📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

དྭེམཱཏིཀཱཔཱལི༹

བྷིཀྑུཔཱཏིམོཀྑཔཱལི༹

པུབྦཀརཎཾ-༤

སམྨཛྫནཱི ¶ ¶ པདཱིཔོ ཙ, ཨུདཀཾ ཨཱསནེན ཙ;

ཨུཔོསཐསྶ ཨེཏཱནི, ‘‘པུབྦཀརཎ’’ནྟི ཝུཙྩཏི.

པུབྦཀིཙྩཾ-༥

ཚནྡ, པཱརིསུདྡྷི, ཨུཏུཀྑཱནཾ, བྷིཀྑུགཎནཱ ཙ ཨོཝཱདོ;

ཨུཔོསཐསྶ ཨེཏཱནི, ‘‘པུབྦཀིཙྩ’’ནྟི ཝུཙྩཏི.

པཏྟཀལླཨངྒཱ-༤

ཨུཔོསཐོ ¶ , ཡཱཝཏིཀཱ ཙ བྷིཀྑཱུ ཀམྨཔྤཏྟཱ;

སབྷཱགཱཔཏྟིཡོ ཙ ན ཝིཛྫནྟི;

ཝཛྫནཱིཡཱ ཙ པུགྒལཱ ཏསྨིཾ ན ཧོནྟི, ‘‘པཏྟཀལླ’’ནྟི ཝུཙྩཏི.

པུབྦཀརཎཔུབྦཀིཙྩཱནི སམཱཔེཏྭཱ དེསིཏཱཔཏྟིཀསྶ སམགྒསྶ བྷིཀྑུསངྒྷསྶ ཨནུམཏིཡཱ པཱཏིམོཀྑཾ ཨུདྡིསིཏུཾ ཨཱརཱདྷནཾ ཀརོམ.

ནིདཱནུདྡེསོ

སུཎཱཏུ མེ བྷནྟེ སངྒྷོ? ཨཛྫུཔོསཐོ པནྣརསོ, ཡདི སངྒྷསྶ པཏྟཀལླཾ, སངྒྷོ ཨུཔོསཐཾ ཀརེཡྻ, པཱཏིམོཀྑཾ ཨུདྡིསེཡྻ.

ཀིཾ སངྒྷསྶ པུབྦཀིཙྩཾ? པཱརིསུདྡྷིཾ ཨཱཡསྨནྟོ ཨཱརོཙེཐ, པཱཏིམོཀྑཾ ཨུདྡིསིསྶཱམི, ཏཾ སབྦེཝ སནྟཱ སཱདྷུཀཾ སུཎོམ མནསི ཀརོམ. ཡསྶ སིཡཱ ཨཱཔཏྟི, སོ ཨཱཝིཀརེཡྻ, ཨསནྟིཡཱ ཨཱཔཏྟིཡཱ ཏུཎྷཱི བྷཝིཏབྦཾ, ཏུཎྷཱིབྷཱཝེན ཁོ པནཱཡསྨནྟེ ‘‘པརིསུདྡྷཱ’’ཏི ཝེདིསྶཱམི. ཡཐཱ ¶ ཁོ པན པཙྩེཀཔུཊྛསྶ ཝེཡྻཱཀརཎཾ ཧོཏི, ཨེཝམེཝཾ ཨེཝརཱུཔཱཡ པརིསཱཡ ཡཱཝཏཏིཡཾ ཨནུསཱཝིཏཾ ཧོཏི. ཡོ པན བྷིཀྑུ ཡཱཝཏཏིཡཾ ཨནུསཱཝིཡམཱནེ སརམཱནོ སནྟིཾ ཨཱཔཏྟིཾ ནཱཝིཀརེཡྻ, སམྤཛཱནམུསཱཝཱདསྶ ཧོཏི. སམྤཛཱནམུསཱཝཱདོ ཁོ པནཱཡསྨནྟོ ཨནྟརཱཡིཀོ དྷམྨོ ཝུཏྟོ བྷགཝཏཱ, ཏསྨཱ སརམཱནེན བྷིཀྑུནཱ ཨཱཔནྣེན ཝིསུདྡྷཱཔེཀྑེན སནྟཱི ཨཱཔཏྟི ཨཱཝིཀཱཏབྦཱ, ཨཱཝིཀཏཱ ཧིསྶ ཕཱསུ ཧོཏི.

ཨུདྡིཊྛཾ ཁོ ཨཱཡསྨནྟོ ནིདཱནཾ. ཏཏྠཱཡསྨནྟེ པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡསྨནྟོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

ནིདཱནཾ ནིཊྛིཏཾ.

པཱརཱཛིཀུདྡེསོ

ཏཏྲིམེ ཙཏྟཱརོ པཱརཱཛིཀཱ དྷམྨཱ ཨུདྡེསཾ ཨཱགཙྪནྟི.

མེཐུནདྷམྨ སིཀྑཱཔདཾ

༡. ཡོ ¶ པན བྷིཀྑུ བྷིཀྑཱུནཾ སིཀྑཱསཱཛཱིཝསམཱཔནྣོ སིཀྑཾ ཨཔྤཙྩཀྑཱཡ དུབྦལྱཾ ཨནཱཝིཀཏྭཱ མེཐུནཾ དྷམྨཾ པཊིསེཝེཡྻ, ཨནྟམསོ ཏིརཙྪཱནགཏཱཡཔི, པཱརཱཛིཀོ ཧོཏི ཨསཾཝཱསོ.

ཨདིནྣཱདཱནསིཀྑཱཔདཾ

༢. ཡོ པན བྷིཀྑུ གཱམཱ ཝཱ ཨརཉྙཱ ཝཱ ཨདིནྣཾ ཐེཡྻསངྑཱཏཾ ཨཱདིཡེཡྻ, ཡཐཱརཱུཔེ ཨདིནྣཱདཱནེ རཱཛཱནོ ཙོརཾ གཧེཏྭཱ ཧནེཡྻུཾ ཝཱ བནྡྷེཡྻུཾ ཝཱ པབྦཱཛེཡྻུཾ ཝཱ ཙོརོསི བཱལོསི མཱུལ༹ྷོསི ཐེནོསཱིཏི, ཏཐཱརཱུཔཾ བྷིཀྑུ ཨདིནྣཾ ཨཱདིཡམཱནོ ཨཡམྤི པཱརཱཛིཀོ ཧོཏི ཨསཾཝཱསོ.

མནུསྶཝིགྒཧསིཀྑཱཔདཾ

༣. ཡོ པན བྷིཀྑུ སཉྩིཙྩ མནུསྶཝིགྒཧཾ ཛཱིཝིཏཱ ཝོརོཔེཡྻ, སཏྠཧཱརཀཾ ཝཱསྶ པརིཡེསེཡྻ, མརཎཝཎྞཾ ཝཱ སཾཝཎྞེཡྻ, མརཎཱཡ ཝཱ སམཱདཔེཡྻ ‘‘ཨམྦྷོ པུརིས ཀིཾ ཏུཡ྄ཧིམིནཱ པཱཔཀེན དུཛྫཱིཝིཏེན, མཏཾ ¶ ཏེ ཛཱིཝིཏཱ སེཡྻོ’’ཏི, ཨིཏི ཙིཏྟམནོ ཙིཏྟསངྐཔྤོ ཨནེཀཔརིཡཱཡེན མརཎཝཎྞཾ ཝཱ སཾཝཎྞེཡྻ, མརཎཱཡ ཝཱ སམཱདཔེཡྻ, ཨཡམྤི པཱརཱཛིཀོ ཧོཏི ཨསཾཝཱསོ.

ཨུཏྟརིམནུསྶདྷམྨསིཀྑཱཔདཾ

༤. ཡོ པན བྷིཀྑུ ཨནབྷིཛཱནཾ ཨུཏྟརིམནུསྶདྷམྨཾ ཨཏྟུཔནཱཡིཀཾ ཨལམརིཡཉཱཎདསྶནཾ སམུདཱཙརེཡྻ ‘‘ཨིཏི ཛཱནཱམི, ཨིཏི པསྶཱམཱི’’ཏི, ཏཏོ ཨཔརེན སམཡེན སམནུགྒཱཧཱིཡམཱནོ ཝཱ ཨསམནུགྒཱཧཱིཡམཱནོ ཝཱ ཨཱཔནྣོ ཝིསུདྡྷཱཔེཀྑོ ཨེཝཾ ཝདེཡྻ ‘‘ཨཛཱནམེཝཾ ཨཱཝུསོ ཨཝཙཾ ཛཱནཱམི, ཨཔསྶཾ པསྶཱམི, ཏུཙྪཾ མུསཱ ཝིལཔི’’ནྟི, ཨཉྙཏྲ ཨདྷིམཱནཱ, ཨཡམྤི པཱརཱཛིཀོ ཧོཏི ཨསཾཝཱསོ.

ཨུདྡིཊྛཱ ཁོ ཨཱཡསྨནྟོ ཙཏྟཱརོ པཱརཱཛིཀཱ དྷམྨཱ. ཡེསཾ བྷིཀྑུ ཨཉྙཏརཾ ཝཱ ཨཉྙཏརཾ ཝཱ ཨཱཔཛྫིཏྭཱ ན ལབྷཏི བྷིཀྑཱུཧི སདྡྷིཾ སཾཝཱསཾ ཡཐཱ པུརེ, ཏཐཱ པཙྪཱ, པཱརཱཛིཀོ ¶ ཧོཏི ཨསཾཝཱསོ. ཏཏྠཱཡསྨནྟེ པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡསྨནྟོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

པཱརཱཛིཀཾ ནིཊྛིཏཾ.

སངྒྷཱདིསེསུདྡེསོ

ཨིམེ ཁོ པནཱཡསྨནྟོ ཏེརས སངྒྷཱདིསེསཱ

དྷམྨཱ ཨུདྡེསཾ ཨཱགཙྪནྟི.

སུཀྐཝིསྶཊྛིསིཀྑཱཔདཾ

༡. སཉྩེཏནིཀཱ སུཀྐཝིསྶཊྛི ཨཉྙཏྲ སུཔིནནྟཱ སངྒྷཱདིསེསོ.

ཀཱཡསཾསགྒསིཀྑཱཔདཾ

༢. ཡོ པན བྷིཀྑུ ཨོཏིཎྞོ ཝིཔརིཎཏེན ཙིཏྟེན མཱཏུགཱམེན སདྡྷིཾ ཀཱཡསཾསགྒཾ སམཱཔཛྫེཡྻ ཧཏྠགྒཱཧཾ ཝཱ ཝེཎིགྒཱཧཾ ཝཱ ཨཉྙཏརསྶ ཝཱ ཨཉྙཏརསྶ ཝཱ ཨངྒསྶ པརཱམསནཾ, སངྒྷཱདིསེསོ.

དུཊྛུལླཝཱཙཱསིཀྑཱཔདཾ

༣. ཡོ ¶ པན བྷིཀྑུ ཨོཏིཎྞོ ཝིཔརིཎཏེན ཙིཏྟེན མཱཏུགཱམཾ དུཊྛུལླཱཧི ཝཱཙཱཧི ཨོབྷཱསེཡྻ ཡཐཱ ཏཾ ཡུཝཱ ཡུཝཏིཾ མེཐུནུཔསཾཧིཏཱཧི, སངྒྷཱདིསེསོ.

ཨཏྟཀཱམཔཱརིཙརིཡསིཀྑཱཔདཾ

༤. ཡོ པན བྷིཀྑུ ཨོཏིཎྞོ ཝིཔརིཎཏེན ཙིཏྟེན མཱཏུགཱམསྶ སནྟིཀེ ཨཏྟཀཱམཔཱརིཙརིཡཱཡ ཝཎྞཾ བྷཱསེཡྻ ‘‘ཨེཏདགྒཾ བྷགིནི པཱརིཙརིཡཱནཾ ཡཱ མཱདིསཾ སཱིལཝནྟཾ ཀལྱཱཎདྷམྨཾ བྲཧྨཙཱརིཾ ཨེཏེན དྷམྨེན པརིཙརེཡྻཱ’’ཏི མེཐུནུཔསཾཧིཏེན, སངྒྷཱདིསེསོ.

སཉྩརིཏྟསིཀྑཱཔདཾ

༥. ཡོ ¶ པན བྷིཀྑུ སཉྩརིཏྟཾ སམཱཔཛྫེཡྻ ཨིཏྠིཡཱ ཝཱ པུརིསམཏིཾ པུརིསསྶ ཝཱ ཨིཏྠིམཏིཾ, ཛཱཡཏྟནེ ཝཱ ཛཱརཏྟནེ ཝཱ, ཨནྟམསོ ཏངྑཎིཀཱཡཔི, སངྒྷཱདིསེསོ.

ཀུཊིཀཱརསིཀྑཱཔདཾ

༦. སཉྙཱཙིཀཱཡ པན བྷིཀྑུནཱ ཀུཊིཾ ཀཱརཡམཱནེན ཨསྶཱམིཀཾ ཨཏྟུདྡེསཾ པམཱཎིཀཱ ཀཱརེཏབྦཱ, ཏཏྲིདཾ པམཱཎཾ, དཱིགྷསོ དྭཱདས ཝིདཏྠིཡོ སུགཏཝིདཏྠིཡཱ, ཏིརིཡཾ སཏྟནྟརཱ, བྷིཀྑཱུ ཨབྷིནེཏབྦཱ ཝཏྠུདེསནཱཡ, ཏེཧི བྷིཀྑཱུཧི ཝཏྠུ དེསེཏབྦཾ ཨནཱརམྦྷཾ སཔརིཀྐམནཾ. སཱརམྦྷེ ཙེ བྷིཀྑུ ཝཏྠུསྨིཾ ཨཔརིཀྐམནེ སཉྙཱཙིཀཱཡ ཀུཊིཾ ཀཱརེཡྻ, བྷིཀྑཱུ ཝཱ ཨནབྷིནེཡྻ ཝཏྠུདེསནཱཡ, པམཱཎཾ ཝཱ ཨཏིཀྐཱམེཡྻ, སངྒྷཱདིསེསོ.

ཝིཧཱརཀཱརསིཀྑཱཔདཾ

༧. མཧལླཀཾ པན བྷིཀྑུནཱ ཝིཧཱརཾ ཀཱརཡམཱནེན སསྶཱམིཀཾ ཨཏྟུདྡེསཾ བྷིཀྑཱུ ཨབྷིནེཏབྦཱ ཝཏྠུདེསནཱཡ, ཏེཧི བྷིཀྑཱུཧི ཝཏྠུ དེསེཏབྦཾ ཨནཱརམྦྷཾ སཔརིཀྐམནཾ. སཱརམྦྷེ ཙེ བྷིཀྑུ ཝཏྠུསྨིཾ ཨཔརིཀྐམནེ མཧལླཀཾ ཝིཧཱརཾ ཀཱརེཡྻ, བྷིཀྑཱུ ཝཱ ཨནབྷིནེཡྻ ཝཏྠུདེསནཱཡ, སངྒྷཱདིསེསོ.

དུཊྛདོསསིཀྑཱཔདཾ

༨. ཡོ པན བྷིཀྑུ བྷིཀྑུཾ དུཊྛོ དོསོ ཨཔྤཏཱིཏོ ཨམཱུལཀེན པཱརཱཛིཀེན དྷམྨེན ཨནུདྡྷཾསེཡྻ ‘‘ཨཔྤེཝ ནཱམ ནཾ ཨིམམྷཱ བྲཧྨཙརིཡཱ ཙཱཝེཡྻ’’ནྟི ¶ , ཏཏོ ཨཔརེན སམཡེན སམནུགྒཱཧཱིཡམཱནོ ཝཱ ཨསམནུགྒཱཧཱིཡམཱནོ ཝཱ ཨམཱུལཀཉྩེཝ ཏཾ ཨདྷིཀརཎཾ ཧོཏི, བྷིཀྑུ ཙ དོསཾ པཏིཊྛཱཏི, སངྒྷཱདིསེསོ.

ཨཉྙབྷཱགིཡསིཀྑཱཔདཾ

༩. ཡོ པན བྷིཀྑུ བྷིཀྑུཾ དུཊྛོ དོསོ ཨཔྤཏཱིཏོ ཨཉྙབྷཱགིཡསྶ ཨདྷིཀརཎསྶ ཀིཉྩིདེསཾ ལེསམཏྟཾ ཨུཔཱདཱཡ པཱརཱཛིཀེན དྷམྨེན ཨནུདྡྷཾསེཡྻ ‘‘ཨཔྤེཝ ནཱམ ནཾ ཨིམམྷཱ བྲཧྨཙརིཡཱ ཙཱཝེཡྻ’’ནྟི, ཏཏོ ཨཔརེན སམཡེན སམནུགྒཱཧཱིཡམཱནོ ཝཱ ཨསམནུགྒཱཧཱིཡམཱནོ ཝཱ ཨཉྙབྷཱགིཡཉྩེཝ ཏཾ ཨདྷིཀརཎཾ ཧོཏི ཀོཙིདེསོ ལེསམཏྟོ ཨུཔཱདིནྣོ, བྷིཀྑུ ཙ དོསཾ པཏིཊྛཱཏི, སངྒྷཱདིསེསོ.

སངྒྷབྷེདསིཀྑཱཔདཾ

༡༠. ཡོ ¶ པན བྷིཀྑུ སམགྒསྶ སངྒྷསྶ བྷེདཱཡ པརཀྐམེཡྻ, བྷེདནསཾཝཏྟནིཀཾ ཝཱ ཨདྷིཀརཎཾ སམཱདཱཡ པགྒཡ྄ཧ ཏིཊྛེཡྻ, སོ བྷིཀྑུ བྷིཀྑཱུཧི ཨེཝམསྶ ཝཙནཱིཡོ ‘‘མཱཡསྨཱ སམགྒསྶ སངྒྷསྶ བྷེདཱཡ པརཀྐམི, བྷེདནསཾཝཏྟནིཀཾ ཝཱ ཨདྷིཀརཎཾ སམཱདཱཡ པགྒཡ྄ཧ ཨཊྛཱསི, སམེཏཱཡསྨཱ སངྒྷེན, སམགྒོ ཧི སངྒྷོ སམྨོདམཱནོ ཨཝིཝདམཱནོ ཨེཀུདྡེསོ ཕཱསུ ཝིཧརཏཱི’’ཏི, ཨེཝཉྩ སོ བྷིཀྑུ བྷིཀྑཱུཧི ཝུཙྩམཱནོ ཏཐེཝ པགྒཎྷེཡྻ, སོ བྷིཀྑུ བྷིཀྑཱུཧི ཡཱཝཏཏིཡཾ སམནུབྷཱསིཏབྦོ ཏསྶ པཊིནིསྶགྒཱཡ, ཡཱཝཏཏིཡཉྩེ སམནུབྷཱསིཡམཱནོ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ, ནོ ཙེ པཊིནིསྶཛྫེཡྻ, སངྒྷཱདིསེསོ.

བྷེདཱནུཝཏྟཀསིཀྑཱཔདཾ

༡༡. ཏསྶེཝ ཁོ པན བྷིཀྑུསྶ བྷིཀྑཱུ ཧོནྟི ཨནུཝཏྟཀཱ ཝགྒཝཱདཀཱ ཨེཀོ ཝཱ དྭེ ཝཱ ཏཡོ ཝཱ, ཏེ ཨེཝཾ ཝདེཡྻུཾ ‘‘མཱཡསྨནྟོ ཨེཏཾ བྷིཀྑུཾ ཀིཉྩི ཨཝཙུཏྠ, དྷམྨཝཱདཱི ཙེསོ བྷིཀྑུ, ཝིནཡཝཱདཱི ཙེསོ བྷིཀྑུ, ཨམྷཱཀཉྩེསོ བྷིཀྑུ ཚནྡཉྩ རུཙིཉྩ ཨཱདཱཡ ཝོཧརཏི, ཛཱནཱཏི, ནོ བྷཱསཏི, ཨམྷཱཀམྤེཏཾ ཁམཏཱི’’ཏི, ཏེ བྷིཀྑཱུ བྷིཀྑཱུཧི ཨེཝམསྶུ ཝཙནཱིཡཱ ‘‘མཱཡསྨནྟོ ཨེཝཾ ཨཝཙུཏྠ, ན ཙེསོ བྷིཀྑུ དྷམྨཝཱདཱི, ན ཙེསོ བྷིཀྑུ ཝིནཡཝཱདཱི, མཱཡསྨནྟཱནམྤི སངྒྷབྷེདོ རུཙྩིཏྠ, སམེཏཱཡསྨནྟཱནཾ སངྒྷེན, སམགྒོ ཧི སངྒྷོ སམྨོདམཱནོ ཨཝིཝདམཱནོ ཨེཀུདྡེསོ ཕཱསུ ཝིཧརཏཱི’’ཏི ¶ , ཨེཝཉྩ ཏེ བྷིཀྑཱུ བྷིཀྑཱུཧི ཝུཙྩམཱནཱ ཏཐེཝ པགྒཎྷེཡྻུཾ, ཏེ བྷིཀྑཱུ བྷིཀྑཱུཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ, ཡཱཝཏཏིཡཉྩེ སམནུབྷཱསིཡམཱནཱ ཏཾ པཊིནིསྶཛྫེཡྻུཾ, ཨིཙྩེཏཾ ཀུསལཾ, ནོ ཙེ པཊིནིསྶཛྫེཡྻུཾ, སངྒྷཱདིསེསོ.

དུབྦཙསིཀྑཱཔདཾ

༡༢. བྷིཀྑུ པནེཝ དུབྦཙཛཱཏིཀོ ཧོཏི ཨུདྡེསཔརིཡཱཔནྣེསུ སིཀྑཱཔདེསུ བྷིཀྑཱུཧི སཧདྷམྨིཀཾ ཝུཙྩམཱནོ ཨཏྟཱནཾ ཨཝཙནཱིཡཾ ཀརོཏི ‘‘མཱ མཾ ཨཱཡསྨནྟོ ཀིཉྩི ཨཝཙུཏྠ ཀལྱཱཎཾ ཝཱ པཱཔཀཾ ཝཱ, ཨཧམྤཱཡསྨནྟེ ན ཀིཉྩི ཝཀྑཱམི ཀལྱཱཎཾ ཝཱ པཱཔཀཾ ཝཱ, ཝིརམཐཱཡསྨནྟོ མམ ཝཙནཱཡཱ’’ཏི, སོ བྷིཀྑུ བྷིཀྑཱུཧི ཨེཝམསྶ ཝཙནཱིཡོ ‘‘མཱཡསྨཱ ཨཏྟཱནཾ ཨཝཙནཱིཡཾ ཨཀཱསི, ཝཙནཱིཡམེཝཱཡསྨཱ ཨཏྟཱནཾ ཀརོཏུ, ཨཱཡསྨཱཔི བྷིཀྑཱུ ཝདཏུ སཧདྷམྨེན, བྷིཀྑཱུཔི ཨཱཡསྨནྟཾ ཝཀྑནྟི སཧདྷམྨེན, ཨེཝཾ སཾཝདྡྷཱ ཧི ཏསྶ བྷགཝཏོ པརིསཱ ཡདིདཾ ཨཉྙམཉྙཝཙནེན ཨཉྙམཉྙཝུཊྛཱཔནེནཱ’’ཏི, ཨེཝཉྩ སོ བྷིཀྑུ བྷིཀྑཱུཧི ཝུཙྩམཱནོ ཏཐེཝ པགྒཎྷེཡྻ, སོ བྷིཀྑུ བྷིཀྑཱུཧི ཡཱཝཏཏིཡཾ སམནུབྷཱསིཏབྦོ ཏསྶ པཊིནིསྶགྒཱཡ ¶ , ཡཱཝཏཏིཡཉྩེ སམནུབྷཱསིཡམཱནོ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ, ནོ ཙེ པཊིནིསྶཛྫེཡྻ, སངྒྷཱདིསེསོ.

ཀུལདཱུསཀསིཀྑཱཔདཾ

༡༣. བྷིཀྑུ པནེཝ ཨཉྙཏརཾ གཱམཾ ཝཱ ནིགམཾ ཝཱ ཨུཔནིསྶཱཡ ཝིཧརཏི ཀུལདཱུསཀོ པཱཔསམཱཙཱརོ, ཏསྶ ཁོ པཱཔཀཱ སམཱཙཱརཱ དིསྶནྟི ཙེཝ སུཡྻནྟི ཙ, ཀུལཱནི ཙ ཏེན དུཊྛཱནི དིསྶནྟི ཙེཝ སུཡྻནྟི ཙ, སོ བྷིཀྑུ བྷིཀྑཱུཧི ཨེཝམསྶ ཝཙནཱིཡོ ‘‘ཨཱཡསྨཱ ཁོ ཀུལདཱུསཀོ པཱཔསམཱཙཱརོ, ཨཱཡསྨཏོ ཁོ པཱཔཀཱ སམཱཙཱརཱ དིསྶནྟི ཙེཝ སུཡྻནྟི ཙ, ཀུལཱནི ཙཱཡསྨཏཱ དུཊྛཱནི དིསྶནྟི ཙེཝ སུཡྻནྟི ཙ, པཀྐམཏཱཡསྨཱ ཨིམམྷཱ ཨཱཝཱསཱ, ཨལཾ ཏེ ཨིདྷ ཝཱསེནཱ’’ཏི, ཨེཝཉྩ སོ བྷིཀྑུ བྷིཀྑཱུཧི ཝུཙྩམཱནོ ཏེ བྷིཀྑཱུ ཨེཝཾ ཝདེཡྻ ‘‘ཚནྡགཱམིནོ ཙ བྷིཀྑཱུ, དོསགཱམིནོ ཙ བྷིཀྑཱུ, མོཧགཱམིནོ ཙ བྷིཀྑཱུ, བྷཡགཱམིནོ ཙ བྷིཀྑཱུ ཏཱདིསིཀཱཡ ཨཱཔཏྟིཡཱ ཨེཀཙྩཾ པབྦཱཛེནྟི, ཨེཀཙྩཾ ན པབྦཱཛེནྟཱི’’ཏི, སོ བྷིཀྑུ བྷིཀྑཱུཧི ཨེཝམསྶ ཝཙནཱིཡོ ‘‘མཱཡསྨཱ ཨེཝཾ ཨཝཙ, ན ཙ བྷིཀྑཱུ ཚནྡགཱམིནོ, ན ཙ བྷིཀྑཱུ དོསགཱམིནོ, ན ཙ བྷིཀྑཱུ མོཧགཱམིནོ, ན ཙ བྷིཀྑཱུ བྷཡགཱམིནོ, ཨཱཡསྨཱ ཁོ ཀུལདཱུསཀོ པཱཔསམཱཙཱརོ, ཨཱཡསྨཏོ ¶ ཁོ པཱཔཀཱ སམཱཙཱརཱ དིསྶནྟི ཙེཝ སུཡྻནྟི ཙ, ཀུལཱནི ཙཱཡསྨཏཱ དུཊྛཱནི དིསྶནྟི ཙེཝ སུཡྻནྟི ཙ, པཀྐམཏཱཡསྨཱ ཨིམམྷཱ ཨཱཝཱསཱ, ཨལཾ ཏེ ཨིདྷ ཝཱསེནཱ’’ཏི, ཨེཝཉྩ སོ བྷིཀྑུ བྷིཀྑཱུཧི ཝུཙྩམཱནོ ཏཐེཝ པགྒཎྷེཡྻ, སོ བྷིཀྑུ བྷིཀྑཱུཧི ཡཱཝཏཏིཡཾ སམནུབྷཱསིཏབྦོ ཏསྶ པཊིནིསྶགྒཱཡ, ཡཱཝཏཏིཡཉྩེ སམནུབྷཱསིཡམཱནོ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ, ནོ ཙེ པཊིནིསྶཛྫེཡྻ, སངྒྷཱདིསེསོ.

ཨུདྡིཊྛཱ ཁོ ཨཱཡསྨནྟོ ཏེརས སངྒྷཱདིསེསཱ དྷམྨཱ ནཝ པཋམཱཔཏྟིཀཱ, ཙཏྟཱརོ ཡཱཝཏཏིཡཀཱ. ཡེསཾ བྷིཀྑུ ཨཉྙཏརཾ ཝཱ ཨཉྙཏརཾ ཝཱ ཨཱཔཛྫིཏྭཱ ཡཱཝཏཱིཧཾ ཛཱནཾ པཊིཙྪཱདེཏི, ཏཱཝཏཱིཧཾ ཏེན བྷིཀྑུནཱ ཨཀཱམཱ པརིཝཏྠབྦཾ. པརིཝུཏྠཔརིཝཱསེན བྷིཀྑུནཱ ཨུཏྟརི ཚཱརཏྟཾ བྷིཀྑུམཱནཏྟཱཡ པཊིཔཛྫིཏབྦཾ, ཙིཎྞམཱནཏྟོ བྷིཀྑུ ཡཏྠ སིཡཱ ཝཱིསཏིགཎོ བྷིཀྑུསངྒྷོ, ཏཏྠ སོ བྷིཀྑུ ཨབྦྷེཏབྦོ. ཨེཀེནཔི ཙེ ཨཱུནོ ཝཱིསཏིགཎོ བྷིཀྑུསངྒྷོ ཏཾ བྷིཀྑུཾ ཨབྦྷེཡྻ, སོ ཙ བྷིཀྑུ ཨནབྦྷིཏོ, ཏེ ཙ བྷིཀྑཱུ གཱརཡ྄ཧཱ, ཨཡཾ ཏཏྠ སཱམཱིཙི. ཏཏྠཱཡསྨནྟེ པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡསྨནྟོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

སངྒྷཱདིསེསོ ནིཊྛིཏོ.

ཨནིཡཏུདྡེསོ

ཨིམེ ཁོ པནཱཡསྨནྟོ དྭེ ཨནིཡཏཱ དྷམྨཱ

ཨུདྡེསཾ ཨཱགཙྪནྟི.

པཋམཨནིཡཏསིཀྑཱཔདཾ

༡. ཡོ ¶ པན བྷིཀྑུ མཱཏུགཱམེན སདྡྷིཾ ཨེཀོ ཨེཀཱཡ རཧོ པཊིཙྪནྣེ ཨཱསནེ ཨལཾཀམྨནིཡེ ནིསཛྫཾ ཀཔྤེཡྻ, ཏམེནཾ སདྡྷེཡྻཝཙསཱ ཨུཔཱསིཀཱ དིསྭཱ ཏིཎྞཾ དྷམྨཱནཾ ཨཉྙཏརེན ཝདེཡྻ པཱརཱཛིཀེན ཝཱ སངྒྷཱདིསེསེན ཝཱ པཱཙིཏྟིཡེན ཝཱ, ནིསཛྫཾ བྷིཀྑུ པཊིཛཱནམཱནོ ཏིཎྞཾ དྷམྨཱནཾ ཨཉྙཏརེན ཀཱརེཏབྦོ པཱརཱཛིཀེན ཝཱ སངྒྷཱདིསེསེན ཝཱ པཱཙིཏྟིཡེན ¶ ཝཱ, ཡེན ཝཱ སཱ སདྡྷེཡྻཝཙསཱ ཨུཔཱསིཀཱ ཝདེཡྻ, ཏེན སོ བྷིཀྑུ ཀཱརེཏབྦོ, ཨཡཾ དྷམྨོ ཨནིཡཏོ.

དུཏིཡཨནིཡཏསིཀྑཱཔདཾ

༢. ན ཧེཝ ཁོ པན པཊིཙྪནྣཾ ཨཱསནཾ ཧོཏི ནཱལཾཀམྨནིཡཾ, ཨལཉྩ ཁོ ཧོཏི མཱཏུགཱམཾ དུཊྛུལླཱཧི ཝཱཙཱཧི ཨོབྷཱསིཏུཾ, ཡོ པན བྷིཀྑུ ཏཐཱརཱུཔེ ཨཱསནེ མཱཏུགཱམེན སདྡྷིཾ ཨེཀོ ཨེཀཱཡ རཧོ ནིསཛྫཾ ཀཔྤེཡྻ, ཏམེནཾ སདྡྷེཡྻཝཙསཱ ཨུཔཱསིཀཱ དིསྭཱ དྭིནྣཾ དྷམྨཱནཾ ཨཉྙཏརེན ཝདེཡྻ སངྒྷཱདིསེསེན ཝཱ པཱཙིཏྟིཡེན ཝཱ, ནིསཛྫཾ བྷིཀྑུ པཊིཛཱནམཱནོ དྭིནྣཾ དྷམྨཱནཾ ཨཉྙཏརེན ཀཱརེཏབྦོ སངྒྷཱདིསེསེན ཝཱ པཱཙིཏྟིཡེན ཝཱ, ཡེན ཝཱ སཱ སདྡྷེཡྻཝཙསཱ ཨུཔཱསིཀཱ ཝདེཡྻ, ཏེན སོ བྷིཀྑུ ཀཱརེཏབྦོ, ཨཡམྤི དྷམྨོ ཨནིཡཏོ.

ཨུདྡིཊྛཱ ཁོ ཨཱཡསྨནྟོ དྭེ ཨནིཡཏཱ དྷམྨཱ. ཏཏྠཱཡསྨནྟེ པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡསྨནྟོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

ཨནིཡཏོ ནིཊྛིཏོ.

ནིསྶགྒིཡཔཱཙིཏྟིཡཱ

ཨིམེ ཁོ པནཱཡསྨནྟོ ཏིཾས ནིསྶགྒིཡཱ པཱཙིཏྟིཡཱ

དྷམྨཱ ཨུདྡེསཾ ཨཱགཙྪནྟི.

ཀཐིནསིཀྑཱཔདཾ

༡. ནིཊྛིཏཙཱིཝརསྨིཾ ¶ བྷིཀྑུནཱ ཨུབྦྷཏསྨིཾ ཀཐིནེ དསཱཧཔརམཾ ཨཏིརེཀཙཱིཝརཾ དྷཱརེཏབྦཾ, ཏཾ ཨཏིཀྐཱམཡཏོ ནིསྶགྒིཡཾ པཱཙིཏྟིཡཾ.

ཨུདོསིཏསིཀྑཱཔདཾ

༢. ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ ཨེཀརཏྟམྤི ཙེ བྷིཀྑུ ཏིཙཱིཝརེན ཝིཔྤཝསེཡྻ, ཨཉྙཏྲ བྷིཀྑུསམྨུཏིཡཱ ནིསྶགྒིཡཾ པཱཙིཏྟིཡཾ.

ཨཀཱལཙཱིཝརསིཀྑཱཔདཾ

༣. ནིཊྛིཏཙཱིཝརསྨིཾ ¶ བྷིཀྑུནཱ ཨུབྦྷཏསྨིཾ ཀཐིནེ བྷིཀྑུནོ པནེཝ ཨཀཱལཙཱིཝརཾ ཨུཔྤཛྫེཡྻ, ཨཱཀངྑམཱནེན བྷིཀྑུནཱ པཊིགྒཧེཏབྦཾ, པཊིགྒཧེཏྭཱ ཁིཔྤམེཝ ཀཱརེཏབྦཾ, ནོ ཙསྶ པཱརིཔཱུརི, མཱསཔརམཾ ཏེན བྷིཀྑུནཱ ཏཾ ཙཱིཝརཾ ནིཀྑིཔིཏབྦཾ ཨཱུནསྶ པཱརིཔཱུརིཡཱ སཏིཡཱ པཙྩཱསཱཡ. ཏཏོ ཙེ ཨུཏྟརི ནིཀྑིཔེཡྻ སཏིཡཱཔི པཙྩཱསཱཡ, ནིསྶགྒིཡཾ པཱཙིཏྟིཡཾ.

པུརཱཎཙཱིཝརསིཀྑཱཔདཾ

༤. ཡོ པན བྷིཀྑུ ཨཉྙཱཏིཀཱཡ བྷིཀྑུནིཡཱ པུརཱཎཙཱིཝརཾ དྷོཝཱཔེཡྻ ཝཱ རཛཱཔེཡྻ ཝཱ ཨཱཀོཊཱཔེཡྻ ཝཱ, ནིསྶགྒིཡཾ པཱཙིཏྟིཡཾ.

ཙཱིཝརཔཊིགྒཧཎསིཀྑཱཔདཾ

༥. ཡོ པན བྷིཀྑུ ཨཉྙཱཏིཀཱཡ བྷིཀྑུནིཡཱ ཧཏྠཏོ ཙཱིཝརཾ པཊིགྒཎྷེཡྻ ཨཉྙཏྲ པཱརིཝཏྟཀཱ, ནིསྶགྒིཡཾ པཱཙིཏྟིཡཾ.

ཨཉྙཱཏཀཝིཉྙཏྟིསིཀྑཱཔདཾ

༦. ཡོ པན བྷིཀྑུ ཨཉྙཱཏཀཾ གཧཔཏིཾ ཝཱ གཧཔཏཱནིཾ ཝཱ ཙཱིཝརཾ ཝིཉྙཱཔེཡྻ ཨཉྙཏྲ ¶ སམཡཱ, ནིསྶགྒིཡཾ པཱཙིཏྟིཡཾ. ཏཏྠཱཡཾ སམཡོ, ཨཙྪིནྣཙཱིཝརོ ཝཱ ཧོཏི བྷིཀྑུ, ནཊྛཙཱིཝརོ ཝཱ, ཨཡཾ ཏཏྠ སམཡོ.

ཏཏུཏྟརིསིཀྑཱཔདཾ

༧. ཏཉྩེ ཨཉྙཱཏཀོ གཧཔཏི ཝཱ གཧཔཏཱནཱི ཝཱ བཧཱུཧི ཙཱིཝརེཧི ཨབྷིཧཊྛུཾ པཝཱརེཡྻ, སནྟརུཏྟརཔརམཾ ཏེན བྷིཀྑུནཱ ཏཏོ ཙཱིཝརཾ སཱདིཏབྦཾ. ཏཏོ ཙེ ཨུཏྟརི སཱདིཡེཡྻ, ནིསྶགྒིཡཾ པཱཙིཏྟིཡཾ.

པཋམཨུཔཀྑཊསིཀྑཱཔདཾ

༨. བྷིཀྑུཾ པནེཝ ཨུདྡིསྶ ཨཉྙཱཏཀསྶ གཧཔཏིསྶ ཝཱ གཧཔཏཱནིཡཱ ཝཱ ཙཱིཝརཙེཏཱཔནྣཾ ཨུཔཀྑཊཾ ཧོཏི ‘‘ཨིམིནཱ ཙཱིཝརཙེཏཱཔནྣེན ཙཱིཝརཾ ཙེཏཱཔེཏྭཱ ཨིཏྠནྣཱམཾ བྷིཀྑུཾ ཙཱིཝརེན ཨཙྪཱདེསྶཱམཱི’’ཏི, ཏཏྲ ཙེ སོ བྷིཀྑུ པུབྦེ ཨཔྤཝཱརིཏོ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫེཡྻ ‘‘སཱདྷུ ཝཏ མཾ ཨཱཡསྨཱ ཨིམིནཱ ཙཱིཝརཙེཏཱཔནྣེན ཨེཝརཱུཔཾ ཝཱ ཨེཝརཱུཔཾ ཝཱ ཙཱིཝརཾ ཙེཏཱཔེཏྭཱ ཨཙྪཱདེཧཱི’’ཏི ཀལྱཱཎཀམྱཏཾ ཨུཔཱདཱཡ, ནིསྶགྒིཡཾ པཱཙིཏྟིཡཾ.

དུཏིཡཨུཔཀྑཊསིཀྑཱཔདཾ

༩. བྷིཀྑུཾ ¶ པནེཝ ཨུདྡིསྶ ཨུབྷིནྣཾ ཨཉྙཱཏཀཱནཾ གཧཔཏཱིནཾ ཝཱ གཧཔཏཱནཱིནཾ ཝཱ པཙྩེཀཙཱིཝརཙེཏཱཔནྣཱནི ཨུཔཀྑཊཱནི ཧོནྟི ‘‘ཨིམེཧི མཡཾ པཙྩེཀཙཱིཝརཙེཏཱཔནྣེཧི པཙྩེཀཙཱིཝརཱནི ཙེཏཱཔེཏྭཱ ཨིཏྠནྣཱམཾ བྷིཀྑུཾ ཙཱིཝརེཧི ཨཙྪཱདེསྶཱམཱ’’ཏི, ཏཏྲ ཙེ སོ བྷིཀྑུ པུབྦེ ཨཔྤཝཱརིཏོ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫེཡྻ ‘‘སཱདྷུ ཝཏ མཾ ཨཱཡསྨནྟོ ཨིམེཧི པཙྩེཀཙཱིཝརཙེཏཱཔནྣེཧི ཨེཝརཱུཔཾ ཝཱ ཨེཝརཱུཔཾ ཝཱ ཙཱིཝརཾ ཙེཏཱཔེཏྭཱ ཨཙྪཱདེཐ ཨུབྷོཝ སནྟཱ ཨེཀེནཱ’’ཏི ཀལྱཱཎཀམྱཏཾ ཨུཔཱདཱཡ, ནིསྶགྒིཡཾ པཱཙིཏྟིཡཾ.

རཱཛསིཀྑཱཔདཾ

༡༠. བྷིཀྑུཾ པནེཝ ཨུདྡིསྶ རཱཛཱ ཝཱ རཱཛབྷོགྒོ ཝཱ བྲཱཧྨཎོ ཝཱ གཧཔཏིཀོ ཝཱ དཱུཏེན ཙཱིཝརཙེཏཱཔནྣཾ པཧིཎེཡྻ ‘‘ཨིམིནཱ ཙཱིཝརཙེཏཱཔནྣེན ཙཱིཝརཾ ཙེཏཱཔེཏྭཱ ཨིཏྠནྣཱམཾ བྷིཀྑུཾ ཙཱིཝརེན ཨཙྪཱདེཧཱི’’ཏི. སོ ཙེ དཱུཏོ ཏཾ བྷིཀྑུཾ ཨུཔསངྐམིཏྭཱ ཨེཝཾ ཝདེཡྻ ‘‘ཨིདཾ ཁོ, བྷནྟེ, ཨཱཡསྨནྟཾ ཨུདྡིསྶ ཙཱིཝརཙེཏཱཔནྣཾ ཨཱབྷཏཾ, པཊིགྒཎྷཱཏུ ཨཱཡསྨཱ ཙཱིཝརཙེཏཱཔནྣ’’ནྟི. ཏེན བྷིཀྑུནཱ སོ དཱུཏོ ཨེཝམསྶ ཝཙནཱིཡོ ‘‘ན ཁོ མཡཾ, ཨཱཝུསོ, ཙཱིཝརཙེཏཱཔནྣཾ པཊིགྒཎྷཱམ, ཙཱིཝརཉྩ ཁོ མཡཾ པཊིགྒཎྷཱམ ཀཱལེན ཀཔྤིཡ’’ནྟི. སོ ཙེ དཱུཏོ ¶ ཏཾ བྷིཀྑུཾ ཨེཝཾ ཝདེཡྻ ‘‘ཨཏྠི པནཱཡསྨཏོ ཀོཙི ཝེཡྻཱཝཙྩཀརོ’’ཏི. ཙཱིཝརཏྠིཀེན, བྷིཀྑཝེ, བྷིཀྑུནཱ ཝེཡྻཱཝཙྩཀརོ ནིདྡིསིཏབྦོ ཨཱརཱམིཀོ ཝཱ ཨུཔཱསཀོ ཝཱ ‘‘ཨེསོ ཁོ, ཨཱཝུསོ, བྷིཀྑཱུནཾ ཝེཡྻཱཝཙྩཀརོ’’ཏི. སོ ཙེ དཱུཏོ ཏཾ ཝེཡྻཱཝཙྩཀརཾ སཉྙཱཔེཏྭཱ ཏཾ བྷིཀྑུཾ ཨུཔསངྐམིཏྭཱ ཨེཝཾ ཝདེཡྻ ‘‘ཡཾ ཁོ, བྷནྟེ, ཨཱཡསྨཱ ཝེཡྻཱཝཙྩཀརཾ ནིདྡིསི, སཉྙཏྟོ སོ མཡཱ, ཨུཔསངྐམཏཱཡསྨཱ ཀཱལེན, ཙཱིཝརེན ཏཾ ཨཙྪཱདེསྶཏཱི’’ཏི. ཙཱིཝརཏྠིཀེན, བྷིཀྑཝེ, བྷིཀྑུནཱ ཝེཡྻཱཝཙྩཀརོ ཨུཔསངྐམིཏྭཱ དྭཏྟིཀྑཏྟུཾ ཙོདེཏབྦོ སཱརེཏབྦོ ‘‘ཨཏྠོ མེ, ཨཱཝུསོ, ཙཱིཝརེནཱ’’ཏི, དྭཏྟིཀྑཏྟུཾ ཙོདཡམཱནོ སཱརཡམཱནོ ཏཾ ཙཱིཝརཾ ཨབྷིནིཔྥཱདེཡྻ, ཨིཙྩེཏཾ ཀུསལཾ, ནོ ཙེ ཨབྷིནིཔྥཱདེཡྻ, ཙཏུཀྑཏྟུཾ པཉྩཀྑཏྟུཾ ཚཀྑཏྟུཔརམཾ ཏུཎྷཱིབྷཱུཏེན ཨུདྡིསྶ ཋཱཏབྦཾ, ཙཏུཀྑཏྟུཾ པཉྩཀྑཏྟུཾ ཚཀྑཏྟུཔརམཾ ཏུཎྷཱིབྷཱུཏོ ཨུདྡིསྶ ཏིཊྛམཱནོ ཏཾ ཙཱིཝརཾ ཨབྷིནིཔྥཱདེཡྻ, ཨིཙྩེཏཾ ཀུསལཾ, ཏཏོ ཙེ ཨུཏྟརི ཝཱཡམམཱནོ ཏཾ ཙཱིཝརཾ ཨབྷིནིཔྥཱདེཡྻ, ནིསྶགྒིཡཾ པཱཙིཏྟིཡཾ. ནོ ¶ ཙེ ཨབྷིནིཔྥཱདེཡྻ, ཡཏསྶ ཙཱིཝརཙེཏཱཔནྣཾ ཨཱབྷཏཾ, ཏཏྠ སཱམཾ ཝཱ གནྟབྦཾ, དཱུཏོ ཝཱ པཱཧེཏབྦོ ‘‘ཡཾ ཁོ ཏུམྷེ ཨཱཡསྨནྟོ བྷིཀྑུཾ ཨུདྡིསྶ ཙཱིཝརཙེཏཱཔནྣཾ པཧིཎིཏྠ, ན ཏཾ ཏསྶ བྷིཀྑུནོ ཀིཉྩི ཨཏྠཾ ཨནུབྷོཏི, ཡུཉྫནྟཱཡསྨནྟོ སཀཾ, མཱ ཝོ སཀཾ ཝིནསྶཱ’’ཏི, ཨཡཾ ཏཏྠ སཱམཱིཙི.

ཀཐིནཝགྒོ པཋམོ.

ཀོསིཡསིཀྑཱཔདཾ

༡༡. ཡོ པན བྷིཀྑུ ཀོསིཡམིསྶཀཾ སནྠཏཾ ཀཱརཱཔེཡྻ, ནིསྶགྒིཡཾ པཱཙིཏྟིཡཾ.

སུདྡྷཀཱལ༹ཀསིཀྑཱཔདཾ

༡༢. ཡོ པན བྷིཀྑུ སུདྡྷཀཱལ༹ཀཱནཾ ཨེལ༹ཀལོམཱནཾ སནྠཏཾ ཀཱརཱཔེཡྻ, ནིསྶགྒིཡཾ པཱཙིཏྟིཡཾ.

དྭེབྷཱགསིཀྑཱཔདཾ

༡༣. ནཝཾ པན བྷིཀྑུནཱ སནྠཏཾ ཀཱརཡམཱནེན དྭེ བྷཱགཱ སུདྡྷཀཱལ༹ཀཱནཾ ཨེལ༹ཀལོམཱནཾ ཨཱདཱཏབྦཱ, ཏཏིཡཾ ཨོདཱཏཱནཾ, ཙཏུཏྠཾ གོཙརིཡཱནཾ. ཨནཱདཱ ཙེ བྷིཀྑུ དྭེ བྷཱགེ སུདྡྷཀཱལ༹ཀཱནཾ ཨེལ༹ཀལོམཱནཾ, ཏཏིཡཾ ཨོདཱཏཱནཾ, ཙཏུཏྠཾ གོཙརིཡཱནཾ, ནཝཾ སནྠཏཾ ཀཱརཱཔེཡྻ, ནིསྶགྒིཡཾ པཱཙིཏྟིཡཾ.

ཚབྦསྶསིཀྑཱཔདཾ

༡༤. ནཝཾ པན བྷིཀྑུནཱ སནྠཏཾ ཀཱརཱཔེཏྭཱ ཚབྦསྶཱནི དྷཱརེཏབྦཾ, ཨོརེན ཙེ ཚནྣཾ ཝསྶཱནཾ ¶ ཏཾ སནྠཏཾ ཝིསྶཛྫེཏྭཱ ཝཱ ཨཝིསྶཛྫེཏྭཱ ཝཱ ཨཉྙཾ ནཝཾ སནྠཏཾ ཀཱརཱཔེཡྻ ཨཉྙཏྲ བྷིཀྑུསམྨུཏིཡཱ, ནིསྶགྒིཡཾ པཱཙིཏྟིཡཾ.

ནིསཱིདནསནྠཏསིཀྑཱཔདཾ

༡༥. ནིསཱིདནསནྠཏཾ པན བྷིཀྑུནཱ ཀཱརཡམཱནེན པུརཱཎསནྠཏསྶ སཱམནྟཱ སུགཏཝིདཏྠི ཨཱདཱཏབྦཱ དུབྦཎྞཀརཎཱཡ. ཨནཱདཱ ཙེ བྷིཀྑུ པུརཱཎསནྠ ཏསྶ ¶ སཱམནྟཱ སུགཏཝིདཏྠིཾ, ནཝཾ ནིསཱིདནསནྠཏཾ ཀཱརཱཔེཡྻ, ནིསྶགྒིཡཾ པཱཙིཏྟིཡཾ.

ཨེལ༹ཀལོམསིཀྑཱཔདཾ

༡༦. བྷིཀྑུནོ པནེཝ ཨདྡྷཱནམགྒཔྤཊིཔནྣསྶ ཨེལ༹ཀལོམཱནི ཨུཔྤཛྫེཡྻུཾ, ཨཱཀངྑམཱནེན བྷིཀྑུནཱ པཊིགྒཧེཏབྦཱནི, པཊིགྒཧེཏྭཱ ཏིཡོཛནཔརམཾ སཧཏྠཱ ཧརིཏབྦཱནི ཨསནྟེ ཧཱརཀེ. ཏཏོ ཙེ ཨུཏྟརི ཧརེཡྻ, ཨསནྟེཔི ཧཱརཀེ, ནིསྶགྒིཡཾ པཱཙིཏྟིཡཾ.

ཨེལ༹ཀལོམདྷོཝཱཔནསིཀྑཱཔདཾ

༡༧. ཡོ པན བྷིཀྑུ ཨཉྙཱཏིཀཱཡ བྷིཀྑུནིཡཱ ཨེལ༹ཀལོམཱནི དྷོཝཱཔེཡྻ ཝཱ རཛཱཔེཡྻ ཝཱ ཝིཛཊཱཔེཡྻ ཝཱ, ནིསྶགྒིཡཾ པཱཙིཏྟིཡཾ.

རཱུཔིཡསིཀྑཱཔདཾ

༡༨. ཡོ པན བྷིཀྑུ ཛཱཏརཱུཔརཛཏཾ ཨུགྒཎྷེཡྻ ཝཱ ཨུགྒཎྷཱཔེཡྻ ཝཱ ཨུཔནིཀྑིཏྟཾ ཝཱ སཱདིཡེཡྻ, ནིསྶགྒིཡཾ པཱཙིཏྟིཡཾ.

རཱུཔིཡསཾཝོཧཱརསིཀྑཱཔདཾ

༡༩. ཡོ པན བྷིཀྑུ ནཱནཔྤཀཱརཀཾ རཱུཔིཡསཾཝོཧཱརཾ སམཱཔཛྫེཡྻ, ནིསྶགྒིཡཾ པཱཙིཏྟིཡཾ.

ཀཡཝིཀྐཡསིཀྑཱཔདཾ

༢༠. ཡོ པན བྷིཀྑུ ནཱནཔྤཀཱརཀཾ ཀཡཝིཀྐཡཾ སམཱཔཛྫེཡྻ, ནིསྶགྒིཡཾ པཱཙིཏྟིཡཾ.

ཀོསིཡཝགྒོ དུཏིཡོ.

པཏྟསིཀྑཱཔདཾ

༢༡. དསཱཧཔརམཾ ¶ ཨཏིརེཀཔཏྟོ དྷཱརེཏབྦོ, ཏཾ ཨཏིཀྐཱམཡཏོ ནིསྶགྒིཡཾ པཱཙིཏྟིཡཾ.

ཨཱུནཔཉྩབནྡྷནསིཀྑཱཔདཾ

༢༢. ཡོ པན བྷིཀྑུ ཨཱུནཔཉྩབནྡྷནེན པཏྟེན ཨཉྙཾ ནཝཾ པཏྟཾ ཙེཏཱཔེཡྻ, ནིསྶགྒིཡཾ པཱཙིཏྟིཡཾ. ཏེན བྷིཀྑུནཱ སོ པཏྟོ བྷིཀྑུཔརིསཱཡ ནིསྶཛྫིཏབྦོ ¶ , ཡོ ཙ ཏསྶཱ བྷིཀྑུཔརིསཱཡ པཏྟཔརིཡནྟོ, སོ ཏསྶ བྷིཀྑུནོ པདཱཏབྦོ ‘‘ཨཡཾ ཏེ བྷིཀྑུ པཏྟོ ཡཱཝ བྷེདནཱཡ དྷཱརེཏབྦོ’’ཏི, ཨཡཾ ཏཏྠ སཱམཱིཙི.

བྷེསཛྫསིཀྑཱཔདཾ

༢༣. ཡཱནི ཁོ པན ཏཱནི གིལཱནཱནཾ བྷིཀྑཱུནཾ པཊིསཱཡནཱིཡཱནི བྷེསཛྫཱནི, སེཡྻཐིདཾ – སཔྤི ནཝནཱིཏཾ ཏེལཾ མདྷུ ཕཱཎིཏཾ, ཏཱནི པཊིགྒཧེཏྭཱ སཏྟཱཧཔརམཾ སནྣིདྷིཀཱརཀཾ པརིབྷུཉྫིཏབྦཱནི, ཏཾ ཨཏིཀྐཱམཡཏོ ནིསྶགྒིཡཾ པཱཙིཏྟིཡཾ.

ཝསྶིཀསཱཊིཀསིཀྑཱཔདཾ

༢༤. ‘‘མཱསོ སེསོ གིམྷཱན’’ནྟི བྷིཀྑུནཱ ཝསྶིཀསཱཊིཀཙཱིཝརཾ པརིཡེསིཏབྦཾ, ‘‘ཨདྡྷམཱསོ སེསོ གིམྷཱན’’ནྟི ཀཏྭཱ ནིཝཱསེཏབྦཾ. ཨོརེན ཙེ ‘‘མཱསོ སེསོ གིམྷཱན’’ནྟི ཝསྶིཀསཱཊིཀཙཱིཝརཾ པརིཡེསེཡྻ, ཨོརེན‘‘དྡྷམཱསོ སེསོ གིམྷཱན’’ནྟི ཀཏྭཱ ནིཝཱསེཡྻ, ནིསྶགྒིཡཾ པཱཙིཏྟིཡཾ.

ཙཱིཝརཨཙྪིནྡནསིཀྑཱཔདཾ

༢༥. ཡོ པན བྷིཀྑུ བྷིཀྑུསྶ སཱམཾ ཙཱིཝརཾ དཏྭཱ ཀུཔིཏོ ཨནཏྟམནོ ཨཙྪིནྡེཡྻ ཝཱ ཨཙྪིནྡཱཔེཡྻ ཝཱ, ནིསྶགྒིཡཾ པཱཙིཏྟིཡཾ.

སུཏྟཝིཉྙཏྟིསིཀྑཱཔདཾ

༢༦. ཡོ པན བྷིཀྑུ སཱམཾ སུཏྟཾ ཝིཉྙཱཔེཏྭཱ ཏནྟཝཱཡེཧི ཙཱིཝརཾ ཝཱཡཱཔེཡྻ, ནིསྶགྒིཡཾ པཱཙིཏྟིཡཾ.

མཧཱཔེསཀཱརསིཀྑཱཔདཾ

༢༧. བྷིཀྑུཾ པནེཝ ཨུདྡིསྶ ཨཉྙཱཏཀོ གཧཔཏི ཝཱ གཧཔཏཱནཱི ཝཱ ཏནྟཝཱཡེཧི ཙཱིཝརཾ ¶ ཝཱཡཱཔེཡྻ, ཏཏྲ ཙེ སོ བྷིཀྑུ པུབྦེ ཨཔྤཝཱརིཏོ ཏནྟཝཱཡེ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫེཡྻ ‘‘ཨིདཾ ཁོ, ཨཱཝུསོ, ཙཱིཝརཾ མཾ ཨུདྡིསྶ ཝིཡྻཏི, ཨཱཡཏཉྩ ཀརོཐ, ཝིཏྠཏཉྩ, ཨཔྤིཏཉྩ, སུཝཱིཏཉྩ, སུཔྤཝཱཡིཏཉྩ, སུཝིལེཁིཏཉྩ, སུཝིཏཙྪིཏཉྩ ཀརོཐ, ཨཔྤེཝ ནཱམ མཡམྤི ཨཱཡསྨནྟཱནཾ ཀིཉྩིམཏྟཾ ཨནུཔདཛྫེཡྻཱམཱ’’ཏི. ཨེཝཉྩ སོ བྷིཀྑུ ཝཏྭཱ ཀིཉྩིམཏྟཾ ཨནུཔདཛྫེཡྻ ཨནྟམསོ པིཎྜཔཱཏམཏྟམྤི, ནིསྶགྒིཡཾ པཱཙིཏྟིཡཾ.

ཨཙྩེཀཙཱིཝརསིཀྑཱཔདཾ

༢༨. དསཱཧཱནཱགཏཾ ¶ ཀཏྟིཀཏེམཱསིཀཔུཎྞམཾ བྷིཀྑུནོ པནེཝ ཨཙྩེཀཙཱིཝརཾ ཨུཔྤཛྫེཡྻ, ཨཙྩེཀཾ མཉྙམཱནེན བྷིཀྑུནཱ པཊིགྒཧེཏབྦཾ, པཊིགྒཧེཏྭཱ ཡཱཝ ཙཱིཝརཀཱལསམཡཾ ནིཀྑིཔིཏབྦཾ. ཏཏོ ཙེ ཨུཏྟརི ནིཀྑིཔེཡྻ, ནིསྶགྒིཡཾ པཱཙིཏྟིཡཾ.

སཱསངྐསིཀྑཱཔདཾ

༢༩. ཨུཔཝསྶཾ ཁོ པན ཀཏྟིཀཔུཎྞམཾ ཡཱནི ཁོ པན ཏཱནི ཨཱརཉྙཀཱནི སེནཱསནཱནི སཱསངྐསམྨཏཱནི སཔྤཊིབྷཡཱནི, ཏཐཱརཱུཔེསུ བྷིཀྑུ སེནཱསནེསུ ཝིཧརནྟོ ཨཱཀངྑམཱནོ ཏིཎྞཾ ཙཱིཝརཱནཾ ཨཉྙཏརཾ ཙཱིཝརཾ ཨནྟརགྷརེ ནིཀྑིཔེཡྻ, སིཡཱ ཙ ཏསྶ བྷིཀྑུནོ ཀོཙིདེཝ པཙྩཡོ ཏེན ཙཱིཝརེན ཝིཔྤཝཱསཱཡ, ཚཱརཏྟཔརམཾ ཏེན བྷིཀྑུནཱ ཏེན ཙཱིཝརེན ཝིཔྤཝསིཏབྦཾ. ཏཏོ ཙེ ཨུཏྟརི ཝིཔྤཝསེཡྻ ཨཉྙཏྲ བྷིཀྑུསམྨུཏིཡཱ, ནིསྶགྒིཡཾ པཱཙིཏྟིཡཾ.

པརིཎཏསིཀྑཱཔདཾ

༣༠. ཡོ པན བྷིཀྑུ ཛཱནཾ སངྒྷིཀཾ ལཱབྷཾ པརིཎཏཾ ཨཏྟནོ པརིཎཱམེཡྻ, ནིསྶགྒིཡཾ པཱཙིཏྟིཡཾ.

པཏྟཝགྒོ ཏཏིཡོ.

ཨུདྡིཊྛཱ ཁོ ཨཱཡསྨནྟོ ཏིཾས ནིསྶགྒིཡཱ པཱཙིཏྟིཡཱ དྷམྨཱ. ཏཏྠཱཡསྨནྟེ པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡསྨནྟོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

ནིསྶགྒིཡཔཱཙིཏྟིཡཱ ནིཊྛིཏཱ.

སུདྡྷཔཱཙིཏྟིཡཱ

ཨིམེ ཁོ པནཱཡསྨནྟོ དྭེནཝུཏི པཱཙིཏྟིཡཱ

དྷམྨཱ ཨུདྡེསཾ ཨཱགཙྪནྟི.

མུསཱཝཱདསིཀྑཱཔདཾ

༡. སམྤཛཱནམུསཱཝཱདེ ¶ པཱཙིཏྟིཡཾ.

ཨོམསཝཱདསིཀྑཱཔདཾ

༢. ཨོམསཝཱདེ པཱཙིཏྟིཡཾ.

པེསུཉྙསིཀྑཱཔདཾ

༣. བྷིཀྑུཔེསུཉྙེ ¶ པཱཙིཏྟིཡཾ.

པདསོདྷམྨསིཀྑཱཔདཾ

༤. ཡོ པན བྷིཀྑུ ཨནུཔསམྤནྣཾ པདསོ དྷམྨཾ ཝཱཙེཡྻ, པཱཙིཏྟིཡཾ.

པཋམསཧསེཡྻསིཀྑཱཔདཾ

༥. ཡོ པན བྷིཀྑུ ཨནུཔསམྤནྣེན ཨུཏྟརིདིརཏྟཏིརཏྟཾ སཧསེཡྻཾ ཀཔྤེཡྻ, པཱཙིཏྟིཡཾ.

དུཏིཡསཧསེཡྻསིཀྑཱཔདཾ

༦. ཡོ པན བྷིཀྑུ མཱཏུགཱམེན སཧསེཡྻཾ ཀཔྤེཡྻ, པཱཙིཏྟིཡཾ.

དྷམྨདེསནཱསིཀྑཱཔདཾ

༧. ཡོ པན བྷིཀྑུ མཱཏུགཱམསྶ ཨུཏྟརིཚཔྤཉྩཝཱཙཱཧི དྷམྨཾ དེསེཡྻ ཨཉྙཏྲ ཝིཉྙུནཱ པུརིསཝིགྒཧེན, པཱཙིཏྟིཡཾ.

བྷཱུཏཱརོཙནསིཀྑཱཔདཾ

༨. ཡོ པན བྷིཀྑུ ཨནུཔསམྤནྣསྶ ཨུཏྟརིམནུསྶདྷམྨཾ ཨཱརོཙེཡྻ, བྷཱུཏསྨིཾ པཱཙིཏྟིཡཾ.

དུཊྛུལླཱརོཙནསིཀྑཱཔདཾ

༩. ཡོ ¶ པན བྷིཀྑུ བྷིཀྑུསྶ དུཊྛུལླཾ ཨཱཔཏྟིཾ ཨནུཔསམྤནྣསྶ ཨཱརོཙེཡྻ ཨཉྙཏྲ བྷིཀྑུསམྨུཏིཡཱ, པཱཙིཏྟིཡཾ.

པཐཝཱིཁཎནསིཀྑཱཔདཾ

༡༠. ཡོ པན བྷིཀྑུ པཐཝིཾ ཁཎེཡྻ ཝཱ ཁཎཱཔེཡྻ ཝཱ པཱཙིཏྟིཡཾ.

མུསཱཝཱདཝགྒོ པཋམོ.

བྷཱུཏགཱམསིཀྑཱཔདཾ

༡༡. བྷཱུཏགཱམཔཱཏབྱཏཱཡ པཱཙིཏྟིཡཾ.

ཨཉྙཝཱདཀསིཀྑཱཔདཾ

༡༢. ཨཉྙཝཱདཀེ, ཝིཧེསཀེ པཱཙིཏྟིཡཾ.

ཨུཛ྄ཛྷཱཔནཀསིཀྑཱཔདཾ

༡༣. ཨུཛ྄ཛྷཱཔནཀེ ¶ , ཁིཡྻནཀེ པཱཙིཏྟིཡཾ.

པཋམསེནཱསནསིཀྑཱཔདཾ

༡༤. ཡོ པན བྷིཀྑུ སངྒྷིཀཾ མཉྩཾ ཝཱ པཱིཋཾ ཝཱ བྷིསིཾ ཝཱ ཀོཙྪཾ ཝཱ ཨཛ྄ཛྷོཀཱསེ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟོ ནེཝ ཨུདྡྷརེཡྻ, ན ཨུདྡྷརཱཔེཡྻ, ཨནཱཔུཙྪཾ ཝཱ གཙྪེཡྻ, པཱཙིཏྟིཡཾ.

དུཏིཡསེནཱསནསིཀྑཱཔདཾ

༡༥. ཡོ པན བྷིཀྑུ སངྒྷིཀེ ཝིཧཱརེ སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟོ ནེཝ ཨུདྡྷརེཡྻ, ན ཨུདྡྷརཱཔེཡྻ, ཨནཱཔུཙྪཾ ཝཱ གཙྪེཡྻ, པཱཙིཏྟིཡཾ.

ཨནུཔཁཛྫསིཀྑཱཔདཾ

༡༦. ཡོ པན བྷིཀྑུ སངྒྷིཀེ ཝིཧཱརེ ཛཱནཾ པུབྦུཔགཏཾ བྷིཀྑུཾ ཨནུཔཁཛྫ སེཡྻཾ ཀཔྤེཡྻ ¶ ‘‘ཡསྶ སམྦཱདྷོ བྷཝིསྶཏི, སོ པཀྐམིསྶཏཱི’’ཏི ཨེཏདེཝ པཙྩཡཾ ཀརིཏྭཱ ཨནཉྙཾ, པཱཙིཏྟིཡཾ.

ནིཀྐཌྜྷནསིཀྑཱཔདཾ

༡༧. ཡོ པན བྷིཀྑུ བྷིཀྑུཾ ཀུཔིཏོ ཨནཏྟམནོ སངྒྷིཀཱ ཝིཧཱརཱ ནིཀྐཌྜྷེཡྻ ཝཱ ནིཀྐཌྜྷཱཔེཡྻ ཝཱ, པཱཙིཏྟིཡཾ.

ཝེཧཱསཀུཊིསིཀྑཱཔདཾ

༡༨. ཡོ པན བྷིཀྑུ སངྒྷིཀེ ཝིཧཱརེ ཨུཔརིཝེཧཱསཀུཊིཡཱ ཨཱཧཙྩཔཱདཀཾ མཉྩཾ ཝཱ པཱིཋཾ ཝཱ ཨབྷིནིསཱིདེཡྻ ཝཱ ཨབྷིནིཔཛྫེཡྻ ཝཱ, པཱཙིཏྟིཡཾ.

མཧལླཀཝིཧཱརསིཀྑཱཔདཾ

༡༩. མཧལླཀཾ པན བྷིཀྑུནཱ ཝིཧཱརཾ ཀཱརཡམཱནེན ཡཱཝ དྭཱརཀོསཱ ཨགྒལ༹ཊྛཔནཱཡ ཨཱལོཀསནྡྷིཔརིཀམྨཱཡ དྭཏྟིཙྪདནསྶ པརིཡཱཡཾ ཨཔྤཧརིཏེ ཋིཏེན ཨདྷིཊྛཱཏབྦཾ, ཏཏོ ཙེ ཨུཏྟརི ཨཔྤཧརིཏེཔི ཋིཏོ ཨདྷིཊྛཧེཡྻ, པཱཙིཏྟིཡཾ.

སཔྤཱཎཀསིཀྑཱཔདཾ

༢༠. ཡོ པན བྷིཀྑུ ཛཱནཾ སཔྤཱཎཀཾ ཨུདཀཾ ཏིཎཾ ཝཱ མཏྟིཀཾ ཝཱ སིཉྩེཡྻ ཝཱ སིཉྩཱཔེཡྻ ཝཱ, པཱཙིཏྟིཡཾ.

བྷཱུཏགཱམཝགྒོ དུཏིཡོ.

ཨོཝཱདསིཀྑཱཔདཾ

༢༡. ཡོ ¶ པན བྷིཀྑུ ཨསམྨཏོ བྷིཀྑུནིཡོ ཨོཝདེཡྻ, པཱཙིཏྟིཡཾ.

ཨཏྠངྒཏསིཀྑཱཔདཾ

༢༢. སམྨཏོཔི ཙེ བྷིཀྑུ ཨཏྠངྒཏེ སཱུརིཡེ བྷིཀྑུནིཡོ ཨོཝདེཡྻ, པཱཙིཏྟིཡཾ.

བྷིཀྑུནུཔསྶཡསིཀྑཱཔདཾ

༢༣. ཡོ ¶ པན བྷིཀྑུ བྷིཀྑུནུཔསྶཡཾ ཨུཔསངྐམིཏྭཱ བྷིཀྑུནིཡོ ཨོཝདེཡྻ ཨཉྙཏྲ སམཡཱ, པཱཙིཏྟིཡཾ. ཏཏྠཱཡཾ སམཡོ, གིལཱནཱ ཧོཏི བྷིཀྑུནཱི, ཨཡཾ ཏཏྠ སམཡོ.

ཨཱམིསསིཀྑཱཔདཾ

༢༤. ཡོ པན བྷིཀྑུ ཨེཝཾ ཝདེཡྻ ‘‘ཨཱམིསཧེཏུ ཐེརཱ བྷིཀྑཱུ བྷིཀྑུནིཡོ ཨོཝདནྟཱི’’ཏི, པཱཙིཏྟིཡཾ.

ཙཱིཝརདཱནསིཀྑཱཔདཾ

༢༥. ཡོ པན བྷིཀྑུ ཨཉྙཱཏིཀཱཡ བྷིཀྑུནིཡཱ ཙཱིཝརཾ དདེཡྻ ཨཉྙཏྲ པཱརིཝཏྟཀཱ, པཱཙིཏྟིཡཾ.

ཙཱིཝརསིབྦནསིཀྑཱཔདཾ

༢༦. ཡོ པན བྷིཀྑུ ཨཉྙཱཏིཀཱཡ བྷིཀྑུནིཡཱ ཙཱིཝརཾ སིབྦེཡྻ ཝཱ སིབྦཱཔེཡྻ ཝཱ, པཱཙིཏྟིཡཾ.

སཾཝིདྷཱནསིཀྑཱཔདཾ

༢༧. ཡོ པན བྷིཀྑུ བྷིཀྑུནིཡཱ སདྡྷིཾ སཾཝིདྷཱཡ ཨེཀདྡྷཱནམགྒཾ པཊིཔཛྫེཡྻ ཨནྟམསོ གཱམནྟརམྤི ཨཉྙཏྲ སམཡཱ, པཱཙིཏྟིཡཾ. ཏཏྠཱཡཾ སམཡོ, སཏྠགམནཱིཡོ ཧོཏི མགྒོ, སཱསངྐསམྨཏོ, སཔྤཊིབྷཡོ, ཨཡཾ ཏཏྠ སམཡོ.

ནཱཝཱབྷིརུཧནསིཀྑཱཔདཾ

༢༨. ཡོ པན བྷིཀྑུ བྷིཀྑུནིཡཱ སདྡྷིཾ སཾཝིདྷཱཡ ཨེཀཾ ནཱཝཾ ཨབྷིརུཧེཡྻ ཨུདྡྷཾགཱམིནིཾ ཝཱ ཨདྷོགཱམིནིཾ ཝཱ ཨཉྙཏྲ ཏིརིཡཾ ཏརཎཱཡ, པཱཙིཏྟིཡཾ.

པརིཔཱཙིཏསིཀྑཱཔདཾ

༢༩. ཡོ ¶ པན བྷིཀྑུ ཛཱནཾ བྷིཀྑུནིཔརིཔཱཙིཏཾ པིཎྜཔཱཏཾ བྷུཉྫེཡྻ ཨཉྙཏྲ པུབྦེ གིཧིསམཱརམྦྷཱ, པཱཙིཏྟིཡཾ.

རཧོནིསཛྫསིཀྑཱཔདཾ

༣༠. ཡོ ¶ པན བྷིཀྑུ བྷིཀྑུནིཡཱ སདྡྷིཾ ཨེཀོ ཨེཀཱཡ རཧོ ནིསཛྫཾ ཀཔྤེཡྻ, པཱཙིཏྟིཡཾ.

ཨོཝཱདཝགྒོ ཏཏིཡོ.

ཨཱཝསཐཔིཎྜསིཀྑཱཔདཾ

༣༡. ཨགིལཱནེན བྷིཀྑུནཱ ཨེཀོ ཨཱཝསཐཔིཎྜོ བྷུཉྫིཏབྦོ. ཏཏོ ཙེ ཨུཏྟརི བྷུཉྫེཡྻ, པཱཙིཏྟིཡཾ.

གཎབྷོཛནསིཀྑཱཔདཾ

༣༢. གཎབྷོཛནེ ཨཉྙཏྲ སམཡཱ པཱཙིཏྟིཡཾ. ཏཏྠཱཡཾ སམཡོ, གིལཱནསམཡོ, ཙཱིཝརདཱནསམཡོ, ཙཱིཝརཀཱརསམཡོ, ཨདྡྷཱནགམནསམཡོ, ནཱཝཱབྷིརུཧནསམཡོ, མཧཱསམཡོ, སམཎབྷཏྟསམཡོ, ཨཡཾ ཏཏྠ སམཡོ.

པརམྤརབྷོཛནསིཀྑཱཔདཾ

༣༣. པརམྤརབྷོཛནེ ཨཉྙཏྲ སམཡཱ པཱཙིཏྟིཡཾ. ཏཏྠཱཡཾ སམཡོ, གིལཱནསམཡོ, ཙཱིཝརདཱནསམཡོ, ཙཱིཝརཀཱརསམཡོ, ཨཡཾ ཏཏྠ སམཡོ.

ཀཱཎམཱཏུསིཀྑཱཔདཾ

༣༤. བྷིཀྑུཾ པནེཝ ཀུལཾ ཨུཔགཏཾ པཱུཝེཧི ཝཱ མནྠེཧི ཝཱ ཨབྷིཧཊྛུཾ པཝཱརེཡྻ, ཨཱཀངྑམཱནེན བྷིཀྑུནཱ དྭཏྟིཔཏྟཔཱུརཱ པཊིགྒཧེཏབྦཱ. ཏཏོ ཙེ ཨུཏྟརི པཊིགྒཎྷེཡྻ, པཱཙིཏྟིཡཾ. དྭཏྟིཔཏྟཔཱུརེ པཊིགྒཧེཏྭཱ ཏཏོ ནཱིཧརིཏྭཱ བྷིཀྑཱུཧི སདྡྷིཾ སཾཝིབྷཛིཏབྦཾ, ཨཡཾ ཏཏྠ སཱམཱིཙི.

པཋམཔཝཱརཎཱསིཀྑཱཔདཾ

༣༥. ཡོ པན བྷིཀྑུ བྷུཏྟཱཝཱི པཝཱརིཏོ ཨནཏིརིཏྟཾ ཁཱདནཱིཡཾ ཝཱ བྷོཛནཱིཡཾ ཝཱ ཁཱདེཡྻ ཝཱ བྷུཉྫེཡྻ ཝཱ, པཱཙིཏྟིཡཾ.

དུཏིཡཔཝཱརཎཱསིཀྑཱཔདཾ

༣༦. ཡོ ¶ ¶ པན བྷིཀྑུ བྷིཀྑུཾ བྷུཏྟཱཝིཾ པཝཱརིཏཾ ཨནཏིརིཏྟེན ཁཱདནཱིཡེན ཝཱ བྷོཛནཱིཡེན ཝཱ ཨབྷིཧཊྛུཾ པཝཱརེཡྻ ‘‘ཧནྡ བྷིཀྑུ ཁཱད ཝཱ བྷུཉྫ ཝཱ’’ཏི ཛཱནཾ ཨཱསཱདནཱཔེཀྑོ, བྷུཏྟསྨིཾ པཱཙིཏྟིཡཾ.

ཝིཀཱལབྷོཛནསིཀྑཱཔདཾ

༣༧. ཡོ པན བྷིཀྑུ ཝིཀཱལེ ཁཱདནཱིཡཾ ཝཱ བྷོཛནཱིཡཾ ཝཱ ཁཱདེཡྻ ཝཱ བྷུཉྫེཡྻ ཝཱ, པཱཙིཏྟིཡཾ.

སནྣིདྷིཀཱརཀསིཀྑཱཔདཾ

༣༨. ཡོ པན བྷིཀྑུ སནྣིདྷིཀཱརཀཾ ཁཱདནཱིཡཾ ཝཱ བྷོཛནཱིཡཾ ཝཱ ཁཱདེཡྻ ཝཱ བྷུཉྫེཡྻ ཝཱ, པཱཙིཏྟིཡཾ.

པཎཱིཏབྷོཛནསིཀྑཱཔདཾ

༣༩. ཡཱནི ཁོ པན ཏཱནི པཎཱིཏབྷོཛནཱནི, སེཡྻཐིདཾ – སཔྤི, ནཝནཱིཏཾ, ཏེལཾ, མདྷུ, ཕཱཎིཏཾ, མཙྪོ, མཾསཾ, ཁཱིརཾ, དདྷི. ཡོ པན བྷིཀྑུ ཨེཝརཱུཔཱནི པཎཱིཏབྷོཛནཱནི ཨགིལཱནོ ཨཏྟནོ ཨཏྠཱཡ ཝིཉྙཱཔེཏྭཱ བྷུཉྫེཡྻ, པཱཙིཏྟིཡཾ.

དནྟཔོནསིཀྑཱཔདཾ

༤༠. ཡོ པན བྷིཀྑུ ཨདིནྣཾ མུཁདྭཱརཾ ཨཱཧཱརཾ ཨཱཧརེཡྻ ཨཉྙཏྲ ཨུདཀདནྟཔོནཱ, པཱཙིཏྟིཡཾ.

བྷོཛནཝགྒོ ཙཏུཏྠོ.

ཨཙེལཀསིཀྑཱཔདཾ

༤༡. ཡོ པན བྷིཀྑུ ཨཙེལཀསྶ ཝཱ པརིབྦཱཛཀསྶ ཝཱ པརིབྦཱཛིཀཱཡ ཝཱ སཧཏྠཱ ཁཱདནཱིཡཾ ཝཱ བྷོཛནཱིཡཾ ཝཱ དདེཡྻ, པཱཙིཏྟིཡཾ.

ཨུཡྻོཛནསིཀྑཱཔདཾ

༤༢. ཡོ པན བྷིཀྑུ བྷིཀྑུཾ ‘‘ཨེཧཱཝུསོ, གཱམཾ ཝཱ ནིགམཾ ཝཱ པིཎྜཱཡ པཝིསིསྶཱམཱ’’ཏི ¶ ཏསྶ དཱཔེཏྭཱ ཝཱ ཨདཱཔེཏྭཱ ཝཱ ཨུཡྻོཛེཡྻ ‘‘གཙྪཱཝུསོ, ན མེ ཏཡཱ སདྡྷིཾ ཀཐཱ ཝཱ ནིསཛྫཱ ཝཱ ཕཱསུ ཧོཏི, ཨེཀཀསྶ མེ ཀཐཱ ཝཱ ནིསཛྫཱ ཝཱ ཕཱསུ ཧོཏཱི’’ཏི ཨེཏདེཝ པཙྩཡཾ ཀརིཏྭཱ ཨནཉྙཾ, པཱཙིཏྟིཡཾ.

སབྷོཛནསིཀྑཱཔདཾ

༤༣. ཡོ ¶ པན བྷིཀྑུ སབྷོཛནེ ཀུལེ ཨནུཔཁཛྫ ནིསཛྫཾ ཀཔྤེཡྻ, པཱཙིཏྟིཡཾ.

རཧོཔཊིཙྪནྣསིཀྑཱཔདཾ

༤༤. ཡོ པན བྷིཀྑུ མཱཏུགཱམེན སདྡྷིཾ རཧོ པཊིཙྪནྣེ ཨཱསནེ ནིསཛྫཾ ཀཔྤེཡྻ, པཱཙིཏྟིཡཾ.

རཧོནིསཛྫསིཀྑཱཔདཾ

༤༥. ཡོ པན བྷིཀྑུ མཱཏུགཱམེན སདྡྷིཾ ཨེཀོ ཨེཀཱཡ རཧོ ནིསཛྫཾ ཀཔྤེཡྻ, པཱཙིཏྟིཡཾ.

ཙཱརིཏྟསིཀྑཱཔདཾ

༤༦. ཡོ པན བྷིཀྑུ ནིམནྟིཏོ སབྷཏྟོ སམཱནོ སནྟཾ བྷིཀྑུཾ ཨནཱཔུཙྪཱ པུརེབྷཏྟཾ ཝཱ པཙྪཱབྷཏྟཾ ཝཱ ཀུལེསུ ཙཱརིཏྟཾ ཨཱཔཛྫེཡྻ ཨཉྙཏྲ སམཡཱ, པཱཙིཏྟིཡཾ. ཏཏྠཱཡཾ སམཡོ, ཙཱིཝརདཱནསམཡོ, ཙཱིཝརཀཱརསམཡོ, ཨཡཾ ཏཏྠ སམཡོ.

མཧཱནཱམསིཀྑཱཔདཾ

༤༧. ཨགིལཱནེན བྷིཀྑུནཱ ཙཏུམཱསཔྤཙྩཡཔཝཱརཎཱ སཱདིཏབྦཱ ཨཉྙཏྲ པུནཔཝཱརཎཱཡ, ཨཉྙཏྲ ནིཙྩཔཝཱརཎཱཡ. ཏཏོ ཙེ ཨུཏྟརི སཱདིཡེཡྻ, པཱཙིཏྟིཡཾ.

ཨུཡྻུཏྟསེནཱསིཀྑཱཔདཾ

༤༨. ཡོ པན བྷིཀྑུ ཨུཡྻུཏྟཾ སེནཾ དསྶནཱཡ གཙྪེཡྻ ཨཉྙཏྲ ཏཐཱརཱུཔཔྤཙྩཡཱ, པཱཙིཏྟིཡཾ.

སེནཱཝཱསསིཀྑཱཔདཾ

༤༩. སིཡཱ ¶ ཙ ཏསྶ བྷིཀྑུནོ ཀོཙིདེཝ པཙྩཡོ སེནཾ གམནཱཡ, དིརཏྟཏིརཏྟཾ ཏེན བྷིཀྑུནཱ སེནཱཡ ཝསིཏབྦཾ. ཏཏོ ཙེ ཨུཏྟརི ཝསེཡྻ, པཱཙིཏྟིཡཾ.

ཨུཡྻོདྷིཀསིཀྑཱཔདཾ

༥༠. དིརཏྟཏིརཏྟཾ ཙེ བྷིཀྑུ སེནཱཡ ཝསམཱནོ ཨུཡྻོདྷིཀཾ ཝཱ བལགྒཾ ཝཱ སེནཱབྱཱུཧཾ ཝཱ ཨནཱིཀདསྶནཾ ཝཱ གཙྪེཡྻ, པཱཙིཏྟིཡཾ.

ཨཙེལཀཝགྒོ པཉྩམོ.

སུརཱཔཱནསིཀྑཱཔདཾ

༥༡. སུརཱམེརཡཔཱནེ ¶ པཱཙིཏྟིཡཾ.

ཨངྒུལིཔཏོདཀསིཀྑཱཔདཾ

༥༢. ཨངྒུལིཔཏོདཀེ པཱཙིཏྟིཡཾ.

ཧསདྷམྨསིཀྑཱཔདཾ

༥༣. ཨུདཀེ ཧསདྷམྨེ པཱཙིཏྟིཡཾ.

ཨནཱདརིཡསིཀྑཱཔདཾ

༥༤. ཨནཱདརིཡེ པཱཙིཏྟིཡཾ.

བྷིཾསཱཔནསིཀྑཱཔདཾ

༥༥. ཡོ པན བྷིཀྑུ བྷིཀྑུཾ བྷིཾསཱཔེཡྻ, པཱཙིཏྟིཡཾ.

ཛོཏིསིཀྑཱཔདཾ

༥༦. ཡོ པན བྷིཀྑུ ཨགིལཱནོ ཝིསིབྦནཱཔེཀྑོ ཛོཏིཾ སམཱདཧེཡྻ ཝཱ སམཱདཧཱཔེཡྻ ཝཱ ཨཉྙཏྲ ཏཐཱརཱུཔཔྤཙྩཡཱ, པཱཙིཏྟིཡཾ.

ནཧཱནསིཀྑཱཔདཾ

༥༧. ཡོ ¶ པན བྷིཀྑུ ཨོརེནདྡྷམཱསཾ ནཧཱཡེཡྻ ཨཉྙཏྲ སམཡཱ, པཱཙིཏྟིཡཾ. ཏཏྠཱཡཾ སམཡོ ‘‘དིཡཌྜྷོ མཱསོ སེསོ གིམྷཱན’’ནྟི ‘‘ཝསྶཱནསྶ པཋམོ མཱསོ’’ ཨིཙྩེཏེ ཨཌྜྷཏེཡྻམཱསཱ ཨུཎྷསམཡོ, པརིལཱ༹ཧསམཡོ, གིལཱནསམཡོ, ཀམྨསམཡོ, ཨདྡྷཱནགམནསམཡོ, ཝཱཏཝུཊྛིསམཡོ, ཨཡཾ ཏཏྠ སམཡོ.

དུབྦཎྞཀརཎསིཀྑཱཔདཾ

༥༨. ནཝཾ པན བྷིཀྑུནཱ ཙཱིཝརལཱབྷེན ཏིཎྞཾ དུབྦཎྞཀརཎཱནཾ ཨཉྙཏརཾ དུབྦཎྞཀརཎཾ ཨཱདཱཏབྦཾ ནཱིལཾ ཝཱ ཀདྡམཾ ཝཱ ཀཱལ༹སཱམཾ ཝཱ. ཨནཱདཱ ཙེ བྷིཀྑུ ཏིཎྞཾ དུབྦཎྞཀརཎཱནཾ ཨཉྙཏརཾ དུབྦཎྞཀརཎཾ ནཝཾ ཙཱིཝརཾ པརིབྷུཉྫེཡྻ, པཱཙིཏྟིཡཾ.

ཝིཀཔྤནསིཀྑཱཔདཾ

༥༩. ཡོ པན བྷིཀྑུ བྷིཀྑུསྶ ཝཱ བྷིཀྑུནིཡཱ ཝཱ སིཀྑམཱནཱཡ ཝཱ སཱམཎེརསྶ ཝཱ སཱམཎེརིཡཱ ཝཱ སཱམཾ ཙཱིཝརཾ ཝིཀཔྤེཏྭཱ ཨཔྤཙྩུདྡྷཱརཎཾ པརིབྷུཉྫེཡྻ, པཱཙིཏྟིཡཾ.

ཨཔནིདྷཱནསིཀྑཱཔདཾ

༦༠. ཡོ ¶ པན བྷིཀྑུ བྷིཀྑུསྶ པཏྟཾ ཝཱ ཙཱིཝརཾ ཝཱ ནིསཱིདནཾ ཝཱ སཱུཙིགྷརཾ ཝཱ ཀཱཡབནྡྷནཾ ཝཱ ཨཔནིདྷེཡྻ ཝཱ ཨཔནིདྷཱཔེཡྻ ཝཱ ཨནྟམསོ ཧསཱཔེཀྑོཔི, པཱཙིཏྟིཡཾ.

སུརཱཔཱནཝགྒོ ཚཊྛོ.

སཉྩིཙྩསིཀྑཱཔདཾ

༦༡. ཡོ པན བྷིཀྑུ སཉྩིཙྩ པཱཎཾ ཛཱིཝིཏཱ ཝོརོཔེཡྻ, པཱཙིཏྟིཡཾ.

སཔྤཱཎཀསིཀྑཱཔདཾ

༦༢. ཡོ པན བྷིཀྑུ ཛཱནཾ སཔྤཱཎཀཾ ཨུདཀཾ པརིབྷུཉྫེཡྻ, པཱཙིཏྟིཡཾ.

ཨུཀྐོཊནསིཀྑཱཔདཾ

༦༣. ཡོ པན བྷིཀྑུ ཛཱནཾ ཡཐཱདྷམྨཾ ནིཧཏཱདྷིཀརཎཾ པུནཀམྨཱཡ ཨུཀྐོཊེཡྻ, པཱཙིཏྟིཡཾ.

དུཊྛུལླསིཀྑཱཔདཾ

༦༤. ཡོ ¶ པན བྷིཀྑུ བྷིཀྑུསྶ ཛཱནཾ དུཊྛུལླཾ ཨཱཔཏྟིཾ པཊིཙྪཱདེཡྻ, པཱཙིཏྟིཡཾ.

ཨཱུནཝཱིསཏིཝསྶསིཀྑཱཔདཾ

༦༥. ཡོ པན བྷིཀྑུ ཛཱནཾ ཨཱུནཝཱིསཏིཝསྶཾ པུགྒལཾ ཨུཔསམྤཱདེཡྻ, སོ ཙ པུགྒལོ ཨནུཔསམྤནྣོ, ཏེ ཙ བྷིཀྑཱུ གཱརཡ྄ཧཱ, ཨིདཾ ཏསྨིཾ པཱཙིཏྟིཡཾ.

ཐེཡྻསཏྠསིཀྑཱཔདཾ

༦༦. ཡོ པན བྷིཀྑུ ཛཱནཾ ཐེཡྻསཏྠེན སདྡྷིཾ སཾཝིདྷཱཡ ཨེཀདྡྷཱནམགྒཾ པཊིཔཛྫེཡྻ ཨནྟམསོ གཱམནྟརམྤི, པཱཙིཏྟིཡཾ.

སཾཝིདྷཱནསིཀྑཱཔདཾ

༦༧. ཡོ པན བྷིཀྑུ མཱཏུགཱམེན སདྡྷིཾ སཾཝིདྷཱཡ ཨེཀདྡྷཱནམགྒཾ པཊིཔཛྫེཡྻ ཨནྟམསོ གཱམནྟརམྤི, པཱཙིཏྟིཡཾ.

ཨརིཊྛསིཀྑཱཔདཾ

༦༨. ཡོ ¶ པན བྷིཀྑུ ཨེཝཾ ཝདེཡྻ ‘‘ཏཐཱཧཾ བྷགཝཏཱ དྷམྨཾ དེསིཏཾ ཨཱཛཱནཱམི, ཡཐཱ ཡེམེ ཨནྟརཱཡིཀཱ དྷམྨཱ ཝུཏྟཱ བྷགཝཏཱ, ཏེ པཊིསེཝཏོ ནཱལཾ ཨནྟརཱཡཱཡཱ’’ཏི, སོ བྷིཀྑུ བྷིཀྑཱུཧི ཨེཝམསྶ ཝཙནཱིཡོ ‘‘མཱཡསྨཱ ཨེཝཾ ཨཝཙ, མཱ བྷགཝནྟཾ ཨབྦྷཱཙིཀྑི, ན ཧི སཱདྷུ བྷགཝཏོ ཨབྦྷཀྑཱནཾ, ན ཧི བྷགཝཱ ཨེཝཾ ཝདེཡྻ, ཨནེཀཔརིཡཱཡེནཱཝུསོ ཨནྟརཱཡིཀཱ དྷམྨཱ ཨནྟརཱཡིཀཱ ཝུཏྟཱ བྷགཝཏཱ, ཨལཉྩ པན ཏེ པཊིསེཝཏོ ཨནྟརཱཡཱཡཱ’’ཏི. ཨེཝཉྩ སོ བྷིཀྑུ བྷིཀྑཱུཧི ཝུཙྩམཱནོ ཏཐེཝ པགྒཎྷེཡྻ, སོ བྷིཀྑུ བྷིཀྑཱུཧི ཡཱཝཏཏིཡཾ སམནུབྷཱསིཏབྦོ ཏསྶ པཊིནིསྶགྒཱཡ. ཡཱཝཏཏིཡཉྩེ སམནུབྷཱསིཡམཱནོ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ. ནོ ཙེ པཊིནིསྶཛྫེཡྻ, པཱཙིཏྟིཡཾ.

ཨུཀྑིཏྟསམྦྷོགསིཀྑཱཔདཾ

༦༩. ཡོ པན བྷིཀྑུ ཛཱནཾ ཏཐཱཝཱདིནཱ བྷིཀྑུནཱ ཨཀཊཱནུདྷམྨེན ཏཾ དིཊྛིཾ ཨཔྤཊིནིསྶཊྛེན སདྡྷིཾ སམྦྷུཉྫེཡྻ ཝཱ, སཾཝསེཡྻ ཝཱ, སཧ ཝཱ སེཡྻཾ ཀཔྤེཡྻ, པཱཙིཏྟིཡཾ.

ཀཎྚཀསིཀྑཱཔདཾ

༧༠. སམཎུདྡེསོཔི ¶ ཙེ ཨེཝཾ ཝདེཡྻ ‘‘ཏཐཱཧཾ བྷགཝཏཱ དྷམྨཾ དེསིཏཾ ཨཱཛཱནཱམི, ཡཐཱ ཡེམེ ཨནྟརཱཡིཀཱ དྷམྨཱ ཝུཏྟཱ བྷགཝཏཱ, ཏེ པཊིསེཝཏོ ནཱལཾ ཨནྟརཱཡཱཡཱ’’ཏི, སོ སམཎུདྡེསོ བྷིཀྑཱུཧི ཨེཝམསྶ ཝཙནཱིཡོ ‘‘མཱཝུསོ, སམཎུདྡེས ཨེཝཾ ཨཝཙ, མཱ བྷགཝནྟཾ ཨབྦྷཱཙིཀྑི, ན ཧི སཱདྷུ བྷགཝཏོ ཨབྦྷཀྑཱནཾ, ན ཧི བྷགཝཱ ཨེཝཾ ཝདེཡྻ, ཨནེཀཔརིཡཱཡེནཱཝུསོ, སམཎུདྡེས ཨནྟརཱཡིཀཱ དྷམྨཱ ཨནྟརཱཡིཀཱ ཝུཏྟཱ བྷགཝཏཱ, ཨལཉྩ པན ཏེ པཊིསེཝཏོ ཨནྟརཱཡཱཡཱ’’ཏི, ཨེཝཉྩ སོ སམཎུདྡེསོ བྷིཀྑཱུཧི ཝུཙྩམཱནོ ཏཐེཝ པགྒཎྷེཡྻ, སོ སམཎུདྡེསོ བྷིཀྑཱུཧི ཨེཝམསྶ ཝཙནཱིཡོ ‘‘ཨཛྫཏགྒེ ཏེ, ཨཱཝུསོ, སམཎུདྡེས ན ཙེཝ སོ བྷགཝཱ སཏྠཱ ཨཔདིསིཏབྦོ, ཡམྤི ཙཉྙེ སམཎུདྡེསཱ ལབྷནྟི བྷིཀྑཱུཧི སདྡྷིཾ དིརཏྟཏིརཏྟཾ སཧསེཡྻཾ, སཱཔི ཏེ ནཏྠི, ཙར པིརེ, ཝིནསྶཱ’’ཏི. ཡོ པན བྷིཀྑུ ཛཱནཾ ཏཐཱནཱསིཏཾ སམཎུདྡེསཾ ཨུཔལཱཔེཡྻ ཝཱ, ཨུཔཊྛཱཔེཡྻ ཝཱ, སམྦྷུཉྫེཡྻ ཝཱ, སཧ ཝཱ སེཡྻཾ ཀཔྤེཡྻ, པཱཙིཏྟིཡཾ.

སཔྤཱཎཀཝགྒོ སཏྟམོ.

སཧདྷམྨིཀསིཀྑཱཔདཾ

༧༡. ཡོ ¶ པན བྷིཀྑུ བྷིཀྑཱུཧི སཧདྷམྨིཀཾ ཝུཙྩམཱནོ ཨེཝཾ ཝདེཡྻ ‘‘ན ཏཱཝཱཧཾ, ཨཱཝུསོ, ཨེཏསྨིཾ སིཀྑཱཔདེ སིཀྑིསྶཱམི, ཡཱཝ ན ཨཉྙཾ བྷིཀྑུཾ བྱཏྟཾ ཝིནཡདྷརཾ པརིཔུཙྪཱམཱི’’ཏི, པཱཙིཏྟིཡཾ. སིཀྑམཱནེན, བྷིཀྑཝེ, བྷིཀྑུནཱ ཨཉྙཱཏབྦཾ པརིཔུཙྪིཏབྦཾ པརིཔཉྷིཏབྦཾ, ཨཡཾ ཏཏྠ སཱམཱིཙི.

ཝིལེཁནསིཀྑཱཔདཾ

༧༢. ཡོ པན བྷིཀྑུ པཱཏིམོཀྑེ ཨུདྡིསྶམཱནེ ཨེཝཾ ཝདེཡྻ ‘‘ཀིཾ པནིམེཧི ཁུདྡཱནུཁུདྡཀེཧི སིཀྑཱཔདེཧི ཨུདྡིཊྛེཧི, ཡཱཝདེཝ ཀུཀྐུཙྩཱཡ ཝིཧེསཱཡ ཝིལེཁཱཡ སཾཝཏྟནྟཱི’’ཏི, སིཀྑཱཔདཝིཝཎྞཀེ པཱཙིཏྟིཡཾ.

མོཧནསིཀྑཱཔདཾ

༧༣. ཡོ པན བྷིཀྑུ ཨནྭདྡྷམཱསཾ པཱཏིམོཀྑེ ཨུདྡིསྶམཱནེ ཨེཝཾ ཝདེཡྻ ‘‘ཨིདཱནེཝ ཁོ ཨཧཾ ཛཱནཱམི, ཨཡམྤི ཀིར དྷམྨོ སུཏྟཱགཏོ སུཏྟཔརིཡཱཔནྣོ ཨནྭདྡྷམཱསཾ ཨུདྡེསཾ ཨཱགཙྪཏཱི’’ཏི. ཏཉྩེ བྷིཀྑུཾ ཨཉྙེ བྷིཀྑཱུ ཛཱནེཡྻུཾ ནིསིནྣཔུབྦཾ ཨིམིནཱ བྷིཀྑུནཱ དྭཏྟིཀྑཏྟུཾ ¶ པཱཏིམོཀྑེ ཨུདྡིསྶམཱནེ, ཀོ པན ཝཱདོ བྷིཡྻོ, ན ཙ ཏསྶ བྷིཀྑུནོ ཨཉྙཱཎཀེན མུཏྟི ཨཏྠི, ཡཉྩ ཏཏྠ ཨཱཔཏྟིཾ ཨཱཔནྣོ, ཏཉྩ ཡཐཱདྷམྨོ ཀཱརེཏབྦོ, ཨུཏྟརི ཙསྶ མོཧོ ཨཱརོཔེཏབྦོ ‘‘ཏསྶ ཏེ, ཨཱཝུསོ, ཨལཱབྷཱ, ཏསྶ ཏེ དུལླདྡྷཾ, ཡཾ ཏྭཾ པཱཏིམོཀྑེ ཨུདྡིསྶམཱནེན སཱདྷུཀཾ ཨཊྛིཾ ཀཏྭཱ མནསི ཀརོསཱི’’ཏི, ཨིདཾ ཏསྨིཾ མོཧནཀེ པཱཙིཏྟིཡཾ.

པཧཱརསིཀྑཱཔདཾ

༧༤. ཡོ པན བྷིཀྑུ བྷིཀྑུསྶ ཀུཔིཏོ ཨནཏྟམནོ པཧཱརཾ དདེཡྻ, པཱཙིཏྟིཡཾ.

ཏལསཏྟིཀསིཀྑཱཔདཾ

༧༥. ཡོ པན བྷིཀྑུ བྷིཀྑུསྶ ཀུཔིཏོ ཨནཏྟམནོ ཏལསཏྟིཀཾ ཨུགྒིརེཡྻ, པཱཙིཏྟིཡཾ.

ཨམཱུལཀསིཀྑཱཔདཾ

༧༦. ཡོ པན བྷིཀྑུ བྷིཀྑུཾ ཨམཱུལཀེན སངྒྷཱདིསེསེན ཨནུདྡྷཾསེཡྻ, པཱཙིཏྟིཡཾ.

སཉྩིཙྩསིཀྑཱཔདཾ

༧༧. ཡོ ¶ པན བྷིཀྑུ བྷིཀྑུསྶ སཉྩིཙྩ ཀུཀྐུཙྩཾ ཨུཔདཧེཡྻ ‘‘ཨིཏིསྶ མུཧུཏྟམྤི ཨཕཱསུ བྷཝིསྶཏཱི’’ཏི ཨེཏདེཝ པཙྩཡཾ ཀརིཏྭཱ ཨནཉྙཾ, པཱཙིཏྟིཡཾ.

ཨུཔསྶུཏིསིཀྑཱཔདཾ

༧༨. ཡོ པན བྷིཀྑུ བྷིཀྑཱུནཾ བྷཎྜནཛཱཏཱནཾ ཀལཧཛཱཏཱནཾ ཝིཝཱདཱཔནྣཱནཾ ཨུཔསྶུཏིཾ ཏིཊྛེཡྻ ‘‘ཡཾ ཨིམེ བྷཎིསྶནྟི, ཏཾ སོསྶཱམཱི’’ཏི ཨེཏདེཝ པཙྩཡཾ ཀརིཏྭཱ ཨནཉྙཾ, པཱཙིཏྟིཡཾ.

ཀམྨཔྤཊིབཱཧནསིཀྑཱཔདཾ

༧༩. ཡོ པན བྷིཀྑུ དྷམྨིཀཱནཾ ཀམྨཱནཾ ཚནྡཾ དཏྭཱ པཙྪཱ ཁཱིཡནདྷམྨཾ ཨཱཔཛྫེཡྻ, པཱཙིཏྟིཡཾ.

ཚནྡཾཨདཏྭཱགམནསིཀྑཱཔདཾ

༨༠. ཡོ ¶ པན བྷིཀྑུ སངྒྷེ ཝིནིཙྪཡཀཐཱཡ ཝཏྟམཱནཱཡ ཚནྡཾ ཨདཏྭཱ ཨུཊྛཱཡཱསནཱ པཀྐམེཡྻ, པཱཙིཏྟིཡཾ.

དུབྦལསིཀྑཱཔདཾ

༨༡. ཡོ པན བྷིཀྑུ སམགྒེན སངྒྷེན ཙཱིཝརཾ དཏྭཱ པཙྪཱ ཁཱིཡནདྷམྨཾ ཨཱཔཛྫེཡྻ ‘‘ཡཐཱསནྠུཏཾ བྷིཀྑཱུ སངྒྷིཀཾ ལཱབྷཾ པརིཎཱམེནྟཱི’’ཏི, པཱཙིཏྟིཡཾ.

པརིཎཱམནསིཀྑཱཔདཾ

༨༢. ཡོ པན བྷིཀྑུ ཛཱནཾ སངྒྷིཀཾ ལཱབྷཾ པརིཎཏཾ པུགྒལསྶ པརིཎཱམེཡྻ, པཱཙིཏྟིཡཾ.

སཧདྷམྨིཀཝགྒོ ཨཊྛམོ.

ཨནྟེཔུརསིཀྑཱཔདཾ

༨༣. ཡོ པན བྷིཀྑུ རཉྙོ ཁཏྟིཡསྶ མུདྡྷཱབྷིསིཏྟསྶ ཨནིཀྑནྟརཱཛཀེ ཨནིགྒཏརཏནཀེ པུབྦེ ཨཔྤཊིསཾཝིདིཏོ ཨིནྡཁཱིལཾ ཨཏིཀྐཱམེཡྻ, པཱཙིཏྟིཡཾ.

རཏནསིཀྑཱཔདཾ

༨༤. ཡོ ¶ པན བྷིཀྑུ རཏནཾ ཝཱ རཏནསམྨཏཾ ཝཱ ཨཉྙཏྲ ཨཛ྄ཛྷཱརཱམཱ ཝཱ ཨཛ྄ཛྷཱཝསཐཱ ཝཱ ཨུགྒཎྷེཡྻ ཝཱ ཨུགྒཎྷཱཔེཡྻ ཝཱ, པཱཙིཏྟིཡཾ. རཏནཾ ཝཱ པན བྷིཀྑུནཱ རཏནསམྨཏཾ ཝཱ ཨཛ྄ཛྷཱརཱམེ ཝཱ ཨཛ྄ཛྷཱཝསཐེ ཝཱ ཨུགྒཧེཏྭཱ ཝཱ ཨུགྒཧཱཔེཏྭཱ ཝཱ ནིཀྑིཔིཏབྦཾ ‘‘ཡསྶ བྷཝིསྶཏི, སོ ཧརིསྶཏཱི’’ཏི, ཨཡཾ ཏཏྠ སཱམཱིཙི.

ཝིཀཱལགཱམཔྤཝེསནསིཀྑཱཔདཾ

༨༥. ཡོ པན བྷིཀྑུ སནྟཾ བྷིཀྑུཾ ཨནཱཔུཙྪཱཝིཀཱལེ གཱམཾ པཝིསེཡྻ ཨཉྙཏྲ ཏཐཱརཱུཔཱ ཨཙྩཱཡིཀཱ ཀརཎཱིཡཱ, པཱཙིཏྟིཡཾ.

སཱུཙིགྷརསིཀྑཱཔདཾ

༨༦. ཡོ ¶ པན བྷིཀྑུ ཨཊྛིམཡཾ ཝཱ དནྟམཡཾ ཝཱ ཝིསཱཎམཡཾ ཝཱ སཱུཙིགྷརཾ ཀཱརཱཔེཡྻ, བྷེདནཀཾ པཱཙིཏྟིཡཾ.

མཉྩཔཱིཋསིཀྑཱཔདཾ

༨༧. ནཝཾ པན བྷིཀྑུནཱ མཉྩཾ ཝཱ པཱིཋཾ ཝཱ ཀཱརཡམཱནེན ཨཊྛངྒུལཔཱདཀཾ ཀཱརེཏབྦཾ སུགཏངྒུལེན ཨཉྙཏྲ ཧེཊྛིམཱཡ ཨཊནིཡཱ. ཏཾ ཨཏིཀྐཱམཡཏོ ཚེདནཀཾ པཱཙིཏྟིཡཾ.

ཏཱུལོནདྡྷསིཀྑཱཔདཾ

༨༨. ཡོ པན བྷིཀྑུ མཉྩཾ ཝཱ པཱིཋཾ ཝཱ ཏཱུལོནདྡྷཾ ཀཱརཱཔེཡྻ, ཨུདྡཱལནཀཾ པཱཙིཏྟིཡཾ.

ནིསཱིདནསིཀྑཱཔདཾ

༨༩. ནིསཱིདནཾ པན བྷིཀྑུནཱ ཀཱརཡམཱནེན པམཱཎིཀཾ ཀཱརེཏབྦཾ, ཏཏྲིདཾ པམཱཎཾ, དཱིགྷསོ དྭེ ཝིདཏྠིཡོ སུགཏཝིདཏྠིཡཱ, ཏིརིཡཾ དིཡཌྜྷཾ, དསཱ ཝིདཏྠི. ཏཾ ཨཏིཀྐཱམཡཏོ ཚེདནཀཾ པཱཙིཏྟིཡཾ.

ཀཎྜུཔྤཊིཙྪཱདིསིཀྑཱཔདཾ

༩༠. ཀཎྜུཔྤཊིཙྪཱདིཾ པན བྷིཀྑུནཱ ཀཱརཡམཱནེན པམཱཎིཀཱ ཀཱརེཏབྦཱ, ཏཏྲིདཾ པམཱཎཾ, དཱིགྷསོ ཙཏསྶོ ཝིདཏྠིཡོ སུགཏཝིདཏྠིཡཱ, ཏིརིཡཾ དྭེ ཝིདཏྠིཡོ. ཏཾ ཨཏིཀྐཱམཡཏོ ཚེདནཀཾ པཱཙིཏྟིཡཾ.

ཝསྶིཀསཱཊིཀསིཀྑཱཔདཾ

༩༡. ཝསྶིཀསཱཊིཀཾ ¶ པན བྷིཀྑུནཱ ཀཱརཡམཱནེན པམཱཎིཀཱ ཀཱརེཏབྦཱ, ཏཏྲིདཾ པམཱཎཾ, དཱིགྷསོ ཚ ཝིདཏྠིཡོ སུགཏཝིདཏྠིཡཱ, ཏིརིཡཾ ཨཌྜྷཏེཡྻཱ. ཏཾ ཨཏིཀྐཱམཡཏོ ཚེདནཀཾ པཱཙིཏྟིཡཾ.

ནནྡསིཀྑཱཔདཾ

༩༢. ཡོ པན བྷིཀྑུ སུགཏཙཱིཝརཔྤམཱཎཾ ཙཱིཝརཾ ཀཱརཱཔེཡྻ, ཨཏིརེཀཾ ཝཱ, ཚེདནཀཾ པཱཙིཏྟིཡཾ ¶ . ཏཏྲིདཾ སུགཏསྶ སུགཏཙཱིཝརཔྤམཱཎཾ, དཱིགྷསོ ནཝ ཝིདཏྠིཡོ སུགཏཝིདཏྠིཡཱ, ཏིརིཡཾ ཚ ཝིདཏྠིཡོ, ཨིདཾ སུགཏསྶ སུགཏཙཱིཝརཔྤམཱཎནྟི.

རཏནཝགྒོ ནཝམོ.

ཨུདྡིཊྛཱ ཁོ ཨཱཡསྨནྟོ དྭེནཝུཏི པཱཙིཏྟིཡཱ དྷམྨཱ. ཏཏྠཱཡསྨནྟེ པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡསྨནྟོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

པཱཙིཏྟིཡཱ ནིཊྛིཏཱ.

པཱཊིདེསནཱིཡཱ

ཨིམེ ཁོ པནཱཡསྨནྟོ ཙཏྟཱརོ པཱཊིདེསནཱིཡཱ

དྷམྨཱ ཨུདྡེསཾ ཨཱགཙྪནྟི.

པཋམཔཱཊིདེསནཱིཡསིཀྑཱཔདཾ

༡. ཡོ པན བྷིཀྑུ ཨཉྙཱཏིཀཱཡ བྷིཀྑུནིཡཱ ཨནྟརགྷརཾ པཝིཊྛཱཡ ཧཏྠཏོ ཁཱདནཱིཡཾ ཝཱ བྷོཛནཱིཡཾ ཝཱ སཧཏྠཱ པཊིགྒཧེཏྭཱ ཁཱདེཡྻ ཝཱ བྷུཉྫེཡྻ ཝཱ, པཊིདེསེཏབྦཾ ཏེན བྷིཀྑུནཱ ‘‘གཱརཡ྄ཧཾ, ཨཱཝུསོ, དྷམྨཾ ཨཱཔཛྫིཾ ཨསཔྤཱཡཾ པཱཊིདེསནཱིཡཾ, ཏཾ པཊིདེསེམཱི’’ཏི.

དུཏིཡཔཱཊིདེསནཱིཡསིཀྑཱཔདཾ

༢. བྷིཀྑཱུ པནེཝ ཀུལེསུ ནིམནྟིཏཱ བྷུཉྫནྟི, ཏཏྲ ཙེ སཱ བྷིཀྑུནཱི ཝོསཱསམཱནརཱུཔཱ ཋིཏཱ ཧོཏི ‘‘ཨིདྷ སཱུཔཾ དེཐ, ཨིདྷ ཨོདནཾ དེཐཱ’’ཏི. ཏེཧི བྷིཀྑཱུཧི སཱ བྷིཀྑུནཱི ཨཔསཱདེཏབྦཱ ‘‘ཨཔསཀྐ ཏཱཝ བྷགིནི, ཡཱཝ ¶ བྷིཀྑཱུ བྷུཉྫནྟཱི’’ཏི. ཨེཀསྶཔི ཙེ བྷིཀྑུནོ ན པཊིབྷཱསེཡྻ ཏཾ བྷིཀྑུནིཾ ཨཔསཱདེཏུཾ ‘‘ཨཔསཀྐ ཏཱཝ བྷགིནི, ཡཱཝ བྷིཀྑཱུ བྷུཉྫནྟཱི’’ཏི, པཊིདེསེཏབྦཾ ཏེཧི བྷིཀྑཱུཧི ‘‘གཱརཡ྄ཧཾ, ཨཱཝུསོ, དྷམྨཾ ཨཱཔཛྫིམྷཱ ཨསཔྤཱཡཾ པཱཊིདེསནཱིཡཾ, ཏཾ པཊིདེསེམཱ’’ཏི.

ཏཏིཡཔཱཊིདེསནཱིཡསིཀྑཱཔདཾ

༣. ཡཱནི ¶ ཁོ པན ཏཱནི སེཀྑསམྨཏཱནི ཀུལཱནི, ཡོ པན བྷིཀྑུ ཏཐཱརཱུཔེསུ སེཀྑསམྨཏེསུ ཀུལེསུ པུབྦེ ཨནིམནྟིཏོ ཨགིལཱནོ ཁཱདནཱིཡཾ ཝཱ, བྷོཛནཱིཡཾ ཝཱ སཧཏྠཱ པཊིགྒཧེཏྭཱ ཁཱདེཡྻ ཝཱ, བྷུཉྫེཡྻ ཝཱ, པཊིདེསེཏབྦཾ ཏེན བྷིཀྑུནཱ ‘‘གཱརཡ྄ཧཾ, ཨཱཝུསོ, དྷམྨཾ ཨཱཔཛྫིཾ ཨསཔྤཱཡཾ པཱཊིདེསནཱིཡཾ, ཏཾ པཊིདེསེམཱི’’ཏི.

ཙཏུཏྠཔཱཊིདེསནཱིཡསིཀྑཱཔདཾ

༤. ཡཱནི ཁོ པན ཏཱནི ཨཱརཉྙཀཱནི སེནཱསནཱནི སཱསངྐསམྨཏཱནི སཔྤཊིབྷཡཱནི, ཡོ པན བྷིཀྑུ ཏཐཱརཱུཔེསུ སེནཱསནེསུ པུབྦེ ཨཔྤཊིསཾཝིདིཏཾ ཁཱདནཱིཡཾ ཝཱ, བྷོཛནཱིཡཾ ཝཱ ཨཛ྄ཛྷཱརཱམེ སཧཏྠཱ པཊིགྒཧེཏྭཱ ཨགིལཱནོ ཁཱདེཡྻ ཝཱ, བྷུཉྫེཡྻ ཝཱ, པཊིདེསེཏབྦཾ ཏེན བྷིཀྑུནཱ ‘‘གཱརཡ྄ཧཾ, ཨཱཝུསོ, དྷམྨཾ ཨཱཔཛྫིཾ ཨསཔྤཱཡཾ པཱཊིདེསནཱིཡཾ, ཏཾ པཊིདེསེམཱི’’ཏི.

ཨུདྡིཊྛཱ ཁོ ཨཱཡསྨནྟོ ཙཏྟཱརོ པཱཊིདེསནཱིཡཱ དྷམྨཱ. ཏཏྠཱཡསྨནྟེ པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡསྨནྟོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

པཱཊིདེསནཱིཡཱ ནིཊྛིཏཱ.

སེཁིཡཱ

ཨིམེ ཁོ པནཱཡསྨནྟོ སེཁིཡཱ དྷམྨཱ ཨུདྡེསཾ ཨཱགཙྪནྟི.

པརིམཎྜལསིཀྑཱཔདཾ

༡. པརིམཎྜལཾ ནིཝཱསེསྶཱམཱིཏི སིཀྑཱ ཀརཎཱིཡཱ.

༢. པརིམཎྜལཾ པཱརུཔིསྶཱམཱིཏི སིཀྑཱ ཀརཎཱིཡཱ.

སུཔྤཊིཙྪནྣསིཀྑཱཔདཾ

༣. སུཔྤཊིཙྪནྣོ ¶ ¶ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༤. སུཔྤཊིཙྪནྣོ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

སུསཾཝུཏསིཀྑཱཔདཾ

༥. སུསཾཝུཏོ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༦. སུསཾཝུཏོ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཨོཀྑིཏྟཙཀྑུསིཀྑཱཔདཾ

༧. ཨོཀྑིཏྟཙཀྑུ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༨. ཨོཀྑིཏྟཙཀྑུ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཨུཀྑིཏྟཀསིཀྑཱཔདཾ

༩. ན ཨུཀྑིཏྟཀཱཡ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༡༠. ན ཨུཀྑིཏྟཀཱཡ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

པརིམཎྜལཝགྒོ པཋམོ.

ཨུཛྫགྒྷིཀསིཀྑཱཔདཾ

༡༡. ན ཨུཛྫགྒྷིཀཱཡ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༡༢. ན ཨུཛྫགྒྷིཀཱཡ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཨུཙྩསདྡསིཀྑཱཔདཾ

༡༣. ཨཔྤསདྡོ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༡༤. ཨཔྤསདྡོ ¶ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཀཱཡཔྤཙཱལཀསིཀྑཱཔདཾ

༡༥. ན ཀཱཡཔྤཙཱལཀཾ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༡༦. ན ཀཱཡཔྤཙཱལཀཾ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

བཱཧུཔྤཙཱལཀསིཀྑཱཔདཾ

༡༧. ན བཱཧུཔྤཙཱལཀཾ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༡༨. ན བཱཧུཔྤཙཱལཀཾ ཨནྟརགྷརེནིསཱིདིསྶཱམཱིཏི སིཀྑཱ ཀརཎཱིཡཱ.

སཱིསཔྤཙཱལཀསིཀྑཱཔདཾ

༡༩. ན ¶ སཱིསཔྤཙཱལཀཾ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༢༠. ན སཱིསཔྤཙཱལཀཾ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཨུཛྫགྒྷིཀཝགྒོ དུཏིཡོ.

ཁམྦྷཀཏསིཀྑཱཔདཾ

༢༡. ན ཁམྦྷཀཏོ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༢༢. ན ཁམྦྷཀཏོ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཨོགུཎྛིཏསིཀྑཱཔདཾ

༢༣. ན ཨོགུཎྛིཏོ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༢༤. ན ཨོགུཎྛིཏོ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཨུཀྐུཊིཀསིཀྑཱཔདཾ

༢༥. ན ¶ ཨུཀྐུཊིཀཱཡ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

པལླཏྠིཀསིཀྑཱཔདཾ

༢༦. ན པལླཏྠིཀཱཡ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

སཀྐཙྩཔཊིགྒཧཎསིཀྑཱཔདཾ

༢༧. སཀྐཙྩཾ པིཎྜཔཱཏཾ པཊིགྒཧེསྶཱམཱིཏི སིཀྑཱ ཀརཎཱིཡཱ.

པཏྟསཉྙཱིཔཊིགྒཧཎསིཀྑཱཔདཾ

༢༨. པཏྟསཉྙཱི པིཎྜཔཱཏཾ པཊིགྒཧེསྶཱམཱིཏི སིཀྑཱ ཀརཎཱིཡཱ.

སམསཱུཔཀཔཊིགྒཧཎསིཀྑཱཔདཾ

༢༩. སམསཱུཔཀཾ པིཎྜཔཱཏཾ པཊིགྒཧེསྶཱམཱིཏི སིཀྑཱ ཀརཎཱིཡཱ.

སམཏིཏྟིཀསིཀྑཱཔདཾ

༣༠. སམཏིཏྟིཀཾ པིཎྜཔཱཏཾ པཊིགྒཧེསྶཱམཱིཏི སིཀྑཱ ཀརཎཱིཡཱ.

ཁམྦྷཀཏཝགྒོ ཏཏིཡོ.

སཀྐཙྩབྷུཉྫནསིཀྑཱཔདཾ

༣༡. སཀྐཙྩཾ ¶ པིཎྜཔཱཏཾ བྷུཉྫིསྶཱམཱིཏི སིཀྑཱ ཀརཎཱིཡཱ.

པཏྟསཉྙཱིབྷུཉྫནསིཀྑཱཔདཾ

༣༢. པཏྟསཉྙཱི པིཎྜཔཱཏཾ བྷུཉྫིསྶཱམཱིཏི སིཀྑཱ ཀརཎཱིཡཱ.

སཔདཱནསིཀྑཱཔདཾ

༣༣. སཔདཱནཾ པིཎྜཔཱཏཾ བྷུཉྫིསྶཱམཱིཏི སིཀྑཱ ཀརཎཱིཡཱ.

སམསཱུཔཀསིཀྑཱཔདཾ

༣༤. སམསཱུཔཀཾ ¶ པིཎྜཔཱཏཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ནཐཱུཔཀཏསིཀྑཱཔདཾ

༣༥. ན ཐཱུཔཀཏོ ཨོམདྡིཏྭཱ པིཎྜཔཱཏཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཨོདནཔྤཊིཙྪཱདནསིཀྑཱཔདཾ

༣༦. ན སཱུཔཾ ཝཱ བྱཉྫནཾ ཝཱ ཨོདནེན པཊིཙྪཱདེསྶཱམི བྷིཡྻོཀམྱཏཾ ཨུཔཱདཱཡཱཏི སིཀྑཱ ཀརཎཱིཡཱ.

སཱུཔོདནཝིཉྙཏྟིསིཀྑཱཔདཾ

༣༧. ན སཱུཔཾ ཝཱ ཨོདནཾ ཝཱ ཨགིལཱནོ ཨཏྟནོ ཨཏྠཱཡ ཝིཉྙཱཔེཏྭཱ བྷུཉྫིསྶཱམཱིཏི སིཀྑཱ ཀརཎཱིཡཱ.

ཨུཛ྄ཛྷཱནསཉྙཱིསིཀྑཱཔདཾ

༣༨. ན ཨུཛ྄ཛྷཱནསཉྙཱི པརེསཾ པཏྟཾ ཨོལོཀེསྶཱམཱིཏི སིཀྑཱ ཀརཎཱིཡཱ.

ཀབལ༹སིཀྑཱཔདཾ

༣༩. ནཱཏིམཧནྟཾ ཀབལ༹ཾ ཀརིསྶཱམཱིཏི སིཀྑཱ ཀརཎཱིཡཱ.

ཨཱལོཔསིཀྑཱཔདཾ

༤༠. པརིམཎྜལཾ ཨཱལོཔཾ ཀརིསྶཱམཱིཏི སིཀྑཱ ཀརཎཱིཡཱ.

སཀྐཙྩཝགྒོ ཙཏུཏྠོ.

ཨནཱཧཊསིཀྑཱཔདཾ

༤༡. ན ¶ ཨནཱཧཊེ ཀབལེ༹ མུཁདྭཱརཾ ཝིཝརིསྶཱམཱིཏི སིཀྑཱ ཀརཎཱིཡཱ.

བྷུཉྫམཱནསིཀྑཱཔདཾ

༤༢. ན བྷུཉྫམཱནོ སབྦཧཏྠཾ མུཁེ པཀྑིཔིསྶཱམཱིཏི སིཀྑཱ ཀརཎཱིཡཱ.

སཀབལ༹སིཀྑཱཔདཾ

༤༣. ན ¶ སཀབལེ༹ན མུཁེན བྱཱཧརིསྶཱམཱིཏི སིཀྑཱ ཀརཎཱིཡཱ.

པིཎྜུཀྑེཔཀསིཀྑཱཔདཾ

༤༤. ན པིཎྜུཀྑེཔཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཀབལཱ༹ཝཙྪེདཀསིཀྑཱཔདཾ

༤༥. ན ཀབལཱ༹ཝཙྪེདཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཨཝགཎྜཀཱརཀསིཀྑཱཔདཾ

༤༦. ན ཨཝགཎྜཀཱརཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཧཏྠནིདྡྷུནཀསིཀྑཱཔདཾ

༤༧. ན ཧཏྠནིདྡྷུནཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

སིཏྠཱཝཀཱརཀསིཀྑཱཔདཾ

༤༨. ན སིཏྠཱཝཀཱརཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཛིཝ྄ཧཱནིཙྪཱརཀསིཀྑཱཔདཾ

༤༩. ན ཛིཝ྄ཧཱནིཙྪཱརཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཙཔུཙཔུཀཱརཀསིཀྑཱཔདཾ

༥༠. ན ཙཔུཙཔུཀཱརཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཀབལ༹ཝགྒོ པཉྩམོ.

སུརུསུརུཀཱརཀསིཀྑཱཔདཾ

༥༡. ན སུརུསུརུཀཱརཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཧཏྠནིལླེཧཀསིཀྑཱཔདཾ

༥༢. ན ཧཏྠནིལླེཧཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

པཏྟནིལླེཧཀསིཀྑཱཔདཾ

༥༣. ན ¶ ¶ པཏྟནིལླེཧཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཨོཊྛནིལླེཧཀསིཀྑཱཔདཾ

༥༤. ན ཨོཊྛནིལླེཧཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

སཱམིསསིཀྑཱཔདཾ

༥༥. ན སཱམིསེན ཧཏྠེན པཱནཱིཡཐཱལཀཾ པཊིགྒཧེསྶཱམཱིཏི སིཀྑཱ ཀརཎཱིཡཱ.

སསིཏྠཀསིཀྑཱཔདཾ

༥༦. ན སསིཏྠཀཾ པཏྟདྷོཝནཾ ཨནྟརགྷརེ ཚཌྜེསྶཱམཱིཏི སིཀྑཱ ཀརཎཱིཡཱ.

ཚཏྟཔཱཎིསིཀྑཱཔདཾ

༥༧. ན ཚཏྟཔཱཎིསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

དཎྜཔཱཎིསིཀྑཱཔདཾ

༥༨. ན དཎྜཔཱཎིསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

སཏྠཔཱཎིསིཀྑཱཔདཾ

༥༩. ན སཏྠཔཱཎིསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཨཱཝུདྷཔཱཎིསིཀྑཱཔདཾ

༦༠. ན ཨཱཝུདྷཔཱཎིསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

སུརུསུརུཝགྒོ ཚཊྛོ.

པཱདུཀསིཀྑཱཔདཾ

༦༡. ན ¶ པཱདུཀཱརུལ༹ྷསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཨུཔཱཧནསིཀྑཱཔདཾ

༦༢. ན ¶ ཨུཔཱཧནཱརུལ༹ྷསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཡཱནསིཀྑཱཔདཾ

༦༣. ན ཡཱནགཏསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

སཡནསིཀྑཱཔདཾ

༦༤. ན སཡནགཏསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

པལླཏྠིཀསིཀྑཱཔདཾ

༦༥. ན པལླཏྠིཀཱཡ ནིསིནྣསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཝེཋིཏསིཀྑཱཔདཾ

༦༦. ན ཝེཋིཏསཱིསསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཨོགུཎྛིཏསིཀྑཱཔདཾ

༦༧. ན ཨོགུཎྛིཏསཱིསསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཚམཱསིཀྑཱཔདཾ

༦༨. ན ཚམཱཡཾ ནིསཱིདིཏྭཱ ཨཱསནེ ནིསིནྣསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ནཱིཙཱསནསིཀྑཱཔདཾ

༦༩. ན ནཱིཙེ ཨཱསནེ ནིསཱིདིཏྭཱ ཨུཙྩེ ཨཱསནེ ནིསིནྣསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཋིཏསིཀྑཱཔདཾ

༧༠. ན ཋིཏོ ནིསིནྣསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

པཙྪཏོགམནསིཀྑཱཔདཾ

༧༡. ན ¶ ¶ པཙྪཏོ གཙྪནྟོ པུརཏོ གཙྪནྟསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཨུཔྤཐེནགམནསིཀྑཱཔདཾ

༧༢. ན ཨུཔྤཐེན གཙྪནྟོ པཐེན གཙྪནྟསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཋིཏོཨུཙྩཱརསིཀྑཱཔདཾ

༧༣. ན ཋིཏོ ཨགིལཱནོ ཨུཙྩཱརཾ ཝཱ པསྶཱཝཾ ཝཱ ཀརིསྶཱམཱིཏི སིཀྑཱ ཀརཎཱིཡཱ.

ཧརིཏེཨུཙྩཱརསིཀྑཱཔདཾ

༧༤. ན ཧརིཏེ ཨགིལཱནོ ཨུཙྩཱརཾ ཝཱ པསྶཱཝཾ ཝཱ ཁེལ༹ཾ ཝཱ ཀརིསྶཱམཱིཏི སིཀྑཱ ཀརཎཱིཡཱ.

ཨུདཀེཨུཙྩཱརསིཀྑཱཔདཾ

༧༥. ན ཨུདཀེ ཨགིལཱནོ ཨུཙྩཱརཾ ཝཱ པསྶཱཝཾ ཝཱ ཁེལ༹ཾ ཝཱ ཀརིསྶཱམཱིཏི སིཀྑཱ ཀརཎཱིཡཱ.

པཱདུཀཝགྒོ སཏྟམོ.

ཨུདྡིཊྛཱ ཁོ ཨཱཡསྨནྟོ སེཁིཡཱ དྷམྨཱ. ཏཏྠཱཡསྨནྟེ པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡསྨནྟོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

སེཁིཡཱ ནིཊྛིཏཱ.

ཨདྷིཀརཎསམཐཱ

ཨིམེ ཁོ པནཱཡསྨནྟོ སཏྟ ཨདྷིཀརཎསམཐཱ

དྷམྨཱ ཨུདྡེསཾ ཨཱགཙྪནྟི.

ཨུཔྤནྣུཔྤནྣཱནཾ ¶ ཨདྷིཀརཎཱནཾ སམཐཱཡ ཝཱུཔསམཱཡ སམྨུཁཱཝིནཡོ དཱཏབྦོ.

སཏིཝིནཡོ དཱཏབྦོ.

ཨམཱུལ༹ྷཝིནཡོ དཱཏབྦོ.

པཊིཉྙཱཡ ¶ ཀཱརེཏབྦཾ.

ཡེབྷུཡྻསིཀཱ.

ཏསྶཔཱཔིཡསིཀཱ.

ཏིཎཝཏྠཱརཀོཏི.

ཨུདྡིཊྛཱ ཁོ ཨཱཡསྨནྟོ སཏྟ ཨདྷིཀརཎསམཐཱ དྷམྨཱ. ཏཏྠཱཡསྨནྟེ, པུཙྪཱམི ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡསྨནྟོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

ཨདྷིཀརཎསམཐཱ ནིཊྛིཏཱ.

ཨུདྡིཊྛཾ ཁོ ཨཱཡསྨནྟོ ནིདཱནཾ,

ཨུདྡིཊྛཱ ཙཏྟཱརོ པཱརཱཛིཀཱ དྷམྨཱ,

ཨུདྡིཊྛཱ ཏེརས སངྒྷཱདིསེསཱ དྷམྨཱ,

ཨུདྡིཊྛཱ དྭེ ཨནིཡཏཱ དྷམྨཱ,

ཨུདྡིཊྛཱ ཏིཾས ནིསྶགྒིཡཱ པཱཙིཏྟིཡཱ དྷམྨཱ,

ཨུདྡིཊྛཱ དྭེནཝུཏི པཱཙིཏྟིཡཱ དྷམྨཱ,

ཨུདྡིཊྛཱ ཙཏྟཱརོ པཱཊིདེསནཱིཡཱ དྷམྨཱ,

ཨུདྡིཊྛཱ སེཁིཡཱ དྷམྨཱ,

ཨུདྡིཊྛཱ སཏྟ ཨདྷིཀརཎསམཐཱ དྷམྨཱ, ཨེཏྟཀཾ ཏསྶ བྷགཝཏོ སུཏྟཱགཏཾ སུཏྟཔརིཡཱཔནྣཾ ཨནྭདྡྷམཱསཾ ¶ ཨུདྡེསཾ ཨཱགཙྪཏི, ཏཏྠ སབྦེཧེཝ སམགྒེཧི སམྨོདམཱནེཧི ཨཝིཝདམཱནེཧི སིཀྑིཏབྦནྟི.

ཝིཏྠཱརུདྡེསོ པཉྩམོ.

བྷིཀྑུཔཱཏིམོཀྑཾ ནིཊྛིཏཾ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

བྷིཀྑུནཱིཔཱཏིམོཀྑཔཱལི༹

པུབྦཀརཎཾ-༤

སམྨཛྫནཱི ¶ ¶ པདཱིཔོ ཙ, ཨུདཀཾ ཨཱསནེན ཙ;

ཨུཔོསཐསྶ ཨེཏཱནི, ‘‘པུབྦཀརཎ’’ནྟི ཝུཙྩཏི.

པུབྦཀིཙྩཾ-༥

ཚནྡ, པཱརིསུདྡྷི, ཨུཏུཀྑཱནཾ, བྷིཀྑུནིགཎནཱ ཙ ཨོཝཱདོ;

ཨུཔོསཐསྶ ཨེཏཱནི, ‘‘པུབྦཀིཙྩ’’ནྟི ཝུཙྩཏི.

པཏྟཀལླཨངྒཱ-༤

ཨུཔོསཐོ, ཡཱཝཏིཀཱ ཙ བྷིཀྑུནཱི ཀམྨཔྤཏྟཱ;

སབྷཱགཱཔཏྟིཡོ ཙ ན ཝིཛྫནྟི;

ཝཛྫནཱིཡཱ ཙ པུགྒལཱ ཏསྨིཾ ན ཧོནྟི, ‘‘པཏྟཀལླ’’ནྟི ཝུཙྩཏི.

པུབྦཀརཎཔུབྦཀིཙྩཱནི སམཱཔེཏྭཱ དེསིཏཱཔཏྟིཀསྶ སམགྒསྶ བྷིཀྑུནིསངྒྷསྶ ཨནུམཏིཡཱ པཱཏིམོཀྑཾ ཨུདྡིསིཏུཾ ཨཱརཱདྷནཾ ཀརོམ.

ནིདཱནུདྡེསོ

སུཎཱཏུ ¶ མེ ཨཡྻེ སངྒྷོ, ཨཛྫུཔོསཐོ པནྣརསོ, ཡདི སངྒྷསྶ པཏྟཀལླཾ, སངྒྷོ ཨུཔོསཐཾ ཀརེཡྻ, པཱཏིམོཀྑཾ ཨུདྡིསེཡྻ.

ཀིཾ སངྒྷསྶ པུབྦཀིཙྩཾ? པཱརིསུདྡྷིཾ ཨཡྻཱཡོ ཨཱརོཙེཐ, པཱཏིམོཀྑཾ ཨུདྡིསིསྶཱམི, ཏཾ སབྦཱཝ སནྟཱ སཱདྷུཀཾ སུཎོམ མནསི ཀརོམ. ཡསྶཱ སིཡཱ ཨཱཔཏྟི, སཱ ཨཱཝིཀརེཡྻ, ཨསནྟིཡཱ ཨཱཔཏྟིཡཱ ཏུཎྷཱི བྷཝིཏབྦཾ, ཏུཎྷཱིབྷཱཝེན ཁོ པནཱཡྻཱཡོ, ‘‘པརིསུདྡྷཱ’’ཏི ཝེདིསྶཱམི. ཡཐཱ ཁོ པན པཙྩེཀཔུཊྛསྶཱ ཝེཡྻཱཀརཎཾ ཧོཏི, ཨེཝམེཝཾ ཨེཝརཱུཔཱཡ པརིསཱཡ ཡཱཝཏཏིཡཾ ཨནུསཱཝིཏཾ ཧོཏི. ཡཱ པན བྷིཀྑུནཱི ཡཱཝཏཏིཡཾ ཨནུསཱཝིཡམཱནེ སརམཱནཱ སནྟིཾ ཨཱཔཏྟིཾ ནཱཝིཀརེཡྻ, སམྤཛཱནམུསཱཝཱདསྶཱ ཧོཏི. སམྤཛཱནམུསཱཝཱདོ ཁོ པནཱཡྻཱཡོ, ཨནྟརཱཡིཀོ དྷམྨོ ¶ ཝུཏྟོ བྷགཝཏཱ, ཏསྨཱ སརམཱནཱཡ བྷིཀྑུནིཡཱ ཨཱཔནྣཱཡ ཝིསུདྡྷཱཔེཀྑཱཡ སནྟཱི ཨཱཔཏྟི ཨཱཝིཀཱཏབྦཱ, ཨཱཝིཀཏཱ ཧིསྶཱ ཕཱསུ ཧོཏི.

ཨུདྡིཊྛཾ ཁོ, ཨཡྻཱཡོ, ནིདཱནཾ. ཏཏྠཱཡྻཱཡོ པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡྻཱཡོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

ནིདཱནཾ ནིཊྛིཏཾ.

པཱརཱཛིཀུདྡེསོ

ཏཏྲིམེ ཨཊྛ པཱརཱཛིཀཱ དྷམྨཱ ཨུདྡེསཾ ཨཱགཙྪནྟི.

མེཐུནདྷམྨསིཀྑཱཔདཾ

༡. ཡཱ པན བྷིཀྑུནཱི ཚནྡསོ མེཐུནཾ དྷམྨཾ པཊིསེཝེཡྻ, ཨནྟམསོ ཏིརཙྪཱནགཏེནཔི, པཱརཱཛིཀཱ ཧོཏི ཨསཾཝཱསཱ.

ཨདིནྣཱདཱནསིཀྑཱཔདཾ

༢. ཡཱ ¶ པན བྷིཀྑུནཱི གཱམཱ ཝཱ ཨརཉྙཱ ཝཱ ཨདིནྣཾ ཐེཡྻསངྑཱཏཾ ཨཱདིཡེཡྻ, ཡཐཱརཱུཔེ ཨདིནྣཱདཱནེ རཱཛཱནོ ཙོརཾ གཧེཏྭཱ ཧནེཡྻུཾ ཝཱ བནྡྷེཡྻུཾ ཝཱ པབྦཱཛེཡྻུཾ ཝཱ ཙོརཱསི བཱལཱསི མཱུལ༹ྷཱསི ཐེནཱསཱིཏི, ཏཐཱརཱུཔཾ བྷིཀྑུནཱི ཨདིནྣཾ ཨཱདིཡམཱནཱ ཨཡམྤི པཱརཱཛིཀཱ ཧོཏི ཨསཾཝཱསཱ.

མནུསྶཝིགྒཧསིཀྑཱཔདཾ

༣. ཡཱ པན བྷིཀྑུནཱི སཉྩིཙྩ མནུསྶཝིགྒཧཾ ཛཱིཝིཏཱ ཝོརོཔེཡྻ, སཏྠཧཱརཀཾ ཝཱསྶ པརིཡེསེཡྻ, མརཎཝཎྞཾ ཝཱ སཾཝཎྞེཡྻ, མརཎཱཡ ཝཱ སམཱདཔེཡྻ ‘‘ཨམྦྷོ པུརིས, ཀིཾ ཏུཡ྄ཧིམིནཱ པཱཔཀེན དུཛྫཱིཝིཏེན, མཏཾ ཏེ ཛཱིཝིཏཱ སེཡྻོ’’ཏི, ཨིཏི ཙིཏྟམནཱ ཙིཏྟསངྐཔྤཱ ཨནེཀཔརིཡཱཡེན མརཎཝཎྞཾ ཝཱ སཾཝཎྞེཡྻ, མརཎཱཡ ཝཱ སམཱདཔེཡྻ, ཨཡམྤི པཱརཱཛིཀཱ ཧོཏི ཨསཾཝཱསཱ.

ཨུཏྟརིམནུསྶདྷམྨསིཀྑཱཔདཾ

༤. ཡཱ པན བྷིཀྑུནཱི ཨནབྷིཛཱནཾ ཨུཏྟརིམནུསྶདྷམྨཾ ཨཏྟུཔནཱཡིཀཾ ཨལམརིཡཉཱཎདསྶནཾ སམུདཱཙརེཡྻ ‘‘ཨིཏི ཛཱནཱམི, ཨིཏི པསྶཱམཱི’’ཏི, ཏཏོ ¶ ཨཔརེན སམཡེན སམནུགྒཱཧཱིཡམཱནཱ ཝཱ ཨསམནུགྒཱཧཱིཡམཱནཱ ཝཱ ཨཱཔནྣཱ ཝིསུདྡྷཱཔེཀྑཱ ཨེཝཾ ཝདེཡྻ ‘‘ཨཛཱནམེཝཾ, ཨཡྻེ, ཨཝཙཾ ཛཱནཱམི, ཨཔསྶཾ པསྶཱམི, ཏུཙྪཾ མུསཱ ཝིལཔི’’ནྟི, ཨཉྙཏྲ ཨདྷིམཱནཱ, ཨཡམྤི པཱརཱཛིཀཱ ཧོཏི ཨསཾཝཱསཱ.

ཨུབྦྷཛཱཎུམཎྜལིཀཱསིཀྑཱཔདཾ

༥. ཡཱ པན བྷིཀྑུནཱི ཨཝསྶུཏཱ ཨཝསྶུཏསྶ པུརིསཔུགྒལསྶ, ཨདྷཀྑཀཾ ཨུབྦྷཛཱཎུམཎྜལཾ ཨཱམསནཾ ཝཱ པརཱམསནཾ ཝཱ གཧཎཾ ཝཱ ཚུཔནཾ ཝཱ པཊིཔཱིལ༹ནཾ ཝཱ སཱདིཡེཡྻ, ཨཡམྤི པཱརཱཛིཀཱ ཧོཏི ཨསཾཝཱསཱ ཨུབྦྷཛཱཎུམཎྜལིཀཱ.

