. (ཨ. ནི. ༧.༥-༦) –

ཨེཝཾ ཝུཏྟཾ སཏྟཝིདྷཾ ཨརིཡདྷནཾ. ཨུཉྪཱཙརིཡཱཡཱཏི བྷིཀྑཱཙརིཡཱཡ. པུཏྟསིནེཧོ ཨུཔྤཛྫམཱནོ སཀལསརཱིརཾ ¶ ཁོབྷེཏྭཱ ཨཊྛིམིཉྫཾ ཨཱཧཙྩ ཏིཊྛཏཱིཏི ཨཱཧ ‘‘པུཏྟཔེམཾ བྷནྟེ…པེ… ཨཊྛིམིཉྫཾ ཨཱཧཙྩ ཏིཊྛཏཱི’’ཏི. པུཏྟསིནེཧོ ཧི བལཝབྷཱཝཏོ སཧཛཱཏཔཱིཏིཝེགསྶ སཝིཔྥཱརཏཱཡ ཏཾསམུཊྛཱནརཱུཔདྷམྨེཧི ཕརཎཝསེན སཀལསརཱིརཾ ཨཱལོལེ༹ཏྭཱ ཨཊྛིམིཉྫཾ ཨཱཧཙྩ ཏིཊྛཏི. ཡཏྲ ཧི ནཱམཱཏི ཡོ ནཱམ. སེསམེཏྠ ཨུཏྟཱནམེཝ.

རཱཧུལཝཏྠུཀཐཱཝཎྞནཱ ནིཊྛིཏཱ.

སིཀྑཱཔདདཎྜཀམྨཝཏྠུཀཐཱཝཎྞནཱ

༡༠༦. ཨནུཛཱནཱམི, བྷིཀྑཝེ, སཱམཎེརཱནཾ དས སིཀྑཱཔདཱནཱིཏིཨཱདཱིསུ སིཀྑིཏབྦཱནི པདཱནི སིཀྑཱཔདཱནི, སིཀྑཱཀོཊྛཱསཱཏི ཨཏྠོ. སིཀྑཱཡ ཝཱ པདཱནི སིཀྑཱཔདཱནི, ཨདྷིསཱིལཨདྷིཙིཏྟཨདྷིཔཉྙཱསིཀྑཱཡ ཨདྷིགམུཔཱཡཱཏི ¶ ཨཏྠོ. ཨཏྠཏོ པན ཀཱམཱཝཙརཀུསལཙིཏྟསམྤཡུཏྟཱ ཝིརཏིཡོ, ཏཾསམྤཡུཏྟདྷམྨཱ པནེཏྠ ཏགྒཧཎེནེཝ གཧེཏབྦཱ. སརསེནེཝ པཏནསབྷཱཝསྶ ཨནྟརཱ ཨེཝ ཨཏིཔཱཏནཾ ཨཏིཔཱཏོ, སཎིཀཾ པཏིཏུཾ ཨདཏྭཱ སཱིགྷཾ པཱཏནནྟི ཨཏྠོ. ཨཏིཀྐམྨ ཝཱ སཏྠཱདཱིཧི ཨབྷིབྷཝིཏྭཱ པཱཏནཾ ཨཏིཔཱཏོ, པཱཎསྶ ཨཏིཔཱཏོ པཱཎཱཏིཔཱཏོ, པཱཎཝདྷོ པཱཎགྷཱཏོཏི ཝུཏྟཾ ཧོཏི. པཱཎོཏི ཙེཏྠ ཝོཧཱརཏོ སཏྟོ, པརམཏྠཏོ ཛཱིཝིཏིནྡྲིཡཾ. ཏསྨིཾ པན པཱཎེ པཱཎསཉྙིནོ ཛཱིཝིཏིནྡྲིཡུཔཙྪེདཀཨུཔཀྐམསམུཊྛཱཔིཀཱ ཀཱཡཝཙཱིདྭཱརཱནཾ ཨཉྙཏརཔྤཝཏྟཱ ཝདྷཀཙེཏནཱ པཱཎཱཏིཔཱཏོ, ཏཏོ པཱཎཱཏིཔཱཏཱ.

ཝེརམཎཱིཏི ཝེརཧེཏུཏཱཡ ཝེརསཉྙིཏཾ པཱཎཱཏིཔཱཏཱདིཔཱཔདྷམྨཾ མཎཏི, ‘‘མཡི ཨིདྷ ཋིཏཱཡ ཀཐམཱགཙྪསཱི’’ཏི ཝཱ ཏཛྫེནྟཱི ཝིཡ ནཱིཧརཏཱིཏི ཝེརམཎཱི. ཝིརམཏི ཨེཏཱཡཱཏི ཝཱ ཝིརམཎཱིཏི ཝཏྟབྦེ ནིརུཏྟིནཡེན ‘‘ཝེརམཎཱི’’ཏི ཝུཏྟཾ. ཨཏྠཏོ པན ཝེརམཎཱིཏི ཀཱམཱཝཙརཀུསལཙིཏྟསམྤཡུཏྟཱ ཝིརཏིཡོ. སཱ ‘‘པཱཎཱཏིཔཱཏཱདིཾ ཝིརམནྟསྶ ཡཱ ཏསྨིཾ སམཡེ པཱཎཱཏིཔཱཏཱ ཨཱརཏི ཝིརཏི པཊིཝིརཏི ཝེརམཎཱི ཨཀིརིཡཱ ཨཀརཎཾ ཨནཛ྄ཛྷཱཔཏྟི ཝེལཱནཏིཀྐམོ སེཏུགྷཱཏོ’’ཏི ཨེཝམཱདིནཱ ནཡེན ཝིབྷངྒེ (ཝིབྷ. ༧༠༤) ཝུཏྟཱ. ཀཱམཉྩེསཱ ཝེརམཎཱི ནཱམ ལོཀུཏྟརཱཔི ཨཏྠི, ཨིདྷ པན སམཱདཱནཝསཔྤཝཏྟཱ ཝིརཏི ཨདྷིཔྤེཏཱཏི ལོཀུཏྟརཱཡ ཝིརཏིཡཱ སམཱདཱནཝསེན པཝཏྟིཨསམྦྷཝཏོ ཀཱམཱཝཙརཀུསལཙིཏྟསམྤཡུཏྟཱ ཝིརཏིཡོ གཧེཏབྦཱ.

ཨདིནྣཱདཱནཱ ཝེརམཎཱིཏིཨཱདཱིསུ ཨདིནྣསྶ ཨཱདཱནཾ ཨདིནྣཱདཱནཾ, པརསྶཧརཎཾ, ཐེཡྻཾ ཙོརིཀཱཏི ¶ ཝུཏྟཾ ཧོཏི. ཏཏྠ ཨདིནྣནྟི པརཔརིགྒཧིཏཾ. ཡཏྠ པརོ ཡཐཱཀཱམཀཱརིཏཾ ཨཱཔཛྫནྟོ ཨདཎྜཱརཧོ ཨནུཔཝཛྫོ ཙ ཧོཏི, ཏསྨིཾ པན པརཔརིགྒཧིཏེ པརཔརིགྒཧིཏསཨཉནོ ཏདཱདཱཡཀཨུཔཀྐམསམུཊྛཱཔིཀཱ ཐེཡྻཙེཏནཱ ཨདིནྣཱདཱནཾ.

ཨབྲཧྨཙརིཡཾ ནཱམ ཨསེཊྛཙརིཡཾ དྭཡཾདྭཡསམཱཔཏྟི. སཱ ཧི ‘‘ཨཔྤསྶཱདཱ ཀཱམཱ བཧུདུཀྑཱ བཧུཔཱཡཱསཱ, ཨཱདཱིནཝོ ཨེཏྠ བྷིཡྻོ’’ཏིཨཱདིནཱ (མ. ནི. ༡.༡༧༧; ༢.༤༢) ཧཱིལི༹ཏཏྟཱ ཨསེཊྛཱ ཨཔྤསཏྠཱ ཙརིཡཱཏི ཝཱ ཨསེཊྛཱནཾ ནིཧཱིནཱནཾ ཨིཏྠིཔུརིསཱནཾ ཙརིཡཱཏི ཝཱ ཨསེཊྛཙརིཡཾ, ཨསེཊྛཙརིཡཏྟཱ ཨབྲཧྨཙརིཡནྟི ཙ ཝུཙྩཏི ¶ , ཨཏྠཏོ པན ཨསདྡྷམྨསེཝནཱདྷིཔྤཱཡེན ཀཱཡདྭཱརཔྤཝཏྟཱ མགྒེནམགྒཔྤཊིཔཏྟིསམུཊྛཱཔིཀཱ ཙེཏནཱ ཨབྲཧྨཙརིཡཾ.

མུསཱཏི ཨབྷཱུཏཾ ཨཏཙྪཾ ཝཏྠུ, ཝཱདོཏི ཏསྶ བྷཱུཏཏོ ཏཙྪཏོ ཝིཉྙཱཔནཾ. ལཀྑཎཏོ པན ཨཏཐཾ ཝཏྠུཾ ཏཐཏོ པརཾ ཝིཉྙཱཔེཏུཀཱམསྶ ཏཐཱཝིཉྙཏྟིསམུཊྛཱཔིཀཱ ཙེཏནཱ མུསཱཝཱདོ མུསཱ ཝདཱིཡཏི ཝུཙྩཏི ཨེཏཱཡཱཏི ཀཏྭཱ.

སུརཱམེརཡམཛྫཔྤམཱདཊྛཱནཱཏི ཨེཏྠ སུརཱཏི པཱུཝསུརཱ པིཊྛསུརཱ ཨོདནསུརཱ ཀིཎྞཔཀྑིཏྟཱ སམྦྷཱརསཾཡུཏྟཱཏི པཉྩ སུརཱ. མེརཡནྟི པུཔྥཱསཝོ ཕལཱསཝོ མདྷྭཱསཝོ གུལཱ༹སཝོ སམྦྷཱརསཾཡུཏྟོཏི པཉྩ ཨཱསཝཱ. ཏཏྠ པཱུཝེ བྷཱཛནེ པཀྑིཔིཏྭཱ ཏཛྫཾ ཨུདཀཾ དཏྭཱ མདྡིཏྭཱ ཀཏཱ པཱུཝསུརཱ. ཨེཝཾ སེསསུརཱཔི. ཀིཎྞཱཏི པན ཏསྶཱ སུརཱཡ བཱིཛཾ ཝུཙྩཏི, ཡེ སུརཱམོདཀཱཏི ཝུཙྩནྟི, ཏེ པཀྑིཔིཏྭཱ ཀཏཱ ཀིཎྞཔཀྑིཏྟཱ. ཧརཱིཏཀཱིསཱསཔཱདིནཱནཱསམྦྷཱརེཧི སཾཡོཛིཏཱ སམྦྷཱརསཾཡུཏྟཱ. མདྷུཀཏཱལནཱལི༹ཀེརཱདིཔུཔྥརསོ ཙིརཔརིཝཱསིཏོ པུཔྥཱསཝོ. པནསཱདིཕལརསོ ཕལཱསཝོ. མུདྡིཀཱརསོ མདྷྭཱསཝོ. ཨུཙྪུརསོ གུལཱ༹སཝོ. ཧརཱིཏཀཨཱམལཀཀཊུཀབྷཎྜཱདིནཱནཱསམྦྷཱརཱནཾ རསོ ཙིརཔརིཝཱསིཏོ སམྦྷཱརསཾཡུཏྟོ. ཏཾ སབྦམྤི མདཀརཎཝསེན མཛྫཾ པིཝནྟཾ མདཡཏཱིཏི ཀཏྭཱ. པམཱདཊྛཱནནྟི པམཱདཀཱརཎཾ. ཡཱཡ ཙེཏནཱཡ ཏཾ མཛྫཾ པིཝནྟི, ཏསྶཱ ཨེཏཾ ཨདྷིཝཙནཾ. སུརཱམེརཡམཛྫེ པམཱདཊྛཱནཾ སུརཱམེརཡམཛྫཔྤམཱདཊྛཱནཾ, ཏསྨཱ སུརཱམེརཡམཛྫཔྤམཱདཊྛཱནཱ.

ཝིཀཱལབྷོཛནཱཏི ཨརུཎུགྒམནཏོ པཊྛཱཡ ཡཱཝ མཛ྄ཛྷནྷིཀཱ. ཨཡཾ བུདྡྷཱདཱིནཾ ཨརིཡཱནཾ ཨཱཙིཎྞསམཱཙིཎྞོ བྷོཛནསྶ ཀཱལོ ནཱམ, ཏདཉྙོ ཝིཀཱལོ. བྷུཉྫིཏབྦཊྛེན བྷོཛནཾ, ཡཱགུབྷཏྟཱདི སབྦཾ ཡཱཝཀཱལིཀཝཏྠུ. ཡཐཱ ཙ ‘‘རཏྟཱུཔརཏོ’’ཏི (དཱི. ༡.༡༠, ༡༩༤; མ. ནི. ༡.༢༩༣; ༣.༡༤) ཨེཏྠ ¶ རཏྟིཡཱ བྷོཛནཾ རཏྟཱིཏི ཨུཏྟརཔདལོཔེན ཝུཙྩཏི, ཨེཝམེཏྠ བྷོཛནཛ྄ཛྷོཧརཎཾ བྷོཛནནྟི. ཝིཀཱལེ བྷོཛནཾ ཝིཀཱལབྷོཛནཾ, ཏཏོ ཝིཀཱལབྷོཛནཱ, ཝིཀཱལེ ཡཱཝཀཱལིཀཝཏྠུསྶ ཨཛ྄ཛྷོཧརཎཱཏི ཨཏྠོ. ཨཐ ཝཱ ན ཨེཏྠ ཀམྨསཱདྷནོ བྷུཉྫིཏབྦཏྠཝཱཙཀོ བྷོཛནསདྡོ, ཨཐ ཁོ བྷཱཝསཱདྷནོ ཨཛ྄ཛྷོཧརཎཏྠཝཱཙཀོ གཧེཏབྦོ ¶ , ཏསྨཱ ཝིཀཱལེ བྷོཛནཾ ཨཛ྄ཛྷོཧརཎཾ ཝིཀཱལབྷོཛནཾ. ཀསྶ པན ཨཛ྄ཛྷོཧརཎནྟི? ཡཱམཀཱལིཀཱདཱིནཾ ཨནུཉྙཱཏཏྟཱ ཝིཀཱལབྷོཛན-སདྡསྶ ཝཱ ཡཱཝཀཱལིཀཛ྄ཛྷོཧརཎེ ནིརུལ༹ྷཏྟཱ ཡཱཝཀཱལིཀསྶཱཏི ཝིཉྙཱཡཏི, ཨཏྠཏོ པན ཀཱཡདྭཱརཔྤཝཏྟཱ ཝིཀཱལེ ཡཱཝཀཱལིཀཛ྄ཛྷོཧརཎཙེཏནཱ ‘‘ཝིཀཱལབྷོཛན’’ནྟི ཝེདིཏབྦཱ.

ནཙྩགཱིཏཝཱདིཏཝིསཱུཀདསྶནཱཏི ཨེཏྠ སཱསནསྶ ཨནནུལོམཏྟཱ ཝིསཱུཀཾ པཊཱཎཱིབྷཱུཏཾ དསྶནནྟི ཝིསཱུཀདསྶནཾ. ནཙྩཱདཱིནཉྷི དསྶནཾ སཚནྡརཱགཔྤཝཏྟིཏོ སངྑེཔཏོ ‘‘སབྦཔཱཔསྶ ཨཀརཎ’’ནྟིཨཱདིནཡཔྤཝཏྟཾ (དཱི. ནི. ༢.༩༠; དྷ. པ. ༡༨༣) བྷགཝཏོ སཱསནཾ ན ཨནུལོམེཏི. ནཙྩཉྩ གཱིཏཉྩ ཝཱདིཏཉྩ ཝིསཱུཀདསྶནཉྩ ནཙྩགཱིཏཝཱདིཏཝིསཱུཀདསྶནཾ. ཨཏྟནཱ པཡོཛིཡམཱནཾ པརེཧི པཡོཛཱཔིཡམཱནཉྩེཏྠ ནཙྩཾ ནཙྩབྷཱཝསཱམཉྙཏོ པཱལི༹ཡཾ ཨེཀེནེཝ ནཙྩ-སདྡེན གཧིཏཾ, ཏཐཱ གཱིཏཝཱདིཏ-སདྡེཧི གཱཡནགཱཡཱཔནཝཱདནཝཱདཱཔནཱནི, ཏསྨཱ ཨཏྟནཱ ནཙྩནནཙྩཱཔནཱདིཝསེན ནཙྩཱ ཙ གཱིཏཱ ཙ ཝཱདིཏཱ ཙ ཨནྟམསོ མཡཱུརནཙྩཱདིཝསེནཔི པཝཏྟཱནཾ ནཙྩཱདཱིནཾ ཝིསཱུཀབྷཱུཏཱ དསྶནཱ ཙ ཝེརམཎཱིཏི ཨེཝམེཏྠ ཨཏྠོ དཊྛབྦོ. ནཙྩཱདཱིནི ཨཏྟནཱ པཡོཛེཏུཾ ཝཱ པརེཧི པཡོཛཱཔེཏུཾ ཝཱ པཡུཏྟཱནི པསྶིཏུཾ ཝཱ ནེཝ བྷིཀྑཱུནཾ ན བྷིཀྑུནཱིནཾ ཝཊྚཏི. དསྶནེན ཙེཏྠ སཝནམྤི སངྒཧིཏཾ ཝིརཱུཔེཀསེསནཡེན. ཡཐཱ སཀཾ ཝིསཡཨཱལོཙནསབྷཱཝཏཱཡ ཝཱ པཉྩནྣཾ ཝིཉྙཱཎཱནཾ སཝནཀིརིཡཱཡཔི དསྶནསངྑེཔསམྦྷཝཏོ ‘‘དསྶནཱ’’ ཨིཙྩེཝ ཝུཏྟཾ. ཏེནེཝ ཝུཏྟཾ ‘‘པཉྩཧི ཝིཉྙཱཎེཧི ན ཀཉྩི དྷམྨཾ པཊིཝིཛཱནཱཏི ཨཉྙཏྲ ཨབྷིནིཔཱཏམཏྟཱ’’ཏི. དསྶནཀམྱཏཱཡ ཨུཔསངྐམིཏྭཱ པསྶཏོ ཨེཝ ཙེཏྠ ཝཱིཏིཀྐམོ ཧོཏི, ཋིཏནིསིནྣསཡནོཀཱསེ པན ཨཱགཏཾ གཙྪནྟསྶ ཝཱ ཨཱཔཱཐགཏཾ པསྶཏོ སིཡཱ སཾཀིལེསོ, ན ཝཱིཏིཀྐམོ.

མཱལཱགནྡྷཝིལེཔནདྷཱརཎམཎྜནཝིབྷཱུསནཊྛཱནཱཏི ཨེཏྠ མཱལཱཏི ཡཾ ཀིཉྩི པུཔྥཾ. ཀིཉྩཱཔི ཧི མཱལཱ-སདྡོ ལོཀེ བདྡྷམཱལཝཱཙཀོ, སཱསནེ པན རུལ༹ྷིཡཱ པུཔྥེསུཔི ཝུཏྟོ, ཏསྨཱ ཡཾ ཀིཉྩི པུཔྥཾ བདྡྷམབདྡྷཾ ཝཱ, ཏཾ སབྦཾ ‘‘མཱལཱ’’ཏི དཊྛབྦཾ. གནྡྷནྟི ཝཱསཙུཎྞདྷཱུམཱདིཀཾ ཝིལེཔནཏོ ཨཉྙཾ ཡཾ ཀིཉྩི གནྡྷཛཱཏཾ. ཝིལེཔནནྟི ཝིལེཔནཏྠཾ པིསིཏྭཱ པཊིཡཏྟཾ ཡཾ ཀིཉྩི ཚཝིརཱགཀརཎཾ. པིལ༹ནྡྷནཾ དྷཱརཎཾ, ཨཱུནཊྛཱནཔཱུརཎཾ མཎྜནཾ, གནྡྷཝསེན ཚཝིརཱགཝསེན ཙ སཱདིཡནཾ ¶ ¶ ཝིབྷཱུསནཾ. ཏེནེཝ དཱིགྷནིཀཱཡཊྛཀཐཱཡཾ (དཱི. ནི. ཨཊྛ. ༡.༡༠) མཛ྄ཛྷིམནིཀཱཡཊྛཀཐཱཡཉྩ (མ. ནི. ཨཊྛ. ༡.༢༩༣) ‘‘པིལ༹ནྡྷནྟོ དྷཱརེཏི ནཱམ, ཨཱུནཊྛཱནཾ པཱུརེནྟོ མཎྜེཏི ནཱམ, གནྡྷཝསེན ཚཝིརཱགཝསེན ཙ སཱདིཡནྟོ ཝིབྷཱུསེཏི ནཱམཱ’’ཏི ཝུཏྟཾ. པརམཏྠཛོཏིཀཱཡཾ པན ཁུདྡཀཊྛཀཐཱཡཾ (ཁུ. པཱ. ཨཊྛ. ༢.པཙྪིམཔཉྩསིཀྑཱཔདཝཎྞནཱ) ‘‘མཱལཱདཱིསུ དྷཱརཎཱདཱིནི ཡཐཱསངྑྱཾ ཡོཛེཏབྦཱནཱི’’ཏི ཨེཏྟཀམེཝ ཝུཏྟཾ. ཋཱནཾ ཝུཙྩཏི ཀཱརཎཾ, ཏསྨཱ ཡཱཡ དུསྶཱིལྱཙེཏནཱཡ ཏཱནི མཱལཱདྷཱརཎཱདཱིནི མཧཱཛནོ ཀརོཏི, སཱ དྷཱརཎམཎྜནཝིབྷཱུསནཊྛཱནཾ.

ཨུཙྩཱསཡནམཧཱསཡནཱཏི ཨེཏྠ ཨུཙྩཱཏི ཨུཙྩ-སདྡེན སམཱནཏྠཾ ཨེཀཾ སདྡནྟརཾ. སེཏི ཨེཏྠཱཏི སཡནཾ, ཨུཙྩཱསཡནཉྩ མཧཱསཡནཉྩ ཨུཙྩཱསཡནམཧཱསཡནཾ. ཨུཙྩཱསཡནཾ ཝུཙྩཏི པམཱཎཱཏིཀྐནྟཾ མཉྩཱདི. མཧཱསཡནཾ ཨཀཔྤིཡཏྠརཎེཧི ཨཏྠཏཾ ཨཱསནྡཱདི. ཨཱསནཉྩེཏྠ སཡནེནེཝ སངྒཧིཏནྟི དཊྛབྦཾ. ཡསྨཱ པན ཨཱདྷཱརེ པཊིཀྑིཏྟེ ཏདཱདྷཱརཱ ཀིརིཡཱ པཊིཀྑིཏྟཱཝ ཧོཏི, ཏསྨཱ ‘‘ཨུཙྩཱསཡནམཧཱསཡནཱ’’ ཨིཙྩེཝ ཝུཏྟཾ, ཨཏྠཏོ པན ཏདུཔབྷོགབྷཱུཏནིསཛྫཱནིཔཛྫནེཧི ཝིརཏི དསྶིཏཱཏི དཊྛབྦཱ. ཨཐ ཝཱ ཨུཙྩཱསཡནམཧཱསཡནསཡནཱཏི ཨེཏསྨིཾ ཨཏྠེ ཨེཀསེསནཡེན ཨཡཾ ནིདྡེསོ ཀཏོ ཡཐཱ ‘‘ནཱམརཱུཔཔཙྩཡཱ སལཱ༹ཡཏན’’ནྟི, ཨཱསནཀིརིཡཱཔུབྦཀཏྟཱ སཡནཀིརིཡཱཡ སཡནགྒཧཎེནེཝ ཨཱསནམྤི གཧིཏནྟི ཝེདིཏབྦཾ.

ཛཱཏརཱུཔརཛཏཔཊིགྒཧཎཱཏི ཨེཏྠ ཛཱཏརཱུཔནྟི སུཝཎྞཾ. རཛཏནྟི ཀཧཱཔཎོ ལོཧམཱསཀོ ཛཏུམཱསཀོ དཱརུམཱསཀོཏི ཡེ ཝོཧཱརཾ གཙྪནྟི, ཏསྶ ཨུབྷཡསྶཔི པཊིགྒཧཎཾ ཛཱཏརཱུཔརཛཏཔཊིགྒཧཎཾ. ཏིཝིདྷཉྩེཏྠ པཊིགྒཧཎཾ ཀཱཡེན ཝཱཙཱཡ མནསཱཏི. ཏཏྠ ཀཱཡེན པཊིགྒཧཎཾ ཨུགྒཎྷནཾ, ཝཱཙཱཡ པཊིགྒཧཎཾ ཨུགྒཧཱཔནཾ, མནསཱ པཊིགྒཧཎཾ སཱདིཡནཾ. ཏིཝིདྷམྤི པཊིགྒཧཎཾ སཱམཉྙནིདྡེསེན ཨེཀསེསནཡེན ཝཱ གཧེཏྭཱ ‘‘པཊིགྒཧཎཱ’’ཏི ཝུཏྟཾ, ཏསྨཱ ནེཝ ཨུགྒཧེཏུཾ ན ཨུགྒཧཱཔེཏུཾ ན ཨུཔནིཀྑིཏྟཾ ཝཱ སཱདིཏུཾ ཝཊྚཏི. ཨིམཱནི པན དས སིཀྑཱཔདཱནི གཧཊྛཱནམྤི སཱདྷཱརཎཱནི. ཝུཏྟཉྷེཏཾ ཝིསུདྡྷིམགྒེ (ཝིསུདྡྷི. ༡༣) ‘‘ཨུཔཱསཀཨུཔཱསིཀཱནཾ ནིཙྩསཱིལཝསེན པཉྩ སིཀྑཱཔདཱནི, སཏི ཝཱ ཨུསྶཱཧེ དས, ཨུཔོསཐངྒཝསེན ཨཊྛཱཏི ཨིདཾ གཧཊྛསཱིལ’’ནྟི. ཨེཏྠ ཧི དསཱཏི སཱམཎེརེཧི རཀྑིཏབྦསཱིལམཱཧ ¶ གྷཊིཀཱརཱདཱིནཾ ཝིཡ. པརམཏྠཛོཏིཀཱཡཾ པན ཁུདྡཀཊྛཀཐཱཡཾ (ཁུ. པཱ. ཨཊྛ. ༢.སཱདྷཱརཎཝིསེསཝཝཏྠཱན) ‘‘ཨཱདིཏོ དྭེ ཙཏུཏྠཔཉྩམཱནི ཨུཔཱསཀཱནཾ སཱམཎེརཱནཉྩ སཱདྷཱརཎཱནི ནིཙྩསཱིལཝསེན, ཨུཔོསཐསཱིལཝསེན པན ཨུཔཱསཀཱནཾ སཏྟམཊྛམཾ ཙེཀཾ ཨངྒཾ ཀཏྭཱ སབྦཔཙྪིམཝཛྫཱནི སབྦཱནིཔི སཱམཎེརེཧི སཱདྷཱརཎཱནི, པཙྪིམཾ པན སཱམཎེརཱནམེཝ ཝིསེསབྷཱུཏ’’ནྟི ¶ ཝུཏྟཾ, ཏཾ ‘‘སཏི ཝཱ ཨུསྶཱཧེ དསཱ’’ཏི ཨིམིནཱ ན སམེཏི. ནཱསནཝཏྠཱུཏི ལིངྒནཱསནཱཡ ཝཏྠུ, ཨདྷིཊྛཱནཾ ཀཱརཎནྟི ཝུཏྟཾ ཧོཏི.

༡༠༧. ཀིནྟཱིཏི ཀེན ནུ ཁོ ཨུཔཱཡེན. ‘‘ཨཏྟནོ པརིཝེཎནྟི ཨིདཾ པུགྒལིཀཾ སནྡྷཱཡ ཝུཏྟ’’ནྟི གཎྛིཔདེསུ ཝུཏྟཾ. ཨཡམེཏྠ གཎྛིཔདཀཱརཱནཾ ཨདྷིཔྤཱཡོ – ‘‘ཝསྶགྒེན པཏྟསེནཱསན’’ནྟི ཨིམིནཱ ཏསྶ ཝསྶགྒེན པཏྟཾ སངྒྷིཀསེནཱསནཾ ཝུཏྟཾ, ‘‘ཨཏྟནོ པརིཝེཎ’’ནྟི ཨིམིནཱཔི ཏསྶེཝ པུགྒལིཀསེནཱསནཾ ཝུཏྟནྟི. ཨཡཾ པནེཏྠ ཨམྷཱཀཾ ཁནྟི – ‘‘ཡཏྠ ཝཱ ཝསཏཱི’’ཏི ཨིམིནཱ སངྒྷིཀཾ ཝཱ ཧོཏུ པུགྒལིཀཾ ཝཱ, ཏསྶ ནིབདྡྷཝསནཀསེནཱསནཾ ཝུཏྟཾ. ‘‘ཡཏྠ ཝཱ པཊིཀྐམཏཱི’’ཏི ཨིམིནཱ པན ཡཾ ཨཱཙརིཡསྶ ཨུཔཛ྄ཛྷཱཡསྶ ཝཱ ཝསནཊྛཱནཾ ཨུཔཊྛཱནཱདིནིམིཏྟཾ ནིབདྡྷཾ པཝིསཏི, ཏཾ ཨཱཙརིཡུཔཛ྄ཛྷཱཡཱནཾ ཝསནཊྛཱནཾ ཝུཏྟཾ. ཏསྨཱ ཏདུབྷཡཾ དསྶེཏུཾ ‘‘ཨུབྷཡེནཔི ཨཏྟནོ པརིཝེཎཉྩ ཝསྶགྒེན པཏྟསེནཱསནཉྩ ཝུཏྟ’’ནྟི ཨཱཧ. ཏཏྠ ཨཏྟནོ པརིཝེཎནྟི ཨིམིནཱ ཨཱཙརིཡུཔཛ྄ཛྷཱཡཱནཾ ཝསནཊྛཱནཾ དསྶིཏཾ, ཝསྶགྒེན པཏྟསེནཱསནནྟི ཨིམིནཱ པན ཏསྶ ཝསནཊྛཱནཾ. ཏདུབྷཡམྤི སངྒྷིཀཾ ཝཱ ཧོཏུ པུགྒལིཀཾ ཝཱ, ཨཱཝརཎཾ ཀཱཏབྦམེཝཱཏི. མུཁདྭཱརིཀནྟི མུཁདྭཱརེན བྷུཉྫིཏབྦཾ. དཎྜཀམྨཾ ཀཏྭཱཏི དཎྜཀམྨཾ ཡོཛེཏྭཱ. དཎྜེནྟི ཝིནེནྟི ཨེཏེནཱཏི དཎྜོ, སོཡེཝ ཀཱཏབྦཏྟཱ ཀམྨནྟི དཎྜཀམྨཾ, ཨཱཝརཎཱདི.

སིཀྑཱཔདདཎྜཀམྨཝཏྠུཀཐཱཝཎྞནཱ ནིཊྛིཏཱ.

ཨནཱཔུཙྪཱཝརཎཝཏྠུཨཱདིཀཐཱཝཎྞནཱ

༡༠༨. དཎྜཀམྨམསྶ ཀརོཐཱཏི ཨསྶ དཎྜཀམྨཾ ཡོཛེཐ ཨཱཎཱཔེཐ. དཎྜཀམྨནྟི ཝཱ ནིགྒཧཀམྨཾ, ཏསྨཱ ནིགྒཧམསྶ ཀརོཐཱཏི ཝུཏྟཾ ¶ ཧོཏི. ཨེས ནཡོ སབྦཏྠ ཨཱིདིསེསུ ཋཱནེསུ. སེནཱསནགྒཱཧོ ཙ པཊིཔྤསྶམྦྷཏཱིཏི ཨིམིནཱ ཙ ཚིནྣཝསྶོ ཙ ཧོཏཱིཏི དཱིཔེཏི. སཙེ ཨཱཀིཎྞདོསོཝ ཧོཏི, ཨཱཡཏིཾ སཾཝརེ ན ཏིཊྛཏི, ནིཀྐཌྜྷིཏབྦོཏི ཨེཏྠ སཙེ ཡཱཝཏཏིཡཾ ཝུཙྩམཱནོ ན ཨོརམཏི, སངྒྷཾ ཨཔལོཀེཏྭཱ ནཱསེཏབྦོ. པུན པབྦཛྫཾ ཡཱཙམཱནོཔི ཨཔལོཀེཏྭཱ པབྦཱཛེཏབྦོཏི ཝདནྟི. པཙྪིམིཀཱཡ ཝསྶཱཝཱསིཀཾ ལཙྪཏཱིཏི པཙྪིམིཀཱཡ པུན ཝསྶཾ ཨུཔགཏཏྟཱ ལཙྪཏི. ཨཔལོཀེཏྭཱ ལཱབྷོ དཱཏབྦོཏི ཚིནྣཝསྶཏཱཡ ཝུཏྟཾ. ཨིཏརཱནི པཉྩ སིཀྑཱཔདཱནཱིཏི ཝིཀཱལབྷོཛནཱདཱིནི པཉྩ. ཨཙྩཡཾ དེསཱཔེཏབྦོཏི ‘‘ཨཙྩཡོ མཾ, བྷནྟེ, ཨཙྩགམཱ’’ཏིཨཱདིནཱ ནཡེན དེསཱཔེཏབྦོ.

ཨནཱཔུཙྪཱཝརཎཝཏྠུཨཱདིཀཐཱཝཎྞནཱ ནིཊྛིཏཱ.

པཎྜཀཝཏྠུཀཐཱཝཎྞནཱ

༡༠༩. པཎྜཀཝཏྠུམྷི ¶ ‘‘ཡོ ཀཱལ༹པཀྑེ ཨིཏྠཱི ཧོཏི, ཛུཎྷཔཀྑེ པུརིསོ, ཨཡཾ པཀྑཔཎྜཀོ’’ཏི ཀེཙི ཝདནྟི, ཨཊྛཀཐཱཡཾ པན ‘‘ཀཱལ༹པཀྑེ པཎྜཀོ ཧོཏི, ཛུཎྷཔཀྑེ པནསྶ པརིལཱ༹ཧོ ཝཱུཔསམྨཏཱི’’ཏི ཨཔཎྜཀཔཀྑེ པརིལཱ༹ཧཝཱུཔསམསྶེཝ ཝུཏྟཏྟཱ པཎྜཀཔཀྑེ ཨུསྶནྣཔརིལཱ༹ཧཏཱ པཎྜཀབྷཱཝཱཔཏྟཱིཏི ཝིཉྙཱཡཏི, ཏསྨཱ ཨིདམེཝེཏྠ སཱརཏོ པཙྩེཏབྦཾ. ཨིཏྠིབྷཱཝོ པུམྦྷཱཝོ ཝཱ ནཏྠི ཨེཏསྶཱཏི ཨབྷཱཝཀོ. ཏསྨིཾ ཡེཝསྶ པཀྑེ པབྦཛྫཱ ཝཱརིཏཱཏི ཨེཏྠ ‘‘ཨཔཎྜཀཔཀྑེ པབྦཱཛེཏྭཱ པཎྜཀཔཀྑེ ནཱསེཏབྦོ’’ཏི ཏཱིསུཔི གཎྛིཔདེསུ ཝུཏྟཾ. ཀེཙི པན ‘‘ཨཔཎྜཀཔཀྑེ པབྦཛིཏོ སཙེ ཀིལེསཀྑཡཾ པཱཔུཎཱཏི, ན ནཱསེཏབྦོ’’ཏི ཝདནྟི, ཏཾ ཏེསཾ མཏིམཏྟཾ པཎྜཀསྶ ཀིལེསཀྑཡཱསམྦྷཝཏོ ཁཱིཎཀིལེསསྶ ཙ པཎྜཀབྷཱཝཱནུཔཔཏྟིཏོ. ཨཧེཏུཀཔཊིསནྡྷིཀཐཱཡཉྷི ཨཝིསེསེན པཎྜཀསྶ ཨཧེཏུཀཔཊིསནྡྷིཏཱ ཝུཏྟཱ. ཨཱསིཏྟཨུསཱུཡཔཀྑཔཎྜཀཱནཉྩ པཊིསནྡྷིཏོ པཊྛཱཡེཝ པཎྜཀསབྷཱཝོ, ན པཝཏྟིཡཾཡེཝཱཏི ཝདནྟི. ཏེནེཝ ཨཧེཏུཀཔཊིསནྡྷིནིདྡེསེ ཛཙྩནྡྷབདྷིརཱདཡོ ཝིཡ པཎྜཀོ ཛཱཏིསདྡེན ཝིསེསེཏྭཱ ན ནིདྡིཊྛོ. ཨིདྷཱཔི ¶ ཙཏུཏྠཔཱརཱཛིཀསཾཝཎྞནཱཡཾ (པཱརཱ. ཨཊྛ. ༢.༢༣༣) ‘‘ཨབྷབྦཔུགྒལེ དསྶེནྟེན པཎྜཀཏིརཙྪཱནགཏཨུབྷཏོབྱཉྫནཀཱ ཏཡོ ཝཏྠུཝིཔནྣཱ ཨཧེཏུཀཔཊིསནྡྷིཀཱ, ཏེསཾ སགྒོ ཨཝཱརིཏོ, མགྒོ པན ཝཱརིཏོ’’ཏི ཨཝིསེསེན ཝུཏྟཾ.

པཎྜཀཝཏྠུཀཐཱཝཎྞནཱ ནིཊྛིཏཱ.

ཐེཡྻསཾཝཱསཀཝཏྠུཀཐཱཝཎྞནཱ

༡༡༠. ཐེཡྻསཾཝཱསཀཝཏྠུམྷི ཀོལཉྙཱཏི མཱཏུཝཾསེ པིཏུཝཾསེ ཙ ཛཱཏཱ མཱཏཱཔིཏུཔྤབྷུཏིསབྦཉཱཏཡོ. ཐེཡྻཱཡ སཾཝཱསོ ཨེཏསྶཱཏི ཐེཡྻསཾཝཱསཀོ. སོ ཙ ན སཾཝཱསམཏྟསྶེཝ ཐེནཀོ ཨིདྷཱདྷིཔྤེཏོ, ཨཐ ཁོ ལིངྒསྶ ཏདུབྷཡསྶ ཙ ཐེནཀོཔཱིཏི ཨཱཧ ‘‘ཏཡོ ཐེཡྻསཾཝཱསཀཱ’’ཏིཨཱདི. ན ཡཐཱཝུཌྜྷཾ ཝནྡནཾ སཱདིཡཏཱིཏི ཡཐཱཝུཌྜྷཾ བྷིཀྑཱུནཾ ཝཱ སཱམཎེརཱནཾ ཝཱ ཝནྡནཾ ན སཱདིཡཏི. ཡཐཱཝུཌྜྷཾ ཝནྡནཾ སཱདིཡཏཱིཏི ཨཏྟནཱ མུསཱཝཱདཾ ཀཏྭཱ དསྶིཏཝསྶཱནུརཱུཔཾ ཡཐཱཝུཌྜྷཾ ཝནྡནཾ སཱདིཡཏི. བྷིཀྑུཝསྶགཎནཱདིཀོཏི ཨིམིནཱ ན ཨེཀཀམྨཱདིཀོཝ ཨིདྷ སཾཝཱསོ ནཱམཱཏི དསྶེཏི.

རཱཛ…པེ… བྷཡེནཱཏི ཨེཏྠ བྷཡ-སདྡོ པཙྩེཀཾ ཡོཛེཏབྦོ ‘‘རཱཛབྷཡེན དུབྦྷིཀྑབྷཡེནཱ’’ཏིཨཱདིནཱ ¶ . སཾཝཱསཾ ནཱདྷིཝཱསེཏི, ཡཱཝ སོ སུདྡྷམཱནསོཏི རཱཛབྷཡཱདཱིཧི གཧིཏལིངྒཏཱཡ སོ སུདྡྷམཱནསོ ཡཱཝ སཾཝཱསཾ ནཱདྷིཝཱསེཏཱིཏི ཨཏྠོ. ཡོ ཧི རཱཛབྷཡཱདིཾ ཝིནཱ ཀེཝལཾ བྷིཀྑཱུ ཝཉྩེཏྭཱ ཏེཧི སདྡྷིཾ སཾཝསིཏུཀཱམཏཱཡ ལིངྒཾ གཎྷཱཏི, སོ ཨསུདྡྷཙིཏྟཏཱཡ ལིངྒགྒཧཎེནེཝ ཐེཡྻསཾཝཱསཀོ ནཱམ ཧོཏི. ཨཡཾ པན ཏཱདིསེན ཨསུདྡྷཙིཏྟེན བྷིཀྑཱུ ཝཉྩེཏུཀཱམཏཱཡ ཨབྷཱཝཏོ ཡཱཝ སཾཝཱསཾ ནཱདྷིཝཱསེཏི, ཏཱཝ ཐེཡྻསཾཝཱསཀོ ནཱམ ན ཧོཏི. ཏེནེཝ ‘‘རཱཛབྷཡཱདཱིཧི གཧིཏལིངྒཱནཾ ‘གིཧཱི མཾ སམཎོཏི ཛཱནནྟཱུ’ཏི ཝཉྩནཱཙིཏྟེ སཏིཔི བྷིཀྑཱུནཾ ཝཉྩེཏུཀཱམཏཱཡ ཨབྷཱཝཱ དོསོ ན ཛཱཏོ’’ཏི ཏཱིསུཔི གཎྛིཔདེསུ ཝུཏྟཾ. ཀེཙི པན ‘‘ཝཱུཔསནྟབྷཡཏཱ ¶ ཨིདྷ སུདྡྷཙིཏྟཏཱ’’ཏི ཝདནྟི, ཨེཝཉྩ སཏི སོ ཝཱུཔསནྟབྷཡོ ཡཱཝ སཾཝཱསཾ ནཱདྷིཝཱསེཏི, ཏཱཝ ཐེཡྻསཾཝཱསཀོ ན ཧོཏཱིཏི ཨཡམཏྠོ ཝིཉྙཱཡཏི. ཨིམསྨིཉྩ ཨཏྠེ ཝིཉྙཱཡམཱནེ ཨཝཱུཔསནྟབྷཡསྶ སཾཝཱསསཱདིཡནེཔི ཐེཡྻསཾཝཱསཀཏཱ ན ཧོཏཱིཏི ཨཱཔཛྫེཡྻ, ན ཙ ཨཊྛཀཐཱཡཾ ཨཝཱུཔསནྟབྷཡསྶ སཾཝཱསསཱདིཡནེཔི ཨཐེཡྻསཾཝཱསཀཏཱ དསྶིཏཱ. སབྦཔཱསཎྜིཡབྷཏྟཱནི བྷུཉྫནྟོཏི ཙ ཨིམིནཱ ཨཝཱུཔསནྟཏཡེནཔི སཾཝཱསཾ ཨསཱདིཡནྟེནེཝ ཝསིཏབྦནྟི དཱིཔེཏི. ཏེནེཝ ཏཱིསུཔི གཎྛིཔདེསུ ཝུཏྟཾ ‘‘ཡསྨཱ ཝིཧཱརཾ ཨཱགནྟྭཱ སངྒྷིཀཾ གཎྷནྟསྶ སཾཝཱསཾ པརིཧརིཏུཾ དུཀྐརཾ, ཏསྨཱ སབྦཔཱསཎྜིཡབྷཏྟཱནི བྷུཉྫནྟོཏི ཨིདཾ ཝུཏྟ’’ནྟི, ཏསྨཱ རཱཛབྷཡཱདཱིཧི གཧིཏལིངྒཏཱཡེཝེཏྠ སུདྡྷཙིཏྟཏཱཏི གཧེཏབྦཾ.

སབྦཔཱསཎྜིཡབྷཏྟཱནཱིཏི སབྦསཱམཡིཀཱནཾ སཱདྷཱརཎཾ ཀཏྭཱ ཝཱིཐིཙཏུཀྐཱདཱིསུ ཋཔེཏྭཱ དཱཏབྦབྷཏྟཱནི. ཀཱཡཔརིཧཱརིཡཱནཱིཏི ཀཱཡེན པརིཧརིཏབྦཱནི. ཨབྦྷུགྒཙྪནྟཱིཏི ཨབྷིམུཁཾ གཙྪནྟི. ཀམྨནྟཱནུཊྛཱནེནཱཏི ཀསིགོརཀྑཱདིཀམྨཀརཎེན. ཏདེཝ པཏྟཙཱིཝརཾ ཨཱདཱཡ ཝིཧཱརཾ གཙྪཏཱིཏི ཙཱིཝརཱནི ནིཝཱསནཔཱརུཔནཝསེན ཨཱདཱཡ པཏྟཉྩ ཨཾསཀཱུཊེ ལགྒེཏྭཱ ཝིཧཱརཾ གཙྪཏི. ནཱཔི སཡཾ ཛཱནཱཏཱིཏི ‘‘ཡོ ཨེཝཾ པབྦཛཏི, སོ ཐེཡྻསཾཝཱསཀོ ནཱམ ཧོཏཱི’’ཏི ཝཱ ‘‘ཨེཝཾ ཀཱཏུཾ ན ལབྷཏཱི’’ཏི ཝཱ ‘‘ཨེཝཾ པབྦཛིཏོ སམཎོ ན ཧོཏཱི’’ཏི ཝཱ ན ཛཱནཱཏི. ཡོ ཨེཝཾ པབྦཛཏི, སོ ཐེཡྻསཾཝཱསཀོ ནཱམ ཧོཏཱིཏི ཨིདཾ པན ནིདསྶནམཏྟཾ. ཨནུཔསམྤནྣཀཱལེཡེཝཱཏི ཨིམིནཱ ཨུཔསམྤནྣཀཱལེ སུཏྭཱ སཙེཔི ནཱརོཙེཏི, ཐེཡྻསཾཝཱསཀོ ན ཧོཏཱིཏི དཱིཔེཏི.

སིཀྑཾ ཨཔྤཙྩཀྑཱཡ…པེ… ཐེཡྻསཾཝཱསཀོ ན ཧོཏཱིཏི ཨིདཾ བྷིཀྑཱུཧི དིནྣལིངྒསྶ ཨཔརིཙྩཏྟཏྟཱ ན ལིངྒཐེནཀོ ཧོཏི, ལིངྒཱནུརཱུཔསྶ སཾཝཱསསྶ སཱདིཏཏྟཱ ནཱཔི སཾཝཱསཐེནཀོ ཧོཏཱིཏི ཝུཏྟཾ. ཨེཀོ བྷིཀྑུ ཀཱསཱཡེ སཨུསྶཱཧོཝ ཨོདཱཏཾ ནིཝཱསེཏྭཱཏི ཨེཏྠཱཔི ཨིདམེཝ ཀཱརཎཾ ¶ དཊྛབྦཾ. པརཏོ སཱམཎེརོ སལིངྒེ ཋིཏོཏིཨཱདིནཱ སཱམཎེརསྶ ཝུཏྟཝིདྷཱནེསུཔི ཨཐེཡྻསཾཝཱསཀཔཀྑེ ཨཡམེཝ ནཡོ. བྷིཀྑུནིཡཱཔི ཨེསེཝ ནཡོཏི ཝུཏྟམེཝཏྠཾ ‘‘སཱཔི ཧི གིཧིབྷཱཝཾ པཏྠཡམཱནཱ’’ཏིཨཱདིནཱ ཝིབྷཱཝེཏི. ཡོ ཀོཙི ཝུཌྜྷཔབྦཛིཏོཏི ¶ སཱམཎེརཾ སནྡྷཱཡ ཝུཏྟཾ. མཧཱཔེལཱ༹དཱིསཱུཏི ཨེཏེན གིཧིསནྟཀཾ དསྶིཏཾ. སཡཾ སཱམཎེརོཝ…པེ… ཐེཡྻསཾཝཱསཀོ ན ཧོཏཱིཏི ཨེཏྠ ཀིཉྩཱཔི ཐེཡྻསཾཝཱསཀོ ན ཧོཏི, པཱརཱཛིཀཾ པན ཨཱཔཛྫཏིཡེཝ. སེསམེཏྠ ཨུཏྟཱནམེཝ.

ཐེཡྻསཾཝཱསཀཝཏྠུཀཐཱཝཎྞནཱ ནིཊྛིཏཱ.

ཏིཏྠིཡཔཀྐནྟཀཀཐཱཝཎྞནཱ

ཏིཏྠིཡཔཀྐནྟཀཀཐཱཡཾ ཏེསཾ ལིངྒེ ཨཱདིནྣམཏྟེ ཏིཏྠིཡཔཀྐནྟཀོ ཧོཏཱིཏི ‘‘ཏིཏྠིཡོ བྷཝིསྶཱམཱི’’ཏི གཏསྶ ལིངྒགྒཧཎེནེཝ ཏེསཾ ལདྡྷིཔི གཧིཏཱཡེཝ ཧོཏཱིཏི ཀཏྭཱ ཝུཏྟཾ. ཀེནཙི པན ‘‘ཏེསཾ ལིངྒེ ཨཱདིནྣམཏྟེ ལདྡྷིཡཱ གཧིཏཱཡཔི ཨགྒཧིཏཱཡཔི ཏིཏྠིཡཔཀྐནྟཀོ ཧོཏཱི’’ཏི ཝུཏྟཾ, ཏཾ ན གཧེཏབྦཾ. ན ཧི ‘‘ཏིཏྠིཡོ བྷཝིསྶཱམཱི’’ཏི གཏསྶ ལིངྒསམྤཊིཙྪནཏོ ཨཉྙཾ ལདྡྷིགྒཧཎཾ ནཱམ ཨཏྠི. ལིངྒསམྤཊིཙྪནེནེཝ ཧི སོ གཧིཏལདྡྷིཀོ ཧོཏི. ཏེནེཝ ‘‘ཝཱིམཾསནཏྠཾ ཀུསཙཱིརཱདཱིནི…པེ… ཡཱཝ ན སམྤཊིཙྪཏི, ཏཱཝ ཏཾ ལདྡྷི རཀྑཏི. སམྤཊིཙྪིཏམཏྟེ ཏིཏྠིཡཔཀྐནྟཀོ ཧོཏཱི’’ཏི ཝུཏྟཾ. ནགྒོཝ ཨཱཛཱིཝཀཱནཾ ཨུཔསྶཡཾ གཙྪཏི, པདཝཱརེ པདཝཱརེ དུཀྐཊནྟི ‘‘ཨཱཛཱིཝཀོ བྷཝིསྶ’’ནྟི ཨསུདྡྷཙིཏྟེན གམནཔཙྩཡཱ དུཀྐཊཾ ཝུཏྟཾ. ནགྒེན ཧུཏྭཱ གམནཔཙྩཡཱཔི དུཀྐཊཱ ན མུཙྩཏིཡེཝ. ཀཱུཊཝསྶཾ གཎེནྟོཏི ཀཱུཊཝསྶཾ གཎེཏྭཱ སཾཝཱསཾ སཱདིཡནྟོཏི ཨདྷིཔྤཱཡོ.

ཏིཏྠིཡཔཀྐནྟཀཀཐཱཝཎྞནཱ ནིཊྛིཏཱ.

༡༡༡. ཏིརཙྪཱནགཏཝཏྠུ ཨུཏྟཱནམེཝ.

མཱཏུགྷཱཏཀཱདིཝཏྠུཀཐཱཝཎྞནཱ

༡༡༢. མཱཏུགྷཱཏཀཱདིཝཏྠཱུསུ ཨཔཝཱཧནནྟི ཨཔགམནཾ, པཏིཀརཎནྟི ཨཏྠོ. ཡཐཱ སམཱནཛཱཏིཀསྶ ཝིཀོཔནེ ཀམྨཾ གརུཏརཾ, ན ཏཐཱ ཝིཛཱཏིཀསྶཱཏི ཨཱཧ ‘‘མནུསྶིཏྠིབྷཱུཏཱ’’ཏི ¶ . པུཏྟསམྦནྡྷེན མཱཏུཔིཏུསམཉྙཱ ¶ , དཏྟཀིཏྟིམཱདིཝསེནཔི པུཏྟཝོཧཱརོ ལོཀེ དིསྶཏི, སོ ཙ ཁོ པརིཡཱཡཏོཏི ནིཔྤརིཡཱཡསིདྡྷཏཾ དསྶེཏུཾ ‘‘ཛནིཀཱ མཱཏཱ’’ཏི ཝུཏྟཾ. ཡཐཱ མནུསྶཏྟབྷཱཝེ ཋིཏསྶེཝ ཀུསལདྷམྨཱནཾ ཏིཀྑཝིསདསཱུརབྷཱཝཱཔཏྟི ཡཐཱ ཏཾ ཏིཎྞམྤི བོདྷིསཏྟཱནཾ བོདྷིཏྟཡནིབྦཏྟིཡཾ, ཨེཝཾ མནུསྶཏྟབྷཱཝེ ཋིཏསྶེཝ ཨཀུསལདྷམྨཱནམྤི ཏིཀྑཝིསདསཱུརབྷཱཝཱཔཏྟཱིཏི ཨཱཧ ‘‘སཡམྤི མནུསྶཛཱཏིཀེནེཝཱ’’ཏི. ཙུཏིཨནནྟརཾ ཕལཾ ཨནནྟརཾ ནཱམ, ཏསྨིཾ ཨནནྟརེ ནིཡུཏྟཾ, ཏཾནིབྦཏྟནེན ཨནནྟརཀརཎསཱིལཾ, ཨནནྟརཔཡོཛནཾ ཝཱ ཨཱནནྟརིཡཾ, ཏེན ཨཱནནྟརིཡེན མཱཏུགྷཱཏཀཀམྨེན. པིཏུགྷཱཏཀེཔི ཡེན མནུསྶབྷཱུཏོ ཛནཀོ པིཏཱ སཡམྤི མནུསྶཛཱཏིཀེནེཝ སཏཱ སཉྩིཙྩ ཛཱིཝིཏཱ ཝོརོཔིཏོ, ཨཡཾ ཨཱནནྟརིཡེན པིཏུགྷཱཏཀཀམྨེན པིཏུགྷཱཏཀོཏིཨཱདིནཱ སབྦཾ ཝེདིཏབྦནྟི ཨཱཧ ‘‘པིཏུགྷཱཏཀེཔི ཨེསེཝ ནཡོ’’ཏི.

པརིཝཏྟིཏལིངྒམྤི (མ. ནི. ཨཊྛ. ༣.༡༢༨; ཨ. ནི. ཨཊྛ. ༡.༡.༢༧༥; ཝིབྷ. ཨཊྛ. ༨༠༩) མཱཏརཾ པིཏརཾ ཝཱ ཛཱིཝིཏཱ ཝོརོཔེནྟསྶ ཨཱནནྟརིཡཀམྨཾ ཧོཏིཡེཝ. སཏིཔི ཧི ལིངྒཔརིཝཏྟེ སོ ཨེཝ ཨེཀཀམྨནིབྦཏྟོ བྷཝངྒཔྤབནྡྷོ ཛཱིཝིཏིནྡྲིཡཔྤབནྡྷོ ཙ, ནཱཉྙོཏི. ཡོ པན སཡཾ མནུསྶོ ཏིརཙྪཱནབྷཱུཏཾ མཱཏརཾ ཝཱ པིཏརཾ ཝཱ, སཡཾ ཝཱ ཏིརཙྪཱནབྷཱུཏོ མནུསྶབྷཱུཏཾ, ཏིརཙྪཱནབྷཱུཏོཡེཝ ཝཱ ཏིརཙྪཱནབྷཱུཏཾ ཛཱིཝིཏཱ ཝོརོཔེཏི, ཏསྶ ཀམྨཾ ཨཱནནྟརིཡཾ ན ཧོཏི, བྷཱརིཡཾ པན ཧོཏི, ཨཱནནྟརིཡཾ ཨཱཧཙྩེཝ ཏིཊྛཏི. ཨེལ༹ཀཙཏུཀྐཾ སངྒཱམཙཏུཀྐཾ ཙོརཙཏུཀྐཉྩེཏྠ ཀཐེཏབྦཾ. ‘‘ཨེལ༹ཀཾ མཱརེམཱི’’ཏི ཨབྷིསནྡྷིནཱཔི ཧི ཨེལ༹ཀཊྛཱནེ ཋིཏཾ མནུསྶོ མནུསྶབྷཱུཏཾ མཱཏརཾ ཝཱ པིཏརཾ ཝཱ མཱརེནྟོ ཨཱནནྟརིཡཾ ཕུསཏི མརཎཱདྷིཔྤཱཡེནེཝ ཨཱནནྟརིཡཝཏྠུནོ ཝིཀོཔིཏཏྟཱ. ཨེལ༹ཀཱབྷིསནྡྷིནཱ པན མཱཏཱཔིཏིཨཨསནྡྷིནཱ ཝཱ ཨེལ༹ཀཾ མཱརེནྟོ ཨཱནནྟརིཡཾ ན ཕུསཏི ཨཱནནྟརིཡཝཏྠུཨབྷཱཝཏོ. མཱཏཱཔིཏིཨབྷིསནྡྷིནཱ མཱཏཱཔིཏརོ མཱརེནྟོ ཕུསཏེཝ. ཨེས ནཡོ ཨིཏརསྨིམྤི ཙཏུཀྐདྭཡེ. ཡཐཱ ཙ མཱཏཱཔིཏཱུསུ, ཨེཝཾ ཨརཧནྟེཔི ཨེཏཱནི ཙཏུཀྐཱནི ཝེདིཏབྦཱནི. སབྦཏྠ ཧི པུརིམཾ ཨབྷིསནྡྷིཙིཏྟཾ ཨཔྤམཱཎཾ, ཝདྷཀཙིཏྟཾ པན ཏདཱརམྨཎཾ ཛཱིཝིཏིནྡྲིཡཉྩ ཨཱནནྟརིཡཱནཱནནྟརབྷཱཝེ པམཱཎཾ. ཀཏཱནནྟརིཡཀམྨོ ཙ ‘‘ཏསྶ ཀམྨསྶ ཝིཔཱཀཾ པཊིབཱཧིསྶཱམཱི’’ཏི སཀལཙཀྐཝཱལ༹ཾ མཧཱཙེཏིཡཔྤམཱཎེཧི ཀཉྩནཐཱུཔེཧི པཱུརེཏྭཱཔི སཀལཙཀྐཝཱལ༹ཾ པཱུརེཏྭཱ ནིསིནྣསྶ ¶ བྷིཀྑུསངྒྷསྶ མཧཱདཱནཾ དཏྭཱཔི བུདྡྷསྶ བྷགཝཏོ སངྒྷཱཊིཀཎྞཾ ཨམུཉྩནྟོ ཝིཙརིཏྭཱཔི ཀཱཡསྶ བྷེདཱ ནིརཡམེཝ ཨུཔཔཛྫཏི, པབྦཛྫཉྩ ན ལབྷཏི.

༡༡༥. ཨིཙྪམཱནནྟི ¶ ཨོདཱཏཝཏྠཝསནཾ ཨིཙྪམཱནཾ. ཏེནེཝཱཧ ‘‘གིཧིབྷཱཝེ སམྤཊིཙྪིཏམཏྟེཡེཝཱ’’ཏི. སངྒྷབྷེདཀཀཐཱཝིཏྠཱརོ པརཏོ ཨཱཝི བྷཝིསྶཏི. ཙཏུནྣཾ ཀམྨཱནནྟི ཨཔལོཀནཱདཱིནཾ ཙཏུནྣཾ ཀམྨཱནཾ. དུཊྛཙིཏྟེནཱཏི ཝུཏྟམེཝཏྠཾ ཝིབྷཱཝེཏི ‘‘ཝདྷཀཙིཏྟེནཱ’’ཏི. ཝདྷཀཙེཏནཱཡ ཧི དཱུསིཏཙིཏྟཾ ཨིདྷ དུཊྛཙིཏྟཾ ནཱམ. ལོཧིཏཾ ཨུཔྤཱདེཏཱིཏི ཨེཏྠ ཏཐཱགཏསྶ ཨབྷེཛྫཀཱཡཏཱཡ པརཱུཔཀྐམེན ཙམྨཙྪེདཾ ཀཏྭཱ ལོཧིཏཔགྒྷརཎཾ ནཱམ ནཏྠི, སརཱིརསྶ པན ཨནྟོཡེཝ ཨེཀསྨིཾ ཋཱནེ ལོཧིཏཾ སམོསརཏི, ཨཱགྷཱཏེན པཀུཔྤམཱནཾ སཉྩིཏཾ ཧོཏི. དེཝདཏྟེན པཝིདྡྷསིལཏོ བྷིཛྫིཏྭཱ གཏསཀྑལིཀཱཔི ཏཐཱགཏསྶ པཱདནྟཾ པཧརི, ཕརསུནཱ པཧཊོ ཝིཡ པཱདོ ཨནྟོལོཧིཏོཡེཝ ཨཧོསི. ཛཱིཝཀོ པན ཏཐཱགཏསྶ རུཙིཡཱ སཏྠཀེན ཙམྨཾ ཚིནྡིཏྭཱ ཏམྷཱ ཋཱནཱ དུཊྛལོཧིཏཾ ནཱིཧརིཏྭཱ ཕཱསུམཀཱསི, ཏེནསྶ པུཉྙཀམྨམེཝ ཨཧོསི. ཏེནཱཧ ‘‘ཛཱིཝཀོ ཝིཡཱ’’ཏིཨཱདི.

