📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིནཡཔིཊཀེ

ཝཛིརབུདྡྷི-ཊཱིཀཱ

གནྠཱརམྦྷཀཐཱ

པཉྙཱཝིསུདྡྷཱཡ ¶ ¶ དཡཱཡ སབྦེ;

ཝིམོཙིཏཱ ཡེན ཝིནེཡྻསཏྟཱ;

ཏཾ ཙཀྑུབྷཱུཏཾ སིརསཱ ནམིཏྭཱ;

ལོཀསྶ ལོཀནྟགཏསྶ དྷམྨཾ.

སངྒྷཉྩ སཱིལཱདིགུཎེཧི ཡུཏྟ-

མཱདཱཡ སབྦེསུ པདེསུ སཱརཾ;

སངྑེཔཀཱམེན མམཱསཡེན;

སཉྩོདིཏོ བྷིཀྑུཧིཏཉྩ དིསྭཱ.

སམནྟཔཱསཱདིཀསཉྙིཏཱཡ ¶ ;

སམྦུདྡྷགྷོསཱཙརིཡོདིཏཱཡ;

སམཱསཏོ ལཱིནཔདེ ལིཁིསྶཾ;

སམཱསཏོ ལཱིནཔདེ ལིཁཱིཏཾ.

སཉྙཱ ནིམིཏྟཾ ཀཏྟཱ ཙ, པརིམཱཎཾ པཡོཛནཾ;

སབྦཱགམསྶ པུབྦེཝ, ཝཏྟབྦཾ ཝཏྟུམིཙྪཏཱཏི. –

ཝཙནཏོ སམནྟཔཱསཱདིཀེཏི སཉྙཱ. དཱིཔནྟརེ བྷིཀྑུཛནསྶ ཨཏྠཾ ནཱབྷིསམྦྷུཎཱཏཱིཏི ནིམིཏྟཾ. བུདྡྷགྷོསོཏི གརཱུཧི གཧིཏནཱམདྷེཡྻེནཱཏི ཀཏྟཱ. སམདྷིཀསཏྟཝཱིསཏིསཧསྶམཏྟེན ཏསྶ གནྠེནཱཏི པརིམཱཎཾ. ཙིརཊྛིཏཏྠཾ དྷམྨསྶཱཏི པཡོཛནཾ.

ཏཏྲཱཧ ¶ – ‘‘ཝཏྟབྦཾ ཝཏྟུམིཙྪཏཱཏི ཡཾ ཝུཏྟཾ, ཏཏྠ ཀཐཾཝིདྷོ ཝཏྟཱ’’ཏི? ཨུཙྩཏེ –

པཱཋཏྠཝིདཱུསཾཧཱིརོ, ཝཏྟཱ སུཙི ཨམཙྪརོ;

ཙཏུཀྐམཔརིཙྩཱགཱི, དེསཀསྶ ཧིཏུསྶུཀོཏི. (མཧཱནི. ཨཊྛ. གནྠཱརམྦྷཀཐཱ);

ཏཏྲ པཋཱིཡཏེཏི པཱཋོ. སོ ཧི ཨནེཀཔྤཀཱརོ ཨཏྠཱནུརཱུཔོ ཨཏྠཱནནུརཱུཔོ ཙེཏི. ཀཐཾ? སནྡྷཱཡབྷཱསིཏོ བྱཉྫནབྷཱསིཏོ སཱཝསེསཔཱཋོ ནིརཝསེསཔཱཋོ ནཱིཏོ ནེཡྻོཏི. ཏཏྲ ཨནེཀཏྠཝཏྟཱ སནྡྷཱཡབྷཱསིཏོ ནཱམ ‘‘མཱཏརཾ པིཏརཾ ཧནྟྭཱ’’ཏིཨཱདི (དྷ. པ. ༢༩༤). ཨེཀཏྠཝཏྟཱ བྱཉྫནབྷཱསིཏོ ནཱམ ‘‘མནོཔུབྦངྒམཱ དྷམྨཱ’’ཏྱཱདི (དྷ. པ. ༡, ༢; ནེཏྟི. ༩༠, ༩༢; པེཊཀོ. ༡༤). སཱཝསེསོ ནཱམ ‘‘སབྦཾ, བྷིཀྑཝེ, ཨཱདིཏྟ’’མིཏྱཱདི (མཧཱཝ. ༥༤; སཾ. ནི. ༤.༢༨). ཝིཔརཱིཏོ ནིརཝསེསོ ནཱམ ‘‘སབྦེ དྷམྨཱ སབྦཱཀཱརེན བུདྡྷསྶ བྷགཝཏོ ཉཱཎམུཁེ ཨཱཔཱཐཾ ཨཱགཙྪནྟཱི’’ཏྱཱདི (མཧཱནི. ༡༥༦; པཊི. མ. ༣.༥). ཡཐཱ ཝཙནཾ, ཏཐཱ ཨཝགནྟབྦོ ནཱིཏོ ནཱམ ‘‘ཨནིཙྩཾ དུཀྑམནཏྟཱ’’ཏྱཱདི. ཡུཏྟིཡཱ ཨནུསྶརིཏབྦོ ནེཡྻོ ནཱམ ‘‘ཨེཀཔུགྒལོ, བྷིཀྑཝེ’’ཏྱཱདི (ཨ. ནི. ༡.༡༧༠).

ཨཏྠོཔི ཨནེཀཔྤཀཱརོ པཱཋཏྠོ སབྷཱཝཏྠོ ཉེཡྻཏྠོ པཱཋཱནུརཱུཔོ པཱཋཱནནུརཱུཔོ སཱཝསེསཏྠོ ནིརཝསེསཏྠོ ནཱིཏཏྠོ ནེཡྻཏྠོཏྱཱདི. ཏཏྠ ཡོ ཏཾཏཾསཉྙཱཔནཏྠམུཙྩཱརཱིཡཏེ པཱཋོ, ས ¶ པཱཋཏྠོ ‘‘སཱཏྠཾ སབྱཉྫན’’མིཏྱཱདཱིསུ (པཱརཱ. ༡; དཱི. ནི. ༡.༡༩༠) ཝིཡ. རཱུཔཱརཱུཔདྷམྨཱནཾ ལཀྑཎརསཱདི སབྷཱཝཏྠོ ‘‘སམྨཱདིཊྛིཾ བྷཱཝེཏཱི’’ཏྱཱདཱིསུ (ཝིབྷ. ༤༨༩; སཾ. ནི. ༥.༣) ཝིཡ. ཡོ ཉཱཡམཱནོ ཧིཏཱཡ བྷཝཏི, ས ཉཱཏུམརཧཏྟཱ ཉེཡྻཏྠོ ‘‘ཨཏྠཝཱདཱི དྷམྨཝཱདཱི’’ཏྱེཝམཱདཱིསུ (དཱི. ནི. ༡.༩, ༡༩༤; ༣.༢༣༨; མ. ནི. ༡.༤༡༡) ཝིཡ. ཡཐཱཔཱཋཾ བྷཱསིཏོ པཱཋཱནུརཱུཔོ ‘‘ཙཀྑུ, བྷིཀྑཝེ, པུརཱཎཀམྨ’’ནྟི (སཾ. ནི. ༤.༡༤༦) བྷགཝཏཱ ཝུཏྟམཏོ ཙཀྑུམཔི ཀམྨནྟི. བྱཉྫནཙྪཱཡཱཡ ཨཏྠཾ པཊིབཱཧཡམཱནེན ཝུཏྟོ པཱཋཱནནུརཱུཔོ. ཝཛྫེཏབྦཾ ཀིཉྩི ཨཔརིཙྩཛིཏྭཱ པརིསེསཾ ཀཏྭཱ ཝུཏྟོ སཱཝསེསཏྠོ ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏཱི’’ཏི ¶ (སཾ. ནི. ༤.༦༠; མཧཱནི. ༡༠༧) ཙ, ‘‘སབྦེ ཏསནྟི དཎྜསྶ, སབྦེ བྷཱཡནྟི མཙྩུནོ’’ཏྱཱདཱིསུ (དྷ. པ. ༡༢༩) ཝིཡ. ཝིཔརཱིཏོ ནིརཝསེསཏྠོ ‘‘སནྡྷཱཝིཏཾ སཾསརིཏཾ མམཉྩེཝ ཏུམྷཱཀཉྩ (དཱི. ནི. ༢.༡༥༥; མཧཱ. ༢༨༧; ནེཏྟི. ༡༡༤). ཏཏྲ, བྷིཀྑཝེ, ཀོ མནྟཱ ཀོ སདྡྷཱཏཱ…པེ… ཨཉྙཏྲ དིཊྛཔདེཧཱི’’ཏྱཱདི (ཨ. ནི. ༧.༦༦). སདྡཝསེནེཝ ཝེདནཱིཡོ ནཱིཏཏྠོ ‘‘རཱུཔཱ སདྡཱ རསཱ གནྡྷཱ, ཕོཊྛབྦཱ ཙ མནོརམཱ’’ཏྱཱདཱིསུ (སཾ. ནི. ༡.༡༥༡, ༡༦༥; མཧཱཝ. ༣༣) ཝིཡ. སམྨུཏིཝསེན ཝེདིཏབྦོ ནེཡྻཏྠོ ‘‘ཙཏྟཱརོམེ, བྷིཀྑཝེ, ཝལཱཧཀཱུཔམཱཔུགྒལཱ’’ཏྱཱདཱིསུ ཝིཡ (ཨ. ནི. ༤.༡༠༡; པུ. པ. ༡༥༧). ཨཱཧ ཙ –

‘‘ཡོ ཨཏྠོ སདྡཏོ ཉེཡྻོ, ནཱིཏཏྠཾ ཨིཏི ཏཾ ཝིདཱུ;

ཨཏྠསྶེཝཱབྷིསཱམགྒཱི, ནེཡྻཏྠོ ཨིཏི ཀཐྱཏེ’’ཏི.

ཨེཝཾ པབྷེདགཏེ པཱཋཏྠེ ཝིཛཱནཱཏཱིཏི པཱཋཏྠཝིདཱུ. ན སཾཧཱིརཏེ པརཔཝཱདཱིཧི དཱིགྷརཏྟཾ ཏིཏྠཝཱསེནེཏྱསཾཧཱིརོ. བྷཱཝནཱཡཱགམཱདྷིགམསམྤནྣཏྟཱ ཝཏྟུཾ སཀྐོཏཱིཏི ཝཏྟཱ, སངྑེཔཝིཏྠཱརནཡེན ཧེཏུདཱཧརཎཱདཱིཧི ཨཝབོདྷཡིཏུཾ སམཏྠོཏྱཏྠོ. སོཙཡཏྱཏྟཱནཾ པརེ ཙེཏི སུཙི, དུསྶཱིལྱདུདྡིཊྛིམལཝིརཧིཏོཏྱཏྠོ. དུསྶཱིལོ ཧི ཨཏྟཱནམུཔཧནྟུནཱདེཡྻཝཱཙོ ཙ བྷཝཏྱཔཏྟཱཧཱརཱཙཱརོ ཨིཝ ནིཙྩཱཏུརོ ཝེཛྫོ. དུདྡིཊྛི པརཾ ཨུཔཧནྟི, ནཱཝསྶཾ ནིསྶཡོ ཙ བྷཝཏྱཧིཝཱལ༹གཧཱཀུལོ ཨིཝ ཀམལསཎྜོ. ཨུབྷཡཝིཔནྣོ སབྦཐཱཔྱནུཔཱསནཱིཡོ བྷཝཏི གཱུཐགཏམིཝ ཚཝཱལཱཏཾ གཱུཐགཏོ ཝིཡ ཙ ཀཎྷསཔྤོ. ཨུབྷཡསམྤནྣོ པན སུཙི སབྦཐཱཔྱུཔཱསནཱིཡོ སེཝིཏབྦོ ཙ ཝིཉྙཱུཧི, ནིརུཔདྡཝོ ཨིཝ རཏནཱཀརོ. ནཱསྶ མཙྪརོཏྱམཙྪརོ, ཨཧཱིནཱཙརིཡམུཊྛཱིཏྱཏྠོ. སུཏྟསུཏྟཱནུལོམཱཙརིཡཝཱདཨཏྟནོམཏིསངྑཱཏསྶ ཙཏུཀྐསྶཱཔརིཙྩཱགཱི, ཏདཏྠསྶེཝ བྱཱཁྱཱཏེཏྱཏྠོ. ཨཐ ཝཱ པཙྩཀྑཱནུམཱནསདྡཏྠཱཔཏྟིཔྤབྷེདསྶ པམཱཎཙཏུཀྐསྶཱཔརིཙྩཱགཱི.

‘‘ཨེཀཾསཝཙནཾ ¶ ཨེཀཾ, ཝིབྷཛྫཝཙནཱཔརཾ;

ཏཏིཡཾ པཊིཔུཙྪེཡྻ, ཙཏུཏྠཾ པན ཋཱཔཡེ’’ཏི. –

ཨེཝཾ ¶ ཝུཏྟཙཏུཀྐསྶ ཝཱ ཨཔརིཙྩཱགཱི; ཧིཏུསྶུཀོ ཨིཏི སོཏཱུནཾ ཧིཏཱཡོསྶུཀོ, ཏེསམཝབོདྷནཾ པཏི པཏྠེཏཱི ཏྱཏྠོ; སོ ཨེསོ སུཙིཏྟཱ པིཡོ; ཙཏུཀྐསྶ ཨཔརིཙྩཱགིཏྟཱ གརུ; ཨསཾཧཱིརཏྟཱ བྷཱཝནཱིཡོ; དེསཀཏྟཱ ཝཏྟཱ; ཧིཏུསྶུཀཏྟཱ ཝཙནཀྑམོ; པཱཋཏྠཝིདུཏྟཱ གམྦྷཱིརཀཐཾ ཀཏྟཱ; ཨམཙྪརཏྟཱ ནོ ཙཊྛཱནེ ནིཡོཛཀོཏི;

‘‘པིཡོ གརུ བྷཱཝནཱིཡོ, ཝཏྟཱ ཙ ཝཙནཀྑམོ;

གམྦྷཱིརཉྩ ཀཐཾ ཀཏྟཱ, ནོ ཙཊྛཱནེ ནིཡོཛཀོ’’. (ཨ. ནི. ༧.༣༧; ནེཏྟི. ༡༡༣) –

ཨིཏིཨབྷིཧིཏོ དེསཀོ;

སོཏཱ ཨིདཱནི ཨབྷིདྷཱིཡཏེ –

དྷམྨཱཙརིཡགརུ སདྡྷཱ-པཉྙཱདིགུཎམཎྜིཏོ;

ཨསཋཱམཱཡོ སོཏཱསྶ, སུམེདྷོ ཨམཏཱམུཁོ.

ཏཏྠ དྷམྨགརུཏྟཱ ཀཐཾ ན པརིབྷཝཏི, ཨཱཙརིཡགརུཏྟཱ ཀཐིཀཾ ན པརིབྷཝཏི, སདྡྷཱཔཉྙཱདིགུཎཔཊིམཎྜིཏཏྟཱ ཨཏྟཱནཾ ན པརིབྷཝཏི, ཨསཋཱམཱཡཏྟཱ ཨམཏཱབྷིམུཁཏྟཱ ཙ ཨཝིཀྑིཏྟཙིཏྟོ བྷཝཏི, སུམེདྷཏྟཱ ཡོནིསོམནསིཀརོཏཱིཏྱཏྠོ. ཝུཏྟཉྷེཏཾ –

‘‘པཉྩཧི, བྷིཀྑཝེ, དྷམྨེཧི སམནྣཱགཏོ སུཎནྟོ སདྡྷམྨཾ བྷབྦོ ནིཡཱམཾ ཨོཀྐམིཏུཾ ཀུསལེསུ དྷམྨེསུ སམྨཏྟཾ. ཀཏམེཧི པཉྩཧི? ན ཀཐཾ པརིབྷོཏི, ན ཀཐིཀཾ པརིབྷོཏི, ན ཨཏྟཱནཾ པརིབྷོཏི, ཨཝིཀྑིཏྟཙིཏྟོ དྷམྨཾ སུཎཱཏི ཨེཀགྒཙིཏྟོ, ཡོནིསོ ཙ མནསི ཀརོཏཱི’’ཏི (ཨ. ནི. ༥.༡༥༡).

ཏཾལཀྑཎཔྤཏྟཏྟཱ བྷཱཝནཱ བྷཝཏི སཝནསྶེཏྱུཏྟོ སོཏཱ.

གནྠཱརམྦྷཀཐཱཝཎྞནཱ

ཨིདཱནི ¶ ཨསྶཱརམྦྷོ – ཏཏྠ ཡོཏི ཨནིཡམནིདྡེསོ, ཏེན ཝིསུདྡྷཛཱཏིཀུལགོཏྟཱདཱིནཾ ཀིལེསམལཝིསུདྡྷིཡཱ, པཱུཛཱརཧཏཱཡ ཝཱ ཨཀཱརཎཏཾ དསྶེཏྭཱ ཡོ ཀོཙི ཨིམིསྶཱ སམནྟཔཱསཱདིཀཱཡ ཨཱདིགཱཐཱཡ ནིདྡིཊྛལོཀནཱཐཏྟཧེཏུཾ ཡཐཱཝུཏྟཧེཏུམཱུལེན ཐིརཏརཾ ¶ ཨཙལཾ ཀཏྭཱ ཡཐཱཝུཏྟཧེཏུཀཱལཾ ཨཙྩནྟམེཝ པཱུརེནྟོ ཨཝསཱནེ ཡཐཱཝུཏྟཧེཏུཕལཾ སམྤཱདེཏྭཱ ཡཐཱཝུཏྟཧེཏུཕལཔྤཡོཛནཾ སཱདྷེཏི, སོཝ པརམཔཱུཛཱརཧོཏི ནིཡམེཏི.

ཨེཏྟཱཝཏཱ –

བྷཡསམྨོཧདུདྡིཊྛི-པཎཱམོ ནེས སབྦཐཱ;

པཉྙཱཔུབྦངྒམོ ཨེསོ, པཎཱམོཏི ནིདསྶིཏོ.

ཏཏྲ ཧེཏཱུཏི ཨཏིདུཀྐརཱནི ཏིཾསཔཱརམིཏཱསངྑཱཏཱནི པུཉྙཀམྨཱནི. ཏཱནི ཧི ཨཙྩནྟདུཀྑེན ཀསིརེན ཝཙནཔཐཱཏཱིཏཱནུབྷཱཝེན མཧཏཱ ཨུསྶཱཧེན ཀརཱིཡནྟཱིཏི ཨཏིདུཀྐརཱནི ནཱམ. ཨཏིདུཀྐརཏྟཱ ཨེཝ ཧི ཏེསཾ ཨཏིདུལླབྷཾ ལོཀེ ཨནཉྙསཱདྷཱརཎཾ ནཱཐཏྟསངྑཱཏཾ ཕལཾ ཕལནྟི, ཏཾ ཏཏྠ ཧེཏུཕལཾ; ཧེཏུམཱུལཾ ནཱམ ཡཐཱཝུཏྟསྶ ཧེཏུནོ ནིཔྥཱདནསམཏྠཱ མཧཱཀརུཎཱ, སཱ ཨཱདིཔཎིདྷཱནཏོ པཊྛཱཡ ‘‘མུཏྟོ མོཙེསྶཱམཱི’’ཏིཨཱདིནཱ ནཡེན ཡཱཝ ཧེཏུཕལཔྤཡོཛནཱ, ཏཱཝ ཨབྦོཙྪིནྣཾ པཝཏྟཏི. ཡཾ སནྡྷཱཡ ཝུཏྟཾ –

‘‘སཀཱནནཱ སགྲིཝརཱ སསཱགརཱ,

གཏཱ ཝིནཱསཾ བཧུསོ ཝསུནྡྷརཱ;

ཡུགནྟཀཱལེ སལིལཱནལཱནིལེ,

ན བོདྷིསཏྟསྶ མཧཱཏཔཱ ཀུཏོ’’ཏི.

ཡཱཡ སམནྣཱགཏཏྟཱ ‘‘ནམོ མཧཱཀཱརུཎིཀསྶ ཏསྶཱ’’ཏི ཨཱཧ. ཧེཏུཀཱལཾ ནཱམ ཙཏུཨཊྛསོལ༹སཨསངྑྱེཡྻཱདིཔྤབྷེདོ ཀཱལོ, ཡཾ སནྡྷཱཡཱཧ ‘‘ཀཔྤཀོཊཱིཧིཔི ཨཔྤམེཡྻཾ ཀཱལ’’ནྟི. ཏཏྠ ཨཙྩནྟསཾཡོགཏྠེ ཨུཔཡོགཝཙནཾ ཝེདིཏབྦཾ ‘‘མཱསཾ ཨདྷཱིཏེ, དིཝསཾ ¶ ཙརཏཱི’’ཏིཨཱདཱིསུ ཝིཡ. ཀཱམཉྩ སོ ཀཱལོ ཨསངྑྱེཡྻཝསེན པམེཡྻོ ཝིཉྙེཡྻོ, ཏཐཱཔི ཀཔྤཀོཊིཝསེན ཨཝིཉྙེཡྻཏཾ སནྡྷཱཡ ‘‘ཀཔྤཀོཊཱིཧིཔི ཨཔྤམེཡྻཾ ཀཱལ’’ནྟི ཨཱཧ. ཏཏྠ ཀཱལཡཏཱིཏི ཀཱལོ, ཁིཔཏི ཝིདྡྷཾསཡཏི སཏྟཱནཾ ཛཱིཝིཏམིཏི ཨཏྠོ. ཀལ ཝིཀྑེཔེ. ཏཏྠ ཀཔྤཱིཡཏི སཾཀཔྤཱིཡཏི སཱསཔཔབྦཏཱདཱིཧི ཨུཔམཱཧི ཀེཝལཾ སཾཀཔྤཱིཡཏི, ན མནུསྶདིཝསམཱསསཾཝཙྪརཱདིགཎནཱཡ གཎཱིཡཏཱིཏི ཀཔྤོ. ཨེཀནྟིཨཱདིགཎནཔཐསྶ ཀོཊིབྷཱུཏཏྟཱ ཀོཊི, ཀཔྤཱནཾ ཀོཊིཡོ ཀཔྤཀོཊིཡོ ¶ . ཏཱཧིཔི ན པམཱིཡཏཱིཏི ཨཔྤམེཡྻོ, ཏཾ ཨཔྤམེཡྻཾ. ཀརོནྟོཏི ནཱནཏྠཏྟཱ དྷཱཏཱུནཾ དཱནཾ དེནྟོ, སཱིལཾ རཀྑནྟོ, ལོབྷཀྑནྡྷཏོ ནིཀྑམནྟོ, ཨཏྟཧིཏཔརཧིཏཱདིབྷེདཾ ཏཾ ཏཾ དྷམྨཾ པཛཱནནྟོ, ཝིཝིདྷེན ཝཱཡཱམེན གྷཊེནྟོ ཝཱཡམནྟོ, ཏཾ ཏཾ སཏྟཱཔརཱདྷཾ ཁམནྟོ, པཊིཉྙཱསམྨུཏིཔརམཏྠསཙྩཱནི སཙྩཱཡནྟོ, ཏཾ ཏཾ སཏྟཧིཏཾ ཨདྷིཊྛཧནྟོ, སཀལལོཀཾ མེཏྟཱཡནྟོ, མིཏྟཱམིཏྟཱདིབྷེདཾ པཀྑཔཱཏཾ པཧཱཡ ཏཾ ཏཾ སཏྟཾ ཨཛ྄ཛྷུཔེཀྑནྟོ ཙཱཏི ཨཏྠོ. ཁེདཾ གཏོཏི ཨནནྟཔྤབྷེདཾ མཧནྟཾ སཾསཱརདུཀྑཾ ཨནུབྷཝནཊྛེན གཏོ, སམྤཏྟོཏྱཏྠོ. སཾསཱརདུཀྑཉྷི སཱརཱིརིཀཾ མཱནསིཀཉྩ སུཁཾ ཁེདཡཏི པཱཏཡཏཱིཏི ‘‘ཁེདོ’’ཏི ཝུཙྩཏི. ལོཀཧིཏཱཡཱཏི ཨིདཾ ཡཐཱཝུཏྟཧེཏུཕལཔྤཡོཛནནིདསྶནཾ, ‘‘སཾསཱརདུཀྑཱནུབྷཝནཀཱརཎནིདསྶན’’ནྟིཔི ཨེཀེ –

‘‘‘ཛཱཏིསཾསཱརདུཀྑཱནཾ, གནྟུཾ སཀྐོཔི ནིབྦུཏིཾ;

ཙིརལླིཊྛོཔི སཾསཱརེ, ཀརུཎཱཡེཝ ཀེཝལ’ནྟི. –

ཙ ཝུཏྟ’’ནྟི, ཏམཡུཏྟཾ. ན ཧི བྷགཝཱ ལོཀཧིཏཱཡ སཾསཱརདུཀྑམནུབྷཝཏི. ན ཧི ཀསྶཙི དུཀྑཱནུབྷཝནཾ ལོཀསྶ ཨུཔཀཱརཾ ཨཱཝཧཏི. ཨེཝཾ པནེཏཾ དསྶེཏི ཏིཾསཔཱརམིཏཱཔབྷེདཾ ཧེཏུཾ, པཱརམིཏཱཕལབྷཱུཏཾ ནཱཐཏྟསངྑཱཏཾ ཕལཉྩ. ཡཐཱ ཙཱཧ ‘‘མམཉྷི, ཨཱནནྡ, ཀལྱཱཎམིཏྟཾ ཨཱགམྨ ཛཱཏིདྷམྨཱ སཏྟཱ ཛཱཏིཡཱ པརིམུཙྩནྟཱི’’ཏིཨཱདི (སཾ. ནི. ༡.༡༢༩; ༥.༢). ཏཏྠ བྷགཝཱ ཡཐཱཝུཏྟཧེཏཱུཧི སཏྟཱནཾ ཝིནེཡྻབྷཱཝནིཔྥཱདནཔཉྙཱབཱིཛཱནི ཝཔི, ཧེཏུཕལེན པརིཔཀྐིནྡྲིཡབྷཱཝེན པརིནིཔྥནྣཝིནེཡྻབྷཱཝེ སཏྟེ ཝིནཡི, སཾསཱརདུཀྑཏོ མོཙཡཱིཏི ཨཏྠོ. ན ཨེཝཾ སཾསཱརདུཀྑེན ལོཀསྶ ཨུཔཀཱརཾ ཀིཉྩི ཨཀཱསི, ཏསྨཱ ཀརོནྟོ ཨཏིདུཀྐརཱནི ལོཀཧིཏཱཡཱཏི སམྦནྡྷོ. ཨིམིསྶཱ ཡོཛནཱཡ སབྦཔཋམསྶ བོདྷིསཏྟསྶ ཨུཔྤཏྟིཀཱལཏོ པཊྛཱཡ བོདྷིསཏྟསྶ ནཱཐཏྟསངྑཱཏཔཱརམིཏཱཧེཏུཕལཱདྷིགམོ ཝེདིཏབྦོ. ཡོ ནཱཐོཏི ཧི སམྦནྡྷོ ཨདྷིཔྤེཏོ. ཨིམསྶ པནཏྠསྶ –

‘‘ཡདེཝ ¶ པཋམཾ ཙིཏྟ-མུཔྤནྣཾ ཏཝ བོདྷཡེ;

ཏྭཾ ཏདེཝསྶ ལོཀསྶ, པཱུཛིཀེ པརིཝསིཏྠ’’. –

ཨིཏི ཝཙནཾ སཱདྷཀཾ. པཋམཙིཏྟསྶ པཱརམིཏཱབྷཱཝོ རུཀྑསྶ ཨངྐུརཏོ པཊྛཱཡ ཨུཔྤཏྟིཨུཔམཱཡ སཱདྷེཏབྦོ. ཨེཏྠཱཧ – ‘‘ཁེདཾ གཏོཏི ཝཙནཾ ནིརཏྠཀཾ ¶ , ཡཐཱཝུཏྟནཡེན གུཎསཱདྷནཱསམྦྷཝཏོ’’ཏི? ན, ཨནྟརཱ ཨནིཝཏྟནཀབྷཱཝདཱིཔནཏོ. དུཀྐརཱནི ཀརོནྟོ ཁེདཾ གཏོ ཨེཝ, ན ཨནྟརཱ ཁེདཾ ཨསཧནྟོ ནིཝཏྟཏཱིཏི དཱིཔེཏི. ལོཀདུཀྑཱཔནཡནཀཱམསྶ ཝཱ བྷགཝཏོ ཨཏྟནོ དུཀྑཱནུབྷཝནསམཏྠཏཾ དསྶེཏི.

‘‘ཡསྶ ཀསྶཙི ཝརདོསྶཾ, ཡཱཝཱཧཾ སབྦསཏྟདུཀྑཱནི;

སབྦཱནི སབྦཀཱལཾ ཡུགཾ, པདྨསྶེཝ བུཛ྄ཛྷནྟོམྷཱི’’ཏི. –

ཨེཝཾཨདྷིཔྤཱཡསྶ ཨཏྟམཏྟདུཀྑཱནུབྷཝནསམཏྠཏཱཡ ཀཱཡེཝ ཀཐཱཏི ཨཏིསཡཾ ཨཏྠཾ དསྶེཏཱིཏི ཨཏྠོ. ཨཐ ཝཱ ཁེདཾ གཏོཏི བྱཱཔཱརཾ པརིཙཡཾ གཏོཏིཔི ཨཏྠོ སམྦྷཝཏི. ཀམྨཱདཱིསུ སབྱཱཔཱརཾ པུརིསཾ དིསྭཱ སནྟི ཧི ལོཀེ ཝཏྟཱརོ ‘‘ཁིནྣོཡཾ ཀམྨེ, ཁིནྣོཡཾ སཏྟེ’’ཏིཨཱདི. ཨིམིསྶཱ ཡོཛནཱཡ ནཱཐོཏི ཨིམིནཱ བུདྡྷཏྟཱདྷིགམསིདྡྷཾ ཀོཊིཔྤཏྟཾ ནཱཐབྷཱཝཾ པཏྭཱ ཋིཏཀཱལོ དསྶིཏོཏི ཝེདིཏབྦོ. ཀེཙི ‘‘མཧཱཀཱརུཎིཀསྶཱཏི ཝདནྟོ བུདྡྷབྷཱུཏསྶཱཏི དསྶེཏཱི’’ཏི ལིཁནྟི, ཏཾ ན སུནྡརཾ ཝིཡ, བོདྷིསཏྟཀཱལེཔི ཏབྦོཧཱརསབྦྷཱཝཏོ. ཏསྨཱ སོ ཨེཏྟཀཾ ཀཱལཾ དུཀྐརཱནི ཀརོནྟོ ཨཝསཱནེ དུཀྐརཔཱརམིཏཱཔཱརིཔཱུརིཡཱ ཏཱསཾ ཕལབྷཱུཏཾ ནཱཐབྷཱཝཾ པཏྭཱ ལོཀཧིཏཱཡ བྱཱཔཱརཾ གཏོཏི ཨཡམཏྠོ ནིདསྶིཏོ ཧོཏི. ‘‘བོདྷིཾ གཏོ’’ཏི ཝུཏྟེཔི སུབྱཏྟཾ ཧེཏུཕལཾ དསྶིཏཾ ཧོཏི. བུདྡྷབྷཱཝཔྤཏྟསྶེཝ ཙ ནཱཐསྶ ནམོ ཀཏོ ཧོཏི ཝིསེསཝཙནསབྦྷཱཝཏོ, ན བོདྷིསཏྟསྶ. ཨེཝཾ སནྟེཔི ཝིནཡཱདྷིཀཱརོ ཨིདྷཱདྷིཔྤེཏོ. སོ ཙ པབྦཛིཏཀཱལཏོ པཊྛཱཡ ཡཱཝམརཎཀཱལཱ ཧོཏི. ཏཾ ཨཏིཝིཡ པརིཏྟཾ ཀཱལཾ ལཛྫིནོ ཨཏིསུཀརཾ སཱིལམཏྟཾ ཨེཀཀསྶ ཨཏྟནོ ཧིཏཱཡ ཨཏྟམཏྟདུཀྑཱཔནཡནཱདྷིཔྤཱཡེན པརིཔཱུརེནྟོ ཀོ ནཱམ ཨིདྷལོཀཔརལོཀཱཏིཀྐམསུཁཾ ན གཙྪེཡྻ, ནནུ བྷགཝཱ སཀལལོཀདུཀྑཱཔནཡནཱདྷིཔྤཱཡེན ཀཔྤཀོཊཱིཧིཔི ཨཔྤམེཡྻཾ ཀཱལཾ ཀརོནྟོ ཨཏིདུཀྐརནིརསྶཱདཾ ཁེདཾ གཏོཏི ཨཉྙཱཔདེསེན གུཎཾ ཝཎྞེཏི ཨཱཙརིཡོ.

ལོཀཧིཏཱཡཱཏི ཨེཏྠ ལོཀིཡཏི ཨེཏྠ དུཀྑནྟི ལོཀོ, ལུཡཏེ ཝཱ ཛཱཏིཛརཱམརཎདུཀྑེཧཱིཏི ལོཀོ, ཨིམིནཱ སཏྟལོཀཾ ཛཱཏིལོཀཉྩ སངྒཎྷཱཏི. ཏསྨཱ ཏསྶ སཏྟལོཀསྶ ¶ ཨིདྷལོཀཔརལོཀཧིཏཾ ཨཏིཀྐནྟཔརལོཀཱནཾ ཝཱ ཨུཙྪིནྣལོཀསམུདཡཱནཾ ལོཀཱནཾ ¶ , ཨིདྷ ཛཱཏིལོཀེ ཨོཀཱསལོཀེ ཝཱ དིཊྛདྷམྨསུཁཝིཧཱརསངྑཱཏཉྩ ཧིཏཾ སམྤིཎྜེཏྭཱ ལོཀསྶ, ལོཀཱནཾ, ལོཀེ ཝཱ ཧིཏནྟི སརཱུཔེཀདེསེཀསེསཾ ཀཏྭཱ ‘‘ལོཀཧིཏ’’མིཙྩེཝཱཧ. ནཱཐོཏི སབྦསཏྟཱནཾ ཨཱསཡཱནུསཡཙརིཡཱདྷིམུཏྟིབྷེདཱནུརཱུཔདྷམྨདེསནསམཏྠཏཱཡ ‘‘དྷམྨཾ ཝོ, བྷིཀྑཝེ, དེསེསྶཱམི…པེ… ཏཾ སུཎཱཐཱ’’ཏི (མ. ནི. ༣.༤༢༠) ཨེཝཾ ཡཱཙནཊྛེནཱཔི ནཱཐཏེཏི ནཱཐོ. བྷིཀྑཱུནཾ ཝཱིཏིཀྐམཱནུརཱུཔཾ སིཀྑཱཔདཔཉྙཱཔནེན དིཊྛདྷམྨིཀསམྤརཱཡིཀཱཡ ཙ ཀརུཎཱཡ ཨུཔགནྟྭཱ ཏཔཏི, སུཏྟནྟཝསེན ཝཱ ཏེསཾ སབྦསཏྟཱནཾ ཨནུསཡིཏེ ཀིལེསེ ཀརུཎཱཡ ཙ པཉྙཱཡ ཙ ཨུཔགནྟྭཱ ཏཔཏི, ཨབྷིདྷམྨཝསེན ཝཱ ཏེ ཏེ སངྑཱརེ ཨནིཙྩཱདིལཀྑཎཝསེན ཨུཔཔརིཀྑིཏྭཱ ཨཏྟནོ ཀིལེསེ པཉྙཱཡ ཨུཔེཙྩ པརིཙྪིནྡིཏྭཱ ཏཔཏཱིཏི ཏཔནཊྛེནཱཔི ནཱཐཏེཏི ནཱཐོ. སདེཝཀེ ལོཀེ ཨཔྤཊིཔུགྒལཏྟཱ ཀེནཙི ཨཔྤཊིཧཏདྷམྨདེསནཏྟཱ པརམཙིཏྟིསྶརིཡཔྤཝཏྟིཏོ ཙ ཨིསྶརིཡཊྛེནཱཔི ནཱཐཏེཏི ནཱཐོ. ‘‘དྷམྨིཡཱ ཀཐཱཡ སནྡསྶེསི སམཱདཔེསི སམུཏྟེཛེསི སམྤཧཾསེསཱི’’ཏི (མཧཱཝ. ༩༠) ཝཙནཏོ སམྤཧཾསནསངྑཱཏེན ཨཱསཱིསཊྛེན, པཎིདྷཱནཏོ པཊྛཱཡ ‘‘ཀཐཾ ནཱམཱཧཾ མུཏྟོ མོཙཡིསྶཱམཱི’’ཏིཨཱདིནཱ ནཡེན ཨཱསཱིསཊྛེན ཝཱ ནཱཐཏེཏི ནཱཐོཏི ཝེདིཏབྦོ, སམྨཱསམྦུདྡྷོ. ཙཏཱུཧིཔི ནཱཐངྒེཧི ཙཏུཝེསཱརཛྫཙཏུཔཊིསམྦྷིདཱདཡོ སབྦེཔི བུདྡྷགུཎཱ ཡོཛེཏབྦཱ, ཨཏིཝིཏྠཱརིཀབྷཡཱ པན ན ཡོཛིཏཱ.

ནམོཏི པརམཏྠཏོ བུདྡྷགུཎབཧུམཱནཔབྦྷཱརཱ ཙིཏྟནཏི, ཙིཏྟནཏིཔྤབྷཝཱ ཙ ཝཙཱིཀཱཡནཏི. ཨཏྠུ མེཏི པཱཋསེསེན སམྦནྡྷོ. མཧཱཀཱརུཎིཀསྶཱཏི ཨེཏྠ སབྦསཏྟཝིསཡཏྟཱ མཧུསྶཱཧཔྤབྷཝཏྟཱ ཙ མཧཏཱི ཀརུཎཱ མཧཱཀརུཎཱ. ཏཏྠ པཎིདྷཱནཏོ པཊྛཱཡ ཡཱཝཨནུཔཱདིསེསནིབྦཱནཔུརཔྤཝེསཱ ནིཡུཏྟོཏི མཧཱཀཱརུཎིཀོ, བྷགཝཱ. ཨེཏྠ ཙ མཧཱཀཱརུཎིཀསྶཱཏི ཨིམིནཱ ཡཐཱཝུཏྟཧེཏུམཱུལཾ དསྶེཏི. ནིཀྐརུཎོ ཧི པརདུཀྑེསུ ཨུདཱསིནོ བུདྡྷཏྠཱཡ པཎིདྷཱནམཏྟམྤི ཨཏིབྷཱརིཡནྟི མཉྙནྟོ ཨཔྤམེཡྻཾ ཀཱལཾ ཨཏིདུཀྐརཾ ཧེཏུཾ པཱུརེཏྭཱ ནཱཐཏྟསངྑཱཏཾ ཧེཏུཕལཔྤཡོཛནབྷཱུཏཾ ལོཀཧིཏཾ ཀཐཾ ཀརིསྶཏི. ཏསྨཱ སབྦགུཎམཱུལབྷཱུཏཏྟཱ མཧཱཀརུཎཱགུཎམེཝ ཝཎྞེནྟོ ‘‘ནམོ མཧཱཀཱརུཎིཀསྶཱ’’ཏི ཨཱཧ. ཨེཏྟཱཝཏཱ ཧེཏུཨནུརཱུཔཾ ཕལཾ, ཕལཱནུརཱུཔོ ¶ ཧེཏུ, དྭིནྣམྤི ཨནུརཱུཔཾ མཱུལཾ, ཏིཎྞམྤི ཨནུརཱུཔཾ པཡོཛནནྟི ཨཡམཏྠོ དསྶིཏོ ཧོཏི.

ཨེཝཾ ཨཙྪརིཡཔུརིསོ, ནཱཐོ ནཱཐགུཎེ ཋིཏོ;

ནམོརཧོ ཨནཱཐསྶ, ནཱཐམཱནསྶ སམྤདཾ.

ཨེཏྠ ¶ སིཡཱ ‘‘ཨནེཀེསུ བྷགཝཏོ གུཎེསུ ཝིཛྫམཱནེསུ ཀསྨཱ ‘མཧཱཀཱརུཎིཀསྶཱ’ཏི ཨེཀམེཝ གཧིཏ’’ནྟི? ཨུཙྩཏེ –

དོསཧཱིནསྶ སཏྠསྶ, ཙོདནཱ ཏུ ན ཝིཛྫཏེ;

དོསཡུཏྟམསཏྠཉྩ, ཏསྨཱ ཙོདནཱ ཨཔཏྟཀཱཏི.

ན མཡཱ ཙོདནཱ ཀཏཱ, ཀིནྟུ པུཙྪཱ ཨེཝ ཀཏཱ. ཨཔིཙ –

‘‘ཕལཾ སཏིཔི རུཀྑེཌྜྷེ, ན པཏཏྱཝིཀམྤིཏེ;

ཙོདནཱ ཡཱ’ཏྠུ སཏྠཱནཾ, པུཙྪནཱཏྱཏྠཕལཾ མཧཏཱ.

‘‘ནབྷོཏྟུཾ ཀུརུཏེ སམྨཱ, གཧིཏུཾ ནཱཌྜྷཏེ གྷཊཾ;

ཨཀྑེཔེ ཧི ཀཏེ ཏདི-ཙྪིསྶཱཎཱབུདྡྷིབནྡྷནཾ.

‘‘ཡཐཱ ཧིམཔདོ པདྡྷོ, པབུདྡྷོ གནྡྷལིམྤིཡཱ;

བྷིནྣཏྠཝིརམསྶེཝཾ, སཏྠཀཏཱཏྠལིམྤིཡཱ’’ཏི. –

ཨེཝཾ ཙེཀཾ –

སམྨཱཔི ཙོདནཱ ཏཾ ཁལུ, གུརཝོ ཝིཝཱཀྱཱ ཝིཝདྡྷ;

ཡཏིསིསྶཱ ཨཱགྷཊྚིཏཱཏི-ཝཱཀྱེནཱབྷྱདྷིཀཾ གོཔཡ.

སརཝཏཱི ཨཱཙེརཾ ཀིལིཊྛཱ, ཏདིཙྪིསྶཛིཏཱཏྟཱནཾ;

ཛཡཏྱཏྟཱནམཱཙེརོ, སདསྶསྶེཝ སཱརཐཱིཏི. –

ཨཏྲོཙྩཏེ –

ཡསྶ ཧི ཝཱཀྱསཧསྶཾ, ཝཱཀྱེ ཝཱཀྱེ སཏཉྩ ཛིཝ྄ཧཱ;

ནཱམཾ དསབལགུཎཔདེསཾ, ཝཏྟུཾ ཀཔྤེནཔི ན སཀྐཱ.

ཡཐཱ ¶ ¶ –

བུདྡྷོཔི བུདྡྷསྶ བྷཎེཡྻ ཝཎྞཾ,

ཀཔྤམྤི ཙེ ཨཉྙམབྷཱསམཱནོ;

ཁཱིཡེཐ ཀཔྤོ ཙིརདཱིགྷམནྟརེ,

ཝཎྞོ ན ཁཱིཡེཐ ཏཐཱགཏསྶཱཏི. (དཱི. ནི. ཨཊྛ. ༡.༣༠༤; ༣.༡༤༡; མ. ནི. ཨཊྛ. ༢.༤༢༥; ཨུདཱ. ཨཊྛ. ༥༣; ཙརིཡཱ. ཨཊྛ. ནིདཱནཀཐཱ) –

ཙོཏྟཏྟཱ ན སཀྐཱ བྷགཝཏཾ གུཎཱནམཝསེསཱབྷིདྷཱཏུཾ.

ཨཔིཙ –

ཡཐཱ ཏྭཾ སཏྟཱནཾ, དསབལ ཏཐཱ ཉཱཎཀརུཎཱ;

གུཎདྭནྡཾ སེཊྛཾ, ཏཝ གུཎགཎཱ ནཱམ ཏིགུཎཱཏི. –

སབྦགུཎསེཊྛཏྟཱ མཱུལཏྟཱ ཙ ཨེཀམེཝ ཝུཏྟཾ. ཨཐ ཝཱ ‘‘ཚསུ ཨསཱདྷཱརཎཉཱཎེསུ ཨཉྙཏརཏྟཱ ཏགྒཧཎེན སེསཱཔི གཧིཏཱཝ སཧཙརཎལཀྑཎེནཱ’’ཏི ཙ ཝདནྟི. ཝིསེསཏོ པནེཏྠ ཨབྷིདྷམྨསྶ ཀེཝལཾ པཉྙཱཝིསཡཏྟཱ ཨབྷིདྷམྨཊྛཀཐཱརམྦྷེ ཨཱཙརིཡེན ‘‘ཀརུཎཱ ཝིཡ སཏྟེསུ, པཉྙཱ ཡསྶ མཧེསིནོ’’ཏི པཉྙཱགུཎོ ཝཎྞིཏོ ཏེསཾ ཏེསཾ སཏྟཱནཾ ཨཱསཡཱནུསཡཙཨཡཱདྷིམུཏྟིབྷེདཱནུརཱུཔཔརིཙྪིནྡནཔཉྙཱཡ, སཏྟེསུ མཧཱཀརུཎཱཡ ཙ ཨདྷིཀཱརཏྟཱ. སུཏྟནྟཊྛཀཐཱརམྦྷེ ‘‘ཀརུཎཱསཱིཏལཧདཡཾ, པཉྙཱཔཛྫོཏཝིཧཏམོཧཏམ’’ནྟི བྷགཝཏོ ཨུབྷོཔི པཉྙཱཀརུཎཱགུཎཱ ཝཎྞིཏཱ. ཨིདྷ པན ཝིནཡེ ཨཱསཡཱདིནིརཔེཀྑཾ ཀེཝལཾ ཀརུཎཱཡ པཱཀཏིཀསཏྟེནཱཔི ཨསོཏབྦཱརཧཾ སུཎནྟོ, ཨཔུཙྪིཏབྦཱརཧཾ པུཙྪནྟོ, ཨཝཏྟབྦཱརཧཉྩ ཝདནྟོ སིཀྑཱཔདཾ པཉྙཔེསཱིཏི ཀརུཎཱགུཎོཡེཝེཀོ ཝཎྞིཏོཏི ཝེདིཏབྦོ.

པཉྙཱདཡཱ ཨཏྟཔརཏྠཧེཏཱུ,

ཏདནྭཡཱ སབྦགུཎཱ ཛིནསྶ;

ཨུབྷོ གུཎཱ ཏེ གུཎསཱགརསྶ,

ཝུཏྟཱ ཨིདྷཱཙརིཡཝརེན ཏསྨཱ.

ཨེཏྟཱཝཏཱ ¶ ཨཊྛཀཐཱདིགཱཐཱ,

སམཱསཏོ ཝུཏྟཔདཏྠསོབྷཱ;

ཨཡམྤི ཝིཏྠཱརནཡོཏི ཙཱཧཾ,

ཨུདྡྷཾ ཨིཏོ ཏེ པཊིསཾཁིཔཱམི.

དུཏིཡགཱཐཱཡ ¶ ཨསམྦུདྷནྟི དྷམྨཱནཾ ཡཐཱསབྷཱཝཾ ཨབུཛ྄ཛྷནྟོ. བུདྡྷནིསེཝིཏནྟི བུདྡྷཱནུབུདྡྷཔཙྩེཀབུདྡྷེཧི གོཙརབྷཱཝནཱསེཝནཱཧི ཡཐཱརཧཾ ནིསེཝིཏཾ. བྷཝཱ བྷཝནྟི ཝཏྟམཱནབྷཝཏོ ཨཉྙཾ བྷཝཾ གཙྪཏི ཨུཔགཙྪཏི, པཊིཔཛྫཏཱིཏི ཨཏྠོ. ཨཐ ཝཱ བྷཝོཏི སསྶཏདིཊྛི. ཏསྶ པཊིཔཀྑཏྟཱ ཨབྷཝོཏི ཨུཙྪེདདིཊྛི. བྷཝོཏི ཝཱ ཝུདྡྷི. ཨབྷཝོཏི ཧཱནི. བྷཝོཏི ཝཱ དུགྒཏི. ཨབྷཝོཏི སུགཏི. ‘‘ཨཔྤམཱཎཱ དྷམྨཱ, ཨསེཀྑཱ དྷམྨཱ’’ཏིཨཱདཱིསུ (དྷ. ས. ཏིཀམཱཏིཀཱ ༡༣, ༡༡) ཝིཡ ཧི ཝུདྡྷིཨཏྠཏྟཱ ཨཀཱརསྶ. བྷཱཝཡཏཱིཏི བྷཝོ, ཛཱཏི. བྷཝཏཱིཏི ཝཱ བྷཝོ. སཝིཀཱརཱ བཧུཝིདྷཁནྡྷུཔྤཏྟི དཱིཔིཏཱ. ཨབྷཝོཏི ཝིནཱསོ, ཛཱཏིབྷཱཝཾ མརཎབྷཱཝཉྩ གཙྪཏཱིཏི ཝུཏྟཾ ཧོཏི. ཨེཏྠ ཨརཧནྟཱནཾ མརཎམྤི ཁཎིཀཝསེན གཧེཏབྦཾ. བྷཝེསུ ཨབྷཝོ བྷཝཱབྷཝོ, ཏཾ བྷཝཱབྷཝཾ, བྷཝེསུ ཨབྷཱཝཔཉྙཏྟིཾ གཙྪཏཱིཏི ཨཏྠོ. ཛཱིཝལོཀོཏི སཏྟལོཀོ, སངྑཱརལོཀཨོཀཱསལོཀཱནཾ བྷཝཱབྷཝགམནཱསམྦྷཝཏོ སཏྟལོཀཾ ཛཱིཝལོཀོཏི ཝིསེསེཏི. ཨཝིཛྫཱདིཀིལེསཛཱལཝིདྡྷཾསིནོཏི ཨེཏྠ ནཝཔི ལོཀུཏྟརདྷམྨཱ སངྒཧཾ གཙྪནྟི. ཨཔཙཡགཱམིཏཱ ཧི ཙཏུམགྒདྷམྨསྶ ཨོདྷིསོ ཨཝིཛྫཱདིཀིལེསཛཱལཝིདྡྷཾསོ, སོ ཨསྶ ཨཏྠི, ཏདཱརམྨཎཾ ཧུཏྭཱ ཏཏྠ སཧཱཡབྷཱཝཱུཔགམནེན ནིབྦཱནསྶཱཔི. ཡཐཱཧ ‘‘ཡོ ཁོ, ཨཱཝུསོ, རཱགཀྑཡོ…པེ… ཨིདཾ ཝུཙྩཏི ནིབྦཱན’’ནྟི. ཨརཧཏྟསྶཱཔི ཏཐཱ རཱགཱདིཀྑཡཝཙནསབྦྷཱཝཏོ. ཕལསཱམཉྙེན ཏིཎྞམྤི ཕལཱནཾ ཨཏྠཱིཏི ནཝཝིདྷོཔེས ‘‘ཨཝིཛྫཱདིཀིལེསཛཱལཝིདྡྷཾསཱི’’ཏི ཝུཙྩཏི. ཨཐ ཝཱ སཧཙརཎལཀྑཎཀཨཱརཎཏཱཡ པཊིཔཀྑགོཙརགྒཧཎཏཱ. ཨནབྷིཧིཏོཔི ཧི དྷམྨསྶ ཏཏྲཱབྷིཧིཏོཝ བུཛ྄ཛྷིཏབྦོ ཨིཏི ཝཙནཏོ ཀཱརཎགོཙརགྒཧཎེན ཙཏྟཱརིཔི ཕལཱནི གཧིཏཱནི. ནརཀཱདཱིསུ ཨཔཏམཱནཾ དྷཱརེཏི སུགཏིཡཾ ཨུཔྤཱདནེནཱཏི དྷམྨོ. པུན སུགཏིམྷི ཨཛནནཀཱརཱི ཨཀུསལདྷམྨེ ནིཝཱརེཏྭཱ པོསེཏི པཝཏྟེཏི ཝཌྜྷེཏཱིཏི དྷམྨོ. སོ པན ཀཱམརཱུཔཱརཱུཔབྷེདཏོ ཏིཝིདྷོ ཨཙྩནྟསུཁཱཝཧནཏོ, ཏཏོཔི ཨུཏྟམཏྟཱ དྷམྨཝརོ.

ཨེཏྠཱཧ – ‘‘ཙཏུནྣཾ, བྷིཀྑཝེ, ཨརིཡསཙྩཱནཾ ཨནནུབོདྷཱ ཨཔྤཊིཝེདྷཱ ཨེཝམིདཾ དཱིགྷམདྡྷཱནཾ སནྡྷཱཝིཏཾ སཾསརིཏ’ནྟི (དཱི. ནི. ༢.༡༥༥; མཧཱཝ. ༢༨༧) ཝཙནཏོ ཙཏུསཙྩདྷམྨཾ ཨསམྦུདྷཾ བྷཝཱ བྷཝཾ གཙྪཏི ཛཱིཝལོཀོཏི སིདྡྷཾ. ཏསྨཱ ཡཾ ཨསམྦུདྷཾ གཙྪཏི, ཏསྶེཝ ¶ ‘‘ཏསྶཱ’’ཏི ཨནྟེ ཏཾནིདྡེསེན ནིཡམནཏོ ཙཏུསཙྩདྷམྨོཔི ཨཝིཛྫཱདིཀིལེསཛཱལཝིདྡྷཾསཱི ¶ དྷམྨཝརོཏི ཙཱཔཛྫཏི. ཨཉྙཐཱ ‘‘ནམོ ཨཝིཛྫཱདིཀིལེསཛཱལཝིདྡྷཾསིནོ དྷམྨཝརསྶ ཏསྶཱ’’ཏི ཏཾནིདྡེསེན སམཱནཝིབྷཏྟིཀརཎཾ ན ཡུཛྫཏི ཨཏིཔྤསངྒནིཡམནཏོ, ‘‘ཨཝིཛྫཱདིཀིལེསཛཱལཝིདྡྷཾསིནོ དྷམྨཝརསྶཱ’’ཏི ཝཙནཾ ཝིསེསནཝཙནཾ. ཏསྨཱ དུཀྑསམུདཡསཙྩཱནཾ ཏབྦྷཱཝཔྤསངྒོ ནཏྠཱིཏི ཙེ? ན, ཏཾནིདྡེསེན སམཱནཝིབྷཏྟིཊྛཱནེ ཨཝིསེསིཏཏྟཱ. ཨཔི ཙ མགྒསཙྩནིརོདྷསཙྩེསུ ཕལཱནཾ ཨཔརིཡཱཔནྣཏྟཱ ནཝ ལོཀུཏྟརདྷམྨཱ སངྒཧིཏཱཏི ཝཙནཝིརོདྷོ, ཕལཱནཾ ཨསངྒཧེ ཝེརཉྫཀཎྜཝཎྞནཱཡཾ ན ཀེཝལཾ ཨརིཡམགྒོ ཙེཝ ནིབྦཱནཉྩ, ཨཔི ཙ ཨརིཡཕལདྷམྨེཧི སདྡྷིཾ པརིཡཏྟིདྷམྨོཔི. ཝུཏྟཉྷེཏཾ ‘‘རཱགཝིརཱགམནེཛམསོཀཾ…པེ… དྷམྨམིམཾ སརཎཏྠམུཔེཧཱི’’ཏི (ཝི. ཝ. ༨༨༧) ཝཙནཝིརོདྷོ ཙཱཏི པུབྦཱཔརཝིརུདྡྷཱ ཨེསཱ གཱཐཱ སཱསནཝིརུདྡྷཱ ཙཱ’’ཏི? ཝུཙྩཏེ – སབྦམེཏམཡུཏྟཾ ཝུཏྟགཱཐཏྠཱཛཱནནཏོ. ཨེཏྠ ཧི ཨཱཙརིཡེན པཝཏྟིཔཝཏྟིཧེཏུཝིསཡཝིབྷཱགོ ཙ དསྶིཏོ. ཀཐཾ? ཏཏྠ ཨསམྦུདྷནྟི ཨསམྦོདྷོ, སོ ཨཏྠཏོ ཨཝིཛྫཱ, ཏཱཡ ཙ ཏཎྷུཔཱདཱནཱནི གཧིཏཱནི, ཏཡོཔི ཏེ དྷམྨཱ སམུདཡསཙྩཾ, བྷཝཱབྷཝནྟི ཨེཏྠ དུཀྑསཙྩཾ ཝུཏྟཾ. སུགཏིདུགྒཏིཔྤབྷེདོ ཧི བྷཝོ ཨཏྠཏོ པཉྩུཔཱདཱནཀྑནྡྷཱ ཧོནྟི. ‘‘ཨེཝམེཏསྶ ཀེཝལསྶ དུཀྑཀྑནྡྷསྶ སམུདཡོ ཧོཏཱི’’ཏི (མཧཱཝ. ༡) ཝཙནཏོ དུཀྑཔྤཝཏྟི པཝཏྟི ནཱམ, དུཀྑསམུདཡོ པཝཏྟིཧེཏུ ནཱམ, ཨཝིཛྫཱསངྑཱཏསྶ ཙ པཝཏྟིཧེཏུསྶ ཨགྒཧིཏགྒཧཎེན ནིརོདྷམགྒསཙྩདྭཡཾ ཝིསཡོ ནཱམ. ཝུཏྟཉྷེཏཾ ‘‘ཏཏྠ ཀཏམཱ ཨཝིཛྫཱ? དུཀྑེ ཨཉྙཱཎཾ…པེ… དུཀྑནིརོདྷགཱམིནིཡཱ པཊིཔདཱཡ ཨཉྙཱཎ’’ནྟི (ཝིབྷ. ༢༢༦).

ཨེཏྠ ཙ ནིརོདྷསཙྩཾ བུདྡྷེན གོཙརཱསེཝནཱཡ ཨཱསེཝིཏཾ, མགྒསཙྩཾ བྷཱཝནཱསེཝནཱཡ. ཨེཏྟཱཝཏཱ ཨསམྦུདྷཾ བུདྡྷནིསེཝིཏཾ ཡནྟི ཨུཔཡོགཔྤཏྟོ ཡོ ཝིསཡོ ནིརོདྷོ ཙ མགྒོ ཙ, ཏསྶ ཡཐཱཝུཏྟཱཝིཛྫཱདིཀིལེསཛཱལཏྟཡཝིདྡྷཾསིནོ ནམོ དྷམྨཝརསྶཱཏི ཨཡཾ གཱཐཱཡ ཨཏྠོ. པརིཡཏྟིདྷམྨོཔི ཀིལེསཝིདྡྷཾསནསྶ སུཏྟནྟནཡེན ཨུཔནིསྶཡཔཙྩཡཏྟཱ ཀིལེསཝིདྡྷཾསནསཱིལཏཱཡ ‘‘ཨཝིཛྫཱདིཀིལེསཛཱལཝིདྡྷཾསཱི’’ཏི ཝཏྟུཾ སམྦྷཝཏི. ཨེཝཉྷི སཏི རཱགཝིརཱགཱཏི གཱཐཏྠོ, སོ དྷམྨཾ དེསེཏི…པེ… བྲཧྨཙརིཡཾ པཀཱསེཏཱིཏི སུཏྟཏྠོ ཙ ཨསེསཏོ གཧིཏོ ཧོཏི. ཨཐ ¶ ཝཱ ཨིམཱཡ གཱཐཱཡ ཀེཝལཾ པརིཡཏྟིདྷམྨོཝ གཧིཏོ ཧོཏི, ཡཾ སནྡྷཱཡཱཧ ‘‘སོ དྷམྨཾ དེསེཏི ཨཱདིཀལྱཱཎཾ…པེ… བྲཧྨཙརིཡཾ པཀཱསེཏཱི’’ཏི (དཱི. ནི. ༡.༡༩༠; པཱརཱ. ༡), ཏམྤི ཨསམྦུདྷཾ བུདྡྷེཧེཝ ནིསེཝིཏཾ གོཙརཱསེཝནཱཡ ཨནཉྙནིསེཝིཏཾ. ཡཐཱཧ ‘‘བྷགཝཾམཱུལཀཱ ནོ, བྷནྟེ, དྷམྨཱ བྷགཝཾནེཏྟིཀཱ བྷགཝཾཔཊིསརཎཱ…པེ… བྷགཝཏོ སུཏྭཱ བྷིཀྑཱུ དྷཱརེསྶནྟཱི’’ཏི (སཾ. ནི. ༢.༡༤༦).

ཏཏིཡགཱཐཱཡ ¶ སཱིལཱདཡོ ཀིཉྩཱཔི ལོཀིཡལོཀུཏྟརཱ ཡཐཱསམྦྷཝཾ ལབྦྷནྟི, ཏཐཱཔི ཨནྟེ ‘‘ཨརིཡསངྒྷ’’ནྟི ཝཙནཏོ སཱིལཱདཡོ ཙཏྟཱརོ དྷམྨཀྑནྡྷཱ ལོཀུཏྟརཱཝ. ཨེཏྠ ཙ ‘‘སཱིལསམཱདྷིཔཉྙཱཝིམུཏྟིཝིམུཏྟིཉཱཎཔྤབྷུཏཱིཧཱི’’ཏི ཝཏྟབྦེ སརཱུཔེཀསེསཾ ཀཏྭཱ ‘‘ཝིམུཏྟིཉཱཎཔྤབྷུཏཱིཧཱི’’ཏི ཝུཏྟཾ. ཨེཏྠ ཙ ཀིཉྩཱཔི ཝིམུཏྟཱིཏི ཕལདྷམྨཱཝ སུཏྟེ ཨདྷིཔྤེཏཱ, ཏཐཱཔི ‘‘མགྒཱ ཝུཊྛཧིཏྭཱ མགྒཾ པཙྩཝེཀྑཏི. པཧཱིནེ ཀིལེསེ པཙྩཝེཀྑཏི. ཕལཾ པཙྩཝེཀྑཏི. ནིབྦཱནཾ པཙྩཝེཀྑཏཱི’’ཏི (པཊྛཱ. ༡.༡.༤༡༠) ཝཙནཏོ མགྒཱདིཔཙྩཝེཀྑཎཉཱཎཾ ཝིམུཏྟིཉཱཎནྟི ཝེདིཏབྦཾ. ཝིམུཏྟི ཝིམོཀྑོ ཁཡོཏི ཧི ཨཏྠཏོ ཨེཀཾ. ‘‘ཁཡེ ཉཱཎཾ ཨནུཔྤཱདེ ཉཱཎནྟི (དྷ. ས. དུཀམཱཏིཀཱ ༡༤༢; དཱི. ནི. ༣.༣༠༤) ཨེཏྠ ཁཡོ ནཱམ མགྒོ, རཱགཀྑཡོ དོསཀྑཡོཏི ཕལནིབྦཱནཱནཾ ཨདྷིཝཙན’’ནྟི སུཏྟེ ཨཱགཏམེཝ. པཧཱིནཀིལེསཱནཾ ཁཡོ པཱཀཏིཀོ ཁཡོ ཨེཝ. པབྷུཏི-སདྡེན ཏིསྶོ ཝིཛྫཱ ཚ ཨབྷིཉྙཱ ཙཏསྶོ པཊིསམྦྷིདཱཏི ཨེཝམཱདཡོ གུཎཱ སངྒཧིཏཱ. སམནྣཱགམཊྛེན ཨཔརིཧཱིནཊྛེན ཙ ཡུཏྟོ. ཁེཏྟཾ ཛནཱནཾ ཀུསལཏྠིཀཱནནྟི ‘‘ཨནུཏྟརཾ པུཉྙཀྑེཏྟཾ ལོཀསྶཱ’’ཏི སུཏྟཏོ ཀུསལསྶ ཝིརུཧནཊྛཱནཏྟཱ, སུཏྟནྟནཡེན ཨུཔནིསྶཡཔཙྩཡཏྟཱ ཙ ཀཱམཾ ཀུསལསྶ ཁེཏྟཾ ཧོཏི སངྒྷོ, ན ཀུསལཏྠིཀཱནཾ ཛནཱནཾ. ཏསྨཱ ན ཡུཛྫཏཱིཏི ཙེ? ན, སུཏྟཏྠསམྦྷཝཏོ. སུཏྟེ ‘‘ཨནུཏྟརཾ པུཉྙཀྑེཏྟཾ ལོཀསྶཱ’’ཏི (སཾ. ནི. ༤.༣༤༡) ཧི ཝུཏྟཾ. ཀསྶ ལོཀསྶ? པུཉྙཏྠིཀསྶ ཁེཏྟཾ སངྒྷོ, པུཉྙུཔནིསྶཡཏྟཱ པུཉྙཀྑེཏྟཾ ཧོཏི སངྒྷོ, ཀུསལཏྠིཀཱནནྟི ཙ ཝུཙྩནྟི. ལོཀེཔི ཧི དེཝདཏྟསྶ ཁེཏྟཾ ཡཉྙདཏྟསྶ ཁེཏྟཾ སཱལིཡཝུཔནིསྶཡཏྟཱ སཱལིཁེཏྟཾ ཡཝཁེཏྟནྟི ཙ ཝུཙྩཏི. ཨརིཡསངྒྷནྟི ཝིགཏཀིལེསཏྟཱ ཨརིཡཾ པརིསུདྡྷཾ ཨརིཡཱནཾ, ཨརིཡབྷཱཝཾ ཝཱ པཏྟཾ སཱིལདིཊྛིསཱམཉྙེན སངྒྷཏཏྟཱ སངྒྷཾ. ‘‘ཨརིཡ-སདྡེན སམྨུཏིསངྒྷཾ ནིཝཱརེཏཱི’’ཏི ཀེཙི ལིཁནྟི, ཏཾ ན སུནྡརཾ ཝིམུཏྟིཉཱཎགུཎགྒཧཎེན ཝིསེསིཏཏྟཱ. སིརསཱཏི ¶ ཨིམིནཱ ཀཱམཾ ཀཱཡནཏིཾ དསྶེཏི, ཏཐཱཔི ཨུཏྟམསངྒྷེ གུཎགཱརཝེན ཨུཏྟམངྒམེཝ ནིདྡིསནྟོ ‘‘སིརསཱ ནམཱམཱི’’ཏྱཱཧ. སིརསྶ པན ཨུཏྟམཏཱ ཨུཏྟམཱནཾ ཙཀྑུསོཏིནྡྲིཡཱནཾ ནིསྶཡཏྟཱ, ཏེསཾ ཨུཏྟམཏཱ ཙ དསྶནཱནུཏྟརིཡསཝནཱནུཏྟརིཡཧེཏུཏཱཡ ཝེདིཏབྦཱ. ཨེཏྠཱཧ – ཨནུསནྡྷིཀུསལོ

‘‘ཨུཔོགྒྷཱཏོ པདཉྩེཝ, པདཏྠོ པདཝིགྒཧོ;

ཙོདནཱཔྲཏྱཝཛྫཱནཾ, བྱཱཁྱཱ ཏནྟསྶ ཚབྦིདྷཱ’’ཏི. –

ཨེཝམཝཏྭཱ ཀསྨཱ རཏནཏྟཡཔཎཱམཾ པཋམཾ ཝུཏྟནྟི? ཝུཙྩཏེ – སཏཱཙཱརཏྟཱ. ཨཱཙཱརོ ཀིརེས སཔྤུརིསཱནཾ, ཡདིདཾ སཾཝཎྞནཱརམྦྷེ རཏནཏྟཡཔཱུཛཱཝིདྷཱནཾ. ཏསྨཱ ‘‘སཏཱཙཱརཏོ བྷཊྛཱ མཱ མཡཾ ཧོམཱ’’ཏི ¶ ཀརཱིཡཏི, ཙཏུགམྦྷཱིརབྷཱཝཡུཏྟཉྩ ཝིནཡཔིཊཀཾ སཾཝཎྞེཏུཀཱམསྶ མཧཱསམུདྡཾ ཨོགཱཧནྟསྶ ཝིཡ པཉྙཱཝེཡྻཏྟིཡསམནྣཱགཏསྶཱཔི མཧནྟཾ བྷཡཾ ཧོཏི, བྷཡཀྑཡཱཝཧཉྩེཏཾ རཏནཏྟཡགུཎཱནུསྶརཎཛནིཏཾ པཎཱམཔཱུཛཱཝིདྷཱནཾ. ཡཐཱཧ ‘‘ཨེཝཾ བུདྡྷཾ སརནྟཱན’’ནྟིཨཱདི (སཾ. ནི. ༡.༢༤༩). ཨཔིཙཱཙརིཡོ སཏྠུཔཱུཛཱཝིདྷཱནེན ཨསཏྠརི སཏྠཱབྷིནིཝེསསྶ ལོཀསྶ ཡཐཱབྷཱུཏཾ སཏྠརི ཨེཝ སམྨཱསམྦུདྡྷེ སཏྠུསམྦྷཱཝནཾ ཨུཔྤཱདེཏི, ཨསཏྠརི སཏྠུསམྦྷཱཝནཾ པརིཙྩཛཱཔེཏི, ‘‘ཏཐཱགཏཔྤཝེདིཏཾ དྷམྨཝིནཡཾ ཨཏྟནོ དཧཏཱི’’ཏི ཝུཏྟདོསཾ པརིཧརཏི. ཨནྟརཱཡབཧུལཏྟཱ ཁནྡྷསནྟཏིཡཱ ཝིཔྤཀཏཱཡ ཝིནཡསཾཝཎྞནཱཡ ཨཏྟནོ ཨཱཡུཝཎྞསུཁབལཱནཾ པརིཀྑཡསམྦྷཝཱསངྐཱཡ ‘‘ཨབྷིཝཱདནསཱིལིསྶ…པེ… ཨཱཡུ ཝཎྞོ སུཁཾ བལ’’ནྟི (དྷ. པ. ༡༠༩) ཝུཏྟཱནིསཾསེ ཡཱཝ སཾཝཎྞནཱཔརིཡོསཱནཱ པཏྠེཏི. ཨཔི ཙེཏྠ བུདྡྷསྶ བྷགཝཏོ པཎཱམཔཱུཛཱཝིདྷཱནཾ སམྨཱསམྦུདྡྷབྷཱཝཱདྷིགམཏྠཾ བུདྡྷཡཱནཾ པཊིཔཛྫནྟཱནཾ ཨུསྶཱཧཾ ཛནེཏི. ལོཀིཡལོཀུཏྟརབྷེདསྶ, ལོཀུཏྟརསྶེཝ ཝཱ སདྡྷམྨསྶ པཱུཛཱཝིདྷཱནཾ པཙྩེཀབུདྡྷབྷཱཝཱདྷིགམཏྠཾ པཙྩེཀབུདྡྷཡཱནཾ པཊིཔཛྫནྟཱནཾ ཨུསྶཱཧཾ ཛནེཏི. སདྡྷམྨཔཊིཝེདྷམཏྟཱབྷིལཱསིནོ ཧི ཏེ. པརམཏྠསངྒྷཔཱུཛཱཝིདྷཱནཾ པརམཏྠསངྒྷབྷཱཝཱདྷིགམཏྠཾ སཱཝཀཡཱནཾ པཊིཔཛྫནྟཱནཾ ཨུསྶཱཧཾ ཛནེཏི, མངྒལཱདཱིནི ཝཱ སཱཏྠཱནི ཨནནྟརཱཡཱནི ཙིརཊྛིཏིཀཱནི བཧུམཏཱནི ཙ བྷཝནྟཱིཏི ཨེཝཾལདྡྷིཀཱནཾ ཙིཏྟཔརིཏོསནཏྠཾ ‘‘པཱུཛཱ ཙ པཱུཛནེཡྻཱན’’ནྟི བྷགཝཏཱ པསཏྠམངྒལཾ ཀརོཏི. ཝུཙྩཏེ ཙ –

‘‘མངྒལཾ ¶ བྷགཝཱ བུདྡྷོ, དྷམྨོ སངྒྷོ ཙ མངྒལཾ;

མངྒལཱདཱིནི སཱཏྠཱནི, སཱིགྷཾ སིཛ྄ཛྷནྟི སབྦསོ.

‘‘སཏྠུ པཱུཛཱཝིདྷཱནེན, ཨེཝམཱདཱི བཧཱུ གུཎེ;

ལབྷཏཱིཏི ཝིཛཱནནྟོ, སཏྠུཔཱུཛཱཔརོ སིཡཱ’’ཏི.

ཨེཏྠ ཙ སཏྠུཔདྷཱནཏྟཱ དྷམྨསངྒྷཱནཾ པཱུཛཱཝིདྷཱནཾ སཏྠུཔཱུཛཱཝིདྷཱནམིཙྩེཝ དཊྛབྦཾ སཱསནཏོ ལོཀཏོ ཙ. ཏེནེཏཾ ཝུཙྩཏི –

‘‘སཏྠཱ’’ཏི དྷམྨོ སུགཏེན ཝུཏྟོ;

ནིབྦཱནཀཱལེ ཡམཏོ ས སཏྠཱ;

སུཝཏྠིགཱཐཱསུ ‘‘ཏཐཱགཏོ’’ཏི;

སངྒྷོ ཙ ཝུཏྟོ ཡམཏོ ས སཏྠཱ.

ཀིཉྩ ¶ བྷིཡྻོ –

དྷམྨཀཱཡོ ཡཏོ སཏྠཱ, དྷམྨོ སཏྠཱ ཏཏོ མཏོ;

དྷམྨཊྛིཏོ སོ སངྒྷོ ཙ, སཏྠུསངྑྱཾ ནིགཙྪཏི.

སནྟི ཧི ལོཀེ ཝཏྟཱརོ ཀོསགཏཾ ཨསིཾ གཧེཏྭཱ ཋིཏཾ པུརིསཾ ཝིསུཾ ཨཔརཱམསིཏྭཱ ‘‘ཨསིཾ གཧེཏྭཱ ཋིཏོ ཨེསོ’’ཏི. ཏེནེཝཱཧ ཙཱརིཡམཱཏྲཙྩེཝཱ –

‘‘ནམཏྠུ བུདྡྷརཏྣཱཡ, དྷམྨརཏྣཱཡ ཏེ ནམོ;

ནམཏྠུ སངྒྷརཏྣཱཡ, ཏིརཏྣསམཝཱནཡཱི’’ཏི.

ཨཔིཙ སབྦདྷམྨེསུ ཨཔྤཊིཧཏཉཱཎནིམིཏྟཱནུཏྟརཝིམོཀྑཔཱཏུབྷཱཝཱབྷིསངྑཱཏཾ ཁནྡྷསནྟཱནམུཔཱདཱཡ ‘‘བུདྡྷོ’’ཏི ཡདི པཉྙཱཔིཡཏི, དྷམྨོ པཎཱམཱརཧོཏི ཀཱ ཨེཝ ཀཐཱ, སངྒྷོ ཙ ‘‘སངྒྷེ གོཏམི དེཧི, སངྒྷེ ཏེ དིནྣེ ཨཧཉྩེཝ པཱུཛིཏོ བྷཝིསྶཱམི སངྒྷོ ཙཱ’’ཏི ཝུཏྟཏྟཱ བྷཱཛནནྟི དཱིཔེཏི. ཨཐ ཝཱ ‘‘བུདྡྷསུབོདྷིཏོ དྷམྨོ ཨཱཙརིཡཔརམྤརཱཡ སུཝཎྞབྷཱཛནེ པཀྑིཏྟཏེལམིཝ ཨཔརིཧཱཔེཏྭཱ ཡཱཝཛྫཏནཱ ཨཱབྷཏཏྟཱ ཨེཝ མཱདིསཱནམྤི སོཏདྭཱརམནུཔྤཏྟོ’’ཏི སངྒྷསྶ ཨཱཙརིཡོ ཨཏཱིཝ ཨཱདརེན པཎཱམཾ ཀརོཏི ‘‘སིརསཱ ནམཱམཱི’’ཏི.

ཨེཝཾ ¶ ཨནེཀཝིདྷཾ པཎཱམཔྤཡོཛནཾ ཝདནྟི, ཨཱཙརིཡེན པན ཨདྷིཔྤེཏཔྤཡོཛནཾ ཨཏྟནཱ ཨེཝ ཝུཏྟཾ ‘‘ཨིཙྩེཝམཙྩནྟནམསྶནེཡྻ’’ནྟིཨཱདིནཱ ཙཏུཏྠགཱཐཱཡ. ཨིཙྩེཝནྟི ཨེཏྠ ཨིཏི-སདྡོ རཏནཏྟཡཔཱུཛཱཝིདྷཱནཔརིསམཏྟཏྠོ. ཡདི ཨེཝཾ ཡཐཱཝིཧིཏམཏྟམེཝ པཱུཛཱཝིདྷཱནཾ ཨརཧཏི རཏནཏྟཡཾ, ན ཏཏོ ཨུདྡྷནྟི ཨཱཔཛྫཏཱིཏི ཨནིཊྛཔྤསངྒནིཝཱརཎཏྠཾ ‘‘ཨེཝམཙྩནྟནམསྶནེཡྻ’’ནྟི ཨཱཧ. ཏཏྠ ཨེཝནྟི ཨིམིནཱ ཡཐཱཝུཏྟཝིདྷིཾ དསྶེཏི. ཡཐཱཝུཏྟེན ཝིདྷིནཱ, ཨཉྙེན ཝཱ ཏཱདིསེན ཨཙྩནྟམེཝ མུཧུཏྟམཔི ཨཊྛཏྭཱ ཨབྷིཀྑཎཾ ནིརནྟརཾ ནིཡམེན ནམསྶནཱརཧཾ ནམསྶམཱནསྶ ཧིཏམཧཔྥལཀརཎཏོཏི ཨཏྠོ. ཨེཝཾཝིདྷཾ དུལླབྷཊྛེན མཧཔྥལཊྛེན ཙ སིདྡྷཾ རཏནབྷཱཝཾ རཏནཏྟཡཾ ནམསྶམཱནོ ཡཾ པུཉྙཱབྷིསནྡཾ ཨལཏྠཾ ཨལབྷིཾ. ཨཀུསལམལཾ ཏདངྒཱདིཔྤཧཱནེན པུནཱཏཱིཏི པུཉྙཾ. ཀིལེསདརཐཔྤཊིཔྤསྶདྡྷིཡཱ སཱིཏལཏྟཱ ཙིཏྟཾ ཨབྷིསནྡེཏཱིཏི ཨབྷིསནྡོ. པུཉྙཉྩ ཏཾ ཨབྷིསནྡོ ཙཱཏི པུཉྙཱབྷིསནྡོ, ཏཾ པུཉྙཱབྷིསནྡཾ. གཎྛིཔདེ པན ‘‘པུཉྙམཧཏྟཾ’’ནྟི བྷཎནྟི, ‘‘ཝིཔུལ’’ནྟི ཝཙནཏོ སོ ཨཏྠོ ན ཡུཛྫཏཱིཏི ཨཱཙརིཡོ. ཨཐ ཝཱ པུཉྙཱནཾ ཨབྷིསནྡོ པུཉྙཱབྷིསནྡོ ¶ , ཏཾ པུཉྙཱབྷིསནྡཾ. སནྡ སཝནེཏི དྷཱཏུ. ཏསྨཱ པུཉྙསོཏཾ པུཉྙུསྶཡནྟི ཨཏྠོ ཡུཛྫཏི, ཏཾ པན ཝིཔུལཾ, ན པརིཏྟནྟི དསྶིཏཾ ཝིཔུལ-སདྡེན.

པཉྩམགཱཐཱ ཡསྨིཾ ཝིནཡཔིཊཀེ པཱལི༹ཏོ ཙ ཨཏྠཏོ ཙ ཨནཱུནཾ ལཛྫཱིཔུགྒལེསུ པཝཏྟནཊྛེན ཋིཏེ སཀལཾ ཏིཝིདྷམྤི སཱསནཾ ཏེསྭེཝ པུགྒལེསུ པཏིཊྛིཏཾ ཧོཏི. ཀསྶ སཱསནནྟི ཙེ? ཨཊྛིཏསྶ བྷགཝཏོ. བྷགཝཱ ཧི ཋིཏིཧེཏུབྷཱུཏཱཡ ཨུཙྪེདདིཊྛིཡཱ ཨབྷཱཝེན ཨཊྛིཏོཏི ཝུཙྩཏི. ཨུཙྪེདདིཊྛིཀོ ཧི པརལོཀེ ནིརཔེཀྑོ ཀེཝལཾ ཀཱམསུཁལླིཀཱནུཡོགམནུཡུཉྫནྟོ ཏིཊྛཏི, ན པརལོཀཧིཏཱནི པུཉྙཱནི ཀཏྟུཾ བྱཱཝཊོ ཧོཏི, སསྶཏདིཊྛིཀོ ཏཱནི ཀཏྟུཾ ཨཱཡཱུཧཏི. བྷགཝཱ པན ཏཐཱ ཨཏིཊྛནྟོ ཨནཱཡཱུཧནྟོ མཛ྄ཛྷིམཾ པཊིཔདཾ པཊིཔཛྫནྟོ སཡཉྩ ཨོགྷཾ ཏརི, པརེ ཙ ཏཱརེསི. ཡཐཱཧ ‘‘ཨཔྤཏིཊྛཾ ཁྭཱཧཾ, ཨཱཝུསོ, ཨནཱཡཱུཧཾ ཨོགྷམཏརི’’ནྟི (སཾ. ནི. ༡.༡). ཙཏུབྲཧྨཝིཧཱརཝསེན སཏྟེསུ སུཊྛུ སམྨཱ ཙ ཋིཏསྶཱཏི ཨཏྠཝསེན ཝཱ སུསཎྛིཏསྶ. སུསཎྛིཏཏྟཱ ཧེས ཀེཝལཾ སཏྟཱནཾ དུཀྑཾ ཨཔནེཏུཀཱམོ ཧིཏཾ ཨུཔསཾཧརིཏུཀཱམོ སམྤཏྟིཡཱ ཙ པམོདིཏོ ཨཔཀྑཔཏིཏོ ཙ ཧུཏྭཱ ཝིནཡཾ དེསེཏི, ཏསྨཱ ཨིམསྨིཾ ¶ ཝིནཡསཾཝཎྞནཱདྷིཀཱརེ སཱརུཔྤཱཡ ཐུཏིཡཱ ཐོམེནྟོ ཨཱཧ ‘‘སུསཎྛིཏསྶཱ’’ཏི. གཎྛིཔདེ པན ‘‘མནཱཔིཡེ ཙ ཁོ, བྷིཀྑཝེ, ཀམྨཝིཔཱཀེ པཙྩུཔཊྛིཏེ’’ཏི (དཱི. ནི. ཨཊྛ. ༢.༣༥; མ. ནི. ཨཊྛ. ༢.༣༨༦) སུཏྟསྶ, ‘‘སུསཎྛཱནཱ སུརཱུཔཏཱ’’ཏི (ཁུ. པཱ. ༨.༡༡) སུཏྟསྶ ཙ ཝསེན སུསཎྛིཏསྶཱཏི ཨཏྠོ ཝུཏྟོ, སོ ཨདྷིཔྤེཏཱདྷིཀཱརཱནུརཱུཔོ ན ཧོཏི. ཨམིསྶནྟི ཀིཾ ཝིནཡཾ ཨམིསྶཾ, ཨུདཱཧུ པུབྦཱཙརིཡཱནུབྷཱཝནྟི? ནོབྷཡམྤི. ཨམིསྶཱ ཨེཝ ཧི ཝིནཡཊྛཀཐཱ. ཏསྨཱ བྷཱཝནཔུཾསཀཝསེན ཨམིསྶཾ ཏཾ ཝཎྞཡིསྶནྟི སམྦནྡྷོ. པུབྦཱཙརིཡཱནུབྷཱཝནྟི ཨཊྛཀཐཱ ‘‘ཡསྨཱ པུརེ ཨཊྛཀཐཱ ཨཀཾསཱུ’’ཏི ཝཙནཏོ ཏེསཾ ཨཱནུབྷཱཝོ ནཱམ ཧོཏི. ཀིཉྩི ཨཔུབྦཾ དིསྭཱ སནྟི ཧི ལོཀེ ཝཏྟཱརོ ‘‘ཀསྶེས ཨཱནུབྷཱཝོ’’ཏི. ཨཐ ཝཱ བྷགཝཏོ ཨདྷིཔྤཱཡཾ ཨནུགནྟྭཱ ཏཾཏཾཔཱཋེ ཨཏྠཾ བྷཱཝཡཏི ཝིབྷཱཝཡཏི, ཏསྶ ཏསྶ ཝཱ ཨཏྠསྶ བྷཱཝནཱ ཝིབྷཱཝནཱཏི ཨཱནུབྷཱཝོ ཝུཙྩཏི ཨཊྛཀཐཱ.

པུབྦཱཙརིཡཱནུབྷཱཝེ སཏི ཀིཾ པུན ཏཾ ཝཎྞཡིསྶནྟི ཨིམིནཱ ཨཱརམྦྷེནཱཏི ཏཏོ ཝུཙྩནྟི ཚཊྛསཏྟམཊྛམནཝམགཱཐཱཡོ. ཏཏྠ ཨརིཡམགྒཉཱཎམྦུནཱ ནིདྡྷོཏམལཏྟཱ ཝིསུདྡྷཝིཛྫེཧི, ཏེནེཝ ནིདྡྷོཏཱསཝཏྟཱ ཝིསུདྡྷཔཊིསམྦྷིདེཧི, ཝིསུདྡྷཔཊིསམྦྷིདཏྟཱ ཙ སདྡྷམྨསཾཝཎྞནཀོཝིདེཧཱིཏི ཡོཛནཱ ཝེདིཏབྦཱ. ཀེཙི ‘‘པུབྦཱཙརིཡཱཏི ཝུཏྟེ ལོཀཱཙརིཡཱཔི, སཱསནེ རཱཧུལཱཙརིཡཱདཡོཔི སངྒཡ྄ཧནྟི, ཏེ ཨཔནེཏུཾ ཀཱམཉྩཱཏིཨཱདི ཝུཏྟ’’ནྟི ཝདནྟི. ‘‘ཏཾ ཝཎྞཡིསྶ’’ནྟི ཝུཏྟཏྟཱ པུབྦཊྛཀཐཱཡ ཨཱུནབྷཱཝོ དསྶིཏོཏི ཙེ? ན, ཙིཏྟེཧི ནཡེཧི སཾཝཎྞིཏོཏི ¶ དསྶེཏུཾ ‘‘ཀཱམཉྩཱ’’ཏིཨཱདི ཝུཏྟཾ. སདྡྷམྨཾ སཾཝཎྞེཏུཾ ཀོཝིདེཧི, ཏཱཡ སཾཝཎྞནཱཡ ཝཱ ཀོཝིདེཧི སདྡྷམྨསཾཝཎྞནཀོཝིདེཧི.

སལླེཁིཡེཏི ཀིལེསཛཱཏཾ བཱཧུལླཾ ཝཱ སལླིཁཏི ཏནུཾ ཀརོཏཱིཏི སལླེཁོ, སལླེཁསྶ བྷཱཝོ སལླེཁིཡཾ, ཏསྨིཾ སལླེཁིཡེ. ནོསུལབྷཱུཔམེཧཱིཏི ཨསུལབྷཱུཔམེཧི. མཧཱཝིཧཱརསྶཱཏི མཧཱཝིཧཱརཝཾསསྶ. པཉྙཱཡ ཨཙྩུགྒཏཊྛེན དྷཛོ ཨུཔམཱ ཨེཏེསནྟི དྷཛཱུཔམཱ, ཏེཧི དྷཛཱུཔམེཧི. སམྦུདྡྷཝརཾ ཨནུཨཡེཧི ཨནུགཏེཧི སམྦུདྡྷཝརནྭཡེཧི, བུདྡྷཱདྷིཔྤཱཡཱནུགེཧཱིཏི ཨདྷིཔྤཱཡོ. ཨིདྷ ཝར-སདྡོ ‘‘སཱམཾ སཙྩཱནི བུདྡྷཏྟཱ སམྦུདྡྷོ’’ཏི ཝཙནཏོ པཙྩེཀབུདྡྷཱཔི སངྒཡ྄ཧནྟི. ཏསྨཱ ཏེ ཨཔནེཏུཾ ཝུཏྟོ.

ཨཊྛཀཐཱཡ ¶ ཨཱུནབྷཱཝཾ དསྶེཏྭཱ ཨིདཱནི ཨཏྟནོ ཀརཎཝིསེསཾ ཏསྶ པཡོཛནཉྩ དསྶེཏུཾ ‘‘སཾཝཎྞནཱ’’ཏིཨཱདིམཱཧ. ན ཀིཉྩི ཨཏྠཾ ཨབྷིསམྦྷུཎཱཏཱིཏི ཀིཉྩི པཡོཛནཾ ཕལཾ ཧིཏཾ ན སཱདྷེཏཱིཏི ཨཏྠོ ‘‘ན ཏཾ ཏསྶ བྷིཀྑུནོ ཀིཉྩི ཨཏྠཾ ཨནུབྷོཏཱི’’ཏིཨཱདཱིསུ (པཱརཱ. ༥༣༨) ཝིཡ. ཨཛ྄ཛྷེསནཾ བུདྡྷསིརིཝ྄ཧཡསྶཱཏི ཨིམིནཱ ཡསྨཱ སཧམྤཏིབྲཧྨུནཱ ཨཛ྄ཛྷིཊྛེན དྷམྨོ དེསིཏོ བྷགཝཏཱ, སཱརིཔུཏྟསྶ ཨཛ྄ཛྷེསནཾ ནིསྶཱཡ ཝིནཡོ པཉྙཏྟོ, ཏསྨཱ ཨཡམྤི ཨཱཙརིཡོ ཏཾ ཨཱཙརིཡཝཏྟཾ པཱུཛེནྟོ ཨིམཾ སཾཝཎྞནཾ བུདྡྷསིརིཏྠེརསྶ ཡཱཙནཾ ནིསྶཱཡ ཨཀཱསཱིཏི དསྶེཏི. སམནུསྶརནྟོཏི ཏསྶཱབྷཱཝཾ དཱིཔེཏི ཨཱདརཉྩ.

ཏཏོ པརཾ དྭེ གཱཐཱཡོ ཀཏྟབྦཝིདྷིདསྶནཏྠཾ ཝུཏྟཱ. ཏེན ཏཱསུ ཨཊྛཀཐཱསུ ཝུཏྟཝིནིཙྪཡཔཙྩཡཝིམཏིཾ ཝིནོདེཏི, ཨེཀཊྛཀཐཱཡ ཀུསལསྶ ཝཱ ‘‘ཨཡཾ ནཡོ ཨཊྛཀཐཱཡཾ ནཏྠཱི’’ཏི པཊིཀྑེཔཾ ནིཝཱརེཏི, ཨཡུཏྟཏྠཔརིཙྩཱགེན ཏཏྠ ཨབྷིནིཝིཊྛཱནཾ ཨབྷིནིཝེསཾ པརིཙྩཛཱཔེཏི, ཐེརཝཱདདསྶནེན ཝིནཡཝིནིཙྪཡཾ པཏི ཝིནཡདྷརཱནཾ ཀཱརཎོཔཔཏྟིཏོ ཨུཧཱཔོཧཀྐམཾ དསྶེཏི, ཨཡུཏྟཏྠེརཝཱདཔཊིཀྑེཔེན པུགྒལཔྤམཱཎཏཾ པཊིཀྑིཔཏཱིཏི ཨིམེ ཙཱནིསཾསཱ ཀཏྟབྦཝིདྷིདསྶནེན དསྶིཏཱ ཧོནྟི. སཾཝཎྞནཾ ཏཉྩ སམཱརབྷནྟོ ཏསྶཱ སཾཝཎྞནཱཡ མཧཱཨཊྛཀཐཾ སརཱིརཾ ཀཏྭཱ སམཱརབྷིསྶཾ, མཧཱཔཙྩརིཡམྤི ཡོ ཝུཏྟོ ཝིནིཙྪཡོ, ཏཐེཝ ཀུརུནྡཱིནཱམཱདཱིསུ ལོཀེ ཝིསྶུཏཱསུ ཨཊྛཀཐཱསུ ཙ ཡོ ཝུཏྟོ ཝིནིཙྪཡོ, ཏཏོཔི ཝིནིཙྪཡཏོ མཧཱཨཊྛཀཐཱནཡེན, ཝིནཡཡུཏྟིཡཱ ཝཱ ཡུཏྟམཏྠཾ ཏསྶ སརཱིརསྶ ཨལངྐཱརཾ ཝིཡ གཎྷནྟོ སམཱརབྷིསྶཾ. ཀིཾ སཾཝཎྞནམེཝ, ན ཨཉྙནྟི དསྶནཏྠཾ པུན སཾཝཎྞནཱགྒཧཎཾ. ཨཐ ཝཱ ཨནྟོགདྷཏྠེརཝཱདཾ སཾཝཎྞནཾ ཀཏྭཱ སམཱརབྷིསྶནྟི ཡོཛནཱ ཝེདིཏབྦཱ. ཐེརཝཱདཱ ཧི བཧིཨཊྛཀཐཱཡ ཝིཙརནྟི. ཨེཏྠ ཨཱདི-སདྡེན ཙཱུལ༹པཙྩརིཨནྡྷཀཨརིཡཊྛཀཐཱཔནྣཝཱརཱདཡོཔི སངྒཧིཏཱ ¶ . ཏཏྠ པཙྩརཱི ནཱམ སཱིཧལ༹བྷཱསཱཡ ཨུལུ༹མྤཾ ཀིར, ཏསྨིཾ ནིསཱིདིཏྭཱ ཀཏཏྟཱ ཏམེཝ ནཱམཾ ཛཱཏཾ. ཀུརུནྡཱིཝལླིཝིཧཱརོ ནཱམ ཨཏྠི, ཏཏྠ ཀཏཏྟཱ ཀུརུནྡཱི ནཱམ ཛཱཏཱ.

སམྨ སམཱརབྷིསྶནྟི ཀཏྟབྦཝིདྷཱནཾ སཛྫེཏྭཱ ཨཧཾ ཋིཏོ, ཏསྨཱ ཏཾ མེ ནིསཱམེནྟཱུཏི གཱཐཱཡ ཏཾ སཾཝཎྞནཾ མེ མམ, མཡཱ ཝཱ ཝུཙྩམཱནནྟི པཱཋསེསོ ¶ . ནིསཱམེནྟུ པསྶནྟུ པཉྙཱཙཀྑུནཱ སུཎནྟུ ཝཱ སདྡྷཱཝཱིརིཡཔཱིཏིཔཱམོཛྫཱབྷིསངྑཱརེན སངྑརིཏྭཱ པཱུཛཡནྟཱ སཀྐཙྩཾ དྷམྨཾ. ཀསྶ དྷམྨཾ? དྷམྨཔྤདཱིཔསྶ ཏཐཱགཏསྶ. ཀིཾ དསྶེཏི? པདཱིཔཊྛཱནིཡོ ཧི དྷམྨོ ཧིཏཱཧིཏཔྤཀཱསནཏོ, པདཱིཔདྷརཊྛཱནིཡོ དྷམྨདྷརོ ཏཐཱགཏོ, ཏསྨཱ པརིནིབྦུཏེཔི ཏསྨིཾ ཏཐཱགཏེ ཏཏྠ སོཀཾ ཨཀཏྭཱ སཀྐཙྩ དྷམྨཾ པཊིམཱནཡནྟཱ ནིསཱམེནྟཱུཏི དསྶེཏི. ཨཐ ཝཱ ‘‘དྷམྨཀཱཡཱ ཏཐཱགཏཱ’’ཏི (དཱི. ནི. ༣.༡༡༨) ཝཙནཏོ དྷམྨོ ཙ སོ པདཱིཔོ ཙཱཏི དྷམྨཔྤདཱིཔོ, བྷགཝཱ.

ཡོ དྷམྨཝིནཡོ ཡཐཱ བུདྡྷེན ཝུཏྟོ, སོ ཏཐེཝ བུདྡྷཔུཏྟེཧི སཱཝཀེཧི ཉཱཏོ ཨཝབུདྡྷོ, ཡེཧི ཏེསཾ བུདྡྷཔུཏྟཱནཾ མཏིཾ ཨདྷིཔྤཱཡཾ ཨཙྩཛནྟཱ ནིརཝསེསཾ གཎྷནྟཱ. པུརེཏི པུརཱ, པོརཱཎཏྠེརཱ ཝཱ. ཨཊྛཀཐཱཏི ཨཊྛཀཐཱཡོ, ཨུཔཡོགབཧུཝཙནཾ.

ཡཾ ཨཏྠཛཱཏཾ ཨཊྛཀཐཱསུ ཝུཏྟཾ, ཏཾ སབྦམྤི པམཱདལེཁཀཱནཾ པམཱདལེཁམཏྟཾ ཝཛྫཡིཏྭཱ. ཀིཾ སབྦེསམྤི པམཱཎཾ? ན, ཀིནྟུ སིཀྑཱསུ སགཱརཝཱནཾ ཨིདྷ ཝིནཡམྷི པཎྜིཏཱནཾ, མཧཱཨཊྛཀཐཱཡཾ པན སཙྩེཔི ཨལིཀེཔི དུཀྐཊམེཝ ཝུཏྟཾ, ཏཾ པམཱདལེཁནྟི ཝེདིཏབྦཾ. པམཱདལེཁཾ ཝཛྫཡིཏྭཱ པམཱཎཾ ཧེསྶཏཱིཏི སམྦནྡྷོ.

ཏཏོ ཙཱཏི ཨཊྛཀཐཱསུ ཝུཏྟཨཏྠཛཱཏཏོ ཏནྟིཀྐམཾ པཱལི༹ཀྐམཾ. སུཏྟནྟཱ སུཏྟཱཝཡཝཱ. ཨནྟོཏི ཧིདཾ ཨབྦྷནྟརཱཝཡཝསམྦྷཱཝནཱདཱིསུ དིསྶཏི. སུཏྟནྟེསུ བྷཝཱ སུཏྟནྟིཀཱ, ཏེསཾ སུཏྟནྟིཀཱནཾ, སུཏྟནྟགནྠེསུ ཨཱགཏཝཙནཱནནྟི ཨཏྠོ. ཨཐ ཝཱ ཨམཱིཡཏཱིཏི ཨནྟོ, སཱདྷཱིཡཏཱིཏི ཨདྷིཔྤཱཡོ. ཀེན སཱདྷཱིཡཏི? སུཏྟེན, སུཏྟསྶ ཨནྟོ སུཏྟནྟོ, ཀོ སོ? སོ སོ ཨཏྠཝིཀཔྤོ, ཏསྨིཾ སུཏྟནྟེ ནིཡུཏྟཱནི ཝཙནཱནི སུཏྟནྟིཀཱནི. ཏེསཾ སུཏྟནྟིཀཱནཾ ཝཙནཱནམཏྠཾ. ཏསྶ ཏསྶ ཨཱགམསུཏྟསྶ ཨབྷིདྷམྨཝིནཡསུཏྟསྶ ཙཱནུརཱུཔཾ པརིདཱིཔཡནྟཱི, ཨཡཾ ཏཱཝེཏྠ སམཱསཏོ ཨཏྠཝིབྷཱཝནཱ – ‘‘ཨིཏིཔི སོ བྷགཝཱ’’ཏིཨཱདཱིནཾ (སཾ. ནི. ༢.༤༡; ༥.༤༧༩; ཨ. ནི. ༦.༡༠; པཱརཱ. ༡) སུཏྟནྟིཀཱནཾ ཝཙནཱནམཏྠཾ ཨཱགམསུཏྟནྟཱནུརཱུཔཾ. ‘‘ཝིཝཱདཱདྷིཀརཎཾ སིཡཱ ¶ ཀུསལཾ སིཡཱ ཨཀུསལཾ སིཡཱ ཨབྱཱཀཏ’’ནྟི (ཙཱུལ༹ཝ. ༢༢༠) ཨེཝམཱདཱིནཾ ¶ ཨབྷིདྷམྨསུཏྟནྟིཀཱནཾ ཝཙནཱནམཏྠཾ ཨབྷིདྷམྨསུཏྟནྟཱནུརཱུཔནྟི ཨེཝམཱདི. ཧེསྶཏཱིཏི བྷཝིསྶཏི, ཀརཱིཡིསྶཏཱིཏི ཨདྷིཔྤཱཡོ. ཝཎྞནཱཔཱིཏི ཨེཏྠ ཨཔི-སདྡོ སམྤིཎྜནཏྠོ, སོ ཏསྨཱཏི པདེན ཡོཛེཏབྦོ. ཀཐཾ? པཎྜིཏཱནཾ པམཱཎཏྟཱཔི ཝིཏྠཱརམགྒསྶ སམཱསིཏཏྟཱཔི ཝིནིཙྪཡསྶ ཨསེསིཏཏྟཱཔི ཏནྟིཀྐམསྶ ཨཝོཀྐམིཏཏྟཱཔི སུཏྟནྟིཀཝཙནཱནཾ སུཏྟནྟཊྛཀཐཱནུརཱུཔཾ དཱིཔནཏོཔི ཏསྨཱཔི སཀྐཙྩཾ ཨནུསིཀྑིཏབྦཱཏི. ཨེཏྠ ‘‘ཏནྟིཀྐམཾ ཨཝོཀྐམིཏྭཱ’’ཏི ཝཙནེན སིདྡྷེཔི ‘‘ཨཊྛཀཐཱཙརིཡཱ ཝེརཉྫཀཎྜཱདཱིསུ ‘སུཏྟནྟིཀཱནཾ བྷཱརོ’ཏི གཏཱ, མཡཾ པན ཝཏྭཱཝ གམིསྶཱམཱ’’ཏི དསྶེཏུཾ ‘‘སུཏྟནྟིཀཱན’’ནྟི ཝུཏྟཾ ཀིར.

གནྠཱརམྦྷཀཐཱཝཎྞནཱ ནིཊྛིཏཱ.

བཱཧིརནིདཱནཀཐཱཝཎྞནཱ

ཏདངྒཝིནཡཱདིབྷེདེན ¶ ཝིནཡསྶབཧུཏྟཱ ཝིནཡོ ཏཱཝ ཝཝཏྠཔེཏབྦོ. ‘‘བུདྡྷེན དྷམྨོ ཝིནཡོ ཙ ཝུཏྟོ’’ཏི པུབྦེ ཝུཏྟཏྟཱ ཨིདཱནི ‘‘ཝུཏྟཾ ཡེནཱ’’ཏི ན ཝཏྟབྦནྟི ཙེ? ཏསྶ ཨེཝམཱདིཝཙནཾ སནྡྷཱཡ ཝུཏྟནྟི སམྦནྡྷོ. དྷཱརིཏཾ ཡེན ཙཱབྷཏཾ. ཡཏྠཔྤཏིཊྛིཏཉྩེཏནྟི ཝཙནཾ སཀལམྤི ཝིནཡཔིཊཀཾ སནྡྷཱཡ ཝུཏྟཾ. ཨཏྟཔཙྩཀྑཝཙནཾ ན ཧོཏཱིཏི ཨཱཧཙྩ བྷཱསིཏཾ ན ཧོཏཱིཏི ཨདྷིཔྤཱཡོ. ན ཧི བྷགཝཏོ ཨཏཱིཏཱདཱིསུ ཨཔྤཙྩཀྑཾ ཀིཉྩི ཨཏྠི. ཡདི ཨཏྟཔཙྩཀྑཝཙནཾ ན ཧོཏི, པདསོདྷམྨཱཔཏྟིཾ ན ཛནེཡྻཱཏི ཙེ? ན, སཱཝཀབྷཱསིཏསྶཔི པདསོདྷམྨཱཔཏྟིཛནནཏོ. ནིཡམཱབྷཱཝཱ ཨཏིཔྤསངྒོཏི ཙེ? ན, པདསོདྷམྨསིཀྑཱཔདཊྛཀཐཱཡཾ ‘‘སངྒཱིཏིཏྟཡཾ ཨཱརུལ༹ྷོ’’ཏི ཝིསེསིཏཏྟཱ. ཏཐཱ ཨཊྛཀཐཱཡམྤི སངྒཱིཏིཾ ཨཱརུལ༹ྷཏྟཱ ‘‘ཁནྡྷཱནཉྩ པཊིཔཱཊི…པེ… སཾསཱརོཏི པཝུཙྩཏཱི’’ཏི (དྷ. ས. ཨཊྛ. ནིདཱནཀཐཱ; ཝིབྷ. ཨཊྛ. ༢༢༦ སངྑཱརཔདནིདྡེས) ཨེཝམཱདིཝཙནཾ, ཡཉྩ སངྒཱིཏིཨཱརུལ༹ྷཀྐམཱནུགཏཾ, ཏཾ པདསོདྷམྨཱཔཏྟིཾ ཛནེཏཱིཏི ཨཱཡསྨཱ ཨུཔཏིསྶོ.

པཋམམཧཱསངྒཱིཏིཀཐཱཝཎྞནཱ

པཋམམཧཱསངྒཱིཏི ནཱམ ཙཱཏི ཨེཏྠ ཙ-སདྡོ ཨཏིརེཀཏྠོ, ཏེན ཨཉྙཱཔི ཨཏྠཱིཏི དཱིཔེཏི. ཏམྤི སཱལཝནཾ ཨུཔགནྟྭཱ མིཏྟསུཧཛྫེ ཨཔལོཀེཏྭཱ ནིཝཏྟནཏོ ཨུཔཝཏྟནནྟི པཱཀཊཾ ཛཱཏཾ ཀིར. ཡམཀསཱལཱནནྟི ཨེཀཱ ཀིར སཱལཔནྟི སཱིསབྷཱགེ, ཨེཀཱ པཱདབྷཱགེ. ཏཏྲཱཔི ཨེཀོ ¶ ཏརུཎསཱལོ སཱིསབྷཱགསྶ ཨཱསནྣེ ཧོཏི, ཨེཀོ པཱདབྷཱགསྶ, མཱུལཁནྡྷཝིཊཔཔཏྟེཧི ཨཉྙམཉྙཾ སཾསིབྦིཏྭཱ ཋིཏསཱལཱནནྟིཔི ཝུཏྟཾ. ཨནུཔཱདིསེསཱཡ ནིབྦཱནདྷཱཏུཡཱཏི ཨིཏྠམྦྷཱུཏལཀྑཎེ ཀརཎཝཙནཾ ‘‘ཀཏཀིཙྩོ པཱིཏིཛ ཧཱས ཙེཏོ ཨཝེརམུཁེནཱབྷཏཀུཎྜལེནཱ’’ཏིཨཱདཱིསུ ཝིཡ. པརིནིབྦཱནེ པརིནིབྦཱནཧེཏུ, ཏསྨིཾ ཋཱནེ ཝཱ མཱ སོཙིཏྠ ཙིཏྟེན, མཱ པརིདེཝིཏྠ ཝཱཙཱཡ ‘‘པརིདེཝནཾ ཝིལཱཔ’’ནྟི ཝཙནཏོ. མཧཱསམཎེནཱཏི ནིསྶཀྐཏྠེ ཀརཎཝཙནཾ. སཱུརིཡཾ’སཱུབྷི པཊུཀརཱ’བྷཱ’རིཎསྶ ཏཱཎཱ ཨིཏྱཏྲེཝ. ཡཉྩ བྷགཝཏོ ཨནུགྒཧཾ, ཏསྶ ཨནུགྒཧསྶཱཏི ཨཱཙརིཡཱ. ཨེཀཙྩེ པན ‘‘ཡཾ ཡསྨཱ ཨཧཾ ཨནུགྒཧིཏོ’’ཏི ཝདནྟི. ནིབྦསནཱནཱིཏི ནིཊྛིཏཝསནཀིཙྩཱནི, མཡཱ པརིབྷུཉྫིཏྭཱ ཨཔནཱིཏཱནི ¶ . ཡདི སུཡུཏྟཱནི དྷཱརེསྶསཱིཏི པུཙྪཏི, ཀཝཙསདིསཱནི སཱཎཱནི. ཨིསྶརིཡསདིསཱ ནཝ ཨནུཔུབྦཝིཧཱརཱདཡོ. ཨཊྛ སམཱཔཏྟིཡོ ནིརོདྷསམཱཔཏྟི ཙ པཊིལཱབྷཀྐམེན ‘‘ཨནུཔུབྦཝིཧཱརཱ’’ཏི ཝུཏྟཱ.

ཨནཱགཏེ སནྣིཀཊྛེ, ཏཐཱཏཱིཏེ ཙིརནྟནེ;

ཀཱལདྭཡེཔི ཀཝཱིཧི, པུརཱསདྡོ པཡུཛྫཏེ.

སཏྠུསཱསནམེཝ པརིཡཏྟི སཏྠུསཱསནཔརིཡཏྟི, སཱ སུཏྟགེཡྻཱདིཝསེན ནཝངྒཱ. ཏིཔིཊཀམེཝ སབྦཔརིཡཏྟིཔྤབྷེདཾ དྷཱརེནྟཱིཏི ཏིཔིཊཀསབྦཔརིཡཏྟིཔྤབྷེདདྷརཱ. ‘‘ཝིནཱ ན སཀྐཱ’’ཏི ན ཝཏྟབྦཾ ‘‘ཏིཔིཊཀསབྦཔརིཡཏྟིཔྤབྷེདདྷརེ’’ཏི ཝུཏྟཏྟཱ, ཨེཝཾ སནྟེཔི ཨཏྠི ཝིསེསོ ཏེཧི སམྨུཁཱཔི ཨསམྨུཁཱཔི སུཏཾ, ཐེརེན པན ཨསམྨུཁཱཔཊིགྒཧིཏཾ ནཱམ ནཏྠཱིཏི. ན ཝཱཡནྟི ཨེཏྠ ཝཱཏི ཝིབྷཱསཱ, ཨཉྙཱསིཔི ན ཨཉྙཱསིཔཱིཏི ཨཏྠོ. ཏཏྲ ཨུཙྩིནནེ. བཧུསདྡོ ཝིཔུལླཏྠོ ‘‘ཨནནྟཔཱརཾ བཧུ ཝེདིཏབྦམིཏྱ’’ཏྲེཝ. པུབྦེ ‘‘ཏིཔིཊཀསབྦཔཨཡཏྟིཔྤབྷེདདྷརེ’’ཏི ཝུཏྟཏྟཱ ‘‘བཧུ ཙཱནེན…པེ… པརིཡཏྟོ’’ཏི ན ཡུཛྫཏཱིཏི ཙེ? ན, ཏིཔིཊཀསྶ ཨནནྟཏྟཱ, ཏསྨཱ ཨམྷེ ཨུཔཱདཱཡ ཏེན བཧུ པརིཡཏྟོཏི ཨདྷིཔྤཱཡོ. ཨིཏརཐཱ ཨཱནནྡཏྠེརོ ཏེཧི ཨཔྤསྶུཏོཏི ཨཱཔཛྫཏི, ‘‘ཨསམྨུཁཱ པཊིགྒཧིཏཾ ནཱམ ནཏྠཱི’’ཏི ཝཙནཝིརོདྷོ ཙ. ཨཌྜྷམཱསོ ཨཏིཀྐནྟོཏི ཨེཏྠ ཨེཀོ དིཝསོ ནཊྛོ, སོ པཱཊིཔདདིཝསོ, ཀོལཱཧལདིཝསོ ནཱམ སོ, ཏསྨཱ ཨིདྷ ན གཧིཏོ. སཾཝེགཝཏྠུཾ ཀིཏྟེཏྭཱ ཀཱིལ༹ནཏོ སཱདྷུཀཱིལ༹ནཾ ནཱམ. སྭེཔཱིཏི ཨཔི-སདྡོ ཨཔེཀྑཱམནྟཱནུཉྙཱཡ. སུབྷསུཏྟཾ ‘‘ཨཙིརཔརིནིབྦུཏེ བྷགཝཏཱི’’ཏི (དཱི. ནི. ༡.༤༤༤) ཝུཏྟཏྟཱ ཙཏུརཱསཱིཏིདྷམྨཀྑནྡྷསཧསྶེསུ ཨནྟོགདྷཾ ན ཧོཏཱིཏི ཙེ? ན, བྷགཝཏོ ཀཱལེ ལདྡྷནཡཏྟཱ ཀཐཱཝཏྠུ ཝིཡ. ཚཌྜིཏཱ པཏིཏཱ ཨུཀླཱཔཱ ཚཌྜིཏཔཏིཏཨུཀླཱཔཱ. ཨཱཎཱ ཨེཝ ཨཔྤཊིཧཏཊྛེན ཙཀྐནྟི ཨཱཎཱཙཀྐཾ. ཨེཀཏོ ཨེཏྠ ནིཔཏནྟཱིཏི ཨེཀནིཔཱཏནཾ. ཨཱཀཱསེན ཨཱགནྟྭཱ ནིསཱིདཱིཏི ཨེཀེཏི ཨེཏཾ དུཏིཡཝཱརེ གམནཾ སནྡྷཱཡཱཏི ཨཱཡསྨཱ ཨུཔཏིསྶོ ¶ . པཋམཾ ཝཱ ཨཱཀཱསེན གནྟྭཱ པརིསཾ པཏྭཱ བྷིཀྑུཔནྟིཾ ཨཔཱིལེ༹ནྟོ པཐཝིཡཾ ནིམུཛྫིཏྭཱ ཨཱསནེ ཨེཝ ཨཏྟཱནཾ དསྶེསི. ཨུབྷཡཐཱ ཙ ཨཱཔཱཐཾ གཏོ, ཏེན ཨུབྷཡམྤི ཡུཛྫཏི, ཨཉྙཐཱ དྭཱིསུ ཨེཀཾ ཨབྷཱུཏཾ ཨཱཔཛྫཏི.

ཨཐ ¶ ཁོ ཨཱཡསྨཱ མཧཱཀསྶཔོ ཨཱཡསྨནྟཾ ཨུཔཱལིཾ པུཙྪི…པེ… ཨཱཡསྨཱ ཨུཔཱལིཏྠེརོ ཝིསྶཛྫེསཱིཏི ཨིདཾ པུབྦེ ‘‘པཋམཾ ཨཱཝུསོ ཨུཔཱལཱི’’ཏིཨཱདིནཱ (ཙཱུལ༹ཝ. ༤༣༩) ཝུཏྟཔུཙྪཱཝིསྶཛྫནཾ སངྑིཔིཏྭཱ སངྒཱིཏིཀཱརཀེཧི དསྶིཏཝཙནནྟི གཎྛིཔདེ ལིཁིཏཾ. ཏཐཱ ཧོཏུ, ཀིམཏྠཾ པནེཏྠ ‘‘ནིདཱནམྤི པུཙྪི, པུགྒལམྤི པུཙྪི, ཝཏྠུམྤི པུཙྪཱི’’ཏི ཨེཝཾ པུབྦེ དསྶིཏཱནུཀྐམེན ཨཝཏྭཱ ‘‘ཝཏྠུམྤི པུཙྪི, ནིདཱནམྤི པུཙྪི, པུགྒལམྤི པུཙྪཱི’’ཏི ཨེཝཾ ཨནུཀྐམོ ཀཏོཏི? ‘‘ཝཏྠུམཱུལཀཏྟཱ སིཀྑཱཔདཔཉྙཏྟིཡཱ ཨུཔྤཊིཔཱཊིཡཱ ཝུཏྟ’’ནྟི ཝདནྟི ཨེཀེ. ཨེཏྠ པན ཝིཙཱརཎཱ ཝེརཉྫཀཎྜེ སམྤཏྟེ ཀརཱིཡཏི. རཱཛཱགཱརཀེཏི ཨེཝཾནཱམཀེ ཨུཡྻཱནེ. ཨབྷིརམནཱརཧཾ ཀིར རཱཛཱགཱརམྤི. ཏཏྠ, ཡསྶ ཝསེནེཏཾ ཨེཝཾ ནཱམཾ ལབྷཏི. ཨཐ ཁོ ‘‘ཨཱཡསྨཱ མཧཱཀསྶཔོ’’ཏིཨཱདིནཱ པུབྦེ ཝུཏྟམེཝ སངྑིཔིཏྭཱ དསྶེཏི སངྒཱིཏིཀཱརཀོ ཝསཱིགཎོ. ཡདི ཨེཝཾ ཡཐཱ ནིདཱནམྤི པུཙྪི, པུགྒལམྤི པུཙྪཱིཏི ཨེཏྠ པུཙྪཱཀྐམོ དསྶིཏོ, ཏཐཱ ཨཱནནྡཏྠེརསྶ ཝིསྶཛྫནཀྐམོཔི ཀིམཏྠཾ ན དསྶིཏོཏི ཙེ? ཨིམིནཱནུཀྐམེན སངྒཧཾ པཉྩཔི ནིཀཱཡཱ ཨནཱརུལ༹ྷཱཏི དསྶནཏྠཾ. ཀཐཾ པན ཨཱརུལ༹ྷཱཏི? ཨཱཡསྨཱ མཧཱཀསྶཔོ པཉྩཔི ནིཀཱཡེ ཨནུཀྐམེནེཝ པུཙྪི, ཨཱནནྡཏྠེརོ པན ཨནུཀྐམེནེཝ པུཙྪིཏམྤི ཨཔུཙྪིཏམྤི ཏསྶ ཏསྶ སུཏྟསྶ སབྷཱཝཾ ཨནྟརཱ ཨུཔྤནྣཾ ཝཏྠུཾ ཨུདྡེསནིདྡེསཀྐམཾ མཱཏིཀཱཝིབྷངྒཀྐམནྟི ཨེཝམཱདིསབྦཾ ཨནུརཱུཔཝཙནཾ པཀྑིཔིཏྭཱ ཝིསྶཛྫེསི, ཏེནེཝཱཧ ‘‘ཨེཏེནེཝ ཨུཔཱཡེན པཉྩཔི ནིཀཱཡེ པུཙྪཱི’’ཏི. ཨཐ ཝཱ ‘‘ཨམྦལཊྛིཀཱཡཾ རཱཛཱགཱརཀེ’’ཏི ཝཏྟབྦེ ‘‘རཱཛཱགཱརཀེ ཨམྦལཊྛིཀཱཡ’’ནྟི ཨུཔྤཊིཔཱཊིཝཙནེནཔི ཨིམམཏྠཾ དཱིཔེཏི. ‘‘ཨམྦལཊྛིཀཱཡཾ ཝིཧརཏི རཱཛཱགཱརཀེ’’ཏི ཧི ཝུཏྟཾ.

གཧཀཱརནྟི ཨིམསྶ ཨཏྟབྷཱཝགེཧསྶ ཀཱརཀཾ ཏཎྷཱཝཌྜྷཀིཾ གཝེསནྟོ ཡེན ཉཱཎེན སཀྐཱ སོ དཊྛུཾ, ཏསྶཏྠཱཡ དཱིཔངྐརཔཱདམཱུལེ ཀཏཱབྷིནཱིཧཱརོ ཨེཏྟཀཾ ཀཱལཾ ཨནེཀཛཱཏིསཾསཱརཾ ཏཾ ཉཱཎཾ ཨཝིནྡནྟོ ཝིཙརིནྟི ཨཏྠོ. དུཀྑཱ ཛཱཏི པུནཔྤུནནྟི ཨིདཾ གཧཀཱརཀགཝེསནསྶ ཀཱརཎཝཙནཾ. སབྦཱ ཏེ ཕཱསུཀཱཏི ཏཝ སབྦཱ ཨནཝསེསཀིལེསཕཱསུཀཱ མཡཱ བྷགྒཱ. གཧཀཱུཊཾ ནཱམ ཨཝིཛྫཱ. སོམནསྶསཧགཏཾ ཉཱཎཾ སོམནསྶམཡཾ. ན ཧི སོམནསྶམཡཾ ཉཱཎཾ ཁནྡྷསབྷཱཝབྷེདཏོ. དལ༹ྷཱིཀམྨསིཐིལཀརཎཔྤཡོཛནཱཏི ཡེབྷུཡྻཏཱཡ ཝུཏྟཾ, ཏཾ ¶ པན ཏཏྠ ཏཏྠ པཀཱསཡིསྶཱམ. ཨཉྙམཉྙསངྐརཝིརཧིཏེ དྷམྨེ ཙ ཝིནཡེ ཙཱཏི ཨེཏྠ པཱཎཱཏིཔཱཏོ ཨཀུསལནྟི ཨེཝམཱདཱིསུ ¶ མརཎཱདྷིཔྤཱཡསྶ ཛཱིཝིཏིནྡྲིཡུཔཙྪེདཀཔྤཡོགསམུཊྛཱཔིཀཱ ཙེཏནཱ ཨཀུསལཾ, ན པཱཎསངྑཱཏཛཱིཝིཏིནྡྲིཡསྶ ཨུཔཙྪེདཀསངྑཱཏོ ཨཏིཔཱཏོ. ཏཐཱ ཨདིནྣསྶ པརསནྟཀསྶ ཨཱདཱནསངྑཱཏཱ ཝིཉྙཏྟི ཨབྱཱཀཏོ དྷམྨོ, ཏབྦིཉྙཏྟིསམུཊྛཱཔིཀཱ ཐེཡྻཙེཏནཱ ཨཀུསལོ དྷམྨོཏི (པཊྛཱ. ༡.༡.༢༧) ཨེཝམཱདིནཱ ཨཉྙམཉྙསངྐརཝིརཧིཏེ དྷམྨེ པཊིབལོ ཝིནེཏུཾ. ཛཱཏརཱུཔརཛཏཾ པརསནྟཀཾ ཐེཡྻཙིཏྟེན གཎྷནྟསྶ ཡཐཱཝཏྠུཾ པཱརཱཛིཀཐུལླཙྩཡདུཀྐཊེསུ ཨཉྙཏརཾ, བྷཎྜཱགཱརིཀསཱིསེན དིཡྻམཱནཾ གཎྷནྟསྶ པཱཙིཏྟིཡཾ, ཨཏྟཏྠཱཡ གཎྷནྟསྶ ནིསྶགྒིཡཾ པཱཙིཏྟིཡཾ, ཀེཝལཾ ལོལཏཱཡ གཎྷནྟསྶ ཨནཱམཱསདུཀྐཊཾ, རཱུཔིཡཚཌྜཀསམྨཏསྶ ཨནཱཔཏྟཱིཏི ཨེཝཾ ཨཉྙམཉྙསངྐརཝིརཧིཏེ ཝིནཡེཔི པཊིབལོ ཝིནེཏུནྟི ཨཏྠོ. བྷཱཝེཏཱིཏི ཝཌྜྷེཏི, ཨེཏེན ཕལཝསེན ཛཝནཝསེན ཙ ཙིཏྟསྶ ཝུདྡྷིཾ དསྶེཏི. ‘‘ཨཝིསིཊྛ’’ནྟི པཱཋོ, སཱདྷཱརཎནྟི ཨཏྠོ.

དེསེནྟསྶ ཝསེནེཏྠ, དེསནཱ པིཊཀཏྟཡཾ;

སཱསིཏབྦཝསེནེཏཾ, སཱསནནྟིཔི ཝུཙྩཏི.

ཀཐེཏབྦསྶ ཨཏྠསྶ, ཝསེནཱཔི ཀཐཱཏི ཙ;

དེསནཱ སཱསནཱ ཀཐཱ, བྷེདམྤེཝཾ པཀཱསཡེ.

སཱསནསྶ ནཔུཾསཀཏྟཱ ‘‘ཡཐཱ…པེ… དྷམྨསཱསནཱནཱི’’ཏི ཝུཏྟཾ. དུཙྩརིཏསཾཀིལེསཾ ནཱམ ཨཏྠཏོ ཙེཏནཱ, ཏཐཱཀཱརཔྤཝཏྟཙིཏྟུཔྤཱདོ ཝཱ. ཨནིཙྩཱདིལཀྑཎཾ པཊིཝིཛ྄ཛྷིཏྭཱ པཝཏྟཏྟཱ ཝིཔསྶནཱཙིཏྟཱནི ཝིསཡཏོ ལོཀིཡཱ’བྷིསམཡོ ཨསམྨོཧཏོ ལོཀུཏྟརོ, ལོཀུཏྟརོ ཨེཝ ཝཱ ཨབྷིསམཡོ ཝིསཡཏོ ནིབྦཱནསངྑཱཏསྶ ཨཏྠསྶ, ཨིཏརསྶ མགྒཱདིཀསྶ ཨསམྨོཧཏོཏིཔི ཨེཀེ. ཨེཏྠ ‘‘པཊིཝེདྷོ’’ཏི ཝུཏྟཾ ཉཱཎཾ, ཏཾ ཀཐཾ གམྦྷཱིརནྟི ཙེ? གམྦྷཱིརསྶ ཨུདཀསྶ པམཱཎགྒཧཎཀཱལེ དཱིགྷེན པམཱཎེན བྷཝིཏབྦཾ, ཨེཝཾ ཨལབྦྷནེཡྻབྷཱཝདསྶནཏྠཾ ཨིདཱནཱིཏི ཝུཏྟནྟི ཨེཀེ. ཡསྶ ཙཏྠཱཡ མགྒཕལཏྠཱཡ. ཏཉྩ ཨཏྠཾ ནཱནུབྷོནྟི ནཱདྷིགཙྪནྟི ཀཉྩི ཨཏྟནཱ ཨདྷིཔྤེཏཾ, ཨིཏིཝཱདཔམོཀྑཉྩ. ཀསྨཱ? ཨཏྠསྶ ཨནུཔཔརིཀྑིཏྭཱ གཧིཏཏྟཱ. ཨདྷིགཏཕལཏྟཱ པཊིཝིདྡྷཱཀུཔྤོ. པུན ཁཱིཎཱསཝགྒཧཎེན ¶ ཨརཧནྟམེཝ དསྶེཏི, ན སེཀྑཾ. སོ ཧི ཡཐཱ བྷཎྜཱགཱརིཀོ རཉྙོ ཀཊཀམཀུཊཱདིཾ གོཔེཏྭཱ ཨིཙྪིཏིཙྪིཏཀྑཎེ ཨུཔནེཏི, ཨེཝཾ སཧེཏུཀཱནཾ སཏྟཱནཾ མགྒཕལཏྠཱཡ དྷམྨཾ དེསེསི. ཏཱསཾཡེཝ ཏཏྠ ཝིནཡཔིཊཀེ པབྷེདཏོ ཝུཏྟཏྟཱ, ཝཱཡམིཏྭཱ ཏཱ ཨེཝ པཱཔུཎཱཏཱིཏི ཨཱཙརིཡཱ. ཀིམཏྠཾ ཏིསྶོཝ ཝིཛྫཱ ཏཏྠ ཝིབྷཏྟཱཏི? སཱིལསམྤཏྟིཡཱ ཨེཏཔརམུཔནིསྶཡབྷཱཝཏོ. ‘‘ཨཔརེཧིཔི སཏྟཧངྒེཧི སམནྣཱགཏོ བྷིཀྑུ ཝིནཡདྷརོ ¶ ཧོཏི. ཨཱཔཏྟིཾ ཛཱནཱཏི, ཨནཱཔཏྟིཾ, ལཧུཀཾ ཨཱཔཏྟིཾ, གརུཀཾ ཨཱཔཏྟིཾ, ཨནེཀཝིཧིཏཾ པུབྦེནིཝཱསཾ ཨནུསྶརཏི…པེ… དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན སཏྟེ པསྶཏི…པེ… ཨཱསཝཱནཉྩ ཁཡཱ…པེ… ཨུཔསམྤཛྫ ཝིཧརཏཱི’’ཏི (པརི. ༣༢༧) སུཏྟམེཏྠ སཱདྷཀཾ. ཝིནཡཾ པརིཡཱཔུཎིཏྭཱ སཱིལསམྤཏྟིཾ ནིསྶཱཡ ཨཱསཝཀྑཡཉཱཎེན སཧེཝ ཝིཡ དིབྦཙཀྑུཔུབྦེནིཝཱསཱནུསྶཏིཉཱཎཱནི པཊིལབྷཏི. ཝིསུཾ ཨེཏེསཾ པརིཀམྨཀིཙྩཾ ནཏྠཱིཏི དསྶནཏྠཾ ཏཱསཾཡེཝཱཏི ཝུཏྟནྟི ཙ ཝདནྟི ཨེཀེ. ཨབྷིདྷམྨེ པན ཏིསྶོཝིཛྫཱ ཚ ཨབྷིཉྙཱ ཙཏསྶོ ཙ པཊིསམྦྷིདཱ ཨཉྙེ ཙ སམྨཔྤདྷཱནཱདཡོ གུཎཝིསེསཱ ཝིབྷཏྟཱ. ཀིཉྩཱཔི ཝིབྷཏྟཱ, ཏཐཱཔི ཝིསེསཏོ པཉྙཱཛཱཏིཀཏྟཱ ཙཏསྶོ པཊིསམྦྷིདཱ པཱཔུཎཱཏཱིཏི དསྶནཏྠཾ ཏཱསཾ ཏཏྠེཝཱཏི ཨཝདྷཱརཎཝིཔལླཱསོ ཀཏོ. ཨཏྟནཱ དུགྒཧིཏེན དྷམྨེནཱཏི པཱཋསེསོ. ཀཏྟརི ཙེཏཾ ཀརཎཝཙནཾ, ཧེཏུཏྠེ ཙ, ཨཏྟནཱ དུགྒཧིཏཧེཏཱུཏི ཨདྷིཔྤཱཡོ. ཀསྨཱ པནཱཏི ‘‘ཨནུལོམིཀོ’’ཏི ཝུཏྟཏྠཾ དཱིཔེཏི.

པཋམམཧཱསངྒཱིཏིཀཐཱཝཎྞནཱནཡོ.

དུཏིཡསངྒཱིཏིཀཐཱཝཎྞནཱ

པནྣབྷཱརཱཏི པཏིཏཀྑནྡྷབྷཱརཱ. ‘‘བྷཱརཱ ཧཝེ པཉྩཀྑནྡྷཱ’’ཏི (སཾ. ནི. ༣.༢༢) ཧི ཝུཏྟཾ. ‘‘སམྨུཁཱ བྷཝིསྶཱམ ན བྷཝིསྶཱམཱ’’ཏི ཝཏྟཱརོ. ཏེསུ དཧརཱ ཀིར. ཛམྨིནྟི ལཱམཀཾ.

དུཏིཡསངྒཱིཏིཀཐཱཝཎྞནཱནཡོ.

ཏཏིཡསངྒཱིཏིཀཐཱཝཎྞནཱ

བྲཧྨལོཀཱ ¶ ཙཝིཏྭཱཏི ཨེཏྠ ཙཏྟཱརོ མགྒཱ པཉྩཱནནྟརིཡཱནི ནིཡཏམིཙྪཱདིཊྛཱིཏི ཨིམེཡེཝ ནིཡཏཱ, ན མཧགྒཏཱ, ཏསྨཱ པཎིདྷིཝསེན ཧེཊྛུཔཔཏྟིཔི ཧོཏི. ཨཏིཙྪཐཱཏི ཨཏིཙྩ ཨིཙྪཐ, གནྟྭཱ བྷིཀྑཾ པརིཡེསཐཱཏི ཨདྷིཔྤཱཡོ. ཀེཊུབྷཾ ནཱམ ཀབྱཀརཎཝིདྷིཡུཏྟཾ སཏྠཾ. ཀིརིཡཱཀཔྤཾ ཨིཏྱེཀེ, ཀཏྟཱཁྱཱདིལཀྑཎཡུཏྟསཏྠཾ. ཨསནྡྷིམིཏྟཱཏི ཏསྶཱ ནཱམཾ. ཏསྶཱ ཀིར སརཱིརེ སནྡྷཡོ ན པཉྙཱཡནྟི, མདྷུསིཏྠཀེན ཀཏཾ ཝིཡ སརཱིརཾ ཧོཏི. ཏསྨཱ ‘‘ཨེཝཾནཱམིཀཱ ཛཱཏཱ’’ཏིཔི ཝདནྟི. མཱགདྷཀེན པཏྠེན ཙཏྟཱརོ པཏྠཱ ཨཱལ༹ྷཀཾ, ཙཏྟཱརི ཨཱལ༹ྷཀཱནི ¶ དོཎཾ, ཙཏུདོཎཱ མཱནིཀཱ, ཙཏུམཱནིཀཱ ཁཱརིཀཱ, ཝཱིསཏིཁཱརིཀོ ཝཱཧོཏི. ཀེཐུམཱལཱཏི ‘‘སཱིསཏོ ཨུཊྛཧིཏྭཱ ཋིཏོ ཨོབྷཱསཔུཉྫོ’’ཏི ཝདནྟི. རཱཛིདྡྷིཨདྷིཀཱརཔྤསངྒེནེཏཾ ཝཏྠུ ཝུཏྟཾ, ནཱནུཀྐམེན. ཨནུཀྐམེན པན བུདྡྷསཱསནཱཝཧཱརཾ ཝཏྠུཾ དཱིཔེནྟོ ‘‘རཱཛཱ ཀིརཱ’’ཏིཨཱདིམཱཧ. ཀིལེསདམནེན དནྟཾ. ཀཱཡཝཱཙཱཧི གུཏྟཾ. ‘‘པཱཙཱིནམུཁོ’’ཏིཔི པཱཋོ ཨཏྠི. པུབྦེ ཛེཊྛབྷཱཏིཀཏྟཱ ཏེནེཝ པརིཙཡེན པཏྟགྒཧཎཏྠཱཡ ཨཱཀཱརཾ དསྶེཏི. ཨབྷཱསཱིཏི ‘‘བྷཱསིསྶཱམཱི’’ཏི ཝིཏཀྐེསི. ཨཔརེ ‘‘ཨཉྙཱཏནྟི ཝུཏྟེཔི སབྦཾ ཨབྷཎཱི’’ཏི ཝདནྟི. ཨམཏནྟི ནིབྦཱནསངྑཱཏཱཡ ནིཝཏྟིཡཱ སགུཎཱདྷིཝཙནཾ, ཏསྶཱ ཨཔྤམཱདོ པདཾ མགྒོ. མཙྩཱུཏི པཝཏྟིཡཱ སདོསཱདྷིཝཙནཾ, ཏསྶཱ པམཱདོ པདཾ མགྒོཏི ཨེཝཾ ཙཏྟཱརི སཙྩཱནི སནྡསྶིཏཱནི ཧོནྟི. སངྒྷསརཎགཏཏྟཱ སངྒྷནིསྶིཏཱ པབྦཛྫཱ, བྷཎྜུཀམྨསྶ ཝཱ ཏདཱཡཏྟཏྟཱ. ནིགྲོདྷཏྠེརསྶཱནུབྷཱཝཀིཏྟནཱདྷིཀཱརཏྟཱ པུབྦེ ཝུཏྟམྤི པཙྪཱ ཝཏྟབྦམྤི སམྤིཎྜེཏྭཱ ཨཱཧ ‘‘པུན རཱཛཱ ཨསོཀཱརཱམཾ ནཱམ མཧཱཝིཧཱརཾ ཀཱརེཏྭཱ སཊྛིསཧསྶཱནི…པེ… ཙཏུརཱསཱིཏིཝིཧཱརསཧསྶཱནི ཀཱརཱཔེསཱི’’ཏི. ‘‘པུཐུཛྫནཀལྱཱཎཀསྶ ཝཱ པཙྩཝེཀྑིཏཔརིབྷོགོ’’ཏི ཝཙནཏོ སེཀྑཱཝ པརམཏྠཏོ དཱཡཱདཱ, ཏཐཱཔི ཐེརོ མཧིནྡཀུམཱརསྶ པབྦཛྫཏྠཾ ཨེཀེན པརིཡཱཡེན ལོཀདྷམྨསིདྡྷེན ཨེཝམཱཧ ‘‘ཡོ ཀོཙི མཧཱརཱཛ…པེ… ཨོརསཾ པུཏྟ’’ནྟི. ཝུཏྟཉྷི ཝེདེ –

‘‘ཨངྒཱ ཨངྒཱ སམྦྷཝསི, ཧདཡཱ ཨདྷིཛཱཡསེ;

ཨཏྟཱ ཝེ པུཏྟོ ནཱམཱསི, ས ཛཱིཝ སརདོསཏ’’ནྟི.

ཏསྨཱ ¶ ཨིམིནཱ པརིཡཱཡེན ཨོརསོ པུཏྟོ མཱཏཱཔིཏཱུཧི པབྦཛིཏོ ཙེ, ཨཏྠཏོ ཏེ སཡཾ པབྦཛིཏཱ ཝིཡ ཧོནྟི. དྷམྨཀཐིཀཱ ཀསྨཱ ནཱརོཙེནྟི? རཱཛཱ ‘‘ཐེརཾ གཎྷིཏྭཱ ཨཱགཙྪཐཱ’’ཏི ཨམཙྩེ པེསེསི, དྷམྨཀཐིཀཱ ཐེརསྶ ཨཱགམནཀཱལེ པརིཝཱརཏྠཱཡ པེསིཏཱ, ཏསྨཱ. ཨཔིཙ ཏེན ཝུཏྟཝིདྷིནཱཝ ཝདནྟི ཙཎྜཏྟཱ, ཙཎྜབྷཱཝོ ཙསྶ ‘‘ཨམྦཾ ཚིནྡིཏྭཱ ཝེལུ༹ཡཱ ཝཏིཾ ཀརོཧཱི’’ཏི ཝུཏྟཨམཙྩཝཏྠུནཱ ཝིབྷཱཝེཏབྦོ. ཀསྨཱ པན དྷམྨཀཐིཀཱ རཱཛཱཎཱཔནཾ ཀརོནྟཱིཏི? ‘‘སཱསནཾ པགྒཧེཏུཾ སམཏྠོ’’ཏི ཝུཏྟཏྟཱ. དཱིཔཀཏིཏྟིརོཏི ཀཱུཊཏིཏྟིརོ. ཨཡཾ པན ཀཱུཊཏིཏྟིརཀམྨེ ནིཡུཏྟོཔི སུདྡྷཙིཏྟོ, ཏསྨཱ ཏཱཔསཾ པུཙྪི. སཱཎིཔཱཀཱརནྟི སཱཎིཔཱཀཱརེན. ཝིབྷཛིཏྭཱ ཝདཏཱིཏི ཝིབྷཛྫཝཱདཱི ‘‘ཨཏྠི ཁྭེས བྲཱཧྨཎ པརིཡཱཡོ’’ཏིཨཱདིནཱ (པཱརཱ. ༥). ཨཔིཙ སསྶཏཝཱདཱི ཙ བྷགཝཱ ‘‘ཨཏྠི, བྷིཀྑཝེ, ཨཛཱཏཾ ཨབྷཱུཏཾ ཨསངྑཏ’’ནྟིཨཱདི (ཨིཏིཝུ. ༤༣)-ཝཙནཏོ. ཨེཀཙྩསསྶཏིཀོ ཙ ‘‘སཔྤཙྩཡཱ ¶ དྷམྨཱ, ཨཔྤཙྩཡཱ དྷམྨཱ’’ཏི (དྷ. ས. དུཀམཱཏིཀཱ ༧) ཝཙནཏོ. ཨནྟཱནནྟིཀོ ཙ –

‘‘གམནེན ན པཏྟབྦོ, ལོཀསྶནྟོ ཀུདཱཙནཾ;

ན ཙ ཨཔྤཏྭཱ ལོཀནྟཾ, དུཀྑཱ ཨཏྠི པམོཙནཾ’’. (སཾ. ནི. ༡.༡༠༧; ཨ. ནི. ༤.༤༥);

‘‘ཨནམཏགྒོཡཾ, བྷིཀྑཝེ, སཾསཱརོ པུབྦཀོཊི ན པཉྙཱཡཏཱི’’ཏི (སཾ. ནི. ༢.༡༢༤; ཙཱུལ༹ནི. ཀཔྤམཱཎཝཔུཙྪཱནིདྡེས ༦༡) ཝཙནཏོ. ཨམརཱཝིཀྑེཔིཀཔཀྑམྤི ཨཱིསཀཾ བྷཛཏི བྷགཝཱ ‘‘སསྶཏོ ལོཀོཏི ཨབྱཱཀཏམེཏཾ ཨསསྶཏོ ལོཀོཏི ཨབྱཱཀཏམེཏ’’ནྟིཨཱདིཨབྱཱཀཏཝཏྠུདཱིཔནཏོ སམྨུཏིསཙྩདཱིཔནཏོ ཙ. ཏཉྷི ཨཛ྄ཛྷཏྟབཧིདྡྷཱདིཝསེན ན ཝཏྟབྦཾ. ཡཐཱཧ ‘‘ཨཱཀིཉྩཉྙཱཡཏནཾ ན ཝཏྟབྦཾ ཨཛ྄ཛྷཏྟཱརམྨཎནྟིཔཱི’’ཏིཨཱདི (དྷ. ས. ༡༤༣༧). ཏཐཱ ཨདྷིཙྩསམུཔྤནྣིཀཔཀྑམྤི བྷཛཏི ‘‘ལདྡྷཱ མུདྷཱ ནིབྦུཏིཾ བྷུཉྫམཱནཱ’’ཏི (ཁུ. པཱ. ༦.༧; སུ. ནི. ༢༣༠) ཝཙནཏོ. ཏཏྠ ཧི མུདྷཱཏི ཨདྷིཙྩསམུཔྤནྣཝེཝཙནཾ. སཉྙཱིཝཱདཱདིཀོ ཙ བྷགཝཱ སཉྙཱིབྷཝཨསཉྙཱིབྷཝནེཝསཉྙཱིནཱསཉྙཱིབྷཝཝསེན. ཨུཙྪེདཝཱདཱི ཙ ‘‘ཨཧཉྷི, བྲཱཧྨཎ, ཨུཙྪེདཾ ཝདཱམི རཱགསྶཱ’’ཏི (པཱརཱ. ༦) ཝཙནཏོ. དིཊྛདྷམྨནིབྦཱནཝཱདཱི ཙ ‘‘ཁཱིཎཱ ཛཱཏི, ཝུསིཏཾ བྲཧྨཙརིཡ’’ནྟི (མཧཱཝ. ༢༣; དཱི. ནི. ༢.༢༡༥; སཾ. ནི. ༣.༣༥) ཝཙནཏོ, ‘‘ནཏྠི དཱནི པུནབྦྷཝོ’’ཏི (མཧཱཝ. ༡༦) ཝཙནཏོ, དིཊྛེཝ དྷམྨེ ནིརོདྷསམཱཔཏྟིདཱིཔནཏོ ¶ ཙ. ཨེཝཾ ཏེན ཏེན པརིཡཱཡེན ཏཐཱ ཏཐཱ ཝེནེཡྻཛ྄ཛྷཱསཡཱནུརཱུཔཾ ཝིབྷཛིཏྭཱ ཝདཏཱིཏི ཝིབྷཛྫཝཱདཱི བྷགཝཱཏི.

ཏཏིཡསངྒཱིཏིཀཐཱཝཎྞནཱནཡོ.

པུཔྥནཱམོ སུམནཏྠེརོ. མཧཱཔདུམཏྠེརོཏི ཨེཀེ. མཧིཾསཀམཎྜལཾ ཨནྡྷརཊྛནྟི ཝདནྟི. དྷམྨཙཀྑུ ནཱམ ཏཡོ མགྒཱ. སོཏཱཔཏྟིམགྒནྟི ཙ ཨེཀེ. པཉྩཔི རཊྛཱནི པཉྩ ཙཱིནརཊྛཱནི ནཱམ. རཱཛགཧེཏི དེཝིཡཱ ཀཏཝིཧཱརེ. སིལཀཱུཊམྷཱིཏི པབྦཏཀཱུཊེ. ཝཌྜྷམཱནནྟི ཨལངྐརཎཙུཎྞཾ. ཨརིཡདེསེ ཨཏཱིཝ སམྨཏཾ ཀིར. ཨེཀརསེན ནཱཐཀརཎཱ ཨིཏི དམིལཱ༹. སཱརཔཱམངྒནྟི ཨུཏྟམཾ པཱམངྒཾ. པེཏཝཏྠུཨཱདིནཱ སཾཝེཛེཏྭཱ ཨབྷིསམཡཏྠཾ སཙྩསཾཡུཏྟཉྩ. མེགྷཝནུཡྻཱནཾ ནཱམ མཧཱཝིཧཱརཊྛཱནཾ. ‘‘དྭཱསཊྛིཡཱ ལེཎེསཱུ’’ཏི པཱཋོ. དསབྷཱཏིཀནྟི ཨབྷཡཀུམཱརཱདཡོ དས, ཏེ ཨིདྷ ¶ ན ཝུཏྟཱ. ཝུཏྠཝསྶོ པཝཱརེཏྭཱཏི ཙཱཏུམཱསིནིཡཱ པཝཱརཎཱཡཱཏི ཨཏྠོ. པཋམཔཝཱརཎཱཡ ཝཱ པཝཱརེཏྭཱ ཨེཀམཱསཾ ཏཏྠེཝ ཝསིཏྭཱ ཀཏྟིཀཔུཎྞམཱསིཡཾ ཨཝོཙ, ཨཉྙཐཱ ‘‘པུཎྞམཱཡཾ མཧཱཝཱིརོ’’ཏི ཝུཏྟཏྟཱ ན སཀྐཱ གཧེཏུཾ. མཧཱཝཱིརོཏི བུདྡྷོཔཙཱརེན དྷཱཏུཡོ ཝདཏི. ཛངྒྷཔྤམཱཎནྟི ‘‘ཐཱུཔསྶ ཛངྒྷཔྤམཱཎ’’ནྟི ཝདནྟི. མཱཏུལབྷཱགིནེཡྻཱ ཙཱུལོ༹དརམཧོདརཱ. དྷརམཱནསྶ ཝིཡ བུདྡྷསྶ རསྨི སརསརསྨི, རཉྙོ ལེཁཱསཱསནཾ ཨཔྤེསི, ཨེཝཉྩ མུཁསཱསནམཝོཙ. དོཎམཏྟཱ མགདྷནཱལི༹ཡཱ དྭཱདསནཱལི༹མཏྟཱ ཀིར. ‘‘པརིཙྪིནྣཊྛཱནེ ཚིཛྫིཏྭཱ’’ཏི པཱཋོ. སབྦདིསཱཧི པཉྩ རསྨིཡོ ཨཱཝཊྚེཏྭཱཏི པཉྩཧི ཕལེཧི ནིཀྑནྟཏྟཱ པཉྩ, ཏཱ པན ཚབྦཎྞཱཝ. ཀཏྟིཀཛུཎྷཔཀྑསྶ པཱཊིཔདདིཝསེཏི ཛུཎྷཔཀྑསྶ པཋམདིཝསེཏི ཨཏྠོ. མཧཱབོདྷིཊྛཱནེ པརིཝཱརེཏྭཱ ཋིཏནཱགཡཀྑཱདིདེཝཏཱཀུལཱནི. གོཔཀཱ ནཱམ རཱཛཔརིཀམྨིནོ ཏཐཱབྷཱཝཀིཙྩཱ. ཏེསཾ ཀུལཱནཾ ནཱམནྟིཔི ཀེཙི. ཨུདཀཱདིཝཱཧཱ ཀཱལིངྒཱ. ཀཱལིངྒེསུ ཛནཔདེསུ ཛཱཏིསམྤནྣཾ ཀུལཾ ཀཱལིངྒཀུལནྟི ཀེཙི.

པཋམཔཱཊིཔདདིཝསེཏི དུཏིཡཨུཔོསཐསྶ པཱཊིཔདདིཝསེཏི ཨཏྠོ. ཏཏྠ ཋིཏེཧི སམུདྡསྶ དིཊྛཏྟཱ ཏཾ ཋཱནཾ སམུདྡསཱལཝཏྠུ. སོལ༹ས ཛཱཏིསམྤནྣཀུལཱནི ཨཊྛ བྲཱཧྨཎཱམཙྩཀུལཱནི. མཧཱཨརིཊྛཏྠེརོ ཙེཏིཡགིརིམྷི ¶ པབྦཛིཏོ. ཨམཙྩསྶ པརིཝེཎཊྛཱནེཏི སམྤཏིཀཱལཝསེནཱཧ. མཧིནྡཏྠེརོ དྭཱདསཝསྶིཀོ ཧུཏྭཱ ཏམྦཔཎྞིདཱིཔཾ སམྤཏྟོ, ཏཏྠ དྭེ ཝསྶཱནི ཝསིཏྭཱ ཝིནཡཾ པཏིཊྛཱཔེསི, དྭཱསཊྛིཝསྶིཀོ ཧུཏྭཱ པརིནིབྦུཏོ. ཝིནཡོ སཾཝརཏྠཱཡཱཏི ཝིནཡཔིཊཀཾ, ཏསྶ པརིཡཱཔུཎནཾ ཝཱ. ཡཐཱབྷཱུཏཉཱཎདསྶནཾ སཔྤཙྩཡནཱམརཱུཔཔརིགྒཧོ. མགྒཱདིཔཙྩཝེཀྑཎེ ཨསཏི ཨནྟརཱ པརིནིབྦཱནཾ ནཱམ ནཏྠི སེཀྑསྶ མརཎཾ ཝཱ, སཏིཡེཝ ཧོཏི. ཏསྨཱ ཨཱཧ ‘‘ཝིམུཏྟིཉཱཎདསྶན’’ནྟི. ཨནུཔཱདཱཔརིནིབྦཱནཏྠཱཡཱཏི ཀཉྩི དྷམྨཾ ཨནུཔཱདཱཡ ཨགྒཧེཏྭཱ ཨཱིསཀམྤི ཨནཝསེསེཏྭཱ པརིནིབྦཱནཏྠཱཡཱཏི ཨཏྠོ. ཨུཔནིསཱཏི ‘‘ཝིནཡོ སཾཝརཏྠཱཡཱ’’ཏིཨཱདིཀཱ ཀཱརཎཔརམྤརཱ. ཨེཏྟཱཝཏཱ ཨཏྟཧིཏནིཔྥཏྟིཾ དསྶེཏྭཱ ཨིདཱནི པརཧིཏནིཔྥཏྟིཾ དསྶེཏུཾ ‘‘ཨེཏདཏྠཾ སོཏཱཝདྷཱན’’ནྟི ཨཱཧ. ཏསྶཏྠོ – ཨཏྟནོ ཝིནཡཀཐནཾ ཝིནཡམནྟནཉྩ ཨུགྒཧེཏུཾ པརེསཾ སོཏསྶ ཨོདཧནཾ སོཏཱཝདྷཱནཾ. ཏཏོ ཨུགྒཧིཏཝིནཡཀཐཱམནྟནཱནཾ ཏེསཾ ཨུཔནིསཱ ཡཐཱཝུཏྟཀཱརཎཔརམྤརཱ སིདྡྷཱཡེཝཱཏི ན པུན དསྶིཏཱཏི ཝེདིཏབྦཱ. ཨཉྙཐཱ ཨེཏདཏྠཱ ཨུཔནིསཱཏི ཨིམིནཱ ཝཙནེནེཝ ཨནུཔཱདཱཔརིནིབྦཱནསྶ སངྒཧིཏཏྟཱ ཨནུཔཱདཱཔརིནིབྦཱནཏོ ཨུདྡྷཾ སོཏཱཝདྷཱནཱསམྦྷཝཏོ ཨེཏདཏྠཾ སོཏཱཝདྷཱནནྟི ཨནྟེ ན སམྦྷཝཏཱིཏི ནིརཏྠཀཾ བྷཝེཡྻ, ན ཙ ནིརཏྠཀཾ པརཧིཏནིཔྥཏྟིཡཱ མཱུལཀཱརཎདསྶནཏྠཏྟཱཏི ཝེདིཏབྦཾ.

ཨེཝཾ ¶ ཡཐཱ ཡཐཱ ཡཾ ཡཾ, སམྦྷཝེཡྻ པདཾ ཨིདྷ;

ཏཾ ཏཾ ཏཐཱ ཏཐཱ སབྦཾ, པཡོཛེཡྻ ཝིཙཀྑཎོཏི.

བཱཧིརནིདཱནཀཐཱཝཎྞནཱ ནིཊྛིཏཱ.

པཱརཱཛིཀཝཎྞནཱ

ཝེརཉྫཀཎྜོ

ཝེརཉྫཀཎྜཝཎྞནཱ

‘‘ཏེན ¶ ¶ སམཡེན བུདྡྷོ བྷགཝཱ ཝེསཱལིཡཾ ཝིཧརཏི མཧཱཝནེ ཀཱུཊཱགཱརསཱལཱཡཾ. ཏེན ཁོ པན སམཡེན ཝེསཱལིཡཱ ཨཝིདཱུརེ ཀལནྡགཱམོ ནཱམ ཧོཏཱི’’ཏི ཝིནཡནིདཱནེ ཨཱརབྷིཏབྦེ ཝེརཉྫཀཎྜསྶ ཨཱརམྦྷོ ཀིམཏྠོཏི ཙེ? ཝུཙྩཏེ – མཱུལཏོ པབྷུཏི ཝིནཡནིདཱནཾ དསྶེཏུཾ. ཡདི ཨེཝཾ ‘‘པཋམཾ ཨཱཝུསོ ཨུཔཱལི པཱརཱཛིཀཾ ཀཏྠ པཉྙཏྟནྟི, ཝེསཱལིཡ’’ནྟི ཝཙནེན ཝིརུཛ྄ཛྷཏཱིཏི ཙེ? ན ཝིརུཛ྄ཛྷཏི. ཀསྨཱ? ཀཏྠ པཉྙཏྟནྟི ཧི ནིདཱནཔུཙྪཱ. ཨེཝཾ སནྟེཔི ‘‘པཋམསྶ པཱརཱཛིཀསྶ ཀིཾནིདཱན’’ནྟི པུཙྪིཏེ སཱདྷཱརཎམཧཱནིདཱནཝིསྶཛྫནཾ ཨཡུཏྟཾ ཝིཡཱཏི? ནཱཡུཏྟཾ, སབྦེསཾ སིཀྑཱཔདཱནཾ པཱཊེཀྐཾ ནིདཱནསྶ པུཊྛཏྟཱ ཏསྶ ཝིསྶཛྫེཏབྦཏྟཱ ཙ སབྦསཱདྷཱརཎམཧཱནིདཱནཾ པཋམམཱཧ. ཨེཀནྟེན པུཙྪཱཝིསྶཛྫནཀྐམེན པཱརཱཛིཀཱདཱིནི སངྒཧཾ ཨཱརོཔིཏཱནི. ཀཐཾ ཨཱརོཔིཏཱནཱིཏི ཙེ? ཨཱཡསྨཏཱ མཧཱཀསྶཔེན ཨནུཀྐམེན སབྦོཔི ཝིནཡོ པུཙྪིཏོ, པུཊྛེན ཙ ཨཱཡསྨཏཱ ཨུཔཱལིཏྠེརེན ཡཐཱསམྦྷཝཾ ནིརནྟརཾ ཝིསྶཛྫིཏམེཝ. ཨཔུཙྪིཏཱནིཔི ཝིནཱིཏཝཏྠུཨཱདཱིནི ཡུཛྫམཱནཱནི ཝཏྠཱུནི ཨནྟོཀཏྭཱ ཝིསྶཛྫནཀྐམེནེཝ གཎསཛ྄ཛྷཱཡམཀཾསཱུཏི ཝེདིཏབྦཾ. ཨཉྙཐཱ ཝེརཉྫཀཎྜཾ པཋམཔཱརཱཛིཀསྶེཝ ནིདཱནནྟི ཝཱ ཨནདྷིཀཱརིཀཾ ཝཱ ནིཔྤཡོཛནཾ ཝཱ པཱཊེཀྐཾ སིཀྑཱཔདནིདཱནཔུཙྪཱནནྟརཾ ཏདེཝ ཝིསྶཛྫེཏབྦནྟི ཝཱ ཨཱཔཛྫཏི, ཏསྨཱ ཨཱདིཏོ པབྷུཏི ཝིནཡནིདཱནཾ དསྶེཏུཾ ‘‘ཏེན སམཡེནཱ’’ཏིཨཱདི ཨཱརདྡྷཾ.

ཨིདཱནི ནིདཱནབྷཎནེ པཡོཛནཾ ཝཀྑཱམ – ཝིནཡསྶཨཱཎཱདེསནཏྟཱ བྷགཝཏོ ཏཱཝ ཨཱཎཱརཧབྷཱཝདཱིཔནཾ ¶ , ཨཱཎཱབྷཱུཏསྶ ཙ ཝིནཡསྶ ཨནཉྙཝིསཡབྷཱཝདཱིཔནཾ, ཨཱཎཱཡ ཋིཏཱནཾ སཱཝཀཱནཾ མཧཱནུབྷཱཝདཱིཔནཉྩཱཏི ཏིཝིདྷམསྶ པཡོཛནཾ. ཀཐཾ? ཨཱཎཱསཱསནཱརཧོ ཧི བྷགཝཱ པཧཱིནཀིལེསཏྟཱ, ཨདྷིགཏགུཎཝིསེསཏྟཱ, ལོཀཛེཊྛསེཊྛཏྟཱ, ཏཱདིབྷཱཝཔྤཏྟཏྟཱ ཙ, ཨརསརཱུཔཏཱདཱིཧི ཨཊྛཧི ཨཀྐོསཝཏྠཱུཧི ཨཀམྤནཏོ བྷགཝཏོ ཏཱདིབྷཱཝཔྤཏྟི ཝེདིཏབྦཱ, ཨཊྛནྣམྤི ཏེསཾ ཨཀྐོསཝཏྠཱུནཾ ཨཏྟནི སམྦྷཝཔརིཡཱཡདཱིཔནཔཱལི༹ཡཱ པཧཱིནཀིལེསཏཱ ཝེདིཏབྦཱ ¶ . ཙཏུནྣཾ ཛྷཱནཱནཾ ཏིསྶནྣཉྩ ཝིཛྫཱནཾ ཨདྷིགམཔརིདཱིཔནེན ཨདྷིགཏགུཎཝིསེསཏཱ ཝེདིཏབྦཱ. ‘‘ནཱཧཾ ཏཾ བྲཱཧྨཎ པསྶཱམི སདེཝཀེ…པེ… མུདྡྷཱཔི ཏསྶ ཝིཔཏེཡྻཱ’’ཏི ཙ ‘‘ཛེཊྛོ སེཊྛོ ལོཀསྶཱ’’ཏི ཙ ཝཙནེན ཛེཊྛསེཊྛཏཱ ཝེདིཏབྦཱ, ཨིདཉྩ བྷགཝཏོ ཨཱཎཱརཧབྷཱཝདཱིཔནཔྤཡོཛནཾ. ‘‘ཨཱགམེཧི ཏྭཾ སཱརིཔུཏྟ, ཨཱགམེཧི ཏྭཾ སཱརིཔུཏྟ, ཏཐཱགཏོཝ ཏཏྠ ཀཱལཾ ཛཱནིསྶཏཱི’’ཏི ཝཙནཾ ཨནཉྙཝིསཡབྷཱཝདཱིཔནཾ. ‘‘སཱདྷཱཧཾ, བྷནྟེ, པཐཝིཾ པརིཝཏྟེཡྻ’’ནྟི ཙ ‘‘ཨེཀཱཧཾ, བྷནྟེ, པཱཎིཾ ཨབྷིནིམྨིནིསྶཱམཱི’’ཏི ཙ ‘‘སཱདྷུ, བྷནྟེ, སབྦོ བྷིཀྑུསངྒྷོ ཨུཏྟརཀུརུཾ པིཎྜཱཡ གཙྪེཡྻཱ’’ཏི ཙ ཨིམེཧི ཐེརསྶ ཏཱིཧི སཱིཧནཱདེཧི ཨཱཎཱཡ ཋིཏཱནཾ སཱཝཀཱནཾ མཧཱནུབྷཱཝཏཱདཱིཔནཾ ཝེདིཏབྦཾ. སཱཝཏྠིཡཱདཱིསུ ཨཝིཧརིཏྭཱ ཀིམཏྠཾ བྷགཝཱ ཝེརཉྫཱཡམེཝ ཏདཱ ཝིཧཱསཱིཏི ཙེ? ནལེ༹རུཡཀྑསྶ པཱིཏིསཉྫནནཏྠཾ, བྷིཀྑུསངྒྷསྶ བྷིཀྑཱཝསེན ཨཀིལམནཏྠཾ, ཝེརཉྫབྲཱཧྨཎསྶ པསཱདསཉྫནནཏྠཾ, མཧཱམོགྒལླཱནཏྠེརསྶ ཨཱནུབྷཱཝདཱིཔནཊྛཱནབྷཱུཏཏྟཱ, སཱརིཔུཏྟཏྠེརསྶ ཝིནཡཔཉྙཏྟིཡཱཙནཧེཏུབྷཱུཏཔརིཝིཏཀྐནཊྛཱནབྷཱུཏཏྟཱ ཙ. ཏེསུ པཙྪིམཾ བལཝཀཱརཎཾ, ཏེན ཝུཏྟཾ ཨཊྛཀཐཱཡཾ ‘‘ཏེན སམཡེནཱཏི ཡེན ཀཱལེན ཨཱཡསྨཏོ…པེ… ཏེན ཀཱལེནཱ’’ཏི. པུརིམེསུ ཙཏཱུསུ ཨསངྒཧཀཱརཎེསུ པཋམེན བྷགཝཱ མེཏྟཱབྷཱཝནཱདིནཱ ཨམནུསྶཱནཾ ཙིཏྟསཾརཀྑཎེན བྷིཀྑཱུནཾ ཨཱདརཾ ཛནེཏི. དུཏིཡེན པརིསཱཝཙརེན བྷིཀྑུནཱ ཨེཝཾ པརིསཱ སངྒཧེཏབྦཱ, ཨེཝཾ ཨཔྤིཙྪེན སནྟུཊྛེན ཙ བྷཝིཏབྦནྟི ཝཱ དསྶེཏི. ཏཏིཡེན པཙྩཡེ ནིརཔེཀྑེན ཀུལཱནུགྒཧོ ཀཱཏབྦོཏི. ཙཏུཏྠེན ཨེཝཾ མཧཱནུབྷཱཝེནཱཔི པཙྩཡཏྠཾ ན ལོལུཔྤཾ ཀཱཏབྦཾ, ཀེཝལཾ པརདཏྟུཔཛཱིཝིནཱ བྷཝིཏབྦནྟི དསྶེཏི. ‘‘ཏེནཱཏིཨཱདིཔཱཋསྶ…པེ… ཝིནཡསྶཏྠཝཎྞན’’ནྟི ཝཙནཏོ ཨཉྙོ ཏེནཱཏིཨཱདིཔཱཋོ, ཨཉྙོ ཝིནཡོ ཨཱཔཛྫཏི.

‘‘ཏེནཱཏིཨཱདིཔཱཋམྷཱ, ཀོ ཨཉྙོ ཝིནཡོ ཨིདྷ;

ཏསྶཏྠཾ དསྶཡནྟོཝ, ཀརེ ཝིནཡཝཎྞན’’ནྟི. –

ཙེ? ནནུ ཝུཏྟཾ པུབྦེཝ ‘‘ཨིདཉྷི བུདྡྷསྶ བྷགཝཏོ ཨཏྟཔཙྩཀྑཝཙནཾ ན ཧོཏཱི’’ཏིཨཱདི, ཏསྨཱ ཨུཔཱལིཏྠེརེན ཝུཏྟསྶ ཏེནཱཏིཨཱདིཔཱཋསྶ ཨཏྠཾ ནཱནཔྤཀཱརཏོ དསྶཡནྟོ ཀརིསྶཱམི ཝིནཡསྶ ¶ བྷགཝཏོ ཨཏྟཔཙྩཀྑཝཙནབྷཱུཏསྶ ཨཏྠཝཎྞནནྟི ཨེཝམེཏྠ ཨཏྠོ དཊྛབྦོ. ཡདི ཨེཝཾ ‘‘ཏེན ¶ སམཡེན བུདྡྷོ བྷགཝཱ ཝེརཉྫཱཡཾ ཝིཧརཏཱིཏི ཨེཝམཱདིཝཙནཔཊིམཎྜིཏནིདཱནཾ ཝིནཡཔིཊཀཾ ཀེན དྷཱརིཏ’’ནྟིཨཱདིཝཙནཾ ཝིརུཛ྄ཛྷཏི ‘‘ཏེན སམཡེནཱ’’ཏིཨཱདིཝཙནསྶ ཝིནཡཔིཊཀཔརིཡཱཔནྣབྷཱཝདཱིཔནཏོཏི ཙེ? ན, ཨཉྙཏྠེཔི ཏབྦོཧཱརསིདྡྷིཏོ ‘‘ནཱནཱཝིདྷབྷིཏྟིཀམྨཔཊིམཎྜིཏཝསནོ པུརིསོ’’ཏིཨཱདཱིསུ ཝིཡ. ཝིནཡསྶཱདིབྷཱཝེན སངྒཱིཏིཀཱརཀེཧི ཨནུཉྙཱཏཏྟཱ ཝིནཡཔརིཡཱཔནྣཏཱཔི ཡུཛྫཏི ཏསྶ ཝཙནསྶ. ཨེཏྠཱཧ – ཡཐཱ སུཏྟནྟེ ‘‘ཨེཀཾ སམཡ’’ནྟི ཙ, ཨབྷིདྷམྨེ ཙ ‘‘ཡསྨིཾ སམཡེ’’ཏི ཨནིཡམཏོ ཝུཏྟཾ, ཏཐཱ ཨཝཏྭཱ ཨིདྷ ‘‘ཏེན སམཡེནཱ’’ཏི པཋམཾ ཏཾནིདྡེསོཝ ཀསྨཱ ཝུཏྟོཏི? ཝུཙྩཏེ – ཏསྶ ཏསྶ སིཀྑཱཔདཔཉྙཏྟིསམཡསྶ, ཡསྶ ཝཱ སིཀྑཱཔདཔཉྙཏྟིཧེཏུབྷཱུཏསྶ སམཡསྶ ཧེཏུ བྷགཝཱ ཏཏྠ ཏཏྠ ཝིཧཱསི, ཏསྶ ཙ སམཡསྶ ཨཏཱིཏསྶ ཏེསཾ སངྒཱིཏིཀཱརཀཱནཾ ཝསཱིནཾ སུཝིདིཏཏྟཱ. ཀཐཾ? ‘‘ཡེ ཏེ བྷིཀྑཱུ ཨཔྤིཙྪཱ ཏེ ཨུཛ྄ཛྷཱཡནྟཱི’’ཏིཨཱདིཝཙནཏོ, ‘‘ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུ’’ནྟི ཙ ‘‘ཨཐ ཁོ བྷགཝཱ ཨེཏསྨིཾ ནིདཱནེ སནྣིཔཱཏཱཔེཏྭཱ’’ཏི ཙ ‘‘བྷིཀྑཱུནཾ ཏདནུཙྪཝིཀཾ ཏདནུ…པེ… དས ཨཏྠཝསེ པཊིཙྩ སངྒྷསུཊྛུཏཱཡཱ’’ཏི ཙ ‘‘ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐཱ’’ཏི ཙ ཁནྡྷཀེསུ ཙ ‘‘ཨནུཛཱནཱམི, བྷིཀྑཝེ, ཏཱིཧི སརཎགམནེཧི པབྦཛྫ’’ནྟིཨཱདིཝིནཡཀྐམསྶ ཝཙནཏོ ཡོ སོ སིཀྑཱཔདཔཉྙཏྟིསམཡོ, ཏསྶ ཏསྶ ཝིནཡཀྐམསྶ སོ པཉྙཏྟིསམཡོ ཙ སུཝིདིཏོ ཏེསཾ པཉྩསཏཱནཾ དྷམྨདྷརཱནཾ བྷིཀྑཱུནཾ, ནཱཡཾ ནཡོ སུཏྟནྟཱབྷིདྷམྨེསུ སམྦྷཝཏི. ཏསྨཱ སུཝིདིཏཏྟཱ ཏེན སམཡེན ཧེཏུབྷཱུཏེན ཝིཧརཏཱིཏི ཝིཧརཏིཔདེན ཨེཀསམྦནྡྷཏྟཱ ཙ པཋམཾ ཡཾནིདྡེསཱདིནོ ཨསམྦྷཝཏོ ཙ ཝིནཡཔིཊཀེ ཏཾནིདྡེསོཝ པཋམཾ ཝུཏྟོ. ཀཐཾ? ཨེཏྠ ‘‘ཡེན ཁོ པན སམཡེན ཝེསཱལིཡཱ ཨཝིདཱུརེ ཀལནྡགཱམོ ནཱམ ཧོཏཱི’’ཏི ཝཱ ‘‘ཡེན ཁོ པན སམཡེན ཝེསཱལཱི…པེ… ཧོཏཱི’’ཏི ཝཱ ཨསམྦྷཝཏོ ཡཾནིདྡེསེན ཨཝཏྭཱ ཏཾནིདྡེསསྶེཝ སམྦྷཝཏོ ‘‘ཏེན ཁོ པན སམཡེན…པེ… ཀལནྡགཱམོ ནཱམ ཧོཏཱི’’ཏི ཝུཏྟནྟི, ཀེཝལཾ སུཝིདིཏཏྟཱ ཝཱ. ཨནིཡམནིདྡེསཝཙནནྟི ཨེཏྠ ཀིཉྩཱཔི ཡཐཱཝུཏྟནཡེན ནིཡམནིདྡེསཝཙནམེཝེཏཾ ཏཾནིདྡེསཏྟཱ, ཏཐཱཔི སམྤཏིཀཱལཝསེན ཏདིཏརེསཾ བྷིཀྑཱུནཾ ཨཝིདིཏཏྟཱ ‘‘ཨནིཡམནིདྡེསཝཙན’’ནྟི ཝུཏྟཾ. ཡཾ པན ཝུཏྟཾ ‘‘ཨཡཉྷི སབྦསྨིམྤི ཝིནཡེ ཡུཏྟཱི’’ཏི, ཏཾ ཏབྦཧུལེན ཝུཏྟནྟི ཝེདིཏབྦཾ.

ཡདི ¶ སབྦཾ ཏེནཱཏི པདཾ ཨནིཡམནིདྡེསཝཙནཾ བྷཝེཡྻ, ཏེན ཧི བྷིཀྑཝེ བྷིཀྑཱུནཾ སིཀྑཱཔདནྟི ཨེཏྠ ཨིདམྤི པུབྦེ སིདྡྷཏྠཾ ཏེནཱཏི པདཾ ཨནིཡམནིདྡེསཝཙནཾ བྷཝེཡྻ. ‘‘ཏེན སམཡེན བུདྡྷོ བྷགཝཱ ཨུརུཝེལཱཡཾ ཝིཧརཏཱི’’ཏིཨཱདཱིསུ ཝུཏྟཾ ཏེནཱཏི པདཉྩ ཨནིཡམནིདྡེསཝཙནཾ བྷཝེཡྻ, ན ཙ ཧོཏི, ཏསྨཱ ཡེསཾ ཏེན ཏཾནིདྡེསེན ནིདྡིཊྛཏྠོ ཨཝིདིཏོ, ཏེསཾ ¶ ཝསེནཱཧ ‘‘ཨནིཡམནིདྡེསཝཙནམེཏ’’ནྟི. ཨཐ ཝཱ ཏཏོ པཋམཾ ཏདཏྠཱདསྶནཏོ པཙྪཱཔི ཏཾསམྦནྡྷེན ཡཾནིདྡེསདསྶནཏོ ཙ ‘‘ཨནིཡམནིདྡེསཝཙནམེཏ’’ནྟི ཝུཏྟཾ. ཨཐ ཝཱ པུབྦཎྷཱདཱིསུ ཨཡཾ ནཱམཱཏི ཨནིཡམེཏྭཱ ཀཱལཔརིདཱིཔནསྶ སམཡསདྡསྶ ཨུཔཔདབྷཱཝེནཔི ཨེཝཾ ཝཏྟུམརཧཏི ‘‘ཡདིདཾ ཨནིཡམནིདྡེསཝཙན’’ནྟི. ཨཐ ཝཱ ‘‘ཏེནཱ’’ཏི ཝུཏྟེ ཏེན གྷཊེན པཊེནཱཏི སབྦཏྠཔྤསངྒནིཝཱརཎཏྠཾ ནིཡམཾ ཀརོཏི ‘‘སམཡེནཱ’’ཏི. ཀེན པན སམཡེན? པརབྷཱགེ ཨཏྠཏོ སིདྡྷེན སཱརིཔུཏྟསྶ པརིཝིཏཀྐསམཡེན. ཨེཏྠཱཧ – ཝིཏཀྐསམཡོ ཙེ ཨིདྷཱདྷིཔྤེཏོ, ‘‘པརཏོ ཨིདྷ པན ཧེཏུཨཏྠོ ཀརཎཏྠོ ཙ སམྦྷཝཏི. ཡོ ཧི སོ སིཀྑཱཔདཔཉྙཏྟིསམཡོ སཱརིཔུཏྟཱདཱིཧིཔི དུབྦིཉྙེཡྻོ, ཏེན སམཡེན ཧེཏུབྷཱུཏེན ཀརཎབྷཱུཏེན ཙཱ’’ཏིཨཱདིཝཙནཾ ཝིརུཛ྄ཛྷཏཱིཏི? ན, བཱཧུལླེན ཝུཏྟཏྟཱ. སུཏྟནྟཱབྷིདྷམྨེསུ ཝིཡ ཨཝཏྭཱ ཨིདྷ ཝིནཡཔིཊཀེ ཀརཎཝཙནེན ཀསྨཱ ནིདྡེསོཏི ཧི ཙོདནཱ. ཏསྨཱ ཏསྶཱ ཝིསྶཛྫནེ བཱཧུལླེན ཀརཎཝཙནཔྤཡོཛནཾ ཝཏྟུཀཱམོ ཨཱཙརིཡོ ཨཱཧ ‘‘ཡོ སོ སིཀྑཱཔདཔཉྙཏྟིསམཡོ’’ཏིཨཱདི. ན སམྤཏི ཝུཙྩམཱནསྶེཝ ཀརཎཝཙནསྶ པཡོཛནཾ ཝཏྟུཀཱམོ, ཨིམསྶ པན ཧེཏུཨཏྠོཝ སམྦྷཝཏི, ན ཀརཎཏྠོ, ཏསྨཱ ཨཱཧ ‘‘ཨཔརབྷཱགེ ཨཏྠཏོ སིདྡྷེནཱ’’ཏིཨཱདི. སམཡཉྩཱཏི ཨཱགམནཔཙྩཡསམཝཱཡཾ ཏདནུརཱུཔཀཱལཉྩ ཨུཔཱདཱཡཱཏི ཨཏྠོ. པཙྩཡསཱམགྒིཉྩ ཨཱགམནཀཱལཉྩ ལབྷིཏྭཱ ཛཱནིསྶཱམཱཏི ཨདྷིཔྤཱཡོ.

ཨེཏྠཱཧ – ཡཐཱ ‘‘ཨེཀོཝ ཁོ, བྷིཀྑཝེ, ཁཎོ སམཡོ ཙཱ’’ཏི ཨེཏྠ ཁཎསམཡཱནཾ ཨེཀོ ཨཏྠོ, ཏཐཱ ཀཱལཉྩ སམཡཉྩ ཨུཔཱདཱཡཱཏི ཀཱལསམཡཱནཾ ཨེཀོ ཨཏྠོ སིཡཱ, ཨཔིཙ ཨཱགམནཔཙྩཡསམཝཱཡོ ཙེཏྠ སམཡོ ཀཱལསྶཱཔི ཨཱགམནཔཙྩཡཏྟཱ སམཡགྒཧཎེནེཝ སོ གཧིཏོཏི ཝིསུཾ ཀཱལོ ཀིམཏྠཾ གཧིཏོཏི ཙ? ཝུཙྩཏེ – ཨཔྤེཝ ནཱམ སྭེཔཱིཏི ཀཱལསྶ པཋམཾ ནིཡམིཏཏྟཱ ན སམཡོ ཀཱལཏྠོ ¶ . ཏསྨིཾ སྭེཏི ནིཡམིཏཀཱལེ ཨིཏརེསཾ ཨཱགམནཔཙྩཡཱནཾ སམཝཱཡཾ པཊིཙྩ ཨུཔསངྐམེཡྻཱམ ཡཐཱནིཡམིཏཀཱལེཔི པུབྦཎྷཱདིཔྤབྷེདཾ ཡཐཱཝུཏྟསམཝཱཡཱནུརཱུཔཾ ཀཱལཉྩ ཨུཔཱདཱཡཱཏི སྭེཏི པརིཙྪིནྣདིཝསེ པུབྦཎྷཱདིཀཱལནིཡཏབྷཱཝཾ དསྶེཏི, ཏསྨཱ ཀཱལསམཡཱནཾ ན ཨེཀཏྠཏྟཱ ཀཱལསྶ ཝིསུཾ གཧཎམྤི སཱཏྠཀནྟི ཝེདིཏབྦཾ. ཡསྨཱ ཁཎེ ཁཎེ ཏྭཾ བྷིཀྑུ ཛཱཡསི ཙ ཛཱིཡསི ཙ མཱིཡསི ཙེཏི བྷིཀྑུནིཡཱ སནྟིཀེ ཨབྷིཀྑཎཾ གཙྪཏཱིཏི (པཱཙི. ༡༩༨) ཙ ཁཎེ ཁཎེ བྷཱསཏི སཏྠུསཱསནནྟི ཙ ཁཎསདྡོ ཨནེཀཏྠོ, ཏཐཱ སམཡསདྡོ ཙ, ཏསྨཱ ཨེཀམེཀེན ནིཡམེནྟོ ‘‘ཨེཀོཝ ཁོ, བྷིཀྑཝེ, ཁཎོ ཙ སམཡོ ཙཱ’’ཏི ཨཱཧ. ཁཎསམཡཱནཾ ཨཏྠོ ཨེཀཏྠོ ཡུཛྫཏི ཁཎོ ཨོཀཱསལཱབྷོ, ཨཊྛཀྑཎཝཛྫིཏོ ནཝམོ ཁཎོཏི ཨཏྠོ. ཨཏྟནོ ཨཏྟནོ ཨུཙྪེདཱདཡོ དིཊྛིགཏསངྑཱཏེ སམཡེ ཨེཏྠ པཝདནྟཱིཏི སམཡཔྤཝཱདཀོ. སྭེཝ ཏིནྡུཀཱཙཱིརསངྑཱཏཱཡ ཏིམྦརུརུཀྑཔནྟིཡཱ པརིཀྑིཏྟཏྟཱ ¶ ཏིནྡུཀཱཙཱིརཾ. ཨེཀསཱལཀེཏི ཨེཀོ སཱལརུཀྑོ. ‘‘ཀུཊིཀཱ’’ཏིཔི ཝདནྟི. ཨཏྠཱབྷིསམཡཱཏི ཨཏྟནོ ཧིཏཔཊིལཱབྷཱ. དྷཱིརོཏི ཙ པཎྜིཏོ ཝུཙྩཏི, ནཱཉྙོ. སམྨཱ མཱནཱབྷིསམཡཱཏི སུཊྛུ མཱནསྶ པཧཱནེན, སམུཙྪེདཝསེན སུཊྛུ མཱནཔྤཧཱནེནཱཏི ཨཏྠོ. དུཀྑསྶ པཱིལ༹ནཊྛོཏིཨཱདཱིསུ ‘‘ཙཏུནྣཾ སཙྩཱནཾ ཙཏཱུཧི ཨཱཀཱརེཧི པཊིཝེདྷོ’’ཏིཨཱདཱིསུ ཁནྡྷཔཉྩཀསངྑཱཏསྶ དུཀྑསྶ དུཀྑཱཀཱརཏཱཡཊྛོ. སངྑཏཊྛོ ཀཱརཎུཔྤཏྟིཨཏྠོ, དུཀྑཱཡ ཝེདནཱཡ སནྟཱཔཊྛོ. སུཁཱཡ ཝེདནཱཡ ཝིཔརིཎཱམཊྛོ. པཱིལ༹ནཊྛཱདིཀོཝ ཨབྷིསམཡཊྛོཏི ཨཏྠོ དཊྛབྦོ. གབྦྷོཀྐནྟིསམཡོཏིཨཱདཱིསུཔི པཐཝཱིཀམྤནཨཱལོཀཔཱཏུབྷཱཝཱདཱིཧི དེཝམནུསྶེསུ པཱཀཊོ. དུཀྐརཀཱརིཀསམཡོཔི ཀཱལོ༹ སམཎོ གོཏམོ ན ཀཱལོ༹ཏིཨཱདིནཱ པཱཀཊོ. སཏྟསཏྟཱཧཱནི ཙ ཨཉྙཱནི ཙ དིཊྛདྷམྨསུཁཝིཧཱརསམཡོ.

ཨཙྩནྟམེཝ ཏཾ སམཡནྟི ཨཱརམྦྷཏོ པཊྛཱཡ ཡཱཝ པཏྟསནྣིཊྛཱནཱ, ཏཱཝ ཨཙྩནྟསམྤཡོགེན ཏསྨིཾ སམཡེ. ཀརུཎཱཝིཧཱརེན ཝིཧཱསཱིཏི ཀརུཎཱཀིཙྩཝིཧཱརེན ཏསྨིཾ སམཡེ ཝིཧཱསཱིཏི ཨཏྠོ. ཏཾ སམཡཉྷི ཀརུཎཱཀིཙྩསམཡཾ. ཉཱཎཀིཙྩཾ ཀརུཎཱཀིཙྩནྟི དྭེ བྷགཝཏོ ཀིཙྩཱནི, ཨབྷིསམྦོདྷི ཉཱཎཀིཙྩཾ, མཧཱཀརུཎཱསམཱཔཏྟིཾ སམཱཔཛྫིཏྭཱ ཝེནེཡྻསཏྟཱཝལོཀནཾ ¶ ཀཏྭཱ ཏདནུརཱུཔཀརཎཾ ཀརུཎཱཀིཙྩཾ. ‘‘སནྣིཔཏིཏཱནཾ ཝོ, བྷིཀྑཝེ, དྭཡཾ ཀརཎཱིཡ’’ནྟི (མ. ནི. ༡.༢༧༣; ཨུདཱ. ༡༢, ༢༨) ཧི ཝུཏྟཾ, ཏཾ བྷགཝཱཔི ཀརོཏིཡེཝ. ཨཐ ཝཱ ཨཱགནྟུཀེཧི བྷིཀྑཱུཧི ཨཱདིསམཱཡོགཉྩ. ཏཏྠ ཀརུཎཱཀིཙྩཾ ཝིཧཱརཾ དསྶེནྟོ ‘‘ཀརུཎཱཝིཧཱརེན ཝིཧཱསཱི’’ཏི ཨཱཧ. ཨདྷིཀརཎཉྷི ཀཱལཏྠོཏི ཨེཏྠ ཧི-ཀཱརོ ཀཱརཎཏྠོ. ཏཏྠ ཧི ཨབྷིདྷམྨེ ཀཱལསམཱུཧཁཎསམཝཱཡཧེཏུསངྑཱཏཝསེན པཉྩཝིདྷོ སམཡཊྛོ དཊྛབྦོ. ཀཱལསམཱུཧཊྛོ སམཡོ ཀཐཾ ཨདྷིཀརཎཾ ཧོཏི? ཨདྷིཀརཎམུཔྤཏྟིཊྛཱནཾ པུབྦཎྷེ ཛཱཏོཏི ཡཐཱ, ཨེཝཾ ཀཱལཊྛོ སམཡསདྡོ དཊྛབྦོ. ཀཐཾ རཱསཊྛོ? ཡཝརཱསིམྷི ཛཱཏོཏི ཡཐཱ. ཏསྨཱ ཡསྨིཾ ཀཱལེ པུཉྫེ ཝཱ ཙིཏྟཾ སམུཔྤནྣཾ, ཏསྨིཾ ཀཱལེ པུཉྫེ ཝཱ ཕསྶཱདཡོ ཨུཔྤཛྫནྟཱིཏི ཝུཏྟཾ ཧོཏི. ཨདྷིཀརཎཉྷཱིཏི ཨེཏྠ ཨབྷིདྷམྨེ ནིདྡིཊྛཾ ཨདྷིཀརཎཾ ཀཱལཊྛོ སམཱུཧཊྛོ ཙ ཧོཏི, ‘‘ཡསྨིཾ སམཡེ’’ཏི ཝུཏྟཾ ཨདྷིཀརཎཾ སནྡྷཱཡ ཝུཏྟནྟི དཊྛབྦཾ. ཨིདཱནི བྷཱཝེནབྷཱཝལཀྑཎཉྩ དསྶེནྟོ ‘‘ཏཏྠ ཝུཏྟཱན’’མིཙྩཱདིམཱཧ. ཏཏྠ ཨབྷིདྷམྨེ ཝུཏྟཱནཾ བྷཱཝོ ནཱམ ཀིནྟི? ཨུཔྤཏྟི ཝིཛྫམཱནཏཱ, སཱ ཏེསཾ ཏཏྠ ཝུཏྟཱནཾ ཕསྶཱདིདྷམྨཱནཾ, སཱ པན སམཡསྶ བྷཱཝེན བྷཱཝོ ལཀྑཱིཡཏི ཉཱཡཏི, ཏསྨཱ ཏཏྠ བྷུམྨཝཙནནིདྡེསོ ཀཏོཏི ཝུཏྟཾ ཧོཏི.

ཏཏྠ ཁཎོ ནཱམ ཨཊྛཀྑཎཝིནིམུཏྟོ ནཝམོ ཁཎོ, ཏསྨིཾ སཏི ཨུཔྤཛྫཏི. སམཝཱཡོ ནཱམ ¶ ཙཀྑུནྡྲིཡཱདིཀཱརཎསཱམགྒཱི, ཏསྨིཾ སཏི ཨུཔྤཛྫཏི. ཧེཏུ ནཱམ རཱུཔཱདིཨཱརམྨཎཾ. ཏསྨཱ ཏསྨིཾ ཁཎཀཱརཎསམཝཱཡཧེཏུམྷི སཏི ཏེསཾ ཕསྶཱདཱིནཾ བྷཱཝོ ཝིཛྫམཱནཏཱ ཧོཏཱིཏི ཝུཏྟཾ ཧོཏི. ཨིདྷ པན ཧེཏུཨཏྠོ ཀརཎཏྠོ ཙ སམྦྷཝཏཱིཏི ཨེཏྠ ཨཏྠདྭཡམེཀསྶ སམྦྷཝཏཱིཏི ཨིདྷ ཝིནཡེ ཝུཏྟསྶ སམཡསདྡསྶ ཀཏྟུཀརཎཏྠེ ཏཏིཡཱ ཧེཏུམྷི ཙ ཨིཏྱུཏྟཏྟཱ. སོ དུབྦིཉྙེཡྻོཏི ‘‘ཏཐཱགཏོཝ ཏཏྠ ཀཱལཾ ཛཱནིསྶཏཱི’’ཏི ཝུཏྟཏྟཱཏི ཝུཏྟཾ ཧོཏི. ཏེན སམཡེནཱཏི ཏསྶ སམཡསྶ ཀཱརཎཱ ‘‘ཨནྣེན ཝསཏི ཝིཛྫཱཡ ཝསཏཱི’’ཏི ཡཐཱ, ཨནྣཾ ཝཱ ཝིཛྫཾ ཝཱ ལབྷཱམཱིཏི ཏདཏྠཾ ཝསཏཱིཏྱཏྠོ. ཨེཝཾ ‘‘ཏེན སམཡེན ཝིཧརཏཱི’’ཏི ཝུཏྟེ ཧེཏྭཏྠེ ཏཏིཡཱ དཊྛབྦཱ, ཏསྨཱ སིཀྑཱཔདཔཉྙཏྟིཡཱ སམཡཉྩ ཝཱིཏིཀྐམཉྩ ཨོལོཀཡམཱནོ ཏཏྠ ཏཏྠ ཝིཧཱསཱིཏི ཝུཏྟཾ ཧོཏི. ཏཏིཡཔཱརཱཛིཀཱདཱིསུ ‘‘ཨིཙྪཱམཧཾ, བྷིཀྑཝེ, ཨདྡྷམཱསཾ ¶ , པཊིསལླཱིཡིཏུ’’ནྟི (པཱརཱ. ༡༦༢) ཨེཝམཱདཱིསུ དཊྛབྦཱ, ཏསྨཱ དུཏིཡཱ ཀཱལདྡྷཱནེ ཨཙྩནྟསཾཡོགེཏི དུཏིཡཱཏྲ སམྦྷཝཏི ‘‘མཱསམདྷཱིཏེ དིཝསམདྷཱིཏེ’’ཏི ཡཐཱ. ཨིདྷ པན ཧེཏུཨཏྠོ ཀརཎཏྠོ ཙ སམྦྷཝཏཱིཏི ཨེཏྠ ཡསྶ ཀརཎཝཙནསྶ ཧེཏུཨཏྠོ སམྦྷཝཏི, ཏེན སམཡེན ཧེཏུབྷཱུཏེན ཏཾ ཏཾ ཝཏྠུཝཱིཏིཀྐམསངྑཱཏཾ ཝཱིཏིཀྐམསམཡསངྑཱཏཾ ཝཱ སིཀྑཱཔདཔཉྙཏྟིཧེཏུཉྩ ཨཔེཀྑམཱནོ བྷགཝཱ ཏཏྠ ཏཏྠ ཝིཧཱསི. ཡསྶ ཀརཎཏྠོ སམྦྷཝཏི, ཏེན ཀརཎབྷཱུཏེན སམཡེན སམྤཏྟེན སིཀྑཱཔདཱནི པཉྙཱཔཡནྟོ བྷགཝཱ ཏཏྠ ཏཏྠ ཝིཧཱསཱིཏི ཨདྷིཔྤཱཡོ.

གཎྛིཔདེ པན ‘‘སུདིནྣཱདཱིནཾ ཝཱིཏིཀྐམོཝ ཀཱརཎཾ ནཱམ, ཏསྶ ནིཡམབྷཱུཏོ ཀཱལོ པན ཀརཎམེཝ ཏཾ ཀཱལཾ ཨནཏིཀྐམིཏྭཱཝ སིཀྑཱཔདསྶ པཉྙཔེཏབྦཏྟཱ’’ཏི ཝུཏྟཾ, ཏཾ ནིདྡོསཾ. ཡཾ པན ཝུཏྟཾ ‘‘ཨིདཾ ཀརཎཾ པུབྦབྷཱགཏྟཱ པཋམཾ ཝཏྟབྦམྤི པཙྪཱ ཝུཏྟ’’ནྟི, ཏཾ དུཝུཏྟཾ. ཧེཏུཨཏྠཏོ ཧི ཡཐཱ པཙྪཱ ཀརཎཏྠོ ཡོཛིཡམཱནོ ཨནུཀྐམེནེཝ ཡོགཾ གཙྪཏི, ཏཐཱ ཙ ཡོཛིཏོ. ཡཾ པན ཨཊྛཀཐཱཙརིཡོ པཙྪཱ ཝུཏྟཾ ཨིདཾ ཀརཎཏྠཾ པཋམཾ ཡོཛེཏྭཱ པཋམཾ ཝུཏྟཾ ཧེཏུཨཏྠཾ པཙྪཱ ཡོཛེསི, ཏཾ ཡོཛནཱསུཁཏྟཱཏི ཝེདིཏབྦནྟི ཨཱཙརིཡེན ལིཁིཏཾ. ཨིཏོ པཊྛཱཡ ཡཏྠ ཡཏྠ ‘‘ཨཱཙརིཡེན ལིཁིཏ’’ནྟི ཝཱ ‘‘ཨཱཙརིཡསྶ ཏཀྐོ’’ཏི ཝཱ ཝུཙྩཏི, ཏཏྠ ཏཏྠ ཨཱཙརིཡོ ནཱམ ཨཱནནྡཱཙརིཡོ ཀལསཔུརཝཱསཱིཏི གཧེཏབྦོ. ཨེཏྠཱཧ – ཡཐཱ སུཏྟནྟེ ‘‘ཨེཀཾ སམཡཾ བྷགཝཱ’’ཏི ཝུཙྩཏི, ཏཐཱ ‘‘ཏེན སམཡེན བྷགཝཱ ཝེརཉྫཱཡ’’ནྟི ཝཏྟབྦཾ, ཨཐ སཝེཝཙནཾ ཝཏྟུཀཱམོ ཐེརོ, ཏཐཱགཏོ སུགཏོཏིཨཱདཱིནིཔི ཝཏྟབྦཱནི, ཨཐ ཨིམསྶེཝ པདདྭཡསྶ གཧཎེ ཀིཉྩི པཡོཛནཾ ཨཏྠི, ཏཾ ཝཏྟབྦནྟི? ཝུཙྩཏེ – ཀེསཉྩི བུདྡྷསྶ བྷགཝཏོ པརམགམྦྷཱིརཾ ཨཛ྄ཛྷཱསཡཀྐམཾ ཨཛཱནཏཾ ‘‘ཨཔཉྙཏྟེ སིཀྑཱཔདེ ཨནཱདཱིནཝདསྶོ…པེ… ཨབྷིཝིཉྙཱཔེསཱི’’ཏིཨཱདིཀཾ (པཱརཱ. ༣༦) ‘‘ཨཐ ཁོ བྷགཝཱ ཨཱཡསྨནྟཾ སུདིནྣཾ པཊིཔུཙྪཱི’’ཏིཨཱདིཀཉྩ (པཱརཱ. ༣༩) ‘‘སཱདིཡི ཏྭཾ བྷིཀྑཱུཏི. ནཱཧཾ བྷགཝཱ སཱདིཡི’’ནྟིཨཱདིཀཉྩ (པཱརཱ. ༧༢) ¶ ཏཐཱ པུརཱཎཝོཧཱརིཀཾ བྷིཀྑུཾ པུཙྪིཏྭཱ ཏེན ཝུཏྟཔརིཙྪེདེན དུཏིཡཔཱརཱཛིཀཔཉྙཱཔནཉྩ དེཝདཏྟསྶ པབྦཛྫཱནུཛཱནནཉྩཱཏི ཨེཝམཱདིཀཾ ཝིནཡཔརིཡཏྟིཾ དིསྭཱ བུདྡྷསུབུདྡྷཏཾ པཊིཙྩ སངྐཱ སམྦྷཝེཡྻ, ‘‘ཏཐཱ ཀིཾ པན ཏུཡ྄ཧཾ ཚཝསྶ ཁེལཱ༹སཀསྶཱ’’ཏི ¶ (ཙཱུལ༹ཝ. ༣༣༦) ཨེཝམཱདིཀཾ ཕརུསཝཙནཔཊིསཾཡུཏྟཾ ཝིནཡཔརིཡཏྟིཾ ནིསྶཱཡ ཁཱིཎཱསཝཏྟཾ པཊིཙྩ སངྐཱ སམྦྷཝེཡྻ, ཏདུབྷཡསངྐཱཝིནོདནཏྠཾ ཨཱཡསྨཏཱ ཨུཔཱལིཏྠེརེན ཨིདམེཝ པདདྭཡགྒཧཎཾ སབྦཏྠ ཀཏནྟི ཝེདིཏབྦཾ. ཏེནེཏཾ དཱིཔེཏི – ཀཱམཾ སབྦཉེཡྻབུདྡྷཏྟཱ བུདྡྷོཡེཝ, བྷགྒསབྦདོསཏྟཱ བྷགཝཱཝ, སོ སཏྠཱཏི. པརཏོཔི ཝུཏྟཾ ‘‘ཛཱནནྟཱཔི ཏཐཱགཏཱ པུཙྪནྟི…པེ… ཨནཏྠསཾཧིཏེ སེཏུགྷཱཏོ ཏཐཱགཏཱན’’ནྟི (པཱརཱ. ༡༦). སུཏྟནྟེ ཙ ཝུཏྟཾ ‘‘སཎྷེནཔི ཀེསི ཝིནེམི ཕརུསེནཔཱི’’ཏིཨཱདི (ཨ. ནི. ༤.༡༡༡).

ཨསཱདྷཱརཎཧེཏུམྷཱིཏི ཨེཏྠ ཀུསལམཱུལཱནི ན ཨཀུསལཱནཾ ཀདཱཙི མཱུལཱནི ཧོནྟི, ཏཐཱ ཨཀུསལམཱུལཱནི ཀུསལཱནཾ, ཨབྱཱཀཏམཱུལཱནི ན ཀདཱཙི ཀུསལཱནནྟི ཨཡམེཝ ནཡོ ལབྦྷཏི, ཡསྨཱ ཀུསལཱ ཧེཏཱུ ཏཾསམུཊྛཱནཱནཾ རཱུཔཱནཾ ཧེཏུཔཙྩཡེན པཙྩཡོ (པཊྛཱ. ༡.༡.༤༠༡ ཨཱདཡོ), ཏསྨཱ ཀུསལཱནི ཀུསལཱནཾཡེཝཱཏིཨཱདིནཡོ ན ལབྦྷཏི. པུཙི ཝུཙྩཏེ ཀུཊྛཱ, ཏེ མནྡཡཏི ནཱསཡཏཱིཏི པུཙིམནྡོ. སཏྟཱནཾ ཧིཏསུཁནིཔྥཱདནཱདྷིམུཏྟཏནྟི ཨེཏྠ སཱམཉྙཏོ ཝུཏྟསཏྟེ དྭིདྷཱ བྷིནྡིཏྭཱ དསྶེཏུཾ ‘‘མནུསྶཱནཾ ཨུཔཀཱརབཧུལཏ’’ནྟིཨཱདི ཝུཏྟཾ. བཧུཛནཧིཏཱཡཱཏི བཧུནོ ཛནསྶ ཧིཏཏྠཱཡ. པཉྙཱསམྤཏྟིཡཱ དིཊྛདྷམྨིཀསམྤརཱཡིཀཧིཏཱུཔདེསཀོ ཧི བྷགཝཱ. སུཁཱཡཱཏི སུཁཏྠཱཡ. ཙཱགསམྤཏྟིཡཱ ཨུཔཀཱརཀསུཁསམྤདཱཡཀོ ཧི ཨེས. མེཏྟཱཀརུཎཱསམྤཏྟིཡཱ ལོཀཱནུཀམྤཱཡ མཱཏཱཔིཏརོ ཝིཡ. ལོཀསྶ རཀྑིཏགོཔིཏཱ ཧི ཨེས. དེཝམནུསྶཱནནྟི ཨེཏྠ བྷབྦཔུགྒལེ ཝེནེཡྻསཏྟེཡེཝ གཧེཏྭཱ ཏེསཾ ནིབྦཱནམགྒཕལཱདྷིགམཱཡ ཨཏྟནོ ཨུཔྤཏྟིཾ དསྶེཏི. ‘‘ཨཏྠཱཡཱ’’ཏི ཧི ཝུཏྟེ པརམཏྠཏྠཱཡ ནིབྦཱནཱཡ, ‘‘ཧིཏཱཡཱ’’ཏི ཝུཏྟེ ཏཾསམྤཱཔཀམགྒཏྠཱཡཱཏི ཝུཏྟཾ ཧོཏི, མགྒཏོ ཨུཏྟརི ཧིཏཾ ནཱམ ནཏྠཱིཏི. སུཁཱཡཱཏི ཕལསམཱཔཏྟིསུཁཏྠཱཡ ཏཏོ ཨུཏྟརི སུཁཱབྷཱཝཏོ. དིཊྛིསཱིལསངྒྷཱཏེནཱཏི ཨེཏྠ སམཱདྷིཾ པཉྙཉྩ ཨགྒཧེཏྭཱ དིཊྛིསཱིལམཏྟགྒཧཎཾ སབྦསེཀྑཱསེཀྑསཱམཉྙཏྟཱ. ཀོསམྦཀསུཏྟེཔི (མ. ནི. ༡.༤༩༢) ‘‘སཱིལསཱམཉྙགཏོ ཝིཧརཏི, དིཊྛིསཱམཉྙགཏོ ཝིཧརཏཱི’’ཏི ཝུཏྟཾ. དིཊྛིགྒཧཎེན པཉྙཱཔི གཧིཏཱཏི ཙེ? ན, སོཏཱཔནྣཱདཱིནམྤི པཉྙཱཡ པརིཔཱུརཀཱརིབྷཱཝཔྤསངྒཏོ, ཏསྨཱ ཨེཀལཀྑཎཱནམྤི ཏཱསཾ པཉྙཱདིཊྛཱིནཾ ཨཝཏྠནྟརབྷེདོ ཨཏྠི དྷིཏིསམཱདྷིནྡྲིཡསམྨཱསམཱདྷཱིནཾ ཝིཡ ¶ . ཨཉྙཱསཱིཏི ཨེཏྠ སོཏདྭཱརཱནུསཱརེན ཉཱཏཱ, ཨཏྠཱ སུཏཱཏི ཧི ཝུཙྩནྟི ‘‘སུཏམེཏཾ, བྷོ གོཏམ, པཱཔཀཱ སམཱཙཱརཱ དིསྶནྟི ཙེཝ སུཡྻནྟི ཙཱ’’ཏིཨཱདཱིསུ ཝིཡ. ‘‘བྷིཀྑུ ཁོ, ཨུཔཱལི ¶ , སངྒྷཾ བྷིནྡཏཱི’’ཏིཨཱདཱིསུ (ཙཱུལ༹ཝ. ༣༥༤) ཝིཡ ཨཝདྷཱརཎཏྠེ ཝཱ. ཝེརཉྫཱཡཾ བྷཝོ ཝིཛྫམཱནོ. ཨིཏྠམྦྷཱུཏསྶ ཨེཝཾ བྷཱུཏསྶ. ཀཐཾ བྷཱུཏསྶ? སཀྱཔུཏྟསྶ སཀྱཀུལཱ པབྦཛིཏསྶ, ཨེཝཾ ཧུཏྭཱ ཋིཏསྶ ཀིཏྟིསདྡོ ཨབྦྷུགྒཏོཏི ཨབྷིསདྡེན ཡོགེ ཨུཔཡོགཝཙནཱནི ཧོནྟཱིཏི ཨཏྠོ.

ཀཱམུཔཱདཱནཔཙྩཡཱ ཨེཝ མེཏྟཾ བྷཱཝེཏི, བྲཧྨལོཀེ ནིབྦཏྟཏཱིཏི ཨིམིནཱ ཀཱམུཔཱདཱནཧེཏུ ཀམྨཾ ཀཏྭཱ ཀཱམབྷཝེ ཨེཝ ནིབྦཏྟཏཱིཏིཝཱདཱིནཾ ཝཱདོ པཊིཀྑིཏྟོཏི ཝདནྟི, ‘‘བྲཧྨལོཀེ པཎཱིཏཱ ཀཱམཱ’’ཏི སུཏྭཱ, ཀཔྤེཏྭཱ ཝཱ པཙྪཱ ‘‘ཏཏྠ སམྤཏྟིཾ ཨནུབྷཝིསྶཱམཱི’’ཏི ཀཱམུཔཱདཱནཔཙྩཡཱ ཏདུཔགཾ ཀརོཏཱིཏི བྲཧྨལོཀེཔི ཀཱམནཱིཡཊྛེན ཀཱམཱ, ‘‘ཏདཱརམྨཎཏྟཱ ཏཎྷཱ ཀཱམུཔཱདཱནནྟི ཝུཏྟཱ’’ཏི ཙ ཝདནྟི, ཝཱིམཾསིཏབྦཾ. ཀམྨཉྩ ཙཀྑུསྶ ཛནཀཀཱརཎཾ, ཀམྨསྶ མཱུལཀཱརཎཾ ཏཎྷཱ, ཏསྨཱ ན མཱུལཀཱརཎཾ ཧོཏི ཛནཀཾ. རཱུཔཏཎྷཱདཡོ དུཀྑསཙྩཾ ཁནྡྷཔརིཡཱཔནྣཏྟཱ, ‘‘ཡམྤིཙྪཾ ན ལབྷཏི, ཏམྤི དུཀྑ’’ནྟི (དཱི. ནི. ༢.༣༨༧; མ. ནི. ༡.༡༣༡; ཝིབྷ. ༡༩༠) ཝཙནཏོ ཙ. ཏསྶ མཱུལཀཱརཎབྷཱཝེན སམུཊྛཱཔིཀཱཏི ཏསྶ ཀཱརཎབྷཱུཏསྶ ཨིམསྶ ཁནྡྷཔཉྩཀསྶ སམུཊྛཱཔིཀཱཏི ཡོཛེཏབྦཾ. ‘‘ཨཱསཝསམུདཡཱ ཨཝིཛྫཱསམུདཡོ’’ཏི (མ. ནི. ༡.༡༠༣) ཝཙནཏོ ཏསྶ ཨེཝ ཀཱརཎནྟིཔི ཝཏྟུཾ ཝཊྚཏི. ཨཔིཙ ‘‘རཱུཔཱདི ཝིཡ ཏཎྷཱཔི ཏཎྷཱཡ ཨུཔྤཏྟིཔྤཧཱནཊྛཱན’’ནྟི ཝཙནཏོ རཱུཔཱདི ཝིཡ ཏཎྷཱཔི དུཀྑསཙྩཾ ཀཏཾ. ཝུཏྟཉྷེཏཾ ‘‘རཱུཔཏཎྷཱ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏཱི’’ཏི (དཱི. ནི. ༢.༤༠༠; ཝིབྷ. ༢༠༣) ཙ ‘‘ཨེཏྠེསཱ ཏཎྷཱ པཧཱིཡམཱནཱ པཧཱིཡཏཱི’’ཏི (དཱི. ནི. ༢.༤༠༡; མ. ནི. ༡.༡༣༤) ཙ. ཝིསུདྡྷིམགྒེ ‘‘སབྦཱཀཱརེན པན ཨུཔཱདཱནཀྑནྡྷཔཉྩཀཾ དུཀྑཉྩེཝ ཨརིཡསཙྩཉྩ ཨཉྙཏྲ ཏཎྷཱཡཱ’’ཏི ཝཙནཏོ ཨིདྷ རཱུཔཏཎྷཱདཡོ དུཀྑསཙྩནྟི ཝཙནཾ ཝིརུཛ྄ཛྷཏཱིཏི ཙེ? ན, ཨཉྙམཉྙཱསངྐརབྷཱཝེན དསྶེཏུཾ ཏཏྠ ཏཏྠ ཝུཏྟཏྟཱ. ཡདི ཏཎྷཱ ཨུཔཱདཱནཀྑནྡྷཔརིཡཱཔནྣཱ ན བྷཝེཡྻ, སཙྩཝིབྷངྒེ ‘‘ཏཏྠ ཀཏམེ སཾཁིཏྟེན པཉྩུཔཱདཱནཀྑནྡྷཱ དུཀྑཱ. སེཡྻཐིདཾ, རཱུཔུཔཱདཱནཀྑནྡྷོ ¶ ..པེ… ཝིཉྙཱཎུཔཱདཱནཀྑནྡྷོ’’ཏི (ཝིབྷ. ༢༠༢) ཨེཏྠ ‘‘ཋཔེཏྭཱ ཏཎྷཾ སངྑཱརུཔཱདཱནཀྑནྡྷོ’’ཏི ཝཏྟབྦཾ བྷཝེཡྻ, ན ཙ ཝུཏྟཾ, ཏསྨཱ དུཀྑསཙྩཔརིཡཱཔནྣཱ ཏཎྷཱཏི ཙེ? ན, ཧེཏུཕལསངྐརདོསཔྤསངྒཏོ. ན སངྐརདོསོཏི ཙེ? སཙྩཝིབྷངྒཔཱལི༹ཡཉྷི པཉྩཧི ཀོཊྛཱསེཧི སམུདཡསཙྩཾ ནིདྡིཊྛཾ.

ཀཐཾ? ཏཎྷཱཏི ཨེཀོ ཝཱརོ, ཏཎྷཱ ཙ ཨཝསེསཱ ཙ ཀིལེསཱཏི དུཏིཡོ, ཏཎྷཱ ཙ ཨཝསེསཱ ཙ ཀིལེསཱ ཨཝསེསཱ ཙ ཨཀུསལཱ དྷམྨཱཏི ཏཏིཡོ, ཏཎྷཱ ཙ ཨཝསེསཱ ཙ ཀིལེསཱ ¶ ཨཝསེསཱ ཙ ཨཀུསལཱ དྷམྨཱ ཏཱིཎི ཙ ཀུསལམཱུལཱནི སཱསཝཱནཱིཏི ཙཏུཏྠོ, ཏཎྷཱ ཙ ཨཝསེསཱ ཙ ཀིལེསཱ ཨཝསེསཱ ཙ ཨཀུསལཱ དྷམྨཱ ཏཱིཎི ཙ ཀུསལམཱུལཱནི སཱསཝཱནི ཨཝསེསཱ ཙ སཱསཝཱ ཀུསལཱ དྷམྨཱཏི པཉྩམོ ཝཱརོཏི. ཨཱམ ནིདྡིཊྛཾ, ཏཐཱཔི ཨབྷིདྷམྨབྷཱཛནིཡེཡེཝ, ན ཨཉྙསྨིཾ, སོ ཙ ནཡོ ཨརིཡསཙྩནིདྡེསེ ན ལབྦྷཏི. ཏཐཱ ཧི ཏཏྠ ‘‘ཙཏྟཱརི སཙྩཱནི’’ཙྩེཝཱཧ, སུཏྟནྟབྷཱཛནིཡཔཉྷཔུཙྪཀེསུ ཝིཡ ‘‘ཙཏྟཱརི ཨརིཡསཙྩཱནཱི’’ཏི ན ཝུཏྟཾ, ཏསྨཱ སུཏྟནྟབྷཱཛནིཡོཝ པམཱཎཾ ཏཏྠ ཙ ཏཎྷཱཡ ཝུཏྟཏྟཱ. ཡཐཱཧ ‘‘ཏཏྠ ཀཏམཾ དུཀྑསམུདཡཾ ཨརིཡསཙྩཾ, ཡཱཡཾ ཏཎྷཱ པོནོབྷཝིཀཱ…པེ… སེཡྻཐིདཾ, ཀཱམཏཎྷཱ’’ཏིཨཱདི (ཝིབྷ. ༢༠༣). ‘‘ཡདནིཙྩཾ ཏཾ དུཀྑ’’ནྟི (སཾ. ནི. ༣.༡༥) ཨིམིནཱ པརིཡཱཡེན ཝུཏྟཏྟཱ ཏཏྠ ཝུཏྟམྤི པམཱཎམེཝ. ‘‘པཋམཾ ཛྷཱནཾ ཨུཔསམྤཛྫ ཝིཧརཏི པཐཝཱིཀསིཎ’’ནྟི (དྷ. ས. ༡༨༦ ཨཱདཡོ) ཝཙནཏོ ‘‘ཀསིཎཱནཱི’’ཏི ཛྷཱནཱནི ཝུཏྟཱནི. ཀེཙི ‘‘ཨུགྒཧནིམིཏྟཔཊིབྷཱགནིམིཏྟེ སནྡྷཱཡ ཝུཏྟ’’ནྟི ཝདནྟི, ཏཾ ན སུནྡརཾ. ‘‘དྭཏྟིཾསཱཀཱརཱཔི པཎྞཏྟིཾ ཝིསྶཛྫེཏྭཱ པཊིཀཱུལཱཏི སཏི པཊྛཔེཏབྦཱ’’ཏི ཝཙནཏོ སཏིགོཙརཱ རཱུཔཱདཡོ ཙ ཝེདིཏབྦཱ.

སདྡྷཱཧིརོཏྟཔྤབཱཧུསཙྩཝཱིརིཡཱརམྦྷོཔཊྛིཏསཏིསམྤཛཉྙཏཱཏི ཨིམེ སཏྟ སདྡྷམྨཱ ནཱམ. སབྷཱཝཏོཏི དུཀྑཏོ. ན ཙཝཏཱིཏི དེཝེ སནྡྷཱཡ. ཉཱཏེཡྻནྟི ཉཱཏབྦཾ. དཊྛེཡྻནྟི དཊྛབྦཾ. ཨཐ ཝཱ པན ‘‘ནཱཧཾ གམནེན ལོཀསྶ ཨནྟཾ ཉཱཏེཡྻ’’ནྟི ཝདཱམཱིཏི ཨཏྠོ. ལོཀནྟི ཁནྡྷལོཀཾ. གམནེན ན པཏྟབྦོཏི སརཱིརགམནེན, ཨགཏིགམནེན ཝཱ ན པཏྟབྦོ, ཨརིཡགམནེན ལོཀནྟཾ པཏྭཱཝ དུཀྑཱ ཨཏྠི པམོཙནནྟི ཝུཏྟཾ ཧོཏི. སམིཏཱཝཱིཏི སམིཏཀིལེསོ. ཨཱཧཱརཊྛིཏིཀཱཏི པཙྩཡཊྛིཏིཀཱ. ཡེ ཀེཙི ¶ པཙྩཡཊྛིཏིཀཱ, སབྦེ ཏེ ལུཛྫནཔལུཛྫནཊྛེན ཨེཀོ ལོཀོཏི ཨདྷིཔྤཱཡོ. སངྑཱརཱ ཧི སཀསཀཔཙྩཡཱཡཏྟཏཱཡ སཏྟཱ ཝིསཏྟཱ སཏྟཱ ནཱམ. པརིཧརནྟི པརིཙརནྟི. དིསཱཏི ཨུཔཡོགབཧུཝཙནཾ. བྷནྟི པཊིབྷནྟི. ཀེ ཏེ? ཏེཡེཝ ཝིརོཙམཱནཱ པབྷསྶརཱ ཙནྡིམསཱུརིཡཱ. ཨཊྛ ལོཀདྷམྨཱ སངྑཱརཱཝ. ‘‘སིནེརུསྶ སམནྟཏོ’’ཏི ཝཙནཏོ ཡུགནྡྷརཱདཡོ སིནེརུཾ པརིཀྑིཔིཏྭཱ པརིམཎྜལཱཀཱརེན ཋིཏཱཏི ཝདནྟི. པརིཀྑིཔིཏྭཱ ཨཙྩུགྒཏོ ལོཀདྷཱཏུ ཨཡཾ. ‘‘མ-ཀཱརོ པདསནྡྷིཀརོ’’ཏི ཝདནྟི. ཨཉྙཐཱཔི ལཀྑཎཱདིབྷེདཏོ སངྑཱརལོཀཾ, ཨཱསཡཱནུསཡབྷེདཏོ སཏྟལོཀཾ, ཙཀྐཝཱལཱ༹དིཔརིམཱཎཏོ ཨོཀཱསལོཀཉྩ སབྦཐཱཔི ཝིདིཏཏྟཱ ལོཀཝིདཱུ.

ཝིམུཏྟིཉཱཎདསྶནཾ ཀཱམཱཝཙརཾ པརིཏྟཾ ལོཀིཡཾ, ཏེན སབྦཾ ལོཀཾ ཀཐཾ ཨབྷིཝཏི? ཨསདིསཱནུབྷཱཝཏྟཱ སབྦཉྙུཏཉྙཱཎཾ ཝིཡ. ཏཉྷི ཨཏྟནོ ཝིསཡེ བྷགཝཏོ སབྦཉྙུཏཉྙཱཎགཏིཀཾ ¶ , ལཧུཏརཔྤཝཏྟི ཙ བྷཝངྒཙིཏྟདྭཡཱནནྟརཾ ཨུཔྤཏྟིཏོ. ན ཀསྶཙི ཨེཝཾལཧུཏརཾ ཙིཏྟཾ ཨུཔྤཛྫཏི, ཨཔི ཨཱཡསྨཏོ སཱརིཔུཏྟསྶ, ཏསྶ ཀིརེས ཙིཏྟཝཱརོ པཉྩདསབྷཝངྒཱནནྟརནྟི. ཨགྒིསིཁདྷཱུམསིཁཱ ཙ ནཱགཱ ཀིར སཱིཧལ༹དཱིཔེ. ཨཏྠསྶ དཱིཔཀཾ པདཾ ཨཏྠཔདཾ. ཨེཀཏྠདཱིཔཀཾ པདཾ, སབྦམེཏཾ ཝཱཀྱནྟི ཨཏྠོ. ཨཊྛ དིསཱ ནཱམ ཨཊྛ ཝིམོཀྑཱ, སམཱཔཏྟིཡོ ཝཱ. སཏྠཝཱཧོ སཏྠཱཏི ནིཔཱཏིཏོ ཡཐཱ པིསིཏཱསོ པིསཱཙོ. ཨུདཀེ མཎྜཱུཀོ ཨཧཾ ཨཱསིཾ, ན ཐལེ མཎྜཱུཀོ, ཝཱརིམཏྟམེཝ གོཙརོ, ཏསྶ མེ ཏཝ དྷམྨཾ སུཎནྟསྶ སཱིསཾ དཎྜེན སནྣིརུམྦྷིཏྭཱཏི པཱཋསེསོ. ཨནཱདརཏྠེ ཝཱ སཱམིཝཙནཾ. ‘‘ཨེཏྟཀེནཔི ཨེཝརཱུཔཱ ཨིདྡྷི བྷཝིསྶཏཱི’’ཏི སིཏཾ ཀཏྭཱ. ཝིམོཀྑོཏི ཙེཏྠ མགྒོ, ཏདནནྟརིཀཾ ཉཱཎཾ ནཱམ ཕལཉཱཎཾ, ཏསྨིཾ ཁཎེ བུདྡྷོ ནཱམ. སབྦསྶ བུདྡྷཏྟཱཏི ཀཏྟརི. བོདྷེཏཱཏི ཧེཏུཀཏྟརི. སེཊྛཏྠདཱིཔཀཾ ཝཙནཾ སེཊྛཾ ནཱམ, ཏཐཱ ཨུཏྟམཾ. སཙྪིཀཱཔཉྙཏྟཱིཏི སབྦདྷམྨཱནཾ སཙྪིཀརཎཝསེན སཡམྦྷུཏཱ པཉྙཏྟི, ཨཏྟནཱ ཨེཝ ཝཱ ཉཱཏཱ སཙྪིཀཏཱཏིཔི སཙྪིཀཱཔཉྙཏྟི. བྷགཱི བྷགཝཱ ཙཱིཝརཔིཎྜཔཱཏཱདཱིནཾ. བྷཛཱི ཨརཉྙཝནཔཏྠཱནི པནྟཱནི སེནཱསནཱནི. བྷཱགཱི ཨཏྠདྷམྨཝིམུཏྟིརསསྶ. རཱགཱདིཀིལེསགཎབྷགྒམཀཱསི. བྷཱཝིཏཏྟནོ བྷཱཝིཏཀཱཡོ. བྷཝསྶ ཨནྟཾ ནིབྦཱནཾ མགྒཱདྷིགམེན ཏཾ གཏོཏི བྷཝནྟགོ.

‘‘ལོབྷཾ ¶ , བྷིཀྑཝེ, ཨེཀཾ དྷམྨཾ པཛཧཐཱ’’ཏིཨཱདིནཱ (ཨིཏིཝུ. ༡) ནཡེན ཨེཀཀཱདིཝསེནཱགཏེ གཧེཏྭཱ ཝདཏི. སཾཀིལེསཏཎྷཱདིཊྛིདུཙྩརིཏསཾཀིལེསཝསེན ཨནིཙྩདུཀྑམནཏྟཱསུབྷེསུ ནིཙྩནྟིཨཱདིཝིཔརིཡེསཱ. ཙཱིཝརཧེཏུ ཝཱ, བྷིཀྑཝེ, བྷིཀྑུནོ ཏཎྷཱ ཨུཔྤཛྫམཱནཱ ཨུཔྤཛྫཏི, པིཎྜཔཱཏ སེནཱསནཨིཏིབྷཝཱབྷཝཧེཏུ ཝཱ (ཨ. ནི. ༤.༩). ཙེཏོཁིལཱ སཏྠརི ཀངྑཏི, དྷམྨེ, སངྒྷེ, སིཀྑཱཡ, སབྲཧྨཙཱརཱིསུ ཀུཔིཏོཏི (དཱི. ནི. ༣.༣༡༩; ཝིབྷ. ༩༤༡) ཨཱགཏཱ པཉྩ. ཀཱམེ ཨཝཱིཏརཱགོ ཧོཏི…པེ… ཀཱཡེ, རཱུཔེ, ཡཱཝདཏྠཾ ཨུདརཱཝདེཧཀཾ བྷུཉྫིཏྭཱ, ཨཉྙཏརཾ དེཝནིཀཱཡཾ པཎིདྷཱཡ བྲཧྨཙརིཡཾ ཙརཏཱིཏི (དཱི. ནི. ༣.༣༢༠; ཝིབྷ. ༩༤༡) ཨཱགཏཱ པཉྩ ཝིནིབནྡྷཱ. ཝིཝཱདམཱུལཱནི ཀོདྷོ ཨུཔནཱཧོ མཀྑོ པལཱ༹སོ ཨིསྶཱ མཙྪརིཡཾ མཱཡཱ སཱཋེཡྻཾ ཐམྦྷོ སཱརམྦྷོ སནྡིཊྛིཔརཱམཱསིཏཱ ཨཱདྷཱནགྒཱཧཱི དུཔྤཊིནིསྶགྒིཏཱ (ཨ. ནི. ༦.༣༦; དཱི. ནི. ༣.༣༢༥). ཝིབྷངྒེ པན ‘‘ཀོདྷོ མཀྑོ ཨིསྶཱ སཱཋེཡྻཾ པཱཔིཙྪཏཱ སནྡིཊྛིཔརཱམཱསིཏཱ’’ཏི (ཝིབྷ. ༩༤༤) ཨཱགཏཾ. ཏཎྷཾ པཊིཙྩ པརིཡེསནཱ, པརིཡེསནཾ པཊིཙྩ ལཱབྷོ, ལཱབྷཾ པཊིཙྩ ཝིནིཙྪཡོ, ཨེཝཾ ཚནྡརཱགོ, ཨཛ྄ཛྷོསཱནཾ, པརིགྒཧོ, མཙྪརིཡཾ, ཨཱརཀྑོ, ཨཱརཀྑཱདྷིཀརཎཾ, དཎྜཱདཱནསཏྠཱདཱན…པེ… ཨཀུསལཱ དྷམྨཱ སམྦྷཝནྟཱིཏི (དཱི. ནི. ༢.༡༠༤; ༣.༣༥༩; ཨ. ནི. ༩.༢༣; ཝིབྷ. ༩༦༣) ཝུཏྟཱནཾ. རཱུཔསདྡགནྡྷརསཕོཊྛབྦདྷམྨཏཎྷཱཏི ཚ, ཏཱ ཀཱམབྷཝཝིབྷཝཏཎྷཱཝསེནེཝ ¶ ཨཊྛཱརས, ཏཱ ཨེཝ ཨཛ྄ཛྷཏྟིཀསྶུཔཱདཱཡ ཨཊྛཱརས, བཱཧིརསྶུཔཱདཱཡ ཨཊྛཱརསཱཏི ཚཏྟིཾས, ཏཱ ཨཏཱིཏེ ཚཏྟིཾས, ཨནཱགཏེ ཚཏྟིཾས, པཙྩུཔྤནྣེ ཚཏྟིཾསཱཏི ཨེཝཾ ཨཊྛསཏཏཎྷཱཝིཙརིཏཱནཱིཏི. མཱརེཏཱིཏི མཱརོ, པམཱདོ ‘‘པམཱདོ མཙྩུནོ པད’’ནྟི (དྷ. པ. ༢༡) ཝཙནཏོ. སམྨཱཨཱཛཱིཝཝིནཱསནཏོ ཝཱ ཀིལེསཱ ཝུཙྩནྟི ‘‘མཱརོ’’ཏི, ཝདྷཀཱུཔམཏྟཱ ཁནྡྷཱཝ མཱརཱ. ཨབྷིསངྑཱརཱ ཛཱཏིདུཀྑཱབྷིནིབྦཏྟཱཔནཏོ, ཛཱཏསྶ ཛརཱདིསམྦྷཝཏོ ཙ མཱརཱ. ཨེཀབྷཝཔརིཡཱཔནྣཛཱིཝིཏམཱརཎཏོ མཙྩུ མཱརོ. ཨཎིམཏཱ ནཱམ པརམཱཎུ ཝིཡ ཨདསྶནཱུཔགམནཾ. ལགྷིམཏཱ སརཱིརེན, ཙིཏྟེན ཝཱ སཱིགྷགམནཾ. མཧིམཏཱ ཙནྡིམསཱུརིཡཱདཱིནམྤིཔཱཎིནཱ པརཱམསནཱདི. པཏྟི ནཱམ ཡཐིཙྪིཏདེསཔྤཏྟི. པཀཱསནཏཱ, ལཱབྷཀསྶཏྠསཱདྷནཾ ཝཱ པཱཀམྨཾ. ཨཱིསཏྟཾ ནཱམ སཡཾཝསིཏཱ. ཝསིཏྟཾ ནཱམ ཨཔརཝསིཏཱ. ཡཏྠཀཱམཱཝསཱཡིཏཾ ནཱམ ཡཏྠིཙྪཏི ཡདིཙྪཏི ཡཱཝདིཙྪཏི, ཏཏྠ ཏཱཝ ཏདཏྠསཱདྷནཾ. པཱིལ༹ནསངྑཏསནྟཱཔཝིཔརིཎཱམཊྛེན ¶ ཝཱ དུཀྑམརིཡསཙྩནྟིཨཱདིམྷི ཨིདཾ ཙོདནཱཔུབྦངྒམཾ ཨཏྠཝིསྶཛྫནཾ – དུཀྑཱདཱིནཾ ཨཉྙེཔི རཱུཔཏཎྷཱདཡོ ཨཏྠཱ ཨཏྠི, ཨཐ ཀསྨཱ ཙཏྟཱརོ ཨེཝ ཝུཏྟཱཏི ཙེ? ཨཉྙསཙྩདསྶནཝསེན ཨཱཝིབྷཱཝཏོ.

‘‘ཏཏྠ ཀཏམཾ དུཀྑེཉཱཎཾ, དུཀྑཾ ཨཱརབྦྷ ཡཱ ཨུཔྤཛྫཏི པཉྙཱ’’ཏིཨཱདིནཱཔི (ཝིབྷ. ༧༩༤) ནཡེན ཨེཀེཀསཙྩཱརམྨཎཝསེནཱཔི སཙྩཉཱཎཾ ཝུཏྟཾ. ‘‘ཡོ, བྷིཀྑཝེ, དུཀྑཾ པསྶཏི, དུཀྑསམུདཡམྤི སོ པསྶཏཱི’’ཏིཨཱདིནཱ (སཾ. ནི. ༥.༡༡༠༠) ནཡེན ཨེཀཾ སཙྩཾ ཨཱརམྨཎཾ ཀཏྭཱ སེསེསུ ཀིཙྩནིཔྥཏྟིཝསེནཱཔི ཝུཏྟཾ. ཏཏྠ ཡདཱ ཨེཀེཀཾ སཙྩཾ ཨཱརམྨཎཾ ཀརོཏི, ཏདཱ སམུདཡདསྶནེན ཏཱཝ སབྷཱཝཏོ པཱིལ༹ནལཀྑཎསྶཱཔི དུཀྑསྶ ཡསྨཱ ཏཾ ཨཱཡཱུཧནལཀྑཎེན སམུདཡེན ཨཱཡཱུཧིཏཾ སངྑཏཾ, ཏསྨཱསྶ སོ སངྑཏཊྛོ ཨཱཝི བྷཝཏི. ཡསྨཱ པན མགྒོ ཀིལེསསནྟཱཔཧརོ སུསཱིཏལོ, ཏསྨཱསྶ མགྒདསྶནེན སནྟཱཔཊྛོ ཨཱཝི བྷཝཏི ནནྡསྶ ཨཙྪརཱདསྶནེན སུནྡརིཡཱ ཨནབྷིརཱུཔབྷཱཝོ ཝིཡ. ཨཝིཔརིཎཱམདྷམྨསྶ པན ནིརོདྷསྶ དསྶནེན ཏསྶ ཝིཔརིཎཱམཊྛོ ཨཱཝི བྷཝཏཱིཏི ཝཏྟབྦམེཝ ནཏྠི. སབྷཱཝཏོ ཨཱཡཱུཧནལཀྑཎསྶཔི སམུདཡསྶ དུཀྑདསྶནེན ནིདཱནཊྛོ ཨཱཝི བྷཝཏི ཨསཔྤཱཡབྷོཛནཏོ ཨུཔྤནྣབྱཱདྷིདསྶནེན བྷོཛནསྶ བྱཱདྷིནིདཱནབྷཱཝོ ཝིཡ. ཝིསཾཡོགབྷཱུཏསྶ ནིརོདྷསྶ དསྶནེན སཾཡོགཊྛོ. ནིཡྻཱནབྷཱུཏསྶ ཙ མགྒསྶ དསྶནེན པལིབོདྷཊྛོཏི. ཏཐཱ ནིསྶརཎསྶཱཔི ནིརོདྷསྶ ཨཝིཝེཀབྷཱུཏསྶ སམུདཡསྶ དསྶནེན ཝིཝེཀཊྛོ ཨཱཝི བྷཝཏི. མགྒདསྶནེན ཨསངྑཏཊྛོ. ཨིམིནཱ ཧི ཨནམཏགྒེ སཾསཱརེ མགྒོ ན དིཊྛཔུབྦོ, སོཔི ཙ སཔྤཙྩཡཏྟཱ སངྑཏོ ཨེཝཱཏི ཨཔྤཙྩཡདྷམྨསྶ ཨསངྑཏབྷཱཝོ ཨཏིཝིཡ པཱཀཊོ ཧོཏི. དུཀྑདསྶནེན པནསྶ ཨམཏཊྛོ ཨཱཝི བྷཝཏི. དུཀྑཉྷི ཝིསཾ, ཨམཏཾ ནིབྦཱནནྟི. ཏཐཱ ནིཡྻཱནལཀྑཎསྶཱཔི ¶ མགྒསྶ སམུདཡདསྶནེན ‘‘ནཱཡཾ ཧེཏུ ནིབྦཱནསྶ པཏྟིཡཱ, ཨཡཾ ཧེཏཱུ’’ཏི ཧེཏྭཏྠོ ཨཱཝི བྷཝཏི. ནིརོདྷདསྶནེན དསྶནཊྛོ པརམསུཁུམརཱུཔཱནི པསྶཏོ ‘‘ཝིཔྤསནྣཾ ཝཏ མེ ཙཀྑཱུ’’ཏི ཙཀྑུསྶ ཝིཔྤསནྣབྷཱཝོ ཝིཡ. དུཀྑདསྶནེན ཨདྷིཔཏེཡྻཊྛོ ཨནེཀརོགཱཏུརཀཔཎཛནདསྶནེན ཨིསྶརཛནསྶ ཨུལཱ༹རབྷཱཝོ ཝིཡཱཏི ཨེཝམེཏྠ ལཀྑཎཝསེན, ཨེཀསྶ ཨཉྙསཙྩདསྶནཝསེན ཙ ཨིཏརེསཾ ཏིཎྞཾ ཨཱཝིབྷཱཝཏོ ¶ ཨེཀེཀསྶ ཙཏྟཱརོ ཨཏྠཱ ཝུཏྟཱ. ཨུཔདྷིཝིཝེཀོ ནིཀྐིལེསཏཱ.

པཊིཔཀྑཾ ཨཏྠཡནྟཱིཏི པཙྩཏྠིཀཱ. པཏི ཝིརུདྡྷཱ ཨམིཏྟཱ པཙྩཱམིཏྟཱ. སཙྪིཀཏྭཱ པཝེདེཏཱིཏི ཨེཏྟཱཝཏཱ བྷགཝཏོ སབྦཉྙུཏཾ དཱིཔེཏི. ཏེན ཉཱཎསམྤཏྟིཾ དཱིཔེཏྭཱ ཨིདཱནི ཀརུཎཱསམྤཏྟིཾ དཱིཔེཏུཾ ‘‘སོ དྷམྨཾ དེསེསཱི’’ཏིཨཱདིམཱཧ. ཨཐ ཝཱ ཀིཾ སོ པཝེདེསཱིཏི? ཉཱཎཾ, ཏཾ སབྦཾ ཏིལོཀཧིཏབྷཱུཏམེཝ. སོ དྷམྨཾ དེསེསཱིཏི ཀཱིདིསཾ? ‘‘ཨཱདིཀལྱཱཎ’’ནྟིཨཱདི. ཨནེན ཝཙནེན ཝཏྟུཾ ཨརཧབྷཱཝཾ དཱིཔེཏི. སཱསནདྷམྨོཏི ཨོཝཱདཔརིཡཏྟི. ཀིཙྩསུདྡྷིཡཱཏི ཀིལེསཔྤཧཱནནིབྦཱནཱརམྨཎཀིཙྩསུདྡྷིཡཱ. སཱསནབྲཧྨཙརིཡཾ ནཱམ སིཀྑཏྟཡཾ, ནཝཀོཊིསཧསྶཱནཱིཏིཨཱདིཀཾ ཝཱ. མགྒམེཝ བྲཧྨཙརིཡཾ མགྒབྲཧྨཙརིཡཾ. ཏསྶ པཀཱསཀཾ པིཊཀཏྟཡཾ ཨིདྷ སཱཏྠཾ སབྱཉྫནཾ ནཱམ. ཚསུ ཨཏྠཔདེསུ སངྑེཔཏོ ཀཱསནཾ སངྐཱསནཾ. ཨཱདིཏོ ཀཱསནཾ པཀཱསནཾ. ཨུབྷཡམྤི ཝིཏྠཱརེཏྭཱ དེསནཾ ཝིཝརཎཾ. པུན ཝིབྷཱགཀརཎཾ ཝིབྷཛནཾ. ཨོཔམྨཱདིནཱ པཱཀཊཀརཎཾ ཨུཏྟཱནཱིཀརཎཾ. སོཏཱུནཾ ཙིཏྟཔརིཏོསཛནནེན, ཙིཏྟནིསཱནེན ཙ པཉྙཱཔནཾ ཝེདིཏབྦཾ. བྱཉྫནཔདེསུ ཨཀྑརཎཏོ ཨཀྑརཾ, ‘‘ཨེཀཀྑརཔདམཀྑར’’ནྟི ཨེཀེ. ཝིབྷཏྟིཨནྟཾ པདཾ. བྱཉྫཡཏཱིཏི བྱཉྫནཾ, ཝཱཀྱཾ. པདསམུདཱཡོ ཝཱ ཝཱཀྱཾ. ཝིབྷཱགཔཀཱསོ ཨཱཀཱརོ ནཱམ. ཕུསཏཱིཏི ཕསྶོཏིཨཱདི ནིབྦཙནཾ ནིརུཏྟི, ནིརུཏྟིཡཱ ནིདྡིཊྛསྶ ཨཔདེསོ ནིདྡེསོ ནཱམ. ཕུསཏཱིཏི ཕསྶོ, སོ ཏིཝིདྷོ – སུཁཝེདནཱིཡོ དུཀྑཝེདནཱིཡོ ཨདུཀྑམསུཁཝེདནཱིཡོཏི. ཨེཏེསུ ཨཡཾ ཡོཛནཱ – ཨཀྑརེཧི སངྐཱསཡཏི, པདེཧི པཀཱསཡཏི, བྱཉྫནེཧི ཝིཝརཏི, ཨཱཀཱརེཧི ཝིབྷཛཏི, ནིརུཏྟཱིཧི ཨུཏྟཱནིཾ ཀརོཏི, ནིདྡེསེཧི པཉྙཱཔེཏི. ཨཀྑརེཧི ཝཱ སངྐཱསཡིཏྭཱ པདེཧི པཀཱསེཏི, བྱཉྫནེཧི ཝིཝརིཏྭཱ ཨཱཀཱརེཧི ཝིབྷཛཏི, ནིརུཏྟཱིཧི ཨུཏྟཱནིཾ ཀཏྭཱ ནིདྡེསེཧི པཉྙཱཔེཏི. ཨཀྑརེཧི ཝཱ ཨུགྒྷཱཊེཏྭཱ པདེཧི ཝིནེཏི ཨུགྒྷཊིཏཉྙུཾ, བྱཉྫནེཧི ཝིཝརིཏྭཱ ཨཱཀཱརེཧི ཝིནེཏི ཝིཔཉྩིཏཉྙུཾ, ནིརུཏྟཱིཧི ནེཏྭཱ ནིདྡེསེཧི ཝིནེཏི ནེཡྻནྟི ཝེདིཏབྦཾ. ཨཏྠོཏི བྷཱསིཏཏྠོ. ཏསྶེཝཏྠསྶ པཊིཝིཛ྄ཛྷིཏབྦོ སཀོ སཀོ བྷཱཝོ པཊིཝེདྷོ ནཱམ. ཏཾ ཨུབྷཡམྤི ཨཏྠོ ནཱམ. ཏེན ཝུཏྟཾ ‘‘ཨཏྠགམྦྷཱིརཏཱཔཊིཝེདྷགམྦྷཱིརཏཱཧི སཱཏྠ’’ནྟི. དྷམྨོཏི ཝཱ དེསནཱཏི ཝཱ བྱཉྫནམེཝ. ནིདྡོསབྷཱཝེན པརིསུདྡྷཾ སཱསནབྲཧྨཙརིཡཾ, སིཀྑཏྟཡཔརིགྒཧིཏོ ¶ མགྒོ ཙ, ཨུབྷཡམྤི བྲཧྨཙརིཡཔདེན ¶ སངྒཧིཏཾ. པཊིཔཏྟིཡཱཏི པཊིཔཏྟིཧེཏུ. ཨཱགམབྱཏྟིཏོཏི པུནཔྤུནཾ ཨདྷཱིཡམཱནཱ ཁནྡྷཱདཡོ པཱཀཊཱ ཧོནྟི. དུརུཏྟསཏྠཱནི ཨདྷཱིཡམཱནཱནི སམྨོཧམེཝཱཝཱཧནྟི.

༢-༣. ཀཙྩི ཁམནཱིཡཾ སཱིཏུཎྷཱདི. ཀཙྩི ཡཱཔནཱིཡཾ ཡཐཱལདྡྷེཧི ཛཱིཝིཏསཱདྷནེཧི ཛཱིཝིཏཾ. ཨཔྤཱབཱདྷནྟི ཨཔྤོཔསགྒཾ, ཨཔྤཱཏངྐནྟི ཨཔྤརོགཾ. ཀཙྩི ལཧུཊྛཱནཾ སརཱིརཀིཙྩེ. ཀཙྩི བལཾ སམཎཀིཙྩེ. ཀཙྩི ཕཱསུཝིཧཱརོ ཡཐཱཝུཏྟནཡེན ཨཔྤཱབཱདྷཏཱཡ, ཨནུཀྐཎྛནཱདིཝསེན ཝཱ. སཏྟསཊྛིཏོ པཊྛཱཡ པཙྪིམཝཡོ, ཨུཏྟརཱམུཁོཏི ཝུཏྟཾ ཧོཏི. ལོཀཝིཝརཎེ ཛཱཏེ ཨིདྷ ཀིཾ ཨོལོཀེསི, ནཏྠེཏྠ ཏཡཱ སདིསོཔཱིཏི ཨཱཧ ‘‘ཏྭཾ སདེཝཀསྶ ལོཀསྶ ཨགྒོ’’ཏིཨཱདི. ཨཱསབྷིཾ ཨུཏྟམཾ. ཨུཔཔཏྟིཝསེན དེཝཱ. རཱུཔཱནཾ པརིབྷོགཝསེན, པཏྠནཱཝསེན ཝཱ ཨུཔྤནྣཱ རཱགསམྤཡུཏྟཱ སོམནསྶཝེདནཱནུརཱུཔཏོ ཨུཔྤཛྫིཏྭཱ ཧདཡཏཔྤནཏོ ཨམྦརསཱདཡོ ཝིཡ ‘‘རཱུཔརསཱ’’ཏི ཝུཙྩནྟི. ཏཐཱགཏསྶ པཧཱིནཱཏི ཨདྷིཀཱརཝསེནཱཧ. ཏཐཱགཏསྶཔི ཧི ཀསྶཙི ཏེ པཧཱིནཱཏི མཏྠཀཙྪིནྣཏཱལོ ཝིཡ ཀཏཱ. ཀཐཾ? རཱུཔརསཱདིཝཙནེན ཝིཔཱཀདྷམྨདྷམྨཱ གཧིཏཱ, ཏེ ཝིཛྫམཱནཱཔི མཏྠཀསདིསཱནཾ ཏཎྷཱཝིཛྫཱནཾ མགྒསཏྠེན ཚིནྣཏྟཱ ཨཱཡཏིཾ ཏཱལཔནྟིསདིསེ ཝིཔཱཀཀྑནྡྷེ ནིབྦཏྟེཏུཾ ཨསམཏྠཱ ཛཱཏཱ. ཏསྨཱ ཏཱལཱཝཏྠུ ཝིཡ ཀཏཱ. ‘‘ཀུསལསོམནསྶཱཔི ཨེཏྠ སངྒཧིཏཱ’’ཏི ཝདནྟི. པཋམམགྒེན པཧཱིནཱ ཀམྨཔཐཊྛཱནིཡཱ, དུཏིཡེན ཨུཙྪིནྣམཱུལཱ ཨོལཱ༹རིཀཱ, ཏཏིཡེན ཏཱལཱཝཏྠུཀཏཱ ཀཱམརཱགཊྛཱནིཡཱ. ཙཏུཏྠེན ཨནབྷཱཝཾཀཏཱ རཱུཔརཱགཱརཱུཔརཱགཊྛཱནིཡཱ. ཨཔརིཧཱནདྷམྨཏཾ པན དཱིཔེནྟོ ‘‘ཨཱཡཏིཾ ཨནུཔྤཱདདྷམྨཱ’’ཏི ཨཱཧ. ཏདངྒཔྤཧཱནེན ཝཱ པཧཱིནཱ ཝིཔསྶནཱཀྑཎེ, ཛྷཱནསྶ པུབྦབྷཱགཀྑཎེ ཝཱ, ཝིཀྑམྦྷནཔྤཧཱནེན ཨུཙྪིནྣམཱུལཱ ཛྷཱནཀྑཎེ. ‘‘ཝིཝིཙྩེཝ ཀཱམེཧཱི’’ཏི (པཱརཱ. ༡༡) ཧི ཝུཏྟཾ. སམུཙྪེདཔྤཧཱནེན ཏཱལཱཝཏྠུཀཏཱ ཏཏིཡཝིཛྫཱདྷིགམཀྑཎེ. ཨིཏྠམྦྷཱུཏཱ པན ཏེ རཱུཔརསཱདཡོ ཨནབྷཱཝཾཀཏཱ ཨཱཡཏིམནུཔྤཱདདྷམྨཱཏི ཨེཀམེཝིདཾ ཨཏྠཔདཾ. པཋམཱཡ ཝཱ ཨབྷིནིབྦྷིདཱཡ པཧཱིནཱ, དུཏིཡཱཡ ཨུཙྪིནྣམཱུལཱ, ཏཏིཡཱཡ ཏཱལཱཝཏྠུཀཏཱ. ཨིཏྠམྦྷཱུཏཱ ཡསྨཱ ཨནབྷཱཝཾཀཏཱ ནཱམ ཧོནྟི, ཏསྨཱ ཨཱཡཏིཾཨནཨུཔྤཱདདྷམྨཱཏི ཝེདིཏབྦཱ. ཨཐ ཝཱ དུཀྑཉཱཎེན པཧཱིནཱ, སམུདཡཉཱཎེན ཨུཙྪིནྣམཱུལཱ ¶ , ནིརོདྷཉཱཎེན ཏཱལཱཝཏྠུཀཏཱ, མགྒཉཱཎེན ཨནབྷཱཝཾཀཏཱ, པཙྩཝེཀྑཎཉཱཎེན ཨཱཡཏིཾ ཨནུཔྤཱདདྷམྨཱཏི ཝེདིཏབྦཱ. ལོཀིཡམགྒེན ཝཱ པཧཱིནཱ, དསྶནམགྒེན ཨུཙྪིནྣམཱུལཱ, ཏིཝིདྷེན བྷཱཝནཱམགྒེན ཏཱལཱཝཏྠུཀཏཱཏིཨཱདི. བྲཱཧྨཎསྶ ཨཝིསཡཏྟཱ དྷམྨརསཱ ན ཨུདྡྷཊཱ.

༡༡. དྷམྨདྷཱཏུནྟི ཨེཏྠ སབྦཉྙུཏཉྙཱཎཾ དྷམྨདྷཱཏུ ནཱམ. ཨནུཀམྤཝཙནཱནུརཱུཔཾ ‘‘པུཎྞཙནྡོ ཝིཡཱ’’ཏི ཝུཏྟཾ, སཱུརིཡཝཙནཾ ‘‘སུཔྤཊིཝིདྡྷཏྟཱ’’ཏིཝཙནཱནུརཱུཔཾ, པཐཝཱིསམཙིཏྟཏཱཡ ཀཱརཎཾ ¶ ‘‘ཀརུཎཱཝིཔྥཱར’’ནྟི ཝདནྟི. པཊིཙྪཱདེཏབྦེ ཧི ཨཏྟནོ གུཎེ ‘‘ཨཱརདྡྷཾ ཁོ པན མེ ཝཱིརིཡ’’ནྟིཨཱདིནཱ པཀཱསེནྟོ ཨཏྟནོ ཀརུཎཱཝིཔྥཱརཾ པཀཱསེཏཱིཏི གཧེཏབྦོ. ཝརབྷཱུརིམེདྷསོ ཝརཔུཐུལཉཱཎོ, བྷཱུརཱིཏི ཝཱ བྷཱུམི, བྷཱུམི ཝིཡ པཏྠཊཝརཔཉྙོཏི ཨཏྠོ. ཨབུཛ྄ཛྷི ཨེཏྠཱཏིཔི ཨདྷིཀརཎེན རུཀྑོ བོདྷི. སཡཾ བུཛ྄ཛྷཏི, བུཛ྄ཛྷནྟི ཝཱ ཏེན ཏཾསམངྒིནོཏི མགྒོ བོདྷི, ཨེཝཾ སབྦཉྙུཏཉྙཱཎམྤི. བུཛ྄ཛྷཱིཡཏཱིཏི ནིབྦཱནཾ བོདྷི. ཏིསྶནྣཾ ཝིཛྫཱནཾ ཨུཔནིསྶཡཝཏོ ཡཐཱསམྦྷཝཾ ཏིསྶོ ཝིཛྫཱ ཝེདིཏབྦཱ. ཨེཀགྒཏཱཝསེན ཏིཀྑབྷཱཝོ. ཏིཀྑོཔི ཨེཀཙྩོ སརོ ལཀྑཾ པཏྭཱ ཀུཎྛོ ཧོཏི, ན ཏཐཱ ཨིདཾ. སཏིནྡྲིཡཝསེནསྶ ཁརབྷཱཝོ, སདྡྷིནྡྲིཡཝསེན ཝིཔྤསནྣབྷཱཝོ, ཨནྟརཱ ཨནོསཀྐིཏྭཱ ཀིལེསཔཙྩཏྠིཀཱནཾ སུཊྛུ ཨབྷིབྷཝནཏོ ཝཱིརིཡིནྡྲིཡཝསེནསྶ སཱུརབྷཱཝོ ཙ ཝེདིཏབྦོ. མགྒཝིཛཱཡནཏྠཾ གབྦྷགྒཧཎཀཱལོ སངྑཱརུཔེཀྑཱནནྟརམནུལོམཏྟཱ.

ཚནྡོཏི ཙ སངྐཔྤོཏི ཙ ཨཝཏྠནྟརབྷེདབྷིནྣོ རཱགོཝ –

‘‘སེནཧཱཏྠྱངྒམུཔེཏི,

རཏྟཧདཡོ རཱགེན;

སམྨགཏེ རཏྟཀཱམམུཔེཏི,

ཀཱམཔཏིཏཾ ལོཀསྶ མཱཏྲཱལམཏཱི’’ཏི –

ཨཱདཱིསུ ཝིཡ –

ཝིབྷངྒེཡེཝ ཀིཉྩཱཔི ཨཏྠོ ཝུཏྟོཏི ཨེཏྠ ཨཡམདྷིཔྤཱཡོ – ཝིབྷངྒཔཱལི༹ཾ ཨཱནེཏྭཱ ཨིདྷ ཝུཏྟོཔི སབྦེསཾ ཨུཔཀཱརཱཡ ན ཧོཏི, ཏསྨཱ ཏཾ ཨཊྛཀཐཱནཡེནེཝ པཀཱསཡིསྶཱམཱིཏི. ཨིཏོཏི ཀཱམེཧི. ཀཱཡཝིཝེཀཱདཱིསུ ¶ ཨུཔདྷིཝིཝེཀོ ཏཏིཡོ, ཏསྨཱ ཏཏིཡཾ ཚཌྜེཏྭཱ དྭེ གཧེཏྭཱ ཏདངྒཱདཱིསུ ཝིཀྑམྦྷནཝིཝེཀཾ གཧེཏྭཱ ‘‘ཏཡོ ཨེཝཱ’’ཏི ཝུཏྟཱ. ཨེཝཾ སཏི ཙིཏྟཝིཀྑམྦྷནཱ ཨེཀཏྠཱ ཨེཝཱཏི ཝིསེསོ ན སིཡཱཏི ཙེ? ཨཔྤནཱཝཱརཏྟཱ ན པནེཝཾ དཊྛབྦཾ. ཀཱཡཝིཝེཀགྒཧཎེན པུབྦབྷཱགགྒཧཎཾ ཉཱཡཏི, ཏསྨཱ ཙིཏྟཝིཝེཀོཏི ཏདངྒཝིཝེཀོ ཝུཏྟོ, ཝིཀྑམྦྷནེན ཨཔྤནཱཀཱལེཏི གཧེཏབྦཾ ཨསངྐརཏོ. ཨཐ ཝཱ ཙིཏྟཝིཝེཀེན ཏདངྒཝིཀྑམྦྷནཱ གཧིཏཱ, ཨིཏརེན ཝིཀྑམྦྷནཝིཝེཀོ ཨེཝཱཏིཔི ཡུཏྟཾ, ཀིལེསཀཱམཏྟཱ ཝཱ དྭཱིསུ ཀམྨེསུ པརིཡཱཔནྣོ པུརིསོ ཝིཡ. ཡཐཱ ཨཝིཛྫམཱནེན ཨཝིཛྫམཱནཔཉྙཏྟིཝསེན ལོཀེ ‘‘སཕལོ རུཀྑོ’’ཏི ¶ ཝུཙྩཏི, ཏཐེཝ ཝིཛྫམཱནེན ཝིཛྫམཱནཔཉྙཏྟིཝསེན སཱསནེ ‘‘སཝིཏཀྐཾ སཝིཙཱརཾ ཛྷཱན’’ནྟི ཝུཙྩཏཱིཏི ཨདྷིཔྤཱཡོ.

ཝཱུཔསམཱཏི ཨེཏྠ ཀེསཾ ཝཱུཔསམཱཏི, ཀིཾ པཋམཛ྄ཛྷཱནིཀཱནཾ, ཨུདཱཧུ དུཏིཡཛ྄ཛྷཱནིཀཱནནྟི? ཨེཏྠ ཡདི པཋམཛ྄ཛྷཱནིཀཱནཾ, ནཏྠི ཏེསཾ ཝཱུཔསམོ. ན ཧི པཋམཛ྄ཛྷཱནཾ ཝིཏཀྐཝིཙཱརརཧིཏཾ ཨཏྠི. ཡདི དུཏིཡཛ྄ཛྷཱནིཀཱནཾ, ནཏྠེཝ ཝཱུཔསམོ ཏཏྠ ཏདབྷཱཝཱཏི ཙེ? ཏེནེཏཾ ཝུཙྩཏི ‘‘སམཏིཀྐམཱ’’ཏི, སམཏིཀྐམོཔི ན ཏེསཾཡེཝ. ཀིནྟུ སཀལསྶཔི པཋམཛ྄ཛྷཱནདྷམྨརཱསིསྶཱཏི ཙེ? ཏེནེཏཾ ཝུཙྩཏི ‘‘ཨོལཱ༹རིཀསྶ པན སམཏིཀྐམཱ’’ཏིཨཱདི. སབྦེཔི པཋམཛ྄ཛྷཱནདྷམྨཱ ཨོལཱ༹རིཀཱཝ དུཏིཡཛ྄ཛྷཱནཏོ, ན ཀེཝལཾ ཝིཏཀྐཝིཙཱརདྭཡམེཝཱཏི ཙེ? ན ཝིཏཀྐཝིཙཱརཱཡེཝ ཏེཧི སམྤཡུཏྟཱནཾ ཨོལཱ༹རིཀབྷཱཝཏོཏི ཏེསྭེཝ ཨཱདཱིནཝདསྶནེན དུཏིཡཛ྄ཛྷཱནཀྑཎེ ཏེསཾ ཨབྷཱཝོ ཧོཏི. ཏེན ཝུཏྟཾ ‘‘དུཏིཡཛ྄ཛྷཱནཀྑཎེ ཨཔཱཏུབྷཱཝཱ’’ཏི, ཡསྶ དྷམྨསྶཱནུབྷཱཝེན, ཡོགེན ཝཱ ཨིདཾ ཛྷཱནཾ ‘‘སམྤསཱདན’’ནྟི ཝུཙྩཏི ‘‘ཨེཀོདིབྷཱཝ’’ནྟི ཙ, ཏསྶ དསྶནཏྠཾ སདྡྷཱསམཱདྷཡོ ཝིབྷངྒེ ཝུཏྟཱ. པཎཱིཏབྷོཛནསིཀྑཱཔདེ (པཱཙི. ༢༥༧ ཨཱདཡོ) སཔྤིཨཱདཡོ ཝིཡཱཏི ཝུཏྟེ ཨཡཾ ཨཏྠཝཎྞནཱ ན ཝིརུཛ྄ཛྷཏི. སམཾ པསྶཏཱིཏི ལཱིནུདྡྷཙྩཾ པཧཱཡ ཁཱིཎཱསཝསྶ ཚསུ དྭཱརེསུ ཨིཊྛཱནིཊྛཚལཱ༹རམྨཎཱཔཱཐེ པརིསུདྡྷཔཀཏིབྷཱཝཱཝིཛཧནཱཀཱརབྷཱུཏཱ ཨུཔེཀྑཱ ཚལ༹ངྒུཔེཀྑཱ. ནཱིཝརཎཱདིཔཊིསངྑཱསནྟིཊྛནཱགཧཎེ མཛ྄ཛྷཏྟབྷཱུཏཱ ཨུཔེཀྑཱ, ཨཡཾ སངྑཱརུཔེཀྑཱ ནཱམ. ཝིཙིནནེ མཛ྄ཛྷཏྟབྷཱུཏཱ ཨུཔེཀྑཱ ཝིཔསྶནུཔེཀྑཱ ནཱམ. ཏཏྠ ཚལ༹ངྒུཔེཀྑཱ བྲཧྨཝིཧཱརུཔེཀྑཱ བོཛ྄ཛྷངྒུཔེཀྑཱ ཏཏྲམཛ྄ཛྷཏྟུཔེཀྑཱ ཛྷཱནུཔེཀྑཱ པཱརིསུདྡྷུཔེཀྑཱ ¶ ཙ ཨཏྠཏོ ཨེཀཱ ཏཏྲམཛ྄ཛྷཏྟུཔེཀྑཱཝ, ཨཝཏྠཱབྷེདེན བྷེདོ ནེསཾ. སངྑཱརུཔེཀྑཱཝིཔསྶནུཔེཀྑཱནམྤི ཨེཀཏཱ པཉྙཱཝསེན, ཀིཙྩཝསེན པན དུཝིདྷཏཱ ཝེདིཏབྦཱ.

ཚལ༹ངྒུཔེཀྑཱ ཀཱམཱཝཙརཱ, བྲཧྨཝིཧཱརུཔེཀྑཱ རཱུཔཱཝཙརཱཏིཨཱདིནཱ བྷཱུམིཝསེན. ཚལ༹ངྒུཔེཀྑཱ ཁཱིཎཱསཝསྶེཝ, བྲཧྨཝིཧཱརུཔེཀྑཱ ཏིཎྞམྤི པུཐུཛྫནསེཀྑཱསེཀྑཱནནྟི ཨེཝཾ པུགྒལཝསེན. ཚལ༹ངྒུཔེཀྑཱ སོམནསྶུཔེཀྑཱསཧགཏཙིཏྟསམྤཡུཏྟཱ, བྲཧྨཝིཧཱརུཔེཀྑཱ ཨུཔེཀྑཱསཧགཏཙིཏྟསམྤཡུཏྟཱ ཨེཝཱཏི ཨེཝཾ ཙིཏྟཝསེན. ཚལ༹ངྒུཔེཀྑཱ ཚལཱ༹རམྨཎཱ, བྲཧྨཝིཧཱརུཔེཀྑཱ དྷམྨཱརམྨཎཱཝཱཏི ཨཱརམྨཎཝསེན. ཝེདནུཔེཀྑཱ ཝེདནཱཀྑནྡྷེན སངྒཧིཏཱ, ཨིཏརཱ ནཝ སངྑཱརཀྑནྡྷེནཱཏི ཁནྡྷསངྒཧཝསེན. ཚལ༹ངྒུཔེཀྑཱ བྲཧྨཝིཧཱརབོཛ྄ཛྷངྒཛྷཱནུཔེཀྑཱ པཱརིསུདྡྷིཏཏྲམཛ྄ཛྷཏྟུཔེཀྑཱ ཙ ཨཏྠཏོ ཨེཀཱ, ཏསྨཱ ཨེཀཀྑཎེ ཨེཀཱཝ སིཡཱ, ན ཨིཏརཱ, ཏཐཱ སངྑཱརུཔེཀྑཱཝིཔསྶནུཔེཀྑཱཔི. ཝེདནཱཝཱིརིཡུཔེཀྑཱནཾ ཨེཀཀྑཎེ སིཡཱ ཨུཔྤཏྟཱིཏི. ཚལ༹ངྒུཔེཀྑཱ ཨབྱཱཀཏཱ, བྲཧྨཝིཧཱརུཔེཀྑཱ ཀུསལཱབྱཱཀཏཱ, ཏཐཱ སེསཱ. ཝེདནུཔེཀྑཱ པན སིཡཱ ¶ ཨཀུསལཱཔི. ཨེཝཾ ཀུསལཏྟིཀཝསེན. དསཔེཏཱ སངྑེཔེན ཙཏྟཱརོཝ དྷམྨཱ ཝཱིརིཡཝེདནཱཏཏྲམཛ྄ཛྷཏྟཉཱཎཝསེན. ‘‘དུཀྑདོམནསྶསུཁསོམནསྶཱན’’ནྟི ཨེཝཾ པཧཱནཀྐམེན ཨཝཏྭཱ ཝིབྷངྒེ ཝུཏྟནཡེན ཀསྨཱ ཝུཏྟཱནཱིཏི ཙེ? སུཏྟཱནུརཀྑཎཏྠཾ. ཨིཊྛཱནིཊྛཝིཔརཱིཏནྟི ཨེཏྠ ‘‘ཨཱརམྨཎཝསེན ཨགྒཧེཏྭཱ ཨིཊྛཱནིཊྛཝིཔརཱིཏཱཀཱརེན ཨནུབྷཝཏཱིཏི གཧེཏབྦ’’ནྟི ཝདནྟི. ཀསྨཱ? ཨེཀཾཡེཝ ཀསིཎཾ ཨཱརབྦྷ སབྦེསཾ པཝཏྟིཏོ. ཏཏིཡཛ྄ཛྷཱནཏོ པཊྛཱཡ ཨུཔཀཱརཱ ཧུཏྭཱ ཨཱགཏཱཏི སཏིསཱིསེན དེསནཱ ཀཏཱ, ཝིགཏཝལཱཧཀཱདིནཱ སོམྨཏཱཡ རཏྟིཡཱ ཝལཱཧཀཱདིནཱ ཀཱལུསྶིཡེ སཏིཔི དིཝཱ ཝིཡ ཨནུཔཀཱརིཀཱ ན ཧོཏི རཏྟིཾ, ཏསྨཱ ‘‘ཨཏྟནོ ཨུཔཀཱརཀཏྟེན ཝཱ’’ཏི ཝུཏྟཾ. ‘‘སཱུརིཡཔྤབྷཱབྷིབྷཝཱ, རཏྟིཡཱ ཨལཱབྷཱཏི ཨིམེ དྭེ ཧེཏཱུ ཨཔརིསུདྡྷཏཱཡ ཀཱརཎཾ. སོམྨབྷཱཝེན, ཨཏྟནོ ཨུཔཀཱརཀཏྟེན ཙཱཏི ཨིམེ དྭེ སབྷཱགཏཱཡ ཀཱརཎ’’ནྟི ཝདནྟི, ཏསྶཱ ཨཔརིསུདྡྷཱཡ ཛཱཏིཡཱཏི ཝུཏྟཾ ཧོཏི, ཏསྨཱ ཀཱརཎཝཙནནྟི ཨེཀེ.

ཛྷཱནཀཐཱཝཎྞནཱ ནིཊྛིཏཱ.

པུབྦེནིཝཱསཀཐཱཝཎྞནཱ

༡༢. ཙིཏྟེཀགྒཏཱསབྷཱགཏྟཱ ¶ ཛྷཱནཱནཾ ‘‘ཀེསཉྩི ཙིཏྟེཀགྒཏཏྠཱནཱི’’ཏི ཨཱཧ. ཀུསལཱནཾ བྷཝོཀྐམནསབྷཱགཏྟཱ ‘‘ཀེསཉྩི བྷཝོཀྐམནཏྠཱནཱི’’ཏི. ཨསབྷཱགཏྟཱ སེསཊྛཱནེསུ ‘‘པཱདཀཏྠཱནཱི’’ཏི ཨཝཏྭཱ ‘‘པཱདཀཱནཱི’’ཏི ཨཱཧ. ཏེན པཱདཀབྷཱུཏཱནམྤི ཡཐཱསམྦྷཝཾ ཙིཏྟེཀགྒཏཱ བྷཝོཀྐམནཏཱཝཧཏཾ, ཨིཏརེསཾ ཡཐཱསམྦྷཝཾ པཱདཀཏཱཝཧཏཉྩ དཱིཔེཏི. ཨསབྷཱགཏྟཱ ཛཝནཝིཔསྶནཱཔཱདཀཱནི སམཱནཱནི ཨབྷིཉྙཱཔཱདཀཱནི ཙ ཧོནྟི, ཨབྷིཉྙཱཔཱདཀཱནི ཙ ཝིཔསྶནཱཔཱདཀཱནི ཧོནྟཱིཏིཔི དཱིཔེཏི, ཏཐཱ པཱདཀཱབྷཱཝཾ དཱིཔེཏི. ཨབྷིཉྙཱཡ ཧི ཙཏུཏྠམེཝ པཱདཀཾ, ན ཨིཏརཱནི. ཏེསུ ཙཏུཏྠསྶ ཏཏིཡཾ པཱདཀཾ, ཏཏིཡསྶ དུཏིཡཾ, དུཏིཡསྶ པཋམནྟི. ཨཐ ཝཱ ‘‘ཙཏྟཱརི ཛྷཱནཱནཱི’’ཏི ཡཐཱལཱབྷཏོ ཝུཏྟཾ.