ཝཛྫཔྤཊིཙྪཱདིཀཱསིཀྑཱཔདཾ

༦. ཡཱ པན བྷིཀྑུནཱི ཛཱནཾ པཱརཱཛིཀཾ དྷམྨཾ ཨཛ྄ཛྷཱཔནྣཾ བྷིཀྑུནིཾ ནེཝཏྟནཱ པཊིཙོདེཡྻ, ན གཎསྶ ཨཱརོཙེཡྻ, ཡདཱ ཙ སཱ ཋིཏཱ ཝཱ ཨསྶ ཙུཏཱ ཝཱ ནཱསིཏཱ ཝཱ ཨཝསྶཊཱ ཝཱ, སཱ པཙྪཱ ཨེཝཾ ཝདེཡྻ ‘‘པུབྦེཝཱཧཾ, ཨཡྻེ, ཨཉྙཱསིཾ ཨེཏཾ བྷིཀྑུནིཾ ‘ཨེཝརཱུཔཱ ཙ ¶ ཨེཝརཱུཔཱ ཙ སཱ བྷགིནཱི’ཏི, ནོ ཙ ཁོ ཨཏྟནཱ པཊིཙོདེསྶཾ, ན གཎསྶ ཨཱརོཙེསྶ’’ནྟི, ཨཡམྤི པཱརཱཛིཀཱ ཧོཏི ཨསཾཝཱསཱ ཝཛྫཔྤཊིཙྪཱདིཀཱ.

ཨུཀྑིཏྟཱནུཝཏྟིཀཱསིཀྑཱཔདཾ

༧. ཡཱ པན བྷིཀྑུནཱི སམགྒེན སངྒྷེན ཨུཀྑིཏྟཾ བྷིཀྑུཾ དྷམྨེན ཝིནཡེན སཏྠུསཱསནེན ཨནཱདརཾ ཨཔྤཊིཀཱརཾ ཨཀཏསཧཱཡཾ ཏམནུཝཏྟེཡྻ, སཱ བྷིཀྑུནཱི བྷིཀྑུནཱིཧི ཨེཝམསྶ ཝཙནཱིཡཱ ‘‘ཨེསོ ཁོ, ཨཡྻེ, བྷིཀྑུ སམགྒེན སངྒྷེན ཨུཀྑིཏྟོ, དྷམྨེན ཝིནཡེན སཏྠུསཱསནེན ཨནཱདརོ ཨཔྤཊིཀཱརོ ཨཀཏསཧཱཡོ, མཱཡྻེ, ཨེཏཾ བྷིཀྑུཾ ཨནུཝཏྟཱི’’ཏི, ཨེཝཉྩ སཱ བྷིཀྑུནཱི བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻ, སཱ བྷིཀྑུནཱི བྷིཀྑུནཱིཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ, ཡཱཝཏཏིཡཾ ཙེ སམནུབྷཱསིཡམཱནཱ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ, ནོ ཙེ པཊིནིསྶཛྫེཡྻ, ཨཡམྤི པཱརཱཛིཀཱ ཧོཏི ཨསཾཝཱསཱ ཨུཀྑིཏྟཱནུཝཏྟིཀཱ.

ཨཊྛཝཏྠུཀཱསིཀྑཱཔདཾ

༨. ཡཱ ¶ པན བྷིཀྑུནཱི ཨཝསྶུཏཱ ཨཝསྶུཏསྶ པུརིསཔུགྒལསྶ ཧཏྠགྒཧཎཾ ཝཱ སཱདིཡེཡྻ, སངྒྷཱཊིཀཎྞགྒཧཎཾ ཝཱ སཱདིཡེཡྻ, སནྟིཊྛེཡྻ ཝཱ, སལླཔེཡྻ ཝཱ, སངྐེཏཾ ཝཱ གཙྪེཡྻ, པུརིསསྶ ཝཱ ཨབྦྷཱགམནཾ སཱདིཡེཡྻ, ཚནྣཾ ཝཱ ཨནུཔཝིསེཡྻ, ཀཱཡཾ ཝཱ ཏདཏྠཱཡ ཨུཔསཾཧརེཡྻ ཨེཏསྶ ཨསདྡྷམྨསྶ པཊིསེཝནཏྠཱཡ, ཨཡམྤི པཱརཱཛིཀཱ ཧོཏི ཨསཾཝཱསཱ ཨཊྛཝཏྠུཀཱ.

ཨུདྡིཊྛཱ ཁོ, ཨཡྻཱཡོ, ཨཊྛ པཱརཱཛིཀཱ དྷམྨཱ. ཡེསཾ བྷིཀྑུནཱི ཨཉྙཏརཾ ཝཱ ཨཉྙཏརཾ ཝཱ ཨཱཔཛྫིཏྭཱ ན ལབྷཏི བྷིཀྑུནཱིཧི སདྡྷིཾ སཾཝཱསཾ ཡཐཱ པུརེ, ཏཐཱ པཙྪཱ, པཱརཱཛིཀཱ ཧོཏི ཨསཾཝཱསཱ. ཏཏྠཱཡྻཱཡོ, པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡྻཱཡོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

པཱརཱཛིཀཾ ནིཊྛིཏཾ.

སངྒྷཱདིསེསུདྡེསོ

ཨིམེ ཁོ པནཱཡྻཱཡོ སཏྟརས སངྒྷཱདིསེསཱ

དྷམྨཱ ཨུདྡེསཾ ཨཱགཙྪནྟི.

ཨུསྶཡཝཱདིཀཱསིཀྑཱཔདཾ

༡. ཡཱ ¶ པན བྷིཀྑུནཱི ཨུསྶཡཝཱདིཀཱ ཝིཧརེཡྻ གཧཔཏིནཱ ཝཱ གཧཔཏིཔུཏྟེན ཝཱ དཱསེན ཝཱ ཀམྨཀཱརེན ཝཱ ཨནྟམསོ སམཎཔརིབྦཱཛཀེནཱཔི, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

ཙོརཱིཝུཊྛཱཔིཀཱསིཀྑཱཔདཾ

༢. ཡཱ པན བྷིཀྑུནཱི ཛཱནཾ ཙོརིཾ ཝཛ྄ཛྷཾ ཝིདིཏཾ ཨནཔལོཀེཏྭཱ རཱཛཱནཾ ཝཱ སངྒྷཾ ཝཱ གཎཾ ཝཱ པཱུགཾ ཝཱ སེཎིཾ ཝཱ, ཨཉྙཏྲ ཀཔྤཱ ཝུཊྛཱཔེཡྻ, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

ཨེཀགཱམནྟརགམནསིཀྑཱཔདཾ

༣. ཡཱ ¶ པན བྷིཀྑུནཱི ཨེཀཱ ཝཱ གཱམནྟརཾ གཙྪེཡྻ, ཨེཀཱ ཝཱ ནདཱིཔཱརཾ གཙྪེཡྻ, ཨེཀཱ ཝཱ རཏྟིཾ ཝིཔྤཝསེཡྻ, ཨེཀཱ ཝཱ གཎམྷཱ ཨོཧིཡེཡྻ, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

ཨུཀྑིཏྟཀཨོསཱརཎསིཀྑཱཔདཾ

༤. ཡཱ པན བྷིཀྑུནཱི སམགྒེན སངྒྷེན ཨུཀྑིཏྟཾ བྷིཀྑུནིཾ དྷམྨེན ཝིནཡེན སཏྠུསཱསནེན ཨནཔལོཀེཏྭཱ ཀཱརཀསངྒྷཾ, ཨནཉྙཱཡ གཎསྶ ཚནྡཾ ཨོསཱརེཡྻ, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

བྷོཛནཔཊིགྒཧཎཔཋམསིཀྑཱཔདཾ

༥. ཡཱ པན བྷིཀྑུནཱི ཨཝསྶུཏཱ ཨཝསྶུཏསྶ པུརིསཔུགྒལསྶ ཧཏྠཏོ ཁཱདནཱིཡཾ ཝཱ, བྷོཛནཱིཡཾ ཝཱ སཧཏྠཱ པཊིགྒཧེཏྭཱ ཁཱདེཡྻ ཝཱ བྷུཉྫེཡྻ ཝཱ, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

བྷོཛནཔཊིགྒཧཎདུཏིཡསིཀྑཱཔདཾ

༦. ཡཱ ¶ པན བྷིཀྑུནཱི ཨེཝཾ ཝདེཡྻ ‘‘ཀིཾ ཏེ, ཨཡྻེ, ཨེསོ པུརིསཔུགྒལོ ཀརིསྶཏི ཨཝསྶུཏོ ཝཱ ཨནཝསྶུཏོ ཝཱ, ཡཏོ ཏྭཾ ཨནཝསྶུཏཱ, ཨིངྒྷ, ཨཡྻེ, ཡཾ ཏེ ཨེསོ པུརིསཔུགྒལོ དེཏི ཁཱདནཱིཡཾ ཝཱ བྷོཛནཱིཡཾ ཝཱ, ཏཾ ཏྭཾ སཧཏྠཱ པཊིགྒཧེཏྭཱ ཁཱད ཝཱ བྷུཉྫ ཝཱ’’ཏི, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

སཉྩརིཏྟསིཀྑཱཔདཾ

༧. ཡཱ པན བྷིཀྑུནཱི སཉྩརིཏྟཾ སམཱཔཛྫེཡྻ ཨིཏྠིཡཱ ཝཱ པུརིསམཏིཾ, པུརིསསྶ ཝཱ ཨིཏྠིམཏིཾ, ཛཱཡཏྟནེ ཝཱ ཛཱརཏྟནེ ཝཱ ཨནྟམསོ ཏངྑཎིཀཱཡཔི, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

དུཊྛདོསསིཀྑཱཔདཾ

༨. ཡཱ པན བྷིཀྑུནཱི བྷིཀྑུནིཾ དུཊྛཱ དོསཱ ཨཔྤཏཱིཏཱ ཨམཱུལཀེན པཱརཱཛིཀེན དྷམྨེན ཨནུདྡྷཾསེཡྻ ‘‘ཨཔྤེཝ ནཱམ ནཾ ཨིམམྷཱ བྲཧྨཙརིཡཱ ཙཱཝེཡྻ’’ནྟི, ཏཏོ ཨཔརེན སམཡེན སམནུགྒཱཧཱིཡམཱནཱ ཝཱ ཨས མནུགྒཱཧཱིཡམཱནཱ ཝཱ ཨམཱུལཀཉྩེཝ ཏཾ ཨདྷིཀརཎཾ ཧོཏི, བྷིཀྑུནཱི ཙ དོསཾ ¶ པཏིཊྛཱཏི, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

ཨཉྙབྷཱགིཡསིཀྑཱཔདཾ

༩. ཡཱ པན བྷིཀྑུནཱི བྷིཀྑུནིཾ དུཊྛཱ དོསཱ ཨཔྤཏཱིཏཱ ཨཉྙབྷཱགིཡསྶ ཨདྷིཀརཎསྶ ཀིཉྩིདེསཾ ལེསམཏྟཾ ཨུཔཱདཱཡ པཱརཱཛིཀེན དྷམྨེན ཨནུདྡྷཾསེཡྻ ‘‘ཨཔྤེཝ ནཱམ ནཾ ཨིམམྷཱ བྲཧྨཙརིཡཱ ཙཱཝེཡྻ’’ནྟི, ཏཏོ ཨཔརེན སམཡེན སམནུགྒཱཧཱིཡམཱནཱ ཝཱ ཨསམནུགྒཱཧཱིཡམཱནཱ ཝཱ ཨཉྙབྷཱགིཡཉྩེཝ ཏཾ ཨདྷིཀརཎཾ ཧོཏི. ཀོཙིདེསོ ལེསམཏྟོ ཨུཔཱདིནྣོ, བྷིཀྑུནཱི ཙ དོསཾ པཏིཊྛཱཏི, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

སིཀྑཾཔཙྩཱཙིཀྑཎསིཀྑཱཔདཾ

༡༠. ཡཱ པན བྷིཀྑུནཱི ཀུཔིཏཱ ཨནཏྟམནཱ ཨེཝཾ ཝདེཡྻ ‘‘བུདྡྷཾ པཙྩཱཙིཀྑཱམི དྷམྨཾ པཙྩཱཙིཀྑཱམི, སངྒྷཾ པཙྩཱཙིཀྑཱམི, སིཀྑཾ པཙྩཱཙིཀྑཱམི, ཀིནྣུམཱཝ སམཎིཡོ ཡཱ སམཎིཡོ སཀྱདྷཱིཏརོ, སནྟཉྙཱཔི སམཎིཡོ ལཛྫིནིཡོ ཀུཀྐུཙྩིཀཱ སིཀྑཱཀཱམཱ, ཏཱསཱཧཾ ¶ སནྟིཀེ བྲཧྨཙརིཡཾ ཙརིསྶཱམཱི’’ཏི. སཱ བྷིཀྑུནཱི བྷིཀྑུནཱིཧི ཨེཝམསྶ ཝཙནཱིཡཱ ‘‘མཱཡྻེ ཀུཔིཏཱ ཨནཏྟམནཱ ཨེཝཾ ཨཝཙ ‘བུདྡྷཾ པཙྩཱཙིཀྑཱམི, དྷམྨཾ པཙྩཱཙིཀྑཱམི, སངྒྷཾ པཙྩཱཙིཀྑཱམི, སིཀྑཾ པཙྩཱཙིཀྑཱམི, ཀིནྣུམཱཝ སམཎིཡོ ཡཱ སམཎིཡོ སཀྱདྷཱིཏརོ, སནྟཉྙཱཔི སམཎིཡོ ལཛྫིནིཡོ ཀུཀྐུཙྩིཀཱ སིཀྑཱཀཱམཱ, ཏཱསཱཧཾ སནྟིཀེ བྲཧྨཙརིཡཾ ཙརིསྶཱམཱི’ཏི, ཨབྷིརམཱཡྻེ, སྭཱཀྑཱཏོ དྷམྨོ, ཙར བྲཧྨཙརིཡཾ སམྨཱ དུཀྑསྶ ཨནྟཀིརིཡཱཡཱ’’ཏི, ཨེཝཉྩ སཱ བྷིཀྑུནཱི བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻ, སཱ བྷིཀྑུནཱི བྷིཀྑུནཱིཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ, ཡཱཝཏཏིཡཉྩེ སམནུབྷཱསིཡམཱནཱ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ, ནོ ཙེ པཊིནིསྶཛྫེཡྻ, ཨཡམྤི བྷིཀྑུནཱི ཡཱཝཏཏིཡཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

ཨདྷིཀརཎཀུཔིཏསིཀྑཱཔདཾ

༡༡. ཡཱ པན བྷིཀྑུནཱི ཀིསྨིཉྩིདེཝ ཨདྷིཀརཎེ པཙྩཱཀཏཱ ཀུཔིཏཱ ཨནཏྟམནཱ ཨེཝཾ ཝདེཡྻ ‘‘ཚནྡགཱམིནིཡོ ཙ བྷིཀྑུནིཡོ, དོསགཱམིནིཡོ ཙ བྷིཀྑུནིཡོ, མོཧགཱམིནིཡོ ཙ བྷིཀྑུནིཡོ, བྷཡགཱམིནིཡོ ཙ བྷིཀྑུནིཡོ’’ཏི, སཱ བྷིཀྑུནཱི བྷིཀྑུནཱིཧི ཨེཝམསྶ ཝཙནཱིཡཱ ‘‘མཱཡྻེ, ཀིསྨིཉྩིདེཝ ཨདྷིཀརཎེ པཙྩཱཀཏཱ ཀུཔིཏཱ ཨནཏྟམནཱ ཨེཝཾ ཨཝཙ ‘ཚནྡགཱམིནིཡོ ¶ ཙ བྷིཀྑུནིཡོ, དོསགཱམིནིཡོ ཙ བྷིཀྑུནིཡོ, མོཧགཱམིནིཡོ ཙ བྷིཀྑུནིཡོ, བྷཡགཱམིནིཡོ ཙ བྷིཀྑུནིཡོ’ཏི, ཨཡྻཱ ཁོ ཚནྡཱཔི གཙྪེཡྻ, དོསཱཔི གཙྪེཡྻ, མོཧཱཔི གཙྪེཡྻ, བྷཡཱཔི གཙྪེཡྻཱ’’ཏི. ཨེཝཉྩ སཱ བྷིཀྑུནཱི བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻ, སཱ བྷིཀྑུནཱི བྷིཀྑུནཱིཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ, ཡཱཝཏཏིཡཉྩེ སམནུབྷཱསིཡམཱནཱ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ, ནོ ཙེ པཊིནིསྶཛྫེཡྻ, ཨཡམྤི བྷིཀྑུནཱི ཡཱཝཏཏིཡཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

པཱཔསམཱཙཱརཔཋམསིཀྑཱཔདཾ

༡༢. བྷིཀྑུནིཡོ པནེཝ སཾསཊྛཱ ཝིཧརནྟི པཱཔཱཙཱརཱ པཱཔསདྡཱ པཱཔསིལོཀཱ བྷིཀྑུནིསངྒྷསྶ ཝིཧེསིཀཱ ཨཉྙམཉྙིསྶཱ ཝཛྫཔྤཊིཙྪཱདིཀཱ, ཏཱ བྷིཀྑུནིཡོ བྷིཀྑུནཱིཧི ཨེཝམསྶུ ཝཙནཱིཡཱ ‘‘བྷགིནིཡོ ཁོ སཾསཊྛཱ ཝིཧརནྟི པཱཔཱཙཱརཱ པཱཔསདྡཱ པཱཔསིལོཀཱ བྷིཀྑུནིསངྒྷསྶ ཝིཧེསིཀཱ ཨཉྙམཉྙིསྶཱ ཝཛྫཔྤཊིཙྪཱདིཀཱ, ཝིཝིཙྩཐཱཡྻེ, ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱི’’ཏི, ཨེཝཉྩ ཏཱ བྷིཀྑུནིཡོ བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻུཾ, ཏཱ བྷིཀྑུནིཡོ བྷིཀྑུནཱིཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ, ཡཱཝཏཏིཡཉྩེ ¶ སམནུབྷཱསིཡམཱནཱ ཏཾ པཊིནིསྶཛྫེཡྻུཾ, ཨིཙྩེཏཾ ཀུསལཾ, ནོ ཙེ པཊིནིསྶཛྫེཡྻུཾ, ཨིམཱཔི བྷིཀྑུནིཡོ ཡཱཝཏཏིཡཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

པཱཔསམཱཙཱརདུཏིཡསིཀྑཱཔདཾ

༡༣. ཡཱ པན བྷིཀྑུནཱི ཨེཝཾ ཝདེཡྻ ‘‘སཾསཊྛཱཝ, ཨཡྻེ, ཏུམྷེ ཝིཧརཐ, མཱ ཏུམྷེ ནཱནཱ ཝིཧརིཏྠ, སནྟི སངྒྷེ ཨཉྙཱཔི བྷིཀྑུནིཡོ ཨེཝཱཙཱརཱ ཨེཝཾསདྡཱ ཨེཝཾསིལོཀཱ བྷིཀྑུནིསངྒྷསྶ ཝིཧེསིཀཱ ཨཉྙམཉྙིསྶཱ ཝཛྫཔྤཊིཙྪཱདིཀཱ, ཏཱ སངྒྷོ ན ཀིཉྩི ཨཱཧ ཏུམྷཉྙེཝ སངྒྷོ ཨུཉྙཱཡ པརིབྷཝེན ཨཀྑནྟིཡཱ ཝེབྷསྶིཡཱ དུབྦལྱཱ ཨེཝམཱཧ – ‘བྷགིནིཡོ ཁོ སཾསཊྛཱ ཝིཧརནྟི པཱཔཱཙཱརཱ པཱཔསདྡཱ པཱཔསིལོཀཱ བྷིཀྑུནིསངྒྷསྶ ཝིཧེསིཀཱ ཨཉྙམཉྙིསྶཱ ཝཛྫཔྤཊིཙྪཱདིཀཱ, ཝིཝིཙྩཐཱཡྻེ, ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱི’’’ཏི, སཱ བྷིཀྑུནཱི བྷིཀྑུནཱིཧི ཨེཝམསྶ ཝཙནཱིཡཱ ‘‘མཱཡྻེ, ཨེཝཾ ཨཝཙ, སཾསཊྛཱཝ ཨཡྻེ ཏུམྷེ ཝིཧརཐ, མཱ ཏུམྷེ ནཱནཱ ཝིཧརིཏྠ, སནྟི སངྒྷེ ཨཉྙཱཔི བྷིཀྑུནིཡོ ཨེཝཱཙཱརཱ ཨེཝཾསདྡཱ ཨེཝཾསིལོཀཱ བྷིཀྑུནིསངྒྷསྶ ཝིཧེསིཀཱ ཨཉྙམཉྙིསྶཱ ཝཛྫཔྤཊིཙྪཱདིཀཱ, ཏཱ ¶ སངྒྷོ ན ཀིཉྩི ཨཱཧ, ཏུམྷཉྙེཝ སངྒྷོ ཨུཉྙཱཡ པརིབྷཝེན ཨཀྑནྟིཡཱ ཝེབྷསྶིཡཱ དུབྦལྱཱ ཨེཝམཱཧ – ‘བྷགིནིཡོ ཁོ སཾསཊྛཱ ཝིཧརནྟི པཱཔཱཙཱརཱ པཱཔསདྡཱ པཱཔསིལོཀཱ བྷིཀྑུནིསངྒྷསྶ ཝིཧེསིཀཱ ཨཉྙམཉྙིསྶཱ ཝཛྫཔྤཊིཙྪཱདིཀཱ, ཝིཝིཙྩཐཱཡྻེ, ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱི’’’ཏི, ཨེཝཉྩ སཱ བྷིཀྑུནཱི བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻ, སཱ བྷིཀྑུནཱི བྷིཀྑུནཱིཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ, ཡཱཝཏཏིཡཉྩེ སམནུབྷཱསིཡམཱནཱ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ, ནོ ཙེ པཊིནིསྶཛྫེཡྻ, ཨཡམྤི བྷིཀྑུནཱི ཡཱཝཏཏིཡཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

སངྒྷབྷེདཀསིཀྑཱཔདཾ

༡༤. ཡཱ པན བྷིཀྑུནཱི སམགྒསྶ སངྒྷསྶ བྷེདཱཡ པརཀྐམེཡྻ, བྷེདནསཾཝཏྟནིཀཾ ཝཱ ཨདྷིཀརཎཾ སམཱདཱཡ པགྒཡ྄ཧ ཏིཊྛེཡྻ, སཱ བྷིཀྑུནཱི བྷིཀྑུནཱིཧི ཨེཝམསྶ ཝཙནཱིཡཱ ‘‘མཱཡྻཱ, སམགྒསྶ སངྒྷསྶ བྷེདཱཡ པརཀྐམི, བྷེདནསཾཝཏྟནིཀཾ ཝཱ ཨདྷིཀརཎཾ སམཱདཱཡ པགྒཡ྄ཧ ཨཊྛཱསི, སམེཏཱཡྻཱ, སངྒྷེན, སམགྒོ ཧི སངྒྷོ སམྨོདམཱནོ ཨཝིཝདམཱནོ ཨེཀུདྡེསོ ཕཱསུ ཝིཧརཏཱི’’ཏི. ཨེཝཉྩ སཱ བྷིཀྑུནཱི བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻ, སཱ བྷིཀྑུནཱི བྷིཀྑུནཱིཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ, ཡཱཝཏཏིཡཉྩེ སམནུབྷཱསིཡམཱནཱ ¶ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ. ནོ ཙེ པཊིནིསྶཛྫེཡྻ, ཨཡམྤི བྷིཀྑུནཱི ཡཱཝཏཏིཡཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

བྷེདཱནུཝཏྟཀསིཀྑཱཔདཾ

༡༥. ཏསྶཱཡེཝ ཁོ པན བྷིཀྑུནིཡཱ བྷིཀྑུནིཡོ ཧོནྟི ཨནུཝཏྟིཀཱ ཝགྒཝཱདིཀཱ ཨེཀཱ ཝཱ དྭེ ཝཱ ཏིསྶོ ཝཱ, ཏཱ ཨེཝཾ ཝདེཡྻུཾ ‘‘མཱཡྻཱཡོ, ཨེཏཾ བྷིཀྑུནིཾ ཀིཉྩི ཨཝཙུཏྠ དྷམྨཝཱདིནཱི ཙེསཱ བྷིཀྑུནཱི, ཝིནཡཝཱདིནཱི ཙེསཱ བྷིཀྑུནཱི, ཨམྷཱཀཉྩེསཱ བྷིཀྑུནཱི ཚནྡཉྩ རུཙིཉྩ ཨཱདཱཡ ཝོཧརཏི, ཛཱནཱཏི, ནོ བྷཱསཏི, ཨམྷཱཀམྤེཏཾ ཁམཏཱི’’ཏི, ཏཱ བྷིཀྑུནིཡོ བྷིཀྑུནཱིཧི ཨེཝམསྶུ ཝཙནཱིཡཱ ‘‘མཱཡྻཱཡོ, ཨེཝཾ ཨཝཙུཏྠ, ན ཙེསཱ བྷིཀྑུནཱི དྷམྨཝཱདིནཱི, ན ཙེསཱ བྷིཀྑུནཱི ཝིནཡཝཱདིནཱི, མཱཡྻཱནམྤི སངྒྷབྷེདོ རུཙྩིཏྠ, སམེཏཱཡྻཱནཾ སངྒྷེན, སམགྒོ ཧི སངྒྷོ སམྨོདམཱནོ ཨཝིཝདམཱནོ ཨེཀུདྡེསོ ཕཱསུ ཝིཧརཏཱི’’ཏི, ཨེཝཉྩ ཏཱ བྷིཀྑུནིཡོ བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻུཾ, ཏཱ བྷིཀྑུནིཡོ བྷིཀྑུནཱིཧི ¶ ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ, ཡཱཝཏཏིཡཉྩེ སམནུབྷཱསིཡམཱནཱ ཏཾ པཊིནིསྶཛྫེཡྻུཾ. ཨིཙྩེཏཾ ཀུསལཾ. ནོ ཙེ པཊིནིསྶཛྫེཡྻུཾ, ཨིམཱཔི བྷིཀྑུནིཡོ ཡཱཝཏཏིཡཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

དུབྦཙསིཀྑཱཔདཾ

༡༦. བྷིཀྑུནཱི པནེཝ དུབྦཙཛཱཏིཀཱ ཧོཏི ཨུདྡེསཔརིཡཱཔནྣེསུ སིཀྑཱཔདེསུ བྷིཀྑུནཱིཧི སཧདྷམྨིཀཾ ཝུཙྩམཱནཱ ཨཏྟཱནཾ ཨཝཙནཱིཡཾ ཀརོཏི ‘‘མཱ མཾ ཨཡྻཱཡོ ཀིཉྩི ཨཝཙུཏྠ ཀལྱཱཎཾ ཝཱ པཱཔཀཾ ཝཱ, ཨཧམྤཱཡྻཱཡོ, ན ཀིཉྩི ཝཀྑཱམི ཀལྱཱཎཾ ཝཱ པཱཔཀཾ ཝཱ, ཝིརམཐཱཡྻཱཡོ, མམ ཝཙནཱཡཱ’’ཏི, སཱ བྷིཀྑུནཱི བྷིཀྑུནཱིཧི ཨེཝམསྶ ཝཙནཱིཡཱ ‘‘མཱཡྻཱ, ཨཏྟཱནཾ ཨཝཙནཱིཡཾ ཨཀཱསི, ཝཙནཱིཡམེཝ, ཨཡྻཱ, ཨཏྟཱནཾ ཀརོཏུ, ཨཡྻཱཔི བྷིཀྑུནིཡོ ཝདཏུ སཧདྷམྨེན, བྷིཀྑུནིཡོཔི ཨཡྻཾ ཝཀྑནྟི སཧདྷམྨེན, ཨེཝཾ སཾཝདྡྷཱ ཧི ཏསྶ བྷགཝཏོ པརིསཱ ཡདིདཾ ཨཉྙམཉྙཝཙནེན ཨཉྙམཉྙཝུཊྛཱཔནེནཱ’’ཏི. ཨེཝཉྩ སཱ བྷིཀྑུནཱི བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻ, སཱ བྷིཀྑུནཱི བྷིཀྑུནཱིཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ, ཡཱཝཏཏིཡཉྩེ སམནུབྷཱསིཡམཱནཱ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ. ནོ ཙེ པཊིནིསྶཛྫེཡྻ, ཨཡམྤི བྷིཀྑུནཱི ཡཱཝཏཏིཡཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

ཀུལདཱུསཀསིཀྑཱཔདཾ

༡༧. བྷིཀྑུནཱི ¶ པནེཝ ཨཉྙཏརཾ གཱམཾ ཝཱ ནིགམཾ ཝཱ ཨུཔནིསྶཱཡ ཝིཧརཏི ཀུལདཱུསིཀཱ པཱཔསམཱཙཱརཱ, ཏསྶཱ ཁོ པཱཔཀཱ སམཱཙཱརཱ དིསྶནྟི ཙེཝ སུཡྻནྟི ཙ, ཀུལཱནི ཙ ཏཱཡ དུཊྛཱནི དིསྶནྟི ཙེཝ སུཡྻནྟི ཙ, སཱ བྷིཀྑུནཱི བྷིཀྑུནཱིཧི ཨེཝམསྶ ཝཙནཱིཡཱ ‘‘ཨཡྻཱ, ཁོ ཀུལདཱུསིཀཱ པཱཔསམཱཙཱརཱ, ཨཡྻཱཡ ཁོ པཱཔཀཱ སམཱཙཱརཱ དིསྶནྟི ཙེཝ སུཡྻནྟི ཙ, ཀུལཱནི ཙཱཡྻཱཡ, དུཊྛཱནི དིསྶནྟི ཙེཝ སུཡྻནྟི ཙ, པཀྐམཏཱཡྻཱ ཨིམམྷཱ ཨཱཝཱསཱ, ཨལཾ ཏེ ཨིདྷ ཝཱསེནཱ’’ཏི. ཨེཝཉྩ སཱ བྷིཀྑུནཱི བྷིཀྑུནཱིཧི ཝུཙྩམཱནཱ ཏཱ བྷིཀྑུནིཡོ ཨེཝཾ ཝདེཡྻ ‘‘ཚནྡགཱམིནིཡོ ཙ བྷིཀྑུནིཡོ, དོསགཱམིནིཡོ ཙ བྷིཀྑུནིཡོ, མོཧགཱམིནིཡོ ཙ བྷིཀྑུནིཡོ, བྷཡགཱམིནིཡོ ཙ བྷིཀྑུནིཡོ, ཏཱདིསིཀཱཡ ཨཱཔཏྟིཡཱ ཨེཀཙྩཾ པབྦཱཛེནྟི ཨེཀཙྩཾ ན པབྦཱཛེནྟཱི’’ཏི, སཱ བྷིཀྑུནཱི བྷིཀྑུནཱིཧི ཨེཝམསྶ ཝཙནཱིཡཱ ‘‘མཱཡྻཱ, ཨེཝཾ ཨཝཙ, ན ཙ བྷིཀྑུནིཡོ ཚནྡགཱམིནིཡོ, ན ཙ བྷིཀྑུནིཡོ དོསགཱམིནིཡོ ¶ , ན ཙ བྷིཀྑུནིཡོ མོཧགཱམིནིཡོ, ན ཙ བྷིཀྑུནིཡོ བྷཡགཱམིནིཡོ, ཨཡྻཱ ཁོ ཀུལདཱུསིཀཱ པཱཔསམཱཙཱརཱ, ཨཡྻཱཡ ཁོ པཱཔཀཱ སམཱཙཱརཱ དིསྶནྟི ཙེཝ སུཡྻནྟི ཙ, ཀུལཱནི ཙཱཡྻཱཡ དུཊྛཱནི དིསྶནྟི ཙེཝ སུཡྻནྟི ཙ, པཀྐམཏཱཡྻཱ, ཨིམམྷཱ ཨཱཝཱསཱ ཨལཾ ཏེ ཨིདྷ ཝཱསེནཱ’’ཏི. ཨེཝཉྩ སཱ བྷིཀྑུནཱི བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻ, སཱ བྷིཀྑུནཱི བྷིཀྑུནཱིཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ, ཡཱཝཏཏིཡཉྩེ སམནུབྷཱསིཡམཱནཱ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ. ནོ ཙེ པཊིནིསྶཛྫེཡྻ, ཨཡམྤི བྷིཀྑུནཱི ཡཱཝཏཏིཡཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེསཾ.

ཨུདྡིཊྛཱ ཁོ ཨཡྻཱཡོ སཏྟརས སངྒྷཱདིསེསཱ དྷམྨཱ ནཝ པཋམཱཔཏྟིཀཱ, ཨཊྛ ཡཱཝཏཏིཡཀཱ,

ཡེསཾ བྷིཀྑུནཱི ཨཉྙཏརཾ ཝཱ ཨཉྙཏརཾ ཝཱ ཨཱཔཛྫཏི, ཏཱཡ བྷིཀྑུནིཡཱ ཨུབྷཏོསངྒྷེ པཀྑམཱནཏྟཾ ཙརིཏབྦཾ. ཙིཎྞམཱནཏྟཱ བྷིཀྑུནཱི ཡཏྠ སིཡཱ ཝཱིསཏིགཎོ བྷིཀྑུནིསངྒྷོ, ཏཏྠ སཱ བྷིཀྑུནཱི ཨབྦྷེཏབྦཱ. ཨེཀཱཡཔི ཙེ ཨཱུནོ ཝཱིསཏིགཎོ བྷིཀྑུནིསངྒྷོ ཏཾ བྷིཀྑུནིཾ ཨབྦྷེཡྻ, སཱ ཙ བྷིཀྑུནཱི ཨནབྦྷིཏཱ, ཏཱ ཙ བྷིཀྑུནིཡོ གཱརཡ྄ཧཱ, ཨཡཾ ཏཏྠ སཱམཱིཙི. ཏཏྠཱཡྻཱཡོ པུཙྪཱམི, ཀཙྩིཏྠ པརིསུདྡྷཱ, དུཏིཡམྤི, པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡྻཱཡོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

སངྒྷཱདིསེསོ ནིཊྛིཏོ.

ནིསྶགྒིཡ པཱཙིཏྟིཡཱ

ཨིམེ ཁོ པནཱཡྻཱཡོ ཏིཾས ནིསྶགྒིཡཱ པཱཙིཏྟིཡཱ

དྷམྨཱ ཨུདྡེསཾ ཨཱགཙྪནྟི.

པཏྟསནྣིཙཡསིཀྑཱཔདཾ

༡. ཡཱ ¶ པན བྷིཀྑུནཱི པཏྟསནྣིཙཡཾ ཀརེཡྻ, ནིསྶགྒིཡཾ པཱཙིཏྟིཡཾ.

ཨཀཱལཙཱིཝརབྷཱཛནསིཀྑཱཔདཾ

༢. ཡཱ པན བྷིཀྑུནཱི ཨཀཱལཙཱིཝརཾ ‘‘ཀཱལཙཱིཝར’’ནྟི ཨདྷིཊྛཧིཏྭཱ བྷཱཛཱཔེཡྻ, ནིསྶགྒིཡཾ པཱཙིཏྟིཡཾ.

ཙཱིཝརཔརིཝཏྟནསིཀྑཱཔདཾ

༣. ཡཱ ¶ པན བྷིཀྑུནཱི བྷིཀྑུནིཡཱ སདྡྷིཾ ཙཱིཝརཾ པརིཝཏྟེཏྭཱ སཱ པཙྪཱ ཨེཝཾ ཝདེཡྻ ‘‘ཧནྡཱཡྻེ, ཏུཡ྄ཧཾ ཙཱིཝརཾ, ཨཱཧར མེཏཾ ཙཱིཝརཾ, ཡཾ ཏུཡ྄ཧཾ ཏུཡ྄ཧམེཝེཏཾ, ཡཾ མཡ྄ཧཾ མཡ྄ཧམེཝེཏཾ, ཨཱཧར མེཏཾ ཙཱིཝརཾ, སཀཾ པཙྩཱཧརཱ’’ཏི ཨཙྪིནྡེཡྻ ཝཱ ཨཙྪིནྡཱཔེཡྻ ཝཱ, ནིསྶགྒིཡཾ པཱཙིཏྟིཡཾ.

ཨཉྙཝིཉྙཱཔནསིཀྑཱཔདཾ

༤. ཡཱ པན བྷིཀྑུནཱི ཨཉྙཾ ཝིཉྙཱཔེཏྭཱ ཨཉྙཾ ཝིཉྙཱཔེཡྻ, ནིསྶགྒིཡཾ པཱཙིཏྟིཡཾ.

ཨཉྙཙེཏཱཔན སིཀྑཱཔདཾ

༥. ཡཱ པན བྷིཀྑུནཱི ཨཉྙཾ ཙེཏཱཔེཏྭཱ ཨཉྙཾ ཙེཏཱཔེཡྻ, ནིསྶགྒིཡཾ པཱཙིཏྟིཡཾ.

པཋམསངྒྷིཀཙེཏཱཔནསིཀྑཱཔདཾ

༦. ཡཱ པན བྷིཀྑུནཱི ཨཉྙདཏྠིཀེན པརིཀྑཱརེན ཨཉྙུདྡིསིཀེན སངྒྷིཀེན ཨཉྙཾ ཙེཏཱཔེཡྻ, ནིསྶགྒིཡཾ པཱཙིཏྟིཡཾ.

དུཏིཡསངྒྷིཀཙེཏཱཔནསིཀྑཱཔདཾ

༧. ཡཱ ¶ པན བྷིཀྑུནཱི ཨཉྙདཏྠིཀེན པརིཀྑཱརེན ཨཉྙུདྡིསིཀེན སངྒྷིཀེན སཉྙཱཙིཀེན ཨཉྙཾ ཙེཏཱཔེཡྻ, ནིསྶགྒིཡཾ པཱཙིཏྟིཡཾ.

པཋམགཎིཀཙེཏཱཔནསིཀྑཱཔདཾ

༨. ཡཱ པན བྷིཀྑུནཱི ཨཉྙདཏྠིཀེན པརིཀྑཱརེན ཨཉྙུདྡིསིཀེན མཧཱཛནིཀེན ཨཉྙཾ ཙེཏཱཔེཡྻ, ནིསྶགྒིཡཾ པཱཙིཏྟིཡཾ.

དུཏིཡགཎིཀཙེཏཱཔནསིཀྑཱཔདཾ

༩. ཡཱ པན བྷིཀྑུནཱི ཨཉྙདཏྠིཀེན པརིཀྑཱརེན ཨཉྙུདྡིསིཀེན མཧཱཛནིཀེན སཉྙཱཙིཀེན ཨཉྙཾ ཙེཏཱཔེཡྻ, ནིསྶགྒིཡཾ པཱཙིཏྟིཡཾ.

པུགྒལིཀཙེཏཱཔནསིཀྑཱཔདཾ

༡༠. ཡཱ པན བྷིཀྑུནཱི ཨཉྙདཏྠིཀེན པརིཀྑཱརེན ཨཉྙུདྡིསིཀེན པུགྒལིཀེན སཉྙཱཙིཀེན ཨཉྙཾ ཙེཏཱཔེཡྻ, ནིསྶགྒིཡཾ པཱཙིཏྟིཡཾ.

པཏྟཝགྒོ པཋམོ.

གརུཔཱཝུརཎསིཀྑཱཔདཾ

༡༡. གརུཔཱཝུརཎཾ ¶ པན བྷིཀྑུནིཡཱ ཙེཏཱཔེནྟིཡཱ ཙཏུཀྐཾསཔརམཾ ཙེཏཱཔེཏབྦཾ. ཏཏོ ཙེ ཨུཏྟརི ཙེཏཱཔེཡྻ, ནིསྶགྒིཡཾ པཱཙིཏྟིཡཾ.

ལཧུཔཱཝུརཎསིཀྑཱཔདཾ

༡༢. ལཧུཔཱཝུརཎཾ པན བྷིཀྑུནིཡཱ ཙེཏཱཔེནྟིཡཱ ཨཌྜྷཏེཡྻཀཾསཔརམཾ ཙེཏཱཔེཏབྦཾ. ཏཏོ ཙེ ཨུཏྟརི ཙེཏཱཔེཡྻ, ནིསྶགྒིཡཾ པཱཙིཏྟིཡཾ.

ཀཐིནསིཀྑཱཔདཾ

༡༣. ནིཊྛིཏཙཱིཝརསྨིཾ བྷིཀྑུནིཡཱ ཨུབྦྷཏསྨིཾ ཀཐིནེ དསཱཧཔརམཾ ཨཏིརེཀཙཱིཝརཾ དྷཱརེཏབྦཾ. ཏཾ ཨཏིཀྐཱམེནྟིཡཱ, ནིསྶགྒིཡཾ པཱཙིཏྟིཡཾ.

ཨུདོསིཏསིཀྑཱཔདཾ

༡༤. ནིཊྛིཏཙཱིཝརསྨིཾ ¶ བྷིཀྑུནིཡཱ ཨུབྦྷཏསྨིཾ ཀཐིནེ ཨེཀརཏྟམྤི ཙེ བྷིཀྑུནཱི ཏིཙཱིཝརེན ཝིཔྤཝསེཡྻ, ཨཉྙཏྲ བྷིཀྑུནིསམྨུཏིཡཱ ནིསྶགྒིཡཾ པཱཙིཏྟིཡཾ.

ཨཀཱལཙཱིཝརསིཀྑཱཔདཾ

༡༥. ནིཊྛིཏཙཱིཝརསྨིཾ བྷིཀྑུནིཡཱ ཨུབྦྷཏསྨིཾ ཀཐིནེ བྷིཀྑུནིཡཱ པནེཝ ཨཀཱལཙཱིཝརཾ ཨུཔྤཛྫེཡྻ, ཨཱཀངྑམཱནཱཡ བྷིཀྑུནིཡཱ པཊིགྒཧེཏབྦཾ, པཊིགྒཧེཏྭཱ ཁིཔྤམེཝ ཀཱརེཏབྦཾ, ནོ ཙསྶ པཱརིཔཱུརི, མཱསཔརམཾ ཏཱཡ བྷིཀྑུནིཡཱ ཏཾ ཙཱིཝརཾ ནིཀྑིཔིཏབྦཾ ཨཱུནསྶ པཱརིཔཱུརིཡཱ སཏིཡཱ པཙྩཱསཱཡ. ཏཏོ ཙེ ཨུཏྟརི ནིཀྑིཔེཡྻ སཏིཡཱཔི པཙྩཱསཱཡ, ནིསྶགྒིཡཾ པཱཙིཏྟིཡཾ.

ཨཉྙཱཏཀཝིཉྙཏྟིསིཀྑཱཔདཾ

༡༦. ཡཱ པན བྷིཀྑུནཱི ཨཉྙཱཏཀཾ གཧཔཏིཾ ཝཱ གཧཔཏཱནིཾ ཝཱ ཙཱིཝརཾ ཝིཉྙཱཔེཡྻ ཨཉྙཏྲ སམཡཱ, ནིསྶགྒིཡཾ པཱཙིཏྟིཡཾ. ཏཏྠཱཡཾ སམཡོ ཨཙྪིནྣཙཱིཝརཱ ཝཱ ཧོཏི བྷིཀྑུནཱི, ནཊྛཙཱིཝརཱ ཝཱ, ཨཡཾ ཏཏྠ སམཡོ.

ཏཏུཏྟརིསིཀྑཱཔདཾ

༡༧. ཏཉྩེ ཨཉྙཱཏཀོ གཧཔཏི ཝཱ གཧཔཏཱནཱི ཝཱ བཧཱུཧི ཙཱིཝརེཧི ཨབྷིཧཊྛུཾ པཝཱརེཡྻ, སནྟརུཏྟརཔརམཾ ཏཱཡ བྷིཀྑུནིཡཱ ཏཏོ ཙཱིཝརཾ སཱདིཏབྦཾ. ཏཏོ ཙེ ཨུཏྟརི སཱདིཡེཡྻ, ནིསྶགྒིཡཾ པཱཙིཏྟིཡཾ.

པཋམཨུཔཀྑཊསིཀྑཱཔདཾ

༡༨. བྷིཀྑུནིཾ ¶ པནེཝ ཨུདྡིསྶ ཨཉྙཱཏཀསྶ གཧཔཏིསྶ ཝཱ གཧཔཏཱནིཡཱ ཝཱ ཙཱིཝརཙེཏཱཔནྣཾ ཨུཔཀྑཊཾ ཧོཏི ‘‘ཨིམིནཱ ཙཱིཝརཙེཏཱཔནྣེན ཙཱིཝརཾ ཙེཏཱཔེཏྭཱ ཨིཏྠནྣཱམཾ བྷིཀྑུནིཾ ཙཱིཝརེན ཨཙྪཱདེསྶཱམཱི’’ཏི. ཏཏྲ ཙེསཱ བྷིཀྑུནཱི པུབྦེ ཨཔྤཝཱརིཏཱ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫེཡྻ ‘‘སཱདྷུ ཝཏ, མཾ ཨཱཡསྨཱ ཨིམིནཱ ཙཱིཝརཙེཏཱཔནྣེན ཨེཝརཱུཔཾ ཝཱ ཨེཝརཱུཔཾ ཝཱ ཙཱིཝརཾ ཙེཏཱཔེཏྭཱ ཨཙྪཱདེཧཱི’’ཏི ཀལྱཱཎཀམྱཏཾ ཨུཔཱདཱཡ, ནིསྶགྒིཡཾ པཱཙིཏྟིཡཾ.

དུཏིཡཨུཔཀྑཊསིཀྑཱཔདཾ

༡༩. བྷིཀྑུནིཾ ¶ པནེཝ ཨུདྡིསྶ ཨུབྷིནྣཾ ཨཉྙཱཏཀཱནཾ གཧཔཏཱིནཾ ཝཱ གཧཔཏཱནཱིནཾ ཝཱ པཙྩེཀཙཱིཝརཙེཏཱཔནྣཱནི ཨུཔཀྑཊཱནི ཧོནྟི ‘‘ཨིམེཧི མཡཾ པཙྩེཀཙཱིཝརཙེཏཱཔནྣེཧི པཙྩེཀཙཱིཝརཱནི ཙེཏཱཔེཏྭཱ ཨིཏྠནྣཱམཾ བྷིཀྑུནིཾ ཙཱིཝརེཧི ཨཙྪཱདེསྶཱམཱ’’ཏི. ཏཏྲ ཙེསཱ བྷིཀྑཱུནཱི པུབྦེ ཨཔྤཝཱརིཏཱ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫེཡྻ ‘‘སཱདྷུ ཝཏ མཾ ཨཱཡསྨནྟོ ཨིམེཧི པཙྩེཀཙཱིཝརཙེཏཱཔནྣེཧི ཨེཝརཱུཔཾ ཝཱ ཨེཝརཱུཔཾ ཝཱ ཙཱིཝརཾ ཙེཏཱཔེཏྭཱ ཨཙྪཱདེཐ ཨུབྷོཝ སནྟཱ ཨེཀེནཱ’’ཏི ཀལྱཱཎཀམྱཏཾ ཨུཔཱདཱཡ, ནིསྶགྒིཡཾ པཱཙིཏྟིཡཾ.

རཱཛསིཀྑཱཔདཾ

༢༠. བྷིཀྑུནིཾ པནེཝ ཨུདྡིསྶ རཱཛཱ ཝཱ རཱཛབྷོགྒོ ཝཱ བྲཱཧྨཎོ ཝཱ གཧཔཏིཀོ ཝཱ དཱུཏེན ཙཱིཝརཙེཏཱཔནྣཾ པཧིཎེཡྻ ‘‘ཨིམིནཱ ཙཱིཝརཙེཏཱཔནྣེན ཙཱིཝརཾ ཙེཏཱཔེཏྭཱ ཨིཏྠནྣཱམཾ བྷིཀྑུནིཾ ཙཱིཝརེན ཨཙྪཱདེཧཱི’’ཏི. སོ ཙེ དཱུཏོ ཏཾ བྷིཀྑུནིཾ ཨུཔསངྐམིཏྭཱ ཨེཝཾ ཝདེཡྻ ‘‘ཨིདཾ ཁོ, ཨཡྻེ, ཨཡྻཾ ཨུདྡིསྶ ཙཱིཝརཙེཏཱཔནྣཾ ཨཱབྷཏཾ, པཊིགྒཎྷཱཏཱཡྻཱ ཙཱིཝརཙེཏཱཔནྣ’’ནྟི. ཏཱཡ བྷིཀྑུནིཡཱ སོ དཱུཏོ ཨེཝམསྶ ཝཙནཱིཡོ ‘‘ན ཁོ མཡཾ, ཨཱཝུསོ, ཙཱིཝརཙེཏཱཔནྣཾ པཊིགྒཎྷཱམ, ཙཱིཝརཉྩ ཁོ མཡཾ པཊིགྒཎྷཱམ ཀཱལེན ཀཔྤིཡ’’ནྟི. སོ ཙེ དཱུཏོ ཏཾ བྷིཀྑུནིཾ ཨེཝཾ ཝདེཡྻ ‘‘ཨཏྠི པནཱཡྻཱཡ, ཀོཙི ཝེཡྻཱཝཙྩཀརོ’’ཏི, ཙཱིཝརཏྠིཀཱཡ, བྷིཀྑཝེ, བྷིཀྑུནིཡཱ ཝེཡྻཱཝཙྩཀརོ ནིདྡིསིཏབྦོ ཨཱརཱམིཀོ ཝཱ ཨུཔཱསཀོ ཝཱ ‘‘ཨེསོ ཁོ, ཨཱཝུསོ, བྷིཀྑུནཱིནཾ ཝེཡྻཱཝཙྩཀརོ’’ཏི. སོ ཙེ དཱུཏོ ཏཾ ཝེཡྻཱཝཙྩཀརཾ སཉྙཱཔེཏྭཱ ཏཾ བྷིཀྑུནིཾ ཨུཔསངྐམིཏྭཱ ཨེཝཾ ཝདེཡྻ ‘‘ཡཾ ཁོ, ཨཡྻེ, ཨཡྻཱ ཝེཡྻཱཝཙྩཀརཾ ནིདྡིསི, སཉྙཏྟོ སོ མཡཱ, ཨུཔསངྐམཏཱཡྻཱ ¶ ཀཱལེན, ཙཱིཝརེན ཏཾ ཨཙྪཱདེསྶཏཱི’’ཏི. ཙཱིཝརཏྠིཀཱཡ, བྷིཀྑཝེ, བྷིཀྑུནིཡཱ ཝེཡྻཱཝཙྩཀརོ ཨུཔསངྐམིཏྭཱ དྭཏྟིཀྑཏྟུཾ ཙོདེཏབྦོ སཱརེཏབྦོ ‘‘ཨཏྠོ མེ, ཨཱཝུསོ, ཙཱིཝརེནཱ’’ཏི, དྭཏྟིཀྑཏྟུཾ ཙོདཡམཱནཱ སཱརཡམཱནཱ ཏཾ ཙཱིཝརཾ ཨབྷིནིཔྥཱདེཡྻ, ཨིཙྩེཏཾ ཀུསལཾ, ནོ ཙེ ཨབྷིནིཔྥཱདེཡྻ, ཙཏུཀྑཏྟུཾ པཉྩཀྑཏྟུཾ ཚཀྑཏྟུཔརམཾ ཏུཎྷཱིབྷཱུཏཱཡ ཨུདྡིསྶ ཋཱཏབྦཾ, ཙཏུཀྑཏྟུཾ པཉྩཀྑཏྟུཾ ཚཀྑཏྟུཔརམཾ ཏུཎྷཱིབྷཱུཏཱ ཨུདྡིསྶ ཏིཊྛམཱནཱ ཏཾ ཙཱིཝརཾ ཨབྷིནིཔྥཱདེཡྻ, ཨིཙྩེཏཾ ཀུསལཾ. ཏཏོ ཙེ ཨུཏྟརི ཝཱཡམམཱནཱ ཏཾ ཙཱིཝརཾ ཨབྷིནིཔྥཱདེཡྻ, ནིསྶགྒིཡཾ པཱཙིཏྟིཡཾ. ནོ ཙེ ཨབྷིནིཔྥཱདེཡྻ, ཡཏསྶཱ ཙཱིཝརཙེཏཱཔནྣཾ ཨཱབྷཏཾ, ཏཏྠ སཱམཾ ཝཱ གནྟབྦཾ, དཱུཏོ ཝཱ པཱཧེཏབྦོ ‘‘ཡཾ ཁོ ཏུམྷེ ཨཱཡསྨནྟོ བྷིཀྑུནིཾ ཨུདྡིསྶ ཙཱིཝརཙེཏཱཔནྣཾ ¶ པཧིཎིཏྠ, ན ཏཾ ཏསྶཱ བྷིཀྑུནིཡཱ ཀིཉྩི ཨཏྠཾ ཨནུབྷོཏི, ཡུཉྫནྟཱཡསྨནྟོ སཀཾ, མཱ ཝོ སཀཾ ཝིནསྶཱ’’ཏི, ཨཡཾ ཏཏྠ སཱམཱིཙི.

ཙཱིཝརཝགྒོ དུཏིཡོ.

རཱུཔིཡསིཀྑཱཔདཾ

༢༡. ཡཱ པན བྷིཀྑུནཱི ཛཱཏརཱུཔརཛཏཾ ཨུགྒཎྷེཡྻ ཝཱ ཨུགྒཎྷཱཔེཡྻ ཝཱ ཨུཔནིཀྑིཏྟཾ ཝཱ སཱདིཡེཡྻ, ནིསྶགྒིཡཾ པཱཙིཏྟིཡཾ.

རཱུཔིཡསཾཝོཧཱརསིཀྑཱཔདཾ

༢༢. ཡཱ པན བྷིཀྑུནཱི ནཱནཔྤཀཱརཀཾ རཱུཔིཡསཾཝོཧཱརཾ སམཱཔཛྫེཡྻ, ནིསྶགྒིཡཾ པཱཙིཏྟིཡཾ.

ཀཡཝིཀྐཡསིཀྑཱཔདཾ

༢༣. ཡཱ པན བྷིཀྑུནཱི ནཱནཔྤཀཱརཀཾ ཀཡཝིཀྐཡཾ སམཱཔཛྫེཡྻ, ནིསྶགྒིཡཾ པཱཙིཏྟིཡཾ.

ཨཱུནཔཉྩབནྡྷནསིཀྑཱཔདཾ

༢༤. ཡཱ པན བྷིཀྑུནཱི ཨཱུནཔཉྩབནྡྷནེན པཏྟེན ཨཉྙཾ ནཝཾ པཏྟཾ ཙེཏཱཔེཡྻ, ནིསྶགྒིཡཾ པཱཙིཏྟིཡཾ. ཏཱཡ བྷིཀྑུནིཡཱ སོ པཏྟོ བྷིཀྑུནིཔརིསཱཡ ནིསྶཛྫིཏབྦོ, ཡོ ཙ ཏསྶཱ བྷིཀྑུནིཔརིསཱཡ པཏྟཔརིཡནྟོ, སོ ཏསྶཱ བྷིཀྑུནིཡཱ པདཱཏབྦོ ‘‘ཨཡཾ ཏེ བྷིཀྑུནི པཏྟོ ཡཱཝབྷེདནཱཡ དྷཱརེཏབྦོ’’ཏི, ཨཡཾ ཏཏྠ སཱམཱིཙི.

བྷེསཛྫསིཀྑཱཔདཾ

༢༥. ཡཱནི ¶ ཁོ པན ཏཱནི གིལཱནཱནཾ བྷིཀྑུནཱིནཾ པཊིསཱཡནཱིཡཱནི བྷེསཛྫཱནི, སེཡྻཐིདཾ – སཔྤི ནཝནཱིཏཾ ཏེལཾ མདྷུ ཕཱཎིཏཾ, ཏཱནི པཊིགྒཧེཏྭཱ སཏྟཱཧཔརམཾ སནྣིདྷིཀཱརཀཾ པརིབྷུཉྫིཏབྦཱནི. ཏཾ ཨཏིཀྐཱམེནྟིཡཱ, ནིསྶགྒིཡཾ པཱཙིཏྟིཡཾ.

ཙཱིཝརཨཙྪིནྡནསིཀྑཱཔདཾ

༢༦. ཡཱ པན བྷིཀྑུནཱི བྷིཀྑུནིཡཱ སཱམཾ ཙཱིཝརཾ དཏྭཱ ཀུཔིཏཱ ཨནཏྟམནཱ ཨཙྪིནྡེཡྻ ཝཱ ཨཙྪིནྡཱཔེཡྻ ཝཱ, ནིསྶགྒིཡཾ པཱཙིཏྟིཡཾ.

སུཏྟཝིཉྙཏྟིསིཀྑཱཔདཾ

༢༧. ཡཱ ¶ པན བྷིཀྑུནཱི སཱམཾ སུཏྟཾ ཝིཉྙཱཔེཏྭཱ ཏནྟཝཱཡེཧི ཙཱིཝརཾ ཝཱཡཱཔེཡྻ, ནིསྶགྒིཡཾ པཱཙིཏྟིཡཾ.

མཧཱཔེསཀཱརསིཀྑཱཔདཾ

༢༨. བྷིཀྑུནིཾ པནེཝ ཨུདྡིསྶ ཨཉྙཱཏཀོ གཧཔཏི ཝཱ གཧཔཏཱནཱི ཝཱ ཏནྟཝཱཡེཧི ཙཱིཝརཾ ཝཱཡཱཔེཡྻ, ཏཏྲ ཙེསཱ བྷིཀྑུནཱི པུབྦེ ཨཔྤཝཱརིཏཱ ཏནྟཝཱཡེ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫེཡྻ ‘‘ཨིདཾ ཁོ ཨཱཝུསོ ཙཱིཝརཾ མཾ ཨུདྡིསྶ ཝིཡྻཏི, ཨཱཡཏཉྩ ཀརོཐ, ཝིཏྠཏཉྩ ཨཔྤིཏཉྩ སུཝཱིཏཉྩ སུཔྤཝཱཡིཏཉྩ སུཝིལེཁིཏཉྩ སུཝིཏཙྪིཏཉྩ ཀརོཐ, ཨཔྤེཝ ནཱམ མཡམྤི ཨཱཡསྨནྟཱནཾ ཀིཉྩིམཏྟཾ ཨནུཔདཛྫེཡྻཱམཱ’’ཏི, ཨེཝཉྩ སཱ བྷིཀྑུནཱི ཝཏྭཱ ཀིཉྩིམཏྟཾ ཨནུཔདཛྫེཡྻ ཨནྟམསོ པིཎྜཔཱཏམཏྟམྤི, ནིསྶགྒིཡཾ པཱཙིཏྟིཡཾ.

ཨཙྩེཀཙཱིཝརསིཀྑཱཔདཾ

༢༩. དསཱཧཱནཱགཏཾ ཀཏྟིཀཏེམཱསིཀཔུཎྞམཾ བྷིཀྑུནིཡཱ པནེཝ ཨཙྩེཀཙཱིཝརཾ ཨུཔྤཛྫེཡྻ, ཨཙྩེཀཾ མཉྙམཱནཱཡ བྷིཀྑུནིཡཱ པཊིགྒཧེཏབྦཾ, པཊིགྒཧེཏྭཱ ཡཱཝ ཙཱིཝརཀཱལསམཡཾ ནིཀྑིཔིཏབྦཾ. ཏཏོ ཙེ ཨུཏྟརི ནིཀྑིཔེཡྻ, ནིསྶགྒིཡཾ པཱཙིཏྟིཡཾ.

པརིཎཏསིཀྑཱཔདཾ

༣༠. ཡཱ པན བྷིཀྑུནཱི ཛཱནཾ སངྒྷིཀཾ ལཱབྷཾ པརིཎཏཾ ཨཏྟནོ པརིཎཱམེཡྻ, ནིསྶགྒིཡཾ པཱཙིཏྟིཡཾ.

པཏྟཝགྒོ ཏཏིཡོ.

ཨུདྡིཊྛཱ ¶ ཁོ, ཨཡྻཱཡོ, ཏིཾས ནིསྶགྒིཡཱ པཱཙིཏྟིཡཱ དྷམྨཱ. ཏཏྠཱཡྻཱཡོ, པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡྻཱཡོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

ནིསྶགྒིཡཔཱཙིཏྟིཡཱ ནིཊྛིཏཱ.

སུདྡྷཔཱཙིཏྟིཡཱ

ཨིམེ ཁོ པནཱཡྻཱཡོ, ཚསཊྛིསཏཱ པཱཙིཏྟིཡཱ

དྷམྨཱ ཨུདྡེསཾ ཨཱགཙྪནྟི.

ལསུཎསིཀྑཱཔདཾ

༡. ཡཱ ¶ པན བྷིཀྑུནཱི ལསུཎཾ ཁཱདེཡྻ པཱཙིཏྟིཡཾ.

སམྦཱདྷལོམསིཀྑཱཔདཾ

༢. ཡཱ པན བྷིཀྑུནཱི སམྦཱདྷེ ལོམཾ སཾཧརཱཔེཡྻ, པཱཙིཏྟིཡཾ.

ཏལགྷཱཏཀསིཀྑཱཔདཾ

༣. ཏལགྷཱཏཀེ པཱཙིཏྟིཡཾ.

ཛཏུམཊྛཀསིཀྑཱཔདཾ

༤. ཛཏུམཊྛཀེ པཱཙིཏྟིཡཾ.

ཨུདཀསུདྡྷིཀསིཀྑཱཔདཾ

༥. ཨུདཀསུདྡྷིཀཾ པན བྷིཀྑུནིཡཱ ཨཱདིཡམཱནཱཡ དྭངྒུལཔབྦཔརམཾ ཨཱདཱཏབྦཾ. ཏཾ ཨཏིཀྐཱམེནྟིཡཱ པཱཙིཏྟིཡཾ.

ཨུཔཏིཊྛནསིཀྑཱཔདཾ

༦. ཡཱ པན བྷིཀྑུནཱི བྷིཀྑུསྶ བྷུཉྫནྟསྶ པཱནཱིཡེན ཝཱ ཝིདྷཱུཔནེན ཝཱ ཨུཔཏིཊྛེཡྻ, པཱཙིཏྟིཡཾ.

ཨཱམཀདྷཉྙསིཀྑཱཔདཾ

༧. ཡཱ པན བྷིཀྑུནཱི ཨཱམཀདྷཉྙཾ ཝིཉྙཏྭཱ ཝཱ ཝིཉྙཱཔེཏྭཱ ཝཱ བྷཛྫིཏྭཱ ཝཱ བྷཛྫཱཔེཏྭཱ ཝཱ ཀོཊྚེཏྭཱ ཝཱ ཀོཊྚཱཔེཏྭཱ ཝཱ པཙིཏྭཱ ཝཱ པཙཱཔེཏྭཱ ཝཱ བྷུཉྫེཡྻ, པཱཙིཏྟིཡཾ.

པཋམཨུཙྩཱརཚཌྜནསིཀྑཱཔདཾ

༨. ཡཱ ¶ ¶ པན བྷིཀྑུནཱི ཨུཙྩཱརཾ ཝཱ པསྶཱཝཾ ཝཱ སངྐཱརཾ ཝཱ ཝིགྷཱསཾ ཝཱ ཏིརོཀུཊྚེ ཝཱ ཏིརོཔཱཀཱརེ ཝཱ ཚཌྜེཡྻ ཝཱ ཚཌྜཱཔེཡྻ ཝཱ, པཱཙིཏྟིཡཾ.

དུཏིཡཨུཙྩཱརཚཌྜནསིཀྑཱཔདཾ

༩. ཡཱ པན བྷིཀྑུནཱི ཨུཙྩཱརཾ ཝཱ པསྶཱཝཾ ཝཱ སངྐཱརཾ ཝཱ ཝིགྷཱསཾ ཝཱ ཧརིཏེ ཚཌྜེཡྻ ཝཱ ཚཌྜཱཔེཡྻ ཝཱ, པཱཙིཏྟིཡཾ.

ནཙྩགཱིཏསིཀྑཱཔདཾ

༡༠. ཡཱ པན བྷིཀྑུནཱི ནཙྩཾ ཝཱ གཱིཏཾ ཝཱ ཝཱདིཏཾ ཝཱ དསྶནཱཡ གཙྪེཡྻ, པཱཙིཏྟིཡཾ.

ལསུཎཝགྒོ པཋམོ.

རཏྟནྡྷཀཱརསིཀྑཱཔདཾ

༡༡. ཡཱ པན བྷིཀྑུནཱི རཏྟནྡྷཀཱརེ ཨཔྤདཱིཔེ པུརིསེན སདྡྷིཾ ཨེཀེནེཀཱ སནྟིཊྛེཡྻ ཝཱ སལླཔེཡྻ ཝཱ, པཱཙིཏྟིཡཾ.

པཊིཙྪནྣོཀཱསསིཀྑཱཔདཾ

༡༢. ཡཱ པན བྷིཀྑུནཱི པཊིཙྪནྣེ ཨོཀཱསེ པུརིསེན སདྡྷིཾ ཨེཀེནེཀཱ སནྟིཊྛེཡྻ ཝཱ སལླཔེཡྻ ཝཱ, པཱཙིཏྟིཡཾ.

ཨཛ྄ཛྷོཀཱསསལླཔནསིཀྑཱཔདཾ

༡༣. ཡཱ པན བྷིཀྑུནཱི ཨཛ྄ཛྷོཀཱསེ པུརིསེན སདྡྷིཾ ཨེཀེནེཀཱ སནྟིཊྛེཡྻ ཝཱ སལླཔེཡྻ ཝཱ, པཱཙིཏྟིཡཾ.

དུཏིཡིཀཨུཡྻོཛནསིཀྑཱཔདཾ

༡༤. ཡཱ པན བྷིཀྑུནཱི རཐིཀཱཡ ཝཱ བྱཱུཧེ ཝཱ སིངྒྷཱཊཀེ ཝཱ པུརིསེན སདྡྷིཾ ཨེཀེནེཀཱ སནྟིཊྛེཡྻ ཝཱ སལླཔེཡྻ ཝཱ ནིཀཎྞིཀཾ ཝཱ ཛཔྤེཡྻ དུཏིཡིཀཾ ཝཱ བྷིཀྑུནིཾ ཨུཡྻོཛེཡྻ, པཱཙིཏྟིཡཾ.

ཨནཱཔུཙྪཱཔཀྐམནསིཀྑཱཔདཾ

༡༥. ཡཱ ¶ པན བྷིཀྑུནཱི པུརེབྷཏྟཾ ཀུལཱནི ཨུཔསངྐམིཏྭཱ ཨཱསནེ ནིསཱིདིཏྭཱ སཱམིཀེ ཨནཱཔུཙྪཱ པཀྐམེཡྻ, པཱཙིཏྟིཡཾ.

ཨནཱཔུཙྪཱཨབྷིནིསཱིདནསིཀྑཱཔདཾ

༡༦. ཡཱ ¶ པན བྷིཀྑུནཱི པཙྪཱབྷཏྟཾ ཀུལཱནི ཨུཔསངྐམིཏྭཱ སཱམིཀེ ཨནཱཔུཙྪཱ ཨཱསནེ ཨབྷིནིསཱིདེཡྻ ཝཱ ཨབྷིནིཔཛྫེཡྻ ཝཱ, པཱཙིཏྟིཡཾ.

ཨནཱཔུཙྪཱསནྠརཎསིཀྑཱཔདཾ

༡༧. ཡཱ པན བྷིཀྑུནཱི ཝིཀཱལེ ཀུལཱནི ཨུཔསངྐམིཏྭཱ སཱམིཀེ ཨནཱཔུཙྪཱ སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ཨབྷིནིསཱིདེཡྻ ཝཱ ཨབྷིནིཔཛྫེཡྻ ཝཱ, པཱཙིཏྟིཡཾ.

པརཨུཛ྄ཛྷཱཔནཀསིཀྑཱཔདཾ

༡༨. ཡཱ པན བྷིཀྑུནཱི དུགྒཧིཏེན དཱུཔདྷཱརིཏེན པརཾ ཨུཛ྄ཛྷཱཔེཡྻ, པཱཙིཏྟིཡཾ.

པརཨབྷིསཔནསིཀྑཱཔདཾ

༡༩. ཡཱ པན བྷིཀྑུནཱི ཨཏྟཱནཾ ཝཱ པརཾ ཝཱ ནིརཡེན ཝཱ བྲཧྨཙརིཡེན ཝཱ ཨབྷིསཔེཡྻ, པཱཙིཏྟིཡཾ.

རོདནསིཀྑཱཔདཾ

༢༠. ཡཱ པན བྷིཀྑུནཱི ཨཏྟཱནཾ ཝདྷིཏྭཱ ཝདྷིཏྭཱ རོདེཡྻ, པཱཙིཏྟིཡཾ.

རཏྟནྡྷཀཱརཝགྒོ དུཏིཡོ.

ནགྒསིཀྑཱཔདཾ

༢༡. ཡཱ པན བྷིཀྑུནཱི ནགྒཱ ནཧཱཡེཡྻ, པཱཙིཏྟིཡཾ.

ཨུདཀསཱཊིཀསིཀྑཱཔདཾ

༢༢. ཨུདཀསཱཊིཀཾ པན བྷིཀྑུནིཡཱ ཀཱརཡམཱནཱཡ པམཱཎིཀཱ ཀཱརེཏབྦཱ, ཏཏྲིདཾ པམཱཎཾ ¶ , དཱིགྷསོ ཙཏསྶོ ཝིདཏྠིཡོ སུགཏཝིདཏྠིཡཱ, ཏིརིཡཾ དྭེ ཝིདཏྠིཡོ. ཏཾ ཨཏིཀྐཱམེནྟིཡཱ ཚེདནཀཾ པཱཙིཏྟིཡཾ.

ཙཱིཝརསིབྦནསིཀྑཱཔདཾ

༢༣. ཡཱ པན བྷིཀྑུནཱི བྷིཀྑུནིཡཱ ཙཱིཝརཾ ཝིསིབྦེཏྭཱ ཝཱ ཝིསིབྦཱཔེཏྭཱ ཝཱ སཱ པཙྪཱ ཨནནྟརཱཡིཀིནཱི ནེཝ སིབྦེཡྻ, ན སིབྦཱཔནཱཡ ཨུསྶུཀྐཾ ཀརེཡྻ ཨཉྙཏྲ ཙཏཱུཧཔཉྩཱཧཱ, པཱཙིཏྟིཡཾ.

སངྒྷཱཊིཙཱརསིཀྑཱཔདཾ

༢༤. ཡཱ ¶ པན བྷིཀྑུནཱི པཉྩཱཧིཀཾ སངྒྷཱཊིཙཱརཾ ཨཏིཀྐཱམེཡྻ, པཱཙིཏྟིཡཾ.

ཙཱིཝརསངྐམནཱིཡསིཀྑཱཔདཾ

༢༥. ཡཱ པན བྷིཀྑུནཱི ཙཱིཝརསངྐམནཱིཡཾ དྷཱརེཡྻ, པཱཙིཏྟིཡཾ.

གཎཙཱིཝརསིཀྑཱཔདཾ

༢༦. ཡཱ པན བྷིཀྑུནཱི གཎསྶ ཙཱིཝརལཱབྷཾ ཨནྟརཱཡཾ ཀརེཡྻ, པཱཙིཏྟིཡཾ.

པཊིབཱཧནསིཀྑཱཔདཾ

༢༧. ཡཱ པན བྷིཀྑུནཱི དྷམྨིཀཾ ཙཱིཝརཝིབྷངྒཾ པཊིབཱཧེཡྻ, པཱཙིཏྟིཡཾ.

ཙཱིཝརདཱནསིཀྑཱཔདཾ

༢༨. ཡཱ པན བྷིཀྑུནཱི ཨགཱརིཀསྶ ཝཱ པརིབྦཱཛཀསྶ ཝཱ པརིབྦཱཛིཀཱཡ ཝཱ སམཎཙཱིཝརཾ དདེཡྻ, པཱཙིཏྟིཡཾ.

ཀཱལཨཏིཀྐམནསིཀྑཱཔདཾ

༢༩. ཡཱ པན བྷིཀྑུནཱི དུབྦལཙཱིཝརཔཙྩཱསཱཡ ཙཱིཝརཀཱལསམཡཾ ཨཏིཀྐཱམེཡྻ, པཱཙིཏྟིཡཾ.

ཀཐིནུདྡྷཱརསིཀྑཱཔདཾ

༣༠. ཡཱ ¶ པན བྷིཀྑུནཱི དྷམྨིཀཾ ཀཐིནུདྡྷཱརཾ པཊིབཱཧེཡྻ, པཱཙིཏྟིཡཾ.

ནགྒཝགྒོ ཏཏིཡོ.

ཨེཀམཉྩཏུཝཊྚནསིཀྑཱཔདཾ

༣༡. ཡཱ པན བྷིཀྑུནིཡོ དྭེ ཨེཀམཉྩེ ཏུཝཊྚེཡྻུཾ, པཱཙིཏྟིཡཾ.

ཨེཀཏྠརཎཏུཝཊྚནསིཀྑཱཔདཾ

༣༢. ཡཱ པན བྷིཀྑུནིཡོ དྭེ ཨེཀཏྠརཎཔཱཝུརཎཱ ཏུཝཊྚེཡྻུཾ, པཱཙིཏྟིཡཾ.

ཨཕཱསུཀརཎསིཀྑཱཔདཾ

༣༣. ཡཱ པན བྷིཀྑུནཱི བྷིཀྑུནིཡཱ སཉྩིཙྩ ཨཕཱསུཾ ཀརེཡྻ, པཱཙིཏྟིཡཾ.

ནཨུཔཊྛཱཔནསིཀྑཱཔདཾ

༣༤. ཡཱ ¶ པན བྷིཀྑུནཱི དུཀྑིཏཾ སཧཛཱིཝིནིཾ ནེཝ ཨུཔཊྛཧེཡྻ, ན ཨུཔཊྛཱཔནཱཡ ཨུསྶུཀྐཾ ཀརེཡྻ, པཱཙིཏྟིཡཾ.

ནིཀྐཌྜྷནསིཀྑཱཔདཾ

༣༥. ཡཱ པན བྷིཀྑུནཱི བྷིཀྑུནིཡཱ ཨུཔསྶཡཾ དཏྭཱ ཀུཔིཏཱ ཨནཏྟམནཱ ནིཀྐཌྜྷེཡྻ ཝཱ ནིཀྐཌྜྷཱཔེཡྻ ཝཱ, པཱཙིཏྟིཡཾ.

སཾསཊྛསིཀྑཱཔདཾ

༣༦. ཡཱ པན བྷིཀྑུནཱི སཾསཊྛཱ ཝིཧརེཡྻ གཧཔཏིནཱ ཝཱ གཧཔཏིཔུཏྟེན ཝཱ, སཱ བྷིཀྑུནཱི བྷིཀྑུནཱིཧི ཨེཝམསྶ ཝཙནཱིཡཱ ‘‘མཱཡྻེ, སཾསཊྛཱ ཝིཧརི གཧཔཏིནཱཔི གཧཔཏིཔུཏྟེནཱཔི, ཝིཝིཙྩཱཡྻེ, ཝིཝེཀཉྙེཝ བྷགིནིཡཱ སངྒྷོ ཝཎྞེཏཱི’’ཏི. ཨེཝཉྩ སཱ བྷིཀྑུནཱི བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻ, སཱ བྷིཀྑུནཱི བྷིཀྑུནཱིཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ, ཡཱཝཏཏིཡཉྩེ སམནུབྷཱསིཡམཱནཱ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ. ནོ ཙེ པཊིནིསྶཛྫེཡྻ, པཱཙིཏྟིཡཾ.

ཨནྟོརཊྛསིཀྑཱཔདཾ

༣༧. ཡཱ ¶ པན བྷིཀྑུནཱི ཨནྟོརཊྛེ སཱསངྐསམྨཏེ སཔྤཊིབྷཡེ ཨསཏྠིཀཱ ཙཱརིཀཾ ཙརེཡྻ, པཱཙིཏྟིཡཾ.

ཏིརོརཊྛསིཀྑཱཔདཾ

༣༨. ཡཱ པན བྷིཀྑུནཱི ཏིརོརཊྛེ སཱསངྐསམྨཏེ སཔྤཊིབྷཡེ ཨསཏྠིཀཱ ཙཱརིཀཾ ཙརེཡྻ, པཱཙིཏྟིཡཾ.

ཨནྟོཝསྶསིཀྑཱཔདཾ

༣༩. ཡཱ པན བྷིཀྑུནཱི ཨནྟོཝསྶཾ ཙཱརིཀཾ ཙརེཡྻ, པཱཙིཏྟིཡཾ.

ཙཱརིཀནཔཀྐམནསིཀྑཱཔདཾ

༤༠. ཡཱ པན བྷིཀྑུནཱི ཝསྶཾཝུཊྛཱ ཙཱརིཀཾ ན པཀྐམེཡྻ ཨནྟམསོ ཚཔྤཉྩཡོཛནཱནིཔི, པཱཙིཏྟིཡཾ.

ཏུཝཊྚཝགྒོ ཙཏུཏྠོ.

རཱཛཱགཱརསིཀྑཱཔདཾ

༤༡. ཡཱ ¶ པན བྷིཀྑུནཱི རཱཛཱགཱརཾ ཝཱ ཙིཏྟཱགཱརཾ ཝཱ ཨཱརཱམཾ ཝཱ ཨུཡྻཱནཾ ཝཱ པོཀྑརཎིཾ ཝཱ དསྶནཱཡ གཙྪེཡྻ, པཱཙིཏྟིཡཾ.

ཨཱསནྡིཔརིབྷུཉྫནསིཀྑཱཔདཾ

༤༢. ཡཱ པན བྷིཀྑུནཱི ཨཱསནྡིཾ ཝཱ པལླངྐཾ ཝཱ པརིབྷུཉྫེཡྻ, པཱཙིཏྟིཡཾ.

སུཏྟཀནྟནསིཀྑཱཔདཾ

༤༣. ཡཱ པན བྷིཀྑུནཱི སུཏྟཾ ཀནྟེཡྻ, པཱཙིཏྟིཡཾ.

གིཧིཝེཡྻཱཝཙྩསིཀྑཱཔདཾ

༤༤. ཡཱ པན བྷིཀྑུནཱི གིཧིཝེཡྻཱཝཙྩཾ ཀརེཡྻ, པཱཙིཏྟིཡཾ.

ཨདྷིཀརཎསིཀྑཱཔདཾ

༤༥. ཡཱ ¶ པན བྷིཀྑུནཱི བྷིཀྑུནིཡཱ ‘‘ཨེཧཱཡྻེ, ཨིམཾ ཨདྷིཀརཎཾ ཝཱུཔསམེཧཱི’’ཏི ཝུཙྩམཱནཱ ‘‘སཱདྷཱུ’’ཏི པཊིསྶུཎིཏྭཱ སཱ པཙྪཱ ཨནནྟརཱཡིཀིནཱི ནེཝ ཝཱུཔསམེཡྻ, ན ཝཱུཔསམཱཡ ཨུསྶུཀྐཾ ཀརེཡྻ, པཱཙིཏྟིཡཾ.

བྷོཛནདཱནསིཀྑཱཔདཾ

༤༦. ཡཱ པན བྷིཀྑུནཱི ཨགཱརིཀསྶ ཝཱ པརིབྦཱཛཀསྶ ཝཱ པརིབྦཱཛིཀཱཡ ཝཱ སཧཏྠཱ ཁཱདནཱིཡཾ ཝཱ བྷོཛནཱིཡཾ ཝཱ དདེཡྻ, པཱཙིཏྟིཡཾ.

ཨཱཝསཐཙཱིཝརསིཀྑཱཔདཾ

༤༧. ཡཱ པན བྷིཀྑུནཱི ཨཱཝསཐཙཱིཝརཾ ཨནིསྶཛྫེཏྭཱ པརིབྷུཉྫེཡྻ, པཱཙིཏྟིཡཾ.

ཨཱཝསཐཝིཧཱརསིཀྑཱཔདཾ

༤༨. ཡཱ པན བྷིཀྑུནཱི ཨཱཝསཐཾ ཨནིསྶཛྫིཏྭཱ ཙཱརིཀཾ པཀྐམེཡྻ, པཱཙིཏྟིཡཾ.

ཏིརཙྪཱནཝིཛྫཱཔརིཡཱཔུཎནསིཀྑཱཔདཾ

༤༩. ཡཱ པན བྷིཀྑུནཱི ཏིརཙྪཱནཝིཛྫཾ པརིཡཱཔུཎེཡྻ, པཱཙིཏྟིཡཾ.

ཏིརཙྪཱནཝིཛྫཱཝཱཙནསིཀྑཱཔདཾ

༥༠. ཡཱ པན བྷིཀྑུནཱི ཏིརཙྪཱནཝིཛྫཾ ཝཱཙེཡྻ, པཱཙིཏྟིཡཾ.

ཙིཏྟཱགཱརཝགྒོ པཉྩམོ.

ཨཱརཱམཔཝིསནསིཀྑཱཔདཾ

༥༡. ཡཱ ¶ པན བྷིཀྑུནཱི ཛཱནཾ སབྷིཀྑུཀཾ ཨཱརཱམཾ ཨནཱཔུཙྪཱ པཝིསེཡྻ, པཱཙིཏྟིཡཾ.

བྷིཀྑུཨཀྐོསནསིཀྑཱཔདཾ

༥༢. ཡཱ པན བྷིཀྑུནཱི བྷིཀྑུཾ ཨཀྐོསེཡྻ ཝཱ པརིབྷཱསེཡྻ ཝཱ, པཱཙིཏྟིཡཾ.

གཎཔརིབྷཱསནསིཀྑཱཔདཾ

༥༣. ཡཱ ¶ པན བྷིཀྑུནཱི ཙཎྜཱིཀཏཱ གཎཾ པརིབྷཱསེཡྻ, པཱཙིཏྟིཡཾ.

པཝཱརིཏསིཀྑཱཔདཾ

༥༤. ཡཱ པན བྷིཀྑུནཱི ནིམནྟིཏཱ ཝཱ པཝཱརིཏཱ ཝཱ ཁཱདནཱིཡཾ ཝཱ བྷོཛནཱིཡཾ ཝཱ ཁཱདེཡྻ ཝཱ བྷུཉྫེཡྻ ཝཱ, པཱཙིཏྟིཡཾ.

ཀུལམཙྪརིནཱིསིཀྑཱཔདཾ

༥༥. ཡཱ པན བྷིཀྑུནཱི ཀུལམཙྪརིནཱི ཨསྶ, པཱཙིཏྟིཡཾ.

ཨབྷིཀྑུཀཱཝཱསསིཀྑཱཔདཾ

༥༦. ཡཱ པན བྷིཀྑུནཱི ཨབྷིཀྑུཀེ ཨཱཝཱསེ ཝསྶཾ ཝསེཡྻ, པཱཙིཏྟིཡཾ.

ཨཔཝཱརཎཱསིཀྑཱཔདཾ

༥༧. ཡཱ པན བྷིཀྑུནཱི ཝསྶཾཝུཊྛཱ ཨུབྷཏོསངྒྷེ ཏཱིཧི ཋཱནེཧི ན པཝཱརེཡྻ དིཊྛེན ཝཱ སུཏེན ཝཱ པརིསངྐཱཡ ཝཱ, པཱཙིཏྟིཡཾ.

ཨོཝཱདསིཀྑཱཔདཾ

༥༨. ཡཱ པན བྷིཀྑུནཱི ཨོཝཱདཱཡ ཝཱ སཾཝཱསཱཡ ཝཱ ན གཙྪེཡྻ, པཱཙིཏྟིཡཾ.

ཨོཝཱདཱུཔསངྐམནསིཀྑཱཔདཾ

༥༩. ཨནྭདྡྷམཱསཾ བྷིཀྑུནིཡཱ བྷིཀྑུསངྒྷཏོ དྭེ དྷམྨཱ པཙྩཱསཱིསིཏབྦཱ ཨུཔོསཐཔུཙྪཀཉྩ ཨོཝཱདཱུཔསངྐམནཉྩ. ཏཾ ཨཏིཀྐཱམེནྟིཡཱ པཱཙིཏྟིཡཾ.

པསཱཁེཛཱཏསིཀྑཱཔདཾ

༦༠. ཡཱ པན བྷིཀྑུནཱི པསཱཁེ ཛཱཏཾ གཎྜཾ ཝཱ རུདྷིཏཾ ཝཱ ཨནཔལོཀེཏྭཱ སངྒྷཾ ཝཱ གཎཾ ཝཱ པུརིསེན སདྡྷིཾ ཨེཀེནེཀཱ བྷེདཱཔེཡྻ ཝཱ ¶ ཕཱལཱཔེཡྻ ཝཱ དྷོཝཱཔེཡྻ ཝཱ ཨཱལིམྤཱཔེཡྻ ཝཱ བནྡྷཱཔེཡྻ ཝཱ མོཙཱཔེཡྻ ཝཱ, པཱཙིཏྟིཡཾ.

ཨཱརཱམཝགྒོ ཚཊྛོ.

གབྦྷིནཱིསིཀྑཱཔདཾ

༦༡. ཡཱ ¶ པན བྷིཀྑུནཱི གབྦྷིནིཾ ཝུཊྛཱཔེཡྻ, པཱཙིཏྟིཡཾ.

པཱཡནྟཱིསིཀྑཱཔདཾ

༦༢. ཡཱ པན བྷིཀྑུནཱི པཱཡནྟིཾ ཝུཊྛཱཔེཡྻ, པཱཙིཏྟིཡཾ.

པཋམསིཀྑམཱནསིཀྑཱཔདཾ

༦༣. ཡཱ པན བྷིཀྑུནཱི དྭེ ཝསྶཱནི ཚསུ དྷམྨེསུ ཨསིཀྑིཏསིཀྑཾ སིཀྑམཱནཾ ཝུཊྛཱཔེཡྻ, པཱཙིཏྟིཡཾ.

དུཏིཡསིཀྑམཱནསིཀྑཱཔདཾ

༦༤. ཡཱ པན བྷིཀྑུནཱི དྭེ ཝསྶཱནི ཚསུ དྷམྨེསུ སིཀྑིཏསིཀྑཾ སིཀྑམཱནཾ སངྒྷེན ཨསམྨཏཾ ཝུཊྛཱཔེཡྻ, པཱཙིཏྟིཡཾ.

པཋམགིཧིགཏསིཀྑཱཔདཾ

༦༥. ཡཱ པན བྷིཀྑུནཱི ཨཱུནདྭཱདསཝསྶཾ གིཧིགཏཾ ཝུཊྛཱཔེཡྻ, པཱཙིཏྟིཡཾ.

དུཏིཡགིཧིགཏསིཀྑཱཔདཾ

༦༦. ཡཱ པན བྷིཀྑུནཱི པརིཔུཎྞདྭཱདསཝསྶཾ གིཧིགཏཾ དྭེ ཝསྶཱནི ཚསུ དྷམྨེསུ ཨསིཀྑིཏསིཀྑཾ ཝུཊྛཱཔེཡྻ, པཱཙིཏྟིཡཾ.

ཏཏིཡགིཧིགཏསིཀྑཱཔདཾ

༦༧. ཡཱ པན བྷིཀྑུནཱི པརིཔུཎྞདྭཱདསཝསྶཾ གིཧིགཏཾ དྭེ ཝསྶཱནི ཚསུ དྷམྨེསུ སིཀྑིཏསིཀྑཾ སངྒྷེན ཨསམྨཏཾ ཝུཊྛཱཔེཡྻ, པཱཙིཏྟིཡཾ.

པཋམསཧཛཱིཝིནཱིསིཀྑཱཔདཾ

༦༨. ཡཱ པན བྷིཀྑུནཱི སཧཛཱིཝིནིཾ ཝུཊྛཱཔེཏྭཱ དྭེ ཝསྶཱནི ནེཝ ཨནུགྒཎྷེཡྻ ན ཨནུགྒཎྷཱཔེཡྻ, པཱཙིཏྟིཡཾ.

པཝཏྟིནཱིནཱནུབནྡྷནསིཀྑཱཔདཾ

༦༩. ཡཱ པན བྷིཀྑུནཱི ཝུཊྛཱཔིཏཾ པཝཏྟིནིཾ དྭེ ཝསྶཱནི ནཱནུབནྡྷེཡྻ, པཱཙིཏྟིཡཾ.

དུཏིཡསཧཛཱིཝིནཱིསིཀྑཱཔདཾ

༧༠. ཡཱ ¶ ¶ པན བྷིཀྑུནཱི སཧཛཱིཝིནིཾ ཝུཊྛཱཔེཏྭཱ ནེཝ ཝཱུཔཀཱསེཡྻ ན ཝཱུཔཀཱསཱཔེཡྻ ཨནྟམསོ ཚཔྤཉྩཡོཛནཱནིཔི, པཱཙིཏྟིཡཾ.

གབྦྷིནིཝགྒོ སཏྟམོ.

པཋམཀུམཱརིབྷཱུཏསིཀྑཱཔདཾ

༧༡. ཡཱ པན བྷིཀྑུནཱི ཨཱུནཝཱིསཏིཝསྶཾ ཀུམཱརིབྷཱུཏཾ ཝུཊྛཱཔེཡྻ, པཱཙིཏྟིཡཾ.

དུཏིཡཀུམཱརིབྷཱུཏསིཀྑཱཔདཾ

༧༢. ཡཱ པན བྷིཀྑུནཱི པརིཔུཎྞཝཱིསཏིཝསྶཾ ཀུམཱརིབྷཱུཏཾ དྭེ ཝསྶཱནི ཚསུ དྷམྨེསུ ཨསིཀྑིཏསིཀྑཾ ཝུཊྛཱཔེཡྻ, པཱཙིཏྟིཡཾ.

ཏཏིཡཀུམཱརིབྷཱུཏསིཀྑཱཔདཾ

༧༣. ཡཱ པན བྷིཀྑུནཱི པརིཔུཎྞཝཱིསཏིཝསྶཾ ཀུམཱརིབྷཱུཏཾ དྭེ ཝསྶཱནི ཚསུ དྷམྨེསུ སིཀྑིཏསིཀྑཾ སངྒྷེན ཨསམྨཏཾ ཝུཊྛཱཔེཡྻ, པཱཙིཏྟིཡཾ.

ཨཱུནདྭཱདསཝསྶསིཀྑཱཔདཾ

༧༤. ཡཱ པན བྷིཀྑུནཱི ཨཱུནདྭཱདསཝསྶཱ ཝུཊྛཱཔེཡྻ, པཱཙིཏྟིཡཾ.

པརིཔུཎྞདྭཱདསཝསྶསིཀྑཱཔདཾ

༧༥. ཡཱ པན བྷིཀྑུནཱི པརིཔུཎྞདྭཱདསཝསྶཱ སངྒྷེན ཨསམྨཏཱ ཝུཊྛཱཔེཡྻ, པཱཙིཏྟིཡཾ.

ཁིཡྻནདྷམྨསིཀྑཱཔདཾ

༧༦. ཡཱ པན བྷིཀྑུནཱི ‘‘ཨལཾ ཏཱཝ ཏེ, ཨཡྻེ, ཝུཊྛཱཔིཏེནཱ’’ཏི ཝུཙྩམཱནཱ ‘‘སཱདྷཱུ’’ཏི པཊིསྶུཎིཏྭཱ སཱ པཙྪཱ ཁིཡྻནདྷམྨཾ ཨཱཔཛྫེཡྻ, པཱཙིཏྟིཡཾ.

པཋམསིཀྑམཱནནཝུཊྛཱཔནསིཀྑཱཔདཾ

༧༧. ཡཱ པན བྷིཀྑུནཱི སིཀྑམཱནཾ ‘‘སཙེ མེ ཏྭཾ, ཨཡྻེ, ཙཱིཝརཾ དསྶསི, ཨེཝཱཧཾ ཏཾ ¶ ཝུཊྛཱཔེསྶཱམཱི’’ཏི ཝཏྭཱ སཱ པཙྪཱ ཨནནྟརཱཡིཀིནཱི ནེཝ ཝུཊྛཱཔེཡྻ, ན ཝུཊྛཱཔནཱཡ ཨུསྶུཀྐཾ ཀརེཡྻ, པཱཙིཏྟིཡཾ.

དུཏིཡསིཀྑམཱནནཝུཊྛཱཔནསིཀྑཱཔདཾ

༧༨. ཡཱ ¶ པན བྷིཀྑུནཱི སིཀྑམཱནཾ ‘‘སཙེ མཾ ཏྭཾ, ཨཡྻེ, དྭེ ཝསྶཱནི ཨནུབནྡྷིསྶསི, ཨེཝཱཧཾ ཏཾ ཝུཊྛཱཔེསྶཱམཱི’’ཏི ཝཏྭཱ སཱ པཙྪཱ ཨནནྟརཱཡིཀིནཱི ནེཝ ཝུཊྛཱཔེཡྻ, ན ཝུཊྛཱཔནཱཡ ཨུསྶུཀྐཾ ཀརེཡྻ, པཱཙིཏྟིཡཾ.

སོཀཱཝཱསསིཀྑཱཔདཾ

༧༩. ཡཱ པན བྷིཀྑུནཱི པུརིསསཾསཊྛཾ ཀུམཱརཀསཾསཊྛཾ ཙཎྜིཾ སོཀཱཝཱསཾ སིཀྑམཱནཾ ཝུཊྛཱཔེཡྻ, པཱཙིཏྟིཡཾ.

ཨནནུཉྙཱཏསིཀྑཱཔདཾ

༨༠. ཡཱ པན བྷིཀྑུནཱི མཱཏཱཔིཏཱུཧི ཝཱ སཱམིཀེན ཝཱ ཨནནུཉྙཱཏཾ སིཀྑམཱནཾ ཝུཊྛཱཔེཡྻ, པཱཙིཏྟིཡཾ.

པཱརིཝཱསིཀསིཀྑཱཔདཾ

༨༡. ཡཱ པན བྷིཀྑུནཱི པཱརིཝཱསིཀཚནྡདཱནེན སིཀྑམཱནཾ ཝུཊྛཱཔེཡྻ, པཱཙིཏྟིཡཾ.

ཨནུཝསྶསིཀྑཱཔདཾ

༨༢. ཡཱ པན བྷིཀྑུནཱི ཨནུཝསྶཾ ཝུཊྛཱཔེཡྻ, པཱཙིཏྟིཡཾ.

ཨེཀཝསྶསིཀྑཱཔདཾ

༨༣. ཡཱ པན བྷིཀྑུནཱི ཨེཀཾ ཝསྶཾ དྭེ ཝུཊྛཱཔེཡྻ, པཱཙིཏྟིཡཾ.

ཀུམཱརིབྷཱུཏཝགྒོ ཨཊྛམོ.

ཚཏྟུཔཱཧནསིཀྑཱཔདཾ

༨༤. ཡཱ པན བྷིཀྑུནཱི ཨགིལཱནཱ ཚཏྟུཔཱཧནཾ དྷཱརེཡྻ, པཱཙིཏྟིཡཾ.

ཡཱནསིཀྑཱཔདཾ

༨༥. ཡཱ ¶ པན བྷིཀྑུནཱི ཨགིལཱནཱ ཡཱནེན ཡཱཡེཡྻ, པཱཙིཏྟིཡཾ.

སངྒྷཱཎིསིཀྑཱཔདཾ

༨༦. ཡཱ པན བྷིཀྑུནཱི སངྒྷཱཎིཾ དྷཱརེཡྻ, པཱཙིཏྟིཡཾ.

ཨིཏྠཱལངྐཱརསིཀྑཱཔདཾ

༨༧. ཡཱ པན བྷིཀྑུནཱི ཨིཏྠཱལངྐཱརཾ དྷཱརེཡྻ, པཱཙིཏྟིཡཾ.

གནྡྷཝཎྞཀསིཀྑཱཔདཾ

༨༨. ཡཱ ¶ པན བྷིཀྑུནཱི གནྡྷཝཎྞཀེན ནཧཱཡེཡྻ, པཱཙིཏྟིཡཾ.

ཝཱསིཏཀསིཀྑཱཔདཾ

༨༩. ཡཱ པན བྷིཀྑུནཱི ཝཱསིཏཀེན པིཉྙཱཀེན ནཧཱཡེཡྻ, པཱཙིཏྟིཡཾ.

བྷིཀྑུནིཨུམྨདྡཱཔནསིཀྑཱཔདཾ

༩༠. ཡཱ པན བྷིཀྑུནཱི བྷིཀྑུནིཡཱ ཨུམྨདྡཱཔེཡྻ ཝཱ པརིམདྡཱཔེཡྻ ཝཱ, པཱཙིཏྟིཡཾ.

སིཀྑམཱནཨུམྨདྡཱཔནསིཀྑཱཔདཾ

༩༡. ཡཱ པན བྷིཀྑུནཱི སིཀྑམཱནཱཡ ཨུམྨདྡཱཔེཡྻ ཝཱ པརིམདྡཱཔེཡྻ ཝཱ, པཱཙིཏྟིཡཾ.

སཱམཎེརཱིཨུམྨདྡཱཔནསིཀྑཱཔདཾ

༩༢. ཡཱ པན བྷིཀྑུནཱི སཱམཎེརིཡཱ ཨུམྨདྡཱཔེཡྻ ཝཱ པརིམདྡཱཔེཡྻ ཝཱ, པཱཙིཏྟིཡཾ.

གིཧིནིཨུམྨདྡཱཔནསིཀྑཱཔདཾ

༩༣. ཡཱ པན བྷིཀྑུནཱི གིཧིནིཡཱ ཨུམྨདྡཱཔེཡྻ ཝཱ པརིམདྡཱཔེཡྻ ཝཱ, པཱཙིཏྟིཡཾ.

ཨནཱཔུཙྪཱསིཀྑཱཔདཾ

༩༤. ཡཱ པན བྷིཀྑུནཱི བྷིཀྑུསྶ པུརཏོ ཨནཱཔུཙྪཱ ཨཱསནེ ནིསཱིདེཡྻ, པཱཙིཏྟིཡཾ.

པཉྷཱཔུཙྪནསིཀྑཱཔདཾ

༩༥. ཡཱ ¶ པན བྷིཀྑུནཱི ཨནོཀཱསཀཏཾ བྷིཀྑུཾ པཉྷཾ པུཙྪེཡྻ, པཱཙིཏྟིཡཾ.

ཨསཾཀཙྩིཀསིཀྑཱཔདཾ

༩༦. ཡཱ པན བྷིཀྑུནཱི ཨསཾཀཙྩིཀཱ གཱམཾ པཝིསེཡྻ, པཱཙིཏྟིཡཾ.

ཚཏྟུཔཱཧནཝགྒོ ནཝམོ.

མུསཱཝཱདསིཀྑཱཔདཾ

༩༧. སམྤཛཱནམུསཱཝཱདེ ¶ པཱཙིཏྟིཡཾ.

ཨོམསཝཱདསིཀྑཱཔདཾ

༩༨. ཨོམསཝཱདེ པཱཙིཏྟིཡཾ.

པེསུཉྙསིཀྑཱཔདཾ

༩༩. བྷིཀྑུནིཔེསུཉྙེ པཱཙིཏྟིཡཾ.

པདསོདྷམྨསིཀྑཱཔདཾ

༡༠༠. ཡཱ པན བྷིཀྑུནཱི ཨནུཔསམྤནྣཾ པདསོ དྷམྨཾ ཝཱཙེཡྻ, པཱཙིཏྟིཡཾ.

པཋམསཧསེཡྻསིཀྑཱཔདཾ

༡༠༡. ཡཱ པན བྷིཀྑུནཱི ཨནུཔསམྤནྣཱཡ ཨུཏྟརིདིརཏྟཏིརཏྟཾ སཧསེཡྻཾ ཀཔྤེཡྻ, པཱཙིཏྟིཡཾ.

དུཏིཡསཧསེཡྻསིཀྑཱཔདཾ

༡༠༢. ཡཱ པན བྷིཀྑུནཱི པུརིསེན སཧསེཡྻཾ ཀཔྤེཡྻ, པཱཙིཏྟིཡཾ.

དྷམྨདེསནཱསིཀྑཱཔདཾ

༡༠༣. ཡཱ པན བྷིཀྑུནཱི པུརིསསྶ ཨུཏྟརིཚཔྤཉྩཝཱཙཱཧི དྷམྨཾ དེསེཡྻ ཨཉྙཏྲ ཝིཉྙུནཱ ཨིཏྠིཝིགྒཧེན, པཱཙིཏྟིཡཾ.

བྷཱུཏཱརོཙནསིཀྑཱཔདཾ

༡༠༤. ཡཱ ¶ པན བྷིཀྑུནཱི ཨནུཔསམྤནྣཱཡ ཨུཏྟརིམནུསྶདྷམྨཾ ཨཱརོཙེཡྻ, བྷཱུཏསྨིཾ པཱཙིཏྟིཡཾ.

དུཊྛུལླཱརོཙནསིཀྑཱཔདཾ

༡༠༥. ཡཱ པན བྷིཀྑུནཱི བྷིཀྑུནིཡཱ དུཊྛུལླཾ ཨཱཔཏྟིཾ ཨནུཔསམྤནྣཱཡ ཨཱརོཙེཡྻ ཨཉྙཏྲ བྷིཀྑུནིསམྨུཏིཡཱ, པཱཙིཏྟིཡཾ.

པཐཝཱིཁཎནསིཀྑཱཔདཾ

༡༠༦. ཡཱ པན བྷིཀྑུནཱི པཐཝིཾ ཁཎེཡྻ ཝཱ ཁཎཱཔེཡྻ ཝཱ, པཱཙིཏྟིཡཾ.

མུསཱཝཱདཝགྒོ དསམོ.

བྷཱུཏགཱམསིཀྑཱཔདཾ

༡༠༧. བྷཱུཏགཱམཔཱཏབྱཏཱཡ ¶ པཱཙིཏྟིཡཾ.

ཨཉྙཝཱདཀསིཀྑཱཔདཾ

༡༠༨. ཨཉྙཝཱདཀེ, ཝིཧེསཀེ པཱཙིཏྟིཡཾ.

ཨུཛ྄ཛྷཱཔནཀསིཀྑཱཔདཾ

༡༠༩. ཨུཛ྄ཛྷཱཔནཀེ, ཁིཡྻནཀེ པཱཙིཏྟིཡཾ.

པཋམསེནཱསནསིཀྑཱཔདཾ

༡༡༠. ཡཱ པན བྷིཀྑུནཱི སངྒྷིཀཾ མཉྩཾ ཝཱ པཱིཋཾ ཝཱ བྷིསིཾ ཝཱ ཀོཙྪཾ ཝཱ ཨཛ྄ཛྷོཀཱསེ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟཱི ནེཝ ཨུདྡྷརེཡྻ, ན ཨུདྡྷརཱཔེཡྻ, ཨནཱཔུཙྪཾ ཝཱ གཙྪེཡྻ, པཱཙིཏྟིཡཾ.

དུཏིཡསེནཱསནསིཀྑཱཔདཾ

༡༡༡. ཡཱ པན བྷིཀྑུནཱི སངྒྷིཀེ ཝིཧཱརེ སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟཱི ནེཝ ཨུདྡྷརེཡྻ, ན ཨུདྡྷརཱཔེཡྻ, ཨནཱཔུཙྪཾ ཝཱ གཙྪེཡྻ, པཱཙིཏྟིཡཾ.

ཨནུཔཁཛྫསིཀྑཱཔདཾ

༡༡༢. ཡཱ ¶ པན བྷིཀྑུནཱི སངྒྷིཀེ ཝིཧཱརེ ཛཱནཾ པུབྦུཔགཏཾ བྷིཀྑུནིཾ ཨནུཔཁཛྫ སེཡྻཾ ཀཔྤེཡྻ ‘‘ཡསྶཱ སམྦཱདྷོ བྷཝིསྶཏི, སཱ པཀྐམིསྶཏཱི’’ཏི ཨེཏདེཝ པཙྩཡཾ ཀརིཏྭཱ ཨནཉྙཾ, པཱཙིཏྟིཡཾ.

ནིཀྐཌྜྷནསིཀྑཱཔདཾ

༡༡༣. ཡཱ པན བྷིཀྑུནཱི བྷིཀྑུནིཾ ཀུཔིཏཱ ཨནཏྟམནཱ སངྒྷིཀཱ ཝིཧཱརཱ ནིཀྐཌྜྷེཡྻ ཝཱ ནིཀྐཌྜྷཱཔེཡྻ ཝཱ, པཱཙིཏྟིཡཾ.

ཝེཧཱསཀུཊིསིཀྑཱཔདཾ

༡༡༤. ཡཱ པན བྷིཀྑུནཱི སངྒྷིཀེ ཝིཧཱརེ ཨུཔརིཝེཧཱསཀུཊིཡཱ ཨཱཧཙྩཔཱདཀཾ མཉྩཾ ཝཱ པཱིཋཾ ཝཱ ཨབྷིནིསཱིདེཡྻ ཝཱ ཨབྷིནིཔཛྫེཡྻ ཝཱ, པཱཙིཏྟིཡཾ.

མཧལླཀཝིཧཱརསིཀྑཱཔདཾ

༡༡༥. མཧལླཀཾ པན བྷིཀྑུནིཡཱ ཝིཧཱརཾ ཀཱརཡམཱནཱཡ ཡཱཝ དྭཱརཀོསཱ ཨགྒལ༹ཊྛཔནཱཡ, ཨཱལོཀསནྡྷིཔརིཀམྨཱཡ དྭཏྟིཙྪདནསྶ པརིཡཱཡཾ ཨཔྤཧརིཏེ ཋིཏཱཡ ཨདྷིཊྛཱཏབྦཾ. ཏཏོ ཙེ ཨུཏྟརི ཨཔྤཧརིཏེཔི ཋིཏཱ ཨདྷིཊྛཧེཡྻ, པཱཙིཏྟིཡཾ.

སཔྤཱཎཀསིཀྑཱཔདཾ

༡༡༦. ཡཱ ¶ པན བྷིཀྑུནཱི ཛཱནཾ སཔྤཱཎཀཾ ཨུདཀཾ ཏིཎཾ ཝཱ མཏྟིཀཾ ཝཱ སིཉྩེཡྻ ཝཱ སིཉྩཱཔེཡྻ ཝཱ, པཱཙིཏྟིཡཾ.

བྷཱུཏགཱམཝགྒོ ཨེཀཱདསམོ.

ཨཱཝསཐཔིཎྜསིཀྑཱཔདཾ

༡༡༧. ཨགིལཱནཱཡ བྷིཀྑུནིཡཱ ཨེཀོ ཨཱཝསཐཔིཎྜོ བྷུཉྫིཏབྦོ. ཏཏོ ཙེ ཨུཏྟརི བྷུཉྫེཡྻ, པཱཙིཏྟིཡཾ.

གཎབྷོཛནསིཀྑཱཔདཾ

༡༡༨. གཎབྷོཛནེ ཨཉྙཏྲ སམཡཱ པཱཙིཏྟིཡཾ. ཏཏྠཱཡཾ སམཡོ, གིལཱནསམཡོ, ཙཱིཝརདཱནསམཡོ ¶ , ཙཱིཝརཀཱརསམཡོ, ཨདྡྷཱནགམནསམཡོ, ནཱཝཱབྷིརུཧནསམཡོ, མཧཱསམཡོ, སམཎབྷཏྟསམཡོ, ཨཡཾ ཏཏྠ སམཡོ.

ཀཱཎམཱཏུསིཀྑཱཔདཾ

༡༡༩. བྷིཀྑུནིཾ པནེཝ ཀུལཾ ཨུཔགཏཾ པཱུཝེཧི ཝཱ མནྠེཧི ཝཱ ཨབྷིཧཊྛུཾ པཝཱརེཡྻ, ཨཱཀངྑམཱནཱཡ བྷིཀྑུནིཡཱ དྭཏྟིཔཏྟཔཱུརཱ པཊིགྒཧེཏབྦཱ. ཏཏོ ཙེ ཨུཏྟརི པཊིགྒཎྷེཡྻ, པཱཙིཏྟིཡཾ. དྭཏྟིཔཏྟཔཱུརེ པཊིགྒཧེཏྭཱ ཏཏོ ནཱིཧརིཏྭཱ བྷིཀྑུནཱིཧི སདྡྷིཾ སཾཝིབྷཛིཏབྦཾ, ཨཡཾ ཏཏྠ སཱམཱིཙི.

ཝིཀཱལབྷོཛནསིཀྑཱཔདཾ

༡༢༠. ཡཱ པན བྷིཀྑུནཱི ཝིཀཱལེ ཁཱདནཱིཡཾ ཝཱ བྷོཛནཱིཡཾ ཝཱ ཁཱདེཡྻ ཝཱ བྷུཉྫེཡྻ ཝཱ, པཱཙིཏྟིཡཾ.

སནྣིདྷིཀཱརཀསིཀྑཱཔདཾ

༡༢༡. ཡཱ པན བྷིཀྑུནཱི སནྣིདྷིཀཱརཀཾ ཁཱདནཱིཡཾ ཝཱ བྷོཛནཱིཡཾ ཝཱ ཁཱདེཡྻ ཝཱ བྷུཉྫེཡྻ ཝཱ, པཱཙིཏྟིཡཾ.

དནྟཔོནསིཀྑཱཔདཾ

༡༢༢. ཡཱ པན བྷིཀྑུནཱི ཨདིནྣཾ མུཁདྭཱརཾ ཨཱཧཱརཾ ཨཱཧརེཡྻ ཨཉྙཏྲ ཨུདཀདནྟཔོནཱ, པཱཙིཏྟིཡཾ.

ཨུཡྻོཛནསིཀྑཱཔདཾ

༡༢༣. ཡཱ ¶ པན བྷིཀྑུནཱི བྷིཀྑུནིཾ ‘‘ཨེཧཱཡྻེ, གཱམཾ ཝཱ ནིགམཾ ཝཱ པིཎྜཱཡ པཝིསིསྶཱམཱ’’ཏི ཏསྶཱ དཱཔེཏྭཱ ཝཱ ཨདཱཔེཏྭཱ ཝཱ ཨུཡྻོཛེཡྻ ‘‘གཙྪཱཡྻེ, ན མེ ཏཡཱ སདྡྷིཾ ཀཐཱ ཝཱ ནིསཛྫཱ ཝཱ ཕཱསུ ཧོཏི, ཨེཀིཀཱཡ མེ ཀཐཱ ཝཱ ནིསཛྫཱ ཝཱ ཕཱསུ ཧོཏཱི’’ཏི ཨེཏདེཝ པཙྩཡཾ ཀརིཏྭཱ ཨནཉྙཾ, པཱཙིཏྟིཡཾ.

སབྷོཛནསིཀྑཱཔདཾ

༡༢༤. ཡཱ པན བྷིཀྑུནཱི སབྷོཛནེ ཀུལེ ཨནུཔཁཛྫ ནིསཛྫཾ ཀཔྤེཡྻ, པཱཙིཏྟིཡཾ.

རཧོཔཊིཙྪནྣསིཀྑཱཔདཾ

༡༢༥. ཡཱ ¶ པན བྷིཀྑུནཱི པུརིསེན སདྡྷིཾ རཧོ པཊིཙྪནྣེ ཨཱསནེ ནིསཛྫཾ ཀཔྤེཡྻ, པཱཙིཏྟིཡཾ.

རཧོནིསཛྫསིཀྑཱཔདཾ

༡༢༦. ཡཱ པན བྷིཀྑུནཱི པུརིསེན སདྡྷིཾ ཨེཀེནེཀཱ རཧོ ནིསཛྫཾ ཀཔྤེཡྻ, པཱཙིཏྟིཡཾ.

བྷོཛནཝགྒོ དྭཱདསམོ.

ཙཱརིཏྟསིཀྑཱཔདཾ

༡༢༧. ཡཱ པན བྷིཀྑུནཱི ནིམནྟིཏཱ སབྷཏྟཱ སམཱནཱ སནྟིཾ བྷིཀྑུནིཾ ཨནཱཔུཙྪཱ པུརེབྷཏྟཾ ཝཱ པཙྪཱབྷཏྟཾ ཝཱ ཀུལེསུ ཙཱརིཏྟཾ ཨཱཔཛྫེཡྻ ཨཉྙཏྲ སམཡཱ, པཱཙིཏྟིཡཾ. ཏཏྠཱཡཾ སམཡོ, ཙཱིཝརདཱནསམཡོ, ཙཱིཝརཀཱརསམཡོ, ཨཡཾ ཏཏྠ སམཡོ.

མཧཱནཱམསིཀྑཱཔདཾ

༡༢༨. ཨགིལཱནཱཡ བྷིཀྑུནིཡཱ ཙཏུམཱསཔྤཙྩཡཔཝཱརཎཱ སཱདིཏབྦཱ ཨཉྙཏྲ པུནཔཝཱརཎཱཡ, ཨཉྙཏྲ ནིཙྩཔཝཱརཎཱཡ. ཏཏོ ཙེ ཨུཏྟརི སཱདིཡེཡྻ, པཱཙིཏྟིཡཾ.

ཨུཡྻུཏྟསེནཱསིཀྑཱཔདཾ

༡༢༩. ཡཱ པན བྷིཀྑུནཱི ཨུཡྻུཏྟཾ སེནཾ དསྶནཱཡ གཙྪེཡྻ ཨཉྙཏྲ ཏཐཱརཱུཔཔྤཙྩཡཱ, པཱཙིཏྟིཡཾ.

སེནཱཝཱསསིཀྑཱཔདཾ

༡༣༠. སིཡཱ ¶ ཙ ཏསྶཱ བྷིཀྑུནིཡཱ ཀོཙིདེཝ པཙྩཡོ སེནཾ གམནཱཡ, དིརཏྟཏིརཏྟཾ ཏཱཡ བྷིཀྑུནིཡཱ སེནཱཡ ཝསིཏབྦཾ. ཏཏོ ཙེ ཨུཏྟརི ཝསེཡྻ, པཱཙིཏྟིཡཾ.

ཨུཡྻོདྷིཀསིཀྑཱཔདཾ

༡༣༡. དིརཏྟཏིརཏྟཾ ཙེ བྷིཀྑུནཱི སེནཱཡ ཝསམཱནཱ ཨུཡྻོདྷིཀཾ ཝཱ བལགྒཾ ཝཱ སེནཱབྱཱུཧཾ ཝཱ ཨནཱིཀདསྶནཾ ཝཱ གཙྪེཡྻ, པཱཙིཏྟིཡཾ.

སུརཱཔཱནསིཀྑཱཔདཾ

༡༣༢. སུརཱམེརཡཔཱནེ ¶ པཱཙིཏྟིཡཾ.

ཨངྒུལིཔཏོདཀསིཀྑཱཔདཾ

༡༣༣. ཨངྒུལིཔཏོདཀེ པཱཙིཏྟིཡཾ.

ཧསདྷམྨསིཀྑཱཔདཾ

༡༣༤. ཨུདཀེ ཧསདྷམྨེ པཱཙིཏྟིཡཾ.

ཨནཱདརིཡསིཀྑཱཔདཾ

༡༣༥. ཨནཱདརིཡེ པཱཙིཏྟིཡཾ.

བྷིཾསཱཔནསིཀྑཱཔདཾ

༡༣༦. ཡཱ པན བྷིཀྑུནཱི བྷིཀྑུནིཾ བྷིཾསཱཔེཡྻ, པཱཙིཏྟིཡཾ.

ཙཱརིཏྟཝགྒོ ཏེརསམོ.

ཛོཏིསིཀྑཱཔདཾ

༡༣༧. ཡཱ པན བྷིཀྑུནཱི ཨགིལཱནཱ ཝིསིབྦནཱཔེཀྑཱ ཛོཏིཾ སམཱདཧེཡྻ ཝཱ སམཱདཧཱཔེཡྻ ཝཱ ཨཉྙཏྲ ཏཐཱརཱུཔཔྤཙྩཡཱ, པཱཙིཏྟིཡཾ.

ནཧཱནསིཀྑཱཔདཾ

༡༣༨. ཡཱ པན བྷིཀྑུནཱི ཨོརེནདྡྷམཱསཾ ནཧཱཡེཡྻ ཨཉྙཏྲ སམཡཱ, པཱཙིཏྟིཡཾ. ཏཏྠཱཡཾ སམཡོ ‘‘དིཡཌྜྷོ མཱསོ སེསོ གིམྷཱན’’ནྟི ‘‘ཝསྶཱནསྶ པཋམོ མཱསོ’’ ཨིཙྩེཏེ ཨཌྜྷཏེཡྻམཱསཱ ཨུཎྷསམཡོ, པརིལཱ༹ཧསམཡོ, གིལཱནསམཡོ, ཀམྨསམཡོ, ཨདྡྷཱནགམནསམཡོ, ཝཱཏཝུཊྛིསམཡོ, ཨཡཾ ཏཏྠ སམཡོ.

དུབྦཎྞཀརཎསིཀྑཱཔདཾ

༡༣༩. ནཝཾ ¶ པན བྷིཀྑུནིཡཱ ཙཱིཝརལཱབྷཱཡ ཏིཎྞཾ དུབྦཎྞཀརཎཱནཾ ཨཉྙཏརཾ དུབྦཎྞཀརཎཾ ¶ ཨཱདཱཏབྦཾ ནཱིལཾ ཝཱ ཀདྡམཾ ཝཱ ཀཱལ༹སཱམཾ ཝཱ. ཨནཱདཱ ཙེ བྷིཀྑུནཱི ཏིཎྞཾ དུབྦཎྞཀརཎཱནཾ ཨཉྙཏརཾ དུབྦཎྞཀརཎཾ ནཝཾ ཙཱིཝརཾ པརིབྷུཉྫེཡྻ, པཱཙིཏྟིཡཾ.

ཝིཀཔྤནསིཀྑཱཔདཾ

༡༤༠. ཡཱ པན བྷིཀྑུནཱི བྷིཀྑུསྶ ཝཱ བྷིཀྑུནིཡཱ ཝཱ སིཀྑམཱནཱཡ ཝཱ སཱམཎེརསྶ ཝཱ སཱམཎེརིཡཱ ཝཱ སཱམཾ ཙཱིཝརཾ ཝིཀཔྤེཏྭཱ ཨཔཙྩུདྡྷཱརཎཾ པརིབྷུཉྫེཡྻ, པཱཙིཏྟིཡཾ.

ཨཔནིདྷཱཔནསིཀྑཱཔདཾ

༡༤༡. ཡཱ པན བྷིཀྑུནཱི བྷིཀྑུནིཡཱ པཏྟཾ ཝཱ ཙཱིཝརཾ ཝཱ ནིསཱིདནཾ ཝཱ སཱུཙིགྷརཾ ཝཱ ཀཱཡབནྡྷནཾ ཝཱ ཨཔནིདྷེཡྻ ཝཱ ཨཔནིདྷཱཔེཡྻ ཝཱ ཨནྟམསོ ཧསཱཔེཀྑཱཔི, པཱཙིཏྟིཡཾ.

སཉྩིཙྩསིཀྑཱཔདཾ

༡༤༢. ཡཱ པན བྷིཀྑུནཱི སཉྩིཙྩ པཱཎཾ ཛཱིཝིཏཱ ཝོརོཔེཡྻ, པཱཙིཏྟིཡཾ.

སཔྤཱཎཀསིཀྑཱཔདཾ

༡༤༣. ཡཱ པན བྷིཀྑུནཱི ཛཱནཾ སཔྤཱཎཀཾ ཨུདཀཾ པརིབྷུཉྫེཡྻ, པཱཙིཏྟིཡཾ.

ཨུཀྐོཊནསིཀྑཱཔདཾ

༡༤༤. ཡཱ པན བྷིཀྑུནཱི ཛཱནཾ ཡཐཱདྷམྨཾ ནིཧཏཱདྷིཀརཎཾ པུནཀམྨཱཡ ཨུཀྐོཊེཡྻ, པཱཙིཏྟིཡཾ.

ཐེཡྻསཏྠསིཀྑཱཔདཾ

༡༤༥. ཡཱ པན བྷིཀྑུནཱི ཛཱནཾ ཐེཡྻསཏྠེན སདྡྷིཾ སཾཝིདྷཱཡ ཨེཀདྡྷཱནམགྒཾ པཊིཔཛྫེཡྻ ཨནྟམསོ གཱམནྟརམྤི, པཱཙིཏྟིཡཾ.

ཨརིཊྛསིཀྑཱཔདཾ

༡༤༦. ཡཱ པན བྷིཀྑུནཱི ཨེཝཾ ཝདེཡྻ ‘‘ཏཐཱཧཾ བྷགཝཏཱ དྷམྨཾ དེསིཏཾ ཨཱཛཱནཱམི, ཡཐཱ ཡེམེ ཨནྟརཱཡིཀཱ དྷམྨཱ ཝུཏྟཱ བྷགཝཏཱ, ཏེ པཊིསེཝཏོ ནཱལཾ ཨནྟརཱཡཱཡཱ’’ཏི. སཱ བྷིཀྑུནཱི བྷིཀྑུནཱིཧི ཨེཝམསྶ ཝཙནཱིཡཱ ‘‘མཱཡྻེ ཨེཝཾ ཨཝཙ, མཱ བྷགཝནྟཾ ཨབྦྷཱཙིཀྑི, ན ¶ ཧི སཱདྷུ བྷགཝཏོ ཨབྦྷཀྑཱནཾ, ན ཧི བྷགཝཱ ཨེཝཾ ཝདེཡྻ, ཨནེཀཔརིཡཱཡེནཱཡྻེ ཨནྟརཱཡིཀཱ དྷམྨཱ ཨནྟརཱཡིཀཱ ཝུཏྟཱ བྷགཝཏཱ, ཨལཉྩ པན ཏེ པཊིསེཝཏོ ¶ ཨནྟརཱཡཱཡཱ’’ཏི. ཨེཝཉྩ སཱ བྷིཀྑུནཱི བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻ, སཱ བྷིཀྑུནཱི བྷིཀྑུནཱིཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ. ཡཱཝཏཏིཡཉྩེ སམནུབྷཱསིཡམཱནཱ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ. ནོ ཙེ པཊིནིསྶཛྫེཡྻ, པཱཙིཏྟིཡཾ.

ཛོཏིཝགྒོ ཙུདྡསམོ.

ཨུཀྑིཏྟསམྦྷོགསིཀྑཱཔདཾ

༡༤༧. ཡཱ པན བྷིཀྑུནཱི ཛཱནཾ ཏཐཱཝཱདིནིཡཱ བྷིཀྑུནིཡཱ ཨཀཊཱནུདྷམྨཱཡ ཏཾ དིཊྛིཾ ཨཔྤཊིནིསྶཊྛཱཡ སདྡྷིཾ སམྦྷུཉྫེཡྻ ཝཱ, སཾཝསེཡྻ ཝཱ, སཧ ཝཱ སེཡྻཾ ཀཔྤེཡྻ, པཱཙིཏྟིཡཾ.

ཀཎྚཀསིཀྑཱཔདཾ

༡༤༨. སམཎུདྡེསཱཔི ཙེ ཨེཝཾ ཝདེཡྻ ‘‘ཏཐཱཧཾ བྷགཝཏཱ དྷམྨཾ དེསིཏཾ ཨཱཛཱནཱམི, ཡཐཱ ཡེམེ ཨནྟརཱཡིཀཱ དྷམྨཱ ཝུཏྟཱ བྷགཝཏཱ, ཏེ པཊིསེཝཏོ ནཱལཾ ཨནྟརཱཡཱཡཱ’’ཏི. སཱ སམཎུདྡེསཱ བྷིཀྑུནཱིཧི ཨེཝམསྶ ཝཙནཱིཡཱ ‘‘མཱཡྻེ, སམཎུདྡེསེ ཨེཝཾ ཨཝཙ, མཱ བྷགཝནྟཾ ཨབྦྷཱཙིཀྑི, ན ཧི སཱདྷུ བྷགཝཏོ ཨབྦྷཀྑཱནཾ, ན ཧི བྷགཝཱ ཨེཝཾ ཝདེཡྻ, ཨནེཀཔརིཡཱཡེནཱཡྻེ, སམཎུདྡེསེ ཨནྟརཱཡིཀཱ དྷམྨཱ ཨནྟརཱཡིཀཱ ཝུཏྟཱ བྷགཝཏཱ, ཨལཉྩ པན ཏེ པཊིསེཝཏོ ཨནྟརཱཡཱཡཱ’’ཏི. ཨེཝཉྩ སཱ སམཎུདྡེསཱ བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻ, སཱ སམཎུདྡེསཱ བྷིཀྑུནཱིཧི ཨེཝམསྶ ཝཙནཱིཡཱ ‘‘ཨཛྫཏགྒེ ཏེ, ཨཡྻེ, སམཎུདྡེསེ ན ཙེཝ སོ བྷགཝཱ སཏྠཱ ཨཔདིསིཏབྦོ, ཡམྤི ཙཉྙཱ སམཎུདྡེསཱ ལབྷནྟི བྷིཀྑུནཱིཧི སདྡྷིཾ དིརཏྟཏིརཏྟཾ སཧསེཡྻཾ, སཱཔི ཏེ ནཏྠི, ཙར པིརེ, ཝིནསྶཱ’’ཏི. ཡཱ པན བྷིཀྑུནཱི ཛཱནཾ ཏཐཱནཱསིཏཾ སམཎུདྡེསཾ ཨུཔལཱཔེཡྻ ཝཱ, ཨུཔཊྛཱཔེཡྻ ཝཱ, སམྦྷུཉྫེཡྻ ཝཱ, སཧ ཝཱ སེཡྻཾ ཀཔྤེཡྻ, པཱཙིཏྟིཡཾ.

སཧདྷམྨིཀསིཀྑཱཔདཾ

༡༤༩. ཡཱ པན བྷིཀྑུནཱི བྷིཀྑུནཱིཧི སཧདྷམྨིཀཾ ཝུཙྩམཱནཱ ཨེཝཾ ཝདེཡྻ ‘‘ན ཏཱཝཱཧཾ, ཨཡྻེ, ཨེཏསྨིཾ སིཀྑཱཔདེ སིཀྑིསྶཱམི, ཡཱཝ ན ཨཉྙཾ བྷིཀྑུནིཾ བྱཏྟཾ ཝིནཡདྷརཾ པརིཔུཙྪཱམཱི’’ཏི, པཱཙིཏྟིཡཾ. སིཀྑམཱནཱཡ, བྷིཀྑཝེ, བྷིཀྑུནིཡཱ ཨཉྙཱཏབྦཾ པརིཔུཙྪིཏབྦཾ པརིཔཉྷིཏབྦཾ, ཨཡཾ ཏཏྠ སཱམཱིཙི.

ཝིལེཁནསིཀྑཱཔདཾ

༡༥༠. ཡཱ ¶ ¶ པན བྷིཀྑུནཱི པཱཏིམོཀྑེ ཨུདྡིསྶམཱནེ ཨེཝཾ ཝདེཡྻ ‘‘ཀིཾ པནིམེཧི ཁུདྡཱནུཁུདྡཀེཧི སིཀྑཱཔདེཧི ཨུདྡིཊྛེཧི, ཡཱཝདེཝ ཀུཀྐུཙྩཱཡ ཝིཧེསཱཡ ཝིལེཁཱཡ སཾཝཏྟནྟཱི’’ཏི, སིཀྑཱཔདཝིཝཎྞཀེ པཱཙིཏྟིཡཾ.

མོཧནསིཀྑཱཔདཾ

༡༥༡. ཡཱ པན བྷིཀྑུནཱི ཨནྭདྡྷམཱསཾ པཱཏིམོཀྑེ ཨུདྡིསྶམཱནེ ཨེཝཾ ཝདེཡྻ ‘‘ཨིདཱནེཝ ཁོ ཨཧཾ, ཨཡྻེ, ཛཱནཱམི ཨཡམྤི ཀིར དྷམྨོ སུཏྟཱགཏོ སུཏྟཔརིཡཱཔནྣོ ཨནྭདྡྷམཱསཾ ཨུདྡེསཾ ཨཱགཙྪཏཱི’’ཏི, ཏཉྩེ བྷིཀྑུནིཾ ཨཉྙཱ བྷིཀྑུནིཡོ ཛཱནེཡྻུཾ ནིསིནྣཔུབྦཾ ཨིམཱཡ བྷིཀྑུནིཡཱ དྭཏྟིཀྑཏྟུཾ པཱཏིམོཀྑེ ཨུདྡིསྶམཱནེ, ཀོ པན ཝཱདོ བྷིཡྻོ, ན ཙ ཏསྶཱ བྷིཀྑུནིཡཱ ཨཉྙཱཎཀེན མུཏྟི ཨཏྠི, ཡཉྩ ཏཏྠ ཨཱཔཏྟིཾ ཨཱཔནྣཱ, ཏཉྩ ཡཐཱདྷམྨོ ཀཱརེཏབྦོ, ཨུཏྟརི ཙསྶཱ མོཧོ ཨཱརོཔེཏབྦོ ‘‘ཏསྶཱ ཏེ, ཨཡྻེ, ཨལཱབྷཱ, ཏསྶཱ ཏེ དུལླདྡྷཾ, ཡཾ ཏྭཾ པཱཏིམོཀྑེ ཨུདྡིསྶམཱནེ ན སཱདྷུཀཾ ཨཊྛིཾ ཀཏྭཱ མནསི ཀརོསཱི’’ཏི, ཨིདཾ ཏསྨིཾ མོཧནཀེ པཱཙིཏྟིཡཾ.

པཧཱརསིཀྑཱཔདཾ

༡༥༢. ཡཱ པན བྷིཀྑུནཱི བྷིཀྑུནིཡཱ ཀུཔིཏཱ ཨནཏྟམནཱ པཧཱརཾ དདེཡྻ, པཱཙིཏྟིཡཾ.

ཏལསཏྟིཀསིཀྑཱཔདཾ

༡༥༣. ཡཱ པན བྷིཀྑུནཱི བྷིཀྑུནིཡཱ ཀུཔིཏཱ ཨནཏྟམནཱ ཏལསཏྟིཀཾ ཨུགྒིརེཡྻ, པཱཙིཏྟིཡཾ.

ཨམཱུལཀསིཀྑཱཔདཾ

༡༥༤. ཡཱ པན བྷིཀྑུནཱི བྷིཀྑུནིཾ ཨམཱུལཀེན སངྒྷཱདིསེསེན ཨནུདྡྷཾསེཡྻ, པཱཙིཏྟིཡཾ.

སཉྩིཙྩསིཀྑཱཔདཾ

༡༥༥. ཡཱ པན བྷིཀྑུནཱི བྷིཀྑུནིཡཱ སཉྩིཙྩ ཀུཀྐུཙྩཾ ཨུཔདཧེཡྻ ‘‘ཨིཏིསྶཱ མུཧུཏྟམྤི ཨཕཱསུ བྷཝིསྶཏཱི’’ཏི ཨེཏདེཝ པཙྩཡཾ ཀརིཏྭཱ ཨནཉྙཾ, པཱཙིཏྟིཡཾ.

ཨུཔསྶུཏི སིཀྑཱཔདཾ

༡༥༦. ཡཱ ¶ ¶ པན བྷིཀྑུནཱི བྷིཀྑུནཱིནཾ བྷཎྜནཛཱཏཱནཾ ཀལཧཛཱཏཱནཾ ཝིཝཱདཱཔནྣཱནཾ ཨུཔསྶུཏིཾ ཏིཊྛེཡྻ ‘‘ཡཾ ཨིམཱ བྷཎིསྶནྟི, ཏཾ སོསྶཱམཱི’’ཏི ཨེཏདེཝ པཙྩཡཾ ཀརིཏྭཱ ཨནཉྙཾ, པཱཙིཏྟིཡཾ.

དིཊྛིཝགྒོ པནྣརསམོ.

ཀམྨཔྤཊིབཱཧནསིཀྑཱཔདཾ

༡༥༧. ཡཱ པན བྷིཀྑུནཱི དྷམྨིཀཱནཾ ཀམྨཱནཾ ཚནྡཾ དཏྭཱ པཙྪཱ ཁཱིཡནདྷམྨཾ ཨཱཔཛྫེཡྻ, པཱཙིཏྟིཡཾ.

ཚནྡཾཨདཏྭཱགམནསིཀྑཱཔདཾ

༡༥༨. ཡཱ པན བྷིཀྑུནཱི སངྒྷེ ཝིནིཙྪཡཀཐཱཡ ཝཏྟམཱནཱཡ ཚནྡཾ ཨདཏྭཱ ཨུཊྛཱཡཱསནཱ པཀྐམེཡྻ, པཱཙིཏྟིཡཾ.

དུབྦལསིཀྑཱཔདཾ

༡༥༩. ཡཱ པན བྷིཀྑུནཱི སམགྒེན སངྒྷེན ཙཱིཝརཾ དཏྭཱ པཙྪཱ ཁཱིཡནདྷམྨཾ ཨཱཔཛྫེཡྻ ‘‘ཡཐཱསནྠུཏཾ བྷིཀྑུནིཡོ སངྒྷིཀཾ ལཱབྷཾ པརིཎཱམེནྟཱི’’ཏི, པཱཙིཏྟིཡཾ.

པརིཎཱམནསིཀྑཱཔདཾ

༡༦༠. ཡཱ པན བྷིཀྑུནཱི ཛཱནཾ སངྒྷིཀཾ ལཱབྷཾ པརིཎཏཾ པུགྒལསྶ པརིཎཱམེཡྻ, པཱཙིཏྟིཡཾ.

རཏནསིཀྑཱཔདཾ

༡༦༡. ཡཱ པན བྷིཀྑུནཱི རཏནཾ ཝཱ རཏནསམྨཏཾ ཝཱ ཨཉྙཏྲ ཨཛ྄ཛྷཱརཱམཱ ཝཱ ཨཛ྄ཛྷཱཝསཐཱ ཝཱ ཨུགྒཎྷེཡྻ ཝཱ ཨུགྒཎྷཱཔེཡྻ ཝཱ, པཱཙིཏྟིཡཾ. རཏནཾ ཝཱ པན བྷིཀྑུནིཡཱ རཏནསམྨཏཾ ཝཱ ཨཛ྄ཛྷཱརཱམེ ཝཱ ཨཛ྄ཛྷཱཝསཐེ ཝཱ ཨུགྒཧེཏྭཱ ཝཱ ཨུགྒཧཱཔེཏྭཱ ཝཱ ནིཀྑིཔིཏབྦཾ ‘‘ཡསྶ བྷཝིསྶཏི, སོ ཧརིསྶཏཱི’’ཏི, ཨཡཾ ཏཏྠ སཱམཱིཙི.

སཱུཙིགྷརསིཀྑཱཔདཾ

༡༦༢. ཡཱ ¶ ¶ པན བྷིཀྑུནཱི ཨཊྛིམཡཾ ཝཱ དནྟམཡཾ ཝཱ ཝིསཱཎམཡཾ ཝཱ སཱུཙིགྷརཾ ཀཱརཱཔེཡྻ, བྷེདནཀཾ པཱཙིཏྟིཡཾ.

མཉྩཔཱིཋསིཀྑཱཔདཾ

༡༦༣. ནཝཾ པན བྷིཀྑུནིཡཱ མཉྩཾ ཝཱ པཱིཋཾ ཝཱ ཀཱརཡམཱནཱཡ ཨཊྛངྒུལཔཱདཀཾ ཀཱརེཏབྦཾ སུགཏངྒུལེན ཨཉྙཏྲ ཧེཊྛིམཱཡ ཨཊནིཡཱ. ཏཾ ཨཏིཀྐཱམེནྟིཡཱ ཚེདནཀཾ པཱཙིཏྟིཡཾ.

ཏཱུལོནདྡྷསིཀྑཱཔདཾ

༡༦༤. ཡཱ པན བྷིཀྑུནཱི མཉྩཾ ཝཱ པཱིཋཾ ཝཱ ཏཱུལོནདྡྷཾ ཀཱརཱཔེཡྻ, ཨུདྡཱལནཀཾ པཱཙིཏྟིཡཾ.

ཀཎྜུཔྤཊིཙྪཱདིསིཀྑཱཔདཾ

༡༦༥. ཀཎྜུཔྤཊིཙྪཱདིཾ པན བྷིཀྑུནིཡཱ ཀཱརཡམཱནཱཡ པམཱཎིཀཱ ཀཱརེཏབྦཱ, ཏཏྲིདཾ པམཱཎཾ, དཱིགྷསོ ཙཏསྶོ ཝིདཏྠིཡོ སུགཏཝིདཏྠིཡཱ, ཏིརིཡཾ དྭེ ཝིདཏྠིཡོ. ཏཾ ཨཏིཀྐཱམེནྟིཡཱ ཚེདནཀཾ པཱཙིཏྟིཡཾ.

ནནྡསིཀྑཱཔདཾ

༡༦༦. ཡཱ པན བྷིཀྑུནཱི སུགཏཙཱིཝརཔྤམཱཎཾ ཙཱིཝརཾ ཀཱརཱཔེཡྻ, ཨཏིརེཀཾ ཝཱ, ཚེདནཀཾ པཱཙིཏྟིཡཾ. ཏཏྲིདཾ སུགཏསྶ སུགཏཙཱིཝརཔྤམཱཎཾ, དཱིགྷསོ ནཝ ཝིདཏྠིཡོ སུགཏཝིདཏྠིཡཱ, ཏིརིཡཾ ཚ ཝིདཏྠིཡོ, ཨིདཾ སུགཏསྶ སུགཏཙཱིཝརཔྤམཱཎནྟི.

དྷམྨིཀཝགྒོ སོལ༹སམོ.

ཨུདྡིཊྛཱ ཁོ, ཨཡྻཱཡོ, ཚསཊྛིསཏཱ པཱཙིཏྟིཡཱ དྷམྨཱ. ཏཏྠཱཡྻཱཡོ, པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡྻཱཡོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

པཱཙིཏྟིཡཱ ནིཊྛིཏཱ.

པཱཊིདེསནཱིཡཱ

ཨིམེ ཁོ པནཱཡྻཱཡོ ཨཊྛ པཱཊིདེསནཱིཡཱ

དྷམྨཱ ཨུདྡེསཾ ཨཱགཙྪནྟི.

སཔྤིཝིཉྙཱཔནསིཀྑཱཔདཾ

༡. ཡཱ ¶ ¶ པན བྷིཀྑུནཱི ཨགིལཱནཱ སཔྤིཾ ཝིཉྙཱཔེཏྭཱ བྷུཉྫེཡྻ, པཊིདེསེཏབྦཾ ཏཱཡ བྷིཀྑུནིཡཱ ‘‘གཱརཡ྄ཧཾ, ཨཡྻེ, དྷམྨཾ ཨཱཔཛྫིཾ ཨསཔྤཱཡཾ པཱཊིདེསནཱིཡཾ, ཏཾ པཊིདེསེམཱི’’ཏི.

ཏེལཝིཉྙཱཔནསིཀྑཱཔདཾ

༢. ཡཱ པན བྷིཀྑུནཱི ཨགིལཱནཱ ཏེལཾ ཝིཉྙཱཔེཏྭཱ བྷུཉྫེཡྻ…པེ… ཏཾ པཊིདེསེམཱིཏི.

མདྷུཝིཉྙཱཔནསིཀྑཱཔདཾ

༣. ཡཱ པན བྷིཀྑུནཱི ཨགིལཱནཱ མདྷུཾ ཝིཉྙཱཔེཏྭཱ བྷུཉྫེཡྻ…པེ… ཏཾ པཊིདེསེམཱིཏི.

ཕཱཎིཏཝིཉྙཱཔནསིཀྑཱཔདཾ

༤. ཡཱ པན བྷིཀྑུནཱི ཨགིལཱནཱ ཕཱཎིཏཾ ཝིཉྙཱཔེཏྭཱ བྷུཉྫེཡྻ…པེ… ཏཾ པཊིདེསེམཱིཏི.

མཙྪཝིཉྙཱཔནསིཀྑཱཔདཾ

༥. ཡཱ པན བྷིཀྑུནཱི ཨགིལཱནཱ མཙྪཾ ཝིཉྙཱཔེཏྭཱ བྷུཉྫེཡྻ…པེ… ཏཾ པཊིདེསེམཱིཏི.

མཾསཝིཉྙཱཔནསིཀྑཱཔདཾ

༦. ཡཱ པན བྷིཀྑུནཱི ཨགིལཱནཱ མཾསཾ ཝིཉྙཱཔེཏྭཱ བྷུཉྫེཡྻ…པེ… ཏཾ པཊིདེསེམཱིཏི.

ཁཱིརཝིཉྙཱཔནསིཀྑཱཔདཾ

༧. ཡཱ ¶ པན བྷིཀྑུནཱི ཨགིལཱནཱ ཁཱིརཾ ཝིཉྙཱཔེཏྭཱ བྷུཉྫེཡྻ…པེ… ཏཾ པཊིདེསེམཱིཏི.