ཨཐ ཡེ པརིནིབྦུཏེ ཏཐཱགཏེ ཙེཏིཡཾ བྷིནྡནྟི, བོདྷིཾ ཚིནྡནྟི, དྷཱཏུམྷི ཨུཔཀྐམནྟི, ཏེསཾ ཀིཾ ཧོཏཱིཏི? བྷཱརིཡཾ ཀམྨཾ ཧོཏི ཨཱནནྟརིཡསདིསཾ. སདྷཱཏུཀཾ པན ཐཱུཔཾ ཝཱ པཊིམཾ ཝཱ བཱདྷམཱནཾ བོདྷིསཱཁཾ ཚིནྡིཏུཾ ཝཊྚཏི. སཙེཔི ཏཏྠ ནིལཱིནཱ སཀུཎཱ ཙེཏིཡེ ཝཙྩཾ པཱཏེནྟི, ཚིནྡིཏུཾ ཝཊྚཏིཡེཝ. པརིབྷོགཙེཏིཡཏོ ཧི སརཱིརཙེཏིཡཾ གརུཏརཾ. ཙེཏིཡཝཏྠུཾ བྷིནྡིཏྭཱ གཙྪནྟེ བོདྷིམཱུལེཔི ཚིནྡིཏྭཱ ཧརིཏུཾ ཝཊྚཏི. ཡཱ པན བོདྷིསཱཁཱ བོདྷིགྷརཾ བཱདྷཏི, ཏཾ གེཧརཀྑཎཏྠཾ ཚིནྡིཏུཾ ན ལབྷཏི. བོདྷིཨཏྠཉྷི གེཧཾ, ན གེཧཏྠཱཡ བོདྷི. ཨཱསནགྷརེཔི ཨེསེཝ ནཡོ. ཡསྨིཾ པན ཨཱསནགྷརེ དྷཱཏུ ནིཧིཏཱ ཧོཏི, ཏསྶ རཀྑཎཏྠཱཡ བོདྷིསཱཁཾ ཚིནྡིཏུཾ ཝཊྚཏི. བོདྷིཛགྒནཏྠཾ ཨོཛོཧརཎསཱཁཾ ཝཱ པཱུཏིཊྛཱནཾ ཝཱ ཚིནྡིཏུཾ ཝཊྚཏིཡེཝ, སཏྠུ རཱུཔཀཱཡཔཊིཛགྒནེ ཝིཡ པུཉྙམྤི ཧོཏི.

མཱཏུགྷཱཏཀཱདིཝཏྠུཀཐཱཝཎྞནཱ ནིཊྛིཏཱ.

ཨུབྷཏོབྱཉྫནཀཝཏྠུཀཐཱཝཎྞནཱ

༡༡༦. ཨུབྷཏོ ¶ བྱཉྫནམསྶ ཨཏྠཱིཏི ཨུབྷཏོབྱཉྫནཀོཏི ཨིམིནཱ ཨསམཱནཱདྷིཀརཎཝིསཡོ བཱཧིརཏྠསམཱསོཡཾ, པུརིམཔདེ ཙ ཝིབྷཏྟིཨལོཔོཏི དསྶེཏི. བྱཉྫནནྟི ཙེཏྠ ཨིཏྠིནིམིཏྟཾ པུརིསནིམིཏྟཉྩ ཨདྷིཔྤེཏཾ. ཨཐ ཨུབྷཏོབྱཉྫནཀསྶ ཨེཀམེཝ ཨིནྡྲིཡཾ, ཨུདཱཧུ དྭེཏི? ཨེཀམེཝ ‘‘ཡསྶ ཨིཏྠིནྡྲིཡཾ ཨུཔྤཛྫཏི, ཏསྶ པུརིསིནྡྲིཡཾ ཨུཔྤཛྫཏཱིཏི? ནོ. ཡསྶ ཝཱ པན པུརིསིནྡྲིཡཾ ཨུཔྤཛྫཏི, ཏསྶ ཨིཏྠིནྡྲིཡཾ ཨུཔྤཛྫཏཱིཏི? ནོ’’ཏི ¶ (ཡམ. ༣.ཨིནྡྲིཡཡམཀ.༡༨༨) ཨེཀསྨིཾ སནྟཱནེ ཨིནྡྲིཡདྭཡསྶ པཊིསིདྡྷཏྟཱ, ཏཉྩ ཁོ ཨིཏྠིཨུབྷཏོབྱཉྫནཀསྶ ཨིཏྠིནྡྲིཡཾ, པུརིསཨུབྷཏོབྱཉྫནཀསྶ པུརིསིནྡྲིཡཾ. ཡདི ཨེཝཾ དུཏིཡབྱཉྫནཀསྶ ཨབྷཱཝོ ཨཱཔཛྫཏི. ཨིནྡྲིཡཉྷི བྱཉྫནཀཱརཎཾ ཝུཏྟཾ, ཏཉྩ ཏསྶ ནཏྠཱིཏི? ཝུཙྩཏེ – ན ཏསྶ ཨིནྡྲིཡཾ དུཏིཡབྱཉྫནཀཱརཎཾ. ཀསྨཱ? སདཱ ཨབྷཱཝཏོ. ཨིཏྠིཨུབྷཏོབྱཉྫནཀསྶ ཧི ཡདཱ ཨིཏྠིཡཱ རཱགཙིཏྟཾ ཨུཔྤཛྫཏི, ཏདཱ པུརིསབྱཉྫནཾ པཱཀཊཾ ཧོཏི, ཨིཏྠིབྱཉྫནཾ པཊིཙྪནྣཾ གུལ༹ྷཾ ཧོཏི, ཏཐཱ ཨིཏརསྶ ཨིཏརཾ. ཡདི ཙ ཏེསཾ ཨིནྡྲིཡཾ དུཏིཡབྱཉྫནཀཱརཎཾ བྷཝེཡྻ, སདཱཔི བྱཉྫནདྭཡཾ ཏིཊྛེཡྻ, ན པན ཏིཊྛཏི, ཏསྨཱ ཝེདིཏབྦམེཏཾ ‘‘ན ཏསྶ ཏཾ བྱཉྫནཀཱརཎཾ, ཀམྨསཧཱཡཾ པན རཱགཙིཏྟམེཝེཏྠ ཀཱརཎ’’ནྟི.

ཡསྨཱ ཙསྶ ཨེཀམེཝ ཨིནྡྲིཡཾ ཧོཏི, ཏསྨཱ ཨིཏྠིཨུབྷཏོབྱཉྫནཀོ སཡམྤི གབྦྷཾ གཎྷཱཏི, པརམྤི གཎྷཱཔེཏི. པུརིསཨུབྷཏོབྱཉྫནཀོ པརཾ གཎྷཱཔེཏི, སཡཾ པན ན གཎྷཱཏི. ཡདི པཊིསནྡྷིཡཾ པུརིསལིངྒཾ, ཡདི པཊིསནྡྷིཡཾ ཨིཏྠིལིངྒནྟི ཙ པཊིསནྡྷིཡཾ ལིངྒསབྦྷཱཝོ ཀུརུནྡིཡཾཝུཏྟོ, སོ ཙ ཨཡུཏྟོ. པཝཏྟིཡཾཡེཝ ཧི ཨིཏྠིལིངྒཱདཱིནི སམུཊྛཧནྟི, ན པཊིསནྡྷིཡཾ. པཊིསནྡྷིཡཾ པན ཨིནྡྲིཡམེཝ སམུཊྛཱཏི, ན ལིངྒཱདཱིནི. ན ཙ ཨིནྡྲིཡམེཝ ལིངྒནྟི སཀྐཱ ཝཏྟུཾ ཨིནྡྲིཡལིངྒཱནཾ བྷིནྣསབྷཱཝཏྟཱ. ཝུཏྟཉྷེཏཾ ཨཊྛསཱལིནིཡཾ (དྷ. ས. ཨཊྛ. ༦༣༢) –

‘‘ཨིཏྠཏྟཾ ཨིཏྠིབྷཱཝོཏི ཨུབྷཡཾ ཨེཀཏྠཾ, ཨིཏྠིསབྷཱཝོཏི ཨཏྠོ. ཨཡཾ ཀམྨཛོ པཊིསནྡྷིསམུཊྛིཏོ. ཨིཏྠིལིངྒཱདི པན ཨིཏྠིནྡྲིཡཾ པཊིཙྩ པཝཏྟེ སམུཊྛིཏཾ. ཡཐཱ བཱིཛེ སཏི བཱིཛཾ པཊིཙྩ བཱིཛཔཙྩཡཱ རུཀྑོ ཝཌྜྷིཏྭཱ སཱཁཱཝིཊཔསམྤནྣོ ཧུཏྭཱ ཨཱཀཱསཾ པཱུརེཏྭཱ ¶ ཏིཊྛཏི, ཨེཝམེཝ ཨིཏྠིབྷཱཝསངྑཱཏེ ཨིཏྠིནྡྲིཡེ སཏི ཨིཏྠིལིངྒཱདཱིནི ཧོནྟི. བཱིཛཾ ཝིཡ ཧི ཨིཏྠིནྡྲིཡཾ, བཱིཛཾ པཊིཙྩ ཝཌྜྷིཏྭཱ ཨཱཀཱསཾ པཱུརེཏྭཱ ཋིཏརུཀྑོ ཝིཡ ཨིཏྠིནྡྲིཡཾ པཊིཙྩ ཨིཏྠིལིངྒཱདཱིནི པཝཏྟེ སམུཊྛཧནྟི. ཏཏྠ ཨིཏྠིནྡྲིཡཾ ན ཙཀྑུཝིཉྙེཡྻཾ, མནོཝིཉྙེཡྻམེཝ. ཨིཏྠིལིངྒཱདཱིནི ཙཀྑུཝིཉྙེཡྻཱནིཔི མནོཝིཉྙེཡྻཱནིཔཱི’’ཏི.

ཏེནེཝཱཧ ‘‘ཏཏྠ ཝིཙཱརཎཀྐམོ ཝིཏྠཱརཏོ ཨཊྛསཱལིནིཡཱ དྷམྨསངྒཧཊྛཀཐཱཡ ཝེདིཏབྦོ’’ཏི.

ཨུབྷཏོབྱཉྫནཀཝཏྠུཀཐཱཝཎྞནཱ ནིཊྛིཏཱ.

ཨནུཔཛ྄ཛྷཱཡཀཱདིཝཏྠུཀཐཱཝཎྞནཱ

༡༡༧. སིཀྑཱཔདཾ ¶ ཨཔཉྙཏྟཾ ཧོཏཱིཏི ཨིདྷེཝ པཉྙཏྟཾ སིཀྑཱཔདཾ སནྡྷཱཡ ཝུཏྟཾ. ཨུཔཛ྄ཛྷཾ ཨགྒཱཧཱཔེཏྭཱཏི ‘‘ཨུཔཛ྄ཛྷཱཡོ མེ, བྷནྟེ, ཧོཧཱི’’ཏི ཨེཝཾ ཨུཔཛ྄ཛྷཾ ཨགྒཱཧཱཔེཏྭཱ. ཀམྨཝཱཙཱཡ པན ཨུཔཛ྄ཛྷཱཡཀིཏྟནཾ ཀཏཾཡེཝཱཏི དཊྛབྦཾ. ཨཉྙཐཱ ‘‘པུགྒལཾ ན པརཱམསཏཱི’’ཏི ཝུཏྟཀམྨཝིཔཏྟིསམྦྷཝཏོ ཀམྨཾ ཀུཔྤེཡྻ, ཏེནེཝ ‘‘ཨུཔཛ྄ཛྷཱཡཾ ཨཀིཏྟེཏྭཱ’’ཏི ཨཝཏྭཱ ‘‘ཨུཔཛ྄ཛྷཾ ཨགྒཱཧཱཔེཏྭཱ’’ཨིཙྩེཝ ཝུཏྟཾ. ཡཐཱ ཙ ཨཔརིཔུཎྞཔཏྟཙཱིཝརསྶ ཨུཔསམྤཱདནཀཱལེ ཀམྨཝཱཙཱཡ ‘‘པརིཔུཎྞསྶ པཏྟཙཱིཝར’’ནྟི ཨསནྟཝཏྠུཾ ཀིཏྟེཏྭཱ ཀམྨཝཱཙཱཡ ཀཏཱཡཔི ཨུཔསམྤདཱ རུཧཏི, ཨེཝཾ ‘‘ཨཡཾ བུདྡྷརཀྑིཏོ ཨཱཡསྨཏོ དྷམྨརཀྑིཏསྶ ཨུཔསམྤདཱཔེཀྑོ’’ཏི ཨསནྟཾ པུགྒལཾ ཀིཏྟེཏྭཱ ཀེཝལཾ སནྟཔདནཱིཧཱརེན ཀམྨཝཱཙཱཡ ཀཏཱཡ ཨུཔསམྤདཱ རུཧཏིཡེཝཱཏི དཊྛབྦཾ. ཏེནེཝཱཧ ‘‘ཀམྨཾ པན ན ཀུཔྤཏཱི’’ཏི. ‘‘ན, བྷིཀྑཝེ, ཨནུཔཛ྄ཛྷཱཡཀོ ཨུཔསམྤཱདེཏབྦོ, ཡོ ཨུཔསམྤཱདེཡྻ, ཨཱཔཏྟི དུཀྐཊསྶཱ’’ཏི ཨེཏྟཀམེཝ ཝཏྭཱ ‘‘སོ ཙ པུགྒལོ ཨནུཔསམྤནྣོ’’ཏི ཨཝུཏྟཏྟཱ ཀམྨཝིཔཏྟིལཀྑཎསྶ ཙ ཨསམྦྷཝཏོ ‘‘ཏཾ ན གཧེཏབྦ’’ནྟི ཝུཏྟཾ. ‘‘པཉྩཝགྒཀརཎཉྩེ, བྷིཀྑཝེ, ཀམྨཾ པཎྜཀཔཉྩམོ ཀམྨཾ ཀརེཡྻ, ཨཀམྨཾ ན ཙ ཀརཎཱིཡ’’ནྟིཨཱདིཝཙནཏོ (མཧཱཝ. ༣༩༠) པཎྜཀཱདཱིནམྤི ཨུབྷཏོབྱཉྫནཀཔརིཡནྟཱནཾ གཎཔཱུརཀབྷཱཝེཡེཝ ཀམྨཾ ཀུཔྤཏི, ན ཨཉྙཐཱཏི ཨཱཧ ‘‘ཨུབྷཏོབྱཉྫནཀུཔཛ྄ཛྷཱཡཔརིཡོསཱནེསུཔི ཨེསེཝ ནཡོ’’ཏི.

ཨནུཔཛ྄ཛྷཱཡཀཱདིཝཏྠུཀཐཱཝཎྞནཱ ནིཊྛིཏཱ.

ཨཔཏྟཀཱདིཝཏྠུཀཐཱཝཎྞནཱ

༡༡༨. ཨཉྙེ ¶ ཝཱ བྷིཀྑཱུ དཱཏུཀཱམཱ ཧོནྟཱིཏི སམྦནྡྷོ. ཨནཱམཊྛཔིཎྜཔཱཏནྟི ཨགྒཧིཏཨགྒཾ པིཎྜཔཱཏཾ. སཱམཎེརབྷཱགསམཀོ ཨཱམིསབྷཱགོཏི ཨེཏྠ ཀིཉྩཱཔི སཱམཎེརཱནཾ ཨཱམིསབྷཱགསྶ སམཀམེཝ དིཡྻམཱནཏྟཱ ཝིསུཾ སཱམཎེརབྷཱགོ ནཱམ ནཏྠི, ཧེཊྛཱ གཙྪནྟཾ པན བྷཏྟཾ ཀདཱཙི མནྡཾ བྷཝེཡྻ, ཏསྨཱ ཨུཔརི ཨགྒཧེཏྭཱ སཱམཎེརཔཱལི༹ཡཱཝ གཧེཏྭཱ དཱཏབྦོཏི ཨདྷིཔྤཱཡོ. ནིཡཏཔབྦཛྫསྶེཝ ཙཱཡཾ བྷཱགོ དཱིཡཏི. ཏེནེཝ ‘‘ཨཔཀྐཾ པཏྟ’’ནྟིཨཱདི ཝུཏྟཾ.

ཨཔཏྟཀཱདིཝཏྠུཀཐཱཝཎྞནཱ ནིཊྛིཏཱ.

ཧཏྠཙྪིནྣཱདིཝཏྠུཀཐཱཝཎྞནཱ

༡༡༩. ཨཛཔདཀེཏི ¶ ཨཛཔདསཎྛཱནེ པདེསེ. བྲཧྨུཛུགཏྟོཏི བྲཧྨཱ ཝིཡ ཨུཛུགཏྟོ. ཨཝསེསོ སཏྟོཏི ཨིམིནཱ ལཀྑཎེན རཧིཏསཏྟོ. ཨེཏེན ཋཔེཏྭཱ མཧཱཔུརིསཾ ཙཀྐཝཏྟིཉྩ ཨིཏརེ སཏྟཱ ཁུཛྫཔཀྑིཀཱཏི དསྶེཏི. ཡེབྷུཡྻེན ཧི སཏྟཱ ཁནྡྷེ ཀཊིཡཾ ཛཱཎཱུསཱུཏི ཏཱིསུ ཋཱནེསུ ནམནྟི. ཏེ ཀཊིཡཾ ནམནྟཱ པཙྪཏོ ནམནྟི, ཨིཏརེསུ དྭཱིསུ ཋཱནེསུ ནམནྟཱ པུརཏོ ནམནྟི. དཱིགྷསརཱིརཱ པན ཨེཀེན པསྶེན ཝངྐཱ ཧོནྟི, ཨེཀེ མུཁཾ ཨུནྣཱམེཏྭཱ ནཀྑཏྟཱནི གཎཡནྟཱ ཝིཡ ཙརནྟི, ཨེཀེ ཨཔྤམཾསལོཧིཏཱ སཱུལསདིསཱ ཧོནྟི, ཨེཀེ པུརཏོ པབྦྷཱརཱ ཧོནྟི, པཝེདྷམཱནཱ གཙྪནྟི. པརིཝཊུམོཏི སམནྟཏོ ཝཊྚལོ.

ཨཊྛིསིརཱཙམྨསརཱིརོཏི ཨཊྛིསིརཱཙམྨམཏྟསརཱིརོ. ཀཔྤསཱིསོཏི དྭིདྷཱབྷཱུཏསཱིསོ. ཀེཀརོཏི ཏིརིཡཾ པསྶནྟོ. ‘‘ཨུདཀཏཱརཀཱ ནཱམ ཨུདཀཔུབྦུལ༹’’ནྟི གཎྛིཔདེསུ ཝུཏྟཾ. ཨཀྑིཏཱརཀཱཏི ཨཀྑིབྷཎྜཀཱ. ནིཔྤཁུམཀྑཱིཏི ཨཀྑིདལལོམེཧི ཝིརཧིཏཨཀྑིཀོ. པཁུམ-སདྡོ ཧི ལོཀེ ཨཀྑིདལལོམེསུ ནིརུལ༹ྷོ. པཊངྒམཎྜཱུཀོ ནཱམ མཧཱམུཁམཎྜཱུཀོ. ཨེལ༹མུཁོཏི ནིཙྩཔགྒྷརཎཀལཱལམུཁོ. སབྦཉྩེཏནྟི ‘‘ཀཙྪུགཏྟོ ཝཱ’’ཏིཨཱདིཾ སནྡྷཱཡ ཝདཏི. ཝཱཏཎྜིཀོཏི ཨཎྜཀེསུ ཝུདྡྷིརོགེན སམནྣཱགཏོ. ཝིཀཊོཏི ཏིརིཡཾ གམནཔཱདེཧི སམནྣཱགཏོ, ཡསྶ ཙ ཙངྐམཏོ ¶ ཛཱཎུཀཱ བཧི གཙྪནྟི. པཎྷོཏི པཙྪཏོ པརིཝཏྟཔཱདེཧི སམནྣཱགཏོ, ཡསྶ ཙངྐམཏོ ཛཱཎུཀཱ ཨནྟོ པཝིསནྟི.

ཀུདཎྜཔཱདཏཱཡ ཀཱརཎཾ ཝིབྷཱཝེཏི ‘‘མཛ྄ཛྷེ སངྐུཊིཏཔཱདཏྟཱ’’ཏི. ཨགྒེ སངྐུཊིཏཔཱདཏྟཱཏི ཀུཎྜཔཱདཏཱཡ ཀཱརཎནིདསྶནཾ. ཀུཎྜཔཱདསྶེཝ གམནསབྷཱཝཾ ཝིབྷཱཝེཏི ‘‘པིཊྛིཔཱདགྒེན ཙངྐམནྟོ’’ཏི. མམྨནནྟི ཁལིཏཝཙནཾ. ཡོ ཨེཀམེཝ ཨཀྑརཾ ཙཏུཔཉྩཀྑཏྟུཾ ཝདཏི, ཏསྶེཏཾ ཨདྷིཝཙནཾ.

ཧཏྠཙྪིནྣཱདིཝཏྠུཀཐཱཝཎྞནཱ ནིཊྛིཏཱ.

ཨལཛྫཱིནིསྶཡཝཏྠུཀཐཱཝཎྞནཱ

༡༢༠. ནིསྶཡཔཊིསཾཡུཏྟཝཏྠཱུསུ བྷིཀྑཱུཧི སམཱནོ སཱིལཱདིགུཎབྷཱགོ ཨསྶཱཏི བྷིཀྑུསབྷཱགོ, ཏསྶ བྷཱཝོ བྷིཀྑུསབྷཱགཏཱ. དྭེ ཏཱིཎི དིཝསཱནི ཝསིཏྭཱ གནྟུཀཱམེན ཨནིསྶིཏེན ¶ ཝསིཏབྦནྟི ཨེཏྠ ‘‘ཡཱཝ བྷིཀྑུསབྷཱགཏཾ ཛཱནཱམཱི’’ཏི ཨཱབྷོགཾ ཝིནཱཔི ཨནིསྶིཏེན ཝསིཏུཾ ཝཊྚཏཱིཏི ཨདྷིཔྤཱཡོ. བྷིཀྑུསབྷཱགཏཾ པན ཛཱནནྟོ ‘‘སྭེ གམིསྶཱམི, ཀིཾ མེ ནིསྶཡེནཱ’’ཏི ཨརུཎཾ ཨུཊྛཔེཏུཾ ན ལབྷཏི. ‘‘པུརཱརུཎཱ ཨུཊྛཧིཏྭཱཝ གམིསྶཱམཱི’’ཏི ཨཱབྷོགེན སཡནྟསྶ སཙེ ཨརུཎོ ཨུགྒཙྪཏི, ཝཊྚཏི. ‘‘སཏྟཱཧཾ ཝསིསྶཱམཱི’’ཏི ཨཱལཡཾ ཀརོནྟེན པན ནིསྶཡོ གཧེཏབྦོཏི ‘‘སཏྟཱཧམཏྟཾ ཝསིསྶཱམི, ཀིཾ བྷིཀྑུསབྷཱགཏཱཛཱནནེནཱ’’ཏི ཛཱནནེ དྷུརཾ ནིཀྑིཔིཏྭཱ ཝསིཏུཾ ན ལབྷཏི, བྷིཀྑུསབྷཱགཏཾ ཨུཔཔརིཀྑིཏྭཱ ནིསྶཡོ གཧེཏབྦོཏི ཨཏྠོ.

གམིཀཱདིནིསྶཡཝཏྠུཀཐཱཝཎྞནཱ

༡༢༡. ཨནྟརཱམགྒེ ཝིསྶམནྟོ ཝཱ…པེ… ཨནཱཔཏྟཱིཏི ཨསཏི ནིསྶཡདཱཡཀེ ཨནཱཔཏྟི. ཏསྶ ནིསྶཱཡཱཏི པཱལི༹ཨནུརཱུཔཏོ ཝུཏྟཾ, ཏཾ ནིསྶཱཡཱཏི ཨཏྠོ. སཙེ པན ཨཱསཱལ༹ྷཱིམཱསེ…པེ… ཏཏྠ གནྟབྦནྟི ཨེཏྠ སཙེ སོ ཝསྶཱུཔནཱཡིཀཱཡ ཨཱསནྣཱཡ གནྟུཀཱམོ སུཎཱཏི ‘‘ཨསུཀོ མཧཱཐེརོ ཨཱགམིསྶཏཱི’’ཏི, ཏཉྩེ ཨཱགམེཏི, ཝཊྚཏི. ཨཱགམེནྟསྶེཝ ¶ ཙེ ཝསྶཱུཔནཱཡིཀདིཝསོ ཧོཏི, ཧོཏུ, གནྟབྦཾ ཏཏྠ, ཡཏྠ ནིསྶཡདཱཡཀཾ ལབྷཏི. ཀེཙི པན ‘‘སཙེ སོ གཙྪནྟོ ཛཱིཝིཏནྟརཱཡཾ བྲཧྨཙརིཡནྟརཱཡཾ ཝཱ པསྶཏི, ཏཏྠེཝ ཝསིཏབྦ’’ནྟི ཝདནྟི.

གོཏྟེན ཨནུསྶཱཝནཱནུཛཱནནཀཐཱཝཎྞནཱ

༡༢༢. ‘‘ཨིཏྠནྣཱམོ ཨིཏྠནྣཱམསྶ ཨཱཡསྨཏོ’’ཏི ནཱམཀིཏྟནསྶ ཨནུསྶཱཝནཱཡ ཨཱགཏཏྟཱ ‘‘ནཱཧཾ ཨུསྶཧཱམི ཐེརསྶ ནཱམཾ གཧེཏུ’’ནྟི ཝུཏྟཾ, ‘‘ཨཱཡསྨཏོ པིཔྤལིསྶ ཨུཔསམྤདཱཔེཀྑོ’’ཏི ཨེཝཾ ནཱམཾ གཧེཏུཾ ན ཨུསྶཧཱམཱིཏི ཨཏྠོ. ‘‘གོཏྟེནཔི ཨནུསྶཱཝེཏུ’’ནྟི ཝཙནཏོ ཡེན ཝོཧཱརེན ཝོཧརཏི, ཏེན ཝཊྚཏཱིཏི སིདྡྷཾ. ‘‘ཀོནཱམོ ཏེ ཨུཔཛ྄ཛྷཱཡོ’’ཏི པུཊྛེནཔི གོཏྟམེཝ ནཱམཾ ཀཏྭཱ ཝཏྟབྦནྟི སིདྡྷཾ ཧོཏི, ཏསྨཱ ཙཏུབྦིདྷེསུ ནཱམེསུ ཡེན ཀེནཙི ནཱམེན ཨནུསྶཱཝནཱ ཀཱཏབྦཱཏི ཝདནྟི. ཨེཀསྶ བཧཱུནི ནཱམཱནི ཧོནྟི, ཏཏྠ ཨེཀཾ ནཱམཾ ཉཏྟིཡཱ, ཨེཀཾ ཨནུསྶཱཝནཱཡ ཀཱཏུཾ ན ཝཊྚཏི, ཨཏྠཏོ བྱཉྫནཏོ ཙ ཨབྷིནྣཱཧི ཨནུསྶཱཝནཱཧི བྷཝིཏབྦནྟི. ཀིཉྩཱཔི ‘‘ཨིཏྠནྣཱམོ ཨིཏྠནྣཱམསྶ ཨཱཡསྨཏོ’’ཏི པཱལི༹ཡཾ ‘‘ཨཱཡསྨཏོ’’ཏི པདཾ པཙྪཱ ཝུཏྟཾ, ཀམྨཝཱཙཱཔཱལི༹ཡཾ པན ‘‘ཨཡཾ བུདྡྷརཀྑིཏོ ཨཱཡསྨཏོ དྷམྨརཀྑིཏསྶཱ’’ཏི པཋམཾ ལིཁིཏནྟི ཏཾ ཨུཔྤཊིཔཱཊིཡཱ ཝུཏྟནྟི ན པཙྩེཏབྦཾ. པཱལི༹ཡཉྷི ‘‘ཨིཏྠནྣཱམོ ཨིཏྠནྣཱམསྶ ¶ ཨཱཡསྨཏོ’’ཏི ཨཏྠམཏྟཾ དསྶིཏཾ, ཏསྨཱ པཱལི༹ཡཾ ཨཝུཏྟོཔི ‘‘ཨཡཾ བུདྡྷརཀྑིཏོ ཨཱཡསྨཏོ དྷམྨརཀྑིཏསྶཱ’’ཏི ཀམྨཝཱཙཱཔཱལི༹ཡཾ པཡོགོ དསྶིཏོ. ‘‘ན མེ དིཊྛོ ཨིཏོ པུབྦེ ཨིཙྩཱཡསྨཱ སཱརིཔུཏྟོ’’ཏི ཙ ‘‘ཨཱཡསྨཱ སཱརིཔུཏྟོ ཨཏྠཀུསལོ’’ཏི ཙ པཋམཾ ‘‘ཨཱཡསྨཱ’’ཏི པཡོགསྶ དསྶནཏོཏི ཝདནྟི. ཀཏྠཙི ‘‘ཨཱཡསྨཏོ བུདྡྷརཀྑིཏཏྠེརསྶཱ’’ཏི ཝཏྭཱ ཀཏྠཙི ཀེཝལཾ ‘‘བུདྡྷརཀྑིཏསྶཱ’’ཏི སཱཝེཏི, སཱཝནཾ ཧཱཔེཏཱིཏི ན ཝུཙྩཏི ནཱམསྶ ཨཧཱཔིཏཏྟཱཏི ཨེཀེ. སཙེ ཀཏྠཙི ‘‘ཨཱཡསྨཏོ བུདྡྷརཀྑིཏསྶཱ’’ཏི ཝཏྭཱ ཀཏྠཙི ‘‘བུདྡྷརཨཁཏསྶཱཡསྨཏོ’’ཏི སཱཝེཏི, པཱཋཱནུརཱུཔཏྟཱ ཁེཏྟམེཝ ཨོཏིཎྞནྟིཔི ཨེཀེ. བྱཉྫནབྷེདཔྤསངྒཏོ ཨནུསྶཱཝནཱནཾ ཏཾ ན ཝཊྚཏཱིཏི ཝདནྟི. སཙེ པན སབྦཊྛཱནེཔི ཨེཏེནེཝ པཀཱརེན ཝདཏི, ཝཊྚཏི.

དྭེཨུཔསམྤདཱཔེཀྑཱདིཝཏྠུཀཐཱཝཎྞནཱ

༡༢༣. ཨེཀཱནུསྶཱཝནེཏི ¶ ཨེཏྠ ཨེཀཏོ ཨནུསྶཱཝནཾ ཨེཏེསནྟི ཨེཀཱནུསྶཱཝནཱཏི ཨསམཱནཱདྷིཀརཎཝིསཡོ བཱཧིརཏྠསམཱསོཏི དཊྛབྦཾ. ཏེནེཝཱཧ ‘‘དྭེ ཨེཀཏོཨནུསྶཱཝནེ’’ཏི. ཏཏྠ ཨེཀཏོཏི ཨེཀཀྑཎེཏི ཨཏྠོ, ཝིབྷཏྟིཨལོཔེན ཙཱཡཾ ནིདྡེསོ. པུརིམནཡེནེཝ ཨེཀཏོཨནུསྶཱཝནེ ཀཱཏུནྟི ‘‘ཨེཀེན ཨེཀསྶ, ཨཉྙེན ཨིཏརསྶཱ’’ཏིཨཱདིནཱ པུབྦེ ཝུཏྟནཡེན དྭཱིཧི ཝཱ ཏཱིཧི ཝཱ ཨཱཙརིཡེཧི ཨེཀེན ཝཱ ཨེཀཏོཨནུསྶཱཝནེ ཀཱཏུཾ.

ཨུཔསམྤདཱཝིདྷིཀཐཱཝཎྞནཱ

༡༢༦. ཝཛྫཱཝཛྫཾ ཨུཔནིཛ྄ཛྷཱཡཏཱིཏི ཨུཔཛ྄ཛྷཱཏི ཨིམིནཱ ཨུཔཛ྄ཛྷཱཡསདྡསམཱནཏྠོ ཨུཔཛ྄ཛྷཱསདྡོཔཱིཏི དསྶེཏི.

ཙཏྟཱརོནིསྶཡཱདིཀཐཱཝཎྞནཱ

༡༣༠. སམྦྷོགེཏི དྷམྨསམྦྷོགེ ཨཱམིསསམྦྷོགེ ཙ. ཨནཱཔཏྟི སམྦྷོགེ སཾཝཱསེཏི ཨེཏྠ ཙ ཨཡམདྷིཔྤཱཡོ – ཡསྨཱ ཨཡཾ ཨོསཱརཎཀམྨསྶ ཀཏཏྟཱ པཀཏཏྟཊྛཱནེ ཋིཏོ, ཏསྨཱ ན ཨུཀྑིཏྟཀེན སདྡྷིཾ སམྦྷོགཱདིཔཙྩཡཱ པཱཙིཏྟིཡཾ, ནཱཔི ཨལཛྫིནཱ སདྡྷིཾ པརིབྷོགཔཙྩཡཱ དུཀྐཊཾ ཨལཛྫཱིལཀྑཎཱནུཔཔཏྟིཏོ. ཡོ ཧི ཨུཙྪུརསཀསཊཱནཾ སཏྟཱཧཀཱལིཀཡཱཝཛཱིཝིཀཏྟཱ ཝཊྚཏི ཝིཀཱལེ ཨུཙྪུ ཁཱདིཏུནྟི སཉྙཾ ཨུཔྤཱདེཏྭཱ ཏཾ ཁཱདིཏྭཱ ཏཔྤཙྩཡཱ པཱཙིཏྟིཡཾ ན པསྶཏི ¶ ‘‘ཝཊྚཏཱི’’ཏི ཏཐཱསཉྙིཏཱཡ, ཡོ ཝཱ པན ཨཱཔཏྟིམཱཔནྣབྷཱཝཾ པཊིཛཱནིཏྭཱ ‘‘ན པཊིཀརོམཱི’’ཏི ཨབྷིནིཝིསཏི, ཨཡཾ –

‘‘སཉྩིཙྩ ཨཱཔཏྟིཾ ཨཱཔཛྫཏི, ཨཱཔཏྟིཾ པརིགཱུཧཏི;

ཨགཏིགམནཉྩ གཙྪཏི, ཨེདིསོ ཝུཙྩཏི ཨལཛྫཱིཔུགྒལོ’’ཏི. (པརི. ༣༥༩) –

ཝུཏྟལཀྑཎེ ཨཔཏནཏོ ཨལཛྫཱི ནཱམ ན ཧོཏི. ཏསྨཱ ཡཐཱ པུབྦེ ཡཱཝ ཨུཀྑེཔནཱིཡཀམྨཾ ཀཏཾ, ཏཱཝ ཏེན སདྡྷིཾ སམྦྷོགེ སཾཝཱསེ ཙ ཨནཱཔཏྟི, ཨེཝམིདྷཱཔཱིཏི སབྦཐཱ ཨནཱཔཏྟིཊྛཱནེཡེཝ ཨནཱཔཏྟི ཝུཏྟཱཏི ཝེདིཏབྦཾ ¶ . ན ཧི བྷགཝཱ ཨལཛྫིནཱ སདྡྷིཾ སམྦྷོགཔཙྩཡཱ ཨཱཔཏྟིསམྦྷཝེ སཏི ‘‘ཨནཱཔཏྟི སམྦྷོགེ སཾཝཱསེ’’ཏི ཝདཏི. ཏཏོ ཡམེཏྠ ཀེནཙི ‘‘ཨནཱཔཏྟི སམྦྷོགེ སཾཝཱསེ’’ཏི ཨིམིནཱ པཱཙིཏྟིཡེན ཨནཱཔཏྟི ཝུཏྟཱ, ‘‘ཨལཛྫཱིཔརིབྷོགཔཙྩཡཱ དུཀྐཊཾ པན ཨཱཔཛྫཏིཡེཝཱ’’ཏི ཝཏྭཱ བཧུདྷཱ པཔཉྩིཏཾ, ན ཏཾ སཱརཏོ པཙྩེཏབྦཾ. སེསམེཏྠ ཨུཏྟཱནམེཝ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ སཱརཏྠདཱིཔནིཡཾ

མཧཱཁནྡྷཀཝཎྞནཱ ནིཊྛིཏཱ.

༢. ཨུཔོསཐཀྑནྡྷཀཾ

སནྣིཔཱཏཱནུཛཱནནཱདིཀཐཱཝཎྞནཱ

༡༣༢. ཨུཔོསཐཀྑནྡྷཀེ ¶ ¶ ཏརནྟི པླཝནྟི ཨེཏྠ བཱལཱཏི ཏིཏྠཾ. ཨིཏོཏི ཨིམསྨིཾ སཱསནེ ལདྡྷིཏོ. ཏཾ ཀཐེནྟཱིཏི ‘‘ཨིམསྨིཾ ནཱམ དིཝསེ མུཧུཏྟེ ཝཱ ཨིདཾ ཀཏྟབྦ’’ནྟིཨཱདིནཱ ཀཐེནྟི.

༡༣༤. ‘‘སུཎཱཏུ མེ བྷནྟེ’’ཏིཨཱདཱིསུ ཡཾ ཝཏྟབྦཾ, ཏཾ མཱཏིཀཱཊྛཀཐཱཡཾ (ཀངྑཱ. ཨཊྛ. ནིདཱནཝཎྞནཱ) ཝིཏྠཱརཏོ ཨཱགཏམེཝཱཏི ན ཨིདྷ ཝིཏྠཱརཡིསྶཱམ, ཨཏྠིཀེཧི པན ཏཏོཡེཝ གཧེཏབྦཾ.

༡༣༥. ཨཱཔཛྫིཏྭཱ ཝཱ ཝུཊྛིཏོཏི ཨེཏྠ ཨཱརོཙིཏཱཔི ཨཱཔཏྟི ཨསནྟཱི ནཱམ ཧོཏཱིཏི ཝེདིཏབྦཾ. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. ནིདཱནཝཎྞནཱ) ཝུཏྟཾ ‘‘ཡསྶ པན ཨེཝཾ ཨནཱཔནྣཱ ཝཱ ཨཱཔཏྟི ཨཱཔཛྫིཏྭཱ ཙ པན ཝུཊྛིཏཱ ཝཱ དེསིཏཱ ཝཱ ཨཱརོཙིཏཱ ཝཱ, ཏསྶ སཱ ཨཱཔཏྟི ཨསནྟཱི ནཱམ ཧོཏཱི’’ཏི. མུསཱཝཱདོ ནཱམ ཝཙཱིབྷེདཔཙྩཡཱ ཧོཏཱིཏི ཨཱཧ ‘‘ན མུསཱཝཱདལཀྑཎེནཱ’’ཏི. བྷགཝཏོ པན ཝཙནེནཱཏི སམྤཛཱནམུསཱཝཱདེ ཀིཾ ཧོཏི? ‘‘དུཀྐཊཾ ཧོཏཱི’’ཏི ཨིམིནཱ ཝཙནེན. ཝཙཱིདྭཱརེ ཨཀིརིཡསམུཊྛཱནཱ ཨཱཔཏྟི ཧོཏཱིཏི ཡསྨཱ ཡསྶ བྷིཀྑུནོ ཨདྷམྨིཀཱཡ པཊིཉྙཱཡ ཏུཎྷཱིབྷཱུཏསྶ ནིསིནྣསྶ མནོདྭཱརེ ཨཱཔཏྟི ནཱམ ནཏྠི, ཡསྨཱ པན ཨཱཝི ཀཱཏབྦཾ ན ཨཱཝི ཨཀཱསི, ཏེནསྶ ཝཙཱིདྭཱརེ ཨཀིརིཡསམུཊྛཱནཱ ཨཱཔཏྟི ཧོཏི.

ཝཱཙཱཏི ¶ ཝཱཙཱཡ, ཡ-ཀཱརལོཔེནཱཡཾ ནིདྡེསོ. ཀེནཙི མནུཛེན ཝཱཙཱཡ ཨནཱལཔནྟོཏི ཡོཛེཏབྦཾ. གིརཾ ནོ ཙ པརེ བྷཎེཡྻཱཏི ‘‘ཨིམེ སོསྶནྟཱི’’ཏི པརཔུགྒལེ སནྡྷཱཡ སདྡམྤི ན ནིཙྪཱརེཡྻ. ཨཱཔཛྫེཡྻ ཝཱཙསིཀནྟི ཝཱཙཏོ སམུཊྛིཏཾ ཨཱཔཏྟིཾ ཨཱཔཛྫེཡྻ.

ཨནྟརཱཡཀརོཏི ཝིཔྤཊིསཱརཝཏྠུཏཱཡ པཱམོཛྫཱདིསམྦྷཝཾ ནིཝཱརེཏྭཱ པཋམཛ྄ཛྷཱནཱདཱིནཾ ཨདྷིགམཱཡ ཨནྟརཱཡཀརོ. ཏསྶ བྷིཀྑུནོ ཕཱསུ ཧོཏཱིཏི ¶ ཨཝིཔྤཊིསཱརམཱུལཀཱནཾ པཱམོཛྫཱདཱིནཾ ཝསེན ཏསྶ བྷིཀྑུནོ སུཁཱ པཊིཔདཱ སམྤཛྫཏཱིཏི ཨཏྠོ.

སནྣིཔཱཏཱནུཛཱནནཱདིཀཐཱཝཎྞནཱ ནིཊྛིཏཱ.

སཱིམཱནུཛཱནནཀཐཱཝཎྞནཱ

༡༣༨. ཨིཏརོཔཱིཏི སུདྡྷཔཾསུཔབྦཏཱདིཾ སནྡྷཱཡ ཝདཏི. ཧཏྠིཔྤམཱཎོ ནཱམ པབྦཏོ ཧེཊྛིམཀོཊིཡཱ ཨཌྜྷཊྛམརཏནུབྦེདྷོ. ཏསྨཱཏི ཡསྨཱ ཨེཀེན ན ཝཊྚཏི, ཏསྨཱ. དྭཏྟིཾསཔལགུལ༹པིཎྜཔྤམཱཎཏཱ ཐཱུལཏཱཡ གཧེཏབྦཱ, ན ཏུལགཎནཱཡ. ཨནྟོསཱརམིསྶཀཱནནྟི ཨནྟོསཱརརུཀྑེཧི མིསྶཀཱནཾ. སཱུཙིདཎྜཀཔྤམཱཎོཏི སཱིཧལ༹དཱིཔེ ལེཁནདཎྜཔྤམཱཎོཏི ཝདནྟི, སོ ཙ ཀནིཊྛངྒུལིཔརིམཱཎོཏི དཊྛབྦཾ. ཨེཏནྟི ནཝམཱུལསཱཁཱནིགྒམནཾ. པརབྷཱགེ ཀིཏྟེཏུཾ ཝཊྚཏཱིཏི བཧི ནིཀྑམིཏྭཱ ཋིཏེསུ ཨཊྛསུ མགྒེསུ ཨེཀིསྶཱ དིསཱཡ ཨེཀཾ, ཨཔརཱཡ ཨེཀནྟི ཨེཝཾ ཙཏཱུསུ ཋཱནེསུ ཀིཏྟེཏུཾ ཝཊྚཏི.

ཡཏྠ ཀཏྠཙི ཨུཏྟརནྟིཡཱ བྷིཀྑུནིཡཱ ཨནྟརཝཱསཀོ ཏེམིཡཏཱིཏི སིཀྑཱཀརཎཱིཡཾ ཨཱགཏལཀྑཎེན ཏིམཎྜལཾ པཊིཙྪཱདེཏྭཱ ཨནྟརཝཱསཀཾ ཨནུཀྑིཔིཏྭཱ ཏིཏྠེན ཝཱ ཨཏིཏྠེན ཝཱ ཨུཏྟརནྟིཡཱ བྷིཀྑུནིཡཱ ཨེཀདྭངྒུལམཏྟམྤི ཨནྟརཝཱསཀོ ཏེམིཡཏི. བྷིཀྑུནིཡཱ ཨེཝ གཧཎཉྩེཏྠ བྷིཀྑུནཱིཝིབྷངྒེ བྷིཀྑུནིཡཱ ཝསེན ནདཱིལཀྑཎསྶ པཱལི༹ཡཾ ཨཱགཏཏྟཱ ཏེནེཝ ནཡེན དསྶནཏྠཾ ཀཏཾ. སཱིམཾ བནྡྷནྟཱནཾ ནིམིཏྟཾ ཧོཏཱིཏི ཨཡཾ ཝུཏྟལཀྑཎཱ ནདཱི སམུདྡཾ ཝཱ པཝིསཏུ ཏལཱ༹ཀཾ ཝཱ, པབྷཝཏོ པཊྛཱཡ ནིམིཏྟཾ ཧོཏི. ཨཛ྄ཛྷོཏྠརིཏྭཱ ཨཱཝརཎཾ པཝཏྟཏིཡེཝཱཏི ཨཱཝརཎཾ ཨཛ྄ཛྷོཏྠརིཏྭཱ སནྡཏིཡེཝ. ཨཔྤཝཏྟམཱནཱཏི ཨསནྡམཱནུདཀཱ. ཨཱཝརཎཉྷི པཏྭཱ ནདིཡཱ ཡཏྟཀེ པདེསེ ཨུདཀཾ ཨསནྡམཱནཾ སནྟིཊྛཏི, ཏཏྠ ནདཱིནིམིཏྟཾ ཀཱཏུཾ ན ཝཊྚཏི. ཨུཔརི སནྡམཱནཊྛཱནེཡེཝ ཝཊྚཏི, ཨསནྡམཱནཊྛཱནེ པན ཨུདཀནིམིཏྟཾ ཀཱཏུཾ ཝཊྚཏི. ཋིཏམེཝ ཧི ཨུདཀནིམིཏྟེ ཝཊྚཏི, ན སནྡམཱནཾ. ཏེནེཝཱཧ ‘‘པཝཏྟནཊྛཱནེ ནདཱིནིམིཏྟཾ, ཨཔྤཝཏྟནཊྛཱནེ ཨུདཀནིམིཏྟཾ ¶ ཀཱཏུཾ ཝཊྚཏཱི’’ཏི. ནདིཾ བྷིནྡིཏྭཱཏི མཱཏིཀཱམུཁདྭཱརེན ནདཱིཀཱུལཾ བྷིནྡིཏྭཱ. ཨུཀྑེཔིམནྟི ཀཱུཔཏོ ཝིཡ ཨུཀྑིཔིཏྭཱ གཧེཏབྦཾ.

སིངྒྷཱཊཀསཎྛཱནཱཏི ¶ ཏིཀོཎརཙྪཱསཎྛཱནཱ. མུདིངྒསཎྛཱནཱཏི མུདིངྒབྷེརཱི ཝིཡ མཛ྄ཛྷེ ཝིཏྠཏཱ ཨུབྷོསུ ཀོཊཱིསུ སངྐོཊིཏཱ ཧོཏི. ཨུཔཙཱརཾ ཋཔེཏྭཱཏི པཙྪཱ སཱིམཾ བནྡྷནྟཱནཾ སཱིམཱཡ ཨོཀཱསཾ ཋཔེཏྭཱ. ཨནྟོནིམིཏྟགཏེཧི པནཱཏི ཨེཀསྶ གཱམསྶ ཨུཔཌྜྷཾ ཨནྟོ ཀཏྟུཀཱམཏཱཡ སཏི སབྦེསཾ ཨཱགམནེ པཡོཛནཾ ནཏྠཱིཏི ཀཏྭཱ ཝུཏྟཾ. ཨཱགནྟབྦནྟི ཙ སཱམཱིཙིཝསེན ཝུཏྟཾ, ནཱཡཾ ནིཡམོ ‘‘ཨཱགནྟབྦམེཝཱ’’ཏི. ཏེནེཝཱཧ ‘‘ཨཱགམནམྤི ཨནཱགམནམྤི ཝཊྚཏཱི’’ཏི. ཨབདྡྷཱཡ ཧི སཱིམཱཡ ནཱནཱགཱམཁེཏྟཱནཾ ནཱནཱསཱིམསབྷཱཝཏྟཱ ཏེསཾ ཨནཱགམནེཔི ཝགྒཀམྨཾ ན ཧོཏི, ཏསྨཱ ཨནཱགམནམྤི ཝཊྚཏི. བདྡྷཱཡ པན སཱིམཱཡ ཨེཀསཱིམབྷཱཝཏོ པུན ཨཉྙསྨིཾ ཀམྨེ ཀརིཡམཱནེ ཨནྟོ སཱིམགཏེཧི ཨཱགནྟབྦམེཝཱཏི ཨཱཧ ‘‘ཨཝིཔྤཝཱསསཱིམཱ…པེ… ཨཱགནྟབྦ’’ནྟི. ནིམིཏྟཀིཏྟནཀཱལེ ཨསོདྷིཏཱཡཔི སཱིམཱཡ ནེཝཏྠི དོསོ ནིམིཏྟཀིཏྟནསྶ ཨཔལོཀནཱདཱིསུ ཨཉྙཏརཱབྷཱཝཏོ.

བྷཎྜུཀམྨཱཔུཙྪནཾ སནྡྷཱཡ པབྦཛྫཱ-གཧཎཾ. སུཁཀརཎཏྠནྟི སབྦེསཾ སནྣིཔཱཏནཔརིསྶམཾ པཧཱཡ ཨཔྤཏརེཧི སུཁཀརཎཏྠཾ. ཨེཀཝཱིསཏི བྷིཀྑཱུ གཎྷཱཏཱིཏི ཝཱིསཏིཝགྒཀརཎཱིཡཔརམཏྟཱ སངྒྷཀམྨསྶ ཀམྨཱརཧེན སདྡྷིཾ ཨེཀཝཱིསཏི བྷིཀྑཱུ གཎྷཱཏི. ཨིདཉྩ ནིསིནྣཱནཾ ཝསེན ཝུཏྟཾ. ཧེཊྛིམནྟཏོ ཧི ཡཏྠ ཨེཀཝཱིསཏི བྷིཀྑཱུ ནིསཱིདིཏུཾ སཀྐོནྟི, ཏཏྟཀེ པདེསེ སཱིམཾ བནྡྷིཏུཾ ཝཊྚཏི. ན སཀྑིསྶནྟཱིཏི ཨཝིཔྤཝཱསསཱིམཱཡ བདྡྷབྷཱཝཾ ཨསལླཀྑེཏྭཱ ‘‘སམཱནསཾཝཱསཀམེཝ སམཱུཧནིསྶཱམཱ’’ཏི ཝཱཡམནྟཱ ན སཀྑིསྶནྟི. བདྡྷཱཡ ཧི ཨཝིཔྤཝཱསསཱིམཱཡ ཏཾ ཨསམཱུཧནིཏྭཱ ‘‘སམཱནསཾཝཱསཀསཱིམཾ སམཱུཧནིསྶཱམཱ’’ཏི ཀཏཱཡཔི ཀམྨཝཱཙཱཡ ཨསམཱུཧཏཱཝ ཧོཏི སཱིམཱ. པཋམཉྷི ཨཝིཔྤཝཱསཾ སམཱུཧནིཏྭཱ པཙྪཱ སཱིམཱ སམཱུཧནིཏབྦཱ. ཨེཀརཏནཔྤམཱཎཱ སུཝིཉྙེཡྻཏརཱ ཧོཏཱིཏི ཀཏྭཱ ཝུཏྟཾ ‘‘ཨེཀརཏནཔྤམཱཎཱ ཝཊྚཏཱི’’ཏི. ཨེཀངྒུལམཏྟཱཔི སཱིམནྟརིཀཱ ཝཊྚཏིཡེཝ. ཏཏྟཀེནཔི ཧི སཱིམཱ ཨསམྦྷིནྣཱཝ ཧོཏི.

ཨཝསེསནིམིཏྟཱནཱིཏི མཧཱསཱིམཱཡ བཱཧིརཔསྶེ ནིམིཏྟཱནི. ཁཎྜསཱིམཏོ པཊྛཱཡ བནྡྷནཾ ཨཱཙིཎྞཾ, ཨཱཙིཎྞཀརཎེནེཝ ཙ སམྨོཧོ ན ཧོཏཱིཏི ཨཱཧ ‘‘ཁཎྜསཱིམཏོཝ པཊྛཱཡ བནྡྷིཏབྦཱ’’ཏི. ཀུཊིགེཧེཏི ཀུཊིགྷརེ, བྷཱུམིགྷརེཏི ཨཏྠོ. ཨུདུཀྑལནྟི ཁུདྡཀཱཝཱཊཾ. ནིམིཏྟཾ ན ཀཱཏབྦནྟི ཏཾ རཱཛིཾ ཝཱ ཨུདུཀྑལཾ ཝཱ ནིམིཏྟཾ ན ཀཱཏབྦཾ.

ཧེཊྛཱ ¶ ¶ ན ཨོཏརཏཱིཏི བྷིཏྟིཏོ ཨོརཾ ནིམིཏྟཱནི ཋཔེཏྭཱ ཀིཏྟིཏཏྟཱ ཧེཊྛཱ ཨཱཀཱསཔྤདེསཾ ན ཨོཏརཏི. ཧེཊྛཱཔི ཨོཏརཏཱིཏི སཙེ ཧེཊྛཱ ཨནྟོབྷིཏྟིཡཾ ཨེཀཝཱིསཏིཡཱ བྷིཀྑཱུནཾ ཨོཀཱསོ ཧོཏི, ཨོཏརཏི. ཨོཏརམཱནཱ ཙ ཨུཔརིསཱིམཔྤམཱཎེན ན ཨོཏརཏི, སམནྟཱ བྷིཏྟིཔྤམཱཎེན ཨོཏརཏི. ཨོཏརཎཱནོཏརཎཾ ཝུཏྟནཡེནེཝ ཝེདིཏབྦནྟི སཙེ ཧེཊྛཱ ཨེཀཝཱིསཏིཡཱ བྷིཀྑཱུནཾ ཨོཀཱསོ ཧོཏི, ཨོཏརཏི. ནོ ཙེ, ན ཨོཏརཏཱིཏི ཨདྷིཔྤཱཡོ. སབྦོ པཱསཱདོ སཱིམཊྛོ ཧོཏཱིཏི ཨུཔརིམཏལེན སདྡྷིཾ ཨེཀཱབདྡྷབྷིཏྟིཀོ ཝཱ ཧོཏུ མཱ ཝཱ, སབྦོཔི པཱསཱདོ སཱིམཊྛོཝ ཧོཏི.

ཏཱལམཱུལཀཔབྦཏེཏི ཏཱལམཱུལསདིསེ པབྦཏེ. སོ ཙ ཧེཊྛཱ མཧནྟོ ཧུཏྭཱ ཨནུཔུབྦེན ཏནུཀོ ཧོཏཱིཏི དཊྛབྦཾ. པཎཝསཎྛཱནོ མཛ྄ཛྷེ ཏནུཀོ ཧོཏི མཱུལེ ཨགྒེ ཙ ཝིཏྠཏོ. ཧེཊྛཱ ཝཱ མཛ྄ཛྷེ ཝཱཏི མུདིངྒསཎྛཱནསྶ ཧེཊྛཱ པཎཝསཎྛཱནསྶ མཛ྄ཛྷེ. ཨཱཀཱསཔབྦྷཱརནྟི བྷིཏྟིཡཱ ཨཔརིཀྑིཏྟཔབྦྷཱརཾ. ཨནྟོལེཎཾ ཧོཏཱིཏི པབྦཏསྶ ཨནྟོ ལེཎཾ ཧོཏི. སཱིམཱམཱལ༹ཀེཏི ཁཎྜསཱིམཱམཱལ༹ཀེ. མཧཱསཱིམཾ སོདྷེཏྭཱ ཝཱ ཀམྨཾ ཀཱཏབྦནྟི མཧཱསཱིམགཏཱ བྷིཀྑཱུ ཧཏྠཔཱསཾ ཝཱ ཨཱནེཏབྦཱ, སཱིམཏོ ཝཱ བཧི ཀཱཏབྦཱཏི ཨདྷིཔྤཱཡོ. གཎྛིཔདེསུ པན ‘‘མཧཱསཱིམགཏེཧི བྷིཀྑཱུཧི ཏཾ སཱཁཾ ཝཱ པཱརོཧཾ ཝཱ ཨནཱམསིཏྭཱ ཋཱཏབྦནྟི ཨདྷིཔྤཱཡོ’’ཏི ཝུཏྟཾ, ཏཾ ན གཧེཏབྦཾ. པུརིམནཡེཔཱིཏི ཁཎྜསཱིམཱཡ ཨུཊྛཧིཏྭཱ མཧཱསཱིམཱཡ ཨོཎཏརུཀྑེཔི. ཨུཀྑིཔཱཔེཏྭཱ ཀཱཏུཾ ན ཝཊྚཏཱིཏི ཁཎྜསཱིམཱཡ ཨནྟོ ཋིཏཏྟཱ རུཀྑསྶ ཏཏྠ ཋིཏོ ཧཏྠཔཱསཾཡེཝ ཨཱནེཏབྦོཏི ཨུཀྑིཔཱཔེཏྭཱ ཀཱཏུཾ ན ཝཊྚཏི.

༡༤༠. པཱརཡཏཱིཏི ཨཛ྄ཛྷོཏྠརཏི. པཱརཱཏི སཱིམཱཔེཀྑོ ཨིཏྠིལིངྒནིདྡེསོ. ཨསྶཱཏི བྷཝེཡྻ. ཨིདྷཱདྷིཔྤེཏནཱཝཱཡ པམཱཎཾ དསྶེནྟོ ཨཱཧ ‘‘ཡཱ སབྦནྟིམེན པརིཙྪེདེན…པེ… ཏཡོ ཛནེ ཝཧཏཱི’’ཏི. ཨིམིནཱ ཙ ཝུཏྟཔྤམཱཎཏོ ཁུདྡཀཱ ནཱཝཱ ཝིཛྫམཱནཱཔི ཨིདྷ ཨསནྟཔཀྑཾ བྷཛཏཱིཏི དཱིཔེཏི. ཨཝསྶཾ ལབྦྷནེཡྻཱ དྷུཝནཱཝཱཝ ཧོཏཱིཏི སམྦནྡྷོ. རུཀྑཾ ཚིནྡིཏྭཱ ཀཏོཏི པཱཋསེསོ. པརཏཱིརེ སམྨུཁཊྛཱནེཏི ཨོརིམཏཱིརེ སབྦཔརིཡནྟནིམིཏྟསྶ སམྨུཁཊྛཱནེ. སབྦནིམིཏྟཱནཾ ཨནྟོ ཋིཏེ བྷིཀྑཱུ ཧཏྠཔཱསགཏེ ཀཏྭཱཏི ཨེཏྠ སཙེ ཨེཀཾ གཱམཁེཏྟཾ ཧོཏི, ཨུབྷོསུ ཏཱིརེསུ སབྦནིམིཏྟཱནཾ ཨནྟོ ཋིཏེ བྷིཀྑཱུ ཧཏྠཔཱསགཏེ ཀཏྭཱ ¶ སམྨནྣིཏབྦཱ. ནཱནཱགཱམཀྑེཏྟཾ ཙེ, སམཱནསཾཝཱསཀསཱིམཱབནྡྷནཀཱལེ ཨནཱགནྟུམྤི ཝཊྚཏི. ཨཝིཔྤཝཱསསཱིམཱསམྨུཏིཡཾ པན ཨཱགནྟབྦམེཝ. ཡསྨཱ ཨུབྷོསུ ཏཱིརེསུ ནིམིཏྟཀིཏྟནམཏྟེན དཱིཔཀོ སངྒཧིཏོ ནཱམ ན ཧོཏི, ཏསྨཱ དཱིཔཀེཔི ནིམིཏྟཱནི ཝིསུཾ ཀིཏྟེཏབྦཱནེཝཱཏི ཨཱཧ ‘‘དཱིཔཀསྶ ¶ ཨོརིམནྟེ ཙ པཱརིམནྟེ ཙ ནིམིཏྟཾ ཀིཏྟེཏབྦ’’ནྟི. དཱིཔཀསིཁརནྟི དཱིཔཀམཏྠཀཾ. པབྦཏསཎྛཱནཱཏི དཱིཔཀསྶ ཨེཀཏོ ཨདྷིཀཏརཏྟཱ ཝུཏྟཾ.

སཱིམཱནུཛཱནནཀཐཱཝཎྞནཱ ནིཊྛིཏཱ.