ཝིནཡནིདཱནནིམིཏྟཾ, ཝེརཉྫནིཝཱསཀཔྤནཾ;

སཏྠུ ཡསྨཱ ཏསྨཱ བྷགཝཱ, ཝིཛྫཏྟཡམཱཧ ཝེརཉྫེ.

ཝུཏྟཉྷེཏཾ ‘‘ཝིནཡེ སུཔྤཊིཔནྣོ བྷིཀྑུ སཱིལསམྤཏྟིཾ ནིསྶཱཡཱ’’ཏིཨཱདི (པཱརཱ. ཨཊྛ. ༡.པཋམམཧཱསངྒཱིཏིཀཐཱ). སཱིལཝཏོ ཧི སཱིལཔཙྩཝེཀྑཎཏྠཾ རཏྟིཊྛཱནདིཝཱཋཱནེསུ ནིསིནྣསྶ ནིསཛྫནཏོ པཊྛཱཡ ཨཏྟནོ ཨཏཱིཏཀིརིཡཱནུསྶརཎབཧུལཏཱཡ པུབྦེནིཝཱསཱནུསྶཏིཝིཛྫཱ ཨཔྤཀསིརེན ¶ སམིཛ྄ཛྷཏི. ཏཐཱ ཨཏྟཱནཾ པཊིཙྩ སཏྟཱནཾ ཙུཏིཔརིགྒཧཎསཱིལཏཱཡ ཙུཏཱུཔཔཱཏཉཱཎཾ ཨཔྤཀསིརེན སམིཛ྄ཛྷཏི, ཨུདཀཱདཱིསུ སུཁུམཏྟ དསྶནསཱིལཏཱཡ དིབྦཙཀྑུཉཱཎཾ སམིཛ྄ཛྷཏི. ཡསྨཱ སཏྟཝིདྷམེཐུནསཾཡོགཔརིཝཛྫནེན, ཀཱམཱསཝཱདིཔརིཝཛྫནེན ཝཱ བྲཧྨཙརིཡཾ ཨཁཎྜཱདིབྷཱཝཾ པཱཔུཎཱཏི, ཏསྨཱསྶ ཨཱསཝཀྑཡཉཱཎཾ ཨཔྤཀསིརེན སམིཛ྄ཛྷཏཱིཏི ཨེཏྠ ཝིནཡནིདཱནེ ཝིཛྫཏྟཡམེཝ དསྶིཏཾ, ཏསྨཱ ཨཱཧ ‘‘ཡེསཉྩ གུཎཱནཾ དཱཡཀཾ ཨཧོསི, ཏེསཾ ཨེཀདེསཾ དསྶེནྟོ’’ཏི, ཨཉྙཐཱ ཝིཛྫཏྟཡཔཊིལཱབྷམཏྟཔྤསངྒོ སིཡཱཏི.

སོ ཨེཝནྟི ཨིམིནཱ ཀིཉྩཱཔི ཙཏུནྣཾ ཛྷཱནཱནཾ པུབྦབྷཱགཔཊིཔདཱཔི སངྒཧཾ གཙྪཏི, ན ཀེཝལཾ པུརིམཛ྄ཛྷཱནཏྟིཀམེཝ, ཏཐཱཔི ཀེཝལཾ པུརིམཛ྄ཛྷཱནཏྟིཀམེཝ གཎྷནྟོ ‘‘ཨེཝནྟི ཙཏུཏྠཛ྄ཛྷཱནཀྐམནིདསྶནམེཏཾ, ཨིམིནཱ པཋམཛ྄ཛྷཱནཱདྷིགམཱདིནཱ ཀམེན ཙཏུཏྠཛ྄ཛྷཱནཾ པཊིལབྷིཏྭཱཏི ཝུཏྟཾ ཧོཏཱི’’ཏི ཨཱཧ, ཏཾ ཀསྨཱཏི ¶ ཙེ? སམྦྷཱརབྷཱུམིཏྟཱ. ཝུཏྟཉྷེཏཾ ཨཊྛཀཐཱཡཾ (ཝིསུདྡྷི. ༢.༣༨༡) ‘‘ཨེཏྠ ཙ པུརིམཱནི ཏཱིཎི ཛྷཱནཱནི ཡསྨཱ པཱིཏིཕརཎེན ཙ སུཁཕརཎེན ཙ སུཁསཉྙཉྩ ལཧུསཉྙཉྩ ཨོཀྐམིཏྭཱ ལཧུམུདུཀམྨཉྙཀཱཡོ ཧུཏྭཱ ཨིདྡྷིཾ པཱཔུཎཱཏི, ཏསྨཱ ཨིམིནཱ པརིཡཱཡེན ཨིདྡྷིལཱབྷཱཡ སཾཝཏྟནཏོ སམྦྷཱརབྷཱུམིཡོཏི ཝེདིཏབྦཱནི. ཙཏུཏྠཛ྄ཛྷཱནཾ པན ཨིདྡྷིལཱབྷཱཡ པཀཏིབྷཱུམི ཨེཝཱ’’ཏི. ཨིདམེཝ ཝཱ ཨཏྠཾ སནྡྷཱཡཱཧ ‘‘པུབྦེ ཨིམཱནི ཙཏྟཱརི ཛྷཱནཱནི ཀེསཉྩི ཨབྷིཉྙཱཔཱདཀཱནཱི’’ཏི. ཡདི ཨེཝཾ ཙཏུཏྠཛ྄ཛྷཱནམྤི ཨནྟོཀཏྭཱ ཨེཝནྟི ཀིམཏྠཾ ན ཝུཏྟཾ. ཏཉྷི པཀཏིབྷཱུམཱིཏི ཙེ? ན ཝཏྟབྦཾ, ཙཏུཏྠཛ྄ཛྷཱནཏོ པརསྶ སམཱཧིཏཱདིབྷཱཝཔྤཏྟསྶ ཙིཏྟསྶ ཨཏྠིབྷཱཝཔྤསངྒཏོ. ཡསྨཱ ཡསྨིཾ སཏི ‘‘པུབྦེནིཝཱསཱནུསྶཏིཉཱཎཱཡ ཙིཏྟཾ ཨབྷིནིནྣཱམེསི’’ནྟི ཝུཏྟཾ, ཏསྨཱ ཏསྨིཾ ཙཏུཏྠཛ྄ཛྷཱནཙིཏྟེ པཀཏིབྷཱུམིབྷཱཝཔྤཏྟེ ཨབྷིཉྙཱཔཱདཀེ ཛཱཏེ པརིཀམྨཙིཏྟཾ ‘‘པུབྦེནིཝཱསཱནུསྶཏིཉཱཎཱཡ ཨབྷིནིནྣཱམེསི’’ནྟི ཨཱཧ. ཨབྷིནཱིཧཱརཀྑམཾ ཧོཏཱིཏི ཨེཏྠ ཏཾ ཨིདྡྷིཝིདྷཱདྷིགམཏྠཱཡ པརིཀམྨཙིཏྟཾ ཨབྷིནཱིཧརཏི. ཀསིཎཱརམྨཎཏོ ཨཔནེཏྭཱ ཨིདྡྷིཝིདྷཱབྷིམུཁཾ པེསེསི. གཎྛིཔདེ པན ‘‘ཨབྷིཉྙཱཔཱདཀཛ྄ཛྷཱནཏོ ཨིདྡྷིཝིདྷཉཱཎཱདཱིནཾ ནཱིཧརཎཏྠ’’ནྟི ཝུཏྟཏྟཱ ཨབྷིནཱིཧཱརཀྑམནྟི ཨཏྠོ པཀཔྤིཏོ.

སོ ཨེཝཾ སམཱཧིཏེ ཨེཝཾ ཨཱནེཉྫཔྤཏྟེཏི ཡོཛནཱ ཝེདིཏབྦཱ དུཏིཡཝིཀཔྤེ, ནཱིཝརཎདཱུརཱིབྷཱཝེན ཝིཏཀྐཱདིསམཏིཀྐམེནཱཏི པཋམཛ྄ཛྷཱནཱདཱིནཾ ཀིཙྩསངྒཎྷནཏོ. ཨཡཾ ཡོཛནཱ པཋམཝིཀཔྤེ ན སམྦྷཝཏི ‘‘པརིསུདྡྷེཏིཨཱདཱིསུ པནཱ’’ཏི ཝཙནེན ‘‘ཨེཝ’’ནྟི པདསྶ ཨནུཔྤབནྡྷནིཝཱརཎཏོ. ཏེནེཝ ‘‘ཨུཔེཀྑཱསཏིཔཱརིསུདྡྷིབྷཱཝེན པརིསུདྡྷེ’’ཏིཨཱདིམཱཧ. ཨིཙྪཱཝཙརཱནནྟི ‘‘ཨཧོ ཝཏཱཧཾ ཨཱཔཏྟིཉྩེཝ ཨཱཔནྣོ ཨསྶཾ, ན ཙ མཾ བྷིཀྑཱུ ཛཱནེཡྻུ’’ནྟིཨཱདིནཱ ¶ (མ. ནི. ༡.༦༠) ནཡེན ཨུཔྤནྣཨིཙྪཱཝསེན པཝཏྟཱནཾ ཀོཔཨཔཙྩཡཱནཾ ཨབྷཱཝེན ཨནངྒཎེཏི ཨཏྠོ. ཨེཏྠ ཙ པན ཡཐཱཝུཏྟཔྤཀཱརཱ ཨིཙྪཱཔི པཋམཛ྄ཛྷཱནཱདཱིནཾ ཨདྷིགམཱཡ ཨནྟརཱཡིཀཱ ‘‘སམྤཛཱནམུསཱཝཱདོ ཁོ པནཱཡསྨནྟོ ཨནྟརཱཡིཀོ དྷམྨོ’’ཏི (མཧཱཝ. ༡༣༤) ཝུཏྟཏྟཱ, པགེཝ ཨིཙྪཱཝཙརཱ ཀོཔཨཔཙྩཡཱ, ཏསྨཱ ཝུཏྟཾ ‘‘ཛྷཱནཔཊིལཱབྷཔཙྩནཱིཀཱནཾ པཱཔཀཱནཾ ཨིཙྪཱཝཙརཱན’’ནྟིཨཱདི. ཀཏྠཙི པན ‘‘ཛྷཱནཔཊིལཱབྷཔཙྩཡཱནཾ ཨིཙྪཱཝཙརཱན’’ནྟི པོཏྠཀེསུ པཱཋོ དིསྶཏི, སོ པམཱདལེཁོ, གཎྛིཔདེ ཙ ‘‘ཨཧོ ཝཏ སཏྠཱ མམཉྙེཝ པཊིཔུཙྪིཏྭཱ དྷམྨཾ དེསེཡྻཱ’’ཏི ¶ ཡོ ཏདཏྠོ ལིཁིཏོ, སོ དུལླིཁིཏོ. ན ཧི ཛྷཱནཔཊིལཱབྷཔཙྩཡཱ ཀོཔཱདཡོ ཨནངྒཎསུཏྟེ (མ. ནི. ༡.༥༧ ཨཱདཡོ) ཝུཏྟཱ, ‘‘ན ཙ ཡུཏྟིཏོ སམྦྷཝནྟི ཛྷཱནལཱབྷིནོ ཏདབྷཱཝཱ’’ཏི ཨཱཙརིཡོ ཝདཏི, ཏཾ ཝཱིམཾསིཏབྦཾ. ཨེཏྠ ཝིཛྫཏྟཡསྶ ཨུཏྟརུཏྟརཝིསེསདསྶནཏྠཾ ‘‘སོ ཨེཝཾ སམཱཧིཏེ ཙིཏྟེ’’ཏིཨཱདིནཱ པུནཔྤུནཾ ཨཊྛངྒནིདསྶནཾ ཀཏནྟི ཝེདིཏབྦཾ. ཨུཏྟརུཏྟརཝིསེསཱ ཙེབྷཱསཾ ཨཏྟདུཀྑཔརདུཀྑདསྶནཏདུཔསམཏྟདཱིཔནཏོ ཝེདིཏབྦཱ. བྷགཝཱ ཧི པུབྦེནིཝཱསཱནུསྶཏིཉཱཎེན ཨཏྟནོ ཨནནྟསཾསཱརདུཀྑཾ པསྶིཏྭཱ, ཙུཏཱུཔཔཱཏཉཱཎེན པརསྶ ཙ ལོཀསྶ ཨཱསཝཀྑཡཉཱཎེན ཏདུབྷཡཝཱུཔསམཏྟཉྩ པསྶིཏྭཱ ཏཾ དེསེཏི, པཋམེན ཝཱ ཨཏྟདུཀྑདསྶནཏོ ཨཏྟསིནེཧཔརིཙྩཱགཾ དཱིཔེཏི. དུཏིཡེན པརདུཀྑདསྶནཏོ པརེསུ ཀོཔཔརིཙྩཱགཾ, ཏཏིཡེན ཨརིཡམགྒདསྶནཏོ མོཧཔརིཙྩཱགཉྩ དཱིཔེཏི. ཨེཝཾ ནཱནཱགུཎཝིསེསདཱིཔནཏོ ཨིམསྶེཝ ལོཀིཡཱབྷིཉྙཱདྭཡསྶ ཨིདྷ གཧཎཾ ཀཏནྟི ཝེདིཏབྦཾ.

ཡསྨཱ ཨཏཱིཏཛཱཏི ཨེཝ ནིཝཱསོ, ཏསྨཱ ‘‘ཨཏཱིཏཛཱཏཱིསཱུ’’ཏི ན ཝཏྟབྦནྟི ཙེ? ན, ཛཱཏིཡཱ ཨེཀདེསེཔི ནིཝཱསཝོཧཱརསིདྡྷིདསྶནཏོ. པཱལི༹ཡཾ ཀིཉྩཱཔི ‘‘ཨེཀམྤི ཛཱཏིཾ དྭེཔི ཛཱཏིཡོ’’ཏིཨཱདིཝཙནེན སཀལཛཱཏིཡཱ ཨནུསྶརཎམེཝ པུབྦེནིཝཱསཱནུསྶཏི ཝིཡ དིསྶཏི, ན ཨེཝཾ དཊྛབྦཾ. ཏདེཀདེསཱནུསྶརཎམྤི པུབྦེནིཝཱསཱནུསྶཏི ཨེཝཱཏི དསྶནཏྠཾ, བྷུམྨཝཙནཾ ཀཏཾ ཨོཀཱསཱདིསངྒཧཏྠཉྩ. ‘‘ཚིནྣཝཊུམཀཱནུསྶརཎཱདཱིསཱུ’’ཏི ཨཱདི-སདྡེན ཨནིཝུཏྠལོཀདྷཱཏུདཱིཔརཊྛནགརགཱམཱདིགྒཧཎཾ ཝེདིཏབྦཾ. གཎྛིཔདེ པན ‘‘ཏེསཾ ཚིནྣཝཊུམཀཱནཾ ལོཀུཏྟརསཱིལཱདཱིནི ན བྷགཝཏཱ བོདྷིསཏྟཀཱལེ ཝིཉྙཱཏཱནཱི’’ཏི ཝུཏྟཾ. ཨཏྠཱཔཏྟིཏོ ལོཀིཡཱནི ཝིཉྙཱཏཱནཱིཏི ཨཱཔཛྫཏི, ཏཾ དིབྦཙཀྑུཉཱཎཱདྷིཀཱརེ ‘‘ཨརིཡཱནཾ ཨུཔཝཱདཀཱ’’ཏི ཝཙནེན སམེནྟཾ ཝིཡ དིསྶཏི. ན ཧི ཨརིཡེ ཨཔསྶནྟསྶ ཨེཝཾ ཧོཏི. ཀིམཏྠཾ པནེཏྠ ཨནུསྶཏི ཝུཏྟཱ, ནནུ ཨེས ཝིཛྫཱདྷིཀཱརོཏི ཙེ? ཨཱདིཀམྨིཀསྶ སཏིཝསེན ནིབྦཏྟིཏོ, ཨཏཱིཏདྷམྨཱནཾ སཏིཡཱ ཝིསེསཱདྷིཀཱརཏྟཱ ཙ. ཝུཏྟཉྷི ‘‘ཨནུསྶརཱམཱི’’ཏི.

‘‘ཝཏྟམཱནེསུ ¶ ཝིཛྫཱན-མཏཱིཏེསྭསྶ སརཏི;

ཨནཱགཏེསུ དྷམྨེསུ, སརཏི ཝིཛྫཱན པཎིདྷཱི’’ཏི.

ཨཱཙརིཡཀུམཱརིཏེན སིལོཀོཔི ཝུཏྟོ.

ཏཏྠ ¶ རཱགེ ཨུསྶནྣཏརེ ཏེཛོསཾཝཊྚོ. དོསེ ཨཱཔོསཾཝཊྚོ. མོཧེ ཝཱཡོསཾཝཊྚོ. ཀེཙི ‘‘དོསེ ཏེཛོསཾཝཊྚོ, རཱགེ ཨཱཔོསཾཝཊྚོ, མོཧེ ཝཱཡོསཾཝཊྚོ’’ཏི ཝདནྟི. ཡསྨཱ ཨམུཏྲཱཏི ཙིཏྟཾ, ཝཙནཾ ཝཱ བྷཝཱདིནིཡམེན ཧོཏི, ཏསྨཱ ‘‘བྷཝེ ཝཱ’’ཏིཨཱདི. ཨེཝཾནཱམོ ཨེཝཾགོཏྟོཏི པདདྭཡེན ཨཛ྄ཛྷཏྟབཧིདྡྷཱམཱུལཀཾ པཉྙཏྟིསངྑཱཏཾ གོཙརནིཝཱསཾ དཱིཔེཏི. པཝཏྟཕལབྷོཛནོ སཡཾཔཏིཏཕལཱཧཱརོ. ཙཏུརཱསཱིཏིཀཔྤསཧསྶཔརམཱཡུཔརིཡནྟོ ཝཱཏི པཎིདྷཱནཏོ པུབྦེ. པཊིནིཝཏྟནྟསྶ པཙྩཝེཀྑཎཾ པུབྦེནིཝཱསཱནུསྶཏིཉཱཎཾ ན ཧོཏི. ‘‘པུབྦེནིཝཱསཱནུསྶཏིཉཱཎལཱབྷཱིནཾ པནེཏཾ ཨཱནུབྷཱཝཔརིདཱིཔན’’ནྟི གཎྛིཔདེ ཝུཏྟཾ. ཨམུཏྲཱཏི ཨེཏྠ པཋམཡོཛནཱཡཾ སཱིཧོཀྐནྟཝསེན ཨནུསྶརཎཾ ཝུཏྟཾ, ཏཉྩ ཁོ ཨནུལོམཝསེན. ‘‘པཊིལོམཝསེནཱ’’ཏིཔི ལིཁནྟི, ཏཾ དུཝིཉྙེཡྻཾ. སཱིཧོཀྐནྟཾ དསྶེཏུཾ ‘‘ཨནེཀཱསུ ཀཔྤཀོཊཱིསཱུ’’ཏིཨཱདི ཝུཏྟཾ. ཡཐཱ ཏནྟི ནིདསྶནེན པཊིཔཏྟིསཱདྷཱརཎེན ཕལསཱདྷཱརཎཏཾ དསྶེནྟོ བྲཱཧྨཎསྶ ཨཱདརཾ ཛནེཏི, ཨཏྟཱནམེཝེཀཾ ཨུཀྐཾསེཏཱིཏི ཝཙནཾ ནིཝཱརེཏི. ‘‘སཱདྷུ ཁོ པན ཏཐཱརཱུཔཱནཾ ཨརཧཏཾ དསྶནཾ ཧོཏཱི’’ཏི ཏསྶ པུབྦེ ཨུཔྤནྣཙིཏྟེ ཨེཝ ནིཡོཛེཏི. པཋམཱ ཨབྷིནིབྦྷིདཱཏི ཝཙནེན ཨཝིཛྫཎྜཀོསསྶ བཧུཔཊལབྷཱཝཾ དསྶེཏི, ཏེན ཨཊྛགུཎིསྶརིཡཱདིནཱ ཨནབྷིནིབྦྷིདཾ དཱིཔེཏི.

པུབྦེནིཝཱསཀཐཱཝཎྞནཱ ནིཊྛིཏཱ.

དིབྦཙཀྑུཉཱཎཀཐཱཝཎྞནཱ

༡༣. ‘‘ཙུཏཱུཔཔཱཏཉཱཎཱཡཱ’’ཏི ཕལཱུཔཙཱརེན ཝུཏྟཾ. ཨིདཉྷི དིབྦཙཀྑུཉཱཎཾ རཱུཔཱརམྨཎཏྟཱ པརིཏྟཔཙྩུཔྤནྣཨཛ྄ཛྷཏྟབཧིདྡྷཱརམྨཎཾ ཧོཏི. ན ཙུཏིཾ ཝཱ པཊིསནྡྷིཾ ཝཱ ཨཱརམྨཎཾ ཀརོཏི. ཏསྨཱ ‘‘ཡཐཱཀམྨཱུཔགེ སཏྟེ པཛཱནཱམཱི’’ཏི (པཱརཱ. ༡༣) ཝཙནཾ ཝིཡ ཕལཱུཔཙཱརེནེཝ ཝུཏྟམིདནྟི ཝེདིཏབྦཾ. དིབྦཝིཧཱརསནྣིསྶིཏཏྟཱ ཀཱརཎོཔཙཱརེན དིབྦཾ. ཨིམིནཱ པན ཀེཙི ཨཱཙརིཡཱ ‘‘ཀུསལཱཀུསལཱ ཙཀྑཱུ དིབྦཙཀྑུ ཀཱམཱཝཙར’’ནྟི ཝདནྟི, ཏེ པཊིསེདྷིཏཱ ཧོནྟི. ཙཏུཏྠཛ྄ཛྷཱནཔཉྙཱ ཧི ཨེཏྠ ཨདྷིཔྤེཏཱ. མཧཱཛུཏིཀཏྟཱ མཧཱགཏིཀཏྟཱཏི ཨེཏེསུ ¶ ‘‘སདྡསཏྠཱནུསཱརེནཱ’’ཏི ཝུཏྟཾ. ཨེཀཱདསནྣཾ ཨུཔཀྐིལེསཱནཾ ¶ ཨེཝཾ ཨུཔྤཏྟིཀྐམོ ཨུཔཀྐིལེསབྷཱཝོ ཙ ཝེདིཏབྦོ, མཧཱསཏྟསྶ ཨཱལོཀཾ ཝཌྜྷེཏྭཱ དིབྦཙཀྑུནཱ ནཱནཱཝིདྷཱནི རཱུཔཱནི དིསྭཱ ‘‘ཨིདཾ ནུ ཁོ ཀི’’ནྟི ཝིཙིཀིཙྪཱ ཨུདཔཱདི, སོ ཨུཔཀྐིལེསོ ཨུཔཀྐིལེསསུཏྟེ (མ. ནི. ༣.༢༣༦ ཨཱདཡོ) ‘‘ཝིཙིཀིཙྪཱདྷིཀརཎཉྩ པན མེ སམཱདྷིམྷི ཙཝི, སམཱདྷིམྷི ཙུཏེ ཨོབྷཱསོ ཨནྟརདྷཱཡཏི དསྶནཉྩ རཱུཔཱན’’ནྟི ཝཙནཏོ. ཏཏོ ‘‘རཱུཔཱནི མེ པསྶཏོ ཝིཙིཀིཙྪཱ ཨུཔྤཛྫཏི, ཨིདཱནི ན ཀིཉྩི མནསི ཀརིསྶཱམཱི’’ཏི ཙིནྟཡཏོ ཨམནསིཀཱརོ, ཏཏོ ཀིཉྩི ཨམནསིཀརོནྟསྶ ཐིནམིདྡྷཾ ཨུདཔཱདི, ཏཏོ ཏསྶ པཧཱནཏྠཾ ཨཱལོཀཾ ཝཌྜྷེཏྭཱ རཱུཔཱནི པསྶཏོ ཧིམཝནྟཱདཱིསུ དཱནཝརཀྑསཱདཡོ པསྶནྟསྶ ཚམྦྷིཏཏྟཾ ཨུདཔཱདི, ཏཏོ ཏསྶ པཧཱནཏྠཾ ‘‘མཡཱ དིཊྛབྷཡཾ པཀཏིཡཱ ཨོལོཀིཡམཱནཾ ནཏྠི, ཨདིཊྛེ ཀིཾ ནཱམ བྷཡ’’ནྟི ཙིནྟཡཏོ ཨུཔྤིལཱཝིཏཏྟཾ ཨུདཔཱདི. གཎྛིཔདེ པན ‘‘ཨུཔྤིལཾ དིབྦརཱུཔདསྶེནེནཱ’’ཏི ཝུཏྟཾ, ‘‘ཏཾ དུཝུཏྟཾ པརཏོ ཨབྷིཛཔྤཱཝཙནེན ཏདཏྠསིདྡྷིཏོ’’ཏི ཨཱཙརིཡོ ཝདཏི. ཏཏོ ཚམྦྷིཏཏྟཔྤཧཱནཏྠཾ ‘‘མཡཱ ཝཱིརིཡཾ དལ༹ྷཾ པགྒཧིཏཾ, ཏེན མེ ཨིདཾ ཨུཔྤིལཾ ཨུཔྤནྣ’’ནྟི ཝཱིརིཡཾ སིཐིལཾ ཀརོནྟསྶ ཀཱཡདུཊྛུལླཾ ཀཱཡདརཐོ ཀཱཡཱལསིཡཾ ཨུདཔཱདི, ཏཏོ ཏཾ ཙཛནྟསྶ ཨཙྩཱརདྡྷཝཱིརིཡཾ ཨུདཔཱདི, ཏཏྠ དོསཾ པསྶཏོ ཨཏིལཱིནཝཱིརིཡཾ ཨུཔདཱདི, ཏཏོ ཏཾ པཧཱཡ སམཔྤཝཏྟེན ཝཱིརིཡེན ཚམྦྷིཏཏྟབྷཡཱ ཧིམཝནྟཱདིཊྛཱནཾ པཧཱཡ དེཝལོཀཱབྷིམུཁཾ ཨཱལོཀཾ ཝཌྜྷེཏྭཱ དེཝསངྒྷཾ པསྶཏོ ཏཎྷཱསངྑཱཏཱ ཨབྷིཛཔྤཱ ཨུདཔཱདི, ཏཏོ ‘‘མཡ྄ཧཾ ཨེཀཛཱཏིཀརཱུཔཾ མནསི ཀརོནྟསྶ ཨབྷིཛཔྤཱ ཨུཔྤནྣཱ, ཏསྨཱ དཱནི ནཱནཱཝིདྷཾ རཱུཔཾ མནསི ཀརིསྶཱམཱི’’ཏི ཀཱལེན དེཝལོཀཱབྷིམུཁཾ, ཀཱལེན མནུསྶལོཀཱབྷིམུཁཾ ཨཱལོཀཾ ཝཌྜྷེཏྭཱ ནཱནཱཝིདྷཱནི རཱུཔཱནི མནསི ཀརོཏོ ནཱནཏྟསཉྙཱ ཨུདཔཱདི, ཏཏོ ‘‘ནཱནཱཝིདྷརཱུཔཱནི མེ མནསི ཀརོནྟསྶ ནཱནཏྟསཉྙཱ ཨུདཔཱདི, ཏསྨཱ དཱནི ཨབྷིཛཔྤཱདིབྷཡཱ ཨིཊྛཱདིནིམིཏྟགྒཱཧཾ པཧཱཡ ཨེཀཛཱཏིཀམེཝ རཱུཔཾ མནསི ཀརིསྶཱམཱི’’ཏི ཏཐཱ ཀརོཏོ ཨབྷིནིཛ྄ཛྷཱཡིཏཏྟཾ རཱུཔཱནཾ ཨུདཔཱདི ཨེཝཾ པཧཱིནཨུཔཀྐིལེསསྶཱཔི ཨནདྷིཊྛིཏཏྟཱ. ཨོབྷཱསཉྷི ཁོ ཛཱནཱམི, ན ཙ རཱུཔཱནི པསྶཱམཱིཏིཨཱདི ཛཱཏཾ.

ཏསྶཏྠོ – ཡདཱ པརིཀམྨོབྷཱསམེཝ མནསི ཀརོམི, ཏདཱ ཨོབྷཱསཾ སཉྫཱནཱམི, དིབྦེན ཙཀྑུནཱ རཱུཔཱནི ན ཙ པསྶཱམི, རཱུཔདསྶནཀཱལེ ཙ ¶ ཨོབྷཱསཾ ན ཛཱནཱམཱིཏི. ཀིམཏྠམིདཾ ཝུཏྟཾ, ན ཧི ཨེཏཾ ཨུཔཀྐིསེསགཏནྟི? ན ཀེཝལཾ ཨུཔཀྐིལེསཔྤཛཧནམེཝེཏྠ ཀཏྟབྦཾ, ཡེན ཨིདཾ ཝིསུདྡྷཾ ཧོཏི, ཨཉྙམྤི ཏདུཏྟརི ཀཏྟབྦཾ ཨཏྠཱིཏི དསྶནཏྠཾ. ཝིཙིཀིཙྪཱ ཙིཏྟསྶ ཨུཔཀྐིལེསོཏིཨཱདཱིསུ ‘‘ཨིམེ དྷམྨཱ ཨུཔཀྐིལེསཱཏི ཨཱདཱིནཝདསྶནེན པཛཧིཾ, ན མཡ྄ཧཾ ཏདཱ ཨུཔྤནྣཏྟཱ’’ཏི ཀེཙི ཝདནྟི. མཱནུསཀཾ ཝཱཏི ཨིམིནཱ སབྷཱཝཱཏིཀྐམཾ དསྶེཏི. མཾསཙཀྑུནཱ ¶ ཝིཡཱཏི ཨིམིནཱ པརིཡཏྟིགྒཧཎཾ, ཝཎྞམཏྟཱརམྨཎཏཉྩ ཨུཔམེཏི. ཝཎྞམཏྟེ ཧེཏྠ སཏྟ-སདྡོ, ན ‘‘སབྦེ སཏྟཱ ཨཱཧཱརཊྛིཏིཀཱ’’ཏི (ཨ. ནི. ༡༠.༢༧) ཨེཏྠ ཝིཡ སབྦསངྑཏེསུ, ཧཱིནཛཱཏིཨཱདཡོ མོཧསྶ ནིསྶནྡོ ཝིཔཱཀོ. ཀཱཡདུཙྩརིཏེན སམནྣཱགཏཱ པུབྦེ ཨཏཱིཏབྷཝེ ཨཧེསུཾ, སམྤཏི ནིརཡཾ ཨུཔཔནྣཱཏི ཨེཝཾ པཱཋསེསེན སམྦནྡྷོ ཝེདིཏབྦོ. ‘‘ཡཐཱཀམྨཱུཔགཉཱཎཉྷི ཨེཀནྟམཏཱིཏཱརམྨཎཾ, དིབྦཙཀྑུ པཙྩུཔྤནྣཱརམྨཎ’’ནྟི ཨུབྷིནྣཾ ཀིཙྩཝསེན ཝུཏྟཾ. མཧལླཀོཏི སམཎཱནཾ སཱརུཔྤམསཱརུཔྤཾ, ལོཀཱཙཱརཾ ཝཱ ན ཛཱནཱཏཱིཏི ཨདྷིཔྤཱཡེན ཝུཏྟཏྟཱ གུཎཔརིདྷཾསནེན གརཧཏཱིཏི ཝེདིཏབྦཾ. ‘‘ནིཡཏོ སམྦོདྷིཔརཱཡནོ’’ཏི (སཾ. ནི. ༢.༤༡; ༥.༩༩༨, ༡༠༠༤) ཝུཏྟོ ཨརིཡཔུགྒལོ མགྒཱཝརཎཾ ཀཱཏུཾ སམཏྠཾ ཕརུསཝཙནཾ ཡདི ཀཐེཡྻ, ཨཔཱཡགམནཱིཡམྤི ཀརེཡྻ, ཏེན སོ ཨཔཱཡུཔགོཔི བྷཝེཡྻ, ཏསྨཱ ཨུཔཔརིཀྑིཏབྦནྟི ཨེཀེ. ‘‘ཝཱཡཱམཾ མཱ ཨཀཱསཱིཏི ཐེརེན ཝུཏྟཏྟཱ མགྒཱཝརཎཾ ཀརོཏཱི’’ཏི ཝདནྟི. པུབྦེཝ སོཏཱཔནྣེན ཨཔཱཡདྭཱརོ པིཧིཏོ, ཏསྨཱསྶ སགྒཱཝརཎཾ ནཏྠི. ‘‘པཱཀཏིཀནྟི པཝཏྟིཝིཔཱཀཾ ཨཧོསཱི’’ཏི ཝདནྟི. ‘‘ཝུདྡྷི ཧེསཱ, བྷིཀྑཝེ, ཨརིཡསྶ ཝིནཡེ, ཡོ ཨཙྩཡཾ ཨཙྩཡཏོ དིསྭཱ ཡཐཱདྷམྨཾ པཊིཀརོཏཱི’’ཏི (མ. ནི. ༣.༣༧༠; དཱི. ནི. ༡.༢༥༡) ཝཙནཏོ པཱཀཏིཀཾ ཨཧོསཱིཏི ཨེཀེ. སཙེ སོ ན ཁམཏཱིཏི སོཏཱཔནྣཱདཱིནཾ ཁནྟིགུཎསྶ མནྡཏཱཡ ཝཱ ཨཱཡཏིཾ ཏསྶ སུཊྛུ སཾཝརཏྠཱཡ ཝཱ ཨཀྑམནཾ སནྡྷཱཡ ཝུཏྟཾ. སུཁཱནཾ ཝཱ ཨཱཡསྶ ཨཱརམྨཎཱདིནོ ཨབྷཱཝཱ ཀཱལཀཉྩིཀཱ ཨསུརཱ ཧོནྟི. ‘‘ཨིཏོ བྷོ སུགཏིཾ གཙྪཱ’’ཏི (ཨིཏིཝུ. ༨༣) ཝཙནཏོ མནུསྶགཏིཔི. དིབྦཙཀྑུཉཱཎཝིཛྫཱཏི དིབྦཙཀྑུམེཝ དསྶནཊྛེན ཉཱཎཾ, ཏསྶ ཏསྶ ཨཏྠསྶ ཝིནྡནཊྛེན ཝིཛྫཱཏི ཨཏྠོ.

དིབྦཙཀྑུཉཱཎཀཐཱཝཎྞནཱ ནིཊྛིཏཱ.

ཨཱསཝཀྑཡཉཱཎཀཐཱཝཎྞནཱ

༡༤. སོ ¶ ཨེཝཾ སམཱཧིཏེ ཙིཏྟེཏི ཀིཾ པུརིམསྨིཾཡེཝ, ཨུདཱཧུ ཨཉྙསྨིཾཡེཝ ཙཏུཏྠཛ྄ཛྷཱནཙིཏྟེ. ཨཊྛཀཐཱཡམྤི ཡཏོ ཝུཊྛཱཡ པུརིམཝིཛྫཱདྭཡཾ ཨདྷིགཏཾ, ཏདེཝ པུན སམཱཔཛྫནཝསེན ཨབྷིནཝཾ ཨབྷིཎྷཾ ཀཏནྟི དསྶནཏྠཾ ‘‘སོ ཨེཝཾ སམཱཧིཏེ ཙིཏྟེཏི ཨིདྷ ཝིཔསྶནཱཔཱདཀཾ ཙཏུཏྠཛ྄ཛྷཱནཙིཏྟཾ ཝེདིཏབྦ’’ནྟི ཝུཏྟཾ. ཨེཏྠཱཧ – ཡདི ཏདེཝ པུན སམཱཔཛྫནཝསེན ཨབྷིནཝཾ ཀཏཾ, ཨཐ ཀསྨཱ པུབྦེ ཝིཡ ‘‘ཝིཔསྶནཱཔཱདཀཾ ཨབྷིཉྙཱཔཱདཀཾ ནིརོདྷཔཱདཀཾ སབྦཀིཙྩསཱདྷཀཾ སབྦལོཀིཡལོཀུཏྟརགུཎདཱཡཀཾ ཨིདྷ ཙཏུཏྠཛ྄ཛྷཱནཙིཏྟཾ ཝེདིཏབྦ’’ནྟི ཨཝཏྭཱ ‘‘ཨིདྷ ཝིཔསྶནཱཔཱདཀཾ ཙཏུཏྠཛ྄ཛྷཱནཙིཏྟཾ ཝེདིཏབྦ’’ནྟི ཨེཏྟཀམེཝ ཝུཏྟཾ ¶ , ནནུ ཨིདྷ ཏཐཱཝཙནཊྛཱནམེཝ ཏཾ ཨརཧཏྟམགྒེན སདྡྷིཾ སབྦགུཎནིཔྥཱདནཏོ, ན པཋམཝིཛྫཱདྭཡམཏྟནིཔྥཱདནཏོཏི? ཝུཙྩཏེ – ཨརིཡམགྒསྶ བོཛ྄ཛྷངྒམགྒངྒཛྷཱནངྒཔཊིཔདཱཝིམོཀྑཝིསེསནིཡམོ པུབྦབྷཱགཝུཊྛཱནགཱམིནཱིཝིཔསྶནཱཡ སངྑཱརུཔེཀྑཱསངྑཱཏཱཡ ནིཡམེན ཨཧོསཱིཏི དསྶནཏྠཾ ཝིཔསྶནཱཔཱདཀམིདྷ ཝུཏྟནྟི ཝེདིཏབྦཾ. ཏཏྠ པརིཡཱཔནྣཏྟཱ, ན ཏདཱརམྨཎམཏྟེན. པརིཡཱཡཏོཏི ཨཉྙེནཔི པཀཱརེན. ‘‘ཨིམེ ཨཱསཝཱ’’ཏི ཨཡཾ ཝཱརོ ཀིམཏྠཾ ཨཱརདྡྷོ? ‘‘ཨཱསཝཱནཾ ཁཡཉཱཎཱཡཱ’’ཏི ཨདྷིཀཱརཱནུལོམནཏྠཾ. མགྒཀྑཎེ ཧི ཙིཏྟཾ ཝིམུཙྩཏི, ཕལཀྑཎེ ཝིམུཏྟཾ ཧོཏཱིཏི ཨིདཾ ཨེཀཏྟནཡེན ཝུཏྟཾ. ཡཉྷི ཝིམུཙྩམཱནཾ, ཏདེཝ ཨཔརབྷཱགེ ཝིམུཏྟཾ ནཱམ ཧོཏི. ཡཉྩ ཝིམུཏྟཾ, ཏདེཝ པུབྦབྷཱགེ ཝིམུཙྩམཱནཾ ནཱམ ཧོཏི. བྷུཉྫམཱནོ ཨེཝ ཧི བྷོཛནཔརིཡོསཱནེ བྷུཏྟཱཝཱི ནཱམ. ‘‘ཨིམིནཱ པཙྩཝེཀྑཎཉཱཎཾ དསྶེཏཱི’’ཏི པཙྩཝེཀྑཎཉཱཎསྶ ཙ པཊྛཱནེ ‘‘མགྒཱ ཝུཊྛཧིཏྭཱ མགྒཾ པཙྩཝེཀྑཏི, ཕལཾ, ནིབྦཱནཾ, པཧཱིནེ ཀིལེསེ པཙྩཝེཀྑཏཱི’’ཏི ཨཡམུཔྤཏྟིཀྐམོ ཝུཏྟོ. པཝཏྟིཀྐམོ པནེཏྠ སརཱུཔཏོ ཨཏྠཏོཏི དྭིདྷཱ ཝུཏྟོ. ཏཏྠ ‘‘ཝིམུཏྟམིཏི ཉཱཎཾ ཨཧོསཱི’’ཏི སརཱུཔཏོ ཙཏུབྦིདྷསྶཔི པཙྩཝེཀྑཎཉཱཎསྶ པཝཏྟིཀྐམནིདསྶནཾ. ‘‘ཁཱིཎཱ ཛཱཏཱི’’ཏིཨཱདི ཨཏྠཏོ. ཏེནེཝ ཨནྟེ ‘‘ཨབྦྷཉྙཱསི’’ནྟི པུགྒལཱདྷིཊྛཱནཾ དེསནཾ ཨཀཱསི པཙྩཝེཀྑཎཉཱཎསྶ ཏཐཱ ཨཔྤཝཏྟིཏོ. ཨཔྤཊིསནྡྷིཀཾ ཧོཏཱིཏི ཛཱནནྟོ ‘‘ཁཱིཎཱ ཛཱཏཱི’’ཏི ཛཱནཱཏི ནཱམ. ‘‘དིབྦཙཀྑུནཱ པཙྩུཔྤནྣཱནཱགཏཾསཉཱཎ’’ནྟི ཨནཱགཏཾསཉཱཎསྶ ཙ དིབྦཙཀྑུསནྣིསྶིཏཏྟཱ ཝུཏྟཾ.

ཨཱསཝཀྑཡཉཱཎཀཐཱཝཎྞནཱ ནིཊྛིཏཱ.

ཨུཔཱསཀཏྟཔཊིཝེདནཱཀཐཱཝཎྞནཱ

༡༥. ཀཎྞསུཁཏོ ¶ ཧདཡངྒམཏོཏི ཝཙནམེཝ སནྡྷཱཡ ཝུཏྟཾ. ཨནཏྟུཀྐཾསནཏོཏིཨཱདི པུགྒལཝསེན, ཀཎྞསུཁཏོཏི སོཏིནྡྲིཡཾ སནྡྷཱཡ. ཨཱཔཱཐཱརམཎཱིཡཏོཏི ཉཱཎཱཔཱཐཱརམཎཱིཡཏོ. སཡམེཝ ཧེཊྛཱམུཁཛཱཏཾ ཝཱ, མགྒོ པན ཨསོཀོ ཧོཏི. ཏདཱ ཧི སོཀོ པཧཱིཡམཱནོ. ཙརིཡཱདིཨནུཀཱུལཏོ ཨཔྤཊིཀཱུལཾ. ‘‘མདྷུརམིམ’’ནྟི ཝུཏྟཏྟཱ ‘‘དྷམྨམིམ’’ནྟི ཝཙནཾ ཨདྷིཀཾ ཝིཡ དིསྶཏི. ཏསྨཱ ‘‘རཱགཝིརཱགམིམ’’ནྟི ཨེཝཾ ཝིསུཾ ཝིསུཾ ཡོཛེཏྭཱ པུན པིཎྜེཏྭཱ དྷམྨམིམཾ ཨུཔེཧཱིཏི ཡོཛེཏབྦཾ, ‘‘དྷམྨམེཝ སརཎཏྠམུཔེཧཱི’’ཏི པཋནྟི ཀིརཱཏི དཱིཔེཏི. སརཎགཏཱནཾ ཏེནེཝ སརཎགམནེན བྷཡཾ སནྟཱསཾ དུགྒཏིཾ པརིཀྐིལེསཾ དུཀྑཾ ཧིཾསཏཱིཏི རཏནཏྟཡཾ སརཎཾ ནཱམ. ཏཔྤསཱདཏགྒརུཏཱདཱིཧི ཝིཧཏཀིལེསོ ཏཔྤརཱཡནཏཱཀཱརཔྤཝཏྟོ ཙིཏྟུཔྤཱདོ ¶ སརཎགམནཾ. ཏཾསམངྒཱིསཏྟོ སརཎཾ གཙྪཏི. པབྷེདེན པན དུཝིདྷཾ སརཎགམནཾ ལོཀུཏྟརཾ ལོཀིཡནྟི. ཏཏྠ ལོཀུཏྟརཾ དིཊྛསཙྩཱནཾ མགྒཀྑཎེ སརཎགམནུཔཀྐིལེསསམུཙྪེདེན ནིབྦཱནཱརམྨཎཾ ཧུཏྭཱ ཀིཙྩཏོ སཀལེཔི རཏནཏྟཡེ ཨིཛ྄ཛྷཏི. ལོཀིཡཾ པུཐུཛྫནཱནཾ སརཎགམནུཔཀྐིལེསཾ ཏདངྒཝིཀྑམྦྷནེན ཨཱརམྨཎཏོ བུདྡྷཱདིགུཎཱརམྨཎཾ ཧུཏྭཱ ཨིཛ྄ཛྷཏི. ཏཾ ཨཏྠཏོ རཏནཏྟཡེ སདྡྷཱཔཊིལཱབྷོ སདྡྷཱམཱུལིཀཱ ཙ སམྨཱདིཊྛི. ལོཀུཏྟརསྶ ཙཏྟཱརི སཱམཉྙཕལཱནི ཝིཔཱཀཕལཾ, སབྦདུཀྑཀྑཡོ ཨཱནིསཾསཕལཾ. ‘‘ཡོ ཙ བུདྡྷཉྩ དྷམྨཉྩ…པེ… སབྦདུཀྑཱ པམུཙྩཏཱི’’ཏི (དྷ. པ. ༡༩༠-༡༩༢) ཧི ཝུཏྟཾ. ལོཀིཡསྶ བྷཝབྷོགསམྤདཱ. ‘‘ཡེ ཀེཙི བུདྡྷཾ སརཎཾ གཏཱསེ’’ཏི (དཱི. ནི. ༢.༣༣༢; སཾ. ནི. ༡.༣༧) ཧི ཝུཏྟཾ. ལོཀིཡསརཎགམནཾ ཏཱིསུ ཝཏྠཱུསུ ཨཉྙཱཎསཾསཡམིཙྪཱཉཱཎཱདཱིཧི སཾཀིལིསྶཏི, ན མཧཱཛུཏིཀཾ ཧོཏི, ན མཧཱཝིཔྥཱརཾ. ལོཀུཏྟརསྶ ནཏྠི སཾཀིལེསོ. ལོཀིཡསྶ སཱཝཛྫོ ཨནཝཛྫོཏི དུཝིདྷོ བྷེདོ. ཏཏྠ ཨཉྙསཏྠཱརཱདཱིསུ ཨཏྟསནྣིཡྻཱཏནཱདཱིཧི སཱཝཛྫོ ཧོཏི, སོ ཨནིཊྛཕལོ. ཨནཝཛྫོ ཀཱལཀིརིཡཱཡ, སོ ཨཝིཔཱཀཏྟཱ ཨཕལོ. ལོཀུཏྟརསྶ ནེཝཏྠི བྷེདོ. བྷཝནྟརེཔི ཧི ཨརིཡསཱཝཀོ ཨཉྙཾ སཏྠཱརཾ ན ཨུདྡིསཏི. ཡོ ཀོཙི སརཎགཏོ གཧཊྛོ ཨུཔཱསཀོ. རཏནཏྟཡཨུཔཱསནཏོ ཨུཔཱསཀོ. པཉྩ ཝེརམཎིཡོ ¶ སཱིལཾ. སཏྠསཏྟམཾསམཛྫཝིསཝཱཎིཛྫཱརཧིཏཾ དྷམྨེན ཛཱིཝིཀཾ ཨཱཛཱིཝོ. ཝུཏྟསཱིལཱཛཱིཝཝིཔཏྟི ཝིཔཏྟི ནཱམ. ཝིཔརཱིཏཱ སམྤཏྟི.

༡༦. ལཙྪཱམ ནུ ཁོཏི དུགྒཏེ སནྡྷཱཡ ཝུཏྟཾ. སཀྑིསྶཱམ ནུཁོ ནོཏི སམིདྡྷེ སནྡྷཱཡ. ཏཏྠ ཝེརཉྫཱཡཾ. པགྒཡ྄ཧཏཱིཏི པཏྟཾ པགྒཧོ, ཏེན པགྒཧེན པཏྟེནཱཏི ཨཏྠོ. སམཱདཱཡེཝཱཏི ནིདསྶནཾ. ན ཙ ཝཊྚཏཱིཏི པུན པཱཀཾ ཀིཉྩཱཔི ཝཊྚཏི, ཏཐཱཔི ན སུཊྛུ པཀྐཏྟཱ ཝུཏྟཾ, ‘‘ཨུཏྟཎྜུལབྷཏྟཾ ལབྷིཏྭཱཔི པིདྷེཏུཾ ན ཝཊྚཏཱི’’ཏི ཨཊྛཀཐཱཝཙནཉྩེཏྠ སཱདྷཀཾ. ‘‘སཱཝཀཱནཾ ཝཱ སིཀྑཱཔདཾ པཉྙཔེསྶཱམཱི’’ཏི ཨིམིནཱ ཝཙནེན ཨཱཛཱིཝཔཱརིསུདྡྷིསཱིལཾ སནྡྷཱཡ ‘‘པཙྪཱ སཱིལ’’ནྟི ཝུཏྟཾ. ཨུཔཱལིཏྠེརོཔི ཏཾ ཏཾ ཝཏྠུཾ པཊིཙྩ བྷགཝཏཱ བཧཱུནི སིཀྑཱཔདཱནི པཉྙཏྟཱནི ཨཏྠཱིཏི དཱིཔེཏི. ཡདི ཨེཝཾ ཝེརཉྫཱཡཾ ‘‘ཨེཏསྶ བྷགཝཱ ཀཱལོ’’ཏི ཝཙནཾ ན སམེཏཱིཏི ཙེ? ན, ཏཏོ པུབྦེ སིཀྑཱཔདཱབྷཱཝཔྤསངྒཏོ. ཐེརོ པན པཉྙཏྟཱནི ཋཔེཏྭཱ ཨིདཱནི པཉྙཔེཏབྦཱནི པཱཏིམོཀྑུདྡེསཔྤཧོནཀཱནི སནྡྷཱཡཱཧ. བྷགཝཱཔི ‘‘ན ཏཱཝ སཱརིཔུཏྟ སཏྠཱ སཱཝཀཱནཾ སིཀྑཱཔདཾ པཉྙཔེཏཱི’’ཏི བྷདྡཱལིསུཏྟེ (མ. ནི. ༢.༡༣༤; ཨཱདཡོ) ཝིཡ ཨེཀཙྩེསུ པཉྙཏྟེསུཔི ཏཏོ པརཾ པཉྙཔེཏབྦཱནི སནྡྷཱཡཱཧ. ཨིདྷེཝ ཨཊྛཀཐཱཡཾ ‘‘སཱམམྤི པཙནཾ སམཎསཱརུཔྤཾ ན ཧོཏི ན ཙ ཝཊྚཏཱི’’ཏི ཝཙནཉྩ, ཏཐཱ ‘‘རཏྟིཙྪེདོ ཝཱ ཝསྶཙྪེདོ ཝཱ’’ཏིཨཱདིཝཙནཱནི ཙ ཨཏྠི. ཨཉྙཐཱ ‘‘དྭཱིཧཱཀཱརེཧི བུདྡྷཱ བྷགཝནྟོ བྷིཀྑཱུ པཊིཔུཙྪནྟཱི’’ཏི ¶ ཨིདྷེཝེདཾ པཱལི༹ཋཔནཾ ཝིརུཛ྄ཛྷཏཱིཏི ཨཱཙརིཡེན ཝིཙཱརིཏཾ, ཏཾ སུནྡརཾ པུབྦེཔི པཉྙཏྟསིཀྑཱཔདསམྦྷཝཏོ. ཀིནྟུ ཨིདྷ པཱལི༹ཋཔནཝིརོདྷཝིཙཱརཎཱ པན ནིཔྤཡོཛནཱ ཝིཡ མམ དིསྶཏི. ཀསྨཱ? ཨུཔཱལིཏྠེརེན སངྒཱིཏིཀཱལེ ཝུཏྟཔཱཋཏྟཱ. རཏྟིཙྪེདོཏི སཏྟཱཧཀིཙྩཾ སནྡྷཱཡ ཝུཏྟོ. ‘‘སཏྟཱཧཀརཎཱིཡེན གནྟྭཱ རཏྟིཙྪེདོ ཝཱ ཝསྶཙྪེདོ ཝཱ ཨེཀབྷིཀྑུནཱཔི ན ཀཏོ’’ཏི ཝུཏྟཾ ཀིར མཧཱཨཊྛཀཐཱཡཾ, ཏསྨཱ ཝསྶཙྪེདསྶ ཀཱརཎེ སཏི སཏྟཱཧཀིཙྩཾ ཀཱཏུཾ ཝཊྚཏཱིཏི ཨེཀེ. ཝིནཡདྷརཱ པན ནིཙྪནྟི, ཏསྨཱ ཨཊྛཀཐཱདྷིཔྤཱཡོ ཝཱིམཾསིཏབྦོ, ཨིམཱཡ ཝེརཉྫཱཡཾ ཨཔྤིཙྪཏཱདིཔཊིཔདཱཡ པསནྣཱ. སཱལཱིནཾ ཝིཀཏི སཱལིཝིཀཏི.

༡༧-༨. ཨུཔཔནྣཕལོཏི བཧུཕལོ. ‘‘ཁུདྡཾ མདྷུ’’ནྟི པཱཋོ. ཐེརཾ སཱིཧནཱདཾ ནདཱཔེཏུཾ པུཙྪཱིཏི ཨིམིནཱ ཨཱཙརིཡོ ཡཾ པུབྦེ ཨཱཎཱཡ ཋིཏཱནཾ ¶ སཱཝཀཱནཾ མཧཱནུབྷཱཝཏཱདསྶནཾ ‘‘ཝེརཉྫཱཡཾ ནིཝཱསཔྤཡོཛན’’ནྟི ཨམྷེཧི ཝུཏྟཾ, ཏཾ སམྤཱདེཏི, རཱཛགཧེ ཝེརཉྫཱཡཉྩཱཏི ཨུབྷཡཏྠ ཝིཏཀྐུཔྤཱདེ ཨེཀཏོ པིཎྜེཏྭཱ དསྶེནྟོ ‘‘ཨཐ ཁོ ཨཱཡསྨཏོ སཱརིཔུཏྟསྶཱ’’ཏིཨཱདིམཱཧ. ཀཱལཾ སནྡྷཱཡ ཙིརཾ, ཋིཏིཾ སནྡྷཱཡ ཙིརཱཏི ཝིགྒཧོ.

ཀཱམཾ ཧིནོཏི ཨཏྟནོ ཕལནིབྦཏྟིཡཱ སཧཱཡཾ གཙྪཏཱིཏི ཀཏྟརི ཧེཏུ, ཏཐཱཔི ཨིདྷ ཏེན ཀརཎབྷཱུཏེན ཏསྶ ཕལཾ ཧིནོཏི པཝཏྟཏཱིཏི ཧེཏུ. ཏཐཱ གྷཊནྟི ཏེནཱཏི གྷཊོ. ཀིལཱསུནོཏི པཡོཛནཱབྷཱཝེན ཨཝཱཝཊཱ. ཨབྦོཀིཎྞཱནི ཝིསབྷཱགེཧི. ཨཱགཱམིནིཡཱ ཨནཱགཏེཏི ཨཏྠོ. ཨིམེསཾཡེཝ ནོཏི དསྶནཏྠཾ ‘‘སབྦབུདྡྷཱནཾ ཧཱི’’ཏི ཝུཏྟཾ. ཡཱཝསཱསནཔརིཡནྟཱཏི ཡཱཝ བུདྡྷཱ དྷརནྟི, ཏཱཝཱཏི ཨཏྠོ. ཁཏྟིཡབྲཱཧྨཎཱཝ ཨུཙྩཱ, ཏཏྠཱཔི ཝིསེསཾ དསྶེཏུཾ ‘‘ཨུཙྩནཱིཙཨུལཱ༹རུལཱ༹རབྷོགཱ’’ཏི. ‘‘མནསི ཀཏྭཱ’’ཏིཔི པཱཋོ. ཨུཔསམྤཱདྱཨུཔསམྤཱདྱཨིཙྩེཏཾ དྭཡཾ མཱགདྷེ ‘‘ཨུཔསམྤཛྫཱ’’ཏི ཝུཙྩཏི. ཨནུཔཱདཱཡཱཏི ཨཱརམྨཎཀརཎཝསེན ཨགྒཧེཏྭཱ. ཨཱསཝེཧཱིཏི ཀཏྟརི ཏཏིཡཱཝིབྷཏྟི. ཙིཏྟཱནཱིཏི པཙྩཏྟབཧུཝཙནཾ. ཝིམུཙྩིཾསཱུཏི ཀམྨཀཱརཀེ. ཝིམོཙིཏཱནཱིཏི ཨདྷིཔྤཱཡོཏི ཨཱཙརིཡོ. ཨཱསཝེཧཱིཏི པདཉྩ པཙྩཏྟེ ཀརཎཝཙནཾ ཀཏྭཱ གཎྛིཔདེ ཨཏྠོ པཀཱསིཏོ. ཡདི ཨརིཡམགྒེན ནིརུདྡྷཱནཾ ཨཱསཝཱནཾ ཝསེན ཨནཱསཝཏཱ, ལོཀེ ཙིཏྟཱནིཔི ཨནཱསཝཱ སིཡུཾ. ན ཧི ནིརུདྡྷཱནི ཙིཏྟཱནི ཨཱརམྨཎཱནི ཀརོནྟཱིཏི ཏཱནི ཨནིརུདྡྷཱསཝཝསེན སཱསཝཱནཱིཏི ཙེ. སོཏཱཔནྣསྶ མགྒཙིཏྟཾ ཨུཔརིམགྒཝཛ྄ཛྷཱསཝཝསེན སཱསཝཾ, ཨཝསིཊྛཱསཝསམུཙྪིནྡནཱནུབྷཱཝཏྟཱ ཕལཱནི སཱསཝཱནི སིཡུནྟི? ན, ཨཱསཝསམུཙྪིནྡནཱནུབྷཱཝཱགཏཕལཏྟཱ. བྷིཾསནསྶ ཀརཎཾ བྷིཾསནཀཏཾ, ཏསྨིཾ བྷིཾསནཀཏསྨིཾ, བྷིཾསནཀིརིཡཱཡཱཏི ཨཏྠོ. ཨིཏྠིལིངྒཾ ཝིཔལླཱསཾ ཀཏྭཱ ནཔུཾསཀལིངྒཾ, པུརིསལིངྒཾ ཝཱ ཀཏྭཱ. ནིམིཏྟཏྠེཏི ཨེཏྠ –

‘‘ཙམྨནི ¶ དཱིཔིནཾ ཧནྟི, དནྟེསུ ཧནྟི ཀུཉྫརཾ;

ཝཱལེསུ ཙཱམརིཾ ཧནྟི, སིངྒེསུ སརབྷོ ཧཏོ’’ཏི. –

ཨདྷིཀརཎཾ.

༢༠-༢༡. ནཙིརཊྛིཏིཀཀཱརཎེ ¶ ཀཐིཏེ ཙིརཊྛིཏིཀཀཱརཎཾ ཨཏྠཏོ ཝུཏྟཔཊིཔཀྑཝསེན ཀིཉྩཱཔི སིདྡྷཾ, ཏཐཱཔི ཏཾ ཐེརསྶ ཝིནཡཔཉྙཏྟིཡཱཙནཱཡ ཨོཀཱསཀཱརཎཱདྷིཔྤཱཡཏོ ཝིནཡཔཉྙཏྟིཡཱཙནོཀཱསཾ པཱཔེཏུཾ པུན བྷགཝནྟཾ ‘‘ཀོ པན, བྷནྟེ, ཧེཏཱུ’’ཏི པུཙྪི. བྷགཝཱཔི ཡཱཙནཾ སམྤཊིཙྪིཏུཀཱམོ བྱཱཀཱསི. ‘‘ཨཱསཝཊྛཱནཱིཡཱ སངྒྷེ པཱཏུབྷཝནྟཱི’’ཏི པུགྒལསྶ སངྒྷཔརིཡཱཔནྣཏྟཱ ཝུཏྟཾ. ཨཱདརཏྠཝསེནེཝེཏྠ དྭིཀྑཏྟུཾ ཝུཏྟནྟི ཡསྨཱ ཐེརོ པུབྦེ རཱཛགཧེ, སམྤཏི ཝེརཉྫཱཡནྟི དྭིཀྑཏྟུཾ ཀཱཙི, ཏསྨཱ ཨཱདརེན པུནཔྤུནཾ ཡཱཙཡམཱནཾ པསྶིཏྭཱ སཡམྤི བྷགཝཱ ཨཱདརེནེཝ ‘‘ཨཱགམེཧི ཏྭཾ སཱརིཔུཏྟཱ’’ཏི ཨཱཧ. ཏེནེཏཾ དཱིཔེཏི ‘‘མཱ ཏྭཾ པུནཔྤུནཾ ཡཱཙཱཧི, སམྤཊིཙྪིཏཱཝ མཡཱ ཏེ ཡཱཙནཱ, པུབྦེནནུ ཏཝཡཱཙནཾ སམྤཊིཙྪཏཱཝ མཡཱ ཨེཏྟཀེ ཀཱལེ ཨེཏྟཀཱནི སིཀྑཱཔདཱནི པཉྙཏྟཱནི, ན ཏཱཝ མེ སཱཝཀཱནཾ ཨཱཎཱཔཱཏིམོཀྑུདྡེསཱནུཛཱནནཀཱལོ སམྤཏྟོ, ཏཀྐཱནུམཱནཝསེན ཏཡཱ ‘ཨེཏསྶ བྷགཝཱ ཀཱལོ’ཏི པུནཔྤུནཾ ནིདྡིསིཡམཱནོཔི ནེས སོ ཀཱལོ, ཀིནྟུ ཏཐཱགཏོཝ ཏཏྠ ཀཱལཾ ཛཱནིསྶཏཱི’’ཏི. ཡསྨཱ པན ‘‘སིཀྑཱཔདཔཉྙཏྟིཀཱལཏོ པབྷུཏི ཨཱཎཱཔཱཏིམོཀྑམེཝ ཨུདྡིསིཡཏཱི’’ཏི ཝུཏྟཾ, ཏསྨཱ པཱཏིམོཀྑུདྡེསཔྤཧོནཀསིཀྑཱཔདམེཝ སནྡྷཱཡཱཧ. ‘‘ཏཏྠཱཏི སིཀྑཱཔདཔཉྙཏྟིཡཱཙནཱཔེཀྑཾ བྷུམྨཝཙན’’ནྟི ཨེཀམེཝ པདཾ ཝུཏྟཾ ཏསྶཱ སིདྡྷིཡཱ ཨིཏརསྶ སིདྡྷིཏོ. ‘‘སཱཝཀཱནཾ ཝིསཡབྷཱཝནྟི ཨིམིནཱ མཧཱཔདུམཏྠེརཝཱདོ པཊིཀྑིཏྟོ’’ཏི ཨནུགཎྛིཔདེ ཝུཏྟཾ, ཏཾ སུནྡརཾ ཝིཡ. སམྨུཁེ གརཧཱ. པརམྨུཁེ ཨུཔཝཱདོ. ‘‘ན, བྷིཀྑཝེ, ཨཱུནདསཝསྶེན…པེ… དུཀྐཊསྶཱ’’ཏི (མཧཱཝ. ༧༥) ཨིདཾ སིཀྑཱཔདཾ བྷགཝཱ བུདྡྷཏྟེན དསཝསྶིཀོ ཧུཏྭཱ པཉྙཔེསི ཨཱུནདསཝསྶིཀསྶ ཏསྶ ཏཐཱ སིཀྑཱཔདཔཉྙཏྟིཡཱ ཨབྷཱཝཏོ. ན ཏདཱ ཨཏིརེཀདསཝསྶིཀོཝ དསཝསྶིཀཱནཾ རཏྟཉྙུམཧཏྟཔྤཏྟིཏོ, ཏསྨཱ ཏཾ སིཀྑཱཔདཾ ཝེརཉྫཱཡཾ ཝསྶཱཝཱསཏོ པུབྦེ རཱཛགཧེ ཨེཝ པཉྙཏྟནྟི སིདྡྷཾ, ཏསྨིཾ སིདྡྷེ སིདྡྷམེཝ ‘‘ཡཱཝ ན སངྒྷོ རཏྟཉྙུམཧཏྟཾ པཏྟོཏི ཝཙནཾ ཨིཏོ པུབྦེ པཋམཡཱཙནཱཡཔི ཝུཏྟ’’ནྟི. ཨཊྛཀཐཱཡམྤི རཏྟཉྙུམཧཏྟཔྤཏྟཀཱལེ ‘‘དྭེ སིཀྑཱཔདཱནཱི’’ཏི གཎནཔརིཙྪེདཝཙནཾ པཋམཡཱཙནཱཡ ཝུཏྟཝཙནཾ སནྡྷཱཡ ཝུཏྟཾ. ཨཉྙཐཱ རཏྟཉྙུམཧཏྟཔྤཏྟཀཱལེ དྭེ ཨེཝ, ན ཨཉྙནྟི ཨཱཔཛྫཏི.

‘‘ཨཐ ¶ ཁོ ཨཱཡསྨཏོ སཱརིཔུཏྟསྶཱ’’ཏིཨཱདིམྷི ཨཡམཱདིཏོ པཊྛཱཡ ཨཏྠཝིབྷཱཝནཱ – ཨཡཾ ¶ ཀིརཱཡསྨཱ ཨསྶཛིཏྠེརཏོ པཊིལདྡྷཾ ཨེཀགཱཐཱམཏྟཀཾ དྷམྨཔརིཡཱཡཾ ནཡསཏསཧསྶེཧི ཝིཝེཙེནྟོ ཨརཧཏྟཾ པཏྭཱ སཱཝཀཔཱརམཱིཉཱཎེ ཋིཏོ ‘‘ཨཧོ ཝཏ མཧཱནུབྷཱཝོཡཾ སདྡྷམྨོ, ཡོ ཝིནཱཔི དྷམྨསཱམིནཱ པརམྨུཁཏོ སུཏམཏྟེཔི མཡ྄ཧཾ མཧནྟཾ གུཎཝིསེསཾ ཛནེསི, སཱདྷུ ཝཏཱཡཾ སདྡྷམྨོ ཙིརཾ ཏིཊྛེཡྻཱ’’ཏི ཙིནྟེནྟོ ‘‘ཀཏམེསཱནཾ ནུ ཁོ བུདྡྷཱནཾ བྷགཝནྟཱནཾ…པེ… ན ཙིརཊྛིཏིཀ’’ནྟི ཏམཏྠཾ, ཀཱརཎཉྩ ཨཏྟནོ ཨགྒསཱཝཀཉཱཎེན པཊིཝིཛ྄ཛྷིཏྭཱ ‘‘སཱཝཀཱནཾ སིཀྑཱཔདཾ པཉྙཏྟནྟིཨཱདིཙིརཊྛིཏིཀཱརཎ’’ནྟི ནིཊྛཾ ཀཏྭཱ ཝིནཡཔཉྙཏྟིཡཱཙནོཀཱསཀརཎཏྠཾ བྷགཝནྟཾ པུཙྪི. ཏཏོ པཉྷསྶ ཝིསྶཛྫནེ ཝིནཡཔཉྙཏྟིཡཱཙནོཀཱསེ སམྤཏྟེ ‘‘ཨེཏསྶ བྷགཝཱ ཀཱལོ, ཨེཏསྶ སུགཏ ཀཱལོ’’ཏི ཝིནཡཔཉྙཏྟིཾ ཡཱཙི. ཏཏོ བྷགཝཱ ཏསྶཱ ཡཱཙནཱཡ སམྤཊིཙྪིཏབྷཱཝཾ, ‘‘ཨེཏསྶ བྷགཝཱ ཀཱལོ’’ཏི ཝུཏྟཀཱལསྶ ཨཀཱལཏཾ, ཀཱལསྶ ཙ ཨནཉྙཝིསཡཏཾ དཱིཔེནྟོ ‘‘ཨཱགམེཧི ཏྭ’’ནྟིཨཱདིམཱཧ, ཏཏོ བྷགཝཱ ཏསྶ ཡཱཙནཾ, སཏྟེསུ ཀཱརུཉྙཏཉྩ པཊིཙྩ ‘‘ཏེན ཁོ པན སམཡེན བྷིཀྑཱུ ཨནུཔཛ྄ཛྷཱཡཀཱ ཨནཱཙརིཡཀཱ ཨནོཝདིཡམཱནཱ’’ཏིཨཱདིནཱ (མཧཱཝ. ༦༤) ནཡེན ཝེཔུལླམཧཏྟཏཾ པཊིཙྩ སཏྠཱ སཱཝཀཱནཾ ཨུཔཛ྄ཛྷཱཡཝཏྟཱདཱིནི ཝིནཡཀམྨཱནི, ཏདནུརཱུཔསིཀྑཱཔདཱནི ཙ པཉྙཔེསི. ཏཏོ ཨནུཀྐམེན དྭཱདསམཝསྶཾ ཝེརཉྫཱཡཾ ཝསི. ཏདཱ ཙ ཨཱཡསྨཱ སཱརིཔུཏྟོ སཏྠཱརཱ ནིདྡིཊྛེསུ ཙིརཊྛིཏིཧེཏཱུསུ ཛཱཏེསུ ‘‘ནཝངྒསཏྠུསཱསནམཧཏྟཏཱ ཙ སམྤཏི ཛཱཏཱ, ཝིནཡཔཉྙཏྟི ཙ བཧུཏརཱ ཛཱཏཱ, པཱཏིམོཀྑུདྡེསོ ཨེཝེཀོ ན ཏཱཝ སཱཝཀཱནཾ ཨནུཉྙཱཏོ, སོ ཙ པརིསུདྡྷེན སངྒྷེན ཀརཱིཡཏི. སངྒྷོཔི ཨེཏརཧི པརིསུདྡྷོ པཙྪིམཀསྶ སོཏཱཔནྣཏྟཱ’’ཏི ཙིནྟེཏྭཱ པཱཏིམོཀྑུདྡེསཾ ཨནུཛཱནཱཔེཏུཀཱམོ ཡཏྟཀེཧི ཙ སིཀྑཱཔདེཧི པཱཏིམོཀྑུདྡེསོ ཨནུཛཱནཱིཡཏི, ཏཏྟཀཱནཾ པཉྙཏྟིཡཱཙནཔུབྦངྒམཾ པཱཏིམོཀྑུདྡེསཾ ཡཱཙནྟོ པུབྦུཔྤནྣཝིཏཀྐསཱུཙནཔུཙྪཱཝིསྶཛྫནཀྐམཝསེན ཡཱཙནོཀཱསེ སམྤཏྟེ ‘‘ཨེཏསྶ བྷགཝཱ ཀཱལོ’’ཏིཨཱདིམཱཧ.

ཏཏྠ ‘‘ཡཾ བྷགཝཱ སཱཝཀཱནཾ སིཀྑཱཔདཾ པཉྙཔེཡྻཱ’’ཏི པཱཏིམོཀྑུདྡེསཔྤཧོནཀསིཀྑཱཔདཾ སནྡྷཱཡཱཧ, ཨཡམཏྠོ བྷདྡཱལིསུཏྟེན (མ. ནི. ༢.༡༣༤ ཨཱདཡོ) དཱིཔེཏབྦོ ¶ . ཏཏྠ ཧི བཧཱུསུ སིཀྑཱཔདེསུ པཉྙཏྟེསུ, པཉྙཔིཡམཱནེསུ ཙ ‘‘ན ཏཱཝ བྷདྡཱལི སཏྠཱ སཱཝཀཱནཾ སིཀྑཱཔདཾ པཉྙཔེཏཱི’’ཏིཨཱདི (མ. ནི. ༢.༡༤༥) ཝུཏྟཾ ཨཔཉྙཏྟཾ ཨུཔཱདཱཡ, ཏཐཱ ཨིདྷཱཔི ཨཔཉྙཏྟཾ སནྡྷཱཡ ཝུཏྟནྟི ཝེདིཏབྦཾ. པརིསུདྡྷཏྟཱ སངྒྷསྶ སམྤཏི སཱཝཀཱནཾ ཨཱཎཱཔཱཏིམོཀྑུདྡེསཾ ནཱནུཛཱནཱམཱིཏི དསྶེནྟོ ‘‘ནིརབྦུདོ’’ཏིཨཱདིམཱཧ. ན ཧི པརིསུདྡྷེ སངྒྷེ ཨོཝཱདཔཱཏིམོཀྑུདྡེསསྶ ཨནུདྡེསཀཱརཎཾ ཨཏྠི, ཏསྨིཾ སཏི ཨཱཎཱཔཱཏིམོཀྑུདྡེསཱནུཛཱནནཱདྷིཔྤཱཡཏོ. ཏཐཱ ཙ སོ ཏཏོ ཨཊྛནྣཾཝསྶཱནཾ ཨཙྩཡེན ཨནུཉྙཱཏོ. ཡཐཱཧ པཱཏིམོཀྑཋཔནཀྑནྡྷཀེ (ཙཱུལ༹ཝ. ༣༨༦) ‘‘ན དཱནཱཧཾ, བྷིཀྑཝེ, ཨིཏོ པརཾ ¶ ཨུཔོསཐཾ ཀརིསྶཱམི…པེ… པཱཏིམོཀྑཾ ཨུདྡིསེཡྻཱཐཱ’’ཏི. ཡཾ པན ཨུཔསམྤདཀྑནྡྷཀེ (མཧཱཝ. ༡༢༩) ‘‘ཏེན ཁོ པན སམཡེན བྷིཀྑཱུ ཨཉྙཏརཾ བྷིཀྑུཾ ཨུཔསམྤཱདེཏྭཱ ཨེཀཀཾ ཨོཧཱཡ པཀྐམིཾསུ…པེ… སོ ཏསྶཱ མེཐུནཾ དྷམྨཾ པཊིསེཝིཏྭཱ ཙིརེན ཨགམཱསཱི’’ཏི ཝཏྠུ ཨཱགཏཾ, ཏཾ སུདིནྣཝཏྠུཏོ པརཏོ ཨུཔྤནྣམྤི ཏཏྠ ཡཐཱདྷིཀཱརཾ སམོདྷཱནེཏུཾ ཝུཏྟཾ. ཏཐཱ ཏཏྠེཝ ‘‘ཨུབྷཡཱནི ཁོ པནསྶ པཱཏིམོཀྑཱནི ཝིཏྠཱརེན སྭཱགཏཱནི ཧོནྟཱི’’ཏིཨཱདིནཱ (པཱཙི. ༡༤༧; ཨ. ནི. ༨.༥༢; ༡༠.༣༣) ཨངྒཱནིཔི ཝེདིཏབྦཱནི. ན ཧི ཨཱདིཏོ ཨེཝ ཨུབྷཏོཔཱཏིམོཀྑཱནི སིདྡྷཱནཱིཏི. ཨཔིཙ ཨཱདིཏོ པཊྛཱཡ ཨཡམནུཀྐམོ ཝེདིཏབྦོ, སེཡྻཐིདཾ – རཱཧུལཀུམཱརེ ཨུཔྤནྣེ བོདྷིསཏྟོ ནིཀྑམིཏྭཱ ཚབྦསྶཱནི དུཀྐརཾ ཀཏྭཱ སཏྟམེ ཨབྷིསམྦུདྡྷོ, ཏསྨིཾ ཨེཝ སཾཝཙྪརེ ཀཔིལཝཏྠུཾ གནྟྭཱ རཱཧུལཀུམཱརཾ པབྦཱཛེསི. ཨམྦལཊྛིཀརཱཧུལོཝཱདསུཏྟཊྛཀཐཱཡཾ (མ. ནི. ཨཊྛ. ༢.༡༠༧ ཨཱདཡོ) ‘‘ཨཡཉྷི ཨཱཡསྨཱ སཏྟཝསྶིཀཀཱལེ བྷགཝནྟཾ ཙཱིཝརཀཎྞེ གཧེཏྭཱ ‘དཱཡཛྫཾ མེ སམཎ དེཧི, དཱཡཛྫཾ མེ སམཎ དེཧཱི’ཏི དཱཡཛྫཾ ཡཱཙམཱནོ བྷགཝཏཱ དྷམྨསེནཱཔཏིསཱརིཔུཏྟཏྠེརསྶ ནིཡྻཱདེཏྭཱ པབྦཱཛིཏོ’’ཏི ཙ ཝུཏྟཾ, ཏསྨཱ རཱཧུལཀུམཱརཾ ཨཱརབྦྷ ‘‘ཨནུཛཱནཱམི, བྷིཀྑཝེ, ཏཱིཧི སརཎགམནེཧི སཱམཎེརཔབྦཛྫ’’ནྟི (མཧཱཝ. ༡༠༥) ཝུཏྟཏྟཱ སརཎགམནཱུཔསམྤདཱ པཋམཝསྶབྦྷནྟརེ ཨེཝ པཊིཀྑིཏྟཱ, ཉཏྟིཙཏུཏྠཀམྨཝསེན ཨུཔསམྤདཱ ཨནུཉྙཱཏཱཏི པཉྙཱཡཏི. ཨཔིཙ རཱཧུལཝཏྠུམྷི ‘‘ན, བྷིཀྑཝེ, ཨནནུཉྙཱཏོ མཱཏཱཔིཏཱུཧི པུཏྟོ པབྦཱཛེཏབྦོ, ཡོ པབྦཱཛེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༠༥) སིཀྑཱཔདཾ པཉྙཏྟཾ, ཏསྨཱ ཨིཏོ པུབྦེཔི སིཀྑཱཔདཱནི པཉྙཏྟཱནཱིཏི སིདྡྷཾ.

སུཏྭཱ ¶ ཙ ཡོ ཧེཏུནིརོདྷམགྒཾ,

ནིརོདྷུཔཱཡཾ པཊིཝིཛ྄ཛྷི ཁིཔྤཾ;

ཛཱཏོཝཔེཀྑེན ཨསེསམེཏཾ,

ལོཀཾ ཝིཔསྶཱི སུགཏགྒསིསྶོ.

སོ དྷམྨསེནཱཔཏི ཨགྒསིསྶོ,

སདྡྷམྨརཱཛསྶ ཏཐཱགཏསྶ;

སཡཾ མུནིནྡེན ཡསསྶ པཏྟོ,

ཨནེཀསོ སོལ༹སདྷཱ པསཏྠོ.

ཏསྨཱ ¶ ཧི སིཀྑཱཔདབནྡྷཀཱལོ,

ཉཱཏུམྤི ལོཀེ ཨཏིབྷཱརིཡོཝ;

པགེཝ སིཀྑཱཔདབྷཱཝབྷེདོ,

པགེཝ ཨཉྙོ ཨུབྷཡཏྠ ཏཏྠ.

པཙྩེཀབུདྡྷཱ ཨཔི ཏཾ དྭཡནྟུ,

ཉཱཏུཾ ན སཀྐཱཝ པགེཝ ནེཏུཾ;

ནིསྶཾསཡཾ ཏཏྠ ཏཐཱགཏོཝ,

ཛཱནིསྶཏིཙྩཱཧ ཏཐཱགཏོཏི.

ཨིཙྩེཏམཏྠཾ ཨིདྷ བྷིཀྑུ ཉཏྭཱ,

སིཀྑཱཔདཱནཾ ཀམབྷཱཝབྷེདཾ;

ཉཱཏུཾ སཡཾ ནོ ན པརེ ཙ ནེཏུཾ,

པརིཡེསིཏབྦོ ཨིདྷ ཡུཏྟིམགྒོ.

ཏཏྠ ཀམབྷེདོ སིཀྑཱཔདཱནཾ པརཏོ ཨཱཝི བྷཝིསྶཏི. བྷཱཝབྷེདོ ཏཱཝ ཨུཀྑིཏྟཀཱནུཝཏྟནཔཙྩཡཱ བྷིཀྑུ ཨནཱཔཏྟིཀོ, བྷིཀྑུནཱི པན སམནུབྷཊྛཱ པཱརཱཛིཀཱ ཧོཏི. པཱརཱཛིཀཱཔཏྟིཔཊིཙྪཱདནེ བྷིཀྑུསྶ དུཀྐཊཾ, བྷིཀྑུནིཡཱ པཱརཱཛིཀཾ. དུཊྛུལླཾ ཨཱརོཙེནྟསྶ, པཊིཙྪཱདེནྟསྶ ཙ པཱཙིཏྟིཡཾ. མཧཱསཱཝཛྫཾ པཱརཱཛིཀཾ ཨཱརོཙེནྟསྶ, པཊིཙྪཱདེནྟསྶ ཙ བྷིཀྑུསྶ དུཀྐཊཾ. ཨིཙྩེཝམཱདཱིཧི ཨབྷཱཝབྷེདསིཀྑཱཔདཱནཾ ཨིདྷ བྷཱཝབྷེདེན ཡུཏྟིཔརིཡེསནཾ སཱདྷཡམཱནོཔི སིཡཱ ཨནུམྨཱདཝིགྷཱཏབྷཱགཱིཏི. ཨེཏྟཱཝཏཱ སཀལསྶཔི ཝིནཡཔིཊཀསྶ ཝིཏཀྐཡཱཙནཀཱལཀཱལཉྙཱུཀཱརཎཕལཔཡོཛནེཧི སཏྟཧི ཨངྒེཧི པཊིམཎྜིཏཾ ནིདཱནམཱཡསྨཏཱ ཨུཔཱལིཏྠེརེན ནིདསྶིཏཾ ཧོཏི. ཏཏྠ ཐེརསྶ ཝིནཡཔཉྙཏྟིཡཱཙནཧེཏུབྷཱུཏོ ¶ ཝིཏཀྐོ ནཱམ. ཏསྶེཝ ‘‘ཨེཏསྶ བྷགཝཱ ཀཱལོ’’ཏིཨཱདིནཱ པཝཏྟཱ ཡཱཙནཱ ནཱམ. རཏྟཉྙཱུཝེཔུལླལཱབྷགྒབཱཧུསཙྩམཧཏྟཔྤཏྟི ཀཱལོ ནཱམ. སབྦཉྙཱུ ཨེཝ ཀཱལཉྙཱུ ནཱམ. ཨཱསཝཊྛཱནཱིཡཱནཾ དྷམྨཱནཾ པཱཏུབྷཱཝོ ཀཱརཎཾ ནཱམ. ‘‘ཏེསཾཡེཝ ཨཱསཝཊྛཱནཱིཡཱནཾ དྷམྨཱནཾ པཊིགྷཱཏཱཡཱ’’ཏི ཝཙནཏོ ཨཱསཝཊྛཱནཱིཡདྷམྨཔཊིགྷཱཏོ ཕལཾ ནཱམ. ‘‘ཡཐཡིདཾ བྲཧྨཙརིཡཾ ཨདྡྷནིཡཾ ཨསྶཱ’’ཏི ཝཙནཏོ སཱསནབྲཧྨཙརིཡསྶ ཙིརཊྛིཏི པཡོཛནནྟི ཝེདིཏབྦཾ. ཧོཏི ཙེཏྠ –

‘‘ཝིཏཀྐོ ¶ ཡཱཙནཱ ཀཱལོ, ཀཱལཉྙཱུ ཀཱརཎཾ ཕལཾ;

པཡོཛནནྟི སཏྟངྒཾ, ནིདཱནཾ ཝིནཡསྶིདྷཱ’’ཏི.

༢༢. ཨནྟིམམཎྜལནྟི ཨབྦྷནྟརམཎྜལཾ. ཏཉྷི ཨིཏརེསཾ ཨནྟོ ཧོཏི, ཁུདྡཀམཎྜལཾ ཝཱ. ཨནུམཏིདཱནཝསེན ཏེསཾ བྷིཀྑཱུནཾ དཏྭཱ. ཏེསཾ བུདྡྷཱནཾ ཙཱརིཀཱཡ ཝིནེཏབྦཱ ཝེནེཡྻསཏྟཱ. ཨོཙིནནྟཱ ཝིཡཱཏི བཧུཔུཔྥཾ གཙྪཾ མཱལཱཀཱརཱ ཙིརཾ ཨོཙིནནྟི, ཨེཝཾ བཧུཝེནེཡྻེསུ གཱམཱདཱིསུ ཙིརཾ ཝསནྟཱ ཝེནེཡྻཔུཉྙཾ པརིཧརནྟཱ ཙརནྟི. སནྟཾ སུཁཾ, ན ཝེདནཱསུཁཾ ཝིཡ སཔརིཔྥནྡཾ. དསསཧསྶཙཀྐཝཱལེ༹ཏི དེཝཱནཾ ཝསེན ཝུཏྟཾ. མནུསྶཱ པན ཨིམསྨིཾཡེཝ ཙཀྐཝཱལེ༹ བོདྷནེཡྻཱ ཨུཔྤཛྫནྟི. མཧཱཀརུཎཱཡ དྷུཝཾ སཏྟསམཝལོཀནཾ. ཨོཏིཎྞེཏི པརིསམཛ྄ཛྷཾ ཨཱགཏེ, ཨཱརོཙིཏེ ཝཱ. ཡེན ཀཱརཎེན མཡཾ ཏུམྷཱཀཾ དེཡྻདྷམྨཾ དདེཡྻཱམ, ཏཾ ཀུཏོ སཀྐཱ ལདྡྷུཾ. བཧུཀིཙྩཱ ཧི གྷརཱཝཱསཱཏི. དུཏིཡཝིཀཔྤེ ཏནྟི དེཡྻདྷམྨཾ. ‘‘ཏུམྷེཧི ཏཾ ཀུཏོ ལདྡྷཱ’’ཏི ཨནུགཎྛིཔདེ ཝུཏྟཾ. ཀེཙི པན ‘‘པཋམཾ ཀིརིཡཾ པེཀྑཏི, དུཏིཡཾ དེཡྻདྷམྨ’’ནྟི ཝདནྟི. ཨཱཙརིཡོ པན ‘‘པཋམཡོཛནཱཡ ཡཾ དཱནཔུཉྙཾ, ཏཾ ཀུཏོ ལབྦྷཱ. པུཉྙནྟརཱཡབཧུལཱ ཧི གྷརཱཝཱསཱཏི. དུཏིཡཡོཛནཱཡ ཏེམཱསབྦྷནྟརེ ཡམཧཾ དདེཡྻཾ, ཨཏིཀྐནྟཀཱལཏྟཱ ཏམཧཾ སམྤཏི ཀུཏོ དདེཡྻནྟི དསྶེཏཱི’’ཏི ཝདཏི. སཱིལཱདིཀུསལདྷམྨསནྡསྶནཱདིདྷམྨརཏནཝསྶཾ.

༢༣. པཏྟུཎྞདེསེ པཏྟུཎྞཾ པཊཝརཾ. མཧཱཡཱགནྟི མཧཱདཱནཾ. པརིཔུཎྞསངྐཔྤནྟི ཏེམཱསཾ སོཏབྦཾ ཨཛྫ སུཎིནྟི.

ཏཏྲིདནྟི ཨིདཾ ཀཱརཎཾ.

ཨུཔཱལི ¶ དཱསཀོཏི ཨཱཙརིཡཔརམྤརཏོ. བཱཧིརབྦྷནྟརནིདཱནཾ, སིཀྑཱཔདཱནཾ པཉྙཏྟིཊྛཱནསངྑཱཏཾ ཨཱཝེཎིཀནིདཱནཉྩ སནྡྷཱཡཱཧ ‘‘ནིདཱནསྶ པབྷེདདཱིཔནཏོ’’ཏི. ཐེརཝཱདཱདི ཝཏྠུཔྤབྷེདོ. སཀཱཡ པཊིཉྙཱཡ མེཏྟིཡཾ བྷིཀྑུནིཾ ནཱསེཐཱཏིཨཱདི པརསམཡཝིཝཛྫནཏོཏིཨཱདི. ཝིབྷངྒནཡབྷེདདསྶནཏོཏི ཏིསྶོ ཨིཏྠིཡོ བྷཱུམཊྛཾ ཐལཊྛནྟིཨཱདི. ཨེཏྠཱཧ – ཀིཾ བྷགཝཏོ མཱརཱཝཊྚནཔཊིགྷཱཏཱཡ སཏྟི ནཏྠཱིཏི? ཨཏྠི, ཏཐཱཔིསྶ པཙྪཱ ཨུཔགུཏྟཀཱལེ པསཱདཧེཏུཏྟཱ ཨདྷིཝཱསེཏི. ཨེཏྠ ཨུཔགུཏྟཱདྷིཊྛཱནཾ ཝཏྟབྦཾ. བུདྡྷཱནཾ ཨཱཙིཎྞནྟི དིཛདསྶནེན ཀིཾཔཡོཛནནྟི ཙེ? མཱརཱཝཊྚནཧེཏུ བྲཱཧྨཎསྶ པུཉྙནྟརཱཡོཏི པཡོཛནཾ.

དིཛོཔི ¶ སོ མཱརམནོརཐསྶ,

བྷངྒཾ ཀརོནྟོ ཛིནཔུངྒཝསྶ;

སསྶིསྶསངྒྷསྶ ཨདཱསི དཱནཾ,

ཨསེསཀཾ ཀཔྤིཡབྷཎྜབྷེདཾ.

ཀིཾ བྷགཝཱ སསིསྶོ ཏཱཝ མཧནྟཾ ཀཔྤིཡབྷཎྜཾ ཨུབྦྷཎྜིཀཾ ཀཏྭཱ ཨགམཱསཱིཏི? ན ཨགམཱསི, ཏེམཱསིབྷཱགིཡཾ པན པུཉྙརཱསིཀཾ དེཡྻདྷམྨཾ ཨཔྤཊིཀྑིཔནྟོ བྲཱཧྨཎསྶ ཨུཔཱཡཏོ སཏྠཱ ཨདཱསི.

ཏདཉྙཐཱ མཱརམནོརཐོཝ,

པཱུརོ སིཡཱ ནེཝ དིཛསྶ བྷིཡྻོ;

པཱཔཾ མཧནྟཾ ཨཔི པཱཔུཎེཡྻ,

མིཙྪཱབྷིམཱནེན ཏཐཱགཏེ སོ.

ཏསྨཱ བྷགཝཱ ཨསྶཱདིཡནྟོ ཏཾ དེཡྻདྷམྨཾ ཨཔྤཊིཀྑིཔནྟོ ཨུཔཱཡེན བྲཱཧྨཎསྶ པུཉྙབུདྡྷིཾ ཀཏྭཱ, མཱརསྶ ཙ མནོརཐཝིགྷཱཏཾ ཀཏྭཱ ཨགམཱསཱིཏི, ‘‘ཨཡཾ ནཡོ ཨཊྛཀཐཾ ཝིནཱཔི པཱལི༹ནཡཱནུལོམཏོ སིདྡྷོ’’ཏི ཝདནྟི. ཀཐཾ? –

‘‘སཏྠཱ སསིསྶོ ཡདི ཨགྒཧེསི,

དིཛསྶ ཏཾ ཙཱིཝརམཱདིཏོཝ;

ནཱཐསྶ ནོ ཝཱིསཏིཝསྶཀཱལེ,

ཝིརུཛ྄ཛྷཏེ ཛཱིཝཀཡཱཙནཱཔི;

ཏཐཱཔི སབྦཾ སུཝིཙཱརཡིཏྭཱ,

ཡུཏྟཾ ནཡཾ ཙིནྟཡིཏུཾཝ ཡུཏྟ’’ནྟི.

ཨིདཱནི ¶ ཨཱཡསྨཱ ཨུཔཱལིཏྠེརོ ཝིནཡཔཉྙཏྟིཡཱ སཱདྷཱརཎནིདཱནཾ དསྶེཏྭཱ སིཀྑཱཔདཱནཾ པཱཊེཀྐཾ པཉྙཏྟིཊྛཱནསངྑཱཏཾ ནིདཱནམཱདིཾ ཀཏྭཱ པུགྒལཔཉྙཏྟིཨནུཔཉྙཏྟིཝིབྷཱགཱཔཏྟིབྷེདནྟརཱཔཏྟིཨཱདིཀཾ ནཱནཔྤཀཱརཾ ཝིདྷིཾ ནིཛྫཊཾ ནིགྒུམྦཾ ཀཏྭཱ དསྶེཏུཾ ‘‘ཨཐ ཁོ བྷགཝཱ ཝེརཉྫཱཡཾ ཡཐཱབྷིརནྟཾ ཝིཧརིཏྭཱ’’ཏིཨཱདིམཱཧཱཏི. ཨིདྷ ཋཏྭཱ –

སིཀྑཱཔདཱན ¶ སབྦེསཾ, ཀམབྷེདཾ པཀཱསཡེ;

ཏསྨིཾ སིདྡྷེ ནིདཱནཱནཾ, ཀམསིདྡྷི ཡཏོ བྷཝེ.

ཏཏྠ སབྦསིཀྑཱཔདཱནཾ ཡཐཱསམྦྷཝཾ དེསནཱཀྐམོ པཧཱནཀྐམོ པཊིཔཏྟིཀྐམོ ཨུཔྤཏྟིཀྐམོཏི ཙཏུབྦིདྷོ ཀམོ ལབྦྷཏི. ཏཏྠ བྷགཝཏཱ རཱཛགཧེ བྷིཀྑཱུནཾ པཱཏིམོཀྑུདྡེསཾ ཨནུཛཱནནྟེན པཱཏིམོཀྑུདྡེསསྶ ཡོ དེསནཱཀྐམོ ཨནུཉྙཱཏོ, ཏཾ དེསནཱཀྐམམནུལོམེནྟོ ཨཱཡསྨཱ མཧཱཀསྶཔོ པཋམཾ པཱརཱཛིཀུདྡེསཾ པུཙྪི, ཏདནནྟརཾ སངྒྷཱདིསེསུདྡེསཾ, ཏཏོ ཨནིཡཏུདྡེསཾ ཝིཏྠཱརུདྡེསཉྩ པུཙྪིཏྭཱ ཏདནནྟརཾ བྷིཀྑུནཱིཝིབྷངྒཉྩ ཏེནེཝ ཨནུཀྐམེན པུཙྪི, ནིདཱནུདྡེསནྟོགདྷཱནཉྩ སརཱུཔེན ཨནུདྡིཊྛཱནཾ པུཙྪནཏྠཾ ཁནྡྷཀེཔི པུཙྪི. ཨེཏེན ཙ ཁནྡྷཀེ པཉྙཏྟཱ ཐུལླཙྩཡཱ སངྒཧིཏཱ ཧོནྟི. པུཙྪིཏཱནུཀྐམེནེཝ ཨུཔཱལིཏྠེརོ ཏཾ སབྦཾ སཱཔཏྟིབྷེདཱདིཀཾ དེསེནྟོ ཐུལླཙྩཡདུབྦྷཱསིཏཨཱཔཏྟིསམུཊྛཱནཱདིདཱིཔཀཾ ཨནྟོཀཏྭཱ དེསེསི, ཨཡམེཏྠ དེསནཱཀྐམོ. ཨུབྷཏོཝིབྷངྒཁནྡྷཀཏོ པན ཨུཙྩིནིཏྭཱ ཏདཱ པརིཝཱརཔཱལི༹ ཝིསུཾ ཀཏཱ. ཨིམམེཝ ནཡཾ སནྡྷཱཡ ཨཊྛཀཐཱཡཾ ཝུཏྟཾ ‘‘ཨེཏེནེཝ ཨུཔཱཡེན ཁནྡྷཀཔརིཝཱརེཔི ཨཱརོཔེསུ’’ནྟིཨཱདི (པཱརཱ. ཨཊྛ. ༡.པཋམམཧཱསངྒཱིཏིཀཐཱ). ཨཔིཙ པཱལི༹ཡཱ ‘‘ཨེཏེནེཝུཔཱཡེན ཨུབྷཏོཝིནཡེ པུཙྪི. པུཊྛོ པུཊྛོ ཨཱཡསྨཱ ཨུཔཱལི ཝིསྶཛྫེསཱི’’ཏི ཨེཏྟཀམེཝ ཝུཏྟཾ, ཏསྨཱ མཧཱཀསྶཔོ ཨུབྷཏོཝིབྷངྒེ ཨེཝ པུཙྪི. ཝིསྶཛྫེནྟོ པན ཨཱཡསྨཱ ཨུཔཱལི ནིཝརསེསཾ དེསེནྟོ ཁནྡྷཀཔརིཝཱརེ ཨནྟོཀཏྭཱ དེསེསི. ཏདཱ ཙ ཁནྡྷཀཔརིཝཱརཔཱལི༹ ཝིསུཾ ཀཏཱཏི ཨཡཾ དེསནཱཀྐམོ. ཡདི ཨེཝཾ ནིདཱནུདྡེསོ པཋམཾ དེསེཏབྦོཏི ཙེ? ན, ཏདསམྦྷཝཏོ. སོ ཧི ‘‘ཡསྶ སིཡཱ ཨཱཔཏྟཱི’’ཏིཨཱདིནཱ (མཧཱཝ. ༡༣༤) ནཡེན པཝཏྟཏྟཱ པཋམཾ སིཀྑཱཔདསངྒཧིཏཱསུ ཨཱཔཏྟཱིསུ ཨདསྶིཏཱསུ ན སམྦྷཝཏི. ‘‘ཡཱནི མཡཱ བྷིཀྑཱུནཾ པཉྙཏྟཱནི སིཀྑཱཔདཱནི, ཏཱནི ནེསཾ པཱཏིམོཀྑུདྡེསཾ ཨནུཛཱནེཡྻ’’ནྟི ཝཙནཏོ སིཀྑཱཔདཱནེཝ པཋམཾ དེསེཏབྦཱནཱིཏི པཱརཱཛིཀུདྡེསཀྐམོ སམྦྷཝཏི.

པཱརཱཛིཀུདྡེསཱདིསངྒཧིཏཱནཾ ¶ ཨཱཔཏྟིཨཀུསལཱནཾ ཡཐོལཱ༹རིཀཀྐམེན པཧཱཏབྦཏྟཱ པཧཱནཀྐམོཔེཏྠ སམྦྷཝཏི. ཨུཔསམྤནྣསམནནྟརཾ ‘‘ཏཱཝདེཝ ཙཏྟཱརི ཨཀརཎཱིཡཱནི ཨཱཙིཀྑིཏབྦཱནཱི’’ཏི (མཧཱཝ. ༡༢༩) ཝཙནཏོ ‘‘སམཱདཱཡ སིཀྑཏི སིཀྑཱཔདེསཱུ’’ཏི (དཱི. ནི. ༡.༡༩༣) ཝཙནཏོ ཙ ཡཐཱ གརུཀཾ ཨཱཙིཀྑཎཾ སིཀྑནེན པཊིཔཏྟིཀྐམོཔེཏྠ སམྦྷཝཏི, ཨེཝམིམེཧི ཏཱིཧི ཀམེཧི དེསེཏབྦཱནམྤེཏེསཾ སིཀྑཱཔདཱནཾ ཡཐཱསམྦྷཝཾ ཨུཔྤཏྟིཀྐམོ སམྦྷཝཏི. ཏཐཱ ཧི ཡཾ ཡཾ སཱདྷཱརཎཾ, ཏཾ ཏཾ བྷིཀྑུཾ ཨཱརབྦྷ ཨུཔྤནྣེ ཨེཝ ཝཏྠུསྨིཾ ‘‘ཡཱ པན བྷིཀྑུནཱི ཚནྡསོ མེཐུནཾ དྷམྨཾ པཊིསེཝེཡྻཱ’’ཏི བྷིཀྑུནཱིནམྤི པཉྙཏྟཾ. ཨཉྙཐཱ ཏཾ བྷིཀྑུནཱིནཾ ¶ ཨནུཔྤནྣཔཉྙཏྟི སིཡཱ. ཏཏོ ‘‘ཨནུཔྤནྣཔཉྙཏྟི ཏསྨིཾ ནཏྠཱི’’ཏི (པརི. ༢༤༧) པརིཝཱརེ ཨེཏཾ ཝཙནཾ ཝིརུཛ྄ཛྷཏི, ཨེཏྟཱཝཏཱ པུརིམེན ཀམཏྟཡེན པཋམཾ དེསེཏབྦཏཾ པཏྟེ པཱརཱཛིཀུདྡེསེ པཋམུཔྤནྣཏྟཱ མེཐུནདྷམྨཔཱརཱཛིཀཾ སབྦཔཋམཾ དེསེཏུཀཱམོ ཨུཔཱལིཏྠེརོ ‘‘ཏཏྲ སུདཾ བྷགཝཱ ཝེསཱལིཡ’’ནྟི ཝེསཱལིམེཝ པཱཔེཏྭཱ ཋཔེསི. ཨཉྙཐཱ བཱརཱཎསིཡཾ པཉྙཏྟཱནཾ ‘‘ན, བྷིཀྑཝེ, མནུསྶམཾསཾ པརིབྷུཉྫིཏབྦ’’ནྟི (མཧཱཝ. ༢༨༠) ཨེཝམཱདཱིནཾ དེསནཱདྷིཔྤཱཡེ སཏི བཱརཱཎསིཾ པཱཔེཏྭཱ ཋཔེཡྻཱཏི.

ཨབྦྷནྟརནིདཱནཀཐཱ ནིཊྛིཏཱ.

ཝེརཉྫཀཎྜཝཎྞནཱ ནིཊྛིཏཱ.

༡. པཱརཱཛིཀཀཎྜོ

༡. པཋམཔཱརཱཛིཀཾ

སུདིནྣབྷཱཎཝཱརཝཎྞནཱ

པཋམསྶེཏྠ ¶ ¶ ནིདཱནེ, ཋཏྭཱ པཱརཱཛིཀསྶ ཝིཉྙེཡྻོ;

ཙོདནཱཔརིཧཱརནཡོ, པུགྒལཝཏྠུཔྤཀཱསནེཡེཝ.

ཏཏྠ བྷགཝཱ ཝེརཉྫཱཡཾ ཝུཏྠཝསྶོ ཨནུཔུབྦེན ཙཱརིཀཾ ཙརནྟོ ཀཏྟིཀཛུཎྷཔཀྑེ ཨེཝ ཝེསཱལིཾ པཱཔུཎིཏྭཱ ཡཱཝ པཋམཔཱརཱཛིཀསིཀྑཱཔདཔཉྙཱཔནཾ, ཏཱཝ ཨཊྛ ཝསྶཱནི ཝེསཱལིཡཾཡེཝ ཝིཧརནྟོ ཝིཡ པཱལི༹ཀྐམེན དིསྶཏི, ན ཙ བྷགཝཱ ཏཱཝཏྟཀཾ ཀཱལཾ ཏཏྠེཝ ཝིཧཱསི. སོ ཧི སུདིནྣསྶ སཱཝཀཱནཾ སནྟིཀེ པབྦཛྫཾ ཨུཔསམྤདཉྩ ཨནུཛཱནིཏྭཱ ཡཐཱབྷིརནྟཾ ཏཏྠ ཝིཧརིཏྭཱ ཙཱརིཀཾ ཙརནྟོ བྷེསཀལཱ༹ཝནཾ པཏྭཱ ཏཏྠ ཏེརསམཾ ཝསྶཾ ཝསི, ཏེནེཝ ཨནུཀྐམེན སཱཝཏྠིཾ པཏྭཱ ཙུདྡསམཾ ཝསྶཾ ཝསི, པནྣརསམཾ ཀཔིལཝཏྠུམྷི, སོལ༹སམཾ ཨཱལ༹ཝིཡཾ, ཏཏོ ཝུཏྠཝསྶོ ཙཱརིཀཾ ཙརནྟོ རཱཛགཧཾ པཏྭཱ སཏྟརསམཾ ཝསི, ཨིམིནཱ ཨནུཀྐམེན ཨཔརཱནིཔི ཏཱིཎི ཝསྶཱནི ཏཏྠེཝ ཝསི. ཨེཏྟཱཝཏཱ བྷགཝཱ པརིཔུཎྞཝཱིསཏིཝསྶོ རཱཛགཧཏོ ཨནུཔུབྦེན ཝེསཱལིཾ པཱཔུཎི, ཏཏོ ཨུཔསམྤདཱཡ ཨཊྛཝསྶིཀོ སུདིནྣོ ཝེསཱལིཡཾཡེཝ མེཐུནཾ དྷམྨཾ ཨབྷིཝིཉྙཱཔེསི, ཏཏོ བྷགཝཱ ཏསྨིཾ ཝཏྠུསྨིཾ པཋམཾ པཱརཱཛིཀཾ པཉྙཔེསཱིཏི ཝེདིཏབྦཾ. ཏཏྠ ཡསྨཱ ཨུཔཱལིཏྠེརོ ཨིཏོ པཋམཏརཾ ཏཏྠ ཝེསཱལིཡཉྩ པཉྙཏྟསིཀྑཱཔདཱནི ཨདསྶེཏུཀཱམོ, ཝིནཡནིདཱནཱནནྟརཾ པཋམཔཱརཱཛིཀམེཝ དསྶེཏུཀཱམོ, ཏསྨཱ ཝེསཱལིཡཾ པཋམཾ ནིཝཱསཾ, པཙྪཱ ཨིམསྶ སིཀྑཱཔདསྶ པཉྙཏྟིཀཱལེ ནིཝཱསཉྩ ཨེཀཏོ ཀཏྭཱ ‘‘ཏཏྲ སུདཾ བྷགཝཱ ཝེསཱལིཡ’’ནྟིཨཱདིམཱཧ, ཏེན ཝུཏྟཾ ‘‘པཋམསྶེཏྠ ནིདཱནེ, ཋཏྭཱ ¶ …པེ… པཀཱསནེཡེཝཱ’’ཏི. ཏསྨཱ ཨིམསྨིཾ པཋམཔཱརཱཛིཀསྶ པཉྙཏྟིཊྛཱནསངྑཱཏེ ནིདཱནེ ཋཏྭཱ ‘‘ཏེན ཁོ པན སམཡེན ཝེསཱལིཡཱ ཨཝིདཱུརེ ཀལནྡགཱམོ ནཱམ ཧོཏི…པེ… ཨཉྙཏརཾ ཝཛྫིགཱམཾ ཨུཔནིསྶཱཡ ཝིཧརཏཱི’’ཏི ཨེཏསྨིཾ ཨིམསྶ སིཀྑཱཔདསྶ པུགྒལཔྤཀཱསནེ, ‘‘ཏེན ཁོ པན སམཡེན ཝཛྫཱི དུབྦྷིཀྑཱ ཧོཏི…པེ… ཏིཀྑཏྟུཾ མེཐུནཾ དྷམྨཾ ཨབྷིཝིཉྙཱཔེསཱི’’ཏི (པཱརཱ. ༣༠) ཨིམསྨིཾ ཝཏྠུཔྤཀཱསནེ ཙ ཙོདནཱནཡོ, པརིཧཱརནཡོ ཙ ཝེདིཏབྦོཏི ¶ ཝུཏྟཾ ཧོཏི. ཏཏྲཱཡཾ པཀཱསནཱ – ཀིམཏྠཾ ཐེརེན ཨཉྙེསཾ སིཀྑཱཔདཱནཾ པུགྒལཝཏྠཱུནི ཝིཡ སངྑེཔཏོ ཨཝཏྭཱ ཡཏྠ ཙ སོ ཨུཔྤནྣོ, ཡཐཱ ཙ དྷམྨེ པསནྣོ, ཡཐཱ ཙ པབྦཛིཏོ, ཡཐཱ ཙ ཨིམཾ ཝཏྠུཾ ཨུཔྤཱདེཏི, ཏཾ སབྦཾ ཨནཝསེསེཏྭཱ པུགྒལཝཏྠཱུནི ཝིཏྠཱརཏོ ཝུཏྟཱནཱིཏི ཙེ? ཝུཙྩཏེ –

ཨེཝཾ སདྡྷཱཡ ཀིཙྪེན, མཧནྟེ བྷོགཉཱཏཀེ;

ཧིཏྭཱ པབྦཛིཏཱནམྤི, པེསལཱནམྤི སབྦསོ.

སབྦལཱམཀདྷམྨཱཡཾ, མེཐུནོ ཡདི སམྦྷཝེ;

ན དྷམྨདེསནཱཡེཝ, སིདྡྷཱ ཝིརཏི སབྦསོ.

ཏསྨཱ ནཝངྒསདྡྷམྨེ, སཏྠཱརཱ དེསིཏེཔི ཙ;

ཝིནཡོ པཉྙཔེཏབྦོ, ཏཏོ དྷམྨཝིསུདྡྷིཧི.

ཝིནཡཱབྷཱཝཏོ ཨེཝཾ, ཨཛ྄ཛྷཱཙཱརོ བྷཝིསྶཏི;

ཏསྨཱ ཝིནཡཔཉྙཏྟི, སཱཏྠིཀཱ པེསལསྶཔི.

ཨནཱདཱིནཝདསྶཱཝཱི, ཡསྨཱ ཡཾ པཱཔམཱཙརི;

ཝིནཡོཡེཝ སདྡྷཱནཾ, ཨཱདཱིནཝཝིབྷཱཝིནོ.

ཏསྨཱ སདྡྷཱནུསཱརཱིནཾ, ཝིནཡོ སཱཏྠཀོཝ ཡཾ;

དྷམྨོ དྷམྨཱནུསཱརཱིནཾ, ཏཏོ ཨུབྷཡདེསནཱ.

ཨཔི ཙ ཡདི པཎྞཏྟིཝཱིཏིཀྐམཾ ཨཀརོནྟསྶཱཔི ཡཱཝ བྲཧྨལོཀཱ ཨཡསོ པཏྠཊོ, པགེཝཉྙེསནྟི དསྶནཏྠཾ ཨཛ྄ཛྷཱཙཱརསྶ པཱཀཊབྷཱཝདཱིཔནཾ. ཀཐཾ? –

ཨབྷབྦོ ¶ ཨརཧཏྟསྶ, སུདིནྣོ པུཏྟམཱཏརོ;

བྷབྦཱནུཔྤནྣཔཉྙཏྟི, ཏདཏྠཾ ན ཀཏཱ ཨཡཾ.

ནནུ མཱགཎྜིཀཾ ཨཛ྄ཛྷུཔེཀྑིཏྭཱ མཱཏཱཔིཏཱུནམསྶཱ ཧིཏཏྠཾ དྷམྨཾ དེསེཏཱིཏི ཨིམམཏྠཾ དསྶེཏུཾ བཱིཛཀབཱིཛཀམཱཏཱུནཾ ཨརཧཏྟུཔྤཏྟི ཐེརེན དཱིཔིཏཱ. ‘‘ཏེན ཁོ པན སམཡེན ཝེསཱལིཡཱ ཨཝིདཱུརེ ཀལནྡགཱམོ ནཱམ ཧོཏི, ཡེན སམཡེན སུདིནྣོ པུརཱཎདུཏིཡིཀཱཡ མེཐུནཾ དྷམྨཾ པཊིསེཝཱི’’ཏི ཝཱ ‘‘ཡེན སམཡེན བྷགཝཱ པཋམཔཱརཱཛིཀཾ པཉྙཔེསཱི’’ཏི ཝཱ ཝཙནཾ ཨིདྷ ན ཡུཛྫཏི. ཀསྨཱ? ‘‘ཨིདྷ པན ཧེཏུཨཏྠོ ཀརཎཏྠོ ཙ སམྦྷཝཏཱི’’ཏི ཝུཏྟཾ ཨཊྛཀཐཱཝཙནཉྷི ཨིདྷ ན ལབྦྷཏི. ཙིརནིཝིཊྛོ ཧི སོ གཱམོ ¶ , ན ཏསྨིཾཡེཝ སམཡེཏི. ཡསྨཱ པན སོ ཙིརནིཝིཊྛོཔི ཙ གཱམོ ཨཏྟནོ ནིཝིཊྛཀཱལཏོ པཊྛཱཡ སབྦཀཱལམཏྠཱིཏི ཝཏྟབྦཏཾ ཨརཧཏི, ཏེན པརིཡཱཡེན ‘‘ཏེན ཁོ པན སམཡེན ཝེསཱལིཡཱ ཨཝིདཱུརེ ཀལནྡགཱམོ ནཱམ ཧོཏཱི’’ཏི ཝུཏྟཾ.

༢༥-༦. ཨནུཉྙཱཏོསི པན ཏྭནྟི སམཎཝཏྟདསྶནཏྠཾ བྷགཝཱ པུཙྪཏི. མཱཏཱཔིཏཱུཧི ཨནནུཉྙཱཏནྟི ཨེཏྠ ཛནཀེཧེཝ ཨནནུཉྙཱཏདསྶནཏྠཾ པུཙྪཱིཏི ཝུཏྟཾ. ན ཁོ སུདིནྣ ཏཐཱགཏཱཏི ‘‘པབྦཱཛེཏུ མཾ བྷགཝཱ’’ཏི ཡཱཙནཱཝསེན པནེཝམཱཧ, ན བྷགཝཱ སཡཾ སརཎཱནི དཏྭཱ པབྦཱཛེསི. དུཀྑསྶཱཏི ཨེཏྠ ‘‘ཀལབྷཱགམྤཱི’’ཏི པཱཋསེསོ. ཝིཀཔྤདྭཡེཔཱིཏི དུཏིཡཏཏིཡཝིཀཔྤེསུ. པུརིམཔདསྶཱཏི ཀིཉྩཱིཏི པདསྶ. ཨུཏྟརཔདེནཱཏི དུཀྑསྶཱཏི པདེན. སམཱནཝིབྷཏྟཱིཏི སཱམིཝཙནཾ. ཡཐཱ ཀིཾ? ‘‘ཀསྶཙི དུཀྑསྶཱ’’ཏི ཝཏྟབྦེ ‘‘ཀིཉྩི དུཀྑསྶཱ’’ཏི ཝུཏྟནྟི ཝེདིཏབྦཾ. ཨཀཱམཀཱ ཝིནཱ བྷཝིསྶཱམཱཏི ཏཡཱ སདྡྷིཾ ཨམརིཏྭཱ ཨཀཱམཱ ཛཱིཝིསྶཱམ. སཙེཔི ན མརཱམ, ཨཀཱམཀཱཝ ཏཡཱ ཝིཡོགཾ པཱཔུཎིསྶཱམ, ཏཡི ཛཱིཝམཱནེ ཨེཝ ནོ མརཎཾ བྷཝེཡྻ, མརཎེནཔི ནོ ཏཡཱ ཝིཡོགཾ མཡཾ ཨཀཱམཀཱཝ པཱཔུཎིསྶཱམ.

༣༠. ཀཏིཔཱཧཾ བལཾ གཱཧེཏྭཱཏི ཀསྨཱ པནཱཡཾ ཏཐཱ པབྦཛྫཱཡ ཏིབྦཙྪནྡོ ཨནུཉྙཱཏོ སམཱནོ ཀཏིཔཱཧཾ གྷརེཡེཝ ཝིལམྦིཏྭཱ ཀཱཡབལཉྩ ཨགྒཧེསཱིཏི? ཨནུམཏིདཱནེན མཱཏཱཔིཏཱུསུ སཧཱཡཀེསུ ཙ ཏུཊྛོ ཏེསཾ ཙིཏྟཏུཊྛཏྠཾ. ཀེསུཙི ཨཊྛཀཐཱཔོཏྠཀེསུ ཀེཙི ཨཱཙརིཡཱ ‘‘ཨཡཾ སུདིནྣོ ཛཱིཝཀཝཏྠུཏོ པཙྪཱ པཾསུཀཱུལིཀདྷུཏངྒཝསེན པཾསུཀཱུལིཀོ ཛཱཏོ’’ཏི སཉྙཱཡ ‘‘གཧཔཏིཙཱིཝརཾ པཊིཀྑིཔིཏྭཱ པཾསུཀཱུལིཀདྷུཏངྒཝསེན པཾསུཀཱུལིཀོ ཧོཏཱི’’ཏི ལིཁནྟི, ཏཾ ‘‘ཨཙིརཱུཔསམྤནྣོ’’ཏི ཝཙནེན ཝིརུཛ྄ཛྷཏི. ‘‘ཏཐཱ སུདིནྣོ ཧི བྷགཝཏོ དྭཱདསམེ ཝསྶེ པབྦཛིཏོ ¶ , ཝཱིསཏིམེ ཝསྶེ ཉཱཏིཀུལཾ པིཎྜཱཡ པཝིཊྛོ སཡཾ པབྦཛྫཱཡ ཨཊྛཝསྶིཀོ ཧུཏྭཱ’’ཏི, ‘‘བྷགཝཏོ ཧི བུདྡྷཏྟཾ པཏྟཏོ པཊྛཱཡ ཡཱཝ ཨིདཾ ཝཏྠཾ, ཨེཏྠནྟརེ ཝཱིསཏི ཝསྶཱནི ན ཀོཙི གཧཔཏིཙཱིཝརཾ སཱདིཡི, སབྦེ པཾསུཀཱུལིཀཱཝ ཨཧེསུ’’ནྟི ཙ ཝུཏྟེན ཨཊྛཀཐཱཝཙནེན ཝིརུཛ྄ཛྷཏི, པབྦཛྫཱཡ ཨཊྛཝསྶིཀོ, ན ཨུཔསམྤདཱཡ. ཨུཔསམྤདཾ པན ཛཱིཝཀཝཏྠུཏོ (མཧཱཝ. ༣༢༦) པཙྪཱ ¶ ཨལཏྠ, ཏསྨཱ ཨཝསྶིཀོ ཉཱཏིཀུལཾ པིཎྜཱཡ པཝིཊྛོ སིཡཱཏི ཙེ? ན, ‘‘ཨལཏྠ ཁོ སུདིནྣོ ཀལནྡཔུཏྟོ བྷགཝཏོ སནྟིཀེ པབྦཛྫཾ, ཨལཏྠ ཨུཔསམྤད’’ནྟི ཨེཀཏོ ཨནནྟརཾ ཝུཏྟཏྟཱ. པབྦཛྫཱནནྟརམེཝ ཧི སོ ཨུཔསམྤནྣོ ཏེརསདྷུཏངྒགུཎེ སམཱདཱཡ ཝཏྟནྟོ ཨཊྛ ཝསྶཱནི ཝཛྫིགཱམེ ཝིཧརིཏྭཱ ནིསྶཡམུཏྟཏྟཱ སཡཾཝསཱི ཧུཏྭཱ ‘‘ཨེཏརཧི ཁོ ཝཛྫཱི དུབྦྷིཀྑཱ’’ཏིཨཱདིཏཀྐཝསེན ཡེན ཝེསཱལཱི ཏདཝསརི, ཏསྨཱ ‘‘པཾསུཀཱུལིཀདྷུཏངྒཝསེན པཾསུཀཱུལིཀོ ཧོཏཱི’’ཏི ཨེཏྟཀོཡེཝ པཱཋོ ཡེསུ པོཏྠཀེསུ དིསྶཏི, སོཝ པམཱཎཏོ གཧེཏབྦོ. ‘‘ཨཱརཉྙིཀོ ཧོཏཱི’’ཏི ཨིམིནཱ པཉྩ སེནཱསནཔཊིསཾཡུཏྟཱནི སངྒཧིཏཱནི ནེསཛྫིཀངྒཉྩ ཝིཧཱརསབྷཱགཏྟཱ, ‘‘པིཎྜཔཱཏིཀོ’’ཏི ཨིམིནཱ པཉྩ པིཎྜཔཱཏཔཊིསཾཡུཏྟཱནི, ‘‘པཾསུཀཱུལིཀོ’’ཏི ཨིམིནཱ དྭེ ཙཱིཝརཔཊིསཾཡུཏྟཱནི སངྒཧིཏཱནཱིཏི. ཉཱཏིགྷརཱུཔགམནཀཱརཎདཱིཔནཱདྷིཔྤཱཡཏོ སཔདཱནཙཱརིཀངྒཾ ཝིསུཾ ཝུཏྟནྟི ཝེདིཏབྦཾ. ‘‘མཱ ཨཏིཧརཱཔེསུ’’ནྟི ཀཱལབྱཏྟཡཝསེན ཝུཏྟཾ. དྷམྨསྶནྟརཱཡཀརཏརཏྟཱ ‘‘ཨིམཾ ནཡ’’ནྟི ཨནཡོཡེཝ.

ཡེབྷུཡྻེན ཧི སཏྟཱནཾ, ཝིནཱསེ པཙྩུཔཊྛིཏེ;

ཨནཡོ ནཡརཱུཔེན, བུདྡྷིམཱགམྨ ཏིཊྛཏི.

༣༦. ཨཔཉྙཏྟེ སིཀྑཱཔདེཏི ཨེཏྠ དུཝིདྷཾ སིཀྑཱཔདཔཉྙཱཔནཾ. ཀཐཾ? ‘‘ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐཱ’’ཏི ཨེཝཾ སཨུདྡེསཱནུདྡེསབྷེདཏོ དུཝིདྷཾ. ཏཏྠ པཱཏིམོཀྑེ སརཱུཔཏོ ཨཱགཏཱ པཉྩ ཨཱཔཏྟིཀྑནྡྷཱ སཨུདྡེསཔཉྙཏྟི ནཱམ. སཱཔི དུཝིདྷཱ སཔུགྒལཱཔུགྒལནིདྡེསབྷེདཏོ. ཏཏྠ ཡསྶཱ པཉྙཏྟིཡཱ ཨནྟོ ཨཱཔཏྟིཡཱ སཧ, ཝིནཱ ཝཱ པུགྒལོ དསྶིཏོ, སཱ སཔུགྒལནིདྡེསཱ. ཨིཏརཱ ཨཔུགྒལནིདྡེསཱཏི ཝེདིཏབྦཱ. སཔུགྒལནིདྡེསཱཔི དུཝིདྷཱ དསྶིཏཱདསྶིཏཱཔཏྟིབྷེདཏོ. ཏཏྠ ཨདསྶིཏཱཔཏྟིཀཱ ནཱམ ཨཊྛ པཱརཱཛིཀཱ དྷམྨཱ. ‘‘པཱརཱཛིཀོ ཧོཏི ཨསཾཝཱསོ’’ཏི ཧི པུགྒལོཝ ཏཏྠ དསྶིཏོ, ནཱཔཏྟི. དསྶིཏཱཔཏྟིཀཱ ནཱམ བྷིཀྑུནཱིཔཱཏིམོཀྑེ ‘‘སཏྟརས སངྒྷཱདིསེསཱ དྷམྨཱ ནིསྶཱརཎཱིཡཾ སངྒྷཱདིསེས’’ནྟི ཧི ཏཏྠ ཨཱཔཏྟི དསྶིཏཱ སདྡྷིཾ པུགྒལེན, ཏཐཱ ཨཔུགྒལནིདྡེསཱཔི དསྶིཏཱདསྶིཏཱཔཏྟིཏོཝ དུཝིདྷཱ. ཏཏྠ ཨདསྶིཏཱཔཏྟིཀཱ ནཱམ སེཁིཡཱ དྷམྨཱ. སེསཱ དསྶིཏཱཔཏྟིཀཱཏི ¶ ཝེདིཏབྦཱ. སཱཔི དུཝིདྷཱ ཨནིདྡིཊྛཀཱརཀནིདྡིཊྛཀཱརཀབྷེདཏོ. ཏཏྠ ཨནིདྡིཊྛཀཱརཀཱ ནཱམ སུཀྐཝིསྶཊྛི མུསཱཝཱད ཨོམསཝཱད ¶ པེསུཉྙ བྷཱུཏགཱམ ཨཉྙཝཱདཀ ཨུཛ྄ཛྷཱཔནཀ གཎབྷོཛན པརམྤརབྷོཛན སུརཱམེརཡ ཨངྒུལིཔཏོདཀ ཧསདྷམྨ ཨནཱདརིཡ ཏལགྷཱཏཀཛཏུམཊྛཀ སིཀྑཱཔདཱནཾ ཝསེན པཉྩདསཝིདྷཱ ཧོནྟི. སེསཱནཾ པུགྒལནིདྡེསཱནཾ ཝསེན ནིདྡིཊྛཀཱརཀཱ ཝེདིཏབྦཱ.

ཨནུདྡེསཔཉྙཏྟིཔི པདབྷཱཛནནྟརཱཔཏྟིཝིནཱིཏཝཏྠུཔཊིཀྑེཔཔཉྙཏྟིཨཝུཏྟསིདྡྷིཝསེན ཚབྦིདྷཱ ཧོནྟི. ཏཏྠ ‘‘ཡེབྷུཡྻེན ཁཱཡིཏཾ ཨཱཔཏྟི ཐུལླཙྩཡསྶཱ’’ཏི (པཱརཱ. ༦༡) ཨེཝམཱདིཀཱ པདབྷཱཛནིཡེ སནྡིསྶམཱནཱཔཏྟི པདབྷཱཛནསིཀྑཱཔདཾ ནཱམ. ‘‘ན ཏྭེཝ ནགྒེན ཨཱགནྟབྦཾ, ཡོ ཨཱགཙྪེཡྻ, ཨཱཔཏྟི དུཀྐཊསྶཱ’’ཏིཨཱདིཀཱ (པཱརཱ. ༥༡༧) ཨནྟརཱཔཏྟིསིཀྑཱཔདཾ ནཱམ. ‘‘ཨནུཛཱནཱམི, བྷིཀྑཝེ, དིཝཱ པཊིསལླཱིཡནྟེན དྭཱརཾ སཾཝརིཏྭཱ པཊིསལླཱིཡིཏུ’’ནྟི (པཱརཱ. ༧༥) ཨེཝམཱདིཀཱ ཝིནཱིཏཝཏྠུསིཀྑཱཔདཾ ནཱམ. ‘‘ལོཧིཏུཔྤཱདཀོ, བྷིཀྑཝེ, ཨནུཔསམྤནྣོ ན ཨུཔསམྤཱདེཏབྦོ, ཨུཔསམྤནྣོ ནཱསེཏབྦོ’’ཏི (མཧཱཝ. ༡༡༤) ཨེཝམཱདིཀཱ པཊིཀྑེཔསིཀྑཱཔདཾ ནཱམ. ཁནྡྷཀེསུ པཉྙཏྟདུཀྐཊཐུལླཙྩཡཱནི པཉྙཏྟིསིཀྑཱཔདཾ ནཱམ. ‘‘ཡཱ པན བྷིཀྑུནཱི ནཙྩཾ ཝཱ གཱིཏཾ ཝཱ ཝཱདིཏཾ ཝཱ དསྶནཱཡ གཙྪེཡྻ, པཱཙིཏྟིཡ’’ནྟི (པཱཙི. ༨༣༤) ཨིམིནཱ ཝུཏྟེན ‘‘ཡཱ པན བྷིཀྑུནཱི ནཙྩེཡྻ ཝཱ གཱཡེཡྻ ཝཱ ཝཱདེཡྻ ཝཱ པཱཙིཏྟིཡ’’ནྟི ཨེཝམཱདིཀཾ ཡཾ ཀིཉྩི ཨཊྛཀཐཱཡ དིསྶམཱནཾ ཨཱཔཏྟིཛཱཏཾ, ཝིནཡཀམྨཾ ཝཱ ཨཝུཏྟསིདྡྷིསིཀྑཱཔདཾ ནཱམ. ཚབྦིདྷམྤེཏཾ ཚཧི ཀཱརཎེཧི ཨུདྡེསཱརཧཾ ན ཧོཏཱིཏི ཨནུདྡེསསིཀྑཱཔདཾ ནཱམཱཏི ཝེདིཏབྦཾ. སེཡྻཐིདཾ – པཉྩཧི ཨུདྡེསེཧི ཡཐཱསམྦྷཝཾ ཝིསབྷཱགཏྟཱ ཐུལླཙྩཡདུབྦྷཱསིཏཱནཾ, སབྷཱགཝཏྠུཀམྤི དུཀྐཊཐུལླཙྩཡདྭཡཾ ཨསབྷཱགཱཔཏྟིཀཏྟཱ, ཨནྟརཱཔཏྟིཔཉྙཏྟིསིཀྑཱཔདཱནཾ ནཱནཱཝཏྠུཀཱཔཏྟིཀཏྟཱ, པཊིཀྑེཔསིཀྑཱཔདཱནཾ ཀེསཉྩི ཝིནཱིཏཝཏྠུཔཉྙཏྟིསིཀྑཱཔདཱནཉྩ ཨདསྶིཏཱཔཏྟིཀཏྟཱ, ཨདསྶིཏཝཏྠུཀཏྟཱ བྷེདཱནུཝཏྟཀཐུལླཙྩཡསྶ, ཨདསྶིཏཱཔཏྟིཝཏྠུཀཏྟཱ ཨཝུཏྟསིདྡྷིསིཀྑཱཔདཱནནྟི. ཨེཏྟཱཝཏཱ ‘‘དུཝིདྷཾ སིཀྑཱཔདཔཉྙཱཔནཾ ཨུདྡེསཱནུདྡེསབྷེདཏོ’’ཏི ཡཾ ཝུཏྟཾ, ཏཾ སམཱསཏོ པཀཱསིཏཾ ཧོཏི.

ཏཏྠ ཨཔཉྙཏྟེ སིཀྑཱཔདེཏི སཨུདྡེསསིཀྑཱཔདཾ སནྡྷཱཡ ཝུཏྟནྟི ཝེདིཏབྦཾ. ཨེཀཙྩེ ཨཱཙརིཡཱ ཨེཝཾ ཀིར ཝཎྞཡནྟི ‘‘ཙཏྟཱརོ པཱརཱཛིཀཱ ཀཏིཝསྶཱབྷིསམྦུདྡྷེན བྷགཝཏཱ པཉྙཏྟཱཏིཨཱདིནཱ པུཙྪཾ ཀཏྭཱ ཏེསུ པཋམཔཱརཱཛིཀོ ¶ ཝེསཱལིཡཾ པཉྙཏྟོ པཉྩཝསྶཱབྷིསམྦུདྡྷེན ཧེམནྟཱནཾ པཋམེ མཱསེ དུཏིཡེ པཀྑེ དསམེ དིཝསེ ཨཌྜྷཏེཡྻཔོརིསཱཡ ཚཱཡཱཡ ¶ པུརཏྠཱབྷིམུཁེན ནིསིནྣེན ཨཌྜྷཏེརསཱནཾ བྷིཀྑུསཏཱནཾ མཛ྄ཛྷེ སུདིནྣཾ ཀལནྡཔུཏྟཾ ཨཱརབྦྷ པཉྙཏྟོ’’ཏི, ཏཾ ན ཡུཛྫཏི, ཀསྨཱ? –

ཡསྨཱ དྭཱདསམཾ ཝསྶཾ, ཝེརཉྫཱཡཾ ཝསི ཛིནོ;

ཏསྨིཉྩ སུདྡྷོ སངྒྷོཏི, ནེཝ པཱརཱཛིཀཾ ཏདཱ.

ཐེརསྶ སཱརིཔུཏྟསྶ, སིཀྑཱཔཉྙཏྟིཡཱཙནཱ;

ཏསྨིཾ སིདྡྷཱཏི སིདྡྷཱཝ, གརུཀཱཔཏྟི ནོ ཏདཱ.

ཨོཝཱདཔཱཏིམོཀྑཉྩ, ཀིཾ སཏྠཱ ཙཏུཝསྶིཀོ;

པཊིཀྑིཔི ཀིམཱཎཉྩ, སམཏྟཾ ཨནུཛཱནི སོ.

ཨཛཱཏསཏྟུཾ ནིསྶཱཡ, སངྒྷབྷེདམཀཱསི ཡཾ;

དེཝདཏྟོ ཏཏོ སངྒྷ-བྷེདོ པཙྪིམབོདྷིཡཾ.

ཨཱརཱདྷཡིཾསུ མཾ པུབྦེ, བྷིཀྑཱུཏི མུནིབྷཱསིཏཾ;

སུཏྟམེཝ པམཱཎཾ ནོ, སོཝ ཀཱལོ ཨནཔྤཀོཏི.

ཡཾ པན ཝུཏྟཾ ‘‘ཨཐ བྷགཝཱ ཨཛ྄ཛྷཱཙཱརཾ ཨཔསྶནྟོ པཱརཱཛིཀཾ ཝཱ སངྒྷཱདིསེསཾ ཝཱ ན པཉྙཔེསཱི’’ཏི, ཏཾ སཀལསིཀྑཱཔདཾ སནྡྷཱཡཱཧ. ན ཀེཝལཾ སཨུདྡེསསིཀྑཱཔདམཏྟཾ, ཏེན སཨུདྡེསཱནུདྡེསཔཉྙཏྟིབྷེདཾ སཀལཾ པཱརཱཛིཀཾ སནྡྷཱཡཱཧཱཏི ཝུཏྟཾ ཧོཏི. ཀིཉྩཱཔི ནཱབྷིཔརཱམསནམྤི ཀཱཡསཾསགྒོ, ཏཐཱཔི ཨེཏཾ ཝིསེསནིཡམནཏོ, ཨཙྪནྡརཱགཱདྷིཔྤཱཡཏོ ཙ ཝིསུཾ ཝུཏྟཾ. ཚནྡརཱགརཏྟསྶེཝ ཧི ཀཱཡསཾསགྒོ ཨིདྷཱདྷིཔྤེཏོ. ཨསུཙིཔཱནེ པན ཧཏྠིནིཡཱ ཏཱཔསཔསྶཱཝཔཱནེན ཝཱལཀཱབྱོ ནཱམ ཨུཔྤཛྫཏི, ཝཱལཀཱབྱསྶ ཝཏྠུ ཝཏྟབྦཾ. མཎྜབྱསྶ ནཱབྷིཡཱ པརཱམསནེནེཝ ཀིར. རཱུཔདསྶནེ པན ཝེཛྫཀཱ ཨཱཧུ –

‘‘ཐཱིནཾ སནྡསྶནཱ སུཀྐཾ, ཀདཱཙི ཙལིཏོཝརེ;

ཏཾ གཱམདྷམྨཀརཎཾ, དྭཡསམཾ སངྒམིཡ;

གབྦྷཱདཱིཏི ཨཡཾ ནཡོ, ཐཱིནཾ པུརིསདསྶནཱསཱིཏྱཱུཔནེཡྻ’’.

ཏཐཱཔྱཱཧུ ¶ ¶ –

‘‘པུཔྥིཀེ ཨེདྷིཡྻ སུདྡྷེ, པསྶཾ ནརཉྩ ཨིཏྠི ཏཾ;

གབྦྷཉྩ ནཡེཏྱུཏྟ-མིཏི ཏསྨཱ ཀཱསོ ཨིཏཱི’’ཏི.

རཱཛོརོདྷོ ཝིཡཱཏི སཱིཧལ༹དཱིཔེ ཨེཀིསྶཱ ཨིཏྠིཡཱ ཏཐཱ ཨཧོསི, ཏསྨཱ ཀིར ཨེཝཾ ཝུཏྟཾ. ཀིཉྩཱཔི ཡཱཝ བྲཧྨལོཀཱ སདྡོ ཨབྦྷུགྒཙྪི, ན ཏཾ མནུསྶཱནཾ ཝིསཡོ ཨཧོསི ཏེསཾ རཱུཔཾ ཝིཡ. ཏེནེཝ བྷིཀྑཱུ པུཙྪིཾསུ ‘‘ཀཙྩི ནོ ཏྭཾ ཨཱཝུསོ སུདིནྣ ཨནབྷིརཏོ’’ཏི.

༣༩. ཀལཱིཏི ཀོདྷོ, ཏསྶ སཱསནཾ ཀལིསཱསནཾ, ཀལཧོ. གཱམདྷམྨནྟི ཨེཏྠ ཛནཔདདྷམྨཾ ཛནཔདཝཱསཱིནཾ སིདྡྷིཾ. ཨཏྟཱཏི ཙིཏྟཾ, སརཱིརཉྩ. ཨསུཏྟནྟཝིནིབདྡྷནྟི ཝིནཡསུཏྟེ ཨནཱགཏཾ, སུཏྟཱབྷིདྷམྨེསུཔི ཨནཱགཏཾ, པཱལི༹ཝིནིམུཏྟནྟི ཨཏྠོ. ཀུསུམམཱལནྟི ནཱནཱགུཎཾ སནྡྷཱཡཱཧ. རཏནདཱམནྟི ཨཏྠསམྤཏྟིཾ སནྡྷཱཡ ཝདཏི. པཊིཀྑིཔནཱདྷིཔྤཱཡཱ བྷདྡཱལི ཝིཡ. པདནིརུཏྟིབྱཉྫནཱནི ནཱམཝེཝཙནཱནེཝ ‘‘ནཱམཾ ནཱམཀམྨཾ ནཱམདྷེཡྻཾ ནིརུཏྟཱི’’ཏིཨཱདཱིསུ (དྷ. ས. ༡༣༡༥) ཝིཡ. ནིཔྤརིཡཱཡེན ཝིརཏི སིཀྑཱཔདཾ ནཱམ. ཨཀུསལཔཀྑེ དུསྶཱིལྱཾ ནཱམ ཙེཏནཱ. ཀུསལཔཀྑེཔི ཙེཏནཱཔརིཡཱཡཏོ ཝིབྷངྒེ ‘‘སིཀྑཱཔད’’ནྟི ཝུཏྟཾ. སངྒྷསུཊྛུཏཱཡཱཏི ཨེཏྠ ལོཀཝཛྫསྶ པཉྙཱཔནེ སངྒྷསུཊྛུཏཱ ཧོཏི པཱཀཊཱདཱིནཝཏོ. པཉྙཏྟིཝཛྫསྶ པཉྙཱཔནེ སངྒྷཕཱསུཏཱ ཧོཏི པཱཀཊཱནིསཾསཏྟཱ. ཏཏྠ པཋམེན དུམྨངྐཱུནཾ ནིགྒཧོ, དུཏིཡེན པེསལཱནཾ ཕཱསུཝིཧཱརོ. པཋམེན སམྤརཱཡིཀཱནཾ ཨཱསཝཱནཾ པཊིགྷཱཏོ, དུཏིཡེན དིཊྛདྷམྨིཀཱནཾ. ཏཐཱ པཋམེན ཨཔྤསནྣཱནཾ པསཱདོ, དུཏིཡེན པསནྣཱནཾ བྷིཡྻོབྷཱཝོ. ‘‘པུབྦེ ཀཏཔུཉྙཏཱཡ ཙོདིཡམཱནསྶ བྷབྦཀུལཔུཏྟསྶཱ’’ཏི ཝུཏྟཏྟཱ ‘‘སུདིནྣོ ཏཾ ཀུཀྐུཙྩཾ ཝིནོདེཏྭཱ ཨརཧཏྟཾ སཙྪཱཀཱསི, ཏེནེཝ པབྦཛྫཱ ཨནུཉྙཱཏཱ’’ཏི ཝདནྟི, ཨུཔཔརིཀྑིཏབྦཾ. ཏཐཱ པཋམེན སདྡྷམྨཊྛིཏི, དུཏིཡེན ཝིནཡཱནུགྒཧོ ཧོཏཱིཏི ཝེདིཏབྦོ.

ཨཔིཙེཏྠ ཝཏྠུཝཱིཏིཀྐམེ ཡཏྠ ཨེཀནྟཱཀུསལབྷཱཝེན, ཏཾ སངྒྷསུཊྛུབྷཱཝཱཡ པཉྙཏྟཾ ལོཀཝཛྫཏོ, ཡཏྠ པཉྙཏྟིཛཱནནེ ཨེཝ ཨཏྠཱཔཏྟི, ན ཨཉྙདཱ, ཏཾ སདྡྷམྨཊྛིཏིཡཱ ཝཱཔི པསཱདུཔྤཱདབུདྡྷིཡཱ དྷམྨདེསནཱཔཊིསཾཡུཏྟཾ, ཨིཏརཉྩ སེཁིཡཾ, ཨིདཾ ལོཀཝཛྫཾ ནཱམ. ཝཏྠུནོ པཉྙཏྟིཡཱ ཝཱ ཝཱིཏིཀྐམཙེཏནཱཡཱབྷཱཝེཔི པཊིཀྑིཏྟསྶ ཀརཎེ, ཀཏྟབྦསྶ ཨཀརཎེ ཝཱ ¶ སཏི ཡཏྠ ཨཱཔཏྟིཔྤསངྒོ, ཏཾ སབྦཾ ཋཔེཏྭཱ སུརཱཔཱནཾ པཎྞཏྟིཝཛྫནྟི ཝེདིཏབྦཾ. ཨཱགནྟུཀཝཏྟཾ, ཨཱཝཱསིཀ, གམིཀ, ཨནུམོདན, བྷཏྟགྒ, པིཎྜཙཱརིཀ, ཨཱརཉྙཀ, སེནཱསན ¶ , ཛནྟཱགྷར, ཝཙྩཀུཊི, སདྡྷིཝིཧཱརིཀ, ཨུཔཛ྄ཛྷཱཡ, ཨནྟེཝཱསིཀ, ཨཱཙརིཡཝཏྟནྟི ཨེཏཱནི ཨགྒཧིཏགྒཧཎནཡེན གཎིཡམཱནཱནི ཙུདྡས, ཨེཏཱནི པན ཝིཏྠཱརཏོ དྭེཨསཱིཏི མཧཱཝཏྟཱནི ནཱམ ཧོནྟི. སཏྟཧི ཨཱཔཏྟིཀྑནྡྷེཧི སཾཝརོ སཾཝརཝིནཡོ པཉྙཏྟིསིཀྑཱཔདམེཝ. ཏཏྠ པཉྙཏྟིཝིནཡོ སམཐཝིནཡཏྠཱཡ སམཐཝིནཡོ སཾཝརཝིནཡཏྠཱཡ སཾཝརཝིནཡོ པཧཱནཝིནཡཏྠཱཡཱཏི ཡོཛནཱ ཝེདིཏབྦཱ. ཡཾ སངྒྷསུཊྛུ, ཏཾ སངྒྷཕཱསཱུཏི ཨེཀམིཝ ཝུཏྟཾ སངྒྷསུཊྛུཏཱཡ སཏི སངྒྷཕཱསུ བྷཝིསྶཏཱིཏི དཱིཔནཏྠཾ. པཀརཱིཡནྟི ཨེཏྠ ཏེ ཏེ པཡོཛནཝིསེསསངྑཱཏཱ ཨཏྠཝསཱཏི ཨཏྠཝསཾ ‘‘པཀརཎ’’ནྟི ཝུཙྩཏི. དསསུ པདེསུ ཨེཀེཀཾ མཱུལཾ ཀཏྭཱ དསཀྑཏྟུཾ ཡོཛནཱཡ པདསཏཾ ཝུཏྟཾ. ཏཏྠ པཙྪིམསྶ པདསྶ ཝསེན ཨཏྠསཏཾ པུརིམསྶ ཝསེན དྷམྨསཏཾ ཨཏྠཛོཏིཀཱནཾ ནིརུཏྟཱིནཾ ཝསེན ནིརུཏྟིསཏཾ, དྷམྨབྷཱུཏཱནཾ ནིརུཏྟཱིནཾ ཝསེན ནིརུཏྟིསཏནྟི དྭེ ནིརུཏྟིསཏཱནི, ཨཏྠསཏེ ཉཱཎསཏཾ, དྷམྨསཏེ ཉཱཎསཏཾ དྭཱིསུ ནིརུཏྟིསཏེསུ དྭེ ཉཱཎསཏཱནཱིཏི ཙཏྟཱརི ཉཱཎསཏཱནི ཝེདིཏབྦཱནི. ཨེཏྠ སངྒྷསུཊྛུཏཱཏི དྷམྨསངྒྷསྶ སུཊྛུབྷཱཝོཏི ཨཏྠོ. ‘‘ཨཏྠཔདཱནཱིཏི ཨཊྛཀཐཱ. དྷམྨཔདཱནཱིཏི པཱལཱི༹’’ཏི ཝུཏྟཾ ཀིར.

མེཐུནཾ དྷམྨནྟི ཨེཝཾ བཧུལནཡེན ལདྡྷནཱམཀཾ སཀསམྤཡོགེན, པརསམྤཡོགེན ཝཱ ཨཏྟནོ ནིམིཏྟསྶ སཀམགྒེ ཝཱ པརམགྒེ ཝཱ པརནིམིཏྟསྶ སཀམགྒེ ཨེཝ པཝེསཔཝིཊྛཋིཏུདྡྷརཎེསུ ཡཾ ཀིཉྩི ཨེཀཾ པཊིསཱདིཡནཝསེན སེཝེཡྻ པཱརཱཛིཀོ ཧོཏི ཨསཾཝཱསོཏི. ཀེཙི པན ‘‘པཝེསཱདཱིནི ཙཏྟཱརི ཝཱ ཏཱིཎི ཝཱ དྭེ ཝཱ ཨེཀཾ ཝཱ པཊིསེཝེཡྻ, པཱརཱཛིཀོ ཧོཏི. ཝུཏྟཉྷེཏཾ ‘སོ ཙེ པཝེསནཾ སཱདིཡཏི, པཝིཊྛཾ, ཋིཏཾ, ཨུདྡྷརཎཾ སཱདིཡཏི, ཨཱཔཏྟི པཱརཱཛིཀསྶཱ’ཏིཨཱདཱི’’ཏི (པཱརཱ. ༥༩) ཝདནྟི, ཏེསཾ མཏེན ཙཏཱུསུཔི ཙཏསྶོ པཱརཱཛིཀཱཔཏྟིཡོ ཨཱཔཛྫཏི. ཏེཡེཝ ཨེཝཾ ཝདནྟི ‘‘ཨཱཔཛྫཏུ མེཐུནདྷམྨཔཱརཱཛིཀཱཔཏྟི མེཐུནདྷམྨཔཱརཱཛིཀཱཔཏྟིཡཱ ཏབྦྷཱགིཡཱ’’ཏི, ‘‘ཨཏྟནོ ཝཱིཏིཀྐམེ པཱརཱཛིཀཱཔཏྟིཾ, སངྒྷཱདིསེསཱཔཏྟིཉྩ ཨཱཔཛྫིཏྭཱ སིཀྑཾ པཙྩཀྑཱཡ གཧཊྛཀཱལེ མེཐུནཱདིཔཱརཱཛིཀཾ ཨཱཔཛྫིཏྭཱ པུན པབྦཛིཏྭཱ ཨུཔསམྤཛྫིཏྭཱ ཨེཀཾ སངྒྷཱདིསེསཱཔཏྟིཾ ཨེཀམནེཀཾ ཝཱ པཊིཀརིཏྭཱཝ སོ པུགྒལོ ཡསྨཱ ནིརཱཔཏྟིཀོ ཧོཏི, ཏསྨཱ སོ གཧཊྛཀཱལེ ¶ སཱཔཏྟིཀོཝཱཏི ཨནྟིམཝཏྠུཾ ཨཛ྄ཛྷཱཔནྣསྶཱཔི ཨཏྠེཝ ཨཱཔཏྟིཝུཊྛཱནཾ. ཝུཊྛཱནདེསནཱཧི པན ཨསུཛ྄ཛྷནཏོ ‘པཡོགེ པཡོགེ ཨཱཔཏྟི པཱརཱཛིཀསྶཱ’ཏི ན ཝུཏྟཾ གཎནཔཡོཛནཱབྷཱཝཏོ. ཀིཉྩཱཔི ན ཝུཏྟཾ, ཨཐ ཁོ པདབྷཱཛནེ ‘ཨཱཔཏྟི པཱརཱཛིཀསྶཱ’ཏི ཝཙནེནཱཡམཏྠོ སིདྡྷོ’’ཏི ཡུཏྟིཉྩ ཝདནྟི. ཡདི ཨེཝཾ མཱཏིཀཱཡམྤི ‘‘ཡོ པན བྷིཀྑུ མེཐུནཾ དྷམྨཾ པཊིསེཝེཡྻ པཱརཱཛིཀ’’ནྟི ཝཏྟབྦཾ བྷཝེཡྻ, པཱརཱཛིཀསྶ ཨནཝསེསཝཙནམྤི ན ཡུཛྫེཡྻ. སབྦེཔི ཧི ཨཱཔཏྟིཀྑནྡྷེ བྷིཀྑུགཎནཉྩ ཨནཝསེསེཏྭཱ ¶ ཏིཊྛཏཱིཏི ཨནཝསེསཝཙནནྟི ཀཏྭཱ པཝེསེཝ ཨཱཔཏྟི, ན པཝིཊྛཱདཱིསུ, ཏམེཝེཀཾ སནྡྷཱཡ ‘‘ཡསྶ སིཡཱ ཨཱཔཏྟཱི’’ཏི པཱརཱཛིཀཱཔཏྟིམྤི ཨནྟོ ཀཏྭཱ ནིདཱནུདྡེསེ ཝཙནཾ ཝེདིཏབྦཾ. ཏསྨཱ མཱཏིཀཱཡཾ ‘‘པཱརཱཛིཀ’’ནྟི ཨཝཏྭཱ ‘‘པཱརཱཛིཀོ ཧོཏཱི’’ཏི པུགྒལནིདྡེསཝཙནཾ ཏེན སརཱིརབནྡྷནེན ཨུཔསམྤདཱཡ ཨབྷབྦབྷཱཝདཱིཔནཏྠཾ. ‘‘ཨཱཔཏྟི པཱརཱཛིཀསྶཱ’’ཏི པདབྷཱཛནེ ཝཙནཾ ཨནྟིམཝཏྠུཾ ཨཛ྄ཛྷཱཔནྣསྶཱཔི པཱརཱཛིཀསྶ ཨསཾཝཱསསྶ སཏོ པུགྒལསྶ ཨཐེཡྻསཾཝཱསཀབྷཱཝདཱིཔནཏྠཾ. ན ཧི སོ སཾཝཱསཾ སཱདིཡནྟོཔི ཐེཡྻསཾཝཱསཀོ ཧོཏི, ཏསྨཱ ‘‘ཨུཔསམྤནྣོ བྷིཀྑུ’’ཏྭེཝ ཝུཙྩཏི. ཏེནེཝཱཧ ‘‘ཨསུདྡྷོ ཧོཏི པུགྒལོ ཨཉྙཏརཾ པཱརཱཛིཀཾ དྷམྨཾ ཨཛ྄ཛྷཱཔནྣོ, ཏཉྩེ སུདྡྷདིཊྛི སམཱནོ ཨནོཀཱསཾ ཀཱརཱཔེཏྭཱ ཨཀྐོསཱདྷིཔྤཱཡོ ཝདེཏི, ཨཱཔཏྟི ཨོམསཝཱདེན དུཀྐཊསྶཱ’’ཏི (པཱརཱ. ༣༨༩). ཨནུཔསམྤནྣསྶ ཏདབྷཱཝཏོ སིདྡྷོ སོ ‘‘ཨུཔསམྤནྣོ བྷིཀྑུ’’ཏྭེཝ ཝུཙྩཏཱིཏི. ཏེན པདསོདྷམྨཾ སཧསེཡྻཉྩ ན ཛནེཏི, བྷིཀྑུཔེསུཉྙཱདིཉྩ ཛནེཏཱིཏི ཝེདིཏབྦཾ. བྷིཀྑུནཱིནཾ སངྒྷཱདིསེསེསུ པན བྷིཀྑུསངྒྷཱདིསེསཏོ ཝུཊྛཱནཝིདྷིཝིསེསདསྶནཏྠཾ ‘‘ཨཡམྤི བྷིཀྑུནཱི…པེ… ཨཱཔནྣཱ’’ཏི (པཱཙི. ༦༧༩) པུགྒལནིདྡེསཾ ཀཏྭཱཔི པཱརཱཛིཀཏོ ཨདྷིཔྤཱཡནྟརདསྶནཏྠཾ ‘‘ནིསྶཱརཎཱིཡཾ སངྒྷཱདིསེས’’ནྟི (པཱཙི. ༦༧༩) ཨཱཔཏྟིནཱམགྒཧཎཉྩ ཀཏཾ. ཨེཏྟཱཝཏཱ སཔུགྒལནིདྡེསེ དསྶིཏཱདསྶིཏཱཔཏྟིདུཀཾ ཝིཏྠཱརིཏཾ ཧོཏི. ཨཔུགྒལནིདྡེསེསུ སེཁིཡེསུ ཨཱཔཏྟིཡཱ དསྶནཀཱརཎཾ སེཁིཡཱནཾ ཨཊྛཀཐཱཡམེཝ ཝུཏྟཾ. ཏདབྷཱཝཏོ ཨིཏརེསུ ཨཱཔཏྟིདསྶནཾ ཀཏཾ. ཨཔུགྒལནིདྡེསེསུཔི དསྶིཏཱདསྶིཏཱཔཏྟིདུཀཉྩ ཝིཏྠཱརིཏཾ ཧོཏཱིཏི.

པཋམཔཉྙཏྟིཀཐཱཝཎྞནཱ ནིཊྛིཏཱ.

སུདིནྣབྷཱཎཝཱརཾ ནིཊྛིཏཾ.

མཀྐཊཱིཝཏྠུཀཐཱཝཎྞནཱ

༤༠-༡. དུཏིཡཔཉྙཏྟིཡཾ ¶ ‘‘ཨིདྷ མལླཱ ཡུཛ྄ཛྷནྟཱི’’ཏིཨཱདཱིསུ ཝིཡ པཊིསེཝཏཱིཏི ཝཏྟམཱནཝཙནཾ པཙུརཔཊིསེཝནཝསེན ཝུཏྟཾ, ‘‘ཏཉྩ ཁོ མནུསྶིཏྠིཡཱ, ནོ ཏིརཙྪཱནགཏཱཡཱ’’ཏི པརིཔུཎྞཏྠམྤི པཋམཾ པཉྙཏྟིཾ ཨཏྟནོ མིཙྪཱགཱཧེན ཝཱ ལེསཨོཌྜནཏྠཱཡ ཝཱ ཨེཝམཱཧ. པརིཔུཎྞཏྠཏཾཡེཝ ནིཡམེཏུཾ ‘‘ནནུ ཨཱཝུསོ ཏཐེཝ ཏཾ ཧོཏཱི’’ཏི ཝུཏྟཾ, ཏེནེཝ མཀྐཊཱིཝཏྠུ ཝིནཱིཏཝཏྠཱུསུ པཀྑིཏྟཾ ཨཝིསེསཏྟཱ, ཏཐཱ ཝཛྫིཔུཏྟཀཝཏྠུ. ཝིཙཱརཎཱ པནེཏྠ ཏཏིཡཔཉྙཏྟིཡཾ ཨཱཝི བྷཝིསྶཏི. ‘‘ནནུ, ཨཱཝུསོ, བྷགཝཏཱ ཨནེཀཔརིཡཱཡེནཱ’’ཏིཨཱདི ན ཀེཝལཾ སཨུདྡེསསིཀྑཱཔདེནེཝ སིདྡྷཾ, ‘‘ཏིརཙྪཱནགཏཱདཱིསུཔི པཱརཱཛིཀ’’ནྟི ཨནུདྡེསསིཀྑཱཔདེནཔི སིདྡྷནྟི ¶ དསྶནཏྠཾ ཝུཏྟཾ. ཨཐ ཝཱ ཡདི སཨུདྡེསསིཀྑཱཔདཾ སཱཝསེསནྟི པཉྙཔེསི, ཨིམིནཱ ཨནུདྡེསསིཀྑཱཔདེནཱཔི ཀིཾ ན སིདྡྷནྟི དསྶནཏྠཾ ཝུཏྟཾ. ‘‘ཏེན ཧི, བྷིཀྑཝེ, བྷིཀྑཱུནཾ སིཀྑཱཔདཾ པཉྙཔེསྶཱམཱི’’ཏི ཏདེཝ སིཀྑཱཔདཾ པཋམཔཉྙཏྟམེཝ ལེསཏྠིཀཱནཾ ཨལེསོཀཱསཾ ཀཏྭཱ ཨཱམེཌིཏཏྠཾ ཀཏྭཱ པཉྙཔེསྶཱམཱིཏི ཨཏྠོ. ཨཉྙཐཱ ‘‘ཨཉྙཝཱདཀེ ཝིཧེསཀེ པཱཙིཏྟིཡ’’ནྟིཨཱདཱིསུ (པཱཙི. ༡༠༡) ཝིཡ ཝཏྠུདྭཡེན ཨཱཔཏྟིདྭཡཾ ཨཱཔཛྫཏི, ན ཙཱཔཛྫཏི, སོ ཨེཝཏྠོ ཨཉྙེནཱཔི ཝཙནེན སུཔྤཀཱསིཏོ, སུཔརིབྱཏྟཀརཎཏྠེན དལ༹ྷཏརོ ཀཏོཏི ཨདྷིཔྤཱཡོ. ཏཏིཡཔཉྙཏྟིཡམྤི ཨཉྙེསུ ཙ ཨེཝཾ ཝིསུདྡྷོ.

ཡསྶ སཙིཏྟཀཔཀྑེཏིཨཱདིམྷི པན གཎྛིཔདནཡོ ཏཱཝ པཋམཾ ཝུཙྩཏི, སཙིཏྟཀཔཀྑེཏི སུརཱཔཱནཱདིཨཙིཏྟཀེ སནྡྷཱཡ ཝུཏྟཾ. སཙིཏྟཀེསུ པན ཡཾ ཨེཀནྟམཀུསལེནེཝ སམུཊྛཱཔིཏཉྩ. ཨུབྷཡཾ ལོཀཝཛྫཾ ནཱམ. སུརཱཔཱནསྨིཉྷི ‘‘སུརཱ’’ཏི ཝཱ ‘‘པཱཏུཾ ན ཝཊྚཏཱི’’ཏི ཝཱ ཛཱནིཏྭཱ པིཝནེ ཨཀུསལམེཝ, ཏཐཱ བྷིཀྑུནཱིནཾ གནྡྷཝཎྞཀཏྠཱཡ ལེཔནེ, བྷེསཛྫཏྠཱཡ ལེཔནེ ཨདོསཏྟཱ ‘‘ཨཝིཙཱརཎཱིཡ’’ནྟི ཨེཏྟཀཾ ཝུཏྟཾ. ཏཏྠ ན ཝཊྚཏཱིཏི ‘‘ཛཱནིཏྭཱ’’ཏི ཝུཏྟཝཙནཾ ན ཡུཛྫཏི པཎྞཏྟིཝཛྫསྶཱཔི ལོཀཝཛྫབྷཱཝཔྤསངྒཏོ. ཨིམཾ ཨནིཊྛཔྤསངྒཾ པརིཧརིཏུཀཱམཏཱཡ ཝཛིརབུདྡྷིཏྠེརསྶ གཎྛིཔདེ ཝུཏྟཾ ‘‘ཨིདྷ སཙིཏྟཀནྟི ཙ ཨཙིཏྟཀནྟི ཙ ཝིཙཱརཎཱ ཝཏྠུཝིཛཱནནེཡེཝ ཧོཏི, ན པཉྙཏྟིཝིཛཱནནེ. ཡདི པཉྙཏྟིཝིཛཱནནེ ཧོཏི, སབྦསིཀྑཱཔདཱནི ལོཀཝཛྫཱནེཝ སིཡུཾ, ན ཙ སབྦསིཀྑཱཔདཱནི ལོཀཝཛྫཱནི ¶ , ཏསྨཱ ཝཏྠུཝིཛཱནནེཡེཝ ཧོཏཱི’’ཏི, ཨིདཾ ཡུཛྫཏི. ཀསྨཱ? ཡསྨཱ སེཁིཡེསུ པཉྙཏྟིཛཱནནམེཝ པམཱཎཾ, ན ཝཏྠུམཏྟཛཱནནནྟི, ཡཾ པན ཏཏྠེཝ ཝུཏྟཾ ‘‘པསུཏྟསྶ མུཁེ ཀོཙི སུརཾ པཀྑིཔེཡྻ, ཨནྟོ ཙེ པཝིསེཡྻ, ཨཱཔཏྟི, ཏཏྠ ཡཐཱ བྷིཀྑུནིཡཱ ཨདྷཀྑཀཾ ཨུབྦྷཛཱཎུམཎྜལཾ པརསྶ ཨཱམསནཱདིཀཱལེ ཀཱཡཾ ཨཙཱལེཏྭཱ ཙིཏྟེནེཝ སཱདིཡནྟིཡཱ ཨཱཔཏྟི ‘ཀིརིཡཱཝ ཧོཏཱི’ཏི ཝུཏྟཱ ཡེབྷུཡྻེན ཀིརིཡསམྦྷཝཏོ, ཏཐཱ ཨཡམྤི ཏདཱ ཀིརིཡཱཝ ཧོཏཱི’’ཏི, ཏཾ སུཝིཙཱརིཏཾ ཨནེཀནྟཱཀུསལབྷཱཝསཱདྷནཏོ. སུརཱཔཱནཱཔཏྟིཡཱ ཨེཀནྟཱཀུསལཏཱ པན མཛྫསཉྙིནོཔི སཀིཾ པཡོགེན པིཝཏོ ཧོཏཱིཏི ཀཏྭཱ ཝུཏྟཱ.

ཨཡཾ པནེཏྠ ཨཏྠོ – སིཀྑཱཔདསཱིསེན ཨཱཔཏྟིཾ གཧེཏྭཱ ཡསྶ སིཀྑཱཔདསྶ སཙིཏྟཀསྶ ཙིཏྟཾ ཨཀུསལམེཝ ཧོཏི, ཏཾ ལོཀཝཛྫཾ. སཙིཏྟཀཱཙིཏྟཀསངྑཱཏསྶ ཨཙིཏྟཀསྶ ཙ སཙིཏྟཀཔཀྑེ ཙིཏྟཾ ཨཀུསལམེཝ ཧོཏི, ཏམྤི སུརཱཔཱནཱདི ལོཀཝཛྫནྟི ཨིམམཏྠཾ སམྤིཎྜེཏྭཱ ‘‘ཡསྶ སཙིཏྟཀཔཀྑེ ཙིཏྟཾ ཨཀུསལམེཝ ཧོཏི, ཏཾ ལོཀཝཛྫ’’ནྟི ཝུཏྟཾ. སཙིཏྟཀཔཀྑེཏི ཧི ཨིདཾ ཝཙནཾ ཨཙིཏྟཀཾ སནྡྷཱཡཱཧ. ན ཧི ཨེཀཾསཏོ སཙིཏྟཀསྶ སཙིཏྟཀཔཀྑེཏི ¶ ཝིསེསནེ པཡོཛནཾ ཨཏྠི. ཡསྨཱ པནེཏྠ པཎྞཏྟིཝཛྫསྶ པཉྙཏྟིཛཱནནཙིཏྟེན སཙིཏྟཀཔཀྑེ ཙིཏྟཾ ཨཀུསལམེཝ, ཝཏྠུཛཱནནཙིཏྟེན སཙིཏྟཀཔཀྑེ ཙིཏྟཾ སིཡཱ ཀུསལཾ སིཡཱ ཨཀུསལཾ སིཡཱ ཨབྱཱཀཏཾ, ཏསྨཱ ‘‘ཏསྶ སཙིཏྟཀཔཀྑེ ཙིཏྟཾ ཨཀུསལམེཝཱ’’ཏི ན ཝུཙྩཏཱིཏི ‘‘སེསཾ པཎྞཏྟིཝཛྫ’’ནྟི ཝུཏྟཾ. ཨདྷིམཱནེ ཝཱིཏིཀྐམཱབྷཱཝཱ, སུཔིནནྟེ ཨབྦོཧཱརིཀཏྟཱ སུཔིནནྟེ ཝིཛྫམཱནཱཔི ཝཱིཏིཀྐམཚཱཡཱ ཨབྦོཧཱརིཀབྷཱཝེནཱཏི ཝུཏྟཾ ཧོཏི. ཨིདཾ པན ཝཙནཾ དལ༹ྷཱིཀམྨསིཐིལཀརཎཔྤཡོཛནཏྟཱ ཙ ཝུཏྟཾ, ཏེན ཡཾ ཝུཏྟཾ བཱཧིརནིདཱནཀཐཱདྷིཀཱརེ ‘‘དལ༹ྷཱིཀམྨསིཐིལཀརཎཔྤཡོཛནཱཏི ཡེབྷུཡྻཏཱཡ ཝུཏྟ’’ནྟིཨཱདི, ཏཾ སུཝུཏྟམེཝཱཏི ཝེདིཏབྦཾ.

མཀྐཊཱིཝཏྠུཀཐཱཝཎྞནཱ ནིཊྛིཏཱ.

ཝཛྫིཔུཏྟཀཝཏྠུཝཎྞནཱ

༤༣-༤. ཝཛྫཱིསུ ¶ ཛནཔདེསུ ཝསནྟཱ ཝཛྫིནོ ནཱམ, ཏེསཾ པུཏྟཱ. ཡཱཝདཏྠནྟི ཡཱཝཏཱ ཨཏྠོ ཨདྷིཔྤཱཡོཏི ཝུཏྟཾ ཧོཏི, ཏཏྠ ཡཾ ཝུཏྟཾ ‘‘སིཀྑཾ ཨཔྤཙྩཀྑཱཡ དུབྦལྱཾཨནཱཝིཀཏྭཱ’’ཏི, ཏཾ ཀཱམཾ སིཀྑཱཔཙྩཀྑཱནེ, ཏདེཀཊྛེ ཙ དུབྦལྱཱཝིཀརཎེ པཉྙཏྟེ སཏི ཡུཛྫཏི, ན ཨཉྙཐཱ. ཏཐཱཔི ཨིདཱནི པཉྙཔེཏབྦཾ ཨུཔཱདཱཡ ཝུཏྟཾ, ཀཐཉྷི ནཱམ ཚབྦགྒིཡཱ བྷིཀྑཱུ ཨཏིརེཀཙཱིཝརཾ དྷཱརེསྶནྟི (པཱརཱ. ༤༥༩), ཨཱལ༹ཝཀཱ བྷིཀྑཱུ ཀུཊིཡོ ཀཱརཱཔེནྟི ཨཔྤམཱཎིཀཱཡོ (པཱརཱ. ༣༤༢), བྷིཀྑུནིཡོ དྭེ ཝསྶཱནི ཚསུ དྷམྨེསུ ཨསིཀྑིཏསིཀྑཾ སིཀྑམཱནཾ ཝུཊྛཱཔེནྟི (པཱཙི. ༡༠༧༧), སངྒྷེན ཨསམྨཏཾ ཝུཊྛཱཔེནྟཱིཏིཨཱདི (པཱཙི. ༡༠༨༤) ཝིཡ དཊྛབྦཾ. ན ཧི ཏཏོ པུབྦེ ཨདྷིཊྛཱནཾ ཝིཀཔྤནཾ ཝཱ ཨནུཉྙཱཏཾ. ཡདབྷཱཝཱ ཨཏིརེཀཙཱིཝརནྟི ཝདེཡྻ, པམཱཎཾ ཝཱ ན པཉྙཏྟཾ, ཡདབྷཱཝཱ ཨཔྤམཱཎིཀཱཡོཏི ཝདེཡྻ, ཨེཝཾསམྤདམིདཾ དཊྛབྦཾ. ‘‘ཨུལླུམྤཏུ མཾ, བྷནྟེ, སངྒྷོ ཨནུཀམྤཾ ཨུཔཱདཱཡཱ’’ཏི (མཧཱཝ. ༧༡, ༡༢༦) ཨུཔསམྤདཾ ཡཱཙིཏྭཱ ཨུཔསམྤནྣེན ཨུཔསམྤནྣསམནནྟརམེཝ ‘‘ཨུཔསམྤནྣེན བྷིཀྑུནཱ མེཐུནོ དྷམྨོ ན པཊིསེཝིཏབྦོ, ཨསཀྱཔུཏྟིཡོ’’ཏི (མཧཱཝ. ༡༢༩) ཙ པཉྙཏྟེན ཨསྶམཎཱདིབྷཱཝཾ ཨུཔགནྟུཀཱམེན ནནུ པཋམཾ ཨཛ྄ཛྷུཔགཏཱ སིཀྑཱ པཙྩཀྑཱཏབྦཱ, ཏཏྠ དུབྦལྱཾ ཝཱ ཨཱཝིཀཱཏབྦཾ སིཡཱ, ཏེ པན ‘‘སིཀྑཾ ཨཔྤཙྩཀྑཱཡ དུབྦལྱཾ ཨནཱཝིཀཏྭཱ མེཐུནཾ དྷམྨཾ པཊིསེཝིཾསཱུ’’ཏི ཨནུཔཉྙཏྟིཡཱ ཨོཀཱསཀརཎཏྠཾ ཝཱ ཏཾ ཝུཏྟནྟི ཝེདིཏབྦཾ. ‘‘སོ ཨཱགཏོ ན ཨུཔསམྤཱདེཏབྦོ’’ཏི ཀིཉྩཱཔི ཨེཏྠེཝ ཝུཏྟཾ, ཏཐཱཔི ཨིཏརེསུཔི པཱརཱཛིཀེསུ ཡཐཱསམྦྷཝཾ ཝེདིཏབྦཾ. ན ཧི སིཀྑཾ ཨཔྤཙྩཀྑཱཡ ¶ དུབྦལྱཾ ཨནཱཝིཀཏྭཱ ཡོ པཱརཱཛིཀཝཏྠུཾ ཨདིནྣཾ ཐེཡྻསངྑཱཏཾ ཨཱདིཡཏི, མནུསྶཝིགྒཧཾ ཝཱ ཛཱིཝིཏཱ ཝོརོཔེཏི, པཊིཝིཛཱནནྟསྶ ཨུཏྟརིམནུསྶདྷམྨཾ ཝཱ ཨུལླཔཏི, སོ ཨཱགཏོ ན ཨུཔསམྤཱདེཏབྦོ. ཨནུཔཉྙཏྟི ཧི དལ༹ྷཱིཀམྨསིཐིལཀམྨཀརཎཔྤཡོཛནཱ. སཱ ཧི ཡསྶ པཱརཱཛིཀཾ ཧོཏི ཨཉྙཱ ཝཱ ཨཱཔཏྟི, ཏསྶ ནིཡམདསྶནཔྤཡོཛནཱཏིལཀྑཎཱནུཔཉྙཏྟིཀཏྟཱ. ཨེཝཉྷི ཨནྟེ ཨཝཏྭཱ ཨཱདིམྷི ཝུཏྟཱ ‘‘གཱམཱ ཝཱ ཨརཉྙཱ ཝཱ’’ཏི (པཱརཱ. ༩༡) ཨནུཔཉྙཏྟི ཝིཡ. པརིཔུཎྞེ པནེཏསྨིཾ སིཀྑཱཔདེ –

‘‘ནིདཱནཱ མཱཏིཀཱབྷེདོ, ཝིབྷངྒོ ཏཾནིཡཱམཀོ;

ཏཏོ ཨཱཔཏྟིཡཱ བྷེདོ, ཨནཱཔཏྟི ཏདཉྙཐཱ’’ཏི. –

ཨཡཾ ¶ ནཡོ ཝེདིཏབྦོ. ཏཏྠ སུདིནྣཝཏྠུ མཀྐཊིཝཏྠུ ཝཛྫིཔུཏྟཀཝཏྠུ ཙཱཏི ཏིཔྤབྷེདཾ ཝཏྠུ ཨིམསྶ སིཀྑཱཔདསྶ ནིདཱནཾ ནཱམ, ཏཏོ ནིདཱནཱ ‘‘ཡོ པན, བྷིཀྑུ, བྷིཀྑཱུནཾ སིཀྑཱསཱཛཱིཝསམཱཔནྣོ…པེ… ཨསཾཝཱསོ’’ཏི ཨིམིསྶཱ མཱཏིཀཱཡ བྷེདོ ཛཱཏོ. ཏཏྠ ཧི ‘‘ཨནྟམསོ ཏིརཙྪཱནགཏཱཡཱ’’ཏི ཨིཏྠིལིངྒཝཙནེན ‘‘སཙྩཾ, ཨཱཝུསོ, བྷགཝཏཱ སིཀྑཱཔདཾ པཉྙཏྟཾ, ཏཉྩ ཁོ ཨིཏྠིཡཱ ནོ པུརིསེ ནོ པཎྜཀེ ནོ ཨུབྷཏོབྱཉྫནཀེ ཙཱ’’ཏི མཀྐཊིཔཱརཱཛིཀོ ཝིཡ ཨཉྙོཔི ལེསཾ ཨོཌྜེཏུཾ སཀྐོཏི, ཏསྨཱ ཏཱདིསསྶ ཨལེསོཀཱསསྶ དསྶནཏྠཾ ཨིདཾ ཝུཙྩཏི. མཀྐཊིཝཏྠུསངྑཱཏཱ ནིདཱནཱ ‘‘ཨནྟམསོ ཏིརཙྪཱནགཏཱཡཔཱི’’ཏི མཱཏིཀཱཝཙནབྷེདོ ན ཨིཏྠིཡཱ ཨེཝ མེཐུནསིདྡྷིདསྶནཏོ ཀཏོ, ཏསྨཱ ཝིབྷངྒོ ཏཾནིཡཱམཀོ ཏསྶཱ མཱཏིཀཱཡ ཨདྷིཔྤེཏཏྠནིཡཱམཀོ ཝིབྷངྒོ. ཝིབྷངྒེ ཧི ‘‘ཏིསྶོ ཨིཏྠིཡོ. ཏཡོ ཨུབྷཏོབྱཉྫནཀཱ. ཏཡོ པཎྜཀཱ. ཏཡོ པུརིསཱ. མནུསྶིཏྠིཡཱ ཏཡོ མགྒེ…པེ… ཏིརཙྪཱནགཏཔུརིསསྶ དྭེ མགྒེ’’ཏིཨཱདིནཱ (པཱརཱ. ༥༦) ནཡེན སབྦལེསོཀཱསཾ པིདཧིཏྭཱ ནིཡམོ ཀཏོ.

ཨེཏྠཱཧ – ཡདི ཨེཝཾ སཱདྷཱརཎསིཀྑཱཔདཝསེན ཝཱ ལིངྒཔརིཝཏྟནཝསེན ཝཱ ན ཀེཝལཾ བྷིཀྑཱུནཾ, བྷིཀྑུནཱིནམྤི ‘‘སིཀྑཱསཱཛཱིཝསམཱཔནྣོ’’ཏི ཝིབྷངྒེ ཝཏྟབྦཾ སིཡཱ. ཏདཝཙནེན བྷིཀྑུནཱི པུརིསལིངྒཔཱཏུབྷཱཝེན བྷིཀྑུབྷཱཝེ ཋིཏཱ ཨེཝཾ ཝདེཡྻ ‘‘ནཱཧཾ ཨུཔསམྤདཀཱལེ བྷིཀྑཱུནཾ སིཀྑཱསཱཛཱིཝསམཱཔནྣཱ, ཏསྨཱ ན ཨཔྤཙྩཀྑཱཏསིཀྑཱཔི མེཐུནདྷམྨེན པཱརཱཛིཀཱ ཧོམཱི’’ཏི? ཝུཙྩཏེ – ཏཐཱ ན ཝཏྟབྦཾ ཨནིཊྛཔྤསངྒཏོ. བྷིཀྑུནཱིནམྤི ‘‘སིཀྑཱསཱཛཱིཝསམཱཔནྣོ’’ཏི ཝུཏྟེ བྷིཀྑུནཱིནམྤི སིཀྑཱཔཙྩཀྑཱནཾ ཨཏྠཱིཏི ཨཱཔཛྫཏི, ཏཉྩཱནིཊྛཾ. ཨིདཾ ཨཔརཾ ཨནིཊྛཔྤསངྒོཏི ‘‘སབྦསིཀྑཱཔདཱནི སཱདྷཱརཎཱནེཝ, ནཱསཱདྷཱརཎཱནཱི’’ཏི. ཨཔིཙཱཡཾ བྷིཀྑཱུནཾ སིཀྑཱསཱཛཱིཝསམཱཔནྣོཝཱཏི དསྶནཏྠཾ ‘‘ཨནུཛཱནཱམི, བྷིཀྑཝེ, ཏཾཡེཝ ཨུཔཛ྄ཛྷ’’ནྟིཨཱདི (པཱརཱ. ༦༩) ཝུཏྟཾ, ཨཔིཙ ཡོ ཏཐཱ ལེསཾ ཨོཌྜེཏྭཱ མེཐུནཾ དྷམྨཾ པཊིསེཝནྟོ ཝཛྫིཔུཏྟཀཱ ཝིཡ པཱརཱཛིཀོ ཧོཏི. ཏེ ཧི ‘‘བྷིཀྑཱུནཾ ¶ སིཀྑཱསཱཛཱིཝསམཱཔནྣོ’’ཏི ཝཙནཱབྷཱཝེ སཏི ‘‘ཨཱཔཏྟིཾ ཏུམྷེ, བྷིཀྑཝེ, ཨཱཔནྣཱ པཱརཱཛིཀ’’ནྟི ཝུཏྟཱ བྷགཝཏཱ. ཨེཏྠ པན ‘‘བྷིཀྑཝེ’’ཏི ཝུཏྟཏྟཱ ཀེཙི བྷིཀྑུལིངྒེ ཋིཏཱ, ‘‘ཨིདཱནི ཙེཔི མཡཾ, བྷནྟེ ཨཱནནྡ, ལབྷེཡྻཱམ བྷགཝཏོ སནྟིཀེ ¶ པབྦཛྫཾ ལབྷེཡྻཱམ ཨུཔསམྤད’’ནྟི ཝུཏྟཏྟཱ ཀེཙི ཝིབྦྷནྟཱཏི ཝེདིཏབྦཱ. ཏཏོ ཨཱཔཏྟིཡཱ བྷེདོཏི ཏཏོ ཝིབྷངྒཏོ ‘‘ཨཀྑཱཡིཏེ སརཱིརེ པཱརཱཛིཀཾ, ཡེབྷུཡྻེན ཁཱཡིཏེ ཐུལླཙྩཡ’’ནྟིཨཱདི ཨཱཔཏྟིཡཱ བྷེདོ ཧོཏི. ཨནཱཔཏྟི ཏདཉྙཐཱཏི ཏཏོ ཨེཝ ཝིབྷངྒཏོ ཡེནཱཀཱརེན ཨཱཔཏྟི ཝུཏྟཱ, ཏཏོ ཨཉྙེནཱཀཱརེན ཨནཱཔཏྟིབྷེདོཝ ཧོཏི. ‘‘སཱདིཡཏི ཨཱཔཏྟི པཱརཱཛིཀསྶ, ན སཱདིཡཏི ཨནཱཔཏྟཱི’’ཏི ཧི ཝིབྷངྒེ ཨསཏི ན པཉྙཱཡཏི. ཨེཏྟཱཝཏཱ སམཱསཏོ གཱཐཱཏྠོ ཝུཏྟོ ཧོཏི. ཨེཏྠ ཙ པན –

‘‘ནིདཱནམཱཏིཀཱབྷེདོ, ཝིབྷངྒསྶ པཡོཛནཾ;

ཨནཱཔཏྟིཔཀཱརོ ཙ, པཋམོ ནིཔྤཡོཛནོ’’ཏི. –

ཨིམཾ ནཡཾ དསྶེཏྭཱཝ སབྦསིཀྑཱཔདཱནཾ ཨཏྠོ པཀཱསིཏབྦོ. ཀཐཾ? བྷགཝཏཱ པན ཡེནཱཀཱརེན ཡཾ སིཀྑཱཔདཾ པཉྙཱཔིཏཾ, ཏསྶ ཨཱཀཱརསྶ སམཏྠཾ ཝཱ ཨསམཏྠཾ ཝཱཏི དུཝིདྷཾ ནིདཱནཾ, ཨཡཾ ནིདཱནབྷེདོ. མཱཏིཀཱཔི ནིདཱནཱཔེཀྑཱ ནིདཱནཱནཔེཀྑཱཏི དུཝིདྷཱ. ཏཏྠ ཙཏུཏྠཔཱརཱཛིཀཱདིསིཀྑཱཔདཱནི ནིདཱནཱཔེཀྑཱནི. ན ཧི ཝགྒུམུདཱཏཱིརིཡཱ བྷིཀྑཱུ སཡམེཝ ཨཏྟནོ ཨཏྟནོ ཨསནྟཾ ཨུཏྟརིམནུསྶདྷམྨཾ མུསཱཝཱདལཀྑཎཾ པཱཔེཏྭཱ བྷཱསིཾསུ. ཨཉྙམཉྙསྶ ཧི ཏེ ཨུཏྟརིམནུསྶདྷམྨསྶ གིཧཱིནཾ ཝཎྞཾ བྷཱསིཾསུ, ན ཙ ཏཱཝཏཱ པཱརཱཛིཀཝཏྠུ ཧོཏི. ཏཏྠ ཏེན ལེསེན བྷགཝཱ ཏཾ ཝཏྠུཾ ནིདཱནཾ ཀཏྭཱ པཱརཱཛིཀཾ པཉྙཔེསི, ཏེན ཝུཏྟཾ ‘‘ནིདཱནཱཔེཀྑ’’ནྟི. ཨིམིནཱ ནཡེན ནིདཱནཱཔེཀྑཱནི ཉཏྭཱ ཏབྦིཔརཱིཏཱནི སིཀྑཱཔདཱནི ནིདཱནཱནཔེཀྑཱནཱིཏི ཝེདིཏབྦཱནི, ཨཡཾ མཱཏིཀཱབྷེདོ.

ནཱནཔྤཀཱརཏོ མཱུལཱཔཏྟིཔྤཧོནཀཝཏྠུཔཡོགཙིཏྟནིཡཱམདསྶནཝསེན མཱཏིཀཱཡ ཝིབྷཛནབྷཱཝདཱིཔནཏྠཾ ཏེསཾ ཨཔྤཧོནཀཏཱཡ ཝཱ ཏདཉྙཏརཝེཀལླཏཱཡ ཝཱ ཝཱིཏིཀྐམེ སཏི ཨཱཔཏྟིབྷེདདསྶནཏྠཾ, ཨསཏི ཨནཱཔཏྟིདསྶནཏྠཉྩཱཏི སབྦཏྠ ཏཡོ ཨཏྠཝསེ པཊིཙྩ མཱཏིཀཱཡ ཝིབྷཛནཾ ཝིབྷངྒོ ཨཱརབྷཱིཡཏཱིཏི ཝེདིཏབྦོ. ཨེཏྠ པན ‘‘བྷིཀྑཀོཏི བྷིཀྑུ, བྷིཀྑཱཙརིཡཾ ཨཛ྄ཛྷུཔགཏོཏི ¶ བྷིཀྑུ, བྷིནྣཔཊདྷརོཏི བྷིཀྑཱུ’’ཏི ཀེཝལཾ བྱཉྫནཏྠདཱིཔནཝསེན པཝཏྟོ ཝཱ, ‘‘སམཉྙཱཡ བྷིཀྑཱུ’’ཏི བྷིཀྑུབྷཱཝསམྦྷཝཾ ཨནཔེཀྑིཏྭཱཔི ཀེཝལཾ བྷིཀྑུ ནཱམ པཝཏྟིཊྛཱནདཱིཔནཝསེན པཝཏྟོ ཝཱ, ‘‘ཨེཧི བྷིཀྑཱུཏི བྷིཀྑུ, སརཎགམནེཧི ཨུཔསམྤནྣོཏི བྷིཀྑུ, ཉཏྟིཙཏུཏྠེན ཀམྨེན ཨུཔསམྤནྣོཏི བྷིཀྑཱུ’’ཏི ཨུཔསམྤདཱནནྟརེནཱཔི བྷིཀྑུབྷཱཝསིདྡྷིདཱིཔནཝསེན ¶ པཝཏྟོ ཝཱ, ‘‘བྷདྲོ བྷིཀྑུ, སཱརོ བྷིཀྑུ, སེཀྑོ བྷིཀྑུ, ཨསེཀྑོ བྷིཀྑཱུ’’ཏི བྷིཀྑུཀརཎེཧི དྷམྨེཧི སམནྣཱགཏབྷིཀྑུདཱིཔནཝསེན པཝཏྟོ ཝཱ ཝིབྷངྒོ ཨཛ྄ཛྷུཔེཀྑིཏོ སབྦསཱམཉྙཔདཏྟཱ, ཏཐཱ ཨཉྙབྷཱགིཡསིཀྑཱཔདཱདཱིསུ སདྭཱརཝསེན, ཨདྷིཀརཎདསྶནཱདིཝསེན པཝཏྟོ ཙ ཨཛ྄ཛྷུཔེཀྑིཏོ ཨིཏརཏྠ ཏདབྷཱཝཏོཏི ཝེདིཏབྦོ.

ཏཏྠ ཏིསྶོ ཨིཏྠིཡོཏིཨཱདི ཝཏྠུནིཡམདསྶནཝསེན པཝཏྟོ, མནུསྶིཏྠིཡཱ ཏཡོ མགྒེ མེཐུནཾ དྷམྨཾ པཊིསེཝནྟསྶ ཨཱཔཏྟི པཱརཱཛིཀསྶཱཏིཨཱདི པཡོགནིཡམདསྶནཝསེན པཝཏྟོ, བྷིཀྑུསྶ སེཝནཙིཏྟཾ ཨུཔཊྛིཏེཏིཨཱདི ཙིཏྟནིཡམདསྶནཝསེན པཝཏྟོ, སཱདིཡཏི ཨཱཔཏྟི པཱརཱཛིཀསྶ, ན སཱདིཡཏི ཨནཱཔཏྟཱིཏིཨཱདི ཝཏྠུཔཡོགནིཡམེ སཏི ཙིཏྟནིཡམབྷཱཝཱབྷཱཝཝསེན ཨཱཔཏྟཱནཱཔཏྟིདསྶནཏྠཾ པཝཏྟོ, མཏཾ ཡེབྷུཡྻེན ཁཱཡིཏཾ ཨཱཔཏྟི ཐུལླཙྩཡསྶཱཏིཨཱདི ཝཏྠུསྶ ཨཔྤཧོནཀཏཱཡ ཝཱིཏིཀྐམེ ཨཱཔཏྟིབྷེདདསྶནཏྠཾ པཝཏྟོ, ན སཱདིཡཏི ཨནཱཔཏྟཱིཏི ཙིཏྟནིཡམཝེཀལྱེན ཝཱིཏིཀྐམཱབྷཱཝཱ ཨནཱཔཏྟིདསྶནཏྠཾ པཝཏྟོཏི. ཨེཝཾ ཨིཏརེསུཔི སིཀྑཱཔདེསུ ཡཐཱསམྦྷཝནཡོ ཨཡནྟི པཡོཛནོ ཝིབྷངྒོ.

ཨནཱཔཏྟིཝཱརོ པན མཱུལཱཔཏྟིཏོ, ཏདཉྙེཀདེསཏོ, སབྦཱཔཏྟིཏོ ཙ ཨནཱཔཏྟིདཱིཔནཝསེན ཏིཝིདྷོ. ཏཏྠ ཡོ པཋམོ, སོ ཝིབྷངྒོ ཝིཡ ཏཡོ ཨཏྠཝསེ པཊིཙྩ པཝཏྟོ. ཀཏམེ ཏཡོ? མཱཏིཀཱཔདཱནཾ སཱཏྠཀནིརཏྠཀཱནཾ ཏདཉྙཐཱ ཨུདྡྷརཎཱནུདྡྷརཎཝསེན སཔྤཡོཛནནིཔྤཡོཛནབྷཱཝདཱིཔནཏྠཾ, ཏདཉྙཐཱ པཊིཔཏྟིཀྐམདསྶནཏྠཾ, ཨཱཔཏྟིཔྤཧོནཀཊྛཱནེཔི ཝིསྶཛྫནཏྠཉྩཱཏི. ཀཐཾ? ཨེལ༹ཀལོམསིཀྑཱཔདེ ‘‘བྷིཀྑུནོ པནེཝ ཨདྡྷཱནམགྒཔྤཊིཔནྣསྶ ཨེལ༹ཀལོམཱནི ཨུཔྤཛྫེཡྻུཾ, ཨཱཀངྑམཱནེན བྷིཀྑུནཱ པཊིགྒཧེཏབྦཱནཱི’’ཏི (པཱརཱ. ༥༧༢) ཨེཏཱནི ཀེཝལཾ ཝཏྠུམཏྟདཱིཔནཔདཱནཱིཏི ནིརཏྠཀཱནི ནཱམ, ཏེསཾ ཨནཱཔཏྟི. ‘‘ཨདྡྷཱནམགྒཾ ཨཔྤཊིཔནྣསྶ ཨུཔྤནྣེ ཨེལ༹ཀལོམེ ཨནཱཔཏྟི, ཨཱཀངྑམཱནེན པཊིགྒཧིཏེ’’ཏིཨཱདིནཱ ནཡེན ཏདཉྙཐཱ ཨནུདྡྷརཎེན ནིཔྤཡོཛནབྷཱཝོ དཱིཔིཏོ ཧོཏི, ཡདིདཾ མཱཏིཀཱཡཾ ‘‘མེཐུནཾ དྷམྨཾ པཊིསེཝེཡྻཱ’’ཏི, ཨིདཾ སཱཏྠཀཾ. ཏསྶ ¶ སཔྤཡོཛནབྷཱཝདཱིཔནཏྠཾ ‘‘ཨནཱཔཏྟི ཨཛཱནནྟསྶ ཨསཱདིཡནྟསྶཱ’’ཏི ཝུཏྟཾ. ཡསྨཱ ཛཱནནསཱདིཡནབྷཱཝེན ཨཱཔཏྟི, ཨསེཝནྟསྶ ཨནཱཔཏྟི, ཏསྨཱ ཝུཏྟཾ མཱཏིཀཱཡཾ ‘‘ཡོ པན བྷིཀྑུ མེཐུནཾ དྷམྨཾ པཊིསེཝེཡྻ, པཱརཱཛིཀོ ཧོཏི ཨསཾཝཱསོ’’ཏི ¶ ཨདྷིཔྤཱཡོ. ‘‘པརཔརིགྒཧིཏཾ པརཔརིགྒཧིཏསཉྙིཏཱ གརུཔརིཀྑཱརོ ཐེཡྻཙིཏྟཾ ཨཝཧརཎ’’ནྟི ཝུཏྟཱནཾ པཉྩནྣམྤི ཨངྒཱནཾ པཱརིཔཱུརིཡཱ པེཏཏིརཙྪཱནགཏཔརིགྒཧིཏེ ཨཱཔཏྟིཔྤཧོནཀཊྛཱནེཔི ཝིསྶཛྫནཏྠཾ ‘‘ཨནཱཔཏྟི པེཏཔརིགྒཧིཏེ’’ཏིཨཱདི (ཀངྑཱ. ཨཊྛ. དུཏིཡཔཱརཱཛིཀཝཎྞནཱ) ཝུཏྟཾ. ཨནཱཔཏྟི ཨིམཾ ཛཱན, ཨིམཾ དེཧི, ཨིམཾ ཨཱཧར, ཨིམིནཱ ཨཏྠོ, ཨིམཾ ཀཔྤིཡཾ ཀརོཧཱིཏི བྷཎཏཱིཏིཨཱདི པན ཏདཉྙཐཱ པཊིཔཏྟིཀྐམདསྶནཏྠཾ ཝུཏྟནྟི ཝེདིཏབྦཾ. ཨེཏྟཱཝཏཱ ‘‘ནིདཱནམཱཏིཀཱབྷེདོ’’ཏིཨཱདིནཱ ཝུཏྟགཱཐཱཡ ཨཏྠོ པཀཱསིཏོ ཧོཏི.

ཨེཏྠ པཋམཔཉྙཏྟི ཏཱཝ པཋམབོདྷིཾ ཨཏིཀྐམིཏྭཱ པཉྙཏྟཏྟཱ, ཨཱཡསྨཏོ སུདིནྣསྶ ཨཊྛཝསྶིཀཀཱལེ པཉྙཏྟཏྟཱ ཙ རཏྟཉྙུམཧཏྟཾ པཏྟཀཱལེ པཉྙཏྟཱ. དུཏིཡཨནུཔཉྙཏྟི བཱཧུསཙྩམཧཏྟཾ པཏྟཀཱལེ ཨུཔྤནྣཱ. སོ ཧཱཡསྨཱ མཀྐཊིཔཱརཱཛིཀོ ཡཐཱ མཱཏུགཱམཔཊིསཾཡུཏྟེསུ སིཀྑཱཔདེསུ ཏིརཙྪཱནགཏིཏྠཱི ཨནདྷིཔྤེཏཱ, ཏཐཱ ཨིདྷཱཔཱིཏི སཉྙཱཡ ‘‘སཙྩཾ, ཨཱཝུསོ, བྷགཝཏཱ སིཀྑཱཔདཾ པཉྙཏྟཾ, ཏཉྩ ཁོ མནུསྶིཏྠིཡཱ, ནོ ཏིརཙྪཱནགཏིཏྠིཡཱ’’ཏི ཨཱཧ. ཏཏིཡཱནུཔཉྙཏྟི ལཱབྷགྒམཧཏྟཾ པཏྟཀཱལེ ཨུཔྤནྣཱ. ཏེ ཧི ཝཛྫིཔུཏྟཀཱ ལཱབྷགྒམཧཏྟཾ པཏྟཱ ཧུཏྭཱ ཡཱཝདཏྠཾ བྷུཉྫིཏྭཱ ནྷཱཡིཏྭཱ ཝརསཡནེསུ སཡིཏྭཱ ཏཏིཡཱནུཔཉྙཏྟིཡཱ ཝཏྠུཾ ཨུཔྤཱདེསུཾ, ཏེ ཙ ཝེཔུལླམཧཏྟཾ པཏྟེ སངྒྷེ ཨུཔྤནྣཱ, སཡཉྩ ཝེཔུལླམཧཏྟཾ པཏྟཱཏི ‘‘ཝེཔུལླམཧཏྟམྤེཏྠ ལབྦྷཏཱི’’ཏི ཝུཏྟཾ. ཨིདཾ པཋམཔཱརཱཛིཀསིཀྑཱཔདཾ ཏིཝིདྷམྤི ཝཏྠུཾ ཨུཔཱདཱཡ ཙཏུབྦིདྷམྤི ཏཾ ཀཱལཾ པཏྭཱ པཉྙཏྟནྟི ཝེདིཏབྦཾ.

ཏཏྠ ཡོ པནཱཏི ཨནཝསེསཔརིཡཱདཱནཔདཾ. བྷིཀྑཱུཏི ཏསྶ ཨཏིཔྤསངྒནིཡམཔདཾ. བྷིཀྑཱུནཾ སིཀྑཱསཱཛཱིཝསམཱཔནྣོཏི ཏསྶ ཝིསེསནཝཙནཾ. ན ཧི སབྦོཔི བྷིཀྑུནཱམཀོ ཡཱ བྷགཝཏཱ ཡཱཡ ཀཱཡཙི ཨུཔསམྤདཱཡ ཨུཔསམྤནྣབྷིཀྑཱུནཾ ཧེཊྛིམཔརིཙྪེདེན སིཀྑིཏབྦསིཀྑཱ ཝིཧིཏཱ, ‘‘ཨེཏྠ སཧ ཛཱིཝནྟཱི’’ཏི ཡོ ཙ ཨཱཛཱིཝོ ཝུཏྟོ, ཏཾ ཨུབྷཡཾ སམཱཔནྣོཝ ཧོཏི. ཀདཱ པན སམཱཔནྣོ ཨཧོསི? ཡཱཡ ཀཱཡཙི ཨུཔསམྤདཱཡ ཨུཔསམྤནྣསམནནྟརམེཝ ¶ ཏདུབྷཡཾ ཛཱནནྟོཔི ཨཛཱནནྟོཔི ཏདཛ྄ཛྷུཔགཏཏྟཱ སམཱཔནྣོ ནཱམ ཧོཏི. སཧ ཛཱིཝནྟཱིཏི ཡཱཝ སིཀྑཾ ན པཙྩཀྑཱཏི, པཱརཱཛིཀབྷཱཝཉྩ ན པཱཔུཎཱཏི, ཡཾ པན ཝུཏྟཾ ཨནྡྷཀཊྛཀཐཱཡཾ ‘‘སིཀྑཾ པརིཔཱུརེནྟོ སིཀྑཱསམཱཔནྣོ སཱཛཱིཝཾ ཨཝཱིཏིཀྐམནྟོ སཱཛཱིཝསམཱཔནྣོ ཧོཏཱི’’ཏི, ཏཾ ཨུཀྐཊྛཔརིཙྪེདཝསེན ཝུཏྟཾ. ན ཧི སིཀྑཾ ཨཔརིཔཱུརེནྟོ ཀཱམཝིཏཀྐཱདིབཧུལོ ཝཱ ཨེཀཙྩཾ སཱཝསེསཾ སཱཛཱིཝཾ ཝཱིཏིཀྐམནྟོ ཝཱ སིཀྑཱསཱཛཱིཝསམཱཔནྣོ ནཱམ ན ཧོཏི. ཨུཀྐཊྛཔརིཙྪེདེན པན ཙཏུཀྐཾ ལབྦྷཏི ཨཏྠི བྷིཀྑུ སིཀྑཱསམཱཔནྣོ སཱིལཱནི པཙྩཝེཀྑནྟོ ན སཱཛཱིཝསམཱཔནྣོ ཨཙིཏྟཀཾ སིཀྑཱཔདཾ ཝཱིཏིཀྐམནྟོ, ཨཏྠི ན སིཀྑཱསམཱཔནྣོ ¶ ཀཱམཝིཏཀྐཱདིབཧུལོ སཱཛཱིཝསམཱཔནྣོ ནིརཱཔཏྟིཀོ, ཨཏྠི ན སིཀྑཱསམཱཔནྣོ ན ཙ སཱཛཱིཝསམཱཔནྣོ ཨནཝསེསཾ ཨཱཔཏྟིཾ ཨཱཔནྣོ, ཨཏྠི སིཀྑཱསམཱཔནྣོ ཙ སཱཛཱིཝསམཱཔནྣོ ཙ སིཀྑཾ པརིཔཱུརེནྟོ སཱཛཱིཝཉྩ ཨཝཱིཏིཀྐམནྟོ, ཨཡམེཝ ཙཏུཏྠོ བྷིཀྑུ ཨུཀྐཊྛོ ཨིདྷ ཨདྷིཔྤེཏོ སིཡཱ. ན ཧི བྷགཝཱ ཨནུཀྐཊྛཾ ཝཏྟུཾ ཡུཏྟོཏི ཙེ? ན, ‘‘ཏཏྲ ཡཱཡཾ ཨདྷིསཱིལསིཀྑཱ, ཨཡཾ ཨིམསྨིཾ ཨཏྠེ ཨདྷིཔྤེཏཱ སིཀྑཱ’’ཏིཝཙནཝིརོདྷཏོ. ཨུཀྐཊྛགྒཧཎཱདྷིཔྤཱཡེ སཏི ‘‘སིཀྑཱཏི ཏིསྶོ སིཀྑཱ’’ཏི ཨེཏྟཀམེཝ ཝཏྟབྦནྟི ཨདྷིཔྤཱཡོ. སིཀྑཏྟཡསམཱཔནྣོ ཧི སབྦུཀྐཊྛོཏི.

‘‘མེཐུནཾ དྷམྨཾ པཊིསེཝེཡྻཱ’’ཏི པརཏོ ཝཙནཾ ཨཔེཀྑིཏྭཱ ཨདྷིསཱིལསིཀྑཱཝ ཝུཏྟཱཏི ཙེ? ན, ཏསྶཱཔི ཨབྷབྦཏྟཱ. ན ཧི ཨདྷིསཱིལསིཀྑཾ པརིཔཱུརེནྟོ སཱཛཱིཝཉྩ ཨཝཱིཏིཀྐམནྟོ མེཐུནཾ དྷམྨཾ པཊིསེཝིཏུཾ བྷབྦོ, ཏཾ སིཀྑཾ ཨཔརིཔཱུརེནྟོ སཱཛཱིཝཉྩ ཝཱིཏིཀྐམནྟོ ཨེཝ ཧི པཊིསེཝེཡྻཱཏི ཨདྷིཔྤཱཡོ, ཏསྨཱ ཨེཝམེཏྠ ཨཏྠོ གཧེཏབྦོ. ཡསྨཱ སིཀྑཱཔདསངྑཱཏོ སཱཛཱིཝོ ཨདྷིསཱིལསིཀྑམེཝ སངྒཎྷཱཏི, ནེཏརཾ ཨདྷིཙིཏྟསིཀྑཾ ཨདྷིཔཉྙཱསིཀྑཾ ཝཱ, ཏསྨཱ ‘‘ཏཏྲ ཡཱཡཾ ཨདྷིསཱིལསིཀྑཱ, ཨཡཾ ཨིམསྨིཾ ཨཏྠེ ཨདྷིཔྤེཏཱ སིཀྑཱ’’ཏི ཝུཏྟཾ, ཏསྨཱ ཨདྷིསཱིལསིཀྑཱཡ སངྒཱཧཀོ སཱཛཱིཝོ སིཀྑཱསཱཛཱིཝོཏི ཝུཏྟོ. ཨིཏི སཱཛཱིཝཝིསེསནཏྠཾ སིཀྑཱགྒཧཎཾ ཀཏཾ. ཏདཏྠདཱིཔནཏྠམེཝ ཝིབྷངྒེ སིཀྑཾ ཨཔརཱམསིཏྭཱ ‘‘ཏསྨིཾ སིཀྑཏི, ཏེན ཝུཙྩཏི སཱཛཱིཝསམཱཔནྣོ’’ཏི ཝུཏྟཾ ¶ , ཏེན ཨེཀམེཝིདཾ ཨཏྠཔདནྟི དཱིཔིཏཾ ཧོཏི. ཏཉྩ ཨུཔསམྤདཱུཔགམནནྟརཏོ པཊྛཱཡ སིཀྑནཱདྷིཀཱརཏྟཱ ‘‘སིཀྑཏཱི’’ཏི ཙ ‘‘སམཱཔནྣོ’’ཏི ཙ ཝུཙྩཏི. ཡོ ཨེཝཾ ‘‘སིཀྑཱསཱཛཱིཝསམཱཔནྣོ’’ཏི སངྑྱཾ གཏོ, ཏཱདིསཾ པཙྩཡཾ པཊིཙྩ ཨཔརབྷཱགེ སཱཛཱིཝསངྑཱཏམེཝ སིཀྑཾ ཨཔྤཙྩཀྑཱཡ, ཏསྨིཾཡེཝ ཙ དུབྦལྱཾ ཨནཱཝིཀཏྭཱ མེཐུནཾ དྷམྨཾ པཊིསེཝེཡྻཱཏི ཨཡམཏྠོ ཡུཛྫཏི. ཀིནྟུ ཨཊྛཀཐཱནཡོ པཊིཀྑིཏྟོ ཧོཏི. སོ ཙ ན པཊིཀྑེཔཱརཧོཏི ཏེན ཏདནུསཱརེན བྷཝིཏབྦཾ.

ཨདྷིཔྤཱཡོ པནེཏྠ པརིཡེསིཏབྦོ, སོ དཱནི ཝུཙྩཏི – སབྦེསུཔི སིཀྑཱཔདེསུ ཨིདམེཝ བྷིཀྑུལཀྑཎཾ སཱདྷཱརཎཾ, ཡདིདཾ ‘‘བྷིཀྑཱུནཾ སིཀྑཱསཱཛཱིཝསམཱཔནྣོ’’ཏི. ཁཱིཎཱསཝོཔི སཱཝཀོ ཨཱཔཏྟིཾ ཨཱཔཛྫཏི ཨཙིཏྟཀཾ, ཏཐཱ སེཀྑོ. པུཐུཛྫནོ པན སཙིཏྟཀམྤི, ཏསྨཱ སེཀྑཱསེཀྑཔུཐུཛྫནབྷིཀྑཱུནཾ སཱམཉྙམིདཾ བྷིཀྑུལཀྑཎནྟི ཀཏྭཱ ཀེཝལཾ སིཀྑཱསམཱཔནྣོ, ཀེཝལཾ སཱཛཱིཝསམཱཔནྣོ ཙ ཨུབྷཡསམཱཔནྣོ ཙཱཏི སརཱུཔེཀདེསེཀསེསནཡེན ‘‘སིཀྑཱསཱཛཱིཝསམཨཱཔནྣོ’’ཏྭེཝ སམྤིཎྜེཏྭཱ ཨུཀྐཊྛགྒཧཎེན ཨནུཀྐཊྛཱནཾ གཧཎསིདྡྷིཏོ ཨཊྛཀཐཱཡཾ ཨུཀྐཊྛོཝ ཝུཏྟོ. ཏམེཝ སམྤཱདེཏུཾ ‘‘ཏསྨིཾ སིཀྑཏི, ཏེན ཝུཙྩཏི སཱཛཱིཝསམཱཔནྣོ’’ཏི ཨེཏྠ སིཀྑཱཔདསྶ ¶ ཨཝཙནེ པརིཧཱརཾ ཝཏྭཱ ཡསྨཱ པན སོ ཨསིཀྑམྤི སམཱཔནྣོ, ཏསྨཱ སིཀྑཱསམཱཔནྣོཏིཔི ཨཏྠཏོ ཝེདིཏབྦོཏི ཙ ཝཏྭཱ ‘‘ཡཾ སིཀྑཾ སམཱཔནྣོ ཏཾ ཨཔྤཙྩཀྑཱཡ ཡཉྩ སཱཛཱིཝཾ སམཱཔནྣོ ཏཏྠ དུབྦལྱཾ ཨནཱཝིཀཏྭཱ’’ཏི ཝུཏྟནྟི ཨཡམཊྛཀཐཱཡཾ ཨདྷིཔྤཱཡོ ཝེདིཏབྦོ. ཨེཏསྨིཾ པན ཨདྷིཔྤཱཡེ ཨདྷིསཱིལསིཀྑཱཡ ཨེཝ གཧཎཾ སབྦཏྠིཀཏྟཱ, སཱིལཱདྷིཀཱརཏོ ཙ ཝིནཡསྶཱཏི ཝེདིཏབྦཾ. ཡཐཱ ཙ སིཀྑཱཔདཾ སམཱདིཡནྟོ སཱིལཾ སམཱདིཡཏཱིཏི ཝུཙྩཏི, ཨེཝཾ སིཀྑཱཔདཾ པཙྩཀྑནྟོ སཱིལསངྑཱཏཾ སིཀྑཾ པཙྩཀྑཱཏཱིཏི ཝཏྟུཾ ཡུཛྫཏི, ཏསྨཱ ཏཏྠ ཝུཏྟཾ ‘‘ཡཾ སིཀྑཾ སམཱཔནྣོ, ཏཾ ཨཔྤཙྩཀྑཱཡཱ’’ཏི. སིཀྑཾ པཙྩཀྑཱཡ པཊིསེཝིཏམེཐུནསྶ ཨུཔསམྤདཾ ཨནུཛཱནནྟོ ན སམཱུཧནཏི ནཱམ. ན ཧི སོ བྷིཀྑུ ཧུཏྭཱ པཊིསེཝི, ‘‘ཡོ པན བྷིཀྑཱུ’’ཏི ཙ པཉྙཏྟཾ. ཨེཏྟཱཝཏཱ སམཱསཏོ ‘‘སིཀྑཱསཱཛཱིཝསམཱནྣོ’’ཏི ཨེཏྠ ཝཏྟབྦཾ ཝུཏྟཾ.

ཀིཾ ཨིམིནཱ ཝིསེསཝཙནེན པཡོཛནཾ, ནནུ ‘‘ཡོ པན བྷིཀྑུ སིཀྑཾ ཨཔྤཙྩཀྑཱཡ དུབྦལྱཾ ཨནཱཝིཀཏྭཱ…པེ… ཨསཾཝཱསོ’’ཏི ཨེཏྟཀམེཝ ཝཏྟབྦནྟི ཙེ ¶ ? ན ཝཏྟབྦཾ ཨནིཊྛཔྤསངྒཏོ. ཡོ པན སིཀྑཱསཱཛཱིཝསམཱཔནྣོ ཐེཡྻསཾཝཱསཱདིཀོ ཀེཝལེན སམཉྙཱམཏྟེན, པཊིཉྙཱམཏྟེན ཝཱ བྷིཀྑུ, ཏསྶཱཔི སིཀྑཱཔཙྩཀྑཱནཾ ཨཏྠི. སིཀྑཾ ཨཔྤཙྩཀྑཱཡ ཙ མེཐུནཾ དྷམྨཾ པཊིསེཝནྟསྶ པཱརཱཛིཀཱཔཏྟི. ཡོ ཝཱ པཙྪཱ པཱརཱཛིཀཾ ཨཱཔཏྟིཾ ཨཱཔཛྫིཏྭཱ ན སིཀྑཱསཱཛཱིཝསམཱཔནྣོ ཏསྶ ཙ, ཡོ ཝཱ པཀྑཔཎྜཀཏྟཱ པཎྜཀབྷཱཝཱུཔགམནེན ན སིཀྑཱསཱཛཱིཝསམཱཔནྣོ ཏསྶ ཙ ཏདུབྷཡཾ ཨཏྠཱིཏི ཨཱཔཛྫཏི. ‘‘པཎྜཀབྷཱཝཔཀྑེ ཙ པཀྑཔཎྜཀོ ཨུཔསམྤདཱཡ ན ཝཏྠཱུ’’ཏི ཝུཏྟཾ, ཏསྨཱ ཨིཏརསྨིཾ པཀྑེ ཝཏྠཱུཏི སིདྡྷཾ, ཏསྨིཾ པཀྑེ ཨུཔསམྤནྣོ པཎྜཀབྷཱཝཔཀྑེ པཎྜཀཏྟཱ ན སིཀྑཱསཱཛཱིཝསམཱཔནྣོ, སོ པརིཙྩཛིཏབྦསིཀྑཱཡ ཨབྷཱཝེན སིཀྑཾ ཨཔྤཙྩཀྑཱཡ མུཁེན པརསྶ ཨངྒཛཱཏགྒཧཎཱདཡོ མེཐུནཾ དྷམྨཾ པཊིསེཝེཡྻ, ཏསྶ ཀུཏོ པཱརཱཛིཀཱཔཏྟཱིཏི ཨདྷིཔྤཱཡོ. ཨཡཾ ནཡོ ཨཔཎྜཀཔཀྑཾ ཨལབྷམཱནསྶེཝ པརཏོ ཡུཛྫཏི, ལབྷནྟསྶ པན ཨརཱུཔསཏྟཱནཾ ཀུསལཱནཾ སམཱཔཏྟིཀྑཎེ བྷཝངྒཝིཙྪེདེ སཏིཔི ཨམརཎཾ ཝིཡ པཎྜཀབྷཱཝཔཀྑེཔི བྷིཀྑུབྷཱཝོ ཨཏྠི. སཾཝཱསཾ ཝཱ སཱདིཡནྟསྶ ན ཐེཡྻསཾཝཱསཀབྷཱཝོ ཨཏྠི ཨནྟིམཝཏྠུཾ ཨཛ྄ཛྷཱཔནྣསྶ ཝིཡ. ན ཙ སཧསེཡྻཱདིཀཾ ཛནེཏི. གཎཔཱུརཀོ པན ན ཧོཏི ཨནྟིམཝཏྠུཾ ཨཛ྄ཛྷཱཔནྣོ ཝིཡ, ན སོ སིཀྑཱསཱཛཱིཝསམཱཔནྣོ, ཨིཏརསྨིཾ པན པཀྑེ ཧོཏི, ཨཡཾ ཨིམསྶ ཏཏོ ཝིསེསོ. ཀིམཡཾ སཧེཏུཀོ, ཨུདཱཧུ ཨཧེཏུཀོཏི? ན ཨཧེཏུཀོ. ཡཏོ ཨུཔསམྤདཱ ཏསྶ ཨཔཎྜཀཔཀྑེ ཨནུཉྙཱཏཱ སཧེཏུཀཔཊིསནྡྷིཀཏྟཱ. པཎྜཀབྷཱཝཔཀྑེཔི ཀིསྶ ནཱནུཉྙཱཏཱཏི ཙེ? པཎྜཀབྷཱུཏཏྟཱ ཨོཔཀྐམིཀཔཎྜཀསྶ ཝིཡ.

ཨཔིཙ ¶ སིཀྑཱསཱཛཱིཝསམཱཔནྣོཏི ཨིམིནཱ ཏསྶ སིཀྑཱསམཱདཱནཾ དཱིཔེཏྭཱ ཏཾ སམཱདིནྣསིཀྑཾ ཨཔྤཙྩཀྑཱཡ ཏཏྠ ཙ དུབྦལྱཾ ཨནཱཝིཀཏྭཱཏི ཝཏྟུཾ ཡུཛྫཏི, ན ཨཉྙཐཱཏི ཨིམིནཱ ཀཱརཎེན ཡཐཱཝུཏྟཱནིཊྛཔྤསངྒཏོ ‘‘ཡོ པན བྷིཀྑུ བྷིཀྑཱུནཾ སིཀྑཱསཱཛཱིཝསམཱཔནྣོ སིཀྑཾ ཨཔྤཙྩཀྑཱཡཱ’’ཏིཨཱདི ཝུཏྟཾ. ཡཐཱ ཙེཏྠ, ཏཐཱ ‘‘ཡོ པན བྷིཀྑུ བྷིཀྑཱུནཾ སིཀྑཱསཱཛཱིཝསམཱཔནྣོ སིཀྑཾ ཨཔྤཙྩཀྑཱཡ དུབྦལྱཾ ཨནཱཝིཀཏྭཱ གཱམཱ ཝཱ ཨརཉྙཱ ཝཱ ཨདིནྣཾ ཐེཡྻསངྑཱཏཾ ཨཱདིཡེཡྻ (པཱརཱ. ༨༩), སུགཏཙཱིཝརཔྤམཱཎཾ ཙཱིཝརཾ ཀཱརཱཔེཡྻ ཨཏིརེཀཾ ཝཱ, ཚེདནཀཾ པཱཙིཏྟིཡ’’ནྟིཨཱདིནཱ (པཱཙི. ༥༤༨) ནཡེན སབྦཏྠ ཡོཛེཏབྦཾ ¶ . ཨནྟམསོ ཏིརཙྪཱནགཏཱཡཔཱིཏི མནུསྶིཏྠིཾ ཨུཔཱདཱཡ ཝུཏྟཾ. ན ཧི ‘‘པགེཝ པཎྜཀེ པུརིསེ ཝཱ’’ཏི ཝཏྟུཾ ཡུཛྫཏི. སེསཾ ཏཏྠ ཏཏྠ ཝུཏྟནཡམེཝ.

ཨཡཾ པཋམཔཱརཱཛིཀསྶ མཱཏིཀཱཡ ཏཱཝ ཝིནིཙྪཡོ.

ཙཏུབྦིདྷཝིནཡཀཐཱཝཎྞནཱ

༤༥. ནཱིཧརིཏྭཱཏི ཨེཏྠ སཱསནཏོ ནཱིཧརིཏྭཱཏི ཨཏྠོ. ‘‘པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ ནཱནུཡུཉྫིཏབྦཾ. ཀཏམེཧི པཉྩཧི? སུཏྟཾ ན ཛཱནཱཏི, སུཏྟཱནུལོམཾ ན ཛཱནཱཏཱི’’ཏི (པརི. ༤༤༢) ཨེཝམཱདིཏོ ཧི པརིཡཏྟིསཱསནཏོ སུཏྟཾ, སུཏྟཱནུལོམཉྩ ནཱིཧརིཏྭཱ པཀཱསེསུཾ. ‘‘ཨནཱཔཏྟི ཨེཝཾ ཨམྷཱཀཾ ཨཱཙརིཡཱནཾ ཨུགྒཧོ པརིཔུཙྪཱཏི བྷཎཏཱི’’ཏི ཨེཝམཱདིཏོ པརིཡཏྟིསཱསནཏོ ཨཱཙརིཡཝཱདཾ ནཱིཧརིཏྭཱ པཀཱསེསུཾ. བྷཱརུཀཙྪཀཝཏྠུསྨིཾ ‘‘ཨཱཡསྨཱ ཨུཔཱལི ཨེཝམཱཧ – ཨནཱཔཏྟི, ཨཱཝུསོ, སུཔིནནྟེནཱ’’ཏི (པཱརཱ. ༧༨) ཨེཝམཱདིཏོ པརིཡཏྟིསཱསནཏོ ཨེཝ ཨཏྟནོམཏིཾ ནཱིཧརིཏྭཱ པཀཱསེསུཾ. ཏཱཡ ཧི ཨཏྟནོམཏིཡཱ ཐེརོ ཨེཏདགྒཊྛཱནཾ ལབྷི. ཨཔི ཙ ཝུཏྟཉྷེཏཾ བྷགཝཏཱ ‘‘ཨནུཔསམྤནྣེན པཉྙཏྟེན ཝཱ ཨཔཉྙཏྟེན ཝཱ ཝུཙྩམཱནོ…པེ… ཨནཱདརིཡཾ ཀརོཏི, ཨཱཔཏྟི དུཀྐཊསྶཱ’’ཏི (པཱཙི. ༣༤༣). ཏཏྠ ཧི པཉྙཏྟཾ ནཱམ སུཏྟཾ. སེསཏྟཡཾ ཨཔཉྙཏྟཾ ནཱམ. ཏེནཱཡཾ ‘‘ཙཏུབྦིདྷཉྷི ཝིནཡཾ, མཧཱཐེརཱ’’ཏི གཱཐཱ སུཝུཏྟཱ. ཡཾ སནྡྷཱཡ ཝུཏྟཾ ནཱགསེནཏྠེརེན. ཨཱཧཙྩཔདེནཱཏི ཨཊྛ ཝཎྞཊྛཱནཱནི ཨཱཧཙྩ ཝུཏྟེན པདནིཀཱཡེནཱཏི ཨཏྠོ, ཨུདཱཧཊེན ཀཎྛོཀྐནྟེན པདསམཱུཧེནཱཏི ཨདྷིཔྤཱཡོ. རསེནཱཏི ཏསྶ ཨཱཧཙྩབྷཱསིཏསྶ རསེན, ཏཏོ ཨུདྡྷཊེན ཝིནིཙྪཡེནཱཏི ཨཏྠོ. སུཏྟཙྪཱཡཱ ཝིཡ ཧི སུཏྟཱནུལོམཾ. ཨཱཙརིཡཝཱདོ ‘‘ཨཱཙརིཡཝཾསོ’’ཏི ཝུཏྟོ པཱལི༹ཡཾ ཝུཏྟཱནཾ ཨཱཙརིཡཱནཾ པརམྤརཱཡ ཨཱབྷཏོཝ པམཱཎནྟི དསྶནཏྠཾ. ཨདྷིཔྤཱཡོཏི ཀཱརཎོཔཔཏྟིསིདྡྷོ ཨུཧཱཔོཧནཡཔྤཝཏྟོ ¶ པཙྩཀྑཱདིཔམཱཎཔཏིརཱུཔཀོ. ཨདྷིཔྤཱཡོཏི ཨེཏྠ ‘‘ཨཏྟནོམཏཱི’’ཏི ཀེཙི ཨཏྠཾ ཝདནྟི.

པརིཝཱརཊྛཀཐཱཡཾ ¶ , ཨིདྷ ཙ ཀིཉྩཱཔི ‘‘སུཏྟཱནུལོམཾ ནཱམ ཙཏྟཱརོ མཧཱཔདེསཱ’’ཏི ཝུཏྟཾ, ཨཐ ཁོ མཧཱཔདེསནཡསིདྡྷཾ པཊིཀྑིཏྟཱཔཊིཀྑིཏྟཾ ཨནུཉྙཱཏཱནནུཉྙཱཏཾ ཀཔྤིཡཱཀཔྤིཡནྟི ཨཏྠཏོ ཝུཏྟཾ ཧོཏི. ཏཏྠ ཡསྨཱ ཋཱནཾ ཨོཀཱསོ པདེསོཏི ཀཱརཎཝེཝཙནཱནི ‘‘ཨཊྛཱནམེཏཾ, ཨཱནནྡ, ཨནཝཀཱསོ’’ཏིཨཱདི (པཱརཱ. ༤༣) སཱསནཏོ, ‘‘ནིགྒཧཊྛཱན’’ནྟི ཙ ‘‘ཨསནྡིཊྛིཊྛཱན’’ནྟི ཙ ‘‘ཨསནྡིཊྛི ཙ པན པདེསོ’’ཏི ཙ ལོཀཏོ, ཏསྨཱ མཧཱཔདེསཱཏི མཧཱཀཱརཎཱནཱིཏི ཨཏྠོ. ཀཱརཎཾ ནཱམ ཉཱཔཀོ ཧེཏུ ཨིདྷཱདྷིཔྤེཏཾ. མཧནྟབྷཱཝོ པན ཏེསཾ མཧཱཝིསཡཏྟཱ མཧཱབྷཱུཏཱནཾ ཝིཡ. ཏེ དུཝིདྷཱ ཝིནཡམཧཱཔདེསཱ སུཏྟནྟིཀམཧཱཔདེསཱ ཙཱཏི. ཏཏྠ ཝིནཡམཧཱཔདེསཱ ཝིནཡེ པཡོགཾ གཙྪནྟི, ཨིཏརེ ཨུབྷཡཏྠཱཔི, ཏེནེཝ པརིཝཱརེ ཨནུཡོགཝཏྟེ ‘‘དྷམྨཾ ན ཛཱནཱཏི, དྷམྨཱནུལོམཾ ན ཛཱནཱཏཱི’’ཏི (པརི. ༤༤༢) ཝུཏྟཾ. ཏཏྠ དྷམྨནྟི ཋཔེཏྭཱ ཝིནཡཔིཊཀཾ ཨཝསེསཔིཊཀདྭཡཾ. དྷམྨཱནུལོམནྟི སུཏྟནྟིཀེ ཙཏྟཱརོ མཧཱཔདེསེ. ཏཏྠ ཡོ དྷམྨཾ དྷམྨཱནུལོམཉྩེཝ ཛཱནཱཏི, ན ཝིནཡཾ ཝིནཡཱནུལོམཉྩ, སོ ‘‘དྷམྨཾ རཀྑཱམཱི’’ཏི ཝིནཡཾ ཨུབྦིནཡཾ ཀརོཏི, ཨིཏརོ ‘‘ཝིནཡཾ རཀྑཱམཱི’’ཏི དྷམྨཾ ཨུདྡྷམྨཾ ཀརོཏི, ཨུབྷཡཾ ཛཱནནྟོ ཨུབྷཡམྤི སམྤཱདེཏི.

ཏཏྲིདཾ མུཁམཏྟཾ – ཏཏྠ པཋམོ ‘‘སོ ཙེ པཝེསནཾ སཱདིཡཏི, པཝིཊྛཾ, ཋིཏཾ, ཨུདྡྷརཎཾ སཱདིཡཏི ཨཱཔཏྟི, ན སཱདིཡཏི ཨནཱཔཏྟཱི’’ཏི ཨེཏྠ ཝིཔྤཊིཔཛྫཏི. སོ ཧཱཡསྨཱ སུཁཝེདནཱིཡསྶ ཨུཔཱདིནྣཕོཊྛབྦསྶ, ཀཱཡིནྡྲིཡསྶ ཙ སམཱཡོགེ སཏི པཊིཝིཛཱནནྟོ ཀཱཡིཀསུཁཝེདནུཔྤཏྟིམཏྟེན སཱདིཡཏི ནཱམཱཏི པརིཙྪིནྡིཏྭཱ ཏསྶ ཨཱཔཏྟི པཱརཱཛིཀསྶཱཏི ཨསེཝནཱདྷིཔྤཱཡསྶཔི ཨཱཔཏྟིཔྤསངྒཾ ཀརོཏི, ཏཐཱ ཡསྶ སནྠཏཏྟཱ ཝཱ ཡོནིདོསཝསེན ཝཱ དུཀྑཱ ཨསཱཏཱ ཝེདནཱ, ཝཱཏོཔཧཊགཏྟཏཱཡ ཝཱ ནེཝ ཀཱཡིཀཝེདནཱ, ཏསྶ ཛཱནཏོ ཨཛཱནཏོཔི ‘‘ཨནཱཔཏྟི ཨསཱདིཡནྟསྶཱ’’ཏི (པཱརཱ. ༧༦) སུཏྟནྟཾ དསྶེཏྭཱ སེཝནཱདྷིཔྤཱཡསྶཱཔི ཨནཱཔཏྟིཔྤསངྒཾ ཀརོཏི, ཏཐཱ ཡདི མོཙནརཱགེན ཨུཔཀྐམཏོ མུཏྟེ སངྒྷཱདིསེསོ, པགེཝ མེཐུནརཱགེནཱཏི དུཀྐཊཊྛཱནཾ གཧེཏྭཱ སངྒྷཱདིསེསཊྛཱནཾ ཀརོཏི, ཨེཝཾ ཝིནཡཾ ཨུབྦིནཡཾ ཀརོཏི ནཱམ. ཨིཏརོ ‘‘ཨནཱཔཏྟི ཨཛཱནནྟསྶཱཏི ཝུཏྟཏྟཱ ཛཱནཏོ ཛཱནནེནེཝ ¶ སུཁཝེདནཱ ཧོཏུ ཝཱ མཱ ཝཱ སཱདིཡནཱ ཧོཏཱི’’ཏི ཝཏྭཱ ཨསེཝནཱདྷིཔྤཱཡསྶཔི ཛཱནཏོ ཨནཱཔཏྟིཊྛཱནེ ཨཱཔཏྟིཾ ཀརོཏི, ཨནཝཛྫཾ སཱཝཛྫཾ ཀརོཏཱིཏི ཨེཝཾ དྷམྨཾ ཨུདྡྷམྨཾ ཀརོཏི. ཨུབྷཡཾ པན ཛཱནནྟོ ‘‘བྷིཀྑུསྶ སེཝནཙིཏྟཾ ཨུཔཊྛིཏེཏི (པཱརཱ. ༥༧) ཝཙནཏོ སེཝནཙིཏྟམེཝེཏྠ ¶ པམཱཎཾ, ཏསྶ བྷཱཝེན ཨཱཔཏྟི པཱརཱཛིཀསྶ, ཨབྷཱཝེན ཨནཱཔཏྟཱི’’ཏི ཝཏྭཱ ཨུབྷཡམྤི རཀྑཏི སམྤཱདེཏི. ཨིམིནཱ ནཡེན སབྦསིཀྑཱཔདེསུ ཡཐཱསམྦྷཝཾ སཔྤཡོཛནཱ ཀཱཏབྦཱ.

སངྒཱིཏིཾ ཨཱརོཔེཏྭཱ ཋཔིཏཔཱལི༹ཏོ ཝིནིམུཏྟཾ ཀཏྭཱ ཋཔིཏཏྟཱ པཱལི༹ཝིནིམུཏྟཱ ཨཏྠཏོ, ནཡཏོ, ཨནུལོམཏོ ཙ པཱལི༹ཨོཀྐནྟཝིནིཙྪཡཔྤཝཏྟཱ ཨནུཔཝིཊྛཝིནིཙྪཡཝསེན པཝཏྟཱཏི ཨཏྠོ. ‘‘ན སམཱུཧནིསྶཏཱི’’ཏི ཛཱནནྟོཔི བྷགཝཱ ཀེཝལཾ ‘‘ཏེསཾ མཏཾ པཙྪིམཱ ཛནཏཱ མམ ཝཙནཾ ཝིཡ པམཱཎཾ ཀརོཏཱུ’’ཏི དསྶནཏྠཉྩ པརིནིབྦཱནཀཱལེ ཨེཝམཱཧ ‘‘ཨཱཀངྑམཱནོ, ཨཱནནྡ, སངྒྷོ མམཙྩཡེན ཁུདྡཱནུཁུདྡཀཱནི སིཀྑཱཔདཱནི སམཱུཧནཏཱུ’’ཏི (དཱི. ནི. ༢.༢༡༦), ཏེནེཏཾ སིདྡྷཾ ‘‘པཉྙཏྟམྤི ཙེ སིཀྑཱཔདཾ སམཱུཧནིཏུཾ ཡསྶ སངྒྷསྶ ཨནུཉྙཱཏཾ བྷགཝཏཱ, ཏསྶ པཉྙཏྟཱནུལོམཾ ཨཏིརེཀཏྠདཱིཔནཾ, པགེཝཱནུཉྙཱཏཾ བྷགཝཏཱ’’ཏི. ཀིཉྩ བྷིཡྻོ ཨཱུནཱཏིརིཏྟསིཀྑཱཔདེསུ ཨཱཙརིཡཀུལེསུ ཝིཝཱདོ ཨཉྙམཉྙཾ ན ཀཱཏབྦོཏི དསྶནཏྠཉྩ. ཀསྨཱ སངྒྷོ ན སམཱུཧནཱིཏི? ཨཉྙམཉྙཾ ཝིཝཱདཔྤསངྒདསྶནཏོ. བྷགཝཏཱ ཙ ‘‘སབྦེཧེཝ སམགྒེཧི སམྨོདམཱནེཧི ཨཝིཝདམཱནེཧི སིཀྑིཏབྦ’’ནྟི ཝུཏྟཾ. ཏཏྠ ཙ ཨེཀཙྩེ ཐེརཱ ཨེཝམཱཧཾསཱུཏི ཙ ཨཉྙཝཱདདསྶནཏོ ཝིཝདམཱནེཧི སིཀྑིཏབྦཾ ཛཱཏཾ, ཏདབྷཱཝཏྟམྤི ཉཏྟིདུཏིཡཀམྨཝཱཙཾ སཱཝེཏྭཱ ཨཝིཝདམཱནེཧེཝ སིཀྑིཏབྦཾ ཨཀཱསི.

ཨཔིཙཱཏི ཨཏྟནོ མཏིཡཱ པཱཀཊཀརཎཏྠཾ ཨཱརམྦྷོ. ཏཏྠ ‘‘སུཏྟནྟཱབྷིདྷམྨཝིནཡཊྛཀཐཱསཱུ’’ཏི ཝཙནཏོ པིཊཀཏྟཡསྶཔི སཱདྷཱརཎཱ ཨེསཱ ཀཐཱཏི ཝེདིཏབྦཱ, ‘‘ཨཐ པནཱཡཾ ཀཔྤིཡ’’ནྟིཨཱདི ཝིནཡསྶེཝ. ཀཱརཀསངྒྷསདིསནྟི སངྒཱིཏིཀཱརཀསངྒྷསདིསཾ. ‘‘སུཏྟཱདིཙཏུཀྐཾ ཨཔྤཙྩཀྑཱཡ ཏེན ཨཝིརུདྡྷསྶ ཀམྨསྶ ཀཱརཀསངྒྷསདིས’’ནྟི དྷམྨསིརིཏྠེརསྶ གཎྛིཔདེ ཝུཏྟཾ, ཏཾ ཨཡུཏྟཾ, ‘‘སུཏྟམེཝ བལཝཏརཾ. སུཏྟཉྷི ཨཔྤཊིཝཏྟིཡཾ ཀཱརཀསངྒྷསདིས’’ནྟི ཨེཏེཧི པདེཧི ཨཡུཏྟཏྟཱ. པཱཀཏིཀེ ¶ པན གཎྛིཔདེ ‘‘ཏམཏྠཾ ཝིནིཙྪིནིཏྭཱ ཏསྶ ཀཱརཀསངྒྷསདིས’’ནྟི ཝུཏྟཾ. པརཝཱདཱིཏི ཨམྷཱཀཾ སམཡཝིཛཱནནཀོ ཨཉྙནིཀཱཡིཀོཏི ཝུཏྟཾ. པརཝཱདཱི སུཏྟཱནུལོམནྟི ཀཐཾ? ‘‘ཨཉྙཏྲ ཨུདཀདནྟཔོནཱ’’ཏི (པཱཙི. ༢༦༦) སུཏྟཾ སཀཝཱདིསྶ, ཏདནུལོམཏོ ནཱལི༹ཀེརཕལསྶ ཨུདཀམྤི ཨུདཀམེཝ ཧོཏཱིཏི པརཝཱདཱི ཙ.

‘‘ནཱལི༹ཀེརསྶ ཡཾ ཏོཡཾ, པུརཱཎཾ པིཏྟབནྡྷནཾ;

ཏམེཝ ཏརུཎཾ ཏོཡཾ, པིཏྟགྷཾ བལབནྡྷན’’ནྟི. –

ཨེཝཾ ¶ པརཝཱདིནཱ ཝུཏྟེ སཀཝཱདཱི དྷཉྙཕལསྶ གཏིཀཏྟཱ, ཨཱཧཱརཏྠསྶ ཙ ཕརཎཏོ ‘‘ཡཱཝཀཱལིཀམེཝ ཏ’’ནྟི ཝདནྟོ པཊིཀྑིཔཏི. པརོ ཨཱཙརིཡཝཱདནྟི ‘‘སུངྐཾ པརིཧརཏཱིཏི ཨེཏྠ ཨུཔཙཱརཾ ཨོཀྐམིཏྭཱ ཀིཉྩཱཔི པརིཧརཏི, ཨཝཧཱརོ ཨེཝཱ’’ཏི ཨཊྛཀཐཱཝཙནཏོ ‘‘ཏཐཱ ཀརོནྟོ པཱརཱཛིཀམཱཔཛྫཏཱི’’ཏི པརཝཱདིནཱ ཝུཏྟེ སཀཝཱདཱི ‘‘སུངྐཾ པརིཧརཏི, ཨཱཔཏྟི དུཀྐཊསྶཱ’’ཏི སུཏྟཾ ཏཏྠེཝ ཨཱགཏམཧཱཨཊྛཀཐཱཝཙནེན སདྡྷིཾ དསྶེཏྭཱ པཊིསེདྷེཏི, ཏཐཱ ཀརོནྟསྶ དུཀྐཊམེཝཱཏི. པརོ ཨཏྟནོམཏཱིཏི ཨེཏྠ ‘‘པུརེབྷཏྟཾ པརསནྟཀཾ ཨཝཧརཱཏི པུརེབྷཏྟམེཝ ཧརིསྶཱམཱིཏི ཝཱཡམནྟསྶ པཙྪཱབྷཏྟཾ ཧོཏི, པུརེབྷཏྟཔཡོགོཝ སོ, ཏསྨཱ མཱུལཊྛོ ན མུཙྩཏཱིཏི ཏུམྷཱཀཾ ཐེརཝཱདཏྟཱ མཱུལཊྛསྶ པཱརཱཛིཀམེཝཱ’’ཏི པརཝཱདིནཱ ཝུཏྟེ སཀཝཱདཱི ‘‘ཏཾ སངྐེཏཾ པུརེ ཝཱ པཙྪཱ ཝཱ ཏཾ བྷཎྜཾ ཨཝཧརཏི, མཱུལཊྛསྶ ཨནཱཔཏྟཱི’’ཏི (པཱརཱ. ༡༡༩) སུཏྟཾ དསྶེཏྭཱ པཊིཀྑིཔཏི.

པརོ སུཏྟནྟི ‘‘ཨནིཡཏཧེཏུདྷམྨོ སམྨཏྟནིཡཏཧེཏུདྷམྨསྶ ཨཱརམྨཎཔཙྩཡེན པཙྩཡོ’’ཏི སུཏྟཾ པཊྛཱནེ ལིཁིཏཾ དསྶེཏྭཱ ‘‘ཨརིཡམགྒསྶ ན ནིབྦཱནམེཝཱརམྨཎ’’ནྟི པརཝཱདིནཱ ཝུཏྟེ སཀཝཱདཱི ‘‘ཨཱརམྨཎཏྟིཀཱདིསུཏྟཱནུལོམེ ན ཨོཏརཏཱི’’ཏི པཊིཀྑིཔཏི. སུཏྟཱནུལོམེ ཨོཏརནྟཾཡེཝ ཧི སུཏྟཾ ནཱམ, ནེཏརཾ. ཏེན ཝུཏྟཾ པཱལི༹ཨཱགཏཾ པཉྙཱཡཏཱིཏི ཨེཏྟཀེནཔི སིདྡྷེ ཏིསྶོ སངྒཱིཏིཡོ ཨཱརུལ༹ྷཔཱལི༹ཨཱགཏཾ པཉྙཱཡཏཱི’’ཏིཨཱདི. ཏཱདིསཉྷི པམཱདལེཁནྟི ཨཱཙརིཡོ. ‘‘ཨཔྤམཱདོ ཨམཏཾ པདཾ, པམཱདོ མཙྩུནོ པད’’ནྟི (དྷ. པ. ༢༡; ནེཏྟི. ༢༦) ཝཙནཏོ དིནྣབྷོཛནེ བྷུཉྫིཏྭཱ པརིསྶཡཱནི པརིཝཛྫིཏྭཱ སཏིཾ པཙྩུཔཊྛཔེཏྭཱ ཝིཧརནྟོ ནིཙྩོ ཧོཏཱིཏི. ཨེཝརཱུཔསྶ ¶ ཨཏྠསྶ ཝསེན ཨཱརུལ༹ྷམྤི སུཏྟཾ ན གཧེཏབྦཾ, ཏེན ཝུཏྟཾ ནོ ཙེ ཏཐཱ པཉྙཱཡཏཱིཏི སིདྡྷེཔི ‘‘ནོ ཙེ ཏཐཱ པཉྙཱཡཏི, ན ཨོཏརཏི ན སམེཏཱི’’ཏི. ‘‘བཱཧིརཀསུཏྟཾ ཝཱ’’ཏི ཝུཏྟཏྟཱ ཨཏྟནོ སུཏྟམྤི ཨཏྠེན ཨསམེནྟཾ ན གཧེཏབྦཾ. པརོ ཨཱཙརིཡཝཱདནྟིཨཱདཱིསུ དྭཱིསུ ནཡེསུ པམཱདལེཁཝསེན ཏཏྠ ཏཏྠ ཨཱགཏཊྛཀཐཱཝཙནཾ ཐེརཝཱདེཧི སདྡྷིཾ ཡོཛེཏྭཱ ཝེདིཏབྦཾ.

ཨཐ པནཱཡཾ ཨཱཙརིཡཝཱདཾ. པརོ སུཏྟནྟི པརཝཱདིནཱ ‘‘མཱུལབཱིཛཾ ནཱམ ཧལིདྡི སིངྒིཝེརཾ ཝཙཱ…པེ… བཱིཛེ བཱིཛསཉྙཱི ཚིནྡཏི ཝཱ ཚེདཱཔེཏི ཝཱ བྷིནྡཏི ཝཱ…པེ… ཨཱཔཏྟི པཱཙིཏྟིཡསྶཱཏི (པཱཙི. ༩༡) ཏུམྷཱཀཾ པཱཋཏྟཱ ཧལིདྡིགཎྛིཾ ཚིནྡནྟསྶ པཱཙིཏྟིཡ’’ནྟི ཝུཏྟེ སཀཝཱདཱི ‘‘ཡཱནི ཝཱ པནཉྙཱནི ཨཏྠི མཱུལེ སཉྫཱཡནྟཱི’’ཏིཨཱདིཾ དསྶེཏྭཱ ཏསྶ ཨཊྛཀཐཱསངྑཱཏེན ཨཱཙརིཡཝཱདེན པཊིཀྑིཔཏི. ན ཧི གཎྛིམྷི གཎྛི ཛཱཡཏཱིཏི. པརོ སུཏྟཱནུལོམནྟི པརཝཱདིནཱ ‘‘ཨནཱཔཏྟི ཨེཝཾ ཨམྷཱཀཾ ཨཱཙརིཡཱནཾ ཨུགྒཧོཏི ཝཙནསྶཱནུལོམཏོ ‘ཨམྷཱཀཾ ¶ པོརཱཎབྷིཀྑཱུ ཨེཀཔཱསཱདེ གབྦྷཾ ཐཀེཏྭཱ ཨནུཔསམྤནྣེན སཡིཏུཾ ཝཊྚཏཱིཏི ཏཐཱ ཀཏྭཱ ཨཱགཏཱ, ཏསྨཱ ཨམྷཱཀཾ ཝཊྚཏཱི’ཏི ཏུམྷེསུ ཨེཝ ཨེཀཙྩེསུ ཝདནྟེསུ ཏུམྷཱཀཾ ན ཀིཉྩི ཝཏྟུཾ སཀྐཱ’’ཏི ཝུཏྟེ སཀཝཱདཱི ‘‘སུཏྟཾ སུཏྟཱནུལོམཉྩ ཨུགྒཧིཏཀཱནཾཡེཝ ཨཱཙརིཡཱནཾ ཨུགྒཧོ པམཱཎ’’ནྟིཨཱདིཨཊྛཀཐཱཝཙནཾ དསྶེཏྭཱ པཊིསེདྷེཏི. པརོ ཨཏྟནོམཏིནྟི ‘‘དྭཱརཾ ཝིཝརིཏྭཱ ཨནཱཔུཙྪཱ སཡིཏེསུ ཀེ མུཙྩནྟཱི’’ཏི ཨེཏྠ པན དྭེཔི ཛནཱ མུཙྩནྟི ཡོ ཙ ཡཀྑགཧིཏཀོ, ཡོ ཙ བནྡྷིཏྭཱ ནིཔཛྫཱཔིཏོཏི ཏུམྷཱཀཾ ཐེརཝཱདཏྟཱ ཨཉྙེ སབྦེཔི ཡཐཱ ཏཐཱ ཝཱ ནིཔནྣཱདཡོཔི མུཙྩནྟཱིཏི པཊིསེདྷེཏི.

ཨཐ པནཱཡཾ ཨཏྟནོམཏིཾ. པརོ སུཏྟནྟི ‘‘ཨཱཔཏྟིཾ ཨཱཔཛྫནྟཱི’’ཏི པརཝཱདིནཱ གུཏྟེ སཀཝཱདཱི ‘‘དིཝཱ ཀིལནྟརཱུཔོ མཉྩེ ནིསིནྣོ པཱདེ བྷཱུམིཏོ ཨམོཙེཏྭཱཝ ནིདྡཱཝསེན ནིཔཛྫཏི, ཏསྶ ཨནཱཔཏྟཱི’’ཏིཨཱདིཨཊྛཀཐཱཝཙནཾ (པཱརཱ. ཨཊྛ. ༡.༧༧) དསྶེཏྭཱ ཨེཀབྷངྒེན ནིཔནྣཱདཡོཔི མུཙྩནྟཱིཏི པཊིསེདྷེཏི. ཨཐཱཡཾ ཨཏྟནོམཏིཾ. པརོ སུཏྟཱནུལོམནྟི ‘‘དོམནསྶཾ པཱཧཾ, དེཝཱནམིནྡ, དུཝིདྷེན ཝདཱམི སེཝིཏབྦམྤི ཨསེཝིཏབྦམྤཱིཏིཨཱདིཝཙནེཧི (དཱི. ནི. ༢.༣༦༠) སཾསནྡནཏོ སདཱརཔོསེ དོསོ ཏུམྷཱཀཾ ནཏྠི, ཏེན ¶ ཝུཏྟཾ ‘པུཏྟདཱརསྶ སངྒཧོ’’’ཏི (ཁུ. པཱ. ༥.༦; སུ. ནི. ༢༦༥) པརཝཱདིནཱ ཝུཏྟེ ཀིཉྩཱཔི སཀཝཱདཱི བཧུསྶུཏོ ན ཧོཏི, ཨཐ ཁོ རཱགསཧིཏེནེཝ ཨཀུསལེན བྷཝིཏབྦནྟི པཊིཀྑིཔཏི. སེསེསུཔི ཨིམིནཱ ནཡེན ཨཉྙཐཱཔི ཨནུརཱུཔཏོ ཡོཛེཏབྦཾ. ཨིདཾ སབྦཾ ཨུཔཏིསྶཏྠེརཱདཡོ ཨཱཧུ. དྷམྨསིརིཏྠེརོ པན ‘‘ཨེཏྠ པརོཏི ཝུཏྟོ ཨཉྙནིཀཱཡིཀོ, སོ པན ཨཏྟནོ སུཏྟཱདཱིནིཡེཝ ཨཱཧརཏི. ཏཱནི སཀཝཱདཱི ཨཏྟནོ སུཏྟཱདིམྷི ཨོཏཱརེཏྭཱ སཙེ སམེཏི གཎྷཱཏི, ནོ ཙེ པཊིཀྑིཔཏཱི’’ཏི ཝདཏི.

ཙཏུབྦིདྷཝིནཡཀཐཱཝཎྞནཱ ནིཊྛིཏཱ.

པདབྷཱཛནཱིཡཝཎྞནཱ

སིཀྑཱཔདཝིབྷངྒེ པན ཀིཉྩཱཔི ཡོ པནཱཏི ཨནཝསེསཔརིཡཱདཱནཔདཾ, ཏཐཱཔི བྷིཀྑཱུཏི ཨིམིནཱ པརཔདེན སམཱནཱདྷིཀརཎཏྟཱ ཏདནུརཱུཔཱནེཝསྶ ཝིབྷངྒཔདཱནི ཝུཏྟཱནི. བྷིཀྑུནིབྦཙནཔདཱནི ཏཱིཎི ཀིཉྩཱཔི སབྷིཀྑུབྷཱཝསྶ, ཨབྷིཀྑུབྷཱཝསྶ ཙཱཏི ཡསྶ ཀསྶཙི པབྦཛིཏསྶ སཱདྷཱརཎཱནི, ཏཐཱཔི ‘‘ཨསུདྡྷོ ཧོཏི པུགྒལོ ཨཉྙཏརཾ པཱརཱཛིཀཾ དྷམྨཾ ཨཛ྄ཛྷཱཔནྣོ, ཏཉྩེ སུདྡྷདིཊྛི སམཱནོ ཨནོཀཱསཾ ཀཱརཱཔེཏྭཱ ཙཱཝནཱདྷིཔྤཱཡོ ཝདེཏི, ཨཱཔཏྟི སངྒྷཱདིསེསེན དུཀྐཊསྶཱ’’ཏི ཨེཝམཱདིསུཏྟཾ ནིབྦཙནཏྠཡུཏྟོཝ པུགྒལོ ‘‘ཨཱཔཏྟི སངྒྷཱདིསེསེན ¶ དུཀྐཊསྶཱ’’ཏི (པཱརཱ. ༣༨༩) ཨེཏྠ ཝཏྠུ, ན ཨིཏརོ གིཧིབྷཱུཏོཏི དསྶནཏྠཾ ཝུཏྟཾ. སབྦསྶཔི ཝིནཡཔིཊཀསྶ སཱདྷཱརཎཾ བྷིཀྑུལཀྑཎཾ ཝཏྠུཉྷི བྷགཝཱ ཨཱརབྷི. ཡོ པན སུདྡྷོ ཨེཝ སམཱནོ ཀེནཙི ཀཱརཎེན གིཧིལིངྒེ ཋིཏོ, སོ ཨཏྟནོ སབྷིཀྑུབྷཱཝཏྟཱ ཨེཝ ཝཏྠུ ཧོཏི, ཨསུདྡྷོཔི བྷིཀྑུལིངྒེ ཋིཏཏྟཱཏི ཨཡམཏྠོ དསྶིཏོ ཧོཏི. ཨསུདྡྷོཔི ཉཱཏཀེཧི, པཙྩཏྠིཀེཧི ཝཱ རཱཛབྷཡཱདིཀཱརཎེན ཝཱ ཀཱསཱཝེསུ སཨུསྶཱཧོཝ ཨཔནཱིཏཀཱསཱཝོ ཝཏྠུ ཨེཝ པུན ཀཱསཱཝགྒཧཎེན ཐེཡྻསཾཝཱསཀབྷཱཝཱནུཔགམནཏོ, བྷིཀྑུནིབྦཙནཏྠེ ཨནིཀྑིཏྟདྷུརཏྟཱཏི ཝུཏྟཾ ཧོཏི. ཡོ པན ལིངྒཏྠེནཀོ བྷིཀྑུནིབྦཙནཏྠཾ སཡཉྩ ཨཛ྄ཛྷུཔགཏོ, སཾཝཱསཾ ཐེནེནྟོ, ཏཉྩེ སུདྡྷདིཊྛི སམཱནོ ཨནོཀཱསཾ ཀཱརཱཔེཏྭཱ ཙཱཝནཱདྷིཔྤཱཡོ ཝདེཏི, ཨཱཔཏྟི ¶ སངྒྷཱདིསེསེན དུཀྐཊསྶཱཏི ཨཡམྤི ཨཏྠོ དསྶིཏོ ཧོཏི.

‘‘སམཉྙཱཡ བྷིཀྑུ པཊིཉྙཱཡ བྷིཀྑཱུ’’ཏི ཝཙནདྭཡཾ ཡཐཱཝུཏྟཉྩ ཨཏྠཾ ཨུཔབྲཱུཧེཏི, ཨནྟརཱ ཨུཔྤནྣཱཡ ནིཡཏཱཡ མིཙྪཱདིཊྛིཡཱ ཨུཔཙྪིནྣཀུསལམཱུལོ ཀེཝལཱཡ སམཉྙཱཡ, པཊིཉྙཱཡ ཙ ‘‘བྷིཀྑཱུ’’ཏི ཝུཙྩཏི, ན པརམཏྠཏོཏི ཨིམཾ ཨཏིརེཀཏྠཾ དཱིཔེཏི. ཀིཾ ཝུཏྟཾ ཧོཏི? ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི, ཡཾ ཨེཝཾ མཧཱསཱཝཛྫཾ ཡཐཡིདཾ, བྷིཀྑཝེ, མིཙྪཱདིཊྛི. མིཙྪཱདིཊྛིཔརམཱནི, བྷིཀྑཝེ, མཧཱཝཛྫཱནཱི’’ཏི ཨཱཧཙྩབྷཱསིཏཾ སངྒཱིཏིཏྟཡཱརུལ༹ྷཾ སུཏྟཾ, ཨཊྛཀཐཱཡམྤིསྶ ‘‘མིཙྪཱདིཊྛིཔརམཱ ཨེཏེསནྟི མིཙྪཱདིཊྛིཔརམཱནཱི’’ཏི (ཨ. ནི. ༡.༣༡༠) ཝུཏྟཾ. པཉྩ ཨཱནནྟརིཡཀམྨཱནི མཧཱསཱཝཛྫཱནི, མིཙྪཱདིཊྛི པན མཧཱསཱཝཛྫཏརཱཏི ཨདྷིཔྤཱཡོཏི. ཀསྨཱ? ཏེསཉྷི པརིཙྪེདོ ཨཏྠི, སབྦབལཝམྤི ཀཔྤཊྛིཏིཀམེཝ ཧོཏི, ནིཡཏམིཙྪཱདིཊྛིཡཱ པན པརིཙྪེདོ ནཏྠི, ཏཱཡ སམནྣཱགཏསྶ བྷཝཏོ ཝུཊྛཱནཾ ནཏྠི, ཏསྨཱ ‘‘ཨིམསྶ བྷིཀྑུཀརཎཱ ཀུསལཱ དྷམྨཱ སཾཝིཛྫནྟཱི’’ཏི ཝཱ ‘‘སུདྡྷོཝཱཡ’’ནྟི ཝཱ ན སཀྐཱ ཝཏྟུཾ. ‘‘དིཊྛིཝིཔཏྟིཔཙྩཡཱ དྭེ ཨཱཔཏྟིཡོ ཨཱཔཛྫཏཱི’’ཏི ཝུཏྟཏྟཱ ན སཀྐཱ ‘‘ཨསུདྡྷོ’’ཏི ཝཱ ‘‘ཨཉྙཏརཾ པཱརཱཛིཀཾ དྷམྨཾ ཨཛ྄ཛྷཱཔནྣོ’’ཏི ཝཱ ཝཏྟུཾ. ཨེས ཧི ཨུབྷོཔི པཀྑེ ན བྷཛཏི, ཏེན ཝུཏྟཾ ‘‘སམཉྙཱཡ, པཊིཉྙཱཡ ཙ བྷིཀྑུ, ན པརམཏྠཏོ’’ཏི.

ཀིམཏྠཾ པནེཝཾ མཧཱསཱཝཛྫཱཡ ནིཡཏམིཙྪཱདིཊྛིཡཱ པཱརཱཛིཀཾ བྷགཝཱ ན པཉྙཔེསཱིཏི? དུབྦིཛཱནཏྟཱ. པཀཏིཡཱཔེསཱ དིཊྛི ནཱམ ‘‘སམྨཱ’’ཏི ཝཱ ‘‘མིཙྪཱ’’ཏི ཝཱ དུཝིཉྙེཡྻཱ, པགེཝ ‘‘ནིཡཏཱ’’ཏི ཝཱ ‘‘ཨནིཡཏཱ’’ཏི ཝཱཏི. ཏཏྠ པཱརཱཛིཀཱཔཏྟིཡཱ པཉྙཏྟཱཡ བྷིཀྑཱུ ཨཉྙམཉྙཾ ཨསམདིཊྛིཀཾ པཱརཱཛིཀཾ མཉྙམཱནཱ ཨུཔོསཐཱདཱིནི ཨཀཏྭཱ ཨཙིརེནེཝ ¶ སཱསནཾ ཝིནཱསེཡྻུཾ, སཡཉྩ ཨཔུཉྙཾ པསཝེཡྻུཾ སུདྡྷེསུཔི བྷིཀྑཱུསུ ཝིཔྤཊིཔཏྟིཡཱ པཊིཔཛྫནེན. ཏསྨཱ ཨུཔཱཡཀུསལཏཱཡ པཱརཱཛིཀཾ ཨཔཉྙཱཔེཏྭཱ ཏསྶ ཨུཀྑེཔནཱིཡཀམྨཾ, སམྨཱཝཏྟཉྩ པཉྙཱཔེཏྭཱ ཏཾ སངྒྷེན ཨསམྦྷོགཾ, ཨསཾཝཱསཉྩ ཨཀཱསི. བྷགཝཱ ཧི ཏསྶ ཙེ ཨེསཱ དིཊྛི ཨནིཡཏཱ, སམྨཱཝཏྟཾ པཱུརེཏྭཱ ཨོསཱརཎཾ ལབྷིཏྭཱ པཀཏཏྟོ བྷཝེཡྻ. ནིཡཏཱ ཙེ, ཨཊྛཱནམེཏཾ ཨནཝཀཱསོ, ཡཾ སོ ནིཡཏམིཙྪཱདིཊྛིཀོ སམྨཱཝཏྟཾ པཱུརེཏྭཱ ཨོསཱརཎཾ ལབྷིཏྭཱ པཀཏཏྟོ བྷཝེཡྻ. ཀེཝལཾ ‘‘སམཉྙཱཡབྷིཀྑུ ¶ པཊིཉྙཱཡབྷིཀྑཱུ’’ཏི ནཱམམཏྟདྷཱརཀོ ཧུཏྭཱ པརཾ མརཎཱ ཨརིཊྛོ ཝིཡ སཾསཱརཁཱཎུཀོཝ བྷཝིསྶཏཱིཏི ཨིམཾ ནཡཾ ཨདྡས.

ཨཊྛསུ ཨུཔསམྤདཱསུ ཏིསྶོཝེཏྠ ཝུཏྟཱ, ན ཨིཏརཱ པཱཊིཔུགྒལཏྟཱ, བྷིཀྑཱུནཾ ཨསནྟཀཏྟཱ ཙ. ཏཏྠ ཧི ཨོཝཱདཔཊིགྒཧཎཔཉྷབྱཱཀརཎཱུཔསམྤདཱ དྭིནྣཾ ཐེརཱནཾ ཨེཝ, སེསཱ ཏིསྶོ བྷིཀྑུནཱིནཾ སནྟཀཱཏི ཨིདྷ ནཱདྷིཔྤེཏཱ, ཏིསྶནྣམྤི ཨུཔསམྤདཱནཾ མཛ྄ཛྷེ ‘‘བྷདྲོ བྷིཀྑཱུ’’ཏིཨཱདཱིནི ཙཏྟཱརི པདཱནི ཝུཏྟཱནི ཏིསྶནྣཾ སཱདྷཱརཎཏྟཱ. ཨེཧིབྷིཀྑུབྷཱཝེན ཝཱ སརཎགམནཉཏྟིཙཏུཏྠེན ཝཱ ཨུཔསམྤནྣོ ཧི བྷདྲོ ཙ སཱརོ ཙ སེཀྑོ ཙ ཨསེཀྑོ ཙ ཧོཏི, ཨུཔསམྤདཝཙནཾ པན ནེསཾ སཱཝཀབྷཱཝདཱིཔནཏྠཾ. ཨིམེ ཨེཝ ཧི ཨཱཔཏྟིཾ ཨཱཔཛྫནྟི, ན སམྨཱསམྦུདྡྷཱ, པཙྩེཀབུདྡྷཱ ཙ.

ཨཡཾ ཨིམསྨིཾ ཨཏྠེ ཨདྷིཔྤེཏོཏི ཨེཏྠ ཙ ཨཱཔཏྟིཾ ཨཱཔཛྫིཏུཾ བྷབྦཱ ཉཏྟིཙཏུཏྠེནེཝ ཀམྨེན ཨུཔསམྤནྣཱ. ན ཧི ཨཉྙེ ཨེཧིབྷིཀྑུསརཎགམནཨོཝཱདཔཊིགྒཧཎཔཉྷབྱཱཀརཎཱཧི ཨུཔསམྤནྣཱ ཨཱཔཏྟིཾ ཨཱཔཛྫིཏུཾ བྷབྦཱ, ཏེནེཏེ པཊིཀྑིཔིཏྭཱ ‘‘ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུ’’ཏི ཨནྟིམོཝ ཝུཏྟོཏི ཀིར དྷམྨསིརིཏྠེརོ, ཏཾ ཨཡུཏྟཾ. ‘‘དྭེ པུགྒལཱ ཨབྷབྦཱ ཨཱཔཏྟིཾ ཨཱཔཛྫིཏུཾ བུདྡྷཱ ཙ པཙྩེཀབུདྡྷཱ ཙཱ’’ཏི (པརི. ༣༢༢) ཨེཏྟཀམེཝ ཝུཏྟནྟི. ཨཉྙཐཱ ཨེཧིབྷིཀྑུཨཱདཡོཔི ཝཏྟབྦཱ སིཡུཾ. ཀིཉྩ བྷིཡྻོ ‘‘དྭེ པུགྒལཱ བྷབྦཱ ཨཱཔཏྟིཾ ཨཱཔཛྫིཏུཾ བྷིཀྑཱུ ཙ བྷིཀྑུནིཡོ ཙཱ’’ཏི སཱམཉྙེན ཝུཏྟཏྟཱ ཙ, ཨཔིཙ ཨཱཔཏྟིབྷཡཊྛཱནདསྶནཏོ ཙ. ཀཐཾ? ཨཱཡསྨཱ སཱརིཔུཏྟོ ཨཱཝསཐཔིཎྜཾ ཀུཀྐུཙྩཱཡནྟོ ན པཊིགྒཧེསི, ཙཱིཝརཝིཔྤཝཱསབྷཡཱ ཙ སབྦཾ ཏིཙཱིཝརཾ གཧེཏྭཱ ནདིཾ ཏརནྟོ མནཾ ཝུལ༹ྷོ ཨཧོསི མཧཱཀསྶཔོ. ཀིཉྩ སརཎགམནཱུཔསམྤདཱཡ ཨུཔསམྤནྣེ ཨཱརབྦྷ སདྡྷིཝིཧཱརིཀཝཏྟཱདཱིནི ཨསམྨཱཝཏྟནྟཱནཾ ནེསཾ དུཀྐཊཱནི ཙ པཉྙཏྟཱནི དིསྶནྟི, ཏསྨཱ དུབྦིཙཱརིཏམེཏཾ. ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི པཊིཀྑིཏྟཱཡ སརཎགམནཱུཔསམྤདཱཡ ཨནུཉྙཱཏཔྤསངྒབྷཡཱཏི ཨུཔཏིསྶཏྠེརོ, ཨཱཔཏྟིཡཱ བྷབྦཏཾ སནྡྷཱཡ ཏསྨིམྤི ཝུཏྟེ པུབྦེ པཊིཀྑིཏྟཱཔི སཱ པུན ཨེཝཾ ཝདནྟེན ཨནུཉྙཱཏཱཏི བྷིཀྑཱུནཾ མིཙྪཱགཱཧོ ཝཱ ཝིམཏི ཝཱ ཨུཔྤཛྫཏི ¶ , ཏསྨཱ ན ཝུཏྟཱཏི ཝུཏྟཾ ཧོཏི, ཏཾ ‘‘བྷིཀྑུནཱི ནཱམ ཨུབྷཏོསངྒྷེ ཨུཔསམྤནྣཱ’’ཏི (པཱཙི. ༡༦༡) ཨིམིནཱ སམེཏི. ཨིདཉྷི སཱཀིཡཱདཱིནཾ ཨནུཉྙཱཏཨུཔསམྤདཱཡ ཨནུཔྤབནྡྷབྷཡཱ ཝུཏྟཾ.

ཨཡཾ ¶ པནེཏྠ ཨམྷཱཀཾ ཁནྟི – བྷིཀྑུ-པདནིདྡེསཏྟཱ ཡཏྟཀཱནི ཏེན པདེན སངྒཧཾ གཙྪནྟི, ཡེ ཙ ཝིནཡཔིཊཀེ ཏཏྠ ཏཏྠ སནྡིསྶནྟི སཡཾ ཨཱཔཏྟཱཔཛྫནཊྛེན ཝཱ དུཊྛུལླཱརོཙནཔཊིཙྪཱདནཱདཱིསུ པརེསཾ ཨཱཔཏྟིཀརཎཊྛེན ཝཱ, ཏེ སབྦེཔི དསྶེཏྭཱ ཨིདཱནི ཡདིདཾ ཏསྶ བྷིཀྑུ-པདསྶ ཝིསེསནཏྠཾ ཝུཏྟཾ པརཔདཾ ‘‘སིཀྑཱསཱཛཱིཝསམཱཔནྣོ’’ཏི, ཏསྶ ཝསེན ཨིདཾ ཝུཏྟཾ ‘‘ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུ’’ཏི. སོ ཨེཝ ཧི ཀམྨཝཱཙཱནནྟརམེཝ སིཀྑཱསཱཛཱིཝསམཱཔནྣོ ཧོཏི ཏཏོ པཊྛཱཡ སཨུདྡེསསིཀྑཱཔདཱནཾ ཨུཔྤཏྟིདསྶནཏོ, ཏསྶེཝ ཙ སིཀྑཱཔཙྩཀྑཱནཾ དིསྶཏི, ནེཏརསྶ. ཏསྶེཝ ཙ སིཀྑཱཔཙྩཀྑཱནཾ སམྦྷཝཏི ‘‘ཨུལླུམྤཏུ མཾ, བྷནྟེ, སངྒྷོ ཨནུཀམྤཾ ཨུཔཱདཱཡཱ’’ཏི (མཧཱཝ. ༧༡, ༡༢༦) ཝཏྭཱ སམཱདིནྣཏྟཱ, ཏསྶེཝ ཙ ཨུཔསམྤནྣསམནནྟརམེཝ ཨཀརཎཱིཡནིསྶཡཱཙིཀྑནདསྶནཏོ, ཝིནཡཾ པཱཏིམོཀྑཾ ཨུདྡེསཾ པཙྩཀྑཱམཱིཏིཨཱདིསིཀྑཱཔཙྩཀྑཱནལཀྑཎཔཱརིཔཱུརིཏོ ཙཱཏི སིཀྑཱཔཙྩཀྑཱནཾ ཨུཔཱདཱཡ སོ ཨེཝ ཨིདྷཱདྷིཔྤེཏོཏི ཝུཏྟཾ ཧོཏི.