དདྷིཝིཉྙཱཔནསིཀྑཱཔདཾ

༨. ཡཱ པན བྷིཀྑུནཱི ཨགིལཱནཱ དདྷིཾ ཝིཉྙཱཔེཏྭཱ བྷུཉྫེཡྻ, པཊིདེསེཏབྦཾ ཏཱཡ བྷིཀྑུནིཡཱ ‘‘གཱརཡ྄ཧཾ, ཨཡྻེ, དྷམྨཾ ཨཱཔཛྫིཾ ཨསཔྤཱཡཾ པཱཊིདེསནཱིཡཾ, ཏཾ པཊིདེསེམཱི’’ཏི.

ཨུདྡིཊྛཱ ¶ ཁོ, ཨཡྻཱཡོ, ཨཊྛ པཱཊིདེསནཱིཡཱ དྷམྨཱ. ཏཏྠཱཡྻཱཡོ, པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡྻཱཡོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

པཱཊིདེསནཱིཡཱ ནིཊྛིཏཱ.

སེཁིཡཱ

ཨིམེ ཁོ པནཱཡྻཱཡོ, སེཁིཡཱ དྷམྨཱ ཨུདྡེསཾ ཨཱགཙྪནྟི.

པརིམཎྜལསིཀྑཱཔདཾ

༡. པརིམཎྜལཾ ནིཝཱསེསྶཱམཱིཏི སིཀྑཱ ཀརཎཱིཡཱ.

༢. པརིམཎྜལཾ པཱརུཔིསྶཱམཱིཏི སིཀྑཱ ཀརཎཱིཡཱ.

སུཔྤཊིཙྪནྣསིཀྑཱཔདཾ

༣. སུཔྤཊིཙྪནྣཱ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༤. སུཔྤཊིཙྪནྣཱ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

སུསཾཝུཏསིཀྑཱཔདཾ

༥. སུསཾཝུཏཱ ¶ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༦. སུསཾཝུཏཱ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཨོཀྑིཏྟཙཀྑུསིཀྑཱཔདཾ

༧. ཨོཀྑིཏྟཙཀྑུནཱི ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༨. ཨོཀྑིཏྟཙཀྑུནཱི ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཨུཀྑིཏྟཀསིཀྑཱཔདཾ

༩. ན ཨུཀྑིཏྟཀཱཡ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༡༠. ན ཨུཀྑིཏྟཀཱཡ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

པརིམཎྜལཝགྒོ པཋམོ.

ཨུཛྫགྒྷིཀསིཀྑཱཔདཾ

༡༡. ན ¶ ཨུཛྫགྒྷིཀཱཡ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༡༢. ན ཨུཛྫགྒྷིཀཱཡ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཨུཙྩསདྡསིཀྑཱཔདཾ

༡༣. ཨཔྤསདྡཱ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༡༤. ཨཔྤསདྡཱ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཀཱཡཔྤཙཱལཀསིཀྑཱཔདཾ

༡༥. ན ཀཱཡཔྤཙཱལཀཾ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༡༦. ན ¶ ཀཱཡཔྤཙཱལཀཾ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

བཱཧུཔྤཙཱལཀསིཀྑཱཔདཾ

༡༧. ན བཱཧུཔྤཙཱལཀཾ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༡༨. ན བཱཧུཔྤཙཱལཀཾ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

སཱིསཔྤཙཱལཀསིཀྑཱཔདཾ

༡༩. ན སཱིསཔྤཙཱལཀཾ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༢༠. ན སཱིསཔྤཙཱལཀཾ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཨུཛྫགྒྷིཀཝགྒོ དུཏིཡོ.

ཁམྦྷཀཏསིཀྑཱཔདཾ

༢༡. ན ཁམྦྷཀཏཱ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༢༢. ན ཁམྦྷཀཏཱ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཨོགུཎྛིཏསིཀྑཱཔདཾ

༢༣. ན ཨོགུཎྛིཏཱ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

༢༤. ན ཨོགུཎྛིཏཱ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

ཨུཀྐུཊིཀསིཀྑཱཔདཾ

༢༥. ན ཨུཀྐུཊིཀཱཡ ཨནྟརགྷརེ གམིསྶཱམཱིཏི སིཀྑཱ ཀརཎཱིཡཱ.

པལླཏྠིཀསིཀྑཱཔདཾ

༢༦. ན ¶ པལླཏྠིཀཱཡ ཨནྟརགྷརེ ནིསཱིདིསྶཱམཱིཏི སིཀྑཱ ཀརཎཱིཡཱ.

སཀྐཙྩཔཊིགྒཧཎསིཀྑཱཔདཾ

༢༧. སཀྐཙྩཾ ¶ པིཎྜཔཱཏཾ པཊིགྒཧེསྶཱམཱིཏི སིཀྑཱ ཀརཎཱིཡཱ.

པཏྟསཉྙིནཱིཔཊིགྒཧཎསིཀྑཱཔདཾ

༢༨. པཏྟསཉྙིནཱི པིཎྜཔཱཏཾ པཊིགྒཧེསྶཱམཱིཏི སིཀྑཱ ཀརཎཱིཡཱ.

སམསཱུཔཀཔཊིགྒཧཎསིཀྑཱཔདཾ

༢༩. སམསཱུཔཀཾ པིཎྜཔཱཏཾ པཊིགྒཧེསྶཱམཱིཏི སིཀྑཱ ཀརཎཱིཡཱ.

སམཏིཏྟིཀསིཀྑཱཔདཾ

༣༠. སམཏིཏྟིཀཾ པིཎྜཔཱཏཾ པཊིགྒཧེསྶཱམཱིཏི སིཀྑཱ ཀརཎཱིཡཱ.

ཁམྦྷཀཏཝགྒོ ཏཏིཡོ.

སཀྐཙྩབྷུཉྫནསིཀྑཱཔདཾ

༣༡. སཀྐཙྩཾ པིཎྜཔཱཏཾ བྷུཉྫིསྶཱམཱིཏི སིཀྑཱ ཀརཎཱིཡཱ.

པཏྟསཉྙིནཱིབྷུཉྫནསིཀྑཱཔདཾ

༣༢. པཏྟསཉྙིནཱི པིཎྜཔཱཏཾ བྷུཉྫིསྶཱམཱིཏི སིཀྑཱ ཀརཎཱིཡཱ.

སཔདཱནསིཀྑཱཔདཾ

༣༣. སཔདཱནཾ པིཎྜཔཱཏཾ བྷུཉྫིསྶཱམཱིཏི སིཀྑཱ ཀརཎཱིཡཱ.

སམསཱུཔཀསིཀྑཱཔདཾ

༣༤. སམསཱུཔཀཾ པིཎྜཔཱཏཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ན ཐཱུཔཀཏསིཀྑཱཔདཾ

༣༥. ན ཐཱུཔཀཏོ ཨོམདྡིཏྭཱ པིཎྜཔཱཏཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཨོདནཔྤཊིཙྪཱདནསིཀྑཱཔདཾ

༣༦. ན སཱུཔཾ ཝཱ བྱཉྫནཾ ཝཱ ཨོདནེན པཊིཙྪཱདེསྶཱམི བྷིཡྻོཀམྱཏཾ ཨུཔཱདཱཡཱཏི སིཀྑཱ ཀརཎཱིཡཱ.

སཱུཔོདནཝིཉྙཏྟིསིཀྑཱཔདཾ

༣༧. ན ¶ ¶ སཱུཔཾ ཝཱ ཨོདནཾ ཝཱ ཨགིལཱནཱ ཨཏྟནོ ཨཏྠཱཡ ཝིཉྙཱཔེཏྭཱ བྷུཉྫིསྶཱམཱིཏི སིཀྑཱ ཀརཎཱིཡཱ.

ཨུཛ྄ཛྷཱནསཉྙིནཱིསིཀྑཱཔདཾ

༣༨. ན ཨུཛ྄ཛྷཱནསཉྙིནཱི པརེསཾ པཏྟཾ ཨོལོཀེསྶཱམཱིཏི སིཀྑཱ ཀརཎཱིཡཱ.

ཀབལ༹སིཀྑཱཔདཾ

༣༩. ནཱཏིམཧནྟཾ ཀབལ༹ཾ ཀརིསྶཱམཱིཏི སིཀྑཱ ཀརཎཱིཡཱ.

ཨཱལོཔསིཀྑཱཔདཾ

༤༠. པརིམཎྜལཾ ཨཱལོཔཾ ཀརིསྶཱམཱིཏི སིཀྑཱ ཀརཎཱིཡཱ.

སཀྐཙྩཝགྒོ ཙཏུཏྠོ.

ཨནཱཧཊསིཀྑཱཔདཾ

༤༡. ན ཨནཱཧཊེ ཀབལེ༹ མུཁདྭཱརཾ ཝིཝརིསྶཱམཱིཏི སིཀྑཱ ཀརཎཱིཡཱ.

བྷུཉྫམཱནསིཀྑཱཔདཾ

༤༢. ན བྷུཉྫམཱནཱ སབྦཧཏྠཾ མུཁེ པཀྑིཔིསྶཱམཱིཏི སིཀྑཱ ཀརཎཱིཡཱ.

སཀབལ༹སིཀྑཱཔདཾ

༤༣. ན སཀབལེ༹ན མུཁེན བྱཱཧརིསྶཱམཱིཏི སིཀྑཱ ཀརཎཱིཡཱ.

པིཎྜུཀྑེཔཀསིཀྑཱཔདཾ

༤༤. ན པིཎྜུཀྑེཔཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཀབལཱ༹ཝཙྪེདཀསིཀྑཱཔདཾ

༤༥. ན ཀབལཱ༹ཝཙྪེདཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཨཝགཎྜཀཱརཀསིཀྑཱཔདཾ

༤༦. ན ¶ ཨཝགཎྜཀཱརཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཧཏྠནིདྡྷུནཀསིཀྑཱཔདཾ

༤༧. ན ཧཏྠནིདྡྷུནཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

སིཏྠཱཝཀཱརཀསིཀྑཱཔདཾ

༤༨. ན སིཏྠཱཝཀཱརཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཛིཝ྄ཧཱནིཙྪཱརཀསིཀྑཱཔདཾ

༤༩. ན ¶ ཛིཝ྄ཧཱནིཙྪཱརཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཙཔུཙཔུཀཱརཀསིཀྑཱཔདཾ

༥༠. ན ཙཔུཙཔུཀཱརཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཀབལ༹ཝགྒོ པཉྩམོ.

སུརུསུརུཀཱརཀསིཀྑཱཔདཾ

༥༡. ན སུརུསུརུཀཱརཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཧཏྠནིལླེཧཀསིཀྑཱཔདཾ

༥༢. ན ཧཏྠནིལླེཧཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

པཏྟནིལླེཧཀསིཀྑཱཔདཾ

༥༣. ན པཏྟནིལླེཧཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

ཨོཊྛནིལླེཧཀསིཀྑཱཔདཾ

༥༤. ན ཨོཊྛནིལླེཧཀཾ བྷུཉྫིསྶཱམཱིཏི སིཀྑཱ ཀརཎཱིཡཱ.

སཱམིསསིཀྑཱཔདཾ

༥༥. ན ¶ སཱམིསེན ཧཏྠེན པཱནཱིཡཐཱལཀཾ པཊིགྒཧེསྶཱམཱིཏི སིཀྑཱ ཀརཎཱིཡཱ.

སསིཏྠཀསིཀྑཱཔདཾ

༥༦. ན སསིཏྠཀཾ པཏྟདྷོཝནཾ ཨནྟརགྷརེ ཚཌྜེསྶཱམཱིཏི སིཀྑཱ ཀརཎཱིཡཱ.

ཚཏྟཔཱཎིསིཀྑཱཔདཾ

༥༧. ན ཚཏྟཔཱཎིསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

དཎྜཔཱཎིསིཀྑཱཔདཾ

༥༨. ན དཎྜཔཱཎིསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

སཏྠཔཱཎིསིཀྑཱཔདཾ

༥༩. ན ¶ སཏྠཔཱཎིསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཨཱཝུདྷཔཱཎིསིཀྑཱཔདཾ

༦༠. ན ཨཱཝུདྷཔཱཎིསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

སུརུསུརུཝགྒོ ཚཊྛོ.

པཱདུཀསིཀྑཱཔདཾ

༦༡. ན པཱདུཀཱརུལ༹ྷསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཨུཔཱཧནསིཀྑཱཔདཾ

༦༢. ན ཨུཔཱཧནཱརུལ༹ྷསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཡཱནསིཀྑཱཔདཾ

༦༣. ན ཡཱནགཏསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

སཡནསིཀྑཱཔདཾ

༦༤. ན སཡནགཏསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

པལླཏྠིཀསིཀྑཱཔདཾ

༦༥. ན པལླཏྠིཀཱཡ ནིསིནྣསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཝེཋིཏསིཀྑཱཔདཾ

༦༦. ན ¶ ཝེཋིཏསཱིསསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཨོགུཎྛིཏསིཀྑཱཔདཾ

༦༧. ན ཨོགུཎྛིཏསཱིསསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཚམཱསིཀྑཱཔདཾ

༦༨. ན ¶ ཚམཱཡཾ ནིསཱིདིཏྭཱ ཨཱསནེ ནིསིནྣསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ནཱིཙཱསནསིཀྑཱཔདཾ

༦༩. ན ནཱིཙེ ཨཱསནེ ནིསཱིདིཏྭཱ ཨུཙྩེ ཨཱསནེ ནིསིནྣསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཋིཏཱསིཀྑཱཔདཾ

༧༠. ན ཋིཏཱ ནིསིནྣསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

པཙྪཏོགཙྪནྟཱིསིཀྑཱཔདཾ

༧༡. ན པཙྪཏོ གཙྪནྟཱི པུརཏོ གཙྪནྟསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཨུཔྤཐེནགཙྪནྟཱིསིཀྑཱཔདཾ

༧༢. ན ཨུཔྤཐེན གཙྪནྟཱི པཐེན གཙྪནྟསྶ ཨགིལཱནསྶ དྷམྨཾ དེསེསྶཱམཱིཏི སིཀྑཱ ཀརཎཱིཡཱ.

ཋིཏཱཨུཙྩཱརསིཀྑཱཔདཾ

༧༣. ན ཋིཏཱ ཨགིལཱནཱ ཨུཙྩཱརཾ ཝཱ པསྶཱཝཾ ཝཱ ཀརིསྶཱམཱིཏི སིཀྑཱ ཀརཎཱིཡཱ.

ཧརིཏེཨུཙྩཱརསིཀྑཱཔདཾ

༧༤. ན ¶ ཧརིཏེ ཨགིལཱནཱ ཨུཙྩཱརཾ ཝཱ པསྶཱཝཾ ཝཱ ཁེལ༹ཾ ཝཱ ཀརིསྶཱམཱིཏི སིཀྑཱ ཀརཎཱིཡཱ.

ཨུདཀེཨུཙྩཱརསིཀྑཱཔདཾ

༧༥. ན ཨུདཀེ ཨགིལཱནཱ ཨུཙྩཱརཾ ཝཱ པསྶཱཝཾ ཝཱ ཁེལ༹ཾ ཝཱ ཀརིསྶཱམཱིཏི སིཀྑཱ ཀརཎཱིཡཱ.

པཱདུཀཝགྒོ སཏྟམོ.

ཨུདྡིཊྛཱ ཁོ, ཨཡྻཱཡོ, སེཁིཡཱ དྷམྨཱ. ཏཏྠཱཡྻཱཡོ, པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡྻཱཡོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

སེཁིཡཱ ནིཊྛིཏཱ.

ཨདྷིཀརཎསམཐཱ

ཨིམེ ¶ ཁོ པནཱཡྻཱཡོ, སཏྟ ཨདྷིཀརཎསམཐཱ

དྷམྨཱ ཨུདྡེསཾ ཨཱགཙྪནྟི.

ཨུཔྤནྣུཔྤནྣཱནཾ ཨདྷིཀརཎཱནཾ སམཐཱཡ ཝཱུཔསམཱཡ སམྨུཁཱཝིནཡོ དཱཏབྦོ.

སཏིཝིནཡོ དཱཏབྦོ.

ཨམཱུལ༹ྷཝིནཡོ དཱཏབྦོ.

པཊིཉྙཱཡ ཀཱརེཏབྦཾ.

ཡེབྷུཡྻསིཀཱ.

ཏསྶཔཱཔིཡསིཀཱ.

ཏིཎཝཏྠཱརཀོཏི.

ཨུདྡིཊྛཱ ཁོ ཨཡྻཱཡོ སཏྟ ཨདྷིཀརཎསམཐཱ དྷམྨཱ. ཏཏྠཱཡྻཱཡོ པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ ¶ , ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡྻཱཡོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི.

ཨདྷིཀརཎསམཐཱ ནིཊྛིཏཱ.

ཨུདྡིཊྛཾ ཁོ ཨཡྻཱཡོ ནིདཱནཾ,

ཨུདྡིཊྛཱ ཨཊྛ པཱརཱཛིཀཱ དྷམྨཱ,

ཨུདྡིཊྛཱ སཏྟརས སངྒྷཱདིསེསཱ དྷམྨཱ,

ཨུདྡིཊྛཱ ཏིཾས ནིསྶགྒིཡཱ པཱཙིཏྟིཡཱ དྷམྨཱ,

ཨུདྡིཊྛཱ ཚསཊྛི སཏཱ པཱཙིཏྟིཡཱ དྷམྨཱ,

ཨུདྡིཊྛཱ ཨཊྛ པཱཊིདེསནཱིཡཱ དྷམྨཱ,

ཨུདྡིཊྛཱ སེཁིཡཱ དྷམྨཱ,

ཨུདྡིཊྛཱ སཏྟ ཨདྷིཀརཎསམཐཱ དྷམྨཱ, ཨེཏྟཀཾ ཏསྶ བྷགཝཏོ སུཏྟཱགཏཾ སུཏྟཔརིཡཱཔནྣཾ ཨནྭདྡྷམཱསཾ ཨུདྡེསཾ ཨཱགཙྪཏི, ཏཏྠ སབྦཱཧེཝ སམགྒཱཧི སམྨོདམཱནཱཧི ཨཝིཝདམཱནཱཧི སིཀྑིཏབྦནྟི.

ཝིཏྠཱརུདྡེསོ ཙཏུཏྠོ.

བྷིཀྑུནིཔཱཏིམོཀྑཾ ནིཊྛིཏཾ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཀངྑཱཝིཏརཎཱི-ཨཊྛཀཐཱ

གནྠཱརམྦྷཀཐཱ

བུདྡྷཾ ¶ ¶ ¶ དྷམྨཉྩ སངྒྷཉྩ, ཝིཔྤསནྣེན ཙེཏསཱ;

ཝནྡིཏྭཱ ཝནྡནཱམཱན, པཱུཛཱསཀྐཱརབྷཱཛནཾ.

ཐེརཝཾསཔྤདཱིཔཱནཾ, ཐིརཱནཾ ཝིནཡཀྐམེ;

པུབྦཱཙརིཡསཱིཧཱནཾ, ནམོ ཀཏྭཱ ཀཏཉྫལཱི.

པཱམོཀྑཾ ཨནཝཛྫཱནཾ, དྷམྨཱནཾ ཡཾ མཧེསིནཱ;

མུཁཾ མོཀྑཔྤཝེསཱཡ, པཱཏིམོཀྑཾ པཀཱསིཏཾ.

སཱུརཏེན ¶ ནིཝཱཏེན, སུཙིསལླེཁཝུཏྟིནཱ;

ཝིནཡཱཙཱརཡུཏྟེན, སོཎཏྠེརེན ཡཱཙིཏོ.

ཏཏྠ སཉྫཱཏཀངྑཱནཾ, བྷིཀྑཱུནཾ ཏསྶ ཝཎྞནཾ;

ཀངྑཱཝིཏརཎཏྠཱཡ, པརིཔུཎྞཝིནིཙྪཡཾ.

མཧཱཝིཧཱརཝཱསཱིནཾ, ཝཱཙནཱམགྒནིསྶིཏཾ;

ཝཏྟཡིསྶཱམི ནཱམེན, ཀངྑཱཝིཏརཎིཾ སུབྷནྟི.

ནིདཱནཝཎྞནཱ

ཏཏྠ ¶ པཱཏིམོཀྑནྟི པཨཏིམོཀྑཾ ཨཏིཔམོཀྑཾ ཨཏིསེཊྛཾ ཨཏིཨུཏྟམནྟི ཨཏྠོ. ཨིཏི ཨིམིནཱ ཝཙནཏྠེན ཨེཀཝིདྷམྤི སཱིལགནྠབྷེདཏོ དུཝིདྷཾ ཧོཏི. ཏཐཱ ཧི ‘‘པཱཏིམོཀྑསཾཝརསཾཝུཏོ ཝིཧརཏཱི’’ཏི (མ. ནི. ༡.༦༩; ༣.༧༥; ཝིབྷ. ༥༠༨) ཙ ‘‘ཨཱདིམེཏཾ མུཁམེཏཾ པམུཁམེཏཾ ཀུསལཱནཾ དྷམྨཱནཾ, ཏེན ཝུཙྩཏི པཱཏིམོཀྑ’’ནྟི (མཧཱཝ. ༡༣༥) ཙ ཨཱདཱིསུ སཱིལཾ པཱཏིམོཀྑནྟི ཝུཙྩཏི, ‘‘ཨུབྷཡཱནི ཁོ པནསྶ པཱཏིམོཀྑཱནི ཝིཏྠཱརེན སྭཱགཏཱནི ཧོནྟཱི’’ཏིཨཱདཱིསུ (པཱཙི. ༡༤༧; ཨ. ནི. ༨.༥༢; ༡༠.༣༣) གནྠོ པཱཏིམོཀྑནྟི ཝུཙྩཏི. ཏཏྠ སཱིལཾ ཡོ ནཾ པཱཏི རཀྑཏི, ཏཾ མོཀྑེཏི མོཙཡཏི ཨཱཔཱཡིཀཱདཱིཧི དུཀྑེཧི, ཨཏྟཱནུཝཱདཱདཱིཧི ཝཱ བྷཡེཧཱིཏི པཱཏིམོཀྑཾ. གནྠོ པན ཏསྶ པཱཏིམོཀྑསྶ ཛོཏཀཏྟཱ པཱཏིམོཀྑནྟི ཝུཙྩཏི. ཨཱདིམྷི པན ཝུཏྟོ ཝཙནཏྠོ ཨུབྷིནྣམྤི སཱདྷཱརཎོ ཧོཏི.

ཏཏྠཱཡཾ ཝཎྞནཱ སཱིལཔཱཏིམོཀྑསྶཱཔི ཡུཛྫཏི གནྠཔཱཏིམོཀྑསྶཱཔི, གནྠེ ཧི ཝཎྞིཏེ ཏསྶ ཨཏྠོ ཝཎྞིཏོཝ ཧོཏི. ཏཾ པནེཏཾ གནྠཔཱཏིམོཀྑཾ བྷིཀྑུཔཱཏིམོཀྑཾ བྷིཀྑུནིཔཱཏིམོཀྑནྟི དུཝིདྷཾ ཧོཏི ¶ . ཏཏྠ ‘‘སུཎཱཏུ མེ, བྷནྟེ, སངྒྷོ’’ཏིཨཱདིཀཾ (མཧཱཝ. ༡༣༤) པཉྩཧི ཨུདྡེསཔརིཙྪེདེཧི ཝཝཏྠིཏཾ བྷིཀྑུཔཱཏིམོཀྑཾ, ‘‘སུཎཱཏུ མེ, ཨཡྻེ, སངྒྷོ’’ཏིཨཱདིཀཾ ཙཏཱུཧི ཨུདྡེསཔརིཙྪེདེཧི ཝཝཏྠིཏཾ བྷིཀྑུནིཔཱཏིམོཀྑཾ. ཏཏྠ བྷིཀྑུཔཱཏིམོཀྑེ པཉྩ ཨུདྡེསཱ ནཱམ ནིདཱནུདྡེསོ, པཱརཱཛིཀུདྡེསོ, སངྒྷཱདིསེསུདྡེསོ, ཨནིཡཏུདྡེསོ ¶ , ཝིཏྠཱརུདྡེསོཏི. ཏཏྠ ནིདཱནུདྡེསོ ཏཱཝ ‘‘སུཎཱཏུ མེ, བྷནྟེ, སངྒྷོ…པེ… ཨཱཝིཀཏཱ ཧིསྶ ཕཱསུ ཧོཏི, ཏཏྠཱཡསྨནྟེ པུཙྪཱམི, ཀཙྩིཏྠ པརིསུདྡྷཱ, དུཏིཡམྤི པུཙྪཱམི, ཀཙྩིཏྠ པརིསུདྡྷཱ, ཏཏིཡམྤི པུཙྪཱམི, ཀཙྩིཏྠ པརིསུདྡྷཱ, པརིསུདྡྷེཏྠཱཡསྨནྟོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི ཝཏྭཱ ‘‘ཨུདྡིཊྛཾ ཁོ ཨཱཡསྨནྟོ ནིདཱན’’ནྟིཨཱདིནཱ ནཡེན ཨཝསེསེ སུཏེན སཱཝིཏེ ཨུདྡིཊྛོ ཧོཏི. པཱརཱཛིཀུདྡེསཱདཱིནཾ པརིཙྪེདཱ ནིདཱནསྶ ཨཱདིཏོ པཊྛཱཡ པཱརཱཛིཀཱདཱིནི ཨོསཱཔེཏྭཱ ཡོཛེཏབྦཱ. ཝིཏྠཱརོ ཝིཏྠཱརོཡེཝ ¶ . ‘‘ཨཝསེསཾ སུཏེན སཱཝེཏབྦ’’ནྟི (མཧཱཝ. ༡༥༠; པརི. ༣༢༥) ཝཙནཏོ པན པཱརཱཛིཀུདྡེསཱདཱིསུ ཡསྨིཾ ཝིཔྤཀཏེ ཨནྟརཱཡོ ཨུཔྤཛྫཏི, ཏེན སདྡྷིཾ ཨཝསེསཾ སུཏེན སཱཝེཏབྦཾ. ནིདཱནུདྡེསེ པན ཨནིཊྛིཏེ སུཏེན སཱཝེཏབྦཾ ནཱམ ནཏྠི. བྷིཀྑུནིཔཱཏིམོཀྑེ པན ཨནིཡཏུདྡེསོ པརིཧཱཡཏི, སེསཾ ཝུཏྟནཡམེཝ. ཨེཝམེཏེསཾ པཉྩཧི ཙེཝ ཙཏཱུཧི ཙ ཨུདྡེསཔརིཙྪེདེཧི ཝཝཏྠིཏཱནཾ དྭིནྣམྤི པཱཏིམོཀྑཱནཾ ཨཡཾ ཝཎྞནཱ བྷཝིསྶཏི. ཡསྨཱ པནེཏྠ བྷིཀྑུཔཱཏིམོཀྑཾ པཋམཾ, ཏསྨཱ ཏསྶ ཏཱཝ ཝཎྞནཏྠམིདཾ ཝུཙྩཏི.

‘‘སུཎཱཏུ མེ’’ཏིཨཱདཱིནཾ, པདཱནཾ ཨཏྠནིཙྪཡཾ;

བྷིཀྑཝོ སཱིལསམྤནྣཱ, སིཀྑཱཀཱམཱ སུཎནྟུ མེཏི.

ཨེཏྠ ཧི སུཎཱཏཱུཏིཨིདཾ སཝནཱཎཏྟིཝཙནཾ. མེཏི ཡོ སཱཝེཏི, ཏསྶ ཨཏྟནིདྡེསཝཙནཾ. བྷནྟེཏི སགཱརཝསཔྤཏིསྶཝཙནཾ. སངྒྷོཏི པུགྒལསམཱུཧཝཙནཾ. སབྦམེཝ ཙེཏཾ པཱཏིམོཀྑུདྡེསཀེན པཋམཾ ཝཏྟབྦཝཙནཾ. བྷགཝཏཱ ཧི པཱཏིམོཀྑུདྡེསཾ ཨནུཛཱནནྟེན རཱཛགཧེ ཝུཏྟཾ, ཏསྨཱ ཡོ པཱཏིམོཀྑཾ ཨུདྡིསཏི, ཏེན སཙེ སངྒྷཏྠེརོ ཧོཏི, ‘‘ཨཱཝུསོ’’ཏི ཝཏྟབྦཾ. སཙེ ནཝཀཏརོ ཧོཏི, པཱལི༹ཡཾ (མཧཱཝ. ༡༣༤) ཨཱགཏནཡེནེཝ ‘‘བྷནྟེ’’ཏི ཝཏྟབྦཾ. སངྒྷཏྠེརོ ཝཱ ཧི པཱཏིམོཀྑཾ ཨུདྡིསེཡྻ ‘‘ཐེརཱདྷིཀཾ པཱཏིམོཀྑ’’ནྟིཝཙནཏོ (མཧཱཝ. ༡༥༤), ནཝཀཏརོ ཝཱ ‘‘ཨནུཛཱནཱམི, བྷིཀྑཝེ, ཡོ ཏཏྠ བྷིཀྑུ བྱཏྟོ པཊིབལོ, ཏསྶཱདྷེཡྻཾ པཱཏིམོཀྑ’’ནྟིཝཙནཏོ (མཧཱཝ. ༡༥༥).

‘‘སངྒྷོ’’ཏིཨིམིནཱ པན པདེན ཀིཉྩཱཔི ཨཝིསེསཏོ པུགྒལསམཱུཧོ ཝུཏྟོ, ཨཐ ཁོ སོ དཀྑིཎེཡྻསངྒྷོ, སམྨུཏིསངྒྷོ ཙཱཏི དུཝིདྷོ ཧོཏི. ཏཏྠ དཀྑིཎེཡྻསངྒྷོཏི ཨཊྛ ཨརིཡཔུགྒལསམཱུཧོ ཝུཙྩཏི. སམྨུཏིསངྒྷོཏི ཨཝིསེསེན བྷིཀྑུསམཱུཧོ, སོ ཨིདྷ ཨདྷིཔྤེཏོ. སོ ¶ པནེས ཀམྨཝསེན པཉྩཝིདྷོ (མཧཱཝ. ༣༨༨) ཧོཏི – ཙཏུཝགྒོ པཉྩཝགྒོ དསཝགྒོ ཝཱིསཏིཝགྒོ ཨཏིརེཀཝཱིསཏིཝགྒོཏི. ཏཏྠ ཙཏུཝགྒེན ཋཔེཏྭཱ ཨུཔསམྤདཔཝཱརཎཨབྦྷཱནཱནི སབྦཾ ¶ སངྒྷཀམྨཾ ཀཱཏུཾ ཝཊྚཏི. པཉྩཝགྒེན ཋཔེཏྭཱ མཛ྄ཛྷིམེསུ ཛནཔདེསུ ཨུཔསམྤདཉྩ ཨབྦྷཱནཀམྨཉྩ སབྦཾ སངྒྷཀམྨཾ ཀཱཏུཾ ¶ ཝཊྚཏི. དསཝགྒེན ཨབྦྷཱནཀམྨམཏྟཾ ཋཔེཏྭཱ སབྦཾ སངྒྷཀམྨཾ ཀཱཏུཾ ཝཊྚཏི. ཝཱིསཏིཝགྒེན ན ཀིཉྩི སངྒྷཀམྨཾ ཀཱཏུཾ ན ཝཊྚཏི, ཏཐཱ ཨཏིརེཀཝཱིསཏིཝགྒེན.སོ པན ཙཏུཝགྒཱདིནཱ སངྒྷེན ཀཏྟབྦཾ ཀམྨཾ ཨཱུནཀཏརེན ཀཱཏུཾ ན ཝཊྚཏི, ཨཏིརེཀེན པན ཝཊྚཏཱིཏི དསྶནཏྠཾ ཝུཏྟོ. ཨིམསྨིཾ པནཏྠེ ཙཏུཝགྒཾ ཨུཔཱདཱཡ སབྦོཔི སམྨུཏིསངྒྷོ ཨདྷིཔྤེཏོ.

ཨཛྫུཔོསཐོཏི ཨཛྫ ཨུཔོསཐདིཝསོ, ཨེཏེན ཨནུཔོསཐདིཝསཾ པཊིཀྑིཔཏི. པནྣརསོཏི ཨིམིནཱ ཨཉྙཾ ཨུཔོསཐདིཝསཾ པཊིཀྑིཔཏི. དིཝསཝསེན ཧི ཏཡོ ཨུཔོསཐཱ ཙཱཏུདྡསིཀོ པནྣརསིཀོ སཱམགྒིཨུཔོསཐོཏི, ཨེཝཾ ཏཡོ ཨུཔོསཐཱ ཝུཏྟཱ. ཏཏྠ ཧེམནྟགིམྷཝསྶཱནཱནཾ ཏིཎྞཾ ཨུཏཱུནཾ ཏཏིཡསཏྟམཔཀྑེསུ དྭེ དྭེ ཀཏྭཱ ཚ ཙཱཏུདྡསིཀཱ, ཨཝསེསཱ ཨཊྛཱརས པནྣརསིཀཱཏི ཨེཝཾ ཨེཀསཾཝཙྪརེ ཙཏུཝཱིསཏི ཨུཔོསཐཱ, ཨིདཾ ཏཱཝ པཀཏིཙཱརིཏྟཾ. ‘‘ཨནུཛཱནཱམི, བྷིཀྑཝེ, སཀིཾ པཀྑསྶ ཙཱཏུདྡསེ ཝཱ པནྣརསེ ཝཱ པཱཏིམོཀྑཾ ཨུདྡིསིཏུ’’ནྟི (མཧཱཝ. ༡༣༦) ཝཙནཏོ པན ‘‘ཨཱགནྟུཀེཧི ཨཱཝཱསིཀཱནཾ ཨནུཝཏྟིཏབྦ’’ནྟིཨཱདིཝཙནཏོ (མཧཱཝ. ༡༧༨) ཙ ཏཐཱརཱུཔཔཙྩཡེ སཏི ཨཉྙསྨིམྤི ཙཱཏུདྡསེ ཨུཔོསཐཾ ཀཱཏུཾ ཝཊྚཏི. པུརིམཝསྶཾཝུཊྛཱནཾ པན པུབྦཀཏྟིཀཔུཎྞམཱ ཝཱ, ཏེསཾཡེཝ སཙེ བྷཎྜནཀཱརཀེཧི ཨུཔདྡུཏཱ པཝཱརཎཾ པཙྩུཀྐཌྜྷནྟི, ཨཐ པུབྦཀཏྟིཀམཱསསྶ ཀཱལ༹པཀྑཙཱཏུདྡསོ ཝཱ, པཙྪིམཀཏྟིཀཔུཎྞམཱ ཝཱ, པཙྪིམཝསྶཾཝུཊྛཱནཉྩ པཙྪིམཀཏྟིཀཔུཎྞམཱ ཨེཝཱཏི ཨིམེ ཏཡོ པཝཱརཎཱདིཝསཱཔི ཧོནྟི, ཨིདམྤི པཀཏིཙཱརིཏྟམེཝ. ཏཐཱརཱུཔཔཙྩཡེ པན སཏི དྭིནྣཾ ཀཏྟིཀཔུཎྞམཱནཾ པུརིམེསུ ཙཱཏུདྡསེསུཔི པཝཱརཎཾ ཀཱཏུཾ ཝཊྚཏི. ཡདཱ པན ཀོསམྦཀཀྑནྡྷཀེ (མཧཱཝ. ༤༥༡) ཨཱགཏནཡེན བྷིནྣེ སངྒྷེ ཨོསཱརིཏེ ཏསྨིཾ བྷིཀྑུསྨིཾ སངྒྷོ ཏསྶ ཝཏྠུསྶ ཝཱུཔསམཱཡ སངྒྷསྶ སཱམགྒིཾ ཀརོཏི, ཏདཱ ‘‘ཏཱཝདེཝ ཨུཔོསཐོ ཀཱཏབྦོ, པཱཏིམོཀྑཾ ཨུདྡིསིཏབྦ’’ནྟི (མཧཱཝ. ༤༧༥) ཝཙནཏོ ཋཔེཏྭཱ ཙཱཏུདྡསཔནྣརསེ, ཨཉྙོཔི ཡོ ཀོཙི དིཝསོ སཱམགྒིཨུཔོསཐདིཝསོ ནཱམ ཧོཏི, པུརིམཝསྶཾཝུཊྛཱནཾ པན ཀཏྟིཀམཱསབྦྷནྟརེ ཨཡམེཝ སཱམགྒིཔཝཱརཎཱདིཝསོ ནཱམ ཧོཏི. ཨིཏི ཨིམེསུ ཏཱིསུ དིཝསེསུ ‘‘པནྣརསོ’’ཏིཨིམིནཱ ཨཉྙཾ ཨུཔོསཐདིཝསཾ པཊིཀྑིཔཏི. ཏསྨཱ ཡྭཱཡཾ ‘‘ཨཛྫུཔོསཐོ’’ཏིཝཙནེན ¶ ཨནུཔོསཐདིཝསོ ¶ པཊིཀྑིཏྟོ, ཏསྨིཾ ཨུཔོསཐོ ན ཀཱཏབྦོཡེཝ. ཡོ པནཱཡཾ ཨཉྙོ ཨུཔོསཐདིཝསོ, ཏསྨིཾ ཨུཔོསཐོ ཀཱཏབྦོ. ཀརོནྟེན པན སཙེ ཙཱཏུདྡསིཀོ ཧོཏི, ‘‘ཨཛྫུཔོསཐོ ཙཱཏུདྡསོ’’ཏི ཝཏྟབྦཾ. སཙེ པནྣརསིཀོ ཧོཏི, ‘‘ཨཛྫུཔོསཐོ པནྣརསོ’’ཏི ཝཏྟབྦཾ. སཙེ སཱམགྒིཨུཔོསཐོ ཧོཏི, ‘‘ཨཛྫུཔོསཐོ སཱམགྒཱི’’ཏི ཝཏྟབྦཾ.

ཡདི ¶ སངྒྷསྶ པཏྟཀལླནྟི ཨེཏྠ པཏྟོ ཀཱལོ ཨིམསྶ ཀམྨསྶཱཏི པཏྟཀཱལཾ, པཏྟཀཱལམེཝ པཏྟཀལླཾ. ཏདེཏཾ ཨིདྷ ཙཏཱུཧི ཨངྒེཧི སངྒཧིཏཾ. ཡཐཱཧུ ཨཊྛཀཐཱཙརིཡཱ –

‘‘ཨུཔོསཐོ ཡཱཝཏིཀཱ ཙ བྷིཀྑཱུ ཀམྨཔྤཏྟཱ,

སབྷཱགཱཔཏྟིཡོ ཙ ན ཝིཛྫནྟི;

ཝཛྫནཱིཡཱ ཙ པུགྒལཱ ཏསྨིཾ ན ཧོནྟི,

‘པཏྟཀལླ’ནྟི ཝུཙྩཏཱི’’ཏི. (མཧཱཝ. ཨཊྛ. ༡༦༨);

ཏཏྠ ཨུཔོསཐོཏི ཏཱིསུ ཨུཔོསཐདིཝསེསུ ཨཉྙཏརཨུཔོསཐདིཝསོ. ཏསྨིཉྷི སཏི ཨིདཾ སངྒྷསྶ ཨུཔོསཐཀམྨཾ པཏྟཀལླཾ ནཱམ ཧོཏི, ནཱསཏི. ཡཐཱཧ ‘‘ན ཙ, བྷིཀྑཝེ, ཨནུཔོསཐེ ཨུཔོསཐོ ཀཱཏབྦོ, ཡོ ཀརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༨༣).

ཡཱཝཏིཀཱ ཙ བྷིཀྑཱུ ཀམྨཔྤཏྟཱཏི ཡཏྟཀཱ བྷིཀྑཱུ ཏསྶ ཨུཔོསཐཀམྨསྶ པཏྟཱ ཡུཏྟཱ ཨནུརཱུཔཱ, སབྦནྟིམེན པརིཙྪེདེན ཙཏྟཱརོ པཀཏཏྟཱ, ཏེ ཙ ཁོ ཧཏྠཔཱསཾ ཨཝིཛཧིཏྭཱ ཨེཀསཱིམཱཡཾ ཋིཏཱ.

སཱིམཱ ཙ ནཱམེསཱ བདྡྷསཱིམཱ ཨབདྡྷསཱིམཱཏི དུཝིདྷཱ ཧོཏི. ཏཏྠ ཨེཀཱདས ཝིཔཏྟིསཱིམཱཡོ ཨཏིཀྐམིཏྭཱ ཏིཝིདྷསམྤཏྟིཡུཏྟཱ ནིམིཏྟེན ནིམིཏྟཾ སམྦནྡྷིཏྭཱ སམྨཏཱ སཱིམཱ བདྡྷསཱིམཱ ནཱམ, ‘‘ཨཏིཁུདྡཀཱ, ཨཏིམཧཏཱི, ཁཎྜནིམིཏྟཱ, ཚཱཡཱནིམིཏྟཱ, ཨནིམིཏྟཱ, བཧིསཱིམེ ཋིཏཱ སམྨཏཱ, ནདིཡཱ སམྨཏཱ, སམུདྡེ སམྨཏཱ, ཛཱཏསྶརེ སམྨཏཱ, སཱིམཱཡ སཱིམཾ སམྦྷིནྡནྟེན སམྨཏཱ, སཱིམཱཡ སཱིམཾ ཨཛ྄ཛྷོཏྠརནྟེན སམྨཏཱ’’ཏི ཨིམཱ ཧི ‘‘ཨེཀཱདསཧི ཨཱཀཱརེཧི སཱིམཏོ ཀམྨཱནི ཝིཔཛྫནྟཱི’’ཏི (པརི. ༤༨༦) ཝཙནཏོ ཨེཀཱདས ཝིཔཏྟིསཱིམཱཡོ ནཱམ. ཏཏྠ ཨཏིཁུདྡཀཱ ནཱམ ཡཏྠ ཨེཀཝཱིསཏི བྷིཀྑཱུ ནིསཱིདིཏུཾ ན སཀྐོནྟི ¶ . ཨཏིམཧཏཱི ནཱམ ཡཱ ཨནྟམསོ ཀེསགྒམཏྟེནཱཔི ཏིཡོཛནཾ ཨཏིཀྐམིཏྭཱ སམྨཏཱ. ཁཎྜནིམིཏྟཱ ནཱམ ཨགྷཊིཏནིམིཏྟཱ ཝུཙྩཏི, པུརཏྠིམཱཡ དིསཱཡ ནིམིཏྟཾ ཀིཏྟེཏྭཱ ཨནུཀྐམེནེཝ དཀྑིཎཱཡ པཙྪིམཱཡ ཨུཏྟརཱཡ དིསཱཡ ཀིཏྟེཏྭཱ པུན པུརཏྠིམཱཡ དིསཱཡ པུབྦཀིཏྟིཏཾ ¶ པཊིཀིཏྟེཏྭཱ ཋཔེཏུཾ ཝཊྚཏི, ཨེཝཾ ཨཀྑཎྜནིམིཏྟཱ ཧོཏི. སཙེ པན ཨནུཀྐམེན ཨཱཧརིཏྭཱ ཨུཏྟརཱཡ དིསཱཡ ནིམིཏྟཾ ཀིཏྟེཏྭཱ ཏཏྠེཝ ཋཔེཏི, ཁཎྜནིམིཏྟཱ ནཱམ ཧོཏི. ཨཔརཱཔི ཁཎྜནིམིཏྟཱ ནཱམ ཡཱ ཨནིམིཏྟུཔགཾ ཏཙསཱརརུཀྑཾ ཝཱ ཁཱཎུཀཾ ཝཱ པཾསུཔུཉྫཝཱལུཀཔུཉྫཱནཾ ཝཱ ཨཉྙཏརཾ ཨནྟརཱ ཨེཀཾ ནིམིཏྟཾ ཀཏྭཱ སམྨཏཱ. ཚཱཡཱནིམིཏྟཱ ནཱམ ¶ པབྦཏཙྪཱཡཱདཱིནཾ ཡཾ ཀིཉྩི ཚཱཡཾ ནིམིཏྟཾ ཀཏྭཱ སམྨཏཱ. ཨནིམིཏྟཱ ནཱམ སབྦེན སབྦཾ ནིམིཏྟཱནི ཨཀིཏྟེཏྭཱ སམྨཏཱ. བཧིསཱིམེ ཋིཏསམྨཏཱ ནཱམ ནིམིཏྟཱནི ཀིཏྟེཏྭཱ ནིམིཏྟཱནཾ བཧིཋིཏེན སམྨཏཱ. ནདིཡཱ སམུདྡེ ཛཱཏསྶརེ སམྨཏཱ ནཱམ ཨེཏེསུ ནདིཨཱདཱིསུ སམྨཏཱ. སཱ ཧི ཨེཝཾ སམྨཏཱཔི ‘‘སབྦཱ, བྷིཀྑཝེ, ནདཱི ཨསཱིམཱ, སབྦོ སམུདྡོ ཨསཱིམོ, སབྦོ ཛཱཏསྶརོ ཨསཱིམོ’’ཏི (མཧཱཝ. ༡༤༧) ཝཙནཏོ ཨསམྨཏཱཝ ཧོཏི. སཱིམཱཡ སཱིམཾ སམྦྷིནྡནྟེན སམྨཏཱ ནཱམ ཨཏྟནོ སཱིམཱཡ པརེསཾ སཱིམཾ སམྦྷིནྡནྟེན སམྨཏཱ. སཙེ ཧི པོརཱཎཀསྶ ཝིཧཱརསྶ པུརཏྠིམཱཡ དིསཱཡ ཨམྦོ ཙེཝ ཛམྦཱུ ཙཱཏི དྭེ རུཀྑཱ ཨཉྙམཉྙཾ སཾསཊྛཝིཊཔཱ ཧོནྟི, ཏེསུ ཨམྦསྶ པཙྪིམདིསཱབྷཱགེ ཛམྦཱུ, ཝིཧཱརསཱིམཱ ཙ ཛམྦུཾ ཨནྟོ ཀཏྭཱ ཨམྦཾ ཀིཏྟེཏྭཱ བདྡྷཱ ཧོཏི, ཨཐ པཙྪཱ ཏསྶ ཝིཧཱརསྶ པུརཏྠིམཱཡ དིསཱཡ ཝིཧཱརེ ཀཏེ སཱིམཾ བནྡྷནྟཱ བྷིཀྑཱུ ཏཾ ཨམྦཾ ཨནྟོ ཀཏྭཱ ཛམྦུཾ ཀིཏྟེཏྭཱ བནྡྷནྟི, སཱིམཱཡ སཱིམཾ སམྦྷིནྣཱ ཧོཏི. སཱིམཱཡ སཱིམཾ ཨཛ྄ཛྷོཏྠརནྟེན སམྨཏཱ ནཱམ ཨཏྟནོ སཱིམཱཡ པརེསཾ སཱིམཾ ཨཛ྄ཛྷོཏྠརནྟེན སམྨཏཱ. སཙེ ཧི པརེསཾ བདྡྷསཱིམཾ སཀལཾ ཝཱ ཏསྶཱ པདེསཾ ཝཱ ཨནྟོ ཀཏྭཱ ཨཏྟནོ སཱིམཾ སམྨནྣཏི, སཱིམཱཡ སཱིམཾ ཨཛ྄ཛྷོཏྠརིཏཱ ནཱམ ཧོཏི. ཨིཏི ཨིམཱ ཨེཀཱདས ཝིཔཏྟིསཱིམཱཡོ ཨཏིཀྐམིཏྭཱ སམྨཏཱ.

ཏིཝིདྷསམྤཏྟིཡུཏྟཱཏི ནིམིཏྟསམྤཏྟིཡཱ པརིསཱསམྤཏྟིཡཱ ཀམྨཝཱཙཱསམྤཏྟིཡཱ ཙ ཡུཏྟཱ. ཏཏྠ ནིམིཏྟསམྤཏྟིཡཱ ཡུཏྟཱ ནཱམ པབྦཏནིམིཏྟཾ, པཱསཱཎནིམིཏྟཾ, ཝནནིམིཏྟཾ, རུཀྑནིམིཏྟཾ, མགྒནིམིཏྟཾ, ཝམྨིཀནིམིཏྟཾ, ནདིནིམིཏྟཾ, ཨུདཀནིམིཏྟནྟི ཨེཝཾ ཝུཏྟེསུ ཨཊྛསུ ནིམིཏྟེསུ ཏསྨིཾ ཏསྨིཾ དིསཱབྷཱགེ ཡཐཱལདྡྷཱནི ¶ ནིམིཏྟུཔགཱནི ནིམིཏྟཱནི ‘‘པུརཏྠིམཱཡ དིསཱཡ ཀིཾ ནིམིཏྟཾ, པབྦཏོ, བྷནྟེ, ཨེསོ པབྦཏོ ནིམིཏྟ’’ནྟིཨཱདིནཱ ནཡེན སམྨཱ ཀིཏྟེཏྭཱ སམྨཏཱ. ཏཏྲེཝཾ སངྑེཔཏོ ནིམིཏྟུཔགཏཱ ཝེདིཏབྦཱ – སུདྡྷཔཾསུསུདྡྷཔཱསཱཎཨུབྷཡམིསྶཀཝསེན ཧི ཏིཝིདྷོཔི པབྦཏོ ཧཏྠིཔྤམཱཎཏོ པཊྛཱཡ ཨུདྡྷཾ ནིམིཏྟུཔགོ, ཏཏོ ཨོམཀཏརོ ན ཝཊྚཏི. པཱསཱཎནིམིཏྟེ ཨཡོགུལ༹མྤི པཱསཱཎསངྑམེཝ གཙྪཏི, ཏསྨཱ ཡོ ཀོཙི པཱསཱཎོ ཨུཀྐཾསཝསེན ཧཏྠིཔྤམཱཎཏོ ཨོམཀཏརཾ ཨཱདིཾ ཀཏྭཱ ཧེཊྛིམཔརིཙྪེདེན ¶ དྭཏྟིཾསཔལགུལ༹པིཎྜཔརིམཱཎོ ནིམིཏྟུཔགོ, ན ཏཏོ ཁུདྡཀཏརོ. པིཊྛིཔཱསཱཎོ པན ཨཏིམཧནྟོཔི ཝཊྚཏི. ཝནནིམིཏྟེ ཨནྟོསཱརེཧི ཝཱ ཨནྟོསཱརམིསྶཀེཧི ཝཱ རུཀྑེཧི ཙཏུཔཉྩརུཀྑམཏྟམྤི ཝནཾ ནིམིཏྟུཔགཾ, ཏཏོ ཨཱུནཀཏརཾ ན ཝཊྚཏི. རུཀྑོ ཛཱིཝནྟོཡེཝ ཨནྟོསཱརོ བྷཱུམིཡཾ པཏིཊྛིཏོ, ཨནྟམསོ ཨུབྦེདྷཏོ ཨཊྛངྒུལོ, པརིཎཱཧཏོ སཱུཙིདཎྜཀཔྤམཱཎོཔི ནིམིཏྟུཔགོ, ཏཏོ ཨོམཀཏརོ ན ཝཊྚཏི. མགྒོ ཛངྒྷམགྒོ ཝཱ ཧོཏུ སཀཊམགྒོ ཝཱ, ཡོ ཝིནིཝིཛ྄ཛྷིཏྭཱ དྭེ ཏཱིཎི གཱམཁེཏྟཱནི གཙྪཏི, ཏཱདིསོ ཛངྒྷསཏྠསཀཊསཏྠེཧི ཝལཉྫིཡམཱནོཡེཝ ནིམིཏྟུཔགོ, ཨཝལཉྫིཏོ ¶ ན ཝཊྚཏི. ཝམྨིཀོ པན ཧེཊྛིམཔརིཙྪེདེན ཏཾདིཝསཾཛཱཏོ ཨཊྛངྒུལུབྦེདྷོ གོཝིསཱཎམཏྟོཔི ཝམྨིཀོ ནིམིཏྟུཔགོ, ཏཏོ ཨོམཀཏརོ ན ཝཊྚཏི. ཡཾ པན ཨབདྡྷསཱིམཱལཀྑཎེ ནདིཾ ཝཀྑཱམ, སཱ ནིམིཏྟུཔགཱ, ཨཉྙཱ ན ཝཊྚཏི. ཨུདཀཾ ཡཾ ཨསནྡམཱནཾ ཨཱཝཱཊཔོཀྑརཎཱིཏལཱ༹ཀཛཱཏསྶརལོཎིསམུདྡཱདཱིསུ ཋིཏཾ, ཏཾ ཨཱདིཾ ཀཏྭཱ ཨནྟམསོ ཏངྑཎེཡེཝ པཐཝིཡཾ ཁཎིཏེ ཨཱཝཱཊཀེ གྷཊེཧི ཨཱཧརིཏྭཱ པཱུརིཏམྤི ཡཱཝ ཀམྨཝཱཙཱཔརིཡོསཱནཱ སཎྛམཱནཀཾ ནིམིཏྟུཔགཾ, ཨིཏརཾ སནྡམཱནཾ ཝཱ ཝུཏྟཔརིཙྪེདཀཱལཾ ཨཏིཊྛནྟཾ ཝཱ བྷཱཛནགཏཾ ཝཱ ན ཝཊྚཏཱིཏི.

པརིསཱསམྤཏྟིཡཱ ཡུཏྟཱ ནཱམ སབྦནྟིམེན པརིཙྪེདེན ཙཏཱུཧི བྷིཀྑཱུཧི སནྣིཔཏིཏྭཱ ཡཱཝཏིཀཱ ཏསྨིཾ གཱམཁེཏྟེ བདྡྷསཱིམཾ ཝཱ ནདིསམུདྡཛཱཏསྶརེ ཝཱ ཨནོཀྐམིཏྭཱ ཋིཏཱ བྷིཀྑཱུ, ཏེ སབྦེ ཧཏྠཔཱསེ ཝཱ ཀཏྭཱ ཚནྡཾ ཝཱ ཨཱཧརིཏྭཱ སམྨཏཱ.

ཀམྨཝཱཙཱསམྤཏྟིཡཱ ¶ ཡུཏྟཱ ནཱམ ‘‘སུཎཱཏུ མེ, བྷནྟེ, སངྒྷོ, ཡཱཝཏཱ སམནྟཱ ནིམིཏྟཱ ཀིཏྟིཏཱ’’ཏིཨཱདིནཱ (མཧཱཝ. ༡༣༩) ནཡེན ཝུཏྟཱཡ པརིསུདྡྷཱཡ ཉཏྟིདུཏིཡཀམྨཝཱཙཱཡ སམྨཏཱ. ཨེཝཾ ཨེཀཱདས ཝིཔཏྟིསཱིམཱཡོ ཨཏིཀྐམིཏྭཱ ཏིཝིདྷསམྤཏྟིཡུཏྟཱ ནིམིཏྟེན ནིམིཏྟཾ སམྦནྡྷིཏྭཱ སམྨཏཱ སཱིམཱ ‘‘བདྡྷསཱིམཱ’’ཏི ཝེདིཏབྦཱ. ཁཎྜསཱིམཱ སམཱནསཾཝཱསསཱིམཱ ཨཝིཔྤཝཱསསཱིམཱཏི ཏསྶཱཡེཝ པབྷེདོ.

ཨབདྡྷསཱིམཱ པན གཱམསཱིམཱ, སཏྟབྦྷནྟརསཱིམཱ, ཨུདཀུཀྑེཔསཱིམཱཏི ཏིཝིདྷཱ. ཏཏྠ ཡཱཝཏཱ ཨེཀཾ གཱམཀྑེཏྟཾ, ཨཡཾ གཱམསཱིམཱ ནཱམ. ཨགཱམཀེ ཨརཉྙེ སམནྟཱ སཏྟབྦྷནྟརཱ སཏྟབྦྷནྟརསཱིམཱ ནཱམ. ཏཏྠ ཨགཱམཀཾ ནཱམ ཨརཉྙཾ ཝིཉྫྷཱཊཝིཨཱདཱིསུ ཝཱ སམུདྡམཛ྄ཛྷེ ཝཱ མཙྪབནྡྷཱནཾ ཨགམནཔཐེསུ དཱིཔཀེསུ ལབྦྷཏི. སམནྟཱ སཏྟབྦྷནྟརཱཏི མཛ྄ཛྷེ ཋིཏཱནཾ སབྦདིསཱསུ ¶ སཏྟབྦྷནྟརཱ ཝིནིབྦེདྷེན ཙུདྡས ཧོནྟི. ཏཏྠ ཨེཀཾ ཨབྦྷནྟརཾ ཨཊྛཝཱིསཏིཧཏྠཔྤམཱཎཾ ཧོཏི, ཨཡཉྩ སཱིམཱ པརིསཱཝསེན ཝཌྜྷཏི, ཏསྨཱ སམནྟཱ པརིསཱཔརིཡནྟཏོ པཊྛཱཡ ཨབྦྷནྟརཔརིཙྪེདོ ཀཱཏབྦོ. སཙེ པན དྭེ སངྒྷཱ ཝིསུཾ ཨུཔོསཐཾ ཀརོནྟི, དྭིནྣཾ སཏྟབྦྷནྟརཱནཾ ཨནྟརེ ཨཉྙམེཀཾ སཏྟབྦྷནྟརཾ ཨུཔཙཱརཏྠཱཡ ཋཔེཏབྦཾ. ཡཱ པནེསཱ ‘‘སབྦཱ, བྷིཀྑཝེ, ནདཱི ཨསཱིམཱ’’ཏིཨཱདིནཱ (མཧཱཝ. ༡༤༧) ནཡེན ནདིཨཱདཱིནཾ སཱིམབྷཱཝཾ པཊིཀྑིཔིཏྭཱ པུན ‘‘ནདིཡཱ ཝཱ, བྷིཀྑཝེ, སམུདྡེ ཝཱ ཛཱཏསྶརེ ཝཱ ཡཾ མཛ྄ཛྷིམསྶ པུརིསསྶ སམནྟཱ ཨུདཀུཀྑེཔཱ, ཨཡཾ ཏཏྠ སམཱནསཾཝཱསཱ ཨེཀཱུཔོསཐཱ’’ཏི ཝུཏྟཱ ཨཡཾ ཨུདཀུཀྑེཔསཱིམཱ ནཱམ. ཏཏྠ ཡསྶཱ དྷམྨིཀཱནཾ རཱཛཱུནཾ ཀཱལེ ཨནྭཌྜྷམཱསཾ ཨནུདསཱཧཾ ཨནུཔཉྩཱཧཾ ¶ ཨནཏིཀྐམིཏྭཱ དེཝེ ཝསྶནྟེ ཝལཱཧཀེསུ ཝིགཏམཏྟེསུ སོཏཾ པཙྪིཛྫཏི, ཨཡཾ ནདིསངྑྱཾ ན གཙྪཏི. ཡསྶཱ པན ཨཱིདིསེ སུཝུཊྛིཀཱལེ ཝསྶཱནསྶ ཙཏུམཱསེ སོཏཾ ན པཙྪིཛྫཏི, ཡཏྠ ཏིཏྠེན ཝཱ ཨཏིཏྠེན ཝཱ སིཀྑཱཀརཎཱིཡེ ཨཱགཏལཀྑཎེན ཏིམཎྜལཾ པཊིཙྪཱདེཏྭཱ ཨནྟརཝཱསཀཾ ཨནུཀྑིཔིཏྭཱ ཨུཏྟརནྟིཡཱ བྷིཀྑུནིཡཱ ཨེཀདྭངྒུལམཏྟམྤི ཨནྟརཝཱསཀོ ཏེམིཡཏི, ཨཡཾ སམུདྡཾ ཝཱ པཝིསཏུ ཏལཱ༹ཀཾ ཝཱ, པབྷཝཏོ པཊྛཱཡ ནདཱི ནཱམ. སམུདྡོ པཱཀཊོཡེཝ. ཡོ པན ཀེནཙི ཁཎིཏྭཱ ཨཀཏོ སཡཾཛཱཏོ སོབྦྷོ སམནྟཏོ ཨཱགཏེན ཨུདཀེན ¶ པཱུརིཏོ ཏིཊྛཏི, ཡཏྠ ནདིཡཾ ཝུཏྟཔྤཀཱརེ ཝསྶཀཱལེ ཨུདཀཾ སནྟིཊྛཏི, ཨཡཾ ཛཱཏསྶརོ ནཱམ. ཡོཔི ནདིཾ ཝཱ སམུདྡཾ ཝཱ བྷིནྡིཏྭཱ ནིཀྑནྟཨུདཀེན ཁཏོ སོབྦྷོ ཨེཏཾ ལཀྑཎཾ པཱཔུཎཱཏི, ཨཡམྤི ཛཱཏསྶརོཡེཝ.

ཡཾ མཛ྄ཛྷིམསྶ པུརིསསྶ སམནྟཱ ཨུདཀུཀྑེཔཱཏི ཡཾ ཋཱནཾ ཐཱམམཛ྄ཛྷིམསྶ པུརིསསྶ སམནྟཏོ ཨུདཀུཀྑེཔེན པརིཙྪིནྣཾ, ཏཏྠ ཡཐཱ ཨཀྑདྷུཏྟཱ དཱརུགུལ༹ཾ ཁིཔནྟི, ཨེཝཾ ཨུདཀཾ ཝཱ ཝཱལུཀཾ ཝཱ ཧཏྠེན གཧེཏྭཱ མཛ྄ཛྷིམེན པུརིསེན སབྦཐཱམེན ཁིཔིཏབྦཾ, ཏཏྠ ཡཏྠ ཨེཝཾ ཁིཏྟཾ ཨུདཀཾ ཝཱ ཝཱལུཀཾ ཝཱ པཏཏི, ཨཡཾ ཨུདཀུཀྑེཔོ ནཱམ.

ཨཡཾ ཏཏྠ སམཱནསཾཝཱསཱ ཨེཀཱུཔོསཐཱཏི ཨཡཾ ཏེསུ ནདིཨཱདཱིསུ ཨུདཀུཀྑེཔཔརིཙྪིནྣཱ སཱིམཱ སམཱནསཾཝཱསཱ ཙེཝ ཨེཀཱུཔོསཐཱ ཙ, ཨཡཾ པན ཨེཏེསཾ ནདིཨཱདཱིནཾ ཨནྟོཡེཝ ལབྦྷཏི, ན བཧི. ཏསྨཱ ནདིཡཱ ཝཱ ཛཱཏསྶརེ ཝཱ ཡཏྟཀཾ པདེསཾ པཀཏིཝསྶཀཱལེ ཙཏཱུསུ མཱསེསུ ཨུདཀཾ ཨོཏྠརཏི, སམུདྡེ ཡསྨིཾ པདེསེ པཀཏིཝཱིཙིཡོ ཨོཏྠརིཏྭཱ སཎྛཧནྟི, ཏཏོ པཊྛཱཡ ཀཔྤིཡབྷཱུམི, ཏཏྠ ཋཏྭཱ ཨུཔོསཐཱདིཀམྨཾ ཀཱཏུཾ ཝཊྚཏི ¶ . དུབྦུཊྛིཀཱལེ ཝཱ གིམྷེ ཝཱ ནདིཛཱཏསྶརེསུ སུཀྑེསུཔི སཱ ཨེཝ ཀཔྤིཡབྷཱུམི, སཙེ པན སུཀྑེ ཛཱཏསྶརེ ཝཱཔིཾ ཝཱ ཁཎནྟི, ཝཔྤཾ ཝཱ ཀརོནྟི, ཏཾ ཋཱནཾ གཱམཀྑེཏྟཾ ཧོཏི. ཡཱ པནེསཱ ‘‘ཀཔྤིཡབྷཱུམཱི’’ཏི ཝུཏྟཱ, ཏཏོ བཧི ཨུདཀུཀྑེཔསཱིམཱ ན གཙྪཏི, ཨནྟོཡེཝ གཙྪཏི, ཏསྨཱ ཏེསཾ ཨནྟོ པརིསཱཔརིཡནྟཏོ པཊྛཱཡ སམནྟཱ ཨུདཀུཀྑེཔཔརིཙྪེདོ ཀཱཏབྦོ. སཙེ པན དྭེ སངྒྷཱ ཝིསུཾ ཝིསུཾ ཨུཔོསཐཱདིཀམྨཾ ཀརོནྟི, དྭིནྣཾ ཨུདཀུཀྑེཔཱནཾ ཨནྟརེ ཨཉྙོ ཨེཀོ ཨུདཀུཀྑེཔོ ཨུཔཙཱརཏྠཱཡ ཋཔེཏབྦོ. ཨཡཉྷི སཏྟབྦྷནྟརསཱིམཱ ཙ ཨུདཀུཀྑེཔསཱིམཱ ཙ བྷིཀྑཱུནཾ ཋིཏོཀཱསཏོ པཊྛཱཡ ལབྦྷཏི. པརིཙྪེདབྦྷནྟརེ ཧཏྠཔཱསཾ ཝིཛཧིཏྭཱ ཋིཏོཔི པརིཙྪེདཏོ བཧི ཨཉྙཾ ཏཏྟཀཾཡེཝ པརིཙྪེདཾ ཨནཏིཀྐམིཏྭཱ ཋིཏོཔི ཀམྨཾ ཀོཔེཏི, ཨིདཾ སབྦཨཊྛཀཐཱསུ (མཧཱཝ. ཨཊྛ. ༡༤༧) སནྣིཊྛཱནཾ. ཨེཝཾ ཨབདྡྷསཱིམཱ ཝེདིཏབྦཱ. ཨིཏི ཨིམཾ བདྡྷསཱིམཱབདྡྷསཱིམཱཝསེན དུཝིདྷཾ སཱིམཾ སནྡྷཱཡེཏཾ ཝུཏྟཾ ‘‘ཏེ ཙ ཁོ ཧཏྠཔཱསཾ ཨཝིཛཧིཏྭཱ ཨེཀསཱིམཱཡཾ ¶ ཋིཏཱ’’ཏི. ཏེསུ ཧི ཙཏཱུསུ བྷིཀྑཱུསུ ཨེཀསཱིམཱཡཾ ཧཏྠཔཱསཾ ཨཝིཛཧིཏྭཱ ཋིཏེསྭེཝེཏཾ ¶ སངྒྷསྶ ཨུཔོསཐཀམྨཾ པཏྟཀལླཾ ནཱམ ཧོཏི, ན ཨིཏརཐཱ. ཡཐཱཧ ‘‘ཨནུཛཱནཱམི, བྷིཀྑཝེ, ཙཏུནྣཾ པཱཏིམོཀྑཾ ཨུདྡིསིཏུ’’ནྟི (མཧཱཝ. ༡༦༨).

སབྷཱགཱཔཏྟིཡོ ཙ ན ཝིཛྫནྟཱིཏི ཨེཏྠ ཡཾ སབྦོ སངྒྷོ ཝིཀཱལབྷོཛནཱདིནཱ སབྷཱགཝཏྠུནཱ ལཧུཀཱཔཏྟིཾ ཨཱཔཛྫཏི, ཨེཝརཱུཔཱ ཝཏྠུསབྷཱགཱ ‘‘སབྷཱགཱ’’ཏི ཝུཙྩཏི, ཝིཀཱལབྷོཛནཔཙྩཡཱ ཨཱཔནྣཾ པན ཨཱཔཏྟིསབྷཱགཾ ཨནཏིརིཏྟབྷོཛནཔཙྩཡཱ ཨཱཔནྣསྶ སནྟིཀེ དེསེཏུཾ ཝཊྚཏི. སབྷཱགཱཔཏྟིཡཱ པན སཏི ཏེཧི བྷིཀྑཱུཧི ཨེཀོ བྷིཀྑུ སཱམནྟཱ ཨཱཝཱསཱ སཛྫུཀཾ པཱཧེཏབྦོ ‘‘གཙྪཱཝུསོ, ཏཾ ཨཱཔཏྟིཾ པཊིཀརིཏྭཱ ཨཱགཙྪ, མཡཾ ཏེ སནྟིཀེ ཨཱཔཏྟིཾ པཊིཀརིསྶཱམཱ’’ཏི, ཨེཝཉྩེཏཾ ལབྷེཐ, ཨིཙྩེཏཾ ཀུསལཾ, ནོ ཙེ ལབྷེཐ, བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ ‘‘སུཎཱཏུ མེ, བྷནྟེ, སངྒྷོ, ཨཡཾ སབྦོ སངྒྷོ སབྷཱགཾ ཨཱཔཏྟིཾ ཨཱཔནྣོ, ཡདཱ ཨཉྙཾ བྷིཀྑུཾ སུདྡྷཾ ཨནཱཔཏྟིཀཾ པསྶིསྶཏི, ཏདཱ ཏསྶ སནྟིཀེ ཏཾ ཨཱཔཏྟིཾ པཊིཀརིསྶཏཱི’’ཏི (མཧཱཝ. ༡༧༡) ཝཏྭཱ ཨུཔོསཐོ ཀཱཏབྦོ. སཙེ པན ཝེམཏིཀོ ཧོཏི, ‘‘སུཎཱཏུ མེ, བྷནྟེ, སངྒྷོ, ཨཡཾ སབྦོ སངྒྷོ སབྷཱགཱཡ ཨཱཔཏྟིཡཱ ཝེམཏིཀོ, ཡདཱ ནིབྦེམཏིཀོ བྷཝིསྶཏི, ཏདཱ ཏཾ ཨཱཔཏྟིཾ པཊིཀརིསྶཏཱི’’ཏི ཝཏྭཱ ཨུཔོསཐོ ཀཱཏབྦོ. སཙེ པནེཏྠ ཀོཙི ཏཾ སབྷཱགཾ ཨཱཔཏྟིཾ དེསེཏུཾ ཝཊྚཏཱིཏི མཉྙམཱནོ ཨེཀསྶ སནྟིཀེ དེསེཏི, དེསིཏཱ སུདེསིཏཱཝ. ཨཉྙཾ པན དེསནཱཔཙྩཡཱ དེསཀོ, པཊིགྒཧཎཔཙྩཡཱ པཊིགྒཱཧཀོ ཙཱཏི ཨུབྷོཔི དུཀྐཊཾ ཨཱཔཛྫནྟི, ཏཾ ནཱནཱཝཏྠུཀཾ ཧོཏི, ཏསྨཱ ཨཉྙམཉྙཾ དེསེཏབྦཾ ¶ . ཨེཏྟཱཝཏཱ ཏེ དྭེ ནིརཱཔཏྟིཀཱ ཧོནྟི, ཏེསཾ སནྟིཀེ སེསེཧི སབྷཱགཱཔཏྟིཡོ དེསེཏབྦཱ ཝཱ ཨཱརོཙེཏབྦཱ ཝཱ. སཙེ ཏེ ཨེཝཾ ཨཀཏྭཱ ཨུཔོསཐཾ ཀརོནྟི, ‘‘པཱརིསུདྡྷིཾ ཨཱཡསྨནྟོ ཨཱརོཙེཐཱ’’ཏིཨཱདིནཱ (མཧཱཝ. ༡༣༤) ནཡེན སཱཔཏྟིཀསྶ ཨུཔོསཐཀརཎེ པཉྙཏྟཾ དུཀྐཊཾ ཨཱཔཛྫནྟི. སཙེ སབྦོ སངྒྷོ སབྷཱགཱཔཏྟིཡཱ སཏི ཝུཏྟཝིདྷིཾ ཨཀཏྭཱ ཨུཔོསཐཾ ཀརོཏི, ཝུཏྟནཡེནེཝ སབྦོ སངྒྷོ ཨཱཔཏྟིཾ ཨཱཔཛྫཏི, ཏསྨཱ སབྷཱགཱཔཏྟིཡཱ སཏི སངྒྷསྶ པཏྟཀལླཾ ¶ ནཱམ ན ཧོཏི, ཏེན ཝུཏྟཾ ‘‘སབྷཱགཱཔཏྟིཡོ ཙ ན ཝིཛྫནྟཱི’’ཏི. ཨེཏཱསུ ཧི སབྷཱགཱཔཏྟཱིསུ ཨཝིཛྫམཱནཱསུ ཝིསབྷཱགཱཔཏྟཱིསུ ཝིཛྫམཱནཱསུཔི པཏྟཀལླཾ ཧོཏིཡེཝ.

ཝཛྫནཱིཡཱ ཙ པུགྒལཱ ཏསྨིཾ ན ཧོནྟཱིཏི ‘‘ན, བྷིཀྑཝེ, སགཧཊྛཱཡ པརིསཱཡ པཱཏིམོཀྑཾ ཨུདྡིསིཏབྦཾ, ཡོ ཨུདྡིསེཡྻ ཨཱཔཏྟི དུཀྐཊསྶཱ’’ཏི ¶ (མཧཱཝ. ༡༥༤) ཝཙནཏོ གཧཊྛོ, ‘‘ན, བྷིཀྑཝེ, བྷིཀྑུནིཡཱ ནིསིནྣཔརིསཱཡ པཱཏིམོཀྑཾ ཨུདྡིསིཏབྦ’’ནྟིཨཱདིནཱ (མཧཱཝ. ༡༨༣) ནཡེན ཝུཏྟཱ བྷིཀྑུནཱི, སིཀྑམཱནཱ, སཱམཎེརོ, སཱམཎེརཱི, སིཀྑཱཔཙྩཀྑཱཏཀོ, ཨནྟིམཝཏྠུཨཛ྄ཛྷཱཔནྣཀོ, ཨཱཔཏྟིཡཱ ཨདསྶནེ ཨུཀྑིཏྟཀོ, ཨཱཔཏྟིཡཱ ཨཔྤཊིཀམྨེ ཨུཀྑིཏྟཀོ, པཱཔིཀཱཡ དིཊྛིཡཱ ཨཔྤཊིནིསྶགྒེ ཨུཀྑིཏྟཀོ, པཎྜཀོ, ཐེཡྻསཾཝཱསཀོ, ཏིཏྠིཡཔཀྐནྟཀོ, ཏིརཙྪཱནགཏོ, མཱཏུགྷཱཏཀོ, པིཏུགྷཱཏཀོ ཨརཧནྟགྷཱཏཀོ, བྷིཀྑུནིདཱུསཀོ, སངྒྷབྷེདཀོ, ལོཧིཏུཔྤཱདཀོ, ཨུབྷཏོབྱཉྫནཀོཏི ཨིམེ ཝཱིསཏི ཙཱཏི ཨེཀཝཱིསཏི པུགྒལཱ ཝཛྫནཱིཡཱ ནཱམ, ཏེ ཧཏྠཔཱསཏོ བཧིཀརཎཝསེན ཝཛྫེཏབྦཱ. ཨེཏེསུ ཧི ཏིཝིདྷེ ཨུཀྑིཏྟཀེ སཏི ཨུཔོསཐཾ ཀརོནྟོ སངྒྷོ པཱཙིཏྟིཡཾ ཨཱཔཛྫཏི, སེསེསུ དུཀྐཊཾ. ཨེཏྠ ཙ ཏིརཙྪཱནགཏོཏི ཡསྶ ཨུཔསམྤདཱ པཊིཀྑིཏྟཱ, ཏིཏྠིཡཱ གཧཊྛེནེཝ སངྒཧིཏཱ. ཨེཏེཔི ཧི ཝཛྫནཱིཡཱ ནཱམ. ཨེཝཾ པཏྟཀལླཾ ཨིམེཧི ཙཏཱུཧི ཨངྒེཧི སངྒཧིཏནྟི ཝེདིཏབྦཾ.

སངྒྷོ ཨུཔོསཐཾ ཀརེཡྻཱཏིཨིམིནཱ ཡེ ཏེ ཨཔརེཔི ཏཡོ ཨུཔོསཐཱ སངྒྷེ ཨུཔོསཐོ, གཎེ ཨུཔོསཐོ, པུགྒལེ ཨུཔོསཐོཏི, ཨེཝཾ ཀཱརཀཝསེན ཏཡོ ཨུཔོསཐཱ ཝུཏྟཱ, ཏེསུ ཨིཏརེ དྭེ པཊིཀྑིཔིཏྭཱ སངྒྷེ ཨུཔོསཐམེཝ དཱིཔེཏི. པཱཏིམོཀྑཾ ཨུདྡིསེཡྻཱཏིཨིམིནཱ ཡེ ཏེ ཨཔརེཔི ཏཡོ ཨུཔོསཐཱ སུཏྟུདྡེསོ, པཱརིསུདྡྷིཨུཔོསཐོ, ཨདྷིཊྛཱནཨུཔོསཐོཏི, ཨེཝཾ ཀཏྟབྦཱཀཱརཝསེན ཏཡོ ཨུཔོསཐཱ ཝུཏྟཱ, ཏེསུ ཨིཏརེ དྭེ པཊིཀྑིཔིཏྭཱ སུཏྟུདྡེསམེཝ དཱིཔེཏི. སུཏྟུདྡེསོ ནཱམ པཱཏིམོཀྑུདྡེསོ ཝུཙྩཏི, སོ དུཝིདྷོ ཨོཝཱདཔཱཏིམོཀྑུདྡེསོ ཙ ཨཱཎཱཔཱཏིམོཀྑུདྡེསོ ཙ. ཏཏྠ

‘‘ཁནྟཱི ¶ པརམཾ ཏཔོ ཏིཏིཀྑཱ…པེ….

‘‘སབྦཔཱཔསྶ ཨཀརཎཾ…པེ….

‘‘ཨནཱུཔཝཱདོ ཨནཱུཔགྷཱཏོ’’ཏི. (དཱི. ནི. ༢.༩༠; དྷ. པ. ༡༨༤, ༡༨༣, ༡༨༥)

ཨཱདིནཱ ནཡེན ཝུཏྟཱ ཏིསྶོ གཱཐཱཡོ ཨོཝཱདཔཱཏིམོཀྑཾ ནཱམ, ཏཾ བུདྡྷཱ ཨེཝ ཨུདྡིསནྟི, ན སཱཝཀཱ. ‘‘སུཎཱཏུ ¶ མེ, བྷནྟེ, སངྒྷོ’’ཏིཨཱདིནཱ (མཧཱཝ. ༡༣༤) ནཡེན ཝུཏྟཾ ཨཱཎཱཔཱཏིམོཀྑཾ ནཱམ, ཏཾ སཱཝཀཱ ཨེཝ ཨུདྡིསནྟི, ན བུདྡྷཱ. ཨིདམེཝ ཙ ཨིམསྨིཾ ཨཏྠེ ‘‘པཱཏིམོཀྑ’’ནྟི ཨདྷིཔྤེཏཾ.

ཡེ ¶ པན ཨིཏརེ དྭེ ཨུཔོསཐཱ, ཏེསུ པཱརིསུདྡྷིཨུཔོསཐོ ཏཱཝ ཨཉྙེསཉྩ སནྟིཀེ, ཨཉྙམཉྙཉྩ ཨཱརོཙནཝསེན དུཝིདྷོ. ཏཏྠ ཡྭཱཡཾ ཨཉྙེསཾ སནྟིཀེ ཀརཱིཡཏི, སོཔི པཝཱརིཏཱནཉྩ ཨཔྤཝཱརིཏཱནཉྩ སནྟིཀེ ཀརཎཝསེན དུཝིདྷོ. ཏཏྠ མཧཱཔཝཱརཎཱཡ པཝཱརིཏཱནཾ སནྟིཀེ པཙྪིམིཀཱཡ ཨུཔགཏེན ཝཱ ཨནུཔགཏེན ཝཱ ཚིནྣཝསྶེན ཝཱ ཙཱཏུམཱསིནིཡཾ པན པཝཱརིཏཱནཾ སནྟིཀེ པུརིམིཀཱཡ ཨུཔགཏེན ཝཱ ཨནུཔགཏེན ཝཱ ཚིནྣཝསྶེན ཝཱ ཀཱཡསཱམགྒིཾ དཏྭཱ ‘‘པརིསུདྡྷོ ཨཧཾ, བྷནྟེ, ‘པརིསུདྡྷོ’ཏི མཾ དྷཱརེཐཱ’’ཏི ཏིཀྑཏྟུཾ ཝཏྭཱ ཀཱཏབྦོ, ཋཔེཏྭཱ ཙ པན པཝཱརཎཱདིཝསཾ ཨཉྙསྨིཾ ཀཱལེ ཨཱཝཱསིཀེཧི ཨུདྡིཊྛམཏྟེ པཱཏིམོཀྑེ ཨཝུཊྛིཏཱཡ ཝཱ ཨེཀཙྩཱཡ ཝུཊྛིཏཱཡ ཝཱ སབྦཱཡ ཝཱ ཝུཊྛིཏཱཡ པརིསཱཡ ཡེ ཨཉྙེ སམསམཱ ཝཱ ཐོཀཏརཱ ཝཱ ཨཱགཙྪནྟི, ཏེཧི ཏེསཾ སནྟིཀེ ཝུཏྟནཡེནེཝ པཱརིསུདྡྷི ཨཱརོཙེཏབྦཱ. ཡོ པནཱཡཾ ཨཉྙམཉྙཾ ཨཱརོཙནཝསེན ཀརཱིཡཏི, སོ ཉཏྟིཾ ཋཔེཏྭཱ ཙ ཨཊྛཔེཏྭཱ ཙ ཀརཎཝསེན དུཝིདྷོ. ཏཏྠ ཡསྨིཾ ཨཱཝཱསེ ཏཡོ བྷིཀྑཱུ ཝིཧརནྟི, ཏེསུ ཨུཔོསཐདིཝསེ སནྣིཔཏིཏེསུ ཨེཀེན བྷིཀྑུནཱ ‘‘སུཎནྟུ མེ ཨཱཡསྨནྟཱ ཨཛྫུཔོསཐོ ཙཱཏུདྡསོ’’ཏི ཝཱ ‘‘པནྣརསོ’’ཏི ཝཱ ཝཏྭཱ ‘‘ཡདཱཡསྨནྟཱནཾ པཏྟཀལླཾ མཡཾ ཨཉྙམཉྙཾ པཱརིསུདྡྷིཨུཔོསཐཾ ཀརེཡྻཱམཱ’’ཏི ཉཏྟིཡཱ ཋཔིཏཱཡ ཐེརེན བྷིཀྑུནཱ ཨེཀཾསཾ ཨུཏྟརཱསངྒཾ ཀརིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ‘‘པརིསུདྡྷོ ཨཧཾ, ཨཱཝུསོ, ‘པརིསུདྡྷོ’ཏི མཾ དྷཱརེཐཱ’’ཏི (མཧཱཝ. ༡༦༨) ཏིཀྑཏྟུཾ ཝཏྟབྦཾ. ཨིཏརེཧི ‘‘བྷནྟེ’’ཏི ཝཏྭཱ ཨེཝམེཝ ཝཏྟབྦཾ. ཨེཝཾ ཉཏྟིཾ ཋཔེཏྭཱ ཀཱཏབྦོ. ཡཏྠ པན དྭེ བྷིཀྑཱུ ཝིཧརནྟི, ཏཏྲ ¶ ཉཏྟིཾ ཨཊྛཔེཏྭཱ ཝུཏྟནཡེནེཝ པཱརིསུདྡྷི ཨཱརོཙེཏབྦཱཏི ཨཡཾ པཱརིསུདྡྷིཨུཔོསཐོ.

སཙེ པན ཨེཀོཝ བྷིཀྑུ ཧོཏི, སབྦཾ པུབྦཀརཎཱིཡཾ ཀཏྭཱ ཨཉྙེསཾ ཨནཱགམནཾ ཉཏྭཱ ‘‘ཨཛྫ མེ ཨུཔོསཐོ ཙཱཏུདྡསོ’’ཏི ཝཱ ‘‘པནྣརསོ’’ཏི ཝཱ ཝཏྭཱ ‘‘ཨདྷིཊྛཱམཱི’’ཏི ཝཏྟབྦཾ. ཨཡཾ ཨདྷིཊྛཱནུཔོསཐོཏི ཨེཝཾ ཀཏྟབྦཱཀཱརཝསེན ཏཡོ ཨུཔོསཐཱཏི ཝེདིཏབྦཱ. ཨེཏྟཱཝཏཱ ནཝ ཨུཔོསཐཱ དཱིཔིཏཱ ཧོནྟི. ཏེསུ དིཝསཝསེན པནྣརསིཀོ, ཀཱརཀཝསེན སངྒྷུཔོསཐོ, ཀཏྟབྦཱཀཱརཝསེན སུཏྟུདྡེསོཏི ཨེཝཾ ཏིལཀྑཎསམྤནྣོ ཨུཔོསཐོ ཨིདྷ ནིདྡིཊྛོཏི ཝེདིཏབྦོ. ཏསྨིཾ པཝཏྟམཱནེ ཨུཔོསཐཾ ཨཀཏྭཱ ཏདཧུཔོསཐེ ཨཉྙཾ ཨབྷིཀྑུཀཾ ནཱནཱསཾཝཱསཀེཧི ཝཱ སབྷིཀྑུཀཾ ཨཱཝཱསཾ ཝཱ ཨནཱཝཱསཾ ཝཱ ཝཱསཏྠཱཡ ཨཉྙཏྲ སངྒྷེན, ཨཉྙཏྲ ཨནྟརཱཡཱ གཙྪནྟསྶ དུཀྐཊཾ ཧོཏི.

ཀིཾ སངྒྷསྶ པུབྦཀིཙྩནྟི ‘‘སངྒྷོ ཨུཔོསཐཾ ཀརེཡྻཱ’’ཏི ཨེཝཾ ¶ ཨུཔོསཐཀརཎསམྦནྡྷེནེཝ ཝུཏྟསྶ ¶ སངྒྷསྶ ཨུཔོསཐེ ཀཏྟབྦེ ཡཾ ཏཾ ‘‘ཨནུཛཱནཱམི, བྷིཀྑཝེ, ཨུཔོསཐཱགཱརཾ སམྨཛྫིཏུ’’ནྟིཨཱདིནཱ (མཧཱཝ. ༡༥༩) ནཡེན པཱལི༹ཡཾ ཨཱགཏཾ, ཨཊྛཀཐཱསུ ཙ –

‘‘སམྨཛྫནཱི པདཱིཔོ ཙ, ཨུདཀཾ ཨཱསནེན ཙ;

ཨུཔོསཐསྶ ཨེཏཱནི, ‘པུབྦཀརཎ’ནྟི ཝུཙྩཏི.

‘‘ཚནྡཔཱརིསུདྡྷིཨུཏུཀྑཱནཾ, བྷིཀྑུགཎནཱ ཙ ཨོཝཱདོ;

ཨུཔོསཐསྶ ཨེཏཱནི, ‘པུབྦཀིཙྩ’ནྟི ཝུཙྩཏཱི’’ཏི. (མཧཱཝ. ཨཊྛ. ༡༦༨);

ཨེཝཾ དྭཱིཧི ནཱམེཧི ནཝཝིདྷཾ པུབྦཀིཙྩཾ དསྶིཏཾ, ཀིཾ ཏཾ ཀཏནྟི པུཙྪཏི. ན ཧི ཏཾ ཨཀཏྭཱ ཨུཔོསཐཾ ཀཱཏུཾ ཝཊྚཏི, ཏསྨཱ ཐེརེན ཨཱཎཏྟེན ཨགིལཱནེན བྷིཀྑུནཱ ཨུཔོསཐཱགཱརཾ སམྨཛྫིཏབྦཾ, པཱནཱིཡཾ པརིབྷོཛནཱིཡཾ ཨུཔཊྛཱཔེཏབྦཾ, ཨཱསནཾ པཉྙཱཔེཏབྦཾ, པདཱིཔོ ཀཱཏབྦོ, ཨཀརོནྟོ དུཀྐཊཾ ཨཱཔཛྫཏི, ཐེརེནཱཔི པཏིརཱུཔཾ ཉཏྭཱ ཨཱཎཱཔེཏབྦཾ.

ཚནྡཔཱརིསུདྡྷཱིཏི ཨེཏྠ ཨུཔོསཐཀརཎཏྠཾ སནྣིཔཏིཏེ སངྒྷེ བཧི ཨུཔོསཐཾ ཀཏྭཱ ཨཱགཏེན སནྣིཔཏིཏཊྛཱནཾ གནྟྭཱ ཀཱཡསཱམགྒིཾ ཨདེནྟེན ¶ ཚནྡོ དཱཏབྦོ. ཡོཔི གིལཱནོ ཝཱ ཧོཏི ཀིཙྩཔྤསུཏོ ཝཱ, ཏེནཱཔི པཱརིསུདྡྷིཾ དེནྟེན ཚནྡོཔི དཱཏབྦོ. ཀཐཾ དཱཏབྦོ? ཨེཀསྶ བྷིཀྑུནོ སནྟིཀེ ‘‘ཚནྡཾ དམྨི, ཚནྡཾ མེ ཧར, ཚནྡཾ མེ ཨཱརོཙེཧཱི’’ཏི (མཧཱཝ. ༡༦༥) ཨཡཾ ཨཏྠོ ཀཱཡེན ཝཱ ཝཱཙཱཡ ཝཱ ཨུབྷཡེན ཝཱ ཝིཉྙཱཔེཏབྦོ, ཨེཝཾ དིནྣོ ཧོཏི ཚནྡོ. ཨཀཏཱུཔོསཐེན པན གིལཱནེན ཝཱ ཀིཙྩཔྤསུཏེན ཝཱ པཱརིསུདྡྷི དཱཏབྦཱ. ཀཐཾ དཱཏབྦཱ? ཨེཀསྶ བྷིཀྑུནོ སནྟིཀེ ‘‘པཱརིསུདྡྷིཾ དམྨི, པཱརིསུདྡྷིཾ མེ ཧར, པཱརིསུདྡྷིཾ མེ ཨཱརོཙེཧཱི’’ཏི (མཧཱཝ. ༡༦༤) ཨཡཾ ཨཏྠོ ཀཱཡེན ཝཱ ཝཱཙཱཡ ཝཱ ཨུབྷཡེན ཝཱ ཝིཉྙཱཔེཏབྦོ, ཨེཝཾ དིནྣཱ ཧོཏི པཱརིསུདྡྷི, ཏཾ པན དེནྟེན ཚནྡོཔི དཱཏབྦོ. ཝུཏྟཉྷེཏཾ བྷགཝཏཱ ‘‘ཨནུཛཱནཱམི, བྷིཀྑཝེ, ཏདཧུཔོསཐེ པཱརིསུདྡྷིཾ དེནྟེན ཚནྡམྤི དཱཏུཾ, སནྟི སངྒྷསྶ ཀརཎཱིཡ’’ནྟི (མཧཱཝ. ༡༦༥). ཏཏྠ པཱརིསུདྡྷིདཱནཾ སངྒྷསྶཔི ཨཏྟནོཔི ཨུཔོསཐཀརཎཾ སམྤཱདེཏི, ན ཨཝསེསཾ སངྒྷཀིཙྩཾ. ཚནྡདཱནཾ སངྒྷསྶེཝ ཨུཔོསཐཀརཎཉྩ སེསཀིཙྩཉྩ སམྤཱདེཏི, ཨཏྟནོ པན ཨུཔོསཐོ ཨཀཏོཡེཝ ཧོཏི. ཏསྨཱ པཱརིསུདྡྷིཾ དེནྟེན ཚནྡོཔི དཱཏབྦོ. པུབྦེ ཝུཏྟཾ པན སུདྡྷིཀཙྪནྡཾ ཝཱ ཨིམཾ ཝཱ ཚནྡཔཱརིསུདྡྷིཾ ཨེཀེན བཧཱུནམྤི ཨཱཧརིཏུཾ ཝཊྚཏི. སཙེ པན སོ ཨནྟརཱམགྒེ ཨཉྙཾ བྷིཀྑུཾ པསྶིཏྭཱ ཡེསཾ ཏེན ཚནྡོ ཝཱ པཱརིསུདྡྷི ¶ ཝཱ གཧིཏཱ, ཏེསཉྩ ཨཏྟནོ ཙ ཚནྡཔཱརིསུདྡྷིཾ དེཏི, ཏསྶེཝ སཱ ཨཱགཙྪཏི, ཨིཏརཱ པན བིལཱ༹ལསངྑལིཀཱ ཚནྡཔཱརིསུདྡྷི ནཱམ ཧོཏི, སཱ ནཱགཙྪཏི, ཏསྨཱ སཡམེཝ སནྣིཔཏིཏཊྛཱནཾ གནྟྭཱ ཨཱརོཙེཏབྦཾ. སཙེ པན སཉྩིཙྩ ནཱརོཙེཏི, དུཀྐཊཾ ཨཱཔཛྫཏི. ཚནྡཔཱརིསུདྡྷི པན ཏསྨིཾ ཧཏྠཔཱསཾ ཨུཔགཏམཏྟེཡེཝ ཨཱགཏཱ ཧོཏི.

ཨུཏུཀྑཱནནྟི ¶ ‘‘ཧེམནྟཱདཱིནཾ ཨུཏཱུནཾ ཨེཏྟཀཾ ཨཏིཀྐནྟཾ, ཨེཏྟཀཾ ཨཝསིཊྛ’’ནྟི ཨེཝཾ ཨུཏཱུནཾ ཨཱཙིཀྑནཾ. བྷིཀྑུགཎནཱཏི ‘‘ཨེཏྟཀཱ བྷིཀྑཱུ ཨུཔོསཐགྒེ སནྣིཔཏིཏཱ’’ཏི བྷིཀྑཱུནཾ གཎནཱ. ཨིདམྤི ཧི ཨུབྷཡཾ ཀཏྭཱཝ ཨུཔོསཐོ ཀཱཏབྦོ. ཨོཝཱདོཏི བྷིཀྑུནོཝཱདོ. ན ཧི བྷིཀྑུནཱིཧི ཡཱཙིཏཾ ཨོཝཱདཾ ཨནཱརོཙེཏྭཱ ཨུཔོསཐཾ ཀཱཏུཾ ཝཊྚཏི. བྷིཀྑུནིཡོ ཧི ‘‘སྭེ ཨུཔོསཐོ’’ཏི ཨཱགནྟྭཱ ‘‘ཨཡཾ ཨུཔོསཐོ ཙཱཏུདྡསོ པནྣརསོ’’ཏི པུཙྪིཏྭཱ པུན ཨུཔོསཐདིཝསེ ཨཱགནྟྭཱ ‘‘བྷིཀྑུནིསངྒྷོ, ཨཡྻ, བྷིཀྑུསངྒྷསྶ ¶ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར, ཨཡྻ, བྷིཀྑུནིསངྒྷོ ཨོཝཱདཱུཔསངྐམན’’ནྟི (ཙཱུལ༹ཝ. ༤༡༣) ཨེཝཾ ཨོཝཱདཾ ཡཱཙནྟི. ཏཾ ཋཔེཏྭཱ བཱལགིལཱནགམིཡེ ཨཉྙོ སཙེཔི ཨཱརཉྙིཀོ ཧོཏི, ཨཔཊིགྒཧེཏུཾ ན ལབྷཏི, ཏསྨཱ ཡེན སོ པཊིགྒཧིཏོ, ཏེན བྷིཀྑུནཱ ཨུཔོསཐགྒེ པཱཏིམོཀྑུདྡེསཀོ བྷིཀྑུ ཨེཝཾ ཝཏྟབྦོ ‘‘བྷིཀྑུནིསངྒྷོ, བྷནྟེ, བྷིཀྑུསངྒྷསྶ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར, བྷནྟེ, བྷིཀྑུནིསངྒྷོ ཨོཝཱདཱུཔསངྐམན’’ནྟི. པཱཏིམོཀྑུདྡེསཀེན ཝཏྟབྦཾ ‘‘ཨཏྠི ཀོཙི བྷིཀྑུ བྷིཀྑུནོཝཱདཀོ སམྨཏོ’’ཏི. སཙེ ཧོཏི ཀོཙི བྷིཀྑུ བྷིཀྑུནོཝཱདཀོ སམྨཏོ, ཏཏོ ཏེན སོ ཝཏྟབྦོ ‘‘ཨིཏྠནྣཱམོ བྷིཀྑུ བྷིཀྑུནོཝཱདཀོ སམྨཏོ, ཏཾ བྷིཀྑུནིསངྒྷོ ཨུཔསངྐམཏཱུ’’ཏི (ཙཱུལ༹ཝ. ༤༡༣). སཙེ ནཏྠི, ཏཏོ ཏེན པུཙྪིཏབྦཾ ‘‘ཀོ ཨཱཡསྨཱ ཨུསྶཧཏི བྷིཀྑུནིཡོ ཨོཝདིཏུ’’ནྟི. སཙེ ཀོཙི ཨུསྶཧཏི, སོཔི ཙ ཨཊྛཧི ཨངྒེཧི སམནྣཱགཏོ, ཏཾ ཏཏྠེཝ སམྨནྣིཏྭཱ ཨོཝཱདཔཊིགྒཱཧཀོ ཝཏྟབྦོ ‘‘ཨིཏྠནྣཱམོ བྷིཀྑུ བྷིཀྑུནོཝཱདཀོ སམྨཏོ, ཏཾ བྷིཀྑུནིསངྒྷོ ཨུཔསངྐམཏཱུ’’ཏི (ཙུལ༹ཝ. ༤༡༣). སཙེ པན ཀོཙི ན ཨུསྶཧཏི, པཱཏིམོཀྑུདྡེསཀེན ཝཏྟབྦཾ ‘‘ནཏྠི ཀོཙི བྷིཀྑུ བྷིཀྑུནོཝཱདཀོ སམྨཏོ, པཱསཱདིཀེན བྷིཀྑུནིསངྒྷོ སམྤཱདེཏཱུ’’ཏི. ཨེཏྟཱཝཏཱ ཧི སིཀྑཏྟཡསངྒཧིཏཾ སཀལཾ སཱསནཾ ཨཱརོཙིཏཾ ཧོཏི. ཏེན བྷིཀྑུནཱ ‘‘སཱདྷཱུ’’ཏི སམྤཊིཙྪིཏྭཱ པཱཊིཔདདིཝསེ བྷིཀྑུནཱིནཾ ཨཱརོཙེཏབྦཾ.

བྷིཀྑུནིསངྒྷེནཱཔི ཏཱ བྷིཀྑུནིཡོ པེསེཏབྦཱ, གཙྪཐ, ཨཡྻཱ, པུཙྪཐ ‘‘ཀིཾ, ཨཡྻ, ལབྷཏི བྷིཀྑུནིསངྒྷོ ཨོཝཱདཱུཔསངྐམན’’ནྟི, ཏཱཧི ‘‘སཱདྷུ, ཨཡྻེ’’ཏི སམྤཊིཙྪིཏྭཱ ཏཾ བྷིཀྑུཾ ཨུཔསངྐམིཏྭཱ ཨེཝཾ ཝཏྟབྦཾ ‘‘ཀིཾ, ཨཡྻ, ལབྷཏི བྷིཀྑུནིསངྒྷོ ཨོཝཱདཱུཔསངྐམན’’ནྟི. ཏེན ཝཏྟབྦཾ ¶ ‘‘ནཏྠི ཀོཙི བྷིཀྑུ བྷིཀྑུནོཝཱདཀོ སམྨཏོ, པཱསཱདིཀེན བྷིཀྑུནིསངྒྷོ སམྤཱདེཏཱུ’’ཏི, ཏཱཧི ‘‘སཱདྷུ ཨཡྻཱ’’ཏི སམྤཊིཙྪིཏབྦཾ. ཨིདཉྩ ཨེཀཏོ ཨཱགཏཱནཾ དྭིནྣཾ ཏིཎྞཾ ཝཱ ཝསེན ཝུཏྟཾ. ཏཱསུ པན ཨེཀཱཡ བྷིཀྑུནིཡཱ ཝཏྟབྦཉྩེཝ སམྤཊིཙྪིཏབྦཉྩ, ཨིཏརཱ ཏསྶཱ སཧཱཡིཀཱ. སཙེ པན བྷིཀྑུསངྒྷོ ཝཱ བྷིཀྑུནིསངྒྷོ ཝཱ ན པཱུརཏི ¶ , ཨུབྷཡཏོཔི ཝཱ གཎམཏྟམེཝ པུགྒལམཏྟཾ ཝཱ ཧོཏི.

ཏཏྲཱཡཾ ¶ ཝཙནཀྐམོ – ‘‘བྷིཀྑུནིཡོ, ཨཡྻ, བྷིཀྑུསངྒྷསྶ པཱདེཝནྡནྟི, ཨོཝཱདཱུཔསངྐམནཉྩ ཡཱཙནྟི, ལབྷནྟུ ཀིར, ཨཡྻ, བྷིཀྑུནིཡོ ཨོཝཱདཱུཔསངྐམན’’ནྟི, ‘‘ཨཧཾ, ཨཡྻ, བྷིཀྑུསངྒྷསྶ པཱདེ ཝནྡཱམི, ཨོཝཱདཱུཔསངྐམནཉྩ ཡཱཙཱམི, ལབྷཱམཧཾ, ཨཡྻ, ཨོཝཱདཱུཔསངྐམན’’ནྟི, ‘‘བྷིཀྑུནིསངྒྷོ, ཨཡྻཱ, ཨཡྻཱནཾ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར, ཨཡྻཱ, བྷིཀྑུནིསངྒྷོ ཨོཝཱདཱུཔསངྐམན’’ནྟི. ‘‘བྷིཀྑུནིཡོ, ཨཡྻཱ, ཨཡྻཱནཾ པཱདེ ཝནྡནྟི, ཨོཝཱདཱུཔསངྐམནཉྩ ཡཱཙནྟི, ལབྷནྟུ ཀིར, ཨཡྻཱ, བྷིཀྑུནིཡོ ཨོཝཱདཱུཔསངྐམན’’ནྟི, ‘‘ཨཧཾ, ཨཡྻཱ, ཨཡྻཱནཾ པཱདེ ཝནྡཱམི, ཨོཝཱདཱུཔསངྐམནཉྩ ཡཱཙཱམི, ལབྷཱམཧཾ, ཨཡྻཱ, ཨོཝཱདཱུཔསངྐམན’’ནྟི, ‘‘བྷིཀྑུནིསངྒྷོ, ཨཡྻ, ཨཡྻསྶ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར, ཨཡྻ, བྷིཀྑུནིསངྒྷོ ཨོཝཱདཱུཔསངྐམན’’ནྟི. ‘‘བྷིཀྑུནིཡོ, ཨཡྻ, ཨཡྻསྶ པཱདེ ཝནྡནྟི, ཨོཝཱདཱུཔསངྐམནཉྩ ཡཱཙནྟི, ལབྷནྟུ ཀིར, ཨཡྻ, བྷིཀྑུནིཡོ ཨོཝཱདཱུཔསངྐམན’’ནྟི, ‘‘ཨཧཾ, ཨཡྻ, ཨཡྻསྶ པཱདེ ཝནྡཱམི, ཨོཝཱདཱུཔསངྐམནཉྩ ཡཱཙཱམི, ལབྷཱམཧཾ, ཨཡྻ, ཨོཝཱདཱུཔསངྐམན’’ནྟི. ཏེནཱཔི བྷིཀྑུནཱ ཨུཔོསཐཀཱལེ ཨེཝཾ ཝཏྟབྦཾ ‘‘བྷིཀྑུནིཡོ, བྷནྟེ, བྷིཀྑུསངྒྷསྶ པཱདེ ཝནྡནྟི, ཨོཝཱདཱུཔསངྐམནཉྩ ཡཱཙནྟི, ལབྷནྟུ ཀིར, བྷནྟེ, བྷིཀྑུནིཡོ ཨོཝཱདཱུཔསངྐམན’’ནྟི, ‘‘བྷིཀྑུནཱི, བྷནྟེ, བྷིཀྑུསངྒྷསྶ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར, བྷནྟེ, བྷིཀྑུནཱི ཨོཝཱདཱུཔསངྐམན’’ནྟི. ‘‘བྷིཀྑུནིསངྒྷོ, བྷནྟེ, བྷིཀྑུནིཡོ, བྷནྟེ, བྷིཀྑུནཱི བྷནྟེ ཨཱཡསྨནྟཱནཾ པཱདེ ཝནྡཏི, ཝནྡནྟི, ཝནྡཏི, ཨོཝཱདཱུཔསངྐམནཉྩ ཡཱཙཏི, ཡཱཙནྟི, ཡཱཙཏི, ལབྷཏུ ཀིར, བྷནྟེ, བྷིཀྑུནིསངྒྷོ, ལབྷནྟུ ཀིར, བྷནྟེ, བྷིཀྑུནིཡོ, ལབྷཏུ ཀིར, བྷནྟེ, བྷིཀྑུནཱི ཨོཝཱདཱུཔསངྐམན’’ནྟི. ཨུཔོསཐགྒེཔི པཱཏིམོཀྑུདྡེསཀེན ཝཱ ཉཏྟིཊྛཔཀེན ཝཱ ཨིཏརེན ཝཱ བྷིཀྑུནཱ སཙེ སམྨཏོ བྷིཀྑུ ཨཏྠི, པུརིམནཡེནེཝ ‘‘ཏཾ བྷིཀྑུནིསངྒྷོ, ཏཾ བྷིཀྑུནིཡོ, ཏཾ བྷིཀྑུནཱི ཨུཔསངྐམཏུ, ཨུཔསངྐམནྟུ, ཨུཔསངྐམཏཱུ’’ཏི ཝཏྟབྦཾ. སཙེ ནཏྠི, ‘‘པཱསཱདིཀེན བྷིཀྑུནིསངྒྷོ, བྷིཀྑུནིཡོ, བྷིཀྑུནཱི སམྤཱདེཏུ, སམྤཱདེནྟུ, སམྤཱདེཏཱུ’’ཏི ཝཏྟབྦཾ. ཨོཝཱདཔྤཊིགྒཱཧཀེན པཱཊིཔདེ ཏཾ པཙྩཱཧརིཏྭཱ ཏཐེཝ ཝཏྟབྦཾ, ཨཡམེཏྠ སངྑེཔཝིནིཙྪཡོ. ཨེཝཾ བྷིཀྑུནཱིཧི ཡཱཙིཏཾ ཨོཝཱདཾ ཨཱརོཙེཏྭཱཝ ཨུཔོསཐོ ཀཱཏབྦོ. ཏེན ཝུཏྟཾ –

‘‘ཚནྡཔཱརིསུདྡྷིཨུཏུཀྑཱནཾ ¶ ¶ ¶ , བྷིཀྑུགཎནཱ ཙ ཨོཝཱདོ;

ཨུཔོསཐསྶ ཨེཏཱནི, ‘པུབྦཀིཙྩ’ནྟི ཝུཙྩཏཱི’’ཏི.

པཱརིསུདྡྷིཾ ཨཱཡསྨནྟོ ཨཱརོཙེཐཱཏི ཨཏྟནོ པརིསུདྡྷབྷཱཝཾ ཨཱརོཙེཐ, ‘‘པཱཏིམོཀྑཾ ཨུདྡིསིསྶཱམཱི’’ཏིཨིདཾ པཱརིསུདྡྷིཨཱརོཙནསྶ ཀཱརཎཝཙནཾ. ‘‘ན ཙ, བྷིཀྑཝེ, སཱཔཏྟིཀེན པཱཏིམོཀྑཾ སོཏབྦཾ, ཡོ སུཎེཡྻ ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༣༨༦) ཧི ཝཙནཏོ ཨཔརིསུདྡྷེཧི པཱཏིམོཀྑཾ སོཏུཾ ན ཝཊྚཏི. ཏེན ཝུཏྟཾ – པཱརིསུདྡྷིཾ ཨཱཡསྨནྟོ ཨཱརོཙེཐ, པཱཏིམོཀྑཾ ཨུདྡིསིསྶཱམཱིཏི. ཨེཏྠ སིཡཱ ‘‘སངྒྷོ ཨུཔོསཐཾ ཀརེཡྻ, པཱཏིམོཀྑཾ ཨུདྡིསེཡྻཱ’’ཏི (མཧཱཝ. ༡༣༤) ཝུཏྟཏྟཱ ཨིདྷཱཔི ‘‘པཱཏིམོཀྑཾ ཨུདྡིསིསྶཏཱི’’ཏི ཝཏྟབྦཾ, ཨེཝཉྷི སཏི པུབྦེནཱཔརཾ སནྡྷིཡཏཱིཏི. ཝུཙྩཏེ, ཝཙནམཏྟམེཝེཏཾ ན སནྡྷིཡཏི, ལཀྑཎཏོ པན སམེཏི, སངྒྷསྶ སཱམགྒིཡཱ, གཎསྶ སཱམགྒིཡཱ, པུགྒལསྶ ཨུདྡེསཱ སངྒྷསྶ ཨུདྡིཊྛཾ ཧོཏི པཱཏིམོཀྑནྟི ཨིདཉྷེཏྠ ལཀྑཎཾ, ཏསྨཱ ‘‘པཱཏིམོཀྑཾ ཨུདྡིསིསྶཱམཱི’’ཏི ཨིདམེཝེཏྠ ཝཏྟབྦཾ.

ཏཾ སབྦེཝ སནྟཱ སཱདྷུཀཾ སུཎོམ མནསི ཀརོམཱཏི ནྟི པཱཏིམོཀྑཾ. སབྦེཝ སནྟཱཏི ཡཱཝཏིཀཱ ཏསྶཱ པརིསཱཡ ཐེརཱ ཙ ནཝཱ ཙ མཛ྄ཛྷིམཱ ཙ. སཱདྷུཀཾ སུཎོམཱཏི ཨཊྛིཾ ཀཏྭཱ མནསི ཀརིཏྭཱ སོཏདྭཱརཝསེན སབྦཙེཏསཱ སམནྣཱཧརཱམ. མནསི ཀརོམཱཏི ཨེཀགྒཙིཏྟཱ ཧུཏྭཱ ཙིཏྟེ ཋཔེཡྻཱམ. ཨེཏྠ ཙ ཀིཉྩཱཔི ‘‘པཱཏིམོཀྑཾ ཨུདྡིསིསྶཱམཱི’’ཏི ཝུཏྟཏྟཱ ‘‘སུཎོཐ མནསི ཀརོཐཱ’’ཏི ཝཏྟུཾ ཡུཏྟཾ ཝིཡ དིསྶཏི, ‘‘སངྒྷོ ཨུཔོསཐཾ ཀརེཡྻཱ’’ཏིཨིམིནཱ པན ན སམེཏི. སམགྒསྶ ཧི སངྒྷསྶེཏཾ ཨུཔོསཐཀརཎཾ, པཱཏིམོཀྑུདྡེསཀོ ཙ སངྒྷཔརིཡཱཔནྣོཝ, ཨིཙྩསྶ སངྒྷཔརིཡཱཔནྣཏྟཱ ‘‘སུཎོམ མནསི ཀརོམཱ’’ཏི ཨིདམེཝ ཝཏྟུཾ ཡུཏྟཾ.

ཨིདཱནི ཡཾ ཝུཏྟཾ ‘‘པཱརིསུདྡྷིཾ ཨཱཡསྨནྟོ ཨཱརོཙེཐཱ’’ཏི, ཏཏྠ ཡཐཱ པཱརིསུདྡྷིཨཱརོཙནཾ ཧོཏི, ཏཾ དསྶེཏུཾ ཡསྶ སིཡཱ ཨཱཔཏྟི, སོ ཨཱཝིཀརེཡྻཱཏི ཨཱཧ. ཏཏྠ ཡསྶ སིཡཱཏི ཡསྶ ཚནྣཾ ཨཱཀཱརཱནཾ ཨཉྙཏརེན ཨཱཔནྣཱཔཏྟི བྷཝེཡྻ. ཨཱཔཏྟིཉྷི ¶ ཨཱཔཛྫནྟོ ཨལཛྫིཏཱ, ཨཉྙཱཎཏཱ, ཀུཀྐུཙྩཔྤཀཏཏཱ, ཨཀཔྤིཡེ ཀཔྤིཡསཉྙིཏཱ, ཀཔྤིཡེ ཨཀཔྤིཡསཉྙིཏཱ, སཏིསམྨོསཱཏི ཨིམེཧི ཚཧཱཀཱརེཧི (པརི. ༢༩༥) ཨཱཔཛྫཏི.

ཀཐཾ ཨལཛྫིཏཱཡ ཨཱཔཛྫཏི? ཨཀཔྤིཡབྷཱཝཾ ཛཱནནྟོཡེཝ མདྡིཏྭཱ ཝཱིཏིཀྐམཾ ཀརོཏི.

ཝུཏྟམྤི ¶ ཙེཏཾ –

‘‘སཉྩིཙྩ ཨཱཔཏྟིཾ ཨཱཔཛྫཏི, ཨཱཔཏྟིཾ པརིགཱུཧཏི;

ཨགཏིགམནཉྩ གཙྪཏི, ཨེདིསོ ཝུཙྩཏི ཨལཛྫིཔུགྒལོ’’ཏི. (པརི. ༣༥༩);

ཀཐཾ ཨཉྙཱཎཏཱཡ ཨཱཔཛྫཏི? ཨཉྙཱཎཔུགྒལོ ཧི མནྡོ མོམཱུཧོ ཀཏྟབྦཱཀཏྟབྦཾ ཨཛཱནནྟོ ཨཀཏྟབྦཾ ཀརོཏི, ཀཏྟབྦཾ ཝིརཱདྷེཏི, ཨེཝཾ ཨཉྙཱཎཏཱཡ ཨཱཔཛྫཏི.

ཀཐཾ ཀུཀྐུཙྩཔྤཀཏཏཱཡ ཨཱཔཛྫཏི? ཀཔྤིཡཱཀཔྤིཡཾ ¶ ནིསྶཱཡ ཀུཀྐུཙྩེ ཨུཔྤནྣེ ཝིནཡདྷརཾ པུཙྪིཏྭཱ ཀཔྤིཡཾ ཙེ, ཀཏྟབྦཾ སིཡཱ, ཨཀཔྤིཡཾ ཙེ, ན ཀཏྟབྦཾ, ཨཡཾ པན ‘‘ཝཊྚཏཱི’’ཏི མདྡིཏྭཱ ཝཱིཏིཀྐམཏིཡེཝ, ཨེཝཾ ཀུཀྐུཙྩཔྤཀཏཏཱཡ ཨཱཔཛྫཏི.

ཀཐཾ ཨཀཔྤིཡེ ཀཔྤིཡསཉྙིཏཱཡ ཨཱཔཛྫཏི? ཨཙྪམཾསཾ ‘‘སཱུཀརམཾས’’ནྟི ཁཱདཏི, ཝིཀཱལེ ཀཱལསཉྙཱཡ བྷུཉྫཏི, ཨེཝཾ ཨཀཔྤིཡེ ཀཔྤིཡསཉྙིཏཱཡ ཨཱཔཛྫཏི.

ཀཐཾ ཀཔྤིཡེ ཨཀཔྤིཡསཉྙིཏཱཡ ཨཱཔཛྫཏི? སཱུཀརམཾསཾ ‘‘ཨཙྪམཾས’’ནྟི ཁཱདཏི, ཀཱལེ ཝིཀཱལསཉྙཱཡ བྷུཉྫཏི, ཨེཝཾ ཀཔྤིཡེ ཨཀཔྤིཡསཉྙིཏཱཡ ཨཱཔཛྫཏི.

ཀཐཾ སཏིསམྨོསཱ ཨཱཔཛྫཏི? སཧསེཡྻཙཱིཝརཝིཔྤཝཱསཱདཱིནི སཏིསམྨོསཱ ཨཱཔཛྫཏི, ཨིཏི ཨིམེསཾ ཚནྣཾ ཨཱཀཱརཱནཾ ཨཉྙཏརེན ཨཱཀཱརེན ཨཱཔནྣཱ ཡསྶ སིཡཱ སཏྟནྣཾ ཨཱཔཏྟིཀྑནྡྷཱནཾ ཨཉྙཏརཱ ཨཱཔཏྟི ཐེརསྶ ཝཱ ནཝསྶ ཝཱ མཛ྄ཛྷིམསྶ ཝཱཏི ཨཏྠོ.

སོ ཨཱཝིཀརེཡྻཱཏི སོ ཏཾ ཨཱཔཏྟིཾ དེསེཏུ ཝཱ པཀཱསེཏུ ཝཱཏི ཝུཏྟཾ ཧོཏི. ཨསནྟིཡཱ ཨཱཔཏྟིཡཱཏི ཡསྶ པན ཨེཝཾ ཨནཱཔནྣཱ ཝཱ ཨཱཔཏྟིཾ ¶ ཨཱཔཛྫིཏྭཱ ཙ པན ཝུཊྛིཏཱ ཝཱ དེསིཏཱ ཝཱ ཨཱརོཙིཏཱ ཝཱ ཨཱཔཏྟི, ཏསྶ སཱ ཨཱཔཏྟི ཨསནྟཱི ནཱམ ཧོཏི, ཨེཝཾ ཨསནྟིཡཱ ཨཱཔཏྟིཡཱ ཏུཎྷཱི བྷཝིཏབྦཾ. ཏུཎྷཱིབྷཱཝེན ཁོ པནཱཡསྨནྟེ ‘‘པརིསུདྡྷཱ’’ཏི ཝེདིསྶཱམཱིཏི ཏུཎྷཱིབྷཱཝེནཱཔི ཧི ཀཱརཎེན ཨཧཾ ཨཱཡསྨནྟེ ‘‘པརིསུདྡྷཱ’’ཨིཙྩེཝ ཛཱནིསྶཱམཱིཏི. ཡཐཱ ཁོ པན པཙྩེཀཔུཊྛསྶ ཝེཡྻཱཀརཎཾ ཧོཏཱིཏི ཡཐཱ ཨེཀེནེཀོ པུཊྛོ བྱཱཀརེཡྻ, ཡཐཱ ཨེཀེནེཀོ པཙྩེཀཔུཊྛོ ‘‘མཾ ཨེས པུཙྪཏཱི’’ཏི ཉཏྭཱ བྱཱཀརེཡྻཱཏི ཝུཏྟཾ ཧོཏི.

ཨེཝམེཝཾ ¶ ཨེཝརཱུཔཱཡ པརིསཱཡ ཡཱཝཏཏིཡཾ ཨནུསཱཝིཏཾ ཧོཏཱིཏི ཨེཏྠ ཨེཀཙྩེ ཏཱཝ ཨཱཙརིཡཱ ཨེཝཾ ཝདནྟི ‘‘ཨེཝམེཝཾ ཨིམིསྶཱཡ བྷིཀྑུཔརིསཱཡ ཡདེཏཾ ‘ཡསྶ སིཡཱ ཨཱཔཏྟི, སོ ཨཱཝིཀརེཡྻ, ཨསནྟིཡཱ ཨཱཔཏྟིཡཱ ཏུཎྷཱི བྷཝིཏབྦཾ, ཏུཎྷཱིབྷཱཝེན ཁོ པནཱཡསྨནྟེ པརིསུདྡྷཱཏི ཝེདིསྶཱམཱི’ཏི ཏིཀྑཏྟུཾ ཨནུསཱཝིཏཾ, ཏཾ ཨེཀམེཀེན ‘མཾ ཨེས པུཙྪཏཱི’ཏི ཨེཝཾ ཛཱནིཏབྦཾ ཧོཏཱིཏི ཨཏྠོ’’ཏི. ཏཾ ན ཡུཛྫཏི, ཀསྨཱ? ཨཏྠབྱཉྫནབྷེདཏོ. ཨནུསྶཱཝནཉྷི ནཱམ ཨཏྠཏོ ཙ བྱཉྫནཏོ ཙ ཨབྷིནྣཾ ཧོཏི ‘‘དུཏིཡམྤི ཨེཏམཏྠཾ ཝདཱམཱི’’ཏིཨཱདཱིསུ (མཧཱཝ. ༧༢; ཙཱུལ༹ཝ. ༣) ཝིཡ, ‘‘ཡསྶ སིཡཱ’’ཏིཨཱདིཝཙནཏྟཡཾ པན ཨཏྠཏོཔི བྱཉྫནཏོཔི བྷིནྣཾ, ཏེནསྶ ཨནུསྶཱཝནཏྟཡཾ ན ཡུཛྫཏི. ཡདི ཙེཏཾ ཡཱཝཏཏིཡཱནུསྶཱཝནཾ སིཡཱ, ནིདཱནུདྡེསེ ཨནིཊྛིཏེཔི ཨཱཔཏྟི སིཡཱ. ན ཙ ཡུཏྟཾ ཨནཱཔཏྟིཀྑེཏྟེ ཨཱཔཏྟིཾ ཨཱཔཛྫིཏུཾ.

ཨཔརེ ‘‘ཨནུསཱཝིཏ’’ནྟིཔདསྶ ཨནུསཱཝེཏབྦནྟི ཨཏྠཾ ཝིཀཔྤེཏྭཱ ‘‘ཡཱཝཏཏིཡ’’ནྟིཨིདཾ ཨུཔརི ཨུདྡེསཱཝསཱནེ ‘‘ཀཙྩིཏྠ པརིསུདྡྷཱ…པེ… ཏཏིཡམྤི པུཙྪཱམཱི’’ཏི ཨེཏཾ སནྡྷཱཡ ཝུཏྟནྟི ཨཱཧུ. ཏམྤི ན ཡུཛྫཏི, ཀསྨཱ? ཨཏྠཡུཏྟཱིནཾ ཨབྷཱཝཏོ. ཨིདཉྷི པདཾ ཀེཙི ‘‘ཨནུསཱཝེཏ’’ནྟི སཛ྄ཛྷཱཡནྟི, ཀེཙི ‘‘ཨནུསཱཝེཏ’’ནྟི, ཏཾ ཨུབྷཡཾ ཝཱཔི ཨཏཱིཏཀཱལམེཝ དཱིཔེཏི, ན ཨནཱགཏཾ. ཡདི ཙསྶ ཨཡཾ ཨཏྠོ སིཡཱ, ‘‘ཨནུསཱཝིཏཾ ཧེསྶཏཱི’’ཏི ཝདེཡྻ ¶ , ཨེཝཾ ཏཱཝ ཨཏྠཱབྷཱཝཏོ ན ཡུཛྫཏི. ཡདི ཙེཏཾ ཨུདྡེསཱཝསཱནེ ཝཙནཾ སནྡྷཱཡ ཝུཏྟཾ སིཡཱ, ‘‘ན ཨཱཝིཀརིསྶཱམཱི’’ཏི ཙིཏྟཾ ཨུཔྤཱདེནྟསྶ ནིདཱནེ སམཏྟེཔི ཝུཏྟམུསཱཝཱདོ ན སིཡཱ, ཀསྨཱ? ‘‘ཡཱཝཏཏིཡཾ ཨནུསྶཱཝིཡམཱནེ’’ཏིཝཙནཏོ (མཧཱཝ. ༡༣༤) ‘‘ཡཱཝཏཏིཡ’’ནྟི ཨིདཾ ཝཙནམེཝ ¶ ནིརཏྠཀཾ སིཡཱ, ཀསྨཱ? ནིདཱནུདྡེསེ ཡཱཝཏཏིཡཱནུསྶཱཝནསྶ ཨབྷཱཝཏོཏི ཨེཝཾ ཡུཏྟིཨབྷཱཝཏོ ཏམྤི ན ཡུཛྫཏི. ‘‘ཡཱཝཏཏིཡཾ ཨནུསཱཝིཏཾ ཧོཏཱི’’ཏི ཨིདཾ པན ལཀྑཎཝཙནམཏྟཾ, ཏེན ཨིམམཏྠཾ དསྶེཏི – ཨིདཾ པཱཏིམོཀྑཾ ནཱམ ཡཱཝཏཏིཡཾ ཨནུསྶཱཝིཡཏི, ཏསྨིཾ ཡཱཝཏཏིཡཾ ཨནུསྶཱཝིཡམཱནེ ཡོ སརམཱནོ སནྟིཾ ཨཱཔཏྟིཾ ནཱཝིཀརོཏི, ཏསྶ ཡཱཝཏཏིཡཱནུསྶཱཝནཱཝསཱནེ སམྤཛཱནམུསཱཝཱདོ ཧོཏཱིཏི.

ཏདེཏཾ ཡཐཱ ཨནུསཱཝིཏཾ ཡཱཝཏཏིཡཾ ཨནུསཱཝིཏཾ ནཱམ ཧོཏི, ཏཾ དསྶེཏུཾ ཏཏྠཱཡསྨནྟེ པུཙྪཱམཱིཏིཨཱདི ཝུཏྟཾ. ཏཾ པནེཏཾ པཱརཱཛིཀཱདཱིནཾ ཨཝསཱནེ དིསྶཏི, ན ནིདཱནཱཝསཱནེ. ཀིཉྩཱཔི ན དིསྶཏི, ཨཐ ཁོ ཨུདྡེསཀཱལེ ‘‘ཨཱཝིཀཏཱ ཧིསྶ ཕཱསུ ཧོཏཱི’’ཏི ཝཏྭཱ ‘‘ཨུདྡིཊྛཾ ཁོ ཨཱཡསྨནྟོ ནིདཱནཾ, ཏཏྠཱཡསྨནྟེ པུཙྪཱམཱི’’ཏིཨཱདིནཱ ནཡེན ཝཏྟབྦམེཝ. ཨེཝཉྷི ནིདཱནཾ སུཨུདྡིཊྛཾ ཧོཏི, ཨཉྙཐཱ དུཨུདྡིཊྛཾ. ཨིམམེཝ ཙ ཨཏྠཾ སནྡྷཱཡ ཨུཔོསཐཀྑནྡྷཀེ ཝུཏྟཾ ‘‘ཡཱཝཏཏིཡཾ ཨནུསཱཝིཏཾ ¶ ཧོཏཱིཏི སཀིམྤི ཨནུསཱཝིཏཾ ཧོཏི, དུཏིཡམྤི ཨནུསཱཝིཏཾ ཧོཏི, ཏཏིཡམྤི ཨནུསཱཝིཏཾ ཧོཏཱི’’ཏི (མཧཱཝ. ༡༣༤). ཨཡམེཏྠ ཨཱཙརིཡཔརམྤརཱབྷཏོ ཝིནིཙྪཡོ.

ཡོ པན བྷིཀྑུ…པེ… སམྤཛཱནམུསཱཝཱདསྶ ཧོཏཱིཏི སམྤཛཱནམུསཱཝཱདོ ཨསྶ ཧོཏི, ཏེནསྶ དུཀྐཊཱཔཏྟི ཧོཏི, སཱ ཙ ཁོ པན ན མུསཱཝཱདལཀྑཎེན, ‘‘སམྤཛཱནམུསཱཝཱདེ ཀིཾ ཧོཏི, དུཀྐཊཾ ཧོཏཱི’’ཏི (མཧཱཝ. ༡༣༥) ཨིམིནཱ པན བྷགཝཏོ ཝཙནེན ཝཙཱིདྭཱརེ ཨཀིརིཡསམུཊྛཱནཱཔཏྟི ཧོཏཱིཏི ཝེདིཏབྦཱ.

ཝུཏྟམྤི ཙེཏཾ –

‘‘ཨནཱལཔནྟོ མནུཛེན ཀེནཙི,

ཝཱཙཱགིརཾ ནོ ཙ པརེ བྷཎེཡྻ;

ཨཱཔཛྫེཡྻ ཝཱཙསིཀཾ, ན ཀཱཡིཀཾ,

པཉྷཱམེསཱ ཀུསལེཧི ཙིནྟིཏཱ’’ཏི. (པརི. ༤༧༩);

ཨནྟརཱཡིཀོཏི ¶ ཝིཔྤཊིསཱརཝཏྠུཏཱཡ པཱམོཛྫཱདིསམྦྷཝཾ ནིཝཱརེཏྭཱ པཋམཛ྄ཛྷཱནཱདཱིནཾ ཨདྷིགམཱཡ ཨནྟརཱཡཾ ཀརོཏི. ཏསྨཱཏི ཡསྨཱ ཨཡཾ ཨནཱཝིཀརཎསངྑཱཏོ སམྤཛཱནམུསཱཝཱདོ ཨནྟརཱཡིཀོ ཧོཏི, ཏསྨཱ. སརམཱནེནཱཏི ཨཏྟནི སནྟིཾ ཨཱཔཏྟིཾ ཛཱནནྟེན. ཝིསུདྡྷཱཔེཀྑེནཱཏི ཝུཊྛཱཏུཀཱམེན ཝིསུཛ྄ཛྷིཏུཀཱམེན. སནྟཱི ཨཱཔཏྟཱིཏི ཨཱཔཛྫིཏྭཱ ཨཝུཊྛིཏཱ ཨཱཔཏྟི. ཨཱཝིཀཱཏབྦཱཏི སངྒྷམཛ྄ཛྷེ ཝཱ གཎམཛ྄ཛྷེ ཝཱ ཨེཀཔུགྒལེ ཝཱ པཀཱསེཏབྦཱ, ཨནྟམསོ ཨནནྟརསྶཱཔི བྷིཀྑུནོ ‘‘ཨཧཾ, ཨཱཝུསོ, ཨིཏྠནྣཱམཾ ཨཱཔཏྟིཾ ཨཱཔནྣོ, ཨིཏོ ཝུཊྛཧིཏྭཱ ¶ ཏཾ ཨཱཔཏྟིཾ པཊིཀརིསྶཱམཱི’’ཏི (མཧཱཝ. ༡༧༠) ཝཏྟབྦཾ. སཙེཔི ཝེམཏིཀོ ཧོཏི, ‘‘ཨཧཾ, ཨཱཝུསོ, ཨིཏྠནྣཱམཱཡ ཨཱཔཏྟིཡཱ ཝེམཏིཀོ, ཡདཱ ནིབྦེམཏིཀོ བྷཝིསྶཱམི, ཏདཱ ཏཾ ཨཱཔཏྟིཾ པཊིཀརིསྶཱམཱི’’ཏི (མཧཱཝ. ༡༦༩) ཝཏྟབྦཾ. ཨཱཝིཀཏཱ ཧིསྶ ཕཱསུ ཧོཏཱིཏིཨེཏྠ ཨཱཝིཀཏཱཏི ཨཱཝིཀཏཱཡ, པཀཱསིཏཱཡཱཏི ཨཏྠོ. ཨལཛྫིཏཱཏིཨཱདཱིསུ (པརི. ༢༩༥) ཝིཡ ཧི ཨིདམྤི ཀརཎཏྠེ པཙྩཏྟཝཙནཾ. ཧཱིཏི ནིཔཱཏམཏྟཾ. ཨསྶཱཏི ཨེཏསྶ བྷིཀྑུནོ. ཕཱསུ ཧོཏཱིཏི པཋམཛ྄ཛྷཱནཱདཱིནཾ ཨདྷིགམཱཡ ཕཱསུ ཧོཏི, ཨཝིཔྤཊིསཱརམཱུལཀཱནཾ པཱམོཛྫཱདཱིནཾ ཝསེན སུཁཔྤཊིཔདཱ སམྤཛྫཏཱིཏི ཨཏྠོ.

ཨིཏི ཀངྑཱཝིཏརཎིཡཱ པཱཏིམོཀྑཝཎྞནཱཡ

ནིདཱནཝཎྞནཱ ནིཊྛིཏཱ.

པཱརཱཛིཀཀཎྜོ

ཨིདཱནི ¶ ¶ ཡདེཏཾ ནིདཱནཱནནྟརཾ ཏཏྲིམེ ཙཏྟཱརོཏིཨཱདི པཱརཱཛིཀཀཎྜཾ, ཏཏྠ ཏཏྲཱཏི ཏསྨིཾ ‘‘པཱཏིམོཀྑཾ ཨུདྡིསིསྶཱམཱི’’ཏི ཨེཝཾ ཝུཏྟེ པཱཏིམོཀྑེ. ཨིམེཏི ཨིདཱནི ཝཏྟབྦཱནཾ ཨབྷིམུཁཱིཀརཎཾ. ཙཏྟཱརོཏི གཎནཔརིཙྪེདོ. པཱརཱཛིཀཱཏི ཨེཝཾནཱམཀཱ. དྷམྨཱཏི ཨཱཔཏྟིཡོ. ཨུདྡེསཾ ཨཱགཙྪནྟཱིཏི སརཱུཔེན ཨུདྡིསིཏབྦཏཾ ཨཱགཙྪནྟི, ན ནིདཱནེ ཝིཡ ‘‘ཡསྶ སིཡཱ ཨཱཔཏྟཱི’’ཏི སཱདྷཱརཎཝཙནམཏྟེན.

༡. པཋམཔཱརཱཛིཀཝཎྞནཱ

ཡོ པནཱཏི རསྶདཱིགྷཱདིནཱ ལིངྒཱདིབྷེདེན ཡོ ཀོཙི. བྷིཀྑཱུཏི ཨེཧིབྷིཀྑུཨུཔསམྤདཱ, སརཎགམནཱུཔསམྤདཱ, ཨོཝཱདཔྤཊིགྒཧཎཱུཔསམྤདཱ, པཉྷཱབྱཱཀརཎཱུཔསམྤདཱ, ཨཊྛགརུདྷམྨཔྤཊིགྒཧཎཱུཔསམྤདཱ, དཱུཏེནཱུཔསམྤདཱ, ཨཊྛཝཱཙིཀཱུཔསམྤདཱ, ཉཏྟིཙཏུཏྠཀམྨཱུཔསམྤདཱཏི ཨིམཱསུ ཨཊྛསུ ཨུཔསམྤདཱསུ ཉཏྟིཙཏུཏྠེན ཨུཔསམྤདཱཀམྨེན ཨཀུཔྤེན ཋཱནཱརཧེན ཨུཔསམྤནྣོ. ཏསྶ པན ཀམྨསྶ ཝཏྠུཉཏྟིཨནུསྶཱཝན སཱིམཱ པརིསཱསམྤཏྟིཝསེན ཨཀུཔྤཏཱ ཝེདིཏབྦཱ.

ཏཏྠ ཝཏྠཱུཏི ཨུཔསམྤདཱཔེཀྑོ པུགྒལོ, སོ ཋཔེཏྭཱ ཨཱུནཝཱིསཏིཝསྶཾ ཨནྟིམཝཏྠུཨཛ྄ཛྷཱཔནྣཔུབྦཾ, པཎྜཀཱདཡོ ཙ ཨེཀཱདས ཨབྷབྦཔུགྒལེ ཝེདིཏབྦོ. ཏཏྠ ཨཱུནཝཱིསཏིཝསྶོ ནཱམ པཊིསནྡྷིགྒཧཎཏོ པཊྛཱཡ ཨཔརིཔུཎྞཝཱིསཏིཝསྶོ. ཨནྟིམཝཏྠུཨཛ྄ཛྷཱཔནྣཔུབྦོ ནཱམ ཙཏུནྣཾ པཱརཱཛིཀཱནཾ ཨཉྙཏརཾ ཨཛ྄ཛྷཱཔནྣཔུབྦོ. པཎྜཀཱདཡོ ཝཛྫནཱིཡཔུགྒལཀཐཱཡཾ ཝུཏྟཱ. ཏེསུ ཨཱསིཏྟཔཎྜཀཉྩ ཨུསཱུཡཔཎྜཀཉྩ ཋཔེཏྭཱ ཨོཔཀྐམིཀཔཎྜཀོ ནཔུཾསཀཔཎྜཀོ པཎྜཀབྷཱཝཔཀྑེ ཋིཏོ པཀྑཔཎྜཀོ ཙ ཨིདྷ ཨདྷིཔྤེཏོ.

ཐེཡྻསཾཝཱསཀོ པན ཏིཝིདྷོ ལིངྒཏྠེནཀོ སཾཝཱསཏྠེནཀོ ཨུབྷཡཏྠེནཀོཏི. ཏཏྠ ཡོ སཡཾ པབྦཛིཏྭཱ ¶ ན བྷིཀྑུཝསྶཱནི གཎེཏི, ན ཡཐཱཝུཌྜྷཾ བྷིཀྑཱུནཾ ཝཱ སཱམཎེརཱནཾ ¶ ཝཱ ཝནྡནཾ སཱདིཡཏི, ན ཨཱསནེན པཊིབཱཧཏི, ན ཨུཔོསཐཱདཱིསུ སནྡིསྶཏི, ཨཡཾ ཨསུདྡྷཙིཏྟཏཱཡ ལིངྒམཏྟསྶེཝ ཐེནིཏཏྟཱ ལིངྒཏྠེནཀོ ནཱམ. ཡོ པན བྷིཀྑཱུཧི པབྦཛིཏོ སཱམཎེརོ སམཱནོ ཀཱསཱཡཱནི ཨཔནེཏྭཱ ཏེསུ སཨུསྶཱཧོཝ ¶ མེཐུནཾ དྷམྨཾ པཊིསེཝིཏྭཱ པུན ནིཝཱསེཏྭཱ སཱམཎེརབྷཱཝཾ པཊིཛཱནཱཏི, ཨཡཾ བྷིཀྑཱུཧི དིནྣལིངྒསྶ ཨཔརིཙྩཏྟཏྟཱ ན ལིངྒཏྠེནཀོ, ན ལིངྒཱནུརཱུཔསྶ སཾཝཱསསྶ སཱདིཏཏྟཱ ནཱཔི སཾཝཱསཏྠེནཀོ. ཨནྟིམཝཏྠུཨཛ྄ཛྷཱཔནྣཀེཔི ཨེསེཝ ནཡོ. ཡོ ཙ ཁོ སཱམཎེརོ སམཱནོ ཝིདེསཾ གནྟྭཱ བྷིཀྑུཝསྶཱནི གཎེཏི, ཡཐཱཝུཌྜྷཾ ཝནྡནཾ སཱདིཡཏི, ཨཱསནེན པཊིབཱཧཏི, ཨུཔོསཐཱདཱིསུ སནྡིསྶཏི, ཨཡཾ སཾཝཱསམཏྟསྶེཝ ཐེནིཏཏྟཱ སཾཝཱསཏྠེནཀོ ནཱམ. བྷིཀྑུཝསྶགཎནཱདིཀོ ཧི སབྦོཔི ཀིརིཡབྷེདོ ཨིམསྨིཾ ཨཏྠེ ‘‘སཾཝཱསོ’’ཏི ཝེདིཏབྦོ. སིཀྑཾ པཙྩཀྑཱཡ ‘‘ན མཾ ཀོཙི ཛཱནཱཏཱི’’ཏི པུན ཨེཝཾ པཊིཔཛྫནྟེཔི ཨེསེཝ ནཡོ. ཡོ པན སཡཾ པབྦཛིཏྭཱ ཝིཧཱརཾ གནྟྭཱ ཡཐཱཝུཌྜྷཾ ཝནྡནཾ སཱདིཡཏི, ཨཱསནེན པཊིབཱཧཏི, བྷིཀྑུཝསྶཱནི གཎེཏི, ཨུཔོསཐཱདཱིསུ སནྡིསྶཏི, ཨཡཾ ལིངྒསྶ ཙེཝ སཾཝཱསསྶ ཙ ཐེནིཏཏྟཱ ཨུབྷཡཏྠེནཀོ ནཱམ. དྷུརནིཀྑེཔཝསེན ཀཱསཱཡཱནི ཨཔནེཏྭཱ ཨནྟིམཝཏྠུཾ ཨཛ྄ཛྷཱཔཛྫིཏྭཱ པུན ཏཱནི ཨཙྪཱདེཏྭཱ ཨེཝཾ པཊིཔཛྫནྟེཔི ཨེསེཝ ནཡོ, ཨཡཾ ཏིཝིདྷོཔི ཐེཡྻསཾཝཱསཀོ ཨིདྷ ཨདྷིཔྤེཏོ. ཋཔེཏྭཱ པན ཨིམཾ ཏིཝིདྷཾ.

‘‘རཱཛ དུབྦྷིཀྑ ཀནྟཱར-རོག ཝེརཱི བྷཡེན ཝཱ;

ཙཱིཝརཱཧརཎཏྠཾ ཝཱ, ལིངྒཾ ཨཱདིཡཏཱིདྷ ཡོ.

‘‘སཾཝཱསཾ ནཱདྷིཝཱསེཏི, ཡཱཝ སོ སུདྡྷམཱནསོ;

ཐེཡྻསཾཝཱསཀོ ནཱམ, ཏཱཝ ཨེས ན ཝུཙྩཏཱི’’ཏི. (མཧཱཝ. ཨཊྛ. ༡༡༠);

ཡོ པན ཨུཔསམྤནྣོ ཏིཏྠིཡབྷཱཝཾ པཏྠཡམཱནོ སཡཾ ཝཱ ཀུསཙཱིརཱདིཀཾ ཏིཏྠིཡལིངྒཾ ཨཱདིཡཏི, ཏེསཾ ཝཱ སནྟིཀེ པབྦཛཏི, ནགྒོ ཝཱ ཧུཏྭཱ ཨཱཛཱིཝཀཱནཾ སནྟིཀཾ གནྟྭཱ ཏེསཾ ཝཏཱནི ཨཱདིཡཏི, ཨཡཾ ཏིཏྠིཡཔཀྐནྟཀོ ནཱམ. ཋཔེཏྭཱ པན མནུསྶཛཱཏིཀཾ ཨཝསེསོ སབྦོཔི ཏིརཙྪཱནགཏོ ནཱམ. ཡེན མནུསྶཛཱཏིཀཱ ཛནེཏྟི སཡམྤི མནུསྶབྷཱུཏེནེཝ སཉྩིཙྩ ཛཱིཝིཏཱ ཝོརོཔིཏཱ, ཨཡཾ མཱཏུགྷཱཏཀོ ནཱམ. པིཏུགྷཱཏཀེཔི ཨེསེཝ ནཡོ. ཡེན ཨནྟམསོ གིཧིལིངྒེ ཋིཏོཔི མནུསྶཛཱཏིཀོ ཁཱིཎཱསཝོ སཉྩིཙྩ ཛཱིཝིཏཱ ཝོརོཔིཏོ, ཨཡཾ ཨརཧནྟགྷཱཏཀོ ནཱམ. ཡོ པན པཀཏཏྟཾ བྷིཀྑུནིཾ ཏིཎྞཾ མགྒཱནཾ ཨཉྙཏརསྨིཾ ¶ མགྒེ དཱུསེཏི ¶ , ཨཡཾ བྷིཀྑུནིདཱུསཀོ ནཱམ. ཡོ དེཝདཏྟོ ཝིཡ སཱསནཾ ཨུདྡྷམྨཾ ཨུབྦིནཡཾ ཀཏྭཱ ཙཏུནྣཾ ཀམྨཱནཾ ཨཉྙཏརཝསེན སངྒྷཾ བྷིནྡཏི, ཨཡཾ སངྒྷབྷེདཀོ ནཱམ. ཡོ དེཝདཏྟོ ཝིཡ དུཊྛཙིཏྟེན ཝདྷཀཙིཏྟེན ཏཐཱགཏསྶ ཛཱིཝམཱནཀསརཱིརེ ཁུདྡཀམཀྑིཀཱཡ པིཝནམཏྟམྤི ལོཧིཏཾ ཨུཔྤཱདེཏི, ཨཡཾ ལོཧིཏུཔྤཱདཀོ ནཱམ. ཡསྶ ¶ ཨིཏྠིནིམིཏྟུཔྤཱདནཀམྨཏོ ཙ པུརིསནིམིཏྟུཔྤཱདནཀམྨཏོ ཙ ཨུབྷཏོ དུཝིདྷམྤི བྱཉྫནཾ ཨཏྠི, ཨཡཾ ཨུབྷཏོབྱཉྫནཀོ ནཱམ. ཨིཏི ཨིམེ ཏེརས པུགྒལཱ ཨུཔསམྤདཱཡ ཨཝཏྠཱུ, ཨིམེ པན ཋཔེཏྭཱ ཨཉྙསྨིཾ ཨུཔསམྤདཱཔེཀྑེ སཏི ཨུཔསམྤདཱཀམྨཾ ཝཏྠུསམྤཏྟིཝསེན ཨཀུཔྤཾ ཧོཏི.