ཨུཔོསཐཱགཱརཱདིཀཐཱཝཎྞནཱ

༡༤༢. ཝཏྠུཝསེན ཝུཏྟནྟི ‘‘མཡཉྩམྷཱ ཨསམྨཏཱཡ བྷཱུམིཡཱ ནིསིནྣཱ པཱཏིམོཀྑཾ ཨསྶུམྷཱ’’ཏི ཝཏྠུམྷི པཱཏིམོཀྑསཝནསྶ ཨཱགཏཏྟཱ ཝུཏྟཾ. ཨུཔོསཐཔྤམུཁཾ ནཱམ ཨུཔོསཐཱགཱརསྶ སམྨུཁཊྛཱནཾ. པཱལི༹ཡཾ ‘‘པཋམཾ ནིམིཏྟཱ ཀིཏྟེཏབྦཱ’’ཏི ཨེཏྟཀམེཝ ཝཏྭཱ སཱིམཱསམྨུཏིཡཾ ཝིཡ ‘‘པབྦཏནིམིཏྟཾ པཱསཱཎནིམིཏྟ’’ནྟིཨཱདིནཱ ཝིསེསེཏྭཱ ནིམིཏྟཱནཾ ཨདསྶིཏཏྟཱ ‘‘ཁུདྡཀཱནི ཝཱ…པེ… ཡཱནི ཀཱནིཙི ནིམིཏྟཱནཱི’’ཏི ཝུཏྟཾ. ཀིཏྟེཏུཾ ཝཊྚཏཱིཏི ཨིམིནཱ སམྦནྡྷོ.

ཨཝིཔྤཝཱསསཱིམཱནུཛཱནནཀཐཱཝཎྞནཱ

༡༤༤. ཨསྶཱཏི བྷིཀྑུནིསངྒྷསྶ. དྭེཔི སཱིམཱཡོཏི པཋམཾ ཝུཏྟཱ ཨཝིཔྤཝཱསསཱིམཱ སམཱནསཾཝཱསཀསཱིམཱ ཙ. ན ཀམྨཝཱཙཾ ཝགྒཾ ཀརོནྟཱིཏི ཀམྨཝཱཙཾ ན བྷིནྡནྟི, ཀམྨཾ ན ཀོཔེནྟཱིཏི ཨདྷིཔྤཱཡོ. ཨེཏྠཱཏི ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི ཨེཏྠ. གཱམཉྩ གཱམཱུཔཙཱརཉྩ ན ཨོཏྠརཏཱིཏི ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི ཝུཏྟཏྟཱ. སཱིམཱསངྑྱམེཝ གཙྪཏཱིཏི ཨཝིཔྤཝཱསསཱིམཱསངྑཾ གཙྪཏི. ཨེཀམྤི ཀུལཾ པཝིཊྛཾ ཝཱཏི ཨབྷིནཝཀཏགེཧེསུ སབྦཔཋམཾ ཨེཀམྤི ཀུལཾ པཝིཊྛཾ ཨཏྠི. ཨགཏཾ ཝཱཏི པོརཱཎཀགཱམེ ཨཉྙེསུ གེཧཱནི ཚཌྜེཏྭཱ གཏེསུ ཨེཀམྤི ཀུལཾ ཨགཏཾ ཨཏྠི.

ཨཝིཔྤཝཱསསཱིམཱ ན སམཱུཧནྟབྦཱཏི མཧཱསཱིམཾ སནྡྷཱཡ ཝདཏི. ནིརཱསངྐཊྛཱནེསུ ཋཏྭཱཏི ཙེཏིཡངྒཎཱདཱིནཾ ཁཎྜསཱིམཱཡ ཨནོཀཱསཏྟཱ ཝུཏྟཾ. ཁཎྜསཱིམཉྷི བནྡྷནྟཱ ཏཱདིསཾ ཋཱནཾ པཧཱཡ ཨཉྙསྨིཾ ཝིཝིཏྟེ ཨོཀཱསེ བནྡྷནྟི ¶ . ཨཔྤེཝ ནཱམ སམཱུཧནིཏུཾ སཀྑིསྶནྟཱིཏི ཨཝིཔྤཝཱསསཱིམཾཡེཝ སམཱུཧནིཏུཾ སཀྑིསྶནྟི, ན ཁཎྜསཱིམཾ. པཊིབནྡྷིཏུཾ པན ན སཀྑིསྶནྟེཝཱཏི ཁཎྜསཱིམཱཡ ཨཉྙཱཏཏྟཱ ན སཀྑིསྶནྟི. ན སམཱུཧནིཏབྦཱཏི ཁཎྜསཱིམཾ ཨཛཱནནྟེཧི ¶ ན སམཱུཧནིཏབྦཱ. ཨུཔོསཐསྶ ཝིསུཾ གཧིཏཏྟཱ ཨཝསེསཀམྨཝསེན སམཱནསཾཝཱསཏཱ ཝེདིཏབྦཱ.

གཱམསཱིམཱདིཀཐཱཝཎྞནཱ

༡༤༧. ཨཔརིཙྪིནྣཱཡཱཏི བདྡྷསཱིམཱཝསེན ཨཀཏཔརིཙྪེདཱཡ. ཡེན ཀེནཙི ཁཎིཏྭཱ ཨཀཏོཏི ཨནྟམསོ ཏིརཙྪཱནེནཔི ཁཎིཏྭཱ ཨཀཏོ. ཏསྶ ཨནྟོཧཏྠཔཱསཾ ཝིཛཧིཏྭཱ ཋིཏོ ཀམྨཾ ཀོཔེཏཱིཏི ཨིམིནཱ བཧིཔརིཙྪེདཏོ ཡཏྠ ཀཏྠཙི ཋིཏོ ཀམྨཾ ན ཀོཔེཏཱིཏི དཱིཔེཏི. ཡཾ པན ཝུཏྟཾ མཱཏིཀཱཊྛཀཐཱཡཾ (ཀངྑཱ. ཨཊྛ. ནིདཱནཝཎྞནཱ) ‘‘པརིཙྪེདབྦྷནྟརེ ཧཏྠཔཱསཾ ཝིཛཧིཏྭཱ ཋིཏོཔི པརིཙྪེདཏོ བཧི ཨཉྙཾ ཏཏྟཀཾཡེཝ པརིཙྪེདཾ ཨནཏིཀྐམིཏྭཱ ཋིཏོཔི ཀམྨཾ ཀོཔེཏི, ཨིདཾ སབྦཨཊྛཀཐཱསུ སནྣིཊྛཱན’’ནྟི, ཏཏྠ ‘‘ཨཉྙཾ ཏཏྟཀཾཡེཝ པརིཙྪེདཾ ཨནཏིཀྐམིཏྭཱ ཋིཏོཔི ཀམྨཾ ཀོཔེཏཱི’’ཏི ཨིདཾ ནེཝ པཱལི༹ཡཾ, ན ཨཊྛཀཐཱཡཾ ཨུཔལབྦྷཏི. ཡདི ཙེཏཾ དྭིནྣཾ སངྒྷཱནཾ ཝིསུཾ ཨུཔོསཐཱདིཀམྨཀརཎཱདྷིཀཱརེ ཝུཏྟཏྟཱ ཨུདཀུཀྑེཔཏོ བཧི ཨཉྙཾ ཨུདཀུཀྑེཔཾ ཨནཏིཀྐམིཏྭཱ ཨུཔོསཐཱདིཀརཎཏྠཾ ཋིཏོ སངྒྷོ སཱིམཱསམྦྷེདསམྦྷཝཏོ ཀམྨཾ ཀོཔེཏཱིཏི ཨིམིནཱ ཨདྷིཔྤཱཡེན ཝུཏྟཾ སིཡཱ, ཨེཝཾ སཏི ཡུཛྫེཡྻ. ཏེནེཝ མཱཏིཀཱཊྛཀཐཱཡ ལཱིནཏྠཔྤཀཱསནིཡཾ ཝུཏྟཾ ‘‘ཨཉྙཾ ཏཏྟཀཾཡེཝ པརིཙྪེདནྟི དུཏིཡཾ ཨུདཀུཀྑེཔཾ ཨནཏིཀྐནྟོཔི ཀོཔེཏི. ཀསྨཱ? ཨཏྟནོ ཨུདཀུཀྑེཔསཱིམཱཡ པརེསཾ ཨུདཀུཀྑེཔསཱིམཱཡ ཨཛ྄ཛྷོཏྠཊཏྟཱ སཱིམཱསམྦྷེདོ ཧོཏི, ཏསྨཱ ཀོཔེཏཱི’’ཏི. ‘‘ཨིདཾ སབྦཨཊྛཀཐཱསུ སནྣིཊྛཱན’’ནྟི ཙ ཨིམིནཱ ཨདྷིཔྤཱཡེན ཝུཏྟནྟི གཧེཏབྦཾ སབྦཱསུཔི ཨཊྛཀཐཱསུ སཱིམཱསམྦྷེདསྶ ཨནིཙྪིཏཏྟཱ. ཏེནེཝ ཧི ‘‘ཨཏྟནོ ཙ ཨཉྙེསཉྩ ཨུདཀུཀྑེཔཔརིཙྪེདསྶ ཨནྟརཱ ཨཉྙོ ཨུདཀུཀྑེཔོ སཱིམནྟརིཀཏྠཱཡ ཋཔེཏབྦོ’’ཏི ཝུཏྟཾ. ཨཉྙེ པནེཏྠ ཨཉྙཐཱཔི པཔཉྩེནྟི, ཏཾ ན གཧེཏབྦཾ.

སབྦཏྠ སངྒྷོ ནིསཱིདཏཱིཏི ཧཏྠཔཱསཾ ཨཝིཛཧིཏྭཱ ནིསཱིདཏི. ཨུདཀུཀྑེཔསཱིམཱཀམྨཾ ནཏྠཱིཏི ཡསྨཱ སབྦོཔི ནདཱིཔདེསོ བྷིཀྑཱུཧི ཨཛ྄ཛྷོཏྠཊོ ¶ , ཏསྨཱ སམནྟཏོ ནདིཡཱ ཨབྷཱཝཱ ཨུདཀུཀྑེཔེ པཡོཛནཾ ནཏྠི. ཨུདཀུཀྑེཔཔྤམཱཎཱ སཱིམནྟརིཀཱ སུཝིཉྙེཡྻཏརཱ ཧོཏི, སཱིམཱསམྦྷེདསངྐཱ ན ཙ སིཡཱཏི སཱམཱིཙིདསྶནཏྠཾ ‘‘ཨཉྙོ ཨུདཀུཀྑེཔོ སཱིམནྟརིཀཏྠཱཡ ཋཔེཏབྦོ’’ཏི ཝུཏྟཾ. ཡཏྟཀེན པན སཱིམཱསམྦྷེདོ ན ཧོཏི, ཏཏྟཀཾ ཋཔེཏུཾ ཝཊྚཏིཡེཝ. ཏེནེཝཱཧུ པོརཱཎཱ ‘‘ཡཏྟཀེན སཱིམཱསངྐརོ ན ཧོཏི, ཏཏྟཀམྤི ཋཔེཏུཾ ཝཊྚཏཱི’’ཏི. ཨཱུནཀཾ པན ན ཝཊྚཏཱིཏི ཨིདམྤི ཨུདཀུཀྑེཔསཱིམཱཡ པརིསཝསེན ཝཌྜྷནཏོ སཱིམཱསམྦྷེདསངྐཱ སིཡཱཏི ཏཾནིཝཱརཎཏྠམེཝ ཝུཏྟཾ.

གཙྪནྟིཡཱ ¶ པན ནཱཝཱཡ ཀཱཏུཾ ན ཝཊྚཏཱིཏི ཨེཏྠ ཨུདཀུཀྑེཔམནཏིཀྐམིཏྭཱ པརིཝཏྟམཱནཱཡ ཀཱཏུཾ ཝཊྚཏཱིཏི ཝེདིཏབྦཾ. སཱིམཾ ཝཱ སོདྷེཏྭཱཏི ཨེཏྠ སཱིམསོདྷནཾ ནཱམ གཱམསཱིམཱདཱིསུ ཋིཏཱནཾ ཧཏྠཔཱསཱནཡནཱདི. ‘‘ནདིཾ ཝིནཱསེཏྭཱ ཏལཱ༹ཀཾ ཀརོནྟཱི’’ཏི ཝུཏྟམེཝཏྠཾ ཝིབྷཱཝེཏི ‘‘ཧེཊྛཱ པཱལི༹ བདྡྷཱ’’ཏི, ཧེཊྛཱནདིཾ ཨཱཝརིཏྭཱ པཱལི༹ བདྡྷཱཏི ཨཏྠོ. ཚཌྜིཏམོདཀནྟི ཏལཱ༹ཀརཀྑཎཏྠཾ ཨེཀམནྟེན ཚཌྜིཏམུདཀཾ. དེཝེ ཨཝསྶནྟེཏི དུབྦུཊྛིཀཱལེ ཝསྶཱནེཔི དེཝེ ཨཝསྶནྟེ. ཨུཔྤཏིཏྭཱཏི ཨུཏྟརིཏྭཱ. གཱམནིགམསཱིམཾ ཨོཏྠརིཏྭཱ པཝཏྟཏཱིཏི ཝུཏྟཔྤཀཱརེ ཝསྶཀཱལེ ཙཏྟཱརོ མཱསེ ཨབྦོཙྪིནྣཱ པཝཏྟཏི. ཝིཧཱརསཱིམནྟི བདྡྷསཱིམཾ སནྡྷཱཡ ཝདཏི.

ཨགམནཔཐེཏི ཡཏྠ ཏདཧེཝ གནྟྭཱ པཙྩཱགནྟུཾ ན སཀྐཱ ཧོཏི, ཏཱདིསེ པདེསེ ཨརཉྙསཱིམཱསངྑམེཝ གཙྪཏཱིཏི སཏྟབྦྷནྟརསཱིམཾ སནྡྷཱཡ ཝདཏི. ཏེསནྟི མཙྪབནྡྷཱནཾ. གམནཔརིཡནྟསྶ ཨོརཏོཏི གམནཔརིཡནྟསྶ ཨོརིམབྷཱགེ དཱིཔཀཾ པབྦཏཉྩ སནྡྷཱཡ ཝུཏྟཾ, ན སམུདྡཔྤདེསཾ.

༡༤༨. སཾསཊྛཝིཊཔཱཏི ཨིམིནཱ ཨཉྙམཉྙསྶ ཨཱསནྣཏཾ དཱིཔེཏི. བདྡྷཱ ཧོཏཱིཏི པཙྪིམདིསཱབྷཱགེ སཱིམཾ སནྡྷཱཡ ཝུཏྟཾ. ཏསྶཱ པདེསནྟི ཡཏྠ ཋཏྭཱ བྷིཀྑཱུཧི ཀམྨཾ ཀཱཏུཾ སཀྐཱ ཧོཏི, ཏཱདིསཾ པདེསཾ. ཡཏྠ པན ཋིཏེཧི ཀམྨཾ ཀཱཏུཾ ན སཀྐཱ ཧོཏི, ཏཱདིསཾ པདེསཾ ཨནྟོཀརིཏྭཱ བནྡྷནྟཱ སཱིམཱཡ སཱིམཾ སམྦྷིནྡནྟི ནཱམ. དྭིནྣཾ སཱིམཱནཾ ནིམིཏྟཾ ཧོཏཱིཏི ནིམིཏྟསྶ སཱིམཏོ བཱཧིརཏྟཱ སཱིམཱསམྦྷེདོ ན ཧོཏཱིཏི ཝུཏྟཾ. སཱིམཱསངྐརཾ ཀརོཏཱིཏི ཝཌྜྷིཏྭཱ སཱིམཔྤདེསཾ པཝིཊྛེ དྭིནྣཾ སཱིམཱནཾ གཏཊྛཱནསྶ དུཝིཉྙེཡྻཏྟཱ ཝུཏྟཾ, ན པན ཏཏྠ ཀམྨཾ ཀཱཏུཾ ན ཝཊྚཏཱིཏི དསྶནཏྠཾ. ན ཧི སཱིམཱ ཏཏྟཀེན ¶ ཨསཱིམཱ ཧོཏི, དྭེ པན སཱིམཱ པཙྪཱ ཝཌྜྷིཏེན རུཀྑེན ཨཛ྄ཛྷོཏྠཊཏྟཱ ཨེཀཱབདྡྷཱ ཧོནྟི, ཏསྨཱ ཨེཀཏྠ ཋཏྭཱ ཀམྨཾ ཀརོནྟེཧི ཨིཏརཾ སོདྷེཏྭཱ ཀཱཏབྦཾ.

གཱམསཱིམཱདིཀཐཱཝཎྞནཱ ནིཊྛིཏཱ.

ཨུཔོསཐབྷེདཱདིཀཐཱཝཎྞནཱ

༡༤༩. ཨདྷམྨེན ཝགྒཾ ཨུཔོསཐཀམྨནྟི ཨེཏྠ ཡཏྠ ཙཏྟཱརོ ཝསནྟི, ཏཏྠ པཱཏིམོཀྑུདྡེསོ ཨནུཉྙཱཏོ. ཡཏྠ དྭེ ཝཱ ཏཡོ ཝཱ ཝསནྟི, ཏཏྠ པཱརིསུདྡྷིཨུཔོསཐོ. ཨིདྷ པན ¶ ཏཐཱ ཨཀཏྭཱ ཙཏུནྣཾ ཝསནཊྛཱནེ པཱརིསུདྡྷིཨུཔོསཐསྶ ཀཏཏྟཱ ཏིཎྞཾ ཝསནཊྛཱནེ ཙ པཱཏིམོཀྑསྶ ཨུདྡིཊྛཏྟཱ ‘‘ཨདྷམྨེནཱ’’ཏི ཝུཏྟཾ. ཡསྨཱ སབྦེཝ ན སནྣིཔཏིཾསུ, ཚནྡཔཱརིསུདྡྷི ཙ སངྒྷམཛ྄ཛྷཾཡེཝ ཨཱགཙྪཏི, ན གཎམཛ྄ཛྷཾ, ཏསྨཱ ‘‘ཝགྒ’’ནྟི ཝུཏྟཾ.

པཱཏིམོཀྑུདྡེསཀཐཱཝཎྞནཱ

༡༥༠. ཨེཝམེཏཾ དྷཱརཡཱམཱིཏི ‘‘སུཏཱ ཁོ པནཱཡསྨནྟེཧཱི’’ཏི ཨེཏྠ ‘‘ཨེཝམེཏཾ དྷཱརཡཱམཱི’’ཏི ཝཏྭཱ ‘‘ཨུདྡིཊྛཾ ཁོ ཨཱཡསྨནྟོ ནིདཱནཾ, སུཏཱ ཁོ པནཱཡསྨནྟེཧི ཙཏྟཱརོ པཱརཱཛིཀཱ དྷམྨཱ’’ཏི ཝཏྟབྦཾ. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. ནིདཱནཝཎྞནཱ) ‘‘ཏཏྠཱཡསྨནྟེ པུཙྪཱམི ཀཙྩིཏྠ པརིསུདྡྷཱ, དུཏིཡམྤི པུཙྪཱམི…པེ… ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི ཝཏྭཱ ‘ཨུདྡིཊྛཾ ཁོ ཨཱཡསྨནྟོ ནིདཱན’ནྟིཨཱདིནཱ ནཡེན ཨཝསེསེ སུཏེན སཱཝིཏེ ཨུདྡིཊྛོ ཧོཏཱི’’ཏི ཝུཏྟཾ. སུཏེནཱཏི སུཏཔདེན. སཝརབྷཡནྟི ཝནཙརཀབྷཡཾ. ཏེནཱཧ ‘‘ཨཊཝིམནུསྶབྷཡ’’ནྟི. ‘‘ཨཝསེསཾ སུཏེན སཱཝེཏབྦ’’ནྟི ཝཙནཏོ ནིདཱནུདྡེསེ ཨནིཊྛིཏེ སུཏེན སཱཝེཏབྦཾ ནཱམ ནཏྠཱིཏི ཨཱཧ ‘‘དུཏིཡཱདཱིསུ ཨུདྡེསེསཱུ’’ཏི. ཨུདྡིཊྛཨུདྡེསཱཔེཀྑཉྷི ཨཝསེསགྒཧཎཾ, ཏསྨཱ ནིདཱནེ ཨུདྡིཊྛེ པཱརཱཛིཀུདྡེསཱདཱིསུ ཡསྨིཾ ཝིཔྤཀཏེ ཨནྟརཱཡོ ཨུཔྤཛྫཏི, ཏེན སདྡྷིཾ ཨཝསེསཾ སུཏེན སཱཝེཏབྦཾ.

ཏཱིཧིཔི ¶ ཝིདྷཱིཧཱིཏི ཨོསཱརཎཀཐནསརབྷཉྙེཧི. ཨེཏྠ ཙ ཨཏྠཾ བྷཎིཏུཀཱམཏཱཡ སུཏྟསྶ ཨོསཱརཎཱ ཨོསཱརཎཾ ནཱམ. ཏསྶེཝ ཨཏྠཔྤཀཱསནཱ ཀཐནཾ ནཱམ. སུཏྟསྶ ཏདཏྠསྶ ཝཱ སརེན བྷཎནཾ སརབྷཉྙཾ ནཱམ. སཛ྄ཛྷཱཡཾ ཨདྷིཊྛཧིཏྭཱཏི ‘‘སཛ྄ཛྷཱཡཾ ཀརོམཱི’’ཏི ཙིཏྟཾ ཨུཔྤཱདེཏྭཱ. ཨོསཱརེཏྭཱ པན ཀཐེནྟེནཱཏི པཋམཾ ཨུསྶཱརེཏྭཱ པཙྪཱ ཨཏྠཾ ཀཐེནྟེན. མནུསྶཱནཾ པན ‘‘བྷཎཱཧཱི’’ཏི ཝཏྟུཾ ཝཊྚཏཱིཏི ཨེཏྠ ཨུཙྩཏརེ ནིསིནྣེནཔི མནུསྶཱནཾ བྷཎཱཧཱིཏི ཝིསེསེཏྭཱཡེཝ ཝཏྟུཾ ཝཊྚཏི, ཨཝིསེསེཏྭཱ པན ན ཝཊྚཏི. སཛ྄ཛྷཱཡཾ ཀརོནྟེནཱཏི ཡཏྠ ཀཏྠཙི ནིསཱིདིཏྭཱ སཛ྄ཛྷཱཡཾ ཀརོནྟེན. ཐེརོཏི ཡོ ཀོཙི ཨཏྟནཱ ཝུཌྜྷཏརོ. ཨེཀཾ ཨཱཔུཙྪིཏྭཱཏི ཨེཀཾ ཝུཌྜྷཏརཾ ཨཱཔུཙྪིཏྭཱ. ཨཔརོ ཨཱགཙྪཏཱིཏི ཨཔརོ ཏཏོཔི ཝུཌྜྷཏརོ ཨཱགཙྪཏི.

པཱཏིམོཀྑུདྡེསཀཐཱཝཎྞནཱ ནིཊྛིཏཱ.

པཱཏིམོཀྑུདྡེསཀཨཛ྄ཛྷེསནཱདིཀཐཱཝཎྞནཱ

༡༥༥. ཙོདནཱཝཏྠུ ¶ ནཱམ ཨེཀཾ ནགརཾ. སངྒྷཨུཔོསཐཱདིབྷེདེན ནཝཝིདྷནྟི སངྒྷེ ཨུཔོསཐོ གཎེ ཨུཔོསཐོ པུགྒལེ ཨུཔོསཐོཏི ཨེཝཾ ཀཱརཀཝསེན ཏཡོ, སུཏྟུདྡེསོ པཱརིསུདྡྷིཨུཔོསཐོ ཨདྷིཊྛཱནུཔོསཐོཏི ཨེཝཾ ཀཏྟབྦཱཀཱརཝསེན ཏཡོ, ཙཱཏུདྡསིཀོ པནྣརསིཀོ སཱམགྒཱིཨུཔོསཐོཏི ཨེཝཾ དིཝསཝསེན ཏཡོཏི ནཝཝིདྷཾ. ཙཏུབྦིདྷཾ ཨུཔོསཐཀམྨནྟི ཨདྷམྨེན ཝགྒཾ ཨུཔོསཐཀམྨཾ, ཨདྷམྨེན སམགྒཾ ཨུཔོསཐཀམྨཾ, དྷམྨེན ཝགྒཾ ཨུཔོསཐཀམྨཾ, དྷམྨེན སམགྒཾ ཨུཔོསཐཀམྨནྟི ཨེཝཾ ཙཏུབྦིདྷམྤི ཨུཔོསཐཀམྨཾ. དུཝིདྷཾ པཱཏིམོཀྑནྟི བྷིཀྑུཔཱཏིམོཀྑཾ བྷིཀྑུནཱིཔཱཏིམོཀྑནྟི དུཝིདྷཾ པཱཏིམོཀྑཾ. ནཝཝིདྷཾ པཱཏིམོཀྑུདྡེསནྟི བྷིཀྑཱུནཾ པཉྩ ཨུདྡེསཱ, བྷིཀྑུནཱིནཾ ཋཔེཏྭཱ ཨནིཡཏུདྡེསཾ ཨཝསེསཱ ཙཏྟཱརོཏི ནཝཝིདྷཾ པཱཏིམོཀྑུདྡེསཾ.

པཀྑགཎནཱདིཨུགྒཧཎཱནུཛཱནནཀཐཱཝཎྞནཱ

༡༥༨-༡༦༡. སམནྣཱཧརཐཱཏི སལླཀྑེཐ. པརིཡེསིཏབྦཱནཱིཏི བྷིཀྑཱཙཱརེན པརིཡེསིཏབྦཱནི.

དིསཾགམིཀཱདིཝཏྠུཀཐཱཝཎྞནཱ

༡༦༣. ཨུཏུཝསྶེཡེཝཱཏི ¶ ཧེམནྟགིམྷེསུཡེཝ.

པཱརིསུདྡྷིདཱནཀཐཱཝཎྞནཱ

༡༦༤. ཡེན ཀེནཙི ཨངྒཔཙྩངྒེན ཝིཉྙཱཔེཏཱིཏི མནསཱ ཙིནྟེཏྭཱ ཧཏྠཔྤཡོགཱདིནཱ ཡེན ཀེནཙི ཝིཉྙཱཔེཏི. སངྒྷོ ནཔྤཧོཏཱིཏི དྭིནྣཾ དྭིནྣཾ ཨནྟརཱ ཧཏྠཔཱསཾ ཨཝིཛཧིཏྭཱ པཊིཔཱཊིཡཱ ཋཱཏུཾ ནཔྤཧོཏི. ཨིཏརཱ པན བིལཱ༹ལསངྑལིཀཔཱརིསུདྡྷི ནཱམཱཏི ཨེཏྠ ཀེཙི ཝདནྟི ‘‘བིལཱ༹ལསངྑལིཀཱ བདྡྷཱཝ ཧོཏི ཨནྟོགེཧེ ཨེཝ སམྤཡོཛནཏྟཱ, ཡཐཱ སཱ ན ཀཏྠཙི གཙྪཏི, ཏཐཱ སཱཔི ན གཙྪཏཱིཏི ཨདྷིཔྤཱཡོ. ཨིཏརཐཱ ཝིསེསནཾ ནིརཏྠཀཾ ཧོཏཱི’’ཏི. ཨཔརེ པན ‘‘ཡཐཱ བཧཱུཧི མནུསྶེཧི ཨེཀསྶ བིལཱ༹ལསྶ ཨཏྟནོ ཨཏྟནོ སངྑལིཀཱ གཱིཝཱཡ ཨཱབདྡྷཱ བིལཱ༹ལེ གཙྪནྟེ གཙྪནྟི ཨཱབདྡྷཏྟཱ, ན ཨཉྙསྨིཾ བིལཱ༹ལེ གཙྪནྟེ གཙྪནྟི ཨནཱབདྡྷཏྟཱ, ཨེཝམེཝསྶ བྷིཀྑུསྶ བཧཱུཧི སངྑལིཀསདིསཱ ཚནྡཔཱརིསུདྡྷི དིནྣཱ, སཱ ཏསྨིཾ བྷིཀྑུསྨིཾ གཙྪནྟེ ¶ གཙྪཏི ཏསྨིཾ སངྑལིཀཱ ཝིཡ ཨཱབདྡྷཏྟཱ, ན ཨཉྙསྨིཾ ཨནཱབདྡྷཏྟཱ’’ཏི ཝདནྟི. སབྦམྤེཏཾ ན སཱརཏོ པཙྩེཏབྦཾ. ཨཡཾ པནེཏྠ སཱརོ – ཡཐཱ སངྑལིཀཱཡ པཋམཝལཡཾ དུཏིཡཾཡེཝ ཝལཡཾ པཱཔུཎཱཏི, ན ཏཏིཡཾ, ཨེཝམཡམྤི པཱརིསུདྡྷིདཱཡཀེན ཡསྶ དིནྣཱ, ཏཏོ ཨཉྙཏྠ ན གཙྪཏཱིཏི སངྑལིཀསདིསཏྟཱ ‘‘བིལཱ༹ལསངྑལིཀཱ’’ཏི ཝུཏྟཱ. བིལཱ༹ལསངྑལིཀགཧཎཉྩེཏྠ ཡཱསཾ ཀཱསཉྩི སངྑལིཀཱནཾ ཨུཔལཀྑཎམཏྟནྟི དཊྛབྦཾ.

ཚནྡདཱནཀཐཱཝཎྞནཱ

༡༦༥. ‘‘སནྟི སངྒྷསྶ ཀརཎཱིཡཱནཱི’’ཏི ཝཏྟབྦེ ཝཙནཝིཔལླཱསེན ‘‘ཀརཎཱིཡ’’ནྟི ཝུཏྟཾ. ཏསྶ སམྨུཏིདཱནཀིཙྩཾ ནཏྠི. ‘‘ཧཏྠཔཱསཾ ཨཱནེཏབྦོཡེཝཱ’’ཏི གཎྛིཔདེསུ ཝུཏྟཾ.

སངྒྷུཔོསཐཱདིཀཐཱཝཎྞནཱ

༡༦༨. སངྒྷསནྣིཔཱཏཏོ པཋམཾ ཀཱཏབྦཾ པུབྦཀརཎནྟི ཝུཏྟཾ, པུབྦཀརཎཏོ པཙྪཱ ཀཱཏབྦམྤི ཨུཔོསཐཀམྨཏོ པཋམཾ ཀཱཏབྦཏྟཱ པུབྦཀིཙྩནྟི ཝུཏྟཾ. ཨུབྷཡམྤི ཙེཏཾ ཨུཔོསཐཀམྨཏོ པཋམཾ ཀཏྟབྦཏྟཱ ཀཏྠཙི པུབྦཀིཙྩམིཙྩེཝ ཝོཧརཱིཡཏི ‘‘ཀིཾ སངྒྷསྶ པུབྦཀིཙྩ’’ནྟིཨཱདཱིསུ ཝིཡ.

ཨུཔོསཐོཏི ¶ ཏཱིསུ ཨུཔོསཐདིཝསེསུ ཨཉྙཏརདིཝསོ. ཏསྨིཉྷི སཏི ཨིདཾ སངྒྷསྶ ཨུཔོསཐཀམྨཾ པཏྟཀལླཾ ནཱམ ཧོཏི, ནཱསཏི. ཡཐཱཧ ‘‘ན ཙ, བྷིཀྑཝེ, ཨནུཔོསཐེ ཨུཔོསཐོ ཀཱཏབྦོ’’ཏི (མཧཱཝ. ༡༨༣). ཡཱཝཏིཀཱ ཙ བྷིཀྑཱུ ཀམྨཔྤཏྟཱཏི ཡཏྟཀཱ བྷིཀྑཱུ ཏསྶ ཨུཔོསཐཀམྨསྶ པཏྟཱ ཡུཏྟཱ ཨནུརཱུཔཱ སབྦནྟིམེན པརིཙྪེདེན ཙཏྟཱརོ བྷིཀྑཱུ པཀཏཏྟཱ, ཏེ ཙ ཁོ ཧཏྠཔཱསཾ ཨཝིཛཧིཏྭཱ ཨེཀསཱིམཱཡཾ ཋིཏཱ. སབྷཱགཱཔཏྟིཡོ ཙ ན ཝིཛྫནྟཱིཏི ཨེཏྠ ཡཾ སབྦོ སངྒྷོ ཝིཀཱལབྷོཛནཱདིནཱ སབྷཱགཝཏྠུནཱ ལཧུཀཱཔཏྟིཾ ཨཱཔཛྫཏི, ཨེཝརཱུཔཱ ‘‘ཝཏྠུསབྷཱགཱ’’ཏི ཝུཙྩནྟི. ཨེཏཱསུ ཧི ཨཝིཛྫམཱནཱསུ ཝིསབྷཱགཱསུ ཝིཛྫམཱནཱསུཔི པཏྟཀལླཾ ཧོཏིཡེཝ.

ཝཛྫནཱིཡཱ ཙ པུགྒལཱ ཏསྨིཾ ན ཧོནྟཱིཏི ‘‘ན, བྷིཀྑཝེ, སགཧཊྛཱཡ པརིསཱཡཱ’’ཏི (མཧཱཝ. ༡༥༤) ཝཙནཏོ གཧཊྛོ, ‘‘ན, བྷིཀྑཝེ, བྷིཀྑུནིཡཱ ནིསིནྣཔརིསཱཡ པཱཏིམོཀྑཾ ཨུདྡིསིཏབྦ’’ནྟིཨཱདིནཱ (མཧཱཝ. ༡༨༣) ནཡེན ཝུཏྟཱ བྷིཀྑུནཱི སིཀྑམཱནཱ སཱམཎེརོ སཱམཎེརཱི ¶ སིཀྑཱཔཙྩཀྑཱཏཀོ ཨནྟིམཝཏྠུཨཛ྄ཛྷཱཔནྣཀོ ཨཱཔཏྟིཡཱ ཨདསྶནེ ཨུཀྑིཏྟཀོ ཨཱཔཏྟིཡཱ ཨཔྤཊིཀམྨེ ཨུཀྑིཏྟཀོ པཱཔིཀཱཡ དིཊྛིཡཱ ཨཔྤཊིནིསྶགྒེ ཨུཀྑིཏྟཀོ པཎྜཀོ ཐེཡྻསཾཝཱསཀོ ཏིཏྠིཡཔཀྐནྟཀོ ཏིརཙྪཱནགཏོ མཱཏུགྷཱཏཀོ པིཏུགྷཱཏཀོ ཨརཧནྟགྷཱཏཀོ བྷིཀྑུནཱིདཱུསཀོ སངྒྷབྷེདཀོ ལོཧིཏུཔྤཱདཀོ ཨུབྷཏོབྱཉྫནཀོཏི ཨིམེ ཝཱིསཏི ཙཱཏི ཨེཀཝཱིསཏི པུགྒལཱ ཝཛྫནཱིཡཱ ནཱམ, ཏེ ཧཏྠཔཱསཏོ བཧིཀརཎཝསེན ཝཛྫེཏབྦཱ. ཨེཏེསུ ཧི ཏིཝིདྷེ ཨུཀྑིཏྟཀེ སཏི ཨུཔོསཐཾ ཀརོནྟོ སངྒྷོ པཱཙིཏྟིཡཾ ཨཱཔཛྫཏི, སེསེསུ དུཀྐཊཾ. ཨེཏྠ ཙ ཏིརཙྪཱནགཏོཏི ཡསྶ ཨུཔསམྤདཱ པཊིཀྑིཏྟཱ, སོཝ ཨདྷིཔྤེཏོ, ཏིཏྠིཡཱ གཧཊྛེནེཝ སངྒཧིཏཱ. ཨེཏེཔི ཧི ཝཛྫནཱིཡཱ. ཨེཝཾ པཏྟཀལླཾ ཨིམེཧི ཙཏཱུཧི ཨངྒེཧི སངྒཧིཏནྟི ཝེདིཏབྦཾ.

ཨཛྫ མེ ཨུཔོསཐོ པནྣརསོཏིཔཱིཏི པི-སདྡེན པཱལི༹ཡཾ ཨཱགཏནཡེནེཝ ‘‘ཨཛྫ མེ ཨུཔོསཐོ’’ཏིཔི ཝཏྟུཾ ཝཊྚཏཱིཏི དཱིཔེཏི. མཱཏིཀཱཊྛཀཐཱཡཾ (ཀངྑཱ. ཨཊྛ. ནིདཱནཝཎྞནཱ) པན ‘‘ཨཛྫ མེ ཨུཔོསཐོ ཙཱཏུདྡསོཏི ཝཱ པནྣརསོཏི ཝཱ ཝཏྭཱ ཨདྷིཊྛཱམཱིཏི ཝཏྟབྦ’’ནྟི ཝུཏྟཾ.

སངྒྷུཔོསཐཱདིཀཐཱཝཎྞནཱ ནིཊྛིཏཱ.

ཨཱཔཏྟིཔཊིཀམྨཝིདྷིཀཐཱཝཎྞནཱ

༡༦༩. ནནུ ¶ ཙ ‘‘ན, བྷིཀྑཝེ, སཱཔཏྟིཀེན ཨུཔོསཐོ ཀཱཏབྦོ, ཡོ ཀརེཡྻ, ཨཱཔཏྟི དུཀྐཊསྶཱ’’ཏི ཨེཝཾ སཱཔཏྟིཀསྶ ཨུཔོསཐཀརཎེ ཝིསུཾ པཉྙཏྟཱ ཨཱཔཏྟི ན དིསྶཏི, ཏསྨཱ བྷགཝཏཱ པཉྙཏྟཾ ‘‘ན སཱཔཏྟིཀེན ཨུཔོསཐོ ཀཱཏབྦོ’’ཏི ཨིདཾ ཀསྨཱ ཝུཏྟནྟི ཨཱཧ ‘‘ཡསྶ སིཡཱ ཨཱཔཏྟི…པེ… པཉྙཏྟཾ ཧོཏཱིཏི ཝེདིཏབྦ’’ནྟི. ཀིཉྩཱཔི ཝིསུཾ པཉྙཏྟཱ ཨཱཔཏྟི ན དིསྶཏི, ཨཐ ཁོ ‘‘ཡསྶ སིཡཱ ཨཱཔཏྟི, སོ ཨཱཝིཀརེཡྻཱ’’ཏིཨཱདིཾ ཝདནྟེན ཨཏྠཏོ པཉྙཏྟཱཡེཝཱཏི ཨདྷིཔྤཱཡོ.

པཱརིསུདྡྷིདཱནཔཉྙཱཔནེན ཙཱཏི ཨིམིནཱཝ ‘‘སཱཔཏྟིཀེན པཱརིསུདྡྷིཔི ན དཱཏབྦཱ’’ཏི དཱིཔིཏཾ ཧོཏི. ན ཧི སཱཔཏྟིཀོ སམཱནོ ‘‘པཱརིསུདྡྷིཾ དམྨི, པཱརིསུདྡྷིཾ མེ ཧར, པཱརིསུདྡྷིཾ མེ ཨཱརོཙེཧཱི’’ཏི ཝཏྟུམརཧཏི. ཏསྨཱ པཱརིསུདྡྷིཾ དེནྟེན པཋམཾ སནྟཱི ཨཱཔཏྟི དེསེཏབྦཱ ‘‘ཨཧཾ, ཨཱཝུསོ, ཨིཏྠནྣཱམཱཡ ཨཱཔཏྟིཡཱ ཝེམཏིཀོ, ཡདཱ ནིབྦེམཏིཀོ བྷཝིསྶཱམི, ཏདཱ ཏཾ ཨཱཔཏྟིཾ པཊིཀརིསྶཱམཱི’’ཏི ཝཏྭཱ ཨུཔོསཐོ ཀཱཏབྦོ. ‘‘པཱཏིམོཀྑཾ སོཏབྦ’’ནྟི ཝཙནཏོ ཡཱཝ ¶ ནིབྦེམཏིཀོ ན ཧོཏི, ཏཱཝ སབྷཱགཱཔཏྟིཾ པཊིགྒཧེཏུཾ ན ལབྷཏི, ཨཉྙེསཉྩ ཀམྨཱནཾ པརིསུདྡྷོ ནཱམ ཧོཏི. ‘‘པུན ནིབྦེམཏིཀོ ཧུཏྭཱ དེསེཏབྦཾ ན ཙཱ’’ཏི ནེཝ པཱལི༹ཡཾ ན ཨཊྛཀཐཱཡཾ ཨཏྠི, དེསིཏེ པན དོསོ ནཏྠི. ‘‘ཨིཏོ ཝུཊྛཧིཏྭཱ པཊིཀརིསྶཱམཱིཏི ཨེཏྠཱཔི ཨེསེཝ ནཡོ’’ཏི གཎྛིཔདེསུ ཝུཏྟཾ. ཡཐཱ སབྦོ སངྒྷོ སབྷཱགཱཔཏྟིཾ ཨཱཔཛྫིཏྭཱ ‘‘སུཎཱཏུ མེ བྷནྟེ, སངྒྷོ…པེ… པཊིཀརིསྶཏཱི’’ཏི ཉཏྟིཾ ཋཔེཏྭཱ ཨུཔོསཐཾ ཀཱཏུཾ ལབྷཏི, ཨེཝཾ ཏཱིཧི ‘‘སུཎནྟུ མེ ཨཱཡསྨནྟཱ, ཨིམེ བྷིཀྑཱུ སབྷཱགཾ ཨཱཔཏྟིཾ ཨཱཔནྣཱ. ཡདཱ ཨཉྙཾ བྷིཀྑུཾ སུདྡྷཾ ཨནཱཔཏྟིཀཾ པསྶིསྶནྟི, ཏདཱ ཏསྶ སནྟིཀེ ཏཾ ཨཱཔཏྟིཾ པཊིཀརིསྶནྟཱི’’ཏི གཎཉཏྟིཾ ཋཔེཏྭཱ, དྭཱིཧི ཨཉྙམཉྙཾ ཨཱརོཙེཏྭཱ ཨུཔོསཐཾ ཀཱཏུཾ ཝཊྚཏི. ཨེཀེནཔི ‘‘པརིསུདྡྷཾ ལབྷིཏྭཱ པཊིཀརིསྶཱམཱི’’ཏི ཨཱབྷོགཾ ཀཏྭཱ ཀཱཏུཾ ཝཊྚཏཱིཏི ཙ ཝདནྟི.

ཨཱཔཏྟིཔཊིཀམྨཝིདྷིཀཐཱཝཎྞནཱ ནིཊྛིཏཱ.

ལིངྒཱདིདསྶནཀཐཱཝཎྞནཱ

༡༧༩. ཨཱཙཱརསཎྛཱནནྟི ¶ ཨཱཙཱརསཎྛིཏི. ཨཱཀརཱིཡཏི པཀཱསཱིཡཏི ཨེཏེནཱཏི ཨཱཀཱརོ. ལཱིནཾ གམཡཏི བོདྷེཏཱིཏི ལིངྒཾ. ནིམིཡནྟི པརིཙྪིཛྫ ཉཱཡནྟི ཨེཏེནཱཏི ནིམིཏྟཾ. ཨུདྡིསཱིཡནྟི ཨཔདིསཱིཡནྟི ཨེཏེནཱཏི ཨུདྡེསོ. ‘‘ཨམྷཱཀཾ ཨིད’’ནྟི ཨཉྙཱཏཾ ཨཝིདིཏནྟི ཨཉྙཱཏཀཾ. ཏཉྩ ཨཏྠཏོ པརསནྟཀཾཡེཝཱཏི ཨཱཧ ‘‘ཨཉྙེསཾ སནྟཀ’’ནྟི.

༡༨༠. ནཱནཱསཾཝཱསཀབྷཱཝནྟི ལདྡྷིནཱནཱསཾཝཱསཀབྷཱཝཾ. ཏསྶ ཨབྷིབྷཝོ ནཱམ ཏེསཾ ལདྡྷིཝིསྶཛྫཱཔནནྟི ཨཱཧ ‘‘ཏཾ དིཊྛིཾ ན ནིསྶཛྫཱཔེནྟཱིཏི ཨཏྠོ’’ཏི.

ནགནྟབྦགནྟབྦཝཱརཀཐཱཝཎྞནཱ

༡༨༡. ཨུཔོསཐཱདྷིཊྛཱནཏྠཾ སཱིམཱཔི ནདཱིཔི ན གནྟབྦཱཏི གརུཀཾ པཱཏིམོཀྑུདྡེསཾ ཝིསྶཛྫེཏྭཱ ལཧུཀསྶ ཨཀཏྟབྦཏྟཱ ཝུཏྟཾ. ཨཱརཉྙཀེནཱཔི བྷིཀྑུནཱཏི ཨེཀཙཱརིཀེན ཨཱརཉྙཀབྷིཀྑུནཱ, ཡཏྠ ཝཱ སངྒྷཔཧོནཀཱ བྷིཀྑཱུ ན སནྟི, ཏཱདིསེ ཨརཉྙེ ཝསནྟེན. ཏཏྠ ཨུཔོསཐཾ ཀཏྭཱཝ གནྟབྦནྟི ཏསྶ ཝསནཊྛཱནེ སངྒྷུཔོསཐསྶ ཨཔྤཝཏྟནཏོ ཝུཏྟཾ. ཨུཔོསཐནྟརཱཡོཏི ཨཏྟནོ ཨུཔོསཐནྟརཱཡོ.

ཝཛྫནཱིཡཔུགྒལསནྡསྶནཀཐཱཝཎྞནཱ

༡༨༣. ཧཏྠཔཱསུཔགམནམེཝ ¶ པམཱཎནྟི བྷིཀྑུནཱིཨཱདཡོ ཋིཏཱ ཝཱ ཧོནྟུ ནིསིནྣཱ ཝཱ, ཏེསཾ ཧཏྠཔཱསུཔགམནམེཝ ཨཱཔཏྟིཡཱ པམཱཎནྟི ཨདྷིཔྤཱཡོ, ཏསྨཱ ཨེཀསཱིམཱཡམྤི ཧཏྠཔཱསཾ ཛཧཱཔེཏྭཱ ཨུཔོསཐཾ ཀཱཏུཾ ཝཊྚཏི. སེསམེཏྠ ཨུཏྟཱནམེཝ.

ཨུཔོསཐཀྑནྡྷཀཝཎྞནཱ ནིཊྛིཏཱ.

༣. ཝསྶཱུཔནཱཡིཀཀྑནྡྷཀཾ

ཝསྶཱུཔནཱཡིཀཱནུཛཱནནཀཐཱཝཎྞནཱ

༡༨༤. ཝསྶཱུཔནཱཡིཀཀྑནྡྷཀེ ¶ ¶ ཨིདྷ-སདྡོ ནིཔཱཏམཏྟོཏི ཨོཀཱསཔརིདཱིཔནསྶཔི ཨསམྦྷཝཏོ ཨཏྠནྟརསྶ ཨབོདྷནཏོ ཝུཏྟཾ. ཨཔརཛྫུགཏཱཡ ཨསྶཱཏི ཨིམིནཱ ཨསམཱནཱདྷིཀརཎཝིསཡོ བཱཧིརཏྠསམཱསོཡནྟི དསྶེཏི. ཨཔརཛྫཱུཏི ཨཱསཱལ༹ྷཱིཔུཎྞམིཏོ ཨཔརཾ དིནཾ, པཱཊིཔདནྟི ཨཏྠོ. ཨསྶཱཏི ཨཱསཱལ༹ྷཱིཔུཎྞམིཡཱ.

ཝསྶཱནེ ཙཱརིཀཱཔཊིཀྑེཔཱདིཀཐཱཝཎྞནཱ

༡༨༥. ཨནཔེཀྑགམནེན ཝཱ ཨཉྙཏྠ ཨརུཎཾ ཨུཊྛཱཔནེན ཝཱ ཨཱཔཏྟི ཝེདིཏབྦཱཏི ཨེཏྠ ཨནཔེཀྑགམནེན ཨུཔཙཱརཱཏིཀྐམེ ཨཱཔཏྟི ཝེདིཏབྦཱ, སཱཔེཀྑགམནེན ཨཉྙཏྠ ཨརུཎུཊྛཱཔནེན ཨཱཔཏྟི ཝེདིཏབྦཱ.

སཏྟཱཧཀརཎཱིཡཱནུཛཱནནཀཐཱཝཎྞནཱ

༡༨༧-༡༨༩. ཏཱིཎི པརིཧཱིནཱནཱིཏི བྷིཀྑུནཱིནཾ ཝཙྩཀུཊིཨཱདཱིནཾ པཊིཀྑིཏྟཏྟཱ པཧཱིནཱནི. ཝཱརེཡྻནྟི ཨཱཝཱཧཝིཝཱཧམངྒལཾ. སུཏྟནྟོཏི ཨཏྟནོ པགུཎསུཏྟནྟོ. ན པལུཛྫཏཱིཏི ན ཝིནསྶཏི ན ཨནྟརདྷཱཡཏི.

པཧིཏེཡེཝ ཨནུཛཱནནཀཐཱཝཎྞནཱ

༡༩༩. བྷིཀྑུགཏིཀོཏི བྷིཀྑུནིསྶིཏཀོ. སོ པན ཡསྨཱ བྷིཀྑཱུཧི སདྡྷིཾ ཝསཏི, ཏསྨཱ ཝུཏྟཾ ‘‘བྷིཀྑཱུཧི སདྡྷིཾ ཝསནཀཔུརིསོ’’ཏི. སཏྟཱཧཀརཎཱིཡེན གནྟྭཱ བཧིདྡྷཱ ཨརུཎུཊྛཱཔནཾ ¶ རཏྟིཙྪེདོ. ཨནིམནྟིཏེན གནྟུཾ ན ཝཊྚཏཱིཏི ཨེཏྠ ཨནིམནྟིཏཏྟཱ སཏྟཱཧཀིཙྩཾ ཨདྷིཊྛཧིཏྭཱ གཙྪནྟསྶཔི ཝསྶཙྪེདོ ཙེཝ དུཀྐཊཉྩ ཧོཏཱིཏི ཝེདིཏབྦཾ. ཡཐཱཝུཏྟཉྷི རཏྟིཙྪེདཀཱརཎཾ ཝིནཱ ཏིརོཝིཧཱརེ ཝསིཏྭཱ ཨཱགཙྪིསྶཱམཱིཏི གཙྪཏོཔི ཝསྶཙྪེདཾ ཝདནྟི. གནྟུཾ ཝཊྚཏཱིཏི སཏྟཱཧཀརཎཱིཡེན གནྟུཾ ཝཊྚཏི. ཨེཝཾ གཙྪནྟེན ཙ ཨནྟོཨུཔཙཱརསཱིམཱཡཾ ཋིཏེནེཝ ‘‘ཨནྟོསཏྟཱཧེ ཨཱགཙྪིསྶཱམཱི’’ཏི ཨཱབྷོགཾ ཀཏྭཱ གནྟབྦཾ. སཙེ ཨཱབྷོགཾ ཨཀཏྭཱ ཨུཔཙཱརསཱིམཾ ཨཏིཀྐམཏི, ཚིནྣཝསྶོཝ ཧོཏཱིཏི ཝདནྟི. བྷཎྜཀནྟི ཙཱིཝརཾ སནྡྷཱཡ ཝུཏྟཾ. པཧིཎནྟཱིཏི ཙཱིཝརདྷོཝནཱདིཀམྨེན པཧིཎནྟི. སམྤཱཔུཎིཏུཾ ¶ ན སཀྐོཏི, ཝཊྚཏཱིཏི ཨེཏྠ ‘‘ཨཛྫེཝ ཨཱགམིསྶཱམཱི’’ཏི སཱམནྟཝིཧཱརཾ གནྟྭཱ པུན ཨཱགཙྪནྟསྶ ཨནྟརཱམགྒེ སཙེ ཨརུཎུགྒམནཾ ཧོཏི, ཝསྶཙྪེདོཔི ན ཧོཏི, རཏྟིཙྪེདདུཀྐཊཉྩ ནཏྠཱིཏི ཝདནྟི. ‘‘ཨཱཙརིཡཾ པསྶིསྶཱམཱི’’ཏི པན གནྟུཾ ལབྷཏཱིཏི ‘‘ཨགིལཱནམྤི ཨཱཙརིཡཾ ཨུཔཛ྄ཛྷཱཡཾ ཝཱ པསྶིསྶཱམཱི’’ཏི སཏྟཱཧཀརཎཱིཡེན གནྟུཾ ལབྷཏི. སཙེ པན ནཾ ཨཱཙརིཡོ ‘‘ཨཛྫ མཱ གཙྪཱ’’ཏི ཝདཏི, ཝཊྚཏཱིཏི ཨེཝཾ སཏྟཱཧཀརཎཱིཡེན གཏཾ ཨནྟོསཏྟཱཧེཡེཝ པུན ཨཱགཙྪནྟཾ སཙེ ཨཱཙརིཡོ ཨུཔཛ྄ཛྷཱཡོ ཝཱ ‘‘ཨཛྫ མཱ གཙྪཱ’’ཏི ཝདཏི, ཝཊྚཏི, སཏྟཱཧཱཏིཀྐམེཔི ཨནཱཔཏྟཱིཏི ཨདྷིཔྤཱཡོ, ཝསྶཙྪེདོ པན ཧོཏིཡེཝཱཏི དཊྛབྦཾ སཏྟཱཧསྶ བཧིདྡྷཱ ཝཱིཏིནཱམིཏཏྟཱ.

ཨནྟརཱཡེ ཨནཱཔཏྟིཝསྶཙྪེདཀཐཱཝཎྞནཱ

༢༠༡. སཙེ དཱུརཾ གཏོ ཧོཏི, སཏྟཱཧཝཱརེན ཨརུཎོ ཨུཊྛཱཔེཏབྦོཏི ཨིམིནཱ ཝསྶཙྪེདཀཱརཎེ སཏི སཏྟཱཧཀརཎཱིཡེན གནྟུཾ ཝཊྚཏཱིཏི དཱིཔེཏི.

ཝཛཱདཱིསུ ཝསྶཱུཔགམནཀཐཱཝཎྞནཱ

༢༠༣. ‘‘ཨིདྷ ཝསྶཾ ཨུཔེམཱི’’ཏི ཏིཀྑཏྟུཾ ཝཏྟབྦནྟི སཏྠསྶཱཝིཧཱརཏྟཱ ‘‘ཨིམསྨིཾ ཝིཧཱརེ’’ཏི ཨཝཏྭཱ ‘‘ཨིདྷ ཝསྶཾ ཨུཔེམཱི’’ཏི ཨེཏྟཀམེཝ ཝཏྟབྦཾ. སཏྠེ པན ཝསྶཾ ཨུཔགནྟུཾ ན ཝཊྚཏཱིཏི ཀུཊིཀཱདཱིནཾ ཨབྷཱཝེ ‘‘ཨིདྷ ཝསྶཾ ཨུཔེམཱི’’ཏི ཝཙཱིབྷེདཾ ཀཏྭཱ ཨུཔགནྟུཾ ན ཝཊྚཏི, ཨཱལཡཀརཎམཏྟེནེཝ ཝཊྚཏཱིཏི ཨདྷིཔྤཱཡོ. ཝིཔྤཀིརཏཱིཏི ཝིསུཾ ཝིསུཾ གཙྪཏི. ཏཱིསུ ཋཱནེསུ ནཏྠི ཝསྶཙྪེདེ ཨཱཔཏྟཱིཏི ཏེཧི སདྡྷིཾ གཙྪནྟསྶེཝ ནཏྠི ཨཱཔཏྟི, ཏེཧི ཝིཡུཛྫིཏྭཱ གམནེ པན ཨཱཔཏྟིཡེཝ, པཝཱརེཏུཉྩ ན ལབྷཏི.

ཝསྶཾ ཨནུཔགནྟབྦཊྛཱནཀཐཱཝཎྞནཱ

༢༠༤. སེཡྻཐཱཔི ¶ པིསཱཙིལླིཀཱཏི ཨེཏྠ པིསཱཙཱ ཨེཝ པིསཱཙིལླིཀཱ, པིསཱཙདཱརཀཱཏིཔི ཝདནྟི. པཝིསནདྭཱརཾ ཡོཛེཏྭཱཏི སཀཝཱཊབདྡྷམེཝ ཡོཛེཏྭཱ. པཉྩནྣཾ ཚདནཱནནྟི ཏིཎཔཎྞཨིཊྛཀསིལཱསུདྷཱསངྑཱཏཱནཾ པཉྩནྣཾ ཚདནཱནཾ. ཨིདཉྩ ཡེབྷུཡྻེན ཝུཏྟནྟི ཝེདིཏབྦཾ རུཀྑཱདཱིསུ ¶ པདརཙྪདནཱཡཔི ཀུཊིཀཱཡ ཝསྶཱུཔགམནསྶ ཝུཏྟཏྟཱ. ན, བྷིཀྑཝེ, ཨསེནཱསནིཀེན ཝསྶཾ ཨུཔགནྟབྦནྟི ཝཙཱིབྷེདཾ ཀཏྭཱ ཝསྶཱུཔགམནཾ སནྡྷཱཡེཝ པཊིཀྑེཔོ, ན ཨཱལཡཀརཎཝསེན ཨུཔགམནཾ སནྡྷཱཡཱཏི ཝདནྟི. པཱལི༹ཡཾ པན ཨཝིསེསེན ཝུཏྟཏྟཱ ཨཊྛཀཐཱཡཉྩ དུཏིཡཔཱརཱཛིཀསཾཝཎྞནཱཡཾ (པཱརཱ. ཨཊྛ. ༡.༨༤) ‘‘ཝསྶཾ ཨུཔགཙྪནྟེན ཧི ནཱལཀཔཊིཔདཾ པཊིཔནྣེནཔི པཉྩནྣཾ ཚདནཱནཾ ཨཉྙཏརེན ཚནྣེཡེཝ སདྭཱརབནྡྷེ སེནཱསནེ ཨུཔགནྟབྦཾ. ཏསྨཱ ཝསྶཀཱལེ སཙེ སེནཱསནཾ ལབྷཏི, ཨིཙྩེཏཾ ཀུསལཾ. ནོ ཙེ ལབྷཏི, ཧཏྠཀམྨཾ པརིཡེསིཏྭཱཔི ཀཱཏབྦཾ. ཧཏྠཀམྨཾ ཨལབྷནྟེན སཱམམྤི ཀཱཏབྦཾ, ན ཏྭེཝ ཨསེནཱསནིཀེན ཝསྶཾ ཨུཔགནྟབྦ’’ནྟི དལ༹ྷཾ ཀཏྭཱ ཝུཏྟཏྟཱ ཨསེནཱསནིཀསྶ ནཱཝཱདིཾ ཝིནཱ ཨཉྙཏྠ ཨཱལཡོ ན ཝཊྚཏཱིཏི ཨམྷཱཀཾ ཁནྟི. ནཱཝཱསཏྠཝཛེསུཡེཝ ཧི ‘‘ཨནུཛཱནཱམི, བྷིཀྑཝེ, ནཱཝཱཡ ཝསྶཾ ཨུཔགནྟུ’’ནྟིཨཱདིནཱ སཏི ཨསཏི ཝཱ སེནཱསནེ ཝསྶཱུཔགམནསྶ ཝིསུཾ ཨནུཉྙཱཏཏྟཱ ‘‘ན, བྷིཀྑཝེ, ཨསེནཱསནིཀེན ཝསྶཾ ཨུཔགནྟབྦ’’ནྟི ཨཡཾ པཊིཀྑེཔོ ཏཏྠ ན ལབྦྷཏཱིཏི ཨསཏི སེནཱསནེ ཨཱལཡཝསེནཔི ནཱཝཱདཱིསུ ཨུཔགམནཾ ཝུཏྟཾ. ཊངྐིཏམཉྩོ ནཱམ དཱིགྷེ མཉྩཔཱདེ མཛ྄ཛྷེ ཝིཛ྄ཛྷིཏྭཱ ཨཊནིཡོ པཝེསེཏྭཱ ཀཏོ མཉྩོ. ཏསྶ ཨིདཾ ཨུཔརི ཨིདཾ ཧེཊྛཱཏི ནཏྠི, པརིཝཏྟེཏྭཱ ཨཏྠཏོཔི ཏཱདིསོཝ ཧོཏི, ཏཾ སུསཱནེ དེཝཊྛཱནེ ཙ ཋཔེནྟི, ཙཏུནྣཾ པཱསཱཎཱནཾ ཨུཔརི པཱསཱཎཾ ཨཏྠརིཏྭཱ ཀཏཾ གེཧམྤི ‘‘ཊངྐིཏམཉྩོ’’ཏི ཝུཙྩཏི.

ཝསྶཾ ཨནུཔགནྟབྦཊྛཱནཀཐཱཝཎྞནཱ ནིཊྛིཏཱ.