ཡསྨཱ པནསྶ སིཀྑཱཔཙྩཀྑཱནཾ སབྦཐཱ ཡུཛྫཏི, ཏསྨཱ ‘‘སིཀྑཾ པཙྩཀྑཱཡ ཏཾ ཏཾ ཝཏྠུཾ ཝཱིཏིཀྐམནྟསྶ ཏཏོ ཏཏོ ཨཱཔཏྟིཏོ ཨནཱཔཏྟི, ཨིཏརསྶ ཨཱཔཏྟཱི’’ཏི ཝཏྟུཾ ཡུཛྫཏི, ཏསྨཱ ‘‘ཡཏྠ ཡཏྠ སཱཝཛྫཔཉྙཏྟི, ཨནཝཛྫཔཉྙཏྟི ཝཱ, ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི ཝུཙྩཏི, ཏཏྠ ཏཏྠ ཏདཛ྄ཛྷཱཙཱརཏྠེནཱཡམེཝ ཉཏྟིཙཏུཏྠེན ཨུཔསམྤནྣོ ཨདྷིཔྤེཏོ ནཱམཱ’’ཏི ཝཏྟུཾ ཡུཛྫཏཱིཏི ཝེདིཏབྦཾ. ཨེཝཾ སནྟེ ཡཾ ཝུཏྟཾ ‘‘ཡཱཡ ཀཱཡཙི ཨུཔསམྤདཱཡ ཨཡཾ ཨིམསྨིཾ ‘མེཐུནཾ དྷམྨཾ པཊིསེཝིཏྭཱ པཱརཱཛིཀོ ཧོཏཱི’ཏི ཨཏྠེ བྷིཀྑཱུཏི ཨདྷིཔྤེཏོ’’ཏི, ཏམྤི ན ཝཏྟབྦམེཝ. ཀཐཾ ཧོཏི? ཝིརོདྷདོསོཔི པརིཧཏོ ཧོཏི. ཀཐཾ? སཙེ ཉཏྟིཙཏུཏྠེན ཨུཔསམྤནྣོ ཨེཝ ཨིདྷཱདྷིཔྤེཏོ ‘‘བྷིཀྑཱུ’’ཏི ཙ ‘‘ཨུཔསམྤནྣོ’’ཏི ཙ, ཏེན ན ཨུཔསམྤནྣོ ཨནུཔསམྤནྣོ ནཱམཱཏི ཀཏྭཱ ཉཏྟིཙཏུཏྠཀམྨཏོ ཨཉྙཐཱ ཨུཔསམྤནྣཱ ནཱམ མཧཱཀསྶཔཏྠེརཱདཡོ ཨིཏརེསཾ ཨནུཔསམྤནྣཊྛཱནེ ཋཏྭཱ སཧསེཡྻཔདསོདྷམྨཱཔཏྟིཾ ཛནེཡྻུཾ, ཨོམསནཱདིཀཱལེ ཙ དུཀྐཊམེཝ ཛནེཡྻུནྟི ཨེཝམཱདིཀོ ཝིརོདྷདོསོ པརིཧཏོ ཧོཏཱིཏི སབྦཾ ཨཱཙརིཡོ ཝདཏི. མངྒུརཙྪཝི ནཱམ སཱམོ.

ཡསྨཱ ¶ ཏེ ཨཏིམཧནྟོ ཛཱཏིམདོ ཙིཏྟཾ པརིཡུཊྛཱཏི, ཏསྨཱ ཏུམྷེཧི མམ སཱསནེ ཨེཝཾ སིཀྑིཏབྦཾ ¶ . ‘‘སཱཏསཧགཏཱ པཋམཛ྄ཛྷཱནསུཁསཧགཏཱ ཨསུབྷེ ཙ ཨཱནཱཔཱནེ ཙཱ’’ཏི གཎྛིཔདེ ཝུཏྟཾ. ཨུདྡྷུམཱཏཀསཉྙཱཏི ཨུདྡྷུམཱཏཀནིམིཏྟེ པཊིལདྡྷཔཋམཛ྄ཛྷཱནསཉྙཱ. རཱུཔསཉྙཱཏི པཐཝཱིཀསིཎཱདིརཱུཔཱཝཙརཛ྄ཛྷཱནསཉྙཱ. སོ ཏཾ བྱཱཀཱསི ‘‘ཨཝིབྷཱུཏཱ, བྷནྟེ, ཨུདྡྷུམཱཏཀསཉྙཱ ཨཝཌྜྷིཏབྦཏྟཱ ཨསུབྷཱནཾ, ཝིབྷཱུཏཱ, བྷནྟེ, རཱུཔསཉྙཱ ཝཌྜྷིཏབྦཏྟཱ ཀསིཎཱན’’ནྟི. པཉྩཨུཔསམྤདཀྐམོ མཧཱཝགྒཱ གཧིཏོ. ཉཏྟིཙཏུཏྠེནཱཏི ཨེཏྠ ཀིཉྩཱཔི ཉཏྟི སབྦཔཋམཾ ཝུཙྩཏི, ཏིསྶནྣཾ པན ཨནུསྶཱཝནཱནཾ ཨཏྠབྱཉྫནབྷེདཱབྷཱཝཏོ ཨཏྠབྱཉྫནབྷིནྣཱ ཉཏྟིཏཱསཾ ཙཏུཏྠཱཏི ཀཏྭཱ ‘‘ཉཏྟིཙཏུཏྠ’’ནྟི ཝུཙྩཏི. བྱཉྫནཱནུརཱུཔམེཝ ཨཊྛཀཐཱཡ ‘‘ཏཱིཧི ཨནུསྶཱཝནཱཧི ཨེཀཱཡ ཙ ཉཏྟིཡཱ’’ཏི ཝུཏྟཾ, ཨཏྠཔཝཏྟིཀྐམེན པདེན པན ‘‘ཨེཀཱཡ ཉཏྟིཡཱ ཏཱིཧི ཨནུསྶཱཝནཱཧཱི’’ཏི ཝཏྟབྦཾ. ཡསྨཱ པནེཏྠ ‘‘ཙཏྟཱརིམཱནི, བྷིཀྑཝེ, ཀམྨཱནི (མཧཱཝ. ༣༨༤), ཚ ཨིམཱནི, བྷིཀྑཝེ, ཀམྨཱནི ཨདྷམྨཀམྨཾ ཝགྒཀམྨ’’ནྟི (མཧཱཝ. ༣༨༧) ཝཙནཏོ ཀུཔྤཀམྨམྤི ཀཏྠཙི ‘‘ཀམྨ’’ནྟི ཝུཙྩཏི ཏསྨཱ ‘‘ཨཀུཔྤེནཱ’’ཏི ཝུཏྟཾ.

ཡསྨཱ ཨཀུཔྤམྤི ཨེཀཙྩཾ ན ཋཱནཱརཧཾ, ཡེན ཨཔྤཏྟོ ཨོསཱརཎཾ ‘‘སོསཱརིཏོ’’ཏི ཙམྤེཡྻཀྑནྡྷཀེ (མཧཱཝ. ༣༩༥ ཨཱདཡོ) ཝུཙྩཏི, ཏསྨཱ ‘‘ཋཱནཱརཧེནཱ’’ཏི ཝུཏྟཾ. ཡདི ཨེཝཾ ‘‘ཋཱནཱརཧེནཱ’’ཏི ཨིདམེཝ པདཾ ཝཏྟབྦཾ, ན པུབྦཔདཾ ཨིམིནཱ ཨཀུཔྤསིདྡྷིཏོཏི ཙེ? ཏཾ ན, ཨཊྛཱནཱརཧེན ཨཀུཔྤེན ཨུཔསམྤནྣོ ཨིམསྨིཾ ཨཏྠེ ཨནདྷིཔྤེཏོཏི ཨནིཊྛཔྤསངྒཏོ. དྭཱིཧི པནེཏེཧི ཨེཀཏོ ཝུཏྟེཧི ཨཡམཏྠོ པཉྙཱཡཏི ‘‘ཀེཝལཾ ཏེན ཨཀུཔྤེན ཨུཔསམྤནྣོ ཨཡམྤི ཨིམསྨིཾ ཨཏྠེ ཨདྷིཔྤེཏོ ‘བྷིཀྑཱུ’ཏི, ཋཱནཱརཧེན ཙ ཨུཔསམྤནྣོ ཨཡམྤི ཨིམསྨིཾ ཨཏྠེ ཨདྷིཔྤེཏོ ‘བྷིཀྑཱུ’ཏི, ཀུཔྤེན ཨུཔསམྤནྣོ ནཱདྷིཔྤེཏོ’’ཏི. ཏེནཱཡམྤི ཨཏྠོ སཱདྷིཏོ ཧོཏི ‘‘ཡོ པན, བྷིཀྑུ, ཛཱནཾ ཨཱུནཝཱིསཏིཝསྶཾ པུགྒལཾ ཨུཔསམྤཱདེཡྻ, སོ ཙ པུགྒལོ ཨནུཔསམྤནྣོ’’ཏི (པཱཙི. ༤༠༣) ཝཙནཏོ ཡཱཝ ན ཉཱཡཏི, ཏཱཝ སམཉྙཱཡབྷིཀྑུཔཊིཉྙཱཡབྷིཀྑུབྷཱཝཾ ཨུཔགཏོཔི ན པུབྦེ དསྶིཏསམཉྙཱཡབྷིཀྑུཔཊིཉྙཱཡབྷིཀྑུ ཝིཡ ཨཉྙེསཾ བྷིཀྑཱུནཾ ཨུཔསམྤནྣཊྛཱནེ ཋཏྭཱ ཨོམསནཔཱཙིཏྟིཡཱདིཝཏྠུ ཧོཏི, ཀེཝལཾ ཨནུཔསམྤནྣཊྛཱནེ ཋཏྭཱ ‘‘ཨནུཔསམྤནྣེ ཨུཔསམྤནྣསཉྙཱི ¶ པདསོ དྷམྨཾ ཝཱཙེཏི, ཨཱཔཏྟི པཱཙིཏྟིཡསྶཱ’’ཏིཨཱདི (པཱཙི. ༤༧) ཨཱཔཏྟིཝཏྠུམེཝ ཧུཏྭཱ ཏིཊྛཏི. ཨཀུཔྤེན ཨུཔསམྤནྣོ པན པཙྪཱ པཱརཱཛིཀོཔི ཛཱཏིཏོ ཨུཔསམྤནྣཊྛཱནེ ཏིཊྛཏཱིཏི ‘‘པཎྜཀོ, བྷིཀྑཝེ, ཨནུཔསམྤནྣོ ན ཨུཔསམྤཱདེཏབྦོ, ཨུཔསམྤནྣོ ནཱསེཏབྦོ’’ཏིཨཱདིནཱ (མཧཱཝ. ༡༠༩) ནཡེན ཝུཏྟེསུ པན ཝཛྫནཱིཡཔུགྒལེསུ ཀོཙི པུགྒལོ ‘‘ཨུཔསམྤནྣོ’’ཏི ཝུཙྩཏི, ནོཔི ཨུཔསམྤནྣཊྛཱནེ ཏིཊྛཏི, ཀོཙི ཏིཊྛཏཱིཏི ཝེདིཏབྦཾ.

ཨེཏྠ ¶ པན ཨཏྠི ཀམྨཾ ཨཀུཔྤཾ ཋཱནཱརཧཾ, ཨཏྠི ཋཱནཱརཧཾ ནཱཀུཔྤཾ, ཨཏྠི ཨཀུཔྤཉྩེཝ ན ཋཱནཱརཧཉྩ, ཨཏྠི ནཱཀུཔྤཾ ན ཙ ཋཱནཱརཧནྟི ཨིདཾ ཙཏུཀྐཾ ཝེདིཏབྦཾ. ཏཏྠ པཋམཾ ཏཱཝ ཝུཏྟཾ, ཏཏིཡཙཏུཏྠཱནི པཱཀཊཱནི. དུཏིཡཾ པརིཡཱཡེན བྷིཀྑུནིསངྒྷཏོ ཨེཀཏོཨུཔསམྤནྣཱཡ ལིངྒཔརིཝཏྟེ སཏི ལབྦྷཏི. ཏསྶ ཧི པུགྒལསྶ པུབྦེ སིཀྑམཱནཀཱལེ ལདྡྷཾ ཉཏྟིཙཏུཏྠཨུཔསམྤདཱཀམྨཾ ཀིཉྩཱཔི ཨཀུཔྤཉྩེཝ ཋཱནཱརཧཉྩ, པུརིསལིངྒེ པན པཱཏུབྷཱུཏེ ‘‘ཨནུཛཱནཱམི, བྷིཀྑཝེ, ཏཾཡེཝ ཨུཔཛ྄ཛྷཾ ཏམེཝ ཨུཔསམྤད’’ནྟི (པཱརཱ. ༦༩) ཨེཏྠ ཨཔརིཡཱཔནྣཏྟཱ ཏསྶ པུགྒལསྶ ཀེཝལཾ སཱམཎེརབྷཱཝཱཔཏྟིཏོ ཀམྨཾ དཱནི ཀུཔྤཾ ཛཱཏནྟི ཝུཙྩཏི. ལིངྒཔརིཝཏྟེན ཙཱིཝརསྶ ཨདྷིཊྛཱནཝིཛཧནཾ ཝིཡ ཏསྶ པུགྒལསྶ བྷིཀྑུནིསངྒྷེན ཀཏཱཡ ཨུཔསམྤདཱཡ ཝིཛཧནཾ ཧོཏཱིཏི ཝེདིཏབྦཾ, ཨཉྙཐཱ སོ པུགྒལོ ཨུཔསམྤནྣོ བྷིཀྑཱུཏི ཨཱཔཛྫཏི. ཨཐ ཝཱ ལིངྒཔརིཝཏྟེ ཨསཏིཔིཏཾ ཨེཀཏོཨུཔསམྤདཱཀམྨཾ ཀུཔྤཏི, ཡཐཱཋཱནེ ན ཏིཊྛཏི. ཏསྨཱ ན ཏཱཝ སཱ ‘‘བྷིཀྑུནཱི’’ཏི སངྑྱཾ གཙྪཏི. ཡསྨཱ ཨཉྙཏརཾ པཱརཱཛིཀཾ དྷམྨཾ ཨཱཔཛྫིཏྭཱཔི ཨནཱཔཛྫིཏྭཱཔི ཨུཔྤབྦཛིཏུཀཱམཏཱཡ གིཧིལིངྒཾ སཱདིཡནྟིཡཱ པུནཔི ཨུཔསམྤདཱ ཨུབྷཏོསངྒྷེ ལབྦྷཏི, ཏསྨཱ ཏེན པརིཡཱཡེན ‘‘ཀུཔྤཏཱིཏི ཀུཔྤ’’ནྟི ཝུཙྩཏི, ཡཐཱཝུཏྟཀམྨདོསཱབྷཱཝཏོ པན ‘‘ཋཱནཱརཧ’’ནྟི. བྷིཀྑུནཱི པན གིཧིལིངྒཾ སཱདིཡནྟིཀཱལེ ན པུརིསལིངྒཔཱཏུབྷཱཝེ སཏི བྷིཀྑཱུསུ ཨུཔསམྤདཾ ལབྦྷཏཱིཏི སཱདྷཀཾ ཀཱརཎཾ ན དིསྶཏི, སིཀྑཾ པཙྩཀྑཱཡ ཨུཔྤབྦཛིཏཱ ཙེ, ལབྷཏཱིཏི ཨེཀེ, ཏཾ པནཱཡུཏྟཾ བྷིཀྑུནིཡཱ སིཀྑཱཔཙྩཀྑནཱབྷཱཝཏོཏི ཨམྷཱཀཾ ཁནྟཱིཏི ཨཱཙརིཡོ. ‘‘ཡཐཱ ‘ཀཏྟབྦ’ནྟི ཝུཏྟཾ, ཏཐཱ ཨཀཏེ ཀུཔྤཏཱིཏི ཀཏྭཱ ཀརཎཾ སཏྠུསཱསན’’ནྟི གཎྛིཔདེ ཝུཏྟཾ. ཡཏྠ ཡཏྠ ‘‘གཎྛིཔདེ’’ཏི ཝུཙྩཏི, ཏཏྠ ཏཏྠ ‘‘དྷམྨསིརིཏྠེརསྶ གཎྛིཔདེ’’ཏི གཧེཏབྦཾ.

སཱཛཱིཝཔདབྷཱཛནཱིཡཝཎྞནཱ

‘‘མཧཱབོདྷིསཏྟཱ ¶ ནིཡཏཱ’’ཏི ཝུཏྟཾ ཨནུགཎྛིཔདེ. ཡཏྠ ‘‘ཨནུགཎྛིཔདེ’’ཏི, ཏཏྠ ‘‘ཝཛིརབུདྡྷིཏྠེརསྶཱ’’ཏི གཧེཏབྦཾ. སཱཝཀབོདྷིཔཙྩེཀབོདྷིསམྨཱསམྦོདྷཱིཏི ཝཱ ཏཱིསུ བོདྷཱིསུ སམྨཱསམྦོདྷིཡཾ སཏྟཱ བོདྷིསཏྟཱ མཧཱབོདྷིསཏྟཱ ནཱམ. པཱཏིམོཀྑསཱིལབཧུཀཏྟཱ, བྷིཀྑུསཱིལཏྟཱ, ཀིལེསཔིདཧནཝསེན ཝཏྟནཏོ, ཨུཏྟམེན བྷགཝཏཱ པཉྙཏྟཏྟཱ ཙ ཨདྷིཀཾ, བུདྡྷུཔྤཱདེཡེཝ པཝཏྟནཏོ ཨུཏྟམནྟི ཨཉྙཏརསྨིཾ གཎྛིཔདེ. ཀིཉྩཱཔི པཙྩེཀབུདྡྷཱཔི དྷམྨཏཱཝསེན པཱཏིམོཀྑསཾཝརསཱིལེན སམནྣཱགཏཱཝ ཧོནྟི, ཏཐཱཔི ‘‘བུདྡྷུཔྤཱདེཡེཝ པཝཏྟཏཱི’’ཏི ནིཡམིཏཾ ཏེན པརིཡཱཡེནཱཏི. ཏེནཱཧ ‘‘ན ཧི ¶ ཏཾ པཉྙཏྟིཾ ཨུདྡྷརིཏྭཱ’’ཏིཨཱདི. པཱཏིམོཀྑསཾཝརཏོཔི ཙ མགྒཕལསམྤཡུཏྟམེཝ སཱིལཾ ཨདྷིསཱིལཾ, ཏཾ པན ཨིདྷ ཨནདྷིཔྤེཏཾ. ན ཧི ཏཾ པཱཏིམོཀྑུདྡེསེན སངྒཧིཏནྟི. སམནྟབྷདྲཀཾ ཀཱརཎཝཙནཾ སབྦསིཀྑཱཔདཱནཾ སཱདྷཱརཎལཀྑཎཏྟཱ ཨིམིསྶཱ ཨནུཔཉྙཏྟིཡཱ ཨརིཡཔུགྒལཱ ཙ ཨེཀཙྩཾ ཨཱཔཏྟིཾ ཨཱཔཛྫནྟཱིཏི སཱདྷིཏམེཏཾ, ཏསྨཱ ‘‘ན ཧི ཏཾ སམཱཔནྣོ མེཐུནཾ དྷམྨཾ པཊིསེཝཏཱི’’ཏི ཨཊྛཀཐཱཝཙནཾ ཨསམཏྠཾ ཝིཡ དིསྶཏཱིཏི? ནཱསམཏྠཾ, སམཏྠམེཝ ཡསྨིཾ ཡསྨིཾ སིཀྑཱཔདེ སཱསཱ ཝིཙཱརཎཱ, ཏསྶ ཏསྶེཝ ཝསེན ཨཊྛཀཐཱཡ པཝཏྟིཏོ. ཏཐཱ ཧི ཀངྑཱཝིཏརཎིཡཾ (ཀངྑཱ. ཨཊྛ. ནིདཱནཝཎྞནཱ) ཨུདཀུཀྑེཔསཱིམཱདྷིཀཱརེ ‘‘ཏིམཎྜལཾ པཊིཙྪཱདེཏྭཱ ཨནྟརཝཱསཀཾ ཨནུཀྑིཔིཏྭཱ ཨུཏྟརནྟིཡཱ བྷིཀྑུནིཡཱ’’ཏི ཝུཏྟཾ བྷིཀྑུནིཝིབྷངྒེ ཨཱགཏཏྟཱ. ཨེསེཝ ནཡོ ཨཉྙེཔི ཨེཝརཱུཔེསུ. ཀིམཏྠནྟི ཙེ ཏཾ? པཱལི༹ཀྐམཱནུཝཏྟནེན པཱལི༹ཀྐམདསྶནཏྠཾ. ཏཏྲིདཾ སམཱསཏོ ཨདྷིཔྤཱཡདཱིཔནཾ – པདསོདྷམྨསིཀྑཱཔདསྶ ཏིཀཔརིཙྪེདེ ཨུཔསམྤནྣེ ཨུཔསམྤནྣསཉྙཱི, ཨནཱཔཏྟི, ཨཀཊཱནུདྷམྨསིཀྑཱཔདཝསེན ཨུཔསམྤནྣེ ཨུཀྑིཏྟཀེ སིཡཱ ཨཱཔཏྟི, ཏཐཱ སཧསེཡྻསིཀྑཱཔདེཏི ཨེཝམཱདི. ཨཏྠོ པནེཏྠ པརཏོ ཨཱཝི བྷཝིསྶཏི.

ཡཾ ཝུཏྟཾ ཨཊྛཀཐཱཡཾ ‘‘ཏཏོཔི ཙ མགྒཕལཙིཏྟམེཝ ཨདྷིཙིཏྟཾ, ཏཾ པན ཨིདྷ ཨནདྷིཔྤེཏ’’ནྟི ཙ, ‘‘ཏཏོཔི ཙ མགྒཕལཔཉྙཱཝ ཨདྷིཔཉྙཱ, སཱ པན ཨིདྷ ཨནདྷིཔྤེཏཱ. ན ཧི ཏཾསམཱཔནྣོ བྷིཀྑུ མེཐུནཾ དྷམྨཾ པཊིསེཝཏཱི’’ཏི. ‘‘ཏཏྲ ཡཱཡཾ ཨདྷིསཱིལསིཀྑཱ, ཨཡཾ ཨིམསྨིཾ ཨཏྠེ ཨདྷིཔྤེཏཱ སིཀྑཱ’’ཏི ཨིམཱཡ པཱལི༹ཡཱ ཝིརུཛ྄ཛྷཏི. ཨཡཉྷི པཱལི༹ ཨདྷིསཱིལསིཀྑཱཝ ཨིདྷ ཨདྷིཔྤེཏཱ, ན ¶ ཨིཏརཱཏི དཱིཔེཏི. ཨཊྛཀཐཱཝཙནཾ ཏཱསམྤི ཏིཎྞཾ ལོཀིཡཱནཾ ཨདྷིཔྤེཏཏཾ དཱིཔེཏི. ཨཡཾ པནེཏྠ ཨཊྛཀཐཱདྷིཔྤཱཡོ – ཏིསྶོཔི ལོཀིཡཱ སིཀྑཱ ཨིམསྨིཾ པཋམཔཱརཱཛིཀེ སམྦྷཝནྟི, ཀཱལེནཱཔི ཨདྷིཙིཏྟཔཉྙཱལཱབྷཱི བྷིཀྑུ ཏཐཱརཱུཔཾ ཨསཔྤཱཡཾ པཙྩཡཾ པཊིཙྩ ཏཏོ ཏཏོ ཨདྷིཙིཏྟཏོ, ཨདྷིཔཉྙཱཏོ ཙ ཨཱཝཏྟིཏྭཱ སཱིལབྷེདཾ པཱཔུཎེཡྻཱཏི ཋཱནམེཏཾ ཝིཛྫཏི, ན ལོཀུཏྟརཙིཏྟཔཉྙཱལཱབྷཱི, ཨཡཾ ནཡོ ཨིཏརེསུཔི སབྦེསུ ཨདིནྣཱདཱནཱདཱིསུ སཙིཏྟཀེསུ ལབྦྷཏི, ཨཙིཏྟཀེསུ པན ཨིཏརོཔི. ཏཐཱཔི ཀེཝལཾ ཝིནཡཔིཊཀསྶ, པཱཏིམོཀྑསཱིལསྶ ཙ སངྒཱཧཀཏྟཱ ‘‘སིཀྑཾ ཨཔྤཙྩཀྑཱཡཱ’’ཏི ཨིམསྨིཾ ཨུཏྟརཔདེ པཙྩཀྑཱནཱརཧཱ ཨདྷིསཱིལསིཀྑཱཝ ལོཀིཡཱཏི དསྶནཏྠཾ པཱལི༹ཡཾ ‘‘ཏཏྲ ཡཱཡཾ ཨདྷིསཱིལསིཀྑཱ, ཨཡཾ ཨིམསྨིཾ ཨཏྠེ ཨདྷིཔྤེཏཱ སིཀྑཱ’’ཏི ཝུཏྟནྟི ཝེདིཏབྦཾ.

ཨེཏྠ སིཀྑཱཏི ཀཱཡཝཙཱིདུཙྩརིཏཏོ ཝིརཏཱི ཙ ཙེཏནཱ ཙ, ཨཉྙཏྲ ཙེཏནཱཡེཝ ཝེདིཏབྦཱ. སིཀྑཱཔདནྟི སཨུདྡེསསིཀྑཱཔདཾ, ཨེཀཙྩཾ ཨནུདྡེསསིཀྑཱཔདཉྩ ལབྦྷཏི. ཙིཏྟསྶ ཨདྷིཀརཎཾ ཀཏྭཱཏི ཏསྨིཾ སིཀྑཏཱིཏི ཨདྷིཀརཎཏྠེ བྷུམྨནྟི དསྶནཏྠཾ ཝུཏྟཾ. ཡཐཱསིཀྑཱཔདནྟི པཙྩཝེཀྑཎཝསེན ཝུཏྟཾ. སཱིལཔཙྩཝེཀྑཎཱཔི ཧི སཱིལམེཝ, ཏསྨཱ སུཔྤཊིཙྪནྣཱདིཙཱརིཏྟེསུ ¶ ཝིརཏིཝིཔྤཡུཏྟཙེཏནཾ པཝཏྟེནྟོཔི སིཀྑཾ པརིཔཱུརེནྟོཏྭེཝ སངྑྱཾ གཙྪཏི. ‘‘སམྤཛཱནམུསཱཝཱདེ པཱཙིཏྟིཡ’’ནྟི (པཱཙི. ༢) ཝུཏྟམརིཡཱདཾ ཨཝཱིཏིཀྐམནྟོ ‘‘ཏསྨིཉྩ སིཀྑཱཔདེ སིཀྑཏཱི’’ཏི ཝུཙྩཏི. ཨཉྙཏརསྨིཾ པན གཎྛིཔདེ ཝུཏྟཾ ‘‘སིཀྑཱཏི ཏཾ སིཀྑཱཔདཾ སིཀྑནབྷཱཝེན པཝཏྟཙིཏྟུཔྤཱདོ. སཱཛཱིཝནྟི པཉྙཏྟི. ཏདཏྠདསྶནཏྠཾ པུབྦེ མེཐུནསཾཝརསྶེཏཾ ཨདྷིཝཙན’’ནྟི. ཡསྨཱ སིཀྑཱཡ གུཎསམྨཏཱཡ པུཉྙསམྨཏཱཡ ཏནྟིཡཱ ཨབྷཱཝཏོ ལོཀསྶ དུབྦལྱཱཝིཀམྨཾ ཏཏྠ ན སམྦྷཝཏི. པཏྠནཱིཡཱ ཧི སཱ, ཏསྨཱ ‘‘ཡཉྩ སཱཛཱིཝཾ སམཱཔནྣོ, ཏཏྠ དུབྦལྱཾ ཨནཱཝིཀཏྭཱ’’ཏི ཝུཏྟཾ. ཨཱཎཱཡ ཧི དུབྦལྱཾ སམྦྷཝཏཱིཏི ཨཱཡསྨཱ ཨུཔཏིསྶོ.

སིཀྑཱཔཙྩཀྑཱནཀཐཱཝཎྞནཱ

ཨེཏྠ ¶ ཡཱམཱིཏི ཨམུཀསྨིཾ ཏིཏྠཱཡཏནེ, གྷརཱདིམྷི ཝཱ. བྷཱཝཝིཀཔྤཱཀཱརེནཱཏི ‘‘ཨཧཾ ཨསྶ’’ནྟི ཨཱགཏཏྟཱ ཡཾ ཡཾ བྷཝིཏུཀཱམོ, ཏསྶ ཏསྶ བྷཱཝསྶ ཝིཀཔྤཱཀཱརེན, བྷིཀྑུབྷཱཝཏོ ཨཉྙབྷཱཝཝིཀཔྤཱཀཱརེནཱཏི ཨདྷིཔྤཱཡོ.

༤༦. ཧནྡཱཏི ཝཙསཱཡེཝ. གིཧིབྷཱཝཾ པཏྠཡམཱནོཏིཨཱདིཔདེཧི ཙིཏྟནིཡམཾ དསྶེཏི. ཨེཀེནེཝ ཙིཏྟེན སིཀྑཱཔཙྩཀྑཱནཾ ཧོཏི, ན ཏདབྷཱཝེནཱཏི.

༥༡. བུདྡྷཾ དྷམྨནྟིཨཱདིཔདེཧི ཁེཏྟནིཡམཾ དསྶེཏི. ཏཏྠ ཨཱདིཏོ ཙུདྡསཧི པདེཧི སབྷཱཝཔརིཙྩཱགོ, པཙྪིམེཧི ཨཊྛཧི བྷཱཝནྟརཱདཱནཉྩ དསྶིཏཾ ཧོཏི. པཙྩཀྑཱམི དྷཱརེཧཱིཏི ཨེཏེཧི ཀཱལནིཡམཾ དསྶེཏི. ཝདཏཱིཏི ཨིམིནཱ པདེན པཡོགནིཡམཾ དསྶེཏི. ཝིཉྙཱཔེཏཱིཏི ཨིམིནཱ ཝིཛཱནནནིཡམཾ དསྶེཏི. ཨུམྨཏྟཀོ སིཀྑཾ པཙྩཀྑཱཏི, ཨུམྨཏྟཀསྶ སནྟིཀེ སིཀྑཾ པཙྩཀྑཱཏཱིཏིཨཱདཱིཧི པུགྒལནིཡམཾ དསྶེཏི. ཨརིཡཀེན མིལཀྑསྶ སནྟིཀེ སིཀྑཾ པཙྩཀྑཱཏཱིཏིཨཱདཱིཧི པན པུགྒལཱདིནིཡམེཔི སཏི ཝིཛཱནནནིཡམཱསམྦྷཝཾ དསྶེཏི. ཏཏྠ ‘‘ཡཱཡ མིལཀྑབྷཱསཱཡ ཀཱལནིཡམོ ནཏྠི, ཏཱཡཔི བྷཱསཱཡ ཀཱལནིཡམཏྠདཱིཔནེ སཏི སིཀྑཱཔཙྩཀྑཱནཾ རུཧཏཱིཏི ནོ མཏཱི’’ཏི ཨཱཙརིཡོ. དཝཱཡཱཏིཨཱདཱིཧི ཁེཏྟཱདིནིཡམེ སཏིཔི ཙིཏྟནིཡམཱབྷཱཝེན ན རུཧཏཱིཏི དསྶེཏི. སཱཝེཏུཀཱམོ ན སཱཝེཏཱིཏི ཙིཏྟནིཡམེཔི སཏི པཡོགནིཡམཱབྷཱཝེན ན རུཧཏཱིཏི དསྶེཏི. ཨཝིཉྙུསྶསཱཝེཏི, ཝིཉྙུསྶ ན སཱཝེཏཱིཏི ཙིཏྟཁེཏྟཀཱལཔཡོགཔུགྒལཝིཛཱནནནིཡམེཔི སཏི ཡཾ པུགྒལཾ ཨུདྡིསྶ སཱཝེཏི, ཏསྶེཝ སཝནེ ན རུཧཏི, ན ཨཉྙསྶཱཏི དསྶནཏྠཾ ཝུཏྟཾ, ཏེན ཝུཏྟཾ ཨཊྛཀཐཱཡཾ ‘‘ཡདི ཨཡམེཝ ཛཱནཱཏཱུཏི ཨེཀཾ ¶ ནིཡམེཏྭཱ ཨཱརོཙེཏི, ཏཉྩེ སོ ཨེཝ ཛཱནཱཏི, པཙྩཀྑཱཏཱ ཧོཏི སིཀྑཱ. ཨཐ སོ ན ཛཱནཱཏི…པེ… ཨཔྤཙྩཀྑཱཏཱ ཧོཏི སིཀྑཱ’’ཏི. སབྦསོ ཝཱ པན ན སཱཝེཏི, ཨཔྤཙྩཀྑཱ ཧོཏི སིཀྑཱཏི ཙིཏྟཱདིནིཡམེནེཝ སིཀྑཱ པཙྩཀྑཱཏཱ ཧོཏི, ན ཨཉྙཐཱཏི དསྶནཏྠཾ ཝུཏྟཾ. ཨེཏྟཱཝཏཱ ‘‘སིཀྑཱ…པེ… དུབྦལྱཾ ཨནཱཝིཀཏྭཱ’’ཏི པདསྶ པདབྷཱཛནཾ ཏཱིཧི ཨཱཀཱརེཧི དསྶིཏཾ ¶ ཧོཏི. ཏཏྠ དྭེ ཨམིསྶཱ, པཙྪིམོ ཨེཀོ མིསྶོཏི ཝེདིཏབྦོ. ཏེནེཝ ཝཙཱིབྷེདེནཱཏི ཏདཏྠདཱིཔནམཏྟཾ ཝཙནཾ སུཏྭཱཝ ཏེནེཝ ཝཙཱིབྷེདེན ཛཱནཱཔེཏཱིཏི ཨཏྠོ. ཙིཏྟསམྤཡུཏྟནྟི པཙྩཀྑཱཏུཀཱམཏཱཙིཏྟསམྤཡུཏྟཾ. སམཡཉྙཱུ ནཱམ ཏདདྷིཔྤཱཡཛཱནནམཏྟེན ཧོཏི.

༥༣. ཝཎྞཔཊྛཱནཾ བུདྡྷགུཎདཱིཔཀཾ སུཏྟཾ. ཨུཔཱལིགཧཔཏིནཱ ཝུཏྟཱ ཀིར ཨུཔཱལིགཱཐཱ. པཉྙཱཎཾ སཉྙཱཎནྟི ཨཏྠཏོ ཨེཀཾ, ཏསྨཱ བོདྷིཔཉྙཱཎནྟི བོདྷིསཉྙཱཎཾ, བོདྷིབཱིཛནྟི ཝུཏྟཾ ཧོཏི.

དྭིནྣམྤི ནིཡམེཏྭཱཏི ཨེཏྠ ‘‘དྭཱིསུཔི ཛཱནནྟེསུ ཨེཝ པཙྩཀྑཱམཱིཏི ཨདྷིཔྤཱཡེན ཝུཏྟེ ཏེསུ ཨེཀོ ཙེ ཛཱནཱཏི, ན པཙྩཀྑཱཏཱ ཧོཏཱི’’ཏི ཨཉྙཏརསྨིམྤི གཎྛིཔདེ ཝུཏྟཾ, ཏཾ ཨཊྛཀཐཱཡ ན སམེཏི. ‘‘གིཧཱི ཧོམཱི’’ཏི ཝཱ ‘‘གིཧིམྷཱི’’ཏི ཝཱ ཝུཏྟེ ཀིཉྩཱཔི ཝཏྟམཱནཝཙནཾ ཧོཏི. ‘‘དྷཱརེཧཱི’’ཏི ཨཏྠཱབྷཱཝཱ ཙ ‘‘དྷཱརེཧཱི’’ཏི ཝུཏྟེ ཙ པརསྶུཔརི གཙྪཏི, ཏསྨཱ ན ཧོཏི. སནྡིཊྛིཀཾ དྷམྨནྟི སབྦཏྠ དྷམྨཝཙནཾ ཝུཏྟཾ ཡཾ སནྡྷཱཡ ‘‘སནྡིཊྛིཀ’’ནྟི ཝདཏི, ཏཾ པཀཱསེཏུཾ. ཨཉྙཐཱ ‘‘ཝིཛིཏཝིཛཡཾ པཙྩཀྑཱམཱི’’ཏི ཝུཏྟེ ཙཀྐཝཏྟིཨཱདཱིསུཔི ཏཔྤསངྒཏོ བུདྡྷསདྡོཔི ཨཝསཱནེ ཝཏྟབྦོ བྷཝེཡྻ. ཨཱཙརིཡཝེཝཙནེསུ པན ཡོ མཾ པབྦཱཛེསཱིཏིཨཱདི ཨུཔཛ྄ཛྷཾ ཨགྒཧེཏྭཱ, པརཾ ཝཱ ཨུདྡིསྶ པབྦཛིཏཾ སནྡྷཱཡ ཝུཏྟནྟི. ཨོཀལླཀོཏི ཀཔཎཱདྷིཝཙནཾ. མོལི༹བདྡྷོཏི སིཁཱབདྡྷོ, ཨོམུཀྐམཀུཊོ ཝཱ. ཙེལླཀོ ཨཐེརོ. ཙེཊཀོ མཛ྄ཛྷིམོ. མོལི༹གལློ མཧཱསཱམཎེརོ. མནུསྶཝིགྒཧནཱགཱདཱིནཾ ནཱགརཱུཔཱདཱིནཾ ཝཱ སནྟིཀེ, བྷཱསཱཛཱནནཀིནྣརཱདཱིནཾ ཝཱ. ‘‘དེཝཏཱ ནཱམ མཧཱཔཉྙཱ’’ཏི ཀིར པཱཋོ. དཝཱཡཱཏི སཧསཱ. རཝཱབྷཉྙེནཱཏི ཁལིཏབྷཉྙེན. ཨཀྑརསམཡཱནཉྷི ནཱབྷིཉྙཱཏཱཡ ཝཱ ཀརཎཱནཾ ཨཝིསདཏཱཡ ཝཱ ཧོཏི རཝཱབྷཉྙཾ. ཨཝིདྷེཡྻིནྡྲིཡཏཱཡ ‘‘པོཏྠཀརཱུཔསདིསསྶཱ’’ཏི ཝུཏྟཾ, གརུམེདྷསྶ མནྡཔཉྙསྶ. ཀིཏྟཱཝཏཱ པན གརུམེདྷོ ཧོཏཱིཏི ཙེ? སམཡེ ཨཀོཝིདཏཱཡ.

སིཀྑཱཔཙྩཀྑཱནཀཐཱཝཎྞནཱ ནིཊྛིཏཱ.

མཱུལཔཉྙཏྟིཀཐཱཝཎྞནཱ

༥༥. ‘‘པཊིསེཝཏིནཱམཱ’’ཏི ¶ ¶ པདཾ མཱཏིཀཱཡཾ ནཏྠི, ཏསྨཱ ‘‘པཊིསེཝེཡྻཱཏི ཨེཏྠཱ’’ཏིཨཱདིམཱཧ. ‘‘ཨེསོ མེཐུནདྷམྨོ ནཱམཱ’’ཏི སབྦཔཱལི༹པོཏྠཀེསུ, ཨཊྛཀཐཱཡཾ ‘‘ཨེསོ ཝུཙྩཏི མེཐུནདྷམྨོ ནཱམཱ’’ཏི ཨུདྡྷཊཱ. ཨིཏྠིཡཱ ནིམིཏྟེན ཨཏྟནོ ནིམིཏྟནྟི དུཝིཉྙེཡྻམེཏཾ དསྶིཏཾ. ཨཏྟནོ ནིམིཏྟེན ཨིཏྠིཡཱ ནིམིཏྟཾ སུཝིཉྙེཡྻཏྟཱ ན དསྶིཏཾ. ཙཏྟཱརི ཋཱནཱནི མུཉྩིཏྭཱཏི ཨེཏྠ ཨབྦྷནྟརཏལཾ ཚུཔནྟཾཡེཝ སནྡྷཱཡ ཝུཏྟཾ, ཨཙྪུཔནྟཾ ནཱིཧརནྟསྶ ཨནཱཔཏྟི. མཛ྄ཛྷནྟི ཨགྒཔྤདེསཾ. ཨུཔརིབྷཱགམཛ྄ཛྷནྟི ཨུཔརིབྷཱགསྶ ཨགྒཔྤདེསཾ. ནཊྛཀཱཡཔྤསཱདནྟི ཨེཏྠ ཨུཔཧཏིནྡྲིཡསྶ ཨཱཔཏྟིསམྦྷཝཏོ ཨིདྷཱཔི ཨཱཔཏྟཱིཏི ཙེ? ནེཏི དསྶནཏྠཾ ‘‘མཏཙམྨཾ ཝཱ’’ཏིཨཱདི ཝུཏྟཾ. མཏཙམྨཉྷི ཨནུཔཱདིནྣཾ, ཨུཔཱདིནྣེ ཨེཝ པཱརཱཛིཀཱཔཏྟི. ཨཔིདྷཱཡ ཨཔྤཊིཙྪཱདེཏྭཱ. ཡཐཱ དནྟཱ ན དིསྶནྟི, ཏཐཱ པིདྷཱཡེཝ ནིསཱིདིཏབྦནྟི ཨདྷིཔྤཱཡོ.

གོནསོཏི གོཎཔིཊྛིཀོ མཎྜལསཔྤོ, ཡསྶ པིཊྛེ ལོཧིཏཀཱནི མཎྜལཱནི དིསྶནྟི. ཀལལཔརིཙཡཝཱརིཙཱརམཙྪགྒཧཎེན ཀིཉྩཱཔི སམུདྡེ མཧཱམུཁཱ ཧཏྠིསརཱིརམྤི ཨེཀཔྤཧཱརེན གིལིཏུཾ སམཏྠཱ ཏཏོ མཧནྟཏརཱ ཙ གཧིཏཱ ཧོནྟི, ཏེསཾ མུཁཱདཱིསུ མེཐུནདྷམྨོ ན སམྦྷཝཏཱིཏི ཏཏྠ ཋཱནཔརིཙྪེདོ ནཏྠཱིཏི ཨེཀེ, ཝིཙཱརེཏྭཱ གཧེཏབྦཾ. ཨེཏམེཝ ཧཱིཏི ཨནནྟརཾ སནྡྷཱཡ. སདྡྷིཾ ཡོཛནཱཡ ཨཀྑརཡོཛནཱཡ. ‘‘པཉྙཏྟཾ པན སིཀྑཱཔདཾ སབྦེཧིཔི ལཛྫཱིཔུགྒལེཧི སམཾ སིཀྑིཏབྦབྷཱཝཏོ སམསིཀྑཏཱ ནཱམཱཏི ཝུཏྟཏྟཱ སབྦསིཀྑཱཔདཾ སབྦབྷིཀྑཱུཧི སིཀྑིཏབྦཾ. ན ཧི ཀསྶཙི ཨཱུནམདྷིཀཾ ཝཱ ཨཏྠཱི’’ཏི ཏསྶ གཎྛིཔདེ ཝུཏྟཾ. པརིཝཱརེ པན –

‘‘ན ཨུཀྑིཏྟཀོ ན ཙ པན པཱརིཝཱསིཀོ,

ན སངྒྷབྷིནྣོ ན ཙ པན པཀྑསངྐནྟོ;

སམཱནསཾཝཱསཀབྷཱུམིཡཱ ཋིཏོ,

ཀཐཾ ནུ སིཀྑཱཡ ཨསཱདྷཱརཎོ སིཡཱ’’ཏི. (པརི. ༤༧༩) –

ཝུཏྟཾ. ཏདཊྛཀཐཱཡ ཙ ‘‘ཨཡཾ པཉྷཱ ནཧཱཔིཏཔུབྦཀཾ སནྡྷཱཡ ཝུཏྟཱ. ཨཡཉྷི ཁུརབྷཎྜཾ པརིཧརིཏུཾ ན ལབྷཏི, ཨཉྙེ ལབྷནྟི. ཏསྨཱ སིཀྑཱཡ ཨསཱདྷཱརཎོ’’ཏི ཝུཏྟཾ. ཏཾ སབྦཾ ཡཐཱ སཾསནྡཏི སམེཏི, ཏཐཱ ཝེདིཏབྦཾ ¶ . བྷིཀྑུནཱིནཾཡེཝ སཱདྷཱརཎཱནི སིཀྑཱཔདཱནིཔི བྷིཀྑུ སིཀྑཏི, ཨེཝམཉྙོཔི ཨནྷཱཔིཏཔུབྦཀོ བྷིཀྑུ ཏཾ སིཀྑཱཔདཾ སིཀྑཏི ཨེཝ ཏདཏྠཀོསལླཏྠནྟི ¶ ཀཏྭཱ སབྦམྤི སིཀྑཱཔདཾ སམསིཀྑཏཱ ནཱམཱཏི. ཡཾ ཏཾ ཝུཏྟནྟི སམྦནྡྷོ. ‘‘ཏིསྶོ ཨིཏྠིཡོ’’ཏིཨཱདིཝིབྷངྒོཏཾནིཡཱམཀོཏིལཀྑཎཏྟཱ ཝཏྠུནིཡམནཏྠཾ ཝུཏྟཾ. ཏེན ཨམནུསྶིཏྠིཔྤསངྒེན ཀཏེ སུཝཎྞརཛཏཱདིམཡེ པཊིཀྑིཔཏི. ཨིཏོ པཊྛཱཡ ཡེ ཙ ‘‘ཏཡོ ཨཏྠཝསེ པཊིཙྩ ཝིབྷངྒོ པཝཏྟཏཱི’’ཏི པུབྦེ ཝུཏྟཱ, ཏེ ཡཐཱསམྦྷཝཾ ཡོཛེཏྭཱ ཝེདིཏབྦཱ.

པཋམཙཏུཀྐཀཐཱཝཎྞནཱ

༥༧. ཨཱཔཏྟི པཱརཱཛིཀཱ ཨསྶ ཧོཏཱིཏི ཨེཏྠ ཡསྨཱ སཱ ཨཀུསལཱ ཨཱཔཏྟི ཏསྶ བྷིཀྑུནོ སཱིལསམྦྷཝཾ ཨབྷིབྷཝཏི, རཱགཱབྷིབྷཝེ ཏསྨིཾ པཱརཱཛིཀཱཏི ལདྡྷནཱམཱ པུབྦབྷཱགེ ཨཱཔནྣཱ དུཀྐཊཐུལླཙྩཡཱདཡོ ཨཱཔཏྟིཡོ ཨབྷིབྷཝིཏྭཱ ཝིནཱསེཏྭཱ སཡམེཝེཀཱ ཨསྶ. ཝཏྠུནཱ སབྷཱགཱཧི ཝཱ ཨསབྷཱགཱཧི ཝཱ ཨཉྙཱཧི པཱརཱཛིཀཏྟེན སམཱནཛཱཏིཀཱཧི ཨཱཔཏྟཱིཧི སཡཾ ནཱབྷིབྷཝཱིཡཏཱིཏི ཨེཀེ. ཏཾ ཏཾ པུབྦེ ཝིཙཱརིཏམེཝ. ཡདཱ པན ཙཏསྶོཔི པཱརཱཛིཀཱཔཏྟིཡོ ཨེཀཏོ ཧོནྟི, ཏདཱ ཏཱ ཏསྶ བྷིཀྑུནོ བྷིཀྑུབྷཱཝཾ ཨབྷིབྷཝནྟི, ཨབྷིཀྑུཾ ཀརོནྟི, ཨནུཔསམྤནྣཾ ཀརོནྟི, སམཉྙཱཡཔི བྷིཀྑུ ན ཧོཏི. ཨོམསཝཱདཔཱཙིཏྟིཡཾ ན ཛནེཏཱིཏི ཨེཀེ. དུཏིཡེན ཨཏྠཝིཀཔྤེན པཱརཱཛིཀསྶ དྷམྨསྶ པཏྟི སམྤཏྟི ཨཱཔཏྟཱིཏི ཨཏྠོ སངྒཧིཏོ ཧོཏཱིཏི ཀཏྭཱ ཨཱཔཏྟིསམྤཏྟིཝཱདཱིནཾ སངྒཧིཏོ ཧོཏི, ཡུཛྫཏི ཙེསཱ པརསཱཔེཀྑཱ. སཱཔཏྟིཀོ ནཱམ སོ བྷིཀྑུ ཧོཏི, ཨཉྙཐཱ ཏསྶ ཁཎབྷངྒེན ཨནཱཔཏྟིཀོ བྷཝེཡྻ, ན ཙ ཧོཏཱིཏི. ཀདཱ པན ཧོཏཱིཏི? ཡདཱ ཀཱལཾ ཀརོཏི, ཡདཱ ཙ སིཀྑཾ པཙྩཀྑཱཡ སཱམཎེརཱདིབྷཱུམིཡཾ ཏིཊྛཏི. ཡདི ཨེཝཾ སིཀྑཱཡ པཙྩཀྑཱཏཱཡ པཱརཱཛིཀཱཔཏྟི པཙྩཀྑཱཏཱ ཧོཏི སིཀྑཱ ཙཱཏི ཨུབྷཡཾ ཏསྶ ཨེཀཏོ ཨཏྠི, སངྒྷཱདིསེསཱདིཨཱཔཏྟི སིཀྑཱཔཙྩཀྑཱནེན ཀིཾ ན པཙྩཀྑཱཏཱ, པུན ཨུཔསམྤནྣེན དེསཱཔེཏབྦཱ. སིཀྑཱཔཙྩཀྑཱནཾ ཨཱཔཏྟིཝུཊྛཱནཾ ཛཱཏཾ, ཨབྷིཀྑུ ཨཱཔཏྟིཏོ ཝུཊྛཱཏི, གཧཊྛོ ཝུཊྛཱཏི, སཱམཎེརོ ཝུཊྛཱཏི, ཏཏོ ¶ ཝིནཡཝིརོདྷཱ ན ཝུཊྛཱཏི. ཧཉྩི པན ཝུཊྛཱཏི གཧཊྛོ, སཱམཎེརོ ཝཱ སཱིལསམྤནྣོཝ ཛྷཱནལཱབྷཱི ཨསྶ, སོཏཱཔཏྟིཕལསྶ ཝཱ ཨརཧཏྟཕལསྶ ཝཱ ལཱབྷཱི ཨསྶ, པཱརཱཛིཀཱཔཏྟིཡཱ སཱཔཏྟིཀོ ཨརཧཱ ཨསྶ. ཨུཀྑིཏྟཀོ ཨུཔྤབྦཛིཏོ ཝཱ པརིཝཱསཱརཧོ མཱནཏྟཱརཧོ ཨུཔྤབྦཛིཏོ ཝཱ སཱིལསམྤནྣོ ཛྷཱནལཱབྷཱི ཨསྶ, སོཏཱཔཏྟིཕལསྶ, ཨརཧཏྟཕལསྶ ཝཱ ལཱབྷཱི ཨསྶ, སཱཔཏྟིཀོ སནྟརཱཡིཀོ ཨརཧཱ ཨསྶ, སོ པུན ཨུཔསམྤནྣོ པརིཝཱསཾ, མཱནཏྟཾ ཝཱ དཏྭཱ ཨབྦྷེཏབྦོ ཨུཀྑིཏྟཀོ ཨོསཱརེཏབྦོཏི སམཱནོ ཨཡཾ ཨུཔལབྦྷོཏི.

ཨཡཾ པནེཏྠ ཝིནིཙྪཡོ – པཱརཱཛིཀཾ དྷམྨཾ ཨཱཔནྣོ ཡཱཝ བྷིཀྑུབྷཱཝཾ པཊིཛཱནཱཏི སཱདིཡཏི ¶ སཾཝཱསཾ, སནྟརཱཡིཀཏྟཱ ཨུཔོསཐདིཝསཱདཱིསུ གཧཊྛསྶ ཝིཡ སཡམེཝ སཱིལཾ སམཱདིཡནྟསྶཔི ན སཱིལསམཱདཱནཾ རུཧཏི, པགེཝ ཛྷཱནཱདཱིནི. སོ ཙེ བྷིཀྑུབྷཱཝཾ ན སཱདིཡཏི ན པཊིཛཱནཱཏི སཾཝཱསཾ ན སཱདིཡཏི, ཀེཝལཾ བྷིཀྑཱུནཾ ཨཱཝིཀཏྭཱ རཱཛཝེརིཙོརཱདིབྷཡེན ཀཱསཱཝཾ ན པརིཙྩཛཏི, ཨནུཔསམྤནྣོཝ ཧོཏི སཧསེཡྻཱདིཾ ཛནེཏི, སཱིལསྶ ཙ ཛྷཱནཱདཱིནཉྩ བྷཱགཱི ཧོཏི. ཝུཏྟཉྷེཏཾ བྷགཝཏཱ –

‘‘ཨཱཔནྣེན ཝིསུདྡྷཱཔེཀྑེན སནྟཱི ཨཱཔཏྟི ཨཱཝིཀཱཏབྦཱ, ཨཱཝིཀཏཱ ཧིསྶ ཕཱསུ ཧོཏི, པཋམསྶ ཛྷཱནསྶ ཨདྷིགམཱཡཱ’’ཏིཨཱདི (མཧཱཝ. ༡༣༤-༡༣༥).

ཏཏྠ སནྟཱི ཨཱཔཏྟཱིཏི སཱཝསེསཱནཝསེསཔྤབྷེདཱ སབྦཱཔི ཨཱཔཏྟི ཨཱཔནྣཱ ཨདྷིཔྤེཏཱ. ཨེཝཾ སནྟེཔི པགེཝ གཧཊྛཱདིབྷཱུམིཡཾ ཋིཏོ ཛྷཱནཱདཱིནཾ བྷཱགཱི ཨསྶ སུདྡྷནྟེ ཋིཏཏྟཱ, ཡོ པན ཨུཀྑིཏྟཀོ ཨནོསཱརིཏོ, གརུདྷམྨཾ ཝཱ ཨཱཔཛྫིཏྭཱ ཨཝུཊྛིཏོ སིཀྑཾ པཙྩཀྑཱཡ གཧཊྛཱདིབྷཱུམིཡཾ ཋིཏོ, ན སོ ཛྷཱནཱདཱིནཾ བྷཱགཱིཡེཝ བྷཝཏི ན སུདྡྷནྟེ ཋིཏཏྟཱ, སཀརཎཱིཡཏྟཱ ཙ, ཏེནེཝ བྷགཝཏཱ ‘‘སོ པུན ཨུཔསམྤནྣོ ཨོསཱརེཏབྦོ’’ཏི ཝུཏྟཾ, ཏསྨཱ ཏསྶ པུགྒལསྶ ཏེ བྷིཀྑུཀཱལེ ཨཱཔནྣཱ ཨནྟརཱཡིཀཱ དྷམྨཱ ཝིཔྤཊིསཱརཾ ཛནཡིཏྭཱ ཨཝིཔྤཊིསཱརམཱུལཀཱནཾ པཱམོཛྫཱདཱིནཾ སམྦྷཝཾ ནིཝཱརེནྟི, ནོ སཀཱསཱཝེསུཡེཝ. ནོ ཙེ ནིཝཱརེནྟི, སམྦྷཝཏི. གརུཀཾ ཨཱཔཛྫིཏྭཱ བྷིཀྑཱུནཾ ཨཱཝིཀཏྭཱ ཙེ ཨུཔྤབྦཛིཏོ, པཀཏཏྟོ ཧུཏྭཱ ¶ ཨུཔྤབྦཛིཏོཏི ཀཏྭཱ ཛྷཱནཱདཱིནཾ བྷཱགཱི ཨསྶ ‘‘ཨཱཝིཀཏཱ ཧིསྶ ཕཱསུ ཧོཏཱི’’ཏི ཝུཏྟཏྟཱ. པགེཝ བྷིཀྑུཀཱལེ, ན ཏྭེཝ ཨུཀྑིཏྟཀོ སཀརཎཱིཡཏྟཱཏི ཨེཀེ. ཏདནུཝཏྟནཀོ པན ཏཾ ལདྡྷིཾ པཧཱཡ བྷཱགཱི ཨསྶ. ན, བྷིཀྑཝེ, སགཧཊྛཱཡ པརིསཱཡ (མཧཱཝ. ༡༥༤) སིཀྑཱཔཙྩཀྑཱཏཀསྶ ཨནྟིམཝཏྠུཾ ཨཛ྄ཛྷཱཔནྣཀསྶ ནིསིནྣཔརིསཱཡཱཏི (མཧཱཝ. ༡༨༣) ཨེཏྠ གཧཊྛོ ནཱམ པཀཏིཡཱ གིཧིལིངྒེ ཋིཏོ. སིཀྑཾ པཙྩཀྑཱཡ བྷིཀྑུལིངྒེ ཋིཏོ སིཀྑཱཔཙྩཀྑཱཏཀོ. སོ སཀཱསཱཝེསུ སཱཔེཀྑཏྟཱ སཱམཎེརབྷཱཝཾ པཏྠཡམཱནོ ཏེནེཝ ལིངྒེན ཏཱིཧི སརཎགམནེཧི སཱམཎེརོ ཧོཏི. ཨནྟིམཝཏྠུཾ ཨཛ྄ཛྷཱཔནྣོ སཾཝཱསཾ སཱདིཡནྟོཔི པཙྪཱ པུབྦེ ཝུཏྟཀྐམེན ཨསཱདིཡིཏྭཱ སཱམཎེརབྷཱཝཾ པཏྠཡམཱནོ སིཀྑཱཔཙྩཀྑཱཏཀོ ཝིཡ ཏཱིཧི སརཎགམནེཧི སཱམཎེརོ ཧོཏི, ན པུན ཀཱསཱཝཾ པཊིགྒཱཧཱཔེཏབྦོ བྷིཀྑཱུཧི པཋམཾ དིནྣལིངྒེཡེཝ ཋིཏཏྟཱ. ཡོ པན པཱརཱཛིཀོ ཙོདིཡམཱནོ པརཱཛིཏྭཱ ‘‘ཧནྡ, བྷནྟེ, སཱམཎེརོ བྷཝཱམི, སརཎཱནི དེཐཱ’’ཏི ཝདཏི, ‘‘སཱདྷུ གཎྷཱཧཱི’’ཏི ན ཝཏྟབྦོ, གིཧིལིངྒེ ཋཔེཏྭཱ པུན ཀཱསཱཡཱནི པཊིགྒཱཧཱཔེཏྭཱ པབྦཱཛེཏབྦོ. ‘‘ཨིདཾ པན སབྦཾ ཨཏྟནོ མཏིཡཱ ཝུཏྟཏྟཱ ཝིཙཱརེཏྭཱ གཧེཏབྦ’’ནྟི ཨཱཙརིཡོ ཝདཏི. པཝེསནཾ ནཱམ ཨངྒཛཱཏཾ པཝེསེནྟསྶ ཨངྒཛཱཏེན སམྥུསནཾ. པཝིཊྛཾ ནཱམ ཡཱཝ མཱུལཱ པཝེསེནྟསྶ ཝིཔྤཀཏཀཱལེ ཝཱཡཱམཀཱལོ. སུཀྐཝིསྶཊྛིསམཡེ ཨངྒཛཱཏཾ ཋིཏཾ ནཱམ. ཨུདྡྷརཎཾ ནཱམ ནཱིཧརཎཀཱལོ. གཎྛིཔདེ པན ‘‘ཝཱཡཱམཏོ ཨོརམིཏྭཱ ཋཱནཾ ཋིཏཾ ནཱམཱ’’ཏི ཝུཏྟཾ, ཏཾ ཨསངྐརཏོ དསྶནཏྠཾ ཝུཏྟཾ. པཝེསནཔཝིཊྛཨུདྡྷརཎཀཱལེསུཔི སུཀྐཝིསྶཊྛི ཧོཏིཡེཝ.

པཋམཙཏུཀྐཀཐཱཝཎྞནཱ ནིཊྛིཏཱ.

ཨེཀཱུནསཏྟཏིདྭིསཏཙཏུཀྐཀཐཱཝཎྞནཱ

༥༩-༦༠. ‘‘མཏཾ ཡེབྷུཡྻེན ཨཀྑཱཡིཏ’’ནྟི ཝཙནཏོ ཨམཏཾ ཡེབྷུཡྻེན ཁཱཡིཏམྤི པཱརཱཛིཀཝཏྠུམེཝཱཏི དསྶེཏི. སབྦསོ ཁཱཡིཏཾ, ཨུཔྤཱཊིཏཾ ཝཱ ཐུལླཙྩཡཝཏྠུམེཝཱཏི དསྶེཏི, ཏཐཱ ‘‘ཡེབྷུཡྻེན ཁཱཡིཏ’’ནྟི ¶ ཝཙནཏོ མཏཾ སབྦཁཱཡིཏཾ, ཨུཔྤཱཊིཏཾ ཝཱ དུཀྐཊཝཏྠཱུཏི དསྶེཏི. ན ཙ སཱཝསེསཾ པཉྙཔེནྟི. ཀིཾ ཀཱརཎཱ? ཨིདཉྷི སིཀྑཱཔདཾ ལོཀཝཛྫཾ, ན པཎྞཏྟིཝཛྫཾ. ཏཏྠ སིཀྑཱཔདནྟི པཱརཱཛིཀཾ ཨདྷིཔྤེཏཾ. ཏཏྠ ཐུལླཙྩཡམྤི ཧི ལོཀཝཛྫཾ, ན པཎྞཏྟིཝཛྫཾ. ཨཐ ཝཱ ཨུབྷཡམྤི ཨནཝསེསཾ པཉྙཏྟཾ. པཱརཱཛིཀཁེཏྟེ ཧི ཧེཊྛིམཀོཊིཾ པཱཔེཏྭཱ ཋཔིཏེ ཏཏོ པརཾ ཐུལླཙྩཡནྟི པཉྙཏྟམེཝ ཧོཏི. ཏཏྠ ཐུལླཙྩཡཁེཏྟམྤི པཱརཱཛིཀཁེཏྟཾ ཝིཡ ཧེཊྛིམཔརིཙྪེདེན ཝུཏྟནྟི ཝེདིཏབྦཾ. ཨུཔཌྜྷཀྑཱཡིཏེ ཐུལླཙྩཡནྟི ཡཏྠ ནིམིཏྟཾ ཁཱཡིཏཾ, ཏཾ དུཀྐཊཝཏྠཱུཏི ཝེདིཏབྦཾ. ཨེཏྠཱཧ – པཎྞཏྟིཝཛྫཾ ཀིཾ སཱཝསེསམེཝ བྷགཝཱ པཉྙཱཔེཏཱིཏི? ན. ཨེཀཾསཏོ པན ཡཐཱསམྦྷཝཾ ཏཏྠ ཏཏྠ པཀཱསཡིསྶཱམ, ཀིམཏྠཾ པན བྷགཝཱ ཨུཔཌྜྷཀྑཱཡིཏེ པཱརཱཛིཀཾ ན པཉྙཱཔེསཱིཏི ཨཡཾ ཏཱཝ ཨཔུཙྪཱ བུདྡྷཝིསཡཏྟཱ ཝིནཡཔཉྙཏྟིཡཱ. ཨིདཾ པནེཏྠ ཀཱརཎཔཏིརཱུཔཀཾ ‘‘ཨུཔཌྜྷབྷཱཝསྶ དུབྦིནིཙྪཡཏྟཱ’’ཏི. ཡེབྷུཡྻེན ཁཱཡིཏཾ ནཱམ ཝཙྩམགྒཔསྶཱཝམགྒམུཁཱནཾ ཙཏཱུསུ ཀོཊྛཱསེསུ དྭེ ཀོཊྛཱསེ ཨཏིཀྐམྨ ཡཱཝ ཏཏིཡཀོཊྛཱསཔརིཡོསཱནཱ ཁཱདིཏཾ, ཏཏིཡཀོཊྛཱསཾ ཨཏིཀྐམྨ ཡཱཝ ཙཏུཏྠཀོཊྛཱསཔརིཡོསཱནཱ དུཀྐཊཝཏྠུ.

ཡདིཔི ནིམིཏྟཾ སབྦསོ ཁཱཡིཏནྟི ‘‘ཛཱིཝམཱནཀསརཱིརཾཡེཝ སནྡྷཱཡ ཝུཏྟ’’ནྟི ཝདནྟི, ཏཾ ཝཱིམཾསིཏྭཱ གཧེཏབྦཾ. ཨལླསརཱིརེཏི ཨབྷིནཝེ, ཨཀུཐིཏེ ཝཱ མནུསྶཱནཾ ཛཱིཝམཱནསརཱིརེ ཨཀྑིནཱསཱདཱིསུ ཐུལླཙྩཡམེཝ. ཏིརཙྪཱནགཏཱནཾ ཧཏྠིཨསྶཱདཱིནཾ ནཱསཱཡ ཝཏྠིཀོསེ ཙ ཐུལླཙྩཡནྟི ‘‘ཨམགྒེན ཨམགྒཾ པཝེསེཏི, ཨཱཔཏྟི ཐུལླཙྩཡསྶཱ’’ཏི ཨིམཱཡ པཱལི༹ཡཱ ཨཏྠཝིསེསེནེཏྠ ཝུཏྟཾ. ཨུཔཀཙྪཀཱདཱིསུ དུཀྐཊཾ, སབྦེསམྤི ཏིརཙྪཱནགཏཱནཾ ཨཀྑིཀཎྞཝཎེསུ དུཀྐཊཾ, ཨཝསེསསརཱིརེཔི དུཀྐཊམེཝཱཏི ཨིདཾ ཝིནཱིཏཝཏྠུསྨིཾ ‘‘ཨེཧི, བྷནྟེ, མེཐུནཾ དྷམྨཾ པཊིསེཝཱ’’ཏི ¶ . ‘‘ཨལཾ བྷགིནི ནེཏཾ ཀཔྤཏཱི’’ཏི (པཱརཱ. ༧༩) ཨིམིནཱ ཏཱཝ མེཐུནརཱགཱབྷཱཝོ དསྶིཏོ ཧོཏི. ‘‘ཨེཧི, བྷནྟེ, ཨཱུརུནྟརིཀཱཡ གྷཊྚེཧི…པེ… སོ བྷིཀྑུ ཏཐཱ ཨཀཱསཱི’’ཏི ཨིམིནཱ ཏཱཝ མོཙནསྶཱདོ དསྶིཏོ ཧོཏི, ཏེནེཝཱཧ བྷགཝཱ ‘‘ཨཱཔཏྟི སངྒྷཱདིསེསསྶཱ’’ཏི. ‘‘ཡོ པན མེཐུནརཱགེན ཨཱུརུནྟརིཀཱཡ གྷཊྚེཏི, ཏསྶ དུཀྐཊ’’ནྟི སིདྡྷནྟི ཀཏྭཱ ཝུཏྟཾ.

མནུསྶཱནཾ ¶ ཨཀྑིཀཎྞཝཎཱདི ཐུལླཙྩཡཝཏྠུ, ཏིརཙྪཱནགཏཱནཾ དུཀྐཊཝཏྠཱུཏི ཨེཏྠ དུཝིཉྙེཡྻོ པཱལི༹ལེསོ, ཏསྨཱ ‘‘ན ཙ, བྷིཀྑཝེ, རཏྟཙིཏྟེན ཨངྒཛཱཏཾ ཚུཔིཏབྦཾ, ཡོ ཚུཔེཡྻ, ཨཱཔཏྟི ཐུལླཙྩཡསྶཱ’’ཏི ཝཙནཏོ རཏྟཙིཏྟེན ཨཀྑིཀཎྞཝཎཾ ཚུཔནྟསྶ དུཀྐཊནྟི སིདྡྷནྟི ཨཡཾ ཙམྨཀྑནྡྷཀེ པཱལི༹ལེསོཏི ཝེདིཏབྦོ. ‘‘ཛཱིཝམཱནཀཔུརིསསྶཱཏི ཛཱིཝམཱནཀསདྡོ མཏེ ཝཏྟབྦམེཝ ནཏྠཱིཏི ཉཱཔནཏྠཾ ཝུཏྟོ’’ཏི ཝདནྟི. མཧཱཨཊྛཀཐཱཡཾ པནཱཏི ཨིདཾ ཀིཉྩཱཔི ‘‘ཀཏྭཱ མཧཱཨཊྛཀཐཾ སརཱིར’’ནྟི ཝུཏྟཾ, ཨཐ ཁོ སེསཨཊྛཀཐཱསུ ‘‘མེཐུནརཱགེན མུཁེནཱ’’ཏི ཝཙནཱབྷཱཝཏོ ཏཏྠེཝ བྷཱཝཏོ ཏཾ ཝཙནཾ པཱལི༹ཝཙནེན སཾསནྡིཏྭཱ དསྶནཏྠཾ ཝུཏྟཾ. ཨནུགཎྛིཔདེ པན ‘‘ཏཾ སབྦམྤཱིཏི མཧཱཨཊྛཀཐཱཡམེཝ མེཐུནརཱགེན ཨིཏྠིཡཱ ནིམིཏྟཾ ཨཔྤཝེསེནྟོ ཚུཔཏི, ཐུལླཙྩཡ’’ནྟི ཙ ཝུཏྟཾ. ‘‘མེཐུནརཱགེན མུཁེནཱ’’ཏིཔི ཀཏྠཙི, པཱལི༹ཡཾ ཨཝིསེསེན ‘‘ན ཙ, བྷིཀྑཝེ, རཏྟཙིཏྟེན ཨངྒཛཱཏཾ ཚུཔིཏབྦ’’ནྟི ཝུཏྟཾ, ཏསྨཱ ‘‘ཏཾ སབྦ’’ནྟི ཝུཏྟཾ. པུརིམཾ པསཾསནྟཱིཏི ཏིརཙྪཱནགཏི…པེ… ཝུཏྟནཡེནེཝ ཐུལླཙྩཡཾ, ཀཱཡསཾསགྒརཱགེན དུཀྐཊནྟིཨཱདིཨཊྛཀཐཱཝཙནེཧི སཾསནྡནཏོ. ‘‘ཏཾ སབྦམྤི…པེ… པུརིམཾ པསཾསནྟཱི’’ཏི ཨིདཾ སངྒཱིཏིཏོ པཙྪཱ སཱིཧལ༹དཱིཔཀེཧི ཨཱཙརིཡེཧི པཱལི༹ཡཱ, ཨཊྛཀཐཱཡཉྩ ཝུཏྟཝཙནཾ སཾསནྡིཏྭཱ ཝུཏྟཝིནིཙྪཡོཏི ཝུཏྟཾ. ཨེཏྠ ཨིཏརཐཱ ཧཱིཏི པཀཏིམུཁེན. ཀསྨཱ དུཀྐཊནྟི ཙེ? ‘‘ཨངྒུལིབཱིཛཱདཱིནི པཝེསེནྟསྶ དུཀྐཊ’’ནྟི ཝུཏྟཏྟཱ ཡུཏྟཾ. ཏིརཙྪཱནགཏིཏྠིཡཱ པསྶཱཝམགྒནྟི ཨེཏྠ མཧཱཨཊྛཀཐཱཡམྤི པུབྦེ ‘‘ནིམིཏྟ’’ནྟི ཝཏྭཱ ཨེཏྠ ‘‘པསྶཱཝམགྒ’’ནྟི ཝུཏྟཏྟཱ ཨཝསེསནིམིཏྟེ དུཀྐཊནྟི ཡུཏྟཾ ཝིཡ དིསྶཏི. ཝུཏྟནཡེནེཝཱཏི མེཐུནརཱགེན. ཐུལླཙྩཡནྟི ཙ ཁནྡྷཀེ པསྶཱཝནིམིཏྟཝསེནེཝཱགཏཏྟཱ ཨུཔཔརིཀྑིཏྭཱ གཧེཏབྦཾ.

ཨེཀཱུནསཏྟཏིདྭིསཏཙཏུཀྐཀཐཱཝཎྞནཱ ནིཊྛིཏཱ.

སནྠཏཙཏུཀྐབྷེདཀཀཐཱཝཎྞནཱ

༦༡-༢. ཨིཏྠིནིམིཏྟཾ ཁཱཎུཾ ཀཏྭཱཏི ཨིཏྠིནིམིཏྟསྶ ཨནྟོ ཁཱཎུཾ པཝེསེཏྭཱ སམཏལཾ ཝཱ ཀཏྭཱ ཨཏིརིཏྟཾ ཝཱ ཁཱཎུཾ གྷཊྚེནྟསྶ དུཀྐཊཾ པཝེསཱབྷཱཝཱ. ཨཱིསཀཾ ཨནྟོ པཝེསེཏྭཱ ¶ ཋིཏཾ ཁཱཎུམེཝ ཙེ ཨངྒཛཱཏེན ¶ ཚུཔཏི, པཱརཱཛིཀཾ. ‘‘ཨུཔྤལགནྡྷཱ ཨུཔྤལབྷཱཝཱ’’ཏིཔི དཱིཔཝཱསིནོ པཋནྟི ཀིར. སུཏྟཾ བྷིཀྑུམྷཱིཏི སེཝནཙིཏྟཾ ཨུཔཊྛིཏེཏི (པཱརཱ. ༥༧) ཨེཏྠ ཝིཡ. ‘‘སུཏྟབྷིཀྑུམྷཱི’’ཏི ཙ པཋནྟི, ཏཾ ཨུཛུཀམེཝ.

སནྠཏཙཏུཀྐབྷེདཀཀཐཱཝཎྞནཱ ནིཊྛིཏཱ.

པདབྷཱཛནཱིཡཝཎྞནཱ ནིཊྛིཏཱ.

པཀིཎྞཀཀཐཱཝཎྞནཱ

པཀིཎྞཀེ ཡཱནི སིཀྑཱཔདཱནི ‘‘ཀིརིཡཱནཱི’’ཏི ཝུཙྩནྟི, ཏེསཾ ཝསེན ཀཱཡོ, ཝཱཙཱ ཙ སཧ ཝིཉྙཏྟིཡཱ ཝེདིཏབྦཱ. ཨཀིརིཡཱནཾ ཝསེན ཝིནཱ ཝིཉྙཏྟིཡཱ ཝེདིཏབྦཱ, ཙིཏྟཾ པནེཏྠ ཨཔྤམཱཎཾ བྷཱུཏཱརོཙནསམུཊྛཱནསྶ ཀིརིཡཏྟཱ, ཨཙིཏྟཀཏྟཱ ཙ. ཏཏྠ ཀིརིཡཱ ཨཱཔཏྟིཡཱ ཨནནྟརཙིཏྟསམུཊྛཱནཱ ཝེདིཏབྦཱ. ཨཝིཉྙཏྟིཛནཀམྤི ཨེཀཙྩཾ བཱཧུལླནཡེན ‘‘ཀིརིཡ’’ནྟི ཝུཙྩཏི, ཡཐཡིདཾ པཋམཔཱརཱཛིཀཾ ཝིཉྙཏྟིཡཱ ཨབྷཱཝེཔི ‘‘སོ ཙེ སཱདིཡཏི, ཨཱཔཏྟི པཱརཱཛིཀསྶཱ’’ཏི ཧི ཝུཏྟཾ ‘‘ན སཱདིཡཏི ཨནཱཔཏྟཱི’’ཏི ཙ. ཝིཉྙཏྟིསངྑཱཏཱཔི ཀིརིཡཱ ཝིནཱ སེཝནཙིཏྟེན ན ཧོཏི ཙིཏྟཛཏྟཱ, ཝིཀཱརརཱུཔཏྟཱ, ཙིཏྟཱནུཔརིཝཏྟིཀཏྟཱ ཙ. ཏསྨཱ ཀིརིཡཱསངྑཱཏམིདཾ ཝིཉྙཏྟིརཱུཔཾ ཨིཏརཾ ཙིཏྟཛརཱུཔཾ ཝིཡ ཛནཀཙིཏྟེན ཝིནཱ ན ཏིཊྛཏི, ཨིཏརཾ སདྡཱཡཏནཾ ཏིཊྛཏི, ཏསྨཱ ཀིརིཡཱཡ སཏི ཨེཀནྟཏོ ཏཛྫནཀཾ སེཝནཙིཏྟཾ ཨཏྠིཡེཝཱཏི ཀཏྭཱ ན སཱདིཡཏི ཨནཱཔཏྟཱིཏི ན ཡུཛྫཏི. ཡསྨཱ ཝིཉྙཏྟིཛནཀམྤི སམཱནཾ སེཝནཙིཏྟཾ ན སབྦཀཱལཾ ཝིཉྙཏྟིཾ ཛནེཏི, ཏསྨཱ ཝིནཱཔི ཝིཉྙཏྟིཡཱ སཡཾ ཨུཔྤཛྫཏཱིཏི ཀཏྭཱ ‘‘སཱདིཡཏི, ཨཱཔཏྟི པཱརཱཛིཀསྶཱ’’ཏི ཝུཏྟཾ. ནུཔྤཛྫཏི ཙེ, ན སཱདིཡཏི ནཱམ, ཏསྶ ཨནཱཔཏྟི, ཏེནེཝ བྷགཝཱ ‘‘ཀིཾཙིཏྟོ ཏྭཾ བྷིཀྑཱུ’’ཏི ཙིཏྟེནེཝ ཨཱཔཏྟིཾ པརིཙྪིནྡཏི, ན ཀིརིཡཱཡཱཏི ཝེདིཏབྦཾ. ཨེཏྟཱཝཏཱ ཚ ཨཱཔཏྟིསམུཊྛཱནཱནི, ཏཱནི ཨེཝ ཨཱཔཏྟིཀརཱ དྷམྨཱ ནཱམཱཏི ཙ, ཙཏཱུཧཱཀཱརེཧི ཨཱཔཏྟིཾ ཨཱཔཛྫཏི ཀཱཡེན ཝཱཙཱཡ ཀཱཡཝཱཙཱཧི ཀམྨཝཱཙཱཡ ཨཱཔཛྫཏཱིཏི ཙ ཨེཏཱནི སུཏྟཔདཱནི ཨཝིརོདྷིཏཱནི ཧོནྟི, ཨཉྙཐཱ ཝིརོདྷིཏཱནི. ཀཐཾ? ཡཉྷི ཨཱཔཏྟིཾ ཀམྨཝཱཙཱཡ ཨཱཔཛྫཏི, ན ཏཏྠ ཀཱཡཱདཡོཏི ཨཱཔནྣཾ, ཏཏོ ¶ ཀམྨཝཱཙཱཡ སདྡྷིཾ ཨཱཔཏྟིཀརཱ དྷམྨཱ སཏྟཱཏི ཨཱཔཛྫཏི, ཨཐ ཏཏྠཱཔི ཀཱཡཱདཡོ ཨེཀཏོ ཝཱ ནཱནཱཏོ ཝཱ ལབྦྷནྟི. ‘‘ཙཏཱུཧི ཨཱཀཱརེཧཱི’’ཏི ན ཡུཛྫཏི, ‘‘ཏཱིཧཱཀཱརེཧི ཨཱཔཏྟིཾ ཨཱཔཛྫཏཱི’’ཏི ཝཏྟབྦཾ སིཡཱཏི ཨེཝཾ ཝིརོདྷིཏཱནི ཧོནྟི. ཀཐཾ ཨཝིརོདྷིཏཱནཱིཏི? སཝིཉྙཏྟིཀཱཝིཉྙཏྟིཀབྷེདབྷིནྣཏྟཱ ཀཱཡཱདཱིནཾ. ཡཱ ཀིརིཡཱ ཨཱཔཏྟི, ཏཾ ཨེཀཙྩཾ ཀཱཡེན སཝིཉྙཏྟིཀེན ཨཱཔཛྫཏི ¶ , ཨེཀཙྩཾ སཝིཉྙཏྟིཡཱ ཝཱཙཱཡ, ཨེཀཙྩཾ སཝིཉྙཏྟིཀཱཧི ཀཱཡཝཱཙཱཧི ཨཱཔཛྫཏི. ཡཱ པན ཨཀིརིཡཱ ཨཱཔཏྟི, ཏཾ ཨེཀཙྩཾ ཀམྨཝཱཙཱཡ ཨཱཔཛྫཏི, ཏཉྩ ཁོ ཨཝསིཊྛཱཧི ཨཝིཉྙཏྟིཀཱཧི ཀཱཡཝཱཙཱཧིཡེཝ, ན ཝིནཱ ‘‘ནོ ཙེ ཀཱཡེན ཝཱཙཱཡ པཊིནིསྶཛྫཏི, ཀམྨཝཱཙཱཔརིཡོསཱནེ ཨཱཔཏྟི སངྒྷཱདིསེསསྶཱ’’ཏི (པཱརཱ. ༤༡༤, ༤༢༡) ཝཙནཏོ. ཨཝིསེསེན ཝཱ ཨེཀཙྩཾ ཨཱཔཏྟིཾ ཀཱཡེན ཨཱཔཛྫཏི, ཨེཀཙྩཾ ཝཱཙཱཡ, ཨེཀཙྩཾ ཀཱཡཝཱཙཱཧི. ཡཾ པནེཏྠ ཀཱཡཝཱཙཱཧི, ཏཾ ཨེཀཙྩཾ ཀེཝལཱཧི ཀཱཡཝཱཙཱཧི ཨཱཔཛྫཏི, ཨེཀཙྩཾ ཀམྨཝཱཙཱཡ ཨཱཔཛྫཏཱིཏི ཨཡམཏྠོ ཝེདིཏབྦོཏི ཨེཝཾ ཨཝིརོདྷིཏཱནི ཧོནྟི.

ཏཏྲཱཡཾ སམཱསཏོ ཨཏྠཝིབྷཱཝནཱ – ཀཱཡེན ཨཱཔཛྫཏཱིཏི ཀཱཡེན སཝིཉྙཏྟིཀེན ཨཀཏྟབྦཾ ཀཏྭཱ ཨེཀཙྩཾ ཨཱཔཛྫཏི, ཨཝིཉྙཏྟིཀེན ཀཏྟབྦཾ ཨཀཏྭཱ ཨཱཔཛྫཏི, ཏདུབྷཡམྤི ཀཱཡཀམྨཾ ནཱམ. ཨཀཏམྤི ཧི ལོཀེ ‘‘ཀཏ’’ནྟི ཝུཙྩཏི ‘‘ཨིདཾ དུཀྐཊཾ མཡཱ, ཡཾ མཡཱ པུཉྙཾ ན ཀཏ’’ནྟི ཨེཝམཱདཱིསུ, སཱསནེ ཙ ‘‘ཨིདཾ ཏེ, ཨཱཝུསོ ཨཱནནྡ, དུཀྐཊཾ, ཡཾ ཏྭཾ བྷགཝནྟཾ ན པུཙྪཱི’’ཏིཨཱདཱིསུ (ཙཱུལ༹ཝ. ༤༤༣), ཨེཝམིདྷ ཝིནཡཔརིཡཱཡེ ཀཱཡེན ཨཀརཎཱིཡམྤི ‘‘ཀཱཡཀམྨ’’ནྟི ཝུཙྩཏི, ཨཡམེཝ ནཡོ ཝཱཙཱཡ ཨཱཔཛྫཏཱིཏིཨཱདཱིསུ. ཏཏྠ སམུཊྛཱནགྒཧཎཾ ཀཏྟབྦཏོ ཝཱ ཨཀཏྟབྦཏོ ཝཱ ཀཱཡཱདིབྷེདཱཔེཀྑམེཝ ཨཱཔཏྟིཾ ཨཱཔཛྫཏི, ན ཨཉྙཐཱཏི དསྶནཏྠཾ. ཀིརིཡཱགྒཧཎཾ ཀཱཡཱདཱིནཾ སཝིཉྙཏྟིཀཱཝིཉྙཏྟིཀབྷེདདསྶནཏྠཾ. སཉྙཱགྒཧཎཾ ཨཱཔཏྟིཡཱ ཨངྒཱནངྒཙིཏྟཝིསེསདསྶནཏྠཾ, ཏེན ཡཾ ཙིཏྟཾ ཀིརིཡཱལཀྑཎེ, ཨཀིརིཡཱལཀྑཎེ ཝཱ སནྣིཧིཏཾ, ཡཏོ ཝཱ ཀིརིཡཱ ཝཱ ཨཀིརིཡཱ ཝཱ ཧོཏི, ན ཏཾ ཨཝིསེསེན ཨཱཔཏྟིཡཱ ཨངྒཾ ཝཱ ཨནངྒཾ ཝཱ ཧོཏི, ཀིནྟུ ཡཱཡ སཉྙཱཡ ‘‘སཉྙཱཝིམོཀྑ’’ནྟི ཝུཙྩཏི, ཏཱཡ སམྤཡུཏྟཾ ཙིཏྟཾ ཨངྒཾ, ཨིཏརཾ ཨནངྒནྟི དསྶིཏཾ ཧོཏི. ཨིདཱནི ¶ ཡེན ཙིཏྟེན སིཀྑཱཔདཾ སཙིཏྟཀཾ ཧོཏི, ཡདབྷཱཝཱ ཨཙིཏྟཀཾ, ཏེན ཏསྶ ཨཝིསེསེན སཱཝཛྫཏྟཱ ལོཀཝཛྫབྷཱཝོཝ ཝུཙྩཏི, ཀིནྟུ སཱཝཛྫཾཡེཝ སམཱནཾ ཨེཀཙྩཾ ལོཀཝཛྫཾ ཨེཀཙྩཾ པཎྞཏྟིཝཛྫནྟི དསྶནཏྠཾ ལོཀཝཛྫགྒཧཎཾ. ཙིཏྟམེཝ ཡསྨཱ ‘‘ལོཀཝཛྫ’’ནྟི ཝུཙྩཏི, ཏསྨཱ མནོཀམྨམྤི སིཡཱ ཨཱཔཏྟཱིཏི ཨནིཊྛཔྤསངྒནིཝཱརཎཏྠཾ ཀམྨགྒཧཎཾ. ཡཾ པནེཏྠ ཨཀིརིཡཱལཀྑཎཾ ཀམྨཾ, ཏཾ ཀུསལཏྟིཀཝིནིམུཏྟཾ སིཡཱཏི ཨནིཊྛཔྤསངྒནིཝཱརཎཏྠཾ ཀུསལཏྟིཀགྒཧཎཾ. ཡཱ པནེཏྠ ཨབྱཱཀཏཱ ཨཱཔཏྟི, ཏཾ ཨེཀཙྩཾ ཨཝེདནམྤི སཉྙཱཝེདཡིཏནིརོདྷསམཱཔནྣོ ཨཱཔཛྫཏཱིཏི ཀཏྭཱ ཝེདནཱཏྟིཀཾ ཨེཏྠ ན ལབྦྷཏཱིཏི ཨནིཊྛཔྤསངྒནིཝཱརཎཏྠཾ ཝེདནཱཏྟིཀགྒཧཎཾ ཀཏནྟི ཝེདིཏབྦཾ. སིཀྑཱཔདཉྷི སཙིཏྟཀཔུགྒལཝསེན ‘‘ཏིཙིཏྟཾ ཏིཝེདན’’ནྟི ལདྡྷཝོཧཱརཾ ཨཙིཏྟཀེནཱཔནྣམྤི ‘‘ཏིཙིཏྟཾ ཏིཝེདན’’མིཙྩེཝ ཝུཙྩཏི. ཏཏྲིདཾ སུཏྟཾ ‘‘ཨཏྠཱཔཏྟི ཨཙིཏྟཀོ ཨཱཔཛྫཏི ཨཙིཏྟཀོ ཝུཊྛཱཏི ¶ (པརི. ༣༢༤). ཨཏྠཱཔཏྟི ཀུསལཙིཏྟོ ཨཱཔཛྫཏི ཀུསལཙིཏྟོ ཝུཊྛཱཏཱི’’ཏིཨཱདི (པརི. ༤༧༠). ཨནུགཎྛིཔདེ པན ‘‘སཉྙཱ སདཱ ཨནཱཔཏྟིམེཝ ཀརོཏི, ཙིཏྟཾ ཨཱཔཏྟིམེཝ, ཨཙིཏྟཀཾ ནཱམ ཝཏྠུཨཝིཛཱནནཾ, ནོསཉྙཱཝིམོཀྑཾ ཝཱིཏིཀྐམཛཱནནཾ, ཨིདམེཏེསཾ ནཱནཏྟ’’ནྟི ཝུཏྟཾ.

སབྦསངྒཱཧཀཝསེནཱཏི སབྦསིཀྑཱཔདཱནཾ སངྒཧཝསེན. བྷིཀྑུནིཡཱ ཙཱིཝརདཱནཱདི ཀིརིཡཱཀིརིཡཏོ. ཛཱཏརཱུཔརཛཏཔཊིགྒཧཎཱདི སིཡཱ ཀིརིཡཏོ. ཨུཔནིཀྑིཏྟཱཔཊིཀྑེཔེ སིཡཱ ཨཀིརིཡཏོ. དེསིཏཝཏྠུཀཔམཱཎཱཏིཀྐནྟཀུཊིཀརཎེ སིཡཱ ཀིརིཡཏོ, ཨདེསིཏཝཏྠུཀཔམཱཎཱཏིཀྐནྟཀརཎེ སིཡཱ ཀིརིཡཱཀིརིཡཏོ. ཡཾ ཙིཏྟངྒཾ ལབྷཏིཡེཝཱཏི ཀཱཡཙིཏྟཾ ཝཱཙཱཙིཏྟནྟི ཨེཝཾ. ཝིནཱཔི ཙིཏྟེནཱཏི ཨེཏྠ ཝིནཱཔི ཙིཏྟེན སཧཱཔི ཙིཏྟེནཱཏི ཨདྷིཔྤཱཡོ. ཡོ སོ སཝིཉྙཏྟིཀོ, ཨཝིཉྙཏྟིཀོ ཙ ཝུཏྟོ ཀཱཡོ, ཏསྶ ཀམྨཾ ཀཱཡཀམྨཾ, ཏཐཱ ཝཙཱིཀམྨཾ. ཏཏྠ སཝིཉྙཏྟིཀོ ཀཱཡོ ཨུཔྤཏྟིཡཱ ཀམྨཾ སཱདྷེཏི, ཨིཏརོ ཨནུཔྤཏྟིཡཱ. ཏཐཱ ཝཱཙཱཏི ཝེདིཏབྦཾ, སིཀྑཱཔདནྟི ‘‘ཡོ ཏཏྠ ནཱམཀཱཡོ པདཀཱཡོ’’ཏི ཝཙནཏོ ཝཱིཏིཀྐམེ ཡུཛྫཏཱིཏི ཝུཏྟཾ. ‘‘ཧསིཏུཔྤཱདཝོཊྛབྦནཱནིཔི ཨཱཔཏྟིསམུཊྛཱཔཀཙིཏྟཱནི. ཨིདམྤི ན མཡཱ པརིཙྪིནྣནྟི ཧསམཱནོ པསྶཏི ཡདཱ, ཏདཱ ཝོཊྛབྦནཾ ཛཝནགཏིཀ’’ནྟི ཨནུགཎྛིཔདེ ཝུཏྟཾ. ཨབྷིཉྙཱཙིཏྟཱནི པཉྙཏྟིཾ ཨཛཱནིཏྭཱ ཨིདྡྷིཝིཀུབྦནཱདིཀཱལེ གཧེཏབྦཱནི.

ཨེཏྠ ¶ པན ཡོ པན བྷིཀྑུ བྷིཀྑཱུནཾ སིཀྑཱསཱཛཱིཝསམཱཔནྣོ…པེ… མེཐུནཾ དྷམྨཾ པཊིསེཝནྟོ ཨཏྠི ཀོཙི པཱརཱཛིཀོ ཧོཏི ཨསཾཝཱསོ, ཨཏྠི ཀོཙི ན པཱརཱཛིཀོ ཧོཏི ཨསཾཝཱསོ. དུཀྐཊཐུལླཙྩཡཝཏྠཱུསུ པཊིསེཝནྟོ ཨཏྠི ཀོཙི ན པཱརཱཛིཀོ. པཀྑཔཎྜཀོ ཨཔཎྜཀཔཀྑེ ཨུཔསམྤནྣོ པཎྜཀཔཀྑེ མེཐུནཾ དྷམྨཾ པཊིསེཝནྟོ སོ པཱརཱཛིཀཾ ཨཱཔཏྟིཾ ནཱཔཛྫཏཱིཏི ན པཱརཱཛིཀོ ནཱམ. ན ཧི ཨབྷིཀྑུནོ ཨཱཔཏྟི ནཱམ ཨཏྠི. སོ ཨནཱཔཏྟིཀཏྟཱ ཨཔཎྜཀཔཀྑེ ཨཱགཏོ ཀིཾ ཨསཾཝཱསོ ཧོཏི ན ཧོཏཱིཏི? ཧོཏི, ‘‘ཨབྷབྦོ ཏེན སརཱིརབནྡྷནེནཱ’’ཏི (པཱརཱ. ༥༥; མཧཱཝ. ༡༢༩) ཧི ཝུཏྟཾ. ‘‘ཡོ པན, བྷིཀྑུ, བྷིཀྑཱུནཾ…པེ… ཨསཾཝཱསོ’’ཏི (པཱརཱ. ༤༤) ཝུཏྟཏྟཱ ཡོ པན བྷིཀྑུབྷཱཝེན མེཐུནཾ དྷམྨཾ པཊིསེཝཏི, སོ ཨེཝ ཨབྷབྦོ. ནཱཡཾ ཨཔཱརཱཛིཀཏྟཱཏི ཙེ? ན, ‘‘བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ’’ཏི (མཧཱཝ. ༨༦) ཝུཏྟཊྛཱནེ ཡཐཱ ཨབྷིཀྑུནཱ ཀམྨཝཱཙཱཡ སཱཝིཏཱཡཔི ཀམྨཾ རུཧཏི ཀམྨཝིཔཏྟིཡཱ ཨསམྦྷཝཏོ, ཨེཝཾསམྤདམིདཾ དཊྛབྦཾ. ཏཏྲིདཾ ཡུཏྟི – ཨུཔསམྤནྣཔུབྦོ ཨེཝ ཙེ ཀམྨཝཱཙཾ སཱཝེཏི, སངྒྷོ ཙ ཏསྨིཾ ཨུཔསམྤནྣསཉྙཱི, ཨེཝཉྩེ ཀམྨཾ རུཧཏི, ན ཨཉྙཐཱཏི ནོ ཁནྟཱིཏི ཨཱཙརིཡོ. གཧཊྛོ ཝཱ ཏིཏྠིཡོ ཝཱ པཎྜཀོ ¶ ཝཱ ཨནུཔསམྤནྣསཉྙཱི ཀམྨཝཱཙཾ སཱཝེཏི, སངྒྷེན ཀམྨཝཱཙཱ ན ཝུཏྟཱ ཧོཏི, ‘‘སངྒྷོ ཨུཔསམྤཱདེཡྻ, སངྒྷོ ཨུཔསམྤཱདེཏི, ཨུཔསམྤནྣོ སངྒྷེནཱ’’ཏི (མཧཱཝ. ༡༢༧) ཧི ཝཙནཏོ སངྒྷེན ཀམྨཝཱཙཱཡ ཝཏྟབྦཱཡ སངྒྷཔརིཡཱཔནྣེན, སངྒྷཔརིཡཱཔནྣསཉྙིཏེན ཝཱ ཨེཀེན ཝུཏྟཱ སངྒྷེན ཝུཏྟཱཝ ཧོཏཱིཏི ཝེདིཏབྦོ, ཨཡམེཝ སབྦཀམྨེསུ ཡུཏྟི. ཏཐཱ ཨཏྠི མེཐུནཾ དྷམྨཾ པཊིསེཝནྟོ ཀོཙི ནཱསེཏབྦོ ‘‘ཡོ བྷིཀྑུནཱིདཱུསཀོ, ཨཡཾ ནཱསེཏབྦོ’’ཏི ཝུཏྟཏྟཱ ཨེཝ, སོ ཨནུཔསམྤནྣོཝ, སཧསེཡྻཱཔཏྟིཨཱདིཾ ཛནེཏི, ཏསྶ ཨོམསནེ ཙ དུཀྐཊཾ ཧོཏི. ཨབྷིཀྑུནིཡཱ མེཐུནཾ དྷམྨཾ པཊིསེཝནྟོ ན ནཱསེཏབྦོ ‘‘ཨནྟིམཝཏྠུཾ ཨཛ྄ཛྷཱཔནྣོ, བྷིཀྑཝེ, ཨནུཔསམྤནྣོ…པེ… ནཱསེཏབྦོ’’ཏི པཱལི༹ཡཱ ཨབྷཱཝཏོ. ཏེནེཝ སོ ཨུཔསམྤནྣསངྑྱཾ གཙྪཏི, ན སཧསེཡྻཱཔཏྟཱདིཾ ཛནེཏི, ཀེཝལཾ ཨསཾཝཱསོཏི ཀཏྭཱ གཎཔཱུརཀོ ན ཧོཏི, ཨེཀཀམྨཾ ཨེཀུདྡེསོཔི ཧི སཾཝཱསོཏི ཝུཏྟོ. སམསིཀྑཏཱཔི སཾཝཱསོཏི ཀཏྭཱ སོ ཏེན སདྡྷིཾ ནཏྠཱིཏི པདསོདྷམྨཱཔཏྟིཾ པན ཛནེཏཱིཏི ཀཱརཎཙྪཱཡཱ དིསྶཏི. ཡཐཱ བྷིཀྑུནིཡཱ སདྡྷིཾ བྷིཀྑུསངྒྷསྶ ཨེཀཀམྨཱདིནོ ¶ སཾཝཱསསྶ ཨབྷཱཝཱ བྷིཀྑུནཱི ཨསཾཝཱསཱ བྷིཀྑུསྶ, ཏཐཱ བྷིཀྑུ ཙ བྷིཀྑུནིཡཱ, པདསོདྷམྨཱཔཏྟིཾ པན ཛནེཏི. ཏཐཱ ‘‘ཨནྟིམཝཏྠུཾ ཨཛ྄ཛྷཱཔནྣོཔི ཨེཀཙྩོ ཡོ ནཱསེཏབྦོ’’ཏི ཨཝུཏྟོཏི ཨིམིནཱ ནིདསྶནེན སཱ ཀཱརཎཙྪཱཡཱ གཧཎཾ ན གཙྪཏི.

ཨཔི ཙ ‘‘བྷིཀྑུ སུཏྟབྷིཀྑུམྷི ཝིཔྤཊིཔཛྫཏི, པཊིབུདྡྷོ སཱདིཡཏི, ཨུབྷོ ནཱསེཏབྦཱ’’ཏི (པཱརཱ. ༦༦) ཙ, ‘‘ཏེན ཧི, བྷིཀྑཝེ, མེཏྟིཡཾ བྷིཀྑུནིཾ ནཱསེཐཱ’’ཏི (པཱརཱ. ༣༨༤) ཙ ཝཙནཏོ ཡོ སངྒྷམཛ྄ཛྷཾ པཝིསིཏྭཱ ཨནུཝིཛྫཀེན ཨནུཝིཛྫིཡམཱནོ པརཱཛཱཔིཏོ, སོཔི ཨནུཔསམྤནྣོཝ, ན ཨོམསཝཱདཔཱཙིཏྟིཡཾ ཛནེཏཱིཏི ཝེདིཏབྦཾ. ཀིཉྩཱཔི ‘‘ཨུཔསམྤནྣཾ ཨུཔསམྤནྣསཉྙཱི ཁུཾསེཏུཀཱམོ’’ཏི པཱལི༹ ནཏྠི, ཀིཉྩཱཔི ཀངྑཱཝིཏརཎིཡཾ ‘‘ཡཾ ཨཀྐོསཏི, ཏསྶ ཨུཔསམྤནྣཏཱ, ཨནཉྙཱཔདེསེན ཛཱཏིཨཱདཱིཧི ཨཀྐོསནཾ, ‘མཾ ཨཀྐོསཏཱི’ཏི ཛཱནནཱ, ཨཏྠཔུརེཀྑཱརཏཱདཱིནཾ ཨབྷཱཝོཏི ཨིམཱནེཏྠ ཙཏྟཱརི ཨངྒཱནཱི’’ཏི (ཀངྑཱ. ཨཊྛ. ཨོམསཝཱདསིཀྑཱཔདཝཎྞནཱ) ཝུཏྟཾ, ཏཐཱཔི དུཊྛདོསསིཀྑཱཔདེ ‘‘ཨསུདྡྷོ ཧོཏི པུགྒལོ ཨཉྙཏརཾ པཱརཱཛིཀཾ དྷམྨཾ ཨཛ྄ཛྷཱཔནྣོ, ཏཉྩེ སུདྡྷདིཊྛི སམཱནོ ཨོཀཱསཾ ཀཱརཱཔེཏྭཱ ཨཀྐོསཱདྷིཔྤཱཡོ ཝདེཏི, ཨཱཔཏྟི ཨོམསཝཱདསྶཱ’’ཏི (པཱརཱ. ༣༨༩) ཝཙནཏོ ཨསུདྡྷེ ཨུཔསམྤནྣསཉྙཱཡ ཨེཝ ཨོམསནྟསྶ པཱཙིཏྟིཡཾ. ཨསུདྡྷདིཊྛིསྶ དུཀྐཊཾ. ‘‘སུདྡྷོ ཧོཏི པུགྒལོ, ཨཉྙཏརཾ པཱརཱཛིཀཾ དྷམྨཾ ཨནཛ྄ཛྷཱཔནྣོ, ཏཉྩེ སུདྡྷདིཊྛི སམཱནོ ཨོཀཱསཾ ཀཱརཱཔེཏྭཱ ཨཀྐོསཱདྷིཔྤཱཡོ ཝདེཏི, ཨཱཔཏྟི ཨོམསཝཱདསྶཱ’’ཏི (པཱརཱ. ༣༨༩) ཝཙནཏོ པན ¶ ཀངྑཱཝིཏརཎིཡཾ ‘‘ཏསྶ ཨུཔསམྤནྣཏཱ ཨུཔསམྤནྣསཉྙིཏཱ’’ཏི ན ཝུཏྟཾ ཨནེཀཾསིཀཏྟཱ ཏསྶ ཨངྒསྶཱཏི ཝེདིཏབྦཾ.

ཨཔི ཙེཏྠ སིཀྑཱཔཙྩཀྑཱཏཀཙཏུཀྐཾ ཝེདིཏབྦཾ, ཨཏྠི པུགྒལོ སིཀྑཱཔཙྩཀྑཱཏཀོ ན སིཀྑཱསཱཛཱིཝསམཱཔནྣོ, ཨཏྠི སིཀྑཱསཱཛཱིཝསམཱཔནྣོ ན སིཀྑཱཔཙྩཀྑཱཏཀོ, ཨཏྠི སིཀྑཱཔཙྩཀྑཱཏཀོ ཙེཝ སིཀྑཱསཱཛཱིཝསམཱཔནྣོ ཙ, ཨཏྠི ནེཝ སིཀྑཱཔཙྩཀྑཱཏཀོ ན སིཀྑཱསཱཛཱིཝསམཱཔནྣོ. ཏཏྠ ཏཏིཡོ བྷིཀྑུནཱིསིཀྑཱཔཙྩཀྑཱཏཀོ ཝེདིཏབྦོ. སཱ ཧི ཡཱཝ ན ལིངྒཾ པརིཙྩཛཏི, ཀཱསཱཝེ སཨུསྶཱཧཱཝ སམཱནཱ སཱམཉྙཱ ཙཝིཏུཀཱམཱ སིཀྑཾ པཙྩཀྑནྟཱིཔི བྷིཀྑུནཱི ཨེཝ སིཀྑཱསཱཛཱིཝསམཱཔནྣཱཝ. ཝུཏྟཉྷི བྷགཝཏཱ ‘‘ན, བྷིཀྑཝེ, བྷིཀྑུནིཡཱ སིཀྑཱཔཙྩཀྑཱན’’ནྟི (ཙཱུལ༹ཝ. ༤༣༤). ཀདཱ ཙ པན སཱ ¶ ཨབྷིཀྑུནཱི ཧོཏཱིཏི? ཡདཱ སཱམཉྙཱ ཙཝིཏུཀཱམཱ གིཧིནིཝཱསནཾ ནིཝཱསེཏི, སཱ ‘‘ཝིབྦྷནྟཱ’’ཏི སངྑྱཾ གཙྪཏི. ཝུཏྟཉྷི བྷགཝཏཱ ‘‘ཡདེཝ སཱ ཝིབྦྷནྟཱ, ཏདེཝ ཨབྷིཀྑུནཱི’’ཏི (ཙཱུལ༹ཝ. ༤༣༤). ཀིཏྟཱཝཏཱ པན ཝིབྦྷནྟཱ ཧོཏཱིཏི? སཱམཉྙཱ ཙཝིཏུཀཱམཱ ཀཱསཱཝེསུ ཨནཱལཡཱ ཀཱསཱཝཾ ཝཱ ཨཔནེཏི, ནགྒཱ ཝཱ གཙྪཏི, ཏིཎཔཎྞཱདིནཱ ཝཱ པཊིཙྪཱདེཏྭཱ གཙྪཏི, ཀཱསཱཝཾཡེཝ ཝཱ གིཧིནིཝཱསནཱཀཱརེན ནིཝཱསེཏི, ཨོདཱཏཾ ཝཱ ཝཏྠཾ ནིཝཱསེཏི, སལིངྒེནེཝ ཝཱ སདྡྷིཾ ཏིཏྠིཡེསུ པཝིསིཏྭཱ ཀེསལུཉྩནཱདིཝཏཾ སམཱདིཡཏི, ཏིཏྠིཡལིངྒཾ ཝཱ སམཱདིཡཏི, ཏདཱ ཝིབྦྷནྟཱ ནཱམ ཧོཏི. ཏཏྠ ཡཱ བྷིཀྑུནིལིངྒེ ཋིཏཱཝ ཏིཏྠིཡཝཏཾ སམཱདིཡཏི, སཱ ཏིཏྠིཡཔཀྐནྟཀོ བྷིཀྑུ ཝིཡ པཙྪཱ པབྦཛྫམྤི ན ལབྷཏི, སེསཱ པབྦཛྫམེཝེཀཾ ལབྷནྟི, ན ཨུཔསམྤདཾ. པཱལི༹ཡཾ ཀིཉྩཱཔི ‘‘ཡཱ སཱ, བྷིཀྑཝེ, བྷིཀྑུནཱི སཀཱསཱཝཱ ཏིཏྠཱཡཏནཾ སངྐནྟཱ, སཱ ཨཱགཏཱ ན ཨུཔསམྤཱདེཏབྦཱ’’ཏི ཝཙནཏོ ཡཱ པཋམཾ ཝིབྦྷམིཏྭཱ པཙྪཱ ཏིཏྠཱཡཏནཾ སངྐནྟཱ, སཱ ཨཱགཏཱ ཨུཔསམྤཱདེཏབྦཱཏི ཨནུཉྙཱཏཾ ཝིཡ དིསྶཏི. སངྒཱིཏིཨཱཙརིཡེཧི པན ‘‘ཙཏུཝཱིསཏི པཱརཱཛིཀཱནཱི’’ཏི ཝུཏྟཏྟཱ ན པུན སཱ ཨུཔསམྤཱདེཏབྦཱ, ཏསྨཱ ཨེཝ སིཀྑཱཔཙྩཀྑཱནཾ ནཱནུཉྙཱཏཾ བྷགཝཏཱ. ཨནྟིམཝཏྠུཨཛ྄ཛྷཱཔནྣཱ པན བྷིཀྑུནཱི ཨེཝ. པཀྑཔཎྜཀཱིཔི བྷིཀྑུནཱི ཨེཝ. ཀིནྟི པུཙྪཱ.

ཝིནཱིཏཝཏྠུཝཎྞནཱ

༦༧. ཝིནཱིཏཱནི ཝིནིཙྪིཏཱནི ཝཏྠཱུནི ཝིནཱིཏཝཏྠཱུནི. ཏེསཾ ཏེསཾ ‘‘ཏེན ཁོ པན སམཡེན ཨཉྙཏརོ བྷིཀྑཱུ’’ཏིཨཱདཱིནཾ ཝཏྠཱུནཾ པཱཊེཀྐཾ ནཱམགཎནཾ ཨུདྡྷརིཏྭཱ ཨུདྡྷརིཏྭཱ ཨཱུནཱདྷིཀདོསསོདྷནཊྛེན ཨུདྡཱནཱ ཙ ཏཱ མཏྲཱདིསིདྡྷིགཱཐཱཧི ཚནྡོཝིཙིཏིལཀྑཎེན གཱཐཱ ཙཱཏི ‘‘ཨུདྡཱནགཱཐཱ ¶ ནཱམཱ’’ཏི ཝུཏྟཾ, དེ, སོདྷནེ ཨིཏི དྷཱཏུསྶ རཱུཔཾ ཨུདྡཱནཱཏི ཝེདིཏབྦཾ. ཨིམཱ པན ཨུདྡཱནགཱཐཱ དྷམྨསངྒཱཧཀཏྠེརེཧི སངྒཱིཏིཀཱལེ ཋཔིཏཱ, ཀཏྠཱཏི ཙེ? པདབྷཱཛནཱིཡཱཝསཱནེ. ‘‘ཝཏྠུགཱཐཱ ནཱམ ‘ཏེན ཁོ པན སམཡེན ཨཉྙཏརོ བྷིཀྑཱུ’ཏིཨཱདཱིནཾ ཨིམེསཾ ཝིནཱིཏཝཏྠཱུནཾ ནིདཱནཱནཱི’’ཏི གཎྛིཔདེ ཝུཏྟཾ, ཏསྨཱ ཏཏྠ ཝུཏྟནཡེན ཝིནཱིཏཝཏྠཱུནི ཨེཝ ‘‘ཝཏྠུགཱཐཱ’’ཏི ཝུཏྟཱཏི ཝེདིཏབྦཾ. ཨིདམེཏྠ སམཱསཏོ ཨདྷིཔྤཱཡནིདསྶནཾ ¶ – ‘‘ཨཱཔཏྟིཾ ཏྭཾ, བྷིཀྑུ, ཨཱཔནྣོ པཱརཱཛིཀ’’ནྟི མཱུལཱཔཏྟིདསྶནཝསེན ཝཱ, ‘‘ཨནཱཔཏྟི, བྷིཀྑུ, པཱརཱཛིཀསྶ, ཨཱཔཏྟི སངྒྷཱདིསེསསྶ, དུཀྐཊསྶཱ’’ཏི ཨཱཔཏྟིབྷེདདསྶནཝསེན ཝཱ, ‘‘ཨནཱཔཏྟི, བྷིཀྑུ, ཨསཱདིཡནྟསྶཱ’’ཏི ཨནཱཔཏྟིདསྶནཝསེན ཝཱ ཡཱནི ཝཏྠཱུནི ཝིནཱིཏཱནི ཝིནིཙྪིཏཱནི, ཏཱནི ཝིནཱིཏཝཏྠཱུནི ནཱམ. ཏེསཾ ཝིནཱིཏཝཏྠཱུནཾ ནིདཱནཝཏྠུདཱིཔིཀཱ ཏནྟི ཝཏྠུགཱཐཱ ནཱམ. ཨུདྡཱནགཱཐཱཝ ‘‘ཝཏྠུགཱཐཱ’’ཏི ཝུཏྟཱཏི ཨེཀེ. ཏེསཾ ‘‘ཨིམིནཱ ལཀྑཎེན ཨཱཡཏིཾ ཝིནཡདྷརཱ ཝིནཡཾ ཝིནིཙྪིནིསྶནྟཱི’’ཏི ཝཙནེན ཝིརུཛ྄ཛྷཏི. ན ཧི ཨུདྡཱནགཱཐཱཡཾ ཀིཉྩིཔི ཝིནིཙྪཡལཀྑཎཾ དིསྶཏི, ཨུདྡཱནགཱཐཱནཾ ཝིསུཾ པཡོཛནཾ ཝུཏྟཾ ‘‘སུཁཾ ཝིནཡདྷརཱ ཨུགྒཎྷིསྶནྟཱི’’ཏི, ཏསྨཱ པཡོཛནནཱནཏྟཏོཔེཏཾ ནཱནཏྟཾ ཝེདིཏབྦཾ. ཏཏྠཱཡཾ ཝིགྒཧོ – ཝཏྠཱུནི ཨེཝ གཱཐཱ ཝཏྠུགཱཐཱ. ཝིནཱིཏཝཏྠུཏོ ཝིསེསནཏྠམེཏྠ གཱཐཱགྒཧཎཾ. ཨུདྡཱནགཱཐཱཏོ ཝིསེསནཏྠཾ ཝཏྠུགྒཧཎནྟི ཝེདིཏབྦཾ. ཀེཙི པན ‘‘གཱཐཱནཾ ཝཏྠཱུནཱིཏི ཝཏྟབྦེ ཝཏྠུགཱཐཱཏི ཝུཏྟ’’ནྟི ཝདནྟི. མཀྐཊིཝཏྠུཾ ཨཉྙེ ཏཏྠ བྷིཀྑཱུ ཨཱརོཙེསུཾ, ཨིདྷ སཡམེཝ. ཏཏྠ ཀཱརཎསྶ ‘‘བྷགཝཏཱ སིཀྑཱཔདཾ པཉྙཏྟ’’ནྟི ཝུཏྟཏྟཱ ཝཛྫིཔུཏྟཀཱཔི ཨཉྙེ ཨེཝ. ‘‘ཏཏྠ ཨཱནནྡཏྠེརོ, ཨིདྷ ཏེ ཨེཝཱ’’ཏི ཨཉྙཏརསྨིཾ གཎྛིཔདེ ཝུཏྟཾ. ཨཱཙརིཡསྶ ཨདྷིཔྤཱཡོ པུབྦེ ཝུཏྟོ, ཏསྨཱ ཨུཔཔརིཀྑིཏབྦཾ.

༦༧-༨. ཉཏྭཱཏི ཨཔུཙྪིཏྭཱ སཡམེཝ ཉཏྭཱ. པོཀྑརནྟི སརཱིརཾ བྷེརིཔོཀྑརཾ ཝིཡ. ལོཀིཡཱ ཨཝིཀལཾ ‘‘སུནྡར’’ནྟི ཝདནྟི, ཏསྨཱ ཝཎྞཔོཀྑརཏཱཡཱཏི པཋམེནཏྠེན ཝིསིཊྛཀཱཡཙྪཝིཏཱཡཱཏི ཨཏྠོ, དུཏིཡེན ཝཎྞསུནྡརཏཱཡཱཏི. ‘‘ཨུཔྤལགབྦྷཝཎྞཏྟཱ སུཝཎྞཝཎྞཱ, ཏསྨཱ ཨུཔྤལཝཎྞཱཏི ནཱམཾ ལབྷཱི’’ཏི གཎྛིཔདེ ཝུཏྟཾ. ནཱིལུཔྤལཝཎྞཱ ཀཱཡཙྪཝཱིཏི ཝཙནཾ པན སཱམཙྪཝིཾ དཱིཔེཏི. ལོཀེ པན ‘‘ཨུཔྤལསམཱ པསཏྠསཱམཱ’’ཏི ཝཙནཏོ ‘‘ཡཱ སཱམཱ སཱམཝཎྞཱ སཱམཏནུམཛ྄ཛྷཱ, སཱ པཱརིཙརིཡཱ སགྒེ མམ ཝཱསོ’’ཏི ཝཙནཏོ སཱམཙྪཝིཀཱ ཨིཏྠཱིནཾ པསཏྠཱ. ‘‘ཡཱཝསྶཱ ནཾ ཨནྡྷཀཱར’’ནྟིཔི པཱཋོ. ཀིལེསཀཱམེཧི ཝཏྠུཀཱམེསུ ཡོ ན ལིམྤཏི.

༦༩. ཨིཏྠིལིངྒཾ པཱཏུབྷཱུཏནྟི ཨིཏྠིསཎྛཱནཾ པཱཏུབྷཱུཏཾ, ཏཉྩ ཁོ པུརིསིནྡྲིཡསྶ ཨནྟརདྷཱནེན ¶ ཨིཏྠིནྡྲིཡསྶ པཱཏུབྷཱཝེན. ཨེཝཾ པུརིསིནྡྲིཡཔཱཏུབྷཱཝེཔི. ཨེཏེན ཡཐཱ བྲཧྨཱནཾ པུརིསིནྡྲིཡཾ ནུཔྤཛྫཏི, ཀེཝལཾ པུརིསསཎྛཱནམེཝ ¶ ཨུཔྤཛྫཏི, ཡཐཱ ཙ ཀསྶཙི པཎྜཀསྶ ཝིནཱཔི པུརིསིནྡྲིཡེན པུརིསསཎྛཱནཾ ཨུཔྤཛྫཏི, ན ཏཐཱ ཏེསནྟི དསྶིཏཾ ཧོཏི, ཏཾ པན ཨིཏྠིནྡྲིཡཾ, པུརིསིནྡྲིཡཾ ཝཱ ཨནྟརདྷཱཡནྟཾ མརནྟཱནཾ ཝིཡ པཊིལོམཀྐམེན སཏྟརསམཙིཏྟཀྑཎཏོ པཊྛཱཡ ཨནྟརདྷཱཡཏི. པཙྩུཔྤནྣེ ཨིནྡྲིཡེ ནིརུདྡྷེ ཨིཏརཾ ཝིསབྷཱགིནྡྲིཡཾ པཱཏུབྷཝཏི. ཡསྨཱ མཧཱནིདྡཾ ཨོཀྐནྟསྶེཝ ཀིརསྶ ཝིསབྷཱགིནྡྲིཡཾ པཱཏུབྷཝཏི, ཏསྨཱ ‘‘རཏྟིབྷཱགེ ནིདྡཾ ཨོཀྐནྟསྶཱ’’ཏི ཝུཏྟཾ. ‘‘ཨནུཛཱནཱམི, བྷིཀྑཝེ, ཏཾཡེཝ ཨུཔཛ྄ཛྷཾ ཏམེཝ ཨུཔསམྤད’’ནྟི ཝཙནཏོ པཝཏྟིནཱིཡེཝ ཨུཔཛ྄ཛྷཱཡཱ, ཨུཔསམྤདཱཙརིཡཱ བྷིཀྑུནཱིཡེཝ ཨཱཙརིཡཱཏི ཀཏྭཱ ཏཱསཾ ཨུཔཛ྄ཛྷཱཡཝཏྟཾ, ཨཱཙརིཡཝཏྟཉྩ ཨིམིནཱ བྷིཀྑུནཱསདཱསཱཡཾ པཱཏཾ བྷིཀྑུནུཔསྶཡཾ གནྟྭཱ ཀཱཏབྦཾ, ཏཱཧི ཙ ཨིམསྶ ཝིཧཱརཾ ཨཱགམྨ སདྡྷིཝིཧཱརིཀཝཏྟཱདི ཀཱཏབྦཾ ནུ ཁོཏི ཙེ? ‘‘ཨནུཛཱནཱམི, བྷིཀྑཝེ, བྷིཀྑུནཱིཧི སངྒམིཏུ’’ནྟི ཝཙནེན ཝིནཱབྷཱཝདཱིཔནཏོ ཀེཝལཾ ན པུན ཨུཔཛ྄ཛྷཱ གཧེཏབྦཱ, ན ཙ ཨུཔསམྤདཱ ཀཱཏབྦཱཏི དསྶནཏྠམེཝ ‘‘ཨནུཛཱནཱམི, བྷིཀྑཝེ, ཏཾཡེཝ ཨུཔཛ྄ཛྷ’’ནྟིཨཱདི ཝུཏྟནྟི ཝེདིཏབྦཾ. ཏཏྠ བྷིཀྑུནཱིཧི སངྒམིཏུནྟི བྷིཀྑཱུཧི ཝིནཱ ཧུཏྭཱ བྷིཀྑུནཱིཧི ཨེཝ སདྡྷིཾ སམངྒཱི བྷཝིཏུཾ ཨནུཛཱནཱམཱིཏི ཨཏྠོ, ཏསྨཱ ཨིམིནཱ པཱལི༹ལེསེན ‘‘ཏསྶཱ ཨེཝ གཱམནྟརཱདཱིཧི ཨནཱཔཏྟཱི’’ཏི ཨཊྛཀཐཱཝཙནཾ སིདྡྷཾ ཧོཏི, ཨཱགནྟྭཱ སངྒམིཏུཾ སཀྐཱ, ཡཉྩ བྷགཝཏཱ གམནཾ ཨནུཉྙཱཏཾ, ཏཾ ནིསྶཱཡ ཀུཏོ གཱམནྟརཱདིཔཙྩཡཱ ཨཱཔཏྟི. ན ཧི བྷགཝཱ ཨཱཔཏྟིཡཾ ནིཡོཛེཏཱིཏི ཡུཏྟམེཝ ཏཾ, ཨཉྙཐཱ ‘‘ཡཱ ཨཱཔཏྟིཡོ བྷིཀྑཱུནཾ བྷིཀྑུནཱིཧི ཨསཱདྷཱརཎཱ, ཏཱཧི ཨཱཔཏྟཱིཧི ཨནཱཔཏྟཱི’’ཏི པཱལི༹ཝཙནཏོ ན གཱམནྟརཱདཱིཧི ཨནཱཔཏྟཱིཏི ཨཱཔཛྫཏི. སཱདྷཱརཎཏཱ ཨཱཔཏྟིཡེཝ ‘‘ཡཱ ཨཱཔཏྟིཡོ བྷིཀྑཱུནཾ བྷིཀྑུནཱིཧི ཨསཱདྷཱརཎཱ, ཡཱ ཙ བྷིཀྑུནཱིཧི སངྒམནྟིཡཱ གཱམནྟརནདཱིཔཱརརཏྟིཝིཔྤཝཱསགཎཨོཧཱིཡནཱཔཏྟིཡོ, ཏཱཧི ཨཱཔཏྟཱིཧི ཨནཱཔཏྟཱི’’ཏི ན ཝུཏྟཏྟཱཏི ཙེ? ན ཝུཏྟཾ ཨནིཊྛཔྤསངྒཏོ. བྷིཀྑུནཱིཧི སདྡྷིཾ སངྐནྟཱཡཔི ཏསྶཱ ཏཱ པཧཱཡ ཨཉྙཱཧི སངྒམནྟིཡཱ གཱམནྟརཱདཱིཧི ཨནཱཔཏྟི ཨེཝ སབྦཀཱལནྟི ཨིམསྶ ཨནིཊྛཔྤསངྒཏོ ཏཐཱ ན ཝུཏྟནྟི ཨཏྠོ. ཏཏྠ གཱམནྟརཱཔཏྟཱདིཝཏྠུཾ སཉྩིཙྩ ཏསྨིཾ ཀཱལེ ཨཛ྄ཛྷཱཙརནྟཱིཔི སཱ ལིངྒཔཱཏུབྷཱཝེན ཀཱརཎེན ཨནཱཔཛྫནཏོ ཨནཱཔཏྟི. ཨནཱཔཛྫནཊྛེནེཝ ཝུཊྛཱཏི ནཱམཱཏི ཝེདིཏབྦཱ. ཏཐཱ ཡོགཱི ཨནུཔྤནྣེ ¶ ཨེཝ ཀིལེསེ ནིརོདྷེཏི. ཨབནྡྷནོཔི པཏྟོ ‘‘ཨཱུནཔཉྩབནྡྷནོ’’ཏི ཝུཙྩཏི, སབྦསོ ཝཱ པན ན སཱཝེཏི ཨཔྤཙྩཀྑཱཏཱ ཧོཏི སིཀྑཱ, ཨེཝམིདྷ ཨནཱཔནྣཱཔི ཨཱཔཏྟི ཝུཊྛིཏཱ ནཱམ ཧོཏཱིཏི ཝེདིཏབྦཱ.

ཡསྨཱ པན སཱ པུརིསེན སཧསེཡྻཱཔཏྟིཾ ཨནཱཔཛྫནྟཱིཔི སཀྐོཏི བྷིཀྑུནཱིཧི སངྒམིཏུཾ ¶ , ཏསྨཱ ཨནཱཔཏྟཱིཏི ཀཏྭཱ ཨཊྛཀཐཱཡཾ ‘‘ཨུབྷིནྣམྤི སཧསེཡྻཱཔཏྟི ཧོཏཱི’’ཏི ཝུཏྟཾ. ཝུཏྟཉྷེཏཾ པརིཝཱརེ ‘‘ཨཔརེཧིཔི ཙཏཱུཧཱཀཱརེཧི ཨཱཔཏྟིཾ ཨཱཔཛྫཏི སངྒྷམཛ྄ཛྷེ གཎམཛ྄ཛྷེ པུགྒལསྶ སནྟིཀེ ལིངྒཔཱཏུབྷཱཝེནཱ’’ཏི (པརི. ༣༢༤). ཡཾ པན ཝུཏྟཾ པརིཝཱརེ ‘‘ཨཏྠཱཔཏྟི ཨཱཔཛྫནྟོ ཝུཊྛཱཏི ཝུཊྛཧནྟོ ཨཱཔཛྫཏཱི’’ཏི (པརི. ༣༢༤), ཏསྶ སཧསེཡྻཱདིཾ ཨཱཔཛྫཏི ཨསཱདྷཱརཎཱཔཏྟཱིཧི ཝུཊྛཱཏི, ཏདུབྷཡམྤི སནྡྷཱཡ ཝུཏྟནྟི ཝེདིཏབྦཾ. དཱུརེ ཝིཧཱརོ ཧོཏི པཉྩདྷནུསཏིཀཾ པཙྪིམཾ, ཝིཧཱརཏོ པཊྛཱཡ གཱམཾ པཝིསནྟིཡཱ གཱམནྟརཾ ཧོཏཱིཏི ཨཏྠོ. སཾཝིདཧནཾ པརིམོཙེཏྭཱཏི ཨདྡྷཱནགམནསཾཝིདཧནཾ ཨཀཏྭཱཏི ཨཏྠོ. ཏཱ ཀོཔེཏྭཱཏི པརིཙྩཛིཏྭཱཏི ཨཏྠོ. ‘‘པརིཔུཎྞཝསྶསཱམཎེརེནཱཔཱི’’ཏི ཝཙནཏོ ཨཔརིཔུཎྞཝསྶསྶ ཨུཔཛ྄ཛྷཱཡགྒཧཎཾ ནཏྠཱིཏི ཝིཡ དིསྶཏི. ཝིནཡཀམྨཾ ཀཏྭཱ ཋཔིཏོཏི ཝིཀཔྤེཏྭཱ ཋཔིཏོ. ཨཝིཀཔྤིཏཱནཾ དསཱཧཱཏིཀྐམེ ནིསྶགྒིཡཏཱ ཝེདིཏབྦཱ. པུན པཊིགྒཧེཏྭཱ སཏྟཱཧཾ ཝཊྚཏཱིཏི པན ‘‘ཨནུཛཱནཱམི, བྷིཀྑཝེ, བྷིཀྑཱུནཾ སནྣིདྷིཾ བྷིཀྑུནཱིཧི པཊིགྒཱཧཱཔེཏྭཱ པརིབྷུཉྫིཏུ’’ནྟི (ཙཱུལ༹ཝ. ༤༢༡) ཝཙནཏོ ཝུཏྟཾ. ཨནཔེཀྑཝིསྶཛྫནེནཱཏི ཝཏྠུཾ ཨནཔེཀྑཝིསྶཛྫནེན ཝཱ པཊིགྒཧཎེན ཝཱ པུན པཊིགྒཧེཏྭཱ པརིབྷུཉྫིསྶཱམཱིཏི. པཀྑམཱནཏྟཀཱལེ པུནདེཝ ལིངྒཾ པརིཝཏྟཏི ཚཱརཏྟཾ མཱནཏྟམེཝ དཱཏབྦནྟི སཙེ, བྷིཀྑུཀཱལེ ཨཔྤཊིཙྪནྣཱཡ ཨཱཔཏྟིཡཱ, ནོ པཊིཙྪནྣཱཡཱཏི ནོ ལདྡྷཱིཏི ཨཱཙརིཡོ.

པརིཝཱསདཱནཾ པན ནཏྠཱིཏི བྷིཀྑུནིཡཱ ཚཱདནཱསམྦྷཝཏོ ཝུཏྟནྟི ཝེདིཏབྦཾ. སཙེ བྷིཀྑུནཱི ཨསཱདྷཱརཎཾ པཱརཱཛིཀཱཔཏྟིཾ ཨཱཔཛྫིཏྭཱ པུརིསལིངྒཾ པཊིལབྷཏི, བྷིཀྑཱུསུ ཨུཔསམྤདཾ ན ལབྷཏི, པབྦཛྫཾ ལབྷཏི, ཨནུཔབྦཛིཏྭཱ བྷིཀྑུབྷཱཝེ ཋིཏོ སཧསེཡྻཱཔཏྟིཾ ན ཛནེཏི. ཝིབྦྷནྟཱཡ བྷིཀྑུནིཡཱ པུརིསལིངྒེ པཱཏུབྷཱུཏེ བྷིཀྑཱུསུ ཨུཔསམྤདཾ ན ལབྷཏི, པཱརཱཛིཀཾ. ཨཝིབྦྷནྟམཱནསྶ གཧཊྛསྶེཝ སཏོ བྷིཀྑུནཱིདཱུསཀསྶ སཙེ ཨིཏྠིལིངྒཾ པཱཏུབྷཝཏི, ནེཝ བྷིཀྑུནཱིསུ ཨུཔསམྤདཾ ལབྷཏི, ན ¶ པུན ལིངྒཔརིཝཏྟེ ཛཱཏེ བྷིཀྑཱུསུ ཝཱཏི. བྷིཀྑུནིཡཱ ལིངྒཔརིཝཏྟེ སཏི བྷིཀྑུ ཧོཏི, སོ ཙེ སིཀྑཾ པཙྩཀྑཱཡ ཝིབྦྷམིཏྭཱ ཨིཏྠིལིངྒཾ པཊིལབྷེཡྻ, བྷིཀྑུནཱིསུ ཨུཔསམྤདཾ པཊིལབྷཏི ཨུབྷཡཏྠ པུབྦེ པཱརཱཛིཀབྷཱཝཾ ཨཔྤཏྟཏྟཱ. ཡཱ པན བྷིཀྑུནཱི པརིཔུཎྞདྭཱདསཝསྶཱ པུརིསལིངྒཾ པཊིལབྷེཡྻ, ཨུཔསམྤནྣོ བྷིཀྑུ ཨེཝ. པུན སིཀྑཾ པཙྩཀྑཱཡ ཨཱགཏོ ན ཨུཔསམྤཱདེཏབྦོ ཨཔརིཔུཎྞཝཱིསཏིཝསྶཏྟཱ. པུན ལིངྒཔརིཝཏྟེ སཏི བྷིཀྑུནཱིསུ ཨུཔསམྤདཾ ལབྷཏི. ཨེཝཾ ཙེ ཀཏདྭཱདསསངྒཧསྶ དཱརཀསྶ ལིངྒཔརིཝཏྟེ སཏི གིཧིགཏཱ ཨིཏྠཱི ཧོཏི, པརིཔུཎྞདྭཱདསཝསྶཱ ཨུཔསམྤཱདེཏབྦཱ ཀིར. བྷིཀྑུནིཡཱ ཨིཏྠིལིངྒནྟརདྷཱནེན, བྷིཀྑུསྶ ཝཱ པུརིསལིངྒནྟརདྷཱནེན པཀྑཔཎྜཀབྷཱཝོ བྷཝེཡྻ, ན སཱ བྷིཀྑུནཱི བྷིཀྑུནཱིཧི ནཱསེཏབྦཱ བྷིཀྑུ ཝཱ བྷིཀྑཱུཧི པུན པཀཏིབྷཱཝཱཔཏྟིསམྦྷཝཱ ¶ . པཀཏིཔཎྜཀཾ པན སནྡྷཱཡ ‘‘པཎྜཀོ ནཱསེཏབྦོ’’ཏི ཝུཏྟཾ. པཀྑཔཎྜཀོ ཧི སཾཝཱསནཱསནཱཡ ནཱསེཏབྦོ, ཨིཏརོ ཨུབྷཡནཱསནཱཡཱཏི ཨཏྠོ. ཡདི ཏེསཾ པུན པཀཏིབྷཱཝོ བྷཝེཡྻ, ‘‘ཨནུཛཱནཱམི, བྷིཀྑཝེ, ཏཾཡེཝ ཨུཔཛ྄ཛྷཾ ཏམེཝ ཨུཔསམྤདཾ ཏཱནིཡེཝ ཝསྶཱནི བྷིཀྑུནཱིཧི སངྒམིཏུ’’ནྟི ཨཡཾ ཝིདྷི སམྦྷཝཏི. སཙེ ནེསཾ ལིངྒནྟརཾ པཱཏུབྷཝེཡྻ, སོ ཙ ཝིདྷི, ཡཱ ཨཱཔཏྟིཡོ བྷིཀྑཱུནཾ བྷིཀྑུནཱིཧི སཱདྷཱརཎཱ, ཏཱ ཨཱཔཏྟིཡོ བྷིཀྑུནཱིནཾ སནྟིཀེ ཝུཊྛཱཏུཾ ཨསཱདྷཱརཎཱཧི ཨནཱཔཏྟཱིཏི ཨཡམྤི ཝིདྷི སམྦྷཝཏི. ཡཾ ཝུཏྟཾ པརིཝཱརེ ‘‘སཧ པཊིལཱབྷེན པུརིམཾ ཛཧཏི, པཙྪིམེ པཏིཊྛཱཏི, ཝིཉྙཏྟིཡོ པཊིཔྤསྶམྦྷནྟི, པཉྙཏྟིཡོ ནིརུཛ྄ཛྷནྟི, སཧ པཊིལཱབྷེན པཙྪིམཾ ཛཧཏི, པུརིམེ པཏིཊྛཱཏི, ཝིཉྙཏྟིཡོ’’ཏིཨཱདི, ཏཾ ཡཐཱཝུཏྟཝིདྷིཾ སནྡྷཱཡ ཝུཏྟནྟི ཨམྷཱཀཾ ཁནྟཱིཏི ཨཱཙརིཡོ. ཨིཏྠིལིངྒཾ, པུརིསལིངྒཾ ཝཱ ཨནྟརདྷཱཡནྟཾ ཀིཾ སཀལམྤི སརཱིརཾ གཧེཏྭཱ ཨནྟརདྷཱཡཏི, ཨུདཱཧུ སཡམེཝ. ཀིཉྩེཏྠ – ཡདི ཏཱཝ སཀལཾ སརཱིརཾ གཧེཏྭཱ ཨནྟརདྷཱཡཏི, ཨཡཾ པུགྒལོ ཙུཏོ བྷཝེཡྻ. ཏསྨཱ སཱམཉྙཱ ཙུཏོ བྷཝེཡྻ, པུན ཨུཔསམྤཛྫནྟོ ཨོཔཔཱཏིཀོ བྷཝེཡྻ. ཨཐ སཡམེཝ ཨནྟརདྷཱཡཏི, སོཔི བྷཱཝོ ཏསྶ ཝིརུཛ྄ཛྷཏི. ཨིཏྠིནྡྲིཡཱདཱིནི ཧི སཀལམྤི སརཱིརཾ བྱཱཔེཏྭཱ ཋིཏཱནཱིཏི ཁཎནིརོདྷོ ཝིཡ ཏེསཾ ཨནྟརདྷཱནཾ ཝེདིཏབྦཾ, ཏསྨཱ ཡཐཱཝུཏྟདོསཔྤསངྒཱབྷཱཝོ ཝེདིཏབྦོ. ཨཉྙམཉྙཾ སཾསཊྛཔྤབྷཱནཾ དཱིཔཱནཾ ཨེཀཔྤབྷཱནིརོདྷེཔི ཨིཏརིསྶཱ ཋཱནཾ ཝིཡ སེསསརཱིརཊྛཱནཾ ཏཏྠ ཧོཏཱིཏི ཝེདིཏབྦཾ.

༧༡-༢. མུཙྩཏུ ¶ ཝཱ མཱ ཝཱ དུཀྐཊམེཝཱཏི མོཙནརཱགཱབྷཱཝཏོ. ཨཝིསཡོཏི ཨསཱདིཡནཾ ནཱམ ཨེཝརཱུཔེ ཋཱནེ དུཀྐརནྟི ཨཏྠོ. མེཐུནདྷམྨོ ནཱམ ཨུབྷིནྣཾ ཝཱཡཱམེན ནིཔཛྫཏི ‘‘ཏསྶ དྭཡཾདྭཡསམཱཔཏྟཱི’’ཏི ཝུཏྟཏྟཱ, ཏསྨཱ ཏྭཾ མཱ ཝཱཡཱམ, ཨེཝཾ ཏེ ཨནཱཔཏྟི བྷཝིསྶཏི, ཀིརིཡཉྷེཏཾ སིཀྑཱཔདནྟི ཝུཏྟཾ ཧོཏི, ‘‘ཨཱཔཏྟིཾ ཏྭཾ བྷིཀྑུ ཨཱཔནྣོ པཱརཱཛིཀ’’ནྟི ཝཙནཏོ ཨཀིརིཡམྤེཏཾ སིཀྑཱཔདཾ ཡེབྷུཡྻེན ‘‘ཀིརིཡ’’ནྟི ཝུཙྩཏཱིཏི སིདྡྷཾ ཧོཏི.

༧༣-༤. ‘‘པཱརཱཛིཀབྷཡེན ཨཱཀཱསགཏམེཝ ཀཏྭཱ པཝེསནཱདཱིནི ཀརོནྟསྶ སཧསཱ ཏཱལུཀཾ ཝཱ པསྶཾ ཝཱ ཨངྒཛཱཏཾ ཚུཔཏི ཙེ, དུཀྐཊམེཝཱ’’ཏི ཝདནྟི. ཀསྨཱ? ན མེཐུནརཱགཏྟཱཏི, ཝཱིམཾསིཏབྦཾ. དནྟཱནཾ བཱཧིརབྷཱཝོ ཨོཊྛཱནཾ བཱཧིརབྷཱཝོ ཝིཡ ཐུལླཙྩཡཝཏྠུ ཧོཏཱིཏི ཝུཏྟཾ ‘‘བཧི ནིཀྑནྟདནྟེ ཛིཝ྄ཧཱཡ ཙ ཐུལླཙྩཡ’’ནྟི. ཏཾ པུགྒལཾ ཝིསཉྙིཾ ཀཏྭཱཏི ཝཙནེན སོ པུགྒལོ ཁིཏྟཙིཏྟོ ནཱམ ཧོཏཱིཏི དསྶིཏཾ ཧོཏི. ཡོ པན པུགྒལོ ན ཝིསཉྙཱིཀཏོ, སོ ཙེ ཨཏྟནོ ཨངྒཛཱཏསྶ དྷཱཏུགྷཊྚནཙརིཎིཛ྄ཛྷིཎིཀཱདིསཉྙཱཡ སཱདིཡཏི, མེཐུནསཉྙཱཡ ¶ ཨབྷཱཝཏོ ཝིསཉྙཱིཔཀྑམེཝ བྷཛཏཱིཏི ཏསྶ ཨནཱཔཏྟིཙྪཱཡཱ དིསྶཏི. ‘‘མེཐུནམེཏཾ མཉྙེ ཀསྶཙི ཨམནུསྶསྶཱ’’ཏི ཉཏྭཱ སཱདིཡནྟསྶ ཨཱཔཏྟི ཨེཝ. པཎྜཀསྶ མེཐུནདྷམྨནྟི པཎྜཀསྶ ཝཙྩམགྒེ ཝཱ མུཁེ ཝཱ, བྷུམྨཏྠེ ཝཱ སཱམིཝཙནཾ. ཨཝེདཡནྟསྶཔི སེཝནཙིཏྟཝསེན ཨཱཔཏྟི སནྠཏེནེཝ སེཝནེ ཝིཡ.

ཨུཔཧཏིནྡྲིཡཝཏྠུསྨིཾ ‘‘ཨེཏམཏྠཾ ཨཱརོཙེསུཾ, སོ ཨཱརོཙེསཱི’’ཏི དུཝིདྷོ པཱཋོ ཨཏྠི. ཏཏྠ ‘‘ཨཱརོཙེསུ’’ནྟི ཝུཏྟཔཱཋོ ‘‘ཝེདིཡི ཝཱ སོ བྷིཀྑཝེ’’ཏི ཝུཏྟཏྟཱ སུནྡརཾ, ཨཉྙཐཱ ‘‘ཨཱཔཏྟིཾ ཏྭཾ བྷིཀྑཱུ’’ཏི ཝཏྟབྦཾ སིཡཱ. ‘‘ཝེདིཡཱ ཝཱ’’ཏི དཱིཔཝཱསིནོ པཋནྟི ཀིར, མེཐུནདྷམྨསྶ པུབྦཔཡོགཱ ཧཏྠགྒཱཧཱདཡོ, ཏསྨཱ ‘‘དུཀྐཊམེཝསྶ ཧོཏཱི’’ཏི ཨིམིནཱ པུརིམཔདེན སམྦནྡྷོ. ཡསྨཱ པན དུཀྐཊམེཝསྶ ཧོཏི, ཏསྨཱ ཡཱཝ སཱིསཾ ན པཱཔུཎཱཏི པུགྒལོ, ཏཱཝ དུཀྐཊེ ཏིཊྛཏཱིཏི སམྦནྡྷོ ཝེདིཏབྦོ. སཱིསཾ ནཱམ མགྒཔཊིཔཱདནཾ. ‘‘སཱིསཾ ན པཱཔུཎཱཏཱིཏི པཱརཱཛིཀཾ ན ཧོཏི ཏཱཝ པུབྦཔཡོགདུཀྐཊེ ཏིཊྛཏཱི’’ཏི ཨཉྙཏརསྨིཾ གཎྛིཔདེ ལིཁིཏཾ ¶ . ཨུཙྩཱལིངྒཔཱཎཀདཊྛེནཱཏི ཨེཏྠ བྷཱཝནིཊྛཱཔཙྩཡོ ཝེདིཏབྦོ. དཊྛེན དཾསེན ཁཱདནེནཱཏི ཧི ཨཏྠཏོ ཨེཀཾ.

༧༦-༧. སངྒཱམསཱིསེ ཡུདྡྷམུཁེ ཡོདྷཔུརིསོ ཝིཡཱཡཾ བྷིཀྑཱུཏི ‘‘སངྒཱམསཱིསཡོདྷོ བྷིཀྑཱུ’’ཏི ཝུཙྩཏི. རུཀྑསཱུཙིདྭཱརཾ ཨུཔིལཝཱཡ, ཨེཀེན ཝཱ བཧཱུཧི ཝཱ ཀཎྚཀེཧི ཐཀིཏབྦཾ ཀཎྚཀདྭཱརཾ. དུསྶདྭཱརཾ སཱཎིདྭཱརཉྩ དུསྶསཱཎིདྭཱརཾ. ‘‘ཀིལཉྫསཱཎཱི’’ཏིཨཱདིནཱ ཝུཏྟཾ སབྦམྤི དུསྶསཱཎིཡམེཝ སངྒཧེཏྭཱ ཝུཏྟཾ. ཨེཀསདིསཏྟཱ ‘‘ཨེཀ’’ནྟི ཝུཏྟཾ. ཨཱཀཱསཏལེཏི ཧམྨིཡཏལེཏི ཨཏྠོ. ཨཡཉྷེཏྠ སངྑེཔོཏི ཨིདཱནི ཝཏྟབྦཾ སནྡྷཱཡ ཝུཏྟཾ. ‘‘ཀིཉྩི ཀརོནྟཱ ནིསིནྣཱ ཧོནྟཱིཏི ཝུཏྟཏྟཱ ནིཔནྣཱནཾ ཨཱཔུཙྪནཾ ན ཝཊྚཏཱི’’ཏི ཝདནྟི. ‘‘ཡཐཱཔརིཙྪེདམེཝ ཙ ན ཨུཊྛཱཏི, ཏསྶ ཨཱཔཏྟིཡེཝཱ’’ཏི ཀིཉྩཱཔི ཨཝིསེསེན ཝུཏྟཾ, ཨནཱདརིཡདུཀྐཊཱཔཏྟི ཨེཝ ཏཏྠ ཨདྷིཔྤེཏཱ. ཀཐཾ པཉྙཱཡཏཱིཏི? ‘‘རཏྟིཾ དྭཱརཾ ཝིཝརིཏྭཱ ནིཔནྣོ ཨརུཎེ ཨུགྒཏེ ཨུཊྛཧཏི, ཨནཱཔཏྟཱི’’ཏི ཝུཏྟཏྟཱ, མཧཱཔཙྩརིཡཾ ཝིསེསེཏྭཱ ‘‘ཨནཱདརིཡདུཀྐཊཱཔི ན མུཙྩཏཱི’’ཏི ཝུཏྟཏྟཱ ཙ, ཏེན ཨིཏརསྨཱ དུཀྐཊཱ མུཙྩཏཱིཏི ཨདྷིཔྤཱཡོ. ཡཐཱཔརིཙྪེདམེཝ ཙ ན ཨུཊྛཱཏི, ཏསྶ ཨཱཔཏྟིཡེཝཱཏི ཨེཏྠ ན ཨནཱདརིཡདུཀྐཊཾ སནྡྷཱཡ ཝུཏྟཾ. ཡཐཱཔརིཙྪེདམེཝཱཏི ཨཝདྷཱརཎཏྟཱ པརིཙྪེདཏོ ཨབྦྷནྟརེ ན ཧོཏཱིཏི ཝུཏྟཾ ཧོཏི. པུན ‘‘སུཔཏཱི’’ཏི ཝུཏྟཊྛཱནེ ཝིཡ སནྣིཊྛཱནཾ གཧེཏྭཱ ཝུཏྟཾ. ཨེཝཾ ནིཔཛྫནྟོཏི ནིཔཛྫནཀཱལེ ཨཱཔཛྫིཏབྦདུཀྐཊམེཝ སནྡྷཱཡ ཝུཏྟཾ, ཏསྨཱ ཡཐཱཔརིཙྪེདེན ཨུཊྛཧནྟསྶ དྭེ དུཀྐཊཱནཱིཏི ཝུཏྟཾ ཧོཏཱིཏི. ཨནྡྷཀཊྛཀཐཱཡམྤི ‘‘ཡདི རཏྟིཾ དྭཱརཾ ཨསཾཝརིཏྭཱ ནིཔནྣོ ‘དིཝཱ ཝུཊྛཧིསྶཱམཱི’ཏི, ཨནཱདརིཡེ ཨཱཔཏྟི ¶ དུཀྐཊསྶཱ’’ཏི ཝུཏྟཾ, ཨེཏྠཱཔི ‘‘ནིཔནྣོ’’ཏི ཝུཏྟཏྟཱ ‘‘ཨརུཎེ ཨུཊྛིཏེ ཨུཊྛཱཧཱི’’ཏི ན ཝུཏྟཏྟཱ ཙ ཛཱནིཏབྦཾ. ‘‘མཧཱཔཙྩརིཡཾ ཨནཱདརིཡདུཀྐཊམེཝ སནྡྷཱཡ ཝུཏྟཾ, ན ཨཊྛཀཐཱཡཾ ཝུཏྟདུཀྐཊ’’ནྟི ཨེཀེ ཝདནྟི. ཏསྶ ཨནཱཔཏྟཱིཏི ཨཏྠཏོ ཨནིཔནྣཏྟཱ ཝུཏྟཾ. ‘‘སཙེ པན རཏྟིཾ སཾཝརིཏྭཱ ནིཔནྣོ, ཨརུཎུཊྛཱནསམཡེ ཀོཙི ཝིཝརཏི, དྭཱརཛགྒནཱདཱིནི ཨཀཏྭཱ ནིཔནྣསྶ ཨཱཔཏྟིཡེཝ. ཀསྨཱ? ཨཱཔཏྟིཁེཏྟཏྟཱ’’ཏི ཝདནྟི.

ཡསྨཱ ཡཀྑགཧིཏཀོཔི ཝིསཉྙཱིབྷཱུཏོ ཝིཡ ཁིཏྟཙིཏྟོ ནཱམ ཧོཏི, ཨསྶ པཱརཱཛིཀཱཔཏྟིཏོ ཨནཱཔཏྟི, པགེཝ ཨཉྙཏོ, ཏསྨཱ ‘‘ཡཀྑགཧིཏཀོ ཝིཡ ཝིསཉྙཱིབྷཱུཏོཔི ན མུཙྩཏཱི’’ཏི ཡཾ མཧཱཔཙྩརིཡཾ ཝུཏྟཾ, ཏཾ པུབྦེ ¶ སཉྩིཙྩ དིཝཱ ནིཔནྣོ པཙྪཱ ཡཀྑགཧིཏཀོཔི ཝིསཉྙཱིབྷཱུཏོཔི ན མུཙྩཏི ནིཔཛྫནཔཡོགཀྑཎེ ཨེཝ ཨཱཔནྣཏྟཱཏི ཨདྷིཔྤཱཡེན ཝུཏྟཾ. བནྡྷིཏྭཱ ནིཔཛྫཱཔིཏོཝ མུཙྩཏཱིཏི ན ཡཀྑགཧིཏཀཱདཱིསྭེཝ, སོཔི ཡཱཝ སཡམེཝ སཡནཱདྷིཔྤཱཡོ ན ཧོཏི, ཏཱཝ མུཙྩཏི. ཡདཱ ཀིལནྟོ ཧུཏྭཱ ནིདྡཱཡིཏུཀཱམཏཱཡ སཡནཱདྷིཔྤཱཡོ ཧོཏི, ཏདཱ སཾཝརཱཔེཏྭཱ, ཛགྒཱཔེཏྭཱ ཝཱ ཨཱབྷོགཾ ཝཱ ཀཏྭཱ ནིདྡཱཡིཏབྦཾ, ཨཉྙཐཱ ཨཱཔཏྟི. སབྷཱགོ ཙེ ནཏྠི, ན པསྶཏི ཝཱ, ན གནྟུཾ ཝཱ སཀྐོཏི. ཙིརམྤི ཨདྷིཝཱསེཏྭཱ པཙྪཱ ཝེདནཱཊྚོ ཧུཏྭཱ ཨནཱབྷོགེནེཝ སཡཏི, ཏསྶ ‘‘ཨནཱཔཏྟི ཝེདནཱཊྚསྶཱ’’ཏི ཝཙནེན ཨནཱཔཏྟི, ཏསྶཱཔི ཨཝིསཡཏྟཱ ཨཱཔཏྟི ན དིསྶཏཱིཏི ཝིསཉྙཱིབྷཱཝེནེཝ སུཔནྟསྶ ‘‘ཨནཱཔཏྟི ཁིཏྟཙིཏྟསྶཱ’’ཏི ཝཙནེན ན དིསྶཏི. ཨཱཙརིཡཱ པན ཨེཝཾ ན ཀཐཡནྟཱིཏི ཨཝིསེསེན ‘‘ན དིསྶཏཱི’’ཏི ན ཀཐཡནྟི, ཡདི སཉྙཾ ཨཔྤཊིལབྷིཏྭཱ སཡཏི, ཨཝསཝཏྟཏྟཱ ཨཱཔཏྟི ན དིསྶཏི, སཙེ སཉྙཾ པཊིལབྷིཏྭཱཔི ཀིལནྟཀཱཡཏྟཱ སཡནཾ སཱདིཡནྟོ སུཔཏི, ཏསྶ ཡསྨཱ ཨཝསཝཏྟཏྟཾ ན དིསྶཏི, ཏསྨཱ ཨཱཔཏྟི ཨེཝཱཏི ཀཐཡནྟཱིཏི ཨདྷིཔྤཱཡོ.

མཧཱཔདུམཏྠེརཝཱདེ ཡཀྑགཧིཏཀོ ཁིཏྟཙིཏྟཀོ མུཙྩཏི. བནྡྷིཏྭཱ ནིཔཛྫཱཔིཏོ ཨསཡནཱདྷིཔྤཱཡཏྟཱ, ཝེདནཱཊྚཏྟཱ ཙ མུཙྩཏཱིཏི ཨདྷིཔྤཱཡོ. ཨེཝཾ སནྟེ པཱལི༹ཨཊྛཀཐཱ, ཐེརཝཱདོ ཙ སམེཏི, ཏསྨཱ ཏེསཾ ཏེསཾ ཝིནིཙྪཡཱནཾ ཨཡམེཝ ཨདྷིཔྤཱཡོཏི ནོ ཁནྟཱིཏི ཨཱཙརིཡོ, ཨནུགཎྛིཔདེ པན ཡཀྑགཧིཏཀོཔི ཝིསཉྙཱིབྷཱུཏོཔི ན མུཙྩཏི ནཱམ, པཱརཱཛིཀཾ ཨཱཔཛྫིཏུཾ བྷབྦོ སོ ཨནྟརནྟརཱ སཉྙཱཔཊིལཱབྷཏོཏི ཨདྷིཔྤཱཡོ. ‘‘བནྡྷིཏྭཱ ནིཔཛྫཱཔིཏོ ཝཱ’’ཏི ཀུརུནྡཱིཝཙནེན ཨེཀབྷངྒེན ནིཔནྣོཔི ན མུཙྩཏཱིཏི ཙེ? མུཙྩཏིཡེཝ. ཀསྨཱ? ཨཏྠཏོ ཨནིཔནྣཏྟཱ. ཀུརུནྡཱིཝཱདེན མཧཱཨཊྛཀཐཱཝཱདོ སམེཏི. ཀསྨཱ? ཨཝསཝཏྟསཱམཉྙཏོ. ཀིཉྩཱཔི སམེཏི, ཨཱཙརིཡཱ པན ཨེཝཾ ན ཀཐཡནྟི. ན ཀེཝལཾ ཏེཡེཝ, མཧཱཔདུམཏྠེརོཔཱིཏི ¶ དསྶནཏྠཾ ‘‘མཧཱཔདུམཏྠེརེནཱ’’ཏི ཝུཏྟཾ. མཧཱཔདུམཏྠེརཝཱདེ ‘‘པཱརཱཛིཀཾ ཨཱཔཛྫིཏུཾ ཨབྷབྦོ ཡཀྑགཧིཏཀོ ནཱམཱ’’ཏི ཙ ཝུཏྟཾ, ཏཏྠ ཨཱཙརིཡཱ པན ཨེཝཾ ཝདནྟི ‘‘སཙེ ཨོཀྐནྟནིདྡོ ཨཛཱནནྟོཔི པཱདེ མཉྩཀཾ ཨཱརོཔེཏི, ཨཱཔཏྟིཡེཝཱཏི ཝུཏྟཏྟཱ ཡོ པན པཏིཏྭཱ ཏཏྠེཝ སཡཏི ན ཝུཊྛཱཏི, ཏསྶ ཨཱཔཏྟི ཨནྟརནྟརཱ ཛཱནནྟསྶཱཔི ཨཛཱནནྟསྶཱཔི ཧོཏཱི’’ཏི ¶ . སབྦཊྛཀཐཱསུ ཝུཏྟཝཙནཱནི སམྤིཎྜེཏྭཱ དསྶེཏུཾ ‘‘ཨིདྷ ཀོ མུཙྩཏི ཀོ ན མུཙྩཏཱི’’ཏི ཝུཏྟཾ. ཡཀྑགཧིཏཀོ ཝཱ ཝིསཉྙཱིབྷཱུཏོ ཝཱ ན ཀེཝལཾ པཱརཱཛིཀཾ ཨཱཔཛྫིཏུཾ བྷབྦོ ཨེཝ, སབྦོཔི ཨཱཔཛྫཏི. ཨེཝཾ ‘‘བནྡྷིཏྭཱ ནིཔཛྫཱཔིཏོཝ མུཙྩཏཱི’’ཏི ཝཙནེན ཏསྶཔི ཨཝསཝཏྟཏྟཱ ‘‘ཨཱཔཏྟི ན དིསྶཏཱི’’ཏི ཨེཝཾ ན ཀཐཡནྟི. ཡསྨཱ ཨུམྨཏྟཀཁིཏྟཙིཏྟཝེདནཱཊྚེསུ ཨཉྙཏརོ ན ཧོཏི, ཏསྨཱ ‘‘ཨཱཔཏྟིཡེཝཱ’’ཏི ཀཐཡནྟི. ཨིདཾ ཀིར སབྦཾ ན སངྒཱིཏིཾ ཨཱརུལ༹ྷཾ. ‘‘པཝེསནཾ སཱདིཡཏཱིཏིཨཱདིནཱ ཝུཏྟཏྟཱ ཨཀིརིཡཱཔི ཧོཏཱིཏི ཝདནྟི, ཏཾ ན གཧེཏབྦཾ, ཡདཱ པན སཱདིཡཏི, ཏདཱ སུཁུམཱཔི ཝིཉྙཏྟི ཧོཏི ཨེཝཱཏི ཨིདྷ ཀིརིཡཱ ཨེཝཱ’’ཏི ཨནུགཎྛིཔདེ ཝུཏྟཾ.

པཋམཔཱརཱཛིཀཝཎྞནཱ ནིཊྛིཏཱ.

༢. དུཏིཡཔཱརཱཛིཀཾ

དྷནིཡཝཏྠུཝཎྞནཱ

༨༤. དུཏིཡེ རཱཛཱུཧི ཨེཝ པརིགྒཧིཏཏྟཱ ‘‘རཱཛགཧ’’ནྟི ལདྡྷནཱམཀེ སམཱིཔཏྠེན, ཨདྷིཀརཎཏྠེན ཙ པཊིལདྡྷབྷུམྨཝིབྷཏྟིཀེ གིཛ྄ཛྷཀཱུཊེ པབྦཏེ ཙཏཱུཧི ཝིཧཱརེཧི ཝིཧརནྟོཏི ཨདྷིཔྤཱཡོ. ཏསྶ ‘‘ཝསྶཾ ཨུཔགཙྪིཾསཱུ’’ཏི ཨིམིནཱ སམྦནྡྷོ ཝེདིཏབྦོ. ཏཡོ ཨེཝ ཧི ཉཏྟིཾ ཋཔེཏྭཱ གཎཀམྨཾ ཀརོནྟི, ན ཏཏོ ཨཱུནཱ ཨདྷིཀཱ ཝཱ ཨཀིརིཡཏྟཱ. ཏཏྠ ཝིནཡཔརིཡཱཡེན སངྒྷགཎཔུགྒལཀམྨཀོསལླཏྠཾ ཨིདཾ པཀིཎྞཀཾ ཝེདིཏབྦཾ – ཨཏྠི སངྒྷཀམྨཾ སངྒྷོ ཨེཝ ཀརོཏི, ན གཎོ ན པུགྒལོ, ཏཾ ཨཔལོཀནཀམྨསྶ ཀམྨལཀྑཎེཀདེསཾ ཋཔེཏྭཱ ཨིཏརཾ ཙཏུབྦིདྷམྤི ཀམྨཾ ཝེདིཏབྦཾ. ཨཏྠི སངྒྷཀམྨཾ སངྒྷོ ཙ ཀརོཏི, གཎོ ཙ ཀརོཏི, པུགྒལོ ཙ ཀརོཏི. ཀིཉྩཱཏི? ཡཾ པུབྦེ ཋཔིཏཾ. ཝུཏྟཉྷེཏཾ པརིཝཱརཊྛཀཐཱཡཾ ‘‘ཡསྨིཾ ཝིཧཱརེ དྭེ ཏཡོ ཛནཱ ཝསནྟི ¶ , ཏེཧི ནིསཱིདིཏྭཱ ཀཏམྤི སངྒྷེན ཀཏསདིསམེཝ. ཡསྨིཾ པན ཝིཧཱརེ ཨེཀོ བྷིཀྑུ ཧོཏི, ཏེན བྷིཀྑུནཱ ཨུཔོསཐདིཝསེ པུབྦཀརཎཔུབྦཀིཙྩཾ ཀཏྭཱ ནིསིནྣེན ཀཏམྤི ཀཏིཀཝཏྟཾ སངྒྷེན ཀཏསདིསམེཝ ཧོཏཱི’’ཏི (པརི. ཨཊྛ. ༤༩༥-༤༩༦). པུནཔི ཝུཏྟཾ ‘‘ཨེཀབྷིཀྑུཀེ པན ¶ ཝིཧཱརེ ཨེཀེན སཱཝིཏེཔི པུརིམཀཏིཀཱ པཊིཔྤསྶམྦྷཏི ཨེཝཱ’’ཏི. ཨཏྠི གཎཀམྨཾ སངྒྷོ ཀརོཏི, གཎོ ཀརོཏི, པུགྒལོ ཀརོཏི, ཏཾ ཏཡོ པཱརིསུདྡྷིཨུཔོསཐཱ ཨཉྙེསཾ སནྟིཀེ ཀརཱིཡནྟི, ཏསྶ ཝསེན ཝེདིཏབྦཾ. ཨཏྠི གཎཀམྨཾ གཎོཝ ཀརོཏི, ན སངྒྷོ ན པུགྒལོ, ཏཾ པཱརིསུདྡྷིཨུཔོསཐོ ཨཉྙམཉྙཾ ཨཱརོཙནཝསེན ཀརཱིཡཏི, ཏསྶ ཝསེན ཝེདིཏབྦཾ. ཨཏྠི པུགྒལཀམྨཾ པུགྒལོཝ ཀརོཏི, ན སངྒྷོ ན གཎོ, ཏཾ ཨདྷིཊྛཱནུཔོསཐཝསེན ཝེདིཏབྦཾ. ཨཏྠི གཎཀམྨཾ ཨེཀཙྩོཝ གཎོ ཀརོཏི, ཨེཀཙྩོ ན ཀརོཏི, ཏཏྠ ཨཉཏྟིཀཾ དྭེ ཨེཝ ཀརོནྟི, ན ཏཡོ. སཉཏྟིཀཾ ཏཡོཝ ཀརོནྟི, ན ཏཏོ ཨཱུནཱ ཨདྷིཀཱ ཝཱ, ཏེན ཝུཏྟཾ ‘‘ཏཡོ ཨེཝ ཧི ཉཏྟིཾ ཋཔེཏྭཱ གཎཀམྨཾ ཀརོནྟི, ན ཏཏོ ཨཱུནཱ ཨདྷིཀཱ ཝཱ ཨཀིརིཡཏྟཱ’’ཏི. ཏསྨཱ ཏཡོཝ ཝིནཡཔརིཡཱཡེན སམྤཧུལཱ, ན ཏཏོ ཨུདྡྷནྟི ཝེདིཏབྦཾ. ཨནུགཎྛིཔདེ པན ‘‘ཀིཉྩཱཔི ཀམྨལཀྑཎཾ ཏཡོཝ ཀརོནྟི, ཨཐ ཁོ ཏེཧི ཀཏཾ སངྒྷེན ཀཏསདིསནྟི ཝུཏྟཏྟཱ ཨེཀེན པརིཡཱཡེན ཏཡོ ཛནཱ ཝིནཡཔརིཡཱཡེནཔི སངྒྷོ’’ཏི ཝུཏྟཾ, ཨིདཾ སབྦམྤི ཝིནཡཀམྨཾ ཨུཔཱདཱཡ ཝུཏྟཾ, ལཱབྷཾ པན ཨུཔཱདཱཡ ཨནྟམསོ ཨེཀོཔི ཨནུཔསམྤནྣོཔི ‘‘སངྒྷོ’’ཏི སངྑྱཾ གཙྪཏི ཀིར. པཝཱརཎཱདིཝསསྶ ཨརུཎུགྒམནསམནནྟརམེཝ ‘‘ཝུཏྠགསྶཱ’’ཏི ཝུཙྩནྟི, ཨུཀྐཾསནཡེན ‘‘པཱཊིཔདདིཝསཏོ པཊྛཱཡཱ’’ཏི ཝུཏྟཾ, ཏེནེཝ ‘‘མཧཱཔཝཱརཎཱཡ པཝཱརིཏཱ’’ཏི ཝུཏྟཾ. ཨཉྙཐཱ ཨནྟརཱཡེན ཨཔཝཱརིཏཱ ‘‘ཝུཏྠཝསྶཱ’’ཏི ན ཝུཙྩནྟཱིཏི ཨཱཔཛྫཏི. ཐམྦྷཱདི ཀཊྛཀམྨནྟི ཝེདིཏབྦཾ. ཀེཙི ཏནུཀཾ དཱརུཏྠམྦྷཾ ཨནྟོཀཏྭཱ མཏྟིཀཱམཡཾ ཐམྦྷཾ ཀརོནྟི, ཨཡཾ པན ཏཐཱ ན ཨཀཱསི, ཏེན ཝུཏྟཾ ‘‘སབྦམཏྟིཀཱམཡཾ ཀུཊིཀཾ ཀརིཏྭཱ’’ཏི. ཏེལམིསྶཱཡ ཏམྦམཏྟིཀཱཡ.

༨༥. ‘‘མཱ པཙྪིམཱ ཛནཏཱ པཱཎེསུ པཱཏབྱཏཾ ཨཱཔཛྫཱི’’ཏི ཨིམིནཱ ཨནུདྡེསསིཀྑཱཔདེན ཡཏྠ ཨིཊྛཀཔཙན པཏྟཔཙན ཀུཊིཀརཎ ཝིཧཱརཀཱརཱཔན ནཝཀམྨཀརཎ ཁཎྜཕུལླཔཊིསངྑརཎ ཝིཧཱརསམྨཛྫན པཊགྒིདཱན ཀཱུཔཔོཀྑརཎཱིཁཎཱཔནཱདཱིསུ པཱཏབྱཏཾ ཛཱནནྟེན བྷིཀྑུནཱ ཀཔྤིཡཝཙནམྤི ན ཝཏྟབྦནྟི དསྶེཏི, ཏེནེཝ པརིཡཱཡཾ ཨཝཏྭཱ ཏེསཾ སིཀྑཱཔདཱནཾ ཨནཱཔཏྟིཝཱརེསུ ‘‘ཨནཱཔཏྟི ཨསཏིཡཱ ཨཛཱནནྟསྶཱ’’ཏི ཝུཏྟཾ. ‘‘ཨནྟརཱཔཏྟིསིཀྑཱཔད’’ནྟིཔི ཨེཏསྶ ནཱམམེཝ. ‘‘གཙྪཐེཏཾ, བྷིཀྑཝེ, ཀུཊིཀཾ བྷིནྡཐཱ’’ཏི ཨིམིནཱ ཀཏཾ ལབྷིཏྭཱ ཏཏྠ ཝསནྟཱནམྤི དུཀྐཊམེཝཱཏི ཙ སིདྡྷཾ. ཨཉྙཐཱ ཧི ¶ བྷགཝཱ ན བྷིནྡཱཔེཡྻ. ཨེས ནཡོ བྷེདནཀཾ ཚེདནཀཾ ཨུདྡཱལནཀནྟི ཨེཏྠཱཔི, ཨཱཔཏྟིབྷེདཱཝ. ཏཏོ ཨེཝ ཧི ¶ བྷེདནཀསིཀྑཱཔདཱདཱིསུ ཝིཡ ‘‘ཨཉྙེན ཀཏཾ པཊིལབྷིཏྭཱ པརིབྷུཉྫཏི, ཨཱཔཏྟི དུཀྐཊསྶཱ’’ཏི ན ཝུཏྟཾ, ཏཐཱ ཨཉྙསྶཏྠཱཡ ཀརོཏི, ཙེཏིཡཱདཱིནཾ ཨཏྠཱཡ ཀརོཏི, དུཀྐཊམེཝཱཏི ཙ སིདྡྷཾ, ཨཉྙཐཱ ཀུཊིཀཱརསིཀྑཱཔདཱདཱིསུ ཝིཡ ‘‘ཨཉྙསྶཏྠཱཡ ཝཱསཱགཱརཾ ཋཔེཏྭཱ སབྦཏྠ, ཨནཱཔཏྟཱི’’ཏི ནཡམེཝ ཝདེཡྻ, ན བྷིནྡཱཔེཡྻ. སབྦམཏྟིཀཱམཡབྷཱཝཾ པན མོཙེཏྭཱ ཀཊྛཔཱསཱཎཱདིམིསྶཾ ཀཏྭཱ པརིབྷུཉྫཏི, ཨནཱཔཏྟི. ཏཐཱ ཧི ཚེདནཀསིཀྑཱཔདཱདཱིསུ བྷགཝཏཱ ནཡོ དིནྣོ ‘‘ཨཉྙེན ཀཏཾ པམཱཎཱཏིཀྐནྟཾ པཊིལབྷིཏྭཱ ཚིནྡིཏྭཱ པརིབྷུཉྫཏཱི’’ཏིཨཱདཱིསུ. ཀེཙི པན ‘‘ཝཡཀམྨམྤཱིཏི ཨེཏེན མཱུལཾ དཏྭཱ ཀཱརཱཔིཏམྤི ཨཏྠི, ཏེན ཏཾ ཨཉྙེན ཀཏམྤི ན ཝཊྚཏཱིཏི སིདྡྷ’’ནྟི ཝདནྟི, ཏཾ ན སུནྡརཾ. ཀསྨཱ? སམྦྷཱརེ ཀིཎིཏྭཱ སཡམེཝ ཀརོནྟསྶཱཔི ཝཡཀམྨསམྦྷཝཏོ. ཀིཾ ཝཱ པཱལི༹ལེསེ སཏི ཨཊྛཀཐཱལེསནཡོ. ཨིཊྛཀཱཧི གིཉྫཀཱཝསཐསངྑེཔེན ཀཏཱ ཝཊྚཏཱིཏི ཨེཏྠ པཀཏིཨིཊྛཀཱཧི ཙིནིཏྭཱ ཀཏྟབྦཱཝསཐོ གིཉྫཀཱཝསཐོ ནཱམ. སཱ ཧི ‘‘མཏྟིཀཱམཡཱ’’ཏི ན ཝུཙྩཏི, ‘‘ཨིཊྛཀཀུཊིཀཱ’’ཏྭེཝ ཝུཙྩཏི, ཏསྨཱ ཐུསགོམཡཏིཎཔལཱལམིསྶཱ མཏྟིཀཱམཡཱཔི ཨཔཀྐིཊྛཀམཡཱཔི ‘‘སབྦམཏྟིཀཱམཡཱ’’ཏྭེཝ ཝུཙྩཏཱིཏི ནོ ཁནྟཱིཏི ཨཱཙརིཡོ, བྷསྨཱདཡོ ཧི མཏྟིཀཱཡ དལ༹ྷིབྷཱཝཏྠམེཝ ཨཱདཱིཡནྟི, ཨཔཀྐིཊྛཀམཡཱཔི གིཉྫཀཱཝསཐསངྑྱཾ ན གཙྪཏི, ན ཙ ཨཱཡསྨཱ དྷནིཡོ ཨེཀཔྤཧཱརེནེཝ ཀུམྦྷཀཱརོ ཝིཡ ཀུམྦྷཾ ཏཾ ཀུཊིཀཾ ནིཊྛཱཔེསི, ཨནུཀྐམེན པན སུཀྑཱཔེཏྭཱ སུཀྑཱཔེཏྭཱ མཏྟིཀཱཔིཎྜེཧི ཙིནིཏྭཱ ནིཊྛཱཔེསི, ཨཔཀྐིཊྛཀམཡཱ ཀུཊི ཝིཡ སབྦམཏྟིཀཱམཡཱ ཀུཊི ཨེཀཱབདྡྷཱ ཧོཏི, ན ཏཐཱ པཀྐིཊྛཀམཡཱ, ཏསྨཱ སཱ ཀཔྤཏཱིཏི ཨེཀེ. སབྦམཏྟིཀཱམཡཱཡ ཀུཊིཡཱ བཧི ཙེ ཏིཎཀུཊིཀཱདིཾ ཀཏྭཱ ཨནྟོ ཝསཏི, དུཀྐཊམེཝ. སཙེ ཏཏྠ ཏཏྠ ཚིདྡཾ ཀཏྭཱ བནྡྷིཏྭཱ ཨེཀཱབདྡྷཾ ཀརོཏི, ཝཊྚཏི. ཨནྟོ ཙེ ཏིཎཀུཊིཀཱདིཾ ཀཏྭཱ ཨནྟོ ཝསཏི, ཝཊྚཏི. ཀཱརཀོ ཨེཝ ཙེ ཝསཏི, ཀརཎཔཙྩཡཱ དུཀྐཊཾ ཨཱཔཛྫཏི, ན ཝསནཔཙྩཡཱ. སཙེ ཨནྟོ ཝཱ བཧི ཝཱ ཨུབྷཡཏྠ ཝཱ སུདྷཱཡ ལིམྤཏི, ཝཊྚཏི. ཡསྨཱ སབྦམཏྟིཀཱམཡཱ ཀུཊི སུཀརཱ བྷིནྡིཏུཾ, ཏསྨཱ ཏཏྠ ཋཔིཏཾ པཏྟཙཱིཝརཱདི ཨགུཏྟཾ ཧོཏི, ཙོརཱདཱིཧི ཨཝཧརིཏུཾ སཀྐཱ, ཏེན ཝུཏྟཾ ‘‘པཏྟཙཱིཝརགུཏྟཏྠཱཡཱ’’ཏི.

པཱལི༹མུཏྟཀཝིནིཙྪཡཝཎྞནཱ

ཏེན ¶ ཁོ པན སམཡེན ཚབྦགྒིཡཱ བྷིཀྑཱུ ཨུཙྩཱཝཙེ པཏྟེ དྷཱརེནྟི, ཨུཙྩཱཝཙཱནི པཏྟམཎྜལཱནི དྷཱརེནྟཱི’’ཏི (ཙུལ༹ཝ. ༢༥༣) ཨེཝམཱདཱིནི ཝཏྠཱུནི ནིསྶཱཡ ‘‘ན, བྷིཀྑཝེ, ཨུཙྩཱཝཙཱ པཏྟཱ དྷཱརེཏབྦཱ, ཡོ དྷཱརེཡྻ, ཨཱཔཏྟི དུཀྐཊསྶཱ’’ཏིཨཱདིནཱ ནཡེན ཨཀཔྤིཡཔརིཀྑཱརེསུ ¶ ཙ དུཀྐཊཾ པཉྙཏྟཾ. ཀསྨཱ? ཏདནུལོམཏྟཱ. ཡཏྠཱཔི ན པཉྙཏྟཾ, ཏཏྠ ‘‘ན, བྷིཀྑཝེ, ཨུཙྩཱཝཙཱནི ཚཏྟཱནི དྷཱརེཏབྦཱནི, ཡོ དྷཱརེཡྻ, ཨཱཔཏྟི དུཀྐཊསྶཱ’’ཏིཨཱདིནཱ (ཙཱུལ༹ཝ. ༢༦༩-༢༧༠) ནཡེན དུཀྐཊཾ སམྦྷཝཏི, ཏསྨཱ ‘‘ཏཏྲཱཡཾ པཱལི༹མུཏྟཀོ’’ཏི ཨཱརབྷིཏྭཱ སབྦཔརིཀྑཱརེསུ ཝཎྞམཊྛཾ, སཝིཀཱརཾ ཝཱ ཀརོནྟསྶ ཨཱཔཏྟི དུཀྐཊནྟི དཱིཔེནྟེན ‘‘ན ཝཊྚཏཱི’’ཏི ཝུཏྟནྟི ཝེདིཏབྦཾ. ཨེཏྠཱཧ – ‘‘ཨནུཛཱནཱམི, བྷིཀྑཝེ, ཋཔེཏྭཱ པཧརཎིཾ སབྦཾ ལོཧབྷཎྜཾ, ཋཔེཏྭཱ ཨཱསནྡིཾ པལླངྐཾ དཱརུཔཏྟཾ དཱརུཔཱདུཀཾ སབྦཾ དཱརུབྷཎྜཾ, ཋཔེཏྭཱ ཀཏཀཉྩ ཀུམྦྷཀཱརིཀཉྩ སབྦཾ མཏྟིཀཱབྷཎྜ’’ནྟི (ཙཱུལ༹ཝ. ༢༩༣) ཝུཏྟཏྟཱ ཡཐཱཋཔིཏཾ ཝཛྫེཏྭཱ ཨིཏརཾ སབྦཾ ཝཎྞམཊྛམྤི སཝིཀཱརམྤི ཨཝིསེསེན ཝཊྚཏཱིཏི? ཝུཙྩཏེ – ཏཾ ན ཡུཏྟཾ ཡཐཱདསྶིཏཔཱལི༹ཝིརོདྷཏོ, ཏསྨཱ ‘‘ཋཔེཏྭཱ པཧརཎི’’ནྟི ཨེཝཾ ཛཱཏིཝསེན ཨཡཾ པཱལི༹ པཝཏྟཱ, ཡཐཱདསྶིཏཱ པཱལི༹ ཝཎྞམཊྛཱདིཝིཀཱརཔཊིསེདྷནཝསེན པཝཏྟཱཏི ཨེཝཾ ཨུབྷཡམྤི ན ཝིརུཛ྄ཛྷཏི, ཏསྨཱ ཡཐཱཝུཏྟམེཝ. ཨཱརགྒེན ནིཁཱདནགྒེན, ‘‘ཨཱརགྒེརིཝ སཱསཔོ’’ཏི (མ. ནི. ༢.༤༥༨; དྷ. པ. ༤༠༡; སུ. ནི. ༦༣༠) ཨེཏྠ ཝུཏྟནཡཏོ ཨཱརགྒེན.

པཊྚམུཁེ ཝཱཏི པཊྚཀོཊིཡཾ. པརིཡནྟེཏི ཙཱིཝརཔརིཡནྟེ. ཝེཎིཨུཧུམུནིཡུཔེཉྙཱམ. ཨགྒྷིཡནྟི ཙེཏིཡཾ. གཡམུགྒརནྟི ཏུལཱདཎྜསཎྛཱནཾ, གཡཱ སཱིསེ སཱུཙིཀཱ ཧོཏི, མུཁཔཏྟཱ ལདྲཱ. ཨུཀྐིརནྟི ནཱིཧརནྟི ཀརོནྟི ཋཔེནྟི. ཀོཎསུཏྟཔིལ༹ཀཱ ནཱམ གཎྛིཀཔཊྚཱདིཀོཎེསུ སུཏྟམཡཔིལ༹ཀཱ. ཡཾ ཨེཏྠ ཙཱིཝརཾ ཝཱ པཏྟོ ཝཱ ‘‘ན ཝཊྚཏཱི’’ཏི ཝུཏྟོ, ཏཏྠ ཨདྷིཊྛཱནཾ རུཧཏི, ཝིཀཔྤནཱཔི རུཧཏཱིཏི ཝེདིཏབྦཾ. དེཌྜུབྷོཏི ཨུདཀསཔྤོ. ཨཙྪཱིཏི ཀུཉྫརཀྑི. གོམུཏྟཀནྟི གོམུཏྟསཎྛཱནཱ རཱཛིཡོ. ཀུཉྩིཀཱཡ སེནཱསནཔརིཀྑཱརཏྟཱ སུཝཎྞརཱུཔིཡམཡཱཔི ཝཊྚཏཱིཏི ཚཱཡཱ དིསྶཏི, ‘‘ཀུཉྩིཀཱཡ ཝཎྞམཊྛཀམྨཾ ན ཝཊྚཏཱི’’ཏི ཝཙནཏོ ཨཉྙེ ཀཔྤིཡལོཧཱདིམཡཱཝ ཀུཉྩིཀཱ ཀཔྤནྟི པརིཧརཎཱིཡཔརིཀྑཱརཏྟཱ. ཨཱརཀཎྚཀོ པོཏྠཀཱདིཀརཎསཏྠཀཛཱཏི. ‘‘ཨཱམཎྜཀསཱརཀོ ཨཱམལཀཕལམཡོ’’ཏི ཝདནྟི ¶ . ཏཱལཔཎྞབཱིཛནཱིཨཱདཱིསུ ‘‘ཝཎྞམཊྛཀམྨཾ ཝཊྚཏཱི’’ཏི ཝུཏྟཾ. ཀིཉྩཱཔི ཏཱནི ཀུཉྩིཀཱ ཝིཡ པརིཧརཎཱིཡཱནི, ཨཐ ཁོ ‘‘ཨུཙྩཱཝཙཱནི ན དྷཱརེཏབྦཱནཱི’’ཏི པཊིཀྑེཔཱབྷཱཝཏོ ཝུཏྟཾ. ཀེཝལཉྷི ཏཱནི ‘‘ཨནུཛཱནཱམི, བྷིཀྑཝེ, ཝིདྷཱུཔནཉྩ ཏཱལཝཎྚཉྩཱ’’ཏིཨཱདིནཱ (ཙཱུལ༹ཝ. ༢༦༩) ཝུཏྟཱནི. གཎྛིཔདེ པན ‘‘ཏེལབྷཱཛནེསུ ཝཎྞམཊྛཀམྨཾ ཝཊྚཏཱིཏི སེནཱསནཔརིཀྑཱརཏྟཱ’’ཏི ཝུཏྟཾ. རཱཛཝལླབྷཱཏི རཱཛཀུལཱུཔཀཱ. སཱིམཱཏི ཨིདྷཱདྷིཔྤེཏཱ བྷཱུམི, བདྡྷསཱིམཱ ཙ. ‘‘ཡེསཾ སནྟཀཱ ཏེསཾ སཱིམཱ, ཏཏྠ པརེཧི ན ཀཏྟབྦ’’ནྟི ཨནུགཎྛིཔདེ ཝུཏྟཾ. ‘‘བྷཱུམི ཙ སཱིམཱ ཙ ཡེསཾ སནྟཀཱ, ཏེཧི ཨེཝ ཝཱརེཏབྦཱ. ཡེསཾ པན ཨཉྙེསཾ བྷཱུམིཡཾ སཱིམཱ ཀཏཱ, ཏེ ཝཱརེཏུཾ ན ཨིསྶརཱ’’ཏི ཝདནྟི ¶ . ‘‘སངྒྷབྷེདཱདཱིནཾ ཀཱརཎཏྟཱ ‘མཱ ཀརོཐཱ’ཏི པཊིསེདྷེཏབྦཱ ཨེཝཱ’’ཏི ཨནྡྷཀཊྛཀཐཱཡཾ ཝུཏྟཾ ཀིར.

༨༦-༧. དཱརུཀུཊིཀཾ ཀཱཏུཾ, ཀཏྟུནྟི ཙ ཨཏྠི. ཁཎྜཱཁཎྜིཀནྟི ཕལཱཕལཾ ཝིཡ དཊྛབྦཾ. ཨཱཎཱཔེཧཱིཏི ཝཙནཾ ཨནིཊྛེ ཨེཝ ཝུཙྩཏཱིཏི ཀཏྭཱ བནྡྷཾ ཨཱཎཱཔེསི. ཨིསྶརིཡམཏྟཱཡཱཏི སམིདྡྷིཡཾ མཏྟཱསདྡོཏི ཉཱཔེཏི.

༨༨. ‘‘ཨེཝརཱུཔཾ ཝཱཙཾ བྷཱསིཏྭཱ’’ཏི ཙ པཱཋོ. ལོམེན ཏྭཾ མུཏྟོ, མཱ པུནཔི ཨེཝརཱུཔམཀཱསཱིཏི ཨིདཾ ཀིཾ བྱཱཔཱདདཱིཔཀཾ, དཱརཱུསུཔི ལོབྷཀྑནྡྷདཱིཔཀཾ ཝཙནཾ སོཏཱཔནྣསྶ སཏོ ཏསྶ རཱཛསྶ པཏིརཱུཔཾ. ནནུ ནཱམ ‘‘པུབྦེ ཀཏཾ སུཀཏཾ བྷནྟེ, ཝདེཡྻཱཐ པུནཔི ཡེནཏྠོ’’ཏི པཝཱརེཏྭཱ ཨཏཱིཝ པཱིཏིཔཱམོཛྫཾ ཨུཔྤཱདེཏབྦཾ ཏེན སིཡཱཏི? སཙྩམེཏཾ སོཏཱཔནྣཏྟཱ ཨཏཱིཝ བུདྡྷམཱམཀོ དྷམྨམཱམཀོ སངྒྷམཱམཀོ ཙ, ཏསྨཱ བྷིཀྑཱུནཾ ཨཀཔྤིཡཾ ཨསཧནྟོ, སིཀྑཱཔདཔཉྙཏྟིཡཱ ཙ ཨོཀཱསཾ ཀཏྟུཀཱམོ ‘‘སུཔཡུཏྟཱནི མེ དཱརཱུནཱི’’ཏི ཏུཊྛཙིཏྟོཔི ཨེཝམཱཧཱཏི ཝེདིཏབྦཾ. ཨིམེཧི ནཱམ ཨེཝརཱུཔེ ཋཱནེ. ‘‘ཨཱགཏཔདཱནུརཱུཔེནཱཏི ཨཉྙེཧི ཝཱ པདེཧི, ཨིཏོ ཐོཀཏརེཧི ཝཱ ཨཱགཏཀཱལེ ཏདནུརཱུཔཱ ཡོཛནཱ ཀཱཏབྦཱ’’ཏི གཎྛིཔདེ ཝུཏྟཾ. ‘‘ན ཀེཝལཾ ཨིམསྨིཾཡེཝ སིཀྑཱཔདེ, ཨཉྙེསུཔི ཨཱགཙྪནྟི, ཏསྨཱ ཏཏྠ ཏཏྠ ཨཱགཏཔདཱནུརཱུཔེན ཡོཛནཱ ཝེདིཏབྦཱ’’ཏི ཨནུགཎྛིཔདེ ཝུཏྟཾ. ཨུཛ྄ཛྷཱཡནཏྠོ ཨདིནྣསྶཱདིནྣཏྟཱཝ, ཏེ ཨུཛ྄ཛྷཱཡིཾསུ.

རུདྲདཱམཀོ ནཱམ རུདྲདཱམཀཱདཱིཧི ཨུཔྤཱདིཏོ. བཱརཱཎསིནགརཱདཱིསུ ཏེཧི ཏེཧི རཱཛཱུཧི པོརཱཎསཏྠཱནུརཱུཔཾ ལཀྑཎསམྤནྣཱ ཨུཔྤཱདིཏཱ ནཱིལཀཧཱཔཎཱ. ཏེསཾ ཀིར ཏིབྷཱགཾ ཨགྒྷཏི རུདྲདཱམཀོ, ཏསྨཱ ཏསྶ ¶ པཱདོ ཐུལླཙྩཡཝཏྠུ ཧོཏི. མཱསཀོ པན ཨིདྷ ཨཔྤམཱཎཾ. ཀཧཱཔཎོ ཀིཉྩིཀཱལེ ཨཱུནཝཱིསཏིམཱསཀོ ཧོཏི, ཀིཉྩི ཀཱལེ ཨཏིརེཀཝཱིསཏིམཱསཀོ. ཏསྨཱ ཏསྶ ཀཧཱཔཎསྶ ཙཏུཏྠབྷཱགོ པཉྩམཱསཀོ ཝིཡ ཨཏིརེཀཔཉྩམཱསཀོ ཝཱ ཨཱུནཔཉྩམཱསཀོ ཝཱ པཱདོཏི ཝེདིཏབྦཾ. ཨིམསྶཏྠསྶ དཱིཔནཏྠཾ ‘‘ཏདཱ རཱཛགཧེ ཝཱིསཏིམཱསཀོ ཀཧཱཔཎོ ཧོཏཱི’’ཏིཨཱདི ཝུཏྟཾ. ཏཏྠ རཛཏམཡོ སུཝཎྞམཡོ ཏམྦམཡོ ཙ ཀཧཱཔཎོ ཧོཏི. སུཝཎྞབྷཱུམིཡཾ ཝིཡ པཱདོཔི ཡཏྠ ཏམྦམཡོཝ ཀཏོ ཧོཏི, ཏཏྠ སོཝ པཱདོཏི ཨཱཙརིཡོ. ཡསྨཱ པཱདོ ཨེཀནཱིལཀཧཱཔཎགྒྷནཀོ, ཏསྨཱ ཏསྶ པཱདསྶ ཙཏུཏྠབྷཱགོཝ སིཡཱ པཱདོཏི ཨེཀེ. ཨིདཾ ན ཡུཛྫཏི. ཡོ ཙ ཏཏྠ པཱདཱརཧོ བྷཎྜོ, ཏསྶ ཙཏུཏྠབྷཱགསྶེཝ པཱརཱཛིཀཝཏྠུབྷཱཝཔྤསངྒཏོ. ཡདི པཱདཱརཧཾ བྷཎྜཾ པཱརཱཛིཀཝཏྠུ, སིདྡྷཾ ‘‘སོཝ པཱདོ པཙྪིམཾ པཱརཱཛིཀཝཏྠཱུ’’ཏི ¶ . ན ཧི སབྦཏྠ བྷཎྜཾ གཧེཏྭཱ ནཱིལཀཧཱཔཎགྒྷེན ཨགྒྷཱཔེནྟི. ཡསྨཱ ཏསྶ ཏསྶེཝ ཀཧཱཔཎགྒྷེན ཨགྒྷཱཔེནྟི, ཏསྨཱ ཏསྶ ཏསྶ ཛནཔདསྶ པཱདོཝ པཱདོཏི ཏདགྒྷནཀམེཝ པཱདགྒྷནཀནྟི སིདྡྷཾ, ‘‘སོ ཙ ཁོ པོརཱཎསྶ ནཱིལཀཧཱཔཎསྶ ཝསེན, ན ཨིཏརེསནྟི ཡཏྠ པན ནཱིལཀཧཱཔཎཱ ཝལ༹ཉྫཾ གཙྪནྟི, ཏཏྠེཝཱ’’ཏི ཀེཙི ཝདནྟི, ཨུཔཔརིཀྑིཏྭཱ གཧེཏབྦཾ.

པདབྷཱཛནཱིཡཝཎྞནཱ

༩༢. གཱམཱ ཝཱ ཨརཉྙཱ ཝཱཏི ལཀྑཎཱནུཔཉྙཏྟིཀཏྟཱ པཋམཔཉྙཏྟིཡཱ ཨཱདིམྷི ཝུཏྟཱ. ཡཏོ ཝཱ ཨཔཀྐནྟཱ, སོ ཨམནུསྶོ ནཱམ. ‘‘ཨམནུསྶགཱམཾ ཨཔཱརུཔིཏྭཱ, གཱམཔྤཝེསནཉྩ ཨནཱཔུཙྪཱ པཝིསིཏུཾ ཝཊྚཏཱི’’ཏི ཨནུགཎྛིཔདེ ཝུཏྟཾ. ‘‘ཡཏོ གཱམཏོ ཨཱགནྟུཀཱམཱ ཨེཝ ཨཔཀྐནྟཱ, ཏཾ གཱམཾ ཨེཝཾ པཝིསིཏུཾ ན ཝཊྚཏཱི’’ཏི ཝདནྟི ཨེཀེ. ཀེཙི པན ‘‘ཡཀྑཔརིགྒཧབྷཱུཏོཔི ཨཱཔཎཱདཱིསུ དིསྶམཱནེསུ ཨེཝ ‘གཱམོ’ཏི སངྑྱཾ གཙྪཏི, ཨདིསྶམཱནེསུ པཝེསནེ ཨནཱཔཏྟཱི’’ཏི ཝདནྟི. ‘‘གཱམོ ཨེཝ ཨུཔཙཱརོ གཱམཱུཔཙཱརོཏི ཨེཝཾ ཀམྨདྷཱརཡཝསེན གཧིཏེ ཀུརུནྡཊྛཀཐཱདཱིསུ ཝུཏྟམྤི སུཝུཏྟམེཝ ཧོཏཱི’’ཏི ཝདནྟི. ‘‘ཏསྶ གྷརཱུཔཙཱརོ གཱམོཏི ཨཱཔཛྫཏཱི’’ཏི ཝཙནཾ པཊིཀྑིཔཏི. ‘‘གཱམསྶུཔཙཱརོ ཙ གཱམོ ཙ གཱམཱུཔཙཱརོ ཙཱ’’ཏི ཝདནྟི, ཏཾ ཝིརུཛ྄ཛྷཏི, ན. ‘‘ཨིམེསཾ ལཱབྷཱདཱིསུ ལཀྑཎཾ སནྡྷཱཡ མཧཱཨཊྛཀཐཱཡཾ ‘གྷརཾ གྷརཱུཔཙཱརོ’ཏིཨཱདི ཝུཏྟཾ, ཏཾ ན མཡཾ པཊིཀྑིཔཱམཱ’’ཏི ཙ ཝདནྟི. ‘‘ཀཏཔརིཀྑེཔོ ¶ ཙཱཏི གྷརསྶ སམནྟཏོ ཏཏྟཀོ ཨུཔཙཱརོ ནཱམཱ’’ཏི གཎྛིཔདེ ལིཁིཏཾ. ཨནུགཎྛིཔདེ པན ‘‘ཡོ ཡོ ཨཊྛཀཐཱཝཱདོ ཝཱ ཐེརཝཱདོ ཝཱ པཙྪཱ ཝུཙྩཏཱིཏི ཨིཏོ ཨནཱགཏཾ སནྡྷཱཡ ཝུཏྟཾ, ནཱཏཱིཏཾ. ཡདི ཨཏཱིཏམྤི སནྡྷཱཡ ཝུཏྟཾ, མཧཱཔདུམཐེརཝཱདོཝ པམཱཎཾ ཛཱཏནྟི ཨཱཔཛྫཏི, ཏསྨཱ ཨནཱགཏམེཝ སནྡྷཱཡ ཝུཏྟནྟི ཨཱཙརིཡཱ ཀཐཡནྟཱི’’ཏི ཝུཏྟཾ. སེསམྤཱིཏི གཱམཱུཔཙཱརལཀྑཎམྤི.

ཏཏྲཱཡཾ ནཡོཏི ཏསྶ གཱམཱུཔཙཱརསྶ གཧཎེ ཨཡཾ ནཡོ. ཝིཀཱལེགཱམཔྤཝེསནཱདཱིསཱུཏི ཨེཏྠ ‘‘གཱམཔྤཝེསནཉྷི བཧི ཨེཝ ཨཱཔུཙྪིཏབྦ’’ནྟི གཎྛིཔདེ ཝུཏྟཾ. ‘‘ཏཾ ཨཊྛཀཐཱཡ ན སམེཏཱི’’ཏི ཝདནྟི. ‘‘གཱམསངྑཱཏཱུཔཙཱརཾ སནྡྷཱཡ ཝུཏྟ’’ནྟི གཧིཏེ སམེཏཱིཏི མམ ཏཀྐོ. ‘‘ཨཱདི-སདྡཏོ གྷརེ ཋིཏཱནཾ དིནྣལཱབྷབྷཱཛནཱདཱིནཱི’’ཏི གཎྛིཔདེ ཝུཏྟཾ. ‘‘གཱམཱུཔཙཱརེ ཋིཏཱནཾ པཱཔུཎིཏབྦལཱབྷཾ སཉྩིཙྩ ཨདེནྟཱནཾ པཱརཱཛིཀ’’ནྟི ཨནུགཎྛིཔདེ ཝུཏྟཾ. ཀིཉྩཱཔི ཀུརུནྡིཨཱདཱིསུ པཱལི༹ཡཾ ཝུཏྟཝཙནཱནུལོམཝསེན ཝུཏྟཏྟཱ ‘‘པམཱདལེཁཱ’’ཏི ན ཝཏྟབྦཾ, མཧཱཨཊྛཀཐཱཡཾ ¶ ཝུཏྟཝིནིཙྪཡོ སངྒཱིཏིཏོ པཊྛཱཡ ཨཱགཏོ. ‘‘ཡཉྩེཏཾ མཧཱཨཊྛཀཐཱཡ’’ནྟིཨཱདི སཱིཧལ༹དཱིཔེ ཨཊྛཀཐཱཙརིཡེཧི ཝུཏྟཾ ‘‘ཝིནིཙྪཡནཡོ’’ཏི ཙ. ལེཌྜུཔཱཏེནེཝ པརིཙྪིནྡིཏབྦོཏི པརིཀྑེཔཱརཧཊྛཱནཾ, ན ཨུཔཙཱརཾ. སོ ཧི ཏཏོ ཨཔརེན ལེཌྜུཔཱཏེན པརཙྪིནྣོ. ཨིམསྨིཾ ཨདིནྣཱདཱནསིཀྑཱཔདེཏི ནིཡམེན ཨཉྙཏྠ ཨཉྙཐཱཏི ཨཏྠཏོ ཝུཏྟཾ ཧོཏི. ཏེན ཝཱ ནིཡམེན ཡཐཱརུཏཝསེནཱཔི ཨཏྠོ ཨིདྷ ཡུཛྫཏི. ཨབྷིདྷམྨེ པནཱཏིཨཱདིནཱ ཨཉྙཐཱཔི ཨཏྠཱཔཏྟིསིདྡྷཾ དསྶེཏི.

‘‘པརིཙྩཱགཱདིམྷི ཨཀཏེ ‘ཨིདཾ མམ སནྟཀ’ནྟི ཨཝིདིཏམྤི པརཔརིགྒཧིཏམེཝ པུཏྟཀཱནཾ པིཏུ ཨཙྩཡེན སནྟཀཾ ཝིཡ, ཏཾ ཨཏྠཏོ ཨཔརིཙྩཏྟེ སངྒཧཾ གཙྪཏཱི’’ཏི གཎྛིཔདེ ཝུཏྟཾ. ‘‘ཐེནསྶ ཀམྨཾ ཐེཡྻཾ, ཐེནེན གཧེཏབྦབྷཱུཏཾ བྷཎྜཾ. ཐེཡྻནྟི སངྑཱཏནྟི ཐེཡྻསངྑཱཏ’’ནྟི པོརཱཎགཎྛིཔདེ ཝུཏྟཾ. ཏཾ ཐེཡྻཾ ཡསྶ ཐེནསྶ ཀམྨཾ, སོ ཡསྨཱ ཐེཡྻཙིཏྟོ ཨཝཧརཎཙིཏྟོ ཧོཏི, ཏསྨཱ ‘‘ཐེཡྻསངྑཱཏ’’ནྟི པདཾ ཨུདྡྷརིཏྭཱ ‘‘ཐེཡྻཙིཏྟོ ཨཝཧརཎཙིཏྟོ’’ཏི པདབྷཱཛནམྤི ཏེསཾ པོརཱཎཱནཾ ཡུཛྫཏེཝ, ཏཐཱཔི ཨཊྛཀཐཱཡཾ ཝུཏྟནཡེནེཝ གཧེཏབྦཾ. ‘‘ཡཉྩ པུབྦབྷཱགེ ‘ཨཝཧརིསྶཱམཱི’ཏི པཝཏྟཾ ཙིཏྟཾ, ཡཉྩ གམནཱདིསཱདྷཀཾ, པརཱམསནཱདིསཱདྷཀཾ ཝཱ མཛ྄ཛྷེ པཝཏྟཾ, ཡཉྩ ཋཱནཱཙཱཝནཔཡོགསཱདྷཀཾ ¶ , ཏེསུ ཨཡམེཝེཀོ པཙྪིམོ ཙིཏྟཀོཊྛཱསོ ཨིདྷ ཨདྷིཔྤེཏོ ‘ཐེནོ’ཏི ཨཔརེ’’ཏི ཨནུགཎྛིཔདེ ཝུཏྟཾ. ཨཱུནམཱསཀམཱསཔཱདཱདཱིསུ ‘‘ཨཝཧརཎཙིཏྟེསུ ཨེཀཙིཏྟཀོཊྛཱསོཏི ཨཱཙརིཡཱ ཝདནྟཱི’’ཏི ཝུཏྟཾ.

པཉྩཝཱིསཏིཨཝཧཱརཀཐཱཝཎྞནཱ

པཉྩཝཱིསཏི ཨཝཧཱརཱ ནཱམ ཝཙནབྷེདེནེཝ བྷིནྣཱ, ཨཏྠཏོ པན ཨབྷིནྣཱ. ཨཱཀུལཱ དུཝིཉྙེཡྻཝིནིཙྪཡཱཏི ཨཱཙརིཡཱནཾ མུཁེ སནྟིཀེ སབྦཱཀཱརེན ཨགྒཧིཏཝིནིཙྪཡཱནཾ དུཝིཉྙེཡྻཱ. དུཀཏིཀཔཊྛཱནཔཱལི༹ (པཊྛཱ. ༥.༡.༡ ཨཱདཡོ, དུཀཏིཀཔཊྛཱནཔཱལི༹) ཝིཡ ཨཱཀུལཱ དུཝིཉྙེཡྻཝིནིཙྪཡཱ, ཀེཝལཾ ཏཾ ཨཱཙརིཡཱ པུབྦཱཔརཝིརོདྷམཀཏྭཱ སངྒཱིཏིཏོ པཊྛཱཡ ཨཱགཏནཡམཝིནཱསེཏྭཱ ཝཎྞཡནྟཱིཏི ‘‘པཊྛཱནཔཱལི༹མིཝཱཏི ཨཔརེ ཝདནྟཱི’’ཏི ཙ ཝུཏྟཱ. པོརཱཎཱཏི སངྒཱིཏིཨཱཙརིཡཱ. ཨཡམེཏྠ སཱམཱིཙི ཨེཝ, སཙེ ན དེཏི, ཨཱཔཏྟི ནཏྠི, པཱརཱཛིཀབྷཡཱ པན ཡཐཱ སིཀྑཱཀཱམོ དེཏི, ཨེཝཾ དཱཏབྦམེཝ. ཡཱནི པནེཏྠ ཝཏྠཱུནི, ཏཱནི སཱིཧལ༹དཱིཔེ ཨཱཙརིཡེཧི སངྒྷཱདཱིནམནུམཏིཡཱ ཨཊྛཀཐཱསུ པཀྑིཏྟཱནི, ‘‘ཨནཱགཏེ བྲཧྨཙཱརཱིནཾ ཧིཏཏྠཱཡ པོཏྠཀཱརུལ༹ྷཀཱལཏོ པཙྪཱཔཱི’’ཏི ཝུཏྟཾ. ཨཱཎཏྟིཀཾ ཨཱཎཏྟིཀྑཎེཔི གཎྷཱཏི, ཀཱལནྟརེནཱཔི ཨཏྠསཱདྷཀོ, ཀཱལནྟརཾ སནྡྷཱཡཱཏི ཨིདམེཏེསཾ ནཱནཏྟཾ. བྷཊྛེཏི ཨཔགཏེ. ཨནྟརསམུདྡེ ¶ ཨཏུརུམུཧུདེ. ཕརཏི སཱདྷེཏི. ནཝདྷོཏོཏི ནཝཀཏོ. པཱསཱཎསཀྑརནྟི པཱསཱཎཉྩ སཀྑརཉྩ.

བྷཱུམཊྛཀཐཱདིཝཎྞནཱ

༩༤. མཧཱཨཊྛཀཐཱཡཾ པན སཙྩེཔི ཨལིཀེཔི དུཀྐཊམེཝ ཝུཏྟཾ, ཏཾ པམཱདལིཁིཏནྟི ཝེདིཏབྦནྟི ཡཐེཏརཧི ཡུཏྟིཡཱ གཧེཏབྦཱ. ཏཏྠ ‘‘ཙཏུཝགྒེན ཋཔེཏྭཱ ཨུཔསམྤདཔཝཱརཎཨབྦྷཱནཱདིསབྦཾ སངྒྷཀམྨཾ ཀཱཏུཾ ཝཊྚཏི’’ཙྩེཝ ཝཏྟབྦེ ‘‘ཨུཔསམྤདཔཝཱརཎཀཐིནབྦྷཱནཱདཱིནཱི’’ཏི ལིཁནྟཱིཏི ཝེདིཏབྦཾ. ཏཾ ཨཱཙརིཡཱ ‘‘པམཱདལེཁཱ’’ཏྭེཝ ཝཎྞཡནྟི, ཏེན ཝུཏྟཾ ‘‘པམཱདལིཁིཏ’’ནྟི. ཡཾ ཡཾ ཝཙནཾ མུསཱ, ཏཏྠ ཏཏྠ པཱཙིཏྟིཡནྟི ཝུཏྟཾ. དུཀྐཊསྶ ཝཙནེ པཡོཛནཱབྷཱཝཱ ‘‘ཨདིནྣཱདཱནསྶ པུབྦཔཡོགེ’’ཏི ཝུཏྟཾ. ཨཉྙེསམྤི པུབྦཔཡོགེ པཱཙིཏྟིཡཊྛཱནེ པཱཙིཏྟིཡམེཝ. པམཱདལིཁིཏནྟི ཨེཏྠ ¶ ཨིདྷ ཨདྷིཔྤེཏམེཝ གཧེཏྭཱ ཨཊྛཀཐཱཡཾ ཝུཏྟནྟི གཧིཏེ སམེཏི ཝིཡ. ཨཱཙརིཡཱ པན ‘‘པཱཙིཏྟིཡཊྛཱནེ པཱཙིཏྟིཡ’’ནྟི ཝཏྭཱ དུཀྐཊེ ཝིསུཾ ཝཏྟབྦེ ‘‘སཙྩཱལིཀེ’’ཏི སཱམཉྙཏོ ཝུཏྟཏྟཱ ‘‘པམཱདལེཁཱ’’ཏི ཝདནྟཱིཏི ཝེདིཏབྦཱཏི. ‘‘ཀུསལཙིཏྟེན གམནེ ཨནཱཔཏྟཱི’’ཏི ཝུཏྟཏྟཱ ‘‘དཱནཉྩ དསྶཱམཱི’’ཏི ཝཙནེན ཨནཱཔཏྟི ཝིཡ.

པཱཙིཏྟིཡཊྛཱནེ དུཀྐཊཱ ན མུཙྩཏཱིཏི པཱཙིཏྟིཡེན སདྡྷིཾ དུཀྐཊམཱཔཛྫཏི. བཧུཀཱཔི ཨཱཔཏྟིཡོ ཧོནྟཱུཏི ཁཎནབྱཱུཧནུདྡྷརཎེསུ དས དས ཀཏྭཱ ཨཱཔཏྟིཡོ ཨཱཔནྣོ, ཏེསུ ཨུདྡྷརཎེ དས པཱཙིཏྟིཡོ དེསེཏྭཱ མུཙྩཏི, ཛཱཏིཝསེན ‘‘ཨེཀམེཝ དེསེཏྭཱ མུཙྩཏཱི’’ཏི ཀུརུནྡིཡཾ ཝུཏྟཾ, ཏསྨཱ པུརིམེན སམེཏི. ‘‘སམོདྷཱནེཏྭཱ དསྶིཏཔཡོགེ ‘‘དུཀྐཊ’’ནྟི ཝུཏྟཏྟཱ སམཱནཔཡོགཱ བཧུདུཀྐཊཏྟཾ ཉཱཔེཏི. ཁཎནེ བཧུཀཱནཱིཏི སམཱནཔཡོགཏྟཱ ན པཊིཔྤསྶམྦྷཏི. ཨཊྛཀཐཱཙརིཡཔྤམཱཎེནཱཏི ཡཐཱ པནེཏྠ, ཨེཝཾ ཨཉྙེསུཔི ཨེཝརཱུཔཱནི ཨཊྛཀཐཱཡ ཨཱགཏཝཙནཱནི སངྒཱིཏིཏོ པཊྛཱཡ ཨཱགཏཏྟཱ གཧེཏབྦཱནཱིཏི ཨཏྠོ. ‘‘ཨིདྷ དུཏིཡཔཱརཱཛིཀེ གཧེཏབྦཱ, ན ཨཉྙེསཱུ’’ཏི དྷམྨསིརིཏྠེརོ ཀིརཱཧ. གཎྛིཔདེ པན ‘‘པུརིམཁཎནཾ པཙྪིམཾ པཏྭཱ པཊིཔྤསྶམྦྷཏི, ཏེནེཝ ཨེཀམེཝ དེསེཏྭཱ མུཙྩཏཱི’’ཏི ཝུཏྟཾ, ‘‘ཝིསབྷཱགཀིརིཡཾ ཝཱ པཏྭཱ པུརིམཾ པཊིཔྤསྶམྦྷཏཱི’’ཏི ཙ ཝུཏྟཾ.

ཨེཝཾ ཨེཀཊྛཱནེ ཋིཏཱཡ ཀུམྦྷིཡཱ ཋཱནཱཙཱཝནཉྩེཏྠ ཚཧཱཀཱརེཧི ཝེདིཏབྦནྟི སམྦནྡྷོ. ཀུམྦྷིཡཱཏི བྷུམྨཝཙནཾ. ཨུདྡྷཾ ཨུཀྑིཔནྟོ ཀེསགྒམཏྟམྤི བྷཱུམིཏོ མོཙེཏི, པཱརཱཛིཀནྟི ཨེཏྠ མུཁཝཊྚིཡཱ ¶ ཕུཊྛོཀཱསཾ བུནྡེན མོཙིཏེ ‘‘ཋཱནཱཙཱཝནཉྩེཏྠ ཚཧཱཀཱརེཧི ཝེདིཏབྦ’’ནྟི ཨིམིནཱ སམེཏི, ཏཐཱ ཨཝཏྭཱ ‘‘བྷཱུམིཏོ མུཏྟེ ཀེསགྒམཏྟམྤི ཨཏིཀྐནྟེ བྷཱུམིཏོ མོཙིཏཾ ནཱམ ཧོཏཱི’’ཏི དལ༹ྷཾ ཀཏྭཱ ཝདནྟི, ཨུཔཔརིཀྑིཏྭཱ གཧེཏབྦཾ. ཨེཏྠ ཨེཀཙྩེ ཨེཝཾ ཨཏྠཾ ཝདནྟི ‘‘པུབྦེ ཁཎནྟེན ཨཝསེསཊྛཱནཱནི ཝིཡོཛིཏཱནི, ཏསྨིཾ ཝིམུཏྟེ པཱརཱཛིཀ’’ནྟི. སངྑེཔམཧཱཔཙྩརིཡཱདཱིསུ ཝུཏྟཝཙནསྶ པམཱདལེཁབྷཱཝོ ‘‘ཨཏྟནོ བྷཱཛནགཏཾ ཝཱ ཀརོཏི, མུཊྛིཾ ཝཱ ཚིནྡཏཱི’’ཏི ཝཙནེན དཱིཔིཏོ.

ཡཾ པན ‘‘པཱིཏམཏྟེ པཱརཱཛིཀ’’ནྟི ཝུཏྟཾ, ཏཾ ཡཐེཏརཧི ‘‘པཉྩཝིཉྙཱཎཱ ཨུཔྤནྣཝཏྠུཀཱ ཨུཔྤནྣཱརམྨཎཱ’’ཏི པདསྶ ‘‘ཨུཔྤནྣཝཏྠུཀཱཧི ཨནཱགཏཔཊིཀྑེཔོ’’ཏི ¶ ཨཊྛཀཐཱཝཙནཾ ‘‘ཨསམྦྷིནྣཝཏྠུཀཱ ཨསམྦྷིནྣཱརམྨཎཱ པུརེཛཱཏཝཏྠུཀཱ པུརེཛཱཏཱརམྨཎཱ’’ཏི ཝཙནམཔེཀྑིཏྭཱ ཨཏཱིཏཱནཱགཏཔཊིཀྑེཔོཏི པརིཝཏྟེཏི, ཏཐཱ ཏཱདིསེཧི པརིཝཏྟ’ནྟི ཝེདིཏབྦཾ. ན ཧི ཨཊྛཀཐཱཙརིཡཱ པུབྦཱཔརཝིརུདྡྷཾ ཝདནྟི. ཡཾ པན ཨཱཙརིཡཱ ‘‘ཨིདཾ པམཱདལིཁིཏ’’ནྟི ཨཔནེཏྭཱ པཊིཀྑིཔིཏྭཱ ཝཙནཀཱལེ ཝཱཙེནྟི, ཨུདྡིསནྟི, ཏམེཝ ཙ ཨིམིནཱཔི ཨཱཙརིཡེན ‘‘པམཱདལིཁིཏ’’ནྟི པཊིཀྑིཏྟཾ. ཡཉྩ སུཏྟཾ དསྶེཏྭཱ ཏེ པཊིཀྑིཔནྟི, ཏམེཝ ཙ དསྶེནྟེན ཨིམིནཱ པཊིཀྑིཏྟཾ, ཏེན ཝུཏྟཾ ‘‘ཏཾ པན ཏཏྠེཝཱ’’ཏིཨཱདི.

ཨནཱཔཏྟིམཏྟམེཝ ཝུཏྟནྟི ནེཝ ཨཝཧཱརོ ན གཱིཝཱ ཨནཱཔཏྟཱིཏི བྱཉྫནཏོཝ བྷེདོ, ན ཨཏྠཏོཏི དསྶནཏྠཾ. ཏཾ པམཱདལིཁིཏཾ ཀཏརེཧཱིཏི ཙེ? པུབྦེ ཝུཏྟཔྤཀཱརེཧི, ལེཁཀེཧི ཝཱ, ཨེས ནཡོ སབྦཏྠ. ‘‘ན ཧི ཏདེཝ བཧཱུསུ ཋཱནེསུ ཡུཏྟཏོ པཱརཱཛིཀམཧུཏྭཱ ཀཏྠཙི ཧོཏཱི’’ཏི སབྦཾ ཨནུགཎྛིཔདེ ཝུཏྟཾ. དུཊྛཔིཏཾ ཝཱ ཋཔེཏཱིཏི ཨེཏྠ ཏཏོ པགྒྷརིསྶཏཱིཏི ཋཱནཱཙཱཝནཾ སནྡྷཱཡ ཀཏཏྟཱ པཱརཱཛིཀཾ ཏཾ པན གཎྷཏུ ཝཱ མཱ ཝཱ ཏཏྠེཝ ‘‘བྷིནྡཏཱི’’ཏིཨཱདིཝཙནཏོ ཝེདིཏབྦཾ. ‘‘ཏཏྠེཝཱཏི ཋཱནཱཙཱཝནཾ ཨཀརོནྟོཝ ཋཱནཱ ཨཙཱཝེཏུཀཱམོཝ ཀེཝལཾ ‘བྷིནྡཏཱི’ཏི ཨཊྛཀཐཱཝཙནཏོ ཙ ཉཱཔེཏབྦ’’ནྟི ཨཉྙཏརསྨིཾ གཎྛིཔདེ ཝུཏྟཾ. ཏཐཱ ‘‘པགྒྷརིཏེཧི ཏིནྟཔཾསུཾ གཧེཏྭཱ ཨུདཀེ པཀྑིཔིཏྭཱ པཙིཏྭཱ གཧེཏུཾ སཀྐཱ, ཏསྨཱ གཧཎམེཝ སནྡྷཱཡ ཝུཏྟ’’ནྟི ཨཔརེ. ‘‘རིཏྟཀུམྦྷིཡཱ ཨུཔརི ཀརོཏི, བྷཎྜདེཡྻ’’ནྟི ཝུཏྟཾ, ཏཾ ཨཱཎཏྟིཡཱ ཝིརུཛ྄ཛྷཏི, ‘‘ཡདཱ སཀྐོསི, ཏདཱ ཏཾ བྷཎྜཾ ཨཝཧརཱ’’ཏི ཨཏྠསཱདྷཀོ ཨཱཎཏྟིཀཱལེ ཨེཝ པཱརཱཛིཀཾ. ཨཔིཙ ཨཱཝཱཊཀཱདཱིནི ཐཱཝརཔཡོགཱནི ཙ ཨེཏྠ སཱདྷཀཱནི. ནཏྠི ཀཱལཀཏཔཡོགཱནི པཱརཱཛིཀཝཏྠཱུནཱིཏི ཏསྨཱ ཨུཔཔརིཀྑིཏབྦནྟི ཨེཀེ. ཡཏྠ ཡཏྠ ‘‘ཨཔརེ’’ཏི ཝཱ ‘‘ཨེཀེ’’ཏི ཝཱ ཝུཙྩཏི, ཏཏྠ ཏཏྠ སུཊྛུ ཨུཔཔརིཀྑིཏྭཱ ཡུཏྟཾ གཧེཏབྦཾ, ཨིཏརཾ ཚཌྜེཏབྦཾ. ཝདནྟཱིཏི ཨཱཙརིཡཱ ཝདནྟི. ན, ཨཉྙཐཱ གཧེཏབྦཏྠཏོཏི པཱལི༹པརིཧརཎཏྠཾ ཝུཏྟཾ. ཨེཝམེཀེ ཝདནྟཱིཏི ཏཾ ¶ ན གཧེཏབྦཾ. ཀསྨཱ? ‘‘པསྶཱཝཾ ཝཱ ཚཌྜེཏཱི’’ཏི ཙ ‘‘ཨཔརིབྷོགཾ ཝཱ ཀརོཏཱི’’ཏི ཙ ཨཏྠཏོ ཨེཀཏྟཱ, ཨཊྛཀཐཱཡ ‘‘མུགྒརེན པོཐེཏྭཱ བྷིནྡཏཱི’’ཏི ཝུཏྟཏྟཱཔི.

ཨཡཾ ¶ པནེཏྠ སཱརོཏིཨཱདིཀཐཱཡ ‘‘ཨམྷཱཀཾ ཨཱཙརིཡསྶ ཝཙན’’ནྟི དྷམྨསིརིཏྠེརོ ཨཱཧ. སངྒཧཱཙརིཡཱནཾ ཝཱདོཏི ཨེཀེ. པུབྦེ ཝུཏྟཱཔི ཏེ ཨེཝ, ཏསྨཱ ཝོཧཱརཝསེནཱཏི ཨཚཌྜེཏུཀཱམམྤི ཏཐཱ ཀརོནྟཾ ‘‘ཚཌྜེཏཱི’’ཏི ཝོཧརནྟི. ཨེཝམེཏེསཾ པདཱནཾ ཨཏྠོ གཧེཏབྦོཏི ཨེཝཾ སནྟེ ‘‘ཋཱནཱཙཱཝནསྶ ནཏྠིཏཱཡ དུཀྐཊ’’ནྟི ཨཊྛཀཐཱཝཙནེན ཨཏིཝིཡ སམེཏི, ཏཏྠ ཋཱནཱཙཱཝནཙིཏྟསྶ ནཏྠིཏཱཡ ཋཱནཱ ཙུཏམྤི ན ‘‘ཋཱནཱ ཙུཏ’’ནྟི ཝུཙྩཏཱིཏི ཨཏྠོ གཧེཏབྦོ. ཨིཏརཐཱཔཱིཏི ཐེཡྻཙིཏྟཱབྷཱཝཱ ཋཱནཱ ཙཱཝེཏུཀཱམསྶཔི དུཀྐཊཾ ཡུཛྫཏི.

༩༦. སཡམེཝ པཏིཏམོརསྶེཝ ཨིཏོ ཙིཏོ ཙ ཀརོཏོ ཐུལླཙྩཡཾ. ཨཱཀཱསཊྛཝིནིཙྪཡེ ཏཔྤསངྒེན ཏསྨིཾ ཝེཧཱསཱདིགཏེཔི ཨསམྨོཧཏྠཾ ཨེཝཾ གཧེཏབྦནྟི ཝུཏྟཾ. ‘‘ཨེཝམཉྙཏྲཱཔི སཱམིསེ’’ཏི གཎྛིཔདེ ཝུཏྟཾ. ‘‘ཋཱནཱཙཱཝནཾ ཨཀརོནྟོ ཙཱལེཏཱི’’ཏི ཝཙནཏོ ཋཱནཱཙཱཝནེ ཐུལླཙྩཡཾ ནཏྠཱིཏི ཝུཏྟཾ ཧོཏི. ཀེཙི ཨཕནྡཱཔེཏྭཱ ཋཱནཱཙཱཝནཱཙཱཝནེཧིཔི དུཀྐཊཐུལླཙྩཡེ ཝདནྟི. ‘‘ཏེ ཋཱནཱཙཱཝནཾ ཨཀརོནྟོཏི ཨིམཾ ཨཊྛཀཐཱཝཙནཾ དསྶེཏྭཱ པཊིསེདྷེཏབྦཱ’’ཏི ཀེཙི ཝདནྟི, ཝཱིམཾསིཏབྦཾ.

༩༧. ཚེདནམོཙནཱདི ཨུཔརིབྷཱགཾ སནྡྷཱཡ ཝུཏྟཾ. ཨཝསྶཾ ཋཱནཏོ ཨཱཀཱསགཏཾ ཀརོཏི. ཨེཏྠ ‘‘ཨེཀཀོཊིཾ ནཱིཧརིཏྭཱ ཋཔིཏེ ཝཾསེ ཋིཏསྶ ཨཱཀཱསཀརཎཾ སནྡྷཱཡཱ’’ཏི ཀེཙི ཝདནྟི. ཏེ པན ཨཐ ‘‘མཱུལཾ ཨཙྪེཏྭཱ ཝལཡཾ ཨིཏོ ཙིཏོ ཙ སཱརེཏི, རཀྑཏི. སཙེ པན མཱུལཏོ ཨནཱིཧརིཏྭཱཔི ཧཏྠེན གཧེཏྭཱ ཨཱཀཱསགཏཾ ཀརོཏི, པཱརཱཛིཀ’’ནྟི ཨཊྛཀཐཱཝཙནཾ དསྶེཏྭཱ པཊིསེདྷེཏབྦཱ. བྷིཏྟིནིསྶིཏནྟི བྷིཏྟིཡཱ ཨུཔཏྠམྦྷིཏཾ སནྡྷཱཡ ཝུཏྟནྟི ཨེཀེ. བྷིཏྟིཾ ནིསྶཱཡ ཋཔིཏནྟི ནཱགདནྟཱདཱིསུ ཋིཏཾ སནྡྷཱཡ ཝུཏྟཾ. ཚིནྣམཏྟེཏི ཨུཔརི ཨུགྒནྟྭཱ ཋིཏཾ སནྡྷཱཡ ཝུཏྟཾ.

༩༨. ཨུཔརི ཋིཏསྶ པིཊྛིཡཱཏི ཨེཏྠ ཨདྷོ ཨོསཱརཎཾ སནྡྷཱཡ ཝུཏྟཾ. ཧེཊྛཱ ཨོསཱརེནྟསྶ ཨུཔརིམསྶ པིཊྛིཡཱ ཧེཊྛིམེན ཋིཏོཀཱསཾ ཨཏིཀྐནྟམཏྟེ པཱརཱཛིཀཾ, ཨུདྡྷཾ ཨུཀྑིཔནྟསྶ ཨུདཀཏོ མུཏྟམཏྟེ. ‘‘ཨེཝཾ གཧིཏེ ¶ བྷཱུམཊྛེ ཝུཏྟེན སམེཏཱི’’ཏི ཝདནྟི. མཏམཙྪཱནཾ ཋིཏཊྛཱནམེཝ ཋཱནཾ ཀིར. ཐེཡྻཙིཏྟེན མཱརེཏྭཱ གཎྷཏོ ཨཱུནཔཱདགྒྷནཀེ དུཀྐཊཾ, སཧཔཡོགཏྟཱ པཱཙིཏྟིཡཾ ནཏྠཱིཏི ཨེཀེ. མདནཕལཝསཱདཱིནཱིཏི ཨེཏྠ སཱིཧལ༹བྷཱསཱ ཀིར ཝས ཨིཏི ཝིསནྟི ཨཏྠོ, གརུལཱ༹ཀཱརེན ཀཏུཔྤེཡིཏཾ ཝཱ.

༩༩. པུབྦེ ¶ པཱསེ བདྡྷསཱུཀརཨུཔམཱཡ ཝུཏྟཱ ཨེཝ. ‘‘ཐལེ ཋཔིཏཱཡ ནཱཝཱཡ ན ཕུཊྛོཀཱསམཏྟམེཝཱ’’ཏི པཱཋོ. ‘‘ཝཱཏོ ཨཱགམྨཱཏི ཝཙནཏོ ཝཱཏསྶ ནཏྠིཀཱལེ པཡོགསྶ ཀཏཏྟཱ ཨཝཧཱརོ ནཏྠི, ཨཏྠིཀཱལེ ཙེ ཀཏོ, ཨཝཧཱརོཝཱ’’ཏི ཝདནྟི. ‘‘བྷཎྜདེཡྻཾ པན ཀེསནྟི ཙེ? ཡེསཾ ཧཏྠེ ཀཧཱཔཎཱནི གཧིཏཱནི, ཏེསཾ ཝཱ, ནཱཝཱསཱམིནཱ ནཱཝཱཡ ཨགྒཧིཏཱཡ ནཱཝཱསཱམིཀསྶ ཝཱ’’ཏི ཨནུགཎྛིཔདེ ཝུཏྟཾ.

༡༠༤. ནིརམྦིཏྭཱ ཨུཔརི. ཨཀཏཾ ཝཱ པན པཏིཊྛཔེཏཱིཏི ཨཔུབྦཾ ཝཱ པཊྛཔེཏཱིཏི ཨཏྠོ.

༡༠༦. གཱམཊྛེ ཝཱ ‘‘གཱམོ ནཱམཱ’’ཏི ན ཝུཏྟཾ པཋམཾ གཱམལཀྑཎསྶ སབྦསོ ཝུཏྟཏྟཱ.

༡༠༧. ཨརཉྙཊྛེ ཨརཉྙཾ ནཱམཱཏི པུན ན ཀེཝལཾ པུབྦེ ཝུཏྟལཀྑཎཉྙེཝ ཨརཉྙནྟི ཨིདྷཱདྷིཔྤེཏཾ, ཀིནྟུ པརཔརིགྒཧིཏམེཝ ཙེཏཾ ཧོཏི, ཏཾ ཨིདྷཱདྷིཔྤེཏནྟི དསྶནཏྠཾ ཝུཏྟཾ. ཏེནེཝ ཨཏྠེཔི ཨརཉྙགྒཧཎཾ ཀཏཾ. ཨགྒེཔི མཱུལེཔི ཚིནྣཱཏི ཨེཏྠ ‘‘ན ཝེཋེཏྭཱ ཋིཏཱ, ཚིནྣམཏྟེ པཏནཀཾ སནྡྷཱཡ ཝུཏྟ’’ནྟི ཝདནྟི. ཏཙྪེཏྭཱ ཋཔིཏོཏི ཨརཉྙསཱམིཀེཧི པརེཧི ལདྡྷེཧི ཏཙྪེཏྭཱ ཋཔིཏོ. ཨདྡྷགཏོཔཱིཏི ཙིརཀཱལིཀོཔི. ‘‘ན གཧེཏབྦོཏི ཨརཉྙསཱམིཀེཧི ཨནུཉྙཱཏེནཔཱི’’ཏི གཎྛིཔདེ ཝུཏྟཾ. ཚལླིཡཱ པརིཡོནདྡྷཾ ཧོཏཱིཏི ཨིམིནཱ སཱམིཀཱནཾ ནིརཔེཀྑཏཾ དཱིཔེཏི. ཏེན ཝུཏྟཾ ‘‘གཧེཏུཾ ཝཊྚཏཱི’’ཏི. ཡདི སཱམིཀཱནཾ སཱཔེཀྑཏཱ ཨཏྠི, ན ཝཊྚཏི.

༡༠༨. ཏཏྠ ‘‘བྷཱཛནེསུ པོཀྑརཎཱིཏལཱ༹ཀེསུ ཙ གཱཝོ པཀྐོསཏཱིཏི ཨིཏོ པཊྛཱཡ ཏཡོ དས ཝཱརཱ ཨཱདིམེཝ དསྶེཏྭཱ སཾཁིཏྟཱ’’ཏི ¶ ཨནུགཎྛིཔདེ ཝུཏྟཾ. ནིབྦཧནཨུདཀཾ ནཱམ ཏལཱ༹ཀརཀྑཎཏྠཱཡ ཨདྷིཀོདཀནིཀྑམནདྭཱརེན ནིཀྑམནཨུདཀཾ. ‘‘གཧེཏུཾ ན ལབྷཏཱིཏི སཱམཱིཙིཀམྨཾ ན ཧོཏཱི’’ཏི ཨནུགཎྛིཔདེ ཝུཏྟཾ. ཨིཏོ པཊྛཱཡ ‘‘ཝུཏྟ’’ནྟི ཝུཏྟེ ཨནུགཎྛིཔདེཏི གཧེཏབྦཾ. ཨནིཀྑནྟེ ཨུདཀེཏི པཱཋསེསོ, སུཀྑམཱཏིཀཱཔཡོགཏྟཱ བྷཎྜདེཡྻམྤི ན ཧོཏཱིཏི ཨདྷིཔྤཱཡོ. ཏལཱ༹ཀཾ ནིསྶཱཡ ཁེཏྟསྶ ཀཏཏྟཱཏི ‘‘སབྦསཱདྷཱརཎཾ ཏལཱ༹ཀཾ ཧོཏཱི’’ཏི པཋམཾ ཝུཏྟཏྟཱ ཏཾ སནྡྷཱཡ ཝུཏྟཾ. ‘‘ཡསྨཱ ཏལཱ༹ཀགཏཾ ཨུདཀཾ སབྦསཱདྷཱརཎམྤི མཱཏིཀཱཡ སཏི ཏཾ ཨཏིཀྐམིཏྭཱ གཧེཏུཾ ན ཝཊྚཏི, ཏསྨཱ ཏཾ སནྡྷཱཡ ཀུརུནྡིཡཱདཱིསུ ཨཝཧཱརོཏི ཝུཏྟ’’ནྟི ཨཔརེ ཨཱཧཱུཏི. ཨིམིནཱ ལཀྑཎེན ན སམེཏཱིཏི ཡསྨཱ སབྦསཱདྷཱརཎདེསོ ནཱམ ཏཉྩ ཏལཱ༹ཀཾ སབྦསཱདྷཱརཎཾ, ཀཏིཀཱབྷཱཝཱ ཙ མཧཱཨཊྛཀཐཱཡཾ ཝུཏྟམེཝ ཡུཏྟནྟི ཨཱཧཱཙརིཡོ.

༡༠༩. ‘‘ཏཏོ ¶ པཊྛཱཡ ཨཝཧཱརོ ནཏྠཱིཏི ཐེཡྻཱཡཔི གཎྷཏོ, ཏསྨཱ ཡཐཱམུཎྜམཧཱཛེཏབྦཏྟཱ, ཨརཀྑིཏབྦཏྟཱ, སབྦསཱདྷཱརཎཏྟཱ ཙ ཨཉྙམྤི སངྒྷསནྟཀཾ ཨིདཾ ན ཧོཏཱི’’ཏི གཎྛིཔདེ ཝུཏྟཾ.

༡༡༠. ཨུཛུཀམེཝ ཏིཊྛཏཱིཏི ཨེཏྠ ‘‘སམཱིཔེ རུཀྑསཱཁཱདཱིཧི སནྡྷཱརིཏཏྟཱ ཨཱིསཀཾ ཁལིཏྭཱ ཨུཛུཀམེཝ ཏིཊྛཏི ཙེ, ཨཝཧཱརོ. ཚིནྣཝེཎུ ཝིཡ ཏིཊྛཏི ཙེ, ཨནཱཔཏྟཱི’’ཏི ཝུཏྟཾ, ཏཾ སུཝུཏྟཾ, ཏསྶ ཝིནིཙྪཡེ ‘‘སཙེ ཏཱནི རཀྑནྟཱི’’ཏི ཝུཏྟཏྟཱ. ནོ ཨཉྙཐཱཏི སམྤཏྟེ ཙེ ཝཱཏེ ཝཱཏམུཁསོདྷནཾ ཀརོཏི, པཱརཱཛིཀནྟི ཨཏྠོ.

༡༡༡. ཨཉྙེསུ པན ཝིཙཱརཎཱ ཨེཝ ནཏྠཱིཏི ཏེསུ ཨཔྤཊིཀྑིཔིཏཏྟཱ ཨཡམེཝ ཝིནིཙྪཡོཏི ཝུཏྟཾ ཧོཏི. ‘‘ཨེཏེན དྷུརནིཀྑེཔཾ ཀཏྭཱཔི ཙོརེཧི ཨཱཧཊཾ ཙོདེཏྭཱ གཎྷཏོ ཨནཱཔཏྟཱིཏི དཱིཔིཏཾ ཧོཏཱི’’ཏི ཝུཏྟཾ.

༡༡༢. ཨེསེཝ ནཡོཏི ཨུདྡྷཱརེཡེཝ པཱརཱཛིཀཾ, ཀསྨཱ? ཨཉྙེཧི པཏྟེཧི སཱདྷཱརཎསྶ སཉྙཱཎསྶ ཝུཏྟཏྟཱ. པདཝཱརེནཱཏི ཙོརེན ནཱིཧརིཏྭཱ དིནྣཾ གཧེཏྭཱ གཙྪཏོ. གཱམདྭཱརནྟི ཝོཧཱརམཏྟམེཝ, གཱམནྟི ཨཏྠོ ཨཱཎཏྟིཡཱ དཊྛབྦཏྟཱ, དྭིནྣམྤི ཨུདྡྷཱརེ ཨེཝ པཱརཱཛིཀཾ. ཨསུཀཾ ¶ ནཱམ གཱམཾ གནྟྭཱཏི ཝཙནེན ཡཱཝ ཏསྶ གཱམསྶ པརཏོ ཨུཔཙཱརོ, སབྦམེཏཾ ཨཱཎཏྟམེཝ ཧོཏི. ‘‘ཋཏྭཱ ཝཱ ནིསཱིདིཏྭཱ ཝཱ ཝིསྶམིཏྭཱ པུརིམཐེཡྻཙིཏྟཾ ཝཱུཔསམིཏྭཱ གམནཏྠཉྩེ བྷཎྜཾ ན ནིཀྑིཏྟཾ, ཡཐཱགཧིཏམེཝ, པདཝཱརེན ཀཱརེཏབྦོཏི, ནིཀྑིཏྟཉྩེ, ཨུདྡྷཱརེནཱ’’ཏི ཙ ལིཁིཏཾ. ཀེཝལཾ ‘‘ལིཁིཏ’’ནྟི ཝུཏྟེ གཎྛིཔདེ གཧེཏབྦཾ. ཐེཡྻཙིཏྟེན པརིབྷུཉྫནྟོཏི ཋཱནཱཙཱཝནཾ ཨཀཏྭཱ ནིཝཏྠཔཱརུཏནཱིཧཱརེན ‘‘པུབྦེཝེདཾ མཡཱ གཧིཏ’’ནྟི ཐེཡྻཙིཏྟེན པརིབྷུཉྫནྟོ. ‘‘ནཊྛེ བྷཎྜདེཡྻཾ ཀིརཱ’’ཏི ལིཁིཏཾ. ‘‘ཨཉྙོ ཝཱ’’ཏི ཝཙནེན ཡེན ཋཔིཏཾ, ཏེན དིནྣེ ཨནཱཔཏྟཱིཏི དཱིཔིཏཾ ཧོཏི གོཔཀསྶ དཱནེ ཝིཡ, ‘‘ཀེཝལཾ ཨིདྷ བྷཎྜདེཡྻནྟི ཨཔརེ’’ཏི ཝུཏྟཾ. ‘‘ཨཉྙོ ཝཱ’’ཏི ཝཙནཏོ ཡེན ཋཔིཏཾ. སོ ཝཱཏིཔི ལབྦྷཏཱིཏི ཝིཙཱརེཏྭཱ གཧེཏབྦོ. ཝཱ-སདྡེན ཡསྶ ཧཏྠེ ཋཔིཏཾ, སོ ཝཱ དེཏི རཱཛགཧེ གཎཀོ ཝིཡ དྷནིཡསྶ, ཏསྨཱ པཱརཱཛིཀཾ ཡུཏྟཾ ཝིཡ.

ཏཝ ཐཱུལསཱཊཀོ ལདྡྷོཏི ཝུཏྟཀྑཎེ མུསཱཝཱདེ དུཀྐཊཾ. ཏསྶ ནཱམཾ ལིཁིཏྭཱཏི ཨེཏྠ ‘‘ཏེན ‘གཧེཏྭཱ ཋཔེཡྻཱསཱི’ཏི ཨཱཎཏྟཏྟཱ ནཱམལེཁནཀཱལེ ཨནཱཔཏྟི ཀུསསངྐམནསདིསཾ ན ཧོཏཱི’’ཏི ཝུཏྟཾ. ན ཛཱནནྟཱིཏི ན སུཎནྟཱིཏི ཨཏྠོ. སཙེ ཛཱནིཏྭཱཔི ཙིཏྟེན ན སམྤཊིཙྪནྟི ¶ ཨེསེཝ ནཡོ. ཛཱནནྟེན པན རཀྑིཏུཾ ཨནིཙྪནྟེ པཊིཀྑིཔིཏབྦམེཝ ཨེཏནྟི ཝཏྟཾ ཛཱནིཏབྦཾ. ཨུམྨགྒེནཱཏི པུརཱཔཱཎཾ ཁཎིཏྭཱ ཀཏམགྒེནཱཏི ཨཏྠོ.

ནིསྶིཏཝཱརིཀསྶ པན སབྷཱགཱ བྷཏྟཾ དེནྟི, ཏསྨཱ ཡཐཱ ཝིཧཱརེ པནྟི, ཏཐེཝ ཀཱཏབྦནྟི སམྤཏྟཝཱརཾ ཨགྒཧེཏུཾ ན ལབྷནྟི, ‘‘ཏསྶ ཝཱ སབྷཱགཱ ཨདཱཏུཾ ན ལབྷནྟཱི’’ཏི ཝུཏྟཾ. ཨཏྟདུཏིཡསྶཱཏི ན ཧི ཨེཀེནཱནཱིཏཾ དྭིནྣཾ པཧོཏི, སཙེ པཧོཏི པཱཔེཏབྦོཏི དསྶེཏུཾ ‘‘ཡསྶ ཝཱ’’ཏིཨཱདི ཝུཏྟཾ. ‘‘པརིཔུཙྪཾ དེཏཱིཏི པུཙྪིཏཔཉྷསྶ ཝིསྶཛྫནཾ ཀརོཏཱི’’ཏི ལིཁིཏཾ. སངྒྷསྶ བྷཱརཾ ནཱམ ‘‘སདྡྷམྨཝཱཙནཱ ཨེཝཱ’’ཏི ཝུཏྟཾ, ‘‘ནཝཀམྨིཀོཔི ཝུཙྩཏཱི’’ཏི ཙ, ‘‘ཨིཏོ བྷཎྜཏོ ཝཊྚནྟཾ པུན ཨནྟོ པཝིསཏཱིཏི མཧཱཨཊྛཀཐཱཔདསྶ ཀུརུནྡཱིསངྑེཔཊྛཀཐཱཧི ཨདྷིཔྤཱཡོ ཝིཝརིཏོ’’ཏི ལིཁིཏཾ.

༡༡༣. གཙྪནྟེ ཡཱནེ ཝཱཏི ཨེཏྠ ‘‘སུངྐཊྛཱནསྶ བཧི ཋིཏཾ སནྡྷཱཡ ཝུཏྟ’’ནྟི ཨུཔཏིསྶཏྠེརོ ཝདཏི ཀིར. ‘‘གཙྪནྟེ ཡཱནེ ཝཱཏིཨཱདི སུངྐཊྛཱནབྦྷནྟརེ ¶ གཧེཏབྦ’’ནྟི ཝུཏྟཾ. བཧི ཋིཏསྶ ཝཏྟབྦམེཝ ནཏྠི, ‘‘ཨནྟོ ཋཏྭཱ’’ཏི ཨདྷིཀཱརེ ཝུཏྟཏྟཱ ཙེཏི ཡུཏྟཾ – ཡཱནཱདཱིསུ ཋཔིཏེ ཏསྶ པཡོགཾ ཝིནཱཡེཝ གཏེསུ པཱརཱཛིཀོ ན ཧོཏི. ཀསྨཱ ན བྷཎྜདེཡྻནྟི ཙེ? སུངྐཊྛཱནསྶ བཧི ཋིཏཏྟཱ. ཨརཉྙཊྛེ ‘‘ཨསྶཏིཡཱ ཨཏིཀྐམནྟསྶཔི བྷཎྜདེཡྻམེཝཱ’’ཏི (པཱརཱ. ཨཊྛ. ༡.༡༠༧) ཝུཏྟཾ ཏེསཾ སཔརིགྒཧིཏཏྟཱ. ཨིདྷ པན ‘‘ཨཏྲ པཝིཊྛསྶཱ’’ཏི ཝཙནཏོ ན བཧི ཋིཏསྶ, ཏཾ ཀིར སུངྐསངྐེཏཾ. ཨཉྙཾ ཧརཱཔེཏཱིཏི ཏཏྠ ‘‘སཧཏྠཱ’’ཏི ཝཙནཏོ ཨནཱཔཏྟི. ནིསྶགྒིཡཱནི ཧོནྟཱིཏི ཨཊྛཀཐཱཏོ པཱཙིཏྟིཡཾ, ཨུཔཙཱརཾ ཨོཀྐམིཏྭཱ པརིཧརཎེ སཱདཱིནཝཏྟཱ དུཀྐཊཾ.

སུངྐཊྛཱནེ སུངྐཾ དཏྭཱཝ གནྟུཾ ཝཊྚཏཱིཏི ཨིདཾ དཱནི ཝཏྟབྦཱནཾ མཱཏིཀཱཏི དྷམྨསིརིཏྠེརོ. ‘‘ཨནུརཱདྷཔུརསྶ ཙཏཱུསུ དྭཱརེསུ སུངྐཾ གཎྷནྟི, ཏེསུ དཀྑིཎདྭཱརསྶ པུརཏོ མགྒོ ཐཱུཔཱརཱམཏོ ཨཱནནྡཙེཏིཡཾ པདཀྑིཎཾ ཀཏྭཱ ཛེཏཝནཝིཧཱརསྶནྟརཔཱཀཱརསྶཱསནྣེ ནིཝིཊྛོ, ཡོ ན གཱམཾ པཝིསནྟོ ཨུཔཙཱརཾ ཨོཀྐནྟོ ཧོཏི. ཐཱུཔཱརཱམཏོ ཙ མཧཱཙེཏིཡཾ པདཀྑིཎཾ ཀཏྭཱ རཱཛཝིཧཱརཾ གཙྪནྟོ ན ཨོཀྐམཏཱི’’ཏི ཀིར མཧཱཨཊྛཀཐཱཡཾ ཨཱགཏཾ. ཨེཏྠ ཙཱཏི སུངྐགྷཱཏེ ‘‘དྭཱིཧི ལེཌྜུཔཱཏེཧཱིཏི ཨཱཙརིཡཔརམྤརཱབྷཏཱ’’ཏི ལིཁིཏཾ. དྭཱིཧི ལེཌྜུཔཱཏེཧཱིཏི སུངྐགྷཱཏསྶ པརིཙྪེདེ ཨཊྛཔིཏེ ཡུཛྫཏི, ཋཔིཏེ པན ཨཏིརེཀཡོཛནམྤི སུངྐགྷཱཏཾ ཧོཏཱིཏི ཏཏོ པརཾ དྭེ ལེཌྜུཔཱཏཱ ཨུཔཙཱརོཏི གཧེཏབྦོ. སོ པནེཏྠཱཔི དུཝིདྷོ བཱཧིརབྦྷནྟརབྷེདཏོ. ཏཏྠ དུཏིཡལེཌྜུཔཱཏསངྑཱཏཾ བཱཧིརོཔཙཱརཾ སནྡྷཱཡ པཱལི༹ཡཾ, མཧཱཨཊྛཀཐཱཡཉྩ དུཀྐཊཾ ཝུཏྟཾ. ཨབྦྷནྟརཾ སནྡྷཱཡ ¶ ཀུརུནྡིཡནྟི ནོ ཁནྟི. ‘‘ཨཏྲ པཝིཊྛསྶ སུངྐཾ གཎྷནྟཱུཏི ཧི ནིཡམིཏཊྛཱནཾ ཨེཀནྟཏོ པཱརཱཛིཀཁེཏྟཾ ཧོཏི, ཏཉྩ པརིཀྑིཏྟཾ, ཨེཀོ ལེཌྜུཔཱཏོ དུཀྐཊཁེཏྟཾ, ཨཔརིཀྑིཏྟཉྩེ, དུཏིཡོ ལེཌྜུཔཱཏོཏི ནོ ཨདྷིཔྤཱཡོ’’ཏི ཨཱཙརིཡོ ཝདཏི.

༡༡༤. དྷནཾ པན གཏཊྛཱནེ ཝཌྜྷཏཱིཏི ཨེཏྠ ‘‘ཝཌྜྷིཡཱ སཧ ཨཝཧཱརཀསྶ བྷཎྜདེཡྻ’’ནྟི ལིཁིཏཾ. ‘‘ཏཾ ཝཌྜྷིཾ དསྶཱམཱི’’ཏི ཨགྒཧེསི, ཏཏྠ ཀམྨཾ ཨཀརོནྟསྶ ཝཌྜྷཏཱིཏི ཀཏྭཱ ཝུཏྟཾ. ཀེཝལཾ ཨཱཋཔིཏཁེཏྟསྶ ན ཝཌྜྷཏི. ‘‘ཡཾ དྷནཾ ཝཌྜྷི, ཏཾ དེནྟསྶ ཨཝཧཱརཀསྶ ཝཌྜྷིཡཱ ཨདཱནེ པཱརཱཛིཀཾ ཧོཏཱི’’ཏི ཝདནྟི.

ནཱམེནཱཏི ¶ སཔྤནཱམེན ཝཱ སཱམིཀེན ཀཏེན ཝཱ.

༡༡༦. རཱཛགྷརསྶ ཨནྟོཝཏྠུམྷི, པརིཀྑིཏྟརཱཛངྒཎཾ ཝཱ ཨནྟོཝཏྠུ. ཨཔརིཀྑིཏྟེ རཱཛངྒཎེ ཋིཏསྶ སཀལནགརཾ ཋཱནཾ. གོཎསྶ ‘‘ཨཔརིཀྑིཏྟེ ཋིཏསྶ ཨཀྐནྟཊྛཱནམེཝ ཋཱན’’ནྟི ཝུཏྟཏྟཱ ཁཎྜདྭཱརནྟི ཨཏྟནཱ ཁཎྜིཏཙྪིདྡཾ. ཏཏྠེཝ གྷཱཏེཏཱིཏི ‘‘ཛཱིཝིཏིནྡྲིཡཱརམྨཎཏྟཱ ཝདྷཀཙིཏྟསྶ པཱཙིཏྟིཡཾ ཧོཏཱིཏི? ན ཧོཏི. ཀསྨཱ? ཨདིནྣཱདཱནཔཡོགཏྟཱ. ཏམྤི ཐེཡྻཙིཏྟཾ སངྑཱརཱརམྨཎཾཝ ཧོཏི. ཨིདྷ ཏདུབྷཡཾ ལབྷཏི སདྡྷིཾ པུབྦབྷཱགཱཔརབྷཱགེཧཱི’’ཏི ཝུཏྟཾ.

༡༡༨. ཏསྶུདྡྷཱརེ སབྦེསཾ པཱརཱཛིཀནྟི ཡདི ཡོ ཨཱཎཏྟོ ཨཝསྶཾ ཏཾ བྷཎྜཾ ཧརཏི, ཨཱཎཏྟིཀྑཎེ ཨེཝ པཱརཱཛིཀཾ. ‘‘ཨིདྷ ཏིཎྞཾ ཀསྨཱ པཱརཱཛིཀཾ, ནནུ ‘ཏུམྷེ, བྷནྟེ, ཏཡོ ཧརཐཱ’ཏི ཝུཏྟཏྟཱ ཐུལླཙྩཡཾ, ཨིཏརེསཉྩ པཊིཔཱཊིཡཱ ཨེཀེཀསྶཱཎཏྟཏྟཱ ཨེཀེཀེན ཙ དུཀྐཊེན བྷཝིཏབྦཾ. ཀཐཾ, ཨེཀོ ཀིར མཱསགྒྷནཀཾ པརིསྶཱཝནཾ ཐེནེཏྭཱ དེསེཏྭཱ ནིརུསྶཱཧོ ཨེཝ ཝཱ ཧུཏྭཱ པུན མཱསགྒྷནཀཾ སཱུཙིཾ ཏཐེཝ ཀཏྭཱ པུན མཱསགྒྷནཀནྟི ཨེཝཾ སིཡཱཏི? ན ཨེཝཾ, ཏཾ ཡཐཱ ཨུཔྤལཐེནཀོ ཡེན ཝཏྠུ པཱུརཏི ཏཱཝ སཨུསྶཱཧཏྟཱ པཱརཱཛིཀོ ཨཱསི, ཨེཝམིམེ སཨུསྶཱཧཱཝ ན དེསཡིཾསུ ཝཱ’’ཏི ལིཁིཏཾ, པཱལི༹ཡཾ, ཨཊྛཀཐཱཡཉྩ སཾཝིདཧིཏྭཱ གཏེསུ ཨེཀསྶུདྡྷཱརེ སབྦེསཾ པཱརཱཛིཀཾ ཝིནཱ ཝིཡ ཨཱཎཏྟིཡཱ ཀིཉྩཱཔི ཝུཏྟཾ, ཨཐ ཁོ ‘‘ཏསྶཱཡཾ ཨཏྠོ’’ཏི ཝཏྭཱ པཙྪཱ ཝུཏྟཝིནིཙྪཡེསུ ཙ ཨེཀབྷཎྜཨེཀཊྛཱནཱདཱིསུ ཙ སམྦཧུལཱ ཨེཀཾ ཨཱཎཱཔེནྟཱིཏི ཨཱཎཏྟིམེཝ ནིཡམེཏྭཱ ཝུཏྟཾ, ཏསྨཱ ཨཱཎཏྟི ཨིཙྪིཏབྦཱ ཝིཡ, ཝཱིམཾསིཏབྦཾ. ‘‘‘ཨེཀབྷཎྜཾ ཨེཀཊྛཱན’ནྟི ཙ པཱཋོ ‘ཨེཀཀུལསྶ བྷཎྜ’ནྟི ཝཙནཏོ’’ཏི ཝདནྟི.

༡༡༩-༡༢༠. ཨོཙརཀེ ¶ ཝུཏྟནཡེནེཝཱཏི ཨཝསྶཾཧཱརིཡེ བྷཎྜེ. ཏཾ སངྐེཏནྟི ཏསྶ སངྐེཏསྶ. ཨཐ ཝཱ ཏཾ སངྐེཏཾ ཨཏིཀྐམིཏྭཱ པཙྪཱ ཝཱ. ཨཔཏྭཱ པུརེ ཝཱ. ཨེས ནཡོ ཏཾ ནིམིཏྟནྟི ཨེཏྠཱཔི. ཨཀྑིནིཁཎནཱདིཀམྨཾ ལཧུཀཾ ཨིཏྟརཀཱལཾ, ཏངྑཎེ ཨེཝ བྷཎྜཾ ཨཝཧརིཏུཾ ན སཀྐཱ, ཀིཉྩི བྷཎྜཾ དཱུརཾ ཧོཏི, ཀིཉྩི བྷཱརིཡཾ, ཏཾ གཧེཏུཾ ཡཱཝ གཙྪཏི ཡཱཝ ཨུཀྑིཔཏི, ཏཱཝ ནིམིཏྟསྶ པཙྪཱ ཧོཏི. སཙེ ཏཾ བྷཎྜཾ ཨདྷིགཏཾ ¶ ཝིཡ ཨཱསནྣཾ, ལཧུཀཉྩ, སཀྐཱ ནིམིཏྟཀྑཎེ ཨཝཧརིཏུཾ, ཏམེཝ སནྡྷཱཡ ཝུཏྟཾ ཀིནྟི? ན, པུབྦེ ཝུཏྟམྤི ‘‘ཏཏོ པཊྛཱཡ ཏེནེཝ ནིམིཏྟེན ཨཝཧརཏཱི’’ཏི ཝུཙྩཏི ཨཱརདྡྷཏྟཱ. ཡདི ཨེཝཾ ‘‘པུརེབྷཏྟཔཡོགོ ཨེསོ’’ཏི ཝཱརོ པམཱཎཾ ཧོཏི, ན ཙ ཏཾ པམཱཎཾ མཧཱཔདུམཏྠེརཝཱདསྶ པཙྪཱ ཝུཏྟཏྟཱ, ན སངྐེཏཀམྨཾ ཝིཡ ནིམིཏྟཀམྨཾ དཊྛབྦཾ. ཏཏྠ ཧི ཀཱལཔརིཙྪེདོ ཨཏྠི, ཨིདྷ ནཏྠི, ཨིདམེཝ ཏེསཾ ནཱནཏྟཾ.

༡༢༡. ཏཉྩ ཨསམྨོཧཏྠནྟི ཨེཀོ ‘‘པུརེབྷཏྟཱདཱིསུ ཝཱ, ཨཀྑིནིཁཎནཱདཱིནི ཝཱ དིསྭཱ གཎྷཱ’’ཏི, ཨེཀོ གཧེཏབྦཾ བྷཎྜནིསྶིཏཾ ཀཏྭཱ ‘‘པུརེབྷཏྟཾ ཨེཝཾ ཝཎྞསཎྛཱནཾ བྷཎྜཾ གཎྷཱ’’ཏི ཝདཏི, ཨེཝཾཝིདྷེསུ ཨསམྨོཧཏྠཾ ཨེཝཾཝིདྷཾ སངྐེཏཾ ནིམིཏྟཉྩ དསྶེཏུནྟི ཙ, ཡཐཱདྷིཔྤཱཡནྟི དུཏིཡོ ཏཏིཡསྶ ཏཏིཡོ ཙཏུཏྠསྶཱཏི ཨེཝཾ པཊིཔཱཊིཡཱ ཙེ ཝདནྟཱིཏི ཨཏྠོ. སཙེ དུཏིཡོ ཙཏུཏྠསྶ ཝདེཏི, ན ཡཐཱདྷིཔྤཱཡོཏི ཙ. ‘‘པཊིགྒཧིཏམཏྟེཏི ཨཝསྶཾ ཙེ པཊིགྒཎྷཱཏི, པུབྦེཝ ཐུལླཙྩཡ’’ནྟི ཙ ལིཁིཏཾ. པཊིགྒཎྷཀཱནཾ དུཀྐཊཾ སབྦཏྠོཀཱསཱབྷཱཝཏོ ན ཝུཏྟཾ. པཱརཱཛིཀཱཔཛྫནེནེཏཾ དུཀྐཊཾ ཨཱཔཛྫིཏྭཱ ཨཱཔཛྫནྟི ཀིར. ཨཏྠསཱདྷཀཱཎཏྟིཙེཏནཱཁཎེ ཨེཝ པཱརཱཛིཀོ ཧོཏཱིཏི ཨདྷིཔྤཱཡོ. ཏཏྠ མགྒཊྛཱནིཡཾ ཀཏརཾ, ཀཏརཾ ཕལཊྛཱནིཡནྟི ‘‘ཨཏྠསཱདྷཀཙེཏནཱ ནཱམ མགྒཱནནྟརཕལསདིསཱ’’ཏི ཝུཏྟཏྟཱ ཕལཊྛཱནིཡཱ ཙེཏནཱཏི སིདྡྷཾ. ཨཱཎཏྟི ཙེ མགྒཊྛཱནིཡཱ སིཡཱ, ཙེཏནཱསཧཛཏྟཱ ན སམྦྷཝཏི, ཏཐཱ བྷཎྜསྶ ཨཝསྶཾཧཱརིཏཱ ཙ ན སམྦྷཝཏི. ཨཱཎཏྟིཀྑཎེ ཨེཝ ཧི ཏཾ ཨཝསྶཾཧཱརིཏཾ ཛཱཏནྟི ཨཝཧཱརཀསྶ པཊིགྒཎྷཉྩེ, ཏམྤི ན སམྦྷཝཏི ཨནཱགཏཏྟཱ. ཙེཏནཱ ཙེ མགྒཊྛཱནིཡཱ ཧོཏི, ཨཱཎཏྟིཨཱདཱིསུ ཨཉྙཏརཾ, བྷཎྜསྶ ཨཝསྶཾཧཱརིཏཱ ཨེཝ ཝཱ ཕལཊྛཱནིཡཱ ཙེ, ཨཏྠོ ན སམྦྷཝཏི. པཱརཱཛིཀཱཔཏྟི ཨེཝ ཧི ཕལཊྛཱནིཡཱ བྷཝིཏུམརཧཏི, ན ཨཉྙནྟི ཨེཝཾ ཏཱཝ ཨིདྷ ཨོཔམྨསཾསནྡནཾ སམྦྷཝཏི ཙེཏནཱ མགྒཊྛཱནིཡཱ, ཏསྶཱ པཱརཱཛིཀཱཔཏྟིབྷཱཝོ ཕལཊྛཱནིཡོ. ཡཐཱ ཀིཾ? ཡཐཱ པཊིསམྦྷིདཱམགྒེ ‘‘སདྡྷཱཡ ཉཱཎཾ དྷམྨཔཊིསམྦྷིདཱ. སདྡྷཱཡ སདྡཏྠེ ཉཱཎཾ ཨཏྠཔཊིསམྦྷིདཱ’’ཏི ཨེཏྠ ཨཉྙོ སདྡྷོ, ཨཉྙོ སདྡྷཱཡ སདྡཏྠོཏི སིདྡྷཾ, ཡཐཱ ཙ ‘‘ཨེཀོ ཨམོཧསངྑཱཏོ དྷམྨོ སམྤཡུཏྟཀཱནཾ དྷམྨཱནཾ ཧེཏུཔཙྩཡེན པཙྩཡོ ¶ ཨདྷིཔཏིསཧཛཱཏཨཉྙམཉྙནིསྶཡཨིནྡྲིཡམགྒསམྤཡུཏྟཨཏྠིཨཝིགཏཔཙྩཡེན པཙྩཡོ’’ཏི ཨེཏྠ ཨམོཧོ དྷམྨོ ཨཉྙོ, ཨཉྙེ ¶ ཏསྶ ཧེཏུཔཙྩཡཏཱདཡོཏི སིདྡྷཾ. ཡཐཱ ཙ ཝིནཡཔིཊཀེ ཡཱནི ཚ ཨཱཔཏྟིསམུཊྛཱནཱནི, ཨེཝཾ ཡཐཱསམྦྷཝཾ ‘‘སཏྟ ཨཱཔཏྟིཀྑནྡྷཱ’’ཏི ཝུཙྩནྟི, ཏེསཾ ཨཉྙཱ ཨཱཔཏྟིསམུཊྛཱནཏཱ, ཨཉྙོ ཨཱཔཏྟིཀྑནྡྷབྷཱཝོཏི སིདྡྷཾ. ཨིམིནཱ ཨཱཔཏྟིཀྑནྡྷནཡེན ཨཱཔཏྟཱདྷིཀརཎསྶ ཀཏི ཋཱནཱནཱིཏི? སཏྟ ཨཱཔཏྟིཀྑནྡྷཱ ཋཱནཱནཱིཏི. ཀཏི ཝཏྠཱུནཱིཏི? སཏྟ ཨཱཔཏྟིཀྑནྡྷཱ ཝཏྠཱུནཱིཏི. ཀཏི བྷཱུམིཡོཏི? སཏྟ ཨཱཔཏྟིཀྑནྡྷཱ བྷཱུམིཡོཏི ཨེཝམཱདཡོཔི དསྶེཏབྦཱ. ཏཐཱ ཧི ཏསྶཱ ཨེཝཾ མགྒཊྛཱནིཡཱཡ ཨཏྠསཱདྷིཀཱཡ ཙེཏནཱཡ ཡསྨཱ ཨཉྙཱ པཱརཱཛིཀཱཔཏྟིཏཱ ཨནཏྠནྟརབྷཱུཏཱ ཨཱཀཱརཝིསེསསངྑཱཏཱ ཕལཊྛཱནིཡཱ ཨཏྠི, ཏསྨཱ ‘‘ཨཏྠསཱདྷཀཙེཏནཱ ནཱམ མགྒཱནནྟརཕལསདིསཱ’’ཏི ཝུཏྟཱཏི ཝེདིཏབྦཾ. ཨཐ ཝཱ ཀེཝལཾ དྷམྨནིཡཱམཏྟཾཡེཝ ཨུཔམཏྟེན ཨཱཙརིཡེན ཨེཝཾ ཝུཏྟནྟིཔི སམྦྷཝཏཱིཏི ན ཏཏྠ ཨོཔམྨསཾསནྡནཾ པརིཡེསིཏབྦཾ, ‘‘ཨིདཾ སབྦཾ ཀེཝལཾ ཏཀྐཝསེན ཝུཏྟཏྟཱ ཝིཙཱརེཏྭཱ གཧེཏབྦ’’ནྟི ཨཱཙརིཡོ.

བྷཱུམཊྛཀཐཱདིཝཎྞནཱ ནིཊྛིཏཱ.