ཀཐཾ ཉཏྟིསམྤཏྟིཝསེན ཨཀུཔྤཾ ཧོཏི? ཝཏྠུསངྒྷཔུགྒལཉཏྟཱིནཾ ཨཔརཱམསནཱནི, པཙྪཱ ཉཏྟིཊྛཔནཉྩཱཏི ཨིམེ ཏཱཝ པཉྩ ཉཏྟིདོསཱ. ཏཏྠ ‘‘ཨཡཾ ཨིཏྠནྣཱམོ’’ཏི ཨུཔསམྤདཱཔེཀྑསྶ ཨཀིཏྟནཾ ཝཏྠུཨཔརཱམསནཾ ནཱམ. ‘‘སུཎཱཏུ མེ, བྷནྟེ, སངྒྷོ’’ཏིཨེཏྠ ‘‘སུཎཱཏུ མེ, བྷནྟེ’’ཏི ཝཏྭཱ ‘‘སངྒྷོ’’ཏི ཨབྷཎནཾ སངྒྷཨཔརཱམསནཾ ནཱམ. ‘‘ཨིཏྠནྣཱམསྶ ཨུཔསམྤདཱཔེཀྑོ’’ཏི ཨུཔཛ྄ཛྷཱཡསྶ ཨཀིཏྟནཾ པུགྒལཨཔརཱམསནཾ ནཱམ. སབྦེན སབྦཾ ཉཏྟིཡཱ ཨནུཙྩཱརཎཾ ཉཏྟིཨཔརཱམསནཾ ནཱམ. པཋམཾ ཀམྨཝཱཙཾ ནིཊྛཱཔེཏྭཱ ‘‘ཨེསཱ ཉཏྟཱི’’ཏི ཝཏྭཱ ‘‘ཁམཏི སངྒྷསྶཱ’’ཏི ཨེཝཾ ཉཏྟིཀིཏྟནཾ པཙྪཱ ཉཏྟིཊྛཔནཾ ནཱམ. ཨིཏི ཨིམེཧི དོསེཧི ཝིམུཏྟཱཡ ཉཏྟིཡཱ སམྤནྣཾ ཉཏྟིསམྤཏྟིཝསེན ཨཀུཔྤཾ ཧོཏི.

ཨནུསྶཱཝནཝསེན ཨཀུཔྤཏཱཡཔི ཝཏྠུསངྒྷཔུགྒལཱནཾ ཨཔརཱམསནཱནི, སཱཝནཱཡ ཧཱཔནཾ, ཨཀཱལེ སཱཝནནྟི ཨིམེ པཉྩ ཨནུསྶཱཝནདོསཱ. ཏཏྠ ཝཏྠཱདཱིནཾ ཨཔརཱམསནཱནི ཉཏྟིཡཾ ཝུཏྟསདིསཱནེཝ. ཏཱིསུ པན ཨནུསྶཱཝནཱསུ ཡཏྠ ཀཏྠཙི ཨེཏེསཾ ཨཔརཱམསནཾ ཨཔརཱམསནམེཝ. སབྦེན སབྦཾ པན ཀམྨཝཱཙཾ ཨཝཏྭཱ ཙཏུཀྑཏྟུཾ ཉཏྟིཀིཏྟནམེཝ, ཨཐ ཝཱ པན ཀམྨཝཱཙཱབྦྷནྟརེ ཨཀྑརསྶ ཝཱ པདསྶ ཝཱ ཨནུཙྩཱརཎཾ ཝཱ དུརུཙྩཱརཎཾ ཝཱ སཱཝནཱཡ ཧཱཔནཾ ནཱམ. སཱཝནཱཡ ཨནོཀཱསེ པཋམཾ ཉཏྟིཾ ཨཊྛཔེཏྭཱ ཨནུསྶཱཝནཀརཎཾ ཨཀཱལེ སཱཝནཾ ནཱམ. ཨིཏི ཨིམེཧི དོསེཧི ཝིམུཏྟཱཡ ཨནུསྶཱཝནཱཡ སམྤནྣཾ ཨནུསྶཱཝནསམྤཏྟིཝསེན ཨཀུཔྤཾ ཧོཏི.

པུབྦེ ཝུཏྟཾ ཝིཔཏྟིསཱིམཱལཀྑཎཾ སམཏིཀྐནྟཱཡ པན སཱིམཱཡ ཀཏཾ སཱིམཱསམྤཏྟིཝསེན ཨཀུཔྤཾ ཧོཏི. ཡཱཝཏིཀཱ བྷིཀྑཱུ ཀམྨཔྤཏྟཱ, ཏེསཾ ¶ ཨནཱགམནཾ, ཚནྡཱརཧཱནཾ ཚནྡསྶ ཨནཱཧརཎཾ, སམྨུཁཱིབྷཱུཏཱནཾ པཊིཀྐོསནནྟི ཨིམེ པན ཏཡོ པརིསཱདོསཱ, ཏེཧི ཝིམུཏྟཱཡ པརིསཱཡ ཀཏཾ པརིསཱསམྤཏྟིཝསེན ཨཀུཔྤཾ ཧོཏི. ཀཱརཎཱརཧཏྟཱ པན སཏྠུ སཱསནཱརཧཏྟཱ ཋཱནཱརཧཾ ནཱམ ཧོཏི. ཨིཏི ཡོ ཨིམིནཱ ཨེཝཾ ཨཀུཔྤེན ཋཱནཱརཧེན ཉཏྟིཙཏུཏྠེན ཨུཔསམྤདཱཀམྨེན ¶ ཨུཔསམྤནྣོ, ཨཡཾ ཨིདྷ ‘‘བྷིཀྑཱུ’’ཏི ཨདྷིཔྤེཏོ. པཎྞཏྟིཝཛྫེསུ པན ཨཉྙེཔི སངྒཧཾ གཙྪནྟི.

བྷིཀྑཱུནཾ སིཀྑཱསཱཛཱིཝསམཱཔནྣོཏི ཡཱ བྷིཀྑཱུནཾ ཨདྷིསཱིལསངྑཱཏཱ སིཀྑཱ, ཏཉྩ, ཡཏྠ ཙེཏེ སཧ ཛཱིཝནྟི, ཨེཀཛཱིཝིཀཱ སབྷཱགཝུཏྟིནོ ¶ ཧོནྟི, ཏཾ བྷགཝཏཱ པཉྙཏྟཾ སིཀྑཱཔདསངྑཱཏཾ སཱཛཱིཝཉྩ, ཏཏྠ སིཀྑནབྷཱཝེན སམཱཔནྣོཏི བྷིཀྑཱུནཾ སིཀྑཱསཱཛཱིཝསམཨཱཔནྣོ. སམཱཔནྣོཏི སིཀྑཉྩ པརིཔཱུརེནྟོ སཱཛཱིཝཉྩ ཨཝཱིཏིཀྐམནྟོ ཧུཏྭཱ ཏདུབྷཡཾ ཨུཔགཏོཏི ཨཏྠོ. སིཀྑཾ ཨཔཙྩཀྑཱཡ དུབྦལྱཾ ཨནཱཝིཀཏྭཱཏི ཡཾ སིཀྑཾ སམཱཔནྣོ, ཏཾ ཨཔཊིཀྑིཔིཏྭཱ, ཡཉྩ སཱཛཱིཝཾ སམཱཔནྣོ, ཏསྨིཾ དུབྦལབྷཱཝཾ ཨཔྤཀཱསེཏྭཱ. ཏཏྠ ཙིཏྟཁེཏྟཀཱལཔཡོགཔུགྒལཝིཛཱནནཝསེན སིཀྑཱཡ པཙྩཀྑཱནཾ ཉཏྭཱ ཏདབྷཱཝེན ཨཔཙྩཀྑཱནཾ ཝེདིཏབྦཾ. ཀཐཾ? ཨུཔསམྤནྣབྷཱཝཏོ ཙཝིཏུཀཱམཏཱཙིཏྟེནེཝ ཧི སིཀྑཱཔཙྩཀྑཱནཾ ཧོཏི, ན དཝཱ ཝཱ རཝཱ ཝཱ བྷཎནྟསྶ. ཨེཝཾ ཙིཏྟཝསེན སིཀྑཱཔཙྩཀྑཱནཾ ཧོཏི, ན ཏདབྷཱཝེན. ཏཐཱ ‘‘བུདྡྷཾ པཙྩཀྑཱམི, དྷམྨཾ པཙྩཀྑཱམི, སངྒྷཾ པཙྩཀྑཱམི, སིཀྑཾ, ཝིནཡཾ, པཱཏིམོཀྑཾ, ཨུདྡེསཾ, ཨུཔཛ྄ཛྷཱཡཾ, ཨཱཙརིཡཾ, སདྡྷིཝིཧཱརིཀཾ, ཨནྟེཝཱསིཀཾ, སམཱནུཔཛ྄ཛྷཱཡཀཾ, སམཱནཱཙརིཡཀཾ, སབྲཧྨཙཱརིཾ པཙྩཀྑཱམཱི’’ཏི ཨེཝཾ ཝུཏྟཱནཾ བུདྡྷཱདཱིནཾ ཙུདྡསནྣཾ, ‘‘གིཧཱིཏི མཾ དྷཱརེཧི, ཨུཔཱསཀོ, ཨཱརཱམིཀོ, སཱམཎེརོ, ཏིཏྠིཡོ, ཏིཏྠིཡསཱཝཀོ, ཨསམཎོ, ‘ཨསཀྱཔུཏྟིཡོ’ཏི མཾ དྷཱརེཧཱི’’ཏི ཨེཝཾ ཝུཏྟཱནཾ གིཧིཨཱདཱིནཾ ཨཊྛནྣཉྩཱཏི ཨིམེསཾ དྭཱཝཱིསཏིཡཱ ཁེཏྟཔདཱནཾ ཡསྶ ཀསྶཙི སཝེཝཙནསྶ ཝསེན ཏེསུ ཡཾཀིཉྩི ཝཏྟུཀཱམསྶ ཡཾཀིཉྩི ཝདཏོ སིཀྑཱཔཙྩཀྑཱནཾ ཧོཏི, ན རུཀྑཱདཱིནཾ ཨཉྙཏརསྶ ནཱམཾ གཧེཏྭཱ པཙྩཱཙིཀྑནྟསྶ. ཨེཝཾ ཁེཏྟཝསེན པཙྩཀྑཱནཾ ཧོཏི, ན ཏདབྷཱཝེན.

ཏཏྠ ཡདེཏཾ ‘‘པཙྩཀྑཱམཱི’’ཏི ཙ, ‘‘མཾ དྷཱརེཧཱི’’ཏི (པཱརཱ. ༥༡) ཙ ཝུཏྟཾ ཝཏྟམཱནཀཱལཝཙནཾ, ཡཱནི ཙ ‘‘ཨལཾ མེ བུདྡྷེན, ཀིཾ ནུ མེ བུདྡྷེན, ན མམཏྠོ བུདྡྷེན ¶ , སུམུཏྟཱཧཾ བུདྡྷེནཱ’’ཏིཨཱདིནཱ (པཱརཱ. ༥༢) ནཡེན ཨཱཁྱཱཏཝསེན ཀཱལཾ ཨནཱམསིཏྭཱ པུརིམེཧི ཙུདྡསཧི པདེཧི སདྡྷིཾ ཡོཛེཏྭཱ ཝུཏྟཱནི ‘‘ཨལཾ མེ’’ཏིཨཱདཱིནི ཙཏྟཱརི པདཱནི, ཏེསཾཡེཝ ཙ སཝེཝཙནཱནཾ ཝསེན པཙྩཀྑཱནཾ ཧོཏི, ན ‘‘པཙྩཀྑཱསི’’ནྟི ཝཱ ‘‘པཙྩཀྑིསྶ’’ནྟི ཝཱ ‘‘མཾ དྷཱརེསཱི’’ཏི ཝཱ ‘‘མཾ དྷཱརེསྶཏཱི’’ཏི ཝཱ ‘‘ཡཾནཱུནཱཧཾ པཙྩཀྑེཡྻ’’ནྟི (པཱརཱ. ༤༥) ཝཱཏིཨཱདཱིནི ཨཏཱིཏཱནཱགཏཔརིཀཔྤཝཙནཱནི བྷཎནྟསྶ. ཨེཝཾ ཝཏྟམཱན ཀཱལཝསེན ཙེཝ ཨནཱམཊྛཀཱལཝསེན ཙ པཙྩཀྑཱནཾ ཧོཏི, ན ཏདབྷཱཝེན.

པཡོགོ ¶ པན དུཝིདྷོ ཀཱཡིཀོ ཙ ཝཱཙསིཀོ ཙ. ཏཏྠ ‘‘བུདྡྷཾ པཙྩཀྑཱམཱི’’ཏིཨཱདིནཱ (པཱརཱ. ༥༡) ནཡེན ཡཱཡ ཀཱཡཙི བྷཱསཱཡ ཝཙཱིབྷེདཾ ཀཏྭཱ ཝཱཙསིཀཔྤཡོགེནེཝ པཙྩཀྑཱནཾ ཧོཏི, ན ཨཀྑརལིཁནཾ ཝཱ ཧཏྠམུདྡཱདིདསྶནཾ ཝཱ ཀཱཡཔྤཡོགཾ ཀརོནྟསྶ. ཨེཝཾ ཝཱཙསིཀཔྤཡོགེནེཝ པཙྩཀྑཱནཾ ཧོཏི, ན ཏདབྷཱཝེན.

པུགྒལོ པན དུཝིདྷོ – ཡོ ཙ པཙྩཀྑཱཏི, ཡསྶ ཙ པཙྩཀྑཱཏི. ཏཏྠ ཡོ པཙྩཀྑཱཏི, སོ སཙེ ཨུམྨཏྟཀཁིཏྟཙིཏྟཝེདནཱཊྚཱནཾ ཨཉྙཏརོ ན ཧོཏི. ཡསྶ པན ¶ པཙྩཀྑཱཏི, སོ སཙེ མནུསྶཛཱཏིཀོ ཧོཏི, ན ཙ ཨུམྨཏྟཀཱདཱིནཾ ཨཉྙཏརོ, སམྨུཁཱིབྷཱུཏོ ཙ སིཀྑཱཔཙྩཀྑཱནཾ ཧོཏི. ན ཧི ཨསམྨུཁཱིབྷཱུཏསྶ དཱུཏེན ཝཱ པཎྞེན ཝཱ ཨཱརོཙནཾ རུཧཏི. ཨེཝཾ ཡཐཱཝུཏྟཔུགྒལཝསེན པཙྩཀྑཱནཾ ཧོཏི, ན ཏདབྷཱཝེན.

ཝིཛཱནནམྤི ནིཡམིཏཱནིཡམིཏཝསེན དུཝིདྷཾ. ཏཏྠ ཡསྶ ཡེསཾ ཝཱ ནིཡམེཏྭཱ ‘‘ཨིམསྶ, ཨིམེསཾ ཝཱ ཨཱརོཙེམཱི’’ཏི ཝདཏི, སཙེ ཏེ ཡཐཱ པཀཏིཡཱ ལོཀེ མནུསྶཱ ཝཙནཾ སུཏྭཱ ཨཱཝཛྫནསམཡེ ཛཱནནྟི, ཨེཝཾ ཏསྶ ཝཙནཱནནྟརམེཝ ཏསྶ ‘‘ཨཡཾ ཨུཀྐཎྛིཏོ’’ཏི ཝཱ ‘‘གིཧིབྷཱཝཾ པཏྠཡཏཱི’’ཏི ཝཱ ཡེན ཀེནཙི ཨཱཀཱརེན སིཀྑཱཔཙྩཀྑཱནབྷཱཝཾ ཛཱནནྟི, པཙྩཀྑཱཏཱཝ ཧོཏི སིཀྑཱ. ཨཐ ཨཔརབྷཱགེ ‘‘ཀིཾ ཨིམིནཱ ཝུཏྟ’’ནྟི ཙིནྟེཏྭཱ ཛཱནནྟི, ཨཉྙེ ཝཱ ཛཱནནྟི, ཨཔཙྩཀྑཱཏཱཝ ཧོཏི སིཀྑཱ. ཨནིཡམེཏྭཱ ཨཱརོཙེནྟསྶ པན སཙེ ཝུཏྟནཡེན ཡོ ཀོཙི མནུསྶཛཱཏིཀོ ཝཙནཏྠཾ ཛཱནཱཏི, པཙྩཀྑཱཏཱཝ ཧོཏི སིཀྑཱ. ཨེཝཾ ཝིཛཱནནཝསེན པཙྩཀྑཱནཾ ཧོཏི, ན ཏདབྷཱཝེན. ཡོ པན ཨནྟམསོ དཝཱཡཔི པཙྩཀྑཱཏི, ཏེན ཨཔཙྩཀྑཱཏཱཝ ཧོཏི སིཀྑཱ. ཨིཏི ཨིམེསཾ ཝུཏྟཔྤཀཱརཱནཾ ¶ ཙིཏྟཱདཱིནཾ ཝཱ ཝསེན, སབྦསོ ཝཱ པན ཨཔཙྩཀྑཱནེན སིཀྑཾ ཨཔཙྩཀྑཱཡ སིཀྑཱཔཙྩཀྑཱནསྶེཝ ཙ ཨཏྠབྷཱུཏཾ ཨེཀཙྩཾ དུབྦལྱཾ ཨནཱཝིཀཏྭཱ.

མེཐུནཾ དྷམྨཾ པཊིསེཝེཡྻཱཏི ཨེཏྠ མེཐུནཾ དྷམྨནྟི རཱགཔརིཡུཊྛཱནེན སདིསཱནཾ ཨུབྷིནྣཾ དྷམྨཾ. པཊིསེཝེཡྻཱཏི པཊིསེཝེཡྻ ཨཛ྄ཛྷཱཔཛྫེཡྻ. ཨནྟམསོཏི སབྦནྟིམེན པརིཙྪེདེན. ཏིརཙྪཱནགཏཱཡཔཱིཏི པཊིསནྡྷིཝསེན ཏིརཙྪཱནེསུ གཏཱཡཔི, ཨཡམེཏྠ ཨནུཔཉྙཏྟི. པཱརཱཛིཀོ ཧོཏཱིཏི པརཱཛིཏོ ཧོཏི, པརཱཛཡཾ ཨཱཔནྣོ. ཨསཾཝཱསོཏི པཀཏཏྟཱ བྷིཀྑཱུ སཧ ཝསནྟི ཨེཏྠཱཏི ཨེཀཀམྨཱདིཀོཝ ཏིཝིདྷོཔི ཝིདྷི སཾཝཱསོ ནཱམ, སོ ཏེན སདྡྷིཾ ནཏྠཱིཏི ཨསཾཝཱསོ. སངྒྷཀམྨེསུ ཧི ཨེས གཎཔཱུརཀོཔི ན ཧོཏི, ཨཡཾ ཏཱཝ པདཝཎྞནཱ.

ཨཡཾ ¶ པནེཏྠ ཝིནིཙྪཡོ – མནུསྶཱམནུསྶཏིརཙྪཱནགཏཝསེན ཧི ཏིསྶོ ཨིཏྠིཡོ, ཏཱསཾ ཝཙྩམགྒཔསྶཱཝམགྒམུཁམགྒཝསེན ཏཡོ ཏཡོ ཀཏྭཱ ནཝ མགྒཱ, ཏཐཱ ཨུབྷཏོབྱཉྫནཀཱནཾ. པུརིསཱནཾ པན ཝཙྩམགྒམུཁམགྒཝསེན དྭེ དྭེ ཀཏྭཱ ཚ མགྒཱ, ཏཐཱ པཎྜཀཱནནྟི ཨེཝཾ ཏིཾས མགྒཱ. ཏེསུ ཨཏྟནོ ཝཱ པརེསཾ ཝཱ ཡསྶ ཀསྶཙི མགྒསྶ སནྠཏསྶ ཝཱ ཨསནྠཏསྶ ཝཱ, པརེསཾ པན མཏཱནམྤི ཨཀྑཱཡིཏསྶ ཝཱ ཡེབྷུཡྻེན ཨཀྑཱཡིཏསྶ ཝཱ པཀཏིཝཱཏེན ཨསཾཕུཊྛེ ཨལློཀཱསེ ཡོ བྷིཀྑུ ཨེཀཏིལབཱིཛམཏྟམྤི ཨཏྟནོ ཨངྒཛཱཏཾ སནྠཏཾ ཝཱ ཨསནྠཏཾ ཝཱ སེཝནཙིཏྟེན པཝེསེཏི, པརེན ཝཱ པཝེསིཡམཱནེ པཝེསནཔཝིཊྛཊྛིཏཨུདྡྷརཎེསུ ཡཾཀིཉྩི སཱདིཡཏི, ཨཡཾ པཱརཱཛིཀཱཔཏྟིཾ ཨཱཔནྣོ ནཱམ ཧོཏི, ཨཡཾ ཏཱཝེཏྠ ཨསཱདྷཱརཎཝིནིཙྪཡོ. སབྦསིཀྑཱཔདཱནཾ པན སཱདྷཱརཎཝིནིཙྪཡཏྠཾ ཨཡཾ མཱཏིཀཱ –

ནིདཱནཾ ¶ པུགྒལཾ ཝཏྠུཾ, པཉྙཏྟིཝིདྷིམེཝ ཙ;

ཨཱཎཏྟཱཔཏྟིནཱཔཏྟི-ཝིཔཏྟིཾ ཨངྒམེཝ ཙ.

སམུཊྛཱནཝིདྷིཾ ཀིརིཡཱ-སཉྙཱཙིཏྟེཧི ནཱནཏྟཾ;

ཝཛྫཀམྨཔྤབྷེདཉྩ, ཏིཀདྭཡཝིདྷིཾ ཏཐཱ.

ལཀྑཎཾ སཏྟརསདྷཱ, ཋིཏཾ སཱདྷཱརཎཾ ཨིདཾ;

ཉཏྭཱ ཡོཛེཡྻ མེདྷཱཝཱི, ཏཏྠ ཏཏྠ ཡཐཱརཧནྟི.

ཏཏྠ ¶ ནིདཱནཾ ནཱམ ཝེསཱལི-རཱཛགཧ-སཱཝཏྠི-ཨཱལ༹ཝི-ཀོསམྦི-སགྒ-བྷགྒཱནཾ ཝསེན སཏྟཝིདྷཾ པཉྙཏྟིཊྛཱནཾ, ཨིདཉྷི སབྦསིཀྑཱཔདཱནཾ ནིདཱནཾ. པུགྒལོ ནཱམ ཡཾ ཡཾ ཨཱརབྦྷ ཏཾ ཏཾ སིཀྑཱཔདཾ པཉྙཏྟཾ. ཝཏྠུ ནཱམ ཏསྶ ཏསྶ པུགྒལསྶ ཨཛ྄ཛྷཱཙཱརོ ཝུཙྩཏི. པཉྙཏྟིཝིདྷིནྟི པཉྙཏྟིཨནུཔཉྙཏྟིཨནུཔྤནྣཔཉྙཏྟིསབྦཏྠཔཉྙཏྟིཔདེསཔཉྙཏྟིསཱདྷཱརཎཔཉྙཏྟི ཨསཱདྷཱརཎཔཉྙཏྟིཨེཀཏོཔཉྙཏྟིཨུབྷཏོཔཉྙཏྟིཝསེན ནཝཝིདྷཱ པཉྙཏྟི. ཏཏྠ ཨནུཔྤནྣཔཉྙཏྟི ནཱམ ཨནུཔྤནྣེ དོསེ པཉྙཏྟཱ, སཱ ཨཊྛགརུདྷམྨཔྤཊིགྒཧཎཝསེན (ཙཱུལ༹ཝ. ༤༠༣) བྷིཀྑུནཱིནཾཡེཝ ཨཱགཏཱ, ཨཉྙཏྲ ནཏྠི. ཝིནཡདྷརཔཉྩམེན (མཧཱཝ. ༢༥༩) གཎེན ཨུཔསམྤདཱ, གཎངྒཎཱུཔཱཧནཱ (མཧཱཝ. ༢༥༩) དྷུཝནྷཱནཾ ཙམྨཏྠརཎནྟི ཨེཏེསཾ ཝསེན ཙཏུབྦིདྷཱ པདེསཔཉྙཏྟི ནཱམ. མཛ྄ཛྷིམདེསེཡེཝ ཧི ཨེཏེཧི ཨཱཔཏྟི ཧོཏི, ཏེསུཔི དྷུཝནྷཱནཾ པཊིཀྑེཔམཏྟམེཝ པཱཏིམོཀྑེ ཨཱགཏཾ, ཏཏོ ཨཉྙཱ པདེསཔཉྙཏྟི ནཱམ ནཏྠི. སབྦཱནི སབྦཏྠཔཉྙཏྟིཡེཝ ཧོནྟི, སཱདྷཱརཎཔཉྙཏྟིདུཀཉྩ ཨེཀཏོཔཉྙཏྟིདུཀཉྩ ཨཏྠཏོ ཨེཀཾ, ཏསྨཱ ཨནུཔྤནྣཔཉྙཏྟིཉྩ ¶ སབྦཏྠཔཉྙཏྟིདུཀཉྩ ཨེཀཏོཔཉྙཏྟིདུཀཉྩ ཋཔེཏྭཱ སེསཱནཾ ཙཏསྶནྣཾ པཉྙཏྟཱིནཾ ཝསེན སབྦཏྠ ཝིནིཙྪཡོ ཝེདིཏབྦོ. ཨཱཎཏྟཱཔཏྟིནཱཔཏྟིཝིཔཏྟིནྟིཨེཏྠ ཨཱཎཏྟཱིཏིཨཱཎཱཔནཱ ཝུཙྩཏི. ཨཱཔཏྟཱིཏི པུབྦཔྤཡོགཱདིཝསེན ཨཱཔཏྟིབྷེདོ. ཨནཱཔཏྟཱིཏི ཨཛཱནནཱདིཝསེན ཨནཱཔཏྟི. ཝིཔཏྟཱིཏི སཱིལཨཱཙཱརདིཊྛིཨཱཛཱིཝཝིཔཏྟཱིནཾ ཨཉྙཏརཱ. ཨིཏི ཨིམཱསཾ ཨཱཎཏྟཱདཱིནམྤི ཝསེན སབྦཏྠ ཝིནིཙྪཡོ ཝེདིཏབྦོ. ཨངྒནྟི སབྦསིཀྑཱཔདེསུ ཨཱཔཏྟཱིནཾ ཨངྒཾ ཝེདིཏབྦཾ.

སམུཊྛཱནཝིདྷིནྟི སབྦཱཔཏྟཱིནཾ ཀཱཡོ ཝཱཙཱ ཀཱཡཝཱཙཱ ཀཱཡཙིཏྟཾ ཝཱཙཱཙིཏྟཾ ཀཱཡཝཱཙཱཙིཏྟནྟི ཨིམཱནི ཨེཀངྒིཀདྭངྒིཀཏིཝངྒིཀཱནི. ཚ སམུཊྛཱནཱནི ནཱམ ཡཱནི ‘‘སིཀྑཱཔདསམཨུཊྛཱནཱནཱི’’ཏིཔི ཝུཙྩནྟི. ཏཏྠ པུརིམཱནི ཏཱིཎི ཨཙིཏྟཀཱནི, པཙྪིམཱནི སཙིཏྟཀཱནི. ཏེསུ ཨེཀེན ཝཱ དྭཱིཧི ཝཱ ཏཱིཧི ཝཱ ཙཏཱུཧི ཝཱ ཚཧི ཝཱ སམུཊྛཱནེཧི ཨཱཔཏྟིཡོ སམུཊྛཧནྟི, པཉྩསམུཊྛཱནཱ ནཱམ ནཏྠི. ཏཏྠ ཨེཀསམུཊྛཱནཱ ནཱམ ཙཏུཏྠེན ཙ པཉྩམེན ཙ ཚཊྛེན ཙ སམུཊྛཱནེན སམུཊྛཱཏི, ན ཨཉྙེན. དྭིསམུཊྛཱནཱ ¶ ནཱམ པཋམཙཏུཏྠེཧི ཙ དུཏིཡཔཉྩམེཧི ཙ ཏཏིཡཚཊྛེཧི ཙ ཙཏུཏྠཚཊྛེཧི ཙ པཉྩམཚཊྛེཧི ཙ སམུཊྛཱནེཧི, སམུཊྛཱཏི, ན ཨཉྙེཧི. ཏིསམུཊྛཱནཱ ནཱམ པཋམེཧི ¶ ཙ ཏཱིཧི, པཙྪིམེཧི ཙ ཏཱིཧི སམུཊྛཱནེཧི སམུཊྛཱཏི, ན ཨཉྙེཧི. ཙཏུསམུཊྛཱནཱ ནཱམ པཋམཏཏིཡཙཏུཏྠཚཊྛེཧི ཙ དུཏིཡཏཏིཡཔཉྩམཚཊྛེཧི ཙ སམུཊྛཱནེཧི སམུཊྛཱཏི, ན ཨཉྙེཧི. ཚ སམུཊྛཱནཱ ནཱམ ཚཧིཔི སམུཊྛཱཏི.

ཨེཝཾ –

ཏིདྷཱ ཨེཀསམུཊྛཱནཱ, པཉྩདྷཱ དྭིསམུཊྛིཏཱ;

དྭིདྷཱ ཏིཙཏུརོ ཋཱནཱ, ཨེཀདྷཱ ཚསམུཊྛིཏཱཏི.

སམུཊྛཱནཝསེན སབྦཱཝ ཏེརས ཨཱཔཏྟིཡོ ཧོནྟི (ཙཱུལ༹ཝ. ༡༦༥ ཨཱདཡོ), ཏཱ པཋམཔཉྙཏྟིསིཀྑཱཔདཝསེན སམུཊྛཱནཏོ ཏེརས ནཱམཱནི ལབྷནྟི པཋམཔཱརཱཛིཀསམུཊྛཱནཱ, ཨདིནྣཱདཱན-སཉྩརིཏྟ-སམནུབྷཱསན-ཀཐིན-ཨེལ༹ཀལོམ-པདསོདྷམྨ-ཨདྡྷཱན-ཐེཡྻསཏྠ-དྷམྨདེསནཱབྷཱུཏཱརོཙན-ཙོརིཝུཊྛཱཔན-ཨནནུཉྙཱཏསམུཊྛཱནཱཏི. ཏཏྠ ཡཱ ཀཱཡཙིཏྟཏོ སམུཊྛཱཏི, ཨཡཾ པཋམཔཱརཱཛིཀསམུཊྛཱནཱ ནཱམ. ཡཱ སཙིཏྟཀེཧི ཏཱིཧི སམུཊྛཱནེཧི སམུཊྛཱཏི, ཨཡཾ ཨདིནྣཱདཱནསམུཊྛཱནཱ ནཱམ. ཡཱ ཚཧིཔི སམུཊྛཱཏི, ཨཡཾ སཉྩརིཏྟསམུཊྛཱནཱ ནཱམ. ཡཱ ཚཊྛེནེཝ སམུཊྛཱཏི, ཨཡཾ སམནུབྷཱསནསམུཊྛཱནཱ ནཱམ. ཡཱ ཏཏིཡཚཊྛེཧི སམུཊྛཱཏི, ཨཡཾ ཀཐིནསམུཊྛཱནཱ ནཱམ. ཡཱ པཋམཙཏུཏྠེཧི སམུཊྛཱཏི, ཨཡཾ ཨེལ༹ཀལོམསམུཊྛཱནཱ ནཱམ. ཡཱ དུཏིཡཔཉྩམེཧི སམུཊྛཱཏི ¶ , ཨཡཾ པདསོདྷམྨསམུཊྛཱནཱ ནཱམ. ཡཱ པཋམཏཏིཡཙཏུཏྠཚཊྛེཧི སམུཊྛཱཏི, ཨཡཾ ཨདྡྷཱནསམུཊྛཱནཱ ནཱམ. ཡཱ ཙཏུཏྠཚཊྛེཧི སམུཊྛཱཏི, ཨཡཾ ཐེཡྻསཏྠསམུཊྛཱནཱ ནཱམ. ཡཱ པཉྩམེནེཝ སམུཊྛཱཏི, ཨཡཾ དྷམྨདེསནཱསམུཊྛཱནཱ ནཱམ. ཡཱ ཨཙིཏྟཀེཧི ཏཱིཧི སམུཊྛཱནེཧི སམུཊྛཱཏི, ཨཡཾ བྷཱུཏཱརོཙནསམུཊྛཱནཱ ནཱམ. ཡཱ པཉྩམཚཊྛེཧི སམུཊྛཱཏི, ཨཡཾ ཙོརིཝུཊྛཱཔནསམུཊྛཱནཱ ནཱམ. ཡཱ དུཏིཡཏཏིཡཔཉྩམཚཊྛེཧི སམུཊྛཱཏི, ཨཡཾ ཨནནུཉྙཱཏསམུཊྛཱནཱ ནཱམཱཏི. ཨིཏི ཨིམསྶ སམུཊྛཱནཝིདྷིནོཔི ཝསེན སབྦཏྠ ཝིནིཙྪཡོ ཝེདིཏབྦོ.

ཀིརིཡཱསཉྙཱཙིཏྟེཧི ནཱནཏྟནྟི ཨེཏེཧི ཀིརིཡཱདཱིཧི སབྦཱཔཏྟཱིནཾ ནཱནཱབྷཱཝཾ ཉཏྭཱ སབྦཏྠ ཝིནིཙྪཡོ ཝེདིཏབྦོ. སབྦཱཔཏྟིཡོ ཧི ཀིརིཡཱཝསེན པཉྩཝིདྷཱ ཧོནྟི, སེཡྻཐིདཾ – ཨཏྠཱཔཏྟི ཀིརིཡཏོ སམུཊྛཱཏི ¶ , ཨཏྠི ཨཀིརིཡཏོ, ཨཏྠི ཀིརིཡཱཀིརིཡཏོ, ཨཏྠི སིཡཱ ཀིརིཡཏོ སིཡཱ ཨཀིརིཡཏོ, ཨཏྠི སིཡཱ ཀིརིཡཏོ སིཡཱ ཀིརིཡཱཀིརིཡཏོཏི. ཏཏྠ ཡཱ ཀཱཡེན ཝཱ ཝཱཙཱཡ ཝཱ པཐཝིཁཎནཱདཱིསུ (པཙི. ༨༤) ཝིཡ ཝཱིཏིཀྐམཾ ཀརོནྟསྶ ཧོཏི, ཨཡཾ ཀིརིཡཏོ སམུཊྛཱཏི ནཱམ. ཡཱ ཀཱཡཝཱཙཱཧི ཀཏྟབྦཾ ཨཀརོནྟསྶ ཧོཏི པཋམཀཐིནཱཔཏྟི (པཱརཱ. ༤༥༩ ཨཱདཡོ) ཝིཡ, ཨཡཾ ཨཀིརིཡཏོ སམུཊྛཱཏི ནཱམ. ཡཱ ཀརོནྟསྶ ཙ ཨཀརོནྟསྶ ཙ ཧོཏི ཨཉྙཱཏིཀཱཡ བྷིཀྑུནིཡཱ ཧཏྠཏོ ཙཱིཝརཔྤཊིགྒཧཎཱཔཏྟི (པཱརཱ. ༥༠༨-༥༡༡) ཝིཡ, ཨཡཾ ཀིརིཡཱཀིརིཡཏོ ¶ སམུཊྛཱཏི ནཱམ. ཡཱ སིཡཱ ཀརོནྟསྶ ཙ, སིཡཱ ཨཀརོནྟསྶ ཙ ཧོཏི རཱུཔིཡཔྤཊིགྒཧཎཱཔཏྟི (པཱརཱ. ༥༨༢) ཝིཡ, ཨཡཾ སིཡཱ ཀིརིཡཏོ སིཡཱ ཨཀིརིཡཏོ སམུཊྛཱཏི ནཱམ. ཡཱ སིཡཱ ཀརོནྟསྶ ཙ སིཡཱ ཀརོནྟཱཀརོནྟསྶ ཙ ཧོཏི ཀུཊིཀཱརཱཔཏྟི (པཱརཱ. ༣༤༢ ཨཱདཡོ) ཝིཡ, ཨཡཾ སིཡཱ ཀིརིཡཏོ སིཡཱ ཀིརིཡཱཀིརིཡཏོ སམུཊྛཱཏི ནཱམ.

སབྦཱཔཏྟིཡོ ཙ སཉྙཱཝསེན དུཝིདྷཱ ཧོནྟི སཉྙཱཝིམོཀྑཱ ནོསཉྙཱཝིམོཀྑཱཏི. ཏཏྠ ཡཏོ ཝཱིཏིཀྐམསཉྙཱཡ ཨབྷཱཝེན མུཙྩཏི, ཨཡཾ སཉྙཱཝིམོཀྑཱ, ཨིཏརཱ ནོསཉྙཱཝིམོཀྑཱ. པུན ཙ སབྦཱཔི ཙིཏྟཝསེན དུཝིདྷཱ ཧོནྟི སཙིཏྟཀཱ ཨཙིཏྟཀཱ ཙཱཏི. ཏཏྠ ཡཱ སཙིཏྟཀསམུཊྛཱནཝསེནེཝ སམུཊྛཱཏི ཨཡཾ སཙིཏྟཀཱ. ཡཱ ཨཙིཏྟཀེན ཝཱ སཙིཏྟཀམིསྶཀེན ཝཱ སམུཊྛཱཏི ཨཡཾ ཨཙིཏྟཀཱ.

ཝཛྫཀམྨཔྤབྷེདནྟི ཨེཏྠ སབྦཱཔཏྟིཡོ ཝཛྫཝསེན དུཝིདྷཱ ཧོནྟི ལོཀཝཛྫཱ པཎྞཏྟིཝཛྫཱ ཙཱཏི. ཏཏྠ ཡསྶཱ སཙིཏྟཀཔཀྑེ ཙིཏྟཾ ཨཀུསལམེཝ ཧོཏི, ཨཡཾ ལོཀཝཛྫཱ, སེསཱ པཎྞཏྟིཝཛྫཱ. སབྦཱ ཙ ཀཱཡཀམྨཝཙཱིཀམྨཏདུབྷཡཝསེན ཏིཝིདྷཱ ཧོནྟི. ཏཏྠ ¶ ཀཱཡདྭཱརེ ཨཱཔཛྫིཏབྦཱ ཀཱཡཀམྨནྟི ཝུཙྩཏི, ཝཙཱིདྭཱརེ ཨཱཔཛྫིཏབྦཱ ཝཙཱིཀམྨནྟི ཝུཙྩཏི, ཨུབྷཡཏྠ ཨཱཔཛྫིཏབྦཱ ཀཱཡཀམྨཾ ཝཙཱིཀམྨཉྩཱཏི, མནོདྭཱརེ ཨཱཔཏྟི ནཱམ ནཏྠི. ཨིཏི ཨིམིནཱ ཝཛྫཀམྨཔྤབྷེདེནཱཔི སབྦཏྠ ཝིནིཙྪཡོ ཝེདིཏབྦོ.

ཏིཀདྭཡཝིདྷིནྟི ཀུསལཏྟིཀཝེདནཱཏྟིཀཝིདྷིཾ. ཨཱཔཏྟིཾ ཨཱཔཛྫམཱནོ ཧི ཨཀུསལཙིཏྟོ ཝཱ ཨཱཔཛྫཏི ཀུསལཱབྱཱཀཏཙིཏྟོ ཝཱ, ཏཐཱ དུཀྑཝེདནཱསམངྒཱི ¶ ཝཱ ཨིཏརཝེདནཱདྭཡསམངྒཱི ཝཱ. ཨེཝཾ སནྟེཔི སབྦསིཀྑཱཔདེསུ ཨཀུསལཙིཏྟཝསེན ཨེཀཾ ཙིཏྟཾ, ཀུསལཱབྱཱཀཏཙིཏྟཝསེན དྭེ ཙིཏྟཱནི, སབྦེསཾ ཝསེན ཏཱིཎི ཙིཏྟཱནི. དུཀྑཝེདནཱཝསེན ཨེཀཱ ཝེདནཱ, སུཁཨུཔེཀྑཱཝསེན དྭེ, སབྦཱསཾ ཝསེན ཏིསྶོ ཝེདནཱཏི. ཨཡམེཝ པབྷེདོ ལབྦྷཏི, ན ཨཉྙོ.

ལཀྑཎཾ སཏྟརསདྷཱ, ཋིཏཾ སཱདྷཱརཎཾ ཨིདཾ, ཉཏྭཱཏི ཨིདཾ ནིདཱནཱདིཝེདནཱཏྟིཀཔརིཡོསཱནཾ སཏྟརསཔྤཀཱརཾ ལཀྑཎཾ ཛཱནིཏྭཱ ཡོཛེཡྻ མེདྷཱཝཱི. ཏཏྠ ཏཏྠ ཡཐཱརཧནྟི པཎྜིཏོ བྷིཀྑུ ཏསྨིཾ ཏསྨིཾ སིཀྑཱཔདེ ཨིདཾ ལཀྑཎཾ ཡཐཱནུརཱུཔཾ ཡོཛེཡྻཱཏི ཨཏྠོ. ཏཾ པན ཨཡོཛིཏཾ དུབྦིཛཱནཾ ཧོཏི, ཏསྨཱ ནཾ སབྦསིཀྑཱཔདཱནཾ ཨསཱདྷཱརཎཝིནིཙྪཡཔརིཡོསཱནེ ཨིམཾ མཱཏིཀཾ ཨནུདྡྷརིཏྭཱཝ ཡོཛེཏྭཱ དསྶཡིསྶཱམ.

ཨིདྷ པནསྶ ཨཡཾ ཡོཛནཱ – ཨིདཾ ཝེསཱལིཡཾ སུདིནྣཏྠེརཾ ཨཱརབྦྷ མེཐུནཝཱིཏིཀྐམཝཏྠུསྨིཾ པཉྙཏྟཾ. ‘‘མེཐུནཾ དྷམྨཾ པཊིསེཝེཡྻཱ’’ཏི ཨཡམེཏྠ པཉྙཏྟི, ‘‘སིཀྑཾ ཨཔཙྩཀྑཱཡཱ’’ཏི ཙ ‘‘ཨནྟམསོ ཏིརཙྪཱནགཏཱཡཔཱི’’ཏི ཙ དྭེ ཨནུཔཉྙཏྟིཡོ. ཨནུཔཉྙཏྟི ཙ ནཱམེསཱ ཨཱཔཏྟིཀརཱ ཙ ཧོཏི ཨཉྙཝཱདཀསིཀྑཱཔདཱདཱིསུ (པཱཙི. ༩༥ ཨཱདཡོ) ཝིཡ, ཨནཱཔཏྟིཀརཱ ཙ ཨཉྙཏྲ སུཔིནནྟཱཏིཨཱདཱིསུ (པཱརཱ. ༢༣༦-༢༣༧) ཝིཡ, ཨཱཔཏྟིཨུཔཏྠམྦྷཀརཱ ཙ ཨདིནྣཱདཱནཱདཱིསུ (པཱརཱ. ༩༡) ཝིཡ ¶ , ཨིདྷ པན ཨུཔཏྠམྦྷཀརཱཏི ཝེདིཏབྦཱ. ཨིཏོ པརཾ པན ཡཏྠ ཨནུཔཉྙཏྟི ཨཏྠི, ཏཏྠ ‘‘ཨཡཾ ཨནུཔཉྙཏྟཱི’’ཏི ཨེཏྟཀམེཝ དསྶཡིསྶཱམ. ཋཔེཏྭཱ པན ཨནུཔཉྙཏྟིཾ ཨཝསེསཱ པཉྙཏྟིཡེཝཱཏི སབྦཏྠ ཝིནིཙྪཡོ ཝེདིཏབྦོ. བྷིཀྑུཾ ཨཱརབྦྷ ཨུཔྤནྣཝཏྠུསྨིཾཡེཝ ‘‘ཡཱ པན བྷིཀྑུནཱི ཚནྡསོ མེཐུནཾ དྷམྨཾ པཊིསེཝེཡྻཱ’’ཏི ཨེཝཾ བྷིཀྑུནཱིནམྤི པཉྙཏྟིཏོ སཱདྷཱརཎཔཉྙཏྟི. ཨཱཎཏྟིཡཱ ཨནཱཔཛྫནཏོ ཨནཱཎཏྟིཀཾ. བྷིཀྑུཾ པན ཨཱཎཱཔེནྟོ ཨཀཔྤིཡསམཱདཱནཱཔཏྟིཏོ ན མུཙྩཏི, མེཐུནརཱགེན ཀཱཡསཾསགྒེ དུཀྐཊཾ, ཛཱིཝམཱནཀསརཱིརསྶ ཝུཏྟཔྤཀཱརེ མགྒེ སཙེཔི ཏཙཱདཱིནི ཨནཝསེསེཏྭཱ སབྦསོ ཚིནྣེ ནིམིཏྟསཎྛཱནམཏྟཾ པཉྙཱཡཏི, ཏཏྠ ཨནྟམསོ ཨངྒཛཱཏེ ཨུཊྛིཏཾ ཨནཊྛཀཱཡཔྤསཱདཾ པཱིལ༹ཀཾ ཝཱ ཙམྨཁིལཾ ཝཱ པཝེསེནྟསྶཱཔི སེཝནཙིཏྟེ སཏི པཱརཱཛིཀཾ, ནཊྛཀཱཡཔྤསཱདཾ ¶ སུཀྑཔཱིལ༹ཀཾ ཝཱ མཏཙམྨཾ ཝཱ ལོམཾ ཝཱ པཝེསེནྟསྶ དུཀྐཊཾ, སཙེ ནིམིཏྟསཎྛཱནམཏྟམྤི ཨནཝསེསེཏྭཱ སབྦསོ མགྒོ ཨུཔྤཱཊིཏོ, ཏཏྠ ཨུཔཀྐམཏོ ཝཎསངྑེཔཝསེན ¶ ཐུལླཙྩཡཾ, ཏཐཱ མནུསྶཱནཾ ཨཀྑིནཱསཱཀཎྞཙྪིདྡཝཏྠིཀོསེསུ སཏྠཀེན ཀཏཝཎེ ཝཱ, ཧཏྠིཨསྶཱདཱིནཉྩ ཏིརཙྪཱནཱནཾ ཝཏྠིཀོསནཱསཱཔུཊེསུ ཐུལླཙྩཡཾ. ཏིརཙྪཱནཱནཾ པན ཨཀྑིཀཎྞནཱསཱཝཎེསུ ཨཧིམཙྪཱདཱིནཾ པཝེསནཔྤམཱཎཝིརཧིཏེ ཨཎུནིམིཏྟེ སབྦེསཉྩ ཨུཔཀཙྪཀཱདཱིསུ སེསསརཱིརེསུ དུཀྐཊཾ. མཏསརཱིརེ ནིམིཏྟེ ཨུཔཌྜྷཀྑཱཡིཏཏོ པཊྛཱཡ ཡཱཝ ན ཀུཐིཏཾ ཧོཏི, ཏཱཝ ཐུལླཙྩཡཾ. ཀུཐིཏེ དུཀྐཊཾ, ཏཐཱ ཝཊྚཀཏེ མུཁེ ཨཙྪུཔནྟཾ ཨངྒཛཱཏཾ པཝེསེནྟསྶ དུཀྐཊཾ. ཨོཊྛཏོ བཧི ནིཀྑནྟཛིཝ྄ཧཱཡ ཝཱ དནྟེསུ ཝཱ ཐུལླཙྩཡཾ. ནིམིཏྟཏོ བཧི པཏིཏམཾསཔེསིཡཾ དུཀྐཊནྟི ཨཡམེཏྠ ཨཱཔཏྟིབྷེདོ.

ཨཛཱནནྟསྶ ཨསཱདིཡནྟསྶ ཨུམྨཏྟཀསྶ ཁིཏྟཙིཏྟསྶ ཝེདནཱཊྚསྶ ཨཱདིཀམྨིཀཱནཉྩ ཨནཱཔཏྟི. ཨེཏྠ པན ཡོ ནིདྡཾ ཨོཀྐནྟཏྟཱ པརེན ཀཏམྤི ཨུཔཀྐམཾ ན ཛཱནཱཏི, སོ ཨཛཱནནྟོ. ཡོ ཛཱནིཏྭཱཔི ན སཱདིཡཏི, སོ ཨསཱདིཡནྟོ. ཡོ པིཏྟཝསེན ཨཏེཀིཙྪཾ ཨུམྨཱདཾ པཏྟོ, སོ ཨུམྨཏྟཀོ. ཡཀྑེཧི ཀཏཙིཏྟཝིཀྑེཔོ ཁིཏྟཙིཏྟོ. དྭིནྣམྤི ཙ ཨེཏེསཾ ཨགྒིསུཝཎྞགཱུཐཙནྡནཱདཱིསུ སམཔྤཝཏྟིབྷཱཝེན ཨཛཱནནབྷཱཝོཝ པམཱཎཾ. ཡོ ཨདྷིམཏྟཝེདནཱཡ ཨཱཏུརཏྟཱ ཀིཉྩི ན ཛཱནཱཏི, སོ ཝེདནཱཊྚོ. ཡོ ཏསྨིཾ ཏསྨིཾ ཝཏྠུསྨིཾ ཨཱདིབྷཱུཏོ, སོ ཨཱདིཀམྨིཀོ. ཨཡཾ པན ཨནཱཔཏྟི. ཙཏཱུསུ ཝིཔཏྟཱིསུ སཱིལཝིཔཏྟི. ཏསྶཱ དྭེ ཨངྒཱནི སེཝནཙིཏྟཉྩ མགྒེན མགྒཔཊིཔཱདནཉྩཱཏི. སམུཊྛཱནཱདིཏོ ཨིདཾ སིཀྑཱཔདཾ པཋམཔཱརཱཛིཀསམུཊྛཱནཾ, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཨཀུསལཙིཏྟཾ, དྭིཝེདནནྟི, ཨིམཱནི ཙ སམུཊྛཱནཱདཱིནི ནཱམ ཨཱཔཏྟིཡཱ ཧོནྟི, ན སིཀྑཱཔདསྶ. ཝོཧཱརསུཁཏྠཾ ¶ པན སབྦཊྛཀཐཱསུ སིཀྑཱཔདསཱིསེན དེསནཱ ཨཱགཏཱ, ཏསྨཱ ཨཉྙེསུཔི ཨེཝརཱུཔེསུ ཋཱནེསུ བྱཉྫནེ ཨཱདརཾ ཨཀཏྭཱ ཨདྷིཔྤེཏམེཝ གཧེཏབྦཾ.

ཨཏྠཉྷི ནཱཐོ སརཎཾ ཨཝོཙ;

ན བྱཉྫནཾ ལོཀཧིཏོ མཧེསཱི.

ཏསྨཱ ཨཀཏྭཱ རཏིམཀྑརེསུ;

ཨཏྠེ ནིཝེསེཡྻ མཏིཾ མུཏཱིམཱཏི.

པཋམཔཱརཱཛིཀཝཎྞནཱ ནིཊྛིཏཱ.

༢. དུཏིཡཔཱརཱཛིཀཝཎྞནཱ

དུཏིཡེ ¶ ¶ གཱམཱ ཝཱ ཨརཉྙཱཝཱཏི ཨེཏྠ སབྦོཔི ཨེཀཀུཊིཀཱདིབྷེདོ པརིཀྑིཏྟོ ཝཱ ཨཔརིཀྑིཏྟོ ཝཱ སམནུསྶོ ཝཱ ཨམནུསྶོ ཝཱ ཨནྟམསོ ཨཏིརེཀཙཱཏུམཱསནིཝིཊྛོ ཡོ ཀོཙི སཏྠོཔི ‘‘གཱམོ’’ཏི ཝེདིཏབྦོ. ཋཔེཏྭཱ གཱམཉྩ གཱམཱུཔཙཱརཉྩ ཨཝསེསཾ ཨརཉྙཾ ནཱམ. ཏཏྠ ཨསམྨོཧཏྠཾ གྷརཾ གྷརཱུཔཙཱརོ གཱམོ གཱམཱུཔཙཱརོཏི ཨཡཾ ཝིབྷཱགོ ཝེདིཏབྦོ. ནིབྦཀོསསྶ ཧི ཨུདཀཔཏནཊྛཱནབྦྷནྟརཾ གྷརཾ ནཱམ. ཡཾ པན དྭཱརེ ཋིཏོ མཱཏུགཱམོ བྷཱཛནདྷོཝནཨུདཀཾ ཚཌྜེཏི, ཏསྶ པཏནཊྛཱནཉྩ མཱཏུགཱམེནེཝ ཨནྟོགེཧེ ཋིཏེན པཀཏིཡཱ བཧི ཁིཏྟསྶ སུཔྤསྶ ཝཱ སཾམུཉྫནིཡཱ ཝཱ པཏནཊྛཱནཉྩ གྷརསྶ པུརཏོ དྭཱིསུ ཀོཎེསུ སམྦནྡྷིཏྭཱ མཛ྄ཛྷེ རུཀྑསཱུཙིདྭཱརཾ ཋཔེཏྭཱ གོརཱུཔཱནཾ པཝེསནནིཝཱརཎཏྠཾ ཀཏཔརིཀྑེཔོ ཙ ཨཡཾ སབྦོཔི གྷརཱུཔཙཱརོ ནཱམ. ཡཾ པན སབྦནྟིམཾ གྷརཾ ཧོཏི, ཏསྶ གྷརསྶ ཏཱདིསེ གྷརཱུཔཙཱརེ ཋིཏསྶ ཐཱམམཛ྄ཛྷིམསྶ པུརིསསྶ ཡཐཱ ཏརུཎམནུསྶཱ ཨཏྟནོ བལཾ དསྶེནྟོ བཱཧུཾ པསཱརེཏྭཱ ལེཌྜུཾ ཁིཔནྟི, ཨེཝཾ ཁིཏྟསྶ ལེཌྜུསྶ པཏནཊྛཱནབྦྷནྟརཾ གཱམོ ནཱམ. ཏཏོ ཨཉྙསྶ ལེཌྜུཔཱཏསྶ ཨབྦྷནྟརཾ གཱམཱུཔཙཱརོ ནཱམ. པཏིཏསྶ པན ལེཌྜུནོ པཝཏྟིཏྭཱ གཏཊྛཱནཾ ན གཧེཏབྦཾ. པརིཀྑིཏྟསྶ པན གཱམསྶ པརིཀྑེཔོཡེཝ གཱམསྶ པརིཙྪེདོ, ཏསྶ སཙེ དྭེ ཨིནྡཁིལཱ ཧོནྟི ཨབྦྷནྟརིམེ ཨིནྡཁིལེ ཋིཏསྶ ལེཌྜུཔཱཏབྦྷནྟརཾ གཱམཱུཔཙཱརོ ནཱམ. པདབྷཱཛནེཔི (པཱརཱ. ༩༢) ཧི ཨིམིནཱཝ ནཡེན ཨཏྠོ ཝེདིཏབྦོ. ཏཏྠ ཡྭཱཡཾ ཨཔརིཀྑིཏྟསྶ གཱམསྶ ཨུཔཙཱརོ དསྶིཏོ, ཏསྶ ཝསེན ཝིཀཱལེ གཱམཔྤཝེསནཱདཱིསུ ཨཱཔཏྟི པརིཙྪིནྡིཏབྦཱ. ཨིཏི ཨིམཾ ཋཔེཏྭཱ གཱམཉྩ གཱམཱུཔཙཱརཉྩ ཨཝསེསཾ ཨིམསྨིཾ སིཀྑཱཔདེ ཨརཉྙཾ ནཱམ. དེསནཱམཏྟམེཝ ཙེཏཾ ‘‘གཱམཱ ཝཱ ཨརཉྙཱཝཱ’’ཏི. ཡེ པན ཨིམེསཾ པརིཙྪེདདསྶནཏྠཾ གྷརགྷརཱུཔཙཱརགཱམཱུཔཙཱརཱ ཝུཏྟཱ, ཏཏོཔི པཱརཱཛིཀཝཏྠུཾ ཨཝཧརནྟསྶ པཱརཱཛིཀཾ ཧོཏིཡེཝ.

ཨདིནྣནྟི ཨཉྙསྶ མནུསྶཛཱཏིཀསྶ སནྟཀཾ. ཐེཡྻསངྑཱཏནྟི ཨེཏྠ ཐེནོཏི ¶ ཙོརོ, ཐེནསྶ བྷཱཝོ ཐེཡྻཾ, ཨཝཧརཎཙིཏྟསྶེཏཾ ནཱམཾ. སངྑཱ སངྑཱཏནྟི ཨཏྠཏོ ཨེཀཾ, ཀོཊྛཱསསྶེཏཾ ནཱམཾ ‘‘སཉྙཱནིདཱནཱ ¶ ཧི པཔཉྩསངྑཱ’’ཏིཨཱདཱིསུ (སུ. ནི. ༨༨༠; མཧཱནི. ༡༠༩) ཝིཡ. ཐེཡྻཉྩ ཏཾ སངྑཱཏཉྩཱཏི ཐེཡྻསངྑཱཏཾ, ཐེཡྻཙིཏྟསངྑཱཏོ ཨེཀོ ཙིཏྟཀོཊྛཱསོཏི ཨཏྠོ. ཀརཎཏྠེ ཙེཏཾ པཙྩཏྟཝཙནཾ, ཏསྨཱ ཐེཡྻསངྑཱཏེནཱཏི ཨཏྠཏོ དཊྛབྦཾ. ཡོ ཙ ཐེཡྻསངྑཱཏེན ཨཱདིཡཏི, སོ ཡསྨཱ ཐེཡྻཙིཏྟོ ཧོཏི, ཏསྨཱ བྱཉྫནཾ ཨནཱདིཡིཏྭཱ ཨཏྠམེཝ དསྶེཏུཾ ‘‘ཐེཡྻཙིཏྟོ ཨཝཧརཎཙིཏྟོ’’ཏི (པཱརཱ. ༩༢) ཨེཝམསྶ པདབྷཱཛནཾ ཝུཏྟནྟི ཝེདིཏབྦཾ.

ཨཱདིཡེཡྻཱཏི ¶ པཉྩཝཱིསཏིཡཱ ཨཝཧཱརཱནཾ ཨཉྙཏརཝསེན ཧརེཡྻ. ཏེ པན ཨཝཧཱརཱ པཉྩ པཉྩཀཱནི སམོདྷཱནེཏྭཱ སཱདྷུཀཾ སལླཀྑེཏབྦཱ. པཉྩ པཉྩཀཱནི ནཱམ ནཱནཱབྷཎྜཔཉྩཀཾ ཨེཀབྷཎྜཔཉྩཀཾ སཱཧཏྠིཀཔཉྩཀཾ པུབྦཔཡོགཔཉྩཀཾ ཐེཡྻཱཝཧཱརཔཉྩཀནྟི. ཏཏྠ པུརིམཱནི དྭེ པཉྩཀཱནི ཨེཏསྶེཝ པདསྶ པདབྷཱཛནེ ཝུཏྟཱནཾ ‘‘ཨཱདིཡེཡྻ ཧརེཡྻ ཨཝཧརེཡྻ ཨིརིཡཱཔཐཾ ཝིཀོཔེཡྻ ཋཱནཱ ཙཱཝེཡྻཱ’’ཏི ཨིམེསཾ པདཱནཾ ཝསེན ལབྦྷནྟི. ཏཏྠ ནཱནཱབྷཎྜཔཉྩཀཾ སཝིཉྙཱཎཀཱཝིཉྙཱཎཀཝསེན དཊྛབྦཾ, ཨིཏརཾ སཝིཉྙཱཎཀཝསེནེཝ. ཀཐཾ? ཨཱདིཡེཡྻཱཏི ཨཱརཱམཾ ཨབྷིཡུཉྫཏི, ཨཱཔཏྟི དུཀྐཊསྶ. སཱམིཀསྶ ཝིམཏིཾ ཨུཔྤཱདེཏི, ཨཱཔཏྟི ཐུལླཙྩཡསྶ. སཱམིཀོ ‘‘ན མཡ྄ཧཾ བྷཝིསྶཏཱི’’ཏི དྷུརཾ ནིཀྑིཔཏི, ཨཱཔཏྟི པཱརཱཛིཀསྶ. ཧརེཡྻཱཏི ཨཉྙསྶ བྷཎྜཾ ཧརནྟོ སཱིསེ བྷཱརཾ ཐེཡྻཙིཏྟོ ཨཱམསཏི, དུཀྐཊཾ. ཕནྡཱཔེཏི, ཐུལླཙྩཡཾ. ཁནྡྷཾ ཨོརོཔེཏི, པཱརཱཛིཀཾ. ཨཝཧརེཡྻཱཏི ཨུཔནིཀྑིཏྟཾ བྷཎྜཾ ‘‘དེཧི མེ བྷཎྜ’’ནྟི ཝུཙྩམཱནོ ‘‘ནཱཧཾ གཎྷཱམཱི’’ཏི བྷཎཏི, དུཀྐཊཾ. སཱམིཀསྶ ཝིམཏིཾ ཨུཔྤཱདེཏི, ཐུལླཙྩཡཾ. སཱམིཀོ ‘‘ན མཡ྄ཧཾ བྷཝིསྶཏཱི’’ཏི དྷུརཾ ནིཀྑིཔཏི, པཱརཱཛིཀཾ. ཨིརིཡཱཔཐཾ ཝིཀོཔེཡྻཱཏི ‘‘སཧ བྷཎྜཧཱརཀཾ ནེསྶཱམཱི’’ཏི པཋམཾ པཱདཾ ཨཏིཀྐཱམེཏི, ཐུལླཙྩཡཾ. དུཏིཡཾ པཱདཾ ཨཏིཀྐཱམེཏི, པཱརཱཛིཀཾ. ཋཱནཱ ཙཱཝེཡྻཱཏི ཐལཊྛཾ བྷཎྜཾ ཐེཡྻཙིཏྟོ ཨཱམསཏི, དུཀྐཊཾ. ཕནྡཱཔེཏི, ཐུལླཙྩཡཾ. ཋཱནཱ ཙཱཝེཏི, པཱརཱཛིཀཾ. ཨེཝཾ ཏཱཝ ནཱནཱབྷཎྜཔཉྩཀཾ ཝེདིཏབྦཾ. སསཱམིཀསྶ པན དཱསསྶ ཝཱ ཏིརཙྪཱནགཏསྶ ཝཱ ཡཐཱཝུཏྟེན ཨབྷིཡོགཱདིནཱ ནཡེན ཨཱདིཡནཧརཎཨཝཧརཎཨིརིཡཱཔཐཝིཀོཔནཋཱནཱཙཱཝནཝསེན ཨེཀབྷཎྜཔཉྩཀཾ ཝེདིཏབྦཾ.

ཀཏམཾ སཱཧཏྠིཀཔཉྩཀཾ? སཱཧཏྠིཀོ ཨཱཎཏྟིཀོ ནིསྶགྒིཡོ ཨཏྠསཱདྷཀོ དྷུརནིཀྑེཔོཏི. ཏཏྠ སཱཧཏྠིཀོ ནཱམ པརསྶ བྷཎྜཾ ¶ སཧཏྠཱ ཨཝཧརཏི. ཨཱཎཏྟིཀོ ནཱམ ‘‘ཨསུཀསྶ བྷཎྜཾ ཨཝཧརཱ’’ཏི ཨཉྙཾ ཨཱཎཱཔེཏི. ནིསྶགྒིཡོ ནཱམ སུངྐགྷཱཏཀཔརིཀཔྤིཏོཀཱསཱནཾ ཨནྟོ ཋཏྭཱ བཧི པཱཏནཾ. ཨཏྠསཱདྷཀོ ནཱམ ‘‘ཨསུཀསྶ བྷཎྜཾ ཡདཱ སཀྐོཏི, ཏདཱ ཏཾ ཨཝཧརཱ’’ཏི ཨཉྙཾ ཨཱཎཱཔེཏི. ཏཏྠ སཙེ པརོ ཨནནྟརཱཡིཀོ ཧུཏྭཱ ཏཾ ཨཝཧརཏི, ཨཱཎཱཔཀསྶ ཨཱཎཏྟིཀྑཎེཡེཝ པཱརཱཛིཀཾ. པརསྶ ཝཱ པན ¶ ཏེལཀུམྦྷིཡཱ པཱདགྒྷནཀཏེལཾ ཨཝསྶཾ པིཝནཀཱནི ཨུཔཱཧནཱདཱིནི པཀྑིཔཏི, ཧཏྠཏོ མུཏྟམཏྟེཡེཝ པཱརཱཛིཀཾ. དྷུརནིཀྑེཔོ པན ཨཱརཱམཱབྷིཡོགཨུཔནིཀྑིཏྟབྷཎྜཝསེན ཝེདིཏབྦོ. ཏཱཝཀཱལིཀབྷཎྜདེཡྻཱནི ཨདེནྟསྶཱཔི ཨེསེཝནཡོཏི ཨིདཾ སཱཧཏྠིཀཔཉྩཀཾ.

ཀཏམཾ པུབྦཔཡོགཔཉྩཀཾ? པུབྦཔཡོགོ སཧཔཡོགོ སཾཝིདྷཱཝཧཱརོ སངྐེཏཀམྨཾ ནིམིཏྟཀམྨནྟི ¶ . ཏཏྠ ཨཱཎཏྟིཝསེན པུབྦཔཡོགོ ཝེདིཏབྦོ. ཋཱནཱ ཙཱཝནཝསེན, ཁིལཱདཱིནི སངྐཱམེཏྭཱ ཁེཏྟཱདིགྒཧཎཝསེན ཙ སཧཔཡོགོ ཝེདིཏབྦོ. སཾཝིདྷཱཝཧཱརོ ནཱམ ‘‘ཨསུཀཾ ནཱམ བྷཎྜཾ ཨཝཧརིསྶཱམཱ’’ཏི སཾཝིདཧིཏྭཱ སཾམནྟཡིཏྭཱ ཨཝཧརཎཾ. ཨེཝཾ སཾཝིདཧིཏྭཱ གཏེསུ ཧི ཨེཀེནཱཔི ཏསྨིཾ བྷཎྜེ ཋཱནཱ ཙཱཝིཏེ སབྦེསཾ ཨཝཧཱརཱ ཧོནྟི. སངྐེཏཀམྨཾ ནཱམ སཉྫཱནནཀམྨཾ. སཙེ ཧི པུརེབྷཏྟཱདཱིསུ ཡཾཀིཉྩི ཀཱལཾ པརིཙྪིནྡིཏྭཱ ‘‘ཨསུཀསྨིཾ ཀཱལེ ཨིཏྠནྣཱམཾ བྷཎྜཾ ཨཝཧརཱ’’ཏི ཝུཏྟོ སངྐེཏཏོ ཨཔཙྪཱ ཨཔུརེ ཏཾ ཨཝཧརཏི, སངྐེཏཀཱརཀསྶ སངྐེཏཀརཎཀྑཎེཡེཝ ཨཝཧཱརོ. ནིམིཏྟཀམྨཾ ནཱམ སཉྙུཔྤཱདནཏྠཾ ཨཀྑིནིཀྑཎཱདིནིམིཏྟཀརཎཾ. སཙེ ཧི ཨེཝཾ ཀཏནིམིཏྟཏོ ཨཔཙྪཱ ཨཔུརེ ‘‘ཡཾ ཨཝཧརཱ’’ཏི ཝུཏྟོ, ཏཾ ཨཝཧརཏི, ནིམིཏྟཀཱརཀསྶ ནིམིཏྟཀརཎཀྑཎེཡེཝ ཨཝཧཱརོཏི ཨིདཾ པུབྦཔཡོགཔཉྩཀཾ.

ཀཏམཾ ཐེཡྻཱཝཧཱརཔཉྩཀཾ? ཐེཡྻཱཝཧཱརོ པསཡ྄ཧཱཝཧཱརོ པརིཀཔྤཱཝཧཱརོ པཊིཙྪནྣཱཝཧཱརོ ཀུསཱཝཧཱརོཏི. ཏཏྠ ཡོ སནྡྷིཙྪེདཱདཱིནི ཀཏྭཱ ཨདིསྶམཱནོ ཨཝཧརཏི, ཀཱུཊམཱནཀཱུཊཀཧཱཔཎཱདཱིཧི ཝཱ ཝཉྩེཏྭཱ གཎྷཱཏི, ཏསྶེཝཾ གཎྷཏོ ཨཝཧཱརོ ཐེཡྻཱཝཧཱརོཏི ཝེདིཏབྦོ. ཡོ པན པསཡ྄ཧ བལཀྐཱརེན པརེསཾ སནྟཀཾ གཎྷཱཏི གཱམགྷཱཏཀཱདཡོ ཝིཡ, ཨཏྟནོ པཏྟབལིཏོ ཝཱ ཝུཏྟནཡེནེཝ ཨདྷིཀཾ གཎྷཱཏི རཱཛབྷཊཱདཡོ ཝིཡ, ཏསྶེཝཾ གཎྷཏོ ཨཝཧཱརོ ¶ པསཡ྄ཧཱཝཧཱརོཏི ཝེདིཏབྦོ. པརིཀཔྤེཏྭཱ གཧཎཾ པན པརིཀཔྤཱཝཧཱརོ ནཱམ. སོ བྷཎྜོཀཱསཝསེན དུཝིདྷོ. ཏཏྲཱཡཾ བྷཎྜཔརིཀཔྤོ – སཱཊཀཏྠིཀོ ཨནྟོགབྦྷཾ པཝིསིཏྭཱ ‘‘སཙེ སཱཊཀོ བྷཝིསྶཏི, གཎྷིསྶཱམི, སཙེ སུཏྟཾ, ན གཎྷིསྶཱམཱི’’ཏི པརིཀཔྤེཏྭཱ ཨནྡྷཀཱརེ པསིབྦཀཾ གཎྷཱཏི, ཏཏྲ ཙེ སཱཊཀོ ཧོཏི, ཨུདྡྷཱརེཡེཝ པཱརཱཛིཀཾ. སུཏྟཾ ཙེ ཧོཏི, རཀྑཏི. བཧི ནཱིཧརིཏྭཱ མུཉྩིཏྭཱ ‘‘སུཏྟ’’ནྟི ཉཏྭཱ པུན ཨཱཧརིཏྭཱ ཋཔེཏི, རཀྑཏིཡེཝ. ‘‘སུཏྟ’’ནྟི ཉཏྭཱཔི ‘‘ཡཾ ལདྡྷཾ, ཏཾ གཧེཏབྦ’’ནྟི གཙྪཏི, པདཝཱརེན ཀཱརེཏབྦོ. བྷཱུམིཡཾ ཋཔེཏྭཱ གཎྷཱཏི, ཨུདྡྷཱརེ པཱརཱཛིཀཾ. ‘‘ཙོརོ ཙོརོ’’ཏི ཨནུབནྡྷོ ཚཊྚེཏྭཱ པལཱཡཏི, རཀྑཏི. སཱམིཀཱ དིསྭཱ གཎྷནྟི, རཀྑཏི ཡེཝ. ཨཉྙོ ཙེ ཀོཙི གཎྷཱཏི, བྷཎྜདེཡྻཾ. སཱམིཀེསུ ནིཝཏྟེསུ སཡཾ དིསྭཱ པཾསུཀཱུལསཉྙཱཡ ‘‘པགེཝེཏཾ མཡཱ གཧིཏཾ, མམ དཱནི སནྟཀ’’ནྟི གཎྷནྟསྶཱཔི བྷཎྜདེཡྻམེཝ. ཏཏྠ ཡྭཱཡཾ ‘‘སཙེ སཱཊཀོ བྷཝིསྶཏི, གཎྷིསྶཱམཱི’’ཏིཨཱདིནཱ ནཡེན པཝཏྟོ པརིཀཔྤོ, ཨཡཾ བྷཎྜཔརིཀཔྤོ ནཱམ.

ཨོཀཱསཔརིཀཔྤོ པན ཨེཝཾ ཝེདིཏབྦོ – ཨེཀཙྩོ པན པརཔརིཝེཎཱདཱིནི ¶ པཝིཊྛོ ཀིཉྩི ལོབྷནེཡྻཾ བྷཎྜཾ དིསྭཱ གབྦྷདྭཱརཔམུཁཧེཊྛཱཔཱསཱདདྭཱརཀོཊྛཀརུཀྑམཱུལཱདིཝསེན པརིཙྪེདཾ ཀཏྭཱ ‘‘སཙེ མཾ ཨེཏྠནྟརེ པསྶིསྶནྟི, དཊྛུཀཱམཏཱཡ གཧེཏྭཱ ཝིཙརནྟོ ཝིཡ དསྶཱམི, ནོ ཙེ ¶ པསྶིསྶནྟི, ཧརིསྶཱམཱི’’ཏི པརིཀཔྤེཏི, ཏསྶ ཏཾ ཨཱདཱཡ པརིཀཔྤིཏཔརིཙྪེདཾ ཨཏིཀྐནྟམཏྟེ ཨཝཧཱརོ ཧོཏི. ཨིཏི ཡྭཱཡཾ ཝུཏྟནཡེནེཝ པཝཏྟོ པརིཀཔྤོ, ཨཡཾ ཨོཀཱསཔརིཀཔྤོ ནཱམ. ཨེཝམིམེསཾ དྭིནྣམྤི པརིཀཔྤཱནཾ ཝསེན པརིཀཔྤེཏྭཱ གཎྷཏོ ཨཝཧཱརོ ‘‘པརིཀཔྤཱཝཧཱརོ’’ཏི ཝེདིཏབྦོ.

པཊིཙྪཱདེཏྭཱ པན ཨཝཧརཎཾ པཊིཙྪནྣཱཝཧཱརོ ནཱམ. སོ ཨེཝཾ ཝེདིཏབྦོ – ཡོ བྷིཀྑུ ཨུཡྻཱནཱདཱིསུ པརེསཾ ཨོམུཉྩིཏྭཱ ཋཔིཏཨངྒུལིམུདྡིཀཱདཱིནི དིསྭཱ ‘‘པཙྪཱ གཎྷིསྶཱམཱི’’ཏི པཾསུནཱ ཝཱ པཎྞེན ཝཱ པཊིཙྪཱདེཏི, ཏསྶ ཨེཏྟཱཝཏཱ ཨུདྡྷཱརོ ནཏྠཱིཏི ན ཏཱཝ ཨཝཧཱརོ ཧོཏི ¶ . ཡདཱ པན སཱམིཀཱ ཝིཙིནནྟཱ ཨཔསྶིཏྭཱ ‘‘སྭེ ཛཱནིསྶཱམཱ’’ཏི སཱལཡཱཝ གཏཱ ཧོནྟི, ཨཐསྶ ཏཾ ཨུདྡྷརཏོ ཨུདྡྷཱརེ ཨཝཧཱརོ. པཊིཙྪནྣཀཱལེཡེཝ ‘‘ཨེཏཾ མམ སནྟཀ’’ནྟི སཀསཉྙཱཡ ཝཱ ‘‘གཏཱ དཱནི ཏེ, ཚཊྚིཏབྷཎྜཾ ཨིད’’ནྟི པཾསུཀཱུལསཉྙཱཡ ཝཱ གཎྷནྟསྶ པན བྷཎྜདེཡྻཾ. ཏེསུ དུཏིཡཏཏིཡདིཝསེ ཨཱགནྟྭཱ ཝིཙིནིཏྭཱ ཨདིསྭཱ དྷུརནིཀྑེཔཾ ཀཏྭཱ གཏེསུཔི གཧིཏཾ བྷཎྜདེཡྻམེཝ. པཙྪཱ ཉཏྭཱ ཙོདིཡམཱནསྶ ཨདདཏོ སཱམིཀཱནཾ དྷུརནིཀྑེཔེ ཨཝཧཱརོ ཧོཏི. ཀསྨཱ? ཡསྨཱ ཏསྶ པཡོགེན ཏེཧི ན དིཊྛཾ. ཡོ པན ཏཐཱརཱུཔཾ བྷཎྜཾ ཡཐཱཋཱནེ ཋིཏཾཡེཝ ཨཔྤཊིཙྪཱདེཏྭཱ ཐེཡྻཙིཏྟོ པཱདེན ཨཀྐམིཏྭཱ ཀདྡམེ ཝཱ ཝཱལུཀཱཡ ཝཱ པཝེསེཏི, ཏསྶ པཝེསིཏམཏྟེཡེཝ ཨཝཧཱརོ.

ཀུསཾ སངྐཱམེཏྭཱ པན ཨཝཧརཎཾ ཀུསཱཝཧཱརོ ནཱམ. སོཔི ཨེཝཾ ཝེདིཏབྦོ – ཡོ བྷིཀྑུ ཝིལཱིཝམཡཾ ཝཱ ཏཱལཔཎྞམཡཾ ཝཱ ཀཏསཉྙཱཎཾ ཡཾཀིཉྩི ཀུསཾ པཱཏེཏྭཱ ཙཱིཝརེ བྷཱཛཱིཡམཱནེ ཨཏྟནོ ཀོཊྛཱསསྶ སམཱིཔེ ཋིཏཾ ཨཔྤགྒྷཏརཾ ཝཱ མཧགྒྷཏརཾ ཝཱ སམསམཾ ཝཱ ཨགྒྷེན པརསྶ ཀོཊྛཱསཾ ཧརིཏུཀཱམོ ཨཏྟནོ ཀོཊྛཱསེ པཏིཏཾ ཀུསཾ པརསྶ ཀོཊྛཱསེ པཱཏེཏུཀཱམཏཱཡ ཨུདྡྷརཏི, རཀྑཏི ཏཱཝ. པརསྶ ཀོཊྛཱསེ པཱཏིཏེ རཀྑཏེཝ. ཡདཱ པན ཏསྨིཾ པཏིཏེ པརསྶ ཀོཊྛཱསཏོ པརསྶ ཀུསཾ ཨུདྡྷརཏི, ཨུདྡྷཏམཏྟེ ཨཝཧཱརོ. སཙེ པཋམཏརཾ པརཀོཊྛཱསཏོ པརསྶ ཀུསཾ ཨུདྡྷརཏི, ཨཏྟནོ ཀོཊྛཱསེ པཱཏེཏུཀཱམཏཱཡ ཨུདྡྷཱརེ རཀྑཏི, པཱཏནེཔི རཀྑཏི, ཨཏྟནོ ཀོཊྛཱསཏོ པན ཨཏྟནོ ཀུསཾ ཨུདྡྷརཏོ ཨུདྡྷཱརེཡེཝ རཀྑཏི, ཏཾ ཨུདྡྷརིཏྭཱ པརཀོཊྛཱསེ པཱཏེནྟསྶ ཧཏྠཏོ མུཏྟམཏྟེ ཨཝཧཱརོ. ཨཡཾ ཀུསཱཝཧཱརོ. ཨིཏི ཡཾ ཝུཏྟཾ ‘‘ཨཱདིཡེཡྻཱཏི པཉྩཝཱིསཏིཡཱ ཨཝཧཱརཱནཾ ཨཉྙཏརཝསེན ཧརེཡྻཱ’’ཏི, ཏསྶཏྠོ པཀཱསིཏོ ཧོཏི.

ཡཐཱརཱུཔེཏི ཡཱདིསེ. ཨདིནྣཱདཱནེཏི ཨདིནྣསྶ པརསནྟཀསྶ གཧཎེ. རཱཛཱནོཏིཨིདཾ བིམྦིསཱརཾཡེཝ སནྡྷཱཡ ཝུཏྟཾ, ཨཉྙེ ¶ པན ཏཐཱ ཀརེཡྻུཾ ཝཱ ན ཀརེཡྻུཾ ཝཱཏི ཏེ ནཔྤམཱཎཾ. ཧནེཡྻུཾ ¶ ཝཱཏི ཧཏྠཱདཱིཧི ཝཱ པོཐེཡྻུཾ, སཏྠེན ཝཱ ཚིནྡེཡྻུཾ. བནྡྷེཡྻུཾ ཝཱཏི རཛྫུབནྡྷནཱདཱིཧི ¶ བནྡྷེཡྻུཾ ཝཱ. པབྦཱཛེཡྻུཾ ཝཱཏི ནཱིཧརེཡྻུཾ ཝཱ. ཙོརོསི བཱལོསི མཱུལ༹ྷོསི ཐེནོསཱིཏི ཨིམེཧི ཝཙནེཧི པརིབྷཱསེཡྻུཾ. ཀཱིདིསསྶ པན ཨདིནྣསྶ ཨཱདཱནེ རཱཛཱནོ ཨེཝཾ ཀརོནྟི? པཱདསྶ ཝཱ པཱདཱརཧསྶ ཝཱ. ཏཐཱརཱུཔཾ བྷིཀྑུ ཨདིནྣཾ ཨཱདིཡམཱནོཏི ཏཱདིསཾ བྷིཀྑུ པོརཱཎཀསྶ ཀཧཱཔཎསྶ པཱདཾ ཝཱ པཱདཱརཧཾ ཝཱ བྷཎྜཾ ཨདིནྣཾ བྷཱུམིཨཱདཱིསུ ཡཏྠ ཀཏྠཙི ཋིཏཾ ཡཾཀིཉྩི སཛཱིཝནིཛྫཱིཝཾ ཝུཏྟཔྤཀཱརཱནཾ ཨཝཧཱརཱནཾ ཡེན ཀེནཙི ཨཝཧཱརེན ཨཝཧརནྟོ པཱརཱཛིཀོ ཧོཏི, ཀོ པན ཝཱདོ ཏཏོ ཨཏིརེཀཏརསྨིནྟི.

རཱཛགཧེ དྷནིཡཏྠེརཾ ཨཱརབྦྷ རཉྙོ དཱརཱུནི ཨདིནྣཾ ཨཱདིཡནཝཏྠུསྨིཾ པཉྙཏྟཾ, ‘‘གཱམཱ ཝཱ ཨརཉྙཱ ཝཱ’’ཏི ཨཡམེཏྠ ཨནུཔཉྙཏྟི, སཱདྷཱརཎཔཉྙཏྟི, སཱཎཏྟིཀཾ, ཧརཎཏྠཱཡ གམནཱདིཀེ པུབྦཔྤཡོགེ དུཀྐཊཾ, ཨཱམསནེ དུཀྐཊཾ, པཱརཱཛིཀཝཏྠུནོ ཕནྡཱཔནེ ཐུལླཙྩཡཾ. ཨཱདིཡནྟསྶ མཱསཀེ ཝཱ ཨཱུནམཱསཀེ ཝཱ དུཀྐཊཾ, ཨཏིརེཀམཱསཀེ ཝཱ ཨཱུནཔཉྩམཱསཀེ ཝཱ ཐུལླཙྩཡཾ, པཉྩམཱསཀེ ཝཱ ཨཏིརེཀཔཉྩམཱསཀེ ཝཱ པཱརཱཛིཀཾ. སབྦཏྠ གཧཎཀཱལཝསེན ཙ གཧཎདེསཝསེན ཙ པརིབྷོགབྷཱཛནཔརིཝཏྟནཱདཱིཧི ཙ པརིཧཱིནཱཔརིཧཱིནཝསེན ཝིནིཙྪཡོ ཝེདིཏབྦོ. སཀསཉྙིསྶ, ཝིསྶཱསགྒཱཧེ, ཏཱཝཀཱལིཀེ, པེཏཔརིགྒཧེ, ཏིརཙྪཱནགཏཔརིགྒཧེ, པཾསུཀཱུལསཉྙིསྶ, ཨུམྨཏྟཀཱདཱིནཉྩ ཨནཱཔཏྟི. སཱིལཝིཔཏྟི, ཨཉྙསྶ མནུསྶཛཱཏིཀསྶ ཝསེན པརཔརིགྒཧིཏཾ, པརཔརིགྒཧིཏསཉྙིཏཱ, གརུཔརིཀྑཱརོ, ཐེཡྻཙིཏྟཾ, ཝུཏྟཔྤཀཱརཱནཾ ཨཝཧཱརཱནཾ ཝསེན ཨཝཧརཎཉྩཱཏི ཨིམཱནེཏྠ པཉྩ ཨངྒཱནི. ཨདིནྣཱདཱནསམུཊྛཱནཾ, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, ཏིཝེདནནྟི.

དུཏིཡཔཱརཱཛིཀཝཎྞནཱ ནིཊྛིཏཱ.

༣. ཏཏིཡཔཱརཱཛིཀཝཎྞནཱ

ཏཏིཡེ སཉྩིཙྩཱཏི སཾཙེཏེཏྭཱ སདྡྷིཾ ཙེཏེཏྭཱ. ‘‘པཱཎོ’’ཏིསཉྙཱཡ སདྡྷིཾཡེཝ ‘‘ཝདྷཱམི ན’’ནྟི ཝདྷཀཙེཏནཱཡ ཙེཏེཏྭཱ པཀཔྤེཏྭཱ. མནུསྶཝིགྒཧནྟི ཀལལཏོ པཊྛཱཡ ཛཱིཝམཱནཀམནུསྶཛཱཏིཀསརཱིརཾ. ཛཱིཝིཏཱ ¶ ཝོརོཔེཡྻཱཏི ཀལལཀཱལེཔི ཏཱཔནམདྡནེཧི ཝཱ བྷེསཛྫསམྤདཱནེན ཝཱ ཏཏོ ཝཱ ཨུདྡྷམྤི ཏདནུརཱུཔེན ཨུཔཀྐམེན ཛཱིཝིཏཱ ཝིཡོཛེཡྻ. ཨིམསྶ པནཏྠསྶ ཨཱཝིབྷཱཝཏྠཾ པཱཎོ ཝེདིཏབྦོ, པཱཎཱཏིཔཱཏོ ཝེདིཏབྦོ, པཱཎཱཏིཔཱཏཱི ཝེདིཏབྦོ, པཱཎཱཏིཔཱཏསྶ པཡོགོ ཝེདིཏབྦོ. ཏཏྠ པཱཎོཏི ཝོཧཱརཏོ སཏྟོ, པརམཏྠཏོ ཛཱིཝིཏིནྡྲིཡཾ. པཱཎཱཏིཔཱཏོཏི ¶ ཡཱཡ ཙེཏནཱཡ ཛཱིཝིཏིནྡྲིཡུཔཙྪེདཀཔཡོགཾ སམུཊྛཱཔེཏི, སཱ ཙེཏནཱ. པཱཎཱཏིཔཱཏཱིཏི ཝུཏྟཙེཏནཱཡ སམངྒིཔུགྒལོ. པཱཎཱཏིཔཱཏསྶ པཡོགོཏི པཱཎཱཏིཔཱཏསྶ ཚ པཡོགཱ སཱཧཏྠིཀོ ནིསྶགྒིཡོ ཨཱཎཏྟིཀོ ཐཱཝརོ ཝིཛྫཱམཡོ ཨིདྡྷིམཡོཏི ¶ . ཏཏྠ སཱཧཏྠིཀོཏི སཡཾ མཱརེནྟསྶ ཀཱཡེན ཝཱ ཀཱཡཔྤཊིབདྡྷེན ཝཱ པཧརཎཾ. ནིསྶགྒིཡོཏི དཱུརེ ཋིཏཾ མཱརེཏུཀཱམསྶ ཀཱཡེན ཝཱ ཀཱཡཔྤཊིབདྡྷེན ཝཱ ཨུསུསཏྟིཡནྟཔཱསཱཎཱདཱིནཾ ནིསྶཛྫནཾ. ཏཏྠ ཨེཀེཀོ ཨུདྡིསྶཱནུདྡིསྶབྷེདཏོ དུཝིདྷོ. ཏཏྠ ཨུདྡིསྶཀེ ཡཾ ཨུདྡིསྶ པཧརཏི, ཏསྶེཝ མརཎེན ཀམྨབདྡྷོ. ‘‘ཡོ ཀོཙི མརཏཱུ’’ཏི ཨེཝཾ ཨནུདྡིསྶཀེ པཧཱརཔྤཙྩཡཱ ཡསྶ ཀསྶཙི མརཎེན ཀམྨབདྡྷོ. ཨུབྷཡཏྠཱཔི ཙ པཧརིཏམཏྟེ ཝཱ མརཏུ, པཙྪཱ ཝཱ ཏེནེཝ རོགེན, པཧརིཏཀྑཎེཡེཝ ཀམྨབདྡྷོ. ཨཱཎཏྟིཀོཏི ‘‘ཨསུཀཾ ནཱམ མཱརེཧཱི’’ཏི ཨཉྙཾ ཨཱཎཱཔེནྟསྶ ཨཱཎཱཔནཾ.

ཏཏྠ –

ཝཏྠུ ཀཱལོ ཙ ཨོཀཱསོ, ཨཱཝུདྷཾ ཨིརིཡཱཔཐོ;

ཀྲིཡཱཝིསེསོཏི ཨིམེ, ཚ ཨཱཎཏྟི ནིཡཱམཀཱ.

ཏཏྠ ཝཏྠཱུཏི པུགྒལོ. ཡཉྷི པུགྒལཾ ‘‘མཱརེཧཱི’’ཏི ཨཱཎཏྟོ སཙེ ཏམེཝ མཱརེཏི, ཨཱཎཱཔཀསྶ ཨཱཔཏྟི. ཨཐ ཨཉྙཾ མཱརེཏི, ཏཾམཉྙམཱནོ ཝཱ ཨཉྙཾ མཱརེཏི, ཨཱཎཱཔཀོ མུཙྩཏི. ‘‘ཨིམཾ མཱརེཧཱི’’ཏི ཨཱཎཏྟེ པན ཨཱཎཱཔཀསྶ དུཀྐཊཾ. ཀཱལོཏི པུརེབྷཏྟཱདིཀཱལོ. སཙེ ཧི ‘‘པུརེབྷཏྟཾ མཱརེཧཱི’’ཏི ཨཱཎཏྟོ པུརེབྷཏྟམེཝ མཱརེཏི, ཨཱཎཱཔཀསྶ ཨཱཔཏྟི. ཨཐ ཡཾ པུརེབྷཏྟཾ ནིཡཱམིཏཾ, ཏཏོ པཙྪཱ ཝཱ པུརེ ཝཱ མཱརེཏི, ཨཱཎཱཔཀོ མུཙྩཏི. ཨིམིནཱ ནཡེན སབྦཏྠ ཝིནིཙྪཡོ ཝེདིཏབྦོ. ཐཱཝརོཏི ཨསཾཧཱརིམེན ཨུཔཀརཎེན མཱརེཏུཀཱམསྶ ¶ ཨོཔཱཏཀྑཎནཾ ཨཔསྶེནསཾཝིདྷཱནཾ ཨསིཨཱདཱིནཾ ཨུཔནིཀྑིཔནཾ ཏལཱ༹ཀཱདཱིསུ ཝིསསམྤཡོཛནཾ རཱུཔཱུཔཧཱརོཏིཨེཝམཱདི. ཝུཏྟནཡེནེཝ ཙེཏྠཱཔི ཨུདྡིསྶཱནུདྡིསྶབྷེདོ ཝེདིཏབྦོ. ཝིཛྫཱམཡོཏི མཱརཎཏྠཾ ཝིཛྫཱཔརིཛཔྤནཾ. ཨིདྡྷིམཡོཏི ཀམྨཝིཔཱཀཛཱཡ ཨིདྡྷིཡཱ པཡོཛནཾ.

སཏྠཧཱརཀཾ ཝཱསྶ པརིཡེསེཡྻཱཏི ཨེཏྠ ཧརཏཱིཏི ཧཱརཀཾ, ཀིཾ ཧརཏི? ཛཱིཝིཏཾ. ཨཐ ཝཱ ཧརིཏབྦནྟི ཧཱརཀཾ, ཨུཔནིཀྑིཔིཏབྦནྟི ཨཏྠོ. སཏྠཉྩ ཏཾ ཧཱརཀཉྩཱཏི སཏྠཧཱརཀཾ. ཨསྶཱཏི མནུསྶཝིགྒཧསྶ. པརིཡེསེཡྻཱཏི ཡཐཱ ལབྷཏི, ཏཐཱ ཀརེཡྻ, ཨུཔནིཀྑིཔེཡྻཱཏི ཨཏྠོ. ཨེཏེན ཐཱཝརཔཡོགཾ དསྶེཏི. ཨིཏརཐཱ ཧི པརིཡིཊྛིམཏྟེཡེཝ པཱརཱཛིཀོ བྷཝེཡྻ, ན ཙེཏཾ ཡུཏྟཾ. པདབྷཱཛནེ པནསྶ བྱཉྫནཾ ཨནཱདིཡིཏྭཱ ཡཾ ཨེཏྠ ཐཱཝརཔཡོགསངྒཧིཏཾ སཏྠཾ, ཏདེཝ ¶ དསྶེཏུཾ ‘‘ཨསིཾ ཝཱ’’ཏིཨཱདི ཝུཏྟཾ. མརཎཝཎྞཾ ཝཱ སཾཝཎྞེཡྻཱཏི ཝཱཙཱཡ ཝཱ ཏཱལཔཎྞཱདཱིསུ ལིཁིཏྭཱ ཝཱ ‘‘ཡོ ཨེཝཾ མརཏི, སོ དྷནཾ ཝཱ ལབྷཏཱི’’ཏིཨཱདིནཱ ནཡེན མརཎེ གུཎཾ པཀཱསེཡྻ. ཨེཏེན ཡཐཱ ‘‘ཨདིནྣཱདཱནེ ཨཱདིཡེཡྻཱ’’ཏི ཝུཏྟཏྟཱ པརིཡཱཡཀཐཱཡ མུཙྩཏི, ནཡིདྷ, ཨེཝཾ ‘‘སཾཝཎྞེཡྻཱ’’ཏི ཝཙནཏོ པན ཨིདྷ པརིཡཱཡཀཐཱཡཔི ན མུཙྩཏཱིཏི ཨཡམཏྠོ ཝེདིཏབྦོ. མརཎཱཡ ཝཱ སམཱདཔེཡྻཱཏི ‘‘སཏྠཾ ཝཱ ཨཱཧརཱ’’ཏིཨཱདིནཱ (པཱརཱ. ༡༧༢) ནཡེན མརཎཏྠཱཡ ¶ ཨུཔཱཡཾ གཱཧཱཔེཡྻ. ཨེཏེན ཨཱཎཏྟིཀཔྤཡོགཾ དསྶེཏི. ཨམྦྷོ པུརིསཱཏི ཨཱལཔནམེཏཾ. ཀིཾ ཏུཡ྄ཧིམིནཱཏིཨཱདི སཾཝཎྞནཱཀཱརནིདསྶནཾ. ཨིཏི ཙིཏྟམནོཏི ཨིཏི ཙིཏྟོ ཨིཏི མནོ. ‘‘མཏཾ ཏེ ཛཱིཝིཏཱ སེཡྻོ’’ཏིཨེཏྠ ཝུཏྟམརཎཙིཏྟོ མརཎམནོཏི ཨཏྠོ. ཨེཏྠ ཙ ‘‘མནོ’’ཏིཨིདཾ ཙིཏྟསྶ ཨཏྠདཱིཔནཏྠཾ ཝུཏྟཾ. ཏེནེཝསྶ པདབྷཱཛནེ ‘‘ཡཾ ཙིཏྟཾ ཏཾ མནོ’’ཏི (པཱརཱ. ༡༧༢) ཨཱཧ. ཙིཏྟསངྐཔྤོཏི ཝིཙིཏྟསངྐཔྤོ. ཨེཏྠཱཔི ཨིཏི-སདྡོ ཨཱཧརིཏབྦོ. ‘‘སངྐཔྤོ’’ཏི ཙ སཾཝིདཧནམཏྟསྶེཏཾ ནཱམཾ, ན ཝིཏཀྐསྶེཝ. ཏཉྩ སཾཝིདཧནཾ ཨིམསྨིཾ ཨཏྠེ སཉྙཱཙེཏནཱདྷིཔྤཱཡེཧི སངྒཧཾ གཙྪཏི, ཏསྨཱ ‘‘ཨིཏི ཙིཏྟསངྐཔྤོ’’ཏི ‘‘མཏཾ ཏེ ཛཱིཝིཏཱ སེཡྻོ’’ཏིཨེཏྠ ཝུཏྟམརཎསཉྙཱི མརཎཙེཏནོ མརཎཱདྷིཔྤཱཡོཏི ཨེཝམེཏྠ ཨཏྠོ དཊྛབྦོ. པདབྷཱཛནེཔི ཧི ཨཡམེཝ ནཡོ དསྶིཏོ ¶ . ཨེཏེན མརཎཙིཏྟཱདཱིཧི ཝིནཱ ‘‘ཨེཀཱཧཾ ཛཱིཝིཏཾ སེཡྻོ, ཝཱིརིཡམཱརབྷཏོ དལ༹ྷ’’ནྟིཨཱདིནཱ (དྷ. པ. ༡༡༢) ནཡེན དྷམྨཾ བྷཱསནྟསྶ སཾཝཎྞནཱ ནཱམ ན ཧོཏཱིཏི དསྶེཏི. ཨནེཀཔརིཡཱཡེནཱཏི ནཱནཔྤཀཱརེན ཨུཙྩཱཝཙེན ཀཱརཎེན. པུན མརཎཝཎྞནྟིཨཱདི ནིགམནཝཙནཾ. པཱརཱཛིཀོ ཧོཏཱིཏི ཏངྑཎཱུཔཔནྣམྤི མནུསྶཝིགྒཧཾ ཝུཏྟནཡེན ཛཱིཝིཏཱ ཝོརོཔེནྟོ པཱརཱཛིཀོ ཧོཏཱིཏི.

ཝེསཱལིཡཾ སམྦཧུལེ བྷིཀྑཱུ ཨཱརབྦྷ ཨཉྙམཉྙཾ ཛཱིཝིཏཱ ཝོརོཔནཝཏྠུསྨིཾ པཉྙཏྟཾ, ‘‘མརཎཝཎྞཾ ཝཱ’’ཏི ཨཡམེཏྠ ཨནུཔཉྙཏྟི, སཱདྷཱརཎཔཉྙཏྟི, སཱཎཏྟིཀཾ, མཱརཎཏྠཱཡ ཨོཔཱཏཀྑཎནཱདཱིསུ དུཀྐཊཾ, ཨནོདིསྶ ཁཏེ ཨོཔཱཏེ ཡསྶ ཀསྶཙི པཏནེཔི དུཀྐཊཾ, ཡཀྑཔེཏཏིརཙྪཱནགཏམནུསྶཝིགྒཧཱནཾ ཏིརཙྪཱནགཏསྶ ཙ དུཀྑུཔྤཏྟིཡཾ དུཀྐཊམེཝ, མནུསྶཛཱཏིཀསྶ དུཀྑུཔྤཏྟིཡཾ ཐུལླཙྩཡཾ, ཏཐཱ ཡཀྑཱདཱིནཾ མརཎེ, ཏིརཙྪཱནགཏམརཎེ པན པཱཙིཏྟིཡཾ, མནུསྶམརཎེ པཱརཱཛིཀནྟི. ཨིམིནཱ ནཡེན སབྦཏྠ པཡོགབྷེདཝསེན ཨཱཔཏྟིབྷེདོ ཝེདིཏབྦོ. ཨསཉྩིཙྩ མཱརེནྟསྶ ཨཛཱནནྟསྶ ནམརཎཱདྷིཔྤཱཡསྶ ཨུམྨཏྟཀཱདཱིནཉྩ ཨནཱཔཏྟི. ཏཏྠ ཨསཉྩིཙྩཱཏི ‘‘ཨིམིནཱ ཨུཔཀྐམེན ཨིམཾ མཱརེམཱི’’ཏི ཨཙེཏེཏྭཱ ཀཏེན ཨུཔཀྐམེན མུསལུསྶཱཔནཝཏྠུསྨིཾ (པཱརཱ. ༡༨༠ ཨཱདཡོ) ཝིཡ པརེ མཏེཔི ཨནཱཔཏྟི. ཨཛཱནནྟསྶཱཏི ‘‘ཨིམིནཱ ཨཡཾ མརིསྶཏཱི’’ཏི ཨཛཱནནྟསྶ ཨུཔཀྐམེན ཝིསགཏཔིཎྜཔཱཏཝཏྠུསྨིཾ (པཱརཱ. ༡༨༡) ཝིཡ པརེ མཏེཔི ཨནཱཔཏྟི. ནམརཎཱདྷིཔྤཱཡསྶཱཏི མརཎཾ ཨནིཙྪནྟསྶ ¶ ཨུཔཀྐམེན བྷེསཛྫཝཏྠུསྨིཾ (པཱརཱ. ༡༨༧) ཝིཡ པརེ མཏེཔི ཨནཱཔཏྟི. ཨེཝཾ ཨསཉྩིཙྩཱཏིཨཱདཱིསུ ཝིནིཙྪཡོ ཝེདིཏབྦོ. སཱིལཝིཔཏྟི, མནུསྶཛཱཏིཀཔཱཎོ, པཱཎསཉྙིཏཱ, ཝདྷཀཙིཏྟཾ, ཨུཔཀྐམོ, ཏེན མརཎནྟི ཨིམཱནེཏྠ པཉྩ ཨངྒཱནི. ཨདིནྣཱདཱནསམཨུཊྛཱནཾ, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

ཏཏིཡཔཱརཱཛིཀཝཎྞནཱ ནིཊྛིཏཱ.

༤. ཙཏུཏྠཔཱརཱཛིཀཝཎྞནཱ

ཙཏུཏྠེ ¶ ¶ ཨནབྷིཛཱནནྟི སཀསནྟཱནེ ཨནུཔྤནྣཏྟཱ ཨཏྟནི ཨཏྠིབྷཱཝཾ ཨཛཱནནྟོ. ཨུཏྟརིམནུསྶདྷམྨནྟི ཨུཏྟརིམནུསྶཱནཾ ཛྷཱཡཱིནཉྩེཝ ཨརིཡཱནཉྩ དྷམྨཾ. ཨཏྟུཔནཱཡིཀནྟི ཨཏྟནི ཏཾ ཨུཔནེཏི ‘‘མཡི ཨཏྠཱི’’ཏི སམུདཱཙརནྟོ, ཨཏྟཱནཾ ཝཱ ཏཏྠ ཨུཔནེཏི ‘‘ཨཧཾ ཨེཏྠ སནྡིསྶཱམཱི’’ཏི སམུདཱཙརནྟོཏི ཨཏྟུཔནཱཡིཀོ, ཏཾ ཨཏྟུཔནཱཡིཀཾ. ཨེཝཾ ཀཏྭཱ སམུདཱཙརེཡྻཱཏི སམྦནྡྷོ. ཨལམརིཡཉཱཎདསྶནནྟིཨེཏྠ མཧགྒཏལོཀུཏྟརཔཉྙཱ ཛཱནནཊྛེན ཉཱཎཾ, ཙཀྑུནཱ ཙ དིཊྛམིཝ དྷམྨཾ པཙྩཀྑཀརཎཏོ དསྶནཏྠེན དསྶནནྟི ཉཱཎདསྶནཾ, ཨརིཡཾ ཝིསུདྡྷཾ ཨུཏྟམཾ ཉཱཎདསྶནནྟི ཨརིཡཉཱཎདསྶནཾ, ཨལཾ པརིཡཏྟཾ ཀིལེསཝིདྡྷཾསནསམཏྠཾ ཨརིཡཉཱཎདསྶནམེཏྠ ཛྷཱནཱདིབྷེདེ ཨུཏྟརིམནུསྶདྷམྨེ, ཨལཾ ཝཱ ཨརིཡཉཱཎདསྶནམསྶཱཏི ཨལམརིཡཉཱཎདསྶནོ, ཏཾ ཨལམརིཡཉཱཎདསྶནཾ. སམུདཱཙརེཡྻཱཏི ཝུཏྟཔྤཀཱརམེཏཾ ཨུཏྟརིམནུསྶདྷམྨཾ ཨཏྟུཔནཱཡིཀཾ ཀཏྭཱ ཀཱཡེན ཝཱ ཝཱཙཱཡ ཝཱ ཏདུབྷཡེན ཝཱ ཝིཉྙུསྶ མནུསྶཛཱཏིཀསྶ ཨཱརོཙེཡྻ. ཨིཏི ཛཱནཱམི ཨིཏི པསྶཱམཱིཏི སམུདཱཙརཎཱཀཱརདསྶནམེཏཾ, ཨཏྟུཔནཱཡིཀཉྷི ཀཏྭཱ ཝིནཱ ཨཉྙཱཔདེསེན སམུདཱཙརནྟོ ཨེཝཾ སམུདཱཙརཏི, ཏསྨཱ ཡྭཱཡཾ པདབྷཱཛནེ (པཱརཱ. ༢༠༩) ‘‘པཋམཾ ཛྷཱནཾ སམཱཔཛྫིཾ, སམཱཔཛྫཱམི, སམཱཔནྣོ’’ཏིཨཱདིབྷེདོ ཝུཏྟོ, སོ སབྦོ ཨིདྷེཝ སངྒཧཾ གཙྪཏཱིཏི ཝེདིཏབྦོ. ‘‘ཨིཏི ཛཱནཱམི ཨིཏི པསྶཱམཱི’’ཏི ཧི ཝདནྟོ ན ཡིདཾ ཝཙནམཏྟམེཝ ཝདཏི, ཨཐ ཁོ ‘‘ཨིམིནཱ ཙ ཨིམིནཱ ཙ ཀཱརཎེན ཨཡཾ དྷམྨོ མཡི ཨཏྠཱི’’ཏི དཱིཔེཏི, ‘‘སམཱཔཛྫི’’ནྟིཨཱདཱིནི ཙ ཝདནྟེན ཧི སམཱཔཛྫནཱདཱིཧི ཀཱརཎེཧི ཨཏྠིཏཱ དཱིཔིཏཱ ཧོཏི, ཏེན ཝུཏྟཾ ‘‘ཡྭཱཡཾ པདབྷཱཛནེ པཋམཾ ཛྷཱནཾ སམཱཔཛྫིཾ, སམཱཔཛྫཱམི, སམཱཔནྣོཏིཨཱདིབྷེདོ ཝུཏྟོ, སོ སབྦོ ཨིདྷེཝ སངྒཧཾ གཙྪཏཱི’’ཏི. ཏཏོ ཨཔརེན སམཡེནཱཏི ཏཏོ ཨཱརོཙིཏཀཱལཏོ ཨཉྙཏརསྨིཾ ཀཱལེ. ཨིཏི ཨཱཔཏྟིཔཊིཛཱནནཀཱལདསྶནམེཏཾ, ཨཡཾ པན ཨཱརོཙིཏཀྑཎེཝ ཨཱཔཏྟིཾ ཨཱཔཛྫཏི. ཨཱཔཏྟིཾ པན ¶ ཨཱཔནྣོ ཡསྨཱ པརེན ཙོདིཏོ ཝཱ ཨཙོདིཏོ ཝཱ པཊིཛཱནཱཏི, ཏསྨཱ ‘‘སམནུགྒཱཧཱིཡམཱནོ ཝཱ ཨསམནུགྒཱཧཱིཡམཱནོ ཝཱ’’ཏི ཝུཏྟཾ. ཨཱཔནྣོཏི ཨཱརོཙིཏཀྑཎེཡེཝ པཱརཱཛིཀཾ ཨཱཔནྣོ. ཝིསུདྡྷཱཔེཀྑོཏི ¶ ཨཏྟནོ གིཧིབྷཱཝཱདིཀཾ ཝིསུདྡྷིཾ ཨཔེཀྑམཱནོ ཨིཙྪམཱནོ. ཨཡཉྷི ཡསྨཱ པཱརཱཛིཀཾ ཨཱཔནྣོ, ཏསྨཱ བྷིཀྑུབྷཱཝེ ཋཏྭཱ ཨབྷབྦོ ཛྷཱནཱདཱིནི ཨདྷིགནྟུཾ, ཨིཙྩསྶ བྷིཀྑུབྷཱཝོ ཝིསུདྡྷི ནཱམ ན ཧོཏི. ཡསྨཱ པན གིཧི ཝཱ ཨུཔཱསཀཱརཱམིཀསཱམཎེརཱནཾ ཝཱ ཨཉྙཏརོ ཧུཏྭཱ དཱནཱདཱིཧི སགྒམགྒཾ ཝཱ ཛྷཱནཱདཱིཧི མོཀྑམགྒཾ ཝཱ ཨཱརཱདྷེཏུཾ བྷབྦོ ཧོཏི, ཏསྨཱསྶ གིཧིཨཱདིབྷཱཝོ ཝིསུདྡྷི ནཱམ ཧོཏི. ཏེན ཝུཏྟཾ ‘‘གིཧིབྷཱཝཱདིཀཾ ཝིསུདྡྷིཾ ཨཔེཀྑམཱནོ’’ཏི. ཨེཝཾ ཝདེཡྻཱཏི ཨེཝཾ བྷཎེཡྻ, ཀཐཾ? ‘‘ཨཛཱནམེཝཾ, ཨཱཝུསོ’’ཏིཨཱདིཾ. ཏཏྠ ཨཛཱནནྟི ཨཛཱནནྟོ. ཨཔསྶནྟི ཨཔསྶནྟོ. ཏུཙྪཾ མུསཱ ཝིལཔིནྟི ཨཧཾ ¶ ཝཙནཏྠཝིརཧཏོ ཏུཙྪཾ, ཝཉྩནཱདྷིཔྤཱཡཏོ མུསཱ ཝིལཔིཾ ཨབྷཎིནྟི ཝུཏྟཾ ཧོཏི. ཨཉྙཏྲ ཨདྷིམཱནཱཏི ཡྭཱཡཾ ཏིལཀྑཎཾ ཨཱརོཔེཏྭཱ སངྑཱརེ སམྨསནྟསྶ ཨཱརདྡྷཝིཔསྶཀསྶ ཨཔཏྟེ པཏྟསཉྙིཏཱསངྑཱཏོ ཨདྷིམཱནོ ཨུཔྤཛྫཏི, ཏཾ ཨདྷིམཱནཾ ཋཔེཏྭཱ ཀེཝལཾ པཱཔིཙྪཏཱཡ ཡོ སམུདཱཙརེཡྻ, ཨཡམྤི པཱརཱཛིཀོ ཧོཏཱིཏི ཨཏྠོ.

ཝེསཱལིཡཾ ཝགྒུམུདཱཏཱིརིཡེ བྷིཀྑཱུ ཨཱརབྦྷ ཏེསཾ ཨུཏྟརིམནུསྶདྷམྨཱརོཙནཝཏྠུསྨིཾ པཉྙཏྟཾ, ‘‘ཨཉྙཏྲ ཨདྷིམཱནཱ’’ཏི ཨཡམེཏྠ ཨནུཔཉྙཏྟི, སཱདྷཱརཎཔཉྙཏྟི, ཨནཱཎཏྟིཀཾ, ‘‘པཋམཾ ཛྷཱནཾ སམཱཔཛྫི’’ནྟིཨཱདིནཱ ནཡེན ཝུཏྟཔྤཀཱརཾ ཨསནྟཾ ཛྷཱནཱདིདྷམྨཾ ཨཱརོཙེནྟསྶ སཙེ ཡསྶ ཀསྶཙི ཨཱརོཙེཏི, སོ མནུསྶཛཱཏིཀོ ཧོཏི, ཨནནྟརམེཝ ‘‘ཨཡཾ ཛྷཱནལཱབྷཱི’’ཏི ཝཱ ‘‘ཨརིཡོ’’ཏི ཝཱ ཡེན ཀེནཙི ཨཱཀཱརེན ཏམཏྠཾ ཛཱནཱཏི, པཱརཱཛིཀཾ. སཙེ ན ཛཱནཱཏི, ཐུལླཙྩཡཾ. སཙེ པན ‘‘ཡོ ཏེ ཝིཧཱརེ ཝསི, སོ བྷིཀྑུ པཋམཾ ཛྷཱནཾ སམཱཔཛྫཱི’’ཏིཨཱདིནཱ (པཱརཱ. ༢༢༠) ནཡེན ཨཉྙཱཔདེསེན ཨཱརོཙེནྟསྶ ཛཱནཱཏི, ཐུལླཙྩཡཾ. སཙེ ན ཛཱནཱཏི, དུཀྐཊཾ. ཨདྷིམཱནེན ཨཱརོཙེནྟསྶ, ཨནུལླཔནཱདྷིཔྤཱཡསྶ, ཨུམྨཏྟཀཱདཱིནཉྩ ཨནཱཔཏྟི. སཱིལཝིཔཏྟི, ཨུཏྟརིམནུསྶདྷམྨསྶ ཨཏྟནི ཨསནྟཏཱ, པཱཔིཙྪཏཱཡ ཏསྶ ཨཱརོཙནཾ, ཨནཉྙཱཔདེསོ, ཡསྶ ཨཱརོཙེཏི, ཏསྶ མནུསྶཛཱཏིཀཏཱ, ཏངྑཎཝིཛཱནནནྟི ཨིམཱནེཏྠ པཉྩ ཨངྒཱནི. སམུཊྛཱནཱདཱིནི ཨདིནྣཱདཱནེ ཝུཏྟསདིསཱནེཝཱཏི.

ཙཏུཏྠཔཱརཱཛིཀཝཎྞནཱ ནིཊྛིཏཱ.

ཨུདྡིཊྛཱ ¶ ཁོ ཨཱཡསྨནྟོ ཙཏྟཱརོ པཱརཱཛིཀཱ དྷམྨཱཏིཨིདཾ ཨིདྷ ཨུདྡིཊྛཔཱརཱཛིཀཔརིདཱིཔནམེཝ. སམོདྷཱནེཏྭཱ པན སབྦཱནེཝ ཙཏུཝཱིསཏི པཱརཱཛིཀཱནི ཝེདིཏབྦཱནི ¶ . ཀཏམཱནི ཙཏུཝཱིསཏི? པཱལི༹ཡཾ ཨཱགཏཱནི ཏཱཝ བྷིཀྑཱུནཾ ཙཏྟཱརི བྷིཀྑུནཱིནཾ ཨསཱདྷཱརཎཱནི ཙཏྟཱརཱིཏི ཨཊྛ, ཏཱནི ཨེཀཱདསནྣཾ པཎྜཀཱདཱིནཾ ཨབྷབྦབྷཱཝསངྑཱཏེཧི ཨེཀཱདསཧི པཱརཱཛིཀེཧི སདྡྷིཾ ཨེཀཱུནཝཱིསཏི, གིཧིབྷཱཝཾ པཏྠཡམཱནཱཡ བྷིཀྑུནིཡཱ ཝིབྦྷནྟབྷཱཝཔཱརཱཛིཀེན སདྡྷིཾ ཝཱིསཏི, ཨཔརཱནིཔི ལམྦཱི, མུདུཔིཊྛིཀོ, པརསྶ ཨངྒཛཱཏཾ མུཁེན གཎྷཱཏི, པརསྶ ཨངྒཛཱཏེ ཨབྷིནིསཱིདཏཱིཏི ཨིམེསཾ ཙཏུནྣཾ ཝསེན ‘‘ཙཏྟཱརི ཨནུལོམཔཱརཱཛིཀཱནཱི’’ཏི ཝདནྟི, ཨིཏི ཨིམཱནི ཙ ཙཏྟཱརི, པུརིམཱནི ཙ ཝཱིསཏཱིཏི སམོདྷཱནེཏྭཱ སབྦཱནེཝ ཙཏུཝཱིསཏི པཱརཱཛིཀཱནི ཝེདིཏབྦཱནི. ན ལབྷཏི བྷིཀྑཱུཧི སདྡྷིཾ སཾཝཱསནྟི ཨུཔོསཐཱདིབྷེདཾ སཾཝཱསཾ བྷིཀྑཱུཧི སདྡྷིཾ ན ལབྷཏི. ཡཐཱ པུརེ, ཏཐཱ པཙྪཱཏི ཡཐཱ པུབྦེ གིཧིཀཱལེ ཨནུཔསམྤནྣཀཱལེ ཙ, པཙྪཱ པཱརཱཛིཀཾ ཨཱཔནྣོཔི ཏཐེཝ ཨསཾཝཱསོ ཧོཏི, ནཏྠི ཏསྶ བྷིཀྑཱུཧི སདྡྷིཾ ཨུཔོསཐཱདིབྷེདོ སཾཝཱསོཏི. ཏཏྠཱཡསྨནྟེ པུཙྪཱམཱིཏི ཏེསུ ཙཏཱུསུ པཱརཱཛིཀེསུ ཨཱཡསྨནྟེ ‘‘ཀཙྩིཏྠ པརིསུདྡྷཱ’’ཏི པུཙྪཱམི. ཀཙྩིཏྠཱཏི ཀཙྩི ཨེཏྠ, ཨེཏེསུ ཙཏཱུསུ ¶ པཱརཱཛིཀེསུ ཀཙྩི པརིསུདྡྷཱཏི ཨཏྠོ. ཨཐ ཝཱ ཀཙྩིཏྠ པརིསུདྡྷཱཏི ཀཙྩི པརིསུདྡྷཱ ཨཏྠ, བྷཝཐཱཏི ཨཏྠོ. སེསཾ སབྦཏྠ ཨུཏྟཱནམེཝཱཏི.

ཀངྑཱཝིཏརཎིཡཱ པཱཏིམོཀྑཝཎྞནཱཡ

པཱརཱཛིཀཝཎྞནཱ ནིཊྛིཏཱ.

སངྒྷཱདིསེསཀཎྜོ

ཨིམེ ¶ ¶ ཁོ པནཱཏི ཨིདཱནི ཝཏྟབྦཱནཾ ཨབྷིམུཁཱིཀརཎཾ. ཨཱཡསྨནྟོཏི སནྣིཔཏིཏཱནཾ པིཡཝཙནེན ཨཱལཔནཾ. ཏེརསཱཏི གཎནཔརིཙྪེདོ. སངྒྷཱདིསེསཱཏི ཨེཝཾནཱམཀཱ. དྷམྨཱཏི ཨཱཔཏྟིཡོ. ཨུདྡེསཾ ཨཱགཙྪནྟཱིཏི སརཱུཔེན ཨུདྡིསིཏབྦཏཾ ཨཱགཙྪནྟི, ན ནིདཱནེ ཝིཡ ‘‘ཡསྶ སིཡཱ ཨཱཔཏྟཱི’’ཏི སཱདྷཱརཎཝཙནམཏྟེན.

༡. སུཀྐཝིསྶཊྛིསིཀྑཱཔདཝཎྞནཱ

སཾཝིཛྫཏི ཙེཏནཱ ཨསྶཱཏི སཉྩེཏནཱ, སཉྩེཏནཱཝ སཉྩེཏནིཀཱ, སཉྩེཏནཱ ཝཱ ཨསྶ ཨཏྠཱིཏི སཉྩེཏནིཀཱ. སུཀྐཝིསྶཊྛཱིཏི སུཀྐསྶ ཝིསྶཊྛི, རཱགཱུཔཏྠམྦྷཱདཱིསུ ཡེན ཀེནཙི ཨངྒཛཱཏེ ཀམྨཉྙཏཾ པཏྟེ ཨཱརོགྱཱདཱིསུ ཡཾཀིཉྩི ཨཔདིསིཏྭཱ ཨཛ྄ཛྷཏྟརཱུཔཱདཱིསུ ཡཏྠ ཀཏྠཙི མོཙནསྶཱདཙེཏནཱཡ ནིམིཏྟེ ཨུཔཀྐམནྟསྶ ཨཱསཡདྷཱཏུནཱནཏྟཏོ ནཱིལཱདིཝསེན (པཱརཱ. ༢༣༩-༢༤༠) དསཝིདྷེསུ སུཀྐེསུ ཡསྶ ཀསྶཙི སུཀྐསྶ ཋཱནཱ ཙཱཝནཱཏི ཨཏྠོ. ཨཉྙཏྲ སུཔིནནྟཱཏི ཡཱ སུཔིནེ སུཀྐཝིསྶཊྛི ཧོཏི, ཏཾ ཋཔེཏྭཱ. སངྒྷཱདིསེསོཏི ཡཱ ཨཉྙཏྲ སུཔིནནྟཱ སཉྩེཏནིཀཱ སུཀྐཝིསྶཊྛི, ཨཡཾ སངྒྷཱདིསེསོ ནཱམ ཨཱཔཏྟིནིཀཱཡོཏི ཨཏྠོ. ཝཙནཏྠོ པནེཏྠ སངྒྷོ ཨཱདིམྷི ཙེཝ སེསེ ཙ ཨིཙྪིཏབྦོ ཨསྶཱཏི སངྒྷཱདིསེསོ. ཀིཾ ཝུཏྟཾ ཧོཏི – ཨིམཾ ཨཱཔཏྟིཾ ཨཱཔཛྫིཏྭཱ ཝུཊྛཱཏུཀཱམསྶ ཡཾ ཏཾ ཨཱཔཏྟིཝུཊྛཱནཾ, ཏསྶ ཨཱདིམྷི ཙེཝ པརིཝཱསདཱནཏྠཱཡ, ཨཱདིཏོ སེསེ མཛ྄ཛྷེ མཱནཏྟདཱནཏྠཱཡ མཱུལཱཡ པཊིཀསྶནེན ཝཱ སཧ མཱནཏྟདཱནཏྠཱཡ, ཨཝསཱནེ ཨབྦྷཱནཏྠཱཡ ཙ སངྒྷོ ཨིཙྪིཏབྦོ, ན ཧེཏྠ ཨེཀམྤི ཀམྨཾ ཝིནཱ སངྒྷེན སཀྐཱ ཀཱཏུཾ. ཨིཏི སངྒྷོ ཨཱདིམྷི ཙེཝ སེསེ ཙ ཨིཙྪིཏབྦོ ཨསྶཱཏི སངྒྷཱདིསེསོཏི.

སཱཝཏྠིཡཾ སེཡྻསཀཾ ཨཱརབྦྷ ཨུཔཀྐམིཏྭཱ ཨསུཙིམོཙནཝཏྠུསྨིཾ པཉྙཏྟཾ, ‘‘ཨཉྙཏྲ སུཔིནནྟཱ’’ཏི ¶ ཨཡམེཏྠ ཨནུཔཉྙཏྟི, ཨསཱདྷཱརཎཔཉྙཏྟི, ཨནཱཎཏྟིཀཾ. སཙེ པན པརེན ཨཏྟནོ ཨངྒཛཱཏེ ཨུཔཀྐམཾ ཀཱརེཏྭཱ མོཙཱཔེཏི, ཨཱཔཛྫཏིཡེཝ. ཙེཏེཏྭཱ ཨནྟམསོ ཨཱཀཱསེ ཀཊིཀམྤནེནཔི ནིམིཏྟེ ཨུཔཀྐམནྟསྶ སཙེ ན མུཙྩཏི, ཐུལླཙྩཡཾ. སཙེ པན ཨནྟམསོ ¶ ཡཾ ཨེཀཱ ཁུདྡཀམཀྑིཀཱ པིཝེཡྻ, ཏཏྟཀམྤི ཋཱནཏོ མུཙྩཏི, དཀསོཏཾ ཨནོཏིཎྞེཔི སངྒྷཱདིསེསོ. ཋཱནཏོ པན ཙུཏཾ ཨཝསྶམེཝ དཀསོཏཾ ཨོཏརཏི, ཏསྨཱ ‘‘དཀསོཏཾ ཨོཏིཎྞམཏྟེ བཧི ནིཀྑནྟེ ཝཱ ཨནིཀྑནྟེ ཝཱ སངྒྷཱདིསེསོ’’ཏི (པཱརཱ. ཨཊྛ. ༢.༢༣༧) ཨཊྛཀཐཱསུ ཝུཏྟཾ. ཨནུཔཀྐམནྟསྶ ཙ, ཨམོཙནཱདྷིཔྤཱཡསྶ ཙ, སུཔིནཾ པསྶནྟསྶ ཙ, ཨུམྨཏྟཀཱདཱིནཉྩ མུཏྟེཔི ཨནཱཔཏྟི. སཱིལཝིཔཏྟི, ཙེཏནཱ, ཨུཔཀྐམོ ¶ , མུཙྩནནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི པཋམཔཱརཱཛིཀེ ཝུཏྟསདིསཱནེཝཱཏི.

སུཀྐཝིསྶཊྛིསིཀྑཱཔདཝཎྞནཱ ནིཊྛིཏཱ.

༢. ཀཱཡསཾསགྒསིཀྑཱཔདཝཎྞནཱ

དུཏིཡེ ཨོཏིཎྞོཏི ཡཀྑཱདཱིཧི ཝིཡ སཏྟཱ ཨནྟོ ཨུཔྤཛྫནྟེན རཱགེན ཝཱ ཨོཏིཎྞོ, ཀཱུཔཱདཱིནི ཝིཡ སཏྟཱ ཨསམཔེཀྑིཏྭཱ རཛྫནཱིཡེ ཋཱནེ རཛྫནྟོ སཡཾ ཝཱ རཱགཾ ཨོཏིཎྞོ, ཀཱཡསཾསགྒརཱགསམངྒིསྶེཏཾ ཨདྷིཝཙནཾ. ཝིཔརིཎཏེན ཙིཏྟེནཱཏི པརིསུདྡྷབྷཝངྒསནྟཏིསངྑཱཏཾ པཀཏིཾ ཝིཛཧིཏྭཱ ཨཉྙཐཱ པཝཏྟེན, ཝིརཱུཔཾ ཝཱ པརིཎཏེན ཡཐཱ པརིཝཏྟམཱནཾ ཝིརཱུཔཾ ཧོཏི, ཨེཝཾ ཝུཏྟརཱགཝསེན པརིཝཏྟེཏྭཱ ཋིཏེན ཙིཏྟེནཱཏི ཨཏྠོ. མཱཏུགཱམེན སདྡྷིནྟི ཏདཧུཛཱཏཱཡཔི ཛཱིཝམཱནཀམནུསྶིཏྠིཡཱ སདྡྷིཾ. ཀཱཡསཾསགྒཾ སམཱཔཛྫེཡྻཱཏི ཧཏྠགྒཧཎཱདིཀཨཱཡསམྤཡོགཾ ཀཱཡམིསྶཱིབྷཱཝཾ སམཱཔཛྫེཡྻ. ཧཏྠགྒཱཧཾ ཝཱཏིཨཱདི པནསྶ ཝིཏྠཱརེན ཨཏྠདསྶནཾ. ཏཏྠ ཧཏྠོ ནཱམ ཀཔྤརཏོ པཊྛཱཡ ཡཱཝ ཨགྒནཁཱ. ཝེཎཱི ནཱམ ཝིནནྡྷིཏྭཱ ཝཱ ཨཝིནནྡྷིཏྭཱ ཝཱ སུདྡྷཀེསེཧི ཝཱ ནཱིལཱདིཝཎྞསུཏྟཀུསུམཀཧཱཔཎམཱལཱསུཝཎྞཙཱིརཀམུཏྟཱཝལི༹ཨཱདཱིསུ ཨཉྙཏརམིསྶེཧི ཝཱ ཀཏཀེསཀལཱཔསྶེཏཾ ཨདྷིཝཙནཾ. ཝེཎིགྒཧཎེན ཙེཏྠ ཀེསཱཔི གཧིཏཱཡེཝ སདྡྷིཾ ལོམེཧི. ཨིཏི ཝུཏྟལཀྑཎསྶ ཧཏྠསྶ གཧཎཾ ཧཏྠགྒཱཧོ, ཝེཎིཡཱ གཧཎཾ ཝེཎིགྒཱཧོ. ཨཝསེསསྶ སརཱིརསྶ པརཱམསནཾ ཨཉྙཏརསྶ ཝཱ ཨཉྙཏརསྶ ཝཱ ཨངྒསྶ པརཱམསནཾ ནཱམ. ཡོ ཏཾ ཧཏྠགྒཱཧཾ ཝཱ ཝེཎིགྒཱཧཾ ཝཱ ཨཉྙཏརསྶ ཝཱ ཨཉྙཏརསྶ ཝཱ ཨངྒསྶ པརཱམསནཾ སམཱཔཛྫེཡྻ, ཏསྶ སངྒྷཱདིསེསོ ནཱམ ཨཱཔཏྟིནིཀཱཡོ ཧོཏཱིཏི.

སཱཝཏྠིཡཾ ¶ ཨུདཱཡིཏྠེརཾ ཨཱརབྦྷ ཀཱཡསཾསགྒསམཱཔཛྫནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི ¶ , ཨནཱཎཏྟིཀཾ, ཨིཏྠིཡཱ ཨིཏྠིསཉྙིནོ ཨནྟམསོ ལོམེན ལོམཾ ཕུསནྟསྶཱཔི, ཨིཏྠིཡཱ ཝཱ ཕུསིཡམཱནསྶ སེཝནཱདྷིཔྤཱཡེན ཝཱཡམིཏྭཱ ཕསྶཾ པཊིཛཱནནྟསྶ སངྒྷཱདིསེསོ. ཨེཀེན པན ཧཏྠེན གཧེཏྭཱ དུཏིཡེན ཧཏྠེན དིཝསམྤི ཏཏྠ ཏཏྠ ཕུསནྟསྶ ཨེཀཱཝ ཨཱཔཏྟི, ཨགྒཧེཏྭཱ ཕུསནྟོ པན སཙེ སཱིསཏོ ཡཱཝ པཱདཱ, ཏཱཝ ཀཱཡཏོ ཧཏྠཾ ཨམོཙེནྟོཡེཝ ཕུསཏི, ཨེཀཱཝ ཨཱཔཏྟི, པཉྩནྣཾ ཨངྒུལཱིནཾ ཨེཀཏོ གཧཎེཔི ཨེཀཱཡེཝ. སཙེ པན ནཱནིཏྠཱིནཾ པཉྩངྒུལིཡོ ཨེཀཏོ གཎྷཱཏི, པཉྩ ཨཱཔཏྟིཡོ. ཨིཏྠིཡཱ ཝེམཏིཀསྶ, པཎྜཀཔུརིསཏིརཙྪཱནགཏསཉྙིསྶ ཙ ཐུལླཙྩཡཾ, ཏཐཱ ཀཱཡེན ཀཱཡཔྤཊིབདྡྷེན, ཨམནུསྶིཏྠིཔཎྜཀེཧི ཙ སདྡྷིཾ ཀཱཡསཾསགྒེཔི. མནུསྶིཏྠིཡཱ པན ཀཱཡཔྤཊིབདྡྷེན ཀཱཡཔྤཊིབདྡྷཱདཱིསུ, པུརིསཀཱཡཕུསནཱདཱིསུ ཙ དུཀྐཊཾ. ཨིཏྠིཡཱ ཕུསིཡམཱནསྶ སེཝནཱདྷིཔྤཱཡསྶཱཔི ཀཱཡེན ཨཝཱཡམིཏྭཱ ¶ ཕསྶཾ པཊིཛཱནནྟསྶ, མོཀྑཱདྷིཔྤཱཡེན ཨིཏྠིཾ ཕུསནྟསྶ, ཨསཉྩིཙྩ, ཨསྶཏིཡཱ, ཨཛཱནནྟསྶ, ཨསཱདིཡནྟསྶ, ཨུམྨཏྟཀཱདཱིནཉྩ ཨནཱཔཏྟི. སཱིལཝིཔཏྟི, མནུསྶིཏྠཱི, ཨིཏྠིསཉྙིཏཱ, ཀཱཡསཾསགྒརཱགོ, ཏེན རཱགེན ཝཱཡཱམོ, ཧཏྠགྒཱཧཱདིསམཱཔཛྫནནྟི ཨིམཱནེཏྠ པཉྩ ཨངྒཱནི. སམུཊྛཱནཱདཱིནི པཋམཔཱརཱཛིཀེ ཝུཏྟསདིསཱནེཝཱཏི.

ཀཱཡསཾསགྒསིཀྑཱཔདཝཎྞནཱ ནིཊྛིཏཱ.

༣. དུཊྛུལླཝཱཙཱསིཀྑཱཔདཝཎྞནཱ

ཏཏིཡེ ཨོཏིཎྞཏཱ ཙ ཝིཔརིཎཏཙིཏྟཏཱ ཙ དུཊྛུལླཝཱཙསྶཱདརཱགཝསེན ཝེདིཏབྦཱ. མཱཏུགཱམནྟི དུཊྛུལླཱདུཊྛུལླསཾལཀྑཎསམཏྠཾ མནུསྶིཏྠིཾ. དུཊྛུལླཱཧིཝཱཙཱཧཱིཏི ཝཙྩམགྒཔསྶཱཝམགྒེམེཐུནདྷམྨཔྤཊིསཾཡུཏྟཱཧི ཝཱཙཱཧི. ཨོབྷཱསེཡྻཱཏི ཨཝབྷཱསེཡྻ, ཝཎྞཱཝཎྞཡཱཙནཨཱཡཱཙནཔུཙྪནཔཊིཔུཙྪནཨཱཙིཀྑཎཱནུསཱསནཨཀྐོསནཝསེན ནཱནཔྤཀཱརཾ ཨསདྡྷམྨཝཙནཾ ཝདེཡྻ. ཡཐཱ ཏནྟི ཨེཏྠ ནྟི ནིཔཱཏམཏྟཾ, ཡཐཱ ཡུཝཱ ཡུཝཏིནྟི ཨཏྠོ. ཨེཏེན ཨོབྷཱསནེ ནིརཱསངྐབྷཱཝཾ དསྶེཏི. མེཐུནུཔསཾཧིཏཱཧཱིཏིཨིདཾ ¶ དུཊྛུལླཝཱཙཱཡ སིཁཱཔཏྟལཀྑཎདསྶནཾ. སངྒྷཱདིསེསོཏི དྭིནྣཾ མགྒཱནཾ ཝསེན ཝཎྞཱཝཎྞེཧི ཝཱ མེཐུནཡཱཙནཱདཱིཧི ཝཱ ‘‘སིཁརཎཱིསི, སཾབྷིནྣཱསི, ཨུབྷཏོབྱཉྫནཀཱསཱི’’ཏི ཨིམེསུ ཏཱིསུ ཨཉྙཏརེན ཨཀྐོསཝཙནེན ཝཱ མཱཏུགཱམཾ ཨོབྷཱསནྟསྶ སངྒྷཱདིསེསོ ནཱམ ཨཱཔཏྟིནིཀཱཡོ ཧོཏཱིཏི.

སཱཝཏྠིཡཾ ཨུདཱཡིཏྠེརཾ ཨཱརབྦྷ དུཊྛུལླཝཱཙཱཧི ཨོབྷཱསནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, ཨནཱཎཏྟིཀཾ, ཨིཏྠིཡཱ ཨིཏྠིསཉྙིནོ ཨནྟམསོ ཧཏྠམུདྡཱཡཔི ཝུཏྟནཡེན ཨོབྷཱསནྟསྶ ¶ སཙེ སཱ ཏམཏྠཾ ཏསྨིཾཡེཝ ཁཎེ ཛཱནཱཏི, སངྒྷཱདིསེསོ. པཎྜཀེ ཐུལླཙྩཡཾ. ཏསྨིཾཡེཝ ཨིཏྠིསཉྙིནོ དུཀྐཊཾ. པུནཔྤུནཾ ཨོབྷཱསནྟསྶ, སམྦཧུལཱ ཙ ཨིཏྠིཡོ ཨེཀཝཱཙཱཡ ཨོབྷཱསནྟསྶ ཝཱཙཱགཎནཱཡ ཙེཝ ཨིཏྠིགཎནཱཡ ཙ ཨཱཔཏྟིཡོ. སཙེ ཡཾ ཨིཏྠིཾ ཨོབྷཱསཏི, སཱ ན ཛཱནཱཏི, ཐུལླཙྩཡཾ. ཨདྷཀྑཀཾ ཨུབྦྷཛཱཎུམཎྜལཾ ཨཱདིསྶ ཝཎྞཱདིབྷཎནེཔི ཐུལླཙྩཡཾ. པཎྜཀེ དུཀྐཊཾ, ཨུབྦྷཀྑཀཾ ཨདྷོཛཱཎུམཎྜལཾ ཀཱཡཔྤཊིབདྡྷཉྩ ཨཱདིསྶ ཝཎྞཱདིབྷཎནེ སབྦཏྠ དུཀྐཊཾ. ཨཏྠདྷམྨཨནུསཱསནིཔུརེཀྑཱརཱནཾ ཨུམྨཏྟཀཱདཱིནཉྩ ཨནཱཔཏྟི. སཱིལཝིཔཏྟི, མནུསྶིཏྠཱི, ཨིཏྠིསཉྙིཏཱ, དུཊྛུལླཝཱཙསྶཱདརཱགོ, ཏེན རཱགེན ཨོབྷཱསནཾ, ཏངྑཎཝིཛཱནནནྟི ཨིམཱནེཏྠ པཉྩ ཨངྒཱནི. ཨདིནྣཱདཱནསམུཊྛཱནཾ, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དྭིཝེདནནྟི.

དུཊྛུལླཝཱཙཱསིཀྑཱཔདཝཎྞནཱ ནིཊྛིཏཱ.

༤. ཨཏྟཀཱམསིཀྑཱཔདཝཎྞནཱ

ཙཏུཏྠེ ཨོཏིཎྞཏཱ ཙ ཝིཔརིཎཏཙིཏྟཏཱ ཙ ཨཏྟཀཱམཔཱརིཙརིཡཱཝསེན ཝེདིཏབྦཱ. མཱཏུགཱམསྶ སནྟིཀེཏི དུཊྛུལློབྷཱསནེ ཝུཏྟཔྤཀཱརཱཡ ཨིཏྠིཡཱ སམཱིཔེ. ཨཏྟཀཱམཔཱརིཙརིཡཱཡཱཏི ¶ མེཐུནདྷམྨསངྑཱཏེན ཀཱམེན པཱརིཙརིཡཱ ཀཱམཔཱརིཙརིཡཱ, ཨཏྟནོ ཨཏྠཱཡ ཀཱམཔཱརིཙརིཡཱ ཨཏྟཀཱམཔཱརིཙརིཡཱ, ཨཏྟནཱ ཝཱ ཀཱམིཏཱ ཨིཙྪིཏཱཏི ཨཏྟཀཱམཱ, སཡཾ མེཐུནརཱགཝསེན པཏྠིཏཱཏི ཨཏྠོ, ཨཏྟཀཱམཱ ཙ སཱ པཱརིཙརིཡཱ ¶ ཙཱཏི ཨཏྟཀཱམཔཱརིཙརིཡཱ, ཏསྶཱ ཨཏྟཀཱམཔཱརིཙརིཡཱཡ. ཝཎྞཾ བྷཱསེཡྻཱཏི གུཎཾ ཨཱནིསཾསཾ པཀཱསེཡྻ. ཨེཏདགྒནྟིཨཱདི ཏསྶཱ ཨཏྟཀཱམཔཱརིཙརིཡཱཡ ཝཎྞབྷཱསནཱཀཱརནིདསྶནཾ. ཏཏྲཱཡཾ པདསམྦནྡྷཝསེནེཝ སངྑེཔཏྠོ – ཡཱ མཱདིསཾ པཱཎཱཏིཔཱཏཱདཱིཧི ཝིརཧིཏཏྟཱ སཱིལཝནྟཾ མེཐུནདྷམྨཱ ཝིརཧིཏཏྟཱ བྲཧྨཙཱརིཾ ཏདུབྷཡེནཱཔི ཀལྱཱཎདྷམྨཾ ཨེཏེན དྷམྨེན པརིཙརེཡྻ ཨབྷིརམེཡྻ, ཏསྶཱ ཨེཝཾ མཱདིསཾ པརིཙརནྟིཡཱ ཡཱ ཨཡཾ པཱརིཙརིཡཱ ནཱམ, ཨེཏདགྒཾ པཱརིཙརིཡཱནནྟི. མེཐུནུཔསཾཧིཏེན སངྒྷཱདིསེསོཏི ཨེཝཾ ཨཏྟཀཱམཔཱརིཙརིཡཱཡ ཝཎྞཾ བྷཱསནྟོ ཙ ‘‘ཨརཧསི ཏྭཾ མཡ྄ཧཾ མེཐུནདྷམྨཾ དཱཏུ’’ནྟིཨཱདིནཱ མེཐུནཔྤཊིསཾཡུཏྟེནེཝ ཝཙནེན ཡོ བྷཱསེཡྻ, ཏསྶ སངྒྷཱདིསེསོ.