ཨདྷམྨིཀཀཏིཀཀཐཱཝཎྞནཱ

༢༠༥. ཏསྶཱ ལཀྑཎཾ མཧཱཝིབྷངྒེ ཝུཏྟནྟི ཙཏུཏྠཔཱརཱཛིཀསཾཝཎྞནཱཡཾ ‘‘ཡོ ཨིམམྷཱ ཨཱཝཱསཱ པཋམཾ པཀྐམིསྶཏི, ཏཾ མཡཾ ཨརཧཱཏི ཛཱནིསྶཱམཱ’’ཏི (པཱརཱ. ༢༢༨) ཨེཏྠ དསྶིཏཾ ཨདྷམྨིཀཀཏིཀཝཏྟལཀྑཎཾ སནྡྷཱཡ ཝདཏི, པརཏོཔི སེནཱསནཀྑནྡྷཀཝཎྞནཱཡཾ ཨདྷམྨིཀཾ ཀཏིཀཝཏྟཾ ཨཱཝི བྷཝིསྶཏིཡེཝ.

པཊིསྶཝདུཀྐཊཱཔཏྟིཀཐཱཝཎྞནཱ

༢༠༧. ཡསྨཱ ¶ ¶ ནཱནཱསཱིམཱཡཾ དྭཱིསུ ཨཱཝཱསེསུ ཝསྶཾ ཝསནྟསྶ དུཏིཡེ ‘‘ཝསཱམཱི’’ཏི ཙིཏྟེ ཨུཔྤནྣེ པཋམསེནཱསནགྒཱཧོ པཊིཔྤསྶམྦྷཏི, པུན པཋམེཡེཝ ‘‘ཝསཱམཱི’’ཏི ཙིཏྟེ ཨུཔྤནྣེ དུཏིཡོ པཊིཔྤསྶམྦྷཏི, ཏསྨཱ ‘‘ཏསྶ, བྷིཀྑཝེ, བྷིཀྑུནོ པུརིམིཀཱ ཙ ན པཉྙཱཡཏཱི’’ཏི ཝུཏྟཾ. པཊིསྶཝསྶ ཝིསཾཝཱདནཔཙྩཡཱ ཧོནྟམྤི དུཀྐཊཾ སཏིཡེཝ པཊིསྶཝེ ཧོཏཱིཏི ཨཱཧ ‘‘ཏསྶ ཏསྶ པཊིསྶཝེ དུཀྐཊ’’ནྟི. ཏེནེཝཱཧ ‘‘ཏཉྩ ཁོ…པེ… པཙྪཱ ཝིསཾཝཱདནཔཙྩཡཱ’’ཏི.

ཨཀརཎཱིཡོཏི སཏྟཱཧཀརཎཱིཡེན ཨཀརཎཱིཡོ. སཀརཎཱིཡོཏི སཏྟཱཧཀརཎཱིཡེནེཝ སཀརཎཱིཡོ. ཡདི ཨེཝཾ ‘‘སཏྟཱཧཀརཎཱིཡེན ཨཀརཎཱིཡོ སཀརཎཱིཡོ’’ཏི ཙ ཀསྨཱ ན ཝུཏྟནྟི? ‘‘ཨཀརཎཱིཡོ’’ཏི ཝུཏྟེཔི སཏྟཱཧཀརཎཱིཡེན སཀརཎཱིཡཱཀརཎཱིཡཏཱ ཝིཉྙཱཡཏཱིཏི ཀཏྭཱ ན ཝུཏྟཾ. ཡདི ཨེཝཾ པརཏོ ‘‘སཏྟཱཧཀརཎཱིཡེན པཀྐམཏཱི’’ཏི ཝཱརདྭཡེཔི ‘‘སཀརཎཱིཡོ པཀྐམཏཱི’’ཏི ཨེཏྟཀམེཝ ཀསྨཱ ན ཝུཏྟནྟི? ཝུཙྩཏེ – ཏཏྠ ‘‘སཏྟཱཧཀརཎཱིཡེནཱ’’ཏི ཨཝཏྭཱ ‘‘སཀརཎཱིཡོ པཀྐམཏཱི’’ཏི ཝུཏྟེ སོ ཏཾ སཏྟཱཧཾ བཧིདྡྷཱ ཝཱིཏིནཱམེཏཱིཏི ན སཀྐཱ ཝཏྟུནྟི ‘‘སཏྟཱཧཀརཎཱིཡེན པཀྐམཏཱི’’ཏི ཝུཏྟཾ. ཨེཝཉྷི ཝུཏྟེ སཏྟཱཧསྶ ཨདྷིཀཏཏྟཱ སོ ཏཾ སཏྟཱཧཾ བཧི ཝཱིཏིནཱམེཏཱིཏི སཀྐཱ ཝཏྟུཾ.

ཨེཏྠ ཙ ཨཱདིམྷི ཙཏྟཱརོ ཝཱརཱ ནིརཔེཀྑགམནཾ སནྡྷཱཡ ཝུཏྟཱ, ཏཏྠཱཔི པུརིམཱ དྭེ ཝཱརཱ ཝསྶཾ ཨནུཔགཏསྶ ཝསེན ཝུཏྟཱ, པཙྪིམཱ པན དྭེ ཝཱརཱ ཝསྶཾ ཨུཔགཏསྶ ཝསེན, ཏཏོ པརཾ དྭེ ཝཱརཱ སཱཔེཀྑགམནཾ སནྡྷཱཡ ཝུཏྟཱ, ཏཏྠཱཔི པཋམཝཱརོ སཱཔེཀྑསྶཔི སཏྟཱཧཀརཎཱིཡེན གནྟྭཱ ཏཾ སཏྟཱཧཾ བཧིདྡྷཱ ཝཱིཏིནཱམེནྟསྶ ཝསྶཙྪེདདསྶནཏྠཾ ཝུཏྟོ, ཨིཏརོ ཝུཏྟནཡེནེཝ གནྟྭཱ ཨནྟོསཏྟཱཧེ ནིཝཏྟནྟསྶ ཝསྶཙྪེདཱབྷཱཝདསྶནཏྠཾ. ‘‘སོ སཏྟཱཧཾ ཨནཱགཏཱཡ པཝཱརཎཱཡ སཀརཎཱིཡོ པཀྐམཏཱི’’ཏི ཨཡཾ པན ཝཱརོ ནཝམིཏོ པཊྛཱཡ གནྟྭཱ སཏྟཱཧཾ བཧིདྡྷཱ ཝཱིཏིནཱམེནྟསྶཔི ཝསྶཙྪེདཱབྷཱཝདསྶནཏྠཾ ཝུཏྟོ. ཨེཏྠ ཙ ‘‘ཨཀརཎཱིཡོ པཀྐམཏཱི’’ཏི དུཏིཡཝཱརསྶ ཨནཱགཏཏྟཱ ནཝམིཏོ པཊྛཱཡ གཙྪནྟེནཔི སཏིཡེཝ ཀརཎཱིཡེ གནྟབྦཾ, ནཱསཏཱིཏི དཊྛབྦཾ. ཨིམེ ཙ སཏྟ ཝཱརཱ བཧིདྡྷཱ ཀཏཨུཔོསཐིཀསྶ ཝསེན ཨཱགཏཱ, ཨཔརེ ¶ སཏྟ ཨནྟོཝིཧཱརཾ གནྟྭཱ ཀཏཨུཔོསཐསྶ ཝསེནཱཏི ཨེཝཾ པུརིམིཀཱཡ ཝསེན ཙུདྡས ཝཱརཱ ཝུཏྟཱ, ཏཏོ པརཾ པཙྪིམིཀཱཡ ཝསེན ཏེཡེཝ ཙུདྡས ཝཱརཱ ཝུཏྟཱཏི ཨེཝམེཏེསཾ ནཱནཱཀརཎཾ ཝེདིཏབྦཾ.

ཨིམེཧི ¶ པན སབྦཝཱརེཧི ཝུཏྟམཏྠཾ སམྤིཎྜེཏྭཱ དསྶེཏུཾ ‘‘སོ ཏདཧེཝ ཨཀརཎཱིཡོཏིཨཱདཱིསཱུ’’ཏིཨཱདི ཨཱརདྡྷཾ. ཀོ པན ཝཱདོ དྭཱིཧཏཱིཧཾ ཝསིཏྭཱ ཨནྟོསཏྟཱཧེ ནིཝཏྟནྟསྶཱཏི ཝསྶཾ ཨུཔགནྟྭཱ དྭཱིཧཏཱིཧཾ ཝསིཏྭཱ སཏྟཱཧཀརཎཱིཡེན གནྟྭཱ ཨནྟོསཏྟཱཧེ ནིཝཏྟནྟསྶ ཀོ པན ཝཱདོ, ཀཐཱ ཨེཝ ནཏྠཱིཏི ཨདྷིཔྤཱཡོ. ཨསཏིཡཱ པན ཝསྶཾ ན ཨུཔེཏཱིཏི ‘‘ཨིམསྨིཾ ཝིཧཱརེ ཨིམཾ ཏེམཱསཾ ཝསྶཾ ཨུཔེམཱི’’ཏི ཝཙཱིབྷེདཾ ཀཏྭཱ ན ཨུཔེཏི.

ཀོམུདིཡཱ ཙཱཏུམཱསིནིཡཱཏི པཙྪིམཀཏྟིཀཔུཎྞམཱཡཾ. སཱ ཧི ཀུམུདཱནཾ ཨཏྠིཏཱཡ ཀོམུདཱི, ཙཏུནྣཾ ཝསྶིཀཱནཾ མཱསཱནཾ པརིཡོསཱནཏྟཱ ‘‘ཙཱཏུམཱསིནཱི’’ཏི ཝུཙྩཏི. ཏདཱ ཧི ཀུམུདཱནི སུཔུཔྥིཏཱནི ཧོནྟི, ཏསྨཱ ཀུམུདཱནཾ སམཱུཧོ, ཀུམུདཱནི ཨེཝ ཝཱ ཀོམུདཱ, ཏེ ཨེཏྠ ཨཏྠཱིཏི ‘‘ཀོམུདཱི’’ཏི ཝུཙྩཏི, ཀུམུདཝཏཱིཏི ཝུཏྟཾ ཧོཏི. སེསམེཏྠ ཨུཏྟཱནམེཝ.

པཊིསྶཝདུཀྐཊཱཔཏྟིཀཐཱཝཎྞནཱ ནིཊྛིཏཱ.

ཝསྶཱུཔནཱཡིཀཀྑནྡྷཀཝཎྞནཱ ནིཊྛིཏཱ.

༤. པཝཱརཎཀྑནྡྷཀཾ

ཨཕཱསུཀཝིཧཱརཀཐཱཝཎྞནཱ

༢༠༩. པཝཱརཎཀྑནྡྷཀེ ¶ ¶ ཨཱདིཏོ ལཱཔོ ཨཱལཱཔོ, ཝཙནཔཊིཝཙནཝསེན སམཾ ལཱཔོ སལླཱཔོ. པིཎྜཱཡ པཊིཀྐམེཡྻཱཏི གཱམེ པིཎྜཱཡ ཙརིཏྭཱ པཙྩཱགཙྪེཡྻ. ཨཝཀྐཱརཔཱཏིཾ དྷོཝིཏྭཱ ཨུཔཊྛཱཔེཡྻཱཏི ཨཏིརེཀཔིཎྜཔཱཏཾ ཨཔནེཏྭཱ ཋཔནཏྠཱཡ ཨེཀཾ སམུགྒཔཱཏིཾ དྷོཝིཏྭཱ ཋཔེཡྻ. སམུགྒཔཱཏི ནཱམ སམུགྒཔུཊསདིསཱ པཱཏི. ཨཔྤཧརིཏེཏི ཨཔརཱུལ༹ྷཧརིཏེ, ཡསྨིཾ ཋཱནེ པིཎྜཔཱཏཛ྄ཛྷོཏྠརཎེན ཝིནསྶནདྷམྨཱནི ཏིཎཱནི ནཏྠི, ཏསྨིནྟི ཨཏྠོ. ཏེན ནིཏྟིཎཉྩ མཧཱཏིཎགཧནཉྩ ཡཏྠ སཀཊེནཔི ཚཌྜིཏེ པིཎྜཔཱཏེ ཏིཎཱནི ན ཝིནསྶནྟི, ཏཉྩ ཋཱནཾ པརིགྒཧིཏཾ ཧོཏི. བྷཱུཏགཱམསིཀྑཱཔདསྶ ཧི ཨཝིཀོཔནཏྠམེཏཾ ཝུཏྟཾ. ཨཔྤཱཎཀེཏི ནིཔྤཱཎཀེ, པིཎྜཔཱཏཛ྄ཛྷོཏྠརཎེན མརིཏབྦཔཱཎཀརཧིཏེ ཝཱ མཧཱཨུདཀཀྑནྡྷེ. པརིཏྟོདཀེ ཨེཝ ཧི བྷཏྟཔཀྑེཔེན ཨཱལུལི༹ཏེ སུཁུམཔཱཎཀཱ མརནྟི, ན མཧཱཏལཱ༹ཀཱདཱིསཱུཏི. པཱཎཀཱནུརཀྑཎཏྠཉྷི ཨེཏཾ ཝུཏྟཾ. ཨོཔིལཱཔེཡྻཱཏི ནིམུཛྫཱཔེཡྻ.

ཝཙྩགྷཊནྟི ཨཱཙམནཀུམྦྷཱི. རིཏྟནྟི རིཏྟཀཾ. ཏུཙྪནྟི ཏསྶེཝ ཝེཝཙནཾ. ཨཝིསཡ྄ཧནྟི ཨུཀྑིཔིཏུཾ ཨསཀྐུཎེཡྻཾ ཨཏིབྷཱརིཀཾ. ཧཏྠཝིཀཱརེནཱཏི ཧཏྠསཉྙཱཡ. ཧཏྠེཧི ཨུཀྑིཔནཾ ཧཏྠཝིལངྒྷནཾ. ཏེནཱཧ ‘‘ཧཏྠུཀྑེཔཀེནཱ’’ཏི. ཨཐ ཝཱ ཝིལངྒྷེཏི དེསནྟརཾ པཱཔེཏི ཨེཏེནཱཏི ཝིལངྒྷཀོ, ཧཏྠོ ཨེཝ ཝིལངྒྷཀོ ཧཏྠཝིལངྒྷཀོ, ཏེན ཧཏྠཝིལངྒྷཀེན, ཨཉྙམཉྙཾ སཾསིབྦིཏཧཏྠེནཱཏི ཝུཏྟཾ ཧོཏི. དྭེ ཧི ཛནཱ ཧཏྠེན ཧཏྠཾ སཾསིབྦེཏྭཱ དྭཱིསུ ཧཏྠེསུ ཋཔེཏྭཱ ཨུཊྛཔེནྟཱ ཧཏྠཝིལངྒྷཀེན ཨུཊྛཔེནྟི ནཱམ. ཏིཏྠིཡསམཱདཱནནྟི ཏིཏྠིཡེཧི སམཱདཱཏབྦཾ.

ཨཕཱསུཀཝིཧཱརཀཐཱཝཎྞནཱ ནིཊྛིཏཱ.

པཝཱརཎཱབྷེདཀཐཱཝཎྞནཱ

༢༡༢. དྭེམཱ ¶ ¶ , བྷིཀྑཝེ, པཝཱརཎཱ ཙཱཏུདྡསིཀཱ ཙ པནྣརསིཀཱ ཙཱཏི ཨེཏྠ པུརིམཝསྶཾཝུཏྠཱནཾ པུབྦཀཏྟིཀཔུཎྞམཱ, ཏེསཾཡེཝ སཙེ བྷཎྜནཀཱརཀེཧི ཨུཔདྡུཏཱ པཝཱརཎཾ པཙྩུཀྐཌྜྷནྟི, ཨཐ ཀཏྟིཀམཱསསྶ ཀཱལ༹པཀྑཙཱཏུདྡསོ ཝཱ པཙྪིམཀཏྟིཀཔུཎྞམཱ ཝཱ, པཙྪིམཝསྶཾཝུཏྠཱནཉྩ པཙྪིམཀཏྟིཀཔུཎྞམཱ ཨེཝ ཝཱཏི ཨིམེ ཏཡོ པཝཱརཎདིཝསཱཏི ཝེདིཏབྦཱ. ཨིདཉྩ པཀཏིཙཱརིཏྟཝསེན ཝུཏྟཾ, ཏཐཱརཱུཔཔཙྩཡེ པན སཏི དྭིནྣཾ ཀཏྟིཀཔུཎྞམཱནཾ པུརིམེསུ ཙཱཏུདྡསེསུཔི པཝཱརཎཾ ཀཱཏུཾ ཝཊྚཏི, ཏེནེཝ མཧཱཝིཧཱརེ བྷིཀྑཱུ ཙཱཏུདྡསིཡཱ པཝཱརེཏྭཱ པནྣརསིཡཱ ཀཱཡསཱམགྒིཾ དེནྟི, ཙེཏིཡགིརིམཧདསྶནཏྠམྤི ཨཊྛམིཡཱ གཙྪནྟི, ཏམྤི ཙཱཏུདྡསིཡཾ པཝཱརེཏུཀཱམཱནཉྙེཝ ཧོཏི.

པཝཱརཎཱདཱནཱནུཛཱནནཀཐཱཝཎྞནཱ

༢༡༣. སཙེ པན ཝུཌྜྷཏརོ ཧོཏཱིཏི སཙེ པཝཱརཎདཱཡཀོ བྷིཀྑུ ཝུཌྜྷཏརོ ཧོཏི. ཏེན ཙ བྷིཀྑུནཱཏི པཝཱརཎདཱཡཀེན བྷིཀྑུནཱ.

ཨནཱཔཏྟིཔནྣརསཀཀཐཱཝཎྞནཱ

༢༢༢. པནྣརསཀེསུ པཝཱརིཏམཏྟེཏི པཝཱརིཏསམནནྟརཾ. ཨཝུཊྛིཏཱཡ པརིསཱཡཱཏི པཝཱརེཏྭཱ པཙྪཱ ཨཉྙམཉྙཾ ཀཐེནྟིཡཱ. ཨེཀཙྩཱཡ ཝུཊྛིཏཱཡཱཏི ཨེཀཙྩེསུ ཡཐཱནིསིནྣེསུ ཨེཀཙྩེསུ སཀསཀཊྛཱནཾ གཏེསུ. པུན པཝཱརིཏབྦནྟི པུནཔི སབྦེཧི སམཱགནྟྭཱ པཝཱརེཏབྦཾ. ཨཱགཙྪནྟི སམསམཱ, ཏེསཾ སནྟིཀེ པཝཱརེཏབྦནྟི གཏེ ཨནཱནེཏྭཱ ནིསིནྣཱནཉྙེཝ སནྟིཀེ པཝཱརེཏབྦཾ. སབྦཱཡ ཝུཊྛིཏཱཡ པརིསཱཡ ཨཱགཙྪནྟི སམསམཱ, ཏེསཾ སནྟིཀེ པཝཱརེཏབྦནྟི ཡདི སབྦེ ཝུཊྛཧིཏྭཱ གཏཱ སནྣིཔཱཏེཏུཉྩ ན སཀྐཱ, ཨེཀཙྩེ སནྣིཔཱཏེཏྭཱ པཝཱརེཏུཾ ཝཊྚཏི, ཉཏྟིཾ ཋཔེཏྭཱ ཀཏྟབྦསངྒྷཀམྨཱབྷཱཝཱ ཝགྒཾ ན ཧོཏི. ཨུཔོསཐེཔི ཨེསེཝ ནཡོ.

པཝཱརཎཱཋཔནཀཐཱཝཎྞནཱ

༢༣༧. ‘‘ནཏྠི དིནྣ’’ནྟིཨཱདིནཡཔྤཝཏྟཱ དསཝཏྠུཀཱ མིཙྪཱདིཊྛི. ‘‘ཧོཏི ཏཐཱགཏོ པརཾ མརཎཱ ¶ , ན ཧོཏི ཏཐཱགཏོ པརཾ མརཎཱ’’ཏིཨཱདིནཱ སསྶཏུཙྪེདསངྑཱཏཾ ཨནྟཾ གཎྷཱཏཱིཏི ཨནྟགྒཱཧིཀཱ.

བྷཎྜནཀཱརཀཝཏྠུཀཐཱཝཎྞནཱ

༢༤༠. ཙཏུཏྠེ ¶ ཀཏེ སུཎནྟཱིཏི ཙཏུཏྠེ པནྣརསིཀུཔོསཐེ ཀཏེ ཨམྷཱཀཾ པཝཱརཎཾ ཋཔེསྶནྟཱིཏི སུཎནྟི. ཨེཝམྤི དྭེ ཙཱཏུདྡསིཀཱ ཧོནྟཱིཏི ཏཏིཡེན སདྡྷིཾ དྭེ ཙཱཏུདྡསིཀཱ ཧོནྟི.

པཝཱརཎཱསངྒཧཀཐཱཝཎྞནཱ

༢༤༡. ཨཡཾ པཝཱརཎཱསངྒཧོ ཨེཀསྶ དིནྣོཔི སབྦེསཾ དིནྣོཝ ཧོཏཱིཏི ཨཱཧ ‘‘ཨེཀསྶཔི ཝསེན དཱཏབྦོ’’ཏི. ཨཱགནྟུཀཱ ཏེསཾ སེནཱསནཾ གཧེཏུཾ ན ལབྷནྟཱིཏི སཙེཔི སཊྛིཝསྶབྷིཀྑཱུ ཨཱགཙྪནྟི, ཏེསཾ སེནཱསནཾ གཧེཏུཾ ན ལབྷནྟི. པཝཱརེཏྭཱ པན ཨནྟརཱཔི ཙཱརིཀཾ པཀྐམིཏུཾ ལབྷནྟཱིཏི པཝཱརཎཱསངྒཧེ ཀཏེ ཨནྟརཱ པཀྐམིཏུཀཱམཱ སངྒྷཾ སནྣིཔཱཏཱཔེཏྭཱ པཝཱརེཏུཾ ལབྷནྟི. སེསམེཏྠ པཱལི༹ཏོ ཨཊྛཀཐཱཏོ ཙ སུཝིཉྙེཡྻམེཝ.

པཝཱརཎཀྑནྡྷཀཝཎྞནཱ ནིཊྛིཏཱ.

༥. ཙམྨཀྑནྡྷཀཾ

སོཎཀོལི༹ཝིསཝཏྠུཀཐཱཝཎྞནཱ

༢༤༢. ཙམྨཀྑནྡྷཀེ ¶ ¶ ཨུཎྞཔཱཝཱརཎནྟི ཨུཎྞཱམཡཾ པཱཝཱརཎཾ. ཝིཧཱརཔཙྪཱཡཱཡནྟི ཝིཧཱརཔཙྩནྟེ ཚཱཡཱཡཾ. ཝིཧཱརསྶ ཝཌྜྷམཱནཙྪཱཡཱཡནྟིཔི ཝདནྟི.

སོཎསྶ པབྦཛྫཱཀཐཱཝཎྞནཱ

༢༤༣. སུཏྟཏྠོ པན སུཏྟཝཎྞནཱཏོཡེཝ གཧེཏབྦོཏི ཨེཏྠཱཡཾ སུཏྟཝཎྞནཱ. སཱིཏཝནེཏི (ཨ. ནི. ཨཊྛ. ༣.༦.༥༥) ཨེཝཾནཱམཀེ ཝནེ. ཏསྨིཾ ཀིར པཊིཔཱཊིཡཱ པཉྩ ཙངྐམནསཏཱནི མཱཔིཏཱནི, ཏེསུ ཐེརོ ཨཏྟནོ སཔྤཱཡཾ ཙངྐམནཾ གཧེཏྭཱ སམཎདྷམྨཾ ཀརོཏི. ཏསྶ ཨཱརདྡྷཝཱིརིཡསྶ ཧུཏྭཱ ཙངྐམཏོ པཱདཏལཱནི བྷིཛྫིཾསུ, ཛཱཎཱུཧི ཙངྐམཏོ ཛཱཎུཀཱནིཔི ཧཏྠཏལཱནིཔི བྷིཛྫིཾསུ, ཚིདྡཱནི ཨཧེསུཾ. ཨེཝཾ ཨཱརདྡྷཝཱིརིཡོ ཝིཧརནྟོ ཨོབྷཱསནིམིཏྟམཏྟཀམྤི དསྶེཏུཾ ནཱསཀྑི. ཏསྶ ཝཱིརིཡེན ཀིལམིཏཀཱཡསྶ ཙངྐམནཀོཊིཡཾ པཱསཱཎཕལཀེ ནིསིནྣསྶ ཡོ ཝིཏཀྐོ ཨུདཔཱདི, ཏཾ དསྶེཏུཾ ‘‘ཨཐ ཁོ ཨཱཡསྨཏོ’’ཏིཨཱདི ཝུཏྟཾ. ཏཏྠ ཨཱརདྡྷཝཱིརིཡཱཏི པརིཔུཎྞཔགྒཧིཏཝཱིརིཡཱ. ན ཨནུཔཱདཱཡ ཨཱསཝེཧི ཙིཏྟཾ ཝིམུཙྩཏཱིཏི ‘‘སཙེ ཨཧཾ ཨུགྒྷཊིཏཉྙཱུ ཝཱ ཝིཔཉྩིཏཉྙཱུ ཝཱ ནེཡྻོ ཝཱ, ན མེ ཙིཏྟཾ ན ཝིམུཙྩེཡྻ, ཨདྡྷཱ པན པདཔརམོ, ཡེན མེ ཙིཏྟཾ ན མུཙྩཏཱི’’ཏི སནྣིཊྛཱནཾ ཀཏྭཱ ‘‘སཾཝིཛྫནྟི ཁོ པནཱ’’ཏིཨཱདཱིནི ཙིནྟེསི. ཏཏྠ བྷོགཱཏི ཨུཔཡོགཏྠེ པཙྩཏྟཾ.

པཱཏུརཧོསཱིཏི ཐེརསྶ ཙིཏྟཱཙཱརཾ ཉཏྭཱ ‘‘ཨཡཾ སོཎོ ཨཛྫ སཱིཏཝནེ པདྷཱནབྷཱུམིཡཾ ནིསིནྣོ ཨིམཾ ཝིཏཀྐཾ ཝིཏཀྐེཏི, གནྟྭཱསྶ ཝིཏཀྐཾ སཧོཌྜྷཾ གཎྷིཏྭཱ ཝཱིཎོཔམཀམྨཊྛཱནཾ ཀཐེསྶཱམཱི’’ཏི སཱིཏཝནེ པཱཏུརཧོསི. པཉྙཏྟེ ཨཱསནེཏི པདྷཱནིཀབྷིཀྑཱུ ཨཏྟནོ ཝསནཊྛཱནེ ཨོཝདིཏུཾ ཨཱགཏསྶ བུདྡྷསྶ བྷགཝཏོ ནིསཱིདནཏྠཾ ཡཐཱལཱབྷེན ཨཱསནམྤི པཉྙཔེཏྭཱཝ པདྷཱནཾ ཀརོནྟི ¶ , ཨཉྙཾ ཨལབྷམཱནཱ པུརཱཎཔཎྞཱནི སངྒྷརིཏྭཱ ཨུཔརི སངྒྷཱཊིཾ པཉྙཔེནྟི. ཐེརོཔི ཨཱསནཾ པཉྙཔེཏྭཱཝ པདྷཱནཾ ཨཀཱསི, ཏཾ སནྡྷཱཡ ཝུཏྟཾ ‘‘པཉྙཏྟེ ཨཱསནེ’’ཏི.

ཏཾ ¶ ཀིཾ མཉྙསཱིཏི སཏྠཱ ‘‘ཨིམསྶ བྷིཀྑུནོ ཨཝསེསཀམྨཊྛཱནེན ཨཏྠོ ནཏྠི, ཨཡཾ གནྡྷབྦསིཔྤེ ཚེཀོ ཙིཎྞཝསཱི, ཨཏྟནོ ཝིསཡེ ཀཐིཡམཱནེ ཁིཔྤམེཝ སལླཀྑེསྶཏཱི’’ཏི ཝཱིཎོཔམཾ ཀཐེཏུཾ ‘‘ཏཾ ཀིཾ མཉྙསཱི’’ཏིཨཱདིམཱཧ. ཝཱིཎཱཡ ཏནྟིསྶརེ ཀུསལཏཱ ནཱམ ཝཱིཎཱཡ ཝཱདནཀུསལཏཱ, སོ ཙ ཏཏྠ ཀུསལོ. མཱཏཱཔིཏརོ ཧིསྶ ‘‘ཨམྷཱཀཾ པུཏྟོ ཨཉྙཾ སིཔྤཾ སིཀྑནྟོ ཀཱཡེན ཀིལམིསྶཏི, ཨིདཾ པན ཨཱསནེ ནིསིནྣེནེཝ སཀྐཱ ཨུགྒཎྷིཏུ’’ནྟི གནྡྷབྦསིཔྤམེཝ ཨུགྒཎྷཱཔེསུཾ. ཏསྶ –

‘‘སཏྟ སརཱ ཏཡོ གཱམཱ, མུཙྪནཱ ཨེཀཝཱིསཏི;

ཋཱནཱ ཨེཀཱུནཔཉྙཱས, ཨིཙྩེཏེ སརམཎྜལཱ’’ཏི. –

ཨཱདིཀཾ གནྡྷབྦསིཔྤཾ སབྦམེཝ པགུཎཾ ཨཧོསི. ཨཙྩཱཡཏཱཏི ཨཏིཨཱཡཏཱ ཁརམུཙྪནཱ. སརཝཏཱིཏི སརསམྤནྣཱ. ཀམྨཉྙཱཏི ཀམྨཀྑམཱ ཀམྨཡོགྒཱ. ཨཏིསིཐིལཱཏི མནྡམུཙྪནཱ. སམེ གུཎེ པཏིཊྛིཏཱཏི མཛ྄ཛྷིམེ སརེ ཋཔེཏྭཱ མུཙྪིཏཱ.

ཨཙྩཱརདྡྷནྟི ཨཏིགཱལ༹ྷཾ. ཨུདྡྷཙྩཱཡ སཾཝཏྟཏཱིཏི ཨུདྡྷཏབྷཱཝཱཡ སཾཝཏྟཏི. ཨཏིལཱིནནྟི ཨཏིསིཐིལཾ. ཀོསཛྫཱཡཱཏི ཀུསཱིཏབྷཱཝཏྠཱཡ. ཝཱིརིཡསམཐཾ ཨདྷིཊྛཱཧཱིཏི ཝཱིརིཡསམྤཡུཏྟཾ སམཐཾ ཨདྷིཊྛཱཧི, ཝཱིརིཡཾ སམཐེན ཡོཛེཧཱིཏི ཨཏྠོ. ཨིནྡྲིཡཱནཉྩ སམཏཾ ཨདྷིཊྛཱཧཱིཏི སདྡྷཱདཱིནཾ ཨིནྡྲིཡཱནཾ སམཏཾ སམབྷཱཝཾ ཨདྷིཊྛཱཧི. ཏཏྠ སདྡྷཾ པཉྙཱཡ, པཉྙཉྩ སདྡྷཱཡ, ཝཱིརིཡཾ སམཱདྷིནཱ, སམཱདྷིཉྩ ཝཱིརིཡེན ཡོཛཡཏཱ ཨིནྡྲིཡཱནཾ སམཏཱ ཨདྷིཊྛིཏཱ ནཱམ ཧོཏི. སཏི པན སབྦཏྠིཀཱ, སཱ སདཱཔི བལཝཏཱིཡེཝ ཝཊྚཏི. ཏཉྩ པན ནེསཾ ཡོཛནཱཝིདྷཱནཾ ཝིསུདྡྷིམགྒེ (ཝིསུདྡྷི. ༡.༦༠-༦༢) ཨཱགཏནཡེན ཝེདིཏབྦཾ. ཏཏྠ ཙ ནིམིཏྟཾ གཎྷཱཧཱིཏི ཏསྨིཉྩ སམབྷཱཝེ སཏི ཡེན ཨཱདཱསེ མུཁབིམྦེནེཝ ནིམིཏྟེན ཨུཔྤཛྫིཏབྦཾ, ཏཾ སམཐནིམིཏྟཾ ཝིཔསྶནཱནིམིཏྟཾ མགྒནིམིཏྟཾ ཕལནིམིཏྟཉྩ གཎྷ ནིབྦཏྟེཧཱིཏི ཨེཝམསྶ སཏྠཱ ཨརཧཏྟེ པཀྑིཔིཏྭཱ ཀམྨཊྛཱནཾ ཀཐེསི.

ཏཏྠ ཙ ནིམིཏྟཾ ཨགྒཧེསཱིཏི སམཐནིམིཏྟཉྩ ཝིཔསྶནཱནིམིཏྟཉྩ ཨགྒཧེསི. ཨེཀོཏི ཨསཧཱཡོ. ཝཱུཔཀཊྛོཏི ཝཏྠུཀཱམེཧི ཙ ཀིལེསཀཱམེཧི ཙ ཀཱཡེན ཙེཝ ཙིཏྟེན ཙ ཝཱུཔཀཊྛོ. ཨཔྤམཏྟོཏི ¶ ཀམྨཊྛཱནེ སཏིཾ ¶ ཨཝིཛཧནྟོ. ཨཱཏཱཔཱིཏི ཀཱཡིཀཙེཏསིཀཝཱིརིཡཱཏཱཔེན ཨཱཏཱཔོ. ཨཱཏཔྤཏི ཀིལེསེཧཱིཏི ཨཱཏཱཔོ, ཝཱིརིཡཾ. པཧིཏཏྟོཏི ཀཱཡེ ཙ ཛཱིཝིཏེ ཙ ཨནཔེཀྑཏཱཡ པེསིཏཏྟོ ཝིསྶཊྛཨཏྟབྷཱཝོ, ནིབྦཱནེ ཝཱ པེསིཏཙིཏྟོ. ན ཙིརསྶེཝཱཏི ཀམྨཊྛཱནཱརམྦྷཏོ ན ཙིརེནེཝ. ཨཉྙཏརོཏི ཨེཀོ. ཨརཧཏནྟི བྷགཝཏོ སཱཝཀཱནཾ ཨརཧནྟཱནཾ ཨབྦྷནྟརོ ཨེཀོ མཧཱསཱཝཀོ ཨཧོསཱིཏི ཨཏྠོ.

༢༤༤. ཝུསིཏཝཱཏི ཝུཏྠབྲཧྨཙརིཡཝཱསོ. ཀཏཀརཎཱིཡོཏི ཙཏཱུཧི མགྒེཧི ཀཏྟབྦཾ ཀཏྭཱ ཋིཏོ. ཨོཧིཏབྷཱརོཏི ཁནྡྷབྷཱརཾ ཀིལེསབྷཱརཾ ཨབྷིསངྑཱརབྷཱརཉྩ ཨོཏཱརེཏྭཱ ཋིཏོ. ཨནུཔྤཏྟསདཏྠོཏི སདཏྠོ ཝུཙྩཏི ཨརཧཏྟཾ, ཏཾ པཏྟོཏི ཨཏྠོ. པརིཀྑཱིཎབྷཝསཾཡོཛནོཏི ཁཱིཎབྷཝབནྡྷནོ. སམྨདཉྙཱ ཝིམུཏྟོཏི སམྨཱ ཧེཏུནཱ ཀཱརཎེན ཛཱནིཏྭཱ ཝིམུཏྟོ. ཚ ཋཱནཱནཱིཏི ཚ ཀཱརཎཱནི. ཨདྷིམུཏྟོ ཧོཏཱིཏི པཊིཝིཛ྄ཛྷིཏྭཱ པཙྩཀྑཾ ཀཏྭཱ ཋིཏོ ཧོཏི. ནེཀྑམྨཱདྷིམུཏྟོཏིཨཱདི སབྦཾ ཨརཧཏྟཝསེན ཝུཏྟཾ. ཨརཧཏྟཉྷི སབྦཀིལེསེཧི ནིཀྑནྟཏྟཱ ནེཀྑམྨཾ, ཏེཧེཝ པཝིཝིཏྟཏྟཱ པཝིཝེཀོ, བྱཱཔཛྫཱབྷཱཝཏོ ཨབྱཱཔཛྫཾ, ཨུཔཱདཱནསྶ ཁཡནྟེ ཨུཔྤནྣཏྟཱ ཨུཔཱདཱནཀྑཡོ, ཏཎྷཱཡ ཁཡནྟེ ཨུཔྤནྣཏྟཱ ཏཎྷཀྑཡོ, སམྨོཧཱབྷཱཝཏོ ཨསམྨོཧོཏི ཙ ཝུཙྩཏི.

ཀེཝལཾ སདྡྷཱམཏྟཀནྟི པཊིཝེདྷརཧིཏཾ ཀེཝལཾ པཊིཝེདྷཔཉྙཱཡ ཨསམྨིསྶཾ སདྡྷཱམཏྟཀཾ. པཊིཙཡནྟི པུནཔྤུནཾ ཀརཎེན ཝཌྜྷིཾ. ཝཱིཏརཱགཏྟཱཏི མགྒཔཊིཝེདྷེན རཱགསྶ ཝིཧཏཏྟཱཡེཝ ནེཀྑམྨསངྑཱཏཾ ཨརཧཏྟཾ པཊིཝིཛ྄ཛྷིཏྭཱ སཙྪིཀཏྭཱ ཋིཏོ ཧོཏི, ཕལསམཱཔཏྟིཝིཧཱརེན ཝིཧརཏི, ཏནྣིནྣམཱནསོཡེཝ ཧོཏཱིཏི ཨཏྠོ. སེསཔདེསུཔི ཨེསེཝ ནཡོ.

ལཱབྷསཀྐཱརསིལོཀནྟི ཙཏུཔཙྩཡལཱབྷཉྩ ཏེསཾཡེཝ སུཀཏབྷཱཝཉྩ ཝཎྞབྷཎནཉྩ. ནིཀཱམཡམཱནོཏི ཨིཙྪམཱནོ པཏྠཡམཱནོ. པཝིཝེཀཱདྷིམུཏྟོཏི ‘‘པཝིཝེཀེ ཨདྷིམུཏྟོ ཨཧ’’ནྟི ཨེཝཾ ཨརཧཏྟཾ བྱཱཀརོཏཱིཏི ཨཏྠོ.

སཱིལབྦཏཔརཱམཱསནྟི སཱིལཉྩ ཝཏཉྩ པརཱམསིཏྭཱ གཧིཏགྒཧཎམཏྟཾ. སཱརཏོ པཙྩཱགཙྪནྟོཏི སཱརབྷཱཝེན ཛཱནནྟོ. ཨབྱཱཔཛྫཱདྷིམུཏྟོཏི ¶ ཨབྱཱཔཛྫཾ ཨརཧཏྟཾ བྱཱཀརོཏི. ཨིམིནཱཝ ནཡེན སབྦཝཱརེསུ ཨཏྠོ དཊྛབྦོ. ཨཔིཙེཏྠ ‘‘ནེཀྑམྨཱདྷིམུཏྟོཏི ཨིམསྨིཾཡེཝ ཨརཧཏྟཾ ཀཐིཏཾ, སེསེསུ པཉྩསུ ནིབྦཱན’’ནྟི ཨེཀེ ཝདནྟི. ཨཔརེ ‘‘ཨསམྨོཧཱདྷིམུཏྟོཏི ¶ ཨེཏྠེཝ ནིབྦཱནཾ ཀཐིཏཾ, སེསེསུ ཨརཧཏྟ’’ནྟི ཝདནྟི. ཨཡཾ པནེཏྠ སཱརོ – ‘‘སབྦེསྭེཝེཏེསུ ཨརཧཏྟམྤི ནིབྦཱནམྤི ཀཐིཏམེཝཱཏི.

བྷུསཱཏི བལཝནྟོ དིབྦརཱུཔསདིསཱ. ནེཝསྶ ཙིཏྟཾ པརིཡཱདིཡནྟཱིཏི ཨེཏསྶ ཁཱིཎཱསཝསྶ ཙིཏྟཾ གཧེཏྭཱ ཋཱཏུཾ ན སཀྐོནྟི. ཀིལེསཱ ཧི ཨུཔྤཛྫམཱནཱ ཙིཏྟཾ གཎྷནྟི ནཱམ. ཨམིསྶཱིཀཏནྟི ཨམིསྶཀཏཾ. ཀིལེསཱ ཧི ཨཱརམྨཎེན སདྡྷིཾ ཙིཏྟཾ མིསྶཾ ཀརོནྟི, ཏེསཾ ཨབྷཱཝཱ ཨམིསྶཱིཀཏཾ. ཋིཏནྟི པཏིཊྛིཏཾ. ཨཱནེཉྫཔྤཏྟནྟི ཨཙལནཔྤཏྟཾ. ཝཡཉྩསྶཱནུཔསྶཏཱིཏི ཏསྶ ཙེས ཙིཏྟསྶ ཨུཔྤཱདམྤི ཝཡམྤི པསྶཏི. བྷུསཱ ཝཱཏཝུཊྛཱིཏི བལཝཱ ཝཱཏཀྑནྡྷོ. ནེཝ ནཾ སངྐམྤེཡྻཱཏི ཨེཀབྷཱགེན ཙཱལེཏུཾ ན སཀྐུཎེཡྻ. ན སམྤཀམྤེཡྻཱཏི ཐཱུཎཾ ཝིཡ སབྦབྷཱགཏོ ཀམྤེཏུཾ ན སཀྐུཎེཡྻ. ན སམྤཝེདྷེཡྻཱཏི ཝེདྷེཏྭཱ པཝེདྷེཏྭཱ པཱཏེཏུཾ ན སཀྐུཎེཡྻ.

ནེཀྑམྨཾ ཨདྷིམུཏྟསྶཱཏི ཨརཧཏྟཾ པཊིཝིཛ྄ཛྷིཏྭཱ ཋིཏསྶ. སེསཔདེསུཔི ཨརཧཏྟམེཝ ཀཐིཏཾ. ཨུཔཱདཱནཀྑཡསྶ ཙཱཏི ཨུཔཡོགཏྠེ སཱམིཝཙནཾ. ཨསམྨོཧཉྩ ཙེཏསོཏི ཙིཏྟསྶ ཙ ཨསམྨོཧཾ ཨདྷིམུཏྟསྶ. དིསྭཱ ཨཱཡཏནུཔྤཱདནྟི ཨཱཡཏནཱནཾ ཨུཔྤཱདཉྩ ཝཡཉྩ དིསྭཱ. སམྨཱ ཙིཏྟཾ ཝིམུཙྩཏཱིཏི སམྨཱ ཧེཏུནཱ ནཡེན ཨིམཱཡ ཝིཔསྶནཱཡ པཊིཔཏྟིཡཱ ཕལསམཱཔཏྟིཝསེན ཙིཏྟཾ ཝིམུཙྩཏི, ནིབྦཱནཱརམྨཎེ ཨདྷིམུཙྩཏི. ཨཐ ཝཱ ཨིམིནཱ ཁཱིཎཱསཝསྶ པུབྦབྷཱགཔཊིཔདཱ ཀཐིཏཱ. ཏསྶ ཧི ཨཱཡཏནུཔྤཱདཾ དིསྭཱ ཨིམཱཡ ཝིཔསྶནཱཡ ཨདྷིགཏསྶ ཨརིཡམགྒསྶ ཨཱནུབྷཱཝེན སབྦཀིལེསེཧི སམྨཱ ཙིཏྟཾ ཝིམུཙྩཏི. ཨེཝཾ ཏསྶ སམྨཱ ཝིམུཏྟསྶ…པེ… ན ཝིཛྫཏི. ཏཏྠ སནྟཙིཏྟསྶཱཏི ནིབྦུཏཙིཏྟསྶ. སེསམེཏྠ ཨུཏྟཱནཏྠམེཝ.

སོཎསྶ པབྦཛྫཱཀཐཱཝཎྞནཱ ནིཊྛིཏཱ.

སབྦནཱིལིཀཱདིཔཊིཀྑེཔཀཐཱཝཎྞནཱ

༢༤༦. ཨདྡཱརིཊྛཀཝཎྞཱཏི ¶ ཨབྷིནཝཱརིཊྛཕལཝཎྞཱ. ཨུདཀེན ཏིནྟཀཱཀཔཏྟཝཎྞཱཏིཔི ཝདནྟི.

ཨཛ྄ཛྷཱརཱམེ ཨུཔཱཧནཔཊིཀྑེཔཀཐཱཝཎྞནཱ

༢༤༨. ཨབྷིཛཱིཝནྟི ¶ ཨེཏེནཱཏི ཨབྷིཛཱིཝནིཀཾ. ཀིནྟཾ? སིཔྤཾ. ཏེནཱཧ ‘‘ཡེན སིཔྤེནཱ’’ཏིཨཱདི.

ཀཊྛཔཱདུཀཱདིཔཊིཀྑེཔཀཐཱཝཎྞནཱ

༢༥༡. ཨུཎྞཱཧི ཀཏཔཱདུཀཱཏི ཨུཎྞཱལོམམཡཀམྦལེཧི, ཨུཎྞཱལོམེཧི ཨེཝ ཝཱ ཀཏཔཱདུཀཱ. ན, བྷིཀྑཝེ, གཱཝཱིནཾ ཝིསཱཎེསུ གཧེཏབྦནྟིཨཱདཱིསུ ‘‘མོཀྑཱདྷིཔྤཱཡེན ཝིསཱཎཱདཱིསུ གཧེཏུཾ ཝཊྚཏཱི’’ཏི གཎྛིཔདེསུ ཝུཏྟཾ.

ཡཱནཱདིཔཊིཀྑེཔཀཐཱཝཎྞནཱ

༢༥༣. ཨནུཛཱནཱམི, བྷིཀྑཝེ, པུརིསཡུཏྟཾ ཧཏྠཝཊྚཀནྟི ཨེཏྠ ‘‘ཨནུཛཱནཱམི, བྷིཀྑཝེ, པུརིསཡུཏྟཾ, ཨནུཛཱནཱམི, བྷིཀྑཝེ, ཧཏྠཝཊྚཀ’’ནྟི ཨེཝཾ པཙྩེཀཝཱཀྱཔརིསམཱཔནཾ ཨདྷིཔྤེཏནྟི ཨཱཧ ‘‘པུརིསཡུཏྟཾ ཨིཏྠིསཱརཐི ཝཱ…པེ… པུརིསཱ ཝཱ, ཝཊྚཏིཡེཝཱ’’ཏི. པཱིཋཀསིཝིཀནྟི པཱིཋཀཡཱནཾ. པཱཊངྐིནྟི ཨནྡོལིཀཱཡེཏཾ ཨདྷིཝཙནཾ.

ཨུཙྩཱསཡནམཧཱསཡནཔཊིཀྑེཔཀཐཱཝཎྞནཱ

༢༥༤. ཝཱལ༹རཱུཔཱནཱིཏི ཨཱཧརིམཱནི ཝཱལ༹རཱུཔཱནི. ‘‘ཨཀཔྤིཡརཱུཔཱཀུལོ ཨཀཔྤིཡམཉྩོ པལླངྐོ’’ཏི སཱརསམཱསེ ཝུཏྟཾ. ‘‘དཱིགྷལོམཀོ མཧཱཀོཛཝོཏི ཙཏུརངྒུལཱདྷིཀལོམོ ཀཱལ༹ཀོཛཝོ. ‘‘ཙཏུརངྒུལཱདྷིཀཱནི ཀིར ཏསྶ ལོམཱནཱི’’ཏི ཝཙནཏོ ཙཏུརངྒུལཏོ ཧེཊྛཱ ཝཊྚཏཱིཏི ཝདནྟི. ཝཱནཙིཏྲོ ཨུཎྞཱམཡཏྠརཎོཏི བྷིཏྟིཙྪེདཱདིཝསེན ཝིཙིཏྲོ ཨུཎྞཱམཡཏྠརཎོ. གྷནཔུཔྥཀོ ཨུཎྞཱམཡཏྠརཎོཏི ཨུཎྞཱམཡལོཧིཏཏྠརཎོ. པཀཏིཏཱུལིཀཱཏི རུཀྑཏཱུལལཏཱཏཱུལཔོཊཀཱིཏཱུལསངྑཱཏཱནཾ ཏིཎྞཾ ཏཱུལཱནཾ ཨཉྙཏརཔུཎྞཱ ཏཱུལིཀཱ. ‘‘ཨུདྡལོམཱིཏི ¶ ཨུབྷཏོདསཾ ཨུཎྞཱམཡཏྠརཎཾ. ཨེཀནྟལོམཱིཏི ཨེཀཏོདསཾ ཨུཎྞཱམཡཏྠརཎ’’ནྟི དཱིགྷནིཀཱཡཊྛཀཐཱཡཾ (དཱི. ནི. ཨཊྛ. ༡.༡༥) ཝུཏྟཾ, སཱརསམཱསེ པན ‘‘ཨུདྡལོམཱིཏི ཨེཀཏོ ཨུགྒཏཔུཔྥཾ. ཨེཀནྟལོམཱིཏི ཨུབྷཏོ ཨུགྒཏཔུཔྥ’’ནྟི ཝུཏྟཾ. ‘‘ཀོསེཡྻཀཊྚིསྶམཡནྟི ཀོསེཡྻཀསཊམཡ’’ནྟི ཨཱཙརིཡདྷམྨཔཱལཏྠེརེན ཝུཏྟཾ. སུདྡྷཀོསེཡྻནྟི རཏནཔརིསིབྦནརཧིཏཾ. དཱིགྷནིཀཱཡཊྛཀཐཱཡཾ པནེཏྠ ‘‘ཋཔེཏྭཱ ¶ ཏཱུལིཀཾ སབྦཱནེཝ གོནཀཱདཱིནི རཏནཔརིསིབྦིཏཱནི ཝཊྚནྟཱི’’ཏི ཝུཏྟཾ. ཏཏྠ ‘‘ཋཔེཏྭཱ ཏཱུལིཀ’’ནྟི ཨེཏེན རཏནཔརིསིབྦནརཧིཏཱཔི ཏཱུལིཀཱ ན ཝཊྚཏཱིཏི དཱིཔེཏི. ‘‘རཏནཔརིསིབྦིཏཱནི ཝཊྚནྟཱི’’ཏི ཨིམིནཱ པན ཡཱནི རཏནཔརིསིབྦིཏཱནི, ཏཱནི བྷཱུམཏྠརཎཝསེན ཡཐཱནུརཱུཔཾ མཉྩཱདཱིསུ ཙ ཨུཔནེཏུཾ ཝཊྚཏཱིཏི དཱིཔིཏནྟི ཝེདིཏབྦཾ. ཨེཏྠ ཙ ཝིནཡཔརིཡཱཡཾ པཏྭཱ གརུཀེ ཋཱཏབྦཏྟཱ ཨིདྷ ཝུཏྟནཡེནེཝེཏྠ ཝིནིཙྪཡོ ཝེདིཏབྦོ. སུཏྟནྟིཀདེསནཱཡཾ པན གཧཊྛཱནམྤི ཝསེན ཝུཏྟཏྟཱ ཏེསཾ སངྒཎྷནཏྠཾ ‘‘ཋཔེཏྭཱ ཏཱུལིཀཾ…པེ… ཝཊྚནྟཱི’’ཏི ཝུཏྟནྟི ཨཔརེ.

ཨཛིནཙམྨེཧཱིཏི ཨཛིནམིགཙམྨེཧི. ཏཱནི ཀིར ཙམྨཱནི སུཁུམཏརཱནི, ཏསྨཱ དུཔཊྚཏིཔཊྚཱནི ཀཏྭཱ སིབྦནྟི. ཏེན ཝུཏྟཾ ‘‘ཨཛིནཔཝེཎཱི’’ཏི. ཨུཏྟརཾ ཨུཔརིབྷཱགཾ ཚཱདེཏཱིཏི ཨུཏྟརཙྪདོ, ཝིཏཱནཾ, ཏཉྩ ལོཧིཏཝིཏཱནཾ ཨིདྷཱདྷིཔྤེཏནྟི ཨཱཧ ‘‘ཨུཔརིབདྡྷེན རཏྟཝིཏཱནེནཱ’’ཏི. ‘‘རཏྟཝིཏཱནེསུ ཙ ཀཱསཱཝཾ ཝཊྚཏི, ཀུསུམྦྷཱདིརཏྟམེཝ ན ཝཊྚཏཱི’’ཏི གཎྛིཔདེསུ ཝུཏྟཾ. མཧཱཨུཔདྷཱནནྟི པམཱཎཱཏིཀྐནྟཾ ཨུཔདྷཱནཾ. ཨེཏྠ ཙ ཀིཉྩཱཔི དཱིགྷནིཀཱཡཊྛཀཐཱཡཾ (དཱི. ནི ཨཊྛ. ༡.༡༥) ‘‘ཨལོཧིཏཀཱནི དྭེཔི ཝཊྚནྟིཡེཝ, ཏཏོ ཨུཏྟརི ལབྷིཏྭཱ ཨཉྙེསཾ དཱཏབྦཱནི, དཱཏུཾ ཨསཀྐོནྟོ མཉྩེ ཏིརིཡཾ ཨཏྠརིཏྭཱ ཨུཔརི པཙྩཏྠརཎཾ དཏྭཱ ནིཔཛྫིཏུམྤི ལབྷཏཱི’’ཏི ཨཝིསེསེན ཝུཏྟཾ, སེནཱསནཀྑནྡྷཀཝཎྞནཱཡཾ (ཙཱུལ༹ཝ. ཨཊྛ. ༢༩༧) པན ‘‘ཨགིལཱནསྶ སཱིསུཔདྷཱནཉྩ པཱདུཔདྷཱནཉྩཱཏི དྭཡམེཝ ཝཊྚཏི, གིལཱནསྶ བིམྦོཧནཱནི སནྠརིཏྭཱ ཨུཔརི པཙྩཏྠརཎཾ དཏྭཱ ནིཔཛྫིཏུམྤི ཝཊྚཏཱི’’ཏི ཝུཏྟཏྟཱ གིལཱནོཡེཝ མཉྩེ ཏིརིཡཾ ཨཏྠརིཏྭཱ ནིཔཛྫིཏུཾ ལབྷཏཱིཏི ཝེདིཏབྦཾ.

ཨུཙྩཱསཡནམཧཱསཡནཔཊིཀྑེཔཀཐཱཝཎྞནཱ ནིཊྛིཏཱ.

གིཧིཝིཀཏཱནུཉྙཱཏཱདིཀཐཱཝཎྞནཱ

༢༥༦. ཨབྷིནིསྶཱཡ ¶ ནིསཱིདིཏུནྟི ཨཔསྶཱཡ ནིསཱིདིཏུཾ.

སོཎཀུཊིཀཎྞཝཏྠུཀཐཱཝཎྞནཱ

༢༥༧. པཔཏཀེ པབྦཏེཏི ཨེཏྠ ‘‘པཝཏྟེ པབྦཏེ’’ཏིཔི པཋནྟི, པཝཏྟནཱམཀེ པབྦཏེཏི ཨཏྠོ. སོཎོ ཨུཔཱསཀོཏིཨཱདཱིསུ (ཨུདཱ. ཨཊྛ. ༤༦) ནཱམེན སོཎོ ནཱམ, ཏཱིཧི སརཎགམནེཧི ¶ ཨུཔཱསཀཏྟཔཊིཝེདནེན ཨུཔཱསཀོ, ཀོཊིཨགྒྷནཀསྶ ཀཎྞཔིལ༹ནྡྷནསྶ དྷཱརཎེན ‘‘ཀོཊིཀཎྞོ’’ཏི ཙ ཝཏྟབྦེ ‘‘ཀུཊིཀཎྞོ’’ཏི ཨེཝཾ ཨབྷིཉྙཱཏོ, ན སུཀུམཱརསོཎོཏི ཨདྷིཔྤཱཡོ. ཨཡཉྷི ཨཱཡསྨཏོ མཧཱཀཙྩཱནསྶ སནྟིཀེ དྷམྨཾ སུཏྭཱ སཱསནེ ཨབྷིཔྤསནྣོ སརཎེསུ ཙ སཱིལེསུ ཙ པཏིཊྛིཏོ པཔཏཀེ པབྦཏེ ཚཱཡཱུདཀསམྤནྣེ ཋཱནེ ཝིཧཱརཾ ཀཱརེཏྭཱ ཐེརཾ ཏཏྠ ཝསཱཔེཏྭཱ ཙཏཱུཧི པཙྩཡེཧི ཨུཔཊྛཱཏི. ཏེན ཝུཏྟཾ ‘‘ཨཱཡསྨཏོ མཧཱཀཙྩཱནསྶ ཨུཔཊྛཱཀོ ཧོཏཱི’’ཏི.

སོ ཀཱལེན ཀཱལཾ ཐེརསྶ ཨུཔཊྛཱནཾ གཙྪཏི, ཐེརོ ཙསྶ དྷམྨཾ དེསེཏི, ཏེན སཾཝེགབཧུལོ དྷམྨཙརིཡཱཡཾ ཨུསྶཱཧཛཱཏོ ཝིཧརཏི. སོ ཨེཀདཱ སཏྠེན སདྡྷིཾ ཝཱཎིཛྫཏྠཱཡ ཨུཛྫེནིཾ གཙྪནྟོ ཨནྟརཱམགྒེ ཨཊཝིཡཾ སཏྠེ ནིཝིཊྛེ རཏྟིཡཾ ཛནསམྦཱདྷབྷཡེན ཨེཀམནྟཾ ཨཔཀྐམྨ ནིདྡཾ ཨུཔགཉྪི. སཏྠོ པཙྩཱུསཝེལཱཡཾ ཨུཊྛཱཡ གཏོ, ན ཨེཀོཔི སོཎཾ པབོདྷེསི, སབྦེ ཝིསྶརིཏྭཱ ཨགམིཾསུ. སོ པབྷཱཏཱཡ རཏྟིཡཱ པབུཛ྄ཛྷིཏྭཱ ཨུཊྛཱཡ ཀཉྩི ཨཔསྶནྟོ སཏྠེན གཏམགྒཾ གཧེཏྭཱ སཱིགྷཾ སཱིགྷཾ གཙྪནྟོ ཨེཀཾ ཝཊརུཀྑཾ ཨུཔགཉྪི. ཏཏྠ ཨདྡས ཨེཀཾ མཧཱཀཱཡཾ ཝིརཱུཔདསྶནཾ བཱིབྷཙྪཾ པུརིསཾ ཨཊྛིཏོ མུཏྟཱནི ཨཏྟནོ མཾསཱནི སཡམེཝ ཁཱདནྟཾ, དིསྭཱན ‘‘ཀོསི ཏྭ’’ནྟི པུཙྪི. པེཏོསྨི, བྷནྟེཏི. ཀསྨཱ ཨེཝཾ ཀརོསཱིཏི? ཨཏྟནོ པུབྦཀམྨེནཱཏི. ཀིཾ པན ཏཾ ཀམྨནྟི? ཨཧཾ པུབྦེ བྷཱརུཀཙྪནགརཝཱསཱི ཀཱུཊཝཱཎིཛོ ཧུཏྭཱ པརེསཾ སནྟཀཾ ཝཉྩེཏྭཱ ཁཱདིཾ, སམཎེ ཙ བྷིཀྑཱཡ ཨུཔགཏེ ‘‘ཏུམྷཱཀཾ མཾསཾ ཁཱདཐཱ’’ཏི ཨཀྐོསིཾ, ཏེན ཀམྨེན ཨེཏརཧི ཨིམཾ དུཀྑཾ ཨནུབྷཝཱམཱིཏི. ཏཾ སུཏྭཱ སོཎོ ཨཏིཝིཡ སཾཝེགཾ པཊིལབྷི.

ཏཏོ ¶ པརཾ གཙྪནྟོ མུཁཏོ པགྒྷརིཏཀཱལ༹ལོཧིཏེ དྭེ པེཏདཱརཀེ པསྶིཏྭཱ ཏཐེཝ པུཙྪི, ཏེཔིསྶ ཨཏྟནོ ཀམྨཾ ཀཐེསུཾ. ཏེ ཀིར བྷཱརུཀཙྪནགརེ དཱརཀཀཱལེ གནྡྷཝཱཎིཛྫཱཡ ཛཱིཝིཀཾ ཀཔྤེནྟཱ ཨཏྟནོ མཱཏརི ཁཱིཎཱསཝེ ནིམནྟེཏྭཱ བྷོཛེནྟིཡཱ གེཧཾ གནྟྭཱ ‘‘ཨམྷཱཀཾ སནྟཀཾ ཀསྨཱ སམཎཱནཾ དེསི, ཏཡཱ དིནྣཾ བྷོཛནཾ བྷུཉྫནཀསམཎཱནཾ མུཁཏོ ཀཱལ༹ལོཧིཏཾ པགྒྷརཏཱུ’’ཏི ཨཀྐོསིཾསུ. ཏེ ཏེན ཀམྨེན ནིརཡེ པཙྩིཏྭཱ ཏསྶ ཝིཔཱཀཱཝསེསེན པེཏཡོནིཡཾ ནིབྦཏྟིཏྭཱ ཏདཱ ཨིམཾ དུཀྑཾ ཨནུབྷཝནྟི. ཏམྤི སུཏྭཱ སོཎོ ཨཏིཝིཡ སཾཝེགཛཱཏོ ཨཧོསི.