ཨཱཔཏྟིབྷེདཝཎྞནཱ

༡༢༢. ‘‘ཝིབྷངྒནཡདསྶནཏོ’’ཏི ཝུཏྟཏྟཱ ཏཾ སམྤཱདེཏུཾ ‘‘ཨིདཱནི ཏཏྠ ཏཏྠཱ’’ཏིཨཱདི ཨཱརདྡྷཾ. ཏཏྠ ཨངྒཝཏྠུབྷེདེན ཙཱཏི ཨཝཧཱརངྒཛཱནནབྷེདེན ཝཏྠུསྶ ཧརིཏབྦབྷཎྜསྶ གརུཀལཧུཀབྷཱཝབྷེདེནཱཏི ཨཏྠོ. ཨཐ ཝཱ ཨངྒཉྩ ཝཏྠུབྷེདེན ཨཱཔཏྟིབྷེདཉྩ དསྶེནྟོཏི ཨཏྠོ. ཨཏིརེཀམཱསཀོ ཨཱུནཔཉྩམཱསཀོཏི ཨེཏྠ ཝཱ-སདྡོ ན ཝུཏྟོ, ཏཱིཧིཔི ཨེཀོ ཨེཝ པརིཙྪེདོ ཝུཏྟོཏི. ཨནཛ྄ཛྷཱཝུཊྛཀཾ ནཱམ ཨརཉྙཔཱལཀཱདིནཱ ན ཀེནཙི མམཱཡིཏཾ. ཚཌྜིཏཾ ནཱམ ཨནཏྠིཀབྷཱཝེན ཨཏིརེཀམཏྟཱདིནཱ སཱམིཀེན ཚཌྜིཏཾ. ནཊྛཾ པརིཡེསིཏྭཱ ཚིནྣཱལཡཏྟཱ ཚིནྣམཱུལཀཾ. ཨསྶཱམིཀཝཏྠཱུཏི ཨཙྪིནྣམཱུལཀམྤི ཡསྶ སཱམིཀོ ཀོཙི ནོ ཧོཏི, ནིརཔེཀྑཱ ཝཱ པརིཙྩཛནྟི, ཡཾ ཝཱ པརིཙྩཏྟཾ དེཝཏཱདཱིནཾ, ཨིདཾ སབྦཾ ཨསྶཱམིཀཝཏྠུ ནཱམ. དེཝཏཱདཱིནཾ ཝཱ བུདྡྷདྷམྨཱནཾ ཝཱ པརིཙྩཏྟཾ པརེཧི ¶ ཙེ ཨཱརཀྑཀེཧི པརིགྒཧིཏཾ, པརཔརིགྒཧིཏམེཝ. ཏཐཱརཱུཔེ ཧི ཨདིནྣཱདཱནེ རཱཛཱནོ ཙོརཾ གཧེཏྭཱ ཧནནཱདིཀཾ ཀརེཡྻུཾ, ཨནཱརཀྑཀེ པན ཨཱཝཱསེ, ཨབྷིཀྑུཀེ ཨནཱརཱམིཀཱདིཀེ ཙ ཡཾ བུདྡྷདྷམྨསྶ སནྟཀཾ, ཏཾ ‘‘ཨཱགཏཱགཏེཧི བྷིཀྑཱུཧི རཀྑིཏབྦཾ གོཔེཏབྦཾ མམཱཡིཏབྦ’’ནྟི ཝཙནཏོ ཨབྷིཀྑུཀཱཝཱསསངྒྷསནྟཀཾ ཝིཡ པརཔརིགྒཧིཏསངྑྱམེཝ གཙྪཏཱིཏི ཚཱཡཱ དིསྶཏི. ཨིསྶརོ ཧི ཡོ ཀོཙི བྷིཀྑུ ཏཱདིསེ པརིཀྑཱརེ ཙོརེཧིཔི གཡ྄ཧམཱནེ ཝཱརེཏུཾ པཊིབལོ ཙེ, བལཀྐཱརེན ཨཙྪིནྡིཏྭཱ ཡཐཱཋཱནེ ཋཔེཏུནྟི. ཨཔརིགྒཧིཏེ པརསནྟཀསཉྙིསྶ ཚསུ ཨཱཀཱརེསུ ཝིཛྫམཱནེསུཔི ཨནཱཔཏྟི ཝིཡ དིསྶཏི ¶ , ‘‘ཡཾ པརཔརིགྒཧིཏཉྩ ཧོཏཱི’’ཏི ཨངྒབྷཱཝོ ཀིཉྩཱཔི དིསྶཏི, པརསནྟཀེ ཏཐཱ པཊིཔནྣཀེ སནྡྷཱཡ ཝུཏྟནྟི གཧེཏབྦཾ. ཨཏྟནོ སནྟཀཾ ཙོརེཧི ཧཊཾ, ཙོརཔརིགྒཧིཏཏྟཱ པརཔརིགྒཧིཏཾ ཧོཏི, ཏསྨཱ པརོ ཙེཏཾ ཐེཡྻཙིཏྟོ གཎྷཏི, པཱརཱཛིཀཾ. སཱམིཀོ ཨེཝ ཙེ གཎྷཏི, ན པཱརཱཛིཀཾ, ཡསྨཱ ཙོདེཏྭཱ, ཨཙྪིནྡིཏྭཱ ཙ སོ ‘‘མམ སནྟཀཾ གཎྷཱམཱི’’ཏི གཧེཏུཾ ལབྷཏི. པཋམཾ དྷུརཾ ནིཀྑིཔིཏྭཱ ཙེ པཙྪཱ ཐེཡྻཙིཏྟོ གཎྷཏི, ཨེས ནཡོ. སཱམིཀེན དྷུརཾ ནིཀྑིཏྟཀཱལེ སོ ཙེ ཙོརོ ཀཱལཾ ཀརོཏི, ཨཉྙོ ཐེཡྻཙིཏྟེན གཎྷཏི, ན པཱརཱཛིཀོ. ཨནིཀྑིཏྟཀཱལེ ཨེཝ ཙེ ཀཱལཾ ཀརོཏི, ཏཾ ཐེཡྻཙིཏྟེན གཎྷནྟསྶ བྷིཀྑུནོ པཱརཱཛིཀཾ མཱུལབྷིཀྑུསྶ སནྟཀབྷཱཝེ ཋིཏཏྟཱ. ཙོརབྷིཀྑུམྷི མཏེ ‘‘མཏཀཔརིཀྑཱར’’ནྟི སངྒྷོ ཝིབྷཛིཏྭཱ ཙེ ཏཾ གཎྷཏི, མཱུལསཱམིཀོ ‘‘མམ སནྟཀམིད’’ནྟི གཧེཏུཾ ལབྷཏི.

ཨེཏྠཱཧ – བྷཱུམཊྛཱདིནིམིཏྟཀམྨཔརིཡོསཱནཱ ཨེཝ ཨཝཧཱརབྷེདཱ, ཨུདཱཧུ ཨཉྙེཔི སནྟཱིཏི. ཀིཉྩེཏྠ ཡདི ཨཉྙེཔི སནྟི, ཏེཔི ཝཏྟབྦཱ. ན ཧི བྷགཝཱ སཱཝསེསཾ པཱརཱཛིཀཾ པཉྙཔེཏི. ནོ ཙེ སནྟི, ཡེ ཨིམེ ཏུལཱཀཱུཊཀཾསཀཱུཊམཱནཀཱུཊཨུཀྐོཊནཝཉྩནནིཀཏིསཱཙིཡོགཝིཔརཱམོསཨཱལོཔསཱཧསཱཀཱརཱ ཙ སུཏྟངྒེསུ སནྡིསྶམཱནཱ, ཏེ ཨིདྷ ཨཱགཏེསུ ཨེཏྠ སམོདྷཱནཾ གཙྪནྟཱིཏི ཙ ལཀྑཎཏོ ཝཱ ཏེསཾ སམོདྷཱནགཏབྷཱཝོ ཝཏྟབྦོཏི? ཝུཙྩཏེ – ལཀྑཎཏོ སིདྡྷོཝ. ཀཐཾ? ‘‘པཉྩཧི ཨཱཀཱརེཧཱི’’ཏིཨཱདིནཱ ནཡེན ཨངྒཝཏྠུབྷེདེན. ཨཱཔཏྟིབྷེདོ ཧི པཱལི༹ཡཾ (པཱརཱ. ༡༢༨-༡༣༠) ཝུཏྟོ ཨེཝ, ཨཊྛཀཐཱཡཉྩ ‘‘ཀཱུཊམཱནཀཱུཊཀཧཱཔཎཱདཱིཧི ཝཱ ཝཉྩེཏྭཱ གཎྷཏི, ཏསྶེཝཾ གཎྷཏོ ཨཝཧཱརོ ཐེཡྻཱཝཧཱརོ’’ཏི (པཱརཱ. ཨཊྛ. ༡.༡༣༨; ཀངྑཱ. ཨཊྛ. དུཏིཡཔཱརཱཛིཀཝཎྞནཱ) ¶ ཨཱགཏཏྟཱ ཏུལཱཀཱུཊགཧཎཱདཡོ ཐེཡྻཱཝཧཱརེ སམོདྷཱནཾ གཏཱཏི སིདྡྷཾ. ཝིཔརཱམོསཨཱལོཔསཱཧསཱཀཱརཱ ཙ ཨཊྛཀཐཱཡཱགཏེ པསཡ྄ཧཱཝཧཱརེ སམོདྷཱནཾ གཙྪནྟི. ཨིམཾཡེཝ ཝཱ པསཡ྄ཧཱཝཧཱརཾ དསྶེཏུཾ ‘‘གཱམཊྛཾ ཨརཉྙཊྛ’’ནྟི མཱཏིཀཾ ནིཀྑིཔིཏྭཱ ‘‘གཱམཊྛཾ ནཱམ བྷཎྜཾ ཙཏཱུཧི ཋཱནེཧི ནིཀྑིཏྟཾ ཧོཏཱི’’ཏིཨཱདིནཱ ནཡེན ཝིབྷཱགོ ཝུཏྟོ. ཏེནེདཾ ཝུཏྟཾ ཧོཏི – གཧཎཱཀཱརབྷེདསནྡསྶནཏྠཾ ཝིསུཾ ཀཏཾ. ན ཧི བྷཱུམིཏལཱདཱིཧི གཱམཱརཉྙཊྛཾ ཡཾ ཀིཉྩཱིཏི. ཏཏྠ ཡཾ ཏུལཱཀཱུཊཾ, ཏཾ རཱུཔཀཱུཊངྒགཧཎཔཊིཙྪནྣཀཱུཊཝསེན ཙཏུབྦིདྷམྤི ཝེཧཱསཊྛེ སམོདྷཱནཾ གཙྪཏི. ཧདཡབྷེདསིཁཱབྷེདརཛྫུབྷེདཝསེན ཏིཝིདྷེ མཱནཀཱུཊེ ‘‘སྭཱཡཾ ཧདཡབྷེདོ མརིཡཱདཾ ཚིནྡཏཱི’’ཏི ཨེཏྠ སམོདྷཱནཾ གཙྪཏི. ཧདཡབྷེདོ ཧི སཔྤིཏེལཱདིམིནནཀཱལེ ལབྦྷཏི. ‘‘ཕནྡཱཔེཏི ཨཏྟནོ བྷཱཛནགཏཾ ཀརོཏཱི’’ཏི ཨེཏྠ སིཁཱབྷེདོཔི ལབྦྷཏི. སོ ‘‘ཏིལཏཎྜུལཱདིམིནནཀཱལེ ལབྦྷཏཱི’’ཏི ཝུཏྟཾ. ཁེཏྟམིནནཀཱལེ རཛྫུབྷེདོ སམོདྷཱནཾ གཙྪཏི. ‘‘དྷམྨཾ ཙརནྟོ སཱམིཀཾ པརཱཛེཏཱི’’ཏི ཨེཏྠ ཨུཀྐོཊནཾ སམོདྷཱནཾ གཙྪཏཱིཏི ཏེ ཙ ཏཐཱ ཝཉྩནནིཀཏིཡོཔི.

ཨཱཔཏྟིབྷེདཝཎྞནཱ ནིཊྛིཏཱ.

ཨནཱཔཏྟིབྷེདཝཎྞནཱ

༡༣༡. ན ¶ ཙ གཧིཏེ ཨཏྟམནོ ཧོཏི, ཏསྶ སནྟཀཾ ཝིསྶཱསགཱཧེན གཧིཏམྤི པུན དཱཏབྦནྟི ཨིདཾ ‘‘ཏེན ཁོ པན སམཡེན དྭེ བྷིཀྑཱུ སཧཱཡཀཱ ཧོནྟི. ཨེཀོ གཱམཾ པིཎྜཱཡ པཱཝིསི…པེ… ཨནཱཔཏྟི, བྷིཀྑུ, ཝིསྶཱསགྒཱཧེ’’ཏི (པཱརཱ. ༡༤༦) ཨིམིནཱ ཨསམེནྟཾ ཝིཡ དིསྶཏི. ཨེཏྠ ཧི ‘‘སོ ཛཱནིཏྭཱ ཏཾ ཙོདེསི ཨསྶམཎོསི ཏྭ’’ནྟི ཝཙནེན ཨནཏྟམནཏཱ དཱིཔིཏཱ. པུན ‘‘ཨནཱཔཏྟི, བྷིཀྑུ, ཝིསྶཱསགྒཱཧེ’’ཏི ཝཙནེན ཨཏྟམནཏཱཡཔི སཏི ཝིསྶཱསགྒཱཧོ རུཧཏཱིཏི དཱིཔིཏནྟི ཙེ? ཏཾ ན, ཨཉྙཐཱ གཧེཏབྦཏྠཏོ. ཨཡཉྷེཏྠ ཨཏྠོ – པཱརཱཛིཀཱཔཏྟིཡཱ ཨནཱཔཏྟི ཝིསྶཱསསཉྙཱཡ གཱཧེ སཏི, སོཔི བྷིཀྑུ སཧཱཡཀཏྟཱ ན ཀུདྡྷོ ཙོདེསི, པིཡོ ཨེཝ སམཱནོ ‘‘ཀཙྩི ཨསྶམཎོསི ཏྭཾ, གཙྪ, ཝིནིཙྪཡཾ ཀཏྭཱ ¶ སུདྡྷནྟེ ཏིཊྛཱཧཱི’’ཏི ཙོདེསི. སཙེཔི སོ ཀུདྡྷོ ཨེཝ ཙོདེཡྻ, ‘‘ཨནཱཔཏྟཱི’’ཏི ཨིདཾ ཀེཝལཾ པཱརཱཛིཀཱབྷཱཝཾ དཱིཔེཏི, ན ཝིསྶཱསགྒཱཧསིདྡྷཾ. ཡོ པན པརིསམཛ྄ཛྷེ ལཛྫཱཡ ཨདྷིཝཱསེཏི, ན ཀིཉྩི ཝདཏཱིཏི ཨཏྠོ. ‘‘པུནཝཏྟུཀཱམཏཱདྷིཔྤཱཡེ པན སོཔི པཙྩཱཧརཱཔེཏུཾ ལབྷཏཱི’’ཏི ཝུཏྟཾ. སཙེ ཙོརོ པསཡ྄ཧ གཧེཏུཀཱམོཔི ‘‘ཨདྷིཝཱསེཐ, བྷནྟེ, ཨིདྷ མེ ཙཱིཝརཱནཱི’’ཏི ཝཏྭཱ ཙཱིཝརཱནི ཐེརེན དིནྣཱནི, ཨདིནྣཱནི ཝཱ སཡཾ གཧེཏྭཱ གཙྪཏི, ཐེརོ པུན པཀྑཾ ལབྷིཏྭཱ ཙོདེཏུཾ ལབྷཏི, པུབྦེ ཨདྷིཝཱསནཱ ཨདྷིཝཱསནསངྑྱཾ ན གཙྪཏི བྷཡེན ཏུཎྷཱིབྷཱུཏཏྟཱ, ‘‘ཡཾ ཙཱིཝརཾ ཨིདྷ སཱམིཀོ པཙྩཱཧརཱཔེཏུཾ ལབྷཏཱི’’ཏི ཝུཏྟཾ. སཱམིཀསྶ པཱཀཏིཀཾ ཀཱཏབྦཾ, ‘‘ཨིདཾ ཀིར ཝཏྟ’’ནྟི ཝུཏྟཾ. སཙེ སངྒྷསྶ སནྟཀཾ ཀེནཙི བྷིཀྑུནཱ གཧིཏཾ, ཏསྶ ཏེན སངྒྷསྶ ཝཱ དྷམྨསྶ ཝཱ ཨུཔཀཱརིཏཱ ཨཏྠི, གཧིཏཔྤམཱཎཾ ཨཔལོཀེཏྭཱ དཱཏབྦཾ. ‘‘སོ ཏེན ཡཐཱགཧིཏཾ པཱཀཏིཀཾ ཀཏྭཱ ཨནཎོ ཧོཏི, གིལཱནཱདཱིནམྤི ཨེསེཝ ནཡོ’’ཏི ཝུཏྟཾ.

པདབྷཱཛནཱིཡཝཎྞནཱ ནིཊྛིཏཱ.

པཀིཎྞཀཀཐཱཝཎྞནཱ

སཱཧཏྠིཀཱཎཏྟིཀནྟི ཨེཀབྷཎྜཾ ཨེཝ. ‘‘བྷཱརིཡཉྷིདཾ ཏྭམྤི ཨེཀཔསྶཾ གཎྷ, ཨཧམྤི ཨེཀཔསྶཾ གཎྷཱམཱིཏི སཾཝིདཧིཏྭཱ ཨུབྷཡེསཾ པཡོགེན ཋཱནཱཙཱཝནེ ཀཏེ ཀཱཡཝཱཙཱཙིཏྟེཧི ཧོཏི ¶ . ཨཉྙཐཱ ‘སཱཧཏྠིཀཾ ཝཱ ཨཱཎཏྟིཀསྶ ཨངྒཾ ན ཧོཏི, ཨཱཎཏྟིཀཾ ཝཱ སཱཧཏྠིཀསྶཱ’ཏི ཨིམིནཱ ཝིརུཛ྄ཛྷཏཱི’’ཏི ལིཁིཏཾ. དྷམྨསིརིཏྠེརོ པན ‘‘ན ཀེཝལཾ བྷཱརིཡེ ཨེཝ ཝཏྠུམྷི ཨཡཾ ནཡོ ལབྦྷཏི, པཉྩམཱསཀམཏྟམྤི དྭེ ཙེ ཛནཱ སཾཝིདཧིཏྭཱ གཎྷནྟི, དྭིནྣམྤི པཱཊེཀྐཾ, སཱཧཏྠིཀཾ ནཱམ ཏཾ ཀམྨཾ, སཱཧཏྠིཀཔཡོགཏྟཱ ཨེཀསྨིཾཡེཝ བྷཎྜེ, ཏསྨཱ ‘སཱཧཏྠིཀཾ ཨཱཎཏྟིཀསྶ ཨངྒཾ ན ཧོཏཱི’ཏི ཝཙནམིམཾ ནཡཾ ན པཊིབཱཧཏི. ‘སཱཧཏྠིཀཝཏྠུཨངྒནྟི སཱཧཏྠིཀསྶ ཝཏྠུསྶ ཨངྒཾ ན ཧོཏཱི’ཏི ཏཏྠ ཝུཏྟཾ. ཨིདྷ པན པཡོགཾ སནྡྷཱཡ ཝུཏྟཏྟཱ ཡུཛྫཏཱི’’ཏི ཨཱཧ ཀིར, ཏཾ ཨཡུཏྟཾ ཀཱཡཝཙཱིཀམྨནྟི ཝཙནཱབྷཱཝཱ, ཏསྨཱ སཱཧཏྠིཀཱཎཏྟིཀེསུ པཡོགེསུ ཨཉྙཏརེན ཝཱཡམཱཔཏྟི སམུཊྛཱཏི ¶ , ཏཐཱཔི ཏུརིཏཏུརིཏཱ ཧུཏྭཱ ཝིལོཔནཱདཱིསུ གཧཎགཱཧཱཔནཝསེནེཏཾ ཝུཏྟཾ. ཡཐཱ ཀཱལེན ཨཏྟནོ ཀཱལེན པརསྶ དྷམྨཾ ཨཱརབྦྷ སཱིགྷཾ སཱིགྷཾ ཨུཔྤཏྟིཾ སནྡྷཱཡ ‘‘ཨཛ྄ཛྷཏྟབཧིདྡྷཱརམྨཎཱ དྷམྨཱ’’ཏི (དྷ. ས. ཏིཀམཱཏིཀཱ ༢༡) ཝུཏྟཱ, ཨེཝཾསམྤདམིདནྟི དཊྛབྦཾ.

ཏཏྠཔི ཡེ ཨནུཏྟརཱདཡོ ཨེཀནྟབཧིདྡྷཱརམྨཎཱ ཝིཉྙཱཎཉྩཱཡཏནཱདཡོ ཨེཀནྟཨཛ྄ཛྷཏྟཱརམྨཎཱ, ཨིཏརེ ཨནིཡཏཱརམྨཎཏྟཱ ‘‘ཨཛ྄ཛྷཏྟབཧིདྡྷཱརམྨཎཱ’’ཏི ཝུཙྩནྟི, ན ཨེཀཀྑཎེ ཨུབྷཡཱརམྨཎཏྟཱ. ཨཡཾ པན ཨཱཔཏྟི ཡཐཱཝུཏྟནཡེན སཱཧཏྠིཀཱ ཨཱཎཏྟིཀཱཔི ཧོཏིཡེཝ, ཏསྨཱ ཨནིདསྶནམེཏནྟི ཨཡུཏྟཾ. ‘‘ཡཐཱ ཨནིཡཏཱརམྨཎཏྟཱ ‘ཨཛ྄ཛྷཏྟབཧིདྡྷཱརམྨཎཱ’ཏི ཝུཏྟཱ, ཏཐཱ ཨནིཡཏཔཡོགཏྟཱ ཨཡམྤི ཨཱཔཏྟི ‘སཱཧཏྠིཀཱཎཏྟིཀཱ’ཏི ཝུཏྟཱཏི ནིདསྶནམེཝེཏ’’ནྟི ཨེཀཙྩེ ཨཱཙརིཡཱ ཨཱཧུ. ‘‘ཨིམེ པནཱཙརིཡཱ ཨུབྷིནྣཾ ཨེཀཏོ ཨཱརམྨཎཀརཎཾ ནཏྠི. ཨཏྠི ཙེ, ‘ཨཛ྄ཛྷཏྟབཧིདྡྷཱརམྨཎཾ དྷམྨཾ པཊིཙྩ ཨཛ྄ཛྷཏྟབཧིདྡྷཱརམྨཎོ དྷམྨོ ཨུཔྤཛྫཏི ཧེཏུཔཙྩཡཱ’ཏིཨཱདིནཱ (པཊྛཱ. ༢.༢༡.༡ ཨཛ྄ཛྷཏྟཱརམྨཎཏིཀ) པཊྛཱནཔཱཋེན བྷཝིཏབྦནྟི སཉྙཱཡ ཨཱཧཾསུ, ཏེསཾ མཏེན ‘སིཡཱ ཨཛ྄ཛྷཏྟབཧིདྡྷཱརམྨཎཱ’ཏི ཝཙནཾ ནིརཏྠཀཾ སིཡཱ, ན ཙ ནིརཏྠཀཾ, ཏསྨཱ ཨཏྠེཝ ཨེཀཏོ ཨཛ྄ཛྷཏྟབཧིདྡྷཱརམྨཎོ དྷམྨོ. པུན ‘ཨཡཾ སོ’ཏི ནིཡམེན ཨཛ྄ཛྷཏྟབཧིདྡྷཱརམྨཎཱ དྷམྨཱ ཝིཡ ནིདྡིསིཏབྦཱབྷཱཝཏོ ན ཨུདྡྷཊོ སིཡཱ. ཏཏྠ ཨནུདྡྷཊཏྟཱ ཨེཝ དྷམྨསངྒཧཊྛཀཐཱཡཾ ཨུབྷིནྣམྤི ཨཛ྄ཛྷཏྟབཧིདྡྷཱདྷམྨཱནཾ ཨེཀཏོ ཨཱརམྨཎཀརཎདྷམྨཝསེན ‘ཨཛ྄ཛྷཏྟབཧིདྡྷཱརམྨཎཱ’ཏི ཨཝཏྭཱ ‘ཀཱལེན ཨཛ྄ཛྷཏྟབཧིདྡྷཱ པཝཏྟིཡཾ ཨཛ྄ཛྷཏྟབཧིདྡྷཱརམྨཎ’ནྟི ཝུཏྟཾ, ཏསྨཱ གཎྛིཔདེ ཝུཏྟནཡོཝ སཱརོཏི ནོ ཏཀྐོ’’ཏི ཨཱཙརིཡོ. ཏཏྠ ‘‘ཀཱཡཝཙཱིཀམྨ’’ནྟི ཨཝཙནཾ པནསྶ སཱཧཏྠིཀཔཡོགཏྟཱ ཨེཀཔཡོགསྶ ཨནེཀཀམྨཏྟཱཝ, ཡདི བྷཝེཡྻ, མནོཀམྨམྤི ཝཏྟབྦཾ བྷཝེཡྻ, ཡཐཱ ཏཏྠ མནོཀམྨཾ ཝིཛྫམཱནམྤི ཨབྦོཧཱརིཀཾ ཛཱཏཾ, ཨེཝཾ ཏསྨིཾ སཱཧཏྠིཀཱཎཏྟིཀེ ཝཙཱིཀམྨཾ ཨབྦོཧཱརིཀནྟི ཝེདིཏབྦཾ, ཏཾ པན ཀེཝལཾ ཀཱཡཀམྨསྶ ཨུཔནིསྶཡཾ ཛཱཏཾ, ཙིཏྟཾ ཝིཡ ཏཏྠ ཨངྒམེཝ ཛཱཏཾ, ཏསྨཱ ¶ ཝུཏྟཾ ‘‘སཱཧཏྠིཀཔཡོགཏྟཱ’’ཏི, ‘‘ཨངྒབྷཱཝམཏྟམེཝ ཧི སནྡྷཱཡ ‘སཱཧཏྠིཀཱཎཏྟིཀ’ནྟི ཝུཏྟནྟི ནོ ཏཀྐོ’’ཏི ཙ, ཝིཙཱརེཏྭཱ གཧེཏབྦཾ.

ཀཱཡཝཱཙཱ ¶ སམུཊྛཱནཱ, ཡསྶཱ ཨཱཔཏྟིཡཱ སིཡུཾ;

ཏཏྠ ཀམྨཾ ན ཏཾ ཙིཏྟཾ, ཀམྨཾ ནསྶཏི ཁཱིཡཏི.

ཀིརིཡཱཀིརིཡཱདིཀཾ ཡཉྩ, ཀམྨཱཀམྨཱདིཀཾ བྷཝེ;

ན ཡུཏྟཾ ཏཾ ཝིརུདྡྷཏྟཱ, ཀམྨམེཀཾཝ ཡུཛྫཏི.

ཝིནཱིཏཝཏྠུཝཎྞནཱ

༡༣༢. ཨནཱཔཏྟི, བྷིཀྑུ, ཙིཏྟུཔྤཱདེཏི ཨེཏྠ ཀེཝལཾ ཙིཏྟཾ, ཏསྶེཝ ཨུཔྤཱདེཏབྦཱཔཏྟཱིཧི ཨནཱཔཏྟཱིཏི ཨཏྠོ. ཨེཏྠཱཧ – ཨུཔནིཀྑིཏྟསཱདིཡནཱདཱིསུ, སབྦེསུ ཙ ཨཀིརིཡསིཀྑཱཔདེསུ ན ཀཱཡངྒཙོཔནཾ ཝཱ ཝཱཙངྒཙོཔནཾ ཝཱ, ཨཔིཙཱཔཏྟི, ཀསྨཱ ཨིམསྨིཾཡེཝ སིཀྑཱཔདེ ཨནཱཔཏྟི, ན སབྦཱཔཏྟཱིཧཱིཏི? ན, ཀསྨཱ.

ཀཏྟབྦཱ སཱདྷིཀཾ སིཀྑཱ, ཝིཉྙཏྟིཾ ཀཱཡཝཱཙིཀཾ;

ཨཀཏྭཱ ཀཱཡཝཱཙཱཧི, ཨཝིཉྙཏྟཱིཧི ཏཾ ཕུསེ.

ན ལེསབྷཱཝཏྟཱ. སཔྤཱཡེ ཨཱརམྨཎེ ཨཊྛཏྭཱ པཊིལདྡྷཱསེཝནཾ ཧུཏྭཱ ཏཏོ པརཾ སུཊྛུ དྷཱཝཏཱིཏི སནྡྷཱཝཏི. ཏཏོ ཨབྷིཛ྄ཛྷཱཡ སཧགཏཾ, བྱཱཔཱདསཧགཏཾ ཝཱ ཧུཏྭཱ ཝིསེསཏོ དྷཱཝཏཱིཏི ཝིདྷཱཝཏི.

༡༣༧. ཝཎཾ ཀཏྭཱ གཧེཏུནྟི ཨེཏྠ ཀིཉྩཱཔི ཨིམིནཱ སིཀྑཱཔདེན ཨནཱཔཏྟི, ཨིཏྠིརཱུཔསྶ ནཱམ ཡཏྠ ཨཱམསནྟསྶ དུཀྐཊནྟི ཀེཙི. ‘‘ཀཱཡཔཊིབདྡྷགྒཧཎཾ ཡུཏྟཾ, ཏཾ སནྡྷཱཡ ཝཊྚཏཱིཏི ཝུཏྟ’’ནྟི ཝདནྟི. ཨུབྷཡཾ ཝིཙཱརེཏྭཱ གཧེཏབྦཾ.

ཀུསསངྐཱམནཝཏྠུཀཐཱཝཎྞནཱ

༡༣༨. མཧཱཔཙྩརིཡཱདཱིསུ ཡཾ ཝུཏྟཾ ‘‘པདུདྡྷཱརེནེཝ ཀཱརེཏབྦོ’’ཏི, ཏཾ སུཝུཏྟཾ. ཀིནྟུ ཏསྶ ¶ པརིཀཔྤཱཝཧཱརཀམཏྟཾ ན དིསྶཏཱིཏི དསྶནཏྠཾ ཨིདཾ ཝུཏྟཾ. ཨུདྡྷཱརེ ཝཱཡཾ ཨཱཔནྣོ, ཏསྨཱ དིསྭཱ གཙྪནྟོ ‘‘པདུདྡྷཱརེནེཝ ཀཱརེཏབྦོ’’ཏི ཨིདཾ ཏཏྠ དུཝུཏྟནྟི ཝུཏྟཾ ཧོཏི. ཀཐཾ? ‘‘སཱཊཀཏྠིཀོ སཱཊཀཔསིབྦཀམེཝ གཧེཏྭཱ བཧི ནིཀྑམིཏྭཱ སཱཊཀབྷཱཝཾ ཉཏྭཱ ‘པཙྪཱ གཎྷིསྶཱམཱི’ཏི ཨེཝཾ པརིཀཔྤེཏྭཱ གཎྷཏི, ན ཨུདྡྷཱརེ ཨེཝཱཔཛྫཏི. ཡདཱ བཧི ཋཏྭཱ ¶ ‘སཱཊཀོ ཨཡ’ནྟི དིསྭཱ གཙྪཏི, ཏདཱ པདུདྡྷཱརེནེཝ ཀཱརེཏབྦོ’’ཏི ན ཝུཏྟམེཏཾ, ཀིནྟུ ཀིཉྩཱཔི པརིཀཔྤོ དིསྶཏི, པུབྦབྷཱགེ ཨཝཧཱརཀྑཎེ ན དིསྶཏཱིཏི ན སོ པརིཀཔྤཱཝཧཱརོ, ཨཡམཏྠོ མཧཱཨཊྛཀཐཱཡཾ ཝུཏྟོཝ, ཏསྨཱ ‘‘ཉཱཡམེཝཱ’’ཏི ཝདནྟི. ཀམྨནྟསཱལཱ ནཱམ ཀསྶཀཱནཾ ཝནཙྪེདཀཱནཾ གེཧཱནི. ཨཡཾ ཏཱཝཱཏི སཙེ ཨུཔཙཱརསཱིམནྟིཨཱདི ཡཱཝ ཐེརཝཱདོ མཧཱཨཊྛཀཐཱནཡོ, ཏཏྠ ཀེཙི པནཱཏིཨཱདི ན གཧེཏབྦཾ ཐེརཝཱདཏྟཱ ཡུཏྟིཨབྷཱཝཏོ, ན ཧི སཱཧཏྠིཀེ ཨེཝཾཝིདྷཱ ཨཏྠསཱདྷཀཙེཏནཱ ཧོཏི. ཨཱཎཏྟིཀེ ཨེཝ ཨཏྠསཱདྷཀཙེཏནཱ. ‘‘སེསཾ མཧཱཔཙྩརིཡཾ ཝུཏྟེནཏྠེན སམེཏཱི’’ཏི ཝུཏྟཾ.

ཀུསསངྐཱམནཀརཎེ སཙེ པརོ ‘‘ནཱཡཾ མམ སནྟཀོ’’ཏི ཛཱནཱཏི, ཨིཏརསྶ ཧཏྠཏོ མུཏྟམཏྟེ པཱརཱཛིཀཱཔཏྟི ཁཱིལསངྐཱམནེ ཝིཡ. ‘‘ཨཏྟནོ སནྟཀཾ སཙེ ཛཱནཱཏི, ན ཧོཏཱི’’ཏི ཝདནྟི. ཨེཝཾ སནྟེ པཉྩཀཱནི སངྐརཱནི ཧོནྟཱིཏི ཨུཔཔརིཀྑིཏབྦཾ.

༡༤༠. པརཱནུདྡཡཏཱཡཱཏི ཨེཏྠ པརཱནུདྡཡཏཱཡ ཀོཊིཔྤཏྟེན བྷགཝཏཱ ཀསྨཱ ‘‘ཨནཱཔཏྟི པེཏཔརིགྒཧེ ཏིརཙྪཱནགཏཔརིགྒཧེ’’ཏི (པཱརཱ. ༡༣༡) ཝུཏྟནྟི ཙེ? པརཱནུདྡཡཏཱཡ ཨེཝ. ཡསྶ ཧི པརིཀྑཱརསྶ ཨཱདཱནེ རཱཛཱནོ ཙོརཾ གཧེཏྭཱ ན ཧནནཱདཱིནི ཀརེཡྻུཾ, ཏསྨིམྤི ནཱམ སམཎོ གོཏམོ པཱརཱཛིཀཾ པཉྙཔེཏྭཱ བྷིཀྑུཾ ཨབྷིཀྑུཾ ཀརོཏཱིཏི མཧཱཛནོ བྷགཝཏི པསཱདཉྙཐཏྟཾ ཨཱཔཛྫིཏྭཱ ཨཔཱཡུཔགོ ཧོཏི. ཨཔེཏཔརིགྒཧིཏཱ རུཀྑཱདཱི ཙ དུལླབྷཱ, ན ཙ སཀྐཱ ཉཱཏུནྟི རུཀྑཱདཱིཧི པཱཔབྷཱིརུཀོ ཨུཔཱསཀཛནོ པཊིམཱགྷརཙེཏིཡབོདྷིགྷརཝིཧཱརཱདཱིནི ཨཀཏྭཱ མཧཏོ པུཉྙཀྑནྡྷཏོ པརིཧཱཡེཡྻ. ‘‘རུཀྑམཱུལསེནཱསནཾ པཾསུཀཱུལཙཱིཝརཾ ནིསྶཱཡ པབྦཛྫཱ’’ཏི (མཧཱཝ. ༡༢༨) ཝུཏྟནིསྶཡཱ ཙ ཨནིསྶཡཱ ཧོནྟི. པརཔརིགྒཧིཏསཉྙིནོ ཧི བྷིཀྑཱུ རུཀྑམཱུལཔཾསུཀཱུལཱནི ན སཱདིཡིསྶནྟཱིཏི, པབྦཛྫཱ ཙ ན སམྦྷཝེཡྻུཾ, སཔྤདཊྛཀཱལེ ཚཱརིཀཏྠཱཡ རུཀྑཾ ཨགྒཧེཏྭཱ མརཎཾ ཝཱ ནིགཙྪེཡྻུཾ, ཨཙྪིནྣཙཱིཝརཱདིཀཱལེ སཱཁཱབྷངྒཱདིཾ ཨགྒཧེཏྭཱ ནགྒཱ ཧུཏྭཱ ཏིཏྠིཡལདྡྷིམེཝ སུལདྡྷི ཝིཡ དཱིཔེནྟཱ ཝིཙརེཡྻུཾ, ཏཏོ ཏིཏྠིཡེསྭེཝ ལོཀོ པསཱིདིཏྭཱ དིཊྛིགྒཧཎཾ པཏྭཱ སཾསཱརཁཱཎུཀོ བྷཝེཡྻ, ཏསྨཱ བྷགཝཱ པརཱནུདྡཡཏཱཡ ¶ ཨེཝ ‘‘ཨནཱཔཏྟི པེཏཔརིགྒཧེ’’ཏིཨཱདིམཱཧཱཏི ཝེདིཏབྦཾ.

༡༤༡. ཨཔརམྤི ¶ བྷཱགཾ དེཧཱིཏི ‘‘གཧིཏཾ ཝིཉྙཏྟིསདིསཏྟཱ ནེཝ བྷཎྜདེཡྻཾ ན པཱརཱཛིཀ’’ནྟི ལིཁིཏཾ, ཨིདཾ པཀཏིཛནེ ཡུཛྫཏི. ‘‘སཙེ པན སཱམིཀོ ཝཱ ཏེན ཨཱཎཏྟོ ཝཱ ‘ཨཔརསྶ སཧཱཡབྷིཀྑུསྶ བྷཱགཾ ཨེས གཎྷཱཏི ཡཱཙཏི ཝཱ’ཏི ཡཾ ཨཔརབྷཱགཾ དེཏི, ཏཾ བྷཎྜདེཡྻ’’ནྟི ཝདནྟི.

༡༤༨-༩. ཁཱདནྟསྶ བྷཎྜདེཡྻནྟི ཙོརསྶ ཝཱ སཱམིཀསྶ ཝཱ སམྤཏྟསྶ དིནྣཾ སུདིནྣམེཝ ཀིར. ཨཝིསེསེནཱཏི ‘‘ཨུསྶཱཧགཏཱནཾ ཝཱ’’ཏི ཨཝཏྭཱ ཝུཏྟཾ, ན ཧི ཀཏིཔཡཱནཾ ཨནུསྶཱཧཏཱཡ སངྒྷིཀམསངྒྷིཀཾ ཧོཏི. མཧཱཨཊྛཀཐཱཡམྤི ‘‘ཡདི སཨུསྶཱཧཱཝ གཙྪནྟི, ཐེཡྻཙིཏྟེན པརིབྷུཉྫཏོ ཨཝཧཱརོ ཧོཏཱི’’ཏི ཝུཏྟཏྟཱ ཏདུབྷཡམེཀཾ. ཚཌྜིཏཝིཧཱརེ ཨུཔཙཱརསཱིམཱཡ པམཱཎཾ ཛཱནིཏུཾ ན སཀྐཱ, ཨཡཾ པན བྷིཀྑུ ཨུཔཙཱརསཱིམཱཡ བཧི ཋཏྭཱ གྷཎྚིཔཧརཎཱདིཾ ཀཏྭཱ པརིབྷུཉྫཏི ཁཱདཏི, ཏེན ཨེཝཾ ཁཱདིཏཾ སུཁཱདིཏནྟི ཨཏྠོ. ‘‘ཨིཏརཝིཧཱརེ ཏཏྠ དིཏྟཝིདྷིནཱཝ པཊིཔཛྫིཏབྦ’’ནྟི ཝུཏྟཾ. ‘‘སུཁཱདིཏཾ ཨནྟོཝིཧཱརཏྟཱ’’ཏི ལིཁིཏཾ, ཨཱགཏཱནཱགཏཱནཾ སནྟཀཏྟཱཏི ‘‘ཙཱཏུདྡིསསྶ སངྒྷསྶ དེམཱི’’ཏི དིནྣཏྟཱ ཝུཏྟཾ. ཨེཝཾ ཨཝཏྭཱ ‘‘སངྒྷསྶ དེམཱི’’ཏི དིནྣམྤི ཏཱདིསམེཝ. ཏཐཱ ཧི བཧི ཋིཏོ ལཱབྷཾ ན ལབྷཏི བྷགཝཏོ ཝཙནེནཱཏི ཝེདིཏབྦཾ.

༡༥༣. ‘‘མཏསཱུཀརོ’’ཏི ཝཙནཏོ ཏམེཝ ཛཱིཝནྟཾ བྷཎྜདེཡྻནྟི ཀཏྭཱ དཱཏུཾ ན ལབྷཏི. ཝཛ྄ཛྷཾ ཝཊྚཏཱིཏི དཱིཔིཏཾ ཧོཏི. མདྡནྟོ གཙྪཏི, བྷཎྜདེཡྻནྟི ཨེཏྠ ཀིཏྟཀཾ བྷཎྜདེཡྻཾ, ན ཧི སཀྐཱ ‘‘ཨེཏྟཀཱ སཱུཀརཱ མདྡིཏྭཱ གཏཱ གམིསྶནྟཱི’’ཏི ཛཱནིཏུནྟི? ཡཏྟཀེ སཱམིཀཱནཾ དིནྣེ ཏེ ‘‘དིནྣཾ མམ བྷཎྜ’’ནྟི ཏུསྶནྟི, ཏཏྟཀཾ དཱཏབྦཾ. ནོ ཙེ ཏུསྶནྟི, ཨཏིཀྐནྟསཱུཀརམཱུལཾ དཏྭཱ ཀིཾ ཨོཔཱཏོ ཁཎིཏྭཱ དཱཏབྦོཏི? ན དཱཏབྦོ. ཨཐ ཀིཾ ཙོདིཡམཱནསྶ ཨུབྷིནྣཾ དྷུརནིཀྑེཔེན པཱརཱཛིཀཾ ཧོཏཱིཏི? ན ཧོཏི, ཀེཝལཾ ཀཔྤིཡཔརིཀྑཱརཾ དཏྭཱ ཏོསེཏབྦོཝ སཱམིཀོ, ཨེསེཝ ནཡོ ཨཉྙེསུཔི ཨེཝརཱུཔེསཱུཏི ནོ ཏཀྐོཏི ཨཱཙརིཡོ. ‘‘ཏདཧེཝ ཝཱ དུཏིཡདིཝསེ ཝཱ མདྡནྟོ གཙྪཏཱི’’ཏི ཝུཏྟཾ. གུམྦེ ཁིཔཏི, བྷཎྜདེཡྻམེཝཱཏི ¶ ཨཝསྶཾ པཝིསནཀེ སནྡྷཱཡ ཝུཏྟཾ. ཨེཏྠ ཨེཀསྨིཾ ཝིཧཱརེ པརཙཀྐཱདིབྷཡཾ ཨཱགཏཾ. མཱུལཝཏྠུཙྪེདནྟི ‘‘སབྦསེནཱསནཾ ཨེཏེ ཨིསྶརཱ’’ཏི ཝཙནཏོ ཨིཏརེ ཨནིསྶརཱཏི དཱིཔིཏཾ ཧོཏི.

༡༥༦. ཨཱརཱམརཀྑཀཱཏི ཝིསྶཊྛཝསེན གཧེཏབྦཾ. ཨདྷིཔྤཱཡཾ ཉཏྭཱཏི ཨེཏྠ ཡསྶ དཱནཾ པཊིགྒཎྷནྟཾ བྷིཀྑུཾ, བྷཱགཾ ཝཱ སཱམིཀཱ ན རཀྑནྟི ན དཎྜེནྟི, ཏསྶ དཱནཾ ཨཔྤཊིཙྪཱདེཏྭཱ ¶ གཧེཏུཾ ཝཊྚཏཱིཏི ཨིདྷ སནྣིཊྛཱནཾ. ཏམྤི ‘‘ན ཝཊྚཏི སངྒྷིཀེ’’ཏི ཝུཏྟཾ. ཨཡམེཝ བྷིཀྑུ ཨིསྶརོཏི ཡཏྠ སོ ཨིཙྪཏི, ཏཏྠ ཨཏྟཉཱཏཧེཏུཾ ལབྷཏི ཀིར ཨཏྠོ. ཨཔིཙ ‘‘དཧརོ’’ཏི ཝདནྟི. སཝཏྠུཀནྟི སཧ བྷཱུམིཡཱཏི ཝུཏྟཾ ཧོཏི. ‘‘གརུབྷཎྜཾ ཧོཏཱི’’ཏི ཝཏྭཱ ‘‘ཏིཎམཏྟཾ པན ན དཱཏབྦ’’ནྟི ཝུཏྟཾ, ཏཾ ཀིནྟུ གརུབྷཎྜནྟི ཙེ, ཨརཀྑིཡཨགོཔིཡཊྛཱནེ, ཝིནསྶནཀབྷཱཝེ ཙ ཋིཏཾ སནྡྷཱཡ ཝུཏྟཾ. ཀཔྤིཡེཔི ཙཱཏི ཝཏྭཱ, ཨཝཏྭཱ ཝཱ གཧཎཡུཏྟེ མཱཏཱདིསནྟཀེཔི ཐེཡྻཙིཏྟུཔྤཱདེན. ཨིདཾ པན སིཀྑཱཔདཾ ‘‘རཱཛཱཔིམེསཾ ཨབྷིཔྤསནྣོ’’ཏི (པཱརཱ. ༨༦) ཝཙནཏོ ལཱབྷགྒམཧཏྟཾ, ཝེཔུལླམཧཏྟཉྩ པཏྟཀཱལེ པཉྙཏྟནྟི སིདྡྷཾ.

དུཏིཡཔཱརཱཛིཀཝཎྞནཱ ནིཊྛིཏཱ.

༣. ཏཏིཡཔཱརཱཛིཀཾ

པཋམཔཉྙཏྟིནིདཱནཝཎྞནཱ

༡༦༢. ཏཱིཧི སུདྡྷེནཱཏི ཨེཏྠ ཏཱིཧཱིཏི ནིསྶཀྐཝཙནཾ ཝཱ ཧོཏི, ཀརཎཝཙནཾ ཝཱ. ནིསྶཀྐཔཀྑེ ཀཱཡཝཙཱིམནོདྭཱརེཧི སུདྡྷེན. ཏཐཱ དུཙྩརིཏམལེཧི ཝིསམེཧི པཔཉྩེཧཱིཏིཨཱདིནཱ ནཡེན སབྦཀིལེསཏྟིཀེཧི བོདྷིམཎྜེ ཨེཝ སུདྡྷེནཱཏི ཡོཛེཏབྦཾ. ཀརཎཔཀྑེ ཏཱིཧཱིཏི ཀཱཡཝཙཱིམནོདྭཱརེཧི སུདྡྷེན. ཏཐཱ ཏཱིཧི སུཙརིཏེཧི, ཏཱིཧི ཝིམོཀྑེཧི, ཏཱིཧི བྷཱཝནཱཧི, ཏཱིཧི སཱིལསམཱདྷིཔཉྙཱཧི སུདྡྷེནཱཏི སབྦགུཎཏྟིཀེཧི ཡོཛེཏབྦཾ. ཝིབྷཱཝིཏནྟི དེསནཱཡ ཝིཏྠཱརིཏཾ, ཝིབྷཱུཏཾ ཝཱ ཀཏཾ ཝིཧིཏཾ, པཉྙཏྟཾ ཝཱ ཧོཏི. སཾཝཎྞནཱཏི ཝཏྟམཱནསམཱིཔེ ཝཏྟམཱནཝཙནཾ.

ན ¶ ཀེཝལཾ རཱཛགཧམེཝ, ཨིདམྤི ནགརཾ. སཔརིཙྪེདནྟི སཔརིཡནྟནྟི ཨཏྠོ. སཔརིཀྑེཔནྟི ཨེཀེ. ‘‘ཧཾསཝཊྚཀཙྪདནེནཱཏི ཧཾསཔརིཀྑེཔསཎྛཱནེནཱ’’ཏི ལིཁིཏཾ. ཀཱཡཝིཙྪིནྡནིཡཀཐནྟི ཨཏྟནོ ཨཏྟབྷཱཝེ, པརསྶ ཝཱ ཨཏྟབྷཱཝེ ཚནྡརཱགཔྤཧཱནཀརཾ ཝིཙྪིནྡནཀརཾ དྷམྨཀཐཾ ཀཐེཏི. ཨསུབྷཱ ཙེཝ སུབྷཱཀཱརཝིརཧིཏཏྟཱ. ཨསུཙིནོ ཙ དོསནིསྶནྡནཔབྷཝཏྟཱ. པཊིཀཱུལཱ ཙ ཛིགུཙྪནཱིཡཏྟཱ པིཏྟསེམྷཱདཱིསུ ཨཱསཡཏོ. ཨསུབྷཱཡ ཝཎྞནྟི ¶ ཨསུབྷཱཀཱརསྶ, ཨསུབྷཀམྨཊྛཱནསྶ ཝཱ ཝིཏྠཱརཾ བྷཱསཏི. སཱམིཨཏྠེ ཧེཏཾ སམྤདཱནཝཙནཾ. ཨསུབྷནྟི ཨསུབྷནིམིཏྟསྶ ཨཱཝིབྷཱཝཱཡ པཙྩུཔཊྛཱནཱཡ ཝིཏྠཱརཀཐཱསངྑཱཏཾ ཝཎྞཾ བྷཱསབྷཱིཏི ཨཏྠོ. ཏེསཾཡེཝ ཨཱདིམཛ྄ཛྷཔརིཡོསཱནཱནཾ དསཧི ལཀྑཎེཧི སམྤནྣཾ ཀིལེསཙོརེཧི ཨནབྷིབྷཝནཱིཡཏྟཱ ཛྷཱནཙིཏྟཾ མཉྫཱུསཾ ནཱམ.

ཏཏྲིམཱནཱིཏི ཨེཏྠཱཡཾ པིཎྜཏྠོ – ཡསྨིཾ ཝཱརེ པཋམཾ ཛྷཱནཾ ཨེཀཙིཏྟཀྑཎིཀཾ ཨུཔྤཛྫཏི, ཏཾ སཀལམྤི ཛཝནཝཱརཾ ཨནུལོམཔརིཀམྨཨུཔཙཱརགོཏྲབྷུཨཔྤནཱཔྤབྷེདཾ ཨེཀཏྟནཡེན ‘‘པཋམཾ ཛྷཱན’’ནྟི གཧེཏྭཱ ཏསྶ པཋམཛ྄ཛྷཱནསྶ ཨཔྤནཱཔཊིཔཱདིཀཱཡ ཁིཔྤཱདིབྷེདཱཡ ཨབྷིཉྙཱཡ ཨདྷིགཏཱཡ ཀིཙྩནིཔྥཏྟིཾ ཨུཔཱདཱཡ ཨཱགམནཝསེན པཊིཔདཱཝིསུདྡྷི ཨཱདཱིཏི ཝེདིཏབྦཱ. ཏཏྲམཛ྄ཛྷཏྟུཔེཀྑཱཡ ཀིཙྩནིཔྥཏྟིཝསེན ཨུཔེཀྑཱནུབྲཱུཧནཱ མཛ྄ཛྷེཏི ཝེདིཏབྦཱ. པརིཡོདཱཔཀཉཱཎསྶ ཀིཙྩནིཔྥཏྟིཝསེན སམྤཧཾསནཱ པརིཡོསཱནནྟི ཝེདིཏབྦཾ. ཏཏྠ ཨཱདིཙིཏྟཏོ པཊྛཱཡ ཡཱཝ པཋམཛ྄ཛྷཱནསྶ ཨུཔྤཱདཀྑཎཾ, ཨེཏསྨིཾ ཨནྟརེ པཊིཔདཱཝིསུདྡྷཱིཏི ཝེདིཏབྦཱ. ཨུཔྤཱདཋིཏིཀྑཎེསུ ཨུཔེཀྑཱནུབྲཱུཧནཱ, ཋིཏིབྷངྒཀྑཎེསུ སམྤཧཾསནཱཏི ཝེདིཏབྦཱ. ལཀྑཱིཡཏི ཨེཏེནཱཏི ལཀྑཎནྟི ཀཏྭཱ ‘‘ཝིསུདྡྷིཔཊིཔཏྟིཔཀྑནྡནེ’’ཏིཨཱདིནཱ པུབྦབྷཱགོ ལཀྑཱིཡཏི, ཏིཝིདྷེན ཨཛ྄ཛྷུཔེཀྑནེན མཛ྄ཛྷཾ ལཀྑཱིཡཏི, ཙཏུབྦིདྷཱཡ སམྤཧཾསནཱཡ པརིཡོསཱནཾ ལཀྑཱིཡཏཱིཏི. ཏེན ཝུཏྟཾ ‘‘དས ལཀྑཎཱནཱི’’ཏི.

པཱརིབནྡྷཀཏོཏི ནཱིཝརཎསངྑཱཏཔཱརིབནྡྷཀཏོ ཝིསུདྡྷཏྟཱ གོཏྲབྷུཔརིཡོསཱནཾ པུབྦབྷཱགཛཝནཙིཏྟཾ ‘‘ཙིཏྟཝིསུདྡྷཱི’’ཏི ཝུཙྩཏི. ཏཐཱ ཝིསུདྡྷཏྟཱ ཏཾ ཙིཏྟཾ མཛ྄ཛྷིམཾ སམཱདྷིནིམིཏྟསངྑཱཏཾ ཨཔྤནཱསམཱདྷིཾ ཏདཏྠཱཡ ཨུཔགཙྪམཱནཾ ཨེཀསནྟཏིཝསེན པརིཎཱམེནྟཾ པཊིཔཛྫཏི ནཱམ. ཨེཝཾ པཊིཔནྣསྶ ཏསྶ ཏཏྠ སམཐནིམིཏྟེ ¶ པཀྑནྡནཾ ཏབྦྷཱཝཱུཔགམནཾ ཧོཏཱིཏི ཀཏྭཱ ‘‘ཏཏྠ ཙིཏྟཔཀྑནྡན’’ནྟི ཝུཙྩཏི. ཨེཝཾ ཏཱཝ པཋམཛ྄ཛྷཱནུཔྤཱདཀྑཎེ ཨེཝ ཨཱགམནཝསེན པཊིཔདཱཝིསུདྡྷི ཝེདིཏབྦཱ. ཨེཝཾ ཝིསུདྡྷསྶ ཨཔྤནཱཔྤཏྟསྶ པུན ཝིསོདྷནེ བྱཱཔཱརཱབྷཱཝཱ ཨཛ྄ཛྷུཔེཀྑནཾ ཧོཏི. སམཐཔྤཊིཔནྣཏྟཱ པུན སམཱདྷཱནེ བྱཱཔཱརཱབྷཱཝཱ ཙ སམཐཔྤཊིཔནྣསྶ ཨཛ྄ཛྷུཔེཀྑནཾ ཧོཏི. ཀིལེསསཾསགྒཾ པཧཱཡ ཨེཀནྟེན ཨུཔཊྛིཏཏྟཱ པུན ཨེཀཏྟུཔཊྛཱནེ བྱཱཔཱརཱསམྦྷཝཏོ ཨེཀཏྟུཔཊྛཱནསྶ ཨཛ྄ཛྷུཔེཀྑནཾ ཧོཏི. ཏཏྠ ཛཱཏཱནནྟི ཏསྨིཾ ཙིཏྟེ ཛཱཏཱནཾ སམཱདྷིཔཉྙཱནཾ ཡུགནདྡྷབྷཱཝེན ཨནཏིཝཏྟནཊྛེན ནཱནཱཀིལེསེཧི ཝིམུཏྟཏྟཱ. སདྡྷཱདཱིནཾ ཨིནྡྲིཡཱནཾ ཝིམུཏྟིརསེནེཀརསཊྛེན ཨནཏིཝཏྟནེཀསབྷཱཝཱནཾ ཏེསཾ དྭིནྣཾ ཨུཔགཏཾ ཏཛྫཾ ཏསྶཱརུཔྤཾ ཏདནུརཱུཔཾ ཝཱིརིཡཾ ཏཐཱ ཙིཏྟཾ ཡོགཱི ཝཱཧེཏི པཝཏྟེཏཱིཏི ཀཏྭཱ ཏདུཔགཝཱིརིཡཝཱཧནཊྛེན ཙ ཝིསེསབྷཱགིཡབྷཱཝཏྟཱ ཨཱསེཝནཊྛེན ཙ སམྤཧཾསནཱ ཧོཏཱིཏི ཨཏྠོ ཝེདིཏབྦོ. ཨཔིཙེཏྠ ‘‘ཨནནྟརཱཏཱིཏཾ ¶ གོཏྲབྷུཙིཏྟཾ ཨེཀསནྟཏིཝསེན པརིཎཱམེནྟཾ པཊིཔཛྫཏི ནཱམཱ’’ཏི ལིཁིཏཾ. ཏཏྠ ཧི པརིཎཱམེནྟཾ པཊིཔཛྫཏཱིཏི ཨེཏཱནི ཝཙནཱནི ཨཏཱིཏསྶ ན སམྦྷཝནྟི, ཡཉྩ ཏདནནྟརཾ ལིཁིཏཾ ‘‘ཨཔྤནཱསམཱདྷིཙིཏྟཾ ཨུཔགཙྪམཱནཾ གོཏྲབྷུཙིཏྟཾ ཏཏྠ པཀྑནྡཏི ནཱམཱ’’ཏི. ཨིམིནཱཔི ཏཾ ན ཡུཛྫཏི, ‘‘པཊིཔཏྟིཀྑཎེ ཨེཝ ཨཏཱིཏ’’ནྟི ཝུཏྟཏྟཱ ‘‘གོཏྲབྷུཙིཏྟཾ ཏཏྠ པཀྑནྡཏཱི’’ཏི ཝཙནམེཝ ཝིརུཛ྄ཛྷཏཱིཏི ཨཱཙརིཡོ. ‘‘ཨེཀཙིཏྟཀྑཎིཀམྤི ལོཀུཏྟརཙིཏྟཾ ཨཱསེཝཏི བྷཱཝེཏི བཧུལཱིཀརོཏཱི’’ཏི ཝུཏྟཏྟཱ ‘‘ཨེཀཙིཏྟཀྑཎིཀསྶཱཔི ཛྷཱནསྶ ཨེཏཱནི དས ལཀྑཎཱནཱི’’ཏི ཝུཏྟཾ. ‘‘ཏཏོ པཊྛཱཡ ཨཱསེཝནཱ བྷཱཝནཱ ཨེཝཱ’’ཏིཔི ཝུཏྟཾ. ‘‘ཨདྷིཊྛཱནསམྤནྣནྟི ཨདྷིཊྛཱནེན སཧགཏ’’ནྟི ལིཁིཏཾ. ཏསྶཏྠོ – ཡཉྩ ‘‘ཨཱདིམཛ྄ཛྷཔརིཡོསཱནསངྑཱཏ’’ནྟི ཝུཏྟཾ, ཏཾ ཏེསཾ ཏིཎྞམྤི ཀལྱཱཎཀཏཱཡ སམནྣཱགཏཏྟཱ ཏིཝིདྷཀལྱཱཎཀཏཉྩ. ཨེཝཾ ཏིཝིདྷཙིཏྟཾ ཏདདྷིགམམཱུལཀཱནཾ གུཎཱནཾ, ཨུཔརིཛྷཱནཱདྷིགམསྶ ཝཱ པདཊྛཱནཊྛེན ཨདྷིཊྛཱནཾ ཧོཏི, ཏསྨཱ ཙིཏྟསྶ ཨདྷིཊྛཱནབྷཱཝེན སམྤནྣཏྟཱ ཨདྷིཊྛཱནསམྤནྣཾ ནཱམཱཏི.

ཨདྡྷམཱསཾ པཊིསལླཱིཡིཏུནྟི ཨེཏྠ ཨཱཙརིཡཱ ཨེཝམཱཧུ ‘‘བྷིཀྑཱུནཾ ཨཉྙམཉྙཝདྷདསྶནསཝནསམྦྷཝེ སཏྠུནོ སཏི ཏསྶ ཨུཔདྡཝསྶ ཨབྷཱཝེ ཨུཔཱཡཱཛཱནནཏོ ‘ཨཡཾ ཨསབྦཉྙཱུ’ཏི ཧེཏུཔཏིརཱུཔཀམཧེཏུཾ ཝཏྭཱ དྷམྨིསྶརསྶཱཔི ཏཐཱགཏསྶ ཀམྨེསྭནིསྶརིཡཾ ཨསམྦུཛ྄ཛྷམཱནཱ ཨསབྦདསྶིཏམདྷིཙྩམོཧཱ བཧུཛནཱ ཨཝཱིཙིཔརཱཡནཱ བྷཝེཡྻུཾ, ཏསྨཱ སོ བྷགཝཱ ¶ པགེཝ ཏེསཾ བྷིཀྑཱུནཾ ཨཉྙམཉྙཾ ཝདྷམཱནབྷཱཝཾ ཉཏྭཱ ཏདབྷཱཝོཔཱཡཱབྷཱཝཾ པན སུཝིནིཙྪིནིཏྭཱ ཏཏྠ པུཐུཛྫནཱནཾ སུགཏིལཱབྷཧེཏུམེཝེཀཾ ཀཏྭཱ ཨསུབྷདེསནཱཡ ཝཱ རཱུཔསདྡདསྶནསཝནེཧི ནིཔྤཡོཛནེཧི ཝིརམིཏྭཱ པགེཝ ཏཏོ ཝིརམཎཏོ, སུགཏིལཱབྷཧེཏུཀརཎཏོ, ཨཝསྶཾ པཉྙཱཔིཏབྦཱཡ ཏཏིཡཔཱརཱཛིཀཔཉྙཏྟིཡཱ ཝཏྠཱགམདསྶནཏོ ཙ ཨཏྟནོ སབྦདསྶིཏཾ པརིཀྑཀཱནཾ པཀཱསེནྟོ ཝིཡ ཏམདྡྷམཱསཾ ཝེནེཡྻཧིཏནིཔྥཏྟིཡཱ ཕལསམཱཔཏྟིཡཱ ཨཝཀཱསཾ ཀཏྭཱ ཝིཧརིཏུཀཱམོ ‘ཨིཙྪཱམཧཾ, བྷིཀྑཝེ, ཨདྡྷམཱསཾ པཊིསལླཱིཡིཏུ’ནྟིཨཱདིམཱཧཱ’’ཏི. ཨཱཙརིཡཱ ནཱམ བུདྡྷམིཏྟཏྠེརདྷམྨསིརིཏྠེརཨུཔཏིསྶཏྠེརཱདཡོ གཎཔཱམོཀྑཱ, ཨཊྛཀཐཱཙརིཡསྶ ཙ སནྟིཀེ སུཏཔུབྦཱ. ཏཏོ ཨཉྙེ ཨེཀེཏི ཝེདིཏབྦཱ. ‘‘སཀེན ཀཱཡེན ཨཊྚཱིཡནྟི…པེ… བྷཝིསྶནྟཱི’’ཏི ཨིདཾ པརཏོ ‘‘ཡེ ཏེ བྷིཀྑཱུ ཨཝཱིཏརཱགཱ, ཏེསཾ ཏསྨིཾ སམཡེ ཧོཏི ཨེཝ བྷཡཾ, ཧོཏི ལོམཧཾསོ, ཧོཏི ཚམྦྷིཏཏྟ’’ནྟི ཨིམིནཱ ན ཡུཛྫཏི, ཨིདཉྩ བྷགཝཏོ ཨསུབྷཀཐཱརམྨཎཔྤཡོཛནེན ན སམེཏཱིཏི ཙེ? ན, ཏདཏྠཱཛཱནནཏོ. སཀེན ཀཱཡེན ཨཊྚཱིཡནྟཱནམྤི ཏེསཾ ཨརིཡམགྒེན ཨཔྤཧཱིནསིནེཧཏྟཱ ཁཱིཎཱསཝཱནཾ ཝིཡ མརཎཾ པཊིཙྩ ཨབྷཡཾ ན ཧོཏི, བྷཡཉྩ པན ཨསུབྷབྷཱཝནཱནུཡོགཱནུབྷཱཝེན མནྡཱིབྷཱུཏཾ ¶ ཨནཊྚཱིཡནྟཱནཾ ཝིཡ ན མཧནྟཾ ཧུཏྭཱ ཙིཏྟཾ མོཧེསི. ཨཔཱཡུཔགེ ཏེ སཏྟེ ནཱཀཱསཱིཏི ཨེཝམཏྠོ ཝེདིཏབྦོ. ཨཐ ཝཱ ཨིདཾ པུརིམསྶ ཀཱརཎཝཙནཾ, ཡསྨཱ ཏེསཾ ཏསྨིཾ སམཡེ ཧོཏི ཨེཝ བྷཡཾ, ཚམྦྷིཏཏྟཾ, ལོམཧཾསོ ཙ, ཏསྨཱ ‘‘ཏེན ཁོ པན སམཡེན བྷགཝཱ ཨསུབྷཀཐཾ ཀཐེཏཱི’’ཏིཨཱདི ཝུཏྟནྟི.

ཨཐ ཝཱ སཀེན ཀཱཡེན ཨཊྚཱིཡནྟཱནམྤི ཏེསཾ ཧོཏི ཨེཝ བྷཡཾ, མཧཱནུབྷཱཝཱ ཝཱིཏརཱགཱཏི ཁཱིཎཱསཝཱནཾ མཧནྟཾ ཝིསེསཾ དསྶེཏི, ཨཏིདུཔྤསཧེཡྻམིདཾ མརཎབྷཡཾ, ཡཏོ ཨེཝཾཝིདྷཱནམྤི ཨཝཱིཏརཱགཏྟཱ བྷཡཾ ཧོཏཱིཏིཔི དསྶེཏི. ཏདཉྙེ ཏེསཾ བྷིཀྑཱུནཾ པཉྩསཏཱནཾ ཨཉྙཏརཱ. ཏེནེདཾ དཱིཔེཏི ‘‘ཏཾ ཏཐཱ ཨཱགཏཾ ཨསིཧཏྠཾ ཝདྷཀཾ པསྶིཏྭཱ ཏདཉྙེསམྤི ཧོཏི ཨེཝ བྷཡཾ, པགེཝ ཏེསནྟི ཀཏྭཱ བྷགཝཱ པཋམམེཝ ཏེསཾ ཨསུབྷཀཐཾ ཀཐེསི, པརཏོ ཏེསཾ ནཱཧོསི. ཨེཝཾ མཧཱནིསཾསཱ ནེསཾ ཨསུབྷཀཐཱ ཨཱསཱི’’ཏི. ཡོ པནེཏྠ པཙྪིམོ ནཡོ ¶ , སོ ‘‘ཏེསུ ཀིར བྷིཀྑཱུསུ ཀེནཙིཔི ཀཱཡཝིཀཱརོ ཝཱ ཝཙཱིཝིཀཱརོ ཝཱ ན ཀཏོ, སབྦེ སཏཱ སམྤཛཱནཱ དཀྑིཎེན པསྶེན ནིཔཛྫིཾསཱུ’’ཏི ཨིམིནཱ ཨཊྛཀཐཱཝཙནེན སམེཏི.

ཨཔརེ པནཱཧཱུཏི ཀུལདྡྷིཔཊིསེདྷནཏྠཾ ཝུཏྟཾ. ‘‘ཨཡཾ ཀིར ལདྡྷཱི’’ཏི ཝཙནཾ ‘‘མཱརདྷེཡྻཾནཱཏིཀྐམིསྶཏཱི’’ཏི ཝཙནེན ཝིརུཛ྄ཛྷཏཱིཏི ཙེ? ན ཝིརུཛ྄ཛྷཏི. ཀཐཾ? ཨཡཾ བྷིཀྑཱུ ཨགྷཱཏེནྟོ མཱརཝིསཡཾ ཨཏིཀྐམིསྶཏི ཨཀུསལཀརཎཏོ ཙ. གྷཱཏེནྟོ པན མཱརདྷེཡྻཾ ནཱཏིཀྐམིསྶཏི བལཝཏྟཱ ཀམྨསྶཱཏི སཡཾ མཱརཔཀྑིཀཏྟཱ ཨེཝཾ ཙིནྟེཏྭཱ པན ‘‘ཡེ ན མཏཱ, ཏེ སཾསཱརཏོ ན མུཏྟཱ’’ཏི ཨཏྟནོ ཙ ལདྡྷི, ཏསྨཱ ཏཾ ཏཏྠ ཨུབྷཡེསཾ མགྒེ ནིཡོཛེནྟཱི ཨེཝམཱཧ, ཏེནེཝ ‘‘མཱརཔཀྑིཀཱ མཱརེན སམཱནལདྡྷིཀཱ’’ཏི ཨཝཏྭཱ ‘‘མཱརསྶཱ ནུཝཏྟིཀཱ’’ཏི ཝུཏྟཱ. ‘‘ཨིམིནཱ ཀིཾ ཝུཏྟཾ ཧོཏི? ཡསྨཱ མཱརསྶ ཨནུཝཏྟི, ཏསྨཱ ཨེཝཾ ཙིནྟེཏྭཱཔི ཨཏྟནོ ལདྡྷིཝསེན ཨེཝམཱཧཱ’’ཏི ཀེཙི ལིཁནྟི. མམ སནྟིཀེ ཨེཀཏོ ཨུཔཊྛཱནམཱགཙྪནྟི, ཨཏྟནོ ཨཏྟནོ ཨཱཙརིཡུཔཛ྄ཛྷཱཡཱནཾ སནྟིཀེ ཨུདྡེསཱདིཾ གཎྷཱཏི.

ཨཱནཱཔཱནསྶཏིསམཱདྷིཀཐཱཝཎྞནཱ

༡༦༥. ཨཡམྤི ཁོ, བྷིཀྑཝེཏི ཨིམིནཱ ཀིཾ དསྶེཏི? ཡེསཾ ཨེཝམསྶ ‘‘བྷགཝཏཱ ཨཱཙིཀྑིཏཀམྨཊྛཱནཱནུཡོགཔཙྩཡཱ ཏེསཾ བྷིཀྑཱུནཾ ཛཱིཝིཏཀྑཡོ ཨཱསཱི’’ཏི, ཏེསཾ ཏཾ མིཙྪཱགཱཧཾ ནིསེདྷེཏི. ཀེཝལཾ ཏེསཾ བྷིཀྑཱུནཾ པུབྦེ ཀཏཀམྨཔཙྩཡཱཝ ཛཱིཝིཏཀྑཡོ ཨཱསི, ཨིདཾ པན ཀམྨཊྛཱནཾ ཏེསཾ ཀེསཉྩི ཨརཧཏྟཔྤཏྟིཡཱ, ཀེསཉྩི ཨནཱགཱམིསཀདཱགཱམིསོཏཱཔཏྟིཕལཔྤཏྟིཡཱ ¶ , ཀེསཉྩི པཋམཛ྄ཛྷཱནཱདྷིགམཱཡ, ཀེསཉྩི ཝིཀྑམྦྷནཏདངྒཔྤཧཱནེན ཨཏྟསིནེཧཔཨཡཱདཱནཱཡ ཨུཔནིསྶཡོ ཧུཏྭཱ, ཀེསཉྩི སུགཏིཡཾ ཨུཔྤཏྟིཡཱ ཨུཔནིསྶཡོ ཨཧོསཱིཏི སཱཏྠིཀཱཝ མེ ཨསུབྷཀཐཱ, ཀིནྟུ ‘‘སཱདྷུ, བྷནྟེ བྷགཝཱ, ཨཉྙཾ པརིཡཱཡཾ ཨཱཙིཀྑཏཱུ’’ཏི ཨཱནནྡེན ཡཱཙིཏཏྟཱ ཨཉྙཾ པརིཡཱཡཾ ཨཱཙིཀྑཱམི, ཡཐཱ ཝོ པུབྦེ ཨཱཙིཀྑིཏཨསུབྷཀམྨཊྛཱནཱནུཡོགཱ, ཨེཝཾ ཨཡམྤི ཁོ བྷིཀྑཝེཏི ཡོཛནཱ ཝེདིཏབྦཱ. ‘‘ཨསྶཱསཝསེན ཨུཔཊྛཱནཾ སཏཱི’’ཏི ཝུཏྟཾ. སཱ ཧི ཏཾ ཨསྶཱསཾ, པསྶཱསཾ ཝཱ ཨཱརམྨཎཾ ཀཏྭཱ པུབྦབྷཱགེ, ཨཔརབྷཱགེ པན ཨསྶཱསཔསྶཱསཔབྷཝནིམིཏྟཾ ཨཱརམྨཎཾ ཀཏྭཱ ཨུཔཊྛཱཏཱིཏི ཙ ཏཐཱ ཝུཏྟཱ.

ཨསུབྷེ ¶ པཝཏྟཾ ཨསུབྷནྟི ཝཱ པཝཏྟཾ བྷཱཝནཱཀམྨཾ ཨསུབྷཀམྨཾ, ཏདེཝ ཨཉྙསྶ པུནཔྤུནཾ ཨུཔྤཛྫནཀསྶ ཀཱརཎཊྛེན ཋཱནཏྟཱ ཨསུབྷཀམྨཊྛཱནཾ, ཨཱརམྨཎཾ ཝཱ ཨསུབྷཀམྨསྶ པདཊྛཱནཊྛེན ཋཱནནྟི ཨསུབྷཀམྨཊྛཱནནྟི ཨིདྷ ཨསུབྷཛ྄ཛྷཱནཾ, ཏེནེཝ ‘‘ཨོལཱ༹རིཀཱརམྨཎཏྟཱ’’ཏི ཝུཏྟཾ. པཊིཝེདྷཝསེནཱཏི ཝིཏཀྐཱདིཨངྒཔཊིལཱབྷཝསེན. ཨཱརམྨཎསནྟཏཱཡཱཏི ཨནུཀྐམེན སནྟཀཱལཾ ཨུཔཱདཱཡ ཝུཏྟཀཱཡདརཐཔྤཊིཔསྶདྡྷིཝསེན ནིབྦུཏོ. པརིཀམྨཾ ཝཱཏི ཀསིཎཔརིཀམྨཾ ཀིར ནིམིཏྟུཔྤཱདཔརིཡོསཱནཾ. ཏདཱ ཧི ནིརསྶཱདཏྟཱ ཨསནྟཾ, ཨཔྤཎིཧིཏཉྩ. ཡཐཱ ཨུཔཙཱརེ ནཱིཝརཎཝིགམེན, ཨངྒཔཱཏུབྷཱཝེན ཙ སནྟཏཱ ཧོཏི, ན ཏཐཱ ཨིདྷ, ཨིདཾ པན ‘‘ཨཱདིསམནྣཱཧཱརཏོ’’ཏི ཝུཏྟཾ. དུཏིཡཝིཀཔྤེ ཨསེཙནཀོཏི ཨཏིཏྟིཀརོ, ཏེན ཝུཏྟཾ ‘‘ཨོཛཝནྟོ’’ཏི. ཙེཏསིཀསུཁཾ ཛྷཱནཀྑཎེཔི ཨཏྠི, ཨེཝཾ སནྟེཔི ‘‘ཨུབྷོཔི ཛྷཱནཱ ཝུཊྛིཏསྶེཝ གཧེཏབྦཱ’’ཏི ཝུཏྟཾ. སམཐེན སཀསནྟཱནེ ཨཝིཀྑམྦྷིཏེ. ཨིཏརཐཱ པཱཔཀཱནཾ ཛྷཱནེན སཧུཔྤཏྟི སིཡཱ. ཁནྡྷཱདཱིནཾ ལོཀུཏྟརཔཱདཀཏྟཱ ནིབྦེདྷབྷཱགིཡཾ, ཝིསེསེན ཡསྶ ནིབྦེདྷབྷཱགིཡཾ ཧོཏི, ཏཾ སནྡྷཱཡ ཝཱ. ‘‘ཨནིཙྩཱནུཔསྶཱིཏིཨཱདིཙཏུཀྐཝསེན ཨནུཔུབྦེན ཨརིཡམགྒཝུཌྜྷིཔྤཏྟོ སམུཙྪིནྡཏི, སེསཱནམེཏཾ ནཏྠཱི’’ཏི ལིཁིཏཾ.

ཏཐཱབྷཱཝཔཊིསེདྷནོ ཙཱཏི སོལ༹སཝཏྠུཀསྶ ཏིཏྠིཡཱནཾ ནཏྠིཏཱཡ ཝུཏྟཾ. སབྦཔཋམཱནཾ པན ཙཏུནྣཾ པདཱནཾ ཝསེན ལོཀིཡཛ྄ཛྷཱནམེཝ ཏེསཾ ཨཏྠི, ཏསྨིཾ ལོཀུཏྟརཔདཊྛཱནཾ ནཏྠི ཨེཝ. ‘‘ཕལམུཏྟམནྟི ཕལེ ཨུཏྟམ’’ནྟི ཝུཏྟཾ. ཨུཏུཏྟཡཱནུཀཱུལནྟི གིམྷེ ཨརཉྙེ, ཧེམནྟེ རུཀྑམཱུལེ, ཝསནྟཀཱལེ སུཉྙཱགཱརེ གཏོ. སེམྷདྷཱཏུཀསྶ ཨརཉྙཾ, པིཏྟདྷཱཏུཀསྶ རུཀྑམཱུལཾ, ཝཱཏདྷཱཏུཀསྶ སུཉྙཱགཱརཾ ཨནུཀཱུལཾ. མོཧཙརིཏསྶ ཨརཉྙཾ ཨནུཀཱུལཾ མཧཱཨརཉྙེ ཙིཏྟཾ ན སངྐུཊཏི, དོསཙརིཏསྶ རུཀྑམཱུལཾ, རཱགཙརིཏསྶ སུཉྙཱགཱརཾ. ཋཱནཙངྐམཱནི ཨུདྡྷཙྩཔཀྑིཀཱནི, སཡནཾ ལཱིནཔཀྑིཀཾ, པལླངྐཱབྷུཛནེན ནིསཛྫཱཡ དལ༹ྷབྷཱཝཾ, ཨུཛུཀཱཡཾ པཎིདྷཱནེན ཨསྶཱསཔསྶཱསཱནཾ པཝཏྟནསུཁཾ ‘‘པརིམུཁཾ སཏི’’ནྟི ཨིམིནཱ ཨཱརམྨཎཔརིགྒཧཱུཔཱཡཾ དསྶེཏི. ཀཱརཱིཏི ཀརཎསཱིལོ ¶ . ཨེཏསྶ ཝིབྷངྒེ ‘‘ཨསྶསཏི པསྶསཏཱི’’ཏི ཨཝཏྭཱ ‘‘སཏོ ཀཱརཱི’’ཏི ཝུཏྟཾ. ཏསྨཱ ‘‘ཨསྶསཏི པསྶསཏཱི’’ཏི ¶ ཝུཏྟེ ‘‘པཋམཙཏུཀྐཾ ཨེཝ ལབྦྷཏི, ན སེསཱནཱི’’ཏི ཙ ‘‘དཱིགྷཾཨསྶཱསཝསེནཱཏི ཨལོཔསམཱསཾ ཀཏྭཱ’’ཨིཏི ཙ ‘‘ཨེཀཏྠཏཱཡ ཨཝིཀྑེཔ’’ནྟི ཙ ‘‘ཨསམྦྷོགཝསེན པཛཱནཏོ’’ཏི ཙ ‘‘ཏེན ཉཱཎེནཱ’’ཏི ཙ ‘‘པཛཱནཏོཏི ཝུཏྟཉཱཎེནཱ’’ཏི ཙ ‘‘སཏོཀཱརཱིཏི སཏིསམྤཛཉྙཱཧིཀཱརཱི’’ཏི ཙ ‘‘པཊིནིསྶགྒཱནུཔསྶིནོ ཨསྶཱསཱཝ པཊིནིསྶགྒཱནུཔསྶིཨསྶཱསཱ’’ཏི ཙ ལིཁིཏཾ. ཨུཔྤཊིཔཱཊིཡཱ ཨཱགཏམྤི ཡུཛྫཏེཝ, ཏེན ཋཱནེན པཊིསིདྡྷཾ. ཏཱལུཾ ཨཱཧཙྩ ནིབྦཱཡནཏོ ཀིར པོཏཀོ སམྤཏིཛཱཏོཝ ཁིཔིཏསདྡཾ ཀརོཏི, ཚནྡཔཱམོཛྫཝསེན ཚ པུརིམཱ ཏཡོཏི ནཝ. ཨེཀེནཱཀཱརེནཱཏི ཨསྶཱསཝསེན ཝཱ པསྶཱསཝསེན ཝཱ ཨེཝཾ ཨཱནཱཔཱནསྶཏིཾ བྷཱཝཡཏོ ཀཱཡེ ཀཱཡཱནུཔསྶནཱསཏིཀམྨཊྛཱནབྷཱཝནཱ སམྤཛྫཏི.

ཀཱཡོཏི ཨསྶཱསཔསྶཱསཱ. ཨུཔཊྛཱནཾ སཏི. དཱིགྷནྟི སཱིགྷཾ གཏཾ ཨསྶཱསཔསྶཱསཾ. ཨདྡྷཱནསངྑཱཏེཏི ཀཱལསངྑཱཏེ ཝིཡ ཀཱལཀོཊྛཱསེཏི ཨཏྠོ, དཱིགྷཀཱལེ ཝཱཏི ཨཏྠོ. ཨེཀོ ཧི ཨསྶཱསམེཝཱུཔལཀྑེཏི, ཨེཀོ པསྶཱསཾ, ཨེཀོ ཨུབྷཡཾ, ཏསྨཱ ‘‘ཝིབྷཱགཾ ཨཀཏྭཱ’’ཏི ཝཱ ཝུཏྟཾ, ཚནྡོཏི ཨེཝཾ ཨསྶཱསཏོ, པསྶཱསཏོ ཙ ཨསྶཱདོ ཨུཔྤཛྫཏི, ཏསྶ ཝསེན ཀཏྟུཀམྱཏཱཚནྡོ ཨུཔྤཛྫཏི. ཏཏོ པཱམོཛྫནྟི. ཨསྶཱསཔསྶཱསཱནཾ དུཝིཉྙེཡྻཝིསཡཏྟཱ ཙིཏྟཾ ཝིཝཏྟཏི, གཎནཾ པཧཱཡ ཕུཊྛཊྛཱནམེཝ མནསི ཀརོནྟསྶ ཀེཝལཾ ཨུཔེཀྑཱཝ སཎྛཱཏི. ཙཏྟཱརོ ཝཎྞཱཏི ‘‘པཏྟསྶ ཏཡོ ཝཎྞཱ’’ཏིཨཱདཱིསུ ཝིཡ ཙཏྟཱརོ སཎྛཱནཱཏི ཨཏྠོ.

ཏཐཱབྷཱུཏསྶཱཏི ཨཱནཱཔཱནསྶཏིཾ བྷཱཝཡཏོ. སཾཝརོཏི སཏིསཾཝརོ. ཨཐ ཝཱ པཋམེན ཛྷཱནེན ནཱིཝརཎཱནཾ, དུཏིཡེན ཝིཏཀྐཝིཙཱརཱནཾ, ཏཏིཡེན པཱིཏིཡཱ, ཙཏུཏྠེན སུཁདུཀྑཱནཾ, ཨཱཀཱསཱནཉྩཱཡཏནསམཱཔཏྟིཡཱ རཱུཔསཉྙཱཡ, པཊིགྷསཉྙཱཡ, ནཱནཏྟསཉྙཱཡ ཝཱ པཧཱནཾ. ‘‘སཱིལནྟི ཝེརམཎི སཱིལཾ, ཙེཏནཱ སཱིལཾ, སཾཝརོ སཱིལཾ, ཨཝཱིཏིཀྐམོ སཱིལ’’ནྟི (པཊི. མ. ༡.༣༩ ཐོཀཾ ཝིསདིསཾ) ཝུཏྟཝིདྷིནཱཔེཏྠ ཨཏྠོ དཊྛབྦོ. ‘‘ཨཏྠཏོ ཏཐཱ ཏཐཱ པཝཏྟདྷམྨཱ ཨུཔདྷཱརཎསམཱདྷཱནསངྑཱཏེན སཱིལནཊྛེན སཱིལནྟི ཝུཙྩནྟཱི’’ཏི ཝུཏྟཾ. ཏཐཱ ‘‘ཨཡཾ ཨིམསྨིཾ ཨཏྠེ ཨདྷིཔྤེཏཱ སིཀྑཱ’’ཏི ཨེཏྠཱཔི ཙེཏནཱསཱིལམེཝ, ཀཏྠཙི ཝིརཏིསཱིལམྤཱིཏི ཨཏྠོ དཊྛབྦོ. ཨཉྙཐཱ པཎྞཏྟིཝཛྫེསུཔི སིཀྑཱཔདེསུ ཝིརཏིཔྤསངྒོ ཨཧོསི ¶ , པཱཏིམོཀྑསཾཝརསཾཝུཏོ ཝིཧརཏཱིཏི ཀཏྭཱ ཏསྶཱཔི ཝིརཏིཔྤསངྒོ. ཏསྨིཾ ཨཱརམྨཎེཏི ཨཱནཱཔཱནཱརམྨཎེ. ཏཱཡ སཏིཡཱཏི ཏཏྠ ཨུཔྤནྣསཏིཡཱ. ‘‘ཏེན མནསིཀཱརེནཱཏི ཨཱཝཛྫནེནཱ’’ཏི ལིཁིཏཾ. ཨེཏེན ནཱནཱཝཛྫནཔྤཝཏྟིདཱིཔནཏོ ནཱནཱཛཝནཝཱརེཧིཔི སིཀྑཏི ནཱམཱཏི དཱིཔིཏཾ ཧོཏི, ཡེན པན མནསིཀཱརེན ¶ ཝཱ. ཉཱཎུཔྤཱདནཱདཱིསཱུཏི ཨེཏྠ ཨཱདིསདྡེན ཡཱཝ པརིཡོསཱནཾ ཝེདིཏབྦཾ. ‘‘ཏཏྲཱཏི ཏསྨིཾ ཨཱནཱཔཱནཱརམྨཎེ. ཨེཝནྟི ཨིདཱནི ཝཏྟབྦནཡེནཱ’’ཏི ལིཁིཏཾ. ཏཏྲཱཏི ཏེསཾ ཨསྶཱསཔསྶཱསཱནཾ ཝཱ. ཏཉྷི ‘‘པུབྦེ ཨཔརིགྒཧིཏཀཱལེ’’ཏི ཨིམིནཱ སུཊྛུ སམེཏི. ‘‘པཋམཝཱདོ དཱིགྷབྷཱཎཀཱནཾ. ཏེ ཧི ‘པཋམཛ྄ཛྷཱནཾ ལབྷིཏྭཱ ནཱནཱསནེ ནིསཱིདིཏྭཱ དུཏིཡཏྠཱཡ ཝཱཡཱམཏོ ཨུཔཙཱརེ ཝིཏཀྐཝིཙཱརཝསེན ཨོལཱ༹རིཀཙིཏྟཔྤཝཏྟིཀཱལེ པཝཏྟཨསྶཱསཔསྶཱསཝསེན ཨོལཱ༹རིཀཱ’ཏི ཝདནྟི. ‘མཛ྄ཛྷིམབྷཱཎཀཱ ཛྷཱནལཱབྷིསྶ སམཱཔཛྫནཀཱལེ, ཨེཀཱསནཔཊིལཱབྷེ ཙ ཨུཔརཱུཔརི ཙིཏྟཔྤཝཏྟིཡཱ སནྟབྷཱཝཏོ པཋམཏོ དུཏིཡསྶུཔཙཱརེ སུཁུམཏཾ ཝདནྟཱི’’’ཏི ལིཁིཏཾ.

ཝིཔསྶནཱཡཾ པནཱཏི ཙཏུདྷཱཏུཝཝཏྠཱནམུཁེན ཨབྷིནིཝིཊྛསྶ ཨཡཾ ཀམོ, ཨཉྙསྶ ཙཱཏི ཝེདིཏབྦཾ. ཨེཏྟཀཾ རཱུཔཾ, ན ཨིཏོ ཨཉྙནྟི དསྶནཾ སནྡྷཱཡ ‘‘སཀལརཱུཔཔརིགྒཧེ’’ཏི ཝུཏྟཾ. རཱུཔཱརཱུཔཔརིགྒཧེཏི ཨེཏྠ ཨནིཙྩཏཱདིལཀྑཎཱརམྨཎིཀབྷངྒཱནུཔསྶནཏོ པབྷུཏི བལཝཏཱི ཝིཔསྶནཱ. པུབྦེ ཝུཏྟནཡེནཱཏི སབྦེསཾཡེཝ པན མཏེན ཨཔརིགྒཧིཏཀཱལེཏིཨཱདིནཱ. སོདྷནཱ ནཱམ ཝིསྶཛྫནཾ. ཨསྶཱཏི ‘‘པསྶམྦྷཡཾ ཀཱཡསངྑཱར’’ནྟི པདསྶ.

པུརཏོ ནམནཱ ཨཱནམནཱ. ཏིརིཡཾ ནམནཱ ཝིནམནཱ. སུཊྛུ ནམནཱ སནྣམནཱ. པཙྪཱ ནམནཱ པཎམནཱ. ཛཱཎུཀེ གཧེཏྭཱ ཋཱནཾ ཝིཡ ཨིཉྫནཱཏི ཨཱནམནཱདཱིནཾ ཨཱཝིབྷཱཝཏྠམུཏྟནྟི ཝེདིཏབྦཾ. ཡཐཱརཱུཔེཧི ཨཱནམནཱདི ཝཱ ཀམྤནཱདི ཝཱ ཧོཏི, ཏཐཱརཱུཔེ པསྶམྦྷཡནྟི སམྦནྡྷོ. ཨིཏི ཀིརཱཏི ཨིཏི ཙེ. ཨེཝཾ སནྟེཏི སནྟསུཁུམམྤི ཙེ པསྶམྦྷཏི. པབྷཱཝནཱཏི ཨུཔྤཱདནཾ. ཨསྶཱསཔསྶཱསཱནཾ ཝཱུཔསནྟཏྟཱ ཨཱནཱཔཱནསྶཏིསམཱདྷིསྶ བྷཱཝནཱ ན ཧོཏི. ཡསྨཱ ཏཾ ནཏྠི, ཏསྨཱ ན སམཱཔཛྫཏི, སམཱཔཏྟིཡཱ ཨབྷཱཝེན ན ཝུཊྛཧནྟི. ཨིཏི ཀིརཱཏི ཨེཝམེཏཾ ཏཱཝ ཝཙནནྟི ཏདེཏཾ ¶ . སདྡོཝ སདྡནིམིཏྟཾ, ‘‘སཏོ ཨསྶསཏི སཏོ པསྶསཏཱི’’ཏི པདཱནི པཏིཊྛཔེཏྭཱ དྭཏྟིཾསཔདཱནི ཙཏྟཱརི ཙཏུཀྐཱནི ཝེདིཏབྦཱནི.

ཨཔྤཊིཔཱིལ༹ནནྟི ཏེསཾ ཀིལེསཱནཾ ཨནུཔྤཱདནཾ ཀིཉྩཱཔི ཙེཏིཡངྒཎཝཏྟཱདཱིནིཔི ཨཏྠཏོ པཱཏིམོཀྑསཾཝརསཱིལེ སངྒཧཾ གཙྪནྟི ‘‘ཡསྶ སིཡཱ ཨཱཔཏྟཱི’’ཏི (མཧཱཝ. ༡༣༤) ཝཙནཏོ. ཏཐཱཔི ‘‘ན ཏཱཝ, སཱརིཔུཏྟ, སཏྠཱ སཱཝཀཱནཾ སིཀྑཱཔདཾ པཉྙཔེཏི ཨུདྡིསཏི པཱཏིམོཀྑཾ, ཡཱཝ ན ཨིདྷེཀཙྩེ ཨཱསཝཊྛཱནཱིཡཱ དྷམྨཱ སངྒྷེ པཱཏུབྷཝནྟཱི’’ཏི ཨེཏྠ ཨནདྷིཔྤེཏཏྟཱ ‘‘ཨཱབྷིསམཱཙཱརིཀ’’ནྟི ཝུཏྟཾ. ‘‘ཡཾ པནེཏྠ ཨཱཔཏྟིཊྛཱནིཡཾ ན ཧོཏི, ཏཾ ཨམིསྶམེཝཱ’’ཏི ཝུཏྟཾ.

ཡཐཱཝུཏྟེནཱཏི ¶ ཡོགཱནུཡོགཀམྨསྶ པདཊྛཱནཏྟཱ. སལླཧུཀཝུཏྟི ཨཊྛཔརིཀྑཱརིཀོ. པཉྩསནྡྷིཀཾ ཀམྨཊྛཱནནྟི ཨེཏྠ ཛྷཱནམྤི ནིམིཏྟམྤི ཏདཏྠཛོཏིཀཱཔི པརིཡཏྟི ཨིདྷ ཀམྨཊྛཱནཾ ནཱམ. གམནཱགམནསམྤནྣཏཱདི སེནཱསནཾ. སཾཀིལིཊྛཙཱིཝརདྷོཝནཱདཡོ ཁུདྡཀཔལིབོདྷཱ. ‘‘ཨནྟརཱ པཏིཏཾ ནུ ཁོ’’ཏི ཝིཀམྤཏི.

ཨཛ྄ཛྷཏྟཾ ཝིཀྑེཔགཏེནཱཏི ནིཡཀཛ྄ཛྷཏྟེ ཝིཀྑེཔགཏེན. སཱརདྡྷཱ ཨསམཱཧིཏཏྟཱ. ཨུཔནིབནྡྷནཐམྦྷམཱུལཾ ནཱམ ནཱསིཀགྒཾ, མུཁནིམིཏྟཾ ཝཱ. ཏཏྠེཝཱཏི ནཱསིཀགྒཱདིནིམིཏྟེ. ‘‘དོལཱཕལཀསྶ ཨེཀཔསྶེ ཨེཝ ཨུབྷོ ཀོཊིཡོ མཛ྄ཛྷཉྩ པསྶཏཱི’’ཏི ཝདནྟི.

ཨིདྷ པནཱཏི ཀཀཙཱུཔམེ. དེསཏོཏི ཕུསནཀཊྛཱནཏོ. ‘‘ནིམིཏྟཾ པཊྛཔེཏབྦནྟི ནིམིཏྟེ སཏི པཊྛཔེཏབྦཱ’’ཏི ཝུཏྟཾ. གརཱུཧི བྷཱཝེཏབྦཏྟཱ གརུཀབྷཱཝནཾ. ཨེཀཙྩེ ཨཱཧཱུཏི ཨེཀཙྩེ ཛྷཱཡིནོ ཨཱཧུ.

‘‘སཉྙཱནཱནཏཱཡཱ’’ཏི ཝཙནཏོ ཨེཀཙྩེཧི ཝུཏྟམྤི པམཱཎམེཝ, སངྒཱིཏིཏོ པཊྛཱཡ ཨཊྛཀཐཱཡ ཨནཱགཏཏྟཱ ཏཐཱ ཝུཏྟཾ. ‘‘མཡ྄ཧཾ ཏཱརཀརཱུཔཾ ནུ ཁོ ཨུཔཊྛཱཏཱི’’ཏིཨཱདིཔརིཀཔྤེ ཨསཏིཔི དྷཱཏུནཱནཏྟེན ཨེཏཱསཾ དྷཱཏཱུནཾ ཨུཔྤཏྟི ཝིཡ ཀེཝལཾ བྷཱཝཡཏོ ཏཐཱ ཏཐཱ ཨུཔཊྛཱཏི. ‘‘ན ནིམིཏྟ’ནྟི ཝཏྟུཾ ན ཝཊྚཏི སམྤཛཱནམུསཱཝཱདཏྟཱ’’ཏི ཝུཏྟཾ. ཀམྨཊྛཱནནྟི ཨིདྷ ཝུཏྟཔཊིབྷཱགནིམིཏྟམེཝ.

ནིམིཏྟེ ¶ པཊིབྷཱགེ. ནཱནཱཀཱརནྟི ‘‘ཙཏྟཱརོ ཝཎྞཱ ཝཏྟནྟཱི’’ཏི ཝུཏྟནཱནཱཝིདྷཏཾ. ཝིབྷཱཝཡནྟི ཛཱནཾ པཀཱསཡཾ. ཨསྶཱསཔསྶཱསེཏི ཏཏོ སམྦྷཱུཏེ ནིམིཏྟེ, ཨསྶཱསཔསྶཱསེ ཝཱ ནཱནཱཀཱརཾ. ནིམིཏྟེ ཧི ཙིཏྟཾ ཋཔེནྟོཝ ནཱནཱཀཱརཏཉྩ ཝིབྷཱཝེཏི, ཨསྶཱསཔསྶཱསེ ཝཱ སཀཾ ཙིཏྟཾ ནིབནྡྷཏཱིཏི ཝུཙྩཏི. ཏཱརཀརཱུཔཱདིཝཎྞཏོ. ཀཀྑལ༹ཏྟཱདིལཀྑཎཏོ.

ཨཊྛཀཐཱསུ པཊིཀྑིཏྟནྟི ཨཱསནྣབྷཝངྒཏྟཱཏི ཀཱརཎཾ ཝཏྭཱ སཱིཧལ༹ཊྛཀཐཱསུ པཊིཀྑིཏྟཾ. ཀསྨཱ? ཡསྨཱ ཚཊྛེ, སཏྟམེ ཝཱ ཨཔྤནཱཡ སཏི མགྒཝཱིཐིཡཾ ཕལསྶ ཨོཀཱསོ ན ཧོཏི, ཏསྨཱ. ཨིདྷ ཧོཏཱུཏི ཙེ? ན, ལོཀིཡཔྤནཱཔི ཧི ཨཔྤནཱཝཱིཐིམྷི ལོཀུཏྟརེན སམཱནགཏིཀཱཝཱཏི པཊིལདྡྷཛ྄ཛྷཱནོཔི བྷིཀྑུ དིཊྛདྷམྨསུཁཝིཧཱརཏྠཱཡ ཛྷཱནཾ སམཱཔཛྫིཏྭཱ སཏྟཱཧཾ ནིསཱིདིཏུཀཱམོ ཙཏུཏྠེ, པཉྩམེ ཝཱ ཨཔྤེཏྭཱ ནིསཱིདཏི, ན ཚཊྛེ, སཏྟམེ ཝཱ. ཏཏྠ ཧི ¶ ཨཔྤནཱ. ཏཏོ པརཾ ཨཔྤནཱཡ ཨཱདྷཱརབྷཱཝཾ ན གཙྪཏི. ཨཱསནྣབྷཝངྒཏྟཱ ཙཏུཏྠཾ, པཉྩམཾ ཝཱ གཙྪཏི ཐལེ ཋིཏགྷཊོ ཝིཡ ཛཝནཱནམནྟརེ ཋིཏཏྟཱཏི ཀིར ཨཱཙརིཡོ.

པུཐུཏྟཱརམྨཎཱནི ཨནཱཝཛྫིཏྭཱ ཛྷཱནངྒཱནེཝ ཨཱཝཛྫནཾ ཨཱཝཛྫནཝསཱི ནཱམ. ཏཏོ པརཾ ཙཏུནྣཾ, པཉྩནྣཾ ཝཱ པཙྩཝེཀྑཎཙིཏྟཱནཾ ཨུཔྤཛྫནཾ, ཏཾ པཙྩཝེཀྑཎཝསཱི ནཱམ. ཏེནེཝ ‘‘པཙྩཝེཀྑཎཝསཱི པན ཨཱཝཛྫནཝསིཡཱ ཨེཝ ཝུཏྟཱ’’ཏི ཝུཏྟཾ. སམཱཔཛྫནཝསཱི ནཱམ ཡཏྟཀཾ ཀཱལཾ ཨིཙྪཏི ཏཏྟཀཾ སམཱཔཛྫནཾ, ཏཾ པན ཨིཙྪིཏཀཱལཔརིཙྪེདཾ པཏིཊྛཱཔེཏུཾ སམཏྠཏཱཏི. ‘‘ཨདྷིཊྛཱནཝསིཡཱ ཝུཊྛཱནཝསིནོ ཨཡཾ ནཱནཏྟཾ ཨདྷིཊྛཱནཱནུབྷཱཝེན ཛཝནཾ ཛཝཏི, ཝུཊྛཱནཱནུབྷཱཝེན པན ཨདྷིཔྤེཏཏོ ཨདྷིཀཾ ཛཝཏཱི’’ཏིཔི ཝདནྟི. ཨཔིཙ པཐཝཱིཀསིཎཱདིཨཱརམྨཎཾ ཨཱཝཛྫིཏྭཱ ཛཝནཉྩ ཛཝིཏྭཱ པུན ཨཱཝཛྫིཏྭཱ ཏཏོ པཉྩམཾ ཛྷཱནཾ ཙིཏྟཾ ཧོཏི, ཨཡཾ ཀིར ཨུཀྐཊྛཔརིཙྪེདོ. བྷགཝཏོ པན ཨཱཝཛྫནསམནནྟརམེཝ ཛྷཱནཾ ཧོཏཱིཏི སབྦཾ ཨནུགཎྛིཔདེ ཝུཏྟཾ.

‘‘ཝཏྠུནྟི ཧདཡཝཏྠུཾ. དྭཱརནྟི ཙཀྑཱདི. ཨཱརམྨཎནྟི རཱུཔཱདཱི’’ཏི ལིཁིཏཾ. ཡཐཱཔརིགྒཧིཏརཱུཔཱརམྨཎཾ ཝཱ ཝིཉྙཱཎཾ པསྶཏི, ཨཉྙཐཱཔི པསྶཏི. ཀཐཾ? ‘‘ཡཐཱཔརིགྒཧིཏརཱུཔཝཏྠུདྭཱརཱརམྨཎཾ ཝཱ’’ཏི ཝུཏྟཾ. ཡཐཱཔརིགྒཧིཏརཱུཔེསུ ཝཏྠུདྭཱརཱརམྨཎཱནི ཡསྶ ཝིཉྙཱཎསྶ, ཏཾ ཝིཉྙཱཎཾ ཡཐཱཔརིགྒཧིཏརཱུཔཝཏྠུདྭཱརཱརམྨཎཾ ¶ ཏམྤི པསྶཏི, ཨེཀསྶ ཝཱ ཨཱརམྨཎསདྡསྶ ལོཔོ དཊྛབྦོཏི ཙ མམ ཏཀྐོ ཝིཙཱརེཏྭཱཝ གཧེཏབྦོ.

ཏཏོ པརཾ ཏཱིསུ ཙཏུཀྐེསུ དྭེ དྭེ པདཱནི ཨེཀམེཀཾ ཀཏྭཱ གཎེཏབྦཾ. སམཐེན ཨཱརམྨཎཏོ ཝིཔསྶནཱཝསེན ཨསམྨོཧཏོ པཱིཏིཔཊིསཾཝེདནམེཏྠ ཝེདིཏབྦཾ. ‘‘དུཀྑམེཏཾ ཉཱཎ’’ནྟིཨཱདཱིསུ པན ‘‘ཨཱརམྨཎཏོ ཨསམྨོཧཏོ’’ཏི ཡཾ ཝུཏྟཾ, ཨིདྷ ཏཏོ ཝུཏྟནཡཏོ ཨུཔྤཊིཔཱཊིཡཱ ཝུཏྟཾ. ཏཏྠ ཧི ཡེན མོཧེན ཏཾ དུཀྑཾ པཊིཙྪནྣཾ, ན ཨུཔཊྛཱཏི, ཏསྶ ཝིཧཏཏྟཱ ཝཱ ཨེཝཾ པཝཏྟེ ཉཱཎེ ཡཐཱརུཙི པཙྩཝེཀྑིཏུཾ ཨིཙྪིཏིཙྪིཏཀཱལེ སམཏྠབྷཱཝཏོ ཝཱ དུཀྑཱདཱིསུ ཏཱིསུ ཨསམྨོཧཏོ ཉཱཎཾ ཝུཏྟཾ. ནིརོདྷེ ཨཱརམྨཎཏོ ཏཾསམྤཡུཏྟཱ པཱིཏིཔཊིསཾཝེདནཱ ཨསམྨོཧཏོ ན སམྦྷཝཏི མོཧཔྤཧཱནཱབྷཱཝཱ, པཊིསམྦྷིདཱཔཱལི༹ཝིརོདྷཏོ ཙ. ཏཏྠ ‘‘དཱིགྷཾ ཨསྶཱསཝསེནཱ’’ཏིཨཱདི ཨཱརམྨཎཏོ དསྶེཏུཾ ཝུཏྟཾ. ཏཱཡ སཏིཡཱ ཏེན ཉཱཎེན སཱ པཱིཏི པཊིསཾཝིདིཏཱ ཧོཏི ཏདཱརམྨཎསྶ པཊིསཾཝིདིཏཏྟཱཏི ཨེཏྠ ཨདྷིཔྤཱཡོ. ‘‘ཨཱཝཛྫཏོ’’ཏིཨཱདི ཨསམྨོཧཏོ པཱིཏིཔཊིསཾཝེདནཾ དསྶེཏུཾ ཝུཏྟཾ. ཨནིཙྩཱདིཝསེན ཛཱནཏོ, པསྶཏོ, པཙྩཝེཀྑཏོ ¶ ཙ. ཏདདྷིམུཏྟཏཱཝསེན ཨདྷིཊྛཧཏོ, ཨདྷིམུཙྩཏོ, ཏཐཱ ཝཱིརིཡཱདིཾ སམཱདཧཏོ ཁཎིཀསམཱདྷིནཱ.

ཨབྷིཉྙེཡྻནྟི ཉཱཏཔརིཉྙཱཡ. པརིཉྙེཡྻནྟི ཏཱིརཎཔརིཉྙཱཡ. སབྦཉྷི དུཀྑསཙྩཾ ཨབྷིཉྙེཡྻཾ, པརིཉྙེཡྻཉྩ. ཏཏྲ ཙཱཡཾ པཱིཏཱིཏི ལིཁིཏཾ. ཨབྷིཉྙེཡྻནྟིཨཱདི མགྒཀྑཎཾ སནྡྷཱཡཱཧཱཏི ཝུཏྟཾ. མགྒེན ཨསམྨོཧསངྑཱཏཝིཔསྶནཱཀིཙྩནིཔྥཏྟིཏོ མགྒོཔི ཨབྷིཉྙེཡྻཱདིཨཱརམྨཎཾ ཀརོནྟོ ཝིཡ ཝུཏྟོ. ཝིཔསྶནཱབྷཱུམིདསྶནཏྠནྟི སམཐེ ཀཱཡིཀསུཁཱབྷཱཝཱ ཝུཏྟཾ. དྭཱིསུ ཙིཏྟསངྑཱརཔདེསཱུཏི ཙིཏྟསངྑཱརཔཊིསཾཝེདཱི…པེ… སིཀྑཏི པསྶམྦྷཡཾ ཙིཏྟསངྑཱརཔཊིསཾཝེདཱི…པེ… སིཀྑཏཱིཏི ཨེཏེསུ. མོདནཱདི སབྦཾ པཱིཏིཝེཝཙནཾ. ཨནིཙྩཱནུཔསྶནཱདི ཀིལེསེ, ཏམྨཱུལཀེ ཁནྡྷཱབྷིསངྑཱརེ. ཨེཝཾ བྷཱཝིཏོཏི ན ཙཏུཀྐཔཉྩཀཛ྄ཛྷཱནནིབྦཏྟནེན བྷཱཝིཏོ. ཨེཝཾ སབྦཱཀཱརཔརིཔུཎྞཾ ཀཏྭཱ བྷཱཝིཏོ. ཝིཔསྶནཱམགྒཔཙྩཝེཀྑཎཀཱལེསུཔི པཝཏྟཨསྶཱསམུཁེནེཝ སབྦཾ དསྶིཏཾ ཨུཔཱཡཀུསལེན བྷགཝཏཱ.

༡༦༨. ཀསྨཱ ཨིདཾ ཝུཙྩཏི ཨམྷེཧཱིཏི ཨདྷིཔྤཱཡོ.

པདབྷཱཛནཱིཡཝཎྞནཱ

༡༧༢. ཨུསྶུཀྐཝཙནནྟི ¶ པཱཀཊསདྡསཉྙཱ ཀིར, སམཱནཀཔདནྟི ཝུཏྟཾ ཧོཏི. ‘‘སུཏྭཱ བྷུཉྫནྟཱི’’ཏི ཨེཏྠ ཝིཡ སཉྩིཙྩ ཝོརོཔེཏུཀཱམསྶ སཉྩིཙྩཔདཾ ཝོརོཔནཔདསྶ ཨུསྶུཀྐཾ, སཉྩེཏནཱ ཙ ཛཱིཝིཏཱ ཝོརོཔནཉྩ ཨེཀསྶེཝཱཏི ཝུཏྟཾ ཧོཏི. ན ཀེཝལཾ ཙེཏསིཀམཏྟེནེཝ ཧོཏི, པཡོགོཔི ཨིཙྪིཏབྦོ ཨེཝཱཏི དསྶེཏུཾ ཝུཏྟཱནཱིཏི ཀིར ཨུཔཏིསྶཏྠེརོ. ‘‘ཛཱནིཏྭཱ སཉྫཱནིཏྭཱ ཙེཙྩ ཨབྷིཝིཏརིཏྭཱ’’ཏི ཝཏྟབྦེ ‘‘ཛཱནནྟོ…པེ… ཝཱིཏིཀྐམོ’’ཏི ཝོརོཔནམྤི དསྶིཏཾ, ཏསྨཱ བྱཉྫནེ ཨཱདརཾ ཨཀཏྭཱ ཨཏྠོ དསྶིཏོ. ཝཱིཏིཀྐམསངྑཱཏཏྠསིདྡྷིཡཱ ཧི པུརིམཙེཏནཱ ཨཏྠསཱདྷིཀཱ ཧོཏི. སབྦསུཁུམཨཏྟབྷཱཝནྟི རཱུཔཾ སནྡྷཱཡ ཝུཏྟཾ, ན ཨརཱུཔཾ. ཨཏྟསངྑཱཏཱནཉྷི ཨརཱུཔཱནཾ ཁནྡྷཝིབྷངྒེ (ཝིབྷ. ༡ ཨཱདཡོ) ཝིཡ ཨིདྷ ཨོལཱ༹རིཀསུཁུམཏཱ ཨནདྷིཔྤེཏཱ. མཱཏུཀུཙྪིསྨིནྟི ཡེབྷུཡྻཝཙནཾ, ཨོཔཔཱཏིཀམནུསྶེཔི པཱརཱཛིཀམེཝ, ཨརཱུཔཀཱཡེ ཨུཔཀྐམཱབྷཱཝཱ ཏགྒཧཎཾ ཀསྨཱཏི ཙེ? ཨརཱུཔཀྑནྡྷེན སདྡྷིཾ ཏསྶེཝ རཱུཔཀཱཡསྶ ཛཱིཝིཏིནྡྲིཡསམྦྷཝཏོ. ཏེན སཛཱིཝཀོཝ མནུསྶཝིགྒཧོཔི ནཱམ ཧོཏཱིཏི སིདྡྷཾ. ཨེཏྠ མཱཏུཀུཙྪིསྨིནྟི མནུསྶམཱཏུཡཱ ཝཱ ཏིརཙྪཱནམཱཏུཡཱ ཝཱ. ཝུཏྟཉྷི པརིཝཱརེ (པརི. ༤༨༠) –

‘‘ཨིཏྠིཾ ¶ ཧནེ ཙ མཱཏརཾ, པུརིསཉྩ པིཏརཾ ཧནེ;

མཱཏརཾ པིཏརཾ ཧནྟྭཱ, ན ཏེནཱནནྟརཾ ཕུསེ;

པཉྷཱ མེསཱ ཀུསལེཧི ཙིནྟིཏཱ’’ཏི.

པཋམནྟི པཊིསནྡྷིཙིཏྟམེཝ. ཨེཀབྷཝཔརིཡཱཔནྣཱཡ ཧི ཙིཏྟསནྟཏིཡཱ པཊིསནྡྷིཙིཏྟཾ པཋམཙིཏྟཾ ནཱམ. ཙུཏིཙིཏྟཾ པཙྪིམཾ ནཱམ. ཨཉྙཐཱ ཨནམཏགྒེ སཾསཱརེ པཋམཙིཏྟཾ ནཱམ ནཏྠི ཝིནཱ ཨནནྟརསམནནྟརནཏྠིཝིགཏཔཙྩཡེཧི ཙིཏྟུཔྤཏྟིཡཱ ཨབྷཱཝཏོ. བྷཱཝེ ཝཱ ནཝསཏྟཔཱཏུབྷཱཝདོསཔྤསངྒོ. ཨཡཾ སབྦཔཋམོ མནུསྶཝིགྒཧོཏི ཀིཉྩཱཔི ཨིམཾ ཛཱིཝིཏཱ ཝོརོཔེཏུཾ ན སཀྐཱ, ཏཾ ཨཱདིཾ ཀཏྭཱ སནྟཏིཡཱ ཡཱཝ མརཎཱ ཨུཔྤཛྫནཀམནུསྶཝིགྒཧེསུ ཨཔརིམཱཎེསུ ‘‘སབྦཔཋམོ’’ཏི དིསྶཏི. ཡདཱ པན ཡོ མནུསྶཝིགྒཧོ པུབྦཱཔརིཡཝསེན སནྟཏིཔྤཏྟོ ཧོཏི, ཏདཱ ཏཾ ཛཱིཝིཏཱ ཝོརོཔེཏུཾ ¶ སཀྐཱ. སནྟཏིཾ ཝིཀོཔེནྟོ ཧི ཛཱིཝིཏཱ ཝོརོཔེཏི ནཱམ. ཨེཏྠ ཙ ནཱནཏྟནཡེ ཨདྷིཔྤེཏེ སཏི ‘‘སབྦཔཋམོ’’ཏི ཝཙནཾ ཡུཛྫཏི, ན པན ཨེཀཏྟནཡེ སནྟཏིཡཱ ཨེཀཏྟཱ. ཨེཀཏྟནཡོ ཙ ཨིདྷཱདྷིཔྤེཏོ ‘‘སནྟཏིཾ ཝིཀོཔེཏཱི’’ཏི ཝཙནཏོ, ཏསྨཱ ‘‘སབྦཔཋམོ’’ཏི ཝཙནཾ ན ཡུཛྫཏཱིཏི ཙེ? ན, སནྟཏིཔཙྩུཔྤནྣབཧུཏྟཱ. ཡསྨཱ པན སནྟཏི ནཱམ ཨནེཀེསཾ པུབྦཱཔརིཡུཔྤཏྟི ཝུཙྩཏི, ཏསྨཱ ‘‘ཨཡཾ སབྦཔཋམོ’’ཏི ཝུཏྟོ, ཨེཝམེཏྠ དྭེཔི ནཡཱ སངྒཧཾ གཙྪནྟི, ཨཉྙཐཱ ‘‘སནྟཏིཾ ཝིཀོཔེཏཱི’’ཏི ཨིདཾ ཝཙནཾ ན སིཛ྄ཛྷཏི. ཀིཉྩཱཔི ཨེཏྠ ‘‘སནྟཏིཾ ཝིཀོཔེཏཱི’’ཏི ཝཙནཏོ སནྟཏིཔཙྩུཔྤནྣམེཝ ཨདྷིཔྤེཏཾ, ན ཨདྡྷཱཔཙྩུཔྤནྣཾ ཝིཡ དིསྶཏི, ཏཐཱཔི ཡསྨཱ སནྟཏིཔཙྩུཔྤནྣེ ཝིཀོཔིཏེ ཨདྡྷཱཔཙྩུཔྤནྣཾ ཝིཀོཔིཏམེཝ ཧོཏི, ཨདྡྷཱཔཙྩུཔྤནྣེ པན ཝིཀོཔིཏེ སནྟཏིཔཙྩུཔྤནྣཾ ཝིཀོཔིཏཾ ཧོཏཱིཏི ཨེཏྠ ཝཏྟབྦཾ ནཏྠི. ཏསྨཱ ཨཊྛཀཐཱཡཾ ‘‘ཏདུབྷཡམྤི ཝོརོཔེཏུཾ སཀྐཱ, ཏསྨཱ ཏདེཝ སནྡྷཱཡ ‘སནྟཏིཾ ཝིཀོཔེཏཱི’ཏི ཨིདཾ ཝུཏྟནྟི ཝེདིཏབྦ’’ནྟི ཨཱཧ. ‘‘སནྟཏིཾ ཝིཀོཔེཏཱི’’ཏི ཝཙནཏོ པཀཏིཡཱ ཨཱཡུཔརིཡནྟཾ པཏྭཱ མརཎཀསཏྟེ ཝཱིཏིཀྐམེ སཏི ཨནཱཔཏྟི ཝཱིཏིཀྐམཔཙྩཡཱ སནྟཏིཡཱ ཨཀོཔིཏཏྟཱ. ཝཱིཏིཀྐམཔཙྩཡཱ ཙེ ཨཱཡུཔརིཡནྟཾ ཨཔྤཏྭཱ ཨནྟརཱཝ མརཎཀསཏྟེ ཝཱིཏིཀྐམཔཙྩཡཱ ཨཱཔཏྟི, ཀམྨབདྡྷོ ཙཱཏི ནོ ཏཀྐོཏི ཨཱཙརིཡོ. ‘‘མརཎཝཎྞཾ ཝཱ སཾཝཎྞེཡྻ, མརཎཱཡ ཝཱ སམཱདཔེཡྻ, ཨཡམྤི པཱརཱཛིཀོ ཧོཏི ཨསཾཝཱསོ’’ཏི ཝཙནཏོ ཝཱ ཙེཏནཱཀྑཎེ ཨེཝ པཱརཱཛིཀཱཔཏྟི ཨེཀནྟཱཀུསལཏྟཱ, དུཀྑཝེདནཏྟཱ, ཀཱཡཀམྨཏྟཱ, ཝཙཱིཀམྨཏྟཱ, ཀིརིཡཏྟཱ ཙཱཏི ཝེདིཏབྦཾ.

སཏྟཊྛཛཝནཝཱརམཏྟནྟི སབྷཱགཱརམྨཎཝསེན ཝུཏྟཾ, ཏེནེཝ ‘‘སབྷཱགསནྟཏིཝསེནཱ’’ཏིཨཱདི ཝུཏྟཾ ¶ . ཨཏྟནོ པཊིཔཀྑེན སམནྣཱགཏཏྟཱ སམནནྟརསྶ པཙྩཡཾ ཧོནྟཾ ཡཐཱ པུརེ ཝིཡ ཨཧུཏྭཱ དུབྦལསྶ. ཏནྟི ཛཱིཝིཏིནྡྲིཡཝིཀོཔནཾ.

ཨཱིཏིནྟི སཏྟཝིདྷཝིཙྪིཀཱདཱིནི ཡུདྡྷེ ཌཾསིཏྭཱ མཱརཎཏྠཾ ཝིསྶཛྫེནྟི. པཛྫརཀནྟི སརཱིརཌཱཧཾ. སཱུཙིཀནྟི སཱུལཾ. ཝིསཱུཙིཀནྟི སུཀྑམཱཏིསཱརཾཝསཡཾ. པཀྑནྡིཡནྟི རཏྟཱཏིསཱརཾ. དྭཏྟིབྱཱམསཏཔྤམཱཎེ མཧཱཀཱཡེ ནིམྨིནིཏྭཱ ཋིཏནཱགུདྡྷརཎཾ, ཀུཛ྄ཛྷིཏྭཱ ཨོལོཀིཏེ པརེསཾ ཀཱཡེ ཝིསམརཎཾ ཝཱ ཌཱཧུཔྤཱདནཾ ཝཱ པཡོགོ ནཱམ.

ཀེཙཱིཏི ¶ མཧཱསངྒྷིཀཱ. ཨཡཾ ཨིཏྠཱི. ཀུལུམྦསྶཱཏི གབྦྷསྶ. ཀཐཾ སཱ ཨིཏརསྶཱཏི ཙེ? ཏསྶ དུཊྛེན མནསཱནུཔཀྑིཏེ སོ ཙ གབྦྷོ སཱ ཙ ཨིདྡྷཱིཏི ཨུབྷཡམྤི སཧེཝ ནསྶཏི, གྷཊགྒཱིནཾ བྷེདནིབྦཱཡནཾ ཝིཡ ཨེཀཀྑཎེ ཧོཏི. ‘‘ཏེསཾ སུཏྟནྟིཀེསུ ཨོཙརིཡམཱནཾ ན སམེཏཱི’’ཏི ལིཁིཏཾ, ‘‘ཏེསཾ མཏཾ གཧེཏྭཱ ‘ཐཱཝརཱིནམྤི ཨཡཾ ཡུཛྫཏཱི’ཏི ཝུཏྟེ ཏིཀཝསེན པཊིསེདྷིཏབྦནྟི ཨཔརེ’’ཏི ཝུཏྟཾ. སཱཧཏྠིཀནིསྶགྒིཡཔཡོགེསུ སནྣིཊྛཱཔཀཙེཏནཱཡ སཏྟམཱཡ སཧུཔྤནྣཀཱཡཝིཉྙཏྟིཡཱ སཱཧཏྠིཀཏཱ ཝེདིཏབྦཱ. ཨཱཎཏྟིཀེ པན སཏྟཧིཔི ཙེཏནཱཧི སཧ ཝཙཱིཝིཉྙཏྟིསམྦྷཝཏོ སཏྟསཏྟ སདྡཱ ཨེཀཏོ ཧུཏྭཱ ཨེཀེཀཀྑརབྷཱཝཾ གནྟྭཱ ཡཏྟཀེཧི ཨཀྑརེཧི ཨཏྟནོ ཨདྷིཔྤཱཡཾ ཝིཉྙཱཔེཏི, ཏདཝསཱནཀྑརསམུཊྛཱཔིཀཱཡ སཏྟམཙེཏནཱཡ སཧཛཱཏཝཙཱིཝིཉྙཏྟིཡཱ ཨཱཎཏྟིཀཏཱ ཝེདིཏབྦཱ. ཏཐཱ ཝིཛྫཱམཡཔཡོགེ. ཀཱཡེནཱཎཏྟིཡཾ པན སཱཧཏྠིཀེ ཝུཏྟནཡོཝ. ཐཱཝརཔཡོགེ ཡཱཝཏཱ པརསྶ མརཎཾ ཧོཏི, ཏཱཝཏཱ ཀམྨབདྡྷོ, ཨཱཔཏྟི ཙ. ཏཏོ པརཾ ཨཏིསཉྩརཎེ ཀམྨབདྡྷཱཏིབཧུཏྟཾ ཝེདིཏབྦཾ སཏི པརཾ མརཎེ. པཱརཱཛིཀཱཔཏྟི པནེཏྠ ཨེཀཱ. ཨཏྠསཱདྷཀཙེཏནཱ ཡསྨཱ ཨེཏྠ ཙ དུཏིཡཔཱརཱཛིཀེ ཙ ལབྦྷཏི, ན ཨཉྙཏྠ, ཏསྨཱ དྭིནྣམྤི སཱདྷཱརཎཱ ཨིམཱ གཱཐཱཡོ –

‘‘བྷཱུཏདྷམྨནིཡཱམཱ ཡེ, ཏེ དྷམྨཱ ནིཡཏཱ མཏཱ;

བྷཱཝིདྷམྨནིཡཱམཱ ཡེ, ཏེཝ ཨནིཡཏཱ ཨིདྷ.

‘‘བྷཱུཏདྷམྨནིཡཱམཱནཾ, ཋིཏཱཝ སཱ པཙྩཡཊྛིཏི;

བྷཱཝིདྷམྨནིཡཱམཱནཾ, སཱཔེཀྑཱ པཙྩཡཊྛིཏི.

‘‘ཏེནཉྙཱ ཧེཏུཡཱ ཨཏྠི, སཱཔི དྷམྨནིཡཱམཏཱ;

ཏསྶཱ ཕལཾ ཨནིཡཏཾ, ཕལཱཔེཀྑཱ ནིཡཱམཏཱ.

‘‘ཨེཝཉྷི ¶ སབྦདྷམྨཱནཾ, ཋིཏཱ དྷམྨནིཡཱམཏཱ;

ལདྡྷདྷམྨནིཡཱམཱ ཡཱ, སཱཏྠསཱདྷཀཙེཏནཱ.

‘‘ཙེཏནཱསིདྡྷིཏོ པུབྦེ, པཙྪཱ ཏསྶཱཏྠསིདྡྷིཏོ;

ཨཝིསེསེན སབྦཱཔི, ཚབྦིདྷཱ ཨཏྠསཱདྷིཀཱ.

‘‘ཨཱཎཏྟིཡཾ ¶ ཡཏོ སཀྐཱ, ཝིབྷཱཝེཏུཾ ཝིབྷཱགཏོ;

ཏསྨཱ ཨཱཎཏྟིཡཾཡེཝ, ཝུཏྟཱ སཱ ཨཏྠསཱདྷིཀཱ.

‘‘མིཙྪཏྟེ ཝཱཔི སམྨཏྟེ, ནིཡཏཱནིཡཏཱ མཏཱ;

ཨབྷིདྷམྨེ ན སབྦཏྠི, ཏཏྠ སཱ ནིཡཏཱ སིཡཱ.

‘‘ཡཱ ཐེཡྻཙེཏནཱ སབྦཱ, སཧཏྠཱཎཏྟིཀཱཔི ཝཱ;

ཨབྷིདྷམྨནཡེནཱཡཾ, ཨེཀནྟནིཡཏཱ སིཡཱ.

‘‘པཱཎཱཏིཔཱཏཾ ནིསྶཱཡ, སཧཏྠཱཎཏྟིཀཱདིཀཱ;

ཨབྷིདྷམྨཝསེནེསཱ, པཙྩེཀཾ ཏཾ དུཀཾ བྷཛེ.

‘‘ཛཱིཝིཏིནྡྲིཡུཔཙྪེདོ, ཙེཏནཱ ཙེཏི ཏཾ དྭཡཾ;

ན སཱཧཏྠིཀཀམྨེན, པགེཝཱཎཏྟིཀཱསམཾ.

‘‘ཛཱིཝིཏིནྡྲིཡུཔཙྪེདོ, ཙེཏནཱ ཙེཏི ཏཾ དྭཡཾ;

ན སཱཧཏྠིཀཀམྨེན, པགེཝཱཎཏྟིཀཱསམཾ.

‘‘ཛཱིཝིཏིནྡྲིཡུཔཙྪེདཀྑཎེ ཝདྷཀཙེཏནཱ;

ཙིརཱཋིཏཱཏི ཀོ དྷམྨོ, ནིཡཱམེཏི ཨཱཔཏྟིཀཾ.

‘‘ཛཱིཝིཏིནྡྲིཡུཔཙྪེདཀྑཎེ ཙེ ཝདྷཀོ སིཡཱ;

མཏོ སུཏྟོ པབུདྡྷོ ཝཱ, ཀུསལོ ཝདྷཀོ སིཡཱ.

‘‘ཀུསལཏྟིཀབྷེདོ ¶ ཙ, ཝེདནཱཏྟིཀབྷེདོཔི;

སིཡཱ ཏཐཱ གཏོ སིདྡྷོ, སཧཏྠཱ ཝདྷཀཙེཏནཱ’’ཏི.

ཡཱནི པན བཱིཛཨུཏུཀམྨདྷམྨཙིཏྟནིཡཱམཱནི པཉྩ ཨཊྛཀཐཱཡ ཨཱནེཏྭཱ ནིདསྶིཏཱནི, ཏེསུ ཨཡམཏྠསཱདྷཀཙེཏནཱ ཡོགཾ གཙྪཏཱིཏི མཉྙེ ‘‘ཨཡཾ ཨཏྠསཱདྷཀཙེཏནཱནིཡམོ ནཏྠཱི’’ཏི ཙེཏནཱནཾ མིཙྪཏྟསམྨཏྟནིཡཏཱནམྤི ནཏྠིབྷཱཝཔྤསངྒཏོ. བྷཛཱཔིཡམཱནཱ ཡེན, ཏེན སབྦེཔི ཡཐཱསམྦྷཝཾ ཀམྨཙིཏྟནིཡཱམེ བྷཛནྟི གཙྪནྟཱིཏི ཝེདིཏབྦཾ. ཛཱིཝིཏེ ཨཱདཱིནཝོ མརཎཝཎྞདསྶནེ ན ཝིབྷཏྟོཝ, ཨིདྷ པན སངྐཔྤཔདེ ཨཏྠཏོ ‘‘མརཎསཉྙཱི མརཎཙེཏནོ མརཎཱདྷིཔྤཱཡོ’’ཏི ཨེཝཾ ཨཝིབྷཱུཏཏྟཱ ཝིབྷཏྟོ, ཨཔཱཀཊཏྟཱ, ཨནོལཱ༹རིཀཏྟཱ ཝཱ ཨཝིབྷཱགཱ ཀཱརིཏཱ ¶ ཝཱ. ནཡིདཾ ཝིཏཀྐསྶ ནཱམནྟི ན ཝིཏཀྐསྶེཝ ནཱམཾ, ཀིནྟུ སཉྙཱཙེཏནཱནམྤི ནཱམནྟི གཧེཏབྦཾ. ཀངྑཱཝིཏརཎིཡམྤི ཨེཝམེཝ ཝུཏྟཾ.

༡༧༤. ཀཱཡཏོཏི ཝུཏྟཏྟཱ ‘‘སཏྟིཉསཱུ’’ཏི ཝཏྟབྦེ ཝཙནསིལིཊྛཏྠཾ ‘‘ཨུསུསཏྟིཨཱདིནཱ’’ཏི ཝུཏྟཾ. ཨནུདྡེསིཀེ ཀམྨསྶཱརམྨཎཾ སོ ཝཱ ཧོཏི, ཨཉྙོ ཝཱ. ཨུབྷཡེཧཱིཏི ཀིཉྩཱཔི པཋམཔྤཧཱརོ ན སཡམེཝ སཀྐོཏི, དུཏིཡཾ ལབྷིཏྭཱ པན སཀྐོནྟོ ཛཱིཝིཏཝིནཱསནཧེཏུ ཨཧོསི, ཏདཏྠམེཝ ཧི ཝདྷཀེན སོ དིནྣོ, དུཏིཡོ པན ཨཉྙེན ཙིཏྟེན དིནྣོ, ཏེན སུཊྛུ ཝུཏྟཾ ‘‘པཋམཔྤཧཱརེནེཝཱ’’ཏི, ‘‘ཙེཏནཱ ནཱམ དཱརུཎཱཏི གརུཾ ཝཏྠུཾ ཨཱརབྦྷ པཝཏྟཔུབྦབྷཱགཙེཏནཱ པཀཏིསབྷཱཝཝདྷཀཙེཏནཱ, ནོ དཱརུཎཱ ཧོཏཱི’’ཏི ཨཱཙརིཡེན ལིཁིཏཾ. ‘‘པུབྦབྷཱགཙེཏནཱ པརིཝཱརཱ, ཝདྷཀཙེཏནཱཝ དཱརུཎཱ ཧོཏཱི’’ཏི ཝུཏྟཾ. ཡཐཱདྷིཔྤཱཡནྟི ཨུབྷོཔི པཊིཝིཛ྄ཛྷཏི, སཱཧཏྠིཀོཔི སངྐེཏཏྟཱ ན མུཙྩཏི ཀིར.

ཀིརིཡཱཝིསེསོ ཨཊྛཀཐཱསུ ཨནཱགཏོ. ‘‘ཨེཝཾ ཝིཛ྄ཛྷ, ཨེཝཾ པཧར, ཨེཝཾ གྷཱཧེཧཱི’ཏི པཱལི༹ཡཱ སམེཏཱིཏི ཨཱཙརིཡེན གཧིཏོ’’ཏི ཝདནྟི. པུརཏོ པཧརིཏྭཱཏིཨཱདི ཝཏྠུཝིསངྐེཏམེཝ ཀིར. ཨེཏཾ གཱམེ ཋིཏནྟི པུགྒལོཝ ནིཡམིཏོ. ཡོ པན ལིངྒཝསེན ‘‘དཱིགྷཾ…པེ… མཱརེཧཱི’’ཏི ཨཱཎཱཔེཏི ཨནིཡམེཏྭཱ. ཡདི ནིཡམེཏྭཱ ཝདཏི, ‘‘ཨེཏཾ དཱིགྷ’’ནྟི ཝདེཡྻཱཏི ཨཔརེ. ཨཱཙརིཡཱ པན ‘‘དཱིགྷནྟི ཝུཏྟེ ནིཡམིཏཾ ཧོཏི, ཨེཝཾ ཨནིཡམེཏྭཱ ཝདཏི, ན པན ཨཱཎཱཔཀོ དཱིགྷཱདཱིསུ ཨཉྙཏརཾ མཱརེཧཱིཏི ཨདྷིཔྤཱཡོ’’ཏི ཝདནྟི ཀིར. ‘‘ཨཏྠོ པན ཙིཏྟེན ཨེཀཾ སནྡྷཱཡཔི ཨནིཡམེཏྭཱ ཨཱཎཱཔེཏཱི’’ཏི ལིཁིཏཾ. ‘‘ཨིཏརོ ཨཉྙཾ ཏཱདིསཾ མཱརེཏི, ཨཱཎཱཔཀོ མུཙྩཏཱི’’ཏི ཝུཏྟཾ ཡཐཱདྷིཔྤཱཡཾ ན གཏཏྟཱ. ‘‘ཨེཝཾ དཱིགྷཱདིཝསེནཱཔི ཙིཏྟེན ཨནིཡམིཏསྶེཝཱཏི ཡུཏྟཾ ཝིཡ དིསྶཏཱི’’ཏི ཨཉྙཏརསྨིཾ གཎྛིཔདེ ལིཁིཏཾ, སུཊྛུ ཝཱིམཾསིཏྭཱ སབྦཾ ¶ གཧེཏབྦཾ, ཨོཀཱསསྶ ནིཡམིཏཏྟཱཏི ཨེཏྠ ཨོཀཱསནིཡམཾ ཀཏྭཱ ནིདྡིསནྟོ ཏསྨིཾ ཨོཀཱསེ ནིསིནྣཾ མཱརེཏུཀཱམོཝ ཧོཏི, སཡཾ པན ཏདཱ ཏཏྠ ནཏྠི. ཏསྨཱ ཨོཀཱསེན སཧ ཨཏྟནོ ཛཱིཝིཏིནྡྲིཡཾ ཨཱརམྨཎཾ ན ཧོཏི, ཏེན ཨཏྟནཱ མཱརཱཔིཏོ པརོ ཨེཝ མཱརཱཔིཏོ. ཀཐཾ? སཡཾ རསྶོ ཙ ཏནུཀོ ཙ ཧུཏྭཱ པུབྦབྷཱགེ ཨཏྟཱནཾ སནྡྷཱཡ ཨཱཎཏྟིཀྑཎེ ‘‘དཱིགྷཾ རསྶཾ ¶ ཐཱུལཾ བལཝནྟཾ མཱརེཧཱི’’ཏི ཨཱཎཱཔེནྟསྶ ཙིཏྟཾ ཨཏྟནི ཏསྶཱཀཱརསྶ ནཏྠིཏཱཡ ཨཉྙསྶ ཏཱདིསསྶ ཛཱིཝིཏིནྡྲིཡཾ ཨཱརམྨཎཾ ཀཏྭཱ པཝཏྟཏི, ཏེན མཱུལཊྛསྶ ཀམྨབདྡྷོ. ཨེཝཾསམྤདམིདནྟི དཊྛབྦཾ.

དཱུཏཔརམྤརཱནིདྡེསེ ཨཱཎཱཔེཏི, ཨཱཔཏྟི དུཀྐཊསྶ. ཨིཏརསྶ ཨཱརོཙེཏི, ཨཱཔཏྟི དུཀྐཊསྶཱཏི ཨཱཙརིཡནྟེཝཱསཱིནཾ ཡཐཱསམྦྷཝཾ ཨཱརོཙནེ, པཊིགྒཎྷནེ དུཀྐཊཾ སནྡྷཱཡ ཝུཏྟཾ. ན ཝདྷཀོ པཊིགྒཎྷཱཏི, ཏསྶ དུཀྐཊནྟི སིདྡྷཾ ཧོཏི. ཏཾ པན ཨོཀཱསཱབྷཱཝཏོ ན ཝུཏྟཾ. མཱུལཊྛེན ཨཱཔཛྫིཏབྦཱཔཏྟིཡཱ ཧི ཏསྶ ཨོཀཱསོ ཨཔརིཙྪིནྣོ, ཏེནསྶ ཏསྨིཾ ཨོཀཱསེ ཐུལླཙྩཡཾ ཝུཏྟཾ. ཝདྷཀོ ཙེ པཊིགྒཎྷཱཏི, མཱུལཊྛོ ཨཱཙརིཡོ པུབྦེ ཨཱཔནྣདུཀྐཊེན སཧ ཐུལླཙྩཡམྤི ཨཱཔཛྫཏི. ཀསྨཱ? མཧཱཛནོ ཧི ཏེན པཱཔེ ནིཡོཛིཏོཏི. ཨིདཾ པན དུཀྐཊཐུལླཙྩཡཾ ཝདྷཀོ ཙེ ཏམཏྠཾ ན སཱཝེཏི ཨཱཔཛྫཏི. ཡདི སཱཝེཏི, པཱརཱཛིཀམེཝཱཔཛྫཏི. ཀསྨཱ? ཨཏྠསཱདྷཀཙེཏནཱཡ ཨབྷཱཝཱ. ཨནུགཎྛིཔདེ པན ‘‘པཊིགྒཎྷཏི, ཏཾ དུཀྐཊཾ ཧོཏི. ཡདི ཨེཝཾ ཀསྨཱ པཱཋེ ན ཝུཏྟནྟི ཙེ? ཝདྷཀོ པན ‘སཱདྷུ ཀརོམཱི’ཏི པཊིགྒཎྷིཏྭཱ ཏཾ ན ཀརོཏི. ཨེཝཉྷི ནིཡམེ ‘མཱུལཊྛསྶ ཀིཾ ནཱམ ཧོཏི, ཀིམསྶ དུཀྐཊཱཔཏྟཱི’ཏི སཉྫཱཏཀངྑཱནཾ ཏདཏྠདཱིཔནཏྠཾ ‘མཱུལཊྛསྶ ཨཱཔཏྟི ཐུལླཙྩཡསྶཱ’’’ཏི ཝུཏྟཾ. ‘‘ཝདྷཀོ པཊིགྒཎྷཱཏི ཨཱཔཏྟི དུཀྐཊསྶ, མཱུལཊྛསྶ ཙ ཨཱཔཏྟི ཐུལླཙྩཡསྶཱ’’ཏི ཝུཏྟཾ ན སིལིསྶཏི, མཱུལཊྛེན ཨཱཔཛྫིཏབྦཱཔཏྟིདསྶནཱདྷིཀཱརཏྟཱ ཝདྷཀོ པཊིགྒཎྷཱཏི, ཨཱཔཏྟི དུཀྐཊསྶཱཏི ཝུཏྟཾ.

ཝིསཀྐིཡདཱུཏཔདནིདྡེསེ ‘‘ཝཏྟུཀཱམཏཱཡ ཙ ཀིཙྪེནེཏྠ ཝཏྭཱ པཡོཛནཾ ནཏྠཱིཏི བྷགཝཏཱ ན ཝུཏྟ’’ནྟི ཝུཏྟཾ. ཡཾ པན ‘‘མཱུལཊྛསྶེཝ དུཀྐཊ’’ནྟི ཨཊྛཀཐཱཡཾ ཝུཏྟཾ. ཏཏྲཱཡཾ ཝིཙཱརཎཱ – ཨཱཙརིཡེན ཨཱཎཏྟེན བུདྡྷརཀྑིཏེན ཏདཏྠེ སངྒྷརཀྑིཏསྶེཝ ཨཱརོཙིཏེ ཀིཉྩཱཔི ཡོ ‘‘སཱདྷཱུ’’ཏི པཊིགྒཎྷཱཏི, ཨཐ ཁོ ཨཱཙརིཡསྶེཝེཏཾ དུཀྐཊཾ ཝིསངྐེཏཏྟཱ, ན བུདྡྷརཀྑིཏསྶ, ཀསྨཱ? ཨཏྠསཱདྷཀཙེཏནཱཡ ཨཱཔནྣཏྟཱ. ཏེནེཝ ‘‘ཨཱཎཱཔཀསྶ ཙ ཝདྷཀསྶ ཙ ཨཱཔཏྟི པཱརཱཛིཀསྶཱ’’ཏི པཱལི༹ཡཾ ཝུཏྟཾ, ཏཾ པན མཱུལཊྛེན ཨཱཔཛྫིཏབྦདུཀྐཊཾ ‘‘མཱུལཊྛསྶ ཨནཱཔཏྟཱི’’ཏི ཨིམིནཱ ཨཔརིཙྪིནྣོཀཱསཏྟཱ ན ཝུཏྟཾ.

ཨཝིསངྐེཏེ ¶ ¶ ‘‘མཱུལཊྛསྶ ཨཱཔཏྟི ཐུལླཙྩཡསྶཱ’’ཏི ཝུཏྟཏྟཱ ཝིསངྐེཏེ ཨཱཔཏྟི དུཀྐཊསྶཱཏི སིདྡྷནྟི ཝེདིཏབྦཾ. ‘‘ཝདྷཀོ པཊིགྒཎྷཱཏི, ཨཱཔཏྟི དུཀྐཊསྶཱ’’ཏི ཨིདཾ པན དུཀྐཊཾ ཝདྷཀསྶེཝ. སོ ཧི པཋམཾ ཨཱཎཱཔཀཾ བུདྡྷརཀྑིཏཾ པཱརཱཛིཀཱཔཏྟིཾ པཱཔེཏྭཱ སཡཾ ཛཱིཝིཏཱ ཝོརོཔེཏྭཱ ཨཱཔཛྫིསྶཏཱིཏི ཀིཉྩཱཔི པཱལི༹ཡཾ ‘‘སོ ཏཾ ཛཱིཝིཏཱ ཝོརོཔེཏི, ཨཱཎཱཔཀསྶ ཙ ཝདྷཀསྶ ཙ ཨཱཔཏྟི པཱརཱཛིཀསྶཱ’’ཏི ན ཝུཏྟཾ, ཏཐཱཔི ཏཾ ཨཏྠཏོ ཝུཏྟམེཝ, ‘‘ཡཏོ པཱརཱཛིཀཾ པཉྙཏྟ’’ནྟི པུབྦེ ཝུཏྟནཡཏྟཱ ཙ ཏཾ ན ཝུཏྟཾ. ‘‘སོ ཏཾ ཛཱིཝིཏཱ ཝོརོཔེཏི, ཨཱཔཏྟི སབྦེསཾ པཱརཱཛིཀསྶཱ’’ཏི ཧི པུབྦེ ཝུཏྟཾ. ཨེཏྠ པུབྦེ ཨཱཙརིཡནྟེཝཱསིཀཱནཾ ཝུཏྟདུཀྐཊཐུལླཙྩཡཱཔཏྟིཡོ པཋམམེཝ ཨནཱཔནྣཱ པཱརཱཛིཀཱཔཏྟིཡཱ ཨཱཔནྣཏྟཱ. ཏཐཱཔི ཝདྷཀསྶ པཱརཱཛིཀཱཔཏྟིཡཱ ཏེསཾ པཱརཱཛིཀབྷཱཝོ པཱཀཊོ ཛཱཏོཏི ཀཏྭཱ ‘‘ཨཱཔཏྟི སབྦེསཾ པཱརཱཛིཀསྶཱ’’ཏི ཨེཀཏོ ཝུཏྟཾ, ན ཏཐཱ ‘‘ཨཱཎཱཔཀསྶ, ཝདྷཀསྶ ཙ ཨཱཔཏྟི པཱརཱཛིཀསྶཱ’’ཏི ཨེཏྠ. ཀསྨཱ? ཝདྷཀསྶ དུཀྐཊཱཔཏྟིཡཱ ཨཱཔནྣཏྟཱ. སོ ཧི པཋམཾ དུཀྐཊཱཔཏྟིཾ ཨཱཔཛྫིཏྭཱ པཙྪཱ པཱརཱཛིཀཾ ཨཱཔཛྫཏི. ཡདི པན ཨནྟེཝཱསིཀཱ ཀེཝལཾ ཨཱཙརིཡསྶ གརུཀཏཱཡ སཱསནཾ ཨཱརོཙེནྟི སཡཾ ཨམརཎཱདྷིཔྤཱཡཱ སམཱནཱ པཱརཱཛིཀེན ཨནཱཔཏྟི. ཨཀཔྤིཡསཱསནཧརཎཔཙྩཡཱ དུཀྐཊཱཔཏྟི ཧོཏི ཨེཝ, ཨིམསྶཏྠསྶ སཱདྷནཏྠཾ དྷམྨཔདཝཏྠཱུཧི མིགལུདྡཀསྶ བྷརིཡཱཡ སོཏཱཔནྣཱཡ དྷནུཨུསུསཱུལཱདིདཱནཾ ནིདསྶནཾ ཝདནྟི ཨེཀེ. ཏཾ ཏིཏྟིརཛཱཏཀེན (ཛཱ. ༡.༤.༧༣ ཨཱདཡོ) སམེཏི, ཏསྨཱ སུཏྟཉྩ ཨཊྛཀཐཉྩ ཨནུལོམེཏཱིཏི ནོ ཏཀྐོཏི ཨཱཙརིཡོ. ཨིདྷ པན དཱུཏཔརམྤརཱཡ ཙ ‘‘ཨིཏྠནྣཱམསྶ པཱཝད, ཨིཏྠནྣཱམོ ཨིཏྠནྣཱམཾ པཱཝདཏཱུ’’ཏི ཨེཏྠ ཨཝིསེསེཏྭཱ ཝུཏྟཏྟཱ ཝཱཙཱཡ ཝཱ ཨཱརོཙེཏུ, ཧཏྠམུདྡཱཡ ཝཱ, པཎྞེན ཝཱ, དཱུཏེན ཝཱ ཨཱརོཙེཏུ, ཝིསངྐེཏོ ནཏྠི. སཙེ ཝིསེསེཏྭཱ མཱུལཊྛོ, ཨནྟརཱདཱུཏོ ཝཱ ཝདཏི, ཏདཏིཀྐམེ ཝིསངྐེཏོཏི ཝེདིཏབྦཾ.

ཨིདཱནི ཨིམསྨིཾཡེཝ ཨདྷིཀཱརདྭཡེ ཨནུགཎྛིཔདེ ཝུཏྟནཡོ ཝུཙྩཏི – ‘‘ཝདྷཀོ པཊིགྒཎྷཱཏི, ཨཱཔཏྟི དུཀྐཊསྶཱ’’ཏི ཝདྷཀསྶེཝ ཨཱཔཏྟི, ན ཨཱཎཱཔཀསྶ བུདྡྷརཀྑིཏསྶ. ཡདི པན སོ ཝཛ྄ཛྷམརཎཱམརཎེསུ ཨཝསྶམཉྙཏརཾ ཀརོཏི, བུདྡྷརཀྑིཏསྶཱཎཏྟིཀྑཎེ ཨེཝ པཱརཱཛིཀདུཀྐཊེསུ ཨཉྙཏརཾ ¶ སིཡཱ. ‘‘ཨིཏི ཙིཏྟམནོ’’ཏི ཨདྷིཀཱརཏོ ‘‘ཙིཏྟསངྐཔྤོ’’ཏི ཨེཏྠཱཔི ཨིཏི-སདྡོ ཝིཡ ‘‘ཝདྷཀོ པཊིགྒཎྷཱཏི, མཱུལཊྛསྶ ཨཱཔཏྟི ཐུལླཙྩཡསྶཱ’’ཏི ཨདྷིཀཱརཏོ ‘‘མཱུལཊྛསྶ ཨཱཔཏྟི དུཀྐཊསྶཱ’’ཏི ཝུཏྟམེཝ ཧོཏི. ཀསྨཱ སརཱུཔེན ན ཝུཏྟནྟི ཙེ? ཏཏོ ཙུཏྟརི ནཡདཱནཏྠཾ. ‘‘མཱུལཊྛསྶ ཨཱཔཏྟི དུཀྐཊསྶཱ’’ཏི ཧི ཝུཏྟེ མཱུལཊྛསྶེཝ ཝསེན ནིཡམིཏཏྟཱ ‘‘པཊིགྒཎྷནྟསྶ དུཀྐཊཾ ཧོཏཱི’’ཏི ན ཉཱཡཏི. ‘‘ཝདྷཀོ པཊིགྒཎྷཱཏི, ཨཱཔཏྟི དུཀྐཊསྶཱ’’ཏི ཧི ཨནིཡམེཏྭཱ ཝུཏྟེ སཀྐཱ ཨུབྷཡེསཾ ¶ ཝསེན དུཀྐཊེ ཡོཛེཏུཾ. ཏསྨཱ ཨེཝ ཧི ཨཊྛཀཐཱཙརིཡེཧི ཨདྷིཀཱརཾ གཧེཏྭཱ ‘‘སངྒྷརཀྑིཏེན སམྤཊིཙྪིཏེ མཱུལཊྛསྶེཝ དུཀྐཊནྟི ཝེདིཏབྦ’’ནྟི ཝུཏྟཾ. པཊིགྒཎྷནྟསྶ ནེཝ ཨནུཉྙཱཏཾ, ན པཊིཀྑིཏྟཾ, ཀེཝལནྟུ བུདྡྷརཀྑིཏསྶ ཨནིཡམིཏཏྟཱ པཊིཀྑིཏྟཾ, ཏསྶ པན པཱརཱཛིཀདུཀྐཊེསུ ཨཉྙཏརཾ བྷཝེཡྻཱཏི ཨཡམཏྠོ དཱིཔིཏོ, ཏསྨཱ ཏམྤི སུཝུཏྟཾ. ཡསྨཱ ཨུབྷཡེསཾ ཝསེན ཡོཛེཏུཾ སཀྐཱ, ཏསྨཱ ཨཱཙརིཡེཧི ‘‘པཊིགྒཎྷནྟསྶེཝེཏཾ དུཀྐཊ’’ནྟི ཝུཏྟཾ. ཏཏྠ མཱུལཊྛོ ནེཝ ཨནུཉྙཱཏོ ‘‘མཱུལཊྛསྶཱ’’ཏི ཝཙནཱབྷཱཝཏོ, ན ཙ པཊིཀྑིཏྟོ ‘‘པཊིགྒཎྷནྟསྶ ཨཱཔཏྟི དུཀྐཊསྶཱ’’ཏི པཱལི༹ཡཱ ཨབྷཱཝཏོ, པཊིགྒཎྷནཔཙྩཡཱ ཝདྷཀསྶ དུཀྐཊཾ སིཡཱཏི ནཡཾ དཱཏུཾ ‘‘མཱུལཊྛསྶཱ’’ཏི པཱལི༹ཡཾ ཨཝུཏྟཏྟཱ ‘‘ཏཾ པཊིགྒཎྷནྟསྶེཝེཏཾ དུཀྐཊ’’ནྟི ཡཾ ཝུཏྟཾ, ཏམྤི སུཝུཏྟཾ. ཏཏྲ ཧི བུདྡྷརཀྑིཏསྶ པཊིཀྑིཏྟཾ, ཝུཏྟནཡེན པན ཏསྶ ཨཱཔཏྟི ཨནིཡཏཱཏི. ཀསྨཱ པན ཨཊྛཀཐཱཡཾ ཨནུཏྟཱནཾ པཊིགྒཎྷནཔཙྩཡཱ ཝདྷཀསྶ དུཀྐཊཾ ཨཝཏྭཱ མཱུལཊྛསྶེཝ ཝསེན དུཀྐཊཾ ཝུཏྟནྟི ཙེ? ཨནིཊྛནིཝཱརཎཏྠཾ. ‘‘སངྒྷརཀྑིཏེན སམྤཊིཙྪིཏེ པཊིགྒཎྷནཔཙྩཡཱ ཏསྶ དུཀྐཊ’’ནྟི ཧི ཝུཏྟེ ཨནནྟརནཡེན སརཱུཔེན ཝུཏྟཏྟཱ ཨིདྷཱཔི མཱུལཊྛསྶ ཐུལླཙྩཡཾ ཨཊྛཀཐཱཡཾ ཝུཏྟམེཝ ཧོཏཱིཏི ཨཱཔཛྫཏི. ཨིཏི ཏཾ ཨེཝཾ ཨཱཔནྣཾ ཐུལླཙྩཡཾ ཨུཏྟཱནནྟི ཏཾ ཨཝཏྭཱ པཊིགྒཎྷནྟསྶ དུཀྐཊཾ ཝུཏྟཾ. ཨནུཏྟཱནཏྟཱ ཨཊྛཀཐཱཡནྟི ཨིམཾ ཨནིཊྛགྒཧཎཾ ནིཝཱརེཏུཾ ‘‘མཱུལཊྛསྶེཝེཏཾ དུཀྐཊ’’ནྟི ཝུཏྟཾ. ཨཱཙརིཡེན ཧི ཝུཏྟནཡེན པཊིགྒཎྷནྟསྶ དུཀྐཊམྤི ཨུཏྟཱནམེཝ. ཨུཏྟཱནཉྩ ཀསྨཱ ཨམྷཱཀཾ ཁནྟཱིཏི ཝུཏྟནྟི ཙེ? པཊིཔཏྟིདཱིཔནཏྠཾ. ‘‘པིཊཀཏྟཡཱདཱིསུ ཨཔྤཊིཧཏབུདྡྷིཡོཔི ཨཱཙརིཡཱ སརཱུཔེན པཱལི༹ཡཾ ཨཊྛཀཐཱཡཉྩ ཨཝུཏྟཏྟཱ ཨེཝརཱུཔེསུ ནཱམ ཋཱནེསུ ཨེཝཾ པཊིཔཛྫནྟི, ཀིམངྒཾ པན མཱདིསོཏི སུཧདཡཱ ཀུལཔུཏྟཱ ཨནཱགཏེ ཝུཏྟནཡམནཏིཀྐམིཏྭཱ སངྐརདོསཾ ཝིཝཛྫེཏྭཱ ¶ ཝཎྞནཱཝེལཉྩ ཨནཏིཀྐམྨ པཊིཔཛྫནྟཱི’’ཏི ཙ ཨཔརེཧི ཝུཏྟཾ. ཨཡཾ པན ཨཊྛཀཐཱཡ ཝཱ ཨཝུཏྟཏྟཱ ཨེཝརཱུཔེསུ ནཱམ པཱཋོ ཨཱཙརིཡེན པཙྪཱ ནིཀྑིཏྟཏྟཱ ཀེསུཙི པོཏྠཀེསུ ན དིསྶཏཱིཏི ཀཏྭཱ སབྦཾ ལིཁིསྶཱམ. ཨེཝཾ སནྟེ པཊིགྒཧཎེ ཨཱཔཏྟིཡེཝ ན སིཡཱ, སཉྩརིཏྟཔཊིགྒཧཎམརཎཱབྷིནནྡནེསུཔི ཙ ཨཱཔཏྟི ཧོཏི, མཱརཎཔཊིགྒཧཎེ ཀཐཾ ན སིཡཱ, ཏསྨཱ པཊིགྒཎྷནྟསྶེཝེཏཾ དུཀྐཊཾ, ཏེནེཝེཏྠ ‘‘མཱུལཊྛསྶཱ’’ཏི ན ཝུཏྟཾ. པུརིམནཡེཔི ཙེཏཾ པཊིགྒཎྷནྟསྶ ཝེདིཏབྦམེཝ, ཨོཀཱསཱབྷཱཝེན པན ན ཝུཏྟཾ. ཏསྨཱ ཡོ ཡོ པཊིགྒཎྷཱཏི, ཏསྶ ཏསྶ ཏཔྤཙྩཡཱ ཨཱཔཏྟིཡེཝཱཏི ཨཡམེཏྠ ཨམྷཱཀཾ ཁནྟི. ཡཐཱ ཙེཏྠ, ཨེཝཾ ཨདིནྣཱདཱནེཔཱིཏི.

༡༧༥. ཨརཧོ རཧོསཉྙཱིནིདྡེསཱདཱིསུ ཀིཉྩཱཔི པཱལི༹ཡཾ, ཨཊྛཀཐཱཡཉྩ དུཀྐཊམེཝ ཝུཏྟཾ, ཏཐཱཔི ཏཏྠ པརམྤརཱཡ སུཏྭཱ མརཏཱུཏི ཨདྷིཔྤཱཡེན ཨུལླཔནྟསྶ ཨུདྡེསེ སཏི ཨུདྡིཊྛསྶ མརཎེན ཨཱཔཏྟི ¶ པཱརཱཛིཀསྶ, ཨསཏི ཡསྶ ཀསྶཙི མརཎེན ཨཱཔཏྟི པཱརཱཛིཀསྶ. ‘‘ཨིཏྠནྣཱམོ སུཏྭཱ མེ ཝཛ྄ཛྷསྶ ཨཱརོཙེཏཱུ’’ཏི ཨུདྡིསིཏྭཱ ཨུལླཔནྟསྶ ཝིསངྐེཏཏཱ དཱུཏཔརམྤརཱཡ ཝུཏྟཏྟཱ ཝེདིཏབྦཱ. སཙེ ‘‘ཡོ ཀོཙི སུཏྭཱ ཝདཏཱུ’’ཏི ཨུལླཔཏི, ཝཛ྄ཛྷོ སཡམེཝ སུཏྭཱ མརཏི, ཝིསངྐེཏཏྟཱ ན པཱརཱཛིཀཾ. ཡོ ཀོཙི སུཏྭཱ ཝདཏི, སོ ཙེ མརཏི, པཱརཱཛིཀཾ. ‘‘ཡོ ཀོཙི མམ ཝཙནཾ སུཏྭཱ ཏཾ མཱརེཏཱུ’’ཏི ཨུལླཔཏི, ཡོ ཀོཙི སུཏྭཱ མཱརེཏི, པཱརཱཛིཀཾ, སཡམེཝ སུཏྭཱ མཱརེཏི, ཝིསངྐེཏཏྟཱ ན པཱརཱཛིཀནྟི ཨེཝཾ ཡཐཱསམྦྷཝོ ཝེདིཏབྦོ.

༡༧༦. མཱུལཾ དཏྭཱ མུཙྩཏཱིཏི ཨེཏྠ བྷིནྡིཏྭཱ, བྷཉྫིཏྭཱ, ཙཝིཏྭཱ, ཙུཎྞེཏྭཱ, ཨགྒིམྷི པཀྑིཔིཏྭཱ ཝཱ པགེཝ མུཙྩཏཱིཏི ཨཏྠཏོ ཝུཏྟམེཝ ཧོཏི. ཡེསཾ ཧཏྠཏོ མཱུལཾ གཧིཏནྟི ཡེསཾ ཉཱཏཀཔརིཝཱརིཏཱནཾ ཧཏྠཏོ མཱུལཾ ཏེན བྷིཀྑུནཱ གཧིཏཾ, པོཏྠཀསཱམིཀཧཏྠཏོ པུབྦེ དིནྣམཱུལཾ པུན གཧེཏྭཱ ཏེསཉྙེཝ ཉཱཏཀཱདཱིནཾ དཏྭཱ མུཙྩཏི, ཨེཝཾ པོཏྠཀསཱམིཀསྶེཝ སནྟཀཾ ཛཱཏཾ ཧོཏི. ཨནུགཎྛིཔདེ པན ‘‘སཙེཔི སོ ཝིཔྤཊིསཱརཱི ཧུཏྭཱ སཱིགྷཾ ཏེསཾ མཱུལཾ དཏྭཱ མུཙྩཏཱི’’ཏི ཝུཏྟཾ, ཏཾ ཡེན དྷནེན པོཏྠཀོ ཀཱིཏོ, ཏཉྩ དྷནཾ སནྡྷཱཡ ཝུཏྟཾ. ཀསྨཱ? པོཏྠཀསཱམིཀཧཏྠཏོ དྷནེ གཧིཏེ པོཏྠཀེ ཨདིནྣེཔི མུཙྩནཏོ. སཙེ ཨཉྙཾ ¶ དྷནཾ སནྡྷཱཡ ཝུཏྟཾ, ན ཡུཏྟཾ པོཏྠཀསྶ ཨཏྟནིཡབྷཱཝཏོ ཨམོཙིཏཏྟཱ. སཙེ པོཏྠཀཾ སཱམིཀཱནཾ དཏྭཱ མཱུལཾ ན གཎྷཱཏི, ན མུཙྩཏི ཨཏྟནིཡབྷཱཝཏོ ཨམོཙིཏཏྟཱ. སཙེ པོཏྠཀཾ མཱུལཊྛེན དིཡྻམཱནཾ ‘‘ཏཝེཝ ཧོཏཱུ’’ཏི ཨཔྤེཏི, མུཙྩཏི ཨཏྟནིཡབྷཱཝཏོ མོཙིཏཏྟཱ. ཨེཏྠཱཡཾ ཝིཙཱརཎཱ – ཡཐཱ ཙེཏིཡཾ ཝཱ པཊིམཾ པོཀྑརཎིཾ སེཏུཾ ཝཱ ཀིཎིཏྭཱ གཧིཏམྤི ཀཱརཀསྶེཝེཏཾ པུཉྙཾ, ན ཀིཎིཏྭཱ གཧིཏསྶ, ཏཐཱ པཱཔམྤི ཡེན པོཏྠཀོ ལིཁིཏོ, ཏསྶེཝ ཡུཛྫཏི, ན ཨིཏརསྶཱཏི ཙེ? ན, ‘‘སཏྠཧཱརཀཾ ཝཱསྶ པརིཡེསེཡྻཱ’’ཏི ཝཙནཏོ. པརེན ཧི ཀཏསཏྠཾ ལབྷིཏྭཱ ཨུཔནིཀྑིཔནྟསྶ པཱརཱཛིཀནྟི སིདྡྷཾ. ཨེཝཾ པརེན ལིཁིཏམྤི པོཏྠཀཾ ལབྷིཏྭཱ ཡཐཱ ཝཛ྄ཛྷོ ཏཾ པསྶིཏྭཱ མརཏི, ཏཐཱ ཨུཔནིཀྑིཔེཡྻ པཱརཱཛིཀནྟི སིདྡྷཾ ཧོཏཱིཏི. ཙེཏིཡཱདཱིཏི ཨེཏམནིདསྶནཾ ཀརཎཔཙྩཡཾ ཧི ཏཾ ཀམྨཾ ཨིདཾམརཎཔཙྩཡནྟི ཨེཝཾ ཨཱཙརིཡེན ཝིཙཱརིཏཾ. མམ པན ཙེཏིཡཱདིནིདསྶནེནེཝ སོཔི ཨཏྠོ སཱདྷེཏབྦོ ཝིཡ པཊིབྷཱཏི.

ཏཏྟཀཱ པཱཎཱཏིཔཱཏཱཏི ‘‘ཨེཀཱཔི ཙེཏནཱ ཀིཙྩཝསེན ‘ཏཏྟཀཱ’ཏི ཝུཏྟཱ སཏིཔཊྛཱནསམྨཔྤདྷཱནཱནཾ ཙཏུཀྐཏཱ ཝིཡཱ’’ཏི ལིཁིཏཾ. པམཱཎེ ཋཔེཏྭཱཏི ཨཏྟནཱ ཨདྷིཔྤེཏཔྤམཱཎེ. ‘‘ཀཏཾ མཡཱ ཨེཝརཱུཔེ ཨཱཝཱཊེ ཁཎིཏེ ཏསྨིཾ པཏིཏྭཱ མརཏཱུ’’ཏི ཨདྷིཔྤཱཡེན ཝདྷཀོ ཨཱཝཱཊཔྤམཱཎཾ ནིཡམེཏྭཱ སཙེ ཁཎི, ཏཾ སནྡྷཱཡ ཝུཏྟཾ ‘‘ཨིམསྨིཾ ཨཱཝཱཊེ’’ཏི. ཨིདཱནི ཁཎིཏབྦཾ སནྡྷཱཡ ཨེཏྟཀཔྤམཱཎསྶ ཨནིཡམིཏཏྟཱ ‘‘ཨེཀསྨིམྤི ཀུདཱལཔྤཧཱརེ’’ཏིཨཱདི ¶ ཝུཏྟཾ, སུཏྟནྟིཀཏྠེརེཧི ཀིཉྩཱཔི ཨུཔཋཏཾ, ཏཐཱཔི སནྣིཊྛཱཔཀཙེཏནཱ ཨུབྷཡཏྠ ཨཏྠེཝཱཏི ཨཱཙརིཡཱ. བཧཱུནཾ མརཎེ ཨཱརམྨཎནིཡམེ ཀཐནྟི ཙེ? ཝཛ྄ཛྷེསུ ཨེཀསྶ ཛཱིཝིཏིནྡྲིཡེ ཨཱལམྦིཏེ སབྦེསམཱལམྦིཏམེཝ ཧོཏི. ཨེཀསྶ མརཎེཔི ན ཏསྶ སཀལཾ ཛཱིཝིཏཾ སཀྐཱ ཨཱལམྦིཏུཾ ན ཨུཔྤཛྫམཱནཾ, ཨུཔྤནྣཾ, ནིརུཛ྄ཛྷམཱནཾ, ཨཏྠིཏཱཡཔཱཎཱཏིཔཱཏཙེཏནཱཝ པཙྩུཔྤནྣཱརམྨཎཱ, པུརེཛཱཏཱརམྨཎཱ ཙ ཧོཏི, ཏསྨཱ ཏམྤི ཡུཛྫཏི. པཙྪིམཀོཊིཡཱ ཨེཀཙིཏྟཀྑཎེ པུརེཛཱཏཾ ཧུཏྭཱ ཋིཏཾ ཏཾ ཛཱིཝིཏམཱལམྦཎཾ ཀཏྭཱ སཏྟམཛཝནཔརིཡཱཔནྣཙེཏནཱཡ ཨོཔཀྐམེ ཀཏེ ཨཏྠཏོ ཏསྶ སཏྟསྶ སབྦཾ ཛཱིཝིཏིནྡྲིཡམཱལམྦིཏཾ, ཝོརོཔིཏཉྩ ཧོཏི, ཨིཏོ པནཉྙཐཱ ན སཀྐཱ; ཨེཝམེཝ པུབྦབྷཱགེ ‘‘བཧཱུཔིསཏྟེ མཱརེམཱི’’ཏི ཙིནྟེཏྭཱ སནྣིཊྛཱནཀཱལེ ཝིསཔཀྑིཔནཱདཱིསུ ཨེཀཾ པཡོགཾ ¶ སཱདྷཡམཱནཱ ཝུཏྟཔྤཀཱརཙེཏནཱ ཏེསུ ཨེཀསྶ ཝུཏྟཔྤཀཱརཾ ཛཱིཝིཏིནྡྲིཡཾ ཨཱལམྦཎཾ ཀཏྭཱ ཨུཔྤཛྫཏི, ཨེཝཾ ཨུཔྤནྣཱཡ པནེཀཱཡ སབྦེཔི ཏེ མཱརིཏཱ ཧོནྟི ཏཱཡ ཨེཝ སབྦེསཾ མརཎསིདྡྷིཏོ, ཨཉྙཐཱ ན སཀྐཱ ཝོརོཔེཏུཾ, ཨཱལམྦིཏུཾ ཝཱ. ཏཏྠ ཨེཀཱཡ ཙེཏནཱཡ བཧཱུནཾ མརཎེ ཨཀུསལརཱསི ཀཐནྟི ཙེ? ཝིསུཾ ཝིསུཾ མརཎེ པཝཏྟཙེཏནཱནཾ ཀིཙྩཀརཎཏོ. ཀཐཾ? ཏཱ པན སབྦཱ ཨུཔཔཛྫཝེདནཱིཡཱཝ ཧོནྟི, ཏསྨཱ ཏཱསུ ཡཱཡ ཀཱཡཙི དིནྣཱཡ པཊིསནྡྷིཡཱ ཨིཏརཱ སབྦཱཔི ‘‘ཏཏོ བལཝཏརཀུསལཔཊིབཱཧིཏཱ ཨཧོསིཀམྨ’’ནྟིཨཱདིཀོཊྛཱསཾ བྷཛནྟི, པུནཔི ཝིཔཱཀཾ ཛནིཏུཾ ན སཀྐོནྟི. ཨཔརཱཔརིཡཝེདནཱིཡཱཔི ཝིཡ ཏཾ པཊིབཱཧིཏྭཱ ཀུསལཙེཏནཱ པཊིསནྡྷིཾ དེཏི, ཏཐཱ ཨཡམྤི ཙེཏནཱ ཨནནྟརབྷཝེ ཨེཝ པཊིསནྡྷིདཱནཱདིཝསེན ཏཱསཾ ཀིཙྩལེསཀརཎཏོ ཨེཀཱཔི སམཱནཱ ‘‘རཱསཱི’’ཏི ཝུཏྟཱ. ཏཱཡ པན དིནྣཱཡ པཊིསནྡྷིཡཱ ཨཏིཏིཀྑོ ཝིཔཱཀོ ཧོཏི. ཨཡམེཏྠ ཝིསེསོཏིཨཱདི ཨནུགཎྛིཔདེ པཔཉྩིཏཾ.

ཨམརིཏུཀཱམཱ ཝཱཏི ཨདྷིཔྤཱཡཏྟཱ ཨོཔཔཱཏིཀམརཎེཔི ཨཱཔཏྟི. ‘‘‘ནིབྦཏྟིཏྭཱ’ཏི ཝུཏྟཏྟཱ པཏནཾ ན དིསྶཏཱིཏི ཙེ? ཨོཔཔཱཏིཀཏྟཾ, པཏནཉྩ ཨེཀམེཝཱ’’ཏི ལིཁིཏཾ. ཨཐ ཝཱ ‘‘སབྦཐཱཔི ཨནུདྡིསྶེཝཱ’’ཏི ཝཙནཏོ ཨེཏྠ མརཏཱུཏི ཨདྷིཔྤཱཡསམྦྷཝཏོ ‘‘ཨུཏྟརིཏུཾ ཨསཀྐོནྟོ མརཏི པཱརཱཛིཀམེཝཱ’’ཏི སུཝུཏྟཾ. སཙེ ‘‘པཏིཏྭཱ མརཏཱུ’’ཏི ནིཡམེཏྭཱ ཁཎིཏོ ཧོཏི, ཨོཔཔཱཏིཀམནུསྶོ ཙ ནིབྦཏྟིཏྭཱ ཋིཏནིཡམེནེཝ ‘‘ཨུཏྟརིཏུཾ ན སཀྐཱ’’ཏི ཙིནྟེཏྭཱ མརཏཱིཏི པཱརཱཛིཀཙྪཱཡཱ ན དིསྶཏི, ཏེན ཝུཏྟཾ ‘‘ཨུཏྟརིཏུཾ ཨསཀྐོནྟོ’’ཏི. སོ ཧི ཨུཏྟརིཏུཾ ཨསཀྐོནྟོ པུནཔྤུནཾ པཏིཏྭཱ མརཏི, ཏེན པཱཏོཔི ཏསྶ སིདྡྷོ ཧོཏཱིཏི ཨདྷིཔྤཱཡོ. ཏཏྠ སིཡཱ – ཡོ པན ‘‘ཨུཏྟརིཏུཾ ཨསཀྐོནྟོ མརཏཱི’’ཏི ཝུཏྟོ, སོ ཨོཔཱཏཁཎནཀྑཎེ ཨརཱུཔལོཀེ ཛཱིཝཏི. ཝདྷཀཙེཏནཱ ཙ ‘‘ཨནིཡཏོ དྷམྨོ མིཙྪཏྟནིཡཏསྶ དྷམྨསྶ ཨཱརམྨཎཔཙྩཡེན པཙྩཡོ, རཱུཔཛཱིཝིཏིནྡྲིཡཾ མཱཏུགྷཱཏིཀམྨསྶ པིཏུགྷཱཏིཀམྨསྶ ཨརཧནྟགྷཱཏིཀམྨསྶ ¶ རུཧིརུཔྤཱདཀམྨསྶ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༥.༣༨ མིཙྪཏྟནིཡཏཏྟིཀ) ཝཙནཏོ རཱུཔཛཱིཝིཏིནྡྲིཡཱརམྨཎཾ ཧོཏི, ན ཙ ཏཾ ཨརཱུཔཱཝཙརསཏྟསྶཏྠི, ན ཙ སཱ ཙེཏནཱ ‘‘ཨནིཡཏོ དྷམྨོ མིཙྪཏྟནིཡཏསྶ དྷམྨསྶ པུརེཛཱཏཔཙྩཡེན པཙྩཡོ, ཨཱརམྨཎཔུརེཛཱཏཾ ཝཏྠུཔུརེཛཱཏཾ ཨཱརམྨཎཔུརེཛཱཏཾ. རཱུཔཛཱིཝིཏིནྡྲིཡཾ ¶ མཱཏུགྷཱཏིཀམྨསྶ པུརེཛཱཏཔཙྩཡེན པཙྩཡོ’’ཏི (པཊྛཱ. ༢.༡༥.༤༨ མིཙྪཏྟནིཡཏཏྟིཀ) ཝཙནཏོ ཨནཱགཏཱརམྨཎཱ ཧོཏི. ཨཉྙོ ཨིདྷ པཏིཏྭཱ མརཎཀསཏྟོ ནཏྠི, ཨེཝཾ སནྟེ ཝདྷཀཙེཏནཱཡ ཀིཾ ཨཱརམྨཎནྟི ཙེ? ཡསྶ ཀསྶཙི ཨིདྷ ཛཱིཝནཀསཏྟསྶ པཙྩུཔྤནྣཾ ཛཱིཝིཏིནྡྲིཡཾ ཨཱརམྨཎཾ. ཀིཉྩཱཔི སོ ན མརཏི, ཨཐ ཁོ པཱཎཱཏིཔཱཏོ ཧོཏི ཨེཝ. ཡཐཱ ཀིཾ ‘‘ཡཐཱཀྐམེན ཋིཏེ སཏྟ ཛནེ ཨེཀེན ཀཎྜེན ཝིཛ྄ཛྷིཏྭཱ མཱརེམཱི’’ཏི པུབྦབྷཱགེ ཙིནྟེཏྭཱ སནྣིཊྛཱནཀཱལེ ཏེསུ ཨེཀསྶ ཛཱིཝིཏམཱརམྨཎཾ ཀཏྭཱ ཀཎྜཾ ཝིསྶཛྫེཏི, ཀཎྜོ ཏཾ ཝིརཛ྄ཛྷིཏྭཱ ཨིཏརེ ཚ ཛནེ མཱརེཏི, ཨེཝཾ སནྟེཔི ཨཡཾ པཱཎཱཏིཔཱཏཱི ཨེཝ ཧོཏི, ཨེཝམིདྷཱཔི ‘‘ཡོ ཀོཙཱི’’ཏི ཝིཀཔྤེནྟསྶ ཝདྷཀཙེཏནཱ ཡསྶ ཀསྶཙི ཛཱིཝིཏཱརམྨཎཾ ཀཏྭཱ པཝཏྟཏི, ཏསྨིཾ ཨམཏེཔི ཨིཏརསྶ ཝསེན པཱཎཱཏིཔཱཏཱི. སཙེ ཨརཧཱ ཧུཏྭཱ པརིནིབྦཱཡཏི, ཨརཧནྟགྷཱཏཀོཝ ཧོཏི. ཨེས ནཡོ སབྦཏྠ ཨེཝརཱུཔེསུ. ཨཡམེཝ ཧེཏྠ ཨཱཙརིཡཔརམྤརཱགཏཱ ཡུཏྟི ཝིནིཙྪཡཀཐཱཏི ཝུཏྟཾ.

པཏནརཱུཔཾ པམཱཎནྟི ཨེཏྠ ཡཐཱ མཱཏུཡཱ པཏིཏྭཱ པརིཝཏྟལིངྒཱཡ མཏཱཡ སོ མཱཏུགྷཱཏཀོ ཧོཏི, ན ཀེཝལཾ པུརིསགྷཱཏཀོ, ཏསྨཱ པཏནསྶེཝ ཝསེན ཨཱཔཏྟི. ཀསྨཱ? པཏནརཱུཔམརཎརཱུཔཱནཾ ཨེཀསནྟཱནཏྟཱ, ཏདེཝ ཧིསྶ ཛཱིཝིཏིནྡྲིཡཾ, ཏསྶ ཧི པརིཝཏྟནཾ ནཏྠི, ཨིཏྠིཔུརིསིནྡྲིཡཱནེཝ པཝཏྟིཡཾ ནིརུཛ྄ཛྷནུཔྤཛྫནཀཱནི, ཨིཏྠིཔུརིསོཏི ཙ ཏཏྠ ཝོཧཱརམཏྟམེཝ, ཏསྨཱ མཱཏུགྷཱཏཀོཝ, ན པུརིསགྷཱཏཀོཏི, ཡཐཱ ཏསྶ པཏནརཱུཔཝསེནཱཔཏྟི, ཏཐཱ ཨིདྷཱཔི པཏནརཱུཔཝསེན ཐུལླཙྩཡཾ ཨེཀསནྟཱནཏྟཱཏི ཨཡཾ པཋམཐེརཝཱདེ ཡུཏྟི. དུཏིཡེ ཀིཉྩཱཔི པེཏོ པཏིཏོ, ཡཀྑོ ཙ, ཨཐ ཁོ ཨཧེཏུཀཔཊིསནྡྷིཀཏྟཱ ཨཀུསལཝིཔཱཀསྶ ‘‘ཝཱམེན སཱུཀརོ ཧོཏཱི’’ཏི (དཱི. ནི. ཨཊྛ. ༢.༢༩༦; མཧཱནི. ཨཊྛ. ༡༦༦) ཨེཏྠ ཝུཏྟཡཀྑཱནཾ པཊིསནྡྷི ཝིཡ སབྦརཱུཔཱནཾ སཱདྷཱརཎཏྟཱ, ཨམནུསྶཛཱཏིཀཏྟཱ ཙ ཏིརཙྪཱནརཱུཔེན མཏེ མརཎརཱུཔཝསེན པཱཙིཏྟིཡཾ, ཝཏྠུཝསེན ལཧུཀཱཔཏྟིཡཱ པརིཝཏྟནཱ ཧོཏི ཨེཝ ཏཏྠཛཱཏཀརུཀྑཱདིཚེདནཔཱཙིཏྟིཡཔརིཝཏྟནཾ ཝིཡ. ཨཡམེཝ ཡུཏྟཏརོ, ཏསྨཱ པཙྪཱ ཝུཏྟོ. པཱརཱཛིཀསྶ པན མནུསྶཛཱཏིཀོ ཡཐཱ ཏཐཱ ཝཱ པཏིཏྭཱ ཡཐཱ ཏཐཱ ཝཱ མརཏུ, པཱརཱཛིཀམེཝ གརུཀཏྟཱ. གརུཀཱཔཏྟིཡཱ ཧི ཝིཔརིཝཏྟནཱ ནཏྠཱིཏི ཝུཏྟཾ.

ཐུལླཙྩཡཾ ¶ ¶ ཏིརཙྪཱནེ, མཏེ བྷེདསྶ ཀཱརཎཾ;

སརཱུཔམརཎཾ ཏིསྶོ, ཕུསྶོ མཉྙེཏི ཨཉྙཐཱ.

གཎྛིཔདེ པན ‘‘དུཏིཡཝཱདེ པུཐུཛྫནསྶ པཏིཏྭཱ ཨརཧཏྟཾ པཏྭཱ མརནྟསྶ ཝསེན ཝུཏྟོ’’ཏི ལིཁིཏཾ. ‘‘ཏིརཙྪཱནེ’’ཏི ཨེཏྠ ཀེཙི ཝདནྟི ‘‘དེཝཱ ཨདྷིཔྤེཏཱ’’ཏི. ‘‘སཀསཀརཱུཔེནེཝ མརཎཾ བྷཝཏི ནཱཉྙཐཱ’’ཏི ཙ ཝདནྟི. ཡཀྑཔེཏརཱུཔེན མཏེཔི ཨེསེཝ ནཡོཏི ཐུལླཙྩཡནྟི ཨཏྠོ. ‘‘ཏིརཙྪཱནགཏམནུསྶཝིགྒཧམརཎེ ཝིཡཱ’’ཏི ལིཁིཏཾ. པཧཱརཾ ལདྡྷཱཏི སཏྟཱནཾ མཱརཎཏྠཱཡ ཀཏཏྟཱ ཝུཏྟཾ.

༡༧༧. སཱདྷུ སུཊྛུ མརཏཱུཏི ཝཙཱིབྷེདཾ ཀརོཏི. ཝིསབྷཱགརོགོཏི སརཱིརཊྛོ གཎྜཔཱིལ༹ཀཱདི.

༡༧༨. ཀཱལཱ༹ནུསཱརཱིཏི ཨེཀིསྶཱ ལཏཱཡ མཱུལཾ ཀིར. མཧཱཀཙྪཔེན ཀཏཔུཔྥཾ ཝཱ. ཧཾསཔུཔྥནྟི ཧཾསཱནཾ པཀྑཔཏྟཾ. ཧེཊྛཱ ཝུཏྟནཡེན སཱཧཏྠིཀཱཎཏྟིཀནཡཉྷེཏྠ ཡོཛེཏྭཱ ཀཱཡཝཱཙཱཙིཏྟཏོ སམུཊྛཱནཝིདྷི དསྶེཏབྦོ.

པདབྷཱཛནཱིཡཝཎྞནཱ ནིཊྛིཏཱ.

ཝིནཱིཏཝཏྠུཝཎྞནཱ

༡༨༠. མརཎཏྠིཀཱཝ ཧུཏྭཱཏི ཨིམསྶ ཀཱཡསྶ བྷེདེན སགྒཔཱཔནཱདྷིཔྤཱཡཏྟཱ ཨཏྠཏོ མརཎཏྠིཀཱཝ ཧུཏྭཱ ཨེཝཾཨདྷིཔྤཱཡིནོ མརཎཏྠིཀཱ ནཱམ ཧོནྟཱིཏི ཨཏྟནོ མརཎཏྠིཀབྷཱཝཾ ཨཛཱནནྟཱ ཨཱཔནྣཱ པཱརཱཛིཀཾ. ན ཧི ཏེ ‘‘ཨཏྟནོ ཙིཏྟཔྤཝཏྟིཾ ན ཛཱནནྟཱི’’ཏི ཝུཙྩནྟི. ཝོཧཱརཝསེནཱཏི པུབྦབྷཱགཝོཧཱརཝསེན. སནྣིཊྛཱནེ པནེཏཾ ནཏྠི. པཱསེ བདྡྷསཱུཀརམོཙནེ ཝིཡ ན ཧོཏི. ཡཐཱནུསནྡྷིནཱཏི ཨནྟརཱ ཨམརིཏྭཱཏི ཨཏྠོ. ཨཔྤཊིཝེཀྑིཏྭཱཏི ཨཝིཙཱརེཏྭཱ. ཧེཊྛིམབྷཱགེ ཧི ཀིསྨིཉྩི ཝིཛྫམཱནེ ཝལི པཉྙཱཡཏི. དསྶིཏེཏི ཨུདྡྷརིཏྭཱ ཋཔིཏེ. པཊིབནྡྷནྟི ཏཡཱ པཊིབནྡྷཾ, པརིབྷོགནྟརཱཡཾ སངྒྷསྶ མཱ ཨཀཱསཱིཏི ཨཏྠོ.

༡༨༡-༢. ཡསྨཱ ¶ ཀིརིཡཾ དཱཏུཾ ན སཀྐཱ, ཏསྨཱ ‘‘པཋམཾ ལདྡྷ’’ནྟི ཝུཏྟཾ. པུབྦེཔི ཨཏྟནཱ ལདྡྷཔིཎྜཔཱཏཏོ པཎཱིཏཔཎཱིཏཾ དེནྟོ ཏཏྠཔི ཨཏྟཀཱརིཡཾ ཨདཱསི. ཨསཉྩིཙྩཱཏི ¶ ཨེཏྠ ཨཉྙཾ ཨཱཀཌྜྷནྟསྶ ཨཉྙསྶ པཏནེ སབྦེན སབྦཾ ཨབྷིསནྡྷི ནཏྠི. ན མརཎཱདྷིཔྤཱཡསྶཱཏི པཊིགྷོ ཙ པཡོགོ ཙ ཨཏྠི, ཝདྷཀཙེཏནཱ ནཏྠི. ཨཛཱནནྟསྶཱཏི ཨེཏྠ ‘‘ཝཏྠུཨཛཱནནཝསེན ཨཛཱནནྟསྶ དོསོ ནཏྠི, ཨིདཾ ཀིར ཏེསཾ ནཱནཏྟཾ. ‘ཨསཉྩིཙྩོ ཨཧ’ནྟི པཱལི༹ཡཾ ན དིསྶཏི. ཨཊྛཀཐཱཡཾ ཝུཏྟཏྟཱ ཏཐཱརཱུཔཱཡ པཱལི༹ཡཱ བྷཝིཏབྦ’’ནྟི ཝདནྟི. ནོ ཙེ, ཐུལླཙྩཡནྟི ཨེཏྠ ‘‘དུཀྑཝེདནཱ ཙེ ནུཔྤཛྫཏི, དུཀྐཊམེཝཱ’’ཏི ཝདནྟི, ཝཱིམཾསིཏབྦཾ. ‘‘མུགྒརཱ ནཱམ ཁཱདནདཎྜཀཱ. ཝེམཱ ནཱམ ཏེསཾ ཁཱདནདཎྜཀཱནཾ ཧེཊྛཱ ཙ ཨུཔརི ཙ ཏིརིཡཾ བནྡྷིཏབྦདཎྜཱ’’ཏི ལིཁིཏཾ. ཧེཊྛཱཝ དུཝིདྷཱཔི པཋནྟི. ཧཏྠཔྤཏྟོ ཝིཡ དིསྶཏི ‘‘ཏསྶ ཝིཀྑེཔོ མཱ ཧོཏཱུ’’ཏི ཨུཔཙྪིནྡཏི. ཝིསེསཱདྷིགམཾ བྱཱཀརིཏྭཱ ཏཔྤབྷཝཾ སཀྐཱརཾ ལཛྫཱིཡནྟོ ཨཱཧཱརཾ ཨུཔཙྪིནྡཏི སབྷཱགཱནཾ བྱཱཀཏཏྟཱ. ཏེ ཧི ཀཔྤིཡཁེཏྟཾ ཨཱརོཙེནྟི.

༡༨༦. ཨཀཏཝིཉྙཏྟིཡཱཏི ན ཝིཉྙཏྟིཡཱ. སཱ ཧི ཨནུཉྙཱཏཏྟཱ ཀཏཱཔི ཨཀཏཱ ཝིཡཱཏི ཨཀཏཝིཉྙཏྟི. ‘‘‘ཝདེཡྻཱཐ, བྷནྟེ ཡེནཏྠོ’ཏི ཨེཝཾ ཨཀཏཊྛཱནེ ཝིཉྙཏྟི ཨཀཏཝིཉྙཏྟཱི’’ཏི ལིཁིཏཾ. ཏིཏྠིཡབྷཱུཏཱནཾ མཱཏཱཔིཏཱུནཾ སཧཏྠཱ དཱཏུཾ ན ཝཊྚཏཱིཏི. པིཏུཙྪཱ ནཱམ པིཏུབྷགིནཱི. སཙེཔི ན ཡཱཙནྟི ‘‘ཡཱཙིཏུཾ དུཀྑ’’ནྟི, སཡཾ ཝཱ ཨེཝཾ ཝཏྟུམསཀྐོནྟཱ. ‘‘ཡདཱ ཏེསཾ ཨཏྠོ བྷཝིསྶཏཱི’’ཏི ཨཱབྷོགཾ ཀཏྭཱ ཝཱ. ‘‘‘ཝེཛྫཀམྨཾ ཝཱ ན ཧོཏཱི’ཏི ཝཙནཏོ ཡཱཝ སཏྟམོ ཀུལཔརིཝཊྚོ, ཏཱཝ བྷེསཛྫཾ ཀཱཏུཾ ཝཊྚཏཱི’’ཏི ཝདནྟི. སབྦཔདེསཱུཏི མཧཱམཱཏུཡཱཙཱུལ༹མཱཏུཡཱཏིཨཱདཱིནཾ.

ཝུཏྟནཡེན པརིཡེསིཏྭཱཏི ‘‘སཱམཎེརེཧི ཝཱ’’ཏིཨཱདིནཱ. ‘‘ན ཨཀཏཝིཉྙཏྟིཡཱ’’ཏི ཝདནྟི. ‘‘པཙྩཱསཱིསཏི སཙེ, དུཀྐཊ’’ནྟི ཝདནྟི. ཀཔྤིཡཝསེནཱཏི པུཔྥཾ ཨཱནེཐཱཏིཨཱདིནཱ. ‘‘པཱུཛཾ ཨཀཱསཱི’ཏི ཝུཏྟཏྟཱ སཡཾ གཧེཏུཾ ན ཝཊྚཏཱི’’ཏི ཝདནྟི.

‘‘བྷཎཐཱ’’ཏི ཝུཏྟེ པན ཀཱཏབྦཾ. དྷམྨཉྷི ཝཏྟུཾ ཝཊྚཏི. ནོ ཙེ ཛཱནནྟི, ན པཱདཱ ཨཔནེཏབྦཱ. ཨཝམངྒལནྟི ཧི གཎྷནྟི.

ཙོརནཱགསྶ ¶ ཧི ཨཱམཊྛཾ དིནྣེ ཀུཛ྄ཛྷིསྶཏི, ཨནཱམཊྛཾ ན ཝཊྚཏཱིཏི ཨངྒུལནྟརེ ཐོཀཾ བྷཏྟཾ གཧེཏྭཱ པཏྟེ བྷཏྟཾ སབྦཾ ཨདཱསི, སོ ཏེན ཏུསྶི. ཝརཔོཏྠཀཙིཏྟཏྠརཎནྟི སིབྦིཏྭཱ ཀཱཏབྦཏྠརཎཝིཀཏི. པིཏུརཱཛཱ དམིལ༹སྶ པརཱཛིཏོ རོཧཎེ སོལ༹སཝསྶཱནི ཝསིཏྭཱ མིཏྟཱམཙྩཔརིཝུཏོ ‘‘རཛྫཾ གཎྷཱམཱི’’ཏི ཨཱགནྟྭཱ ཨནྟརཱམགྒེ ཨཔྤམཏྟཀསྶ ཀཱརཎཱ ཨེཀཾ ཨམཙྩཾ ¶ གྷཱཏཱཔེསི. སེསཱ བྷཡེན པལཱཡནྟཱ ཨརཉྙེ ཨནྟརཱམགྒེ ཙོརེཧི ཝིལུཏྟཱ ཧམྦུགལླཀཝིཧཱརཾ གནྟྭཱ ཏཏྠ ཙཱཏུནིཀཱཡིཀཏིསྶཏྠེརོ ཏེསཾ སངྒཧཾ ཀཏྭཱ པུན ཨཱནེཏྭཱ རཉྙོ དསྶེསི, ཏེཧི སདྡྷིཾ རཛྫཾ གཧེཏྭཱ རཱཛཱ ཧམྦུགལླཀཏིསྶཏྠེརསྶ ཨབྷཡགིརིཝིཧཱརཾ ཨཀཱསི. སེསཱཔི ཨེཀེཀཝིཧཱརཾ ཀཱརཱཔེསུཾ ཀིར.

༡༨༧. ཙོརསམཱིཔཾ པེསེནྟོ ‘‘ཝཱལ༹ཡཀྑཝིཧཱརཾ པེསེཏཱི’’ཏི ཨིམིནཱ སདིསོ. ཀསྨཱ? མརཎཱདྷིཔྤཱཡཏྟཱ. ཏལཱ༹ཀཱདཱིསུ མཙྪཱདིགྒཧཎཏྠཾ ཀེཝཊྚཾ ཨཉྙཱཔདེསེན ‘‘ཏལཱ༹ཀཏཱིརཾ གཙྪཱ’’ཏི པཧིཎནྟསྶ པཱཎཱཏིཔཱཏེན བྷཝིཏབྦཾ, ‘‘ཝཱལ༹ཡཀྑཝིཧཱརཾ པཱཧེསཱི’’ཏི ཨིམསྶ སདིསོ. ཀསྨཱ? ‘‘མརཎཱདྷིཔྤཱཡཏྟཱ’’ཏི ཝཙནསྶཱནུལོམཏོ, ཨཊྛཀཐཱཡམྤི ‘‘ཨེཝཾ ཝཱལ༹ཡཀྑམྤཱི’’ཏི ཝུཏྟཏྟཱ.

༡༨༩. ཏཾ ཏཏྲཊྛིཏཾ ཚིནྡནྟནྟི ཏཾ-སདྡོ ཨེཀཙྩེསུ ནཏྠི. ཨིཏརེསུ པཱརཱཛིཀཐུལླཙྩཡཾ ཨཱཔནྣཱཏི ཨཏྠོ. ‘‘ཨིམཾ ཚིནྡིཏྭཱ སཱིགྷཾ གནྟྭཱ སངྒྷསྶ པཏྟཙཱིཝརཾ དསྶཱམཱི’’ཏི ཀུསལཙིཏྟེནཔི ཚིནྡིཏུཾ ན ཝཊྚཏི ཨནནུཉྙཱཏཏྟཱ. ཨཉྙསྶ པན བྷིཀྑུནོ ཝཊྚཏི ཨནུཉྙཱཏཏྟཱ.

༡༩༠. ཀཐཾ? ཀུཊིརཀྑཎཏྠཉྷི བྷགཝཏཱ པཊགྒིདཱནཱདི ཨནུཉྙཱཏཾ, ཀུཊི ནཱམེསཱ བྷིཀྑཱུནཾ ཨཏྠཱཡ. ཏསྨཱ ‘‘བྷིཀྑུརཀྑཎཏྠཾ ཨཉྙསྶ བྷིཀྑུསྶ ཝཊྚཏཱི’ཏི ཝཏྟབྦམེཏྠ ནཏྠཱི’’ཏི ཝུཏྟཾ. ཡདི ཨེཝཾ ཨཙྪིནྣཙཱིཝརསྶ ནགྒབྷཱཝཔྤཊིཙྪཱདནཏྠཾ བྷཱུཏགཱམཔཱཏབྱཏཱ བྷགཝཏཱ ཨནུཉྙཱཏཱ, ཛཱིཝིཏརཀྑཎཏྠཉྩ སཔྤདཊྛཀཱལེ ཨནུཉྙཱཏཾ, ཏསྨཱ ‘‘ཨཔི ཛཱིཝིཏཾ པརིཙྩཛིཏབྦཾ, ན ཙ རུཀྑོ ཝཱ ཚིནྡིཏབྦོ’’ཏིཨཱདི ན ཝཏྟབྦཾ སིཡཱ, ཏསྨཱ ཏཾ ནིདསྶནཾ ཨཔྤམཱཎཾ, ཨཊྛཀཐཱཙརིཡོ ཨེཝེཏྠ པམཱཎཾ. ཨེཏྠ པནཱཡཾ ཨཱཙརིཡསྶ ཏཀྐོ – ཨརིཡཔུགྒལེསུཔི སཏྟཱ ནགྒིཡཾ པསྶིཏྭཱ ཨཔྤསཱདཾ ཀཏྭཱ ནིརཡཱུཔགཱ བྷཝིསྶནྟི ¶ , ཏཐཱ སཔྤཱ ཙ ཌཾསིཏྭཱ, ཏེསཾ པཱཔཝིམོཙནཏྠཾ བྷཱུཏགཱམཔཱཏབྱཏཱ ཨནུཉྙཱཏཱ. དཱནཔཏཱིནཾ ཙིཏྟརཀྑཎཏྠཾ པཊགྒིདཱནཱདི. ཨཉྙཐཱ ལོཀསྶ པུཉྙནྟརཱཡོ, སངྒྷསྶ ཙ ལཱབྷནྟརཱཡོ ཧོཏི. ཝདྷཀསྶ པན ཙིཏྟཧིཏཀརཎཾ ནཏྠི, ཏཾ པན ཨཝཱིཏིཀྐམཾ, ཛཱིཝིཏཔརིཙྩཛནཾ པསྶིཏྭཱ ཝཱ ‘‘ཨཧོ དུཀྐརཾ ཀཏ’’ནྟི པསཱདམེཝ ལབྷེཡྻུནྟི ཨཏྟནོ ན ཝཊྚཏི, ཨཉྙསྶ ཝཊྚཏི. ཨཉྙཐཱ ཏིཏྠིཡཱནཾ ཨསདྡྷམྨསིདྡྷིཡཱཏི. གཎྛིཔདེ པན ‘‘ཛཱིཝིཏཏྠཱཡ རུཀྑཾ ཚིནྡནྟསྶ ཨཏྟསིནེཧཝསེན ཚིནྡནཏོ ཨཀུསལཏྟཱ ན ཝཊྚཏི, ཨཉྙསྶ ཝཊྚཏཱི’’ཏི ལིཁིཏཾ. ཨནེཀེསུ རུཀྑེན ཨོཏྠཏེསུ, ཨོཔཱཏེ ཝཱ པཏིཏེསུ ཨཉྙེན ཨཉྙསྶཏྠཱཡ རུཀྑཚེདནཱདི ¶ ཀཱཏུཾ ཝཊྚཏི, ཀསྨཱ? པརཔརིཏྟཱཎཱདྷིཔྤཱཡཏོཏི. པརིཏྟནྟི རཀྑཎཾ, ཏཾ དསྶེཏུཾ ‘‘སམནྟཱ བྷཱུམིཏཙྪན’’ནྟིཨཱདི ཝུཏྟཾ.

༡༩༡. ཏཱིཧི མཱརིཏེ པན ཝིསངྐེཏནྟི ཨེཏྠ ཏཱིསུ ཨེཀེན མཱརིཏེཔི ‘‘ཁེཏྟམེཝ ཨོཏིཎྞཏྟཱ པཱརཱཛིཀ’’ནྟི ཝུཏྟཏྟཱ ཏཡོཔི ཨེཀཏོ ཧུཏྭཱ མཱརེནྟི ཙེ, ཨཱཔཛྫཏི, ཏེནེཝ ཝུཏྟཾ ‘‘པརིཙྪེདབྦྷནྟརེ ཝཱ ཨཝིསངྐེཏ’’ནྟི. ‘‘པརིཙྪེདཱཏིཀྐམེ པན སབྦཏྠ ཝིསངྐེཏཾ ཧོཏཱི’’ཏི ཝུཏྟཏྟཱ དྭིནྣཾ བལཾ གཧེཏྭཱ ཏཏིཡོ ཙེ མཱརེཏི ཨཱཔཛྫཏི ཝིཡ དིསྶཏི, ཝཱིམཾསིཏབྦཾ. ‘‘དྭེ མཱརེནྟཱུ’’ཏི ཝུཏྟེ ཨེཀེན ཝཱ དྭཱིཧི ཝཱ མཱརིཏེ པཱརཱཛིཀནྟི ‘‘དྭིནྣཾ པཧཱརཱནཾ མརཎེ སཏི དྭེ མཱརིཏཱ ནཱམ ཧོནྟི, ཨསཏི ཨེཀོཝ ཧོཏི, ཏསྨཱ ཝིཛཱནིཏབྦ’’ནྟི ཝདནྟི.

ཏཏིཡཔཱརཱཛིཀཝཎྞནཱ ནིཊྛིཏཱ.

༤. ཙཏུཏྠཔཱརཱཛིཀཾ

ཝགྒུམུདཱཏཱིརིཡབྷིཀྑུཝཏྠུཝཎྞནཱ

༡༩༣. ཙཏུཏྠེ ཝགྒུ ཙ སཱ མོདཡཏི ཙ སཏྟེཏི ཝགྒུམུདཱ. ‘‘ཝགྒུམདཱ’’ཏིཔི པཱཋོ, ཏསྶ ཝགྒུ ཙ སཱ པསནྣསུདྡྷཏརངྒསམིདྡྷཏྟཱ སུཁུམཱ ཙཱཏི ཨཏྠོ ཛཱིཝིཏཝགྒུཏྠནིཏཱ ཛཱིཝིཏཏྠནྟི ནཱིལུཔྤལནྟིཨཱདཱིསུ ཝིཡ. མདསྶཱཏི ཙ བཧུཁཛྫབྷོཛྫཔཱནཱདིསམིདྡྷཱ ནདཱི ཚཎདིཝསེསཱུཏི ནིརུཏྟི ཝེདིཏབྦཱ. ཝགྒུ པརིསུདྡྷཱཏི ལོཀེན སམྨཏཱཏི ཀིར ཨཏྠོ. བྷཱསིཏོ བྷཝིསྶཏཱིཏི པཱཋསེསོ.

༡༩༤-༥. ཝཎྞཝཱ ¶ ཝཎྞཝནྟོ ཝཎྞཝནྟཱནཱིཏིཔི སིཛ྄ཛྷཏི ཀིར བཧུཝཙནེན. ཡསྨཱ ཨིནྡྲིཡཱནཾ ཨཱུནཏྟཾ, པཱུརཏྟཾ ཝཱ ནཏྠི, ཏསྨཱ ‘‘ཨབྷིནིཝིཊྛོཀཱསསྶ པརིཔུཎྞཏྟཱ’’ཏི ཝུཏྟཾ. ཚཊྛསྶ ཨབྷིནིཝིཊྛོཀཱསོ ཧདཡཝཏྠུ. ཙཏུཨིརིཡཱཔཐཙཀྐེ པཱཀཏིནྡྲིཡེ. ཨཏྟནོ དཧཏཱིཏི ཨཏྟནཱ དཧཏི, ཨཏྟནཱ པཊིཝིདྡྷཾ ཀཏྭཱ པཝེདེཏཱིཏི ཨདྷིཔྤཱཡོ. སནྟནྟི ཝཏྟམཱནཾ. གོཏྲབྷུནོཏི གོཏྟམཏྟཾ ཨནུབྷཝཏྟཱ ནཱམམཏྟཀམེཝཱཏི ཨཏྠོ.

སཝིབྷངྒསིཀྑཱཔདཝཎྞནཱ

༡༩༧. པདབྷཱཛནེ ¶ ‘‘ཏིསྶོ ཝིཛྫཱ’’ཏི ཝུཏྟཏྟཱ ཨརཱུཔཱཝཙརཛ྄ཛྷཱནཱནི པཊིཀྑིཏྟཱནཱིཏི ཙེ? ན, ཏཏྠེཝ ‘‘ཡཾ ཉཱཎཾ, ཏཾ དསྶནཾ, ཡཾ དསྶནཾ, ཏཾ ཉཱཎ’’ནྟི དསྶནཔདེན ཝིསེསེཏྭཱ ཝུཏྟཏྟཱ, ཏསྨཱ ཨེཝ ཨཊྛཀཐཱཡཾ ‘‘ཝིཛྫཱསཱིསེན པདབྷཱཛནཾ ཝུཏྟ’’ནྟི ཝུཏྟཾ. དྷུརཾ ཀཏྭཱཏི པུརིམཾ ཀཏྭཱ.

པདབྷཱཛནཱིཡཝཎྞནཱ

༡༩༩. ཨནཱགཏེ ཨུཔྤཛྫནཀརཱགཱདཱིནཾ ཀཱརཎཏྟཱ རཱགཱདཡོཝ ནིམིཏྟཾ ནཱམ. ཏིསྶནྣཉྩ ཝིཛྫཱནཾ ཨཉྙཏརཾ སནྡྷཱཡ ‘‘ཝིཛྫཱནཾ ལཱབྷཱིམྷཱི’’ཏི བྷཎཏི, པཱརཱཛིཀཾ, ན ཝཏྠུཝིཛྫཱདཱིནཾ ཀིལེསནཧཱནམེཝ ཝུཏྟཾ, ཏཾཁཎཏྟཱ ཨུཏྟརིམནུསྶདྷམྨཔྤཝཏྟི ན ཧོཏཱིཏི ཙེ? ན, མགྒཀིཙྩདཱིཔནཏོ. ཏེནེཝ ‘‘མགྒེན ཝིནཱ ནཏྠཱི’’ཏིཨཱདི ཝུཏྟཾ. ཙིཏྟནྟི ཙིཏྟསྶ ཝིགཏནཱིཝརཎཏཱཏི ཨཏྠོ. ‘‘ཡཱཝཉྩ ཝིཛྫཱ ཨནཱགཏཱ, ཏཱཝ ཝིཔསྶནཱཉཱཎསྶ ལཱབྷཱིམྷཱི’ཏི ཝདནྟོ ཡདི ལོཀུཏྟརཾ སནྡྷཱཡ ཝདཏི, སོཔི ཙ ཏཐཱ ཛཱནཱཏི, པཱརཱཛིཀམེཝ ལོཀུཏྟརསྶཔི ཏཾནཱམཏྟཱ’’ཏི ཝདནྟི. ‘‘ཨཝིསེསེནཱཔི ཝདཏོ པཱརཱཛིཀཾ ཝུཏྟནྟི ལོཀུཏྟརཾ སནྡྷཱཡ ཝདཏོ ‘པཱརཱཛིཀ’ནྟི ཝཏྟུཾ ཡུཛྫཏི. ཡཐཱ ཀིཾ ‘ཝིཛྫཱནཾ ལཱབྷཱིམྷཱི’ཏི བྷཎནྟོཔི པཱརཱཛིཀམེཝཱ’ཏི ཝུཏྟཊྛཱནེ ཝཏྠུཝིཛྫཱདཱིནཾ སམྦྷཝེཔི ཏཱསཾ ཨནདྷིཔྤེཏཏྟཱ པཱརཱཛིཀཾ ཧོཏི, ཨེཝམིདྷཱཔི. ན སཀྐཱ ཨཉྙཾ པམཱཎཾ ཀཱཏུནྟི ཨཏྟནོ གུཎམཱརོཙེཏུཀཱམོ ལོཀིཡེན སམྨིསྶཾ ཨཏྠཔཊིསམྦྷིདཾ ཝདཏོ པཱརཱཛིཀནྟི པམཱཎཾ ཀཱཏུཾ ན སཀྐཱ, ཨིཏརཐཱ ཧོཏཱི’’ཏི ཨཔརེཧི ཝུཏྟཾ, ‘‘ཏཾ པུབྦཱཔརཝིརུདྡྷཾ, ཏསྨཱ ཝིཛྫཱནིདསྶནཾ ཨིདྷ ཨནིདསྶནཾ སཱསནེ ཝཏྠུཝིཛྫཱདཱིནཾ ཝིཛྫཱཝིདྷཱནཱབྷཱཝཱ. བྷགཝཏཱ ཝིབྷཏྟཁེཏྟཔདེ ཝཱ ཏེསཾ པརིཡཱཡཝཙནཱནཾ ཨནཱམཊྛཏྟཱ ན སཀྐཱ ཨཉྙཾ པམཱཎཾ ཀཱཏུ’’ནྟི ལིཁིཏཾ. ‘‘པཊིསམྦྷིདཱནཾ ལཱབྷཱིམྷཱི’ཏི ཝུཏྟེ པརིཡཱཡེན ¶ ཝུཏྟཏྟཱ ཐུལླཙྩཡཾ ཡུཏྟ’’ནྟི ཝདནྟི, ཝིཙཱརེཏབྦཾ. ཝཱིམཾསིཏྭཱ གཧེཏབྦནྟི ‘‘ཡོ ཏེ ཝིཧཱརེ ཝསཏཱི’’ཏིཨཱདཱིཧི སཾསནྡནཏོ པརིཡཱཡཝཙནཏྟཱ ཐུལླཙྩཡཾ ཝུཏྟཾ. ‘‘ནིརོདྷསམཱཔཏྟིཾ སམཱཔཛྫཱམཱི’ཏི ཝཱ ‘ལཱབྷཱིམྷཱཧཾ ཏསྶཱ’ཏི ཝཱ ཝདཏོཔཱི’’ཏི ཝུཏྟཝཙནམྤི ‘‘སཙེ པནསྶེཝཾ ཧོཏཱི’’ཏིཨཱདིཝཙནམྤི ཨཏྠཏོ ཨེཀམེཝ, སོཔི ཧི ཨཏྟནོ ཝིསེསཾ ཨཱརོཙེཏུམེཝ ཝདཏི. ‘‘ཡོ ཏེ ཝིཧཱརེ ཝསཏཱི’ཏིཨཱདཱིསུ ཨཧཾ-ཝཙནཱབྷཱཝཱ པརིཡཱཡོ ཡུཛྫཏི, ཨིདྷ པན ‘ལཱབྷཱིམྷཱཧཾ ཏསྶཱ’ཏི ཨཏྟཱནཾ ནིདྡིསཏི, ཏསྨཱ པཱརཱཛིཀཾ ཨཱཔཛྫིཏུཾ ཡུཏྟཾ ཝིཡཱ’’ཏི ཝདནྟི. ‘‘མཧཱཔཙྩརིཡཱདིཝཙནཾ ཨུཏྟརིམནུསྶདྷམྨེསུ ཨེཀོཔི ན ཧོཏི, ཏསྨཱ པརིཡཱཡེན ཝུཏྟཏྟཱ ན ཧོཏཱི’’ཏི ¶ ཝདནྟི, སུཊྛུ ཨུཔཔརིཀྑིཏབྦཾ. ཕལསཙྪིཀིརིཡཱ-པདཏོ པཊྛཱཡ ཨེཝ པཱཋོ གཧེཏབྦོ, ཕལསཙྪིཀིརིཡཱཡཔི ཨེཀེཀམྤི ཨེཀེཀཕལཝསེན པཱརཱཛིཀཾ ཝེདིཏབྦཾ.

རཱགསྶ པཧཱནནྟིཨཱདིཏྟིཀེ ཀིལེསཔྤཧཱནམེཝ ཝུཏྟཾ, ཏཾ པན ཡསྨཱ མགྒེན ཝིནཱ ནཏྠི. ཏཏིཡམགྒེན ཧི རཱགདོསཱནཾ པཧཱནཾ, ཙཏུཏྠེན མོཧསྶ, ཏསྨཱ ‘‘རཱགོ མེ པཧཱིནོ’’ཏིཨཱདཱིནི ཝདཏོཔི པཱརཱཛིཀཾ. རཱགཱ ཙིཏྟཾ ཝིནཱིཝརཎཏཱཏིཨཱདིཏྟིཀེ ལོཀུཏྟརམེཝ ཝུཏྟཾ, ཏསྨཱ ‘‘རཱགཱ མེ ཙིཏྟཾ ཝིནཱིཝརཎ’’ནྟིཨཱདཱིནི ཝདཏོ པཱརཱཛིཀམེཝཱཏི. ཨཀུཔྤདྷམྨཏྟཱཏི ཀེཙི ཨུཏྟརཝིཧཱརཝཱསིནོ. ཀསྨཱ ན ཧོཏཱིཏི ཙེ? ‘‘ཨིཏི ཛཱནཱམི, ཨིཏི པསྶཱམཱི’’ཏི ཝཏྟམཱནཝཙནེནེཝ མཱཏིཀཱཡཾ ཝུཏྟཏྟཱ. ཡདི ཨེཝཾ པདབྷཱཛནེ ‘‘སམཱཔཛྫིཾ, སམཱཔནྣོ’’ཏིཨཱདིནཱ ཝུཏྟཏྟཱ ‘‘ཨཏཱིཏཏྟབྷཱཝེ སོཏཱཔནྣོམྷཱི’’ཏི ཝདཏོཔི ཧོཏཱུཏི ཙེ? ན, ཨཉྙཐཱ ཨཏྠསམྦྷཝཏོ. ཀཐཾ? ཨདྡྷཱཔཙྩུཔྤནྣཝསེན ཝཏྟམཱནཏཱ གཧེཏབྦཱཏི ཉཱཔནཏྠཾ ཝུཏྟཾ, ན ཨཏཱིཏཏྟབྷཱཝཾ. ཨཏཱིཏཏྟབྷཱཝོ ཧི པརིཡཱཡེན ཝུཏྟཏྟཱ ‘‘ཐུལླཙྩཡ’’ནྟི ཝུཏྟནྟི ཨཱཙརིཡཱ.

༢༠༠. ‘‘སཙེཔི ན ཧོཏི, པཱརཱཛིཀམེཝཱ’’ཏི ཨཊྛཱནཔརིཀཔྤཝསེན ཝུཏྟཾ ཀིར. ‘‘ཨིཏི ཝཱཙཱ ཏིཝངྒིཀཱ’’ཏི ཝཀྑཏི. ནཏྠེཏནྟི པུརིམེ སཏི པཙྪིམསྶཱབྷཱཝཱ སམཱཔཛྫིཾ, སམཱཔནྣོཏི ཨིམེསཾ ཀིཉྩཱཔི ཨཏྠཏོ ཀཱལཝིསེསོ ནཏྠི, ཝཙནཝིསེསོ པན ཨཏྠི ཨེཝ.

༢༠༧. ཨུཀྑེཊིཏོཏི ཨུཏྟཱསིཏོ. ཁིཊ ཨུཏྲཱསནེ.

སུདྡྷིཀཝཱརཀཐཱཝཎྞནཱ ནིཊྛིཏཱ.

ཝཏྟུཀཱམཝཱརཀཐཱཝཎྞནཱ

ཝིཉྙཏྟིཔཐེཏི ¶ ཝིཛཱནནཊྛཱནེ, ཏེན ‘‘ཝིཉྙཏྟིཔཐམཏིཀྐམིཏྭཱ ཋིཏོ བྷིཀྑུ དིབྦཱཡ སོཏདྷཱཏུཡཱ སུཏྭཱ ཛཱནཱཏི, ན པཱརཱཛིཀནྟི དཱིཔེཏཱི’’ཏི ཝུཏྟཾ. ཛྷཱནཾ ཀིར སམཱཔཛྫིནྟི ཨེཏྠ སོ ཙེ ‘‘ཨེས བྷིཀྑུ ཨཏྟནོ གུཎདཱིཔནཱདྷིཔྤཱཡེན ཨེཝཾ ཝདཏཱི’’ཏི ཛཱནཱཏི, པཱརཱཛིཀམེཝ. ཨཉྙཐཱ ཛཱནཱཏཱིཏི ཙེ? པཱརཱཛིཀཙྪཱཡཱ ན དིསྶཏཱིཏི ཨཱཙརིཡོ.

ཝཏྟུཀཱམཝཱརཀཐཱཝཎྞནཱ ནིཊྛིཏཱ.

ཨནཱཔཏྟིབྷེདཀཐཱཝཎྞནཱ

ཨནུལླཔནཱདྷིཔྤཱཡོཏི ¶ ཡདི ཨུལླཔནཱདྷིཔྤཱཡོ བྷཝེཡྻ, དུཀྐཊམེཝཱཏི ཨཔརེ. ‘‘ཏཾ པརཏོ ‘ནཱཝུསོ, སཀྐཱ པུཐུཛྫནེན ཨདྷིཝཱསེཏུ’ནྟི ཝཏྠུནཱ སཾསནྡིཏྭཱ གཧེཏབྦ’’ནྟི ཝུཏྟཾ.

པདབྷཱཛནཱིཡཝཎྞནཱ ནིཊྛིཏཱ.

ཝིནཱིཏཝཏྠུཝཎྞནཱ

༢༢༥-༦. དུཀྐར ཨཱགཱར ཨཱཝཊཀཱམ ཨབྷིརཏིཝཏྠཱུསུ ‘‘ཡདི ཨུལླཔནཱདྷིཔྤཱཡོ བྷཝེཡྻ, པཱརཱཛིཀ’’ནྟི ཝདནྟི, ཀཱརཎཾ པན དུདྡསཾ, ཐུལླཙྩཡཾ ཝུཏྟཾ ཝིཡ, ཝཱིམཾསིཏབྦཾ. ཡཱནེན ཝཱ ཨིདྡྷིཡཱ ཝཱ གཙྪནྟོཔི པཱརཱཛིཀཾ ནཱཔཛྫཏཱིཏི པདསཱ གམནཝསེནེཝ ཀཏིཀཱཡ ཀཏཱཡ ཡུཛྫཏི. ‘‘ཨཔུབྦཾཨཙརིམཾ གཙྪནྟོཏི ཧཏྠཔཱསཾ ཨཝིཛཧིཏྭཱ ཨཉྙམཉྙསྶ ཧཏྠཾ གཎྷནྟོ ཝིཡ གཙྪནྟོ’’ཏི ཝུཏྟཾ. ཨུཊྛེཐ ཨེཐ གཙྪཱམཱཏི ཨེཝཾ སཧགམནེ པུབྦཱཔརཱ གཙྪནྟོཔི ནཱཔཛྫཏཱིཏི ཨཱཙརིཡསྶ ཏཀྐོ. ཝསནྟསྶཱཏི ཏཐཱ ཝསནྟོ ཙེ ཨུཔཱསཀེན དིསྶཏི, པཱརཱཛིཀོ ཧོཏི. ‘‘རཏྟིཾ ཝསིཏྭཱ གཙྪནྟོ ན པཱརཱཛིཀོ’’ཏི ཝུཏྟཾ. ནཱནཱཝེརཛྫཀཱཏི ནཱནཱཛནཔདཝཱསིནོ. སངྒྷལཱབྷོཏི ཡཐཱཝུཌྜྷཾ ཨཏྟནོ པཱཔུཎནཀོཊྛཱསོ.

༢༢༨. ཨིདྷཱཏི ‘‘ཀོ ནུ ཁོ’’ཏིཨཱདིནཱ ཝུཏྟེ པཉྷཱཀམྨེ. དྷམྨདྷཱཏུ སབྦཉྙུཏཉྙཱཎཾ.

༢༣༢. ན ¶ ཨུཔྤཊིཔཱཊིཡཱཏི ན སཱིཧོཀྐནྟཝསེན ཨནུསྶརི. ཏསྨཱ ཨནྟརཱབྷཝབྷཱུཏཱ ཨེཀཱ ཨེཝ ཛཱཏཱིཏི པཊིཝིཛ྄ཛྷཏཱིཏི ཨཏྠོ.

ནིགམནཝཎྞནཱ

༢༣༣. ཙཏུཝཱིསཏཱིཏི ཨེཏྠ མཱཏུགྷཱཏཀཔིཏུགྷཱཏཀཨརཧནྟགྷཱཏཀཱ ཏཏིཡཔཱརཱཛིཀཾ ཨཱཔནྣཱ. བྷིཀྑུནིདཱུསཀོ, ལམྦིཨཱདཡོ ཙ ཙཏྟཱརོ པཋམཔཱརཱཛིཀཾ ཨཱཔནྣཱ ཨེཝཱཏི ཀཏྭཱ ཀུཏོ ཙཏུཝཱིསཏཱིཏི ཙེ? ན, ཨདྷིཔྤཱཡཱཛཱནནཏོ. མཱཏུགྷཱཏཀཱདཡོ ཧི ཙཏྟཱརོ ཨིདྷཱནུཔསམྤནྣཱ ཨེཝ ཨདྷིཔྤེཏཱ, ལམྦིཨཱདཡོ ཙཏྟཱརོ ཀིཉྩཱཔི པཋམཔཱརཱཛིཀེན སངྒཧིཏཱ, ཡསྨཱ ¶ ཨེཀེན པརིཡཱཡེན མེཐུནདྷམྨཔཊིསེཝིནོ ན ཧོནྟི, ཏསྨཱ ཝིསུཾ ཝུཏྟཱ. ‘‘ཨེཀཀམྨཾ ཨེཀུདྡེསོ སམསིཀྑཏཱ’’ཏི ཨེཝཾ ཝུཏྟསཾཝཱསསྶ ཨབྷབྦཏཱམཏྟཾ སནྡྷཱཡ ཝུཏྟཾ ‘‘ཡཐཱ པུརེ ཏཐཱ པཙྪཱ’’ཏི. ཨཉྙཐཱ ནེསཾ སམཉྙཱཡཔཊིཉྙཱཡབྷིཀྑུབྷཱཝོཔི ནཏྠཱིཏི ཨཱཔཛྫཏི.

ཙཏུཏྠཔཱརཱཛིཀཝཎྞནཱ ནིཊྛིཏཱ.

པཱརཱཛིཀཀཎྜཝཎྞནཱ ནིཊྛིཏཱ.

༢. སངྒྷཱདིསེསཀཎྜོ

༡. སུཀྐཝིསྶཊྛིསིཀྑཱཔདཝཎྞནཱ

༢༣༥. ‘‘ཨོཀྐམནྟཱན’’ནྟི ¶ ¶ པཱཋོ. ཨེཏྠཱཧ – ‘‘ཡོ པན བྷིཀྑཱུ’’ཏི ཀཱརཀོ ཨིདྷ ཀསྨཱ ན ནིདྡིཊྛོཏི? ཨབྷི-ནིདྡེསེན ཨིམསྶ སཱཔེཀྑཱབྷཱཝདསྶནཏྠཾ. ཀཐཾ? ཀཎྜུཝནཱདིཨདྷིཔྤཱཡཙེཏནཱཝསེན ཙེཏེནྟསྶ ཀཎྜུཝནཱདིཨུཔཀྐམེན ཨུཔཀྐམནྟསྶ, མེཐུནརཱགཝསེན ཨཱུརུཨཱདཱིསུ དུཀྐཊཝཏྠཱུསུ, ཝཎཱདཱིསུ ཐུལླཙྩཡཝཏྠཱུསུ ཙ ཨུཔཀྐམནྟསྶ སུཀྐཝིསྶཊྛིཡཱ སཏིཔི ན སངྒྷཱདིསེསོ. མོཙནསྶཱདསངྑཱཏཱདྷིཔྤཱཡཱཔེཀྑཱཝ སུཀྐཝིསྶཊྛི སཏི ཨུཔཀྐམེ, ན ཨཉྙཐཱ ‘‘ཨནཱཔཏྟི ན མོཙནཱདྷིཔྤཱཡསྶཱ’’ཏི ཝཙནཏོ. ཏསྨཱ ཏདཏྠདསྶནཏྠཾ ཨིདྷ ཀཱརཀོ ན ནིདྡིཊྛོ, ཨཉྙཐཱ ‘‘ཡོ པན བྷིཀྑུ སཉྩེཏནིཀཾ སུཀྐཝིསྶཊྛིཾ ཨཱཔཛྫེཡྻཱ’’ཏི ཀཱརཀེ ནིདྡིཊྛེ ‘‘ཙེཏེཏི ན ཨུཔཀྐམཏི མུཙྩཏི, ཨནཱཔཏྟཱི’’ཏི ཝུཏྟཝཙནཝིརོདྷོ. ‘‘སཉྩེཏནིཀཱཡ སུཀྐཝིསྶཊྛིཡཱ ཨཉྙཏྲ སུཔིནནྟཱ’’ཏི བྷུམྨེ ནིདྡིཊྛེཔི སོཝ ཝིརོདྷོ ཨཱཔཛྫཏི, ཏསྨཱ ཏདུབྷཡཝཙནཀྐམཾ ཨཝཏྭཱ ‘‘སཉྩེཏནིཀཱ སུཀྐཝིསྶཊྛི ཨཉྙཏྲ སུཔིནནྟཱ’’ཏི ཝུཏྟཾ. ཏཏྠ ནིམིཏྟཏྠེ བྷུམྨཝཙནཱབྷཱཝཏོ ཧེཏུཏྠནིཡམོ ན ཀཏོ ཧོཏི. ཏསྨིཾ ཨཀཏེ སཉྩེཏནིཀཱ སུཀྐཝིསྶཊྛི ཨཉྙཏྲ སུཔིནནྟཱ སངྒྷཱདིསེསཱཔཏྟི, ཨུཔཀྐམེ ཨསཏི ཨནཱཔཏྟཱིཏི ཨཡམཏྠོ དཱིཔིཏོཏི ཝེདིཏབྦཾ.

༢༣༦-༧. སཉྩེཏནིཀཱཏི ཨེཏྠ པཋམཝིགྒཧེན ཨུཔསགྒསྶ སཱཏྠཀཏཱ དསྶིཏཱ, དུཏིཡེན ཨིཀཔཙྩཡསྶ. ཝཱཏཔིཏྟསེམྷརུཧིརཱདིཨཱསཡབྷེདཏོཏི ཨཏྠོ. དྷཱཏཱུཏི ཨེཏྠ ‘‘པཐཝཱིདྷཱཏུཨཱདཡོ ཙཏསྶོ, ཙཀྑུདྷཱཏུཨཱདཡོ ཝཱ ཨཊྛཱརསཱ’’ཏི གཎྛིཔདེ ལིཁིཏཾ. ཝཏྠིསཱིསནྟི ཝཏྠིཔུཊསྶ སཱིསཾ. ‘‘ཨངྒཛཱཏསྶ མཱུལཾ ཨདྷིཔྤེཏཾ, ན ཨགྒསཱིས’’ནྟི ཝདནྟི. ཏཐེཝཱཏི ‘‘ནིམིཏྟེ ཨུཔཀྐམཏོ’’ཏིཨཱདིཾ གཎྷཱཏི. ཏཏོ མུཙྩིཏྭཱཏི ‘‘ན སཀལཀཱཡཏོ, ཏསྨཱ པན ཋཱནཱ ཙུཏམཏྟེ ཧོཏཱུ’’ཏི གཎྛིཔདེ ལིཁིཏཾ. ‘‘དཀསོཏཾ ཨོཏིཎྞམཏྟེ’’ཏི ཨིམིནཱ ན སམེཏཱིཏི ཙེ ¶ ? ཏཏོ དཀསོཏོརོཧཎཉྩེཏྠཱཏིཨཱདི ཝུཙྩཏི. ཏསྶཏྠོ – ནིམིཏྟེ ཨུཔཀྐམཾ ཀཏྭཱ སུཀྐཾ ཋཱནཱ ཙཱཝེཏྭཱ པུན ཝིཔྤཊིསཱརཝསེན དཀསོཏོརོཧཎཾ ནིཝཱརེཏུཾ ཨདྷིཝཱསེམཱིཏི. ཏཏོ བཧི ནིཀྑམནྟེ ཨདྷིཝཱསེཏུཾ ན སཀྐཱ, ཏཐཱཔི ཨདྷིཝཱསནཱདྷིཔྤཱཡེན ཨདྷིཝཱསེཏྭཱ ཨནྟརཱ དཀསོཏཏོ ¶ ཨུདྡྷཾ ནིཝཱརེཏུཾ ཨསཀྐུཎེཡྻཏཱཡ ‘‘ཨནིཀྑནྟེ ཝཱ’’ཏི ཝུཏྟཾ. ཀསྨཱ? ཋཱནཱ ཙུཏཉྷི ཨཝསྶཾ དཀསོཏཾ ཨོཏརཏཱིཏི ཨཊྛཀཐཱདྷིཔྤཱཡོ གཎྛིཔདཱདྷིཔྤཱཡེན སམེཏི. ཏཏོ མུཙྩིཏྭཱཏི སཀཊྛཱནཏོ. སཀསརཱིརཏོ ཧི བཧི ནིཀྑནྟམེཝ ཧོཏི, ཏཏོ ‘‘བཧི ནིཀྑནྟེ ཝཱ ཨནིཀྑནྟེ ཝཱ’’ཏི ཝཙནཾ ཝིརུཛ྄ཛྷེཡྻ. ཡསྨཱ པན ཏམྷཱ ཏམྷཱ སརཱིརཔདེསཱ ཙུཏཾ ཨཝསྶཾ དཀསོཏཾ ཨོཏརཏི, ཏསྨཱ ཝུཏྟཾ ‘‘དཀསོཏཾ ཨོཏིཎྞམཏྟེ’’ཏི, ཨིམིནཱ ཙ ཨཱཔཏྟིཡཱ པཱཀཊཀཱལཾ དསྶེཏི, ཀིཾ ཝུཏྟཾ ཧོཏི? མོཙནསྶཱདེན ནིམིཏྟེ ཨུཔཀྐམཏོ སུཀྐཾ བཧུཏརམྤི སརཱིརཔདེསཱ ཙུཏཾ ཏཏྠ ཏཏྠ ལགྒཱཝསེསཾ ཡཏྟཀཾ ཨེཀཱ ཁུདྡཀམཀྑིཀཱ པིཝེཡྻ, ཏཏྟཀེ དཀསོཏཾ ཨོཏིཎྞམཏྟེ སངྒྷཱདིསེསཱཔཏྟི. ཝུཏྟཉྷི ཀངྑཱཝིཏརཎིཡཾ (ཀངྑཱ. ཨཊྛ. སུཀྐཝིསྶཊྛིསིཀྑཱཔདཝཎྞནཱ) ‘‘དཀསོཏཾ ཨནོཏིཎྞེཔི སངྒྷཱདིསེསོ’’ཏིཨཱདི. ཏཏྟཀསྶ བཧི ནིཀྑམནཾ ཨསལླཀྑེནྟོ ‘‘ཙེཏེཏི ཨུཔཀྐམཏི ན མུཙྩཏི, ཨཱཔཏྟི ཐུལླཙྩཡསྶཱ’’ཏི ཝཙནཏོ ཐུལླཙྩཡནྟི སཉྙཱཡ དེསེནྟོཔི ན མུཙྩཏི, པསྶཱཝམྤི ཝཎྞཏཾ པསྶིཏྭཱ ཝཏྠིཀོསགཏསྶ པིཙྪིལཏཱཡ ཝཱ ཉཏྭཱ སངྒྷཱདིསེསཏོ ཝུཊྛཱཏབྦཾ. ཨཡམེཏྠ ཏཏིཡཏྠེརཝཱདེ ཡུཏྟི. སབྦཱཙརིཡཱ ཨིམེ ཨེཝ ཏཡོ ཐེརཱ, ཏེསམྤི དཀསོཏོརོཧཎཾ ནིམིཏྟེ ཨུཔཀྐམནནྟི ཨཡཾ དུཏིཡོ ཝིནིཙྪཡོ སཱདྷཱརཎཏོ ཨེཏྠ, ཨེཝཾ ཨུཔཏིསྶཏྠེརོ ཝདཏི ཀིར.

ཋཱནཱ ཙུཏཉྷི ཨཝསྶཾ དཀསོཏཾ ཨོཏརཏཱིཏི ཀཏྭཱ ‘‘ཋཱནཱ ཙཱཝནམཏྟེནེཝེཏྠ ཨཱཔཏྟི ཝེདིཏབྦཱ’’ཏི ཝུཏྟཾ. དཀསོཏཾ ཨོཏིཎྞེ ཨེཝ ཨཱཔཏྟི. སུཀྐསྶ ཧི སཀལཾ སརཱིརཾ ཋཱནཾ, ཨནོཏིཎྞེ ཋཱནཱ ཙུཏཾ ནཱམ ན ཧོཏཱིཏི ཝཱིམཾསིཏབྦཾ. ཨཱབྷིདྷམྨིཀཏྟཱ ཐེརསྶ ‘‘སུཀྐཝིསྶཊྛི ནཱམ རཱགསམུཊྛཱནཱ ཧོཏཱི’’ཏི (ཀཐཱ. ཨཊྛ. ༣༠༧) ཀཐཱཝཏྠུཊྛཀཐཱཡཾ ཝུཏྟཏྟཱ སམྦྷཝོ ཙིཏྟསམུཊྛཱནོ, ‘‘ཏཾ ཨསུཙིཾ ཨེཀདེསཾ མུཁེན ཨགྒཧེསི, ཨེཀདེསཾ ཨངྒཛཱཏེ པཀྑིཔཱི’’ཏི (པཱརཱ. ༥༠༣) ཝཙནཏོ ཨུཏུསམུཊྛཱནོ ཙ དིསྶཏི, སོ ཙ ཁོ ཨཝཱིཏརཱགསྶེཝ ‘‘ཨཊྛཱནམེཏཾ, བྷིཀྑཝེ, ཨནཝཀཱསོ ཡཾ ཨརཧཏོ ཨསུཙི མུཙྩེཡྻཱ’’ཏི (མཧཱཝ. ༣༥༣; ཀཐཱ. ༣༡༣) ཝཙནཏོ. པརཱུཔཱཧཱརཊྛཀཐཱཡཾ ‘‘ཨཏྠི ཏསྶ ཨཱསཡོཏི ཏསྶ སུཀྐསྶ ཨུཙྩཱརཔསྶཱཝཱནཾ ཝིཡ པཏིཊྛཱནོཀཱསོ ཨཏྠཱི’’ཏི ¶ (ཀཐཱ. ཨཊྛ. ༣༠༩) ཙནཏོ ཏསྶ ཨཱསཡོཏི སིདྡྷཾ. པཱཀཏིཀཙིཏྟསམུཊྛཱནརཱུཔཾ ཝིཡ ཨསཾསཊྛཏྟཱ, ནིཀྑམནཏོ ཙ ‘‘ཝཏྠིསཱིསཾ, ཀཊི, ཀཱཡོ’’ཏི ཏིདྷཱ སུཀྐསྶ ཋཱནཾ པཀཔྤེནྟི ཨཱཙརིཡཱ. སཔྤཝིསཾ ཝིཡ ཏཾ ¶ དཊྛབྦཾ, ན ཙ ཝིསསྶ ཋཱནནིཡམོ, ཀོདྷཝསེན ཕུསནྟསྶ ཧོཏི, ཨེཝམསྶ ན ཙ ཋཱནནིཡམོ, རཱགཝསེན ཨུཔཀྐམནྟསྶ ཧོཏཱིཏི ཏཀྐོ.

ཁོབྷཀརཎཔཙྩཡོ ནཱམ བྷེསཛྫསེནཱསནཱཧཱརཱདིཔཙྩཡོ. སཾསགྒབྷེདཏོཔཱིཏི ཨེཏེསུ དྭཱིཧིཔི ཏཱིཧིཔི. པཧཱིནཝིཔལླཱསཏྟཱཏི ཨེཏྠ ཡཾ ཀིཉྩི སུཔིནནྟེན སེཀྑཔུཐུཛྫནཱ པསྶནྟི, ཏཾ སབྦཾ ཝིཔལླཏྠཾ ཨབྷཱུཏམེཝཱཏི ཨཱཔཛྫཏི. ཏཏོ ‘‘ཡཾ པན པུབྦནིམིཏྟཏོ པསྶཏི. ཏཾ ཨེཀནྟསཙྩམེཝ ཧོཏཱི’’ཏི ཨིདཾ ཝིརུཛ྄ཛྷཏི, ཏསྨཱ ན ཝིསཡཾ སནྡྷཱཡ ཝུཏྟཾ. སོ ཧི སཙྩོ ཝཱ ཧོཏི, ཨལིཀོ ཝཱཏི ཀཏྭཱ ཏཉྩེ སནྡྷཱཡ ཝུཏྟཾ སིཡཱ, ‘‘ཨསེཀྑཱ པཧཱིནཝིཔལླཱསཏྟཱ སཙྩམེཝ པསྶནྟི, ནཱསཙྩ’’ནྟི ཝཏྟབྦཾ སིཡཱ. ཀིནྟུ དསྶནཾ སནྡྷཱཡ ཝུཏྟཾ. ཏཉྷི ཨབྷཱུཏཾ, ཨཔསྶནྟོཔི ཧི པསྶནྟོ ཝིཡ ཨསུཎནྟོཔི སུཎནྟོ ཝིཡ ཨམུནནྟོཔི མུནནྟོ ཝིཡ ཧོཏི. སཙྩམྤི ཝིཔསྶཏཱིཏི ནོ ཏཀྐོཏི ཨཱཙརིཡོ. ཏཾ རཱུཔནིམིཏྟཱདིཨཱརམྨཎཾ ན ཧོཏི, ཨཱགནྟུཀཔཙྩུཔྤནྣཾ རཱུཔནིམིཏྟཱདིཨཱརམྨཎཾ སནྡྷཱཡ ཝུཏྟཾ. ཀམྨནིམིཏྟགཏིནིམིཏྟབྷཱུཏཱནི ཧི རཱུཔནིམིཏྟཱདཱིནི བྷཝངྒསྶ ཨཱརམྨཎཱནི ཧོནྟི ཨེཝ. ཏཏྠ ཀམྨནིམིཏྟམཏཱིཏམེཝ, གཏིནིམིཏྟཾ ཐོཀཾ ཀཱལཾ པཙྩུཔྤནྣཾ སིཡཱ.

ཨཱིདིསཱནཱིཏི པཙྩཀྑཏོ ཨནུབྷཱུཏཔུབྦཔརིཀཔྤིཏཱགནྟུཀཔཙྩུཔྤནྣརཱུཔནིམིཏྟཱདིཨཱརམྨཎཱནི, རཱགཱདིསམྤཡུཏྟཱནི ཙཱཏི ཨཏྠོ. མཀྐཊསྶ ནིདྡཱ ལཧུཔརིཝཏྟཱ ཧོཏི. སོ ཧི རུཀྑསཱཁཏོ པཏནབྷཡཱ ཨབྷིཀྑཎཾ ཨུམྨཱིལཏི ཙ སུཔཏི ཙ. མནུསྶཱ ཀིཉྩཱཔི པུནཔྤུནཾ ཨུམྨཱིལནྟི སུབྱཏྟཏརཾ པཊིབུདྡྷཱ ཝིཡ པསྶནྟི, ཨཐ ཁོ པཊིབུདྡྷཱནཾ པུནཔྤུནཾ བྷཝངྒོཏརཎཾ ཝིཡ སུཔིནཀཱལེཔི ཏེསཾ བྷཝངྒོཏརཎཾ ཧོཏི, ཡེན ‘‘སུཔཏཱི’’ཏི ཝུཙྩཏི. ‘‘བྷཝངྒཙིཏྟེན ཧི སུཔཏཱི’’ཏི ཝཙནཏོ བྷཝངྒོཏརཎཾ ཀརཛཀཱཡསྶ ནིརུསྶཱཧསནྟབྷཱཝཱུཔནིསྶཡཏྟཱ ‘‘ནིདྡཱ’’ཏི ཝུཙྩཏི. སཱ ཀརཛཀཱཡསྶ དུབྦལབྷཱཝེན སུཔིནདསྶནཀཱལེ བྷཝངྒཏོ ཨུཏྟརཎེ སཏིཔི ནིརུསྶཱཧསནྟབྷཱཝཔྤཏྟིཡཱ ‘‘པཝཏྟཏཱི’’ཏི ཙ ཝུཙྩཏི, ཡཏོ སཏྟཱ ‘‘པཊིབུདྡྷཱ’’ཏི ན ཝུཙྩནྟི, ཀརཛཀཱཡསྶ ནིརུསྶཱཧསནྟསབྷཱཝཔྤཏྟིཏོ ཙ ཏནྣིསྶིཏཾ ¶ ཧདཡཝཏྠུ ན སུཔྤསནྣཾ ཧོཏི, ཏཏོ ཏནྣིསྶིཏཱཔི ཙིཏྟཔྤཝཏྟི ཨསུཔྤསནྣཝཊྚིནིསྶིཏདཱིཔཔྤབྷཱ ཝིཡ. ཏེནེཝ ཨཊྛཀཐཱཡཾ ‘‘སྭཱཡཾ དུབྦལཝཏྠུཀཏྟཱ ཙེཏནཱཡ པཊིསནྡྷིཾ ཨཱཀཌྜྷིཏུཾ ཨསམཏྠོ’’ཏིཨཱདི ཝུཏྟཾ.

གཎྛིཔདེ པན ‘‘དུབྦལཝཏྠུཀཏྟཱཏི སུཔིནེ ཨུཔཊྛིཏཾ ནིམིཏྟམྤི དུབྦལ’’ནྟི ལིཁིཏཾ. ཏཾ ཨནེཀཏྠཾ སབྦམྤི ནིམིཏྟཾ ཧོཏི, ན ཙ དུབྦལཱརམྨཎཝཏྠུཀཏྟཱ ཙེཏནཱ, ཏཱཡ ཙིཏྟཔྤཝཏྟི དུབྦལཱ ཨཏཱིཏཱནཱགཏཱརམྨཎཱཡ, པཉྙཏྟཱརམྨཎཱཡ ཝཱ ཨདུབྦལཏྟཱ, ཨཝཏྠུཀཱཡ དུབྦལབྷཱཝོ ན ¶ ཡུཛྫཏི ཙེཏནཱཡ ཨཝཏྠུཀཱཡ བྷཱཝནཱཔབྷཱཝཱཡཱཏིརེཀབལསབྦྷཱཝཏོ. བྷཱཝནཱབལསམཔྤིཏཉྷི ཙིཏྟཾ ཨརཱུཔམྤི སམཱནཾ ཨཏིབྷཱརིཡམྤི ཀརཛཀཱཡཾ གཧེཏྭཱ ཨེཀཙིཏྟཀྑཎེནེཝ བྲཧྨལོཀཾ པཱཔེཏྭཱ ཋཔེཏི. ཏཔྤཊིབྷཱགཾ ཨནཔྤིཏམྤི ཀཱམཱཝཙརཙིཏྟཾ ཀརཛཀཱཡཾ ཨཱཀཱསེ ལངྒྷནསམཏྠཾ ཀརོཏི, པགེཝེཏརཾ. ཀིཾ པནེཏྠ ཏཾ ཨནུམཱནཀཱརཎཾ, ཡེན ཙིཏྟསྶེཝ ཨཱནུབྷཱཝོཏི པཉྙཱཡེཡྻ ཙིཏྟཱནུབྷཱཝེན ཝཱ ལདྡྷཱསེཝནཱདིཀིརིཡཱཝིསེསནིབྦཏྟིདསྶནཏོ, ཏསྨཱ དུབྦལཝཏྠུཀཏྟཱཏི དུབྦལཧདཡཝཏྠུཀཏྟཱཏི ཨཱཙརིཡསྶ ཏཀྐོ. ཨཏྟནོ མནྡཏིཀྑཱཀཱརེན ཏནྣིསྶིཏསྶ ཙིཏྟསྶ མནྡཏིཀྑབྷཱཝནིཔྥཱདནསམཏྠཉྩེ, ཧདཡཝཏྠུ ཙཀྑུསོཏཱདིཝཏྠུ ཝིཡ ཨིནྡྲིཡཾ བྷཝེཡྻ, ན ཙེཏཾ ཨིནྡྲིཡཾ. ཡཏོ དྷམྨསངྒཧེ ཨུཔཱདཱཡརཱུཔཔཱལི༹ཡཾ ཨུདྡེསཱརཧཾ ན ཛཱཏཾ. ཨནིནྡྲིཡཏྟཱ ཧི ཏཾ ཀཱཡིནྡྲིཡསྶ ཨནནྟརཾ ན ཨུདྡིཊྛཾ, ཝཏྠུརཱུཔཏྟཱ ཙ ཨཝཏྠུརཱུཔསྶ ཛཱིཝིཏིནྡྲིཡསྶ ཨནནྟརམྤི ན ཨུདྡིཊྛཾ, ཏསྨཱ ཡཾ ཝུཏྟཾ ‘‘ཏསྶ ཨསུཔྤསནྣཏྟཱ ཏནྣིསྶིཏཱ ཙ ཙིཏྟཔྤཝཏྟི ཨསུཔྤསནྣཱ ཧོཏཱི’’ཏི, ཏཾ ན སིདྡྷནྟི ཙེ? སིདྡྷམེཝ ཨནིནྡྲིཡཱནམྤི སཔྤཱཡཱསཔྤཱཡཨུཏུཨཱཧཱརཱདཱིནཾ པཙྩཡཱནཾ སམཱཡོགཏོ, ཙིཏྟཔྤཝཏྟིཡཱ ཝིཀཱརདསྶནཏོ, པཙྩཀྑཏྟཱ ཙ. ཡསྨཱ ཨཔྤཊིབུདྡྷོཔི པཊིབུདྡྷཾ ཝིཡ ཨཏྟཱནཾ མཉྙཏཱིཏི. ཨེཏྟཱཝཏཱ ཀརཛཀཱཡསྶ ནིརུསྶཱཧསནྟབྷཱཝཱཀཱརཝིསེསོ ནིདྡཱ ནཱམ. སཱ ཙིཏྟསྶ བྷཝངྒོཏརཎཱཀཱརཝིསེསེན ཧོཏི, ཏཱཡ སམནྣཱགཏོ སཏྟོ བྷཝངྒཏོ ཨུཏྟིཎྞོ སུཔིནཾ པསྶཏི, སོ ‘‘ཀཔིམིདྡྷཔརེཏོ’’ཏི ཝུཙྩཏི, སོ སུཏྟོ ཨཔྤཊིབུདྡྷོ ཧོཏཱིཏི ཨཡམཏྠོ སཱདྷིཏོ ཧོཏི.

ཡསྨཱ ¶ བྷཝངྒཝཱརནིརནྟརཏཱཡ ཨཙྩནྟསུཏྟོ ནཱམ ཧོཏི, ཏསྨཱ ‘‘ཡདི ཏཱཝ སུཏྟོ པསྶཏི, ཨབྷིདྷམྨཝིརོདྷོ ཨཱཔཛྫཏཱི’’ཏིཨཱདི ཝུཏྟཾ. ཡསྨཱ པན ནིདྡཱཀྑཎེ ན པཊིབུདྡྷོ ནཱམ ཧོཏི, ཏསྨཱ ‘‘ཨཐ པཊིབུདྡྷོ པསྶཏི, ཝིནཡཝིརོདྷོ’’ཏིཨཱདི ཝུཏྟཾ, ཡསྨཱ ཙ ཨཁཱིཎནིདྡོ, ཨནོཏིཎྞབྷཝངྒོ ཙ ཨཏྠི, ཏསྨཱ ‘‘ཀཔིམིདྡྷཔརེཏོ པསྶཏཱི’’ཏི ཝུཏྟཾ. ཨཉྙཐཱ ཨཡཾ ནེཝ སུཏྟོ ན པཊིབུདྡྷོ, ཨཏྟནཱ ཏཾ ནིདྡཾ ཨནོཀྐནྟོ ཨཱཔཛྫེཡྻ. ཨེཏྟཱཝཏཱ ཙ ཨབྷིདྷམྨོ, ཝིནཡོ, ནཱགསེནཏྠེརཝཙནཾ ཡུཏྟི ཙཱཏི སབྦཾ ཨཉྙམཉྙསཾསནྡིཏཾ ཧོཏི. ཏཏྠ ཀཔིམིདྡྷཔརེཏོཏི བྷཝངྒཏོ ཨུཏྟིཎྞནིདྡཱཔརེཏོ. སཱ ཧི ཨིདྷ ཀཔིམིདྡྷཾ ནཱམ. ‘‘ཏཏྠ ཀཏམཾ མིདྡྷཾ? ཡཱ ཀཱཡསྶ ཨཀལྱཏཱ ཨཀམྨཉྙཏཱ…པེ… སུཔནཾ, ཨིདཾ ཝུཙྩཏི མིདྡྷ’’ནྟི (དྷ. ས. ༡༡༦༣) ཨེཝམཱགཏཾ. ཨིདཉྷི ཨརཱུཔཾ, ཨིམསྶ ཕལབྷཱུཏོ ཀརཛཀཱཡསྶ ཨཀལྱཏཱ’པཙལཱཡིཀཱསུཔི ནིདྡཱཝིསེསོ ཀཱརཎོཔཙཱརེན ‘‘ཀཔིམིདྡྷ’’ནྟི པཝུཙྩཏི. ཡཉྩེཝ ‘‘ཀཔིམིདྡྷཔརེཏོ ཁོ, མཧཱརཱཛ, སུཔིནཾ པསྶཏཱི’’ཏི (མི. པ. ༥.༣.༥ ཐོཀཾ ཝིསདིསཾ) ཝུཏྟནྟི.

ཡཾ ¶ ཏཾ ཨཱཔཏྟིཝུཊྛཱནནྟི ཨེཏྠ ཡེན ཝིནཡཀམྨེན ཏཏོ ཝུཊྛཱནཾ ཧོཏི, ཏཾ ཨིདྷ ཨཱཔཏྟིཝུཊྛཱནཾ ནཱམ. ཨཝཡཝེ སམཱུཧཝོཧཱརེན ཝཱཏི ཨེཏྠ སཱཁཙྪེདཀོ རུཀྑཙྪེདཀོཏི ཝུཙྩཏཱིཏིཨཱདི ནིདསྶནཾ, ཝེདནཱཀྑནྡྷཱདི རུལ༹ྷཱིསདྡསྶ ནིདསྶནཾ. ན ཙ མཡཱཏི ཝཱིམཾསནཔདསྶ ཏསྶ ཀིརིཡཾ སནྡྷཱཡ, མོཙནེ ཙ སནྣིཊྛཱནཾ སནྡྷཱཡ མུཙྩནཔཀཏིཡཱ ཙཱཏི ཝུཏྟཾ.

༢༤༠. གེཧནྟི པཉྩཀཱམགུཎཱ. ཝནབྷངྒིཡནྟི པཱབྷཏིཀཾ. སམྤཡུཏྟསུཁཝེདནཱམུཁེན རཱགོཝ ‘‘ཨསྶཱདོ’’ཏི ཝུཏྟོ. སུཔནྟསྶ ཙཱཏི ཨིདཾ ཀཔིམིདྡྷཔརེཏོ ཝིཡ བྷཝངྒསནྟཏིཾ ཨཝིཙྪིནྡིཏྭཱ སུཔནྟཾ སནྡྷཱཡ ཝུཏྟནྟི, ཝཱིམཾསིཏབྦཾ. ཛགྒནཏྠཱཡཱཏི སོདྷནཏྠཱཡ.

༢༦༦. ‘‘དཱརུདྷཱིཏལིཀལེཔཙིཏྟཱནཾ ཨངྒཛཱཏཔཊིནིཛ྄ཛྷཱནེཔི དུཀྐཊ’’ནྟི ཝདནྟི. ‘‘ཨུཔྤནྣེ པརིལཱ༹ཧེ མོཙནརཱགཛོ’’ཏི ལིཁནྟི. ཝཱལིཀཱཡ ཝཱ ‘‘ཧཏྠིཀཱམཾ ནསྶཏཱི’’ཏི ཨེཏྠ ཝིཡ ‘‘ཨཱཔཏྟི ཏྭ’’ནྟི སབྦཏྠ པཱཋོ. ‘‘ཨེཧི མེ ཏྭཾ, ཨཱཝུསོ སཱམཎེར, ཨངྒཛཱཏཾ གཎྷཱཧཱི’’ཏི ཨཱགཏཏྟཱ ‘‘ཝཙཱིཀམྨ’’ནྟིཔི ཝཏྟུཾ ཡུཏྟཾ ཝིཡ དིསྶཏི. ཨེཝཾ སནྟེ ཨཉྙཾ ‘‘ཨེཝཾ ཀརོཧཱི’’ཏི ཨཱཎཏྟིཡཱཔི ¶ ཨཱཔཏྟི སིཡཱཏི སངྐརཾ ཧོཏི. ཏསྨཱ ན ཝུཏྟནྟི གཧེཏབྦནྟི ཀེཙི.

༢༦༧. ‘‘པུཔྥཱཝལིཡཾ སཱསཝལི༹ཡ’’ནྟི དུཝིདྷོ ཀིར.

སུཀྐཝིསྶཊྛིསིཀྑཱཔདཝཎྞནཱ ནིཊྛིཏཱ.

༢. ཀཱཡསཾསགྒསིཀྑཱཔདཝཎྞནཱ

༢༧༠. ‘‘ཨོཏིཎྞོ’’ཏི ཨིམིནཱསྶ སེཝནཱདྷིཔྤཱཡཏཱ དསྶིཏཱ. ‘‘ཝིཔརིཎཏེན ཙིཏྟེན མཱཏུགཱམེན སདྡྷི’’ནྟི ཨིམིནཱསྶ ཝཱཡཱམོ དསྶིཏོ. ‘‘སདྡྷི’’ནྟི ཧི པདཾ སཾཡོགཾ དཱིཔེཏི, སོ ཙ པཡོགོ སམཱགམོ ཨལླཱིཡནཾ. ཀེན ཙིཏྟེན? ཝིཔརིཎཏེན ཙིཏྟེན, ན པཏྟཔཊིགྒཧཎཱདྷིཔྤཱཡཱདིནཱཏི ཨདྷིཔྤཱཡོ. ‘‘ཀཱཡསཾསགྒཾ སམཱཔཛྫེཡྻཱ’’ཏི ཨིམིནཱསྶ ཝཱཡམཏོ ཕསྶཔཊིཝིཛཱནནཱ དསྶིཏཱ ཧོཏི. ཝཱཡམིཏྭཱ ཕསྶཾ པཊིཝིཛཱནནྟོ ཧི སམཱཔཛྫཏི ནཱམ. ཨེཝམསྶ ཏིཝངྒསམྤཏྟི དསྶིཏཱ ཧོཏི. ཨཐ ཝཱ ཨོཏིཎྞོ. ཀེན? ཝིཔརིཎཏེན ཙིཏྟེན ཡཀྑཱདིནཱ སཏྟོ ཝིཡ. ཨུཔཡོགཏྠེ ཝཱ ཨེཏཾ ཀརཎཝཙནཾ. ཨོཏིཎྞོ ཝིཔརིཎཏཾ ¶ ཙིཏྟཾ ཀཱུཔཱདིཾ ཝིཡ སཏྟོ. ཨཐ ཝཱ ‘‘རཱགཏོ ཨུཏྟིཎྞོ བྷཝིསྶཱམཱི’’ཏི བྷིཀྑུབྷཱཝཾ ཨུཔགཏོ, ཏཏོ ཨུཏྟིཎྞཱདྷིཔྤཱཡཏོ ཝིཔརིཎཏེན ཙིཏྟེན ཧེཏུབྷཱུཏེན ཏམེཝ རཱགཾ ཨོཏིཎྞོ. མཱཏུགཱམེན ཨཏྟནོ སམཱིཔཾ ཨཱགཏེན, ཨཏྟནཱ ཨུཔགཏེན ཝཱ. ཨེཏེན མཱཏུགཱམསྶ སཱརཏྟཏཱ ཝཱ ཧོཏུ ཝིརཏྟཏཱ ཝཱ, སཱ ཨིདྷ ཨཔྤམཱཎཱ, ན བྷིཀྑུནཱིནཾ ཀཱཡསཾསགྒེ ཝིཡ ཨུབྷིནྣཾ སཱརཏྟཏཱཡ པཡོཛནཾ ཨཏྠི.

ཀཱཡསཾསགྒནྟི ཨུབྷིནྣཾ ཀཱཡཱནཾ སམྤཡོགཾ. པདབྷཱཛནེ པན ‘‘སམཱཔཛྫེཡྻཱཏི ཨཛ྄ཛྷཱཙཱརོ ཝུཙྩཏཱི’’ཏི ཝུཏྟཾ, ཏཾ སམཱཔཛྫནཾ སནྡྷཱཡ, ན ཀཱཡསཾསགྒཾ. ཀཱཡསཾསགྒསྶ སམཱཔཛྫནཱ ཧི ‘‘ཨཛ྄ཛྷཱཙཱརོ’’ཏི ཝུཙྩཏི. ཨཊྛཀཐཱཡཾ པན ‘‘ཡོ སོ ཀཱཡསཾསགྒོ ནཱམ, སོ ཨཏྠཏོ ཨཛ྄ཛྷཱཙཱརོ ཧོཏཱི’’ཏི ཝུཏྟཾ, ཏཾ པརཏོ པཱལི༹ཡཾ ‘‘སེཝནཱདྷིཔྤཱཡོ, ན ཙ ཀཱཡེན ཝཱཡམཏི, ཕསྶཾ པཊིཝིཛཱནཱཏི, ཨནཱཔཏྟཱི’’ཏི (པཱརཱ. ༢༧༩) ཝུཏྟལཀྑཎེན ¶ ཝིརུཛ྄ཛྷཏཱིཏི. ཕསྶཔཊིཝིཛཱནནཱཡ ཧི སཾསགྒོ དཱིཔིཏོ. སོ ཙེ ཨཛ྄ཛྷཱཙཱརོ ཧོཏི, ཀཐཾ ཨནཱཔཏྟི ཧོཏཱིཏི. སུཝུཏྟམེཏཾ, ཀིནྟུ ‘‘ཀཱཡསཾསགྒཾ སམཱཔཛྫེཡྻཱ’’ཏི པདཾ ཨུདྡྷརིཏྭཱ ‘‘ཨཛ྄ཛྷཱཙཱརོ ཝུཙྩཏཱི’’ཏི ཨུབྷིནྣམྤི པདཱནཾ སཱམཉྙབྷཱཛནཱིཡཏྟཱ, སམཱཔཛྫིཏབྦཱབྷཱཝེ སམཱཔཛྫནཱབྷཱཝེན ‘‘སོ ཨཏྠཏོ ཨཛ྄ཛྷཱཙཱརོ ཧོཏཱི’’ཏི ཝུཏྟཾ སིཡཱ.

‘‘ཧཏྠགྒཱཧཾ ཝཱ’’ཏི ཨེཏྠ ཧཏྠེན སབྦོཔི ཨུཔཱདིནྣཀོ ཀཱཡོ སངྒཧིཏོ, ན བྷིནྣསནྟཱནོ ཏཔྤཊིབདྡྷོ ཧཏྠཱལངྐཱརཱདི. ཝེཎིགྒཧཎེན ཨནུཔཱདིནྣཀོ ཨབྷིནྣསནྟཱནོ ཀེསལོམནཁདནྟཱདིཀོ ཀམྨཔཙྩཡཨུཏུསམུཊྛཱནོ གཧིཏོཏི ཝེདིཏབྦཾ. ཏེནེཝཱཧ ཨཊྛཀཐཱཡཾ ‘‘ཨནུཔཱདིནྣཀེནཔི ཀེནཙི ཀེསཱདིནཱ ཨུཔཱདིནྣཀཾ ཝཱ ཨནུཔཱདིནྣཀཾ ཝཱ ཕུསནྟོཔི སངྒྷཱདིསེསཾ ཨཱཔཛྫཏིཡེཝཱ’’ཏི (པཱརཱ. ཨཊྛ. ༢.༢༧༤). ཏེན ཨནུཔཱདིནྣཀཱནམྤི ཀེསལོམཱདཱིནཾ ཨངྒབྷཱཝོ ཝེདིཏབྦོ. ཨེཝཾ སནྟེཔི ‘‘ཕསྶཾ པཊིཛཱནཱཏཱིཏི ཏིཝངྒསམྤཏྟིཡཱ སངྒྷཱདིསེསོ. ཕསྶསྶ ཨཔྤཊིཝིཛཱནནཏོ དུཝངྒསམྤཏྟིཡཱ དུཀྐཊ’’ནྟི ཨིམིནཱ པཱལི༹ཨཊྛཀཐཱནཡེན ཝིརུཛ྄ཛྷཏཱིཏི ཙེ? ན, ཏདཏྠཛཱནནཏོ. ཕུཊྛབྷཱཝཉྷི པཊིཝིཛཱནནྟོཔི ཕསྶཾ པཊིཝིཛཱནཱཏི ནཱམ, ཨཡམེཀོ ཨཏྠོ, ཏསྨཱ མཱཏུགཱམསྶ, ཨཏྟནོ ཙ ཀཱཡཔརིཡཱཔནྣཱནཾ ཀེསཱདཱིནཾ ཨཉྙམཉྙཾ ཕུཊྛབྷཱཝཾ ཕུསིཏྭཱ ཏཾ སཱདིཡནཾ ཕསྶཾ པཊིཝིཛཱནཱཏི ནཱམ, ན ཀཱཡཝིཉྙཱཎུཔྤཏྟིཡཱ ཨེཝ. ཨནེཀནྟིཀཉྷེཏྠ ཀཱཡཝིཉྙཱཎཾ. མཱཏུགཱམསྶ ཨུཔཱདིནྣཀེན ཀཱཡེན, ཨནུཔཱདིནྣཀེན ཝཱ ཀཱཡེན བྷིཀྑུནོ ཨུཔཱདིནྣཀཀཱཡེ ཕུཊྛེ པསནྣཀཱཡིནྡྲིཡོ ཙེ ཧོཏི, ཏསྶ ཀཱཡཝིཉྙཱཎཾ ཨུཔྤཛྫཏི, ཏེནེཝ ཕསྶཾ པཊིཝིཛཱནཱཏི ནཱམ སོ ཧོཏི. ཨནུཔཱདིནྣཀཀཱཡོ, ལོལུཔྤོ ཨཔྤསནྣཀཱཡིནྡྲིཡོ ཝཱ ཧོཏི, ཏིམིརཝཱཏེན ཨུཔཧཏཀཱཡོ ¶ ཝཱ ཏསྶ ཀཱཡཝིཉྙཱཎཾ ནུཔྤཛྫཏི. ན ཙ ཏེན ཕསྶཾ པཊིཝིཛཱནཱཏི ནཱམ, ཀེཝལཾ སེཝནཱདྷིཔྤཱཡེན ཝཱཡམིཏྭཱ ཀཱཡསཾསགྒཾ སམཱཔཛྫནྟོ ཕསྶཾ པཊིཝིཛཱནཱཏི ནཱམ མནོཝིཉྙཱཎེན, ཏེན ཝུཏྟཾ ‘‘ཀཱཡསཾསགྒཾ སམཱཔཛྫེཡྻཱཏི ཨིམིནཱསྶ ཝཱཡམཏོ ཕསྶཔཊིཝིཛཱནནཱ དསྶིཏཱ’’ཏི. ཨཔརོཔི བྷིཀྑུ མཱཏུགཱམསྶ ཀཱཡཔཊིབདྡྷེན ཝཱ ནིསྶགྒིཡེན ཝཱ ཕུཊྛོ ཀཱཡཝིཉྙཱཎཾ ཨུཔྤཱདེནྟེན ཕསྶཾ པཊིཝིཛཱནཱཏི ནཱམ, ཏསྨཱ ཝུཏྟཾ ‘‘ཨནེཀནྟིཀཉྷེཏྠ ¶ ཀཱཡཝིཉྙཱཎ’’ནྟི. ཨཔརོ ཝཏྠཾ པཱརུཔིཏྭཱ ནིདྡཱཡནྟཾ མཱཏུགཱམཾ ཀཱཡསཾསགྒརཱགེན ཝཏྠསྶ ཨུཔརིབྷཱགེ སཎིཀཾ ཕུསནྟོ ཝཏྠནྟརེན ནིཀྑནྟལོམསམྥསྶཾ ཨཔྤཊིཝིཛཱནནྟོཔི སེཝནཱདྷིཔྤཱཡོ ཀཱཡེན ཝཱཡམིཏྭཱ ཕསྶཾ པཊིཝིཛཱནཱཏི ནཱམ, སངྒྷཱདིསེསཾ ཨཱཔཛྫཏི. ‘‘ནཱིལཾ གྷཊྚེསྶཱམཱིཏི ཀཱཡཾ གྷཊྚེཏི, སངྒྷཱདིསེསོ’’ཏི ཧི ཝུཏྟཾ. ཨཡཾ དུཏིཡོ ཨཏྠོ. ཨེཝཾ ཨནེཀཏྠཏྟཱ, ཨེཝཾ དུཝིཉྙེཡྻཱདྷིཔྤཱཡཏོ ཙ མཱཏིཀཱཊྛཀཐཱཡཾ ཕསྶཔཊིཝིཛཱནནཾ ཨངྒནྟྭེཝ ན ཝུཏྟཾ. ཏསྨིཉྷི ཝུཏྟེ ཋཱནམེཏཾ ཝིཛྫཏི, ཡཾ བྷིཀྑུ སངྒྷཱདིསེསཾ ཨཱཔཛྫིཏྭཱཔི ནཁེན ལོམེན སཾསགྒོ དིཊྛོ, ན ཙ མེ ལོམགྷཊྚནེན ཀཱཡཝིཉྙཱཎཾ ཨུཔྤནྣཾ, ཏིམིརཝཱཏཐདྡྷགཏྟོ ཙཱཧཾ ན ཕསྶཾ པཊིཝིཛཱནཱམཱིཏི ཨནཱཔནྣསཉྙཱི སིཡཱཏི ན ཝུཏྟཾ, ཨཔིཙ ‘‘ཕསྶཾ པཊིཝིཛཱནཱཏི, ན ཙ ཕསྶཾ པཊིཝིཛཱནཱཏཱི’’ཏི ཙ ཨེཏེསཾ པདཱནཾ ཨཊྛཀཐཱཡཾ ཝུཏྟནཡཾ དསྶེཏྭཱ སོ པཉྙཱཔེཏབྦོ. ཨེཏྟཱཝཏཱ ན ཏདཏྠཛཱནནཏོཏི ཀཱརཎཾ ཝིཏྠཱརིཏཾ ཧོཏི.