སཱཝཏྠིཡཾ ཨུདཱཡིཏྠེརཾ ཨཱརབྦྷ ཨཏྟཀཱམཔཱརིཙརིཡཱཡ ཝཎྞབྷཱསནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, ཨནཱཎཏྟིཀཾ, ཨིཏྠིཡཱ ཨིཏྠིསཉྙིནོ ཨནྟམསོ ཧཏྠམུདྡཱཡཔི ཝུཏྟནཡེནེཝ ཨཏྟཀཱམཔཱརིཙརིཡཱཡ ཝཎྞཾ བྷཱསནྟསྶ སཙེ སཱ ཏམཏྠཾ ཏསྨིཾཡེཝ ཁཎེ ཛཱནཱཏི, སངྒྷཱདིསེསོ ¶ . ནོ ཙེ ཛཱནཱཏི, ཐུལླཙྩཡཾ. པཎྜཀེ པཎྜཀསཉྙིནོཔི ཐུལླཙྩཡཾ. ཏསྨིཾཡེཝ ཨིཏྠིསཉྙིནོ དུཀྐཊཾ. ཙཱིཝརཱདཱིཧི ཝཏྠུཀཱམེཧི པཱརིཙརིཡཱཡ ཝཎྞཾ བྷཱསནྟསྶ ཨུམྨཏྟཀཱདཱིནཉྩ ཨནཱཔཏྟི. སཱིལཝིཔཏྟི, མནུསྶིཏྠཱི, ཨིཏྠིསཉྙིཏཱ, ཨཏྟཀཱམཔཱརིཙརིཡཱཡ རཱགོ, ཏེན རཱགེན ཝཎྞབྷཎནཾ, ཏངྑཎཝིཛཱནནནྟི ཨིམཱནེཏྠ པཉྩ ཨངྒཱནི. སམུཊྛཱནཱདཱིནི དུཊྛུལློབྷཱསནེ ཝུཏྟསདིསཱནེཝཱཏི.

ཨཏྟཀཱམསིཀྑཱཔདཝཎྞནཱ ནིཊྛིཏཱ.

༥. སཉྩརིཏྟསིཀྑཱཔདཝཎྞནཱ

པཉྩམེ སཉྩརིཏྟནྟི ཨིཏྠིཔུརིསཱནཾ ཨནྟརེ སཾཙརཎབྷཱཝཾ. སམཱཔཛྫེཡྻཱཏི སམྨཱ པཊིགྒཎྷནཝཱིམཾསནཔཙྩཱཧརཎཱནི ཀརོནྟོ ཨཱཔཛྫེཡྻ. ཨིཏྠིཡཱ ཝཱཏིཨཱདི སམཱཔཛྫནཱཀཱརདསྶནཾ. ཏཏྠ ཨིཏྠིཡཱ ཝཱ པུརིསམཏིནྟི པུརིསེན ཝཱ ཏསྶ མཱཏཱཔིཏཱདཱིཧི ཝཱ པེསིཏོ པུརིསསྶ མཏིཾ ཨདྷིཔྤཱཡཾ ཨིཏྠིཡཱ ཨཱརོཙེཡྻཱཏི ཨཏྠོ. པུརིསསྶ ཝཱ ཨིཏྠིམཏིནྟི ཨིཏྠིཡཱ ཝཱ ཏསྶཱ མཱཏཱཔིཏཱདཱིཧི ཝཱ པེསིཏོ ཨིཏྠིཡཱ མཏིཾ ཨདྷིཔྤཱཡཾ པུརིསསྶ ¶ ཨཱརོཙེཡྻཱཏི ཨཏྠོ. ཛཱཡཏྟནེ ཝཱ ཛཱརཏྟནེ ཝཱཏི ཛཱཡབྷཱཝེ ཝཱ ཛཱརབྷཱཝེ ཝཱ. པུརིསསྶ ཧི མཏིཾ ཨིཏྠིཡཱ ཨཱརོཙེནྟོ ཛཱཡཏྟནེ ཨཱརོཙེཏི, ཨིཏྠིཡཱ མཏིཾ པུརིསསྶ ཨཱརོཙེནྟོ ཛཱརཏྟནེ ཨཱརོཙེཏི. ཨཔིཙ པུརིསསྶེཝ མཏིཾ ཨིཏྠིཡཱ ཨཱརོཙེནྟོ ཛཱཡཏྟནེ ཝཱ ཨཱརོཙེཏི ནིབདྡྷབྷརིཡབྷཱཝེ, ཛཱརཏྟནེ ཝཱ མིཙྪཱཙཱརབྷཱཝེ, ཏེནེཝསྶ པདབྷཱཛནེ (པཱརཱ. ༣༠༢) ‘‘ཛཱཡཏྟནེ ཝཱཏི ཛཱཡཱ བྷཝིསྶསི, ཛཱརཏྟནེ ཝཱཏི ཛཱརཱི བྷཝིསྶསཱི’’ཏི ཝུཏྟཾ. ཨེཏེནེཝ ཨུཔཱཡེན ཨིཏྠིཡཱ མཏིཾ པུརིསསྶ ཨཱརོཙནེཔི ‘‘པཏི བྷཝིསྶསི, ཛཱརོ བྷཝིསྶསཱི’’ཏི ¶ ཝཏྟབྦཏཱ ཝེདིཏབྦཱ. ཨནྟམསོ ཏངྑཎིཀཱཡཔཱིཏི སབྦནྟིམེན པརིཙྪེདེན ཡཱ ཨཡཾ ཏངྑཎེ མུཧུཏྟམཏྟེ སཾཝསིཏབྦཏོ ‘‘ཏངྑཎིཀཱ’’ཏི ཝུཙྩཏི, མུཧུཏྟིཀཱཏི ཨཏྠོ. ཏསྶཱཔི ‘‘མུཧུཏྟིཀཱ བྷཝིསྶསཱི’’ཏི ཨེཝཾ པུརིསསྶ མཏིཾ ཨཱརོཙེནྟསྶ སངྒྷཱདིསེསོ, ཨེཏེནེཝ ཨུཔཱཡེན ‘‘མུཧུཏྟིཀོ བྷཝིསྶསཱི’’ཏི ཨེཝཾ པུརིསསྶ ཨིཏྠིམཏིཾ ཨཱརོཙེནྟོཔི སངྒྷཱདིསེསཾ ཨཱཔཛྫཏཱིཏི ཝེདིཏབྦོ.

སཱཝཏྠིཡཾ ཨུདཱཡིཏྠེརཾ ཨཱརབྦྷ སཉྩརིཏྟསམཱཔཛྫནཝཏྠུསྨིཾ པཉྙཏྟཾ, ‘‘ཨནྟམསོ ཏངྑཎིཀཱཡཔཱི’’ཏི ཨཡམེཏྠ ཨནུཔཉྙཏྟི, སཱདྷཱརཎཔཉྙཏྟི, ‘‘པཊིགྒཎྷཱཏི, ཝཱིམཾསཏི, ཨནྟེཝཱསིཾ པཙྩཱཧརཱཔེཏཱི’’ཏིཨིམིནཱ (པཱརཱ. ༣༣༨) ནཡེན སཱཎཏྟིཀཾ, ཨཉྙཏྲ ནཱལཾཝཙནཱིཡཱཡ ¶ ཡཱཡ ཀཱཡཙི ཨིཏྠིཡཱ ཨནྟམསོ མཱཏུཡཱཔི པུརིསམཏིཾ ཨཱརོཙེནྟོ ‘‘ཧོཧི ཀིར བྷརིཡཱ དྷནཀྐཱིཏཱ’’ཏི ཝཏྟུཀཱམོ སཙེཔི ཚནྡཝཱསིནཱིཨཱདཱིསུ ཨཉྙཏརཱཀཱརེན ཨཱརོཙེཏྭཱ ཏཱཡ ‘‘སཱདྷཱུ’’ཏི སམྤཊིཙྪིཏེཔི ཨསམྤཊིཙྪིཏེཔི པུན ཨཱགནྟྭཱ ཡེན པཧིཏོ, ཏསྶ ཏཾ པཝཏྟིཾ ཨཱརོཙེཏི, སངྒྷཱདིསེསཾ ཨཱཔཛྫཏི. སཱ པན ཏསྶ བྷརིཡཱ ཧོཏུ ཝཱ, མཱ ཝཱ, ཨཀཱརཎམེཏཾ. སཙེཔི ཡསྶཱ སནྟིཀཾ པེསིཏོ, ཏཾ ཨདིསྭཱ ཨཉྙཏརསྶ ཨཝསྶཱརོཙནཀསྶ ‘‘ཨཱརོཙེཧཱི’’ཏི ཝཏྭཱ པཙྩཱཧརཏི, ཨཱཔཛྫཏིཡེཝ. ‘‘མཱཏུརཀྑིཏཾ བྲཱུཧཱི’’ཏི པེསིཏསྶ པན གནྟྭཱ ཨཉྙཾ པིཏུརཀྑིཏཱདཱིསུ ཨཉྙཏརཾ ཝདནྟསྶ ཝིསངྐེཏཾ ཧོཏི, པུརིསསྶ ཝཱ ཨིཏྠིཡཱ ཝཱ ཝཙནཾ ‘‘སཱདྷཱུ’’ཏི ཀཱཡེན ཝཱ ཝཱཙཱཡ ཝཱ ཨུབྷཡེན ཝཱ པཊིགྒཎྷིཏྭཱ ཏསྶཱ ཨིཏྠིཡཱ ཝཱ པུརིསསྶ ཝཱ ཨཱརོཙེཏྭཱ ཝཱ ཨཱརོཙཱཔེཏྭཱ ཝཱ པུན ཡེན པེསིཏོ, ཏསྶ ཏཾ པཝཏྟིཾ སཡཾ ཨཱརོཙེནྟསྶ ཝཱ ཨཉྙེན ཨཱརོཙཱཔེནྟསྶ ཝཱ སངྒྷཱདིསེསོ ¶ . ཨེཏྟཱཝཏཱ ཧི ‘‘པཊིགྒཎྷཱཏི, ཝཱིམཾསཏི, པཙྩཱཧརཏཱི’’ཏིཨིདཾ ཨངྒཏྟཡཾ སམྤཱདིཏམེཝ ཧོཏི, ཨིཏོ པན ཡེཧི ཀེཧིཙི དྭཱིཧི ཨངྒེཧི, པཎྜཀེ ཙ ཨངྒཏྟཡེནཱཔི ཐུལླཙྩཡཾ. ཨེཀེན དུཀྐཊཾ. སངྒྷསྶ ཝཱ ཙེཏིཡསྶ ཝཱ གིལཱནསྶ ཝཱ ཀིཙྩེན གཙྪནྟསྶ, ཨུམྨཏྟཀཱདཱིནཉྩ ཨནཱཔཏྟི.

སཱིལཝིཔཏྟི, ཡེསུ སཉྩརིཏྟཾ སམཱཔཛྫཏི, ཏེསཾ མནུསྶཛཱཏིཀཏཱ, ན ནཱལཾཝཙནཱིཡཏཱ,

པཊིགྒཎྷནཝཱིམཾསནཔཙྩཱཧརཎཱནཱིཏི ཨིམཱནེཏྠ པཉྩ ཨངྒཱནི. ཚསམུཊྛཱནཾ, པཎྞཏྟིཾ ཝཱ ཨལཾཝཙནཱིཡབྷཱཝཾ ཝཱ ཨཛཱནནྟསྶ ཀཱཡཝིཀཱརེན སཱསནཾ གཧེཏྭཱ ཏཐེཝ ཝཱིམཾསིཏྭཱ ཏཐེཝ པཙྩཱཧརནྟསྶ ཀཱཡཏོ སམུཊྛཱཏི. ‘‘ཨིཏྠནྣཱམཱ ཨཱགམིསྶཏི, ཏསྶཱ ཙིཏྟཾ ཛཱནེཡྻཱཐཱ’’ཏི ཀེནཙི ཝུཏྟེ ‘‘སཱདྷཱུ’’ཏི སམྤཊིཙྪིཏྭཱ ཏཾ ཨཱགཏཾ ཝཏྭཱ པུན ཏསྨིཾ པུརིསེ ཨཱགཏེ ཨཱརོཙེནྟསྶ ཀཱཡེན ཀིཉྩི ཨཀཏཏྟཱ ཝཱཙཏོ སམུཊྛཱཏི. ཝཱཙཱཡ ‘‘སཱདྷཱུ’’ཏི སཱསནཾ གཧེཏྭཱ ཨཉྙེན ཀརཎཱིཡེན ཏསྶཱ གྷརཾ གནྟྭཱ ཨཉྙཏྠ ཝཱ གམནཀཱལེ ཏཾ དིསྭཱ ཝཙཱིབྷེདེན ཝཱིམཾསིཏྭཱ པུནཔི ཨཉྙེནེཝ ཀཱརཎེན ཏཏོ ཨཔཀྐམྨ ཀདཱཙིདེཝ ཏཾ པུརིསཾ དིསྭཱ ཨཱརོཙེནྟསྶཱཔི ཝཱཙཏོ སམུཊྛཱཏི. པཎྞཏྟིཾ ཨཛཱནནྟསྶ པན ཁཱིཎཱསཝསྶཱཔི པིཏུཝཙནེན གནྟྭཱ ཨལཾཝཙནཱིཡཾ མཱཏརམྤི ‘‘ཨེཧི མེ པིཏརཾ ཨུཔཊྛཱཧཱི’’ཏི ཝཏྭཱ པཙྩཱཧརནྟསྶ ཀཱཡཝཱཙཏོ སམུཊྛཱཏི. ཨིམཱནི ཏཱིཎི ཨཙིཏྟཀསམུཊྛཱནཱནི. ཏདུབྷཡཾ ¶ པན ཛཱནིཏྭཱ ཨེཏེཧེཝ ཏཱིཧི ནཡེཧི སམཱཔཛྫནྟསྶ ཏཱནེཝ ཏཱིཎི ཏདུབྷཡཛཱནནཙིཏྟེན སཙིཏྟཀཱནི ཧོནྟི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཀུསལཱདིཝསེན ཙེཏྠ ཏཱིཎི ཙིཏྟཱནི, སུཁཱདིཝསེན ཏིསྶོ ཝེདནཱཏི.

སཉྩརིཏྟསིཀྑཱཔདཝཎྞནཱ ནིཊྛིཏཱ.

༦. ཀུཊིཀཱརསིཀྑཱཔདཝཎྞནཱ

ཚཊྛེ ¶ སཉྙཱཙིཀཱཡ པནཱཏི ཨེཏྠ སཉྙཱཙིཀཱ ནཱམ སཡཾ པཝཏྟིཏཡཱཙནཱ ཝུཙྩཏི, ཏསྨཱ སཉྙཱཙིཀཱཡཱཏི ཨཏྟནོ ཡཱཙནཱཡཱཏི ཝུཏྟཾ ཧོཏི, སཡཾ ཡཱཙིཏཀེཧི ཨུཔཀརཎེཧཱིཏི ཨཏྠོ. ཨེཏྠ ཙ ཡཾཀིཉྩི པརཔརིགྒཧིཏཀཾ ¶ མཱུལཙྪེདཝསེན ཡཱཙིཏུཾ ན ཝཊྚཏི, ཏཱཝཀཱལིཀཾ པན ཝཊྚཏི. སཧཱཡཏྠཱཡ ཀམྨཀརཎཏྠཱཡ ‘‘པུརིསཾ དེཐཱ’’ཏི ཝཏྟུཾ ཝཊྚཏི, པུརིསཏྟཀརམྤི ཡཱཙིཏུཾ ཝཊྚཏི, པུརིསཏྟཀརོ ནཱམ ཝཌྜྷཀིཨཱདིནཱ པུརིསེན ཀཱཏབྦཾ ཧཏྠཀམྨཾ. ཏཾ ‘‘པུརིསཏྟཀརཾ དེཧཱི’’ཏི ཝཱ ‘‘ཧཏྠཀམྨཾ དེཧཱི’’ཏི ཝཱ ཝཏྭཱ ཡཱཙིཏུཾ ཝཊྚཏི. ཧཏྠཀམྨཾ ནཱམ ཀིཉྩི ཝཏྠུ ན ཧོཏི, ཏསྨཱ ‘‘ཀིཾ, བྷནྟེ, ཨཱགཏཏྠཱ’’ཏི པུཙྪིཏེ ཝཱ ཨཔུཙྪིཏེ ཝཱ ཡཱཙིཏུཾ ཝཊྚཏི, ཝིཉྙཏྟིཔཙྩཡཱ དོསོ ནཏྠི, མིགལུདྡཀཱདཡོ པན སཀཀམྨཾ ན ཡཱཙིཏབྦཱ. ཀུཊིནྟི ཨུལླིཏྟཱདཱིསུ ཨཉྙཏརཾ. ཏཏྠ ཨུལླིཏྟཱ ནཱམ ཋཔེཏྭཱ ཐམྦྷཏུལཱཔིཊྛསངྒྷཱཊཝཱཏཔཱནདྷཱུམཙྪིདྡཱདིབྷེདཾ ཨལེཔོཀཱསཾ ཨཝསེསེ ལེཔོཀཱསེ ཀུཊྚེཧི སདྡྷིཾ གྷཊེཏྭཱ ཚདནསྶ ཨནྟོ སུདྷཱཡ ཝཱ མཏྟིཀཱཡ ཝཱ ལིཏྟཱ. ཨཝལིཏྟཱ ནཱམ ཏཐེཝ ཝུཏྟནཡེནེཝ ཚདནསྶ བཧི ལིཏྟཱ. ཨུལླིཏྟཱཝལིཏྟཱ ནཱམ ཏཐེཝ ཚདནསྶ ཨནྟོ ཙ བཧི ཙ ལིཏྟཱ. ཀཱརཡམཱནེནཱཏི སཡཾ ཝཱ ཀརོནྟེན, ཨཱཎཏྟིཡཱ ཝཱ ཀཱརཱཔེནྟེན. ཨསཱམིཀནྟི ཀཱརེཏཱ དཱཡཀེན ཝིརཧིཏཾ. ཨཏྟུདྡེསནྟི ‘‘མཡ྄ཧཾ ཝཱསཱགཱརཾ ཨེསཱ’’ཏི ཨེཝཾ ཨཏྟཱ ཨུདྡེསོ ཨེཏིསྶཱཏི ཨཏྟུདྡེསཱ, ཏཾ ཨཏྟུདྡེསཾ. པམཱཎིཀཱ ཀཱརེཏབྦཱཏི པམཱཎཡུཏྟཱ ཀཱརེཏབྦཱ. ཏཏྲིདཾ པམཱཎནྟི ཏསྶཱ ཀུཊིཡཱ ཨིདཾ པམཱཎཾ. དཱིགྷསོཏི དཱིགྷཏོ. དྭཱདས ཝིདཏྠིཡོ སུགཏཝིདཏྠིཡཱཏིཨེཏྠ སུགཏཝིདཏྠི ནཱམ ཨིདཱནི མཛ྄ཛྷིམསྶ པུརིསསྶ ཏིསྶོ ཝིདཏྠིཡོ, ཝཌྜྷཀིཧཏྠེན དིཡཌྜྷོ ཧཏྠོ ཧོཏི. མིནནྟེན པན ཀུཊིཡཱ བཧིཀུཊྚེ པཋམཾ དིནྣཾ མཧཱམཏྟིཀཔརིཡནྟཾ ཨགྒཧེཏྭཱ ཐུསཔིཎྜཔརིཡནྟེན དྭཱདས ཝིདཏྠིཡོ མིནེཏབྦཱ, སཙེ ཐུསཔིཎྜཀེན ཨནཏྠིཀོ ཧོཏི, མཧཱམཏྟིཀལེཔེནེཝ ནིཊྛཱཔེཏི, སྭེཝ པརིཙྪེདོ. ཏིརིཡནྟི ཝིཏྠཱརཏོ. སཏྟནྟརཱཏི ཀུཊྚསྶ བཧིཨནྟཾ ཨགྒཧེཏྭཱ ཨབྦྷནྟརིམེན ཨནྟེན སཏྟ སུགཏཝིདཏྠིཡོ པམཱཎནྟི ཝུཏྟཾ ཧོཏི. ཨེཏྠ ཙ ཀེསགྒམཏྟམྤི དཱིགྷཏོ ཧཱཔེཏྭཱ ཏིརིཡཾ, ཏིརིཡཏོ ཝཱ ཧཱཔེཏྭཱ དཱིགྷཾ ཝཌྜྷེཏུཾ ན ཝཊྚཏི, ཀོ པན ཝཱདོ ཨུབྷཏོཝཌྜྷནེ. ཡཱ པན དཱིགྷཏོ སཊྛིཧཏྠཱཔི ཧོཏི, ཏིརིཡཏོ ཏིཧཏྠཱ ཝཱ ཨཱུནཀཙཏུཧཏྠཱ ཝཱ, ཡཏྠ ¶ པམཱཎཡུཏྟོ མཉྩོ ཨིཏོ ཙིཏོ ཙ ན པརིཝཊྚཏི, པཙྪིམཀོཊིཡཱ ཙཏུཧཏྠཝིཏྠཱརཱ ན ཧོཏི, ཨཡཾ ཀུཊིསངྑྱཾ ན གཙྪཏི, ཏསྨཱ ཝཊྚཏི. བྷིཀྑཱུ ¶ ཨབྷིནེཏབྦཱ ཝཏྠུདེསནཱཡཱཏི ཡསྨིཾ པདེསེ ཀུཊིཾ ཀཱརེཏུཀཱམོ ཧོཏི, ཏཾ སོདྷེཏྭཱ པདབྷཱཛནེ (པཱརཱ. ༣༤༩) ཝུཏྟནཡེན སངྒྷཾ ཏིཀྑཏྟུཾ ཡཱཙིཏྭཱ སབྦེ ཝཱ སངྒྷཔརིཡཱཔནྣཱ སངྒྷེན ཝཱ སམྨཏཱ དྭེ ཏཡོ བྷིཀྑཱུ ཏཏྠ ཝཏྠུདེསནཏྠཱཡ ནེཏབྦཱ. ཏེཧི བྷིཀྑཱུཧི ཝཏྠུ དེསེཏབྦཾ ཨནཱརམྦྷཾ སཔརིཀྐམནནྟི ཏེཧི བྷིཀྑཱུཧི ¶ ཀིཔིལླིཀཱདཱིནཾ ཨཱསཡཱདཱིཧི ཏེརསཧི, པུབྦཎྞཱཔརཎྞནིསྶིཏཱདཱིཧི སོལ༹སཧི ཨུཔདྡཝེཧི ཝིརཧིཏཏྟཱ ཨནཱརམྦྷཾ, དྭཱིཧི ཝཱ ཙཏཱུཧི ཝཱ བལིབདྡྷེཧི ཡུཏྟེན སཀཊེན ཨེཀཾ ཙཀྐཾ ནིབྦོདཀཔཏནཊྛཱནེ ཨེཀཾ བཧི ཀཏྭཱ ཨཱཝིཛ྄ཛྷིཏུཾ སཀྐུཎེཡྻཏཱཡ སཔརིཀྐམནནྟི སལླཀྑེཏྭཱ སཙེ སངྒྷཔཧོནཀཱ ཧོནྟི, ཏཏྠེཝ, ནོ ཙེ, སངྒྷམཛ྄ཛྷཾ གནྟྭཱ ཏེན བྷིཀྑུནཱ ཡཱཙིཏེཧི ཉཏྟིདུཏིཡེན ཀམྨེན ཝཏྠུ དེསེཏབྦཾ. སཱརམྦྷེ ཙེཏིཨཱདི པཊིཔཀྑནཡེན ཝེདིཏབྦཾ.

ཨཱལ༹ཝིཡཾ ཨཱལ༹ཝིཀེ བྷིཀྑཱུ ཨཱརབྦྷ སཉྙཱཙིཀཱཡ ཀུཊིཀརཎཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, སཱཎཏྟིཀཾ, ‘‘ཨདེསིཏཝཏྠུཀཾ པམཱཎཱཏིཀྐནྟཾ ཀུཊིཾ ཀཱརེསྶཱམཱི’’ཏི ཨུཔཀརཎཏྠཾ ཨརཉྙཾ གམནཏོ པཊྛཱཡ སབྦཔཡོགེསུ དུཀྐཊཾ, ‘‘ཨིདཱནི དྭཱིཧི པིཎྜེཧི ནིཊྛཱནཾ གམིསྶཏཱི’’ཏི ཏེསུ པཋམཔིཎྜདཱནེ ཐུལླཙྩཡཾ, དུཏིཡདཱནེན ལེཔེ གྷཊིཏེ སཙེ ཨདེསིཏཝཏྠུཀཱ ཨེཝ ཝཱ པམཱཎཱཏིཀྐནྟཱ ཨེཝ ཝཱ ཧོཏི, ཨེཀོ སངྒྷཱདིསེསོ, དྭེ ཙ དུཀྐཊཱནི. ཨུབྷཡཝིཔྤནྣཱ, དྭེ སངྒྷཱདིསེསཱ, དྭེ ཙ དུཀྐཊཱནི. སཙེ པན དྭཱརབནྡྷཾ ཝཱ ཝཱཏཔཱནཾ ཝཱ ཨཊྛཔེཏྭཱཝ མཏྟིཀཱཡ ལིམྤཏི, ཋཔིཏེ ཙ ཏསྨིཾ ལེཔོ ན གྷཊིཡཏི, རཀྑཏི ཏཱཝ. པུན ལིམྤནྟསྶ པན གྷཊིཏམཏྟེ སངྒྷཱདིསེསོ. སཙེ ཏཾ ཋཔིཡམཱནཾ པཋམདིནྣལེཔེན སདྡྷིཾ ནིརནྟརམེཝ ཧུཏྭཱ ཏིཊྛཏི, པཋམམེཝ སངྒྷཱདིསེསོ. ཀེཝལཾ སཱརམྦྷཱཡ དུཀྐཊཾ, ཏཐཱ ཨཔརིཀྐམནཱཡ. ཝིཔྤཀཏཾ ཀུཊིཾ ཨཉྙསྶ དདཏོ ཙ, བྷཱུམིཾ སམཾ ཀཏྭཱ བྷིནྡནྟསྶ ཙ, ལེཎགུཧཱཏིཎཀུཊིཔཎྞཙྪདནགེཧེསུ ཨཉྙཏརཾ ཀཱརེནྟསྶ, ཀུཊིམྤི ཨཉྙསྶ ཝཱསཏྠཱཡ, ཝཱསཱགཱརཾ ཋཔེཏྭཱ ཨུཔོསཐཱགཱརཱདཱིསུ ཨཉྙཏརཏྠཱཡ ཀཱརེནྟསྶ ཙ ཨུམྨཏྟཀཱདཱིནཉྩ ཨནཱཔཏྟི. སཱིལཝིཔཏྟི, ཨུལླིཏྟཱདཱིནཾ ཨཉྙཏརཏཱ, ཧེཊྛིམཔམཱཎསམྦྷཝོ, ཨདེསིཏཝཏྠུཀཏཱ, པམཱཎཱཏིཀྐནྟཏཱ, ཨཏྟུདྡེསིཀཏཱ, ཝཱསཱགཱརཏཱ ¶ , ལེཔགྷཊནཱཏི ཨིམཱནེཏྠ ཚ ཝཱ སཏྟ ཝཱ ཨངྒཱནི. ཚསམུཊྛཱནཾ, ཀིརིཡཉྩ, ཀིརིཡཱཀིརིཡཉྩ. ཨིདཉྷི ཝཏྠུཾ དེསཱཔེཏྭཱ པམཱཎཱཏིཀྐནྟཾ ཝཱ ཀརོཏོ ཀིརིཡཏོ སམུཊྛཱཏི, ཨདེསཱཔེཏྭཱ ཀརོཏོ ཀིརིཡཱཀིརིཡཏོ སམུཊྛཱཏི. སེསམེཏྠ སཉྩརིཏྟེ ཝུཏྟསདིསམེཝཱཏི.

ཀུཊིཀཱརསིཀྑཱཔདཝཎྞནཱ ནིཊྛིཏཱ.

༧. ཝིཧཱརཀཱརསིཀྑཱཔདཝཎྞནཱ

སཏྟམེ ¶ མཧལླཀནྟི སསཱམིཀབྷཱཝེན སཉྙཱཙིཏཀུཊིཏོ མཧནྟབྷཱཝོ ཨེཏསྶ ཨཏྠཱིཏི མཧལླཀོ, ཡསྨཱ ཝཱ ཝཏྠུཾ དེསཱཔེཏྭཱ པམཱཎཱཏིཀྐམེནཱཔི ཀཱཏུཾ ཝཊྚཏི, ཏསྨཱ པམཱཎམཧནྟཏཱཡཔི ¶ མཧལླཀོ, ཏཾ མཧལླཀཾ. ཡསྨཱ པནསྶ ཏཾ པམཱཎམཧནྟཏྟཾ སསཱམིཀཏྟཱཝ ལབྦྷཏི, ཏསྨཱ ཏདཏྠདསྶནཏྠཾ ‘‘མཧལླཀོ ནཱམ ཝིཧཱརོ སསཱམིཀོ ཝུཙྩཏཱི’’ཏི ཨེཝམསྶ པདབྷཱཛནེ (པཱརཱ. ༣༦༧) ཝུཏྟཾ. སེསཾ སབྦཾ ཀུཊིཀཱརསིཀྑཱཔདེ ཝུཏྟསདིསཾ, སསཱམིཀབྷཱཝམཏྟམེཝ ཧི ཝིསེསོ.

ཀོསམྦིཡཾ ཚནྣཏྠེརཾ ཨཱརབྦྷ ཙེཏིཡརུཀྑཾ ཚེདཱཔནཝཏྠུསྨིཾ པཉྙཏྟབྷཱཝོ, ཨཀིརིཡམཏྟཏོ སམུཊྛཱནབྷཱཝོ, ཨེཀསངྒྷཱདིསེསཏཱ ཙ ཨེཏྠ ཝིསེསོ.

ཝིཧཱརཀཱརསིཀྑཱཔདཝཎྞནཱ ནིཊྛིཏཱ.

༨. དུཊྛདོསསིཀྑཱཔདཝཎྞནཱ

ཨཊྛམེ དུཊྛོ དོསོཏི དཱུསིཏོ ཙེཝ དཱུསཀོ ཙ. ཨུཔྤནྣེ ཧི དོསེ པུགྒལོ ཏེན དོསེན དཱུསིཏོ ཧོཏི, པཀཏིབྷཱཝཾ ཛཧཱཔིཏོ, ཏསྨཱ ‘‘དུཊྛོ’’ཏི ཝུཙྩཏི. པརཉྩ དཱུསེཏི ཝིནཱསེཏི, ཏསྨཱ ‘‘དོསོ’’ཏི ཝུཙྩཏི. ཨིཏི ‘‘དུཊྛོ དོསོ’’ཏི ཨེཀསྶེཝེཏཾ པུགྒལསྶ ཨཱཀཱརནཱནཏྟེན ནིདསྶནཾ. ཨཔྤཏཱིཏོཏི ནཔྤཏཱིཏོ, པཱིཏིསུཁཱདཱིཧི ཝིཝཛྫིཏོ, ན ཨབྷིསཊོཏི ཨཏྠོ. ཨམཱུལཀེནཱཏི ཡཾ ཙོདཀེན ཙུདིཏཀམྷི ¶ པུགྒལེ ཨདིཊྛཾ ཨསྶུཏཾ ཨཔརིསངྐིཏཾ, ཨིདཾ ཨེཏེསཾ དསྶནསཝནཔརིསངྐཱསངྑཱཏཱནཾ མཱུལཱནཾ ཨབྷཱཝཏོ ཨམཱུལཀཾ ནཱམ. ཏཾ པན སོ ཨཱཔནྣོ ཝཱ ཧོཏུ, ཨནཱཔནྣོ ཝཱ, ཨེཏཾ ཨིདྷ ཨཔྤམཱཎཾ. ཨེཏྠ ཙ ཨདིཊྛཾ ནཱམ ཨཏྟནོ པསཱདཙཀྑུནཱ ཝཱ དིབྦཙཀྑུནཱ ཝཱ ཨདིཊྛཾ, ཨསྶུཏཾ ནཱམ ཏཐེཝ ཀེནཙི ཝུཙྩམཱནཾ ན སུཏཾ, ཨཔརིསངྐིཏཾ ནཱམ ཨཏྟནོ ཝཱ པརསྶ ཝཱ དིཊྛསུཏམུཏཝསེན ཙེཏསཱ ཨཔརིསངྐིཏཾ, ཨིཏི ཨེཝརཱུཔེན ཨམཱུལཀེན. པཱརཱཛིཀེནཱཏི བྷིཀྑུནོ ཨནུརཱུཔེསུ ཨེཀཱུནཝཱིསཏིཡཱ ཨཉྙཏརེན, པདབྷཱཛནེ (པཱརཱ. ༣༨༦) པན པཱརཱཛིཀུདྡེསེ ཨཱགཏཱནེཝ གཧེཏྭཱ ‘‘ཙཏུནྣཾ ཨཉྙཏརེནཱ’’ཏི ཝུཏྟཾ. ཨནུདྡྷཾསེཡྻཱཏི དྷཾསེཡྻ ཝིདྡྷཾསེཡྻ པདྷཾསེཡྻ ཨབྷིབྷཝེཡྻ. ཏཾ པན ཨནུདྡྷཾསནཾ ཡསྨཱ ཨཏྟནཱ ཙོདེནྟོཔི པརེན ཙོདཱཔེནྟོཔི ཀརོཏི, ཏསྨཱསྶ པདབྷཱཛནེ ‘‘ཙོདེཏི ཝཱ ཙོདཱཔེཏི ཝཱ’’ཏི ཝུཏྟཾ. ཏཏྠ ཝཏྠུསནྡསྶནཱ ཨཱཔཏྟིསནྡསྶནཱ སཾཝཱསཔྤཊིཀྑེཔོ སཱམཱིཙིཔྤཊིཀྑེཔོཏི སངྑེཔཏོ ཙཏསྶོ ཙོདནཱ. ཏཱསུ ཝཏྠུསནྡསྶནཱ ནཱམ ‘‘ཏྭཾ མེཐུནཾ དྷམྨཾ པཊིསེཝཱི’’ཏིཨཱདིནཱ ནཡེན པཝཏྟཱ. ཨཱཔཏྟིསནྡསྶནཱ ནཱམ ‘‘ཏྭཾ མེཐུནདྷམྨཱཔཏྟིཾ ཨཱཔནྣོ’’ཏིཨཱདིནཱ ནཡེན པཝཏྟཱ. སཾཝཱསཔྤཊིཀྑེཔོ ནཱམ ‘‘ནཏྠི ཏཡཱ སདྡྷིཾ ཨུཔོསཐོ ཝཱ པཝཱརཎཱ ཝཱ སངྒྷཀམྨཾ ཝཱ’’ཏི ཨེཝཾ པཝཏྟོ. ཨེཏྟཱཝཏཱ པན སཱིསཾ ན ཨེཏི, ‘‘ཨསྶམཎོསཱི’’ཏིཨཱདཱིཧི ཝཙནེཧི སདྡྷིཾ གྷཊིཏེཡེཝ སཱིསཾ ¶ ཨེཏི. སཱམཱིཙིཔྤཊིཀྑེཔོ ནཱམ ཨབྷིཝཱདནཔཙྩུཊྛཱནཨཉྫལིཀམྨསཱམཱིཙིཀམྨབཱིཛནིཀམྨཱདཱིནཾ ཨཀརཎཾ, ཏཾ པཊིཔཱཏིཡཱ ཝནྡནཱདཱིནི ཀརོཏོ ཨེཀསྶ ཨཀཏྭཱ སེསཱནཾ ཀརཎཀཱལེ ཝེདིཏབྦཾ. ཨེཏྟཱཝཏཱ ཙ ཙོདནཱ ནཱམ ཧོཏི, ཨཱཔཏྟི པན ¶ སཱིསཾ ན ཨེཏི. ‘‘ཀསྨཱ མམ ཝནྡནཱདཱིནི ན ཀརོསཱི’’ཏི པུཙྪིཏེ པན ‘‘ཨསྶམཎོསཱི’’ཏིཨཱདིཝཙནེཧི སདྡྷིཾ གྷཊིཏེཡེཝ སཱིསཾ ཨེཏི, ཏསྨཱ ཡོ བྷིཀྑུ བྷིཀྑུཾ སམཱིཔེ ཋཏྭཱ ‘‘ཏྭཾ མེཐུནཾ དྷམྨཾ པཊིསེཝཱི’’ཏི ཝཱ ‘‘ཨསྶམཎོསཱི’’ཏི ཝཱ ཨཱདཱིཧི ཝཙནེཧི ཧཏྠམུདྡཱཡ ཨེཝ ཝཱ ཨེཏམཏྠཾ དཱིཔེནྟོ སཡཾ ཝཱ ཙོདེཏི, གཧཊྛཔབྦཛིཏེསུ ཝཱ ཨཉྙཏརེན ཙོདཱཔེཏི, ཨཡཾ ཨནུདྡྷཾསེཏི ནཱམ. ཨཔྤེཝ ནཱམ ནཾ ཨིམམྷཱ བྲཧྨཙརིཡཱ ཙཱཝེཡྻནྟི ཨཔི ཨེཝ ནཱམ ནཾ པུགྒལཾ ཨིམམྷཱ སེཊྛཙརིཡཱ ཨཔནེཡྻཾ. ‘‘སཱདྷུ ཝཏསྶ སཙཱཧཾ ཨིམཾ པུགྒལཾ ཨིམམྷཱ བྲཧྨཙརིཡཱ ཙཱཝེཡྻ’’ནྟི ཨིམིནཱ ཨདྷིཔྤཱཡེན ཨནུདྡྷཾསེཡྻཱཏི ཝུཏྟཾ ཧོཏི. ཨེཏེན ¶ ཨེཀཾ ཙཱཝནཱདྷིཔྤཱཡཾ གཧེཏྭཱ ཨཝསེསཱ ཨཀྐོསཱདྷིཔྤཱཡོ ཀམྨཱདྷིཔྤཱཡོ ཝུཊྛཱནཱདྷིཔྤཱཡོ ཨུཔོསཐཊྛཔནཱདྷིཔྤཱཡོ པཝཱརཎཊྛཔནཱདྷིཔྤཱཡོ ཨནུཝིཛྫནཱདྷིཔྤཱཡོ དྷམྨཀཐཱདྷིཔྤཱཡོཏི སཏྟ ཨདྷིཔྤཱཡཱ པཊིཀྑིཏྟཱ ཧོནྟི. ཏཏོ ཨཔརེན སམཡེནཱཏི ཡསྨིཾ སམཡེ ཨནུདྡྷཾསིཏོ ཧོཏི, ཏཏོ ཨཉྙསྨིཾ སམཡེ. སམནུགྒཱཧཱིཡམཱནོ ཝཱཏི ཨནུཝིཛྫཀེན ཀིཾ ཏེ དིཊྛནྟིཨཱདིནཱ ནཡེན ཨནུཝིཛྫིཡམཱནོ ཨུཔཔརིཀྑིཡམཱནོ. ཨསམནུགྒཱཧཱིཡམཱནོ ཝཱཏི དིཊྛཱདཱིསུ ཀེནཙི ཝཏྠུནཱཝཱ ཨནུཝིཛྫཀཱདཱིསུ ཡེན ཀེནཙི པུགྒལེན ཝཱ ཨཝུཙྩམཱནོ. ཨིམེསཾ པན པདཱནཾ པརཏོ ‘‘བྷིཀྑུ ཙ དོསཾ པཏིཊྛཱཏཱི’’ཏི ཨིམིནཱ སམྦནྡྷོ. ཨིདཉྷི ཝུཏྟཾ ཧོཏི – ཨེཝཾ སམནུགྒཱཧཱིཡམཱནོ ཝཱ ཨསམནུགྒཱཧཱིཡམཱནོ ཝཱ བྷིཀྑུ ཙ དོསཾ པཏིཊྛཱཏི པཊིཙྩ ཏིཊྛཏི པཊིཛཱནཱཏི, སངྒྷཱདིསེསོཏི. ཨིདཉྩ ཨམཱུལཀབྷཱཝསྶ པཱཀཊཀཱལདསྶནཏྠཾ ཝུཏྟཾ. ཨཱཔཏྟིཾ པན ཨནུདྡྷཾསིཏཀྑཎེཡེཝ ཨཱཔཛྫཏི. ཨམཱུལཀཉྩེཝ ཏཾ ཨདྷིཀརཎཾ ཧོཏཱིཏི ཨེཏྠ པན དིཊྛམཱུལཱདཱིནཾ ཨབྷཱཝེན ཨམཱུལཀཾ, སམཐེཧི ཨདྷིཀརཎཱིཡབྷཱཝེན ཨདྷིཀརཎཾ. ཡཉྷི ཨདྷིཀིཙྩ ཨཱརབྦྷ པཊིཙྩ སནྡྷཱཡ སམཐཱ པཝཏྟནྟི, ཏཾ ཨདྷིཀརཎཾ. ཨིདྷ པན པཱརཱཛིཀསངྑཱཏཾ ཨཱཔཏྟཱདྷིཀརཎམེཝ ཨདྷིཔྤེཏཾ. ཡདི ཧི ཏཾ ཨདྷིཀརཎཾ དིཊྛཱདཱིཧི མཱུལེཧི ཨམཱུལཀཉྩེཝ ཧོཏི, ཨཡཾ ཙོདེཏུཾ ཨཱགཏོ བྷིཀྑུ ཙ དོསཾ པཏིཊྛཱཏི པཊིཙྩ ཏིཊྛཏི, ‘‘ཏུཙྪཀཾ མཡཱ བྷཎིཏ’’ནྟིཨཱདཱིནི (པཱརཱ. ༣༨༦) ཝདནྟོ པཊིཛཱནཱཏི, ཏསྶ བྷིཀྑུནོ ཨནུདྡྷཾསིཏཀྑཎེཡེཝ སངྒྷཱདིསེསོཏི, ཨཡཾ སིཀྑཱཔདསྶ པདཱནུཀྐམེན ཨཏྠོ.

རཱཛགཧེ མེཏྟིཡབྷཱུམཛཀེ བྷིཀྑཱུ ཨཱརབྦྷ ཨམཱུལཀེན པཱརཱཛིཀེན ཨནུདྡྷཾསནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, སཱཎཏྟིཀཾ, ཀཏཱུཔསམྤདཾ སུདྡྷཾ ཝཱ ཨསུདྡྷཾ ཝཱ པུགྒལཾ ཡེན པཱརཱཛིཀེན ཙོདེཏི, ཏཾ ‘‘ཨཡཾ ཨནཛ྄ཛྷཱཔནྣོ’’ཏི ཉཏྭཱ ཙཱཝནཱདྷིཔྤཱཡེན ‘‘ཀརོཏུ མེ ཨཱཡསྨཱ ¶ ཨོཀཱསཾ, ཨཧཾ ཏཾ ཝཏྟུཀཱམོ’’ཏི ཨེཝཾ ཨོཀཱསཾ ཨཀཱརེཏྭཱ ཙོདེནྟསྶ སཙེ སོ ཏངྑཎེཡེཝ ཛཱནཱཏི ‘‘མཾ ཙོདེཏཱི’’ཏི, ཝཱཙཱཡ ཝཱཙཱཡ སངྒྷཱདིསེསོ ཙེཝ དུཀྐཊཉྩ. ཨོཀཱསཾ ཀཱརེཏྭཱ ཙོདེནྟསྶ སངྒྷཱདིསེསོཡེཝ. ཧཏྠམུདྡཱཡ སམྨུཁཱ ཙོདེནྟསྶཱཔི ཨེསེཝ ནཡོ. པརམྨུཁཱ ཙོདེནྟསྶ པན སཱིསཾ ན ཨེཏི ¶ . ཨཏྟནཱ སམཱིཔེ ཋཏྭཱ ཨཉྙཾ བྷིཀྑུཾ ཨཱཎཱཔེཏི ¶ , སོ ཏསྶ ཝཙནེན ཏཾ ཙོདེཏི, ཙོདཱཔཀསྶེཝ ཝུཏྟནཡེན ཨཱཔཏྟིཡོ. ཨཐ སོཔི ‘‘མཡཱ དིཊྛཾ སུཏཾ ཨཏྠཱི’’ཏི ཙོདེཏི, དྭིནྣམྤི ཛཱནཱནཾ ཏཐེཝ ཨཱཔཏྟིཡོ. ཨཀྐོསཱདྷིཔྤཱཡེན པན ཨོཀཱསཾ ཨཀཱརེཏྭཱ ཝདནྟསྶ ཝུཏྟནཡེནེཝ པཱཙིཏྟིཡཉྩེཝ དུཀྐཊཉྩ. ཨོཀཱསཾ ཀཱརེཏྭཱ ཝདནྟསྶ པཱཙིཏྟིཡམེཝ. ཀམྨཱདྷིཔྤཱཡེན ཨསམྨུཁཱ སཏྟཝིདྷམྤི ཀམྨཾ ཀརོནྟསྶ དུཀྐཊམེཝ. ཝུཊྛཱནཱདྷིཔྤཱཡེན ‘‘ཏྭཾ ཨིཏྠནྣཱམཾ ཨཱཔཏྟིཾ ཨཱཔནྣོ, ཏཾ པཊིཀརོཧཱི’’ཏི ཝདནྟསྶ, ཨུཔོསཐཾ ཝཱ པཝཱརཎཾ ཝཱ ཋཔེནྟསྶ ཙ ཨོཀཱསཀམྨཾ ནཏྠི, ཋཔནཀྑེཏྟཾ པན ཛཱནིཏབྦཾ, ཨནུཝིཛྫཀསྶཱཔི ཨོསཊེ ཝཏྠུསྨིཾ ‘‘ཨཏྠེཏཾ ཏཝཱ’’ཏི ཨནུཝིཛྫནཱདྷིཔྤཱཡེན ཝདནྟསྶ ཨོཀཱསཀམྨཾ ནཏྠི, དྷམྨཀཐིཀསྶཱཔི ‘‘ཡོ ཨིདཉྩ ཨིདཉྩ ཀརོཏི, ཨཡཾ ཨསྶམཎོ’’ཏིཨཱདིནཱ ནཡེན ཨནོདིསཀཾ དྷམྨཾ ཀཐེནྟསྶ ཨོཀཱསཀམྨཾ ནཏྠི. སཙེ པན ཨོདིསྶ ནིཡམེཏྭཱ ‘‘ཨསུཀོ ཙ ཨསུཀོ ཙ ཨསྶམཎོ ཨནུཔཱསཀོ’’ཏི ཀཐེཏི, ཨཱསནཏོ ཨོརུཡ྄ཧ ཨཱཔཏྟིཾ དེསེཏྭཱ གནྟབྦཾ. ཨུམྨཏྟཀཱདཱིནཉྩ ཨནཱཔཏྟི, སཱིལཝིཔཏྟི, ཡཾ ཙོདེཏི ཝཱ ཙོདཱཔེཏི ཝཱ, ཏསྶ ‘‘ཨུཔསམྤནྣོ’’ཏི སངྑྱུཔགམནཾ, ཏསྨིཾ སུདྡྷསཉྙིཏཱ, ཡེན པཱརཱཛིཀེན ཙོདེཏི, ཏསྶ དིཊྛཱདིཝསེན ཨམཱུལཀཏཱ, ཙཱཝནཱདྷིཔྤཱཡེན སམྨུཁཱཙོདནཱ, ཏསྶ ཏངྑཎཝིཛཱནནནྟི ཨིམཱནེཏྠ པཉྩ ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནི. ཝེདནཱ པནེཏྠ དུཀྑཱཡེཝཱཏི.

དུཊྛདོསསིཀྑཱཔདཝཎྞནཱ ནིཊྛིཏཱ.

༩. ཨཉྙབྷཱགིཡསིཀྑཱཔདཝཎྞནཱ

ནཝམེ ཨཉྙབྷཱགིཡསྶཱཏིཨཱདཱིསུ ཨཉྙབྷཱགསྶ ཨིདཾ, ཨཉྙབྷཱགོ ཝཱ ཨསྶ ཨཏྠཱིཏི ཨཉྙབྷཱགིཡཾ. ཨདྷིཀརཎནྟི ཨཱདྷཱརོ ཝེདིཏབྦོ, ཝཏྠུ ཨདྷིཊྛཱནནྟི ཝུཏྟཾ ཧོཏི. ཡོ ཧི སོ ཨཊྛུཔྤཏྟིཡཾ ‘‘དབྦོ མལླཔུཏྟོ ནཱམཱ’’ཏི ཚགལཀོ ཝུཏྟོ. སོ ཡྭཱཡཾ ཨཱཡསྨཏོ དབྦསྶ མལླཔུཏྟསྶ བྷཱགོ ཀོཊྛཱསོ པཀྑོ མནུསྶཛཱཏི ཙེཝ བྷིཀྑུབྷཱཝོ ཙ, ཏཏོ ཨཉྙསྶ བྷཱགསྶ ཀོཊྛཱསསྶ པཀྑསྶ ཧོཏི ཏིརཙྪཱནཛཱཏིཡཱ ¶ ཙེཝ ཚགལཀབྷཱཝསྶ ཙ, སོ ཝཱ ཨཉྙབྷཱགོ ཨསྶ ཨཏྠི, ཏསྨཱ ཨཉྙབྷཱགིཡསངྑྱཾ ལབྷཏི. ཡསྨཱ ཙ ཏེསཾ ‘‘ཨིམཾ མཡཾ དབྦཾ ¶ མལླཔུཏྟཾ ནཱམ ཀརོམཱ’’ཏི ཝདནྟཱནཾ ཏསྶ ནཱམཀརཎསཉྙཱཡ ཨཱདྷཱརོ ཝཏྠུ ཨདྷིཊྛཱནཾ, ཏསྨཱ ‘‘ཨདྷིཀརཎ’’ནྟི ཝེདིཏབྦོ. ཏཉྷི སནྡྷཱཡ ‘‘སཙྩཾ ཀིར ཏུམྷེ, བྷིཀྑཝེ, དབྦཾ མལླཔུཏྟཾ ཨཉྙབྷཱགིཡསྶ ཨདྷིཀརཎསྶཱ’’ཏིཨཱདི (པཱརཱ. ༣༩༡) ཝུཏྟཾ. ན ཝིཝཱདཱདྷིཀརཎཱདཱིསུ ཨཉྙཏརཾ, ཀསྨཱ? ཨསམྦྷཝཏོ. ན ཧི མེཏྟིཡབྷཱུམཛཀཱ ཙཏུནྣཾ ཨདྷིཀརཎཱནཾ ཀསྶཙི ཨཉྙབྷཱགིཡསྶ ཨདྷིཀརཎསྶ ཀིཉྩིདེསཾ ལེསམཏྟཾ ཨུཔྤཱདིཡིཾསུ, ན ཙ ཙཏུནྣཾ ཨདྷིཀརཎཱནཾ ལེསོ ནཱམ ཨཏྠི. ཛཱཏིལེསཱདཡོ ཧི པུགྒལཱནཾཡེཝ ལེསཱ ཝུཏྟཱ, ན ཝིཝཱདཱདྷིཀརཎཱདཱིནཾ. ཏཉྩ ‘‘དབྦོ མལླཔུཏྟོ’’ཏི ནཱམཾ ཏསྶ ཨཉྙབྷཱགིཡཱདྷིཀརཎབྷཱཝེ ཋིཏསྶ ཚགལཀསྶ ¶ ཀོཙི དེསོ ཧོཏི ཐེརཾ པཱརཱཛིཀེན དྷམྨེན ཨནུདྡྷཾསེཏུཾ ལེསམཏྟོ, ཨེཏྠ ཙ དིསྶཏི ཨཔདིསྶཏི ‘‘ཨསྶ ཨཡ’’ནྟི ཝོཧརཱིཡཏཱིཏི དེསོ, ཛཱཏིཨཱདཱིསུ ཨཉྙཏརཀོཊྛཱསསྶེཏཾ ཨདྷིཝཙནཾ. ཨཉྙམྤི ཝཏྠུཾ ལིསྶཏི སིལིསྶཏི ཝོཧཱརམཏྟེནེཝ ཨཱིསཀཾ ཨལླཱིཡཏཱིཏི ལེསོ, ཛཱཏིཨཱདཱིནཾཡེཝ ཨཉྙཏརཀོཊྛཱསསྶེཏཾ ཨདྷིཝཙནཾ. པདབྷཱཛནེ (པཱརཱ. ༣༩༣) པན ཡསྶ ཨཉྙབྷཱགིཡསྶ ཨདྷིཀརཎསྶ ཀིཉྩིདེསཾ ལེསམཏྟཾ ཨུཔཱདཱཡ པཱརཱཛིཀེན དྷམྨེན ཨནུདྡྷཾསེཡྻ, ཏཾ ཡསྨཱ ཨཊྛུཔྤཏྟིཝསེནེཝ ཨཱཝིབྷཱུཏཾ, ཏསྨཱ ཏཾ ཨཝིབྷཛིཏྭཱ ཡཱནི ‘‘ཨདྷིཀརཎ’’ནྟི ཝཙནསཱམཉྙཏོ ཨཏྠུདྡྷཱརཝསེན པཝཏྟཱནི ཙཏྟཱརི ཨདྷིཀརཎཱནི, ཏེསཾ ཨཉྙབྷཱགིཡཏཱ ཙ ཏབྦྷཱགིཡཏཱ ཙ ཡསྨཱ ཨཔཱཀཊཱ, ཛཱནིཏབྦཱ ཙ ཝིནཡདྷརེཧི, ཏསྨཱ ཏཉྩ ཨཝསཱནེ ཨཱཔཏྟཉྙབྷཱགིཡེན ཙོདནཉྩ ཨཱཝིཀཱཏུཾ ‘‘ཨཉྙབྷཱགིཡསྶ ཨདྷིཀརཎསྶཱཏི ཨཱཔཏྟཉྙབྷཱགིཡཾ ཝཱ ཧོཏི ཨདྷིཀརཎཉྙབྷཱགིཡཾ ཝཱ’’ཏིཨཱདི ཝུཏྟཾ, སེསཱ ཝིནིཙྪཡཀཐཱ ཨཊྛམེ ཝུཏྟསདིསཱཡེཝ. ཨཡཾ པན ཝིསེསོ – ཨིདཾ ཨཉྙབྷཱགིཡསྶ ཨདྷིཀརཎསྶ ཀིཉྩིདེསཾ ལེསམཏྟཾ ཨུཔཱདཱཡ པཱརཱཛིཀེན དྷམྨེན ཨནུདྡྷཾསནཝཏྠུསྨིཾ པཉྙཏྟཾ, ཨིདྷ ཙ ཨཱཔཏྟཉྙབྷཱགིཡཙོདནཱཡ ཏཐཱསཉྙིནོཔི ཨནཱཔཏྟི. ཨངྒེསུ ཙ ཨཉྙབྷཱགིཡསྶ ཨདྷིཀརཎསྶ ཀིཉྩིདེསཾ ལེསམཏྟཾ ཨུཔཱདིཡནཏཱ ཨདྷིཀཱཏི.

ཨཉྙབྷཱགིཡསིཀྑཱཔདཝཎྞནཱ ནིཊྛིཏཱ.

༡༠. སངྒྷབྷེདསིཀྑཱཔདཝཎྞནཱ

དསམེ ¶ སམགྒསྶ སངྒྷསྶཱཏི སཧིཏསྶ བྷིཀྑུསངྒྷསྶ, ཙིཏྟེན ཙ སརཱིརེན ཙ ཨཝིཡུཏྟསྶཱཏི ཨཏྠོ. ཏེནེཝསྶ པདབྷཱཛནེ (པཱརཱ. ༤༡༢) ‘‘སམགྒོ ནཱམ སངྒྷོ སམཱནསཾཝཱསཀོ སམཱནསཱིམཱཡཾ ཋིཏོ’’ཏི ཝུཏྟཾ. སམཱནསཾཝཱསཀོ ཧི སམཙིཏྟཏཱཡ ཙིཏྟེན ཨཝིཡུཏྟོ ཧོཏི, སམཱནསཱིམཱཡཾ ཋིཏོ ཀཱཡསཱམགྒིདཱནཏོ སརཱིརེན ཨཝིཡུཏྟོ. བྷེདཱཡ པརཀྐམེཡྻཱཏི ¶ ‘‘ཀཐཾ ནཱམཱཡཾ བྷིཛྫེཡྻཱ’’ཏི བྷེདནཏྠཱཡ ཝཱཡཱམེཡྻ. བྷེདནསཾཝཏྟནིཀཾ ཝཱ ཨདྷིཀརཎནྟི བྷེདནསྶ སངྒྷབྷེདསྶ ཨཏྠཱཡ སཾཝཏྟནིཀཾ ཀཱརཎཾ. ཨིམསྨིཉྷི ཨོཀཱསེ ‘‘ཀཱམཧེཏུ ཀཱམནིདཱནཾ ཀཱམཱདྷིཀརཎ’’ནྟི ཨཱདཱིསུ (མ. ནི. ༡.༡༦༨, ༡༧༨) ཝིཡ ཀཱརཎཾ ‘‘ཨདྷིཀརཎ’’ནྟི ཨདྷིཔྤེཏཾ. ཏཾ བྷེདཀརཝཏྠུཝསེན ཨཊྛཱརསཝིདྷཾ. སམཱདཱཡཱཏི གཧེཏྭཱ. པགྒཡ྄ཧ ཏིཊྛེཡྻཱཏི ཏཾ སངྒྷབྷེདསྶ ཨཏྠཱཡ སཾཝཏྟནིཀཾ སངྒྷབྷེདནིབྦཏྟིསམཏྠཾ ཀཱརཎཾ གཧེཏྭཱ དཱིཔེཡྻ ཙེཝ ནཔྤཊིནིསྶཛྫེཡྻ ཙ. བྷིཀྑཱུཧི ཨེཝམསྶ ཝཙནཱིཡོཏི ཡེ ཏཾ པགྒཡ྄ཧ ཏིཊྛནྟཾ སམྨུཁཱ པསྶནྟི, ཡེ ཝཱ ‘‘ཨསུཀསྨིཾ ནཱམ ཝིཧཱརེ’’ཏི སུཎནྟི, ཏེཧི སབྦནྟིམེན པརིཙྪེདེན ཨཌྜྷཡོཛནམཏྟཾ གནྟྭཱཔི ཡྭཱཡཾ ཨནནྟརེ ‘‘མཱཡསྨཱ’’ཏིཨཱདིཝཙནཀྐམོ ཝུཏྟོ, ཨེཝམསྶ ཝཙནཱིཡོ. དིསྭཱ ཝཱ སུཏྭཱ ཝཱ ཨཝདནྟཱནཾ དུཀྐཊཾ. ཨེཏྠ ཙ མཱཨིཏི པདཾ ¶ ‘‘པརཀྐམཱི’’ཏིཔདེན ‘‘ཨཊྛཱསཱི’’ཏིཔདེན ཙ སདྡྷིཾ ‘‘མཱ པརཀྐམི, མཱ ཨཊྛཱསཱི’’ཏི ཡོཛེཏབྦཾ. སམེཏཱཡསྨཱ སངྒྷེནཱཏི ཨཱཡསྨཱ སངྒྷེན སདྡྷིཾ སམེཏུ སམཱགཙྪཏུ, ཨེཀལདྡྷིཀོ ཧོཏཱུཏི ཨཏྠོ. ཀིཾ ཀཱརཎཱ? སམགྒོ ཧི སངྒྷོ…པེ… ཝིཧརཏཱིཏི. ཏཏྠ སམྨོདམཱནོཏི ཨཉྙམཉྙསམྤཏྟིཡཱ སུཊྛུ མོདམཱནོ. ཨཝིཝདམཱནོཏི ‘‘ཨཡཾ དྷམྨོ, ནཱཡཾ དྷམྨོ’’ཏི ཨེཝཾ ན ཝིཝདམཱནོ. ཨེཀོ ཨུདྡེསོ ཨསྶཱཏི ཨེཀུདྡེསོ, ཨེཀཏོ པཝཏྟཔཱཏིམོཀྑུདྡེསོཏི ཨཏྠོ. ཕཱསུ ཝིཧརཏཱིཏི སུཁཾ ཝིཧརཏི. ཨེཝཾ ཝིསུམྤི སངྒྷམཛ྄ཛྷེཔི ཏིཀྑཏྟུཾ ཝུཙྩམཱནསྶ ཨཔྤཊིནིསྶཛྫཏོ དུཀྐཊཾ. ཨེཝཉྩ སོཏིཨཱདིམྷི སམནུབྷཱསིཏབྦོཏི སམནུབྷཱསནཀམྨཾ ཀཱཏབྦཾ. ཨིཙྩེཏཾ ཀུསལནྟི ཨིཏི ཨེཏཾ པཊིནིསྶཛྫནཾ ཀུསལཾ ཁེམཾ སོཏྠིབྷཱཝོ ཏསྶ བྷིཀྑུནོ. ནོ ཙེ ¶ པཊིནིསྶཛྫེཡྻ, སངྒྷཱདིསེསོཏི ཨེཏྠ སམནུབྷཱསནཀམྨཔརིཡོསཱནེ ཨཔྤཊིནིསྶཛྫནྟསྶ སངྒྷཱདིསེསོ. སེསཾ ཨུཏྟཱནཔདཏྠམེཝ.

རཱཛགཧེ དེཝདཏྟཾ ཨཱརབྦྷ སངྒྷབྷེདཱཡ པརཀྐམནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, སམནུབྷཱསནཀམྨེ ཀརིཡམཱནེ ཨཔྤཊིནིསྶཛྫནྟསྶ ཉཏྟིཔརིཡོསཱནེ དུཀྐཊཾ, དྭཱིཧི ཀམྨཝཱཙཱཧི དྭེ ཐུལླཙྩཡཱ, ‘‘ཡསྶ ནཀྑམཏི, སོ བྷཱསེཡྻཱ’’ཏི ཨེཝཾ ཡྻ-ཀཱརཔཏྟཱཡ ཏཏིཡཀམྨཝཱཙཱཡ ཏཉྩ དུཀྐཊཾ ཏེ ཙ ཐུལླཙྩཡཱ པཊིཔྤསྶམྦྷནྟི, སངྒྷཱདིསེསོཡེཝ ཏིཊྛཏི. ཨསམནུབྷཱསིཡམཱནསྶ ཙ པཊིནིསྶཛྫནྟསྶ ཙ ཨུམྨཏྟཀཱདཱིནཉྩ ཨནཱཔཏྟི. སཱིལཝིཔཏྟི, བྷེདཱཡ པརཀྐམནཾ, དྷམྨཀམྨེན སམནུབྷཱསནཾ, ཀམྨཝཱཙཱཔརིཡོསཱནཾ, ཨཔྤཊིནིསྶཛྫནནྟི ཨིམཱནེཏྠ ཙཏྟཱརི ཨངྒཱནི. སམནུབྷཱསནསམུཊྛཱནཾ, ཨཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

སངྒྷབྷེདསིཀྑཱཔདཝཎྞནཱ ནིཊྛིཏཱ.

༡༡. བྷེདཱནུཝཏྟཀསིཀྑཱཔདཝཎྞནཱ

ཨེཀཱདསམེ ¶ ཏསྶེཝ ཁོ པནཱཏི ཡོ སངྒྷབྷེདཱཡ པརཀྐམཏི, ཏསྶེཝ. ཨནུཝཏྟཀཱཏི ཏསྶ དིཊྛིཾ ཁནྟིཾ རུཙིཾ གཧཎེན ཨནུཔཊིཔཛྫནཀཱ. ཝགྒཾ ཨསཱམགྒིཔཀྑིཡཝཙནཾ ཝདནྟཱིཏི ཝགྒཝཱདཀཱ. ཡསྨཱ པན ཏིཎྞཾ ཨུདྡྷཾ ཀམྨཱརཧཱ ན ཧོནྟི. ན ཧི སངྒྷོ སངྒྷསྶ ཀམྨཾ ཀརོཏི, ཏསྨཱ ‘‘ཨེཀོ ཝཱ དྭེ ཝཱ ཏཡོ ཝཱ’’ཏི ཝུཏྟཾ. ཛཱནཱཏི ནོཏི ཨམྷཱཀཾ ཚནྡཱདཱིནི ཛཱནཱཏི. བྷཱསཏཱིཏི ‘‘ཨེཝཾ ཀརོམཱ’’ཏི ཨམྷེཧི སདྡྷིཾ བྷཱསཏི. ཨམྷཱཀམྤེཏཾ ཁམཏཱིཏི ཡཾ སོ ཀརོཏི, ཨེཏཾ ཨམྷཱཀམྤི རུཙྩཏི. སམེཏཱཡསྨནྟཱནཾ སངྒྷེནཱཏི ཨཱཡསྨནྟཱནཾ ཙིཏྟཾ སངྒྷེན སདྡྷིཾ སམེཏུ སམཱགཙྪཏུ, ཨེཀཱིབྷཱཝཾ གཙྪཏཱུཏི ཝུཏྟཾ ཧོཏི. སེསཾ པདཏྠཏོ ཨུཏྟཱནམེཝ. ཝིནིཙྪཡཀཐཱཔེཏྠ དསམེ ཝུཏྟསདིསཱཡེཝ.

ཨཡཾ པན ཝིསེསོ – ཨིདཾ རཱཛགཧེ སམྦཧུལེ བྷིཀྑཱུ ཨཱརབྦྷ དེཝདཏྟསྶ ¶ སངྒྷབྷེདཱཡ པརཀྐམནྟསྶ ཨནུཝཏྟནཝཏྠུསྨིཾ པཉྙཏྟཾ, ཨངྒེསུ ཙ ཡཐཱ ཏཏྠ པརཀྐམནཾ, ཨེཝཾ ཨིདྷ ཨནུཝཏྟནཾ དཊྛབྦནྟི.

བྷེདཱནུཝཏྟཀསིཀྑཱཔདཝཎྞནཱ ནིཊྛིཏཱ.

༡༢. དུབྦཙསིཀྑཱཔདཝཎྞནཱ

དྭཱདསམེ ¶ དུབྦཙཛཱཏིཀོཏི དུབྦཙསབྷཱཝོ, ཝཏྟུཾ ཨསཀྐུཎེཡྻོཏི ཨཏྠོ. ཨུདྡེསཔརིཡཱཔནྣེསཱུཏི ཨུདྡེསེ པརིཡཱཔནྣེསུ ཨནྟོགདྷེསུ, ‘‘ཡསྶ སིཡཱ ཨཱཔཏྟི, སོ ཨཱཝིཀརེཡྻཱ’’ཏི ཨེཝཾ སངྒཧིཏཏྟཱ ཨནྟོ པཱཏིམོཀྑསྶ ཝཏྟམཱནེསཱུཏི ཨཏྠོ. སཧདྷམྨིཀཾ ཝུཙྩམཱནོཏི སཧདྷམྨིཀེན ཝུཙྩམཱནོ, ཀཱརཎཏྠེ ཙེཏཾ ཨུཔཡོགཝཙནཾ. པཉྩཧི སཧདྷམྨིཀེཧི སིཀྑིཏབྦཏྟཱ, ཏེསཾ ཝཱ སནྟཀཏྟཱ ‘‘སཧདྷམྨིཀ’’ནྟི ལདྡྷནཱམེན བུདྡྷཔཉྙཏྟེན སིཀྑཱཔདེན ཝུཙྩམཱནོཏི ཨཏྠོ. ཝིརམཐཱཡསྨནྟོ མམ ཝཙནཱཡཱཏི ཡེན ཝཙནེན མཾ ཝདཐ, ཏཏོ མམ ཝཙནཏོ ཝིརམཐ, མཱ མཾ ཏཾ ཝཙནཾ ཝདཐཱཏི ཝུཏྟཾ ཧོཏི. ཝདཏུ སཧ དྷམྨེནཱཏི སཧདྷམྨིཀེན སིཀྑཱཔདེན, སཧདྷམྨེན ཝཱ ཨཉྙེནཔི པཱསཱདིཀབྷཱཝསཾཝཏྟནིཀེན ཝཙནེན ཝདེཏུ. ཡདིདནྟི ཝུདྡྷིཀཱརཎདསྶནཏྠེ ནིཔཱཏོ, ཏེན ཡཾ ཨིདཾ ཨཉྙམཉྙསྶ ཧིཏཝཙནཾ, ཨཱཔཏྟིཏོ ཙ ཝུཊྛཱཔནཾ, ཏེན ཨཉྙམཉྙཝཙནེན ཨཉྙམཉྙཝུཊྛཱཔནེན. ཨེཝཾ སཾཝདྡྷཱཧི ཏསྶ བྷགཝཏོ པརིསཱཏི ཨེཝཾ པརིསཱཡ ¶ ཝུདྡྷིཀཱརཎཾ དསྶིཏཾ ཧོཏི. སེསཾ ཨུཏྟཱནཏྠམེཝ. ཝིནིཙྪཡཀཐཱཔི དསམེ ཝུཏྟསདིསཱཡེཝ.

ཨཡཾ པན ཝིསེསོ – ཨིདཾ ཀོསམྦིཡཾ ཚནྣཏྠེརཾ ཨཱརབྦྷ ཨཏྟཱནཾ ཨཝཙནཱིཡཀརཎཝཏྠུསྨིཾ པཉྙཏྟཾ, ཨངྒེསུ ཙ ཡཐཱ ཏཏྠ པརཀྐམནཾ, ཨེཝཾ ཨིདྷ ཨཝཙནཱིཡཀརཎཏཱ དཊྛབྦཱཏི.

དུབྦཙསིཀྑཱཔདཝཎྞནཱ ནིཊྛིཏཱ.

༡༣. ཀུལདཱུསཀསིཀྑཱཔདཝཎྞནཱ

ཏེརསམེ གཱམཾ ཝཱ ནིགམཾཝཱཏི ཨེཏྠ ནགརམྤི གཱམེ ཨནྟོགདྷམེཝ. ཨུཔནིསྶཱཡ ཝིཧརཏཱིཏིཏཏྠ པཊིབདྡྷཙཱིཝརཱདིཔཙྩཡཏཱཡ ཏཾ ནིསྶཱཡ ཝསཏི. པུཔྥདཱནཱདཱིཧི མནུསྶཱནཾ སདྡྷཾ ཝིནཱསེནྟོ ཀུལཱནི དཱུསེཏཱིཏི ཀུལདཱུསཀོ. མཱལཱཝཙྪརོཔནཱདཡོ པཱཔཀཱ སམཱཙཱརཱ ཨསྶཱཏི པཱཔསམཱཙཱརོ. སོ བྷིཀྑཱུཏི སོ ཀུལདཱུསཀོ བྷིཀྑུ. ཨཱཡསྨཱ ཁོ ¶ ཀུལདཱུསཀོ…པེ… ཨལཾ ཏེ ཨིདྷ ཝཱསེནཱཏི ཨིམིནཱསྶ པབྦཱཛནཱིཡཀམྨཱརཧཏཾ དསྶེཏི. པབྦཱཛནཱིཡཀམྨཀཏོ པནེས ཡསྨིཾ གཱམེ ཝཱ ནིགམེ ཝཱ ཀུལདཱུསཀཀམྨཾ ཀཏཾ, ཡསྨིཉྩ ཝིཧཱརེ ཝསཏི, ནེཝ ཏསྨིཾ གཱམེ ཝཱ ནིགམེ ཝཱ ཙརིཏུཾ ལབྷཏི, ན ཝིཧཱརེ ཝསིཏུཾ. ཨེཝཉྩ སོ བྷིཀྑཱུཏིཨེཏྠ སོཏི པབྦཱཛནཱིཡཀམྨཀཏོ ཨདྷིཔྤེཏོ. ཚནྡེན གཙྪནྟཱིཏི ཚནྡགཱམིནོ, ཨེས ནཡོ སེསེསུ. སོ བྷིཀྑཱུཏི སོ ‘‘ཚནྡགཱམིནོ’’ཏིཨཱདཱིནི ¶ ཝདམཱནོ. ཏསྶ ཝཙནསྶ པཊིནིསྶགྒཱཡ ཨེཝཾ ཝཙནཱིཡོ, ན ཀུལདཱུསནནིཝཱརཎཏྠཱཡ. ཀུལདཱུསནཀམྨེན ཧི སོ ཨཱཔཛྫིཏབྦཱ ཨཱཔཏྟིཡོ པུབྦེཝ ཨཱཔནྣོ, ཨེཝཾ པནསྶ ཝིསུམྤི སངྒྷམཛ྄ཛྷེཔི ཝུཙྩམཱནསྶ ཨཔྤཊིནིསྶཛྫཏོ ཨཔརཾ དུཀྐཊཾ. ཨེཝཉྩ སོཏིཨཱདི ཨིཏོ པུབྦེ ཝུཏྟཉྩ ཨཝུཏྟཉྩ སབྦཾ ཨུཏྟཱནཏྠམེཝ. ཝིནིཙྪཡཀཐཱཔི དསམེ ཝུཏྟསདིསཱཡེཝ.

ཨཡཾ པན ཝིསེསོ – ཨིདཾ སཱཝཏྠིཡཾ ཨསྶཛིཔུནབྦསུཀེ བྷིཀྑཱུ ཨཱརབྦྷ ཚནྡགཱམིཏཱདཱིཧི པཱཔནཝཏྠུསྨིཾ པཉྙཏྟཾ, ཨངྒེསུ ཙ ཡཐཱ ཏཏྠ པརཀྐམནཾ, ཨེཝཾ ཨིདྷ ཚནྡཱདཱིཧི པཱཔནཾ དཊྛབྦནྟི.

ཀུལདཱུསཀསིཀྑཱཔདཝཎྞནཱ ནིཊྛིཏཱ.

ནིགམནཝཎྞནཱ

ཨུདྡིཊྛཱ ¶ ཁོ…པེ… ཨེཝམེཏཾ དྷཱརཡཱམཱིཏིཨེཏྠ པཋམཾ ཨཱཔཏྟི ཨེཏེསནྟི པཋམཱཔཏྟིཀཱ, པཋམཾ ཝཱིཏིཀྐམནཀྑཎེཡེཝ ཨཱཔཛྫིཏབྦཱཏི ཨཏྠོ. ཨིཏརེ པན ཡཐཱ ཏཏིཡེ ཙ ཙཏུཏྠེ ཙ དིཝསེ ཧོཏཱིཏི ཨེཏྠ ‘‘ཏཏིཡཀོ, ཙཏུཏྠཀོ’’ཏི ཝུཙྩཏི, ཨེཝཾ ཡཱཝཏཏིཡེ སམནུབྷཱསནཀམྨེ ཧོནྟཱིཏི ཡཱཝཏཏིཡཀཱཏི ཝེདིཏབྦཱ. ཡཱཝཏཱིཧནྟི ཡཏྟཀཱནི ཨཧཱནི. ཛཱནཾ པཊིཙྪཱདེཏཱིཏི ཛཱནནྟོ པཊིཙྪཱདེཏི. ཏཏྠཱཡཾ པཊིཙྪཱདནལཀྑཎསྶ མཱཏིཀཱ – ཨཱཔཏྟི ཙ ཧོཏི, ཨཱཔཏྟིསཉྙཱི ཙ, པཀཏཏྟོ ཙ ཧོཏི, པཀཏཏྟསཉྙཱི ཙ, ཨནནྟརཱཡིཀོ ཙ ཧོཏི, ཨནནྟརཱཡིཀསཉྙཱི ཙ, པཧུ ཙ ཧོཏི, པཧུསཉྙཱི ཙ, ཚཱདེཏུཀཱམོ ཙ ཧོཏི, ཚཱདེཏི ཙཱཏི. ཏཏྠ ཨཱཔཏྟི ཙ ཧོཏི, ཨཱཔཏྟིསཉྙཱི ཙཱཏི ཡཾ ཨཱཔཏྟིཾ ཨཱཔནྣོ, སཱ ཏེརསནྣཾ ཨཉྙཏརཱ ཧོཏི, སོཔི ཙ ཏཏྠ ཝཏྠུཝསེན ཝཱ ‘‘ཨིདཾ བྷིཀྑཱུནཾ ན ཝཊྚཏཱི’’ཏི ¶ ནཱམམཏྟཝསེན ཝཱ ‘‘ཨཡཾ ཨིཏྠནྣཱམཱ ཨཱཔཏྟཱི’’ཏི ཨཱཔཏྟིསཉྙཱིཡེཝ ཧུཏྭཱ ‘‘ན དཱནི ནཾ ཀསྶཙི ཨཱརོཙེསྶཱམཱི’’ཏི ཨེཝཾ ཚཱདེཏུཀཱམོཝ དྷུརཾ ནིཀྑིཔིཏྭཱ ཨརུཎཾ ཨུཊྛཱཔེཏི, ཚནྣཱ ཧོཏི ཨཱཔཏྟི. སཙེ པནེཏྠ ཨནཱཔཏྟིསཉྙཱི ཝཱ ཧོཏི, ཨཉྙཱཔཏྟིཀྑནྡྷསཉྙཱི ཝཱ, ཝེམཏིཀོ ཝཱ, ཨཙྪནྣཱཝ ཧོཏི. པཀཏཏྟོཏི ཨནུཀྑིཏྟོ སམཱནསཾཝཱསཀོ. སོ ཙེ པཀཏཏྟསཉྙཱི ཧུཏྭཱ ཝུཏྟནཡེནེཝ ཚཱདེཏི, ཚནྣཱ ཧོཏི. ཨནནྟརཱཡིཀོཏི ཡསྶ དསསུ རཱཛཙོརཨགྒིཨུདཀམནུསྶཨམནུསྶཝཱལ༹སརཱིསཔཛཱིཝིཏབྲཧྨཙརིཡནྟརཱཡེསུ ཨེཀོཔི ནཏྠི, སོ ཙེ ཨནནྟརཱཡིཀསཉྙཱི ཚཱདེཏི, ཚནྣཱ ཧོཏི. པཧཱུཏི ཡོ སཀྐོཏི བྷིཀྑུནོ སནྟིཀཾ གནྟུཉྩེཝ ཨཱརོཙེཏུཉྩ, སོ ཙེ པཧུསཉྙཱི ཧུཏྭཱ ཚཱདེཏི, ཚནྣཱ ཧོཏི. ཚཱདེཏུཀཱམོ ཙ ཧོཏི, ཚཱདེཏི ཙཱཏིཨིདཾ ཨུཏྟཱནམེཝ. སཙེཔི ཧི སོ སབྷཱགཾ དིསྭཱ ‘‘ཨཡཾ མེ ཨུཔཛ྄ཛྷཱཡོ ཝཱ ཨཱཙརིཡོ ཝཱ’’ཏི ལཛྫཱཡ ནཱརོཙེཏི, ཚནྣཱཝ ཧོཏི. ཨུཔཛ྄ཛྷཱཡཱདིབྷཱཝོ ཧི ཨིདྷ ཨཔྤམཱཎཾ, སབྷཱགམཏྟམེཝ པམཱཎཾ. ཨཡཾ ‘‘ཛཱནཾ པཊིཙྪཱདེཏཱི’’ཏིཔདསྶ སངྑེཔཏོ ཨཏྠཝིནིཙྪཡོ.

ཏཱཝཏཱིཧནྟི ¶ ཏཏྟཀཱནི ཨཧཱནི, པཊིཙྪཱདིཏདིཝསཏོ པཊྛཱཡ ཡཱཝ ཨཱརོཙིཏདིཝསོ, ཏཱཝ དིཝསཔཀྑམཱསསཾཝཙྪརཝསེན ཡཏྟཀོ ཀཱལོ ཨཏིཀྐནྟོ, ཏཏྟཀཾ ཀཱལནྟི ཨཏྠོ. ཨཀཱམཱ པརིཝཏྠབྦནྟི ན ཀཱམེན ན ཝསེན, ཨཐ ཁོ ཨཀཱམེན ཨཝསེན པརིཝཱསཾ སམཱདཱཡ ཝཏྠབྦཾ. ཏཏྠ པཊིཙྪནྣཔརིཝཱསོ སུདྡྷནྟཔརིཝཱསོ སམོདྷཱནཔརིཝཱསོ ཙཱཏི ཏིཝིདྷོ པརིཝཱསོ. ཏཏྠ པཊིཙྪནྣཔརིཝཱསོ ཏཱཝ ཡཐཱཔཊིཙྪནྣཱཡ ཨཱཔཏྟིཡཱ དཱཏབྦོ. ཀསྶཙི ཧི ཨེཀཱཧཔྤཊིཙྪནྣཱ ཨཱཔཏྟི ཧོཏི, ཀསྶཙི དྭཱིཧཱདིཔྤཊིཙྪནྣཱ. ཀསྶཙི ཨེཀཱ ཨཱཔཏྟི ཧོཏི, ཀསྶཙི ¶ དྭེ ཝཱ ཏིསྶོ ཝཱ ཏདུཏྟརི ཝཱ. ཏསྨཱ པཊིཙྪནྣཔརིཝཱསཾ དེནྟེན པཋམམེཝ ཝུཏྟནཡེན པཊིཙྪནྣབྷཱཝཾ ཉཏྭཱ ཏཏོ པཊིཙྪནྣདིཝསེ ཙ ཨཱཔཏྟིཡོ ཙ སལླཀྑེཏྭཱ སཙེ ཨེཀཱ ཨེཀཱཧཔྤཊིཙྪནྣཱ ཧོཏི, ‘‘ཨཧཾ, བྷནྟེ, ཨེཀཾ ཨཱཔཏྟིཾ ཨཱཔཛྫིཾ སཉྩེཏནིཀཾ སུཀྐཝིསྶཊྛིཾ ཨེཀཱཧཔྤཊིཙྪནྣ’’ནྟི ཨེཝཾ པརིཝཱསཾ ཡཱཙཱཔེཏྭཱ ཁནྡྷཀེ (ཙཱུལ༹ཝ. ༩༨) ཨཱགཏནཡེན ཀམྨཝཱཙཾ ཝཏྭཱ པརིཝཱསོ དཱཏབྦོ. ཨཐ དྭཱིཧཏཱིཧཱདིཔྤཊིཙྪནྣཱ ཧོཏི ¶ , དྭཱིཧཔྤཊིཙྪནྣཾ ཏཱིཧཔྤཊིཙྪནྣཾ ཙཏཱུཧཔྤཊིཙྪནྣཾ པཉྩཱཧཔྤཊིཙྪནྣཾ…པེ… ཙུདྡསཱཧཔྤཊིཙྪནྣནྟིཨེཝཾ ཡཱཝ ཙུདྡསདིཝསཱནི དིཝསཝསེན ཡོཛནཱ ཀཱཏབྦཱ, པཉྩདསདིཝསཔྤཊིཙྪནྣཱཡཾ ‘‘པཀྑཔྤཊིཙྪནྣ’’ནྟི ཡོཛནཱ ཀཱཏབྦཱ. ཏཏོ ཡཱཝ ཨེཀཱུནཏིཾསཏིམོ དིཝསོ, ཏཱཝ ‘‘ཨཏིརེཀཔཀྑཔྤཊིཙྪནྣ’’ནྟི, ཏཏོ མཱསཔྤཊིཙྪནྣཾ ཨཏིརེཀམཱསཔྤཊིཙྪནྣཾ དྭེམཱསཔྤཊིཙྪནྣཾ ཨཏིརེཀདྭེམཱསཔྤཊིཙྪནྣཾ ཏེམཱསཔྤཊིཙྪནྣཾ…པེ… ཨཏིརེཀཨེཀཱདསམཱསཔྤཊིཙྪནྣནྟི ཨེཝཾ ཡོཛནཱ ཀཱཏབྦཱ. སཾཝཙྪརེ པུཎྞེ ‘‘ཨེཀསཾཝཙྪརཔྤཊིཙྪནྣ’’ནྟི, ཏཏོ པརཾ ཨཏིརེཀསཾཝཙྪརཾ དྭེསཾཝཙྪརཾ ཨེཝཾ ཡཱཝ སཊྛིསཾཝཙྪརཨཏིརེཀསཊྛིསཾཝཙྪརཔྤཊིཙྪནྣནྟི, ཏཏོ ཝཱ བྷིཡྻོཔི ཝཏྭཱ ཡོཛནཱ ཀཱཏབྦཱ.

སཙེ པན དྭེ ཏིསྶོ ཏདུཏྟརི ཝཱ ཨཱཔཏྟིཡོ ཧོནྟི, ཡཐཱ ‘‘ཨེཀཾ ཨཱཔཏྟི’’ནྟི ཝུཏྟཾ, ཨེཝཾ ‘‘དྭེ ཨཱཔཏྟིཡོ, ཏིསྶོ ཨཱཔཏྟིཡོ’’ཏི ཝཏྟབྦཾ. ཏཏོ པརཾ པན སཏཾ ཝཱ ཧོཏུ, སཧསྶཾ ཝཱ, ‘‘སམྦཧུལཱ’’ཏི ཝཏྟུཾ ཝཊྚཏི. ནཱནཱཝཏྠུཀཱསུཔི ‘‘ཨཧཾ, བྷནྟེ, སམྦཧུལཱ སངྒྷཱདིསེསཱ ཨཱཔཏྟིཡོ ཨཱཔཛྫིཾ ཨེཀཾ སུཀྐཝིསྶཊྛིཾ ཨེཀཾ ཀཱཡསཾསགྒཾ ཨེཀཾ དུཊྛུལླཝཱཙཾ ཨེཀཾ ཨཏྟཀཱམཾ ཨེཀཾ སཉྩརིཏྟཾ ཨེཀཱཧཔྤཊིཙྪནྣཱཡོ’’ཏི ཨེཝཾ གཎནཝསེན ཝཱ, ‘‘ཨཧཾ, བྷནྟེ, སམྦཧུལཱ སངྒྷཱདིསེསཱ ཨཱཔཏྟིཡོ ཨཱཔཛྫིཾ ནཱནཱཝཏྠུཀཱཡོ ཨེཀཱཧཔྤཊིཙྪནྣཱཡོ’’ཏི ཨེཝཾ ཝཏྠུཀིཏྟནཝསེན ཝཱ, ‘‘ཨཧཾ, བྷནྟེ, སམྦཧུལཱ སངྒྷཱདིསེསཱ ཨཱཔཏྟིཡོ ཨཱཔཛྫིཾ ཨེཀཱཧཔྤཊིཙྪནྣཱཡོ’’ཏི ཨེཝཾ ནཱམམཏྟཝསེན ཝཱ ཡོཛནཱ ཀཱཏབྦཱ. ཏཏྠ ནཱམཾ དུཝིདྷཾ སཛཱཏིསཱདྷཱརཎཾ སབྦསཱདྷཱརཎཉྩ, ཏཏྠ སངྒྷཱདིསེསོཏི སཛཱཏིསཱདྷཱརཎཾ, ཨཱཔཏྟཱིཏི སབྦསཱདྷཱརཎཾ, ཏསྨཱ ‘‘སམྦཧུལཱ ཨཱཔཏྟིཡོ ཨཱཔཛྫིཾ ཨེཀཱཧཔྤཊིཙྪནྣཱཡོ’’ཏི ཨེཝཾ སབྦསཱདྷཱརཎནཱམཝསེནཱཔི ¶ ཝཏྟུཾ ཝཊྚཏི. ཨིདཉྷི པརིཝཱསཱདིཝིནཡཀམྨཾ ཝཏྠུཝསེན གོཏྟཝསེན ནཱམཝསེན ཨཱཔཏྟིཝསེན ཙ ཀཱཏུཾ ཝཊྚཏིཡེཝ. ཏཏྠ སུཀྐཝིསྶཊྛཱིཏི ཝཏྠུ ཙེཝ གོཏྟཉྩ, སངྒྷཱདིསེསོཏི ནཱམཉྩེཝ ཨཱཔཏྟི ཙ, ཏཏྠ ‘‘སུཀྐཝིསྶཊྛིཾ ཀཱཡསཾསགྒ’’ནྟིཨཱདིཝཙནེནཱཔི ‘‘ནཱནཱཝཏྠུཀཱཡོ’’ཏིཝཙནེནཱཔི ཝཏྠུ ཙེཝ གོཏྟཉྩ གཧིཏཾ ཧོཏི, ‘‘སངྒྷཱདིསེསོ’’ཏིཝཙནེནཱཔི ‘‘ཨཱཔཏྟིཡོ’’ཏིཝཙནེནཱཔི ནཱམཉྩེཝ ཨཱཔཏྟི ཙ གཧིཏཱ ཧོཏི, ཏསྨཱ ཨེཏེསུ ཡསྶ ཀསྶཙི ཝསེན ཀམྨཝཱཙཱ ཀཱཏབྦཱ.

ཀམྨཝཱཙཱཔརིཡོསཱནེ ¶ ¶ ཙ སཙེ ཨཔྤབྷིཀྑུཀོ ཨཱཝཱསོ ཧོཏི, སཀྐཱ རཏྟིཙྪེདཾ ཨནཱཔཛྫནྟེན ཝསིཏུཾ, ཏཏྠེཝ ‘‘པརིཝཱསཾ སམཱདིཡཱམི, ཝཏྟཾ སམཱདིཡཱམཱི’’ཏི ཏིཀྑཏྟུཾ ཝཏྟཾ སམཱདཱཏབྦཾ, སམཱདིཡིཏྭཱ ཏཏྠེཝ སངྒྷསྶ ཨཱརོཙེཏྭཱ པུན ཨཱགཏཱགཏཱནཾ བྷིཀྑཱུནཾ ཨཱརོཙེནྟེན ཝཏྟབྷེདཉྩ རཏྟིཙྪེདཉྩ ཨཀཏྭཱ པརིཝསིཏབྦཾ. སཙེ ན སཀྐཱ ཧོཏི པརིཝཱསཾ སོདྷེཏུཾ, ནིཀྑིཏྟཝཏྟེན ཝསིཏུཀཱམོ ཧོཏི, ཏཏྠེཝ སངྒྷམཛ྄ཛྷེ, ཨེཀཔུགྒལསྶ ཝཱ སནྟིཀེ ‘‘པརིཝཱསཾ ནིཀྑིཔཱམི, ཝཏྟཾ ནིཀྑིཔཱམཱི’’ཏི པརིཝཱསོ ནིཀྑིཔིཏབྦོ, ཨེཀཔདེནཱཔི ཙེཏྠ ནིཀྑིཏྟོ ཧོཏི པརིཝཱསོ, དྭཱིཧི པན སུནིཀྑིཏྟོཡེཝ, སམཱདཱནེཔི ཨེསེཝ ནཡོ. ནིཀྑིཏྟཀཱལཏོ པཊྛཱཡ པཀཏཏྟཊྛཱནེ ཏིཊྛཏི, ཨཐཱནེན པཙྩཱུསསམཡེ ཨེཀེན བྷིཀྑུནཱ སདྡྷིཾ པརིཀྑིཏྟསྶ ཝིཧཱརསྶ པརིཀྑེཔཏོ, ཨཔརིཀྑིཏྟསྶ པརིཀྑེཔཱརཧཊྛཱནཏོ དྭེ ལེཌྜུཔཱཏེ ཨཏིཀྐམིཏྭཱ མཧཱམགྒཏོ ཨོཀྐམྨ གུམྦེན ཝཱ ཝཏིཡཱ ཝཱ པཊིཙྪནྣཊྛཱནེ ནིསཱིདིཏྭཱ ཨནྟོཨརུཎེཡེཝ ཝཏྟཾ སམཱདིཡིཏྭཱ ཨཱརོཙེཏབྦཾ. ཡམྤི ཨཉྙཾ བྷིཀྑུཾ པསྶཏི, ཏསྶཱཔི ཨཱརོཙེཏབྦམེཝ. ཨརུཎེ ཨུཊྛིཏེ ཏསྶ སནྟིཀེ ཝཏྟཾ ནིཀྑིཔིཏྭཱ ཝིཧཱརཾ གནྟབྦཾ. སཙེ སོ པུརེ ཨརུཎེཡེཝ ཀེནཙི ཀརཎཱིཡེན གཏོ, ཝིཧཱརཾ གནྟྭཱ ཡཾ སབྦཔཋམཾ བྷིཀྑུཾ པསྶཏི, ཏསྶ ཨཱརོཙེཏྭཱ ནིཀྑིཔིཏབྦཾ. ཨེཝཾ སལླཀྑེཏྭཱ ཡཱཝ རཏྟིཡོ པཱུརེནྟི, ཏཱཝ པརིཝཏྠབྦཾ, ཨཡཾ སངྑེཔཏོ པཊིཙྪནྣཔརིཝཱསཝིནིཙྪཡོ, ཝིཏྠཱརོ པན སམནྟཔཱསཱདིཀཱཡ ཝིནཡསཾཝཎྞནཱཡ (ཙཱུལ༹ཝ. ཨཊྛ. ༩༧) ཝུཏྟནཡེནེཝ ཝེདིཏབྦོ.

ཨིཏརེསུ པན དྭཱིསུ ‘‘ཨཱཔཏྟིཔརིཡནྟཾ ན ཛཱནཱཏི, རཏྟིཔརིཡནྟཾ ན ཛཱནཱཏཱི’’ཏི (ཙཱུལ༹ཝ. ༡༥༧) ཨིམསྨིཾ ཝཏྠུསྨིཾ ཁནྡྷཀེ ཨནུཉྙཱཏོ སུདྡྷནྟཔརིཝཱསོ ནཱམ, སོ དུཝིདྷོ ཙཱུལ༹སུདྡྷནྟོ མཧཱསུདྡྷནྟོཏི, དུཝིདྷོཔི ཙེས རཏྟིཔརིཙྪེདཾ སཀལཾ ཝཱ ཨེཀཙྩཾ ཝཱ ཨཛཱནནྟསྶ ཙ ཨསྶརནྟསྶ ཙ ཏཏྠ ཝེམཏིཀསྶ ཙ དཱཏབྦོ. ཨཱཔཏྟིཔརིཡནྟཾ པན ‘‘ཨེཏྟིཀཱ ཨཧཾ ཨཱཔཏྟིཡོ ཨཱཔནྣོ’’ཏི ཛཱནཱཏུ ཝཱ, མཱ ཝཱ, ཨཀཱརཎམེཏཾ. ཏསྶ དཱནཝིདྷི ཁནྡྷཀེ ཨཱགཏོ, ཝིནིཙྪཡཀཐཱ པན ཝིཏྠཱརཏོ སམནྟཔཱསཱདིཀཱཡཾ (ཙཱུལ༹ཝ. ཨཊྛ. ༡༠༢) ཝུཏྟཱ. ཨིཏརོ པན སམོདྷཱནཔརིཝཱསོ ནཱམ, སོ ཏིཝིདྷོ ཧོཏི ཨོདྷཱནསམོདྷཱནོ ¶ ཨགྒྷསམོདྷཱནོ མིསྶཀསམོདྷཱནོཏི. ཏཏྠ ཨོདྷཱནསམོདྷཱནོ ནཱམ ཨནྟརཱཔཏྟིཾ ཨཱཔཛྫིཏྭཱ པཊིཙྪཱདེནྟསྶ པརིཝུཏྠདིཝསེ ཨོདྷུནིཏྭཱ ¶ མཀྑེཏྭཱ པུརིམཱཡ ཨཱཔཏྟིཡཱ མཱུལདིཝསཔརིཙྪེདེ པཙྪཱ ཨཱཔནྣཾ ཨཱཔཏྟིཾ སམོདཧིཏྭཱ དཱཏབྦཔརིཝཱསོ ཝུཙྩཏི. ཨགྒྷསམོདྷཱནོ ནཱམ སམྦཧུལཱསུ ཨཱཔཏྟཱིསུ ཡཱ ཨེཀཱ ཝཱ དྭེ ཝཱ ཏིསྶོ ཝཱ སམྦཧུལཱ ཝཱ ཨཱཔཏྟིཡོ སབྦཙིརཔྤཊིཙྪནྣཱཡོ, ཏཱསཾ ཨགྒྷེན སམོདྷཱཡ ཏཱསཾ རཏྟིཔརིཙྪེདཝསེན ཨཝསེསཱནཾ ཨཱུནཏརཔྤཊིཙྪནྣཱནཾ ཨཱཔཏྟཱིནཾ དཱཏབྦཔརིཝཱསོ ཝུཙྩཏི. མིསྶཀསམོདྷཱནོ ནཱམ ནཱནཱཝཏྠུཀཱཡོ ཨཱཔཏྟིཡོ ཨེཀཏོ ཀཏྭཱ དཱཏབྦཔརིཝཱསོ ¶ ཝུཙྩཏི, ཨཡཾ ཏིཝིདྷེཔི སམོདྷཱནཔརིཝཱསེ སངྑེཔཀཐཱ, ཝིཏྠཱརོ པན སམནྟཔཱསཱདིཀཱཡཾ (ཙཱུལ༹ཝ. ཨཊྛ. ༡༠༢) ཝུཏྟོ, ཨིདཾ ‘‘པརིཝཏྠབྦ’’ནྟི པདསྶ ཝིནིཙྪཡཀཐཱམུཁཾ.

ཨུཏྟརི ཚཱརཏྟནྟི པརིཝཱསཏོ ཨུཏྟརི ཚ རཏྟིཡོ. བྷིཀྑུམཱནཏྟཱཡཱཏི བྷིཀྑཱུནཾ མཱནབྷཱཝཱཡ, ཨཱརཱདྷནཏྠཱཡཱཏི ཝུཏྟཾ ཧོཏི. པཊིཔཛྫིཏབྦནྟི ཝཏྟིཏབྦཾ. བྷིཀྑུམཱནཏྟཉྩ པནེཏཾ པཊིཙྪནྣཱཔཊིཙྪནྣཝསེན དུཝིདྷཾ. ཏཏྠ ཡསྶ ཨཔྤཊིཙྪནྣཱཔཏྟི ཧོཏི, ཏསྶ པརིཝཱསཾ ཨདཏྭཱ མཱནཏྟམེཝ དཱཏབྦཾ, ཨིདཾ ཨཔྤཊིཙྪནྣམཱནཏྟཾ. ཡསྶ པཊིཙྪནྣཱ ཧོཏི, ཏསྶ པརིཝཱསཔརིཡོསཱནེ དཱཏབྦཾ མཱནཏྟཾ པཊིཙྪནྣམཱནཏྟནྟི ཝུཙྩཏི, ཨིདཾ ཨིདྷ ཨདྷིཔྤེཏཾ. ཨུབྷིནྣམྤི པནེཏེསཾ དཱནཝིདྷི ཝིནིཙྪཡཀཐཱ ཙ སམནྟཔཱསཱདིཀཱཡཾ (ཙཱུལ༹ཝ. ཨཊྛ. ༡༠༢) ཝུཏྟནཡེན ཝེདིཏབྦཱ, ཨཡཾ པནེཏྠ སངྑེཔོ. སཙེ ཨཡཾ ཝཏྟཾ ནིཀྑིཔིཏྭཱ པཙྩཱུསསམཡེ སམཱདཱཏུཾ གཙྪཏི, སབྦནྟིམེན པརིཙྪེདེན ཙཏཱུཧི བྷིཀྑཱུཧི སདྡྷིཾ པརིཝཱསེ ཝུཏྟཔྤཀཱརཾ པདེསཾ གནྟྭཱ ‘‘མཱནཏྟཾ སམཱདིཡཱམི, ཝཏྟཾ སམཱདིཡཱམཱི’’ཏི སམཱདིཡིཏྭཱ ནེསཾ ཨཱརོཙེཏྭཱ ཏཏོ ཏེསུ གཏེསུ ཝཱ ཨགཏེསུ ཝཱ པུརིམནཡེན པཊིཔཛྫིཏབྦཾ. ཡཏྠ སིཡཱ ཝཱིསཏིགཎོཏི ཨེཏྠ ཝཱིསཏིསངྒྷོ གཎོ ཨསྶཱཏི ཝཱིསཏིགཎོ. ཏཏྲཱཏི ཡཏྲ སབྦནྟིམེན པརིཙྪེདེན ཝཱིསཏིགཎོ བྷིཀྑུསངྒྷོ ཨཏྠི, ཏཏྠ. ཨབྦྷེཏབྦོཏི ཨབྷིཨེཏབྦོ, སམྤཊིཙྪིཏབྦོ, ཨབྦྷཱནཀམྨཝསེན ཨོསཱརེཏབྦོཏི ཝུཏྟཾ ཧོཏི. ཨཝ྄ཧཱཏབྦོཏི ཝཱ ཨཏྠོ. ཨབྦྷཱནཀམྨཾ པན པཱལི༹ཝསེན ཁནྡྷཀེ (ཙཱུལ༹ཝ. ༡༠༠ ཨཱདཡོ) ཝིནིཙྪཡཝསེན སམནྟཔཱསཱདིཀཱཡཾ ཝུཏྟཾ. ཨནབྦྷིཏོཏི ན ཨབྦྷིཏོ ཨསམྤཊིཙྪིཏོ, ཨཀཏབྦྷཱནཀམྨོཏི ཝུཏྟཾ ཧོཏི. ཨནཝ྄ཧཱཏོཏི ཝཱ ཨཏྠོ. ཏེ ཙ བྷིཀྑཱུ གཱརཡ྄ཧཱཏི ཡེ ཨཱུནབྷཱཝཾ ཉཏྭཱ ¶ ཨབྦྷེནྟི, ཏེ བྷིཀྑཱུ ཙ གརཧིཏབྦཱ, སཱཏིསཱརཱ སདོསཱ དུཀྐཊཾ ཨཱཔཛྫནྟཱིཏི ཨཏྠོ. ཨཡཾ ཏཏྠ སཱམཱིཙཱིཏི ཨཡཾ ཏཏྠ ཨནུདྷམྨཏཱ ལོཀུཏྟརདྷམྨཾ ཨནུགཏཱ ཨོཝཱདཱནུསཱསནཱི སཱམཱིཙི དྷམྨཏཱ. སེསམེཏྠ ཝུཏྟནཡམེཝཱཏི.

ཀངྑཱཝིཏརཎིཡཱ པཱཏིམོཀྑཝཎྞནཱཡ

སངྒྷཱདིསེསཝཎྞནཱ ནིཊྛིཏཱ.

ཨནིཡཏཀཎྜོ

༡. པཋམཱནིཡཏསིཀྑཱཔདཝཎྞནཱ

ཨནིཡཏུདྡེསེ ¶ ¶ ¶ ཨིམེ ཁོ པནཱཏིཨཱདི ཝུཏྟནཡམེཝ. མཱཏུགཱམེནཱཏི ཏདཧུཛཱཏཱཡཔི ཛཱིཝམཱནཀམནུསྶིཏྠིཡཱ. ཨེཀོ ཨེཀཱཡཱཏི ཨེཀོ བྷིཀྑུ མཱཏུགཱམསངྑཱཏཱཡ ཨེཀཱཡ ཨིཏྠིཡཱ སདྡྷིཾ. རཧོཏི ཙཀྑུསྶ རཧོ. ཀིཉྩཱཔི པཱལི༹ཡཾ (པཱརཱ. ༤༤༥) སོཏསྶ རཧོ ཨཱགཏོ, ཙཀྑུསྶེཝ པན རཧོ ‘‘རཧོ’’ཏི ཨིདྷ ཨདྷིཔྤེཏོ. སཙེཔི ཧི པིཧིཏཀཝཱཊསྶ གབྦྷསྶ དྭཱརེ ནིསིནྣོ ཝིཉྙཱུ པུརིསོ ཧོཏི, ནེཝ ཨནཱཔཏྟིཾ ཀརོཏི. ཡཏྠ པན སཀྐཱ དཊྛུཾ, ཏཱདིསེ ཨནྟོདྭཱདསཧཏྠེཔི ཨོཀཱསེ ནིསིནྣོ སཙཀྑུཀོ ཝིཀྑིཏྟཙིཏྟོཔི ནིདྡཱཡནྟོཔི ཨནཱཔཏྟིཾ ཀརོཏི, སམཱིཔེ ཋིཏོཔི ཨནྡྷོ ན ཀརོཏི, ཙཀྑུམཱཔི ནིཔཛྫིཏྭཱ ནིདྡཱཡནྟོཔི ན ཀརོཏི, ཨིཏྠཱིནཾ པན སཏམྤི ན ཀརོཏིཡེཝ, ཏེན ཝུཏྟཾ ‘‘རཧོཏི ཙཀྑུསྶ རཧོ’’ཏི. པཊིཙྪནྣེ ཨཱསནེཏི ཀུཊྚཱདཱིཧི པཊིཙྪནྣོཀཱསེ. ཨལཾཀམྨནིཡེཏི ཀམྨཀྑམཾ ཀམྨཡོགྒནྟི ཀམྨནིཡཾ, ཨལཾ པརིཡཏྟཾ ཀམྨནིཡབྷཱཝཱཡཱཏི ཨལཾཀམྨནིཡཾ, ཏསྨིཾ ཨལཾཀམྨནིཡེ. ཡཏྠ ཨཛ྄ཛྷཱཙཱརཾ ཀརོནྟཱ སཀྐོནྟི ཏཾ ཀམྨཾ ཀཱཏུཾ, ཏཱདིསེཏི ཨཏྠོ. ནིསཛྫཾ ཀཔྤེཡྻཱཏི ནིསཛྫཾ ཀརེཡྻ, ནིསཱིདེཡྻཱཏི ཨཏྠོ. ཨེཏྠ ཙ སཡནམྤི ནིསཛྫཱཡ ཨེཝ སངྒཧིཏཾ. སདྡྷེཡྻཝཙསཱཏི སདྡྷཱཏབྦཝཙནཱ, ཨརིཡསཱཝིཀཱཏི ཨཏྠོ. ནིསཛྫཾ བྷིཀྑུ པཊིཛཱནམཱནོཏི ཀིཉྩཱཔི ཨེཝརཱུཔཱ ཨུཔཱསིཀཱ དིསྭཱ ཝདཏི, ཨཐ ཁོ བྷིཀྑུ ནིསཛྫཾ པཊིཛཱནམཱནོཝ ཏིཎྞཾ དྷམྨཱནཾ ཨཉྙཏརེན ཀཱརེཏབྦོ, ན ཨཔྤཊིཛཱནམཱནོཏི ཨཏྠོ. ཡེན ཝཱ སཱཏི ནིསཛྫཱདཱིསུ ཨཱཀཱརེསུ ཡེན ཝཱ ཨཱཀཱརེན སདྡྷིཾ མེཐུནཱདཱིནི ཨཱརོཔེཏྭཱ སཱ ཨུཔཱསིཀཱ ཝདེཡྻ, པཊིཛཱནམཱནོཝ ཏེན སོ བྷིཀྑུ ཀཱརེཏབྦོ, ཨེཝརཱུཔཱཡཔི ཧི ཨུཔཱསིཀཱཡ ཝཙནམཏྟེན ཨཱཀཱརེན ན ཀཱརེཏབྦོཏི ཨཏྠོ. ཀསྨཱ? ཡསྨཱ དིཊྛཾ ནཱམ ཏཐཱཔི ཧོཏི, ཨཉྙཐཱཔཱིཏི. ཨཡཾ དྷམྨོ ཨནིཡཏོཏི ཏིཎྞཾ ཨཱཔཏྟཱིནཾ ཡཾ ཨཱཔཏྟིཾ ཝཱ ཝཏྠུཾ ཝཱ པཊིཛཱནཱཏི, ཏསྶ ཝསེན ཀཱརེཏབྦཏཱཡ ཨནིཡཏོ.

སཱཝཏྠིཡཾ ¶ ¶ ཨུདཱཡིཏྠེརཾ ཨཱརབྦྷ མཱཏུགཱམེན སདྡྷིཾ ཝུཏྟཔྤཀཱརེ ཨཱསནེ ནིསཛྫཀཔྤནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, ཨནཱཎཏྟིཀཾ, མེཐུནདྷམྨསནྣིསྶིཏཀིལེསསངྑཱཏེན རཧསྶཱདེན མཱཏུགཱམསྶ སནྟིཀཾ གནྟུཀཱམཏཱཡ ཨཀྑིཨཉྫནཱདིཏོ པཊྛཱཡ སབྦཔཡོགེསུ དུཀྐཊཾ. གནྟྭཱ ཏསྨིཾ ཝཱ ནིསིནྣེ ཨིཏྠཱི ནིསཱིདཏུ, ཏསྶཱ ཝཱ ནིསིནྣཱཡ སོ ནིསཱིདཏུ, ཨཔཙྪཱ ཨཔུརིམཾཡེཝ ཨུབྷོ ཝཱ ནིསཱིདནྟུ, ཨུབྷིནྣཾ ནིསཛྫཱཡ པཱཙིཏྟིཡཾ. སཙེ པན ཀཱཡསཾསགྒཾ ཝཱ མེཐུནཾ ཝཱ སམཱཔཛྫཏི, ཏེསཾ ཝསེན ཀཱརེཏབྦོ. ནིཔཛྫནེཔི ཨེསེཝ ནཡོ. ཝུཏྟཔྤཀཱརེ པུརིསེ ནིཔཛྫིཏྭཱ ཨནིདྡཱཡནྟེ ཨནནྡྷེ ཝིཉྙུཔུརིསེ ཨུཔཙཱརགཏེ སཏི, ཋིཏསྶ, ཨརཧོཔེཀྑསྶ, ཨཉྙཝིཧིཏསྶ ཙ ནིསཛྫནཔཙྩཡཱ ཨནཱཔཏྟི. ཨུམྨཏྟཀཱདཱིནཾ པན ཏཱིཧིཔི ཨཱཔཏྟཱིཧི ཨནཱཔཏྟི. སིཡཱ སཱིལཝིཔཏྟི, སིཡཱ ཨཱཙཱརཝིཔཏྟི. ཡཾ པན ¶ ཨཱཔཏྟིཾ པཊིཛཱནཱཏི, ཏསྶཱ ཝསེན ཨངྒབྷེདོ ཉཱཏབྦོ. སམུཊྛཱནཱདཱིནི པཋམཔཱརཱཛིཀསདིསཱནེཝཱཏི.

པཋམཱནིཡཏསིཀྑཱཔདཝཎྞནཱ ནིཊྛིཏཱ.

༢. དུཏིཡཱནིཡཏསིཀྑཱཔདཝཎྞནཱ

དུཏིཡེ ཨིཏྠཱིཔི པུརིསོཔི ཡོ ཀོཙི ཝིཉྙཱུ ཨནནྡྷོ ཨབདྷིརོ ཨནྟོདྭཱདསཧཏྠེ ཨོཀཱསེ ཋིཏོ ཝཱ ནིསིནྣོ ཝཱ ཝིཀྑིཏྟོཔི ནིདྡཱཡནྟོཔི ཨནཱཔཏྟིཾ ཀརོཏི. བདྷིརོ པན ཙཀྑུམཱཔི, ཨནྡྷོ ཝཱ ཨབདྷིརོཔི ན ཀརོཏི. པཱརཱཛིཀཱཔཏྟིཉྩ པརིཧཱཔེཏྭཱ དུཊྛུལླཝཱཙཱཔཏྟི ཝུཏྟཱཏི ཨཡཾ ཝིསེསོ. སེསཾ པུརིམནཡེནེཝ ཝེདིཏབྦཾ. སམུཊྛཱནཱདཱིནི པནེཏྠ ཨདིནྣཱདཱནསདིསཱནེཝཱཏི.

དུཏིཡཱནིཡཏསིཀྑཱཔདཝཎྞནཱ ནིཊྛིཏཱ.

ཨུདྡིཊྛཱ ཁོཏིཨཱདི སབྦཏྠ ཝུཏྟནཡེནེཝ ཝེདིཏབྦཾ.

ཀངྑཱཝིཏརཎིཡཱ པཱཏིམོཀྑཝཎྞནཱཡ

ཨནིཡཏཝཎྞནཱ ནིཊྛིཏཱ.

ནིསྶགྒིཡཀཎྜོ

ཨིཏོ པརཾ པན ཨིམེ ཁོ པནཱཏིཨཱདི སབྦཏྠ ཝུཏྟནཡེནེཝ ཝེདིཏབྦཾ.

༡. ཙཱིཝརཝགྒོ

༡. ཀཐིནསིཀྑཱཔདཝཎྞནཱ

ནིསྶགྒིཡེསུ ¶ ¶ པན ཙཱིཝརཝགྒསྶ ཏཱཝ པཋམསིཀྑཱཔདེ ནིཊྛིཏཙཱིཝརསྨིནྟི སཱུཙིཀམྨཔརིཡོསཱནེན ཝཱ, ‘‘ནཊྛཾ ཝཱ ཝིནཊྛཾ ཝཱ དཌྜྷཾ ཝཱ ཙཱིཝརཱསཱ ཝཱ ཨུཔཙྪིནྣཱ’’ཏི (པཱརཱ. ༤༦༣) ཨིམེསུ ཝཱ ཡེན ཀེནཙི ཨཱཀཱརེན ནིཊྛིཏེ ཙཱིཝརསྨིཾ, ཙཱིཝརསྶ ཀརཎཔལིབོདྷེ ཨུཔཙྪིནྣེཏི ཨཏྠོ. ཨཏྠཏཀཐིནསྶ ཧི བྷིཀྑུནོ ཡཱཝ ཨིམེཧཱཀཱརེཧི ཙཱིཝརཔལིབོདྷོ ན ཚིཛྫཏི, ཏཱཝ ཀཐིནཱནིསཾསཾ ལབྷཏི. ཨུབྦྷཏསྨིཾ ཀཐིནེཏི ཡཾ སངྒྷསྶ ཀཐིནཾ ཨཏྠཏཾ, ཏསྨིཉྩ ཨུབྦྷཏེ. ཏཏྲེཝཾ སངྑེཔཏོ ཀཐིནཏྠཱརོ ཙ ཨུབྦྷཱརོ ཙ ཝེདིཏབྦོ. ཨཡཉྷི ཀཐིནཏྠཱརོ ནཱམ བྷགཝཏཱ པུརིམཝསྶཾཝུཊྛཱནཾ ཨནུཉྙཱཏོ, སོ སབྦནྟིམེན པརིཙྪེདེན པཉྩནྣཾ ཛནཱནཾ ཝཊྚཏི, ཏསྨཱ ཡཏྠ ཙཏྟཱརོ ཝཱ ཏཡོ ཝཱ དྭེ ཝཱ ཨེཀོ ཝཱ པུརིམཝསྶཾ ཨུཔགཏོ, ཏཏྠ པཙྪིམཝསྶཱུཔགཏེ གཎཔཱུརཀེ ཀཏྭཱ ཨཏྠརིཏབྦཾ, ཏེ ཙ གཎཔཱུརཀཱཝ ཧོནྟི, ཨཱནིསཾསེ ན ལབྷནྟི, ཏསྨཱ སཙེ པུརིམཝསྶཾཝུཊྛཱནཾ གཧཊྛཔབྦཛིཏེསུ ཡོ ཀོཙི དྷམྨེན སམེན ཙཱིཝརཾ དེཏི ‘‘ཨིམིནཱ ཀཐིནཾ ཨཏྠརཐཱ’’ཏི (མཧཱཝ. ༣༠༦-༣༠༩), ཏཾ ཁནྡྷཀེ ཝུཏྟཱཡ ཉཏྟིདུཏིཡཀམྨཝཱཙཱཡ ཀཐིནཏྠཱརཱརཧསྶ བྷིཀྑུནོ དཱཏབྦཾ. ཏེན ཏདཧེཝ པཉྩ ཝཱ ཨཏིརེཀཱནི ཝཱ ཁཎྜཱནི ཚིནྡིཏྭཱ སངྒྷཱཊི ཝཱ ཨུཏྟརཱསངྒོ ཝཱ ཨནྟརཝཱསཀོ ཝཱ ཀཱཏབྦོ, སེསབྷིཀྑཱུཧིཔི ཏསྶ སཧཱཡེཧི བྷཝིཏབྦཾ, སཙེ ཀཏཙཱིཝརམེཝ ཨུཔྤཛྫཏི, སུནྡརམེཝ. ཨཙྪིནྣཱསིབྦིཏཾ པན ན ཝཊྚཏི. ཏེན བྷིཀྑུནཱ སཙེ སངྒྷཱཊིཡཱ ཨཏྠརིཏུཀཱམོ ཧོཏི, པོརཱཎིཀཾ ¶ སངྒྷཱཊིཾ པཙྩུདྡྷརིཏྭཱ ¶ ནཝཾ སངྒྷཱཊིཾ ཨདྷིཊྛཧིཏྭཱ ‘‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’’ཏི ཨཏྠརིཏབྦཾ. ཨུཏྟརཱསངྒཨནྟརཝཱསཀེསུཔི ཨེསེཝ ནཡོ. ཏཏོ ཏེན པུརིམཝསྶཾཝུཊྛེ ཨནྟོསཱིམཱགཏེ བྷིཀྑཱུ ཨུཔསངྐམིཏྭཱ ‘‘ཨཏྠཏཾ, བྷནྟེ, སངྒྷསྶ ཀཐིནཾ, དྷམྨིཀོ ཀཐིནཏྠཱརོ, ཨནུམོདཐཱ’’ཏི (པརི. ༤༡༣) ཝཏྟབྦཾ, ཐེརཱནཉྩ ནཝཱནཉྩ བཧཱུནཉྩ ཨེཀསྶ ཙ ཨནུརཱུཔཾ སལླཀྑེཏྭཱ ¶ ཝཏྟབྦཾ. ཏེཧིཔི ‘‘ཨཏྠཏཾ, བྷནྟེ, སངྒྷསྶ ཀཐིན’’ནྟི ཝཱ ‘‘ཨཏྠཏཾ, ཨཱཝུསོ, སངྒྷསྶ ཀཐིན’’ནྟི ཝཱ ཝཏྭཱ ‘‘དྷམྨིཀོ ཀཐིནཏྠཱརོ, ཨནུམོདཱམཱ’’ཏི ཝཱ ‘‘ཨནུམོདཱམཱི’’ཏི ཝཱ ཝཏྟབྦཾ. པུརིམཝསྶཾཝུཊྛེསུཔི ཡེ ཨནུམོདནྟི, ཏེསཾཡེཝ ཨཏྠཏཾ ཧོཏི ཀཐིནཾ. ཏེ ཏཏོ པཊྛཱཡ ཡཱཝ ཀཐིནསྶུབྦྷཱརཱ ཨནཱམནྟཙཱརོ, ཨསམཱདཱནཙཱརོ, ཡཱཝདཏྠཙཱིཝརཾ, གཎབྷོཛནཾ, ཡོ ཙ ཏཏྠ ཙཱིཝརུཔྤཱདོ, ཏསྨིཾ ཨཱཝཱསེ སངྒྷསྶ ཨུཔྤནྣཙཱིཝརཉྩཱཏི ཨིམེ པཉྩཱནིསཾསེ ལབྷནྟི, ཨཡཾ ཏཱཝ ཀཐིནཏྠཱརོ. ཏཾ པནེཏཾ ཀཐིནཾ ‘‘ཨཊྛིམཱ, བྷིཀྑཝེ, མཱཏིཀཱ ཀཐིནསྶུབྦྷཱརཱཡ པཀྐམནནྟིཀཱ ནིཊྛཱནནྟིཀཱ སནྣིཊྛཱནནྟིཀཱ ནཱསནནྟིཀཱ སཝནནྟིཀཱ ཨཱསཱཝཙྪེདིཀཱ སཱིམཱཏིཀྐམནནྟིཀཱ སཧུབྦྷཱརཱ’’ཏི (མཧཱཝ. ༣༡༠) ཨེཝཾ ཝུཏྟཱསུ ཨཊྛསུ མཱཏིཀཱསུ ཨཉྙཏརཝསེན ཨུདྡྷརཱིཡཏི, ཏཏྠ ཝིཏྠཱརཝིནིཙྪཡོ སམནྟཔཱསཱདིཀཱཡཾ (མཧཱཝ. ཨཊྛ. ༣༡༠) ཝུཏྟནཡེན ཝེདིཏབྦོ. ཨིཏི ‘‘ཨུབྦྷཏསྨིཾ ཀཐིནེ’’ཏིཨིམིནཱ སེསཔལིབོདྷཱབྷཱཝཾ དསྶེཏི.

དསཱཧཔརམནྟི དས ཨཧཱནི པརམོ པརིཙྪེདོ ཨསྶཱཏི དསཱཧཔརམོ, ཏཾ དསཱཧཔརམཾ ཀཱལཾ དྷཱརེཏབྦནྟི ཨཏྠོ. ཨདྷིཊྛིཏཝིཀཔྤིཏེསུ ཨཔརིཡཱཔནྣཏྟཱ ཨཏིརེཀཾ ཙཱིཝརནྟི ཨཏིརེཀཙཱིཝརཾ, ཙཱིཝརཾ ནཱམ ཁོམཾ ཀཔྤཱསིཀཾ ཀོསེཡྻཾ ཀམྦལཾ སཱཎཾ བྷངྒནྟི ཨེཏེསཾ ཝཱ ཏདནུལོམཱནཾ ཝཱ ཨཉྙཏརཾ ཨཡམསྶ ཛཱཏི, པམཱཎཏོ པན ཏཾ ཝིཀཔྤནུཔགཾ པཙྪིམཾ ཨིདྷ ཨདྷིཔྤེཏཾ. ཝུཏྟཉྷེཏཾ ‘‘ཨནུཛཱནཱམི, བྷིཀྑཝེ, ཨཱཡཱམཏོ ཨཊྛངྒུལཾ སུགཏངྒུལེན ཙཏུརངྒུལཝིཏྠཏཾ པཙྪིམཾ ཙཱིཝརཾ ཝིཀཔྤེཏུ’’ནྟི (མཧཱཝ. ༣༥༨). ཡཾ པན ཝུཏྟཾ ‘‘ཨདྷིཊྛིཏཝིཀཔྤིཏེསུ ཨཔརིཡཱཔནྣཏྟཱ’’ཏི, ཨེཏྠ ‘‘ཨནུཛཱནཱམི, བྷིཀྑཝེ, ཏིཙཱིཝརཾ ཨདྷིཊྛཱཏུཾ ན ཝིཀཔྤེཏུཾ, ཝསྶིཀསཱཊིཀཾ ཝསྶཱནཾ ཙཏུམཱསཾ ཨདྷིཊྛཱཏུཾ ཏཏོ པརཾ ཝིཀཔྤེཏུཾ, ནིསཱིདནཾ ཨདྷིཊྛཱཏུཾ ན ཝིཀཔྤེཏུཾ པཙྩཏྠརཎཾ ཨདྷིཊྛཱཏུཾ ན ཝིཀཔྤེཏུཾ, ཀཎྜུཔྤཊིཙྪཱདིཾ ཡཱཝ ཨཱབཱདྷཱ ཨདྷིཊྛཱཏུཾ ཏཏོ པརཾ ཝིཀཔྤེཏུཾ, མུཁཔུཉྪནཙོལ༹ཀཾ ཨདྷིཊྛཱཏུཾ ན ཝིཀཔྤེཏུཾ, པརིཀྑཱརཙོལ༹ཾ ཨདྷིཊྛཱཏུཾ ན ཝིཀཔྤེཏུ’’ནྟི (མཧཱཝ. ༣༥༨) ཨིམིནཱ ནཡེན ཨདྷིཊྛཱཏབྦཝིཀཔྤེཏབྦཏཱ ཛཱནིཏབྦཱ. ཏཏྠ ཏིཙཱིཝརཾ ཨདྷིཊྛཧནྟེན རཛིཏྭཱ ཀཔྤབིནྡུཾ དཏྭཱ པམཱཎཡུཏྟམེཝ ཨདྷིཊྛཱཏབྦཾ, ཏསྶ པམཱཎཾ ཨུཀྐཊྛཔརིཙྪེདེན སུགཏཙཱིཝརཏོ ཨཱུནཀཾ ཝཊྚཏི, ལཱམཀཔརིཙྪེདེན སངྒྷཱཊིཡཱ ¶ ཏཱཝ ཨུཏྟརཱསངྒསྶ ¶ ཙ དཱིགྷཏོ མུཊྛིཔཉྩཀཾ, ཏིརིཡཾ མུཊྛིཏྟིཀཾ, ཨནྟརཝཱསཀོ དཱིགྷཏོ མུཊྛིཔཉྩཀོ ¶ , ཏིརིཡཾ དྭིཧཏྠོཔི ཝཊྚཏི. ཝུཏྟཔྤམཱཎཏོ པན ཨཏིརེཀཉྩ ཨཱུནཀཉྩ ‘‘པརིཀྑཱརཙོལ༹’’ནྟི ཨདྷིཊྛཱཏབྦཾ. ཏཏྠ ཡསྨཱ ‘‘དྭེ ཙཱིཝརསྶ ཨདྷིཊྛཱནཱནི ཀཱཡེན ཝཱ ཨདྷིཊྛེཏི, ཝཱཙཱཡ ཝཱ ཨདྷིཊྛེཏཱི’’ཏི ཝུཏྟཾ, ཏསྨཱ པུརཱཎསངྒྷཱཊིཾ ‘‘ཨིམཾ སངྒྷཱཊིཾ པཙྩུདྡྷརཱམཱི’’ཏི པཙྩུདྡྷརིཏྭཱ ནཝཾ ཧཏྠེན གཧེཏྭཱ ‘‘ཨིམཾ སངྒྷཱཊིཾ ཨདྷིཊྛཱམཱི’’ཏི ཙིཏྟེན ཨཱབྷོགཾ ཀཏྭཱ ཀཱཡཝིཀཱརཾ ཀརོནྟེན ཀཱཡེན ཝཱ ཨདྷིཊྛཱཏབྦཱ, ཝཙཱིབྷེདཾ ཀཏྭཱ ཝཱཙཱཡ ཝཱ ཨདྷིཊྛཱཏབྦཱ. ཏཏྲ དུཝིདྷཾ ཨདྷིཊྛཱནཾ – སཙེ ཧཏྠཔཱསེ ཧོཏི, ‘‘ཨིམཾ སངྒྷཱཊིཾ ཨདྷིཊྛཱམཱི’’ཏི ཝཱཙཱ བྷིནྡིཏབྦཱ. ཨཐ ཨནྟོགབྦྷཱདཱིསུ སཱམནྟཝིཧཱརེ ཝཱ ཧོཏི, ཋཔིཏཊྛཱནཾ སལླཀྑེཏྭཱ ‘‘ཨེཏཾ སངྒྷཱཊིཾ ཨདྷིཊྛཱམཱི’’ཏི ཝཱཙཱ བྷིནྡིཏབྦཱ. ཨེས ནཡོ ཨུཏྟརཱསངྒེ ཙ ཨནྟརཝཱསཀེ ཙ. ནཱམམཏྟམེཝ ཧི ཝིསེསོ. ཏསྨཱ སབྦཱནི སངྒྷཱཊིཾ ཨུཏྟརཱསངྒཾ ཨནྟརཝཱསཀནྟི ཨེཝཾ ཨཏྟནོ ཨཏྟནོ ནཱམེནེཝ ཨདྷིཊྛཱཏབྦཱནི. སཙེ ཨདྷིཊྛཧིཏྭཱ ཋཔིཏཝཏྠེཧི སངྒྷཱཊིཨཱདཱིནི ཀརོཏི, ནིཊྛིཏེ རཛནེ ཙ ཀཔྤེ ཙ ‘‘ཨིམཾ པཙྩུདྡྷརཱམཱི’’ཏི པཙྩུདྡྷརིཏྭཱ པུན ཨདྷིཊྛཱཏབྦཱནི. ཨིདཉྩ པན ཏིཙཱིཝརཾ སུཁཔརིབྷོགཏྠཾ པརིཀྑཱརཙོལ༹ཾ ཨདྷིཊྛཱཏུམྤི ཝཊྚཏི.

ཝསྶིཀསཱཊིཀཱ ཨནཏིརིཏྟཔམཱཎཱ ནཱམཾ གཧེཏྭཱ ཝུཏྟནཡེནེཝ ཙཏྟཱརོ ཝསྶིཀེ མཱསེ ཨདྷིཊྛཱཏབྦཱ, ཏཏོ པརཾ པཙྩུདྡྷརིཏྭཱ ཝིཀཔྤེཏབྦཱ, ཝཎྞབྷེདམཏྟརཏྟཱཔི ཙེསཱ ཝཊྚཏི, དྭེ པན ན ཝཊྚནྟི. ནིསཱིདནཾ ཝུཏྟནཡེན ཨདྷིཊྛཱཏབྦམེཝ, ཏཉྩ ཁོ པམཱཎཡུཏྟཾ ཨེཀམེཝ, དྭེ ན ཝཊྚནྟི. པཙྩཏྠརཎམྤི ཨདྷིཊྛཱཏབྦམེཝ, ཏཾ པན མཧནྟམྤི ཨེཀམྤི བཧཱུནིཔི ཝཊྚནྟི, ནཱིལམྤི པཱིཏཀམྤི སདསམྤི པུཔྥདསམྤཱིཏི སབྦཔྤཀཱརམྤི ཝཊྚཏི. ཀཎྜུཔྤཊིཙྪཱདི ཡཱཝ ཨཱབཱདྷོ ཨཏྠི, ཏཱཝ པམཱཎིཀཱ ཨདྷིཊྛཱཏབྦཱ, ཨཱབཱདྷེ ཝཱུཔསནྟེ པཙྩུདྡྷརིཏྭཱ ཝིཀཔྤེཏབྦཱ, སཱ ཨེཀཱཝ ཝཊྚཏི. མུཁཔུཉྪནཙོལ༹ཾ ཨདྷིཊྛཱཏབྦམེཝ, ཏཾ པན ཨེཀམྤི བཧཱུནིཔི མཧནྟམྤི ཝཊྚཏིཡེཝ. པརིཀྑཱརཙོལེ༹ གཎནཱ ནཏྠི, ཡཏྟཀཾ ཨིཙྪཏི, ཏཏྟཀཾ ཨདྷིཊྛཱཏབྦམེཝ. ཐཝིཀཱཔི པརིསྶཱཝནམྤི ཝིཀཔྤནུཔགཾ པཙྪིམཔམཱཎཾ ‘‘པརིཀྑཱརཙོལ༹’’ནྟི ཨདྷིཊྛཱཏབྦམེཝ, བཧཱུནིཔི ཨེཀཏོ ཀཏྭཱ ‘‘ཨིམཱནི ཙཱིཝརཱནི པརིཀྑཱརཙོལཱ༹ནི ཨདྷིཊྛཱམཱི’’ཏིཨཱདིནཱ ནཡེན ཨདྷིཊྛཱཏུཾ ཝཊྚཏིཡེཝ. མཉྩབྷིསི པཱིཋབྷིསི བིབྦོཧནཾ ¶ པཱཝཱརོ ཀོཛཝོཏི ཨེཏེསུ པན སེནཱསནཔརིཀྑཱརཏྠཱཡ དིནྣཔཙྩཏྠརཎེ ཙ ཨདྷིཊྛཱནཀིཙྩཾ ནཏྠིཡེཝ. སབྦཉྩ པནེཏཾ ཝུཏྟཔྤཀཱརེན ཨདྷིཊྛིཏཙཱིཝརཾ ཨཉྙསྶ དཱནེན, ཨཙྪིནྡིཏྭཱ གཧཎེན, ཝིསྶཱསགྒཱཧེན, ཧཱིནཱཡཱཝཏྟནེན, སིཀྑཱཔཙྩཀྑཱནེན, ཀཱལངྐིརིཡཱཡ, ལིངྒཔརིཝཏྟནེན, པཙྩུདྡྷརཎེནཱཏི ཨིམེཧི ཨཊྛཧི ཀཱརཎེཧི ཨདྷིཊྛཱནཾ ཝིཛཧཏི. ཏིཙཱིཝརཾ པན ཀནིཊྛངྒུལིནཁཔིཊྛིཔྤམཱཎེན ཚིདྡེནཱཔི ཝིཛཧཏི, ཏཉྩ ¶ ཁོ ཝིནིབྦེདྷེནེཝ. སཙེ ཧི ཚིདྡསྶ ཨབྦྷནྟརེ ཨེཀཏནྟུཔི ཨཙྪིནྣོ ཧོཏི, རཀྑཏིཡེཝ. ཏཏྠ སངྒྷཱཊིཡཱ ཙ ཨུཏྟརཱསངྒསྶ ཙ དཱིགྷནྟཏོ ཝིདཏྠིཔྤམཱཎསྶ ཏིརིཡནྟཏོ ¶ ཨཊྛངྒུལཔྤམཱཎསྶ པདེསསྶ ཨོརཏོ ཚིདྡཾ ཨདྷིཊྛཱནཾ བྷིནྡཏི, ཨནྟརཝཱསཀེཔི དཱིགྷནྟཏོ ཨེཏདེཝ པམཱཎཾ, ཏིརིཡནྟེན པན ཙཏུརངྒུལཏཱ ཝེདིཏབྦཱ. ཏིཎྞནྣམྤི ཝུཏྟོཀཱསསྶ པརཏོ ན བྷིནྡཏི, ཏསྨཱ ཚིདྡེ ཛཱཏེ ཏིཙཱིཝརཾ ཨཏིརེཀཙཱིཝརཊྛཱནེ ཏིཊྛཏི, སཱུཙིཀམྨཾ ཀཏྭཱ པུན ཨདྷིཊྛཱཏབྦཾ. ཝསྶིཀསཱཊིཀཱ ཝསྶཱནམཱསཱཏིཀྐམེནཱཔི, ཀཎྜུཔྤཊིཙྪཱདི ཨཱབཱདྷཝཱུཔསམེནཱཔི ཨདྷིཊྛཱནཾ ཝིཛཧཏི. ཏསྨཱ སཱ ཏཏོ པརཾ ཝིཀཔྤེཏབྦཱ. ཝིཀཔྤནལཀྑཎཾ པན སབྦཙཱིཝརཱནཾ ཝིཀཔྤནསིཀྑཱཔདེཡེཝ ཝཎྞཡིསྶཱམ. ཀེཝལཉྷི ཨིམསྨིཾ ཨོཀཱསེ ཡཾ ཨེཝཾ ཨནདྷིཊྛིཏཾ ཨཝིཀཔྤིཏཉྩ, ཏཾ ‘‘ཨཏིརེཀཙཱིཝར’’ནྟི ཝེདིཏབྦཾ.

ཏཾ ཨཏིཀྐཱམཡཏོ ནིསྶགྒིཡཾ པཱཙིཏྟིཡནྟི ཏཾ ཡཐཱཝུཏྟཛཱཏིཔྤམཱཎཾ ཙཱིཝརཾདསཱཧཔརམཾ ཀཱལཾ ཨཏིཀྐཱམཡཏོ ཨེཏྠནྟརེ ཡཐཱ ཨཏིརེཀཙཱིཝརཾ ན ཧོཏི, ཏཐཱ ཨཀྲུབྦཏོ ནིསྶགྒིཡཾ པཱཙིཏྟིཡཾ, ཏཉྩ ཙཱིཝརཾ ནིསྶགྒིཡཾ ཧོཏི, པཱཙིཏྟིཡཾ ཨཱཔཏྟི ཙསྶ ཧོཏཱིཏི ཨཏྠོ. ཨཐ ཝཱ ནིསྶཛྫནཾ ནིསྶགྒིཡཾ, པུབྦབྷཱགེ ཀཏྟབྦསྶ ཝིནཡཀམྨསྶེཏཾ ནཱམཾ, ནིསྶགྒིཡམསྶ ཨཏྠཱིཏི ནིསྶགྒིཡམིཙྩེཝ. ཀིཾ ཏཾ? པཱཙིཏྟིཡཾ. ཏཾ ཨཏིཀྐཱམཡཏོ སཧ ནིསྶགྒིཡེན ནིསྶགྒིཡཝིནཡཀམྨཾ པཱཙིཏྟིཡཾ ཧོཏཱིཏི ཨཡམེཏྠ ཨཏྠོ. ཏཉྩ པནེཏཾ ཙཱིཝརཾ ཡཾ དིཝསཾ ཨུཔྤནྣཾ, ཏསྶ ཡོ ཨརུཎོ, སོ ཨུཔྤནྣདིཝསནིསྶིཏོ, ཏསྨཱ ཙཱིཝརུཔྤཱདདིཝསེན སདྡྷིཾ ཨེཀཱདསེ ཨརུཎུགྒམནེ དསཱཧཱཏིཀྐམིཏཾ ཧོཏི, ཏཾ གཧེཏྭཱ སངྒྷསྶ ཝཱ གཎསྶ ཝཱ པུགྒལསྶ ཝཱ ནིསྶཛྫིཏབྦཾ, ཏཏྲཱཡཾ ནཡོ – སངྒྷསྶ ཏཱཝ ཨེཝཾ ནིསྶཛྫིཏབྦཾ ‘‘ཨིདཾ མེ, བྷནྟེ, ཙཱིཝརཾ དསཧཱཏིཀྐནྟཾ ནིསྶགྒིཡཾ, ཨིམཱཧཾ སངྒྷསྶ ནིསྶཛྫཱམཱི’’ཏི ནིསྶཛྫིཏྭཱ ‘‘ཨཧཾ, བྷནྟེ, ཨེཀཾ ནིསྶགྒིཡཾ པཱཙིཏྟིཡཾ ཨཱཔནྣོ, ཏཾ ¶ པཊིདེསེམཱི’’ཏི ཨེཝཾ ཨཱཔཏྟི དེསེཏབྦཱ. སཙེ དྭེ ཧོནྟི, ‘‘དྭེ’’ཏི ཝཏྟབྦཾ, སཙེ ཏདུཏྟརི, ‘‘སམྦཧུལཱ’’ཏི ཝཏྟབྦཾ. ནིསྶཛྫནེཔི སཙེ དྭེ ཝཱ བཧཱུནི ཝཱ ཧོནྟི, ‘‘ཨིམཱནི མེ, བྷནྟེ, ཙཱིཝརཱནི དསཱཧཱཏིཀྐནྟཱནི ནིསྶགྒིཡཱནི, ཨིམཱནཱཧཾ སངྒྷསྶ ནིསྶཛྫཱམཱི’’ཏི ཝཏྟབྦཾ, པཱལི༹ཾ ཝཏྟུཾ ཨསཀྐོནྟེན ཨཉྙཐཱཔི ཝཏྟབྦཾ. བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ ‘‘སུཎཱཏུ མེ, བྷནྟེ, སངྒྷོ, ཨཡཾ ཨིཏྠནྣཱམོ བྷིཀྑུ ཨཱཔཏྟིཾ སརཏི ཝིཝརཏི ཨུཏྟཱནིཾ ཀརོཏི དེསེཏི, ཡདི སངྒྷསྶ པཏྟཀལླཾ, ཨཧཾ ཨིཏྠནྣཱམསྶ བྷིཀྑུནོ ཨཱཔཏྟིཾ པཊིགྒཎྷེཡྻ’’ནྟི (ཙཱུལ༹ཝ. ༢༣༩), ཨིམིནཱ ལཀྑཎེན ཨཱཔཏྟིཾ པཊིགྒཎྷིཏྭཱ ཝཏྟབྦོ ‘‘པསྶསཱི’’ཏི, ‘‘ཨཱམ པསྶཱམཱི’’ཏི, ‘‘ཨཱཡཏིཾ སཾཝརེཡྻཱསཱི’’ཏི, ‘‘སཱདྷུ སུཊྛུ སཾཝརིསྶཱམཱི’’ཏི. དྭཱིསུ པན སམྦཧུལཱསུ ཝཱ པུརིམནཡེནེཝ ཝཙནབྷེདོ ཀཱཏབྦོ. དེསིཏཱཡ ¶ ཨཱཔཏྟིཡཱ ‘‘སུཎཱཏུ མེ, བྷནྟེ, སངྒྷོ, ཨིདཾ ཙཱིཝརཾ ཨིཏྠནྣཱམསྶ བྷིཀྑུནོ ནིསྶགྒིཡཾ སངྒྷསྶ ནིསྶཊྛཾ, ཡདི སངྒྷསྶ པཏྟཀལླཾ ¶ , སངྒྷོ ཨིམཾ ཙཱིཝརཾ ཨིཏྠནྣཱམསྶ བྷིཀྑུནོ དདེཡྻཱ’’ཏི (པཱརཱ. ༤༦༤) ཨེཝཾ ནིསྶཊྛཙཱིཝརཾ དཱཏབྦཾ, དྭཱིསུ བཧཱུསུ ཝཱ ཝཙནབྷེདོ ཀཱཏབྦོ.