སོ ཨུཛྫེནིཾ གནྟྭཱ ཏཾ ཀརཎཱིཡཾ ཏཱིརེཏྭཱ ཀུརརགྷརཾ པཙྩཱགཏོ ཐེརཾ ཨུཔསངྐམིཏྭཱ ཀཏཔཊིསནྠཱརོ ཏམཏྠཾ ཨཱརོཙེསི. ཐེརོཔིསྶ པཝཏྟིནིཝཏྟཱིསུ ཨཱདཱིནཝཱནིསཾསེ ཝིབྷཱཝེནྟོ དྷམྨཾ ¶ དེསེསི. སོ ཐེརཾ ཝནྡིཏྭཱ གེཧཾ གཏོ སཱཡམཱསཾ བྷུཉྫིཏྭཱ སཡནཾ ཨུཔགཏོ ཐོཀཾཡེཝ ནིདྡཱཡིཏྭཱ པབུཛ྄ཛྷིཏྭཱ སཡནཏལེ ནིསཛྫ ཡཐཱསུཏཾ དྷམྨཾ པཙྩཝེཀྑིཏུཾ ཨཱརདྡྷོ. ཏསྶ ཏཾ དྷམྨཾ པཙྩཝེཀྑཏོ ཏེ ཙ པེཏཏྟབྷཱཝེ ཨནུསྶརཏོ སཾསཱརདུཀྑཾ ཨཏིཝིཡ བྷཡཱནཀཾ ཧུཏྭཱ ཨུཔཊྛཱསི, པབྦཛྫཱཡ ཙིཏྟཾ ནམི. སོ ཝིབྷཱཏཱཡ རཏྟིཡཱ སརཱིརཔཊིཛགྒནཾ ཀཏྭཱ ཐེརཾ ཨུཔགནྟྭཱ ཨཏྟནོ ཨཛ྄ཛྷཱསཡཾ ཨཱརོཙེཏྭཱ པབྦཛྫཾ ཡཱཙི. ཏེན ཝུཏྟཾ ‘‘ཨཐ ཁོ སོཎོ ཨུཔཱསཀོ…པེ… པབྦཱཛེཏུ མཾ, བྷནྟེ, ཨཡྻོ མཧཱཀཙྩཱནོ’’ཏི.

ཏཏྠ ཡཐཱ ཡཐཱཏིཨཱདིཔདཱནཾ ཨཡཾ སངྑེཔཏྠོ – ཡེན ཡེན ཨཱཀཱརེན ཨཡྻོ མཧཱཀཙྩཱནོ དྷམྨཾ དེསེཏི ཨཱཙིཀྑཏི པཉྙཔེཏི པཊྛཔེཏི ཝིཝརཏི ཝིབྷཛཏི ཨུཏྟཱནིཾ ཀརོཏི པཀཱསེཏི, ཏེན ཏེན མེ ཨུཔཔརིཀྑཏོ ཨེཝཾ ཧོཏི ‘‘ཡདེཏཾ སིཀྑཏྟཡབྲཧྨཙརིཡཾ ཨེཀམྤི དིཝསཾ ཨཁཎྜཾ ཀཏྭཱ ཙརིམཀཙིཏྟཾ པཱཔེཏབྦཏཱཡ ཨེཀནྟཔརིཔུཎྞཾ, ཨེཀདིཝསམྤི ཀིལེསམལེན ཨམལཱིནཾ ཀཏྭཱ ཙརིམཀཙིཏྟཾ པཱཔེཏབྦཏཱཡ ཨེཀནྟཔརིསུདྡྷཾ, སངྑལིཁིཏཾ ལིཁིཏསངྑསདིསཾ དྷོཏསངྑསཔྤཊིབྷཱགཾ ཙརིཏབྦཾ, ཨིདཾ ན སུཀརཾ ཨགཱརཾ ཨཛ྄ཛྷཱཝསཏཱ ཨགཱརམཛ྄ཛྷེ ཝསནྟེན ཨེཀནྟཔརིཔུཎྞཾ…པེ… ཙརིཏུ’’ནྟི.

ཨེཝཾ ཨཏྟནོ པརིཝིཏཀྐིཏཾ སོཎོ ཨུཔཱསཀོ ཐེརསྶ ཨཱརོཙེཏྭཱ ཏཾ པཊིཔཛྫིཏུཀཱམོ ‘‘ཨིཙྪཱམཧཾ བྷནྟེ’’ཏིཨཱདིམཱཧ. ཐེརོ པན ¶ ‘‘ན ཏཱཝསྶ ཉཱཎཾ པརིཔཱཀཾ གཏ’’ནྟི ཨུཔདྷཱརེཏྭཱ ཉཱཎཔརིཔཱཀཾ ཨཱགམཡམཱནོ ‘‘དུཀྐརཾ ཁོ’’ཏིཨཱདིནཱ པབྦཛྫཱཚནྡཾ ནིཝཱརེསི. ཏཏྠ ཨེཀསེཡྻནྟི ཨདུཏིཡསེཡྻཾ. ཨེཏྠ ཙ སེཡྻཱསཱིསེན ‘‘ཨེཀོ ཏིཊྛཏི, ཨེཀོ གཙྪཏི, ཨེཀོ ནིསཱིདཏཱི’’ཏིཨཱདིནཱ ནཡེན ཝུཏྟཾ ཙཏཱུསུ ཨིརིཡཱཔཐེསུ ཀཱཡཝིཝེཀཾ དཱིཔེཏི, ན ཨེཀིཀཱ ཧུཏྭཱ སཡནམཏྟཾ. ཨེཀབྷཏྟནྟི ‘‘ཨེཀབྷཏྟིཀོ ཧོཏི རཏྟཱུཔརཏོ ཝིརཏོ ཝིཀཱལབྷོཛནཱ’’ཏི (དཱི. ནི. ༡.༡༠, ༡༩༤; མ. ནི. ༡.༢༩༣ ཨ. ནི. ༣.༧༡) ཨེཝཾ ཝུཏྟཾ ཝིཀཱལབྷོཛནཱ ཝིརཏིཾ སནྡྷཱཡ ཝདཏི. བྲཧྨཙརིཡནྟི མེཐུནཝིརཏིབྲཧྨཙརིཡཾ, སིཀྑཏྟཡཱནུཡོགསངྑཱཏཾ སཱསནབྲཧྨཙརིཡཾ ཝཱ. ཨིངྒྷཱཏི ཙོདནཏྠེ ནིཔཱཏོ. ཏཏྠེཝཱཏི གེཧེཡེཝ. བུདྡྷཱནཾ སཱསནཾ ཨནུཡུཉྫཱཏི ནིཙྩསཱིལཨུཔོསཐསཱིལནིཡམཱདིབྷེདཾ པཉྩངྒཾ ཨཊྛངྒཾ དསངྒཉྩ སཱིལཾ ཏདནུརཱུཔཉྩ སམཱདྷིཔཉྙཱབྷཱཝནཾ ཨནུཡུཉྫ. ཨེཏཉྷི ཨུཔཱསཀེན པུབྦབྷཱགེ ཨནུཡུཉྫིཏབྦཾ བུདྡྷསཱསནཾ ནཱམ. ཏེནཱཧ ‘‘ཀཱལཡུཏྟཾ ཨེཀསེཡྻཾ ཨེཀབྷཏྟཾ བྲཧྨཙརིཡ’’ནྟི.

ཏཏྠ ཀཱལཡུཏྟནྟི ཙཱཏུདྡསཱིཔཉྩདྡསཱིཨཊྛམཱིཔཱཊིཧཱརིཀཔཀྑསངྑཱཏེན ཀཱལེན ཡུཏྟཾ, ཡཐཱཝུཏྟཀཱལེ ཝཱ ཏུཡ྄ཧཾ ཨནུཡུཉྫནྟསྶ ཡུཏྟཾ པཏིརཱུཔཾ སཀྐུཎེཡྻཾ, ན སབྦཀཱལཾ སབྦནྟི ཨདྷིཔྤཱཡོ ¶ . སབྦམེཏཾ ཉཱཎསྶ ཨཔརིཔཀྐཏྟཱ ཏསྶ ཀཱམཱནཾ དུཔྤཧཱནཏཱཡ སམྨཱ པཊིཔཏྟིཡཾ ཡོགྱཾ ཀཱརཱཔེཏུཾ ཝདཏི, ན པབྦཛྫཱཚནྡཾ ནིཝཱརེཏུཾ. པབྦཛྫཱབྷིསངྑཱརོཏི པབྦཛིཏུཾ ཨཱརམྦྷོ ཨུསྶཱཧོ. པཊིཔྤསྶམྦྷཱིཏི ཨིནྡྲིཡཱནཾ ཨཔརིཔཀྐཏྟཱ སཾཝེགསྶ ཙ ནཱཏིཏིཀྑབྷཱཝཏོ ཝཱུཔསམི. ཀིཉྩཱཔི པཊིཔྤསྶམྦྷི, ཐེརེན ཝུཏྟཝིདྷིཾ པན ཨནུཏིཊྛནྟོ ཀཱལེན ཀཱལཾ ཐེརཾ ཨུཔསངྐམིཏྭཱ པཡིརུཔཱསནྟོ དྷམྨཾ སུཎཱཏི. ཏསྶ ཝུཏྟནཡེནེཝ དུཏིཡམྤི པབྦཛྫཱཡ ཙིཏྟཾ ཨུཔྤཛྫི, ཐེརསྶ ཙ ཨཱརོཙེསི, དུཏིཡམྤི ཐེརོ པཊིཀྑིཔི. ཏཏིཡཝཱརེ པན ཉཱཎསྶ པརིཔཀྐབྷཱཝཾ ཉཏྭཱ ‘‘ཨིདཱནི ནཾ པབྦཱཛེཏུཾ ཀཱལོ’’ཏི ཐེརོ པབྦཱཛེསི, པབྦཛིཏཉྩ ཏཾ ཏཱིཎི སཾཝཙྪརཱནི ཨཏིཀྐམིཏྭཱ གཎཾ པརིཡེསིཏྭཱ ཨུཔསམྤཱདེསི. ཏཾ སནྡྷཱཡ ཝུཏྟཾ ‘‘དུཏིཡམྤི ཁོ སོཎོ…པེ… ཨུཔསམྤཱདེསཱི’’ཏི.

ཏཏྠ ཨཔྤབྷིཀྑུཀོཏི ཀཏིཔཡབྷིཀྑུཀོ. ཏདཱ ཀིར བྷིཀྑཱུ ཡེབྷུཡྻེན མཛ྄ཛྷིམདེསེཡེཝ ཝསིཾསུ, ཏསྨཱ ཏཏྠ ཀཏིཔཡཱ ཨེཝ ཨཧེསུཾ ¶ . ཏེ ཙ ཨེཀསྨིཾ གཱམེ ཨེཀོ, ཨེཀསྨིཾ ནིགམེ དྭེཏི ཨེཝཾ ཝིསུཾ ཝིསུཾ ཝསིཾསུ. ཀིཙྪེནཱཏི དུཀྑེན. ཀསིརེནཱཏི ཨཱཡཱསེན. ཏཏོ ཏཏོཏི ཏསྨཱ ཏསྨཱ གཱམནིགམཱདིཏོ. ཐེརེན ཧི ཀཏིཔཡེ བྷིཀྑཱུ ཨཱནེཏྭཱ ཨཉྙེསུ ཨཱནཱིཡམཱནེསུ པུབྦེ ཨཱནཱིཏཱ ཀེནཙིདེཝ ཀརཎཱིཡེན པཀྐམིཾསུ, ཀཉྩི ཀཱལཾ ཨཱགམེཏྭཱ པུན ཏེསུ ཨཱནཱིཡམཱནེསུ ཨིཏརེ པཀྐམིཾསུ. ཨེཝཾ པུནཔྤུནཾ ཨཱནཡནེན སནྣིཔཱཏོ ཙིརེནེཝ ཨཧོསི. ཐེརོཔི ཏདཱ ཨེཀཝིཧཱརཱི ཨཧོསི. ཏེན ཝུཏྟཾ ‘‘ཏིཎྞཾ ཝསྶཱནཾ…པེ… སནྣིཔཱཏཱཔེཏྭཱ’’ཏི.

ཝསྶཾཝུཏྠསྶཱཏི ཝསྶཾ ཨུཔགནྟྭཱ ཝུསིཏཝཏོ. ཨེདིསོ ཙ ཨེདིསོ ཙཱཏི ཨེཝརཱུཔོ ཙ ཨེཝརཱུཔོ ཙ. ‘‘ཨེཝརཱུཔཱཡ ནཱམ རཱུཔཀཱཡསམྤཏྟིཡཱ སམནྣཱགཏོ, ཨེཝརཱུཔཱཡ དྷམྨཀཱཡསམྤཏྟིཡཱ སམནྣཱགཏོ’’ཏི སུཏོཡེཝ མེ སོ བྷགཝཱ. ན ཙ མཡཱ སམྨུཁཱ དིཊྛོཏི ཨེཏྠ པན པུཐུཛྫནསདྡྷཱཡ ཨེཝ ཨཱཡསྨཱ སོཎོ བྷགཝནྟཾ དཊྛུཀཱམོ ཨཧོསི. ཨཔརབྷཱགེ པན སཏྠཱརཱ སདྡྷིཾ ཨེཀགནྡྷཀུཊིཡཾ ཝསིཏྭཱ པཙྩཱུསསམཡཾ ཨཛ྄ཛྷིཊྛོ སོལ༹ས ཨཊྛཀཝགྒིཡཱནི སཏྠུ སམྨུཁཱ ཨཊྛིཾ ཀཏྭཱ མནསི ཀཏྭཱ སབྦཾ ཙེཏསཱ སམནྣཱཧརིཏྭཱ ཨཏྠདྷམྨཔཊིསཾཝེདཱི ཧུཏྭཱ བྷཎནྟོ དྷམྨུཔསཉྷིཏཔཱམོཛྫཱདིམུཁེན སམཱཧིཏོ སརབྷཉྙཔརིཡོསཱནེ ཝིཔསྶནཾ པཊྛཔེཏྭཱ སངྑཱརེ སམྨསནྟོ ཨནུཔུབྦེན ཨརཧཏྟཾ པཱཔུཎི. ཨེཏདཏྠམེཝ ཧིསྶ བྷགཝཏཱ ཨཏྟནཱ སདྡྷིཾ ཨེཀགནྡྷཀུཊིཡཾ ཝཱསོ ཨཱཎཏྟོཏི ཝདནྟི.

ཀེཙི པནཱཧུ ‘‘ན ཙ མཡཱ སམྨུཁཱ དིཊྛོཏི ཨིདཾ རཱུཔཀཱཡདསྶནམེཝ སནྡྷཱཡ ཝུཏྟཾ. ཨཱཡསྨཱ ཧི སོཎོ པབྦཛིཏྭཱ ཐེརསྶ སནྟིཀེ ཀམྨཊྛཱནཾ གཧེཏྭཱ གྷཊེནྟོ ཝཱཡམནྟོ ཨནུཔསམྤནྣོཝ ¶ སོཏཱཔནྣོ ཧུཏྭཱ ཨུཔསམྤཛྫིཏྭཱ ‘ཨུཔཱསཀཱཔི སོཏཱཔནྣཱ ཧོནྟི, ཨཧམྤི སོཏཱཔནྣོ, ཀིམེཏྠ ཙིཏྟ’ནྟི ཨུཔརིམགྒཏྠཱཡ ཝིཔསྶནཾ ཝཌྜྷེཏྭཱ ཨནྟོཝསྶེཡེཝ ཚལ༹བྷིཉྙོ ཧུཏྭཱ ཝིསུདྡྷིཔཝཱརཎཱཡ པཝཱརེསི. ཨརིཡསཙྩདསྶནེན བྷགཝཏོ དྷམྨཀཱཡོ དིཊྛོ ནཱམ ཧོཏི. ཝུཏྟཉྷེཏཾ ‘ཡོ ཁོ, ཝཀྐལི, དྷམྨཾ པསྶཏི, སོ མཾ པསྶཏཱི’ཏི (སཾ. ནི. ༣.༨༧). ཏསྨཱསྶ དྷམྨཀཱཡདསྶནཾ པགེཝ སིདྡྷཾ, པཝཱརེཏྭཱ པན རཱུཔཀཱཡཾ དཊྛུཀཱམོ ཨཧོསཱི’’ཏི.

པཱསཱདིཀནྟིཨཱདིཔདཱནཾ ¶ ཨཏྠོ ཨཊྛཀཐཱཡམེཝ ཝུཏྟོ. ཏཏྠ ཝིསཱུཀཱཡིཀཝིཔྥནྡིཏཱནནྟི པཊིཔཀྑབྷཱུཏཱནཾ དིཊྛིཙིཏྟཝིཔྥནྡིཏཱནནྟི ཨཏྠོ. པཱསཱདིཀནྟི (ཨུདཱ. ཨཊྛ. ༡༠) ཝཱ དྭཏྟིཾསམཧཱཔུརིསལཀྑཎཨསཱིཏིཨནུབྱཉྫནབྱཱམཔྤབྷཱཀེཏུམཱལཱལངྐཏཱཡ སམནྟཔཱསཱདིཀཱཡ ཨཏྟནོ སརཱིརཔྤབྷཱཡ སམྤཏྟིཡཱ རཱུཔཀཱཡདསྶནབྱཱཝཊསྶ ཛནསྶ སབྦབྷཱགཏོ པསཱདཱཝཧཾ. པསཱདནཱིཡནྟི དསབལཙཏུཝེསཱརཛྫཚཨསཱདྷཱརཎཉཱཎཨཊྛཱརསཨཱཝེཎིཀབུདྡྷདྷམྨཔྤབྷུཏིཨཔརིམཱཎགུཎགཎསམནྣཱགཏཱཡ དྷམྨཀཱཡསམྤཏྟིཡཱ པརིཀྑཀཛནསྶ པསཱདནཱིཡཾ པསཱིདིཏབྦཡུཏྟཾ པསཱདཀཾ ཝཱ. སནྟིནྡྲིཡནྟི ཙཀྑཱདིཔཉྩིནྡྲིཡལོལཏཱཝིགམེན ཝཱུཔསནྟཔཉྩིནྡྲིཡཾ. སནྟམཱནསནྟི ཚཊྛསྶ མནིནྡྲིཡསྶ ནིབྦིསེཝནབྷཱཝཱུཔགམནེན ཝཱུཔསནྟམཱནསཾ. ཨུཏྟམདམཐསམཐཾ ཨནུཔྤཏྟནྟི ལོཀུཏྟརཔཉྙཱཝིམུཏྟིཙེཏོཝིམུཏྟིསངྑཱཏཾ ཨུཏྟམཾ དམཐཾ སམཐཉྩ ཨནུཔྤཏྭཱ ཨདྷིགནྟྭཱ ཋིཏཾ. དནྟནྟི སུཔརིསུདྡྷཀཱཡསམཱཙཱརཏཱཡ ཧཏྠཔཱདཀུཀྐུཙྩཱབྷཱཝཏོ དཝཱདིཨབྷཱཝཏོ ཙ ཀཱཡེན དནྟཾ. གུཏྟནྟི སུཔརིསུདྡྷཝཙཱིསམཱཙཱརཏཱཡ ནིརཏྠཀཝཱཙཱབྷཱཝཏོ རཝཱདིཨབྷཱཝཏོ ཙ ཝཱཙཱཡ གུཏྟཾ. ཡཏིནྡྲིཡནྟི སུཔརིསུདྡྷམནོསམཱཙཱརཏཱཡ ཨརིཡིདྡྷིཡོགེན ཨབྱཱཝཊཨཔྤཊིསངྑུཔེཀྑཱབྷཱཝཏོ ཙ མནིནྡྲིཡཝསེན ཡཏིནྡྲིཡཾ. ནཱགནྟི ཚནྡཱདིཝསེན ཨགམནཏོ, པཧཱིནཱནཾ རཱགཱདིཀིལེསཱནཾ ཨཔུནཱགམནཏོ ཨཔཙྩཱགམནཏོ ཀསྶཙིཔི ཨཱགུསྶ སབྦཐཱཔི ཨཀརཎཏོ, པུནབྦྷཝསྶ ཙ ཨགམནཏོཏི ཨིམེཧི ཀཱརཎེཧི ནཱགཾ. ཨེཏྠ ཙ ‘‘པཱསཱདིཀ’’ནྟི ཨིམིནཱ རཱུཔཀཱཡེན བྷགཝཏོ པམཱཎབྷཱུཏཏཾ དཱིཔེཏི, ‘‘པསཱདནཱིཡ’’ནྟི ཨིམིནཱ དྷམྨཀཱཡེན. ‘‘སནྟིནྡྲིཡ’’ནྟིཨཱདིནཱ སེསེཧི པམཱཎབྷཱུཏཏཾ དཱིཔེཏི, ཏེན ཙཏུཔྤམཱཎིཀེ ལོཀསནྣིཝཱསེ ཨནཝསེསཏོ སཏྟཱནཾ བྷགཝཏོ པམཱཎབྷཱཝོ པཀཱསིཏོཏི ཝེདིཏབྦོ. ཨེཀཝིཧཱརེཏི ཨེཀགནྡྷཀུཊིཡཾ. གནྡྷཀུཊི ཧི ཨིདྷ ‘‘ཝིཧཱརོ’’ཏི ཨདྷིཔྤེཏོ. ཝཏྠུནྟི ཝསིཏུཾ.

༢༥༨. ཨཛ྄ཛྷོཀཱསེ ཝཱིཏིནཱམེཏྭཱཏི (ཨུདཱ. ཨཊྛ. ༤༦) ཨཛ྄ཛྷོཀཱསེ ནིསཛྫཱཡ ཝཱིཏིནཱམེཏྭཱ. ‘‘ཡསྨཱ བྷགཝཱ ཨཱཡསྨཏོ སོཎསྶ སམཱཔཏྟིསམཱཔཛྫནེན པཊིསནྠཱརཾ ཀརོནྟོ སཱཝཀསཱདྷཱརཎཱ སབྦཱ སམཱཔཏྟིཡོ ¶ ཨནུལོམཔཊིལོམཾ སམཱཔཛྫནྟོ བཧུདེཝ རཏྟིཾ ཨཛ྄ཛྷོཀཱསེ ནིསཛྫཱཡ ཝཱིཏིནཱམེཏྭཱ པཱདེ པཀྑཱལེཏྭཱ ཝིཧཱརཾ པཱཝིསི, ཏསྨཱ ཨཱཡསྨཱཔི སོཎོ བྷགཝཏོ ཨདྷིཔྤཱཡཾ ཉཏྭཱ ཏདནུརཱུཔཾ སབྦཱ ཏཱ སམཱཔཏྟིཡོ སམཱཔཛྫནྟོ བཧུདེཝ རཏྟིཾ ཨཛ྄ཛྷོཀཱསེ ¶ ནིསཛྫཱཡ ཝཱིཏིནཱམེཏྭཱ པཱདེ པཀྑཱལེཏྭཱ ཝིཧཱརཾ པཱཝིསཱི’’ཏི ཀེཙི ཝདནྟི. པཝིསིཏྭཱ ཙ བྷགཝཏཱ ཨནུཉྙཱཏོ ཙཱིཝརཾ ཏིརོཀརཎཱིཡཾ ཀཏྭཱཔི བྷགཝཏོ པཱདཔསྶེ ནིསཛྫཱཡ ཝཱིཏིནཱམེསི. ཨཛ྄ཛྷེསཱིཏི ཨཱཎཱཔེསི. པཊིབྷཱཏུ ཏཾ བྷིཀྑུ དྷམྨོ བྷཱསིཏུནྟི བྷིཀྑུ ཏུཡ྄ཧཾ དྷམྨོ བྷཱསིཏུཾ ཨུཔཊྛཱཏུ ཉཱཎམུཁཾ ཨཱགཙྪཏུ, ཡཐཱསུཏཾ ཡཐཱཔརིཡཏྟཾ དྷམྨཾ བྷཎཱཧཱིཏི ཨཏྠོ.

སབྦཱནེཝ ཨཊྛཀཝགྒིཀཱནཱིཏི ཨཊྛཀཝགྒབྷཱུཏཱནི ཀཱམསུཏྟཱདཱིནི (མཧཱནི. ༡) སོལ༹ས སུཏྟཱནི. སརེན ཨབྷཱསཱིཏི སུཏྟུསྶཱརཎསརེན ཨབྷཱསི, སརབྷཉྙཝསེན ཀཐེསཱིཏི ཨཏྠོ. སརབྷཉྙཔརིཡོསཱནེཏི ཨུསྶཱརཎཱཝསཱནེ. སུགྒཧིཏཱནཱིཏི སམྨཱ ཨུགྒཧིཏཱནི. སུམནསིཀཏཱནཱིཏི སུཊྛུ མནསི ཀཏཱནི. ཨེཀཙྩོ ཨུགྒཧཎཀཱལེ སམྨཱ ཨུགྒཧེཏྭཱཔི པཙྪཱ སཛ྄ཛྷཱཡཱདིཝསེན མནསིཀརཎཀཱལེ བྱཉྫནཱནི ཝཱ མིཙྪཱ རོཔེཏི, པདཔཙྩཱབྷཊྛཾ ཝཱ ཀརོཏི, ན ཨེཝམཡཾ. ཨིམིནཱ པན སམྨདེཝ ཡཐུགྒཧིཏཾ མནསི ཀཏཱནི. ཏེན ཝུཏྟཾ ‘‘སུམནསིཀཏཱནཱིཏི སུཊྛུ མནསི ཀཏཱནཱི’’ཏི. སཱུཔདྷཱརིཏཱནཱིཏི ཨཏྠཏོཔི སུཊྛུ ཨུཔདྷཱརིཏཱནི. ཨཏྠེ ཧི སུཊྛུ ཨུཔདྷཱརིཏེ སཀྐཱ པཱལི༹ སམྨཱ ཨུསྶཱརེཏུཾ. ཀལྱཱཎིཡཱཔི ཝཱཙཱཡ སམནྣཱགཏོཏི སིཐིལདྷནིཏཱདཱིནཾ ཡཐཱཝིདྷཱནཾ ཝཙནེན པརིམཎྜལཔདབྱཉྫནཱཡ པོརིཡཱ ཝཱཙཱཡ སམནྣཱགཏོ. ཝིསྶཊྛཱཡཱཏི ཝིམུཏྟཱཡ. ཨེཏེནསྶ ཝིམུཏྟཝཱདིཏཾ དསྶེཏི. ཨནེལགལཱཡཱཏི ཨེལཾ ཝུཙྩཏི དོསོ, ཏཾ ན པགྒྷརཏཱིཏི ཨནེལགལཱ, ཏཱཡ ནིདྡོསཱཡཱཏི ཨཏྠོ. ཨཐ ཝཱ ཨནེལགལཱཡཱཏི ཨནེལཱཡ ཙ ཨགལཱཡ ཙ, ནིདྡོསཱཡ ཨགལིཏཔདབྱཉྫནཱཡ ཨཔརིཧཱིནཔདབྱཉྫནཱཡཱཏི ཨཏྠོ. ཏཐཱ ཧི ནཾ བྷགཝཱ ‘‘ཨེཏདགྒཾ, བྷིཀྑཝེ, མམ སཱཝཀཱནཾ བྷིཀྑཱུནཾ ཀལྱཱཎཝཱཀྐརཎཱནཾ ཡདིདཾ སོཎོ ཀུཊིཀཎྞོ’’ཏི (ཨ. ནི. ༡.༡༩༨, ༢༠༦) ཨེཏདགྒེ ཋཔེསི. ཨཏྠསྶ ཝིཉྙཱཔནིཡཱཏི ཡཐཱདྷིཔྤེཏཾ ཨཏྠཾ ཉཱཔེཏུཾ སམཏྠཱཡ.

ཀཏིཝསྶོཏི ¶ སོ ཀིར མཛ྄ཛྷིམཝཡསྶ ཏཏིཡེ ཀོཊྛཱསེ ཋིཏོ ཨཱཀཔྤསམྤནྣོ ཙ པརེསཾ ཙིརཏརཔབྦཛིཏོ ཝིཡ ཁཱཡཏི. ཏཾ སནྡྷཱཡ བྷགཝཱ པུཙྪཱིཏི ཀེཙི, ཏཾ ཨཀཱརཎཾ. ཨེཝཾ སནྟཾ སམཱདྷིསུཁཾ ཨནུབྷཝིཏུཾ ཡུཏྟོ, ཨེཏྟཀཾ ཀཱལཾ ཀསྨཱ པམཱདཾ ཨཱཔནྣོསཱིཏི པན ཨནུཡུཉྫིཏུཾ སཏྠཱ ‘‘ཀཏིཝསྶོསཱི’’ཏི ཏཾ པུཙྪི. ཏེནེཝཱཧ ‘‘ཀིསྶ པན ཏྭཾ བྷིཀྑུ ཨེཝཾ ཙིརཾ ཨཀཱསཱི’’ཏི. ཏཏྠ ཀིསྶཱཏི ཀིཾཀཱརཎཱ. ཨེཝཾ ཙིརཾ ཨཀཱསཱིཏི ཨེཝཾ ཙིརཱཡི, ཀེན ཀཱརཎེན ཨེཝཾ ཙིརཀཱལཾ པབྦཛྫཾ ཨནུཔགནྟྭཱ ཨགཱརམཛ྄ཛྷེ ཝསཱིཏི ཨཏྠོ. ཙིརཾ དིཊྛོ མེཏི ཙིརེན ¶ ཙིརཀཱལེན མཡཱ དིཊྛོ. ཀཱམེསཱུཏི ཝཏྠུཀཱམེསུ ཀིལེསཀཱམེསུ ཙ. ཨཱདཱིནཝོཏི དོསོ. ཨཔིཙཱཏི ཀཱམེསུ ཨཱདཱིནཝེ ཀེནཙི པཀཱརེན དིཊྛེཔི ན ཏཱཝཱཧཾ གྷརཱཝཱསཏོ ནིཀྑམིཏུཾ ཨསཀྑིཾ. ཀསྨཱ? སམྦཱདྷོ གྷརཱཝཱསོ, ཨུཙྩཱཝཙེཧི ཀིཙྩཀརཎཱིཡེཧི སམུཔབྱཱུལ༹ྷོ ཨགཱརིཡབྷཱཝོ. ཏེནེཝཱཧ ‘‘བཧུཀིཙྩོ བཧུཀརཎཱིཡོ’’ཏི.

ཨེཏམཏྠཾ ཝིདིཏྭཱཏི ཀཱམེསུ ཡཐཱབྷཱུཏཾ ཨཱདཱིནཝདསྶིནོ ཙིཏྟཾ ཙིརཱཡིཏྭཱཔི གྷརཱཝཱསེ ན པཀྑནྡཏི, ཨཉྙདཏྠུ པདུམཔལཱསེ ཨུདཀབིནྡུ ཝིཡ ཝིནིཝཏྟཏིཡེཝཱཏི ཨེཏམཏྠཾ སབྦཱཀཱརཏོ ཝིདིཏྭཱ. ཨིམཾ ཨུདཱནནྟི པཝཏྟིཾ ནིཝཏྟིཉྩ སམྨདེཝ ཛཱནནྟོ པཝཏྟིཡཾ ཏཾནིམིཏྟེ ཙ ན ཀདཱཙིཔི རམཏཱིཏི ཨིདམཏྠདཱིཔཀཾ ཨིམཾ ཨུདཱནཾ ཨུདཱནེསི.

ཏཏྠ དིསྭཱ ཨཱདཱིནཝཾ ལོཀེཏི སབྦསྨིམྤི སངྑཱརལོཀེ ‘‘ཨནིཙྩོ དུཀྑོ ཝིཔརིཎཱམདྷམྨོ’’ཏིཨཱདཱིནཝཾ དོསཾ པཉྙཱཙཀྑུནཱ པསྶིཏྭཱ. ཨེཏེན ཝིཔསྶནཱཙཱརོ ཀཐིཏོ. ཉཏྭཱ དྷམྨཾ ནིརཱུཔདྷིནྟི སབྦཱུཔདྷིཔཊིནིསྶགྒཏྟཱ ནིརུཔདྷིཾ ནིབྦཱནདྷམྨཾ ཡཐཱབྷཱུཏཾ ཉཏྭཱ, ནིསྶརཎཝིཝེཀཱསངྑཏཱམཏསབྷཱཝཏོ མགྒཉཱཎེན པཊིཝིཛ྄ཛྷིཏྭཱ. ‘‘དིསྭཱ ཉཏྭཱ’’ཏི ཨིམེསཾ པདཱནཾ ‘‘གྷཏཾ པིཝིཏྭཱ བལཾ ཧོཏི, སཱིཧཾ དིསྭཱ བྷཡཾ ཧོཏི, པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟཱི’’ཏིཨཱདཱིསུ (མ. ནི. ༡.༢༧༡) ཝིཡ ཧེཏུཨཏྠཏཱ དཊྛབྦཱ. ཨརིཡོ ན རམཏཱི པཱཔེཏི ཀིལེསེཧི ཨཱརཀཏྟཱ ཨརིཡོ སཔྤུརིསོ ཨཎུམཏྟེཔི པཱཔེ ན རམཏི. ཀསྨཱ? པཱཔེ ན རམཏཱི སུཙཱིཏི སུཝིསུདྡྷཀཱཡསམཱཙཱརཱདིཏཱཡ སུཙི སུདྡྷཔུགྒལོ རཱཛཧཾསོ ཝིཡ ཨུཙྩཱརཊྛཱནེ པཱཔེ སཾཀིལིཊྛདྷམྨེ ན རམཏི ནཱབྷིནནྡཏི. ‘‘པཱཔོ ¶ ན རམཏཱི སུཙི’’ནྟིཔི པཱཋོ, ཏསྶཏྠོ – པཱཔོ པུགྒལོ སུཙིཾ ཨནཝཛྫཾ ཝོདཱནདྷམྨཾ ན རམཏི, ཨཉྙདཏྠུ གཱམསཱུཀརཱདཡོ ཝིཡ ཨུཙྩཱརཊྛཱནཾ ཨསུཙིཾ སཾཀིལེསདྷམྨཾཡེཝ རམཏཱིཏི པཊིཔཀྑཏོ དེསནཾ པརིཝཏྟེཏི.

སོཎཀུཊིཀཎྞཝཏྠུཀཐཱཝཎྞནཱ ནིཊྛིཏཱ.

༢༥༩. ཀཱལ༹སཱིཧོཏི ཀཱལ༹མུཁཝཱནརཛཱཏི. སེསམེཏྠ པཱལི༹ཏོ ཨཊྛཀཐཱཏོ ཙ སུཝིཉྙེཡྻམེཝཱཏི.

ཙམྨཀྑནྡྷཀཝཎྞནཱ ནིཊྛིཏཱ.

༦. བྷེསཛྫཀྑནྡྷཀཾ

པཉྩབྷེསཛྫཱདིཀཐཱཝཎྞནཱ

༢༦༡. བྷེསཛྫཀྑནྡྷཀེ ¶ ¶ ནཙྪཱདེནྟཱིཏི རུཙིཾ ན ཨུཔྤཱདེནྟི.

༢༦༢. སུསུཀཱཏི སམུདྡེ བྷཝཱ ཨེཀཱ མཙྪཛཱཏི. ཀུམྦྷཱིལཱཏིཔི ཝདནྟི. སཾསཊྛནྟི པརིསྶཱཝིཏཾ. ཏེལཔརིབྷོགེནཱཏི སཏྟཱཧཀཱལིཀཔརིབྷོགཾ སནྡྷཱཡ ཝུཏྟཾ.

༢༦༣. པིཊྛེཧཱིཏི པིསིཏེཧི. ཨུབྦྷིདཾ ནཱམ ཨཱུསརཔཾསུམཡཾ.

༢༦༤. ཚཀཎནྟི གོམཡཾ. པཱཀཏིཀཙུཎྞཾ ནཱམ ཨཔཀྐཀསཱཝཙུཎྞཾ. ཏེན ཋཔེཏྭཱ གནྡྷཙུཎྞཾ སབྦཾ ཝཊྚཏཱིཏི ཝདནྟི.

༢༦༥. སུཝཎྞགེརུཀོཏི སུཝཎྞཏུཏྠཱདི. ཨཉྫནཱུཔཔིསནནྟི ཨཉྫནཏྠཱཡ ཨུཔཔིསིཏབྦཾ ཡཾ ཀིཉྩི ཙུཎྞཛཱཏཾ.

༢༦༨. སཱམཾ གཧེཏྭཱཏི ཨེཏྠ སཔྤདཊྛསྶ ཨཏྠཱཡ ཨཉྙེན བྷིཀྑུནཱ གཧིཏམྤི སཱམཾ གཧིཏསངྑམེཝ གཙྪཏཱིཏི ཝེདིཏབྦཾ.

༢༦༩. གྷརདིནྣཀཱབཱདྷོ ནཱམ ཝསཱིཀརཎཏྠཱཡ གྷརཎིཡཱ དིནྣབྷེསཛྫསམུཊྛིཏོ ཨཱབཱདྷོ. ཏེནཱཧ ‘‘ཝསཱིཀརཎཔཱཎཀསམུཊྛིཏརོགོ’’ཏི. གྷར-སདྡོ ཙེཏྠ ཨབྷེདེན གྷརཎིཡཱ ཝཏྟམཱནོ ཨདྷིཔྤེཏོ. ‘‘ཨཀཊཡཱུསེནཱཏི ཨནབྷིསངྑཏེན མུགྒཡཱུསེན. ཀཊཱཀཊེནཱཏི མུགྒེ པཙིཏྭཱ ཨཙཱལེཏྭཱཝ པརིསྶཱཝིཏེན མུགྒསཱུཔེནཱ’’ཏི གཎྛིཔདེསུ ཝུཏྟཾ.

གུལཱ༹དིཨནུཛཱནནཀཐཱཝཎྞནཱ

༢༧༢. གུལ༹ཀརཎནྟི ¶ གུལ༹ཀརཎཊྛཱནཾ, ཨུཙྪུསཱལནྟི ཝུཏྟཾ ཧོཏི.

༢༧༤. ཨཝིསྶཏྠཱཏི སཱསངྐཱ.

༢༧༦. ཨཔྤམཏྟཀེཔི ¶ པཝཱརེནྟཱིཏི ཨཔྤམཏྟཀེཔི གཧིཏེ པཝཱརེནྟི, ‘‘བཧུམྷི གཧིཏེ ཨཉྙེསཾ ནཔྤཧོཏཱི’’ཏི མཉྙམཱནཱ ཨཔྤམཏྟཀཾ གཧེཏྭཱ པཝཱརེནྟཱིཏི ཨདྷིཔྤཱཡོ. པཊིསངྑཱཔི པཊིཀྑིཔནྟཱིཏི ‘‘དིཝཱ བྷོཛནཏྠཱཡ བྷཝིསྶཏཱི’’ཏི སལླཀྑེཏྭཱཔི པཊིཀྑིཔནྟི.

༢༧༩. སམྦཱདྷེ དཧནཀམྨཾ པཊིཀྑེཔཱབྷཱཝོ ཝཊྚཏི.

༢༨༠. ཨུབྷཏོཔསནྣཱཏི ཨུབྷཡཏོ པསནྣཱ. མཱགྷཱཏོཏི ‘‘མཱ གྷཱཏེཐ པཱཎིནོ’’ཏི ཨེཝཾ མཱགྷཱཏགྷོསིཏདིཝསོ.

ཡཱགུམདྷུགོལ༹ཀཱདིཀཐཱཝཎྞནཱ

༢༨༢. མདྷུགོལ༹ཀནྟི སཀྐརཱདིསཾཡུཏྟཔཱུཝཾ. ཨཱཡུཾ དེཏཱིཏི ཨཱཡུདཱནཾ དེཏི. ཝཎྞནྟི སརཱིརཝཎྞཾ. སུཁནྟི ཀཱཡིཀཙེཏསིཀསུཁཾ. བལནྟི སརཱིརཐཱམཾ. པཊིབྷཱནནྟི ཡུཏྟམུཏྟཔཊིབྷཱནཾ. ཝཱཏཾ ཨནུལོམེཏཱིཏི ཝཱཏཾ ཨནུལོམེཏྭཱ ཧརཏི. ཝཏྠིཾ སོདྷེཏཱིཏི དྷམནིཡོ སུདྡྷཾ ཀརོཏི. ཨཱམཱཝསེསཾ པཱཙེཏཱིཏི སཙེ ཨཱམཱཝསེསཀཾ ཧོཏི, ཏཾ པཱཙེཏི. ཨནུཔྤཝེཙྪཏཱིཏི དེཏི. ཝཱཏཉྩ བྱཔནེཏཱིཏི སམྦནྡྷིཏབྦཾ.

༢༨༣. ནནུ ཙ ‘‘པརམྤརབྷོཛནེན ཀཱརེཏབྦོ’’ཏི ཀསྨཱ ཝུཏྟཾ. པརམྤརབྷོཛནཉྷི པཉྩནྣཾ བྷོཛནཱནཾ ཨཉྙཏརེན ནིམནྟིཏསྶ ཏཾ ཋཔེཏྭཱ ཨཉྙཾ པཉྩནྣཾ བྷོཛནཱནཾ ཨཉྙཏརཾ བྷུཉྫནྟསྶ ཧོཏི, ཨིམེ ཙ བྷིཀྑཱུ བྷོཛྫཡཱགུཾ པརིབྷུཉྫིཾསུ, པཉྩསུ བྷོཛནེསུ ཨཉྙཏརནྟི ཨཱཧ ‘‘བྷོཛྫཡཱགུཡཱ ཧི པཝཱརཎཱ ཧོཏཱི’’ཏི. ཡསྨཱ པཉྩནྣཾ བྷོཛནཱནཾ ཨཉྙཏརཾ པཊིཀྑིཔནྟསྶ ཝུཏྟཱ པཝཱརཎཱ བྷོཛྫཡཱགུཾ པཊིཀྑིཔནྟསྶཔི ཧོཏིཡེཝ, ཏསྨཱ བྷོཛྫཡཱགུཔི ཨོདནགཏིཀཱཡེཝཱཏི ཨདྷིཔྤཱཡོ.

༢༨༤. སུཁུམོཛཾ ¶ པཀྑིཔིཾསཱུཏི ‘‘བྷགཝཱ པརིབྷུཉྫིསྶཏཱི’’ཏི མཉྙམཱནཱ པཀྑིཔིཾསུ.

པཱཊལིགཱམཝཏྠུཀཐཱཝཎྞནཱ

༢༨༥. པཱཊལིགཱམོཏི ¶ (ཨུདཱ. ཨཊྛ. ༧༦) ཨེཝཾནཱམཀོ མགདྷརཊྛེ ཨེཀོ གཱམོ. ཏསྶ ཀིར གཱམསྶ མཱཔནདིཝསེ གཱམངྒཎཊྛཱནེ དྭེ ཏཡོ པཱཊལངྐུརཱ པཐཝིཏོ ཨུབྦྷིཛྫིཏྭཱ ནིཀྑམིཾསུ. ཏེན ཏཾ ‘‘པཱཊལིགཱམོ’’ ཏྭེཝ ཝོཧརིཾསུ. ཏདཝསརཱིཏི ཏཾ པཱཊལིགཱམཾ ཨཝསརི ཨནུཔཱཔུཎི. པཱཊལིགཱམིཀཱཏི པཱཊལིགཱམཝཱསིནོ. ཨུཔཱསཀཱཏི ཏེ ཀིར བྷགཝཏོ པཋམདསྶནེན ཀེཙི སརཎེསུ ཙ སཱིལེསུ ཙ པཏིཊྛིཏཱ. ཏེན ཝུཏྟཾ ‘‘ཨུཔཱསཀཱ’’ཏི. ཡེན བྷགཝཱ ཏེནུཔསངྐམིཾསཱུཏི པཱཊལིགཱམེ ཀིར ཨཛཱཏསཏྟུནོ ལིཙྪཝིརཱཛཱུནཉྩ མནུསྶཱ ཀཱལེན ཀཱལཾ གནྟྭཱ གེཧསཱམིཀེ གེཧཏོ ནཱིཧརིཏྭཱ མཱསམྤི ཨཌྜྷམཱསམྤི ཝསནྟི. ཏེན པཱཊལིགཱམཝཱསིནོ མནུསྶཱ ནིཙྩུཔདྡུཏཱ ‘‘ཨེཏེསཉྩེཝ ཨཱགཏཀཱལེ ཝསནཊྛཱནཾ བྷཝིསྶཏཱིཏི ཨེཀཔསྶེ ཨིསྶརཱནཾ བྷཎྜཔཊིསཱམནཊྛཱནཾ, ཨེཀཔསྶེ ཝསནཊྛཱནཾ, ཨེཀཔསྶེ ཨཱགནྟུཀཱནཾ ཨདྡྷིཀམནུསྶཱནཾ, ཨེཀཔསྶེ དལིདྡཱནཾ ཀཔཎམནུསྶཱནཾ, ཨེཀཔསྶེ གིལཱནཱནཾ ཝསནཊྛཱནཾ བྷཝིསྶཏཱི’’ཏི སབྦེསཾ ཨཉྙམཉྙཾ ཨགྷཊྚེཏྭཱ ཝསནཔྤཧོནཀཾ ནགརམཛ྄ཛྷེ མཧཏིཾ སཱལཾ ཀཱརེསུཾ, ཏསྶ ནཱམཾ ཨཱཝསཐཱགཱརནྟི. ཨཱགནྟྭཱ ཝསནྟི ཨེཏྠ ཨཱགནྟུཀཱཏི ཨཱཝསཐོ, ཏདེཝ ཨཱགཱརཾ ཨཱཝསཐཱགཱརཾ.

ཏཾ དིཝསཉྩ ཏཾ ནིཊྛཱནཾ ཨགམཱསི. ཏེ ཏཏྠ གནྟྭཱ ཨིཊྛཀཀམྨསུདྷཱཀམྨཙིཏྟཀམྨཱདིཝསེན སུཔརིནིཊྛིཏཾ སུསཛྫིཏཾ དེཝཝིམཱནསདིསཾ དྭཱརཀོཊྛཀཏོ པཊྛཱཡ ཨོལོཀེཏྭཱ ‘‘ཨིདཾ ཨཱཝསཐཱགཱརཾ ཨཏིཝིཡ མནོརམཾ སསྶིརིཀཾ, ཀེན ནུ ཁོ པཋམཾ པརིབྷུཏྟཾ ཨམྷཱཀཾ དཱིགྷརཏྟཾ ཧིཏཱཡ སུཁཱཡ ཨསྶཱ’’ཏི ཙིནྟེསུཾ, ཏསྨིཾཡེཝ ཙ ཁཎེ ‘‘བྷགཝཱ ཏཾ གཱམཾ ཨནུཔྤཏྟོ’’ཏི ཨསྶོསུཾ, ཏེན ཏེ ཨུཔྤནྣཔཱིཏིསོམནསྶཱ ‘‘ཨམྷེཧི བྷགཝཱ གནྟྭཱཔི ཨཱནེཏབྦོ སིཡཱ, སོ སཡམེཝ ཨམྷཱཀཾ ཝསནཊྛཱནཾ སམྤཏྟོ, ཨཛྫ མཡཾ བྷགཝནྟཾ ཨིདྷ ཝསཱཔེཏྭཱ པཋམཾ པརིབྷུཉྫཱཔེསྶཱམ, ཏཐཱ བྷིཀྑུསངྒྷཾ, བྷིཀྑུསངྒྷེ ཨཱགཏེ ཏེཔིཊཀཾ བུདྡྷཝཙནཾ ཨཱགཏམེཝ བྷཝིསྶཏི, སཏྠཱརཾ མངྒལཾ ཝདཱཔེསྶཱམ, དྷམྨཾ ཀཐཱཔེསྶཱམ, ཨིཏི ཏཱིཧི རཏནེཧི པརིབྷུཏྟེ པཙྪཱ ཨམྷཱཀཾ པརེསཉྩ པརིབྷོགོ བྷཝིསྶཏི, ཨེཝཾ ནོ དཱིགྷརཏྟཾ ཧིཏཱཡ སུཁཱཡ བྷཝིསྶཏཱི’’ཏི སནྣིཊྛཱནཾ ཀཏྭཱ ཨེཏདཏྠམེཝ བྷགཝནྟཾ ཨུཔསངྐམིཾསུ. ཏསྨཱ ཨེཝམཱཧཾསུ ‘‘ཨདྷིཝཱསེཏུ ནོ, བྷནྟེ, བྷགཝཱ ¶ ཨཱཝསཐཱགཱར’’ནྟི. ཏེནུཔསངྐམིཾསཱུཏི (དཱི. ནི. ཨཊྛ. ༣.༢༩༧-༢༩༨; མ. ནི. ཨཊྛ. ༢.༢༢) ཀིཉྩཱཔི ཏཾ དིཝསམེཝ པརིནིཊྛིཏཏྟཱ དེཝཝིམཱནཾ ¶ ཝིཡ སུསཛྫིཏཾ སུཔཊིཛགྒིཏཾ, བུདྡྷཱརཧཾ པན ཀཏྭཱ ན པཉྙཏྟཾ. བུདྡྷཱ ཧི ནཱམ ཨརཉྙཛ྄ཛྷཱསཡཱ ཨརཉྙཱརཱམཱ, ཨནྟོགཱམེ ཝསེཡྻུཾ ཝཱ ནོ ཝཱ, ཏསྨཱ བྷགཝཏོ རུཙིཾ ཛཱནིཏྭཱཝ པཉྙཔེསྶཱམཱཏི ཙིནྟེཏྭཱ ཏེ བྷགཝནྟཾ ཨུཔསངྐམིཾསུ, ཨིདཱནི བྷགཝཏོ རུཙིཾ ཛཱནིཏྭཱ ཏཐཱ པཉྙཱཔེཏུཀཱམཱ ཡེནཱཝསཐཱགཱརཾ ཏེནུཔསངྐམིཾསུ. སབྦསནྠརིཾ ཨཱཝསཐཱགཱརཾ སནྠརིཏྭཱཏི ཨེཏྠ སནྠརཎཾ སནྠརི, སབྦོ སཀལོ སནྠརི ཨེཏྠཱཏི སབྦསནྠརི. ཨཐ ཝཱ སནྠཏནྟི སནྠརི, སབྦཾ སནྠརི སབྦསནྠརི, ཏཾ སབྦསནྠརིཾ. བྷཱཝནཔུཾསཀནིདྡེསོཝཱཡཾ, ཡཐཱ སབྦམེཝ སནྠཏཾ ཧོཏི, ཨེཝཾ སནྠརིཏྭཱཏི ཨཏྠོ. སབྦཔཋམཾ ཏཱཝ ‘‘གོམཡཾ ནཱམ སབྦམངྒལེསུ ཝཊྚཏཱི’’ཏི སུདྷཱཔརིཀམྨཀཏམྤི བྷཱུམིཾ ཨལླགོམཡེན ཨོཔུཉྫཱཔེཏྭཱ པརིསུཀྑབྷཱཝཾ ཉཏྭཱ ཡཐཱ ཨཀྐནྟཊྛཱནེ པདཾ པཉྙཱཡཏི, ཨེཝཾ ཙཱཏུཛྫཱཏིཡགནྡྷེཧི ལིམྤེཏྭཱ ཨུཔརི ནཱནཱཝཎྞཀཊསཱརཀེ སནྠརིཏྭཱ ཏེསཾ ཨུཔརི མཧཱཔིཊྛིཀཀོཛཝེ ཨཱདིཾ ཀཏྭཱ ཧཏྠཏྠརཎཱདཱིཧི ནཱནཱཝཎྞེཧི ཨཏྠརཎེཧི སནྠརིཏབྦཡུཏྟཀཾ སབྦོཀཱསཾ སནྠརཱཔེསུཾ. ཏེན ཝུཏྟཾ ‘‘སབྦསནྠརིཾ ཨཱཝསཐཱགཱརཾ སནྠརིཏྭཱ’’ཏི.

ཨཱསནཱནཱིཏི མཛ྄ཛྷཊྛཱནེ ཏཱཝ མངྒལཏྠམྦྷཾ ནིསྶཱཡ མཧཱརཧཾ བུདྡྷཱསནཾ པཉྙཔེཏྭཱ ཏཏྠ ཡཾ ཡཾ མུདུཀཉྩ མནོརམཉྩ པཙྩཏྠརཎཾ, ཏཾ ཏཾ ཨཏྠརིཏྭཱ ཨུབྷཏོལོཧིཏཀཾ མནུཉྙདསྶནཾ ཨུཔདྷཱནཾ ཨུཔདཧིཏྭཱ ཨུཔརི སུཝཎྞརཛཏཏཱརཀཝིཙིཏྟཝིཏཱནཾ བནྡྷིཏྭཱ གནྡྷདཱམཔུཔྥདཱམཔཏྟཱདཱམཱདཱིཧི ཨལངྐརིཏྭཱ སམནྟཱ དྭཱདསཧཏྠེ ཋཱནེ པུཔྥཛཱལཾ ཀཱརེཏྭཱ ཏིཾསཧཏྠམཏྟཾ ཋཱནཾ པཊསཱཎིཡཱ པརིཀྑིཔཱཔེཏྭཱ པཙྪིམབྷིཏྟིཾ ནིསྶཱཡ བྷིཀྑུསངྒྷསྶ པལླངྐཔཱིཋཨཔསྶཡཔཱིཋམུཎྜཔཱིཋཱདཱིནི པཉྙཔཱཔེཏྭཱ ཨུཔརི སེཏཔཙྩཏྠརཎེཧི པཙྩཏྠརཱཔེཏྭཱ སཱལཱཡ པཱཙཱིནཔསྶཾ ཨཏྟནོ ནིསཛྫཱཡོགྒཾ ཀཱརེསུཾ. ཏཾ སནྡྷཱཡ ཝུཏྟཾ ‘‘ཨཱསནཱནི པཉྙཔེཏྭཱ’’ཏི.

ཨུདཀམཎིཀནྟི མཧཱཀུཙྪིཀཾ སམེཁལཾ ཨུདཀཙཱཊིཾ. ཨེཝཾ བྷགཝཱ བྷིཀྑུསངྒྷོ ཙ ཡཐཱརུཙིཡཱ ཧཏྠཔཱདེ དྷོཝིསྶནྟི, མུཁཾ ཝིཀྑཱལེསྶནྟཱིཏི ཏེསུ ཏེསུ ཋཱནེསུ མཎིཝཎྞསྶ ཨུདཀསྶ པཱུརེཏྭཱ ཝཱསཏྠཱཡ ནཱནཱཔུཔྥཱནི ¶ ཙེཝ ཨུདཀཝཱསཙུཎྞཱནི ཙ པཀྑིཔིཏྭཱ ཀདལིཔཎྞེཧི པིདཧིཏྭཱ པཏིཊྛཔེསུཾ. ཏེན ཝུཏྟཾ ‘‘ཨུདཀམཎིཀཾ པཏིཊྛཱཔེཏྭཱ’’ཏི.

ཏེལཔདཱིཔཾ ཨཱརོཔེཏྭཱཏི རཛཏསུཝཎྞཱདིམཡདཎྜཱསུ དཎྜདཱིཔིཀཱསུ ཡོནཀརཱུཔཀཱདཱིནཾ ཧཏྠེ ཋཔིཏསུཝཎྞརཛཏཱདིམཡཀཔལླིཀཱསུ ཙ ཏེལཔདཱིཔེ ཛལཡིཏྭཱ. ཡེན བྷགཝཱ ཏེནུཔསངྐམིཾསཱུཏི ཨེཏྠ པན ཏེ པཱཊལིགཱམིཀཨུཔཱསཀཱ ན ཀེཝལཾ ཨཱཝསཐཱགཱརམེཝ, ཨཐ ཁོ སཀལསྨིམྤི གཱམེ ཝཱིཐིཡོ སཛྫཱཔེཏྭཱ དྷཛེ ཨུསྶཱཔེཏྭཱ གེཧདྭཱརེསུ པུཎྞགྷཊེ ཙ ཀདལིཨཱདཡོ ཙ ཋཔཱཔེཏྭཱ ¶ སཀལགཱམཾ དཱིཔམཱལཱཧི ཝིཔྤཀིཎྞཏཱརཀཾ ཝིཡ ཀཏྭཱ ‘‘ཁཱིརཔཀེ དཱརཀེ ཁཱིརཾ པཱཡེཐ, དཧརཀུམཱརེ ལཧུཾ ལཧུཾ བྷོཛེཏྭཱ སཡཱཔེཐ, ཨུཙྩཱསདྡཾ མཱ ཀརིཏྠ, ཨཛྫ ཨེཀརཏྟིཾ སཏྠཱ ཨནྟོགཱམེ ཝསིསྶཏི, བུདྡྷཱ ནཱམ ཨཔྤསདྡཀཱམཱ ཧོནྟཱི’’ཏི བྷེརིཾ ཙརཱཔེཏྭཱ སཡཾ དཎྜདཱིཔིཀཱ ཨཱདཱཡ ཡེན བྷགཝཱ ཏེནུཔསངྐམིཾསུ.

ཨཐ ཁོ བྷགཝཱ ནིཝཱསེཏྭཱ པཏྟཙཱིཝརམཱདཱཡ སདྡྷིཾ བྷིཀྑུསངྒྷེན ཡེན ཨཱཝསཐཱགཱརཾ ཏེནུཔསངྐམཱིཏི ‘‘ཡསྶ དཱནི, བྷནྟེ, བྷགཝཱ ཀཱལཾ མཉྙཏཱི’’ཏི ཨེཝཾ ཀིར ཏེཧི ཀཱལེ ཨཱརོཙིཏེ བྷགཝཱ ལཱཁཱརསེན ཏིནྟརཏྟཀོཝིལཱ༹རཔུཔྥཝཎྞཾ སུརཏྟཾ དུཔཊྚཾ ཀཏྟརིཡཱ པདུམཾ ཀནྟེནྟོ ཝིཡ, སཾཝིདྷཱཡ ཏིམཎྜལཾ པཊིཙྪཱདེནྟོ ནིཝཱསེཏྭཱ སུཝཎྞཔཱམངྒེན པདུམཀལཱཔཾ པརིཀྑིཔནྟོ ཝིཡ, ཝིཛྫུལཏཱསསྶིརིཀཾ ཀཱཡབནྡྷནཾ བནྡྷིཏྭཱ རཏྟཀམྦལེན གཛཀུམྦྷཾ པརིཡོནནྡྷནྟོ ཝིཡ, རཏནསཏུབྦེདྷེ སུཝཎྞགྒྷིཀེ པཝཱལ༹ཛཱལཾ ཁིཔམཱནོ ཝིཡ, མཧཏི སུཝཎྞཙེཏིཡེ རཏྟཀམྦལཀཉྩུཀཾ པཊིམུཉྩནྟོ ཝིཡ, གཙྪནྟཾ པུཎྞཙནྡཾ རཏྟཝལཱཧཀེན པཊིཙྪཱདཡམཱནོ ཝིཡ, ཀཉྩནགིརིམཏྠཀེ སུཔཀྐལཱཁཱརསཾ པརིསིཉྩནྟོ ཝིཡ, ཙིཏྟཀཱུཊཔབྦཏམཏྠཀཾ ཝིཛྫུལཏཱཛཱལེན པརིཀྑིཔནྟོ ཝིཡ ཙ སཙཀྐཝཱལ༹སིནེརུཡུགནྡྷརམཧཱཔཐཝིཾ ཙཱལེཏྭཱ གཧིཏནིགྲོདྷཔལླཝསམཱནཝཎྞཾ རཏྟཝརཔཾསུཀཱུལཾ པཱརུཔིཏྭཱ ཝནགཧནཏོ ཀེསརསཱིཧོ ཝིཡ, ཨུདཡཔབྦཏཀཱུཊཏོ པུཎྞཙནྡོ ཝིཡ, བཱལསཱུརིཡོ ཝིཡ ཙ ཨཏྟནཱ ནིསིནྣཏརུསཎྜཏོ ནིཀྑམི.