པདབྷཱཛནཱིཡཝཎྞནཱ

༢༧༡. ‘‘རཏྟཾ ཙིཏྟཾ ཨིམསྨིཾ ཨཏྠེ ཨདྷིཔྤེཏཾ ཝིཔརིཎཏ’’ནྟི ཀིཉྩཱཔི སཱམཉྙེན ཝུཏྟཾ, ཝིནཱིཏཝཏྠཱུསུ ‘‘མཱཏུཡཱ མཱཏུཔེམེན ཨཱམསཏི…པེ… ཨཱཔཏྟི དུཀྐཊསྶཱ’’ཏི ཝུཏྟཏྟཱ ཀཱཡསཾསགྒརཱགེནེཝ རཏྟནྟི ཝེདིཏབྦཾ. ཏཐཱ ‘‘མཱཏུགཱམོ ནཱམ མནུསྶིཏྠཱི’’ཏི ཀིཉྩཱཔི ཨཝིསེསེན ཝུཏྟཾ, ཨཐ ཁོ ཨཝིནཊྛིནྡྲིཡཱཝ མནུསྶིཏྠཱི ཨིདྷཱདྷིཔྤེཏཱ ‘‘མཏིཏྠིཡཱ ཀཱཡསཾསགྒཾ སམཱཔཛྫི…པེ… ཨཱཔཏྟི ཐུལླཙྩཡསྶཱ’’ཏི ཝུཏྟཏྟཱ. ‘‘མནུསྶིཏྠཱི’’ཏི ཨེཏྟཱཝཏཱ སིདྡྷེ ‘‘ན ཡཀྑཱི ན པེཏཱི ན ཏིརཙྪཱནགཏཱ’’ཏི ཝཙནཾ ཨཝིནཊྛིནྡྲིཡཱཔི ན སབྦཱ མནུསྶཝིགྒཧཱ ཨིཏྠཱི ཨིདྷ མནུསྶིཏྠཱི ནཱམ. ཡཀྑིཨཱདཡོ ཧི ཨཏྟནོ ཛཱཏིསིདྡྷེན ཨིདྡྷིཝིསེསེན ཨིཛ྄ཛྷནྟིཡོ མནུསྶཝིགྒཧཱཔི ཧོནྟཱིཏི དསྶནཏྠཾ ཝུཏྟཾ. ཏཱསུ ཡཀྑཱི ཐུལླཙྩཡཝཏྠུ ཧོཏི ཝིནཱིཏཝཏྠཱུསུ ཡཀྑིཡཱ ཀཱཡསཾསགྒེན ཐུལླཙྩཡསྶ ཝུཏྟཏྟཱ. ཏདནུལོམཏྟཱ པེཏིཏྠཱི, དེཝིཏྠཱི ཙ ཐུལླཙྩཡཝཏྠུ. ཏིརཙྪཱནགཏིཏྠཱི དུཀྐཊཝཏྠུ. ཏིརཙྪཱནགཏམནུསྶཝིགྒཧིཏྠཱི ཙ ཐུལླཙྩཡཝཏྠུམེཝཱཏི ཨེཀེ. ཝིབྷངྒེ པན ‘‘མནུསྶིཏྠཱི ཙ ཧོཏི མནུསྶིཏྠིསཉྙཱི’’ཏི པཱལི༹ཡཱ ཨབྷཱཝེན ¶ ‘‘ཨིཏྠཱི ཙ ཧོཏི ཡཀྑིསཉྙཱི’’ཏིཨཱདིཝཙནེ སཏི ཡཀྑིཨཱདཱིནཾ ཨནིཏྠིཏཱཔསངྒཏོ, ‘‘ཨིཏྠཱི ¶ ཙ ཧོཏི ཨིཏྠིསཉྙཱི’’ཏིཨཱདིམྷི ཡཀྑིཨཱདཱིནཾ ཨནྟོཀརཎེ སཏི ཏཱསཾ སངྒྷཱདིསེསཝཏྠུབྷཱཝཔྤསངྒཏོ ཙ ཡཀྑིཨཱདཡོ ན ཝུཏྟཱཏི ཝེདིཏབྦཱ. ཨེཀེ པན ‘‘ཝིནཱིཏཝཏྠུམྷི ‘ཨཉྙཏརོ བྷིཀྑུ ཏིརཙྪཱནགཏིཏྠིཡཱ ཀཱཡ…པེ… དུཀྐཊསྶཱ’ཏི ཨེཏྠ ཨམནུསྶཝིགྒཧཱ པཱཀཏིཀཏིརཙྪཱནགཏིཏྠཱི ཨདྷིཔྤེཏཱ, ཏསྨཱ དུཀྐཊཾ ཝུཏྟཾ. ‘ཨིཏྠཱི ཙ ཧོཏི ཏིརཙྪཱནགཏསཉྙཱིཏི ཏིརཙྪཱནགཏཱ ཙ ཧོཏི ཨིཏྠིསཉྙཱི’ཏིཨཱདིཝཱརེསུཔི པཱཀཏིཀཏིརཙྪཱནགཏོཝ ཨདྷིཔྤེཏོ, སོ ཙ ཏིརཙྪཱནགཏཔུརིསོཝ. ཏེནེཝ དུཊྛུལླཝཱཙཱཨཏྟཀཨཱམཔཱརིཙརིཡསིཀྑཱཔདེསུ མནུསྶཔུརིསཔཊིསཾཡུཏྟཝཱརཱ ཝིཡ ཏིརཙྪཱནཔཊིསཾཡུཏྟཝཱརཱཔི ནཱགཏཱ’’ཏི ཝདནྟི. ཏཐཱ པཎྜཀོཏི ཨིདྷ མནུསྶཔཎྜཀོཝ, པུརིསོཏི ཙ ཨིདྷ མནུསྶཔུརིསོཝ ཨཱགཏོ, ཏསྨཱ ཨམནུསྶིཏྠཱི ཨམནུསྶཔཎྜཀོ ཨམནུསྶཔུརིསོ ཏིརཙྪཱནགཏིཏྠཱི ཏིརཙྪཱནགཏཔཎྜཀོ མནུསྶཱམནུསྶཏིརཙྪཱནགཏཨུབྷཏོབྱཉྫནཀཱ ཙཱཏི ཨཊྛ ཛནཱ ཨིདྷ ནཱགཏཱ, ཏེསཾ ཝསེན ཝཏྠུསཉྙཱཝིམཏིབྷེདཝསེན ཨཱཔཏྟིབྷེདཱབྷེདཝིནིཙྪཡོ, ཨནཱགཏཝཱརགཎནཱ ཙ ཨསམྨུཡ྄ཧནྟེན ཝེདིཏབྦཱ, ཏཐཱ ཏེསཾ དུཀམིསྶཀཱདིཝཱརཱ, ཨཱཔཏྟིཨནཱཔཏྟིབྷེདཝིནིཙྪཡོ ཙ. ‘‘ཏཏྠ ཨམནུསྶཔཎྜཀཨམནུསྶཔུརིསཏིརཙྪཱནགཏིཏྠིཏིརཙྪཱནགཏཔཎྜཀཱཏི ཙཏྟཱརོ དུཀྐཊཝཏྠུཀཱ, ཨམནུསྶིཏྠིམནུསྶཨུབྷཏོབྱཉྫནཀཱ ཐུལླཙྩཡཝཏྠུཀཱ, ཨམནུསྶཨུབྷཏོབྱཉྫནཀཱ ཏིརཙྪཱནགཏཨུབྷཏོབྱཉྫནཀཱ དུཀྐཊཝཏྠུཀཱ, པཱལི༹ཡཾ པན ཨམནུསྶིཏྠིཡཱ ཨནཱགཏཏྟཱ ཨམནུསྶཔཎྜཀཱ, ཨུབྷཏོབྱཉྫནཀཱ པུརིསཱ ཙ ནཱགཏཱ. ཏིརཙྪཱནགཏིཏྠིཔཎྜཀཨུབྷཏོབྱཉྫནཀཱ ཏིརཙྪཱནགཏཔུརིསེན སམཱནགཏིཀཏྟཱ ནཱགཏཱ, མནུསྶཨུབྷཏོབྱཉྫནཀོ མནུསྶཔཎྜཀེན སམཱནགཏིཀཏྟཱ ཨནཱགཏོ’’ཏི ཝདནྟི. ཨཊྛཀཐཱཡཾ (པཱརཱ. ཨཊྛ. ༢.༢༨༡) པན ‘‘ནཱགམཱཎཝིཀཱཡཔི སུཔཎྞམཱཎཝིཀཱཡཔི ཀིནྣརིཡཱཔི གཱཝིཡཱཔི དུཀྐཊམེཝཱ’’ཏི ཝུཏྟཏྟཱ ཏདེཝ པམཱཎཏོ གཧེཏབྦཾ.

ཏཏྲཱཡཾ ཝིཙཱརཎཱ – ‘‘ན, བྷིཀྑཝེ, ཏིརཙྪཱནགཏསྶ ནིསིནྣཔརིསཱཡ པཱཏིམོཀྑཾ ཨུདྡིསིཏབྦ’’ནྟི (མཧཱཝ. ༡༨༣) ཨེཏྠ ‘‘ཏིརཙྪཱནགཏོཏི ཡསྶ ཨུཔསམྤདཱ པཊིཀྑིཏྟཱ’’ཏི (ཀངྑཱ. ཨཊྛ. ནིདཱནཝཎྞནཱ) ཨཊྛཀཐཱཡཾ ཝུཏྟཏྟཱ ཏིརཙྪཱནགཏམནུསྶཝིགྒཧོ པཱཀཏིཀཏིརཙྪཱནགཏཏོ ཝིསིཊྛོ, ཏཐཱ ཡཀྑཔེཏཏིརཙྪཱནགཏམནུསྶཝིགྒཧཱནཾ ‘‘ཏིརཙྪཱནགཏསྶ ཙ དུཀྑུཔྤཏྟིཡཾ ཨཔིཙ དུཀྐཊམེཝཱ’’ཏི ཨེཏྠ ¶ ཝིསེསེཏྭཱ ཝུཏྟཏྟཱ ཙ ‘‘པཏནརཱུཔཾ པམཱཎཾ, ན མརཎརཱུཔ’’ནྟི ཨེཏྠ ཨཱཔཏྟིཝིསེསཝཙནཏོ ཙ ‘‘ཨུབྷཏོ ཨཝསྶུཏེ ཡཀྑསྶ ཝཱ པེཏསྶ ཝཱ པཎྜཀསྶ ཝཱ ཏིརཙྪཱནགཏམནུསྶཝིགྒཧསྶ ཝཱ ཨདྷཀྑཀཾ ཨུབྦྷཛཱཎུམཎྜལཾ ཀཱཡེན ཀཱཡཾ ཨཱམསཏི, ཨཱཔཏྟི ཐུལླཙྩཡསྶཱ’’ཏི (པཱཙི. ༦༦༡) སཱམཉྙེན ¶ ཝཙནཏོ ཙ སོ ཝིསིཊྛོཏི སིདྡྷཾ. ཝིསིཊྛཏྟཱ ཙ ཏིརཙྪཱནགཏམནུསྶཝིགྒཧིཏྠིཡཱ ཀཱཡསཾསགྒཾ སམཱཔཛྫནྟསྶཱཏི ཝིསེསོ ཧོཏི, ཏསྨཱ ཏཏྠ ཨཱཔཏྟིཝིསེསེན བྷཝིཏབྦཾ. ཡདི ཀཱཡསཾསགྒསིཀྑཱཔདེ ཏིརཙྪཱནགཏམནུསྶཝིགྒཧིཏྠཱིཔི ཨདྷིཔྤེཏཱ, རཱུཔསཱམཉྙེན སཉྙཱཝིརཱགཏྟཱསམྦྷཝཏོ དུཊྛུལླཝཱཙཱཨཏྟཀཱམཔཱརིཙརིཡསིཀྑཱཔདེསུཔི སཱ ཝཏྟབྦཱ བྷཝེཡྻ, སཱ ཙཱནཱགཏཱ. སརཱུཔེན སཾཁིཏྟཝཱརཏྟཱ ནཱགཏཱཏི ཙེ? ཨིཏྠཱི ཙ ཧོཏི ཏིརཙྪཱནགཏོ ཙ ཨུབྷིནྣཾ ཨིཏྠིསཉྙཱིཏི ཨིདྷ ཨཱགཏཏྟཱ པུརིསལིངྒནིདྡེསོ ན ཡུཛྫཏི, ཏསྨཱ ཏིརཙྪཱནགཏཔུརིསོ ཙ ཨིདྷ ཨཱགཏོ, ཏིརཙྪཱནགཏམནུསྶཝིགྒཧིཏྠིཡཱ པཱལི༹ཡཾ ཨནཱགཏཱཡཔི དུཀྐཊམེཝ ཨཊྛཀཐཱཡཾ ཝུཏྟཏྟཱཏི ཨིམསྶ ཝཙནསྶ ཀཱརཎཙྪཱཡཱ པརིཡེསིཏབྦཱཏི ཨདྷིཔྤཱཡོ. ཨིདཾ ན ཡུཛྫཏི. ཀསྨཱ? ཨིཏྠཱིནཾ, པུརིསཱནཉྩ ཨེཀཏོ ཝཙནེ པུརིསལིངྒསབྦྷཱཝཏོ. ཨིདྷ ཏིརཙྪཱནགཏཔུརིསཔཎྜཀིཏྠིཡོ ཏིསྶོཔི ཨེཀཏོ སམྤིཎྜེཏྭཱ ‘‘ཏིརཙྪཱནགཏོ’’ཏི ཝུཏྟཾ.

ཏཏྠ ཙ མནུསྶཝིགྒཧཱམནུསྶཝིགྒཧེསུ ཨིཏྠིཔཎྜཀཔུརིསསཉྙིཏཱ ཡཐཱསམྦྷཝཾ ཝེདིཏབྦཱ. དུཊྛུལླཝཱཙཱདིསིཀྑཱཔདདྭཡེ ཝཱརཱནཾ སཾཁིཏྟཏྟཱ པུརིསཏིརཙྪཱནགཏཱདཡོ ནཱགཏཱ. ཡཐཱཝུཏྟེསུ ཨཱཔཏྟི, ཏཐཱ ཏཏྠཱཔི. ཨཉྙཐཱ པུརིསཾ ཨོབྷཱསནྟསྶ ཙ ཨནཱཔཏྟཱིཏི པཎྜཀཾ ཨོབྷཱསནྟསྶ ཙ ཐུལླཙྩཡནྟི མཱཏིཀཱཊྛཀཐཱཡཾ ཝུཏྟཾ. ཏསྨཱ ཏེ ཝཱརཱ སཾཁིཏྟཱཏི པཉྙཱཡནྟཱིཏི. ཝིསེསོ ཙ པཎྜཀེ, པུརིསེ, ཏིརཙྪཱནགཏེ ཙ ཨིཏྠིསཉྙིསྶ ཨཏྠི, ཏཐཱཔི ཏཏྠ དུཀྐཊཾ ཝུཏྟཾ, ཏསྨཱ ཨཊྛཀཐཱཡཾ ཝུཏྟམེཝ པམཱཎནྟི དྭིནྣམེཏེསཾ ཝཱདཱནཾ ཡཏྠ ཡུཏྟི ཝཱ ཀཱརཎཾ ཝཱ ཨཏིརེཀཾ དིསྶཏི, ཏཾ ཝིཙཱརེཏྭཱ གཧེཏབྦནྟི ཨཱརིཙཡོ. ཨེཝརཱུཔེསུ ཋཱནེསུ སུཊྛུ ཝིཙཱརེཏྭཱ ཀཐེཏབྦཾ.

ཏཏྠ པཱལི༹ཡཾ ཨཱགཏཝཱརགཎནཱ ཏཱཝ ཨེཝཾ སངྑེཔཏོ ཝེདིཏབྦཱ – ཨིཏྠིམཱུལཀཱ པཉྩ ཝཱརཱ པཎྜཀཔུརིསཏིརཙྪཱནགཏམཱུལཀཱ ཙ པཉྩ པཉྩཱཏི ཝཱིསཏི ཝཱརཱ ཨེཀམཱུལཀཱ, ཏཐཱ དུམཱུལཀཱ ཝཱིསཏི, མིསྶཀམཱུལཀཱ ཝཱིསཏཱིཏི སཊྛི ¶ ཝཱརཱ, ཏཱནི ཏཱིཎི ཝཱིསཏིཀཱནི ཧོནྟི. ཨེཀེཀསྨིཾ ཝཱིསཏིཀེ ཨེཀེཀམཱུལཝཱརཾ གཧེཏྭཱ ཀཱཡེན ཀཱཡཔཊིབདྡྷཝཱརཱ ཏཡོ ཝུཏྟཱ. སེསཱ སཏྟཔཉྙཱས ཝཱརཱ སཾཁིཏྟཱ, ཏཐཱ ཀཱཡཔཊིབདྡྷེན ཀཱཡཝཱརཱ ཏཡོ ཝུཏྟཱ, སེསཱ སཾཁིཏྟཱ, ཨེཝཾ ཀཱཡཔཊིབདྡྷེན ཀཱཡཔཊིབདྡྷཝཱརེཔི ནིསྶགྒིཡེན ཀཱཡཝཱརེཔི ནིསྶགྒིཡེན ཀཱཡཔཊིབདྡྷཝཱརེཔི ནིསྶགྒིཡེན ནིསྶགྒིཡཝཱརེཔི ཏཡོ ཏཡོ ཝཱརཱ ཝུཏྟཱ, སེསཱ སཾཁིཏྟཱ. ཨེཝཾ ཚནྣཾ ཏིཀཱནཾ ཝསེན ཨཊྛཱརས ཝཱརཱ ཨཱགཏཱཏི སརཱུཔཏོ ཝུཏྟཱ, སེསཱ དྭེཙཏྟཱལཱིསཱདྷིཀཱནི ཏཱིཎི ཝཱརསཏཱནི སཾཁིཏྟཱནི. ཏཏོ པརཾ མཱཏུགཱམསྶ སཱརཏྟཔཀྑེ ཀཱཡེན ཀཱཡནྟི ཨེཀམེཀཾ ཝཌྜྷེཏྭཱ པུབྦེ ཝུཏྟཱ ཨཊྛཱརས ཝཱརཱ ཨཱགཏཱཏི ཨེཀཝཱིསཏི ཝཱརཱ སརཱུཔེན ཨཱགཏཱ, ནཝནཝུཏཱདྷིཀཱནི ཏཱིཎི ཝཱརསཏཱནི སཾཁིཏྟཱནི. ཏཏོ པརཾ ཨཱཔཏྟཱནཱཔཏྟིདཱིཔཀཱ ¶ ཙཏྟཱརོ སེཝནཱདྷིཔྤཱཡམཱུལཀཱ ཙཏྟཱརོ མོཀྑཱདྷིཔྤཱཡམཱུལཀཱཏི དྭེ ཙཏུཀྐཱ ཨཱགཏཱ.

ཏཏྠཱཡཾ ཝིསེསོ – ཡདིདཾ མཱཏིཀཱཡ པརཱམསནཔདཾ, ཏེན ཡསྨཱ ཨཱམསནཱདཱིནི ཚུཔནཔརིཡོསཱནཱནི དྭཱདསཔི པདཱནི གཧིཏཱནི, ཏསྨཱ པདུདྡྷཱརཾ ཨཀཏྭཱ ‘‘ཨཱམསནཱ པརཱམསནཾ ཚུཔན’’ནྟི ཨཱཧ. པརཱམསནཾ ནཱམ ཨཱམསནཱ. ‘‘ཚུཔན’’ནྟི ཧི ཝུཏྟེ པརཱམསནམྤི ཝིསུཾ ཨེཀཏྟཾ བྷཝེཡྻཱཏི ཝེདིཏབྦཾ. ཨིཏྠཱི ཙ ཧོཏི ཨིཏྠིསཉྙཱི ཙཱཏི ཨིམསྨིཾ པཋམཝཱརེ ཨེཝ དྭཱདསཔི ཨཱམསནཱདཱིནི ཡོཛེཏྭཱ དསྶིཏཱནི. ཏཏོ པརཾ ཨཱདིམྷི དྭེ པདཱནཱིཏི ཙཏྟཱརི པདཱནི ཨཱགཏཱནི, ཨིཏརཱནི སཾཁིཏྟཱནཱིཏི ཝེདིཏབྦཱནི. ནིསྶགྒིཡེན ཀཱཡཝཱརཱདཱིསུ པན སབྦཱཀཱརེན ཨལཱབྷཏོ ཨཱམསནམེཝེཀཾ ཨཱགཏཾ, ནེཏརཱནི. ‘‘སཉྩོཔེཏི ཧརཏཱི’’ཏི པཱཋོ, སཉྩོཔེཏི ཙ. གཎྛིཔདེསུ པན ‘‘པུརིམནཡེནེཝཱཏི རཛྫུཝཏྠཱདཱིཧི པརིཀྑིཔནེ’’ཏི ཙ པཙྪཱ ‘‘པུརིམནཡེནེཝཱཏི སམྨསནཱ ཧོཏཱི’’ཏི ཙ ‘‘ཝེཎིགྒཱཧེ ཨཱཔཏྟིཡཱ པཉྙཏྟཏྟཱ ལོམཕུསནེཔི སངྒྷཱདིསེསོ’’ཏི ཙ ‘‘ཏཾ པཀཱསེཏུཾ ཨུཔཱདིནྣཀེན ཧཱིཏིཨཱདི ཝུཏྟ’’ནྟི ཙ ལིཁིཏཾ.

ཡཐཱནིདྡིཊྛནིདྡེསེཏི ཨིམསྨིཾཡེཝ ཡཐཱནིདྡིཊྛེ ནིདྡེསེ. ‘‘སདིསཾ ཨགྒཧེསཱི’’ཏི ཝུཏྟེ ཏཱདིསཾ ཨགྒཧེསཱིཏི གརུཀཾ ཏཏྠ ཀཱརཡེཏི ཨཏྠོ, ཀཱཡསཾསགྒཝིབྷངྒེ ཝཱཏི ཨཏྠོ. ཨིཏརོཔི ཀཱཡཔཊིབདྡྷཚུཔནཀོ. གཧཎེ ཙཱཏི གཧཎཾ ཝཱ. ཝིརཱགིཏེཏི ཝིརདྡྷེ. སཱརཏྟནྟི ཀཱཡསཾསགྒརཱགེན ¶ རཏྟཾ, ཨཏྟནཱ ཨདྷིཔྤེཏནྟི ཨཏྠོ. ‘‘མཱཏུབྷགིནིཨཱདིཝིརཏྟཾ གཎྷིསྶཱམཱི’’ཏི ཝིརཏྟཾ ཉཱཏིཔེམཝསེན གཎྷི, ཨེཏྠ དུཀྐཊཾ ཡུཏྟཾ. ‘‘ཀཱཡསཾསགྒརཱགཾ ཝཱ སཱརཏྟཾ གཎྷིསྶཱམཱི’’ཏི ཝིརཏྟཾ མཱཏརཾ གཎྷི, ཨནདྷིཔྤེཏཾ གཎྷི. ཨེཏྠ མཧཱསུམཏྠེརཝཱདེན ཐུལླཙྩཡཾ ‘‘ཀཱཡཾ གཎྷིསྶཱམཱི’’ཏི ཀཱཡཔྤཊིབདྡྷཾ གཎྷཱཏི, ཐུལླཙྩཡནྟི ལདྡྷིཀཏྟཱ. ‘‘ཨིཏྠཱི ཙ ཧོཏི ཨིཏྠིསཉྙཱི སཱརཏྟོ ཙ, བྷིཀྑུ ཙ ནཾ ཨིཏྠིཡཱ ཀཱཡེན ཀཱཡཾ ཨཱམསཏི, ཨཱཔཏྟི སངྒྷཱདིསེསསྶཱ’’ཏི (པཱརཱ. ༢༧༣) ཝཙནཏོ སངྒྷཱདིསེསོཔི ཁཱཡཏི. ‘‘ཝིརཏྟཾ གཎྷིསྶཱམཱི’’ཏི སཱརཏྟཾ གཎྷཱཏི, ཨེཏྠཔི སངྒྷཱདིསེསོཝ ཁཱཡཏི ‘‘ནཱིལཾ གྷཊྚེསྶཱམཱི’ཏི ཀཱཡཾ གྷཊྚེཏི, སངྒྷཱདིསེསོ’’ཏི ཝཙནཏོ. ཨེཏྠ པན ‘‘ན པུབྦབྷཱགེ ཀཱཡསཾསགྒརཱགཏྟཱ’’ཏི ཨནུགཎྛིཔདེ ཀཱརཎཾ ཝུཏྟཾ. ཀེཙི པན ‘‘གརུཀཱཔཏྟིབྷཡེན ‘ནཱིལམེཝ གྷཊྚེསྶཱམཱི’ཏི ཝཱཡཱམནྟོ ཀཱཡཾ གྷཊྚེཏི, པུབྦབྷཱགེ ཏསྶ ‘ཀཱཡཔཊིབདྡྷཾ གྷཊྚེསྶཱམཱི’ཏི པཝཏྟཏྟཱ དུཀྐཊེན བྷཝིཏབྦ’’ནྟི ཝདནྟི. དྷམྨསིརིཏྠེརོ ‘‘ཨེཝརཱུཔེ སངྒྷཱདིསེསོ’’ཏི ཝདཏི ཀིར. ‘‘ཨིཏྠིཨུབྷཏོབྱཉྫནཀཨིཏྠིཡཱ པུརིསཨུབྷཏོབྱཉྫནཀཔུརིསེ ཝུཏྟནཡེན ཨཱཔཏྟིབྷེདོ, ཨིཏྠིལིངྒསྶ པཊིཙྪནྣཀཱལེཔི ཨིཏྠིཝསེནེཝ ཨཱཔཏྟཱི’’ཏི ཝདནྟི.

ཝིནཱིཏཝཏྠུཝཎྞནཱ

༢༨༡. ཏིཎཎྜུཔཀནྟི ¶ ཧིརིཝེརཱདིམཱུལཱནི གཧེཏྭཱ ཀཏྟབྦཾ. ཏཱལཔཎྞམུདྡིཀནྟི ཏཱལཔཎྞམཡཾ ཨངྒུལིམུདྡིཀཾ, ཏེན ཏཱལཔཎྞམཡཾ ཀཊཾ, ཀཊིསུཏྟཀཾ, ཀཎྞཔིལ༹ནྡྷནཱདི སབྦཾ ན ཝཊྚཏཱིཏི སིདྡྷཾ. ཏམྦཔཎྞིཝཱསིནོ ཨིཏྠིརཱུཔཾ ལིཁིཏཾ, ཀཊིཀཔཊཉྩ ན ཚུཔནྟི ཀིར. ཨཱཀརཏོ མུཏྟམཏྟོ. རཏནམིསྶོཏི ཨལངྐཱརཏྠཾ ཀཏོ ཀཉྩནལཏཱདིཝིནདྡྷོ. སུཝཎྞེན སདྡྷིཾ ཡོཛེཏྭཱ པཙིཏྭཱཏི སུཝཎྞརསཾ པཀྑིཔིཏྭཱ པཙིཏྭཱ. བཱིཛཏོ དྷཱཏུཔཱསཱཎཏོ པཊྛཱཡ. ཐེརོ ན ཀཔྤཏཱིཏི ‘‘ཏུམྷཱཀཾ པེསིཏ’’ནྟི ཝུཏྟཏྟཱ. ‘‘ཙེཏིཡསྶ པཱུཛཾ ཀརོཐཱ’’ཏི ཝུཏྟེ ཝཊྚཏི ཀིར. བུབྦུལ༹ཀཾ ཏཱརཀཾ. ཨཱརཀཱུཊལོཧམྤི ཛཱཏརཱུཔགཏིཀམེཝ.

ཝུཏྟཉྷེཏཾ ཨནྡྷཀཊྛཀཐཱཡཾ –

‘‘ཨཱརཀཱུཊལོཧཾ སུཝཎྞསདིསམེཝ, སུཝཎྞཾ ཨནུལོམེཏི, ཨནཱམཱས’’ནྟི.

‘‘བྷེསཛྫཏྠཱཡ ¶ པན ཝཊྚཏཱི’’ཏི ཝཙནཏོ མཧཱཨཊྛཀཐཱཡཾ ཝུཏྟནཡེཀདེསོཔི ཨནུཉྙཱཏོ ཧོཏཱིཏི ཏཏྠ ཏཏྠ ཨདྷིཔྤཱཡཾ ཉཏྭཱ ཝིབྷཱཝེཏབྦཾ.

ཀཱཡསཾསགྒསིཀྑཱཔདཝཎྞནཱ ནིཊྛིཏཱ.

༣. དུཊྛུལླཝཱཙཱསིཀྑཱཔདཝཎྞནཱ

༢༨༣. ཏཏིཡེ ཏཡོ སངྒྷཱདིསེསཝཱརཱ ཏཡོ ཐུལླཙྩཡཝཱརཱ ཏཡོ དུཀྐཊཝཱརཱ ཏཡོ ཀཱཡཔཊིབདྡྷཝཱརཱཏི དྭཱདས ཝཱརཱ སརཱུཔེན ཨཱགཏཱ. ཏཏྠ ཏཡོ སངྒྷཱདིསེསཝཱརཱ དུཏིཡསིཀྑཱཔདེ ཝུཏྟཱཏི ཏིཎྞཾ ཝཱིསཏིཀཱནཾ ཨེཀེཀམཱུལཱ ཝཱརཱཏི ཝེདིཏབྦཱ, ཏསྨཱ ཨིདྷ ཝིསེསཱཏི པཎྞཱས ཝཱརཱ སཾཁིཏྟཱ ཧོནྟི, ཨཉྙཐཱ ཨིཏྠཱི ཙ ཧོཏི ཝེམཏིཀོ སཱརཏྟོ ཙ, བྷིཀྑུ ཙ ནཾ ཨིཏྠིཡཱ ཝཙྩམགྒཾ པསྶཱཝམགྒཾ ཨཱདིསྶ ཝཎྞམྤི བྷཎཏི…པེ… ཨཱཔཏྟི ཐུལླཙྩཡསྶ. ཨིཏྠཱི ཙ ཧོཏི པཎྜཀཔུརིསསཉྙཱི ཏིརཙྪཱནགཏསཉྙཱི སཱརཏྟོ ཙ, བྷིཀྑུ ཙ ནཾ ཨིཏྠིཡཱ ཝཙྩམགྒཾ པསྶཱཝམགྒཾ ཨཱདིསྶ ཝཎྞམྤི བྷཎཏི ཨཀྐོསཏིཔི, ཨཱཔཏྟི ཐུལླཙྩཡསྶ. པཎྜཀོ ཙ ཧོཏི པཎྜཀསཉྙཱི སཱརཏྟོ ཙ, བྷིཀྑུ ཙ ནཾ པཎྜཀསྶ ཝཙྩམགྒཾ ཨཱདིསྶ ཝཎྞམྤི བྷཎཏི, ཨཱཔཏྟི ཐུལླཙྩཡསྶཱཏི ཨེཝམཱདཱིནཾ ཨཱཔཏྟིཊྛཱནཱནཾ ཨནཱཔཏྟིཊྛཱནཏཱ ¶ ཨཱཔཛྫེཡྻ, ན ཙཱཔཛྫཏི, པཎྜཀེ ཨིཏྠིསཉྙིསྶ དུཀྐཊནྟི དཱིཔེཏུཾ ‘‘ཨིཏྠཱི ཙ པཎྜཀོ ཙ ཨུབྷིནྣཾ ཨིཏྠིསཉྙཱི ཨཱཔཏྟི སངྒྷཱདིསེསེན དུཀྐཊསྶཱ’’ཏི ཝུཏྟཏྟཱ ‘‘པཎྜཀེ པཎྜཀསཉྙིསྶ ཐུལླཙྩཡ’’ནྟི ཝུཏྟམེཝ ཧོཏི, ཏསྨཱ སབྦཏྠ སཾཁིཏྟཝཱརེསུ ཐུལླཙྩཡཊྛཱནེ ཐུལླཙྩཡཾ, དུཀྐཊཊྛཱནེ དུཀྐཊམྤི ཝུཏྟམེཝ ཧོཏཱིཏི ཝེདིཏབྦཾ. ཏཐཱ ‘‘ཨིཏྠཱི ཙ ཧོཏི ཝེམཏིཀོ སཱརཏྟོ ཙ, བྷིཀྑུ ཙ ནཾ ཨིཏྠིཡཱ ཝཙྩམགྒཾ པསྶཱཝམགྒཾ ཋཔེཏྭཱ ཨདྷཀྑཀཾ ཨུབྦྷཛཱཎུམཎྜལཾ ཨཱདིསྶ ཝཎྞམྤི བྷཎཏི…པེ… ཐུལླཙྩཡསྶཱ’’ཏིཨཱདིནཱ ནཡེན ཐུལླཙྩཡཁེཏྟེཔི ཡཐཱསམྦྷཝཾ ཨུདྡྷརིཏབྦཱ. ཏཐཱ ‘‘ཨིཏྠཱི ཙ ཧོཏི ཝེམཏིཀོ སཱརཏྟོ ཙ, བྷིཀྑུ ཙ ནཾ ཨིཏྠིཡཱ ཀཱཡཔཊིབདྡྷཾ ཨཱདིསྶ ཝཎྞམྤི བྷཎཏི…པེ… དུཀྐཊསྶཱ’’ཏིཨཱདིནཱ ནཡེན ཀཱཡཔཊིབདྡྷཝཱརཱཔི ཡཐཱསམྦྷཝཾ ཨུདྡྷརིཏབྦཱ. ཀཱཡཔྤཊིབདྡྷཝཱརཏྟིཀཾ ཝིཡ ནིསྶགྒིཡཝཱརཏྟིཀཾ ལབྦྷམཱནམྤི ཨཱཔཏྟིཝིསེསཱབྷཱཝཏོ ན ཨུདྡྷཊཾ. ཀཱཡཔྤཊིབདྡྷཝཱརཏྟིཀེ པན དིནྣནཡཏྟཱ ཏམྤི ཏདནུལོམཱ ཝཱརཱ ཙ ¶ ཨུདྡྷརིཏབྦཱ. སབྦཏྠ ན-ཝིཉྙཱུ ཏརུཎདཱརིཀཱ, མཧལླིཀཱ ཨུམྨཏྟིཀཱདིཀཱ ཙ ཨནདྷིཔྤེཏཱ, པགེཝ པཱཀཏིཀཱ ཏིརཙྪཱནགཏིཏྠཱིནཾ, ཏཐཱ པཎྜཀཱདཡོཔཱིཏི ཝེདིཏབྦཱ. སེསཾ དུཏིཡེ ཝུཏྟནཡེནེཝ ཝེདིཏབྦཾ.

པདབྷཱཛནཱིཡཝཎྞནཱ

༢༨༥. ཝུཏྟནཡམེཝཱཏི ‘‘ཀཱཡསཾསགྒེ ཨིཏྠིལཀྑཎེནཱ’’ཏི ལིཁིཏཾ. ‘‘ཨིཏྠིལཀྑཎེནཱ’’ཏི ཀིར མཧཱཨཊྛཀཐཱཔཱཋོ. སཱིསཾ ན ཨེཏཱིཏི ཨཀྐོསནཾ ན ཧོཏི, གྷཊིཏེ པན ཧོཏི. ཏཏྲཱཡཾ ཝིསེསོ – ཨིམེཧི ཏཱིཧི གྷཊིཏེ ཨེཝ སངྒྷཱདིསེསོ ཝཙྩམགྒཔསྶཱཝམགྒཱནཾ ནིཡཏཝཙནཏྟཱ, ཨཙྩོལཱ༹རིཀཏྟཱ ཝཱ, ན ཨཉྙེཧི ཨནིམིཏྟཱསཱིཏིཨཱདཱིཧི ཨཊྛཧི. ཏཏྠ ཨལོཧིཏཱསི, དྷུཝལོཧིཏཱསི, དྷུཝཙོལཱ༹སི, པགྒྷརཎཱིསི, ཨིཏྠིཔཎྜཀཱསི, ཝེཔུརིསིཀཱསཱིཏི ཨེཏཱནི ཚ མགྒཱནཾ ཨནིཡཏཝཙནཱནི, ཨནིམིཏྟཱསི, ནིམིཏྟམཏྟཱསཱིཏི དྭེ པདཱནི ཨནཙྩོལཱ༹རིཀཱནི ཙ, ཡཏོ ཨཊྛཔདཱནི ‘‘སངྒྷཱདིསེསཾ ན ཛནེནྟཱི’’ཏི ཝུཏྟཱནི, ཏསྨཱ ཏཱནི ཐུལླཙྩཡཝཏྠཱུནི. པརིབྦཱཛཀཝཏྠུམྷི ཝིཡ ཨཀྐོསམཏྟཏྟཱ དུཀྐཊཝཏྠཱུནཱིཏི ཨེཀེ. ཨིཏྠིཔཎྜཀཱསི, ཝེཔུརིསིཀཱསཱིཏི ཨེཏཱནེཝ པདཱནི སཀལསརཱིརསཎྛཱནབྷེདདཱིཔཀཱནི སུདྡྷཱནི སངྒྷཱདིསེསཾ ན ཛནེནྟི སཀལསརཱིརསཱམཉྙཏྟཱ, ཨིཏརཱནི ཛནེནྟི ཨསཱམཉྙཏྟཱ. ཏཱནི ཧི པསྶཱཝམགྒམེཝ དཱིཔེནྟི སིཁརཎཱི-པདཾ ཝིཡ. ཨུབྷཏོབྱཉྫནཱསཱིཏི ཝཙནཾ པན པུརིསནིམིཏྟེན ཨསངྒྷཱདིསེསཝཏྠུནཱ མིསྶཝཙནཾ. པུརིསཨུབྷཏོབྱཉྫནཀསྶ ཙ ཨིཏྠིནིམིཏྟཾ པཊིཙྪནྣཾ, པུརིསནིམིཏྟཾ པཱཀཊཾ ཧོཏི. ཡདི ཏམྤི ཛནེཏི, ཀཐཾ ཨནིམིཏྟཱསཱིཏིཨཱདིཔདཱནི ན སངྒྷཱདིསེསཾ ཛནེནྟཱིཏི ཨེཀེ, ཏཾ ན ཡུཏྟཾ. པུརིསསྶཔི ནིམིཏྟཱདྷིཝཙནཏོ, ‘‘མེཐུནུཔསཾཧིཏཱཧི སངྒྷཱདིསེསོ’’ཏི མཱཏིཀཱཡ ལཀྑཎསྶ ཝུཏྟཏྟཱ ཙ མེཐུནུཔསཾཧིཏཱཧིཔི ¶ ཨོབྷཱསནེ པཊིཝིཛཱནནྟིཡཱ སངྒྷཱདིསེསོ, ཨཔྤཊིཝིཛཱནནྟིཡཱ ཐུལླཙྩཡཾ, ཨིཏརེཧི ཨོབྷཱསནེ པཊིཝིཛཱནནྟིཡཱ ཐུལླཙྩཡཾ, ཨཔྤཊིཝིཛཱནནྟིཡཱ དུཀྐཊནྟི ཨེཀེ, སབྦཾ སུཊྛུ ཝིཙཱརེཏྭཱ གཧེཏབྦཾ.

༢༨༧. ཧསནྟོཏི ཡཾ ཨུདྡིསྶ བྷཎཏི, སཱ ཙེ པཊིཝིཛཱནཱཏི, སངྒྷཱདིསེསོ.

ཝིནཱིཏཝཏྠུཝཎྞནཱ

༢༨༩. ‘‘པཊིཝུཏྟཾ ¶ ནཱམཱ’’ཏི པཱཋོ. ནོ-སདྡོ ཨདྷིཀོ. ‘‘ཨཀྑརལིཁནེནཔི ཧོཏཱི’’ཏི ཝདནྟི, ཏཾ ཨཱཝཛྫནསམནནྟརཝིདྷིནཱ སམེཏི ཙེ, གཧེཏབྦཾ.

དུཊྛུལླཝཱཙཱསིཀྑཱཔདཝཎྞནཱ ནིཊྛིཏཱ.

༤. ཨཏྟཀཱམཔཱརིཙརིཡསིཀྑཱཔདཝཎྞནཱ

༢༩༠. ཙཏུཏྠེ ཏཡོ སངྒྷཱདིསེསཝཱརཱ ཨཱགཏཱ, སེསཱ སཏྟཔཉྙཱས ཝཱརཱ ཐུལླཙྩཡདུཀྐཊཱཔཏྟིཀཱཡ སཾཁིཏྟཱཏི ཝེདིཏབྦཱ, ཏཏོ ཨཉྙཏརོ ཨསམྦྷཝཏོ ཨིདྷ ན ཨུདྡྷཊོ. སེསཡོཛནཀྐམོ ཝུཏྟནཡེན ཝེདིཏབྦོ. ནགརཔརིཀྑཱརེཧཱིཏི པཱཀཱརཔརིཁཱདཱིཧི ནགརཔརིཝཱརེཧི. སེཏཔརིཀྑཱརོཏི སེཏཱལངྐཱརོ, སཱིལཱལངྐཱརོཏི ཨཏྠོ (སཾ. ནི. ཨཊྛ. ༣.༥.༤). ཙཀྐཝཱིརིཡོཏི ཝཱིརིཡཙཀྐོ. ཝསལཾ དུགྒནྡྷནྟི ནིམིཏྟཾ སནྡྷཱཡཱཧ, ཏདེཝ སནྡྷཱཡ ‘‘ཀིཾ མེ པཱཔཀཾ, ཀིཾ མེ དུགྒནྡྷ’’ནྟི ཝུཏྟཾ.

༢༩༡. སནྟིཀེཏི ཡཏྠ ཋིཏོ ཝིཉྙཱཔེཏི. ‘‘པཋམཝིགྒཧེ སཙེ པཱལི༹ཝསེན ཡོཛེཏཱིཏི ཀཱམཧེཏུཔཱརིཙརིཡཱཨཏྠོ. སེསནྟི ‘ཨདྷིཔྤཱཡོ’ཏི པདཾ བྱཉྫནཾ ཨཏྠཱབྷཱཝཏོ. དུཏིཡེ པཱལི༹ཝསེན ཀཱམཧེཏུ-པདཱནི བྱཉྫནཱནི ཏེསཾ ཏཏྠ ཨཏྠཱབྷཱཝཏོ. ཨེཝཾ ཙཏྟཱརི པདཱནི དྭིནྣཾ ཝིགྒཧཱནཾ ཝསེན ཡོཛིཏཱནཱིཏི ཨཔརེ ཝདནྟཱི’’ཏི ཝུཏྟཾ.

༢༩༥. ཨེཏེསུ སིཀྑཱཔདེསུ མེཐུནརཱགེན ཝཱིཏིཀྐམེ སཏི སངྒྷཱདིསེསེན ཨནཱཔཏྟི. ཏསྨཱ ‘‘ཀིཾ བྷནྟེ ཨགྒདཱནནྟི. མེཐུནདྷམྨ’’ནྟི ཨིདཾ ཀེཝལཾ མེཐུནདྷམྨསྶ ཝཎྞབྷཎནཏྠཾ ཝུཏྟཾ, ན མེཐུནདྷམྨཱདྷིཔྤཱཡེན ཏདཏྠིཡཱ ཝུཏྟནྟི ཝེདིཏབྦཾ, པརསྶ བྷིཀྑུནོ ཀཱམཔཱརིཙརིཡཱཡ ཝཎྞབྷཎནེ ¶ དུཀྐཊཾ. ‘‘ཡོ ཏེ ཝིཧཱརེ ཝསཏི, ཏསྶ ཨགྒདཱནཾ དེཧཱི’’ཏི པརིཡཱཡཝཙནེནཔི དུཀྐཊཾ. ‘‘ཨཏྟཀཱམཔཱརིཙརིཡཱཡ ཝཎྞཾ བྷཱསེཡྻ. ཡཱ མཱདིསཾ སཱིལཝནྟ’’ནྟི ཙ ཝུཏྟཏྟཱཏི ཨེཀེ. པཉྩསུ ཨངྒེསུ སབྦྷཱཝཱ སངྒྷཱདིསེསོཝཱཏི ཨེཀེ. ཝིཙཱརེཏྭཱ གཧེཏབྦཾ. གཎྛིཔདེ པན ‘‘ཨིམསྨིཾ ¶ སིཀྑཱཔདདྭཡེ ཀཱཡསཾསགྒེ ཝིཡ ཡཀྑིཔེཏཱིསུ དུཊྛུལླཏྟཀཱམཝཙནེ ཐུལླཙྩཡ’ནྟི ཝདནྟི. ཨཊྛཀཐཱསུ པན ནཱགཏ’’ནྟི ལིཁིཏཾ. ‘‘ཨུབྷཏོབྱཉྫནཀོ པན པཎྜཀགཏིཀོཝཱ’’ཏི ཝདནྟི.

ཨཏྟཀཱམཔཱརིཙརིཡསིཀྑཱཔདཝཎྞནཱ ནིཊྛིཏཱ.

༥. སཉྩརིཏྟསིཀྑཱཔདཝཎྞནཱ

༢༩༧. ཨཧམྷི དུགྒཏཱཏི ཨཧཾ ཨམྷི དུགྒཏཱ. ཨཧཾ ཁྭཡྻོཏི ཨེཏྠ ཨཡྻོཏི བཧུཝཙནཾ ཧོཏི.

༢༩༨. ཨོཡཱཙནྟཱིཏི ནཱིཙཾ ཀཏྭཱ དེཝེ ཡཱཙནྟི. ཨཱཡཱཙནྟཱིཏི ཨུཙྩཾ ཀཏྭཱ ཨཱདརེན ཡཱཙནྟི. ཨལངྐཱརཱདཱིཧི མཎྜིཏོ ཀེསསཾཝིདྷཱནཱདཱིཧི པསཱདྷིཏོ. ‘‘མཎྜིཏཀརཎེ དུཀྐཊ’’ནྟི ཝདནྟི.

པདབྷཱཛནཱིཡཝཎྞནཱ

༣༠༣. སཧ པརིདཎྜེན ཝཏྟམཱནཱཏི ཨཏྠོ. ཚནྡཝཱསིནཱི ནཱམ ‘‘པིཡཱ པིཡཾ ཝསེཏཱི’’ཏི པཱལི༹, པུརིསཾ ཝཱསེཏཱིཏི ཨདྷིཔྤཱཡོ. ‘‘པིཡོ པིཡཾ ཝཱསེཏཱི’’ཏི ཨཊྛཀཐཱ.

ཏཾ ཀིརིཡཾ སམྤཱདེསྶཏཱིཏི ཨཝསྶཾ ཨཱརོཙེནྟིཡཱ ཙེ ཨཱརོཙེཏཱིཏི ཨཏྠོ. དྭིནྣཾ མཱཏཱཔིཏཱུནཾ ཙེ ཨཱརོཙེཏི, སངྒྷཱདིསེསོཏི ཝིནཡཝིནིཙྪཡེ ‘‘ཝཏྠུ ཨོལོཀེཏབྦ’’ནྟི ཝུཏྟཾ. ཝཏྠུམྷི ཙ ‘‘ཨུདཱཡིཏྠེརོ གཎིཀཱཡ ཨཱརོཙེསཱི’’ཏི ཝུཏྟཾ. ཏཾ ‘‘མཱཏཱདཱིནམྤི ཝདཏོ ཝིསངྐེཏོ ནཏྠཱི’’ཏི ཨཊྛཀཐཱཝཙནཏོ ནིཔྤཡོཛནཾ. ཏཾ པནེཏནྟི ཨཱཙརིཡསྶ ཝཙནཾ. མཱཏུརཀྑིཏཾ བྲཱུཧཱིཏི པེསིཏསྶ གནྟྭཱ མཱཏཱཔིཏུརཀྑིཏཾ ཝདཏོ ཏསྶ ཏསྶཱ མཱཏུརཀྑིཏབྷཱཝེཔི སཏི ཝིསངྐེཏམེཝ, ཀསྨཱ? ‘‘པིཏུརཀྑིཏཱདཱིསུ ཨཉྙཏརཾ ཝདནྟསྶ ཝིསངྐེཏ’’ནྟི ཝུཏྟཏྟཱ ཨིཏརཐཱ ཨཱདི-སདྡོ ནིརཏྠཀོ སིཡཱ. ཨེཀཾ དསཀཾ ཨིཏརེན དསཀེན ཡོཛེཏྭཱ པུབྦེ སུཀྐཝིསྶཊྛིཡཾ ཝུཏྟནཡཏྟཱ མཱཏུརཀྑིཏཱཡ མཱཏཱ ཨཏྟནོ དྷཱིཏུསནྟིཀཾ པཧིཎཏཱིཏི གཧེཏབྦཾ.

༣༣༨. ཨནབྷིནནྡིཏྭཱཏི ¶ ཝཙནམཏྟམེཝ, ཡདིཔི ཨབྷིནནྡཏི, ཡཱཝ སཱསནཾ ནཱརོཙེཏི, ཏཱཝ ‘‘ཝཱིམཾསིཏོ’’ཏི ན ཝུཙྩཏི. སཱསནཱརོཙནཀཱལེཏི ཨཱཎཱཔཀསྶ ¶ སཱསནཝཙནཀྑཎེ. ཏཏིཡཔདེ ཝུཏྟནཡེནཱཏི ཨེཀངྒསམྤཏྟིཡཱ དུཀྐཊནྟི ཨཏྠོ. ཝཏྠུགཎནཱཡ སངྒྷཱདིསེསོཏི ཨུབྷཡཝཏྠུགཎནཱཡ ཀིར.

༣༣༩. ཙཏུཏྠེ ཨནཱཔཏྟཱིཏི ཨེཏྠ པན ‘‘པཊིགྒཎྷཱཏི ན ཝཱིམཾསཏི ན པཙྩཱཧརཏི, ཨནཱཔཏྟཱིཏི ཨེཏྠ ཝིཡ ‘གཙྪནྟོ ན སམྤཱདེཏི, ཨཱགཙྪནྟོ ཝིསཾཝཱདེཏཱི’ཏི ཨནཱཔཏྟིཔཱལི༹ཡཱཔི བྷཝིཏབྦནྟི དསྶནཏྠཾ ཝུཏྟ’’ནྟི ཝདནྟི, ཨེཀཙྩེསུ པོཏྠཀེསུ ‘‘ཨཏྠཱི’’ཏིཔི.

ཝིནཱིཏཝཏྠུཝཎྞནཱ

༣༤༡. ཨལཾཝཙནཱིཡཱཏི ན ཝཙནཱིཡཱ, ནིཝཱརཎེ ཨལཾ-སདྡོ. ཐེརཔིཏཱ ཝདཏཱིཏི ཛིཎྞཔིཏཱ ཝདཏཱིཏི ཨཏྠོ. ཀིཉྩཱཔི ཨེཏྠ ‘‘ཨིཏྠཱི ནཱམ མནུསྶིཏྠཱི ན ཡཀྑཱི ན པེཏཱི ན ཏིརཙྪཱནགཏཱ, པུརིསོ ནཱམ མནུསྶཔུརིསོ ན ཡཀྑོ’’ཏིཨཱདི ནཏྠི, ཏཐཱཔི ཀཱཡསཾསགྒཱདཱིསུ ‘‘མནུསྶིཏྠཱི’’ཏི ཨིཏྠཱིཝཝཏྠཱནསྶ ཀཏཏྟཱ ཨིདྷཱཔི མནུསྶིཏྠཱི ཨེཝཱཏི པཉྙཱཡཏི. མེཐུནཔུབྦབྷཱགཏྟཱ མནུསྶཨུབྷཏོབྱཉྫནཀོ ཙ ཐུལླཙྩཡཝཏྠུཀོཝ ཧོཏི, སེསཱ མནུསྶཔཎྜཀཨུབྷཏོབྱཉྫནཀཏིརཙྪཱནགཏཔུརིསཱདཡོ དུཀྐཊཝཏྠུཀཱཝ མིཙྪཱཙཱརསཱསནངྒསམྦྷཝཏོཏི ཝེདིཏབྦཾ. ཡཐཱསམྦྷཝཾ པན ཝཱརཱ ཨུདྡྷརིཏབྦཱ. པཉྙཏྟིཨཛཱནནེ ཝིཡ ཨལཾཝཙནཱིཡབྷཱཝཱཛཱནནེཔི ཨཙིཏྟཀཏཱ ཝེདིཏབྦཱ. དུཊྛུལླཱདཱིསུཔཱིཏི ‘‘ཨིམསྨིམྤཱི’’ཏི ཝུཏྟམེཝ ཧོཏི. ‘‘ལེཁཾ ནེཏྭཱ པཊིལེཁཾ ཨཱརོཙིཏསྶཱཔི སཉྩརིཏྟཾ ནཏྠི སཉྩརིཏྟབྷཱཝམཛཱནནྟསྶཱ’’ཏི ཝདནྟི, ཝཱིམཾསིཏྭཱ གཧེཏབྦཾ.

སཉྩརིཏྟསིཀྑཱཔདཝཎྞནཱ ནིཊྛིཏཱ.

༦. ཀུཊིཀཱརསིཀྑཱཔདཝཎྞནཱ

༣༤༢. ཡཱཙནཱཏི ‘‘དེཐ དེཐཱ’’ཏི ཙོདནཱ. ཝིཉྙཏྟཱིཏི ཨིམིནཱ ནོ ཨཏྠོཏི ཝིཉྙཱཔནཱ. ‘‘ཧཏྠཀམྨཾ ཡཱཙིཏོ ཨུཔཀརཎཾ, མཱུལཾ ཝཱ དསྶཏཱི’’ཏི ཡཱཙཏི, ན ཝཊྚཏཱིཏི. ཝཊྚཏི སེནཱསནེ ཨོབྷཱསཔརིཀཐཱདཱིནཾ ལདྡྷཏྟཱཏི ཨེཀེ. ཨནཛ྄ཛྷཱཝུཏྠཀནྟི ཨསྶཱམིཀཾ. ན ཨཱཧཊཾ ¶ པརིབྷུཉྫིཏབྦནྟི ‘‘སཱུཔོདནཝིཉྙཏྟིདུཀྐཊཾ ¶ ཧོཏཱི’’ཏི ཝུཏྟཾ. ‘‘ཀིཉྩཱཔི གརུབྷཎྜཔྤཧོནཀེསཱུཏི ཝུཏྟཾ, ཏཐཱཔི ཡཾ ཝཏྠུཝསེན ཨཔྤཾ ཧུཏྭཱ ཨགྒྷཝསེན མཧཱ ཧརིཏཱལཧིངྒུལིཀཱདི, ཏཾ ཡཱཙིཏུཾ ན ཝཊྚཏཱི’’ཏི ཝདནྟི.

༣༤༤. སོ ཀིརཱཏི ཨིསི. ཏདཱ ཨཛ྄ཛྷགམཱ ཏདཛ྄ཛྷགམཱ.

༣༤༨-༩. ན ཧི སཀྐཱ ཡཱཙནཱཡ ཀཱཏུཾ, ཏསྨཱ སཡཾ ཡཱཙིཏཀེཧི ཨུཔཀརཎེཧཱིཏི ཨདྷིཔྤཱཡོ. བྱཉྫནཾ སམེཏི, ན ཨཏྠོ. ཀསྨཱ? ཨིདྷ ཨུབྷཡེསཾ ཨདྷིཔྤེཏཏྟཱ, ཏཾ དསྶེནྟོ ‘‘ཡསྨཱ པནཱ’’ཏིཨཱདིམཱཧ. ཨིདྷ ཝུཏྟནཡེནཱཏི ཨིམསྨིཾ སིཀྑཱཔདཝིབྷངྒེ ཝུཏྟནཡེན. ‘‘སཉྙཱཙིཀཱཡཱ’’ཏི ཝཙནཏོ ཀརོནྟེནཱཔི, ‘‘པརེཧི པརིཡོསཱཔེཏཱི’’ཏི ཝཙནཏོ ཀཱརཱཔེནྟེནཱཔི པཊིཔཛྫིཏབྦཾ. ཨུབྷོཔེཏེ ཀཱརཀཀཱརཱཔཀཱ. བྱཉྫནཾ ཝིལོམིཏཾ བྷཝེཡྻ, ‘‘ཀཱརཡམཱནེནཱ’’ཏི ཧི བྱཉྫནཾ ‘‘ཀརོནྟེནཱ’’ཏི ཝུཏྟེ ཝིལོམིཏཾ ཧོཏི ཨཏདཏྠཏྟཱ. ན ཧི ཀཱརཱཔེནྟོ ནཱམ ཧོཏི. ‘‘ཨིདྷ ཝུཏྟནཡེནཱཏི དེསིཏཝཏྠུཀཔམཱཎིཀནཡེན. ཨེཝཾ སནྟེ ‘ཀརོནྟེན ཝཱ ཀཱརཱཔེནྟེན ཝཱ’ཏི ཝཙནཏོ ཀརོནྟེནཱཔི པརེཧི ཝིཔྤཀཏཾ ཝཏྟབྦནྟི ཙེ, ཏདཏྠཝིསྶཛྫནཏྠཾ ‘ཡདི པནཱཏིཨཱདིམཱཧཱ’’’ཏི ཨནུགཎྛིཔདེ ཝུཏྟཾ. ‘‘སཉྙཱཙིཀཱཡ ཀུཊིཾ ཀརོནྟོ’’ཏི ཝཙནཝསེན ཝུཏྟཾ. ‘‘ཨཱཡཱམཏོ ཙ ཝིཏྠཱརཏོ ཙཱ’’ཏི ཨཝཏྭཱ ཝིཀཔྤཏྠསྶ ཝཱ-སདྡསྶ གཧིཏཏྟཱ ཨེཀཏོབྷཱགེཔི ཝཌྜྷིཏེ ཨཱཔཏྟི ཨེཝ. པམཱཎཡུཏྟམཉྩོ ཀིར ནཝཝིདཏྠི. ‘‘‘ཙཏུཧཏྠཝིཏྠཱརཱ’ཏི ཝཙནེན ‘ཏིརིཡཾ ཏིཧཏྠཱ ཝཱ’ཏི ཝཙནམྤི སམེཏི ‘ཡཏྠ པམཱཎཡུཏྟོ’ཏིཨཱདིསནྣིཊྛཱནཝཙནཱསམྦྷཝཏོ’’ཏི ཝུཏྟཾ. པམཱཎཏོ ཨཱུནཏརམྤཱིཏི ཝིཏྠཱརཏོ ཙཏུཔཉྩཧཏྠམྤི དཱིགྷཏོ ཨནཏིཀྐམིཏྭཱ ཝུཏྟཔམཱཎམེཝ དེསིཏཝཏྠུ. ཨདེསིཏཝཏྠུཉྷི ཀརོཏོ ཨཱཔཏྟི. པམཱཎཱཏིཀྐནྟཱ ཀུཊི ཨེཝ པམཱཎཱཏིཀྐནྟཾ ཀུཊིཾ ཀརེཡྻཱཏི ཝུཏྟཏྟཱ. ‘‘ཐམྦྷཏུལཱ’’ཏི པཱཋོ. ཨནུསྶཱཝནཱནཡེནཱཏི ཨེཏྠ ‘‘དམིལ༹བྷཱསཱཡཔི ཝཊྚཏཱི’’ཏི ཝདནྟི.

༣༥༣. ཙཱརབྷཱུམི གོཙརབྷཱུམི. ན གཧིཏཱཏི ན ཝཱརིཏཱ. ཨཊྛཀཐཱཡཾ ‘‘ཀཱརཎཱཡ གུཏྟིབནྡྷནཱགཱརཾ, ཨཀརཎཊྛཱནཾ ཝཱ དྷམྨགནྡྷིཀཱ ཧཏྠཔཱདཙྪིནྡནཀཱ གནྡྷིཀཱ’’ཏི ལིཁིཏཾ. དྭཱིཧི བལིབདྡེཧཱིཏི ཧེཊྛིམཀོཊིཡཱ ཀིར ¶ ཝུཏྟཏོ ཨཱཝིཛྫིཏུཾ ན སཀྐཱ ཚིནྣཱཝཊཏྟཱ, ནིགམནསྶཱཔི ཨཏྠཔྤཀཱསནཏྠཾ ཝུཏྟནྟི ཝེདིཏབྦཾ. པཱཙིནནྟི ཝཏྠུ ཨདྷིཊྛཱནཾ. ཏདཏྠཱཡཱཏི ཏཙྪནཏྠཱཡ. པཎྞསཱལམྤཱིཏི ཨུལླིཏྟཱཝལིཏྟཀུཊིམེཝ པཎྞཙྪདནཾ. ཏེནེཝ ‘‘སབྷིཏྟིཙྪདན’’ནྟི ཝུཏྟཾ, ཨལིཏྟཾ ཀིར སབྦཾ ཝཊྚཏི. པུབྦེ ཐོཀཾ ཋཔིཏཾ པུན ཝཌྜྷེཏྭཱ. ཏསྨིནྟི དྭཱརབནྡྷནེ ཝཱ ཝཱཏཔཱནེ ཝཱ ཋཔིཏེ. པཋམམེཝཱཏི ཨེཏྠ པཏྟཀཱལེ ཨེཝཱཏི ཀིར དྷམྨསིརིཏྠེརོ. ཨུཔཏིསྶཏྠེརོ ¶ ཋཔིཏཀཱལེཝཱཏི ཀིར. པུརིམེན ལེཔསྶ ཨགྷཊིཏཏྟཱ དུཏིཡེན ཝཏྟསཱིསེན ཀཏཏྟཱ ཨུབྷིནྣམྤི ཨནཱཔཏྟི. སཙེ ཨཱཎཏྟེན ཀཏཾ, ‘‘ཀརོཏི ཝཱ ཀཱརཱཔེཏི ཝཱ’’ཏི ཝཙནཏོ ཨཱཔཏྟི ཨུབྷིནྣཾ སཏི ཨཏྟུདྡེསིཀཏཱཡ, ཨསཏི མཱུལཊྛསྶེཝ. ཧེཊྛིམཔྤམཱཎསམྦྷཝེ སཏི སབྦམཏྟིཀཱམཡཾ ཀུཊིཾ ཀརོཏོ ཨཱཔཏྟི དུཀྐཊེན སངྒྷཱདིསེསོཏི ཨཱཙརིཡསྶ ཏཀྐོ.

༣༥༤. ཚཏྟིཾས ཙཏུཀྐཱནི ནཱམ ཨདེསིཏཝཏྠུཀཙཏུཀྐཾ དེསིཏཝཏྠུཀཙཏུཀྐཾ པམཱཎཱཏིཀྐནྟཙཏུཀྐཾ པམཱཎིཀཙཏུཀྐཾ ཨདེསིཏཝཏྠུཀཔམཱཎཱཏིཀྐནྟཙཏུཀྐཾ དེསིཏཝཏྠུཀཔམཱཎིཀཙཏུཀྐནྟི ཚ ཙཏུཀྐཱནི, ཨེཝཾ སམཱདིསཏིཝཱརཱདཱིསུཔི པཉྩསཱུཏི ཚཏྟིཾས. ཨཱཔཏྟིབྷེདདསྶནཏྠནྟི ཨེཏྠ ཡསྨཱ ‘‘སཱརམྦྷེ ཙེ, བྷིཀྑུ, ཝཏྠུསྨིཾ ཨཔརིཀྐམནེ…པེ… སངྒྷཱདིསེསོ’’ཏི མཱཏིཀཱཡཾ ཨཝིསེསེན ཝུཏྟཏྟཱ སཱརམྦྷཨཔརིཀྐམནེཔི སངྒྷཱདིསེསོཝཱཏི མིཙྪཱགཱཧཝིཝཛྫནཏྠཾ ཨཱཔཏྟིབྷེདོ དསྶིཏོ, ཏསྨཱ ཝུཏྟཱནཱིཏི ཨདྷིཔྤཱཡོ. ཝིབྷངྒེ ཨེཝཾ ཨཝཏྭཱ ཀིམཏྠཾ མཱཏིཀཱཡཾ དུཀྐཊཝཏྠུ ཝུཏྟནྟི ཙེ? བྷིཀྑཱུ ཨབྷིནེཏབྦཱ ཝཏྠུདེསནཱཡ, ཏེཧི བྷིཀྑཱུཧི ཝཏྠུ དེསེཏབྦཾ. ཀཱིདིསཾ? ཨནཱརམྦྷཾ སཔརིཀྐམནཾ, ནེཏརཾ, ཨིཏརསྨིཾ ‘‘སཱརམྦྷེ ཙེ བྷིཀྑུ ཝཏྠུསྨིཾ ཨཔརིཀྐམནེ’’ཏི ཨེཝཾ ཨཱནིསཾསཝསེན ཨཱགཏཏྟཱ ཝུཏྟཾ. ཡསྨཱ ཝཏྠུ ནཱམ ཨཏྠི སཱརམྦྷཾ, ཨཏྠི ཨནཱརམྦྷཾ, ཨཏྠི སཔརིཀྐམནཾ, ཨཏྠི ཨཔརིཀྐམནཾ, ཨཏྠི སཱརམྦྷཾ སཔརིཀྐམནཾ, ཨཏྠི སཱརམྦྷཾ ཨཔརིཀྐམནཾ, ཨཏྠི ཨནཱརམྦྷཾ སཔརིཀྐམནཾ, ཨཏྠི ཨནཱརམྦྷཾ ཨཔརིཀྐམནནྟི བཧུཝིདྷཏྟཱ ཝཏྠུ དེསེཏབྦཾ ཨནཱརམྦྷཾ སཔརིཀྐམནཾ, ནེཏརནྟི ཝུཏྟཾ ཧོཏི. ཀིམཏྠིཀཱ པནེསཱ དེསནཱཏི ཙེ? གརུཀཱཔཏྟིཔཉྙཱཔནཧེཏུཔརིཝཛྫནུཔཱཡཏྠཱ. ཝཏྠུདེསནཱཡ ཧི གརུཀཱཔཏྟིཔཉྙཱཔནཧེཏུཏྟཱ ཨཀཏཝིཉྙཏྟི གིཧཱིནཾ པཱིལཱ༹ཛནནེན ཨཏྟདུཀྑཔརདུཀྑཧེཏུབྷཱུཏོ ཙ སཱརམྦྷབྷཱཝོཏི ཨེཏེ ཝཏྠུདེསནཱཔདེསེན ཨུཔཱཡེན པརིཝཛྫིཏཱ ཧོནྟི. ན ཧི བྷིཀྑུ ཨཀཔྤིཡཀུཊིཀརཎཏྠཾ གིཧཱིནཾ ¶ ཝཱ པཱིལཱ༹ནིམིཏྟཾ སཱརམྦྷཝཏྠུ. ཀུཊིཀརཎཏྠཾ ཝཱ ཝཏྠུཾ དེསེནྟཱིཏི པཋམམེཝ སཱདྷིཏམེཏཾ. ཝོམིསྶཀཱཔཏྟིཡོཏི དུཀྐཊསངྒྷཱདིསེསམིསྶཀཱཔཏྟིཡོ.

༣༥༥. ཏཏྠ ‘‘དྭཱིཧི སངྒྷཱདིསེསེཧཱི’’ཏི ཝཏྟབྦེ ‘‘དྭིནྣཾ སངྒྷཱདིསེསེནཱ’’ཏི ཝིབྷཏྟིབྱཏྟཡེན, ཝཙནབྱཏྟཡེན ཙ ཝུཏྟཾ. ‘‘ཨཱཔཏྟི དྭིནྣཾ སངྒྷཱདིསེསཱན’’ནྟིཔི པཱཋོ.

༣༦༤. ན གྷཊཡཏི ཚདནལེཔཱབྷཱཝཏོ, ཨནཱཔཏྟི, ཏཾ པརཏོ སཱདྷིཡཏི. ཚདནམེཝ སནྡྷཱཡ ཨུལླིཏྟཱཝལིཏྟཏཱ ཝུཏྟཱཏི. ‘‘ཀུཀྐུཊཙྪིཀགེཧཾ ཝཊྚཏཱིཏི ཝཏྭཱ པུན ཚདནཾ དཎྜཀེཧཱིཏིཨཱདིནཱ ནཡེན ཏཾ དསྶེནྟེཧི ཏིཎཔཎྞཙྪདནཱཀུཊིཀཱཝ ཝུཏྟཱ. ཏཏྠ ཚདནཾ དཎྜཀེཧི ¶ དཱིགྷཏོ ཏིརིཡཉྩ ཛཱལཾ ཝིཡ བནྡྷིཏྭཱ ཏིཎེཧི ཝཱ པཎྞེཧི ཝཱ ཚཱདེཏུཾ ཨུལླིཏྟཱདིབྷཱཝོ ཚདནམེཝ སནྡྷཱཡ ཝུཏྟོཏི ཡུཏྟམིདཾ. ཏསྨཱ མཏྟིཀཱམཡཾ བྷིཏྟིཾ ཝཌྜྷཱཔེཏྭཱ ཨུཔརི ཨུལླིཏྟཾ ཝཱ ཨཝལིཏྟཾ ཝཱ ཨུབྷཡཾ ཝཱ བྷིཏྟིཡཱ གྷཊིཏཾ ཀརོནྟསྶ ཨཱཔཏྟི ཨེཝ ཝིནཱཔི བྷིཏྟིལེཔེནཱ’’ཏི ལིཁིཏཾ. ‘‘‘སོ ཙ ཚདནམེཝ སནྡྷཱཡཱ’ཏི པདྷཱནཝསེན ཝུཏྟཾ, ན ཧེཊྛཱབྷཱགཾ པཊིཀྑིཏྟ’’ནྟི ཝདནྟི, ཝཱིམཾསིཏབྦཾ. ཨེཏྠཱཏི ཏིཎཀུཊིཀཱཡ. ཡཐཱསམཱདིཊྛཱཡཱཏི ཡཐཱཝུཏྟཔྤཀཱརནྟི ཨདྷིཔྤཱཡོ. ‘‘ཨཱཔཏྟི ཀཱརུཀཱནཾ ཏིཎྞཾ དུཀྐཊཱན’’ནྟིཨཱདིམྷི སོ སུཎཱཏིཚཀྐམྤི ལབྦྷཏི. ཨུབྷཡཏྠ སམཱདིཊྛཏྟཱ ཨཱཎཱཔཀསྶ ཨནཱཔཏྟི. ཨཱཎཏྟསྶ ཡཐཱ སམཱདིཊྛཾ ཨཱཎཱཔཀེན, ཏཐཱ ཨཀརཎཔཙྩཡཱ དུཀྐཊཾ. སཙེ ‘‘ཨཧམྤེཏྠ ཝསཱམཱི’’ཏི ཨཏྟུདྡེསམྤི ཀརོཏི, སངྒྷཱདིསེསོཝ. ‘‘ཀུཊིཾ ཀརོཐཱ’’ཏི ཨཝིསེསེན ཝུཏྟཊྛཱནེ པན ཨཱཎཱཔཀསྶཱཔི སངྒྷཱདིསེསོ ཨཙིཏྟཀཏྟཱ སིཀྑཱཔདསྶ.

ཨཧཉྩ ཝསིསྶཱམཱིཏི ཨེཏྠ པརསྶ ཡསྶ ཀསྶཙི ཨུདྡིཊྛསྶ ཨབྷཱཝཱ ཨཱཔཏྟི ཨེཝ ‘‘ཀརོནྟསྶ ཝཱ’’ཏི ནིཡམིཏཏྟཱ, ཨནཱཔཏྟི ཨཝིབྷཏྟཏྟཱ. ‘‘ཨིདྷ པཉྙཏྟིཛཱནནམཏྟམེཝ ཙིཏྟ’’ནྟི ཙ ལིཁིཏཾ. ཨནུགཎྛིཔདེ པན ཨཧཉྩ ཝསིསྶཱམཱིཏི ཨེཏྠ ཡོ ‘‘མཡ྄ཧཾ ཝཱསཱགཱརཉྩ བྷཝིསྶཏཱི’’ཏི ཨིཙྪཏི, ཏསྶཱཔཏྟི. ཡོ པན ཨུཔོསཐཱགཱརཾ ཨིཙྪཏི, ཏསྶ ཨནཱཔཏྟི, ཏསྨཱ ‘‘ཨུབྷཡཾ སམེཏཱི’’ཏི ཝཏྭཱ ཙ ‘‘ཝིནཡཝིནིཙྪཡེ ཨཱགཏེ གརུཀེ ཋཱཏབྦ’’ནྟི ཝཙནཏོ མཧཱཔཙྩརིཝཱདཏོ ཨིཏརོ པཙྪཱ ཝཏྟབྦོཏི ཙེ? ན, བལཝཏྟཱ ¶ . ‘‘ཝཱསཱགཱརཾ ཋཔེཏྭཱ སབྦཏྠ, ཨནཱཔཏྟཱི’’ཏི ཝཙནཏོ, བྷོཛནསཱལཱདཱིནམྤི ཨཏྠཱཡ ཨིམིནཱ ཀཏཏྟཱ སངྐརཱ ཛཱཏཱ. ཡཐཱ – དྭེ ཏཡོ ‘‘ཨེཀཏོ ཝསིསྶཱམཱ’’ཏི ཀརོནྟི, རཀྑཏི ཏཱཝཱཏི ཨེཏྠ ཝིཡ. ‘‘ཨིདཾ ཋཱནཾ ཝཱསཱགཱརཾ བྷཝིསྶཏི, ཨིདཾ ཨུཔོསཐཱགཱར’’ནྟི ཝིབྷཛིཏྭཱ ཀཏེཔི ཨཱཔཏྟི ཨེཝ. དྭཱིསུ མཧཱཔཙྩརིཝཱདོ བལཝཱ, ཏསྨཱ ‘‘པཙྪཱ ཝུཏྟོ’’ཏིཨཱདིནཱ ཨཏཱིཝ པཔཉྩིཏཾ. ཀིཾ ཏེན. ‘‘ཨཏྟནཱ ཝིཔྤཀཏཾ ཨཏྟནཱ ཙ པརེཧི ཙ པརིཡོསཱཔེཏཱི’’ཏིཨཱདིནཱ ནཡེན ཨཔརཱནིཔི ཙཏུཀྐཱནི ཡཐཱསམྦྷཝཾ ཡོཛེཏྭཱ དསྶེཏབྦཱནི, ལེཎཱདཱིསུ ཀིཉྩཱཔི སངྒྷཱདིསེསེན ཨནཱཔཏྟི, ཨཀཏཝིཉྙཏྟིཡཱ སཏི ཏཔྤཙྩཡཱ ཨཱཔཏྟི ཨེཝ.

ཀུཊིཀཱརསིཀྑཱཔདཝཎྞནཱ ནིཊྛིཏཱ.

༧. ཝིཧཱརཀཱརསིཀྑཱཔདཝཎྞནཱ

༣༦༦. སཏྟམེ ¶ ཝཱ-སདྡོ ཨཝདྷཱརཎཏྠོཏི ཝེདིཏབྦོ.

ཝིཧཱརཀཱརསིཀྑཱཔདཝཎྞནཱ ནིཊྛིཏཱ.

༨. པཋམདུཊྛདོསསིཀྑཱཔདཝཎྞནཱ

༣༨༠. སཱཝཀེན པཏྟབྦནྟི པཀཏིསཱཝཀཾ སནྡྷཱཡ ཝུཏྟཾ, ན ཨགྒསཱཝཀཾ. ཡཐཱུཔནིསྶཡཡཐཱཔུགྒལཝསེན ‘‘ཏིསྶོ ཝིཛྫཱ’’ཏིཨཱདི ཝུཏྟཾ. ཀེནཙི སཱཝཀེན ཏིསྶོ ཝིཛྫཱ, ཀེནཙི ཙཏསྶོ པཊིསམྦྷིདཱ, ཀེནཙི ཚ ཨབྷིཉྙཱ, ཀེནཙི ཀེཝལོ ནཝལོཀུཏྟརདྷམྨོཏི ཨེཝཾ ཝིསུཾ ཝིསུཾ ཡཐཱསམྦྷཝཾ ཝུཏྟནྟི ཝེདིཏབྦཾ.

༣༨༢. ‘‘ཡེ ཏེ བྷིཀྑཱུ སུཏྟནྟིཀཱ’’ཏིཨཱདིཝཙནཏོ དྷརམཱནེཔི བྷགཝཏི པིཊཀཏྟཡཔརིཙྪེདོ ཨཏྠཱིཏི སིདྡྷཾ. དྷམྨཀཐིཀཱཏི ཨཱབྷིདྷམྨིཀཱ རཏིཡཱ ཨཙྪིསྶནྟཱིཏིཨཱདི ཨཱཡསྨཏོ དབྦསྶ ནེསཾ ཏིརཙྪཱནཀཐཱཡ རཏིནིཡོཛནཾ ཝིཡ དིསྶཏི, ན ཏཐཱ དཊྛབྦཾ. སུཏྟནྟིཀཱདིསཾསགྒཏོ ཏེསཾ སུཏྟནྟིཀཱདཱིནཾ ཕཱསུཝིཧཱརནྟརཱཡཾ, ཏེསམྤི ཏིརཙྪཱནཀཐཱརཏིཡཱ ཨབྷཱཝེན ཨནབྷིརཏིཝཱསཾ, ཏཏོ ནེསཾ སཱམཉྙཱ ཙཱཝནཉྩ ¶ པརིཝཛྫནྟོ ཨེཝཾ ཙིནྟེསཱིཏི དཊྛབྦཾ. ‘‘ནིམྨིཏཱནཾ དྷམྨཏཱཏི སཱཝཀེཧི ནིམྨིཏཱནཾཡེཝ, ན བུདྡྷེཧཱི’’ཏི ཝདནྟི. ‘‘སཱདྷཀཏམཾ ཀརཎ’’ནྟི ཨེཝཾ ཝུཏྟེ ཀརཎཏྠེཡེཝ ཏཏིཡཱཝིབྷཏྟཱིཏི ཨཏྠོ.

༣༨༣-༤. ཡནྟི ཡེན. ‘‘ཀཏྟཱཏི ཀཏྟཱ, ན ཀཏྟཱ’’ཏི ལིཁིཏཾ. ‘‘བྷརིཡཾ ཝིཡ མཾ ཨཛ྄ཛྷཱཙརཏཱི’’ཏི ཝདནྟིཡཱ བལཝཏཱི ཙོདནཱ. ཏེན ཧཱིཏི ཨེཏྠ ཡཐཱ ཚུཔནམཏྟེ ཝིཔྤཊིསཱརཱིཝཏྠུསྨིཾ ཀཱཡསཾསགྒརཱགསམྦྷཝཱ ཨཔུཙྪིཏྭཱ ཨེཝ སངྒྷཱདིསེསཾ པཉྙཱཔེསི, ཏཐེཝ པུབྦེཝསྶཱ དུསྶཱིལབྷཱཝཾ ཉཏྭཱ ཝུཏྟནྟི ཝེདིཏབྦཾ. ཡདི ཏཱཝ བྷཱུཏཱཡ པཊིཉྙཱཡ ནཱསིཏཱ, ཐེརོ ཀཱརཀོ ཧོཏི. ཨཐ ཨབྷཱུཏཱཡ, བྷགཝཏཱ ‘‘ནཱསེཐཱ’’ཏི ན ཝཏྟབྦཾ, ཝུཏྟཉྩ, ཏསྨཱ ཝུཏྟཾ ‘‘ཡདི ཏཱཝ པཊིཉྙཱཡ ནཱསིཏཱ, ཐེརོ ཀཱརཀོ ཧོཏཱི’’ཏི.

ཨཐ ཨཔྤཊིཉྙཱཡཱཏི ‘‘ཨཡྻེནམྷི དཱུསིཏཱ’’ཏི ཨིམཾ པཊིཉྙཾ ཝིནཱ ཨེཝ ཏསྶཱ པཀཏིདུསྶཱིལབྷཱཝཾ སནྡྷཱཡ ནཱསིཏཱ, ཐེརོ ཨཀཱརཀོ ཧོཏི. ཨབྷཡགིརིཝཱསིནོཔི ཨཏྟནོ སུཏྟཾ ཝཏྭཱ ‘‘ཏུམྷཱཀཾ ཝཱདེ ཐེརོ ཀཱརཀོ’’ཏི ཝདནྟི, ཀསྨཱ? དུཀྐཊཾ མུསཱཝཱདཔཙྩཡཱ ལིངྒནཱསནཱཡ ¶ ཨནཱསེཏབྦཏྟཱ. པཱརཱཛིཀསྶེཝ ཧི ལིངྒནཱསནཱཡ ནཱསེཏབྦཱ. ‘‘ནཱསེཐཱ’’ཏི ཙ ཝུཏྟཏྟཱ པཱརཱཛིཀཱཝ ཛཱཏཱ, སཱ ཀིཾ སནྡྷཱཡ, ཏཏོ ཐེརོ ཀཱརཀོ ཨཱཔཛྫཏི. ‘‘སཀཱཡ པཊིཉྙཱཡ ནཱསེཐཱ’’ཏི ཝུཏྟེ པན ཨཔཱརཱཛིཀཱཔི ཨཏྟནོ ཝཙནེན ནཱསེཏབྦཱ ཛཱཏཱཏི ཨདྷིཔྤཱཡོ. མཧཱཝིཧཱརཝཱསིནོཔི ཨཏྟནོ སུཏྟཾ ཝཏྭཱ ‘‘ཏུམྷཱཀཾ ཝཱདེ ཐེརོ ཀཱརཀོ’’ཏི ཙ ཝདནྟི. ཀསྨཱ? ‘‘སཀཱཡ པཊིཉྙཱཡ ནཱསེཐཱ’’ཏི ཧི ཝུཏྟེ པཊིཉྙཱཡ བྷཱུཏཏཱ ཨཱཔཛྫཏི ‘‘ནཱསེཐཱ’’ཏི ཝཙནཏོ. བྷཱུཏཱཡེཝ ཧི པཊིཉྙཱཡ ནཱསེཏབྦཱ ཧོཏི, ནཱབྷཱུཏཱཡཱཏི ཨདྷིཔྤཱཡོ. པུརིམནཡེཏི དུཀྐཊཝཱདེ. པུརིམོ ཡུཏྟིཝསེན པཝཏྟོ, པཙྪིམོ པཱལི༹ཝཙནཝསེན པཝཏྟོཏི ཝེདིཏབྦོ.

༣༨༥-༦. པཱིཏིསུཁེཧཱིཏི ཨེཏྠ ‘‘སུཁེནཱ’’ཏི ཝཏྟབྦེ པཱིཏིགྒཧཎཾ ཏཏིཡཛ྄ཛྷཱནསུཁཾ, ཀཱཡིཀཉྩ ཨཔནེཏུཾ སམྤཡུཏྟཔཱིཏིཡཱ ཝུཏྟཾ. སཙེ ཙུདིཏཀཝསེན ཀཏཾ ཨམཱུལཀཾ ནཱམ, ‘‘ཨནཛ྄ཛྷཱཔནྣཾ ཨཀཏ’’ནྟི ཝདེཡྻ, ཨིམེ ཀརིསྶནྟི, ཏསྨཱ ‘‘ཏཱདིསཾ དིཊྛསཉྙཱི ཧུཏྭཱ ཙོདེཏཱི’’ཏི པཱཋོ ¶ . ‘‘ཨེཏེན ནཡེན སུཏམུཏཔརིསངྐིཏཱནིཔི ཝིཏྠཱརཏོ ཝེདིཏབྦཱནཱི’’ཏི པཱཋོ. ‘‘ཙཏུནྣཾ ཨཉྙཏརེནཱ’’ཏི པཱཏིམོཀྑུདྡེསེ ཨེཝ ཨཱགཏེ གཧེཏྭཱ ཝུཏྟཾ, ཨིཏརེསཾ ཨཉྙཏརེནཱཔི ཨནུདྡྷཾསེནྟསྶ སངྒྷཱདིསེསོཝཱཏི ནོ ཏཀྐོཏི ཨཱཙརིཡོ. བྷིཀྑུབྷཱཝཱ ཧི ཙཱཝནསམཏྠཏོ. ‘‘སམཱིཔེ ཋཏྭཱ’’ཏི ཝཙནཏོ པརམྨུཁཱ ཙོདེནྟསྶ, ཙོདཱཔེནྟསྶ ཝཱ སཱིསཾ ན ཨེཏི. དིཊྛཉྩེ སུཏེན པརིསངྐིཏེན ཙོདེཏི ཙོདཱཔེཏི, སུཏཔརིསངྐིཏཾ ཝཱ དིཊྛཱདཱིཧི ཙོདིཏེ ཝཱ ཙོདཱཔིཏེ ཝཱ སཱིསཾ ཨེཏི ཨེཝ ཨམཱུལཀེན ཙོདིཏཏྟཱ. ཝུཏྟཉྷེཏཾ ‘‘དིཊྛསྶ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ, ཏཉྩེ ཙོདེཏི ‘སུཏོ མཡཱ…པེ… སངྒྷཱདིསེསསྶཱ’’ཏི (པཱརཱ. ༣༨༧). ‘‘ཨསུདྡྷོ ཧོཏི པུགྒལོ ཨཉྙཏརཾ པཱརཱཛིཀཾ དྷམྨཾ ཨཛ྄ཛྷཱཔནྣོ, ཏཉྩེ ཨསུདྡྷདིཊྛི སམཱནོ ཨནོཀཱསཾ ཀཱརཱཔེཏྭཱ ཙཱཝནཱདྷིཔྤཱཡོ ཝདེཏི, ཨཱཔཏྟི དུཀྐཊསྶ. ཨོཀཱསཾ ཀཱརཱཔེཏྭཱ ཙཱཝནཱདྷིཔྤཱཡོ ཝདེཏི, ཨནཱཔཏྟཱི’’ཏི (པཱརཱ. ༣༨༩) ཨིམིནཱ ན-སམེནྟཾ ཝིཡ ཁཱཡཏི, ཀཐཾ? དིཊྛསྶ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ ནཱམ ཨསུདྡྷོ པུགྒལོ ཧོཏི, ‘‘ཨཉྙཏརསྨིཾ ཨསུདྡྷདིཊྛི སམཱནོ ཏཉྩེ ཙོདེཏི ‘སུཏོ མཡཱ པཱརཱཛིཀཾ དྷམྨཾ ཨཛ྄ཛྷཱཔནྣོསཱི’ཏི, ཨཱཔཏྟི ཝཱཙཱཡ ཝཱཙཱཡ སངྒྷཱདིསེསསྶཱ’’ཏི ཝཙནཏོ པུརིམནཡེནཱཔཏྟི. ‘‘ཙཱཝནཱདྷིཔྤཱཡོ ཝདེཏི, ཨཱཔཏྟི དུཀྐཊསྶཱ’’ཏི ཝཙནཏོ པཙྪིམནཡེན སངྒྷཱདིསེསེན ཨཱཔཏྟཱིཏི དྭེ པཱལི༹ནཡཱ ཨཉྙམཉྙཾ ཝིརུདྡྷཱ ཝིཡ དིསྶནྟི, ན ཙ ཝིརུདྡྷཾ བུདྡྷཱ ཀཐཡནྟི, ཏསྨཱ ཨེཏྠ ཡུཏྟི པརིཡེསིཏབྦཱ. ཨཊྛཀཐཱཙརིཡཱ ཏཱཝཱཧུ ‘‘སམཱུལཀེན ཝཱ སཉྙཱསམཱུལཀེན ཝཱ ཙོདེནྟསྶ ཨནཱཔཏྟི, ཨམཱུལཀེན ཝཱ པན སཉྙཱཨམཱུལཀེན ཝཱ ཙོདེནྟསྶ ཨཱཔཏྟཱི’’ཏི. ཏསྶཏྠོ – དསྶནསཝནཔརིསངྐནམཱུལེན སམཱུལཀེན ཝཱ ཏདབྷཱཝེན ཨམཱུལཀེནཱཔི ¶ སཉྙཱསམཱུལཀེན ཝཱ ཙོདེནྟསྶ ཨནཱཔཏྟི, དསྶནཱདིམཱུལཱབྷཱཝེན ཨམཱུལཀེན ཝཱ ཏབྦྷཱཝེན སམཱུལཀེནཱཔི སཉྙཱཨམཱུལཀེན ཝཱ ཙོདེནྟསྶ ཨཱཔཏྟི, ཏསྨཱ དིཊྛསྶ ཧོཏི.

པཱརཱཛིཀཾ དྷམྨཾ ཨཛ྄ཛྷཱཔཛྫནྟོཏིཨཱདིམྷི དསྶནམཱུལེན སམཱུལཀེནཱཔི ‘‘སུཏོ མཡཱ’’ཏི ཝཙནཏོ སཉྙཱཨམཱུལཀེན ཝཱ ཙོདེཏི, ཨཱཔཏྟི སངྒྷཱདིསེསསྶ. ཏདཏྠསྶ ཨཱཝིབྷཱཝཏྠཾ ‘‘དིཊྛེ ཝེམཏིཀོ’’ཏིཨཱདི ཝཱརཱ ཝུཏྟཱཏི ཝེདིཏབྦཱ.

ཨསུདྡྷོ ¶ ཧོཏི པུགྒལོབྷིཨཱདིམྷི པན སམཱུལཀེན, སཉྙཱསམཱུལཀེན ཝཱ ཙོདིཏཏྟཱ ཨནཱཔཏྟཱིཏི. ཨེཝམེཝཾ པན ཏདཏྠདཱིཔནཏྠཾ ཏེ ཝཱརཱ ཝུཏྟཱ. ཏཏྠ ཧི ‘‘ཨདིཊྛསྶ ཧོཏཱི’’ཏིཨཱདིཝཱརཱ ཨམཱུལཀེན ཙོདེནྟསྶ ཨཱཔཏྟི ཧོཏཱིཏི དསྶནཏྠཾ ཝུཏྟཱ. ‘‘དིཊྛེ ཝེམཏིཀོ’’ཏིཨཱདིནཱ སཉྙཱཨམཱུལཀེན ཙོདེནྟསྶ ཨཱཔཏྟི ཧོཏཱིཏི དསྶནཏྠཾ ཝུཏྟཱ. ཨཉྙཐཱ ‘‘དིཊྛསྶ ཧོཏི, དིཊྛེ ཝེམཏིཀོ’’ཏིཨཱདིཝཱརཱ ནིབྦིསེསཱ བྷཝེཡྻུཾ. ཨིདཾ པནེཏྠ སནྣིཊྛཱནཾ-ཡཐཱ ཨསུདྡྷཾ པུགྒལཾ ཨནོཀཱསཾ ཀཱརཱཔེཏྭཱ ཙོདེནྟསྶ དུཀྐཊཾ, ཨཀྐོསཱདྷིཔྤཱཡསྶ ཙ ཨོམསཝཱདེན དུཀྐཊསྶ, ཏཐཱ ཨསུདྡྷདིཊྛིཀོཔི ཨསུདྡྷཾ ཨསུདྡྷདིཊྛི ཨམཱུལཀེན ཙོདེཏི, ཨཱཔཏྟི. སམཱུལཀེན ཝཱ ཙོདེཏི, ཨནཱཔཏྟཱིཏི ཏཾ སནྣིཊྛཱནཾ ཡཐཱ ‘‘ཨནཱཔཏྟི སུདྡྷེ ཨསུདྡྷདིཊྛིསྶ ཨསུདྡྷེ ཨསུདྡྷདིཊྛིསྶཱ’’ཏི ཨིམིནཱ སཾསནྡཏི, ཏཐཱ གཧེཏབྦཾ. ཨཉྙཐཱ ཡུཏྟི པརིཡེསིཏབྦཱ.

སཱིལསམྤནྣོཏི ཨེཏྠ ‘‘དུསྶཱིལསྶ ཝཙནཾ ཨཔྤམཱཎཾ. བྷིཀྑུནཱི ཧི བྷིཀྑུམྷི ཨནིསྶརཱ, ཏསྨཱ ཨུཀྐཊྛནཡེ ཝིདྷིཾ སནྡྷཱཡ ཐེརེན ཝུཏྟཾ. དུཏིཡཏྠེརེན བྷིཀྑུནཱི ཨཛཱནིཏྭཱཔི ཙོདེཏི, སིཀྑམཱནཱདཡོ ཝཱ ཙོདེནྟི, ཏེསཾ སུཏྭཱ བྷིཀྑཱུ ཨེཝ ཝིཙཱརེཏྭཱ ཏསྶ པཊིཉྙཱཡ ཀཱརེནྟི. ཀོ ཨེཏྠ དོསོཏི ཨིདཾ སནྡྷཱཡ ཝུཏྟཾ. ཏཏིཡེན ཏིཏྠིཡཱནཾ ཝཙནཾ སུཏྭཱཔི བྷིཀྑཱུ ཨེཝ ཝིཙཱརེནྟི, ཏསྨཱ ན ཀོཙི ན ལབྷཏཱིཏི ཨེཝཾ སབྦཾ སམེཏཱིཏི ཨཔརེ’’ཏི ཝུཏྟཾ. ཏིཾསཱནི ཏིཾསཝནྟཱནི. ཨནུཡོགོཏི པཊིཝཙནཾ. ཨེཧིཏཱིཏི ཨཱགམིསྶཏི. དིཊྛསནྟཱནེནཱཏི དིཊྛནཡེན, དིཊྛཝིདྷཱནེནཱཏི ཨདྷིཔྤཱཡོ. པཏིཊྛཱཡཱཏི པཏིཊྛཾ ལབྷིཏྭཱ. ཋཱནེཏི ལཛྫིཊྛཱནེ.

གཱཧནྟི ‘‘ཨཧཾ ཙོདེསྶཱམཱི’’ཏི ཨཏྟཱདཱནགྒཧཎཾ. ཙེཏནཱཏི ཨཏྟཱདཱནགྒཧཎཙེཏནཱ. ཝོཧཱརོཏི ཨིཏོ, ཨེཏྟོ ཙ ཉཏྭཱ པཀཱསནཾ. པཎྞཏྟཱིཏི ནཱམཔཉྙཏྟི. ཡཱ ཝཙཱིགྷོསཱརམྨཎསྶ སོཏདྭཱརཔྤཝཏྟཝིཉྙཱཎསནྟཱནསྶ ཨནནྟརཾ ཨུཔྤནྣེན ཨུཔལདྡྷཔུབྦསངྐེཏེན མནོདྭཱརཝིཉྙཱཎེན ¶ ཝིཉྙཱཡཏི, ཡསྶཱ ཝིཉྙཱཏཏྟཱ ཏདཏྠོ པརམཏྠོ ཝཱ ཨཔརམཏྠོ ཝཱ ཏཏིཡཝཱརཾ ཨུཔྤནྣེན མནོཝིཉྙཱཎེན ཝིཉྙཱཡཏཱིཏི ནཱམཱདཱིཧི ཚཧི བྱཉྫནེཧི པཱལི༹ཡཱ པཀཱསིཏཱ, སཱ ‘‘ཝིཛྫམཱནཔཉྙཏྟི ཨཝིཛྫམཱནཔཉྙཏྟཱི’’ཏིཨཱདིནཱ ཚདྷཱ ཨཱཙརིཡེཧི དསྶིཏཱ. ཏབྦྷཱགིཡབྷཱཝོ ཨཏབྦྷཱགིཡབྷཱཝོ ཙ ནིཔྥནྣདྷམྨསྶེཝ ཡུཛྫཏི, ན པཉྙཏྟིཡཱ ཨདྷིཀརཎཱིཡཝཏྠུཏྟཱ ¶ , ཨདྷིཀརཎེ པཝཏྟཏྟཱ ཙ ཨདྷིཀརཎོ མཉྩཊྛེ མཉྩོཔཙཱརོ ཝིཡཱཏི ཙ. ‘‘པརིཡཱཡེནཱཏི ཨམཱུལཀཱ ནཱམཔཉྙཏྟི ནཏྠི. པརིཡཱཡམཏྟཾ, སབྷཱཝཏོ ནཏྠི. ཨབྷིདྷཱནམཏྟམེཝ, ཨབྷིདྷེཡྻཾ ནཏྠཱི’’ཏི ཙ ལིཁིཏཾ. ཨིདྷེཝཱཏི ཨིམསྨིཾ ཨེཝ སིཀྑཱཔདེ. ན སབྦཏྠཱཏི ཝིཝཱདཱདྷིཀརཎཱདཱིསུ. ཀསྨཱ? ན ཧཱིཏིཨཱདི. ཝིཝཱདཱདྷིཀརཎཱདཱིནམཏྠིཏཱ ཝིཡ ཨམཱུལཀཾ ཨདྷིཀརཎཾ ནཏྠཱིཏི. པུབྦེ ཝུཏྟསམཐེཧཱིཏི ‘‘ཡཾ ཨདྷིཀིཙྩ སམཐཱ ཝཏྟནྟཱི’’ཏི ཝུཏྟསམཐེཧཱིཏི ཨདྷིཔྤཱཡོ. ཨཔིཙ སབྷཱཝཏོ ནཏྠཱིཏི ཨཔྤཊིལདྡྷསབྷཱཝཏྟཱ ཝུཏྟཾ. ཨནུཔྤནྣཾ ཝིཡ ཝིཉྙཱཎཱདི. ན ཧི ཝིཝཱདཱདཱིནཾ པཎྞཏྟི ཨདྷིཀརཎཊྛོཏི པཎྞཏྟིཾ ཨདྷིཀིཙྩ སམཐཱ ན པཝཏྟནྟི, ཏསྨཱ ན ཏསྶཱ ཨདྷིཀརཎཱིཡཏཱཏི ན ཝིཝཱདཱདཱིནཾ པཎྞཏྟི ཨདྷིཀརཎཊྛོཏི ཨདྷིཔྤཱཡོ. ཧོཏི ཙེཏྠ –

‘‘པཱརཱཛིཀཱཔཏྟི ཨམཱུལིཀཱ ཙེ,

པཎྞཏྟིམཏྟཱ ཕལམགྒདྷམྨཱ;

ཙཏུཏྠཔཱརཱཛིཀཝཏྠུབྷཱུཏཱ,

པཎྞཏྟིམཏྟཱཝ སིཡུཾ ཏཐེཝ.

‘‘ཏཏོ དྭིདྷཱ མགྒཕལཱདིདྷམྨཱ,

སིཡུཾ ཏཐཱཏཱིཏམནཱགཏཉྩ;

པཎྞཏྟིཚཀྐཾ ན སིཡཱ ཏཏོ ཝཱ,

པརིཡཱཡཏོ སམྨུཏིཝཱདམཱཧཱ’’ཏི.

ཨནུཝདནྟཱིཏི ཨཀྐོསནྟི. ཀིཙྩཡཏཱཏི ཀརཎཱིཡཏཱ. ཏཾ ཀཏམནྟི ཙེ? ཨཔལོཀནཀམྨནྟིཨཱདི. ཀིཙྩནྟི ཝིཉྙཏྟིསམུཊྛཱཔཀཙིཏྟཾ ཀིར ཨདྷིཔྤེཏཾ.

༣༨༧. སུཏཱདཱིནཾ ཨབྷཱཝེན ཨམཱུལཀཏྟནྟི ཨེཏྠ ཡོ དིསྭཱཔི ‘‘དིཊྛོསི མཡཱ’’ཏི ཝཏྟུཾ ཨསཀྐོནྟོ ཨཏྟནོ དིཊྛནིཡཱམེནེཝ ‘‘སུཏོསི མཡཱ’’ཏི ཝདཏི. ཏསྶ ཏསྨིཾ ཨསུདྡྷདིཊྛིཏྟཱ ཨཱཔཏྟི, ཨིདྷ པན ཡོ པུབྦེ སུཏྭཱ ཨནཱཔཏྟི, པཙྪཱ ཏཾ ཝིསྶརིཏྭཱ སུདྡྷདིཊྛི ཨེཝ སམཱནོ ཝདཏི, ཏཾ སནྡྷཱཡ ཝུཏྟཾ. ‘‘ཨེས ནཡོ སབྦཏྠཱཏི ཨཔརེ’’ཏི ཝུཏྟཾ. ཛེཊྛབྦཏིཀོ ཀཱཀེཀཔྤཊིཝཏྟཱ ¶ . ཡདགྒེནཱཏི ཡཱཝཏཱ, ཡདཱ ཝཱ. ནོ ཀཔྤེཏཱིཏིཨཱདི ཝེམཏིཀཱབྷཱཝདཱིཔནཏྠམེཝ ཝུཏྟནྟི དསྶེཏི. ཏེན ཝེམཏིཀོཝ ནསྶརཏི ¶ སམྨུཊྛོ ནཱམཱཏི ཨཱཔཛྫཏི, ཏཾ ན ཡུཏྟཾ ཏདནནྟརབྷཱཝཏོ, ཏསྨཱ དུཏིཡཏྠེརཝཱདོ པཙྪཱ ཝུཏྟོ.

༣༨༩. སབྦཏྠཱཏི སབྦཨཊྛཀཐཱསུ. ཨོཀཱསཀམྨནྟི ཨོཀཱསཀརཎཾ. ‘‘ཨོཀཱསེན ཀམྨཾ ཨོཀཱསཀམྨ’’ནྟི ལིཁིཏཾ. ཨསཱུརིཡཾ པསྶཏི ཀཉྙཱཏི ཨེཏྠ ཡཐཱ ཀཉྙཱ སཱུརིཡཾ ན པསྶཏཱིཏི བྷཝཏི, ཨེཝཾ ‘‘ཨནོཀཱསཾ ཀཱརེཏྭཱ’’ཏི ཝུཏྟེ ཨོཀཱསཾ ན ཀཱརེཏྭཱཏི ཧོཏི.

པཋམདུཊྛདོསསིཀྑཱཔདཝཎྞནཱ ནིཊྛིཏཱ.

༩. དུཏིཡདུཊྛདོསསིཀྑཱཔདཝཎྞནཱ

༣༩༡. ཝེལུ༹ཝནེཡེཝཱཏི ཨིདཾ ཏེཧི ཝུཏྟཝེལཾ སནྡྷཱཡ ཝུཏྟཾ. ‘‘པུབྦེ མཡཾ ཨཱཝུསོ སུཏེན ཨཝོཙུམྷཱ’’ཏི ‘‘ཨམྷེཧི སཱ ཨུསྶཱཧིཏཱ ཀུཔིཏེཧི ཨནཏྟམནེཧཱི’’ཏིཨཱདིཝཙནཾ སནྡྷཱཡ ཝུཏྟཾ, ཨཉྙབྷཱགསྶ ཨིདནྟི མནུསྶབྷིཀྑུབྷཱཝཏོ ཨཉྙབྷཱགསྶ ཏིརཙྪཱནཚགལཀབྷཱགསྶ ཨིདཾ ཚགལཀཛཱཏཾ ཨདྷིཀརཎཾ. ཨཉྙབྷཱགོ ཝཱ ཨསྶ ཨཏྠཱིཏི སོ ཏིརཙྪཱནཚགལཀབྷཱཝསངྑཱཏོ ཨཉྙབྷཱགོ ཨསྶ ཚགལཀསྶ ཨཏྠཱིཏི སྭཱཡཾ ཚགལཀོ ཨཉྙབྷཱགིཡཾ ཨདྷིཀརཎཾ ནཱམ.

ཏཏྠ པཊིམཱཡ སརཱིརཾ, སིལཱཔུཏྟཀསྶ སརཱིརནྟི ནིདསྶནཾ, པཋམཾ པནེཏྠ ནིབྦཙནཾ ཛཱཏིཔདཏྠོཏིཝཱདཱིནཾ མཏེན ཝུཏྟཾ. སཱ ཧི སཱམིབྷཱཝེན, ནིཙྩབྷཱཝེན ཙ པདྷཱནཏྟཱ སཏྟིསབྷཱཝེ ཋིཏཱ. ཏབྦིཔརཱིཏཀཏྟཱ བྱཏྟཱཀཏི ཛཱཏིཡོ ཏུ པདཏྠོ ཨིཏི ཨིམསྶ སུཏྟསྶ ཝསེན དུཏིཡཾ ནིབྦཙནཾ ཝུཏྟནྟི ཝེདིཏབྦཾ. ནཱམཀརཎསཉྙཱཡ ཨཱདྷཱརོཏི ཨེཏྠ ནཱམམེཝ ནཱམཀརཎཾ. ནཱམཾ ཀརོནྟཱནཾ སཉྙཱ ནཱམཀརཎསཉྙཱ, ཏསྶཱ. མནུསྶཛཱཏིཀོ ཚགལཀཛཱཏིཨཱདྷཱརོ ནཱམ. ན ཧི ཏཾ ནཱམཾ ཀཙྪཔལོམཾ ཝིཡ ཨནཱདྷཱརནྟི ཨདྷིཔྤཱཡོ. ཏཾ པན ཚགལཀསྶ དབྦོཏི དིནྣནཱམཾ ‘‘དེསོ’’ཏི ཝུཙྩཏི. ཏསྨཱ ཐེརཾ ཨམཱུལཀེནཱཏིཨཱདིནཱ ཨཉྙམྤི ཝཏྠུཾ ཐེརསྶ ལིསྶཏི སིལིསྶཏི ཝོཧཱརམཏྟེནེཝ, ན ཨཏྠཏོ, ཨཱིསཀཾ ཨལླཱིཡཏཱིཏི ལེསོཏི ཨདྷིཔྤཱཡོ. ཡསྨཱ དེསལེསཱ ཨཏྠཏོ ནིནྣཱནཱཀརཎཱ, ཏསྨཱ ‘‘ཀཉྩིདེསཾ ལེསམཏྟཾ ཨུཔཱདཱཡཱ’’ཏི ཨུདྡྷརིཏྭཱ ‘‘དས ལེསཱ ཛཱཏིལེསོ’’ཏིཨཱདི ཝུཏྟནྟི ཝེདིཏབྦཾ. ཡཐཱ ནིདཱནེ ¶ , ཨེཝཾ སིཀྑཱཔདཔཉྙཏྟིཡམྤི མཱཏིཀཱཡམྤི ཨཡམེཝཏྠོ. ཡསྨཱ ཨཉྙབྷཱགིཡསྶ ཨདྷིཀརཎསྶཱཏི ཚགལཀསྶ. ཀཉྩིདེསཾ ལེསམཏྟཾ ཨུཔཱདཱཡཱཏི དབྦོཏི ནཱམཾ ཨུཔཱདཱཡཱཏི ཨཡམཏྠོ ¶ ཨཊྛུཔྤཏྟིཝསེནེཝ ཨཱཝིབྷཱུཏོ, ཏསྨཱ ན ཝིབྷཏྟོ. ཀིཉྩ བྷིཡྻོ ཨནིཡམཏྟཱ. ན ཧི མེཏྟིཡབྷཱུམཛཀཱནཾ ཝིཡ སབྦེསམྤི ཚགལཀམེཝ ཨཉྙབྷཱགིཡཾ ཨདྷིཀརཎཾ ཧོཏི. ཨཉྙཾ གོམཧིཾ སཱདིཀམྤི ཧོཏི, ན ཙ མེཏྟིཡབྷཱུམཛཀཱ ཝིཡ སབྦེཔི ནཱམལེསམཏྟམེཝ ཨུཔཱདིཡནྟི. ཨཉྙམྤི ཛཱཏིལེསཱདིཾ ཨུཔཱདིཡནྟི, ཏསྨཱ ཨནིཡམཏྟཱ ཙ ཡཐཱཝུཏྟནཡེན ན ཝིབྷཏྟཾ. ཀིཉྩ བྷིཡྻོ ཏཐཱ ཝུཏྟེ ཚགལཀསྶེཝ ཨཉྙབྷཱགིཡཏཱ སམྦྷཝཏི, ན ཨཉྙསྶ, ཡེན སོཝ དསྶིཏོ. ལེསོ ཙ ནཱམ ལེསོཝ, ན ཛཱཏིཨཱདི, ཡེན སོཝ དསྶིཏོཏི ཨེཝཾ མིཙྪཱགཱཧཔྤསངྒཏོ ཙ ཏཐཱ ན ཝིབྷཏྟོ.

༣༩༣. ཨཉྙབྷཱགིཡསྶཱཏི ཙུདིཏཀཏོ ཨཉྙསྶ. ཨདྷིཀརཎསྶཱཏི མནུསྶསྶ ཝཱ ཨམནུསྶསྶ ཝཱ ཏིརཙྪཱནགཏསྶ ཝཱཏི ཨེཝཾ ཝཏྟབྦཾ. ཨེཝཉྷི ཝུཏྟེ མནུསྶཱདཱིནཾཡེཝ ཛཱཏིལེསཱདཡོ ཝུཏྟཱ ཧོནྟི, ཨཉྙཐཱ ཙཏུནྣཾ ཨདྷིཀརཎཱནཾ ཏེ ཨཱཔཛྫནྟི ‘‘ཨདྷིཀརཎསྶ ཀཉྩི དེསཾ ལེསམཏྟ’’ནྟི སཱམིཝཙནཾ པུབྦངྒམཾ ཨུདྡིཊྛཏྟཱཏི ཙེ? ན, ནཱམསྶ ཝིཡ ཛཱཏིཨཱདཱིནཾ མནུསྶཱདཱིནཾ ཨཱདྷཱརབྷཱཝནིཡམསམྦྷཝཏོ, ཨདྷིཀརཎབྷཱཝཱནིཡམཏོཏི ཝུཏྟཾ ཧོཏི. ནིཡམེ ཙ སཏི ཛཱཏིཡཱ ཨཱདྷཱརོ ཛཱཏི, ལིངྒསྶ ཙ ལིངྒཾ, ཨཱཔཏྟིཡཱ ཙ ཨཱཔནྣོ ཨཱདྷཱརོ, ཝིརུདྡྷཱནམྤི ཨསམཱདིནྣཱནམྤི པཏྟཙཱིཝརཱནཾ སཱམིཀོ ཨཱདྷཱརོ, ཡེན ཨདྷིཀརཎསངྑྱཾ གཙྪེཡྻཱཏི ཨཱཔཛྫཏཱིཏི ཨདྷིཀརཎསྶཱཏི པདཾ ཨབྷཱཛེཏབྦམེཝ བྷཝེཡྻཱཏི ན ཨུདྡྷརིཏབྦཾ སིཡཱ, ཨུདྡྷརིཏབྦཾ. ཏསྨཱ ‘‘ཨདྷིཀརཎནྟི ཝཙནསཱམཉྙཏོ’’ཏིཨཱདི སབྦཾ ཝཏྟབྦཾ. ཨཔཱཀཊཱ ཨིཏོ ཨཉྙཏྲ དསྶིཏཊྛཱནཱབྷཱཝཏོ. ཛཱནིཏབྦཱ ཙ ཝིནཡདྷརེཧི ཡསྨཱ ཨཉྙཐཱ པརིཝཱརེ ‘‘ཝིཝཱདཱདྷིཀརཎཾ ཙཏུནྣཾ ཨདྷིཀརཎཱནཾ ཝིཝཱདཱདྷིཀརཎཾ བྷཛཏཱི’’ཏིཨཱདིནཱ ནཡེན ཨནཱགཏཊྛཱནེ ‘‘ཀསྨཱ’’ཏི ཝུཏྟེ ཀཱརཎཾ ན པཉྙཱཡེཡྻ, ཏསྨཱ ཏེསཾ ཏབྦྷཱགིཡཏཱ ཙ ཨཉྙབྷཱགིཡཏཱ ཙ ཛཱནིཏབྦཱ ཝིནཡདྷརེཧི. ཏཱསུ ཧི ཝིཉྙཱཏཱསུ ཝིཝཱདཱདྷིཀརཎཾ ཝིཝཱདཱདྷིཀརཎཾ བྷཛཏི. ཀསྨཱ? ཏབྦྷཱགིཡཏྟཱ. ཨིཏརཾ ན བྷཛཏི ཨཉྙབྷཱགིཡཏྟཱཏི སུཁཀཱརཎཏོ པཉྙཱཡནྟི, ཏསྨཱ ཝཙནསཱམཉྙཏོ ལདྡྷཾ ཨདྷིཀརཎཾ ནིསྶཱཡཱཏིཨཱདི. ཏཏྠ ¶ ཡསྨཱ ཨཱཔཏྟཉྙབྷཱགིཡཾ མཧཱཝིསཡཾ, ཨིཏརེཧི ཨསདིསནིདྡེསཉྩ, ཏསྨཱ ཏཾ ཨདྷིཀརཎཔརིཡཱཔནྣམྤི སམཱནཾ ཝིསུཾ ཝུཏྟཾ ‘‘ཨཱཔཏྟཉྙབྷཱགིཡཾ ཝཱ ཧོཏཱི’’ཏི. ཨདྷིཀརཎཔརིཡཱཔནྣཏྟཱ ཙ ‘‘ཨདྷིཀརཎཉྙབྷཱགིཡཾ ཝཱ’’ཏི ཨེཏྠ ཝུཏྟནྟི ཝེདིཏབྦཾ. ཏཏྠཱཔི མཧཱཝིསཡཏྟཱ, མཱཏིཀཱཡཾ ཨཱགཏཏྟཱ ཙ པཋམཾ ཨཉྙབྷཱགིཡཏཱ ཝུཏྟཱ, པཙྪཱ ཏབྦྷཱགིཡཏཱཏི ཝེདིཏབྦཱ. ཏཏྠ ཡསྨཱ ཨདྷིཀརཎཉྙབྷཱགིཡཝཙནེན ཨཏྠཱཔཏྟིནཡེན སིདྡྷཾ. ཨདྷིཀརཎཾ ཏབྦྷཱགིཡཾ, ཏསྨཱ ‘‘ཨདྷིཀརཎཾ ཏབྦྷཱགིཡཾ ཧོཏཱི’’ཏི ཨེཝཾ ཨུདྡེསཾ ཨཀཏྭཱ ‘‘ཀཐཾ ཨདྷིཀརཎཾ ཨདྷིཀརཎསྶ ཏབྦྷཱགིཡཾ ཧོཏཱི’’ཏི པུཙྪཱཔུབྦངྒམནིདྡེསོ ཀཏོ. ཏཏྠཱཔི ཨཱཔཏྟཱདྷིཀརཎསྶ ཨཉྙབྷཱགིཡཏཱ ཀིཉྩཱཔི པཱརཱཛིཀེན ¶ ཨནུདྡྷཾསིབྷཱདྷིཀཱརཏྟཱ པཱརཱཛིཀཱནཾཡེཝ ཝསེན ཝུཏྟཱ, ཨཐ ཁོ སེསཱཔཏྟིཀྑནྡྷཝསེནཱཔི ཝེདིཏབྦཱ. ཡཱ ཙ སཱ ཙོདནཱ ‘‘ཨསུཀོ ནཱམ བྷིཀྑུ སངྒྷཱདིསེསཾ ཨཛ྄ཛྷཱཔཛྫནྟོ དིཊྛོ ཧོཏཱི’’ཏིཨཱདིཀཱ, ཏཏྠ ‘‘སངྒྷཱདིསེསེ ཐུལླཙྩཡདིཊྛི ཧོཏི, དུབྦྷཱསིཏེ སངྒྷཱདིསེསདིཊྛི ཧོཏཱི’’ཏི ཨེཝམཱདིཀཱ ཝིནཡེ ཨཔཀཏཉྙུཏཱཡ, ཏཾཏཾཝཏྠུསརིཀྑཏཱཡ ཝཱ ཝུཏྟཱཏི ཝེདིཏབྦཱ. སབྦཏྠཱཔི ‘‘པཱརཱཛིཀདིཊྛི ཧོཏཱི’’ཏི ན ཝུཏྟཾ. ཏཐཱསཉྙིནོ ཨནཱཔཏྟིཏོ. ‘‘ཏབྦྷཱགིཡཝིཙཱརཎཱཡ’’ནྟི ཏབྦྷཱགིཡཔདནིདྡེསེ ཨཉྙབྷཱགིཡཏཱཡཔི ནིདྡིཊྛཏྟཱ ཝུཏྟཾ.

ཝཏྠུསབྷཱགཏཱཡཱཏི ཨནུཝཱདཝཏྠུསབྷཱགཏཱཡཱཏི ཨཏྠོ. ཨཉྙཐཱ ‘‘ཙཏསྶོ ཝིཔཏྟིཡོ’’ཏི ཝཙནཾ ཝིརུཛ྄ཛྷེཡྻ. སབྷཱཝསརིཀྑཱསརིཀྑཏོ ཙཱཏི སབྷཱཝེན སདིསཱསདིསཏོ. ཏཏྠ ཛྷཱནཱདིཝཏྠུཝིསབྷཱགཏཱཡཔི སབྷཱཝསརིཀྑཏཱཡ ཨུཏྟརིམནུསྶདྷམྨཔཱརཱཛིཀཱཔཏྟི ཏསྶེཝ ཏབྦྷཱགིཡཱཝ ཧོཏི. ཏཐཱ ཝཏྠུཝསེན ཨནུཝཱདཱདྷིཀརཎཾ, ཀིཙྩཱདྷིཀརཎཉྩ པཱཊེཀྐཾ ཙཏུབྦིདྷམྤི ཝུཏྟཉྙབྷཱགིཡཾ ན ཛཱཏཾ, ཏསྨཱ ཏདཉྙབྷཱགིཡཏཱཡ ཝིདིཏཱཡ ཏབྦྷཱགིཡཏཱ པཱརིཡེསཡུཏྟིཡཱ ཨཝུཏྟཱཔི སིཛ྄ཛྷཏཱིཏི ཀཏྭཱ ‘‘ཨཉྙབྷཱགིཡམེཝ པཋམཾ ནིདྡིཊྛ’’ནྟིཔི ཝཏྟུཾ ཡུཛྫཏི. ཨེཀཾསེན ཏབྦྷཱགིཡཾ ན ཧོཏཱིཏི སརིཀྑཝསེན ཨརཧཏྟཾ ཨཱཔཏྟི ཨནཱཔཏྟཱིཏི ཝིཝཱདསབྦྷཱཝཏོ ཨབྱཱཀཏབྷཱཝེན ཝིཝཱདཱདྷིཀརཎསྶཔི ཨཉྙབྷཱགིཡཾ སིཡཱ, པཱལི༹ཡཾ ཨཱཔཏྟཱདྷིཀརཎསྶ ཝུཏྟཏྟཱ ཨེཝཾ ཝུཏྟཾ, ཨཱདིཏོ པཊྛཱཡཱཏི ‘‘ཨཉྙབྷཱགིཡསྶ ཨདྷིཀརཎསྶཱ’’ཏི ཨིཏོ པཊྛཱཡ. ‘‘མེཐུནརཱགེན མནུསྶཝིགྒཧོ དོསེནཱཏིཨཱདིནཱ ¶ སརིཀྑཏོ ཙཱ’’ཏི ལིཁིཏཾ. ཏཾ ཝཏྠུཝིསབྷཱགཏཱཡ ཨེཝ སིདྡྷཾ. ཨཡཾ པན ཝཏྠུསབྷཱགཏཱཡཔི སཏི ཨཱཔཏྟིསབྷཱགཏཱ སརིཀྑཏོཏི ནོ ཏཀྐོཏི ཙ, ཨེཀསྨིམྤི ཧི ཝཏྠུསྨིཾ ཨཱཔཏྟིབྷེདོ ཧོཏཱིཏི ཨཱཙརིཡོ. པརཏོ ཝུཏྟནཡེན ཝེདིཏབྦནྟི སམྦནྡྷོ.

‘‘ཀིཙྩམེཝ ཀིཙྩཱདྷིཀརཎ’’ནྟི ཝུཏྟཏྟཱ སངྒྷཀམྨཱནམེཏཾ ཨདྷིཝཙནཾ. ཀམྨལཀྑཎནྟི ཀམྨཱནཾ སབྷཱཝཾ. ཏཾ ནིསྶཱཡཱཏི པུབྦེཝ ཧི སཾཝིདྷཱཡ སངྒྷོ ཀམྨཾ ཀརོཏི. ཨཐ ཝཱ པུརིམཾ པུརིམནྟི པརིཝཱསཨུཀྑེཔནིཡཱདཱིནི སངྒྷཀམྨཱནི ནིསྶཱཡ ཨབྦྷཱནཨོསཱརཎཱདི ཨུཔྤནྣནྟི ཀཏྭཱ ཝུཏྟཾ. ཏསྨཱ ཀིཉྩཱཔི སངྒྷཀམྨམེཝ ཀིཙྩཱདྷིཀརཎཾ, ཏཐཱཔི སེསཝིསེསོ ལབྦྷཏཱིཏི དསྶེཏི.

༣༩༤. ཨཏྠཏོ ཨེཀཾ, ཏསྨཱ དེསསྶ ཨཏྠམཝཏྭཱ ‘‘ལེསོ’’ཏིཨཱདི ཝུཏྟཾ ཀིར.

༣༩༥. སཝཏྠུཀཾ ཀཏྭཱཏི པུགྒལསྶ ཨུཔརི ཨཱརོཔེཏྭཱ ཁཏྟིཡཱདིབྷཱཝེན ཨེཀཛཱཏིཀོཔི དཱིགྷརསྶཀཱལ༹ཀོདཱཏཱདཱིནཾ ¶ དིཊྛསུཏཔརིསངྐིཏཱནཾ ཝསེན ཨཉྙབྷཱགིཡཏཱ, དཱིགྷཾ ཁཏྟིཡཾ ཨཛ྄ཛྷཱཙརནྟཾ དིསྭཱ རསྶཱདིཁཏྟིཡཔཉྙཏྟིཡཱ ཨཱདྷཱརབྷཱཝཏོ ཛཱཏིལེསེན ཙོདེཏི, ཨེཀཾ ཝཱ ཁཏྟིཡཾ ཨཛ྄ཛྷཱཙརནྟཾ དིསྭཱ ཏཏོ ཝིསིཊྛཉྙབྷཱགབྷཱུཏཾ ཁཏྟིཡཾ ཛཱཏིལེསཾ གཧེཏྭཱ ‘‘ཁཏྟིཡོ དིཊྛོ ཏྭཾ ཁཏྟིཡོསཱི’’ཏི ཙོདེཏི དིཊྛཱདིཨཉྙབྷཱགེན. ཨེཏྠ ཙ ‘‘དཱིགྷཱདཡོ, དིཊྛཱདཡོ ཙ ཛཱཏིནཱམཱདཱིནཾ ཝཏྠུབྷཱུཏཏྟཱ ཨདྷིཀརཎ’’ནྟི ལིཁིཏཾ. ཏཾ ‘‘ཨདྷིཀརཎབྷཱཝཱནིཡམཏོ’’ཏི ཝུཏྟདོསཾ ནཱཏིཀྐམཏི, ཨཊྛཀཐཱཡཾ ‘‘ཁཏྟིཡཛཱཏིཔཉྙཏྟིཡཱ ཨཱདྷཱརཝསེན ཨདྷིཀརཎཏཱ ཙ ཝེདིཏབྦཱ’’ཏི ཝུཏྟཾ. ཏམྤི ནཱམགོཏྟཏོ ཨཉྙིསྶཱ ནཱམགོཏྟཔཉྙཏྟིཡཱ ནཱམ ཀསྶཙི ཨབྷཱཝཏོ ན སབྦསཱདྷཱརཎཾ, ཏསྨཱ ‘‘ཨདྷིཀརཎསྶཱ’’ཏི པདུདྡྷཱརཎཾ ཨདྷིཀརཎཙཏུཀྐདསྶནཏྠཾ, ཏཾ སམཱནཝཙནདསྶནཏྠནྟི ནོ ཏཀྐོཏི. ཏཏྠ དཱིགྷཱདིནོ ཝཱ དིཊྛཱདིནོ ཝཱཏི ཨེཏྠ དཱིགྷཱདིཏཱ, དིཊྛཱདིཏཱ ཙ ཨཉྙབྷཱགོ, ཡོ ཙུདིཏཀོ ཨིཏརསྶ ཝིསེསོ ཡཏོ ཨཉྙོཏི ཝུཙྩཏི.

༣༩༩. ལཧུཀཾ ཨཱཔཏྟིནྟི པཱརཱཛིཀཏོ ལཧུཀཱཔཏྟི སངྒྷཱདིསེསཱདི. ཏེནེཝ ཨནྟེ ཏཾ དསྶེནྟེན ‘‘བྷིཀྑུ སངྒྷཱདིསེསཾ ཨཛ྄ཛྷཱཔཛྫནྟོ ¶ དིཊྛོ ཧོཏཱི’’ཏིཨཱདི ཝུཏྟཾ. ཨཱཔཏྟིལེསོཔི ཀིམཏྠཾ ཛཱཏིལེསཱདཡོ ཝིཡ ན ཝིཏྠཱརིཏོཏི ཙེ? ཏཐཱ ཨསམྦྷཝཏོཏི ཝེདིཏབྦཾ.

༤༠༠. སཱཊཀཔཏྟོ སརཱིརཊྛཔཏྟོ. ཨཱཔཏྟིཡཱཏི པཱརཱཛིཀཱཔཏྟིཡཱ ཨཉྙབྷཱགིཡཾ སངྒྷཱདིསེསཱདི, ཨདྷིཀརཎཉྩ ཨཱཔཏྟིཔཉྙཏྟིཡཱ. ‘‘ལེསོ ནཱམ ཨཱཔཏྟིབྷཱགོ’’ཏི ཝུཏྟཏྟཱ ཨཱཔཏྟིབྷཱཝལེསོ ཝུཏྟོཏི ཝེདིཏབྦོ, ཏསྨཱ པཱརཱཛིཀཱཔཏྟིཏོ ཨཉྙབྷཱགིཡསྶ ཨཱཔཏྟིཔཉྙཏྟིཡཱ ཨཱདྷཱརཎཊྛེན ‘‘ཨདྷིཀརཎ’’ནྟི སངྑྱཾ གཏསྶ སངྒྷཱདིསེསཱདིནོ ཨཱཔཏྟིནིཀཱཡསྶ ཨཱཔཏྟིབྷཱཝལེསཾ གཧེཏྭཱ ཙོདནཱ ཨཱཔཏྟིལེསཙོདནཱཏི ཝེདིཏབྦཱ.

༤༠༨. ཨནཱཔཏྟི ཏཐཱསཉྙཱི ཙོདེཏི ཝཱ ཙོདཱཔེཏི ཝཱཏི ཨཱཔཏྟཉྙབྷཱགིཡཙོདནཱཡམེཝ, ན ཨཉྙཏྠ. ཨེཏྟཱཝཏཱ པཋམདུཊྛདོསེ ཝུཏྟཝིཙརཎཱཡ སཾསནྡིཏཾ ཧོཏི, ཏཾ ཨིདྷ ཀཐཾ པཉྙཱཡཏཱིཏི ཙེ? ཀངྑཱཝིཏརཎིཡཱ ཝཙནཏོ. ཝུཏྟཉྷི ‘‘ཏཏྠ ཨིདྷ ཙ ཨཱཔཏྟཉྙབྷཱགིཡཙོདནཱཡ ཏཐཱསཉྙིནོཔི ཨནཱཔཏྟཱི’’ཏི.

ཨཉྙཱབྷཱགིཡསིཀྑཾ ཡོ, ནེཝ སིཀྑཏི ཡུཏྟིཏོ. གཙྪེ ཝིནཡཝིཉྙཱུཧི, ཨཉྙབྷཱགིཡཏཉྩ

སོཏི.

དུཏིཡདུཊྛདོསསིཀྑཱཔདཝཎྞནཱ ནིཊྛིཏཱ.

༡༠. པཋམསངྒྷབྷེདསིཀྑཱཔདཝཎྞནཱ

༤༠༩. ‘‘ཝཛྫཾ ¶ ན ཕུསེཡྻཱ’’ཏི ཙ པཱཋོ.

༤༡༠. ཏེསཾ ཨནུརཱུཔཱཛཱནནཏོ ཨསབྦཉྙཱུ ཨསྶ. ‘‘ན, བྷིཀྑཝེ, ཨསེནཱསནིཀེན ཝསྶཾ ཨུཔགནྟབྦ’’ནྟི (མཧཱཝ. ༢༠༤) ཝུཏྟཏྟཱ པཊིཀྑིཏྟམེཝ. ཏིཀོཊིཔརིསུདྡྷནྟི པརསྶ པཱཔཔསངྒནིཝཱརཎཏྠཾ ཝུཏྟཾ, ན པཊིཙྩཀམྨནིཝཱརཎཏྠཾ ཀོཊཱིཧཱིཏི ཨཱཀཱརེཧི. པརིསུདྡྷནྟི ཝིམུཏྟཾ. དསཧི ལེསེཧི ཨུདྡིསྶ ཀཏཾ སམཎཱ པརིབྷུཉྫནྟི, ཨསྶམཎཱ ཨིམེཏི སཱསནསྶ གརཧབྷཱཝོ ཨཱགཙྪེཡྻ ¶ , གརཧཔཙྩཡཱ ལོཀོ ཝཱ ཨཔུཉྙཾ ཨརིཡཱུཔཝཱདཾ པསཝེཡྻ, ཏེཧི ཝིམུཏྟནྟི ཨཏྠོ. ཝཱགུརནྟི མིགཛཱལཾ. ཨཏྟནོ ཨཏྠཱཡ ཝཱཏིཨཱདིནཱ པརེསཾ ཨཏྠཱཡ ཀཏེ ཀཔྤིཡབྷཱཝཾ དསྶེཏྭཱ བྷིཀྑཱུནཉྩ ཨཉྙེསཉྩ ཨཏྠཱཡ ཀཏེ ཏཾ དསྶེཏུཾ ‘‘མཏཱནཾ པེཏཀིཙྩཏྠཱཡཱ’’ཏིཨཱདིམཱཧ.

ཡཾ ཡཾ ཧཱིཏིཨཱདི ཏསྶ ཀཱརཎསྶ དསྶནཏྠཾ ཝུཏྟཾ. པུན པཉྩནྣཾ སཧདྷམྨིཀཱནཾ ཨཏྠཱཡ ཀཏཾ ན ཀཔྤཏཱིཏི ཝུཏྟནྟི ཀིར དྷམྨསིརིཏྠེརོ. གཎྛིཔདེ ‘‘བྷིཀྑཱུནམེཝ སུདྡྷཱནཾ ཨཏྠཱཡ ཀཏཾ ན ཝཊྚཏཱི’’ཏི ལིཁིཏཾ. ཨཔརེཧི པན ‘‘མཏཱནཾ པེཏཀིཙྩཏྠཱཡཱཏིཨཱདིནཱ ཝུཏྟེཔི ཀཔྤཏི, བྷིཀྑཱུནཾཡེཝ ཨཏྠཱཡཱཏི ཨིམིནཱ ‘བྷིཀྑཱུནམྤི དཏྭཱ མཡཾ བྷུཉྫིསྶཱམཱ’ཏི ཀཏམྤི ཝུཏྟཾ. པུན ‘པཉྩསུ ཨེཀཾ ཨུདྡིསྶཀཏཾ ཨིཏརེསཾ ན ཀཔྤཏཱི’ཏི དསྶནཏྠཾ ‘པཉྩསུ ཧི སཧདྷམྨིཀེསཱུཏིཨཱདི ཝུཏྟ’ནྟི ཝདནྟཱི’’ཏི ཝུཏྟཾ. ཨཉྙཏརསྨིཾ པན གཎྛིཔདེ ‘‘ཨམྷཱཀནྟི ཙ རཱཛཡུཏྟཱདཱིནནྟི ཙ ཝུཏྟེ ཝཊྚཏཱིཏི ཝཏྭཱ ‘ཏུམྷཱཀ’ནྟི ཨཝཏྭཱ ‘པེཏཀིཙྩཏྠཱཡཱཏི ཝུཏྟེཔི ཝཊྚཏཱི’ཏི ཙ དསྶེཏྭཱ སབྦཏྠ ཝུཏྟཱནཾ, ཨཱདིསདྡེན སངྒཧིཏཱནཉྩ ལཀྑཎཾ ཋཔེནྟེན ‘བྷིཀྑཱུནཾཡེཝཱ’ཏིཨཱདི ཝུཏྟཾ. ཏཏྠ ‘བྷིཀྑཱུནཾ ཨུདྡིཊྛེ ཨེཝཱཏི ཨདྷིཔྤཱཡེནཱ’ཏི ཝུཏྟཾ. ན ‘ཏུམྷཱཀཾ, ཨམྷཱཀཉྩཱཏི ཝུཏྟེ ཨནཱཔཏྟཱི’ཏི དསྶནཏྠཾ. ཀསྨཱ? མིསྶཀཝཱརསྶ ཨབྷཱཝཱ. ལཀྑཎཾ ནཱམ ཝུཏྟཱནཾ, ཝུཏྟསདིསཱནཉྩ ཧོཏི. ‘སཙེ པེཏཀིཙྩཏྠཱཡཱཏི ཝུཏྟཊྛཱནེ བྷིཀྑཱུནཾ བྷོཛནཾ སནྡྷཱཡ ཀརོནྟཱི’ཏི ཝདནྟི མཧཱཨཊྛཀཐཱཡཉྩ ‘ཏསྨིཾ ཝཱརེ ཙ ན ཏུམྷཱཀནྟི ཝུཏྟེ ཝཊྚཏཱི’ཏི ཝུཏྟཏྟཱ. ཏེནེཝ ཨིདྷཱཔི ‘པེཏཀིཙྩཏྠཱཡ, མངྒལཱདཱིནཾ ཝཱ ཨཏྠཱཡ ཀཏེཔི ཨེསེཝ ནཡོ’ཏི པུབྦེ ཝུཏྟཏྠཝསེན ཝུཏྟཾ. ‘ཨཝདྷཱརཎཏྠེན མིསྶཀེ ཝཊྚཏཱི’ཏི ཙེ? ‘ཀཔྤིཡམཾསསྶ ཧི པཊིགྒཧཎེ ཨཱཔཏྟི ནཏྠཱི’ཏི ཝཙནེན ཨཀཔྤིཡཔཊིགྒཧཎེ ཨཱཔཏྟཱིཏི ཨཱཔནྣཾ, ‘ཏཉྩ གཧེཏབྦཾ སིཡཱ’ཏི པཊིཀྑིཔིཏབྦཱ’’ཏི ཝུཏྟཾ, ཏཾ སུནྡརཾ ཝིཡ དིསྶཏི, ཝིཙཱརེཏྭཱ གཧེཏབྦཾ. ཡཏྠ ཙཱཏི བྷིཀྑཱུནཾ ཨཏྠཱཡ ཀཏེཔི. ཏམཏྠཾ ཨཱཝི ཀཱཏུཾ ‘‘སཙེ པནཱ’’ཏིཨཱདི ཝུཏྟཾ ¶ . ཨེཏྠ པན ‘‘བྷིཀྑུནཱིནཾ དུཀྐཊཾ, ཨིཏརེསཾ དཎྜཀམྨཝཏྠཱུ’’ཏི ཝདནྟི. ཀཔྤཾ ནིརཡམྷཱིཏི ཨསངྑྱེཡྻཀཔྤཾ. ཝིཝཊྚཊྛཱཡིཀཱལེཡེཝ སངྒྷབྷེདོ ཧོཏཱིཏི. ཀཔྤནྟི ཨཱཡུཀཔྤཾ.

༤༡༡. ཀུསལནྟི ཁེམཾ. ཨཱཔཏྟིབྷཡཱ ཀཏཱ ལཛྫཱིཧཱིཏི ཨེཏྠ ཨཱཔཏྟིབྷཡེན ཨཝསྶཾ ཨཱརོཙེནྟཱིཏི དསྶནཏྠཾ ‘‘ལཛྫཱི རཀྑིསྶཏཱི’’ཏི (ཝིསུདྡྷི. ༡.༤༢; པཱརཱ. ཨཊྛ. ༡.༤༥) པོརཱཎཝཙནསྶཱནུརཱུཔཏོ ¶ ‘‘ཨཉྙེཧི ལཛྫཱིཧཱི’’ཏི ཝུཏྟཾ. ཨལཛྫིསྶཔི ཨནཱརོཙེནྟསྶ ཨཱཔཏྟིཡེཝ ‘‘ཡེ པསྶནྟི ཡེ སུཎནྟཱི’’ཏི ཝཙནཏོ.

༤༡༦. ཨསམནུབྷཱསནྟསྶཱཏི ཀམྨཀཱརཀེ ཀཏྟུནིདྡེསོ, སམནུབྷཱསནཀམྨཾ ཨཀརིཡམཱནསྶཱཏི ཨཏྠོ. ཨོདིསྶ ཨནུཉྙཱཏོ ནཱམ ཨུམྨཏྟཀཁིཏྟཙིཏྟཝེདནཊྚཱདིཀོ ‘‘ཨནཱཔཏྟི ཨཱདིཀམྨིཀསྶཱ’’ཏི ཨརིཊྛསིཀྑཱཔདེ ཨཱགཏཏྟཱ ཨཏྠཱིཏི ཙེ? ཡམྤཱིཏིཨཱདི. སཱ པནེསཱ ཨནཱཔཏྟི. སོ ཝུཙྩཏཱིཏི ཏཏྠ ཨཱགཏོཔི སཀམྨབྱཱཝཊོཔི ཨེཝཾ ཝུཙྩཏི. ཨེཏེནུཔཱཡེནཱཏི ཨསམནུབྷཱསནྟསྶ ཙ ཨཱདིཀམྨིཀསྶ ཙ ཝུཏྟཏྠཝསེན. ཋཔེཏྭཱ ཨརིཊྛསིཀྑཱཔདནྟི ཏཏྠ ཨཱདིཀམྨིཀཔདཱབྷཱཝཱ.

ཏིཝངྒིཀནྟི ཨེཏྠ ཝཱཙཱཡ ཨེཝ པཊིནིསྶཛྫནྟསྶ ཨོཊྛཙལནཱདིཀཱཡཝིཉྙཏྟི ཧོཏི, ཏསྨཱ དུཝིདྷམྤི ཝིཉྙཏྟིཾ ཀཐེནྟསྶ ཧོཏི. ཝཙཱིབྷེདཾ ཀཱཏུཾ ཨསཀྐོནྟསྶ ཀཱཡཝིཀཱརཾ ཀརོནྟསྶ ཨནཱཔཏྟིཡཱ བྷཝིཏབྦཾ. ཀསྨཱ? ཏིཝངྒེསུ ཨེཀསྶ པརིཧཱིནཏྟཱ, ཏསྨཱ ཏིཝངྒབྷཱཝོ ཨཱཔཏྟིཡཱ, ཨངྒཧཱནིབྷཱཝོ ཨནཱཔཏྟིཡཱཏི གཧེཏབྦཾ. ཨེཏྠ སིཡཱ – ཡདི ཨངྒཧཱནིབྷཱཝེན ཨནཱཔཏྟི, ཨེཝཾ སནྟེཔི ཝིཀཱརཾ ཨཀཏྭཱ ཙིཏྟེནེཝ ཝིསྶཛྫེནྟསྶ ཨནཱཔཏྟིཡཱ བྷཝིཏབྦནྟི? ཏཾ ན, ཀསྨཱ? ཨཊྛཀཐཱཡཾ ‘‘ཀཱཡཝིཀཱརཾ ཝཱ ཝཙཱིབྷེདཾ ཝཱ ཨཀརོནྟསྶེཝ པན ཨཱཔཛྫནཏོ ཨཀིརིཡ’’ནྟི ཧི ཝུཏྟཾ, ‘‘ཙིཏྟཾ ཝཱ ཨནུཔྤཱདེནྟསྶ ཝཱ’’ཏི ན ཝུཏྟཾ, ཏསྨཱ ཙིཏྟཉྩ ནཱམ ཝིཉྙཏྟིཔཊིབདྡྷཾ ཨེཝཱཏི ཝིསུཾ ཨངྒབྷཱཝེནེཝ ཝུཏྟཏྟཱ ཛཱནིཏབྦནྟི ཙེ? ཏཾ ན, དྭིནྣཾཡེཝ ཨཀིརིཡཱཏི, ཏསྨཱ ཙིཏྟེན ཝིསྶཛྫེནྟསྶཱཔི ཨཱཔཏྟི ཝིཡ དིསྶཏི, ཨུཔཔརིཀྑིཏྭཱ གཧེཏབྦཾ. ཏཏྠ ‘‘ཨཀུསལཙིཏྟ’’ནྟི ཝུཏྟནྟི ཙེ? ‘‘ཙིཏྟབཱཧུལླཏོ ཝུཏྟ’’ནྟི ཝདནྟི. ཏེཔི ཀིར བཱཧུལླཏོ ཝདནྟི.

པཋམསངྒྷབྷེདསིཀྑཱཔདཝཎྞནཱ ནིཊྛིཏཱ.

༡༡. དུཏིཡསངྒྷབྷེདསིཀྑཱཔདཝཎྞནཱ

༤༢༢. སཉྙཱིཏི ¶ སཉྙིནོ.

དུཏིཡསངྒྷབྷེདསིཀྑཱཔདཝཎྞནཱ ནིཊྛིཏཱ.

༡༢. དུབྦཙསིཀྑཱཔདཝཎྞནཱ

༤༢༤. པཏཾ ¶ པཏིཏཾ ཝིཝརི ཝིཝཊྚཡི. ཨེཀཏོ ཨུསྶཱརེཏི ཙ གིལི༹ཏཏོ ཋཔེཏི ཙ. ཨེཀཔཾསུཐུཔཀནདཱིསངྑཾ དཱིགྷམཱུལཀཔཎྞསེཝཱལཾ སེཝཱལཾ དཎྜིསིཔིཔྤརིཾ པཎཀཾ པེསིཊྛིཾ ནིསྶཱརེཏི. ཏིལབཱིཛཀནྟི སུཁུམམཱུལཔཎྞཀཾ ཧུཏྭཱ ཨུདཀཔིཊྛེ པཏྠརིཀཾ ཨུདཀཔཔྤཊཀཾ ནིསྶཱརེཏི.

༤༢༥-༦. ‘‘དུབྦཙྩཛཱཏིཀོ’’ཏིཔི པཋནྟི. ཨཔདཱནེནཱཏི པུརཱཎཀམྨེན. ‘‘ཀིཾ པུབྦེཔི མཡཾ ཨེཝརཱུཔཾ ཀརོམཱཏིཨཱདིནཱ ཨེཀཱུནཝཱིསཏཱི’’ཏི མཧཱཔཙྩརིཡཾ ཀིར ཝུཏྟཾ. མཧཱཨཊྛཀཐཱཡཉྩ ཨནུམཱནསུཏྟཊྛཀཐཱཡཉྩ ‘‘སོལ༹སཝཏྠུཀཱ’’ཏི ཝུཏྟཾ, ཏཾ སམེཏི.

དུབྦཙསིཀྑཱཔདཝཎྞནཱ ནིཊྛིཏཱ.

༡༣. ཀུལདཱུསཀསིཀྑཱཔདཝཎྞནཱ

༤༣༡. ན ཀེཝལཾ ཝིཧཱརོ ཨེཝ ཀཱིཊཱགིརི, སོཔི གཱམོ ‘‘ཀཱིཊཱགིརི’’ཙྩེཝ ཝུཙྩཏི. གཱམཉྷི སནྡྷཱཡ པརཏོ ‘‘ན ཨསྶཛིཔུནབྦསུཀེཧི བྷིཀྑཱུཧི ཀཱིཊཱགིརིསྨིཾ ཝཏྠབྦ’’ནྟི ཝུཏྟཾ. ཨེཀསཾཝཙྪརེ དྭིཀྑཏྟུཾ ཝསྶཏི ཀིར, ཏཾ སནྡྷཱཡ ‘‘དྭཱིཧི མེགྷེཧཱི’’ཏི ཝུཏྟཾ. སམདྷིཀནྟི ཚ ཛནེ སནྡྷཱཡ. ཨཀཏཝཏྠུནྟི ནཝཾ ཨཊྛུཔྤཏྟིཾ. ‘‘ཛཱབྷིསུམནཱདིགཙྪཾ ཨལླཱནཾ ཧརིཏཱནཾ ཨེཝཱ’’ཏི ལིཁིཏཾ. བྷཱུཏགཱམབཱིཛགཱམབྷེདཏོ པནེས བྷེདོ. ཝཏཏྠཱཡཱཏི ཝཏིཨཏྠཱཡ. ཡཾཀིཉྩཱིཏི སོདཀཾ ཝཱ ནིརུདཀཾ ཝཱ. ཨཱརཱམཱདིཨཏྠཱཡཱཏི ཝནརཱཛིཀཱདིཨཏྠཱཡ. མཱལཱཝཙྪརོཔནཾ ཀུལདཱུསཀཾཡེཝ སནྡྷཱཡ, གནྠནཱདིསབྦཾ ན སནྡྷཱཡ ཝུཏྟནྟི. ཀཐཾ པཉྙཱཡཏཱིཏི ཙེ? ཏཾ དསྶེཏུཾ ‘‘བུདྡྷེན དྷམྨོ’’ཏིཨཱདི. ‘‘ཨཱཝེལ༹ཾ ཨཱབིལ༹’’ནྟིཔི པཱཋོ.

གོཔྥནནྟི གནྠནཾ. ཝེཋིམནྟི ཏགྒཏིཀམེཝ. ཝེདྷིམཾ ཨཉྙེན ཀེནཙི པུཔྥཾ ཝེདྷེཏྭཱ ཀཏཾ ¶ . ཀཎྚཀམྤི བནྡྷིཏུནྟི ཨེཏྠ ‘‘སཡཾ ཝིཛ྄ཛྷནཏྠཾ ན ཝཊྚཏི. ཨཉྙསྶཏྠཱཡ ཝཊྚཏཱི’’ཏི ཝདནྟི. ཛཱལམཡཾ ཝིཏཱནཾ ཛཱལཝིཏཱནཾ. པུཔྥཔཊིཙྪཀཾ གཝཀྑཾ ཝིཡ སཚིདྡཾ ཀརོནྟི. ཏཱལཔཎྞགུལ༹ཀནྟི ཏཱལཔཎྞམཡཾ པུན ཀཏམྤི པཊིཚིཛྫཀམེཝ. དྷམྨརཛྫུ ཙེཏིཡཾ ཝཱ བོདྷིཾ ཝཱ པུཔྥཔྤཝེསནཏྠཾ ཨཱཝིཛ྄ཛྷིཏྭཱ ¶ བདྡྷརཛྫུ. ‘‘ཀཱསཱཝེན བདྡྷམྤི སུཏྟཝཱཀཱདཱིཧི བདྡྷཾ བྷཎྜིཏསདིས’’ནྟི ལིཁིཏཾ. ཨཾསབྷཎྜིཀཾ པསིབྦཀེ པཀྑིཏྟསདིསཏྟཱ ཝེདྷིམཾ ན ཛཱཏཾ, ཏསྨཱ ‘‘སིཐིལབདྡྷསྶ ཨནྟརནྟརཱ པཀྑིཔིཏུཾ ན ཝཊྚཏཱི’’ཏི ཝདནྟི. ‘‘ཨཉྙམཉྙཾ ཨཕུསཱཔེཏྭཱ ཨནེཀཀྑཏྟུམྤི པརིཀྑིཔིཏུཾ ཝཊྚཏཱི’’ཏི ཝདནྟི. པཱུརིཏནྟི དཱིགྷཏོ པསཱརེཏྭཱ པཱུརིཏཾ. གྷཊིཀདཱམཨོལམྦཀོཏི ‘‘ཡམཀདཱམཨོལམྦཀོ’’ཏི ལིཁིཏཾ. ‘‘གེཎྜུཁརཔཏྟདཱམཱནཾ པཊིཀྑིཏྟཏྟཱ ཙེལཱདཱིཧི ཀཏདཱམམྤི ན ཝཊྚཏི ཨཀཔྤིཡཱནུལོམཏྟཱ’’ཏི ཝདནྟི.

‘‘རེཙཀཾ ནཱམ ཏཐཱལཱསིཡནཱཊནཊཱནཾ ནཙྩ’’ནྟི ལིཁིཏཾ. ཏཾ ‘‘པརིཝཏྟནྟཱི’’ཏི ཝུཏྟཾ. ‘‘སཱརིཡོ ནཱམ རུཏསུནཁཱ སིངྒཱལཀམྨཀུརུངྒཀེལི༹པནེ ཋིཏཱ’’ཏི ཀིར པཱཋོ. ‘‘ནིབུཛ྄ཛྷནྟཱི’’ཏི པཱལི༹.

༤༣༢. ཨབལབལཱདི-པདཱནཾ ཨུཔྤཊིཔཱཊིཡཱ. ཡཐཱ པཱམོཀྑཱནཾ ཝསེན སབྦེཔི ‘‘ཨསྶཛིཔུནབྦསུཀཱ’’ཏི ཝུཏྟཱ, ཏཐཱ པཱམོཀྑཔྤཏྟསཱཝཀསྶ ཝསེན ཏདཱཡཏྟཝུཏྟིནེ སབྦེཔི ‘‘སཱརིཔུཏྟཱ’’ཏི. ཏེན ཝུཏྟཾ ‘‘གཙྪཐ ཏུམྷེ སཱརིཔུཏྟཱ’’ཏི.

༤༣༣. ‘‘གཱམེ ཝཱ ན ཝསིཏབྦ’’ནྟི ཨིམིནཱཝ ཏསྨིཾ གཱམེ ཨཉྙཏྠ ན ཝསིཏབྦནྟི སིདྡྷཾ. ‘‘ཏསྨིཾ ཝིཧཱརེ ཝཱ’’ཏི ཀསྨཱ ཝུཏྟནྟི ཙེ? ཨཏྠསབྦྷཱཝཏོ. ཡསྨིཉྷི གཱམེ ཀུལདཱུསཀཀམྨཾ ཀཏཾ, ཏསྨིཾ གཱམེ, ཡསྨིཾ ཝིཧཱརེ ཝསནྟེན ཀུལདཱུསནཾ ཀཏཾ, ཏཾ ཝིཧཱརཾ ཋཔེཏྭཱ ཨཉྙསྨིཾ ཝསིཏུཾ ན ཝཊྚཏཱིཏི དསྶནཏྠཾ. ཏཾ ཀཐནྟི ཙེ? ‘‘གཱམེ ཝཱ ན ཝསིཏབྦ’’ནྟི ཝཙནེན ཡསྨིཾ གཱམེ ཀུལདཱུསནཀམྨཾ ཀཏཾ, ཏསྨིཾ ཝིཧཱརེཔི ཝསིཏུཾ ན ལབྦྷཏཱིཏི ཨཱཔནྣཾ, ཏཾ དིསྭཱ ‘‘ཏསྨིཾ ཝིཧཱརེ’’ཏི ཝུཏྟཾ, ཏེན ཏསྨིཾ གཱམེ ཨཉྙསྨིཾ ཝསིཏུཾ ལབྦྷཏཱིཏི སིདྡྷཾ. ‘‘ཏསྨིཾ ཝིཧཱརེ ཝསནྟེནཱ’’ཏི ཨིམིནཱ ཏསྨིཾ གཱམེ ཨཉྙཏྠ ཝསནྟེན སཱམནྟགཱམེ པིཎྜཱཡ ཙརིཏུཾ ཝཊྚཏཱིཏི དཱིཔིཏཾ ཧོཏི. སཱམནྟཝིཧཱརེཔཱིཏི སཱམནྟཝིཧཱརོ ནཱམ ཏསྨིཾཡེཝ གཱམེ ཏསྶ ཝིཧཱརསྶ སཱམནྟཝིཧཱརོ ཙ ཏསྶ གཱམསྶ སཱམནྟཝིཧཱརོ ཙཱཏི ཨུབྷཡཾ ཝུཙྩཏི, ཨེཏེན ཏསྨིཾ གཱམེ ཨཉྙཏྠ ཝསནྟེན ཏསྨིཾ གཱམེ པིཎྜཱཡ ན ཙརིཏབྦཾ. སཱམནྟགཱམེཔི པིཎྜཱཡ ཙརིཏུཾ ཝཊྚཏི, པུན ཡསྨིཾ གཱམེ ཀུལདཱུསནཀམྨཾ ཀཏཾ, ཏསྶ སཱམནྟགཱམེ ཀུལདཱུསཀཝིཧཱརསྶ སཱམནྟཝཏྠུཝིཧཱརེ ཝསནྟེན ཏསྨིཾ གཱམེཔི ཙརིཏུཾ ཝཊྚཏི. ཡསྨིཾ ¶ སཱམནྟགཱམེ ཀུལདཱུསཀཾ ན ཀཏཾ, ཏསྨིམྤི ཙརིཏུཾ ཝཊྚཏི, ནེཝ ཝིཧཱརེཏི ཨདྷིཔྤཱཡོ. ‘‘ན ¶ ནགརེ ཙརིཏུ’’ནྟི ཝུཏྟཏྟཱ ཨཉྙསྨིཾ ཝིཧཱརེ ཏསྨིཾ གཱམེ ཝསིཏུཾ ཝཊྚཏཱིཏི དཱིཔིཏཾ ཧོཏཱིཏི ཨེཀེ. གཎྛིཔདེསུ པན ཝིཙཱརཎཱ ཨེཝ ནཏྠི, ཏསྨཱ སུཊྛུ ཝིཙཱརེཏྭཱ ཀཐེཏབྦཾ.

༤༣༦-༧. དཱཔེཏུཾ ན ལབྷནྟི, པུཔྥདཱནཉྷི སིཡཱ. ཏསྶེཝ ན ཀཔྤཏཱིཏི ཨེཏྠ ཡཱགུཨཱདཱིནི ཨཱནེཏྭཱ ‘‘དདནྟཱུ’’ཏི ཨིཙྪཱཝསེན ཝདཏི ཙེ, སབྦེསཾ ན ཀཔྤཏི, ཀེཝལཾ པན སུདྡྷཙིཏྟེན ཨཏྟཱནཾ ཝཱ པརེསཾ ཝཱ ཨནུདྡིསིཏྭཱ ‘‘ཨིམེ མནུསྶཱ དཱནཾ དཏྭཱ པུཉྙཾ པསཝནྟཱུ’’ཏི ཝདནྟསྶ ཏསྶེཝ ན ཀཔྤཏི ཡཱགུཨཱདཱིནཾ པཙྩཡཔཊིསཾཡུཏྟཀཐཱཡ ཨུཔྤནྣཏྟཱ. མཧཱཨཊྛཀཐཱཡམྤི ‘‘པཉྩནྣམྤི སཧདྷམྨིཀཱན’’ནྟི ཝིསེསེཏྭཱ ཨཝུཏྟཏྟཱ ཨཏྠཏོ སཡམེཝཱཏི ཨཔརེ. ཨཱཙརིཡཱ པན ‘‘ཡཐཱ མཧཱཔཙྩརིཡཾ, ཀུརུནྡིཡཉྩ ‘ཏསྶེཝཱ’ཏི ཝིསེསེཏྭཱ ཝུཏྟཾ, ཨེཝཾ མཧཱཨཊྛཀཐཱཡཾ ཝིསེསེཏྭཱ ན ཝུཏྟཾ, ཏསྨཱ སབྦེསཾ ན ཀཔྤཏཱི’’ཏི ཝདནྟི.

ཀུལདཱུསཀསིཀྑཱཔདཝཎྞནཱ ནིཊྛིཏཱ.

ཏེརསཀཀཎྜཝཎྞནཱ ནིཊྛིཏཱ.

༣. ཨནིཡཏཀཎྜོ

༡. པཋམཨནིཡཏསིཀྑཱཔདཝཎྞནཱ

༤༤༤-༥. ཨུདྡེསནྟི ¶ ¶ ཨུདྡིསནཾ, ཨཱསཱལ༹ྷིནཀྑཏྟཾ ནཱམ ཝསྶཱུཔགམཔཱུཛཱ. སོཏསྶ རཧོཏི ཨེཏྠ རཧོ-ཝཙནསཱམཉྙཏོ ཝུཏྟཾ དུཊྛུལླསཱམཉྙཏོ དུཊྛུལླཱརོཙནཔྤཊིཙྪཱདནསིཀྑཱཔདེསུ པཱརཱཛིཀཝཙནཾ ཝིཡ. ཏསྨཱ ‘‘ཙཀྑུསྶ རཧེནེཝ པན པརིཙྪེདོ ཀཱཏབྦོ’’ཏི ཝུཏྟཾ. ཀཐཾ པཉྙཱཡཏཱིཏི ཙེ? ‘‘མཱཏུགཱམོ ནཱམ ཏདཧུཛཱཏཱཔི དཱརིཀཱ’’ཏི ཝཙནཏོ, ‘‘ཨལཾཀམྨནིཡེཏི སཀྐཱ ཧོཏི མེཐུནཾ དྷམྨཾ པཊིསེཝིཏུ’’ནྟི ཝཙནཏོ ཙ རཧོནིསཛྫསྶཱདོ ཙེཏྠ མེཐུནསནྣིསྶིཏཀིལེསོ, ན དུཏིཡེ ཝིཡ དུཊྛུལླཝཱཙསྶཱདཀིལེསོ, ཏསྨཱ ཙ པཉྙཱཡཏི ‘‘སོཏསྶ རཧོ ནཱདྷིཔྤེཏོ’’ཏི. ཀེཙི པན ‘‘ཏཉྩ ལབྦྷཏཱིཏི ཝཙནསྶ དསྶནཏྠཾ ཝུཏྟཾ, ཏེན དུཏིཡེ ཝུཏྟཱ ཝིཉྙཱུ པཊིབལཱ གཧིཏཱ ཧོཏཱི’’ཏི ཝདནྟི. ཡེན ཝཱ སཱཏི ཨེཏྠ ཝཱ-སདྡོ ‘‘ཏེན སོ བྷིཀྑུ ཀཱརེཏབྦོ ཝཱ’’ཏི ཡོཛེཏབྦོ, སོ ཙ ཝིཀཔྤཏྠོ, ཏསྨཱ ཀཱརེཏབྦོ ཝཱ པཊིཛཱནམཱནོ, ན ཝཱ ཀཱརེཏབྦོ ཨཔྤཊིཛཱནམཱནོཏི ཨཏྠོ. ཏེན ཝུཏྟཾ ཨཊྛཀཐཱཡཾ ‘‘པཊིཛཱནམཱནོཝ ཏེན སོ བྷིཀྑུ ཀཱརེཏབྦོ…པེ… ན ཀཱརེཏབྦོ’’ཏི. ཏསྨཱ ཨེཝ པཱལི༹ཡཾ ཏདཏྠདྭཡདསྶནཏྠཾ ‘‘སཱ ཙེ ཨེཝཾ ཝདེཡྻཱ’’ཏིཨཱདི ཝུཏྟཾ. ‘‘སདྡྷེཡྻཝཙསཱ’’ཏི ཨིམིནཱ སོཏཱཔནྣཱ ཨཏྠབྷཉྫནཀཾ ན བྷཎནྟི, སེསཾ བྷཎནྟཱིཏི ཝཱདཱིནཾ ཝཱདོ པཊིསེདྷིཏོ ཧོཏི. ‘‘དིཊྛ’’ནྟི ཝུཏྟཏྟཱ ‘‘ཨོལོཀེསཱི’’ཏི སུནྡརཾ. རཀྑེཡྻཱསཱིཏི མམ ཝིསེསཾ ཀསྶཙི ནཱརོཙེཡྻཱསཱིཏི ཨདྷིཔྤཱཡོ.

༤༤༦. ‘‘སཱ ཙེ ཨེཝཾ ཝདེཡྻ ‘ཨཡྻསྶ མཡཱ སུཏཾ ནིསིནྣསྶ མཱཏུགཱམཾ དུཊྛུལླཱཧི ཝཱཙཱཧི ཨོབྷཱསེནྟསྶཱ’’’ཏི, ཨིདཾ ཀིམཏྠམེཏྠ ཝུཏྟཾ, ན ཨདྷིཔྤེཏཉྷེཏཾ ཨིདྷ སོཏསྶ རཧོ ནཱདྷིཔྤེཏོཏི ཀཏྭཱཏི ཙེ? ཨལཾཀམྨནིཡཊྛཱནེ དུཊྛུལླཝཱཙཱཔི ལབྦྷཏི, ན པན ནཱལཾཀམྨནིཡཊྛཱནེ མེཐུནནྟི དསྶནཏྠཾ ཝུཏྟནྟི ཝེདིཏབྦནྟི. ཡཐཱ ཨེཏཾ, ཏཐཱ ‘‘སཱ ཙེ ཨེཝཾ ཝདེཡྻ ¶ ‘ཨཡྻསྶ མཡཱ སུཏཾ མཱཏུགཱམསྶ སནྟིཀེ ཨཏྟཀཱམཔཱརིཙརིཡཱཡ ཝཎྞཾ བྷཱསནྟསྶཱ’’’ཏི ཨེཏམྤི ཨིདྷ ལབྦྷཏི, ན དུཏིཡེ ནཱལཾཀམྨནིཡཊྛཱནཏྟཱཏི ཨེཀེ. ཀངྑཱཝིཏརཎིཡཾ (ཀངྑཱ. ཨཊྛ. དུཏིཡཱནིཡཏསིཀྑཱཔདཝཎྞནཱ) ཨིདྷཱཔི དུཏིཡཱནིཡཏཱདྷིཀཱརེ པཱརཱཛིཀཱཔཏྟིཉྩ ¶ པརིཧཱཔེཏྭཱ དུཊྛུལླཝཱཙཱཔཏྟིཡཱ ཝུཏྟཏྟཱ པཋམཱནིཡཏེ དུཊྛུལླཝཱཙཱཔཏྟི ན ཝུཏྟཱཏི ཙེ? ‘‘སཱ ཙེ’’ཏི ཏསྶཱ པཱལི༹ཡཱ པོཏྠཀཱ སོདྷེཏབྦཱ. གཎྛིཔདེ ཙ ‘‘ཨིདྷ སིཀྑཱཔདེ མེཐུནཀཱཡསཾསགྒརཧོནིསཛྫཱནམེཝཱགཏཏྟཱ ཙཀྑུསྶརཧོཝ པམཱཎ’’ནྟི ལིཁིཏཾ, དུཏིཡཱནིཡཏཱདྷིཀཱརེ ཙ ‘‘ཨནནྡྷོ ཀཱཡསཾསགྒཾ པསྶཏི, ཨབདྷིརོ དུཊྛུལླཾ སུཎཱཏི, ཀཱཡཙིཏྟཏོ ཀཱཡསཾསགྒོ, ཝཱཙཱཙིཏྟཏོ དུཊྛུལླཾ, ཨུབྷཡེཧི ཨུབྷཡ’’ནྟི ཙ ལིཁིཏཾ. ཨཊྛཀཐཱཡཾ ‘‘སམུཊྛཱནཱདཱིནི པཋམཔཱརཱཛིཀསདིསཱནེཝཱ’’ཏི ཝུཏྟཏྟཱཔི དུཊྛུལླཝཱདོ ན སུནྡརོ ‘‘ཏདཧུཛཱཏཱ’’ཏི ཝུཏྟཏྟཱཏི.

པཋམཨནིཡཏསིཀྑཱཔདཝཎྞནཱ ནིཊྛིཏཱ.

༢. དུཏིཡཨནིཡཏསིཀྑཱཔདཝཎྞནཱ

༤༥༣. དུཏིཡེ ཀེསུཙི པོཏྠཀེསུ ‘‘ན ཧེཝ ཁོ པན པཊིཙྪནྣཾ ཨཱསནཾ ཧོཏི ཨཱསན’’ནྟི ལིཁིཏཾ. ‘‘ཨཱསནནྟི ཨདྷིཀཾ, ཨུདྡྷརིཏཱནུརཱུཔ’’ནྟི ལིཁིཏཾ. དྭེཔི རཧཱ ཨིདྷ ཨདྷིཔྤེཏཱ ཀཱཡསཾསགྒདུཊྛུལླཝཱཙཱརཧོནིསཛྫགྒཧཎཏོ. ཡདི ཨེཝཾ ‘‘མཱཏུགཱམོ ནཱམ ཝིཉྙཱུ པཊིབལཱ’’ཏི ཀིམཏྠཾ ཝུཏྟནྟི? ཨཡམེཝ ཧི མཱཏུགཱམོ དྭིནྣམྤི ཀཱཡསཾསགྒདུཊྛུལླཝཱཙཱནཾ ཨེཀཏོ ཝཏྠུབྷཱུཏོ, ཏསྨཱ ཝུཏྟཾ. ཀཱཡསཾསགྒསྶ ཝཏྠུབྷཱུཏོ དསྶིཏོ, ན ཨིཏརསྶཱཏི ཀཏྭཱ དུཊྛུལླཝཱཙམེཝ སནྡྷཱཡ ཏསྶཱ ཝཏྠུཾ དསྶེནྟོ ཨེཝམཱཧ.

ཨེཏྠཱཧ – ཡཐཱ པཋམེ ཨནདྷིཔྤེཏཱཔི དུཊྛུལླཝཱཙཱ སམྦྷཝཝིསེསདསྶནཏྠཾ ཝུཏྟཱ, ཨིདྷཱཔི ཀཱཡསཾསགྒོ, ཀསྨཱ ན ཏསྶ ཝསེན ཙཀྑུསྶ རཧོ གཧེཏབྦོཏི? ཨཱམ ན གཧེཏབྦོ, ན ཙ གཧིཏོ, གཧིཏོ ཨེཝ པན ནིསཛྫཝསེན, ན ཧི ཨངྒསྶ ནིསཛྫཱ ཝིསེསོཏི. ཨཔྤཊིཙྪནྣེ སཏི ཀཐཾ ཙཀྑུསྶ རཧོཏི ཙེ? དཱུརཏྟཱ. པཋམེ ཀསྨཱ ཨིཏྠིསཏམྤི ཨནཱཔཏྟིཾ ན ཀརོཏི, ཨིདྷ ཀསྨཱ ཨེཀཱཔི ཀརོཏཱིཏི ཙེ? ནོ ཝུཙྩཏི སིདྡྷཏྟཱ. སིདྡྷཾ ཧོཏི, ཡདིདཾ ཨཉྙཏརོ བྷིཀྑུ ཝེསཱལིཡཾ མཧཱཝནེ…པེ… དྭཱརཾ ཝིཝརིཏྭཱ ནིཔནྣོ ཧོཏི…པེ… སམྦཧུལཱ ཨིཏྠིཡོ ཡཱཝདཏྠཾ ¶ ཀཏྭཱ པཀྐམིཾསཱུཏི (པཱརཱ. ༧༧). ཏསྨཱ ན མེཐུནསྶ མཱཏུགཱམོ དུཏིཡོ ཧོཏི. ཨིཏྠིཡོ ཧི ཨཉྙམཉྙིསྶཱ ཝཛྫཾ པཊིཙྪཱདེནྟི, ཏེནེཝ བྷིཀྑུནཱིནཾ ¶ ཝཛྫཔཊིཙྪཱདནེ པཱརཱཛིཀཾ པཉྙཏྟཾ. ཏཐཱ ‘‘ཨཱཡསྨཱ ཨུདཱཡཱི ཏཱ ཨིཏྠིཡོ ཝིཧཱརཾ པེཀྑཱཔེཏྭཱ ཏཱསཾ ཨིཏྠཱིནཾ ཝཙྩམགྒ’’ནྟི (པཱརཱ. ༢༨༣) ཨེཏྠ ‘‘ཡཱ པན ཏཱ ཨིཏྠིཡོ ཧིརིམནཱ, ཏཱ ནིཀྑམིཏྭཱ བྷིཀྑཱུ ཨུཛ྄ཛྷཱཔེནྟཱི’’ཏི (པཱརཱ. ༢༨༣) ཝཙནཏོ དུཊྛུལླསྶ མཱཏུགཱམོ དུཏིཡོ ཧོཏཱིཏི སིདྡྷནྟི ཨདྷིཔྤཱཡོ. ཨུབྷཡཏྠཱཔི ཨུམྨཏྟཀཱདིཀམྨིཀཱནཾ ཨནཱཔཏྟཱིཏི ཏེསཾ པཱཊེཀྐཾ ནིདཱནེ ཨཱགཏཾ, ཨཱདིཀམྨིཀཱནཾ ཨནཱཔཏྟཱིཏི ཨཏྠོ. ཨནུགཎྛིཔདེ པན ‘‘ཨཙེལཀཝགྒེ རཧོཔཊིཙྪནྣཱསནསིཀྑཱཔདེ ‘ཝིཉྙཱུ པུརིསོ དུཏིཡོ ཧོཏཱི’ཏི (པཱཙི. ༢༨༨) ཨིམསྶ ཨནུརཱུཔཏོ ‘ཨིཏྠཱིནཾ སཏམྤི ཨནཱཔཏྟིཾ ན ཀརོཏཱི’ཏི ཝུཏྟ’’ནྟི ཙ, ‘‘དུཏིཡཱནིཡཏེ ‘ཨིཏྠཱིཔི པུརིསོཔཱི’ཏི ཨིདཾ བྷིཀྑུནཱིཝགྒེ ཨོསཱནསིཀྑཱཔདསྶ, ཨཙེལཀཝགྒེ ཨཔྤཊིཙྪནྣཱསནསིཀྑཱཔདསྶ ཙ ཨནཱཔཏྟིཝཱརེ ‘ཡོ ཀོཙི ཝིཉྙཱུ པུརིསོ དུཏིཡོ’ཏི ཝུཏྟཾ. ཨིམེསཾ ཨནུརཱུཔཏོ ཝུཏྟནྟི ཝེདིཏབྦ’’ནྟི ཙ ཝུཏྟཾ.

དུཏིཡཨནིཡཏསིཀྑཱཔདཝཎྞནཱ ནིཊྛིཏཱ.

པཀིཎྞཀཝཎྞནཱ

ཨཔིཙེཏྠ ཨིདཾ པཀིཎྞཀཾ, སེཡྻཐིདཾ – ཨིདཾ ཨནིཡཏཀཎྜཾ ནིཔྤཡོཛནཾ ཨཔུབྦཱབྷཱཝཏོཏི ཙེ? ན, གརུཀལཧུཀབྷེདབྷིནྣཱཔཏྟིརོཔནཱརོཔནཀྐམལཀྑཎདཱིཔནཔྤཡོཛནཏོ. ཨེཏྠ ཧི ‘‘སཱ ཙེ ཨེཝཾ ཝདེཡྻ ‘ཨཡྻོ མཡཱ དིཊྛོ ནིསིནྣོ མཱཏུགཱམསྶ མེཐུནཾ དྷམྨཾ པཊིསེཝནྟོ’ཏི, སོ ཙ ཏཾ པཊིཛཱནཱཏི, ཨཱཔཏྟིཡཱ ཀཱརེཏབྦོ…པེ… ནིསཛྫཱཡ ཀཱརེཏབྦོ’’ཏིཨཱདིནཱ (པཱརཱ. ༤༤༦) ཨཱཔཏྟིཡཱ གརུཀཱཡ ལཧུཀཱཡ ཙ རོཔནཀྐམལཀྑཎཾ, ཀཱརེཏབྦོཏི ཨིམིནཱ ཨནཱརོཔནཀྐམལཀྑཎཉྩ དསྶིཏཾ. ལཀྑཎདཱིཔནཏོ ཨཱདིམྷི, ཨནྟེ ཝཱ ཨུདྡིསིཏབྦནྟི ཙེ? ན, ཨསམྦྷཝཏོ. ཀཐཾ? ན ཏཱཝ ཨཱདིམྷི སམྦྷཝཏི, ཡེསམིདཾ ལཀྑཎཾ, ཏེསཾ སིཀྑཱཔདཱནཾ ཨདསྶིཏཏྟཱ. ན ཨནྟེ, གརུཀམིསྶཀཏྟཱ, ཏསྨཱ གརུཀལཧུཀཱནཾ མཛ྄ཛྷེ ཨེཝ ཨུདྡིསིཏབྦནྟི ཨརཧཏི ཨུབྷཡཱམིསྶཀཏྟཱ. ཡཱ ཏཏྠ ལཧུཀཱཔཏྟི དསྶིཏཱ ¶ , སཱཔི གརུཀཱདིཀཱ. ཏེནེཝཱཧ ‘‘མེཐུནདྷམྨསནྣིསྶིཏཀིལེསསངྑཱཏེན རཧསྶཱདེནཱ’’ཏིཨཱདི, ཏསྨཱ གརུཀཱནཾ ཨེཝ ཨནནྟརཾ ཨུདྡིཊྛཱཏིཔི ཨེཀེ. ཨེཝཾ སནྟེ པཋམམེཝཱལཾ ཏཱཝཏཱ ལཀྑཎདཱིཔནསིདྡྷིཏོ, ཀིཾ དུཏིཡེནཱཏི ཙེ? ན, ཨོཀཱསནིཡམཔཙྩཡམིཙྪཱགཱཧནིཝཱརཎཔྤཡོཛནཏོ. ‘‘པཊིཙྪནྣེ ཨཱསནེ ཨལཾཀམྨནིཡེ’’ཏི ཨོཀཱསནིཡམཏོ ཧི ཏབྦིཔརཱིཏེ ཨོཀཱསེ ཨིདཾ ལཀྑཎཾ ན ཝིཀཔྤིཏནྟི མིཙྪཱགཱཧོ ཧོཏི, ཏནྣིཝཱརཎཏོ དུཏིཡམྤི སཱཏྠཀམེཝཱཏི ཨདྷིཔྤཱཡོ. ཀསྨཱ? ཨོཀཱསབྷེདཏོ, རཧོབྷེདདཱིཔནཏོ, རཧོནིསཛྫསྶཱདབྷེདདཱིཔནཏོ ¶ . ཨོཀཱསནིཡམབྷཱཝེ ཙ རཧོནིསཛྫསྶཱདབྷེདོ ཛཱཏོ. དྭིནྣཾ རཧོནིསཛྫསིཀྑཱཔདཱནཾ ནཱནཏཱཛཱནནཉྩ སིཡཱ, ཏཐཱ ཀཱཡསཾསགྒབྷེདདཱིཔནཏོ. ནཱལཾཀམྨནིཡེཔི ཧི ཨོཀཱསེ ཨཔྤཊིཙྪནྣེ, པཊིཙྪནྣེཔི ཝཱ ནིསིནྣཱཡ ཝཱཏཔཱནཀཝཱཊཚིདྡཱདཱིཧི ནིཀྑནྟཀེསཱདིགྒཧཎེན ཀཱཡསཾསགྒོ ལབྦྷཏཱིཏི ཨེཝམཱདཡོཔི ནཡཱ ཝིཏྠཱརཏོ ཝེདིཏབྦཱ. ‘‘བྷིཀྑུཔཱཏིམོཀྑེ ཨཱགཏནཡཏྟཱ བྷིཀྑུནཱིཔཱཏིམོཀྑེ ཨིདཾ ཀཎྜཾ པརིཧཱིནནྟི ཝེདིཏབྦ’’ནྟི ཝདནྟི. ཨཏྠུཔྤཏྟིཡཱ ཏཏྠ ཨནུཔནྣཏྟཱཏི ཨེཀེ. ཏཾ ཨནེཀཏྠབྷཱཝདཱིཔནཏོ ཨཡུཏྟཾ. སབྦབུདྡྷཀཱལེ ཧི བྷིཀྑཱུནཾ པཉྩནྣཾ, བྷིཀྑུནཱིནཾ ཙཏྟཱརོ ཙ ཨུདྡེསཱ སནྟི. པཱཏིམོཀྑུདྡེསཔཉྙཏྟིཡཱ ཨསཱདྷཱརཎཏྟཱ ཏཏྠ ནིདྡིཊྛསངྒྷཱདིསེསཔཱཙིཏྟིཡཱནནྟི ཨེཀེ. ཏཱསཾ བྷིཀྑུནཱིནཾ ཨུབྦྷཛཱཎུམཎྜལིཀཨཊྛཝཏྠུཀཝསེན ཀཱཡསཾསགྒཝིསེསོ པཱརཱཛིཀཝཏྠུ, ‘‘ཧཏྠགྒཧཎཾ ཝཱ སཱདིཡེཡྻ, ཀཱཡཾ ཝཱ ཏདཏྠཱཡ ཨུཔསཾཧརེཡྻཱ’’ཏི (པཱཙི. ༦༧༤-༦༧༥) ཝཙནཏོ སཱདིཡནམྤི, ‘‘སནྟིཊྛེཡྻ ཝཱ’’ཏི (པཱཙི. ༦༧༥) ཝཙནཏོ ཋཱནམྤི, ‘‘སངྐེཏཾ ཝཱ གཙྪེཡྻཱ’’ཏི (པཱཙི. ༦༧༥) ཝཙནཏོ གམནམྤི, ‘‘ཚནྣཾ ཝཱ ཨནུཔཝིསེཡྻཱ’’ཏི (པཱཙི. ༦༧༥) ཝཙནཏོ པཊིཙྪནྣཊྛཱནཔཝེསོཔི, ཏཐཱ ‘‘རཏྟནྡྷཀཱརེ ཨཔྤདཱིཔེ པཊིཙྪནྣེ ཨོཀཱསེ ཨེཀེནེཀཱ སནྟིཊྛེཡྻ ཝཱ སལླཔེཡྻ ཝཱ’’ཏི (པཱཙི. ༨༣༨) ཝཙནཏོ དུཊྛུལླཝཱཙཱཔི པཱཙིཏྟིཡཝཏྠུཀནྟི ཀཏྭཱ ཏཱསཾ ཨཉྙཐཱ ཨནིཡཏཀཎྜསྶ ཨཝཏྟབྦཏཱཔཏྟིཏོཔི ན ཝུཏྟནྟི ཏེསཾ ཨདྷིཔྤཱཡོ.

པཀིཎྞཀཝཎྞནཱ ནིཊྛིཏཱ.

ཨནིཡཏཀཎྜཾ ནིཊྛིཏཾ.

༤. ནིསྶགྒིཡཀཎྜོ

༡. ཙཱིཝརཝགྒོ

༡. པཋམཀཐིནསིཀྑཱཔདཝཎྞནཱ

༤༥༩. སམིཏཱཝིནཱཏི ¶ ¶ སམིཏཱ’ནེན ཀིལེསཱཏི སམིཏཱཝཱི, ཏེན སམིཏཱཝིནཱ. ‘‘ཏཱིཎི ཙཱིཝརཱནཱི’’ཏི ཝཏྟབྦེ ‘‘ཏིཙཱིཝར’’ནྟི ཝུཏྟཾ. སངྑྱཱཔུབྦོ དིགུནེཀཝཙནནྟི ཨེཏྠ ལཀྑཎཾ ཝེདིཏབྦཾ. ཏཾ པན ཨདྷིཊྛིཏསྶཔི ཨནདྷིཊྛིཏསྶཔི ནཱམཾ ‘‘ཨེཀརཏྟམྤི ཙེ བྷིཀྑུ ཏིཙཱིཝརེན ཝིཔྤཝསེཡྻཱ’’ཏིཨཱདཱིསུ ཏིཙཱིཝརཱདྷིཊྛཱནེན ཨདྷིཊྛིཏསྶ ནཱམཾ. ‘‘ཨནུཛཱནཱམི, བྷིཀྑཝེ, ཏིཙཱིཝརཾ ཨདྷིཊྛཱཏུ’’ནྟི (མཧཱཝ. ༣༥༨) ཨེཏྠ ཨནདྷིཊྛིཏསྶ ནཱམཾ, ཨིདྷ ཏདུབྷཡམྤི སམྦྷཝཏི. ‘‘བྷགཝཏཱ བྷིཀྑཱུནཾ ཏིཙཱིཝརཾ ཨནུཉྙཱཏཾ ཧོཏཱི’’ཏི ཨེཏྠ ཨདྷིཊྛིཏམེཝ. ‘‘ཨཉྙེནེཝ ཏིཙཱིཝརེན གཱམཾ པཝིསནྟཱི’’ཏི ཨེཏྠ ཨནདྷིཊྛིཏམེཝ. ཨེཀསྨིཾཡེཝ ཧི ཙཱིཝརེ ཏིཙཱིཝརཱདྷིཊྛཱནཾ རུཧཏི, ན ཨིཏརསྨིཾ པཏྟཱདྷིཊྛཱནཾ ཝིཡ, ཏསྨཱ ཨིཏརཾ ཨཏིརེཀཊྛཱནེ ཏིཊྛཏི. ཏེན ཝུཏྟཾ ‘‘ཀཐཉྷི ནཱམ ཚབྦགྒིཡཱ བྷིཀྑཱུ ཨཏིརེཀཙཱིཝརཾ དྷཱརེསྶནྟཱི’’ཏིཨཱདི.

༤༦༠-༡. པཋམཔཉྙཏྟིཡཱ པནེཏྠ ཨེཀརཏྟམྤི ཨཏིརེཀཙཱིཝརཾ དྷཱརེཡྻ, ནིསྶགྒིཡཾ ཝུཏྟཾ ཧོཏི, ཏཏོ པརཾ ‘‘ཨནུཛཱནཱམི, བྷིཀྑཝེ, དསཱཧཔརམཾ ཨཏིརེཀཙཱིཝརཾ དྷཱརེཏུཾ. ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ ‘དསཱཧཔརམཾ ཨཏིརེཀཙཱིཝརཾ དྷཱརེཏབྦཾ, ཏཾ ཨཏིཀྐཱམཡཏོ ནིསྶགྒིཡཾ པཱཙིཏྟིཡ’’’ནྟི ཨེཝཾ བྷགཝཱ པརིཔུཎྞཾ སིཀྑཱཔདཾ པཉྙཱཔེསི. ཨཐ པཙྪིམབོདྷིཡཾ ཨཛཱཏསཏྟུཀཱལེ ཀཐིནཾ ཨནུཉྙཱཏཾ, ཏཏོ པཊྛཱཡ བྷིཀྑཱུ ཨིདཾ སིཀྑཱཔདཾ ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ དསཱཧ…པེ… པཱཙིཏྟིཡ’’ནྟི ཨུདྡིསནྟི, ཨེས ནཡོ དུཏིཡཏཏིཡཀཐིནེསུཔི. ཏཐཱཔི ཀངྑཱཝིཏརཎིཡཾ (ཀངྑཱ. ཨཊྛ. ཀཐིནསིཀྑཱཔདཝཎྞནཱ) ‘‘དསཱཧཔརམནྟི ¶ ཨཡམེཏྠ ཨནུཔཉྙཏྟཱི’’ཏི ཨེཏྟཀཾཡེཝ ཝུཏྟཾ, ཏསྨཱ ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ’’ཏི ཝཙནཾ ན པཉྙཏྟི, ན ཙ ཨནུཔཉྙཏྟཱིཏི སིདྡྷཾ. ན ཧི པཉྙཏྟིཝཏྠུསྨིཾ, ཨནུཔཉྙཏྟིཝཏྠུམྷི ཝཱ ཀཐིནཱདྷིཀཱརོ དིསྶཏཱིཏི ཡཐཱཝུཏྟནཡོཝ སཱརོཏི ནིཊྛམེཏྠ གནྟབྦཾ. ཨཐཱཔི སིཡཱ ‘‘ཀཐིནསྶུཔྤཏྟིཀཱལཏོ པཊྛཱཡ བྷགཝཏོ ཝཙནཾ ཨནུཔཉྙཏྟིབྷཱཝེན ཝུཏྟ’’ནྟི. ཡདི ཨེཝཾ དྭེ ཨནུཔཉྙཏྟིཡོ སིཡུཾ, ཏཏོ པརིཝཱརེ (པརི. ༢༤) ‘‘ཨེཀཱ ¶ ཨནུཔཉྙཏྟཱི’’ཏིཝཙནཝིརོདྷོ. ཨཔིཙ ཡཐཱཝུཏྟནཡདཱིཔནཏྠཾ ཨིདྷ ཏཾ ཝཙནཾ པཋམཔཉྙཏྟིཀཱལེ ཨཝཏྭཱ པཙྪཱ ཝུཏྟཾ. ཨེཏྠ སཱདྷིཏཏྟཱ དུཏིཡཏཏིཡེསུ པཙྪཱ ཝུཏྟཔཋམཔཉྙཏྟཱིསུ ཨེཝཾ ཝུཏྟཾ. ཨཉྙཐཱ ཏཏྠཔི ཏཾ ཝཙནཾ པཙྪཱ ཝཏྟབྦཾ སིཡཱ. ཨནུགཎྛིཔདེ པན ‘‘པཙྪཱ ཝུཏྟབྷཱཝཾ སནྡྷཱཡ ནིཊྛིཏཙཱིཝརསྨིནྟིཨཱདཱིསུ ཨནུཔཉྙཏྟཱི’’ཏི ཝུཏྟཾ. སེཀྑཔུཐུཛྫནཱནཾ པེམཾ, ཨརཧནྟཱནཾ གཱརཝོ. དསམཾ ཝཱ ནཝམཾ ཝཱཏི ཨེཏྠ བྷུམྨཏྠེ ཨུཔཡོགཝཙནཾ.

༤༦༢-༣. ནིཊྛིཏཙཱིཝརསྨིནྟི ཨིདཾ ཀེཝལཾ ཙཱིཝརཔལིབོདྷཱབྷཱཝམཏྟདཱིཔནཏྠཾ ཝུཏྟཾ, ཏསྨཱ ‘‘ནཊྛཾ ཝཱ ཝིནཊྛཾ ཝཱ དཌྜྷཾ ཝཱ ཙཱིཝརཱསཱ ཝཱ ཨུཔཙྪིནྣཱ’’ཏི ཝུཏྟཾ. ཡདི དསཱཧཔརམཾ དྷཱརེཏབྦཙཱིཝརདསྶནཏྠཾ ཝུཏྟཾ སིཡཱ, ནཊྛཱདིཀཾ སོ དྷཱརེཡྻ. དྷཱརཎཉྩེཏྠ ཋཔནཾ, པརིབྷོགོ ཝཱ. ཏཾ དྭཡཾ ཀཏེཔི ཡུཛྫཏི, ཨཀཏེཔི ཡུཛྫཏི, ཏསྨཱ ‘‘ཀཏཾ ཝཱ ཧོཏཱི’’ཏིཔི ན ཝཏྟབྦཾ. ན ཧི ཀཏམེཝ ཨཏིཀྐཱམཡཏོ ནིསྶགྒིཡནྟི, ཏསྨཱ ཡཾ ཙཱིཝརཾ ཨུཔཱདཱཡ ‘‘ནིཊྛིཏཙཱིཝརསྨི’’ནྟི ཝུཏྟཾ. ཏམྤི ཨུབྦྷཏསྨིཾ ཀཐིནེ དསཱཧཔརམཾ ཀཱལཾ དྷཱརེཏབྦནྟི ཨཏྠོ ན གཧེཏབྦོ. ཏཉྷི ཙཱིཝརཾ སནྟཉྩེ, ཨུབྦྷཏསྨིཾ ཀཐིནེ ཨེཀདིཝསམྤི པརིཧཱརཾ ན ལབྦྷཏི. ཨཔིཙ ‘‘ཙཱིཝརཾ ནཱམ ཝིཀཔྤནུཔགཾ པཙྪིམ’’ནྟི ཝུཏྟཾ. ཏཏྠ ཙ ཀཏཾ ནཱམ ཧོཏི, ཏསྨཱཔི ན ཏཾ སནྡྷཱཡ དྷཱརེཏབྦནྟི ཝུཏྟནྟི ཝེདིཏབྦཾ ཨསམྦྷཝཏོ.

ཨནུགཎྛིཔདེ པནེཏཾ ཝུཏྟཾ ‘‘ཏཏྠ སིཡཱ – ཏསྶ བྷིཀྑུནོ ཙཱིཝརཾ ནཊྛཱདཱིསུ ཨཉྙཏརཾ ཡདི བྷཝེཡྻ, ཀཏམཾ ཙཱིཝརཾ དསཱཧཔརམཾ དྷཱརེཡྻ. ཡསྨཱ དྷཱརེཏབྦཙཱིཝརཾ ནཏྠི, ཏསྨཱ ཨཏྠུདྡྷཱརཝསེན ཀརཎཔལིབོདྷདསྶནཏྠཾ ‘ནཊྛཾ ཝཱ’ཏིཨཱདིཔདཱནི ཝུཏྟཱནི. ཨཡཾ པནཏྠོ ‘ནཊྛཾ ཝཱ’ཏིཨཱདིནཱ ནཡེན ཝུཏྟཙཱིཝརཱནཾ ཨཉྙཏརསྨིཾ ཙཱིཝརེ ཨསཏི གཧེཏབྦོ, སཏི ཏཾ དསཱཧཔརམཾ ཨཏིཀྐཱམཡཏོ ནིསྶགྒིཡཾ. ཨེས ནཡོ སབྦཏྠ. ‘ཀཏཾ ཝཱ ཧོཏཱི’ཏི ཝུཏྟཙཱིཝརམེཝཱདྷིཔྤེཏཾ. ཀསྨཱ པན ཀཏཙཱིཝརཾ ཨིམསྨིཾ ཨཏྠེ ཨདྷིཔྤེཏནྟི ན ཝུཏྟནྟི ཙེ? པཱཀཊཏྟཱ. ཀཐཾ? ནཊྛཝིནཊྛཙཱིཝརཱདཱིནཾ དྷཱརཎསྶ ཨབྷཱཝཏོ ཀཏཙཱིཝརམེཝ ཨིདྷཱདྷིཔྤེཏནྟི པཱཀཊཾ. ཡཐཱ ཀིཾ? ཡཐཱ པཋམཱནིཡཏེ མེཐུནཀཱཡསཾསགྒརཧོནིསཛྫཱནམེཝཱགཏཏྟཱ སོཏསྶ རཧོ ཨཏྠུདྡྷཱརཝསེན ¶ ཝུཏྟོཏི པཱཀཊོ, ཏསྨཱ ‘ཙཀྑུསྶ རཧོ ཨིཏརསྨིཾ ཨཏྠེ ཨདྷིཔྤེཏོ’ཏི ན ཝུཏྟོ. ཨེཝཾསམྤདམིདནྟི ཝེདིཏབྦཾ. ‘ཀཏཾ ཝཱ ཧོཏཱི’ཏི ཨིདཾ ན ཝཏྟབྦཾ, ཀསྨཱ? ཨཀཏཾ ཨཏིཀྐཱམཡཏོཔི ནིསྶགྒིཡཏྟཱ, ཀིཉྩཱཔི ནིསྶགྒིཡཾ ཧོཏི ¶ , ཨིདྷ པན ཏིཙཱིཝརཱདྷིཊྛཱནམདྷིཔྤེཏཾ. ཏསྨིཾ ཏིཙཱིཝརཱདྷིཊྛཱནེ ཨཀཏཾ, ཨརཛིཏཾ, ཨཀཔྤིཡཀཏཉྩ ‘ཨིམཾ སངྒྷཱཊིཾ ཨདྷིཊྛཱམཱི’ཏིཨཱདིནཱ ནཡེན ཨདྷིཊྛཱཏུཾ ན ཝཊྚཏི, ཏདཏྠདཱིཔནཏྠཾ ‘ཀཏཾ ཝཱ ཧོཏཱི’ཏི ཝུཏྟཾ. ཨིཏརཐཱ ‘ནིཊྛིཏཙཱིཝརསྨིཾ པཊིལདྡྷེ’ཏི ཝདེཡྻ, ཨེཝཾ སནྟེ ཏིཙཱིཝརཾ དསཱཧཾ ཨཏིཀྐཱམཡཏོ ནིསྶགྒིཡནྟི ཀཐཾ པཉྙཱཡཏཱིཏི ཙེ? ཝཙནཔྤམཱཎཏོ. ‘ཨནུཛཱནཱམི, བྷིཀྑཝེ, ཏིཙཱིཝརཾ ཨདྷིཊྛཱཏུཾ ན ཝིཀཔྤེཏུ’ནྟི ཝུཏྟཏྟཱ ཨིདྷཱཔི ‘ཨཏིརེཀཙཱིཝརཾ ནཱམ ཨནདྷིཊྛིཏ’ནྟི ཨེཏྟཀམེཝ ཝཏྟབྦཾ སིཡཱ. ཡསྨཱ ‘ཀཏཾ ཝཱ ཧོཏཱི’ཏི ཝཙནེན ཨིདྷཱདྷིཔྤེཏཙཱིཝརེན སདྡྷིཾ སེསམྤི དསཱཧཔརམཏོ ཨུཏྟརི དྷཱརེཏུཾ ན ལབྦྷཏཱིཏི ཨནུཛཱནནྟོ ‘ཨཏིརེཀཙཱིཝརཾ ནཱམ ཨནདྷིཊྛིཏཾ ཨཝིཀཔྤིཏ’ནྟི ཨཱཧ. ཏཏྠ སིཡཱ – ཡཐཱ ‘ཨཝིཀཔྤིཏ’ནྟི ཨཏྠུདྡྷཱརཝསེན ཝུཏྟཾ, ཏཐཱ ‘ཝིཀཔྤནུཔགཾ པཙྪིམ’ནྟིཔི. ཀསྨཱ? ཡསྨཱ ཏིཙཱིཝརམེཝ དསཱཧཔརམཾ དྷཱརེཏབྦཾ ‘ནིཊྛིཏཙཱིཝརསྨི’ནྟིཨཱདིཨནུཔཉྙཏྟིཝསེན. ཨིཏརཐཱ ཨེཀཱཧཱཏིཀྐམེཔི ནིསྶགྒིཡཾ ཧོཏི ‘ཡོ པན, བྷིཀྑུ, ཨཏིརེཀཙཱིཝརཾ དྷཱརེཡྻ, ནིསྶགྒིཡཾ པཱཙིཏྟིཡ’ནྟི ཝཙནཏོ. ན ཏིཙཱིཝརཏོ ཨཉྙམྤི ཙཱིཝརཾ དསཱཧཔརམཾ དྷཱརེཏབྦཾ, ཏཏོ པརཾ ནིསྶགྒིཡཾ ‘ཨནྟོདསཱཧ’ནྟི ཝུཏྟཏྟཱ. ཡཐཱཧ ‘ཨནཱཔཏྟི ཨནྟོདསཱཧཾ ཨདྷིཊྛེཏི, ཝིཀཔྤེཏཱི’ཏི, ཨིཏརཐཱ ‘ཨནྟོདསཱཧཾ ཨདྷིཊྛེཏཱི’ཏི ཝཙནམཏྟམེཝ བྷཝེཡྻ, ཏསྨཱ ཨཊྛཀཐཱཡཾ ཝུཏྟནཡེནེཝ ཨཏྠོ གཧེཏབྦོ. ཨིདཾ སབྦཾ ཨཔརེ ཝདནྟཱི’’ཏི. ཨེཏྠ ཨནྟོཀཐིནེ ཨུཔྤནྣཙཱིཝརཾ ཀཏམེཝ སནྟཉྩེ, དསཱཧཔརམཾ དྷཱརེཏབྦནྟི ཨིདཉྩིམསྶ སཱདྷནཏྠཾ ཝུཏྟཝཙནཉྩ པརཏོ ཨིདྷེཝ ཝུཏྟཝིཙཱརཎཱཡ ཡཐཱཝུཏྟཡུཏྟིཡཱ ཙ ཝིརུཛ྄ཛྷཏཱིཏི ན གཧེཏབྦཾ.

ཨིདྷེཝ ཝུཏྟཝིཙཱརཎཱ ནཱམ – ‘‘སྭེ ཀཐིནུདྡྷཱརོ བྷཝིསྶཏཱི’’ཏི ཨཛྫ ཨུཔྤནྣཙཱིཝརཾ ཏདཧེཝ ཨནདྷིཊྛཧནྟསྶ ཨརུཎུགྒམནེ ནིསྶགྒིཡཾ. ཀསྨཱ? ‘‘ནིཊྛིཏཙཱིཝརསྨི’’ནྟིཨཱདིནཱ སིཀྑཱཔདསྶ ཝུཏྟཏྟཱ. ཨནྟོཀཐིནེ ཨཏིརེཀདསཱཧམྤི པརིཧཱརཾ ལབྷཏི, ཀཐིནཏོ ཨུདྡྷཾ ཨེཀདིཝསམྤི ན ལབྷཏི. ཡཐཱ ཀིཾ? ཡཐཱ ཨཏྠཏཀཐིནོ སངྒྷོ ཨཏྠཏདིཝསཏོ པཊྛཱཡ ཡཱཝ ཨུབྦྷཱརཱ ཨེཀདིཝསཱཝསེསེཔི ཀཐིནུབྦྷཱརེ ཨཱནིསཾསཾ ལབྷཏི, པུནདིཝསེ ན ལབྷཏི. སཙེ སཏིསམྨོསཱ བྷཱཛནཱིཡཙཱིཝརཾ ན བྷཱཛིཏཾ, པུནདིཝསེ ཨནཏྠཏཀཐིནཱནམྤི སཱདྷཱརཎཾ ཧོཏི. དིཝསཱ ཙེ སཱཝསེསཱ, ཨཏྠཏཀཐིནསྶེཝ སངྒྷསྶ པཱཔུཎཱཏི, ཨེཝམེཝ ཨཏྠཏདིཝསཏོ པཊྛཱཡ ཡཱཝ ཨུབྦྷཱརཱ ཨནདྷིཊྛིཏཾ ཨཝིཀཔྤིཏཾ ཝཊྚཏི ཨནུཉྙཱཏདིཝསབྦྷནྟརཏྟཱ. ཀཐིནདིཝསོ ¶ གཎནུཔགོ ཧོཏི, ཨུབྦྷཏདིཝསཏོ པཊྛཱཡ དསཱཧཔརམཾ ཀཱལཾ ཨུཔྤནྣཙཱིཝརཾ པརིཧཱརཾ ལབྷཏི, ཏཏོ ¶ པརཾ ན ལབྷཏི. ཀསྨཱ? ‘‘ཨནུཛཱནཱམི, བྷིཀྑཝེ, དསཱཧཔརམཾ ཨཏིརེཀཙཱིཝརཾ དྷཱརེཏུ’’ནྟི ཝཙནཏོ. ཨནྟོཀཐིནེཔི ཨེཀཱདསེ ཨརུཎུགྒམནེ ནིསྶགྒིཡཔྤསངྒཾ ‘‘ནིཊྛིཏཙཱིཝརསྨིཾ ཨུབྦྷཏསྨིཾ ཀཐིནེ’’ཏི ཨཡཾ ཨནུཔཉྙཏྟི ཝཱརེཏྭཱ ཋིཏཱ, ན ཙ ཏེ དིཝསེ ཨདིཝསེ ཨཀཱསཱིཏི. ཏཐཱ ཏཏིཡཀཐིནེ ཙ ཝིཙཱརིཏཾ ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ བྷིཀྑུནོ པནེཝ ཨཀཱལཙཱིཝརཾ ཨུཔྤཛྫེཡྻཱ’ཏི ཝདནྟེན བྷགཝཏཱ ཡཾ མཡཱ ཧེཊྛཱ པཋམསིཀྑཱཔདེ ‘དསཱཧཔརམཾ ཨཏིརེཀཙཱིཝརཾ དྷཱརེཏབྦ’ནྟི ཨནུཉྙཱཏཾ, ཏམྤི ཀཐིནམཱསཏོ བཧི ཨུཔྤནྣམེཝ, ན ཨནྟོཏི དཱིཔིཏཾ ཧོཏཱི’’ཏི ཙ, ‘‘‘ཀཱལེཔི ཨཱདིསྶ དིནྣཾ ཨེཏཾ ཨཀཱལཙཱིཝར’ནྟི (པཱརཱ. ༥༠༠) ཝཙནཏོ ཀཐིནུབྦྷཱརཏོ ཨུདྡྷཾ དསཱཧཔརིཧཱརཾ ན ལབྷཏཱིཏི དཱིཔིཏཾ ཧོཏི, ཏེཧི སདྡྷིཾ པུན ཀཐིནུབྦྷཱརཏོ ཨུདྡྷཾ པཉྩ དིཝསཱནི ལབྷཏཱིཏི པསངྒོཔི ‘ནིཊྛིཏཙཱིཝར…པེ… ཁིཔྤམེཝ ཀཱརེཏབྦ’ནྟི ཨཀཱལཙཱིཝརསྶ ཨུཔྤཏྟིཀཱལཾ ནིཡམེཏྭཱ ཝུཏྟཏྟཱ ཝཱརིཏོ ཧོཏི. ཏདུབྷཡེན ཀཐིནབྦྷནྟརེ ཨུཔྤནྣཙཱིཝརཾ ཀཐིནུབྦྷཱརཏོ ཨུདྡྷཾ ཨེཀདིཝསམྤི པརིཧཱརཾ ན ལབྷཏཱིཏི སིདྡྷཾ ཧོཏཱི’’ཏི ཙ. ཏསྨཱ དུཝིདྷམྤེཏཾ ཝིཙཱརཎཾ སནྡྷཱཡ ཨམྷེཧི ‘‘ཨིདྷེཝ ཝུཏྟཝིཙཱརཎཱཡ ཡཐཱཝུཏྟཡུཏྟིཡཱ ཙ ཝིརུཛ྄ཛྷཏཱིཏི ན གཧེཏབྦ’’ནྟི ཝུཏྟནྟི ཝེདིཏབྦཾ.

ཨེཏྠཱཧ – ‘‘ནིཊྛིཏཙཱིཝརསྨིཾ ཨུབྦྷཏསྨིཾ ཀཐིནེ’’ཏི ཨིདཾ བྷུམྨཾ ཀིཾ ཙཱིཝརསྶ ཨུཔྤཏྟི ནིཡམེཏི, ཨུདཱཧུ དྷཱརཎཾ, ཨུདཱཧུ ཨུབྷཡནྟི, ཀིཉྩེཏྠ, ཡདི ཨུཔྤཏྟིཾ ནིཡམེཏི, པཙྪིམཀཏྟིཀམཱསེ ཨེཝ ཨུབྦྷཏསྨིཾ ཀཐིནེ ཨུཔྤནྣཙཱིཝརཾ ཏཏོ པཊྛཱཡ དསཱཧཾ དྷཱརེཏབྦཾ ཨནིཊྛིཏེཔི ཏསྨིཾ མཱསེཏི ཨཱཔཛྫཏི. ཨཐ དྷཱརཎཾ ནིཡམེཏི, ཨནྟོཀཐིནེ ཨུཔྤནྣཙཱིཝརཾ ཨུབྦྷཏེཔི དསཱཧཔརམཾ དྷཱརེཏབྦནྟི ཨཱཔཛྫཏི. ཨཐ ཨུབྷཡཾ ནིཡམེཏི, ཏཏིཡཀཐིནེ ཝིཡ ཝིསེསེཏྭཱ ཝཏྟབྦནྟི? ཝུཙྩཏེ – ཀཱམཾ ཨུབྷཡཾ ནིཡམེཏི, ན པན ཝིསེསནེ པཡོཛནཾ ཨཏྠི. ཡཾ ཨནྟོཀཐིནེ ཨུཔྤནྣཙཱིཝརཾ སནྡྷཱཡ ‘‘ནིཊྛིཏཙཱིཝརསྨི’’ནྟི ཝུཏྟཾ, ན ཏཾ སནྡྷཱཡ ‘‘དྷཱརེཏབྦ’’ནྟི ཝུཏྟཾ, སཱདྷིཏཉྷེཏཾ. ‘‘ཀཏཾ ཝཱ ཧོཏཱི’’ཏིཨཱདིཝཙནཏོ ཏདཏྠསིདྡྷི, ཏེན པུན ཝིསེསནེ པཡོཛནཾ ནཏྠི, ན ཧི ཀཏམེཝ ནིསྶགྒིཡཾ ཀརོཏི, ན ཙ ནཊྛཱདིཀཾ དྷཱརེཏུཾ སཀྐཱཏི. ཡེན ཝཱ ཨདྷིཔྤཱཡེན བྷགཝཏཱ ཨིདཾ སིཀྑཱཔདཾ པཉྙཏྟཾ, སོ ¶ ཨདྷིཔྤཱཡོ ཏཏིཡཀཐིནེ པཀཱསིཏོཏི ཝེདིཏབྦོ. ཀསྨཱ ཏཏྠ པཀཱསིཏོཏི ཙེ? ཝིསེསཝིདྷཱནདསྶནཱདྷིཔྤཱཡཏོ. ཝིསེསཝིདྷཱནཉྷི ‘‘ནོ ཙསྶ པཱརིཔཱུརཱི’’ཏིཨཱདི. ཏཏྠཱཔི ‘‘ཙཱིཝརཾ ཨུཔྤཛྫེཡྻཱ’’ཏི ཨཝཏྭཱ ‘‘ཨཀཱལཙཱིཝརཾ ཨུཔྤཛྫེཡྻཱ’’ཏི ཝིསེསནེན ཨུབྦྷཏེཔི ཀཐིནེ ཀཱལཙཱིཝརཾ ཨཏྠཱིཏི དཱིཔེཏི. ཀིཉྩེཏཾ? པཙྪིམཀཏྟིཀམཱསེ ཨུཔྤནྣཙཱིཝརཾ, ཏེནེཝ ཏཏྠ ‘‘ཨནཏྠཏེ ཀཐིནེ ཨེཀཱདསམཱསེ ཨུཔྤནྣ’’ནྟི ཝུཏྟཾ, ཏསྨཱ ཨུཔྤཏྟིནིཡམེ ཝུཏྟདོསཱབྷཱཝསིདྡྷི. ཡཉྩ ¶ ཏཏྠ ‘‘ཀཱལེཔི ཨཱདིསྶ དིནྣཾ ཨེཏཾ ཨཀཱལཙཱིཝརཾ ནཱམཱ’’ཏི ཝུཏྟཾ, ཏསྶ དྭེ ཨཏྠཝིཀཔྤཱ. ཨཱདེསཝསེན ‘‘ཨཀཱལཙཱིཝར’’ནྟི ལདྡྷསངྑྱམྤི ཀཱལེ ཨུཔྤནྣཏྟཱ ཀཱལཔརིཧཱརཾ ལབྷཏི, པགེཝཱནཱདེསནྟི ཨཡཾ པཋམོ ཝིཀཔྤོ ཨུཔྤཏྟིནིཡམེ ཝུཏྟདོསཱབྷཱཝམེཝ ཨུཔཏྠམྦྷེཏི. ཏཐཱ ཨཱདེསཝསེན ཨཀཱལཙཱིཝརསངྑྱཾ གཏཾ ཙཱིཝརཀཱལེ ཨུཔྤནྣཏྟཱ ཙཱིཝརཀཱལཏོ པརཾ དསཱཧཔརིཧཱརཾ ན ལབྷཏི, པགེཝཱནཱདེསནྟི ཨཡཾ དུཏིཡོ དྷཱརཎནིཡམེ ཝུཏྟདོསཱབྷཱཝམེཝ ཨུཔཏྠམྦྷེཏི. ཡདི ཨེཝཾ ཨཱདེསཝསེན ཨཀཱལཙཱིཝརསྶ ཨཀཱལཙཱིཝརཏཱ ཀིམཏྠིཀཱཏི ཙེ? སངྒྷུདྡེསིཀསྶ ཏསྶ ཨཏྠཏཀཐིནསྶཔི བྷིཀྑུསངྒྷསྶ སཱདྷཱརཎབྷཱཝཏྠིཀཱཏི ཝེདིཏབྦཱ.

ཨཔིཙ པུགྒལསྶ ཀཐིནདིཝསཱཔི དིཝསཱཝ. ཨེཝཾ གཎནུཔགཏྟཱ ཨཀཱལཙཱིཝརསངྑཡཱཔཊིལཱབྷཱནུབྷཱཝེན ‘‘ཨུབྦྷཏསྨིཾ ཀཐིནེ’’ཏི ཝཙནཱཔེཀྑསྶ ཨནིསྶགྒིཡཏྟཱ ཏདནུལོམཏྟཱ ‘‘ཀཱལཙཱིཝརསྶཔཱི’’ཏི ཨེཝཾ སབྦཐཱ ཙཏུབྦིདྷཾ ཨེཏྠ ཝཙནནྟི ཝེདིཏབྦཾ. ཨཔིཙ ཨཏྠི ཨེཀཙྩེན ཀཐིནུདྡྷཱརེན ཨུབྦྷཏེ ཀཐིནེ ཨུཔྤནྣཾ ཨེཀཙྩསྶ བྷིཀྑུནོ ཀཱལཙཱིཝརཾ ཧོཏི, ཨེཀཙྩསྶ ཨཀཱལཙཱིཝརཾ, ཏཾ སཱིམཱཏིཀྐནྟསྶ, ནོ ཨུབྦྷཱརགཏཾ. ཏཾ དྭིནྣཾ ཝསེན ཨུབྦྷཏེ ཨུཔྤནྣཾ ཋཔེཏྭཱ ཨིཏརེསཾ ཨཉྙཏརེན ཨུབྦྷཏེ ཨུཔྤནྣནྟི ཝེདིཏབྦཾ. ཏཉྷི ཡསྶ ཨུབྦྷཏཾ, ཏསྶ ཨཀཱལཙཱིཝརཾ, ཨིཏརསྶ ཀཱལཙཱིཝརཾ. ཏཐཱ ཨཏྠི ཨེཀཙྩེན ཀཐིནུདྡྷཱརེན ཨུབྦྷཏེ ཀཐིནེ ཨུཔྤནྣཾ སབྦསྶཔི ཨཀཱལཙཱིཝརམེཝ ཧོཏི. ཏཾ ཡཐཱཋཔིཏཾ ཝེདིཏབྦཾ. ཏཐཱ ཨཏྠི ཨུབྦྷཏསྨིཾ ཀཐིནེ ཨུཔྤནྣཾ ཋཔེཏྭཱ ཝསྶཱནསྶ པཙྪིམེ མཱསེ ཨུཔྤནྣཾ. ཏཐཱ ཨཏྠི ཨུབྦྷཏསྨིཾ ཀཐིནེ ཨུཔྤནྣཾ ཨཀཱལཙཱིཝརཾ, ཏཾ ཧེམནྟེ, གིམྷེ ཝཱ ཨུཔྤནྣནྟི ཝེདིཏབྦཾ. ཨེཝཾ པུགྒལཀཱལབྷེདཏོ བཧུཝིདྷཏྟཱ ཨུཔྤནྣསྶ ‘‘ཨུབྦྷཏསྨིཾ ཀཐིནེ ཨུཔྤནྣ’’ནྟི ན ཝུཏྟནྟི ཝེདིཏབྦཾ. ཨནེཀཾསིཀཏྟཱ ཨིམམྤི ཨཏྠཝིཀཔྤཾ ¶ དསྶེཏུཾ ‘‘ཨུབྦྷཏསྨིཾ ཀཐིནེཏི བྷིཀྑུནོ ཀཐིནཾ ཨུབྦྷཏཾ ཧོཏཱི’’ཏི. ཨེཏྟཱཝཏཱ སིདྡྷེཔི ‘‘ཨཊྛནྣཾ མཱཏིཀཱནཾ ཨཉྙཏརཱཡཱ’’ཏིཨཱདི ཝུཏྟཾ. ‘‘དྷཱརཡཱམཱི’’ཏི བྷིཀྑུནཱིཝིབྷངྒེ ཨཱགཏོཏི ཝཏྟབྦོ. ‘‘ཨེཝ’’ནྟི ཝཙནེན ཝཙནབྷེདོ ཏཏྠ ནཏྠཱིཏི ཝུཏྟཾ ཧོཏི.

‘‘ཝིཀཔྤནུཔགཾ པཙྪིམ’’ནྟི ཨིདཾ སབྦསངྒཱཧིཀཏྟཱ ཝུཏྟཾ. ‘‘ཨདྷིཊྛཱནུཔགཾ པཙྪིམ’’ནྟི ཨསབྦསངྒཱཧིཀཾ. ན ཧི ཡཏྟཀཾ སངྒྷཱཊི ཨདྷིཊྛཱནུཔགཾ པཙྪིམཾ, ཏཏྟཀཾ ཨནྟརཝཱསཀཱདི ཨདྷིཊྛཱནུཔགཾ པཙྪིམཾ ཧོཏི ཨདྷིཊྛཱནསྶ བཧུཝིདྷཏྟཱ. ན ཨེཝཾ ཝིཀཔྤནཱཡ བྷེདོ ཏསྶཱ ཨེཀཝིདྷཏྟཱཏི ཝེདིཏབྦཾ. ‘‘ཨེཀཱདསེ ཨརུཎུགྒམནེ ནིསྶགྒིཡ’’ནྟི ཨནྟིམཾ ཋཔེཏྭཱ ཏཏོ པུརིམཏརསྨིནྟི ཨཏྠོ ཝེདིཏབྦོ. ཨནྟིམཾ ནཱམ ཨཔརཀཏྟིཀཱཡ པཋམཱརུཎུགྒམནཾ. ཏཉྷི ཀཱལཏྟཱ ནིསྶགྒིཡཾ ན ཀརོཏི, ཏེནེཝཱཧ ཨཙྩེཀཙཱིཝརསིཀྑཱཔདཊྛཀཐཱཡཾ ‘‘ཚཊྛིཏོ པཊྛཱཡ པན ཨུཔྤནྣཾ ཨནཙྩེཀཙཱིཝརམྤི པཙྩུདྡྷརིཏྭཱ ཋཔིཏཙཱིཝརམྤི ཨེཏཾ པརིཧཱརཾ ལབྷཏིཡེཝཱ’’ཏི (པཱརཱ. ཨཊྛ. ༢.༦༤༦-༩). ཨིམཾཡེཝ ¶ ནཡཾ སནྡྷཱཡ ‘‘ཨཙྩེཀཙཱིཝརསྶ ཨནཏྠཏེ ཀཐིནེ ཨེཀཱདསདིཝསཱདྷིཀོ མཱསོ, ཨཏྠཏེ ཀཐིནེ ཨེཀཱདསདིཝསཱདྷིཀཱ པཉྩ མཱསཱ, ཏཏོ པརཾ ཨེཀདིཝསམྤི པརིཧཱརོ ནཏྠཱི’’ཏི ཏཏྠེཝཱཧ. ཨིམསྨིཾ ནཡེ སིདྡྷེ ཨནཙྩེཀཙཱིཝརཾ དྭཱདསཱཧེ ན ལབྷཏཱིཏི སིདྡྷམེཝ ཧོཏི. ཏཏོ ‘‘ཨནཙྩེཀཙཱིཝརེ ཨནཙྩེཀཙཱིཝརསཉྙཱི, ཨནཱཔཏྟཱི’’ཏི (པཱརཱ. ༦༥༠) ཨེཏྠ ཨཙྩེཀཙཱིཝརསདིསེ ཨཉྙསྨིཾ ཨནདྷིཊྛིཏེཏི སིདྡྷཾ ཧོཏི. ཏཏྠ པན ‘‘པཉྩ མཱསཱ’’ཏི ཨུཀྐཊྛཔརིཙྪེདཝཙནཾ. ཝསྶིཀསཱཊིཀཉྩ ཨཝསྶིཀསཱཊིཀབྷཱཝཾ པཏྭཱ ཨེཀཱདསམཱསེ པརིཧཱརཾ ལབྷཏཱིཏི ཝེདིཏབྦཾ.

དསཱཧཱཏིཀྐནྟཾ ནིསྶགྒིཡནྟི ཨེཏྠ ཨཱཔཏྟིཝུཊྛཱནེ ‘‘དསཱཧཔྤཊིཙྪནྣཾ པཀྑཨཏིརེཀཔཀྑམཱསཨཏིརེཀམཱསཔཊིཙྪནྣ’’ནྟིཨཱདིཝཙནབྷེདོ ཝིཡ, ན ཨིདྷ ཝཙནབྷེདོ, ཏསྨཱ སཾཝཙྪརཱཏིཀྐནྟམྤི དསཱཧཱཏིཀྐནྟམེཝ ནཱམ, ཏཐཱ དུཏིཡཀཐིནེཔི སཾཝཙྪརཝིཔྤཝུཏྠམྤི རཏྟིཝིཔྤཝུཏྠམེཝ. ཏཏིཡེ སཾཝཙྪརཱཏིཀྐནྟམྤི མཱསཱཏིཀྐནྟམེཝ ནཱམཱཏི ཝེདིཏབྦཾ. ‘‘ཨནདྷིཊྛིཏེ ཨདྷིཊྛིཏསཉྙཱི ནིསྶགྒིཡཾ པཱཙིཏྟིཡ’’ནྟི ཨིདམེཀསྶ ཏིཀཔཱཙིཏྟིཡསྶ ཨཱདིཔདདཱིཔནཾ. ཨེས ནཡོ ཨཝིཀཔྤིཏེཏིཨཱདཱིསུཔི, ཏསྨཱ ཨེཏྠ ཨཊྛསུ ཏིཀཙྪེདེསུ ཨེཀཾ ཝིཏྠཱརེཏྭཱ ཨིཏརེསཾ ཨེཀེཀམཱདིཔདཾ ཝིཏྠཱརེཧྭཱ དྭེ དྭེ བྷགཝཏཱཝ ¶ སངྑིཏྟཏྟཱཏི བཧཱུསུཔི ཏིཀཙྪེདེསུ སམྦྷཝནྟེསུ ཨེཀོ ཨེཝ ཝུཙྩཏི, ‘‘ཨཡཾ ཝིནཡསྶ དྷམྨཏཱ’’ཏི ཝདནྟི. དུཀྐཊཝཱརེསུ པན ཨེཀཾ དུཀྐཊཾ ཝིཏྠཱརེཏྭཱ སེསཱནི སཏྟ ཏཐེཝ སངྑིཏྟཱནི. ཏཐཱ ཨནྟིམནྟིམོ ཨེཀེཀོ ཨནཱཔཏྟིཀོཊྛཱསོཏི ཝེདིཏབྦཾ.

ཨནཱཔཏྟི ཨནྟོདསཱཧནྟི ཨཡཾ སངྑེཔཏྠོ – ཏཾ དསཱཧཔརམཾ དྷཱརེཏབྦཾ. ཏཾ ཨཏིརེཀཙཱིཝརཾ ཡཐཱསཀཾ ཨདྷིཊྛཱནཾ ཨནྟོདསཱཧཾ ཨདྷིཊྛེཏི ཝཱ ཝིཀཔྤེཏི ཝཱ ཝིསྶཛྫེཏི ཝཱ ཨཏྟནོ དྷམྨཏཱཡ ནསྶཏི ཝཱ ཝིནསྶཏི ཝཱ ཌཡ྄ཧཏི ཝཱ ཨཉྙོ ཝཱ ཏཾ ཨཙྪིནྡིཏྭཱ གཎྷཱཏི ཝིསྶཱསནྟོ ཝཱ གཎྷཱཏི པཱཙིཏྟིཡཏོ ཨནཱཔཏྟི. དུཀྐཊཏོ པན སིཡཱ ཨཱཔཏྟི སིཡཱ ཨནཱཔཏྟི སཉྙཱབྷེདེན. ཨནྟིམཱནཾ པནེཏྠ དྭིནྣཾ པདཱནཾ ཝསེན ཨནཙྪིནྣེ ཨཙྪིནྣསཉྙཱི ནིསྶགྒིཡཾ པཱཙིཏྟིཡཾ. ཨཝིསྶཱསགྒཱཧེ ཝིསྶཱསགྒཱཧསཉྙཱི ནིསྶགྒིཡཾ པཱཙིཏྟིཡནྟིཨཱདིཀཱ དྭེ ཏིཀཔཱཙིཏྟིཡཱ, དྭེ ཙ དུཀྐཊཱ སངྑིཏྟཱཏི ཝེདིཏབྦཱ. ཨེཏྠ ཧི ཡདི ཨནྟོདསཱཧཾ ཨདྷིཊྛེཏི, དསཱཧཔརམཾ ཨརུཎཾ ཨཏིཀྐམིཏྭཱ ཏསྶ དིཝསབྷཱགེ ཨདྷིཊྛཧཏཱིཏི ཝེདིཏབྦཾ. ཨཡཾ ཏཱཝ པཱལི༹ཝིནིཙྪཡོ.

ཨཊྛཀཐཱཡཾ པན ཨིཏོ གརུཀཏརཱནཱིཏིཨཱདིམྷི ཨཡཾ ཙོདནཱཔུབྦངྒམོ ཝིནིཙྪཡོ – གཎྛིཔདེ ¶ པནསྶ ཨིཏོ ནིསྶཊྛཙཱིཝརདཱནཏོ གརུཀམྤི ཉཏྟིདུཏིཡཀམྨཾ ཡཐཱ ཨཔལོཀནེན ཀརོནྟི, ཨེཝམིདཾ ཉཏྟིཡཱ ཀཏྟབྦམྤི པཀཏིཝཙནེན ཝཊྚཏཱིཏི. ཡདི ཨེཝཾ པརིཝཱརེ ཀམྨཝགྒསྶ ཨཊྛཀཐཱཡཾ ‘‘ཉཏྟིཀམྨམྤི ཨེཀཾ ཉཏྟིཾ ཋཔེཏྭཱཝ ཀཱཏབྦཾ, ཨཔལོཀནཀམྨཱདིཝསེན ན ཀཱཏབྦ’’ནྟི (པརི. ཨཊྛ. ༤༨༢) ཡཾ ཝུཏྟཾ, ཏེན ཝིརུཛ྄ཛྷེཡྻ. ཏེནེཏཾ ཝུཙྩཏི ‘‘ཏེསཾ ཨེཏཾ ཨནུལོམ’’ནྟི, ཏསྨཱ ཨནུལོམནཡེནེཝ ཏཾ ཝུཏྟཾ. ནིཡམཾ པན ཡཐཱ དྭིནྣཾ པཱརིསུདྡྷིཨུཔོསཐོ ཝིནཱ ཉཏྟིཡཱ ཧོཏི, ཨེཝཾ དྭིནྣཾ ནིསྶཊྛཙཱིཝརདཱནམྤཱིཏི ཝདཱམ, ཏསྨཱ ‘‘ཨཱཡསྨཏོ དེམཱ’’ཏི ཝཏྟུཾ ཝཊྚཏི. ཀཐཾ པནེཏཾ ཉཱཏབྦནྟི? ཏདནུལོམཏྟཱཏི. ཨེཀདེཝེདཾ ཉཏྟིཀམྨཾ ཨཔལོཀནེནཱཔི ཀཱཏུཾ ཝཊྚཏཱིཏི སཱདྷནནྟི ཝེདིཏབྦནྟི ཨཱཙརིཡོ. ཨནུགཎྛིཔདེ པནེཏྠ ཙོདནཾ ཀཏྭཱ ‘‘ཨེཏཾ སཱདྷིཏཾ. ཉཏྟིཀམྨཾ ཨེཀཾ ཉཏྟིཾ ཋཔེཏྭཱཝ ཀཱཏབྦ’’ནྟི པཱལི༹ཡཱ ཨཱགཏཾ སནྡྷཱཡ ཝུཏྟཾ, ཨིདཾ པན པཱལི༹ཡཾ ནཱགཏཾ, ལེསཏོ ཨཱཧརིཏྭཱ ཝུཏྟནྟི ཀཏྭཱ ཨེཏཾ ཨཔལོཀནེནཱཔི ཝཊྚཏཱིཏི.

༤༦༨. ཨེས ¶ ནཡོཏི ཨཉྙེསཾ ཙཱིཝརེསུ ཨུཔཙིཀཱདཱིཧི ཁཱཡིཏེསུ མམཔི ཁཱཡིཏཱནཱིཏིཨཱདི. ‘‘ཨཉྙེན ཀཏཾ…པེ… སཱདྷཀ’’ནྟི ཝཙནཏོ སམཱནཛཱཏིཀཾ, ཨེཀཏྠཛཱཏིཀཉྩ ཏཏིཡཀཐིནཾ པཋམསམཱནམེཝཱཏི སིདྡྷཾ ཧོཏི.

༤༦༩. ཏིཙཱིཝརཾ ཨདྷིཊྛཱཏུནྟི ཨེཏྠ ཏིཙཱིཝརཾ ཏིཙཱིཝརཱདྷིཊྛཱནེན ཨདྷིཊྛཱཏབྦཡུཏྟཀཾ, ཡཾ ཝཱ ཏིཙཱིཝརཱདྷིཊྛཱནེན ཨདྷིཊྛཱཏུཾ ཨཝིཀཔྤེཏུཾ ཨནུཛཱནཱམི, ཏསྶ ཨདྷིཊྛཱནཀཱལཔརིཙྪེདཱབྷཱཝཏོ སབྦཀཱལཾ ཨིཙྪནྟསྶ ཨདྷིཊྛཱཏུཾཡེཝ ཨནུཛཱནཱམི, ཏཾ ཀཱལཔརིཙྪེདཾ ཀཏྭཱ ཝིཀཔྤེཏུཾ ནཱནུཛཱནཱམི. སཏི པན པཙྩཡེ ཡདཱ ཏདཱ ཝཱ པཙྩུདྡྷརིཏྭཱ ཝིཀཔྤེཏུཾ ཝཊྚཏཱིཏི ‘‘ཨནཱཔཏྟི ཨནྟོདསཱཧཾ ཨདྷིཊྛེཏི, ཝིཀཔྤེཏཱི’’ཏི ཝཙནཏོ སིདྡྷཾ ཧོཏཱིཏི ཝུཏྟམེཏཾ. ཝསྶིཀསཱཊིཀཾ ཏཏོ པརཾ ཝིཀཔྤེཏུཾཡེཝ ནཱདྷིཊྛཱཏུཾ. ཝཏྠཉྷི ཀཏཔརིཡོསིཏཾ ཨནྟོཙཏུམཱསེ ཝསྶཱནདིཝསཾ ཨཱདིཾ ཀཏྭཱ ཨནྟོདསཱཧེ ཨདྷིཊྛཱཏུཾ ཨནུཛཱནཱམི, ཙཏུམཱསཏོ ཨུདྡྷཾ ཨཏྟནོ སནྟཀཾ ཀཏྭཱ ཋཔིཏུཀཱམེན ཝིཀཔྤེཏུཾ ཨནུཛཱནཱམཱིཏི ཨཏྠོ. སུགཏཙཱིཝརཏོ ཨཱུནཀནྟི ཏིཎྞམྤི ཙཱིཝརཱནཾ ཨུཀྐཊྛཔརིཙྪེདོ. ‘‘ཏིཙཱིཝརཾ པན པརིཀྑཱརཙོལ༹ཾ ཨདྷིཊྛཱཏུཾ ཝཊྚཏཱི’’ཏི ཝཱདེ པན སཏི ཏཐཱརཱུཔཔཙྩཡེ ཝཊྚཏི. ཡཐཱ སཏི པཙྩཡེ ཝིཀཔྤེཏུཾ ཝཊྚཏཱིཏི སཱདྷིཏམེཏཾ, པགེཝ ཨཉྙེན ཨདྷིཊྛཱནེན ཨདྷིཊྛཱཏུཾ. ‘‘ཨནྟོདསཱཧཾ ཨདྷིཊྛེཏི, ཝིཀཔྤེཏཱི’’ཏི ཨནིཡམཏོ ཝུཏྟནྟི སངྒྷཱཊི, ཨུཏྟརཱསངྒོ, ཨནྟརཝཱསཀནྟི ཨདྷིཊྛིཏཱནདྷིཊྛིཏཱནཾ སམཱནམེཝ ནཱམཾ. ‘‘ཨཡཾ སངྒྷཱཊཱི’’ཏིཨཱདཱིསུ (མཧཱཝ. ༡༢༦) ཧི ཨནདྷིཊྛིཏཱ ཝུཏྟཱ. ‘‘ཏིཙཱིཝརེན ཝིཔྤཝསེཡྻཱ’’ཏི ཨེཏྠ ཨདྷིཊྛིཏཱ ཝུཏྟཱ. སཱམནྟཝིཧཱརེ ཝཱཏི གོཙརགཱམཏོ ཝིཧཱརེཏི དྷམྨསིརིཏྠེརོ. དཱུརཏརེཔི ལབྦྷཏེཝཱཏི ¶ ཨཱཙརིཡོ. ཨནུགཎྛིཔདེཔི ‘‘སཱམནྟཝིཧཱརེ ཝཱཏི དེསནཱསཱིསམཏྟཾ, ཏསྨཱ ཋཔིཏཊྛཱནཾ སལླཀྑེཏྭཱ དཱུརེ ཋིཏམྤི ཨདྷིཊྛཱཏབྦ’’ནྟི ཝུཏྟཾ. སཱམནྟཝིཧཱརོ ནཱམ ཡཏྠ ཏདཧེཝ གནྟྭཱ ནིཝཏྟིཏུཾ སཀྐཱ. རཏྟིཝིཔྤཝཱསཾ རཀྑནྟེན ཏཏོ དཱུརེ ཋིཏཾ ཨདྷིཊྛཱཏུཾ ན ཝཊྚཏི, ཨེཝཾ ཀིར མཧཱཨཊྛཀཐཱཡཾ ཝུཏྟནྟི. ཀེཙི ‘‘ཙཱིཝརཝཾསེ ཋཔིཏཾ ཨཉྙོ པརིཝཏྟིཏྭཱ ནཱགདནྟེ ཋཔེཏི, ཏཾ ཨཛཱནིཏྭཱ ཨདྷིཊྛཧནྟསྶཔི རུཧཏི ཙཱིཝརསྶ སལླཀྑིཏཏྟཱ’’ཏི ཝདནྟི. ཨདྷིཊྛཧིཏྭཱཏི པརིཀྑཱརཙོལཱ༹དིཝསེན. མཧནྟཏརམེཝཱཏིཨཱདི སབྦཱདྷིཊྛཱནསཱདྷཱརཎལཀྑཎཾ ¶ . ཏཏྠ པུན ཨདྷིཊྛཱཏབྦམེཝཱཏི ཨདྷིཊྛིཏཙཱིཝརསྶ ཨེཀདེསབྷཱུཏཏྟཱ. ཨནདྷིཊྛིཏཉྩེ, ཨདྷིཊྛིཏསྶ ཨཔྤབྷཱཝེན ཨེཀདེསབྷཱུཏཾ ཨདྷིཊྛིཏསངྑྱམེཝ གཙྪཏི. ཏཐཱ ཨདྷིཊྛིཏཉྩེ, ཨནདྷིཊྛིཏསྶ ཨེཀདེསབྷཱུཏཾ ཨནདྷིཊྛིཏསངྑྱཾ གཙྪཏཱིཏི ཧི ལཀྑཎཾ, ན ཀེཝལཉྩེཏྠ དུཏིཡཔཊྚམེཝ, ཏཏིཡཔཊྚཱདིཀམྤི. ཡཐཱཧ ‘‘ཨནུཛཱནཱམི…པེ… ཨུཏུདྡྷཊཱནཾ དུསྶཱནཾ ཙཏུགྒུཎཾ སངྒྷཱཊིཾ…པེ… པཾསུཀཱུལེ ཡཱཝདཏྠ’’ནྟི (མཧཱཝ. ༣༤༨).

ཨཝསེསཱ བྷིཀྑཱུཏི ཝཀྑམཱནཀཱལེ ནིསིནྣཱ བྷིཀྑཱུ. ཏསྨཱ ཝཊྚཏཱིཏི ཡཐཱ ‘‘ཨནུཛཱནཱམི, བྷིཀྑཝེ, ཏིཙཱིཝརཾ ཨདྷིཊྛཱཏུཾ ན ཝིཀཔྤེཏུ’’ནྟི ཝུཏྟཾ, ཨེཝཾ པརིཀྑཱརཙོལ༹མྤི ཝུཏྟཾ, ན ཏསྶ ཨུཀྐཊྛཔརིཙྪེདོ ཝུཏྟོ, ན ཙ སངྑྱཱཔརིཙྪེདོ, ཏསྨཱ ཏཱིཎིཔི ཙཱིཝརཱནི པཙྩུདྡྷརིཏྭཱ ‘‘ཨིམཱནི ཙཱིཝརཱནི པརིཀྑཱརཙོལཱ༹ནི ཨདྷིཊྛཱམཱི’’ཏི ཨདྷིཊྛཧིཏྭཱ པརིབྷུཉྫིཏུཾ ཝཊྚཏཱིཏི ཨཏྠོ. ‘‘ནིདྷཱནམུཁམེཏ’’ནྟི ཀཐཾ པཉྙཱཡཏཱིཏི ཙེ? ‘‘ཏེན ཁོ པན སམཡེན བྷིཀྑཱུནཾ པརིཔུཎྞཾ ཧོཏི ཏིཙཱིཝརཾ, ཨཏྠོ ཙ ཧོཏི པརིསྶཱཝནེཧིཔི ཐཝིཀཱཧིཔཱི’’ཏི ཨེཏསྨིཾ ཝཏྠུསྨིཾ ‘‘ཨནུཛཱནཱམི, བྷིཀྑཝེ, པརིཀྑཱརཙོལ༹’’ནྟི (མཧཱཝ. ༣༥༨) ཨནུཉྙཱཏཏྟཱ. བྷིཀྑཱུནཉྩ ཨེཀམེཝ པརིསྶཱཝནཾ, ཐཝིཀཱ ཝཱ ཝཊྚཏི, ན དྭེ ཝཱ ཏཱིཎི ཝཱཏི པཊིཀྑེཔཱབྷཱཝཏོ ཝིཀཔྤནུཔགཔཙྪིམཔྤམཱཎཱནི, ཨཏིརེཀཔྤམཱཎཱནི ཝཱ པརིསྶཱཝནཱདཱིནི པརིཀྑཱརཱནི ཀཔྤནྟཱིཏི སིདྡྷཾ. ཡདི ཨེཝཾ ‘‘ཡཾནཱུནཱཧཾ བྷིཀྑཱུནཾ ཙཱིཝརེ སཱིམཾ བནྡྷེཡྻཾ མརིཡཱདཾ ཋཔེཡྻ’’ནྟི (མཧཱཝ. ༣༤༦) ཝཙནཝིརོདྷོཏི ཙེ? ན, ཨནུསནྡྷིཡཱ ཨཛཱནནཏོ, ཝིརོདྷཏོ ཙ. ཀིཾ ཝུཏྟཾ ཧོཏི? ཙཱིཝརཀྑནྡྷཀེ (མཧཱཝ. ༣༢༦ ཨཱདཡོ) པཋམཾ གཧཔཏིཙཱིཝརཾ ཨནུཉྙཱཏཾ, ཏཏོ པཱཝཱརཀོསིཡཀོཛཝཀམྦལཱདི. ཏཏོ ‘‘ཏེན ཁོ པན སམཡེན སངྒྷསྶ ཨུཙྩཱཝཙཱནི ཙཱིཝརཱནི ཨུཔྤནྣཱནི ཧོནྟི. ཨཐ ཁོ བྷིཀྑཱུནཾ ཨེཏདཧོསི ‘ཀིཾ ནུ ཁོ བྷགཝཏཱ ཙཱིཝརཾ ཨནུཉྙཱཏཾ, ཀིཾ ཨནནུཉྙཱཏ’’’ནྟི ཨེཏསྨིཾ ཝཏྠུསྨིཾ ‘‘ཨནུཛཱནཱམི, བྷིཀྑཝེ, ཚ ཙཱིཝརཱནི ཁོམ’’ནྟིཨཱདིནཱ (མཧཱཝ. ༣༣༩) ཀཔྤིཡཙཱིཝརཛཱཏི ཨནུཉྙཱཏཱ, ན པན སངྑྱཱཔམཱཎཾ. ཏཏོ ‘‘ཨདྡས བྷགཝཱ…པེ… སམྦཧུལེ བྷིཀྑཱུ ཙཱིཝརེཧི ཨུབྦྷཎྜིཏེ སཱིསེཔི ཙཱིཝརབྷིསིཾ ཀརིཏྭཱ ཁནྡྷེཔི ཙཱིཝརབྷིསིཾ ཀརིཏྭཱ ¶ ཀཊིཡཱཔི ཙཱིཝརབྷིསིཾ ཀརིཏྭཱ ཨཱགཙྪནྟེ, དིསྭཱན བྷགཝཏོ ཨེཏདཧོསི…པེ… ཡེཔི ཁོ ཏེ ཀུལཔུཏྟཱ ཨིམསྨིཾ དྷམྨཝིནཡེ སཱིཏཱལུཀཱ སཱིཏབྷཱིརུཀཱ, ཏེཔི སཀྐོནྟི ¶ ཏིཙཱིཝརེན ཡཱཔེཏུཾ, ཡཾནཱུནཱཧཾ བྷིཀྑཱུནཾ ཙཱིཝརེ སཱིམཾ བནྡྷེཡྻཾ མརིཡཱདཾ ཋཔེཡྻཾ ཏིཙཱིཝརཾ ཨནུཛཱནེཡྻ’’ནྟི (མཧཱཝ. ༣༤༦) ཙཱིཝརཾ ཨནུཉྙཱཏཾ, ཏཉྩ ཁོ ཨེཀམེཝ. ཚབྦགྒིཡཱ པན མིཙྪཱ གཧེཏྭཱ བཧཱུནི པརིཧརིཾསུ. ཏཱནི ནེསཾ ཨཏིརེཀཊྛཱནེ ཋིཏཱནི ཧོནྟི. ཏཏོ ‘‘ཨནུཛཱནཱམི, བྷིཀྑཝེ, དསཱཧཔརམཾ ཨཏིརེཀཙཱིཝརཾ དྷཱརེཏུ’’ནྟི (མཧཱཝ. ༣༤༧) ཨནུཉྙཱཏཾ, ཏེནེཏཾ པཉྙཱཡཏི. ཨཏིརེཀཱནི བཧཱུནི ཙཱིཝརཱནི ཏེ པརིཧརིཾསུ, ‘‘ཏཱནི དསཱཧཔརམམེཝ དྷཱརེཏུཾ ཨནུཛཱནཱམི, ན ཏམེཝེཀ’’ནྟི ཝདནྟེན ཡཱ པུབྦེ ཏིཙཱིཝརཱདྷིཊྛཱནསངྑཱཏཱ ཙཱིཝརེ སཱིམཱབདྡྷཱ, མརིཡཱདཱ ཙ ཋཔིཏཱ, ཏཱཡ སཏིཔི ཏིཙཱིཝརབཱཧུལླཔརིཧརཎཀྐམོ དསྶིཏོ དིཝསཔརིཙྪེདཝསེན. ཏཏོ པརཾ ‘‘ཨནུཛཱནཱམི, བྷིཀྑཝེ, ཨཏིརེཀཙཱིཝརཾ ཝིཀཔྤེཏུ’’ནྟི (མཧཱཝ. ༣༤༧) ཨནུཛཱནནྟེན ཝིནཱཔི དིཝསཔརིཙྪེདེན ཨཏིརེཀཙཱིཝརཔརིཧརཎཀྐམོ དསྶིཏོཏི དྭེཔི ཏཱནི ནིདྷཱནམུཁཱནཱིཏི སིདྡྷཾ. ཏཐཱ པརིཀྑཱརཙོལཱ༹དྷིཊྛཱནམྤི སིཡཱ, ཨཉྙཐཱ ཨིཏརཙཱིཝརཱདྷིཊྛཱནཱནུཛཱནནཝིརོདྷོ སིཡཱ སཱིམཱམརིཡཱདཊྛཔནཝིརོདྷཏོ. ཏིཙཱིཝརཱདྷིཊྛཱནཔཉྙཏྟིཡེཝ ཏིཙཱིཝརམརིཡཱདཱ ཧོཏི. ཏེན ཝུཏྟཾ ‘‘པཱཊེཀྐཾ ནིདྷཱནམུཁམེཏ’’ནྟི. ‘‘པཋམཾ ཏིཙཱིཝརཾ ཏིཙཱིཝརཱདྷིཊྛཱནེན ཨདྷིཊྛཱཏབྦཾ, པུན པརིཧརིཏུཾ ཨསཀྐོནྟེན པཙྩུདྡྷརིཏྭཱ པརིཀྑཱརཙོལ༹ཾ ཨདྷིཊྛཱཏབྦཾ, ན ཏྭེཝ ཨཱདིཏོཝ ཨིདཾ ཝུཏྟ’’ནྟི ཝུཏྟཾ. ‘‘ཡཐཱ ཏིཙཱིཝརཾ པརིཧརིཏུཾ ཨསཀྐོནྟསྶ གིལཱནསྶ ཝིཔྤཝཱསསམྨུཏི ཨནུཉྙཱཏཱ, ཨགིལཱནསྶཔི སཱསངྐསིཀྑཱཔདེ (པཱརཱ. ༦༥༢) ཏསྶ ཨནྟརགྷརེ ནིཀྑེཔོ ཙ, ཏཏོཔི སཏི པཙྩཡེ ཚཱརཏྟཝིཔྤཝཱསོ, ཏཏོཔི ཨསཀྐོནྟསྶ པཙྩུདྡྷཱརོ, པཙྩུདྡྷཊམྤི ཨནྟོདསཱཧེ ཨདྷིཊྛཱཏུཾ, ཨསཀྐོནྟསྶ ཝིཀཔྤནཱ ཙ ཨནུཉྙཱཏཱ. ཏཐེཝ དྭིནྣམྤི སམྨུཁཱཔརམྨུཁཱཝིཀཔྤནཱནཾ པརསནྟཀཏྟཱ ཝིཀཔྤནཔཙྩཡེ ཨསཏི ‘པརིཀྑཱརཙོལ༹’ནྟི ཨདྷིཊྛཧིཏྭཱ པརིབྷུཉྫིཏུཾ བྷགཝཏཱ ཨནུཉྙཱཏཾ སིཡཱ, ཡཏོ ཏདདྷིཔྤཱཡཉྙཱུ ཨེཝཾ ཝདནྟཱི’’ཏི མཧཱཔཙྩརིཡམྤི ཝུཏྟཾ. པུབྦེཏིཨཱདི ‘‘པཱཊེཀྐཾ ནིདྷཱནམུཁ’’ནྟི ཝུཏྟསྶ པཡོགདསྶནཏྠཾ ཝུཏྟཾ. ཨབདྡྷསཱིམཱཡཾ དུཔྤརིཧཱརནྟི ཝིཀཔྤནཱདིཨཏྠཱཡ ཨུཔཙཱརཾ ཨཏིཀྐམིཏྭཱཔི གམནསམྦྷཝཏོ.

ཝསྶིཀསཱཊིཀཱ ཨནཏིརིཏྟཔྤམཱཎཱཏི ཏསྶཱ ཨུཀྐཊྛཔརིཙྪེདསྶ ཝུཏྟཏྟཱ ཝུཏྟཾ. པཙྩཏྠརཎམྤི ཨདྷིཊྛཱཏབྦམེཝཱཏི ‘‘ཨིདཾ, བྷནྟེ, ཨམྷཱཀཾ སེནཱསནསྶ ཨུཔརི ཨཏྠརིཏབྦ’’ནྟིཨཱདིནཱ དིནྣཾ ནཱདྷིཊྛཱཏབྦཾ, ‘‘ཨིདཾ ཏུམྷཱཀ’’ནྟི ¶ དིནྣཾ སཡཾ ཨདྷིཔྤེཏཾཝ ཨདྷིཊྛཱཏབྦནྟི ཨདྷིཔྤཱཡོ. ‘‘སཀིཾ ཨདྷིཊྛིཏཾ ཨདྷིཊྛིཏམེཝ ཧོཏི, ན པུན པཙྩུདྡྷརཱིཡཏི ཀཱལཔརིཙྪེདཱབྷཱཝཏོ’’ཏི ལིཁིཏཾ. ‘‘ཨེཀཝཙནེནཔི ཝཊྚཏཱིཏི ཨཔརེ’’ཏི ཝུཏྟཾ. བྷེསཛྫནཝཀམྨམཱཏཱཔིཏུཨཱདཱིནཾ ¶ ཨཏྠཱཡཱཏི ཨེཏྠ ‘‘ཨིམིནཱ བྷེསཛྫཾ ཙེཏཱཔེསྶཱམི, ཨིདཾ མཱཏུཡཱ དསྶཱམཱི’’ཏི ཋཔེནྟེན ཨདྷིཊྛཱཏབྦཾ. ‘‘‘ཨིདཾ བྷེསཛྫསྶ, ཨིམཾ མཱཏུཡཱ’ཏི ཝིབྷཛནྟེན ཨདྷིཊྛཱནཀིཙྩཾ ནཏྠཱིཏི ཨཔརེ’’ཏི ཝུཏྟཾ. ‘‘སཀབྷཱཝཾ མོཙེཏྭཱ ཋཔནཾ སནྡྷཱཡཱཧཱ’’ཏི ལིཁིཏཾ.

‘‘པུན ཨདྷིཊྛཱཏབྦནྟི ཨཡཾ སངྒཱིཏིཏོ པཊྛཱཡ ཨཱགཏཨཊྛཀཐཱཝཱདོ. ཏཏོ པརཾ ཨཱཙརིཡཱནཾ ཏཏྠ ཏཏྠ ཡུཏྟིཝིཙཱརཎཱ’’ཏི ཝུཏྟཾ. པམཱཎཙཱིཝརསྶཱཏི པཙྪིམཔྤམཱཎསྶ. དྭེ ཙཱིཝརཱནཱིཏི སཧ ཨུཏྟརཱསངྒེན. ཨེས ནཡོཏི པམཱཎཡུཏྟེསུ ཡཏྠ ཀཏྠཙཱིཏིཨཱདིནཡོཝ. ‘‘ཏཾ ཨཏིཀྐཱམཡཏོ ཚེདནཀ’’ནྟི (པཱཙི. ༥༣༣) ཝཙནཏོ ཨུཏྟརི པཊིསིདྡྷཾ, ཏཏོ ཧེཊྛཱ ཨཔྤཊིསིདྡྷཏྟཱ ཝཊྚཏི. ཏཏྠ སིཡཱ – ཏིཙཱིཝརསྶ པཙྪིམཔྤམཱཎཾ ཝིསུཾ སུཏྟེ ནཏྠཱིཏི, ན ཝཏྟབྦཾ, སིཀྑཱཀརཎཱིཡེཧི སིདྡྷཏྟཱ. ཀིཾ ཝུཏྟཾ ཧོཏི? ‘‘‘པརིམཎྜལཾ ནིཝཱསེསྶཱམི, པཱརུཔིསྶཱམི, སུཔྤཊིཙྪནྣོ ཨནྟརགྷརེ གམིསྶཱམཱི’ཏི (པཱཙི. ༥༧༦-༥༧༩) ཝཙནཏོ ཡཏྟཀེན པམཱཎེན པརིམཎྜལཏཱ, སུཔྤཊིཙྪནྣཏཱ ཙ ཨཊྛཀཐཱཡཾ ཝུཏྟཀྐམེན སམྤཛྫཏཱི’’ཏི ཝཏྟབྦཾ. ཏེསཾ ཝསེན པཙྪིམཔྤམཱཎནྟི སིདྡྷཾ, ཏཉྩ ཁོ མུཊྛིཔཉྩཀཱདི ཡཐཱཝུཏྟམེཝ ཝུཙྩཏེ. ཏེནེཝཱཧ ལེསཾ ཋཔེཏྭཱ ‘‘ཝིསུཾ སུཏྟེ ནཏྠཱི’’ཏི.

ཨཔིཙེཏྠ ཨདྷིཔྤེཏཾ, ཏཐཱཔི ན སམེཏིཡེཝཱཏི ཨཏྠོ, ཏསྨཱ ‘‘ཡདཱི’’ཏིཨཱདིསམྦནྡྷོ ཨདྡྷཱ ཝུཏྟོ. ཡསྨཱ པརིཙྪིནྣོ སམེཏི ཙ. ཨིཏརེསུ པན ཨེཀཙྩསྨིཾ ཨཱཙརིཡཝཱདེ ནེཝ པརིཙྪེདོ ཨཏྠི. ཨེཀཙྩསྨིཾ ན པུབྦཱཔརཾ སམེཏཱིཏི སམྦནྡྷོ. ཨདྷིཊྛཱནཾ ཨདྷིཊྛཱནམེཝ, པརིབྷོགཀཱལེ པན ཨརཛིཏཾ ན ཝཊྚཏི. ཨིདཾ སབྦཾ ཏིཙཱིཝརེ ཨེཝ. ཨིམསྶ པན སིཀྑཱཔདསྶ ཨཡཾ སངྑེཔཝིནིཙྪཡོ – ཨནཏྠཏེ ཀཐིནེ ཧེམནྟཱནཾ པཋམདིཝསཏོ པཊྛཱཡ ཨཏྠཏེ ཀཐིནེ གིམྷཱནཾ པཋམདིཝསཏོ པཊྛཱཡ ཨུཔྤནྣཙཱིཝརཾ སནྡྷཱཡ ‘‘ནིཊྛིཏཙཱིཝརསྨི’’ནྟིཨཱདི ཝུཏྟནྟི.

ཨེཏྠཱཧ – ‘‘རཛཀེཧི དྷོཝཱཔེཏྭཱ སེཏཾ ཀཱརཱཔེནྟསྶཱཔི ཨདྷིཊྛཱནཾ ཨདྷིཊྛཱནམེཝཱ’’ཏི ཝཙནཏོ ཨརཛིཏེཔི ཨདྷིཊྛཱནཾ རུཧཏི, ཏེན སཱུཙིཀམྨཾ ¶ ཀཏྭཱ རཛིཏྭཱ ཀཔྤབིནྡུཾ དཏྭཱ ཨདྷིཊྛཱཏབྦནྟི ནིཡམོ ན ཀཱཏབྦོཏི? ཝུཙྩཏེ, ཀཱཏབྦོཝ པཏྟོ ཝིཡ ཨདྷིཊྛིཏོ. ཡཐཱ པུན སེཏབྷཱཝཾ, ཏམྦབྷཱཝཾ ཝཱ པཏྟོ ཨདྷིཊྛཱནཾ ན ཝིཛཧཏི, ན ཙ པན ཏཱདིསོ ཨདྷིཊྛཱནཾ ཨུཔགཙྪཏི, ཨེཝམེཏཾ དཊྛབྦནྟི. ‘‘ཡཏོ པཊྛཱཡ པརིབྷོགཱདཡོ ཝཊྚནྟི, ཏཏོ པཊྛཱཡ ཨནྟོདསཱཧེ ཨདྷིཊྛཱཏབྦ’’ནྟི ཝདནྟི.

ཨཝིསེསེན ¶ ཝུཏྟཝཙནནྟི ཨདྷིཊྛཱཏབྦཾ ཨདྷིཊྛེཏི, ཝིཀཔྤེཏབྦཾ ཝིཀཔྤེཏཱིཏི ཨེཝཾ སཝིསེསཾ ཀཏྭཱ ཨཝཙནཾ ‘‘ན ཝིཀཔྤེཏུ’’ནྟི (མཧཱཝ. ༣༥༨) ཨིམིནཱ ཝིརུདྡྷཾ ཝིཡ དིསྶཏི. ཨིདཱནི ཨིདཾ ཨདྷིཊྛཱནཝིཀཔྤནནཡཔཊིབདྡྷཾ ཁནྡྷཀཾ, པརིཝཱརཉྩ མིསྶེཏྭཱ པཀིཎྞཀཾ ཝུཙྩཏི – ཁནྡྷཀེ ཏཱཝ ‘‘ཨནུཛཱནཱམི, བྷིཀྑཝེ, ཏིཙཱིཝརཾ ཨདྷིཊྛཱཏུཾ ན ཝིཀཔྤེཏུཾ, ཝསྶིཀསཱཊིཀཾ ཝསྶཱནཾ ཙཱཏུམཱསཾ ཨདྷིཊྛཱཏུཾ, ཏཏོ པརཾ ཝིཀཔྤེཏུ’’ནྟིཨཱདི ཝུཏྟཾ. པརིཝཱརེ ‘‘ན ནཝ ཙཱིཝརཱནི ཨདྷིཊྛཱཏབྦཱནི, ན ནཝ ཙཱིཝརཱནི ཝིཀཔྤེཏབྦཱནཱི’’ཏི (པརི. ༣༢༩), ‘‘དསཀེ དས, ཨེཀཱདསཀེ ཨེཀཱདས ཙཱིཝརཱནི ཨདྷིཊྛཱཏབྦཱནི, ན ཝིཀཔྤེཏབྦཱནཱི’’ཏི (པརི. ༣༣༡) ཙ ཨནེཀཀྑཏྟུཾ ཝཙནེན སུཊྛུ དལ༹ྷཾ ཀཏྭཱ ‘‘སབྦཱནི ཙཱིཝརཱནི ཨདྷིཊྛཱཏབྦཱནི, ན ཝིཀཔྤེཏབྦཱནཱི’’ཏི ཝུཏྟཾ, ཏསྨཱ ཨུབྷོཔི ཏེ ཝིརུདྡྷཱ ཝིཡ དིསྶནྟི, ཁནྡྷཀེ ཨེཝ ཙ ‘‘ཝསྶིཀསཱཊིཀཾ ཝསྶཱནཾ ཙཱཏུམཱསཾ ཨདྷིཊྛཱཏུཾ ཏཏོ པརཾ ཝིཀཔྤེཏུ’’ནྟི (མཧཱཝ. ༣༥༨) ཝུཏྟཾ. ཏདཊྛཀཐཱཡཾ ‘‘ཝསྶིཀསཱཊིཀཱ ཨནཏིརིཏྟཔྤམཱཎཱ ནཱམཾ གཧེཏྭཱ ཝུཏྟནཡེནེཝ ཙཏྟཱརོ ཝསྶིཀེ མཱསེ ཨདྷིཊྛཱཏབྦཱ, ཏཏོ པརཾ པཙྩུདྡྷརིཏྭཱ ཝིཀཔྤེཏབྦཱ’’ཏི ཝུཏྟཾ. ཨིདཉྩ ཝིརུདྡྷཾ ཝིཡ དིསྶཏི ཨཉྙམཉྙཾ ཧེམནྟེ པཙྩུདྡྷཱརསམྦྷཝཏོ, ཝསྶཱནེ ཝིཀཔྤནཱསམྦྷཝཏོ ཙ. ཏཐཱ ཨིདྷ ‘‘ཨནཱཔཏྟི ཨནྟོདསཱཧཾ ཨདྷིཊྛེཏི ཝིཀཔྤེཏཱི’’ཏི ཝཙནཔྤམཱཎཏོ སབྦཏྠ ཝིཀཔྤནཱཡ ཨཔྤཊིསིདྡྷབྷཱཝོ ཝེདིཏབྦོཏི (པཱརཱ. ཨཊྛ. ༢.༤༦༩) ཨཊྛཀཐཱཝཙནཾ པརིཝཱརཝཙནེན ཝིརུདྡྷཾ ཝིཡ དིསྶཏི, ན ཧི ཝིརུདྡྷཾ ཏཐཱགཏཱ བྷཱསནྟི, ཏསྨཱ ཨཊྛཀཐཱནཡོཝེཏྠ པཊིསརཎཾ, ཡེན སབྦམྤི ཏཾ ཨེཀརསཾ ཧོཏི. པརིཝཱརཊྛཀཐཱཡཉྩ ཝུཏྟཾ ‘‘ན ཝིཀཔྤེཏབྦཱནཱིཏི ཨདྷིཊྛིཏཀཱལཏོ པཊྛཱཡ ན ཝིཀཔྤེཏབྦཱནཱི’’ཏི (པརི. ཨཊྛ. ༣༢༩). ཏིཙཱིཝརཱནི ཨདྷིཊྛིཏཀཱལཏོ པཊྛཱཡ, ཝསྶིཀསཱཊིཀཱདཱིནི ཙ ཨཏྟནོ ཨཏྟནོ ཨདྷིཊྛཱནཁེཏྟེ ན ཨཀཱམཱ ཝིཀཔྤེཏབྦཱནཱིཏི ཨཏྠོ, ཨཝསེསཔཱལི༹, ཨཏྠོ ཙ ཨིདྷ ཨཊྛཀཐཱཡཾ ཝུཏྟོ, ཏསྨཱ སབྦམྤེཏཾ ཨེཀརསནྟི.

ཨེཏྠཱཧ ¶ – ཡདི ཨེཝཾ ‘‘ནཝ ཙཱིཝརཱནི ནཱདྷིཊྛཱཏབྦཱནཱི’’ཏི ཙ ཝཏྟབྦཾ. ཝིཀཔྤིཏཀཱལཏོ པཊྛཱཡ ཧི ནཱདྷིཊྛཱཏབྦཱནཱིཏི? ཨེཏྠ ཝུཙྩཏེ – ‘‘ཏིཙཱིཝརཾ ཨདྷིཊྛཱཏུཾ ན ཝིཀཔྤེཏུཾ…པེ… པརིཀྑཱརཙོལ༹ཾ ཨདྷིཊྛཱཏུཾ ན ཝིཀཔྤེཏུ’’ནྟི ཨེཏྠ སབྦཏྠ ཨདྷིཊྛཱནེ པཊིསེདྷཱདསྶནཏོ, ཝིཀཔྤནཱཡ ཨདསྶནཏོ ཙ ‘‘ཏཏོ པར’’ནྟི དྭཱིསྭེཝ པརིཙྪེདདསྶནཏོ ཙ ‘‘ནཝ ཙཱིཝརཱནི ཨདྷིཊྛཱཏབྦཱནི, ན ཝིཀཔྤེཏབྦཱནི ཙེཝ ཝུཏྟནྟི ཝེདིཏབྦཾ. ཨཔརོ ནཡོ – ཨནུཛཱནཱམི, བྷིཀྑཝེ, ཏིཙཱིཝརཾ ཨདྷིཊྛཱཏུཾ ཨཀཱམཱ. ཀསྨཱ? ཀཱལེ ཨུཔྤནྣཾ ཨནདྷིཊྛཧནྟསྶ ཀཱལཱཏིཀྐམེ ཨཱཔཏྟིསམྦྷཝཏོ, ཨཀཱལེ ཨུཔྤནྣཾ ཨནདྷིཊྛཧནྟསྶ དསཱཧཱཏིཀྐམེ ཨཱཔཏྟིསམྦྷཝཏོ ཙ. ཏཏྠ ཡཾ ཀཱལེ ཨུཔྤནྣཾ ཨཔྤཧོནྟེཔི དསཱཧེ ཀཱལཱཏིཀྐམེ ཨཱཔཏྟིཀརཾ, ཏཾ ¶ ནིསྶཛྫནཀཱལེ ‘‘ཨིདཾ མེ, བྷནྟེ, ཨཏིརེཀཙཱིཝརཾ དྷཱརིཏཾ ནིསྶགྒིཡཾ, ཨིམཱཧཾ སངྒྷསྶཱ’’ཏིཨཱདིནཱ ནིསྶཛྫིཏབྦཾ, ཨིཏརཾ ཡཐཱཔཱལི༹མེཝ. ཏཏྠ པཋམནཡོ ‘‘ཡོ པན, བྷིཀྑུ, ཨཏིརེཀཙཱིཝརཾ དྷཱརེཡྻ ནིསྶགྒིཡ’’ནྟི ཨིམཱཡ པཋམཔཉྙཏྟིཡཱ ཝསེན ཝུཏྟོ, དུཏིཡོ ཨནུཔཉྙཏྟིཡཱ ཝསེན ཝུཏྟོ.

ཡཐཱ ཙ ནིསྶཛྫིཏབྦཝཏྠུམྷི ཨསཏི ཡཐཱཔཱལི༹ཾ ཨཝཏྭཱ ཀེཝལཾ ཨཱཔཏྟི ཨེཝ དེསེཏབྦཱ, ཡཐཱ ཙ ཝསྶིཀསཱཊིཀནིསྶཛྫནེ ཀེཝལཾ པརིཡིཊྛམཏྟེ ཡཐཱཔཱལི༹ཾ ཨཝཏྭཱ ཡཐཱསམྦྷཝཾ ནིསྶཛྫིཏབྦཾ, ཏཐཱ ཨིདམྤཱིཏི ཝེདིཏབྦཾ. ཡཐཱ སཾཝཙྪརཱཏིཀྐནྟཾ ཨཏིརེཀཙཱིཝརཾ ‘‘དསཱཧཱཏིཀྐནྟ’’མིཙྩེཝ ཝུཙྩཏི. སཾཝཙྪརཝིཔྤཝུཏྠཏིཙཱིཝརཾ, མཱསཱཏིཀྐནྟཉྩ ‘‘རཏྟིཝིཔྤཝུཏྠ’’ནྟི ཙ ‘‘ཚཱརཏྟཝིཔྤཝུཏྠ’’ནྟི ཙ ཝུཙྩཏི, ཏཐཱ ཨིདམྤི ‘‘དསཱཧཱཏིཀྐནྟ’’མིཙྩེཝ ཝུཙྩཏཱིཏི ཨེཀེ, ཏསྨཱ སིདྡྷམིདཾ ‘‘ཨནུཛཱནཱམི, བྷིཀྑཝེ, ཏིཙཱིཝརཾ ཨདྷིཊྛཱཏུཾ ཨཀཱམཱ’’ཏི, ཏཐཱ ཨཀཱམཱ ན ཝིཀཔྤེཏུནྟི ཨཏྠོ. ཨིཙྪཱཡ ཧི སཏི ‘‘པཙྩུདྡྷརིཏྭཱ ཝིཔྤཝཱསསུཁཏྠཾ ཝིཀཔྤནཱཡ ཨོཀཱསོ དིནྣོ ཧོཏི, དསཱཧཱཏིཀྐམེ ཙ ཨནཱཔཏྟཱི’’ཏི ཝཙནཏོ ཝིཀཔྤེཏུཾ ཨནུཛཱནཱམཱིཏི ཝུཏྟཾ ཧོཏི. ཏཐཱ ཝསྶིཀསཱཊིཀཱ ཨཀཱམཱ ཨདྷིཊྛཱཏུཾ དསཱཧཱཏིཀྐམེ ཨཱཔཏྟིསམྦྷཝཏོ. ཀིཏྟཀཾ ཀཱལནྟི ཙེ? ཝསྶཱནཾ ཙཱཏུམཱསཾ, ཨིཙྪཱཡ པན སཏི ཨུདྡྷཾཡེཝ ཝིཀཔྤེཏབྦཾ. ‘‘སབྦཏྠ ཝིཀཔྤནཱཡ ཨཔྤཊིསིདྡྷབྷཱཝོ ཝེདིཏབྦོ’’ཏི ཧི ཝུཏྟཾ. ‘‘ཨཏྠཱཔཏྟི ཧེམནྟེ ཨཱཔཛྫཏི, ནོ གིམྷེ, ནོ ཝསྶེ’’ཏི (པརི. ༣༢༣) ཙ ཝུཏྟཾ, ཏེན ཝུཏྟཾ ཨཊྛཀཐཱཡཾ ‘‘ཏཏོ པརཾ པཙྩུདྡྷརིཏྭཱ ཝིཀཔྤེཏབྦཱ’’ཏི.