གཎསྶ པན ནིསྶཛྫནྟེན ‘‘ཨིམཱཧ’’ནྟི ཝཱ ‘‘ཨིམཱནི ཨཧ’’ནྟི ཝཱ ཝཏྭཱ ‘‘ཨཱཡསྨནྟཱནཾ ནིསྶཛྫཱམཱི’’ཏི ཝཏྟབྦཾ, ཨཱཔཏྟིཔྤཊིགྒཱཧཀེནཱཔི ‘‘སུཎནྟུ མེ ཨཱཡསྨནྟཱ, ཨཡཾ ཨིཏྠནྣཱམོ བྷིཀྑུ ཨཱཔཏྟིཾ སརཏི…པེ… དེསེཏི, ཡདཱཡསྨནྟཱནཾ པཏྟཀལླ’’ནྟི ཝཏྟབྦཾ, ཙཱིཝརདཱནེཔི ‘‘སུཎནྟུ མེ ཨཱཡསྨནྟཱ, ཨིདཾ ཙཱིཝརཾ ཨིཏྠནྣཱམསྶ བྷིཀྑུནོ ནིསྶགྒིཡཾ ཨཱཡསྨནྟཱནཾ ནིསྶཊྛཾ, ཡདཱཡསྨནྟཱནཾ པཏྟཀལླཾ, ཨཱཡསྨནྟཱ ཨིམཾ ཙཱིཝརཾ ཨིཏྠནྣཱམསྶ བྷིཀྑུནོ དདེཡྻུ’’ནྟི (པཱརཱ. ༤༦༦) ཝཏྟབྦཾ, སེསཾ པུརིམསདིསམེཝ. པུགྒལསྶ པན ནིསྶཛྫནྟེན ‘‘ཨིམཱཧ’’ནྟི ཝཱ ‘‘ཨིམཱནི ཨཧ’’ནྟི ཝཱ ཝཏྭཱ ‘‘ཨཱཡསྨཏོ ནིསྶཛྫཱམཱི’’ཏི ཝཏྟབྦཾ, ནིསྶཛྫིཏྭཱ ‘‘ཨཧཾ, བྷནྟེ, ཨེཀཾ ནིསྶགྒིཡཾ པཱཙིཏྟིཡཾ ཨཱཔནྣོ, ཏཾ པཊིདེསེམཱི’’ཏི ཨེཝཾ ཨཱཔཏྟི དེསེཏབྦཱ. སཙེ པན ནཝཀཏརོ ཧོཏི, ‘‘ཨཱཝུསོ’’ཏི ཝཏྟབྦཾ, ཏེནཱཔི ‘‘པསྶསཱི’’ཏི ཝཱ ‘‘པསྶཐཱ’’ཏི ཝཱ ཝུཏྟེ ‘‘ཨཱམ, བྷནྟེ’’ཏི ཝཱ ‘‘ཨཱམ ཨཱཝུསོ’’ཏི ཝཱ ཝཏྭཱ ‘‘པསྶཱམཱི’’ཏི ཝཏྟབྦཾ, ཏཏོ ‘‘ཨཱཡཏིཾ སཾཝརེཡྻཱསཱི’’ཏི ཝཱ ‘‘སཾཝརེཡྻཱཐཱ’’ཏི ཝཱ ཝུཏྟེ ‘‘སཱདྷུ སུཊྛུ སཾཝརིསྶཱམཱི’’ཏི ཝཏྟབྦཾ. ཨེཝཾ དེསིཏཱཡ ཨཱཔཏྟིཡཱ ‘‘ཨིམཾ ཙཱིཝརཾ ཨཱཡསྨཏོ དམྨཱི’’ཏི དཱཏབྦཾ, དྭཱིསུ ཏཱིསུ ¶ ཝཱ པུབྦེ ཝུཏྟཱནུསཱརེནེཝ ནཡོ ཝེདིཏབྦོ. དྭིནྣཾ པན ཡཐཱ གཎསྶ, ཨེཝཾ ནིསྶཛྫིཏབྦཾ, ཏཏོ ཨཱཔཏྟིཔྤཊིགྒཧཎཉྩ ནིསྶཊྛཙཱིཝརདཱནཉྩ ཏེསཾ ཨཉྙཏརེན ཡཐཱ ཨེཀེན པུགྒལེན, ཏཐཱ ཀཱཏབྦཾ, ཨིདཾ པན སབྦནིསྶགྒིཡེསུ ཝིདྷཱནཾ. ཙཱིཝརཾ པཏྟོ ནིསཱིདནནྟི ཝཏྠུམཏྟམེཝ ཧི ནཱནཾ, པརམྨུཁཾ པན ཝཏྠུ ‘‘ཨེཏ’’ནྟི ནིསྶཛྫིཏབྦཾ. སཙེ བཧཱུནི ཧོནྟི, ‘‘ཨེཏཱནཱི’’ཏི ཝཏྟབྦཾ. ནིསྶཊྛདཱནེཔི ཨེསེཝ ནཡོ. ནིསྶཊྛཝཏྠུཾ ‘‘དིནྣམིདཾ ཨིམིནཱ མཡ྄ཧ’’ནྟི སཉྙཱཡ ན པཊིདེནྟསྶ དུཀྐཊཾ, ཏསྶ སནྟཀབྷཱཝཾ ཉཏྭཱ ལེསེན ཨཙྪིནྡནྟོ སཱམིཀསྶ དྷུརནིཀྑེཔེན བྷཎྜཾ ཨགྒྷཱཔེཏྭཱ ཀཱརེཏབྦོཏི.

ཝེསཱལིཡཾ ཚབྦགྒིཡེ བྷིཀྑཱུ ཨཱརབྦྷ ཨཏིརེཀཙཱིཝརདྷཱརཎཝཏྠུསྨིཾ པཉྙཏྟཾ, ‘‘དསཱཧཔརམ’’ནྟི ཨཡམེཏྠ ཨནུཔཉྙཏྟི, སཱདྷཱརཎཔཉྙཏྟི, ཨནཱཎཏྟིཀཾ, ཨནིསྶཛྫིཏྭཱ པརིབྷུཉྫནྟསྶ དུཀྐཊཾ, ཡཐཱ ཙ ཨིདྷ, ཨེཝཾ སབྦཏྠ, ཏསྨཱ ནཾ པརཏོ ན ཝཀྑཱམ. དསཱཧཾ ཨནཏིཀྐནྟེཔི ཨཏིཀྐནྟསཉྙིནོ ཝེམཏིཀསྶ ཙ དུཀྐཊཾ. ཨཏིཀྐནྟེ ཨནཏིཀྐནྟསཉྙིནོཔི ཝེམཏིཀསྶཔི ནིསྶགྒིཡཾ པཱཙིཏྟིཡམེཝ, ཏཐཱ ཨནདྷིཊྛིཏཱཝིཀཔྤིཏཨཨསྶཛྫིཏཨནཊྛཱཝིནཊྛཨདཌྜྷཱཝིལུཏྟེསུ ཨདྷིཊྛིཏཱདིསཉྙིནོ. ཨནྟོདསཱཧཾ ཨདྷིཊྛིཏེ ཝིཀཔྤིཏེ ¶ ཝིསྶཛྫིཏེ ནཊྛེ ཝིནཊྛེ དཌྜྷེ ཨཙྪིནྣེ ཝིསྶཱསེན གཱཧིཏེ ཨུམྨཏྟཀཱདཱིནཉྩ ཨནཱཔཏྟི. ཨཱཙཱརཝིཔཏྟི, ཡཐཱ ཙ ཨིདཾ, ཨེཝཾ ཨིཏོ པརཱནིཔི, ཨུབྷཏོཔཱཏིམོཀྑེསུཔི ཧི པཱརཱཛིཀཱནི ཙ སངྒྷཱདིསེསཱ ཙ སཱིལཝིཔཏྟི, སེསཱཔཏྟིཡོ ཨཱཙཱརཝིཔཏྟི, ཨཱཛཱིཝཝིཔཏྟི ཝཱ དིཊྛིཝིཔཏྟི ཝཱ ཀཱཙི ཨཱཔཏྟི ནཱམ ནཏྠི. ཨཱཛཱིཝཝིཔཏྟིཔཙྩཡཱ ¶ པན ཋཔེཏྭཱ དུབྦྷཱསིཏཾ ཚ ཨཱཔཏྟིཀྑནྡྷཱ པཉྙཏྟཱ, དིཊྛིཝིཔཏྟིཔཙྩཡཱ པཱཙིཏྟིཡདུཀྐཊཝསེན དྭེ ཨཱཔཏྟིཀྑནྡྷཱ པཉྙཏྟཱཏི, ཨིདམེཏྠ ལཀྑཎཾ, ཨིཏི ཝིཔཏྟིཀཐཱ ཨིདྷེཝ ནིཊྛིཏཱཏི, ན ནཾ ཨིཏོ པརཾ ཝིཙཱརཡིསྶཱམ. ཛཱཏིཔྤམཱཎསམྤནྣསྶ ཙཱིཝརསྶ ཨཏྟནོ སནྟཀཏཱ, གཎནུཔགཏཱ, ཚིནྣཔལིབོདྷབྷཱཝོ, ཨཏིརེཀཙཱིཝརཏཱ, དསཱཧཱཏིཀྐམོཏི ཨིམཱནེཏྠ པཉྩ ཨངྒཱནི. ཀཐིནསམུཊྛཱནཾ, ཨཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

ཀཐིནསིཀྑཱཔདཝཎྞནཱ ནིཊྛིཏཱ.

༢. ཨུདོསིཏསིཀྑཱཔདཝཎྞནཱ

དུཏིཡེ ¶ ནིཊྛིཏཙཱིཝརསྨིཾ བྷིཀྑུནཱཏིཨེཏྠ པུརིམསིཀྑཱཔདེ ཝིཡ ཨཏྠཾ ཨགྒཧེཏྭཱ ནིཊྛིཏེ ཙཱིཝརསྨིཾ བྷིཀྑུནོཏི ཨེཝཾ སཱམིཝསེན ཀརཎཝཙནསྶ ཨཏྠོ ཝེདིཏབྦོ. ཀརཎཝསེན ཧི བྷིཀྑུནཱ ཨིདཾ ནཱམ ཀམྨཾ ཀཱཏབྦཾ, ཏཾ ནཏྠི, སཱམིཝསེན པན བྷིཀྑུནོ ཙཱིཝརསྨིཾ ནིཊྛིཏེ ཀཐིནེ ཙ ཨུབྦྷཏེ ཨེཝཾ ཨིམེཧི ཙཱིཝརནིཊྛཱནཀཐིནུབྦྷཱརེཧི ཚིནྣཔལིབོདྷོ ཨེཀརཏྟམྤི ཙེ བྷིཀྑུ ཏིཙཱིཝརེན ཝིཔྤཝསེཡྻཱཏི ཨེཝཾ ཨཏྠོ ཡུཛྫཏི. ཏཏྠ ཏིཙཱིཝརེནཱཏི ཏིཙཱིཝརཱདྷིཊྛཱནནཡེན ཨདྷིཊྛིཏེསུ སངྒྷཱཊིཨཱདཱིསུ ཡེནཀེནཙི. ཝིཔྤཝསེཡྻཱཏི ཝིཡུཏྟོ ཝསེཡྻ, ‘‘གཱམོ ཨེཀཱུཔཙཱརོ ནཱནཱུཔཙཱརོ’’ཏིཨཱདིནཱ (པཱརཱ. ༤༧༧) ནཡེན པཱལི༹ཡཾ ཝུཏྟཱནཾ གཱམནིགམནནིཝེསནཨུདོསིཏཨཊྚམཱལ༹པཱསཱདཧམྨིཡནཱཝཱསཏྠཁེཏྟདྷཉྙཀརཎཨཱརཱམཝིཧཱརརུཀྑམཱུལཨཛ྄ཛྷོཀཱསཔྤབྷེདཱནཾ པནྣརསཱནཾ ནིཀྑེཔཊྛཱནཱནཾ ཡཏྠཀཏྠཙི ནིཀྑིཔིཏྭཱ ཏེསཾ གཱམཱདཱིནཾ བཧི ཧཏྠཔཱསཱཏིཀྐམེན ཨརུཎཾ ཨུཊྛཱཔེཡྻཱཏི ཨཡམེཏྠ སངྑེཔོ, ཝིཏྠཱརོ པན སམནྟཔཱསཱདིཀཱཡཾ (པཱརཱ. ཨཊྛ. ༢.༤༧༣-༤༧༧-༨) ཝུཏྟོ. ཨཉྙཏྲ བྷིཀྑུསམྨུཏིཡཱཏི ཡཾ སངྒྷོ གིལཱནསྶ བྷིཀྑུནོ ཏིཙཱིཝརེན ཨཝིཔྤཝཱསསམྨུཏིཾ དེཏི, ཏཾ ཋཔེཏྭཱ ཨལདྡྷསམྨུཏིཀསྶ བྷིཀྑུནོ ཨེཀརཏྟམྤི ཝིཔྤཝཱསཏོ ཝུཏྟནཡེནེཝ ནིསྶགྒིཡཾ པཱཙིཏྟིཡནྟི ཝེདིཏབྦཾ, ཀེཝལཾ ཨིདྷ ‘‘ཨིདཾ མེ, བྷནྟེ, ཙཱིཝརཾ རཏྟིཝིཔྤཝུཏྠཾ ཨཉྙཏྲ བྷིཀྑུསམྨུཏིཡཱ ནིསྶགྒིཡ’’ནྟིཨཱདིནཱ ནཡེན ཝཙནབྷེདོ ཧོཏི, ཨཡཾ པན ཝིསེསོ.

སཱཝཏྠིཡཾ ¶ སམྦཧུལེ བྷིཀྑཱུ ཨཱརབྦྷ སནྟརུཏྟརེན ཛནཔདཙཱརིཀཾ པཀྐམནཝཏྠུསྨིཾ

པཉྙཏྟཾ, ‘‘ཨཉྙཏྲ བྷིཀྑུསམྨུཏིཡཱ’’ཏི ཨཡམེཏྠ ཨནུཔཉྙཏྟི, སཱདྷཱརཎཔཉྙཏྟི, ཨནཱཎཏྟིཀཾ, ཨཝིཔྤཝུཏྠེ ཝིཔྤཝུཏྠསཉྙིནོ ཙེཝ ཝེམཏིཀསྶ ཙ དུཀྐཊཾ. ཝིཔྤཝུཏྠེ ཝིཔྤཝུཏྠསཉྙིནོཔི ཨཝིཔྤཝུཏྠསཉྙིནོཔི ཝེམཏིཀསྶཱཔི ནིསྶགྒིཡཾ པཱཙིཏྟིཡཾ, ཏཐཱ ཨཔཙྩུདྡྷཊཨཝིསྶཛྫིཏཱདཱིསུ ཙ པཙྩུདྡྷཊཝིསྶཛྫིཏཱདིསཉྙིནོ. ཨནྟོཨརུཎེ པཙྩུདྡྷཊེ པན པཋམཀཐིནེ ཝུཏྟཝིསྶཛྫིཏཱདིབྷེདེ ཙ ཨནཱཔཏྟི, ཏཐཱ ལདྡྷསམྨུཏིཀསྶ ¶ ཝིཔྤཝཱསེ. ཨཱབཱདྷེ པན ཝཱུཔསནྟེ པཙྩཱགནྟབྦཾ, ཏཏྠེཝ ཝཱ ཋིཏེན པཙྩུདྡྷརིཏབྦཾ, ཨཐཱཔིསྶ པུན སོ ཝཱ ཨཉྙོ ཝཱ ཨཱབཱདྷོ ཀུཔྤཏི, ལདྡྷཀཔྤིཡམེཝ. ཨདྷིཊྛིཏཙཱིཝརཏཱ ¶ , ཨནཏྠཏཀཐིནཏཱ, ཨལདྡྷསམྨུཏིཀཏཱ, རཏྟིཝིཔྤཝཱསོཏི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི པཋམཀཐིནེ ཝུཏྟཔྤཀཱརཱནེཝ. ཀེཝལཉྷི ཏཏྠ ཨནདྷིཊྛཱནཾ ཨཝིཀཔྤནཉྩ ཨཀིརིཡཱ, ཨིདྷ ཨཔྤཙྩུདྡྷརཎཾ, ཨཡཾ ཝིསེསོཏི.

ཨུདོསིཏསིཀྑཱཔདཝཎྞནཱ ནིཊྛིཏཱ.

༣. ཨཀཱལཙཱིཝརསིཀྑཱཔདཝཎྞནཱ

ཏཏིཡེ ནིཊྛིཏཙཱིཝརསྨིཾ བྷིཀྑུནཱཏི སཱམིཝསེནེཝ ཀརཎཏྠོ ཝེདིཏབྦོ. ཨཀཱལཙཱིཝརཾ ནཱམ ཡྭཱཡཾ ‘‘ཨནཏྠཏེ ཀཐིནེ ཝསྶཱནསྶ པཙྪིམོ མཱསོ, ཨཏྠཏེ ཀཐིནེ པཉྩམཱསཱ’’ཏི (པཱརཱ. ༦༤༩) ཙཱིཝརཀཱལོ ཝུཏྟོ, ཏཾ ཋཔེཏྭཱ ཨཉྙདཱ ཨུཔྤནྣཾ, ཡཉྩ ཀཱལེཔི སངྒྷསྶ ཝཱ ‘‘ཨིདཾ ཨཀཱལཙཱིཝར’’ནྟི, པུགྒལསྶ ཝཱ ‘‘ཨིདཾ ཏུཡ྄ཧཾ དམྨཱི’’ཏིཨཱདིནཱ ནཡེན དིནྣཾ, ཨེཏཾ ཨཀཱལཙཱིཝརཾ ནཱམ. ཨུཔྤཛྫེཡྻཱཏི ཨེཝརཱུཔཾ ཙཱིཝརཾ ཨཏྟནོ བྷཱགཔཊིལཱབྷཝསེན སངྒྷཏོ ཝཱ སུཏྟནྟིཀཱདིགཎཏོ ཝཱ ཉཱཏིཏོ ཝཱ མིཏྟཏོ ཝཱ པཾསུཀཱུལཾ ཝཱ ཨཏྟནོ ཝཱ དྷནེན (པཱརཱ. ༥༠༠), ཨཐ ཝཱ པན ‘‘ཨཊྛིམཱ, བྷིཀྑཝེ, མཱཏིཀཱ ཙཱིཝརསྶ ཨུཔྤཱདཱཡ སཱིམཱཡ དེཏི, ཀཏིཀཱཡ དེཏི, བྷིཀྑཱཔཉྙཏྟིཀཱཡ དེཏི, སངྒྷསྶ དེཏི, ཨུབྷཏོསངྒྷསྶ དེཏི, ཝསྶཾཝུཊྛསངྒྷསྶ དེཏི, ཨཱདིསྶ དེཏི, པུགྒལསྶ དེཏཱི’’ཏི (མཧཱཝ. ༣༧༩) ཨིམཱསཾ ཨཊྛནྣཾ མཱཏིཀཱནཾ ཨཉྙཏརཏོ ཨུཔྤཛྫེཡྻ. ཨེཏྠ ཙ ‘‘སཱིམཱཡ དམྨཱི’’ཏི ཨེཝཾ སཱིམཾ པརཱམསིཏྭཱ དེནྟོ སཱིམཱཡ དེཏི ནཱམ, ཨེས ནཡོ སབྦཏྠ. ཨེཏྠ ཙ སཱིམཱཏི ཁཎྜསཱིམཱ ཨུཔཙཱརསཱིམཱ སམཱནསཾཝཱསསཱིམཱ ཨཝིཔྤཝཱསསཱིམཱ ལཱབྷསཱིམཱ གཱམསཱིམཱ ནིགམསཱིམཱ ནགརསཱིམཱ ཨབྦྷནྟརསཱིམཱ ཨུདཀུཀྑེཔསཱིམཱ ཛནཔདསཱིམཱ རཊྛསཱིམཱ རཛྫསཱིམཱ དཱིཔསཱིམཱ ཙཀྐཝཱལ༹སཱིམཱཏི པནྣརསཝིདྷཱ. ཏཏྠ ཨུཔཙཱརསཱིམཱ ནཱམ པརིཀྑིཏྟསྶ ཝིཧཱརསྶ པརིཀྑེཔེན, ཨཔརིཀྑིཏྟསྶ པརིཀྑེཔཱརཧཊྛཱནེན པརིཙྪིནྣཱ. ཨཔི ཙ བྷིཀྑཱུནཾ དྷུཝསནྣིཔཱཏཊྛཱནཏོ ཝཱ པརིཡནྟེ ¶ ཋིཏབྷོཛནསཱལཏོ ཝཱ ནིབདྡྷཝསནཀཨཱཝཱསཏོ ཝཱ ཐཱམམཛ྄ཛྷིམསྶ པུརིསསྶ དྭིནྣཾ ལེཌྜུཔཱཏཱནཾ ཨནྟོ ‘‘ཨུཔཙཱརསཱིམཱ’’ཏི ཝེདིཏབྦཱ. སཱ པན ཨཱཝཱསེ ཝཌྜྷནྟེ ཝཌྜྷཏི, ཧཱཡནྟེ ཧཱཡཏི ¶ , ཡོཛནསཏམྤི ཨུཔཙཱརསཱིམཱཝ ཧོཏི. ཏཏྠ དིནྣལཱབྷོ སབྦེསཾ ཨནྟོསཱིམགཏཱནཾ པཱཔུཎཱཏི, བྷིཀྑུནཱིནཾ ཨཱརཱམཔཝེསནསེནཱསནཱཔུཙྪནཱནི པརིཝཱསམཱནཏྟཱརོཙནཾ ཝསྶཙྪེདནིསྶཡསེནཱསནགྒཱཧཱདིཝིདྷཱནནྟི ཨིདམྤི སབྦཾ ཨིམིསྶཱཝ སཱིམཱཡ ཝསེན ཝེདིཏབྦཾ. ལཱབྷསཱིམཱཏི ཡཾ རཱཛརཱཛམཧཱམཏྟཱདཡོ ཝིཧཱརཾ ཀཱརཱཔེཏྭཱ གཱཝུཏཾ ཝཱ ཨདྡྷཡོཛནཾ ཝཱ ཡོཛནཾ ཝཱ སམནྟཱ པརིཙྪིནྡིཏྭཱ ‘‘ཨཡཾ ཨམྷཱཀཾ ཝིཧཱརསྶ ལཱབྷསཱིམཱ, ཡཾ ཨེཏྠནྟརེ ¶ ཨུཔྤཛྫཏི, ཏཾ སབྦཾ ཨམྷཱཀཾ ཝིཧཱརསྶ དེམཱ’’ཏི ཋཔེནྟི, ཨཡཾ ལཱབྷསཱིམཱ ནཱམ. ཀཱསིཀོསལཱདཱིནཾ པན རཊྛཱནཾ ཨནྟོ བཧཱུ ཛནཔདཱ ཧོནྟི, ཏཏྠ ཨེཀོ ཛནཔདཔརིཙྪེདོ ཛནཔདསཱིམཱ, ཀཱསིཀོསལཱདིརཊྛཔརིཙྪེདོ རཊྛསཱིམཱ, ཨེཀསྶ རཉྙོ ཨཱཎཱཔཝཏྟིཊྛཱནཾ རཛྫསཱིམཱ, སམུདྡནྟེན པརིཙྪིནྣོ མཧཱདཱིཔོ ཝཱ ཨནྟརདཱིཔོ ཝཱ དཱིཔསཱིམཱ, ཨེཀཙཀྐཝཱལ༹པབྦཏཔརིཀྑེཔབྦྷནྟརཾ ཙཀྐཝཱལ༹སཱིམཱ, སེསཱ ནིདཱནཀཐཱཡཾ ཝུཏྟནཡཱ ཨེཝ. ཏཏྠ ‘‘ཁཎྜསཱིམཱཡ དེམཱ’’ཏི དིནྣཾ ཁཎྜསཱིམཊྛཱནཾཡེཝ པཱཔུཎཱཏི, ཏཏོ བཧིསཱིམཱཡ སཱིམནྟརིཀཊྛཱནམྤི ན པཱཔུཎཱཏི. ‘‘ཨུཔཙཱརསཱིམཱཡ དེམཱ’’ཏི དིནྣཾ པན ཨནྟོཔརིཙྪེདེ ཁཎྜསཱིམཱསཱིམནྟརིཀཱསུ ཋིཏཱནམྤི པཱཔུཎཱཏི, སམཱནསཾཝཱསསཱིམཱཡ དིནྣཾ ཁཎྜསཱིམཱསཱིམནྟརིཀཊྛཱནཾ ན པཱཔུཎཱཏི, ཨཝིཔྤཝཱསསཱིམཱལཱབྷསཱིམཱསུ དིནྣཾ ཏཱསཾ ཨནྟོགདྷཱནཾཡེཝ པཱཔུཎཱཏི, གཱམསཱིམཱདཱིསུ དིནྣཾ ཏཱསཾ སཱིམཱནཾ ཨབྦྷནྟརེ བདྡྷསཱིམཊྛཱནམྤི པཱཔུཎཱཏི, ཨབྦྷནྟརསཱིམཱཨུདཀུཀྑེཔསཱིམཱསུ དིནྣཾ ཏཏྠ ཨནྟོགདྷཱནཾཡེཝ པཱཔུཎཱཏི, ཛནཔདསཱིམཱདཱིསུ དིནྣམྤི ཏཱསཾ ཨབྦྷནྟརེ བདྡྷསཱིམཊྛཱནམྤི པཱཔུཎཱཏི, ཏསྨཱ ཡཾ ཛམྦུདཱིཔེ ཋཏྭཱ ‘‘ཏམྦཔཎྞིདཱིཔེ སངྒྷསྶ དེམཱ’’ཏི དཱིཡཏི, ཏཾ ཏམྦཔཎྞིདཱིཔཏོ ཨེཀོཔི གནྟྭཱ སབྦེསཾ སངྒཎྷིཏུཾ ལབྷཏི. སཙེཔི ཏཏྠེཝ ཨེཀོ སབྷཱགོ བྷིཀྑུ སབྷཱགཱནཾ བྷཱགཾ གཎྷཱཏི, ན ཝཱརེཏབྦོ. ཡོ པན ཝིཧཱརཾ པཝིསིཏྭཱ ‘‘ཨསུཀསཱིམཱཡཱ’’ཏི ཨཝཏྭཱཝ ཀེཝལཾ ‘‘སཱིམཱཡ དམྨཱི’’ཏི ཝདཏི, སོ པུཙྪིཏབྦོ ‘‘སཱིམཱ ནཱམ བཧུཝིདྷཱ, ཀཏརཾ སནྡྷཱཡ ཝདསཱི’’ཏི, སཙེ ཝདཏི ‘‘ཨཧམེཏཾ བྷེདཾ ན ཛཱནཱམི, སཱིམཊྛཀསངྒྷོ གཎྷཏཱུ’’ཏི, ཨུཔཙཱརསཱིམཊྛེཧི བྷཱཛེཏབྦཾ.

ཀཏིཀཱཡཱཏིཨེཏྠ ཀཏིཀཱ ནཱམ སམཱནལཱབྷཀཏིཀཱ. སཱ པན ཨེཝཾ ཀཱཏབྦཱ, ཨེཀསྨིཾ ཝིཧཱརེ སནྣིཔཏིཏེཧི བྷིཀྑཱུཧི ཡཾ ཝིཧཱརཾ སངྒཎྷིཏུཀཱམཱ སམཱནལཱབྷཾ ཀཱཏུཾ ཨིཙྪནྟི, ཏསྶ ནཱམཾ གཧེཏྭཱ ‘‘ཨསུཀོ ནཱམ ཝིཧཱརོ པོརཱཎཀོ ཨཔྤལཱབྷོ’’ཏི ཡཾ ¶ ཀིཉྩི ཀཱརཎཾ ཝཏྭཱ ‘‘ཏཾ ཝིཧཱརཾ ཨིམིནཱ ཝིཧཱརེན སདྡྷིཾ ཨེཀལཱབྷཾ ཀཱཏུཾ སངྒྷསྶ རུཙྩཏཱི’’ཏི ཏིཀྑཏྟུཾ སཱཝེཏབྦཾ, ཨེཏྟཱཝཏཱ ཏསྨིཾ ཝིཧཱརེ ནིསིནྣོཔི ཨིདྷ ནིསིནྣོཝ ཧོཏི, ཏསྨིཾ ཝིཧཱརེཔི ཨེཝམེཝ ¶ ཀཱཏབྦཾ, ཨེཏྟཱཝཏཱ ཨིདྷ ནིསིནྣོཔི ཏསྨིཾ ནིསིནྣོཝ ཧོཏི. ཨེཀསྨིཾ ཝིཧཱརེ ལཱབྷེ བྷཱཛིཡམཱནེ ཨིཏརསྨིཾ ཋིཏསྶ བྷཱགཾ གཧེཏུཾ ཝཊྚཏི.

བྷིཀྑཱཔཉྙཏྟིཡཱཏི ཨེཏྠ བྷིཀྑཱཔཉྙཏྟི ནཱམ དཱཡཀསྶ པརིཙྩཱགཔཉྙཏྟིཊྛཱནཾ, ཏསྨཱ ‘‘ཡཏྠ མཡ྄ཧཾ དྷུཝཀཱརཱ ཀརཱིཡནྟི, ཏཏྠ དམྨཱི’’ཏི ཝཱ ‘‘ཏཏྠ དེཐཱ’’ཏི ཝཱ ཝུཏྟེ ཡཏྠ ཏསྶ པཱཀཝཏྟཾ ཝཱ ཝཏྟཏི, ཡཏོ ཝཱ བྷིཀྑཱུ ནིཙྩཾ བྷོཛེཏི, ཡཏྠ ཝཱ ཏེན ཀིཉྩི སེནཱསནཾ ཀཏཾ, སབྦཏྠ དིནྣམེཝ ཧོཏི. སཙེ པན ཨེཀསྨིཾ ¶ དྷུཝཀཱརཊྛཱནེ ཐོཀཏརཱ བྷིཀྑཱུ ཧོནྟི, ཨེཀམེཝ ཝཱ ཝཏྠཾ ཧོཏི, མཱཏིཀཾ ཨཱརོཔེཏྭཱ ཡཐཱ སོ ཝདཏི, ཏཐཱ གཧེཏབྦཾ.

སངྒྷསྶ དེཏཱིཏི ཨེཏྠ ཝིཧཱརཾ པཝིསིཏྭཱ ‘‘སངྒྷསྶ དམྨཱི’’ཏི དིནྣཾ ཨུཔཙཱརསཱིམཱགཏཱནཉྩ ཏཏོ བཧིདྡྷཱཔི ཏེཧི སདྡྷིཾ ཨེཀཱབདྡྷཱནཉྩ པཱཔུཎཱཏི, ཏསྨཱ ཏེསཾ གཱཧཀེ སཏི ཨསམྤཏྟཱནམྤི བྷཱགོ དཱཏབྦོ. ཡཾ པན བཧི ཨུཔཙཱརསཱིམཱཡ བྷིཀྑཱུ དིསྭཱ ‘‘སངྒྷསྶཱ’’ཏི དཱིཡཏི, ཏཾ ཨེཀཱབདྡྷཔརིསཱཡ པཱཔུཎཱཏི. ཡེ པན དྭཱདསཧི ཧཏྠེཧི པརིསཾ ཨསམྤཏྟཱ, ཏེསཾ ན པཱཔུཎཱཏི.

ཨུབྷཏོསངྒྷསྶཱཏི ཨེཏྠ པན ཡཾ ཨུབྷཏོསངྒྷསྶ དིནྣཾ, ཏཏོ ཨུཔཌྜྷཾ བྷིཀྑཱུནཾ, ཨུཔཌྜྷཾ བྷིཀྑུནཱིནཾ དཱཏབྦཾ. སཙེཔི ཨེཀོ བྷིཀྑུ ཧོཏི, ཨེཀཱ ཝཱ བྷིཀྑུནཱི, ཨནྟམསོ ཨནུཔསམྤནྣསྶཱཔི ཨུཔཌྜྷམེཝ དཱཏབྦཾ. ‘‘ཨུབྷཏོསངྒྷསྶ ཙ ཏུཡ྄ཧཉྩཱ’’ཏི ཝུཏྟེ པན སཙེ དས བྷིཀྑཱུ ཙ དས བྷིཀྑུནིཡོ ཙ ཧོནྟི, ཨེཀཝཱིསཏི པཊིཝཱིསེ ཀཏྭཱ ཨེཀོ པུགྒལསྶ དཱཏབྦོ, དས བྷིཀྑུསངྒྷསྶ, དས བྷིཀྑུནིསངྒྷསྶ ཙ, ཡེན པུགྒལིཀོ ལདྡྷོ, སོ སངྒྷཏོཔི ཨཏྟནོ ཝསྶགྒེན གཧེཏུཾ ལབྷཏི, ཀསྨཱ? ཨུབྷཏོསངྒྷགྒཧཎེན གཧིཏཏྟཱ, ‘‘ཨུབྷཏོསངྒྷསྶ ཙ ཙེཏིཡསྶ ཙཱ’’ཏི ཝུཏྟེཔི ཨེསེཝ ནཡོ. ཨིདྷ པན ཙེཏིཡསྶ སངྒྷཏོ པཱཔུཎཀོཊྛཱསོ ནཱམ ནཏྠི, ཨེཀཔུགྒལསྶ པཏྟཀོཊྛཱསསམོ ཨེཀོ ཀོཊྛཱསོ ཧོཏི. ‘‘བྷིཀྑུསངྒྷསྶ ཙ བྷིཀྑུནཱིནཉྩཱ’’ཏི ཝུཏྟེ པན ན མཛ྄ཛྷེ བྷིནྡིཏྭཱ དཱཏབྦཾ, བྷིཀྑཱུ ཙ བྷིཀྑུནིཡོ ཙ གཎེཏྭཱ དཱཏབྦཾ. ‘‘བྷིཀྑུསངྒྷསྶ ཙ བྷིཀྑུནཱིནཉྩ ཏུཡ྄ཧཉྩཱ’’ཏི ཝུཏྟེ པུགྒལོ ཝིསུཾ ན ལབྷཏི, པཱཔུཎཀོཊྛཱསཏོ ཨེཀམེཝ ལབྷཏི ¶ . ‘‘ཙེཏིཡསྶ ཙཱ’’ཏི ཝུཏྟེ པན ཙེཏིཡསྶ ཨེཀོ པུགྒལཔཊིཝཱིསོ ལབྦྷཏི. ‘‘བྷིཀྑཱུནཉྩ བྷིཀྑུནཱིནཉྩཱ’’ཏི ཝུཏྟེཔི ན མཛ྄ཛྷེ བྷིནྡིཏྭཱ དཱཏབྦཾ, པུགྒལགཎནཱཡ ཨེཝ ཝིབྷཛིཏབྦཾ, ཏེཧི སདྡྷིཾ པུགྒལཙེཏིཡཔརཱམསནཾ ཨནནྟརནཡསདིསམེཝ, ཡཐཱ ཙ བྷིཀྑུསངྒྷཾ ཨཱདིཾ ཀཏྭཱ ནཡོ ནཱིཏོ, ཨེཝཾ བྷིཀྑུནིསངྒྷཾ ཨཱདིཾ ཀཏྭཱཔི ནེཏབྦོ. ‘‘བྷིཀྑུསངྒྷསྶ ཙ ཏུཡ྄ཧཉྩཱ’’ཏི ཝུཏྟེཔི པུགྒལསྶ ཝིསུཾ ན ལབྦྷཏི ¶ , ཙེཏིཡསྶ པན ལབྦྷཏི. ‘‘བྷིཀྑཱུནཉྩ ཏུཡ྄ཧཉྩཱ’’ཏི ཝུཏྟེཔི ཝིསུཾ ན ལབྦྷཏི, ཙེཏིཡསྶ པན ལབྦྷཏིཡེཝ.

ཝསྶཾཝུཊྛསངྒྷསྶཱཏི ཨེཏྠ སཙེ ཝིཧཱརཾ པཝིསིཏྭཱ ‘‘ཝསྶཾཝུཊྛསངྒྷསྶ དམྨཱི’’ཏི ཝདཏི, ཡེ ཏཏྠ ཝསྶཙྪེདཾ ཨཀཏྭཱ པུརིམཝསྶཾཝུཊྛཱ, ཏེསཾ བཧི སཱིམཊྛཱནམྤི པཱཔུཎཱཏི, ན ཨཉྙེསཾ. སཙེ པན བཧིཨུཔཙཱརསཱིམཱཡཾ ཋིཏོ ‘‘ཝསྶཾཝུཊྛསངྒྷསྶཱ’’ཏི ཝདཏི, ཡཏྠཀཏྠཙི ཝུཊྛཝསྶཱནཾ སབྦེསཾ སམྤཏྟཱནཾ པཱཔུཎཱཏི. ཨཐ ‘‘ཨསུཀཝིཧཱརེ ཝསྶཾཝུཊྛསྶཱ’’ཏི ཝདཏི, ཏཏྠ ཝསྶཾཝུཊྛཱནཾཡེཝ ཡཱཝ ཀཐིནསྶུབྦྷཱརཱ པཱཔུཎཱཏི. གིམྷཱནཾ པཋམདིཝསཏོ པཊྛཱཡ ཨེཝཾ ཝདཏི, ཏཏྲ སམྨུཁཱིབྷཱུཏཱནཾ སབྦེསཾ པཱཔུཎཱཏི, ན ཨཉྙེསཾ.

ཨཱདིསྶ དེཏཱིཏི ཨཱདིསིཏྭཱ པརིཙྪིནྡིཏྭཱ དེཏི, ཀཐཾ? བྷིཀྑཱུ ཨཛྫཏནཱཡ ¶ ཝཱ སྭཱཏནཱཡ ཝཱ ཡཱགུཡཱ ནིམནྟེཏྭཱ ཏེ གྷརེ ཡཱགུཾ པཱཡེཏྭཱ ‘‘ཨིམཱནི ཙཱིཝརཱནི ཡེཧི མཡ྄ཧཾ ཡཱགུ པཱིཏཱ, ཏེསཾ དམྨཱི’’ཏི ཝདཏི, ཡེཧི ནིམནྟིཏེཧི ཡཱགུ པཱིཏཱ, ཏེསཾཡེཝ པཱཔུཎཱཏི, བྷཏྟཁཛྫཀཱདཱིཧི ནིམནྟིཏེསུཔི ཨེསེཝ ནཡོ.

པུགྒལསྶ དེཏཱིཏི ‘‘ཨིདཾ ཙཱིཝརཾ ཨིཏྠནྣཱམསྶ དམྨཱི’’ཏི ཨེཝཾ པརམྨུཁཱ ཝཱ, པཱདམཱུལེ ཋཔེཏྭཱ ‘‘ཨིདཾ ཏུམྷཱཀ’’ནྟི ཨེཝཾ སམྨུཁཱ ཝཱ དེཏཱིཏི ཨཡམེཏྠ སངྑེཔཀཐཱ, ཝིཏྠཱརོ པན སམནྟཔཱསཱདིཀཱཡཾ ཝུཏྟོ. ཨིཏི ཨིམཱསཾ ཨཊྛནྣཾ མཱཏིཀཱཔདཱནཾ ཝསེན ཡཾ ཨཀཱལཙཱིཝརལཀྑཎེན པཊིལདྡྷཾ, ཏཾ སནྡྷཱཡ ‘‘ཨཀཱལཙཱིཝརཾ ཨུཔྤཛྫེཡྻཱ’’ཏི ཝུཏྟཾ.

ཨཱཀངྑམཱནེནཱཏི ཨིཙྪམཱནེན. ཁིཔྤམེཝ ཀཱརེཏབྦནྟི སཱིགྷཾ ཨནྟོདསཱཧེཡེཝ ཀཱརེཏབྦཾ. ནོ ཙསྶ པཱརིཔཱུརཱིཏི ནོ ཙེ པཱརིཔཱུརཱི བྷཝེཡྻ, ཡཏྟཀེན ཀརིཡམཱནཾ ཨདྷིཊྛཱནཙཱིཝརཾ པཧོཏི, ཏཾ ཙཱིཝརཾ ཏཏྟཀཾ ན བྷཝེཡྻ, ཨཱུནཀཾ བྷཝེཡྻཱཏི ཨཏྠོ. སཏིཡཱ པཙྩཱསཱཡཱཏི ‘‘ཨསུཀདིཝསཾ ནཱམ སངྒྷོ ཙཱིཝརཱནི ལབྷིསྶཏི, ཏཏོ མེ ཙཱིཝརཾ ཨུཔྤཛྫིསྶཏཱི’’ཏིཨིམིནཱ ¶ ནཡེན སངྒྷགཎཉཱཏིམིཏྟེསུ ཝཱ ཨཉྙཏརཊྛཱནཏོ, ‘‘པཾསུཀཱུལཾ ཝཱ ལཙྪཱམཱི’’ཏི, ‘‘ཨིམིནཱ ཝཱ ཀཔྤིཡབྷཎྜེན ཙཱིཝརཾ གཎྷིསྶཱམཱི’’ཏི ཨེཝཾ ཝིཛྫམཱནཱཡ ཙཱིཝརཱསཱཡ. ཏཏོ ཙེ ཨུཏྟརཱིཏི མཱསཔརམཏོ ཙེ ཨུཏྟརི ནིཀྑིཔེཡྻ, ནིསྶགྒིཡནྟི ཨཏྠོ. ཡདི པནསྶ མཱུལཙཱིཝརཾ སཎྷཾ ཧོཏི, པཙྩཱསཱཙཱིཝརཾ ཐཱུལཾ ཧོཏི, ན སཀྐཱ ཡོཛེཏུཾ, རཏྟིཡོ ཙ སེསཱ ཧོནྟི, ན ཏཱཝ མཱསོ པཱུརཏི, ན ཨཀཱམཱ ཙཱིཝརཾ ཀཱརེཏབྦཾ, ཨཉྙཾ པཙྩཱསཱཙཱིཝརཾ ལབྷིཏྭཱ ཨེཝ ཀཱལབྦྷནྟརེ ཀཱརེཏབྦཾ. སཙེ ན ལབྷཏི, པཙྩཱསཱཙཱིཝརམྤི པརིཀྑཱརཙོལ༹ཾ ཨདྷིཊྛཱཏབྦཾ. ཨཐ མཱུལཙཱིཝརཾ ¶ ཐཱུལཾ ཧོཏི, པཙྩཱསཱཙཱིཝརཾ སཎྷཾ, མཱུལཙཱིཝརཾ པརིཀྑཱརཙོལ༹ཾ ཨདྷིཊྛཧིཏྭཱ པཙྩཱསཱཙཱིཝརམེཝ མཱུལཙཱིཝརཾ ཀཏྭཱ ཋཔེཏབྦཾ, ཏཾ པུན མཱསཔརིཧཱརཾ ལབྷཏི, ཨེཏེནུཔཱཡེན ཡཱཝ ན ལཙྪཏི, ཏཱཝ ཨཉྙཾ མཱུལཙཱིཝརཾ ཀཏྭཱ ཋཔེཏུཾ ལབྦྷཏི. ཨིམསྶ ‘‘ཨིདཾ མེ, བྷནྟེ, ཨཀཱལཙཱིཝརཾ མཱསཱཏིཀྐནྟཾ ནིསྶགྒིཡ’’ནྟི (པཱརཱ. ༥༠༠) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ.

སཱཝཏྠིཡཾ སམྦཧུལེ བྷིཀྑཱུ ཨཱརབྦྷ ཨཀཱལཙཱིཝརཾ པཊིགྒཧེཏྭཱ མཱསཾ ཨཏིཀྐམནཝཏྠུསྨིཾ

པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཨིཏོ པརཾ སབྦཾ པཋམཀཐིནེ ཝུཏྟསདིསམེཝ. ཀེཝལཉྷི ཏཏྠ དསཱཧཱཏིཀྐམོ, ཨིདྷ མཱསཱཏིཀྐམོཏི ཨཡཾ ཝིསེསོ. སེསཾ ཏཱདིསམེཝཱཏི.

ཨཀཱལཙཱིཝརསིཀྑཱཔདཝཎྞནཱ ནིཊྛིཏཱ.

༤. པུརཱཎཙཱིཝརསིཀྑཱཔདཝཎྞནཱ

ཙཏུཏྠེ ཨཉྙཱཏིཀཱཡཱཏི ན ཉཱཏིཀཱཡ, མཱཏིཏོ ཝཱ པིཏིཏོ ཝཱ ཡཱཝ སཏྟམཾ ཡུགཾ, ཏཱཝ ཀེནཙི ཨཱཀཱརེན ཨསམྦདྡྷཱཡཱཏི ཨཏྠོ. བྷིཀྑུནིཡཱཏི ¶ སཱཀིཡཱནིཡོ ཝིཡ སུདྡྷབྷིཀྑུསངྒྷེ ཝཱ ཨུབྷཏོསངྒྷེ ཝཱ ཨུཔསམྤནྣཱཡ. པུརཱཎཙཱིཝརནྟི རཛིཏྭཱ ཀཔྤཾ ཀཏྭཱ ཨེཀཝཱརམྤི ནིཝཏྠཾ ཝཱ པཱརུཏཾ ཝཱ, ཡཾ ཨནྟམསོ པརིབྷོགསཱིསེན ཨཾསེ ཝཱ མཏྠཀེ ཝཱ ཀཏྭཱ མགྒཾ གཏོ ཧོཏི, ཨུསྶཱིསཀཾ ཝཱ ཀཏྭཱ ནིཔནྣོ, ཨེཏམྤི པུརཱཎཙཱིཝརམེཝ. དྷོཝཱཔེཡྻ ཝཱཏི སཙེ ‘‘དྷོཝཱ’’ཏིཝཱཙཱཡ ཝདཏི, ཀཱཡཝིཀཱརཾ ཝཱ ཀརོཏི, ཧཏྠེན ཝཱ ཧཏྠེ དེཏི, པཱདམཱུལེ ཝཱ ཋཔེཏི, ཨནྟོདྭཱདསཧཏྠེ ཨོཀཱསེ ཋཏྭཱ ཨུཔརི ཝཱ ཁིཔཏི, ཨཉྙསྶ ཝཱ ¶ ཧཏྠེ པེསེཏི, ཏཱཡ དྷོཏཾ, དྷོཝཱཔིཏམེཝ ཧོཏི, རཛཱཔནཱཀོཊཱཔནེསུཔི ཨེསེཝ ནཡོ. སིཀྑམཱནཱཡ ཝཱ སཱམཎེརིཡཱ ཝཱ ཨུཔཱསིཀཱཡ ཝཱ ཧཏྠེ དྷོཝནཏྠཱཡ དེཏི, སཱ སཙེ ཨུཔསམྤཛྫིཏྭཱ དྷོཝཏི, ཨེཝམྤི ནིསྶགྒིཡཾ པཱཙིཏྟིཡཾ. ཨུཔཱསཀསྶ ཝཱ སཱམཎེརསྶ ཝཱ ཧཏྠེ དིནྣཾ ཧོཏི, སོ ཙེ ལིངྒེ པརིཝཏྟེ ཨུཔསམྤཛྫིཏྭཱ དྷོཝཏི, དཧརསྶ བྷིཀྑུསྶ ཝཱ དིནྣཾ ཧོཏི, སོཔི ལིངྒེ པརིཝཏྟེ དྷོཝཏི, ནིསྶགྒིཡཾ པཱཙིཏྟིཡམེཝ, རཛཱཔནཱཀོཊཱཔནེསུཔི ཨེསེཝ ནཡོ. ‘‘ཨིདཾ མེ, བྷནྟེ, པུརཱཎཙཱིཝརཾ ཨཉྙཱཏིཀཱཡ བྷིཀྑུནིཡཱ དྷོཝཱཔིཏཾ ནིསྶགྒིཡ’’ནྟི (པཱརཱ. ༥༠༥) ཨིམིནཱ པནེཏྠ ནཡེན ནིསྶཛྫནཝིདྷཱནཾ ཝེདིཏབྦཾ.

སཱཝཏྠིཡཾ ཨུདཱཡིཏྠེརཾ ཨཱརབྦྷ པུརཱཎཙཱིཝརདྷོཝཱཔནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, སཱཎཏྟིཀཾ ¶ ‘‘དྷོཝཱ’’ཏིཨཱདིཀཱཡ ཨཱཎཏྟིཡཱ, ཨེཝཾ ཨཱཎཏྟཱཡ ཙ བྷིཀྑུནིཡཱ ཨུདྡྷནསཛྫནཱདཱིསུ སབྦཔྤཡོགེསུ བྷིཀྑུནོ དུཀྐཊཾ. དྷོཝིཏྭཱ ཨུཀྑིཏྟམཏྟཾ པན རཏྟམཏྟཾ ཨཱཀོཊིཏམཏྟཉྩ ནིསྶགྒིཡཾ ཧོཏི, དྷོཝནཱདཱིནི ཏཱིཎིཔི དྭེ ཝཱ ཀཱརཱཔེནྟསྶ ཨེཀེན ཝཏྠུནཱ ནིསྶགྒིཡཾ, ཨིཏརེཧི དུཀྐཊཾ. སཙེ པན ‘‘དྷོཝཱ’’ཏི ཝུཏྟཱ སབྦཱནིཔི ཀརོཏི, དྷོཝནཔཙྩཡཱཝ ཨཱཔཏྟི. ‘‘ཨིམསྨིཾ ཙཱིཝརེ ཡཾ ཀཏྟབྦཾ, ཏཾ ཀརོཧཱི’’ཏི ཝདཏོ པན ཨེཀཝཱཙཱཡ པཱཙིཏྟིཡེན སདྡྷིཾ དྭེ དུཀྐཊཱནི, བྷིཀྑུནིསངྒྷཝསེན ཨེཀཏོཨུཔསམྤནྣཱཡ དྷོཝཱཔེནྟསྶ ཨནིསྶཛྫིཏྭཱ པརིབྷུཉྫནྟསྶ, ཨཉྙསྶ ཝཱ སནྟཀཾ ནིསཱིདནཔཙྩཏྠརཎཾ ཝཱ དྷོཝཱཔེནྟསྶ, ཉཱཏིཀཱཡ ཨཉྙཱཏིཀསཉྙིནོ ཙེཝ, ཝེམཏིཀསྶ ཙ དུཀྐཊཾ, ཨཉྙཱཏིཀཱཡ ཉཱཏིཀསཉྙིནོཔི ཝེམཏིཀསྶཱཔི ནིསྶགྒིཡཾ པཱཙིཏྟིཡམེཝ. ཨིཏོ པརཾ པན ཨེཝརཱུཔེསུ ཋཱནེསུ ‘‘ཏིཀཔཱཙིཏྟིཡ’’ནྟི ཝཀྑཱམ, སཙེ ཉཱཏིཀཱཡ སཧཱཡཱ ཨཉྙཱཏིཀཱ ‘‘དྷོཝཱ’’ཏི ཨཝུཏྟཱ ཝཱ དྷོཝཏི, ཨཔརིབྷུཏྟཾ ཝཱ ཨཉྙཾ ཝཱ པརིཀྑཱརཾ དྷོཝཏི, སིཀྑམཱནསཱམཎེརིཡོ ཝཱ དྷོཝནྟི, ཨནཱཔཏྟི, ཨུམྨཏྟཀཱདཱིནཾ ཨནཱཔཏྟིཡེཝ. པུརཱཎཙཱིཝརཏཱ, ཨུཔཙཱརེ ཋཏྭཱ ཨཉྙཱཏིཀཱཡ བྷིཀྑུནིཡཱ ཨཱཎཱཔནཾ, ཏསྶཱ དྷོཝནཱདཱིནི ཙཱཏི ཨིམཱནེཏྠ ཏཱིཎི ཨངྒཱནི. སཉྩརིཏྟསམུཊྛཱནཾ, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པུརཱཎཙཱིཝརསིཀྑཱཔདཝཎྞནཱ ནིཊྛིཏཱ.

༥. ཙཱིཝརཔྤཊིགྒཧཎསིཀྑཱཔདཝཎྞནཱ

པཉྩམེ ¶ ཨཉྙཱཏིཀཱཡཱཏིཨིདཾ ཝུཏྟནཡམེཝ, ཏསྨཱ ཨིཏོ པརཾ ཀཏྠཙི ན ཝིཙཱརཡིསྶཱམ. ཙཱིཝརནྟི ཚནྣཾ ཨཉྙཏརཾ ¶ ཝིཀཔྤནུཔགཾ, ཨེས ནཡོ སབྦེསུ ཙཱིཝརཔྤཊིསཾཡུཏྟསིཀྑཱཔདེསུ. ཡཏྠ པན ཝིསེསོ བྷཝིསྶཏི, ཏཏྠ ཝཀྑཱམ. པཊིགྒཎྷེཡྻཱཏིཨེཏྠ ཧཏྠེན ཝཱ ཧཏྠེ དེཏུ, པཱདམཱུལེ ཝཱ ཋཔེཏུ, དྷམྨཀཐཾ ཀཐེནྟསྶ ཝཏྠེསུ ཁིཔིཡམཱནེསུ ཨུཔཙཱརཾ མུཉྩིཏྭཱཔི ཨུཔརི ཝཱ ཁིཔཏུ, སཙེ སཱདིཡཏི, པཊིགྒཧིཏམེཝ ཧོཏི. ཡསྶ ཀསྶཙི པན ཨནུཔསམྤནྣསྶ ཧཏྠེ པེསིཏཾ གཎྷིཏུཾ ཝཊྚཏི, ‘‘པཾསུཀཱུལཾ གཎྷིསྶཏཱི’’ཏི སངྐཱརཀཱུཊཱདཱིསུ ཋཔིཏམྤི པཾསུཀཱུལཾ ཨདྷིཊྛཧིཏྭཱ གཧེཏུཾ ཝཊྚཏིཡེཝ. ཨཉྙཏྲ པཱརིཝཏྟཀཱཏི ཡཾ ‘‘ཨནྟམསོ ཧརཱིཊཀཀྑཎྜམྤི དཏྭཱ ཝཱ དསྶཱམཱི’’ཏི ཨཱབྷོགཾ ཀཏྭཱ ཝཱ པཱརིཝཏྟཀཾ གཎྷཱཏི, ཏཾ ཋཔེཏྭཱ ཨཉྙཾ ཨནྟམསོ ཝིཀཔྤནུཔགཾ པཊཔརིསྶཱཝནམྤི གཎྷནྟསྶ ནིསྶགྒིཡཾ ཧོཏི. ཏཏྲ ‘‘ཨིདཾ མེ, བྷནྟེ, ཙཱིཝརཾ ཨཉྙཱཏིཀཱཡ བྷིཀྑུནིཡཱ ཧཏྠཏོ པཊིགྒཧིཏཾ ¶ ཨཉྙཏྲ པཱརིཝཏྟཀཱ ནིསྶགྒིཡ’’ནྟི (པཱརཱ. ༥༡༢) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ.

རཱཛགཧེ ཨུདཱཡིཏྠེརཾ ཨཱརབྦྷ ཙཱིཝརཔྤཊིགྒཧཎཝཏྠུསྨིཾ པཉྙཏྟཾ, ‘‘ཨཉྙཏྲ པཱརིཝཏྟཀཱ’’ཏི ཨཡམེཏྠ ཨནུཔཉྙཏྟི, ཨསཱདྷཱརཎཔཉྙཏྟི, ཨནཱཎཏྟིཀཾ, གཧཎཏྠཱཡ ཧཏྠཔྤསཱརཎཱདིཔྤཡོགེ དུཀྐཊཾ, པཊིལཱབྷེན ནིསྶགྒིཡཾ ཧོཏི, ནིསྶཛྫིཏབྦཾ, ཏིཀཔཱཙིཏྟིཡཾ, ཨེཀཏོཨུཔསམྤནྣཱཡ ཉཱཏིཀཱཡ ཙ ཨཉྙཱཏིཀསཉྙིསྶ ཝེམཏིཀསྶ ཝཱ དུཀྐཊཾ. ཝིསྶཱསགྒཱཧེ, ཏཱཝཀཱལིཀེ, པཏྟཏྠཝིཀཱདིམྷི ཙ ཨནདྷིཊྛཱཏབྦཔརིཀྑཱརེ, སིཀྑམཱནསཱམཎེརཱིནཾ ཧཏྠཏོ གཧཎེ, ཨུམྨཏྟཀཱདཱིནཉྩ ཨནཱཔཏྟི. ཝིཀཔྤནུཔགཙཱིཝརཏཱ, པཱརིཝཏྟཀཱབྷཱཝོ, ཨཉྙཱཏིཀཱཡ ཧཏྠཏོ གཧཎནྟི ཨིམཱནེཏྠ ཏཱིཎི ཨངྒཱནི. སཉྩརིཏྟསམུཊྛཱནཾ, ཀིརིཡཱཀིརིཡཾ, སེསཾ ཙཏུཏྠསདིསམེཝཱཏི.

ཙཱིཝརཔྤཊིགྒཧཎསིཀྑཱཔདཝཎྞནཱ ནིཊྛིཏཱ.

༦. ཨཉྙཱཏཀཝིཉྙཏྟིསིཀྑཱཔདཝཎྞནཱ

ཚཊྛེ གཧཔཏིནྟི བྷིཀྑཱུསུ ཨཔབྦཛིཏམནུསྶཾ. གཧཔཏཱནིནྟི བྷིཀྑུནཱིསུ ཨཔབྦཛིཏིཏྠིཾ, ཨེས ནཡོ སབྦེསུ གཧཔཏིཔྤཊིསཾཡུཏྟེསུ སིཀྑཱཔདེསུ. ཝིཉྙཱཔེཡྻཱཏི ¶ ཡཱཙེཡྻ ཝཱ ཡཱཙཱཔེཡྻ ཝཱ. ཨཉྙཏྲ སམཡཱཏི ཡོ ཨཙྪིནྣཙཱིཝརོ ཝཱ ཧོཏི ནཊྛཙཱིཝརོ ཝཱ, ཏསྶ ཏཾ སམཡཾ ཋཔེཏྭཱ ཨཉྙསྨིཾ ཝིཉྙཱཔནཔྤཡོགེ དུཀྐཊཾ, པཊིལཱབྷེན ནིསྶགྒིཡཾ ཧོཏི. ཏཏྠ ‘‘ཨིདཾ མེ, བྷནྟེ, ཙཱིཝརཾ ཨཉྙཱཏཀཾ གཧཔཏིཀཾ ཨཉྙཏྲ སམཡཱ ཝིཉྙཱཔིཏཾ ནིསྶགྒིཡ’’ནྟི (པཱརཱ. ༥༢༤) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ.

སཱཝཏྠིཡཾ ཨུཔནནྡཾ ཨཱརབྦྷ ཙཱིཝརཝིཉྙཱཔནཝཏྠུསྨིཾ པཉྙཏྟཾ. ‘‘ཨཉྙཏྲ སམཡཱ’’ཏི ཨཡམེཏྠ ཨནུཔཉྙཏྟི, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཉཱཏཀེ ཨཉྙཱཏཀསཉྙིནོ ཝེམཏིཀསྶ ཙ དུཀྐཊཾ. སམཡེ ཝཱ ཉཱཏཀཔྤཝཱརིཏེ ཝཱ ཝིཉྙཱཔེནྟསྶ, ཨཉྙསྶ ཝཱ ཉཱཏཀཔྤཝཱརིཏེ ཏསྶེཝཏྠཱཡ ཝིཉྙཱཔེནྟསྶ, ཨཏྟནོ ¶ དྷནེན གཎྷནྟསྶ, ཨུམྨཏྟཀཱདཱིནཉྩ ཨནཱཔཏྟི. ཝིཀཔྤནུཔགཙཱིཝརཏཱ, སམཡཱབྷཱཝོ, ཨཉྙཱཏཀཝིཉྙཏྟི, ཏཱཡ ཙ པཊིལཱབྷོཏི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི ཙཏུཏྠསདིསཱནེཝཱཏི.

ཨཉྙཱཏཀཝིཉྙཏྟིསིཀྑཱཔདཝཎྞནཱ ནིཊྛིཏཱ.

༧. ཏཏུཏྟརིསིཀྑཱཔདཝཎྞནཱ

སཏྟམེ ¶ ཏཉྩེཏི ཏཾ ཨཙྪིནྣཙཱིཝརཾ ཝཱ ནཊྛཙཱིཝརཾ ཝཱ. ཨབྷིཧཊྛུནྟི ཨབྷཱིཏི ཨུཔསགྒོ, ཧརིཏུནྟི ཨཏྠོ, གཎྷིཏུནྟི ཝུཏྟཾ ཧོཏི. པཝཱརེཡྻཱཏི ཨིཙྪཱཔེཡྻ, ཨིཙྪཾ རུཙིཾ ཨུཔྤཱདེཡྻ, ‘‘ཡཱཝཏྟཀཾ ཨིཙྪསི, ཏཱཝཏྟཀཾ གཎྷཱཧཱི’’ཏི ཨེཝཾ ནིམནྟེཡྻཱཏི ཨཏྠོ, ཡཐཱ ཝཱ ‘‘ནེཀྑམྨཾ དཊྛུ ཁེམཏོ’’ཏི (སུ. ནི. ༤༢༦, ༡༡༠༤; ཙཱུལ༹ནི. ཛཏུཀཎྞཱིམཱཎཝཔུཙྪཱནིདྡེས ༦༧) ཨེཏྠ དིསྭཱཏི ཨཏྠོ, ཨེཝམིདྷཱཔི ‘‘ཨབྷིཧཊྛུཾ པཝཱརེཡྻཱ’’ཏི ཨུཔནེཏྭཱ པུརཏོ ཋཔེནྟོ ཀཱཡེན ཝཱ, ‘‘ཨམྷཱཀཾ དུསྶཀོཊྛཱགཱརཏོ ཡཏྟཀཾ ཨིཙྪཐ, ཏཏྟཀཾ གཎྷཐཱ’’ཏི ཝདནྟོ ཝཱཙཱཡ ཝཱ ཨབྷིཧརིཏྭཱ ནིམནྟེཡྻཱཏི ཨཏྠོ. སནྟརུཏྟརཔརམནྟི སཨནྟརཾ ཨུཏྟརཾ པརམཾ ཨསྶ ཙཱིཝརསྶཱཏི སནྟརུཏྟརཔརམཾ, ནིཝཱསནེན སདྡྷིཾ པཱརུཔནཾ ཨུཀྐཊྛཔརིཙྪེདོ ཨསྶཱཏི ཝུཏྟཾ ཧོཏི. ཏཏོ ཙཱིཝརཾ སཱདིཏབྦནྟི ཏཏོ ཨབྷིཧཊཙཱིཝརཏོ ཨེཏྟཀཾ ཙཱིཝརཾ གཧེཏབྦཾ, ན ཏཏོ པརཾ.

ཏཏྲཱཡཾ ¶ ཝིནིཙྪཡོ – ཡསྶ ཨདྷིཊྛིཏཙཱིཝརསྶ ཏཱིཎི ནཊྛཱནི, ཏེན དྭེ སཱདིཏབྦཱནི, ཨེཀཾ ནིཝཱསེཏྭཱ ཨེཀཾ པཱརུཔིཏྭཱ ཨཉྙཾ སབྷཱགཊྛཱནཏོ པརིཡེསིཏབྦཾ. ཡསྶ དྭེ ནཊྛཱནི, ཏེན ཨེཀཾ སཱདིཏབྦཾ. སཙེ པན པཀཏིཡཱཝ སནྟརུཏྟརེན ཙརཏི, དྭེ སཱདིཏབྦཱནི, ཨེཝཾ ཨེཀཾ སཱདིཡནྟེནེཝ སམོ བྷཝིསྶཏི. ཡསྶ ཏཱིསུ ཨེཀཾ ནཊྛཾ, ཀིཉྩི ན སཱདིཏབྦཾ. ཡསྶ པན དྭཱིསུ ཨེཀཾ ནཊྛཾ, ཨེཀཾ སཱདིཏབྦཾ. ཡསྶ ཨེཀཾཡེཝ ཧོཏི, ཏཉྩ ནཊྛཾ, དྭེ སཱདིཏབྦཱནི. བྷིཀྑུནིཡཱ པན པཉྩསུ ནཊྛེསུ དྭེ སཱདིཏབྦཱནི, ཙཏཱུསུ ནཊྛེསུ ཨེཀཾ སཱདིཏབྦཾ, ཏཱིསུ ནཊྛེསུ ན ཀིཉྩི སཱདིཏབྦཾ, ཀོ པན ཝཱདོ དྭཱིསུ ཝཱ ཨེཀསྨིཾ ཝཱ. ཡེན ཀེནཙི ཧི སནྟརུཏྟརཔརམཏཱཡ ཋཱཏབྦཾ, ཏཏོ ཨུཏྟརི ཝིཉྙཱཔནཔྤཡོགེ དུཀྐཊཾ, པཊིལཱབྷེན ནིསྶགྒིཡཾ ཧོཏི. ཏཏྠ ‘‘ཨིདཾ མེ, བྷནྟེ, ཙཱིཝརཾ ཨཉྙཱཏཀཾ གཧཔཏིཀཾ ཏཏུཏྟརི ཝིཉྙཱཔིཏཾ ནིསྶགྒིཡ’’ནྟི (པཱརཱ. ༥༢༤) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ.

སཱཝཏྠིཡཾ ཚབྦགྒིཡེ བྷིཀྑཱུ ཨཱརབྦྷ བཧུཙཱིཝརཝིཉྙཱཔནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཉཱཏཀེ ཨཉྙཱཏཀསཉྙིནོ ཝེམཏིཀསྶ ཝཱ དུཀྐཊཾ. དྭེ ཙཱིཝརཱནི ཀཏྭཱ ‘‘སེསཀཾ ཨཱཧརིསྶཱམཱི’’ཏི ཝཏྭཱ གཎྷནྟསྶ, ‘‘སེསཀཾ ཏུཡ྄ཧཾཡེཝ ཧོཏཱུ’’ཏི ཝུཏྟསྶ, ན ཨཙྪིནྣནཊྛཀཱརཎཱ དིནྣཾ གཎྷནྟསྶ, ཝུཏྟནཡེན ཉཱཏཀཔྤཝཱརིཏེ ཝིཉྙཱཔེནྟསྶ, ཨཏྟནོ དྷནེན གཎྷནྟསྶ, ཨུམྨཏྟཀཱདཱིནཉྩ ཨནཱཔཏྟི. ཏཏུཏྟརིཏཱ ¶ , ཨཙྪིནྣཱདིཀཱརཎཏཱ ¶ , ཨཉྙཱཏཀཝིཉྙཏྟི, ཏཱཡ ཙ པཊིལཱབྷོཏི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི ཙཏུཏྠསདིསཱནེཝཱཏི.

ཏཏུཏྟརིསིཀྑཱཔདཝཎྞནཱ ནིཊྛིཏཱ.

༨. ཨུཔཀྑཊསིཀྑཱཔདཝཎྞནཱ

ཨཊྛམེ བྷིཀྑུཾ པནེཝ ཨུདྡིསྶཱཏི ‘‘ཨིཏྠནྣཱམསྶ བྷིཀྑུནོ དསྶཱམཱི’’ཏི ཨེཝཾ ཨཔདིསིཏྭཱ. ཙཱིཝརཙེཏཱཔནྣནྟི ཧིརཉྙཱདིཀཾ ཙཱིཝརམཱུལཾ. ཨུཔཀྑཊཾ ཧོཏཱིཏི སཛྫིཏཾ ཧོཏི, སཾཧརིཏྭཱ ཋཔིཏཾ. ཙེཏཱཔེཏྭཱཏི པརིཝཏྟེཏྭཱ, ཀཱརེཏྭཱ ཝཱ ཀིཎིཏྭཱ ཝཱཏི ཨཏྠོ. ཙཱིཝརེན ཨཙྪཱདེསྶཱམཱིཏི ཝོཧཱརཝཙནམེཏཾ, ཨིཏྠནྣཱམསྶ བྷིཀྑུནོ དསྶཱམཱིཏི ཨཡཾ པནེཏྠ ¶ ཨཏྠོ. ཏཏྲ ཙེ སོཏི ཡཏྲ སོ གཧཔཏི ཝཱ གཧཔཏཱནཱི ཝཱ, ཏཏྲ སོ བྷིཀྑུ པུབྦེ ཨཔྤཝཱརིཏོ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫེཡྻ ཙེཏི ཨཡམེཏྠ པདསམྦནྡྷོ. ཝིཀཔྤཾ ཨཱཔཛྫེཡྻཱཏི ཝིསིཊྛཀཔྤཾ ཨདྷིཀཝིདྷཱནཾ ཨཱཔཛྫེཡྻ. ཡཐཱ པན ཏམཱཔཛྫཏི, ཏཾ དསྶེཏུཾ སཱདྷུ ཝཏཱཏིཨཱདིམཱཧ. ཏཏྠ སཱདྷཱུཏི ཨཱཡཱཙནེ ནིཔཱཏོ. ཝཏཱཏི པརིཝིཏཀྐེ. མནྟི ཨཏྟཱནཾ ནིདྡིསཏི. ཨཱཡསྨཱཏི པརཾ ཨཱལཔཏི. ཨེཝརཱུཔཾ ཝཱ ཨེཝརཱུཔཾ ཝཱཏི ཨཱཡཏཱདཱིསུ ཨཉྙཏརཾ. ཀལྱཱཎཀམྱཏཾ ཨུཔཱདཱཡཱཏི སུནྡརཀཱམཏཾ ཝིསིཊྛཀཱམཏཾ ཙིཏྟེན གཧེཏྭཱ, ཏསྶ ‘‘ཨཱཔཛྫེཡྻ ཙེ’’ཏིཨིམིནཱ སམྦནྡྷོ, སཙེ པན ཨེཝརཱུཔཾ ཨཱཔཛྫནྟསྶ ཏསྶ ཝཙནེན ཡོ པཋམཾ ཨདྷིཔྤེཏཏོ མཱུལཾ ཝཌྜྷེཏྭཱ སུནྡརཏརཾ ཙེཏཱཔེཏི, ཏསྶ པཡོགེ བྷིཀྑུནོ དུཀྐཊཾ, པཊིལཱབྷེན ནིསྶགྒིཡཾ ཧོཏི. ཏཏྠ ‘‘ཨིདཾ མེ, བྷནྟེ, ཙཱིཝརཾ པུབྦེ ཨཔྤཝཱརིཏཾ ཨཉྙཱཏཀཾ གཧཔཏིཀཾ ཨུཔསངྐམིཏྭཱ ཝིཀཔྤཾ ཨཱཔནྣཾ ནིསྶགྒིཡ’’ནྟི (པཱརཱ. ༥༢༩) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ.

སཱཝཏྠིཡཾ ཨུཔནནྡཾ ཨཱརབྦྷ ཙཱིཝརེ ཝིཀཔྤཾ ཨཱཔཛྫནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཉཱཏཀེ ཨཉྙཱཏཀསཉྙིནོ ཝེམཏིཀསྶ ཝཱ དུཀྐཊཾ. མཧགྒྷཾ ཙེཏཱཔེཏུཀཱམཾ ཨཔྤགྒྷཾ ཝཱ, ཨེཏེནེཝ མཱུལེན ‘‘ཨཉྙཾ ཨེཝརཱུཔཾ ཝཱ དེཧཱི’’ཏི ཝདནྟསྶ, ཝུཏྟནཡེན ཉཱཏཀཔྤཝཱརིཏེ ཝིཉྙཱཔེནྟསྶ, ཨཏྟནོ དྷནེན གཎྷནྟསྶ, ཨུམྨཏྟཀཱདཱིནཉྩ ཨནཱཔཏྟི. ཙཱིཝརེ བྷིཡྻོཀམྱཏཱ, ཨཉྙཱཏཀཝིཉྙཏྟི, ཏཱཡ ཙ པཊིལཱབྷོཏི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཙཏུཏྠསདིསཱནེཝཱཏི.

ཨུཔཀྑཊསིཀྑཱཔདཝཎྞནཱ ནིཊྛིཏཱ.

༩. དུཏིཡཨུཔཀྑཊསིཀྑཱཔདཝཎྞནཱ

ནཝམེ ¶ ཨིམིནཱཝ ནཡེན ཨཏྠོ ཝེདིཏབྦོ. ཨིདཉྷི པུརིམསྶ ཨནུཔཉྙཏྟིསདིསཾ, ཀེཝལཾ ཏཏྠ ཨེཀསྶ པཱིལཱ༹ ཀཏཱ, ཨིདྷ དྭིནྣཾ, ཨཡམེཏྠ ཝིསེསོ, སེསཾ སབྦཾ པུརིམསདིསམེཝ. ཡཐཱ ཙ དྭིནྣཾ, ཨེཝཾ བཧཱུནཾ པཱིལ༹ཾ ཀཏྭཱ གཎྷཏོཔི ཨཱཔཏྟི ཝེདིཏབྦཱ. ནིསྶཛྫནཝིདྷཱནེ ཙ ‘‘ཨིདཾ མེ, བྷནྟེ ¶ , ཙཱིཝརཾ པུབྦེ ཨཔྤཝཱརིཏེ ¶ ཨཉྙཱཏཀེ གཧཔཏིཀེ ཨུཔསངྐམིཏྭཱ ཝིཀཔྤཾ ཨཱཔནྣཾ ནིསྶགྒིཡ’’ནྟི (པཱརཱ. ༥༣༤) ཨིམིནཱ ནཡེན ཝཙནབྷེདོ ཉཱཏབྦོཏི.

དུཏིཡཨུཔཀྑཊསིཀྑཱཔདཝཎྞནཱ ནིཊྛིཏཱ.

༡༠. རཱཛསིཀྑཱཔདཝཎྞནཱ

དསམེ རཱཛབྷོགྒོཏི རཱཛཏོ བྷོགྒཾ བྷུཉྫིཏབྦཾ ཨསྶ ཨཏྠཱིཏི རཱཛབྷོགྒོ, ‘‘རཱཛབྷོགོ’’ཏིཔི པཱཋོ, རཱཛཏོ བྷོགོ ཨསྶ ཨཏྠཱིཏི ཨཏྠོ. ཙཱིཝརཙེཏཱཔནྣནྟི ཧིརཉྙཱདིཀཾ ཨཀཔྤིཡཾ. པཧིཎེཡྻཱཏི པེསེཡྻ. ཨིམིནཱཏིཨཱདི ཨཱགམནསུདྡྷིཾ དསྶེཏུཾ ཝུཏྟཾ. སཙེ ཧི ‘‘ཨིདཾ ཨིཏྠནྣཱམསྶ བྷིཀྑུནོ དེཧཱི’’ཏི པེསེཡྻ, ཨཱགམནསྶ ཨསུདྡྷཏྟཱ ཨཀཔྤིཡཝཏྠུཾ ཨཱརབྦྷ བྷིཀྑུནཱ ཀཔྤིཡཀཱརཀོཔི ནིདྡིསིཏབྦོ ན བྷཝེཡྻ. ཨཱབྷཏནྟི ཨཱནཱིཏཾ. ན ཁོ མཡནྟིཨཱདི ཨིདཾ ཀཔྤིཡཝསེན ཨཱབྷཏམྤི ཙཱིཝརམཱུལཾ ཨཱིདིསེན དཱུཏཝཙནེན ཨཀཔྤིཡཾ ཧོཏི, ཏསྨཱ ཏཾ པཊིཀྑིཔིཏབྦནྟི དསྶེཏུཾ ཝུཏྟཾ. སུཝཎྞཾ རཛཏཾ ཀཧཱཔཎོ མཱསཀོཏི ཨིམཱནི ཧི ཙཏྟཱརི ནིསྶགྒིཡཝཏྠཱུནི, མུཏྟཱ མཎི ཝེལུ༹རིཡོ སངྑོ སིལཱ པཝཱལ༹ཾ ལོཧིཏངྐོ མསཱརགལླཾ སཏྟ དྷཉྙཱནི དཱསིདཱསཁེཏྟཝཏྠུཔུཔྥཱརཱམཕལཱརཱམཱདཡོཏི ཨིམཱནི དུཀྐཊཝཏྠཱུནི ཙ ཨཏྟནོ ཝཱ ཙེཏིཡསངྒྷགཎཔུགྒལཱནཾ ཝཱ ཨཏྠཱཡ སམྤཊིཙྪིཏུཾ ན ཝཊྚནྟི, ཏསྨཱ ཏཾ སཱདིཏུཾ ན ཝཊྚཏཱིཏི དསྶནཏྠཾ ‘‘ན ཁོ མཡ’’ནྟིཨཱདི ཝུཏྟཾ.

ཙཱིཝརཉྩ ཁོ མཡཾ པཊིགྒཎྷཱམཱཏི ཨིདཾ པན ཨཏྟཱནཾ ཨུདྡིསྶ ཨཱབྷཏཏྟཱ ཝཏྟུཾ ཝཊྚཏི, ཏསྨཱ ཝུཏྟཾ. ཀཱལེནཱཏི ཡུཏྟཔཏྟཀཱལེན, ཡདཱ ནོ ཨཏྠོ ཧོཏི, ཏདཱ ཀཔྤིཡཾ ཙཱིཝརཾ པཊིགྒཎྷཱམཱཏི ཨཏྠོ. ཝེཡྻཱཝཙྩཀརོཏི ཀཔྤིཡཀཱརཀོ. ནིདྡིསིཏབྦོཏིཨིདཾ ‘‘ཨཏྠི པནཱཡསྨཏོ ཀོཙི ཝེཡྻཱཝཙྩཀརོ’’ཏི ཀཔྤིཡཝཙནེན ཝུཏྟཏྟཱ ཨནུཉྙཱཏཾ. སཙེ པན དཱུཏོ ‘‘ཀོ ཨིམཾ གཎྷཱཏཱི’’ཏི ཝཱ ‘‘ཀསྶ དེམཱི’’ཏི ཝཱ ཝདཏི, ན ནིདྡིསིཏབྦོ. ཨཱརཱམིཀོ ཝཱ ཨུཔཱསཀོ ཝཱཏིཨིདཾ སཱརུཔྤཏཱཡ ཝུཏྟཾ, ཋཔེཏྭཱ པན པཉྩ སཧདྷམྨིཀེ ཡོ ཀོཙི ཀཔྤིཡཀཱརཀོ ¶ ཝཊྚཏི. ཨེསོ ཁོ, ཨཱཝུསོཏིཨིདཾ བྷིཀྑུསྶ ཀཔྤིཡཝཙནདསྶནཏྠཾ ཝུཏྟཾ, ཨེཝམེཝ ཧི ¶ ཝཏྟབྦཾ, ‘‘ཨེཏསྶ དེཧཱི’’ཏིཨཱདི ན ཝཏྟབྦཾ. སཉྙཏྟོ སོ མཡཱཏི ཨཱཎཏྟོ སོ མཡཱ, ཡཐཱ ཏུམྷཱཀཾ ཙཱིཝརེན ཨཏྠེ སཏི ཙཱིཝརཾ དསྶཏི, ཨེཝཾ ཝུཏྟོཏི ཨཏྠོ. དཱུཏེན ཧི ཨེཝཾ ཨཱརོཙིཏེཡེཝ ཏཾ ཙོདེཏུཾ ཝཊྚཏི, ནེཝ ཏསྶ ཧཏྠེ དཏྭཱ གཏམཏྟཀཱརཎེན. སཙེ པན ‘‘ཨཡཾ ཝེཡྻཱཝཙྩཀརོ’’ཏི སམྨུཁཱ ནིདྡིཊྛོ ཧོཏི, དཱུཏོ ཙ སམྨུཁཱ ཨེཝ ཏསྶ ཧཏྠེ ཙེཏཱཔནྣཾ དཏྭཱ ‘‘ཐེརསྶ ཙཱིཝརཾ ཀིཎིཏྭཱ དེཧཱི’’ཏི གཙྪཏི, ཨེཝཾ ‘‘སཉྙཏྟོ སོ མཡཱ’’ཏི ཨཝུཏྟེཔི ཙོདེཏུཾ ཝཊྚཏི. སཙེ པན དཱུཏོ གཙྪནྟོཝ ‘‘ཨཧཾ ཏསྶ ཧཏྠེ དསྶཱམི, ཏུམྷེ ཙཱིཝརཾ གཎྷེཡྻཱཐཱ’’ཏི བྷིཀྑུནོ ཝཏྭཱ ཝཱ གཙྪཏི, ཨཉྙཾ ཝཱ པེསེཏྭཱ ཨཱརོཙཱཔེཏི, ཨེཝཾ སཏི ཨིཏརམྤི ཙོདེཏུཾ ཝཊྚཏིཡེཝ. དེསནཱམཏྟམེཝ ¶ ཙེཏཾ ‘‘དཱུཏེནཱ’’ཏི. ཡོཔི ཨཏྟནཱ ཨཱཧརིཏྭཱ ཨེཝཾ པཊིཔཛྫཏི, ཏསྨིམྤི ཨིདམེཝ ལཀྑཎཾ. ཨཏྠོ མེ, ཨཱཝུསོ, ཙཱིཝརེནཱཏི ཙོདནཱལཀྑཎནིདསྶནམེཏཾ. སཙེ ཧི ཝཱཙཱཡ ཙོདེཏི, ཨིདཾ ཝཱ ཝཙནཾ ཡཱཡ ཀཱཡཙི བྷཱསཱཡ ཨེཏསྶ ཨཏྠོ ཝཱ ཝཏྟབྦོ, ‘‘དེཧི མེ, ཨཱཧར མེ’’ཏིཨཱདིནཱ ནཡེན པན ཝཏྟུཾ ན ཝཊྚཏི. ཨབྷིནིཔྥཱདེཡྻཱཏི ཨེཝཾ ཝཙཱིབྷེདཾ ཀཏྭཱ ཏིཀྑཏྟུཾ ཙོདཡམཱནོ པཊིལཱབྷཝསེན སཱདྷེཡྻ. ཨིཙྩེཏཾ ཀུསལནྟི ཨེཏཾ སུནྡརཾ.

ཚཀྑཏྟུཔརམནྟི བྷཱཝནཔུཾསཀཝཙནམེཏཾ. ཚཀྑཏྟུཔརམཉྷི ཏེན ཙཱིཝརཾ ཨུདྡིསྶ ཏུཎྷཱིབྷཱུཏེན ཋཱཏབྦཾ, ན ནིསཱིདིཏབྦཾ, ན ཨཱམིསཾ པཊིགྒཧེཏབྦཾ, ན དྷམྨོ བྷཱསིཏབྦོ. ‘‘ཀིཾཀཱརཎཱ ཨཱགཏོསཱི’’ཏི ཝུཏྟེ པན ‘‘ཛཱནཱཧི, ཨཱཝུསོ’’ཏི ཨེཏྟཀམེཝ ཝཏྟབྦཾ. སཙེ ནིསཛྫཱདཱིནི ཀརོཏི, ཋཱནཾ བྷཉྫཏི, ཨཱགཏཀཱརཎཾ ཝིནཱསེཏི, ཨིདཾ ཀཱཡེན ཙོདནཱཡ ལཀྑཎདསྶནཏྠཾ ཝུཏྟཾ. ཨེཏྠ ཙ ཨུཀྐཊྛཔརིཙྪེདེན ཏིསྶནྣཾ ཙོདནཱནཾ ཚནྣཉྩ ཋཱནཱནཾ ཨནུཉྙཱཏཏྟཱ ཙོདནཱཡ དིགུཎཾ ཋཱནཾ ཨནུཉྙཱཏཾ ཧོཏི, ཏསྨཱ སཙེ ཙོདེཏིཡེཝ, ན ཏིཊྛཏི, ཚ ཙོདནཱཡོ ལབྦྷནྟི. སཙེ ཏིཊྛཏིཡེཝ, ན ཙོདེཏི, དྭཱདས ཋཱནཱནི ལབྦྷནྟི. སཙེ ཨུབྷཡཾ ཀརོཏི, ཨེཀཱཡ ཙོདནཱཡ དྭེ ཋཱནཱནི ཧཱཔེཏབྦཱནི. ཏཏྠ ཡོ ཨེཀདིཝསམེཝ པུནཔྤུནཾ གནྟྭཱ ཚཀྑཏྟུཾ ཙོདེཏི, སཀིཾཡེཝ ཝཱ གནྟྭཱ ‘‘ཨཏྠོ མེ, ཨཱཝུསོ, ཙཱིཝརེནཱ’’ཏི ཚཀྑཏྟུཾ ཝདཏི, ཏཐཱ ཨེཀདིཝསམེཝ པུནཔྤུནཾ གནྟྭཱ དྭཱདསཀྑཏྟུཾ ཏིཊྛཏི, སཀིཾཡེཝ ཝཱ གནྟྭཱ ཏཏྲ ཏཏྲ ཋཱནེ ཏིཊྛཏི, སོཔི སབྦཙོདནཱཡོ སབྦཊྛཱནཱནི ཙ བྷཉྫཏི, ཀོ པན ཝཱདོ ¶ ནཱནཱདིཝསེསུ ཨེཝཾ ཀརོནྟསྶཱཏི ཨཡམེཏྠ ཝིནིཙྪཡོ. ཡེ པན ཀཔྤིཡཀཱརཀེ དཱཡཀོ སཡམེཝ གནྟྭཱ ནིསཱིདཏི ཏེ སཏཀྑཏྟུམྤི ཙོདེཏུཾ ཝཊྚཏི. ཡོ པན ཨུབྷོཧི པི ཨནིདྡིཊྛོ མུཁཝེཝཊིཀཀཔྤིཡཀཱརཀོ ཙ པརམྨུཁཀཔྤིཡཀཱརཀོ ཙ, སོ ན ཀིཉྩི ཝཏྟབྦོ, ཨེཝཾ ཨིདྷ དསཔི ཀཔྤིཡཀཱརཀཱ དསྶིཏཱ ཧོནྟི.

ཏཏོ ¶ ཙེ ཨུཏྟརཱིཏི ཝུཏྟཙོདནཱཋཱནཔརིམཱཎཏོ ཨུཏྟརི. ནིསྶགྒིཡནྟི ཨུཏྟརི ཝཱཡཱམམཱནསྶ སབྦཔྤཡོགེསུ དུཀྐཊཾ, པཊིལཱབྷེན ནིསྶགྒིཡཾ ཧོཏི. ཨེཏྠ ཙ ‘‘ཨིདཾ མེ, བྷནྟེ, ཙཱིཝརཾ ཨཏིརེཀཏིཀྑཏྟུཾ ཙོདནཱཡ ཨཏིརེཀཚཀྑཏྟུཾ ཋཱནེན ཨབྷིནིཔྥཱདིཏཾ ནིསྶགྒིཡ’’ནྟི (པཱརཱ. ༥༣༩) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ. ཡཏསྶ ཙཱིཝརཙེཏཱཔནྣཾ ཨཱབྷཏནྟི ཡཏོ རཱཛཏོ ཝཱ རཱཛབྷོགྒཏོ ཝཱ ཨསྶ བྷིཀྑུནོ ཙཱིཝརཙེཏཱཔནྣཾ ཨཱནཱིཏཾ, ‘‘ཡཏྭསྶཱ’’ཏིཔི པཱཋོ, ཨཡམེཝ ཨཏྠོ. ཏཏྠཱཏི ཏསྶ རཉྙོ ཝཱ རཱཛབྷོགྒསྶ ཝཱ སནྟིཀཾ, སམཱིཔཏྠེ ཧི ཨིདཾ བྷུམྨཝཙནཾ. ན ཏཾ ཏསྶ བྷིཀྑུནོ ཀིཉྩི ཨཏྠཾ ཨནུབྷོཏཱིཏི ཏཾ ཙེཏཱཔནྣཾ ཏསྶ བྷིཀྑུནོ ཨཔྤམཏྟཀམྤི ཀམྨཾ ན ནིཔྥཱདེཏི. ཡུཉྫནྟཱཡསྨནྟོ སཀནྟི ཨཱཡསྨནྟོ ཨཏྟནོ སནྟཀཾ དྷནཾ པཱཔུཎནྟུ. མཱ ཝོ སཀཾ ¶ ཝིནསྶཱཏི ཏུམྷཱཀཾ སནྟཀཾ མཱ ཝིནསྶཏུ. ཨཡཾ ཏཏྠ སཱམཱིཙཱིཏི ཨཡཾ ཏཏྠ ཨནུདྷམྨཏཱ ལོཀུཏྟརདྷམྨཾ ཨནུགཏཱ, ཝཏྟདྷམྨཏཱཏི ཨཏྠོ, ཏསྨཱ ཨེཝཾ ཨཀརོནྟོ ཝཏྟབྷེདེ དུཀྐཊཾ ཨཱཔཛྫཏི.

སཱཝཏྠིཡཾ ཨུཔནནྡཾ ཨཱརབྦྷ ‘‘ཨཛྫུཎྷོ, བྷནྟེ, ཨཱགམེཧཱི’’ཏི (པཱརཱ. ༥༣༧) ཝུཙྩམཱནོ ནཱགམེསི, ཏསྨིཾ ཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཨཱུནཀེསུ ཙོདནཱཋཱནེསུ ཨཏིརེཀསཉྙིནོ ཝེམཏིཀསྶ ཝཱ དུཀྐཊཾ. ཨཙོདནཱཡ ལདྡྷེ, སཱམིཀེཧི ཙོདེཏྭཱ དིནྣེ, ཨུམྨཏྟཀཱདཱིནཉྩ ཨནཱཔཏྟི. ཀཔྤིཡཀཱརཀསྶ བྷིཀྑུནོ ནིདྡིཊྛབྷཱཝོ, དཱུཏེན ཨཔྤིཏཏཱ, ཏཏུཏྟརིཝཱཡཱམོ, ཏེན ཝཱཡཱམེན པཊིལཱབྷོཏི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི ཙཏུཏྠསདིསཱནེཝཱཏི.

རཱཛསིཀྑཱཔདཝཎྞནཱ ནིཊྛིཏཱ.

ཙཱིཝརཝགྒོ པཋམོ.

༢. ཨེལ༹ཀལོམཝགྒོ

༡. ཀོསིཡསིཀྑཱཔདཝཎྞནཱ

ཨེལ༹ཀལོམཝགྒསྶ ¶ པཋམེ ཀོསིཡམིསྶཀནྟི ཨེཀེནཱཔི ཀོསིཡཾསུནཱ ཨནྟམསོ ཏསྶ ཀརཎཊྛཱནེ ¶ ཝཱཏཝེགེན ནིཔཱཏིཏེནཱཔི མིསྶཱིཀཏཾ. སནྠཏནྟི སམེ བྷཱུམིབྷཱགེ ཀོསིཡཾསཱུནི ཨུཔརཱུཔརི སནྠརིཏྭཱ ཀཉྫིཡཱདཱིཧི སིཉྩིཏྭཱ ཀཏྟབྦཏཱལཀྑཎཾ. ཀཱརཱཔེཡྻ ནིསྶགྒིཡནྟི ཀརཎཀཱརཱཔནཔྤཡོགེསུ དུཀྐཊཾ, པཊིལཱབྷེན ནིསྶགྒིཡཾ ཧོཏི. ཨེཏྠ ཙ ‘‘ཨིདཾ མེ, བྷནྟེ, ཀོསིཡམིསྶཀཾ སནྠཏཾ ཀཱརཱཔིཏཾ ནིསྶགྒིཡ’’ནྟི (པཱརཱ. ༥༤༤) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ, ཨིམསྶེཝ ཝཙནསྶ ཨནུསཱརེན ཨིཏོ པརཾ སབྦསནྠཏཾ ཝེདིཏབྦཾ. སཀྐཱ ཧི ཨེཏྟཱཝཏཱ ཛཱནིཏུནྟི ན ཏཾ ཨིཏོ པརཾ དསྶཡིསྶཱམ.

ཨཱལ༹ཝིཡཾ ཚབྦགྒིཡེ ཨཱརབྦྷ ཀོསིཡམིསྶཀཾ སནྠཏཾ ཀཱརཱཔནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, ཨཏྟནོ ཨཏྠཱཡ ཀཱརཱཔནཝསེན སཱཎཏྟིཀཾ, ཨཏྟནཱ ཝིཔྤཀཏཔཨཡོསཱཔནནཡེན ཙཏུཀྐཔཱཙིཏྟིཡཾ, ཨཉྙསྶཏྠཱཡ ཀརཎཀཱརཱཔནེསུ ཨཉྙེན ཀཏཾ པཊིལབྷིཏྭཱ པརིབྷུཉྫནེ ཙ དུཀྐཊཾ. ཝིཏཱནཱདིཀརཎེ, ཨུམྨཏྟཀཱདཱིནཉྩ ཨནཱཔཏྟི. ཀོསིཡམིསྶཀབྷཱཝོ, ཨཏྟནོ ཨཏྠཱཡ སནྠཏསྶ ཀརཎཀཱརཱཔནཾ, པཊིལཱབྷོ ཙཱཏི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི དྷོཝཱཔནསིཀྑཱཔདེ ཝུཏྟནཡེནེཝཱཏི.

ཀོསིཡསིཀྑཱཔདཝཎྞནཱ ནིཊྛིཏཱ.

༢. སུདྡྷཀཱལ༹ཀསིཀྑཱཔདཝཎྞནཱ

དུཏིཡེ སུདྡྷཀཱལ༹ཀཱནནྟི སུདྡྷཱནཾ ཀཱལ༹ཀཱནཾ ཨཉྙེཧི ཨམིསྶཱིཀཏཱནཾ. ཝེསཱལིཡཾ ཚབྦགྒིཡེ ཨཱརབྦྷ ཏཱདིསཾ སནྠཏཾ ཀརཎཝཏྠུསྨིཾ པཉྙཏྟཾ, སེསཾ པཋམསདིསམེཝཱཏི.

སུདྡྷཀཱལ༹ཀསིཀྑཱཔདཝཎྞནཱ ནིཊྛིཏཱ.

༣. དྭེབྷཱགསིཀྑཱཔདཝཎྞནཱ

ཏཏིཡེ ¶ ¶ དྭེ བྷཱགཱཏི དྭེ ཀོཊྛཱསཱ. ཨཱདཱཏབྦཱཏི གཧེཏབྦཱ. གོཙརིཡཱནནྟི ཀཔིལཝཎྞཱནཾ. ཨཡཾ པནེཏྠ ཝིནིཙྪཡོ – ཡཏྟཀེཧི ཀཏྟུཀཱམོ ཧོཏི, ཏེསུ ཏུལཡིཏྭཱ དྭེ ཀོཊྛཱསཱ ཀཱལ༹ཀཱནཾ གཧེཏབྦཱ, ཨེཀོ ཨོདཱཏཱནཾ, ཨེཀོ གོཙརིཡཱནཾ. ཨེཀསྶཱཔི ཀཱལ༹ཀལོམསྶ ཨཏིརེཀབྷཱཝེ ནིསྶགྒིཡཾ ཧོཏི, ཨཱུནཀཾ ཝཊྚཏི.

སཱཝཏྠིཡཾ ཚབྦགྒིཡེ ཨཱརབྦྷ ཏཱདིསཾ སནྠཏཾ ཀརཎཝཏྠུསྨིཾ པཉྙཏྟཾ, ཀིརིཡཱཀིརིཡཾ, སེསཾ པཋམསདིསམེཝཱཏི. ཨིམཱནི པན ཏཱིཎི ནིསྶཛྫིཏྭཱ པཊིལདྡྷཱནིཔི པརིབྷུཉྫིཏུཾ ན ཝཊྚནྟི.

དྭེབྷཱགསིཀྑཱཔདཝཎྞནཱ ནིཊྛིཏཱ.

༤. ཚབྦསྶསིཀྑཱཔདཝཎྞནཱ

ཙཏུཏྠེ ཨོརེན ཙེ ཚནྣཾ ཝསྶཱནནྟི ཚནྣཾ ཝསྶཱནཾ ཨོརིམབྷཱགེ, ཨནྟོཏི ཨཏྠོ. ཨཉྙཏྲ བྷིཀྑུསམྨུཏིཡཱཏི ཡཾ སངྒྷོ གིལཱནསྶ བྷིཀྑུནོ སནྠཏསམྨུཏིཾ དེཏི, ཏཾ ཋཔེཏྭཱ ཨལདྡྷསམྨུཏིཀསྶ ཚབྦསྶབྦྷནྟརེ ཨཉྙཾ སནྠཏཾ ཀརོནྟསྶ ནིསྶགྒིཡཾ ཧོཏི.

སཱཝཏྠིཡཾ ¶ སམྦཧུལེ བྷིཀྑཱུ ཨཱརབྦྷ ཨནུཝསྶཾ སནྠཏཾ ཀཱརཱཔནཝཏྠུསྨིཾ པཉྙཏྟཾ, ‘‘ཨཉྙཏྲ བྷིཀྑུསམྨུཏིཡཱ’’ཏི ཨཡམེཏྠ ཨནུཔཉྙཏྟི, སཱ ཡེན ལདྡྷཱ ཧོཏི, ཏསྶ ཡཱཝ རོགོ ན ཝཱུཔསམྨཏི, ཝཱུཔསནྟོ ཝཱ པུན ཀུཔྤཏི, ཏཱཝ གཏགཏཊྛཱནེ ཨནུཝསྶམྤི ཀཱཏུཾ ཝཊྚཏི, ཨཉྙསྶཏྠཱཡ ཀཱརེཏུཾ, ཀཏཉྩ པཊིལབྷིཏྭཱ པརིབྷུཉྫིཏུམྤི ཝཊྚཏི, སེསཾ པཋམསདིསམེཝཱཏི.

ཚབྦསྶསིཀྑཱཔདཝཎྞནཱ ནིཊྛིཏཱ.

༥. ནིསཱིདནསིཀྑཱཔདཝཎྞནཱ

པཉྩམེ པུརཱཎསནྠཏཾ ནཱམ ཡཏྠ སཀིམྤི ནིསིནྣོ ཝཱ ཧོཏི ནིཔནྣོ ཝཱ. སམནྟཱཏི ཨེཀཔསྶཏོ ཝཊྚཾ ཝཱ ཙཏུརསྶཾ ཝཱ ཚིནྡིཏྭཱ གཧིཏཊྛཱནཾ ཡཐཱ ¶ ཝིདཏྠིམཏྟཾ ཧོཏི, ཨེཝཾ གཧེཏབྦཾ. སནྠརནྟེན པན ཨེཀདེསེ ཝཱ སནྠརིཏབྦཾ, ཝིཛཊེཏྭཱ ཝཱ མིསྶཀཾ ཀཏྭཱ སནྠརིཏབྦཾ, ཨེཝཾ ཐིརཏརཾ ཧོཏི. ཨནཱདཱ ཙེཏི སཏི པུརཱཎསནྠཏེ ཨགྒཧེཏྭཱ. ཨསཏི པན ཨགྒཧེཏྭཱཔི ཝཊྚཏི, ཨཉྙསྶཏྠཱཡ ཀཱརེཏུཾ, ཀཏཉྩ པཊིལབྷིཏྭཱ པརིབྷུཉྫིཏུམྤི ཝཊྚཏི.

སཱཝཏྠིཡཾ སམྦཧུལེ བྷིཀྑཱུ ཨཱརབྦྷ སནྠཏཝིསྶཛྫནཝཏྠུསྨིཾ པཉྙཏྟཾ, སེསཾ ཏཏིཡསདིསམེཝཱཏི.

ནིསཱིདནསིཀྑཱཔདཝཎྞནཱ ནིཊྛིཏཱ.

༦. ཨེལ༹ཀལོམསིཀྑཱཔདཝཎྞནཱ

ཚཊྛེ ¶ ཨདྡྷཱནམགྒཔྤཊིཔནྣསྶཱཏི ཨདྡྷཱནསངྑཱཏཾ དཱིགྷམགྒཾ པཊིཔནྣསྶ, སབྦཉྩེཏཾ ཝཏྠུམཏྟདཱིཔནམེཝ, ཡཏྠ ཀཏྠཙི པན དྷམྨེན ལབྷིཏྭཱ གཎྷཏོ དོསོ ནཏྠི. ཏིཡོཛནཔརམནྟི གཧིཏཊྛཱནཏོ ཏིཡོཛནཔྤམཱཎཾ དེསཾ. སཧཏྠཱཏི སཧཏྠེན, ཨཏྟནཱ ཧརིཏབྦཱནཱིཏི ཨཏྠོ. ཨསནྟེ ཧཱརཀེཏི ¶ ཨསནྟེཡེཝ ཨཉྙསྨིམྤི ཧཱརཀེ. སཙེ པན ཨཏྠི, ཏཾ གཱཧེཏུཾ ཝཊྚཏི. ཨཏྟནཱ པན ཨནྟམསོ ཝཱཏཱབཱདྷཔྤཊིཀཱརཏྠཾ སུཏྟཀེན ཨབནྡྷིཏྭཱ ཀཎྞཙྪིདྡེ པཀྑིཏྟཱནིཔི ཨཱདཱཡ ཏིཡོཛནཾ ཨེཀཾ པཱདཾ ཨཏིཀྐཱམེནྟསྶ དུཀྐཊཾ, དུཏིཡཔཱདཱཏིཀྐམེ ནིསྶགྒིཡཾ པཱཙིཏྟིཡཾ.

སཱཝཏྠིཡཾ ཨཉྙཏརཾ བྷིཀྑུཾ ཨཱརབྦྷ ཏིཡོཛནཱཏིཀྐམནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཨཱུནཀཏིཡོཛནེ ཨཏིརེཀསཉྙིནོ ཝེམཏིཀསྶ ཝཱ དུཀྐཊཾ. ཏིཡོཛནཾ ཧརཎཔཙྩཱཧརཎེ, ཝཱསཱདྷིཔྤཱཡེན གནྟྭཱ ཏཏོ པརཾ ཧརཎེ, ཨཙྪིནྣཾ ཝཱ ནིསྶཊྛཾ ཝཱ པཊིལབྷིཏྭཱ ཧརཎེ, ཨཉྙཾ ཧརཱཔནེ, ཨནྟམསོ སུཏྟཀེནཔི བདྡྷཀཏབྷཎྜཧརཎེ, ཨུམྨཏྟཀཱདཱིནཉྩ ཨནཱཔཏྟི. ཨེལ༹ཀལོམཱནཾ ཨཀཏབྷཎྜཏཱ, པཋམཔྤཊིལཱབྷོ, ཨཏྟནཱ ཨཱདཱཡ ཝཱ ཨཉྙསྶ ཨཛཱནནྟསྶ ཡཱནེ པཀྑིཔིཏྭཱ ཝཱ ཏིཡོཛནཱཏིཀྐམནཾ, ཨཱཧརཎཔཙྩཱཧརཎཾ, ཨཝཱསཱདྷིཔྤཱཡཏཱཏི ཨིམཱནེཏྠ པཉྩ ཨངྒཱནི. ཨེལ༹ཀལོམསམུཊྛཱནཾ ¶ , ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི.

ཨེལ༹ཀལོམསིཀྑཱཔདཝཎྞནཱ ནིཊྛིཏཱ.

༧. ཨེལ༹ཀལོམདྷོཝཱཔནསིཀྑཱཔདཝཎྞནཱ

སཏྟམེ སཀྐེསུ ཚབྦགྒིཡེ ཨཱརབྦྷ ཨེལ༹ཀལོམདྷོཝཱཔནཝཏྠུསྨིཾ པཉྙཏྟཾ. ཏཏྠ པུརཱཎཙཱིཝརདྷོཝཱཔནེ ཝུཏྟནཡེནེཝ སབྦོཔི ཝིནིཙྪཡོ ཝེདིཏབྦོ.

ཨེལ༹ཀལོམདྷོཝཱཔནསིཀྑཱཔདཝཎྞནཱ ནིཊྛིཏཱ.

༨. ཛཱཏརཱུཔསིཀྑཱཔདཝཎྞནཱ

ཨཊྛམེ ¶ ཛཱཏརཱུཔརཛཏནྟི སུཝཎྞཉྩེཝ རཱུཔིཡཉྩ, ཨཔིཙ ཀཧཱཔཎོ ལོཧམཱསཀདཱརུམཱསཀཛཏུམཱསཀཱདཡོཔི ཡེ ཝོཧཱརཾ གཙྪནྟི, སབྦེ ཏེ ཨིདྷ རཛཏནྟྭེཝ ཝུཏྟཱ. ཨུགྒཎྷེཡྻ ཝཱཏི ཨཏྟནོ ཨཏྠཱཡ དིཡྻམཱནཾ ཝཱ ཡཏྠཀཏྠཙི ཋིཏཾ ཝཱ ནིཔྤརིགྒཧིཏཾ དིསྭཱ སཡཾ གཎྷེཡྻ ཝཱ. ཨུགྒཎྷཱཔེཡྻ ཝཱཏི ཏདེཝ ཨཉྙེན གཱཧཱཔེཡྻ ཝཱ. ཨུཔནིཀྑིཏྟཾ ཝཱ སཱདིཡེཡྻཱཏི ‘‘ཨིདཾ ཨཡྻསྶ ཧོཏཱུ’’ཏི ཨེཝཾ སམྨུཁཱ ཝཱ, ‘‘ཨསུཀསྨིཾ ནཱམ ཋཱནེ མམ ཧིརཉྙསུཝཎྞཾ, ཏཾ ཏུཡ྄ཧཾ ཧོཏཱུ’’ཏི ཨེཝཾ པརམྨུཁཱ ཋིཏཾ ཝཱ ཀེཝལཾ ཝཱཙཱཡ ཝཱ ཧཏྠམུདྡཱཡ ཝཱ ‘‘ཏུཡ྄ཧ’’ནྟི ཝཏྭཱ པརིཙྩཏྟཾ ཡོ ཀཱཡཝཱཙཱཧི ཨཔྤཊིཀྑིཔིཏྭཱ ཙིཏྟེན ཨདྷིཝཱསེཡྻ, ཨཡཾ ‘‘སཱདིཡེཡྻཱ’’ཏི ཝུཙྩཏི. སཙེ པན ཙིཏྟེན སཱདིཡཏི, གཎྷིཏུཀཱམོ ཧོཏི, ཀཱཡེན ཝཱ ཝཱཙཱཡ ཝཱ ‘‘ནཡིདཾ ཀཔྤཏཱི’’ཏི པཊིཀྑིཔཏི, ཀཱཡཝཱཙཱཧི ཨཔྤཊིཀྑིཔིཏྭཱ སུདྡྷཙིཏྟོ ཧུཏྭཱ ‘‘ནཡིདཾ ཨམྷཱཀཾ ཀཔྤཏཱི’’ཏི ན སཱདིཡཏི, ཝཊྚཏི. ནིསྶགྒིཡནྟི ཨུགྒཧཎཱདཱིསུ ཡཾཀིཉྩི ཀརོནྟསྶ ¶ ཨགྷནབདྡྷེསུ ཝཏྠཱུསུ ཝཏྠུགཎནཱཡ ནིསྶགྒིཡཾ པཱཙིཏྟིཡཾ. ཏཾ ནིསྶཛྫནྟེན ‘‘ཨཧཾ, བྷནྟེ, རཱུཔིཡཾ པཊིགྒཧེསིཾ, ཨིདཾ མེ, བྷནྟེ, ནིསྶགྒིཡཾ, ཨིམཱཧཾ སངྒྷསྶ ནིསྶཛྫཱམཱི’’ཏི (པཱརཱ. ༥༨༤) ཨེཝཾ སངྒྷམཛ྄ཛྷེཡེཝ ནིསྶཛྫིཏབྦཾ. སཙེ ཏཏྠ ཀོཙི གཧཊྛོ ཨཱགཙྪཏི ¶ , ‘‘ཨིདཾ ཛཱནཱཧཱི’’ཏི ཝཏྟབྦོ. ‘‘ཨིམིནཱ ཀིཾ ཨཱཧརིཡྻཏཱུ’’ཏི བྷཎནྟེ པན ‘‘ཨིདཾ ནཱམཱ’’ཏི ཨཝཏྭཱ ‘‘སཔྤིཨཱདཱིནི བྷིཀྑཱུནཾ ཀཔྤནྟཱི’’ཏི ཨེཝཾ ཀཔྤིཡཾ ཨཱཙིཀྑིཏབྦཾ. སཙེ སོ ཨཱཧརཏི, རཱུཔིཡཔྤཊིགྒཱཧཀཾ ཋཔེཏྭཱ སབྦེཧི བྷཱཛེཏྭཱ པརིབྷུཉྫིཏབྦཾ. རཱུཔིཡཔྤཊིགྒཱཧཀསྶ པན ཡཾ ཏཔྤཙྩཡཱ ཨུཔྤནྣཾ, ཏཾ ཨཉྙེན ལབྷིཏྭཱ དིཡྻམཱནམྤི ཨནྟམསོ ཏཏོ ནིབྦཏྟརུཀྑཙྪཱཡཱཔི པརིབྷུཉྫིཏུཾ ན ཝཊྚཏི. སཙེ པན སོ ཀིཉྩི ཨཱཧརིཏུཾ ན ཨིཙྪཏི, ‘‘ཨིམཾ ཚཊྚེཧཱི’’ཏི ཝཏྟབྦོ. སཙེ ཡཏྠ ཀཏྠཙི ནིཀྑིཔཏི, གཧེཏྭཱ ཝཱ གཙྪཏི, ན ཝཱརེཏབྦོ. ནོ ཙེ ཚཊྚེཏི, པཉྩངྒསམནྣཱགཏོ བྷིཀྑུ རཱུཔིཡཚཊྚཀོ སམྨནྣིཏབྦོ. ཏེན ཨནིམིཏྟཾ ཀཏྭཱཝ གཱུཐཾ ཝིཡ ཚཊྚེཏབྦཾ. སཙེ ནིམིཏྟཾ ཀརོཏི, དུཀྐཊཾ ཨཱཔཛྫཏི.

རཱཛགཧེ ཨུཔནནྡཾ ཨཱརབྦྷ རཱུཔིཡཔྤཊིགྒཧཎཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, སཱཎཏྟིཀཾ, ཏིཀཔཱཙིཏྟིཡཾ, ཨརཱུཔིཡེ རཱུཔིཡསཉྙིནོ ཝེམཏིཀསྶ ཝཱ, སངྒྷཙེཏིཡཱདཱིནཾ ཨཏྠཱཡ གཎྷནྟསྶ, མུཏྟཱམཎིཨཱདིཔྤཊིགྒཧཎེ ཙ དུཀྐཊཾ. རཏནསིཀྑཱཔདནཡེན ནིཀྑིཔནྟསྶ, ཨུམྨཏྟཀཱདཱིནཉྩ ཨནཱཔཏྟི. ཛཱཏརཱུཔརཛཏབྷཱཝོ, ཨཏྟུདྡེསིཀཏཱ, གཧཎཱདཱིསུ ཨཉྙཏརབྷཱཝོཏི ¶ ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིསུ སིཡཱ ཀིརིཡཾ གཧཎེན ཨཱཔཛྫནཏོ, སིཡཱ ཨཀིརིཡཾ པཊིཀྑེཔསྶ ཨཀརཎཏོ, སེསཾ སཉྩརིཏྟེ ཝུཏྟནཡམེཝཱཏི.

ཛཱཏརཱུཔསིཀྑཱཔདཝཎྞནཱ ནིཊྛིཏཱ.

༩. རཱུཔིཡསཾཝོཧཱརསིཀྑཱཔདཝཎྞནཱ

ནཝམེ ནཱནཔྤཀཱརཀནྟི ཀཏཱདིཝསེན ཨནེཀཝིདྷཾ. རཱུཔིཡསཾཝོཧཱརནྟི ཛཱཏརཱུཔརཛཏཔརིཝཏྟནཾ. པུརིམསིཀྑཱཔདེན ཧི ནིསྶགྒིཡཝཏྠུདུཀྐཊཝཏྠཱུནཾ པཊིགྒཧཎཾ ཝཱརིཏཾ, ཨིམིནཱ པརིཝཏྟནཾ. ཏསྨཱ དུཀྐཊཝཏྠུནཱ དུཀྐཊཝཏྠུཀཔྤིཡཝཏྠཱུནི, ཀཔྤིཡཝཏྠུནཱ ཙ དུཀྐཊཝཏྠུཾ པརིཝཏྟེནྟསྶ དུཀྐཊཾ. ནིསྶགྒིཡཝཏྠུནཱ པན ནིསྶགྒིཡཝཏྠུཾ ཝཱ དུཀྐཊཝཏྠུཾ ཝཱ ཀཔྤིཡཝཏྠུཾ ཝཱ, དུཀྐཊཝཏྠུཀཔྤིཡཝཏྠཱུཧི ཙ ནིསྶགྒིཡཝཏྠུཾ པརིཝཏྟེནྟསྶ ནིསྶགྒིཡཾ ཧོཏི, ཏཾ པུརིམནཡཱནུསཱརེནེཝ སངྒྷམཛ྄ཛྷེ ནིསྶཛྫིཏབྦཾ, ནིསྶཊྛཝཏྠུསྨིཉྩ ཏཏྠ ཝུཏྟནཡེནེཝ པཊིཔཛྫིཏབྦཾ.

སཱཝཏྠིཡཾ ¶ ཚབྦགྒིཡེ ཨཱརབྦྷ རཱུཔིཡསཾཝོཧཱརཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཡཾ ཨཏྟནོ དྷནེན པརིཝཏྟེཏི, ཏསྶ ཝཱ དྷནསྶ ཝཱ རཱུཔིཡབྷཱཝོ ཙེཝ, པརིཝཏྟནཉྩཱཏི ཨིམཱནེཏྠ ¶ དྭེ ཨངྒཱནི. ཀིརིཡཾ, སེསཾ ཨནནྟརསིཀྑཱཔདེ ཝུཏྟནཡམེཝཱཏི.

རཱུཔིཡསཾཝོཧཱརསིཀྑཱཔདཝཎྞནཱ ནིཊྛིཏཱ.

༡༠. ཀཡཝིཀྐཡསིཀྑཱཔདཝཎྞནཱ

དསམེ ནཱནཔྤཀཱརཀནྟི ཙཱིཝརཱདཱིནཾ ཀཔྤིཡབྷཎྜཱནཾ ཝསེན ཨནེཀཝིདྷཾ. ཀཡཝིཀྐཡནྟི ཀཡཉྩེཝ ཝིཀྐཡཉྩ. ‘‘ཨིམིནཱ ཨིམཾ དེཧི, ཨིམཾ ཨཱཧར, པརིཝཏྟེཧི, ཙེཏཱཔེཧཱི’’ཏི ཨིམིནཱ ཧི ནཡེན པརསྶ ཀཔྤིཡབྷཎྜཾ གཎྷནྟོ ཀཡཾ སམཱཔཛྫཏི, ཨཏྟནོ ཀཔྤིཡབྷཎྜཾ དེནྟོ ཝིཀྐཡཾ སམཱཔཛྫཏི. ཏསྨཱ ཋཔེཏྭཱ པཉྩ སཧདྷམྨིཀེ ཡཾ ཨེཝཾ ཨཏྟནོ ཀཔྤིཡབྷཎྜཾ དཏྭཱ མཱཏུ སནྟཀམྤི ཀཔྤིཡབྷཎྜཾ གཎྷཱཏི, ཏཾ ནིསྶགྒིཡཾ ཧོཏི. ཝུཏྟལཀྑཎཝསེན སངྒྷགཎཔུགྒལེསུ ཡསྶ ཀསྶཙི ནིསྶཛྫིཏབྦཾ, ‘‘ཨིམཾ བྷུཉྫིཏྭཱ ཝཱ གཧེཏྭཱ ཝཱ ཨིདཾ ནཱམ ཨཱཧར ¶ ཝཱ ཀརོཧི ཝཱ’’ཏི རཛནཱདིཾ ཨཱཧརཱཔེཏྭཱ ཝཱ དྷམཀརཎཱདིཔརིཀྑཱརཾ བྷཱུམིསོདྷནཱདིཉྩ ནཝཀམྨཾ ཀཱརེཏྭཱ ཝཱ སནྟཾ ཝཏྠུ ནིསྶཛྫིཏབྦཾ, ཨསནྟེ པཱཙིཏྟིཡཾ དེསེཏབྦམེཝ.

སཱཝཏྠིཡཾ ཨུཔནནྡཾ ཨཱརབྦྷ ཀཡཝིཀྐཡཝཏྠུསྨིཾ པཉྙཏྟཾ, ‘‘ཨིདཾ ཀིཾ ཨགྒྷཏཱི’’ཏི ཨེཝཾ ཨགྒྷཾ པུཙྪནྟསྶ, ཡསྶ ཧཏྠཏོ བྷཎྜཾ གཎྷིཏུཀཱམོ ཧོཏི, ཏཾ ཋཔེཏྭཱ ཨཉྙཾ ཨནྟམསོ ཏསྶེཝ པུཏྟབྷཱཏུཀམྤི ཀཔྤིཡཀཱརཀཾ ཀཏྭཱ ‘‘ཨིམིནཱ ཨིདཾ ནཱམ གཧེཏྭཱ དེཧཱི’’ཏི ཨཱཙིཀྑནྟསྶ, ‘‘ཨིདཾ ཨམྷཱཀཾ ཨཏྠི, ཨམྷཱཀཉྩ ཨིམིནཱ ཙ ཨིམིནཱ ཙ ཨཏྠོ’’ཏི ཨེཝཾ ཝཏྭཱ ཨཏྟནོ དྷནེན ལདྡྷཾ གཎྷནྟསྶ, སཧདྷམྨིཀེཧི སདྡྷིཾ ཀཡཝིཀྐཡཾ ཀརོནྟསྶ, ཨུམྨཏྟཀཱདཱིནཉྩ ཨནཱཔཏྟི. ཡཾ ཨཏྟནོ དྷནེན པརིཝཏྟེཏི, ཡེན ཙ པརིཝཏྟེཏི, ཏེསཾ ཀཔྤིཡཝཏྠུཏཱ, ཨསཧདྷམྨིཀཏཱ, ཀཡཝིཀྐཡཱཔཛྫནཉྩཱཏི ཨིམཱནེཏྠ ཏཱིཎི ཨངྒཱནི. སེསཾ རཱུཔིཡསཾཝོཧཱརེ ཝུཏྟནཡམེཝཱཏི.

ཀཡཝིཀྐཡསིཀྑཱཔདཝཎྞནཱ ནིཊྛིཏཱ.

ཨེལ༹ཀལོམཝགྒོ དུཏིཡོ.

༣. པཏྟཝགྒོ

༡. པཏྟསིཀྑཱཔདཝཎྞནཱ

པཏྟཝགྒསྶ ¶ པཋམེ ཨཏིརེཀཔཏྟོཏི ཨནདྷིཊྛིཏོ ཙ ཨཝིཀཔྤིཏོ ཙ, སོ ཙ ཁོ ཨུཀྐཊྛམཛ྄ཛྷིམོམཀཱནཾ ཨཉྙཏརོ པམཱཎཡུཏྟོཝ, ཏསྶ པམཱཎཾ ‘‘ཨཌྜྷཱལ༹ྷཀོདནཾ གཎྷཱཏཱི’’ཏིཨཱདིནཱ (པཱརཱ ༦༠༢) ནཡེན པཱལི༹ཡཾ ཝུཏྟཾ. ཏཏྲཱཡཾ ཝིནིཙྪཡོ – ཨནུཔཧཏཔུརཱཎསཱལིཏཎྜུལཱནཾ སུཀོཊྚིཏཔརིསུདྡྷཱནཾ དྭེ མགདྷནཱལི༹ཡོ གཧེཏྭཱ ཏེཧི ཏཎྜུལེཧི ཨནུཏྟཎྜུལམཀིལིནྣམཔིཎྜིཀཾ སུཝིསདཾ ཀུནྡམཀུལ༹རཱསིསདིསཾ ཨཝསྶཱཝིཏོདནཾ པཙིཏྭཱ ནིརཝསེསཾ པཏྟེ པཀྑིཔིཏྭཱ ཏསྶ ཨོདནསྶ ཙཏུཏྠབྷཱགཔྤམཱཎོ ནཱཏིགྷནོ ནཱཏིཏནུཀོ ཧཏྠཧཱརིཡོ སབྦསམྦྷཱརསངྑཏོ མུགྒསཱུཔོ པཀྑིཔིཏབྦོ, ཏཏོ ཨཱལོཔསྶ ཨནུརཱུཔཾ ཡཱཝཙརིམཱལོཔཔྤཧོནཀཾ མཙྪམཾསཱདིབྱཉྫནཾ པཀྑིཔིཏབྦཾ, སཔྤིཏེལཏཀྐརསཀཉྫིཡཱདཱིནི ¶ པན ¶ གཎནཱུཔགཱནི ན ཧོནྟི. ཏཱནི ཧི ཨོདནགཏིཀཱནེཝ, ནེཝ ཧཱཔེཏུཾ, ན ཝཌྜྷེཏུཾ སཀྐོནྟི, ཨེཝམེཏཾ སབྦམྤི པཀྑིཏྟཾ སཙེ པཏྟསྶ མུཁཝཊྚིཡཱ ཧེཊྛིམརཱཛིསམཾ ཏིཊྛཏི, སུཏྟེན ཝཱ ཧཱིརེན ཝཱ ཚིནྡནྟསྶ སུཏྟསྶ ཝཱ ཧཱིརསྶ ཝཱ ཧེཊྛིམནྟཾ ཕུསཏི, ཨཡཾ ཨུཀྐཊྛོ ནཱམ པཏྟོ. སཙེ ཏཾ རཱཛིཾ ཨཏིཀྐམྨ ཐཱུཔཱིཀཏཾ ཏིཊྛཏི, ཨཡཾ ཨུཀྐཊྛོམཀོ ནཱམ པཏྟོ. སཙེ ཏཾ རཱཛིཾ ན སམྤཱཔུཎཱཏི, ཨནྟོགདྷམེཝ ཧོཏི, ཨཡཾ ཨུཀྐཊྛུཀྐཊྛོ ནཱམ པཏྟོ. ཨུཀྐཊྛཏོ ཨུཔཌྜྷཔྤམཱཎོ མཛ྄ཛྷིམོ. མཛ྄ཛྷིམཔཏྟཏོ ཨུཔཌྜྷཔྤམཱཎོ ཨོམཀོ. ཏེསམྤི ཝུཏྟནཡེནེཝ བྷེདོ ཝེདིཏབྦོ. ཨིཙྩེཏེསུ ནཝསུ ཨུཀྐཊྛུཀྐཊྛོ ཙ ཨོམཀོམཀོ ཙཱཏི དྭེ ཨཔཏྟཱ, སེསཱ སཏྟ པཏྟཱ པམཱཎཡུཏྟཱ ནཱམ, ཨཡམེཏྠསངྑེཔོ, ཝིཏྠཱརོ པན སམནྟཔཱསཱདིཀཱཡཾ (པཱརཱ. ཨཊྛ. ༢.༥༩༨ ཨཱདཡོ) ཝུཏྟོ, ཏསྨཱ ཨེཝཾ པམཱཎཡུཏྟཾ སམཎསཱརུཔྤེན པཀྐཾ ཨཡོཔཏྟཾ ཝཱ མཏྟིཀཱཔཏྟཾ ཝཱ ལབྷིཏྭཱ པུརཱཎཔཏྟཾ པཙྩུདྡྷརིཏྭཱ ཨནྟོདསཱཧེ ཨདྷིཊྛཱཏབྦོ. སཙེ པནསྶ མཱུལཏོ ཀཱཀཎིཀམཏྟམྤི དཱཏབྦཾ ཨཝསིཊྛཾ ཧོཏི, ཨདྷིཊྛཱནུཔགོ ན ཧོཏི, ཨཔྤཙྩུདྡྷརནྟེན ཝིཀཔྤེཏབྦོ. ཏཏྠ པཙྩུདྡྷརཎཱདྷིཊྛཱནལཀྑཎཾ ཙཱིཝརཝགྒེ ཝུཏྟནཡེནེཝ ཝེདིཏབྦཾ, ཝིཀཔྤནལཀྑཎཾ པརཏོ ཝཀྑཱམ. སཙེ པན ཀོཙི ཨཔཏྟཀོ བྷིཀྑུ དས པཏྟེ ལབྷིཏྭཱ སབྦེ ཨཏྟནཱཝ པརིབྷུཉྫིཏུཀཱམོ ཧོཏི, ཨེཀཾ པཏྟཾ ཨདྷིཊྛཱཡ པུན དིཝསེ ཏཾ པཙྩུདྡྷརིཏྭཱ ཨཉྙོ ཨདྷིཊྛཱཏབྦོ, ཨེཏེནུཔཱཡེན ཝསྶསཏམྤི ¶ པརིཧརིཏུཾ སཀྐཱ. ཡོ པནསྶ པཏྟོ མུཁཝཊྚིཏོ ཧེཊྛཱ དྭངྒུལམཏྟོཀཱསཏོ པཊྛཱཡ ཡཏྠཀཏྠཙི ཀངྒུསིཏྠནིཀྑམནམཏྟེན ཚིདྡེན ཚིདྡོ ཧོཏི, སོ ཨདྷིཊྛཱནུཔགོ ན ཧོཏི. པུན ཚིདྡེ པཱཀཏིཀེ ཀཏེ ཨདྷིཊྛཱཏབྦོ, སེསཾ ཨདྷིཊྛཱནཝིཛཧནཾ ཏིཙཱིཝརེ ཝུཏྟནཡམེཝ.

སཱཝཏྠིཡཾ ཚབྦགྒིཡེ ཨཱརབྦྷ ཨཏིརེཀཔཏྟདྷཱརཎཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, སེསཝཎྞནཱཀྐམོ ཙཱིཝརཝགྒསྶ པཋམསིཀྑཱཔདེ ཝུཏྟནཡེནེཝ ཝེདིཏབྦོཏི.

པཏྟསིཀྑཱཔདཝཎྞནཱ ནིཊྛིཏཱ.

༢. ཨཱུནཔཉྩབནྡྷནསིཀྑཱཔདཝཎྞནཱ

དུཏིཡེ ཨཱུནཱནི པཉྩ བནྡྷནཱནི ཨསྶཱཏི ཨཱུནཔཉྩབནྡྷནོ, ནཱསྶ པཉྩ བནྡྷནཱནི པཱུརེནྟཱིཏི ཨཏྠོ, ཏེན ཨཱུནཔཉྩབནྡྷནེན, ཨིཏྠམྦྷཱུཏསྶ ལཀྑཎེ ཀརཎཝཙནཾ. ཏཏྠ ཡསྨཱ ཨབནྡྷནསྶཱཔི པཉྩ བནྡྷནཱནི ན པཱུརེནྟི སབྦསོ ནཏྠིཏཱཡ, ཏེནསྶ པདབྷཱཛནེ ‘‘ཨཱུནཔཉྩབནྡྷནོ ནཱམ པཏྟོ ཨབནྡྷནོ ཝཱ ཨེཀབནྡྷནོ ཝཱ’’ཏིཨཱདི (པཱརཱ. ༦༡༣) ཝུཏྟཾ. ‘‘ཨཱུནཔཉྩབནྡྷནེནཱ’’ཏི ¶ ཙ ཝུཏྟཏྟཱ ཡསྶ པཉྩབནྡྷནོ པཏྟོ ཧོཏི པཉྩབནྡྷནོཀཱསོ ཝཱ, ཏསྶ སོ ཨཔཏྟོ, ཏསྨཱ ཨཉྙཾ ཝིཉྙཱཔེཏུཾ ཝཊྚཏི. ཡསྨིཾ པན པཏྟེ མུཁཝཊྚིཏོ ཧེཊྛཱ བྷཊྛཱ དྭངྒུལཔྤམཱཎཱ ཨེཀཱཔི རཱཛི ཧོཏི, ཏཾ ¶ ཏསྶཱ རཱཛིཡཱ ཧེཊྛིམཔརིཡནྟེ པཏྟཝེདྷཀེན ཝིཛ྄ཛྷིཏྭཱ པཙིཏྭཱ སུཏྟརཛྫུཀམཀཙིརཛྫུཀཱདཱིཧི ཝཱ ཏིཔུསུཏྟཀེན ཝཱ བནྡྷིཏྭཱ ཏཾ བནྡྷནཾ ཨཱམིསསྶ ཨལགྒནཏྠཾ ཏིཔུཔཊྚཀེན ཝཱ ཀེནཙི བདྡྷསིལེསཱདིནཱ ཝཱ པཊིཙྪཱདེཏབྦཾ, སོ ཙ པཏྟོ ཨདྷིཊྛཧིཏྭཱ པརིབྷུཉྫིཏབྦོ, སུཁུམཾ ཝཱ ཚིདྡཾ ཀཏྭཱ བནྡྷིཏབྦོ, ཕཱཎིཏཾ ཛྷཱཔེཏྭཱ པཱསཱཎཙུཎྞེན བནྡྷིཏུམྤི ཝཊྚཏི. ཡསྶ པན དྭེ རཱཛིཡོ ཝཱ ཨེཀཱཡེཝ ཝཱ ཙཏུརངྒུལཱ, ཏསྶ དྭེ བནྡྷནཱནི དཱཏབྦཱནི. ཡསྶ ཏིསྶོ ཝཱ ཨེཀཱཡེཝ ཝཱ ཚལ༹ངྒུལཱ, ཏསྶ ཏཱིཎི. ཡསྶ ཙཏསྶོ ཝཱ ཨེཀཱཡེཝ ཝཱ ཨཊྛངྒུལཱ, ཏསྶ ཙཏྟཱརི. ཡསྶ པཉྩ ཝཱ ཨེཀཱཡེཝ ཝཱ དསངྒུལཱ, སོ བདྡྷོཔི ཨབདྡྷོཔི ཨཔཏྟོཡེཝ, ཨཉྙོ ཝིཉྙཱཔེཏབྦོ, ཨེས ཏཱཝ མཏྟིཀཱཔཏྟེ ཝིནིཙྪཡོ.

ཨཡོཔཏྟེ ¶ པན སཙེཔི པཉྩ ཝཱ ཨཏིརེཀཱནི ཝཱ ཚིདྡཱནི ཧོནྟི, ཏཱནི ཙེ ཨཡཙུཎྞེན ཝཱ ཨཱཎིཡཱ ཝཱ ལོཧམཎྜལེན ཝཱ བདྡྷཱནི མཊྛཱནི ཧོནྟི, སྭེཝ པརིབྷུཉྫིཏབྦོ, ཨཉྙོ ན ཝིཉྙཱཔེཏབྦོ. ཨཐ པན ཨེཀམྤི ཚིདྡཾ མཧནྟཾ ཧོཏི, ལོཧམཎྜལེན བདྡྷམྤི མཊྛཾ ན ཧོཏི, པཏྟེ ཨཱམིསཾ ལགྒཏི, ཨཀཔྤིཡོ ཧོཏི ཨཡཾ པཏྟོ, ཨཉྙོ ཝིཉྙཱཔེཏབྦོ. ཡོ པན ཨེཝཾ པཏྟསངྑེཔགཏེ ཝཱ ཨཡོཔཏྟེ, ཨཱུནཔཉྩབནྡྷནེ ཝཱ མཏྟིཀཱཔཏྟེ སཏི ཨཉྙཾ ཝིཉྙཱཔེཏི, པཡོགེ དུཀྐཊཾ, པཊིལཱབྷེན ནིསྶགྒིཡོ ཧོཏི, ནིསྶཛྫིཏབྦོ. ནིསྶཛྫནྟེན སངྒྷམཛ྄ཛྷེ ཨེཝ ནིསྶཛྫིཏབྦོ, ཏེན ཝུཏྟཾ ‘‘བྷིཀྑུཔརིསཱཡ ནིསྶཛྫིཏབྦོ’’ཏི. ཡོ ཙ ཏསྶཱ བྷིཀྑུཔརིསཱཡཱཏིཨེཏྠ ཏེཧི བྷིཀྑཱུཧི པཀཏིཡཱ ཨེཝ ཨཏྟནོ ཨཏྟནོ ཨདྷིཊྛིཏཾ པཏྟཾ གཧེཏྭཱ སནྣིཔཏིཏབྦཾ, ཏཏོ སམྨཏེན པཏྟགྒཱཧཱཔཀེན པཏྟསྶ ཝིཛྫམཱནགུཎཾ ཝཏྭཱ ‘‘བྷནྟེ, ཨིམཾ གཎྷཐཱ’’ཏི ཐེརོ ཝཏྟབྦོ. སཙེ ཐེརསྶ སོ པཏྟོ ན རུཙྩཏི, ཨཔྤིཙྪཏཱཡ ཝཱ ན གཎྷཱཏི, ཝཊྚཏི. ཏསྨིཾ པན ཨནུཀམྤཱཡ ཨགཎྷནྟསྶ དུཀྐཊཾ. སཙེ པན གཎྷཱཏི, ཐེརསྶ པཏྟཾ དུཏིཡཏྠེརཾ གཱཧཱཔེཏྭཱ ཨེཏེནེཝ ཨུཔཱཡེན ཡཱཝ སངྒྷནཝཀཱ གཱཧཱཔེཏབྦོ, ཏེན པརིཙྩཏྟཔཏྟོ པན པཏྟཔརིཡནྟོ ནཱམ, སོ ཏསྶ བྷིཀྑུནོ པདཱཏབྦོ. ཏེནཱཔི སོ ཡཐཱ ཝིཉྙཱཔེཏྭཱ གཧིཏཔཏྟོ, ཨེཝམེཝ སཀྐཙྩཾ པརིབྷུཉྫིཏབྦོ. སཙེ པན ཏཾ ཛིགུཙྪནྟོ ཨདེསེ ཝཱ ནིཀྑིཔཏི, ཨཔརིབྷོགེན ཝཱ པརིབྷུཉྫཏི, ཝིསྶཛྫེཏི ཝཱ, དུཀྐཊཾ ཨཱཔཛྫཏི.

སཀྐེསུ ཚབྦགྒིཡེ ཨཱརབྦྷ བཧཱུ པཏྟེ ཝིཉྙཱཔནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ ¶ , ཨབནྡྷནེན ཨབནྡྷནཾ, ཨེཀབནྡྷནཾ, དུབནྡྷནཾ, ཏིབནྡྷནཾ, ཙཏུབྦནྡྷནཾ, ཨབནྡྷནོཀཱསཾ, ཨེཀདྭིཏིཙཏུབྦནྡྷནོཀཱསཾ ཙེཏཱཔེཏི, ཨེཝཾ ཨེཀེཀེན པཏྟེན དསདྷཱ དསཝིདྷཾ པཏྟཾ. ཙེཏཱཔནཝསེན པན ཨེཀཾ ནིསྶགྒིཡཔཱཙིཏྟིཡསཏཾ ཧོཏི. ནཊྛཔཏྟསྶ, བྷིནྣཔཏྟསྶ, ཨཏྟནོ ཉཱཏཀཔྤཝཱརིཏེ, ཨཉྙསྶ ཙ ཉཱཏཀཔྤཝཱརིཏེ, ཏསྶེཝཏྠཱཡ ཝིཉྙཱཔེནྟསྶ, ཨཏྟནོ དྷནེན གཎྷཏོ, ཨུམྨཏྟཀཱདཱིནཉྩ ཨནཱཔཏྟི. ཨདྷིཊྛཱནུཔགཔཏྟསྶ ཨཱུནཔཉྩབནྡྷནཏཱ, ཨཏྟུདྡེསིཀཏཱ, ཨཀཏཝིཉྙཏྟི ¶ , ཏཱཡ ཙ པཊིལཱབྷོཏི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི དྷོཝཱཔནསིཀྑཱཔདེ ཝུཏྟནཡཱནེཝཱཏི.

ཨཱུནཔཉྩབནྡྷནསིཀྑཱཔདཝཎྞནཱ ནིཊྛིཏཱ.

༣. བྷེསཛྫསིཀྑཱཔདཝཎྞནཱ

ཏཏིཡེ ¶ པཊིསཱཡནཱིཡཱནཱིཏི པཊིསཱཡིཏབྦཱནི, པརིབྷུཉྫིཏབྦཱནཱིཏི ཨཏྠོ. ཨེཏེན སཡཾ ཨུགྒཧེཏྭཱ ནིཀྑིཏྟཱནཾ སཏྟཱཧཱཏིཀྐམེཔི ཨནཱཔཏྟིཾ དསྶེཏི, ཏཱནི ཧི པཊིསཱཡིཏུཾ ན ཝཊྚནྟི. བྷེསཛྫཱནཱིཏི བྷེསཛྫཀིཙྩཾ ཀརོནྟུ ཝཱ, མཱ ཝཱ, ཨེཝཾ ལདྡྷཝོཧཱརཱནི. སཔྤི ནཱམ གཝཱདཱིནཾ སཔྤི, ཡེསཾ མཾསཾ ཀཔྤཏི, ཏེསཾ སཔྤི. ཏཐཱ ནཝནཱིཏཾ. ཏེལཾ ནཱམ ཏིལསཱསཔམདྷཱུཀཨེརཎྜཀཝསཱདཱིཧི ནིབྦཏྟིཏཾ. མདྷུ ནཱམ མཀྑིཀཱམདྷུམེཝ. ཕཱཎིཏཾ ནཱམ ཨུཙྪུརསཾ ཨུཔཱདཱཡ པན ཨཔཀྐཱ ཝཱ ཨཝཏྠུཀཔཀྐཱ ཝཱ སབྦཱཔི ཨུཙྪུཝིཀཏི ‘‘ཕཱཎིཏ’’ནྟི ཝེདིཏབྦཾ. ཏཱནི པཊིགྒཧེཏྭཱཏི ཏཱནི བྷེསཛྫཱནི པཊིགྒཧེཏྭཱ, ན ཏེསཾ ཝཏྠཱུནི. ཨེཏེན ཋཔེཏྭཱ ཝསཱཏེལཾ ཡཱནེཏྠ ཡཱཝཀཱལིཀཝཏྠུཀཱནི, ཏེསཾ ཝཏྠཱུནི པཊིགྒཧེཏྭཱ ཀཏཱནི སཔྤིཨཱདཱིནི སཏྟཱཧཾ ཨཏིཀྐཱམཡཏོཔི ཨནཱཔཏྟིཾ དསྶེཏི. ཝསཱཏེལཾ པན ཀཱལེ པཊིགྒཧིཏཾ ཀཱལེ ནིཔཀྐཾ ཀཱལེ སཾསཊྛཾ ཏེལཔརིབྷོགེན པརིབྷུཉྫིཏུཾ ཨནུཉྙཱཏཾ, ཏསྨཱ ཋཔེཏྭཱ མནུསྶཝསཾ ཨཉྙཾ ཡཾཀཉྩི ཝསཾ པུརེབྷཏྟཾ པཊིགྒཧེཏྭཱ སཱམཾ པཙིཏྭཱ ནིབྦཏྟིཏཏེལམྤི སཏྟཱཧཾ ནིརཱམིསཔརིབྷོགེན ཝཊྚཏི. ཨནུཔསམྤནྣེན པཙིཏྭཱ དིནྣཾ པན ཏདཧུཔུརེབྷཏྟཾ སཱམིསམྤི ཝཊྚཏི, ཨཉྙེསཾ ཡཱཝཀཱལིཀཝཏྠཱུནཾ ཝཏྠུཾ པཙིཏུཾ ན ཝཊྚཏིཡེཝ. ནིབྦཏྟིཏསཔྤི ཝཱ ནཝནཱིཏཾ ཝཱ པཙིཏུཾ ཝཊྚཏི, ཏཾ པན ཏདཧུཔུརེབྷཏྟམྤི སཱམིསཾ པརིབྷུཉྫིཏུཾ ན ཝཊྚཏི. པུརེབྷཏྟཾ པཊིགྒཧིཏཁཱིརཱདིཏོ ཨནུཔསམྤནྣེན པཙིཏྭཱ ཀཏསཔྤིཨཱདཱིནི པན ཏདཧུཔུརེབྷཏྟཾ སཱམིསཱནིཔི ཝཊྚནྟི, པཙྪཱབྷཏྟཏོ པཊྛཱཡ ཨནཛ྄ཛྷོཧརཎཱིཡཱནི, སཏྟཱཧཱཏིཀྐམེཔི ཨནཱཔཏྟི. སནྣིདྷིཀཱརཀཾ པརིབྷུཉྫིཏབྦཱནཱིཏི སནྣིདྷིཾ ཀཏྭཱ ནིདཧིཏྭཱ པུརེབྷཏྟཾ པཊིགྒཧིཏཱནི ཏདཧུཔུརེབྷཏྟཾ སཱམིསཔརིབྷོགེནཱཔི ཝཊྚནྟི, པཙྪཱབྷཏྟཏོ ¶ པཊྛཱཡ པན ཏཱནི ཙ, པཙྪཱབྷཏྟཾ པཊིགྒཧིཏཱནི ཙ སཏྟཱཧཾ ནིརཱམིསཔརིབྷོགེན པརིབྷུཉྫིཏབྦཱནཱིཏི ཨཏྠོ. ‘‘པརིབྷུཉྫིཏབྦཱནཱི’’ཏི ཙ ཝཙནཏོ ཨནྟོསཏྟཱཧེ ཨབྦྷཉྫནཱདཱིནཾ ཨཏྠཱཡ ཨདྷིཊྛཧིཏྭཱ ཋཔིཏེསུ ཨནཱཔཏྟི, ཡཱཝཛཱིཝིཀཱནི སཱསཔམདྷཱུཀཨེརཎྜཀཨཊྛཱིནི ཏེལཀརཎཏྠཾ པཊིགྒཧེཏྭཱ ཏདཧེཝ ཀཏཏེལཾ སཏྟཱཧཀཱལིཀཾ, དུཏིཡདིཝསེ ཀཏཾ ཚཱཧཾ ཝཊྚཏི, ཏཏིཡདིཝསེ ཀཏཾ པཉྩཱཧཾ, ཙཏུཏྠཔཉྩམཚཊྛསཏྟམདིཝསེ ཀཏཾ ཏདཧེཝ ཝཊྚཏི. སཙེ ཡཱཝ ཨརུཎསྶ ཨུགྒམནཱ ¶ ཏིཊྛཏི, ནིསྶགྒིཡཾ ཧོཏི, ཨཊྛམདིཝསེ ཀཏཾ ཨནཛ྄ཛྷོཧརཎཱིཡཾ, ཨནིསྶགྒིཡཏྟཱ པན བཱཧིརཔརིབྷོགེན ཝཊྚཏི. སཙེཔི ན ཀརོཏི, ཏེལཏྠཱཡ པཊིགྒཧིཏསཱསཔཱདཱིནཾ པན པཱལི༹ཡཾ ཨནཱགཏསཔྤིཨཱདཱིནཉྩ ¶ སཏྟཱཧཱཏིཀྐམེ དུཀྐཊཾ ཨཱཔཛྫཏི. སཱིཏུདཀེན ཀཏམདྷཱུཀཔུཔྥཕཱཎིཏཾ པན ཕཱཎིཏགཏིཀམེཝ, ཨམྦཕཱཎིཏཱདཱིནི ཡཱཝཀཱལིཀཱནི. ཡཾ པནེཏྠ སཏྟཱཧཀཱལིཀཾ, ཏཾ ནིསྶཊྛཾ པཊིལབྷིཏྭཱཔི ཨརུཨཱདཱིནི ཝཱ མཀྑེཏུཾ, ཨཛ྄ཛྷོཧརིཏུཾ ཝཱ ན ཝཊྚཏི. པདཱིཔེ ཀཱལ༹ཝཎྞེ ཝཱ ཨུཔནེཏབྦཾ, ཨཉྙསྶ བྷིཀྑུནོ ཀཱཡིཀཔརིབྷོགཾ ཝཊྚཏི. ཡཾ པན ནིརཔེཀྑོ པརིཙྩཛིཏྭཱ པུན ལབྷཏི, ཏཾ ཨཛ྄ཛྷོཧརིཏུམྤི ཝཊྚཏི. ཝིསུཾ ཋཔིཏསཔྤིཨཱདཱིསུ, ཨེཀབྷཱཛནེ ཝཱ ཨམིསྶིཏེསུ ཝཏྠུགཎནཱཡ ཨཱཔཏྟིཡོ.