ཨཐསྶ ཀཱཡཏོ མེགྷམུཁཏོ ཝིཛྫུཀལཱཔཱ ཝིཡ རསྨིཡོ ནིཀྑམིཏྭཱ སུཝཎྞརསདྷཱརཱཔརིསེཀཔིཉྫརཔཏྟཔུཔྥཕལསཱཁཱཝིཊཔེ ཝིཡ སམནྟཏོ ¶ རུཀྑེ ཀརིཾསུ. ཏཱཝདེཝ ཨཏྟནོ ཨཏྟནོ པཏྟཙཱིཝརམཱདཱཡ མཧཱབྷིཀྑུསངྒྷོ བྷགཝནྟཾ པརིཝཱརེསི. ཏེ ཙ ནཾ པརིཝཱརེཏྭཱ ཋིཏབྷིཀྑཱུ ཨེཝརཱུཔཱ ཨཧེསུཾ ཨཔྤིཙྪཱ སནྟུཊྛཱ པཝིཝིཏྟཱ ཨསཾསཊྛཱ ཨཱརདྡྷཝཱིརིཡཱ ཝཏྟཱརོ ཝཙནཀྑམཱ ཙོདཀཱ པཱཔགརཧིནོ སཱིལསམྤནྣཱ སམཱདྷིསམྤནྣཱ པཉྙཱསམྤནྣཱ ཝིམུཏྟིསམྤནྣཱ ཝིམུཏྟིཉཱཎདསྶནསམྤནྣཱ. ཏེཧི པརིཝཱརིཏོ བྷགཝཱ རཏྟཀམྦལཔརིཀྑིཏྟོ ཝིཡ སུཝཎྞཀྑནྡྷོ, རཏྟཔདུམསཎྜམཛ྄ཛྷགཏཱ ཝིཡ སུཝཎྞནཱཝཱ, པཝཱལ༹ཝེདིཀཱཔརིཀྑིཏྟོ ཝིཡ སུཝཎྞཔཱསཱདོ ཝིརོཙིཏྠ. མཧཱཀསྶཔཔྤམུཁཱ པན མཧཱཐེརཱ མེགྷཝཎྞཾ པཾསུཀཱུལཙཱིཝརཾ པཱརུཔིཏྭཱ མཎིཝམྨཝམྨིཏཱ ཝིཡ མཧཱནཱགཱ པརིཝཱརཡིཾསུ ཝཱིཏརཱགཱ བྷིནྣཀིལེསཱ ཝིཛཊིཏཛཊཱ ཚིནྣབནྡྷནཱ ཀུལེ ཝཱ གཎེ ཝཱ ཨལགྒཱ.

ཨིཏི བྷགཝཱ སཡཾ ཝཱིཏརཱགོ ཝཱིཏརཱགེཧི, ཝཱིཏདོསོ ཝཱིཏདོསེཧི, ཝཱིཏམོཧོ ཝཱིཏམོཧེཧི ¶ , ནིཏྟཎྷོ ནིཏྟཎྷེཧི, ནིཀྐིལེསོ ནིཀྐིལེསེཧི, སཡཾ བུདྡྷོ ཨནུབུདྡྷེཧི པརིཝཱརིཏོ པཏྟཔརིཝཱརིཏཾ ཝིཡ ཀེསརཾ, ཀེསརཔརིཝཱརིཏཱ ཝིཡ ཀཎྞིཀཱ, ཨཊྛནཱགསཧསྶཔརིཝཱརིཏོ ཝིཡ ཚདྡནྟོ ནཱགརཱཛཱ, ནཝུཏིཧཾསསཧསྶཔརིཝཱརིཏོ ཝིཡ དྷཏརཊྛོ ཧཾསརཱཛཱ, སེནངྒཔརིཝཱརིཏོ ཝིཡ ཙཀྐཝཏྟཱི, མརུགཎཔརིཝཱརིཏོ ཝིཡ སཀྐོ དེཝརཱཛཱ, བྲཧྨགཎཔརིཝཱརིཏོ ཝིཡ ཧཱརིཏམཧཱབྲཧྨཱ, ཏཱརཱགཎཔརིཝུཏོ ཝིཡ པུཎྞཙནྡོ ཨསམེན བུདྡྷཝེསེན ཨཔརིམཱཎེན བུདྡྷཝིལཱསེན པཱཊལིགཱམཱིནཾ མགྒཾ པཊིཔཛྫི.

ཨཐསྶ པུརཏྠིམཀཱཡཏོ སུཝཎྞཝཎྞཱ གྷནབུདྡྷརསྨིཡོ ཨུཊྛཧིཏྭཱ ཨསཱིཏིཧཏྠཾ ཋཱནཾ ཨགྒཧེསུཾ, པཙྪིམཀཱཡཏོ དཀྑིཎཔསྶཏོ ཝཱམཔསྶཏོ སུཝཎྞཝཎྞཱ གྷནརསྨིཡོ ཨུཊྛཧིཏྭཱ ཨསཱིཏིཧཏྠཾ ཋཱནཾ ཨགྒཧེསུཾ, ཨུཔརིཀེསནྟཏོ པཊྛཱཡ སབྦཀེསཱཝཏྟེཧི མོརགཱིཝཝཎྞཱ གྷནབུདྡྷརསྨིཡོ ཨུཊྛཧིཏྭཱ གགནཏལེ ཨསཱིཏིཧཏྠཾ ཋཱནཾ ཨགྒཧེསུཾ, ཧེཊྛཱཔཱདཏལེཧི པཝཱལ༹ཝཎྞཱ རསྨིཡོ ཨུཊྛཧིཏྭཱ གྷནཔཐཝིཡཾ ཨསཱིཏིཧཏྠཾ ཋཱནཾ ཨགྒཧེསུཾ, དནྟཏོ ཨཀྑཱིནཾ སེཏཊྛཱནཏོ, ནཁཱནཉྩ མཾསཝིནིམུཏྟཊྛཱནཏོ ཨོདཱཏཱ གྷནབུདྡྷརསྨིཡོ ཨུཊྛཧིཏྭཱ ཨསཱིཏིཧཏྠཾ ཋཱནཾ ཨགྒཧེསུཾ, རཏྟཔཱིཏཝཎྞཱནཾ སམྦྷིནྣཊྛཱནཏོ མཉྫིཊྛཝཎྞཱ རསྨིཡོ ཨུཊྛཧིཏྭཱ ཨསཱིཏིཧཏྠཾ ཋཱནཾ ཨགྒཧེསུཾ, སབྦཏྠཀམེཝ པབྷསྶརཱ རསྨིཡོ ཨུཊྛཧིཾསུ. ཨེཝཾ སམནྟཱ ཨསཱིཏིཧཏྠམཏྟཾ ཋཱནཾ ཚབྦཎྞཱ བུདྡྷརསྨིཡོ ཝིཛྫོཏམཱནཱ ཝིཔྥནྡམཱནཱ ¶ ཝིདྷཱཝམཱནཱ ཀཉྩནདཎྜདཱིཔིཀཱཧི ནིཙྪརིཏྭཱ ཨཱཀཱསཾ པཀྑནྡམཱནཱ མཧཱཔདཱིཔཛཱལཱ ཝིཡ, ཙཱཏུདྡཱིཔིཀམཧཱམེགྷཏོ ནིཀྑནྟཝིཛྫུལཏཱ ཝིཡ ཙ དིསོདིསཾ པཀྑནྡིཾསུ. ཡཱཧི སབྦདིསཱབྷཱགཱ སུཝཎྞཙམྤཀཔུཔྥེཧི ཝིཀིརིཡམཱནཱ ཝིཡ, སུཝཎྞགྷཊཏོ ནིཀྑནྟསུཝཎྞརསདྷཱརཱཧི ཨཱསིཉྩིཡམཱནཱ ཝིཡ, པསཱརིཏསུཝཎྞཔཊྚཔརིཀྑིཏྟཱ ཝིཡ, ཝེརམྦྷཝཱཏསམུདྡྷཏཀིཾསུཀཀཎིཀཱརཀིཀིརཱཏཔུཔྥཙུཎྞསམོཀིཎྞཱ ཝིཡ ཙཱིནཔིཊྛཙུཎྞསམྤརིརཉྫིཏཱ ཝིཡ ཙ ཝིརོཙིཾསུ.

བྷགཝཏོཔི ཨསཱིཏིཨནུབྱཉྫནབྱཱམཔྤབྷཱཔརིཀྑེཔསམུཛྫལཾ དྭཏྟིཾསམཧཱཔུརིསལཀྑཎཔཊིམཎྜིཏཾ སརཱིརཾ ཨབྦྷམཧིཀཱདིཨུཔཀྐིལེསཝིམུཏྟཾ སམུཛྫལཏཱརཀཔབྷཱསིཏཾ ཝིཡ གགནཏལཾ, ཝིཀསིཏཾ ཝིཡ པདུམཝནཾ, སབྦཔཱལིཕུལློ ཝིཡ ཡོཛནསཏིཀོ པཱརིཙྪཏྟཀོ, པཊིཔཱཊིཡཱ ཋཔིཏཱནཾ དྭཏྟིཾསཙནྡཱནཾ དྭཏྟིཾསསཱུརིཡཱནཾ དྭཏྟིཾསཙཀྐཝཏྟཱིནཾ དྭཏྟིཾསདེཝརཱཛཱནཾ དྭཏྟིཾསམཧཱབྲཧྨཱནཾ སིརིཡཱ སིརིཾ ཨབྷིབྷཝམཱནཾ ཝིཡ ཝིརོཙིཏྠ, ཡཐཱ ཏཾ དསཧི པཱརམཱིཧི དསཧི ཨུཔཔཱརམཱིཧི དསཧི པརམཏྠཔཱརམཱིཧཱིཏི སམྨདེཝ པརིཔཱུརིཏཱཧི སམཏིཾསཱཡ པཱརམཱིཧི ཨལངྐཏཾ ཀཔྤསཏསཧསྶཱདྷིཀཱནི ཙཏྟཱརི ཨསངྑྱེཡྻཱནི དིནྣེན དཱནེན རཀྑིཏེན སཱིལེན ཀཏེན ཀལྱཱཎཀམྨེན ཨེཀསྨིཾ ཨཏྟབྷཱཝེ སམོསརིཏྭཱ ཝིཔཱཀཾ དཱཏུཾ ཨོཀཱསཾ ཨལབྷམཱནེན སམྦཱདྷཔྤཏྟེན ¶ ཝིཡ ནིབྦཏྟིཏཾ ནཱཝཱསཧསྶསྶ བྷཎྜཾ ཨེཀཾ ནཱཝཾ ཨཱརོཔནཀཱལོ ཝིཡ, སཀཊསཧསྶསྶ བྷཎྜཾ ཨེཀཾ སཀཊཾ ཨཱརོཔནཀཱལོ ཝིཡ, པཉྩཝཱིསཏིཡཱ གངྒཱནཾ སམྦྷིཛྫ མུཁདྭཱརེ ཨེཀཏོ རཱསཱིབྷཱུཏཀཱལོ ཝིཡ ཙ ཨཧོསི.

ཨིམཱཡ བུདྡྷརསྨིཡཱ ཨོབྷཱསམཱནསྶཔི བྷགཝཏོ པུརཏོ ཨནེཀཱནི དཎྜདཱིཔིཀཱསཧསྶཱནི ཨུཀྑིཔིཾསུ, ཏཐཱ པཙྪཏོ ཝཱམཔསྶེ དཀྑིཎཔསྶེ. ཛཱཏིསུམནཙམྤཀཝནམཱལིཀཱརཏྟུཔྤལནཱིལུཔྤལབཀུལསིནྡུཝཱརཱདིཔུཔྥཱནི ཙེཝ ནཱིལཔཱིཏཱདིཝཎྞསུགནྡྷགནྡྷཙུཎྞཱནི ཙ ཙཱཏུདྡཱིཔིཀམཧཨཱམེགྷཝིསྶཊྛཱ སལིལཝུཊྛིཡོ ཝིཡ ཝིཔྤཀིརིཾསུ. པཉྩངྒིཀཏཱུརིཡནིགྒྷོསཱ ཙེཝ བུདྡྷདྷམྨསངྒྷགུཎཔཊིསཾཡུཏྟཱ ཐུཏིགྷོསཱ ཙ སབྦཱ དིསཱ པཱུརཡམཱནཱ མུཁརཱ ཝིཡ ཨཀཾསུ. དེཝསུཔཎྞནཱགཡཀྑགནྡྷབྦམནུསྶཱནཾ ཨཀྑཱིནི ཨམཏཔཱནཾ ཝིཡ ལབྷིཾསུ. ཨིམསྨིཾ པན ཋཱནེ ཋཏྭཱ པདསཧསྶེཧི གམནཝཎྞཾ ཝཏྟུཾ ཝཊྚཏི. ཏཏྲིདཾ མུཁམཏྟཾ (མ. ནི. ཨཊྛ. ༢.༢༢; ཨུདཱ. ཨཊྛ. ༧༦) –

‘‘ཨེཝཾ ¶ སབྦངྒསམྤནྣོ, ཀམྤཡནྟོ ཝསུནྡྷརཾ;

ཨཧེཋཡནྟོ པཱཎཱནི, ཡཱཏི ལོཀཝིནཱཡཀོ.

‘‘དཀྑིཎཾ པཋམཾ པཱདཾ, ཨུདྡྷརནྟོ ནརཱསབྷོ;

གཙྪནྟོ སིརིསམྤནྣོ, སོབྷཏེ དྭིཔདུཏྟམོ.

‘‘གཙྪཏོ བུདྡྷསེཊྛསྶ, ཧེཊྛཱཔཱདཏལཾ མུདུ;

སམཾ སམྥུསཏེ བྷཱུམིཾ, རཛསཱནུཔལིམྤཏི.

‘‘ནིནྣཾ ཋཱནཾ ཨུནྣམཏི, གཙྪནྟེ ལོཀནཱཡཀེ;

ཨུནྣཏཉྩ སམཾ ཧོཏི, པཐཝཱི ཙ ཨཙེཏནཱ.

‘‘པཱསཱཎཱ སཀྑརཱ ཙེཝ, ཀཐལཱ ཁཱཎུཀཎྚཀཱ;

སབྦེ མགྒཱ ཝིཝཛྫནྟི, གཙྪནྟེ ལོཀནཱཡཀེ.

‘‘ནཱཏིདཱུརེ ཨུདྡྷརཏི, ནཱཙྩཱསནྣེ ཙ ནིཀྑིཔཾ;

ཨགྷཊྚཡནྟོ ནིཡྻཱཏི, ཨུབྷོ ཛཱཎཱུ ཙ གོཔྥཀེ.

‘‘ནཱཏིསཱིགྷཾ ¶ པཀྐམཏི, སམྤནྣཙརཎོ མུནི;

ན ཙཱཏིསཎིཀཾ ཡཱཏི, གཙྪམཱནོ སམཱཧིཏོ.

‘‘ཨུདྡྷཾ ཨདྷོ ཏིརིཡཉྩ, དིསཉྩ ཝིདིསཾ ཏཐཱ;

ན པེཀྑམཱནོ སོ ཡཱཏི, ཡུགམཏྟཉྷི པེཀྑཏི.

‘‘ནཱགཝིཀྐནྟཙཱརོ སོ, གམནེ སོབྷཏེ ཛིནོ;

ཙཱརུ གཙྪཏི ལོཀགྒོ, ཧཱསཡནྟོ སདེཝཀེ.

‘‘ཨུསབྷརཱཛཱཝ སོབྷནྟོ, ཙཱཏུཙཱརཱིཝ ཀེསརཱི;

ཏོསཡནྟོ བཧཱུ སཏྟེ, གཱམསེཊྛཾ ཨུཔཱགམཱི’’ཏི. (མ. ནི. ཨཊྛ. ༢.༢༢; ཨུདཱ. ཨཊྛ. ༧༦);

ཝཎྞཀཱལོ ནཱམ ཀིརེས. ཨེཝཾཝིདྷེསུ ཀཱལེསུ བྷགཝཏོ སརཱིརཝཎྞེ ཝཱ གུཎཝཎྞེ ཝཱ དྷམྨཀཐིཀསྶ ཐཱམོཡེཝ པམཱཎཾ. ཙུཎྞིཡཔདེཧི གཱཐཱབནྡྷེཧི ཝཱ ཡཏྟཀཾ སཀྐོཏི, ཏཏྟཀཾ ཝཏྟབྦཾ, ‘‘དུཀྐཐིཏ’’ནྟི ཝཱ ‘‘ཨཏིཏྠེན པཀྑནྡོ’’ཏི ཝཱ ན ཝཏྟབྦོ. ཨཔརིམཱཎཝཎྞཱ ཧི བུདྡྷཱ བྷགཝནྟོ, ཏེསཾ བུདྡྷཱཔི ཨནཝསེསཏོ ཝཎྞཾ ཝཏྟུཾ ཨསམཏྠཱ. སཀལམྤི ཧི ཀཔྤཾ ཝདནྟཱ པརིཡོསཱཔེཏུཾ ན སཀྐོནྟི, པགེཝ ཨིཏརཱ པཛཱཏི. ཨིམིནཱ སིརིཝིལཱསེན ཨལངྐཏཔཊིཡཏྟཾ པཱཊལིགཱམཾ པཝིསིཏྭཱ བྷགཝཱ པསནྣཙིཏྟེན ཛནེན པུཔྥགནྡྷདྷཱུམཝཱསཙུཎྞཱདཱིཧི པཱུཛིཡམཱནོ ཨཱཝསཐཱགཱརཾ ¶ པཱཝིསི. ཏེན ཝུཏྟཾ ‘‘ཨཐ ཁོ བྷགཝཱ ནིཝཱསེཏྭཱ པཏྟཙཱིཝརམཱདཱཡ སདྡྷིཾ བྷིཀྑུསངྒྷེན ཡེན ཨཱཝསཐཱགཱརཾ ཏེནུཔསངྐམཱི’’ཏི.

པཱདེ པཀྑཱལེཏྭཱཏི ཡདིཔི བྷགཝཏོ པཱདེ རཛོཛལླཾ ན ཨུཔལིམྤཏི, ཏེསཾ པན ཨུཔཱསཀཱནཾ ཀུསལཱབྷིཝུདྡྷིཾ ཨཱཀངྑནྟོ པརེསཾ དིཊྛཱནུགཏིཾ ཨཱཔཛྫནཏྠཾ བྷགཝཱ པཱདེ པཀྑཱལེསི. ཨཔིཙ ཨུཔཱདིནྣཀསརཱིརཾ ནཱམ སཱིཏིཀཱཏབྦམྤི ཧོཏཱིཏི ཏདཏྠམྤི བྷགཝཱ ནཧཱནཔཱདདྷོཝནཱནི ཀརོཏིཡེཝ. བྷགཝནྟཾཡེཝ པུརཀྑཏྭཱཏི བྷགཝནྟཾ པུརཏོ ཀཏྭཱ. ཏཏྠ བྷགཝཱ བྷིཀྑཱུནཉྩེཝ ཨུཔཱསཀཱནཉྩ མཛ྄ཛྷེ ནིསིནྣོ གནྡྷོདཀེན ནཧཱཔེཏྭཱ དུཀཱུལཙུམྦཊེན ཝོདཀཾ ཀཏྭཱ ཛཱཏིཧིངྒུལཀེན མཛྫིཏྭཱ རཏྟཀམྦལཔལིཝེཋིཏེ པཱིཋེ ཋཔིཏཱ རཏྟསུཝཎྞགྷནཔཊིམཱ ཝིཡ ཨཏིཝིཡ ཝིརོཙིཏྠ. ཨཡཾ པནེཏྠ པོརཱཎཱནཾ ཝཎྞབྷཎནམགྒོ –

‘‘གནྟྭཱན ¶ མཎྜལམཱལ༹ཾ, ནཱགཝིཀྐནྟཙཱརཎོ;

ཨོབྷཱསཡནྟོ ལོཀགྒོ, ནིསཱིདི ཝརམཱསནེ.

‘‘ཏཧིཾ ནིསིནྣོ ནརདམྨསཱརཐི,

དེཝཱཏིདེཝོ སཏཔུཉྙལཀྑཎོ;

བུདྡྷཱསནེ མཛ྄ཛྷགཏོ ཝིརོཙཏི,

སུཝཎྞནེཀྑཾ ཝིཡ པཎྜུཀམྦལེ.

‘‘ནེཀྑཾ ཛམྦོནདསྶེཝ, ནིཀྑིཏྟཾ པཎྜུཀམྦལེ;

ཝིརོཙཏི ཝཱིཏམལོ, མཎི ཝེརོཙནོ ཡཐཱ.

‘‘མཧཱསཱལོཝ སམྥུལློ, མེརུརཱཛཱཝལངྐཏོ;

སུཝཎྞཐཱུཔསངྐཱསོ, པདུམོ ཀོསཀོ ཡཐཱ.

‘‘ཛལནྟོ དཱིཔརུཀྑོཝ, པབྦཏགྒེ ཡཐཱ སིཁཱི;

དེཝཱནཾ པཱརིཙྪཏྟོཝ, སབྦཕུལློ ཝིརོཙཐཱ’’ཏི. (མ. ནི. ཨཊྛ. ༢.༢༢; ཨུདཱ. ཨཊྛ. ༧༦);

པཱཊལིགཱམིཀེ ཨུཔཱསཀེ ཨཱམནྟེསཱིཏི ཡསྨཱ ཏེསུ ཨུཔཱསཀེསུ བཧཱུ ཛནཱ སཱིལེ པཏིཊྛིཏཱ, ཏསྨཱ པཋམཾ ཏཱཝ སཱིལཝིཔཏྟིཡཱ ཨཱདཱིནཝཾ པཀཱསེཏྭཱ པཙྪཱ སཱིལསམྤདཱཡ ཨཱནིསཾསཾ དསྶེཏུཾ ‘‘པཉྩིམེ གཧཔཏཡོ’’ཏིཨཱདིནཱ དྷམྨདེསནཏྠཾ ཨཱམནྟེསི. ཏཏྠ དུསྶཱིལོཏི ¶ ནིསྶཱིལོ (དཱི. ནི. ཨཊྛ. ༢.༡༤༩; ཨ. ནི. ཨཊྛ. ༣.༥.༢༡༣; ཨུདཱ. ཨཊྛ. ༧༦). ཨབྷཱཝཏྠོ ཧེཏྠ དུ-སདྡོ ‘‘དུཔྤཉྙོ’’ཏིཨཱདཱིསུ ཝིཡ. སཱིལཝིཔནྣོཏི ཝིཔནྣསཱིལོ བྷིནྣསཾཝརོ. ཨེཏྠ ཙ ‘‘དུསྶཱིལོ’’ཏི པདེན པུགྒལསྶ སཱིལཱབྷཱཝོ ཝུཏྟོ. སོ པནསྶ སཱིལཱབྷཱཝོ དུཝིདྷོ ཨསམཱདཱནེན ཝཱ སམཱདིནྣསྶ བྷེདེན ཝཱཏི. ཏེསུ པུརིམོ ན ཏཐཱ སཱཝཛྫོ, ཡཐཱ དུཏིཡོ སཱཝཛྫཏརོ. ཡཐཱདྷིཔྤེཏཱདཱིནཝནིམིཏྟཾ སཱིལཱབྷཱཝཾ པུགྒལཱདྷིཊྛཱནཱཡ དེསནཱཡ དསྶེཏུཾ ‘‘སཱིལཝིཔནྣོ’’ཏི ཝུཏྟཾ, ཏེན ‘‘དུསྶཱིལོ’’ཏི པདསྶ ཨཏྠཾ དསྶེཏི. པམཱདཱདྷིཀརཎནྟི པམཱདཀཱརཎཱ. ཨིདཉྩ སུཏྟཾ གཧཊྛཱནཾ ཝསེན ཨཱགཏཾ, པབྦཛིཏཱནམྤི པན ལབྦྷཏེཝ. གཧཊྛོ ཧི ཡེན ཡེན སིཔྤཊྛཱནེན ཛཱིཝིཀཾ ཀཔྤེཏི ཡདི ཀསིཡཱ ཡདི ཝཎིཛྫཱཡ ཡདི གོརཀྑེན. པཱཎཱཏིཔཱཏཱདིཝསེན པམཏྟོ ཏཾ ཏཾ ཡཐཱཀཱལཾ སམྤཱདེཏུཾ ན སཀྐོཏི, ཨཐསྶ ¶ ཀམྨཾ ཝིནསྶཏི. མཱགྷཱཏཀཱལེ པཱཎཱཏིཔཱཏཾ པན ཨདིནྣཱདཱནཱདཱིནི ཙ ཀརོནྟོ དཎྜཝསེན མཧཏིཾ བྷོགཛཱནིཾ ནིགཙྪཏི. པབྦཛིཏོ དུསྶཱིལོ པམཱདཀཱརཎཱ སཱིལཏོ བུདྡྷཝཙནཏོ ཛྷཱནཏོ སཏྟཨརིཡདྷནཏོ ཙ ཛཱནིཾ ནིགཙྪཏི.

པཱཔཀོ ཀིཏྟིསདྡོཏི གཧཊྛསྶ ‘‘ཨསུཀོ ཨསུཀཀུལེ ཛཱཏོ དུསྶཱིལོ པཱཔདྷམྨོ པརིཙྩཏྟཨིདྷལོཀཔརལོཀོ སལཱཀབྷཏྟམཏྟམྤི ན དེཏཱི’’ཏི ཙཏུཔརིསམཛ྄ཛྷེ པཱཔཀོ ཀིཏྟིསདྡོ ཨབྦྷུགྒཙྪཏི. པབྦཛིཏསྶ ‘‘ཨསུཀོ ནཱམ སཏྠུསཱསནེ པབྦཛིཏྭཱ ནཱསཀྑི སཱིལཱནི རཀྑིཏུཾ, ན བུདྡྷཝཙནཾ ཨུགྒཧེཏུཾ, ཝེཛྫཀམྨཱདཱིཧི ཛཱིཝཏི, ཚཧི ཨགཱརཝེཧི སམནྣཱགཏོ’’ཏི ཨེཝཾ པཱཔཀོ ཀིཏྟིསདྡོ ཨབྦྷུགྒཙྪཏི.

ཨཝིསཱརདོཏི གཧཊྛོ ཏཱཝ ‘‘ཨཝསྶཾ བཧཱུནཾ སནྣིཔཱཏཊྛཱནེ ཀོཙི མམ ཀམྨཾ ཛཱནིསྶཏི, ཨཐ མཾ ནིགྒཎྷིསྶནྟཱི’’ཏི ཝཱ, ‘‘རཱཛཀུལསྶ ཝཱ དསྶནྟཱི’’ཏི སབྷཡོ ཨུཔསངྐམཏི, མངྐུབྷཱུཏོ པཏྟཀྑནྡྷོ ཨདྷོམུཁོ ནིསཱིདཏི, ཝིསཱརདོ ཧུཏྭཱ ཀཐེཏུཾ ན སཀྐོཏི. པབྦཛིཏོཔི ‘‘བཧཱུ བྷིཀྑཱུ སནྣིཔཏིཏཱ, ཨཝསྶཾ ཀོཙི མམ ཀམྨཾ ཛཱནིསྶཏི, ཨཐ མེ ཨུཔོསཐམྤི པཝཱརཎམྤི ཋཔེཏྭཱ སཱམཉྙཏོ ཙཱཝེཏྭཱ ནིཀྐཌྜྷིསྶནྟཱི’’ཏི སབྷཡོ ཨུཔསངྐམཏི, ཝིསཱརདོ ཧུཏྭཱ ཀཐེཏུཾ ན སཀྐོཏི. ཨེཀཙྩོ པན དུསྶཱིལོཔི སམཱནོ དཔྤིཏོ ཝིཡ ཝདཏི, སོཔི ཨཛ྄ཛྷཱསཡེན མངྐུ ཧོཏིཡེཝ ཝིཔྤཊིསཱརཱིབྷཱཝཏོ.

སམྨཱུལ༹ྷོ ¶ ཀཱལཾ ཀརོཏཱིཏི དུསྶཱིལསྶ ཧི མརཎམཉྩེ ནིཔནྣསྶ དུསྶཱིལྱཀམྨཱནཾ སམཱདཱཡ ཝཏྟིཏཊྛཱནཱནི ཨཱཔཱཐམཱགཙྪནྟི. སོ ཨུམྨཱིལེཏྭཱ ཨཏྟནོ པུཏྟདཱརཱདིདསྶནཝསེན ཨིདྷལོཀཾ པསྶཏི, ནིམཱིལེཏྭཱ གཏིནིམིཏྟུཔཊྛཱནཝསེན པརལོཀཾ པསྶཏི, ཏསྶ ཙཏྟཱརོ ཨཔཱཡཱ ཀམྨཱནུརཱུཔཾ ཨུཔཊྛཧནྟི. སཏྟིསཏེན པཧརིཡམཱནོ ཝིཡ ཨགྒིཛཱལཱཡ ཨཱལིངྒིཡམཱནོ ཝིཡ ཙ ཧོཏི. སོ ‘‘ཝཱརེཐ ཝཱརེཐཱ’’ཏི ཝིརཝནྟོཝ མརཏི. ཏེན ཝུཏྟཾ ‘‘སམྨཱུལ༹ྷོ ཀཱལཾ ཀརོཏཱི’’ཏི.

ཀཱཡསྶ བྷེདཱཏི ཨུཔཱདིནྣཀཀྑནྡྷཔརིཙྩཱགཱ. པརཾ མརཎཱཏི ཏདནནྟརཾ ཨབྷིནིབྦཏྟཀྑནྡྷགྒཧཎེ. ཨཐ ཝཱ ཀཱཡསྶ བྷེདཱཏི ཛཱིཝིཏིནྡྲིཡསྶ ཨུཔཙྪེདཱ. པརཾ མརཎཱཏི ཙུཏིཏོ ཨུདྡྷཾ. ཨཔཱཡནྟིཨཱདི སབྦཾ ནིརཡཝེཝཙནཾ. ནིརཡོ ཧི སགྒམོཀྑཧེཏུབྷཱུཏཱ པུཉྙསངྑཱཏཱ ཨཡཱ ཨཔེཏཏྟཱ, སུཁཱནཾ ཝཱ ཨཱཡསྶ ཨཱགམནསྶ ཨབྷཱཝཱ ཨཔཱཡོ. དུཀྑསྶ གཏི པཊིསརཎནྟི དུགྒཏི, དོསབཧུལཏཱཡ ཝཱ དུཊྛེན ཀམྨུནཱ ནིབྦཏྟཱ གཏཱིཏི དུགྒཏི. ཝིཝསཱ ¶ ནིཔཏནྟི ཨེཏྠ དུཀྐཊཀཱརིནོཏི ཝིནིཔཱཏོ, ཝིནསྶནྟཱ ཝཱ ཨེཏྠ ནིཔཏནྟི སཾབྷིཛྫམཱནངྒཔཙྩངྒཱཏི ཝིནིཔཱཏོ. ནཏྠི ཨེཏྠ ཨསྶཱདསཉྙིཏོ ཨཡོཏི ནིརཡོ.

ཨཐ ཝཱ ཨཔཱཡགྒཧཎེན ཏིརཙྪཱནཡོནིཾ དཱིཔེཏི. ཏིརཙྪཱནཡོནི ཧི ཨཔཱཡོ སུགཏིཏོ ཨཔེཏཏྟཱ, ན དུགྒཏི མཧེསཀྑཱནཾ ནཱགརཱཛཱདཱིནཾ སམྦྷཝཏོ. དུགྒཏིགྒཧཎེན པེཏྟིཝིསཡཾ དཱིཔེཏི. སོ ཧི ཨཔཱཡོ ཙེཝ དུགྒཏི ཙ སུགཏིཏོ ཨཔེཏཏྟཱ དུཀྑསྶ ཙ གཏིབྷཱུཏཏྟཱ, ན ཏུ ཝིནིཔཱཏོ ཨསུརསདིསཾ ཨཝིནིཔཏིཏཏྟཱ. པེཏམཧིདྡྷིཀཱནཾ ཝིམཱནཱནིཔི ནིབྦཏྟནྟི. ཝིནིཔཱཏགྒཧཎེན ཨསུརཀཱཡཾ དཱིཔེཏི. སོ ཧི ཡཐཱཝུཏྟེནཏྠེན ཨཔཱཡོ ཙེཝ དུགྒཏི ཙ སབྦསམྤཏྟིསམུསྶཡེཧི ཝིནིཔཱཏཏྟཱ ཝིནིཔཱཏོཏི ཙ ཝུཙྩཏི. ནིརཡགྒཧཎེན པན ཨཝཱིཙིཨཱདིཀཾ ཨནེཀཔྤཀཱརཾ ནིརཡམེཝ དཱིཔེཏི. ཨུཔཔཛྫཏཱིཏི ནིབྦཏྟཏི.

ཨཱནིསཾསཀཐཱ ཝུཏྟཝིཔརིཡཱཡེན ཝེདིཏབྦཱ. ཨཡཾ པན ཝིསེསོ – སཱིལཝཱཏི སམཱདཱནཝསེན སཱིལཝཱ. སཱིལསམྤནྣོཏི པརིསུདྡྷཾ པརིཔུཎྞཉྩ ཀཏྭཱ སཱིལསྶ སམྤཱདནེན སཱིལསམྤནྣོ. བྷོགཀྑནྡྷནྟི བྷོགརཱསིཾ. སུགཏིཾ སགྒཾ ལོཀནྟི ཨེཏྠ སུགཏིགྒཧཎེན མནུསྶགཏིཔི སངྒཡ྄ཧཏི, སགྒགྒཧཎེན དེཝགཏི ཨེཝ. ཏཏྠ སུནྡརཱ གཏཱིཏི སུགཏི, རཱུཔཱདཱིཧི ¶ ཝིསཡེཧི སུཊྛུ ཨགྒོཏི སགྒོ, སོ སབྦོཔི ལུཛྫནཔལུཛྫནཊྛེན ལོཀོཏི.

པཱཊལིགཱམིཀེ ཨུཔཱསཀེ བཧུདེཝ རཏྟིཾ དྷམྨིཡཱ ཀཐཱཡཱཏི ཨཉྙཱཡཔི པཱལི༹མུཏྟཱཡ དྷམྨཀཐཱཡ ཙེཝ ཨཱཝསཐཱནུམོདནཀཐཱཡ ཙ. ཏདཱ ཧི བྷགཝཱ ཡསྨཱ ཨཛཱཏསཏྟུནཱ ཏཏྠ པཱཊལིཔུཏྟནགརཾ མཱཔེནྟེན ཨཉྙཱསུ གཱམནིགམརཱཛདྷཱནཱིསུ ཡེ སཱིལཱཙཱརསམྤནྣཱ ཀུཊུམྦིཀཱ, ཏེ ཨཱནེཏྭཱ དྷནདྷཉྙཱནི གྷརཝཏྠུཁེཏྟཝཏྠཱདཱིནི ཙེཝ པརིཧཱརཉྩ དཱཔེཏྭཱ ནིཝེསིཡནྟི, ཏསྨཱ པཱཊལིགཱམིཀཱ ཨུཔཱསཀཱ ཨཱནིསཾསདསྶཱཝིཏཱཡ ཝིསེསཏོ སཱིལགརུཀཱཏི སབྦགུཎཱནཉྩ སཱིལསྶ ཨདྷིཊྛཱནབྷཱཝཏོ ཏེསཾ པཋམཾ སཱིལཱནིསཾསེ པཀཱསེཏྭཱ ཏཏོ པརཾ ཨཱཀཱསགངྒཾ ཨོཏཱརེནྟོ ཝིཡ པཐཝོཛཾ ཨཱཀཌྜྷནྟོ ཝིཡ མཧཱཛམྦུཾ མཏྠཀེ གཧེཏྭཱ ཙཱལེནྟོ ཝིཡ ཡོཛནཔྤམཱཎཾ མཧཱམདྷུཾ ཙཀྐཡནྟེན པཱིལེ༹ཏྭཱ སུམདྷུརརསཾ པཱཡམཱནོ ཝིཡ ཙ པཱཊལིགཱམིཀཱནཾ ཨུཔཱསཀཱནཾ ཧིཏསུཁཱཝཧཾ པཀིཎྞཀཀཐཾ ཀཐེནྟོཔི ‘‘ཨཱཝཱསདཱནཾ ནཱམེཏཾ གཧཔཏཡོ མཧནྟཾ པུཉྙཾ, ཏུམྷཱཀཾ ཨཱཝཱསོ མཡཱ པརིབྷུཏྟོ, བྷིཀྑུསངྒྷེན པརིབྷུཏྟོ, མཡཱ ཙ བྷིཀྑུསངྒྷེན ཙ པརིབྷུཏྟེ དྷམྨརཏནེནཔི པརིབྷུཏྟོཡེཝ ཧོཏི, ཨེཝཾ ཏཱིཧི རཏནེཧི པརིབྷུཏྟེ ཨཔརིམེཡྻོཝ ཝིཔཱཀོ, ཨཔིཙ ཨཱཝཱསདཱནསྨིཾ དིནྣེ སབྦདཱནཾ དིནྣམེཝ ཧོཏི, བྷཱུམཊྛཀཔཎྞསཱལཱཡ ཝཱ སཱཁཱམཎྜཔསྶ ཝཱ སངྒྷཾ ཨུདྡིསྶ ཀཏསྶ ཨཱནིསཾསོ པརིཙྪིནྡིཏུཾ ན སཀྐཱ. ཨཱཝཱསདཱནཱནུབྷཱཝེན ¶ ཧི བྷཝེ ནིབྦཏྟམཱནསྶཔི སམྤཱིལི༹ཏགབྦྷཝཱསོ ནཱམ ན ཧོཏི, དྭཱདསཧཏྠོ ཨོཝརཀོ ཝིཡསྶ མཱཏུཀུཙྪི ཨསམྦཱདྷོཝ ཧོཏཱི’’ཏི ཨེཝཾ ནཱནཱནཡཝིཙིཏྟཾ བཧུཾ དྷམྨཀཐཾ ཀཐེཏྭཱ –

‘‘སཱིཏཾ ཨུཎྷཾ པཊིཧནྟི, ཏཏོ ཝཱལ༹མིགཱནི ཙ;

སརཱིསཔེ ཙ མཀསེ, སིསིརེ ཙཱཔི ཝུཊྛིཡོ.

‘‘ཏཏོ ཝཱཏཱཏཔོ གྷོརོ, སཉྫཱཏོ པཊིཧཉྙཏི;

ལེཎཏྠཉྩ སུཁཏྠཉྩ, ཛྷཱཡིཏུཉྩ ཝིཔསྶིཏུཾ.

‘‘ཝིཧཱརདཱནཾ སངྒྷསྶ, ཨགྒཾ བུདྡྷེན ཝཎྞིཏཾ;

ཏསྨཱ ཧི པཎྜིཏོ པོསོ, སམྤསྶཾ ཨཏྠམཏྟནོ.

‘‘ཝིཧཱརེ ¶ ཀཱརཡེ རམྨེ, ཝཱསཡེཏྠ བཧུསྶུཏེ;

ཏེསཾ ཨནྣཉྩ པཱནཉྩ, ཝཏྠསེནཱསནཱནི ཙ.

‘‘དདེཡྻ ཨུཛུབྷཱུཏེསུ, ཝིཔྤསནྣེན ཙེཏསཱ;

ཏེ ཏསྶ དྷམྨཾ དེསེནྟི, སབྦདུཀྑཱཔནཱུདནཾ;

ཡཾ སོ དྷམྨཾ ཨིདྷཉྙཱཡ, པརིནིབྦཱཏི ཨནཱསཝོ’’ཏི. (ཙཱུལ༹ཝ. ༢༩༥, ༣༡༥) –

ཨེཝཾ ཨཡམྤི ཨཱཝཱསདཱནེ ཨཱནིསཾསོ ཨཡམྤི ཨཱཝཱསདཱནེ ཨཱནིསཾསོཏི བཧུདེཝ རཏྟིཾ ཨཏིརེཀདིཡཌྜྷཡཱམཾ ཨཱཝཱསདཱནཱནིསཾསཾ ཀཐེསི. ཏཏྠ ཨིམཱ གཱཐཱཝ སངྒཧཾ ཨཱརུལ༹ྷཱ, པཀིཎྞཀདྷམྨདེསནཱ པན སངྒཧཾ ན ཨཱརོཧཏི. སནྡསྶེཏྭཱཏིཨཱདཱིནི ཝུཏྟཏྠཱནེཝ.

ཨབྷིཀྐནྟཱཏི ཨཏིཀྐནྟཱ དྭེ ཡཱམཱ གཏཱ. ཡསྶདཱནི ཏུམྷེ ཀཱལཾ མཉྙཐཱཏི ཡསྶ གམནསྶ ཏུམྷེ ཀཱལཾ མཉྙཐ, གམནཀཱལོ ཏུམྷཱཀཾ, གཙྪཐཱཏི ཝུཏྟཾ ཧོཏི. ཀསྨཱ པན བྷགཝཱ ཏེ ཨུཡྻོཛེསཱིཏི? ཨནུཀམྤཱཡ. ཏིཡཱམརཏྟིཉྷི ནིསཱིདིཏྭཱ ཝཱིཏིནཱམེནྟཱནཾ ཏེསཾ སརཱིརེ ཨཱབཱདྷོ ཨུཔྤཛྫེཡྻ, བྷིཀྑུསངྒྷོཔི ཙ མཧཱ, ཏསྶ སཡནནིསཛྫཱནཾ ཨོཀཱསཾ ལདྡྷུཾ ཝཊྚཏི, ཨིཏི ཨུབྷཡཱནུཀམྤཱཡ ཨུཡྻོཛེསི.

སུཉྙཱགཱརནྟི ¶ པཱཊིཡེཀྐཾ སུཉྙཱགཱརཾ ནཱམ ཏཏྠ ནཏྠི. ཏེ ཀིར གཧཔཏཡོ ཏསྶེཝ ཨཱཝསཐཱགཱརསྶ ཨེཀཔསྶེ པཊསཱཎིཾ པརིཀྑིཔཱཔེཏྭཱ ཀཔྤིཡམཉྩཾ པཉྙཔེཏྭཱ ཏཏྠ ཀཔྤིཡཔཙྩཏྠརཎཱནི ཨཏྠརིཏྭཱ ཨུཔརི སུཝཎྞརཛཏཏཱརཀགནྡྷམཱལཱདིདཱམཔཊིམཎྜིཏཾ ཝིཏཱནཾ བནྡྷིཏྭཱ གནྡྷཏེལཔདཱིཔཾ ཨཱརོཔཡིཾསུ ‘‘ཨཔྤེཝ ནཱམ སཏྠཱ དྷམྨཱསནཏོ ཝུཊྛཱཡ ཐོཀཾ ཝིསྶམེཏུཀཱམོ ཨིདྷ ནིཔཛྫེཡྻ, ཨེཝཾ ནོ ཨིདཾ ཨཱཝསཐཱགཱརཾ བྷགཝཏཱ ཙཏཱུཧི ཨིརིཡཱཔཐེཧི པརིབྷུཏྟཾ དཱིགྷརཏྟཾ ཧིཏཱཡ སུཁཱཡ བྷཝིསྶཏཱི’’ཏི. སཏྠཱཔི ཏདེཝ སནྡྷཱཡ ཏཏྠ སངྒྷཱཊིཾ པཉྙཔེཏྭཱ སཱིཧསེཡྻཾ ཀཔྤེསི. ཏཾ སནྡྷཱཡ ཝུཏྟཾ ‘‘སུཉྙཱགཱརཾ པཱཝིསཱི’’ཏི. ཏཏྠ པཱདདྷོཝནཊྛཱནཏོ པཊྛཱཡ ཡཱཝ དྷམྨཱསནཱ ཨགམཱསི, ཨེཏྟཀེ ཋཱནེ གམནཾ ནིཔྥནྣཾ. དྷམྨཱསནཾ པཏྭཱ ཐོཀཾ ཨཊྛཱསི, ཨིདཾ ཏཏྠ ཋཱནཾ. དྭེ ཡཱམེ དྷམྨཱསནེ ནིསཱིདི, ཨེཏྟཀེ ཋཱནེ ནིསཛྫཱ ནིཔྥནྣཱ. ཨུཔཱསཀེ ཨུཡྻོཛེཏྭཱ དྷམྨཱསནཏོ ཨོརུཡ྄ཧ ཡཐཱཝུཏྟེ ཋཱནེ སཱིཧསེཡྻཾ ཀཔྤེསི ¶ . ཨེཏཾ ཋཱནཾ བྷགཝཏཱ ཙཏཱུཧི ཨིརིཡཱཔཐེཧི པརིབྷུཏྟཾ ཨཧོསཱིཏི.

པཱཊལིགཱམཝཏྠུཀཐཱཝཎྞནཱ ནིཊྛིཏཱ.

སུནིདྷཝསྶཀཱརཝཏྠུཀཐཱཝཎྞནཱ

༢༨༦. སུནིདྷཝསྶཀཱརཱཏི (དཱི. ནི. ༢.༡༥༣; ཨུདཱ. ཨཊྛ. ༧༦) སུནིདྷོ ཙ ཝསྶཀཱརོ ཙ དྭེ བྲཱཧྨཎཱ. མགདྷམཧཱམཏྟཱཏི མགདྷརཉྙོ མཧཱཨམཙྩཱ, མགདྷརཊྛེ ཝཱ མཧཱམཏྟཱ, མཧཏིཡཱ ཨིསྶརིཡམཏྟཱཡ སམནྣཱགཏཱཏི མགདྷམཧཱམཏྟཱ. པཱཊལིགཱམེ ནགརཾ མཱཔེནྟཱིཏི པཱཊལིགཱམནྟསངྑཱཏེ བྷཱུམིཔྤདེསེ ནགརཾ མཱཔེནྟི, པུབྦེ ‘‘པཱཊལིགཱམོ’’ཏི ལདྡྷནཱམཾ ཋཱནཾ ཨིདཱནི ནགརཾ ཀཏྭཱ མཱཔེནྟཱིཏི ཨཏྠོ. ཝཛྫཱིནཾ པཊིབཱཧཱཡཱཏི ལིཙྪཝིརཱཛཱུནཾ ཨཱཡམུཁཔཙྪིནྡནཏྠཾ. ཝཏྠཱུནཱིཏི གྷརཝཏྠཱུནི གྷརཔཏིཊྛཱཔནཊྛཱནཱནི. ཙིཏྟཱནི ནམནྟི ནིཝེསནཱནི མཱཔེཏུནྟི རཉྙོ རཱཛམཧཱམཏྟཱནཉྩ ནིཝེསནཱནི མཱཔེཏུཾ ཝཏྠུཝིཛྫཱཔཱཋཀཱནཾ ཙིཏྟཱནི ནམནྟི. ཏེ ཀིར ཨཏྟནོ སིཔྤཱནུབྷཱཝེན ཧེཊྛཱཔཐཝིཡཾ ཏིཾསཧཏྠམཏྟེ ཋཱནེ ‘‘ཨིདྷ ནཱགཱནཾ ནིཝཱསཔརིགྒཧོ, ཨིདྷ ཡཀྑཱནཾ, ཨིདྷ བྷཱུཏཱནཾ ནིཝཱསཔརིགྒཧོ, ཨིདྷ པཱསཱཎོ ཝཱ ཁཱཎུཀོ ཝཱ ཨཏྠཱི’’ཏི ཛཱནནྟི, ཏེ ཏདཱ སིཔྤཾ ཛཔྤིཏྭཱ ཏཱདིསཾ སཱརམྦྷཊྛཱནཾ པརིཧརིཏྭཱ ཨནཱརམྦྷེ ཋཱནེ ཏཱཧི ཝཏྠུཔརིགྒཱཧིཀཱཧི དེཝཏཱཧི སདྡྷིཾ མནྟཡམཱནཱ ཝིཡ ཏཾཏཾགེཧཱནི མཱཔེནྟི.

ཨཐ ཝཱ ནེསཾ སརཱིརེ དེཝཏཱ ཨདྷིམུཙྩིཏྭཱ ཏཏྠ ཏཏྠ ནིཝེསནཱནི མཱཔེཏུཾ ཙིཏྟཾ ནཱམེནྟི. ཏཱ ཙཏཱུསུ ཀོཎེསུ ཁཱཎུཀེ ཀོཊྚེཏྭཱ ཝཏྠུམྷི གཧིཏམཏྟེ པཊིཝིགཙྪནྟི. སདྡྷཱནཾ ཀུལཱནཾ ¶ སདྡྷཱ དེཝཏཱ ཏཐཱ ཀརོནྟི, ཨསྶདྡྷཱནཾ ཀུལཱནཾ ཨསྶདྡྷཱ དེཝཏཱ ཙ. ཀིཾ ཀཱརཎཱ? སདྡྷཱནཉྷི ཨེཝཾ ཧོཏི ‘‘ཨིདྷ མནུསྶཱ ནིཝེསནཾ མཱཔེནྟཱ པཋམཾ བྷིཀྑུསངྒྷཾ ནིསཱིདཱཔེཏྭཱ མངྒལཾ ཝདཱཔེསྶནྟི, ཨཐ མཡཾ སཱིལཝནྟཱནཾ དསྶནཾ དྷམྨཀཐཾ པཉྷཝིསྶཛྫནཾ ཨནུམོདནཉྩ སོཏུཾ ལབྷིསྶཱམ, མནུསྶཱདཱནཾ དཏྭཱ ཨམྷཱཀཾ པཏྟིཾ དསྶནྟཱི’’ཏི. ཨསྶདྡྷཱ དེཝཏཱཔི ‘‘ཨཏྟནོ ཨིཙྪཱནུརཱུཔཾ ཏེསཾ པཊིཔཏྟིཾ པསྶིཏུཾ ཀཐཉྩ སོཏུཾ ལབྷིསྶཱམཱ’’ཏི ཏཐཱ ཀརོནྟི.

ཏཱཝཏིཾསེཧཱིཏི ¶ ཡཐཱ ཧི ཨེཀསྨིཾ ཀུལེ ཨེཀཾ པཎྜིཏཾ མནུསྶཾ, ཨེཀསྨིཉྩ ཝིཧཱརེ ཨེཀཾ བཧུསྶུཏཾ བྷིཀྑུཾ ཨུཔཱདཱཡ ‘‘ཨསུཀཀུལེ མནུསྶཱ པཎྜིཏཱ, ཨསུཀཝིཧཱརེ བྷིཀྑཱུ བཧུསྶུཏཱ’’ཏི སདྡོ ཨབྦྷུགྒཙྪཏི, ཨེཝམེཝཾ སཀྐཾ དེཝརཱཛཱནཾ ཝིསྶཀམྨཉྩ དེཝཔུཏྟཾ ཨུཔཱདཱཡ ‘‘ཏཱཝཏིཾསཱ པཎྜིཏཱ’’ཏི སདྡོ ཨབྦྷུགྒཏོ. ཏེནཱཧ ‘‘ཏཱཝཏིཾསེཧཱི’’ཏི. སེཡྻཐཱཔཱིཏིཨཱདིནཱ དེཝེཧི ཏཱཝཏིཾསེཧི སདྡྷིཾ མནྟེཏྭཱ ཝིཡ སུནིདྷཝསྶཀཱརཱ ནགརཾ མཱཔེནྟཱིཏི དསྶེཏི.

ཡཱཝཏཱ ཨརིཡཾ ཨཱཡཏནནྟི ཡཏྟཀཾ ཨརིཡམནུསྶཱནཾ ཨོསརཎཊྛཱནཾ ནཱམ ཨཏྠི. ཡཱཝཏཱ ཝཎིཔྤཐོཏི ཡཏྟཀཾ ཝཱཎིཛཱནཾ ཨཱཧཊབྷཎྜསྶ རཱསིཝསེནེཝ ཀཡཝིཀྐཡཊྛཱནཾ ནཱམ, ཝཱཎིཛཱནཾ ཝསནཊྛཱནཾ ཝཱ ཨཏྠི. ཨིདཾ ཨགྒནགརནྟི ཏེསཾ ཨརིཡཱཡཏནཝཎིཔྤཐཱནཾ ཨིདཾ ནགརཾ ཨགྒཾ བྷཝིསྶཏི ཛེཊྛཀཾ པཱམོཀྑཾ. པུཊབྷེདནནྟི བྷཎྜཔུཊབྷེདནཊྛཱནཾ, བྷཎྜགནྠིཀཱནཾ མོཙནཊྛཱནནྟི ཝུཏྟཾ ཧོཏི. སཀལཛམྦུདཱིཔེ ཨལདྡྷབྷཎྜམྤི ཧི ཨིདྷེཝ ལབྷིསྶཏི, ཨཉྙཏྠ ཝིཀྐཡཾ ཨགཙྪནྟམྤི ཨིདྷ ཝིཀྐཡཾ གཙྪིསྶཏི, ཏསྨཱ ཨིདྷེཝ པུཊཾ བྷིནྡིསྶཏཱིཏི ཨཏྠོ. ཨཱཡནྟི ཡཱནི ཙཏཱུསུ དྭཱརེསུ ཙཏྟཱརི, སབྷཱཡཾ ཨེཀནྟི ཨེཝཾ དིཝསེ དིཝསེ པཉྩསཏསཧསྶཱནི ཏཏྠ ཨུཊྛཧིསྶནྟི, ཏཱནིསྶ བྷཱཝཱིནི ཨཱཡཱནི དསྶེཏི. ཨགྒིཏོ ཝཱཏིཨཱདཱིསུ ཙ-ཀཱརཏྠོ ཝཱ-སདྡོ, ཨགྒིནཱ ཙ ཨུདཀེན ཙ མིཐུབྷེདེན ཙ ནསྶིསྶཏཱིཏི ཨཏྠོ. ཏསྶ ཧི ཨེཀོ ཀོཊྛཱསོ ཨགྒིནཱ ནསྶིསྶཏི, ནིབྦཱཔེཏུམྤི ནཾ ན སཀྑིསྶཏི, ཨེཀཾ ཀོཊྛཱསཾ གངྒཱ གཧེཏྭཱ གམིསྶཏི, ཨེཀོ ཨིམིནཱ ཨཀཐིཏཾ ཨམུསྶ, ཨམུནཱ ཨཀཐིཏཾ ཨིམསྶ ཝདནྟཱནཾ པིསུཎཝཱཙཱནཾ ཝསེན བྷིནྣཱནཾ མནུསྶཱནཾ ཨཉྙམཉྙབྷེདེན ཝིནསྶིསྶཏི.

ཨེཝཾ ཝཏྭཱ བྷགཝཱ པཙྩཱུསཀཱལེ གངྒཱཏཱིརཾ གནྟྭཱ ཀཏམུཁདྷོཝནོ བྷིཀྑཱཙཱརཀཱལཾ ཨཱགམཡམཱནོ ནིསཱིདི. སུནིདྷཝསྶཀཱརཱཔི ‘‘ཨམྷཱཀཾ རཱཛཱ སམཎསྶ གོཏམསྶ ཨུཔཊྛཱཀོ, སོ ཨམྷེ ཨུཔགཏེ པུཙྪིསྶཏི ‘སཏྠཱ ཀིར པཱཊལིགཱམཾ ཨགམཱསི, ཀིཾ ཏསྶ སནྟིཀཾ ཨུཔསངྐམིཏྠ, ན ཨུཔསངྐམིཏྠཱ’ཏི, ‘ཨུཔསངྐམིམྷཱ’ཏི ཙ ཝུཏྟེ ‘ནིམནྟཡིཏྠ, ན ནིམནྟཡིཏྠཱ’ཏི ¶ པུཙྪིསྶཏི, ‘ན ནིམནྟཡིམྷཱ’ཏི ཙ ཝུཏྟེ ཨམྷཱཀཾ དོསཾ ཨཱརོཔེཏྭཱ ནིགྒཎྷིསྶཏི, ཨིདཉྩཱཔི མཡཾ ཨཀཏཊྛཱནེ ནགརཾ མཱཔེམ, སམཎསྶ ཁོ ¶ པན གོཏམསྶ གཏགཏཊྛཱནེ ཀཱལ༹ཀཎྞིསཏྟཱ པཊིཀྐམནྟི, ཏཾ མཡཾ ནགརམངྒལཾ ཝཱཙཱཔེསྶཱམཱ’’ཏི ཙིནྟེཏྭཱ སཏྠཱརཾ ཨུཔསངྐམིཏྭཱ ནིམནྟཡིཾསུ. ཏེན ཝུཏྟཾ ‘‘ཨཐ ཁོ སུནིདྷཝསྶཀཱརཱ’’ཏིཨཱདི. པུབྦཎྷསམཡནྟི པུབྦཎྷཀཱལེ. ནིཝཱསེཏྭཱཏི གཱམཔྤཝེསནནཱིཧཱརེན ནིཝཱསནཾ ནིཝཱསེཏྭཱ ཀཱཡབནྡྷནཾ བནྡྷིཏྭཱ. པཏྟཙཱིཝརམཱདཱཡཱཏི པཏྟཉྩ ཙཱིཝརཉྩ ཨཱདིཡིཏྭཱ ཀཱཡཔཊིབདྡྷཾ ཀཏྭཱ, ཙཱིཝརཾ པཱརུཔིཏྭཱ པཏྟཾ ཧཏྠེན གཧེཏྭཱཏི ཨཏྠོ.

སཱིལཝནྟེཏྠཱཏི སཱིལཝནྟེ ཨེཏྠ ཨཏྟནོ ཝསནཊྛཱནེ. སཉྙཏེཏི ཀཱཡཝཱཙཱཙིཏྟེཧི སཉྙཏེ. ཏཱསཾ དཀྑིཎམཱདིསེཏི སངྒྷསྶ དིནྣེ ཙཏྟཱརོ པཙྩཡེ ཏཱསཾ གྷརདེཝཏཱནཾ ཨཱདིསེཡྻཔཏྟིཾ དདེཡྻ. པཱུཛིཏཱ པཱུཛཡནྟཱིཏི ‘‘ཨིམེ མནུསྶཱ ཨམྷཱཀཾ ཉཱཏཀཱཔི ན ཧོནྟི, ཏཐཱཔི ནོ པཏྟིཾ དེནྟཱིཏི ཨཱརཀྑཾ སུསཾཝིཧིཏཾ ཀརོཐཱ’’ཏི སུཊྛུ ཨཱརཀྑཾ ཀརོནྟི. མཱནིཏཱ མཱནཡནྟཱིཏི ཀཱལཱནུཀཱལཾ བལིཀམྨཀརཎེན མཱནིཏཱ ‘‘ཨེཏེ མནུསྶཱ ཨམྷཱཀཾ ཉཱཏཀཱཔི ན ཧོནྟི, ཏཐཱཔི ཙཏུམཱསཚམཱསནྟརེ ནོ བལིཀམྨཾ ཀརོནྟཱི’’ཏི མཱནེནྟི ཨུཔྤནྣཔརིསྶཡཾ ཧརནྟི. ཏཏོ ནནྟི ཏཏོ ནཾ པཎྜིཏཛཱཏིཀཾ མནུསྶཾ. ཨོརསནྟི ཨུརེ ཋཔེཏྭཱ སཾཝཌྜྷིཏཾ, ཡཐཱ མཱཏཱ ཨོརསཾ པུཏྟཾ ཨནུཀམྤཏི, ཨུཔྤནྣཔརིསྶཡཧརཎཏྠམེཝསྶ ཝཱཡམཏི, ཨེཝཾ ཨནུཀམྤནྟཱིཏི ཨཏྠོ. བྷདྲཱནི པསྶཏཱིཏི སུནྡརཱནི པསྶཏི.

ཨནུམོདིཏྭཱཏི ཏེཧི ཏདཱ པསུཏཔུཉྙསྶ ཨནུམོདནཝསེན ཏེསཾ དྷམྨཀཐཾ ཀཏྭཱ. སུནིདྷཝསྶཀཱརཱཔི ‘‘ཡཱ ཏཏྠ དེཝཏཱ ཨཱསུཾ, ཏཱསཾ དཀྑིཎམཱདིསེ’’ཏི བྷགཝཏོ ཝཙནཾ སུཏྭཱ དེཝཏཱནཾ པཏྟིཾ ཨདཾསུ. ཏཾ གོཏམདྭཱརཾ ནཱམ ཨཧོསཱིཏི ཏསྶ ནགརསྶ ཡེན དྭཱརེན བྷགཝཱ ནིཀྑམི, ཏཾ གོཏམདྭཱརཾ ནཱམ ཨཧོསི. གངྒཱཡ པན ཨུཏྟརཎཏྠཾ ཨནོཏིཎྞཏྟཱ གོཏམཏིཏྠཾ ནཱམ ནཱཧོསི. པཱུརཱཏི པུཎྞཱ. སམཏིཏྟིཀཱཏི ཏཱིརསམཾ ཨུདཀསྶ ཏིཏྟཱ བྷརིཏཱ. ཀཱཀཔེཡྻཱཏི ཏཱིརེ ཋིཏཀཱཀེཧི པཱཏུཾ སཀྐུཎེཡྻཨུདཀཱ. ཏཱིཧིཔི པདེཧི ཨུབྷཏོཀཱུལསམཾ པརིཔུཎྞབྷཱཝམེཝ ཝདཏི. ཨུལུ༹མྤནྟི པཱརགམནཏྠཱཡ ལཧུཀེ དཱརུདཎྜེ གཧེཏྭཱ ཀཝཱཊཕལཀེ ཝིཡ ཨཉྙམཉྙསམྦནྡྷེ ཀཱཏུཾ ཨཱཎིཡོ ཀོཊྚེཏྭཱ ནཱཝཱསངྑེཔེན ཀཏཾ. ཀུལླནྟི ཝེལུ༹ནལཱ༹དིཀེ སངྒྷརིཏྭཱ ཝལླིཨཱདཱིཧི ཀལཱཔཝསེན བནྡྷིཏྭཱ ཀཏཾ.