ཏཏྲཱཡཾ ¶ ཝིཙཱརཎཱ – ཀདཱ པཙྩུདྡྷརིཏབྦཱ, ཀདཱ ཝིཀཔྤེཏབྦཱ, ཀིཉྩེཏྠ ཡསྨཱ ‘‘ཏཏོ པར’’ནྟི ཝུཏྟཾ. ཧེམནྟཉྩ པཏྟམཏྟེ སཱ ཨདྷིཊྛཱནཾ ཝིཛཧཏི, ཏསྨཱ ‘‘པཙྩུདྡྷརིཏྭཱ’’ཏི ན ཝཏྟབྦཾ ཨདྷིཊྛཱནསྶ ནཏྠིཏཱཡ, ཨཐ ‘‘ཨནྟོཙཱཏུམཱསེ ཝིཀཔྤེཏབྦཱ’’ཏི ན ཝཏྟབྦཾ. ‘‘ཏཏོ པརཾ ཝིཀཔྤེཏུ’’ནྟི ཧི ཝུཏྟནྟི? ཨེཏྠ ཨེཀཙྩེ ཝདནྟི ‘‘ཝཏྟབྦམེཏ’’ནྟི. ཡཐཱ པརིཝུཏྠཔརིཝཱསོ, ཙིཎྞམཱནཏྟོ ཙ སནྟོ ནིཊྛིཏེསུཔི པརིཝཱསམཱནཏྟདིཝསེསུ, ཏཐཱ ནིཊྛིཏེསུཔི ཨདྷིཊྛཱནདིཝསེསུ སཱདྷིཊྛཱནམེཏནྟི ཨེཀེ. ཨཊྛཀཐཱཙརིཡཱནཾ ཨིདཾ སནྣིཊྛཱནཾ ‘‘ཀཏྟིཀཔུཎྞམདིཝསེ པཙྩུདྡྷརིཏྭཱ པཱཊིཔདདིཝསེ ཝིཀཔྤེཏབྦཱ’’ཏི. ཝུཏྟཉྷེཏཾ པརིཝཱརཊྛཀཐཱཡཾ ‘‘ཀཏྟིཀཔུཎྞམཱསིཡཱ པཙྪིམེ པཱཊིཔདདིཝསེ ཝིཀཔྤེཏྭཱ ཋཔིཏཾ ཝསྶིཀསཱཊིཀཾ ནིཝཱསེནྟོ ཧེམནྟེ ཨཱཔཛྫཏི. ཀུརུནྡིཡཾ པན ‘ཀཏྟིཀཔུཎྞམདིཝསེ ཨཔཙྩུདྡྷརིཏྭཱ ཧེམནྟེ ཨཱཔཛྫཏཱི’ཏི ཝུཏྟཾ, ཏམྤི སུཝུཏྟཾ. ‘ཙཱཏུམཱསཾ ཨདྷིཊྛཱཏུཾ, ཏཏོ པརཾ ཝིཀཔྤེཏུ’ནྟི ཧི ཝུཏྟ’’ནྟི (པརི. ཨཊྛ. ༣༢༣). ཏཏྠ ཀུརུནྡིནཡོ པཙྪཱ ཝུཏྟཏྟཱ སཱརཏོ དཊྛབྦོ ¶ , ན པུརིམོ. ནིཝཱསེནྟོ ཧི གིམྷེཔི ཨོརེནདྡྷམཱསཾ ཨཱཔཛྫཏི ཨེཝ. ཨིདྷ ཙ ‘‘ཨཏྠཱཔཏྟི ཧེམནྟེ ཨཱཔཛྫཏི, ནོ གིམྷེཏི ཝུཏྟ’’ནྟི ཀུརུནྡིཝཙནསྶཱཡམཏྠོ དིསྶཏི.

‘‘ཀཏྟིཀཔུཎྞམདིཝསེ ཨཔཙྩུདྡྷརིཏྭཱ ཏསྨིཾཡེཝ དིཝསེ ཨཝིཀཔྤེནྟོ པཙྪིམཔཱཊིཔདདིཝསེ ཨཔཙྩུདྡྷཱརཔཙྩཡཱ དུཀྐཊཾ ཨཱཔཛྫཏི, ན, ཨཝིཀཔྤནཔཙྩཡཱ དསཱཧཔརིཧཱརསམྦྷཝཏོ’’ཏི ཀཱརཎམེཀེ ཝདནྟི. ཨེཝཾ སཏི ཧེམནྟེ པཏྟམཏྟེ ཨདྷིཊྛཱནཾ ཝིཛཧཏཱིཏི ཨཱཔཛྫཏི, ཏཉྩ ཨཡུཏྟཾ. ཨདྷིཊྛཱནཉྷི ‘‘ཨཉྙསྶ དཱནེན…པེ… ཚིདྡབྷཱཝེནཱཏི ཨིམེཧི ནཝཧི ཀཱརཎེཧི ཝིཛཧཏཱི’’ཏི (པཱརཱ. ཨཊྛ. ༢.༤༦༩) ཝུཏྟཾ, ན ‘‘ཨདྷིཊྛཱནཁེཏྟཱཏིཀྐམེན ཝཱ’’ཏི. ཨསཱདྷཱརཎཏྟཱ ན ཝུཏྟནྟི ཙེ? ན, ‘‘ཚིདྡབྷཱཝེནཱ’’ཏི ན ཝཏྟབྦཔྤསངྒཏོ, ཚིདྡབྷཱཝེན པན ཏིཙཱིཝརསྶེཝ སབྦཊྛཀཐཱསུ ཨདྷིཊྛཱནཝིཛཧནསྶ ཝུཏྟཏྟཱ. ཏསྨཱ ཧེམནྟསྶ པཋམདིཝསེ ཨཔཙྩུདྡྷཱརཔཙྩཡཱ དུཀྐཊཾ ཨཱཔཛྫཏི, ན པཙྩུདྡྷརིཏྭཱ ཨཝིཀཔྤནཔཙྩཡཱ. ‘‘ཝིཀཔྤེཏུ’’ནྟི ཝཙནཏོ ཏཏོ ཨདྷིཊྛཱནཾ ན ཝིཛཧཏཱིཏི པཉྙཱཡཏི. ན ཧི ཀཏྟིཀཔུཎྞམཱསིཡཱ པཙྪིམེ པཱཊིཔདདིཝསེ ཨཝིཀཔྤེཏྭཱ ཧེམནྟེ ཨཱཔཛྫཏཱིཏི ཝུཏྟནྟི ཨདྷིཔྤཱཡོ, ཡསྨཱ ཏཾ ཨཔཙྩུདྡྷཱརཔཙྩཡཱ དུཀྐཊཾ ཧེམནྟསྶ པཋམཨརུཎཀྑཎེ ཨེཝ ཨཱཔཛྫཏི, ཏསྨཱ ‘‘ཀཏྟིཀཔུཎྞམདིཝསེ ཨཔཙྩུདྡྷརིཏྭཱ’’ཏི ཝུཏྟཾ. པཙྩུདྡྷཊཾ པན ཧེམནྟེ དསཱཧཔརིཧཱརཾ ¶ ལབྷཏི. ‘‘དསཱཧེ ཨཔྤཧོནྟེ ཙཱིཝརཀཱལཾ ནཱཏིཀྐཱམེཏབྦཱ’’ཏི (པཱརཱ. ཨཊྛ. ༢.༦༣༠) ཧི ཝུཏྟཾ, ཏཉྩ ཁོ སམཡེ ཨུཔྤནྣཾ ཙེ, ནཱསམཡེ. ཏཐཱ ཙ སཱདྷིཏཾ ཨཔཙྩུདྡྷཊཾ ན ནིསྶགྒིཡཾ ཧོཏི, ནོ ཙ ཏཾ པརིདཧིཏཾ, ཏསྨཱ ཀཏྟིཀཔུཎྞམདིཝསེ ཨེཝ པཙྩུདྡྷརཎཉྩ ཝིཀཔྤནཉྩ ཀཏྟབྦནྟི སིདྡྷཾ, ཨེཏྠ ཙ ཡཐཱ ཨཏིརེཀཙཱིཝརཾ དསམེ དིཝསེ ཝིཀཔྤེནྟེན དསཱཧཔརམཾ དྷཱརིཏཾ ཧོཏི, ཨནྟོདསཱཧེ ཙ ཝིཀཔྤིཏཾ ཧོཏི, ཏཐཱ ཀཏྟིཀཔུཎྞམཱཡ ཝིཀཔྤེནྟེན ཝསྶཱནཾ ཙཱཏུམཱསཾ ཨདྷིཊྛིཏཉྩ ཧོཏི, ཏཏོ པརཾ ཨནཱཔཏྟིཁེཏྟེ ཨེཝ ཝིཀཔྤནཱ ཙ ཧོཏཱིཏི ཝེདིཏབྦཾ. ཨེཏྟཱཝཏཱ ཨཏྠི ཝིཀཔྤནཱཁེཏྟེ ཨདྷིཊྛཱནཾ, ཨདྷིཊྛཱནཁེཏྟེ ཙ ཝིཀཔྤནཱཏི དཱིཔིཏཾ ཧོཏི. ཨཉྙཐཱ ‘‘ཨཏྠཱཔཏྟི ཨདྷིཊྛཱནེན ཨཱཔཛྫཏི, ཨནདྷིཊྛཱནེན ཨཱཔཛྫཏི. ཨཏྠཱཔཏྟི ཝིཀཔྤནཱཡ ཨཱཔཛྫཏི, ཨཝིཀཔྤནཱཡ ཨཱཔཛྫཏཱི’’ཏི དུཀེསུ དྭེ དུཀཱནི ཝཏྟབྦཱནི སིཡུཾ. ཏཏྠ པཋམདུཀེ པཋམཔདཾ སམྦྷཝཏི. ཝིཀཔྤནཁེཏྟེ ཧི ཝསྶིཀསཱཊིཀཱདཱིནཾ ཨདྷིཊྛཱནེན ཝིནཡཱཏིསཱརདུཀྐཊཾ ཨཱཔཛྫཏི. ཨེཏེནེཝ དུཏིཡདུཀྐཊསྶ དུཏིཡཔདཾ ཝུཏྟཾ ཧོཏི. ཨནདྷིཊྛཱནེན ཨཱཔཛྫཏཱིཏི ནཏྠི. ཨནྟོདསཱཧེ ཨནཱཔཛྫནཏོ, ཝིཀཔྤནཱདིསམྦྷཝཏོ ཙ ཝིཀཔྤནཱཡ ཨཱཔཛྫཏཱིཏི ནཏྠི སབྦཏྠ ཝིཀཔྤནཱཡ ཨཔྤཊིསིདྡྷཏྟཱ, ཏསྨཱ ཏཱནི དུཀཱནི ‘‘ན ལབྦྷནྟཱི’’ཏི ན ཝུཏྟཱནི. ཨེཏྠཱཧ – ཡཱ སཱ ‘‘ཨཏྠཱཔཏྟི ཧེམནྟེ ཨཱཔཛྫཏཱི’’ཏི (པརི. ༣༢༣) ཝཙནཔྤམཱཎཏོ དུཀྐཊཱཔཏྟི སཱདྷིཏཱ, སཱ ¶ སཉྩིཙྩ ཨཔཙྩུདྡྷརནྟསྶ ཡུཛྫཏི, ཨསཏིཡཱ ཙེ, ཀཉྩི, ཨནཱཔཏྟི. ཀཏྟིཀཔུཎྞམཱཡ པཙྩུདྡྷཊཾ སཉྩིཙྩ ཨཝིཀཔྤཡཏོ དུཀྐཊེན སཧ པུནདིཝསེ ནིསྶགྒིཡཾ, ཨསཏིཡཱ ཨཝིཀཔྤཡཏོ ནིསྶགྒིཡམེཝ ཨིདྷ པཋམཔཉྙཏྟིཡཱ. ཡཾ པན ཝུཏྟཾ མཱཏིཀཱཊྛཀཐཱཡཾ (ཀངྑཱ. ཨཊྛ. ཀཐིནསིཀྑཱཔདཝཎྞནཱ) ‘‘ཝསྶིཀསཱཊིཀཱ ཝསྶཱནམཱསཱཏིཀྐམེནཱཔི, ཀཎྜུཔཊིཙྪཱདི ཨཱབཱདྷཝཱུཔསམེནཱཔི ཨདྷིཊྛཱནཾ ཝིཛཧཏི, ཏསྨཱ སཱ ཏཏོ པརཾ ཝིཀཔྤེཏབྦཱ’’ཏི, ཏེནེཏཾ ཝིརུཛ྄ཛྷཏི, ན ཀེཝལཾ ཨིདམེཝ, ‘‘ཏཏོ པརཾ པཙྩུདྡྷརིཏྭཱ ཝིཀཔྤེཏབྦཱ’’ཏི ཨཊྛཀཐཱཝཙནཉྩ ཝིརུཛ྄ཛྷཏི. ཏཏོ པརཾ ནཱམ ཧི ཧེམནྟཾ, ཏཏྠ ཙེ པཙྩུདྡྷཱརོ, ‘‘ཝསྶིཀསཱཊིཀཱ ཝསྶཱནམཱསཱཏིཀྐམེནཱཔཱི’’ཏིཨཱདི ན ཡུཏྟཾ ཨདྷིཊྛཱནཱབྷཱཝེན པཙྩུདྡྷཱརཱབྷཱཝཏོ. ཨཝིརོདྷོ ཙ ཨིཙྪིཏབྦོ, ཏསྨཱ ‘‘པཙྩུདྡྷརཎཾ ཝཏྟམཏྟ’’ནྟིཝཱདོ ཨེཏྠཱཔི སམྦྷཝཏཱིཏི ཙེ? ན, ཀུརུནྡི ཝཙནཝིརོདྷཏོ. ཏཏྠ ཧི ཀཏྟིཀཔུཎྞམཱཡ པཙྩུདྡྷཱརོ ཝུཏྟོ, ཏསྨཱ ¶ ཝསྶཱནདིཝསཏྟཱ སཱདྷིཊྛཱནཱཝསཱ པཙྩུདྡྷརཱིཡཏཱིཏི ན པཙྩུདྡྷཱརོ ཝཏྟམཏྟཾ, ཏསྨཱ ‘‘ཏཏོ པར’’ནྟི ཡཱཝ པུཎྞམཱ ཨདྷིཔྤེཏཱ སིཡཱ. ཡཐཱ ཙཱཡཾ ཝིཀཔྤོ, ཏཐཱ ‘‘ཝསྶཱནམཱསཱཏིཀྐམེནཱཔི ཨཱབཱདྷཝཱུཔསམེནཱཔཱི’’ཏི ཨིདམྤི ཨཝསྶཾ པཙྩུདྡྷརིཏབྦཏཱཡ ཝུཏྟཾ སིཡཱ. ཨེཝཉྩ སཏི ཨིདྷ སམནྟཔཱསཱདིཀཱཡ ཏདཝཙནེན སམེཏི. ཨཉྙཐཱ ཨིདྷཔི ཏཾ ཝཏྟབྦཾ སིཡཱཏི ཡཐཱཝུཏྟོཝ ཝིདྷི ཨེཏྠ སམྦྷཝཏི, ཀིཉྩཱཔི སམྦྷཝཏི, དུཝིཉྙཱཔཡསྶ པན ལོཀསྶ སུཝིཉྙཱཔནཏྠཾ ཝུཏྟཱ. ཡསྨཱ པན སཱ ཝསྶཱནཱཏིཀྐམེན ཨདྷིཊྛཱནཾ ཝིཛཧཏི, ཧེམནྟཔཋམཱརུཎེ ཙ ཨཔཙྩུདྡྷཱརཔཙྩཡཱ དུཀྐཊཱ སཱདྷིཏཱ, ཏསྨཱ ཀཏྟིཀཔུཎྞམཱཡམེཝ པཙྩུདྡྷརིཏྭཱ ཝིཀཔྤེཏབྦཱ, ཨཝིཀཔྤིཏཱཡ ‘‘ནིསྶགྒིཡཱཔཛྫནམེཝཱ’’ཏི ཝཏྟབྦཾ. ཨེཏྟཱཝཏཱཔི སནྟོསཾ ཨཀཏྭཱ ཝིནིཙྪཡོ པརིཡེསིཏབྦོ. ཧོཏི ཙེཏྠ –

‘‘ཨེཝཾ ཨབྷཱཝཾ ཝིནཡསྶ པཱལི༹,

བྷིནྣཾ ཨབྷིནྣཉྩ ཏདཏྠཡུཏྟིཾ;

ཝིཉྙཱཏུཀཱམེན ཏདཏྠཝིཉྙཱུ,

པརིཡེསིཏབྦཱ ཝིནཡེ ཝིཉྙཱཡཱ’’ཏི.

‘‘ཏུཡ྄ཧཾ གཎྷཱཧཱི’’ཏི ཝུཏྟེ ཝིནཱཔི ‘‘མཡ྄ཧཾ གཎྷཱམཱི’’ཏི ཝཙནེན སུདིནྣཾ ཧོཏི. ཨིཏརོ ཙེ ཨདྷིཝཱསེཏི, ཏེནཱཔི སུགྒཧིཏཾ ཧོཏི, ནོ ཙེ ཨདྷིཝཱསེཏི, དེནྟེན སུདིནྣཾ. ཏཾ པན ཝཏྠུ ན ཀསྶཙི ཧོཏི. ཏཐཱ ‘‘མཡ྄ཧཾ གཎྷཱམཱི’’ཏི ཝདཏི, སཱམིཀོ ཙེ ཨདྷིཝཱསེཏི, ཝིནཱཔི ‘‘གཎྷཱཧཱི’’ཏི ཝཙནེན སུགྒཧིཏཾ. ནོ ཙེ ཨདྷིཝཱསེཏི, སཱམིཀསྶེཝ ཏཾ, ན ཧི ཏསྶེཏཾ ཝིནཡཀམྨནྟི ཨེཏྠ ཝིནཡཀམྨསྶཏྠཱཡ ཙེ གཎྷཱཏི, ན ཝཊྚཏི. ན ཀེཝལཾ ཨཏྟནོ ཨཏྠཱཡ གཧིཏཾ ¶ , པུན ཏསྶཔི དེཏི, ཝཊྚཏཱིཏི ཙ. ཏཐཱ ཨནཔེཀྑོ ཧུཏྭཱ པརསྶ ཝིསྶཛྫེཏྭཱ པུན ཏེན དིནྣཾ ཝཱ ཏསྶ ཝིསྶཱསནྟོ ཝཱ པརིབྷུཉྫཏི, ཝཊྚཏི. ཏཏྠཱཔི ཝིནཡཀམྨཝསེན ན ཝཊྚཏཱིཏི ཨེཀེ. ཏེ ཨེཝ ‘‘མཧནྟཾ ཝཱ ཁུདྡཀཾ ཀརོཏཱི’’ཏི ཨེཏྠ ‘‘ཏིཙཱིཝརེ དཱིགྷཏོ ཝིདཏྠི ཨནཏིཀྐམིཏྭཱ ཚིནྡིཏྭཱ ཀརོཏི, ཨེཝཾ སེསེསུཔཱི’’ཏི ཝདནྟི. ཨེཝརཱུཔེསུ ཋཱནེསུ པོརཱཎཱཙརིཡཱནཾ ཀཐཱམགྒཾ སུཊྛུ ཨཱཙརིཡཀུལསེཝནཱཡ སཉྫཱནིཏྭཱ ཏེན སཾསནྡིཏྭཱ སཏོ སམྤཛཱནོ ཧུཏྭཱ སོཏཱུནཉྩ ཙིཏྟཾ ཨཝིམོཧེཏྭཱ ཀཐེཏབྦཾ. ཨེསཱ ཨམྷཱཀཾ ཨཱཡཱཙནཱ.

པཋམཀཐིནསིཀྑཱཔདཝཎྞནཱ ནིཊྛིཏཱ.

༢. ཨུདོསིཏསིཀྑཱཔདཝཎྞནཱ

༤༧༡. སནྟརུཏྟརེན ¶ ཛནཔདཙཱརིཀཾ པཀྐམནྟི. ཀསྨཱ? ཀིཉྩཱཔི ‘‘ན, བྷིཀྑཝེ, སནྟརུཏྟརེན གཱམོ པཝིསིཏབྦོ, ཡོ པཝིསེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༣༦༢) པཋམཾ ཝུཏྟཾ. པཙྪཱ པན ‘‘པཉྩིམེ, བྷིཀྑཝེ, པཙྩཡཱ སངྒྷཱཊིཡཱ ནིཀྑེཔཱཡ, ཨུཏྟརཱསངྒསྶ, ཨནྟརཝཱསཀསྶ ནིཀྑེཔཱཡ གིལཱནོ ཝཱ ཧོཏི, ཝསྶིཀསངྐེཏཾ ཝཱ, ནདཱིཔཱརཾ གནྟུཾ ཝཱ, ཨགྒལ༹གུཏྟིཝིཧཱརོ ཝཱ, ཨཏྠཏཀཐིནཾ ཝཱ ཧོཏཱི’’ཏི ཝུཏྟཏྟཱ, ཨཊྛཀཐཱཡམྤིསྶ ‘‘པཉྩསུ པེཏེསུ ཨགྒལ༹གུཏྟི ཨེཝ པམཱཎཾ. གུཏྟེ ཨེཝ ཧི ཝིཧཱརེ ནིཀྑིཔིཏྭཱ བཧི གནྟུཾ ཝཊྚཏི, ནཱགུཏྟེ’’ཏི ཝུཏྟཏྟཱ ཨཔཉྙཏྟེཔི ཀཐིནེ ‘‘ཏེ བྷིཀྑཱུ ཨགྒལ༹གུཏྟིཝིཧཱརེ ཋཔེཐཱ’’ཏི ཝཏྭཱ སབྷཱགཱནཾ ཧཏྠེ ཙཱིཝརཾ ནིཀྑིཔིཏྭཱ སནྟརུཏྟརེན གཱམཔྤཝེསེ ལདྡྷཀཔྤིཡཱ ཛནཔདཙཱརིཀཾ པཀྐཱམིཾསཱུཏི ཝེདིཏབྦཾ.

༤༧༣. ཨཝིཔྤཝཱསསམྨུཏིནྟི ཨཝིཔྤཝཱསཏྠཾ, ཝིཔྤཝཱསཔཙྩཡཱ ཡཱ ཨཱཔཏྟི, ཏདབྷཱཝཏྠཾ ཝཱ སམྨུཏིཾ དཱཏུནྟི ཨཏྠོ. ཏཏོ པཊྛཱཡ ཝཊྚཏི. ཀིཏྟཀཾ ཀཱལཾ ཝཊྚཏཱིཏི? མཱསཾ ཝཱ ཨཏིརེཀཾ ཝཱ ཡཱཝ གམནེ སཨུསྶཱཧོ, ཏཱཝ ཝཊྚཏི. ཏེན ཝུཏྟཾ ‘‘དྷུརནིཀྑེཔཾ ཀརོནྟེན པཙྩུདྡྷརིཏབྦ’’ནྟི. པུན སམྨུཏིདཱནཀིཙྩཾ ནཏྠཱིཏི སཙེ དྭཱདསནྣཾ ཝསྶཱནཾ ཨཙྩཡེན ཨཉྙོ རོགོ ཧོཏི, ཝཊྚཏི, ཨུཔསམྤདཀམྨཾ ཝིཡ ཡཱཝཛཱིཝཾ ཨེཀཱསམྨུཏི ཝཊྚཏཱིཏི ཙ.

‘‘ཀཏཾ ཝཱ ཧོཏཱི’’ཏིཨཱདི ཨིམསྨིཾ སིཀྑཱཔདེ ན ཝཏྟབྦཾ, ཀསྨཱ? ཀརཎཔལིབོདྷེ ཨུཔཙྪིནྣེཔི ཨནདྷིཊྛིཏཙཱིཝརཏོ ཝིཔྤཝཱསཔཙྩཡཱ ཨཱཔཏྟིཡཱ ཨསམྦྷཝཏོ, ཏསྨཱ ‘‘ནིཊྛིཏཙཱིཝརསྨིནྟི བྷིཀྑུནོ ཙཱིཝརཾ ཨདྷིཊྛིཏཾ ཧོཏཱི’’ཏི ཨེཏྟཀམེཝ ཝཏྟབྦནྟི ཙེ? ན, ཏདཱཡཏྟཏྟཱ ¶ . ཨདྷིཊྛཱནཉྷི ཀརཎཔལིབོདྷསྶ ནིཊྛཱཔནཱཡཏྟཾ, ཏསྨཱ ‘‘ཀཏཾ ཝཱཏིཨཱདི ཝུཏྟ’’ནྟི ཙ ཝུཏྟཾ. ཏཏྠ ཀཏནྟི པུབྦེ ཝུཏྟམེཝ.

༤༧༧-༨. ཨཝིཔྤཝཱསལཀྑཎཝཝཏྠཱཔནཏྠནྟི ཨེཏྠ ‘‘ཨནྟོགཱམེ ཙཱིཝརཾ ནིཀྑིཔིཏྭཱ ཨནྟོགཱམེ ཝཏྠབྦ’’ནྟིཨཱདིཝཙནཏོ ཨཝིཔྤཝཱསལཀྑཎཾ ཝཝཏྠཱཔིཏཾ, ཏབྦིཔརཱིཏནཡེན ཝིཔྤཝཱསལཀྑཎཾ ཝེདིཏབྦཾ. གཱམོ ཨེཀཱུཔཙཱརོཏིཨཱདིམྷི པན ཋཔེཏྭཱ སཏྠཾ, རུཀྑམཱུལཾ, ཨཛ྄ཛྷོཀཱསཉྩ སེསེསུ པརིཀྑེཔཱཔརིཀྑེཔཝསེན ཨེཀཱུཔཙཱརནཱནཱུཔཙཱརཏཱ ཝེདིཏབྦཱ. ཡསྨཱ པན ¶ སཏྠཾ དུཝིདྷཾ ནིཝིཊྛཾ, ཨནིཝིཊྛཉྩ, ཏེསུ ཨནིཝིཊྛཾ ཨེཀཀུལསྶ ཝཱ ནཱནཱཀུལསྶ ཝཱ ཨཔརིཀྑིཏྟམེཝ ཧོཏི, ནིཝིཊྛཾ སིཡཱ པརིཀྑིཏྟཾ, སིཡཱ ཨཔརིཀྑིཏྟཾ, ཏསྨཱ ཏཏྠ པརིཀྑེཔཱདིཝསེན ཨདསྶེཏྭཱ ཨབྦྷནྟརཝསེན ཝུཏྟོ. ཏཐཱ ཨབྦྷོཀཱསེ. རུཀྑམཱུལེ ཚཱཡཱཝསེན. ཨཉྙཐཱ ‘‘སཏྠོ ཨེཀཱུཔཙཱརོ ནཱནཱུཔཙཱརོ’’ཏིཨཱདི ཨུདྡེསཝིརོདྷོ སིཡཱ ཝིབྷངྒེ ཨདསྶིཏཏྟཱ, ཏསྨཱ སཏྠསྶ པུརཏོ ཙ པཙྪཏོ ཙ སཏྟབྦྷནྟརཱ, པསྶཏོ ཙ ཨེཀབྦྷནྟརནྟི ཨཡམེཀཱུཔཙཱརོ, ཏཏོ པརཾ ནཱནཱུཔཙཱརོ. ཏཐཱ རུཀྑམཱུལསྶ ཡཏྠ མཛ྄ཛྷནྷིཀེ ཀཱལེ ཚཱཡཱ ཕརཏི, ཨཡཾ ཨེཀཱུཔཙཱརོ. ཨིཏརོ ནཱནཱུཔཙཱརོ. ཀསྨཱ? ཏཏྠ ཧི པརིཀྑེཔོ ཨཔྤམཱཎཾ. ཚཱཡཱཝ པམཱཎཾ. ཨཛ྄ཛྷོཀཱསསྶ པཱལི༹ཡཾ ཝུཏྟོཝ. ‘‘སཏྠཱདཱིནཾ ཨེཀཀུལསནྟཀཝསེན ཨེཀཱུཔཙཱརཏཱ’’ཏི ལིཁིཏཾ, ཏསྨཱ ནིཝེསནེ, ཨུདོསིཏེ ཙ ཝུཏྟཔརིཙྪེདོཝ ཨཊྚཱདཱིསཱུཏི ཀཏྭཱ སཾཁིཏྟཾ. ཏཏོ པརཾ ཁེཏྟདྷཉྙཀརཎཨཱརཱམཝིཧཱརེསུ པན པརིཀྑིཏྟཱཔརིཀྑིཏྟ-པདཾ པུན ཨུདྡྷཊཾ སཏྠཝིབྷངྒེན ཨདྷིཀཱརསྶ པཙྪིནྣཏྟཱ. ‘‘ནཱནཱགབྦྷཱ’’ཏིཨཱདིཝཙནཾ པན ཨསམྦྷཝཏོ ཁེཏྟདྷཉྙཀརཎཨཱརཱམེསུ ན ཨུདྡྷཊཾ. ཝིཧཱརེ སམྦྷཝནྟམྤི ཏཏྠ པཙྪིནྣཏྟཱ ན ཨུདྡྷཊཾ. ཀུལཾ ཝུཙྩཏི སཱམིཀོ, ཏསྨཱ ‘‘ཨེཀཀུལསྶ ནཱནཱཀུལསྶཱ’’ཏི ཨིམིནཱ གཱམཱདཱིནཾ ཙུདྡསནྣཾ ཙཱིཝརནིཀྑེཔཊྛཱནཱནཾ སཱདྷཱརཎཱསཱདྷཱརཎབྷཱཝཾ དཱིཔེཏི. ཨཛ྄ཛྷོཀཱསསྶ པན ཨསམྦྷཝཏོ ན ཝུཏྟཾ. ཡསྨཱ པནེཏྠ ཨེཀཀུལསྶ, ནཱནཱཀུལསྶ ཙ ཨཔརིཀྑིཏྟེསུ གཱམཱདཱིསུ པརིཧཱརཝིསེསོ ཀིཉྩཱཔི ནཏྠི, པརིཀྑིཏྟེསུ པན ཨཏྠི, ཏསྨཱ ཨེཀནཱནཱཀུལགྒཧཎཾ, ཨེཀནཱནཱུཔཙཱརགྒཧཎཉྩ སཱཏྠཀནྟི ཝེདིཏབྦཾ. ཏཏྠཔི ཨཡཾ ཝིསེསོ – སཏྠེ, རུཀྑམཱུལེ ཙ ཀུལབྷེདཏོཝ བྷེདོ, ནོཔཙཱརབྷེདཏོ. ཨཛ྄ཛྷོཀཱསེ ཨུཔཙཱརབྷེདཏོ ཙ, སོ པན པཱལི༹ཡཾ ན དསྶིཏོཏི. ‘‘ཏཾ པམཱཎཾ ཨཏིཀྐམིཏྭཱཏི ཝཙནཏོ ཨཱཀཱསེཔི ཨཌྜྷཏེཡྻརཏནཔྤམཱཎེ དོསོ ནཏྠཱི’’ཏི ཝདནྟི.

༤༧༩. ‘‘སབྷཱ’’ཏི ཨིཏྠིལིངྒཾ. ‘‘སབྷཱཡ’’ནྟི ནཔུཾསཀལིངྒཾ, ཏེན ཝུཏྟཾ ‘‘ལིངྒབྱཏྟནཡེནཱ’’ཏི. ནཔུཾསཀལིངྒདསྶནཏྠཾ ཀིར ‘‘སབྷཱཡ’’ནྟི པཙྩཏྟཝསེན ནིདྡིཊྛཾ, ཏསྶ ཨནུཔཡོགཏྟཱ ¶ ‘‘དྭཱརམཱུལ’’ནྟིཔི. ཨཏྟནོ ནིཀྑིཏྟཊྛཱནེ ཨནིཀྑིཏྟཏྟཱ ཝཱིཐིཧཏྠཔཱསོ ན རཀྑཏི, ཡསྨིཾ གྷརེ ཙཱིཝརཾ ནིཀྑིཏྟཾ ཧོཏི, ཏསྨིཾ གྷརེ ཝཏྠབྦཾ. ‘‘སབྷཱཡེ ཝཱ ཝཏྠབྦཾ དྭཱརམཱུལེ ཝཱ, ཧཏྠཔཱསཱ ¶ ཝཱ ན ཝིཛཧིཏབྦ’’ནྟི ཧི ཝུཏྟཾ. ‘‘ཧཏྠཔཱསེཡེཝ ཨརུཎཾ ཨུཊྛཔེཏབྦ’’ནྟི ནིཡམིཏཏྟཱ ཛཱནིཏུཾ ན སཀྐཱཏི ཙེ? ཨནྟོགྷརེ ན སཀྐཱ, ཏཐཱ ཏཐཱ ཝུཏྟཏྟཱ, ཏསྨཱ ‘‘ཡུཏྟི པམཱཎ’’ནྟི ཝུཏྟཾ. ཨཡམཏྠོ ཨཊྛཀཐཱཡམྤི པཀཱསིཏོ, པུནཔི ཁུདྡཀགཱམེ སབྦསཱདྷཱརཎགཱམདྭཱརཝསེན. སཙེ ཏསྶ དྭཱརདྭཡཾ ཧོཏི, མཛ྄ཛྷེ ཙ གྷརསབྷཱཡཾ, ཡཏྠིཙྪཏི, ཏཏྠ ཝསིཏབྦ’’ནྟི.

༤༨༠-༡. ཡཱནི ནིཝེསནཱདཱིནི གཱམསངྑྱཾ ན གཙྪནྟི, ཏཱནི ནིཝེསནཱདཱིནཱིཏི ཨདྷིཔྤེཏཱནི. ཨཛ྄ཛྷོཀཱསེ ཨཔརིསངྐིཏམྤི ཙཱིཝརཾ ཨཏིརེཀསཏྟབྦྷནྟརེ ནིཀྑིཏྟཾ ནིསྶགྒིཡཾ ཧོཏི, ཨེཏྠ ཨནྟོསཱིམཏཱ ན རཀྑཏི, སཏྠེ པན རཀྑཏི. ‘‘ནདཱིཔརིཧཱརོ ཙ ལབྦྷཏཱི’’ཏི ཝཙནཏོ ཨུདཀུཀྑེཔསཱིམཱཡཾ པརིཧཱརོ ལབྦྷཏཱིཏི སིདྡྷཾ. སཱམནྟཝིཧཱརོ ཙེ ཨེཀསཱིམོ, ཙཱིཝརཾ ན ནིསྶགྒིཡཾ.

ཨིདཱནི –

‘‘ཚིནྣཾ དྷུཏངྒཾ སཱསངྐ-སམྨཏོ སནྟརུཏྟརཾ;

ཨཙཱིཝརསྶཱནཱཔཏྟི, པཙྩུདྡྷཱརཱདིསིདྡྷིཏོ’’ཏི. –

ཨིདཾ པཀིཎྞཀཾ, ཏཏྠཱཡཾ ཙོདནཱཔུབྦངྒམོ ཝིནིཙྪཡོ – ཀེཙི ‘‘དིགུཎཾ སངྒྷཱཊི’’ནྟི (མཧཱཝ. ༣༤༨) ཝཙནཏོ ‘‘ཨེཀཙྩིཀཱ སངྒྷཱཊིཔི ནཱདྷིཊྛཱཏབྦཱ. སཙེ ཨདྷིཊྛཱཏི ན རུཧཏཱི’’ཏི ཝཏྭཱ ཨུཔསམྤདཱཔེཀྑཱནམྤི དིགུཎམེཝ སངྒྷཱཊིཾ དཏྭཱ ཨུཔསམྤཱདེནྟི, ཏེ ཨིམིནཱ སུཏྟལེསེན སཉྙཱཔེཏབྦཱ. བྷགཝཏཱ ཧི ‘‘ཚིནྣཀཾ སངྒྷཱཊིཾ ཚིནྣཀཾ ཨུཏྟརཱསངྒཾ ཚིནྣཀཾ ཨནྟརཝཱསཀ’’ནྟི པཋམཾ ཨནུཉྙཱཏཾ. ཏཏོ ‘‘ཨཉྙཏརསྶ བྷིཀྑུནོ ཏིཙཱིཝརེ ཀརིཡམཱནེ སབྦཾ ཚིནྣཀཾ ནཔྤཧོཏི. དྭེ ཚིནྣཀཱནི ཨེཀཾ ཨཙྪིནྣཀཾ ནཔྤཧོཏི. དྭེ ཨཙྪིནྣཀཱནི ཨེཀཾ ཚིནྣཀཾ ནཔྤཧོཏཱི’’ཏི ཨིམསྨིཾ ཝཏྠུསྨིཾ ‘‘ཨནུཛཱནཱམི, བྷིཀྑཝེ, ཨནྭཱདྷིཀམྤི ཨཱརོཔེཏུ’’ནྟི (མཧཱཝ. ༣༦༠) ཨནུཉྙཱཏཾ, ཏསྨཱ ཨེཀཙྩིཀཱཔི སངྒྷཱཊི ཝཊྚཏཱིཏི སིདྡྷཾ. ཡཱ ཚིཛྫམཱནཱ ནཔྤཧོཏི, ཏསྶཱ ཀུཏོ དིགུཎཏཱཏི. ཨཊྛཀཐཱཡམྤིསྶ ཝུཏྟཾ ‘‘ཨནྭཱདྷིཀམྤི ཨཱརོཔེཏུནྟི ཨཱགནྟུཀཔཏྟམྤི དཱཏུཾ. ཨིདཾ པན ཨཔྤཧོནཀེ ཨཱརོཔེཏབྦཾ. སཙེ པཧོཏི, ཨཱགནྟུཀཔཏྟཾ ན ཝཊྚཏི, ཚིནྡིཏབྦམེཝཱ’’ཏི (མཧཱཝ. ཨཊྛ. ༣༦༠). ཀཐིནཾ པན ཚིནྣཀམེཝ ཝཊྚཏི ཨཱཝེཎིཀལཀྑཎཏྟཱ ¶ , ‘‘ཚིནྣཀཾ དིགུཎཾ ནཔྤཧོཏཱི’’ཏི ཝཙནཱབྷཱཝཏོ ཙཱཏི སནྣིཊྛཱནམེཏྠ གནྟབྦཾ.

དྷུཏངྒནྟི ¶ ཨནུཔསམྤནྣཱནཾ ཏེཙཱིཝརིཀདྷུཏངྒཱབྷཱཝཏོ ཏིཙཱིཝརེནེཝ ཏེཙཱིཝརིཀོཏི. ཏེསཾ ཨདྷིཊྛཱནཱབྷཱཝཏོ ‘‘ཨདྷིཊྛིཏེནེཝཱ’’ཏི ཝཏྟབྦཾ ཧོཏཱུཏི ཙེ? ན, དྷུཏངྒབྷེདེན ཝིརོདྷཔྤསངྒཏོ. ཙཏུཏྠཙཱིཝརསཱདིཡནེན ཧི དྷུཏངྒབྷེདོ, ན ཏིཙཱིཝརཝིཔྤཝཱསེན, ནཱཔི ཨཏིརེཀཙཱིཝརསཱདིཡནེན, ནཱཔི ཨཏིརེཀཙཱིཝརདྷཱརཎེན. ཡསྨཱ པན བྷིཀྑཱུནཾཡེཝ བྷགཝཏཱ ཨདྷིཊྛཱནཝསེན ནཝ ཙཱིཝརཱནི ཨནུཉྙཱཏཱནི, ཛཱཏིཝསེན ཙ ཝུཏྟཱནི, ན ཨེཝཾ ཨནུཔསམྤནྣཱནཾ. ཏསྨཱ ཏེསཾ ཙཱིཝརནིཡམཱབྷཱཝཱ ན ཏཾ དྷུཏངྒཾ ཨནུཉྙཱཏཾ གཧཊྛཱནཾ ཝིཡ, ཏསྨཱ ཏསྶ སམཱདཱནཝིདྷཱནེ ཨཝཙནཏོ ཙ སནྣིཊྛཱནམེཏྠ གནྟབྦཾ.

སཱསངྐསམྨཏོཏི ཀངྑཱཝིཏརཎིཡཾ སཱསངྐསིཀྑཱཔདེ ཝིསུཾ ཨངྒཱནི ན ཝུཏྟཱནི, ‘‘སེསམེཏྠ ཙཱིཝརཝགྒསྶ དུཏིཡསིཀྑཱཔདེ ཝུཏྟནཡེན ཝེདིཏབྦ’’ནྟི (ཀངྑཱ. ཨཊྛ. སཱསངྐསིཀྑཱཔདཝཎྞནཱ) ཝུཏྟཾ, ན ཙ པནེཏཾ ཝུཏྟཾ. ཏཏྠ རཏྟིཝིཔྤཝཱསོ ཙཏུཏྠཾ ཨངྒཾ, ཨིདྷ ཚཱརཏྟཝིཔྤཝཱསོ, ཨཡམེཏྠ ཝིསེསོཏི, ཏསྨཱ ཨངྒསཱམཉྙཏོ, སམྨུཏིསཱམཉྙཏོ ཙ སཱསངྐསིཀྑཱཔདམེཝ ཝདནྟི. ཨིདཾ ནིཔྤདེསཾ, ཏཾ སཔྤདེསཾ མཱསཔརམཏྟཱ. ཏཏྠ བཧིགཱམེཔི གཱམསཱིམཾ ཨོཀྐམིཏྭཱ ཝསིཏྭཱ པཀྐམནྟསྶ ཨནཱཔཏྟི, ཨིདྷ ན ཏཐཱ, ཨིདྷ ཨནནྟརེ ཨནནྟརེ ཨརུཎུགྒམནེ ནིསྶགྒིཡཾ, ཏཏྠ སཏྟམེཏི ཨཡཾ ཨིམེསཾ དྭིནྣཾ ཝིསེསོ. ཨངྒཱནི པན ཙཱིཝརནིཀྑེཔངྒསམྤཏྟིཏོ ཝིཔརིཡཱཡེན, ཨིདྷ ཝུཏྟནཡེན ཙ སིདྡྷཏྟཱ ན ཝུཏྟཱནི. ཏཱནི ཀཱམཾ ན ཝུཏྟཱནི, ཏཐཱཔི ཙཏུཏྠམངྒཾ ཝིསེསིཏབྦཾ, ན པན ཝིསེསིཏཾ. ཀིཾཀཱརཎཱ? ཨིདྷ ཝུཏྟནིསྶཛྫནཀྐམེན ནིསྶཛྫེཏྭཱ ཨཱཔཏྟིདེསནཏོ, ཏཏྠཱཔནྣཱཔཏྟིཝིམོཀྑདཱིཔནཏྠཾ. སཾཝཙྪརཝིཔྤཝུཏྠམྤི རཏྟིཝིཔྤཝུཏྠམེཝ, པགེཝ ཚཱརཏྟཾ ཝིཔྤཝུཏྠཾ. ཨེཝཾ སནྟེཔི ཏཏྠ ཡཐཱཝུཏྟཨངྒསམྤཏྟིཡཱ སཏི ཏཏྠ ཝུཏྟནཡེནེཝ ནིསྶཛྫིཏབྦཾ. ཧེམནྟེ ཝཱ གིམྷེ ཝཱ ནིསྶཛྫཏི ཙེ? ཨིདྷ ཝུཏྟནཡེནཱཔི ནིསྶཛྫིཏུཾ ཝཊྚཏཱིཏི ཉཱཔནཏྠཾ ཙཏུཏྠཾ ཨངྒཾ ན ཝིསེསིཏནྟི ནོ ཏཀྐོཏི ཨཱཙརིཡོ. མཱསཱཏིཀྐནྟམྤི ཙཱིཝརཾ ‘‘དསཱཧཱཏིཀྐནྟ’’ནྟི ཝཏྭཱ ནིསྶཊྛམེཝ. དྭཡེན ཨཱུནམཱསཾ ཧུཏྭཱ ‘‘དསཱཧཱཏིཀྐནྟ’’ནྟི ཝཏྭཱ མཱསཱཏིཀྐནྟནྟི ཨེཀེ. ཏཐཱཔི སཙེ པཙྩཱསཱཙཱིཝརཾ ཧོཏི, ནིསྶགྒིཡཾ ‘‘དསཱཧཱཏིཀྐནྟ’’ནྟི ཝཏྭཱ, མཱུལཙཱིཝརཾ པན ‘‘མཱསཱཏིཀྐནྟ’’ནྟི ཝཏྭཱ ནིསྶཛྫིཏབྦཾ.

‘‘སནྟརུཏྟར’’ནྟི ¶ ཝཱ ‘‘སངྒྷཱཊི’’ནྟི ཝཱ ‘‘ཙཱིཝར’’ནྟི ཝཱ ཀིཾ ཏིཙཱིཝརཾ, ཨུདཱཧུ ཨཉྙམྤཱིཏི ¶ . ཀིཉྩེཏྠ – ཡདི ཏིཙཱིཝརམེཝ པཊིསིདྡྷཾ, པརིཡཱཔནྣཝསེན ཨཙྪིནྣཙཱིཝརཙྪིནྡནདྷོཝཱཔནཝིཉྙཏྟིཨཱདིཝིརོདྷོ. ཨཐ ཨཉྙམྤི, ‘‘ནིཊྛིཏཙཱིཝརསྨི’’ནྟི ཨེཝམཱདིནཱ ཝིརོདྷོཏི? ཝུཙྩཏེ – ན ནིཡམཏོ ཝེདིཏབྦཾ ཡཐཱསམྦྷཝཾ གཧེཏབྦཏོ. ཏཐཱ ཧི ‘‘ཙཱིཝརཾ ནིཀྑིཔིཏྭཱ སནྟརུཏྟརེན ཛནཔདཙཱརིཀཾ པཀྐམནྟཱི’’ཏི (པཱརཱ. ༤༧༡) ཨེཝམཱདཱིསུ ཏིཙཱིཝརམེཝ. ‘‘ན, བྷིཀྑཝེ, སནྟརུཏྟརེན གཱམོ པཝིསིཏབྦོ, སནྟརུཏྟརཔརམཾ ཏཏོ ཙཱིཝརཾ སཱདྷིཏབྦ’’ནྟི ཨེཝམཱདཱིསུ ཡཾཀིཉྩི, ཏཐཱ སགུཎཾ ཀཏྭཱ སངྒྷཱཊིཡོ དཱཏབྦཱ, ནིཝཱསནཾ དཱཏབྦཾ, སངྒྷཱཊི དཱཏབྦཱ, ཧནྡ ཏེ, ཨཱཝུསོ, སངྒྷཱཊི, དེཧི མེ པཊནྟིཨཱདཱིསུ. ཝུཏྟཉྷེཏཾ ‘‘སབྦཉྷི ཙཱིཝརཾ སངྒྷཊིཏཊྛེན ‘སངྒྷཱཊཱི’ཏི ཝུཙྩཏཱི’’ཏི. ཏཐཱ ‘‘ནིཊྛིཏཙཱིཝརསྨི’’ནྟི ཨེཏྠཱཔཱིཏི ཨེཀེ. ཨནྟོསམཡེ ཧི ཡཱཝདཏྠཾ ཙཱིཝརཾ ཨནུཉྙཱཏཾ, ཏཾ སབྦཾ ཀརིཡམཱནཾ ཀདཱ ནིཊྛཱནཾ གཙྪིསྶཏི, ཏསྨཱ ཏིཙཱིཝརམེཝཱཏི ཨེཀེ. ཨཙཱིཝརསྶཱནཱཔཏྟི པཙྩུདྡྷཱརཱདིསིདྡྷིཏོཏི ཀིཾ ཝུཏྟཾ ཧོཏི? ཨུདོསིཏསིཀྑཱཔདསྶ ནིཔྤཡོཛནབྷཱཝཔྤསངྒཏོ ཏིཙཱིཝརཝིཔྤཝཱསེ ཏེཙཱིཝརསྶ ཨཱཔཏྟཱིཏི ཨེཀེ. ཏཏྠེཏཾ ཝུཙྩཏི ན ཧོཏི ཨཱཔཏྟི པཙྩུདྡྷཱརཱདིསིདྡྷིཏོ. ‘‘ཨནཱཔཏྟི ཨནྟོཨརུཎེ པཙྩུདྡྷརཏི, ཝིསྶཛྫེཏཱི’’ཏི ཧི ཝུཏྟཾ. ཨཉྙཐཱ པཙྩུདྡྷརནྟསྶ, ཨནྟོཨརུཎེ ཝིསྶཛྫེནྟསྶ ཙ ཡཱཝ ཨཉྙོ ནཱདྷིཊྛཱཏི, ཏཱཝ ཨཱཔཏྟིཾ ཨཱཔཛྫཏི ཡཐཱཝུཏྟནཡེན. ཨཉྙཐཱ སཏྟབྦྷནྟརེན ཝིཔྤཝཱསསྶཱཏི ཝིཔྤཝཱསཏོ ཡཐཱརུཏཾཡེཝ སཏི ཝིཔྤཝཱསེ ཝིཔྤཝཱསཏོ ཨཝིཔྤཝཱསེ སཏི ཨཝིཔྤཝཱསཏོཏི.

ཨུདོསིཏསིཀྑཱཔདཝཎྞནཱ ནིཊྛིཏཱ.

༣. ཏཏིཡཀཐིནསིཀྑཱཔདཝཎྞནཱ

༤༩༧. ནཔྤཧོཏཱིཏི ལཱམཀཔརིཙྪེདཾ ན པཱཔུཎཱཏི, ཏེནེཝ ཏིཙཱིཝརསྶ མུཊྛིཔཉྩཀཱདིལཱམཀཔརིཙྪེདོཝ ཏཱཝ ཝུཏྟོ. ཙཱིཝརེ པཙྩཱསཱ ཙཱིཝརཔཙྩཱསཱ. ཏེནེཏཾ དཱིཔེཏི – ཏཾ ཙཱིཝརཾ པཙྪཱ ལབྦྷཏུ ཝཱ མཱ ཝཱ, ཡཱཝ སཱ པཙྩཱསཱ ཚིཛྫཏི, ཏཱཝ ཨིདཾ མཱུལཙཱིཝརཾ ཋཔེཏུཾ ཨནུཛཱནཱམཱིཏི. ‘‘ཙཱིཝརཔཙྩཱསཱ’’ཏི མརིཡཱདཏྠེ ནིསྶཀྐཝཙནཾ, བྷུམྨཏྠེ ཝཱ པཙྩཏྟཝཙནཾ ཀཏཾ.

༤༩༩-༥༠༠. ནིཊྛིཏཙཱིཝརསྨིཾ ¶ …པེ… ཙཱིཝརཱསཱ ཝཱ ཨུཔཙྪིནྣཱཏིཨཱདིམྷི ཏཱིསུ ཙཱིཝརེསུ ཨཉྙཏརཾ ཀཏཾ ཧོཏི, སེསཱ ཨཏྠི, རཀྑཏི. ཙཱིཝརཔལིབོདྷསྶ ཨུཔཙྪེདེ, ཨུབྦྷཏསྨིཉྩ ཀཐིནེ སམཡེ ཝཱ ཧེམནྟསྶ སམཡེ ཝཱ ཨཀཱལཙཱིཝརཾ ཨུཔྤཛྫེཡྻ, ཁིཔྤམེཝ ཀཱརེཏབྦཾ ¶ . སཏི པཱརིཔཱུརིཡཱ པཙྩཱསཱ ན རཀྑཏི, ཨསཏི ནཏྠི ཙེ པཙྩཱསཱ, ན རཀྑཏི. ‘‘ཨནཏྠཏེ ཀཐིནེ ཨེཀཱདསམཱསེ ཨུཔྤནྣ’’ནྟི ཝཙནཏོ ཨཔརཀཏྟིཀཱ ཨཏྠཏེ ཝཱ ཨནཏྠཏེ ཝཱ སམཡོཝ. ཧེམནྟོ སིཡཱ སམཡོ ཨཏྠཏེ, སིཡཱ ཨསམཡོ ཨནཏྠཏེ. ཏཏོ པརཾ ཨེཀཾསཏོ ཨསམཡོ ཝཱཏི. ‘‘ཨཱདིསྶ དིནྣ’’ནྟི ཨིདཾ ཨིདྷ ཨལབྦྷམཱནམྤི ཨཏྠུདྡྷཱརཝསེན ཝུཏྟཾ བྷིཀྑུནཱིནཾ དུཏིཡནིསྶགྒིཡེ (པཱཙི. ༧༣༨ ཨཱདཡོ) སེསཾ ཨཀཱལཙཱིཝརཾ ཝིཡ. ཏཏྠ ཧི བྷིཀྑུནིསངྒྷསྶ ‘‘སམྤཏྟཱ བྷཱཛེནྟཱུ’’ཏི ཨེཝཾ ཨཱདིསྶ དིནྣམེཝ ‘‘ཨཀཱལཙཱིཝརཾ ཀཱལཙཱིཝར’’ནྟི ཨདྷིཊྛཧིཏྭཱ བྷཱཛེནྟིཡཱ ནིསྶགྒིཡཾ. ཏཐཱ ཧི ཏཏྠ ཡཐཱ ‘‘ཨཀཱལཙཱིཝརཾ ནཱམ ཨནཏྠཏེ ཀཐིནེ ཨེཀཱདསམཱསེ ཨུཔྤནྣཾ, ཨཏྠཏེ ཀཐིནེ སཏྟམཱསེ ཨུཔྤནྣ’’ནྟི ཨིདཾ ཨཏྠུདྡྷཱརཝསེན ཝུཏྟཾ, ཨེཝཾསམྤདམིདཾ. ཡདི ཨེཝཾ ‘‘ཨེཀཔུགྒལསྶ ཨིདཾ ཏུཡ྄ཧཾ དམྷཱིཏི དིནྣ’’ནྟི ཨིདཾ ཀིམཏྠཾ ཝུཏྟཾ, ན ཧི ཏཾ བྷཱཛནཱིཡནྟི ཙེ? ཨབྷཱཛནཱིཡསཱམཉྙཏོ ཝུཏྟཾ ཧོཏི. ཡཐཱ སངྒྷསྶ ཨཱདིསྶ དིནྣཾ ཨཏྠཏཀཐིནེཧི ཨེཝ བྷིཀྑཱུཧི ཨབྷཱཛནཱིཡཏྟཱ ཨཀཱལཙཱིཝརཾ ནཱམ ཛཱཏཾ, ཨེཝཾ པུགྒལིཀམྤི ཨིཏརེཧཱིཏི ཨཏྠོ. ཨེཝཾ སནྟེཔི ཀསྶཙི སིཡཱ ‘‘ཨཱདིསྶ དིནྣམྤི དསཱཧམེཝ པརིཧཱརཾ ལབྷཏཱི’’ཏི. ཏསྶེཏཾ པཱཊིཀངྑཾ. པཋམཀཐིནེ ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ’’ཏི ཨིདཉྷི ནིརཏྠཀནྟི. ཨནུབྦྷཏསྨིམྤི ཧི ཀཐིནེ དསཱཧཔརམམེཝ དྷཱརེཏབྦནྟི ཝིཉྙཱཏཏྟཱ ཨནཱདིསྶ དིནྣམེཝ སནྡྷཱཡེཏཾ ཝུཏྟཾ སིཡཱཏི ཙེ? ཨེཝཾ སནྟེཔི ཨནཱདིསྶ དིནྣམྤི ཨནཏྠཏཀཐིནཱནཾ ཨཔརཀཏྟིཀཱཡ དསཱཧམེཝ པརིཧཱརཾ ལབྷཏི ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ’’ཏི ཝུཏྟཏྟཱ. ཨཱམནྟཱཏི ཙེ? ‘‘ཨནཏྠཏེ ཀཐིནེ ཨེཀཱདསམཱསེ ཨུཔྤནྣ’’ནྟི ཝཙནེན ཝིརུཛ྄ཛྷཏི, ཏསྨཱ ཡཐཱཝུཏྟནཡེནེཝེཏྠ སནྣིཊྛཱནཾ གནྟབྦཾ.

ཨནུགཎྛིཔདེ ཝུཏྟཾ ‘‘པཋམསིཀྑཱཔདེ སབྦཙཱིཝརཱནཾ ཡཱཝདཏྠཙཱིཝརཝསེན ཀཐིནམཱསབྦྷནྟརེ དསཱཧཱཏིཀྐམེཔི ཨནཱཔཏྟི པརིཧཱརསྶ དིནྣཏྟཱ. ཡཐཱ ¶ ཀཐིནམཱསབྦྷནྟརེ ཨཱདིསྶ དིནྣམཀཱལཙཱིཝརཾ ཀཱལཙཱིཝརཔརིཧཱརམེཝ ལབྷཏི, ཏཐཱ ཨིཏརམཱསེཔི ལབྷཏཱིཏི ཝེདིཏབྦཾ. ཏསྨཱ ཨེཝཾ ‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ བྷིཀྑུནོ པནེཝ ཙཱིཝརཾ ཨུཔྤཛྫེཡྻཱ’ཏིཨཱདིནཱ སིཀྑཱཔདེ སིདྡྷེཔི ཨནཏྠཏཀཐིནཱནཾ པཙྪིམཀཏྟིཀམཱསཾ ཨནུཛཱནནྟེན ‘ཨཀཱལཙཱིཝརཾ ཨུཔྤཛྫེཡྻཱ’ཏི ཝུཏྟཾ. ཨེཝཉྷི ཨཝུཏྟེ ཨཀཱལཙཱིཝརཾ ནཱམ ‘ཨནཏྠཏེ ཀཐིནེ ཨེཀཱདསམཱསེ ཨུཔྤནྣ’ནྟི ན སཀྐཱ ཝཏྟུཾ. ཨེཝཉྷི ཝཙནཏོ ཨནཏྠཏཀཐིནཱནཾ ཨཏྠཏཀཐིནཱནཾ ཝིཡ སབྦཙཱིཝརཱནཾ པཙྪིམཀཏྟིཀམཱསེ དསཱཧཱཏིཀྐམེ ནིསྶགྒིཡཾ ན ཧོཏཱི’’ཏིཨཱདི.

བྷིཡྻོཔི ཨེཝཾ ཝུཏྟཾ – ཡཾ པན མཡཱ ‘‘པཋམཀཐིནེ དསཱཧཔརམཾ ཨཏིརེཀཙཱིཝརཾ དྷཱརེཏབྦ’’ནྟི ¶ ཨནུཉྙཱཏཾ, ཏམྤི ཀཐིནམཱསཏོ བཧི ཨུཔྤནྣམེཝ, ན ཨནྟོཏི ཨཡམཏྠོ དཱིཔིཏོ ཧོཏི. ཀཐཾ? ཨཏིརེཀཙཱིཝརསྶ དསཱཧཔརིཧཱརཏོ ཨུདྡྷཾ ཨཱཔཛྫིཏབྦཱཔཏྟིཾ ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ’’ཏི ཨནུཔཉྙཏྟིཡཱ ཀཐིནབྦྷནྟརེ ཝཱརེཏྭཱ ཏཏོ ཨུདྡྷཾ ཨུཔྤནྣེསུ དསཱཧཱཏིཀྐམེ ཨཱཔཛྫིཏབྦཱཔཏྟིཾ ཨིམིནཱ སིཀྑཱཔདེན ཝཱརེཏུཾ ‘‘ཨཀཱལཙཱིཝརཾ ཨུཔྤཛྫེཡྻཱ’’ཏིཨཱདི ཝུཏྟཾ. ཏེན ‘‘ཀཱལེཔི ཨཱདིསྶ དིནྣཾ, ཨེཏཾ ཨཀཱལཙཱིཝརཾ ནཱམཱ’’ཏི ཝཙནཏོ ཀཐིནུབྦྷཱརཏོ ཨུདྡྷཾ དསཱཧཔརིཧཱརཾ ན ལབྷཏཱིཏི དཱིཔིཏཾ ཧོཏི, ཏེཧི སདྡྷིཾ པུན ཀཐིནུབྦྷཱརཏོ ཨུདྡྷཾ པཉྩ དིཝསཱནི ལབྷཏཱིཏི པསངྒོཔི ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ བྷིཀྑུནོ པནེཝ ཨཀཱལཙཱིཝརཾ ཨུཔྤཛྫེཡྻ…པེ… ཁིཔྤམེཝ ཀཱརེཏབྦ’’ནྟི ཨཀཱལཙཱིཝརསྶ ཨུཔྤཏྟིཀཱལཾ ནིཡམེཏྭཱ ཝུཏྟཏྟཱ ནིཝཱརིཏོ ཧོཏི, ཏདུབྷཡེན ཀཐིནབྦྷནྟརེ ཨུཔྤནྣཙཱིཝརཾ ཀཐིནུབྦྷཱརཏོ ཨུདྡྷཾ ཨེཀདིཝསམྤི པརིཧཱརཾ ན ལབྷཏཱིཏི སིདྡྷཾ ཧོཏི. ཨེཝཾ ཨཔརེ ཝདནྟཱིཏི.

པུནཔི ཝུཏྟཾ – ཨཱཙརིཡཱ པན ཨེཝཾ ཝདེཡྻུཾ ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ བྷིཀྑུནོ པནེཝ ཨཀཱལཙཱིཝརཾ ཨུཔྤཛྫེཡྻཱ’’ཏི ཨེཏྠ ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ’’ཏི ཝདནྟོ ཨེཝཾ ཝིཉྙཱཔེཏི ‘‘ཨེཏྠནྟརེ ཏིཎྞནྣམྤི ཨཀཱལཙཱིཝརཱནཾ ཨུཔྤཏྟི ཨབྷཱཝ’’ནྟི. ཀསྨཱ པན པདབྷཱཛནེ ཝིཏྠཱརིཏཱནཱིཏི? ཝུཙྩཏེ – ཨིདཾ སིཀྑཱཔདཾ ཨདྷིཊྛཱནཾ སནྡྷཱཡ ཝུཏྟཾ, ཀིནྟུ པཋམེ དསཱཧཾ ཨནུཛཱནིཏྭཱ ཏསྨིཾ ཨཔྤཧོནྟེ སཙེ པཙྩཱསཱ ཨཏྠི, ཏམེཝ ཝཌྜྷེཏྭཱ མཱསཾ ཨནུཛཱནནྟོ ཨིམམྤི ཨཏྠཝིསེསཾ དཱིཔེཏི ཨཀཱལཙཱིཝརཾ ནཱམ ¶ སམྨུཁཱིབྷཱུཏེན བྷཱཛེཏབྦནྟིཔི དཱིཔེཏི. ཏཾ པན ‘‘ཨཱཀངྑམཱནེན བྷིཀྑུནཱ པཊིགྒཧེཏབྦ’’ནྟི ཨིམིནཱ སིཀྑཱཔདེན ཝཌྜྷེཏྭཱ ཝུཏྟནྟི, ཏསྨཱ ཏཱིཎིཔི པདབྷཱཛནེ ཝིཏྠཱརིཏཱནཱིཏི.

‘‘ཁིཔྤམེཝ ཀཱརེཏབྦནྟི དསཱཧཱ ཀཱརེཏབྦ’’ནྟི ཨིདཾ པན པཧོནཀབྷཱཝེ པུརིམསིཀྑཱཔདལཀྑཎེནཱཏི དཱིཔེཏུཾ ཝུཏྟཾ, ཏསྨཱ ‘‘ཨེཝཾ སཱིགྷནྟི ཝཱ ལཧུནྟི ཝཱ’’ཏིཨཱདིནཱ ཨཝཏྭཱ ‘‘དསཱཧཱ’’ཏི ཝུཏྟཾ. ཨཏྠཏཀཐིནསྶ ཨེཝཾ ཧོཏུ, ཨནཏྠཏེ པན ཀཐིནེ ཀཐནྟི ཝུཏྟེ ཨནཏྠཏསྶ པཊིཀྑེཔཏཾ དསྶེཏཱིཏི ཝུཏྟོ ཨཔསྶནྟོ ཝིགྷཱཏཾ ཨཱཔཛྫཏཱིཏི. ཨེཀཏིཾསེ ཨརུཎུགྒམནེ ནིསྶགྒིཡནྟི མཧནྟེནཔི པཙྩཱསཱཙཱིཝརེན སཧ གྷཊིཏམྤི ཏབྦྷཱཝཾ ཨནུཔཏིཏྭཱ ནིསྶགྒིཡཾ ཧོཏི སཏི པཙྪིམཔྤམཱཎསམྦྷཝེ, ཨསཏི ན ཧོཏི, པུན གྷཊིཏེ ཧོཏི, ཨཉྙེན གྷཊིཏེ ན ཧོཏི. ཚིནྣཾ ཨཉྙཝཏྠུ ཧོཏི. པུབྦཔརིཙྪེདཾ ཨཏིཀྐནྟཾ གྷཊིཏཾ པུན ཨཉྙཔརིཙྪེདཾ ལབྷཏཱིཏི ཨེཀེ, ཨུཔཔརིཀྑིཏྭཱ གཧེཏབྦཾ. ཨཉྙཏརསྨིཾ གཎྛིཔདེ པན ‘‘སངྒྷསྶ ཝཱ ཨིདཾ ཨཀཱལཙཱིཝརནྟི ཨུདྡིསྶ དིནྣ’ནྟི ཨེཏྠ སངྒྷསྶ དིནྣེ ཨཱཔཏྟི ནཱམ ནཏྠི, ‘སོཏསྶ ¶ རཧོ’ཏིཨཱདཱིསུ ཝིཡ པདུདྡྷཱརེན ཝུཏྟཾ, ཏསྶ ལཱབྷཾ སནྡྷཱཡཱཏི ཙེ? སངྒྷཏོ ཝཱ ཨུཔྤཛྫེཡྻཱཏི ཨནེན སིདྡྷཏྟཱ ཨདྷིཀམེཝཱ’’ཏི ཙ ‘‘སངྒྷོ ཙཱིཝརཱནི ལབྷིསྶཏི གཎོ ཝཱ’ཏིཨཱདིནཱཔི པཱཋོ ཨཏྠཱི’’ཏི ཙ ཝུཏྟཾ. གཎྛིཔདེ ཀོསལླཏྠཾ པན མཡཱ སབྦཾ ལིཁིཏཾ, སུཊྛུ ཝིཙཱརེཏྭཱ ཀཐེཏབྦཾ.

ཏཏིཡཀཐིནསིཀྑཱཔདཝཎྞནཱ ནིཊྛིཏཱ.

༤. པུརཱཎཙཱིཝརསིཀྑཱཔདཝཎྞནཱ

༥༠༣-༥༠༥. བྷཏྟཝིསྶགྒནྟི བྷཏྟཀིཙྩཱདྷིཊྛཱནཾ. བྷཏྟཀིཙྩཱདྷིཊྛཱནཝིབྷཱགནྟི པོརཱཎཱ. ཏཏྠ ནཱམ ཏྭནྟི ཏཏྠ ཏཡཱ ཀཏཀམྨེ ཨེཝཾ ཨཀཏྟབྦེ སཏི དྷོཝཱཔིསྶསི ནཱམ. ཨཐ ཝཱ སོ ནཱམ ཏྭནྟི ཨཏྠོ. ཨུབྷཏོསངྒྷེ ཨུཔསམྤནྣཱཏི བྷིཀྑཱུནཾ སནྟིཀེ ཨུཔསམྤདཱཡ པཊིཀྑིཏྟཏྟཱ ཏདནུཔསངྒབྷཡཱ ཨེཝཾ ཝུཏྟནྟི ཝེདིཏབྦཾ. ‘‘པུརཱཎཙཱིཝར’’ནྟི ཨེཏྠ པུརཱཎབྷཱཝདཱིཔནཏྠམེཝ ‘‘སཀིཾ ནིཝཏྠམྤི སཀིཾ པཱརུཏམྤཱི’’ཏི ཝུཏྟཾ, ཏསྨཱ ‘‘ཙཱིཝརཾ ནཱམ ཚནྣཾ ཙཱིཝརཱནཾ ཨཉྙཏརཾ ཙཱིཝརཾ ཝིཀཔྤནུཔགཾ པཙྪིམ’’ནྟི ཝཙནསྶ ཨོཀཱསོ ན ¶ ཛཱཏོཏི ཨེཀེ. ཡསྨཱ ཝིཀཔྤནུཔགཔཙྪིམཾ ཨིདྷ ནཱདྷིཔྤེཏཾ, ནིཝཱསནཔཱརུཔནུཔགམེཝཱདྷིཔྤེཏཾ, ཏེནེཝ ནིསཱིདནཔཙྩཏྠརཎེ དུཀྐཊཾ ཝུཏྟཾ, ཏསྨཱ ན ཝུཏྟནྟི ཨེཀེ. ཛཱཏིཔྤམཱཎཱཝཙནཏོ ཡཾ ཀིཉྩི པུརཱཎཝཏྠཾ དྷོཝཱཔེནྟསྶ ནིསྶགྒིཡམེཝ, ཏེནེཝ ‘‘ཨནཱཔཏྟི ཙཱིཝརཾ ཋཔེཏྭཱ ཨཉྙཾ པརིཀྑཱརཾ དྷོཝཱཔེཏཱི’’ཏི ཝུཏྟཾ. ཐཝིཀམྤི ཧི ཨསུཙིམཀྑིཏཾ པརིབྷུཏྟཾ དྷོཝཱཔེཏི, ནིསྶགྒིཡམེཝ ཨོལཱ༹རིཀཏྟཱ, ཨཔྤཏིརཱུཔཏྟཱ ཙ. ཏེནེཝ ཀངྑཱཝིཏརཎིཡཾ ཨིམསྨིཾ ཋཱནེ ཙཱིཝརཔརིཙྪེདོ ན ཝུཏྟོཏི ཨེཀེ, ཝིཙཱརེཏྭཱ ཡུཏྟཏརཾ གཧེཏབྦཾ. ‘‘རཛིཏྭཱ ཀཔྤཾ ཀཏྭཱཏི ཀཔྤིཡཾ ཀཏམེཝ ནིཝཱསེཏུཾ, པཱརུཔིཏུཾ ཝཱ ཝཊྚཏི, ནེཏར’’ནྟི ཝུཏྟཾ. ཨིམིནཱ ཙ མཛ྄ཛྷིམཏྠེརཝཱདོ ཨུཔཏྠམྦྷིཏོ ཧོཏི, ནོཔཏྠམྦྷིཏོ. རཛིཏྭཱཏིཨཱདི པན ཝིནཡཝིདྷིདསྶནཏྠཾ ཝུཏྟནྟི མམ ཏཀྐོ. ཡཐཱ ཨཉྙཱཏིཀཱཡ ཨཉྙཱཏིཀསཉྙཱིཝཱརེ ཏཱིཎི ཙཏུཀྐཱནི, ཨེཝཾ ཝེམཏིཀཉཱཏིཀཝཱརེསུ ཙཱཏི ནཝ ཙཏུཀྐཱནི ཧོནྟི. ཨེཏྠཱཧ – ཨེཀཝཱརཾ དྷོཝིཏྭཱ དྷོཝནེསུ དྷུརཾ ནིཀྑིཔིཏྭཱ པུན ‘‘དུདྡྷོཏ’’ནྟི མཉྙམཱནཱ དྷོཝཏི, ཨནཱཔཏྟིཡཱ བྷཝིཏབྦཾ, དུཏིཡཝཱརཾ ཨཝུཏྟཱ དྷོཝཏི ནཱམ ཧོཏཱིཏི? ཝུཙྩཏེ – སཙེ བྷིཀྑུ ‘‘ཨལཾ ཨེཏྟཱཝཏཱ དྷོཏེནཱ’’ཏི པཊིཀྑིཔཏི, པུན དྷོཝནྟཱི ཨཝུཏྟཱ དྷོཝཏི ནཱམཱཏི ཡུཛྫཏི. ནོ ཙེ, ཝུཏྟཱཝ ཧོཏཱིཏི ཝེདིཏབྦཾ. བྷིཀྑུསྶ ལིངྒཔརིཝཏྟནེ ཨེཀཏོཨུཔསམྤནྣཱཡ ཝསེན ཨཱཔཏྟི སཱཀིཡཱནཱིནཾ ཝིཡ.

༥༠༦. ཨེཀེན ¶ ཝཏྠུནཱཏི ཡེན ཀེནཙི པཋམེན. ‘‘ཏིཎྞཾ ཙཏུཀྐཱནཾ ཝསེནཱ’’ཏི པཱཋོ. བྷིཀྑཱུནཾ སནྟིཀེ ཨཊྛཝཱཙིཀཱཡ ཨུཔསམྤནྣཱཡ པཱཀཊཏྟཱ ཏཾ ཨཝཏྭཱ སཱཀིཡཱནིཡོཝ ཝུཏྟཱ ཨཔཱཀཊཏྟཱ.

པུརཱཎཙཱིཝརསིཀྑཱཔདཝཎྞནཱ ནིཊྛིཏཱ.

༥. ཙཱིཝརཔཊིགྒཧཎསིཀྑཱཔདཝཎྞནཱ

༥༠༨-༥༡༠. ཨཔཉྙཏྟེ སིཀྑཱཔདེཏི ཨེཏྠ ‘‘གཎམྷཱ ཨོཧཱིཡནསིཀྑཱཔདེ’’ཏི ལིཁིཏཾ. ཨརཉྙཝཱསཱིནིསེདྷནསིཀྑཱཔདེ ཨཔཉྙཏྟེཏི ཨེཀེ, ‘‘ཏཾ ན སུནྡར’’ནྟི ཝདནྟི. ཝིཧཏྠཏཱཡཱཏི ཨཱཡཱསེན.

༥༡༢. ཨུཔཙཱརོཏི དྭཱདསཧཏྠོ. མཧཱཔཙྩརིཡཾ, ཀུརུནྡིཡཉྩ ཝུཏྟནྟི ཨེཏྠ རཏྟིབྷཱགེ དྷམྨཀཐིཀསྶ བྷིཀྑུནོ བཧཱུསུ ཙཱིཝརེསུ མཧཱཛནེན པསཱདདཱནཝསེན ¶ པཊིཀྑིཏྟེསུ པུནདིཝསེ ‘‘ཨུཔཱསཀཱནཾ པསཱདདཱནཱནི ཨེཏཱནཱི’’ཏི སུདྡྷཙིཏྟེན གཎྷནྟསྶ དོསོ ནཏྠི, ‘‘བྷིཀྑུནཱིཧིཔི དིནྣཱནི ཨིདྷ སནྟཱི’’ཏི ཉཏྭཱ གཎྷཏོ དོསོ. ཏཾ ཨཙིཏྟཀབྷཱཝེནཱཏི བྷིཀྑུནཱིཧི དིནྣབྷཱཝཾ ཉཏྭཱ བཧཱུསུ ཏསྶཱ ཙཱིཝརསྶ ཨཛཱནནེནཱཏི ཨཏྠོ. པཾསུཀཱུལཾ ཨདྷིཊྛཧིཏྭཱཏི ‘‘བྷིཀྑུནཱིཧི ནུ ཁོ དིནྣཾ སིཡཱ’’ཏི ཨཝིཀཔྤེཏྭཱ ‘‘པཾསུཀཱུལཾ གཎྷཱམཱི’’ཏི གཎྷནྟསྶ ཝཊྚཏི. ཀུརུནྡིཨཱདཱིསུ ཝུཏྟོཔི ཨཏྠོ ཨཡམེཝ, ཨེཀཾ, ‘‘ཨཙིཏྟཀབྷཱཝེནཱ’’ཏི ཝཙནེན ‘‘ཡཐཱ ཏཐཱ གཎྷིཏུཾ ཝཊྚཏཱི’’ཏི ཨུཔྤཐོཝ པཊིསེདྷིཏོཏི ཨཔརེ. ཨེཝཾ དྷམྨསིརིཏྠེརོ ན ཝདཏི, ཨུཛུཀམེཝ ཝདཏཱིཏི པཔཉྩིཏཾ. ཏསྶེཝ ཝིསཡོ, ཏསྶཱཡཾ ཨདྷིཔྤཱཡོ – ཡཐཱ ‘‘པཾསུཀཱུལཾ གཎྷིསྶཏཱིཏི ཋཔིཏཾ ཀཱམཾ བྷིཀྑུནིསནྟཀམྤི ཨཝིཀཔྤེཏྭཱ པཾསུཀཱུལཾ ཨདྷིཊྛཧིཏྭཱ གཧེཏུཾ ཝཊྚཏཱི’’ཏི ཝུཏྟཾ, ཏཐཱ དྷམྨཀཐིཀསྶ བྷིཀྑུནིཡཱ དིནྣམྤི ཨཔཉྙཱཡམཱནཾ ཝཊྚཏཱིཏི, ཏསྨཱ ཏཾ ཝུཏྟཾ མཧཱཔཙྩརིཡཾ, ཀུརུནྡིཡཉྩ ཨཙིཏྟཀབྷཱཝེན ན སམེཏཱིཏི. པཊིཀྑེཔོ པན ཝིཀཔྤགྒཧཎེ ཨེཝ རུཧཏི. ཨཉྙཐཱ པུབྦཱཔརཾ ཝིརུཛ྄ཛྷཏཱིཏི. ཏཾ ན ཡུཏྟཾ པཾསུཀཱུལེན ཨསམཱནཏྟཱ. པཾསུཀཱུལབྷཱཝེན སངྐཱརཀཱུཊཱདཱིསུ ཋཔིཏཾ བྷིཀྑུནཱིཧི, ན ཏཾ ཏསྶཱ སནྟཀཾ ཧུཏྭཱ ཋིཏཾ ཧོཏི. ཨསྶཱམིཀཉྷི པཾསུཀཱུལཾ སབྦསཱདྷཱརཎཉྩ, ཨཉྙོཔི གཧེཏུཾ ལབྷཏི. ཨིདཾ པུབྦེཝ ‘‘བྷིཀྑུནཱིནཾ ཙཱིཝར’’ནྟི ཛཱནིཏྭཱཔི པཾསུཀཱུལིཀོ གཧེཏུཾ ལབྷཏི ཏདཱ ཏསྶཱ ཨསནྟཀཏྟཱ. ‘‘པཾསུཀཱུལཾ ཨདྷིཊྛཧིཏྭཱ’’ཏི སལླེཁཀྐམནིདསྶནཏྠཾ ཝུཏྟཾ. མཾསཾ དདནྟེན ཏཐཱགཏེན སལླེཁཏོ ཀཔྤིཡམྤི བྷུཏྟཾ ནིསྶགྒིཡཾ ཙཱིཝརམཱཧ ཡོ མཾསཾ ཀཐནྟི སཡམཱདིསེཡྻཱཏི.

ཨཙིཏྟཀཏྟཱ ¶ ཀཐཾ པཾསུཀཱུལཾ ཝཊྚཏཱིཏི ཙེ? ཏཱཡ ཏསྶ ཨདིནྣཏྟཱ, བྷིཀྑུནཱཔི ཏཏོ བྷིཀྑུནིཏོ ཨགྒཧིཏཏྟཱ ཙ. ཨསྶཱམིཀམྤི ཧི པཾསུཀཱུལཾ ཨཉྙིསྶཱ ཧཏྠཏོ གཎྷཱཏི, ན ཝཊྚཏི ‘‘ཨཉྙཱཏིཀཱཡ བྷིཀྑུནིཡཱ ཙཱིཝརཾ པཊིགྒཎྷེཡྻཱ’’ཏི ཝུཏྟལཀྑཎསམྦྷཝཏོ. ཨཉྙཱཏིཀཱཡ སནྟཀཾ ཉཱཏིཀཱཡ ཧཏྠཏོ གཎྷཱཏི, ཝཊྚཏཱིཏི ཨེཀེ. ཡཐཱ སིཀྑམཱནསཱམཎེརཱདཱིནཾ ཧཏྠཏོ པཊིགྒཎྷནྟསྶ ཨནཱཔཏྟི, ཏཐཱ ཀངྑཱཝིཏརཎིཡཉྩ ‘‘ཨཉྙཱཏིཀཱཡ ཧཏྠཏོ གཧཎ’’ནྟི (ཀངཁཱ. ཨཊྛ. ཙཱིཝརཔྤཊིགྒཧཎསིཀྑཱཔདཝཎྞནཱ) ཨངྒཾ ཝུཏྟཾ. ཏཐཱ ཉཱཏིཀཱཡ ¶ སནྟཀཾ སིཀྑམཱནཱཡ, སཱམཎེརིཡཱ, ཨུཔཱསཀསྶ, ཨུཔཱསིཀཱཡ, བྷིཀྑུསྶ, སཱམཎེརསྶ སནྟཀཾ ཨཉྙཱཏིཀཱཡ བྷིཀྑུནིཡཱ ཧཏྠཏོ གཎྷནྟསྶ ཙ ཨནཱཔཏྟི ཨེཝཾ ཡཐཱཝུཏྟལཀྑཎཱསམྦྷཝཏོཏི ཨེཀེ, ཏེནེཝ ‘‘ཨེཀཏོཨུཔསམྤནྣཱཡ ཙཱིཝརཾ པཊིགྒཎྷཱཏཱི’ཏི ཨཝཏྭཱ ‘ཧཏྠཏོ པཊིགྒཎྷཱཏི ཨཉྙཏྲ པཱརིཝཏྟཀཱ, ཨཱཔཏྟི དུཀྐཊསྶཱ’ཏི (པཱརཱ. ༥༡༣) ཝུཏྟཾ, ཏསྨཱ ཨཉྙཱཏིཀཱཡ སནྟཀམྤི ཨེཀཏོཨུཔསམྤནྣཱཡ ཧཏྠཏོ པཊིགྒཎྷནྟསྶ དུཀྐཊ’’ནྟི ཝདནྟི, ཨུབྷོཔེཏེ ན སཱརཏོ དཊྛབྦཱ, ཀཱརཎཾ པརིཡེསིཏབྦཾ.

༥༡༤. ཀོ པན ཝཱདོ པཏྟཏྠཝིཀཱདཱིསཱུཏི ཨནདྷིཊྛཱཏབྦེསུ བཧཱུསུ པཊལེསུ. ཏེནེཝཱཧ མཱཏིཀཱཊྛཀཐཱཡཾ ‘‘པཏྟཏྠཝིཀཱདིམྷི ཨནདྷིཊྛཱཏབྦཔརིཀྑཱརེ’’ཏི. ཨདྷིཊྛཱནུཔགེསུ ཝཱ ཏེསཾ པརིཀྑཱརཏྟཱ བྷིསིཚཝིཡཱ ཝིཡ ཨནཱཔཏྟི. ཀིཾ པཊཔརིསྶཱཝནཾ པརིཀྑཱརཾ ན ཧོཏཱིཏི? ཧོཏི, ཀིནྟུ ཏཾ ཀིར ནིཝཱསནཱདིཙཱིཝརསཎྛཱནཏྟཱ ན ཝཊྚཏི. ཏསྨཱ ཨིདྷ ནིཝཱསནཱདིཙཱིཝརསཱདྷནཾ ཝིཀཔྤནུཔགཔཙྪིམཾ ཙཱིཝརཾ ནཱམ. ཨནནྟརཱཏཱིཏེ ནིཝཱསནཔཱརུཔནུཔགམེཝཱཏི སནྣིཊྛཱནཾ. ཨེཝཾ སནྟེ ཀངྑཱཝིཏརཎིཡཾ (ཀངྑཱ. ཨཊྛ. ཙཱིཝརཔྤཊིགྒཧཎསིཀྑཱཔདཝཎྞནཱ) ཀཔྤནུཔགཔཙྪིམཏཱ, པཱརིཝཏྟཀཱབྷཱཝོ, ཨཉྙཱཏིཀཱཡ ཧཏྠཏོ གཧཎནྟི ཏཱིཎེཝ ཨངྒཱནི ཨཝཏྭཱ ཨཔརིཀྑཱརཏཱཏི ཙཏུཏྠམངྒཾ ཝཏྟབྦནྟི ཙེ? ན ཝཏྟབྦཾ, ཨིམསྨིཾ སིཀྑཱཔདེ པཏྟཏྠཝིཀཱདིཔརིཀྑཱརསྶ ཨཙཱིཝརསངྑྱཏྟཱ. པཋམཀཐིནཱདཱིསུ ཝིཀཔྤནུཔགཏཱ པམཱཎཾ, ཨིདྷ ཀཱཡཔརིབྷོགུཔགཏཱཏི. ‘‘ཨཉྙཾ པརིཀྑཱར’’ནྟི ཨུདྡྷརིཏྭཱ ‘‘པཏྟཏྠཝིཀཱདིཾ ཡཾཀིཉྩཱི’’ཏི ཝུཏྟཏྟཱ ཝིཀཔྤནུཔགམྤི པཏྟཏྠཝིཀཱདིཾ གཎྷིཏུཾ ཝཊྚཏི, ‘‘པཊཔརིསྶཱཝནམྤཱི’’ཏི ཝུཏྟཊྛཱནེ ཙ ‘‘ཙཱིཝརཾ ནཱམ ཝིཀཔྤནུཔགཔཙྪིམ’’ནྟི ཝཙནཏོ པཊཔརིསྶཱཝནཾ ཙཱིཝརམེཝ, ན པརིཀྑཱརཾ. ‘‘ཀོ པན ཝཱདོཏི ནིགམནཝཙནམྤི སཱདྷཀ’’ནྟི ཀེཙི ཝདནྟི, པཎྞཏྟིཾ ཨཛཱནནཏོ ཨཙིཏྟཀཾ, ན ཝཏྠུཾ, ‘‘ཨཉྙཱཏིཀཱཡ བྷིཀྑུནིཡཱ སནྟཀབྷཱཝཱཛཱནནཏོ, ཙཱིཝརབྷཱཝཱཛཱནནཏོ ཙ ཨཙིཏྟཀ’’ནྟི ཨནུགཎྛིཔདེ ཝུཏྟཾ.

ཙཱིཝརཔཊིགྒཧཎསིཀྑཱཔདཝཎྞནཱ ནིཊྛིཏཱ.

༦. ཨཉྙཱཏཀཝིཉྙཏྟིསིཀྑཱཔདཝཎྞནཱ

༥༡༥. པརིཀྑཱརཱནནྟི ¶ ¶ ཨུཔཡོགཏྠེ སཱམིཝཙནཾ. ཨེཀསཱཊཀནྟི བྷཱཝནཔུཾསཀཾ, ‘‘ཨཉྙཱཏཀོ མོགྷཔུརིསཱ’’ཏི ཝཙནེན པཝཱརིཏོཔི ཨདཱཏུཀཱམོ ཨཉྙཱཏཀོ ཨཔྤཝཱརིཏཊྛཱནེ ཏིཊྛཏཱིཏི དཱིཔིཏཾ ཧོཏི. ཨཉྙཐཱ ‘‘ཨནཱཔཏྟི པཝཱརིཏཱན’’ནྟི ཨིམིནཱ ཝིརུཛ྄ཛྷཏི.

༥༡༧. ནེཝ ཏཱཝ ཝིཉྙཱཔེཏབྦཾ, ན བྷཉྫིཏབྦནྟི ཨནཙྪིནྣཱནཾ ཙཱིཝརཱནཾ ཨཏྟནོ སནྟཀཱནཾ ཨཏྠིཏཱཡ, ཏཏྠ པཙྩཱསཱསབྦྷཱཝཏོ ཙ. པཙྩཱསཱ ཀིཏྟཀཾ ཀཱལཾ རཀྑཏཱིཏི? ཡཱཝ གཱམནྟརཱ, ཡཱཝ ཨདྡྷཡོཛནཱཏི ཨེཀེ. ཡཱཝ དསྶནསཝནཱུཔཙཱརཱཏི ཨེཀེ. ཡཱཝ ཨཉྙེ ན པསྶནྟཱིཏི ཨེཀེ. ཡཱཝ པཙྩཱསཱ ཚིཛྫཏཱིཏི ཨེཀེ. ཡཱཝ སཱཁཱཔལཱསཔརིཡེསནབྷཉྫནསཛྫནཀཱལཔརིཙྪེདཱཏི ཨེཀེ. ཨིདཾ སབྦཾ ཡཐཱསམྦྷཝཾ ཡུཛྫཏི. ཀཐཾ པཉྙཱཡཏཱིཏི ཙེ? ‘‘སཙེ པན ཨེཏེསཾ ཝུཏྟཔྤཀཱརཱནཾ གིཧིཝཏྠཱདཱིནཾ བྷིསིཚཝིཔརིཡནྟཱནཾ ཀིཉྩི ན ལབྦྷཏི, ཏེན ཏིཎེན ཝཱ པཎྞེན ཝཱ པཊིཙྪཱདེཏྭཱ ཨཱགནྟབྦ’’ནྟི ཨཊྛཀཐཱཝཙནཏོ.

ན ཏཱཝ ཐེརཱནཾ དཱཏབྦཱནཱིཏི ན ཏཱཝ ཨཏྟནོ རུཙིཡཱ དཱཏབྦཱནི, ཡདཱ ཐེརཱ ‘‘དེཐཱཝུསོ’’ཏི ཝདནྟི, ཏདཱ དཱཏབྦཱནི. ‘‘ཨེཝཾ སཏི དཧརཱཔི ཨཙྪིནྣཙཱིཝརཊྛཱནེ ཏིཊྛནྟི, སཱཁཱཔལཱསཾ བྷཉྫིཏུཾ ཝཊྚཏི, ན ཨཉྙཐཱ. ‘ཡེཧི ཀེཧིཙི ཝཱ ཨཙྪིནྣཾ ཧོཏཱི’ཏི ཧི ཝུཏྟ’’ནྟི ཝུཏྟཾ. ཨཱཙརིཡོ པན ཨེཝཾ ཝདཏི ‘‘ཨཏྟནོ རུཙིཡཱཔི དཱཏུཾ ལབྷནྟཱི’’ཏི. ཏཐཱ ཧི ཨཊྛཀཐཱཡཾ ‘‘པརིབྷོགཛིཎྞཾ ཝཱ’ཏི ཨེཏྠ ཙ ‘ཨཙྪིནྣཙཱིཝརཱནཾ ཨཱཙརིཡུཔཛ྄ཛྷཱཡཱདཱིནཾ ཨཏྟནཱ ཏིཎཔཎྞེཧི པཊིཙྪཱདེཏྭཱ དིནྣཙཱིཝརམྤི སངྒཧཾ གཙྪཏཱི’ཏི ཝཏྟུཾ ཡུཛྫཏཱི’’ཏི ཝུཏྟཾ. ཨཐཱཔི སིཡཱ ཨཱཙརིཡཱདཱིཧི ‘‘ཨཱཧརཱཝུསོ’’ཏི ཝུཏྟེཡེཝ, ནཱཝུཏྟེཏི, ན, ‘‘ཀེཧིཙི ཝཱ ཨཙྪིནྣ’’ནྟི ཨེཏྠ ཝུཏྟལེསཏོ དུཏིཡལེསསྶ ཨཝིསེསབྷཱཝཔྤསངྒཏོཏི. ཨཐ ཀིམཏྠཾ ‘‘ན ཏཱཝ ཐེརཱནཾ དཱཏབྦཱནཱི’’ཏི ཝུཏྟནྟི ཙེ? ཡཱཝ ཐེརཱནཾ ཨཏྠཱཡ སཱཁཱཔལཱསཱནི བྷཉྫཏི, ཏཱཝ ན དཱཏབྦཱནི, ཏཏོ ཏཱནི ཐེརུདྡིསྶཀཱནི སཱཁཱཔལཱསཱནི སཡཾ པརིདཧིཏྭཱ ཝིནཱཔི ཐེརཱཎཏྟིཡཱ ཨཏྟནོ རུཙིཡཱ དཱཏབྦཱནི, བྷཱུཏགཱམཔཱཏབྱཏཱཡ པཱཙིཏྟིཡཾ ན ཧོཏི སཏྠུནཱཔི ཨནུཉྙཱཏཏྟཱ. ‘‘ཏིཎེན ཝཱ པཎྞེན ཝཱ’’ཏི ཧི ཝུཏྟཾ, ཏཾ ཀཔྤིཡམེཝ སནྡྷཱཡ ཝུཏྟནྟི ཙེ? ན, ‘‘ཏདལཱབྷེ ན ཏྭེཝ…པེ… དུཀྐཊསྶཱ’’ཏི ¶ ཝཙནཝིརོདྷཏོ. ཨེཏྠཱཧ – དུཀྐཊབྷཡཱ པཱཙིཏྟིཡཝཏྠུ ཙེ ཨཏིཀྐམིཏབྦཾ, ཏདལཱབྷེ ཐུལླཙྩཡཝཏྠུ སངྒྷིཀཾ, ཏདལཱབྷེ པཱརཱཛིཀཝཏྠུཔི ཨཏིཀྐམིཏབྦཾ སིཡཱཏི? ན, པཱརཱཛིཀསྶ ལོཀཝཛྫཏྟཱ. ཨཔིཙ ན སབྦཾ བྷཱུཏགཱམཾ པཱཙིཏྟིཡཝཏྠུམེཝ, ཏཏོ དུཀྐཊཱདིཝཏྠུཔི ཨཏྠི, ཨནཱཔཏྟིཝཏྠུཔི ཀཱལོདིསཀཾ, ཏསྨཱ ཨིདཾ ཏདཱ ¶ ཨནཱཔཏྟིཝཏྠུཀནྟི ཝེདིཏབྦཾ. ཀིཏྟཱཝཏཱ བྷིཀྑུ ཨཙྪིནྣཙཱིཝརོ ནཊྛཙཱིཝརོ ཧོཏཱིཏི? ཨེཏྟཱཝཏཱ ནགྒོ ཧོཏཱིཏི ཨེཀེ. ཝིཀཔྤནུཔགཔཙྪིམབྷཱཝེན, ཝིཀཔྤནུཔགཔཙྪིམམཱདིཾ ཀཏྭཱ ཝིཉྙཱཔེནྟསྶ ཨཱཔཏྟཱིཏི ཨེཀེ. ནིཝཱསནཔཱརུཔནུཔགཱབྷཱཝེནཱཏི ཨེཀེ. ཏིཙཱིཝརཱབྷཱཝེནཱཏི ཨེཀེ. སནྟརུཏྟརཔརམཱབྷཱཝེནཱཏི ཨེཀེ. ཨཡཾ ཨེཀེཝཱདོ ཡུཏྟོ ‘‘སནྟརུཏྟརཔརམཾ ཏཏོ ཙཱིཝརཾ སཱདིཏབྦ’’ནྟི ཧི ཝཙནཏོ, ཏསྨཱ སནྟརུཏྟརེ སཏི ཝིཀཔྤནུཔགཔཙྪིམཾ ཝིཉྙཱཔེནྟསྶ པཊིལཱབྷེན ནིསྶགྒིཡཾ. ཡདི ཨེཝཾ ‘‘ཝིཉྙཱཔེཏྭཱ པཊིལབྷེཡྻ ནིསྶགྒིཡ’’ནྟི སིཀྑཱཔདེན བྷཝིཏབྦནྟི ཙེ? ཏནྣ, ཏདཏྠསིདྡྷིཏོ ནཱནཏྠཏྟཱ དྷཱཏཱུནཾ. ཀིཾ ཝུཏྟཾ ཧོཏི? ཡཐཱ ཧི ‘‘ཏིཀྑཏྟུཾ མེཐུནཾ དྷམྨཾ ཨབྷིཝིཉྙཱཔེསཱི’’ཏི (པཱརཱ. ༣༦) ཝུཏྟེ པཝཏྟེསཱིཏི ཨཏྠོ, ཏཐཱ ཨིདྷཱཔི ‘‘ཙཱིཝརཾ ཝིཉྙཱཔེཡྻཱ’’ཏི ཝིཉྙཏྟིཡཱ པཝཏྟེཡྻ ཨུཔྤཱདེཡྻཱཏི ཨཏྠོ.

ཏེན ནིཝཏྠོཏི ཏཾནིཝཏྠོ. ཨཉྙསྶ ཨལཱབྷེན ཏམེཝ པརིབྷུཉྫཏོ ཛིརཏི, ན ལེསེན. ཨཏྟནཱཏི སཡམེཝ ཝཏྟུཾ ཡུཛྫཏི, ཏསྨཱ ཨཡུཏྟཔརིབྷོགེན ཨཔརིབྷུཉྫིཏྭཱ ཡུཏྟཔརིབྷོགཝསེན པརིབྷུཉྫཏོ ཛིཎྞཾ པརིབྷོགཛིཎྞཾ ནཱམ. ཏསྶ སབྷཱགཱནཾ ཨཙྪིནྣཀཱལེ དཱནམྤི ཡུཏྟཔརིབྷོགེ ཨེཝ སངྒཧཾ གཙྪཏཱིཏི ཨདྷིཔྤཱཡོ. ‘‘ཨིམེ ཀིར དྭེ ལེསཱ ཨཊྛཀཐཱཡོ, ཝཱཙེནྟཱནཾ ཨཱཙརིཡཱནཾ མཏནྟི དྷམྨསིརིཏྠེརོ ཨཱཧཱ’’ཏི ཝུཏྟཾ.

༥༢༡. ནིསཱིདིཏུཾ ཝཱ ནིཔཛྫིཏུཾ ཝཱ ན ལབྷཏཱིཏི ཡཐཱསུཁཾ ན ལབྷཏཱིཏི ཨདྷིཔྤཱཡོ. ‘‘ཨཉྙསྶཏྠཱཡཱ’’ཏི ཨེཏྠཱཔི ‘‘ཉཱཏཀཱནཾ པཝཱརིཏཱན’’ནྟི ཨནུཝཏྟཏི ཨེཝ. ཨཏྠཱཡ ཀསྶ? ཏསྶེཝ ཨཉྙསྶ. ཡཐཱ ཨཉྙཱཏཀེ ཏིཀཔཱཙིཏྟིཡཾ, ཏཐཱ ཨཔྤཝཱརིཏེཔཱིཏི དསྶནཏྠཾ ‘‘ཉཱཏཀཱནཾ པཝཱརིཏཱན’’ནྟི ཝུཏྟཾ. ཨཉྙཐཱ ‘‘ཉཱཏཀེ ཉཱཏཀསཉྙཱི’’ཏི ཨིམིནཱ སིདྡྷཏྟཱ ན ནིཙྩཾ སེསཾ ཨཱཔཛྫཏི. ཨཔིཙེཏྠ ཨཉྙཱཏཀགྒཧཎེན ཨཔྤཝཱརིཏགྒཧཎཾ ཧོཏི ¶ , ཨཔྤཝཱརིཏགྒཧཎེན ཨཉྙཱཏཀགྒཧཎཾ, ཨཉྙཱཏཀཱ ཧི ཨཔྤཝཱརིཏཱ ཧོནྟི. ཏཐཱ ཉཱཏཀགྒཧཎེན པཝཱརིཏགྒཧཎཾ ཧོཏི, ཀཏྠཙི ན ཧོཏི. ན པཝཱརིཏགྒཧཎེན ཉཱཏཀགྒཧཎཾ ཧོཏཱིཏི ཨིམསྶ ཨཏྠཝིསེསསྶ དསྶནཏྠཾ ‘‘ཉཱཏཀཱནཾ པཝཱརིཏཱན’’ནྟི ཝུཏྟཾ. ཏཐཱ ཧི ཨཉྙཱཏིཀཱཡ བྷིཀྑུནིཡཱ ཨཔྤཝཱརིཏཱཡ ཙ ཙཱིཝརཾ ཨཉྙཏྲ པཱརིཝཏྟཀཱ པཊིགྒཎྷནྟསྶ ཨཱཔཏྟི. ཉཱཏིཀཱཡ པན པཝཱརིཏཱཡ ཙ ཝིསྶཱསཾ གཎྷཱཏི, ཨནཱཔཏྟི. ཏཐཱ པུརཱཎཙཱིཝརཾ ཉཱཏིཀཱཡ ཨནཱཔཏྟི, པཝཱརིཏཱཡ པན ཏིཀཔཱཙིཏྟིཡམེཝ. ཉཱཏཀཱནཉྩ ཨེཀཙྩཱནཾ པུརཱཎཙཱིཝརཾ ནཱམ དཱཏུཾ ཝཊྚཏི, ན པཝཱརིཏཱནཾ. ཏིཀཙྪེདོ ཙ མཱཏིཀཱཔདེནེཝ ཧོཏི, ན ཨཉྙེན. ཏཏྠཱཔི ཨེཀེནེཝ, ན དུཏིཡཱདཱིཧཱིཏི ཨཡཾ ཝིནཡེ དྷམྨཏཱ ཝེདིཏབྦཱ.

ཨཉྙཱཏཀཝིཉྙཏྟིསིཀྑཱཔདཝཎྞནཱ ནིཊྛིཏཱ.

༧. ཏཏུཏྟརིསིཀྑཱཔདཝཎྞནཱ

༥༢༢-༤. པགྒཱཧིཀསཱལཾ ¶ ཝཱཏི དུསྶཔསཱརཾ ཝཱ. ཧཏྠེན པགྒཧེཏྭཱ ཋཏྭཱ སཱལཱཡཾ པསཱརེཏབྦདུསྶཾ པསཱརེནྟཱིཏི ཙོདནཱ. ཏིཙཱིཝརིཀེནེཝཱཏི ཝིནཡཏིཙཱིཝརིཀེན. སོ ཧི ཨདྷིཊྛཧིཏྭཱ ཋཔིཏཔརིཀྑཱརཙོལཱ༹དཱིསུ སནྟེསུཔི ཏིཙཱིཝརེ ཨཙྪིནྣེ སནྟརུཏྟརཔརམཾ ཝིཉྙཱཔེཏྭཱ གཧེཏུཾ ལབྷཏི. ཨཉྙཐཱཔཱིཏི ‘‘པམཱཎིཀཾ ཏིཙཱིཝརཾ པརིཀྑཱརཙོལ༹ཝསེན ཨདྷིཊྛཧིཏྭཱ པརིབྷུཉྫཏོ ཏསྨིཾ ནཊྛེ བཧཱུནིཔི གཧེཏུཾ ལབྷཏི, ན སནྟརུཏྟརཔརམ’’ནྟི ཙ, ཏསྨཱ ཏཾ ཝིབྷཱགནྟི ‘‘ཏིཙཱིཝརིཀསྶ ཏཾ ཝིབྷཱགནྟི ཨཏྠོ, ན པརིཀྑཱརཙོལི༹ཀསྶཱ’’ཏི ཙ ཀེཙི ཝདནྟི. ཨཱཙརིཡོ པན ‘‘ཨཉྙེནཱཏི ཨཏིཙཱིཝརིཀེན, ཨཉྙཐཱཏི ཨིཏོ ཝུཏྟགྒཧཎཔརིཙྪེདཏོ ཨཉྙེནཱ’’ཏི ཨེཏྟཀམེཝ ཝདཏི. ཨཉྙཐཱཏི པན སཙེ ཏཱིཎིཔི ནཊྛཱནི, སནྟརུཏྟརཔརམཾ གཎྷིཏབྦཾ, སཙེ དྭེ ཝཱ ཨེཀཾ ཝཱ ནཊྛཾ, ཏེན ‘‘ཨཉྙཐཱཔཱི’’ཏི དསྶནཏྠཾ ཝུཏྟནྟི ཨེཀེ. གཎྛིཔདེསུ ཝིཙཱརཎཱ ཨེཝ ནཏྠི, ཏསྨཱ ཨུཔཔརིཀྑིཏྭཱ གཧེཏབྦཾ. པཀཏིཡཱ སནྟརུཏྟརེན ཙརཏི, སཱསངྐསིཀྑཱཔདཝསེན ཝཱ ཏཾསམྨུཏིཝསེན ཝཱ ཏཏིཡསྶ ཨལཱབྷེན ཝཱ.

༥༢༦. ‘‘པམཱཎམེཝ ¶ ཝཊྚཏཱི’’ཏི སལླེཁདསྶནཏྠཾ ཝུཏྟཾ. ཏཾ མིཙྪཱ གཧེཏྭཱ ཉཱཏཀཱདིཊྛཱནེ ཏདུཏྟརི གཎྷནྟསྶ ཨཱཔཏྟཱིཏི ཙེ? ཏཾ པཱལི༹ཡཱ ན སམེཏི, ‘‘ཨནཱཔཏྟི ཉཱཏཀཱནཾ པཝཱརིཏཱན’’ནྟི ཧི པཱལི༹. ཨེཏྠ ཙ པཝཱརིཏཱ ནཱམ ཨཙྪིནྣཀཱལཏོ པུབྦེ ཨེཝ པཝཱརིཏཱ, ན ཨཙྪིནྣཀཱལེ. ‘‘ཨབྷིཧཊྛུཾ པཝཱརེཡྻཱ’’ཏི ཧི ཝུཏྟཾ, ཏསྨཱ ཡོ ཨཙྪིནྣཀཱལསྶཏྠཱཡ པཝཱརེཏི, ཨུབྷོཔི ཨཔྤཝཱརིཏཱ ཨེཝཱཏི ཝེདིཏབྦཱ. ཏེ ཧི ཨཙྪིནྣཀཱརཎཱ ནཊྛཀཱརཎཱཝ དེནྟི ནཱམ. ཨཔིཙ ཡཐཱ པིཊྛིསམཡེ སཏུཔྤཱདཾ ཀཏྭཱ ཉཱཏཀཔཝཱརིཏཊྛཱནཏོ ཝསྶིཀསཱཊིཀཾ ནིཔྥཱདེནྟསྶ ཏེན སིཀྑཱཔདེན ནིསྶགྒིཡཾ, ཏཐཱ ཨིདྷཱཔི ཉཱཏཀཔཝཱརིཏཊྛཱནེཔི ཨཙྪིནྣནཊྛཀཱརཎཱ ན ཝཊྚཏི, ཏསྨཱ ‘‘ཨཊྛཀཐཱསུ པམཱཎམེཝ ཝཊྚཏཱི’ཏི ཝུཏྟཝཙནམེཝ པམཱཎ’’ནྟི དྷམྨསིརིཏྠེརོ ཨཱཧ, ཏཾ ཨཡུཏྟཾ, ཀསྨཱ? ཡསྨཱ ཨིདཾ སིཀྑཱཔདཾ ཏདུཏྟརི ཝིཉྙཱཔེནྟསྶ པཉྙཏྟཾ, ཏསྨིཉྩ ‘‘ཨཉྙཱཏཀོ གཧཔཏི ཝཱ གཧཔཏཱནཱི ཝཱ’’ཏི མཱཏིཀཱཡ པཱལི༹, ཝིབྷངྒེ ཙ ‘‘ཨཉྙཱཏཀོ ནཱམ མཱཏིཏོ ཝཱ…པེ… ཨསམྦདྡྷོ’’ཏི པཱལི༹, ཨནཱཔཏྟིཝཱརེ ཙ ‘‘ཉཱཏཀཱནཾ པཝཱརིཏཱན’’ནྟི པཱལི༹, ཏསྨཱ ཏིཝིདྷཱཡཔི པཱལི༹ཡཱ ན སམེཏཱིཏི ཨཡུཏྟམེཝ, ཏསྨཱ ཀེཝལཾ སལླེཁམེཝ སནྡྷཱཡ ཝུཏྟནྟི ཨཔརེ. ཨུཔརི ཀཱཎམཱཏཱསིཀྑཱཔདེ ཨཊྛཀཐཱསུ པན ‘‘ཏེསམྤི པཱཐེཡྻཔཧེཎཀཏྠཱཡ པཊིཡཏྟཏོ པམཱཎམེཝ ཝཊྚཏཱི’’ཏི ཝུཏྟཾ, ན པན ‘‘པཱལི༹ཡཱ ན སམེཏཱི’’ཏི ཝུཏྟཾ, ན ཏཏྠ ཙ ཨིདྷ ཙ ནཱནཱཀརཎཾ པཉྙཱཡཏི ¶ , ཏསྨཱ ཐེརསྶ ལདྡྷི སུནྡརཱ ཝིཡ མམ ཁཱཡཏི, ཝཱིམཾསིཏབྦཾ. ཡསྨཱ པནིདཾ སིཀྑཱཔདཾ ཨཉྙསྶཏྠཱཡ ཝིཉྙཱཔནཝཏྠུསྨིཾཡེཝ པཉྙཏྟཾ, ཏསྨཱ ཨིདྷ ‘‘ཨཉྙསྶཏྠཱཡཱ’’ཏི ན ཝུཏྟཾ. ‘‘སེསཾ ཨུཏྟཱནཏྠམེཝཱ’’ཏི པཱཋོ. ‘‘ཨཉྙསྶཏྠཱཡཱ’’ཏི ནིདཱནཝིརོདྷཏོ ན ཝུཏྟཾ. ཏཐཱཔི ཨནནྟརེ ཝུཏྟནཡེན ལབྦྷཏཱིཏི ཨཱཙརིཡོ. ཨེཝརཱུཔེསུ གཧཔཏིཔཊིསཾཡུཏྟསིཀྑཱཔདེསུ ཀིཉྩཱཔི ‘‘གཧཔཏི ནཱམ ཡོ ཀོཙི ཨགཱརཾ ཨཛ྄ཛྷཱཝསཏཱི’’ཏི ཝུཏྟཾ, ཏཐཱཔི པཉྩ སཧདྷམྨིཀེ ཋཔེཏྭཱ ཨཝསེསཱ ཙ སིཀྑཱཔཙྩཀྑཱཏཀོ ཙ ཏིཏྠིཡོ ཙ ཝེདིཏབྦོ.

ཏཏུཏྟརིསིཀྑཱཔདཝཎྞནཱ ནིཊྛིཏཱ.

༨. པཋམཨུཔཀྑཊསིཀྑཱཔདཝཎྞནཱ

༥༢༧-༨. ཨཔི ¶ ཧོཏི ཙིཏྟནྟི ཨཏྠོ. མེཡྻཱཏི པཱཋསྶ མཡ྄ཧནྟི ཨཏྠོ. ན ཨིམེ སུཀརཱ, ‘‘ན ཨིམེསཾ སུཀརཱ’’ཏི ཝཱ པཱཋོ. ‘‘ཏསྶ ན ཨིམེསཾ སུཀརཱ ཨཙྪཱདེཏུནྟི ཨཏྠོ’’ཏི ལིཁིཏཾ. ‘‘པུབྦེ ཨཔྤཝཱརིཏོ’’ཏི ཝཙནཏོ ཏསྨིཾ ཁཎེ པཝཱརིཏོཔི ཨཔྤཝཱརིཏོཝ ཧོཏཱིཏི.

པཋམཨུཔཀྑཊསིཀྑཱཔདཝཎྞནཱ ནིཊྛིཏཱ.

༩. དུཏིཡཨུཔཀྑཊསིཀྑཱཔདཝཎྞནཱ

༥༣༢. དུཏིཡཨུཔཀྑཊེན ཀིཾཔཡོཛནནྟི? ནཏྠི, ཀེཝལཾ ཨཊྛུཔྤཏྟིཝསེན པཉྙཏྟཾ བྷིཀྑུནིཡཱ རཧོནིསཛྫསིཀྑཱཔདཾ ཝིཡ. ཨེཝཾ སནྟེ ཏནྟི ཨནཱརོཔེཏབྦཾ བྷཝེཡྻ ཝིནཱཔི ཏེན ཏདཏྠསིདྡྷིཏོ, ཨནིསྶརཏྟཱ, ཨནཱརོཔེཏུཾ ཨནུཉྙཱཏཏྟཱ ཙ. ཝུཏྟཉྷེཏཾ ‘‘ཨཱཀངྑམཱནོ, ཨཱནནྡ, སངྒྷོ…པེ… སམཱུཧནེཡྻཱ’’ཏི (དཱི. ནི. ༢.༢༡༦). ཨིདཾ སབྦམཀཱརཎཾ. ན ཧི བུདྡྷཱ ཨཔྤཡོཛནཾ ཝཱཙཾ ནིཙྪཱརེནྟི, པགེཝ སིཀྑཱཔདཾ, ཏེནེཝཱཧ ཨཊྛཀཐཱཡཾ ‘‘ཏཉྷི ཨིམསྶ ཨནུཔཉྙཏྟིསདིས’’ནྟིཨཱདི. ཨནུཔཉྙཏྟི ཙ ནིཔྤཡོཛནཱ ནཏྠི, ཏཾསདིསཉྩེཏཾ, ན ནིཔྤཡོཛནནྟི དསྶིཏཾ ཧོཏི, ཨེཝཾ སནྟེ ཀོ པནེཏྠ ཝིསེསོཏི? ཏཏོ ཨཱཧ ‘‘པཋམསིཀྑཱཔདེ ཨེཀསྶ པཱིལཱ༹ ཀཏཱ, དུཏིཡེ དྭིནྣཾ, ཨཡམེཏྠ ཝིསེསོ’’ཏི. ཨིམིནཱ ཨཏྠཝིསེསེན ཀོ པནཉྙོ ཨཏིརེཀཏྠོ དསྶིཏོཏི? པོརཱཎགཎྛིཔདེ ཏཱཝ ཝུཏྟཾ ‘‘ཨེཀསྨིམྤི ཝཏྠུསྨིཾ ¶ ཨུབྷིནྣཾ པཱིལཱ༹ ཀཱཏུཾ ཝཊྚཏཱིཏི ཨཡམཏིརེཀཏྠོ དསྶིཏོ’’ཏི. ཏེནེཏཾ དཱིཔེཏི ‘‘ན ཀེཝལཾ པཊིལདྡྷཙཱིཝརགཎནཱཡེཝ ཨཱཔཏྟིགཎནཱ, པཱིལི༹ཏཔུགྒལསངྑཱཏཝཏྠུགཎནཱཡཔཱི’’ཏི.

ཧོནྟི ཙེཏྠ –

‘‘ཝཏྠུཏོ གཎནཱཡཱཔི, སིཡཱ ཨཱཔཏྟི ནེཀཏཱ;

ཨིཏི སནྡསྶནཏྠཉྩ, དུཏིཡཱུཔཀྑཊཾ ཨིདྷ.

‘‘ཀཱཡསཾསགྒསིཀྑཱཡ, ཝིབྷངྒེ ཝིཡ ཀིནྟེཏཾ;

ཨེཀིཏྠིཡཱཔི ནེཀཏཱ, ཨཱཔཏྟཱིནཾ པཡོགཏོ’’ཏི.

ཨཔིཙེཏཾ ¶ སིཀྑཱཔདཾ ཏཾཛཱཏིཀེསུ སིཀྑཱཔདེསུ སབྦེསུཔི གཧེཏབྦཝིནིཙྪཡསྶ ནཡདསྶནཔྤཡོཛནནྟི ཝེདིཏབྦཾ. ཨཱཧ ཙ –

‘‘ཨཉྙཱཏིཀཱཡ བཧུཏཱཡ ཝིམིསྶཏཱཡ,

ཨཱཔཏྟིཡཱཔི བཧུཏཱ ཙ ཝིམིསྶཏཱ ཙ;

ཨིཙྩེཝམཱདིཝིདྷིསམྦྷཝདསྶནཏྠཾ,

སཏྠཱ ཨུཔཀྑཊམིདཾ དུཏིཡཾ ཨཝོཙཱ’’ཏི.

ཏསྶཱཡཾ སངྑེཔཏོ ཨདྷིཔྤཱཡཔུབྦངྒམཱ ཝིཙཱརཎཱ – པུརཱཎཙཱིཝརཾ ཨེཀམེཝ བྷིཀྑུ བྷིཀྑུནཱིཧི དྭཱིཧི, བཧཱུཧི ཝཱ དྷོཝཱཔེཏི, བྷིཀྑུནིགཎནཱཡ པཱཙིཏྟིཡགཎནཱ, ཏཐཱ དྭིནྣཾ, བཧཱུནཾ ཝཱ སཱདྷཱརཎཾ ཨེཀམེཝ ཙཱིཝརཾ ཨཉྙཏྲ པཱརིཝཏྟཀཱ པཊིགྒཎྷཱཏི, ཨིདྷཱཔི ཏཐཱ དྭིནྣཾ, བཧཱུནཾ ཝཱ སཱདྷཱརཎམེཀཾ ཝིཉྙཱཔེཏི, ཝིཉྙཏྟཔུགྒལགཎནཱཡ ཨཱཔཏྟིགཎནཱ. ཏཐཱ ཨཉྙེསུཔི ཨེཝརཱུཔེསུ སིཀྑཱཔདེསུ ནཡོ ནེཏབྦོ. ཨཡཾ ཏཱཝ བཧུཏཱཡ ནཡོ. མིསྶཏཱཡ པན ཉཱཏིཀཱཡ, ཨཉྙཱཏིཀཱཡ ཙ ཨེཀཾ དྷོཝཱཔེཏི, ཨེཀཏོ ནིཊྛཱཔནེ ཨེཀཾ པཱཙིཏྟིཡཾ. ཨཐ ཉཱཏིཀཱ པཋམཾ ཐོཀཾ དྷོཝིཏྭཱ ཋིཏཱ, པུན ཨཉྙཱཏིཀཱ སུདྷོཏཾ ཀརོཏི, ནིསྶགྒིཡཾ. ཨཐ ཨཉྙཱཏིཀཱ པཋམཾ དྷོཝཏི, པཙྪཱ ཉཱཏིཀཱ སུདྷོཏཾ ཀརོཏི, ཨཉྙཱཏིཀཱཡ པཡོགཝསེན བྷིཀྑུནོ དུཀྐཊམེཝ. ཨཉྙཱཏིཀཱཡ ཙ ཉཱཏིཀཱཡ ཙ ཨཉྙཱཏིཀསཉྙཱི, ཝེམཏིཀོ, ཉཱཏིཀསཉྙཱི ཝཱ དྷོཝཱཔེཏི, ཡཐཱཝུཏྟནཡེན ནིསྶགྒིཡདུཀྐཊཱདིཨཱཔཏྟིབྷེདགཎནཱ ཝེདིཏབྦཱ. ཏཐཱ ཨཉྙཱཏིཀཱཡ ཙ ཉཱཏིཀཱཡ ཙ སནྟཀཾ ཙཱིཝརཾ ཨུབྷོཧི ཨེཀཏོ དིཡྻམཱནཾ པཊིགྒཎྷནྟསྶ ¶ , ཨཉྙཱཏིཀཱཡ ཨེཝ ཧཏྠཏོ པཊིགྒཎྷནྟསྶ ཙ ནིསྶགྒིཡམེཝ. ཨཐ ཉཱཏིཀཱཡ ཨནཱཔཏྟི. ཨཐ ཨུབྷོསུ ཨཉྙཱཏིཀཱདིསཉྙཱི ཝུཏྟནཡེནེཝ ནིསྶགྒིཡདུཀྐཊཱདིཨཱཔཏྟིབྷེདགཎནཱ ཝེདིཏབྦཱ. ཏཐཱ ཨཉྙཱཏཀཝིཉྙཏྟིསིཀྑཱཔདེསུཔི ཡཐཱསམྦྷཝཾ ནཡོ ནེཏབྦོ. ཨཡཾ མིསྶཏཱཡ ནཡོ. ཨཱདི-སདྡེན པན ཨནེཀེ ཨཉྙཱཏིཀཱ ཝིཉྙཏྟཱཝིཉྙཏྟཔུགྒལགཎནཱཡ དུཀྐཊཾ. ཨེཀོ དེཏི, ཨེཀོ ན དེཏི, ནིསྶགྒིཡཾ. ཨཐ ཨཝིཉྙཏྟོ དེཏི, ན ནིསྶགྒིཡཾ. ཨཐ ཝིཉྙཏྟཱཝིཉྙཏྟཱནཾ སཱདྷཱརཎཾ ཝིཉྙཏྟོ དེཏི, ནིསྶགྒིཡམེཝ. ཨུབྷོ དེནྟི, ནིསྶགྒིཡམེཝ. ཨཝིཉྙཏྟོ དེཏི, ནིསྶགྒིཡེན ཨནཱཔཏྟི. ཝིཉྙཏྟསྶ ཝཙནེན ཨཝིཉྙཏྟོ དེཏི, ཨནཱཔཏྟི ཨེཝ. ཏཐཱ ཨུཔཀྑཊཱདཱིསུཔི ཡཐཱསམྦྷཝཾ ནཡོ ནེཏབྦོ.

དུཏིཡཨུཔཀྑཊསིཀྑཱཔདཝཎྞནཱ ནིཊྛིཏཱ.

༡༠. རཱཛསིཀྑཱཔདཝཎྞནཱ

༥༣༧. ‘‘ན ¶ ཁོ མཡཾ, ཨཱཝུསོ, ཙཱིཝརཙེཏཱཔནྣཾ པཊིགྒཎྷཱམ…པེ… ཀཱལེན ཀཔྤིཡ’’ནྟི ཨིཏོ པུབྦེ ཨེཝ རཱུཔིཡཔཊིགྒཧཎསིཀྑཱཔདསྶ པཉྙཏྟཏྟཱ ཝུཏྟཾ. ཨཉྙཐཱ ཨཱཡསྨཱ ཨུཔནནྡོ མཾསསྶ ཙེཏཱཔནྣཾ ཨེཀམྤི ཀཧཱཔཎཾ ཧཏྠེན པཊིགྒཎྷནྟོ ཏཏོ མཧནྟཏརཾ ཙཱིཝརཙེཏཱཔནྣཾ ཀཐཾ ན པཊིགྒཎྷིསྶཏི, ཨེཝཾ སནྟེཔི ཙཱིཝརཔཊིསཾཡུཏྟཏྟཱ ཙཱིཝརཝགྒེ སངྒཱཡིཾསཱུཏི.

༥༣༨-༩. ‘‘ཨཱགཏཀཱརཎཾ བྷཉྫཏཱི’’ཏི ཝུཏྟཏྟཱ ནནུ པུན ཙོདེཏུཾ ན ལབྷཏཱིཏི ཨེཀེ. ཨཱགམནསྶ སཱཏྠཀཾ ན ཧོཏི, ཙཱིཝརཾ ན ལབྷིསྶཏི པཊིསནྠཱརསྶ ཀཏཏྟཱཏི ཨེཀེ. ཙོདནཱལཀྑཎཾ ན ཧོཏཱིཏི ཀཏྭཱ ཝུཏྟནྟི ཨེཀེ. ‘‘ཋཏྭཱ ཙོདེམཱི’’ཏི ཨཱགཏོ ཏཾ ཋཱནཾ བྷཉྫཏི, ཀརོཏི ཙེཀཾ, ཏཱིཎིཔི ཙེ ཀརོཏི, ཨེཀམེཝ, ཨེཀཝཙནཏྟཱཏི ཨེཀེ. ཏཱིཎི ཋཱནཱནི བྷཉྫཏཱིཏི ཨེཀེ. ཨུཔཏིསྶཏྠེརོ ‘‘ན ཙོདནཱདིཾ བྷཉྫཏི, ཙོདེཏུཀཱམོ ཨཀཏྟབྦཾ ཨཀཱསི, ཏེན ཝཏྟབྷེདེ དུཀྐཊ’’ནྟི ཝདཏི. དྷམྨསིརིཏྠེརོ པན ‘‘ཨཱསནེ ཙེ ནིསཱིདཏི, ཨེཀཱཡ ནིསཛྫཱཡ དྭེ ཋཱནཱནི བྷཉྫཏི. ཨཱམིསཾ ཙེ པཊིགྒཎྷཱཏི, ཨེཀེན པཊིགྒཧེན དྭེ ཋཱནཱནི བྷཉྫཏི. དྷམྨཾ ཙེ བྷཱསཏི, དྷམྨདེསནསིཀྑཱཔདེ ཝུཏྟཔརིཙྪེདཱཡ ཨེཀཱཡ ཝཱཙཱཡ དྭེ ཋཱནཱནི བྷཉྫཏི, ཏཾ སནྡྷཱཡ ཝུཏྟ’’ནྟི ཝདཏི. ‘‘ཡཏྠཱ’’ཏི ཝུཏྟེ ཨཏྟནོ ཨེཝ སནྟིཀཾ གནྟབྦནྟི ཝུཏྟཾ ཝིཡ ཧོཏི. ཏེན ཝུཏྟཾ ‘‘བྱཉྫནཾ པན ན སམེཏཱི’’ཏི. ཨུཔཱསཀེཧི ཨཱཎཏྟཱ ཏཾ. མཱུལཾ ཨསཱདིཡནྟེནཱཏི མཱུལསྶ ཨཀཔྤིཡབྷཱཝེ སཏི ཨསཱདིཡནྟེན. ཏཉྩ ཁོ ཙིཏྟེན ¶ , ན མུཁེན. སཙེ ཨེཝཾ ཝུཏྟེ ཨཀཔྤིཡཾ དསྶེཏཱིཏི ཀཏྭཱ ཙིཏྟེན ཨཀཔྤིཡཾ ཨིཙྪནྟོཝ མུཁེན ཀཔྤིཡཾ ནིདྡིསཏི ‘‘ཙཱིཝརཾ མེ དེཐཱ’’ཏི, ན ཝཊྚཏི. པཊིལཱབྷེ རཱུཔིཡཔཊིགྒཧཎསིཀྑཱཔདེན ཨཱཔཏྟི.

ཏཏྲཱཡཾ ཝིཙཱརཎཱ – ཙིཏྟེན སཱདིཡནྟོཔི མུཁེན ཀཔྤིཡཝོཧཱརེན ཙེ ཝོཧརཏི ‘‘ཀཧཱཔཎཱརཧེན, པཱདཱརཧེན ཝཱ ཀཔྤིཡབྷཎྜེན ཨིདཉྩིདཉྩ ཨཱཧརཱ’’ཏི. ཀིཉྩཱཔི རཱུཔིཡཾ སནྡྷཱཡ ཝདཏི, ཝཊྚཏི ཨེཝ. ཀསྨཱ? ཀཉྩི སསྶུཊྛཱནཀཾ བྷཱུམིཔདེསཾ སནྡྷཱཡ ‘‘སཱིམཾ དེམཱཏི ཝདནྟི, ཝཊྚཏཱི’’ཏི ཝཙནཏོ, ‘‘ཝིཧཱརསྶ དེམཱ’’ཏི ཝུཏྟེ ‘‘པཊིཀྑིཔིཏུཾ ན ཝཊྚཏཱི’’ཏི ཝཙནཏོ ཙ. ཨནུགཎྛིཔདེ པན ཝུཏྟཾ ‘‘སངྒྷཾ སནྡྷཱཡ ‘ཝིཧཱརསྶ དེམཱ’ཏི དིནྣཾ གརུབྷཎྜཾ ན ཧོཏི, དཀྑིཎོདཀཾ སམྤཊིཙྪིཏུཾ, ‘སཱདྷཱུ’ཏི ཙ ཝཏྟུཾ, ཨནུམོདེཏུཉྩ ¶ ཝཊྚཏི. ཀསྨཱ? སངྒྷསྶ ‘ཝིཧཱརོ’ཏི ནཱམཱབྷཱཝཏོ, ཁེཏྟསྶེཝ ‘སཱིམཱ’ཏི ནཱམབྷཱཝཏོ ཙ, ཙིཏྟེན ཨཱརམྨཎཾ ཀཏཾ ཨཔྤམཱཎཾ, ཀཔྤིཡཝོཧཱརོཝ པམཱཎཾ. ཀཔྤིཡམེཝཱཙིཀྑིཏཏྟཱ ‘ན ཏྭེཝཱཧཾ, བྷིཀྑཝེ, ཀེནཙི པརིཡཱཡེན ཛཱཏརཱུཔརཛཏཾ སཱདིཏབྦཾ པརིཡེསིཏབྦནྟི ཝདཱམཱི’ཏི (མཧཱཝ. ༢༩༩) ཝཙནེནཔི ན ཝིརུཛ྄ཛྷཏི. ཀཔྤིཡཝཙནཔཙྩཡཱ དཱཡཀོ སཡམེཝ ཀཏྟབྦཡུཏྟཀཾ ཛཱནིསྶཏཱིཏི ཨདྷིཔྤཱཡཏོ དཱཡཀེན ཨེཏསྶ ཨདྷིཔྤཱཡཾ ཉཏྭཱ ཀཔྤིཡཀཱརཀསྶ ཧཏྠེ ཋཔིཏཾ བྷིཀྑུསྶ སནྟཀམེཝ ཧོཏཱི’’ཏི. ཨིདཾ སབྦམཡུཏྟཾ, ཀསྨཱ? སཱིམཱཝིཧཱརཝཙནསྶ དཱཡཀཝཙནཏྟཱ. ཨིདྷ ཙ བྷིཀྑུནོ ཝཙནཾ པམཱཎཾ. ཏེནེཝཱཧ ‘‘ཨཐཱཔི ‘མམ ཏལཱ༹ཀཾ ཝཱ པོཀྑརཎིཾ ཝཱ སངྒྷསྶ དམྨཱི’ཏི ཝུཏྟེ ‘སཱདྷུ, ཨུཔཱསཀ, སངྒྷོ པཱནཱིཡཾ པིཝིསྶཏཱི’ཏིཨཱདཱིནི ཝཏྭཱ པརིབྷུཉྫིཏུཾ ཝཊྚཏི ཨེཝཱ’’ཏི. ཨཉྙཐཱ ཁེཏྟཾ སནྡྷཱཡ བྷིཀྑུནོ ཁེཏྟཔཊིབདྡྷཝཙནཱནི སཱིམཱཝཙནེན ཀཔྤནྟཱིཏི ཨཱཔཛྫཏི. ཨཝིཧཱརསྶ ཙ བྷིཀྑུསྶ རཱུཔིཡཾ དསྶེཏྭཱ ‘‘ཨིདཾ ཝིཧཱརསྶ དམྨཱི’’ཏི ཝུཏྟེ ཨཏྟནོ ཨཏྠཱཡ དིཡྻམཱནཾ ཛཱནནྟེནཱཔི ཏཾ ཨཔྤཊིཀྑིཔིཏབྦཾ. ཏཐཱ ཀཧཱཔཎཱརཧཱདིནོ ཨཀཔྤིཡབྷཎྜབྷཱཝཾ, ཀཧཱཔཎཱདིབྷཱཝམེཝ ཝཱ ཛཱནནྟམེཝ སནྡྷཱཡ ཏཐཱཝོཧརནྟསྶ ཙ ཨནཱཔཏྟཱིཏི ཨཱཔཛྫཏི. ‘‘ན ཏྭེཝཱཧཾ, བྷིཀྑཝེ, ཀེནཙི པརིཡཱཡེནཱ’’ཏི ནིཔྤདེསཏོ ཝུཏྟཏྟཱ ན སཀྐཱ ལེསཾ ཨོཌྜེཏུནྟི ནོ ཏཀྐོ, ཝིཙཱརེཏྭཱ པན གཧེཏབྦཾ. ‘‘ནོ ཙེ ཨིཙྪཏི, ན ཀཐེཏབྦ’’ནྟི ཝཙནཏོ ཡཐཱཝུཏྟསཱམིཙིཡཱ ཨཀརཎེ ཨནཱཔཏྟི དུཀྐཊསྶཱཏི དསྶེཏི.

‘‘ཨཉྙཱཏཀཨཔྤཝཱརིཏེསུ ཝིཡ པཊིཔཛྫིཏབྦ’’ནྟི ཝཙནཏོ ཡཐཱཝུཏྟསཱམིཙིམྤི ན ཀཏྭཱ ཙེ ནིཔྥཱདེཏི, ཨཉྙཱཏཀཝིཉྙཏྟིསིཀྑཱཔདེན ཀཱརེཏབྦོཏི དསྶེཏི. ཀཔྤིཡཀཱརཀཱ སཡམེཝ ཙོདེཏྭཱ དེནྟི, ཝཊྚཏི. ‘‘སཡཾ ཀརཎམེཝ པཊིཀྑིཏྟ’’ནྟི ཙ ཝདནྟི. པིཎྜཔཱཏཱདཱིནཾ ¶ …པེ… ཨེསེཝ ནཡོཏི ཨེཏྠ ‘‘དུཀྐཊ’’ནྟི ཝདནྟི, ཏཾ ན སུནྡརཾ, དདནྟེསུཔཱིཏི ཨཔི-སདྡེན སངྒཧིཏཏྟཱ ནིསྶགྒིཡཔཱཙིཏྟིཡམེཝ. ཛཱཏརཱུཔརཛཏཾ ‘‘སངྒྷེ སཱདིཏེ དུཀྐཊ’’ནྟི ཙ ཝིཀཔྤེནྟི. ཏཾ ཝིསེསེཏྭཱ ནཝུཏྟཏྟཱ པཱཙིཏྟིཡམེཝཱཏི དསྶེཏི. ‘‘ནིསྶགྒིཡམེཝཱཏི ཡེཝཱཔནཀསིཀྑཱཔདེསུ སིཡཱ’’ཏི ཝདནྟི, ཨུཔཔརིཀྑིཏབྦཾ. ‘‘ཡསྶ ཀསྶཙི ཧི ཨཉྙསྶ…པེ… མཧཱཔཙྩརིཡཾ ཝུཏྟ’’ནྟི ཝཙནཏོ ཨཔབྦཛིཏཱནཾ ཨནྟམསོ མཱཏཱཔིཏཱུནམྤི ཨཏྠཱཡ སམྤཊིཙྪནྟསྶ དུཀྐཊམེཝཱཏི དསྶེཏི.

སབྦཏྠ ¶ སམྤཊིཙྪནཾ ནཱམ ‘‘ཨུགྒཎྷེཡྻ ཝཱ ཨུགྒཎྷཱཔེཡྻཝཱ ཨུཔནིཀྑིཏྟཾ ཝཱ སཱདིཡེཡྻཱ’’ཏི ཨེཝཾ ཝུཏྟལཀྑཎམེཝ. ཨེཝཾ སནྟེཔི ཀཏྠཙི པཊིཀྑིཔིཏབྦཾ, ཀཏྠཙི ན པཊིཀྑིཔིཏབྦཾ, ཀཏྠཙི པཊིཀྑིཏྟཾ སཱདིཏུཾ ཝཊྚཏི, ཨེཝཾ ཨཔྤཊིཀྑིཏྟཾ ཀིཉྩི ཝཊྚཏི, ཨིདཾ སབྦམྤི དསྶེཏུཾ ‘‘སཙེ པནཱ’’ཏི ཝིཏྠཱརོ ཨཱརདྡྷོ. ཏཏྠ ‘‘ཙེཏིཡསྶ…པེ… ན ཝཊྚཏཱི’’ཏི ཝཙནཏོ ཨཔྤཊིཀྑིཏྟཾ ཝིཧཱརསྶ དིནྣཾ སཱདིཏུཾ ཝཊྚཏཱིཏི སིདྡྷཾ. ཏཐཱ ཐེརསྶ ‘‘མཱཏུཡཱ དེམཱ’’ཏིཨཱདིནཱ ཝུཏྟེཔི པཊིགྒཧཎེ ཨཱཔཏྟི པཱཙིཏྟིཡམེཝ. སཱཔཏྟིཀོ ཧོཏཱིཏི ཨེཏྠ ཀཱཡ ཨཱཔཏྟིཡཱ སཱཔཏྟིཀོ ཧོཏཱིཏི? དུཀྐཊཱཔཏྟིཡཱཏི ཨེཀེ. ན ཡཱཡ ཀཱཡཙི, ཀེཝལཾ ཨཊྛཱནེ ཙོདེཏཱིཏི ཀཏྭཱ ‘‘སཱཔཏྟིཀོ’’ཏི ཝུཏྟཾ. ཡཐཱ ཀཐནྟི? ‘‘པཉྩཧི, བྷིཀྑཝེ, ཨངྒེཧི སམནྣཱགཏོ སདྡྷིཝིཧཱརིཀོ པཎཱམེཏབྦོ…པེ… པཎཱམེནྟོ ཨནཏིསཱརོ’’ཏི (མཧཱཝ. ༦༨) ཨེཏྠ ན སམྨཱཝཏྟནྟཾཡེཝ ཨཔཎཱམེནྟསྶ དུཀྐཊཾ ཝུཏྟཾ. ཡཐཱཧ – ‘‘ན ཙ, བྷིཀྑཝེ, ཨསམྨཱཝཏྟནྟོ ན པཎཱམེཏབྦོ, ཡོ ན པཎཱམེཡྻ, ཨཱཔཏྟིདུཀྐཊསྶཱ’’ཏི (མཧཱཝ. ༦༨), ཏསྨཱ ཨདྷིམཏྟཔེམཱདིཨབྷཱཝེཔི ཨཔཎཱམེནྟསྶ ཨནཱཔཏྟི དིསྶཏི. ཨཔིཙ ‘‘སཱཏིསཱརོ ཧོཏཱི’’ཏི ཝུཏྟཾ. ཨེཝཾསམྤདམིདཾ དཊྛབྦཾ. ཨཊྛཀཐཱཡ ‘‘སཱཏིསཱརོ ཧོཏཱིཏི སདོསོ ཧོཏི, ཨཱཔཏྟིཾ ཨཱཔཛྫཏཱི’’ཏི (མཧཱཝ. ཨཊྛ. ༦༨) ཝུཏྟཏྟཱ ན ཡུཏྟནྟི ཙེ? ན, ཏདནནྟརམེཝ ཏཾམིཙྪཱགཱཧནིཝཏྟནཏྠཾ, ཏསྨཱ ‘‘ན སམྨཱཝཏྟནྟོ པཎཱམེཏབྦོ’’ཏི ཝུཏྟཏྟཱ ཨནཱཔཏྟིཀཱ ཀཏཱཏི. དུཀྐཊཱཔཏྟི ཧོཏཱིཏི ཨཱཙརིཡོ, ཝཱིམཾསིཏབྦཾ. ‘‘ཀཔྤིཡབྷཎྜམྤི ཨཀཔྤིཡམེཝཱཏི ཏལཱ༹ཀཏོ ནིཔྥནྣདྷཉྙེན པརིཝཏྟེཏྭཱ ལདྡྷཾ གོརསམྤི ན ཝཊྚཏཱི’’ཏི ཝུཏྟཾ.

ཀཔྤིཡཝོཧཱརེཔི ཝིདྷཱནཾ ཝཀྑཱམ, སེཡྻཐིདཾ – ‘‘ཨུདཀཝསེནཱ’’ཏིཨཱདི. དུབྦིནིབྦྷོགཾ ཧོཏཱིཏི ཨིདཾ པརཏོ ‘‘ཏསྶེཝ ཨཀཔྤིཡཾ. ཀསྨཱ? དྷཉྙསྶ ཝིཙཱརིཏཏྟཱ’’ཏི ཨིམིནཱ ཨསདིསཾ, ཏསྨཱ སུཝུཏྟཾ. ཨིདཉྷི བྷིཀྑུསྶ པཡོགཝསེན ཨཱདིཏོ པཊྛཱཡ ཨུཔྤནྣེན མིསྶནྟི. ཨཀཏཔུབྦཾ ནཝསསྶཾ ནཱམ. ཁལེ ཝཱ ཋཏྭཱ རཀྑཏཱིཏི ‘‘ཨིདཾ ཝཱ ཨེཏྟཀཾ ཝཱ མཱ གཎྷ, ཨིདཾ གཧེཏུཾ ལབྦྷཏཱི’’ཏི ཝཱ ‘‘ཨིཏོ ཨཔནེཧི, ཨིདྷ པུཉྫཾ ཀརོཧཱི’’ཏི ཨེཝམཱདིནཱ ཝཱ པཡོགེན ¶ ཙེ རཀྑཏི, ཏཾ ཨཀཔྤིཡཾ. ‘‘སཙེ ‘མཡིཋིཏེ རཀྑིཏཾ ཧོཏཱི’ཏི རཀྑཏི, གཎྷནྟེ ཝཱ པསྶིཏྭཱ ‘ཀིཾ ཀརོཐཱ’ཏི, བྷཎཏི ཝཊྚཏཱི’’ཏི ཝུཏྟཾ, ཏཾ ཡུཏྟཾ. རཱུཔིཡཔཊིགྒཧཎསིཀྑཱཔདེ ‘‘དྭཱརཾ པིདཧིཏྭཱ རཀྑནྟེན ཝསིཏབྦ’’ནྟི ཧི ¶ ཝུཏྟཾ. ཏསྶེཝ ཏཾ ཨཀཔྤིཡཾ. ཀསྨཱ? ཨཔུབྦསྶ ཨནུཔྤཱདིཏཏྟཱ. ཧེཊྛཱ ‘‘སསྶཾ ཀཏྭཱ ཨཱཧརཐཱ’’ཏི ཝཏྟུཾ པན ན ཝཊྚཏཱིཏི. པཎྞེཔི ཨེསེཝ ནཡོ. ‘‘པཀཏིཡཱ སཡམེཝ ཀརོནྟཱནཾ ཨུསྶཱཧཛནནཏོ’’ཏི ཝུཏྟཾ. ཀསྨཱ? ‘‘ཀཧཱཔཎཱནཾ ཝིཙཱརིཏཏྟཱ’’ཏི ཝཙནཏོ, པགེཝ ཨུཊྛཱཔིཏཏྟཱཏི སིདྡྷཾ ཧོཏི. སཙེ དཱཡཀཱ ཝཱ སངྒྷསྶ གཱམཁེཏྟཱརཱམཱདིཾ ཀེཎིཡཱ གཧིཏམནུསྶཱ ཝཱ ཏཏྠ ཀུཊུམྦིནོ ‘‘ཨིམེ སངྒྷསྶ ཀཧཱཔཎཱ ཨཱཧཊཱ’’ཏི ཝདནྟི, ‘‘ན ཀཔྤཏཱི’’ཏི ཨེཏྟཀམེཝ ཝཏྟབྦཾ. ཀཔྤིཡཀཱརཀཱཝ ཙེ ཝདནྟི, ‘‘སངྒྷསྶ ཀཧཱཔཎཱ ན ཀཔྤནྟི, སཔྤིཨཱདཱིནི ཝཊྚནྟཱི’’ཏི ཝཏྟབྦཾ, ཏསྨཱ ‘‘སངྒྷསྶ ཀཔྤིཡཀཱརཀེ ཝཱ གུཏྟཊྛཱནཾ ཝཱ ཨཱཙིཀྑཐཱ’’ཏི ཝཏྭཱ ཏེཧི སམྤཱདིཏཾ ཀེནཙི ཨཀཏྟབྦཏཱཡ ‘‘ཨིམིནཱ སཔྤིཾ ཨཱཧརཱཧཱི’’ཏི ཝིཙཱརེཏི ནིཊྛཱཔེཏྭཱ ཨིཏརེསཾ ཀཔྤིཡཾ པརཏོ པཏྟཙཏུཀྐེ ཙཏུཏྠཔཏྟོ ཝིཡ. ཝུཏྟཉྷི ཏཏྠ ‘‘ཨིམེ ཀཧཱཔཎེ གཧེཏྭཱ ཨིམཾ དེཧཱི’ཏི ཀཧཱཔཎེ དཱཔེཏྭཱ གཧིཏོ, ཨཡཾ པཏྟོ ཨེཏསྶེཝ བྷིཀྑུནོ ན ཝཊྚཏི, དུབྦིཙཱརིཏཏྟཱ, ཨཉྙེསཾ པན ཝཊྚཏི, མཱུལསྶ ཨསམྤཊིཙྪིཏཏྟཱ’’ཏིཨཱདི. ཡདི ཨེཝཾ སབྦེསཾ ཨཀཔྤིཡཾ. ཀསྨཱ? ཀཧཱཔཎཱནཾ ཝིཙཱརིཏཏྟཱཏི. ཨིདཾ དུཝུཏྟནྟི ཙེ? ན, མཱུལསྶ སམྤཊིཙྪིཏཊྛཱནཾ སནྡྷཱཡ ཨིམསྶ ཝུཏྟཏྟཱ པཏྟཙཏུཀྐེ དུཏིཡཏཏིཡཔཏྟཱ ཝིཡ, ཏེནེཝ ཝུཏྟཾ སཡཾཀཱརིཝཱརེ ‘‘ན ཀཔྤཏཱི’’ཏི ཨེཏྟཀམེཝ ཝཏྟབྦ’ནྟི. ཏཏོ པརཾ མཱུལཾ སམྤཊིཙྪཏི ནཱམ.

མཧཱཝིསཡསིཀྑཏྟཱ, རཱཛསིཀྑཱཔདཾ ཨིདཾ;

རཉྙོ ཝིཡ དུཝིཉྙེཡྻཾ, ཙིཏྟཱདྷིཔྤཱཡཏོཔི ཝཱ.

རཱཛསིཀྑཱཔདཝཎྞནཱ ནིཊྛིཏཱ.

ནིཊྛིཏོ ཙཱིཝརཝགྒོ པཋམོ.

༢. ཀོསིཡཝགྒོ

༡. ཀོསིཡསིཀྑཱཔདཝཎྞནཱ

༥༤༢. ཀོསིཡཀཱརཀོཏི ¶ ཨེཏྠ ཀོསཾ ཀརོནྟཱིཏི ‘‘ཀོསཀཱརཱ’’ཏི ལདྡྷཝོཧཱརཱནཾ པཱཎཀཱནཾ ཀོསཏོ ནིབྦཏྟཾ ཀོསིཡཾ ནཱམ. ཨཏྟནཱ ཀཏཾ ཙེ? ནིསྶཛྫནཀཱལེ ‘‘སཡཾ ཀཏཾ ནིསྶགྒིཡ’’ནྟི ཝཏྟབྦཾ. ཨུབྷོཧི ¶ ཙེ ཀཏཾ, ཡཐཱཔཱཋམེཝ ཝཏྟབྦཾ. ཨཏྟནཱ ཙ པརེཧི ཙ ཝིཔྤཀཏཾ ཨཏྟནཱ པརིཡོསཱཔེཏཱིཏིཨཱདིཙཏུཀྐམྤི སམྦྷཝནྟཾ ན དསྶིཏཾ. ཝིནཡདྷམྨཏཱ ཧེསཱ, ཡདིདཾ ཨེཀསྨིཾ ཏིཀེ ཝཱ ཙཏུཀྐེ ཝཱ དསྶིཏེ ཨིཏརཾ སམྦྷཝནྟམྤི ན ཝུཙྩཏཱིཏི.

ཀོསིཡསིཀྑཱཔདཝཎྞནཱ ནིཊྛིཏཱ.

༢. སུདྡྷཀཱལ༹ཀསིཀྑཱཔདཝཎྞནཱ

༥༤༧. སུདྡྷཀཱལ༹ཀཱནནྟི ཨེཏྠ ཡཐཱ པཋམེ ‘‘ཨེཀེནཔི ཀོསིཡཾསུནཱ’’ཏི ཝུཏྟཾ, ཏཐཱ ཨིདྷ ‘‘ཨེཀེནཔི ཨཉྙེན ཨམིསྶེཏྭཱ’’ཏི ཝཙནཱབྷཱཝཏོ ཨཉྙེཧི མིསྶབྷཱཝེ སཏིཔི ཨཔཉྙཱཡམཱནརཱུཔཀཾ ‘‘སུདྡྷཀཱལ༹ཀ’’མིཙྩེཝ ཝུཙྩཏཱིཏི ཝེདིཏབྦཾ.

སུདྡྷཀཱལ༹ཀསིཀྑཱཔདཝཎྞནཱ ནིཊྛིཏཱ.

༣. དྭེབྷཱགསིཀྑཱཔདཝཎྞནཱ

༥༥༢. ‘‘དྷཱརཡིཏྭཱ དྭེ ཏུལཱ ཨཱདཱཏབྦཱ’’ཏི ཝཙནཏོ ཡཐཱ ཏུལཱདྷཱརཎཱཡ ཀཱལ༹ཀཱ ཨདྷིཀཱ ན ཧོནྟི, ཏཐཱ ཀཱལ༹ཀཱནཾ དྭེ བྷཱཝཱ གཧེཏབྦཱ ཨུཀྐཊྛཔརིཙྪེདེན. ཀཐཾ པཉྙཱཡཏཱིཏི? སུདྡྷཀཱལ༹ཀཔཊིསེདྷནནིདཱནེན. ཏཏིཡཾ ཨོདཱཏཱནཾ ཙཏུཏྠཾ གོཙརིཡཱནནྟི ཧེཊྛིམཔརིཙྪེདོ. མཱཏིཀཱཊྛཀཐཱཡཾ པན ‘‘ཨེཀསྶཔི ཀཱལ༹ཀལོམསྶ ཨཏིརེཀབྷཱཝེ ནིསྶགྒིཡ’’ནྟི (ཀངྑཱ. ཨཊྛ. དྭེབྷཱགསིཀྑཱཔདཝཎྞནཱ) ཝུཏྟཾ, ཏཾ ཏུལཱདྷཱརཎཱཡ ཀིཉྩཱཔི ན སམེཏི, ཨཙིཏྟཀཏྟཱ པན སིཀྑཱཔདསྶ པུབྦེ ཏུལཱཡ དྷཱརཡིཏྭཱ ཋཔིཏེསུ ཨེཀམྤི ལོམཾ ཏཏྠ ¶ པཏེཡྻ ནིསྶགྒིཡནྟི ཨདྷིཔྤཱཡོཏི ནོ ཏཀྐོ. ཨཉྙཐཱ དྭེ ཏུལཱ ནཱདཱཏབྦཱ, ཨཱུནཀཏརཱ ཨཱདཱཏབྦཱ སིཡུཾ. ན ཧི ལོམཾ གཎེཏྭཱ ཏུལཱདྷཱརཎཱ ཀརཱིཡཏི. ཨཐ གཎེཏྭཱཝ ཀཱཏབྦཾ. ཀིཾ ཏུལཱདྷཱརཎཱཡ པཡོཛནནྟི ཀེཙི. ‘‘གོཙརིཡཨོདཱཏེསུ ཨེཀམེཝ དིགུཎཾ ཀཏྭཱ གཧེཏུཾ ཝཊྚཏཱི’’ཏི ཝདནྟི, ཨཊྛཀཐཱཡཾ ཨཝིཙཱརིཏཏྟཱ ཝཱིམཾསིཏབྦཾ.

དྭེབྷཱགསིཀྑཱཔདཝཎྞནཱ ནིཊྛིཏཱ.

༤. ཚབྦསྶསིཀྑཱཔདཝཎྞནཱ

༥༦༢. ནཝཾ ¶ ནཱམ ཀརཎཾ ཨུཔཱདཱཡཱཏི ཨིདཾ ཨཱདིཀརཎཏོ པཊྛཱཡ ཝསྶགཎནཾ དཱིཔེཏི. ཀརིཏྭཱ ཝཱཏི ཝཙནཾ ནིཊྛཱནདིཝསཏོ པཊྛཱཡཱཏི དཱིཔེཏི. དྷཱརེཏབྦནྟི ཝཙནཾ པན པརིབྷོགཏོ པཊྛཱཡཱཏི དཱིཔེཏི, ཡསྨཱ ལདྡྷསམྨུཏིཀསྶ གཏགཏཊྛཱནེ ཚནྣཾ ཚནྣཾ ཝསྶཱནཾ ཨོརཏོཝ ཀཏཱནི བཧཱུནིཔི ཧོནྟི, ཏསྨཱ ཨཉྙཾ ནཝནྟི ཀིཾ ཀཏཏོ ཨཉྙཾ, ཨུདཱཧུ དྷཱརིཏཏོ ཨཉྙནྟི? ཀིཉྩེཏྠ ཡདི ཀཏཏོ ཨཉྙཾ, ཏེསུ ཨཉྙཏརཾ དུཀྐཏཾ ཝཱ པརིབྷོགཛིཎྞཾ ཝཱ པུན ཀཱཏུཾ ཝཊྚཏི, ཏཉྩ ཁོ ཝིནཱཔི པུརཱཎསནྠཏསྶ སུགཏཝིདཏྠིཾ ཨཔྤཊིསིདྡྷཔརིཡཱཔནྣཏྟཱ. ཀཏཏོ ཧི ཨཉྙཾ པཊིསིདྡྷཾ, ཨིདཉྩ པུབྦཀཏནྟི ཏཏོ ཨནནྟརསིཀྑཱཔདཝིརོདྷོ ཧོཏི. ཨཐ དྷཱརིཏཏོ ཨཉྙཾ ནཱམ, སམྨུཏི ནིརཏྠིཀཱ ཨཱཔཛྫཏི, པཋམཀཏཾ ཙེ ཨཔརིབྷུཏྟཾ, སཏིཡཱཔི སམྨུཏིཡཱ ཨཉྙཾ ནཝཾ ན ཝཊྚཏཱིཏི ཨདྷིཔྤཱཡོ? ཏཏྲིདཾ སནྣིཊྛཱནནིདསྶནཾ – ནིཊྛཱནདིཝསཏོ པཊྛཱཡ ཚནྣཾ ཚནྣཾ ཝསྶཱནཾ པརིཙྪེདོ ཝེདིཏབྦོ. ཏཏྠ ཙ སཏྟམེ ཝསྶེ སམྤཏྟེ ཚབྦསྶཱནི པརིཔུཎྞཱནི ཧོནྟི. ཏཉྩ ཁོ མཱསཔརིཙྪེདཝསེན, ན ཝསྶཔརིཙྪེདཝསེན. སཏྟམེ པརིཔུཎྞཉྩ ཨཱུནཀཉྩ ཝསྶཾ ནཱམ, ཏསྨཱ ཝིཔྤཀཏསྶེཝ སཙེ ཚབྦསྶཱནི པཱུརེནྟི, པུན ནིཊྛཱནདིཝསཏོ པཊྛཱཡ ཚབྦསྶཱནི ལབྷནྟི. ཏཉྩ ཁོ པརིབྷུཏྟཾ ཝཱ ཧོཏུ ཨཔརིབྷུཏྟཾ ཝཱ, དྷཱརིཏམེཝ ནཱམ. ཡསྨཱ ‘‘ནཝཾ ནཱམ ཀརཎཾ ཨུཔཱདཱཡ ཝུཙྩཏཱི’’ཏི ཝུཏྟཾ, ཏསྨཱ ཚནྣཾ ཝསྶཱནཾ པརཏོ ཏམེཝ པུབྦཀཏཾ དུཀྐཏབྷཱཝེན, པརིབྷོགཛིཎྞཏཱཡ ཝཱ ཝིཛཊེཏྭཱ པུན ཀརོཏི, ནིཊྛཱནདིཝསཏོ པཊྛཱཡ ཚབྦསྶཔརམཏཱ དྷཱརེཏབྦཾ, ཨཏིརེཀཾ ཝཱ. ཨནྟོ ཙེ ཀརོཏི, ཏདེཝ ཨཉྙཾ ནཝཾ ནཱམ ཧོཏི ཀརཎཾ ཨུཔཱདཱཡ, ཏསྨཱ ནིསྶགྒིཡཾ. ཨཉྙཐཱ ‘‘ནཝཾ ནཱམ ཀརཎཾ ཨུཔཱདཱཡཱ’’ཏི ཨིམིནཱ ན ཀོཙི ཝིསེསོ ཨཏྠི. ཨེཝཾ སནྟེ ཀིཾ ཧོཏི? ཨཊྛུཔྤཏྟཱིཏི. ‘‘ཡཱཙནབཧུལཱ ཝིཉྙཏྟིབཧུལཱ ཝིཧརནྟཱི’’ཏི ཧི ཏཏྠ ཝུཏྟཾ, ཏཉྩ ཨཉྙསྶ ཀརཎཾ དཱིཔེཏི. ཡདི ཨེཝཾ ཏཾ ནིབྦིསེསམེཝ ཨཱཔཛྫཏཱིཏི? ནཱཔཛྫཏི. ཨཡཾ པནསྶ ཝིསེསོ, ཡསྨཱ ‘‘ཨཉྙེན ཀཏཾ པཊིལབྷིཏྭཱ པརིབྷུཉྫཏི, ཨནཱཔཏྟཱི’’ཏི ཝུཏྟཏྠོ ཝིསེསོཏི. ཀིཾ ཝུཏྟཾ ཧོཏི ¶ ? ‘‘ནཝཾ ནཱམ ཀརཎཾ ཨུཔཱདཱཡ ཝུཙྩཏཱི’’ཏི ཝུཏྟེ ཨཏིརེཀཙཱིཝརསྶ ཨུཔྤཏྟི ཝིཡ པཊིལཱབྷེནསྶ ཨུཔྤཏྟི ནཝཏཱ ཨཱཔཛྫཏི. ཏཏོ པཊིལདྡྷདིཝསཏོ པཊྛཱཡ ¶ ཚབྦསྶཔརམཏཱ དྷཱརེཏབྦཾ. ཨོརེན ཙེ ཚནྣཾ ཝསྶཱནཾ…པེ… ཀཱརཱཔེཡྻ, ནིསྶགྒིཡནྟི ཨཱཔཛྫཏི, ཏསྨཱ ནཝཾ ནཱམ ཀརཎམེཝ ཨུཔཱདཱཡ ཝུཙྩཏི, ན པཊིལཱབྷཾ. ཨོརེན ཚནྣཾ ཝསྶཱནཾ ཨཏྟནོ ཨནུཔྤནྣཏྟཱ ‘‘ནཝ’’ནྟི སངྑྱཾ གཏཾ, ཨཔྤཊིལདྡྷཾ ཙེ ཀཱརཱཔེཡྻ, ཡཐཱ ལཱབྷོ, ཏཐཱ ཀརེཡྻ ཝཱ ཀཱརཱཔེཡྻ ཝཱཏི ཙ ན ཧོཏི. ཀསྨཱ? ཡསྨཱ ཨཉྙེན ཀཏཾ པཊིལབྷིཏྭཱ པརིབྷུཉྫཏི, ཨནཱཔཏྟཱིཏི ཝིསེསོཏི.

ཚབྦསྶསིཀྑཱཔདཝཎྞནཱ ནིཊྛིཏཱ.

༥. ནིསཱིདནསནྠཏསིཀྑཱཔདཝཎྞནཱ

༥༦༥. ནཱསྶུདྷ ཀོཙཱིཏི ཨེཏྠ ཨསྶུདྷ-ཨིཏི ཨཝདྷཱརཎཏྠེ ནིཔཱཏོ. ཏཏྠ ཀིཉྩཱཔི ‘‘ཨེཝཾ བྷནྟེཏི ཁོ ཏེ བྷིཀྑཱུ’’ཏི བཧུཝཙནཾ ཝུཏྟཾ, ཏཐཱཔི ཏེ བྷིཀྑཱུ བྷགཝཏོ པཊིསྶུཎིཏྭཱ ཨིདྷ ཏེསུ བྷིཀྑཱུསུ ཀོཙི བྷགཝནྟཾ ནཱསྶུདྷ ཨུཔསངྐམཏི ཨཉྙཏྲ ཨེཀེནཱཏི ཨཏྠོ གཧེཏབྦོ. ཏཾ སུགྒཱཧཾ ཨེཀཱཧཾ བྷནྟེ བྷགཝནྟཾ ཝརནྟིཨཱདཱིསུ (མཧཱཝ. ༣༣༧) ཝིཡ, ཨནུཛཱནཱམི…པེ… ཡཐཱསུཁཾ མཾ དསྶནཱཡ ཨུཔསངྐམནྟཱུཏི དསྶནཏྠཱཡ ཨུཔསངྐམནྟུ.

༥༦༦-༧. ‘‘མཡཾ ཨཱཡསྨནྟཾ ཨུཔསེན’’ནྟི ཏསྶ གཎཔཱམོཀྑཏྟཱ ཝུཏྟཾ. ཨཱརཉྙིཀཔིཎྜཔཱཏིཀཔཾསུཀཱུལིཀཝསེན སབྦཱནི ཝུཏྟཱནི. ཏེནེཝཱཧ ཨཊྛཀཐཱཡཾ ‘‘སནྠཏེ ཙཏུཏྠཙཱིཝརསཉྙིཏཱཡཱ’’ཏི. ཀིཾ སབྦེཔི ཏེ ཙཱིཝརཾ ན བུཛ྄ཛྷནྟཱིཏི ཙེ? ཡཐཱ ཧོཏུ. ཀཏམཾ ཙཱིཝརཾ ནཱམཱཏི? ཚནྣཾ ཨཉྙཏརཾ ཝིཀཔྤནུཔགཾ པཙྪིམནྟི. ཀིཉྩ ཝཱཡིམཾ ཨཝཱཡིམནྟི? ཝཱཡིམམེཝཱཏི. ཀཏརསུཏྟེནཱཏི? ཨདྡྷཱ སོ སུཏྟམེཝ ན པསྶཏི, སིཝེཡྻཀཾ དུསྶཡུགཾ, ཨིདྡྷིམཡིཀཉྩ དེཝདཏྟིཡཉྩ ཨཙཱིཝརཾ ཀརོཏི. ཡདི ཨེཝཾ ཨཝཱཡིམམྤཱིཏི ཝདཱམཱིཏི. ཨེཝཾ སནྟེ སིདྡྷཱ སནྠཏེ ཙཱིཝརསཉྙིཏཱ ཀམྦལསཱིསེན ཨུཎྞཱམཡསཱམཉྙཏོ. ཀིཾ པན ཏེ སནྠཏཾ ཨདྷིཊྛཧིཾསཱུཏི? དུཊྛུ ཨདྷིཊྛཧིཾསུ ཨཙཱིཝརཏྟཱ, ན ཨདྷིཊྛཱནུཔགཏྟཱ ཙ སནྠཏསྶ. ཨཐ ནཱདྷིཊྛཧིཾསུ, པུབྦེཝ ཏཏྠ ཨཙཱིཝརསཉྙིནོ ཨེཏེཏི ཀཏྭཱ ཏཏྠ ཙཱིཝརསཉྙིཏཱཡ ཏདུབྷཡཾ ན ཡུཛྫཏཱིཏི. ཀིཾ པནེཏཾ ཨདྷིཊྛཱནུཔགཾ ནཏྠཱིཏི? ཏཏྠེཝཱགཏཾ ¶ , ཨཔིཙེཏཾ ཨཝིཀཔྤནུཔགཾ ཙེ, ཙཱིཝརཾ ན ཧོཏི, ཨཉྙཐཱ ‘‘ཙཱིཝརཾ ནཱམ ཚནྣཾ ཙཱིཝརཱནཾ ཨཉྙཏར’’ནྟི ཨེཏྟཱཝཏཱ སིདྡྷཾ ‘‘ཝིཀཔྤནུཔགཾ པཙྪིམ’’ནྟི ན ཝཏྟབྦཾ. ཨཐ ན ཝིཀཔྤནུཔགམྤི ཙཱིཝརམེཝ སིདྡྷཾ, ཨནདྷིཊྛཱནུཔགཾ ¶ , ཨཝིཀཔྤནུཔགཉྩ ཨེཀཛ྄ཛྷཾ ‘‘ཙཱིཝར’’ནྟི སངྑྱཾ གཙྪཏི. ཏེནེཝཱཧ ‘‘ཏེཙཱིཝརིཀསྶ ཙཏུཏྠཙཱིཝརཾ ཝཏྟམཱནཾ ཨཾསཀཱསཱཝམེཝ ཝཊྚཏཱི’’ཏི.

ཨཔིཙ སནྠཏེ ཙཱིཝརསཉྙིཏཱ ན ཀེཝལཾ ཏེསཾཡེཝ, ཨཉྙེསམྤི ཨནུབནྡྷཏི ཨེཝ ‘‘པུརཱཎསནྠཏཾ ནཱམ སཀིཾ ནིཝཏྠམྤི སཀིཾ པཱརུཏམྤཱི’’ཏི ཝཙནཏོ. ཨཊྛཀཐཱཙརིཡོ པནསྶ ཨཙཱིཝརཏཾ སནྡྷཱཡབྷཱསིཏཏྠདཱིཔནེན དཱིཔེཏི. ནིཝཏྠཔཱརུཏནྟི ཨེཏེསཾ ནིསིནྣཉྩེཝ ནིཔནྣཉྩཱཏི ཨཏྠོ. ཨཔིཙ ཨེཝཾ སནྟེཔི སནྠཏེ ཙཱིཝརསཉྙིཏཱ ཨནུབནྡྷཏི ཨེཝ. ཁནྡྷཀེ (མཧཱཝ. ༣༥༨) ཧི ‘‘ནིསཱིདནཾ ཨདྷིཊྛཱཏུཾ ན ཝིཀཔྤེཏུ’’ནྟི ཙ, པརིཝཱརེ (པརི. ༣༢༩) ‘‘ནཝ ཙཱིཝརཱནི ཨདྷིཊྛཱཏབྦཱནཱི’’ཏི ཙ ནིསཱིདནསིཀྑཱཔདེ ‘‘དསཱ ཝིདཏྠཱི’’ཏི ཙ ཨིདྷ ‘‘ནིསཱིདནཾ ནཱམ སདསཾ ཝུཙྩཏཱི’’ཏི ཙ ཝུཏྟཾ, ཨཊྛཀཐཱཡཉྩསྶ ‘‘སནྠཏསདིསཾ སནྠརིཏྭཱ ཨེཀསྨིཾ ཨནྟེ སུགཏཝིདཏྠིཡཱ ཝིདཏྠིམཏྟཔདེསེ དྭཱིསུ ཋཱནེསུ ཕཱལེཏྭཱ ཏིསྶོ དསཱ ཀརཱིཡནྟི, ཏཱཧི དསཱཧི སདསཾ ནཱམ ཝུཙྩཏཱི’’ཏི ཙ ‘‘ནིསཱིདནཾ ཝུཏྟནཡེན ཨདྷིཊྛཱཏབྦམེཝ, ཏཉྩ ཁོ པམཱཎཡུཏྟཾ ཨེཀམེཝ, དྭེ ན ཝཊྚནྟཱི’’ཏི ཙ ཝུཏྟཾ, ཏསྨཱ ནིསཱིདནཾ ནཱམ ནཝནྣཾ ཙཱིཝརཱནཾ ཨཉྙཏརཾ ཙཱིཝརཾ ཨདྷིཊྛཱཏབྦཾ, ཏཉྩ སནྠཏསདིསཾ ཨེལ༹ཀལོམམཡསནྠཏཝིསེསནྟི སིདྡྷཾ, ཏཐཱ ནིསཱིདནམེཝ ནིསཱིདནསནྠཏཉྩ སིདྡྷཾ. པོརཱཎགཎྛིཔདེ ཙ ‘‘ཨེཀམེཝཱ’’ཏི ཝུཏྟཾ. ཏསྨིཾ སིདྡྷེ སིདྡྷཱ སནྠཏེ ཙཱིཝརསཉྙིཏཱཏི ཨཏྠོ. ཀསྨཱ? སནྠཏསཱམཉྙཏོ.

ཨེཏྠཱཧ – ཀཐཾ ཨདསམེཝ སནྠཏཾ ཙཱིཝརསངྑྱཾ ན གཙྪཏི. ཨནེཀམྤི ཨནདྷིཊྛིཏམྤི མཧནྟམྤི ཝཊྚཏི, ཡཏོ སདསམེཝ སནྠཏཾ ཙཱིཝརསངྑྱཾ གཙྪཏི, ཏཏོ ཨདྷིཊྛཱནཉྩ ཨུཔགཙྪཏཱིཏི. ཨསནྠཏཔརིཡཱཔནྣཏྟཱ ཨོརེན ཙ ཚནྣཾ ཝསྶཱནཾ ཝིནཱཔི སམྨུཏིཾ, ཏཉྩ པོརཱཎཾ ཝིསྶཛྫེཏྭཱ ཨེཝ, ན ཨཝིསྶཛྫེཏྭཱ ‘‘ཏཉྩ ཁོ པམཱཎཡུཏྟཾ ཨེཀམེཝ, དྭེ ན ཝཊྚནྟཱི’’ཏི (པཱརཱ. ཨཊྛ. ༢.༤༦༩) ཝཙནཏོཏི. ཨཐཱཔི སིཡཱ སནྠཏཾ སཡནཏྠམེཝ ཀརཱིཡཏི, ནིསཱིདནཾ ཨསནྠཏམེཝཱཏི. ཏཉྩ ན ནིཡམཏོ ‘‘པུརཱཎསནྠཏཾ ནཱམ སཀིཾ ནིཝཏྠཾ སཀིཾ པཱརུཏམྤཱི’’ཏི ཝུཏྟཏྟཱཏི. ཨེཏྠ ཝུཙྩཏི, ན ཨེཏྠ ཀཱརཎཾ པརིཡེསིཏབྦཾ ཝིནཡཔཉྙཏྟིཡཱ ཨནཉྙཝིསཡཏྟཱ.

སནྠཏསྶ ¶ པན ཨཙཱིཝརབྷཱཝེ ཨཡཾ ཡུཏྟི – ཨཱདིཏོ ‘‘ཏཱིཎི སནྠཏཱནི པན ཝིནཡཀམྨཾ ཀཏྭཱ པཊིལབྷིཏྭཱ པརིབྷུཉྫིཏུཾ ན ཝཊྚནྟཱི’’ཏི ཨཊྛཀཐཱཝཙནཏོ ཏཱནི ཨཀཔྤིཡཱནཱིཏི སིདྡྷཾ, བྷགཝཏཱ ཙ ཁོམཱདཱིནི ཚ ཨནུཉྙཱཏཱནཱིཏི ཀོསེཡྻཾ ཀཔྤིཡནྟི སིདྡྷཾ. ཨེཝཾ སནྟེ སུདྡྷཀོསེཡྻམྤི ཙཱིཝརཾ ཀཔྤིཡཾ ཛཱཏཾ, པགེཝ ཀོསིཡམིསྶཀསནྠཏཙཱིཝརནྟི ¶ ཨཱཔཛྫཏི. ཏཐཱ ཀམྦལཉྩ ཨནུཉྙཱཏཾ, ཏཉྩ སུདྡྷིཀམྤི ཧོཏི ཛཱཏིཀཱལ༹ཀབྷཱཝེན, པགེཝ ཨོདཱཏགོཙརིཡམིསྶཀསནྠཏཙཱིཝརནྟི ཨཱཔཛྫཏི. ཏཏོ ཙ ཨཉྙམཉྙཝིརོདྷོ, ཏསྨཱ ན སནྠཏཾ ཙཱིཝརཾ ནཱམ ཧོཏི, ནིསཱིདནཾ པན ཧོཏི ཏསྶ པམཱཎསཎྛཱནཔརིཙྪེདསམྦྷཝཏོ. ཨེཏྠཱཧུ ཀེཙི ཨཱཙརིཡཱ ‘‘དུཝིདྷཾ ནིསཱིདནཾ སནྠཏཾ, ཨསནྠཏཉྩ. ཏཏྠ སནྠཏཾ སནྠཏམེཝ. ཨསནྠཏཾ ཁོམཱདིཚབྦིདྷཾ, ཏདནུལོམཾ ཝཱ ཧོཏི, ཨཡམེཏེསཾ ཝིསེསོ’’ཏི.

ཨེཏྠཱཧ – ཀསྨཱ པནེཏྠ ‘‘སནྠཏཾ པན བྷིཀྑུནཱ’’ཏི སིཀྑཱཔདཾ ཨཔཉྙཱཔེཏྭཱ ‘‘ནིསཱིདནསནྠཏ’’ནྟི པཉྙཏྟནྟི? ཙཱིཝརསཉྙིཏཱཡ སནྠཏཱནཾ ཨུཛ྄ཛྷིཏཏྟཱ ཏེསཾ ཨཙཱིཝརབྷཱཝདསྶནཏྠཾ ཏཐཱ པཉྙཏྟནྟི ཝུཏྟཾ ཧོཏི, ཏསྨཱ ཏེ བྷིཀྑཱུ དྷུཏངྒབྷེདབྷཡཱ ཏཱནི ཨུཛ྄ཛྷིཏྭཱ ཏེརསཱཔི དྷུཏངྒཱནི སམཱདིཡིཾསུ, སཱིསདསྶནཝསེན ཏཱིཎེཝ ཝུཏྟཱནི, བྷགཝཱ ཙ ཏེསཾ སནྠཏཾ ཨནུཛཱནི, ཏཏོ ནེསཾ ཨེཝཾ ཧོཏི ‘‘ནིསཱིདནཙཱིཝརསཎྛཱནམྤེཏཾ ནིསཱིདནསནྠཏཾ ནོ ཨནུཉྙཱཏཾ, ཙཏུཏྠཙཱིཝརབྷཱཝེན པགེཝ ཀཏསནྠཏཾ ཝཱ’’ཏི. ཏཏོ སནྠཏེ ནེསཾ ཙཱིཝརསཉྙིཏཱ ན བྷཝིསྶཏཱིཏི ཏདཏྠཾ བྷགཝཏཱ ནིསཱིདནསནྠཏནྟི པཉྙཏྟནྟི ཨདྷིཔྤཱཡོ. ‘‘པཙྪིམཱནི དྭེ ཝཊྚནྟཱི’’ཏི ཀཐཾ པཉྙཱཡཏཱིཏི ཙེ? ‘‘ཨནཱཔཏྟི ཨཉྙེན ཀཏཾ པཊིལབྷིཏྭཱ པརིབྷུཉྫཏཱི’’ཏི ཝཙནཏོཏི.

ནིསཱིདནསནྠཏསིཀྑཱཔདཝཎྞནཱ ནིཊྛིཏཱ.

༦. ཨེལ༹ཀལོམསིཀྑཱཔདཝཎྞནཱ

༥༧༢-༣. ཨདྡྷཱནམགྒཔྤཊིཔནྣསྶཱཏི ཨིམིནཱ པཀཏིཡཱ དཱིགྷམགྒཔྤཊིཔནྣསྶ ཨུཔྤནྣཱནིཔི ཏིཡོཛནཔརམམེཝ ཧརིཏབྦཱནི, པགེཝ ཨཔྤཊིཔནྣསྶཱཏི དསྶེཏི. ཨདྡྷཱནམགྒཔྤཊིཔནྣསྶ ནིསྶགྒིཡནྟི ཝཱ སམྦནྡྷོ. ཏེནེཝ ཝཱསཱདྷིཔྤཱཡསྶ པཊིཔྤསྶདྡྷགམནུསྶཱཧཏྟཱ ‘‘ཨཔྤཊིཔནྣོ’’ཏི སངྑྱཾ གཏསྶ ¶ ཨནཱཔཏྟཱིཏི སིདྡྷཱ. ཨིམསྨིཾ ཨཏྠཝིཀཔྤེ ཧི བྷིཀྑུནོ པནེཝ ཨེལ༹ཀལོམཱནི ཨུཔྤཛྫེཡྻུཾ…པེ… ཨསནྟེཔི ཧཱརཀེ ཨདྡྷཱནཾ མགྒཔྤཊིཔནྣསྶ ནིསྶགྒིཡཾ པཱཙིཏྟིཡནྟི ཡོཛནཱ ཝེདིཏབྦཱ. ཨཱཀངྑམཱནེན བྷིཀྑུནཱ པཊིགྒཧེཏབྦཱནཱིཏི ཨཏྟནོ སནྟཀཱནཾཡེཝ ཏིཡོཛནཱཏིཀྐམེ ཨཱཔཏྟིཾ དསྶེཏི. ཏེན ཨནཱཀངྑམཱནེན པརསནྟཀཱནི པཊིགྒཧིཏཱནི ཨཏིརེཀཏིཡོཛནཾ ཧརནྟསྶ ཨནཱཔཏྟི སིདྡྷཱ. ཨཡམཏྠོ ‘‘བྷིཀྑུནོ ཨུཔྤཛྫེཡྻུ’’ནྟི ཨིམིནཱ, ‘‘ཨཙྪིནྣཾ པཊིལབྷིཏྭཱ’’ཏི ཨིམིནཱ ཙ དཱིཔིཏོཝ ཧོཏཱིཏི. པོརཱཎགཎྛིཔདེ ¶ ཙ ‘‘ཨཉྙཾ བྷིཀྑུཾ ཧརཱཔེནྟོ གཙྪཏི ཙེ, དྭིནྣཾ ཨནཱཔཏྟཱིཏི ཝུཏྟཾ, ཏསྨཱ དྭེ བྷིཀྑཱུ ཏིཡོཛནཔརམཾ པཏྭཱ ཨཉྙམཉྙསྶ བྷཎྜཾ པརིཝཏྟེཏྭཱ ཙེ ཧརནྟི, ཨནཱཔཏྟཱིཏི སིདྡྷཾ, ཏེནེཝ ཨནཱཔཏྟིཝཱརེ ‘‘ཨཉྙཾ ཧརཱཔེཏཱི’’ཏི ཝུཏྟཾ. ཀིཾ ཧརཱཔེཏི? ཛཱནནྟཾ ཨཛཱནནྟཾ. ཀིཉྩེཏྠ ཡདི ཛཱནནྟཾ, ‘‘ཨཉྙོ ཧརིསྶཏཱིཏི ཋཔེཏི, ཏེན ཧརིཏེཔི ཨཱཔཏྟིཡེཝཱ’’ཏི ཨེཀཾསཏོ ན ཝཏྟབྦཾ. ཛཱནནྟོཔི ཧི ཨེཀཙྩོ ཧརཏཱིཏི. ཏཏོ ཨཊྛཀཐཱཡ ཝིརུཛ྄ཛྷཏི. ཨཐ ཨཛཱནནྟཾ, ‘‘ཨཉྙསྶ ཡཱནེ ཝཱ བྷཎྜེ ཝཱ ཨཛཱནནྟསྶ པཀྑིཔིཏྭཱ ཏིཡོཛནཾ ཨཏིཀྐཱམེཏི, ནིསྶགྒིཡཱནཱི’’ཏི པཱལི༹ཡཱ ཝིརུཛ྄ཛྷཏི, ཨཐ ཨུབྷོཔི ཨེཀཏོ ཨེཀཾ བྷཎྜཾ ཧརཱཔེནྟི, ཏམྤི ནིསྶགྒིཡཾ སིཡཱ. ཨནིསྶགྒིཡནྟི ཡུཏྟིཡཱ ཝིརུཛ྄ཛྷཏི ‘‘ཏིཡོཛནཔརམཾ སཧཏྠཱ ཧརིཏབྦཱནི ཨསནྟེ ཧཱརཀེ’’ཏི ཨཝིསེསེན ཙ པཱལི༹ ཝུཏྟཱ. ཧཱརཀོཔི སཙེཏནོ ཨཙེཏནོཏི དུཝིདྷོ. སཙེཏནོཔི ཨེལ༹ཀལོམབྷཱཝཾ ཝཱ ‘‘ཨཧམིདཾ ཧརཱམཱི’’ཏི ཝཱ ‘‘མཾ ཨེས ཨིདཾ ཧརཱཔེཏཱི’’ཏི ཝཱ ཛཱནནཱཛཱནནཝསེན དུཝིདྷོ ཧོཏི. ཏཏྠ ཨཙེཏནོ ནཱམ ཧཱརཀོ ནདཱིསོཏོ ཝཱ ནཱཝཱ ཝཱ ཨསྶཱམིཀཡཱནཾ ཝཱ ཧོཏི. སཙེཏནོ པཱཀཊོཝ. ཏཏྠ ‘‘མཾ ཨེས ཨིདཾ ཧརཱཔེཏཱི’’ཏི ཨེཏྟཀཾ ཛཱནནྟཾ མནུསྶཾ ཝཱ ཏིརཙྪཱནགཏཾ ཝཱ ཨཉྙཾ ཧརཱཔེཏི, ཨནཱཔཏྟཱིཏི ཨནུགཎྛིཔདནཡོ. ཨཡཾ པཱལི༹ཡཱ, ཨཊྛཀཐཱཡ ཙ ཨེཀརསོ ཝིནིཙྪཡོ, ‘‘ཨསནྟེ ཧཱརཀེ’’ཏི ཀིཉྩཱཔི ཨིདཾ ཨཝིསེསཏོ ཝུཏྟཾ, ‘‘ཨཉྙསྶ ཡཱནེ ཝཱ བྷཎྜེ ཝཱ ཨཛཱནནྟསྶཱ’’ཏི ཝཙནཏོ པན སཙེཏནོཝ ཧཱརཀོ ཏཏྠ ཨདྷིཔྤེཏོཏི པཉྙཱཡཏི, སོ ཙ ཨེལ༹ཀལོམབྷཱཝཉྩ ‘‘ཨིདཾ ཧརཱམཱི’’ཏི ཙ ཛཱནནྟོ ནཱདྷིཔྤེཏོ. ཏེན ཝུཏྟཾ ‘‘ཨཉྙོ ཧརིསྶཏཱིཏི ཋཔེཏི, ཏེན ཧརིཏེཔི ཨཱཔཏྟིཡེཝཱ’’ཏིཨཱདི. ཏཏྠ ཧེཏུཀཏྟུནོ ཨབྷཱཝཏོཝ. པཱལི༹ཡཉྷི ‘‘ཨཉྙཾ ཧརཱཔེཏཱི’’ཏི ཧེཏུཀཏྟུཝསེན ཝུཏྟཱ ¶ . ཨིཏརེ དྭེ ཛཱནནྟཱ ཨིདྷ སམྦྷཝནྟི. ‘‘ཨཛཱནནྟསྶ པཀྑིཔིཏྭཱ’’ཏི པཱལི༹ཡཾ ‘‘ཨེས ཧརཱཔེཏཱི’’ཏི ཝཱ ‘‘ཨིདཾ ཋཱནཾ ཨཏིཀྐམཱཔེཏཱི’’ཏི ཝཱ ཛཱནནྟསྶ ཡཱནེ ཝཱ བྷཎྜེ ཝཱ པཀྑིཔིཏྭཱ ཏིཡོཛནཾ ཨཏིཀྐམཱཔེཏི, ན ནིསྶགྒིཡཱ ཧོནྟཱིཏི དཱིཔེཏི.

‘‘ཧརཱཔེཏཱི’’ཏི ཨིདཾ ཧེཏུཀཏྟུཝཙནཏཾ སཱདྷེཏི, ཏསྨཱ ཨཊྛཀཐཱཡཾ ‘‘སཱམིཀསྶ ཨཛཱནནྟསྶེཝཱ’’ཏི ཨིདཾ ‘‘མཾ ཨེས ཧརཱཔེཏཱི’’ཏི ཨེཝཾ ཨཛཱནནྟཾ སནྡྷཱཡ ཝུཏྟཾ. ‘‘སཱརེཏི ཙོདེཏི ཨནུབནྡྷཱཔེཏཱི’’ཏི ཨིདཾ ‘‘མཾ ཨེས ཨིདཾ ཋཱནཾ ཨཏིཀྐམཱཔེཏཱི’’ཏི ཨེཝཾ ཛཱནནྟཾ སནྡྷཱཡ ཝུཏྟཾ. ཨཛཱནནྟོཔི སཱརཎཱདཱིཧི ཋིཏཊྛཱནཾ ནཱཏིཀྐམཏི, ན ཝཱ ཨནུབནྡྷཏི. ཨཐ སཱརཎཱདཱིཧི ཨནཏིཀྐམིཏྭཱ ཨཏྟནོ རུཙིཡཱ ཨཏིཀྐམཏི ཨཱཔཏྟི ཨེཝ བྷིཀྑུནོ ཧེཏུཀཏྟུབྷཱཝཱསམྦྷཝཏོ.

ཨིདཱནི ཡཐཱཋིཏཊྛཱནཏོ པཊྛཱཡ ཝཀྑཱམ, ‘‘ཨསནྟེཔི ཧཱརཀེ’’ཏི ཧཱརཀཱལཱབྷཔཙྩཡཱཔི སཡཾ ¶ ཧརཎཏོ ནིསྶགྒིཡམེཝ, པགེཝ སཏི ཧཱརཀེཏི ཨཡམེཀོ ཨཏྠོ. ཨཝདྷཱརཎཏྠཾ ཨཔི-སདྡཾ གཧེཏྭཱ ཨསནྟེ ཨེཝ ཧཱརཀེ ནིསྶགྒིཡཾ, སཏི པན ཧཱརཀེ ན ཏེན ཧརཱཔེནྟསྶ ནིསྶགྒིཡནྟི ཨཡཾ དུཏིཡོ ཨཏྠོ. ‘‘སངྒྷཏོ ཝཱ…པེ… ཨཏྟནོ ཝཱ དྷནེནཱ’’ཏི ཨིམིནཱ ཀིཉྩཱཔི ཨཙིཏྟཀམིདཾ སིཀྑཱཔདཾ, སངྒྷཱདིཏོ པན ཨཏྟནཱ ཨཱཀངྑམཱནེན པཊིགྒཧིཏསྶེཝ ཨེལ༹ཀལོམསྶ ཏིཡོཛནཱཏིཀྐམེ ཨཱཔཏྟི, ན ཨཛཱནཏོ ཨཔྤཊིགྒཧིཏསྶ ཙཱིཝརཱདཱིསུ ཀུཏོཙི ལགྒསྶ ཨཏིཀྐམནེཏི དཱིཔེཏི. ཨནུགཎྛིཔདེ པན ‘‘ཀམྦལསྶ ཨུཔརི ནིཔཛྫིཏྭཱ གཙྪནྟསྶ སཙེ ཨེཀམྤི ལོམཾ ཙཱིཝརེ ལགྒཾ ཧོཏི, ཨཱཔཏྟི ཨེཝ ཀམྦལཏོ ཝིཛཊིཏཏྟཱ’’ཏི ཝུཏྟཾ, ཏཾ ཀམྦལསྶ པཊིགྒཧིཏཏྟཱ ཨཏྟནོ ཨིཙྪཱཡ པཊིགྒཧིཏམེཝ ཧོཏཱིཏི ཡུཏྟཾ. ཡསྨཱ ‘‘ཨནཱཔཏྟི ཀཏབྷཎྜེ’’ཏི ཝུཏྟཾ, ཏསྨཱ ཏཾ ཨནེཀམྤི ཀཏབྷཎྜཊྛཱནིཡམེཝ ཧོཏི. ཏཉྷི ཨནེན པཊིགྒཧིཏཾ, ན ལོམཾ. ཨཐ ལོམམྤི ཨགྒཧིཏམེཝ ཧོཏི, ཀཏབྷཎྜཾ དུཔྤརིཧཱརིཡལོམཝིནིབྦྷོགཀཏབྷཎྜོ ནིཡམོ. ཨེཝཾ སནྟེ ཨཀཏབྷཎྜེ ཏིཀཔཱཙིཏྟིཡཾ, ཀཏབྷཎྜེ ཏིཀདུཀྐཊཉྩ ནཡཏོ དསྶེཏབྦཾ བྷཝེཡྻ, ཨཉྙཐཱ ཏིཀསྶ དསྶིཏཏྟཱ. སཨུསྶཱཧཏྟཱཏི ཨཔྤཊིཔྤསྶདྡྷགམནཏྟཱ. ཨཙིཏྟཀཏྟཱ ཙཱཏི བྷིཀྑུནོ ཨུསྶཱཧཱནུརཱུཔཾ ལོམཱནཾ ཏིཡོཛནཱཏིཀྐམནཏོ ཝིནཱཔི པཡོགཙིཏྟེན ཧརཎཙིཏྟེན ཨཱཔཛྫཏི ཨེཝཱཏི ཨདྷིཔྤཱཡོ. སཱ ཨནཱཔཏྟི པཱལི༹ཡཱ ན སམེཏཱིཏི ¶ ཨནྟོ པན པཡོགེན ཏིཡོཛནཔརམཾ ཨཏིཀྐམིཏཏྟཱ ཨནཱཔཏྟི. ‘‘ཏིཡོཛནཾ ཧརཏཱི’’ཏི ཨིམིནཱ ཏིཡོཛནཾ པདསཱ ནེཏུཀཱམོཔི ཨནྟོཏིཡོཛནེ པདེ པདེ དུཀྐཊཾ ནཱཔཛྫཏཱིཏི དསྶེཏི, ཏཾ ཡུཏྟཾ ‘‘ཏིཡོཛནཾ ཝཱསཱདྷིཔྤཱཡོ གནྟྭཱ ཏཏོ པརཾ ཧརཏཱི’ཏི ཝཙནསྶཏྠིཏཱཡཱ’’ཏི ཝུཏྟཾ. པུནཔི ཝུཏྟཾ ‘‘ཨཉྙཾ ཧརཱཔེཏཱིཏི ‘ཨིདཾ ཧརིསྶཱམཱི’ཏི སཨུསྶཱཧམེཝ ཨཉྙཾ ཧརཱཔེཏཱིཏི ཨཏྠོ. ཨིཏརཐཱ གཙྪནྟསྶ སཱིསེ ཋཔེསི, ཏསྨིཾ ཨཛཱནནྟེཔི ཨནཱཔཏྟི སིཡཱ’’ཏི. སཙེ པན ‘‘ཨགཙྪནྟེ ཡཱནེ ཝཱ’’ཏིཨཱདིནཱ ནཡེན ཝུཏྟཏྟཱ ཧརཎཱདཱིཧི ཛནིཏཨུསྶཱཧཱནཾ ཧཏྠིཨཱདཱིནཾ ‘ཨིདཾ ཀརིསྶཱམཱ’ཏི ཝཱ ‘ཧརིསྶཱམཱ’ཏི ཝཱ ཨཱབྷོགེ ཛནིཏེ ཨེཝ ཨནཱཔཏྟི, ན ཨཛནིཏེཏི ཨུཔཏིསྶཏྠེརོ ཨཱཧཱ’’ཏི ཙ ཝུཏྟཾ. པརིཝཏྟེཏྭཱ ཋཔིཏེཏི དྭིནྣམྤི བཧི ནིཀྑིཔིཏཏྟཱཏི ཨུཔཏིསྶཏྠེརོ. བཧིསཱིམཱཡ ཋཔིཏཾ བྷཎྜིཀཾ ཨནྟོ ཨནྟོསཱིམཱཡཾ ཋཔིཏཾ བཧི ཀརོཏོ ཨནཱཔཏྟཱིཏི ཀེཙི, ན སུནྡརཾ ཝིཡ.

༥༧༥. པཊིལབྷིཏྭཱ ཧརཏཱིཏི པཋམཏིཡོཛནཏོ པརཾ ཧརཏི, ན དུཏིཡཱདིཏོཏི ཨཏྠོ. ཀཏབྷཎྜེ ཨུཔྤནྣོཀཱསཱབྷཱཝཱ ཨནཱཔཏྟི.

ཨེལ༹ཀལོམསིཀྑཱཔདཝཎྞནཱ ནིཊྛིཏཱ.

༧. ཨེལ༹ཀལོམདྷོཝཱཔནསིཀྑཱཔདཝཎྞནཱ

༥༨༡. ཀིཉྩཱཔི ¶ པུརཱཎཙཱིཝརདྷོཝནསིཀྑཱཔདེ ཙཱིཝརཾ ཋཔེཏྭཱ ‘‘ཨཉྙཾ པརིཀྑཱརཾ དྷོཝཱཔེཏཱི’’ཏི (པཱརཱ. ༥༠༧) ཨནཱཔཏྟིཝཱརེ ཝུཏྟཾ. ཨིམསྶ པན སིཀྑཱཔདསྶ ཨུཔྤནྣཀཱལཏོ པཊྛཱཡ ཨེལ༹ཀལོམདྷོཝཱཔནཱདིནཱ ཨཱཔཏྟཱིཏི ཨེཀེ. སཱ ཝཱ ཨནཱཔཏྟི མཱུལཱཔཏྟིཏོ ཨེཝ, ན ཨིམམྷཱཏི ཨེཀེ. ཨེལ༹ཀལོམཱནཾ ཨཔརིཀྑཱརཏྟཱ བྷཊྛཾ ཨགྒཧཎམེཝཱཏི ཨེཀེ. ཨིམསྶ ཨནྟིམནཡསྶ ཨཏྠཔྤཀཱསནཏྠཾ ཨིདཾ པཉྷཱཀམྨཾ – ‘‘དྷོཝཱཔེཏཱི’’ཏི ཨིདཾ རཛཱཔནཝིཛཊཱཔནགྒཧཎེན ནིཔྤདེསཝཱཙིཔདཾ, ཨུདཱཧུ ཨགྒཧཎེན སཔྤདེསཝཱཙིཔདཾ. ཀིཉྩེཏྠ ཡདི ནིཔྤདེསཝཱཙིཔདཾ, སབྦཏྠ ཨིདམེཝ ཝཏྟབྦཾ, ན ཨིཏརཱནི. ཨཐ སཔྤདེསཝཱཙིཔདཾ, ‘‘ཨཝུཏྟཱ དྷོཝཏི, ཨཔརིབྷུཏྟཾ དྷོཝཱཔེཏཱི’’ཏི ཨེཏྠ ཝིརོདྷོ. ‘‘ཨཝུཏྟཱ རཛཏི ཝིཛཊེཏི, ནིསྶགྒིཡ’’ནྟི ཨནིཊྛཔྤསངྒཏོཏི? དེསནཱཝིལཱསམཏྟཾ ¶ བྷགཝཏོ ཝཙནཾ, ཀཏྠཙི ཏིཀཔདཝཙནཾ, ཀཏྠཙི ཨེཀཔདཝཙནཾ, ནིཔྤདེསཔདམེཝ ཏེ ཝདནྟཱིཏི. སཙེ ‘‘ཀཏབྷཎྜཾ དྷོཝཱཔེཏཱི’’ཏི ཨེཏྠ པཊིཝིརོདྷོ, ‘‘ཀཏབྷཎྜཾ ཝིཛཊཱཔེཏི, ཨནཱཔཏྟཱི’’ཏི ཨནིཊྛཔྤསངྒཏོ ཨནཱཔཏྟི ཨེཝཱཏི ཙེ? ན, ཨཀཏབྷཎྜསྶ སུདྡྷལོམསྶ ཝིཛཊཱཔནཾ ཨིཏོ ཝཱ དཱཏབྦཾ. ཨུདཀཱདིདྷོཝནཝསེན པིཎྜེཏྭཱ ཋིཏཱནཾ ཝིཛཊཱཔནཾ ལབྦྷཏཱིཏི ཙེ? པུརཱཎསནྠཏསྶ ཝིཛཊཱཔནེ ཨནཱཔཏྟིཡཱ བྷཝིཏབྦཾ, ན ཙ ཏཾ ཡུཏྟཾ ‘‘ཨཔརིབྷུཏྟཾ དྷོཝཱཔེཏཱི’’ཏི ཝཙནཏོ. ཏེན པརིབྷུཏྟཾ དྷོཝཱཔེཏི རཛཱཔེཏི ཝིཛཊཱཔེཏི, ནིསྶགྒིཡམེཝཱཏི སིདྡྷཾ ཧོཏི, ཏཉྩ པརིབྷུཏྟཾ ནཱམ ཀཏབྷཎྜམེཝ ཧོཏི. ན ཧི སཀྐཱ ཨེལ༹ཀལོམཱནི པརིབྷུཉྫིཏུཾ, ཨཉྙཐཱ ‘‘པརིབྷུཏྟཾ དྷོཝཱཔེཏཱི’’ཏི ཝཙནཾ ནིརཏྠཀཾ ཧོཏི. ན ཧི ཨེཏྠ ‘‘པུརཱཎཱནི ཨེལ༹ཀལོམཱནི དྷོཝཱཔེཡྻ ཝཱ’’ཏི ཝཙནཾ ཨཏྠི པུརཱཎཙཱིཝརསིཀྑཱཔདེ ཝིཡ. ཏཏྠ ཨཱདིནྣཀཔྤཝསེན, ཨིདྷ ཏཾ ལིཁིཏཾ. ལེཁདོསོཏི ཙེ? ན, ཝིསེསཧེཏུནོ ཨབྷཱཝཱ, པུརཱཎཙཱིཝརསིཀྑཱཔདེ ཨཔརིབྷུཏྟཾ ཀཏབྷཎྜཾ ནཱམ, ‘‘ཀམྦལཀོཛཝསནྠཏཱདི’’ནྟི ཝཙནཏོ ཙ. ཀིཉྩཱཔི ཨིམིནཱ སདྡེན ཨཡམཏྠོ སིདྡྷོ, ‘‘དྷོཝཱཔེཏཱི’’ཏི ཨིདཾ པན སིཡཱ ནིཔྤདེསཾ. སིཡཱ སཔྤདེསཾ. ཏཉྷི ‘‘ཨཝུཏྟཱ དྷོཝཏཱི’’ཏིཨཱདཱིསུ ནིཔྤདེསཾ. ‘‘ཀཏབྷཎྜཾ དྷོཝཱཔེཏཱི’’ཏི ཨེཏྠ སཔྤདེསཾ. ‘‘ཨཀཏབྷཎྜཾ དྷོཝཱཔེཏི རཛཱཔེཏི, ཨནཱཔཏྟཱི’’ཏི ‘‘ཝིཛཊཱཔེཏི, ཨནཱཔཏྟཱི’’ཏི ཝཙནཔྤམཱཎཏོ ཨནཱཔཏྟི ཨེཝཱཏི ཙེ? ན, ཝཙནཔྤམཱཎཏོ ཨེཝ ཨཱཔཏྟཱིཏི ཨཱཔཛྫནཏོ. ‘‘ཨཔརིབྷུཏྟཾ དྷོཝཱཔེཏཱི’’ཏི ཝཙནམེཝ ཧི ཏཾ ཨཔརིབྷུཏྟཾ སནྠཏཾ ཝིཛཊཱཔེནྟསྶ ཨནཱཔཏྟཱིཏི དཱིཔེཏི ཙེ? སིདྡྷཾ པརིབྷུཏྟཾ ཝིཛཊཱཔེནྟསྶ ཨཱཔཏྟི ཨེཝཱཏི.

ཨེལ༹ཀལོམདྷོཝཱཔནསིཀྑཱཔདཝཎྞནཱ ནིཊྛིཏཱ.

༨. རཱུཔིཡསིཀྑཱཔདཝཎྞནཱ

༥༨༣-༤. སབྦམྤཱིཏི ¶ ཏིཝིདྷམྤི. ‘‘མུཏྟཱ མཎི ཝེལུ༹རིཡོ སངྑོ’ཏིཨཱདི པན ཀིཉྩཱཔི རཱཛསིཀྑཱཔདེ ‘ན ཝཊྚཏཱི’ཏི པསངྒཏོ ཝུཏྟཾ, སརཱུཔཏོ པན ཨཱཔཏྟིདསྶནཝསེན སཀཊྛཱནེཔི ཝཏྟུམཱརདྡྷ’’ནྟི ཝུཏྟཾ. ཀཐམེཏཾ? མུཏྟཱདཱིནཾ སཀཊྛཱནཾ ཛཱཏཾ, ན ཧི ཏཱནི ཨིདྷ པཱལི༹ཡཾ དིསྶནྟཱིཏི ཨིམསྶ ཨཊྛཀཐཱཡཾ ཝུཏྟཱནི, རཱཛསིཀྑཱཔདསྶཔི ཨཊྛཀཐཱཡཾ ཝུཏྟཱནཱིཏི. ན ཀེཝལཾ ¶ ཧིརཉྙསུཝཎྞམེཝ, ཨཉྙམྤི ཁེཏྟཝཏྠཱདིཀཾ ‘‘ཨཀཔྤིཡཾ ན སམྤཊིཙྪིཏབྦ’’ནྟི སཱམཉྙེན, ན སརཱུཔཏོ. པཱལི༹ཡཾ པན སརཱུཔཏོ ‘‘ཙཱིཝརཙེཏཱཔནྣཾ ནཱམ ཧིརཉྙཾ ཝཱ སུཝཎྞཾ ཝཱ མུཏྟཱ ཝཱ མཎི ཝཱ’’ཏི ཨེཏྟཀམེཝ ཝུཏྟཾ, ཏསྨཱ རཱཛསིཀྑཱཔདམེཝསྶ སཀཊྛཱནཾ. མུཏྟཱམཎིགྒཧཎེན ཙེཏྠ ཏཛྫཱཏིཡགྒཧཎཾ སིདྡྷམེཝཱཏི ནཱགཏོ ཨིམསྶ པཋམམེཝ པཉྙཏྟཏྟཱ. ཡདི ཨེཝཾ ཨིདྷ ཨནཱགཏཏྟཱ ཀཏརཾ ནེསཾ སཀཊྛཱནནྟི? ཨིདམེཝ ཨཏྠཏོ, ནོ སརཱུཔཏོ.

ཀཐཾ? ཨེཏཱནི ཧི རཏནསིཀྑཱཔདེ ནིསྶགྒིཡཝཏྠཱུནི, དུཀྐཊཝཏྠཱུནི ཙ ཨེཀཏོ ‘‘རཏན’’ནྟི ཨཱགཏཱནི, ‘‘རཏནསམྨཏ’’ནྟི ཀཔྤིཡཝཏྠུ ཨཱགཏཾ. ཏེསུ ཙ དསསུ རཏནེསུ རཛཏཛཱཏརཱུཔདྭཡཾ ཨིདྷ ནིསྶགྒིཡཝཏྠུ, ཨཝསེསཾ དུཀྐཊཝཏྠཱུཏི སིདྡྷཾ. ཨིདྷ ཙ སིདྡྷཏྟཱ ཨེཝ རཏནསིཀྑཱཔདསྶ ཨནཱཔཏྟིཝཱརེ ‘‘རཏནསམྨཏཾ ཝིསྶཱསཾ གཎྷཱཏི, ཏཱཝཀཱལིཀཾ གཎྷཱཏི, པཾསུཀཱུལསཉྙིསྶཱ’’ཏི ཝུཏྟཾ, ན རཏནཾ ཝུཏྟཾ. སཏྟཝིདྷདྷཉྙདཱསིདཱསཁེཏྟཱདི པན བྲཧྨཛཱལཱདིསུཏྟཝསེན (དཱི. ནི. ༡.༡ ཨཱདཡོ) ཨཀཔྤིཡནྟི སིདྡྷཾ, ཏསྨཱ ཨིདྷ དུཀྐཊཝཏྠཱུཏི སིདྡྷཾ, ཏེནེཝ ཨནུཡོགཝཏྟེ ‘‘དྷམྨཾ ཛཱནཱཏི, དྷམྨཱནུལོམཾ, ཝིནཡཾ, ཝིནཡཱནུལོམཾ ཛཱནཱཏཱི’’ཏི (པརི. ༤༤༢) ཝུཏྟཾ. ཏཐཱ ཨཱམཀམཾསམྤི དུཀྐཊཝཏྠུཾ ཨཱཔཛྫཏཱིཏི? ན, ཨིདྷ ཝིནཡེ ཨནུཉྙཱཏཏྟཱ ‘‘ཨནུཛཱནཱམི, བྷིཀྑཝེ, ཨམནུསྶིཀཱབཱདྷེ ཨཱམཀམཾས’’ནྟིཨཱདིནཱ (མཧཱཝ. ༢༦༤), ཏསྨཱ ན ཨཱམཀམཾསཾ སུཏྟེ ཨཱགཏམྤི དུཀྐཊཝཏྠུ ཧོཏི, ཏཐཱཔི ཨཏྟནོ པརིབྷོགཏྠཱཡ པཊིགྒཧཎེ དུཀྐཊམེཝཱཏི ནོ ཏཀྐོཏི ཨཱཙརིཡོ. ‘‘ཨིདྷ ནིཀྑིཔཱཧཱི’ཏི ཝུཏྟེ ཨུཔནིཀྑིཏྟསཱདིཡནམེཝ ཧོཏཱི’’ཏི ཝདནྟི. ‘‘ཨཀཔྤིཡཝིཙཱརཎཱ ཨེཝ ན ཝཊྚཏཱིཏི ཙེ? ཀཔྤིཡཉྩ ཨཀཔྤིཡཉྩ ནིསྶཱཡ ཋིཏནྟི ཨེཏྠ ཏཾ སཡཾ ཨཔརིབྷོགཱརཧཾ ཧུཏྭཱ ཏདགྒྷནཀཾ ཀཔྤིཡབྷཎྜཾ པརིབྷོགཱརཧཾ ཧུཏྭཱ ཋིཏནྟི ཨཏྠོ’’ཏི ལིཁིཏཾ, ‘‘པཾསུཀཱུལབྷཱཝེན ཋིཏཏྟཱ, གུཏྟཊྛཱནཱཙིཀྑནསྶ ཀཔྤིཡཏྟཱ ཙ ཀཔྤིཡཾ ནིསྶཱཡ ཋིཏཾ. ‘ཨིདཾ གཎྷཱ’ཏིཨཱདིནཱ ཝདནྟསྶ ཨཀཔྤིཡཏྟཱ ཨཀཔྤིཡཾ ནིསྶཱཡ ཋིཏ’’ནྟི ཙ. ཨེཝམྤི ཀཔྤིཡཉྩ ཨཀཔྤིཡཉྩཱཏི ‘‘ཨིམསྨིཾ ཨོཀཱསེ ཋཔིཏཾ, ཀིཾ ན པསྶསཱིཏི ཚེཀཏརེ ཨིམེཝ ཀཧཱཔཎེ’’ཏིཨཱདིཝཙནསྶ ཀཔྤིཡཏྟཱ ཀཔྤིཡཾ ནིསྶཱཡ ཋིཏཾ. ‘‘ཨིདཾ གཎྷཱ’’ཏི ཝུཏྟེ དུབྦིཙཱརིཏཏྟཱ ཨཏྟནོ ཨཀཔྤིཡཏྟཱ ཏཏོ ཨཱགཏཾ ¶ ཨཀཔྤིཡཾ ནིསྶཱཡ ཋིཏམེཝ ཧོཏི. ‘‘ཨིདཾ གཎྷཱ’ཏི ཝུཏྟེ ཏེན གཧིཏེ ‘ཨུགྒཎྷཱཔེཡྻ ¶ ཝཱ’ཏི ཝུཏྟཝིདྷིཾ ན པཱཔུཎཱཏི, ཀེཝལཾ དུབྦིཙཱརིཏཏྟཱ ཏསྶེཝ ཏཾ ཨཀཔྤིཡཾ ཧོཏི, མཱུལཔཊིགྒཧཎསྶ སུདྡྷཏྟཱ པརཏོ པཏྟཙཏུཀྐེ ཏཏིཡཔཏྟོ ཝིཡཱཏི ཙ ཨེཝཾ ཨུཔཏིསྶཏྠེརོ ཝདཏཱི’’ཏི ཨནུགཎྛིཔདེ ཝུཏྟཾ. ཀིཾ བཧུནཱ, ཝིསུདྡྷཱགམཏྟཱ ཀཔྤིཡཾ. དུབྦིཙཱརཎཱཡ སཏི ཨཀཔྤིཡཾ ནིསྶཱཡ ཋིཏཾ ཧོཏཱིཏི ནོ ཏཀྐོཏི ཨཱཙརིཡོ. ‘‘ཨེཝཾ སངྒྷགཎཱདཱིནམྤི ཨཏྠཱཡ པརིཙྩཏྟེཔི ཏེན སམཱནགཏིཀཏྟཱ ཋཔེཏྭཱ ཨཱཔཏྟིཝིསེས’’ནྟི ཝུཏྟཾ.

ན ཀིཉྩི ཀཔྤིཡབྷཎྜཾ ཙེཏཱཔིཏནྟི ཙེཏཱཔིཏཉྩེ, ཨུཔཱཡཱབྷཱཝཾ དསྶེཏི. ‘‘ཨུཔནིཀྑེཔཾ ཋཔེཏྭཱཏི སཙེ སོ ཨུཔཱསཀོ ‘ཨཏིབཧུཾ ཨེཏཾ ཧིརཉྙཾ, ཨིདཾ བྷནྟེ ཨཛྫེཝ ན ཝིནཱསེཏབྦ’ནྟི ཝཏྭཱ སཡཾ ཨུཔནིཀྑེཔདེསེ ཋཔེཏི, ཨཉྙེན ཝཱ ཋཔཱཔེཏི, ཨེཏཾ ཨུཔནིཀྑེཔཾ ཋཔེཏྭཱ ཏཏོ ལདྡྷཾ ཨུདཡཾ པརིབྷུཉྫནྟོ སངྒྷོ པཙྩཡེ པརིབྷུཉྫཏི ནཱམཱ’’ཏི ཝུཏྟཾ.

༥༨༥. ཨཡཾ ཀིར ཨིཏྠཾལཀྑཎསམྤནྣོ ཨུཀྐཾསཏོ. ཨེཝཾ ཨངྒསམྤནྣོཔི ཨཔརབྷཱགེ ལོབྷཝསེན ཝཱ ཨཉྙེན ཝཱ ཀཱརཎེན སཙེ ནིམིཏྟཾ ཀཏྭཱ པཱཏེཏི, ཨཱཔཏྟི དུཀྐཊསྶ. སེནཱསནམྤི པརིབྷོགེ པརིབྷོགེཏི པཝེསེ པཝེསེ. སོ ཧི ཀཱརཎནྟརེན རུཀྑམཱུལིཀསྶ, ཨབྦྷོཀཱསིཀསྶཔི ཝཊྚཏི ཨེཝ, ཋཱནནིསཛྫཱདིཝསེན ནིཝཱསཱདྷིཔྤཱཡེ སཏི པརིབྷོགེ པརིབྷོགེ པཙྩཝེཀྑིཏབྦཾ. བྷེསཛྫསྶ སཏིཔཙྩཡཏཱ སབྦཀཱལམྤཱིཏི ཨེཀེ. ཨསནྣིཧིཏསྶ པཙྪཱབྷཏྟམེཝ, སནྣིཧིཏསྶ པུརེབྷཏྟམྤཱིཏི ནོ ཏཀྐོཏི ཨཱཙརིཡོ. ‘‘ཡཱམཀཱལིཀཾ སཏྟཱཧཀཱལིཀཾ ཡཱཝཛཱིཝིཀཾ ཨཱཧཱརཏྠཱཡ…པེ… པཊིགྒཎྷཱཏི, ཨཱཔཏྟི དུཀྐཊསྶ. ཨཛ྄ཛྷོཧཱརེ ཨཛ྄ཛྷོཧཱརེ ཨཱཔཏྟི དུཀྐཊསྶཱ’’ཏི (པཱཙི. ༢༤༤) ཧི ཝུཏྟཾ. དུཀྐཊཉྷི ཝིཀཱལབྷོཛནསིཀྑཱཔདེ ཨཱགཏཾ ཝིཀཱལེ ཨཱཔཛྫཏི, ནོ ཀཱལེ ཨཱཧཱརཀཱལཏྟཱ, སནྣིདྷིསིཀྑཱཔདེ ཨཱགཏཾ པན ཀཱལེཔི སནྣིདྷིཛཱཏཏྟཱ, ཏེནེཝ ཏཏྠ སཏྟཱཧཀཱལིཀཡཱཝཛཱིཝིཀདྭཡམེཝ ཝུཏྟནྟི. ‘‘སཏི པཙྩཡེ’’ཏི ཝཙནཏོ ནཱཡཾ ཝིསེསོ ལབྦྷཏཱིཏི ཙེ? ན, ཨནིཊྛཔྤསངྒཏོ, ཝཙནཱནིཡམཏོ ཙ. སནྣིདྷིསིཀྑཱཔདེ ཧི ‘‘ཨནཱཔཏྟི ཡཱཝཀཱལིཀཾ ཡཱཝཀཱལཾ ནིདཧིཏྭཱ བྷུཉྫཏི. ཡཱམཀཱལིཀཾ ཡཱམེ ནིདཧིཏྭཱ བྷུཉྫཏཱི’’ཏི (པཱཙི. ༢༥༦) ཨེཏྠ ཝཙནཔྤམཱཎཏོ ཡཱམཀཱལིཀཾ ན པུརེབྷཏྟེ, ན པཙྪཱབྷཏྟེ, ན དིཝསེ, ན རཏྟིཡཾ ཡཱམམེཝ ནིདཧིཏྭཱ བྷུཉྫནྟསྶ ཨནཱཔཏྟཱིཏི ¶ ཨནིཊྛཔྤསངྒོ. ཏཐཱ ཏཏྠེཝ ‘‘ཡཱམཀཱལིཀཾ ཡཱམཾ ནིདཧིཏྭཱ བྷུཉྫཏི, སཏྟཱཧཀཱལིཀཾ སཏྟཱཧཾ ནིདཧིཏྭཱ བྷུཉྫཏཱི’’ཏི ཨེཏྟཀམེཝ ཝུཏྟཾ, ན ཝུཏྟཾ ‘‘སཏི པཙྩཡེ’’ཏི, ཏསྨཱ སཏིཔཙྩཡ-ཝཙནཾ ཀཏྠཙི ཧོཏི, ཀཏྠཙི ན ཧོཏཱིཏི ཝཙནཱནིཡམཏོ ཨཱཔཏྟིཡཱཔི ཨནིཡམོ སིཡཱ. ཨེཝཾ སནྟེཔི ཡཐཱཝུཏྟདུཀྐཊཾ ཨཱཔཛྫཏི ¶ ཨེཝ. ན ཨནཱཧཱརཔྤཡོཛནཏྟཱ ཡཱམཀཱལིཀཱདཱིནནྟི ཙེ? ན, སཔྤིཨཱདིམིསྶབྷོཛནསྶ པཎཱིཏབྷོཛནབྷཱཝཔྤཏྟིཏོ. ཨཔིཙ སབྦཀཱལིཀེསུ ཡཱཝཀཱལིཀཾ ཨོལཱ༹རིཀཾ, ཏཾ ཨཱཧཱརཏྠཱཡ པཊིགྒཎྷནྟསྶ ཀཱལེ ཨནཱཔཏྟི, པགེཝ ཨནོལཱ༹རིཀཾ ཡཱམཀཱལིཀཱདིཾ, ཨཱཧཱརཏྠཱཡ ཨེཝ ཨནུཉྙཱཏཏྟཱ. ཡཱཝཀཱལིཀེ ཨེཝ ཨནཱཔཏྟཱིཏི ཙེ? ན, ཨནཱཧཱརཏྠཱཡ གཎྷནྟསྶ ཨཱཔཏྟིསམྦྷཝཏོ ཨིཏརཾ ཨཱཧཱརཏྠཱཡ གཎྷནྟསྶ ཝིཡ, ཏསྨཱ ཡཐཱཝུཏྟམེཝེཏྠ སནྣིཊྛཱནཾ པཱལི༹ཾ, ཡུཏྟིཉྩ ཨནུལོམེཏཱིཏི.

དེསནཱསུདྡྷཱིཏི ཨེཏྠ དེསནཱ ནཱམ ཝིནཡཀམྨཾ, ཏེན ཝུཊྛཱནམྤི དེསནཱ ཨེཝ ནཱམ ཧོཏཱིཏི. ‘‘པཊིགྒཎྷཱཏཱི’’ཏི ཨཝཏྭཱ ‘‘པཊིསེཝཏཱི’’ཏི ཝུཏྟཏྟཱ པཊིགྒཧཎེ པན སཏིཾ ཨཀཏྭཱ པརིབྷོགེ ཀརོནྟསྶ ཨནཱཔཏྟི. ཁཱིཎཱསཝཱ ཀཏཀིཙྩཏྟཱ ཝིབྷཏྟདཱཡཱདཱ ཝིཡ ཧོནྟི, ཏེན ཏེསཾ སཱམིཔརིབྷོགཱ ཧོནྟི. ཨཉྙཐཱ ཡཱཝཀཱལིཀབྷཱཝཾ ཨནཏིཀྐནྟཏྟཱ ཝིརུཛ྄ཛྷཏི. ཨིཎཔརིབྷོགོ ན ཝཊྚཏི, བྷེསཛྫེ ཨཱཔཏྟིཏོ, ཨིཏརསྨིཾ ཨཡུཏྟཔརིབྷོགཏོ, ཨིཎཾ ཝིཡ ཨནནུཉྙཱཏབྷུཏྟཏྟཱ ཙ. ‘‘ཨཱདིཏོ པཊྛཱཡ ཧི ཨལཛྫཱི ནཱམ ནཏྠི, ཏསྨཱ ན ཀོཙི སངྐིཏབྦོ’’ཏི ལིཁིཏཾ. བྷཱརབྷཱུཏཱ སདྡྷིཝིཧཱརིཀཱདཡོ. ཡཐཱདཱནམེཝ གཧིཏཏྟཱཏི ཨེཏྠ ‘‘ཨཏྟནོ ཧཏྠེན ཙེ དེཏི, ན ཝཊྚཏཱི’’ཏི ཝུཏྟཾ, ‘‘ཨཏིརེཀབྷཱགཾ གཧེཏྭཱ པུནདིཝསེ ཨཏྟནོ ཨཏྠཱཡ ཨུདྡྷཊབྷཱགཾ ཏཏྠེཝ དཱཔེཏི, ཝཊྚཏཱི’’ཏི ཙ. པརིཝཏྟཀཾ དེཏི, དྷམྨིཡཉྩེ, ཝཊྚཏི. ནོ ཨདྷམྨིཡཾ. ‘‘ཏཾ དྷམྨཱནུགྒཧེན ཨུགྒཎྷིཏུཾ ཝཊྚཏཱི’’ཏི ཝུཏྟཾ. ཀེན ལེསེནཱཏི ཙེ? ‘‘ཨལབྦྷམཱནཱཡ སཱམགྒིཡཱ ཨནཱཔཏྟི སམྦྷོགེ སཾཝཱསེ’’ཏི (མཧཱཝ. ༡༣༠) ཨིམིནཱ ཨུཔསམྤདཀྑནྡྷཀཝཙནལེསེན.

༥༨༦. ཨསྶཏིཡཱ དིནྣནྟི ཨེཏྠ ‘‘ཨསྶཏིཡཱ དིནྣཾ ནཱམ ཨཔརིཙྩཏྟཾ ཧོཏི, ཏསྨཱ དུསྶནྟེ བདྡྷཀཧཱཔཎཱདཱིནི སཏིཾ པཊིལབྷིཏྭཱ དཱཡཀཱ ཙེ ¶ པུན གཎྷནྟི, ནིསྶགྒིཡམེཝ དེསེཏབྦཾ. ཏེན ཨཀཔྤིཡབྷཎྜེན ཏེ ཙེ དཱཡཀཱ སཔྤིཨཱདཱིནི ཀིཎིཏྭཱ སངྒྷསྶ དེནྟི, ཏསྶཔི བྷིཀྑུནོ ཀཔྤཏི དཱཡཀཱནཾཡེཝ སནྟཀཏྟཱ. བྷིཀྑུནཱ ཧི ‘ཝཏྠཾ གཎྷཱམཱི’ཏི ཝཏྠསཉྙཱཡ ཨེཝ གཧིཏཾ, ན རཱུཔིཡསཉྙཱཡ. ཨིདཉྩ སིཀྑཱཔདཾ ཨཏྟནོ ཨཏྠཱཡ ཨུགྒཧཎཾ སནྡྷཱཡ ཝུཏྟཾ, ན ཙ ཏེན ཏཾ ཨཏྟནོ ཨཏྠཱཡ པརེསཾ ཝཱ ཨཏྠཱཡ གཧིཏཾ. ཨཐ ཏེ དཱཡཀཱ ནོ ཙེ ཨཱགནྟྭཱ གཎྷནྟི, དཱཡཀེ པུཙྪིཏྭཱ ཨཏྟནོ ཨཏྠཱཡ ཙེ པརིཙྩཏྟཾ, སངྒྷེ ནིསྶཛྫིཏྭཱ ཨཱཔཏྟི དེསེཏབྦཱ. ནོ ཙེ, ཨཱཔཏྟི ཨེཝ དེསེཏབྦཱ’’ཏི ཝུཏྟཾ, ཏཾ པུབྦཱཔརཝིརུདྡྷཾ. ཨཱཔཏྟིདེསནཱཡ ཧི སཏི རཱུཔིཡཾ པཊིགྒཧིཏནྟི སིདྡྷཾ, ཏསྨིཾ སིདྡྷེ ‘‘ཏཏོ ཨུཔྤནྣཾ ཏསྶཔི ཀཔྤཏཱི’’ཏི ཨིདཾ ན ཡུཛྫཏཱིཏི. ཀཔྤཏི ཨེཝཱཏི ཙེ? ན, ཝཏྠུཾ ཨནིསྶཛྫིཏྭཱ ¶ ཨཱཔཏྟི དེསེཏབྦཱཏི ན ཡུཛྫཏི. ཨཙིཏྟཀཏྟཱ སིཀྑཱཔདསྶ ཡུཛྫཏཱིཏི ཙེ? ན, སབྦཏྠ ‘‘རཱུཔིཡཾ པཊིགྒཎྷཱཏཱི’’ཏི ཝཙནཏོ. ‘‘རཱུཔིཡཾ པཊིགྒཎྷཱཏཱི’’ཏི ཧི ཝུཏྟཾ, ཨཉྙཐཱ སབྦཏྠ ‘‘རཱུཔིཡ’’ནྟི པདཾ ནིརཏྠཀཾ ཧོཏི ཝིནཱཔི ཏེན ཏདཏྠསིདྡྷིཏོ. ཨནེན ཙ ཝཏྠཾ པཊིགྒཧིཏཾ, དཱཡཀེན ཙ ཝཏྠམེཝ དིནྣཾ, ཝཏྠགཏམྤི རཱུཔིཡཾ ཐེཡྻཙིཏྟེན གཎྷནྟོ པདཝཱརེན ཀཱརེཏབྦོ. ཨཊྛཀཐཱཡཉྩ ‘‘རཱུཔིཡེ ཨརཱུཔིཡསཉྙཱིཏི སུཝཎྞཱདཱིསུ ཁརཔཏྟཱདིསཉྙཱི’’ཏི ཝུཏྟཾ ‘‘རཱུཔིཡཾ པཊིགྒཎྷཱཏཱི’’ཏི ཝཙནཝསེན.

‘‘ཨཔིཙ པུཉྙཀཱམཱ’’ཏིཨཱདི པན ཝིདྷཱནནྟརདསྶནཏྠཾ ཝུཏྟཾ, ཏེནེཝ ཧི ‘‘ཨིམསྨིཾ གེཧེ ཨིདཾ ལདྡྷནྟི སལླཀྑེཏབྦ’’ནྟི ཝུཏྟཾ. ཨཉྙཐཱ སལླཀྑཎེ ཝིམཏིཝསེན, ཝིམཏིཡཱ ཙ སཏི ནིསྶགྒིཡམེཝ ‘‘རཱུཔིཡེ ཝེམཏིཀོ’’ཏིཨཱདི ཝཙནཏོཏི. ཨིདཾ ཝིདྷཱནཾ ནིརཏྠཀམེཝ ཨཱཔཛྫཏི, ན ཙ ནིརཏྠཀཾ. ཀསྨཱ? དུསྶནྟེ བདྡྷཀཧཱཔཎཱདི ཨསྶཏིཡཱ དིནྣཾ ཝཏྠསཉྙཱཡ པཊིགྒཧིཏཉྩ, ཏཏོ ན རཱུཔིཡཾ དིནྣཉྩ ཧོཏི པཊིགྒཧིཏཉྩཱཏི. ཨེཏྠ ཨཱཔཏྟིདེསནཱཀིཙྩཾ ནཏྠི, ཏཾ པན དཱཡཀཱནམེཝ པཊིདཱཏབྦཾ. ཏཏོ ཨུཔྤནྣཾ ཀཔྤིཡབྷཎྜཉྩ སབྦེསཾ ཀཔྤཏཱིཏི ཨིམསྶ ཝིདྷཱནནྟརདསྶནཏྠཾ ‘‘ཨཔིཙ པུཉྙཀཱམཱ’’ཏིཨཱདཱིཏི ནོ ཏཀྐོཏི ཨཱཙརིཡོ.

རཱུཔིཡསིཀྑཱཔདཝཎྞནཱ ནིཊྛིཏཱ.

༩. རཱུཔིཡསཾཝོཧཱརསིཀྑཱཔདཝཎྞནཱ

༥༨༧. ‘‘ཛཱཏརཱུཔརཛཏཔརིཝཏྟན’’ནྟི ¶ ཨུཀྐཊྛཔརིཙྪེདེན ཝུཏྟཾ, ཏཐཱ ‘‘རཱུཔིཡཾ ནཱམ སཏྠུཝཎྞོ ཀཧཱཔཎོ’’ཏིཨཱདི པཱལི༹ཝཙནཉྩ. ‘‘ཨརཱུཔིཡེ རཱུཔིཡསཉྙཱི རཱུཔིཡཾ ཙེཏཱཔེཏཱི’’ཏིཨཱདི ཏིཀཝཙནཏོ, ‘‘དུཀྐཊཝཏྠུནཱ པན ནིསྶགྒིཡཝཏྠུཾ ཙེཏཱཔེནྟསྶ…པེ… ནིསྶགྒིཡཾ པཱཙིཏྟིཡཾ གརུཀསྶ ཙེཏཱཔིཏཏྟཱ’’ཏི ཨཊྛཀཐཱཝཙནཏོ ཙ པན ཨནུཀྐཊྛཔརིཙྪེདོཔེཏྠ ལབྦྷཏཱིཏི སིདྡྷཾ. སཏྠུཝཎྞོ ཙ ཀཧཱཔཎོ ཙ ཏཏོ ཡེ ཙཉྙེ ཝོཧཱརཾ གཙྪནྟཱིཏི ཨེཝམེཏྠ སམུཙྩཡོ ཝེདིཏབྦོ. ཨིམསྨིཾ པན སིཀྑཱཔདེ ‘‘ནཱནཔྤཀཱརཀཾ ནཱམ ཀཏམྤི ཨཀཏམྤི ཀཏཱཀཏམྤཱི’’ཏི ཨེཏྠ ཝིབྷཏྟཱནཾ ཏིཎྞཾ རཱུཔིཡཱརཱུཔིཡཱནཉྩ དྭིནྣཾ ཝསེན པཉྩ ཏིཀཱ ཝུཏྟཱ, ཨཊྛཀཐཱཙརིཡེཧི ཏདནུལོམཏོ ཨེཀོ ཏིཀོ དསྶིཏོཏི སབྦེ ཚ ཧོནྟི.

ཨེཏྠཱཧ – ཨཉྙསྨིཾ སིཀྑཱཔདེ ཨེཀསྨིཾ ཏིཀཙྪེདེ དསྶིཏེ སཏིཔི སམྦྷཝེ ཨིཏརེ ན དསྶཱིཡནྟི ¶ , ཨིདྷེཝ ཀསྨཱ དསྶིཏོཏི? ‘‘ནཱནཔྤཀཱརཀ’’ནྟི མཱཏིཀཱཡཾ ཝུཏྟཏྟཱ ཨིདྷེཝ ནཱནཔྤཀཱརབྷཱཝདསྶནཏྠནྟི. ན ཀཡཝིཀྐཡསིཀྑཱཔདེཔི ཝཏྟབྦཔྤསངྒཏོཏི ཙེ? ན, ཨིདྷ དསྶིཏནཡཏྟཱ. ཨཐ ཙ རཱུཔིཡསྶ ཝིབྷངྒེ ‘‘ཡེ ཝོཧཱརཾ གཙྪནྟཱི’’ཏི ཨནྟེ ཝུཏྟཏྟཱ སཏྠུཝཎྞཱདཡོ ཝལ༹ཉྫནུཔགཱ ཨེཝཱཏི སིདྡྷཾ. ཏཏོ ཨཝལ༹ཉྫནུཔགེཧི ཛཱཏརཱུཔརཛཏེཧི ཝོཧཱརེན ན ནིསྶགྒིཡནྟི ཨཱཔཛྫཏི, ཏསྨཱ ཏཾ ཨཱཔཛྫནཏྠནྟི དསྶེནྟེན ‘‘ཀཏེན ཀཏཾ ཙེཏཱཔེཏཱི’’ཏིཨཱདཡོ ཏིཀཱ ཝུཏྟཱཏི, ཨེཝཾ སནྟེ རཱུཔིཡཝིབྷངྒེ ‘‘ཡེ ཙ ཝོཧཱརཾ གཙྪནྟཱི’’ཏི ན ཝཏྟབྦཾ, ཏསྨིཾ པདེ ཨཝུཏྟེ ཨཝལ༹ཉྫནུཔགཱཔི སངྒཧཾ གཏཱཝ ཧོནྟཱིཏི ཀཏཱདཱིཧི ཏིཀཏྟཡསྶ ཝཏྟབྦཔཡོཛནཾ ན བྷཝིསྶཏཱིཏི ཙེ? ན, ཀཔྤིཡབྷཎྜེན ཀཔྤིཡབྷཎྜཔཨཝཏྟནསྶཱཔི རཱུཔིཡསཾཝོཧཱརབྷཱཝཔྤསངྒཏོ. ‘‘ཡེ ཝོཧཱརཾ གཙྪནྟཱི’’ཏི ཝཙནེནཔི ཀམུཀ ཀཐལ ཀཾསབྷཱཛན སཱཊཀཱདིཔརིཝཏྟནསྶཔི རཱུཔིཡསཾཝོཧཱརབྷཱཝཔྤསངྒོ ཨེཝཱཏི ཙེ? ན, ཀཏཱདིཝཙནེན ཛཱཏརཱུཔཱདིཨཀཔྤིཡཝཏྠཱུནཉྙེཝ ཨདྷིཔྤེཏབྷཱཝདཱིཔནཏོ, ཏསྨཱ ཨུབྷཡེནཔི ཡདེཏཾ ཀཏཱཀཏཱདིབྷེདཾ པཱཀཏིཀརཱུཔིཡཾ ཡཉྩ ཀཧཱཔཎམཱསཀསངྑེཔཾ, ཡཉྩ ཀཧཱཔཎཱདིཝོཧཱརཱུཔགཾ, ཨུབྷཡམྤེཏཾ ཨིདྷ ཙ ཨནནྟརཱཏཱིཏསིཀྑཱཔདེ ཙ རཱུཔིཡཾ ནཱམཱཏི ཨདྷིཔྤེཏཏྠསིདྡྷི ཧོཏི, ན ཏཎྜུལཱདཱིནི, ཏཏྠ ཀཏཱདིཝོཧཱརཱསམྦྷཝཏོ. ཨེཏྟཱཝཏཱ ཀཏཱདིཏིཀཏྟཡཔྤཡོཛནཾ ཝུཏྟཾ.

ཨིདཱནི ¶ སེསཏྟིཀཱནི ཝུཙྩཏི – ཨེཏྠ ཧི ཡཐཱཝུཏྟཔྤབྷེདཾ ནིསྶགྒིཡཝཏྠུ རཱུཔིཡཾ ནཱམ, སེསཾ དུཀྐཊཝཏྠུཔི ཀཔྤིཡཝཏྠུཔི ན རཱུཔིཡནྟི ཨརཱུཔིཡཾ ནཱམ ཧོཏཱིཏི ཀཏྭཱ ‘‘ཨརཱུཔིཡེ ཨརཱུཔིཡསཉྙཱི པཉྩནྣཾ སཧདྷམྨིཀཱནཾ ཨནཱཔཏྟཱི’’ཏི ཨིདཾ ན ཨེཀཾསིཀཾ ཨཱཔཛྫཏི དུཀྐཊཝཏྠུམྷི དུཀྐཊཱཔཛྫནཏོ. ཨིདྷ ཝཙནཔྤམཱཎཏོ ནིསྶགྒིཡཝཏྠུཏོ ཨཉྙཾ ཨནྟམསོ མུཏྟཱདིཔི ཨརཱུཔིཡམེཝ ནཱམ. ཏཏྠ པཉྩནྣཾ སཧདྷམྨིཀཱནཾ ཨནཱཔཏྟཱིཏི ཙེ? ན, རཱཛསིཀྑཱཔདཝིརོདྷཏོ. ཏཏྠ ཧི ‘‘མུཏྟཱ ཝཱ མཎི ཝཱ’’ཏི ཝུཏྟཾ, ཏསྨཱ མུཏྟཱདི ཨཀཔྤིཡཾ དུཀྐཊཝཏྠཱུཏི ཙ སིདྡྷཾ ནིསྶགྒིཡཝཏྠཱུསུ ཨབྷཱཝཱ. ཨེཝཾ སནྟེ ‘‘ཨརཱུཔིཡེ ཨརཱུཔིཡསཉྙཱི པཉྩནྣཾ སཧདྷམྨིཀཱནཾ ཨནཱཔཏྟཱི’’ཏི སུདྡྷཀཔྤིཡབྷཎྜཾ སནྡྷཱཡ ཝུཏྟཾ, ན སབྦཾ ཨརཱུཔིཡཾ. ཏཏོ ཨཉྙཏྠ པན ‘‘ཨརཱུཔིཡེ རཱུཔིཡསཉྙཱི’’ཏིཨཱདིཏིཀདུཀྐཊེ ཙ ཨཊྛཀཐཱཡཾ དསྶིཏཏིཀེ ཙ སབྦཾ ཨརཱུཔིཡཾ ནཱམཱཏི ཝེདིཏབྦཾ, ཏསྨཱ ཨརཱུཔིཡབྷཱཝདཱིཔནཏྠཾ དུཏིཡོ ཏིཀོ ཝུཏྟོ. ཏདཏྠམེཝ ཨཊྛཀཐཱཡཾ དསྶིཏོ ཨེཀོ ཏིཀོ. ཀསྨཱ ན པཱལི༹ཡཾ སོ ཝུཏྟོཏི ཙེ? ཏཏྠ ཙེཏཱཔིཏཨརཱུཔིཡེ རཱུཔིཡཚཌྜནཀསམྨུཏིཀིཙྩཱབྷཱཝཏོ. ཏསྨིཉྷི ཏིཀེ ཝུཏྟེ ཀཔྤིཡཝཏྠུནོཔི ཨརཱུཔིཡཚཌྜནཀསམྨུཏི དཱཏབྦཱཏི ཨཱཔཛྫཏི, ཏསྶ ཝསེན རཱུཔིཡཚཌྜནཀསམྨུཏི ཨེཝ ན ཝཏྟབྦཱཏི? ན, རཱུཔིཡསྶཔི སམྨུཏིཀིཙྩཱབྷཱཝཔྤསངྒཏོ, ཏསྨཱ རཱུཔིཡེ རཱུཔིཡསཉྙཱི ཀཔྤིཡཝཏྠུཾ ཙེཏཱཔེཏི པཏྟཙཏུཀྐེ ཏཏིཡཔཏྟཾ ཝིཡ, ཏཾ སངྒྷཱདཱིནཾ ནིསྶཛྫིཏབྦཾ, ནིསྶཊྛཾ པན ¶ ཨཉྙེསཾ ཀཔྤཏི ཏཏིཡཔཏྟོ ཝིཡ. ཨཐ སམྤཊིཙྪིཏརཱུཔིཡེན ཙེཏཱཔིཏཾ ཧོཏི དུཏིཡཔཏྟོ ཝིཡ, ཏཾ ཝིནཱཔི སམྨུཏིཡཱ ཡོ ཀོཙི བྷིཀྑུ ཚཌྜེཏི, ཝཊྚཏི. ཏཏོ པརཾ ‘‘སཙེ ཏཏྠ ཨཱགཙྪཏི ཨཱརཱམིཀོ ཝཱ’’ཏིཨཱདིནཱ ཝུཏྟནཡེནེཝ པཊིཔཛྫིཏབྦཾ. ཏཏྠ ‘‘རཱུཔིཡེ’’ཏི ཝཱ ‘‘ཨརཱུཔིཡེ’’ཏི ཝཱ སབྦཏྠ བྷུམྨཔྤཏྟེ ཨཏྟནོ སནྟཀཾ, ཨུཔཡོགཔྤཏྟེ པརསནྟཀནྟི ཝེདིཏབྦཾ. ཨེཏྠཱཧ – ཨུཔཏིསྶཏྠེརོ པུརིམསིཀྑཱཔདེན རཱུཔིཡཔཊིགྒཧཎཾ ཝཱརིཏཾ, ཨིམིནཱ སུདྡྷཱགམེན ཀཔྤིཡཀཱརཀསྶ ཧཏྠེ ཀཔྤིཡཾ ནིསྶཱཡ ཋིཏེན སཾཝོཧཱརོ ཝཱརིཏོཏི.

༥༨༩. ནིསྶགྒིཡཝཏྠུནཱ ནིསྶགྒིཡཝཏྠུཾ…པེ… ཨཔརཱཔརཔརིཝཏྟནེ ཨིམིནཱཏི ཨེཏྠ ཨེཀསྨིཾ ཨེཝ ཝཏྠུསྨིཾ དྭིནྣཾ སིཀྑཱཔདཱནཾ ཝསེན ཨེཀཏོ ཨཱཔཏྟི ཝུཏྟཱ, ཏཾ པན པཙྪིམསྶ ཝསེན ནིསྶཛྫིཏབྦཾ. ཨེཏེན ནིསྶགྒིཡཾ ཨཱཔནྣམྤི ཨཱཔཛྫཏཱིཏི ཨེཀེ. པརསྶ རཱུཔིཡགྒཧཎཾ པརིཝཏྟནནྟི རཱུཔིཡེ ཨགྒཧིཏེ ཏསྶ ཨབྷཱཝཏོ ཨིམིནཱཝ ཨཱཔཏྟི, ན པུརིམེན ཨོམསཝཱདོ ཝིཡ. མུསཱཝཱདེན ¶ མུསཱ ཝདནྟསྶཱཔི ཧི ཨོམསཝཱདེནེཝ ཨཱཔཏྟི. ནིསྶགྒིཡཝཏྠུནཱ དུཀྐཊ…པེ… ཨེསེཝ ནཡོཏི ཨེཏསྶ ཡུཏྟིཾ དསྶེནྟོ ‘‘ཡོ ཧི ཨཡ’’ནྟི ཨཱཧ.

ཝཌྜྷིཾ པཡོཛེནྟསྶཱཏི ཨེཏྠ ཨིདཾ གཧེཏྭཱ སཏི མཱསེ, སཏི སཾཝཙྪརེ ‘‘ཨེཏྟཀཾ དེཧཱི’’ཏི ཙེ ཝདཏི. རཱུཔིཡསཾཝོཧཱརོ ཧོཏི. ཝིནཱ ཀཔྤིཡཀཱརཀེན ‘‘ཨེཏྟཀཱ ཝུཌྜྷི ཧོཏུ, ཨེཏྟཀཾ གཎྷཱ’’ཏི ཝདཏོ དུཀྐཊཾ ཀཡཝིཀྐཡལཀྑཎཱབྷཱཝཏོ. ‘‘མཱུལེ མཱུལསཱམིཀཱན’’ནྟིཨཱདི ཀཔྤིཡཀརཎཱུཔཱཡདསྶནཏྠཾ ཝུཏྟཾ, ན ཀེཝལཾ ནིསྶཊྛཾ ཨཔརིབྷོགཾ ཧོཏི, པུན ཨེཝཾ ཀཏེ པརིབྷུཉྫིཏུཾ ཝཊྚཏི. ཏསྶཔི པརིབྷོགེ མཱུལསྶ ཀཔྤིཡཀརཎཱུཔཱཡོ ཙེ ན ཧོཏི, ཀཔྤིཡཾ ཨཱཙིཀྑིཏབྦནྟི ཡཐཱ པཱལི༹ཡཱ ཙེཏྠ ཀཔྤིཡཀརཎཱུཔཱཡོ, སོ ཙ ཏཏིཡཔཏྟེཔི, ‘‘ཡཐཱ ཙ ཨཏྟནོ ཨཏྠཱཡ གཧིཏེ ཨེཝརཱུཔུཔཱཡོ, ཏཐཱ སངྒྷཱདིཨཏྠཱཡ གཧིཏེཔི ཨེསོ ཝཱ’’ཏི ཝུཏྟཾ. ཨིམེ ཀིར པཋམདུཏིཡཔཏྟེ ཡཱཝ གཧཊྛེན པརིཝཏྟེཏི, ཏཱཝ ན ཀཔྤིཡཀརཎཱུཔཱཡོ, ཨནེཀཔུརིསཡུགམྤི ‘‘ཨཀཔྤིཡཱ ཨེཝཱ’’ཏི ཨཊྛཀཐཱཡཾ ཝུཏྟཾ. ཨནུགཎྛིཔདེ པན ‘‘སངྒྷསནྟཀཾ ཀཔྤིཡབྷཎྜཾ ཝིཀྐིཎིཏྭཱ ཨཱགཏཀཧཱཔཎཱནིཔི པཊིགྒཧཎཾ མོཙེཏྭཱཝ སམྤཊིཙྪིཏབྦཱནི, ཏསྨཱ ཀཔྤིཡཀཱརཀོ ཙེ ཨིམཱནི ཏཱནི ཀཧཱཔཎཱནཱིཏི ཝདཏི, ན ཝཊྚཏིཡེཝ, པཊིཀྑིཔིཏབྦཾ, ན ཝིཙཱརེཏབྦཾ, ཝིཙཱརེཏི ཙེ? སབྦེསཾ ན ཀཔྤཏི. པཊིགྒཧཎཾ མོཙེཏྭཱ སམྤཊིཙྪིཏཱནི ཙེ ཝིཙཱརེཏི, ཏསྶེཝ ན ཝཊྚཏཱི’’ཏི ཨབྷིཀྑཎཾ ཝུཏྟཾ.

རཱུཔིཡསཾཝོཧཱརསིཀྑཱཔདཝཎྞནཱ ནིཊྛིཏཱ.

༡༠. ཀཡཝིཀྐཡསིཀྑཱཔདཝཎྞནཱ

༥༩༣. པཊཔིལོཏིཀཱནནྟི ¶ པཊཔིལོཏིཀེཧི. ‘‘ཨཛ྄ཛྷཱཙརཏི, ཨཱཔཏྟི དུཀྐཊསྶཱ’’ཏི ཨིདཾ པུརིམསིཀྑཱཔདེཔི ཝེདིཏབྦཾ. ‘‘ཀཡིཏཉྩ ཧོཏི ཝིཀྐཡིཏཉྩཱ’’ཏི ཨེཏེསཾ པདཱནཾ ཝིཔརཱིཏཏོ ‘‘ཨཏྟནོ བྷཎྜ’’ནྟིཨཱདི ཝུཏྟཾ. ཀསྨཱ? ‘‘ཨིམིནཱ ཨིམ’’ནྟི ཝཙནཱནུརཱུཔཏོ. སདྡྷཱདེཡྻཝིནིཔཱཏནཾ པནེཏྠ ཨཊྛཱནཔདཱནཾ ཝསེན ཝེདིཏབྦཾ.

ཀཡཝིཀྐཡསིཀྑཱཔདཝཎྞནཱ ནིཊྛིཏཱ.

ནིཊྛིཏོ ཀོསིཡཝགྒོ དུཏིཡོ.

༣. པཏྟཝགྒོ

༡. པཏྟསིཀྑཱཔདཝཎྞནཱ

༥༩༨. བཧཱུ ¶ པཏྟེ སནྣིཙཡནྟི ཨེཏྠ སནྣིཙཡནྟི བྷཱཝནཔུཾསཀཾ, བཧཱུ པཏྟེ ཝཱ གཧེཏྭཱ སནྣིཙཡཾ ཀརིསྶནྟཱིཏི ཨཏྠོ. ‘‘ཨཌྜྷཏེརསཔལམཱསཱནཾ གཱཧིཀཱ’’ཏི ལིཁིཏཾ. ཨེཏྠ –

‘‘ཀུཌུཝོ ཙཏུཔལེཡྻོ, ཀུཌུཝཱནཾ ཙཏུགྒུཎཾ;

པཏྠཾ ཙཏུགྒུཎོ མཱསཱ-ཏི ཀམཱཧུ ཙཏུགྒུཎ’’ནྟི. –

ཨཱདིཾ ལོཀཝོཧཱརཾ དསྶེཏྭཱཝ ཀེཙི པཔཉྩེནྟི.

༦༠༢. ཁཱདནནྟི ཁཱདནཱིཡཾ སཱུཔཱདི. ‘‘བྱཉྫནསྶ མཏྟཱ ནཱམ ཨོདནཏོ ཙཏུཏྠོ བྷཱགོ’’ཏི (མ. ནི. ཨཊྛ. ༢.༣༨༧) བྲཧྨཱཡུསུཏྟཊྛཀཐཱཡཾ ཝུཏྟཏྟཱ ཨཱལོཔསྶ ཙཏུཏྠབྷཱགཾ བྱཉྫནཾ ཨནུརཱུཔནྟི གཧེཏབྦཾ. ‘‘བྷིཀྑུནིཡཱ པཏྟསནྣིཙཡསྶ ཝཱརིཏཏྟཱ ཏདནུལོམཏོ བྷིཀྑཱུནམྤི དུཏིཡོ ཝཱརིཏོ’’ཏི ཝུཏྟཾ, ཏཾ ན ཡུཏྟཾ, པཱལི༹ཡཉྷི ‘‘སནྣིཙཡཾ ཀརེཡྻཱཏི ཨནདྷིཊྛིཏོ ཨཝིཀཔྤིཏོ’’ཏི (པཱཙི. ༧༣༥) ཝུཏྟཾ. སོ ཧི ཀཐིནཀྑནྡྷཀེ (མཧཱཝ. ༣༠༦ ཨཱདཡོ) ནིཙཡསནྣིདྷི ¶ ཝིཡ ཨེཀོཔི པུནདིཝསེ ‘‘སནྣིཙཡོ’’ཏི ཝུཙྩཏི. ཨནནྟརསིཀྑཱཔདེ པན ‘‘དུཏིཡོ ཝཱརིཏོཏི ཨདྷིཊྛཱནཾ ནིཡཏཾ, ཏསྨཱ དྭེ པཏྟེ ཨདྷིཊྛཱཏུཾ ན ལབྷཏི. སཙེ ཨེཀཏོ ཨདྷིཊྛཱཏི, དྭེཔི ན ཨདྷིཊྛིཏཱ ཧོནྟི. ཝིསུཾ ཝིསུཾ ཨདྷིཊྛཱཏི, དུཏིཡོ ཨནདྷིཊྛིཏོ’’ཏི ཝདནྟི. ཝིཀཔྤེཏུཾ པན བཧཱུཔི ལབྷཏི. ཨིདཱནི ཝཏྟབྦཾ སནྡྷཱཡ ‘‘ནཱམམཏྟེ ཝིསེསོ’’ཏི ཝུཏྟཾ. ཏཏྠ ནཱམནྟི མཛ྄ཛྷིམོ མཛ྄ཛྷིམོམཀོ མཛ྄ཛྷིམུཀྐཊྛོཏིཨཱདི.

༦༠༨. ‘‘པཱཀསྶ ཧི ཨཱུནཏྟཱ པཏྟསངྑྱཾ ན གཙྪཏཱི’’ཏི ཝཙནཏོ ཨདྷིཊྛིཏཔཏྟོཔི ཁརཔཱཀེན སེཏཏྟཱ ཨདྷིཊྛཱནཾ ཝིཛཧཏཱིཏི ཙེ? ན, ཨདྷིཊྛཱནཝིཛཧནེསུ ནཝསུ ཨནཱགཏཏྟཱ, ཏསྨཱ པཋམཔཱཀཱནཾ ཨེཝ ཨཱུནཏྟཱ པཏྟསངྑྱཾ ན གཙྪཏི, ཏསྨིཾ སཏི ཨཉྙཾ ཝིཉྙཱཔེཏུཾ ན ཝཊྚཏི. ‘‘ཨཱུནཔཉྩབནྡྷནེནཱ’’ཏི ཧི ཝུཏྟཾ. ཚིདྡེ, རཱཛིཡཱ ཝཱ ཧི སཏི ཏེཧི ཨདྷིཊྛཱནཾ ཝིཛཧཏཱིཏི ཝིཛཧིཏེ ནཱཡཾ པཊིསེདྷོ, ཏསྨཱ པཙྩུདྡྷརིཏྭཱ, ཝིཀཔྤེཏྭཱཔི ཨཉྙཾ ཝིཉྙཱཔེཏུཾ ན ལབྷཏི.

ཨེཝཾ པཏྟཀཱརཀོ མཱུལཾ ལབྷིཏྭཱཏི ཨེཏྠ པཙིཏྭཱ ཋཔིཏདིཝསཏོ པཊྛཱཡ. དཱཏུཀཱམོ ཧུཏྭཱཏི ཨེཏྠ དིནྣདིཝསཏོ, སུཏདིཝསཏོ ཝཱ ¶ པཊྛཱཡ དསཱཧཾ ཝེདིཏབྦཾ. ལིངྒཔརིཝཏྟེན པན དསཱཧཱཏིཀྐམེ པཏྟསཱམིཀསྶ བྷིཀྑུསྶ, བྷིཀྑུནིཡཱ པན རཏྟཱཏིཀྐམེ ནིསྶགྒིཡཾ.

པཏྟསིཀྑཱཔདཝཎྞནཱ ནིཊྛིཏཱ.

༢. ཨཱུནཔཉྩབནྡྷནསིཀྑཱཔདཝཎྞནཱ

༦༡༢-༣. བཧཱུ པཏྟེ ཝིཉྙཱཔེནྟཱིཏི ཨེཀམེཀཾ ཝིཉྙཱཔེནྟཱ བཧཱུ བྷིཀྑཱུ བཧཱུ པཏྟེ ཝིཉྙཱཔེནྟི, བཧཱུ ཝཱ བྷིཀྑཱུ པཏྟེ ཝིཉྙཱཔེནྟཱིཏི ཨཏྠོ. ‘‘ན, བྷིཀྑཝེ, པཏྟོ ཝིཉྙཱཔེཏབྦོ, ཡོ ཝིཉྙཱཔེཡྻ, ཨཱཔཏྟི དུཀྐཊསྶཱ’’ཏི ཨིདཾ སིཀྑཱཔདཾ ཨཱུནཔཉྩབནྡྷནེན སམཱུཧཏཾ ཧོཏི ན ཧོཏཱིཏི? ན ཧོཏི ཏམེཝ གཧེཏྭཱ ‘‘ཝིཉྙཱཔེཏི, པཡོགེ དུཀྐཊ’’ནྟི ཝུཏྟཏྟཱཏི ཨེཀེ. པཊིལཱབྷམྤི པརིཡཱདིཡིཏྭཱ ཏཾ དུཀྐཊཾ ཝུཏྟཾ, ཏསྨཱ ཏཾ ‘‘པཊིལཱབྷེན ནིསྶགྒིཡོ ཧོཏཱི’’ཏི ཨིམིནཱ སམཱུཧཏཾ ཧོཏི. ཨཉྙཐཱ སདུཀྐཊཾ ནིསྶགྒིཡཾ ཨཱཔཛྫཏི ཨནཱཔཏྟིཝཱརཝིརོདྷོ ཙ. ཡཱ ཀཱཙི པན ཨཀཏཝིཉྙཏྟི ཨནནུཉྙཱཏཀཱལེ དུཀྐཊམེཝ. བྷིནྣེནཱཏི ཨིཏྠམྦྷཱུཏལཀྑཎེ, བྷེདེནཱཏི ཝཱ ཨཏྠོ, ཧེཏྭཏྠེ ཀརཎཝཙནཾ.

ཨཱུནཔཉྩབནྡྷནསིཀྑཱཔདཝཎྞནཱ ནིཊྛིཏཱ.

༣. བྷེསཛྫསིཀྑཱཔདཝཎྞནཱ

༦༢༠. ‘‘སཱ ¶ ཨཧོསི སུཝཎྞམཱལཱ’’ཏི ཝཙནཏོ ཋཔེཏྭཱ སཧདྷམྨིཀེ ཨཉྙེསཾ ཡཐཱསུཁཾ རཱུཔིཡཾ དཱཏུཾ ཝཊྚཏི ཨུགྒཎྷཱཔེཏུཾ, སབྱོཧཱརཱཔེབྷུཉྩཱཏི ཨཱཙརིཡོ, ཝཱིམཾསིཏབྦཾ ཨིདྡྷིམསྶ ཨིདྡྷིཝིསཡཏྟཱ.

༦༢༢. ‘‘ཡེསཾ མཾསཾ ཀཔྤཏཱི’’ཏི ཝཙནེན ཡེསཾ མཾསཾ ན ཀཔྤཏི, ཏེསཾ སཔྤིཨཱདི ཀིཉྩཱཔི ན ཀཔྤཏི, ན པན ནིསྶགྒིཡཝཏྠཱུཏི ཝེདིཏབྦཾ. ཏཐཱ ན པཎཱིཏབྷོཛནཝཏྠཱུཏི. ཨུགྒཧིཏཀཾ ཀཏྭཱ ནིཀྑིཏྟནྟི ཨཛ྄ཛྷོཧརཎཏྠཾ ནིཀྑིཏྟཾ. ཨིཏརཉྷི པཊིགྒཧེཏྭཱ ཨཛ྄ཛྷོཧརིཏུཾ ཝཊྚཏི. ཨུབྷཡེསམྤཱིཏི པཙྪཱབྷཏྟཾ པཊིགྒཧིཏེཧི, པུརེབྷཏྟཾ པཊིགྒཧིཏེཧི ཙ ཀཏཱནཾ. ‘‘མཾསསྶ ཨཀཔྤིཡཏྟཱ’’ཏི ཀཱརཎཔཏིརཱུཔཀཾ ཝཏྭཱ. ཁཱདིཾསཱུཏི ‘‘ཝིཀཱལེ ¶ ཀེཝལཾ ནཝནཱིཏམེཝ ཁཱདིཏུཀཱམེན དདྷིཏཀྐགཏཱནི ཨཔནེཏབྦཱནི, པཙིཏུཀཱམསྶ སཱམཾཔཱཀཾ ན ཧོཏཱིཏི ཐེརསྶ ཨདྷིཔྤཱཡོ’’ཏི ཝུཏྟཾ. ‘‘ཁཡཾ གམིསྶཏཱི’’ཏི ཝཙནཏོ ཁཱིརཾ པཀྑིཔིཏྭཱ པཀྐསཔྤི ཝིཀཱལེ ཀཔྤཏཱིཏི སིདྡྷཾ. བྷེསཛྫེཧཱིཏི ཡཱཝཛཱིཝིཀབྷེསཛྫེཧི. ཀཏཏེལཾ པུརེབྷཏྟནྟི ཨཔཙིཏྭཱ ཀཏཾ ཨེཝ. ཨུཎྷོདཀེནཱཏི ཏཱཔནབྷཱཝཾ དཱིཔེཏཱིཏི ཀེཙི, ཏཾ ན སུནྡརཾ. ནིབྦཊྚིཏཏྟཱཏི པིཉྙཱཀཱདིཏོ. ‘‘ཏེལཏྠཱཡ པཊིགྒཧིཏ…པེ… དུཀྐཊམེཝཱ’’ཏི ཝཙནཏོ ཨཏེལཏྠཱཡ པཊིགྒཧིཏེཧི, སཏྟཱཧཱཏིཀྐནྟེཧིཔི ཀཏཏེལཾ ཀཏདིཝསཏོ པཊྛཱཡ སཏྟཱཧཾ ཝཊྚཏཱིཏི ཚཱཡཱ དིསྶཏི, ཀརམནྡཾ རུཀྑསཱརོཏི ཀེཙི.

༦༢༣. ཨཝསཀསཊེ ཡསྨཱ ཁཱིརཱདཱིནི པཀྑིཔིཏྭཱ ཏེལཾ པཙནྟི, ཏསྨཱ ཀསཊཾ ན ཝཊྚཏི, ཏེལམེཝ ཝཊྚཏི, ཏེན ཝུཏྟཾ ‘‘པཀྐཏེལཀསཊེ ཝིཡ ཀུཀྐུཙྩཱཡཏཱི’’ཏི. ཝསཱཡ སདྡྷིཾ པཀྐཏྟཱ ན ཝཊྚཏཱིཏི ཙེ? ཝདཐ, བྷནྟེ, ནཝནཱིཏེ དདྷིགུལི༹ཀཱཏིཨཱདིསམྦནྡྷོ. མདྷུམྷི ཙཏྟཱརོ ཀཱལིཀཱ ཡཐཱསམྦྷཝཾ ཡོཛེཏབྦཱ, ཨུཙྪུམྷི ཙ, ཀཐཾ? སམཀྑིཀཾ སེལ༹ཀཾ མདྷུ ཡཱཝཀཱལིཀཾ. ཨནེལཀཾ ཨུདཀསམྦྷིནྣཾ ཡཱམཀཱལིཀཾ, ཨསམྦྷིནྣཾ སཏྟཱཧཀཱལིཀཾ, མདྷུསིཊྛཾ པརིསུདྡྷཾ ཡཱཝཛཱིཝིཀཾ. ཏཐཱ ཨུཙྪུ ཝཱ རསོ ཝཱ སཀསཊོ ཡཱཝཀཱལིཀོ, ནིཀྐསཊོ ཨུདཀསམྦྷིནྣོ ཡཱམཀཱལིཀོ, ཨསམྦྷིནྣོ སཏྟཱཧཀཱལིཀོ, སུཀྑཀསཊཾ ཡཱཝཛཱིཝིཀནྟི ཝེདིཏབྦཾ. ཀསྨཱ? ཨུདཀསམྦྷེདཝིསེསཏོ.

ཀིཾ ཝུཏྟཾ ཧོཏི? ཙཏཱུསུ ཀཱལིཀེསུ པུབྦཾ པུབྦཾ གརུཀཾ, ཨཔརཾ ཨཔརཾ ལཧུཀཾ. ཏེསུ ཙཱཡཾ ཨུདཀསམྦྷེདོ གརུཀཾ ལཧུཀཾ ཀརོཏི, ལཧུཀཉྩ གརུཀཾ. ཨམྦརསཱདཱིནི ཧི ཡཱཝཀཱལིཀཏྟཱ ¶ གརུཀཱནི, ཨུདཀསམྦྷེདོ པན ཏཱནི ཨམྦཔཱནཱདིསམཉྙཾ དཏྭཱ ལཧུཀཱནི ཡཱམཀཱལིཀཱནི ཀརོཏི. ‘‘ཕཱཎིཏཾ ནཱམ ཨུཙྪུམྷཱ ནིབྦཏྟནྟི ཨུཙྪུརསཾ ཨུཔཱདཱཡཱ’’ཏི ཨཊྛཀཐཱཝཙནཏོ ཨུཙྪུརསོ སཏྟཱཧཀཱལིཀོཏི སིདྡྷཾ. ཏཏྠ ‘‘ཨུདཀསམྦྷེདོ ཏཾ ཡཱམཀཱལིཀཾ ཀརོཏཱི’’ཏིཨཱདིཾ བཧུཾ ཝཏྭཱ ཡོཛིཏཱ.

ཨཔིཙེཏྠ ཨུཙྪུརསོ ‘‘ཨནུཛཱནཱམི, བྷིཀྑཝེ, ཨུཙྪུརས’’ནྟི (མཧཱཝ. ༣༠༠) ཨནུཉྙཱཏཏྟཱ གུལོ༹དཀཾ ཝིཡ ཨུཙྪུརསསཱམཉྙཏོ ཨུདཀེན ཨསམྦྷིནྣོཔི ཨགིལཱནསྶ ¶ ཝཊྚཏི, ཏེནེཝཱཧ ཨཊྛཀཐཱཡཾ ‘‘ཨུཙྪུརསོ ནིཀསཊོ པཙྪཱབྷཏྟཾ ཝཊྚཏཱི’’ཏི (མཧཱ. ཨཊྛ. ༣༠༠). ཨཡཾ སབྦོ ནོ ཏཀྐོཏི ཨཱཙརིཡོ. ཀེཙི པནཱཧུ ‘‘ཕཱཎིཏཾ ནཱམ ཨུཙྪུམྷཱ ནིབྦཏྟ’ནྟི ཝཙནཏོ, ‘ཨུཙྪུརསཾ ཨུཔཱདཱཡཱ’ཏི ཨཊྛཀཐཱཝཙནཏོ ཙ ཨུཙྪུརསོ ཕཱཎིཏམེཝ, ཏསྨཱ གུལེ༹ ཝིཡ པཊིཔཛྫིཏབྦ’’ནྟི. ཀེཙི ‘‘ཝུཏྟནཡེན སཏྟཱཧཀཱལིཀོཝ སམཱནོ ‘ཨནུཛཱནཱམི, བྷིཀྑཝེ, ཨུཙྪུརས’ནྟི ཝིསུཾ ཨནུཉྙཱཏཏྟཱ ཨསམྦྷིནྣོཔི ཨགིལཱནསྶ ཝཊྚཏཱི’’ཏི ཝདནྟི. ཀེཙི ‘‘ཝུཏྟནཡེན ཝིསུཾ ཨནུཉྙཱཏཏྟཱ ཨེཝ སམྦྷིནྣོ ཝཱ ཨསམྦྷིནྣོ ཝཱ ཡཱམཀཱལིཀོཝ, གུལོ༹དཀཾ པན སཏྟཱཧཀཱལིཀམེཝཱ’’ཏི ཝདནྟི. ཀེཙི ‘‘གུལོ༹དཀཾ ཝིཡ སོ དུཝིདྷོཔི སཏྟཱཧཀཱལིཀོཡེཝཱ’’ཏི ཝདནྟི.

ཏཏྠཱཡཾ པཋམཱཙརིཡཝཱདེ ཝིཙཱརཎཱ – ཕཱཎིཏཱནུམཏིཡཱཡེཝ ཨུཙྪུརསཱནུམཏིཡཱ སིདྡྷིཏོ ཝིསུཾ ‘‘ཨུཙྪུརས’’ནྟི ཨུདྡྷརིཏྭཱ ཨནུམཏི ནིརཏྠིཀཱཏི ཨཱཔཛྫཏི, ཏཐཱ ‘‘ཨུཙྪུརསོ ནིཀསཊོ པཙྪཱབྷཏྟཾ ཝཊྚཏཱི’’ཏི ཨཊྛཀཐཱཔི ནིརཏྠིཀཱ. ‘‘སཏྟཱཧཾ ཝཊྚཏཱི’’ཏི ཝཏྟབྦཾ སིཡཱཏི, ན ཙ ཏཐཱ སཀྐཱ ཝཏྟུཾ. པཙྪཱབྷཏྟཾ ཝཊྚནཀརསཱདྷིཀཱརཏྟཱཏི ཙེ? ན, ཏསྨིཾ ཨདྷིཀཱརེ སཏྟཱཧཀཱལིཀསྶ ཨཝཏྟབྦཔྤསངྒཏོ. ཀཱལབྷེདཾ ཨནཔེཀྑིཏྭཱ རསཱདྷིཀཱརེ ཨོཏིཎྞཏྟཱ ཝུཏྟོཏི ཙེ? ན སཀྐཱ ‘‘ནིཀསཊོ སཏྟཱཧཾ ཝཊྚཏཱི’’ཏི ཝཏྟུཾ. པཙྪཱབྷཏྟཾ ཝཊྚནཀརསཱདྷིཀཱརཏྟཱ ན ཝཏྟབྦནྟི ཙེ? ན, ཨེཝཉྷི ཝུཏྟེ ཏདཉྙརསོ ཝིཡ ཨཡམྤི པཙྪཱབྷཏྟམེཝ ཝཊྚཏི, ན ཏཏོ པརནྟི ཨཱཔཛྫཏི. ཏཏོ པརཾ ཨཔརིབྷོགཏྟཱ ‘‘པཙྪཱབྷཏྟཾ ཝཊྚཏཱི’’ཏི ཝུཏྟནྟི ཙེ? ན, ཡཱཝཀཱལིཀབྷཱཝཔྤསངྒཏོ. ན སོ པསངྒོ ཨཱབྷིདོསིཀསྶཱཔི ཨུཙྪུརསསྶ པཱཀེན ཕཱཎིཏཱདིབྷཱཝཔྤསངྒཏོ. ཨཡམེཝ ཏཏིཡཙཏུཏྠཱཙརིཡཝཱདེསུ ཝིཙཱརཎཱ. དུཏིཡཝཱདེ ཝིཙཱརཎཱ ཝུཏྟཱ, ཝིམདྡོ པནེཏྠ བྷེསཛྫཀྑནྡྷཀེ (མཧཱཝ. ༣༠༠) ཨཱཝི བྷཝིསྶཏི. ཕཱཎིཏཾ ནཱམ ཨུཙྪུམྷཱ ནིབྦཏྟནྟི མདྷུཀཏཱལནཱལི༹ཀེརཕཱཎིཏཱདིཏོ ཨུཀྐཊཝཏྠུཏོ ནིསྶགྒིཡཝཏྠུཕཱཎིཏསྶ ཝིསེསཝཙནཾ, ཏེནེཏཾ པཉྙཱཡཏི ‘‘ནིསྶགྒིཡཝཏྠུབྷཱུཏཾ ཨིདྷ ཕཱཎིཏཾ ནཱམ ཨུཙྪུམྷཱ ནིབྦཏྟམེཝ, ན མདྷུཀཱདིཏོ ནིབྦཏྟ’’ནྟི. ཨེཏྟཱཝཏཱ ཡཾཀིཉྩི ཨུཙྪུམྷཱ ནིབྦཏྟཾ ¶ , ན ཏཾ སབྦཾ ཕཱཎིཏམེཝ ནཱམཱཏི སཱདྷིཏཾ ཧོཏི. ཏེནེཝ ཁནྡྷཀེ ཕཱཎིཏཾ པཋམཾ ཨནུཛཱནིཏྭཱཝ པཙྪཱ ཨུཙྪུརསོ ཨནུཉྙཱཏོ, ཏཐཱ ཏཏྠེཝ གུལ༹ཾ, གུལོ༹དཀཉྩ.