སཱཝཏྠིཡཾ སམྦཧུལེ བྷིཀྑཱུ ཨཱརབྦྷ སཏྟཱཧཾ ཨཏིཀྐམནཝཏྠུསྨིཾ པཉྙཏྟཾ, སེསཾ ཙཱིཝརཝགྒསྶ པཋམསིཀྑཱཔདེ ཝུཏྟནཡེནེཝ ཝེདིཏབྦནྟི.

བྷེསཛྫསིཀྑཱཔདཝཎྞནཱ ནིཊྛིཏཱ.

༤. ཝསྶིཀསཱཊིཀསིཀྑཱཔདཝཎྞནཱ

ཙཏུཏྠེ མཱསོ སེསོ གིམྷཱནནྟི ཙཏུནྣཾ གིམྷམཱསཱནཾ ཨེཀོ པཙྪིམམཱསོ སེསོ. པརིཡེསིཏབྦནྟི གིམྷཱནཾ པཙྪིམམཱསསྶ པཋམདིཝསཏོ པཊྛཱཡ ཡཱཝ ཀཏྟིཀམཱསསྶ པཙྪིམདིཝསོ, ཏཱཝ ‘‘ཀཱལོ ཝསྶིཀསཱཊིཀཱཡཱ’’ཏིཨཱདིནཱ སཏུཔྤཱདཀརཎེན, སངྒྷསྶ པཝཱརིཏཊྛཱནཏོ, ཨཏྟནོ ཉཱཏཀཔྤཝཱརིཏཊྛཱནཏོ པན ‘‘དེཐ མེ ཝསྶིཀསཱཊིཀཙཱིཝར’’ནྟིཨཱདིཀཱཡ ཝིཉྙཏྟིཡཱཔི པརིཡེསིཏབྦཾ. ཨཉྙཱཏཀཨཔྤཝཱརིཏཊྛཱནེ སཏུཔྤཱདཾ ཀརོནྟསྶ ཝཏྟབྷེདེ དུཀྐཊཾ, ཡཐཱ ཝཱ ཏཐཱ ཝཱ ‘‘དེཐ མེ’’ཏིཨཱདིཝཙནེན ཝིཉྙཱཔེནྟསྶ ཨཉྙཱཏཀཝིཉྙཏྟིསིཀྑཱཔདེན ནིསྶགྒིཡཾ པཱཙིཏྟིཡཾ. ཀཏྭཱ ནིཝཱསེཏབྦནྟི གིམྷཱནཾ པཙྪིམདྡྷམཱསསྶ པཋམདིཝསཏོ པཊྛཱཡ ཡཱཝ ཀཏྟིཀམཱསསྶ པཙྪིམདིཝསོ, ཏཱཝ སཱུཙིཀམྨནིཊྛཱནེན ¶ སཀིམྤི ཝཎྞབྷེདམཏྟརཛནེན ཀཔྤབིནྡུཀརཎེན ཙ ཀཏྭཱ པརིདཧིཏབྦཱ. ཨེཏྟཱཝཏཱ གིམྷཱནཾ པཙྪིམོ མཱསོ པརིཡེསནཀྑེཏྟཾ ¶ , པཙྪིམོ ཨདྡྷམཱསོ ཀརཎནིཝཱསནཀྑེཏྟམྤི, ཝསྶཱནསྶ ཙཏཱུསུ མཱསེསུ སབྦམྤི ཏཾ ཝཊྚཏཱིཏི ཨཡམཏྠོ དསྶིཏོ ཧོཏི. ཡོ ཙཱཡཾ གིམྷཱནཾ པཙྪིམོ མཱསོ ཨནུཉྙཱཏོ, ཨེཏྠ ཀཏཔརིཡེསིཏམྤི ཝསྶིཀསཱཊིཀཾ ཨདྷིཊྛཱཏུཾ ན ཝཊྚཏི. སཙེ ཏསྨིཾ མཱསེ ཨཏིཀྐནྟེ ཝསྶཾ ཨུཀྐཌྜྷིཡཏི, པུན མཱསཔརིཧཱརཾ ལབྷཏི, དྷོཝིཏྭཱ པན ནིཀྑིཔིཏྭཱ ཝསྶཱུཔནཱཡིཀདིཝསེ ཨདྷིཊྛཱཏབྦཱ. སཙེ སཏིསམྨོསེན ཝཱ ཨཔྤཧོནཀབྷཱཝེན ཝཱ ཨཀཏཱ ཧོཏི. ཏེ ཙ དྭེ མཱསེ ཝསྶཱནསྶ ཙཏུམཱསནྟི ཚ མཱསེ པརིཧཱརཾ ལབྷཏི. སཙེ པན ཀཏྟིཀམཱསེ ཀཐིནཾ ཨཏྠརིཡཏི, ཨཔརེཔི ཙཏྟཱརོ མཱསེ ལབྷཏི, ཨེཝཾ དས མཱསཱ ཧོནྟི. ཏཏོ པརམྤི སཏིཡཱ པཙྩཱསཱཡ ཏཾ མཱུལཙཱིཝརཾ ཀཏྭཱ ཋཔེནྟསྶ ཨེཀམཱསནྟི ཨེཝཾ ཨེཀཱདས མཱསེ པརིཧཱརཾ ལབྷཏི, ཨིཏོ པརཾ ཨེཀཱཧམྤི ན ལབྷཏི.

ཨོརེན ཙེ མཱསོ ¶ སེསོ གིམྷཱནནྟི གིམྷཱནཾ པཙྪིམམཱསསྶ ཨོརིམབྷཱགེ ཡཱཝ ཧེམནྟསྶ པཋམདིཝསོ, ཏཱཝཱཏི ཨཏྠོ. པརིཡེསེཡྻཱཏི ཨེཏེསུ སཏྟསུ པིཊྛིསམཡམཱསེསུ ཨཉྙཱཏཀཨཔྤཝཱརིཏཊྛཱནཏོ སཏུཔྤཱདཀརཎེན པརིཡེསནྟསྶ ནིསྶགྒིཡཾ པཱཙིཏྟིཡཾ, ཝིཉྙཱཔེནྟསྶ ཨཉྙཱཏཀཝིཉྙཏྟིསིཀྑཱཔདེན ནིསྶགྒིཡཾ པཱཙིཏྟིཡཾ, ཉཱཏཀཔྤཝཱརིཏེ ཝིཉྙཱཔེནྟསྶ ཏེན སིཀྑཱཔདེན ཨནཱཔཏྟི, སཏུཔྤཱདཾ ཀརོནྟསྶ ཨིམིནཱ སིཀྑཱཔདེན ཨཱཔཏྟི. ཨོརེནདྡྷམཱསོ སེསོ གིམྷཱནནྟི གིམྷཱནསྶ པཙྪིམདྡྷམཱསཏོ ཨོརིམབྷཱགེ ཨེཀསྨིཾ ཨདྡྷམཱསེ. ཀཏྭཱ ནིཝཱསེཡྻཱཏི ཨེཏྠནྟརེ དྷམྨེན ཨུཔྤནྣམྤི ཀཏྭཱ ནིཝཱསེནྟསྶ ནིསྶགྒིཡཾ ཧོཏི.

སཱཝཏྠིཡཾ ཚབྦགྒིཡེ བྷིཀྑཱུ ཨཱརབྦྷ ཝསྶིཀསཱཊིཀཔརིཡེསནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཨཱུནཀམཱསདྡྷམཱསེསུ ཨཏིརེཀསཉྙིནོ ཝེམཏིཀསྶ ཝཱ དུཀྐཊཾ, ཏཐཱ སཏིཡཱ ཝསྶིཀསཱཊིཀཱཡ ནགྒསྶ ཀཱཡཾ ཨོཝསྶཱཔཡཏོ. པོཀྑརཎིཡཱདཱིསུ པན ནྷཱཡནྟསྶ ཝཱ ཨཙྪིནྣཙཱིཝརསྶ ཝཱ ནཊྛཙཱིཝརསྶ ཝཱ ‘‘ཨནིཝཏྠཾ ཙོརཱ ཧརནྟཱི’’ཏི ཨེཝཾ ཨཱཔདཱསུ ཝཱ ནིཝཱསཡཏོ ཨུམྨཏྟཀཱདཱིནཉྩ ཨནཱཔཏྟི. ཨེཏྠ ཙ ཝསྶིཀསཱཊིཀཱཡ ཨཏྟུདྡེསིཀཏཱ, ཨསམཡེ པརིཡེསནཏཱ, ཏཱཡ ཙ པཊིལཱབྷོཏི ཨིམཱནི ཏཱཝ པརིཡེསནཱཔཏྟིཡཱ ཏཱིཎི ཨངྒཱནི ¶ . སཙཱིཝརཏཱ, ཨཱཔདཱབྷཱཝོ, ཝསྶིཀསཱཊིཀཱཡ སཀབྷཱཝོ, ཨསམཡེ ནིཝཱསནནྟི ཨིམཱནི ནིཝཱསནཱཔཏྟིཡཱ ཙཏྟཱརི ཨངྒཱནི. སམུཊྛཱནཱདཱིནི དྷོཝཱཔནསིཀྑཱཔདེ ཝུཏྟནཡཱནེཝཱཏི.

ཝསྶིཀསཱཊིཀསིཀྑཱཔདཝཎྞནཱ ནིཊྛིཏཱ.

༥. ཙཱིཝརཨཙྪིནྡནསིཀྑཱཔདཝཎྞནཱ

པཉྩམེ ¶ སཱམཾ ཙཱིཝརཾ དཏྭཱཏི ཝེཡྻཱཝཙྩཱདཱིནི པཙྩཱསིསམཱནོ སཡམེཝ དཏྭཱ. ཨཙྪིནྡེཡྻཱཏི ཝེཡྻཱཝཙྩཱདཱིནི ཨཀརོནྟཾ དིསྭཱ སཀསཉྙཱཡ ཨཙྪིནྡནྟསྶ ཝཏྠུགཎནཱཡ ཨཱཔཏྟིཡོ. ཨཙྪིནྡཱཔེཡྻཱཏིཨེཏྠ པན ‘‘ཨཙྪིནྡཱ’’ཏི ཨཱཎཏྟིཡཱ དུཀྐཊཾ, ཨཙྪིནྡེསུ ཡཏྟཀཱནི ཨཱཎཏྟཱནི, ཏེསཾ གཎནཱཡ ཨཱཔཏྟིཡོ.

སཱཝཏྠིཡཾ ཨུཔནནྡཾ ཨཱརབྦྷ ཙཱིཝརཨཙྪིནྡནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, སཱཎཏྟིཀཾ, ཏིཀཔཱཙིཏྟིཡཾ. ཨནུཔསམྤནྣེ ཨུཔསམྤནྣསཉྙིནོ, ཝེམཏིཀསྶ, ཨནུཔསམྤནྣསཉྙིནོ ཝཱ, ཨུཔསམྤནྣསྶཱཔི ཝིཀཔྤནུཔགཔཙྪིམཙཱིཝརཾ ཋཔེཏྭཱ ཨཉྙཾ པརིཀྑཱརཾ, ཨནུཔསམྤནྣསྶ ཙ ཡཾཀིཉྩི ཨཙྪིནྡཏོ ཝཱ དུཀྐཊཾ. ཏེན ཏུཊྛེན ཝཱ ཀུཔིཏེན ཝཱ དིནྣཾ པན ཏསྶ ཝིསྶཱསཾ ཝཱ གཎྷནྟསྶ ཨུམྨཏྟཀཱདཱིནཉྩ ཨནཱཔཏྟི. ཝིཀཔྤནུཔགཔཙྪིམཙཱིཝརཏཱ, སཱམཾ དིནྣཏཱ, སཀསཉྙིཏཱ, ཨུཔསམྤནྣཏཱ, ཀོདྷཝསེན ཨཙྪིནྡནཾ ཝཱ ཨཙྪིནྡཱཔནཾ ཝཱཏི ཨིམཱནེཏྠ པཉྩ ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནི ཨཉྙཏྲ ཝེདནཱཡ. ཝེདནཱ པན ཨིདྷ དུཀྑཝེདནཱཡེཝཱཏི.

ཙཱིཝརཨཙྪིནྡནསིཀྑཱཔདཝཎྞནཱ ནིཊྛིཏཱ.

༦. སུཏྟཝིཉྙཏྟིསིཀྑཱཔདཝཎྞནཱ

ཚཊྛེ ¶ སུཏྟནྟི ཚབྦིདྷཾ ཁོམསུཏྟཱདིཾ ཝཱ ཏེསཾ ཨནུལོམཾ ཝཱ. ཝིཉྙཱཔེཏྭཱཏི ཙཱིཝརཏྠཱཡ ཡཱཙིཏྭཱ. ཝཱཡཱཔེཡྻཱཏི ‘‘ཙཱིཝརཾ མེ, ཨཱཝུསོ, ཝཱཡཐཱ’’ཏི ཨཀཔྤིཡཱཡ ཝིཉྙཏྟིཡཱ ཝཱཡཱཔེཡྻ. ནིསྶགྒིཡནྟི ཨེཝཾ ¶ ཝཱཡཱཔེནྟསྶ ཡོ ཏནྟཝཱཡོ ཙཱིཝརཝཱཡནཏྠཾ ཏུརིཝེམསཛྫནཱདིཀེ པཡོགེ ཀརོཏི, ཏསྶ སབྦཔྤཡོགེསུ དུཀྐཊཾ, པཊིལཱབྷེན ནིསྶགྒིཡཾ ཧོཏི.

རཱཛགཧེ ཚབྦགྒིཡེ བྷིཀྑཱུ ཨཱརབྦྷ ཙཱིཝརཝཱཡཱཔནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཝིཉྙཱཔིཏསུཏྟཾ ཝིཉྙཱཔིཏཏནྟཝཱཡེན ཝཱཡཱཔེནྟསྶ དཱིགྷཏོ ཝིདཏྠིམཏྟེ ཏིརིཡཉྩ ཧཏྠམཏྟེ ཝཱིཏེ ནིསྶགྒིཡཾ པཱཙིཏྟིཡཾ. ཨིཏི ཡཱཝ ཙཱིཝརཾ ཝཌྜྷཏི, ཏཱཝ ཨིམིནཱ པམཱཎེན ཨཱཔཏྟིཡོ ཝཌྜྷནྟི. ཏེནེཝ པན ཨཝིཉྙཏྟིཡཱ ལདྡྷསུཏྟཾ ཝཱཡཱཔེནྟསྶ ཡཐཱ པུབྦེ ནིསྶགྒིཡཾ ¶ , ཨེཝཾ ཨིདྷ དུཀྐཊཾ. ཏེནེཝ ཝིཉྙཏྟཉྩ ཨཝིཉྙཏྟཉྩ ཝཱཡཱཔེནྟསྶ སཙེ ཝུཏྟཔྤམཱཎེན ཀེདཱརབདྡྷཾ ཝིཡ ཙཱིཝརཾ ཧོཏི, ཨཀཔྤིཡསུཏྟམཡེ པརིཙྪེདེ པཱཙིཏྟིཡཾ, ཨིཏརསྨིཾ ཏཐེཝ དུཀྐཊཾ. ཏཏོ ཙེ ཨཱུནཏརཱ པརིཙྪེདཱ, སབྦཔརིཙྪེདེསུ དུཀྐཊཱནེཝ. ཨཐ ཨེཀནྟརིཀེན ཝཱ སུཏྟེན དཱིགྷཏོ ཝཱ ཀཔྤིཡཾ ཏིརིཡཾ ཨཀཔྤིཡཾ ཀཏྭཱ ཝཱིཏཾ ཧོཏི, པུབྦེ ཝུཏྟཔྤམཱཎགཎནཱཡ དུཀྐཊཱནི. ཨེཏེནེཝ ཨུཔཱཡེན ཀཔྤིཡཏནྟཝཱཡེན ཨཀཔྤིཡསུཏྟེ, ཀཔྤིཡཱཀཔྤིཡེཧི ཏནྟཝཱཡེཧི སུཏྟེཔི ཀཔྤིཡེ ཨཀཔྤིཡེ ཀཔྤིཡཱཀཔྤིཡེ ཙ ཨཱཔཏྟིབྷེདོ ཝེདིཏབྦོ. ཏིཀཔཱཙིཏྟིཡཾ, ཨཝཱཡཱཔིཏེ ཝཱཡཱཔིཏསཉྙིནོ ཝེམཏིཀསྶ ཝཱ དུཀྐཊཾ. ཙཱིཝརསིབྦནཨཱཡོགཀཱཡབནྡྷནཨཾསབདྡྷཀཔཏྟཏྠཝིཀཔརིསྶཱཝནཱནཾ ཨཏྠཱཡ སུཏྟཾ ཝིཉྙཱཔེནྟསྶ, ཉཱཏཀཔྤཝཱརིཏེཧི ཀཔྤིཡསུཏྟཾ ཝཱཡཱཔེནྟསྶ, ཨཉྙསྶཏྠཱཡ, ཨཏྟནོ དྷནེན, ཨུམྨཏྟཀཱདཱིནཉྩ ཨནཱཔཏྟི, ཙཱིཝརཏྠཱཡ ཝིཉྙཱཔིཏསུཏྟཾ, ཨཏྟུདྡེསིཀཏཱ, ཨཀཔྤིཡཏནྟཝཱཡེན ཨཀཔྤིཡཝིཉྙཏྟིཡཱ ཝཱཡཱཔནནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི དྷོཝཱཔནསིཀྑཱཔདེ ཝུཏྟནཡཱནེཝཱཏི.

སུཏྟཝིཉྙཏྟིསིཀྑཱཔདཝཎྞནཱ ནིཊྛིཏཱ.

༧. མཧཱཔེསཀཱརསིཀྑཱཔདཝཎྞནཱ

སཏྟམེ ཏཏྲ ཙེ སོ བྷིཀྑཱུཏི ཡཏྲ གཱམེ ཝཱ ནིགམེ ཝཱ ཏནྟཝཱཡཱ, ཏཏྲ. པུབྦེ ཨཔྤཝཱརིཏོཏི ཙཱིཝརསཱམིཀེཧི ཨཔྤཝཱརིཏོ ཧུཏྭཱ ¶ . ཝིཀཔྤཾ ཨཱཔཛྫེཡྻཱཏི ཝིསིཊྛཀཔྤཾ ཨདྷིཀཝིདྷཱནཾ ཨཱཔཛྫེཡྻ. ཨིདཱནི ཡེནཱཀཱརེན ཝིཀཔྤཾ ཨཱཔནྣོ ཧོཏི, ཏཾ དསྶེཏུཾ ཨིདཾ ཁོ, ཨཱཝུསོཏིཨཱདི ཝུཏྟཾ. ཏཏྠ ཨཱཡཏནྟི དཱིགྷཾ. ཝིཏྠཏནྟི པུཐུལཾ. ཨཔྤིཏནྟི གྷནཾ. སུཝཱིཏནྟི སུཊྛུ ཝཱིཏཾ, སབྦཊྛཱནེསུ སམཾ ཀཏྭཱ ཝཱིཏཾ. སུཔྤཝཱཡིཏནྟི སུཊྛུ པཝཱཡིཏཾ, སབྦཊྛཱནེསུ སམཾ ཀཏྭཱ ཏནྟེ པསཱརིཏཾ. སུཝིལེཁིཏནྟི ལེཁནིཡཱ སུཊྛུ ཝིལེཁིཏཾ. སུཝིཏཙྪིཏནྟི ཀོཙྪེན ¶ སུཊྛུ ཝིཏཙྪིཏཾ, སུཊྛུ ནིདྡྷོཏནྟི ཨཏྠོ. པིཎྜཔཱཏམཏྟམྤཱིཏི ཨེཏྠ ཙ ན བྷིཀྑུནོ པིཎྜཔཱཏདཱནམཏྟེན ཏཾ ནིསྶགྒིཡཾ ཧོཏི, སཙེ པན ཏེ ཏསྶ ཝཙནེན ཙཱིཝརསཱམིཀཱནཾ ཧཏྠཏོ སུཏྟཾ གཧེཏྭཱ ཨཱིསཀམྤི ཨཱཡཏཾ ཝཱ ཝིཏྠཏཾ ཝཱ ཨཔྤིཏཾ ཝཱ ཀརོནྟི, ཨཐ ཏེསཾ པཡོགེ བྷིཀྑུནོ དུཀྐཊཾ, པཊིལཱབྷེན ནིསྶགྒིཡཾ ཧོཏི.

སཱཝཏྠིཡཾ ཨུཔནནྡཾ ཨཱརབྦྷ ཙཱིཝརེ ཝིཀཔྤཾ ཨཱཔཛྫནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཉཱཏཀེ ཨཉྙཱཏཀསཉྙིནོ ཝེམཏིཀསྶ ཝཱ དུཀྐཊཾ. ཉཱཏཀཔྤཝཱརིཏཱནཾ ཏནྟཝཱཡེཧི, ཨཉྙསྶ ཝཱ ཨཏྠཱཡ, ཨཏྟནོ ཝཱ དྷནེན, མཧགྒྷཾ ཝཱཡཱཔེཏུཀཱམཾ ¶ ཨཔྤགྒྷཾ ཝཱཡཱཔེནྟསྶ, ཨུམྨཏྟཀཱདཱིནཉྩ ཨནཱཔཏྟི. ཨཉྙཱཏཀཨཔྤཝཱརིཏཱནཾ ཏནྟཝཱཡེ ཨུཔསངྐམིཏྭཱ ཝིཀཔྤམཱཔཛྫནཏཱ, ཙཱིཝརསྶ ཨཏྟུདྡེསིཀཏཱ, ཏསྶ ཝཙནེན སུཏྟཝཌྜྷནཾ, ཙཱིཝརཔྤཊིལཱབྷོཏི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི དྷོཝཱཔནསིཀྑཱཔདེ ཝུཏྟནཡཱནེཝཱཏི.

མཧཱཔེསཀཱརསིཀྑཱཔདཝཎྞནཱ ནིཊྛིཏཱ.

༨. ཨཙྩེཀཙཱིཝརསིཀྑཱཔདཝཎྞནཱ

ཨཊྛམེ དསཱཧཱནཱགཏནྟི དས ཨཧཱནི དསཱཧཾ, ཏེན དསཱཧེན ཨནཱགཏཱ དསཱཧཱནཱགཏཱ, དསཱཧེན ཨསམྤཏྟཱཏི ཨཏྠོ, ཏཾ དསཱཧཱནཱགཏཾ, ཨཙྩནྟསཾཡོགཝསེན བྷུམྨཏྠེ ཨུཔཡོགཝཙནཾ. ཀཏྟིཀཏེམཱསིཀཔུཎྞམནྟི པཋམཀཏྟིཀཔུཎྞམཾ, ཨིདྷཱཔི པཋམཔདསྶ ཨནུཔཡོགཏཱ པུརིམནཡེནེཝ བྷུམྨཏྠེ ཨུཔཡོགཝཙནཾ. ཨིདཾ ཝུཏྟཾ ཧོཏི – ཡཏོ པཊྛཱཡ པཋམཔྤཝཱརཎཱ ‘‘དསཱཧཱནཱགཏཱ’’ཏི ཝུཙྩཏི, སཙེཔི ཏཱནི དིཝསཱནི ཨཙྩནྟམེཝ བྷིཀྑུནོ ཨཙྩེཀཙཱིཝརཾ ཨུཔྤཛྫེཡྻ, ‘‘ཨཙྩེཀཾ ཨིད’’ནྟི ཛཱནམཱནེན བྷིཀྑུནཱ ¶ སབྦམྤི པཊིགྒཧེཏབྦནྟི. ཏེན པཝཱརཎཱམཱསསྶ ཛུཎྷཔཀྑཔཉྩམིཏོ པཊྛཱཡ ཨུཔྤནྣསྶ ཙཱིཝརསྶ ནིདྷཱནཀཱལོ དསྶིཏོ ཧོཏི. ཀཱམཉྩེས ‘‘དསཱཧཔརམཾ ཨཏིརེཀཙཱིཝརཾ དྷཱརེཏབྦ’’ནྟིཨིམིནཱཝ སིདྡྷོ, ཨཊྛུཔྤཏྟིཝསེན པན ཨཔུབྦཾ ཝིཡ ཨཏྠཾ དསྶེཏྭཱ སིཀྑཱཔདཾ ཋཔིཏཾ. ཨཙྩེཀཙཱིཝརནྟི གམིཀགིལཱནགབྦྷིནིཨབྷིནཝུཔྤནྣསདྡྷཱནཾ པུགྒལཱནཾ ཨཉྙཏརེན ‘‘ཝསྶཱཝཱསིཀཾ དསྶཱམཱི’’ཏི ཨེཝཾ ཨཱརོཙེཏྭཱ དིནྣཾ. སཙེ ཏཾ པུརེ པཝཱརཎཱཡ ཝིབྷཛིཏཾ, ཡེན གཧིཏཾ, ཏེན ཝསྶཙྪེདོ ན ཀཱཏབྦོ, ཀརོཏི ཙེ, ཏཾ ཙཱིཝརཾ སངྒྷིཀཾ ཧོཏི. ཡཱཝ ཙཱིཝརཀཱལསམཡནྟི ཨནཏྠཏེ ཀཐིནེ ཡཱཝ ཝསྶཱནསྶ པཙྪིམོ མཱསོ, ཨཏྠཏེ ཀཐིནེ ཡཱཝ པཉྩ མཱསཱ, ཏཱཝ ནིཀྑིཔིཏབྦཾ.

སཱཝཏྠིཡཾ སམྦཧུལེ བྷིཀྑཱུ ཨཱརབྦྷ ཨཙྩེཀཙཱིཝརསྶ ཙཱིཝརཀཱལསམཡཾ ཨཏིཀྐམནཝཏྠུསྨིཾ པཉྙཏྟཾ, སེསམེཏྠ ཙཱིཝརཝགྒསྶ པཋམསིཀྑཱཔདེ ཝུཏྟནཡེནེཝ ཝེདིཏབྦནྟི.

ཨཙྩེཀཙཱིཝརསིཀྑཱཔདཝཎྞནཱ ནིཊྛིཏཱ.

༩. སཱསངྐསིཀྑཱཔདཝཎྞནཱ

ནཝམེ ¶ ཨུཔཝསྶཾ ཁོ པནཱཏི ཨེཏྠ ཨུཔཝསྶནྟི ཨུཔཝསྶ, ཨུཔཝསིཏྭཱཏི ཝུཏྟཾ ཧོཏི, ཨུཔསམྤཛྫནྟིཨཱདཱིསུ ¶ (ཝིབྷ. ༥༧༠) ཝིཡ ཧེཏྠ ཨནུནཱསིཀོ དཊྛབྦོ, ཝསྶཾ ཨུཔགནྟྭཱ ཝསིཏྭཱ ཙཱཏི ཨཏྠོ. ཨིམསྶ ཙ པདསྶ ‘‘ཏཐཱརཱུཔེསུ བྷིཀྑུ སེནཱསནེསུ ཝིཧརནྟོ’’ཏིཨིམིནཱ སམྦནྡྷོ, ཨིདཾ ཝུཏྟཾ ཧོཏི – ཝསྶཾ ཨུཔགནྟྭཱ ཝསིཏྭཱ ཙ ཏཏོ པརཾ པཙྪིམཀཏྟིཀཔུཎྞམཔརིཡོསཱནཀཱལཾ ཡཱནི ཁོ པན ཏཱནི ཨཱརཉྙཀཱནི…པེ… ཨནྟརགྷརེ ནིཀྑིཔེཡྻཱཏི. ཏཏྠ ཨཱརཉྙཀཱནཱིཏི སབྦཔཙྪིམཱནི ཨཱརོཔིཏེན ཨཱཙརིཡདྷནུནཱ གཱམསྶ ཨིནྡཁཱིལཏོ པཊྛཱཡ པཉྩདྷནུསཏཔྤམཱཎེ པདེསེ ཀཏསེནཱསནཱནི. སཙེ པན ཨཔརིཀྑིཏྟོ གཱམོ ཧོཏི, པརིཀྑེཔཱརཧཊྛཱནཏོ པཊྛཱཡ མིནེཏབྦཾ. སཙེ ཝིཧཱརསྶ པརིཀྑེཔོ ཝཱ ཨཔརིཀྑིཏྟསྶ ཡཾ གཱམཏོ སབྦཔཋམཾ སེནཱསནཾ ཝཱ ཙེཏིཡཾ ཝཱ བོདྷི ཝཱ དྷུཝསནྣིཔཱཏཊྛཱནཾ ཝཱ ཡཱཝ ¶ , ཏཾ ཏཱཝ པཀཏིམགྒེན མིནེཏབྦཾ, ཨཉྙཾ མགྒཾ ཀཱཏུཾ, ཨམགྒེན ཝཱ མིནེཏུཾ ན ཝཊྚཏི. སཱསངྐསམྨཏཱནཱིཏི ཙོརཱདཱིནཾ ནིཝིཊྛོཀཱསཱདིདསྶནེན ‘‘སཱསངྐཱནཱི’’ཏི སམྨཏཱནི, ཨེཝཾ སཉྙཱཏཱནཱིཏི ཨཏྠོ. སཧ པཊིབྷཡེན སཔྤཊིབྷཡཱནི, ཙོརེཧི མནུསྶཱནཾ ཧཏཝིལུཏྟཱཀོཊིཏབྷཱཝདསྶནཏོ སནྣིཧིཏབལཝབྷཡཱནཱིཏི ཨཏྠོ.

ཨནྟརགྷརེ ནིཀྑིཔེཡྻཱཏི ཨཱརཉྙཀསྶ སེནཱསནསྶ སམནྟཱ སབྦདིསཱབྷཱགེསུ ཨཏྟནཱ ཨབྷིརུཙིཏེ གོཙརགཱམེ ནིཀྑིཔེཡྻ. ཏཉྩ ཁོ སཏིཡཱ ཨངྒསམྤཏྟིཡཱ, ཏཏྲཱཡཾ ཨངྒསམྤཏྟི – པུརིམིཀཱཡ ཨུཔགནྟྭཱ མཧཱཔཝཱརཎཱཡ པཝཱརིཏོ ཧོཏི, ཨིདམེཀཾ ཨངྒཾ. ཀཏྟིཀམཱསོཡེཝ ཧོཏི, ཨིདཾ དུཏིཡཾ ཨངྒཾ. པཉྩདྷནུསཏིཀཔཙྪིམཔྤམཱཎཡུཏྟཾ སེནཱསནཾ ཧོཏི, ཨིདཾ ཏཏིཡཾ ཨངྒཾ. ཨཱུནཔྤམཱཎེ ཝཱ གཱཝུཏཏོ ཨཏིརེཀཔྤམཱཎེ ཝཱ ན ལབྷཏི, ཡཏྲ ཧི པིཎྜཱཡ ཙརིཏྭཱ བྷུཏྟཝེལཱཡམེཝ པུན ཝིཧཱརཾ སཀྐཱ ཨཱགནྟུཾ, ཏདེཝ ཨིདྷཱདྷིཔྤེཏཾ. སཱསངྐསཔྤཊིབྷཡམེཝ ཧོཏི, ཨིདཾ ཙཏུཏྠཾ ཨངྒཾ ཧོཏཱིཏི. ཀོཙིདེཝ པཙྩཡོཏི ཀིཉྩིདེཝ ཀཱརཎཾ. ཏེན ཙཱིཝརེནཱཏི ཏེན ཨནྟརགྷརེ ནིཀྑིཏྟཙཱིཝརེན. ཝིཔྤཝཱསཱཡཱཏི ཝིཡོགཝཱསཱཡ. ཏཏོ ཙེ ཨུཏྟརི ཝིཔྤཝསེཡྻཱཏི ཚཱརཏྟཏོ ཨུཏྟརི ཏསྨིཾ སེནཱསནེ སཏྟམཾ ཨརུཎཾ ཨུཊྛཱཔེཡྻཱཏི ཨཏྠོ, ཏཐཱ ཨསཀྐོནྟེན པན གཱམསཱིམཾ ཨོཀྐམིཏྭཱ སབྷཱཡཾ ཝཱ ཡཏྠ ཀཏྠཙི ཝཱ ཝསིཏྭཱ ཙཱིཝརཔྤཝཏྟིཾ ཉཏྭཱ པཀྐམིཏུཾ ཝཊྚཏི. ཨཉྙཏྲ བྷིཀྑུསམྨུཏིཡཱཏི ཡཾ སངྒྷོ གིལཱནསྶ བྷིཀྑུནོ ཙཱིཝརེན ཝིཔྤཝཱསསམྨུཏིཾ དེཏི, ཏཾ ཋཔེཏྭཱ ཨལདྡྷསམྨུཏིཀསྶ ཨཏིརེཀཚཱརཏྟཾ ཝིཔྤཝསཏོ ནིསྶགྒིཡཾ ཧོཏི.

སཱཝཏྠིཡཾ སམྦཧུལེ བྷིཀྑཱུ ཨཱརབྦྷ ཙཱིཝརཝིཔྤཝཱསཝཏྠུསྨིཾ པཉྙཏྟཾ, སེསམེཏྠ ཙཱིཝརཝགྒསྶ དུཏིཡསིཀྑཱཔདེ ཝུཏྟནཡེནེཝ ཝེདིཏབྦནྟི.

སཱསངྐསིཀྑཱཔདཝཎྞནཱ ནིཊྛིཏཱ.

༡༠. པརིཎཏསིཀྑཱཔདཝཎྞནཱ

དསམེ ¶ ¶ སངྒྷིཀནྟི སངྒྷསྶ སནྟཀཾ. སོ ཧི སངྒྷསྶ པརིཎཏཏྟཱ ཧཏྠེ ཨནཱརུལ༹ྷོཔི ཨེཀེན པརིཡཱཡེན སངྒྷསནྟཀོ ཧོཏི. ལཱབྷནྟི ལབྷིཏབྦཾ ཙཱིཝརཱདིཝཏྠུཾ. པརིཎཏནྟི ‘‘དསྶཱམ ཀརིསྶཱམཱ’’ཏི ཝཙཱིབྷེདེན ཝཱ ¶ ཧཏྠམུདྡཱཡ ཝཱ སངྒྷསྶ ནིནྣཾ ཧུཏྭཱ ཋིཏཾ. ཨཏྟནོ པརིཎཱམེཡྻཱཏི ‘‘ཨིདཾ མཡ྄ཧཾ དེཐཱ’’ཏིཨཱདཱིནི ཝདནྟོ ཨཏྟནིནྣཾ ཀརེཡྻ. སཙེ པན སངྒྷསྶ དིནྣཾ ཧོཏི, ཏཾ གཧེཏུཾ ན ཝཊྚཏི, སངྒྷསྶེཝ དཱཏབྦཾ. པརིཎཏཾ པན སཧདྷམྨིཀཱནཾ ཝཱ གིཧཱིནཾ ཝཱ ཨནྟམསོ མཱཏུསནྟཀམྤི ཨཏྟནོ པརིཎཱམེནྟསྶ པཡོགེ དུཀྐཊཾ, པཊིལཱབྷེན ནིསྶགྒིཡཾ ཧོཏི.

སཱཝཏྠིཡཾ ཚབྦགྒིཡེ བྷིཀྑཱུ ཨཱརབྦྷ པརིཎཱམནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, པརིཎཏེ ཝེམཏིཀསྶ, ཨཔརིཎཏེ པརིཎཏསཉྙིནོ ཙེཝ ཝེམཏིཀསྶ ཙ, སངྒྷཙེཏིཡཔུགྒལེསུ ཡསྶ ཀསྶཙི པརིཎཏཾ ཨཉྙསངྒྷཱདཱིནཾ པརིཎཱམེནྟསྶ ཙ དུཀྐཊཾ. ཨཔརིཎཏསཉྙིནོ, ‘‘ཀཏྠ དེམཱ’’ཏི པུཙྪིཏེ ‘‘ཡཏྠ ཏུམྷཱཀཾ ཙིཏྟཾ པསཱིདཏི, ཏཏྠ དེཐ, ཏུམྷཱཀཾ དེཡྻདྷམྨོ པརིབྷོགཾ ཝཱ ལབྷེཡྻཱ’’ཏིཨཱདཱིནི ཝདནྟསྶ, ཨུམྨཏྟཀཱདཱིནཉྩ ཨནཱཔཏྟི. སངྒྷེ པརིཎཏབྷཱཝོ, ཏཾ ཉཏྭཱ ཨཏྟནོ པརིཎཱམནཾ, པཊིལཱབྷོཏི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནཱིཏི.

པརིཎཏསིཀྑཱཔདཝཎྞནཱ ནིཊྛིཏཱ.

པཏྟཝགྒོ ཏཏིཡོ.

ཨིཏི ཀངྑཱཝིཏརཎིཡཱ པཱཏིམོཀྑཝཎྞནཱཡ

ནིསྶགྒིཡཔཱཙིཏྟིཡཝཎྞནཱ ནིཊྛིཏཱ.

པཱཙིཏྟིཡཀཎྜོ

༡. མུསཱཝཱདཝགྒོ

༡. མུསཱཝཱདསིཀྑཱཔདཝཎྞནཱ

པཱཙིཏྟིཡེསུ ¶ ¶ མུསཱཝཱདཝགྒསྶ པཋམེ སམྤཛཱནམུསཱཝཱདེཏི པུབྦེཔི ཛཱནིཏྭཱ ཝཙནཀྑཎེཔི ཛཱནནྟསྶེཝ མུསཱཝཱདབྷཎནེ. བྷཎནཉྩ ནཱམ ཨིདྷ ཨབྷཱུཏསྶ ཝཱ བྷཱུཏཏཾ, བྷཱུཏསྶ ཝཱ ཨབྷཱུཏཏཾ ཀཏྭཱ ཀཱཡེན ཝཱ ཝཱཙཱཡ ཝཱ ཝིཉྙཱཔནཔྤཡོགོ, ནིམིཏྟཏྠེ ཙེཏཾ བྷུམྨཝཙནཾ. ཏསྨཱ ཡོ སམྤཛཱནམུསཱཝཱདཾ ཝདཏི, ཏསྶ ཏཾནིམིཏྟཾ ཏཾཧེཏུ ཏཔྤཙྩཡཱ པཱཙིཏྟིཡཾ ཧོཏཱིཏི ཨེཝམེཏྠ ཨཉྙེསུ ཙ ཨཱིདིསེསུ ཨཏྠོ ཝེདིཏབྦོ.

སཱཝཏྠིཡཾ ཧཏྠཀཾ སཀྱཔུཏྟཾ ཨཱརབྦྷ ཨཝཛཱནིཏྭཱ པཊིཛཱནནཱདིཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཨུཏྟརིམནུསྶདྷམྨཱརོཙནཏྠཾ མུསཱ བྷཎནྟསྶ པཱརཱཛིཀཾ, ཨམཱུལཀེན པཱརཱཛིཀེན ཨནུདྡྷཾསནཏྠཾ སངྒྷཱདིསེསོ, སངྒྷཱདིསེསེན ཨནུདྡྷཾསནཏྠཾ པཱཙིཏྟིཡཾ, ཨཱཙཱརཝིཔཏྟིཡཱ ཨནུདྡྷཾསནཏྠཾ དུཀྐཊཾ, ‘‘ཡོ ཏེ ཝིཧཱརེ ཝསཱི’’ཏིཨཱདིནཱ (པཱརཱ. ༢༢༠) པརིཡཱཡེན ཨུཏྟརིམནུསྶདྷམྨཱརོཙནཏྠཾ པཊིཝིཛཱནནྟསྶ མུསཱ བྷཎིཏེ ཐུལླཙྩཡཾ, ཨཔྤཊིཝིཛཱནནྟསྶ དུཀྐཊཾ, ཀེཝལཾ མུསཱ བྷཎནྟསྶ ཨིདྷ པཱཙིཏྟིཡཾ. ཨནུཔདྷཱརེཏྭཱ སཧསཱ བྷཎནྟསྶ, ‘‘ཨཉྙཾ ¶ བྷཎིསྶཱམཱི’’ཏི ཨཉྙཾ བྷཎནྟསྶ, ཨུམྨཏྟཀཱདཱིནཉྩ ཨནཱཔཏྟི. ཝིསཾཝཱདནཔུརེཀྑཱརཏཱ, ཝིསཾཝཱདནཙིཏྟེན ཡམཏྠཾ ཝཏྟུཀཱམོ, ཏསྶ པུགྒལསྶ ཝིཉྙཱཔནཔཡོགོ ཙཱཏི ཨིམཱནེཏྠ དྭེ ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནཱིཏི.

མུསཱཝཱདསིཀྑཱཔདཝཎྞནཱ ནིཊྛིཏཱ.

༢. ཨོམསཝཱདསིཀྑཱཔདཝཎྞནཱ

དུཏིཡེ ¶ ཨོམསཝཱདེཏི ཨོཝིཛ྄ཛྷནཝཙནེ, ཛཱཏིནཱམགོཏྟཀམྨསིཔྤཨཱབཱདྷལིངྒཀིལེསཨཱཔཏྟིཨཀྐོསེསུ བྷཱུཏེན ཝཱ ཨབྷཱུཏེན ཝཱ ཡེན ཀེནཙི པཱརཱཛིཀཾ ཨཱཔནྣཾ ཝཱ ཨནཱཔནྣཾ ཝཱ ཡཾཀིཉྩི བྷིཀྑུཾ ཡཱཡ ཀཱཡཙི ¶ ཝཱཙཱཡ ཝཱ ཧཏྠམུདྡཱཡ ཝཱ ཨནཉྙཱཔདེསེན ཨཀྐོསནཝཙནེ པཱཙིཏྟིཡནྟི ཨཏྠོ.

སཱཝཏྠིཡཾ ཚབྦགྒིཡེ བྷིཀྑཱུ ཨཱརབྦྷ ཨོམསནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏེཧིཡེཝ དསཧི ཨཀྐོསཝཏྠཱུཧི ‘‘སནྟི ཨིདྷེཀཙྩེ ཙཎྜཱལཱ’’ཏིཨཱདིནཱ (པཱཙི. ༢༦) ནཡེན ཨཉྙཱཔདེསཾ ཀཏྭཱ ཨཀྐོསནྟསྶ, ‘‘ཙོརོསི གཎྛིབྷེདཀོསཱི’’ཏིཨཱདཱིཧི པཱལི༹མུཏྟཀཔདེཧི ཨཀྐོསནྟསྶ, ཡཐཱ ཏཐཱ ཝཱ ཨནུཔསམྤནྣཾ ཨཀྐོསནྟསྶ ཙ དུཀྐཊཾ. ཨིདྷ བྷིཀྑུནཱིཔི ཨནུཔསམྤནྣསངྑྱཾ གཙྪཏི. ཨནཀྐོསིཏུཀཱམསྶ ཀེཝལཾ དཝཀམྱཏཱཡ ཝདཏོ སབྦཏྠ དུབྦྷཱསིཏཾ. ཨཏྠདྷམྨཨནུསཱསནིཔུརེཀྑཱརཱནཾ, ཨུམྨཏྟཀཱདཱིནཉྩ ཨནཱཔཏྟི. ཡཾ ཨཀྐོསཏི, ཏསྶ ཨུཔསམྤནྣཏཱ, ཨནཉྙཱཔདེསེན ཛཱཏིཨཱདཱིཧི ཨཀྐོསནཾ, ‘‘མཾ ཨཀྐོསཏཱི’’ཏི ཛཱནནཱ, ཨཏྠཔུརེཀྑཱརཏཱདཱིནཾ ཨབྷཱཝོཏི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནི, ཝེདནཱ པན ཨིདྷ དུཀྑཱཏི.

ཨོམསཝཱདསིཀྑཱཔདཝཎྞནཱ ནིཊྛིཏཱ.

༣. པེསུཉྙསིཀྑཱཔདཝཎྞནཱ

ཏཏིཡེ བྷིཀྑུཔེསུཉྙེཏི བྷིཀྑུསྶ པེསུཉྙེ, ཛཱཏིཨཱདཱིཧི ཨཀྐོསཝཏྠཱུཧི བྷིཀྑཱུ ཨཀྐོསནྟསྶ བྷིཀྑུནོ སུཏྭཱ ཝཙནཾ བྷིཀྑུནོ པིཡཀམྱཏཱཡ ཝཱ བྷེདཱདྷིཔྤཱཡེན ཝཱ ཡོ ཨཀྐུདྡྷོ, ཏསྶ བྷིཀྑུསྶ ཀཱཡེན ཝཱ ཝཱཙཱཡ ཝཱ ཨུཔསཾཧཊེ ཏསྨིཾ པེསུཉྙཀརཎཝཙནེ པཱཙིཏྟིཡནྟི ཨཏྠོ.

སཱཝཏྠིཡཾ ཚབྦགྒིཡེ བྷིཀྑཱུ ཨཱརབྦྷ པེསུཉྙཨུཔསཾཧརཎཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཝུཏྟནཡེནེཝ ཨཉྙཱཔདེསེན ཨཀྐོསནྟསྶ ཝཙནཱུཔསཾཧཱརེ ཝཱ པཱལི༹མུཏྟཀཨཀྐོསཱུཔསཾཧཱརེ ཝཱ ཨནུཔསམྤནྣསྶ ཙ ཨུཔསཾཧཱརེ དུཀྐཊཾ. ཨིདྷཱཔི བྷིཀྑུནཱི ཨནུཔསམྤནྣཊྛཱནེ ¶ ཋིཏཱ. ན པིཡཀམྱཏཱཡ, ན བྷེདཱདྷིཔྤཱཡེན ཀེཝལཾ པཱཔགརཧིཏཱཡ ཝདནྟསྶ, ཨུམྨཏྟཀཱདཱིནཉྩ ཨནཱཔཏྟི. ཛཱཏིཨཱདཱིཧི ཨནཉྙཱཔདེསེན ཨཀྐོསནྟསྶ བྷིཀྑུནོ སུཏྭཱ ཝཙནཾ བྷིཀྑུསྶ ཨུཔསཾཧརཎཾ, པིཡཀམྱཏཱབྷེདཱདྷིཔྤཱཡེསུ ¶ ཨཉྙཏརཏཱ ¶ , ཏསྶ ཝིཛཱནནཱཏི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནེཝཱཏི.

པེསུཉྙསིཀྑཱཔདཝཎྞནཱ ནིཊྛིཏཱ.

༤. པདསོདྷམྨསིཀྑཱཔདཝཎྞནཱ

ཙཏུཏྠེ པདསོ དྷམྨཾ ཝཱཙེཡྻཱཏི སངྒཱིཏིཏྟཡཾ ཨནཱརུལ༹ྷམྤི རཱཛོཝཱདཏིཀྑིནྡྲིཡཙཏུཔརིཝཏྟནནནྡོཔནནྡཀུལུམྤསུཏྟམགྒཀཐཱདིདྷམྨཉྩ སངྒཱིཏིཏྟཡམཱརུལ༹ྷཾ ཏིཔིཊཀདྷམྨཉྩ པདཾ པདཾ ཝཱཙེཡྻ, པདཱནུཔདཨནྭཀྑརཨནུབྱཉྫནེསུ ཨེཀེཀཾ ཀོཊྛཱསནྟི ཨཏྠོ. པཱཙིཏྟིཡནྟི ཨེཏེསུ པདཱདཱིསུ བྷིཀྑུཉྩ བྷིཀྑུནིཉྩ ཋཔེཏྭཱ ཡཾཀཉྩི ཀོཊྛཱསཾ ཨཝསེསཔུགྒལེཧི སདྡྷིཾ ཨེཀཏོ བྷཎནྟསྶ པདཱདིགཎནཱཡ པཱཙིཏྟིཡཾ.

སཱཝཏྠིཡཾ ཚབྦགྒིཡེ བྷིཀྑཱུ ཨཱརབྦྷ པདསོ དྷམྨཝཱཙནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ. ཨུཔསམྤནྣེ ཨནུཔསམྤནྣསཉྙིནོ ཝེམཏིཀསྶ ཝཱ དུཀྐཊཾ. ཨནུཔསམྤནྣེན སདྡྷིཾ ཨེཀཏོ ཨུདྡེསགྒཧཎེ, སཛ྄ཛྷཱཡཀརཎེ, ཏསྶ སནྟིཀེ ཨུདྡེསགྒཧཎེ, ཡེབྷུཡྻེན པགུཎགནྠཾ བྷཎནྟསྶ, ཨོསཱརེནྟསྶ ཙ ཁལིཏཊྛཱནེ ‘‘ཨེཝཾ བྷཎཱཧཱི’’ཏི ཝཙནེ ཙ ཨེཀཏོ བྷཎནྟསྶཱཔི, ཨུམྨཏྟཀཱདཱིནཉྩ ཨནཱཔཏྟི. ཨནུཔསམྤནྣཏཱ, ཝུཏྟལཀྑཎཾ དྷམྨཾ པདསོ ཝཱཙནཏཱ, ཨེཀཏོ ཨོསཱཔནཉྩཱཏི ཨིམཱནེཏྠ ཏཱིཎི ཨངྒཱནི. པདསོདྷམྨསམུཊྛཱནཾ, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པདསོདྷམྨསིཀྑཱཔདཝཎྞནཱ ནིཊྛིཏཱ.

༥. པཋམསཧསེཡྻསིཀྑཱཔདཝཎྞནཱ

པཉྩམེ ཨནུཔསམྤནྣེནཱཏི བྷིཀྑུཾ ཋཔེཏྭཱ ཨནྟམསོ པཱརཱཛིཀཝཏྠུབྷཱུཏེན ཏིརཙྪཱནགཏེནཱཔི. ཨུཏྟརིདིརཏྟཏིརཏྟནྟི དྭིནྣཾ ཝཱ ཏིཎྞཾ ཝཱ རཏྟཱིནཾ ཨུཔརི. སཧསེཡྻནྟི སབྦཙྪནྣཔརིཙྪནྣེ ཡེབྷུཡྻེན ཚནྣཔརིཙྪནྣེ ཝཱ སེནཱསནེ པུབྦཱཔརིཡེན ཝཱ ཨེཀཀྑཎེན ཝཱ ཨེཀཏོ ¶ ནིཔཛྫནཾ. ཀཔྤེཡྻཱཏི ¶ ཝིདཧེཡྻ སམྤཱདེཡྻ. ཏཏྠ ཚདནཾ ཨནཱཧཙྩ དིཡཌྜྷཧཏྠུབྦེདྷེན པཱཀཱརཱདིནཱ པརིཙྪིནྣམྤི སབྦཔརིཙྪནྣམིཙྩེཝ ཝེདིཏབྦཾ, ཏསྨཱ ཨིམིནཱ ལཀྑཎེན སམནྣཱགཏོ སཙེཔི སཏྟབྷཱུམིཀོ པཱསཱདོ ཨེཀཱུཔཙཱརོ ཧོཏི, སཏགབྦྷཾ ཝཱ ཙཏུསཱལཾ, ཡོ ཏཏྠ ཝཱ ཨཉྙཏྠ ཝཱ ཏཱདིསེ ཏེན ཝཱ ཨཉྙེན ཝཱ ཨནུཔསམྤནྣེན སཧ ཏིསྶོ རཏྟིཡོ སཡིཏྭཱ ཙཏུཏྠདིཝསེ ཨཏྠངྒཏེ སཱུརིཡེ ཨནུཔསམྤནྣེ ནིཔནྣེ གབྦྷདྭཱརཾ པིདྷཱཡ ཝཱ ཨཔིདྷཱཡ ཝཱ ནིཔཛྫཏི, པཋམནིཔནྣོ ཝཱ ཏསྨིཾ ནིཔཛྫནྟེ ན ཝུཊྛཱཏི, ཏསྶ ཨུབྷིནྣཾ ཨུཊྛཧིཏྭཱ ནིཔཛྫནཔྤཡོགགཎནཱཡ ཨནུཔསམྤནྣགཎནཱཡ ཙ པཱཙིཏྟིཡཾ. ཨཡམེཏྠ སངྑེཔོ, ཝིཏྠཱརོ པན སམནྟཔཱསཱདིཀཱཡཾ (པཱཙི. ཨཊྛ. ༥༡) སབྦཔྤཀཱརཏོ ཝུཏྟོ.

ཨཱལ༹ཝིཡཾ ¶ སམྦཧུལེ བྷིཀྑཱུ ཨཱརབྦྷ ཨནུཔསམྤནྣེན སཧསེཡྻཝཏྠུསྨིཾ པཉྙཏྟཾ, ‘‘ཨུཏྟརིདིརཏྟཏིརཏྟ’’ནྟི ཨཡམེཏྠ ཨནུཔཉྙཏྟི, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཨུཔསམྤནྣེ ཨནུཔསམྤནྣསཉྙིནོ ཝེམཏིཀསྶ ཝཱ ཨུཔདྡྷཙྪནྣཔརིཙྪནྣཱདཱིསུ ཙ དུཀྐཊཾ. ཨཱུནཀདིརཏྟཏིརཏྟཾ ཝསནྟསྶ, ཏཏིཡཱཡ རཏྟིཡཱ པུརཱརུཎཱ ནིཀྑམིཏྭཱ པུན ཝསནྟསྶ, སབྦཙྪནྣསབྦཱཔརིཙྪནྣཱདཱིསུ ཝསནྟསྶ, ཨིཏརསྨིཾ ནིསིནྣེ ནིཔཛྫནྟསྶ, ནིཔནྣེ ཝཱ ནིསཱིདནྟསྶ, ཨུམྨཏྟཀཱདཱིནཉྩ ཨནཱཔཏྟི. པཱཙིཏྟིཡཝཏྠུཀསེནཱསནཾ, ཏཏྠ ཨནུཔསམྤནྣེན སཧ ནིཔཛྫནཾ, ཙཏུཏྠདིཝསེ སཱུརིཡཏྠངྒམནནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཨེལ༹ཀལོམསདིསཱནེཝཱཏི.

པཋམསཧསེཡྻསིཀྑཱཔདཝཎྞནཱ ནིཊྛིཏཱ.

༦. དུཏིཡསཧསེཡྻསིཀྑཱཔདཝཎྞནཱ

ཚཊྛེ མཱཏུགཱམེནཱཏི ཨནྟམསོ ཏདཧུཛཱཏཱཡཔི མནུསྶིཏྠིཡཱ. དིསྶམཱནརཱུཔཱ པན ཡཀྑིཔེཏིཡོ པཎྜཀོ མེཐུནཝཏྠུབྷཱུཏཱ ཙ ཏིརཙྪཱནིཏྠིཡོ ཨིདྷ དུཀྐཊཝཏྠུཀཱ ཧོནྟི.

སཱཝཏྠིཡཾ ཨཱཡསྨནྟཾ ཨནུརུདྡྷཏྠེརཾ ཨཱརབྦྷ མཱཏུགཱམེན སཧསེཡྻཝཏྠུསྨིཾ པཉྙཏྟཾ, སེསཾ ཨནནྟརསིཀྑཱཔདེ ཝུཏྟནཡེནེཝ ཝེདིཏབྦཾ ཨཉྙཏྲ ¶ རཏྟིཔརིཙྪེདཱ, ཏཏྲ ཧི ཙཏུཏྠདིཝསེ ཨཱཔཏྟི, ཨིདྷ པན པཋམདིཝསེཔཱིཏི.

དུཏིཡསཧསེཡྻསིཀྑཱཔདཝཎྞནཱ ནིཊྛིཏཱ.

༧. དྷམྨདེསནཱསིཀྑཱཔདཝཎྞནཱ

སཏྟམེ ¶ ཨུཏྟརིཚཔྤཉྩཝཱཙཱཧཱིཏིཨེཏྠ ཨེཀོ གཱཐཱཔཱདོ ཨེཀཱ ཝཱཙཱཏི ཨེཝཾ སབྦཏྠ ཝཱཙཱཔམཱཎཾ ཝེདིཏབྦཾ. དྷམྨཾ དེསེཡྻཱཏི པདསོདྷམྨསིཀྑཱཔདེ ཝུཏྟལཀྑཎཾ དྷམྨཾ ཝཱ ཨཊྛཀཐཱདྷམྨཾ ཝཱ བྷཱསེཡྻ. ཨཉྙཏྲ ཝིཉྙུནཱ པུརིསཝིགྒཧེནཱཏི ཝིནཱ ཝིཉྙུནཱ པུརིསེན. མནུསྶཝིགྒཧཾ གཧེཏྭཱ ཋིཏེན པན ཡཀྑེན ཝཱ པེཏེན ཝཱ ཏིརཙྪཱནེན ཝཱ སདྡྷིཾ ཋིཏཱཡཔི དྷམྨཾ དེསེཏུཾ ན ཝཊྚཏི. པཱཙིཏྟིཡནྟི དུཏིཡཱནིཡཏེ ཝུཏྟལཀྑཎེན མནུསྶེན ཝིནཱ ཝིཉྙུམནུསྶིཏྠིཡཱ ཚནྣཾ ཝཱཙཱནཾ ཨུཔརི པདཱདིཝསེན དྷམྨཾ དེསེནྟསྶ པདཱདིགཎནཱཡ, བཧཱུནཾ དེསཡཏོ མཱཏུགཱམགཎནཱཡ ཙ པཱཙིཏྟིཡཾ.

སཱཝཏྠིཡཾ ཨུདཱཡིཏྠེརཾ ཨཱརབྦྷ མཱཏུགཱམསྶ དྷམྨདེསནཱཝཏྠུསྨིཾ པཉྙཏྟཾ, ‘‘ཨཉྙཏྲ ཝིཉྙུནཱ’’ཏི ཨཡམེཏྠ ཨནུཔཉྙཏྟི, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཨམཱཏུགཱམེ མཱཏུགཱམསཉྙིནོ ཝེམཏིཀསྶ ཝཱ ཡཀྑིཔེཏིཔཎྜཀམནུསྶཝིགྒཧཏིརཙྪཱནིཏྠཱིནཾ དེསེནྟསྶ ཙ དུཀྐཊཾ. ཚཧི ཝཱཙཱཧི, ཏཏོ ཝཱ ཨོརཾ དེསེནྟསྶ, ཝུཏྟལཀྑཎེ ཝཱ པུརིསེ སཏི, སཡཾ ཝཱ ཨུཊྛཱཡ, པུན ནིསཱིདིཏྭཱ མཱཏུགཱམསྶ ཝཱ ཨུཊྛཧིཏྭཱ པུན ནིསིནྣསྶ, ཨཉྙསྶ ཝཱ མཱཏུགཱམསྶ དེསཡཏོ, ‘‘དཱིགྷནིཀཱཡོ ནཱམ བྷནྟེ ཀིམཏྠིཡོ’’ཏི ¶ ཨེཝཾ པན པུཊྛེ སབྦམྤི དཱིགྷནིཀཱཡཾ དེསེནྟསྶ, ཨཉྙསྶཏྠཱཡ ཝུཙྩམཱནཾ མཱཏུགཱམེ སུཎནྟེ, ཨུམྨཏྟཀཱདཱིནཉྩ ཨནཱཔཏྟི. ཝུཏྟལཀྑཎསྶ དྷམྨསྶ ཚནྣཾ ཝཱཙཱནཾ ཨུཔརི དེསནཱ, ཝུཏྟལཀྑཎོ མཱཏུགཱམོ, ཨིརིཡཱཔཐཔརིཝཏྟཱབྷཱཝོ, ཀཔྤིཡཀཱརཀསྶཱབྷཱཝོ, ཨཔཉྷཱཝིསྶཛྫནཱཏི ཨིམཱནེཏྠ པཉྩ ཨངྒཱནི. སམུཊྛཱནཱདཱིནི པདསོདྷམྨསདིསཱནེཝ, ཀེཝལཾ ཨིདྷ ཀིརིཡཱཀིརིཡཾ ཧོཏཱིཏི.

དྷམྨདེསནཱསིཀྑཱཔདཝཎྞནཱ ནིཊྛིཏཱ.

༨. བྷཱུཏཱརོཙནསིཀྑཱཔདཝཎྞནཱ

ཨཊྛམེ ¶ ཨུཏྟརིམནུསྶདྷམྨནྟི ཙཏུཏྠཔཱརཱཛིཀེ ཝུཏྟལཀྑཎཾ ཨུཏྟརིམནུསྶཱནཾ ཛྷཱཡཱིནཉྩེཝ ཨརིཡཱནཉྩ དྷམྨཾ. བྷཱུཏསྨིཾ པཱཙིཏྟིཡནྟི ཨཏྟནི ཛྷཱནཱདིདྷམྨེ སཏི ཏཾ བྷིཀྑུཉྩ བྷིཀྑུནིཉྩ ཋཔེཏྭཱ ཨཉྙསྶ ཨཱརོཙཡཏོ པཱཙིཏྟིཡཾ.

ཝེསཱལིཡཾ ཝགྒུམུདཱཏཱིརིཡེ བྷིཀྑཱུ ཨཱརབྦྷ ཏེསཾ བྷཱུཏཱརོཙནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི ¶ , ཨནཱཎཏྟིཀཾ, ནིཔྤརིཡཱཡེན ཨཏྟནི ཝིཛྫམཱནཾ ཛྷཱནཱདིདྷམྨཾ ཨཱརོཙེནྟསྶ སཙེ ཡསྶ ཨཱརོཙེཏི, སོ ཨནནྟརམེཝ ‘‘ཨཡཾ ཛྷཱནལཱབྷཱི’’ཏི ཝཱ ‘‘ཨརིཡོ’’ཏི ཝཱ ཡེན ཀེནཙི ཨཱཀཱརེན ཏམཏྠཾ ཛཱནཱཏི, པཱཙིཏྟིཡཾ. ནོ ཙེ ཛཱནཱཏི, དུཀྐཊཾ. པརིཡཱཡེན ཨཱརོཙིཏཾ པན ཛཱནཱཏུ ཝཱ, མཱ ཝཱ, དུཀྐཊམེཝ. ཏཐཱརཱུཔེ ཀཱརཎེ སཏི ཨུཔསམྤནྣསྶ ཨཱརོཙཡཏོ, ཨཱདིཀམྨིཀསྶ ཙ ཨནཱཔཏྟི. ཡསྨཱ པན ཨརིཡཱནཾ ཨུམྨཏྟཀཱདིབྷཱཝོ ནཏྠི, ཛྷཱནལཱབྷིནོ པན ཏསྨིཾ སཏི ཛྷཱནཱ པརིཧཱཡནྟི, ཏསྨཱ ཏེ ཨིདྷ ན གཧིཏཱ. ཨུཏྟརིམནུསྶདྷམྨསྶ བྷཱུཏཏཱ, ཨནུཔསམྤནྣསྶ ཨཱརོཙནཾ, ཏངྑཎཝིཛཱནནཱ, ཨནཉྙཱཔདེསོཏི ཨིམཱནེཏྠ ཙཏྟཱརི ཨངྒཱནི. བྷཱུཏཱརོཙནསམུཊྛཱནཾ, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཀུསལཱབྱཱཀཏཙིཏྟེཧི དྭིཙིཏྟཾ, སུཁམཛ྄ཛྷཏྟཝེདནཱཧི དྭིཝེདནནྟི.

བྷཱུཏཱརོཙནསིཀྑཱཔདཝཎྞནཱ ནིཊྛིཏཱ.

༩. དུཊྛུལླཱརོཙནསིཀྑཱཔདཝཎྞནཱ

ནཝམེ བྷིཀྑུསྶཱཏི པཱརཱཛིཀཾ ཨནཛ྄ཛྷཱཔནྣསྶ. དུཊྛུལླནྟི ཀིཉྩཱཔི དྭིནྣཾ ཨཱཔཏྟིཀྑནྡྷཱནམེཏཾ ཨདྷིཝཙནཾ, ཨིདྷ པན སངྒྷཱདིསེསམེཝ ཨདྷིཔྤེཏཾ. ཨཉྙཏྲ བྷིཀྑུསམྨུཏིཡཱཏི ཡཾ སངྒྷོ ཨབྷིཎྷཱཔཏྟིཀསྶ བྷིཀྑུནོ ཨཱཡཏིཾ སཾཝརཏྠཱཡ ཨཱཔཏྟཱིནཉྩ ཀུལཱནཉྩ པརིཡནྟཾ ཀཏྭཱ ཝཱ ཨཀཏྭཱ ཝཱ ཏིཀྑཏྟུཾ ཨཔལོཀེཏྭཱ ཀཏིཀཾ ཀརོཏི, ཏཾ ཋཔེཏྭཱ, ཨཡཐཱཀཏིཀཱཡ ‘‘ཨཡཾ ཨསུཙིཾ མོཙེཏྭཱ སངྒྷཱདིསེསཾ ཨཱཔནྣོ’’ཏིཨཱདིནཱ ནཡེན ཝཏྠུནཱ སདྡྷིཾ ཨཱཔཏྟིཾ གྷཊེཏྭཱ ཨཱརོཙེནྟསྶ པཱཙིཏྟིཡཾ.

སཱཝཏྠིཡཾ ¶ ཚབྦགྒིཡེ བྷིཀྑཱུ ཨཱརབྦྷ དུཊྛུལླཱཔཏྟིཨཱརོཙནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ ¶ , ཨདུཊྛུལླཱཡ དུཊྛུལླསཉྙིནོ ཝེམཏིཀསྶ ཝཱ དུཀྐཊཾ, ཨཝསེསེ ཚ ཨཱཔཏྟིཀྑནྡྷེ, ཨནུཔསམྤནྣསྶ པུརིམཔཉྩསིཀྑཱཔདཝཱིཏིཀྐམསངྑཱཏཾ དུཊྛུལླཾ ཝཱ ཨིཏརཾ ཨདུཊྛུལླཾ ཝཱ ཨཛ྄ཛྷཱཙཱརཾ ཨཱརོཙེནྟསྶཱཔི དུཀྐཊམེཝ. ཝཏྠུམཏྟཾ ཝཱ ཨཱཔཏྟིམཏྟཾ ཝཱ ཨཱརོཙེནྟསྶ, བྷིཀྑུསམྨུཏིཔརིཙྪེདཾ ཨནཏིཀྐམིཏྭཱ ཨཱརོཙེནྟསྶ, ཨུམྨཏྟཀཱདཱིནཉྩ ཨནཱཔཏྟི. ཝུཏྟལཀྑཎསྶ བྷིཀྑུནོ སཝཏྠུཀོ སངྒྷཱདིསེསོ, ཨནུཔསམྤནྣསྶ ཨཱརོཙནཾ, བྷིཀྑུསམྨུཏིཡཱ ཨབྷཱཝོཏི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནི, ཝེདནཱ པན ཨིདྷ དུཀྑཱཡེཝཱཏི.

དུཊྛུལླཱརོཙནསིཀྑཱཔདཝཎྞནཱ ནིཊྛིཏཱ.

༡༠. པཐཝཱིཁཎནསིཀྑཱཔདཝཎྞནཱ

དསམེ ¶ པཐཝིནྟི དུཝིདྷཱ པཐཝཱི ཛཱཏཔཐཝཱི ཨཛཱཏཔཐཝཱིཏི. ཏཏྠ ཛཱཏཔཐཝཱི སུདྡྷམིསྶཔུཉྫཝསེན ཏིཝིདྷཱ, ཏཏྠ སུདྡྷཔཐཝཱི ནཱམ པཀཏིཡཱ སུདྡྷཔཾསུ ཝཱ སུདྡྷམཏྟིཀཱ ཝཱ. མིསྶཔཐཝཱི ནཱམ ཡཏྠ པཾསུཏོ ཝཱ མཏྟིཀཱཏོ ཝཱ པཱསཱཎསཀྑརཀཐལམརུམྦཝཱལུཀཱསུ ཨཉྙཏརསྶ ཏཏིཡབྷཱགོ ཧོཏི. པུཉྫཔཐཝཱི ནཱམ ‘‘ཨཏིརེཀཙཱཏུམཱསཾ ཨོཝཊྛོ པཾསུཔུཉྫོ ཝཱ མཏྟིཀཱཔུཉྫོ ཝཱ’’ཏི (པཱཙི. ༨༦) ཝུཏྟཾ, ཝུཏྟལཀྑཎེན པན མིསྶཀཔུཉྫོཔི པིཊྛིཔཱསཱཎེ ཋིཏསུཁུམརཛམྤི ཙ དེཝེ ཕུསཱཡནྟེ སཀིཾ ཏིནྟཾ ཙཏུམཱསཙྩཡེན ཏིནྟོཀཱསོ པུཉྫཔཐཝིསངྑམེཝ གཙྪཏི. ཏིཝིདྷཱཔི ཙེསཱ པཐཝཱི ཨུདྡྷནཔཏྟཔཙནཱདིཝསེན ཝཱ ཡཐཱ ཏཐཱ ཝཱ ཨདཌྜྷཱ ‘ཛཱཏཔཐཝཱི’ཏི ཝུཙྩཏི, དཌྜྷཱ པན ཝུཏྟཔྤམཱཎཏོ ཨདྷིཀཏརཔཱསཱཎཱདིམིསྶཱ ཝཱ ཨཛཱཏཔཐཝཱི ནཱམ ཧོཏི, ཀོ པན ཝཱདོ སུདྡྷཔཱསཱཎཱདིབྷེདཱཡ. ཏཏྠ ཡཱ ‘ཛཱཏཔཐཝཱི’ཏི ཝུཏྟཱ, ཨཡཾ ཨཀཔྤིཡཔཐཝཱི. ཡོ བྷིཀྑུ ཏཾ ཨེཝརཱུཔཾ པཐཝིཾ སཡཾ ཁཎཏི, ཁཎནབྷེདནཝིལེཁནཔཙནཱདཱིཧི ཝིཀོཔེཏི, ཏསྶ པཡོགགཎནཱཡ པཱཙིཏྟིཡཾ. ཡོ པན ཁཎཱཔེཏི, ཝུཏྟནཡེནེཝ ཝིཀོཔཱཔེཏི, ཏསྶ ‘‘ཨིམཾ པདེས’’ནྟི ཝཱ ‘‘ཨིམཾ པཐཝི’’ནྟི ཝཱ ཨེཝཾ ནིཡམེཏྭཱ ‘‘ཁཎ, བྷིནྡཱ’’ཏིཨཱདིནཱ ནཡེན ཨཱཎཱཔེནྟསྶ ཨཱཎཏྟིཡཱ ¶ དུཀྐཊཾ, སཀིཾ ཨཱཎཏྟེ དིཝསམྤི ཁཎནྟེ ཨཱཎཱཔཀསྶ ཨེཀམེཝ པཱཙིཏྟིཡཾ, སཙེ ཨིཏརོ པུནཔྤུནཾ ཨཱཎཱཔེཏི, ཝཱཙཱཡ ཝཱཙཱཡ པཱཙིཏྟིཡཾ.

ཨཱལ༹ཝིཡཾ ཨཱལ༹ཝཀེ བྷིཀྑཱུ ཨཱརབྦྷ པཐཝིཁཎནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, སཱཎཏྟིཀཾ, པཐཝིཡཱ ཝེམཏིཀསྶ, ཨཔཐཝིཡཱ པཐཝིསཉྙིནོ ཙེཝ ཝེམཏིཀསྶ ཙ དུཀྐཊཾ. ཨོཀཱསཾ ཨནིཡམེཏྭཱ ‘‘པོཀྑརཎིཾ ཁཎ, ཨཱཝཱཊཾ ཁཎ, ཀནྡཾ ཁཎཱ’’ཏིཨཱདཱིནི བྷཎནྟསྶ, ཨཱཏཔེན སུསྶིཏྭཱ ཕལིཏཀདྡམཾ ཝཱ གོཀཎྚཀཾ ཝཱ ཧེཊྛཱ པཐཝིཡཱ ཨསམྦདྡྷཾ བྷིཛྫིཏྭཱ པཏིཏནདིཏཊཾ ཝཱ མཧནྟམྤི ནངྒལཙྪིནྣམཏྟིཀཱཔིཎྜནྟིཨེཝམཱདཱིནི སབྦཉྩ ཨཛཱཏཔཐཝིཾ ཝིཀོཔེནྟསྶ, ‘‘ཨིམསྶ ཐམྦྷསྶ ཨཱཝཱཊཾ ཛཱན ¶ , མཏྟིཀཾ དེཧི, མཏྟིཀཾ ཨཱཧར, པཾསུནཱ མེ ཨཏྠོ, མཏྟིཀཾ ཀཔྤིཡཾ ཀརོཧཱི’’ཏི བྷཎནྟསྶ, ཨསཉྩིཙྩ རུཀྑཱདིཔཝཊྚནེན བྷིནྡནྟསྶ, ཨསཏིཡཱ པཱདངྒུཊྛཀཱདཱིཧི ཝིལེཁནྟསྶ, ཛཱཏཔཐཝིབྷཱཝཾ ཝཱ, ‘‘ཁཎཱམི ཝཱ ཨཧ’’ནྟི ཨཛཱནནྟསྶ, ཨུམྨཏྟཀཱདཱིནཉྩ ཨནཱཔཏྟི. ཛཱཏཔཐཝཱི, པཐཝིསཉྙིཏཱ, ཁཎནཁཎཱཔནཱནཾ ཨཉྙཏརནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནི, ཨིདཾ པན པཎྞཏྟིཝཛྫཾ, ཏིཙིཏྟཾ, ཏིཝེདནནྟི.

པཐཝཱིཁཎནསིཀྑཱཔདཝཎྞནཱ ནིཊྛིཏཱ.

མུསཱཝཱདཝགྒོ པཋམོ.

༢. བྷཱུཏགཱམཝགྒོ

༡. བྷཱུཏགཱམསིཀྑཱཔདཝཎྞནཱ

བྷཱུཏགཱམཝགྒསྶ ¶ པཋམེ བྷཱུཏགཱམཔཱཏབྱཏཱཡཱཏི ཨེཏྠ བྷཝནྟི ཨཧེསུཉྩཱཏི བྷཱུཏཱ, ཛཱཡནྟི ཝཌྜྷནྟི ཛཱཏཱ ཝཌྜྷིཏཱ ཙཱཏི ཨཏྠོ. གཱམོཏི རཱསི, བྷཱུཏཱནཾ གཱམོ, བྷཱུཏཱ ཨེཝ ཝཱ གཱམོཏི བྷཱུཏགཱམོ, པཏིཊྛིཏཧརིཏཏིཎརུཀྑཱདཱིནམེཏཾ ཨདྷིཝཙནཾ. པཱཏབྱསྶ བྷཱཝོ པཱཏབྱཏཱ, ཚེདནབྷེདནཱདཱིཧི ཡཐཱརུཙི པརིབྷུཉྫིཏབྦཏཱཏི ཨཏྠོ, ཏསྶཾ བྷཱུཏགཱམཔཱཏབྱཏཱཡ, ནིམིཏྟཏྠེ ཙེཏཾ བྷུམྨཝཙནཾ, བྷཱུཏགཱམཔཱཏབྱཏཱཧེཏུ བྷཱུཏགཱམསྶ ཚེདནཱདིཔཙྩཡཱ པཱཙིཏྟིཡནྟི ཨཏྠོ. ཏསྨཱ ཡོ བྷིཀྑུ ¶ པཐཝིཨུདཀཔཱཀཱརཱདཱིསུ ཡཏྠཀཏྠཙི ཛཱཏཾ ཨསུཀྑཾ ཨནྟམསོ ཨཏིསུཁུམཏིཎམྤི སཱསཔབཱིཛཀསེཝཱལམྤི ཨུདྡྷརཎཙྪེདནཝིཛ྄ཛྷནཱདཱིཧི ཝིཀོཔེཏི ཝཱ པཐཝིཁཎནེ ཝུཏྟནཡེན ཝིཀོཔཱཔེཏི ཝཱ པཱཙིཏྟིཡཾ ཨཱཔཛྫཏི.

ཨཱལ༹ཝིཡཾ ཨཱལ༹ཝཀེ བྷིཀྑཱུ ཨཱརབྦྷ རུཀྑཚིནྡནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, སཱཎཏྟིཀཾ, བྷཱུཏགཱམཏོ ཝིཡོཛིཏམཱུལབཱིཛཁནྡྷབཱིཛཕལུབཱིཛཨགྒབཱིཛབཱིཛབཱིཛཱནཾ ཨཉྙཏརཾ བྷཱཛནགཏཾ ཝཱ རཱསིཀཏཾ ཝཱ བྷཱུམིཡཾ རོཔིཏམྤི ནིཀྑནྟམཱུལམཏྟཾ ཝཱ ནིཀྑནྟཨངྐུརམཏྟཾ ཝཱ སཙེཔིསྶ ཝིདཏྠིམཏྟཱ པཏྟཝཊྚི ནིགྒཙྪཏི, ཨནིཀྑནྟེ ཝཱ མཱུལེ ནིཀྑནྟེ ཝཱ མཱུལེ ཡཱཝ ཨངྐུརོ ཧརིཏོ ན ཧོཏི, ཏཱཝ ཏཾ ཝིཀོཔེནྟསྶ དུཀྐཊཾ, ཏཐཱ བྷཱུཏགཱམབཱིཛགཱམེ ཝེམཏིཀསྶ, ཨབྷཱུཏགཱམབཱིཛགཱམེ བྷཱུཏགཱམབཱིཛགཱམསཉྙིནོ ཙེཝ ཝེམཏིཀསྶ ཙ. ཨུབྷཡཏྠ པན ཨཏཐཱསཉྙིསྶ, ཨུམྨཏྟཀཱདཱིནཉྩ ཨནཱཔཏྟི, ཨསཉྩིཙྩ ཨསཏིཡཱ ཨཛཱནིཏྭཱ ཝཱ ཝིཀོཔེནྟསྶ, ‘ཨིམཾ རུཀྑ’ནྟི ཨེཝཾ ཨནིཡམེཏྭཱ ‘‘རུཀྑཾ ཚིནྡ, ཝལླིཾ ཚིནྡཱ’’ཏིཨཱདཱིནི བྷཎནྟསྶ, ‘‘ཨིམཾ པུཔྥཾ ཝཱ ཕལཾ ཝཱ ཛཱན, ཨིམཾ དེཧི, ཨིམཾ ཨཱཧར, ཨིམིནཱ མེ ཨཏྠོ, ཨིམཾ ཀཔྤིཡཾ ཀརོཧཱི’’ཏི བྷཎནྟསྶ ཙ ཨནཱཔཏྟི. ཨེཝཾ ཀཔྤིཡཝཙནེན བྷཱུཏགཱམཏོ ཝིཡོཛིཏཾ པན བཱིཛཛཱཏཾ པུན པི ‘‘ཀཔྤིཡཾ ཀརོཧཱི’’ཏི ཀཱརེཏྭཱཝ པརིབྷུཉྫིཏབྦཾ. ཨེཝཉྷིསྶ བཱིཛགཱམཔརིམོཙནམྤི ཀཏཾ ཧོཏི.

ཀཔྤིཡཾ ཀརོནྟེན པན ཨགྒིནཱ ཝཱ ནཁེན ཝཱ སཏྠེན ཝཱ ཀཏྟབྦཾ, ཨགྒིནཱ ཀརོནྟེན ཙ ཡེན ཀེནཙི ཨགྒིནཱ ཨེཀདེསེ ཕུསནྟེན ‘ཀཔྤིཡ’ནྟི ¶ ཝཏྭཱཝ ཀཱཏབྦཾ. སཏྠེན ¶ ཀརོནྟེན ཡསྶ ཀསྶཙི ཏིཁིཎསཏྠསྶ ཨནྟམསོ སཱུཙིནཁཙྪེདནཱདཱིནམྤི ཏུཎྜེན ཝཱ དྷཱརཱཡ ཝཱ ཝེདྷཾ ཝཱ ཚེདཾ ཝཱ དསྶེནྟེན ཏཐེཝ ཀཱཏབྦཾ. ནཁེན ཀརོནྟེན ཋཔེཏྭཱ གོམཧིཾསཱདཱིནཾ ཁུརེ ཡེན ཀེནཙི ཨཔཱུཏིནཱ མནུསྶཱནཾ ཝཱ ཏིརཙྪཱནཱནཾ ཝཱ ནཁེན ཨནྟམསོ ཚིནྡིཏྭཱ ཨཱཧཊེནཱཔི སཏྠེ ཝུཏྟནཡེནེཝ ཀཱཏབྦཾ. ཏཏྠ སཙེཔི བཱིཛཱནཾ པབྦཏམཏྟོ རཱསི, རུཀྑསཧསྶཾ ཝཱ ཚིནྡིཏྭཱ ཨེཀཱབདྡྷཾ, ཨུཙྪཱུནཾ ཝཱ མཧཱབྷཱརོ བནྡྷིཏྭཱ ཋཔིཏོ ཧོཏི, ཨེཀསྨིཾ བཱིཛེ ཝཱ རུཀྑསཱཁཱཡ ཝཱ ཨུཙྪུམྷི ཝཱ ཀཔྤིཡེ ཀཏེ སབྦཾ ཀཏཾ ཧོཏི. ཨུཙྪུཾ ‘‘ཀཔྤིཡཾ ཀརིསྶཱམཱི’’ཏི ཏེཧི སདྡྷིཾ བདྡྷཾ དཱརུཀཾ ཝིཛ྄ཛྷཏི, ཝཊྚཏིཡེཝ. སཙེ པན ཡཱཡ ཝལླིཡཱ བྷཱརོ བདྡྷོ, ཏཾ ཝིཛ྄ཛྷཏི, ན ཝཊྚཏི. མརིཙཔཀྐཱདཱིཧི མིསྶེཏྭཱ ¶ བྷཏྟཾ ཨཱཧརནྟི, ‘‘ཀཔྤིཡཾ ཀརོཧཱི’’ཏི ཝུཏྟེ སཙེཔི བྷཏྟསིཏྠེ ཝིཛ྄ཛྷཏི, ཝཊྚཏིཡེཝ, ཏིལཏཎྜུལེསུཔི ཨེསེཝ ནཡོ. ཡཱགུཡཱ པཀྑིཏྟཱནི པན ཨེཀཱབདྡྷཱནི ཧུཏྭཱ ན སནྟིཊྛནྟི, ཏཏྠ ཨེཀེཀཾ ཝིཛ྄ཛྷིཏྭཱཝ ཀཱཏབྦཾ. ཀཔིཊྛཕལཱདཱིནཾ ཨནྟོ མིཉྫཾ ཀཊཱཧཾ མུཉྩིཏྭཱ སཉྩརཏི, བྷིནྡཱཔེཏྭཱ ཀཔྤིཡཾ ཀཱརེཏབྦཾ. ཨེཀཱབདྡྷཱ ཙེ, ཀཊཱཧེཔི ཀཱཏུཾ ཝཊྚཏི. ཡཾ པན ཕལཾ ཏརུཎཾ ཧོཏི ཨབཱིཛཾ ཡཉྩ ནིབྦཏྟབཱིཛཾ བཱིཛཾ ཨཔནེཏྭཱ པརིབྷུཉྫིཏབྦཾ, ཏཏྠ ཀཔྤིཡཀརཎཀིཙྩཾ ནཏྠི. བྷཱུཏགཱམོ, བྷཱུཏགཱམསཉྙིཏཱ, ཝིཀོཔནཾ ཝཱ ཝིཀོཔཱཔནཾ ཝཱཏི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི པཐཝིཁཎནསདིསཱནེཝཱཏི.

བྷཱུཏགཱམསིཀྑཱཔདཝཎྞནཱ ནིཊྛིཏཱ.

༢. ཨཉྙཝཱདཀསིཀྑཱཔདཝཎྞནཱ

དུཏིཡེ ཡམཏྠཾ སངྒྷམཛ྄ཛྷེ ཝིནཡདྷརོ པུཙྪཏི, ཏཏོ ཨཉྙཾ ཝདཏཱིཏི ཨཉྙཝཱདཀོ, ཨཉྙེནཉྙཾ པཊིཙརཎསྶེཏཾ ནཱམཾ. ཝིཧེསཏཱིཏི ཝིཧེསཀོ, ཏུཎྷཱིབྷཱཝསྶེཏཾ ནཱམཾ, ཏསྨིཾ ཨཉྙཝཱདཀེ ཝིཧེསཀེ. པཱཙིཏྟིཡནྟི ཝཏྠུདྭཡེ པཱཙིཏྟིཡདྭཡཾ ཝུཏྟཾ. ཏསྨཱ ཡོ བྷིཀྑུ སཱཝསེསཾ ཨཱཔཏྟིཾ ཨཱཔནྣོ སངྒྷམཛ྄ཛྷེ ཨནུཡུཉྫིཡམཱནོ ཏཾ ན ཀཐེཏུཀཱམོ ཨཉྙེན ཝཙནེན ཨཉྙཾ ཚཱདེནྟོ ཏཐཱ ཏཐཱ ཝིཀྑིཔཏི, ཡོ ཙ ཏུཎྷཱིབྷཱཝེན ཝིཧེསེཏི, ཏེསཾ ཡཾ བྷགཝཏཱ ཨཉྙཝཱདཀཀམྨཉྩེཝ ཝིཧེསཀཀམྨཉྩ ཨནུཉྙཱཏཾ, ཏསྨིཾ སངྒྷེན ཀཏེ པུན ཏཐཱ ཀརོནྟཱནཾ པཱཙིཏྟིཡཾ.

ཀོསམྦིཡཾ ཚནྣཏྠེརཾ ཨཱརབྦྷ ཨཉྙེནཉྙཾ པཊིཙརཎཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, དྷམྨཀམྨེ ཏིཀཔཱཙིཏྟིཡཾ, ཨདྷམྨཀམྨེ ཏིཀདུཀྐཊཾ, ཨནཱརོཔིཏེ པན ཨཉྙཝཱདཀེ ¶ ཝཱ ཝིཧེསཀེ ཝཱ ཏཐཱ ཀརོནྟསྶ དུཀྐཊམེཝ. ཨཱཔཏྟིཾ ཨཱཔནྣབྷཱཝཾ ཝཱ ཨཛཱནནྟསྶ ‘‘ཀིཾ ཏུམྷེ བྷཎཐཱ’’ཏི པུཙྪཏོ, གེལཉྙེན ཝཱ, ‘‘སངྒྷསྶ བྷཎྜནཱདཱིནི ཝཱ བྷཝིསྶནྟི, ཨདྷམྨེན ཝཱ ཝགྒེན ཝཱ ནཀམྨཱརཧསྶ ཝཱ ཀམྨཾ ཀརིསྶནྟཱི’’ཏི ¶ ཨིམིནཱ ཨདྷིཔྤཱཡེན ན ཀཐེནྟསྶ, ཨུམྨཏྟཀཱདཱིནཉྩ ཨནཱཔཏྟི. དྷམྨཀམྨེན ཨཱརོཔིཏཏཱ, ཨཱཔཏྟིཡཱ ཝཱ ཝཏྠུནཱ ཝཱ ཨནུཡུཉྫིཡམཱནཏཱ, ཚཱདེཏུཀཱམཏཱཡ ¶ ཨཉྙེནཉྙཾ པཊིཙརཎཾ ཝཱ ཏུཎྷཱིབྷཱཝོ ཝཱཏི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནི, ཨིདཾ པན སིཡཱ ཀིརིཡཾ, སིཡཱ ཨཀིརིཡཾ, དུཀྑཝེདནཉྩ ཧོཏཱིཏི.

ཨཉྙཝཱདཀསིཀྑཱཔདཝཎྞནཱ ནིཊྛིཏཱ.

༣. ཨུཛ྄ཛྷཱཔནཀསིཀྑཱཔདཝཎྞནཱ

ཏཏིཡེ ཡེན ཝཙནེན ཨུཛ྄ཛྷཱཔེནྟི ‘‘ཚནྡཱཡ ཨིཏྠནྣཱམོ ཨིདཾ ནཱམ ཀརོཏཱི’’ཏིཨཱདཱིནི ཝདནྟཱ ཨུཔསམྤནྣཾ སངྒྷེན སམྨཏཾ སེནཱསནཔཉྙཱཔཀཱདིབྷེདཾ ཏསྶ ཨཡསཀཱམཱ ཧུཏྭཱ བྷིཀྑཱུཧི ཨཝཛཱནཱཔེནྟི, ཨཝཉྙཱཡ ཨོལོཀཱཔེནྟི, ལཱམཀཏོ ཝཱ ཙིནྟཱཔེནྟི, ཏཾ ཝཙནཾ ཨུཛ྄ཛྷཱཔནཀཾ. ཡེན ཙ ཏཐེཝ ཝདནྟཱ ཁིཡྻནྟི, སབྦཏྠ ཏསྶ ཨཝཎྞཾ པཀཱསེནྟི, ཏཾ ཁིཡྻནཀཾ, ཏསྨིཾ ཨུཛ྄ཛྷཱཔནཀེ ཁིཡྻནཀེ. པཱཙིཏྟིཡནྟི ཝཏྠུདྭཡེ པཱཙིཏྟིཡདྭཡཾ ཝུཏྟཾ. ཏསྨཱ ཡོ སམྨཏསྶ བྷིཀྑུནོ ཨཡསཀཱམཏཱཡ ཨུཔསམྤནྣསྶ ཝདནྟོ ཨུཛ྄ཛྷཱཔེཏི ཝཱ ཁིཡྻཏི ཝཱ, ཏསྶ པཱཙིཏྟིཡཾ ཧོཏི.

རཱཛགཧེ མེཏྟིཡབྷཱུམཛཀེ བྷིཀྑཱུ ཨཱརབྦྷ ཨུཛ྄ཛྷཱཔནཁིཡྻནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཡཾ ཏསྶ ཨུཔསམྤནྣསྶ སམྨུཏིཀམྨཾ ཀཏཾ, ཏསྨིཾ དྷམྨཀམྨེ ཏིཀཔཱཙིཏྟིཡཾ, ཨདྷམྨཀམྨེ ཏིཀདུཀྐཊཾ, ཨནུཔསམྤནྣསྶ པན སནྟིཀེ ཏཐཱ བྷཎནྟསྶ, ཨསམྨཏསྶ ཙ ཨཝཎྞཾ ཡསྶ ཀསྶཙི སནྟིཀེ བྷཎནྟསྶ, ཨནུཔསམྤནྣསྶ པན སམྨཏསྶ ཝཱ ཨསམྨཏསྶ ཝཱ ཨཝཎྞཾ ཡསྶ ཀསྶཙིདེཝ སནྟིཀེ བྷཎནྟསྶ ཙ དུཀྐཊམེཝ. པཀཏིཡཱཝ ཚནྡཱདིཝསེན ཀརོནྟཾ ཨུཛ྄ཛྷཱཔེནྟསྶ ཝཱ ཁིཡྻནྟསྶ ཝཱ, ཨུམྨཏྟཀཱདཱིནཉྩ ཨནཱཔཏྟི. དྷམྨཀམྨེན སམྨཏཏཱ, ཨུཔསམྤནྣཏཱ, ཨགཏིགམནཱབྷཱཝོ, ཏསྶ ཨཝཎྞཀཱམཏཱ, ཡསྶ སནྟིཀེ ཝདཏི, ཏསྶ ཨུཔསམྤནྣཏཱ, ཨུཛ྄ཛྷཱཔནཾ ཝཱ ཁིཡྻནཾ ཝཱཏི ཨིམཱནེཏྠ ཚ ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནི, ཨིདཾ པན དུཀྑཝེདནམེཝཱཏི.

ཨུཛ྄ཛྷཱཔནཀསིཀྑཱཔདཝཎྞནཱ ནིཊྛིཏཱ.

༤. པཋམསེནཱསནསིཀྑཱཔདཝཎྞནཱ

ཙཏུཏྠེ ¶ ¶ སངྒྷིཀནྟི སངྒྷསྶ སནྟཀཾ. མཉྩཱདཱིསུ ཡོཀོཙི མཉྩསངྑེཔེན ཀཏོ སབྦོཔི མཉྩོཡེཝ, པཱིཋེཔི ཨེསེཝ ནཡོ. ཡེན ཀེནཙི པན ཙོལེ༹ན ཝཱ ཀཔྤིཡཙམྨེན ཝཱ ཚཝིཾ ཀཏྭཱ ཋཔེཏྭཱ མནུསྶལོམཾ ཏཱལཱིསཔཏྟཉྩ ཡེཧི ཀེཧིཙི ལོམཔཎྞཏིཎཝཱཀཙོལེ༹ཧི པཱུརེཏྭཱ ཀཏསེནཱསནཾ བྷིསཱིཏི ཝུཙྩཏི. ཏཏྠ ནིསཱིདིཏུམྤི ནིཔཛྫིཏུམྤི ཝཊྚཏི, པམཱཎཔརིཙྪེདོཔི ཙེཏྠ ནཏྠི. ཀོཙྪཾ པན ཝཱཀཨུསཱིརམུཉྫཔབྦཛཱདཱིནཾ ཨཉྙཏརམཡཾ ཨནྟོ སཾཝེལླིཏྭཱ བདྡྷཾ ཧེཊྛཱ ཙ ཨུཔརི ཙ ཝིཏྠཏཾ པཎཝསཎྛཱནཾ མཛ྄ཛྷེ སཱིཧཙམྨཱདིཔརིཀྑིཏྟཾ ཧོཏི, ཨཀཔྤིཡཙམྨཾ ནཱམེཏྠ ནཏྠི. སེནཱསནཉྷི སོཝཎྞམཡམྤི ཝཊྚཏི. ཨཛ྄ཛྷོཀཱསེཏི ¶ ཨེཏྠ ཡེ ཨཝསྶིཀསངྐེཏཱ ཝསྶཱནམཱསཱཏི ཨེཝཾ ཨསཉྙིཏཱ ཨཊྛ མཱསཱ, ཏེ ཋཔེཏྭཱ ཨིཏརེསུ ཙཏཱུསུ མཱསེསུ སཙེཔི དེཝོ ན ཝསྶཏི. ཏཐཱཔི པཀཏིཨཛ྄ཛྷོཀཱསེ ཙ ཨོཝསྶཀམཎྜཔེ ཙ སནྠརིཏུཾ ན ཝཊྚཏི. ཡཏྠ པན ཧེམནྟེ ཝསྶཏི, ཏཏྠ ཨཔརེཔི ཙཏྟཱརོ མཱསེ ན ཝཊྚཏི. གིམྷེ པན སབྦཏྠ ཝིགཏཝལཱཧཀཾ ཝིསུདྡྷཾ ནབྷཾ ཧོཏི, ཏསྨཱ ཏདཱ ཀེནཙིདེཝ ཀརཎཱིཡེན གཙྪཏི, ཝཊྚཏི. ཀཱཀཱདཱིནཾ ནིབདྡྷཝཱསརུཀྑམཱུལེ པན ཀདཱཙིཔི ན ཝཊྚཏི. ཨིཏི ཡཏྠ ཙ ཡདཱ ཙ སནྠརིཏུཾ ན ཝཊྚཏི, ཏཾ སབྦམིདྷ ཨཛ྄ཛྷོཀཱསསངྑམེཝ གཏནྟི ཝེདིཏབྦཾ.

སནྠརིཏྭཱཏི ཏཐཱརཱུཔེ ཋཱནེ ཨཏྟནོ ཝཱ པརསྶ ཝཱ ཨཏྠཱཡ སནྠརིཏྭཱ. ཨཉྙསྶཏྠཱཡ སནྠཏམྤི ཧི ཡཱཝ སོ ཏཏྠ ན ནིསཱིདཏི, ‘གཙྪ ཏྭ’ནྟི ཝཱ ན བྷཎཏི, ཏཱཝ སནྠཱརཀསྶེཝ བྷཱརོ. སནྠརཱཔེཏྭཱཏི ཨནུཔསམྤནྣེན སནྠརཱཔེཏྭཱ. ཨེཏདེཝ ཧི ཏསྶ པལིབོདྷོ ཧོཏི, ཨུཔསམྤནྣེན སནྠཏཾ སནྠཱརཀསྶེཝ བྷཱརོ, ཏཉྩ ཁོ ཡཱཝ ཨཱཎཱཔཀོ ཏཏྠ ན ནིསཱིདཏི, ‘གཙྪ ཏྭ’ནྟི ཝཱ ན བྷཎཏི. ཡསྨིཉྷི ཨཏྟནཱ སནྠརཱཔིཏེ ཝཱ པཀཏིསནྠཏེ ཝཱ ཨུཔསམྤནྣོ ནིསཱིདཏི, སབྦཾ ཏཾ ནིསིནྣསྶེཝ བྷཱརོ, ཏསྨཱ སནྠརཱཔིཏནྟྭེཝ སངྑཾ གཙྪཏི. ཏཾ པཀྐམནྟོ ནེཝ ཨུདྡྷརེཡྻ, ན ཨུདྡྷརཱཔེཡྻཱཏི ཨཏྟནཱ ཝཱ ཨུདྡྷརིཏྭཱ པཏིརཱུཔེ ཋཱནེ ན ཋཔེཡྻ, པརེན ཝཱ ཏཐཱ ན ཀཱརཱཔེཡྻ. ཨནཱཔུཙྪཾ ཝཱ གཙྪེཡྻཱཏི ཡོ བྷིཀྑུ ཝཱ སཱམཎེརོ ཝཱ ཨཱརཱམིཀོ ཝཱ ལཛྫཱི ¶ ཧོཏི, ཨཏྟནོ པལིབོདྷཾ ཝིཡ མཉྙཏི, ཏཐཱརཱུཔཾ ཨནཱཔུཙྪིཏྭཱ ཏཾ སེནཱསནཾ ཏསྶ ཨནིཡྻཱཏེཏྭཱ ནིརཔེཀྑོ གཙྪཏི, ཐཱམམཛ྄ཛྷིམསྶ པུརིསསྶ ལེཌྜུཔཱཏཾ ཨཏིཀྐམེཡྻ, ཏསྶ ཨེཀེན པཱདེན ལེཌྜུཔཱཏཱཏིཀྐམེ དུཀྐཊཾ, དུཏིཡཔཱདཱཏིཀྐམེ པཱཙིཏྟིཡཾ. བྷོཛནསཱལཱཡ ཋིཏོ པན ‘‘ཨསུཀསྨིཾ ནཱམ དིཝཱཝིཧཱརཊྛཱནེ པཉྙཔེཏྭཱ གཙྪཱཧཱི’’ཏི པེསེཏྭཱ ཏཏོ ནིཀྑམིཏྭཱ ཨཉྙཏྠ གཙྪནྟོ པཱདུདྡྷཱརེན ཀཱརེཏབྦོ.

སཱཝཏྠིཡཾ ¶ སམྦཧུལེ བྷིཀྑཱུ ཨཱརབྦྷ སནྠཏཾ ཨནུདྡྷརིཏྭཱ ཨནཱཔུཙྪཾ པཀྐམནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, པུགྒལིཀེ ཏིཀདུཀྐཊཾ, ཙིམིལིཀཾ ཝཱ ཨུཏྟརཏྠརཎཾ ཝཱ བྷཱུམཏྠརཎཾ ཝཱ ཏཊྚིཀཾ ཝཱ ཙམྨཀྑཎྜཾ ཝཱ པཱདཔུཉྪནཾ ཝཱ ཕལཀཔཱིཋཾ ཝཱ ཡཾ ཝཱ པནཉྙཾ ཀཉྩི དཱརུབྷཎྜཾ མཏྟིཀཱབྷཎྜཾ ཨནྟམསོ པཏྟཱདྷཱརཀམྤི ཝུཏྟལཀྑཎེ ཨཛ྄ཛྷོཀཱསེ ཋཔེཏྭཱ གཙྪནྟསྶ དུཀྐཊམེཝ. ཨཱརཉྙཀེན པན ཨསཏི ཨནོཝསྶཀེ སབྦཾ རུཀྑེ ལགྒེཏྭཱཔི ཡཐཱ ཝཱ ཨུཔཙིཀཱཧི ན ཁཛྫཏི, ཨེཝཾ ཀཏྭཱཔི གནྟུཾ ཝཊྚཏི. ཨབྦྷོཀཱསིཀེན པན ཙཱིཝརཀུཊིཀཾ ཀཏྭཱཔི རཀྑིཏབྦཾ. ཨཏྟནོ སནྟཀེ, ཝིསྶཱསིཀཔུགྒལིཀེ, ཨུདྡྷརཎཱདཱིནི ཀཏྭཱ གམནེ, ཨོཏཱཔེནྟསྶ, ‘‘ཨཱགནྟྭཱ ཨུདྡྷརིསྶཱམཱི’’ཏི གཙྪཏོ, ཝུཌྜྷཏརཱ ཨུཊྛཱཔེནྟི, ཨམནུསྶོ ཏཏྠ ནིསཱིདཏི, ཀོཙི ཨིསྶརོ གཎྷཱཏི, སཱིཧཱདཡོ ཏཾ ཋཱནཾ ཨཱགནྟྭཱ ཏིཊྛནྟི, ཨེཝཾ སེནཱསནཾ པལིབུདྡྷཾ ཧོཏི, ཏཐཱ པལིབུདྡྷེ ཝཱ སེནཱསནེ, ཛཱིཝིཏབྲཧྨཙརིཡནྟརཱཡཀརཱསུ ¶ ཨཱཔདཱསུ ཝཱ གཙྪནྟསྶ, ཨུམྨཏྟཀཱདཱིནཉྩ ཨནཱཔཏྟི. མཉྩཱདཱིནཾ སངྒྷིཀཏཱ, ཝུཏྟལཀྑཎེ དེསེ སནྠརཎཾ ཝཱ སནྠརཱཔནཾ ཝཱ, ཨཔལིབུདྡྷཏཱ, ཨཱཔདཱཡ ཨབྷཱཝོ, ནིརཔེཀྑཏཱ, ལེཌྜུཔཱཏཱཏིཀྐམོཏི ཨིམཱནེཏྠ ཚ ཨངྒཱནི. སམུཊྛཱནཱདཱིནི པཋམཀཐིནསདིསཱནེཝ, ཨིདཾ པན ཀིརིཡཱཀིརིཡནྟི.

པཋམསེནཱསནསིཀྑཱཔདཝཎྞནཱ ནིཊྛིཏཱ.

༥. དུཏིཡསེནཱསནསིཀྑཱཔདཝཎྞནཱ

པཉྩམེ ཝིཧཱརེཏི གབྦྷེ ཝཱ ཨཉྙཏརསྨིཾ ཝཱ སབྦཔརིཙྪནྣེ ཝུཏྟསེནཱསནེ. སེཡྻནྟི སེཡྻཱ ནཱམ བྷིསཱི ཙིམིལིཀཱ ཨུཏྟརཏྠརཎཾ བྷཱུམཏྠརཎཾ ཏཊྚིཀཱ ¶ ཙམྨཀྑཎྜོ ནིསཱིདནཾ པཙྩཏྠརཎཾ ཏིཎསནྠཱརོ པཎྞསནྠཱརོཏི ཝུཏྟཾ. ཏཏྠ ཙིམིལིཀཱ ནཱམ པརིཀམྨཀཏཱཡ བྷཱུམིཡཱ ཝཎྞཱནུརཀྑཎཏྠཾ ཀཏཱ. ཨུཏྟརཏྠརཎཾ ནཱམ མཉྩཔཱིཋཱདཱིནཾ ཨུཔརི ཨཏྠརིཏབྦཡུཏྟཀཾ པཙྩཏྠརཎཾ. བྷཱུམཏྠརཎཾ ནཱམ ཙིམིལིཀཱཡ སཏི ཏསྶཱ ཨུཔརི, ཨསཏི སུདྡྷབྷཱུམིཡཾ ཨཏྠརིཏབྦཱ ཀཊསཱརཀཱདི ཝིཀཏི. ཏཊྚིཀཱ ནཱམ ཏཱལཔཎྞཱདཱིཧི ཀཏཏཊྚིཀཱ. ཙམྨཀྑཎྜོ ནཱམ ཡཾཀིཉྩི ཙམྨཾ, སཱིཧཙམྨཱདཱིནཉྷི པརིཧརཎེཡེཝ པརིཀྑེཔོ, སེནཱསནཔརིབྷོགེ པན ཨཀཔྤིཡཙམྨཾ ནཱམ ནཏྠི. པཙྩཏྠརཎཾ ནཱམ པཱཝཱརོ ཀོཛཝོཏི ཨེཏྟཀམེཝ, སེསཾ པཱཀཊམེཝ. ཨིཏི ཨིམཱསུ དསསུ སེཡྻཱསུ ཨེཀམྤི སེཡྻཾ ཨཏྟནོ ཝསྶགྒེན གཧེཏྭཱ ཝུཏྟལཀྑཎེ ཝིཧཱརེ སནྠརིཏྭཱ ཝཱ སནྠརཱཔེཏྭཱ ཝཱ ཡོ བྷིཀྑུ དིསཾགམིཀོ ཡཐཱ ཋཔིཏཾ ཨུཔཙིཀཱཧི ན ཁཛྫཏི, ཏཐཱ ཋཔནཝསེན ནེཝ ཨུདྡྷརེཡྻ, ན ཨུདྡྷརཱཔེཡྻ, པུརིམསིཀྑཱཔདེ ཝུཏྟནཡེན ཨནཱཔུཙྪཾ ¶ ཝཱ གཙྪེཡྻ, ཏསྶ པརིཀྑིཏྟསྶ ཨཱརཱམསྶ པརིཀྑེཔཾ, ཨཔརིཀྑིཏྟསྶ ཨུཔཙཱརཾ ཨཏིཀྐམནྟསྶ པཋམཔཱདེ དུཀྐཊཾ, དུཏིཡཔཱདེ པཱཙིཏྟིཡཾ. ཡཏྠ པན ཨུཔཙིཀཱསངྐཱ ནཏྠི, ཏཏོ ཨནཱཔུཙྪཱཔི གནྟུཾ ཝཊྚཏི, ཨཱཔུཙྪནཾ པན ཝཏྟཾ.

སཱཝཏྠིཡཾ སཏྟརསཝགྒིཡེ བྷིཀྑཱུ ཨཱརབྦྷ སངྒྷིཀེ ཝིཧཱརེ སེཡྻཾ སནྠརིཏྭཱ ཨནུདྡྷརིཏྭཱ ཨནཱཔུཙྪཱ པཀྐམནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, པུགྒལིཀེ ཏིཀདུཀྐཊཾ, ཝུཏྟལཀྑཎསྶ པན ཝིཧཱརསྶ ཨུཔཙཱརེ བཧི ཨཱསནྣེ ཨུཔཊྛཱནསཱལཱཡ ཝཱ ཨཔརིཙྪནྣམཎྜཔེ ཝཱ པརིཙྪནྣེ ཝཱཔི བཧཱུནཾ སནྣིཔཱཏབྷཱུཏེ རུཀྑམཱུལེ ཝཱ སནྠརིཏྭཱ ཝཱ སནྠརཱཔེཏྭཱ ཝཱ, མཉྩཔཱིཋཉྩ ཝིཧཱརེ ཝཱ ཝུཏྟཔྤཀཱརེ ཝིཧཱརཱུཔཙཱརེ ཝཱ སནྠརིཏྭཱ ཝཱ སནྠརཱཔེཏྭཱ ཝཱ ཨུདྡྷརཎཱདཱིནི ཨཀཏྭཱ གཙྪནྟསྶ དུཀྐཊམེཝ. ཨཏྟནོ སནྟཀེ, ཝིསྶཱསིཀཔུགྒལིཀེ, ཨུདྡྷརཎཱདཱིནི ཀཏྭཱ, པུརིམནཡེནེཝ པལིབུདྡྷཾ ཚཌྜེཏྭཱ གམནེ, ཡོ ཙ ‘‘ཨཛྫེཝ ཨཱགནྟྭཱ པཊིཛགྒིསྶཱམཱི’’ཏི ཨེཝཾ སཱཔེཀྑོ ནདིཔཱརཾ ཝཱ གཱམནྟརཾ ཝཱ གནྟྭཱ ཡཏྠསྶ གམནཙིཏྟཾ ཨུཔྤནྣཾ, ཏཏྠེཝ ཋིཏོ ཀཉྩི པེསེཏྭཱ ཝཱ ཨཱཔུཙྪཏི, ནདིཔཱུརརཱཛཙོརཱདཱིསུ ཝཱ ཀེནཙི པལིབུདྡྷོ ན སཀྐོཏི པཙྩཱགནྟུཾ, ཏསྶ ཙ, ཨཱཔདཱསུ ཙ, ཨུམྨཏྟཀཱདཱིནཉྩ ཨནཱཔཏྟི. ཝུཏྟལཀྑཎསེཡྻཱ ¶ , ཏསྶཱ སངྒྷིཀཏཱ, ཝུཏྟལཀྑཎེ ཝིཧཱརེ སནྠརཎཾ ཝཱ སནྠརཱཔནཾ ཝཱ, ཨཔལིབུདྡྷཏཱ, ཨཱཔདཱཡ ཨབྷཱཝོ, ཨནཔེཀྑསྶ དིསཱཔཀྐམནཾ ¶ , ཨུཔཙཱརསཱིམཱཏིཀྐམོཏི ཨིམཱནེཏྠ སཏྟ ཨངྒཱནི. སམུཊྛཱནཱདཱིནི ཨནནྟརསིཀྑཱཔདེ ཝུཏྟནཡཱནེཝཱཏི.

དུཏིཡསེནཱསནསིཀྑཱཔདཝཎྞནཱ ནིཊྛིཏཱ.

༦. ཨནུཔཁཛྫསིཀྑཱཔདཝཎྞནཱ

ཚཊྛེ ཛཱནནྟི ‘‘ཨནུཊྛཱཔནཱིཡོ ཨཡ’’ནྟི ཛཱནནྟོ, ཏེནེཝསྶ པདབྷཱཛནེ ‘‘ཝུཌྜྷོ’ཏི ཛཱནཱཏི, ‘གིལཱནོ’ཏི ཛཱནཱཏི, ‘སངྒྷེན དིནྣོ’ཏི ཛཱནཱཏཱི’’ཏི (པཱཙི. ༡༢༡) ཝུཏྟཾ. ཝུཌྜྷོ ཧི ཨཏྟནོ ཝུཌྜྷཏཱཡ ཨནུཊྛཱཔནཱིཡོ, གིལཱནོ གིལཱནཏཱཡ, སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརགཎཝཱཙཀཱཙརིཡཱནཾ ཝཱ བཧཱུཔཀཱརཏཾ གུཎཝིསིཊྛཏཉྩ སལླཀྑེཏྭཱ དྷུཝཝཱསཏྠཱཡ ཝིཧཱརཾ སལླཀྑེཏྭཱ སམྨནྣིཏྭཱ དེཏི, ཏསྨཱ ཡསྶ སངྒྷེན དིནྣོ, སོཔི ཨནུཊྛཱཔནཱིཡོ. པུབྦུཔགཏནྟི པུབྦཾ ཨུཔགཏཾ. ཨནུཔཁཛྫཱཏི མཉྩཔཱིཋཱནཾ ཝཱ ཏསྶ ཝཱ བྷིཀྑུནོ པཝིསནྟསྶ ཝཱ ནིཀྑམནྟསྶ ཝཱ ཨུཔཙཱརཾ ཨནུཔཝིསིཏྭཱ. ཏཏྠ མཉྩཔཱིཋཱནཾ ཏཱཝ མཧལླཀེ ཝིཧཱརེ སམནྟཱ དིཡཌྜྷོ ཧཏྠོ ཨུཔཙཱརོ, ཁུདྡཀེ ཡཏོ པཧོཏི, ཏཏོ དིཡཌྜྷོ ཧཏྠོ ¶ , ཏསྶ པན པཝིསནྟསྶ པཱདདྷོཝནཔཱསཱཎཏོ ཡཱཝ མཉྩཔཱིཋཾ, ནིཀྑམནྟསྶ མཉྩཔཱིཋཏོ ཡཱཝ པསྶཱཝཊྛཱནཾ, ཏཱཝ ཨུཔཙཱརོ. སེཡྻཾ ཀཔྤེཡྻཱཏི ཏསྶ སམྦཱདྷཾ ཀཏྟུཀཱམཏཱཡ ཏསྨིཾ ཨུཔཙཱརེ དསསུ སེཡྻཱསུ ཨེཀམྤི སནྠརནྟསྶ ཝཱ སནྠརཱཔེནྟསྶ ཝཱ དུཀྐཊཾ, ཏཏྠ ནིསཱིདནྟསྶ ཝཱ ནིཔཛྫནྟསྶ ཝཱ པཱཙིཏྟིཡཾ, དྭེཔི ཀརོནྟསྶ དྭེ པཱཙིཏྟིཡཱནི, པུནཔྤུནཾ ཀརོནྟསྶ པཡོགགཎནཱཡ པཱཙིཏྟིཡཾ.

སཱཝཏྠིཡཾ ཚབྦགྒིཡེ བྷིཀྑཱུ ཨཱརབྦྷ ཨནུཔཁཛྫ སེཡྻཀཔྤནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, པུགྒལིཀེ ཏིཀདུཀྐཊཾ, ཝུཏྟཱུཔཙཱརཏོ ཝཱ བཧི, ཨུཔཊྛཱནསཱལཱདིཀེ ཝཱ, ཝིཧཱརསྶ ཨུཔཙཱརེ ཝཱ, སནྠརཎསནྠརཱཔནེསུཔི ནིསཛྫསཡནེསུཔི དུཀྐཊམེཝ. ཨཏྟནོ ཝཱ, ཝིསྶཱསིཀསྶ ཝཱ སནྟཀེ པན ཝིཧཱརེ སནྠརནྟསྶ, ཡོ ཙ གིལཱནོ ཝཱ སཱིཏུཎྷཔཱིལི༹ཏོ ཝཱ པཝིསཏི, ཏསྶ ཙ, ཨཱཔདཱསུ ཙ, ཨུམྨཏྟཀཱདཱིནཉྩ ཨནཱཔཏྟི. སངྒྷིཀཝིཧཱརཏཱ, ཨནུཊྛཱཔནཱིཡབྷཱཝཛཱནནཾ, སམྦཱདྷེཏུཀཱམཏཱ, ཨུཔཙཱརེ ནིསཱིདནཾ ཝཱ ནིཔཛྫནཾ ཝཱཏི ཨིམཱནེཏྠ ¶ ཙཏྟཱརི ཨངྒཱནི. སམུཊྛཱནཱདཱིནི པཋམཔཱརཱཛིཀསདིསཱནེཝ, ཨིདཾ པན དུཀྑཝེདནམེཝཱཏི.

ཨནུཔཁཛྫསིཀྑཱཔདཝཎྞནཱ ནིཊྛིཏཱ.

༧. ནིཀྐཌྜྷནསིཀྑཱཔདཝཎྞནཱ

སཏྟམེ ཀུཔིཏོཏི ཀུདྡྷོ. ཨནཏྟམནོཏི ཨཏུཊྛཙིཏྟོ. ནིཀྐཌྜྷེཡྻ ཝཱ ནིཀྐཌྜྷཱཔེཡྻ ཝཱ པཱཙིཏྟིཡནྟི ཨེཏྠ ཡེ ཨནེཀབྷཱུམཀཱ ¶ པཱསཱདཱ, ཨནེཀཀོཊྛཀཱནི ཝཱ ཙཏུསྶཱལཱནི, ཏཱདིསེསུ སེནཱསནེསུ གཧེཏྭཱ ཨནྟརཱ ཨཊྛཔེཏྭཱ ཨེཀེནེཝ པཡོགེན ཨཏིཀྐཱམེནྟསྶ ཨེཀཾ པཱཙིཏྟིཡཾ, ཋཔེཏྭཱ ཋཔེཏྭཱ ནཱནཱཔཡོགེཧི ཨཏིཀྐཱམེནྟསྶ དྭཱརགཎནཱཡ པཱཙིཏྟིཡཱནི, ཧཏྠེན ཨནཱམསིཏྭཱ ‘ནིཀྑམཱ’ཏི ཝཏྭཱ ཝཱཙཱཡ ནིཀྐཌྜྷནྟསྶཱཔི ཨེསེཝ ནཡོ. ནིཀྐཌྜྷཱཔེནྟསྶ པན ‘ནིཀྐཌྜྷཱ’ཏི ཨཱཎཏྟམཏྟེ དུཀྐཊཾ, སཀིཾ ཨཱཎཏྟེ པན ཏསྨིཾ བཧུཀེཔི དྭཱརེ ནིཀྑམནྟེ ཨིཏརསྶ ཨེཀམེཝ པཱཙིཏྟིཡཾ. སཙེ པན ‘‘ཨེཏྟཀཱནི དྭཱརཱནི ནིཀྐཌྜྷཱཧཱི’’ཏི ཝཱ, ‘‘ཡཱཝ མཧཱདྭཱརཾ, ཏཱཝ ནིཀྐཌྜྷཱཧཱི’’ཏི ཝཱ ཨེཝཾ ནིཡམེཏྭཱ ཨཱཎཏྟོ ཧོཏི, དྭཱརགཎནཱཡ པཱཙིཏྟིཡཱནི.

སཱཝཏྠིཡཾ ཚབྦགྒིཡེ བྷིཀྑཱུ ཨཱརབྦྷ བྷིཀྑུཾ སངྒྷིཀཱ ཝིཧཱརཱ ནིཀྐཌྜྷནཝཏྠུསྨིཾ

པཉྙཏྟཾ ¶ , སཱདྷཱརཎཔཉྙཏྟི, སཱཎཏྟིཀཾ, ཏིཀཔཱཙིཏྟིཡཾ, པུགྒལིཀེ ཏིཀདུཀྐཊཾ, ཏསྶ པརིཀྑཱརནིཀྐཌྜྷནེ, ཨུཔཊྛཱནསཱལཱདིཀཱ ཝིཧཱརཱུཔཙཱརཱ ཏསྶ ཝཱ ཏསྶ པརིཀྑཱརསྶ ཝཱ ནིཀྐཌྜྷནེ, ཨནུཔསམྤནྣསྶ པན ཨནུཔསམྤནྣཔརིཀྑཱརསྶ ཝཱ ཝིཧཱརཱ ཝཱ ཝིཧཱརཱུཔཙཱརཱ ཝཱ ནིཀྐཌྜྷནེ ནིཀྐཌྜྷཱཔནེ ཙ དུཀྐཊམེཝ. ཏཉྩ ཁོ ཨསམྦདྡྷེསུ པརིཀྑཱརེསུ པརིཀྑཱརགཎནཱཡ ཝེདིཏབྦཾ. ཨཏྟནོ ཝཱ, ཝིསྶཱསིཀསྶ ཝཱ སནྟཀཱ ཝིཧཱརཱ ནིཀྐཌྜྷནེ, སཀལསངྒྷཱརཱམཏོཔི བྷཎྜནཀཱརཀསྶ ཝཱ ཏསྶ པརིཀྑཱརསྶ ཝཱ ནིཀྐཌྜྷནེ ནིཀྐཌྜྷཱཔནེ ཝཱ, ཨཏྟནོ ཝསནཊྛཱནཏོ ཨལཛྫིསྶ, ཨུམྨཏྟཀསྶ, ན སམྨཱཝཏྟནྟཱནཾ ཨནྟེཝཱསིཀསཨཝིཧཱརིཀཱནཾ, ཏེསཾ པརིཀྑཱརསྶ ཝཱ ནིཀྐཌྜྷནེ ཙ, སཡཾ ཨུམྨཏྟཀཱདཱིནཉྩ ཨནཱཔཏྟི. སངྒྷིཀཝིཧཱརོ ¶ , ཨུཔསམྤནྣསྶ བྷཎྜནཀཱརཀབྷཱཝཱདིཝིནིམུཏྟཏཱ, ཀོཔེན ནིཀྐཌྜྷནཾ ཝཱ ནིཀྐཌྜྷཱཔནཾ ཝཱཏི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནི, ཨིདཾ པན དུཀྑཝེདནནྟི.

ནིཀྐཌྜྷནསིཀྑཱཔདཝཎྞནཱ ནིཊྛིཏཱ.

༨. ཝེཧཱསཀུཊིསིཀྑཱཔདཝཎྞནཱ

ཨཊྛམེ ཨུཔརིཝེཧཱསཀུཊིཡཱཏི ཨུཔརི ཨཙྪནྣཏལཱཡ དྭིབྷཱུམིཀཀུཊིཡཱ ཝཱ ཏིབྷཱུམིཀཀུཊིཡཱ ཝཱ, པདབྷཱཛནེ པན ཨིདྷ ཨདྷིཔྤེཏཾ ཀུཊིཾ དསྶེཏུཾ ‘‘མཛ྄ཛྷིམསྶ པུརིསསྶ ཨསཱིསགྷཊྚཱ’’ཏི (པཱཙི. ༡༣༡) ཝུཏྟཾ. ཨཱཧཙྩཔཱདཀནྟི ཨངྒེ ཝིཛ྄ཛྷིཏྭཱ པཝེསིཏཔཱདཀཾ. ཨབྷིནིསཱིདེཡྻཱཏི ཨབྷིབྷཝིཏྭཱ ཨཛ྄ཛྷོཏྠརིཏྭཱ ནིསཱིདེཡྻ, བྷུམྨཏྠེ ཝཱ ཨེཏཾ ཨུཔཡོགཝཙནཾ, མཉྩེ ཝཱ པཱིཋེ ཝཱ ནིསཱིདེཡྻ ཝཱ ནིཔཛྫེཡྻ ཝཱཏི ཨཏྠོ. ཨབྷཱིཏི ཨིདཾ པན པདསོབྷཎཏྠེ ཨུཔསགྒམཏྟམེཝ, ཏསྨཱ ཡོ བྷིཀྑུ ཝུཏྟལཀྑཎཱཡ ཝེཧཱསཀུཊིཡཱ སབྦནྟིམེན པརིཙྪེདེན ཡཱཝ པམཱཎམཛ྄ཛྷིམསྶ པུརིསསྶ སབྦསོ ཧེཊྛིམཱཧི ཏུལཱཧི སཱིསཾ ན གྷཊྚེཏི, ཨེཏྟཀཾ ཨུཙྩཱཡ ཏུལཱནཾ ཨུཔརི ཋཔིཏེ ཨཱཧཙྩཔཱདཀེ མཉྩེ ཝཱ པཱིཋེ ཝཱ ནིསཱིདཏི ཝཱ ནིཔཛྫཏི ཝཱ, ཏསྶ ཨནུཔཁཛྫསིཀྑཱཔདེ ཝུཏྟནཡེན པཡོགགཎནཱཡ པཱཙིཏྟིཡཾ.

སཱཝཏྠིཡཾ ¶ ཨཉྙཏརཾ བྷིཀྑུཾ ཨཱརབྦྷ ཨུཔརིཝེཧཱསཀུཊིཡཱ ཨཱཧཙྩཔཱདཀཾ མཉྩཾ པཱིཋཾ སཧསཱ ཨབྷིནིསཱིདནཨབྷིནིཔཛྫནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, པུགྒལིཀེ ཏིཀདུཀྐཊཾ, ཨཏྟནོ ཝཱ, ཝིསྶཱསིཀསྶ ཝཱ སནྟཀེ ཝིཧཱརེ, ཨཝེཧཱསཀུཊིཡཱ, སཱིསགྷཊྚཱཡ, ཡསྶ ཝཱ ཧེཊྛཱ དབྦསམྦྷཱརཱདཱིནཾ ནིཀྑིཏྟཏྟཱ ཨཔརིབྷོགཾ ཧོཏི, ཨུཔརིཏལཾ ཝཱ པདརསཉྩིཏཾ སུདྷཱདིཔརིཀམྨཀཏཾ ཝཱ, ཏཏྠ ཨཱཧཙྩཔཱདཀེ ནིསཱིདནྟསྶ, ཡོ ¶ ཙེ ཏསྨིཾ ཝེཧཱསཊྛེཔི ཨཱཧཙྩཔཱདཀེ ཋིཏོ ཀིཉྩི གཎྷཱཏི ཝཱ ལགྒཏི ཝཱ, ཡསྶ ཙ པཊཱཎཱི དིནྣཱ ཧོཏི, པཱདསཱིསཱནཾ ཨུཔརི ཨཱཎཱི པཝེསིཏཱ, ཏཏྠ ནིསཱིདནྟསྶ, ཨུམྨཏྟཀཱདཱིནཉྩ ཨནཱཔཏྟི. སངྒྷིཀོ ཝིཧཱརོ, ཨསཱིསགྷཊྚཱ ཝེཧཱསཀུཊི, ཧེཊྛཱ སཔརིབྷོགཾ ¶ , ཨཔཊཱཎིདིནྣེ ཨཱཧཙྩཔཱདཀེ ནིསཱིདནཾ ཝཱ ནིཔཛྫནཾ ཝཱཏི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི ཨེལ༹ཀལོམསདིསཱནཱིཏི.

ཝེཧཱསཀུཊིསིཀྑཱཔདཝཎྞནཱ ནིཊྛིཏཱ.

༩. མཧལླཀཝིཧཱརསིཀྑཱཔདཝཎྞནཱ

ནཝམེ མཧལླཀནྟི སསྶཱམིཀཾ. ཝིཧཱརནྟི ཨུལླིཏྟཱཝལླིཏྟཾ. ཡཱཝ དྭཱརཀོསཱཏིཨེཏྠ དྭཱརཀོསོ ནཱམ ཨུཀྐཊྛཔརིཙྪེདེན པིཊྛསངྒྷཱཊསྶ སཱམནྟཱ ཨཌྜྷཏེཡྻཧཏྠོ པདེསོ. ཨགྒལ༹ཊྛཔནཱཡཱཏི སཀཝཱཊཀསྶ དྭཱརབནྡྷསྶ ནིཙྩལབྷཱཝཏྠཱཡ. ཀཝཱཊཉྷི ལཧུཔརིཝཏྟཀཾ ཝིཝརཎཀཱལེ བྷིཏྟིཾ ཨཱཧནཏི, པིདཧནཀཱལེ དྭཱརབནྡྷཾ. ཏེན ཨཱཧནེན བྷིཏྟི ཀམྤཏི, ཏཏོ མཏྟིཀཱ ཙལཏི, ཙལིཏྭཱ སིཐིལཱ ཝཱ ཧོཏི པཏཏི ཝཱ, ཏེནཱཧ བྷགཝཱ ‘‘ཡཱཝ དྭཱརཀོསཱ ཨགྒལ༹ཊྛཔནཱཡཱ’’ཏི. ཏཏྠ ཀིཉྩཱཔི ‘‘ཨིདཾ ནཱམ ཀཏྟབྦ’’ནྟི ནེཝ མཱཏིཀཱཡཾ, ན པདབྷཱཛནེ ཝུཏྟཾ, ཨཊྛུཔྤཏྟིཡཾ པན ‘‘པུནཔྤུནཾ ཚཱདཱཔེསི, པུནཔྤུནཾ ལེཔཱཔེསཱི’’ཏི (པཱཙི. ༡༣༤) ཨདྷིཀཱརཏོ ཡཱཝ དྭཱརཀོསཱ ཨགྒལ༹ཊྛཔནཱཡ པུནཔྤུནཾ ལིམྤིཏབྦོ ཝཱ ལེཔཱཔེཏབྦོ ཝཱཏི ཨེཝམཏྠོ དཊྛབྦོ. ཨཱལོཀསནྡྷིཔརིཀམྨཱཡཱཏིཨེཏྠ ཨཱལོཀསནྡྷཱིཏི ཝཱཏཔཱནཀཝཱཊཀཱ ཝུཙྩནྟི. ཏེ ཝིཝརཎཀཱལེ ཝིདཏྠིམཏྟམྤི ཨཏིརེཀམྤི བྷིཏྟིཔྤདེསཾ པཧརནྟི, ཨུཔཙཱརོ པནེཏྠ སབྦདིསཱསུ ལབྦྷཏི, ཏསྨཱ སབྦདིསཱསུ ཀཝཱཊཝིཏྠཱརཔྤམཱཎོ ཨོཀཱསོ ཨཱལོཀསནྡྷིཔརིཀམྨཏྠཱཡ ལིམྤིཏབྦོ ཝཱ ལེཔཱཔེཏབྦོ ཝཱཏི ཨཡམེཏྠ ཨདྷིཔྤཱཡོ.

ཨེཝཾ ལེཔཀམྨེ ཡཾ ཀཏྟབྦཾ, ཏཾ དསྶེཏྭཱ ཨིདཱནི ཚདནེ ཀཏྟབྦཾ དསྶེཏུཾ དྭཏྟིཙྪདནསྶཱཏིཨཱདིམཱཧ. ཏཏྠ དྭཏྟིཙྪདནསྶ པརིཡཱཡནྟི ཚདནསྶ དྭཏྟིཔརིཡཱཡཾ, པརིཡཱཡཾ ཝུཙྩཏི པརིཀྑེཔོ, པརིཀྑེཔདྭཡཾ ཝཱ པརིཀྑེཔཏྟཡཾ ཝཱ ཨདྷིཊྛཱཏབྦནྟི ཨཏྠོ. ཨཔྤཧརིཏེ ཋིཏེནཱཏི ཨཧརིཏེ ཋིཏེན. ཧརིཏནྟི ཙེཏྠ སཏྟདྷཉྙཱདིབྷེདཾ ¶ པུབྦཎྞཾ, མུགྒམཱསཏིལཀུལཏྠཨལཱབུཀུམྦྷཎྜཱདིབྷེདཉྩ ཨཔརཎྞཾ ཨདྷིཔྤེཏཾ. ཡཾ ཏསྨིཾ ཁེཏྟེ ཝུཏྟཾ ¶ ན ཏཱཝ སམྤཛྫཏི, ཝསྶེ པན པཏིཏེ སམྤཛྫིསྶཏི, ཏམྤི ཧརིཏསངྑམེཝ གཙྪཏི. ཏསྨཱ ཏསྨིཾ ཋཏྭཱ ཨདྷིཊྛཧནྟོ དུཀྐཊཾ ཨཱཔཛྫཏི. ཨཔྤཧརིཏེ ཋཏྭཱ ཨདྷིཊྛཧནྟསྶཱཔི ཨཡཾ པརིཙྪེདོ, པིཊྛིཝཾསསྶ ¶ ཝཱ ཀཱུཊཱགཱརཐཱུཔིཀཱཡ ཝཱ པསྶེ ནིསིནྣོ པུརིསོ ཚདནམུཁཝཊྚིཨནྟེན ཨོལོཀེནྟོ ཡསྨིཾ བྷཱུམིབྷཱགེ ཋིཏཾ བྷིཀྑུཾ པསྶཏི, ཡསྨིཉྩ ཋིཏོ ཏཾ ཨུཔརི ནིསིནྣཀཾ ཏཐེཝ ཨུལློཀེནྟོ པསྶཏི, ཏསྨིཾ ཋཱཏབྦཾ, ཏསྶ ཨནྟོ ཨཧརིཏེཔི ཋཱཏུཾ ན ལབྷཏི. ཏཏོ ཙེ ཨུཏྟརཱིཏི མགྒེན ཚཱདིཡམཱནེ ཏིཎྞཾ མགྒཱནཾ, པརིཡཱཡེན ཚཱདིཡམཱནེ ཏིཎྞཾ པརིཡཱཡཱནཾ ཨུཔརི ཨིཊྛཀསིལཱསུདྷཱཧི ཚཱདིཡམཱནེ ཨིཊྛཀསིལཱསུདྷཱཔིཎྜགཎནཱཡ, ཏིཎཔཎྞེཧི ཚཱདིཡམཱནེ པཎྞགཎནཱཡ ཙེཝ ཏིཎམུཊྛིགཎནཱཡ ཙ པཱཙིཏྟིཡཾ.

ཀོསམྦིཡཾ ཚནྣཏྠེརཾ ཨཱརབྦྷ པུནཔྤུནཾ ཚཱདཱཔནལེཔཱཔནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཨཱུནདྭཏྟིཔརིཡཱཡེ ཨཏིརེཀསཉྙིནོ ཝེམཏིཀསྶ ཝཱ དུཀྐཊཾ. སེཏཝཎྞཱདིཀརཎེ, དྭཏྟིཔརིཡཱཡེ ཝཱ ཨཱུནཀདྭཏྟིཔརིཡཱཡེ ཝཱ, ལེཎགུཧཱཏིཎཀུཊིཀཱདཱིསུ, ཨཉྙསྶཏྠཱཡ, ཨཏྟནོ དྷནེན ཀཱརེནྟསྶ, ཝཱསཱགཱརཾ ཋཔེཏྭཱ སེསཱནི ཨདྷིཊྛཧནྟསྶ, ཨུམྨཏྟཀཱདཱིནཉྩ ཨནཱཔཏྟི. མཧལླཀཝིཧཱརཏཱ, ཨཏྟནོ ཝཱསཱགཱརཏཱ, ཨུཏྟརི ཨདྷིཊྛཱནནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི སཉྩརིཏྟེ ཝུཏྟནཡཱནེཝཱཏི.

མཧལླཀཝིཧཱརསིཀྑཱཔདཝཎྞནཱ ནིཊྛིཏཱ.

༡༠. སཔྤཱཎཀསིཀྑཱཔདཝཎྞནཱ

དསམེ ཛཱནཾ སཔྤཱཎཀནྟི ‘‘སཔྤཱཎཀཾ ཨེཏ’’ནྟི དིསྭཱ ཝཱ སུཏྭཱ ཝཱ ཡེན ཀེནཙི ཨཱཀཱརེན ཛཱནནྟོ. སིཉྩེཡྻ ཝཱ སིཉྩཱཔེཡྻ ཝཱཏི ཏེན ཨུདཀེན སཡཾ ཝཱ སིཉྩེཡྻ, ཨཉྙཾ ཝཱ ཨཱཎཱཔེཏྭཱ སིཉྩཱཔེཡྻ. ཏཏྠ དྷཱརཾ ཨཝིཙྪིནྡིཏྭཱ སིཉྩནྟསྶ ཨེཀསྨིཾ གྷཊེ ཨེཀཱཝ ཨཱཔཏྟི, ཝིཙྪིནྡནྟསྶ པཡོགགཎནཱཡ ཨཱཔཏྟིཡོ. མཱཏིཀཾ པམུཁཾ ཀརོཏི, དིཝསམྤི སནྡཏུ, ཨེཀཱཝ ཨཱཔཏྟི. ཏཏྠ ཏཏྠ བནྡྷིཏྭཱ ཨཉྙཏོ ནེནྟསྶ པཡོགགཎནཱཡ ཨཱཔཏྟིཡོ. བཧུཀམྤི ཏིཎཔཎྞསཱཁཱདིཾ ཨེཀཔྤཡོགེན ¶ ཨུདཀེ པཀྑིཔནྟསྶ ཨེཀཱཝ ཨཱཔཏྟི, ཨེཀེཀཾ པཀྑིཔནྟསྶ པཡོགགཎནཱཡ ཨཱཔཏྟིཡོ. ཨིདཉྩ ཡཾ ཨེཝཾ པཀྑིཔིཡམཱནེ པརིཡཱདཱནཾ གཙྪཏི, ཨཱཝིལཾ ཝཱ ཧོཏི, ཡཐཱ པཱཎཀཱ མརནྟི, ཏཱདིསཾ སནྡྷཱཡ ཝུཏྟཾ, ན མཧཱཨུདཀཾ. སིཉྩཱཔནེ ཨཱཎཏྟིཡཱ དུཀྐཊཾ, ཨེཀཱཎཏྟིཡཱ བཧུཀམྤི སིཉྩཏུ, ཨཱཎཱཔཀསྶ ཨེཀམེཝ པཱཙིཏྟིཡཾ.

ཨཱལ༹ཝིཡཾ ཨཱལ༹ཝཀེ བྷིཀྑཱུ ཨཱརབྦྷ སིཉྩནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, སཱཎཏྟིཀཾ ¶ , ཨཔྤཱཎཀེ སཔྤཱཎཀསཉྙིནོ, ཨུབྷོསུ ¶ ཝེམཏིཀསྶ དུཀྐཊཾ. ཨཔྤཱཎཀསཉྙིནོ, ཨསཉྩིཙྩ ཨསྶཏིཡཱ ཝཱ སིཉྩནྟསྶ, ཨཛཱནནྟསྶ, ཨུམྨཏྟཀཱདཱིནཉྩ ཨནཱཔཏྟི. ཨུདཀསྶ སཔྤཱཎཀཏཱ, ‘‘སིཉྩནེན པཱཎཀཱ མརིསྶནྟཱི’’ཏི ཛཱནནཾ, ཏཉྩ ཨུདཀཾ ཏཱདིསམེཝ, ཝིནཱ ཝདྷཀཙེཏནཱཡ ཡེན ཀེནཙི ཀརཎཱིཡེན ཏིཎཱདཱིནཾ སིཉྩནནྟི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནི, ཨིདཾ པན པཎྞཏྟིཝཛྫཾ, ཏིཙིཏྟཾ, ཏིཝེདནནྟི.

སཔྤཱཎཀསིཀྑཱཔདཝཎྞནཱ ནིཊྛིཏཱ.

བྷཱུཏགཱམཝགྒོ དུཏིཡོ.

༣. ཨོཝཱདཝགྒོ

༡. ཨོཝཱདསིཀྑཱཔདཝཎྞནཱ

ཨོཝཱདཝགྒསྶ པཋམེ ཨསམྨཏོཏི ཡཱ ཨཊྛངྒསམནྣཱགཏསྶ བྷིཀྑུནོ བྷགཝཏཱ ཉཏྟིཙཏུཏྠེན ཀམྨེན (པཱཙི. ༡༤༦) བྷིཀྑུནོཝཱདཀསམྨུཏི ཨནུཉྙཱཏཱ, ཏཱཡ ཨསམྨཏོ. ཨོཝདེཡྻཱཏི བྷིཀྑུནིསངྒྷཾ ཝཱ སམྦཧུལཱ ཝཱ ཨེཀཾ བྷིཀྑུནིཾ ཝཱ ‘‘ཝསྶསཏཱུཔསམྤནྣཱཡ བྷིཀྑུནིཡཱ ཏདཧུཔསམྤནྣསྶ བྷིཀྑུནོ ཨབྷིཝཱདནཾ པཙྩུཊྛཱནཾ ཨཉྫལིཀམྨཾ སཱམཱིཙིཀམྨཾ ཀཱཏབྦ’’ནྟི ཨཱདིཀེ (ཙཱུལ༹ཝ. ༤༠༣) ཨཊྛ གརུདྷམྨེ ཨོཝཱདཝསེན ཨོསཱརེནྟོ ཨོཝདེཡྻ. པཱཙིཏྟིཡནྟི ཨོཝཱདཔརིཡོསཱནེ པཱཙིཏྟིཡཾ.