ཨེཏམཏྠཾ ¶ ཝིདིཏྭཱཏི ཨེཏཾ མཧཱཛནསྶ གངྒུདཀམཏྟསྶཔི ཀེཝལཾ ཏརིཏུཾ ཨསམཏྠཏཾ, ཨཏྟནོ པན བྷིཀྑུསངྒྷསྶ ཙ ཨཏིགམྦྷཱིརཝིཏྠཏཾ སཾསཱརམཧཎྞཝཾ ཏརིཏྭཱ ཋིཏབྷཱཝཉྩ སབྦཱཀཱརཏོ ¶ ཝིདིཏྭཱ ཏདཏྠཔརིདཱིཔནཾ ཨིམཾ ཨུདཱནཾ ཨུདཱནེསི. ཨུདཱནགཱཐཱཡ ཨཏྠོ པན ཨཊྛཀཐཱཡཾ དསྶིཏོཡེཝ. ཏཏྠ ཨུདཀཊྛཱནསྶེཏཾ ཨདྷིཝཙནནྟི ཡཐཱཝུཏྟསྶ ཡསྶ ཀསྶཙི ཨུདཀཊྛཱནསྶ ཨེཏཾ ཨཎྞཝནྟི ཨདྷིཝཙནཾ, ན སམུདྡསྶེཝཱཏི ཨདྷིཔྤཱཡོ. སརནྟི ཨིདྷ ནདཱི ཨདྷིཔྤེཏཱ སརཏི སནྡཏཱིཏི ཀཏྭཱ. གམྦྷཱིརཾ ཝིཏྠཏནྟི ཨགཱདྷཊྛེན གམྦྷཱིརཾ, སཀལལོཀཏྟཡབྱཱཔིཏཱཡ ཝིཏྠཏཾ. ཝིསཛྫཱཏི ཨནཱསཛྫ ཨཔྤཏྭཱ ཨེཝ པལླལཱནི ཏེསཾ ཨཏརཎཏོ. ཀུལླཉྷི ཛནོ བནྡྷཏཱིཏི ཀུལླཾ བནྡྷིཏུཾ ཨཱཡཱསཾ ཨཱཔཛྫཏི. ཝིནཱ ཨེཝ ཀུལླེནཱཏི ཨཱིདིསཾ ཨུདཀཾ ཀུལླེན ཨཱིདིསེན ཝིནཱ ཨེཝ. ཏིཎྞཱ མེདྷཱཝིནོ ཛནཱཏི ཨརིཡམགྒཉཱཎསངྑཱཏཱཡ མེདྷཱཡ སམནྣཱགཏཏྟཱ མེདྷཱཝིནོ བུདྡྷཱ ཙ བུདྡྷསཱཝཀཱ ཙ ཏིཎྞཱ པརཏཱིརེ པཏིཊྛིཏཱ.

སུནིདྷཝསྶཀཱརཝཏྠུཀཐཱཝཎྞནཱ ནིཊྛིཏཱ.

ཀོཊིགཱམེ སཙྩཀཐཱཝཎྞནཱ

༢༨༧. ཀོཊིགཱམོཏི མཧཱཔནཱདསྶ རཉྙོ པཱསཱདཀོཊིཡཾ ཀཏགཱམོ, པཏིཏསྶ པཱསཱདསྶ ཐུཔིཀཱཡ པཏིཊྛིཏཊྛཱནེ ནིཝིཊྛགཱམོཏི ཨཏྠོ. ཨརིཡསཙྩཱནནྟི ཡེ པཊིཝིཛ྄ཛྷནྟི, ཏེསཾ ཨརིཡབྷཱཝཀརཱནཾ སཙྩཱནཾ. ཨནནུབོདྷཱཏི ཨབུཛ྄ཛྷནེན ཨཛཱནནེན. ཨཔྤཊིཝེདྷཱཏི ཨཔྤཊིཝིཛ྄ཛྷནེན. ཨནུབོདྷོ ཙེཏྠ པུབྦབྷཱགིཡཉཱཎཾ, པཊིཝེདྷོ མགྒཉཱཎེན ཨབྷིསམཡོ. ཏཏྠ ཡསྨཱ ཨནུབོདྷཔུབྦཀོ པཊིཝེདྷོ ཨནུབོདྷེན ཝིནཱ ན ཧོཏི, ཨནུབོདྷོཔི ཨེཀཙྩོ པཊིཝེདྷསམྦནྡྷོ ཏདུབྷཡཱབྷཱཝཧེཏུཀཉྩ ཝཊྚེ སཾསརཎཾ, ཏསྨཱ ཝུཏྟཾ ‘‘ཨནནུབོདྷཱ…པེ… ཏུམྷཱཀཉྩཱ’’ཏི. ཏཏྠ སནྡྷཱཝིཏནྟི པཊིསནྡྷིགྒཧཎཝསེན བྷཝཏོ བྷཝནྟརུཔགམནེན སནྡྷཱཝིཏཾ. སཾསརིཏནྟི ཨཔརཱཔརཾ ཙཝནུཔཔཛྫནཝསེན སཾསརིཏཾ. མམཉྩེཝ ཏུམྷཱཀཉྩཱཏི མཡཱ ཙ ཏུམྷེཧི ཙ. ཨཐ ཝཱ སནྡྷཱཝིཏཾ སཾསརིཏནྟི སནྡྷཱཝནཾ སཾསརཎཾ མམཉྩེཝ ཏུམྷཱཀཉྩ ཨཧོསཱིཏི ཨེཝམེཏྠ ཨཏྠོ ཝེདིཏབྦོ.

སཾསིཏནྟི ¶ སཾསརིཏཾ. བྷཝནེཏྟི སམཱུཧཏཱཏི དཱིགྷརཛྫུཡཱ བདྡྷསཀུཎཾ ཝིཡ རཛྫུཧཏྠོ པུརིསོ དེསནྟརཾ, ཏཎྷཱརཛྫུཡཱ བདྡྷསཏྟསནྟཱནཾ ཨབྷིསངྑཱརོ བྷཝནྟརཾ ནེཏི ཨེཏཱཡཱཏི བྷཝནེཏྟི, སཱ བྷཝཏོ བྷཝཾ ནཡནསམཏྠཱ ཏཎྷཱརཛྫུ ཨརིཡམགྒསཏྠེན སུཊྛུ ཧཏཱ ཚིནྣཱ ཨཔྤཝཏྟིཀཏཱཏི བྷཝནེཏྟི སམཱུཧཏཱ.

ཨམྦཔཱལཱིཝཏྠུཀཐཱཝཎྞནཱ

༢༨༨. ཡཱནསྶ ¶ བྷཱུམཱིཏི ཡཏྠ སཀྐཱ ཧོཏི ཡཱནཾ ཨཱརུཡ྄ཧ ཡཱནེན གནྟུཾ, ཨཡཾ ཡཱནསྶ བྷཱུམི ནཱམ. ཡཱནཱ པཙྩོརོཧིཏྭཱཏི ཝིཧཱརསྶ བཧིདྭཱརཀོཊྛཀེ ཡཱནཏོ ཨོརོཧིཏྭཱ.

ལིཙྪཝཱིཝཏྠུཀཐཱཝཎྞནཱ

༢༨༩. ནཱིལཱཏི ཨིདཾ སབྦསངྒཱཧཀཝཙནཾ. ནཱིལཝཎྞཱཏིཨཱདི ཏསྶེཝ ཝིབྷཱགདསྶནཏྠཾ. ཏཏྠ ན ཏེསཾ པཀཏིཝཎྞོ ནཱིལོ, ནཱིལཝིལེཔནཝིལིཏྟཏྟཱ པནེཏཾ ཝུཏྟཾ. ནཱིལཝཏྠཱཏི པཊདུཀཱུལཀོསེཡྻཱདཱིནིཔི ནེསཾ ནཱིལཱནེཝ ཧོནྟི. ནཱིལཱལངྐཱརཱཏི ནཱིལམཎིཨལངྐཱརེཧི ནཱིལཔུཔྥེཧི ཙ ཨལངྐཏཱ. ཏེ ཀིར ཨལངྐཱརཱ སུཝཎྞཝིཙིཏྟཱཔི ཨིནྡནཱིལམཎིཨོབྷཱསེཧི ཨེཀནཱིལཱ ཝིཡ ཁཱཡནྟི, རཐཱཔི ནེསཾ ནཱིལམཎིཁཙིཏཱ ནཱིལཝཏྠཔརིཀྑིཏྟཱ ནཱིལདྷཛནཱིལཝམྨིཀེཧི ནཱིལཱབྷརཎེཧི ནཱིལཨསྶེཧི ཡུཏྟཱ, པཏོདཡཊྛིཡོཔི ནཱིལཱཡེཝཱཏི ཨིམིནཱ ནཡེན སབྦཔདེསུ ཨཏྠོ ཝེདིཏབྦོ. པཊིཝཊྚེསཱིཏི པཧརི. ཀིསྶ ཛེ ཨམྦཔཱལཱིཏི ཛེ-ཏི ཨཱལཔནཾ, བྷོཏི ཨམྦཔཱལི ཀིཾཀཱརཎཱཏི ཝུཏྟཾ ཧོཏི. སཱཧཱརནྟི ཨེཏྠ ཨཱཧརནྟི ཨིམསྨཱ རཱཛཔུརིསཱ བལིནྟི ཨཱཧཱརོ, ཏབྦྷུཏྟཛནཔདོ. ཏེན སཧིཏཾ སཱཧཱརཾ, སཛནཔདནྟི ཨཏྠོ. ཨངྒུལིཾ ཕོཊེསུནྟི ཨངྒུལིཾ ཙཱལེསུཾ. ཨམྦཀཱཡཱཏི མཱཏུགཱམེན. ཨུཔཙཱརཝཙནཉྷེཏཾ, ཨིཏྠཱིསུ ཡདིདཾ ཨམྦཀཱ མཱཏུགཱམོ ཛནནིཀཱཏི. ཨོལོཀེཐཱཏི པསྶཐ. ཨཔལོཀེཐཱཏི ཨཔཝཏྟིཏྭཱ ཨོལོཀེཐ, པུནཔྤུནཾ པསྶཐཱཏི ཨཏྠོ. ཨུཔསཾཧརཐཱཏི ཨུཔནེཐ, ཨིམཾ ལིཙྪཝཱིཔརིསཾ ཏུམྷཱཀཾ ཙིཏྟེན ཏཱཝཏིཾསསདིསཾ ཨུཔསཾཧརཐ ཨུཔནེཐ ཨལླཱིཡཱཔེཐ. ཡཐེཝ ཏཱཝཏིཾསཱ ¶ ཨབྷིརཱུཔཱ པཱསཱདིཀཱ ནཱིལཱདིནཱནཱཝཎྞཱ, ཨེཝམིམེ ལིཙྪཝཱིརཱཛཱནོཔཱིཏི ཏཱཝཏིཾསེཧི སམཀེ ཀཏྭཱ པསྶཐཱཏི ཨཏྠོ.

ཀསྨཱ པན བྷགཝཱ ཨནེཀསཏེཧི སུཏྟེཧི ཙཀྑཱདཱིནཾ རཱུཔཱདཱིསུ ནིམིཏྟགྒཱཧཾ པཊིསེདྷེཏྭཱ ཨིདྷ མཧནྟེན ཨུསྶཱཧེན ནིམིཏྟགྒཱཧེ ནིཡོཛེཏཱིཏི? ཧིཏཀཱམཏཱཡ ཏེསཾ བྷིཀྑཱུནཾ ཡཐཱ ཨཱཡསྨཏོ ནནྡསྶ ཧིཏཀཱམཏཱཡ སགྒསམྤཏྟིདསྶནཏྠཾ. ཏཏྲ ཀིར ཨེཀཙྩེ བྷིཀྑཱུ ཨོསནྣཝཱིརིཡཱ, ཏེ སམྤཏྟིཡཱ པལོབྷེནྟོ ‘‘ཨཔྤམཱདེན སམཎདྷམྨཾ ཀརོནྟཱནཾ ཨེཝརཱུཔཱ ཨིསྶརིཡསམྤཏྟི སུལབྷཱ’’ཏི སམཎདྷམྨེ ཨུསྶཱཧཛནནཏྠཾ ཨཱཧ. ཨཐ ཝཱ ནཡིདཾ ནིམིཏྟགྒཱཧེ ནིཡོཛནཾ, ཀེཝལཾ པན ‘‘དིབྦསམྤཏྟིསདིསཱ ཨེཏེསཾ རཱཛཱུནཾ ཨིསྶརིཡསམྤཏྟཱི’’ཏི ཨནུཔུབྦིཀཐཱཡ སམྤཏྟིཀཐནཾ ཝིཡ དཊྛབྦཾ. ཨནིཙྩལཀྑཎཝིབྷཱཝནཏྠཉྩཱཔི ཨེཝམཱཧ. ན ཙིརསྶེཝ ¶ ཧི སབྦེཔིམེ ཨཛཱཏསཏྟུསྶ ཝསེན ཝིནཱསཾ པཱཔུཎིསྶནྟི, ཨཐ ནེསཾ རཛྫསིརིསམྤཏྟིཾ དིསྭཱ ཋིཏབྷིཀྑཱུ ‘‘ཏཐཱརཱུཔཱཡཔི ནཱམ སིརིསམྤཏྟིཡཱ ཝིནཱསོ པཉྙཱཡིསྶཏཱི’’ཏི ཨནིཙྩལཀྑཎཾ བྷཱཝེཏྭཱ སཧ པཊིསམྦྷིདཱཧི ཨརཧཏྟཾ པཱཔུཎིསྶནྟཱིཏི ཨནིཙྩལཀྑཎཝིབྷཱཝནཏྠཾ ཨཱཧ.

ཨདྷིཝཱསེཏཱུཏི ཨམྦཔཱལིཡཱ ནིམནྟིཏབྷཱཝཾ ཉཏྭཱཔི ཀསྨཱ ནིམནྟེནྟཱིཏི? ཨསདྡཧནཏཱཡ ཙ ཝཏྟསཱིསེན ཙ. སཱ ཧི དྷུཏྟཱ ཨིཏྠཱི ཨནིམནྟེཏྭཱཔི ‘‘ནིམནྟེསི’’ནྟི ཝདེཡྻཱཏི ཏེསཾ ཨཧོསི. དྷམྨཾ སུཏྭཱ གམནཀཱལེ ཙ ནིམནྟེཏྭཱ གམནཾ ནཱམ མནུསྶཱནཾ ཝཏྟམེཝ.

ལིཙྪཝཱིཝཏྠུཀཐཱཝཎྞནཱ ནིཊྛིཏཱ.

སཱིཧསེནཱཔཏིཝཏྠུཀཐཱཝཎྞནཱ

༢༩༠. ཨབྷིཉྙཱཏཱཏི (ཨ. ནི. ཨཊྛ. ༣.༨.༡༢) ཉཱཏཱ པཉྙཱཏཱ པཱཀཊཱ. སནྠཱགཱརེཏི མཧཱཛནསྶ སནྠམྦྷནཱགཱརེ ཝིསྶམནཏྠཱཡ ཀཏེ ཨགཱརེ. སཱ ཀིར སནྠཱགཱརསཱལཱ ནགརམཛ྄ཛྷེ ཨཧོསི, ཙཏཱུསུ དྭཱརེསུ ཋིཏཱནཾ པཉྙཱཡཏི, ཙཏཱུཧི དིསཱཧི ཨཱགཏམནུསྶཱ པཋམཾ ཏཏྠ ཝིསྶམིཏྭཱ པཙྪཱ ཨཏྟནོ ཨཏྟནོ ཕཱསུཀཊྛཱནཾ གཙྪནྟི. རཱཛཀུལཱནཾ རཛྫཀིཙྩསནྠརཎཏྠཾ ཀཏཾ ¶ ཨགཱརནྟིཔི ཝདནྟིཡེཝ. ཏཏྠ ཧི ནིསཱིདིཏྭཱ ལིཙྪཝཱིརཱཛཱནོ རཛྫཀིཙྩཾ སནྠརནྟི ཀརོནྟི ཝིཙཱརེནྟི. སནྣིསིནྣཱཏི ཏེསཾ ནིསཱིདནཏྠཾཡེཝ པཉྙཏྟེསུ མཧཱརཧཔཙྩཏྠརཎེསུ སམུསྶིཏསེཏཙྪཏྟེསུ ཨཱསནེསུ སནྣིསིནྣཱ. ཨནེཀཔརིཡཱཡེན བུདྡྷསྶ ཝཎྞཾ བྷཱསནྟཱིཏི རཱཛཀུལཀིཙྩཉྩེཝ ལོཀཏྠཀིརིཡཉྩ ཝིཙཱརེཏྭཱ ཨནེཀེཧི ཀཱརཎེཧི བུདྡྷསྶ ཝཎྞཾ བྷཱསནྟི. པཎྜིཏཱ ཧི ཏེ རཱཛཱནོ སདྡྷཱསམྤནྣཱ སོཏཱཔནྣཱཔི སཀདཱགཱམིནོཔི ཨནཱགཱམིནོཔི ཨརིཡསཱཝཀཱ, ཏེ སབྦེཔི ལོཀིཡཛཊཾ བྷིནྡིཏྭཱ བུདྡྷཱདཱིནཾ ཏིཎྞཾ རཏནཱནཾ ཝཎྞཾ བྷཱསནྟི.

ཏཏྠ ཏིཝིདྷོ བུདྡྷཝཎྞོ ནཱམ ཙརིཡཝཎྞོ སརཱིརཝཎྞོ གུཎཝཎྞོཏི. ཏཏྲིམེ རཱཛཱནོ ཙརིཡཱཡ ཝཎྞཾ ཨཱརབྷིཾསུ – ‘‘དུཀྐརཾ ཝཏ ཀཏཾ སམྨཱསམྦུདྡྷེན ཀཔྤསཏསཧསྶཱདྷིཀཱནི ཙཏྟཱརི ཨསངྑྱེཡྻཱནི དས པཱརམིཡོ དས ཨུཔཔཱརམིཡོ དས པརམཏྠཔཱརམིཡོཏི སམཏིཾས པཱརམིཡོ པཱུརེནྟེན ཉཱཏཏྠཙརིཡཾ ལོཀཏྠཙརིཡཾ བུདྡྷཏྠཙརིཡཾ མཏྠཀཾ པཱཔེཏྭཱ པཉྩ མཧཱཔརིཙྩཱགེ པརིཙྩཛནྟེནཱ’’ཏི ཨཌྜྷཙྪཀྐེཧི ཛཱཏཀསཏེཧི བུདྡྷཝཎྞཾ ཀཐེནྟཱ ཏུསིཏབྷཝནཾ པཱཔེཏྭཱ ¶ ཋཔཡིཾསུ. དྷམྨསྶ ཝཎྞཾ བྷཱསནྟཱ པནེཏེ ‘‘བྷགཝཏཱ དྷམྨོ དེསིཏོ, ནིཀཱཡཏོ པཉྩ ནིཀཱཡཱ ཧོནྟི, པིཊཀཏོ ཏཱིཎི པིཊཀཱནི, ཨངྒཏོ ནཝ ཨངྒཱནི, ཁནྡྷཏོ ཙཏུརཱསཱིཏིདྷམྨཀྑནྡྷསཧསྶཱནཱི’’ཏི ཀོཊྛཱསཝསེན དྷམྨགུཎཾ ཀཐཡིཾསུ. སངྒྷསྶ ཝཎྞཾ བྷཱསནྟཱ ‘‘སཏྠུ དྷམྨདེསནཾ སུཏྭཱ པཊིལདྡྷསདྡྷཱ ཀུལཔུཏྟཱ བྷོགཀྑནྡྷཉྩེཝ ཉཱཏིཔརིཝཊྚཉྩ པཧཱཡ སེཏཙྪཏྟཨུཔརཛྫསེནཱཔཏིསེཊྛིབྷཎྜཱགཱརིཀཊྛཱནནྟརཱདཱིནི ཨགཎཡིཏྭཱ ནིཀྑམྨ སཏྠུ ཝརསཱསནེ པབྦཛནྟི, སེཏཙྪཏྟཾ པཧཱཡ པབྦཛིཏཱནཾ བྷདྡིཡམཧཱརཱཛམཧཱཀཔྤིནཔུཀྐུསཱཏིཨཱདིརཱཛཔབྦཛིཏཱནཾཡེཝ བུདྡྷཀཱལེ ཨསཱིཏི སཧསྶཱནི ཨཧེསུཾ, ཨནེཀཀོཊིདྷནཾ པཧཱཡ པབྦཛིཏཱནཾ པན ཡསཀུལཔུཏྟསོཎསེཊྛིཔུཏྟརཊྛཔཱལཔུཏྟཱདཱིནཾ པརིཙྪེདོ ནཏྠི, ཨེཝརཱུཔཱ ཙ ཨེཝརཱུཔཱ ཙ ཀུལཔུཏྟཱ སཏྠུ སཱསནེ པབྦཛནྟཱི’’ཏི པབྦཛྫཱསངྑེཔཝསེན སངྒྷགུཎཾ ཀཐཡིཾསུ.

སཱིཧོ སེནཱཔཏཱིཏི ཨེཝཾནཱམཀོ སེནཱཡ ཨདྷིཔཏི. ཝེསཱལིཡཉྷི སཏྟ སཧསྶཱནི སཏྟ སཏཱནི སཏྟ ཙ རཱཛཱནོ, ཏེ སབྦེཔི སནྣིཔཏིཏྭཱ སབྦེསཾ མནཾ གཧེཏྭཱ ‘‘རཊྛཾ ཝིཙཱརེཏུཾ སམཏྠཾ ཨེཀཾ ཝིཙིནཐཱ’’ཏི ཝིཙིནནྟཱ སཱིཧརཱཛཀུམཱརཾ དིསྭཱ ‘‘ཨཡཾ སཀྑིསྶཏཱི’’ཏི སནྣིཊྛཱནཾ ཀཏྭཱ ཏསྶ ¶ རཏྟམཎིཝཎྞཀམྦལཔརིཡོནདྡྷཾ སེནཱཔཏིཙྪཏྟཾ ཨདཾསུ. ཏཾ སནྡྷཱཡ ཝུཏྟཾ ‘‘སཱིཧོ སེནཱཔཏཱི’’ཏི. ནིགཎྛསཱཝཀོཏི ནིགཎྛསྶ ནཱཊཔུཏྟསྶ པཙྩཡདཱཡཀོ ཨུཔཊྛཱཀོ. ཛམྦུདཱིཔཏལསྨིཉྷི ཏཡོ ཛནཱ ནིགཎྛཱནཾ ཨགྒུཔཊྛཱཀཱ – ནཱལ༹ནྡཱཡཾ ཨུཔཱལི གཧཔཏི, ཀཔིལཔུརེ ཝཔྤོ སཀྐོ, ཝེསཱལིཡཾ ཨཡཾ སཱིཧོ སེནཱཔཏཱིཏི. ནིསིནྣོ ཧོཏཱིཏི སེསརཱཛཱུནམྤི པརིསཱཡ ཨནྟརེ ཨཱསནཱནི པཉྙཱཔཡིཾསུ, སཱིཧསྶ པན མཛ྄ཛྷེ ཋཱནེཏི ཏསྨིཾ པཉྙཏྟེ མཧཱརཧེ རཱཛཱསནེ ནིསིནྣོ ཧོཏི. ནིསྶཾསཡནྟི ནིབྦིཙིཀིཙྪཾ ཨདྡྷཱ ཨེཀཾསེན. ན ཧེཏེ ཡསྶ ཝཱ ཏསྶ ཝཱ ཨཔྤེསཀྑསྶ ཨེཝཾ ཨནེཀསཏེཧི ཀཱརཎེཧི ཝཎྞཾ བྷཱསནྟི.

ཡེན ནིགཎྛོ ནཱཊཔུཏྟོ ཏེནུཔསངྐམཱིཏི ནིགཎྛོ ཀིར ནཱཊཔུཏྟོ ‘‘སཙཱཡཾ སཱིཧོ ཀསྶཙིདེཝ སམཎསྶ གོཏམསྶ ཝཎྞཾ ཀཐེནྟསྶ སུཏྭཱ སམཎཾ གོཏམཾ དསྶནཱཡ ཨུཔསངྐམིསྶཏི, མཡ྄ཧཾ པརིཧཱནི བྷཝིསྶཏཱི’’ཏི ཙིནྟེཏྭཱ པཋམཏརཾཡེཝ སཱིཧཾ སེནཱཔཏིཾ ཨེཏདཝོཙ ‘‘སེནཱཔཏི ཨིམསྨིཾ ལོཀེ ‘ཨཧཾ བུདྡྷོ ཨཧཾ བུདྡྷོ’ཏི བཧཱུ ཝདནྟི, སཙེ ཏྭཾ ཀཉྩི དསྶནཱཡ ཨུཔསངྐམིཏུཀཱམོ ཨཧོསི, མཾ པུཙྪེཡྻཱསི, ཨཧཾ ཏེ ཡུཏྟཊྛཱནཉྙེཝ པེསེསྶཱམི, ཨཡུཏྟཊྛཱནཏོ ནིཝཱརེསྶཱམཱི’’ཏི. སོ ཏཾ ཀཐཾ ཨནུསྶརིཏྭཱ ‘‘སཙེ མཾ པེསེསྶཏི, གམིསྶཱམི. ནོ ཙེ, ན གམིསྶཱམཱི’’ཏི ཙིནྟེཏྭཱ ཡེན ནིགཎྛོ ནཱཊཔུཏྟོ ཏེནུཔསངྐམི.

ཨཐསྶ ཝཙནཾ སུཏྭཱ ནིགཎྛོ མཧཱཔབྦཏེན ཝིཡ བལཝསོཀེན ཨོཏྠཊོ ‘‘ཡཏྠ དཱནིསྶཱཧཾ ¶ གམནཾ ན ཨིཙྪཱམི, ཏཏྠེཝ གནྟུཀཱམོ ཛཱཏོ, ཧཏོཧམསྨཱི’’ཏི ཨནཏྟམནོ ཧུཏྭཱ ‘‘པཊིབཱཧནུཔཱཡམསྶ ཀརིསྶཱམཱི’’ཏི ཙིནྟེཏྭཱ ‘‘ཀིཾ པན ཏྭ’’ནྟིཨཱདིམཱཧ. ཨེཝཾ ཝདནྟོ ཙརནྟཾ གོཎཾ ཏུཎྜེ པཧརནྟོ ཝིཡ ཛལམཱནཾ པདཱིཔཾ ནིབྦཱཔེནྟོ ཝིཡ བྷཏྟབྷརིཏཾ པཏྟཾ ནིཀུཛྫནྟོ ཝིཡ ཙ སཱིཧསྶ ཨུཔྤནྣཾ པཱིཏིཾ ཝིནཱསེསི. གམིཀཱབྷིསངྑཱརོཏི ཧཏྠིཡཱནཱདཱིནཾ ཡོཛཱཔནགནྡྷམཱལཱདིགྒཧཎཝསེན པཝཏྟོ པཡོགོ. སོ པཊིཔྤསྶམྦྷཱིཏི སོ ཝཱུཔསནྟོ.

དུཏིཡམྤི ཁོཏི དུཏིཡཝཱརམྤི. ཨིམསྨིཉྩ ཝཱརེ བུདྡྷསྶ ཝཎྞཾ བྷཱསནྟཱ ཏུསིཏབྷཝནཏོ པཊྛཱཡ ཡཱཝ མཧཱབོདྷིཔལླངྐཱ དསབལསྶ ཧེཊྛཱ པཱདཏལེཧི ¶ ཨུཔརི ཀེསགྒེཧི པརིཙྪིནྡིཏྭཱ དྭཏྟིཾསམཧཱཔུརིསལཀྑཎཨསཱིཏིཨནུབྱཉྫནབྱཱམཔྤབྷཱཝསེན སརཱིརཝཎྞཾ ཀཐཡིཾསུ. དྷམྨསྶ ཝཎྞཾ བྷཱསནྟཱ ‘‘ཨེཀཔདེཔི ཨེཀབྱཉྫནེཔི ཨཝཀྑལིཏཾ ནཱམ ནཏྠཱི’’ཏི སུཀཐིཏཝསེནེཝ དྷམྨགུཎཾ ཀཐཡིཾསུ. སངྒྷསྶ ཝཎྞཾ བྷཱསནྟཱ ‘‘ཨེཝརཱུཔཾ ཡསསིརིཝིབྷཝཾ པཧཱཡ སཏྠུ སཱསནེ པབྦཛིཏཱ ན ཀོསཛྫཔཀཏིཀཱ ཧོནྟི, ཏེརསསུ པན དྷུཏགུཎེསུ པརིཔཱུརཀཱརིནོ ཧུཏྭཱ སཏྟསུ ཨནུཔསྶནཱསུ ཀམྨཾ ཀརོནྟི, ཨཊྛཏིཾས ཨཱརམྨཎཝིབྷཏྟིཡོ ཝལ༹ཉྫེནྟཱི’’ཏི པཊིཔདཱཝསེན སངྒྷགུཎེ ཀཐཡིཾསུ.

ཏཏིཡཝཱརེ པན བུདྡྷསྶ ཝཎྞཾ བྷཱསམཱནཱ ‘‘ཨིཏིཔི སོ བྷགཝཱ’’ཏི སུཏྟནྟཔརིཡཱཡེནེཝ བུདྡྷགུཎེ ཀཐཡིཾསུ, ‘‘སྭཱཀྑཱཏོ བྷགཝཏཱ དྷམྨོ’’ཏིཨཱདིནཱ སུཏྟནྟཔརིཡཱཡེནེཝ དྷམྨགུཎེ, ‘‘སུཔྤཊིཔནྣོ བྷགཝཏོ སཱཝཀསངྒྷོ’’ཏིཨཱདིནཱ སུཏྟནྟཔརིཡཱཡེནེཝ སངྒྷགུཎེ ཙ ཀཐཡིཾསུ. ཏཏོ སཱིཧོ ཙིནྟེསི ‘‘ཨིམེསཾ ལིཙྪཝཱིརཱཛཀུལཱནཾ ཏཏིཡདིཝསཏོ པཊྛཱཡ བུདྡྷདྷམྨསངྒྷགུཎེ ཀཐེནྟཱནཾ མུཁཾ ནཔྤཧོཏི, ཨདྡྷཱ ཨནོམགུཎསམནྣཱགཏོ སོ བྷགཝཱ, ཨིམཾ དཱནི ཨུཔྤནྣཾ པཱིཏིཾ ཨཝིཛཧིཏྭཱཝ ཨཧཾ ཨཛྫ སམྨཱསམྦུདྡྷཾ པསྶིསྶཱམཱི’’ཏི. ཨཐསྶ ‘‘ཀིཉྷི མེ ཀརིསྶནྟི ནིགཎྛཱ’’ཏི ཝིཏཀྐོ ཨུདཔཱདི. ཏཏྠ ཀིཉྷི མེ ཀརིསྶནྟཱིཏི ཀིཾ ནཱམ མཡ྄ཧཾ ནིགཎྛཱ ཀརིསྶནྟི. ཨཔལོཀིཏཱ ཝཱ ཨནཔལོཀིཏཱ ཝཱཏི ཨཱཔུཙྪིཏཱ ཝཱ ཨནཱཔུཙྪིཏཱ ཝཱ. ན ཧི མེ ཏེ ཨཱཔུཙྪིཏཱ ཡཱནཝཱཧནསམྤཏྟིཨིསྶརིཡཡསཝིསེསཾ དསྶནྟི, ནཱཔི ཨནཱཔུཙྪིཏཱ མཱརེསྶནྟི, ཨཕལཾ ཨེཏེསཾ ཨཱཔུཙྪནནྟི ཨདྷིཔྤཱཡོ.

དིཝཱ དིཝསྶཱཏི དིཝསྶ དིཝཱ མཛ྄ཛྷནྷིཀེ ཨཏིཀྐནྟམཏྟེ. ཝེསཱལིཡཱ ནིཡྻཱསཱིཏི ཡཐཱ ཧི གིམྷཀཱལེ དེཝེ ཝུཊྛེ ཨུདཀཾ སནྡམཱནཾ ནདིཾ ཨོཏརིཏྭཱ ཐོཀམེཝ གནྟྭཱ ཏིཊྛཏི ནཔྤཝཏྟཏི, ཨེཝཾ སཱིཧསྶ པཋམདིཝསེ ‘‘དསབལཾ པསྶིསྶཱམཱི’’ཏི ཨུཔྤནྣཱཡ པཱིཏིཡཱ ནིགཎྛེན པཊིབཱཧིཏཀཱལོ, ཡཐཱ དུཏིཡདིཝསེ དེཝེ ཝུཊྛེ ཨུདཀཾ སནྡམཱནཾ ནདིཾ ཨོཏརིཏྭཱ ཐོཀཾ ¶ གནྟྭཱ ཝཱལིཀཱཔུཉྫཾ པཧརིཏྭཱ ཨཔྤཝཏྟཾ ཧོཏི, ཨེཝཾ སཱིཧསྶ དུཏིཡདིཝསེ ‘‘དསབལཾ པསྶིསྶཱམཱི’’ཏི ཨུཔྤནྣཱཡ པཱིཏིཡཱ ནིགཎྛེན པཊིབཱཧིཏཀཱལོ, ཡཐཱ ཏཏིཡདིཝསེ དེཝེ ཝུཊྛེ ཨུདཀཾ སནྡམཱནཾ ནདིཾ ཨོཏརིཏྭཱ པུརཱཎཔཎྞསུཀྑདཎྜཀནལ༹ཀཙཝརཱདཱིནི པརིཀཌྜྷནྟཾ ཝཱལིཀཱཔུཉྫཾ བྷིནྡིཏྭཱ སམུདྡནིནྣམེཝ ¶ ཧོཏི, ཨེཝཾ སཱིཧོ ཏཏིཡདིཝསེ ཏིཎྞཾ ཝཏྠཱུནཾ གུཎཀཐཾ སུཏྭཱ ཨུཔྤནྣེ པཱིཏིཔཱམོཛྫེ ‘‘ཨཕལཱ ནིགཎྛཱ, ནིཔྥལཱ ནིགཎྛཱ, ཀིཾ མེ ཨིམེ ཀརིསྶནྟི, གམིསྶཱམཧཾ སཏྠུ སནྟིཀ’’ནྟི གམནཾ ཨབྷིནཱིཧརིཏྭཱ ཝེསཱལིཡཱ ནིཡྻཱསི. ནིཡྻནྟོ ཙ ‘‘ཙིརསྶཱཧཾ དསབལསྶ སནྟིཀཾ གནྟུཀཱམོ ཛཱཏོ, ན ཁོ པན མེ ཡུཏྟཾ ཨཉྙཱཏཀཝེསེན གནྟུ’’ནྟི ‘‘ཡེ ཀེཙི དསབལསྶ སནྟིཀཾ གནྟུཀཱམོ, སབྦེ ནིཀྑམནྟཱུ’’ཏི གྷོསནཾ ཀཱརེཏྭཱ པཉྩ རཐསཏཱནི ཡོཛཱཔེཏྭཱ ཨུཏྟམརཐེ ཋིཏོ ཏེཧི ཙེཝ པཉྩཧི རཐསཏེཧི མཧཏིཡཱ ཙ པརིསཱཡ པརིཝུཏོ གནྡྷཔུཔྥཙུཎྞཝཱསཱདཱིནི གཱཧཱཔེཏྭཱ ནིཡྻཱསི.

ཡེན བྷགཝཱ ཏེནུཔསངྐམཱིཏི ཨཱརཱམཾ པཝིསནྟོ དཱུརཏོཝ ཨསཱིཏིཨནུབྱཉྫནབྱཱམཔྤབྷཱདྭཏྟིཾསམཧཱཔུརིསལཀྑཎཱནི ཚབྦཎྞཱ གྷནབུདྡྷརསྨིཡོ དིསྭཱ ‘‘ཨེཝརཱུཔཾ ནཱམ པུརིསཾ ཨེཝཾ ཨཱསནྣེ ཝསནྟཾ ཨེཏྟཀཾ ཀཱལཾ ནཱདྡསཾ, ཝཉྩིཏོ ཝཏམྷི, ཨལཱབྷཱ ཝཏ མེ’’ཏི ཙིནྟེཏྭཱ མཧཱནིདྷིཾ དིསྭཱ དལིདྡཔུརིསོ ཝིཡ སཉྫཱཏཔཱིཏིཔཱམོཛྫོ ཡེན བྷགཝཱ ཏེནུཔསངྐམི. དྷམྨསྶ ཙཱནུདྷམྨཾ བྱཱཀརོནྟཱིཏི བྷོཏཱ གོཏམེན ཝུཏྟཀཱརཎསྶ ཨནུཀཱརཎཾ ཀཐེནྟི. ཀཱརཎཝཙནོ ཧེཏྠ དྷམྨ-སདྡོ ‘‘ཧེཏུམྷི ཉཱཎཾ དྷམྨཔཊིསམྦྷིདཱ’’ཏིཨཱདཱིསུ (ཝིབྷ. ༧༢༠) ཝིཡ. ཀཱརཎནྟི ཙེཏྠ ཏཐཱཔཝཏྟསྶ སདྡསྶ ཨཏྠོ ཨདྷིཔྤེཏོ ཏསྶ པཝཏྟིཧེཏུབྷཱཝཏོ. ཨཏྠཔྤཡུཏྟོ ཧི སདྡཔྤཡོགོ. ཨནུཀཱརཎནྟི ཙ སོ ཨེཝཾ པརེཧི ཏཐཱ ཝུཙྩམཱནོ. སཧདྷམྨིཀོ ཝཱདཱནུཝཱདོཏི པརེཧི ཝུཏྟཀཱརཎེན སཀཱརཎོ ཧུཏྭཱ ཏུམྷཱཀཾ ཝཱདོ ཝཱ ཏཏོ པརཾ ཏསྶ ཨནུཝཱདོ ཝཱ ཀོཙི ཨཔྤམཏྟཀོཔི ཝིཉྙཱུཧི གརཧིཏབྦཾ ཋཱནཾ ཀཱརཎཾ ན ཨཱགཙྪཏི. ཨིདཾ ཝུཏྟཾ ཧོཏི – ཀིཾ སབྦཱཀཱརེནཔི ཏཝ ཝཱདེ གཱརཡ྄ཧཀཱརཎཾ ནཏྠཱིཏི. ཨནབྦྷཀྑཱཏུཀཱམཱཏི ན ཨབྷཱུཏེན ཝཏྟུཀཱམཱ.

༢༩༡-༢༩༢. ཨཏྠི སཱིཧ པརིཡཱཡོཏིཨཱདཱིནཾ ཨཏྠོ ཝེརཉྫཀཎྜེ ཨཱགཏནཡེནེཝ ཝེདིཏབྦོ. པརམེན ཨསྶཱསེནཱཏི ཙཏུམགྒཙཏུཕལསངྑཱཏེན ཨུཏྟམཨསྶཱསེན. ཨསྶཱསཱཡ དྷམྨཾ དེསེཏཱིཏི ཨསྶཱསནཏྠཱཡ སནྠམྦྷནཏྠཱཡ དྷམྨཾ དེསེཏི. ཨིཏི བྷགཝཱ ཨཊྛཧངྒེཧི སཱིཧསེནཱཔཏིསྶ དྷམྨཾ དེསེཏི.

༢༩༣. ཨནུཝིཙྩཀཱརནྟི ¶ ཨནུཝིདིཏྭཱ ཙིནྟེཏྭཱ ཏུལཡིཏྭཱ ཀཱཏབྦཾ ཀརོཧཱིཏི ཝུཏྟ ཧོཏི. སཱདྷུ ཧོཏཱིཏི སུནྡརོ ཧོཏི. ཏུམྷཱདིསསྨིཉྷི མཾ དིསྭཱ མཾ སརཎཾ གཙྪནྟེ ནིགཎྛཾ དིསྭཱ ¶ ནིགཎྛཾ སརཎཾ གཙྪནྟེ ‘‘ཀིཾ ཨཡཾ སཱིཧོ དིཊྛདིཊྛམེཝ སརཎཾ གཙྪཏཱི’’ཏི གརཧཱ ཨུཔྤཛྫཏི, ཏསྨཱ ཨནུཝིཙྩཀཱརོ ཏུམྷཱདིསཱནཾ སཱདྷཱུཏི དསྶེཏི. པཊཱཀཾ པརིཧརེཡྻུནྟི ཏེ ཀིར ཨེཝརཱུཔཾ སཱཝཀཾ ལབྷིཏྭཱ ‘‘ཨསུཀོ ནཱམ རཱཛཱ ཝཱ རཱཛམཧཱམཏྟོ ཝཱ སེཊྛི ཝཱ ཨམྷཱཀཾ སརཎཾ གཏོ སཱཝཀོ ཛཱཏོ’’ཏི པཊཱཀཾ ཨུཀྑིཔིཏྭཱ ནགརེ གྷོསེནྟཱ ཨཱཧིཎྜནྟི. ཀསྨཱ? ‘‘ཨེཝཾ ནོ མཧནྟབྷཱཝོ ཨཱཝི བྷཝིསྶཏཱི’’ཏི ཙ, སཙེ པནསྶ ‘‘ཀིམཧཾ ཨེཏེ སརཎཾ གཏོ’’ཏི ཝིཔྤཊིསཱརོ ཨུཔྤཛྫེཡྻ, ཏམྤི སོ ‘‘ཨེཏེསཾ མེ སརཎགཏབྷཱཝཾ བཧཱུ ཛཱནནྟི, དུཀྐརཾ དཱནི པཊིནིཝཏྟིཏུ’’ནྟི ཝིནོདེཏྭཱ ན པཊིཀྐམིསྶཏཱིཏི ཙ. ཏེནཱཧ ‘‘པཊཱཀཾ པརིཧརེཡྻུ’’ནྟི. ཨོཔཱནབྷཱུཏནྟི པཊིཡཏྟཨུདཔཱནོ ཝིཡ ཋིཏཾ. ཀུལནྟི ཏཝ ནིཝེསནཾ. དཱཏབྦཾ མཉྙེཡྻཱསཱིཏི པུབྦེཔི དསཔི ཝཱིསཏིཔི སཊྛིཔི ཛནེ ཨཱགཏེ དིསྭཱ ནཏྠཱིཏི ཨཝཏྭཱ དེསི, ཨིདཱནི མཾ སརཎཾ གཏཀཱརཎམཏྟེནེཝ མཱ ཨིམེསཾ དེཡྻདྷམྨཾ ཨུཔཙྪིནྡིཏྠ, སམྤཏྟཱནཉྷི དཱཏབྦམེཝཱཏི ཨོཝདཏི. སུཏཾ མེ ཏཾ བྷནྟེཏི ཀུཏོ སུཏཾ? ནིགཎྛཱནཾ སནྟིཀཱ. ཏེ ཀིར ཀུལགྷརེསུ ཨེཝཾ པཀཱསེནྟི ‘‘མཡཾ ཡསྶ ཀསྶཙི སམྤཏྟསྶ དཱཏབྦནྟི ཝདཱམ, སམཎོ པན གོཏམོ ‘མཡ྄ཧམེཝ དཱནཾ དཱཏབྦཾ…པེ… ན ཨཉྙེསཾ སཱཝཀཱནཾ དིནྣཾ མཧཔྥལ’ནྟི ཨེཝཾ ཝདཏཱི’’ཏི. ཏཾ སནྡྷཱཡ ཨཡཾ ‘‘སུཏཾ མེ ཏ’’ནྟིཨཱདིམཱཧ.

༢༩༤. པཝཏྟམཾསནྟི པཀཏིཡཱ པཝཏྟཾ ཀཔྤིཡམཾསཾ, མཱུལཾ གཧེཏྭཱ ཨནྟརཱཔཎེ པརིཡེསཱཧཱིཏི ཨདྷིཔྤཱཡོ. སམྦཧུལཱ ནིགཎྛཱཏི པཉྩསཏམཏྟཱ ནིགཎྛཱ. ཐཱུལཾ པསུནྟི ཐཱུལཾ མཧཱསརཱིརཾ གོཀཎྞམཧིཾསསཱུཀརསངྑཱཏཾ པསུཾ. ཨུདྡིསྶཀཏནྟི ཨཏྟཱནཾ ཨུདྡིསིཏྭཱ ཀཏཾ, མཱརིཏནྟི ཨཏྠོ. པཊིཙྩཀམྨནྟི ཨེཏྠ ཀམྨ-སདྡོ ཀམྨསཱདྷནོ ཨཏཱིཏཀཱལིཀོཏི ཨཱཧ ‘‘ཨཏྟཱནཾ པཊིཙྩ ཀཏ’’ནྟི. ནིམིཏྟཀམྨསྶེཏཾ ཨདྷིཝཙནཾ ‘‘པཊིཙྩ ཀམྨཾ ཕུསཏཱི’’ཏིཨཱདཱིསུ (ཛཱ. ༡.༤.༧༥) ཝིཡ. ནིམིཏྟཀམྨསྶཱཏི ནིམིཏྟབྷཱཝེན ལདྡྷབྦཀམྨསྶ, ན ཀརཎཀཱརཱཔནཝསེན. པཊིཙྩཀམྨཾ ཨེཏྠ ཨཏྠཱིཏི མཾསཾ པཊིཙྩཀམྨཾ ཡཐཱ ‘‘བུདྡྷཾ ཨེཏསྶ ཨཏྠཱིཏི བུདྡྷོ’’ཏི. ཨཐ ཝཱ པཊིཙྩ ཀམྨཾ ཕུསཏཱིཏི ¶ པཱཋསེསོ དཊྛབྦོ, སྭཱཡཾ ཨེཏཾ མཾསཾ པཊིཙྩ ཏཾ པཱཎཝདྷཀཀམྨཾ ཕུསཏཱིཏི ཨཏྠོ. ཏཉྷི ཨཀུསལཾ ཨུཔཌྜྷཾ དཱཡཀསྶ, ཨུཔཌྜྷཾ པཊིགྒཱཧཀསྶ ཧོཏཱིཏི ནེསཾ ལདྡྷི. ཨུཔཀཎྞཀེཏི ཀཎྞམཱུལེ. ཨལནྟི པཊིཀྑེཔཝཙནཾ, ཧོཏུ ཀིཾ ཨིམིནཱཏི ཨཏྠོ. ན ཙ པན ཏེཏི ཨེཏེ ཨཱཡསྨནྟཱ དཱིགྷརཏྟཾ ཨཝཎྞཀཱམཱ ཧུཏྭཱ ཨཝཎྞཾ བྷཱསནྟཱཔི ཨབྦྷཱཙིཀྑནྟཱ ན ཛིརིདནྟི, ཨབྦྷཀྑཱནསྶ ཨནྟཾ ན གཙྪནྟཱིཏི ཨཏྠོ. ཨཐ ཝཱ ལཛྫནཏྠེ ཨིདཾ ཛིརིདནྟཱིཏི པདཾ དཊྛབྦཾ, ན ལཛྫནྟཱིཏི ཨཏྠོ.

སཱིཧསེནཱཔཏིཝཏྠུཀཐཱཝཎྞནཱ ནིཊྛིཏཱ.

ཀཔྤིཡབྷཱུམིཨནུཛཱནནཀཐཱཝཎྞནཱ

༢༩༥. ཨབྷིལཱཔམཏྟནྟི ¶ དེསནཱམཏྟཾ. ཨཱམིསཁཱདནཏྠཱཡཱཏི ཏཏྠ ཏཏྠ ཚཌྜིཏསྶ ཨཱམིསསྶ ཁཱདནཏྠཱཡ. ཨནུཔྤགེཡེཝཱཏི པཱཏོཡེཝ. ཨོརཝསདྡནྟི མཧཱསདྡཾ. ཏཾ པན ཨཝཏྭཱཔཱིཏི ཨནྡྷཀཊྛཀཐཱཡཾཝུཏྟནཡེན ཨཝཏྭཱཔི. པི-སདྡེན ཏཐཱ ཝཙནམྤི ཨནུཛཱནཱཏི. ཨཊྛཀཐཱསུ ཝུཏྟནཡེནཱཏི སེསཨཊྛཀཐཱསུ ཝུཏྟནཡེན. ‘‘ཀཔྤིཡཀུཊིཾ ཀརོམཱ’ཏི ཝཱ, ‘ཀཔྤིཡཀུཊཱི’ཏི ཝཱ ཝུཏྟེ སཱདྷཱརཎལཀྑཎ’’ནྟི སབྦཨཊྛཀཐཱསུ ཝུཏྟཨུསྶཱཝནནྟིཀཱཀུཊིཀརཎལཀྑཎཾ. ཙཡནྟི ཨདྷིཊྛཱནཾ. ཡཏོ པཊྛཱཡཱཏི ཡཏོ ཨིཊྛཀཏོ སིལཏོ མཏྟིཀཱཔིཎྜཏོ ཝཱ པཊྛཱཡ. པཋམིཊྛཀཱདཱིནཾ ཧེཊྛཱ ན ཝཊྚནྟཱིཏི བྷིཏྟིཡཱ པཋམིཊྛཀཱདཱིནཾ ཧེཊྛཱ བྷཱུམིཡཾ པཏིཊྛཱཔིཡམཱནཱ ཨིཊྛཀཱདཡོ བྷཱུམིགཏིཀཏྟཱ ‘‘ཀཔྤིཡཀུཊིཾ ཀརོམཱ’’ཏི ཝཏྭཱ པཏིཊྛཱཔེཏུཾ ན ཝཊྚནྟི. ཡདི ཨེཝཾ བྷཱུམིཡཾ ནིཁཎིཏྭཱ པཏིཊྛཱཔིཡམཱནཱ ཐམྦྷཱ ཀསྨཱ ཏཐཱ ཝཏྭཱ པཏིཊྛཱཔེཏུཾ ཝཊྚནྟཱིཏི ཨཱཧ ‘‘ཐམྦྷཱ པན…པེ… ཝཊྚནྟཱི’’ཏི. སངྒྷསནྟཀམེཝཱཏི ཝཱསཏྠཱཡ ཀཏཾ སངྒྷིཀསེནཱསནཾ སནྡྷཱཡ ཝདཏི. བྷིཀྑུསནྟཀནྟི ཝཱསཏྠཱཡ ཨེཝ ཀཏཾ བྷིཀྑུསྶ པུགྒལིཀསེནཱསནཾ. མུཁསནྣིདྷཱིཏི ཨིམིནཱ ཨནྟོཝུཏྠདུཀྐཊམེཝ དཱིཔིཏཾ.

ཀཔྤིཡབྷཱུམིཨནུཛཱནནཀཐཱཝཎྞནཱ ནིཊྛིཏཱ.

ཀེཎིཡཛཊིལཝཏྠུཀཐཱཝཎྞནཱ

༣༠༠. ཡེན ¶ ཨཱཔཎཾ ཏདཝསརཱིཏིཨཱདཱིསུ ཨཱཔཎནྟི ཨེཀསྶ ནིགམསྶེཏཾ ཨདྷིཝཙནཾ. ཏསྨིཾ ཀིར ནིགམེ ཝཱིསཏི ཨཱཔཎམུཁསཧསྶཱནི ཝིབྷཏྟཱནི ཨཧེསུཾ. ཨིཏི སོ ཨཱཔཎཱནཾ ཨུསྶནྣཏྟཱ ‘‘ཨཱཔཎ’’ནྟྭེཝ སངྑཾ གཏོ. ཏསྶ པན ནིགམསྶ ཨཝིདཱུརེ ནདཱིཏཱིརེ གྷནཙྪཱཡོ རམཎཱིཡབྷཱུམིབྷཱགོ མཧཱཝནསཎྜོ, ཏསྨིཾ བྷགཝཱ ཝིཧརཏི. ཀེཎིཡོཏི ཏསྶ ནཱམཾ. ཛཊིལོཏི ཨཱཧརིམཛཊཱདྷརོ ཏཱཔསོ. སོ ཀིར བྲཱཧྨཎམཧཱསཱལོ, དྷནརཀྑཎཏྠཱཡ པན ཏཱཔསཔབྦཛྫཾ སམཱདཱཡ རཉྙོ པཎྞཱཀཱརཾ དཏྭཱ བྷཱུམིབྷཱགཾ གཧེཏྭཱ ཏཏྠ ཨསྶམཾ ཀཱརེཏྭཱ པཉྩཧི སཀཊསཏེཧི ཝཎིཛྫཾ པཡོཛེཏྭཱ ཀུལསཧསྶསྶ ནིསྶཡོ ཧུཏྭཱ ཝསཏི. ཨསྶམེཔི ཙསྶ ཨེཀོ ཏཱལརུཀྑོ དིཝསེ དིཝསེ ཨེཀཾ སོཝཎྞམཡཾ ཕལཾ མུཉྩཏཱིཏི ཝདནྟི. སོ དིཝཱ ཀཱསཱཝཱནི དྷཱརེཏི, ཛཊཱ ཙ བནྡྷཏི, རཏྟིཾ ཀཱམསམྤཏྟིཾ ཨནུབྷཝཏི.

པཝཏྟཱརོཏི (དཱི. ནི. ཨཊྛ. ༡.༢༨༥; མ. ནི. ཨཊྛ. ༢.༤༢༧; ཨ. ནི. ཨཊྛ. ༣.༥.༡༩༢) པཝཏྟཡིཏཱརོ ¶ , པཱཝཙནཝསེན ཝཏྟཱརོཏི ཨཏྠོ. ཡེསནྟི ཡེསཾ སནྟཀཾ. མནྟཔདནྟི མནྟསདྡེ བཧིཀཏྭཱ རཧོ བྷཱསིཏབྦཊྛེན མནྟཱ ཨེཝ ཏཾཏཾཨཏྠཔཊིཔཏྟིཧེཏུཏཱཡ པདནྟི མནྟཔདཾ, ཝེདཝཙནཾ. གཱིཏནྟི ཨཊྛཀཱདཱིཧི དསཧི པོརཱཎབྲཱཧྨཎེཧི ཨུདཱཏྟཱནུདཱཏྟཱདིསརསམྤཏྟིཝསེན སཛ྄ཛྷཱཡིཏཾ. པཝུཏྟནྟི པཱཝཙནཝསེན ཨཉྙེསཾ ཝུཏྟཾ, ཝཱཙིཏནྟི ཨཏྠོ. སམིཧིཏནྟི སམུཔབྱཱུལ༹ྷཾ རཱསིཀཏཾ, ཨིརུཝེདཡཛུཝེདསཱམཝེདཱདིཝསེན ཏཏྠཱཔི པཙྩེཀཾ མནྟབྲཱཧྨཎཱདིཝསེན སཛ྄ཛྷཱཡནཝཱཙཀཱདིཝསེན ཙ པིཎྜཾ ཀཏྭཱ ཋཔིཏནྟི ཨཏྠོ. ཏདནུགཱཡནྟཱིཏི ཨེཏརཧི བྲཱཧྨཎཱ ཏཾ ཏེཧི པུབྦེ གཱིཏཾ ཨནུགཱཡནྟི ཨནུསཛ྄ཛྷཱཡནྟི. ཏདནུབྷཱསནྟཱིཏི ཏཾ ཨནུབྷཱསནྟི, ཨིདཾ པུརིམསྶེཝ ཝེཝཙནཾ. བྷཱསིཏམནུབྷཱསནྟཱིཏི ཏེཧི བྷཱསིཏཾ སཛ྄ཛྷཱཡིཏཾ ཨནུསཛ྄ཛྷཱཡནྟི. ཝཱཙིཏམནུཝཱཙེནྟཱིཏི ཏེཧི ཨཉྙེསཾ ཝཱཙིཏཾ ཨནུཝཱཙེནྟི. སེཡྻཐིདནྟི ཏེ ཀཏམེཏི ཨཏྠོ. ཨཊྛཀོཏིཨཱདཱིནི ཏེསཾ ནཱམཱནི. ཏེ ཀིར དིབྦཙཀྑུཔརིབྷཎྜེན ཡཐཱཀམྨཱུཔགཉཱཎེན སཏྟཱནཾ ཀམྨསྶཀཏཱདིཾ པུབྦེནིཝཱསཉཱཎེན ¶ ཨཏཱིཏཀཔྤེ བྲཱཧྨཎཱནཾ མནྟཛ྄ཛྷེནཝིདྷིཉྩ ཨོལོཀེཏྭཱ པརཱུཔགྷཱཏཾ ཨཀཏྭཱ ཀསྶཔསམྨཱསམྦུདྡྷསྶ བྷགཝཏོ ཝཊྚསནྣིསྶིཏེན ཝཙནེན སཧ སཾསནྡིཏྭཱ མནྟེ གནྠེསུཾ. ཨཔརཱཔརེ པན ཨོཀྐཱཀརཱཛཀཱལཱདཱིསུ ཨུཔྤནྣབྲཱཧྨཎཱ པཱཎཱཏིཔཱཏཱདཱིནི པཀྑིཔིཏྭཱ ཏཡོ ཝེདེ བྷིནྡིཏྭཱ བུདྡྷཝཙནེན སདྡྷིཾ ཝིརུདྡྷེ ཨཀཾསུ. རཏྟིབྷོཛནཾ རཏྟི, ཏཏོ ཨུཔརཏཱཏི རཏྟཱུཔརཏཱ. ཨཏིཀྐནྟེ མཛ྄ཛྷནྷིཀེ ཡཱཝ སཱུརིཡཏྠངྒམནཱ བྷོཛནཾ ཝིཀཱལབྷོཛནཾ ནཱམ, ཏཏོ ཝིརཏཏྟཱ ཝིརཏཱ ཝིཀཱལབྷོཛནཱ. པཊིཡཱདཱཔེཏྭཱཏི སཔྤིམདྷུསཀྐརཱདཱིཧི ཙེཝ མརིཙེཧི ཙ སུསངྑཏཾ པཱནཾ པཊིཡཱདཱཔེཏྭཱ.

‘‘མཧཱ ཁོ ཀེཎིཡ བྷིཀྑུསངྒྷོ’’ཏི ཀསྨཱ བྷགཝཱ པུནཔྤུནཾ པཊིཀྑིཔི? ཏིཏྠིཡཱནཾ པཊིཀྑེཔཔསནྣཏཱཡ. ཏིཏྠིཡཱ ཧི ‘‘ཨཧོ ཝཏཱཡཾ ཨཔྤིཙྪོ, ཡོ ནིམནྟིཡམཱནོཔི ན སཱདིཡཏཱི’’ཏི ཨུཔནིམནྟིཡམཱནསྶ པཊིཀྑེཔེ པསཱིདནྟཱིཏི ཀེཙི, ཨཀཱརཎཉྩེཏཾ. ནཏྠི བུདྡྷཱནཾ པཙྩཡཧེཏུ ཨེཝརཱུཔཾ ཀོཧཉྙཾ, ཨཡཾ པན ཨཌྜྷཏེལསཱནི བྷིཀྑུསཏཱནི དིསྭཱ ཨེཏྟཀཱནཾཡེཝ བྷིཀྑཾ པཊིཡཱདེསྶཏི, སྭེཝ སེལོ བྲཱཧྨཎོ ཏཱིཧི པུརིསསཏེཧི སདྡྷིཾ པབྦཛིསྶཏི, ཨཡུཏྟཾ ཁོ པན ནཝཀེ ཨཉྙཏོ པེསེཏྭཱ ཨིམེཧེཝ སདྡྷིཾ གནྟུཾ, ཨིམེ ཝཱ ཨཉྙཏོ པེསེཏྭཱ ནཝཀེཧི སདྡྷིཾ གནྟུཾ. ཨཐཱཔི སབྦེཝ གཧེཏྭཱ གམིསྶཱམི, བྷིཀྑཱཧཱརོ ནཔྤཧོསྶཏི. ཏཏོ བྷིཀྑཱུསུ པིཎྜཱཡ ཙརནྟེསུ མནུསྶཱ ཨུཛ྄ཛྷཱཡིསྶནྟི ‘‘ཙིརསྶམྤི ཀེཎིཡོ སམཎཾ གོཏམཾ ནིམནྟེཏྭཱ ཡཱཔནམཏྟཾ དཱཏུཾ ནཱསཀྑཱི’’ཏི, སཡཉྩ ཝིཔྤཊིསཱརཱི བྷཝིསྶཏི. པཊིཀྑེཔེ པན ཀཏེ ‘‘སམཎོ གོཏམོ པུནཔྤུནཾ ‘ཏྭཉྩ བྲཱཧྨཎེསུ ཨབྷིཔྤསནྣོ’ཏི བྲཱཧྨཎཱནཾ ནཱམཾ གཎྷཱཏཱི’’ཏི ཙིནྟེཏྭཱ བྲཱཧྨཎེཔི ནིམནྟེཏུཀཱམོ བྷཝིསྶཏི, ཏཏོ ¶ བྲཱཧྨཎེ པཱཊིཡེཀྐཾ ནིམནྟེསྶཏི, ཏེ ཏེན ནིམནྟིཏཱ བྷིཀྑཱུ ཧུཏྭཱ བྷུཉྫིསྶནྟི, ཨེཝམསྶ སདྡྷཱ ཨནུརཀྑིཏཱ བྷཝིསྶཏཱིཏི པུནཔྤུནཾ པཊིཀྑིཔི. ཀིཉྩཱཔི ཁོ བྷོ གོཏམཱཏི ཨིམིནཱ ཨིདཾ དཱིཔེཏི ‘‘བྷོ གོཏམ, ཀིཾ ཛཱཏཾ, ཡདི ཨཧཾ བྲཱཧྨཎེསུ ཨབྷིཔྤསནྣོ, ཨདྷིཝཱསེཏུ བྷཝཾ གོཏམོ, ཨཧཾ བྲཱཧྨཎཱནམྤི དཱཏུཾ སཀྐོམི ཏུམྷཱཀམྤཱི’’ཏི. ཋཔེཏྭཱ དྷཉྙཕལརསནྟི ཨེཏྠ ཏཎྜུལདྷོཝནོདཀམྤི དྷཉྙརསོཡེཝཱཏི ཝདནྟི. ཨནུཛཱནཱམི, བྷིཀྑཝེ, ཨུཙྪུརསནྟི ཨེཏྠ ནིཀྐསཊོ ཨུཙྪུརསོ སཏྟཱཧཀཱལིཀོཏི ཝེདིཏབྦཾ.