ཨུཙྪུརསཾ ¶ ཨུཔཱདཱཡ ཨཔཀྐཱ ཝཱཏིཨཱདིམྷི པན ཡེསཾ ལདྡྷི ‘‘ཨུཙྪུརསོ ཡཱམཀཱལིཀོ’’ཏི. ‘‘ཏེ ཨཔཀྐཱ ཝཱཏི སཱམཾ བྷིཀྑུནཱ ཨཔཀྐཱ ཝཱ. ཨཝཏྠུཀཔཀྐཱ ཝཱཏི ཝིནཱ ཝཏྠུནཱ པཀྐཱ ཝཱ’’ཏི ཨཏྠཾ ཝཎྞཡནྟི, ཏཾ ན ཡུཏྟཾ ‘‘ཨུཙྪུརསཾ ཨུཔཱདཱཡཱ’’ཏི ཨིམསྶ ཝཙནསྶ པཡོཛནཱབྷཱཝཔྤསངྒཏོ, བྷིཀྑུནོ པཙནཱདྷིཀཱརཱབྷཱཝཱ. སཱམཔཱཀོ ཨིདྷཱདྷིཔྤེཏོཏི ཙེ? སཱམཾ ཨཔཀྐསྶ ཨུཙྪུརསསྶ ཏེསཾ ཨཏྟནོམཏིཡཱ ཕཱཎིཏབྷཱཝསིདྡྷིཏོ ཙ པརཏོ ‘‘པུརེབྷཏྟཾ པཊིགྒཧིཏེན ཨཔརིསྶཱཝིཏཨུཙྪུརསེན ཀཏཕཱཎིཏ’’ནྟིཨཱདིནཡདསྶནཏོ ཙ ཏཾ ཨཡུཏྟཾ, ཏཏྠ ‘‘ཨཔརིསྶཱཝིཏཨུཙྪུརསེན སཡཾཀཏཾ ནིརཱམིསམེཝ ཝཊྚཏཱི’’ཏི ཝཙནཾ ཡཾ ཏཏྠ ཀསཊཾ སཱམཔཱཀཾ ན ཛནེཏི, སཝཏྠུཀཔཊིགྒཧིཏཀཏཾཡེཝ ཏཾ ཀརོཏཱིཏི དཱིཔེཏི, ཏསྨཱ པཊིགྒཧེཏུཾ ན ཝཊྚཏི ཝིཀཱལེཏི པོརཱཎཱ. ‘‘ཀོཊྚིཏཨུཙྪུཕཱཎིཏཾ ‘རཛནཔཱཀཾ ཝིཡ ཨོལཱ༹རིཀཾ སཝཏྠུཀཔཀྐཾ ནཱམ ཧོཏཱི’ཏི སཉྙཱཡ པུརེབྷཏྟམེཝ ཝཊྚཏཱི’’ཏི ཝུཏྟཾ. མཧཱཨཊྛཀཐཱཙརིཡཱ ‘‘ཨེཝཾ ཕཱཎིཏགྒཧཎཾ ཨམདྷུརཾ, ཏསྨཱ པཙྪཱབྷཏྟཾ ན ཝཊྚཏཱི’’ཏི ཝདིཾསུ. ཀིཾ མདྷུརཏཱཡ, ཨམདྷུརཏཱཡ ཝཱཏི? ཨཏྠམེཝ དསྶེཏུཾ མཧཱཔཙྩརིཡཾ ཏཐཱ ཝུཏྟནྟི ཨུཔཏིསྶཏྠེརོ ཨཱཧ ཀིར. ཏཾ ཡུཏྟནྟི ཨུཙྪུཏོ ནིབྦཏྟཏྟཱ ཝུཏྟཾ, ཏེནེཝཱཧ ‘‘ཁཎྜསཀྑརཾ པན…པེ… ཝཊྚཏཱི’’ཏི. ‘‘ཏཾ ཁཱིརགྷཊེ པཀྑིཔིཏྭཱ པཙནྟཱི’’ཏི ལིཁིཏཾ. ཛལླིཀཱ ནཱམ ཕེཎཱདི.

བྷེསཛྫོདིསཾ ཝདནྟེན ཨིཏརེ ཨཏྠུདྡྷཱརཝསེན ཝུཏྟཱ. ‘‘ཨཱཧཱརཏྠཾ ཕརིཏུཾ སམཏྠཱནཱི’’ཏི ཁནྡྷཀེ (མཧཱཝ. ༢༦༠) ‘‘ཡཾ བྷེསཛྫཉྩེཝ ཨསྶ བྷེསཛྫསམྨཏཉྩ ལོཀསྶ, ཨཱཧཱརཏྠཉྩ ཕརེཡྻཱ’’ཏི ཝུཏྟཏྟཱ ཝུཏྟཾ. ཨེཏྠ ཝིཙཱརཎཱ བྷེསཛྫཀྑནྡྷཀེ ཨཱཝི བྷཝིསྶཏི.

༦༢༤. དྭཱརཝཱཏཔཱནཀཝཱཊཱནཱིཏི དྭཱརསྶ ཙ ཝཱཏཔཱནཱནཉྩ ཀཝཱཊཱནི. ཀསཱཝཔཀྑེཔམཏྟེན ཧི ཏཱནི ཨཏྟནོ སབྷཱཝཾ པརིཙྩཛིཏཱནི ཧོནྟི, ཏསྨཱ ‘‘མཀྑེཏབྦཱནཱི’’ཏི ཝུཏྟཾ. ‘‘ཀསཱཝོ ནཱམ ཀནཀལམྦཱདཱིནིཔཱི’’ཏི ཝདནྟི. ཨདྷིཊྛེཏཱིཏི ‘‘ཨིདཱནི ཨཛ྄ཛྷོཧརཎཱིཡཾ ན བྷཝིསྶཏི, བཱཧིརཔརིབྷོགོ བྷཝིསྶཏཱི’’ཏི ཙིཏྟཾ ཨུཔྤཱདེཏི. ཨིདྷ ‘‘ཝིཀཔྤེཏཱི’’ཏི པདཾ ནཏྠི. ཨདྷིཊྛཱནམྤི མུཁཱརུལ༹ྷིཡཱ ཝུཏྟཾ ‘‘ཨིམཾ ནཝནཱིཏཾ ཨདྷིཊྛཱམཱི’’ཏི ཨཝཏྟབྦཏོ.

༦༢༥. པརིབྷུཉྫིཏུཾ ¶ པན ན ཝཊྚཏཱིཏི ཝིསྶཱསཱབྷཱཝཾ སནྡྷཱཡ ཝུཏྟཾ. སཙེ སཝིསྶཱསོ, ཝཊྚཏཱིཏི ¶ ‘‘པརིབྷུཉྫ ཏྭ’’ནྟི ཨེཏྟཱཝཏཱ ཝིསྶཛྫིཏཾ ཧོཏི, ཏསྨཱ ཨུབྷིནྣཾ ཨནཱཔཏྟཱིཏི སམྦནྡྷོ. སཙེ ན ཝིསྶཛྫིཏཾ, ཨཱཔཏྟི ཧོཏཱིཏི སིདྡྷཾ. ཏསྨཱ ཨུབྷིནྣཾ སནྟཀཾ ཙཱིཝརཾ ཨཉྙཏརེན སམྨུཁཱིབྷཱུཏེན ཨདྷིཊྛཱཏབྦཾ. ནོ ཙེ ཨདྷིཊྛཱཏི, ནིསྶགྒིཡཾ ཧོཏཱིཏིཔི ཡུཛྫཏི. ཀཱཀནིཀམཏྟཉྩེ མཱུལཾ ཨདིནྣཾ, ‘‘ན ཨདྷིཊྛཱནུཔགཾ…པེ… སཀབྷཱཝཾ ན ཨུཔེཏཱི’’ཏི ཨིམིནཱ ཨེཏཾ སདིསཾ ན ཧོཏི, ཨཱབྷིདྷམྨིཀགཎཱནཾ དིནྣཾ ཝིཡ ཙ ན ཧོཏི. ཀསྨཱ? ཨཱབྷིདྷམྨིཀཱ ཧི ཨནུཔསམྤནྣཱཔི ཧོནྟི, པཙྪཱ ཨཱབྷིདྷམྨིཀབྷཱུཏཱནམྤི ཏཾ སཱདྷཱརཎཾ ཧོཏཱིཏི. ཨེཏྠ དྭེཔི ཨུཔསམྤནྣཱ ཨེཝ, དྭིནྣམྤི ཏཏྠ ཡཐཱཀཱམཀརཎཱིཡཏཱ ཨཏྠི མམཏྟཉྩ, ན ཨེཝཾ ཏདཉྙེསཾ སཱདྷཱརཎཾ, ན ཙ དྭེ ཏཡོ བྷིཀྑཱུ ‘‘ཨེཀཏོ ཝསྶིསྶཱམཱ’’ཏི ཀརོནྟི, རཀྑཏི ཏཱཝ. ‘‘ཨཝིབྷཏྟཏྟཱ ཨནཱཔཏྟཱི’’ཏི ཨིམིནཱ ཙ ཨིདཾ སདིསཾ, ཡེན མཱུལེན པཊིགྒཧིཏཾ, ཏསྶ སཙེ ཨིཏརོ དེཏི, སོ ཝཱ ཏཾ ཨིཏརསྶ དེཏི, སཏི པཊིགྒཧཎེ སཏྟཱཧཱཏིཀྐམེ ནིསྶགྒིཡཏྟཱ, ཏསྨཱ ཏཾ ཙཱིཝརཾ དྭཱིསུ སམྨུཁཱིབྷཱུཏེན ཨེཀེན ཨདྷིཊྛཱཏབྦཾ. ཀིཉྩཱཔི ཨེཏྠ པཡོགོ ན དིསྶཏི སམཱནཔརིཀྑཱརཱནཾ དྭིནྣཾ ཨདྷིཊྛཱནཔཡོགཱབྷཱཝཏོ, ཏཐཱཔི སམཱནསབྦབྷཎྜཀཱནཾ དྭིནྣཾ ཏེལཱདི ཡེན པཊིགྒཧིཏཾ, ཏསྶ ཀཱལཱཏིཀྐམེ ཨཱཔཏྟིསམྦྷཝཏོ, ཨནདྷིཊྛཱནེ དུལླབྷཝིསེསཧེཏུཏྟཱ ཙ ‘‘ཨདྷིཊྛཱཏབྦ’’ནྟི ཝུཏྟཾ. ཏཾ ཨཡུཏྟཾ པཏྟཙཱིཝརསཏྟཱཧཀཱལིཀཱནཾ ཨསདིསཝིདྷཱནཏྟཱ. ཨེཏྠ པཏྟཙཱིཝརཉྷི ཨཏྟནོ སནྟཀབྷཱཝཾ ཨུཔགཏམེཝ ཨནདྷིཊྛཧནྟསྶ ཀཱལཱཏིཀྐམེ ཨཱཔཏྟི, སཏྟཱཧཀཱལིཀཾ པན པརསནྟཀསཱདྷཱརཎམྤི པཊིགྒཧིཏཾ པཊིགྒཱཧཀསྶ ཀཱལཱཏིཀྐམེ ཨཱཔཏྟིཀརཾ. པཊིགྒཧཎཉྩེཏྠ པམཱཎཾ, ན ཏཏྠ སཀསནྟཀཏཱ, སཏྟཱཧཀཱལིཀཉྩ ནིསྶགྒིཡཾ, སབྦེསམྤི ཨནཛ྄ཛྷོཧརཎཱིཡཾ. པཏྟཙཱིཝརཾ ཨཉྙསྶ པརིབྷུཉྫཏོ ཨནཱཔཏྟི. ཨིདཉྩ ཀཱལཱཏིཀྐནྟམྤི ནིསྶཛྫིཏྭཱ པཙྪཱ ལདྡྷཾ ཀཔྤཏི. པཏྟཙཱིཝརཾ པན ཏཾ ཏསྶ ཝིནཡཀམྨནྟི ཀཔྤཏཱིཏི. ཨཝིབྷཏྟསྶཔི ཨིམསྶ དཱནཾ རུཧཏི, ན པཏྟཙཱིཝརསྶ. ཝུཏྟཉྷེཏཾ ཨཊྛཀཐཱཡཾ ‘‘དྭིནྣཾ སནྟཀཾ ཧོཏི…པེ… སཙེཔི ཨཝིབྷཛིཏྭཱ སདྡྷིཝིཧཱརིཀཱདཱིནཾ དེནྟི, ཨདིནྣམེཝ ཧོཏཱི’’ཏི. ཡསྶ དཱནམེཝ ན རུཧཏི, ཏསྶ ཀུཏོ ཨདྷིཊྛཱནཾ. ཨེཀོ ཙེ པཏྟཙཱིཝརཾ དསམེ དིཝསེ ཨིཏརསྶ དེཏི. ཏཏོ པཊྛཱཡ སོ དས དིཝསེ པརིཧརིཏུཾ ལབྷཏི ¶ , ན ཏཐཱ སཏྟཱཧཀཱལིཀནྟི སབྦཐཱ ཨུཔཔརིཀྑིཡམཱནཾ སརིཀྑཾ ནཀྑམཏཱིཏི ན ཏཾ སཱརཏོ དཊྛབྦནྟི ཨཱཙརིཡསྶ ཏཀྐོ. ‘‘ཝིནཡཀམྨཝསེན པན ཨནིསྶཛྫིཏྭཱ སཧསཱ ཝིརུཛ྄ཛྷིཏྭཱ ཀསྶཙི པརིཙྩཏྟམྤི པུན པཊིལབྷིཏྭཱ པརིབྷུཉྫིཏུཾ ན ཝཊྚཏཱི’’ཏི ཝུཏྟཾ, སཙེ དེསནྟརིཏཾ, སམུདྡནྟརིཏཾ ཝཱ ཙཱིཝརཾ ནིསྶགྒིཡཾ ཛཱཏཾ, ཏཾ ཨིདྷ ཋིཏེན བྷིཀྑུནཱ ཨེཀསྶ ཝནྟེན ཙིཏྟེན ཙཏྟཾ ཀཏྭཱ ཨནཔེཀྑིཏྭཱ ཨཱཔཏྟིཾ དེསེཏྭཱ ཏསྶ ཝིསྶཱསེན པུན གཧེཏྭཱ ཨདྷིཊྛཱཏབྦཾ, ‘‘པཏྟཱདཱིསུ ཙ ཨཡམེཝ ནཡོ’’ཏི ཙ ཝུཏྟཾ, ‘‘ཏཱལནཱལི༹ཀེརཕཱཎིཏམྤི སཏྟཱཧཀཱལིཀཾ ཨེཝཱ’’ཏི ཙ. ‘‘དྭིནྣཾ སནྟཀཾ ཨེཀེན པཊིགྒཧིཏཾ སཏྟཱཧཀཱལིཀཾ སཏྟཱཧཱཏིཀྐམེ ཨཱཔཏྟིཾ ན ཀརོཏི ¶ , པརིབྷུཉྫིཏུཾ པན དྭིནྣམྤི ན ཝཊྚཏཱི’’ཏི ཙ ‘‘པརསནྟཀཾ པཊིགྒཧེཏྭཱ ཋཔིཏེཔི ཨེསེཝ ནཡོ’’ཏི ཙ ཀེཙི ཝདནྟི. དུཀྐཊཝཏྠུབྷཱུཏཾ སཔྤིཨཱདི ནིསྶཛྫིཏབྦཾ པུན པརིབྷུཉྫིཏུཾ ཝཊྚཏཱིཏི ཝིདྷཱནཾ ན དིསྶཏཱིཏི.

བྷེསཛྫསིཀྑཱཔདཝཎྞནཱ ནིཊྛིཏཱ.

༤. ཝསྶིཀསཱཊིཀསིཀྑཱཔདཝཎྞནཱ

༦༢༧. ‘‘ཨེཀམེཝ ཀཏྭཱ’’ཏི ཝཙནེན ཝསྶིཀསཱཊིཀལཀྑཎེན ཉཱཏཀཱནམྤི སཏུཔྤཱདཾ ཀརོནྟེན ཨེཀམེཝ གཧེཏབྦནྟི དྷམྨསིརིཏྠེརོ. ཙཏུབྦིདྷཾ ཁེཏྟནྟི ཨེཏྠ ཀིཉྩཱཔི ཏིཝིདྷཾ དིསྶཏི, ཏཾ པན ཨེཝཾ གཧེཏབྦཾ, ཡསྨིཾ ཁེཏྟེ པརིཡེསིཏུཾ ལབྷཏི, ཏཾ པརིཡེསནཁེཏྟཾ ནཱམ, ‘‘ཨེཝཾ ཀརཎནིཝཱསནཱདྷིཊྛཱནཁེཏྟཱནིཔཱི’’ཏི ཝུཏྟཾ. ཨེཏྠ པཙྪིམེན པུརིམགྒཱཧོ ཝེདིཏབྦོ, ན པུརིམེན པཙྪིམགྒཱཧོ, ཡཐཱལཱབྷནྟི ཨཱཙརིཡོ. ཏསྶཏྠོ – ཨདྷིཊྛཱནཁེཏྟེན པཙྪིམེན པུརིམཱནཾ ཏིཎྞཾ གཱཧོ ཧོཏི, ཏཐཱ ནིཝཱསནཁེཏྟེན དྭིནྣཾ པུརིམཱནཾ. ཀརཎཁེཏྟེན པན ཨེཀསྶེཝ པུརིམསྶ གཱཧོ ཧོཏཱིཏི. ཨེཏྠ པན ཀིཉྩཱཔི ཀརཎཁེཏྟནིཝཱསནཁེཏྟཱནཾ ཀཱལཏོ ནཱནཏྟཾ ནཏྠི, ཀིརིཡཏོ པན ‘‘ཨཊྛིཾ ཀཏྭཱ ནིཝཱསེཏབྦ’’ནྟི པཱལི༹ཝཙནཏོ, ཏསྨཱ དྭིདྷཱ ཀཏྭཱ ཝུཏྟཾ ཨཉྙཏརཱབྷཱཝེན, ཏདཏྠསིདྡྷིཏོ ཙ, ཀཐཾ པནེཏྠ ནཱནཏྟཾ ནཏྠཱིཏི པཉྙཱཡཏཱིཏི ཙེ? པཱལི༹ཏོ, ‘‘ཨཌྜྷམཱསོ སེསོ གིམྷཱནནྟི ཀཏྭཱ ནིཝཱསེཏབྦ’’ནྟི ཧི པཱལི༹, ཏཐཱ མཱཏིཀཱཊྛཀཐཱཏོ (ཀངྑཱ. ཨཊྛ. ཝསྶིཀསཱཊིཀསིཀྑཱཔདཝཎྞནཱ) ཙ.

ཏཐཱཧ ¶ ‘‘པཙྪིམོ ཨཌྜྷམཱསོ ཀརཎནིཝཱསནཁེཏྟམྤཱི’’ཏི, ཨིམིནཱ ནཡེན ཏིཝིདྷམེཝ ཁེཏྟནྟིཔི སིདྡྷཾ. སམནྟཔཱསཱདིཀཱཡཾ པན ཀཏྠཙི པོཏྠཀེ ‘‘ཛེཊྛམཱུལཔུཎྞམཱསིཡཱ པཙྪིམཔཱཊིཔདདིཝསཏོ པཊྛཱཡ ཡཱཝ ཀཱལ༹པཀྑུཔོསཐོ, ཨཡམེཀོ ཨདྡྷམཱསོ པརིཡེསནཁེཏྟཉྩེཝ ཀརཎཁེཏྟཉྩ. ཨེཏསྨིཉྷི ཨནྟརེ ཝསྶིཀསཱཊིཀཾ ཨལདྡྷཾ པརིཡེསིཏུཾ, ལདྡྷཾ ཀཱཏུཉྩ ཝཊྚཏི, ནིཝཱསེཏུཾ, ཨདྷིཊྛཱཏུཉྩ ན ཝཊྚཏཱི’’ཏི པཱཋོ དིསྶཏི, སོ ཨཔཱཋོ ཡཐཱཝུཏྟཔཱལི༹མཱཏིཀཱཊྛཀཐཱཝིརོདྷཏོ, ཏསྨཱ ཏཏྠ ‘‘ཨལདྡྷཾ པརིཡེསིཏུཾ ཝཊྚཏི, ཀཱཏུཾ, ནིཝཱསེཏུཾ, ཨདྷིཊྛཱཏུཉྩ ན ཝཊྚཏཱི’’ཏི པཱཋོ ཝེདིཏབྦོ. ཨེཝཾ ཏཱཝ པཙྪིམེན པུརིམགྒཱཧསིདྡྷི ཝེདིཏབྦཱ, ན པུརིམེན ཀརཎཁེཏྟཱདཱིནཾ གཱཧོ སམྦྷཝཏི. ‘‘མཱསོ སེསོ གིམྷཱནནྟི ཝསྶིཀསཱཊིཀཙཱིཝརཾ པརིཡེསིཏབྦ’’ནྟི ཨེཏྟཀམེཝ ཧི ཝུཏྟཾ, ན, ཨཊྛཀཐཱཡཾ ‘‘ཨཡམེཀོ ཨདྡྷམཱསོ པརིཡེསནཁེཏྟཉྩེཝ ཀརཎཁེཏྟཉྩཱ’’ཏི ཝུཏྟཏྟཱཏི ཙེ? ན, ཏསྶ ལེཁནདོསཏྟཱ ¶ , ཏཐཱ སཱདྷིཏཾ. ཀརཎཁེཏྟེན པན ནིཝཱསནཁེཏྟགྒཱཧོ ཨཏྠི ཀཱལནཱནཏྟཱབྷཱཝཏོ, ཏེནེཝ པུབྦེ ཡཐཱལཱབྷགྒཧཎཾ ཀཏཾ, ཏཐཱ ཙ སཱདྷིཏམེཝ, ན བྷེདོ པནཏྠི, པཡོཛནཾ ཝུཏྟམེཝ. ནིཝཱསནཀྑེཏྟེན ཨདྷིཊྛཱནཀྑེཏྟགྒཱཧོ ནཏྠི ཨེཝ, ན ཧི པུརིམེན པཙྪིམགྒཱཧོ ཝེདིཏབྦོ. ན པཱལི༹ཝིརོདྷཏོཏི ཙེ? ན, ཏདཏྠཱཛཱནནཏོ. ‘‘མཱསོ སེསོ གིམྷཱནནྟི ཨདྡྷམཱསོ སེསོ གིམྷཱན’’ནྟི ཨེཏྠ ཨིཏི-སདྡསྶ ཧི ཨིཏོ པཊྛཱཡཱཏི ཨཏྠོ. པརཏོ ཨཱཔཏྟིཁེཏྟདསྶནཏོ ཨིཏརསྶ ཨནཱཔཏྟིཁེཏྟབྷཱཝོ དསྶིཏོཝ ཧོཏི. དིནྣཔུབྦཏོཔི ཉཱཏཀཔཝཱརིཏཊྛཱནཏོ ནིཔྥཱདེནྟསྶ ནིསྶགྒིཡཾ པིཊྛིསམཡཏྟཱ, པཀཏིཡཱ ཝསྶིཀསཱཊིཀདཱཡཀཱ ནཱམ སངྒྷསྶ ཝཱ པུགྒལསྶ ཝཱ ཨཔཝཱརེཏྭཱ ཨནུསཾཝཙྪརཾ དེནྟཱ, ཏཏྠ སཏུཔྤཱདོཝ ཝཊྚཏི. ཝཏྟབྷེདེ དུཀྐཊནྟི ཏདཉྙེསུ.

‘‘སཙེ ཀཏ…པེ… ཝསྶཱུཔནཱཡིཀདིཝསེ ཨདྷིཊྛཱཏབྦཱ…པེ… ཚ མཱསེ པརིཧཱརཾ ལབྷཏཱི’’ཏི ཝཙནཏོ ཨནྟོཝསྶེཔི ཡཱཝ ཝསྶཱནསྶ པཙྪིམདིཝསཱ ཨཀཏཱ པརིཧཱརཾ ལབྷཏཱིཏི དཱིཔིཏཾ ཧོཏི. ཀསྨཱ ན ཝིཙཱརིཏནྟི ཙེ? ཨཏྠཱཔཏྟིསིདྡྷཏྟཱ. ‘‘ཚ མཱསེ པརིཧཱརཾ ལབྷཏཱི’’ཏི ཝཙནེན ཨཀཏཱ ལབྷཏཱིཏི སིདྡྷམེཝ, ཏཾ ཀིཉྩཱཔི སིདྡྷཾ, སརཱུཔེན པན ཨནཱགཏཏྟཱ སརཱུཔེན དསྶེཏུཾ, དུསྶདྡྷཱཔཡཏྟཱ ཨུཔཔཏྟིཏོ དསྶེཏུཉྩ ཨིདམཱརདྡྷཾ ¶ ཨཱཙརིཡེན, ‘‘ཡཐཱ ཙེཏྠ, ཨེཝཾ ཀཐིནབྦྷནྟརེ ཨུཔྤནྣཙཱིཝརམྤི ཧེཊྛཱ ཝུཏྟནཡེནེཝ པཊིཔཛྫིཏབྦ’’ནྟི ཨནུགཎྛིཔདེ ཝུཏྟཾ, ཏཾ དུཝུཏྟཾ ཏཏྠེཝ པུབྦཱཔརཝིརོདྷཏོ. ཡཉྩེཏྠ ཨཊྛཀཐཱཝཙནཾ སཱདྷཀཏྟེན ཝུཏྟཾ, ཏཾ ཏམཏྠཾ ན སཱདྷེཏི. ‘‘ཡདི ནཔྤཧོཏི ཡཱཝ ཀཏྟིཀཔུཎྞམཱ པརིཧཱརཾ ལབྷཏཱི’’ཏི ཝཙནཾ ཨཔྤཧོནྟསྶ ཡཱཝ ཀཏྟིཀཔུཎྞམཱ ཏཱཝ པརིཧཱརཁེཏྟཾ, ཏཏོ པརཾ ཨེཀདིཝསོཔི ན ཧོཏཱིཏི དཱིཔེཏི, ཏསྨཱ ཨཔྤཧོནཀབྷཱཝེན ཨཀཏཱཝ ཡཱཝ ཀཏྟིཀཔུཎྞམཱ པརིཧཱརཾ ལབྷཏི, ཏཏོ པརཾ ན ལབྷཏཱིཏི སིདྡྷཾ. ཏཐཱ ཏདེཝ ཝཙནཾ ཀཏཔརིཧཱརཾ ན ལབྷཏཱིཏི དཱིཔེཏི, ཏསྨཱ ཀཏྟིཀཔུཎྞམདིཝསེཡེཝ ཨདྷིཊྛཱཏབྦཱ. ‘‘ཨཔྤཧོནྟེ དསཱཧེ ཨནྟོཝསྶེ ཀརཎཔརིཡོསཱནཾཡེཝ པམཱཎ’’ནྟི ལིཁིཏཾ.

ཨེཏྠཱཧ – ‘‘ཨེཀཱཧདྭཱིཧཱདིཝསེནཱ’’ཏིཨཱདི ན ཝཏྟབྦཾ. ཀསྨཱ? གིམྷདིཝསཱནཾ ཨནདྷིཊྛཱནཀཱལཏྟཱ, ཏསྨཱ ཨེཝ ‘‘ཨནྟོདསཱཧེ ཝཱ ཏདཧེཡེཝ ཝཱ ཨདྷིཊྛཱཏབྦཱ’ཏི ཙ སཱམཉྙཏོ ན ཝཏྟབྦཾ གིམྷདིཝསཱནཾ ཨདྷིཊྛཱནཁེཏྟབྷཱཝཔྤསངྒཏོ’’ཏི. ཨེཏྠ ཝུཙྩཏི – ན, ཏདཏྠཱཛཱནནཏོ. དསཱཧཱནཱགཏཱཡ ཝསྶཱུཔནཱཡིཀཱཡ གིམྷདིཝསཱ དསཱཧཱ ཧོནྟི, པཋམདིཝསེ ཙ ལདྡྷཱ ནིཊྛིཏཱ ཝསྶིཀསཱཊིཀཱ དསཱཧཱཏིཀྐནྟཱཔི ཝསྶཱུཔནཱཡིཀདིཝསཾ ཨདྷིཊྛཱནཁེཏྟཾ ཨཔྤཏྟཏྟཱ ¶ ན ཙ ཏཱཝ ནིསྶགྒིཡཾ ཧོཏི, ཝུཏྟཉྩེཏཾ ‘‘ཝསྶཱུཔནཱཡིཀཏོ པུབྦེ དསཱཧཱཏིཀྐམེཔི ཨནཱཔཏྟཱི’’ཏི.

ཨནྟོདསཱཧེ ཨདྷིཊྛཱཏབྦཱཏི ཨིདཾ ན ཨཝིསེསེན ཨེཏསྨིཾ ཨནྟརེ གིམྷདིཝསེཔི ཨདྷིཊྛཱཏབྦནྟི ཨིམམཏྠཾ དཱིཔེཏུཾ ཝུཏྟཾ, ཀིནྟུ གིམྷདིཝསེ ཙེ ཨུཔྤནྣཱ, ཨདྷིཊྛཱནཁེཏྟེ ཙ ཨནྟོདསཱཧཾ ཧོཏི, ཨནྟོདསཱཧེ ཁེཏྟེཡེཝ ཨདྷིཊྛཱཏབྦཱ, ན ཁེཏྟནྟི ཀཏྭཱ དསཱཧཾ ཨཏིཀྐམིཏབྦནྟི དཱིཔེཏུཾ ཝུཏྟཾ. ཀསྨཱ? གིམྷདིཝསཱནམྤི གཎནཱུཔགཏྟཱ, ཏསྨཱ ཨཁེཏྟདིཝསེཔི གཎེཏྭཱ ཁེཏྟེ ཨེཝ ‘‘ཨནྟོདསཱཧེ ཨདྷིཊྛཱཏབྦཱ’’ཏི ཝུཏྟཾ ཧོཏཱིཏི.

ཝསྶིཀསཱཊིཀསིཀྑཱཔདཝཎྞནཱ ནིཊྛིཏཱ.

༥. ཙཱིཝརཨཙྪིནྡནསིཀྑཱཔདཝཎྞནཱ

༦༣༢. སཱམནྟི ¶ སཀསཉྙིཏཱནིཡམནཏྠཾ ཝུཏྟཾ. སཀསཉྙིཏཱཡེཝ ཧི ཨཙྪིནྡཱཔནཨཙྪིནྡནེསུ ནིསྶགྒིཡཾ, ཏསྨཱ ནིསྶགྒིཡམཱུལངྒནིདསྶནམེཏཾ. ‘‘ཙཱིཝར’’ནྟི ཝུཏྟཏྟཱ ‘‘ཨཙཱིཝརཾ ཨཙྪིནྡནྟསྶ ན ནིསྶགྒིཡ’’ནྟི ཝུཏྟམེཝ ཧོཏི. ‘‘དཏྭཱཏི དཏྭཱ ཝཱ དཱཔེཏྭཱ ཝཱ’’ཏི ཀིཉྩཱཔི པདབྷཱཛནཾ ཡུཛྫཏི, ཨཉྙསྶ པན སནྟཀཾ ཨཉྙསྶ བྷིཀྑུནོ དཱཔེཏྭཱ ཏཾ སཡཾ ཝཱ ཨཙྪིནྡེཡྻ, ཏེནེཝ ཝཱ ཨཙྪིནྡཱཔེཡྻཱཏི ཨནིཊྛཔྤསངྒབྷཡཱ ན ཝུཏྟཾ, ཨཏྠཏོ པན ཨཏྟནོ སནྟཀཾ ཨཉྙེན སདྡྷིཝིཧཱརིཀཱདིནཱ དཱཔེཏྭཱ, ཨཉྙསྶ སནྟཀཾ ཝཱ ཏསྶ ཝིསྶཱསཱ དཱཔེཏྭཱ ཏཾ ཨཙྪིནྡེཡྻ ཝཱ ཨཙྪིནྡཱཔེཡྻ ཝཱ ནིསྶགྒིཡནྟི ཝེདིཏབྦཾ, ཏཉྩ ཁོ ཨནཔེཀྑོ དཏྭཱ. ཡདི ཨེཝཾ ‘‘ཙཛིཏྭཱ དིནྣཾ ཨཙྪིནྡིཏྭཱ གཎྷནྟོ བྷཎྜགྒྷེན ཀཱརེཏབྦོ’’ཏི ཨིདཾ ཀིནྟི ཙེ? སཀསཉྙཱཡ ཨགྒཧེཏྭཱ ཨཉྙཱཡ ཐེཡྻཱཡ གཎྷནྟཾ སནྡྷཱཡ ཝུཏྟཾ, ཏེནེཝ ཝུཏྟཾ ‘‘སཀསཉྙཱཡ གཧིཏཏྟཱ པནསྶ པཱརཱཛིཀཾ ནཏྠཱི’’ཏི, ཨཔིཙ ‘‘ཨནཱཔཏྟི སོ ཝཱ དེཏི, ཏསྶ ཝཱ ཝིསྶསནྟོ གཎྷཱཏཱི’’ཏི ཝཙནཏོཔི ཏཾ སིདྡྷམེཝ. ཨེཏྟཱཝཏཱ ཏཱཝཀཱལིཀཾ ཀཏྭཱ དིནྣཾ ཨཙྪིནྡནྟསྶ ཨནཱཔཏྟི སཱདྷིཏཱ ཧོཏི. ‘‘ཨམྷཱཀཾ སནྟིཀེ ཨུཔཛ྄ཛྷཾ གཎྷིསྶཏཱི’’ཏིཨཱདིཝཙནཾ སཱམཎེརསྶ དཱནཾ དཱིཔེཏི, ཏཉྩ ཨིདྷ ནཱདྷིཔྤེཏཾ. པཱལི༹ཡཾ (པཱརཱ. ༦༣༣-༦༣༤) ཨུཔསམྤནྣེ ཏིཀཔཱཙིཏྟིཡཾ ཝིཡ ཨནུཔསམྤནྣེ ཏིཀདུཀྐཊམྤི ཨཱགཏནྟི ཙེ? ན, ཏདདྷིཔྤཱཡཱཛཱནནཏོ. ཨནུཔསམྤནྣཀཱལེ ཨེཝཾ དཏྭཱ ཨཉྙསྶ སནྟིཀེ ཨུཔསམྤནྣཾ དིསྭཱ ཀུཔིཏོ ཙེ ཨཙྪིནྡཏི, ཨུཔསམྤནྣསྶེཝ ཝཱ ‘‘སིཀྑཾ པཙྩཀྑཱཡ ཏུམྷཱཀཾ སནྟིཀེ ¶ ཨུཔསམྤཛྫིསྶཱམཱི’’ཏི ཝདནྟསྶ དཏྭཱ པུན ཨཙྪིནྡཏི ཙེ, ནིསྶགྒིཡནྟི ཨཡམེཏྠ ཨདྷིཔྤཱཡོ.

༦༣༣. སཀིཾ ཨཱཎཏྟོ བཧུཀམྤི ཨཙྪིནྡཏི, ནིསྶགྒིཡནྟི ཨེཀབདྡྷཏྟཱ ཨེཀཾ པཱཙིཏྟིཡཾ, ཏཾ སནྡྷཱཡེཏཾ ཝུཏྟཾ ‘‘ཨཱཎཏྟོ བཧཱུནི གཎྷཱཏི, ཨེཀཾ པཱཙིཏྟིཡ’’ནྟི. མཱཏིཀཱཊྛཀཐཱཡཾ པན ‘‘ཝཏྠུགཎནཱཡ ཨཱཔཏྟིཡོ’’ཏི ཝུཏྟཾ, ཏཾ ཨཱཎཏྟིཡཱ བཧུཏྟཱ ‘‘སབྦཱནི གཎྷཱ’’ཏི ཝདནྟསྶ གཱཧཾ སནྡྷཱཡ ཝུཏྟཾ, ཏེནེཝ ཏཏྠ ཝུཏྟཾ ‘‘ཨེཀཝཱཙཱཡ སམྦཧུལཱ ཨཱཔཏྟིཡོ’’ཏི. ཨེཝཾ སནྟེ པཱལི༹ཝཙནཾ, ཨཊྛཀཐཱཝཙནདྭཡཉྩ ཨཉྙམཉྙཾ སམེཏི, པརསནྟཀམྤི ནིསྶགྒིཡཾ ཧོཏི པཾསུཀཱུལཉྩ, ཏེན ‘‘དུསྶནྟེ བདྡྷརཱུཔིཡཾ ཝིཡཱ’’ཏི ཝུཏྟཾ, ཏཾ ¶ ཏདཏྠནིཡམདསྶནཏྠཾ ཝུཏྟཾ, ཡཐཱཝཚཱདིཏཾ ཨཙྪིནྡནཙིཏྟེན སཙིཏྟཀཾ, ཝཙཱིཀམྨཾ པན ཀེཝལཾ ཨཙྪིནྡཱཔེནྟསྶེཝ ‘‘དེཧཱི’’ཏི བལཀྐཱརེན གཎྷཏོཔི ཝེདིཏབྦཾ, ཏཾ ན ཡུཏྟཾ ‘‘ཨནཱཔཏྟི སོ ཝཱ དེཏཱི’’ཏི ཝཙནཏོ. ‘‘ཏུཊྛོ ཝཱ དུཊྛོ ཝཱ དེཏི, ཨནཱཔཏྟིཡེཝཱ’’ཏི མཱཏིཀཱཊྛཀཐཱཝཙནཏོ ཝཱཏི ཙེ? ན, ཨུབྷཡཏྠ ཨཏྟནོ རུཙིཡཱ དཱནཾ སནྡྷཱཡ ཝུཏྟཏྟཱ, པསཡ྄ཧཱཝཧཱརེ ཨནཱཔཏྟིཔྤསངྒཏོ ཙ. ‘‘བྷིཀྑུསྶ སཱམཾ ཙཱིཝརཾ དཏྭཱ’ཏི པཱལི༹ཝཙནཏོ ཙ མཱཏིཀཱཊྛཀཐཱཡ ཨངྒཝཝཏྠཱནེ ‘ཨུཔསམྤནྣཏཱ’ཏི ཝུཏྟཏྟཱ ཙ ཨུབྷཡཏྠ དཱནཧརཎེསུ བྷིཀྑུབྷཱཝོ ཨིཙྪིཏབྦོཏི དཱིཔེཏཱི’’ཏི ཝདནྟི, ཨིདམཡུཏྟནྟི ནོ ཏཀྐོཏི ཨཱཙརིཡོ. ཀསྨཱ? ཨནུཔསམྤནྣསྶ ཙཱིཝརཾ དཏྭཱ ཏཾ ཨུཔསམྤནྣཀཱལེ ཨཙྪིནྡནྟསྶ ཨནཱཔཏྟིཔྤསངྒཏོ. ‘‘ཨནུཔསམྤནྣསྶ ཙཱིཝརཾ ཝཱ ཨཉྙཾ ཝཱ པརིཀྑཱརཾ དཏྭཱ…པེ… ཨཱཔཏྟི དུཀྐཊསྶཱ’’ཏི ཝཙནཏོ དུཀྐཊཾ ཏཏྠ ཧོཏཱིཏི ཙེ? ནཱསིདྡྷཏྟཱ, དཱནཀཱལེ ཨེཝ ཨུཔསམྤནྣཏཱ པམཱཎནྟི ཨསིདྡྷམེཏཾ ཨཊྛཀཐཱཡ ཝཱ པཱལི༹ཡཱ ཝཱ ཡུཏྟིཏོ ཝཱ, ཏསྨཱ ཏཾ ན ཡུཏྟནྟི ཨཏྠོ. ཨནུཔསམྤནྣསྶ ཙཱིཝརཾ དཏྭཱ ཏསྶེཝ ཨནུཔསམྤནྣཀཱལེཡེཝ ཙཱིཝརཾ ཨཙྪིནྡནྟསྶ དུཀྐཊཾ, ཨུཔསམྤནྣཀཱལེ ཝཱ དཏྭཱ ཨནུཔསམྤནྣཀཱལེ ཨཙྪིནྡནྟསྶ དུཀྐཊནྟི ཏསྶ ཝཙནསྶ ཨིདཾ ཝིཀཔྤནྟརཉྩ སམྦྷཝཏི, ཏསྨཱ (པཱརཱ. ༦༣༡ ཨཱདཡོ) ཝིཀཔྤནྟརསྶ སམྦྷཝཏོ ཙ ན ཡུཏྟཾ, ཡསྨཱ ཨནུཔསམྤནྣཀཱལེ དཏྭཱ ཨུཔསམྤནྣཀཱལེ ཨཙྪིནྡནྟསྶ ཝིསུཾ དུཀྐཊཾ ན པཉྙཏྟཾ, ཏསྨཱ པུརཱཎཙཱིཝརདྷོཝཱཔནཱདིསིཀྑཱཔདེསུ ཝིཡ ཨཔརབྷཱགེ ཨུཔསམྤནྣཏཱ ཙེཏྠ པམཱཎཾ, ཏསྨཱ ‘‘ཨུཔསམྤནྣཏཱ’’ཏི ཨངྒེསུ ཝུཏྟཏྟཱ ཙ ཏཾ ན ཡུཏྟནྟི ཨཏྠོ. ཨེཏྠ ‘‘པཙྩཱསཱིསནྟསྶེཝ དཱནམདྷིཔྤེཏཾ, ན ནིསྶཊྛདཱན’’ནྟི དྷམྨསིརིཏྠེརོ ཝདཏི ཀིར, ཝཱིམཾསིཏབྦཾ.

ཙཱིཝརཨཙྪིནྡནསིཀྑཱཔདཝཎྞནཱ ནིཊྛིཏཱ.

༦. སུཏྟཝིཉྙཏྟིསིཀྑཱཔདཝཎྞནཱ

༦༣༧. ཚཊྛེ ¶ ཀིཉྩཱཔི ‘‘སཱམཾ སུཏྟཾ ཝིཉྙཱཔེཏྭཱ’’ཏི ཝུཏྟཾ, མཱཏིཀཱཊྛཀཐཱཡཾ པན ‘‘ཙཱིཝརཏྠཱཡ སཱམཾ ཝིཉྙཏྟཾ སུཏྟ’’ནྟི ཨཝཏྭཱ ཀེཝལཾ ‘‘ཙཱིཝརཏྠཱཡ ཝིཉྙཱཔིཏསུཏྟ’’ནྟི ཨངྒེསུ ཝུཏྟཏྟཱ ཨཉྙེན ཙཱིཝརཏྠཱཡ ཝིཉྙཏྟཾ སུཏྟམྤི སངྒཧཾ གཙྪཏཱིཏི ཝེདིཏབྦཾ. སཱམནྟི ཙེཏྠ ཀསྶཙི ནིཡམནཾ. ‘‘སཱམཾ ¶ ཝིཉྙཱཔེཏྭཱ’’ཏི ཀིཉྩཱཔི ཝུཏྟཾ, ཏཐཱཔི ‘‘སཱམཾ ཝཱཡཱཔེཡྻཱ’’ཏི ཨཏྟནོ ཨཏྠཱཡ ཝཱཡཱཔེཡྻཱཏི ཨེཝཾ སམྦནྡྷོ, ཨཏྠོ ཙ ཝེདིཏབྦོ, པཱལི༹ཡཾ པན ཨཱསནྣཔདེན ཡོཛནཱ ཀཏཱ, ཏསྨཱ སཱམཾ ཝིཉྙཏྟཾ སུཏྟནྟི ཨཉྙཝིཉྙཏྟཾ ཀཔྤིཡཾ ཨཱཔཛྫཏི, ཧཏྠཀམྨཡཱཙནཝསེན ལདྡྷཏནྟཝཱཡོཔི ཀཔྤིཡོ. ཝིཀཔྤནུཔགཔཙྪིམཔྤམཱཎཾ ཙེ, ཏནྟེ ཝཱིཏཾཡེཝ སཀིཾ ཨདྷིཊྛཱཏབྦཾ, པུན ཨདྷིཊྛཱནཀིཙྩཾ ནཏྠི ཨདྷིཊྛིཏེན ཨེཀཱིབྷཱཝཱུཔགམནཏོ. ‘‘སཙེ པན པརིཙྪེདཾ དསྶེཏྭཱཝ ཙིནསཱཊཀཾ ཝིཡ, ཨནྟརནྟརཱ ཨདྷིཊྛིཏཾ ཧོཏི, པུན ཨདྷིཊྛཱཏབྦ’’ནྟི ཝུཏྟཾ. ‘‘པཊིལཱབྷེནཱཏི ཝཙནེན ཝཱཡཱཔེཏྭཱ ཋཔེསྶཱམཱིཏིཨཱདི ཨེཀསྨིཾ ཨནྟོགདྷཾ ཧོཏཱི’’ཏི ཝདནྟི.

སུཏྟཝིཉྙཏྟིསིཀྑཱཔདཝཎྞནཱ ནིཊྛིཏཱ.

༧. མཧཱཔེསཀཱརསིཀྑཱཔདཝཎྞནཱ

༦༤༢. ཝིསིཊྛཾ ཀཔྤཉྩ ཏསྶ ཝཙནེན ཝིསིཊྛཾ ཀཏཉྩ པམཱཎཾ, ན ཨཱམིསདཱནཾ. ཀེསུཙི པོཏྠཀེསུ ‘‘ཙཱིཝར’’ནྟི ཨུདྡྷརིཏྭཱ ཝིབྷཱགོ ཝུཏྟོ, ཏཾ ན སམེཏཱིཏི.

མཧཱཔེསཀཱརསིཀྑཱཔདཝཎྞནཱ ནིཊྛིཏཱ.

༨. ཨཙྩེཀཙཱིཝརསིཀྑཱཔདཝཎྞནཱ

༦༤༦. ‘‘ཨནུཛཱནཱམི, བྷིཀྑཝེ, ཨཙྩེཀཙཱིཝརཾ པཊིགྒཧེཏྭཱ ནིཀྑིཔིཏུ’’ནྟི, ‘‘ཡཱཝ པཝཱརཎཱ པཝཱརིཏཱ’’ཏི ཙ ཡཾ ཝུཏྟཾ, ཏེ པན བྷིཀྑཱུ ཏསྶ ཝཙནསྶ ཨཏྠཾ མིཙྪཱ གཧེཏྭཱ ཨཙྩེཀཙཱིཝརཾ ནིཀྑིཔནྟཱ ཙཱིཝརཀཱལསམཡཾ ཨཏིཀྐཱམེསུཾ. ཀིམིདཾ ཝིབྷཏྟཾ, ཨུདཱཧུ ཨཝིབྷཏྟནྟི? ཝིབྷཏྟཾ, པུགྒལིཀཾ ཝཱ. ཏེནེཝ པརཏོ ‘‘ཨམྷཱཀཾ, ཨཱཝུསོ, ཨཙྩེཀཙཱིཝརཱནཱི’’ཏི ཝུཏྟཾ, ཨཝིབྷཏྟཾ པན སངྒྷིཀཏྟཱ ན ཀསྶཙི ནིསྶགྒིཡཾ ཀརོཏི.

ཨཔིཙ ¶ ‘‘ཨཙྩེཀཙཱིཝརཾ པཊིགྒཧེཏྭཱ ནིཀྑིཔིཏུ’’ནྟི ཨིམིནཱ སཱམཉྙཝཙནེན ཝསྶཱུཔནཱཡིཀདིཝསཏོ པཊྛཱཡ, པིཊྛིསམཡཏོ པཊྛཱཡ ཝཱ ཡཱཝ པཝཱརཎཱ ¶ ནིཀྑིཔིཏུཾ ཝཊྚཏི ཨེཝ སངྒྷིཀཏྟཱ, པུགྒལིཀམྤི ‘‘ཝསྶཾཝུཏྠཀཱལེ གཎྷཐཱ’’ཏི དིནྣཏྟཱ. ཏཱདིསཉྷི ཡཱཝ ཝསྶཾཝུཏྠོ ཧོཏི, ཏཱཝ ན ཏསྶེཝ, དཱཡཀསྶ སནྟཀཾ ཧོཏི, ཏཐཱ ཨིཏོ ཏཏིཡཝསྶེ, ཙཏུཏྠཝསྶེ ཝཱ ‘‘པཝཱརཎཱཡ གཎྷཐཱ’’ཏིཨཱདིནཱ དིནྣམྤི ནིཀྑིཔིཏྭཱ ཡཐཱདཱནམེཝ གཧེཏབྦཾ. ཨཡམཏྠོ ཨཊྛཀཐཱཡཾ (པཱརཱ. ཨཊྛ. ༢.༦༤༦-༩ ཨཱདཡོ) པཱཀཊོ. ཏཱནི ཙཱིཝརཀཱལསམཡཱཏིཀྐམེ ན ནིསྶགྒིཡཱནཱིཏི ཙེ? ན, ཨུདྡིསྶ དིནྣཏྟཱ. ཡསྨཱ ཨཡཾ སམཡོ ‘‘ཀཱལེཔི ཨཱདིསྶ དིནྣ’’ནྟི ཨེཏྠ ‘‘ཀཱལོ’’ཏི ཨཱགཏོ, གཎབྷོཛནསིཀྑཱཔདཱདཱིསུ ‘‘སམཡོ’’ཏྭེཝ ཨཱགཏོ, ཏསྨཱ ཨིདྷ ཏེསཾ ཨེཀཏྠཏཱདསྶནཏྠཾ ཨེཀཏོ ‘‘ཙཱིཝརཀཱལསམཡོ’’ཏི ཝུཏྟནྟི ཝེདིཏབྦཾ. མཱཏིཀཱཡཾ པནེཏྠ ཏཱདིསཾ ཙཱིཝརཾ ཨཏྟནོ སནྟཀབྷཱཝཾ ཨུཔགཏཾ པུགྒལིཀཾ སནྡྷཱཡ ཝུཏྟཾ, ཏེནེཝཱཧ ‘‘བྷིཀྑུནོ པནེཝ ཨཙྩེཀཙཱིཝརཾ ཨུཔྤཛྫེཡྻཱ’’ཏི. ཨཏྟནོ ཀུཊིཡཱ ཝསྶཾཝུཏྠསྶ བྷིཀྑུནོ ཧི དཱཏུཾ ཨལབྷནྟོ ཨནྟོཝསྶེ ཨེཝ དཱནཀིཙྩཾ པརིནིཊྛཱཔེཏྭཱ གཙྪཏི, ཏཐཱ སངྒྷསྶ. ཏསྨཱ ཨིདཾ ཨཙྩེཀཙཱིཝརཾ ཨཏྠི ཨུཔྤནྣཀཱལཏོ པཊྛཱཡ སངྒྷསྶ ཝཱ པུགྒལསྶ ཝཱ སནྟཀབྷཱཝཾ ཨུཔགཙྪནྟཾ, ཡཾ ན ཝསྶཱཝཱསིཀབྷཱཝེན དིནྣཾ, ཨཏྠི ཨུཔྤནྣཀཱལཏོ པཊྛཱཡ ཨནུཔགནྟྭཱ ཝསྶཾཝུཏྠཀཱལེཡེཝ པུགྒལསྶ ཝཱ སངྒྷསྶ ཝཱ ཨུཔགཙྪནྟཾ, ཡཾ ཝསྶཱཝཱསིཀབྷཱཝེན ཨུཔྤཛྫིཏྭཱ སམཡེ དིནྣཾ, ཨཏྠི སམཡེ དིནྣམྤི པུགྒལསྶ སནྟཀབྷཱཝཾ ཨནུཔགཙྪནྟཾ, སངྒྷསནྟཀབྷཱཝཾ ཝཱ དཱཡཀསནྟཀབྷཱཝཾ ཝཱ ཨུཔགཙྪནྟཾ, ཨཱིདིསཾ སནྡྷཱཡ ‘‘སཉྙཱཎཾ ཀཏྭཱ ནིཀྑིཔིཏབྦ’’ནྟི ཝུཏྟཾ. ཨིདཾ ཨཏིརེཀསཾཝཙྪརམྤི ནིཀྑིཔིཏུཾ ལབྷཏི ཨཏྟནོ སནྟཀབྷཱཝཾ ཨནུཔགཏཏྟཱ, ཏསྨཱ ‘‘དསཱཧཱནཱགཏ’’ནྟི ཨིཏོ ཨཉྙཾ སནྡྷཱཡ ཝུཏྟནྟི སིདྡྷམེཏནྟི. དསཱཧཏོ པུརེཏརཾ ལབྷིཏྭཱ ཡཱཝ པཝཱརཎཱ ནིཀྑིཔིཏུཾ ན ལབྷཏི, ཏསྨཱ སཀབྷཱཝཱུཔགཏམེཝ ཨདྷིཊྛཱཏབྦཾ, ཏཾཡེཝ སནྡྷཱཡ ‘‘དསཱཧཱནཱགཏ’’ནྟི ཝུཏྟཾ, ཡཏོ ‘‘ཨནྟོསམཡེ ཨདྷིཊྛེཏི, ཝིཀཔྤེཏཱི’’ཏི ཨནཱཔཏྟིཝཱརེ ཝུཏྟཾ. སཉྙཱཎཾ ཀཏྭཱ ནིཀྑིཔིཏབྦཀཾ པན པརསྶ དཱཏབྦཏཱཡ སཀབྷཱཝཾ ཨནུཔགཏཾ, ན ཧི ཏཾ སནྡྷཱཡ ‘‘ཨདྷིཊྛེཏི, ཝིཀཔྤེཏཱི’’ཏི སཀྐཱ ཝཏྟུཾ, ན ཙ ཏཾ ཨིམསྨིཾ ཨཏྠེ ནིསྶགྒིཡཾ ཧོཏི སངྒྷསྶ ནིསྶགྒིཡཱབྷཱཝཏོ, ཨཊྛཀཐཱཡམྤི ཨཡམཏྠོ སུཊྛུ པཱཀཊོཝ. ཀཏམཾ སཉྙཱཎཾ ཀཏྭཱ ནིཀྑིཔིཏབྦནྟི ཙེ? པརསནྟཀཾ ཙཱིཝརཾ སངྒྷིཀམེཝ ¶ ཧོཏི, ཏཏོ ‘‘སལླཀྑེཏྭཱ སུཁཾ དཱཏུཾ བྷཝིསྶཏཱི’’ཏི ཨིམིནཱ ཧི པརསྶ སནྟཀབྷཱཝོ དསྶིཏོ.

‘‘ཏཏོ པརཾ ཨེཀདིཝསམྤི པརིཧཱརོ ནཏྠཱིཏི དསཱཧཔརམཏོ ཨུདྡྷཾ ཨནུཔགཏཏྟཱ’’ཏི ལིཁིཏཾ, ཨིཏོ སམཡཏོ ཨུདྡྷམེཝ དསཱཧསྶ ཨནུཔགཏཏྟཱ སམཡཏོ པརཾ དསཱཧཾ ན ལབྷཏཱིཏི ཀིརསྶ ¶ ཨདྷིཔྤཱཡོ. ‘‘ཨེཏཾ པརིཧཱརཾ ལབྷཏིཡེཝཱ’’ཏི ཨེཏྠ ‘‘ཨེཀཱདསམཾ ཨརུཎཾ ཙཱིཝརམཱསེ ཨུཊྛེཏཱི’’ཏི ཀཱརཎཾ ལིཁིཏཾ. ཨནུགཎྛིཔདེ པན ‘‘ཨནདྷིཊྛཧིཏྭཱ ཨེཀཱདསདིཝསེ ནིཀྑིཔིཏུཾ ལབྷཏཱི’ཏི ཝདནྟོ བྷགཝཱ ཨིཏརམྤི ཨནཙྩེཀཙཱིཝརཱདིཾ ཨནུཛཱནཱཏི, ཨཙྩེཀཙཱིཝརམུཁེནཱཏི ཨཔརེ’’ཏི ཝུཏྟཾ. ཨེཏྠ ཀཏརཾ སུབྷཱསིཏཾ? ཨུབྷཡམྤཱིཏི ཨེཀེ. ཀཐཾ? པཋམཾ ‘‘ཨཙྩེཀཙཱིཝརསྶ ཨནཏྠཏེ ཀཐིནེ དསདིཝསཱདྷིཀོ མཱསོ, ཨཏྠཏེ ཀཐིནེ དསདིཝསཱདྷིཀཱ པཉྩམཱསཱ’’ཏི ཨིམིནཱ སམེཏི, ཨནུགཎྛིཔདལདྡྷིཡཱ ཧི ཨེཏྠ ‘‘ཨེཀཱདསདིཝསཱདྷིཀོ’’ཏི ཝཏྟབྦཏཾ ཨཱཔཛྫཏི, དུཏིཡཾ ‘‘དསཱཧཱནཱགཏནྟི…པེ… དསཱཧེན ཨསམྤཏྟཱཏི ཨཏྠོ’’ཏི ཨིམིནཱ སམེཏི. ཨིམསྶ ནཡསྶ ཝསེན ‘‘པཉྩམིཏོ པཊྛཱཡ ཨུཔྤནྣསྶ ཙཱིཝརསྶ ནིདྷཱནཀཱལོ དསྶིཏོ ཧོཏཱི’’ཏི པཱཋོ ཡུཛྫཏི. ཏཐཱ གཎྛིཔདལདྡྷིཡཱ ‘‘ནཝཱཧཱནཱགཏཾ ཀཏྟིཀཏེམཱསིཀཔུཎྞམ’’ནྟི ཝཏྟབྦཏཾ ཨཱཔཛྫཏི, ཏསྶ ཝསེན ‘‘ཀཱམཉྩེས དསཱཧཔརམཾ ཨཏིརེཀཙཱིཝརཾ དྷཱརེཏབྦནྟི ཨིམིནཱཝ སིདྡྷོ, ཨཊྛུཔྤཏྟིཝསེན པན ཨཔུབྦཾ ཝིཡ ཨཏྠཾ དསྶེཏྭཱ སིཀྑཱཔདཾ ཋཔིཏ’’ནྟི ཨཡཾ པཱཋོ ཡུཛྫཏི. ཀོ པནེཏྠ སཱརོཏི? ཡོ པཙྪཱ ཝུཏྟོ, སོཝ སཱརོ. ཏེནེཝ ཨཊྛཀཐཱཙརིཡེན ‘‘པཉྩམིཏོ པཊྛཱཡཱ’’ཏི ཝུཏྟཾ. པོརཱཎགཎྛིཔདེཧི ཨཊྛཀཐཱཡ ཙ སདྡྷིཾ སཾསནྡནཏོ, ‘‘དསཱཧཱནཱགཏ’’ནྟི པཱལི༹ཡཱ སཾསནྡནཏོ ཙ ཨེཏྠ གཎྛིཔདལདྡྷིཔི པཱལི༹ཡཱ སམེཏི.

ཀཐཾ? ཡསྨཱ པཝཱརཎཱདིཝསེ ཨརུཎུགྒམནེ བྷིཀྑུ ཝསྶཾཝུཏྠོ ཧོཏི, ཏསྨཱ ཨིམིནཱ དསམེན ཨཧེན སདྡྷིཾ ཚཊྛིཏོ པཊྛཱཡ ནཝདིཝསཱ དས ཨཧཱནཱིཏི དསཱཧཾ, ཏེན དསཱཧེན, སཧཡོགཏྠེ ཀརཎཝཙནཾ. ཀཏྟིཀཏེམཱསིཀཔུཎྞམཱ ཙཱིཝརསམཡཾ ཨསམྤཏྟཱཏི ཀཏྭཱ ‘‘ཨནཱགཏཱ’’ཏི ཝུཙྩཏི. ཡཐཱ ཨཔརཀཏྟིཀཔུཎྞམཱཡ ཝསྶིཀསཱཊིཀཾ པཙྩུདྡྷརིཏྭཱ ཝིཀཔྤེནྟོ ‘‘ཙཱཏུམཱསཾ ཨདྷིཊྛཱཏུཾ ཏཏོ པརཾ ཝིཀཔྤེཏུ’’ནྟི ཝུཙྩཏི ¶ , ཨེཝཾསམྤདམིདནྟི. ཨེཏྠ ཝུཙྩཏཱིཏི ཙེ? ན, ཨིམསྶ ནིཔྤཡོཛནབྷཱཝཔྤསངྒཏོ. ཨཙྩེཀཙཱིཝརཔཊིགྒཧཎཀཱལཾ ནིཡམིཏནྟི ཙེ? ན, ‘‘ཚཊྛིཏོ པཊྛཱཡ ཨུཔྤནྣཙཱིཝརཾ ཨཙྩེཀམེཝ ན ཧོཏི. པཋམཀཐིནེན སིདྡྷཏྟཱ’’ཏི པོརཱཎཊྛཀཐཱགཎྛིཔདེསུ ཝུཏྟཏྟཱ ཏཏོ ཨུཔརི ‘‘ཨཙྩེཀཙཱིཝར’’ནྟི ཝུཙྩཏི, པཊིགྒཎྷནྟསྶ ཨཱཔཏྟིསངྒཧོ ཙ. ན ཙ སཱ ཨཱཔཏྟི པཱལི༹ཡཱ, ཨཊྛཀཐཱཡ, ཡུཏྟིཏོ ཝཱ སམྦྷཝཏི. ཨཊྛུཔྤཏྟིམཏྟཝསེན ཝུཏྟནྟི ཙེ? ན, དསཱཧཱདྷིཙྩཀཱརིཀཱ ཨཊྛུཔྤཏྟིཔཱཡཾ ན དིསྶཏི. ‘‘བྷིཀྑཱུ ཨཙྩེཀཙཱིཝརཾ པཊིགྒཧེཏྭཱ ཙཱིཝརཀཱལསམཡཾ ཨཏིཀྐཱམེནྟཱི’’ཏི ཨེཏྠ ཨེཏྟིཀཱ ཨེཝ ཧི ཨཊྛུཔྤཏྟི. ཏཐཱ ཧི པརིཝཱརེ (པརི. ༤༧-༥༣) ‘‘ཀིསྨིཾ ཝཏྠུསྨི’’ནྟི ཨཱརབྷིཏྭཱ ཨེཏྟཀམེཝ ཝུཏྟནྟི ཝེདིཏབྦཾ. ཨཙྩེཀཙཱིཝརཾ ཙཱིཝརཀཱལཾ ནཱཏིཀྐཱམེཏབྦཾ, ཨིཏརཾ ཨཏིཀྐཱམེཏབྦནྟི དསྶནཏྠཾ ཨིདཾ པཉྙཏྟནྟི ཙེ? ན, ཨཙྩེཀཙཱིཝརསྶེཝ ཨཔརཱདྷདསྶནཏོ, ཝིསེསཀཱརཎཱབྷཱཝཱ ¶ , ‘‘ཀཱམཉྩེས དསཱཧཔརམཾ ཨཏིརེཀཙཱིཝརཾ དྷཱརེཏབྦནྟི ཨིམིནཱཝ སིདྡྷོ’’ཏིཨཱདིཝཙནཝིརོདྷཏོ ཙ ཡཐཱཝུཏྟཝཙནཱསམྦྷཝཏོ ཙ.

ཀཐཾ? དསཱཧེན སཧ ཀཏྟིཀཔུཎྞམཱ ‘‘ཨནཱགཏཱ’’ཏི ཧི ཝུཏྟེ དསཱཧཏོ ཨཉྙཱ སཱ པུཎྞམཱཏི ཨཱཔཛྫཏི. ཨནཉྙཱ ཙེ, སཧ-སདྡོ ན སམྦྷཝཏི, ན ཧི ཨཏྟནཱཝ ཨཏྟནོ ཡོགོ སམྦྷཝཏི, ཨནཱགཏ-སདྡོ ཙ ན སམྦྷཝཏི. ཨཱགཏཱ སམྤཏྟཱ ཨེཝ ཧི སཱ པུཎྞམཱ. ཙཱིཝརསམཡསྶ ཨནནྟརཏྟཱ ཨེཀཱིབྷཱཝཾ ཨནཱགཏཏྟཱ ཨནཱགཏཱཡེཝཱཏི ཙེ? ན, ཏཐཱཔི ཨནཱགཏ-སདྡསྶ སམྦྷཝཏོ, ཨཱགམནསམྦྷཝེ སཏིཡེཝ ཧི ཨནཱགཏ-སདྡོ སམྦྷཝཏི, ན ཧི ནིབྦཱནཾ, པཉྙཏྟི ཝཱ ‘‘ཨནཱགཏཱ’’ཏི ཝུཙྩཏི. ནིབྦཱནཾ ཝིཡ ཁཎཏྟཡཾ, སཱ ཙ པུཎྞམཱ ན ཀདཱཙི སམཡབྷཱཝཾ པཱཔུཎཱཏཱིཏི ཨཡུཏྟམེཝ. ‘‘ཏཏོ པརཾ ཝིཀཔྤེཏུ’’ནྟི པན ཝཙནཾ པིཊྛིསམཡཾ གཧེཏྭཱ ཋིཏཏྟཱ སམྦྷཝཏི. ཨཔིཙ པཝཱརཎཱཡཾ ཨརུཎེ ཙ ཨུཊྛིཏེ སཱ པུཎྞམཱ ཙཱིཝརསམཡཾ ཨེཀཱཧཱནཱགཏཱ ཨེཝཱཔཛྫཏི པུབྦེ སཧཡོགཔཏྟཏྟཱ. ཨེཝཾ སནྟེ ཨེཀཱིབྷཱཝགཏཱཔི སཱ ཙཱིཝརསམཡཾ ཨནཱགཏཱ ཨེཝ ཛཱཏཱཏི སབྦདཱ ན ཏཐཱཝིགྒཧཀརཎཝཙནཏྠཾ ཀོཙིདེཝ ཝཙནཏོ དཱིཔེཏཱིཏི ཝེདིཏབྦཾ.

ཀིམཏྠཾ ¶ པནེཏྠ ‘‘དསདིཝསཱདྷིཀོ མཱསོ’’ཏིཨཱདི ཝུཏྟནྟི? ཏཾ པཱརིཔཱུརིསམྦྷཝཏོ. པཉྩམིཡཉྷི པུརེ ཨརུཎཾ ཨུཔྤནྣཨཙྩེཀཙཱིཝརསྶ དསདིཝསཱདྷིཀོ མཱསོཡེཝ པརིཔཱུརོཏི ཀཏྭཱ ཏཐཱ ཝུཏྟཾ. ཨཔིཙ ཏསྶཱ པཉྩམིཡཱ དིཝསབྷཱགོཔི སམྤཏྟཱཡ རཏྟིཡཱ ‘‘ཧིཡྻོ’’ཏི ཝུཙྩཏི, པགེཝ པུརེ ཨརུཎཾ, ཏེནེཝཱཧ ‘‘ཧིཡྻོ ཁོ, ཨཱཝུསོ, ཨམྷཱཀ’’ནྟིཨཱདི. ‘‘ཨེཝཾ སནྟེ ‘ཚཊྛིཏོ པཊྛཱཡཱ’ཏི ཝུཏྟཔཋམཔཱཋསྶ ཝསེན ‘ཨནཙྩེཀཙཱིཝརམྤི པཙྩུདྡྷརིཏྭཱ ཋཔིཏཾ ཏིཙཱིཝརམྤི ཨེཏཾ པརིཧཱརཾ ལབྷཏིཡེཝཱ’’’ཏི ཙ ‘‘དསདིཝསཱདྷིཀོ མཱསོ’’ཏིཨཱདི ཙ ཡཾ ལིཁིཏཾ. ཏཾ ན, ‘‘པཉྩམིཏོ པཊྛཱཡཱ’’ཏི པཱཋེ སཛྫིཏེཝ ཨེཏེན པརིཡཱཡེན ཡཐཱཝུཏྟཨཏྠསམྦྷཝཏོ, ན ཏཱནི ཋཱནཱནི པུན སཛྫིཏཱནི. ཡཐཱཋིཏཝསེནེཝ ཨཛ྄ཛྷུཔེཀྑིཏབྦཱནཱིཏི ནོ ཏཀྐོཏི ཨཱཙརིཡོ. ཨིདཾ སིཀྑཱཔདཾ པུཎྞམཱཡཾ ཨནིསྶགྒིཡཏྠམེཝཱཏི ཨུཔཏིསྶཏྠེརོ. ‘‘པཝཱརཎཱམཱསསྶ ཛུཎྷཔཀྑཔཉྩམིཏོ པཊྛཱཡཱ’’ཏི པཱཋེ སཛྫིཏེ ཨེཏེན པརིཡཱཡེན ཡཐཱཝུཏྟོ ཨུཔྤནྣསྶ ཙཱིཝརསྶ ནིདྷཱནཀཱལོ དསྶིཏོ ཧོཏི, ‘‘ཨཙྩེཀཙཱིཝརནྟི ཨཙྩཱཡིཀཙཱིཝརཾ ཝུཙྩཏཱི’’ཏིཨཱདི པཱཋོ. ‘‘ཚཊྛིཏོ པཊྛཱཡཱ’’ཏི ཙ ‘‘ཀཱམཉྩེས དསཱཧཔརམ’’ནྟིཨཱདི ཙ ཡཾ ལིཁིཏཾ, ཏཾ ན པཱཋོ, ཏསྨཱ ཨེཀཱདསདིཝསཾ པརིཧཱརཾ ལབྷཏཱིཏི ཀཏྭཱ ཨཱཙརིཡེན ‘‘པཉྩམིཏོ པཊྛཱཡཱ’’ཏི ལིཁཱཔིཏོ ཀིར. ‘‘པཝཱརཎཱམཱསསྶ ཛུཎྷཔཀྑཚཊྛིཏོ པཊྛཱཡ པན ཨུཔྤནྣཾ ཨནཙྩེཀཙཱིཝརམྤི པཙྩུདྡྷརིཏྭཱ ཋཔིཏཾ ¶ ཏིཙཱིཝརམྤི ཨེཏཾ པརིཧཱརཾ ལབྷཏིཡེཝཱཏི པཱཋོ’’ཏི ཙ ‘‘ཨཙྩེཀཙཱིཝརསྶ ཨནཏྠཏེ ཀཐིནེ ཨེཀཱདསདིཝསཱདྷིཀོ མཱསོ, ཨཏྠཏེ ཀཐིནེ ཨེཀཱདསདིཝསཱདྷིཀཱ པཉྩམཱསཱཏི པཱཋོ’’ཏི ཙ ཨེཏྠ པཔཉྩེནྟི, ཏསྨཱ སུཊྛུ སལླཀྑེཏྭཱ ཀཐེཏབྦཾ, ཏུཎྷཱིབྷཱུཏེན ཝཱ བྷཝིཏབྦཾ.

ཨཙྩེཀཙཱིཝརསིཀྑཱཔདཝཎྞནཱ ནིཊྛིཏཱ.

༩. སཱསངྐསིཀྑཱཔདཝཎྞནཱ

༦༥༢. ‘‘ཏིཎྞཾ ཙཱིཝརཱནཾ ཨཉྙཏརཾ ཙཱིཝརནྟི ཨིདཾ ཏིཙཱིཝརེ ཨེཝ ཨཡཾ ཝིདྷི, ཨིཏརསྨིཾ ཡཐཱསུཁནྟི དསྶནཏྠཾ ཝུཏྟ’’ནྟི ཝདནྟི. ‘‘ཨཏིརེཀཚཱརཏྟཾ ཝིཔྤཝསནྟཱི’’ཏི ཏསྨིཾཡེཝ སེནཱསནེ ཝཱསོ ན ཝིཔྤཝཱསོཏི ཀཏྭཱ ཝུཏྟཾ. ཀསྨཱ? ཙཱིཝརཔྤཝཏྟིཛཱནནཏོ. ཨེཏྠ ཀིཉྩཱཔི ‘‘ཨཱརཉྙཀཾ ནཱམ ¶ སེནཱསནཾ པཉྩདྷནུསཏིཀཾ པཙྪིམ’’ནྟི ཝཙནཏོ ཨཏིརེཀཏོཔི ཝུཏྟཾ, ཨཱརཉྙཀམེཝ པན སེནཱསནཾ ཧོཏི, དྷུཏངྒཾ རཀྑཏི ཙཱིཝརཔྤཝཏྟིཛཱནནཔལིབོདྷསམྦྷཝཏོ.

༦༥༣. ‘‘གཱཝུཏཏོ ཨཏིརེཀཔྤམཱཎེན ལབྷཏཱི’’ཏི ཡཾ ཝུཏྟཾ, ཏཾ ཀཐཾ པཉྙཱཡཏཱིཏི ཙེ? ‘‘སིཡཱ ཙ ཏསྶ བྷིཀྑུནོ ཀོཙིདེཝ པཙྩཡོ ཏེན ཙཱིཝརེན ཝིཔྤཝཱསཱཡཱ’’ཏི ཝཙནཏོ. ཡོཛནཔྤམཱཎེཔི སིཡཱཏི ཙེ? ན, ‘‘པུན གཱམསཱིམཾ ཨོཀྐམིཏྭཱ ཝསིཏྭཱ པཀྐམཏཱི’’ཏི ཨནཱཔཏྟིཝཱརེ ཨནུཉྙཱཏཏྟཱ. ཡདི ཨེཝཾ ‘‘ཡོཛནཔྤམཱཎེ ན ལབྷཏཱི’’ཏི ཨིདཾ ཀིནྟི? ཨིདཾ ནིབདྡྷཱཝཱསཝསེནེཝ ཝུཏྟཾ. ཏཏྠ དྷུཏངྒཾ བྷིཛྫཏཱིཏི? ན བྷིཛྫཏི, ཀིནྟུ ན ཨིདྷ དྷུཏངྒཱདྷིཀཱརོ ཨཏྠཱིཏི. ཨཐ ཀསྨཱ ‘‘ཨཡཾ དྷུཏངྒཙོརོཏི ཝེདིཏབྦོ’’ཏི ཝུཏྟནྟི? ཨསམྦྷཝཏོ. ཀཐཾ པཉྙཱཡཏཱིཏི? ཨངྒེསུ ཨབྷཱཝཏོ. དྷུཏངྒདྷརསྶ པཏིརཱུཔསེནཱསནདཱིཔནཏོ དྷུཏངྒདྷརཏཱ ཏསྶ སིདྡྷཱ. ཝཙནཔྤམཱཎཏོཏི ཙེ? ན, ཝཙནཔྤམཱཎཏོ ཙ པཱལི༹ཡེཝ པམཱཎཾ. ‘‘ཨནཱཔཏྟི པུན གཱམསཱིམཾ ཨོཀྐམིཏྭཱ ཝསིཏྭཱ པཀྐམཏཱི’’ཏི ཧི ཝུཏྟཾ. གཱམསཱིམཱ ནིཀྑམིཏྭཱ ཀིཏྟཀཾ ཀཱལཾ ཝསིཏྭཱ པཀྐམིཏབྦནྟི ཙེ? པུནདིཝསེཡེཝ, ཏསྨཱ ཨཊྛམོ ཨརུཎོ ནིབདྡྷཱཝཱསེ ཝཱ གནྟབྦཊྛཱནེ ཝཱ ཨུཊྛེཏབྦོཏི ཨེཀེ. ཨནྟོཚཱརཏྟནྟི ཨེཀེ. ཡཱཝ ནིབདྡྷཱཝཱསཾ ན ཀཔྤེཏཱིཏི ཨེཀེ. ཡཱཝ མགྒཔརིསྶམཝིནོདནཱཏི ཨེཀེ. སཏི ཨནྟརཱཡེ ཨནྟོཚཱརཏྟཾ ཝསཏི, ཨནཱཔཏྟི. ནིབདྡྷཱཝཱསཀཔྤནེ སཏི ཨརུཎུགྒམནེ ཨཱཔཏྟི. སཙེ ཏཾསཏྟམོ དིཝསོ, ཏདཧེཝ ནིཀྑིཏྟཙཱིཝརཾ གཧེཏབྦཾ, པཙྩུདྡྷརིཏབྦཾ ཝཱཏི ཨེཀེ. སཙེ ཨནྟརཱ ¶ ནཝམགྒཔཱཏུབྷཱཝེན ཝཱ ནཝགཱམསནྣིཝེསེན ཝཱ, ཏཾ སེནཱསནཾ ཨངྒསམྤཏྟིཏོ པརིཧཱཡཏི. ཏདཧེཝ ཙཱིཝརཾ གཧེཏབྦཾ ཝཱ པཙྩུདྡྷརིཏབྦཾ ཝཱ. ཚཱརཏྟཾ ཝིཔྤཝསནྟསྶ ཙེ པརིཧཱཡཏི, ཨནཱཔཏྟི ཨནུཉྙཱཏདིཝསཏྟཱཏི ཨེཀེ. ཨཱཔཏྟི ཨེཝ ཨནངྒསམྤཏྟིཏོཏི ཨེཀེ. ཡུཏྟཏརཾ པནེཏྠ ཝིཙཱརེཏྭཱ གཧེཏབྦཾ. སཙེ དྷུཏངྒདྷརོ ཧོཏི, གཱམསཱིམཱཡཾ ཨཝསིཏྭཱ པཙྪིམཔྤམཱཎཡུཏྟེ ཋཱནེ ཝསིཏྭཱ པཀྐམིཏབྦཾ. པཋམཾ བདྡྷཨཝིཔྤཝཱསསཱིམོ ཙེ གཱམོ ཧོཏི, ཨཉྙསྨིམྤི མཱསེ ཨནྟོསཱིམཱཡ ཝསཏོ ཨནཱཔཏྟི. པོརཱཎགཎྛིཔདེ ‘‘ཡཐཱཝུཏྟསེནཱསནེ ཝསནྟེནཱཔི ཚཱརཏྟམེཝ ཙཱིཝརཾ གཱམེ ནིཀྑིཔིཏབྦནྟི ཨདྷིཔྤཱཡེན ཨཉྙཾ ཨནྟོཚཱརཏྟམྤི ཨཉྙམྤི ཝསཏོ ཨཱཔཏྟིཡེཝཱ’’ཏི ཝུཏྟཾ.

སཱསངྐསིཀྑཱཔདཝཎྞནཱ ནིཊྛིཏཱ.

༡༠. པརིཎཏསིཀྑཱཔདཝཎྞནཱ

༦༥༧. དེཐཱཝུསོ ¶ ཨམྷཱཀནྟི ཨེཏྠ ཨཀཏཝིཉྙཏྟི ཧོཏི ན ཧོཏཱིཏི? ཧོཏི, ཡདི ཨེཝཾ ཨཉྙཱཏཀཝིཉྙཏྟིསིཀྑཱཔདསྶ ཙ ཨིམསྶ ཙ ཀིཾ ནཱནཱཀརཎནྟི? ཏཾ ཨཉྙཱཏཀཨཔྤཝཱརིཏེཡེཝ ཝིཉྙཱཔེནྟསྶ, ཨིདཾ ཉཱཏཀཔཝཱརིཏེཔི, ཏཾ ཨནཙྪིནྣཙཱིཝརསྶེཝ, ཨིདཾ ཏསྶཔི, ཏཾ ཙཱིཝརཾཡེཝ ཝིཉྙཱཔེནྟསྶ, ཨིདཾ ཨཙཱིཝརམྤི. ཨེཝཾ སནྟེ ཨིདཾ ཏཾ ཨནྟོཀཏྭཱ ཋིཏཾ ཧོཏི, ཏསྨཱ དྭིནྣམྤི ཨངྒསམྤཏྟིཡཱ སཏི ཀེན བྷཝིཏབྦནྟི? ཨིམིནཱ བྷཝིཏབྦཾ ཨིམསྶ ནིཔྤདེསཏོཏི ཨེཀེ. དྭཱིཧིཔི བྷཝིཏབྦཾ ཨུབྷིནྣམྤི ཨངྒསིདྡྷིཏོཏི ཨེཀེ. ཨིམཱནི ཏསྶ ཨངྒཱནི ཝིཀཔྤནུཔགཙཱིཝརཏཱ, སམཡཱབྷཱཝོ, ཨཉྙཱཏཀཝིཉྙཏྟི, ཏཱཡ ཙ པཊིལཱབྷོཏི ཙཏྟཱརི. ཨིམསྶ པན སངྒྷེ པརིཎཏབྷཱཝོ, ཉཏྭཱ ཨཏྟནོ པརིཎཱམནཾ, པཊིལཱབྷོཏི ཏཱིཎི. ཨེཏྠ པཋམོ ཝཱདོ ཨཡུཏྟོ ཀཏྭཱཔི ཨོཀཱསཾ ཨཊྛཀཐཱཡཾ, པརིཝཱརེ ཙ ཨཝིཙཱརིཏཏྟཱ. ཡདི ཨེཝཾ ཏཏྠ ཨངྒེསུ ‘‘ཨནཉྙཔརིཎཏཏཱ’’ཏི ཝཏྟབྦནྟི ཙེ? ན ཝཏྟབྦཾ, ཨཏྠཏོ སིདྡྷཏྟཱ. པརིཎཏསིཀྑཱཔདདྭཡསིདྡྷིཏོ, པརིཎཏསཉྙིཏོ, ཨཱཔཏྟིསམྦྷཝཏོ ཙ ‘‘མཡ྄ཧམྤི དེཐཱ’’ཏི ཝདཏི, ‘‘ཝཊྚཏཱི’’ཏི ཨནུདྡིཊྛཾ, ‘‘ཨམྷཱཀམྤི ཨཏྠཱི’’ཏི ཝུཏྟཏྟཱ ཝཊྚཏི. ‘‘སངྒྷསྶ པརིཎཏཾ…པེ… ཨཱཔཏྟི དུཀྐཊསྶཱ’’ཏི ཨེཏྠ ‘‘པུགྒལསྶཱ’’ཏི ན ཝུཏྟཾ, ཡཏོ སུདྡྷཔཱཙིཏྟིཡཝསེན ཨཱགཏཏྟཱ. ‘‘ཨཉྙཙེཏིཡསྶཱ’’ཏི ན ཝུཏྟཾ སངྒྷསྶ ཨཙེཏིཡཏྟཱ, ཏསྨཱཡེཝ ‘‘ཙེཏིཡསྶ པརིཎཏཾ…པེ… ཨཱཔཏྟི དུཀྐཊསྶཱ’’ཏི ཨེཏྠཱཔི ‘‘ཨཉྙསངྒྷསྶ ཨཉྙཔུགྒལསྶཱ’’ཏི ན ཝུཏྟཾ. ‘‘ཡཏོ ཏཐཱ ཨིདྷ ཙ ‘པུགྒལསྶ པརིཎཏཾ…པེ… ཨཱཔཏྟི དུཀྐཊསྶཱ’ཏི ཨེཏྠ ཙ ‘ཨཏྟནོཔཱི’ཏི ཀིཉྩཱཔི ན ཝུཏྟཾ, ཏཐཱཔི སམྦྷཝཏཱི’’ཏི ཝདནྟི. ཏཾ ¶ པན ཨིདྷ ཨཏྟནོ པརིཎཱམནཱདྷིཀཱརཏྟཱ ཨིམསྶ སིཀྑཱཔདསྶ ན ཝུཏྟནྟི ཨེཀེ. ཏཏུཏྟརིསིཀྑཱཔདེ ‘‘ཨཉྙསྶཏྠཱཡཱ’’ཏི (པཱརཱ. ཨཊྛ. ༢.༥༢༦) པདཾ ཝིཡཱཏི ཨེཀེ. ཏཾ ན, ཨེཏྠ པུགྒལཔརིཎཱམནསིཀྑཱཔདེ ཨཝུཏྟཏྟཱ. དྷམྨསིརིཏྠེརོ པནཱཧ –

‘‘ཨཏྟནོ ཨཉྙཏོ ལཱབྷཾ, སངྒྷསྶཉྙསྶ ཝཱ ནཏཾ;

པརིཎཱམེཡྻ ནིསྶགྒི, པཱཙིཏྟིཡམྤི དུཀྐཊ’’ནྟི.

ཏསྶཏྠོ – སངྒྷསྶ པརིཎཏཾ ཨཏྟནོ པརིཎཱམེཡྻ ནིསྶགྒིཡཾ. ཏདེཝ ཨཉྙཏོ པརིཎཱམེཡྻ པཱཙིཏྟིཡཾ. ཨཉྙསྶ པརིཎཏཾ ཨཏྟནོ ཝཱ ¶ པརསྶ ཝཱ པརིཎཱམེཡྻ དུཀྐཊནྟི, ཏསྨཱ ཨཉྙཱཏཀཝིཉྙཏྟིཨཱདཱིསུ ཝུཏྟཱཔཏྟིསམྦྷཝཏོ ཨིདྷ པརིཎཏདྭཡེ ‘‘ཨཏྟནོ’’ཏི པདཾ ན ཝུཏྟཾ. ཏསྨིཉྷི ཝུཏྟེ དུཀྐཊམཏྟཔྤསངྒོ སིཡཱ, ཨཝུཏྟེ པནེཏེསུ ཝུཏྟཱཔཏྟཱིནཾ ཡཐཱགམམཉྙཏརཱ ཙ ཨིདྷ ཨཝུཏྟསིདྡྷི དུཀྐཊཉྩཱཏི དྭེ ཨཱཔཏྟིཡོ ཨེཀཏོ ཧོནྟཱིཏི ཝིནཡདྷརཱནཾ ཨནཝསེསཉཱཎསྶ ཨོཀཱསོ ཀཏོ ཧོཏཱིཏི.

ཨིཏི ཏིཾསཀཀཎྜཾ སཱརམཎྜཾ,

ཨལམེཏཾ ཝིནཡསྶ སཱརམཎྜེ;

ཨིདྷ ནིཊྛིཏསབྦསཱརམཎྜཾ,

ཝིནཡཝསེན པུནཱཏི སཱརམཎྜནྟི.

པརིཎཏསིཀྑཱཔདཝཎྞནཱ ནིཊྛིཏཱ.

ནིཊྛིཏོ པཏྟཝགྒོ ཏཏིཡོ.

ནིསྶགྒིཡཝཎྞནཱ ནིཊྛིཏཱ.

པཱཙིཏྟིཡཝཎྞནཱ

༥. པཱཙིཏྟིཡཀཎྜོ

༡. མུསཱཝཱདཝགྒོ

༡. མུསཱཝཱདསིཀྑཱཔདཝཎྞནཱ

༡. ཝཱདཀྑིཏྟོཏི ¶ ¶ ཨེཏྠ ཨཝིསེསེན ཝཱདཛཔྤཝིཏཎྜསངྑཱཏོ ཏིཝིདྷོཔི ཀཐཱམགྒོ ‘‘ཝཱདོ’’ ཨིཙྩེཝ ཝུཏྟོཏི ཝེདིཏབྦོ. ཏེསུ ‘‘ཏིཏྠིཡེཧི སདྡྷི’’ནྟི ཝཙནཏོ ཋཔེཏྭཱ ཝཱདཾ ‘‘སེསཱ’’ཏི ཝདནྟི. ཚལཛཱཏིནིགྒཧཊྛཱནཀུསལཏཱཡ ཀདཱཙི ཀཏྠཙི ཨཝཛཱནིཏྭཱ པཊིཛཱནཱཏི, ཏཐཱ པུབྦེ ཀིཉྩི ཝཙནཾ པཊིཛཱནིཏྭཱ པཙྪཱ ཨཝཛཱནཱཏི. ཨེཝཾ ཝཱ ཨཉྙཐཱ ཝཱ ཨཉྙེནཉྙཾ པཊིཙརཏི. ཨེཝཾ པཝཏྟོ སམྤཛཱནམུསཱ བྷཱསཾ པཊིསྶུཎིཏྭཱ ཨསཙྩཱཡནྟོ སངྐེཏཾ ཀཏྭཱ ཝིསཾཝཱདེནྟོ ཨེཝཾ སོ ཝཱདཀྑིཏྟོ སམཱནོ པཱཙིཏྟིཡཝཏྠུཉྩ པརིཔཱུརེནྟོ ཝིཙརཏཱིཏི ཨེཝམདྷིཔྤཱཡོ ཝེདིཏབྦོ. ཨཏྟནོ ཝཱདེཏི ཨེཏྠ ‘‘སབྦེ དྷམྨཱ ཨནཏྟཱ’’ཏི (དྷ. པ. ༢༧༩; ཙཱུལ༹ནི. ཨཛིཏམཱཎཝཔུཙྪཱནིདྡེས ༧; ནེཏྟི. ༥; མཧཱནི. ༢༧) པཋམམཱརདྡྷེ ཨཏྟནོ ཝཱདེ. ‘‘ཡཾ དུཀྑཾ ཏདནཏྟཱ’’ཏི (སཾ. ནི. ༣.༡༥) ནོ སམཡོ. ‘‘སབྦེ དྷམྨཱ’’ཏི ཝུཏྟེ ནིབྦཱནམྤི སངྒཧཾ གཙྪཏི. ‘‘ནིབྦཱནཾ པརམཾ སུཁ’’ནྟི (དྷ. པ. ༢༠༣-༢༠༤; མ. ནི. ༢.༢༡༥) ཝུཏྟཏྟཱ པན ཏཾ ན དུཀྑཾ. ནོ ཋཱནམེཏཾ ཝིཛྫཏི. ཨཡཾ པརཝཱདཱི ‘‘ཡཾ དུཀྑཾ ཏདནཏྟཱ’’ཏི སུཏྟཾ དསྶེཏྭཱ སིདྡྷནྟཾ སམྦྷམེཏྭཱ ‘‘ཝིརོདྷི ཝིརུདྡྷོ’’ཏི ཝུཏྟཾ དོསཾ ཨཱརོཔེསྶཏཱིཏི ཏསྨིཾ པཋམཝཱདེ ཀཉྩི དོསཾ སལླཀྑེནྟོ ཨཱརོཔིཏེ ཝཱ དོསེ ཨནཱརོཔིཏེ ཝཱ ‘‘ནཱཡཾ མམ ཝཱདོ’’ཏི ཏཾ ཨཝཛཱནིཏྭཱ ‘‘ནིབྦཱནནྟྭེཝ སསྶཏ’’ནྟི, ‘‘ཨནཏྟཱ ཨིཏི ནིཙྪཡཱ’’ཏི ¶ ཙ སུཏྟཾ དིསྭཱ ཏསྶ པཋམཝཱདསྶ ནིདྡོསཏཾ སལླཀྑེཏྭཱ ‘‘མམེཝ ཨཡཾ ཝཱདོ’’ཏི ཏམེཝ པཙྪཱ པཊིཛཱནཱཏི. ཨེཝཾ ཏཏྠ ཡཐཱཝུཏྟམཱནིསཾསཾ སལླཀྑེནྟོ ཏཾ པཊིཛཱནིཏྭཱ ཡདི ཨནཏྟཱ སབྦེ དྷམྨཱ, དྷམྨཱ ཨེཝ ན ཏེ བྷཝནྟི. སབྷཱཝཾ དྷཱརེནྟཱིཏི ཧི ‘‘དྷམྨཱ’’ཏི ཝུཙྩནྟི.

ཨཡཉྩ ཨཏྟ-སདྡོ སབྷཱཝཝཱཙཱིཏི ཨེཝཾ ཨཱརོཔིཏེ ཝཱ དོསེ ཨནཱརོཔིཏེ ཝཱ དོསོཏི སལླཀྑེཏྭཱ ‘‘ནཱཡཾ མམ ཝཱདོ’’ཏི ཏམེཝ པཋམཝཱདཾ པཙྪཱ ཨཝཛཱནཱཏི. ཨཐ སོ པརཝཱདཱི སཔཀྑཾ པཊིསེདྷེ པཊིཛཱནནཏྟཱཔནཡནཾ ¶ . པཊིཛཱནཱཏི པཏྱཱསྶ ཨིཏི ཝཙནཏོ ‘‘པཊིཉྙཱ ཨཉྙཱ སོ ནཱམ ཏེ ནིགྒཧོ’’ཏི ཝུཏྟོ. སབྷཱཝཱཏིརིཏྟཾ ཨཏྠཾ པཊིསེདྷཱདྷིཔྤཱཡཏོ སབྷཱཝཏོ ཨཏིརིཏྟཾ བཱལཔརིཀཔྤིཏམཏྟཱནཾ སནྡྷཱཡ ‘‘ཨནཏྟཱ སབྦེ དྷམྨཱ’’ཏི མེ པཊིཉྙཱཏཀཐཱ, སཱ ཙ ཏདཝཏྠཱཡེཝཱཏི ན མེ ཏཾ པཊིཉྙཱཏཏྟཱཔནཡནཾ ཨཏྠི, ‘‘ནཱཡཾ མམ ཝཱདོ’’ཏི ཨཝཛཱནནཾ པན སབྷཱཝསངྑཱཏཾ ཨཏྟཱནཾ སནྡྷཱཡ ‘‘ཨནཏྟཱ སབྦེ དྷམྨཱ’’ཏི ན ཝདཱམཱིཏི ཨདྷིཔྤཱཡེན ཀཏནྟི ཨིམིནཱ ཨཉྙེན ཀཱརཎེན ཏཾ པུབྦེ པཊིཉྙཱཏཏྟཱཔནཡནཾ ཀཱརཎཾ པཊིཙྪཱདེཏི. ‘‘ཨནཏྟཱ སབྦེཝ དྷམྨཱ’’ཏི ན ཝཏྟབྦཾ ‘‘ཨཏྟ-སདྡསྶ སབྷཱཝཝཱཙིཏྟཱ’’ཏི ཨིདཾ ཀཱརཎཾ པཊིཙྩ ཏེན པུབྦེ པཊིཉྙཱཏཏྟཱཔནཡནཾ ཀཏཾ. ཏམཉྙཀཱརཎཾ པཙྪཱ དསྶིཏེན ཨཉྙེན ཀཱརཎེན པཊིཙྪཱདེཏཱིཏི ཨདྷིཔྤཱཡོ.

ཡསྨཱ ན ཀེཝལཾ ཡཐཱདསྶིཏནཡེན སོ ཨཏྠམེཝ ཨཝཛཱནཱཏི, པཊིཛཱནཱཏི ཙ, ཀིནྟུ ཝཙནམྤི, ཏསྨཱ ཨཊྛཀཐཱཡཾ (པཱཙི. ཨཊྛ. ༡) ‘‘ཛཱནིཏབྦཏོ’’ཏི པཋམཾ ཀཱརཎཾ ཝཏྭཱ པརཝཱདིནཱ ‘‘ཡདི ཛཱནིཏབྦཏོ ཨནིཙྩཾ, ནིབྦཱནཾ ཏེ ཨནིཙྩཾ སིཡཱ’’ཏི ཝུཏྟེ ‘‘ན མཡཱ ‘ཛཱནིཏབྦཏོ’ཏི ཀཱརཎཾ ཝུཏྟཾ, ‘ཛཱཏིདྷམྨཏོ’ཏི མཡཱ ཝུཏྟཾ, ཏཾ ཏཡཱ བདྷིརཏཱཡ ཨཉྙེན སལླཀྑིཏནྟིཨཱདཱིནི ཝདཏཱིཏི ཨདྷིཔྤཱཡོ. ‘ཛཱནིཏབྦཏོ’ཏི ཝཏྭཱ པུན ‘ཛཱཏིདྷམྨཏོ’ཏིཨཱདཱིནི ཝདཏཱི’’ཏི ཝུཏྟཾ. ‘‘ཨཝཛཱནིཏྭཱ པུན པཊིཛཱནནྟོ ཏཾ ཨཝཛཱནནཾ ཨིམིནཱ པཊིཙྪཱདེཏི ནཱམཱ’’ཏི ལིཁིཏཾ.

༢. ཛཱནིཏྭཱ ཛཱནནྟསྶ ཙཱཏི ཛཱནིཏྭཱ ཝཱ ཛཱནནྟསྶ ཝཱཏི ཨཏྠདྭཡཾ དཱིཔེཏཱིཏི.

༣. ཨཔིཙ མིཙྪཱཝཱཙཱཔརིཡཱཔནྣཱཏི ཙཏུབྦིདྷམིཙྪཱཝཱཙཱཔརིཡཱཔནྣཱ. སཱིཧལཱ༹དིནཱམབྷེདགཏཱཏི ཀེཙི, ཏསྨཱ ཨེཝཾ ཝདཏོ ཝཙནཾ, ཏཾསམུཊྛཱཔིཀཱ ཙེཏནཱཏི ཨུབྷཡཾ ཝུཏྟནྟི མཱཏིཀཱཡཾ ཨུབྷིནྣཾ སངྒཧིཏཏྟཱ. ཝིབྷངྒེ ཏཾ ཝཙནཾ ཡསྨཱ ཝིནཱ ཝིཉྙཏྟིཡཱ ནཏྠི, ཏསྨཱ ¶ ‘‘ཝཱཙསིཀཱ ཝིཉྙཏྟཱི’’ཏི ཝིཉྙཏྟི ཙ དསྶིཏཱ. ‘‘ཨེཝཾ ཝདཏོ ཝཙན’’ནྟི ལོཀཝོཧཱརེན ཝཏྭཱ པརམཏྠཏོ དསྶེནྟོ ‘‘ཏཾསམུཊྛཱཔིཀཱ ཝཱ ཙེཏནཱཏི ཝུཏྟ’’ནྟི ཙ ཝདཏི. ཨོལཱ༹རིཀེནེཝཱཏི ཙེཏནཱསམུཊྛཱནཝཱཙཱནཾ སུཁུམཏྟཱ ཝིསཡཝསེནེཝ ཀཏཱཏི.

༩. དིཊྛསྶ ¶ ཧོཏཱིཏི དིཊྛོ ཨསྶ, ཨནེན ཝཱ ཨུཔཙཱརཛ྄ཛྷཱནཝསེན ན མཡཱ ཨབྱཱཝཊོ མཏོ, ‘‘ན མཡཱ པཝནྟོ པཊོ དིཊྛོ’’ཏིཨཱདིཾ བྷཎནྟསྶ ཙ པརམཏྠསུཉྙཏཾ ཨུཔཱདཱཡ ཨེཝ ‘‘ཨིཏྠིཾ ན པསྶཱམི, ན ཙ པུརིས’’ནྟི བྷཎནྟསྶ ཙ ན མུསཱཝཱདོ.

༡༡. ཨཱཔཏྟིཾ ཨཱཔཛྫཏིཡེཝཱཏི ཨེཏྠ ‘‘དུབྦྷཱསིཏཱཔཏྟཱི’’ཏི ཝདནྟི. ཀསྨཱ? ‘‘ཀེལི༹ཾ ཀུརུམཱནོ’’ཏི ཝུཏྟཏྟཱ. ‘‘ཝཱཙཱ གིརཱ…པེ… ཝཱཙསིཀཱ ཝིཉྙཏྟཱི’’ཏི ཨུཛུཀཾ སནྡྷཱཡ, ཀཱཡོ ན ཨུཛུཀོ.

མུསཱཝཱདསིཀྑཱཔདཝཎྞནཱ ནིཊྛིཏཱ.

༢. ཨོམསཝཱདསིཀྑཱཔདཝཎྞནཱ

༡༣. ‘‘པུན ཨརེ པཏྟེཏི པུན ཏཾ ཋཱནཾ པརིཝཊྚེཏྭཱ ཨཱགཏེ ཨཉྙསྨིཾ ཨརེ’’ཏི ལིཁིཏཾ. པཏིཊྛིཏཱརཔྤདེསནྟི བྷཱུམིཾ. པུན ཨརེཏི པུན ཏསྨིཾཡེཝ ཨརེ བྷཱུམིཾ པཏྟེཏི ཨཏྠོཏི ཀེཙི, ཏཾ ན སུནྡརཾ ཝིཡ. ཛཱཔིཏོཏི པརཱཛིཏོ, ‘‘པརཱཛིཏོ’’ཏི ཝཱ པཱཋོ. པཱཔེསཱིཏི ཨབྷིབྷཝསི. མནཱཔཾ བྷཱསམཱནསྶ བྲཱཧྨཎསྶ གརུཾ བྷཱརཾ. ཨུདབྦཧཱིཏི ཨཱཀཌྜྷཱིཏི ཨཏྠོ, ཨནཱདརཏྠེ ཝཱ སཱམིཝཙནཾ. དྷནཉྩ ནཾ ཨལཱབྷེསཱིཏི ཡཐཱ སོ དྷནཾ ཨལབྷི, ཏཐཱ ཨཀཱསཱིཏི ཨདྷིཔྤཱཡོ.

༡༥. པུབྦེཏི ནིདཱནེ. ཨཝཀཎྞཀནྟི ཚིནྣཀཎྞཀནཱམཾ. ཛཝཀཎྞཀནྟི ཝངྐཀཎྞཀནཱམཾ. དྷནིཊྛཀཾ དྷནཝཌྜྷཀནཱམཾ, སིརིཝཌྜྷཀནཱམཾ ཀུལཝཌྜྷཀསྶེཝ ནཱམཾ. ཏཙྪཀཀམྨནྟི ཁཎནཀམྨཀཱརཱ ཀོཊྛཀཱ, པཱསཱཎཀམྨཀཱརཱཏི ཀེཙི. ‘‘མུདྡཱཏི པབྦགཎནཱ. གཎནཱཏི མཧཱགཎནཱ’’ཏི པོརཱཎགཎྛིཔདེ ཝུཏྟཾ. ‘‘མདྷུམེཧཾ ཨོམེཧ’’ནྟི ལིཁིཏཾ. ཐཱུལཀཱཡསྶ མཾསཱུཔཙཡོཏི ཨེཀེ. ཡབྷ མེཐུནེ. ཝཱིཏརཱགཏཱདཱིཧི ཨཀྐོསནྟོཔི ཀིལེསེཧེཝ ཀིར ཨཀྐོསཏི ནཱམ, ཏཐཱ ‘‘སོཏཱཔནྣོ’’ཏི ཨཀྐོསནྟོ ཨཱཔཏྟིཡཱ ཨཀྐོསཏི ནཱམཱཏི ཨེཀེ. ལིངྒཱཡཏྟཏྟཱ ཨཙྩོདཱཏཱདིཔི ལིངྒམེཝ ཛཱཏཾ.

༡༦. སབྦཏྠ ¶ ཝདེཏཱིཏི ཨུདྡེསོ. བྷཎཏཱིཏི ཝིཏྠཱརོ. ཝདེཏཱིཏི ཝཱ ཨིམིནཱ པརཝིཉྙཱཔནཾ དཱིཔེཏི.

༢༦. ཨཉྙཱཔདེསཝཱརེསུ ¶ པན ‘‘ཨེཝཾ ཝདེཏཱི’’ཏི ཝུཏྟཾ. ཀསྨཱ? པུབྦེ དསྶིཏཨུདྡེསཀྐམནིདསྶནཏྠཾ. པུབྦེཔི ‘‘ཧཱིནེན ཧཱིནཾ, ཧཱིནེན ཨུཀྐཊྛཾ, ཨུཀྐཊྛེན ཧཱིནཾ, ཨུཀྐཊྛེན ཨུཀྐཊྛ’’ནྟི ཛཱཏྱཱདཱིསུ ཨེཀེཀསྨིཾ ཙཏུདྷཱ ཙཏུདྷཱ དསྶིཏཨུདྡེསཀྐམསྶ ནིདསྶནཾ ‘‘ཨེཝ’’ནྟི ཨིམིནཱ ཀརོཏི. ‘‘ཧཱིནེན ཧཱིནཾ ཝདེཏཱི’’ཏི ཝུཏྟཊྛཱནེཡེཝ ཧི ‘‘ཨེཝཾ ཝདེཏཱི’’ཏི ཝུཏྟེ སོ ཨཱཀཱརོ ནིདསྶིཏོ ཧོཏཱིཏི ཨདྷིཔྤཱཡོ. ཨཉྙཐཱ ཨཉྙཱཔདེསེན སོ ཨཱཀཱརོ ན སམྦྷཝཏཱིཏི ཨཱཔཛྫཏི. ན སམྦྷཝཏི ཨེཝཱཏི ཙེ? ན, ཝིསེསཀཱརཎཱབྷཱཝཱ, ཏཏྠ ཨནཱཔཏྟིཔྤསངྒཏོ, ཨནིཡམནིདྡེསེན ཨནིཡམཏྠསམྦྷཝཏོ ཙ. ‘‘སནྟི ཨིདྷེཀཙྩེ ཙཎྜཱལཱ’’ཏིཨཱདིནཱ ཧི ཨནིཡམནིདྡེསེན ཙཎྜཱལཾ ཝཱ ཨཙཎྜཱལཾ ཝཱ སནྡྷཱཡ བྷཎནྟསྶ ཨཱཔཏྟཱིཏི ཨནིཡམཏྠོ སམྦྷཝཏཱིཏི ཨདྷིཔྤཱཡོ. ཡདི ཨེཝཾ ཨེཏྟཀམེཝ ཝཏྟབྦཾ ཏཱཝཏཱ པུབྦེ དསྶིཏཨུདྡེསཀྐམནིདསྶནསིདྡྷིཏོཏི? ན, ‘‘ཝདེཏཱི’’ཏི ཨིམིནཱ ཨཡོཛིཏེ ‘‘ཨེཝ’’ནྟི པདེ ཨིམཾ ནཱམ ཨཱཀཱརཾ དསྶེཏཱིཏི ཨནཝབོདྷཏོ. ཨཉྙཱཔདེསནཡེཔི པརཝིཉྙཱཔནེཡེཝ དུཀྐཊཔཱཙིཏྟིཡཾ ཝིཡཱཏི ནིཡམནཔཡོཛནཾ ཝཱ ‘‘ཝདེཏཱི’’ཏི པདནྟི ཝེདིཏབྦཾ. ཨཐ ཝཱ ཨཏྟནོ སམཱིཔེ ཋཏྭཱ ཨཉྙཾ བྷིཀྑུཾ ཨཱཎཱཔེནྟོ ཧཱིནེན ཧཱིནཾ ཝདེཏི བྷཎཏི, ཨཱཔཏྟི པཱཙིཏྟིཡསྶ. སཙེ སཡཾ ཧཱིནོ ཧཱིནེན ཧཱིནཾ ཙཎྜཱལཾ…པེ… པུཀྐུསཾ ‘‘པུཀྐུསོ’’ཏི བྷཎཏི ཨཱཔཏྟི ཝཱཙཱཡ ཝཱཙཱཡ པཱཙིཏྟིཡསྶ, ཨེས ནཡོ ཨཉྙཱཔདེསཝཱརེསུཔཱིཏི ཡོཛནཱ ཝེདིཏབྦཱ. ཨཡམཏྠོ དུཊྛདོསེསུ པརིཡེསིཏབྦོ. ཨཉྙཐཱ ‘‘ཝདེཏི བྷཎཏཱི’’ཏི ཨེཏེསཾ ཨཉྙཏརཾ ཨུབྷཡཏྠ ཨནཉྙཱཔདེསཝཱརཨཉྙཱཔདེསཝཱརེསུ, ཝིསེསེན ཝཱ ཨཉྙཱཔདེསཝཱརེསུ ནིརཏྠཀཾ ཨཱཔཛྫཏི ཝིནཱཡེཝ ཏེན ཝཙནསིལིཊྛཏཱསམྦྷཝཏོ. ཨཏྟཏོ པཱལི༹ཡཾ ཨཝུཏྟཏྟཱ པནེཏྠ ‘‘སཱཎཏྟིཀ’’ནྟི ཝུཏྟནྟི ཝེདིཏབྦཾ. ཏཏྲཱཡཾ པདསནྡྷི ཝདེཏཱིཏི ཝད ཨིཏཱིཏི. ཨསམྨུཁཱ ཝདནྟསྶ དུཀྐཊཾ ‘‘སམྨུཁཱ པན སཏྟཧིཔི ཨཱཔཏྟིཀྑནྡྷེཧི ཝདནྟསྶ དུཀྐཊ’’ནྟི ཨནྡྷཀཊྛཀཐཱཡཾ ཝུཏྟཏྟཱ. དཝཀམྱཏཱ ནཱམ ཀེལི༹, ཏཾ དསྶེཏུཾ ‘‘ཧསཱདྷིཔྤཱཡཏཱ’’ཏི ཝུཏྟཾ. ‘‘ཨསམྨུཁཱཔི དཝཀམྱཏཱཡ ཝདནྟསྶ དུབྦྷཱསིཏམེཝཱ’’ཏི ཨཱཙརིཡཱ ཝདནྟི. པཱཔགརཧིཏཱཡ ཀུཛ྄ཛྷིཏྭཱཔི ཝདནྟསྶ དུཀྐཊཾ, ཨསམྨུཁཱ ཨནཱཔཏྟཱིཏི.

ཨོམསཝཱདསིཀྑཱཔདཝཎྞནཱ ནིཊྛིཏཱ.

༣. པེསུཉྙསིཀྑཱཔདཝཎྞནཱ

༣༦-༧. ‘‘ཨིམསྶ ¶ ¶ སུཏྭཱ ཨམུསྶཱ’’ཏི པཱཋོ. ‘‘ཨིམེསཾ སུཏྭཱ’’ཏི ན སུནྡརཾ. བྷེདཱཡཔཱིཏི བྷེདཱཡ. ཏིཎྞམྤི བྷིཀྑུབྷཱཝཏོཡེཝ ནིཔཛྫནཏོ ‘‘བྷིཀྑཱུནཾ པེསུཉྙེ’’ཏི བཧུཝཙནཾ ཀཏཾ.

༣༨-༩. ‘‘ཨིཏྠནྣཱམོ ཨཱཡསྨཱ ཙཎྜཱལོ…པེ… པུཀྐུསོཏི བྷཎཏཱི’’ཏི ཝཏྭཱ པེསུཉྙཾ ཨུཔསཾཧརཏཱིཏི ཡོཛནཱ. ཨཉྙཐཱ ‘‘པུཀྐུསོཏི བྷཎཏཱི’’ཏི ཝཏྟབྦཏཱ ཨཱཔཛྫཏི. ཨེཏྠ ཨནུཔསམྤནྣཝཱརོ ལབྦྷམཱནོཔི ན ཨུདྡྷཊོ ཨོམསཝཱདེ དསྶིཏནཡཏྟཱ, སངྑེཔཏོ ཨནྟེ དསྶེཏུཀཱམཏཱཡ ཝཱ. ཏཐཱ ཧི ཨནྟེ ཏཱིཎི དུཀྐཊཱནི དསྶིཏཱནི. ཏཱནི པན དསྶེནྟོ བྷགཝཱ ཡསྨཱ ‘‘ཨུཔསམྤནྣསྶ སུཏྭཱ ཨུཔསམྤནྣསྶ པེསུཉྙཾ ཨུཔསཾཧརཏཱི’’ཏི ཝུཏྟཱནཾ དྭིནྣཾ པདཱནཾ ཨཉྙཏརཝིཔལླཱསཝསེན ཝཱ ཨུབྷཡཝིཔལླཱསཝསེན ཝཱ པཱཙིཏྟིཡནྟི ཀཏྭཱ དྭེཔི ཏཱནི ཨེཀཏོ ཝུཏྟཱནཱིཏི དསྶེཏུཀཱམོ, ཏསྨཱ སབྦཔཋམཾཡེཝ ‘‘ཨུཔསམྤནྣོ ཨུཔསམྤནྣསྶ སུཏྭཱ ཨུཔསམྤནྣསྶ པེསུཉྙཾ ཨུཔསཾཧརཏི, ཨཱཔཏྟི པཱཙིཏྟིཡསྶཱ’’ཏི ཨཱཧ. ‘‘དྭཱིསུ པནེཏེསུ ཡསྨཱ པཱརཱཛིཀཾ ཨཛ྄ཛྷཱཔནྣོཔི ཨུཔསམྤནྣོ ཏཱདིསཾཡེཝ ཨུཔསམྤནྣཾ ཁུཾསེཏུཀཱམོ ཨོམསཏི, ཏཱདིསསྶ སུཏྭཱ ཏཱདིསསྶ པེསུཉྙཾ ཨུཔསཾཧརཏི, ཨཱཔཏྟི པཱཙིཏྟིཡསྶ, ཏསྨཱ ‘ཨུཔསམྤནྣོ’ཏི ཨིདཾ ཨཱདིཔདཾ སབྦཏྠ ཝུཏྟ’’ནྟི ཀེཙི ཝདནྟི, ཏཾ ན ཡུཏྟཾ, ཨནཝསེསཨཱཔཏྟིཾ ཨཱཔནྣསྶ པུན ཨཱཔཏྟིཡཱ ཨསམྦྷཝཏོ, ཏསྨཱ ཀེཝལཾ མཱཏིཀཱཡཾ བྷིཀྑུཔདཱབྷཱཝཏོཡེཝ ‘‘བྷཎཏི ཨུཔསཾཧརཏཱི’’ཏི པདཱནཾ ཀཱརཀནིདྡེསཱབྷཱཝེ ཨསམྦྷཝཏོ ཨེཝ ཏཾ ཨཱདིཔདཾ ཝུཏྟནྟི ཝེདིཏབྦཾ. ཨིདཾ པཱལི༹ལེསཱབྷཱཝཏོ ཨནཱཎཏྟིཀམེཝ. ‘‘ན པིཡཀམྱསྶ, ན བྷེདཱདྷིཔྤཱཡསྶཱ’’ཏི ཨུཔསཾཧརཎཱཔེཀྑཾ སཱམིཝཙནཾ ཏུཎྷཱིབྷཱུཏསྶ ཝཙནཔྤཡོཛནཱབྷཱཝཏོ, ཏེན ཝུཏྟཾ ‘‘པཱཔགརཧིཏཱཡ བྷཎནྟསྶ ཨནཱཔཏྟཱི’’ཏི.

པེསུཉྙསིཀྑཱཔདཝཎྞནཱ ནིཊྛིཏཱ.

༤. པདསོདྷམྨསིཀྑཱཔདཝཎྞནཱ

༤༥-༦. སབྦམེཏཾ ¶ པདསོ དྷམྨོ ནཱམཱཏི ཨེཏྠ དྷམྨོ ནཱམ བུདྡྷབྷཱསིཏོཏི ཨེཝཾ སམྦནྡྷོ. ཨཀྑརསམཱུཧོཏི ཨསམཏྟཔདེ. པཙྩེཀབུདྡྷབྷཱསིཏཾ བུདྡྷབྷཱསིཏེ ཨེཝ. ཨནུཔཱསཀགཧཊྛེཧི བྷཱསིཏོ ཨིསིབྷཱསིཏཱདིསངྒཧཾ གཙྪཏཱིཏི ཝེདིཏབྦཾ. ཀཏྠཙི པོཏྠཀེ ‘‘དེཝཏཱབྷཱསིཏོ’’ཏི ¶ པདཾ ནཏྠི, ཡཏྠ ཨཏྠི, སཱ པཱལི༹. གཱཐཱབནྡྷེཔི ཙ ཨེས ནཡོཏི ཨེཀམེཝ ཨཀྑརཾ ཝཏྭཱ ཋཱནཾ ལབྦྷཏི ཨེཝ. ‘‘ཨེཝཾ མེ སུཏ’’ནྟིཨཱདིསུཏྟཾ བྷཎཱཔིཡམཱནོ ཨེཀཱརཾ ཝཏྭཱ ཏིཊྛཏི ཙེ, ཨནྭཀྑརེན པཱཙིཏྟིཡཾ, ཨཔརིཔུཎྞཔདཾ ཝཏྭཱ ཋིཏེ ཨནུབྱཉྫནེན. པདེསུ ཨེཀཾ པཋམཔདཾ ཝིརུཛ྄ཛྷཏི ཙེ, ཨནུཔདེན པཱཙིཏྟིཡཾ. ཨཊྛཀཐཱནིསྶིཏོཏི ཨཊྛཀཐཱནིསྶིཏཝསེན ཋིཏོ. པུབྦེ པཀཏིབྷཱསཱཡ ཝུཏྟཾ ཨཊྛཀཐཾ སནྡྷཱཡ. པཱལི༹ནིསྶིཏོཏི པཱལི༹ཡཾ ཨེཝཱགཏོ. མགྒཀཐཱདཱིནིཔི པཀརཎཱནི.

༤༨. ཨུཔཙཱརནྟི དྭཱདསཧཏྠཾ. ‘‘ཨོཔཱཏེཏཱིཏི ཨེཀཏོ བྷཎཏི སམཱགཙྪཏཱི’’ཏི ལིཁིཏཾ. ཀིཉྩཱཔི ཨཔལཱལདམནམྤི སཱིལུཔདེསོཔི བྷགཝཏོ ཀཱལེ ཨུཔྤནྣོ, ཨཐ ཁོ ཏེསུ ཡཾ ཡཾ བུདྡྷཝཙནཏོ ཨཱཧརིཏྭཱ ཝུཏྟཾ, ཏཾ ཏདེཝ ཨཱཔཏྟིཝཏྠུ ཧོཏཱིཏི ཝིཉྙཱཔནཏྠཾ མཧཱཨཊྛཀཐཱཡཾ ‘‘ཝདནྟཱི’’ཏི ཝཙནེཧི སིཐིལཾ ཀཏཾ. བུདྡྷཝཙནཏོ ཨཱཧརིཏྭཱ ཝུཏྟསྶ བཧུལཏཱཡ ཏབྦཧུལནཡེན ཏེསུ ཨཱཔཏྟི ཝུཏྟཱ, ཏསྨཱ མཧཱཔཙྩརིཡཾ ཏསྶཱདྷིཔྤཱཡོ པཀཱསིཏོཏི ཨཏྠོ. ‘‘སབྦེསམེཝ ཝཙནནྟི ཨཔརེ’’ཏི ཝུཏྟཾ. སཙེ ཨཱཙརིཡོ ཋིཏོ ནིསིནྣཱནཾ པཱཋཾ དེཏི, ‘‘ན ཋིཏོ ནིསིནྣསྶ དྷམྨཾ དེསེསྶཱམཱི’’ཏི ཝུཏྟཱཔཏྟིཾ ནཱཔཛྫཏཱིཏི ཨེཀེ. ཏེསམྤི པཱཋདཱནཾ དྷམྨདེསནཏོ ན ཨཉྙནྟི ཏཾ ན ཡུཏྟཾ, ཚཏྟཔཱཎིཀཱདཱིནཾ པཱཋདཱནེན ཨནཱཔཏྟིཔྤསངྒཏོ, ཨཱཔཏྟིབྷཱཝོ ཙ སིདྡྷོ. ཝུཏྟཉྷེཏཾ –

‘‘ཨུབྷོ ཨཏྠཾ ན ཛཱནནྟི, ཨུབྷོ དྷམྨཾ ན པསྶརེ;

ཡོ ཙཱཡཾ མནྟཾ ཝཱཙེཏི, ཡོ ཙཱདྷམྨེནདྷཱིཡཏཱི’’ཏི. (པཱཙི. ༦༤༧);

ཨེཏྠ ཨདྷཱིཡཏཱིཏི ཨཏྠོ, ཏསྨཱ པཱཋདཱནམྤི དྷམྨདེསནཱཝ. སེཁིཡཊྛཀཐཱཡཾ (པཱཙི. ཨཊྛ. ༦༣༤) ‘‘དྷམྨཔརིཙྪེདོ པནེཏྠ པདསོདྷམྨེ ཝུཏྟནཡེན ཝེདིཏབྦོ’’ཏི ཝུཏྟཾ ¶ , ཏསྨཱ ཨཡམེཝ དྷམྨོ སབྦཏྠ དྷམྨཔཊིསཾཡུཏྟསིཀྑཱཔདེསུ ཝེདིཏབྦོ. ཡདི ཨེཝཾ སངྑཱརབྷཱསཱདིཝསེན ཙིཏྟདྷམྨཾ དེསེནྟསྶ སེཁིཡཝསེན ཨནཱཔཏྟི སིཡཱ, ཏཏོ ཚཔཀཛཱཏཀཝིརོདྷོ. ཏཏྠ མནྟཱནཾ བཱཧིརགནྠཏྟཱཏི ཙེ? ན, ཏདདྷིཔྤཱཡཱཛཱནནཏོ. ཨཡཉྷི ཏཏྠ ཨདྷིཔྤཱཡོ ‘‘བཱཧིརཀགནྠསངྑཱཏམྤི མནྟཾ ཨུཙྩེ ཨཱསནེ ནིསིནྣསྶ ཝཱཙེཏུཾ མེ བྷིཀྑཝེ ཨམནཱཔཾ, པགེཝ དྷམྨཾ དེསེཏུ’’ནྟི. ‘‘ཏདཱཔི མེ, བྷིཀྑཝེ, ཨམནཱཔཾ ནཱིཙེ ཨཱསནེ ནིསཱིདིཏྭཱ ཨུཙྩེ ཨཱསནེ ནིསིནྣསྶ མནྟཾ ཝཱཙེཏུཾ, ཀིམངྒཾ པན ཨེཏརཧི…པེ… དྷམྨཾ དེསེཏུ’’ནྟི (པཱཙི. ༦༤༧) ཧི ཨཡཾ པཱལི༹ ཡཐཱཝུཏྟམེཝ ཨདྷིཔྤཱཡཾ དཱིཔེཏི, ན ཨཉྙཾ. ཏེནེཝ ‘‘མནྟཾ ཝཱཙེཏུཾ དྷམྨཾ དེསེཏུ’’ནྟི ཝཙནབྷེདོ ཀཏོ. ཨཉྙཐཱ ཨུབྷཡཏྠ ‘‘དྷམྨཾ དེསེཏུ’’མིཙྩེཝ ཝཏྟབྦནྟི.

མཡཱ ¶ སདྡྷིཾ མཱ ཝདཱཏིཨཱདིམྷི པན ཨནུགཎྛིཔདེ ཨེཝཾ ཝུཏྟོ ‘‘སཙེ བྷིཀྑུ སཱམཎེརེན སདྡྷིཾ ཝཏྟུཀཱམོ, ཏཐཱ སཱམཎེརོཔི བྷིཀྑུནཱ སདྡྷིཾ ཝཏྟུཀཱམོ སཧསཱ ཨོཔཱཏེཏི, ‘ཡེབྷུཡྻེན པགུཎཾ གནྠཾ བྷཎནྟཾ ཨོཔཱཏེཏཱི’’ཏིཨཱདཱིསུ ཝིཡ ཨནཱཔཏྟི, ན ཧི ཨེཏྟཱཝཏཱ བྷིཀྑུ སཱམཎེརསྶ ཨུདྡིསཏི ནཱམ ཧོཏི. ཡསྨཱ མཧཱཨཊྛཀཐཱཡཾ ནཏྠི, ཏསྨཱཔི ཡུཏྟམེཝེཏཾ. སཙེ ཏཏྠ ཝིཙཱརེཏྭཱ པཊིཀྑིཏྟཾ སིཡཱ ཨཱཔཏྟི, ཀིརིཡཱཀིརིཡཉྩ ནཱཔཛྫཏི. ཀསྨཱ? ཡསྨཱ ཙིཏྟེན ཨེཀཏོ ཝཏྟུཀཱམོ, ཨཐ ཁོ ནཾ ‘ཨེཀཏོ མཱ ཝདཱ’ཏི པཊིཀྑིཔིཏྭཱཔི ཨེཀཏོ ཝདནྟོ ཨཱཔཛྫཏི. ཨཝཏྟུཀཱམསྶ སཧསཱ ཝིརཛ྄ཛྷིཏྭཱ ཨེཀཏོ ཝདནྟསྶ ཨནཱཔཏྟི, ཏེན ཝུཏྟཾ ‘མཡཱ སདྡྷིཾ མཱ ཝདཱཏི ཝུཏྟོ ཡདི ཝདཏི, ཨནཱཔཏྟཱི’ཏི. ཏཐཱཔི ཨཱཙརིཡཱནཾ མཏིམནུཝཏྟནྟེན ཨེཝརཱུཔེསུ ཋཱནེསུ ཡཐཱཝུཏྟནཡེནེཝ པཊིཔཛྫིཏབྦཾ. ཀསྨཱ? ཡསྨཱ མཧཱཨཊྛཀཐཱཡཾ ནཏྠི, ནཏྠིབྷཱཝཏོཡེཝ ཨཱཔཏྟི. སཙེ ཏཏྠ ཨནཱཔཏྟིཨཝཙནཾ ན སམྦྷཝཏི ཨཡམཊྛཱནཏྟཱ’’ཏི.

ཏཏྲཱཡཾ ཝིཙཱརཎཱ – ‘‘མཡཱ སདྡྷིཾ མཱ ཝདཱ’’ཏི ཝུཏྟོ ཡདི ཝདཏི, བྷིཀྑུནོ ཨནཱཔཏྟཱིཏི ཡུཏྟམེཏཾ བྷིཀྑུནོ ཝཏྟུཀཱམཏཱཡཱབྷཱཝཏོ, བྷཱཝེཔི སཛ྄ཛྷཱཡཀརཎཱདཱིསུ ཏཱིསུ ཨནཱཔཏྟིཏོ ཙ. ཨཐ སཱམཎེརེན བྱཏྟཏཱཡ ‘‘མཡཱ སདྡྷིཾ མཱ ཝདཱ’’ཏི ཝུཏྟོ བྷིཀྑུ ཨབྱཏྟཏཱཡ ཝདཏི, ཨཱཔཏྟི ཨེཝ ཝཏྟུཀཱམཏཱསབྦྷཱཝཏོ. སཧསཱ ཙེ ཝདཏི, ཨནཱཔཏྟི ཏདབྷཱཝཏོ. སཙེ བྷིཀྑུ ཨེཝཾ ‘‘མཡཱ སདྡྷིཾ མཱ ཝདཱ’’ཏི ¶ ཝཏྭཱ ཏེན སདྡྷིཾ སཡཾ ཝདཏི, ཨཱཔཏྟི ཨེཝ. ན ཧི ཨེཏཾ སིཀྑཱཔདཾ ཀིརིཡཱཀིརིཡཾ. ཡདི ཨེཏཾ སིཀྑཱཔདཾ ཀིརིཡཱཀིརིཡཾ བྷཝེཡྻ, ཡུཏྟཾ. ཏཏྠ ཨནཱཔཏྟཱིཏི ཨདྷིཔྤཱཡོ. མཧཱཔཙྩརིཡཾ ཨིམིནཱཝ ཨདྷིཔྤཱཡེན ‘‘མཡཱ སདྡྷིཾ མཱ ཝདཱ’’ཏི ཝུཏྟཾ སིཡཱ. ན ཧི སཱམཎེརསྶ ཀིརིཡཱ ཨིདྷ པམཱཎནྟི, ཨིམསྨིཾ པན ཨདྷིཔྤཱཡེ ཝུཏྟེ ཨཏིཡུཏྟཾཝཱཏི ཨཏྠོ. ཨཀྑརཏྠོ བྱཉྫནཏྠོ. ཀིཉྩཱཔི ‘‘ཡཉྩ པདཾ ཡཉྩ ཨནུཔདཾ ཡཉྩ ཨནྭཀྑརཾ ཡཉྩ ཨནུབྱཉྫནཾ, སབྦམེཏཾ པདསོདྷམྨོ ནཱམཱ’’ཏི ཝུཏྟཾ, ཏཐཱཔི ‘‘པདེན ཝཱཙེཏི, པདེ པདེ ཨཱཔཏྟི པཱཙིཏྟིཡསྶ, ཨཀྑརཱཡ ཝཱཙེཏི, ཨཀྑརཀྑརཱཡ ཨཱཔཏྟི པཱཙིཏྟིཡསྶཱ’’ཏི ཨིདམེཝ དྭཡཾ ཡོཛིཏཾ, ཏཾ ཀསྨཱཏི ཙེ? པདེན ཨནུཔདཨནུབྱཉྫནཱནཾ སངྒཧིཏཏྟཱ. ཝུཏྟཉྷེཏཾ ‘‘ཨནུཔདནྟི དུཏིཡཔཱདོ. ཨནུབྱཉྫནནྟི པུརིམབྱཉྫནེན སདིསཾ པཙྪཱབྱཉྫན’’ནྟི (པཱཙི. ཨཊྛ. ༤༥), ཏསྨཱ ཨནུཔདེཀདེསམཏྟམེཝ ཨནུབྱཉྫནནྟི སིདྡྷཾ. ‘‘ཨཀྑརཱནུབྱཉྫནསམཱུཧོ པད’’ནྟི ཙ ཝུཏྟཏྟཱ པདམཏྟམེཝ ཝཏྟབྦཾ ཏེན ཨནུཔདཱདིཏྟཡགྒཧཎཏོཏི ཙེ? ན ཝཏྟབྦཾ ཝཙནཝིསེསཏོ. པདེན ཝཱཙེནྟོ ཧི པདེ ཝཱ ཨནུཔདེ ཝཱ ཨནུབྱཉྫནེ ཝཱ ཨཱཔཏྟིཾ ཨཱཔཛྫཏི. ན ཨཀྑརེན. ཨཀྑརེན ཝཱཙེནྟོ པན པདཱདཱིསུ ཨཉྙཏརསྨིཾ ཨཱཔཛྫཏི. ན ཧི ‘‘ཝརོ ཝརཉྙཱུ ཝརདོ ཝརཱཧརོ’’ཏིཨཱདིམྷི ¶ པཋམཾ ཝ-ཀཱརཾ ཝཱཙེནྟོ དུཏིཡཱདིཝ-ཀཱརེ ཨོཔཱཏེཏི, པཋམཾ རོ-ཀཱརཾ ཝཱཙེནྟོ དུཏིཡརོ-ཀཱརེ ཨོཔཱཏེཏི, པཋམཾ ར-ཀཱརཾ ཝཱཙེནྟོ དུཏིཡར-ཀཱརེ ཨོཔཱཏེཏི, ཨཱཔཏྟི པཱཙིཏྟིཡསྶཱཏི སམྦྷཝཏི. ཨནུབྱཉྫནཱནུལོམཏོ སམྦྷཝཏི ཨེཝཱཏི ཙེ? ན, ‘‘པདེ པདེ ཨཱཔཏྟི པཱཙིཏྟིཡསྶཱ’’ཏི ཨིམིནཱ ཝིརུདྡྷཏྟཱ. ཨིདཉྷི ཝཙནཾ ཨེཀསྨིཾ པདེ ཨེཀཱ ཨཱཔཏྟཱིཏི དཱིཔེཏི. ‘‘རཱུཔཾ ཨནིཙྩནྟི ཝུཙྩམཱནོ རཱུཏི ཨོཔཱཏེཏཱི’’ཏི ཝཙནཏོ སཀལཾ པཱདཾ ཝཱཙེནྟསྶ པཋམཨཀྑརམཏྟེ ཨེཀཏོ ཝུཏྟེ ཨཱཔཏྟཱིཏི སིདྡྷནྟི ཙེ? ན, ‘‘ཨཀྑརཀྑརཱཡ ཨཱཔཏྟི པཱཙིཏྟིཡསྶཱ’’ཏི ཨིམིནཱ ཝིརུདྡྷཏྟཱ, ཏསྨཱ རཱུཏི ཨོཔཱཏེཏཱིཏི ཝཏྟུཾ ཨསམྦྷཝཏོ རཱུ-ཀཱརསྶ ཡཐཱཝུཏྟདྷམྨཔརིཡཱཔནྣབྷཱཝསིདྡྷིཏོ ཏཾ ཨཝཏྭཱ ཀེཝལཾ ཨཀྑརཱཡ ཝཱཙེནྟསྶ ཡཐཱཝུཏྟདྷམྨཔརིཡཱཔནྣཨཀྑརབྷཱཝདསྶནཏྠཾ ‘‘རཱུཔཾ ཨནིཙྩནྟི ཝུཙྩམཱནོ’’ཏི ཝུཏྟཾ, ཝཙནསིལིཊྛཏཱཝསེན ཝཱ ཨནུབྱཉྫནེ ཝེདནཱཝཙནཾ ཝིཡཱཏི ཝེདིཏབྦཾ.

པདསོདྷམྨསིཀྑཱཔདཝཎྞནཱ ནིཊྛིཏཱ.

༥. པཋམསཧསེཡྻསིཀྑཱཔདཝཎྞནཱ

༥༠. ‘‘ན ¶ སཧསེཡྻཾ ཀཔྤེཏབྦ’’ནྟི བྷཱཝཝསེན ཝུཏྟཾ, ཀེསུཙི ‘‘ན སཧསེཡྻཱ ཀཔྤེཏབྦཱ’’ཏི པཱཋོ, ན ཀཔྤེཏབྦཱ བྷིཀྑུནཱཏི པཉྙཏྟནྟི ཨདྷིཔྤཱཡོ. ‘‘ཨཔསྶེནཾ ཝཱཏི ཝཱཡིམམཉྩཀམེཝ ཧོཏཱི’’ཏི ལིཁིཏཾ. ཡཾ ཨེཏེསཾ ན ཀཔྤཏི, ཏཾ ཏེསམྤཱིཏི ཨུཔཛ྄ཛྷཱཡཱདཱིནཾ སནྟིཀཾ ཨགནྟྭཱ སཧསེཡྻཾ ཀཔྤེཡྻཱཏི པཱཋསེསོ.

༥༢. ‘‘ཨནུཔསམྤནྣོ ནཱམ བྷིཀྑུཾ ཋཔེཏྭཱ ཨཝསེསོ’ཏི ཝུཏྟཏྟཱ མཱཏུགཱམོ ཨནུཔསམྤནྣོཏི ཙཏུཏྠརཏྟིཡཾ མཱཏུགཱམོ དྭེཔི སཧསེཡྻཱཔཏྟིཡོ ཛནེཏཱིཏི ཨཔརེ’’ཏི ཝུཏྟཾ, ‘‘བྷིཀྑུཾ ཋཔེཏྭཱ…པེ… པནྣོཏི པཱརཱཛིཀཝཏྠུབྷཱུཏོ ཏིརཙྪཱནཔུརིསོ ཨདྷིཔྤེཏོ’’ཏི ཙ, ཨུབྷཡམྤི ཝཱིམཾསིཏབྦཾ. དུཏིཡསིཀྑཱཔདེ མཱཏུགཱམོ ནཱམཱཏི མནུསྶིཏྠིཾཡེཝ གཧེཏྭཱ ཡཀྑཱི པེཏཱི ཏིརཙྪཱནགཏཱ པཱརཱཛིཀཝཏྠུབྷཱུཏཱ ན གཧིཏཱ ཏེསུ དུཀྐཊཏྟཱ. ‘‘སཙེ པན ཨཏྟནོཔི སིཀྑཱཔདེ དུཀྐཊཾ བྷཝེཡྻ, ཨཐ ཀསྨཱ པཋམསིཀྑཱཔདེ པཱཙིཏྟིཡ’’ནྟི ཙ ཝུཏྟཾ. ‘‘ཨཔརིཀྑིཏྟེ པམུཁེ ཨནཱཔཏྟཱི’’ཏི སཱིཧལ༹ཊྛཀཐཱཝཙནཾ, ཏསྶཏྠཾ དཱིཔེཏུཾ ཨནྡྷཀཊྛཀཐཱཡཾ ‘‘བྷཱུམིཡཾ ཝིནཱ ཛགཏིཡཱ པམུཁཾ སནྡྷཱཡ ཀཐིཏ’’ནྟི ཝུཏྟཾ. པུན ཝསཏཱིཏི ཙཏུཏྠདིཝསེ ཝསཏི. བྷིཀྑུནིཔནྣེཏི བྷིཀྑུམྷི ནིཔནྣེ. སནྣིཔཏིཏམཎྜཔཾ ནཱམ མཧཱཝིཧཱརེ སནྣིཔཱཏཊྛཱནཾ. ‘‘ཏཱིཎི ¶ ཙ དིཝསཱནི དུཀྐཊཁེཏྟེ ཝསིཏྭཱ ཙཏུཏྠེ དིཝསེ སཧསེཡྻཱཔཏྟིཔཧོནཀེ སཡཏི, པཱཙིཏྟིཡེཝཱ’’ཏི ཨེཀཙྩེ ཝདནྟི ཀིར, ཏཾ ན ཡུཏྟཾ.

པཋམསཧསེཡྻསིཀྑཱཔདཝཎྞནཱ ནིཊྛིཏཱ.

༦. དུཏིཡསཧསེཡྻསིཀྑཱཔདཝཎྞནཱ

༥༥. ‘‘ཨཐ ཁོ ཏེ མནུསྶཱ’’ཏི ཙ ‘‘ཏེ ཨདྡྷིཀཱ’’ཏི ཙ པཱཋོ. ‘‘ཨེཀརཏྟ’’ནྟིཔི ཨཏྠི, སོ ན སུནྡརོ. པཎྜཀེ པཱལི༹ཡཾ དུཀྐཊསྶ ཝུཏྟཏྟཱ ‘‘ཨུབྷཏོབྱཉྫནེཧི མཱུལཱཔཏྟཱིཏི དིསྶཏཱི’’ཏི, ‘‘ཨནིམིཏྟཱདཡོ ཨིཏྠིཡོཝཱ’’ཏི ཙ ཝདནྟི ཨུབྷཏོབྱཉྫནཀེ ཝུཏྟཾ ཝིཡ. ཀིཉྩཱཔི མཏིཏྠཱི པཱརཱཛིཀཝཏྠུ ཧོཏི, ཨནུཔཱདིནྣཔཀྑེ ཋིཏཏྟཱ པན ཨིདྷ ཨཱཔཏྟིཾ ན ཀརོཏི. པཱརཱཛིཀཱཔཏྟིཊྛཱནཉྩེཏྠ ན ཨོལོཀེཏབྦཾ.

དུཏིཡསཧསེཡྻསིཀྑཱཔདཝཎྞནཱ ནིཊྛིཏཱ.

༧. དྷམྨདེསནཱསིཀྑཱཔདཝཎྞནཱ

༦༦. ‘‘ཝིཉྙཱུ ¶ པཊིབལཱ’’ཏི ཝཙནཏོ ཨཝིཉྙཱུ ཨིཏྠིཡཱཔི དེསེནྟསྶ ཨནཱཔཏྟི. ཨིདྷ ཡཀྑཱིཨཱདཡོ མནུསྶིཏྠཱི ཝིཡ ཨནོལཱ༹རིཀཏྟཱ དུཀྐཊཝཏྠུཀཱ ཛཱཏཱ. ཏིརཙྪཱནགཏམནུསྶཝིགྒཧིཏྠིཡཱ པཊིབལཏཱཡ ཝུཏྟཏྟཱ ཨིཏརཱཔི དུཀྐཊཝཏྠུཡེཝཱཏི ཨེཀེ. ‘‘མཱཏུགཱམཱཡཱ’’ཏི ལིངྒཝིཔལླཱསེན ཝུཏྟཾ. ‘‘ཨཊྛཀཐཱདིཔཱཋཾ ཋཔེཏྭཱ དམིལཱ༹དིནཱ ཡཐཱརུཙི ཀཐེཏུཾ ལབྷཏི ཀིརཱ’’ཏི ལིཁིཏཾ, ཡཐཱ ཡཀྑཱིཨཱདཡོ དུཀྐཊཝཏྠུཀཱ ཛཱཏཱ, ཏཐཱ པུརིསཝིགྒཧཾ གཧེཏྭཱ ཋིཏེན ཡཀྑཱདིནཱ སདྡྷིཾ ཋིཏསྶ མཱཏུགཱམསྶ དྷམྨཾ དེསེནྟོ དུཀྐཊཾ ཨནཱཔཛྫིཏྭཱ ཀསྨཱ པཱཙིཏྟིཡམཱཔཛྫཏཱིཏི ཙེ? ཨཱིསཀམྤི དུཏིཡཔཀྑཾ ཨབྷཛནཏོ. མནུསྶམཱཏུགཱམོཔི ན དུཏིཡོ, པགེཝ ཡཀྑཱདཡོཏི. ན དུཏིཡཱནིཡཏེ ཏསྶ དུཏིཡཏྟཱཏི ཙེ? ན ཏཏྠ དུཊྛུལླཝཱཙཱཔེཀྑཱ དུཏིཡཏཱ, ཀིནྟུ ནིསཛྫཱཔེཀྑཱ, ཨིདྷ ཙ ན ནིསཛྫམཏྟཾ, ཀིནྟུ དེསནཱ ཨིདྷཱདྷིཔྤེཏཱ. སཱ ཙ ནིཔཛྫནཏོ ཨོལཱ༹རིཀཱ, ཏསྨཱ ཨསམཏྠནིདསྶནཾ.

དྷམྨདེསནཱསིཀྑཱཔདཝཎྞནཱ ནིཊྛིཏཱ.

༨. བྷཱུཏཱརོཙནསིཀྑཱཔདཝཎྞནཱ

༦༧. ‘‘ཙཏུཏྠཔཱརཱཛིཀཝཏྠུ ¶ ཙ ཨིདཉྩ ཨེཀམེཝཱ’’ཏི ཝུཏྟཾ, ན ཡུཏྟཾ. ཀསྨཱ? ཏཏྠ ‘‘མོགྷཔུརིསཱ’’ཏི ཝུཏྟཏྟཱ. ཏེ ཨརིཡམིསྶཀཱ ན ཧོནྟཱིཏི དྭེཔི ཨེཀསདིསཱནཱིཏི མམ ཏཀྐོ. ‘‘ཨརིཡཱཔི པཊིཛཱནིཾསུ, ཏེསམྤི ཨབྦྷནྟརེ ཝིཛྫམཱནཏྟཱ ཨུཏྟརིམནུསྶདྷམྨསྶཱ’’ཏི ལིཁིཏཾ. ‘‘སབྦེཔི བྷཱུཏཾ བྷགཝཱཏི པུཐུཛྫནཨརིཡཱནཾ ཨུཏྟརིམནུསྶདྷམྨསྶ ཨཱརོཙིཏཏྟཱ ‘བྷཱུཏ’ནྟི ཝུཏྟཾ, ན ཨཏྟནོ ཨུཏྟརིམནུསྶདྷམྨཾ སནྡྷཱཡཱཏི ཨཔརེ’’ཏི ཝུཏྟཾ.

༧༧. པུབྦེ ཨཝུཏྟེཧཱིཏི ཙཏུཏྠཔཱརཱཛིཀེ ཨཝུཏྟེཧཱིཏི.

བྷཱུཏཱརོཙནསིཀྑཱཔདཝཎྞནཱ ནིཊྛིཏཱ.

༩. དུཊྛུལླཱརོཙནསིཀྑཱཔདཝཎྞནཱ

༧༨-༨༠. ‘‘ཏེནེཝ ¶ ཧཏྠེན ཨུཔཀྐམིཏྭཱ ཨསུཙིཾ མོཙེསཱི’’ཏི པཱཋོ སམྤཏིཔཱཋོ སུནྡརོ. ཨཔལོཀེཏྭཱཝ ཀཱཏབྦཱ. ནོ ཙེ, པཱལི༹ཡཾཡེཝ ཝུཏྟཾ སིཡཱ. ‘‘ཨོཏྟཔྤེནཱ’’ཏི ཝཏྟབྦེ རུལ༹ྷཱིཝསེན པརེསུ ‘‘ཧིརོཏྟཔྤེནཱ’’ཏི ཝུཏྟཾ. མཧཱཨཊྛཀཐཱཡཾ ཨུཏྟཱནཏྟཱ ན ཝུཏྟཾ, པཱཙིཏྟིཡཱསམྦྷཝདསྶནེནེཝ ཧི དུཀྐཊནྟི སིདྡྷཾ.

༨༣. ཏཏྠ ‘‘ཀམྨ’’ནྟི ཝུཏྟཨཛ྄ཛྷཱཙཱརེཔི པརིཡཱཔནྣཏྟཱ ཏཾ ཏསྶ དཎྜཀམྨཝཏྠུ. ‘‘ཏཏྠ ཀམྨཾ ཨཱཔནྣོ’’ཏི པུབྦེཔི ལིཁིཏཾ. མཧཱཨཊྛཀཐཱཡཾ ‘‘ཨཏྟཀཱམཾ ཨཱཔནྣོ’’ཏི པཱཋོ, ‘‘ཨཡམེཝ གཧེཏབྦོ’’ཏི ཝདནྟི, ཝཱིམཾསིཏབྦཾ.

དུཊྛུལླཱརོཙནསིཀྑཱཔདཝཎྞནཱ ནིཊྛིཏཱ.

༡༠. པཐཝཱིཁཎནསིཀྑཱཔདཝཎྞནཱ

༨༦. ཀཊསཀྑརཱ སེཏམཏྟིཀཱ ཝིཡ མུདུཀཱ སཀྑརཛཱཏི. ‘‘ཨཀཏཔབྦྷཱརེཏི ཨཝལཉྫིཏབྦཊྛཱནདསྶནཏྠཾ ཝུཏྟ’’ནྟི ལིཁིཏཾ. ‘‘ཨནོཝསྶཀཊྛཱནདསྶནཏྠ’’ནྟི ཝཏྟབྦཾ. མཱུསིཀུཀྐུརནྟི མཱུསིཀཱཧི ཨུདྡྷཊཔཾསུ. སུདྡྷཙིཏྟཱཏི ཀིཉྩཱཔི ‘‘ཨེཝཾ པཝཊྚིཏེ པཐཝཱི བྷིཛྫིསྶཏཱི’’ཏི ¶ ཛཱནནྟི, ནོ པན ཙེ པཐཝཱིབྷེདཏྠིཀཱ, སུདྡྷཙིཏྟཱ ནཱམ ཧོནྟི. པཾསུཨཱདཡོ དྭེ ཀོཊྛཱསཱ ཨཱཔཏྟིཀརཱ. ཀེཙི ‘‘སབྦཙྪནྣཱདཱིསུ ཨུཔཌྜྷེ དུཀྐཊསྶ ཝུཏྟཏྟཱ སཙེ དུཀྐཊཾ, ཡུཏྟ’’ནྟི ཝདནྟི. ཏཏྠ ཡུཏྟཾ ཏཱདིསསྶ ཝཏྠུནོ སམྦྷཝཱ, ཨིདྷ པན ཛཱཏཔཐཝཱི ཙ ཨཛཱཏཔཐཝཱི ཙཱཏི དྭེཡེཝ ཝཏྠཱུནི, ཏསྨཱ དྭིནྣཾ ཨེཀེན བྷཝིཏབྦནྟི ན ཡུཏྟཾ. ཨེཏྠཱཔི དུཀྐཊཝཙནཾ ཨཏྠཱིཏི ཙེ? ཏཾ པན སཉྙཱཝསེན, ན ཝཏྠུཝསེནཱཏི ན ཡུཏྟམེཝ.

༨༧. ཨགྒིཾ ཀཱཏུཾ ཝཊྚཏཱིཏི ཨེཏྠ ཨེཏྟཱཝཏཱ ཨུསུམཾ གཎྷཱཏི, ཏསྨཱ ཝཊྚཏཱིཏི ཀེཙི. ཨེཝཾ སཏི པཐཝིཡཱ ཨགྒིམྷི ཀཏེ དཱུརཏོཔི བྷཱུམི ཨུཎྷཱ ཧོཏི, ཏཏྟཀཾ ཀོཔེཏབྦཾ སིཡཱ, ན ཙ ཀཔྤཏི, ཏསྨཱ ཡསྨིཾ ཋཱནེ པཏཏི, ཏཾ སོ ཨགྒི ཌཧཏི, ཏསྨཱ ཝཊྚཏཱིཏི ཨེཀེ. ཨཌཧིཏེཔི ‘‘ཨདཌྜྷཱཡ ¶ པཐཝིཡཱ ཨགྒིཾ ཋཔེཏུཾ ན ཝཊྚཏཱི’’ཏི ཝུཏྟཏྟཱ ཨཏྟནཱ པཱཏནཱཡེཝ དོསོ པཏིཏེ ཨུཔདཱཧེཏི ཝེདིཏབྦཾ.

པཐཝཱིཁཎནསིཀྑཱཔདཝཎྞནཱ ནིཊྛིཏཱ.

སམཏྟོ ཝཎྞནཱཀྐམེན མུསཱཝཱདཝགྒོ པཋམོ.

༢. བྷཱུཏགཱམཝགྒོ

༡. བྷཱུཏགཱམསིཀྑཱཔདཝཎྞནཱ

༨༩. ཕརསུཾ ནིགྒཧེཏུཾ ཨསཀྐོནྟོཏི དསྶིཏབྷཱཝཾ ཛཱནཱཔེཏི. ཀསྨཱ ཨཡཾ ཕརསུཾ ཨུགྒིརཱིཏི ཙེ? མནུསྶཱནནྟིཨཱདི ཏསྶ པརིཧཱརོ. ‘‘ཨཱཀོཊེསི ཚིནྡཱིཏི ཙ ཝཙནཏོ རུཀྑདེཝཏཱནཾ ཧཏྠཱནི ཚིཛྫནྟི, ན ཙཱཏུམཧཱརཱཛིཀཱདཱིནཾ ཝིཡ ཨཙྪེཛྫཱནཱི’’ཏི ཝདནྟི.

༩༠-༩༢. བྷཝནྟི ཨཧུཝུཉྩཱཏི དྭིཀཱལིཀོ བྷཱུཏསདྡོ. ཡདི བཱིཛཏོ ནིབྦཏྟེན བཱིཛཾ དསྶིཏཾ, ཏདེཝ སནྟཀཾ ཡདིདཾ. སོཝ ཀུཀྐུཊོ མཾསིམཀྑིཏོཏི ཨཡམེཝ ཧི པརིཧཱརོ. ཨཊྛཀཐཱསུཔི ཧི ‘‘བཱིཛེ བཱིཛསཉྙཱི’’ཏི ལིཁིཏཾ. ཡཾ བཱིཛཾ བྷཱུཏགཱམོ ནཱམ ཧོཏི, ཏསྨིཾ བཱིཛེ བྷཱུཏགཱམབཱིཛེཏི ཡོཛེཏྭཱ. ཨམཱུལཀཏྟཱ ཀིར སམྤུཎྞབྷཱུཏགཱམོ ན ཧོཏི, ‘‘སམཱུལཔཏྟོ ཨེཝ ¶ ཧི བྷཱུཏགཱམོ ནཱམཱ’’ཏི ཀཱརཎཾ ཝདནྟི. ‘‘ཨབྷཱུཏགཱམམཱུལཏྟཱཏི བྷཱུཏགཱམཏོ ཨནུཔྤནྣཏྟཱ ཨབྷཱུཏགཱམམཱུལཾ, བྷཱུཏགཱམསྶ ཨམཱུལཀཏྟཱ ཝཱ. ན ཧི ཏཏོ ཨཉྙོ བྷཱུཏགཱམོ ཨུཔྤཛྫཏཱི’’ཏི དྭིདྷཱཔི ལིཁིཏཾ. པིཡངྒུ ཨསནརུཀྑོ ཝཌྜྷནཏྟཙོ ཁཛྫཕལོ, ‘‘པཱིཏསཱལོ’’ཏིཔི ཝུཙྩཏི. ཨམཱུལཀབྷཱུཏགཱམེ སངྒཧཾ གཙྪཏཱིཏི ནཱལི༹ཀེརསྶེཝཱཡཾ. གྷཊཔིཊྛིཛཱཏཏྟཱ, བཱིཛགཱམཱནུལོམཏྟཱ ཙ དུཀྐཊཝཏྠུ. ན ཝཱསེཏབྦཾ ‘‘དུརཱུཔཙིཎྞཏྟཱ’’ཏི ལིཁིཏཾ, ‘‘ཡེསཾ རུཀྑཱནཾ སཱཁཱ རུཧཏཱིཏི ཝཙནཏོ ཡེསཾ ན རུཧཏི, ཏེསཾ སཱཁཱཡ ཀཔྤིཡཀརཎཀིཙྩཾ ནཏྠཱིཏི སིདྡྷ’’ནྟི ཝུཏྟཾ. མུདྡཏིཎནྟི ཏསྶ ནཱམཾ. ‘‘མུཉྫཏིཎནྟི པཱཋོ’’ཏི ལིཁིཏཾ.

སམཎཀཔྤེཧཱིཏི སམཎཝོཧཱརེཧི, ཏསྨཱ ཝཏྟབྦཾ བྷིཀྑུནཱ ‘‘ཀཔྤིཡཾ ཀརོཧཱི’’ཏི. ཏསྶ ཨཱཎཏྟིཡཱ ཀརོནྟེནཱཔི སཱམཎེརཱདིནཱ ‘‘ཀཔྤིཡ’’ནྟི ¶ ཝཏྭཱཝ ཨགྒིཔརིཛིཏཾ ཀཱཏབྦནྟི སིདྡྷཾ. ཨགྒིཔརིཛིཏཱདཱིནི ཝིཡ ཀཔྤིཡཏྟཱ ཨབཱིཛནིབྦཊྚབཱིཛཱནིཔི ‘‘པཉྩཧི སམཎཀཔྤེཧཱི’’ཏི (ཙཱུལ༹ཝ. ༢༥༠) ཨེཏྠ པཝིཊྛཱནི, ཡཐཱལཱབྷཏོ ཝཱ སམཎཀཔྤཝཙནཾ གཧེཏབྦཾ. ‘‘ཀཔྤིཡ’ནྟི ཝཏྟུཀཱམོ ‘ཀཔྤ’ནྟི ཙེ ཝདཏི, ‘ཝཊྚཏཱི’ཏི ཝདནྟཱི’’ཏི ཝུཏྟཾ. ‘‘ཀཔྤིཡ’ནྟི ཝཙནཾ སཀསཀབྷཱསཱཡཔི ཝཊྚཏཱི’’ཏི ཝདནྟི. ‘‘ཀཔྤིཡནྟི ཝཏྭཱ’’ཏི ཝུཏྟཏྟཱ བྷིཀྑུནཱ ‘ཀཔྤིཡཾ’ཨིཙྩེཝ ཝཏྟབྦཾ, ‘‘ཨིཏརེན པན ཡཱཡ ཀཱཡཙི བྷཱསཱཡཱ’’ཏི ཝདནྟི, ཝཱིམཾསིཏབྦཾ. ‘‘ཨུཙྪུཾ ཀཔྤིཡཾ ཀརིསྶཱམཱིཏི དཱརུཾ ཝིཛ྄ཛྷཏཱི’’ཏི ཝཙནཏོ ཀཔྤིཡཾ ཀཱཏབྦཾ སནྡྷཱཡ ཝིརདྡྷེཏི ཝུཏྟཾ ཧོཏི, ཨཱཙརིཡཱ པན ‘‘ཀཔྤིཡཾ ཀཱརེཏབྦཾ སནྡྷཱཡ ཀཔྤིཡནྟི སིཏྠཱདིཾ ཀཱརེཏི, ཝཊྚཏཱི’’ཏི ཝདནྟི, ཏསྶ ཀཱརཎཾ ཝདནྟཱ ཀཱཏུཾ ཝཊྚནབྷཱཝེནེཝ ཝིརཛ྄ཛྷིཏྭཱ ཀཏེཔི ཀཔྤིཡཾ ཛཱཏཾ. ཡདི ན ཝཊྚེཡྻ, སིཏྠཱདིམྷི ཀཏེ ན ཝཊྚེཡྻཱཏི, ཨུཔཔརིཀྑིཏབྦཾ. ཨུཊྛིཏསེཝཱལགྷཊཾ ཨཱཏཔེ ནིཀྑིཔིཏུཾ ཝཊྚཏི, ཝིཀོཔེཏུཀཱམཏཱཡ སཏི དུཀྐཊཾ ཡུཏྟཾ ཝིཡ. ‘‘པུཔྥརཛྫུབྷཱཛནགཏིཀཱ, ཏསྨཱ ན ཝཊྚཏི. ནཱལེ༹ ཝཱ བདྡྷཔུཔྥཀལཱཔེ ནཱལ༹སྨིཾ ཀཏེཔི ཝཊྚཏི ཏསྨིཾ པུཔྥསྶ ཨཏྠིཏཱཡཱ’’ཏི ཝདནྟི. པོརཱཎགཎྛིཔདེ ‘‘བཱིཛགཱམེན བྷཱུཏགཱམོ དསྶིཏོ ཨནཝསེསཔརིཡཱདཱནཏྠ’’ནྟི ཝུཏྟཾ.

བྷཱུཏགཱམསིཀྑཱཔདཝཎྞནཱ ནིཊྛིཏཱ.

༢. ཨཉྙཝཱདཀསིཀྑཱཔདཝཎྞནཱ

༩༨-༩. ཨཉྙཾ ཝདཏཱིཏི ཨཉྙཝཱདཀཾ, ‘‘ཝཙནཾ ཀརེཡྻཱ’’ཏི ལིཁིཏཾ. ‘‘ཏུཎྷཱིབྷཱུཏསྶེཏཾ ནཱམ’’ནྟི པཱཋོ. ཨུགྒྷཱཏེཏུཀཱམོཏི སམོཧནིཏུཀཱམོ, ཨནྟརཱཡཾ ཀཏྟུཀཱམོཏི པོརཱཎཱ.

༡༠༠. ‘‘སུདིཊྛོ ¶ བྷནྟེ, ན པནེསོ ཀཧཱཔཎོཏིཨཱདཱིསུ ཨནཱརོཔིཏེ དུཀྐཊེན མུསཱཝཱདཔཱཙིཏྟིཡཾ, ཨརོཔིཏེ པཱཙིཏྟིཡདྭཡཾ ཧོཏཱི’’ཏི ཝདནྟི, ཝཱིམཾསིཏབྦཾ.

༡༠༢. ཨདྷམྨེན ཝཱ ཝགྒེན ཝཱ ན ཀམྨཱརཧསྶ ཝཱཏི ཨེཏྠ ‘‘མཡི ཝུཏྟེ མཾ ཝཱ ཨཉྙཾ ཝཱ སངྒྷོ ཨདྷམྨེན ཝཱ ཀམྨཾ, ཝགྒེན ཝཱ ཀམྨཾ ཀརིསྶཏི, ན ¶ ཀམྨཱརཧསྶ ཝཱ མེ, ཨཉྙསྶ ཝཱ ཀམྨཾ ཀརིསྶཏཱི’’ཏི ན ཀཐེཏཱིཏི ཡོཛེཏབྦཾ.

ཨཉྙཝཱདཀསིཀྑཱཔདཝཎྞནཱ ནིཊྛིཏཱ.

༣. ཨུཛ྄ཛྷཱཔནཀསིཀྑཱཔདཝཎྞནཱ

༡༠༣. ‘‘ཚནྡཱཡཱ’’ཏི ཨཀྑརཀྑརཱཡཱཏིཨཱདི ཝིཡ ལིངྒཝིཔལླཱསེན ཝུཏྟཾ, ཚནྡཏྠནྟི ཝཱ ཨཏྠོ. ཡེསཾ སེནཱསནཱནི པཉྙཔེཏི, ཏེསཾ ཨཏྟནི ཚནྡཏྠནྟི ཨདྷིཔྤཱཡོ.

༡༠༦. ཨནུཔསམྤནྣནྟིཨཱདཱིསུ ཀརཎཏྠོ གཧེཏབྦོ. ཨཉྙཾ ཨནུཔསམྤནྣནྟི ཨཉྙེན ཨནུཔསམྤནྣེན. ཏསྶ ཝཱཏི ཨནུཔསམྤནྣསྶ. ‘‘སམྨུཏིཀཱལེ པཉྩངྒཝིརཧཱདཡོ ཨསམྨཏཱ ནཱམཱ’’ཏི, ‘‘ཨུཔསམྤནྣེན ལདྡྷསམྨུཏི སིཀྑཱཔཙྩཀྑཱནེན ཝིནསྶཏཱི’’ཏི ཙ ཝུཏྟཾ. སངྒྷེནཱཏི སབྦེན སངྒྷེན ཀམྨཝཱཙཱཡ ཨསྶཱཝེཏྭཱ ‘‘ཏཝེསོ བྷཱརོ’’ཏི ཀེཝལཾ ཨཱརོཔིཏབྷཱརོ. ཀེཝལ-སདྡོ ཧེཏྠ ཀམྨཝཱཙཱཡ ཨསྶཱཝིཏབྷཱཝམཏྟམེཝ དཱིཔེཏི. སཡམེཝཱཏི ཨིཏརེསཾ བྷིཀྑཱུནཾ ཨནུམཏིཡཱ. ཨབྷཱུཏེན ཁཱིཡནཀསྶ ཨཱདིཀམྨིཀསྶ ཀཐཾ ཨནཱཔཏྟཱིཏི ཙེ? ཨིམིནཱ སིཀྑཱཔདེན. མུསཱཝཱདེ ཨཱཔཏྟིཡེཝ དྭེ པཱཙིཏྟིཡོ ཝུཏྟཱ ཝིཡ དིསྶནྟི པུབྦཔཡོགེ རུཀྑཱདིཚིནྡནཱདཱིསུ ཝིཡ, ཝིཙཱརེཏབྦཾ.

ཨུཛ྄ཛྷཱཔནཀསིཀྑཱཔདཝཎྞནཱ ནིཊྛིཏཱ.

༤. པཋམསེནཱསནསིཀྑཱཔདཝཎྞནཱ

༡༡༠. ‘‘ཨེཝཉྩིདཾ བྷགཝཏཱ བྷིཀྑཱུནཾ སིཀྑཱཔདཾ པཉྙཏྟཾ ཧོཏཱི’’ཏི ཝཙནཏོ, པརིཝཱརེ ‘‘ཨེཀཱ པཉྙཏྟི, ཨེཀཱ ཨནུཔཉྙཏྟཱི’’ཏི (པརི. ༢༢༦) ཝཙནཏོ ཙ ཨིདྷ ཨཏྠི ཨནུཔཉྙཏྟཱིཏི སིདྡྷཾ. ཀིཉྩཱཔི སིདྡྷཾ, ‘‘ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐཱ’’ཏིཨཱདིནཱ ¶ པན པཉྙཏྟིཊྛཱནཾ ན པཉྙཱཡཏི, ཀེཝལཾ ‘‘ཨནུཛཱནཱམི, བྷིཀྑཝེ, ཨཊྛམཱསེ…པེ… ནིཀྑིཔིཏུ’’ནྟི ཨེཏྟཀམེཝ ཝུཏྟཾ, ཏཾ ཀསྨཱཏི ¶ ཙེ? པཋམཔཉྙཏྟིཡཾ ཝུཏྟནཡེནེཝ ཝཏྟབྦཏོ ཨཝིསེསཏྟཱ ན ཝུཏྟཾ. ཡདི ཨེཝཾ ཀཱ ཨེཏྠ ཨནུཔཉྙཏྟཱིཏི? ཨཛ྄ཛྷོཀཱསེཏི. ཨཡམནུཔཉྙཏྟི པཉྙཏྟིཡམྤི ཨཏྠཱིཏི ཙེ? ཨཏྠི, ཏཾ པན ཨོཀཱསམཏྟདཱིཔནཾ, དུཏིཡཾ ཙཱཏུཝསྶིཀམཱསསངྑཱཏཀཱལདཱིཔནཾ. ཡསྨཱ ཨུབྷཡམྤི ཨེཀཾ ཀཱལོཀཱསཾ ཨེཀཏོ ཀཏྭཱ ‘‘ཨཛ྄ཛྷོཀཱསེ’’ཏི ཝུཏྟནྟི དཱིཔེནྟོ བྷགཝཱ ‘‘ཨནུཛཱནཱམི, བྷིཀྑཝེ…པེ… ནིཀྑིཔིཏུ’’ནྟི ཨཱཧཱཏི ཝེདིཏབྦཾ. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. པཋམསེནཱསནསིཀྑཱཔདཝཎྞནཱ) ཝུཏྟཾ ‘‘ཡཏྠ ཙ ཡདཱ ཙ སནྠརིཏུཾ ན ཝཊྚཏི, ཏཾ སབྦམིདྷ ཨཛ྄ཛྷོཀཱསསངྑྱམེཝ གཏནྟི ཝེདིཏབྦ’’ནྟི. ཧེམནྟཀཱལསྶ ཨནཱཔཏྟིསམཡཏྟཱ ཨིདཾ སིཀྑཱཔདཾ ནིདཱནཱནཔེཀྑནྟི སིདྡྷཾ, ཏཐཱ ཧི ཨཛ྄ཛྷོཀཱསཔདསཱམཏྠིཡེན ཨཡཾ ཝིསེསོ – ཝསྶཱནཀཱལེ ཨོཝསྶཀཊྛཱནེ ཨཛ྄ཛྷོཀཱསེ, མཎྜཔཱདིམྷི ཙ ན ཝཊྚཏི. ཧེམནྟཀཱལེ པཀཏིཨཛ྄ཛྷོཀཱསེ ན ཝཊྚཏི, སབྦམིདྷ ཨོཝསྶཀེཔི མཎྜཔཱདིམྷི ཝཊྚཏི, ཏཉྩ ཁོ ཡཏྠ ཧིམཝསྶེན སེནཱསནཾ ན ཏེམེཏི, གིམྷཀཱལེ པཀཏིཨཛ྄ཛྷོཀཱསེཔི ཝཊྚཏི, ཏཉྩ ཁོ ཨཀཱལམེགྷཱདསྶནེཡེཝཱཏི ཨཡཾ ཝིསེསོ ‘‘ཨཊྛ མཱསེ’’ཏི ཙ ‘‘ཨཝསྶིཀསངྐེཏེ’’ཏི ཙ ཨེཏེསཾ དྭིནྣཾ པདཱནཾ སཱམཏྠིཡཏོཔི སིདྡྷོ.

ཀིཉྩ བྷིཡྻོ – ཨཊྛཀཐཱཡཾ སནྡསྶིཏཝིསེསོཝ. ཙམྨཱདིནཱ ཨོནདྡྷཀོ ཝཱ ནཝཝཱཡིམོ ཝཱ ན སཱིགྷཾ ཝིནསྶཏི. ཀཱཡཱནུགཏིཀཏྟཱཏི ཀཱཡེ ཡཏྠ, ཏཏྠ གཏཏྟཱ. སངྒྷིཀམཉྩཱདིམྷི ཀཱཡཾ ཕུསཱཔེཏྭཱ ཝིཧརིཏུཾ ན ཝཊྚཏཱིཏི དྷམྨསིརིཏྠེརོ. ‘‘སངྒྷིཀཾ པན ‘ཨཛ྄ཛྷོཀཱསཔརིབྷོགེན པརིབྷུཉྫཐ, བྷནྟེ, ཡཐཱསུཁ’ནྟི དཱཡཀཱ དེནྟི སེནཱསནཾ, ཨེཝརཱུཔེ ཨནཱཔཏྟཱི’’ཏི ཨནྡྷཀཊྛཀཐཱཡཾ ཝཙནཏོ, ཨིདྷ ཙ པཊིཀྑེཔཱབྷཱཝཏོ ཝཊྚཏི. ‘‘ཨཉྙཉྩ ཨེཝརཱུཔནྟི ཨཔརེ’’ཏི ཝུཏྟཾ. ‘‘པཱདཊྛཱནཱབྷིམུཁཱཏི ནིསཱིདནྟསྶ པཱདཔཏནཊྛཱནཱབྷིམུཁཱ’’ཏི ལིཁིཏཾ. སམྨཛྫནྟསྶ པཱདཊྛཱནཱབྷིམུཁནྟི ཨཱཙརིཡསྶ ཏཀྐོ.

༡༡༡. ‘‘པཱདུདྡྷཱརེནཱཏི བཧིཨུཔཙཱརེ ཋིཏཏྟཱ’’ཏི ལིཁིཏཾ. གཙྪནྟི, དུཀྐཊཾ དྷམྨཀཐིཀསྶ ཝིཡ. ཀསྨཱ ན པཱཙིཏྟིཡཾ? པཙྪཱ ཨཱགཏེཧི ཝུཌྜྷཏརེཧི ཨུཊྛཱཔེཏྭཱ གཧེཏབྦཏོ. དྷམྨཀཐིཀསྶ པན ཨནུཊྛཔེཏབྦཏྟཱ. ‘‘ཨནཱཎཏྟིཡཱ པཉྙཏྟིཡམྤི ཏསྶ བྷཱརོ’’ཏི ཝུཏྟཾ.

༡༡༢. པརིཧརཎེཡེཝཱཏི ¶ ¶ ཨེཏྠ གཧེཏྭཱ ཝིཙཱརཎེཏི དྷམྨསིརིཏྠེརོ. ཨཏྟནོ སནྟཀཀརཎེཏི ཨུཔཏིསྶཏྠེརོ. བཱིཛནཱིཔཏྟཀཾ ཙཏུརསྶབཱིཛནཱི.

༡༡༣. ‘‘ཡོ བྷིཀྑུ ཝཱ སཱམཎེརོ ཝཱ…པེ… ལཛྫཱི ཧོཏཱི’ཏི ཝུཏྟཏྟཱ ཨལཛྫིཾ ཨཱཔུཙྪིཏྭཱ གནྟུཾ ན ཝཊྚཏཱི’’ཏི ཝདནྟི. པཱཋེ ‘‘ཀེནཙི པལིབུདྡྷཾ ཧོཏཱི’’ཏི ཙ ཨཊྛཀཐཱཡཾ ‘‘པལིབུདྡྷ’’ནྟི ཙ སེནཱསནཾཡེཝ སནྡྷཱཡ ཝུཏྟཾ, ཏསྨཱ ཏཐཱཔི ཨཏྠཱིཏི གཧེཏབྦཾ. ‘‘ཨནཱཔུཙྪཾ ཝཱ’’ཏི པཱཋོ.

པཋམསེནཱསནསིཀྑཱཔདཝཎྞནཱ ནིཊྛིཏཱ.

༥. དུཏིཡསེནཱསནསིཀྑཱཔདཝཎྞནཱ

༡༡༦-༧. ཨེཏྟཀམེཝ ཝུཏྟམཊྛཀཐཱསུ, ཏཐཱཔི པདཊྛཱདཡོཔི ལབྦྷནྟི ཨེཝ. ཨནུགཎྛིཔདེ ‘‘ཨཉྙཾ ཨཏྠརཎཱདི ཨཀཔྤིཡཏྟཱ ན ཝུཏྟ’’ནྟི ཝུཏྟཾ. ‘‘མཉྩཾ ཝཱ པཱིཋཾ ཝཱ ཝིཧཱརེ ཝཱ ཝིཧཱརཱུཔཙཱརེ ཝཱ’ཏི ཨིམིནཱཔི སཾསནྡནཏྠཾ ‘ཀིཉྩཱཔི ཝུཏྟོ, ཨཐ ཁོ’ཏིཨཱདི ཨཱརདྡྷ’’ནྟི ཙ ཝུཏྟཾ. ཨུཔཙཱརམཏྟཉྩེཏཾ ‘‘རུཀྑམཱུལེ’’ཏི, ཏཏྠ ཝཏྟབྦཾ ནཏྠི.

༡༡༨. ཨནཱཔུཙྪིཏྭཱཔི གནྟུཾ ཝཊྚཏཱིཏི ཨསཏིཡཱ གཙྪཏོཔི ཨནཱཔཏྟི, ཨཱཔུཙྪནཾ པན ཝཏྟཾ སཉྩིཙྩ ཨནཱཔུཙྪཏོ ཝཏྟབྷེདདུཀྐཊཏྟཱ. པུགྒལིཀསེནཱསནེ སངྒྷིཀསེཡྻཾ, སངྒྷིཀསེནཱསནེ ཝཱ པུགྒལིཀསེཡྻཾ ཨཏྠརིཏྭཱ གཙྪནྟསྶ དུཀྐཊཾ ཡུཏྟཾ ཝིཡ. ཀསྨཱ? ‘‘སེཡྻཱམཏྟམེཝ ནསྶེཡྻཱ’’ཏི ཝུཏྟཏྟཱ. ཨིདྷ པན ‘‘པལིབུདྡྷཾ པལིབུདྡྷོ’’ཏི དུཝིདྷམྤི ཨཏྠི.

དུཏིཡསེནཱསནསིཀྑཱཔདཝཎྞནཱ ནིཊྛིཏཱ.

༦. ཨནུཔཁཛྫསིཀྑཱཔདཝཎྞནཱ

༡༢༡. ཚབྦགྒིཡེསུཡེཝ ཐེརཱ བྷིཀྑཱུཏི ཀེཙི. པཱདེ དྷོཝིཏྭཱཏིཨཱདིམྷི པཝིསནྟསྶ ཝཱ པཱདདྷོཝནཔཱསཱཎཏོ ཡཱཝ མཉྩཔཱིཋཾ པསྶཱཝཏྠཱཡ ནིཀྑམནྟསྶ ཝཱ ཡཱཝ པསྶཱཝཊྛཱནནྟི ཡོཛནཱ ཀཱཏབྦཱ. ཨེཝཾ སནྟེ ¶ ‘‘པསྶཱཝཏྠཱཡ ནིཀྑམནྟསྶ ཝཱ’’ཏི ན ཝཏྟབྦཾ, ‘‘པསྶཱཝཊྛཱནཏོ ནིཀྑམནྟསྶ ཝཱ’’ཏི ཝཏྟབྦཾ. པསྶཱཝཊྛཱནནྟི ཀཏྠཙི པོཏྠཀེ. ཏཐཱ ཧི མཱཏིཀཱཊྛཀཐཱཡཾ (ཀངྑཱ. ཨཊྛ. ཨནུཔཁཛྫསིཀྑཱཔདཝཎྞནཱ) ¶ ‘‘པཝིསནྟསྶ པཱདདྷོཝནཔཱསཱཎཏོ ཡཱཝ མཉྩཔཱིཋཾ ནིཀྑམནྟསྶ མཉྩཔཱིཋཏོ ཡཱཝ པསྶཱཝཊྛཱནཾ, ཏཱཝ ཨུཔཙཱརོ’’ཏི ཝུཏྟཾ, ཏསྨཱ ‘‘པཱདེ དྷོཝིཏྭཱ པཝིསནྟསྶ, པསྶཱཝཏྠཱཡ ནིཀྑམནྟསྶ ཙ དྭཱརེ ནིཀྑིཏྟཔཱདདྷོཝནཔཱསཱཎཏོ, པསྶཱཝཊྛཱནཏོ ཙ མཉྩཔཱིཋ’’ནྟི ཀཏྠཙི པོཏྠཀེ པཱཋོ, སོ ཨཔཱཋོ. ཀསྨཱ? མཉྩཔཱིཋཱནཾ ཨུཔཙཱརསྶ ཝུཏྟཏྟཱ. པཝིསནྟསྶ ཡཱཝ མཉྩཔཱིཋཱནཾ ཨུཔཙཱརོ, ནིཀྑམནྟསྶ ཏཏོ པཊྛཱཡ ཡཱཝ པསྶཱཝཊྛཱནཾ ཝཙྩཀུཊིཙངྐམཊྛཱནནྟི ཨིམིནཱ ཨཏྠེན ཡཐཱ སཾསནྡཏི, ཏཐཱཝིདྷོ པཱཋོཏི ཨཱཙརིཡོ.

༡༢༢. ཨུཔཙཱརཾ ཋཔེཏྭཱཏི ཨིདྷ ཝུཏྟཨུཔཙཱརཾ ཋཔེཏྭཱ. ‘‘དསྶནསཝནཱུཔཙཱརེཔི སནྠརནྟསྶཱ’’ཏི ལིཁིཏཾ.

ཨནུཔཁཛྫསིཀྑཱཔདཝཎྞནཱ ནིཊྛིཏཱ.

༧. ནིཀྐཌྜྷནསིཀྑཱཔདཝཎྞནཱ

༡༢༦-༧. ཚསཏྟཀོཊྛཀཱནི ཝཱཏི ཨེཏྠ དྭཱརཀོཊྛཀཾ ཨདྷིཔྤེཏཾ. ‘‘ནིཀྑམཱ’’ཏི ཝཙནཾ སུཏྭཱཔི ཨཏྟནོ རུཙིཡཱ ནིཀྑམཏི, ཨནཱཔཏྟི; ཨིདྷ ཨགྒིསཱལཱདི ཨེཝ ཨུཔཙཱརོཏི.

ནིཀྐཌྜྷནསིཀྑཱཔདཝཎྞནཱ ནིཊྛིཏཱ.

༨. ཝེཧཱསཀུཊིསིཀྑཱཔདཝཎྞནཱ

༡༢༩. ‘‘པམཱཎམཛ྄ཛྷིམསྶ གལཔྤམཱཎེ དིནྣཏུལཱཔི ཝེཧཱསཀུཊིཡེཝཱ’’ཏི ལིཁིཏཾ, ‘‘ན སཱ ཨིདྷ ཨདྷིཔྤེཏཱ’’ཏི ཝུཏྟཾ.

ཝེཧཱསཀུཊིསིཀྑཱཔདཝཎྞནཱ ནིཊྛིཏཱ.

༩. མཧལླཀཝིཧཱརསིཀྑཱཔདཝཎྞནཱ

༡༣༥. ཡཱཝ ¶ དྭཱརཀོསཱཏི དྭཱརསམཱིཔཱ, ཡཱཝ བྷིཏྟཱིཏི ཨཏྠོ, ཏཾ སུཝུཏྟཾ. ཀཝཱཊཝིཏྠཱརཔྤམཱཎོཏི ¶ ཧཏྠཔཱསསྶཱདྷིཔྤེཏཏྟཱ, སམནྟཱ ཀཝཱཊཝིཏྠཱརཔྤམཱཎཨུཔཙཱརསྶ གཧིཏཏྟཱ ཨཔརིཔཱུརཨུཔཙཱརཱཔི ཧོཏི. ཨཱལོཀཾ ཀརོཏཱིཏི ཨཱལོཀཾ སནྡྷེཏི པིདྷེཏཱིཏི སནྡྷི ཨེཝ ཨཱལོཀསནྡྷིནཱམཀཱ ཧོནྟི. ཝཱཏཔཱནཀཝཱཊལེཔཀམྨེ ཨཔྤཧརིཏཊྛཱནཀིཙྩཾ ནཏྠི.

༡༣༦. ཨིཊྛཀཱཏི ཚདནཀཔཱལཱསིལཱདིཨིཊྛཀཱ. ཚདནཱུཔརཱིཏི ཨེཏྠ པཋམཾ ཏཱཝ ཨེཀཝཱརཾ ཨཔརིསེསཾ ཚཱདེཏྭཱ པུན ཚཱདནདཎྜཀེ བནྡྷིཏྭཱ དུཏིཡཝཱརཾ ཏཐེཝ ཚཱདེཏབྦཾ. ‘‘ཏཏིཡཝཱརཙཏུཏྠཝཱརེ སམྤཏྟེ དྭེ མགྒེ ཨདྷིཊྛཧིཏྭཱ ཏཏིཡམགྒཾ ཨཱཎཱཔེཏྭཱ པཀྐམིཏབྦ’’ནྟི ཝུཏྟཾ, ཏཾ ‘‘པུནཔྤུནཾ ཚཱདཱཔེཏཱི’’ཏི ཨིམིནཱ ཡུཛྫཏི.

པོརཱཎཱ པན ‘‘པཋམཝཱརེཡེཝ ཏཡོ མགྒེ ཨདྷིཊྛཱཏུཾ ཝཊྚཏི, ཙཏུཏྠཏོ པཊྛཱཡ ཨཱཔཏྟི པཱཙིཏྟིཡཾ, ཙཏུཏྠལེཔཏོ པཊྛཱཡ ཨཱཔཏྟཱི’’ཏི ཝདནྟི. ཏཏྠ ཚདནེ ཝུཏྟཝིདྷིནིདཱནེན སམེཏི, ལེཔེ ཝུཏྟཝིདྷིཏིཀཙྪེདེན སམེཏི. ཏཐཱཔི སོ ན ཡུཏྟོཝ. ནིདཱནེ, ཨཊྛཀཐཱཡཉྩ སིདྡྷལེཔཏྟཱ སབྦསོཝཱཔི ཨཙྪནྣེ, ཚནྣེཝཱཔི ཨནེཀསོ པརིཡཱཡསྶ ཏཏིཡསྶེཝ ཨདྷིཊྛཱནནྟི ནོ སམེཏཱིཏི ཨཱཙརིཡོ. ‘‘དྭེ མགྒེ’’ཏི, ‘‘དྭེ ཚདནེ’’ཏི ཙ ‘‘ཏཏིཡཝཱརཏོ པཊྛཱཡ ཨེཝཾ ཚཱདཱཔེཧཱི’ཏི ཨཱཎཱཔེཏྭཱ པཀྐམིཏབྦ’’ནྟི ཙ ཨུཔཏིསྶཏྠེརོ ཝདཏི ཀིར.

མཧལླཀཝིཧཱརསིཀྑཱཔདཝཎྞནཱ ནིཊྛིཏཱ.

༡༠. སཔྤཱཎཀསིཀྑཱཔདཝཎྞནཱ

༡༤༠. སཔྤཱཎཀསིཀྑཱཔདཾ ཨུཏྟཱནཏྠམེཝ.

སམཏྟོ ཝཎྞནཱཀྐམེན བྷཱུཏགཱམཝགྒོ དུཏིཡོ.

༣. ཨོཝཱདཝགྒོ

༡. ཨོཝཱདསིཀྑཱཔདཝཎྞནཱ

༡༤༤. ཀཐཱནུསཱརེནཱཏི ¶ ¶ ཡོ བྷིཀྑུནོཝཱདཀཏྠིཀོ ཀིཾསཱིལོ ཀིཾསམཱཙཱརོ ཀཏརཀུལཱ པབྦཛིཏོཏིཨཱདི ཀཐཱནུསཱརེནཱཏི ཨཏྠོ. སགྒམགྒགམནེཔཱིཏི ཨཔི-སདྡེན མོཀྑགམནེཔི. ‘‘ལཀྑཎཔྤཊིཝེདྷཔཊིསཾཡུཏྟོ’’ཏི ཨཊྛགརུདྷམྨཱནུསཱརེན ཝཏྟབྦཾ དྷམྨཀཐཾ སནྡྷཱཡ ཝུཏྟཾ.

༡༤༥-༡༤༧. ནིསྶཱིམནྟི ཝིཧཱརེ བདྡྷསཱིམཏོ ཨཉྙཾ ཨབདྡྷསཱིམཾ, གཱམསཱིམཱདིནྟི ཨཏྠོ. ‘‘སུཔིནནྟེནཔཱི’’ཏི ན སབྦེསནྟི ཨིདྷ བཱཧུལླནཡེན ཝུཏྟཾ. ཚབྦགྒིཡཱ ཧི ཀེཙི ཝཱིསཏིཝསྶཱཔི ཨཏྠི ཨཏིརེཀཝཱིསཏིཝསྶཱཔཱིཏི ཨིམིནཱ ཨིམཾ མཛ྄ཛྷིམབོདྷིཀཱལེ པཉྙཏྟནྟི ཝིཉྙཱཡཏི. ‘‘སཱིལཝཱ ཧོཏཱི’’ཏི ཝཏྭཱ ཏསྶ ཙཏུབྦིདྷཏྟཱ ཨིདྷ ཨདྷིཔྤེཏསཱིལམེཝ དསྶེཏུཾ ‘‘པཱཏིམོཀྑསཾཝརསཾཝུཏོ’’ཏིཨཱདི ཝུཏྟཾ. གཎྛཱནུགཎྛིཔདེསུ ‘‘སཏིསཾཝརཱདཡོ ཨིདྷ ནཱདྷིཔྤེཏཱ, ཏེན ཝིབྷངྒཔཱཋཾ དསྶེཏི ཨཊྛཀཐཱཙརིཡོ’’ཏི ཝུཏྟཾ. ཨཏྠཏོཏི པཱལི༹ཨཏྠཏོ. ཀཱརཎཏོཏི ཀཱརཎཱུཔཔཏྟིཏོ, ཨཊྛཀཐཱཏོཏི ཨདྷིཔྤཱཡོ. ཨཐ ཝཱ ཀཱརཎཏོཏི དྷམྨཏོ, ཏེན ཨཏྠཏོ དྷམྨཏོཏི ཝུཏྟཾ ཧོཏི. ཨཐ ཝཱ ཨཏྠཏོཏི ཕལཏོ. ‘‘ཀཱརཎཏོཏི ཧེཏུཏོ. དྷམྨཔདམྤི ཛཱཏཀེན སཧཱ’’ཏི ལིཁིཏཾ. པཉྷཾ ཀཐེཏུནྟི ‘‘པཉྷཾ པུཊྛོ ཀཐེཏཱི’’ཏི ཨེཏྠ བྷིཀྑུནིཡཱ པུཊྛེན ‘‘ན ཛཱནཱམཱི’’ཏི ན སཀྐཱ ཀཐེཏུཾ. ‘‘ན ཁོ པན ཏཾ བྷགཝནྟ’’ནྟི པཱཋོ. ‘‘ན ཁོ པནེཏ’’ནྟི ཙ ལིཁནྟི, ཏཾ ན སུནྡརཾ. ‘‘ཀཱསཱཡཝཏྠཝསནཱཡཱ’’ཏི ཝཙནཏོ པཱརཱཛིཀཱཡཔི ན ཝཊྚཏི. བྷིཀྑུནིཡཱ ཀཱཡསཾསགྒམེཝ ཝུཏྟཾ. མེཐུནེན ཧི བྷིཀྑུནཱིདཱུསཀོ ཧོཏི.

༡༤༨-༩. བྷིཀྑཱུནཾ སནྟིཀེ ཨུཔསམྤནྣཱ ནཱམ པརིཝཏྟལིངྒཱ, པཉྩསཏཱ སཱཀིཡཱནིཡོ ཝཱ. ‘‘དྷམྨདེསནཱཔཏྟིམོཙནཏྠཾ པནཱ’’ཏི ཝཙནཏོ མཱཏུགཱམགྒཧཎེན སབྦཏྠ བྷིཀྑུནཱིསངྒཧཾ གཙྪཏཱིཏི སིདྡྷཾ. བྷིཀྑུནིགྒཧཎེན པན མཱཏུགཱམོ ཏིརིཡཾ ཏརཎསིཀྑཱཔདེ (པཱཙི. ༡༨༧-༡༩༠) སངྒཧིཏོ, ན ཨཉྙཏྠ. ‘‘ཨོསཱརེཏབྦཱ’’ཏི པཱལི༹པཱཋོ, པཱལི༹ ཨོསཱརེཏབྦཱཏི ཨཏྠོ ¶ . ‘‘ཨོསཱརེཏབྦ’’ནྟི ཨཊྛཀཐཱཔཱལི༹. ཨེཀསྨིཾ ཋཱནེ ཝནྡིཏེ དོསཱབྷཱཝཏོ བཧཱུསུ ཨེཀཱཡ ཝནྡིཏེ ཝཊྚཏཱིཏི ཙེ? བྷིཀྑཱུཧི ཀཏྟབྦཾ ནཏྠི, བྷིཀྑུནིཡཱཡེཝ ཀཏྟབྦཾ, ཏསྨཱ ན ཝཊྚཏི ¶ . ‘‘ཡཏྠ ཀཏྠཙི ནིསིནྣཱཡཱཏི ཨནྟོདྭཱདསཧཏྠེ ནིསིནྣཱཡཱ’’ཏི ཝདནྟི. ན ནིམནྟིཏཱ ཧུཏྭཱ གནྟུཀཱམཱཏི ནིམནྟིཏཱ ཧུཏྭཱ གནྟུཀཱམཱ བྷིཀྑཱུ ཨིདྷ ནཱདྷིཔྤེཏཱ, ཝསྶཾ ཨུཔགནྟུཀཱམཱཝ ཨདྷིཔྤེཏཱཏི ཨཏྠོ. ཡཏོ པནཱཏི བྷིཀྑུནཱིཝིཧཱརཏོ. ཏཏྠཱཏི བྷིཀྑུནཱིཝིཧཱརེ. ཀིཉྩཱཔི ‘‘ཨོཝཱདདཱཡཀཱ བྷིཀྑཱུ’’ཏི ཝཙནཏོ ཨོཝཱདདཱཡཀེཧེཝ སབྷིཀྑུཀོ ཨཱཝཱསོ ཧོཏི, ན སབྦེཧཱིཏི ཨཱཔནྣོ, ཏཐཱཔི ཨསཏི བྷིཀྑུནོཝཱདཀེ ཨོཝཱདསཾཝཱསཱནཾ ཨཏྠཱཡ ཡཱཙནཏྠཱཡ ཨཝསྶཾ གནྟབྦཏྟཱ ཨཉྙེཧིཔི བྷིཀྑཱུཧི སབྷིཀྑུཀོཔི སབྷིཀྑུཀོ ཨེཝཱཏི ཝེདིཏབྦོ. སཱ རཀྑིཏབྦཱཏི ཝསྶཙྪེདཱཔཏྟི རཀྑིཏབྦཱ. ཀསྨཱ? ཨཱཔདཱསུ ཧཱིཏིཨཱདི. ‘‘ཨཡཾ ཨུཔོསཐོ ཙཱཏུདྡསིཀོཏི པུཙྪིཏབྦ’’ནྟི ཝུཏྟཾ, ཏམྤི ཏེརསིཡཾཡེཝ, ཨེཏརཧི པན བྷིཀྑུནིཡོ ཙཱཏུདྡསིཡཾཡེཝ གནྟྭཱ ‘‘ཀདཱ ཨཡྻ ཨུཔོསཐོ’’ཏི པུཙྪནྟི. ‘‘ཛཱཡཱཡོ ཝཱ ཛཱརིཡོ ཝཱ’’ཏི ཨདྷིཔྤཱཡེན ཝུཏྟཾ ཀིར. ‘‘གཙྪེཡྻ ཙེ, ཨཱཔཏྟཱི’’ཏི པཱཋོ. དྭེ ཏིསྶོཏི དྭཱིཧི ཏཱིཧི. ཨེཀཏོ ཨཱགཏཱནཾ ཝསེན ‘‘ཏཱཧཱི’’ཏི བཧུཝཙནཾ ཝུཏྟནྟི ཨདྷིཔྤཱཡོ. ‘‘ཨེཀཱ བྷིཀྑུནཱི ཝཱ བཧཱུ བྷིཀྑུནཱི ཝཱ བཧཱུཧི བྷིཀྑུནུཔསྶཡེཧི ཨོཝཱདཏྠཱཡ པེསིཏཱ’’ཏི ཝཙནསྶ ཝིཏྠཱརོ ‘‘བྷིཀྑུནིསངྒྷོ ཙ ཨཡྻ བྷིཀྑུནིཡོ ཙཱ’’ཏིཨཱདིནཱ ཝུཏྟོ. ‘‘བྷིཀྑུནིསངྒྷོ ཙ ཨཡྻ བྷིཀྑུནིཡོ ཙཱ’ཏིཨཱདི ནཱནཱཨུཔསྶཡེཧི པེསིཏཱཡ ཝཙན’’ནྟི ཙ ‘‘ཨཔརིཔུཎྞསངྒྷཔུགྒལནཱནཱཝཱསདུཏིཡཝཙནཝསེན པཉྩཀྑཏྟུཾ ཨུཔསངྐམནཾ ཝུཏྟ’’ནྟི ཙ ལིཁིཏཾ. ཡསྨིཾ ཨཱཝཱསེ པཱཏིམོཀྑུདྡེསོ ན པཝཏྟཏི, ཏཏྠཱཔི ཡཱཙནཾ སམྤཊིཙྪིཏྭཱ པུནདིཝསེ ཡེན པཊིགྒཧིཏཾ, ཏེན ‘‘ནཏྠི ཀོཙི བྷིཀྑུ བྷིཀྑུནོཝཱདཀོ སམྨཏོ’’ཏིཨཱདི ཝཏྟབྦཾ. ཨཏྠི ཙེ སམྨཏོ, ནིདྡིསིཏབྦོ. ‘‘སཡམེཝ ཙེ སམྨཏོ, ཨཧ’ནྟི ཝཏྟབྦ’’ནྟི ཝུཏྟཾ. སཙེ སམྨཏོ ཝཱ ཨོཝཱདཔཊིགྒཱཧཀོ ཝཱ པཱཏིམོཀྑཾ ཨུདྡིསཏི, ཨཉྙེན ཨཱརོཙཱཔེཏབྦནྟི ཨེཀེ, ‘‘ཨཏྟནཱཔི ཨཱརོཙེཏུཾ ཝཊྚཏཱི’’ཏི ཙ ཝདནྟི. ཀེསུཙི པོཏྠཀེསུ ‘‘ཨཡྻཱནཾ པཝཱརེཏཱི’’ཏི ལིཁིཏཾ, ཨེཝཾ སཏི ‘‘ཨཡྻསྶ པཝཱརེམཱི’’ཏི ཝཏྟབྦཾ, པོཏྠཀེ ནཏྠི.

ཨོཝཱདསིཀྑཱཔདཝཎྞནཱ ནིཊྛིཏཱ.

༢. ཨཏྠངྒཏསིཀྑཱཔདཝཎྞནཱ

༡༥༣. མུནཱཏཱིཏི ¶ ཛཱནཱཏི. ཨནྟརདྷཱཡཏིཔཱིཏི ཨེཏྠ ཏདུཏྟམཾ ཙེ ཨཏྠི, ཏཾ པསྶཱམི, ཡཾ ཝིཙིཏྟཾ ཝཱ, ཏདཏྠཉྩ. ཏགྒྷ ཀཱརཎཾ. སཧ ཨུཔྤཱདམནནྟརཱ ཀིརིཡཱ. ཡམཱ ཙ ཏེ མནསཱ ཀཏཏྲ ནེཏྭཱཏི. ཡཐཱ པཱཏོ སིཡཱ པཱཏོ བྷཝཾ པཱཏོཝ ཨུདཀཏོ ཨུགྒནྟྭཱ ཋིཏཾ, ཏཐཱ ཝིརོཙམཱནཾ ཨངྒཱིརསཾ བུདྡྷཾ པསྶ, ན ཀེཝལཾ པདུམཾ ཝིཡ, ཝིརོཙམཱནཾ ཏཔནྟམཱདིཙྩམིཝནྟལིཀྑེཏི ¶ སམྦནྡྷོ. ཨཐ ཝཱ ཨངྒཱིརསཾ བུདྡྷཾ པདུམཾཝ ཝིརོཙམཱནཾ སཱུརིཡཾཝ ཏཔནྟཾ པསྶ བུདྡྷཾ. ཡཐཱ པཱཏོ སིཡཱ ཕུལླམཝཱིཏགནྡྷཾ ཀོཀནུདསངྑཱཏཾ པདུམཾ པསྶསི, ཏཐཱ ཝིརོཙམཱནཾ ཨངྒཱིརསཾ བུདྡྷཾ པསྶ. ཨུབྷཡེནེཝ ཧི བྷགཝཏོ ཀནྟི དཱིཔིཏཱཏི ཀཏྭཱ དཱིཔིཏགུཎསུབྷཾ བུདྡྷཾ སཀྐཏྭཱ ཏཾ ཀནྟིཾ པཱུཛེཡྻ. པཱུཛནེཡྻཏོཔི ཝཱིཏིནཱམེཡྻ ཨིཏི ལཀྑཡེ. ‘‘ཨེཀཏོ ཨུཔསམྤནྣཱཡཱ’’ཏི པཱལི༹.

༡༥༦. ‘‘ཨེཀཏོ ཨུཔསམྤནྣཱན’’ནྟི ཨཊྛཀཐཱཔཱཋོ. ‘‘ཨབྷབྦོ ཏྭ’’ནྟིཨཱདིཝཙནཏོ ཨནུཀམྤཱཝསེན སདྡྷིཝིཧཱརིཀཱདིཾ སངྒྷིཀཱ ཝིཧཱརཱ ནིཀྐཌྜྷཱཔེནྟསྶ ཨནཱཔཏྟི ཝིཡ དིསྶཏི. ཨབྷབྦོ ཧི ཐེརོ སཉྩིཙྩ ཏཾ ཀཱཏུཾ, གཝེསིཏབྦཱཝ ཨེཏྠ ཡུཏྟཱིཏི ཀེཙི. ཐེརེན སིཀྑཱཔདཔཉྙཏྟིཏོ པུབྦེ ཀཏནྟི མམ ཏཀྐོ.

ཨཏྠངྒཏསིཀྑཱཔདཝཎྞནཱ ནིཊྛིཏཱ.

༣. བྷིཀྑུནུཔསྶཡསིཀྑཱཔདཝཎྞནཱ

༡༦༢. ‘‘ཨེཀརཏྟམྤི ཝསནྟཱི’’ཏི (པཱཙི. ༡༦༡) ཝཙནཏོ ཡཏྠ རཏྟིཡཾ ན ཝསནྟི, ཏཏྠ གནྟྭཱ ཨོཝདིཏུཾ ཝཊྚཏཱིཏི ཨེཀེ. ཡདི ཨེཝཾ སངྐེཏཊྛཱནཾ གནྟྭཱ ཨོཝདིཏུཾ ཝཊྚཏཱིཏི སིདྡྷཾ. ‘‘ཏཏོ ཨདྡྷཡོཛནེཡེཝ སབྷིཀྑུཀོ ཨཱཝཱསོ ཨིཙྪིཏབྦོ’’ཏི ན ཝཏྟབྦཾ. བྷིཀྑུནོཝཱདཀོ ཙེ ཨདྡྷཡོཛནཾ གནྟྭཱ ཨོཝདིཏུཀཱམོ ཧོཏི, བྷིཀྑུནིསངྒྷོ ཙ ཨདྡྷཡོཛནཾ གནྟྭཱ སོཏུཀཱམོ, ‘‘ཝཊྚཏཱི’’ཏི ཝཏྟབྦཾ སིཡཱ, ཏཉྩ ན ཝུཏྟཾ, ཏསྨཱ ན ཝཊྚཏི. ཧེཊྛིམཔརིཙྪེདེན པན ‘‘ཨེཀརཏྟམྤཱི’’ཏི ཝུཏྟཾ. ཏཏོ པཊྛཱཡ ཨུཔསྶཡཾ ཧོཏི, ན ཨུཔསྶཡསངྑེཔེན ཀཏམཏྟེནཱཏི ཝུཏྟཾ ཧོཏི. ཡཏྠ ཝཱསཱུཔགཏཱ ¶ བྷིཀྑུནིཡོ, སོ ཨུཔསྶཡསངྑྱཾ གཙྪཏི, ཏཏྠ ན གནྟྭཱ ཨོཝཱདོ དཱཏབྦོ. ཨེཀཱཝཱསེ དིཝཱ ཝཊྚཏཱིཏི ཨེཀེ, ཝིཙཱརེཏྭཱ ཡུཏྟཏརཾ གཧེཏབྦཾ.

བྷིཀྑུནུཔསྶཡསིཀྑཱཔདཝཎྞནཱ ནིཊྛིཏཱ.

༤. ཨཱམིསསིཀྑཱཔདཝཎྞནཱ

༡༦༤. ‘‘ཨུཔསམྤནྣཾ སངྒྷེན ཨསམྨཏ’’ནྟི པཱལི༹ཝཙནཏོ, ‘‘སམྨཏེན ཝཱ སངྒྷེན ཝཱ བྷཱརཾ ¶ ཀཏྭཱ ཋཔིཏོ’’ཏི ཨཊྛཀཐཱཝཙནཏོ ཙ ཨཊྛཧངྒེཧི སམནྣཱགཏོ སམྨཏེན ཝཱ ཝིཔྤཝསིཏུཀཱམེན ‘‘ཡཱཝཱཧཾ ཨཱགམིསྶཱམི, ཏཱཝ ཏེ བྷཱརོ ཧོཏཱུ’’ཏི ཡཱཙིཏྭཱ ཋཔིཏོ, ཏསྶཱབྷཱཝཏོ སངྒྷེན ཝཱ ཏཐེཝ བྷཱརཾ ཀཏྭཱ ཋཔིཏོ ཨཊྛཧི གརུདྷམྨེཧི ཨོཝདིཏུཾ ལབྷཏི, པགེཝ ཨཉྙེན དྷམྨེནཱཏི སིདྡྷཾ. ‘‘ཡོ པན བྷིཀྑུ ཨསམྨཏོ བྷིཀྑུནིཡོ ཨོཝདེཡྻ, པཱཙིཏྟིཡ’’ནྟི པགེཝ བྷཱརཾ ཀཏྭཱ ཨཊྛཔིཏཾ སནྡྷཱཡ ཝུཏྟནྟི ཝེདིཏབྦཾ. ཨབྷཡགིརིཝཱསཱིནམྤི ཨིདམེཝ མཏཾ, ཨནུགཎྛིཔདེ པན ཨིམཾ ནཡཾ པཊིཀྑིཔིཏྭཱ ‘‘ནཏྠི ཀོཙཱི’’ཏིཨཱདིནཱ ‘‘ཨེཏརཧི ཨོཝཱདཀོ ཨསམྨཏོ བྷིཀྑུནོཝཱདཀོ ནཱམཱ’’ཏི ཝཏྭཱ ‘‘ཡཾ པན ཨནྡྷཀཊྛཀཐཱཡཾ ཝུཏྟཾ ‘ཨུཔསམྤནྣཾ སངྒྷེན ཀམྨཝཱཙཱཡ ཨསམྨཏཾ, བྷིཀྑུསངྒྷེན པན བྷིཀྑུནིསངྒྷསྶ ཨནུགྒཧཾ ཀརོཐ, བྷིཀྑུནིཡོ ཨོཝདཐ, བྷིཀྑུསངྒྷསྶ ཙ ཀརོཐ ཕཱསུཝིཧཱརནྟི ཨེཝཾ ཡཱཙིཏྭཱ ཋཔིཏོ བྷིཀྑུསངྒྷཾ ཨཱཔུཙྪིཏྭཱ, ཏཏོ སོ ཐེརོ བྷིཀྑུནིཡོ ཨོཝདཏི, ཨེཝརཱུཔཾ བྷིཀྑུསངྒྷེན ཨསམྨཏནྟི, ཏཏྲ ཝུཏྟནཡེནེཝ ཨཏྠོ གཧེཏབྦོ’’ཏི ཝུཏྟཾ. པོརཱཎགཎྛིཔདེ པན ‘‘ཨསམྨཏོ གཱམཾ ཨོཝཱདཏྠཱཡ ཨཱགཏཱནཾ བྷིཀྑུནཱིནཾ ཝཙནཾ སུཏྭཱ པཊིཝཙནཾ དེནྟོ སངྒྷཱནུམཏིཡཱ, ན ཉཏྟིཙཏུཏྠེནཱ’’ཏི ཝུཏྟཾ, ཏཾ ཨནུགཎྛིཔདམཏེན སམེཏི, ཨནྡྷཀཊྛཀཐཱཡཾ ཝུཏྟཝཙནཾ ཏེན སམེཏི, ཏཉྩ པཱལི༹ཝཙནཾ, ན ཧི ཨོཝཱདཔཊིགྒཱཧཀོ, པཱཏིམོཀྑུདྡེསཀོ ཝཱ ‘‘པཱསཱདིཀེན སམྤཱདེཏཱུ’’ཏི ཝཙནམཏྟེན བྷིཀྑུནོཝཱདཀོ ནཱམ ཧོཏི. ཧོཏཱིཏི ཙེ, ཨནུཔསམྤནྣོཔི ཏཏྟཀེན ཝཙནེན ‘‘བྷིཀྑུནོཝཱདཀོ ཧོཏཱུ’’ཏི ཝཏྟབྦོ. ཧོཏཱིཏི ཙེ, ཡཾ ཝུཏྟཾ གཎྛཱནུགཎྛིཔདེསུ ‘‘ཨསམྨཏོ ནཱམ ཨསམྨཏབྷཱཝེན ‘བཧུསྶུཏོ ཏྭཾ ཨོཝདཱཧཱི’ཏི ¶ སངྒྷེན བྷཱརཾ ཀཏྭཱ ཋཔིཏོ’’ཏི. ཨེཏྠ བཱཧུསཙྩེན ཀིཾ པཡོཛནཾ. ཨནུགཎྛིཔདེཡེཝ ‘‘ཨབྷཡགིརིཝཱསཱི ཝདཏཱིཏི སུཏྭཱ སམྨཏེན ཝཱ ཨཱཎཏྟོ ཨོཝདིཏུཾ ལབྷཏཱིཏི དྷམྨསིརིཏྠེརོ པཙྪཱ ཨནུཛཱནཱཏཱི’’ཏི ཝུཏྟཾ. ཀིཾ བཧུཀཱཡ. ‘‘པཱསཱདིཀེན སམྤཱདེཏཱུ’’ཏི ཨེཏྟཀམཏྟེན བྷིཀྑུནོཝཱདཀོ ཧོཏི. ཨཊྛཀཐཱཡཾ ‘‘བྷཱརཾ ཀཏྭཱ’’ཏི ཨིམིནཱ ཀིཾ པཡོཛནཾ, ཏཏྟཀམྤི ཝཏྟུཾ ཨཉྙོ ན ལབྷཏི, ཏེན ཙ ‘‘ཨནུཛཱནཱམི, བྷིཀྑཝེ, ཋཔེཏྭཱ བཱལཾ གིལཱནཾ གམིཀཾ ཨཝསེསེཧི ཨོཝཱདཾ གཧེཏུ’’ནྟི (ཙཱུལ༹ཝ. ༤༡༤) ཨཡཾ པཱལི༹ ཝིརུཛ྄ཛྷེཡྻ. ཀཐཾ? ཏསྶ ཧི ‘‘ན, བྷིཀྑཝེ, ཨོཝཱདོ ན པཙྩཱཧརིཏབྦོ’’ཏི (ཙཱུལ༹ཝ. ༤༡༥) ཙནཏོ སམྨཏཱསམྨཏབྷཱཝེན ནཏྠི ཀོཙཱིཏི ‘‘པཱསཱདིཀེན སམྤཱདེཏཱུ’’ཏི ཝཏྟབྦཾ སིཡཱ, ཝདནྟོ ཙ ཨིདྷ པཋམེན ཨཱཔཏྟིཡཱ ཀཱརེཏབྦོ ཧོཏཱིཏི. ཧོཏུ ཨསམྨཏཏྟཱ, ཨཀཏབྷཱརཏྟཱ ཙ. ཨིམསྶ ཙ བྷིཀྑུནོཝཱདཀཏྟེ ཨིམསྶ ཁཱིཡནེན དུཀྐཊཾ སིཡཱ, སབྦམེཏཾ ཨནིཊྛཾ, ཏསྨཱ ཨཊྛཀཐཱཡཾ ‘‘ཨཡམེཏྠ བྷིཀྑུནོཝཱདཀོ ནཱམཱ’’ཏི ཨཝུཏྟཏྟཱ ཏཐཱ བྷཱརཾ ཀཏྭཱ ཋཔིཏོ ཨོཝདིཏུཾ ལབྷཏིཡེཝ, ནཱཉྙོཏི ཨཱཙརིཡོ.

ཨཱམིསསིཀྑཱཔདཝཎྞནཱ ནིཊྛིཏཱ.

༥. ཙཱིཝརདཱནསིཀྑཱཔདཝཎྞནཱ

༡༦༩. སཱདིཡིསྶསཱིཏི ¶ པུཙྪཱ.

ཙཱིཝརདཱནསིཀྑཱཔདཝཎྞནཱ ནིཊྛིཏཱ.

༦. ཙཱིཝརསིབྦནསིཀྑཱཔདཝཎྞནཱ

༡༧༦. ཝཉྩེཏྭཱཏི ‘‘ཏཝ ཉཱཏིཀཱཡཱ’’ཏི ཨཝཏྭཱ ‘‘ཨེཀིསྶཱ བྷིཀྑུནིཡཱ’’ཏི ཨེཏྟཀམེཝ ཝཏྭཱ, ཏེ ཧི ‘‘ཨེཀིསྶཱ’’ཏི ཝཙནཾ སུཏྭཱ ཨཉྙཱཏིཀཱཡ སནྟཀསཉྙིནོ སིབྦེསུཾ. ཨིམསྨིཾ སིཀྑཱཔདེ ‘‘ཙཱིཝརཾ ནཱམ ཚནྣཾ ¶ ཙཱིཝརཱནཾ ཨཉྙཏརཾ ཙཱིཝར’’ནྟི ཨེཏྟཀམེཝ པཱལི༹, ཏེན ཝུཏྟཾ ‘‘ཙཱིཝརནྟི ཡཾ ནིཝཱསེཏུཾ ཝཱ པཱརུཔིཏུཾ ཝཱ’’ཏིཨཱདི. ‘‘ཝིཀཔྤནུཔགཾ པཙྪིམ’’ནྟི ཙ ལིཁིཏཾ, སོ པམཱདལེཁོ.

ཙཱིཝརསིབྦནསིཀྑཱཔདཝཎྞནཱ ནིཊྛིཏཱ.

༧. སཾཝིདྷཱནསིཀྑཱཔདཝཎྞནཱ

༡༨༡. ཏཱ བྷིཀྑུནིཡོ དཱུསཡིཾསཱུཏི ཝིཔརིཎཱམོ ཀཱཏབྦོ.

༡༨༢-༤. སམྤདནྟཱིཏི པདསཱ གཙྪནྟི. ཝུཏྟནཡེནེཝཱཏི ‘‘སམྤཏནྟི ཨེཏྠཱཏི སམྤཱཏོ’’ཏིཨཱདིནཱ. པདགཏེ ཨུཔཙཱརོ ན ལབྦྷཏི, ཨཙྩཱསནྣཏྟཱ མིསྶཾ ཝིཡ ཧོཏཱིཏི. ཀུཀྐུཊཝསྶིཏཔརིཙྪིནྣོ མཧཱཨཊྛཀཐཱཡཾ. ‘‘ཏམྤི ཝོཧཱརེནཱ’’ཏི ལིཁིཏཾ. ‘‘ཡེབྷུཡྻེན ཏཐཱ སནྣིཝེསོ ཧོཏཱིཏི ཀཏྭཱ ཨཊྛཀཐཱཡཾ ཝུཏྟཾ, ཏསྨཱ ན པམཱདལེཁོ’’ཏི ཙ, ‘‘ཨུཀྐཊྛཔརིཙྪེདེན ཝུཏྟཾ ཨཊྛཀཐཱཡཾ, ཏཏོ ཨུདྡྷཾ ཨདྡྷཡོཛནལཀྑཎསམྤཏྟཾ ནཱམ ཧོཏཱིཏི གཧེཏབྦ’’ནྟི ཙ ཝུཏྟཾ. ‘‘ཀཔྤིཡབྷཱུམི ཀིརཱཡཾ…པེ… ན ཝདནྟཱི’’ཏི ཝུཏྟཾ. དུདྡསཉྷེཏྠ ཀཱརཎཾ. ཀཏརཾ པན ཏནྟི? ‘‘གཙྪཱམཱཏི སཾཝིདཧཏི, ཨཱཔཏྟི དུཀྐཊསྶཱ’’ཏི ཝུཏྟཾ. ཏཏྠ ‘‘གཙྪཱམཱ’’ཏི ཝཏྟམཱནཝཙནནྟཉྩ, ཨམགྒེ བྷིཀྑུནུཔསྶཡཱདིམྷི ན སམྦྷཝཏིཡེཝ མནུསྶཱནཾ ཨནྟརགྷརཱདིམྷི མགྒསངྑེཔགམནཏོ, ཨུཙྩཱསཡནཱདིཨུཔྤཏྟིཊྛཱནཏྟཱ ཙ. ན ཏིཏྠིཡསེཡྻཱཡ ཝཱ པབྦཛིཏཱཝཱསཏྟཱ. དྭཱརེཏི སམཱིཔཏྠེ བྷུམྨཾ, ཏསྨཱ ཏཾ དསྶེཏུཾ པུན ‘‘རཐིཀཱཡཱ’’ཏི ཨཱཧ. སེསཨཊྛཀཐཱཡཾ ¶ ‘‘ཨེཏྠནྟརེ སཾཝིདཧིཏེཔི བྷིཀྑུནོ དུཀྐཊ’’ནྟི ཨཱགཏཏྟཱ ན སམེཏི. ‘‘གཱམནྟརེ’’ཏི ཝཙནཏོ ཨཉྙགཱམསྶ ཨུཔཙཱརོཀྐམནེ ཨེཝ ཨཱཔཏྟི. ‘‘ཨདྡྷཡོཛནེ’’ཏི ཝཙནཏོ ཨཏིཀྐམནེཡེཝ ཡུཏྟཾ.

༡༨༥. རཊྛབྷེདེཏི ཝིལོཔེ. པོརཱཎགཎྛིཔདེ ‘‘ཏཡོཔི སངྐེཏཱ ཀཱལདིཝསམགྒཝསེན, ཏཏྠ པཙྪིམེནེཝ ཨཱཔཏྟཱི’’ཏི ཝུཏྟཾ. ‘‘ཨིམིནཱ མགྒེནཱ’’ཏི ཝིསྶཛྫེཏྭཱ ཨཉྙེན གཙྪནྟི ཙེ, ཨཱཔཏྟིཡེཝཱཏི ཨཏྠོ.

སཾཝིདྷཱནསིཀྑཱཔདཝཎྞནཱ ནིཊྛིཏཱ.

༨. ནཱཝཱབྷིརུཧནསིཀྑཱཔདཝཎྞནཱ

༡༨༩. ནདིཡཱ ¶ ཀུཏོ གཱམནྟརནྟི ཙེ? ‘‘ཡསྶཱ ནདིཡཱ’’ཏིཨཱདིམཱཧ. གཱམནྟརགཎནཱཡཱཏི ཡསྨིཾ གཱམཏིཏྠེ ཨཱརུལ༹ྷོ, ཏཾ ཋཔེཏྭཱ ཨཉྙགཱམགཎནཱཡ. ‘‘མཱཏུགཱམོཔི ཨིདྷ སངྒཧཾ གཙྪཏཱི’’ཏི ཨཱཙརིཡསྶ ཏཀྐོ, ཏེནེཝ ‘‘ཨུབྷཡཏྠ ཨེཀཏོ ཨུཔསམྤནྣཱཡ དུཀྐཊཾ, སིཀྑམཱནཱཡ སཱམཎེརིཡཱ ཨནཱཔཏྟཱི’’ཏི ཙ ན ཝུཏྟཾ. ཨེསེཝ ནཡོ ཨཉྙེསུཔི ཨེཝརཱུཔེསུ.

༡༩༡. ‘‘ལོཀསྶཱདམིཏྟསནྠཝཝསེན ཀེལི༹པུརེཀྑཱརཱ སཾཝིདཧིཏྭཱ’’ཏི ཝུཏྟཏྟཱ ཨཀུསལཙིཏྟཾ ལོཀཝཛྫནྟི ཝཏྟབྦནྟི? ན ཝཏྟབྦཾ, ‘‘ཀེལི༹པུརེཀྑཱརཱ’’ཏི ཝཙནཾ ཡེབྷུཡྻཏཱཡ ཝུཏྟཾ. པོརཱཎགཎྛིཔདེ ཙ ‘‘ཏཱིཎི ཙིཏྟཱནི ཏིསྶོ ཝེདནཱ’’ཏི ཝུཏྟཾ, སཾཝིདཧནཀཱལེ ཝཱ ཀེལི༹པུརེཀྑཱརོ བྷིཀྑུ སཾཝིདཧཏི, ཨཱཔཏྟི བྷིཀྑུནོ གཱམནྟརོཀྐམནེ, ཨདྡྷཡོཛནཱཏིཀྐམེ ཝཱ. ཀུསལཙིཏྟོ ཝཱ ཧོཏི པཙྩཝེཀྑནྟོ, ཙེཏིཡཱདཱིནི ཝཱ པསྶནྟོ, ཨབྱཱཀཏཙིཏྟོ ཝཱ ཧོཏི ཀིལམཐཝསེན ནིདྡཱཡནྟོཏི ཏིཙིཏྟཱནི གཧིཏཱནཱིཏི ཝེདིཏབྦཱ.

ནཱཝཱབྷིརུཧནསིཀྑཱཔདཝཎྞནཱ ནིཊྛིཏཱ.

༩. པརིཔཱཙིཏསིཀྑཱཔདཝཎྞནཱ

༡༩༢. ཙེཊཀེཏི དཱརཀེ. ཏརུཎཔོཏཀེཏི པོརཱཎཱ. ‘‘པཱཔབྷིཀྑཱུནཾ པཀྑུཔཙྪེདཱཡ ཨིདཾ པཉྙཏྟཾ, ཏསྨཱ པཉྩ བྷོཛནེཡེཝཱཔཏྟི ཝུཏྟཱ’’ཏི ལིཁིཏཾ.

༡༩༤-༧. ནིཔྥཱདིཏནྟི ¶ ཝིཉྙཏྟིཡཱ ན ཧོཏི, ཀིནྟུ པརིཀཐཱདཱིཧི, ཏསྨཱ ཨིམིནཱ སིཀྑཱཔདེན ཨནཱཔཏྟི, ཏཾ སནྡྷཱཡ ‘‘སབྦཏྠ ཨནཱཔཏྟཱི’’ཏི ཝུཏྟཾ. ‘‘ཀཐཱནུསཱརེན ཏཏྠ པསཱིདིཏྭཱ དེནྟི, ཨིདཾ པརིཔཱཙིཏཾ ན ཧོཏི, ཝཊྚནྟཱི’’ཏི པཋམསིཀྑཱཔདེ ཝུཏྟཏྟཱཏི དྷམྨསིརིཏྠེརོ, ཨུཔཏིསྶཏྠེརོ པན ‘‘ཨིཏརམྤི ཝཊྚཏིཡེཝཱ’’ཏི ཨཱཧ. པོརཱཎགཎྛིཔདེ པན ‘‘ཡསྨཱ དེཝདཏྟོ པཀཏིཡཱ ཏཏྠ བྷིཀྑུནིཔརིཔཱཙིཏཾ བྷུཉྫཏི, ཏསྨཱ ཨིམཾ ཨཊྛུཔྤཏྟིཾ ནིདཱནཾ ཀཏྭཱ ཨིདཾ སིཀྑཱཔདཾ པཉྙཏྟ’’ནྟི ཝུཏྟཾ.

པརིཔཱཙིཏསིཀྑཱཔདཝཎྞནཱ ནིཊྛིཏཱ.

༡༠. རཧོནིསཛྫསིཀྑཱཔདཝཎྞནཱ

༡༩༨. ‘‘ཨུཔནནྡསྶ ¶ ཙཏུཏྠསིཀྑཱཔདེན ཙཱ’’ཏི པཱཋོ.

རཧོནིསཛྫསིཀྑཱཔདཝཎྞནཱ ནིཊྛིཏཱ.

སམཏྟོ ཝཎྞནཱཀྐམེན ཨོཝཱདཝགྒོ ཏཏིཡོ.

༤. བྷོཛནཝགྒོ

༡. ཨཱཝསཐཔིཎྜསིཀྑཱཔདཝཎྞནཱ

༢༠༣-༤. པཱུགསྶཱཏི པཱུགེན. ཀུཀྐུཙྩཱཡནྟོཏི ནིསྶརཎེནེཏྠ བྷཝིཏབྦཾ, ཏཾ མཡཾ ན ཛཱནཱམཱཏི སནྣིཊྛཱནསྶ ཀརཎཝསེན ‘‘ཀུཀྐུཙྩཱཡནྟོ’’ཏི ཝུཙྩཏི. ཡཐཱ ཧི ཨཱཡསྨཱ ཨུཔཱལི ནཡགྒཱཧེན ‘‘ཨནཱཔཏྟི ཨཱཝུསོ སུཔིནནྟེནཱ’’ཏི (པཱརཱ. ༧༨) ཨཱཧ, ཏཐཱ ཐེརོཔི ‘‘ཨནཱཔཏྟི གིལཱནསྶཱ’’ཏི ཀསྨཱ ན པརིཙྪིནྡཏཱིཏི? ཨནཏྟཱདྷིཀཱརཏྟཱ ཝིནཡཔཉྙཏྟིཡཱ, ‘‘ནཱཡཾ ཨཏྟནོ ཨོཀཱསོ’’ཏི པཊིཀྑིཏྟཏྟཱ, སིཀྑཱཔདསྶ ཨཔརིཔུཎྞཏྟཱ. པཋམཔཱརཱཛིཀསིཀྑཱཔདེ པརིཔུཎྞཾ ཀཏྭཱ པཉྙཏྟེཡེཝ ཧི སོ ཐེརོ ‘‘ཨནཱཔཏྟི སུཔིནནྟེནཱ’’ཏི ¶ ཨཱཧ ‘‘ཨཉྙཏྲ སུཔིནནྟཱ’’ཏི ཝུཏྟཔདཱནུསཱརེནཱཏི. ཡསྨཱ ཨོདིསྶ ཨཡཱཝདཏྠེཝ དཱཡཀཱནཾ པཱིལཱ༹ ནཏྠི, ཏསྨཱ ‘‘ཨནོདིསྶ ཡཱཝདཏྠོ’’ཏི ཝུཏྟཾ.

༢༠༨. ‘‘ཨནྟརཱམགྒེ ཨེཀདིཝས’ནྟི ཨེཀཾཡེཝ སནྡྷཱཡ ཝུཏྟ’’ནྟི ཙ ‘‘ཨེསེཝ ནཡོཏི ཝུཏྟནཡམེཝ དསྶེཏུཾ གནྟྭཱ པཙྩཱགཙྪནྟོ ཧཱིཏིཨཱདིམཱཧཱ’’ཏི ཙ ‘‘སུདྡྷཙིཏྟོ ཧུཏྭཱ པཀཏིགམནེཝ བྷུཉྫིཏུཾ ལབྷཏཱི’’ཏི ཙ ‘‘ཨགིལཱནསྶ གིལཱནསཉྙིནོ ཀཱཡེན སམུཊྛཱཏཱི’’ཏི ཙ ལིཁིཏཾ.

ཨཱཝསཐཔིཎྜསིཀྑཱཔདཝཎྞནཱ ནིཊྛིཏཱ.

༢. གཎབྷོཛནསིཀྑཱཔདཝཎྞནཱ

༢༠༩-༢༡༨. གུལ༹ྷཔཊིཙྪནྣོཏི ཨཔཱཀཊོཝ. ཨེཀོ པུཏྟེནཱཏི ཨེཀསྶེཀཾ བྷཏྟཾ ‘‘ཨཧཾ ཨཉྙེན ནིམནྟིཏོ’’ཏི ན ཝུཙྩཏི. ‘‘སཙེ ཨེཀཏོ གཎྷནྟི ¶ , གཎབྷོཛནཾ ཧོཏཱི’’ཏི (པཱཙི. ཨཊྛ. ༢༡༧-༢༡༨) ཝུཏྟཏྟཱ ཙཏྟཱརོ ཨུཔཱསཀཱ ཙཏྟཱརོ བྷིཀྑཱུ ཝིསུཾ ཝིསུཾ ནིམནྟེཏྭཱ ཧཏྠཔཱསེ ཋིཏཱནཾ ཙེ དེནྟི, གཎབྷོཛནཾ ཧོཏི ཨེཝཱཏི ཨེཀེ, ཏཾ ན ཡུཏྟཾ ཝིཡ. ‘‘ཝིཉྙཏྟིཏོ པསཝནེ གཎསྶ ཨེཀཏོ གཧཎེ ཨིམིནཱ སིཀྑཱཔདེན ཨཱཔཏྟི, ཝིསུཾ གཧཎེ པཎཱིཏབྷོཛནསཱུཔོདནཝིཉྙཏྟཱིཧཱི’’ཏི ལིཁིཏཾ. ‘‘ཝིཉྙཏྟིཏོ པསཝནཾ ཨཊྛུཔྤཏྟིཝསེན ཨཊྛཀཐཱཡཾ ཨནུཉྙཱཏཾ. སཱུཔོདནཱདིཝསེན ཏཏྠ ཨཱཔཏྟི ཨེཝཱ’’ཏི ཝུཏྟཾ, ཏཾ ན ཡུཏྟཾ. ཀསྨཱ? པརིཝཱརེ (པརི. ༡༦༨) ཨེཝ དྭིནྣཾ ཨཱཀཱརཱནཾ ཨཱགཏཏྟཱ, ཏསྨཱ ཨཊྛཀཐཱཡཾ ‘‘ཨནུཉྙཱཏ’’ནྟི དུཝུཏྟཾ. ཨཊྛུཔྤཏྟིཡཾཡེཝ པཱཀཊནྟི ‘‘པདབྷཱཛནེ ན ཝུཏྟ’’ནྟི ཝཏྟབྦཾ. ཨེཀཏོ གཎྷནྟཱིཏི གཧིཏབྷཏྟཱཔི ཨཉྙེ ཡཱཝ གཎྷནྟི, ཏཱཝ ཙེ ཏིཊྛནྟི, ཨེཀཏོ གཎྷནྟིཡེཝ ནཱམ. ‘‘གཙྪཏི ཙེ, ཨནཱཔཏྟཱི’’ཏི ཝདནྟི.

ཨེཏྠཱཧ – ‘‘པཊིགྒཧཎམེཝ ཧེཏྠ པམཱཎ’’ནྟི ཝུཏྟཾ, ཨཐ ཀསྨཱ པཱལི༹ཡཾ ‘‘གཎབྷོཛནཾ ནཱམ ཡཏྠ ཙཏྟཱརོ…པེ… བྷུཉྫནྟི, ཨེཏཾ གཎབྷོཛནཾ ནཱམཱ’’ཏི (པཱཙི. ༢༡༨) ཝུཏྟནྟི? ཝུཙྩཏི – ཡཏྠཱཏི ཨུཔཡོགཏྠེ བྷུམྨཝཙནཾ. ཙཏྟཱརོཏི གཎསྶ ཧེཊྛིམཔརིཙྪེདནིདསྶནཾ. པཉྩནྣཾ བྷོཛནཱནནྟི ཨཱཔཏྟིཔྤཧོནཀབྷོཛནནིདསྶནཾ. ཨཉྙཏརེན བྷོཛནེན ནིམནྟིཏཱཏི ཨཀཔྤིཡནིམནྟནནིདསྶནཾ. ནིམནྟནཝསེནེཝ པན གཎབྷོཛནསྶ ཝུཏྟཏྟཱ ‘‘ནིམནྟིཏཱ བྷུཉྫནྟཱིཏི ཝུཏྟ’’ནྟི ཝུཏྟཾ. ‘‘ཨཉྙཏརཾ བྷོཛནཾ ཝིཉྙཱཔེཏྭཱ བྷུཉྫནྟཱི’’ཏི ¶ པན ན ཝུཏྟཾ ཨཊྛུཔྤཏྟིཡཾཡེཝ པཱཀཊཏྟཱ. ཡཾ བྷུཉྫནྟཱིཏི ཨེཝཾ སམྦནྡྷོ ཝེདིཏབྦོ. ཏཏྠ བྷུཉྫནྟཱིཏི པཊིགྒཱཧཀནིཡམཝཙནཾ. ན ཧི ཨཔྤཊིགྒཧིཏཀཾ བྷིཀྑཱུ བྷུཉྫནྟི. ཨིདཾ ཝུཏྟཾ ཧོཏི ‘‘གཎསྶ ཡཏོ པཊིགྒཧིཏཱཧཱརབྷོཛནཧེཏུ པཱཙིཏྟིཡ’’ནྟི. ཨཱགནྟུཀཔཊྚཾ མོགྷསུཏྟེན སིབྦིཏྭཱ ཋཔེནྟི, ཏཏྠ ཨནུཝཱཏེ ཡཐཱ ཨེཀཏལཾ ཧོཏི, ཏཐཱ ཧཏྠེཧི གྷཊྚེཏི. ཝལེཏཱིཏི ཨཱཝཊྚེཏི. པརིཝཏྟནནྟི སུཏྟཾ གཎྷནྟཱནཾ སུཁགྒཧཎཏྠཾ སུཏྟཔརིཝཏྟནཾ ཀརོཏི, པཊྚཾ སིབྦནྟཱནཾ སུཁསིབྦནཏྠཾ པཊྚཔརིཝཏྟནཉྩ. ནཝཙཱིཝརཀཱརཀོ ཨིདྷཱདྷིཔྤེཏོ, ན ཨིཏརོཏི. ‘‘བིམྦིསཱརཾ ཨཱཔུཙྪིཏྭཱ སམྦྷཱརེ ཀཡིརམཱནེཡེཝ ཀཱལཱ ཨཏིཀྐནྟཱ, པཙྪཱ གཎབྷོཛནསིཀྑཱཔདེ པཉྙཏྟེ བྷགཝནྟཾ ཨུཔསངྐམིཏྭཱ པུཙྪཱི’’ཏི ཝདནྟི, ཨཉྙཐཱ ཨཊྛཀཐཱཡ ཝིརུཛ྄ཛྷནཏོ.

༢༢༠. ‘‘དྭེ ¶ ཏཡོ ཨེཀཏོཏི ཡེཔི ཨཀཔྤིཡནིམནྟནཾ སཱདིཡིཏྭཱ’’ཏིཨཱདིཝཙནེན ཨཀཔྤིཡནིམནྟནཔཙྩཡཱ ཨེཝ ཨནཱཔཏྟི, ཝིཉྙཏྟིཏོ ཨཱཔཏྟིཡེཝཱཏི དཱིཔེཏི. ཨནིམནྟིཏོ ཙཏུཏྠོ ཡསྶ ཏདེཏཾ ཨནིམནྟིཏཙཏུཏྠཾ. ཨེས ནཡོ སབྦཏྠ. པཝེསེཏྭཱཏི ནིསཱིདཱཔེཏྭཱ. ཙཱིཝརདཱནསམཡལདྡྷཀཙཏུཀྐཾ ཙཱིཝརཀཱརསམཡལདྡྷཀཙཏུཀྐནྟི ཨེཝམཱདཱིནི. ཏཱནི ཙཱཏི ཡེཧི བྷོཛནེཧི ཝིསངྐེཏོ ནཏྠི, ཏཱནི. མཧཱཐེརེཏི ཨུཔསམྤནྣེ. ཨཊྛཏྭཱཏི ཋིཏེན ནིམིཏྟཾ དསྶིཏཾ ཧོཏི. ཏཏྠ ཏཏྠ གནྟྭཱཏི རཐིཀཱདཱིསུ བྷིཀྑུསམཱིཔེ གནྟྭཱ. ཨིམསྨིཾ པན སིཀྑཱཔདེ ཀཏྠཙི པོཏྠཀེ ‘‘ཨནུཛཱནཱམི, བྷིཀྑཝེ, ཙཱིཝརདཱནསམཡེ གཎབྷོཛནཾ བྷུཉྫིཏུཾ. ཨེཝཉྩིདཾ བྷགཝཏཱ བྷིཀྑཱུན’’ནྟི པཱཋོ དིསྶཏི. ཀཏྠཙི ‘‘བྷུཉྫིཏུ’’ནྟི ཝཏྭཱ ‘‘ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐཱ’’ཏི པཱཋོ, ཨཡཾ སོབྷནོ.

གཎབྷོཛནསིཀྑཱཔདཝཎྞནཱ ནིཊྛིཏཱ.

༣. པརམྤརབྷོཛནསིཀྑཱཔདཝཎྞནཱ

༢༢༡. ཨདྷིཊྛིཏཱཏི ནིཙྩཔྤཝཏྟཱ. བདརཙུཎྞསཀྐརཱདཱིཧི ཡོཛིཏཾ བདརསཱལ༹ཝཾ. ཀིརཀམྨཀཱརེནཱཏི ཀིརསྶ ཀམྨཀཱརེན.

༢༢༦. ‘‘ཝིཀཔྤེཏྭཱ གཎྷཱཧཱི’’ཏི ཨེཏྠཱཧུ པོརཱཎཏྠེརཱ ‘‘བྷགཝཏོ སམྨུཁཱ ཨཝིཀཔྤེཏྭཱ གེཧཏོ ནིཀྑམིཏྭཱ རཐིཀཱཡ ཨཉྙཏརསྶ བྷིཀྑུནོ སནྟིཀེ ཝིཀཔྤེསི, ཝིཀཔྤེནྟེན པན ‘མཡ྄ཧཾ བྷཏྟཔཙྩཱསཾ ཨིཏྠནྣཱམསྶ དམྨཱི’ཏི ཝཏྟབྦཾ, ཨིཏརེན ཝཏྟབྦཾ ‘ཏསྶ སནྟཀཾ པརིབྷུཉྫ ཝཱ ¶ ཡཐཱཔཙྩཡཾ ཝཱ ཀརོཧཱི’’’ཏི. པཉྩསུསཧདྷམྨིཀེསཱུཏི སམྨུཁཱ ཋིཏསྶ སཧདྷམྨིཀསྶ ཡསྶ ཝིཀཔྤེཏུཀཱམོ, ཏཾ སཧདྷམྨིཀཾ ཨདིསྭཱ གཧཊྛསྶ ཝཱ སནྟིཀེ, སཡམེཝ ཝཱ ‘‘པཉྩསུ སཧདྷམྨིཀེསུ ཨིཏྠནྣཱམསྶ ཝིཀཔྤེམཱི’’ཏི ཝཏྭཱ བྷུཉྫིཏབྦནྟི ཨེཀེ, ཨེཝཾ སཏི ཐེརོ ཏསྨིཾཡེཝ ནིསིནྣོཝ ཏཐཱ ཝཱཙཾ ནིཙྪཱརེཏྭཱ པཊིགྒཎྷཱཏཱིཏི ཏཀྐོ དིསྶཏི. མཧཱཔཙྩརིཡཱདཱིསུ པན པརམྨུཁཱ ཝིཀཔྤནཱཝ ཝུཏྟཱ, སཱ ‘‘ཏེན ཧཱནནྡ, ཝིཀཔྤེཏྭཱ གཎྷཱཧཱི’’ཏི ཨིམིནཱ སམེཏི, ཏཐཱཔི མཱཏིཀཱཊྛཀཐཱཡཾ (ཀངྑཱ. ཨཊྛ. པརམྤརབྷོཛནསིཀྑཱཔདཝཎྞནཱ) ‘‘ཏསྨཱ ཡོ བྷིཀྑུ པཉྩསུ སཧདྷམྨིཀེསུ ¶ ཨཉྙཏརསྶ ‘མཡ྄ཧཾ བྷཏྟཔཙྩཱསཾ ཏུཡ྄ཧཾ དམྨཱི’ཏི ཝཱ ‘ཝིཀཔྤེམཱི’ཏི ཝཱ ཨེཝཾ སམྨུཁཱ ཝཱ ‘ཨིཏྠནྣཱམསྶ དམྨཱི’ཏི ཝཱ ‘ཝིཀཔྤེམཱི’ཏི ཝཱ ཨེཝཾ པརམྨུཁཱ ཝཱ’’ཏི ཝཙནཏོ སཧདྷམྨིཀསྶ སནྟིཀེ ཨེཝ ཝཏྟབྦཾ, ན སཡམེཝཱཏི དིསྶཏི. ཡསྨཱ ཨཡཾ པཙྪིམནཡོ པོརཱཎགཎྛིཔདེནཔི སམེཏི, ཏསྨཱ ཨིདྷ མཱཏིཀཱཊྛཀཐཱནུསཱརེན ཨཏྠོ ཝེདིཏབྦོ. ཨེཏྠ ཀིཉྩཱཔི ‘‘ཏེ མནུསྶཱ…པེ… བྷོཛནམདཾསཱུ’’ཏི ཝཙནཏོ ཨཀཔྤིཡནིམནྟནཾ པཉྙཱཡཏི, ཏཐཱཔི ཐེརསྶ ཀུཀྐུཙྩུཔྤཏྟིཀཱརཎེན བྷཏྟེན སོ ནིམནྟིཏོཏི ཝེདིཏབྦོ. ཨཉྙཐཱ པརཏོ ‘‘དྭེ ཏཡོ ནིམནྟནེ ཨེཀཏོ བྷུཉྫཏཱི’’ཏི ཝཙནེན, ཨནཱཔཏྟིཝཱརེན ཙ ཝིརུཛ྄ཛྷཏི.

༢༢༩. ཨེཏྠཱཡཾ ཝིཙཱརཎཱ – ‘‘ཨཉྙོ མནུསྶོ པཏྟཾ གཎྷཱཏི, ན དཱཏབྦ’’ནྟི ཝཙནཏོ ཨཔརབྷཱགེ ཨཀཔྤིཡནིམནྟནེན ནཏྠི པཡོཛནཾ, པུབྦབྷཱགེཡེཝ ཨཀཔྤིཡནིམནྟནེན པཡོཛནནྟི སྭེཔི བྷནྟེ ཨཱགཙྪེཡྻཱཐཱཏི ཨེཏྠ ཀཏརཾ ཨཀཔྤིཡནིམནྟནཾ, ཏསྨཱ ཨདྷིཔྤཱཡོ ཙེཏྠ པམཱཎནྟི. ན, ‘‘པིཎྜཱཡ ཙརིཏྭཱ ལདྡྷབྷཏྟཾ བྷུཉྫཏི, ཨཱཔཏྟཱི’’ཏི ཝཙནཏོཏི. ཏཏྠ ‘‘སྭེཔི བྷནྟེ’’ཏི ཨེཏྠ ཡཐཱ ཝཙནམཏྟཾ ཨགྒཧེཏྭཱ ཨཀཔྤིཡནིམནྟནཀྐམེན ཨཏྠོ གཧིཏོ, ཏཐཱ ‘‘པིཎྜཱཡ ཙརིཏྭཱ’’ཏི ཨེཏྠཱཔི ཨནྟརཱ ཨཀཔྤིཡནིམནྟནེན ལདྡྷབྷཏྟཾ སནྡྷཱཡ ཝུཏྟནྟི ཨཏྠོ གཧེཏབྦོ. པིཎྜཱཡ ཧི ཙརནྟཾ དིསྭཱ ‘‘ཨེཏྠ, བྷནྟེ, བྷཏྟཾ གཎྷཐཱ’’ཏི དིནྣམྤི ཨཀཔྤིཡནིམནྟནེན ལདྡྷཾ ནཱམ ཧོཏི. ཝོཧཱརེན པན ‘‘པིཎྜཱཡ ཙརིཏྭཱ ལདྡྷབྷཏྟ’’ནྟི ཝུཙྩཏི, ཨེཝཾསམྤདམིདཾ དཊྛབྦཾ. ཨཉྙཐཱ མཱཏིཀཱཊྛཀཐཱཡཾ ‘‘གཎབྷོཛནེ ཝུཏྟནཡེནེཝ པཉྩཧི བྷོཛནེཧི ནིམནྟིཏསྶ…པེ… པརསྶ པརསྶ བྷོཛནེ’’ཏི ཝུཏྟཝཙནཝིརོདྷོ. ཨིདཉྷི ཝཙནཾ ཡེན པཋམཾ ནིམནྟིཏོ, ཏཏོ པཋམནིམནྟིཏཾ ཨཱདཱཡ གཏོ པརསྶ པརསྶ ནིམནྟནཀདཱཡཀསྶ བྷོཛནེཏི ཨཏྠཔརིདཱིཔནཏོ ནིམནྟནཏོ ལདྡྷབྷཏྟསྶ བྷོཛནེཡེཝ ཨཱཔཏྟཱིཏི དཱིཔེཏི. ‘‘དྭེ ཏཡོ ནིམནྟནེ ཨེཀཏོ’’ཏི ཝཙནེནཔི སམེཏི, ཨཉྙཐཱ ‘‘ཡེན ནིམནྟིཏོ, ཏསྶ བྷོཛནཏོ པརསྶ བྷོཛནེ’’ཏི ཨེཏྟཀཾ ཝཏྟབྦཾ སིཡཱ, པཱལི༹ཡཾ ཝཱ ‘‘ནིམནྟནེན ཨེཀཏོབྷུཉྫཏཱི’’ཏི ཨེཏྟཀཾ ཝཏྟབྦཾ སིཡཱ. དུཏིཡནིམནྟནསྶ པཋམབྷོཛནེ ཨཱཔཏྟིཔྤསངྒནིཝཱརཎཏྠཾ ¶ ‘‘ཡེན ཡེནཱ’’ཏིཨཱདི ཝུཏྟཾ. ནིམནྟནཔཊིཔཱཊིཡཱ བྷུཉྫཏཱིཏི པཱལཱི༹ཏི ཙེ? ན, ‘‘ཨནཱཔཏྟི ནིཙྩབྷཏྟེ’’ཏིཨཱདིཔཱལི༹ཝིརོདྷཏོ.

གཎྛིཔདེ ¶ པན ‘‘པིཎྜཱཡ ཙརིཏྭཱ ལདྡྷབྷཏྟཾ ཀསྨཱ བྷུཉྫིཏུཾ ན ལབྷཏཱིཏི ཙེ? ‘པརམྤརབྷོཛནཾ ནཱམ པཉྩནྣཾ བྷོཛནཱནཾ ཨཉྙཏརེན བྷོཛནེན ནིམནྟིཏོ, ཏཾ ཋཔེཏྭཱ པཉྩནྣཾ བྷོཛནཱནཾ ཨཉྙཏརཾ བྷོཛནཾ བྷུཉྫཏི, ཨེཏཾ པརམྤརབྷོཛནཾ ནཱམཱ’ཏི ཝུཏྟཏྟཱ’’ཏི ལིཁིཏཾ. ཡདི ཨེཝཾ ནིཙྩབྷཏྟཱདིཀམྤི ན ཝཊྚཏཱིཏི ཨཱཔཛྫཏཱིཏི ནིཙྩབྷཏྟཱདི ཨོདིསྶཀནྟི ཙེ? ཏཾ ན, ཏདཉྙསྶ ཨཏྟནོ དྷནེན ནིཔྥནྣསྶ, སངྒྷཏོ ལདྡྷསྶ ཝཱ པཱཏོ པཙནཀཡཱགུ ཙེ གྷནཱ ཧོཏི, ཏསྶཱཔི, ཨེཀཀུཊིཀཾ གཱམཾ ཨུཔནིསྶཱཡ ཝིཧརཏོ བྷིཀྑཱཙརིཡཝསེན ལབྷིཏབྦནིཙྩབྷཏྟསྶ ཙ ཨཀཔྤིཡབྷཱཝཔྤསངྒཏོ. ཏཏྠ བྷིཀྑཱཙརིཡཝསེན ལདྡྷཾ ན ཀཔྤཏི ནིམནྟནཀཱནཾ ཨཔྤསཱདཱཝཧནཏོཏི ཙེ? ན, ‘‘པཉྩ བྷོཛནཱནི ཋཔེཏྭཱ སབྦཏྠ ཨནཱཔཏྟཱི’’ཏི ཝཙནཝིརོདྷཏོ. ཁཱདནཱིཡམྤི ཧི པརསྶ ཁཱདིཏྭཱ བྷུཏྟཏྟཱ ནིམནྟནབྷོཛནཾ ཨབྷུཉྫནྟོ ཨཔྤསཱདཾ ཀརོཏི ཨེཝ, ཏསྨཱ ཨཔྤསཱདཱཝཧཾ ཨཔྤམཱཎཾ, ཏསྨཱ ནིཙྩབྷཏྟཱདི ཨོདིསྶཀཾ ན སམྦྷཝཏི. ཨཔིཙ ཧེཊྛཱ ཝུཏྟནཡེན སདྡྷིཾ ཨིདྷ ཝུཏྟནཡེན སཾསནྡིཏྭཱ ཡཾ ཡཾ ཁམཏི, ཏཾ ཏཾ གཧེཏབྦནྟི སབྦོཔི ཀེསཉྩི ཨཱཙརིཡཱནཾ ཝིནིཙྪཡོ. ཨཱཙརིཡསྶ པན ཝིནིཙྪཡོ ཨནྟེ ཨཱཝི བྷཝིསྶཏི. ‘‘ཁཱིརཾ ཝཱ རསཾ ཝཱ པིཝཏོ ཨམིསྶམྤཱིཏི ཨདྷིཔྤཱཡོ’’ཏི ཝུཏྟཾ. གཎྛིཔདེ ‘‘ཧེཊྛཱ ཨོདནེནཱམིསྶེཏྭཱ ཨུཔརི ཏིཊྛཏཱི’’ཏི ལིཁིཏཾ.

མཧཱཨུཔཱསཀོཏི གེཧསཱམིཀོ. མཧཱཨཊྛཀཐཱཡཾ ‘‘ཨཱཔཏྟཱི’’ཏི ཝཙནེན ཀུརུནྡིཡཾ ‘‘ཝཊྚཏཱི’’ཏི ཝཙནཾ ཝིརུདྡྷཾ ཝིཡ དིསྶཏི. ‘‘དྭིནྣམྤི ཨདྷིཔྤཱཡོ མཧཱཔཙྩརིཡཾ ཝིཙཱརིཏོ’’ཏི ལིཁིཏཾ. ‘‘ཙཱརིཏྟཏོཏི ‘སནྟཾ བྷིཀྑུཾ ཨནཱཔུཙྪཱ’ཏི པརཏོ ཝཏྟབྦཏོ’’ཏི ཝུཏྟཾ. ཝཙཱིཀམྨཾ ཨཝིཀཔྤནཾ. ཨེཏྠ ‘‘མཧཱཨུཔཱསཀོ བྷིཀྑཱུ ནིམནྟེཏི…པེ… པཙྪཱ ལདྡྷཾ བྷཏྟཾ བྷུཉྫནྟསྶ ཨཱཔཏྟི. པིཎྜཱཡ ཙརིཏྭཱ ལདྡྷབྷཏྟཾ བྷུཉྫཏི, ཨཱཔཏྟཱི’’ཏི ཨཊྛཀཐཱཡཾ ཝཙནཏོ, ‘‘ཀཱལསྶེཝ པིཎྜཱཡ ཙརིཏྭཱ བྷུཉྫིམྷཱ’’ཏི པཱལི༹ཏོ, ཁནྡྷཀེ ‘‘ན ཙ, བྷིཀྑཝེ, ཨཉྙཏྲ ནིམནྟནེ ཨཉྙསྶ བྷོཛྫཡཱགུ པརིབྷུཉྫིཏབྦཱ, ཡོ པརིབྷུཉྫེཡྻ, ཡཐཱདྷམྨོ ཀཱརེཏབྦོ’’ཏི (མཧཱཝ. ༢༨༣) ཝཙནཏོ ཙ ནིམནྟེཏྭཱ ཝཱ པཝེདེཏུ ཨནིམནྟེཏྭཱ ཝཱ, པཋམགཧིཏནིམནྟནསྶ བྷིཀྑུནོ པཋམནིམནྟནབྷོཛནཏོ ཨཉྙཾ ཡཾ ཀིཉྩི པརསནྟཀཾ བྷོཛནཾ པརམྤརབྷོཛནཱཔཏྟིཾ ཀརོཏི. ཨཏྟནོ སནྟཀཾ, སངྒྷགཎཏོ ལདྡྷཾ ཝཱ ཨགཧཊྛསནྟཀཾ ཝཊྚཏི, ནིམནྟནཏོ པཋམཾ ནིབདྡྷཏྟཱ པན ནིཙྩབྷཏྟཱདི པརསནྟཀམྤི ཝཊྚཏི. ཁནྡྷཀེ ¶ ‘‘ན ཙ ¶ , བྷིཀྑཝེ…པེ… ཡཐཱདྷམྨོ ཀཱརེཏབྦོ’’ཏི (མཧཱཝ. ༢༨༣) ཝཙནཾ པརསནྟཀབྷོཛནཝུཏྟནིཡམནཾ. ཏཏོ ཧཏྠཀོཝ ནོ ཏཀྐོཏི ཨཱཙརིཡོ.

པརམྤརབྷོཛནསིཀྑཱཔདཝཎྞནཱ ནིཊྛིཏཱ.

༤. ཀཱཎམཱཏཱསིཀྑཱཔདཝཎྞནཱ

༣༡-༣. པཊིཡཱལོཀནྟི པཙྪིམཾ དེསཾ. པཱུཝགཎནཱཡཱཏི ཨཏིརིཏྟཔཱུཝགཎནཱཡཱཏི ཨཏྠོ. སཙེ ‘‘ཨཔཱཐེཡྻཱདིཨཏྠཱཡ སཛྫིཏ’’ནྟི སཉྙཱཡ གཎྷཱཏི, ཨཙིཏྟཀཏྟཱ སིཀྑཱཔདསྶ ཨཱཔཏྟི ཨེཝ. ཨཐ ཨུགྒཧིཏཾ གཎྷཱཏི, ན མུཙྩཏིཡེཝ. ཨསཾཝིབྷཱགེ པན ཨནཱཔཏྟི ཨཀཔྤིཡཏྟཱ. ཨཙིཏྟཀཏཱ པཉྙཏྟིཛཱནནཱབྷཱཝེནེཝ, ན ཝཏྠུཛཱནནཱབྷཱཝེནཱཏི ཨེཀེ. ན, མཱཏིཀཱཊྛཀཐཱཡཾ ‘‘པཱཐེཡྻཱདིཨཏྠཱཡ སཛྫིཏབྷཱཝཛཱནན’’ནྟི ཨངྒེསུ ཨཝུཏྟཏྟཱ. པོརཱཎགཎྛིཔདེ པནེཝཾ ཝུཏྟཾ ‘‘ཨེཀེན ཝཱ ཨནེཀེཧི ཝཱ དྭཏྟིཔཏྟཔཱུརེསུ གཧིཏེསུ ཏེསཾ ཨནཱརོཙནེན ཝཱ སཡཾ ཝཱ ཛཱནིཏྭཱ ཡོ ཨཉྙཾ གཎྷཱཏི, ཏསྶ དུཀྐཊཾ. ཨེཀཏོ ཏཱིསུ, ཙཏཱུསུ ཝཱ པཝིཊྛེསུ ཨེཀེན ཙེ དྭེཔཏྟཔཱུརཱ གཧིཏཱ, དུཏིཡེ དྭེ གཎྷནྟེ པཋམོ ཙེ ན ནིཝཱརེཏི, པཋམསྶ པཱཙིཏྟིཡཾ. ནིཝཱརེཏི ཙེ, ཨནཱཔཏྟི, དུཏིཡསྶེཝ དུཀྐཊ’’ནྟི. སཙེ སཉྩིཙྩ ན ཝདཏི, པོརཱཎགཎྛིཔདེ ཝུཏྟནཡེན པཱཙིཏྟིཡཾ, མཱཏིཀཱཊྛཀཐཱཝསེན (ཀངྑཱ. ཨཊྛ. ཀཱཎམཱཏཱསིཀྑཱཔདཝཎྞནཱ) དུཀྐཊཾ. ‘‘ཨཏིརེཀཔཊིགྒཧཎ’’ནྟི ཏཏྠ པཉྩམཾ ཨངྒཾ ཝུཏྟཾ, ཏསྨཱ ཨཔྤཊིགྒཧིཏཏྟཱ ན པཱཙིཏྟིཡཾ, ཀཏྟབྦཱཀརཎཏོ པན དུཀྐཊཾ. ཨཉྙཐཱ ཀིརིཡཱཀིརིཡཾ ཨིདཾ ཨཱཔཛྫཏི, ཨནིཝཱརཎཾ, ཨནཱརོཙནཾ ཝཱ ཚཊྛངྒཾ ཝཏྟབྦཾ སིཡཱ. ཨེཀནིཀཱཡིཀཱནཾ ཝཱཏི ཨེཏྠ ‘‘ཨཱསནྣཝིཧཱརབྷིཀྑཱུ, ཨཱསནྣཨཱསནསཱལཱགཏཱ ཝཱ སཙེ ཝིསབྷཱགེཧི ཨཱནཱིཏཾ ན པཊིགྒཎྷནྟི, ‘ཨཱརཱམིཀཱདཱིནཾཡེཝ ཝཱ དཱཔེནྟཱི’ཏི ཛཱནཱཏི, ཡཏྠ པརིབྷོགཾ གཙྪཏི, ཏཏྠ དཱཏུཾ ཝཊྚཏཱི’’ཏི ཝུཏྟཾ. ‘‘དྭཏྟིཔཏྟཔཱུརཱ’ཏི ཝཙནཏོ པཙྪིཨཱདཱིསུ ཨདྷིཀམྤི གཎྷཏོ ཨནཱཔཏྟཱི’’ཏི ཀེཙི ཝིནཡདྷརམཱནིནོ ཝདནྟི, ཏཾ ཏེསཾཡེཝ ནིསཱིདཏུ, ཨཱཙརིཡཱ པན ‘‘པཙྪིཨཱདཱིསུཔི ཨུཀྐཊྛཔཏྟསྶ པམཱཎཝསེན དྭཏྟིཔཏྟཔཱུརཱ གཧེཏབྦཱ. ཨུཀྐཊྛཔརིཙྪེདཀཐཱ ཧེསཱ’’ཏི ཝདནྟི.

ཀཱཎམཱཏཱསིཀྑཱཔདཝཎྞནཱ ནིཊྛིཏཱ.

༥. པཋམཔཝཱརཎསིཀྑཱཔདཝཎྞནཱ

༢༣༦. ཡཱཝདཏྠཔཝཱརཎཱཡ ¶ ¶ པཝཱརིཏཱ ཀིཉྩཱཔི ‘‘པཝཱརིཏཱ’’ཨིཙྩེཝ ཨདྷིཔྤེཏཱ ཨཊྛུཔྤཏྟིཡཱཝ, ཨཐ ཁོ པཙྪིམཱཝ ཨིདྷཱདྷིཔྤེཏཱ.

༢༣༧. ‘‘ཨལམེཏཾ སབྦ’’ནྟི ཝུཏྟཏྟཱ ཨཏིརིཏྟཾ ནཱམ ཧོཏི. བྷིཀྑུསྶ ཨིདམྤི ཏེ ཨདྷིཀཾ, ཨིཏོ ཨཉྙཾ ན ལཙྪཏཱིཏི ཀིར ཨཏྠོ.

༢༣༨-༩. ‘‘ཨསནཾ པཉྙཱཡཏཱི’’ཏི ཨེཏེནེཝ ‘‘བྷུཏྟཱཝཱི’’ཏི ཨེཏསྶ སིདྡྷཏྟཱ ཝིསུཾ ཨཏྠསིདྡྷི ནཏྠི. ཡདི ཨཏྠི, ཨངྒཱནཾ ཚཀྐཏྟདསྶནནྟི. ཝུཏྟམྤི ཙེཏནྟིཨཱདི པཝཱརཎངྒཱནཾ པཉྩཀཏྟདསྶནཾ. ཝརཀོཏི ཡོ ཀོཙི ཝརཀོ. ‘‘པཝཱརཎཾ པན ཛནེཏིཡེཝཱཏི ཝིསུཾ སིཏྠཾ ཝོདཀཾ ཀརོནྟི, པཝཱརཎཾ ན ཛནེཏི. ཡཱགུཾ ཝཱ པིཝནྟོ པཋམཾ ཨུདཀཾ པིཝཏི, ཝཊྚཏི. ཨཝསིཊྛཾ ཧེཊྛཱསིཏྠཾ པཝཱརཎཾ ན ཛནེཏཱི’’ཏི ལིཁིཏཾ. ཨུཔཏིསྶཏྠེརོ ‘‘ཛནེཏིཡེཝཱ’’ཏི ཝདཏི, ཏཾ ན ཨིཙྪནྟི ཨཱཙརིཡཱ. བྷཛྫིཏཔིཊྛནྟི ཏཎྜུལཙུཎྞམེཝ. བྷཛྫིཏསཏྟུཡོ པིཎྜེཏྭཱ ཀཏམོདཀོ སཏྟུམོདཀོ.

‘‘ཡཱགུསིཏྠམཏྟཱནེཝ དྭེ…པེ… པཊིཀྑིཔཏི, ན པཝཱརེཏཱི’’ཏི ཝུཏྟཏྟཱ པརཙངྐམཙྪཱདཡོ པཀྑིཔིཏྭཱ པཀྐཡཱགུཾ པིཝནྟོ སཙེ ཨཉྙཾ ཏཱདིསཾཡེཝ པཊིཀྑིཔཏི, པཝཱརཎཱ ན ཧོཏཱིཏི ཀིར དྷམྨསིརིཏྠེརོ. སཙེ ཨཉྙཾ པཊིཀྑིཔཏི, ན པཝཱརེཏི. ཀསྨཱ? ཨསནསངྑཱཏསྶ ཝིཔྤཀཏབྷོཛནསྶཱབྷཱཝཏོ. བྷོཛནསཱལཱཡཾ བྷུཉྫནྟོ ཙེ, ཨཏྟནོ ཨཔཱཔུཎནཀོཊྛཱསཾ ཨབྷིཧཊཾ པཊིཀྑིཔཏི, ན པཝཱརེཏི. ཀཱམཾ པཊིཀྑིཔཏི, པཏྟེ པན ཨཱརཱམིཀོ ཨཱཀིརཏི, ཏཏོ བྷུཉྫིཏུཾ ན ཝཊྚཏི. ཨིདཉྷི བུདྡྷཔྤཊིཀུཊྛཨནེསནཱཡ ཨུཔྤནྣེཡེཝ སངྒཧཾ གཙྪཏི. ཡཐཱ ཧི སངྒྷཏོ ཨུདྡྷཊཔིཎྜཾ དུསྶཱིལོ དེཏི, ཏཾ པཊིཀྑིཔཏི, ན པཝཱརེཏི, ཨེཝཾསམྤདམིདཾ. ‘‘ཝིསབྷཱགོ ལཛྫཱི ཙེ དེཏི, ཏཾ ཏེན སམྦྷོགཾ ཨཀཏྟུཀཱམཏཱཡ པཊིཀྑིཔཏི, པཝཱརེཏཱིཏི ཨཔརེ’’ཏི ཝུཏྟཾ. པརིཝེསནཱཡཱཏི བྷཏྟགྒེ. ‘‘མཾསེན རསཾ, མཾསཉྩ རསཉྩ མཾསརསནྟི ཨཱཔཛྫནཏོ ‘མཾསརས’ནྟི ཝུཏྟེ པཊིཀྑེཔཏོ ཧོཏི, མཾསསྶ རསཾ མཾསརསནྟི ཝིགྒཧོ ནཱདྷིཔྤེཏོ’’ཏི ཝུཏྟཾ. མཾསཀརམྦཀོ ནཱམ…པེ… ཝཊྚཏཱིཏི སུདྡྷཡཱགུ ཨེཝ ཧོཏི. ཨཔྤཝཱརཎམིསྶཀཀརམྦཀོཡེཝ ཧོཏི, ཏསྨཱ ན པཝཱརེཏི, ཏེན ཝུཏྟཾ པརཏོ ‘‘ཨིདཉྩ ཀརམྦཀེན ན སམཱནེཏབྦ’’ནྟིཨཱདི, ཏསྨཱ ‘‘ཏཾ ཨབྷིཧརིཏྭཱ ¶ ཀཉྫིཡཾ གཎྷཐཱ’ཏི ཝདནྟཾ པཊིཀྑིཔཏི, པཝཱརཎཱ ན ཧོཏཱི’’ཏི ཙ ‘‘མིསྶཀཡཱགུཾ གཎྷཐཱ’ཏི ཨཝུཏྟཏྟཱ ‘སམྨིསྶིཏཾ ཝིསུཾ ¶ ཀཏྭཱ དེཏཱི’ཏི ཝུཏྟཏྟཱ’’ཏི ཙ ཝུཏྟཾ, ཡསྨཱ ཡཱགུམིསྶཀནྟི ཨེཏྠ པདདྭཡེ པཝཱརཎཱརཧསྶ ནཱམགྒཧཎཾ ནཏྠི, ཏསྨཱ ཏཏྲ ཙེ ཡཱགུ བཧུཏརཱ ཝཱ ཧོཏི སམསམཱ ཝཱ, ན པཝཱརེཏི. ཀསྨཱ? ཏཏྠ ཨབྷིཧཱརཀཔཊིཀྑེཔཀཱནཾ ཡཱགུསཉྙཏྟཱ. ཡཱགུ ཙེ མནྡཱ, བྷཏྟཾ བཧུཏརཾ, པཝཱརེཏི. ཀསྨཱ? ཏེསཾ ཨུབྷིནྣམྤི ཏཏྠ བྷིནྣསཉྙཏྟཱཏི ཏཀྐོ ཨཱཙརིཡསྶ. བྷཏྟམིསྶཀེ པཝཱརཎཱརཧསྶ ནཱམསྶ སབྦྷཱཝཏོ སབྦདཱ པཝཱརེཏི ཨེཝ. མིསྶཀེ པན ཝུཏྟནཡེན ཀཱརཎཾ ཝཏྟབྦཾ. ཝིསུཾ ཀཏྭཱ དེཏཱིཏི ཡཐཱ བྷཏྟསིཊྛཾ ན པཏཏི, ཏཐཱ གཱལ༹ྷཾ ཧཏྠེན པཱིལེ༹ཏྭཱ པརིསྶཱཝེཏྭཱ དེཏི.