སཱཝཏྠིཡཾ ཚབྦགྒིཡེ བྷིཀྑཱུ ཨཱརབྦྷ ཨོཝདནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, ཨནཱཎཏྟིཀཾ, ཨཉྙེན ཝཱ དྷམྨེན བྷིཀྑུནཱིསུ ཨུཔསམྤནྣམཏྟཾ ཝཱ ཨོཝདཏོ དུཀྐཊཾ. སམྨཏསྶཱཔི ཏཉྩེ སམྨུཏིཀམྨཾ ཨདྷམྨཀམྨཾ ཧོཏི, ཏསྨིཾ ཨདྷམྨཀམྨེ ཨདྷམྨཀམྨསཉྙིནོ ཝགྒེ བྷིཀྑུནིསངྒྷེ ཨོཝདཏོ ¶ ཏིཀཔཱཙིཏྟིཡཾ, ཏཐཱ ཝེམཏིཀསྶ དྷམྨཀམྨསཉྙིནོ ཙཱཏི ནཝ པཱཙིཏྟིཡཱནི, སམགྒེཔི བྷིཀྑུནིསངྒྷེན ཝཱཏི ཨདྷམྨཀམྨཝསེན ཨཊྛཱརས. སཙེ པན ཏཾ དྷམྨཀམྨཾ ཧོཏི, ‘‘དྷམྨཀམྨེ དྷམྨཀམྨསཉྙཱི སམགྒཾ བྷིཀྑུནིསངྒྷཾ སམགྒསཉྙཱི ཨོཝདཏཱི’’ཏི (པཱཙི. ༡༥༡) ཨིདཾ ཨཝསཱནཔདཾ ཋཔེཏྭཱ ཏེནེཝ ནཡེན སཏྟརས དུཀྐཊཱནི, ‘‘སམགྒམྷཱཡྻཱ’’ཏི ¶ ཙ ཝུཏྟེ ཨཉྙཾ དྷམྨཾ, ‘‘ཝགྒམྷཱཡྻཱ’’ཏི ཙ ཝུཏྟེ ཨཊྛ གརུདྷམྨེ བྷཎནྟསྶ, ཨོཝཱདཉྩ ཨནིཡྻཱཏེཏྭཱ ཨཉྙཾ དྷམྨཾ བྷཎནྟསྶ དུཀྐཊམེཝ. ཡོ པན དྷམྨཀམྨེ དྷམྨཀམྨསཉྙཱི སམགྒཾ བྷིཀྑུནིསངྒྷཾ སམགྒསཉྙཱི ཨོཝདཏི, གརུདྷམྨཔཱལི༹ཾ ཨུདྡེསཾ དེཏི, པརིཔུཙྪཾ དེཏི, ‘‘ཨོསཱརེཧི ཨཡྻཱ’’ཏི ཝུཙྩམཱནོ ཨོསཱརེཏི, པཉྷཾ པུཊྛོ ཀཐེཏི, བྷིཀྑུནཱིནཾ སུཎམཱནཱནཾ ཨཉྙསྶཏྠཱཡ བྷཎཏི, སིཀྑམཱནཱཡ ཝཱ སཱམཎེརིཡཱ ཝཱ བྷཎཏི, ཏསྶ, ཨུམྨཏྟཀཱདཱིནཉྩ ཨནཱཔཏྟི. ཨསམྨཏཏཱ, བྷིཀྑུནིཡཱ པརིཔུཎྞཱུཔསམྤནྣཏཱ, ཨོཝཱདཝསེན ཨཊྛགརུདྷམྨབྷཎནནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི པདསོདྷམྨསདིསཱནེཝཱཏི.

ཨོཝཱདསིཀྑཱཔདཝཎྞནཱ ནིཊྛིཏཱ.

༢. ཨཏྠངྒཏསིཀྑཱཔདཝཎྞནཱ

དུཏིཡེ ¶ ཨོཝདེཡྻཱཏི ཨཊྛགརུདྷམྨེཧི ཝཱ ཨཉྙེན ཝཱ དྷམྨེན ཨོཝདནྟསྶ སམྨཏསྶཱཔི པཱཙིཏྟིཡམེཝ.

སཱཝཏྠིཡཾ ཨཱཡསྨནྟཾ ཙཱུལ༹པནྠཀཾ ཨཱརབྦྷ ཨཏྠངྒཏེ སཱུརིཡེ ཨོཝདནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, སཱུརིཡེ ཨཏྠངྒཏེ ཨཏྠངྒཏསཉྙིནོ ཝེམཏིཀསྶ ཝཱ, ཨེཀཏོཨུཔསམྤནྣཾ ཨོཝདནྟསྶ ཙ དུཀྐཊཾ. པུརིམསིཀྑཱཔདེ ཝིཡ ཨུདྡེསཱདིནཡེན ཨནཱཔཏྟི. ཨཏྠངྒཏསཱུརིཡཏཱ, པརིཔུཎྞཱུཔསམྤནྣཏཱ, ཨོཝདནནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི པདསོདྷམྨསདིསཱནེཝཱཏི.

ཨཏྠངྒཏསིཀྑཱཔདཝཎྞནཱ ནིཊྛིཏཱ.

༣. བྷིཀྑུནུཔསྶཡསིཀྑཱཔདཝཎྞནཱ

ཏཏིཡེ ¶ བྷིཀྑུནུཔསྶཡནྟི བྷིཀྑུནིཡཱ ཨེཀརཏྟཾ ཝསནཊྛཱནམྤི. ཨོཝདེཡྻཱཏི ཨིདྷ གརུདྷམྨེཧི ཨོཝདནྟསྶེཝ པཱཙིཏྟིཡཾ. སཙེ པན ཨསམྨཏོ ཧོཏི, དྭེ པཱཙིཏྟིཡཱནི. སཙེ པན སཱུརིཡེཔི ཨཏྠངྒཏེ ཨོཝདཏི, ཏཱིཎི ཧོནྟི. སམྨཏསྶ པན རཏྟིཾ ཨོཝདནྟསྶཔི དྭེ ཨེཝ ཧོནྟི. སམྨཏཏྟཱ ཧི བྷིཀྑུསྶ གརུདྷམྨོཝཱདམཱུལཀཾ པཱཙིཏྟིཡཾ ནཏྠི. གིལཱནཱཏི ན སཀྐོཏི ཨོཝཱདཱཡ ཝཱ སཾཝཱསཱཡ ཝཱ གནྟུཾ.

སཀྐེསུ ¶ ཚབྦགྒིཡེ བྷིཀྑཱུ ཨཱརབྦྷ བྷིཀྑུནུཔསྶཡཾ ཨུཔསངྐམིཏྭཱ ཨོཝདནཝཏྠུསྨིཾ པཉྙཏྟཾ, ‘‘ཨཉྙཏྲ སམཡཱ’’ཏི ཨཡམེཏྠ ཨནུཔཉྙཏྟི, ཨསཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཨནུཔསམྤནྣཱཡ ཨུཔསམྤནྣསཉྙིནོ ཝེམཏིཀསྶ ཝཱ, ཨེཀཏོཨུཔསམྤནྣཾ ཡེན ཀེནཙི, ཨིཏརཾ ཨཉྙེན དྷམྨེན ཨོཝདནྟསྶ ཙ དུཀྐཊཾ. སམཡེ, ཨནུཔསམྤནྣཱཡ, པུརིམསིཀྑཱཔདེ ཝིཡ ཨུདྡེསཱདིནཡེན ཙ ཨནཱཔཏྟི. ཨུཔསྶཡཱུཔགམནཾ, པརིཔུཎྞཱུཔསམྤནྣཏཱ, སམཡཱབྷཱཝོ, གརུདྷམྨེཧི ཨོཝདནནྟི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི པཋམཀཐིནསདིསཱནི, ཨིདཾ པན ཀིརིཡཾ ཧོཏཱིཏི.

བྷིཀྑུནུཔསྶཡསིཀྑཱཔདཝཎྞནཱ ནིཊྛིཏཱ.

༤. ཨཱམིསསིཀྑཱཔདཝཎྞནཱ

ཙཏུཏྠེ ཨཱམིསཧེཏཱུཏི ཙཱིཝརཱདཱིནཾ ཨཉྙཏརཧེཏུ. བྷིཀྑཱུཏི སམྨཏཱ བྷིཀྑཱུ ཨིདྷཱདྷིཔྤེཏཱ. པཱཙིཏྟིཡནྟི ཨེཝརཱུཔེ བྷིཀྑཱུ ཨཝཎྞཀཱམཏཱཡ ཨེཝཾ བྷཎནྟསྶ པཱཙིཏྟིཡཾ.

སཱཝཏྠིཡཾ ཚབྦགྒིཡེ བྷིཀྑཱུ ཨཱརབྦྷ ‘‘ཨཱམིསཧེཏུ ཨོཝདནྟཱི’’ཏི བྷཎནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, ཨནཱཎཏྟིཀཾ, དྷམྨཀམྨེ ཏིཀཔཱཙིཏྟིཡཾ, ཨདྷམྨཀམྨེ ཏིཀདུཀྐཊཾ, ཨསམྨཏཾ ཨུཔསམྤནྣཉྩ, ཨནུཔསམྤནྣཉྩ སམྨཏཾ ཝཱ ཨསམྨཏཾ ཝཱ ཨེཝཾ བྷཎནྟསྶ དུཀྐཊམེཝ. ཏཏྠ ཡོ བྷིཀྑུ ཀཱལེ སམྨུཏིཾ ལབྷིཏྭཱ སཱམཎེརབྷཱུམིཡཾ སཎྛིཏོ, ཨཡཾ སམྨཏོ ནཱམ ཨནུཔསམྤནྣོ. པཀཏིཡཱ ཙཱིཝརཱདིཧེཏུ ཨོཝདནྟཾ པན ཨེཝཾ ¶ བྷཎནྟསྶ ¶ , ཨུམྨཏྟཀཱདཱིནཉྩ ཨནཱཔཏྟི. ཨུཔསམྤནྣཏཱ, དྷམྨེན ལདྡྷསམྨུཏིཏཱ, ཨནཱམིསནྟརཏཱ, ཨཝཎྞཀཱམཏཱཡ ཨེཝཾ བྷཎནནྟི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནི, ཨིདཾ པན དུཀྑཝེདནམེཝཱཏི.

ཨཱམིསསིཀྑཱཔདཝཎྞནཱ ནིཊྛིཏཱ.

༥. ཙཱིཝརདཱནསིཀྑཱཔདཝཎྞནཱ

པཉྩམེ སཱཝཏྠིཡཾ ཨཉྙཏརཾ བྷིཀྑུཾ ཨཱརབྦྷ ཙཱིཝརདཱནཝཏྠུསྨིཾ པཉྙཏྟཾ, སེསཀཐཱམགྒོ པནེཏྠ ¶ ཙཱིཝརཔྤཊིགྒཧཎསིཀྑཱཔདེ ཝུཏྟནཡེནེཝ ཝེདིཏབྦོ. ཏཏྲ ཧི བྷིཀྑུ པཊིགྒཱཧཀོ, ཨིདྷ བྷིཀྑུནཱི, ཨཡཾ ཝིསེསོ, སེསཾ ཏཱདིསམེཝཱཏི.

ཙཱིཝརདཱནསིཀྑཱཔདཝཎྞནཱ ནིཊྛིཏཱ.

༦. ཙཱིཝརསིབྦནསིཀྑཱཔདཝཎྞནཱ

ཚཊྛེ ཙཱིཝརནྟི ནིཝཱསནཔཱརུཔནུཔགཾ. སིབྦེཡྻ ཝཱ སིབྦཱཔེཡྻཱ ཝཱཏི ཨེཏྠ སཡཾ སིབྦནྟསྶ སཱུཙིཾ པཝེསེཏྭཱ པཝེསེཏྭཱ ནཱིཧརཎེ པཱཙིཏྟིཡཾ, སཏཀྑཏྟུམྤི ཝིཛ྄ཛྷིཏྭཱ སཀིཾ ནཱིཧརནྟསྶ ཨེཀམེཝ པཱཙིཏྟིཡཾ. ‘སིབྦཱ’ཏི ཝུཏྟོ པན སཙེཔི སབྦཾ སཱུཙིཀམྨཾ ནིཊྛཱཔེཏི, ཨཱཎཱཔཀསྶ ཨེཀམེཝ པཱཙིཏྟིཡཾ. ཨཐ ‘‘ཡཾ ཨེཏྠ ཙཱིཝརེ ཀཏྟབྦཾ, སབྦཾ ཏཾ ཏཝ བྷཱརོ’’ཏི ཝུཏྟོ ནིཊྛཱཔེཏི, ཏསྶ ཨཱརཱཔཐེ ཨཱརཱཔཐེ པཱཙིཏྟིཡཾ. ཨཱཎཱཔཀསྶ ཨེཀཝཱཙཱཡ སམྦཧུལཱནིཔི, པུནཔྤུནཾ ཨཱཎཏྟིཡཾ པན ཝཏྟབྦམེཝ ནཏྠི.

སཱཝཏྠིཡཾ ཨུདཱཡིཏྠེརཾ ཨཱརབྦྷ ཙཱིཝརསིབྦནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, སཱཎཏྟིཀཾ, ཏིཀཔཱཙིཏྟིཡཾ, ཉཱཏིཀཱཡ ཨཉྙཱཏིཀསཉྙིནོ ཝཱ ཝེམཏིཀསྶ ཝཱ, ཨེཀཏོཨུཔསམྤནྣཱཡ སིབྦནྟསྶ ཙ དུཀྐཊཾ. ཨཉྙཾ ཐཝིཀཱདིཔརིཀྑཱརཾ སིབྦནྟསྶ, ཉཱཏིཀཱཡ, སིཀྑམཱནསཱམཎེརཱིནཉྩ ཙཱིཝརམྤི སིབྦནྟསྶ, ཨུམྨཏྟཀཱདཱིནཉྩ ཨནཱཔཏྟི. ཨཉྙཱཏིཀཱཡ བྷིཀྑུནིཡཱ སནྟཀཏཱ ¶ , ནིཝཱསནཔཱརུཔནུཔགཏཱ, ཝུཏྟལཀྑཎཾ སིབྦནཾ ཝཱ སིབྦཱཔནཾ ཝཱཏི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི སཉྩརིཏྟསདིསཱནེཝཱཏི.

ཙཱིཝརསིབྦནསིཀྑཱཔདཝཎྞནཱ ནིཊྛིཏཱ.

༧. སཾཝིདྷཱནསིཀྑཱཔདཝཎྞནཱ

སཏྟམེ སཾཝིདྷཱཡཱཏི སཾཝིདཧིཏྭཱ, གམནཀཱལེ སངྐེཏཾ ཀཏྭཱཏི ཨཏྠོ. ཨེཀདྡྷཱནམགྒནྟི ཨེཀཾ ཨདྡྷཱནསངྑཱཏཾ མགྒཾ, ཨེཀཏོ ཝཱ ཨདྡྷཱནམགྒཾ. སཏྠགམནཱིཡོཏི སཏྠེན སདྡྷིཾ གནྟབྦོ, སེསཾ ཨུཏྟཱནཔདཏྠམེཝ. ཨཡཾ པནེཏྠ ཝིནིཙྪཡོ – ཨཀཔྤིཡབྷཱུམིཡཾ སཾཝིདཧནྟསྶ སཾཝིདཧནཔཙྩཡཱ ཏཱཝ དུཀྐཊཾ. ཏཏྠ ཋཔེཏྭཱ བྷིཀྑུནུཔསྶཡཾ ཨནྟརཱརཱམཾ ཨཱསནསཱལཾ ཏིཏྠིཡསེཡྻཉྩ སེསཱ ཨཀཔྤིཡབྷཱུམི, ཏཏྠ ཋཏྭཱ སཾཝིདཧནྟསྶཱཏི ཨཏྠོ. སཾཝིདཧིཏྭཱ པན ‘‘ཨཛྫ ཝཱ སྭེ ཝཱ’’ཏི ནིཡམིཏཾ ཀཱལཾ ཝིསངྐེཏཾ ཨཀཏྭཱ, དྭཱརཝིསངྐེཏཾ པན མགྒཝིསངྐེཏཾ ཝཱ ཀཏྭཱཔི བྷིཀྑུནིཡཱ ¶ སདྡྷིཾ གཙྪནྟསྶ ཡཱཝ ¶ ཨཱསནྣསྶཱཔི ཨཉྙསྶ གཱམསྶ ‘‘ཨཡཾ ཨིམསྶ ཨུཔཙཱརོ’’ཏི མནུསྶེཧི ཋཔིཏཾ ཨུཔཙཱརཾ ན ཨོཀྐམཏི, ཏཱཝ ཨནཱཔཏྟི. ཏཾ ཨོཀྐམནྟསྶ པན པཋམཔཱདེ དུཀྐཊཾ, དུཏིཡཔཱདེ པཱཙིཏྟིཡཾ, ཨིཏི གཱམཱུཔཙཱརོཀྐམནགཎནཱཡ པཱཙིཏྟིཡཱནི. ཨདྡྷཡོཛནཱཏིཀྐམེ པན གཱམེ ཨསཏི ཨདྡྷཡོཛནགཎནཱཡ པཱཙིཏྟིཡཾ.

སཱཝཏྠིཡཾ ཚབྦགྒིཡེ བྷིཀྑཱུ ཨཱརབྦྷ ཨེཀདྡྷཱནམགྒཔྤཊིཔཛྫནཝཏྠུསྨིཾ པཉྙཏྟཾ, ‘‘ཨཉྙཏྲ སམཡཱ’’ཏི ཨཡམེཏྠ ཨནུཔཉྙཏྟི, ཨསཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཨསཾཝིདཧིཏེ སཾཝིདཧིཏསཉྙིནོ ཝེམཏིཀསྶ ཝཱ, ཡོ ཙ བྷིཀྑུནིཡཱ ཨསཾཝིདཧནྟིཡཱ ཀེཝལཾ ཨཏྟནཱཝ སཾཝིདཧཏི, ཏསྶ དུཀྐཊཾ. སམཡེ སཾཝིདཧིཏྭཱཔི གཙྪནྟསྶ, ཨཏྟནཱ ཨསཾཝིདཧནྟསྶ, ཝིསངྐེཏེན ཝཱ, ཨཱཔདཱསུ གཙྪནྟསྶ, ཨུམྨཏྟཀཱདཱིནཉྩ ཨནཱཔཏྟི. དྭིནྣམྤི སཾཝིདཧིཏྭཱ མགྒཔྤཊིཔཏྟི, ཨཝིསངྐེཏཏཱ, སམཡཱབྷཱཝོ, ཨནཱཔདཱ, གཱམནྟརོཀྐམནཾ ཝཱ ཨདྡྷཡོཛནཱཏིཀྐམོ ཝཱཏི ཨིམཱནེཏྠ པཉྩ ཨངྒཱནི. ཨེཀཏོཨུཔསམྤནྣཱདཱིཧི པན སདྡྷིཾ མཱཏུགཱམསིཀྑཱཔདེན ཨཱཔཏྟི, ཨདྡྷཱནསམུཊྛཱནཾ, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

སཾཝིདྷཱནསིཀྑཱཔདཝཎྞནཱ ནིཊྛིཏཱ.

༨. ནཱཝཱབྷིརུཧནསིཀྑཱཔདཝཎྞནཱ

ཨཊྛམེ ¶ སཾཝིདྷཱཡཱཏི ཀཱིལཱ༹པུརེཀྑཱརོ སཾཝིདཧིཏྭཱ, ཨབྷིརུཧནཀཱལེ སངྐེཏཾ ཀཏྭཱཏི ཨཏྠོ. ཨུདྡྷཾགཱམིནིནྟི ཀཱིལཱ༹ཝསེན ཨུདྡྷཾ ནདིཡཱ པཊིསོཏཾ གཙྪནྟིཾ. ཨདྷོགཱམིནིནྟི ཏཐེཝ ཨདྷོ ཨནུསོཏཾ གཙྪནྟིཾ. ཡཾ པན ཏིཏྠཔྤཊིཔཱདནཏྠཾ ཨུདྡྷཾ ཝཱ ཨདྷོ ཝཱ ཧརནྟི, ཨེཏྠ ཨནཱཔཏྟི. ཨཉྙཏྲ ཏིརིཡཾ ཏརཎཱཡཱཏི ཨུཔཡོགཏྠེ ནིསྶཀྐཝཙནཾ, ཡཱ ཏིརིཡཾ ཏརཎཱ, ཏཾ ཋཔེཏྭཱཏི ཨཏྠོ. པཱཙིཏྟིཡནྟི སགཱམཀཏཱིརཔསྶེན གམནཀཱལེ གཱམནྟརགཎནཱཡ, ཨགཱམཀཏཱིརཔསྶེན ཝཱ ཡོཛནཝིཏྠཏཱཡ ནདིཡཱ མཛ྄ཛྷེན ཝཱ གམནཀཱལེ ཨདྡྷཡོཛནགཎནཱཡ པཱཙིཏྟིཡཾ, སམུདྡེ པན ཡཐཱསུཁཾ གནྟུཾ ཝཊྚཏི.

སཱཝཏྠིཡཾ ཚབྦགྒིཡེ བྷིཀྑཱུ ཨཱརབྦྷ ནཱཝཱབྷིརུཧནཝཏྠུསྨིཾ པཉྙཏྟཾ, ‘‘ཨཉྙཏྲ ཏིརིཡཾ ཏརཎཱཡཱ’’ཏི ཨཡམེཏྠ ཨནུཔཉྙཏྟི, སེསཾ ཨནནྟརསིཀྑཱཔདེ ཝུཏྟནཡེནེཝ ཝེདིཏབྦནྟི.

ནཱཝཱབྷིརུཧནསིཀྑཱཔདཝཎྞནཱ ནིཊྛིཏཱ.

༩. པརིཔཱཙིཏསིཀྑཱཔདཝཎྞནཱ

ནཝམེ ¶ བྷིཀྑུནིཔརིཔཱཙིཏནྟི བྷིཀྑུནིཡཱ པརིཔཱཙིཏཾ, ནེཝ ཏསྶ ནཱཏྟནོ ཉཱཏཀཔྤཝཱརིཏཱནཾ གིཧཱིནཾ སནྟིཀེ བྷིཀྑུསྶ གུཎཾ པཀཱསེཏྭཱ ‘‘དེཐ ཨཡྻསྶ, ཀརོཐ ཨཡྻསྶཱ’’ཏི ཨེཝཾ ནིཔྥཱདིཏཾ ལདྡྷབྦཾ ཀཏནྟི ཨཏྠོ. པུབྦེ གིཧིསམཱརམྦྷཱཏི ཨེཏྠ སམཱརམྦྷོཏི སམཱརདྡྷཾ, པཊིཡཱདིཏསྶེཏཾ ནཱམཾ. གིཧཱིནཾ སམཱརམྦྷོ ¶ གིཧིསམཱརམྦྷོ, བྷིཀྑུནིཡཱ པརིཔཱཙནཏོ པུབྦེ པཋམཏརཾཡེཝ ཡཾ བྷིཀྑཱུནཾ ཨཏྠཱཡ གིཧཱིནཾ པཊིཡཱདིཏབྷཏྟཾ, ཉཱཏཀཔྤཝཱརིཏཱནཾ ཝཱ སནྟཀཾ, ཏཾ ཋཔེཏྭཱ ཨཉྙཾ ཛཱནཾ བྷུཉྫནྟསྶ པཱཙིཏྟིཡནྟི ཨཏྠོ. ཏཉྩ ཁོ ཨཛ྄ཛྷོཧརཎགཎནཱཡ, པཊིགྒཧཎེ པནསྶ དུཀྐཊཾ.

རཱཛགཧེ དེཝདཏྟཾ ཨཱརབྦྷ བྷིཀྑུནིཔརིཔཱཙིཏཔིཎྜཔཱཏབྷུཉྫནཝཏྠུསྨིཾ པཉྙཏྟཾ, ‘‘ཨཉྙཏྲ པུབྦེ གིཧིསམཱརམྦྷཱ’’ཏི ཨཡམེཏྠ ཨནུཔཉྙཏྟི, ཨསཱདྷཱརཎཔཉྙཏྟི, ཨནཱཎཏྟིཀཾ, ཨེཀཏོཨུཔསམྤནྣཱཡ པརིཔཱཙིཏཾ བྷུཉྫནྟསྶ ¶ , ཨཔརིཔཱཙིཏེ པརིཔཱཙིཏསཉྙིནོ, ཨུབྷཡཏྠ ཝེམཏིཀསྶ ཙ དུཀྐཊཾ. ཨུབྷཡཏྠ ཨཔརིཔཱཙིཏསཉྙིནོ, གིཧིསམཱརམྦྷེ, སིཀྑམཱནསཱམཎེརཱདཱིཧི པརིཔཱཙིཏེ, པཉྩ བྷོཛནཱནི ཋཔེཏྭཱ ཨཝསེསེ, ཨུམྨཏྟཀཱདཱིནཉྩ ཨནཱཔཏྟི. བྷིཀྑུནིཡཱ པརིཔཱཙིཏཏཱ, པརིཔཱཙིཏབྷཱཝཛཱནནཾ, གིཧིསམཱརམྦྷཱབྷཱཝོ, ཨོདནཱདཱིནཾ ཨཉྙཏརཏཱ, ཏསྶ ཨཛ྄ཛྷོཧརཎནྟི ཨིམཱནེཏྠ པཉྩ ཨངྒཱནི. སམུཊྛཱནཱདཱིནི པཋམཔཱརཱཛིཀསཨསཱནི, ཨིདཾ པན པཎྞཏྟིཝཛྫཾ, ཏིཙིཏྟཾ, ཏིཝེདནནྟི.

པརིཔཱཙིཏསིཀྑཱཔདཝཎྞནཱ ནིཊྛིཏཱ.

༡༠. རཧོནིསཛྫསིཀྑཱཔདཝཎྞནཱ

དསམེ སབྦོཔི ཀཐཱམགྒོ དུཏིཡཨནིཡཏེ ཝུཏྟནཡེནེཝ ཝེདིཏབྦོ. ཨིདཉྷི སིཀྑཱཔདཾ དུཏིཡཨནིཡཏེན ཙ ཨུཔརི ཨུཔནནྡསྶ ཙཏུཏྠསིཀྑཱཔདེན ཙ ཨེཀཔརིཙྪེདཾ, ཨཊྛུཔྤཏྟིཝསེན པན ཝིསུཾ པཉྙཏྟནྟི.

རཧོནིསཛྫསིཀྑཱཔདཝཎྞནཱ ནིཊྛིཏཱ.

ཨོཝཱདཝགྒོ ཏཏིཡོ.

༤. བྷོཛནཝགྒོ

༡. ཨཱཝསཐསིཀྑཱཔདཝཎྞནཱ

བྷོཛནཝགྒསྶ ¶ པཋམེ ཨགིལཱནེནཱཏི ཨདྡྷཡོཛནམྤི གནྟུཾ སམཏྠེན. ཨེཀོཏི ཨེཀདིཝསིཀོ. ཨཱཝསཐཔིཎྜོཏི ‘‘ཨིམེསཾ ཝཱ ཨེཏྟཀཱནཾ ཝཱ’’ཏི ཨེཀཾ པཱསཎྜཾ ཝཱ, ‘‘ཨེཏྟཀམེཝཱ’’ཏི ཨེཝཾ བྷཏྟཾ ཝཱ ཨནོདིསྶ སཱལཱདཱིསུ ཡཏྠ ཀཏྠཙི པུཉྙཀཱམེཧི པཉྙཏྟཾ བྷོཛནཾ. བྷུཉྫིཏབྦོཏི ཨེཀཀུལེན ཝཱ ནཱནཱཀུལེཧི ཝཱ ཨེཀཏོ ཧུཏྭཱ ཨེཀསྨིཾ ཝཱ ཋཱནེ, ནཱནཱཋཱནེསུ ཝཱ ‘‘ཨཛྫ ཨེཀསྨིཾ, སྭེ ཨེཀསྨི’’ནྟི ཨེཝཾ ཨནིཡཏཊྛཱནེ ཝཱ པཉྙཏྟོ ཨེཀསྨིཾ ཋཱནེ ཨེཀདིཝསམེཝ བྷུཉྫིཏབྦོ. ཏཏོ ཙེ ཨུཏྟརཱིཏི དུཏིཡདིཝསཏོ པཊྛཱཡ ཏསྨིཾ ཝཱ ཋཱནེ ཨཉྙསྨིཾ ཝཱ ཋཱནེ ཏེསཾ སནྟཀསྶ པཊིགྒཧཎེ དུཀྐཊཾ, ཨཛ྄ཛྷོཧཱརེ ཨཛ྄ཛྷོཧཱརེ པཱཙིཏྟིཡཾ.

སཱཝཏྠིཡཾ ¶ ཚབྦགྒིཡེ བྷིཀྑཱུ ཨཱརབྦྷ ཨནུཝསིཏྭཱ ཨཱཝསཐཔིཎྜབྷུཉྫནཝཏྠུསྨིཾ པཉྙཏྟཾ, ‘‘ཨགིལཱནེནཱ’’ཏི ཨཡམེཏྠ ཨནུཔཉྙཏྟི, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, གིལཱནསྶ ཨགིལཱནསཉྙིནོ ཝེམཏིཀསྶ ཝཱ དུཀྐཊཾ. གིལཱནསྶ གིལཱནསཉྙིནོ, ཡོ ཙ སཀིཾ བྷུཉྫཏི, གཙྪནྟོ ཝཱ ཨནྟརཱམགྒེ ཨེཀདིཝསཾ ¶ , གཏཊྛཱནེ ཨེཀདིཝསཾ, པཙྩཱགནྟོཔི ཨནྟརཱམགྒེ ཨེཀདིཝསཾ, ཨཱགཏཊྛཱནེ ཨེཀདིཝསཾ, གམིསྶཱམཱི’ཏི ཙ བྷུཉྫིཏྭཱ ནིཀྑནྟོ ཀེནཙི ཨུཔདྡཝེན ནིཝཏྟིཏྭཱ ཁེམབྷཱཝཾ ཉཏྭཱ གཙྪནྟོ པུན ཨེཀདིཝསཾ བྷུཉྫཏི, ཡསྶ ཝཱ སཱམིཀཱ ནིམནྟེཏྭཱ དེནྟི, ཡོ ཝཱ བྷིཀྑཱུནཾཡེཝ ཨུདྡིསྶ པཉྙཏྟཾ, ན ཡཱཝདཏྠཾ པཉྙཏྟཾ, ཋཔེཏྭཱ ཝཱ པཉྩ བྷོཛནཱནི ཨཉྙཾ བྷུཉྫཏི, ཏསྶ ཙ, ཨུམྨཏྟཀཱདཱིནཉྩ ཨནཱཔཏྟི. ཨཱཝསཐཔིཎྜཏཱ, ཨགིལཱནཏཱ, ཨནུཝསིཏྭཱ པརིབྷོཛནནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཨེལ༹ཀལོམསིཀྑཱཔདསདིསཱནཱིཏི.

ཨཱཝསཐསིཀྑཱཔདཝཎྞནཱ ནིཊྛིཏཱ.

༢. གཎབྷོཛནསིཀྑཱཔདཝཎྞནཱ

དུཏིཡེ གཎབྷོཛནེཏི གཎསྶ བྷོཛནེ. ཨིདྷ ཙ གཎོཏི ཙཏྟཱརོ ཝཱ ཏཏུཏྟརི ཝཱ བྷིཀྑཱུ ¶ , ཏེསཾ ནིམནྟནཏོ ཝཱ ཝིཉྙཏྟིཏོ ཝཱ ལདྡྷེ ཨོདནཱདཱིནཾ པཉྩནྣཾ བྷོཛནཱནཾ ཨཉྙཏརབྷོཛནེཏི ཨཏྠོ. ཏཏྠཱཡཾ ཝིནིཙྪཡོ – སཙེ ཧི ཀོཙི ཙཏྟཱརོ བྷིཀྑཱུ ཨུཔསངྐམིཏྭཱ ཡེན ཀེནཙི ཝེཝཙནེན ཝཱ བྷཱསནྟརེན ཝཱ པཉྩནྣཾ བྷོཛནཱནཾ ནཱམཾ གཧེཏྭཱ ‘‘ཨོདནེན ནིམནྟེམི, ཨོདནཾ མེ གཎྷཐཱ’’ཏིཨཱདིནཱ ནཡེན ནིམནྟེཏི, ཏེ ཙེ ཨེཝཾ ཨེཀཏོ ཝཱ ནཱནཱཏོ ཝཱ ནིམནྟིཏཱ ཨེཀཏོ ཝཱ ནཱནཱཏོ ཝཱ གནྟྭཱ ཨེཀཏོ གཎྷནྟི, པཙྪཱ ཨེཀཏོ ཝཱ ནཱནཱཏོ ཝཱ བྷུཉྫནྟི, གཎབྷོཛནཾ ཧོཏི. པཊིགྒཧཎམེཝ ཧེཏྠ པམཱཎཾ. སཙེ ཨོདནཱདཱིནཾ ནཱམཾ གཧེཏྭཱ ཨེཀཏོ ཝཱ ནཱནཱཏོ ཝཱ ཝིཉྙཱཔེཏྭཱ ཙ གནྟྭཱ ཙ ཨེཀཏོ གཎྷནྟི, ཨེཝམྤི གཎབྷོཛནམེཝ. ཏསྶ དུཝིདྷསྶཱཔི ཨེཝཾ པཊིགྒཧཎེ དུཀྐཊཾ, ཨཛ྄ཛྷོཧཱརེ ཨཛ྄ཛྷོཧཱརེ པཱཙིཏྟིཡཾ. གིལཱནསམཡཱདཱིསུ ཡདཱ པཱདཱནམྤི ཕལིཏཏྟཱ ན སཀྐཱ པིཎྜཱཡ ཙརིཏུཾ, ཨཡཾ ¶ གིལཱནསམཡོ. ཨཏྠཏཀཐིནཱནཾ པཉྩ མཱསཱ, ཨིཏརེསཾ ཀཏྟིཀམཱསོཏི ཨཡཾ ཙཱིཝརདཱནསམཡོ. ཡདཱ ཡོ ཙཱིཝརེ ཀརིཡམཱནེ ཀིཉྩིདེཝ ཙཱིཝརེ ཀཏྟབྦཾ ཀམྨཾ ཀརོཏི, ཨཡཾ ཙཱིཝརཀཱརསམཡོ. ཡདཱ ཨདྡྷཡོཛནམྤི གནྟུཀཱམོ ཝཱ ཧོཏི གཙྪཏི ཝཱ གཏོ ཝཱ, ཨཡཾ ཨདྡྷཱནགམནསམཡོ. ནཱཝཱབྷིརུཧནསམཡེཔི ཨེསེཝ ནཡོ. ཡདཱ གོཙརགཱམེ ཙཏྟཱརོ བྷིཀྑཱུ པིཎྜཱཡ ཙརིཏྭཱ ན ཡཱཔེནྟི, ཨཡཾ མཧཱསམཡོ. ཡདཱ ཡོཀོཙི པབྦཛིཏོ བྷཏྟེན ནིམནྟེཏི, ཨཡཾ སམཎབྷཏྟསམཡོ, ཨེཏེསུ སམཡེསུ བྷུཉྫིཏུཾ ཝཊྚཏི.

རཱཛགཧེ དེཝདཏྟཾ ཨཱརབྦྷ ཝིཉྙཱཔེཏྭཱ བྷུཉྫནཝཏྠུསྨིཾ པཉྙཏྟཾ, ‘‘ཨཉྙཏྲ སམཡཱ’’ཏི ཨཡམེཏྠ སཏྟཝིདྷཱ ཨནུཔཉྙཏྟི, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ནགཎབྷོཛནེ གཎབྷོཛནསཉྙིསྶ ཝེམཏིཀསྶ ཝཱ དུཀྐཊཾ. ནགཎབྷོཛནསཉྙིསྶ པན, ཡེ ཙ དྭེ ཏཡོ ཨེཀཏོ གཎྷནྟི, བཧཱུནཾ པིཎྜཱཡ ¶ ཙརིཏྭཱ ཨེཀཏོ བྷུཉྫནྟཱནཾ, ནིཙྩབྷཏྟིཀཱདཱིསུ, པཉྩ བྷོཛནཱནི ཋཔེཏྭཱ སབྦཏྠ, ཨུམྨཏྟཀཱདཱིནཉྩ ཨནཱཔཏྟི. གཎབྷོཛནཏཱ, སམཡཱབྷཱཝོ, ཨཛ྄ཛྷོཧརཎནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཨེལ༹ཀལོམསདིསཱནེཝཱཏི.

གཎབྷོཛནསིཀྑཱཔདཝཎྞནཱ ནིཊྛིཏཱ.

༣. པརམྤརབྷོཛནསིཀྑཱཔདཝཎྞནཱ

ཏཏིཡེ པརམྤརབྷོཛནེཏི གཎབྷོཛནེ ཝུཏྟནཡེནེཝ པཉྩཧི བྷོཛནེཧི ནིམནྟིཏསྶ ཡེན ཡེན པཋམཾ ནིམནྟིཏོ, ཏསྶ ཏསྶ བྷོཛནཏོ ཨུཔྤཊིཔཱཊིཡཱ ཝཱ ཨཝིཀཔྤེཏྭཱ ཝཱ པརསྶ པརསྶ བྷོཛནེ. ཏསྨཱ ཡོ བྷིཀྑུ པཉྩསུ སཧདྷམྨིཀེསུ ཨཉྙཏརསྶ ‘‘མཡ྄ཧཾ བྷཏྟཔཙྩཱསཾ ཏུཡ྄ཧཾ ¶ དམྨཱི’’ཏི ཝཱ ‘‘ཝིཀཔྤེམཱི’’ཏི ཝཱ ཨེཝཾ སམྨུཁཱ ཝཱ ‘‘ཨིཏྠནྣཱམསྶ དམྨཱི’’ཏི (པཱཙི. ༢༢༦) ཝཱ ‘‘ཝིཀཔྤེམཱི’’ཏི ཝཱ ཨེཝཾ པརམྨུཁཱཝཱ པཋམནིམནྟནཾ ཨཝིཀཔྤེཏྭཱ པཙྪཱ ནིམནྟིཏཀུལེ ལདྡྷབྷིཀྑཏོ ཨེཀསིཏྠམྤི ཨཛ྄ཛྷོཧརཏི, པཱཙིཏྟིཡཾ. སམཡཱ ཝུཏྟནཡཱ ཨེཝ.

ཝེསཱལིཡཾ ¶ སམྦཧུལེ བྷིཀྑཱུ ཨཱརབྦྷ ཨཉྙཏྲ ནིམནྟིཏབྷོཛནཝཏྠུསྨིཾ པཉྙཏྟཾ, ‘‘ཨཉྙཏྲ སམཡཱ’’ཏི ཨཡམེཏྠ ཏིཝིདྷཱ ཨནུཔཉྙཏྟི, པརིཝཱརེ པན ཝིཀཔྤནམྤི གཧེཏྭཱ ‘‘ཙཏསྶོ ཨནུཔཉྙཏྟིཡོ’’ཏི (པརི. ༨༦) ཝུཏྟཾ, ཨསཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ནཔརམྤརབྷོཛནེ པརམྤརབྷོཛནསཉྙིནོ ཝེམཏིཀསྶ ཝཱ དུཀྐཊཾ. ནཔརམྤརབྷོཛནསཉྙིསྶ པན, ཡོ ཙ སམཡེ ཝཱ ཝིཀཔྤེཏྭཱ ཝཱ ཨེཀསཾསཊྛཱནི ཝཱ དྭེ ཏཱིཎི ནིམནྟནཱནི ཨེཀཏོ ཝཱ ཀཏྭཱ བྷུཉྫཏི, ནིམནྟནཔྤཊིཔཱཊིཡཱ བྷུཉྫཏི, སཀལེན གཱམེན ཝཱ པཱུགེན ཝཱ ནིམནྟིཏོ ཏེསུ ཡཏྠཀཏྠཙི བྷུཉྫཏི, ནིམནྟིཡམཱནོ ཝཱ ‘‘བྷིཀྑཾ གཧེསྶཱམཱི’’ཏི ཝདཏི, ཏསྶ, ནིཙྩབྷཏྟིཀཱདཱིསུ, པཉྩ བྷོཛནཱནི ཋཔེཏྭཱ སབྦཏྠ, ཨུམྨཏྟཀཱདཱིནཉྩ ཨནཱཔཏྟི. པརམྤརབྷོཛནཏཱ, སམཡཱབྷཱཝོ, ཨཛ྄ཛྷོཧརཎནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི པཋམཀཐིནསདིསཱནེཝ, ཨིདཾ པན ཀིརིཡཱཀིརིཡནྟི.

པརམྤརབྷོཛནསིཀྑཱཔདཝཎྞནཱ ནིཊྛིཏཱ.

༤. ཀཱཎམཱཏཱསིཀྑཱཔདཝཎྞནཱ

ཙཏུཏྠེ པཱུཝེཧཱིཏི པཧེཎཀཏྠཱཡ པཊིཡཏྟེཧི ཨཏིརསཀམོདཀསཀྑལིཀཱདཱིཧི ཡེཧི ཀེཧིཙི ཁཛྫཀེཧི. མནྠེཧཱིཏི པཱཐེཡྻཏྠཱཡ པཊིཡཏྟེཧི ཡེཧི ཀེཧིཙི སཏྟུཏིལཏཎྜུལཱདཱིཧི. དྭཏྟིཔཏྟཔཱུརཱཏི མུཁཝཊྚིཡཱ ཧེཊྛིམལེཁཾ ཨནཏིཀྐནྟཱ དྭེ ཝཱ ཏཡོ ཝཱ པཏྟཔཱུརཱ. ཏཏོ ཙེ ཨུཏྟརཱིཏི སཙེཔི ཏཏིཡཾ པཏྟཾ ཐཱུཔཱིཀཏཾ གཎྷཱཏི, མུཁཝཊྚིཡཱ ཧེཊྛིམལེཁཏོ ཨུཔརིཊྛིཏཔཱུཝགཎནཱཡ པཱཙིཏྟིཡཾ. དྭཏྟིཔཏྟཔཱུརེ པཊིགྒཧེཏྭཱཏི ཨེཏྠ ཡེན དྭེ གཧིཏཱ ཧོནྟི, ཏེན བཧི བྷིཀྑུཾ དིསྭཱ ‘‘ཨེཏྠ མཡཱ དྭེ པཏྟཔཱུརཱ གཧིཏཱ, ཏྭཾ ཨེཀཾ གཎྷེཡྻཱསཱི’’ཏི ཝཏྟབྦཾ, ཏེནཱཔི ཨཉྙཾ པསྶིཏྭཱ ‘‘པཋམཾ ཨཱགཏེན དྭེ པཏྟཔཱུརཱ གཧིཏཱ, མཡཱ ཨེཀོ གཧིཏོ, ཏྭཾ མཱ གཎྷཱི’’ཏི ཝཏྟབྦཾ. ཡེན པཋམཾ ཨེཀོ གཧིཏོ ¶ , ཏསྶཱཔི པརམྤརཱརོཙནེ ཨེསེཝ ནཡོ. ཡེན པན སཡམེཝ ཏཡོ གཧིཏཱ, ཏེན ཨཉྙཾ དིསྭཱ ‘‘མཱ ཁོ ཏྭཾ ཨེཏྠ པཊིགྒཎྷཱིཏི ཝཏྟབྦཾ, ཨཝདནྟསྶ དུཀྐཊཾ, ཏཾ སུཏྭཱ གཎྷནྟསྶཱཔི དུཀྐཊམེཝ. ཏཏོ ནཱིཧརིཏྭཱ བྷིཀྑཱུཧི སདྡྷིཾ སཾཝིབྷཛིཏབྦནྟི ¶ ལདྡྷཊྛཱནཏོ སབྦཱསནྣཾ ཨཱསནསཱལཾ ཝཱ ཝིཧཱརཾ ཝཱ ཡཏྠ ཝཱ པན ནིབདྡྷཾ ¶ པཊིཀྐམཏི, ཏཏྠ གནྟྭཱ ཨེཀཾ པཏྟཔཱུརཾ ཨཏྟནོ ཋཔེཏྭཱ སེསཾ བྷིཀྑུསངྒྷསྶ དཱཏབྦཾ. ཡཐཱམིཏྟཾ པན དཱཏུཾ ན ལབྦྷཏི. ཡེན ཨེཀོ གཧིཏོ, ན ཏེན ཀིཉྩི ཨཀཱམཱ དཱཏབྦཾ, ཡཐཱརུཙི ཀཱཏབྦཾ.

སཱཝཏྠིཡཾ སམྦཧུལེ བྷིཀྑཱུ ཨཱརབྦྷ ན མཏྟཾ ཛཱནིཏྭཱ པཊིགྒཧཎཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཨཱུནཀདྭཏྟིཔཏྟཔཱུརེ ཨཏིརེཀསཉྙིསྶ ཝེམཏིཀསྶ ཝཱ དུཀྐཊཾ. ཨཱུནཀསཉྙིསྶ པན, ན པཧེཎཀཏྠཱཡ ན པཱཐེཡྻཏྠཱཡ ཝཱ པཊིཡཏྟཾ, ཏདཏྠཱཡ པཊིཡཏྟསེསཀཾ ཝཱ, གམནེ ཝཱ པཊིཔྤསྶདྡྷེ, ཉཱཏཀཔྤཝཱརིཏཱནཾ ཝཱ དེནྟཱནཾ, ཨཏྟནོ དྷནེན གཎྷནྟསྶ, ཨུམྨཏྟཀཱདཱིནཉྩ ཨནཱཔཏྟི. ཝུཏྟལཀྑཎཔཱུཝམནྠཏཱ, ཨསེསཀཏཱ, ཨཔྤཊིཔྤསྶདྡྷགམནཏཱ, ཨནཉྙཱཏཀཱདིཏཱ, ཨཏིརེཀཔྤཊིགྒཧཎནྟི ཨིམཱནེཏྠ པཉྩ ཨངྒཱནི, སམུཊྛཱནཱདཱིནི སཉྩརིཏྟསདིསཱནེཝཱཏི.

ཀཱཎམཱཏཱསིཀྑཱཔདཝཎྞནཱ ནིཊྛིཏཱ.

༥. པཋམཔཝཱརཎཱསིཀྑཱཔདཝཎྞནཱ

པཉྩམེ བྷུཏྟཱཝཱིཏི བྷུཏྟཝཱ, ཡེན པཉྩནྣཾ བྷོཛནཱནཾ སཱསཔམཏྟམྤི ཨཛ྄ཛྷོཧརིཏཾ, སོ ཨེཝཾ ཝུཙྩཏི. པཝཱརིཏོཏི ‘‘ཨསནཾ པཉྙཱཡཏི, བྷོཛནཾ པཉྙཱཡཏི, ཧཏྠཔཱསེ ཋིཏོ ཨབྷིཧརཏི, པཊིཀྑེཔོ པཉྙཱཡཏཱི’’ཏི (པཱཙི. ༢༣༩) ཨེཝཾ པཱལི༹ཡཾ ཝུཏྟཔཉྩངྒཝསེན ཀཏཔྤཝཱརཎོ, ཀཏཔྤཊིཀྑེཔོཏི ཨཏྠོ. ཏཏྠ ཡསྨཱ ‘‘ཨསནཾ པཉྙཱཡཏཱི’’ཏི ཨིམིནཱ ཝིཔྤཀཏབྷོཛནོ ‘པཝཱརིཏོ’ཏི ཝུཏྟོ. ཡོ ཙ ཝིཔྤཀཏབྷོཛནོ, ཏེན ཀིཉྩི བྷུཏྟཾ, ཀིཉྩི ཨབྷུཏྟཾ, ཡཉྩ བྷུཏྟཾ, ཏཾ སནྡྷཱཡ ‘བྷུཏྟཱཝཱི’ཏིཔི སངྑཾ གཙྪཏི. ཏསྨཱ ‘བྷུཏྟཱཝཱི’ཏིཝཙནེན ཝིསུཾ ཀིཉྩི ཨཏྠསིདྡྷིཾ ན པསྶཱམ, ‘‘དིརཏྟཏིརཏྟ’’ནྟིཨཱདཱིསུ (པཱཙི. ༥༢) པན དིརཏྟཱདིཝཙནཾ ཝིཡ པཝཱརིཏཔདསྶ པརིཝཱརབྷཱཝེན བྱཉྫནསིལིཊྛཏཱཡ ཙེཏཾ ཝུཏྟནྟི ཝེདིཏབྦཾ.

པཝཱརཎངྒེསུ པན ཨསནཾ པཉྙཱཡཏཱིཏི ཝིཔྤཀཏབྷོཛནཾ དིསྶཏི, ཏཾ བྷུཉྫམཱནོ ཙེས པུགྒལོ ཧོཏཱིཏི ཨཏྠོ. བྷོཛནཾ པཉྙཱཡཏཱིཏི པཝཱརཎཔྤཧོནཀཾ ¶ བྷོཛནཾ དིསྶཏི, ཨོདནཱདཱིནཾ ཙེ ཨཉྙཏརཾ པཊིཀྑིཔིཏབྦཾ བྷོཛནཾ ཧོཏཱིཏི ཨཏྠོ. ཧཏྠཔཱསེ ཋིཏོཏི པཝཱརཎཔྤཧོནཀཾ ཙེ བྷོཛནཾ གཎྷིཏྭཱ དཱཡཀོ ཨཌྜྷཏེཡྻཧཏྠཔྤམཱཎེ ཨོཀཱསེ ཋིཏོ ཧོཏཱིཏི ཨཏྠོ ¶ . ཨབྷིཧརཏཱིཏི ¶ སོ ཙེ དཱཡཀོ ཏསྶ ཏཾ བྷོཛནཾ ཀཱཡེན ཨབྷིསཾཧརཏཱིཏི ཨཏྠོ. པཊིཀྑེཔོ པཉྙཱཡཏཱིཏི པཊིཀྑེཔོ དིསྶཏི, ཏཾ ཙེ ཨབྷིཧཊཾ སོ བྷིཀྑུ ཀཱཡེན ཝཱ ཝཱཙཱཡ ཝཱ པཊིཀྑིཔཏཱིཏི ཨཏྠོ. ཨེཝཾ པཉྩནྣཾ ཨངྒཱནཾ ཝསེན པཝཱརིཏོ ཧོཏི.

ཏཏྲཱཡཾ ཝིནིཙྪཡོ – ‘ཨསན’ནྟིཨཱདཱིསུ ཏཱཝ ཡཉྩ ཨསྣཱཏི, ཡཉྩ བྷོཛནཾ ཧཏྠཔཱསེ ཋིཏེན ཨབྷིཧཊཾ པཊིཀྑིཔཏི, ཏཾ ཨོདནོ ཀུམྨཱསོ སཏྟུ མཙྪོ མཾསནྟི ཨིམེསཾ ཨཉྙཏརམེཝ ཝེདིཏབྦཾ. ཏཏྠ ཨོདནོ ནཱམ སཱལི ཝཱིཧི ཡཝོ གོདྷུམོ ཀངྒུ ཝརཀོ ཀུདྲཱུསཀོཏི ཨིམེསཾ སཏྟནྣཾ དྷཉྙཱནཾ ཏཎྜུལེ གཧེཏྭཱ ‘‘བྷཏྟཾ པཙཱམཱ’’ཏི ཝཱ ‘‘ཡཱགུཾ པཙཱམཱ’’ཏི ཝཱ ཡཾཀིཉྩི སནྡྷཱཡ པཙནྟུ, སཙེ ཨུཎྷཾ ཝཱ སཱིཏལཾ ཝཱ བྷུཉྫནྟཱནཾ བྷོཛནཀཱལེ གཧིཏགཧིཏཊྛཱནེ ཨོདྷི པཉྙཱཡཏི, ཨོདནོ ཧོཏི, པཝཱརཎཾ ཛནེཏི. ཡོ པན པཱཡཱསོ ཝཱ ཨམྦིལཡཱགུ ཝཱ ཨུདྡྷནཏོ ཨོཏཱརིཏམཏྟཱ ཨབྦྷུཎྷཱ སཀྐཱ ཧོཏི ཨཱཝིཛ྄ཛྷིཏྭཱ པིཝིཏུཾ, སཱ ཡསྶ ཧཏྠེན གཧིཏོཀཱསེཔི ཨོདྷི ན པཉྙཱཡཏི, པཝཱརཎཾ ན ཛནེཏི. སཙེ པན ཨུསུམཱཡ ཝིགཏཱཡ གྷནབྷཱཝཾ གཙྪཏི, ཨོདྷིཾ དསྶེཏི, པུན པཝཱརཎཾ ཛནེཏི, པུབྦེ ཏནུཀབྷཱཝོ ན རཀྑཏི. སཙེཔི བཧཱུ པཎྞཕལཀལཱི༹རེ པཀྑིཔིཏྭཱ མུཊྛིམཏྟཱཔི ཏཎྜུལཱ པཀྑིཏྟཱ ཧོནྟི, བྷོཛནཀཱལེ ཙེ ཨོདྷི པཉྙཱཡཏི, པཝཱརཎཾ ཛནེཏི. ཨཡཱགུཀེ ནིམནྟནེ ‘‘ཡཱགུཾ དསྶཱམཱ’’ཏི བྷཏྟེ ཨུདཀཀཉྫིཀཁཱིརཱདཱིནི ཨཱཀིརིཏྭཱ ‘‘ཡཱགུཾ གཎྷཐཱ’’ཏི དེནྟི, ཀིཉྩཱཔི ཏནུཀཱ ཧོཏི, པཝཱརཎཾ ཛནེཏིཡེཝ. སཙེ པན པཀྐུཐིཏེསུ ཨུདཀཱདཱིསུ པཀྑིཔིཏྭཱ པཙིཏྭཱ དེནྟི, ཡཱགུསངྒཧམེཝ གཙྪཏི. སཙེ ཡཱགུཡཱཔི སཱསཔམཏྟམྤི མཙྪམཾསཀྑཎྜཾ ཝཱ ནྷཱརུ ཝཱ པཀྑིཏྟཾ ཧོཏི, པཝཱརཎཾ ཛནེཏི. ཋཔེཏྭཱ སཱནུལོམཱནཾ ཝུཏྟདྷཉྙཱནཾ ཏཎྜུལེ ཨཉྙེཧི ཝེལུ༹ཏཎྜུལཱདཱིཧི ཝཱ ཀནྡམཱུལཕལེཧི ཝཱ ཡེཧི ཀེཧིཙི ཀཏབྷཏྟཾ པཝཱརཎཾ ན ཛནེཏི. ཀུམྨཱསོ ནཱམ ཡཝེཧི ཀཏོ. ཨཉྙེཧི པན མུགྒཱདཱིཧི ཀཏཀུམྨཱསོ པཝཱརཎཾ ན ཛནེཏི. སཏྟུ ནཱམ སཏྟ དྷཉྙཱནི བྷཛྫིཏྭཱ ཀཏོ. ཨནྟམསོ ཁརཔཱཀབྷཛྫིཏཱནཾ ཝཱིཧཱིནཾ ཏཎྜུལེ ¶ ཀོཊྚེཏྭཱ ཀཏཙུཎྞམྤི ཀུཎྜཀམྤི སཏྟུསངྒཧམེཝ གཙྪཏི. སམཔཱཀབྷཛྫིཏཱནཾ པན ཨཱཏཔསུཀྑཱནཾ ཀུཎྜཀཾ ཝཱ, ཡེ ཀེཙི ཏཎྜུལཱ ཝཱ ལཱཛཱ ཝཱ, ལཱཛེཧི ཀཏབྷཏྟསཏྟུཨཱདཱིནི ཝཱ ན པཝཱརེནྟི. མཙྪམཾསེསུ སཙེ ཡཱགུཾ པིཝནྟསྶ ཡཱགུསིཏྠམཏྟཱནེཝ དྭེ མཙྪཀྑཎྜཱནི ཝཱ མཾསཀྑཎྜཱནི ཝཱ ཨེཀབྷཱཛནེ ཝཱ ནཱནཱབྷཱཛནེ ཝཱ དེནྟི, ཏཱནི ཙེ ཨཁཱདནྟོ ཨཉྙཾ པཝཱརཎཔྤཧོནཀཾ ཡཾཀིཉྩི པཊིཀྑིཔཏི, ན པཝཱརེཏི. ཏཏོ ཨེཀཾ ཁཱདིཏཾ, ཨེཀཾ ཧཏྠེ ཝཱ པཏྟེ ཝཱ ཧོཏི, སཙེ ཨཉྙཾ པཊིཀྑིཔཏི པཝཱརེཏི. དྭེཔི ཁཱདིཏཱནི ཧོནྟི, མུཁེ སཱསཔམཏྟམྤི ཨཝསིཊྛཾ ནཏྠི, སཙེཔི ཨཉྙཾ པཊིཀྑིཔཏི, ན པཝཱརེཏི. ཡོ པན ཨཀཔྤིཡམཾསཾ ཀུལདཱུསནཝེཛྫཀམྨཨུཏྟརིམནུསྶདྷམྨཱརོཙནསཱདིཏརཱུཔིཡཱདཱིཧི ¶ ¶ ནིབྦཏྟཾ ཨཀཔྤིཡབྷོཛནཉྩ ཨཉྙཾ ཀཔྤིཡཾ ཝཱ ཨཀཔྤིཡཾ ཝཱ ཁཱདནྟོ པཊིཀྑིཔཏི, ན པཝཱརེཏི.

ཨེཝཾ ཡཉྩ ཨསྣཱཏི, ཡཉྩ བྷོཛནཾ ཧཏྠཔཱསེ ཋིཏེན ཨབྷིཧཊཾ པཊིཀྑིཔནྟོ པཝཱརཎཾ ཛནེཏི, ཏཾ ཉཏྭཱ ཨིདཱནི ཡཐཱ ཨཱཔཛྫཏི, ཏསྶ ཛཱནནཏྠཾ ཨཡཾ ཝིནིཙྪཡོ ཝེདིཏབྦོ – ‘‘ཨསནཾ བྷོཛན’’ནྟི ཨེཏྠ ཏཱཝ ཡེན ཨེཀསིཏྠམྤི ཨཛ྄ཛྷོཧཊཾ ཧོཏི, སོ སཙེ པཏྟམུཁཧཏྠེསུ ཡཏྠཀཏྠཙི བྷོཛནེ སཏི སཱཔེཀྑོཝ ཨཉྙཾ ཝུཏྟལཀྑཎཾ བྷོཛནཾ པཊིཀྑིཔཏི, པཝཱརེཏི. སཙེ པན ནིརཔེཀྑོ ཧོཏི, ཡཾ པཏྟཱདཱིསུ ཨཝསིཊྛཾ, ཏཾ ན ཙ ཨཛ྄ཛྷོཧརིཏུཀཱམོ, ཨཉྙསྶ ཝཱ དཱཏུཀཱམོ, ཨཉྙཏྲ ཝཱ གནྟྭཱ བྷུཉྫིཏུཀཱམོ, སོ པཊིཀྑིཔནྟོཔི ན པཝཱརེཏི. ‘‘ཧཏྠཔཱསེ ཋིཏོ’’ཏི ཨེཏྠ པན སཙེ བྷིཀྑུ ནིསིནྣོ ཧོཏི, ཨཱནིསདསྶ པཙྪིམནྟཏོ པཊྛཱཡ, སཙེ ཋིཏོ, པཎྷཱིནཾ ཨནྟཏོ པཊྛཱཡ, སཙེ ནིཔནྣོ, ཡེན པསྶེན ནིཔནྣོ, ཏསྶ པཱརིམནྟཏོ པཊྛཱཡ དཱཡཀསྶ ནིསིནྣསྶ ཝཱ ཋིཏསྶ ཝཱ ནིཔནྣསྶ ཝཱ ཋཔེཏྭཱ པསཱརིཏཧཏྠཾ ཡཾ ཨཱསནྣཏརཾ ཨངྒཾ, ཏསྶ ཨོརིམནྟེན པརིཙྪིནྡིཏྭཱ ཨཌྜྷཏེཡྻཧཏྠོ ‘ཧཏྠཔཱསོ’ཏི ཝེདིཏབྦོ. ཏསྨིཾ ཋཏྭཱ ཨབྷིཧཊཾ པཊིཀྑིཔནྟསྶེཝ པཝཱརཎཱ ཧོཏི, ན ཏཏོ པརཾ. ‘ཨབྷིཧརཏཱི’ཏི ཧཏྠཔཱསབྦྷནྟརེ ཋིཏོ གཧཎཏྠཾ ཨུཔནཱམེཏི. སཙེ པན ཨནནྟརནིསིནྣོཔི བྷིཀྑུ ཧཏྠེ ཝཱ ཨཱདྷཱརཀེ ཝཱ ཋིཏཾ པཏྟཾ ཨནབྷིཧརིཏྭཱཝ ‘‘བྷཏྟཾ གཎྷཐཱ’’ཏི ཝདཏི, ཏཾ པཊིཀྑིཔཏོ པཝཱརཎཱ ནཏྠི. བྷཏྟཔཙྪིཾ ཨཱནེཏྭཱ པུརཏོ བྷཱུམིཡཾ ཋཔེཏྭཱ ཨེཝཾ ཝུཏྟེཔི ཨེསེཝ ནཡོ. ཨཱིསཀཾ པན ཨུདྡྷརིཏྭཱ ཝཱ ཨཔནཱམེཏྭཱ ཝཱ ‘གཎྷཐཱ’ཏི ཝུཏྟེ ཏཾ པཊིཀྑིཔཏོ པཝཱརཎཱ ¶ ཧོཏི. བྷཏྟཔཙྪིཾ གཧེཏྭཱ པརིཝིསནྟསྶ ཨཉྙོ ‘‘ཨཧཾ དྷཱརེསྶཱམཱི’’ཏི གཧིཏམཏྟམེཝ ཀརོཏི, པརིཝེསཀོཡེཝ པན ཏཾ དྷཱརེཏི, ཏསྨཱ སཱ ཨབྷིཧཊཱཝ ཧོཏི, ཏཏོ དཱཏུཀཱམཏཱཡ གཎྷནྟཾ པཊིཀྑིཔནྟསྶ པཝཱརཎཱ ཧོཏི. སཙེ པན པརིཝེསཀེན ཕུཊྛམཏྟཱཝ ཧོཏི, ཨིཏརོཝ ནཾ དྷཱརེཏི, ཏཏོ དཱཏུཀཱམཏཱཡ གཎྷནྟཾ པཊིཀྑིཔནྟསྶ པཝཱརཎཱ ན ཧོཏི. ཀཊཙྪུནཱ ཨུདྡྷཊེ པན ཧོཏི, དྭིནྣཾ སམབྷཱརེཔི པཊིཀྑིཔནྟོ པཝཱརེཏིཡེཝ. ཨནནྟརསྶ དིཡྻམཱནེ ཨིཏརོ པཏྟཾ པིདཧཏི, ཨཉྙསྶ ཨབྷིཧཊཾ ནཱམ པཊིཀྑིཏྟཾ ཧོཏི, ཏསྨཱ པཝཱརཎཱ ནཏྠི. ‘པཊིཀྑེཔོ’ཏི ཨེཏྠ ཝཱཙཱཡ ཨབྷིཧཊེ པཊིཀྑེཔོ ན རུཧཏི, ཀཱཡེན ཨབྷིཧཊཾ པན ཨངྒུལིཙལནཱདིནཱ ཀཱཡཝིཀཱརེན ཝཱ ‘‘ཨལཾ, མཱ དེཧཱི’’ཏིཨཱདིནཱ ཝཙཱིཝིཀཱརེན ཝཱ པཊིཀྑིཔཏོ པཝཱརཎཱ ཧོཏི.

ཨེཀོ སམཾསཀཾ རསཾ ཨབྷིཧརཏི, ‘‘རསཾ པཊིགྒཎྷཐཱ’’ཏི ཝདཏི, ཏཾ སུཏྭཱ པཊིཀྑིཔཏོ པཝཱརཎཱ ནཏྠི. ‘མཾསརས’ནྟི ཝུཏྟེ པན པཊིཀྑིཔཏོ པཝཱརཎཱ ཧོཏི. ‘‘ཨིམཾ གཎྷཐཱ’’ཏི ¶ ཝུཏྟེཔི ཧོཏིཡེཝ. མཾསཾ ཝིསུཾ ཀཏྭཱ ‘མཾསརས’ནྟི ཝུཏྟེཔི སཙེ སཱསཔམཏྟམྤི ཁཎྜཾ ¶ ཨཏྠི, པཊིཀྑིཔཏོ པཝཱརཎཱ ཧོཏི. སཙེ ནཏྠི, ཝཊྚཏི. ཀལཱི༹རཔནསཱདཱིཧི མིསྶེཏྭཱ མཙྪམཾསཾ པཙནྟི, ཏཾ གཧེཏྭཱ ‘‘ཀལཱི༹རསཱུཔཾ གཎྷཐ, པནསབྱཉྫནཾ གཎྷཐཱ’’ཏི ཝདཏི, ཨེཝམྤི ན པཝཱརེཏི. ཀསྨཱ? ཨཔཝཱརཎཱརཧསྶ ནཱམེན ཝུཏྟཏྟཱ. ‘‘མཙྪམཾསཾ བྱཉྫན’’ནྟི ཝཱ ‘‘ཨིམཾ གཎྷཐཱ’’ཏི ཝཱ ཝུཏྟེ པན པཝཱརེཏི, ཨཡམེཏྠ སངྑེཔོ, ཝིཏྠཱརོ པན སམནྟཔཱསཱདིཀཱཡཾ ཝུཏྟོ. གམནཱདཱིསུ པན ཡསྨིཾ ཨིརིཡཱཔཐེ པཝཱརེཏི, ཏཾ ཨཝིཀོཔེནྟེནེཝ བྷུཉྫིཏབྦཾ.

ཨནཏིརིཏྟནྟི ན ཨཏིརིཏྟཾ, ན ཨདྷིཀནྟི ཨཏྠོ. ཏཾ པན ཀཔྤིཡཀཏཱདཱིཧི སཏྟཧི ཝིནཡཀམྨཱཀཱརེཧི ཨཀཏཾ ཝཱ གིལཱནསྶ ཨནདྷིཀཾ ཝཱ ཧོཏི. ཏསྨཱ པདབྷཱཛནེ (པཱཙི. ༢༣༩) ‘ཨཀཔྤིཡཀཏ’ནྟིཨཱདི ཝུཏྟཾ, ཏཏྠ ཡཾ ཕལཾ ཝཱ ཀནྡམཱུལཱདི ཝཱ པཉྩཧི སམཎཀཔྤིཡེཧི ཀཔྤིཡཾ ཨཀཏཾ, ཡཉྩ ཨཀཔྤིཡམཾསཾ ཝཱ ཨཀཔྤིཡབྷོཛནཾ ཝཱ, ཨེཏཾ ཨཀཔྤིཡཾ ནཱམ, ཏཾ ཨཀཔྤིཡཾ ‘‘ཨལམེཏཾ སབྦ’’ནྟི ཨེཝཾ ཨཏིརིཏྟཾ ཀཏཾ ཨཀཔྤིཡཀཏནྟི ཝེདིཏབྦཾ. ཨཔྤཊིགྒཧིཏཀཏནྟི བྷིཀྑུནཱ ཨཔྤཊིགྒཧིཏཾཡེཝ པུརིམནཡེན ཨཏིརིཏྟཾ ཀཏཾ. ཨནུཙྩཱརིཏཀཏནྟི ཀཔྤིཡཾ ཀཱརེཏུཾ ཨཱགཏེན བྷིཀྑུནཱ ཨཱིསཀམྤི ཨནུཀྑིཏྟཾ ¶ ཝཱ ཨནཔནཱམིཏཾ ཝཱ ཀཏཾ. ཨཧཏྠཔཱསེ ཀཏནྟི ཀཔྤིཡཾ ཀཱརེཏུཾ ཨཱགཏསྶ ཧཏྠཔཱསཏོ བཧི ཋིཏེན ཀཏཾ. ཨབྷུཏྟཱཝིནཱ ཀཏནྟི ཡོ ཨཏིརིཏྟཾ ཀརོཏི, ཏེན པཝཱརཎཔྤཧོནཀཾ བྷོཛནཾ ཨབྷུཏྟེན ཀཏཾ. བྷུཏྟཱཝིནཱ པཝཱརིཏེན ཨཱསནཱ ཝུཊྛིཏེན ཀཏནྟི ཨིདཾ ཨུཏྟཱནམེཝ. ‘‘ཨལམེཏཾ སབྦ’’ནྟི ཨཝུཏྟནྟི ཝཙཱིབྷེདཾ ཀཏྭཱ ཨེཝཾ ཨཝུཏྟཾ ཧོཏི. ཨིཏི ཨིམེཧི སཏྟཧི ཝིནཡཀམྨཱཀཱརེཧི ཡཾ ཨཏིརིཏྟཾ ཀཔྤིཡཾ ཨཀཏཾ, ཡཉྩ པན ན གིལཱནཱཏིརིཏྟཾ, ཏདུབྷཡམྤི ཨནཏིརིཏྟཾ. ཨཏིརིཏྟཾ པན ཏསྶེཝ པཊིཔཀྑནཡེན ཝེདིཏབྦཾ.

ཨཔིཙེཏྠ བྷུཏྟཱཝིནཱ ཀཏཾ ཧོཏཱིཏི (པཱཙི. ༢༣༩) ཨནྟམསོ ཨནནྟརནིསིནྣསྶ པཏྟཏོ ཨེཀམྤི སིཏྠཾ ཝཱ མཾསཧཱིརཾ ཝཱ ཁཱདིཏྭཱ ཀཏམྤི བྷུཏྟཱཝིནཱ ཀཏཾ ཧོཏི, ཡོ པཱཏོཝ ཨེཝཾ བྷུཏྟཱཝཱི པཝཱརིཏོ ནིསཱིདཏིཡེཝ, སོ ཨུཔཀཊྛེཔི ཀཱལེ ཨབྷིཧཊཾ པིཎྜཾ བྷིཀྑུནཱ ཨུཔནཱིཏཾ ཀཔྤིཡཾ ཀཱཏུཾ ལབྷཏི. སཙེ པན ཏསྨིཾ ཀཔྤིཡེ ཀཏེ བྷུཉྫནྟསྶ ཨཉྙཾ ཨཱམིསཾ ཨཱཀིརནྟི, ཏཾ སོ པུན ཀཱཏུཾ ན ལབྷཏི. ཡཉྷི ཨཀཏཾ, ཏཾ ཀཱཏབྦཾ. ཡེན ཙ ཨཀཏཾ, ཏེན ཙ ཀཱཏབྦནྟི (པཱཙི. ཨཊྛ. ༢༣༨-༩) ཝུཏྟཾ, ཏསྨཱ ཏསྨིཾ བྷཱཛནེ ཀརིཡམཱནེ པཋམཀཏེན སདྡྷིཾ ཀཏཾ ཧོཏཱིཏི ཏཾ ཀཱཏུཾ ན ཝཊྚཏི. ཨཉྙསྨིཾ པན བྷཱཛནེ ཏེན ཝཱ ཨཉྙེན ཝཱ ཀཱཏུཾ ཝཊྚཏི. ཨེཝཾ ཀཏཾ པཋམཀཏེན མིསྶེཏྭཱཔི བྷུཉྫིཏུཾ ཝཊྚཏི, ན ཀེཝལཉྩ ཏསྶ ¶ ཡེན པན ཀཏཾ, ཏཾ ཋཔེཏྭཱ ཨཉྙེསཾ པཝཱརིཏཱནམྤི བྷུཉྫིཏུཾ ཝཊྚཏི. ཡཐཱ པན ཨཀཏེན མིསྶཾ ན ཧོཏི, ཨེཝཾ མུཁཉྩ ཧཏྠཉྩ སུདྡྷཾ ཀཏྭཱ བྷུཉྫིཏབྦཾ. གིལཱནཱཏིརིཏྟཾ པན ན ཀེཝལཾ གིལཱནསྶ བྷུཏྟཱཝསེསམེཝ, ཨཐ ཁོ ཡཾཀིཉྩི གིལཱནཾ ཨུདྡིསྶ ‘‘ཨཛྫ ཝཱ སྭེ ¶ ཝཱ ཡདཱ ཝཱ ཨིཙྪཏི, ཏདཱ ཁཱདིསྶཏཱི’’ཏི ཨཱཧཊཾ, ཏཾ སབྦཾ ‘གིལཱནཱཏིརིཏྟ’ནྟི ཝེདིཏབྦཾ. ཁཱདནཱིཡཾ ཝཱ བྷོཛནཱིཡཾ ཝཱཏི ཡཾཀིཉྩི ཡཱཝཀཱལིཀཾ. ཁཱདེཡྻ ཝཱ བྷུཉྫེཡྻ ཝཱ པཱཙིཏྟིཡནྟི ཨེཏྠ ཝུཏྟནཡེན པཝཱརིཏསྶ ཨནཏིརིཏྟཾ ཡཾཀིཉྩི ཨཱམིསཾ ཨཛ྄ཛྷོཧརཎཏྠཱཡ པཊིགྒཎྷཏོ གཧཎེ དུཀྐཊཾ, ཨཛ྄ཛྷོཧཱརེ ཨཛ྄ཛྷོཧཱརེ པཱཙིཏྟིཡཾ.

སཱཝཏྠིཡཾ སམྦཧུལེ བྷིཀྑཱུ ཨཱརབྦྷ ཨཉྙཏྲ བྷུཉྫནཝཏྠུསྨིཾ པཉྙཏྟཾ, ‘‘ཨནཏིརིཏྟ’’ནྟི ཨཡམེཏྠ ཨནུཔཉྙཏྟི, ཨསཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཡཱམཀཱལིཀཱདཱིནི ཨཱཧཱརཏྠཱཡ གཎྷཏོ, ནིརཱམིསཱནི ཨཛ྄ཛྷོཧརཏོ ཙ དུཀྐཊཾ, ཏཐཱ ཨཏིརིཏྟེ ཨནཏིརིཏྟསཉྙིནོ ཙེཝ ཝེམཏིཀསྶ ¶ ཙ. ཨཏིརིཏྟསཉྙིནོ པན, ‘‘ཨཏིརིཏྟཾ ཀཱརཱཔེཏྭཱ བྷུཉྫིསྶཱམཱི’’ཏི གཎྷནྟསྶ, ཨཉྙསྶཏྠཱཡ གཎྷནྟསྶ, ཡཱམཀཱལིཀཱདཱིནི ཏེསཾ ཨནུཉྙཱཏཔརིབྷོགཝསེན ནིརཱམིསཱནི པརིབྷུཉྫནྟསྶ, ཨུམྨཏྟཀཱདཱིནཉྩ ཨནཱཔཏྟི. པཝཱརིཏབྷཱཝོ, ཨཱམིསསྶ ཨནཏིརིཏྟཏཱ, ཀཱལེན ཨཛ྄ཛྷོཧརཎནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི པཋམཀཐིནསདིསཱནེཝ, ཨིདཾ པན ཀིརིཡཱཀིརིཡནྟི.

པཋམཔཝཱརཎཱསིཀྑཱཔདཝཎྞནཱ ནིཊྛིཏཱ.

༦. དུཏིཡཔཝཱརཎཱསིཀྑཱཔདཝཎྞནཱ

ཚཊྛེ ཨབྷིཧཊྛུཾ པཝཱརེཡྻཱཏི ཨབྷིཧརིཏྭཱ ‘‘ཧནྡ, བྷིཀྑུ ཁཱད ཝཱ བྷུཉྫ ཝཱ’’ཏི ཨེཝཾ པཝཱརེཡྻ. ཛཱནནྟི སུཏྭཱ ཝཱ དིསྭཱ ཝཱ ཏསྶ པཝཱརིཏབྷཱཝཾ ཛཱནནྟོ. ཨཱསཱདནཱཔེཀྑོཏི ཨཱསཱདནཾ ཙོདནཾ མངྐུཀརཎབྷཱཝཾ ཨཔེཀྑམཱནོ. བྷུཏྟསྨིཾ པཱཙིཏྟིཡནྟི ཨེཏྠ ཨབྷིཧཱརེ ཏཱཝ དུཀྐཊཾ, སཙེ སོ ཏཾ གཎྷཱཏི, པུན ཨབྷིཧཱརཀསྶ དུཀྐཊཾ, ཏསྨིཾ པན བྷུཉྫནྟེ ཨབྷིཧཱརཀསྶ ཏསྶ ཨཛ྄ཛྷོཧཱརེ ཨཛ྄ཛྷོཧཱརེ དུཀྐཊཾ, བྷོཛནཔརིཡོསཱནེ པཱཙིཏྟིཡཾ.

སཱཝཏྠིཡཾ ཨཉྙཏརཾ བྷིཀྑུཾ ཨཱརབྦྷ ཨནཏིརིཏྟེན བྷོཛནེན ཨབྷིཧཊྛུཾ པཝཱརཎཱཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, ཨནཱཎཏྟིཀཾ, པཝཱརིཏེ པཝཱརིཏསཉྙིནོ པཱཙིཏྟིཡཾ. ཝེམཏིཀསྶ, ཡཱམཀཱལིཀཱདཱིནི ཨཱཧཱརཏྠཱཡ ཨབྷིཧརནྟསྶ, ཏེསཉྩ པཊིགྒཧཎཨཛ྄ཛྷོཧཱརེསུ, ཨཔྤཝཱརིཏེ ¶ ཙ པཝཱརིཏསཉྙིནོ, ཝེམཏིཀསྶ ཙ དུཀྐཊཾ. ཨཔྤཝཱརིཏསཉྙིསྶ པན, ཡོ ཙ ཨཏིརིཏྟཾ ཀཱརཱཔེཏྭཱ དེཏི, ‘‘ཀཱརཱཔེཏྭཱ ཝཱ བྷུཉྫཱཧཱི’’ཏི དེཏི, ཡོ ཝཱ ‘‘ཨཉྙསྶཏྠཱཡ ཧརནྟོ གཙྪཱཧཱི’’ཏི དེཏི, ཡོ ཙ ཡཱམཀཱལིཀཱདཱིནི ‘‘སཏི པཙྩཡེ པརིབྷུཉྫཱཧཱི’’ཏི དེཏི, ཏསྶ, ཨུམྨཏྟཀཱདཱིནཉྩ ཨནཱཔཏྟི. པཝཱརིཏཏཱ, པཝཱརིཏསཉྙིཏཱ, ཨཱསཱདནཱཔེཀྑཏཱ, ཨནཏིརིཏྟེན ཨབྷིཧཊྛུཾ པཝཱརཎཏཱ, བྷོཛནཔརིཡོསཱནནྟི ཨིམཱནེཏྠ པཉྩ ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནི, ཨིདཾ པན དུཀྑཝེདནནྟི.

དུཏིཡཔཝཱརཎཱསིཀྑཱཔདཝཎྞནཱ ནིཊྛིཏཱ.

༧. ཝིཀཱལབྷོཛནསིཀྑཱཔདཝཎྞནཱ

སཏྟམེ ¶ ¶ ཝིཀཱལེཏི ཝིགཏེ ཀཱལེ, མཛ྄ཛྷནྷིཀཱཏིཀྐམནཏོ ཡཱཝ ཨརུཎུགྒམནཱཏི ཨདྷིཔྤཱཡོ. ཏསྨཱ ཡོ བྷིཀྑུ ཨེཏསྨིཾ ཨནྟརེ ཡཾཀིཉྩི ཝནམཱུལཕལཾ ཨུཔཱདཱཡ ཨཱམཾ ཝཱ པཀྐཾ ཝཱ ཨཱམིསསངྑེཔགཏཾ ཁཱདནཱིཡཾ ཝཱ བྷོཛནཱིཡཾ ཝཱ ཨཛ྄ཛྷོཧརཎཏྠཱཡ པཊིགྒཎྷཱཏི, ཏསྶ པཊིགྒཧཎེ དུཀྐཊཾ, ཨཛ྄ཛྷོཧཱརེ ཨཛ྄ཛྷོཧཱརེ པཱཙིཏྟིཡཾ.

རཱཛགཧེ སཏྟརསཝགྒིཡེ བྷིཀྑཱུ ཨཱརབྦྷ ཝིཀཱལེ བྷོཛནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཡཱམཀཱལིཀཱདཱིནི ཨཱཧཱརཏྠཱཡ པཊིགྒཧཎཨཛ྄ཛྷོཧཱརེསུ, ཀཱལེ ཝིཀཱལསཉྙིསྶ, ཝེམཏིཀསྶ ཙ དུཀྐཊཾ, ཀཱལེ ཀཱལསཉྙིསྶ ཡཱམཀཱལིཀཱདཱིནི སཏི པཙྩཡེ པརིབྷུཉྫནྟསྶ ཨུམྨཏྟཀཱདཱིནཉྩ ཨནཱཔཏྟི. ‘‘ཨནུཛཱནཱམི, བྷིཀྑཝེ, རོམཊྛཀསྶ རོམཊྛཾ, ན ཙ བྷིཀྑཝེ བཧིམུཁདྭཱརཱ ནཱིཧརིཏྭཱ ཨཛ྄ཛྷོཧརིཏབྦ’’ནྟི (ཙཱུལ༹ཝ. ༢༧༣) ཨནུཉྙཱཏནཡེན རོམཊྛཀསྶཱཔི ཨནཱཔཏྟི. ཝིཀཱལཏཱ, ཡཱཝཀཱལིཀཏཱ, ཨཛ྄ཛྷོཧརཎནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཨེལ༹ཀལོམསདིསཱནཱིཏི.

ཝིཀཱལབྷོཛནསིཀྑཱཔདཝཎྞནཱ ནིཊྛིཏཱ.

༨. སནྣིདྷིཀཱརཀསིཀྑཱཔདཝཎྞནཱ

ཨཊྛམེ སནྣིདྷིཀཱརཀནྟི ཀཱརོ ཀརཎཾ ཀིརིཡཱཏི ཨཏྠཏོ ཨེཀཾ, སནྣིདྷི ཀཱརོ ཨསྶཱཏི སནྣིདྷིཀཱརཾ ¶ , སནྣིདྷིཀཱརམེཝ སནྣིདྷིཀཱརཀཾ, པཊིགྒཧེཏྭཱ ཨེཀརཏྟིཾ ཝཱིཏིནཱམིཏསྶེཏཾ ནཱམཾ. ཏསྨཱ ཨེཝཾ སནྣིདྷིཀཏཾ ཡཾཀིཉྩི ཡཱཝཀཱལིཀཾ ཝཱ ཡཱམཀཱལིཀཾ ཝཱ ‘ཨཛ྄ཛྷོཧརིསྶཱམཱི’ཏི གཎྷནྟསྶ པཊིགྒཧཎེ དུཀྐཊཾ, ཨཛ྄ཛྷོཧཱརེ ཨཛ྄ཛྷོཧཱརེ པཱཙིཏྟིཡཾ. སཙེཔི པཏྟོ དུདྡྷོཏོ ཧོཏི, ཡཾ ཨངྒུལིཡཱ གྷཾསནྟསྶ ལེཁཱ པཉྙཱཡཏི, གཎྛིཀཔཏྟསྶ ཝཱ གཎྛིཀནྟརེ སྣེཧོ པཝིཊྛོ ཧོཏི, ཡོ ཨུཎྷེ ཨོཏཱཔེནྟསྶ པགྒྷརཏི, ཨུཎྷཡཱགུཡཱ ཝཱ གཧིཏཱཡ སནྡིསྶཏི, ཏཱདིསེ པཏྟེཔི པུནདིཝསེ བྷུཉྫནྟསྶ པཱཙིཏྟིཡཾ. ཡཾ པན བྷིཀྑུ ནིརཔེཀྑོ སཱམཎེརཱནཾ པརིཙྩཛིཏྭཱ ཏེཧི ནིཧིཏཾ ལབྷིཏྭཱ བྷུཉྫཏི, ཏཾ ཝཊྚཏི ¶ . སཡཾ པཊིགྒཧེཏྭཱ ཨཔརིཙྩཏྟམེཝ ཧི དུཏིཡདིཝསེ ཀཔྤིཡབྷོཛནཾ བྷུཉྫནྟསྶ པཱཙིཏྟིཡཾ. ཨཀཔྤིཡེསུ པན མནུསྶམཾསེ ཐུལླཙྩཡེན སདྡྷིཾ པཱཙིཏྟིཡཾ, སེསེསུ པན དུཀྐཊེན སདྡྷིཾ. ཡཱམཀཱལིཀཾ སཏི པཙྩཡེ ཨཛ྄ཛྷོཧརཏོ པཱཙིཏྟིཡཾ, ཨཱཧཱརཏྠཱཡ ཨཛ྄ཛྷོཧརཏོ དུཀྐཊེན སདྡྷིཾ. ཡོ པན པཝཱརིཏོ ཧུཏྭཱ ཨནཏིརིཏྟཀཏཾ ཨཛ྄ཛྷོཧརཏི, ཏསྶ སབྦཝིཀཔྤེསུ ཨཔརམྤི པཱཙིཏྟིཡཾ ཝཌྜྷཏི. སཙེ ཝིཀཱལེ ཨཛ྄ཛྷོཧརཏི, ཨནཏིརིཏྟཔཙྩཡཱ སབྦཝིཀཔྤེསུ ཨནཱཔཏྟི, སཏི པཙྩཡེ ཝིཀཱལཔཙྩཡཱ ཡཱམཀཱལིཀཱདཱིསུ ཙ ཨནཱཔཏྟི. ཨཝསེསེསུ ཝིཀཱལཔཙྩཡཱ པཱཙིཏྟིཡཾ ཝཌྜྷཏིཡེཝ. བྷིཀྑུསྶ པན སནྣིདྷི བྷིཀྑུནིཡཱ ཝཊྚཏི, བྷིཀྑུནིཡཱ ཙ སནྣིདྷི བྷིཀྑུསྶ ཝཊྚཏི, བྷིཀྑུནིཀྑནྡྷཀེ (ཙཱུལ༹ཝ. ༤༢༡-༤༢༢) ཨནུཉྙཱཏཏྟཱ ཝཊྚཏཱིཏི.

སཱཝཏྠིཡཾ ཨཱཡསྨནྟཾ བེལཊྛསཱིསཾ ཨཱརབྦྷ སནྣིདྷིཀཱརཀབྷོཛནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ ¶ , སཏྟཱཧཀཱལིཀ ཡཱཝཛཱིཝིཀཱནཾ པན ཨཱཧཱརཏྠཱཡ པཊིགྒཧཎེ ཨཛ྄ཛྷོཧཱརེ ཙ དུཀྐཊཾ. ཡཐཱ ཙེཏཱནི ཨཱཧཱརཏྠཱཡ ན ཀཔྤནྟི, ཨེཝཾ ཡཱཝཀཱལིཀཱདཱིཧི སཾསཊྛཱནིཔི, ཝུཏྟཉྷེཏཾ ‘‘ཡཱཝཀཱལིཀེན, བྷིཀྑཝེ, ཡཱམཀཱལིཀཾ ཏདཧུཔཊིགྒཧིཏཾ ཀཱལེ ཀཔྤཏི, ཝིཀཱལེ ན ཀཔྤཏཱི’’ཏིཨཱདི (མཧཱཝ. ༣༠༥). ཏསྨཱ སཙེཔི ཏཾ ཏཾ ཏེན ཏེན སདྡྷིཾ སཾསཊྛཾ ལབྷཏི, སཙེ ཨསམྦྷིནྣརསཾ ཝཱ ཧོཏི སུདྷོཏཾ ཝཱ, ཡཐཱ ཨིཏརེན སཾསགྒོ ན པཉྙཱཡཏི, ཨཏྟནོ ཀཱལཱནུརཱུཔེན པརིབྷུཉྫིཏུཾ ཝཊྚཏི.

སཙེ པན སམྦྷིནྣརསཾ ཝཱ ཧོཏི དུདྡྷོཏཾ ཝཱ, ན ཝཊྚཏི. ཡཱཝཀཱལིཀཉྷི ཨཏྟནཱ སདྡྷིཾ སམྦྷིནྣརསཱནི ཏཱིཎིཔི ཡཱམཀཱལིཀཱདཱིནི ཨཏྟནོ སབྷཱཝཾ ཨུཔནེཏི, ཡཱམཀཱལིཀཾ དྭེཔི སཏྟཱཧཀཱལིཀཱདཱིནི ཨཏྟནོ སབྷཱཝཾ ཨུཔནེཏི, སཏྟཱཧཀཱལིཀཾ ཡཱཝཛཱིཝིཀམེཝ ཨཏྟནོ སབྷཱཝཾ ཨུཔནེཏི. ཏསྨཱ ཏེན ཏདཧུཔཊིགྒཧིཏེན སདྡྷིཾ ཏདཧུཔཊིགྒཧིཏཾ ཝཱ པུརེ པཊིགྒཧིཏཾ ཝཱ ཡཱཝཛཱིཝིཀཾ སཏྟཱཧཾ ཀཔྤཏི, དྭཱིཧཔྤཊིགྒཧིཏེན ཚཱཧཾ, ཏཱིཧཔྤཊིགྒཧིཏེན པཉྩཱཧཾ…པེ… སཏྟཱཧཔྤཊིགྒཧིཏེན ཏདཧེཝ ཀཔྤཏཱིཏི ཝེདིཏབྦཾ. ཏསྨཱཡེཝ ཧི ‘‘སཏྟཱཧཀཱལིཀེན, བྷིཀྑཝེ ¶ , ཡཱཝཛཱིཝིཀཾ ཏདཧུཔཊིགྒཧིཏ’’ནྟི ཨཝཏྭཱ ‘‘པཊིགྒཧིཏཾ སཏྟཱཧཾ ཀཔྤཏཱི’’ཏི ཝུཏྟཾ. ཀཱལཡཱམསཏྟཱཧཱཏིཀྐམེསུ ཙེཏྠ ཝིཀཱལབྷོཛན སནྣིདྷིབྷེསཛྫསིཀྑཱཔདཱནཾ ཝསེན ཨཱཔཏྟིཡོ ཝེདིཏབྦཱ, ཨིམེསུ པན ཙཏཱུསུ ཀཱལིཀེསུ ¶ ཡཱཝཀཱལིཀཾ ཡཱམཀཱལིཀནྟི ཨིམམེཝ དྭཡཾ ཨནྟོཝུཊྛཉྩེཝ སནྣིདྷིཀཱརཀཉྩ, སཏྟཱཧཀཱལིཀཾ ཡཱཝཛཱིཝིཀཉྩ ཨཀཔྤིཡཀུཊིཡཾ ནིཀྑིཔིཏུམྤི ཝཊྚཏི, སནྣིདྷིམྤི ན ཛནེཏི. ཨཀཔྤིཡཀུཊིཡཾ ཨནྟོཝུཊྛེན པན ཏེན སདྡྷིཾ ཨིཏརདྭཡཾ ཏདཧུཔཊིགྒཧིཏམྤི ན ཝཊྚཏི, མུཁསནྣིདྷི ནཱམ ཧོཏི, མཧཱཔཙྩརིཡཾ པན ཨནྟོཝུཊྛཾ ཧོཏཱིཏི ཝུཏྟཾ. ཏཏྠ ནཱམམཏྟམེཝ ནཱནཱཀརཎཾ, ཨཱཔཏྟི པན དུཀྐཊམེཝ. ཏཏྠ ཨཀཔྤིཡཀུཊི ནཱམ སངྒྷསྶ ཝཱ ཨུཔསམྤནྣཔུགྒལསྶ ཝཱ སནྟཀཾ ཝསནཏྠཱཡ ཀཏགེཧཾ, ཏཏྠ སཧསེཡྻཔྤཧོནཀེ པདེསེ ཝུཊྛཾ ཡཱཝཀཱལིཀཉྩ ཡཱམཀཱལིཀཉྩ སངྒྷིཀཾ ཝཱ ཨུཔསམྤནྣཔུགྒལསྶ ཝཱ སནྟཀཾ ཨནྟོཝུཊྛཾ ནཱམ ཧོཏི, ཏཏྠ པཀྐཾ ཨནྟོཔཀྐཾ ནཱམ, ཡཏྠ ཀཏྠཙི པན སཡཾ པཀྐཾ སཱམཾ པཀྐཾ ནཱམ, ཏཾ སབྦཾ ཨནཛ྄ཛྷོཧརཎཱིཡཾ. ཏེན ཏེན སདྡྷིཾ སཾསཊྛམྤི ཏཾགཏིཀམེཝ, སབྦཾ ཨཛ྄ཛྷོཧརནྟསྶ དུཀྐཊཾ. ཏསྨཱ ཨནྟོཝུཊྛཨནྟོཔཀྐམོཙནཏྠཾ བྷགཝཏཱ ཙཏསྶོ ཀཔྤིཡབྷཱུམིཡོ (མཧཱཝ. ༢༩༥) ཨནུཉྙཱཏཱ, ཏཱསཾ ཝིནིཙྪཡོ སམནྟཔཱསཱདིཀཱཡཾ (མཧཱཝ. ཨཊྛ. ༢༩༥) ཝུཏྟོ. ཡཏྠ པནེཏཱ ན སནྟི, ཏཏྠ ཨནུཔསམྤནྣསྶ སནྟཀཾ ཀཏྭཱ པརིབྷུཉྫིཏུཾ ཝཊྚཏི. སཱམཾ པཱཀམྤི པུནཔཱཀཾ ཝཊྚཏི, ཨསནྣིདྷིཀཱརཀེ སནྣིདྷིཀཱརཀསཉྙིནོ, ཝེམཏིཀསྶ ཝཱ དུཀྐཊཾ. ཨསནྣིདྷིཀཱརཀསཉྙིནོ, ཡཱཝཀཱལིཀཱདཱིནི ཏཱིཎི ནིདཧིཏྭཱ ¶ སཀཾ སཀཾ ཀཱལཾ ཨནཏིཀྐམིཏྭཱ, ཡཱཝཛཱིཝིཀཾ སདཱཔི སཏི པཙྩཡེ པརིབྷུཉྫནྟསྶ, ཨུམྨཏྟཀཱདཱིནཉྩ ཨནཱཔཏྟི. ཨཱམིསཾ, སནྣིདྷིབྷཱཝོ, ཏསྶ ཨཛ྄ཛྷོཧརཎནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཨེལ༹ཀལོམསདིསཱནེཝཱཏི.

སནྣིདྷིཀཱརཀསིཀྑཱཔདཝཎྞནཱ ནིཊྛིཏཱ.

༩. པཎཱིཏབྷོཛནསིཀྑཱཔདཝཎྞནཱ

ནཝམེ པཎཱིཏབྷོཛནཱནཱིཏི པཎཱིཏསཾསཊྛཱནི སཏྟདྷཉྙནིབྦཏྟཱནི བྷོཛནཱནི. ཡཐཱ ཧི ཨཱཛཉྙཡུཏྟོ རཐོ ‘ཨཱཛཉྙརཐོ’ཏི ཝུཙྩཏི, ཨེཝམིདྷཱཔི པཎཱིཏསཾསཊྛཱནི བྷོཛནཱནི པཎཱིཏབྷོཛནཱནཱིཏི. ཡེཧི པན པཎཱིཏེཧི སཾསཊྛཱནི, ཏཱནི ‘པཎཱིཏབྷོཛནཱནཱི’ཏི ཝུཙྩནྟི, ཏེསཾ པབྷེདདསྶནཏྠཾ སེཡྻཐིདཾ སཔྤི ནཝནཱིཏནྟིཨཱདིམཱཧ, ཏཏྠ སཔྤིཨཱདཱིནི བྷེསཛྫསིཀྑཱཔདེ ¶ (ཀངྑཱ. ཨཊྛ. བྷེསཛྫསིཀྑཱཔདཝཎྞནཱ) ཝུཏྟལཀྑཎེནེཝ ཝེདིཏབྦཱནི. མཙྪཱདཱིསུ པན སབྦོཔི ‘ཨོདཀོ’ཏི (པཱཙི. ༢༦༠) ཝུཏྟལཀྑཎོ མཙྪོ མཙྪོཡེཝ. ཡེསཾ པན ¶ མཾསཾ ཀཔྤཏི, ཏེསཾ མཾསཉྩ ཁཱིརདདྷཱིནི ཙ ཨིདྷཱདྷིཔྤེཏཱནི. ཨེཝརཱུཔཱནི པཎཱིཏབྷོཛནཱནཱིཏི ཡཱནི ཨེཏེཧི སཔྤིཨཱདཱིཧི སཾསཊྛཏྟཱ ‘པཎཱིཏབྷོཛནཱནཱི’ཏི ཝུཙྩནྟི, ཏཐཱརཱུཔཱནི པཎཱིཏབྷོཛནཱནི. ཨགིལཱནོཏི ཡསྶ ཏེཧི ཝིནཱཔི ཕཱསུ ཧོཏི. ཨཏྟནོ ཨཏྠཱཡ ཝིཉྙཱཔེཏྭཱཏི ཨེཏྠ པན ཡོ ཨགིལཱནོ སུདྡྷཱནི སཔྤིཨཱདཱིནི བྷེསཛྫཏྠཱཡ ཝིཉྙཱཔེཏི, སོ མཧཱནཱམསིཀྑཱཔདེན (པཱཙི. ༣༠༣) ཀཱརེཏབྦོ, མཙྪཱདཱིནི ཙཏྟཱརི ཝིཉྙཱཔེནྟོ སཱུཔོདནཝིཉྙཏྟིཡཱ (པཱཙི. ༦༡༢-༦༡༣) ཀཱརེཏབྦོ, སཔྤིཨཱདཱིཧི སཾསཊྛབྷོཛནཱནི ཝིཉྙཱཔེནྟོ ཨིམིནཱ ཀཱརེཏབྦོ. ཏཏྲཱཡཾ ཝིནིཙྪཡོ – ‘‘སཔྤིནཱ བྷཏྟཾ དེཧི, སཔྤིཾ ཨཱཀིརིཏྭཱ དེཧི, སཔྤིམིསྶཀཾ ཀཏྭཱ དེཧི, སཧ སཔྤིནཱ དེཧི, སཔྤིཉྩ བྷཏྟཉྩ དེཧཱི’’ཏི ཨེཝཾ ཝིཉྙཱཔེནྟསྶ ཏཱཝ ཝིཉྙཏྟིཡཱ དུཀྐཊཾ, པཊིགྒཧཎེ དུཀྐཊཾ, ཨཛ྄ཛྷོཧརཎེ ཨཛ྄ཛྷོཧརཎེ པཱཙིཏྟིཡཾ. ‘‘སཔྤིབྷཏྟཾ དེཧཱི’’ཏི ཝུཏྟེ པན ཡསྨཱ སཱལིབྷཏྟཾ ཝིཡ སཔྤིབྷཏྟཾ ནཱམ ནཏྠི, ཏསྨཱ སཱུཔོདནཝིཉྙཏྟིཡཱ དུཀྐཊམེཝ ཧོཏི. སཙེ པན ‘‘སཔྤིནཱ བྷཏྟཾ དེཧཱི’’ཏི ཝུཏྟེ བྷཏྟཾ དཏྭཱ ‘‘སཔྤིཾ ཀཏྭཱ བྷུཉྫཱཧཱི’’ཏི ནཝནཱིཏཁཱིརཱདཱིནི ཝཱ ཀཔྤིཡབྷཎྜཾ ཝཱ དེཏི ‘‘ཨིམིནཱ སཔྤིཾ གཧེཏྭཱ བྷུཉྫཱཧཱི’’ཏི, ཡཐཱཝཏྠུཀམེཝ. ‘‘གོསཔྤིནཱ བྷཏྟཾ དེཧཱི’’ཏི ཝུཏྟེ པན གོསཔྤིཾ ཝཱ དེཏུ, ཏསྨིཾ ཨསཏི པུརིམནཡེན ནཝནཱིཏཱདཱིནི ཝཱ, གཱཝིཾཡེཝ ཝཱ དེཏུ ‘‘ཨིཏོ སཔྤིནཱ བྷུཉྫཱཧཱི’’ཏི, ཡཐཱཝཏྠུཀམེཝ. སཙེ པན ‘‘གོསཔྤིནཱ དེཧཱི’’ཏི ཡཱཙིཏོ ཨཛིཀཱསཔྤིཨཱདཱིཧི དེཏི, ཝིསངྐེཏཾ. ཨེཝཉྷི སཏི ཨཉྙཾ ཡཱཙིཏེན ཨཉྙཾ དིནྣཾ ནཱམ ཧོཏི, ཏསྨཱ ཨནཱཔཏྟི, ཨེས ནཡོ ‘‘ཨཛིཀཱསཔྤིནཱ དེཧཱི’’ཏིཨཱདཱིསུཔི. ‘‘ཀཔྤིཡསཔྤིནཱ དེཧཱི’’ཏི ཝུཏྟེ ཨཀཔྤིཡསཔྤིནཱ དེཏི, ཝིསངྐེཏམེཝ. ‘‘ཨཀཔྤིཡསཔྤིནཱ དེཧཱི’’ཏི ཝུཏྟེ ཨཀཔྤིཡསཔྤིནཱཝ དེཏི, པཊིགྒཧཎེཔི པརིབྷོགེཔི དུཀྐཊམེཝ. ཨིམིནཱ ནཡེན སབྦཔདེསུ ཝིནིཙྪཡོ ཝེདིཏབྦོ. སཙེ པན སབྦེཧིཔི སཔྤིཨཱདཱིཧི ཨེཀཊྛཱནེ ཝཱ ནཱནཱཊྛཱནེ ཝཱ ཝིཉྙཱཔེཏྭཱ པཊིལདྡྷཾ ཨེཀཏོ སམྦྷིནྣརསཾ ཀཏྭཱ ཏཏོ ཀུསགྒེན ཨེཀབིནྡུམྤི ཨཛ྄ཛྷོཧརཏི, ནཝ པཱཙིཏྟིཡཱནི.

སཱཝཏྠིཡཾ ¶ ¶ ཚབྦགྒིཡེ བྷིཀྑཱུ ཨཱརབྦྷ པཎཱིཏབྷོཛནཝིཉྙཏྟིཝཏྠུསྨིཾ པཉྙཏྟཾ, ‘‘ཨགིལཱནོ’’ཏི ཨཡམེཏྠ ཨནུཔཉྙཏྟི, ཨསཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, གིལཱནསྶ ཨགིལཱནསཉྙིནོ, ཝེམཏིཀསྶ ཝཱ དུཀྐཊཾ. གིལཱནསཉྙིསྶ, གིལཱནཀཱལེ ཝིཉྙཱཔེཏྭཱ ཨགིལཱནསྶ བྷུཉྫཏོ, གིལཱནསྶ སེསཀེ, ཉཱཏཀཔྤཝཱརིཏཊྛཱནཏོ, ཨཉྙསྶཏྠཱཡ ཝིཉྙཏྟེ, ཨཏྟནོ དྷནེན གཧིཏེ, ཨུམྨཏྟཀཱདཱིནཉྩ ཨནཱཔཏྟི. པཎཱིཏབྷོཛནཏཱ, ཨགིལཱནཏཱ, ཀཏཝིཉྙཏྟིཡཱ པཊིལཱབྷོ, ཨཛ྄ཛྷོཧརཎནྟི ཨིམཱནེཏྠ ཙཏྟཱརི ཨངྒཱནི. ཨདྡྷཱནསམུཊྛཱནཾ, ཀིརིཡཾ ¶ , ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི.

པཎཱིཏབྷོཛནསིཀྑཱཔདཝཎྞནཱ ནིཊྛིཏཱ.

༡༠. དནྟཔོནསིཀྑཱཔདཝཎྞནཱ

དསམེ ཨདིནྣནྟི ཀཱཡེན ཝཱ ཀཱཡཔྤཊིབདྡྷེན ཝཱ གཎྷནྟསྶ ཧཏྠཔཱསེ ཋཏྭཱ ཀཱཡཀཱཡཔྤཊིབདྡྷནིསྶགྒིཡཱནཾ ཨཉྙཏརེན ན དིནྣཾ, ཨཔྤཊིགྒཧིཏཀསྶེཏཾ ནཱམཾ. ཨཔྤཊིགྒཧིཏཀཉྷི བྷིཀྑུནོ ཨཏྟནོ སནྟཀམྤི ཨཛ྄ཛྷོཧརིཏུཾ ན ཝཊྚཏི. པཊིགྒཧིཏཾ ཨནྟམསོ ཝིསྶཱསིཀསནྟཀམྤི ཝཊྚཏི, ཏསྶ ལཀྑཎཾ ཝུཏྟཝིཔལླཱསེན ཝེདིཏབྦཾ. སཙེ ཧི ཡོ ཀོཙི ཨནུཔསམྤནྣོ ཨནྟམསོ ཏིརཙྪཱནོཔི བྷིཀྑུསྶ ཝཱ བྷིཀྑུནིཡཱ ཝཱ ཧཏྠཔཱསེ ཋིཏོ ཀཱཡཱདཱིནཾ ཨཉྙཏརེན དེཏི, ཏཉྩེ བྷིཀྑུནཱ ཡེན ཀེནཙི སརཱིརཱཝཡཝེན ཝཱ, ཏཔྤཊིབདྡྷེན ཝཱ, སཾཧཱརིམེན ཙ ཨནྟམསོ མཉྩེནཱཔི, དྷཱརེཏུཾ སམཏྠེན ཙ ཨནྟམསོ ཨཏཏྠཛཱཏཀརུཀྑཔཎྞེནཱཔི, སཱུཙིཡཱ པརཱམཊྛམཏྟེནཱཔི པཊིགྒཧིཏཾ, པཊིགྒཧིཏམེཝ ཧོཏི. པཊིབདྡྷཔྤཊིབདྡྷཾ ནཱམ ཨིདྷ ནཏྠི, ཡམྤི ནཏྠུཀརཎིཡཱ དིཡྻམཱནཾ ནཱསིཀཱཡ, ཨཀལླཀོ ཝཱ མུཁེན པཊིགྒཎྷཱཏི, སབྦཾ ཝཊྚཏི, ཨཱབྷོགམཏྟམེཝ ཧེཏྠ པམཱཎཾ. པུབྦཱབྷོགེ ཙ སཏི པཙྪཱ ནིདྡཱཡནྟསྶ པཏྟེ དིནྣམྤི ཧཏྠཔཱསེ སཏི པཊིགྒཧིཏམེཝ ཧོཏི. ཡམྤི ‘‘པཏྟེན པཊིགྒཎྷིསྶཱམཱི’’ཏི ནིསིནྣསྶེཝ ཧཏྠེ པཏཏི, ཏཾ ཝཊྚཏིཡེཝ. ཨབྷིཧཊབྷཱཛནཏོ ¶ པཏིཏརཛམྤི ཝཊྚཏི, ཏཏྠ ཋིཏནིསིནྣནིཔནྣཱནཾ པཝཱརཎཱསིཀྑཱཔདེ ཝུཏྟནཡེནེཝ ཧཏྠཔཱསོ ཝེདིཏབྦོ.

སཙེ པན དཱཡཀཔྤཊིགྒཱཧཀེསུ ཨེཀོ ཨཱཀཱསེ ཧོཏི, ཨེཀོ བྷཱུམིཡཾ, བྷཱུམཊྛསྶ སཱིསེན ཨཱཀཱསཊྛསྶ ཙ ཋཔེཏྭཱ དཱཏུཾ ཝཱ གཧེཏུཾ ཝཱ པསཱརིཏཧཏྠཾ ཡཾ ཨཱསནྣཏརཾ ཨངྒཾ, ཏསྶ ཨོརིམནྟེན ཧཏྠཔཱསཔྤམཱཎཾ པརིཙྪིནྡིཏབྦཾ. སཙེཔི ཨེཀོ ཀཱུཔེ ཧོཏི, ཨེཀོ ཀཱུཔཏཊེ, ཨེཀོ ཝཱ རུཀྑེ, ཨེཀོ པཐཝིཡཾ, ཝུཏྟནཡེནེཝ ཧཏྠཔཱསཔྤམཱཎཾ པརིཙྪིནྡིཏབྦཾ. ཏསྨིཾ ཋཏྭཱ སཙེཔི དྭེ ཏཡོ ཝཱ སཱམཎེརཱ ཡཾ མཛ྄ཛྷིམོ པུརིསོ ཨུཀྑིཔིཏུཾ སཀྐོཏི, ཨེཝརཱུཔཾ བྷཱརཾ པཝཊྚེནྟཱ བྷིཀྑུནོ བྷཱུམིཡཾ ཋཔིཏཧཏྠཾ ¶ ཨཱརོཔེནྟི, ཨུཀྑིཔིཏྭཱ ཝཱ བྷིཀྑུནོ པསཱརིཏཧཏྠེ ཨེཀདེསེནཱཔི ཋཔེནྟི, ཏཾ པཊིགྒཧིཏམེཝ ཧོཏི. ཡཾ པན པིཎྜཱཡ ཙརནྟསྶ པཏྟེ རཛཾ པཏཏི, ཏཾ ཨཔྤཊིགྒཧིཏམེཝ ཧོཏི, ཏསྨཱ པཊིགྒཧེཏྭཱཝ བྷིཀྑཱ གཎྷིཏབྦཱ. ཨཔྤཊིགྒཧེཏྭཱ གཎྷནྟསྶ ཝིནཡདུཀྐཊཾ, ཏཾ པན པུན པཊིགྒཧེཏྭཱ བྷུཉྫནྟསྶ ཨནཱཔཏྟི. སཙེ ¶ ‘‘པཊིགྒཧེཏྭཱ དེཐཱ’’ཏི ཝུཏྟེ ཝཙནཾ ཨསྶུཏྭཱ ཝཱ ཨནཱདིཡིཏྭཱ ཝཱ བྷིཀྑཾ དེནྟིཡེཝ, ཝིནཡདུཀྐཊཱ མུཙྩཏི, པུན པཊིགྒཧེཏྭཱ ཨཉྙཱ བྷིཀྑཱ པཊིགྒཧེཏབྦཱ. སཙེ མཧཱཝཱཏོ ཏཏོ ཏཏོ རཛཾ པཱཏེཏི, ན སཀྐཱ ཧོཏི བྷིཀྑཾ གཧེཏུཾ, ‘‘ཨནུཔསམྤནྣསྶ དསྶཱམཱི’’ཏི སུདྡྷཙིཏྟེན ཨཱབྷོགཾ ཀཏྭཱ གཎྷིཏུཾ ཝཊྚཏི. ཏཾ ཨནུཔསམྤནྣསྶ དཏྭཱ པུན ཏེན དིནྣཾ ཝཱ ཏསྶ ཝིསྶཱསེན ཝཱ པཊིགྒཧེཏྭཱ བྷུཉྫིཏུཾ ཝཊྚཏི. ཨསྶུཁེལ༹སིངྒྷཱཎིཀཱདཱིསུ ཡཾ ཋཱནཏོ ཙཝིཏྭཱ ཧཏྠེ ཝཱ པཏྟེ ཝཱ པཏཏི, ཏཾ པཊིགྒཧེཏབྦཾ, ཨངྒལགྒཾ པཊིགྒཧིཏམེཝ. པཏནྟམྤི ཝོཙྪིནྣཉྩེ ཨནྟརཱ ན གཧེཏབྦཾ, ཨུགྒཧིཏཀཾ ནཱམ ཧོཏི, ཏཾ པཙྪཱ པཊིགྒཧིཏམྤི ན ཝཊྚཏི. ཡཾ པན བྷེསཛྫཾ ཝཱ མཱུལཕལཾ ཝཱ མཱཏཱདཱིནཾ ཨཏྠཱཡ གཧེཏྭཱ ཚཱཡཏྠཱཡ ཝཱ ཕལིནིསཱཁཾ ཨུཀྑིཔིཏྭཱ གཙྪཏི, ཏཏོ ཡཾ ཨིཙྪཏི, ཏཾ པུན པཊིགྒཧེཏྭཱ པརིབྷུཉྫིཏུཾ ཝཊྚཏི. ཡོ པན ཏཏྠ ཛཱཏཀཕལིནིསཱཁཱཡ ཝཱ ཝལླིཡཱ ཝཱ གཧེཏྭཱ ཙཱལེཏི. ཏསྶ ཏཏོ ལདྡྷཾ ཕལཾ ན ཝཊྚཏི, དུརུཔཙིཎྞདུཀྐཊཉྩ ཨཱཔཛྫཏི, ཨཉྙསྶ ཏཾ ཝཊྚཏི, ཕལིརུཀྑཾ པན ཨཔསྶཡིཏུཾ ཝཱ ཨཱལམྦིཏུཾ ཝཱ ཝཊྚཏི, པཊིགྒཧེཏྭཱ ཋཔིཏེ ཡཾ ཨཉྙཾ ཨངྐུརཱདི ཨུཔྤཛྫཏི, པཊིགྒཧིཏམེཝ ཏཾ. ཡཱཝ ཧི ཧཏྠཏོ མུཏྟེ ནིརཔེཀྑོ ན ཧོཏི, ནིརཔེཀྑཏཱཡ ཝཱ ཧཏྠཏོ ན ¶ མུཙྩཏི, ཏཱཝ ན པཊིགྒཧཎཾ ཝིཛཧཏི, ཨཡམེཏྠ སངྑེཔོ, ཝིཏྠཱརོ པན སམནྟཔཱསཱདིཀཱཡཾ ཝུཏྟོ.

མུཁདྭཱརནྟི གལནཱལི༹ཀཾ. མུཁེན ཝཱ ཧི པཝིཊྛཾ ཧོཏུ, ནཱསིཀཱཡ ཝཱ, གལེན ཨཛ྄ཛྷོཧརཎཱིཡཏཱཡ སབྦམྤི ཏཾ མུཁདྭཱརཾ པཝེསིཏམེཝ ཧོཏི. ཨཱཧཱརནྟི ཡཾཀིཉྩི ཡཱཝཀཱལིཀཾ ཝཱ ཡཱམཀཱལིཀཾ ཝཱ སཏྟཱཧཀཱལིཀཾ ཝཱ ཡཱཝཛཱིཝིཀཾ ཝཱ. སབྦཉྷེཏཾ ཨཛ྄ཛྷོཧརཎཱིཡཏྟཱ ‘ཨཱཧཱརོ’ཏི ཝུཙྩཏི, ཏཏྠ སབྦམྤི དྷཉྙཾ ཝཱ དྷཉྙཱནུལོམཾ ཝཱ ཏཱལནཱལི༹ཀེརཔནསལབུཛཨལཱབུཀུམྦྷཎྜཔུསྶཕལཏིཔུསཕལཨེལཱ༹ལུཀསངྑཱཏཾ ནཝཝིདྷཾ མཧཱཕལཉྩེཝ ཨཔརཎྞཉྩ, ཡཉྩཉྙཾ ཝནམཱུལཔཏྟཔུཔྥཕལཱདི ཨཱཧཱརཏྠཾ ཕརཏི, ཏཾ སབྦཾ ཡཱཝ མཛ྄ཛྷནྷིཀཀཱལོ, ཏཱཝ པརིབྷུཉྫིཏབྦཏོ ཡཱཝཀཱལིཀཾ ནཱམ. ཨམྦཔཱནཾ ཛམྦུཔཱནཾ ཙོཙཔཱནཾ མོཙཔཱནཾ མདྷུཀཔཱནཾ མུདྡིཀཔཱནཾ སཱལཱུཀཔཱནཾ ཕཱརུསཀཔཱནནྟི ཨིམཱནི ཨཊྛ པཱནཱནི, ཡཱནི ཙ ཏེསཾ ཨནུལོམཱནི ཝེཏྟཏིནྟིཎིཀམཱཏུལུངྒཀཔིཊྛཀོསམྦཀརམནྡཱདིཁུདྡཀཕལཔཱནཱནི, ཨེཏཱནི སབྦཱནི ཨནུཔསམྤནྣེཧི ¶ སཱིཏོདཀེན མདྡིཏྭཱ ཀཏཱནི ཨཱདིཙྩཔཱཀཱནི ཝཱ ཡཱཝ རཏྟིཡཱ པཙྪིམཡཱམཾ ནིདཧིཏྭཱ པརིབྷུཉྫིཏབྦཏོ ཡཱམཀཱལིཀཱནི ནཱམ. ཨཝསེསེསུ ཨནུཉྙཱཏཕལཔཏྟཔུཔྥརསེསུཔི ཨེསེཝ ནཡོ. སཔྤིཨཱདཱིནི པཉྩ བྷེསཛྫཱནི སཏྟཱཧཾ ནིདཧིཏྭཱ པརིབྷུཉྫིཏབྦཏོ སཏྟཱཧཀཱལིཀཱནི ནཱམ. ཨིདཾ པན ཡཱཝཀཱལིཀཱདིཏྟཡཾ ཀཱལཝིམུཏྟཉྩ ཨུདཀཾ ཋཔེཏྭཱ ཨཝསེསམཱུལཕལཱཕལཱདི ཡཾ ནེཝ ཁཱདནཱིཡཏྠཾ ན བྷོཛནཱིཡཏྠཾ ཕརཏི ¶ , ཏཾ ཡཱཝཛཱིཝཾ ནིདཧིཏྭཱ སཏི པཙྩཡེ པརིབྷུཉྫིཏབྦཏོ ཡཱཝཛཱིཝིཀཾ ནཱམ. ཨཱཧརེཡྻཱཏི པཝེསེཡྻ. ཨཉྙཏྲ ཨུདཀདནྟཔོནཱཏི ཨིདཾ ཨནཱཧཱརེཔི ཨུདཀེ ཨཱཧཱརསཉྙཱཡ, དནྟཔོནེ ཙ ‘‘མུཁདྭཱརཾ ཨཱཧཊཾ ཨིད’’ནྟི སཉྙཱཡ ཀུཀྐུཙྩཱཡནྟཱནཾ ཀུཀྐུཙྩཝིནོདནཏྠཾ ཝུཏྟཾ. ཨུདཀཉྷི ཡཐཱསུཁཾ པཱཏུཾ, དནྟཀཊྛཉྩ དནྟཔོནཔརིབྷོགེན པརིབྷུཉྫིཏུཾ ཝཊྚཏི. ཋཔེཏྭཱ པན ཨིདཾ དྭཡཾ ཨཝསེསཾ ཨཛ྄ཛྷོཧརཎཏྠཱཡ གཎྷཏོ གཧཎེ དུཀྐཊཾ, ཨཛ྄ཛྷོཧཱརེ ཨཛ྄ཛྷོཧཱརེ པཱཙིཏྟིཡཾ, སཙེཔི དནྟཀཊྛརསོ ཨཛཱནནྟསྶ ཨནྟོ པཝིསཏི, པཱཙིཏྟིཡམེཝ.

ཝེསཱལིཡཾ ཨཉྙཏརཾ བྷིཀྑུཾ ཨཱརབྦྷ ཨདིནྣཾ ཨཱཧཱརཾ ཨཱཧརཎཝཏྠུསྨིཾ པཉྙཏྟཾ, ‘‘ཨཉྙཏྲ ཨུདཀདནྟཔོནཱ’’ཏི ཨཡམེཏྠ ཨནུཔཉྙཏྟི, སཱདྷཱརཎཔཉྙཏྟི ¶ , ཨནཱཎཏྟིཀཾ, ཏིཀཔཱཙིཏྟིཡཾ, པཊིགྒཧིཏཀེ ཨཔྤཊིགྒཧིཏསཉྙིནོ, ཝེམཏིཀསྶ ཝཱ དུཀྐཊཾ. པཊིགྒཧིཏསཉྙིསྶ, ཨུདཀདནྟཔོནེ, ཙཏྟཱརི མཧཱཝིཀཊཱནི སཏི པཙྩཡེ ཨསཏི ཀཔྤིཡཀཱརཀེ སཱམཾ གཧེཏྭཱ པརིབྷུཉྫནྟསྶ, ཨུམྨཏྟཀཱདཱིནཉྩ ཨནཱཔཏྟི. ཨེཏྠ དུབྦཙོཔི ཨསམཏྠོཔི ཀཔྤིཡཀཱརཀོ ཨསནྟཔཀྑེཡེཝ ཏིཊྛཏི, ཚཱརིཀཱཡ ཨསཏི སུཀྑདཱརུཾ ཛྷཱཔེཏྭཱ, ཏསྨིཉྩ ཨསཏི ཨལླདཱརུཾ རུཀྑཏོ ཚིནྡིཏྭཱཔི ཀཱཏུཾ, མཏྟིཀཏྠཱཡ ཙ པཐཝིཾ ཁཎིཏུམྤི ཝཊྚཏི, ཨིདཾ པན ཙཏུབྦིདྷམྤི མཧཱཝིཀཊཾ ཀཱལོདིསྶཾ ནཱམ སཔྤདཊྛཀྑཎེཡེཝ སཱམཾ གཧེཏུཾ ཝཊྚཏི, ཨཉྙདཱ པཊིགྒཱཧཱཔེཏྭཱ པརིབྷུཉྫིཏབྦཾ. ཨཔྤཊིགྒཧིཏཀཏཱ, ཨནནུཉྙཱཏཏཱ, དྷཱུམཱདིཨབྦོཧཱརིཀཱབྷཱཝོ, ཨཛ྄ཛྷོཧརཎནྟི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི ཨེལ༹ཀལོམསདིསཱནཱིཏི.

དནྟཔོནསིཀྑཱཔདཝཎྞནཱ ནིཊྛིཏཱ.

བྷོཛནཝགྒོ ཙཏུཏྠོ.

༥. ཨཙེལཀཝགྒོ

༡. ཨཙེལཀསིཀྑཱཔདཝཎྞནཱ

ཨཙེལཀཝགྒསྶ པཋམེ ཨེཏེསཾ ཨཙེལཀཱདཱིནཾ ཨཉྙཏིཏྠིཡཱནཾ ཡཾཀིཉྩི ཨཱམིསཾ ཨེཀཔྤཡོགེན ¶ དེནྟསྶ ཨེཀཾ པཱཙིཏྟིཡཾ, ཨཝཙྪིནྡིཏྭཱ ཨཝཙྪིནྡིཏྭཱ དེནྟསྶ པཡོགེ པཡོགེ པཱཙིཏྟིཡཾ.

ཝེསཱལིཡཾ ཨཱཡསྨནྟཾ ཨཱནནྡཾ ཨཱརབྦྷ པརིབྦཱཛིཀཱཡ དྭེ པཱུཝེ དཱནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཨུདཀདནྟཔོནཾ དེནྟསྶ, ཨཏིཏྠིཡེ ཏིཏྠིཡསཉྙིསྶ, ཝེམཏིཀསྶ ཙ དུཀྐཊཾ. ཨཏིཏྠིཡེ ཨཏིཏྠིཡསཉྙིསྶ, ཨནུཔསམྤནྣེན དཱཔེནྟསྶ, ཏེསཾ སནྟིཀེ བྷཱཛནཾ ནིཀྑིཔིཏྭཱ ‘‘ཨིདཾ གཎྷཐཱ’’ཏི བྷཎནྟསྶ, ཏེསཾ ཝཱ ནིཀྑིཏྟབྷཱཛནེ དེནྟསྶ, བཱཧིརལེཔཾ ¶ དེནྟསྶ, ཨུམྨཏྟཀཱདཱིནཉྩ ཨནཱཔཏྟི. ཨཉྙཏིཏྠིཡཏཱ, ཨནནུཉྙཱཏཏཱ, ཨཛ྄ཛྷོཧརཎཱིཡཾ ཨཛ྄ཛྷོཧརཎཏྠཱཡ སཧཏྠཱ ཨནིཀྑིཏྟབྷཱཛནེ དཱནནྟི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཨེལ༹ཀལོམསདིསཱནཱིཏི.

ཨཙེལཀསིཀྑཱཔདཝཎྞནཱ ནིཊྛིཏཱ.

༢. ཨུཡྻོཛནསིཀྑཱཔདཝཎྞནཱ

དུཏིཡེ ¶ དཱཔེཏྭཱ ཝཱ ཨདཱཔེཏྭཱ ཝཱཏི ཡཾཀིཉྩི ཨཱམིསཾ དཱཔེཏྭཱ ཝཱ ན དཱཔེཏྭཱ ཝཱ. ཨུཡྻོཛེཡྻཱཏི མཱཏུགཱམེན སདྡྷིཾ ཧསནཀཱིལ༹ནརཧོནིསཛྫཱདཱིནི ཀཏྟུཀཱམོ ‘གཙྪཱ’ཏིཨཱདཱིནི ཝཏྭཱ ཨུཡྻོཛེཡྻ. ཨེཏདེཝཱཏི ཨེཏཾ ཨནཱཙཱརམེཝ པཙྩཡཾ ཀརིཏྭཱ, ན ཨཉྙཾ པཏིརཱུཔཾ ཀཱརཎཾ. པཱཙིཏྟིཡནྟི ཨུཡྻོཛནམཏྟེ ཏཱཝ དུཀྐཊཾ, ཡདཱ པནསྶ སོ དསྶནཱུཔཙཱརཾ ཝཱ སཝནཱུཔཙཱརཾ ཝཱ ཨེཀེན པཱདེན ཝིཛཧཏི, ཨཔརཾ དུཀྐཊཾ, དུཏིཡེན ཝིཛཧིཏེ པཱཙིཏྟིཡཾ. ཨེཏྠ ཙ དསྶནཱུཔཙཱརསྶ ཨཛ྄ཛྷོཀཱསེ ཋཏྭཱ དྭཱདསཧཏྠཔྤམཱཎཾ, ཏཐཱ སཝནཱུཔཙཱརསྶ. སཙེ པན ཨནྟརཱ ཀུཊྚདྭཱརཔཱཀཱརཱདཡོ ཧོནྟི, ཏེཧི ཨནྟརིཏབྷཱཝོཡེཝ ཨུཔཙཱརཱཏིཀྐམོ.

སཱཝཏྠིཡཾ ཨུཔནནྡཾ ཨཱརབྦྷ ཨུཡྻོཛནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨུཡྻོཛནཱཎཏྟིཀཱཡ སཱཎཏྟིཀཾ, ཏིཀཔཱཙིཏྟིཡཾ, ཨནུཔསམྤནྣེ ཏིཀདུཀྐཊཾ, ཨུབྷིནྣམྤི ཀལིསཱསནཱརོཔནེ དུཀྐཊམེཝ, ‘‘ཨུབྷོ ཨེཀཏོ ན ཡཱཔེསྶཱམཱ’’ཏི ཨེཝམཱདཱིཧི པཏིརཱུཔཀཱརཎེཧི ཨུཡྻོཛེནྟསྶ, ཨུམྨཏྟཀཱདཱིནཉྩ ཨནཱཔཏྟི. ཨནཱཙཱརཾ ཨཱཙརིཏུཀཱམཏཱ, ཏདཏྠམེཝ ཨུཔསམྤནྣསྶ ཨུཡྻོཛནཾ, ཨེཝཾ ཨུཡྻོཛིཏསྶ ཨུཔཙཱརཱཏིཀྐམོཏི ཨིམཱནེཏྠ ཏཱིཎི ཨངྒཱནི. སམུཊྛཱནཱདཱིནི ཨདིནྣཱདཱནསདིསཱནཱིཏི.

ཨུཡྻོཛནསིཀྑཱཔདཝཎྞནཱ ནིཊྛིཏཱ.

༣. སབྷོཛནསིཀྑཱཔདཝཎྞནཱ

ཏཏིཡེ ¶ སཧ ཨུབྷོཧི ཛནེཧཱིཏི སབྷོཛནཾ, ཏསྨིཾ སབྷོཛནེ. ཨཐ ཝཱ སབྷོཛནེཏི སབྷོགེ, རཱགཔརིཡུཊྛིཏཔུརིསསྶ ཧི ཨིཏྠཱི བྷོགོ, ཨིཏྠིཡཱ ཙ པུརིསོ, ཏེནེཝསྶ པདབྷཱཛནེ ‘‘ཨིཏྠཱི ཙེཝ ཧོཏི, པུརིསོ ཙཱ’’ཏིཨཱདི (པཱཙི. ༢༨༡) ཝུཏྟཾ. ཨནུཔཁཛྫ ནིསཛྫཾ ཀཔྤེཡྻཱཏི ཨནུཔཝིསིཏྭཱ ནིསཱིདེཡྻ, ཡཾ ཏསྨིཾ ཀུལེ སཡནིགྷརཾ, ཏསྶ མཧཱཙཏུསྶཱལཱདཱིསུ ཀཏསྶ མཧལླཀསྶ པིཊྛསངྒྷཱཊཏོ ཧཏྠཔཱསཾ ཝིཛཧིཏྭཱ ཨནྟོསཡནསྶ ཨཱསནྣེ ཋཱནེ, ཁུདྡཀསྶ ཝཱ ཝེམཛ྄ཛྷཾ ཨཏིཀྐམིཏྭཱ ནིསཱིདེཡྻཱཏི ཨཏྠོ, ཨེཝཾ ནིསིནྣསྶ པཱཙིཏྟིཡཾ.

སཱཝཏྠིཡཾ ¶ ཨུཔནནྡཾ ཨཱརབྦྷ ཨནུཔཁཛྫ ནིསཛྫནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཨསཡནིགྷརེ སཡནིགྷརསཉྙིནོ, ཝེམཏིཀསྶ ཝཱ དུཀྐཊཾ. ནསཡནིགྷརསཉྙིསྶ, ཝུཏྟལཀྑཎཾ པདེསཾ ཨནཏིཀྐམིཏྭཱ ནིསིནྣསྶ, བྷིཀྑུསྨིཾ དུཏིཡཀེ སཏི, ཨུབྷོསུ ནིཀྑནྟེསུ ཝཱ, ཝཱིཏརཱགེསུ ཝཱ ནིསཱིདནྟསྶ, ཨུམྨཏྟཀཱདཱིནཉྩ ཨནཱཔཏྟི. ཨཝཱིཏརཱགཛཱཡམྤཏིཀཱནཾ ¶ སནྣིཧིཏཏཱ, སཡནིགྷརཏཱ, དུཏིཡསྶ བྷིཀྑུནོ ཨབྷཱཝོ, ཨནུཔཁཛྫ ནིསཱིདནནྟི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི པཋམཔཱརཱཛིཀསདིསཱནཱིཏི.

སབྷོཛནསིཀྑཱཔདཝཎྞནཱ ནིཊྛིཏཱ.

༤-༥. རཧོཔཊིཙྪནྣ-རཧོནིསཛྫསིཀྑཱཔདཝཎྞནཱ

ཙཏུཏྠཔཉྩམཱནི སཱཝཏྠིཡཾ ཨུཔནནྡཾ ཨཱརབྦྷ པཊིཙྪནྣཱསནེ ཙ, རཧོ ཙ ནིསཛྫནཝཏྠུསྨིཾ པཉྙཏྟཱནི, སཱདྷཱརཎཔཉྙཏྟིཡོ, ཨེཏེསམྤི སམུཊྛཱནཱདཱིནི པཋམཔཱརཱཛིཀསདིསཱནེཝ. སེསོ ཀཐཱནཡོ ཨནིཡཏདྭཡེ ཝུཏྟནཡེནེཝ ཝེདིཏབྦོ.

རཧོཔཊིཙྪནྣ-རཧོནིསཛྫསིཀྑཱཔདཝཎྞནཱ ནིཊྛིཏཱ.

༦. ཙཱརིཏྟསིཀྑཱཔདཝཎྞནཱ

ཚཊྛེ ནིམནྟིཏོཏི པཉྩནྣཾ བྷོཛནཱནཾ ཨཉྙཏརེན ནིམནྟིཏོ. སབྷཏྟོ སམཱནོཏི ཏེནེཝ ནིམནྟནབྷཏྟེན སབྷཏྟོ སམཱནོ. སནྟཾ བྷིཀྑུཾ ཨནཱཔུཙྪཱཏི ཨནྟོཨུཔཙཱརསཱིམཱཡ དསྶནཱུཔཙཱརེ བྷིཀྑུཾ ¶ དིསྭཱ ཡཾ སཀྐཱ ཧོཏི པཀཏིཝཙནེན ཨཱཔུཙྪིཏུཾ, ཏཱདིསཾ ‘‘ཨཧཾ ཨིཏྠནྣཱམསྶ གྷརཾ གཙྪཱམཱི’’ཏི ཝཱ ‘‘ཙཱརིཏྟཾ ཨཱཔཛྫཱམཱི’’ཏི ཝཱ ཨཱིདིསེན ཝཙནེན ཨནཱཔུཙྪིཏྭཱ. པུརེབྷཏྟཾ ཝཱ པཙྪཱབྷཏྟཾ ཝཱཏི ཡེན བྷཏྟེན ནིམནྟིཏོ, ཏསྨིཾ བྷུཏྟེ ཝཱ ཨབྷུཏྟེ ཝཱ. ཀུལེསུ ཙཱརིཏྟཾ ཨཱཔཛྫེཡྻཱཏི ཡསྨིཾ ཀུལེ ནིམནྟིཏོ, ཏཏོ ཨཉྙཱནི ཀུལཱནི པཝིསེཡྻ. ཨཉྙཏྲ སམཡཱ པཱཙིཏྟིཡནྟི སཙེ སོ བྷིཀྑུ ཝུཏྟལཀྑཎཾ དུཝིདྷམྤི སམཡཾ ཋཔེཏྭཱ ཨཝཱིཏིཝཏྟེ ¶ མཛ྄ཛྷནྷིཀེ ཨཉྙཾ ཀུལཾ པཝིསཏི, ཨཐསྶ གྷརཱུཔཙཱརོཀྐམནེ དུཀྐཊཾ, པཋམཔཱདེན ཨུམྨཱརཾ ཨཏིཀྐམནྟསྶ ཨཔརམྤི དུཀྐཊཾ, དུཏིཡཔཱདེན ཨཏིཀྐམེ པཱཙིཏྟིཡཾ.

རཱཛགཧེ ཨུཔནནྡཾ ཨཱརབྦྷ ཙཱརིཏྟཱཔཛྫནཝཏྠུསྨིཾ པཉྙཏྟཾ, ‘‘སནྟཾ བྷིཀྑུཾ, ཨནཱཔུཙྪཱ, པུརེབྷཏྟཾ པཙྪཱབྷཏྟཾ, ཨཉྙཏྲ སམཡཱ’’ཏི ཨཡམེཏྠ ཙཏུབྦིདྷཱ ཨནུཔཉྙཏྟི, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཨནིམནྟིཏེ ནིམནྟིཏསཉྙིསྶ, ཝེམཏིཀསྶ ཝཱ དུཀྐཊཾ. ཏསྨིཾ ཨནིམནྟིཏསཉྙིསྶ, སམཡེ སནྟཾ བྷིཀྑུཾ ཨཱཔུཙྪིཏྭཱ, ཨསནྟཾ བྷིཀྑུཾ ཨནཱཔུཙྪིཏྭཱ པཝིསཏོ, ཨཉྙསྶ གྷརེན ཝཱ གྷརཱུཔཙཱརེན ཝཱ མགྒོ ཧོཏི, ཏེན གཙྪཏོ, ཨནྟརཱརཱམབྷིཀྑུནུཔསྶཡཏིཏྠིཡསེཡྻཔཊིཀྐམནབྷཏྟིཡགྷརཱནི གཙྪཏོ, ཨཱཔདཱསུ, ཨུམྨཏྟཀཱདཱིནཉྩ ཨནཱཔཏྟི. པཉྩནྣཾ བྷོཛནཱནཾ ཨཉྙཏརེན ནིམནྟནསཱདིཡནཾ, སནྟཾ བྷིཀྑུཾ ཨནཱཔུཙྪནཱ, བྷཏྟིཡགྷརཏོ ཨཉྙགྷརཔྤཝིསནཾ, མཛ྄ཛྷནྷིཀཱནཏིཀྐམོ, སམཡསྶ ཝཱ ཨཱཔདཱནཾ ཝཱ ཨབྷཱཝོཏི ཨིམཱནེཏྠ པཉྩ ཨངྒཱནི. སམུཊྛཱནཱདཱིནི པཋམཀཐིནསདིསཱནེཝ, ཨིདཾ པན ཀིརིཡཱཀིརིཡནྟི.

ཙཱརིཏྟསིཀྑཱཔདཝཎྞནཱ ནིཊྛིཏཱ.

༧. མཧཱནཱམསིཀྑཱཔདཝཎྞནཱ

སཏྟམེ ¶ ཙཏུམཱསཔྤཙྩཡཔཝཱརཎཱཏི ཙཏྟཱརོ མཱསེ གིལཱནཔྤཙྩཡཔཝཱརཎཱ, སབྦཉྩེཏཾ ཝཏྠུཝསེན ཝུཏྟཾ. ཨཡཾ པནེཏྠ ཨཏྠོ – ཙཏུམཱསཔཝཱརཎཱ ཝཱ ཧོཏུ, པུནཔཝཱརཎཱ ཝཱ, ནིཙྩཔཝཱརཎཱ ཝཱ, སབྦཱཔི སཱདིཏབྦཱ, ‘‘ཨིདཱནི མམ རོགོ ནཏྠཱི’’ཏི ན པཊིཀྑིཔིཏབྦཱ, ‘‘རོགེ པན སཏི ཝིཉྙཱཔེསྶཱམཱི’’ཏི ཨདྷིཝཱསེཏབྦཱཏི. ཏཏོ ཙེ ཨུཏྟརི སཱདིཡེཡྻཱཏི ཨེཏྠ སཙེ ཏཏྠ རཏྟཱིཧི ཝཱ བྷེསཛྫེཧི ཝཱ པརིཙྪེདོ ཀཏོ ཧོཏི ‘‘ཨེཏྟཀཱཡེཝ རཏྟིཡོ, ཨེཏྟཀཱནི ཝཱ བྷེསཛྫཱནི ཝིཉྙཱཔེཏབྦཱནཱི’’ཏི, ཨཐ ཏཏོ རཏྟིཔརིཡནྟཏོ ཝཱ བྷེསཛྫཔརིཡནྟཏོ ཝཱ ཨུཏྟརི, ན བྷེསཛྫཀརཎཱིཡེན ཝཱ བྷེསཛྫཾ, ཨཉྙབྷེསཛྫཀརཎཱིཡེན ཝཱ ཨཉྙཾ བྷེསཛྫཾ ཝིཉྙཱཔེནྟསྶ པཱཙིཏྟིཡཾ.

སཀྐེསུ ¶ ¶ ཚབྦགྒིཡེ ཨཱརབྦྷ བྷེསཛྫཝིཉྙཱཔནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ནཏཏུཏྟརི ཏཏུཏྟརིསཉྙིནོ, ཝེམཏིཀསྶ ཝཱ དུཀྐཊཾ. ནཏཏུཏྟརི ནཏཏུཏྟརིསཉྙིསྶ, ཡེཧི བྷེསཛྫེཧི པཝཱརིཏོ, ཏཏོ ཨཉྙེཧི ཝཱ ཨདྷིཀཏརེཧི ཝཱ ཨཏྠེ སཏི, ཡཱསུ ཙ རཏྟཱིསུ པཝཱརིཏོ, ཏཱ ཨཏིཀྐམིཏྭཱཔི ཨཏྠེ སཏི ཡཐཱབྷཱུཏཾ ཨཱཙིཀྑིཏྭཱ ཝིཉྙཱཔེནྟསྶ, ཡེ ཙ ཉཱཏཀེ ཝཱ པུགྒལིཀཔྤཝཱརཎཱཡ པཝཱརིཏེ ཝཱ ཨཔརིཡནྟཔཝཱརཎཱཡ ཝཱ པཝཱརིཏེ, ཨཉྙསྶ ཝཱ ཨཏྠཱཡ, ཨཏྟནོ ཝཱ དྷནེན ཝིཉྙཱཔེནྟི, ཏེསཾ, ཨུམྨཏྟཀཱདཱིནཉྩ ཨནཱཔཏྟི. སངྒྷཔཝཱརཎཏཱ, ཏཏོ བྷེསཛྫཝིཉྙཏྟི, ཨགིལཱནཏཱ, པརིཡནྟཱཏིཀྐམོཏི ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི སཉྩརིཏྟསདིསཱནཱིཏི.

མཧཱནཱམསིཀྑཱཔདཝཎྞནཱ ནིཊྛིཏཱ.

༨. ཨུཡྻུཏྟསེནཱསིཀྑཱཔདཝཎྞནཱ

ཨཊྛམེ ཨུཡྻུཏྟནྟི ཀཏཨུཡྻོགཾ, གཱམཏོ ནིཀྑནྟནྟི ཨཏྠོ. སེནནྟི ཙཏུརངྒིནིཾ. ཨཉྙཏྲ ཏཐཱརཱུཔཔྤཙྩཡཱཏི ཏཐཱརཱུཔེ ཀཱརཎེ ཨསཏི ཀེཝལཾ སེནཾ དསྶནཏྠཱཡ གཙྪཏོ པདེ པདེ དུཀྐཊཾ, དསྶནཱུཔཙཱརེ ཋཏྭཱ པསྶཏོ པཱཙིཏྟིཡཾ. དསྶནཱུཔཙཱརོ ནཱམ ཡཏྠ ཋིཏོ པསྶཏི, ཏཾ པན ཝིཛཧིཏྭཱ པུནཔྤུནཾ པསྶཏོ པཡོགེ པཡོགེ པཱཙིཏྟིཡཾ.

སཱཝཏྠིཡཾ ཚབྦགྒིཡེ ཨཱརབྦྷ སེནཱདསྶནཝཏྠུསྨིཾ པཉྙཏྟཾ, ‘‘ཨཉྙཏྲ ཏཐཱརཱུཔཔྤཙྩཡཱ’’ཏི ཨཡམེཏྠ ཨནུཔཉྙཏྟི, སཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཧཏྠིཨཱདཱིསུ ཨེཀམེཀཾ དསྶནཱཡ གམནེ ཝུཏྟནཡེནེཝ དུཀྐཊཾ, ཏཐཱ ཨནུཡྻུཏྟེ ཨུཡྻུཏྟསཉྙིནོ, ཝེམཏིཀསྶ ཙ དུཀྐཊཾ. ཨནུཡྻུཏྟསཉྙིནོ པན, ཨཱརཱམེ ཋཏྭཱ ཨཏྟནོ ཋིཏོཀཱསཾ ཨཱགཏཾ, པཊིཔཐཾ ཨཱགཙྪནྟཉྩ པསྶཏོ, ཏཐཱརཱུཔཔྤཙྩཡེ, ཨཱཔདཱསུ, ཨུམྨཏྟཀཱདཱིནཉྩ ཨནཱཔཏྟི. ཨུཡྻུཏྟསེནཾ དསྶནཏྠཱཡ གམནཾ, ཨནུཉྙཱཏོཀཱསཏོ ཨཉྙཏྲ དསྶནཾ, ཏཐཱརཱུཔཔྤཙྩཡསྶ ཨཱཔདཱཡ ཝཱ ཨབྷཱཝོཏི ¶ ཨིམཱནེཏྠ ཙཏྟཱརི ཨངྒཱནི. སམུཊྛཱནཱདཱིནི ཨེལ༹ཀལོམསདིསཱནི, ཨིདཾ པན ལོཀཝཛྫཾ, ཨཀུསལཙིཏྟཾ, ཏ