ཨིམཱཧི ¶ གཱཐཱཧཱིཏི (མ. ནི. ཨཊྛ. ༢.༤༠༠) ཨིམཱཧི ཀེཎིཡསྶ ཙིཏྟཱནུཀཱུལཱཧི གཱཐཱཧི. ཏཏྠ ཨགྒིཔརིཙརིཡཾ ཝིནཱ བྲཱཧྨཎཱནཾ ཡཉྙཱབྷཱཝཏོ ‘‘ཨགྒིཧུཏྟམུཁཱ ཡཉྙཱ’’ཏི ཝུཏྟཾ, ཨགྒིཧུཏྟསེཊྛཱ ཨགྒིཛུཧནཔྤདྷཱནཱཏི ཨཏྠོ. བྲཱཧྨཎཱ ཧི ‘‘ཨགྒིམུཁཱ དེཝཱ’’ཏི ཨགྒིཛུཧནཔུབྦཀཾ ཡཉྙཾ ཝིདཧནྟི. ཝེདེ སཛ྄ཛྷཱཡནྟེཧི པཋམཾ སཛ྄ཛྷཱཡིཏབྦཏོ སཱཝིཏྟཱི ‘‘ཚནྡསོ མུཁ’’ནྟི ཝུཏྟཱ, སཱཝིཏྟཱི ཝེདསྶ པུབྦངྒམཱཏི ཨཏྠོ ཏཾཔུབྦཀཏྟཱ ཝེདསཝནསྶ. མནུསྶཱནཾ སེཊྛབྷཱཝཏོ རཱཛཱ ‘‘མུཁ’’ནྟི ཝུཏྟོ. ཨོགཱཧནྟཱིནཾ ནདཱིནཾ ཨཱདྷཱརབྷཱཝཏོ གནྟབྦཊྛཱནབྷཱཝེན པཊིསརཎཏོ ཙ སཱགརོ ‘‘མུཁ’’ནྟི ཝུཏྟོ. ཙནྡསམཱཡོགེན ‘‘ཨཛྫ ཀཏྟིཀཱ, ཨཛྫ རོཧིཎཱི’’ཏི སཉྙཱཡནཏོ ནཀྑཏྟཱནི ཨབྷིབྷཝིཏྭཱ ཨཱལོཀཀརཎཏོ ནཀྑཏྟེཧི ཨཏིཝིསེསསོམྨབྷཱཝཏོ ཙ ‘‘ནཀྑཏྟཱནཾ མུཁཾ ཙནྡོ’’ཏི ཝུཏྟཾ. ‘‘དཱིཔསིཁཱ ཨགྒིཛཱལཱ ཨསནིཝིཙཀྐ’’ནྟི ཨེཝམཱདཱིནཾ ཏཔནྟཱནཾ ཝིཛྫུལཏཱནཾ ཨགྒཏྟཱ ཨཱདིཙྩོ ‘‘ཏཔཏཾ མུཁ’’ནྟི ཝུཏྟོ. དཀྑིཎེཡྻཱནཾ པན ཨགྒཏྟཱ ཝིསེསེན ཏསྨིཾ སམཡེ བུདྡྷཔྤམུཁཾ སངྒྷཾ སནྡྷཱཡ ‘‘པུཉྙཾ ཨཱཀངྑམཱནཱནཾ, སངྒྷོ ཝེ ཡཛཏཾ མུཁ’’ནྟི ཝུཏྟཾ. ཏེན སངྒྷོ པུཉྙསྶ ཨཱཡམུཁཾ ཨགྒདཀྑིཎེཡྻབྷཱཝེནཱཏི དསྶེཏི.

ཀེཎིཡཛཊིལཝཏྠུཀཐཱཝཎྞནཱ ནིཊྛིཏཱ.

རོཛམལླཝཏྠུཀཐཱཝཎྞནཱ

༣༠༡. རོཛཝཏྠུམྷི ཝིཧཱརོཏི གནྡྷཀུཊིཾ སནྡྷཱཡ ཨཱཧཾསུ. ཨཏརམཱནོཏི ཨཏུརནྟོ, སཎིཀཾ པདཔྤམཱཎཊྛཱནེ པདཾ ནིཀྑིཔནྟོ ཝཏྟཾ ཀཏྭཱ སུསམྨཊྛཾ མུཏྟཱདལསིནྡུཝཱརསནྠརསདིསཾ ཝཱལིཀཾ ཨཝིནཱསེནྟོཏི ཨཏྠོ. ཨཱལི༹ནྡནྟི པམུཁཾ. ཨུཀྐཱསིཏྭཱཏི ཨུཀྐཱསིཏསདྡཾ ཀཏྭཱ. ཨགྒལ༹ནྟི ཀཝཱཊཾ. ཨཱཀོཊེཧཱིཏི ཨགྒནཁེན ཨཱིསཀཾ ཀུཉྩིཀཚིདྡསམཱིཔེ ཀོཊེཧཱིཏི ཝུཏྟཾ ཧོཏི. དྭཱརཾ ཀིར ཨཏིཨུཔརི ཨམནུསྶཱ, ཨཏིཧེཊྛཱ ཏིརཙྪཱནཛཱཏིཀཱ ཀོཊེནྟི, ཏཐཱ ཨཀོཊེཏྭཱ མཛ྄ཛྷེ ཚིདྡསམཱིཔེ མནུསྶཱ ¶ ཀོཊེནྟི, ཨིདཾ དྭཱརཀོཊཀཝཏྟནྟི དཱིཔེནྟཱ ཝདནྟི. ཝིཝརི ¶ བྷགཝཱ དྭཱརནྟི ན བྷགཝཱ ཨུཊྛཱཡ དྭཱརཾ ཝིཝརི, ཝིཝརཏཱུཏི པན ཧཏྠཾ པསཱརེསི. ཏཏོ ‘‘བྷགཝཱ ཏུམྷེཧི ཨནེཀཱསུ ཀཔྤཀོཊཱིསུ དཱནཾ དདམཱནེཧི ན སཧཏྠཱ དྭཱརཝིཝརཎཀམྨཾ ཀཏ’’ནྟི སཡམེཝ དྭཱརཾ ཝིཝཊཾ. ཏཾ པན ཡསྨཱ བྷགཝཏོ མནེན ཝིཝཊཾ, ཏསྨཱ ‘‘ཝིཝརི བྷགཝཱ དྭཱར’’ནྟི ཝུཏྟཾ.

རོཛམལླཝཏྠུཀཐཱཝཎྞནཱ ནིཊྛིཏཱ.

ཝུཌྜྷཔབྦཛིཏཝཏྠུཀཐཱཝཎྞནཱ

༣༠༣. ཨཱཏུམཱཝཏྠུམྷི ཨཉྙཏརོ ཝུཌྜྷཔབྦཛིཏོཏི སུབྷདྡོ ནཱམ ཨཉྙཏརོ བྷིཀྑུ ཝུཌྜྷཀཱལེ པབྦཛིཏཏྟཱ ‘‘ཝུཌྜྷཔབྦཛིཏོ’’ཏི ཝུཏྟོ. དྭེ དཱརཀཱཏི སཱམཎེརབྷཱུམིཡཾ ཋིཏཱ དྭེ པུཏྟཱ. ནཱལི༹ཡཱཝཱཔཀེནཱཏི ནཱལི༹ཡཱ ཙེཝ ཐཝིཀཱཡ ཙ. སཾཧརིཾསཱུཏི ཡསྨཱ མནུསྶཱ ཏེ དཱརཀེ མཉྫུབྷཱཎིནེ པཊིབྷཱནཝནྟེ དིསྭཱ ཀཱརེཏུཀཱམཱཔི ཨཀཱརེཏུཀཱམཱཔི ཀཱརེནྟིཡེཝ, ཀཏཀཱལེ ཙ ‘‘ཀིཾ གཎྷིསྶཐ ཏཱཏཱ’’ཏི པུཙྪནྟི. ཏེ ཝདནྟི ‘‘ན ཨམྷཱཀཾ ཨཉྙེན ཀེནཙི ཨཏྠོ, པིཏཱ པན ནོ བྷགཝཏོ ཨཱགཏཀཱལེ ཡཱགུདཱནཾ ཀཱཏུཀཱམོ’’ཏི. ཏཾ སུཏྭཱ མནུསྶཱ ཨཔརིགཎེཏྭཱཝ ཡཾ ཏེ སཀྐོནྟི ཧརིཏུཾ, སབྦཾ དེནྟི. ཡམྤི ན སཀྐོནྟི, མནུསྶེཧི པེསེནྟི. ཏསྨཱ ཏེ དཱརཀཱ བཧུཾ ལོཎམྤི ཏེལམྤི སཔྤིམྤི ཏཎྜུལམྤི ཁཱདནཱིཡམྤི སཾཧརིཾསུ.

ཨཱཏུམཱཡཾ ཝིཧརཏཱིཏི ཨཱཏུམཾ ནིསྶཱཡ ཝིཧརཏི. བྷུསཱགཱརེཏི བྷུསམཡེ ཨགཱརཀེ. ཏཏྠ ཀིར མཧནྟཾ པལཱལཔུཉྫཾ ཨབྦྷནྟརཏོ པལཱལཾ ནིཀྐཌྜྷིཏྭཱ སཱལཱསདིསཾ པབྦཛིཏཱནཾ ཝསནཡོགྒཊྛཱནསདིསཾ ཀཏཾ, ཏདཱ བྷགཝཱ ཏཏྠ ཝསི. ཨཐ བྷགཝཏི ཨཱཏུམཾ ཨཱགནྟྭཱ བྷུསཱགཱརཀཾ པཝིཊྛེ སུབྷདྡོ སཱཡནྷསམཡཾ གཱམདྭཱརཾ གནྟྭཱ མནུསྶེ ཨཱམནྟེསི ‘‘ཨུཔཱསཀཱ ནཱཧཾ ཏུམྷཱཀཾ སནྟིཀཱ ཨཉྙཾ ཀིཉྩི པཙྩཱསཱིསཱམི, མཡ྄ཧཾ དཱརཀེཧི ཨཱནཱིཏཏེལཱདཱིནིཡེཝ སངྒྷསྶ པཧོནྟི, ཧཏྠཀམྨམཏྟཾ མེ དེཐཱ’’ཏི. ཀིཾ, བྷནྟེ, ཀརོམཱཏི? ‘‘ཨིདཉྩིདཉྩ གཎྷཐཱ’’ཏི སབྦཱུཔཀརཎཱནི གཱཧེཏྭཱ ཝིཧཱརེ ཨུདྡྷནཱནི ཀཱརེཏྭཱ ཨེཀཾ ཀཱལ༹ཀཾ ཀཱསཱཝཾ ནིཝཱསེཏྭཱ ཏཱདིསམེཝ པཱརུཔིཏྭཱ ‘‘ཨིདཾ ཀརོཐ, ཨིདཾ ཀརོཐཱ’’ཏི སབྦརཏྟིཾ ཝིཙཱརེནྟོ སཏསཧསྶཾ ཝིསྶཛྫེཏྭཱ བྷོཛྫཡཱགུཉྩ ¶ མདྷུགོལ༹ཀཉྩ པཊིཡཱདཱཔེསི. བྷོཛྫཡཱགུ ནཱམ པཋམཾ བྷུཉྫིཏྭཱ པཱཏབྦཡཱགུ, ཏཏྠ སཔྤིམདྷུཕཱཎིཏམཙྪམཾསཔུཔྥཕལརསཱདི ཡཾཀིཉྩི ཁཱདནཱིཡཾ ནཱམ, སབྦཾ པཝིསཏི, ཀཱིལི༹ཏུཀཱམཱནཾ སཱིསམཀྑནཡོགྒཱ ཧོཏི སུགནྡྷགནྡྷཱ.

ཨཐ ¶ བྷགཝཱ ཀཱལསྶེཝ སརཱིརཔཊིཛགྒནཾ ཀཏྭཱ བྷིཀྑུསངྒྷཔརིཝུཏོ པིཎྜཱཡ ཙརིཏུཾ ཨཱཏུམགཱམནགརཱབྷིམུཁོ པཱཡཱསི. མནུསྶཱ ཏསྶ ཨཱརོཙེསུཾ ‘‘བྷགཝཱ པིཎྜཱཡ གཱམཾ པཝིསཏི, ཏཡཱ ཀསྶ ཡཱགུ པཊིཡཱདིཏཱ’’ཏི. སོ ཡཐཱནིཝཏྠཔཱརུཏེཧེཝ ཏེཧི ཀཱལ༹ཀཀཱསཱཝེཧི ཨེཀེན ཧཏྠེན དབྦིཉྩ ཀཊཙྪུཉྩ གཧེཏྭཱ བྲཧྨཱ ཝིཡ དཀྑིཎཛཱཎུམཎྜལཾ བྷཱུམིཡཾ པཏིཊྛཱཔེཏྭཱ ཝནྡིཏྭཱ ‘‘པཊིགྒཎྷཱཏུ མེ, བྷནྟེ, བྷགཝཱ ཡཱགུ’’ནྟི ཨཱཧ. ཏེན ཝུཏྟཾ ‘‘ཨཐ ཁོ སོ ཝུཌྜྷཔབྦཛིཏོ ཏསྶཱ རཏྟིཡཱ ཨཙྩཡེན བཧུཏརཾ ཡཱགུཾ པཊིཡཱདཱཔེཏྭཱ བྷགཝཏོ ཨུཔནཱམེསཱི’’ཏི. ཛཱནནྟཱཔི ཏཐཱགཏཱ པུཙྪནྟཱིཏིཨཱདི ཝུཏྟནཡམེཝ. ཀུཏཱཡནྟི ཀུཏོ ཨཡཾ. སེསམེཏྠ ཨུཏྟཱནམེཝ.

༣༠༤. དསབྷཱགཾ དཏྭཱཏི དསམབྷཱགཾ དཏྭཱ. ཏེནེཝཱཧ ‘‘དས ཀོཊྛཱསེ ཀཏྭཱ ཨེཀོ ཀོཊྛཱསོ བྷཱུམིསཱམིཀཱནཾ དཱཏབྦོ’’ཏི.

ཝུཌྜྷཔབྦཛིཏཝཏྠུཀཐཱཝཎྞནཱ ནིཊྛིཏཱ.

ཙཏུམཧཱཔདེསཀཐཱཝཎྞནཱ

༣༠༥. པརིམདྡནྟཱཏི ཨུཔཔརིཀྑནྟཱ. པཏྟུཎྞདེསེ སཉྫཱཏཝཏྠཾ པཏྟུཎྞཾ. ཀོསེཡྻཝིསེསོཏི ཧི ཨབྷིདྷཱནཀོསེ ཝུཏྟཾ. ཙཱིནདེསེ སོམཱརདེསེ ཙ སཉྫཱཏཝཏྠཱནི ཙཱིནསོམཱརཔཊཱནི. པཏྟུཎྞཱདཱིནི ཏཱིཎི ཀོསེཡྻསྶ ཨནུལོམཱནི པཱཎཀེཧི ཀཏསུཏྟམཡཏྟཱ. ཨིདྡྷིམཡིཀཾ ཨེཧིབྷིཀྑཱུནཾ པུཉྙིདྡྷིཡཱ ནིབྦཏྟཙཱིཝརཾ. ཏཾ ཁོམཱདཱིནཾ ཨཉྙཏརཾ ཧོཏཱིཏི ཏེསཾཡེཝ ཨནུལོམཾ. དེཝཏཱཧི དིནྣཙཱིཝརཾ དེཝདཏྟིཡཾ. ཏཾ ཀཔྤརུཀྑེ ནིབྦཏྟཾ ཛཱལིནཱིདེཝཀཉྙཱཡ ཨནུརུདྡྷཏྠེརསྶ དིནྣཝཏྠསདིསཾ. ཏམྤི ཁོམཱདཱིནཉྙེཝ ཨནུལོམཾ ཧོཏི ཏེསུ ཨཉྙཏརབྷཱཝཏོ. དྭེ པཊཱ དེསནཱམེནེཝ ཝུཏྟཱཏི ཏེསཾ སརཱུཔདསྶནཔརམེཏཾ, ནཱཉྙཾ ནིཝཏྟནཔརཾ པཏྟུཎྞཔཊསྶཔི དེསནཱམེནེཝ ཝུཏྟཏྟཱ. ཏུམྦཱཏི བྷཱཛནཱནི ¶ . ཕལཏུམྦོཏི ལཱབུཨཱདི. ཨུདཀཏུམྦོཏི ཨུདཀུཀྑིཔནཀཀུཊཀོ. ཀིལཉྫཙྪཏྟནྟི ཝེལུ༹ཝིལཱིཝེཧི ཝཱཡིཏྭཱ ཀཏཚཏྟཾ. སམྦྷིནྣརསནྟི སམྨིསྶིཏརསཾ. པཱནཀཾ པཊིགྒཧིཏཾ ཧོཏཱིཏི ཨམྦཔཱནཱདིཔཱནཀཾ པཊིགྒཧིཏཾ ¶ ཧོཏི, ཏཾ ཝིཀཱལེཔི ཀཔྤཏི ཨསམྦྷིནྣརསཏྟཱ. ཏེན ཏདཧུཔཊིགྒཧིཏེན སདྡྷིནྟི ཏེན སཏྟཱཧཀཱལིཀེན ཏདཧུཔཊིགྒཧིཏེན སདྡྷིཾ. སེསམེཏྠ སུཝིཉྙེཡྻམེཝ.

ཙཏུམཧཱཔདེསཀཐཱཝཎྞནཱ ནིཊྛིཏཱ.

བྷེསཛྫཀྑནྡྷཀཝཎྞནཱ ནིཊྛིཏཱ.

༧. ཀཐིནཀྑནྡྷཀཾ

ཀཐིནཱནུཛཱནནཀཐཱཝཎྞནཱ

༣༠༦. ཀཐིནཀྑནྡྷཀེ ¶ ¶ སཱིསཝསེནཱཏི པདྷཱནངྒཝསེན. ‘‘ཀཐིནནྟི པཉྩཱནིསཾསེ ཨནྟོཀརཎསམཏྠཏཱཡ ཐིརནྟི ཨཏྠོ’’ཏི གཎྛིཔདེསུ ཝུཏྟཾ. ‘‘སོ ནེསཾ བྷཝིསྶཏཱི’’ཏི ཡུཛྫཏཱིཏི ‘‘སོ ཏུམྷཱཀ’’ནྟི ཨཝཏྭཱ ‘‘ནེས’’ནྟི ཝཙནཾ ཡུཛྫཏི. ཡེ ཨཏྠཏཀཐིནཱཏི ན ཀེཝལཾ ཏུམྷཱཀམེཝ, ཡེ ཨཉྙེཔི ཨཏྠཏཀཐིནཱ, ཏེསམྤི བྷཝིསྶཏཱིཏི ཨཏྠོ. ཨནཱམནྟེཏྭཱ ཙརཎནྟི ཙཱརིཏྟསིཀྑཱཔདེ ཝུཏྟནཡེན ཨནཱཔུཙྪིཏྭཱ ཀུལེསུ ཙརཎཾ. མཏཀཙཱིཝརནྟི མཏསྶ སནྟཀཾ ཙཱིཝརཾ. ཏཏྲུཔྤཱདེན ཨཱབྷཏནྟི ཝིཧཱརསནྟཀེན ཁེཏྟཝཏྠུཨཱདིནཱ ཨཱནཱིཏཾ.

པཋམཔཝཱརཎཱཡ པཝཱརིཏཱཏི ཨིདཾ ཝསྶཙྪེདཾ ཨཀཏྭཱ ཝསྶཾཝུཏྠབྷཱཝསནྡསྶནཏྠཾ ཝུཏྟཾ ཨནྟརཱཡེན ཨཔྤཝཱརིཏཱནམྤི ཝུཏྠཝསྶཱནཾ ཀཐིནཏྠཱརསམྦྷཝཏོ. ཏེནེཝ ‘‘ཨཔྤཝཱརིཏཱ ཝཱ’’ཏི ཨཝཏྭཱ ‘‘ཚིནྣཝསྶཱ ཝཱ པཙྪིམིཀཱཡ ཨུཔགཏཱ ཝཱ ན ལབྷནྟཱི’’ཏི ཨེཏྟཀམེཝ ཝུཏྟཾ. ཨཉྙསྨིཾ ཝིཧཱརེ ཝུཏྠཝསྶཱཔི ན ལབྷནྟཱིཏི ནཱནཱསཱིམཱཡ ཨཉྙསྨིཾ ཝིཧཱརེ ཝུཏྠཝསྶཱ ཨིམསྨིཾ ཝིཧཱརེ ཀཐིནཏྠཱརཾ ན ལབྷནྟཱིཏི ཨཏྠོ. ཁལིམཀྑིཏསཱཊཀོཏི ཨཧཏཝཏྠཾ སནྡྷཱཡ ཝུཏྟཾ. དཱནཀམྨཝཱཙཱཏི ཀཐིནདུསྶདཱནཀམྨཝཱཙཱ. ཨཀཱཏུཾ ན ལབྦྷཏཱིཏི ཨིམིནཱ ཨནཱདརིཡེན ཨཀརོནྟསྶ དུཀྐཊནྟི དཱིཔེཏི. ཀམྨཝཱཙཱ པན ཨེཀཱཡེཝ ཝཊྚཏཱིཏི ཀཐིནཏྠཱརསཱཊཀསྶ དཱནཀཱལེ ཝུཏྟཱ ཨེཀཱཡེཝ ཀམྨཝཱཙཱ ཝཊྚཏི. པུན ཏསྶ ཨཉྙསྨིཾ ཝཏྠེ དིཡྻམཱནེ ཀམྨཝཱཙཱཡ དཱཏབྦཀིཙྩཾ ནཏྠི, ཨཔལོཀནམེཝ ཨལནྟི ཨདྷིཔྤཱཡོ.

༣༠༨. མཧཱབྷཱུམིཀནྟི མཧཱཝིསཡཾ, ཙཏུཝཱིསཏིཨཱཀཱརཝནྟཏཱཡ མཧཱཝིཏྠཱརིཀནྟི ཝུཏྟཾ ཧོཏི. པཉྩཀནྟི པཉྩཁཎྜཾ. ཨེས ནཡོ སེསེསུཔི. པཋམཙིམིལིཀཱཏི ཀཐིནཝཏྠཏོ ཨཉྙཱ ཨཏྟནོ པཀཏིཙིམིལིཀཱ. ‘‘ཀུཙྪིཙིམིལིཀཾ ཀཏྭཱ སིབྦིཏམཏྟེནཱཏི ཐིརཛིཎྞཱནཾ ཙིམིལིཀཱནཾ ཨེཀཏོ ཀཏྭཱ སིབྦནསྶེཏཾ ཨདྷིཝཙན’’ནྟི གཎྛིཔདེསུ ཝུཏྟཾ. མཧཱཔཙྩརིཡཾ ཀུརུནྡིཡཉྩ ¶ ¶ ‘‘ཝུཏྟཝཙནནིདསྶནཾ བྱཉྫནེ ཨེཝ བྷེདོ, ཨཏྠེ ནཏྠཱིཏི དསྶནཏྠཾ ཀཏ’’ནྟི ཝདནྟི. པིཊྛིཨནུཝཱཏཱརོཔནམཏྟེནཱཏི དཱིགྷཏོ ཨནུཝཱཏསྶ ཨཱརོཔནམཏྟེན. ཀུཙྪིཨནུཝཱཏཱརོཔནམཏྟེནཱཏི པུཐུལཏོ ཨནུཝཱཏསྶ ཨཱརོཔནམཏྟེན. སཱརུཔྤཾ ཧོཏཱིཏི སམཎསཱརུཔྤཾ ཧོཏི. རཏྟིནིསྶགྒིཡེནཱཏི རཏྟིཨཏིཀྐནྟེན.

ཀཐིནཱནུཛཱནནཀཐཱཝཎྞནཱ ནིཊྛིཏཱ.

ཨཱདཱཡསཏྟཀཱདིཀཐཱཝཎྞནཱ

༣༡༡. ཨཡནྟི ཨཱསཱཝཙྪེདིཀོ ཀཐིནུདྡྷཱརོ. ཨིདྷ ན ཝུཏྟོཏི པཱལི༹ཡཾ མཱཏིཀཱཔདབྷཱཛནེ སཝནནྟིཀཱནནྟརཾ ན ཝུཏྟོ. ཏཏྠཱཏི ཏསྨིཾ སཱིམཱཏིཀྐནྟིཀེ ཀཐིནུདྡྷཱརེ. ‘‘སཱིམཱཏིཀྐནྟིཀོ ནཱམ ཙཱིཝརཀཱལསཱིམཱཏིཀྐནྟིཀོ’’ཏི ཀེནཙི ཝུཏྟཾ. ‘‘བཧིསཱིམཱཡཾ ཙཱིཝརཀཱལསམཡསྶ ཨཏིཀྐནྟཏྟཱ སཱིམཱཏིཀྐནྟིཀོ’’ཏི ཨཡཾ ཨམྷཱཀཾ ཁནྟི. སཧུབྦྷཱརེ ‘‘སོ ཀཏཙཱིཝརོ’’ཏི པཱཋོ དིསྶཏི, ཨེཝཉྩ སཏི ཙཱིཝརཔལིབོདྷོ པཋམཾ ཚིཛྫཏཱིཏི ཝིཉྙཱཡཏི, ཨིདྷ པན པརིཝཱརཔཱལི༹ཡཉྩ ‘‘དྭེ པལིབོདྷཱ ཨཔུབྦཾ ཨཙརིམཾ ཚིཛྫནྟཱི’’ཏི (པརི. ༤༡༥) ཝཙནཏོ ཏཾ ན སམེཏི, ཏསྨཱ ཝཱིམཾསིཏབྦམེཏྠ ཀཱརཎཾ.

༣༡༢. ‘‘སམཱདཱཡཝཱརོ ཨཱདཱཡཝཱརསདིསོ, ཨུཔསགྒམཏྟམེཏྠ ཝིསེསོ’’ཏི གཎྛིཔདེསུ ཝུཏྟཾ. ཀེཙི པན ‘‘སབྦཾ ཨཏྟནོ པརིཀྑཱརཾ ཨནཝསེསེཏྭཱ པཀྐམནྟོ ‘སམཱདཱཡ པཀྐམཏཱི’ཏི ཝུཙྩཏཱི’’ཏི ཝདནྟི. པུན སམཱདཱཡཝཱརེཔི ཏེཡེཝ དསྶིཏཱཏི སམྦནྡྷོ. ཝིཔྤཀཏཙཱིཝརེ པཀྐམནནྟིཀསྶ ཀཐིནུདྡྷཱརསྶ ཨསམྦྷཝཏོ ‘‘ཡཐཱསམྦྷཝ’’ནྟི ཝུཏྟཾ. པཀྐམནནྟིཀོ ཧི ཀཐིནུདྡྷཱརོ ནིཊྛིཏཙཱིཝརསྶེཝ ཝསེན ཝུཏྟོ ‘‘བྷིཀྑུ ཨཏྠཏཀཐིནོ ཀཏཙཱིཝརཾ ཨཱདཱཡ པཀྐམཏཱི’’ཏི ཝུཏྟཏྟཱ, ཏསྨཱ སོ ཝིཔྤཀཏཙཱིཝརོ ན སམྦྷཝཏཱིཏི ཚལེ༹ཝ ཨུབྦྷཱརཱ ཏཏྠ དསྶིཏཱ.

ཏཏྲཱཡཾ ཨཱདིཏོ པཊྛཱཡ ཝཱརཝིབྷཱཝནཱ – ཨཱདཱཡཝཱརཱ སཏྟ, ཏཐཱ སམཱདཱཡཝཱརཱཏི དྭེ སཏྟཀཝཱརཱ, ཏཏོ པཀྐམནནྟིཀཾ ཝཛྫེཏྭཱ ཝིཔྤཀཏཙཱིཝརསྶ ཨཱདཱཡསམཱདཱཡཝཱརཝསེན དྭེ ཚཀྐཝཱརཱ, ཏཏོ པརཾ ¶ ནིཊྛཱནསནྣིཊྛཱནནཱསནནྟིཀཱནཾ ཝསེན ཏཱིཎི ཏིཀཱནི དསྶིཏཱནི. ཏཏྠ པཋམཏྟིཀཾ ཨནྟོསཱིམཱཡཾ ‘‘པཙྩེསྶཾ ན པཙྩེསྶ’’ནྟི ཨིམཾ ཝིདྷིཾ ཨནཱམསིཏྭཱ བཧིསཱིམཱཡམེཝ ‘‘ན པཙྩེསྶ’’ནྟི པཝཏྟཾ, ཏསྨཱ པཀྐམནནྟིཀསཱིམཱཏིཀྐནྟིཀསཨུབྦྷཱརཱ ཏཏྠ ¶ ན ཡུཛྫནྟི. དུཏིཡཏྟིཀཾ ཨནྟོསཱིམཱཡཾ ‘‘ན པཙྩེསྶ’’ནྟི པཝཏྟཾ. ཏཏིཡཏྟིཀཾ ཨནདྷིཊྛིཏ-པདེན ཝིསེསེཏྭཱ པཝཏྟཾ, ཨཏྠཏོ པཋམཏྟིཀེན སམེཏི. ཨནདྷིཊྛིཏེནཱཏི ཙ ‘‘པཙྩེསྶཾ ན པཙྩེསྶ’’ནྟི ཨེཝཾ ཨནདྷིཊྛིཏེན, ཨནིཡམིཏེནཱཏི ཨཏྠོ. ཏཏིཡཏྟིཀཱནནྟརཾ ཙཏུཏྠཏྟིཀཾ སམྦྷཝནྟཾ ཨནྟོསཱིམཱཡཾ ‘‘པཙྩེསྶ’’ནྟི ཝཙནཝིསེསེན སམྦྷཝཏི. ཏཐཱ ཙ ཡོཛིཡམཱནཾ ཨིཏརེཧི སཝནནྟིཀཱདཱིཧི ཨཝིརུདྡྷཾ ཧོཏཱིཏི ཙཏུཏྠཏྟིཀཾ ཨཧུཏྭཱ ཚཀྐཾ ཛཱཏནྟི ཝེདིཏབྦཾ. ཨེཝཾ ཏཱིཎི ཏིཀཱནི ཨེཀཾ ཚཀྐཉྩཱཏི པཋམཾ པནྣརསཀཾ ཝེདིཏབྦཾ.

༣༡༦-༣༢༠. ཏཏོ ཨིདམེཝ པནྣརསཀཾ ཨུཔསགྒཝིསེསེན དུཏིཡཾ སམཱདཱཡཔནྣརསཀཾ ནཱམ ཀཏཾ. པུན ‘‘ཝིཔྤཀཏཙཱིཝརཾ ཨཱདཱཡཱ’’ཏི ཏཏིཡཾ པནྣརསཀཾ, ‘‘སམཱདཱཡཱ’’ཏི ཙཏུཏྠཾ པནྣརསཀཾ དསྶིཏནྟི ཨེཝཾ ཙཏྟཱརི པནྣརསཀཱནི ཝེདིཏབྦཱནི. ཏཏྠ པཋམདུཏིཡེསུ པནྣརསཀེསུ སབྦེན སབྦཾ ཨཀཏཙཱིཝརཾ ཨདྷིཔྤེཏཾ, ཨིཏརེསུ དྭཱིསུ ཝིཔྤཀཏནྟི ཝེདིཏབྦཾ. ཏཏོ པརཾ ‘‘ཙཱིཝརཱསཱཡ པཀྐམཏཱི’’ཏིཨཱདིནཱ ནཡེན ནིཊྛཱནསནྣིཊྛཱནནཱསནཨཱསཱཝཙྪེདིཀཝསེན ཨེཀོ ཝཱརོཏི ཨིདམེཀཾ ཙཏུཀྐཾ ཛཱཏཾ, ཏསྨཱ པུབྦེ ཝུཏྟཱནི ཏིཀཱནི ཨཱསཱཝཙྪེདིཀཱནི ཏཱིཎི ཙ ཏིཀཱནཱིཏི ཨེཏཾ ཨནཱསཱཡདྭཱདསཀནྟི ཝེདིཏབྦཾ. ཏདནནྟརེ ཨཱསཱཡདྭཱདསཀེ ཀིཉྩཱཔི པཋམཾ དྭཱདསཀཾ ལབྦྷཏི, ཏཐཱཔི ཏཾ ནིབྦིསེསནྟི ཏམེཀཾ དྭཱདསཀཾ ཨཝུཏྟསིདྡྷཾ ཀཏྭཱ ཝིསེསཏོ དསྶེཏུཾ ཨཱདིཏོ པཊྛཱཡ ‘‘ཨནྟོསཱིམཱཡཾ པཙྩེསྶ’’ནྟི ཝུཏྟཾ. ཏཾ དུཏིཡཙཏུཀྐེ ‘‘སོ བཧིསཱིམགཏོ སུཎཱཏཱི’’ཏིཨཱདིཝཙནསྶ ཏཏིཡཙཏུཀྐེ སཝནནྟིཀཱདཱིནཉྩ ཨོཀཱསཀརཎཏྠནྟི ཝེདིཏབྦཾ. ཨིདཾ པན དྭཱདསཀཾ ཨནཱསཱཡཝསེནཔི ལབྦྷམཱནཾ ཨིམིནཱ ཨཝུཏྟསིདྡྷཾ ཀཏྭཱ ན དསྶིཏནྟི ཝེདིཏབྦཾ. ཨེཝམེཏྠ དྭེ དྭཱདསཀཱནི ཨུདྡྷརིཏབྦཱནི. ཀརཎཱིཡདྭཱདསཀེཔི ཡཐཱདསྶིཏཾ ཨནཱསཱཡདྭཱདསཀཾ ཨཝུཏྟསིདྡྷཾ ཨཱསཱཡདྭཱདསཀཉྩཱཏི དྭེ དྭཱདསཀཱནི ཨུདྡྷརིཏབྦཱནི.

༣༢༡-༣༢༢. ཡསྨཱ དིསཾགམིཀནཝཀེ ‘‘དིསཾགམིཀོ པཀྐམཏཱི’’ཏི ཝཙནེནེཝ ‘‘ན པཙྩེསྶ’’ནྟི ཨིདཾ ཨཝུཏྟསིདྡྷམེཝ, ཏསྨཱ ཏཾ ན ཝུཏྟཾ. ཨེཏྟཱཝཏཱ ¶ ཙ ཨཱཝཱསཔལིབོདྷཱབྷཱཝོ དསྶིཏོ. ཙཱིཝརཔཊིཝཱིསཾ ཨཔཝིལཱཡམཱནོཏི ཨིམིནཱ ཙཱིཝརཔལིབོདྷསམངྒིཏམསྶ དསྶེཏི. ཏཏྠ ཙཱིཝརཔཊིཝཱིསནྟི ཨཏྟནོ པཏྟབྦཙཱིཝརབྷཱགཾ. ཨཔཝིལཱཡམཱནོཏི ཨཱཀངྑམཱནོ. ཏསྶ ཙཱིཝརལཱབྷེ སཏི ཝསྶཾཝུཏྠཱཝཱསེ ནིཊྛཱནསནྣིཊྛཱནནཱསནནྟིཀཱནཾ ཝསེན ཨེཀཾ ཏིཀཾ, ཏེསཾཡེཝ ཝསེན ཨནྟརཱམགྒེ ཨེཀཾ, གཏཊྛཱནེ ཨེཀནྟི ཏིཎྞཾ ཏིཀཱནཾ ཝསེན ཨེཀཾ ནཝཀཾ ཝེདིཏབྦཾ.

༣༢༤. ཏཏོ ¶ པརཾ ནིཊྛཱནསནྣིཊྛཱནནཱསནནྟིཀསཱིམཱཏིཀྐནྟིཀསཨུབྦྷཱརཱནཾ ཝསེན ཕཱསུཝིཧཱརཔཉྩཀཾ ཝུཏྟཾ. སེསམེཏྠ པཱལི༹ཏོ ཨཊྛཀཐཱཏོ ཙ སུཝིཉྙེཡྻམེཝ.

ཨཱདཱཡསཏྟཀཱདིཀཐཱཝཎྞནཱ ནིཊྛིཏཱ.

ཀཐིནཀྑནྡྷཀཝཎྞནཱ ནིཊྛིཏཱ.

༨. ཙཱིཝརཀྑནྡྷཀཾ

ཛཱིཝཀཝཏྠུཀཐཱཝཎྞནཱ

༣༢༩-༣༣༠. ཙཱིཝརཀྑནྡྷཀེ ¶ ¶ ཀམྨཝིཔཱཀནྟི ཀམྨཛརོགཾ. སཾཡམསྶཱཏི ཨཱནིསཾསསྶ, ཨུཔཡོགཏྠེ ཙེཏཾ སཱམིཝཙནཾ.

པཛྫོཏརཱཛཝཏྠུཀཐཱདིཝཎྞནཱ

༣༣༤-༣༣༦. ཝིཙྪིཀསྶ ཛཱཏོཏི ཏསྶ ཀིར མཱཏུཡཱ ཨུཏུསམཡེ སཡནགཏཱཡ ཝིཙྪིཀོ ནཱབྷིཔྤདེསཾ ཨཱརུལ༹ྷོ, སཱ ཏསྶ སམྥསྶེན གབྦྷཾ གཎྷི. ཏཾ སནྡྷཱཡ ཝུཏྟཾ ‘‘ཝིཙྪིཀསྶ ཛཱཏོ’’ཏི. ཨུསྶནྣདོསོཏི སཉྩིཏཔིཏྟཱདིདོསོ.

ཝརཡཱཙནཀཐཱཝཎྞནཱ

༣༣༧. ཨིཏརཱིཏརེནཱཏི ཨིཏརེན ཨིཏརེན. ཨིཏར-སདྡོ པན ཨནིཡམཝཙནོ དྭིཀྑཏྟུཾ ཝུཙྩམཱནོ ཡཾཀིཉྩི-སདྡེཧི སམཱནཏྠོ ཧོཏཱིཏི ཝུཏྟཾ ‘‘ཨཔྤགྒྷེནཔི མཧགྒྷེནཔི ཡེན ཀེནཙཱི’’ཏི. མཧཱཔིཊྛིཡཀོཛཝནྟི ཧཏྠིཔིཊྛཱིསུ ཨཏྠརིཏབྦཏཱཡ མཧཱཔིཊྛིཡནྟི ལདྡྷསམཉྙཾ ཙཏུརངྒུལཔུཔྥཾ ཀོཛཝཾ.

ཀམྦལཱནུཛཱནནཱདིཀཐཱཝཎྞནཱ

༣༤༠. ཨུཔཙཱརེཏི སུསཱནསྶ ཨཱསནྣེ པདེསེ. ཚཌྜེཏྭཱ གཏཱཏི ཀིཉྩི ཨཝཏྭཱཡེཝ ཚཌྜེཏྭཱ གཏཱ. སོ ཨེཝ སཱམཱིཏི ཨཀཏཱཡ ཀཏིཀཱཡ ཡེན གཧིཏཾ, སོཝ སཱམཱི.

ཙཱིཝརཔཊིགྒཱཧཀསམྨུཏིཨཱདིཀཐཱཝཎྞནཱ

༣༤༢-༣༤༣. དྷུརཝིཧཱརཊྛཱནེཏི ¶ ཝིཧཱརདྭཱརསྶ སམྨུཁཊྛཱནེ. ཝིཧཱརམཛ྄ཛྷེཡེཝ སམྨནྣིཏབྦནྟི སབྦེསཾ ཛཱནནཏྠཱཡ ཝིཧཱརམཛ྄ཛྷེཡེཝ ནིསིནྣེཧི སམྨནྣིཏབྦཾ. ཏུལཱབྷཱུཏོཏི ཏུལཱསདིསོ. ཝཎྞཱཝཎྞཾ ཀཏྭཱཏི སབྦཀོཊྛཱསེ ཨགྒྷཏོ སམཀེ ཀཏྭཱ. ཏེནེཝཱཧ ‘‘སམེ པཊིཝཱིསེ ཋཔེཏྭཱ’’ཏི. ཨིདནྟི སཱམཎེརཱནཾ ཨུཔཌྜྷཔཊིཝཱིསསྶ དཱནཾ. ཕཱཏིཀམྨནྟི སམྨུཉྫནཱིབནྡྷནཱདིཧཏྠཀམྨཾ ¶ . ཨུཀྐུཊྛིཾ ཀརོནྟཱིཏི མཧཱསདྡཾ ཀརོནྟི. སམཔཊིཝཱིསོ དཱཏབྦོཏི ཀརིསྶཱམཱཏི ཡཱཙནྟཱནཾ པཊིཉྙཱམཏྟེནཔི སམཀོཊྛཱསོ དཱཏབྦོ.

ཙཱིཝརརཛནཀཐཱཝཎྞནཱ

༣༤༤. རཛནཀུམྦྷིཡཱ མཛ྄ཛྷེ ཋཔེཏྭཱཏི ཨནྟོརཛནཀུམྦྷིཡཱ མཛ྄ཛྷེ ཋཔེཏྭཱ ཨེཝཾ ཝཊྚཱདྷཱརཀེ ཨནྟོརཛནཀུམྦྷིཡཱ པཀྑིཏྟེ མཛ྄ཛྷེ ཨུདཀཾ ཏིཊྛཏི, ཝཊྚཱདྷཱརཀཏོ བཧི སམནྟཱ ཨནྟོཀུམྦྷིཡཾ རཛནཙྪལླི. རཛནཾ པཀྑིཔིཏུནྟི རཛནཙྪལླིཾ པཀྑིཔིཏུཾ.

ཏིཙཱིཝརཱནུཛཱནནཀཐཱཝཎྞནཱ

༣༤༦. ཨུདྡྷསྟེ ཨརུཎེཏི ཨུགྒཏེ ཨརུཎསཱིསེ. ནནྡིམུཁིཡཱཏི ཏུཊྛམུཁིཡཱ.

ཨཏིརེཀཙཱིཝརཱདིཀཐཱཝཎྞནཱ

༣༤༨. ཨཙྪུཔེཡྻནྟི པཏིཊྛཔེཡྻཾ. ཧཏཝཏྠཀཱནནྟི ཀཱལཱཏཱིཏཝཏྠཱནཾ. ཨུདྡྷརིཏྭཱ ཨལླཱིཡཱཔནཁཎྜནྟི དུབྦལཊྛཱནཾ ཨཔནེཏྭཱ ཨལླཱིཡཱཔནཝཏྠཁཎྜཾ.

ཝིསཱཁཱཝཏྠུཀཐཱཝཎྞནཱ

༣༤༩-༣༥༡. ཝིསཱཁཱཝཏྠུམྷི ཀལླཀཱཡཱཏི ཨཀིལནྟཀཱཡཱ པཱིཏིསོམནསྶེཧི ཕུཊསརཱིརཱ. གཏཱིཏི ཉཱཎགཏི ཉཱཎཱདྷིགམོ. ཨབྷིསམྤརཱཡོཏི ཉཱཎཱབྷིསམྤརཱཡོ ཉཱཎསཧིཏོ པེཙྩབྷཱཝོ.

ཏཾ ¶ བྷགཝཱ བྱཱཀརིསྶཏཱིཏི ‘‘སོ བྷིཀྑུ སོཏཱཔནྣོ སཀདཱགཱམཱི’’ཏིཨཱདིནཱ ཏསྶ ཏཾ ཉཱཎགཏིཾ, ཏཏོ པརཾ ‘‘ནིཡཏོ སམྦོདྷིཔརཱཡཎོ སཀིདེཝ ཨིམཾ ལོཀཾ ཨཱགནྟྭཱ དུཀྑསྶནྟཾ ཀརིསྶཏཱི’’ཏིཨཱདིནཱ (སཾ. ནི. ༥.༡༠༠༤) ཉཱཎཱབྷིསམྤརཱཡཉྩ ཨཱཝི ཀརིསྶཏི. སོཝགྒིཀནྟི སགྒསཾཝཏྟནིཀཾ. སོཀཾ ནུདཏི ཝིནོདེཏཱིཏི སོཀནུདཾ.

ནིསཱིདནཱདིཨནུཛཱནནཀཐཱཝཎྞནཱ

༣༥༣. དུཀྑཾ ¶ སུཔཏཱིཏི ནཱནཱཝིདྷསུཔིནཾ པསྶནྟོ དུཀྑཾ སུཔཏི. དུཀྑཾ པཊིབུཛ྄ཛྷཏཱིཏི པཊིབུཛ྄ཛྷནྟོཔི ཨུཏྟསིཏྭཱ སལོམཧཾསོ དུཀྑཾ པཊིབུཛ྄ཛྷཏི.

པཙྪིམཝིཀཔྤནུཔགཙཱིཝརཱདིཀཐཱཝཎྞནཱ

༣༥༩-༣༦༢. ཨཊྛཔདཀཙྪནྣེན པཏྟམུཁཾ སིབྦིཏུནྟི ཨཊྛཔདཕལཀཱཀཱརེན པཏྟམུཁེ ཏཏྠ ཏཏྠ གབྦྷཾ དསྶེཏྭཱ སིབྦིཏུཾ. ཨགྒལ༹གུཏྟིཡེཝ པམཱཎནྟི ཨིམེཧི ཙཏཱུཧི ནིཀྑེཔཀཱརཎེཧི ཋཔེནྟེནཔི ཨགྒལ༹གུཏྟིཝིཧཱརེཡེཝ ཋཔེཏུཾ ཝཊྚཏཱིཏི ཨདྷིཔྤཱཡོ.

སངྒྷིཀཙཱིཝརུཔྤཱདཀཐཱཝཎྞནཱ

༣༦༣. པཉྩ མཱསེཏི ཨཙྩནྟསཾཡོགེ ཨུཔཡོགཝཙནཾ. ཝཌྜྷིཾ པཡོཛེཏྭཱ ཋཔིཏཨུཔནིཀྑེཔཏོཏི ཝསྶཱཝཱསིཀཏྠཱཡ ཝེཡྻཱཝཙྩཀརེཧི ཝཌྜྷིཾ པཡོཛེཏྭཱ ཋཔིཏཨུཔནིཀྑེཔཏོ. ཏཏྲུཔྤཱདཏོཏི ནཱལི༹ཀེརཨཱརཱམཱདིཏཏྲུཔྤཱདཏོ. ‘‘ཝསྶཱཝཱསིཀལཱབྷཝསེན ཝཱ མཏཀཙཱིཝརཝསེན ཝཱ ཏཏྲུཔྤཱདཝསེན ཝཱ ཨཉྙེན ཝཱ ཀེནཙི ཨཱཀཱརེན སངྒྷཾ ཨུདྡིསྶ ཨུཔྤནྣཙཱིཝརཾ, སབྦཾ ཏསྶེཝ ཨཏྠཏཀཐིནསྶ པཉྩ མཱསེ, ཨནཏྠཏཀཐིནསྶ ཨེཀཾ ཙཱིཝརམཱསཾ པཱཔུཎཱཏཱི’’ཏི ཨཝིསེསཏོ ཝཏྭཱཔི པུན ཝསྶཱཝཱསིཀལཱབྷཝསེན ཨུཔྤནྣེ ལབྦྷམཱནཝིསེསཾ དསྶེཏུཾ ‘‘ཡཾ པན ཨིད’’ནྟིཨཱདི ཨཱརདྡྷཾ. ཏཏྠ ཨིདྷཱཏི ཨབྷིལཱཔམཏྟམེཏཾ. ‘‘ཝསྶཾཝུཏྠསངྒྷསྶ དེམཱ’’ཏི ཝུཏྟེཔི སོཡེཝ ནཡོ. ཨནཏྠཏཀཐིནསྶཔི པཉྩ མཱསེ པཱཔུཎཱཏཱིཏི ཝསྶཱཝཱསིཀལཱབྷཝསེན ཨུཔྤནྣཏྟཱ ཨནཏྠཏཀཐིནསྶཔི ཝུཏྠཝསྶསྶ པཉྩ མཱསེ པཱཔུཎཱཏི. ཀེནཙི པན ‘‘ཨིདྷ-སདྡེན ནིཡམིཏཏྟཱ’’ཏི ཀཱརཎཾ ཝུཏྟཾ, ཏཾ ཨཀཱརཎཾ. ཏཐཱ ཧི ཨིདྷ-སདྡེན ཨནིཡམེཏྭཱཔི ‘‘ཝསྶཾཝུཏྠསངྒྷསྶ དེམཱ’’ཏི ཝཱ ‘‘ཝསྶཱཝཱསིཀཾ དེམཱ’’ཏི ཝཱ ཨནྟོཧེམནྟེ ཝསྶཱཝཱསིཀལཱབྷཝསེན དིནྣཾ ཙཱིཝརཾ ཨནཏྠཏཀཐིནསྶཔི ཝུཏྠཝསྶསྶ པཉྩ མཱསེ པཱཔུཎཱཏི, ཏེནེཝ ¶ པརཏོ ཨཊྛསུ མཱཏིཀཱསུ ‘‘ཝསྶཾཝུཏྠསངྒྷསྶ དེཏཱི’’ཏི ཨིམསྶ མཱཏིཀཱཔདསྶ ཝིནིཙྪཡེ (མཧཱཝ. ཨཊྛ. ༣༧༩) ‘‘ཙཱིཝརམཱསཏོ པཊྛཱཡ ཡཱཝ ཧེམནྟསྶ པཙྪིམོ དིཝསོ, ཏཱཝ ཝསྶཱཝཱསིཀཾ ¶ དེམཱཏི ཝུཏྟེ ཀཐིནཾ ཨཏྠཏཾ ཝཱ ཧོཏུ ཨནཏྠཏཾ ཝཱ, ཨཏཱིཏཝསྶཾཝུཏྠཱནམེཝ པཱཔུཎཱཏཱི’’ཏི ཝུཏྟཾ. ཏཏོ པརནྟི པཉྩམཱསཏོ པརཾ, གིམྷཱནསྶ པཋམདིཝསཏོ པཊྛཱཡཱཏི ཨཏྠོ.

‘‘ཀསྨཱ? པིཊྛིསམཡེ ཨུཔྤནྣཏྟཱ’’ཏི ཨིདཾ ‘‘ཨུདཱཧུ ཨནཱགཏཝསྶེ’’ཏི ཨིམསྶཱནནྟརཾ དཊྛབྦཾ. གིམྷཱནསྶ པཋམདིཝསཏོ པཊྛཱཡ ཨུཔྤནྣམེཝ ཧི པིཊྛིསམཡེ ཨུཔྤནྣཏྟཱ ‘‘ཀིཾ ཨཏཱིཏཝསྶེ ཨིདཾ ཝསྶཱཝཱསིཀ’’ནྟིཨཱདིནཱ པུཙྪིཏབྦཾ, ཏེནེཝ པརཏོཔི ཝཀྑཏི ‘‘གིམྷཱནཾ པཋམདིཝསཏོ པཊྛཱཡ ཝུཏྟེ པན མཱཏིཀཱ ཨཱརོཔེཏབྦཱ ‘ཨཏཱིཏཝསྶཱཝཱསསྶ པཉྩ མཱསཱ ཨཏིཀྐནྟཱ, ཨནཱགཏོ ཙཱཏུམཱསཙྩཡེན བྷཝིསྶཏི, ཀཏརཝསྶཱཝཱསསྶ དེསཱི’ཏི. སཙེ ‘ཨཏཱིཏཝསྶཾཝུཏྠཱནཾ དམྨཱི’ཏི ཝདཏི, ཏཾཨནྟོཝསྶཾཝུཏྠཱནམེཝ པཱཔུཎཱཏཱི’’ཏི (མཧཱཝ. ཨཊྛ. ༣༧༩). པོཏྠཀེསུ པན ‘‘ཨནཏྠཏཀཐིནསྶཔི པཉྩ མཱསེ པཱཔུཎཱཏཱི’’ཏི ཨིམསྶཱནནྟརཾ ‘‘ཀསྨཱ? པིཊྛིསམཡེ ཨུཔྤནྣཏྟཱ’’ཏི ཨིདཾ ལིཁནྟི, ཏཾ ན ཡུཛྫཏི. ན ཧི པིཊྛིསམཡེ ཨུཔྤནྣཾ སནྡྷཱཡ ‘‘ཨནཏྠཏཀཐིནསྶཔི པཉྩ མཱསེ པཱཔུཎཱཏཱི’’ཏི ཝུཏྟཾ, ན ཙ པིཊྛིསམཡེ ཨུཔྤནྣཾ ཝུཏྠཝསྶསྶེཝ པཱཔུཎཱཏི, སམྨུཁཱིབྷཱུཏཱནཾ སབྦེསཾ པཱཔུཎཱཏི, ཏེནེཝ པརཏོ ཝཀྑཏི ‘‘ཨསུཀཝིཧཱརེ ཝསྶཾཝུཏྠསངྒྷསྶཱཏི ཝདཏི, ཏཏྲ ཝསྶཾཝུཏྠཱནམེཝ ཡཱཝ ཀཐིནསྶུབྦྷཱརཱ པཱཔུཎཱཏི. སཙེ པན གིམྷཱནཾ པཋམདིཝསཏོ པཊྛཱཡ ཨེཝཾ ཝདཏི, ཏཏྲ སམྨུཁཱིབྷཱུཏཱནཾ སབྦེསཾ པཱཔུཎཱཏི. ཀསྨཱ? པིཊྛིསམཡེ ཨུཔྤནྣཏྟཱ’’ཏི (མཧཱཝ. ཨཊྛ. ༣༧༩).

ཋིཏིཀཱ པན ན ཏིཊྛཏཱིཏི ཨེཏྠ ཨཊྛིཏཱཡ ཋིཏིཀཱཡ པུན ཨཉྙསྨིཾ ཙཱིཝརེ ཨུཔྤནྣེ སཙེ ཨེཀོ བྷིཀྑུ ཨཱགཙྪཏི, མཛ྄ཛྷེ ཚིནྡིཏྭཱ དྭཱིཧིཔི གཧེཏབྦཾ. ཋིཏཱཡ པན ཋིཏིཀཱཡ པུན ཨཉྙསྨིཾ ཙཱིཝརེ ཨུཔྤནྣེ སཙེ ནཝཀཏརོ ཨཱགཙྪཏི, ཋིཏིཀཱ ཧེཊྛཱ གཙྪཏི. སཙེ ཝུཌྜྷཏརོ ཨཱགཙྪཏི, ཋིཏིཀཱ ཨུདྡྷམཱརོཧཏི. ཨཐ ཨཉྙོ ནཏྠི, པུན ཨཏྟནོ པཱཔེཏྭཱ གཧེཏབྦཾ. དུགྒཧིཏཱནི ཧོནྟཱིཏི ཨེཏྠ སངྒྷིཀཱནེཝ ཧོནྟཱིཏི ཨདྷིཔྤཱཡོ. གཧིཏམེཝ ནཱམཱཏི ‘‘ཨིམསྶ ཨིདཾ པཏྟ’’ནྟི ཀིཉྩཱཔི ན ཝིདིཏཾ, ཏེ པན བྷཱགཱ ཨཏྠཏོ ཏེསཾ པཏྟཱཡེཝཱཏི ཨདྷིཔྤཱཡོ. ཨིཏོཝཱཏི ཐེརཱནཾ དཱཏབྦཏོཡེཝ.

སངྒྷིཀཙཱིཝརུཔྤཱདཀཐཱཝཎྞནཱ ནིཊྛིཏཱ.

ཨུཔནནྡསཀྱཔུཏྟཝཏྠུཀཐཱཝཎྞནཱ

༣༦༤. སཏྟཱཧཝཱརེན ¶ ¶ ཨརུཎམེཝ ཨུཊྛཱཔེཏཱིཏི ཨེཏཾ ཝཙནམཏྟམེཝ ཨེཀསྨིཾ ཝིཧཱརེ སཏྟཱཧཀིཙྩཱབྷཱཝཏོ. ཨིདནྟི ཨེཀཱདྷིཔྤཱཡདཱནཾ. ནཱནཱལཱབྷེཧཱིཏིཨཱདཱིསུ ནཱནཱ ཝིསུཾ ཝིསུཾ ལཱབྷོ ཨེཏེསཱུཏི ནཱནཱལཱབྷཱ, དྭེ ཝིཧཱརཱ, ཏེཧི ནཱནཱལཱབྷེཧི. ནཱནཱ ཝིསུཾ ཝིསུཾ པཱཀཱརཱདཱིཧི པརིཙྪིནྣོ ཨུཔཙཱརོ ཨེཏེསནྟི ནཱནཱུཔཙཱརཱ, ཏེཧི ནཱནཱུཔཙཱརེཧི. ཨེཀསཱིམཝིཧཱརེཧཱིཏི ཨེཀཱུཔཙཱརསཱིམཱཡཾ དྭཱིཧི ཝིཧཱརེཧི.

གིལཱནཝཏྠུཀཐཱཝཎྞནཱ

༣༦༥. པལིཔནྣོཏི ནིམུགྒོ, མཀྑིཏོཏི ཨཏྠོ. ཨུཙྩཱརེཏྭཱཏི ཨུཀྑིཔིཏྭཱ. སམཱནཱཙརིཡཀོཏི ཨེཏྠ སཙེཔི ཨེཀསྶ ཨཱཙརིཡསྶ ཨེཀོ ཨནྟེཝཱསིཀོ ཧོཏི, ཨེཀོ སདྡྷིཝིཧཱརིཀོ, ཨེཏེཔི ཨཉྙམཉྙཾ སམཱནཱཙརིཡཀཱ ཨེཝཱཏི ཝདནྟི.

༣༦༦. བྷེསཛྫཾ ཡོཛེཏུཾ ཨསམཏྠོ ཧོཏཱིཏི ཝེཛྫེན ‘‘ཨིདཉྩིདཉྩ བྷེསཛྫཾ གཧེཏྭཱ ཨིམིནཱ ཡོཛེཏྭཱ དཱཏབྦ’’ནྟི ཝུཏྟེ ཏཐཱ ཀཱཏུཾ ཨསམཏྠོཏི ཨཏྠོ. ནཱིཧཱཏུནྟི ནཱིཧརིཏུཾ, ཚཌྜེཏུནྟི ཨཏྠོ.

མཏསནྟཀཀཐཱཝཎྞནཱ

༣༦༧-༣༦༩. བྷིཀྑུསྶ ཀཱལཀཏེཏི ཨེཏྠ ཀཱལཀཏ-སདྡོ བྷཱཝསཱདྷནོཏི ཨཱཧ ‘‘ཀཱལཀིརིཡཱཡཱ’’ཏི. ཏཏྠ ཏཏྠ སངྒྷསྶཱཏི ཏསྨིཾ ཏསྨིཾ ཝིཧཱརེ སངྒྷསྶ.

སངྒྷེ བྷིནྣེ ཙཱིཝརུཔྤཱདཀཐཱཝཎྞནཱ

༣༧༦. ཡཏྠ པན དཀྑིཎོདཀཾ པམཱཎནྟི བྷིཀྑཱུ ཡསྨིཾ རཊྛེ དཀྑིཎོདཀཔཨགྒཧཎམཏྟེནཔི དེཡྻདྷམྨསྶ སཱམིནོ ཧོནྟཱིཏི ཨདྷིཔྤཱཡོ. པརསམུདྡེཏི ཛམྦུདཱིཔེ.

༣༧༨. མཏཀཙཱིཝརཾ ཨདྷིཊྛཱཏཱིཏི ཨེཏྠ མགྒཾ གཙྪནྟོ ཏསྶ ཀཱལཀིརིཡཾ སུཏྭཱ ཨཝིཧཱརཊྛཱནེ ¶ ཙེ དྭཱདསརཏནབྦྷནྟརེ ཨཉྙེསཾ བྷིཀྑཱུནཾ ཨབྷཱཝཾ ཉཏྭཱ ‘‘ཨིདཾ ཙཱིཝརཾ མཡ྄ཧཾ པཱཔུཎཱཏཱི’’ཏི ཨདྷིཊྛཱཏི, སྭཱདྷིཊྛིཏཾ.