ཨཀཔྤིཡཀཏནྟི ཨེཏྠ ‘‘ཀཔྤིཡཾ ཨཀཱརཱཔིཏེཧི ཀདལིཔྥལཱདཱིཧི སདྡྷིཾ ཨཏིརིཏྟཾ ཀཔྤིཡཾ ཀཱརཱཔེཏྭཱཔི ཏཾ ཀདལིཔྥལཱདིཾ ཋཔེཏྭཱ ཨཝསེསཾ བྷུཉྫིཏུཾ ཝཊྚཏི. ཨམིསྶཀརསཏྟཱ པུན ཏཱནི ཀཔྤིཡཾ ཀཱརཱཔེཏྭཱ ཨཉྙསྨིཾ བྷཱཛནེ ཋཔེཏྭཱ ཨཏིརིཏྟཾ ཀཱརེཏྭཱ བྷུཉྫིཏུཾ ཝཊྚཏི. ཀསྨཱ? པུབྦེ ཏེསུ ཝིནཡཀམྨསྶ ཨནཱརུལ༹ྷཏྟཱ’’ཏི ཝདནྟི. ‘‘བྷུཏྟཱཝིནཱ ཙ པཝཱརིཏེན ཨཱསནཱ ཝུཊྛིཏེན ཀཏ’’ནྟི ཝཙནཏོ བྷུཏྟཱཝིནཱ ཨཔྤཝཱརིཏེན ཨཱསནཱ ཝུཊྛིཏེན ཀཏྟབྦནྟི སིདྡྷཾ, ཏསྨཱ ‘‘པཱཏོཝ ཨདྡྷཱནཾ གཙྪནྟེསུ དྭཱིསུ ཨེཀོ པཝཱརིཏོ ཨཝུཊྛིཏོ ཏཏྠ ནིསཱིདཏི, སོ ཨིཏརེན པིཎྜཱཡ ཙརིཏྭཱ ལདྡྷཾ བྷིཀྑཾ ཨཏྟནཱ ཨབྷུཏྭཱཔི ‘ཨལམེཏཾ སབྦ’ནྟི ཀཱཏུཾ ལབྷཏི ཨེཝཱ’’ཏི ཝུཏྟཾ, ཏཾ སུཀྐཔཀྑེ ‘‘བྷུཏྟཱཝིནཱ ཀཏཾ ཧོཏཱི’’ཏི ཨིམིནཱཝ སིདྡྷཾ, ཏསྨིཾ པཀྑེ ཨཏྟནོ སཏྟངྒཱནི ན པཱུརེནྟི, ཀཎྷཔཀྑེ པཊིབྷཱགེན སཏྟ ཝུཏྟཱནཱིཏི ཝེདིཏབྦཾ. བྷུཏྟཱཝིནཱ ཨཔྤཝཱརིཏེན ཨཱསནཱ ཝུཊྛིཏེན, ཨཝུཊྛིཏེན ཝཱ ཀཏཾ ཧོཏི, ཝཊྚཏི. ‘‘པཝཱརིཏེན ཨཱསནཱ ཨཝུཊྛིཏེནེཝཱ’’ཏི ཨིམཾ པན ཨཏྠཝིཀཔྤཾ དཱིཔེཏུཾ ‘‘སཏྟངྒཱནི ཝུཏྟཱནཱི’’ཏིཔི ཝཏྟུཾ ཝཊྚཏི. སོ པུན ཀཱཏུཾ ན ལབྷཏི པཋམཾ ཀཏསྶ པུན ཏེནེཝ ཀཏྟབྦཔྤསངྒཏོ. ཡཉྩ ཨཀཏཾ, ཏཾ ཀཏྟབྦནྟི ཧི ཝུཏྟཾ. ཨཐ སོཝ པཋམོ པུན ཀཏྟུཀཱམོ ཧོཏི, ཨཉྙསྨིཾ བྷཱཛནེ པུབྦེ ཨཀཏཾ ཀཱཏུཾ ལབྷཏི. དུཏིཡོ པཋམབྷཱཛནེཔི ཀཱཏུཾ ལབྷཏི. ‘‘ཡེན ཨཀཏཾ, ཏེན ཀཱཏབྦ’’ནྟི ཧི ཝུཏྟཾ. ཨིམམེཝཏྠཾ སནྡྷཱཡ ‘‘ཡེན ཡཾ པཋམཾ ཀཔྤིཡཾ ཀཏཾ, ཏམེཝ སོ པུན ཀཱཏུཾ ན ལབྷཏི, ཨཉྙེན ཀཱཏབྦ’’ནྟི ¶ ལིཁིཏཾ. ཏཏྠ ཏནྟི ཏཾ པཋམཾ ཀཏནྟི ཨཏྠོ. པེསེཏྭཱ ཀཱརེཏབྦནྟི ཨེཏྠ ཨནུཔསམྤནྣོ ཙེ གཏོ, ཏཏྲཊྛེན ཨེཀེན བྷིཀྑུནཱ པཊིགྒཱཧེཏྭཱ ཨཔརེན ཀཱརེཏབྦནྟི ཏཏྠ ཨེཀོཝ ཨེཝམེཝ ཀཱཏུཾ ན ལབྷཏཱིཏི. ‘‘ཡཾ ཀིཉྩི གིལཱནཾ ཨུདྡིསྶཱ’ཏིཨཱདིཝཙནཏོ ཝིཧཱརཱདཱིསུ གིལཱནསྶ པཱཔུཎནཀོཊྛཱསམྤི གིལཱནཱཏིརིཏྟཾ ནཱམ, ཏསྨཱ ཝཊྚཏཱི’’ཏི ཝདནྟི. ཨཱཧཱརཏྠཱཡཱཏི ཝིཀཱལེ ཨེཝཱཏི ཨེཀེ.

༢༤༡. ཀཱཡཀམྨཾ ¶ ཨཛ྄ཛྷོཧརཎཏོ. ཝཙཱིཀམྨཾ ཝཱཙཱཡ ‘‘ཨཏིརིཏྟཾ ཀརོཐ བྷནྟེ’’ཏི ཨཀཱརཱཔནེནཱཏི ཝེདིཏབྦཾ.

པཋམཔཝཱརཎསིཀྑཱཔདཝཎྞནཱ ནིཊྛིཏཱ.

༦. དུཏིཡཔཝཱརཎསིཀྑཱཔདཝཎྞནཱ

༢༤༣. སཱདྷཱརཎམེཝཱཏི སབྦཔཝཱརཎཱནཾ སཱདྷཱརཎཾ ‘‘ཡཱཝཏྟཀཾ ཨིཙྪསཱི’’ཏི ཨིདཾ.

དུཏིཡཔཝཱརཎསིཀྑཱཔདཝཎྞནཱ ནིཊྛིཏཱ.

༧. ཝིཀཱལབྷོཛནསིཀྑཱཔདཝཎྞནཱ

༢༤༧-༩. ནཊཱནཾ ནཱཊཀཱནི ནཊནཱཊཀཱནི, སཱིཏཱཧརཎཱདཱིནི. མཱུལཉྩ ཏཾ ཁཱདནཱིཡཉྩཱཏི མཱུལཁཱདནཱིཡཾ. ཨེས ནཡོ སབྦཏྠ. པིཊྛནྟི ཙུཎྞཾ. ཁཱརཀམཱུལནྟི ཡཱུཔསམཱུལཾ. ཙཙྩུམཱུལཾ ནེལི༹ཡམཱུལཾ. ཏམྦཀཾ ཝཙཾ. ཏཎྜུལེཡྻཀཾ ཙཱུལ༹ཀུཧུ. ཝཏྠུལེཡྻཀཾ མཧཱཀུཧུ. ཝཛཀལི ནིཀོཊྛཾ. ཛཛ྄ཛྷརཱི ཧིརཏོ.

ཀོཊྛཾ ཛརཊྛཾ ཝུཙྩཏི. གཎྛི མུཧུཀུལམུདུ ཝིཙཡཏྠ ཝཛམུཛུ ཝདུལ༹ཝི.

ཝཛྫཡེཏིམེ ཀིཾསུཀཾ, ཧལིདྡི. ཀསེརུཀོ, ཀཊིབལཝནྟི ཏསྶ ནཱམཾ. ཨམྦཱཊཀཾ ཨམཱུལཀཾ པིཌྷལ ཀཀྐུལ. མསཱལུ ཀིནལ༹. ཨཱལུཝ ཀལི༹ ཏཌྜྷིཨལི༹ ཨལས ཀཊིསྶལ ནམེདཏི མེར. སིགྒུ སཱིརི ཀོལ༹ ཀཱལཀཾ ནེཀལ༹ཝི. ཁཱིརཝལླིཀནྡོ ཏུམཱུརོརིཡོ ཧོཏི. སངྑཏོ དྷོཝནམེཝ. ཨཡཾ ‘‘པརིསངྑཱརོ’’ཏི ལིཁིཏཾ. ཁཱིརཀཱཀོལཱི ཀིརིཀཝེལི༹. ཛཱིཝིཀཾ ཛཱིཝིཧི. ཨུསབྷཀ ཨུམྨསུཝིཡི.

ཧིནྟཱལཾ ¶ ཀིཏིལི. ཀུནྟཱལ ཏོཧོ ཏིལིསཏཱ པདིཀལི༹རོ པཊསེཝལཀལི༹. ཀརམནྡཀཾ ཀརམྦ དཎྜོཀིར ཨུདཀཛོཏི ཀཎྜཀོ. ‘‘སིངྒྷཏཀོཏིཔི ཝུཙྩཏཱི’’ཏི ལིཁིཏཾ. ཕགྒཝ ཧཀིལི༹. ནཏྟམཱལནྟི ཀརཉྫི.

སེལླུ ¶ ལོཧོལིཡཾ. ཀཱསམདྡཀ ཀུདུཝཝལི ཨནསིཀིན. ཨུམྨཱདིཡ མེལེལིདིཡ. ཙཱིནམུགྒོ ཝེནམུཏྟི ཧུརམུགྒ. རཱཛམཱསོ མཱཧཝིལིཏི. ཨགྒིམནྟོ མུཉྩི. སུནིཔཎྞཀོ ཏིཔིལཝནིནཱལི༹ཀཱ ཏིལཀ. བྷཱུམིཡཾ ཛཱཏལོཎཱིཏི ཨེཏྠ ལོཎཱིནཱམསྶ སཱདྷཱརཎཏྟཱ ‘‘བྷཱུམིཡ’’ནྟི ཝིསེསེཏྭཱ ཝུཏྟཾ. བྲཧྨཱིཔཏྟཾ དེམེཏེཡེ པཎསཱ. ‘‘དཱིཔཝཱསིནོ ཝདནྟཱི’’ཏི སིཐིལཾ ཀཏྭཱ ཀསྨཱ ཝུཏྟནྟི ཙེ? ‘‘ཁཱདནཱིཡཏྠཾ ཕརཏཱིཏི ལཀྑཎེན ཨསམཱནཏྟཱ’’ཏི ཝུཏྟཾ. པདེལིཝིནིཏེཀི. སུལསིཔཎྞནྟི ཏསཱཔལིཀཾ.

ཨགནྡྷིཀཔུཔྥཾ ཀརིསྶཡེཏི ཙེཀཝཱདིདཔུཔྥཾ ཙེལེཔཏིམལཾ. ཛཱིཝནྟཱིཔུཔྥཾ ཛཱིཝིཏནྡིགམལ. བཀུལ མུཐུཝལ. ཀུཡྻཀ པུནཔུནྣཱམཔུནྣརཱ, ཛཱཏིསུམན. ནཝམཱལིཀཱ ཙེཧེམལ.

ཏིནྟིཎིཀ ཀཙིནཱི ཝིལེཡི. མཱཏུལུངྒ ལཝནོ. པུསྶཕལ སུཔུལི. ཏིམྦརཱུསཀ ཏིགིབྦེརེཧིཏི སུསཏུདྷུཏ. ཏིཔུསཝཱཏིངྒཎ དྷུཏཏིཀེཎ པཊིཡི. ཙོཙ ཝརིཡིཡེལི. མོཙ ཨཏིརེལི. གོཊྛཕལཾ པཱུཝཕལནྟི ཨེཀེ. ཀོཊྛསེ ཀིར ཨཙྪིཝ.

ཨསམུསྶི བིམྦ ཨིཏི ཀེཙི. ཀཱསྨརཱིཏི སེཔཎྞི. ཨཏིཏེམེཏི ཀརིཡམེཏིསྶ. ཛཱཏིཕལཾ ཀཏཾམེཏི. ཀཊུཀཕལཾ ཏིརིརཀ.

ཏརུཎཕལཾ ཀིརིཨུཔུལུ. པོཀྑརཊྛི ཀིཉྩཀྑཊྛི. སིདྡྷཏྠཀཾ སཱསཔཾ སེཏཝཎྞཾ. རཱཛིཀཾ རཏྟཾ ཧོཏི.

ཧིངྒུཾ ཧིངྒུཛཏུནྟི སབྦཱཔི ཧིངྒུཝིཀཏིཡོ. ཨེཏྠ ཧིངྒུཛཏུ ནཱམ པཏྟསཱཁཱ པཙིཏྭཱ ཀཱཏབྦཱ. སཱཁཱ པཙིཏྭཱ ཀཏཱ སིཔཱཊིཀཱ. ཨཉྙེཧི མིསྶེཏྭཱ ཀཏཱཏི ཀེཙི. ཏཀཾ ཀཊྛཛནྟི ཨགྒིཀེལི༹ནི. ནིཀིཏིསྶཱཀཱལེསཡོ. ཏིམེར, ཏཀཔཏྟི པསཱཁཱཔཏྟེ པཙིཏྭཱ ཀཱཏབྦཱ. ‘‘ཏཀཔཎྞི སཱཝཏི ཨེཝ ཀཱཏབྦཱ’’ཏི ལིཁིཏཾ.

ཝིཀཱལབྷོཛནསིཀྑཱཔདཝཎྞནཱ ནིཊྛིཏཱ.

༨. སནྣིདྷིཀཱརཀསིཀྑཱཔདཝཎྞནཱ

༢༥༣. ཨཔརཛྫུ ¶ ¶ སནྣིདྷི ནཱམ ཧོཏཱིཏི ཨཏྠོ. ཨཛྫ པཊིགྒཧིཏནྟི ན ཀེཝལཾ པཊིགྒཧིཏམེཝ, ཨཐ ཁོ ཨུགྒཧིཏཀམྤི, ཏེནེཝ ཨཊྛཀཐཱཡཾ ‘‘པཊིགྒཎྷཱཏི, ཨཱཔཏྟི དུཀྐཊསྶཱཏི ཨེཝཾ སནྣིདྷིཀཏཾ ཡཾ ཀིཉྩི ཡཱཝཀཱལིཀཾ ཝཱ ཡཱམཀཱལིཀཾ ཝཱ ཨཛ྄ཛྷོཧརིཏུཀཱམཏཱཡ གཎྷནྟསྶ པཊིགྒཧཎེ ཏཱཝ ཨཱཔཏྟི དུཀྐཊསྶཱ’’ཏི ཝུཏྟཾ. ཡདི ཏཾ པཋམམེཝ པཊིགྒཧིཏཾ, ‘‘པཊིགྒཧཎེ ཏཱཝཱ’’ཏི ན ཝཏྟབྦཾ, ཏསྨཱ ཝེདིཏབྦམེཏཾ ‘‘ཨཏྟནོ ཀཱལེ གཧིཏཾ ཨཛྫ པཊིགྒཧིཏ’ནྟི ཝུཏྟ’’ནྟི.

ཨེཏྠཱཧ – ཡཐཱ པཉྩ བྷེསཛྫཱནི ཨུགྒཧིཏཀཱནི ཨནདྷིཔྤེཏཱནི. སཏྟཱཧཱཏིཀྐམེ ཨནཱཔཏྟི ཨནཛ྄ཛྷོཧརཎཱིཡཏྟཱ, ཏཐཱ ཨིདྷཱཔི ཨུགྒཧིཏཀཾ ནཱདྷིཔྤེཏནྟི? ཨེཏྠ ཝུཙྩཏི – བྷེསཛྫསིཀྑཱཔདེ (པཱརཱ. ༦༡༨ ཨཱདཡོ) ཨུགྒཧིཏཀཾ ནཱདྷིཔྤེཏནྟི ཡུཏྟཾ ཨཏྟནོ ཀཱལཱཏིཀྐམནམཏྟེན ཏཏྠ ཨཱཔཏྟིཔྤསངྒཏོ. ཨེཏྠ ན ཡུཏྟཾ ཨཏྟནོ ཀཱལཱཏིཀྐམནམཏྟེན ཨཱཔཏྟིཔྤསངྒཱབྷཱཝཏོ. ཨཛ྄ཛྷོཧརཎེནེཝ ཧི ཨེཏྠ ཨཱཔཏྟཱིཏི ཨདྷིཔྤཱཡོ, ཏསྨཱ ཨནུགཎྛིཔདམཏེན ཨཛྫ ཨུགྒཧེཏྭཱ པུནདིཝསེ བྷུཉྫནྟོ དྭེ ཨཱཔཏྟིཡོ ཨཱཔཛྫཏི.

ཏཏྲཱཡཾ ཝིཙཱརཎཱ – ཨཏྟནཱ བྷུཉྫིཏུཀཱམོ ཨཛྫ ཨུགྒཧེཏྭཱ པུནདིཝསེ བྷུཉྫཏི, དྭེ ཨཱཔཏྟིཡོ ཨཱཔཛྫཏི. སཱམཎེརཱདཱིནཾཡེཝ ཨཏྠཱཡ ཨུགྒཧེཏྭཱ གཧིཏཾ པུནདིཝསེ པཊིགྒཧེཏྭཱ བྷུཉྫནྟོ ཨཱཔཏྟིཡཱ ན ཀཱརེཏབྦོཏི. པཊིགྒཎྷཱཏི, ཨཱཔཏྟི དུཀྐཊསྶཱཏི ཨེཏྠཱཡམདྷིཔྤཱཡོ – སཙེ བེལཊྛསཱིསོ ཝིཡ དུཏིཡཏཏིཡཱདིདིཝསཏྠཱཡ ཨཛྫ པཊིགྒཧེཏྭཱ སཱམཎེརཱདཱིནཾ གོཔནཏྠཱཡ དེཏི, ཏསྶ པུནདིཝསེ ཨཛ྄ཛྷོཧརཎཏྠཾ པཊིགྒཧཎེ ཨཱཔཏྟི དུཀྐཊསྶཱཏི སམྦྷཝཏི. སཡམེཝ སཙེ ཏཾ གོཔེཏྭཱ ཋཔེཏི, པུནདིཝསེ པཏིཏཾ ཀཙཝརཾ དིསྭཱ ཝིམཏིཝསེན ཝཱ པཊིགྒཎྷཏོ པཊིགྒཧཎཏོཝ ཨཱཔཏྟི དུཀྐཊསྶཱཏི སམྦྷཝཏི. ནོ ཙེ པཊིགྒཎྷཱཏི, ཏཾ དུཀྐཊཾ ནཏྠི. ‘‘ཨིདཉྷི ‘ཨེཀཾ པཱདཾ ཨཏིཀྐཱམེཏི, ཨཱཔཏྟི ཐུལླཙྩཡསྶཱ’ཏིཨཱདི ཝིཡཱ’’ཏི ཝུཏྟཾ. ཡོ པན ཨེཀཔྤཧཱརེནེཝ དྭེཔི པཱདེ ཨཏིཀྐཱམེཏི, ཏསྶ ཏཾ ཐུལླཙྩཡཾ ནཏྠི, ཨེཝཾསམྤདམིདནྟི ཝེདིཏབྦཾ. ཨེཏྠ པཊིགྒཧིཏབྷཱཝཾ ཨཝིཛཧནྟམེཝ སནྣིདྷིཾ ¶ ཛནེཏཱིཏི དྷམྨསིརིཏྠེརོ, ཏཾ ‘‘པཊིགྒཎྷཱཏི, ཨཱཔཏྟི དུཀྐཊསྶཱ’’ཏི པཱལི༹ཡཱ ཝིརུཛ྄ཛྷཏི. ཀཔཱལེན པཱིཏོ པན སྣེཧོ ཨབྦོཧཱརིཀོ. ཀིཉྩཱཔི ཨུཎྷེ ཨོཏཱཔེནྟསྶ པགྒྷརཏི, ཏཐཱཔི ‘‘བྷེསཛྫསིཀྑཱཔདེ ཝིཡཱ’’ཏི ཝུཏྟཾ. ཨིཏརཐཱ ཀཔཱལེན པཱིཏཱ སཔྤིཨཱདཡོཔི སཏྟཱཧཱཏིཀྐམེ ཨཱཔཏྟིཾ ཛནེཡྻུནྟི. སཡཾ པཊིགྒཧེཏྭཱཏི ཨིདྷཱཔི པུབྦེ ཝུཏྟཝིདྷིཡེཝ. དུདྡྷོཏཔཏྟཀཐཱཔི ཨེཏེན སམེཏི ཝིཡ ¶ . ཨཱཧཱརཏྠཱཡཱཏི ཀཱལེཔི ལབྦྷཏི. པཀཏིཨཱམིསེཏི ཀཔྤིཡཱམིསེ. སཱམིསེན མུཁེན ཨཛ྄ཛྷོཧརཏོ དྭེཏི ‘‘ཧིཡྻོ པཊིགྒཧིཏཡཱམཀཱལིཀཾ ཨཛྫ པུརེབྷཏྟཾ སཱམིསེན མུཁེན ཨཛ྄ཛྷོཧརཏོ དྭེ པཱཙིཏྟིཡཱནཱི’’ཏི ལིཁིཏཾ. ཨཛྫ པཊིགྒཧིཏཾ ཡཱཝཀཱལིཀམྤི ཧི ཡཱམཱཏིཀྐནྟཔཱནཀེན སཾསཊྛཾ སནྣིདྷིཾ ཀརོཏི. ཨཀཔྤིཡམཾསེསུ མནུསྶམཾསེ ཐུལླཙྩཡཾ, སེསམཾསེ དུཀྐཊཉྩ ཝཌྜྷཏི.

༢༥༥. སཏྟཱཧཀཱལིཀཾ ཡཱཝཛཱིཝིཀཾ ཨཱཧཱརཏྠཱཡཱཏི ཀཱལེཔི དུཀྐཊམེཝ སནྣིདྷིཾ ཨནཱཔཛྫནཏོཏི ཀེཙི. ཏདཧུ པཊིགྒཧིཏཾ ཏདཧུ པུརེབྷཏྟཾ ཝཊྚཏཱིཏི ཙེ? ན, པཱལི༹ཡམྤི ཨཊྛཀཐཱཡམྤི ཝིསེསསྶ ནཏྠིཏཱཡ. བྷེསཛྫསིཀྑཱཔདེ པུརེབྷཏྟཾ ཡཐཱསུཁཾ པརིབྷུཉྫནཾ ཝུཏྟནྟི ཙེ? ཨཱཧཱརེ སཔྤིཨཱདི སངྒཧཾ ཡཱཏི, ཏེན ཏགྒཏིཀཝསེན ཝུཏྟཾ, ན བྷེསཛྫཝསེན ཝུཏྟནྟི ཨུཔཏིསྶོ.

སནྣིདྷིཀཱརཀསིཀྑཱཔདཝཎྞནཱ ནིཊྛིཏཱ.

༩. པཎཱིཏབྷོཛནསིཀྑཱཔདཝཎྞནཱ

༢༥༩. ཨཀཔྤིཡསཔྤིནཱཏི ཡེསཾ མཾསཾ ན ཀཔྤཏི, ཏེསཾ སཔྤིནཱ. ‘‘ཝསཱཏེལཉྷི ཋཔེཏྭཱ ཨཀཔྤིཡསཔྤི ནཱམ ནཏྠཱི’’ཏི ལིཁིཏཾ. ཝིསངྐེཏནྟི ཨེཏྠ ‘‘སཱུཔོདནཝིཉྙཏྟིཔི ན ཧོཏཱི’’ཏི ཝུཏྟཾ. ཀཱཡིཀཱནཱིཏི ཀཱཡེན ཨཱཔཛྫིཏབྦཱནི.

༢༦༡. མཧཱནཱམསིཀྑཱཔདེན ཀཱརེཏབྦོཏི སངྒྷཝསེན པཝཱརིཏེ བྷེསཛྫཏྠཱཡ སཔྤིཨཱདིཔཉྩཀཾ ཝིཉྙཱཔེཏི ཙེ, ཏཏྠ ‘‘ན བྷེསཛྫེན ཀརཎཱིཡེན ¶ བྷེསཛྫ’’ནྟི ཨེཏྠ སངྒཧཾ གཙྪཏི, ཏསྨཱ ‘‘ཏེན པཱཙིཏྟིཡ’’ནྟི ཝུཏྟཾ. པཱལི༹མུཏྟཀེསུ ‘‘བྷིཀྑུནཱིནམྤི དུཀྐཊ’’ནྟི ལིཁིཏཾ.

པཎཱིཏབྷོཛནསིཀྑཱཔདཝཎྞནཱ ནིཊྛིཏཱ.

༡༠. དནྟཔོནསིཀྑཱཔདཝཎྞནཱ

༢༦༤-༥. མུཁདྭཱརནྟི ཀཎྛནཱལི༹. ཨུཙྩཱརཎམཏྟནྟི ཨུཀྑིཔིཏབྦམཏྟཀཾ. ཀསཊཾ ཚཌྜེཏྭཱཏི ¶ སམུདཱཙཱརཝསེན, ཨཚཌྜིཏེཔི ‘‘ཝཊྚཏཱི’’ཏི ཝུཏྟཾ. ཧཏྠཔཱསཱཏིཀྐམནྟི དཱཡཀསྶ. བྷིཀྑུསྶ དེཏཱིཏི ཨཉྙསྶ བྷིཀྑུསྶ. ཀཉྫིཀནྟི ཡཾ ཀིཉྩི དྲཝཾ. པཏྟོ པཊིགྒཧེཏབྦོཏི བྷཱུམིཡཾ ཋཔིཏེ ཨབྷིཧཱརཱབྷཱཝཏོ. ‘‘ཡཐཱ པཋམཏརཾ པཏིཏཐེཝེ དོསོ ནཏྠི, ཏཐཱ ཨཱཀིརིཏྭཱ ཨཔནེནྟཱནཾ པཏིཏཐེཝེཔི ཨབྷིཧཊཏྟཱ ནེཝཏྠི དོསོ’’ཏི ལིཁིཏཾ. ཙརུཀེནཱཏི ཁུདྡཀཔིཎྜེན. ཛཱགརནྟསྶཔཱིཏི ‘‘ཨཔི-སདྡེན སུཏྟསྶཔཱི’’ཏི ལིཁིཏཾ. ཀེཙཱིཏི ཨབྷཡགིརིཝཱསིནོ. ཏེཧི ཀཱཡསཾསགྒེ ཀཱཡཔཊིབདྡྷེནཱཔི ཏཔྤཊིབདྡྷེནཱཔི ཐུལླཙྩཡཱཔཏྟི དསྶིཏཱ ཨེཝཱཏི ཨཏྠོ. ཀཱཡཔཊིབདྡྷཔཊིབདྡྷེནཱཏི ཝཙནམཏྟམེཝེཏཾ. ‘‘སཏྠཀེནཱཏི པཊིགྒཧིཏཀེནཱ’’ཏི ལིཁིཏཾ, ཏཾ དུལླིཁིཏཾ སཏིཔི མལེ པུན པཊིགྒཧེཏབྦཀིཙྩཱབྷཱཝཏོ. ཀེསཉྩི ཨཏྠཱཡཱཏི ཨནུཔསམྤནྣཱནཾ ཨཏྠཱཡ. ‘‘སཱམཎེརསྶ ཧཏྠཾ ཕུཊྛམཏྟམེཝ ཏཾ པརིཙྩཏྟ’’ནྟི ལིཁིཏཾ.

པཊིགྒཧཎུཔགབྷཱརཾ ནཱམ མཛ྄ཛྷིམཔུརིསེན ཨུཀྑིཔིཏབྦཀཾ. མཱུལཔཊིགྒཧཎམེཝ ཝཊྚཏཱིཏི ཨེཏྠ ‘‘མཙྪིཀཝཱརཎཏྠནྟི ཝུཏྟཏྟཱ ‘ཨབྷུཉྫནཏྠཱཡཱཔི པཊིགྒཧེཏྭཱ གཧིཏེ ཝཊྚཏཱི’’’ཏི ཡེ ཝདནྟི, ཏེ ཝཏྟབྦཱ ‘‘སཱིསམཀྑནཏེལཾ པཊིགྒཧེཏྭཱ ‘ཨིདཾ སཱིསམཀྑན’ནྟི ཨནཱབྷོགེནེཝ སཏྟཱཧཾ ཨཏིཀྐཱམེནྟསྶ ཀིཾ ནིསྶགྒིཡཾ བྷཝེཡྻཱ’’ཏིཨཱདི, སུཏྟཱདྷིཔྤཱཡོ པན ཨེཝཾ གཧེཏབྦོ ‘‘མཙྪིཀཝཱརཎཏྠཾ བཱིཛནྟསྶ ཏསྨིཾ ལགྒརཛཱདིམྷི པཏྟེ པཏིཏེ སུཁཾ པརིབྷུཉྫིཏུཾ སཀྐཱ’ཏི སཉྙཱཡ པུབྦེ པཊིགྒཧིཏབྦ’’ནྟི ཝུཏྟཾ. པརིཝཏྟནཀཐཱཡཾ ‘‘ཨམྷཱཀཾ ཏཎྜུལེསུ ཁཱིཎེསུ ཨེཏེཧི ཨམྷཱཀཾ ཧཏྠགཏེཧི སཱམཎེརསནྟཀེཧིཔི སཀྐཱ པཏིཊྛཔེཏུ’ནྟི བྷིཀྑཱུནཾ ཙིཏྟུཔྤཱདོ ཙེ སམྦྷཝཏི, ‘པརིཝཏྟནཾ སཱཏྠཀ’ནྟི ཨུཔཏིསྶཏྠེརོ’’ཏི ཝུཏྟཾ. ཡདི ཨེཝཾ སུདྡྷཙིཏྟཱནཾ ནིརཏྠཀནྟི ཨཱཔནྣམེཝ, ཏཐཱ ‘‘པཎྜིཏོ ཨེས སཱམཎེརོ པཏྟཔརིཝཏྟནཾ ཀཏྭཱ དསྶཏི, མཡམེཝ ཙ ཨིམསྶ ཝིསྶཱསེན ཝཱ ཡཱཙིཏྭཱ ¶ ཝཱ བྷུཉྫིསྶཱམཱ’’ཏི ཙིཏྟེ སཏི བྷུཉྫིཏུཾ ན ཝཊྚཏི ཀཏེཔི པརིཝཏྟནེཏི ཙ ཨཱཔནྣཾ, ཀིཾ བཧུནཱ. ནིརཔེཀྑེཧེཝ གཎྷིཏབྦཾ, ན སཱཔེཀྑེཧཱིཏི དསྶནཏྠཾ ཝུཏྟནྟི ཨཱཙརིཡོ. ཨཡམེཝཏྠོ ‘‘སཙེ པན སཀྐོཏི ཝིཏཀྐཾ སོདྷེཏུཾ, ཏཏོ ལདྡྷཾ ཁཱདིཏུམྤི ཝཊྚཏཱི’’ཏི ཝཙནེན སིདྡྷོཝ. ཨཱདྷཱརཀེ པཏྟོ ཋཔིཏོ ཧོཏི ཡཐཱཔཊིགྒཧིཏབྷཱཝེ ནིརཱལཡོ. སམུདྡོདཀེན ཨཔྤཊིགྒཧིཏཀེན. མེཎྜཀསྶ ཁཱིརཾ ཁཱིརཏྟཱཝ ཝཊྚཏི. ‘‘ཨཏྟནོ པན ཁཱིརཾ མུཁེནེཝ པིཝནྟསྶ ཨནཱཔཏྟཱིཏི དསྶེཏུཾ ཝུཏྟ’’ནྟི ཝུཏྟཾ. ‘‘སརཱིརནིསྶིཏམཧཱབྷཱུཏཱནི ཧི ཨིདྷཱདྷིཔྤེཏཱནཱི’’ཏི ལིཁིཏཾ, ཏདུབྷཡམྤི ‘‘ཀཔྤིཡམཾསཁཱིརཾ ཝཱ’’ཏིཨཱདིནཱ ནཡེན ཝིརུཛ྄ཛྷཏི.

ཨཔིཙ ‘‘ཨཔྤཊིགྒཧིཏབྷཱཛནེ ཨཉྙབྷིཀྑུསནྟཀེ ཨཏྟནོ པིཎྜཔཱཏཾ པཀྑིཔཏི, ‘ཏཾ ཐོཀ’ནྟི ཝཱ ཨཉྙེན ཝཱ ཀཱརཎེན ཝདཏི, ཏཾ སབྦེསཾ ན ཀཔྤཏི. ཀསྨཱ? ཝིནཡདུཀྐཊཏྟཱ ¶ . ཨཏྟནཱ པཊིགྒཧེཏྭཱ པཀྑིཔིཏབྦཾ ཝིནཡཝིདྷིཾ ཨཀཏྭཱ དུཀྐཊནྟི ཨདྷིཔྤཱཡོ. ཨེཝཾ ཏཱདིསཾ ཀིམཏྠཾ ན བྷུཉྫཏཱིཏི? ཨཊྛཀཐཱཡཾ ‘ཨུགྒཧིཏཀོ ཧོཏཱི’ཏི ཝུཏྟཏྟཱ. ཨེཝཉྷི ཏཏྠ ཝུཏྟཾ བྷཱུམིཡཾ ཝཱ བྷཱཛནེ ཝཱ ཕལཾ ཝཱ ཡཾ ཀིཉྩི ཨཱམིསཾ ཝཱ ཡཱཝཛཱིཝིཀམྤི ཨཔྤཊིགྒཧིཏཀཾ ཨཛཱནནྟོ ཨཱམསཏི, ན ཝཊྚཏི, ཨུགྒཧིཏཀཾ ཧོཏཱི’’ཏི ཨནུགཎྛིཔདེ ཝུཏྟཾ, ཏསྨཱ ཨིམསྶ མཏེན བྷིཀྑུ བྷིཀྑུསྶ སཙེ པཏྟེ ཨཔྤཊིགྒཧིཏེ པིཎྜཾ ཋཔེཏི, ཏཾ ཨཀཔྤིཡཾ ཨུགྒཧིཏཀནྟི སིདྡྷཾ. ཨཡམེཝཏྠོ ‘‘སཙེ ཨཏྟནོ ཝཱ བྷིཀྑཱུནཾ ཝཱ ཡཱགུཔཙནཀབྷཱཛནེ…པེ… ནིརཱམིསཾ ཀཏྭཱ པརིབྷུཉྫིཏབྦ’’ནྟི ཝཙནེན སཾསནྡིཏྭཱ ཀཐེཏབྦོ. ‘‘ཀཔྤིཡམཾསཁཱིརཾ ཝཱ’’ཏི པསངྒཝསེན ཝུཏྟཾ. དདྷི ཙེ པཊིལདྡྷཾ, ཏཉྩ ཨདྷིཔྤེཏནྟི ཀེཙི.

དནྟཔོནསིཀྑཱཔདཝཎྞནཱ ནིཊྛིཏཱ.

སམཏྟོ ཝཎྞནཱཀྐམེན བྷོཛནཝགྒོ ཙཏུཏྠོ.

༥. ཨཙེལཀཝགྒོ

༡. ཨཙེལཀསིཀྑཱཔདཝཎྞནཱ

༢༦༩. ཝིགྷཱསཱདཱནཾ ཨནྟརཱ པཱུཝལཱབྷེན ཨཉྙཏརཱ པརིབྦཱཛིཀཱ པཝིསིཏྭཱ ཋིཏཱ. དཱཔེཏཱིཏི ཨནུཔསམྤནྣེན.

ཨཙེལཀསིཀྑཱཔདཝཎྞནཱ ནིཊྛིཏཱ.

༢. ཨུཡྻོཛནསིཀྑཱཔདཝཎྞནཱ

༢༧༦. ཝིཛཧནྟསྶཱཏི ¶ ཨནཱདརཏྠེ སཱམིཝཙནཾ. ཨུཡྻོཛཀསྶ ཝིཛཧནྟསྶ སཏོ ཨཱཔཏྟི དུཀྐཊསྶཱཏིཔི ཨཏྠོ. ཨིདྷ ཨནུཔསམྤནྣོ ནཱམ སཱམཎེརོཝཱདྷིཔྤེཏོ.

ཨུཡྻོཛནསིཀྑཱཔདཝཎྞནཱ ནིཊྛིཏཱ.

༣. སབྷོཛནསིཀྑཱཔདཝཎྞནཱ

༢༨༠. སབྷོཛནེཏི ¶ ཨེཏྠ པཋམཝིཀཔྤོ ‘‘ཨིཏྠཱི ཙ པུརིསོ ཙཱ’’ཏི ཨིམིནཱ ཏཏིཡཔདེན ཡུཛྫཏི, དུཏིཡཝིཀཔྤོ པཋམེཧི དྭཱིཧི. ཀུལེཏི གྷརེ. ཨནུཔཝིསིཏྭཱ ནིསཱིདནཙིཏྟེན སཙིཏྟཀཾ.

སབྷོཛནསིཀྑཱཔདཝཎྞནཱ ནིཊྛིཏཱ.

༤. རཧོཔཊིཙྪནྣསིཀྑཱཔདཝཎྞནཱ

༢༨༤. ཨིདྷ པཉྩམཾ ཨུཔནནྡསྶ ཙཏུཏྠཾ ཧོཏི, ཏསྨཱ བྷིཀྑུནིཝགྒསྶ དསམཊྛཀཐཱཡཾ ཨུཔརི ཨུཔནནྡསྶ ‘‘ཏཏིཡསིཀྑཱཔདེནཱ’’ཏི ན པཱཋོ, ‘‘ཙཏུཏྠེནཱ’’ཏི པཱཋོཏི ཝེདིཏབྦོ.

རཧོཔཊིཙྪནྣསིཀྑཱཔདཝཎྞནཱ ནིཊྛིཏཱ.

༥. རཧོནིསཛྫསིཀྑཱཔདཝཎྞནཱ

༢༨༩. རཧོནིསཛྫསིཀྑཱཔདཾ ཨུཏྟཱནཏྠམེཝ.

༦. ཙཱརིཏྟསིཀྑཱཔདཝཎྞནཱ

༢༩༤. སབྷཏྟོཏི ནིམནྟནབྷཏྟོཏི པོརཱཎཱ.

པུརེབྷཏྟཉྩ པིཎྜཱཡ, ཙརིཏྭཱ ཡདི བྷུཉྫཏི;

སིཡཱ པརམྤརཱཔཏྟི, པཙྪཱབྷཏྟཾ ན སཱ སིཡཱ.

པཙྪཱབྷཏྟཉྩ ¶ གམིཀོ, པུབྦགེཧཾ ཡདི གཙྪེ;

ཨེཀེ ཨཱཔཏྟིཡེཝཱཏི, ཨནཱཔཏྟཱིཏི ཨེཀཙྩེ.

ཀུལནྟརསྶོཀྐམནེ ¶ , ཨཱཔཏྟིམཏཡོ ཧི ཏེ;

སམཱནབྷཏྟཔཙྩཱསཱ, ཨིཏི ཨཱཧུ ཨིདྷཱཔརེ.

མཏཱ གཎིཀབྷཏྟེན, སམེནྟི ནཾ ནིམནྟནེ;

ཝིསྶཛྫནཾ སམཱནནྟི, ཨེཀེ སམྨུཁཏཱཔརེ.

སནྣིཊྛཱནཏྠིཀེཧེཝ, ཝིཙཱརེཏབྦབྷེདཏོ;

ཝིཉྙཱུ ཙཱརིཏྟམིཙྩེཝ, སིཀྑཱཔདམིདཾ ཝིདཱུཏི.

ཙཱརིཏྟསིཀྑཱཔདཝཎྞནཱ ནིཊྛིཏཱ.

༧. མཧཱནཱམསིཀྑཱཔདཝཎྞནཱ

༣༡༠. ཀཱལནྟི སོ. ཡསྨཱ སངྒྷཔཝཱརཎཱཡམེཝཱཡཾ ཝིདྷི, ཏསྨཱ ‘‘ཉཱཏཀཱནཾ པཝཱརིཏཱན’’ནྟི ཝུཏྟཾ. ‘‘ཨིམིནཱ ཧི ཏཡཱ པཝཱརིཏམྷ, ཨམྷཱཀཉྩ ཨིམིནཱ ཙ ཨིམིནཱ ཙ ཨཏྠོ’’ཏི ཡཐཱབྷཱུཏཾ ཨཱཙིཀྑིཏྭཱ ཝིཉྙཱཔེཏུཾ གིལཱནོཝ ལབྷཏི. ཡཾ པན ཝུཏྟཾ པཎཱིཏབྷོཛནསིཀྑཱཔདེ ‘‘མཧཱནཱམསིཀྑཱཔདེན ཀཱརེཏབྦོ’’ཏི, ཏཾ སངྒྷཝསེན པཝཱརིཏཾ, བྷེསཛྫཏྠཱཡ སཔྤིཨཱདིབྷེསཛྫཔཉྩཀཾ ཝིཉྙཱཔེཏི ཙེ, ‘‘ན བྷེསཛྫེན ཀརཎཱིཡེན བྷེསཛྫཾ ཝིཉྙཱཔེཏཱི’ཏི ཝཙནེན པཱཙིཏྟིཡནྟི ཨཏྠོ’’ཏི (པཱཙི. ༣༠༩) ལིཁིཏཾ.

མཧཱནཱམསིཀྑཱཔདཝཎྞནཱ ནིཊྛིཏཱ.

༨. ཨུཡྻུཏྟསེནཱསིཀྑཱཔདཝཎྞནཱ

༣༡༡-༥. མཾ དིཊྛེནཱཏི མཡཱ དིཊྛེན, མམ དསྶནེན ཝཱ. ཨེཀམྤི སརཧཏྠཾ པུརིསནྟི ཨངྒཔརིཡཱཔནྣཾ.

ཨུཡྻུཏྟསེནཱསིཀྑཱཔདཝཎྞནཱ ནིཊྛིཏཱ.

༩. སེནཱཝཱསསིཀྑཱཔདཝཎྞནཱ

༣༡༩. ནཝམེ ¶ ¶ སེནཱཔརིཀྑེཔེན ཝཱ པརིཀྑེཔཱརཧཊྛཱནེན ཝཱ སཉྩརཎཊྛཱནཔརིཡནྟེན ཝཱ པརིཙྪིནྡིཏབྦཱ.

སེནཱཝཱསསིཀྑཱཔདཝཎྞནཱ ནིཊྛིཏཱ.

༡༠. ཨུཡྻོདྷིཀསིཀྑཱཔདཝཎྞནཱ

༣༢༤. དསམེ ཨེཀམེཀཾ དསྶནཱཡ གཙྪཏི, ཨཱཔཏྟི དུཀྐཊསྶ. ཡཏྠ ཋིཏོ པསྶཏི, ཨཱཔཏྟི པཱཙིཏྟིཡསྶཱཏིཨཱདི. ཨཊྛམེ པན ཨེཀམེཀཾ དསྶནཱཡ གཙྪཏི, ཨཱཔཏྟི དུཀྐཊསྶ. ཡཏྠ ཋིཏོ པསྶཏི, ཨཱཔཏྟི དུཀྐཊསྶཱཏི པཱལི༹. ཀསྨཱ? ཨངྒཔྤམཱཎཱབྷེདེཔི ཨནཱིཀཝིསེསཏོ. དསམེ པན ཨཊྛམངྒསྶ དསྶནེན དུཀྐཊཾ སིཡཱཏི.

ཨུཡྻོདྷིཀསིཀྑཱཔདཝཎྞནཱ ནིཊྛིཏཱ.

སམཏྟོ ཝཎྞནཱཀྐམེན ཨཙེལཀཝགྒོ པཉྩམོ.

༦. སུརཱཔཱནཝགྒོ

༡. སུརཱཔཱནསིཀྑཱཔདཝཎྞནཱ

ཨཱཡསྨཏོ ཡཾ མུནི སཱགཏསྶ,

མཧིདྡྷིཀཏྟསྶ ནིདསྶནེན;

པཱནསྶ དོསོ ཏསྶ དསྶནཏྠཾ,

པུབྦེཝ སོ བྷདྡཝཏིཾ པཡཱཏོ.

ཏསྨཱ ¶ པསྶཾ ནཱགམཔོཐཡིཏྭཱ,

ཝིནིསྶཊཾ སཱགཏཾ ཨིདྡྷིཡཱ ཙ;

ནཏོ སུརཱཔཱནནིསེདྷནཏྠཾ,

ཀོསམྦིམེཝཛ྄ཛྷགམཱཏི ཉེཡྻཾ.

༣༢༦-༨. པསུཔཱལཀཱཏི ¶ ཨཛཔཱལཀཱ. ཡེན མཛྫཏི, ཏསྶ བཱིཛཏོ པཊྛཱཡ. ཀེཙི ‘‘སཙིཏྟཀཔཀྑེ ཙིཏྟཾ ཨཀུསལམེཝཱཏི (ཀངྑཱ. ཨཊྛ. པཋམཔཱརཱཛིཀཝཎྞནཱ) ཝུཏྟཏྟཱ ཝཏྠུཾ ཛཱནིཏྭཱ པིཝཏོ ཨཀུསལ’’ནྟི ཝདནྟི. ཨེཝཾ སཏི ‘‘ཨཀུསལེནེཝ པཱཏབྦཏཱཡཱཏི ན ཝཏྟབྦ’’ནྟི ཝུཏྟེ ‘‘སཙིཏྟཀཔཀྑམེཝ སནྡྷཱཡཱ’’ཏི ཝདནྟི. ཨེཝཾ སཏི ‘‘ཀུསལཱཀུསལཱབྱཱཀཏཙིཏྟནྟི ཝཏྟབྦ’’ནྟི ཝུཏྟེ ཏམྤི ‘‘ཏབྦཧུལནཡེན ཝུཏྟ’’ནྟི ཝདནྟི. ཀངྑཱཝིཏརཎིཡམྤི ཨཝིསེསེཏྭཱ ‘‘ཨཀུསལཙིཏྟ’’ནྟི (ཀངྑཱ. ཨཊྛ. སུརཱཔཱནསིཀྑཱཔདཝཎྞནཱ) ཝུཏྟཾ, ཏསྨཱ ‘‘ཏཾ ཨཀུསལེནེཝ པིཝཏཱི’’ཏི ཝདནྟཱིཏི.

སུརཱཔཱནསིཀྑཱཔདཝཎྞནཱ ནིཊྛིཏཱ.

༢. ཨངྒུལིཔཏོདཀསིཀྑཱཔདཝཎྞནཱ

༣༣༠. ཨངྒུལིཔཏོདཀསིཀྑཱཔདཾ ཨུཏྟཱནཏྠམེཝ.

༣. ཧསདྷམྨསིཀྑཱཔདཝཎྞནཱ

༣༣༦. ཏཏིཡེ ཀཐཾ ཏིཝེདནཾ? ཧསཱདྷིཔྤཱཡེནེཝ ‘‘པརསྶ དུཀྑཾ ཨུཔྤཱདེསྶཱམཱི’’ཏི ཨུདཀཾ ཁིཔནྟསྶ དུཀྑཝེདནཾ. སེསཾ ཨུཏྟཱནཾ.

ཨིདཾ སཉྙཱཝིམོཀྑཉྩེ, ཏིཀཔཱཙིཏྟིཡཾ ཀཐཾ;

ཀཱིལི༹ཏཾཝ ཨཀཱིལཱ༹ཏི, མིཙྪཱགཱཧེན ཏཾ སིཡཱ.

ཨེཏྟཱཝཏཱ ཀཐཾ ཀཱིལཱ༹, ཨིཏི ཀཱིལཱ༹ཡཾ ཨེཝཱཡཾ;

ཨཀཱིལཱ༹སཉྙཱི ཧོཏེཏྠ, ཝིནཡཏྠཾ སམཱདཡེ.

ཨེཀནྟཱཀུསལོ ¶ ཡསྨཱ, ཀཱིལཱ༹ཡཱབྷིརཏམནོ;

ཏསྨཱ ཨཀུསལཾ ཙིཏྟཾ, ཨེཀམེཝེཏྠ ལབྦྷཏཱིཏི.

ཧསདྷམྨསིཀྑཱཔདཝཎྞནཱ ནིཊྛིཏཱ.

༤. ཨནཱདརིཡསིཀྑཱཔདཝཎྞནཱ

༣༤༤. ‘‘ལོཀཝཛྫཾ ཨཏིཀྐམིཏྭཱ ‘ཨིདཾ ཨམྷཱཀཾ ཨཱཙརིཡུགྒཧོ’ཏི ཝདནྟསྶ ན ཝཊྚཏཱི’’ཏི ལིཁིཏཾ. ཡཾ སཾཀིལིཊྛེནེཝ ཙིཏྟེན ཨཱཔཛྫཏི, ཡཾ ཝཱ ཨརིཡཔུགྒལོ ¶ ཨཔཉྙཏྟེ སིཀྑཱཔདེ ཨཛ྄ཛྷཱཙརཏི, ཨིདཾ ལོཀཝཛྫནྟི སབྦཏྠིཀཝཱདཱིཨཱདཱིནི ཨཱཙརིཡཀུལཱནི. ཏཏྠ དུཏིཡཏཏིཡཝིཀཔྤོ ཨིདྷ ན ཨདྷིཔྤེཏོ སེཁིཡཱནཾ ལོཀཝཛྫཏྟཱ.

གཱརཡ྄ཧོ ཨཱཙརིཡུགྒཧོཏི ཨེཏྠ ‘‘ཡསྨཱ ཨུཙྪུརསོ སཏྟཱཧཀཱལིཀོ, ཏསྶ ཀསཊོ ཡཱཝཛཱིཝིཀོ, དྭིནྣཾཡེཝ སམཝཱཡོ ཨུཙྪུཡཊྛི, ཏསྨཱ ཝིཀཱལེ ཨུཙྪུཡཊྛིཾ ཁཱདིཏུཾ ཝཊྚཏི གུལ༹ཧརཱིཊཀཾ ཝིཡཱ’ཏི ཨེཝམཱདིཀོ སམྤཏི ནིབྦཏྟོ གཱརཡ྄ཧཱཙརིཡཝཱདོ ན གཧེཏབྦོ’’ཏི ཙ, པཎྞཏྟིཝཛྫེ པན ཝཊྚཏཱིཏི ‘‘ན པཏྟཧཏྠེན ཀཝཱཊོ པཎཱམེཏབྦོ’ཏི ཨིམསྶ ‘ཡེན ཧཏྠེན པཏྟོ གཧིཏོ, ཏེན ཧཏྠེན ན པཎཱམེཏབྦོ, ཨིཏརེན པཎཱམེཏབྦོ’ཏི ཨཏྠཾ གཧེཏྭཱ ཏཐཱ ཨཱཙརནྟོ ན ཨཱཔཏྟིཡཱ ཀཱརེཏབྦོ. ‘ཏཐཱ བུདྡྷབོདྷིཙེཏིཡཱནཾ པུཔྥཾ གཎྷིཏུཾ ཝཊྚཏཱིཏི ཏཐཱ ཨཱཙརནྟོ’’ཏི ཙ. ཏཐཱ ཨཱཙརཏི ཨབྷཡགིརིཝཱསིཀོ. མཧཱཝིཧཱརཝཱསིནོ ཙེ ཨེཝཾ ཝདནྟི, ‘‘མཱ ཨེཝཾ ཝདཱ’’ཏི ཨཔསཱདེཏབྦོ. ཏེན ཝུཏྟཾ ‘‘སུཏྟཾ སུཏྟཱནུལོམཉྩ ཨུགྒཧིཏཀཱནཾཡེཝཱ’’ཏིཨཱདི. ‘‘ཨིདཾ སབྦཾ ཨུཔཏིསྶཏྠེརོ ཨཱཧཱ’’ཏི ཙ ཝུཏྟཾ. ‘‘སུཏྟཱནུལོམཾ ཨཊྛཀཐཱ’’ཏི ལིཁིཏཾ.

ཨནཱདརིཡསིཀྑཱཔདཝཎྞནཱ ནིཊྛིཏཱ.

༥. བྷིཾསཱཔནསིཀྑཱཔདཝཎྞནཱ

༣༤༥. བྷིཾསཱཔནསིཀྑཱཔདཾ ཨུཏྟཱནཏྠམེཝ.

༦. ཛོཏིསིཀྑཱཔདཝཎྞནཱ

༣༥༤. ‘‘ཝིསིབྦནཱཔེཀྑོ’’ཏི ¶ ཝཙནཏོ ཡསྶ ཨཔེཀྑཱ ནཏྠི, ཏསྶ ཨནཱཔཏྟི.

ཛོཏིསིཀྑཱཔདཝཎྞནཱ ནིཊྛིཏཱ.

༧. ནཧཱནསིཀྑཱཔདཝཎྞནཱ

༣༦༤. ནཧཱནསིཀྑཱཔདཾ ཨུཏྟཱནཏྠམེཝ.

༨. དུབྦཎྞཀརཎསིཀྑཱཔདཝཎྞནཱ

༣༦༨. ཨལབྷཱིཏི ¶ ལབྷོ. ཡཐཱ ‘‘པཙཏཱིཏི པཙོ, པཐཏཱིཏི པཐོ’’ཏི ཝུཙྩཏི, ཨེཝཾ ‘‘ལབྷཏཱིཏི ལབྷོ’’ཏི ཀསྨཱ ན ཝུཏྟཾ? པརིནིཊྛིཏལཱབྷསྶེཝ ཨིདྷཱདྷིཔྤེཏཏྟཱ. མགྒེཏི སིབྦིནིམགྒེ. ཀཔྤཀཏེན སདྡྷིཾ ཨཀཔྤཀཏཾ སིབྦེཏི. ཡཱཝཏཱ ཨདྷིཊྛཱནཾ ན ཝིཛཧཏི, ཏཱཝཏཱ པུབྦཾ ཀཔྤམེཝ. ཀཔྤཾ ན ཝིཛཧཏི ཙེ, པུན ཀཔྤཾ དཱཏབྦནྟི ཨཱཙརིཡསྶ ཏཀྐོ.

དུབྦཎྞཀརཎསིཀྑཱཔདཝཎྞནཱ ནིཊྛིཏཱ.

༩. ཝིཀཔྤནསིཀྑཱཔདཝཎྞནཱ

༣༧༤. པརིབྷོགོ ཨེཏྠ ཀཱཡཀམྨཾ. ཨཔཙྩུདྡྷཱརཎཾ ཝཙཱིཀམྨཾ.

ཝིཀཔྤནསིཀྑཱཔདཝཎྞནཱ ནིཊྛིཏཱ.

༡༠. ཙཱིཝརཱཔནིདྷཱནསིཀྑཱཔདཝཎྞནཱ

༣༧༩. དསམེ ཡསྨཱ ནིསཱིདནསནྠཏཾ ཙཱིཝརནིསཱིདནམྤཱིཏི ཨུབྷཡམྤི སདསམེཝ, ཏསྨཱ ཏཾ ཨུབྷཡམྤི ཨེཀཏོ ཀཏྭཱ ‘‘ནིསཱིདནཾ ནཱམ སདསཾ ཝུཙྩཏཱི’’ཏི ཨཱཧ. ཏཏྠཱཔི ཙཱིཝརགྒཧཎེན ཙཱིཝརནིསཱིདནཾ གཧིཏམེཝཱཏི ཨཏྠཏོ སནྠཏནིསཱིདནམེཝ ཝུཏྟཾ ཧོཏི. ཡདི ཨེཝཾ ‘‘ནིསཱིདནསནྠཏཾ ¶ ནཱམ སདསཾ ཝུཙྩཏཱི’’ཏི ཝཏྟབྦནྟི? ན, ཨིཏརསྶ ཨནིསཱིདནཨདསབྷཱཝཔྤསངྒཏོ. ཨེཏྠ ནིསཱིདནསནྠཏསྶ པཱཙིཏྟིཡཝཏྠུཏྟཱ ཨིཏརམྤི པཱཙིཏྟིཡཝཏྠུམེཝཱཏི ཝེདིཏབྦཾ ཏཛྫཱཏིཀཏྟཱ. སསྶཱམིཀེ སཱུཙིགྷརེ སཱུཙིགཎནཱཡ ཨཱཔཏྟིཡོཏི པོརཱཎཱ.

ཙཱིཝརཱཔནིདྷཱནསིཀྑཱཔདཝཎྞནཱ ནིཊྛིཏཱ.

སམཏྟོ ཝཎྞནཱཀྐམེན སུརཱཔཱནཝགྒོ ཚཊྛོ.

༧. སཔྤཱཎཀཝགྒོ

༡. སཉྩིཙྩཔཱཎསིཀྑཱཔདཝཎྞནཱ

༣༨༢. སཉྩིཙྩཔཱཎསིཀྑཱཔདཾ ¶ ཨུཏྟཱནཏྠམེཝ.

༢. སཔྤཱཎཀསིཀྑཱཔདཝཎྞནཱ

༣༨༧. ‘‘པཱཎོ ཨཏྠཱི’’ཏི ཛཱནནྟོཔི ‘‘མརིསྶནྟཱི’’ཏི ཨཝིཙཱརེཏྭཱ པིཝཏིཙེ, ཨནཱཔཏྟི.

ཛལེ པཀྑིཔནཾ པུཔྥཾ, ཛལཔྤཝེསནཾ ཨིདཾ;

ཨེཝཾ ཨུབྷིནྣཾ ནཱནཏྟཾ, ཉེཡྻཾ ཉཱཎཝཏཱ སདཱཏི.

སཔྤཱཎཀསིཀྑཱཔདཝཎྞནཱ ནིཊྛིཏཱ.

༣. ཨུཀྐོཊནསིཀྑཱཔདཝཎྞནཱ

༣༩༢. ཏཏིཡེ དྭཱདས ཨུཀྐོཊཱ ཝེདིཏབྦཱ. ཏཏྠ ཨཀཏཾ ཀམྨཾ, དུཀྐཊཾ ཀམྨཾ, པུན ཀཱཏབྦཾ ¶ ཀམྨནྟི ཨནུཝཱདཱདྷིཀརཎེ ལབྦྷནྟི. ཨནིཧཊཾ, དུནྣིཧཊཾ, ན པུན ཧརིཏབྦནྟི ཝིཝཱདཱདྷིཀརཎེ ལབྦྷནྟི, ཨཝིནིཙྪིཏཾ, དུཝིནིཙྪིཏཾ, པུན ཝིནིཙྪིཏབྦནྟི ཨཱཔཏྟཱདྷིཀརཎེ ལབྦྷནྟི. ཨཝཱུཔསནྟཾ, དུཝཱུཔསནྟཾ, པུན ཝཱུཔསམེཏབྦནྟི ཀིཙྩཱདྷིཀརཎེ ལབྦྷནྟཱིཏི ཨཊྛཀཐཱནཡོ, པཱལི༹ཡཾ པནེཏྠ མུཁམཏྟམེཝ དསྶིཏཾ.

ཨུཀྐོཊནསིཀྑཱཔདཝཎྞནཱ ནིཊྛིཏཱ.

༤. དུཊྛུལླསིཀྑཱཔདཝཎྞནཱ

༣༩༩. ‘‘པཱརཱཛིཀཱནཱིཏི ཨཏྠུདྡྷཱརཝསེན དསྶིཏཱནཱི’’ཏི ཀཐཾ ཝིཉྙཱཡཏཱིཏི ཙེ? པརིཝཱརཔཱལི༹ཏོ. ཝུཏྟཉྷི ཏཏྠ ‘‘ཨཱཔཏྟཱདྷིཀརཎཔཙྩཡཱ ཀཏི ཨཱཔཏྟིཡོ ཨཱཔཛྫཏི. ཨཱཔཏྟཱདྷིཀརཎཔཙྩཡཱ ཙཏསྶོ ཨཱཔཏྟིཡོ ཨཱཔཛྫཏི. བྷིཀྑུནཱི ཛཱནཾ པཱརཱཛིཀཾ དྷམྨཾ པཊིཙྪཱདེཏི, ཨཱཔཏྟི པཱརཱཛིཀསྶ. ཝེམཏིཀཱ པཊིཙྪཱདེཏི, ཨཱཔཏྟི ཐུལླཙྩཡསྶ. བྷིཀྑུ སངྒྷཱདིསེསཾ པཊིཙྪཱདེཏི, ཨཱཔཏྟི པཱཙིཏྟིཡསྶ. ཨཱཙཱརཝིཔཏྟིཾ པཊིཙྪཱདེཏི ¶ , ཨཱཔཏྟི དུཀྐཊསྶཱ’’ཏི (པརི. ༢༩༠). པཱརཱཛིཀཾ པཊིཙྪཱདེནྟོ བྷིཀྑུ ཨནཱཔཏྟི, ནོ ཨཱཔཏྟིཾ ཨཱཔཛྫཏི ཨཝུཏྟཏྟཱཏི ཙེ? ན, སཾཀིལིཊྛེན ཙིཏྟེན པཊིཙྪཱདནེ ཝིནཱ ཨཱཔཏྟིཡཱ ཨསམྦྷཝཏོ. དུཀྐཊཝཱརེ ཝཏྟབྦཱཔི པཱརཱཛིཀཱཔཏྟིཡོ པཋམཾ ཨཏྠུདྡྷཱརཝསེན སངྒྷཱདིསེསེཧི སཧ ཝུཏྟཏྟཱ ན སཀྐཱ པུན ཝཏྟུནྟི ན ཝུཏྟཱཏི ཝེདིཏབྦཱ.

ཡཱཝ ཀོཊི ན ཚིཛྫཏཱིཏི ཙེཏྠ ཡོ ཨནྟམསོ པཊིཙྪཱདནཏྠཾ ཨཉྙསྶ ཨཱརོཙེཏུ ཝཱ, མཱ ཝཱ, པཊིཙྪཱདནཙིཏྟེནེཝ ཨཱཔཏྟིཾ ཨཱཔནྣོ. ཏསྶ པུན ཨཉྙསྶ པཊིཙྪཱདནཏྠཾ ཨནཱརོཙནེནེཝ ན ཀོཊི ཚིནྣཱ ཧོཏི, ཀིཾ པུན པཊིནིཝཏྟིཏྭཱ ཝཙནེན པཡོཛནནྟི ན ཨནྟིམསྶ ཨནཱརོཙནེན ཚིནྣཱ ཧོཏི, ཨཔྤཊིཙྪཱདནེན ཨེཝ ཚིནྣཱ ཧོཏི, ཏཏོ ཨཔྤཊིཙྪཱདནཏྠཾ ཨཔུབྦསྶ ཨཱརོཙེཏབྦཾ, ཏཏོ པཊྛཱཡ ཀོཊི ཚིནྣཱ ཧོཏི, ཏདབྷཱཝོ པཊིནིཝཏྟིཏྭཱ ཨཔྤཊིཙྪཱདནཏྠཾ ཨཱརོཙེཏབྦཾ, ཨེཝམྤི ཀོཊི ཚིནྣཱ ཧོཏཱིཏི ཨེཝཾ ནོ པཊིབྷཱཏཱིཏི ཨཱཙརིཡོ. ཏཏིཡེན དུཏིཡསྶཱཏི ཨེཏྠ ‘‘དུཏིཡོ ནཱམ པཋམོ’’ཏི ཝདནྟཱནཾ ‘‘ཝཏྠུ པུགྒལོ ན ཝཏྟབྦོ’’ཏི ཝཱརིཏཏྟཱ ན སུནྡརཾ. ཨཉྙསྶ ཙཏུཏྠསྶ ཨཱརོཙནེཔི ན སུནྡརཾ. ཀསྨཱ? པུབྦེཝ སུཏྭཱ ཨཉྙསྶ ཨནཱརོཙིཏཏྟཱ. ‘‘སུཏེན ཨཉྙསྶ ཨཱརོཙེཏབྦཾ སིཡཱ’’ཏི ཝདནྟི.

དུཊྛུལླསིཀྑཱཔདཝཎྞནཱ ནིཊྛིཏཱ.

༥. ཨཱུནཝཱིསཏིཝསྶསིཀྑཱཔདཝཎྞནཱ

༤༠༤. པུནཔྤུནཾ ¶ ཨུཔྤཛྫནཏོ བཧུདྷཱ. ཧཱཡནཝཌྜྷནནྟི མཱཏུཀུཙྪིསྨིཾ ཙེ དྭཱདསནྣཾ མཱསཱནཾ ཨཱུནཏཱཡ ཧཱཡནཾ ཀཏཾ. པསཱུཏསྶ ཝཌྜྷནཾ ཀཱཏབྦཾ. མཱཏུཀུཙྪིསྨིཾ ཙེ ཝཌྜྷནཾ ཀཏཾ. པསཱུཏསྶ ཧཱཡནཾ ཀཱཏབྦཾ. ནིཀྑམནཱིཡཔུཎྞམཱསཱི ནཱམ སཱཝཎམཱསསྶ པུཎྞམཱསཱི. ‘‘པཱཊིཔདདིཝསེཏི དུཏིཡེ ཨུཔགཙྪཏི དིཝསེ’’ཏི ལིཁིཏཾ. སོ ཧི པསཱུཏདིཝསཏོ པཊྛཱཡ པརིཔུཎྞཝཱིསཏིཝསྶོ ཧོཏི. ཨཝསེསཱནཾ དྭིནྣཾ ཝསྶཱནཾ ཨདྷིཀདིཝསཱནི ཧོནྟེཝ, ཏསྨཱ ནིཀྐངྑཱ ཧུཏྭཱ ཨུཔསམྤཱདེནྟི. ཏཾ སནྡྷཱཡཱཏི གབྦྷཝསྶཉྩ པཝཱརེཏྭཱ ལདྡྷཝསྶཉྩ ཨགཎེཏྭཱ ཛཱཏདིཝསཏོ པཊྛཱཡ གཎེཏྭཱ ¶ ཨེཀཱུནཝཱིསཏིཝསྶཾ. ཨེཀཱུནཝཱིསཏིཝསྶོཏི ‘‘གབྦྷཝསྶཾ ཨེཝ པཧཱཡཱ’’ཏི ལིཁིཏཾ, ཏཾ དུལླིཁིཏཾ.

༤༠༦. ཨཉྙཾ ཨུཔསམྤཱདེཏཱིཏི ཨུཔཛ྄ཛྷཱཡོ ཝཱ ཨཱཙརིཡོ ཝཱ ཧུཏྭཱ ཨུཔསམྤཱདེཏི. ‘‘ཨོཔཔཱཏིཀསྶ སོལ༹སཝསྶུདྡེསིཀབྷཱཝཏོ པུན ཙཏྟཱརོ ཝསྶེ ཨཏིཀྐམིཏྭཱ ཨུཔསམྤདཱ ཀཱཏབྦཱ’’ཏི ཨཱཙརིཡཱ ཝདནྟཱིཏི ཀེཙི.

ཨཱུནཝཱིསཏིཝསྶསིཀྑཱཔདཝཎྞནཱ ནིཊྛིཏཱ.

༦. ཐེཡྻསཏྠསིཀྑཱཔདཝཎྞནཱ

༤༠༩. ཐེཡྻསཏྠོ ཙེ སུདྡྷམཱཏུགཱམོ དྭེ ཨཱཔཏྟིཡོ. ཨཐ བྷིཀྑུནིཡོ, སམཡོ རཀྑཏི. ཐེཡྻསཏྠབྷཱཝསྶ ཋཱནཾ ཀཏྭཱ རཀྑཎཱིཡཏྟཱ སཧདྷམྨིཀཱནཾ རཀྑཏིཡེཝཱཏི ཨེཀེ. ཐེཡྻབྷཱཝེ ན སཧདྷམྨིཀཏཱ, ཏསྨཱ ན རཀྑཏི ཨེཝཱཏི ཨེཀེ. ཨཔཱརཱཛིཀཐེཡྻབྷཱཝེ སཏི སཧདྷམྨིཀབྷཱཝོཏི ཙེ? ཨིཏརསྨིཾ ཨིཏརནྟི སམཡོ ཨནིསྶཊོ ཨཱཔཛྫཏི. བྷིཀྑུ ཐེཡྻསཏྠོ ཙེ, ཡཐཱཝཏྠུཀམེཝ. ཐེཡྻསཏྠེ ཐེཡྻསཏྠསཉྙཱི སདྡྷིཾ སཾཝིདྷཱཡཱཏི ཙ. ‘‘སདྡྷི’’ནྟི པདཾ ཀེསུཙི ནཏྠི, ཏཾ ཨནནུརཱུཔཾ. ཏཐཱ དུཏིཡེཔི.

ཐེཡྻསཏྠསིཀྑཱཔདཝཎྞནཱ ནིཊྛིཏཱ.

༧. སཾཝིདྷཱནསིཀྑཱཔདཝཎྞནཱ

༤༡༢. ‘‘ཏེན ¶ ཁོ པན སམཡེན ཨཉྙཏརཱ ཨིཏྠཱི’’ཏི ཙ པཱཋོ ཨཏྠི, ཀེསུཙི ནཏྠི. ནཏྠིབྷཱཝོ སུནྡརོ ‘‘ཏེན ཁོ སམཡེནཱ’’ཏི ཨདྷིཀཱརཏྟཱཏི ཀེཙི. ཨིདྷ ཨེཀཏོཨུཔསམྤནྣཱ, སིཀྑམཱནཱ, སཱམཎེརཱིཏི ཨིམཱཔི ཏིསྶོ སངྒཧཾ གཙྪནྟི. ཨིམཱསཾ པན སམཡོ རཀྑཏི, ཨཡམིམཱསཾ, མཱཏུགཱམསྶ ཙ ཝིསེསོ.

༤༡༤. ཨཔིཙེཏྠ ‘‘ཝིཉྙཱུ པཊིབལཱ’’ཏི ཝཙནཏོ ཨཔྤཊིབལཱ ཨནཱཔཏྟིཝཏྠུཀཱཏི ཨེཀེ, ཏཾ ན ཡུཏྟཾ དུཀྐཊཝཏྠུཀཏྟཱ. ‘‘བྷིཀྑུ སཾཝིདཧཏི, མཱཏུགཱམོ ¶ ན སཾཝིདཧཏི, ཨཱཔཏྟི དུཀྐཊསྶཱ’’ཏི ཧི ཝུཏྟཾ. ཏཐཱ ཧི ཨུཔཔརིཀྑིཏབྦཾ.

སཾཝིདྷཱནསིཀྑཱཔདཝཎྞནཱ ནིཊྛིཏཱ.

༨. ཨརིཊྛསིཀྑཱཔདཝཎྞནཱ

༤༡༧. གཧཊྛསྶཱཔི བྷིཀྑུནཱིདཱུསཀཀམྨཾ མོཀྑནྟརཱཡིཀམེཝ, ཏསྨཱ ཏསྶ པབྦཛྫཱཔི པཊིཀྑིཏྟཱ. ཝིཔཱཀནྟརཱཡིཀཱ ཨཧེཏུཀཏྟཱ. པུབྦེ སཉྩིཙྩ ཨཱཔནྣཱ སམྨུཊྛཱ སུདྡྷསཉྙིནོ ཨནྟརཱཡིཀཱ ཨེཝ. སེསཱཏི ཛཱཏིཀཱ. རསེནཱཏི བྷཱཝེན. ཨདྷིཀུཊྚནཊྛེནཱཏི ཨདྷིཀརཎཾ ཀཏྭཱ ཀུཊྚནཊྛེན ཚིནྡནཊྛེན. ཨསིསཱུནཱུཔམཱ ཀུསལདྷམྨཙྪེདནཊྛེན. སཏྟིསཱུལཱུཔམཱ ཙིཏྟཝིཏུདནཊྛེནཱཏི པོརཱཎཱ. ཨནཱཔཏྟིཔཱལི༹ཡཾ ‘‘ཨཱདིཀམྨིཀསྶཱ’’ཏི མུཁཱརུལ༹ྷཝསེན ལིཁིཏཾ.

ཨརིཊྛསིཀྑཱཔདཝཎྞནཱ ནིཊྛིཏཱ.

༩. ཨུཀྑིཏྟསམྦྷོགསིཀྑཱཔདཝཎྞནཱ

༤༢༥. ‘‘ཏཾ དིཊྛིཾ ཨཔྤཊིནིསྶཊྛེནཱཏི ཨིམིནཱ ལདྡྷིནཱནཱསཾཝཱསཀཏཾ དཱིཔེཏཱི’’ཏི ཝུཏྟཾ. ཏིཙིཏྟནྟི ཨེཏྠ ཝིཔཱཀཱབྱཱཀཏཙིཏྟེན སཧཝཱསེཡྻཾ ཀཔྤེཡྻཱཏི ཨེཝམཏྠོ དཊྛབྦོ. ཨཉྙཐཱ སཙིཏྟཀཏྟཱ སིཀྑཱཔདསྶ ཀིརིཡཱབྱཱཀཏཾ སནྡྷཱཡ ན ཡུཛྫཏི.

ཨུཀྑིཏྟསམྦྷོགསིཀྑཱཔདཝཎྞནཱ ནིཊྛིཏཱ.

༡༠. ཀཎྚཀསིཀྑཱཔདཝཎྞནཱ

༤༢༨. ཡཏྠ ¶ ཏེ ན པསྶཱམཱཏི ཏེཏི ཏཾ. ཨཐ ཝཱ ཏཝ རཱུཔཱདིཾ ན པསྶཱམ. ཨཡཾ སམཎུདྡེསོ པཱརཱཛིཀོ ཧོཏི. ‘‘སཙེ ཏཾ དིཊྛིཾ པཊིནིསྶཛྫཏི, སངྒྷསྶ ཨཱརོཙེཏྭཱ སངྒྷཱནུམཏིཡཱ པབྦཱཛེཏབྦོ’’ཏི པོརཱཎགཎྛིཔདེ ཝུཏྟཾ, ཏཾ ན ཡུཏྟཾ, དཎྜཀམྨནཱསནཱ ཧི ཨིདྷཱདྷིཔྤེཏཱ. ཡདི ¶ སོ པཱརཱཛིཀོ, ལིངྒནཱསནཱ ནཱམ སིཡཱ. ཏེ པཊིསེཝཏོ ནཱལཾ ཨནྟརཱཡཱཡཱཏི ཙ དིཊྛི སཏྠརི ཨསཏྠཱདིདིཊྛི ན ཧོཏི. སཙེ སཱ ཡསྶ ཨུཔྤཛྫཏི, སོ པཱརཱཛིཀོ ཧོཏི, ཏསྨིམྤི ཨེཝམེཝ པཊིཔཛྫིཏབྦཾ སཾཝརེ ཨཏིཊྛནྟོ ལིངྒནཱསནཱཡེཝ ནཱསེཏབྦོཏི ཨཱཙརིཡསྶ ཏཀྐོ.

ཀཎྚཀསིཀྑཱཔདཝཎྞནཱ ནིཊྛིཏཱ.

སམཏྟོ ཝཎྞནཱཀྐམེན སཔྤཱཎཀཝགྒོ སཏྟམོ.

༨. སཧདྷམྨིཀཝགྒོ

༡. སཧདྷམྨིཀསིཀྑཱཔདཝཎྞནཱ

༤༣༤. སཧདྷམྨིཀསིཀྑཱཔདཾ ཨུཏྟཱནཏྠམེཝ.

༢. ཝིལེཁནསིཀྑཱཔདཝཎྞནཱ

༤༣༨. ཨཱཔཏྟིཉྩ སཏིསམྨོསཱཡཱཏི ཨེཏྠ ཙ-སདྡོ ཀཏྟབྦཉྩ ན ཀརོཏཱིཏི དཱིཔེཏི, ན ཙཏྟཱརི ཨེཝཱཏི ཝུཏྟཾ ཧོཏི. རཊྛེཀདེསོ ཛནཔདོ. བུདྡྷཀཱལེ ཨརིཊྛཀཎྚཀཱ སཱསནཔཙྩཏྠིཀཱ. ‘‘ནཱལཾ ཨནྟརཱཡཱཡཱ’’ཏི ཝཙནེན ཧི ཏེ བྷགཝཏོ ཨསབྦཉྙུཏཾ དཱིཔེནྟི. པརིནིབྦུཏེ བྷགཝཏི དསཝཏྠུདཱིཔཀཱ ཝཛྫིཔུཏྟཀཱ. ཏེ ཧི ཝིནཡསཱསནཔཙྩཏྠིཀཱ. པརཱུཔཧཱརཱདིཝཱདཱ པན སུཏྟནྟཱབྷིདྷམྨཔྤཙྩཏྠིཀཱ. ཀེ པན ཏེ? ཨེཀཙྩེ མཧཱསངྒྷིཀཱདཡོ, ན སབྦེཏི དཱིཔནཏྠཾ ‘‘པརཱུཔཧཱརཱ…པེ… ཝཱདཱ’’ཏི ཝིསེསནཝཙནམཱཧ. ཏཏྠ ཡེ ཀུཧཀཱ པཱཔིཙྪཀཱ ¶ ཨབྷཱུཏཾ ཨུལླཔིཏྭཱ པཊིལདྡྷཝརབྷོཛནཱནི བྷུཉྫིཏྭཱ མུཊྛསྶཏཱི ནིདྡཾ ཨོཀྐམིཏྭཱ སུཀྐཝིསྶཊྛིཾ པཏྟཱ, ཨཉྙེཧི ཏཾ དིསྭཱ ‘‘ཨཏྠི ཨརཧཏོ སུཀྐཝིསྶཊྛཱི’’ཏི ཝུཏྟེ ‘‘མཱརཀཱཡིཀཱ ཨུཔསཾཧརནྟཱི’’ཏི ཝཏྭཱ ཛནཾ ཝཉྩེནྟི. ཡེ ཙ སམྨཱཔཊིཔནྣཱ ཨཀུཧཀཱ, ཏེཔི ཏཾ ཝཙནཾ སུཏྭཱ ཀེཙི ཏཾདིཊྛིཀཱ ཧོནྟི ཨདྷིམཱནིནོ ཙ. ཨཏྟནོ སུཀྐཝིསྶཊྛིཾ པསྶིཏྭཱཔི ནཱདྷིམུཙྩནྟི, ཨནདྷིགཏེ ཨདྷིཀཏསཉྙིནོཝ ཧོནྟི. ཏཐཱ ཨཏྠི ཨརཧཏོ ཨཉྙཱཎཀངྑཱཝིཏརཎཱ ནཱམགོཏྟཱདཱིསུ ཝིཡ སཙྩེསུ པརཝིཏརཎཱ པརེཧི པཉྙཏྟཱ ནཱམཱནཱིཏི ཨདྷིཔྤཱཡོ ཡཐཱསམྦྷཝཾ ཡོཛེཏབྦོ. ཏཏྠ ཝིནཡདྷརོ ‘‘ཨཊྛཱནམེཏཾ, བྷིཀྑཝེ, ཨནཝཀཱསོ ¶ , ཡཾ ཨརཧཏོ ཨསུཙི མུཙྩེཡྻ (ཀཐཱ. ༣༡༣; མཧཱཝ. ༣༥༣). དིཊྛདྷམྨཱ…པེ… ཨཔརཔྤཙྩཡཱ སཏྠུསཱསནེ’’ཏིཨཱདཱིནི (མཧཱཝ. ༣༠) སུཏྟཔདཱནི དསྶེཏྭཱ ཏེ སཱསནཔཙྩཏྠིཀེསུ ནིགྒཧིཏཾ ནིགྒཎྷཱཏཱིཏི ཨདྷིཔྤཱཡོ. ཨིཏརེ ‘‘པརིཡཏྟི མཱུལ’’ནྟི ཝཱདིནོ. ‘‘པཱཏིམོཀྑེ ཨུདྡིསྶམཱནེ’’ཏི ནིདཱནཝསེན ཝུཏྟཾ. ཏཐཱགཏསྶ ཝིབྷངྒཔདཱནི སིདྡྷཱནི. སིདྡྷེཡེཝ ཀིཾ ཨིམསྶ ཨངྒཱནི? གརཧིཏུཀཱམཏཱ ཨུཔསམྤནྣསྶ སནྟིཀེ སིཀྑཱཔདཝིཝཎྞནཉྩཱཏི.

ཝིལེཁནསིཀྑཱཔདཝཎྞནཱ ནིཊྛིཏཱ.

༣. མོཧནསིཀྑཱཔདཝཎྞནཱ

༤༤༤. མོཧནསིཀྑཱཔདཾ ཨུཏྟཱནཏྠམེཝ.

༤. པཧཱརསིཀྑཱཔདཝཎྞནཱ

༤༥༢. རཏྟཙིཏྟོཏི ཀཱཡསཾསགྒརཱགེན. ཝིཧེཋེཏུཀཱམཾ པན དིསྭཱ ‘‘སཙེ ཨཧཾ ཨིམཾ མཱརེམི, ནཏྠི མེ མོཀྑོ’’ཏི ཙིནྟེཏྭཱ ཀུཔིཏོ སཏྟསཉྙཾ པུརེཀྑཏྭཱ པཧཱརཾ དེཏི, ཏསྶ ཡཐཱཝཏྠུཀམེཝ.

པཧཱརསིཀྑཱཔདཝཎྞནཱ ནིཊྛིཏཱ.

༥. ཏལསཏྟིཀསིཀྑཱཔདཝཎྞནཱ

༤༥༦. ‘‘ཀཱཡཾ ཝཱ ཀཱཡཔཊིབདྡྷཾ ཝཱ’’ཏི (པཱཙི. ༤༥༦) ཝཙནཏོ ཀཱཡཱདཱིསུ ཡཾ ཨུཙྩཱརེཏི ¶ , ཏཾ ཏལཾ ནཱམ. ཏལམེཝ ཏལསཏྟིཀཾ. པོཐནསམཏྠཊྛེན སཏྟིཀནྟི ཨེཀེ. ཏཾ ‘‘ཨུཔྤལཔཏྟམྤཱི’’ཏི ཨིམིནཱ ནིཡམེཏི. ཨེཝཾ ཀུཔིཏཱ ཧི ཀོཔཝསེན པོཐནཱསམཏྠཏཾ ཨཝིཙཱརེཏྭཱ ཡཾ ཀིཉྩི ཧཏྠགཏཾ པཊིཀྑིཔནྟི, སུཁསམྥསྶམྤི ཧོཏུ, པཱཙིཏྟིཡམེཝ. ཡསྨཱ པཧརིཏུཀཱམཏཱཡ པཧཊེ པུརིམེན པཱཙིཏྟིཡཾ. ཀེཝལཾ ཨུཙྩཱརེཏུཀཱམཏཱཡ ཨུགྒིརཎམཏྟེ ཀཏེ ¶ ཨིམིནཱ པཱཙིཏྟིཡཾ. ཨིམིནཱ པན ཝིརཛ྄ཛྷིཏྭཱ པཧཱརོ དིནྣོ, ཏསྨཱ ན པཧརིཏུཀཱམཏཱཡ དིནྣཏྟཱ དུཀྐཊཾ. ཀིམིདཾ དུཀྐཊཾ པཧཱརཔཙྩཡཱ, ཨུདཱཧུ ཨུགྒིརཎཔཙྩཡཱཏི? པཧཱརཔཙྩཡཱ ཨེཝ དུཀྐཊཾ. པུརིམཾ ཨུགྒིརཎཔཙྩཡཱ པཱཙིཏྟིཡནྟི སདུཀྐཊཾ པཱཙིཏྟིཡཾ ཡུཛྫཏི. པུརིམཉྷི ཨུགྒིརཎཾ, པཙྪཱ པཧཱརོ. ན ཙ པཙྪིམཔཧཱརཾ ནིསྶཱཡ པུརིམཾ ཨུགྒིརཎཾ ཨནཱཔཏྟིཝཏྠུཀཾ བྷཝིཏུམརཧཏཱིཏི ནོ ཏཀྐོཏི ཨཱཙརིཡོ. ‘‘ཏེན པཧཱརེན ཧཏྠཱདཱིསུ ཡཾ ཀིཉྩི བྷིཛྫཏི, དུཀྐཊམེཝཱ’’ཏི ཨིམིནཱཔི པཧཱརཔཙྩཡཱ དུཀྐཊཾ. ཨུགྒིརཎཾ ཡཐཱཝཏྠུཀམེཝཱཏི སིདྡྷཾ, སུཊྛུ ཝཱིམཾསིཏབྦཾ. ‘‘ཏིརཙྪཱནཱདཱིནཾ ཨསུཙིཀརཎཱདཱིནི དིསྭཱ ཀུཛ྄ཛྷིཏྭཱཔི ཨུགྒིརནྟསྶ མོཀྑཱདྷིཔྤཱཡོ ཨེཝཱ’’ཏི ཝདནྟི.

ཏལསཏྟིཀསིཀྑཱཔདཝཎྞནཱ ནིཊྛིཏཱ.

༦. ཨམཱུལཀསིཀྑཱཔདཝཎྞནཱ

༤༦༢. ཨུཔསམྤནྣེ ཨནུཔསམྤནྣསཉྙཱི ཨམཱུལཀེན སངྒྷཱདིསེསེནཱཏི སུཀྐཝིསྶཊྛིཀཱཡསཾསགྒཱདིནཱ སངྒྷཱདིསེསཱཔཏྟིཡཱ ཝཏྠུནཱཏི ཝེདིཏབྦཾ. ན ཧི ཨནུཔསམྤནྣསྶ སངྒྷཱདིསེསཱཔཏྟི ནཱམ ཨཏྠི.

ཨམཱུལཀསིཀྑཱཔདཝཎྞནཱ ནིཊྛིཏཱ.

༧. སཉྩིཙྩསིཀྑཱཔདཝཎྞནཱ

༤༦༨. ཨཱུནཝཱིསཏིཝསྶོ མཉྙེཏི ཨེཏྠ སཡཾ སཉྙཱཡ ཏཐཱ ཨམཉྙནྟོ ཀུཀྐུཙྩུཔྤཱདནཏྠཾ ‘‘མཉྙེ’’ཏི ཝདནྟོ ཀིཾ མུསཱཝཱདེན ཀཱརེཏབྦོཏི? ན སིཡཱ ཨངྒསམྤཏྟིཡཱ, ན ཙ ཀེཝལཾ ‘‘མཉྙེ’’ཏི ཨིམིནཱ ནིཡམཏོ ཨངྒསམྤཏྟི ཧོཏི. པརམཏྠཝིཧིཏཾ ཀཏྠཙི ཧོཏི. ‘‘ཨུདཀཾ མཉྙེ ཨཱདིཏྟ’’ནྟིཨཱདིམྷི པརོ ཀུཀྐུཙྩཾ ཨུཔྤཱདེཏུ ཝཱ ¶ , མཱ ཝཱ, ཏཾ ཨཔྤམཱཎནྟི མཱཏིཀཱཊྛཀཐཱཡཾ (ཀངྑཱ. ཨཊྛ. སཉྩིཙྩསིཀྑཱཔདཝཎྞནཱ) ‘‘ཀུཀྐུཙྩུཔྤཱདན’’ནྟི ཏསྶ ཨདྷིཔྤཱཡཝསེན ཝུཏྟནྟི.

སཉྩིཙྩསིཀྑཱཔདཝཎྞནཱ ནིཊྛིཏཱ.

༨. ཨུཔསྶུཏིསིཀྑཱཔདཝཎྞནཱ

༤༧༣. ཨིམེསཾ ¶ སུཏྭཱཏི ཨེཏྠ ‘‘ཝཙན’’ནྟི པཱཋསེསོ. ཨེཀཔརིཙྪེདཱནཱིཏི སིཡཱ ཀིརིཡཱ སིཡཱ ཨཀིརིཡཱཏི ཨིམིནཱ ནཡེན ཨེཀཔརིཙྪེདཱནི. ཨེཏྠ ཀིཉྩཱཔི ཨཉྙཝཱདཀཔཙྩཡཱཔཏྟི ཀིརིཡཱ ཙ ཝིཧེསཀཔཙྩཡཱཔཏྟི ཨཀིརིཡཱ ཙ, ཏདུབྷཡཾ པན ཨེཀསིཀྑཱཔདནྟི ཀཏྭཱ ཏཾ ཨཉྙཝཱདཀསངྑཱཏཾ སིཀྑཱཔདཾ སིཡཱ ཀིརིཡཱ པཋམསྶ ཝསེན, སིཡཱ ཨཀིརིཡཱ དུཏིཡསྶ ཝསེནཱཏི ཨེཝམཏྠོ དཊྛབྦོ.

ཨུཔསྶུཏིསིཀྑཱཔདཝཎྞནཱ ནིཊྛིཏཱ.

༩. ཀམྨཔཊིབཱཧནསིཀྑཱཔདཝཎྞནཱ

༤༧༤. ‘‘དྷམྨིཀཱནཾ ཀམྨཱན’’ནྟི (པཱཙི. ༤༧༥) ཝཙནཏོ ཨེཀཙྩེ བྷིཀྑཱུ དྷམྨིཀཱནཾ ཀམྨཱནཾ ‘‘ཚནྡཾ དམྨཱི’’ཏི ཚནྡཾ དེནྟི, ཏཾ ཏེསཾ མཏིམཏྟམེཝ, ན པཊིཔཏྟི. ཨདྷམྨཾ ནིསྶཱཡ ཁིཡྻཏི, ཏཾ ཝཱ ཨུཀྐོཊེཏི, ཨནཱཔཏྟི ནེཝ ཧོཏཱིཏི? ན, ཏཐཱ ཚནྡདཱནཀཱལེ ཨཀཏྭཱ པཙྪཱ ཨདྷམྨཀམྨཁིཡྻནཱདིཔཙྩཡཱ ཨནཱཔཏྟིཝཱརེ ཝུཏྟཏྟཱ. ཨདྷམྨེན ཝཱ ཝགྒེན ཝཱ ན ཀམྨཱརཧསྶ ཝཱ ཀམྨཀརཎཔཙྩཡཱ ཨཱཔཏྟིམོཀྑཀརཎཏོ ཨཝིསེསམེཝ ཏཐཱཝཙནནྟི ཙེ? ན, ཚནྡདཱནཀཱལེ ཨདྷམྨཀམྨཀརཎཱནུམཏིཡཱ ཨབྷཱཝཏོ, ཀཱརཀསྶེཝ ཝཛྫཔྤསངྒཏོ ཙ. གཎསྶ དུཀྐཊནྟི ཙེ? པཱརིསུདྡྷིཚནྡདཱཡཀཱཝ ཏེ, ན གཎོ ཨཀམྨཔྤཏྟཏྟཱ, པརིཝཱརེཔི (པརི. ༤༨༢ ཨཱདཡོ) ཀམྨཝགྒེ ཀམྨཔྤཏྟཚནྡདཱཡཀཱ ཝིསུཾ ཝུཏྟཱ. ཏཐཱཔི ཨདྷམྨཀམྨསྶ ཚནྡོ ན དཱཏབྦོ དེནྟེ ཨཀཔྤིཡཱནུམཏིདུཀྐཊཏོ. ཏཏྠ ཧི ཡོཛནདུཀྐཊཏོ ན མུཙྩནྟཱིཏི ནོ ཏཀྐོཏི ཨཱཙརིཡོ.

ཀམྨཔཊིབཱཧནསིཀྑཱཔདཝཎྞནཱ ནིཊྛིཏཱ.

༡༠. ཚནྡཾཨདཏྭཱགམནསིཀྑཱཔདཝཎྞནཱ

༤༨༡. སནྣིཔཱཏཾ ¶ ཨནཱགནྟྭཱ ཙེ ཚནྡཾ ན དེཏི, ཨནཱཔཏྟཱིཏི ཨེཀེ. དུཀྐཊནྟི ཨེཀེ དྷམྨཀམྨནྟརཱཡཀརཎཱདྷིཔྤཱཡཏྟཱ. སངྒྷམཛ྄ཛྷེ ཚནྡཾ དཱཏུཾ ལབྷཏཱིཏི ¶ ཀེཙི. དིནྣཚནྡེ སངྒྷམཛ྄ཛྷཾ པཝིསིཏྭཱ པུན གཏེཔི ཚནྡོ ན པཊིཔྤསྶམྦྷེཡྻཱཏི ཙེ? པཊིཔྤསྶམྦྷཏི. ཀསྨཱ? ‘‘ཨཧཏྠཔཱསོ ཚནྡཱརཧོ’’ཏིཨཱདཱིཧི ཝིརུཛ྄ཛྷནཏོ. པཱལི༹ཡཾ པན དཱཏུཀཱམཏཱཡ ཧཏྠཔཱསཾ ཨཏིཀྐམནྟཾ སནྡྷཱཡ ཝུཏྟནྟི ཀེཙི.

ཚནྡཾཨདཏྭཱགམནསིཀྑཱཔདཝཎྞནཱ ནིཊྛིཏཱ.

༡༡. དུབྦལསིཀྑཱཔདཝཎྞནཱ

༤༨༤-༥. ཨདཱསཱིཏི ཨཔལོཀེཏྭཱ ཨདཱསི. བྷིཀྑཱུཏི ཨེཏྠ ཏེ ཚབྦགྒིཡཱ ཨཏྟཱནཾ པརིཝཛྫཡིཏྭཱ ‘‘སངྒྷོ’’ཏི ཨཝཏྭཱ ‘‘བྷིཀྑཱུ’’ཏི ཨཱཧཾསུ. པརིཎཱམེནྟཱིཏི ནེནྟི. ཏཏྠ ལཱབྷོཏི པདུདྡྷཱརཀརཎཾ ཨིདྷ ཨནདྷིཔྤེཏསྶཔི ཡསྶ ཀསྶཙི ཨཏྠུདྡྷཱརཝསེན ལཱབྷདཱིཔནཏྠཾ. ཙཱིཝརམེཝ ཧི ཨིདྷཱདྷིཔྤེཏཾ, ཏེནེཝ ‘‘ཨཉྙཾ པརིཀྑཱརཾ དིནྣཾ ཁཱིཡཏི, ཨཱཔཏྟི དུཀྐཊསྶཱ’’ཏི ཝུཏྟཾ. དིནྣནྟི ཙ པརིཀྑཱརནྟི ཙ བྷུམྨཏྠེ ཨུཔཡོགཝཙནཾ.

དུབྦལསིཀྑཱཔདཝཎྞནཱ ནིཊྛིཏཱ.

༡༢. པརིཎཱམནསིཀྑཱཔདཝཎྞནཱ

༤༩༡. ཉཱཏཀམྤི པརསྶ དཱཏུཀཱམཾ ཨཉྙསྶ དཱཔེཏི, ཨཱཔཏྟི ཨེཝ. སབྦཏྠ ཨཱཔུཙྪིཏྭཱ དཱཏུཀཱམཾ ཡཐཱསུཁཾ ཝིཙཱརེཏུཾ ལབྷཏི.

པརིཎཱམནསིཀྑཱཔདཝཎྞནཱ ནིཊྛིཏཱ.

སམཏྟོ ཝཎྞནཱཀྐམེན སཧདྷམྨིཀཝགྒོ ཨཊྛམོ.

༩. རཏནཝགྒོ

༡. ཨནྟེཔུརསིཀྑཱཔདཝཎྞནཱ

༤༩༤-༧. ཡཐཱ ¶ བྷགཝནྟཾ པཡིརུཔཱསཏི, ཨེཝམཱཀཱརེན ནཱརཧཏཱཡཾ པུརིསོ པཱཔོ ཧོཏུཾ, ན ཧོཏི པཱཔོཏི ཨཏྠོ, ཀཱརཎཏྠཾ ཝཱ. ཏནྟི ¶ ནིཔཱཏམཏྟཾ, ཡཏོཏི ཝཱ ཨཏྠོ. ཧཏྠིསམྨདྡནྟི སངྒྷཱཊསམྨདྡོ, ཨཀྐམནཾ ཙུཎྞཏཱཏི ཨཏྠོ.

༤༩༨. རཏནཾ ནཱམ ཨགྒམཧེསཱི, ཏཐཱཔི ཨིདྷ ཨཉྙཱཔི དེཝིགོཏྟཱ ན རཀྑཏི, ཨནཱཔཏྟིཝཱརེ ‘‘ན མཧེསཱི ཧོཏཱི’’ཏི ཝཙནཱབྷཱཝཏོ. སཙེ ཁཏྟིཡོཝ ཧོཏི, ནཱབྷིསིཏྟོ. ཨབྷིསིཏྟོཡེཝ ཧོཏི, ན ཁཏྟིཡོ རཀྑཏཱིཏི ཨཱཙརིཡོ. ཨནཱཔཏྟིཝཱརེ མཱཏིཀཱཊྛཀཐཱཡཾ ཨངྒབྷཱཝེན ཙ ཝུཏྟཏྟཱ ཨབྷིསིཏྟབྷཱཝོཝཔམཱཎཾ. སེསཾ ཨུཀྐཊྛཔརིཙྪེདོཏི ཨེཀེ.

༥༠༠-༥༠༡. ‘‘ན སཡནིགྷརེ སཡནིགྷརསཉྙཱི’’ཏི ཏིཀཙྪེདོཔི ཨེཏྠ ལབྦྷཏི. ན སཡནིགྷརཾ ནཱམ ཨཔརིཀྑིཏྟརུཀྑམཱུལཱདི.

ཨནྟེཔུརསིཀྑཱཔདཝཎྞནཱ ནིཊྛིཏཱ.

༢. རཏནསིཀྑཱཔདཝཎྞནཱ

༥༠༤. ‘‘ཨདྷིཝཱསེནྟུ གཧཔཏིནོ བྷཏྟ’’ནྟི ཙ ‘‘མེ གཧཔཏིནོ’’ཏི ཙ ཨཏྠི.

༥༠༦. ཀུརུནྡིཝཙནེན གྷརེཔི ཡདི བྷིཀྑཱུ ཨཱསངྐནྟི, ཏཏྠ ཋཏྭཱ ཨཱཙིཀྑིཏབྦནྟི ཝུཏྟཾ ཧོཏི. པཏིརཱུཔཱཏི ‘‘རཏནསམྨཏེ པཾསུཀཱུལགྒཧཎཾ ཝཱ རཏནེ ནིརུསྶུཀྐགམནཾ ཝཱ’’ཏི ལིཁིཏཾ. ‘‘ཏཱཝཀཱལིཀཝསེནཔི ཨནཱམཱསཾ པཊིགྒཎྷིཏུཾ ན ལབྷཏཱི’’ཏི ཝདནྟི. སམཱདཔེཏྭཱཏི ཡཱཙིཏྭཱ ‘‘ཨུདྡིསྶ ཨརིཡཱ ཏིཊྛནྟི, ཨེསཱ ཨརིཡཱན ཡཱཙནཱ’’ཏི (ཛཱ. ༡.༧.༥༩) ཝུཏྟནཡེན.

རཏནསིཀྑཱཔདཝཎྞནཱ ནིཊྛིཏཱ.

༣. ཝིཀཱལགཱམཔྤཝིསནསིཀྑཱཔདཝཎྞནཱ

༥༡༡-༢. ཨཧིནཱ ¶ ཌཊྛཝཏྠུམྷི སོ བྷིཀྑུ སནྟཾ བྷིཀྑུཾ ཨནཱཔུཙྪཱ གཏོ, ཏསྶ ཀུཀྐུཙྩཾ ཨུདཔཱདི. ཨདིནྣཱདཱནེ ཝུཏྟནཡེནཱཏི གཱམོ གཱམཱུཔཙཱརོཏི ཨིདཾ སནྡྷཱཡ ཝུཏྟཾ.

ཝིཀཱལགཱམཔྤཝིསནསིཀྑཱཔདཝཎྞནཱ ནིཊྛིཏཱ.

༤. སཱུཙིགྷརསིཀྑཱཔདཝཎྞནཱ

༥༡༧. ཏནྟི ¶ བྷེདནཀཾ. ཨསྶཱཏི པཱཙིཏྟིཡསྶ པཋམཾ བྷེདནཀཾ ཀཏྭཱ པཙྪཱ དེསེཏབྦཏྟཱ. ཨེས ནཡོ ཨིཏརེསུཔི.

༥༢༠. ཝཱསིཛཊེཏི ཝཱསིདཎྜཀེ.

སཱུཙིགྷརསིཀྑཱཔདཝཎྞནཱ ནིཊྛིཏཱ.

༥. མཉྩསིཀྑཱཔདཝཎྞནཱ

༥༢༡-༢. ‘‘ཨུཙྩེ མཉྩེ’’ཏི ཙ ‘‘ཨུཙྩཱ མཉྩེ’’ཏི ཙ ཀཏྠཙི. ཨཱཡཏོཏི ཝིཏྠཏོ. ཨཊྛངྒུལཔཱདཀནྟི བྷཱཝནཔུཾསཀཾ, ཨཊྛངྒུལཔྤམཱཎཾ པཱདཀཾ ཝཱ.

མཉྩསིཀྑཱཔདཝཎྞནཱ ནིཊྛིཏཱ.

༦. ཏཱུལོནདྡྷསིཀྑཱཔདཝཎྞནཱ

༥༢༨. པོཊཀིཏཱུལནྟི ཡཾ ཀིཉྩི ཏིཎཏཱུལཾ. པཊིལཱབྷེན ཨུདྡཱལེཏྭཱ པཱཙིཏྟིཡཾ དེསེཏབྦནྟི ཨེཏྠ ཀིཉྩཱཔི པཊིལཱབྷམཏྟེནེཝ པཱཙིཏྟིཡནྟི ཝིཡ དིསྶཏི, པརིབྷོགེཡེཝ པན ཨཱཔཏྟི དཊྛབྦཱ, ‘‘ཨཉྙེན ཀཏཾ པཊིལབྷིཏྭཱ པརིབྷུཉྫཏི, ཨཱཔཏྟི དུཀྐཊསྶཱ’’ཏི ཝཙནཾ ཨེཏྠ སཱདྷཀཾ.

ཏཱུལོནདྡྷསིཀྑཱཔདཝཎྞནཱ ནིཊྛིཏཱ.

༧. ནིསཱིདནསིཀྑཱཔདཝཎྞནཱ

༥༣༡. ཀིཉྩཱཔི ¶ ནིསཱིདནསྶ ཛཱཏི ན དིསྶཏི ཨེཏྠ, ཏཐཱཔི ཙཱིཝརཀྑནྡྷཀེ ཨནུཉྙཱཏཏྟཱ, ‘‘ནཝ ཙཱིཝརཱནི ཨདྷིཊྛཱཏབྦཱནཱི’’ཏི ཨེཏྠ ཙ པརིཡཱཔནྣཏྟཱ ཙཱིཝརཛཱཏིཡེཝསྶ ཛཱཏཱིཏི ཝེདིཏབྦཱ. ‘‘སནྠཏསདིསཾ སནྠརིཏྭཱཏི སདས’’ནྟི པུབྦེ ཝུཏྟནིསཱིདནསནྠཏཏྟཱ ཨུཔམེཏི. ལཱབྷེ སདསཾ, ཨལཱབྷེ ཨདསམྤི ¶ ཝཊྚཏཱིཏི ཨེཀེ, ཏཾ ན ཡུཏྟཾ. ‘‘ནིསཱིདནཾ ནཱམ སདསཾ ཝུཙྩཏཱི’’ཏི ཏསྶ སཎྛཱནནིཡམནཏོ.

ནིསཱིདནསིཀྑཱཔདཝཎྞནཱ ནིཊྛིཏཱ.

༨. ཀཎྜུཔཊིཙྪཱདིསིཀྑཱཔདཝཎྞནཱ

༥༣༩. ཡདི ཀཎྜུཔཊིཙྪཱདི ནཱམ ཨདྷོནཱབྷི ཨུབྦྷཛཱཎུམཎྜལཱ ཨུཔྤནྣཀཎྜུཔཱིལ༹ཀཱདིཔཊིཙྪཱདིཀཱ ཨདྷིཔྤེཏཱ, ཏསྶ སུགཏསྶ སུགཏཝིདཏྠིཡཱ དཱིགྷསོ ཙཏསྶོ ཝིདཏྠིཡོ ཏིརིཡཾ དྭེཏི ཨིདམྤི ཨཏིམཧནྟཾ པམཱཎཾ དིསྶཏི. སབྦོ ཧི པུརིསོ ཨཏྟནོ ཨཏྟནོ ཝིདཏྠིཡཱ སཏྟཝིདཏྠིཀོ ཧོཏི, སུགཏསྶ ཙ ཨེཀཱཝིདཏྠི མཛ྄ཛྷིམསྶ པུརིསསྶ ཏིསྶོ ཝིདཏྠིཡོ ཧོནྟི, ཏསྨཱ ཀཎྜུཔཊིཙྪཱདི པཀཏིཔུརིསསྶ པམཱཎཾ ཨཱཔཛྫཏི ཏིརིཡཾ, དཱིགྷསོ པན དིགུཎཾ ཨཱཔཛྫཏཱིཏི. ཨཱཔཛྫཏུ, ཨུཀྐཊྛཔརིཙྪེདོ ཏསྶཱ, ཙེ ཨིཙྪཏི, སབྦམྤི སརཱིརཾ པཊིཙྪཱདེསྶཏི, སབྦསརཱིརགཏསངྒྷཱཊི ཝིཡ བཧུགུཎཾ ཀཏྭཱ ནིཝཱསེཏུཀཱམོ ནིཝཱསེསྶཏཱིཏི ཨཡཾ བྷགཝཏོ ཨདྷིཔྤཱཡོ སིཡཱ.

ཀཎྜུཔཊིཙྪཱདིསིཀྑཱཔདཝཎྞནཱ ནིཊྛིཏཱ.

༩. ཝསྶིཀསཱཊིཀསིཀྑཱཔདཝཎྞནཱ

༥༤༢. ཝསྶིཀསཱཊིཀཱཔི ཨུཀྐཊྛཔཊིཙྪེདཝསེན ཨནུཉྙཱཏཱ. ཝསྶཀཱལེ ཀེཙི སངྒྷཱཊིཔརིབྷོགེནེཝ པརིབྷུཉྫིསྶནྟཱིཏི ཨཡཾ བྷགཝཏོ ཨདྷིཔྤཱཡོ སིཡཱ. ཀིཉྩཱཔི ཨིམིནཱ ཏཀྐེན ཨནུཉྙཱཏཱ, ‘‘ཨཔྤམཱཎིཀཱཡོ ཀཎྜུཔཊིཙྪཱདིཡོ དྷཱརེནྟི, ཝསྶིཀསཱཊིཀཱཡོ དྷཱརེནྟཱི’’ཏི ཨིམསྨིཾ ཝཏྠུསྨིཾ པཉྙཏྟཏྟཱ པན ཨཉྙཐཱ པུཎྞཔརིཙྪེདཏོ ཨདྷིཀཔྤམཱཎཱཡོ ཏེ བྷིཀྑཱུ ¶ དྷཱརེསུནྟི ཀཏྭཱ ཨེཏཔརམཏཱ ཏཱསཾ ཨནུཉྙཱཏཱཏི ཝེདིཏབྦཱ. ཨེསེཝ ནཡོ དསམེཔི.

ཝསྶིཀསཱཊིཀསིཀྑཱཔདཝཎྞནཱ ནིཊྛིཏཱ.

༡༠. ནནྡཏྠེརསིཀྑཱཔདཝཎྞནཱ

༥༥༡. ཏཏྠ ¶ བྷིསིཾ ཝཱ བིབྦོཧནཾ ཝཱ ཀརོཏཱིཏི དཱིགྷསོ བཧཱུནཾ བྷིཀྑཱུནཾ སཱདྷཱརཎཏྠཾ ཀརོཏཱིཏི ཡུཛྫཏི.

ནནྡཏྠེརསིཀྑཱཔདཝཎྞནཱ ནིཊྛིཏཱ.

སམཏྟོ ཝཎྞནཱཀྐམེན རཏནཝགྒོ ནཝམོ.

པཱཙིཏྟིཡཀཎྜཝཎྞནཱ ནིཊྛིཏཱ.

༦. པཱཊིདེསནཱིཡཀཎྜོ

༡. པཋམཔཱཊིདེསནཱིཡསིཀྑཱཔདཝཎྞནཱ

༥༥༣-༥. ‘‘པཊིདེསེཏབྦཱཀཱརདསྶན’’ནྟི ¶ ¶ ཨཊྛཀཐཱཡཾ ཝུཏྟཏྟཱ པཱལི༹ཡཾ ཨཱགཏཝསེནེཝ ཨཱཔཏྟི དེསེཏབྦཱ, ན ཨཉྙཐཱ. ‘‘ཨནྟརགྷརེ ཨནྟརགྷརསཉྙཱི’’ཏིཨཱདིནཱ ཙ ‘‘ཁཱདནཱིཡབྷོཛནཱིཡེ ཨཁཱདནཱིཡཨབྷོཛནཱིཡསཉྙཱི’’ཏིཨཱདིནཱ ཙ ‘‘བྷིཀྑུནིཡཱ ཨབྷིཀྑུནིསཉྙཱི’’ཏིཨཱདིནཱ ཙ ནཡེན ཨཔརེཔི ཏཡོ ཏིཀཙྪེདཱ ཡོཛེཏྭཱ དསྶེཏབྦཱ.

པཋམཔཱཊིདེསནཱིཡསིཀྑཱཔདཝཎྞནཱ ནིཊྛིཏཱ.

༢. དུཏིཡཔཱཊིདེསནཱིཡསིཀྑཱཔདཝཎྞནཱ

༥༥༩. ‘‘ནིམནྟིཏཱ བྷུཉྫནྟཱིཏི པཉྩནྣཾ བྷོཛནཱནཾ ཨཉྙཏརེན བྷོཛནེན ནིམནྟིཏཱ བྷུཉྫནྟཱི’’ཏི ཀིཉྩཱཔི ཝུཏྟཾ, ཨཐ ཁོ ཨཀཔྤིཡནིམནྟནེན ནིམནྟིཏཏཱ ཨེཏྠ ན ཨངྒཾ, མཱཏིཀཱཊྛཀཐཱཡཾ ཝཱ ཨིདྷ ཝཱ ཨནཱཔཏྟིཝཱརེ ལེསཱབྷཱཝཏོ, ཏསྨཱ ‘‘ནིམནྟིཏཱ’’ཏི པདསྶ ཨཏྠོ པུབྦེ ཨཱཙིཎྞཝསེནེཝ ཝུཏྟོ. ཨཔརེཔི ཏཡོ ཏིཀཙྪེདཱ ཡོཛེཏྭཱ དསྶེཏབྦཱ པདབྷཱཛནེ ཝུཏྟཏྟཱཏི ཝེདིཏབྦཾ. ཡཐཱ ཏཐཱ ཧི བྷུཉྫནྟཱནཾ ཏཱདིསཾ བྷིཀྑུནིཾ ཨཝཱརེནྟཱནཾ པཱཊིདེསནཱིཡམེཝ. ‘‘ཨེསཱ ཝོསཱསཏི ནཱམ, ཝོསཱསནྟཱི’’ཏི ཙ དུཝིདྷོ པཱཋོ. ‘‘ཨཛ྄ཛྷོཧཱརེ ཨཛ྄ཛྷོཧཱརེ’’ཏི ཝཙནེན པུན ‘‘གཱརཡ྄ཧཾ ཨཱཝུསོ དྷམྨ’’ནྟི ཨེཀཝཙནཾ ཝིརུདྡྷནྟི. པཋམཾ ཨཛ྄ཛྷོཧཱརེཡེཝ ཨཱཔནྣཾ སནྡྷཱཡ ཝུཏྟཾ, ཏཐཱ ཨཉྙཏྲཱཔི ཨཱགཙྪཏི ‘‘ཨཱཔཛྫིམྷཱ’’ཏི ཝཙནཏོ. ཨེཀེན བཧཱུནམྤི ཝཊྚཏཱིཏི ཀེཙི, ཏཾ ན སུནྡརཾ. ‘‘ཏེཧི བྷིཀྑཱུཧཱི’’ཏིཨཱདིནཱ པཱཋེ ཝུཏྟཏྟཱཏི མམ ཏཀྐོ. ཨེཀེན སཧེཝ ‘‘ཨཧཾ ཨཱཔཛྫི’’ནྟིཔི ཝཏྟབྦནྟི ཨེཀེན དྭཱིཧི ཏཱིཧི ¶ དེསེཏབྦཏོ, སབྦེཧི ཨེཝཾ ཝཏྟུཾ ཝཊྚཏི. ‘‘ཨཱཔཛྫིམྷཱཏི སཧེཝཱ’’ཏི ཝདནྟི. ཨེཀེན ཙེ ཨཝཱརིཏོ, ‘‘ཨཧཾ, ཨཱཝུསོ, གཱརཡ྄ཧཾ དྷམྨཾ ཨཱཔཛྫི’’ནྟིཔི ཝཏྟབྦཾ.

དུཏིཡཔཱཊིདེསནཱིཡསིཀྑཱཔདཝཎྞནཱ ནིཊྛིཏཱ.

༥༦༢-༥༧༠. ཏཏིཡཙཏུཏྠསིཀྑཱཔདཱནི ཨུཏྟཱནཏྠཱནིཡེཝ.

པཱཊིདེསནཱིཡཀཎྜཝཎྞནཱ ནིཊྛིཏཱ.

༧. སེཁིཡཀཎྜོ

༡. པརིམཎྜལཝགྒཝཎྞནཱ

༥༧༦. ‘‘སིཀྑིཏསིཀྑེནཱཏི ¶ ¶ ཙཏཱུཧི མགྒེཧཱི’’ཏི ཝུཏྟཾ. ཡསྨཱ ཨཊྛངྒུལམཏྟཾ ཨོཏཱརེཏྭཱ ནིཝཏྠམེཝ ནིསིནྣསྶ ཙཏུརངྒུལམཏྟཾ ཧོཏི, ཏསྨཱ ཨུབྷོཔེཏེ ཨཊྛཀཐཱཝཱདཱ ཨེཀཔརིཙྪེདཱ, ‘‘ཨཌྜྷཏེཡྻཧཏྠ’’ནྟི སུཁུམཾ, ཨེཀཔཏྟཾ ཝཱ སནྡྷཱཡ ཝུཏྟཾ. ཏཉྷི ཡཐཱཋཱནེན ཏིཊྛཏི. དུཔཊྚཾ སནྡྷཱཡ ‘‘དྭིཧཏྠཔྤམཱཎམྤཱི’’ཏི ཝུཏྟནྟི ཨུཔཏིསྶཏྠེརོ. ཨེཀཔཊྚཾ, དྭིཔཊྚཾ ཝཱ ཧེཊྛིམཔརིཙྪེདེན ‘‘དྭིཧཏྠཔྤམཱཎ’’ནྟི ཝུཏྟནྟི ཝེདིཏབྦཾ. ཝུཏྟཉྷི ནིསྶགྒིཡཨཊྛཀཐཱཡཾ ‘‘ཏིརིཡཾ དྭིཧཏྠོཔི ཝཊྚཏཱི’’ཏི, ཏཉྩ ཁོ ཨལཱབྷེ ཨེཝ ‘‘ཨལཱབྷེ ཏིརིཡཾ དྭིཧཏྠཔྤམཱཎམྤི ཝཊྚཏཱི’’ཏི ཝུཏྟཏྟཱ. ཨིདཾ སབྦཾ ཨདྷིཊྛཱནུཔགཾ སནྡྷཱཡ ཝུཏྟཾ. ཝིརུདྡྷཾ དིསྭཱ སཛྫེཏབྦཾ. ནོ ཙེ སཛྫེཏི, དུཀྐཊཾ. སཙིཏྟཀཾ པཎྞཏྟིཝིཛཱནནཙིཏྟེནེཝ ‘‘ཨནཱདརིཡཾ པཊིཙྩཱ’’ཏི ཝུཏྟཏྟཱ, ན ཝཏྠུཝིཛཱནནཙིཏྟེན ‘‘ཨིདམེཝཾ ཀཏ’’ནྟི ཛཱནཏོཔི ཨཱཔཏྟིཡཱ ཨབྷཱཝཏོ. ཕུསྶདེཝཏྠེརཝཱདོཔི ཨེཀེན པརིཡཱཡེན ཡུཛྫཏི. ཏཐཱ ཨུཔཏིསྶཏྠེརཝཱདོཔི. པཉྙཏྟེཔི སིཀྑཱཔདེ ཨཔཉྙཏྟེཔི ཡཾ པཀཏིཡཱ ཝཛྫཾ, ཏཾ ལོཀཝཛྫཾ. ཨིདཾ པན པཉྙཏྟེཡེཝ ཝཛྫཾ, ནཱཔཉྙཏྟེ, ཏསྨཱ ཨིཏརལོཀཝཛྫེན ཨསདིསཏྟཱ ན ལོཀཝཛྫཾ. པཎྞཏྟིཏོ པཊྛཱཡ ཝཛྫཏོ པཎྞཏྟིཝཛྫཾ. ཨནཱདརིཡཙིཏྟེནེཝ ཨཱཔཛྫིཏབྦཏྟཱ སཙིཏྟཀཾ, ཏསྶ ཙིཏྟསྶ ཏིཝེདནཏྟཱ ཏིཝེདནཾ. ཡསྨཱ ཨནཱདརིཡཙིཏྟཏཱ ནཱམ ཀེཝལཾ ཨཀུསལམེཝ, ཏཉྩ པཀཏིཡཱ ཝཛྫཾ, ཏསྨཱ ཨིདཾ ལོཀཝཛྫཾ. སཉྩིཙྩ ཝཱིཏིཀྐམནཾ ནཱམ དོམནསྶིཀསྶེཝ ཧོཏཱིཏི དུཀྑཝེདནཾ. གཎྛིཔདེ པན ‘‘པཱཎཱཏིཔཱཏཱདི ཝིཡ ནིཝཱསནཱདིདོསོ ལོཀགརཧིཏོ ན ཧོཏཱིཏི པཎྞཏྟིཝཛྫནྟི ཕུསྶདེཝཏྠེརོ’’ཏི ལིཁིཏཾ.

༥༧༧. ཝིཧཱརེཔཱིཏི བུདྡྷུཔཊྛཱནཱདིཀཱལེ, ཏསྨཱ ‘‘པཱརུཔིཏབྦ’’ནྟི ཨུཏྟརཱསངྒཀིཙྩཝསེན ཝུཏྟཾ. པཋམདུཏིཡསིཀྑཱཔདེསུ པརིལཱ༹ཧཱདིཔཙྩཡཱ ཀཔྤཏི, ན ཨནྟརགྷརཔཊིསཾཡུཏྟེསུ.

༥༨༢. ‘‘ཨེཀསྨིཾ ¶ ¶ པན ཋཱནེ ཋཏྭཱ’’ཏི ཨེཏྠ ‘‘གཙྪནྟོཔི པརིསྶཡཱབྷཱཝཾ ཨོལོཀེཏུཾ ལབྷཏིཡེཝ. ཏཐཱ གཱམེ པཱུཛ’’ནྟི ལིཁིཏཾ, ཏཾ པན ‘‘ཨེཀསྨིཾ ཋཱནེ ཋཏྭཱ’’ཏི ཝུཏྟཏྟཱ ཏཱདིསཾ ཨནྟརཱཡཾ སནྡྷཱཡ ཝུཏྟནྟི ཝེདིཏབྦཾ.

པརིམཎྜལཝགྒཝཎྞནཱ ནིཊྛིཏཱ.

༢. ཨུཛྫགྒྷིཀཝགྒཝཎྞནཱ

༥༨༦. ཧསནཱིཡསྨིནྟི ཧེཏྭཏྠེ བྷུམྨཾ, ཧསིཏབྦཝཏྠུཀཱརཎཱཏི ཨཏྠོ. ཨནྟརགྷརེ ཨུཙྩཱསདྡེན ཨནུམོདནཱདིཾ ཀརོནྟསྶ ཨནཱཔཏྟི ཀིར. ཏཐཱ ཧི མཧིནྡཏྠེརོཔི ཧཏྠིསཱལཱདཱིསུ མཧཱཛནསྶ ཀཐེསི.

༥༩༡. ཀེཙི བྷིཀྑཱུ ‘‘པརིཀྑཱརཊྛཔནམཏྟེན ཝཱསཱུཔགཏོ ཧོཏཱི’’ཏི ཝདནྟི, ཏཾ ཏེསཾ མཏིམཏྟམེཝ. བྷིཀྑུནིཡོ ཙེ ཝཱསཱུཔགཱ ཧོནྟི, བྷིཀྑུནུཔསྶཡོཝ ཀཔྤིཡབྷཱུམི. ‘‘ཡཏྠ བྷིཀྑུནིཡོ ཨེཀརཏྟམྤི ཝསནྟི, ཨཡཾ བྷིཀྑུནུཔསྶཡོ’’ཏི (པཱཙི. ༡༦༡) ཝཙནཏོ ཏཱསཾ སམཱིཔཾ ཝཱ ཏཱཧི གཧིཏཝཱསཱགཱརཾ ཝཱ ‘‘གཙྪཱམཱི’’ཏི གཙྪཏོ ཡཐཱསུཁཾ གནྟུཾ ཝཊྚཏི. ན ཧི ཏཱཝཏཱ ཏཾ གྷརཾ ཨནྟརགྷརསངྑྱཾ གཙྪཏཱིཏི ནོ ཏཀྐོཏི ཨཱཙརིཡོ.

ཨུཛྫགྒྷིཀཝགྒཝཎྞནཱ ནིཊྛིཏཱ.

༣. ཁམྦྷཀཏཝགྒཝཎྞནཱ

༦༠༤. སཱུཔོ པཏྟཔྤམཱཎཝཎྞནཱཡཾ ཝུཏྟཱཀཱརོ. ཨོལོཎཱི ཝུཙྩཏི ཀུདྷིཏཾ, གོརསཏོ པཱུརཱ ཐཱུཔིཏོཏི ཨཏྠོ.

༦༠༥. ཧེཊྛཱ ཨོརོཧཏཱིཏི ཨེཏྠ ‘‘ཨོརོཧནཔྤམཱཎེ སཏི ཨེཀདེསེ ཐཱུཔཱིཀཏེཔི ཨནཱཔཏྟཱི’’ཏི ཝདནྟི. ‘‘པཏྟསྶ པན ཧེཊྛཱ ཙ ཨུཔརི ཙ པདུམིནིཔཎྞཱདཱིཧི པཊིཙྪཱདེཏྭཱ ཨོདཧནྟིཡཱ ལདྡྷཾ ནཱམ ཝཊྚཏཱི’’ཏི ཙ ཝདནྟི. ཨེཏྠ ‘‘ཡསྨཱ ‘སམཏིཏྟིཀོ པིཎྜཔཱཏོ པཊིགྒཧེཏབྦོ’ཏི ཝཙནཾ པིཎྜཔཱཏོ སམཔུཎྞོ ¶ པཊིགྒཧེཏབྦོཏི དཱིཔེཏི, ཏསྨཱ ཨཏྟནོ ཧཏྠགཏེ པཏྟེ པིཎྜཔཱཏོ དིཡྻམཱནོ ཐཱུཔཱིཀཏོཔི ཙེ ཧོཏི, ཝཊྚཏཱིཏི དཱིཔེཏི. ‘ཐཱུཔཱིཀཏཾ པིཎྜཔཱཏཾ ¶ པཊིགྒཎྷཱཏི, ཨཱཔཏྟི དུཀྐཊསྶཱ’ཏི ཧི ཝཙནཾ པཋམཾ ཐཱུཔཱིཀཏཾ པིཎྜཔཱཏཾ པཙྪཱ པཊིགྒཎྷཏོ, ཨཱཔཏྟཱིཏི དཱིཔེཏི. པཏྟེན པཊིགྒཎྷཏོ ཙེཔི ཐཱུཔཱིཀཏཾ ཧོཏི, ཝཊྚཏི ཨཐཱུཔཱིཀཏསྶ པཊིགྒཧིཏཏྟཱ. པཡོགོ པན ནཏྠི ཨཉྙཏྲ པུབྦདེསཱ’’ཏི ཙ ‘‘སམཏིཏྟིཀནྟི ཝཱ བྷཱཝནཔུཾསཀ’’ནྟི ཙ ཝདནྟི, ཏསྨཱ ཝིཙཱརེཏྭཱ གཧེཏབྦཾ.

ཁམྦྷཀཏཝགྒཝཎྞནཱ ནིཊྛིཏཱ.

༤. སཀྐཙྩཝགྒཝཎྞནཱ

༦༠༩. སཱུཔོདནཝིཉྙཏྟིསིཀྑཱཔདེ ‘‘སཱུཔོ ནཱམ དྭེ སཱུཔཱ’’ཏི ན ཝུཏྟཾ སཱུཔགྒཧཎེན པཎཱིཏབྷོཛནེཧི ཨཝསེསཱནཾ སབྦབྷོཛནཱནཾ སངྒཎྷནཏྠཾ. ཨནཱཔཏྟིཝཱརེ ཙསྶ ‘‘ཉཱཏཀཱནཾ པཝཱརིཏཱནཾ ཨཉྙསྶཏྠཱཡ ཨཏྟནོ དྷནེནཱ’’ཏི ཨིདཾ ཨདྷིཀཾ. ཀཏྠཙི པོཏྠཀེ ‘‘ཨནཱཔཏྟི ཨསཉྩིཙྩ ཨསཏིཡཱ ཨཛཱནནྟསྶ གིལཱནསྶ ཨཱཔདཱསཱུ’’ཏི ཨེཏྟཀམེཝ ཝུཏྟཾ, ཏཾ ན, ‘‘སམསཱུཔཀཾ པིཎྜཔཱཏཾ བྷུཉྫིསྶཱམཱི’’ཏི ཨིམསྶ ཨནཱཔཏྟིཝཱརེ ‘‘ཨཉྙསྶཏྠཱཡཱ’’ཏི ཀཏྠཙི ལིཁིཏཾ, ཏཉྩ པམཱདཝསེན ལིཁིཏཾ. ‘‘མུཁེ པཀྑིཔིཏྭཱ པུན ཝིཔྤཊིསཱརཱི ཧུཏྭཱ ཨོགིལིཏུཀཱམསྶཔི སཧསཱ ཙེ པཝིསཏི, ཨེཏྠ ‘ཨསཉྩིཙྩཱ’ཏི ཝུཙྩཏི. ཝིཉྙཏྟམྤི ཨཝིཉྙཏྟམྤི ཨེཀསྨིཾ ཋཱནེ ཋིཏཾ སཧསཱ ཨནུཔདྷཱརེཏྭཱ གཧེཏྭཱ བྷུཉྫནྟོ ‘ཨསཏིཡཱ’ཏི ཝུཙྩཏཱི’’ཏི ལིཁིཏཾ, ཨནཱཔཏྟིཝཱརེ ཨེཀཙྩེསུ པོཏྠཀེསུ ‘‘རསརསེཏི ལིཁིཏཾ, ཏཾ གཧེཏབྦ’’ནྟི ཝུཏྟཾ.

སཀྐཙྩཝགྒཝཎྞནཱ ནིཊྛིཏཱ.

༥. ཀབལ༹ཝགྒཝཎྞནཱ

༦༡༨. ‘‘སབྦཾ ཧཏྠ’’ནྟི ཝཙནཏོ ཨེཀདེསཾ མུཁེ པཀྑིཔནྟསྶ ཨནཱཔཏྟཱིཏི ཨེཀཙྩེ. ‘‘སབྦནྟི ཝཙནཏོ ཨེཀདེསམྤི ན ཝཊྚཏཱི’’ཏི ཝདནྟི, ཏཾ ཡུཏྟཾ ཨནཱཔཏྟིཝཱརེ ཨཝིསེསིཏཏྟཱ.

༦༢༤. སིཏྠཱཝཀཱརཀེ ¶ ‘‘ཀཙཝརཾ ཚཌྜེནྟཾ སིཏྠཾ ཚཌྜིཡྻཏཱི’’ཏི ཙ ‘‘ཀཙཝརཾ ཚཌྜེནྟོ’’ཏི ཙ པཱཋོ.

ཀབལ༹ཝགྒཝཎྞནཱ ནིཊྛིཏཱ.

༦. སུརུསུརུཝགྒཝཎྞནཱ

༦༢༧. ‘‘སུརུསུརུ’’ནྟི ¶ ཙ ‘‘སུརོསུརོ’’ཏི ཙ པཱཋོ. སཱིཏཱིཀཏོཏི སཱིཏངྐོ. ‘‘སིལཀབུདྡྷོཏི ཨརིཡཱནཾ པརིཧཱསཝཙནམེཝེཏ’’ནྟི ལིཁིཏཾ.

༦༣༡. པཊིཀྐཱུལཝསེནཱཏི ཨེཏྠ ཡདི པཊིཀྐཱུལཝསེན པཊིཀྑིཏྟཾ, ‘‘སེཡྻཐཱཔི ཀཱམབྷོགིནོ’’ཏི ན ཝཏྟབྦཾ. ན ཧི ཏེ པཊིཀྐཱུལཾ ཀརོནྟཱིཏི ཙེ? ན, ཨིསྶརིཡལིངྒཝསེན གཧཎསམྦྷཝཏོ. ཏེ ཧི ཨནཱདརཱ ཧོནྟི. པཏྟདྷོཝནནྟི པཏྟདྷོཝནོདཀཾ བྷོཛནཔཊིསཾཡུཏྟཾ.

༦༣༤. ‘‘ཚཏྟཔཱདུཀཱཡ’’ནྟི ཙ ‘‘ཚཏྟཔཱདེ’’ཏི ཙ པཱཋོ.

༦༣༧. ཙཱཔོཏི སཏྟཁཱདནཝདྷོ. ‘‘སེསཱ སབྦཱ དྷནུཝིཀཏི ཀོདཎྜེ པཝིཊྛཱ’’ཏི ཙ ལིཁིཏཾ, པཊིམུཀྐནྟི པཝེསིཏཾ, ལགྒིཏཾ ཧོཏཱིཏི ཨཏྠོ.

སུརུསུརུཝགྒཝཎྞནཱ ནིཊྛིཏཱ.

༧. པཱདུཀཝགྒཝཎྞནཱ

༦༤༠. སཡཾ ཡཱནགཏོ ཧུཏྭཱ, ཡཐཱ ཡཱནགཏསྶ ཝེ.

ཨལཾ ཝཏྟུཾ ཏཐཱ ནཱལཾ, སཚཏྟོ ཚཏྟཔཱཎིནོ.

ཡཐཱ ཨེཏྠ, ཨེཝཾ ཨཉྙཏྲཱཔི.

༦༤༧. ཚཔཀཝཏྠུསྨིཾ ‘‘སཙཱཧཾ ན ལབྷིསྶཱམཱི’’ཏི པཱཋོ, ‘‘དས ཙེ ན ལབྷིསྶཱམཱི’’ཏི ཙ ཨཏྠི, ‘‘ཝཏྠུསྨིཾ ཨགིལཱནསྶཱ’’ཏི ཙ ཨཱགཙྪཏི, ཏཾ ན སུནྡརཾ, སིཀྑཱཔདེཡེཝ སུནྡརཾ. ཐོམིཏོཏི ཨཧམྤི ཛཱནཱམཱིཏི སམྦནྡྷོ ¶ . ཡཱ དྷནཡསལཱབྷསངྑཱཏཱ ཝུཏྟི ཝིནིཔཱཏེན ཧོཏི སམྤརཱཡེ ཨཔཱཡེསུ ཝིནིཔཱཏཧེཏུ ཧུཏྭཱ པཝཏྟཏི. ཨཐ ཝཱ ཝིནིཔཱཏེནཱཏི ཧེཏྭཏྠེ ཀརཎཝཙནཾ, ཝིནིཔཱཏནཱཡ པཝཏྟཏཱིཏི ཨདྷིཔྤཱཡོ. ཨདྷམྨཙརཎེན ཨདྷམྨཙརཎཱཡ. ‘‘ཨསྨཱ ཀུམྦྷིམིཝཱ’’ཏི ཙ པཋནྟི.

པཱདུཀཝགྒཝཎྞནཱ ནིཊྛིཏཱ.

པཀིཎྞཀཝཎྞནཱ

ཀཱཡཝཱཙཱཙིཏྟཏོ ¶ སམུཊྛཧནྟཱིཏི ཀཏྭཱ ‘‘སམནུབྷཱསནསམུཊྛཱནཱནཱི’’ཏི ཝུཏྟཱནི. སམནུབྷཱསནཾ ཀིརིཡཾ. ཨིམཱནི ཀིརིཡཱནི. དྷམྨདེསནསམུཊྛཱནཱནི ཝཱཙཱཙིཏྟཏོཏི ཨེཏྠ ཀཱཡཝཙཱིཝིཉྙཏྟིབྷཱཝཏོ ཨུཛྫགྒྷིཀཨུཙྩཱསདྡཱདཱིསུ ཝིཡ ‘‘ཀཱཡཝཱཙཱཙིཏྟཏོ’’ཏི ཝཏྟབྦཱནཱིཏི ཙེ? ན ཝཏྟབྦཱནི. ནིསཱིདནགམནཱཧཱརཔཀྑིཔནཱདིཀཱཡཝིཉྙཏྟིཡཱ སབྦྷཱཝཱ ཏཏྠ ཡུཏྟཾ, ན དྷམྨདེསནེ ཏཱདིསསྶཱབྷཱཝཱ.

པཀིཎྞཀཝཎྞནཱ ནིཊྛིཏཱ.

སེཁིཡཀཎྜཝཎྞནཱ ནིཊྛིཏཱ.

༨. སཏྟཱདྷིཀརཎསམཐཝཎྞནཱ

‘‘ཡེབྷུཡྻསིཀཱ ¶ ¶ ཀཱཏབྦཱ…པེ… ཏིཎཝཏྠཱརཀོ ཀཱཏབྦོ, སོ པུགྒལོ’’ཏི ཙ ལིཁིཏཾ.

སཏྟཱདྷིཀརཎསམཐཝཎྞནཱ ནིཊྛིཏཱ.

བྷིཀྑུཝིབྷངྒོ ནིཊྛིཏོ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

བྷིཀྑུནཱིཝིབྷངྒཝཎྞནཱ

༡. པཱརཱཛིཀཀཎྜཝཎྞནཱ

གནྠཱརམྦྷཝཎྞནཱ

ཝིབྷངྒེ ¶ ¶ ཝིཡ བྷིཀྑཱུནཾ, ཝིཏྠཱརམབྷིསངྑཏཾ;

ཨཀཏྭཱ བྷིཀྑུནཱིནམྤི, ཝཀྑེ གཎྛིཔདཀྐམཾ.

ཡོ བྷིཀྑུནཱིནཾ ཝིབྷངྒོ ཨསྶ, ཏསྶ སཾཝཎྞནཱཀྐམོ པཏྟོཏི ཨཏྠོ.

གནྠཱརམྦྷཝཎྞནཱ ནིཊྛིཏཱ.

༡. པཋམཔཱརཱཛིཀསིཀྑཱཔདཝཎྞནཱ

༦༥༦-༧. ཏཏྠ ཏཏྠ ཋཱནུཔྤཏྟིཀཔཉྙཱ ཝཱིམཾསཱ. པདཔཊིཔཱཊིཡཱ ཨེཝཱཏི མཱཏིཀཱཔདཔཊིཔཱཊིཡཱ ¶ ཨེཝ. ‘‘ཝུཏྟནྟི སངྒཱིཏིཀཱནཾ ཨུཔསངྐཔྤནཱནཾ ཝིབྷཱཛནཾ ཝུཏྟ’’ནྟི ལིཁིཏཾ.

༦༥༨. ‘‘ཨེཧིབྷིཀྑུནཱིཏི བྷིཀྑུནཱི, ཏཱིཧི སརཎགམནེཧི ཨུཔསམྤནྣཱཏི བྷིཀྑུནཱི’’ཏི ཨིདཾ པན དེསནཱཝིལཱསཝསེན ཝུཏྟནྟི ཨེཀེ. ཨཉྙབུདྡྷཀཱལེ ཨཏྠཱིཏི ཨེཀེ, ཏཾ ན ཡུཏྟཾ ཝིཡ དིསྶཏི ཨམྷཱཀམྤི བུདྡྷཀཱལེ སམྦྷཝཔྤསངྒཏོ, ཨེཧིབྷིཀྑུནིཡཱ པཊིསེདྷཚཱཡཱདིསྶནཏོ ཙ. ཡཐཱཧ དྷམྨཔདེ ཝིསཱཁཱཝཏྠུསྨིཾ (དྷ. པ. ཨཊྛ. ༡. ཝིསཱཁཱཝཏྠུ) ‘‘ཏསྶ ཙཱིཝརདཱནསྶ ནིསྶནྡེན ཨིམཾ མཧཱལཏཱཔསཱདྷནཾ ལབྷི. ཨིཏྠཱིནཉྷི ཙཱིཝརདཱནཾ མཧཱལཏཱཔསཱདྷནབྷཎྜེན མཏྠཀཾ པཔྤོཏི, པུརིསཱནཾ ཨིདྡྷིམཡཔཏྟཙཱིཝརེནཱ’’ཏི. ཏཱིཧི སརཎགམནེཧི ཨུཔསམྤནྣཱཡ པན བྷིཀྑུནིཡཱ ¶ སམྦྷཝོ ཨཉྙབུདྡྷཀཱལེ ཀདཱཙི སིཡཱ, ནཏྠེཝ ཨམྷཱཀཾ བུདྡྷཀཱལེ. དེསནཱཝིལཱསེན པན བྷིཀྑུདེསནཱཀྐམེནེཝ བྷིཀྑུནིནིདྡེསོ ཝུཏྟོ, ཏེནེཝ བྷིཀྑུསངྒྷཝསེན ཨེཀཏོཨུཔསམྤནྣཱ བྷིཀྑུནིཡོ ཝིཛྫམཱནཱཔི ཏཏྠ ན ཝུཏྟཱ. ཏཱསཾ ཨཏྠིཏཱ ཨིམཱཡ པརིཝཱརཀཐཱཡ ཝེདིཏབྦཱ –

‘‘ཨུབྷོ ཨེཀཏོ ཨུཔསམྤནྣཱ,

ཨུབྷིནྣཾ ཧཏྠཏོ ཙཱིཝརཾ པཊིགྒཎྷེཡྻ;

སིཡཱ ཨཱཔཏྟིཡོ ནཱནཱ,

པཉྷཱ མེསཱ ཀུསལེཧི ཙིནྟིཏཱ’’ཏི. (པརི. ༤༧༩);

ཨཐ ཝཱ པུཐུཛྫནཀཱལེ ཨེཧིབྷིཀྑུསརཎགམནེན ཨུཔསམྤནྣོཝ ཨིཏྠིལིངྒཔཱཏུབྷཱཝེན བྷིཀྑུནིབྷཱཝེ ཋིཏཱ པུརིསཱུཔསམྤནྣཾ ཨུཔཱདཱཡ ‘‘ཨེཧིབྷིཀྑུནཱི’’ཏི, ‘‘ཏཱིཧི སརཎགམནེཧི ཨུཔསམྤནྣཱ བྷིཀྑུནཱི’’ཏི ཙ སངྑྱཾ གཙྪཏི. ནོ ཙེ, ཏཾ ཝཙནཾ ཝིརུཛ྄ཛྷེཡྻཱཏི ཨེཀེ, ཝིཙཱརེཏྭཱ གཧེཏབྦཾ. ‘‘ཝིཉྙཱུ པཊིབལོ’’ཏི དྭིནྣཾ ཨཝསྶཝབྷཱཝསྶ ཨིཛ྄ཛྷནཏོ ཝུཏྟཾ. ཨེཏྠ ཡསྨཱ ཡཾ ཀིཉྩི ཨཱམིསཾ པཊིགྒཎྷནྟཱིནཾ ཨགྒཧཏྠཱ པུརིསཱནཾ ཧཏྠེཧི ཀདཱཙི མིསྶཱིབྷཱཝཾ གཙྪནྟི, ཝནྡནྟཱནཾ ཝཱ པུརིསཱནཾ སིརཱནི ཨགྒཔཱདེཧི མིསྶིཏཱནི ཀདཱཙི ཧོནྟི, ཀེསཙྪེདནཀཱལེ ཝཱ སིརཾ པུརིསཱནཾ ཧཏྠེཧི མིསྶིཏཾ ཧོཏི, ཙིཏྟཾ ནཱམེཏཾ ཨཏིརདྡྷགཝེསི, དུརཀྑིཡཾ ཝཱ, ཏསྨཱ ‘‘མཱ ཨཏིལཧུཾ པཱརཱཛིཀཱཔཏྟི བྷིཀྑུནཱིནཾ ཧོཏཱུ’’ཏི བུདྡྷཱ བྷགཝནྟོ ཀཱརུཉྙེན པཱརཱཛིཀཀྑེཏྟཔརིཙྪེདཾ, ཐུལླཙྩཡཀྑེཏྟཔརིཙྪེདཉྩ ཝིསུཾ ཝིསུཾ དེསེསུནྟི ཝེདིཏབྦཾ.

༦༥༩. ཏབྦཧུལནཡེན ¶ སཱ ཝུཏྟཱཏི ཨེཏྠ ཨཡམནུགཎྛིཔདཀྐམོ – ཡེབྷུཡྻེན ཀིརིཡསམུཊྛཱནཏྟཱ ‘‘ཀིརིཡསམུཊྛཱན’’ནྟི ཝུཏྟཾ. ‘‘ཀཱཡསཾསགྒཾ སམཱཔཛྫེཡྻཱ’’ཏི ཨཝཏྭཱ པན ‘‘སཱདིཡེཡྻཱ’’ཏི ཝུཏྟཏྟཱ ཨཀིརིཡཏོཔི སམུཊྛཱཏཱིཏི ཝེདིཏབྦཾ. ཡཐཱ ཙེཏྠ, ཨེཝཾ ཧེཊྛཱ ‘‘མནུསྶིཏྠིཡཱ ཏཡོ མགྒེ མེཐུནཾ དྷམྨཾ པཊིསེཝནྟསྶ ཨཱཔཏྟི པཱརཱཛིཀསྶཱ’’ཏིཨཱདིནཱ ནཡེན ཀིརིཡསམུཊྛཱནཏཾ ཝཏྭཱ ཏདནནྟརཾ ‘‘བྷིཀྑུཔཙྩཏྠིཀཱ…པེ… སོ ཙེ པཝེསནཾ སཱདིཡཏི, ཨཱཔཏྟི པཱརཱཛིཀསྶཱ’’ཏིཨཱདིནཱ (པཱརཱ. ༥༦) ནཡེན ཨཀིརིཡསམུཊྛཱནཏཱཡཔི ཝུཏྟཏྟཱ པཋམཔཱརཱཛིཀསྶཱཔི ཏབྦཧུལནཡེནེཝ ཀིརིཡསམུཊྛཱནཏཱ ཝེདིཏབྦཱ. ན ཧི པཝེསནསཱདིཡནཱདིམྷི ཀིརིཡསམུཊྛཱནཏཱ དིསྶཏི. ཨངྒཛཱཏཙལནཉྩེཏྠ ན སཱརཏོ དཊྛབྦཾ ‘‘སོ ཙེ པཝེསནཾ ¶ ན སཱདིཡཏི, པཝིཊྛཾ ན སཱདིཡཏི, ཋིཏཾ ན སཱདིཡཏི, ཨུདྡྷརཎཾ སཱདིཡཏི, ཨཱཔཏྟི པཱརཱཛིཀསྶཱ’’ཏི (པཱརཱ. ༥༨) ཨེཏྠ ཋིཏ ན སཱདིཡནེ པཀཏིཡཱཔི པརིཔུཎྞཙལནཏྟཱ. སཱདིཡནཔཙྩཡཱ ཧི སེཝནཙལནཉྩེཏྠ ན དིསྶཏེཝཱཏི ཏབྦཧུལནཡེནེཝ ཀིརིཡསམུཊྛཱནཏཱ གཧེཏབྦཱ. ཏཏྠ ཏཏྠ ཨཊྛཀཐཱསུ ཀསྨཱ ཏབྦཧུལནཡོ ཨཝུཏྟོཏི ཙེ? ‘‘ཡོ པན བྷིཀྑུ མེཐུནཾ དྷམྨཾ པཊིསེཝེཡྻཱ’’ཏི (པཱརཱ. ༣༩, ༤༢) མཱཏིཀཱཡཾ ཀིརིཡསམུཊྛཱནསྶ སརཱུཔེན ཝུཏྟཏྟཱ ཏདནུརཱུཔཝསེན ཝིབྷངྒནཡམནོལོཀེཏྭཱ ‘‘ཀིརིཡསམུཊྛཱན’’མིཙྩེཝ ཝུཏྟཾ. ཡཐཱ ཙེཏེསུ ཏབྦཧུལནཡེན ཀིརིཡསམུཊྛཱནཏཱ ཝུཏྟཱ, ཏཐཱ སུརཱདཱིནཾ ཨཀུསལེནེཝ པཱཏབྦཏཱ, ན ཨིཏརཐཱ ‘‘ཡཾ ཨཀུསལེནེཝ ཨཱཔཛྫཏི, ཨཡཾ ལོཀཝཛྫཱ, སེསཱ པཎྞཏྟིཝཛྫཱ’’ཏི (ཀངྑཱ. ཨཊྛ. པཋམཔཱརཱཛིཀཝཎྞནཱ) ཝུཏྟེ ལོཀཝཛྫཔཎྞཏྟིཝཛྫཱནཾ ནིཡམནལཀྑཎསིདྡྷི ཧོཏི, ཏཐཱ ཏཾ ཨཝཏྭཱ ‘‘ཡསྶཱ སཙིཏྟཀཔཀྑེ ཙིཏྟཾ ཨཀུསལམེཝ ཧོཏི, ཨཡཾ ལོཀཝཛྫཱ. སེསཱ པཎྞཏྟིཝཛྫཱ’’ཏི ཝུཏྟེ ལོཀཝཛྫཝཙནཾ ནིརཏྠཀཾ སིཡཱ ཝཏྠུཨཛཱནནཔཀྑེཔི ཨཀུསལེནེཝ པཱཏབྦཏྟཱ. ཡསྨཱ ཏཏྠ སུརཱཔཱནཝཱིཏིཀྐམསྶ ཨཀུསལཙིཏྟུཔྤཱདོ ནཏྠི, ཏསྨཱ ཁནྡྷཀཊྛཀཐཱཡཾ (མཧཱཝ. ཨཊྛ. ༡༠༨) ‘‘མཛྫཔཱནེ པན བྷིཀྑུནོ ཨཛཱནིཏྭཱཔི བཱིཛཏོ པཊྛཱཡ མཛྫཾ པིཝནྟསྶ པཱཙིཏྟིཡཾ, སཱམཎེརོ ཛཱནིཏྭཱ པིཝནྟོ སཱིལབྷེདཾ ཨཱཔཛྫཏི, ན ཨཛཱནིཏྭཱ’’ཏི ཝུཏྟཾ, ན ཝུཏྟཾ ‘‘ཝཏྠུཨཛཱནནཔཀྑེ པཱཎཱཏིཔཱཏཱདཱིནཾ སིདྡྷིཀརཨཀུསལཙིཏྟུཔྤཱདསདིསེ ཙིཏྟུཔྤཱདེ སཏིཔི སཱམཎེརོ སཱིལབྷེདཾ ནཱཔཛྫཏཱི’’ཏི. ཨབྷིནིཝེསཝཙནཾ པཱཎཱཏིཔཱཏཱདཱིཧི སམཱནཛཱཏིཀཏྟཱ སཱམཎེརཱནཾ སུརཱཔཱནསྶ. ‘‘སུརཱདཡོ པནིམེ’’ཏི ཝཏྠུཾ ཛཱནིཏྭཱ པཱཏབྦཏཱདིཝསེན ཝཱིཏིཀྐམནྟསྶ ཨཀུསལསྶ ཨསམྦྷཝོ ནཏྠི. ཏེན ཝུཏྟཾ ‘‘ཡསྶ སཙིཏྟཀཔཀྑེ’’ཏིཨཱདི.

ཀིཉྩེཏྠ ཡུཏྟིཝཙནེན ཨརཧནྟཱནཾ ཨཔྤཝིསནཏོ སཙིཏྟཀཱཙིཏྟཀཔཀྑེསུ ཨཀུསལནིཡམོཏི ཙེ? ན, དྷམྨཏཱཝསེན སེཀྑཱནམྤི ཨཔྤཝིསནཏོ. ཨཙིཏྟཀཔཀྑེ ཨཀུསལནིཡམཱབྷཱཝདསྶནཏྠཾ ¶ སུཔནྟསྶ མུཁེ པཀྑིཏྟཛལབིནྡུམིཝ སུརཱབིནྡུཨཱདཡོ ཨུདཱཧརིཏབྦཱཏི. ཏབྦཧུལནཡེན ཧི ཨཏྠེ གཧིཏེ པུབྦེནཱཔརཾ ཨཊྛཀཐཱཡ སམེཏི. ‘‘སདྡྷིཾ པཱལི༹ཡཱ ཨཝིསེསཏྠོ པརཏོ ཨཱཝི བྷཝིསྶཏཱིཏི ཨཔརེ’’ཏི ཝུཏྟཾ. ཨིདམེཏྠ ཝིཙཱརེཏབྦཾ ¶ . ཡདི ཝཏྠུཛཱནནཔཀྑེ ཝིནཱ ཨཀུསལེན མཛྫཔཱནཾ སིཡཱ, ཀསྨཱ ནཱལི༹མཛ྄ཛྷཾ ནཱཏིཀྐམཏི ཨརིཡཱནཾ པཱནཀཱདིསཉྙཱིནནྟི? སཱིལབྷེདཝཏྠུཝཱིཏིཀྐམོ ཝིནཱཔི ཙིཏྟེན ཨརིཡཱནཾ དྷམྨཏཱཝསེནེཝ ན སམྦྷཝཏཱིཏི ཙེ, ན, ཙཀྑུཔཱལཏྠེརཝཏྠུ (དྷ. པ. ཨཊྛ. ༡.༡) ཨཱདིཝིརོདྷཏོཏི. ཨཔིཙ བྷིཀྑུནོཔི སཱམཎེརསྶ ཝིཡ སུརཱཔཱནཾ སཙིཏྟཀམེཝ ཀསྨཱ ན ཛཱཏནྟི? ཨཔྤཏིརཱུཔཏྟཱཏི ཙེ, སཱམཎེརཱནམྤི ཨཔྤཏིརཱུཔམེཝ. སཧདྷམྨིཀཱ ཨེཝ ཧི ཏེ. མཧཱསཱཝཛྫཏྟཱཏི ཙེ? སཱམཎེརཱནམྤི ཏཱདིསམེཝ. སཱམཎེརཱནཾ སཙིཏྟཀམེཝ པཱརཱཛིཀཾ, ཨིཏརཾ དཎྜཀམྨཝཏྠཱུཏི ཙེ? བྷིཀྑཱུནམྤི མཛྫཔཱནེ ནཏྠི. ཨེཏྠ ཏིཀཔཱཙིཏྟིཡེན ན བྷཝིཏབྦཾ. མཛྫེ ཨམཛྫསཉྙིསྶ དུཀྐཊཱཔཏྟི པཉྙཱཔེཏབྦཱ སིཡཱ. བྷིཀྑུསྶ པཱཙིཏྟིཡཝཏྠུ སཱམཎེརཱནཾ པཱརཱཛིཀཾ ཧོཏི ཏིརཙྪཱནགཏསཱམཎེརཱནཾ ཝིཡཱཏི ཙེ? ཨཙིཏྟཀམྤི མཛྫཔཱནཱདཱིནཾ སཱམཎེརཱནཾ པཱརཱཛིཀཾ པཉྙཱཔེཏབྦཾ སིཡཱ. ནཱཙིཏྟཀཾ པཱརཱཛིཀཾ སམྦྷཝཏཱིཏི ཙེ? ན, པཎྞཏྟིཝཛྫམྤི པཱརཱཛིཀཾ སམྦྷཝཏཱིཏི. ནིཀཱཡནྟརཔཀྑེ ཨཡམེཝ དོསོ. ཨམྷཱཀཉྷི ལོཀཝཛྫམེཝ མཛྫཔཱནནྟི. ཀསྨཱ པནེཏྠ སུརཱཔཱནམེཝ དྷམྨཏཱཝསེན ཨརིཡཱ ན ཀརོནྟཱིཏི? ན ཀེཝལཾ སུརཱཔཱནམེཝ དྷམྨཏཱཝསེན ཨརིཡཱ ན ཀརོནྟི, པཱཎེསུཔི ཀོདྷཝསེན པཱཎསཉྙིཏཱཡ སཱིསཙྪེདནཱདཱིནི ན ཀརོནྟི, སདཱརསཉྙཱཡ པརདཱརཾ ན ཝཱིཏིཀྐམནྟི, ཨནཏྠབྷཉྫཀསཉྙཱཡ ཨཏྠབྷཉྫཀམུསཱ ན ཝདནྟི, སམྨཱདིཊྛིསཉྙཱཡ མིཙྪཱདིཊྛིཾ ན པཊིཔཛྫནྟཱིཏི ཝེདིཏབྦཱ. ཨཱཙརིཡཱཔི སུརཱཔཱནེ ཨཀུསལནིཡམཱབྷཱཝམེཝ ཝདནྟི, ཏསྨཱ ཨེཝ མཱཏིཀཱཊྛཀཐཱཡ གཎྛིཔདེ ལོཀཝཛྫཔཎྞཏྟིཝཛྫཱདྷིཀཱརེ ‘‘སཙིཏྟཀཔཀྑེཨཀུསལནྟི སུརཱཔཱནཱདིསངྒཧཏྠཾ, ཨིཏརཐཱ ཡསྶ ཨཀུསལམེཝཱཏི ཝདེཡྻཱ’’ཏི ལིཁིཏཾ. ཀིརིཡསམུཊྛཱནཏཱ པནསྶ ཏབྦཧུལནཡམེཝ, ན པཋམཔཱརཱཛིཀེ. ཀཐཾ? ཀཱཡསཾསགྒསིཀྑཱཔདཾ པཋམཔཱརཱཛིཀསམུཊྛཱནཾ. ཨེཏྠ བྷིཀྑུསྶ ཙ བྷིཀྑུནིཡཱ ཙ ཀཱཡསཾསགྒབྷཱཝེ སཏི བྷིཀྑུནཱི ཀཱཡངྒམཙོཔཡམཱནཱཔི ཙིཏྟེནེཝ ཨདྷིཝཱསེནྟཱི ཨཱཔཛྫཏི, ན ཨེཝཾ བྷིཀྑུ. བྷིཀྑུ པན ཙོཔཡམཱནོཝ ཨཱཔཛྫཏི, ཨེཝམེཝ པཋམཔཱརཱཛིཀེཔི ཙོཔནེ སཏི ཨེཝ ཨཱཔཛྫཏི, ནཱསཏི. པཝེསནཾ སཱདིཡཏཱིཏི ཨེཏྠ པཝེསནསཱདིཡནཾ ནཱམ སེཝནཙིཏྟསྶུཔྤཱདནནྟི, ཨེཝཾ སནྟེཔི ‘‘ཝཱིམཾསིཏྭཱ གཧེཏབྦ’’ནྟི ཝུཏྟཾ.

པཋམཔཱརཱཛིཀསིཀྑཱཔདཝཎྞནཱ ནིཊྛིཏཱ.

༢. དུཏིཡཔཱརཱཛིཀསིཀྑཱཔདཝཎྞནཱ

‘‘ཀིསྶ ¶ ¶ པན ཏྭཾ ཨཡྻེ ཛཱནཾ པཱརཱཛིཀཾ དྷམྨཾ ཨཛ྄ཛྷཱཔནྣ’’ནྟི ཝཙནཏོ, ‘‘ཨཊྛནྣཾ པཱརཱཛིཀཱནཾ ཨཉྙཏརཾ པཱརཱཛིཀཾ ཨཛ྄ཛྷཱཔནྣ’’ནྟི (པཱཙི. ༦༦༦) ཝཙནཏོ, ཨནྟེ ‘‘ཨུདྡིཊྛཱ ཁོ ཨཡྻཱཡོ ཨཊྛ པཱརཱཛིཀཱ དྷམྨཱ’’ཏིཨཱདིཝཙནཏོ (པཱཙི. ༦༧༧), པརིཝཱརེ ‘‘སཱདྷཱརཎཔཉྙཏྟི ཨུབྷཏོཔཉྙཏྟཱི’’ཏི (པརི. ༢༠༡) ཝཙནཏོ ཙ བྷིཀྑུནིཝིབྷངྒཾ པཏྭཱ བྷགཝཱ སཱདྷཱརཎཱནི སིཀྑཱཔདཱནི བྷིཀྑཱུནཾ ཨུཔྤནྣཝཏྠུསྨིཾཡེཝ ‘‘ཡཱ པན བྷིཀྑུནཱི ཚནྡསོ མེཐུནཾ དྷམྨཾ པཊིསེཝེཡྻ ཨནྟམསོ ཏིརཙྪཱནགཏེནཔི པཱརཱཛིཀཱ ཧོཏི ཨསཾཝཱསཱ’’ཏིཨཱདིནཱ ནཡེན སཝིསེསམྤི ཨཝིསེསམྤི མཱཏིཀཾ ནིཀྑིཔིཏྭཱ ཨནུཀྐམེན པདབྷཱཛནཾ, ཨཱཔཏྟིབྷེདཾ, ཏིཀཙྪེདཾ, ཨནཱཔཏྟིཝཱརཉྩ ཨནཝསེསཾ ཝཏྭཱ ཝིཏྠཱརེསི. སངྒཱིཏིཀཱརཀེཧི པན ཨསཱདྷཱརཎཔཉྙཏྟིཡོཡེཝ ཨིདྷ ཝིཏྠཱརིཏཱཏི ཝེདིཏབྦཱ.

༦༦༦. ཏཏྠ ‘‘ཨཊྛནྣཾ པཱརཱཛིཀཱན’’ནྟི ཨིདཾ ཀེཝལཾ སངྒཱིཏིཀཱརཀཱནཾཡེཝ ནཡཏོ ནིཀྑིཏྟཝཙནཾ ཨིཏོ པུབྦེ ཚཊྛསཏྟམཊྛམཱནཾ པཱརཱཛིཀཱནཾ ཨཔཉྙཏྟཏྟཱ. བྷགཝཏཱ པན ཨིདཾ པཉྙཱཔིཏམཱདིསིཀྑཱཔདམྤི ཨུཔཱདཱཡ ‘‘ཚནྣཾ པཱརཱཛིཀཱན’’ནྟི ཝུཏྟཾ སིཡཱ. ཨིཏོ ཨུདྡྷཾ པཉྙཏྟཱནིཔི ཨུཔཱདཱཡ ‘‘ཨཊྛནྣཾ པཱརཱཛིཀཱན’’ནྟི ཝཙནཾ ཨཔརབྷཱགེ ཨུཔྤནྣནྟི ཨེཀཙྩེ ཨཱཙརིཡཱ. ཨཊྛཀཐཱཡཾ པན ‘‘ཨིདཉྩ པཱརཱཛིཀཾ པཙྪཱ པཉྙཏྟཾ, ཏསྨཱ ‘ཨཊྛནྣ’ནྟི ཝིབྷངྒེ ཝུཏྟ’’ནྟིཨཱདི ཝུཏྟཾ, ཏསྨཱ ཨཊྛཀཐཱཙརིཡཱནཾ མཏེན སིདྡྷམེཏཾ ཡཐཱཔཉྙཏྟཱནུཀྐམཝསེནེཝ སངྒཱིཏཱནཱིཏི. ‘‘ཨཉྙཱསི’’ནྟི པཱཋོ. ཨཉྙཱསཱིཏི ན གཧེཏབྦོ. ‘‘དུཊྛུལླསིཀྑཱཔདེ ཝུཏྟནཡེནེཝཱ’’ཏི ཝཙནཏོ ཝཛྫཔཊིཙྪཱདིཀཾ ཡཱ པཊིཙྪཱདེཏི, སཱཔི ཝཛྫཔཊིཙྪཱདིཀཨཱཡེཝཱཏི སིདྡྷཾ. ཀིཉྩཱཔི ཝཛྫཔཊིཙྪཱདནཾ པེམཝསེན ཧོཏི, ཏཐཱཔི སིཀྑཱཔདཝཱིཏིཀྐམཙིཏྟཾ དོམནསྶིཀམེཝ ཧོཏཱིཏི ཀཏྭཱ ‘‘དུཀྑཝེདན’’ནྟི ཝུཏྟཾ.

དུཏིཡཔཱརཱཛིཀསིཀྑཱཔདཝཎྞནཱ ནིཊྛིཏཱ.

༣. ཏཏིཡཔཱརཱཛིཀསིཀྑཱཔདཝཎྞནཱ

༦༦༩. ཨིམཾ ཨདྷིཔྤཱཡམཏྟནྟི ‘‘ཙོདེཏྭཱ སཱརེཏྭཱ’’ཏི ཨེཏཾ. ཨེཏྠཱཡཾ ཝིཙཱརཎཱ – ཡོ བྷིཀྑུ ཨུཀྑིཏྟཀབྷིཀྑུནཱ སམཱནདིཊྛིཀོ ལདྡྷིནཱནཱསཾཝཱསཀོ ཧོཏི, སོ ཨཝནྡནཱིཡོ, ཀམྨཱཀམྨེ ཨུཀྑིཏྟཀོ ཝིཡ ན ¶ གཎཔཱུརཎོ, སཧསེཡྻམྤི ན ལབྷཏི, ན ཏཐཱ བྷིཀྑུནཱི. སཱ ¶ ཧི ཡཱཝ ན སམནུབྷཊྛཱ, ཏཱཝ གཎཔཱུརཀཱ ཙ ཧོཏི, སཾཝཱསཉྩ ལབྷཏི. ལདྡྷིནཱནཱསཾཝཱསིཀཱནུཝཏྟིཀཱཔི ཨུཀྑིཏྟཱནུཝཏྟིཀཱཝ ཧོཏི. ཨུཀྑིཏྟོ ཙེ ཀཱལངྐཏོ, ཏདནུཝཏྟཀོ བྷིཀྑུ ལདྡྷིནཱནཱསཾཝཱསཀོ ཧོཏིཡེཝ. ཏཐཱ ཝིབྦྷནྟེཔི ཏསྨིཾ ཏིཏྠིཡཔཀྐནྟཀེཔི སིཀྑཾ པཙྩཀྑཱཡ སཱམཎེརབྷཱུམིཡཾ ཋིཏེཔཱིཏི ཨེཀེ. ཏེསཾ མཏེན ཨུཀྑིཏྟཀེ ཏཐཱབྷཱུཏེཔི བྷིཀྑུནཱི ཏདནུཝཏྟིཀཱ སམནུབྷཱསིཏབྦཱཝཱཏི ཨཱཔཛྫཏི. སམནུབྷཱསནཀམྨཾ སངྒྷཱཡཏྟཾ, སངྒྷེན སཉྩིཙྩ པུརིམཀཱཔཏྟིཾ ཨཔནེཏུཾ ན ཡུཏྟཾ ཝིཡ ཁཱཡཏི. ཨུཀྑེཔནཱིཡཀམྨཉྩ ཨཱཔཏྟིཨདསྶནམཏྟེ, ཨཔྤཊིཀམྨམཏྟེ, ཀུདིཊྛིཨཔྤཊིནིསྶཛྫནམཏྟེ ཙ ཀརིཡཏི, ཏསྶ ཨནུཝཏྟནམཏྟེན སམནུབྷཱསིཏྭཱ སཱསནཏོ ཙཱཝེཏབྦཱནཱིཏི ན ཡུཏྟནྟི ཙེ? ན ཝཏྟབྦམེཝ, ཨིདཾ ཨཔཱརཱཛིཀཝཏྠཱུསུཔི ཏཔྤསངྒཏོ, ཨནཉྙཝིསཡཏྟཱ ཙ ཝིནཡསྶ.

ཏཏིཡཔཱརཱཛིཀསིཀྑཱཔདཝཎྞནཱ ནིཊྛིཏཱ.

༤. ཙཏུཏྠཔཱརཱཛིཀསིཀྑཱཔདཝཎྞནཱ

༦༧༥. ‘‘ལོཀསྶཱདསངྑཱཏསྶ མིཏྟསནྠཝསྶ ཝསེན ཏཾ དསྶེཏུཾ ཀཱཡསཾསགྒརཱགེནཱཏི ཝུཏྟ’’ནྟི ལིཁིཏཾ. ཏིསྶིཏྠིཡོཏི ཏཱིསུ ཨིཏྠཱིསུ, ཏིསྶོ ཝཱ ཨིཏྠིཡོ. ཏཾ ན སེཝེཏི ཏཱསུ ན སེཝཏི. ཨནརིཡཱཏི ཨུབྷཏོབྱཉྫནཱ. བྱཉྫནསྨིནྟི ཨཏྟནོ བྱཉྫནེ. ན སེཝེཏི ན སེཝཏི. ན ཙཱཙརེཏི ནཱཙརཏི. ཝཎྞཱཝཎྞོཏི དྭཱིཧིཔི སུཀྐཝིསྶཊྛི. གམནུཔྤཱདནནྟི སཉྩརིཏྟཾ.

༦༧༦. ‘‘ནིཝཏྠཾ ཝཱ པཱརུཏཾ ཝཱ’’ཏི ཨེཏྠ ནིཝཏྠསྶ ཝཱ པཱརུཏསྶ ཝཱ ཝཏྠསྶ གཧཎཾ སཱདིཡཏཱིཏི ཨཏྠོ.

ཙཏུཏྠཔཱརཱཛིཀསིཀྑཱཔདཝཎྞནཱ ནིཊྛིཏཱ.

པཱརཱཛིཀཀཎྜཝཎྞནཱ ནིཊྛིཏཱ.

༢. སངྒྷཱདིསེསཀཎྜཝཎྞནཱ

༡. པཋམསངྒྷཱདིསེསསིཀྑཱཔདཝཎྞནཱ

༦༨༡. ཨཱཧཏཀོཏི ¶ ¶ ཨཱནཱིཏོ, ནིཡཏཀོཏི ཨདྷིཔྤཱཡོ. ཨཀཔྤིཡཨཌྜོ ནཱམ སངྒྷསྶ ཝཱ ཨཱརཱམིཀཔུགྒལསྶ ཝཱ ཝཏྠུསྶ ཀཱརཎཱ སངྒྷསྶ ཝཱརིཀབྷཱཝེན སཡམེཝ ཝཱ ཨདྷིཀརཎཊྛཱནཾ གནྟྭཱ ‘‘ཨམྷཱཀཾ ཨེསོ དཱསོ, དཱསཱི, ཝཱཔཱི, ཁེཏྟཾ, ཨཱརཱམོ, ཨཱརཱམཝཏྠུ, གཱཝོ, གཱཝཱི, མཧིཾསཱི, ཨཛཱ, ཀུཀྐུཊཱ’’ཏིཨཱདིནཱ ཝོཧརཏི, ཨཀཔྤིཡཾ. ‘‘ཨཡཾ ཨམྷཱཀཾ ཨཱརཱམིཀོ ཨཱརཱམིཀཱ, ཨཡཾ ཝཱཔཱི ཨིཏྠནྣཱམེན སངྒྷསྶ ཧཏྠེ དོཧནཏྠཱཡ དིནྣཱ. ཨིཏོ ཁེཏྟཏོ ཨཱརཱམཏོ ཨུཔྤཛྫནཀཙཏུཔཙྩཡཱ ཨིཏོ གཱཝིཏོ མཧིཾསིཏོ ཨཛཱཏོ ཨུཔྤཛྫནཀགོརསཱ ཨིཏྠནྣཱམེན སངྒྷསྶ དིནྣཱ’’ཏི པུཙྪིཏེ ཝཱ ཨཔུཙྪིཏེ ཝཱ ཝཏྟུཾ ཝཊྚཏི. ‘‘ཀཏ’’ནྟི ཨཝཏྭཱ ‘‘ཀརོནྟཱི’’ཏི ཝཙནེན ཀིར ཨནེནཀཏཾ ཨཱརབྦྷ ཨཱཙིཀྑིཏཱ ནཱམ ཧོཏི. གཱིཝཱཏི ཀེཝལཾ གཱིཝཱ ཨེཝ ཧོཏི, ན པཱརཱཛིཀཾ. ཀཱརཱཔེཏྭཱ དཱཏབྦཱཏི ཨེཏྠ སཙེ ཨཱཝུདྷབྷཎྜཾ ཧོཏི, ཏསྶ དྷཱརཱ ན ཀཱརེཏབྦཱ, ཨཉྙེན པན ཨཱཀཱརེན སཉྙཱཔེཏབྦཾ. ‘‘ཏིཙིཏྟཾ ཏིཝེདན’’ནྟི ཝུཏྟཏྟཱ ‘‘མཱནུསྶཡཝསེན ཀོདྷུསྶཡཝསེནཱ’’ཏི ཏབྦཧུལནཡེན ཝུཏྟནྟི ཝེདིཏབྦཾ.

པཋམསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༢. དུཏིཡསངྒྷཱདིསེསསིཀྑཱཔདཝཎྞནཱ

༦༨༣. བྷཊིཔུཏྟཀཱནཾ ཀུམཱརབྷཊིཀཱནཾ གཎཱ བྷཊིཔུཏྟགཎཱ. ཀཔྤནྟི ཀཔྤིཡཾ. ཀཔྤགཏིཀནྟི ཀཔྤིཡསབྷཱཝཾ. པཀྐནྟཱསུཔཱིཏི ཨཏྟནོ པརིསཾ ཋཔེཏྭཱ ཨིཏརཱསུ པཀྐནྟཱསུ. པཎྞཏྟིཾ ཨཛཱནནྟཱ ཨརིཡཱཔི ཝུཊྛཱཔེནྟཱིཏི ཀཏྭཱ ཝཱ ཀམྨཝཱཙཱཔརིཡོསཱནེ ཨཱཔཏྟིཀྑཎེ ཝིཔཱཀཱབྱཱཀཏསམངྒིཏཱཝསེན ¶ ཝཱ ‘‘ཏིཙིཏྟ’’ནྟི ཝུཏྟནྟི ཝེདིཏབྦཾ. ‘‘པབྦཱཛནེ ན དུཀྐཊ’’ནྟི པོརཱཎགཎྛིཔདེ ཝུཏྟཾ.

དུཏིཡསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༣. ཏཏིཡསངྒྷཱདིསེསསིཀྑཱཔདཝཎྞནཱ

༦༨༧. བྷདྡཱཀཱཔིལཱནཱི ¶ མཧཱཀསྶཔསྶ པུརཱཎདུཏིཡཱ ཀིར. ཉཱཏཱིནཾ ཀུལཾ ཡསྨིཾ གཱམཀེ, ཏདེཏཾ གཱམཀཾ ཉཱཏིཀུལཾ, ཀུལསནྣིཧིཏཾ གཱམཀཾ ཨགམཱསཱིཏི ཨཏྠོ. ‘‘ཨཛཾ གཱམཾ ནེཏཱི’’ཏིཨཱདཱིསུ ཝིཡ ཝཱ དྭིཀམྨིཀཾ ཀཏྭཱ གཱམཀཾ ཨགམཱསི ཉཱཏིཀུལཾ ཨགམཱསཱིཏིཔི ཡུཛྫཏི.

༦༩༢. ‘‘ཨཔརིཀྑིཏྟསྶ གཱམསྶ ཨུཔཙཱརཾ ཨཏིཀྐཱམེནྟིཡཱ’’ཏི ཝཙནེནཔི ཨེཝཾ ཝེདིཏབྦཾ – ཝིཀཱལགཱམཔྤཝེསནེ དྭིནྣཾ ལེཌྜུཔཱཏཱནཾཡེཝ ཝསེན ཨུཔཙཱརོ པརིཙྪིནྡིཏབྦོ, ཨིཏརཐཱ ཡཐཱ ཨེཏྠ པརིཀྑེཔཱརཧཊྛཱནཾ པརིཀྑེཔཾ ཝིཡ ཀཏྭཱ ‘‘ཨཏིཀྐཱམེནྟིཡཱ’’ཏི ཝུཏྟཾ, ཨེཝཾ ཏཏྠཱཔི ‘‘ཨཔརིཀྑིཏྟསྶ གཱམསྶ ཨུཔཙཱརཾ ཨཏིཀྐམནྟསྶཱ’’ཏི ཝདེཡྻ. ཡསྨཱ པན ཏཏྠ པརིཀྑེཔཱརཧཊྛཱནཏོ ཨུཏྟརི ཨེཀོ ལེཌྜུཔཱཏོ ཨུཔཙཱརོཏི ཨདྷིཔྤེཏོ, ཏསྨཱ ཏདཏྠདཱིཔནཏྠཾ ‘‘ཨཔརིཀྑིཏྟསྶ གཱམསྶ ཨུཔཙཱརཾ ཨོཀྐམནྟསྶཱ’’ཏི ཝུཏྟཾ. ཡཾ པན ཨནྡྷཀཊྛཀཐཱཡཾ ‘‘པརིཀྑེཔཱརཧཊྛཱནཾཡེཝ ‘ཨུཔཙཱར’ནྟི སལླཀྑེཏྭཱ པརིཀྑེཔཔརིཀྑེཔཱརཧཊྛཱནཱནཾ ནིནྣཱནཱཀཱརཎདཱིཔནཏྠཾ ‘ཨུཔཙཱརཾ ཨོཀྐམནྟསྶཱ’ཏི ཝུཏྟཾ པཱལི༹ཝིསེསམསལླཀྑེཏྭཱཝ ཨཔརིཀྑིཏྟསྶ གཱམསྶ ཨུཔཙཱརཾ ཨཏིཀྐམནྟསྶ ཨིདྷ ཨུཔཙཱརོ པརིཀྑེཔོ ཡཐཱ བྷཝེཡྻ, ཏཾ ཨུཔཙཱརཾ པཋམཾ པཱདཾ ཨཏིཀྐམནྟསྶ ཨཱཔཏྟི དུཀྐཊསྶ. དུཏིཡཾ པཱདཾ ཨཏིཀྐམནྟསྶ ཨཱཔཏྟི པཱཙིཏྟིཡསྶཱ’’ཏི ཝུཏྟཾ, ཏཾ ན གཧེཏབྦམེཝ པཱལི༹ཡཱ ཝིསེསསབྦྷཱཝཏོཏི. ‘‘ཨཔརིཀྑིཏྟསྶ གཱམསྶ ཨུཔཙཱརཾ ཨོཀྐམནྟིཡཱཏིཔི ཨེཀཙྩེསུ དིསྶཏི, ཏཾ ན གཧེཏབྦནྟི ཨཔརེ’’ཏི ཝུཏྟཾ. ཏཏྠ ‘‘པཱལི༹ཝིསེསམསལླཀྑེཏྭཱ’’ཏི དུཝུཏྟཾ, ཀསྨཱ? ཝིཀཱལགཱམཔྤཝེསནསིཀྑཱཔདེཔི ཀཏྠཙི ‘‘ཨུཔཙཱརཾ ཨཏིཀྐམནྟསྶཱ’’ཏི པཱཋོ དིསྶཏཱིཏི, སོ ཨནྡྷཀཊྛཀཐཱཔཱཋཏོ གཧིཏོཏི ཨཱཙརིཡོ. ཨཔརིཀྑིཏྟསྶ ཨུཔཙཱརོཀྐམནམེཝ པཱཋོ ཡུཛྫཏི, ན ཨཏིཀྐམནཾ. ཀསྨཱ? བཧཱུསུ ཋཱནེསུ པཱལི༹ཡཱ ཨཊྛཀཐཱཧི ཝིརུཛ྄ཛྷནཏོ, ཨིམསྨིཾ ཝཱཔི སིཀྑཱཔདེ ཝིརུཛ྄ཛྷཏི. ཀཐཾ? གཎམྷཱ ཨོཧཱིཡམཱནཱཡ ཨརཉྙེ ཨཱཔཏྟི ཧོཏི, ན གཱམེ. ཨཐ ཙ པན ནིདསྶནམྤི ‘‘སིཀྑཱཔདཱ བུདྡྷཝརེནཱ’’ཏི (པརི. ༤༧༩) གཱཐཱ དསྶིཏཱ, ཏསྨཱ ཨུཔཙཱརོཀྐམནཔརིཡཱཔནྣནདིཾ ཨཏིཀྐཱམེནྟིཡཱ ཧོཏི. ཀིཉྩ བྷིཡྻོ ‘‘གཙྪནྟསྶ ཙཏསྶོ ཨཱཔཏྟིཡོ, ཋིཏསྶ ཙཱཔི ཏཏྟཀཱཏིཨཱདཱིནཾ (པརི. ༤༧༥) པརིཝཱརགཱཐཱནཾ ¶ ¶ ཨཊྛཀཐཱཧི ཨུཔཙཱརོཀྐམནམེཝ པཱཋོཏི ནིཊྛཾ གནྟབྦ’’ནྟི ཙ ཝུཏྟཾ, སུཊྛུ སལླཀྑེཏྭཱ ཀཐེཏབྦཾ.

‘‘པདསཱ གམནམེཝ ཧི ཨིདྷཱདྷིཔྤེཏཾ, ཏེནེཝ པཋམཾ པཱདཾ ཨཏིཀྐཱམེནྟིཡཱཏིཨཱདིམཱཧཱ’’ཏི ཨེཏྠ ཝིཀཱལགཱམཔྤཝེསནསིཀྑཱཔདཱདཱིསུ ཏདབྷཱཝཱ ཡཱནེན ཝཱ ཨིདྡྷིཡཱ ཝཱ པཝིསཏོ, ཨདྡྷཱནཾ གཙྪཏོ ཙ ཨཱཔཏྟཱིཏི དཱིཔེཏི. ཏཏྠ ཨསཱརུཔྤཏྟཱ ཨཱཔཏྟིམོཀྑོ ནཏྠཱིཏི ཨེཀེ, ཝིཙཱརེཏྭཱ གཧེཏབྦཾ. བྷིཀྑུནཱིཝིཧཱརབྷཱུམི ‘‘གཱམནྟར’’ནྟི ན ཝུཙྩཏི གཱམནྟརཔརིཡཱཔནྣཱཡཔི ཀཔྤིཡབྷཱུམིཏྟཱ. ‘‘པརཏོ ‘སཙེ བྷིཀྑུནཱིསུ མཧཱབོདྷིཡངྒཎཾ པཝིསནྟཱིསུ ཨེཀཱ བཧི ཏིཊྛཏི, ཏསྶཱ ཨཱཔཏྟཱི’ཏིཨཱདིཝཙནཏོ བྷིཀྑུཝིཧཱརོ ན ཀཔྤིཡབྷཱུམཱིཏི སིདྡྷཾ, ཏསྨཱ ཀཉྩིནགརེ ཁནྡྷདྷམྨཝིཧཱརོ ཝིཡ, ཀཱཝཱིརཔཊྚནེ སཱརཱིདྷམྨཝིཧཱརོ ཝིཡ ཙ ཨཉྙོཔི སོ ཝིཧཱརོ, ཏསྨཱ སཱིམབདྡྷསུཁཏྠཾ གཱམནྟརབྷཱཝེ ནིརནྟརཱ ཨདྷིཊྛཱནཏྠཾ པཝིསནྟིཡཱ, ནིཀྑམནྟིཡཱཔི གཱམནྟརཱཔཏྟི ཧོཏཱིཏི ཨཔརེ’’ཏི ཝུཏྟཾ. ཙཏུགཱམསཱདྷཱརཎཏྟཱཏི ཨེཏྠ ཨེཝཾཝིདྷེ ཝིཧཱརེ སཱིམཾ བནྡྷནྟེཧི ཙཏྟཱརོཔི ཏེ གཱམཱ སོདྷེཏབྦཱཏི ཝེདིཏབྦཱ. སཾཝིདཧིཏྭཱ བྷིཀྑུནིཡཱ ཝཱ མཱཏུགཱམེན ཝཱ ཐེཡྻསཏྠེན ཝཱ སདྡྷིཾ ཏཾ ཝིཧཱརཾ ཨོཀྐམནྟིཡཱ ཙཏསྶོ ཨཱཔཏྟིཡོ ཨེཀཏོཝ ཧོནྟི. ‘‘གཱམནྟརེ གཱམནྟརེ ཨཱཔཏྟི པཱཙིཏྟིཡསྶཱ’’ཏི ཝུཏྟཱཏི ཨེཀེ.

དུཏིཡཔཱདུདྡྷཱརེ སངྒྷཱདིསེསོཏི ཨེཏྠ སཙེ དུཏིཡོ པཱདུདྡྷཱརོ ཀཔྤིཡབྷཱུམིཡཾ ཧོཏི, ན སངྒྷཱདིསེསོ, ཨཀཔྤིཡབྷཱུམིཡཾ ཨེཝ སངྒྷཱདིསེསོ. ‘‘ཨུབྷཡཏཱིརེསུ ཝིཙརནྟི, ཝཊྚཏཱིཏི དསྶནཱུཔཙཱརསྶེཏྠ སམྦྷཝཱ’’ཏི ལིཁིཏཾ, ཏཾ ཡུཏྟཾ. སཝནཱུཔཙཱརོ ཧེཏྠ ནདཱིཔཱརེ, གཱམནྟརེ ཝཱ ཨཔྤམཱཎནྟི. ཨནྡྷཀཊྛཀཐཱཡཾ པན ‘‘པརཏཱིརཏོ ནདིཾ ཨོཏརིཏྭཱ དསྶནཱུཔཙཱརཏོ དཱརཱུནི, པཎྞཱནིཝཱ མགྒིཏྭཱ ཨཱནེཏི, ཨནཱཔཏྟི. ཏིཙཱིཝརཱནི པརཏཱིརེ ཨོཏཱཔེཏི, ཨནཱཔཏྟཱི’’ཏི ཝུཏྟཾ. ‘‘ཨོརིམཏཱིརམེཝ ཨཱགཙྪཏི, ཨཱཔཏྟཱི’’ཏི ཨཏིཀྐམིཏུཀཱམཏཱཡ པཝིཊྛཏྟཱ ཝུཏྟཾ. ‘‘ནྷཱཡནཱདིཀིཙྩེན པཝིཊྛཱནཾ ཀཏྠེཝཱལཡསམྦྷཝཱ ཝཊྚཏཱི’’ཏི ཝུཏྟཾ. གཱམནྟརེ པམཱཎནྟི ཨཊྛཀཐཱཡཾ པརཏཱིརཏོ ནདིཾ ཨོཏརིཏྭཱ དསྶནཱུཔཙཱརཏོ དཱརཱུནི པཎྞཱནི སཀགཱམཏོ ཐོཀམྤི ཏརཎཝཱརེན ན ཝཊྚཏི ཀིར ནིཀྑམིཏྭཱ པཝིསིཏུཾ.

ཨགཱམཀེ ¶ ཨརཉྙེཏི ཨགཱམལཀྑཎེ ཨརཉྙེཏི ཨཏྠོ. ཨིམིནཱ ཨཱཔཏྟིཁེཏྟཾ དསྶིཏཾ. ཡསྨཱ ཨིདཾ ཨཱཔཏྟིཁེཏྟཾ, ཏསྨཱ ཡཱ བྷིཀྑུནུཔསྶཡཏོ གཱམསྶ ཨིནྡཁཱིལཾ ཨཏིཀྐམཏི, སཱ ཨསནྟེ ¶ གཱམེ གཎམྷཱ ཨོཧཱིཡནཱཔཏྟིཾ ཨཱཔཛྫཏི. དསྶནསཝནཱུཔཙཱརཱབྷཱཝེཔི པགེཝ གཱམེ ཨིནྡཁཱིལཱཏིཀྐམནཀྑཎེཡེཝ ཨཱཔཛྫཏི. སཙེ ཏཏྠ ཨེཀཱ བྷིཀྑུནཱི ཨཏྠི, ཏསྶཱ དསྶནསཝནཱུཔཙཱརཱཏིཀྐམནཀྑཎེ ཨཱཔཛྫཏི, ཨརཉྙམགྒགམནཀཱལེ ཨེཝཱཡཾ ཝིདྷཱིཏི ན གཧེཏབྦཾ. གཱམཏོ པན ནིཀྑམནྟཱི ཨིཏོ པཊྛཱཡ ཨཱཔཛྫཏཱིཏི དསྶནཏྠཾ ‘‘ཨགཱམཀཾ ཨརཉྙ’’ནྟི ཝུཏྟཾ. ཝུཏྟཉྷེཏཾ ‘‘ཨཱརཱདྷིཀཱ ཙ ཧོནྟི སངྒཱཧིཀཱ ལཛྫིནིཡོ, ཏཱ ཀོཔེཏྭཱ ཨཉྙཏྠ ན གནྟབྦཾ. གཙྪཏི ཙེ, གཱམནྟརནདཱིཔཱརརཏྟིཝིཔྤཝཱསགཎམྷཱ ཨོཧཱིཡནཱཔཏྟཱིཧི ན མུཙྩཏཱི’’ཏིཨཱདི. ཏཏྠ ‘‘གཎམྷཱ ཨོཧཱིཡནཱཔཏྟི སཀིཾཡེཝཱཔཛྫཏི. ཨིཏརཱ གཱམེ གཱམེ པཱརེ པཱརེ ཨརུཎེ ཨརུཎེ ཙཱཏི ཝེདིཏབྦ’’ནྟི ཝུཏྟཾ. ཏཏྠ ‘‘ཝུཏྟཉྷེཏ’’ནྟིཨཱདཱིནི ཨསཱདྷཀཱནི ཡཐཱསམྦྷཝཾ གཧེཏབྦཏྟཱ. ‘‘མཧཱབོདྷིཡངྒཎནྟིཨཱདི ཨེཝཾ གཱམསྶ ཨཱསནྣཊྛཱནེཔི ཨིམཾ ཨཱཔཏྟིཾ ཨཱཔཛྫཏཱིཏི དསྶནཏྠཾ ཝུཏྟ’’ནྟི ལིཁིཏཾ.

ཏཏིཡསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༤. ཙཏུཏྠསངྒྷཱདིསེསསིཀྑཱཔདཝཎྞནཱ

༦༩༤. པཊིཝཏྟཱཏི པཊིཝཙནཾ དེནྟི. ཀམྨདོསནྟི ‘‘ཨནཉྙཱཡ གཎསྶ ཚནྡནྟི ཨེཝམཱདཱི’’ཏི ལིཁིཏཾ. ཀཏྟབྦཊྛཱནདོསནྟི པོརཱཎཱ. ཀཱརཀགཎསྶཱཏི ཀཱརཀསངྒྷསྶ. ‘‘བྷིཀྑུནིསངྒྷཾ སནྣིཔཱཏེཏྭཱ’ཏི ཝུཏྟཏྟཱ ཀཱརཀསངྒྷོཔི ཨཡམེཝཱཏི ཙེ? པཋམམེཝ ཀཱརཀསངྒྷཾ ན ཨཱམནྟེཏྭཱ བལཀྐཱརེནཱཡཾ ཐུལླནནྡཱ ཏཾ བྷིཀྑུནིཾ ཨོསཱརེསཱི’’ཏི པོརཱཎགཎྛིཔདེ ཝུཏྟཾ, ཏསྨཱ ཀཱརཀབྷིཀྑཱུནཾ སམྨུཁཱཔི ཏེསཾ ཨནུམཏིཾ པཋམཾ ཨགྒཧེཏྭཱ ཏཾ ཀམྨཾ ན པཊིཔྤསྶམྦྷེཏབྦནྟི སིདྡྷཾ ཧོཏི, པཊིཔྤསྶདྡྷཾ བལཀྐཱརེན ན ཀཱཏབྦམེཝཱཏི ཨདྷིཔྤཱཡོ. ‘‘བྷིཀྑུནཱིཔི དིཊྛཱཝིཀམྨཾ ཀཱཏུཾ ལབྷཏཱི’’ཏི ཙ ཏཏྠ ཝུཏྟཾ.

༦༩༨. ཨསནྟེ ཀམྨཀཱརཀསངྒྷེ ཨོསཱརེཏི, ཨནཱཔཏྟཱིཏི ཨེཏྠ ཀིཏྟཱཝཏཱ ཨསནྟོ ནཱམ ཧོཏཱིཏི? ཨིདཾ སབྦཏྠ ན ཝིཙཱརིཏཾ. ཀཱརཀཱནཾ ¶ ཀཱལཀིརིཡཱཡཱཏི ཨེཀེ. ཨེཀསྶཔི ཨབྷཱཝེནཱཏི ཨེཀེ. ཨེཀསྨིཾ རཛྫེཏི ཨེཀེ. ཨེཀརཊྛེཏི ཨེཀེ. ཨེཀགཱམེཏི ཨེཀེ. ཨེཀསྨིཾ ཨཱཝཱསེཏི ཨེཀེ. ཡཏྠ སཀྐཱ ཨཔལོཀེཏུནྟི ཨེཀེ. ཨནྟོཨདྡྷཡོཛནེཏི ཨེཀེ. ཏཏྠ ཏསྨིཾ ཨཱཝཱསེ ཨསནྟེ ཀཱརཀསངྒྷེ ཨོསཱརེཏི, ཨནཱཔཏྟཱིཏི ཨིདཾ པསཾསནྟི ཨཱཙརིཡཱ. ཡཏྠ སཀྐཱ ཨཔལོཀེཏུནྟི སཱམཱིཙི.

ཙཏུཏྠསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༥. པཉྩམསངྒྷཱདིསེསསིཀྑཱཔདཝཎྞནཱ

༧༠༡. ཨེཏཾ ¶ ན ཝུཏྟནྟི བྷིཀྑུནིཡཱ ཨཝསྶུཏབྷཱཝོ དཊྛབྦོཏི ཨེཏཾ ནིཡམནཾ ན ཝུཏྟཾ. ཏཾ ཨཝཙནཾ པཱལི༹ཡཱ སམེཏི. ཀཏརཔཱལི༹ཡཱཏི? ‘‘ཨནཝསྶུཏོཏི ཛཱནནྟཱི པཊིགྒཎྷཱཏཱི’’ཏི ཨིམཱཡ. ཡདི ཧི པུགྒལསྶ ཨཝསྶུཏབྷཱཝོ ན པམཱཎཾ, ཀིཾ ཨིམཱཡ པཱལི༹ཡཱ པཡོཛནཾ, ‘‘ཨནཱཔཏྟི ཨུབྷོ ཨནཝསྶུཏཱ ཧོནྟི, ཨནཝསྶུཏཱ པཊིགྒཎྷཱཏཱི’’ཏི ཨེཏྟཀམེཝ ཝཏྟབྦཾ སིཡཱ. ཨཏྟནོ ཧི ཨནཝསྶུཏབྷཱཝོཡེཝ པམཱཎནྟི. ཨིམསྶ པན ཨནཱཔཏྟིཝཱརསྶ ཨཡམཏྠོ – ཨུབྷོ ཙེ ཨནཝསྶུཏཱ, སབྦཐཱཔི ཨནཱཔཏྟི. ཨཐ བྷིཀྑུནཱི ཨནཝསྶུཏཱ སམཱནཱ ཨཝསྶུཏམྤི ‘‘ཨནཝསྶུཏོ’’ཏི སཉྙཱཡ ཏསྶ ཧཏྠཏོ པཊིགྒཎྷཱཏི, ཨེཝམྤི ཨནཱཔཏྟཱིཏི. ཨཐ སཱ ཨནཝསྶུཏཱཔི ཨཉྙཾ ཨནཝསྶུཏཾ ཝཱ ཨཝསྶུཏཾ ཝཱ ‘‘ཨཝསྶུཏོ’’ཏི ཛཱནཱཏི, དུཀྐཊམེཝ. ཝུཏྟཉྷེཏཾ ཨནནྟརསིཀྑཱཔདེ ‘‘ཀིསྶ ཏྭཾ ཨཡྻེ ན པཊིགྒཎྷཱསཱིཏི. ཨཝསྶུཏོ ཨཡྻེཏི…པེ… ནཱཧཾ ཨཝསྶུཏཱ’’ཏི.

པཉྩམསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༦. ཚཊྛསངྒྷཱདིསེསསིཀྑཱཔདཝཎྞནཱ

༧༠༥. ཏེནཱཏི ཏསྨཱ. ཡསྨཱ ཨུཡྻོཛིཀཱ ན དེཏི ན པཊིགྒཎྷཱཏི, ཏསྨཱ པཊིགྒཧོ ན ཝིཛྫཏཱིཏི ཨཏྠོ. ཨིཏརིསྶཱ པརིབྷོགཔཙྩཡཱ. ‘‘ཨཀུསལཙིཏྟ’’ནྟི བཱཧུལླེན ཝུཏྟཾ. ‘‘ཝཊྚཏཱིཏི སཉྙཱཡ ཝདནྟིཡཱཔི ཨཱཔཏྟཱི’’ཏི ཝདནྟི.

ཚཊྛསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༧. སཏྟམསངྒྷཱདིསེསསིཀྑཱཔདཝཎྞནཱ

༧༡༢-༤. ཀམྨཝཱཙཏོ ¶ པུབྦེ ཨཱཔནྣཱཔཏྟིཡོ ན པཊིཔྤསྶམྦྷནྟི. ཉཏྟིཡཱ དུཀྐཊཐུལླཙྩཡཱ པཊིཔྤསྶམྦྷནྟི སངྒྷཱདིསེསེ པཏྟེཏི པོརཱཎཱ. ཏཾ ‘‘ཨཛ྄ཛྷཱཔཛྫནྟིཡཱ’’ཏི པཱལི༹ཡཱ སམེཏི. ‘‘སུཏྭཱ ན ཝདནྟཱི’’ཏི ཨེཏྠ སཙེ ཛཱིཝིཏབྲཧྨཙརིཡནྟརཱཡབྷཡཱ ན ཝདནྟི, ཨནཱཔཏྟི ¶ . ‘‘ཨདྷམྨཀམྨེ ཨདྷམྨཀམྨསཉྙཱ ཨཱཔཏྟི དུཀྐཊསྶཱ’’ཏི ཝུཏྟཏྟཱ ‘‘ཨནཱཔཏྟི ཨསམནུབྷཱསནྟིཡཱ’’ཏི སངྒྷཱདིསེསཾ སནྡྷཱཡ ཝུཏྟཾ.

སཏྟམསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༨. ཨཊྛམསངྒྷཱདིསེསསིཀྑཱཔདཝཎྞནཱ

༧༡༥. པཙྩཱཀཏཱཏི པརཱཛིཏཱ. ཀུལདཱུསཀསིཀྑཱཔདསྶ, ཨིམསྶ ཙ ནིདཱནམཏྟམེཝ ནཱནཱཀརཎཾ. ཝུཏྟཉྷི ཏཏྠ ‘‘ཏསྶ ཝཙནསྶ པཊིནིསྶགྒཱཡ ཨེཝ ཝཙནཱིཡོ, ན ཀུལདཱུསནནིཝཱརཎཏྠཱཡཱ’’ཏི. ཨེཝཾ སནྟེ ཨུབྷོཔེཏཱ ཨཱཔཏྟིཡོ ཨཉྙམཉྙཾ སབྷཱགཏྠཱ, ཏསྨཱ ཨིདཾ ཏསྶ ཨནུཔཉྙཏྟིསདིསཾ ཨཱཔཛྫཏི, ཏཏོ ཨིདཾ ནིརཏྠཀམེཝ ཨཱཔཛྫཏཱིཏི? ན ཨེཝཾ དཊྛབྦཾ. ཝཏྠུཝིསེསཏོ, ཀམྨཝཱཙཱཝིསེསཏོ ཙ ཨུབྷིནྣཾ ནཱནཱཀརཎཾ.

ཨཊྛམསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༩. ནཝམསངྒྷཱདིསེསསིཀྑཱཔདཝཎྞནཱ

༧༢༣. ‘‘ཀཱཡིཀཝཱཙསིཀེན སཾསགྒེནཱ’’ཏི པཱཋསེསོ.

ནཝམསངྒྷཱདིསེསསིཀྑཱཔདཝཎྞནཱ ནིཊྛིཏཱ.

སངྒྷཱདིསེསཀཎྜཝཎྞནཱ ནིཊྛིཏཱ.

༣. ནིསྶགྒིཡཀཎྜཝཎྞནཱ

༡. པཋམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༣༣. པཋམནིསྶགྒིཡཔཱཙིཏྟིཡསིཀྑཱཔདཾ ¶ ¶ ཨུཏྟཱནམེཝ.

༢. དུཏིཡནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༤༠. ཝཏྠུསམྤཏྟཏྟཱ ཝཱ ན ཏསྶཱ ཨནཱཔནྣཀཱམཏཱཡ ཝཱ ཨནཱཎཏྟིཀཏཱཡ ཝཱ ཨཀཱལཙཱིཝརམདཾསུ. ཡཐཱདཱནེ ཨེཝ ཨུཔནེཏབྦཾ, ན བྷཱཛེཏབྦཾ པུགྒལིཀཏྟཱཏི ཨདྷིཔྤཱཡོ. ཨཏྠཏོ ཧི ཨིཏརམྤི ཡཐཱདཱནེ ཨེཝ ཨུཔནེཏབྦམེཝ. གཎྛིཔདེ པན ‘‘ཨཡྻཱཡ དམྨཱིཏི ཨེཝཾ པཊིལདྡྷནྟི ནིསྶཊྛཔཊིལདྡྷཾ. ཡཐཱདཱནེཏི དཱཡཀེཧི པརིཙྩཏྟཝིདྷཱནེན. ཨུཔནེཏབྦནྟི ཨཀཱལཙཱིཝརབྷཱཝེན བྷཱཛེཏབྦནྟི ཨདྷིཔྤཱཡོ. ཨིདྷ བྷཱཛཱཔིཏཱཡ ལདྡྷཙཱིཝརམེཝ ནིསྶགྒིཡཾ ཧོཏི, ཏཾ ཝིནཡཀམྨཾ ཀཏྭཱཔི ཨཏྟནཱ ན ལབྷཏཱི’’ཏི ལིཁིཏཾ. ཡདི ནིསྶཊྛཔཊིལདྡྷཾ སནྡྷཱཡ ཨིདཾ ཝུཏྟཾ སིཡཱ, ‘‘ནིསྶཛྫིཏབྦཾ སངྒྷསྶ ཝཱ གཎསྶ ཝཱ པུགྒལསྶ ཝཱ དདེཡྻ, དདེཡྻུཾ, ཨཡྻཱཡ དམྨཱི’’ཏི ཝུཏྟཏྟཱ ཏཱིཎིཔེཏཱནི པདཱནི ཝཏྟབྦཱནི སིཡུཾ, ཏསྨཱ ན ཀེཝལཾ ནིསྶཊྛཔཊིལདྡྷམེཝ ཡཐཱདཱནེ ཨུཔནེཏབྦཾ, ཨཉྙཱཧི བྷིཀྑུནཱིཧི ལདྡྷཀོཊྛཱསམྤི ཡཐཱདཱནེཡེཝ ཨུཔནེཏབྦཾ.

༧༤༡. ‘‘ཨཀཱལཙཱིཝརེ ཀཱལཙཱིཝརསཉྙཱཡ ཨནཱཔཏྟཱི’’ཏི པན བྷཱཛནཔཙྩཡཱ ཨཱཔཛྫིཏབྦཱཔཏྟིཾ ནཱཔཛྫཏཱིཏི ཨེཏྟཀམེཝ དཱིཔེཏི, ན པཊིལདྡྷཾ, ན ཡཐཱདཱནེ དཱཏབྦནྟི ཨིམམཏྠཾ དཱིཔེཏི. ལེསེན པན གཎྷཱཏི ཙེ, བྷཎྜགྒྷེན ཀཱརེཏབྦཱ.

དུཏིཡནིསྶགྒིཡཔཱཙིཏྟིཡསིཀྑཱཔདཝཎྞནཱ ནིཊྛིཏཱ.

༣. ཏཏིཡནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༤༤. སཀསཉྙཱཡ ¶ གཧིཏཏྟཱ པཱཙིཏྟིཡཾ, དུཀྐཊཉྩ ཝུཏྟཾ. ཨིཏརཐཱ བྷཎྜགྒྷེན ཀཱརེཏབྦཾ.

ཏཏིཡནིསྶགྒིཡཔཱཙིཏྟིཡསིཀྑཱཔདཝཎྞནཱ ནིཊྛིཏཱ.

༤. ཙཏུཏྠནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༥༢. ལེསེན ¶ གཧེཏུཀཱམཏཱ, ཨཉྙསྶ ཝིཉྙུསྶ ཝིཉྙཱཔནཾ, པཊིལཱབྷོཏི ཏཱིཎི ཨངྒཱནི, ཏསྨཱ པཋམཾ ཝིཉྙཏྟཾ ཨལབྷིཏྭཱ ཨཉྙཾ ཏཏོ ཨཱུནཏརམྤི ལབྷེཡྻ, ནིསྶགྒིཡམེཝ ཨངྒསམྤཏྟིཏོ. ཨེས ནཡོ ཨཉྙཏྠཱཔི.

ཙཏུཏྠནིསྶགྒིཡཔཱཙིཏྟིཡསིཀྑཱཔདཝཎྞནཱ ནིཊྛིཏཱ.

༥. པཉྩམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༥༣. ‘‘ཏེལཾ གོཔེཏྭཱ སཔྤིམྤི མེ ཨཏྟནོ ཀུལགྷརཱ’’ཏི ཀིར པཱཋོ.

པཉྩམནིསྶགྒིཡཔཱཙིཏྟིཡསིཀྑཱཔདཝཎྞནཱ ནིཊྛིཏཱ.

༦. ཚཊྛནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༥༨-༧༦༢. པཱཝཱརིཀསྶཱཏི དུསྶཝཱཎིཛཀསྶ. ཡཱཡ ཙེཏཱཔིཏཾ, ཏསྶཱ ནིསྶགྒིཡཾ, ནིསྶཊྛཔཊིལཱབྷོ ཙ. ‘‘ཨིཏརཱསཾ པན ཛཱནིཏྭཱ ཝསྶགྒེན པཏྟཀོཊྛཱསཾ སཱདིཡནྟཱིནམྤི ན ནིསྶགྒིཡཾ, ཀེཝལཾ ཡཐཱདཱནེ ཨེཝ ཏཱཧིཔི ཨུཔནེཏབྦ’’ནྟི ཝདནྟི. ‘‘ནིསྶཊྛཾ པཊིལབྷིཏྭཱཔི ཡཐཱདཱནེ ཨུཔནེཏབྦ’ནྟི ཝུཏྟཏྟཱ སེསཱཧི གཧིཏཾ སུགྒཧིཏ’’ནྟི ཝདནྟི. ཨེཏྠ གིལཱནཱཡཔི ན མོཀྑོ.

ཚཊྛནིསྶགྒིཡཔཱཙིཏྟིཡསིཀྑཱཔདཝཎྞནཱ ནིཊྛིཏཱ.

༧. སཏྟམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༦༤. སཏྟམེ ¶ ‘‘སཡཾ ཡཱཙིཏཀེནཱ’’ཏི ཀིཉྩཱཔི ཨཝིསེསེན ཝུཏྟཾ. ཏཐཱཔི ཨཉྙདཏྠིཀེན ཨཏྟུདྡེསིཀེན སཉྙཱཙིཀེནཱཏི ཨཏྠོ ཝེདིཏབྦོ. ཨཡམཏྠོ ‘‘བྷིཀྑུནིཡོ ཏེན ཙ པརིཀྑཱརེན སཡམྤི ཡཱཙིཏྭཱ ¶ བྷེསཛྫཾ ཙེཏཱཔེཏྭཱ པརིབྷུཉྫིཾསཱུ’’ཏི ཨིམིསྶཱ པཱལི༹ཡཱ ཨཏྠེན སཾསནྡིཏྭཱ ཝེདིཏབྦོ. ཏསྶཱཡམཏྠོ – ཏེན པརིཀྑཱརེན བྷེསཛྫཾ ཙེཏཱཔེཏྭཱ ཙ-སདྡེན སཉྙཱཙིཀེན ཙ བྷེསཛྫཾ ཙེཏཱཔེཏྭཱཏི ཨིམམཏྠཾ དཱིཔེནྟོ ‘‘སཡམྤི ཡཱཙིཏྭཱ བྷེསཛྫཾ ཙེཏཱཔེཏྭཱ’’ཏི ཨཱཧ. ཨཉྙཐཱ ‘‘ཏེན པརིཀྑཱརེན བྷེསཛྫཾ ཙེཏཱཔེཏྭཱ སཡམྤི ཡཱཙིཏྭཱ པརིབྷུཉྫིཾསཱུ’’ཏི ཨིམིནཱ ཨནུཀྐམེན པཱལི༹ ཝཏྟབྦཱ སིཡཱ.

པདབྷཱཛནེ པན ‘‘སཾཡཱཙིཀེནཱཏི སཡཾ ཡཱཙིཏྭཱ’’ཏི ཏསྶེཝ པདསྶ ཨདྷིཔྤཱཡམཏྟཾ ཝུཏྟཾ. སཱ ཧི པདབྷཱཛནདྷམྨཏཱ. ‘‘སངྒྷིཀཾ ལཱབྷཾ པརིཎཏ’’ནྟིཨཱདིཔདཱནཾ བྷཱཛནེ པན སཱ པཱཀཊཱ. ཨཉྙཐཱ སཾཡཱཙིཀཔདེན ཀོ ཨཉྙོ ཨཏིརེཀཏྠོ སངྒཧིཏོ སིཡཱ, སོ ན དིསྶཏཱིཏི ཏདེཝ པདཾ ནིཔྤཡོཛནཾ, ཨིདཉྩ སིཀྑཱཔདཾ པུརིམེན ནིནྣཱནཱཀརཎཾ སིཡཱ. ཨཏྟནོ ཧི སནྟཀཾ ཡཐཱཀཱམཾ ཀརཎཱིཡནྟི. ཨེཏྠ ཙ སངྒྷསྶ ཡཱཙནཱཡ ཝསེན ཨེཀཏོ ཧུཏྭཱ ཡཱཙནཱཡ ལདྡྷཾ སཾཡཱཙིཀནྟི ཝེདིཏབྦཾ. ཨཉྙཐཱ ཨིཏོ པརེན སཾཡཱཙིཀ-སདྡེན ཨིདཾ ནིབྦིསེསཾ ཨཱཔཛྫཏཱིཏི ‘‘པུགྒལིཀེན སཾཡཱཙིཀེནཱ’’ཏི ཨིདཉྩ སིཀྑཱཔདཾ ཝིསུཾ ན ཝཏྟབྦཾ སིཡཱ ཨིདྷེཝ ཏེན ཨཱཔཛྫིཏབྦཱཔཏྟིཡཱ སངྒཧིཏཏྟཱ, ན ཙ སངྒཧིཏཱ ཨཱཔཏྟིདྭཡབྷཱཝཏོ. མིསྶེཏྭཱ ཙེཏཱཔིཏཏྟཱ ཧི ཨེཀམེཝ ཨཱཔཏྟཱིཏི ཙེ? ན, སཾཡཱཙིཀཔདསྶ ནིཔྤཡོཛནབྷཱཝཔྤསངྒཏོ, ཨེཝཾ སངྒྷིཀམཧཱཛནིཀཔུགྒལིཀཱནི མིསྶིཏྭཱ ཙེཏཱཔནེ ཨེཀཱཔཏྟིབྷཱཝཔྤསངྒཏོ ཙ.

སཏྟམནིསྶགྒིཡཔཱཙིཏྟིཡསིཀྑཱཔདཝཎྞནཱ ནིཊྛིཏཱ.

༨. ཨཊྛམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༦༩. གཎསྶཱཏི ཨཱབྷིདྷམྨིཀཱདིགཎསྶ, ཨཱུནཙཏུཝགྒསྶ ཙ.

ཨཊྛམནིསྶགྒིཡཔཱཙིཏྟིཡསིཀྑཱཔདཝཎྞནཱ ནིཊྛིཏཱ.

༩. ནཝམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༧༤. སཉྙཱཙིཀེནཱཏི ¶ གཎཡཱཙནཱཡ ལདྡྷེནེཝ, ན ཨཉྙེན.

ནཝམནིསྶགྒིཡཔཱཙིཏྟིཡསིཀྑཱཔདཝཎྞནཱ ནིཊྛིཏཱ.

༡༠. དསམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༧༩. དསམེ ¶ པན ‘‘ཡཱ པན བྷིཀྑུནཱི ཨཉྙདཏྠིཀེན པརིཀྑཱརེན ཨཉྙུདྡིསིཀེན པུགྒལིཀེན ཨཉྙཾ ཙེཏཱཔེཡྻ, ནིསྶགྒིཡཾ པཱཙིཏྟིཡ’’ནྟི ཨེཝཾཝིདྷེན བྷཝིཏབྦཾ, ‘‘པུགྒལིཀེན སཾཡཱཙིཀེནཱ’’ཏི ཨིམིནཱ ཨེཀཱདསམེན བྷཝིཏབྦཾ སིཡཱ ཡཐཱཀྐམེན སམྦྷཝཏོ. ཀཱམམེཝ ཙེཏཾ ཨཊྛུཔྤཏྟིཡཱ ཨབྷཱཝཏོ ན ཝུཏྟཾ, ཨཏྠཏོ པན གཧེཏབྦམེཝ. ཨེཏྠ པན སངྒྷགཎཔུགྒལཱནཾ པཝཱརིཏཊྛཱནེ, པུགྒལསྶེཝ ཉཱཏཀཊྛཱནེ ཙ ཨནཱཔཏྟིཚཱཡཱ དིསྶཏི, ཨིདཾ སབྦཾ ཨམྷཱཀཾ ཏཀྐཱནུསཱརཝསེནེཝ ཝུཏྟནྟི ཀཏྭཱ ན སཱརཏོ དཊྛབྦཾ. ཝིཙཱརེཏྭཱ ཡཐཱ ནིཙྩལཀཱརཎཾ དིསྭཱ ཡཾ ཝཱ ཝིནཡཀྐམཀོཝིདཱ ཨནུཛཱནནྟི, ཏཾ ཏདེཝ གཧེཏབྦཾ. པོརཱཎགཎྛིཔདེ པན ‘‘ཨཱཔདཱསུཔི ཨཉྙཾ གརུབྷཎྜམེཝ ཙེཏཱཔེཏབྦཾ, ཨིཏརཾ ན ཝཊྚཏི, བྷིཀྑུསྶ པན ཝཊྚཏཱི’’ཏི ཝུཏྟཾ.

དསམནིསྶགྒིཡཔཱཙིཏྟིཡསིཀྑཱཔདཝཎྞནཱ ནིཊྛིཏཱ.

༡༡. ཨེཀཱདསམནིསྶགྒིཡཔཱཙིཏྟིཡསིཀྑཱཔདཝཎྞནཱ

༧༨༤. ‘‘དུཏིཡཝགྒསྶ པཋམེ’’ཏི ཨཝཏྭཱ ‘‘ཨེཀཱདསམེ’’ཏི ཨིདྷ ཝུཏྟཾ. ཀསྨཱ? བྷིཀྑུནིཝིབྷངྒེ ཏིཾསཀཀཎྜཾ པཏྭཱ ཝགྒཀྐམསྶ ཨཝུཏྟཏྟཱ. ཡསྨཱ པཝཱརིཏཊྛཱནེ ཝིཉྙཏྟི ནཱམ ན པཊིསེདྷེཏབྦཱ, ཏསྨཱ བྷགཝཱ ཨཉྙཱཏིཀཨཔྤཝཱརིཏཊྛཱནེ དྷམྨནིམནྟནཝསེན ཝདེཡྻ ‘‘ཡེནཏྠོ’’ཏི ཝུཏྟཱཡ ‘‘ཙཏུཀྐཾསཔརམཾ ཝིཉྙཱཔེཏབྦ’’ནྟི པརིཙྪེདཾ དསྶེཏཱིཏི ཝེདིཏབྦཾ. ཨཉྙཐཱ ‘‘ནིདཱནེན སིཀྑཱཔདཾ ན སམེཏི, སིཀྑཱཔདེན ཙ ཨནཱཔཏྟིཝཱརོ’’ཏི ཙ ‘‘ཨཀཏཝིཉྙཏྟིཡཱ ཙཏུཀྐཾསཔརམཾ ཝིཉྙཱཔེཏབྦ’’ནྟི ཙ ཨནིཊྛཾ ཨཱཔཛྫཏི, ཏསྨཱ མཱཏིཀཱཊྛཀཐཱཡཾ ཙེཏཱཔེཏབྦནྟི ཋཔེཏྭཱ སཧདྷམྨིཀེ ཙ ཉཱཏཀཔཝཱརིཏེ ཙ ཨཉྙེན ཀིསྨིཉྩིདེཝ གུཎེན, པརིཏུཊྛེན ཙ ཝདེཡྻ ‘‘ཡེནཏྠོ’’ཏི ཝུཏྟསྶ ‘‘ཝིཉྙཱཔེཏབྦ’’ནྟི ཝུཏྟནཡེན ¶ ཨཏྠོ དཊྛབྦོ. པོརཱཎགཎྛིཔདེ པན ‘‘ཨིདཾ པརིཙྪིནྣཔཝཱརཎཾ སནྡྷཱཡ ཝུཏྟཾ. ཨནཱཔཏྟི ཉཱཏཀཱནཾ པཝཱརིཏཱནནྟི པན སབྦཔྤཀཱརེན པཝཏྟཾ ནིཙྩཔཝཱརཎཾ སནྡྷཱཡ ཝུཏྟཾ. ནིཙྩཔཝཱརཎཱ ནཱམ ཡདཱ ཡེནཏྠོ, ཏདཱ ཏཾ ཝདེཡྻཱཐཱཏི ཨེཝཾ པཝཏྟཱ ¶ . ‘ཧནྡ སཱིཏཔཱཝུརཎ’ནྟི དེནྟཱནཾ པན ཨཏིརེཀཙཏུཀྐཾསམྤི གཧེཏུཾ ཝཊྚཏཱི’’ཏི ཝུཏྟཾ. ཨཡམེཝ ནཡོ དསམེཔཱིཏི.

ཨེཀཱདསམནིསྶགྒིཡཔཱཙིཏྟིཡསིཀྑཱཔདཝཎྞནཱ ནིཊྛིཏཱ.

བྷིཀྑུནཱིཝིབྷངྒེ ཏིཾསཀཝཎྞནཱ ནིཊྛིཏཱ.

ནིསྶགྒིཡཀཎྜཝཎྞནཱ ནིཊྛིཏཱ.

༤. པཱཙིཏྟིཡཀཎྜཝཎྞནཱ

༡. ལསུཎཝགྒོ

༡. པཋམལསུཎསིཀྑཱཔདཝཎྞནཱ

༧༩༣-༧. ཨཧཾ ¶ ¶ ལསུཎེནཱཏི ཨེཏྠ ‘‘པཝཱརེམཱི’’ཏི པཱཋསེསོ. བདརསཱལ༹ཝཾ ཀིར བདརཕལཱནི སུཀྑཱཔེཏྭཱ ཙུཎྞེཏྭཱ ཀཏྟབྦཱ ཁཱདནཱིཡཝིཀཏི.

པཋམལསུཎསིཀྑཱཔདཝཎྞནཱ ནིཊྛིཏཱ.

༢. དུཏིཡསིཀྑཱཔདཝཎྞནཱ

༨༠༠. སཾཧརཱཔེཡྻཱཏི ‘‘སཾཧརཏི ཝཱ སཾཧརཱཔེཏི ཝཱ’’ཏི པདབྷཱཛནཾ ཝེདིཏབྦཾ. ཀིཉྩཱཔི ཨེཏྠ ཨཱཔཏྟིབྷེདོ ན དསྶིཏོ, ཏཐཱཔི ཁུརསཎྜཱསཀཏྟརིཨཱདིཔརིཡེསནགྷཾསནཱདཱིསུ པུབྦཔཡོགེསུ དུཀྐཊཾ ཡུཛྫཏི, ཡཐཱ ཙེཏྠ, ཨེཝཾ ཏལགྷཱཏཀཱདིམྷི ཙ ཨཱཔཏྟིབྷེདོ པཱལི༹ཡཾ ན ཝུཏྟོ. ཡཐཱསམྦྷཝཾ པན པུབྦཔཡོགེསུ དུཀྐཊཾ སམྦྷཝཏི. ཨེཝཾ བྷིཀྑུསྶ ཨེཏྠ ཙ ལསུཎེ ཙ དུཀྐཊཾ. ཨིདཾ ཀིརིཡཱཀིརིཡནྟི པོརཱཎཱ. ཏཏྠ ‘‘ཀིརིཡཱཀིརིཡ’’ནྟི ན ཝུཏྟཾ.

དུཏིཡསིཀྑཱཔདཝཎྞནཱ ནིཊྛིཏཱ.

༨༠༢-༦. ཏཏིཡཙཏུཏྠསིཀྑཱཔདཾ ཨུཏྟཱནཏྠམེཝ.

༥. པཉྩམསིཀྑཱཔདཝཎྞནཱ

༨༡༢. པཉྩམེ ¶ ཨུདཀསུདྡྷིཔཙྩཡེ སཏིཔི ཕསྶསཱདིཡནེ ཡཐཱཝུཏྟཔརིཙྪེདེ ཨནཱཔཏྟི. ཏཏྠ དྭིནྣཾ པབྦཱནནྟི ‘‘དྭིནྣཾ ཨངྒུལཱནཾ སཧཔཝེསནེ ཨེཀེཀཨངྒུལསྶ ཨེཀེཀཾ པབྦཾ ཀཏྭཱ དྭེ པབྦཱ, ཨེཀངྒུལཔྤཝེསནེ དྭིནྣཾ པབྦཱནཾ ¶ ཨུཔརི ན ཝཊྚཏཱིཏི ཝེདིཏབྦཾ. མཧཱཔཙྩརིཡམྤི ཨཡམེཝ ནཡོ དསྶིཏོ’’ཏི ལིཁིཏཾ.

པཉྩམསིཀྑཱཔདཝཎྞནཱ ནིཊྛིཏཱ.

༨༡༥. ཚཊྛསིཀྑཱཔདཾ ཨུཏྟཱནཏྠམེཝ.

༧. སཏྟམསིཀྑཱཔདཝཎྞནཱ

༨༢༠-༨༢༢. ‘‘ནགརཾ ཨཏིཧརནྟཱི’’ཏི པཱཋོ. ‘‘ནགརདྭཱརེ ཨཏིཧརནྟཱི’’ཏི ཀཏྠཙི, ཏཏྠ དྭཱརེནཱཏི ཨཏྠོ. ཨཡམེཝ ཝཱ པཱཋོ. ཏཾ པུབྦཱཔརཝིརུདྡྷནྟི ‘‘པུནཔི ཝུཏྟ’’ནྟི ཝུཏྟཾ ཝཱདཾ སནྡྷཱཡ, ན ཏཏོ པུབྦེ ཏཏྠ ཝུཏྟཾ ཝཱདཾ. ཨེཏྠ ‘‘མཱཏརམྤི ཝིཉྙཱཔེཏྭཱཏི ཝཙནེན ཝིརུཛ྄ཛྷཏཱི’’ཏི ལིཁིཏཾ, ཏཾ དུལླིཁིཏཾ, ན ཧི ཏེན ཝིརོདྷཾ སནྡྷཱཡ ཨིདཾ ཝུཏྟནྟི. ཀརཎེ ཙེ པཱཙིཏྟིཡཾ, ཀཱརཱཔནེཔི པཱཙིཏྟིཡེནེཝ བྷཝིཏབྦཾ. ཨཐ ཀཱརཱཔནེ དུཀྐཊཾ, ཀརཎེཔི དུཀྐཊེནེཝ བྷཝིཏབྦཾ. ན ཧི ཀརཎེ ཝཱ ཀཱརཱཔནེ ཝཱ ཝིསེསོ ཨཏྠི ཨཱཔཛྫནེ སཏཱིཏི ཨདྷིཔྤཱཡོ.

༨༢༣. སམྤཊིཙྪིཏུཾ ཝཊྚཏཱིཏི ཨཔྤཊིཀྑིཔིཏྭཱ ‘‘སཱདྷཱུ’’ཏི ཝཏྟུཾ ཝཊྚཏཱིཏི ཨདྷིཔྤཱཡོ. ན ཧི པཊིགྒཧེཏུཾ ཝཊྚཏི. ཨནཱམཱསཏྟཱ ‘‘ཨཱམཀདྷཉྙཾ པན ཉཱཏཀཔཝཱརིཏཊྛཱནེཔི ན ཝཊྚཏཱི’’ཏི ཝུཏྟཾ. ཨནུགཎྛིཔདེ པན ‘‘ཀཔྤིཡེན ལདྡྷཾ དྷཉྙཾ བྷཛྫིཏྭཱ བྷུཉྫནྟིཡཱ དུཀྐཊཾ. ཨཔརཎྞེཔི ཨེསེཝ ནཡོ’’ཏི ཙ ‘‘ཨནཱཔཏྟི ཨཱབཱདྷཔཙྩཡཱཏི ཝཙནཏོ སཏྟ དྷཉྙཱནིཔི ཨནཱམཱསཱནཱིཏི སིདྡྷཾ, ཏེནེཝ ཧེཊྛཱ ཨཊྛཀཐཱཡཾ དུཀྐཊཝཏྠུམྷི སཏྟ དྷཉྙཱནིཔི གཧིཏཱནི ཨནཱམཱསཱནཱི’’ཏི ཙ ཝུཏྟཱནི. ཨཱམཱསཱནི ཀཔྤིཡཝཏྠཱུནི ཙ ཡདི བྷཝེཡྻུཾ, ཡཐཱ ཉཱཏཀཔཝཱརིཏེ སནྡྷཱཡ ‘‘ཨཔརཎྞཾ ཝིཉྙཱཔེཏཱི’’ཏི ཨཝིསེསེན ཝུཏྟཾ, ཨེཝཾ ‘‘ཨནཱཔཏྟི ཉཱཏཀཱནཾ པཝཱརིཏཱནཾ ཨཉྙསྶ ཨཏྠཱཡ ཝིཉྙཱཔེཏི, ཨུམྨཏྟིཀཱཡ ཨཱདིཀམྨིཀཱཡཱ’’ཏི ཝཏྟབྦཾ. ཡསྨཱ དུཀྐཊཝཏྠུཏྟཱ ཙ ཨནཱམཱསཏྟཱ ཙ མཱཏརམྤི སཏྟཝིདྷཾ དྷཉྙཾ ཝིཉྙཱཔེཏུཾ ན ཝཊྚཏི ¶ , ཏསྨཱ ཏདཏྠདཱིཔནཏྠཾ སཏྟཝིདྷཾ དྷཉྙཾ སནྡྷཱཡ ‘‘ཨནཱཔཏྟི ཨཱབཱདྷཔཙྩཡཱ’’ཏི ཝུཏྟཾ, ཡཐཱ བྷིཀྑུནིཡཱ ཨཱབཱདྷཔཙྩཡཱ ཝཊྚཏི, ཏཐཱ བྷིཀྑུསྶཱཔཱིཏི ¶ ཙ. ཡཐཱ ཝཱ པན བྷིཀྑུནིཡཱ བྷཛྫནཱདཱིནི ཀཱརཱཔེཏུཾ ན ཝཊྚཏི, ཨེཝཾ བྷིཀྑུསྶཱཔི. ཝུཏྟམྤི ཙེཏཾ ཨནྡྷཀཊྛཀཐཱཡཾ ‘‘ཨཉྙཏརོ བཱལབྷིཀྑུ ཀཔྤིཡཾ ཨཛཱནནྟོ ཨེཏདཝོཙ ‘ཨཱམཀདྷཉྙཾ སམྤཊིཙྪིཏུཾ བྷིཀྑཱུནཾ ན ཝཊྚཏི. ཨེཏཾ དྷཉྙཾ བྷཛྫིཏྭཱ ཀོཊྚེཏྭཱ པཙིཏྭཱ ཡཱགུཁཛྫཀཾ བྷཏྟཉྩ དེཐཱ’ཏི, ཨཱཎཱཔཀསྶེཝ བྷིཀྑུསྶ ཨཱཔཏྟི, སབྦེསཾ ཨནཱཔཏྟཱི’’ཏི. ཏསྨཱ ‘‘སངྒྷཝཱརིཀཱནཾ དྷཉྙཾ ཀོཊྚེཐཱ’’ཏི ཨཱརཱམིཀཱནཾ ཝཏྟུཉྩ ན ཝཊྚཏི. ‘‘དིཝསཾ པརིབྦཡཾ གཎྷཐ, ཏཎྜུལེ སམྤཱདེཐ, ཏྭཾ ཨེཏྟཀེ གཎྷ, ཏྭཾ ཨེཏྟཀེ’’ཏི ཨེཝམཱདཱིནི པན ཝཏྟུཾ ཝཊྚཏཱིཏི ཙ. ཡཾ པན ‘‘ཨཝིཉྙཏྟིཡཱ ལབྦྷམཱནཾ པན ནཝཀམྨཏྠཱཡ སམྤཊིཙྪིཏུཾ ཝཊྚཏཱི’’ཏི ཝུཏྟཾ, ཏམྤི ཧེཊྛཱ ‘‘ཨིམཾ ཏལཱ༹ཀཾ ཁེཏྟཾ ཝཏྠུཾ ཝིཧཱརསྶ དེམཱ’ཏི ཝུཏྟེ ‘སམྤཊིཙྪིཏུཾ ཝཊྚཏཱི’’ཏི ཝུཏྟཾ ནཡཾ སནྡྷཱཡ ཝུཏྟཏྟཱ སུཝུཏྟམེཝ. ‘‘ནཝཀམྨཏྠཱཡ དྷཉྙཾ དེམཱ’’ཏི ཝུཏྟེ ‘‘སཱདྷཱུ’’ཏི ཝཏྟབྦཾ. ཡཾ པན ཧེཊྛཱ ‘‘ཏཏྠ ནིསྶགྒིཡཝཏྠུཾ ཨཏྟནོ ཝཱ སངྒྷགཎཔུགྒལཙེཏིཡཱནཾ ཝཱ ཨཏྠཱཡ སམྤཊིཙྪིཏུཾ ན ཝཊྚཏི…པེ… དུཀྐཊཝཏྠུཾ སབྦེསམྤི ཨཏྠཱཡ སམྤཊིཙྪཏོ དུཀྐཊམེཝཱ’’ཏི ཝུཏྟཾ, ཏམྤི སུཝུཏྟམེཝ. ཀསྨཱ? ‘‘ཙེཏིཡསྶ ཨཏྠཱཡ དྷཉྙཾ དཱཏུཀཱམོམྷི, ཏུམྷེ བྷནྟེ ཏདཏྠཱཡ སམྤཊིཙྪཐཱ’’ཏི ཝུཏྟེ པཊིགྒཧེཏུཾ ཨཀཔྤིཡཏྟཱ. ‘‘ཨིདཾ པན ཏཱདིསཾ ན ཧོཏཱི’’ཏི ཙ ཝུཏྟཾ. སབྦོཔཱཡཾ ཨུཔཏིསྶཏྠེརཝཱདོ ཀིར. དྷམྨསིརིཏྠེརོ པནེཝམཱཧ ‘‘པུབྦེཔི ནཝཀམྨཏྠཱཡ པཊིགྒཧོ ན ཝཱརིཏོ, སངྒྷསྶཏྠཱཡ པཊིགྒཧིཏམྤི པཊིགྒཱཧཀསྶེཝ ཨཀཔྤིཡ’’ནྟི.

སཏྟམསིཀྑཱཔདཝཎྞནཱ ནིཊྛིཏཱ.

༨. ཨཊྛམསིཀྑཱཔདཝཎྞནཱ

༨༢༤. པོརཱཎཱ ‘‘ནིབྦིཊྛརཱཛབྷཊོ’’ཏི པཋནྟི. ཏསྶཏྠོ ཝཱརིཏབྷཏྟཝེཏནོ རཱཛབྷཊོཏི. ‘‘ཏཉྙེཝ བྷཊཔཐནྟི ཏཾཡེཝ བྷཏྟཝེཏན’’ནྟི ཨཏྠཾ ཝདནྟི. ཨུམྨུཀནྟི ཨལཱཏཾ.

༨༢༦. ཨེཏྠ ཚཌྜིཏཾ ཀིརིཡཱ. ཨནོལོཀནཾ ཨཀིརིཡཱ.

ཨཊྛམསིཀྑཱཔདཝཎྞནཱ ནིཊྛིཏཱ.

༩. ནཝམསིཀྑཱཔདཝཎྞནཱ

༨༣༢. ‘‘སཱམིཀེ ¶ ¶ ཨཔལོཀེཏྭཱ ཚཌྜེཏཱི’’ཏི ཀཏྠཙི པོཏྠཀེ ནཏྠི, ཀཏྠཙི ཨཏྠི, ཨཏྠིབྷཱཝོཝ སེཡྻོ ཀིརིཡཱཀིརིཡཏྟཱ སིཀྑཱཔདསྶ. ཨིདྷ ཁེཏྟཔཱལཀཱ, ཨཱརཱམཱདིགོཔཀཱ ཙ སཱམིཀཱ ཨེཝ. ‘‘སངྒྷསྶ ཁེཏྟེ, ཨཱརཱམེ ཙ ཏཏྠ ཀཙཝརཾ ན ཚཌྜེཏབྦནྟི ཀཏིཀཱ ཙེ ནཏྠི, བྷིཀྑུསྶ ཚཌྜེཏུཾ ཝཊྚཏི སངྒྷཔརིཡཱཔནྣཏྟཱ, ན བྷིཀྑུནཱིནཾ. ཏཱསམྤི བྷིཀྑུནིསངྒྷསནྟཀེ ཝུཏྟནཡེན ཝཊྚཏི, ན ཏཏྠ བྷིཀྑུསྶ, ཨེཝཾ སནྟེཔི སཱརུཔྤཝསེནེཝ ཀཱཏབྦ’’ནྟི ཝུཏྟཾ.

ནཝམསིཀྑཱཔདཝཎྞནཱ ནིཊྛིཏཱ.

༡༠. དསམསིཀྑཱཔདཝཎྞནཱ

༨༣༣. སཱདྷུཀཱིལི༹ཏགཱིཏཾ ཝཱཏི ཨེཏྠ པཱཙིཎྞགཱིཏམྤི སོཏུཾ ན ཝཊྚཏི. ‘‘གཱིཏུཔསཉྷིཏཾ པན དྷམྨཾ སོཏུཾ ཝཊྚཏཱིཏི དཱིགྷནིཀཱཡཊྛཀཐཱཡཾ ཝུཏྟ’’ནྟི ཝུཏྟཾ. པོརཱཎགཎྛིཔདེ པན ‘‘དྷམྨགཱིཏམྤི ན ཝཊྚཏཱི’’ཏི ཝཏྭཱ ‘‘བུདྡྷསྶ གཱཡཱམ ཝཱདེམཱཏི ཝུཏྟེ སམྤཊིཙྪིཏུཾ ན ཝཊྚཏི, དུཀྐཊཾ ཧོཏཱི’’ཏི ཝུཏྟཾ, ‘‘པཱུཛཾ ཀརོམ, ཛཱཏཀཾ ཝཱ ཝཏྠུཾ ཝཱ དེསེམཱཏི ཝུཏྟེ ‘སཱདྷཱུ’ཏི སམྤཊིཙྪིཏུཾ ཝཊྚཏཱི’’ཏི ཙ ཝུཏྟཾ.

༨༣༦. ཨེཀཔཡོགོ ནཱམ ཨེཀདིཝསཱཝལོཀནཾ. ཏེསཾཡེཝཱཏི ཡེསཾ ནཙྩཾ པསྶཏི. ‘‘བྷིཀྑུནཱི སཡམྤི ནཙྩིཏུཾ ཝཱ གཱཡིཏུཾ ཝཱ ཝཱདིཏུཾ ཝཱ ན ལབྷཏཱི’’ཏིཨཱདི ཨིདྷ སིཀྑཱཔདེ ནཏྠི. ཀསྨཱ? ཨེལ༹ཀལོམསམུཊྛཱནཏྟཱ. ཡདི ཨེཝཾ ཀསྨཱ ཝུཏྟནྟི ཙེ? སུཏྟཱནུལོམམཧཱཔདེསཏོ. ཡདི ནཙྩཱདཱིནི པསྶིཏུཾ ཝཱ སོཏུཾ ཝཱ ན ལབྷཏི, པགེཝ ཨཏྟནཱ ཀཱཏུནྟི ནཡཏོ ལབྦྷམཱནཏྟཱ ཝུཏྟཾ. ཨིཏརཐཱ མཧཱཔདེསཱ ནིརཏྠཀཱ སིཡུཾ. ཨེཝམཉྙཏྠཱཔི ནཡོ ནེཏབྦོ. ‘‘སམུཊྛཱནམྤི ཨིདྷ ཝུཏྟམེཝ ཨགྒཧེཏྭཱ ཚསམུཊྛཱནཝསེན གཧེཏབྦ’’ནྟི ལིཁིཏཾ. ཏཾ ‘‘ཨཉྙེ ནཙྩ, གཱཡ, ཝཱདེཧཱི’’ཏི ཝཏྟུཾ ན ལབྦྷཏཱིཏིཨཱདིཝཙཱིཀམྨཾ སནྡྷཱཡ ལིཁིཏཉྩེ, ཏཾ སུལིཁིཏཾ ཨེལ༹ཀལོམསམུཊྛཱནེ ཝཱཙཱཡ ཨབྷཱཝཏོ. ‘‘སཡམྤི ནཙྩིཏུ’’ནྟིཨཱདིཀཱཡཀམྨཉྩེ སནྡྷཱཡ ལིཁིཏཾ, དུལླིཁིཏཾ. ཨེལ༹ཀལོམསམུཊྛཱནཉྷི ཨེཀནྟཏོ ཀཱཡཀམྨཾ ¶ ཧོཏི, ཏསྨཱ ཨུདྡྷཊཾ ཨགྒཧེཏྭཱ ཨཱདིསདྡེན སངྒཧིཏམེཝ ཨིདྷ གཧེཏབྦནྟི. ཨེཏཾ ཨེལ༹ཀལོམསམུཊྛཱནཏྟཱཏི ཨེཏྠ ཀཱརཎཝཙནེ སུཏྟཱནུལོམམཧཱཔདེསཏོཏི ཨེཏྠ པན ཨུདྡྷཊཾ གཧེཏབྦཾ, ཨེཝཾ ཡཐཱལཱབྷཝསེན ཏཾ ལིཁིཏནྟི ཝེདིཏབྦཾ. ‘‘ཨཱཧཙྩབྷཱསིཏསིཀྑཱཔདཝསེན ཨེལ༹ཀལོམསམུཊྛཱན’’ནྟི ཝུཏྟནྟི ཨུཔཏིསྶཏྠེརོ ¶ . ‘‘ཨེལ༹ཀལོམསམུཊྛཱནཉྩེ ཨིདཾ སིཀྑཱཔདཾ, ཨཱཎཱཔཀོ མུཙྩེཡྻ, ན ཙ མུཙྩཏཱི’’ཏི ཝུཏྟཾ. ཏཾ ‘‘ཀསྨཱ’’ཏི ཝུཏྟེ ‘‘སབྦཨཊྛཀཐཱསུ ཝུཏྟ’’ནྟི ཨཊྛཀཐཱཙརིཡོ ཨཱཧཱཏི དྷམྨསིརིཏྠེརོ.

༨༣༧. ཨཱརཱམེ ཋཏྭཱཏི ན ཀེཝལཾ ཋཏྭཱ, ཏཏོ གནྟྭཱ པན སབྦིརིཡཱཔཐེཧིཔི ལབྷཏི. ‘‘ཨཱརཱམེ ཋིཏཱཏི པན ཨཱརཱམཔརིཡཱཔནྣཱཏི ཨཏྠོ, ཨིཏརཐཱ ནིསིནྣཱཔི ན ལབྷེཡྻཱ’’ཏི ལིཁིཏཾ, ཏཾ སུལིཁིཏམེཝ.

དསམསིཀྑཱཔདཝཎྞནཱ ནིཊྛིཏཱ.

ལསུཎཝགྒཝཎྞནཱ ནིཊྛིཏཱ.

༢. ཨནྡྷཀཱརཝགྒཝཎྞནཱ

༡. པཋམསིཀྑཱཔདཝཎྞནཱ

༨༣༩. ‘‘དིཝཱཔི ཨནྡྷཀཱརཾ ཨཏྠི, ཏཔྤཊིསེདྷནཏྠཾ ‘རཏྟནྡྷཀཱརེ’ཏི ཝུཏྟ’’ནྟི ཝདནྟི པོརཱཎཱ. སནྟིཊྛེཡྻཱཏི ཨེཏྠ ཋཱནཱཔདེསེན ཙཏུབྦིདྷོཔི ཨིརིཡཱཔཐོ སངྒཧིཏོ, ཏསྨཱ པུརིསསྶ ཧཏྠཔཱསེ ཏེན སདྡྷིཾ ཙངྐམནཱདིཾ ཀརོནྟིཡཱ པཱཙིཏྟིཡམེཝ. ‘‘སལླཔེཡྻ ཝཱ’’ཏི ཀེཝལཾ ནིདཱནཝསེན ཝུཏྟཾ ཝིསེསཱབྷཱཝཏོ. ‘‘སལླཔེཡྻཝཱཏི པུརིསསྶ ཧཏྠཔཱསེ ཋིཏཱ སལླཔཏི, ཨཱཔཏྟི པཱཙིཏྟིཡསྶཱ’’ཏི ཧི ཝུཏྟཾ, ཏཾ ན ཡུཏྟནྟི ཨེཀེ. ཀསྨཱ? ཡསྨཱ ཏསྶ པུརིསསྶ ཧཏྠཔཱསེ ཋིཏེནེཝ ཨེཀཾ པཱཙིཏྟིཡཾ. སལླཔནེནཔི ཨཔརམྤི ཨེཀཾ ཨཱཔཛྫཏཱིཏི ནཱཔཛྫཏི, ཀཐཾ པཉྙཱཡཏཱིཏི? ཨངྒཝསེན. ཨིམསྶ ཧི རཏྟནྡྷཀཱརཏཱ, པུརིསསྶ ཧཏྠཔཱསེ ཋཱནཾ ཝཱ སལླཔནཾ ཝཱ, སཧཱཡཱབྷཱཝོ, རཧོཔེཀྑཏཱཏི ཨིམཱནི ཙཏྟཱརི ཨངྒཱནི ཝུཏྟཱནི. ཏཏྠ ཡདི ཋཱནཔཙྩཡཱ ཨེཀཱ ཨཱཔཏྟི ཝིསུཾ སིཡཱ, ཏསྶཱ ¶ ཙཏྟཱརི ཨངྒཱནི སིཡུཾ. ཡདི སལླཔནཔཙྩཡཱ ཨེཀཱ, ཏསྶཱཔི པཉྩ ཨངྒཱནི སིཡུཾ. ཏསྨཱ མཱཏིཀཱཊྛཀཐཱཡཾ ‘‘ཙཏྟཱརི ཝཱ པཉྩ ཝཱ ཨངྒཱནཱི’’ཏི ཝཏྟབྦཾ སིཡཱ, ན ཙ ཝུཏྟཾ, ཏསྨཱ སལླཔནཔཙྩཡཱ ཝིསུཾ ནཏྠཱིཏི. ཨཏྠིཡེཝ, མཱཏིཀཱཊྛཀཐཱཝཙནཉྩ ཏདཏྠམེཝཱཏི ཨེཀེ. ཀཐཾ? སཧུཔྤཏྟིཏོ དྭིནྣཾ ཨཱཔཏྟཱིནཾ. ཀིཾ ¶ ཝུཏྟཾ ཧོཏི? སལླཔནེ སཏི ཋཱནཔཙྩཡཱ ཨཱཔཛྫིཏབྦཾ ཙཏུརངྒིཀཾ, སལླཔནཔཙྩཡཱ ཨཱཔཛྫིཏབྦཾ ཙཏུརངྒིཀནྟི དྭེ པཱཙིཏྟིཡཱནི སཧུཔྤནྣཱནི ཨེཀཏོ ཨཱཔཛྫནྟཱིཏི. ཨིདཾ ཨཡུཏྟཾ པཱལི༹ཝིརོདྷཏོ. པཱལི༹ཡཉྷི ‘‘སལླཔེཡྻ ཝཱཏི པུརིསསྶ ཧཏྠཔཱསེ ཋིཏཱ སལླཔཏི, ཨཱཔཏྟི པཱཙིཏྟིཡསྶཱ’’ཏི ཝུཏྟཾ. ཡདི དྭེ སིཡུཾ, ‘‘ཨཱཔཏྟི དྭིནྣཾ པཱཙིཏྟིཡཱན’’ནྟི ན ཝཏྟབྦཏཱ སིཡཱཏི. ཨཡཾ ནཡོ དུཏིཡཱདཱིསུཔི ཡཐཱཡོགཾ ཝེདིཏབྦོ. ཨེཏྠ དུཏིཡེནཱཔི སདྡྷིཾ ཡདི བྷིཀྑུནིཡཱ རཧོཔེཀྑཏཱ ཨཏྠི, སོ ཙེ པུརིསོ, ན དུཏིཡོ, པུརིསགཎནཱཡ ཨཱཔཏྟིཡོ. ཨཐ དུཏིཡཱ བྷིཀྑུནཱི ཧོཏི, ཏསྶཱ ཙ ཏེན པུརིསེན སདྡྷིཾ རཧོཔེཀྑཏཱ ཨཏྠི, སཱ ཙ བྷིཀྑུནཱི ན དུཏིཡཱ ཧོཏི. ཨུབྷིནྣམྤི ཨཱཔཛྫཏཱིཏི ཨེཀེ, ཝིཙཱརེཏྭཱ པན གཧེཏབྦཾ. པོརཱཎགཎྛིཔདེ པན ཝུཏྟཾ ‘‘ཧཏྠཔཱསེ ཋཱནེན དུཀྐཊ’’ནྟི, ཏཾ པཱལི༹ཡཱ ཝིརུཛ྄ཛྷཏི. ‘‘པུརིསསྶ ཧཏྠཔཱསེ ཏིཊྛཏི, ཨཱཔཏྟི པཱཙིཏྟིཡསྶཱ’’ཏི ཧི པཱལི༹, ཀིཾབཧུནཱ. ཙཏུཏྠསིཀྑཱཔདེ མཱཏིཀཱཊྛཀཐཱཡཾ (ཀངྑཱ. ཨཊྛ. དུཏིཡིཀཨུཡྻོཛནསིཀྑཱཔདཝཎྞནཱ) ‘‘སནྟིཊྛནཱདཱིསུ ཏཱིཎི པཱཙིཏྟིཡཱནཱི’’ཏིཨཱདིཝཙནཏོ ཝཏྠུགཎནཱཡ ཨཱཔཏྟི ཝེདིཏབྦཱ. ‘‘ཨངྒཱནི ཙེཏྠ ཙཏྟཱརི པཉྩ ཝཱ’’ཏི ཝཏྟབྦནྟི སནྣིཊྛཱནཾ.

པཋམསིཀྑཱཔདཝཎྞནཱ ནིཊྛིཏཱ.

༢-༣-༤. དུཏིཡཏཏིཡཙཏུཏྠསིཀྑཱཔདཝཎྞནཱ

༨༤༢-༦. དུཏིཡཏཏིཡཙཏུཏྠཱནི ཨུཏྟཱནཱནི. སབྦཏྠ ‘‘སལླཔཏཱིཏི ཡཾ ཀིཉྩི ཏིརཙྪཱནཀཐཾ ཀཐེཏཱི’’ཏི པོརཱཎགཎྛིཔདེ ཝུཏྟཾ.

༨༥༢. ཙཏུཏྠེ པནཱཡཾ ཝིསེསོ – ‘‘ཨེཀེནེཀཱ’’ཏི པཋམཾ ཝུཏྟཏྟཱ དུཏིཡིཀཾ ཝཱ བྷིཀྑུནཱིནཾ ཨུཡྻོཛེཡྻ, པཱཙིཏྟིཡཾ ན སམྦྷཝཏཱིཏི ཙེ? སམྦྷཝཏི. ཀསྨཱ? སནྟིཊྛནཱདིཏྟཡམཏྟཱཔེཀྑཏྟཱ, ཏསྶ ཝཙནསྶཱཔི ཝཱ ཨཉྙཱཡཔི རཧོཔེཀྑནསྶཱདསམྦྷཝེ སཏི ཨུབྷིནྣཾ ཨེཀཏྠསམྦྷཝཏོ ཙ སཱདྷིཏམེཏཾ. ‘‘ཧཏྠཔཱསཾ ¶ ཝིཛཧིཏྭཱ སནྟིཊྛཏི ཝཱ སལླཔཏི ཝཱ’’ཏི ཨེཏྟཀམེཝ ཝུཏྟཾ. ཀསྨཱ ‘‘ནིཀཎྞིཀཾ ཝཱ ཛཔྤེཏཱི’’ཏི ན ཝུཏྟཾ? ཧཏྠཔཱསཱཏིཀྐམེ ཨསམྦྷཝཏོ. ཏསྶ ཏཏིཡསྶ པདསྶ པཙྪིནྣཏྟཱ སམྦྷཝནྟམྤི ‘‘དུཏིཡིཀཾ ཝཱ ཨུཡྻོཛེཏཱི’’ཏི ན ཝུཏྟཾ, ཏསྨཱ ཨཏྠཏོ ཧཏྠཔཱསཾ ཝིཛཧིཏྭཱ སནྟིཊྛཏི ཝཱ སལླཔཏི ཝཱ དུཏིཡིཀཾ ཝཱ ཨུཡྻོཛེཏི, ཨཱཔཏྟི དུཀྐཊསྶཱཏི ཝུཏྟཾ ཧོཏི. ཨེས ནཡོ ཡཀྑེན ཝཱཏིཨཱདཱིསུཔི. ཏཏྠ ‘‘ཧཏྠཔཱསེ’’ཏི ཝཱ ‘‘ཧཏྠཔཱསཾ ཝིཛཧིཏྭཱ’’ཏི ཝཱ ན ཝུཏྟཾ ཨུབྷཡཏྠ དུཀྐཊཏྟཱ. ཨནཱཔཏྟིཝཱརེཔི ¶ ཨསམྦྷཝཏོ ‘‘ནིཀཎྞིཀཾ ཝཱ ཛཔྤེཏཱི’’ཏི ན ཝུཏྟནྟི ཙེ? སམྦྷཝཏི སཏི ཀརཎཱིཡེ ནིཀཎྞིཀཾ ཝཱ ཛཔྤེཏཱིཏི སམྦྷཝཏོ. ཨཐ ཀསྨཱ ཨེཝཾ ན ཝུཏྟནྟི ཙེ? ཨནཝཛྫཀཐཱཡཾ ནིཀཎྞིཀཛཔྤནེ པཡོཛནཱབྷཱཝཱ, དྷམྨཀཐཱཡམྤི ཨུདཱཡིཾ ཨཱརབྦྷ པཊིསིདྡྷཏྟཱ ཙ.

དུཏིཡཏཏིཡཙཏུཏྠསིཀྑཱཔདཝཎྞནཱ ནིཊྛིཏཱ.

༥. པཉྩམསིཀྑཱཔདཝཎྞནཱ

༨༥༦. ‘‘ཀུལཾ ནཱམ ཙཏྟཱརི ཀུལཱནཱི’’ཏི ཝུཏྟཏྟཱ ཏིཏྠིཡཱརཱམེ ཀཔྤཏི ཏསྶ ཀུལཝོཧཱརཱབྷཱཝཏོཏི ཨེཀེ. ཏིཏྠིཡཱནཾ ཁཏྟིཡཱདིཔརིཡཱཔནྣཏྟཱ ན ཀཔྤཏཱིཏི ཨེཀེ. ཏསྶ ཀཔྤིཡབྷཱུམིཏྟཱ ན ཡུཏྟནྟི ཙེ? ན, ཡཐཱཝུཏྟཁཏྟིཡཱདཱིནཾ སམྦྷཝཏོ. ཏཐཱཔི གོཙརཀུལཾ ཨིདྷཱདྷིཔྤེཏཾ. ‘‘ཨུཔཙཱརོ དྭཱདསཧཏྠོ’’ཏི ལིཁིཏཾ.

པཉྩམསིཀྑཱཔདཝཎྞནཱ ནིཊྛིཏཱ.

༦. ཚཊྛསིཀྑཱཔདཝཎྞནཱ

༨༦༠. ‘‘ནིསཱིདནྟིཡཱ ཨེཀཱ, ནིཔཛྫནྟིཡཱ ཨེཀཱ’’ཏི ཨཝཏྭཱ ‘‘ནིསཱིདིཏྭཱ གཙྪནྟིཡཱ’’ཏིཨཱདི ན ཝཏྟབྦཾ. ན ཧི གམནཔཙྩཡཱ ཨེསཱ ཨཱཔཏྟཱིཏི? ན, པརིཡོསཱནཱདྷིཔྤཱཡཝསེན ཝུཏྟཏྟཱ. ‘‘ནིསཱིདིཏྭཱ ནིཔཛྫནྟིཡཱ དྭེ’’ཏི ཝཙནེནཔི གམནཾ ཨིདྷ ནཱདྷིཔྤེཏནྟི དསྶིཏཾ ཧོཏི, ཏཐཱ ‘‘ནིཔཛྫིཏྭཱ ནིསཱིདནྟིཡཱ དྭེ’’ཏིཔི ཝཏྟབྦཾ. ཡདི ཨེཝཾ ‘‘ཏསྨིཾ ཨབྷིནིཔཛྫཏི, ཨཱཔཏྟི དྭིནྣཾ པཱཙིཏྟིཡཱན’’ནྟི ཀསྨཱ ན ཝུཏྟནྟི ཙེ? ཨནིསཱིདིཏྭཱཔི ནིཔཛྫནསམྦྷཝཏོ. ནིཔཛྫནཏྠཱཡ ¶ ནིསཱིདིཏྭཱ ནིཔཛྫནྟིཡཱ ནིཔཛྫནཀཔཡོགཏྟཱ ཨེཀཱ ཨཱཔཏྟཱིཏི ཀེཙི.

ཚཊྛསིཀྑཱཔདཝཎྞནཱ ནིཊྛིཏཱ.

༧. སཏྟམསིཀྑཱཔདཝཎྞནཱ

༨༦༧. ཨནཱཔཏྟིཝཱརེ ‘‘དྷུཝཔཉྙཏྟེ’’ཏི ན ཝུཏྟཾ ‘‘སནྠརིཏྭཱ ཝཱ སནྠརཱཔེཏྭཱ ཝཱ’’ཏི ཝུཏྟཏྟཱ ¶ . ཨིདྷ ཚཊྛེ ཝུཏྟནཡེན པཀཏིཡཱ པཉྙཏྟེ ཨབྷིནིསཱིདཏི ཝཱ ཨབྷིནིཔཛྫཏི ཝཱ, པཱཙིཏྟིཡམེཝ. ཨཉྙཏྠ དྷུཝཔཉྙཏྟཾ. ཨིདྷ ཝུཏྟནཡེན སནྠརིཏྭཱ ཝཱ སནྠརཱཔེཏྭཱ ཝཱ ཨབྷིནིསཱིདཏི ཝཱ ཨབྷིནིཔཛྫཏི ཝཱ, པཱཙིཏྟིཡམེཝ. ཨུབྷཡཏྠཱཔི པཉྩམེ ཝུཏྟནཡེན ཨནཱཔུཙྪཱ པཀྐམེཡྻ, པཱཙིཏྟིཡམེཝ, ཨནཱཔཏྟིཝཱརེ མཱཏིཀཱཡཾ ཝུཏྟཀཱལཏོ ཨཉྙཀཱལསྶ ཨཔརཱམཊྛཏྟཱཏི ནོ ཏཀྐོཏི ཨཱཙརིཡོ. ཨཔིཙ ཨཏྠཱཔཏྟིཀཱལེ ཨཱཔཛྫཏི, ནོ ཝིཀཱལེཏིཨཱདིཏྟིཀེ, ཨཏྠཱཔཏྟི རཏྟིཾ ཨཱཔཛྫཏི, ནོ དིཝཱཏིཨཱདིཏྟིཀེ ཙ ཨཊྛཀཐཱཡཾ ཨིདྷ པཉྩམཚཊྛསཏྟམསིཀྑཱཔདེཧི སངྒཧིཏཱཔཏྟཱིནཾ ཨཔརཱམཊྛཏྟཱ ཡཐཱསམྦྷཝཾ ཏིཝིདྷཀཱལེ ཏིཝིདྷམེཏཾ ཡོཛེཏྭཱ དསྶེཏུཾ ཝཊྚཏི ཨེཝ མཧཱཔདེསནཡཱནུལོམཏོ.

སཏྟམསིཀྑཱཔདཝཎྞནཱ ནིཊྛིཏཱ.

༨. ཨཊྛམསིཀྑཱཔདཝཎྞནཱ

༨༦༩. ཨཊྛམེ བྷིཀྑུསྶ དུཀྐཊཾ སམྦྷཝཏི.

ཨཊྛམསིཀྑཱཔདཝཎྞནཱ ནིཊྛིཏཱ.

༩. ནཝམསིཀྑཱཔདཝཎྞནཱ

༨༧༥-༧. དུགྒཱཧཝསེན ཝཱ སུགྒཱཧཝསེན ཝཱ ཡཐཱཝུཏྟནཡེན སཔཐཀརཎེ ཨཱཔཏྟཱིཏི ཝེདིཏབྦཾ. ཡསྨཱ མཱཏིཀཱཡཾ ‘‘ཨཏྟཱནཾ ཝཱ པརཾ ཝཱ’’ཏི ཝུཏྟཾ, ཏསྨཱ ཡཱ ཨཏྟཱནམེཝ ཨཱརབྦྷ སཔཐཾ ཀརེཡྻ, ཏསྶཱ ཨེཀཱ ¶ . པརམེཝཱརབྦྷ ཏསྶཱ ཨེཀཱ. ཨུབྷོཔི ཨཱརབྦྷ ཏསྶཱ དྭེ ཨཱཔཏྟིཡོ སམྦྷཝནྟི. ཏིཀཙྪེདོ པནེཏྠ པརམེཝཱརབྦྷ སཔཐཀརཎཾ སནྡྷཱཡ པཝཏྟོ.

ནཝམསིཀྑཱཔདཝཎྞནཱ ནིཊྛིཏཱ.

༡༠. དསམསིཀྑཱཔདཝཎྞནཱ

༨༨༢. དསམེ ¶ ཨནཱཔཏྟིཝཱརོ རོདནསྶེཝ, ན ཝདྷསྶ, ཏསྨཱ ཉཱཏིབྱསནཱདཱིཧི ཕུཊྛཱཔི ཨཏྟཱནཾ ཝདྷཏི ཨེཝ, ན རོདཏི, དུཀྐཊམེཝ.

དསམསིཀྑཱཔདཝཎྞནཱ ནིཊྛིཏཱ.

ཨནྡྷཀཱརཝགྒཝཎྞནཱ ནིཊྛིཏཱ.

༣. ནགྒཝགྒཝཎྞནཱ

༡-༢. པཋམདུཏིཡསིཀྑཱཔདཝཎྞནཱ

༨༨༣. ནགྒཝགྒསྶ པཋམདུཏིཡཱནི ཨུཏྟཱནཱནི. པཋམེ ཨཡཾ ཝིསེསོ – བྷིཀྑུསྶ ཏཐཱ ནྷཱཡནྟསྶ དུཀྐཊཾ ཨཉྙཏྲ ཛནྟཱགྷརཨུདཀཔཊིཙྪཱདཱིཧི. ན ཙ ཝིགརཧི ཏཏྠ བྷགཝཱ ཨཏྟནཱཝ ཨནནུཉྙཱཏཏྟཱ ཨུདཀསཱཊིཀཱཡཱཏི པོརཱཎཱ. ‘‘ཨེཀམེཝ ནིཝཱསེཏྭཱ, པཱརུཔིཏྭཱ ཙ ནཧཱཡིཏུཾ ན ཝཊྚཏཱི’’ཏི པོརཱཎགཎྛིཔདེ ཝུཏྟཾ.

པཋམདུཏིཡསིཀྑཱཔདཝཎྞནཱ ནིཊྛིཏཱ.

༣. ཏཏིཡསིཀྑཱཔདཝཎྞནཱ

༨༩༤. ཏཏིཡེ ཨནྟོཙཏཱུཧཔཉྩཱཧཾ དྷུརཾ ནིཀྑིཔནྟིཡཱཔི ཨཱཔཏྟི ཨེཝ. ལིངྒཔརིཝཏྟེ དྷུརཾ ནིཀྑིཔནྟིཡཱ དུཀྐཊཾ ཏིཀདུཀྐཊཏྟཱ. ‘‘སམྦཧུལཱཧི བྷིཀྑུནཱིཧི སདྡྷིནྟི ཨེཏྠ ཙཏསྶོཔི སམྦཧུལཱ’’ཏི པོརཱཎགཎྛིཔདེ ཝུཏྟཾ.

ཏཏིཡསིཀྑཱཔདཝཎྞནཱ ནིཊྛིཏཱ.

༤. ཙཏུཏྠསིཀྑཱཔདཝཎྞནཱ

༨༩༨. ཙཏུཏྠེ ¶ ¶ སངྒྷཱཊིཙཱརནྟི ཨེཏྠ སངྒྷཱཊིཨཱདིཝསེན ཨདྷིཊྛིཏཱནཾཡེཝཱཡཾ ཝིདྷི, ནེཏརཱསཾ ཀིར. ཏཏྠ ཏིཙཱིཝརེ ཨེཝ ཝིཔྤཝཱསཔཙྩཡཱ ནིསྶགྒིཡཾ. ཨནྟོཙཱིཝརཀཱལེཔི པཉྩཱཧིཀཾ སངྒྷཱཊིཙཱརཾ ཨཏིཀྐཱམེནྟིཡཱ ཨཱཔཏྟིཡེཝ. ‘‘ཝིནཱ ཨེཏེཧི ཙཱིཝརེཧི ཨུཔསམྤདཾ ཀཱཏུཾ ན ཝཊྚཏཱི’’ཏི པོརཱཎགཎྛིཔདེ ཝུཏྟཾ.

ཙཏུཏྠསིཀྑཱཔདཝཎྞནཱ ནིཊྛིཏཱ.

༥. པཉྩམསིཀྑཱཔདཝཎྞནཱ

༩༠༦. པཉྩམསྶ ཨནཱཔཏྟིཝཱརེ ཏཱཡ ཝཱ ཨཝིཔྤཝཱསཱཡཱཏི ཨཏྠཏོ ལབྦྷཏི.

པཉྩམསིཀྑཱཔདཝཎྞནཱ ནིཊྛིཏཱ.

༩༠༧-༩༡༡. ཚཊྛསཏྟམཱནི ཨུཏྟཱནཱནི.

༨. ཨཊྛམསིཀྑཱཔདཝཎྞནཱ

༩༡༦. སོཀཛ྄ཛྷཱཡིཀཱ ནཱམ ཀིར མཱཡཱཀཱརཱ. ཝིལུམྤཀཱ བྷཎྜཀཱཏི ཙ པོརཱཎཱ.

ཨཊྛམསིཀྑཱཔདཝཎྞནཱ ནིཊྛིཏཱ.

༩. ནཝམསིཀྑཱཔདཝཎྞནཱ

༩༢༠. ‘‘ཀཐཉྷི ནཱམ ཨཏིཀྐཱམེསྶཏཱི’’ཏི ཝུཏྟཏྟཱ ཐུལླནནྡཱ ཙཱིཝརཀཱལསམཡཾ ཨཱགམེཐཱཏི ཨཏིཀྐམཱཔེསཱིཏི སིདྡྷཾ ཧོཏི.

ནཝམསིཀྑཱཔདཝཎྞནཱ ནིཊྛིཏཱ.

༡༠. དསམསིཀྑཱཔདཝཎྞནཱ

༩༢༧. དསམེ ¶ ¶ ཨེཀཀུལཾ ཨེཏདཝོཙུནྟི ཨེཏྠ ཀུལཾ ནཱམ ཏསྨིཾ མནུསྶཱ, ཏསྨཱ བཧུཝཙནཾ.

དསམསིཀྑཱཔདཝཎྞནཱ ནིཊྛིཏཱ.

ནགྒཝགྒཝཎྞནཱ ནིཊྛིཏཱ.

༤. ཏུཝཊྚཝགྒཝཎྞནཱ

༡. པཋམསིཀྑཱཔདཝཎྞནཱ

༩༣༤-༥. ཨེཀཱཡ ནིཔནྣཱཡ ཨཔརཱ ནིཔཛྫཏི, ཨཱཔཏྟི པཱཙིཏྟིཡསྶཱཏི ‘‘ཨུབྷིནྣམྤི པཋམནིཔནྣཱཡ ཨནུཊྛཱཔནཱ’’ཏི ཝཏྭཱ ཨེཏྠ ཀིརིཡཱཀིརིཡནྟི ཨེཀེ, ཏཾ ཨཊྛཀཐཱཡ ཝིརུཛ྄ཛྷཏི. ‘‘ཀིརིཡ’’ནྟི ཧི ཨཊྛཀཐཱཡཾ ཝུཏྟཾ. ཨཐ ཀསྶཱ ཨཱཔཏྟཱིཏི? ཨུབྷིནྣམྤི ནིཔཛྫནཀིརིཡཾ པཊིཙྩ. ཨིམསྶ ཨནཱཔཏྟིཝཱརེ ‘‘ཝཝཏྠཱནཾ དསྶེཏྭཱ’’ཏི ནཏྠི, ཏསྨཱ ཝཝཏྠཱནཾ ཀཏྭཱ ནིཔཛྫིཏུཾ ན ཝཊྚཏཱིཏི ཨེཀེ. ཝིཔུལཏརེ ཝཊྚཏཱིཏི ཨེཀེ. ‘‘ཨནྟརཾ ཀཏྭཱ ནིཔཛྫིཏུཾ ཝཊྚཏཱི’’ཏི པོརཱཎགཎྛིཔདེ ལིཁིཏཾ.

པཋམསིཀྑཱཔདཝཎྞནཱ ནིཊྛིཏཱ.

༢. དུཏིཡསིཀྑཱཔདཝཎྞནཱ

༩༤༠. ཝཝཏྠཱནཾ དསྶེཏྭཱཏི ཨེཏྠ ཨུཔརི པཱརུཔནམྤི མཛ྄ཛྷེ ཨོབྷོགཾ ཀཏྭཱ ཨུབྷིནྣཾ ཨནྟརེ ཨོཏཱརེཏི, ཝཊྚཏཱིཏི ཨེཀེ. ཝཝཏྠཱནཉྩ ཡཐཱ ཋཱནེ ན ཏིཊྛཏི, ཏཐཱ ཨཏིཀྐམིཏྭཱ ཏུཝཊྚེནྟིཡཱ ཨཱཔཏྟིཡེཝཱཏི. ‘‘ཀིརིཡཱཀིརིཡ’’ནྟི ཙ པོརཱཎགཎྛིཔདེ ཝུཏྟཾ.

དུཏིཡསིཀྑཱཔདཝཎྞནཱ ནིཊྛིཏཱ.

༣. ཏཏིཡསིཀྑཱཔདཝཎྞནཱ

༩༤༡. ཨཏྟནོ ¶ ¶ སཛ྄ཛྷཱཡནཊྛཱནེ ཙེ ཝུཌྜྷཏརཱ ཨཱགཙྪཏི, ཝནྡནཀཱལེ ཝཱ, ཨཱཔུཙྪནཀིཙྩཾ ནཏྠི. ཨེཀསྨིཾ ཨོཝརཀེ ཨཱཔུཙྪིཏབྦཾ. ‘‘ཨཐ ཨོཝརཀེ མཧཱཐེརཱི ཝསཏི, སམྨུཁེ ཨིཏརཱ, ཨཱཔུཙྪིཏབྦཱ ཏསྶཱ ཨུཔཙཱརཏྟཱ’’ཏི པོརཱཎགཎྛིཔདེ ཝུཏྟཾ.

ཏཏིཡསིཀྑཱཔདཝཎྞནཱ ནིཊྛིཏཱ.

༩༤༦-༩༥༠. ཙཏུཏྠཔཉྩམསིཀྑཱཔདཾ ཨུཏྟཱནཏྠམེཝ.

༦. ཚཊྛསིཀྑཱཔདཝཎྞནཱ

༩༥༦. གཧཔཏི ནཱམ ཋཔེཏྭཱ སཧདྷམྨིཀེ ཝེདིཏབྦོ, ཏསྨཱ བྷིཀྑུནཱ ཝཱ སཱམཎེརེན ཝཱ ཨནནུལོམིཀེན སཾསགྒེན སཾསཊྛཱཔི ན སམནུབྷཱསིཏབྦཱཏི སམྦྷཝཏི ཨེཝ.

ཚཊྛསིཀྑཱཔདཝཎྞནཱ ནིཊྛིཏཱ.

༩༦༡-༥. སཏྟམཨཊྛམ སིཀྑཱཔདཾ ཨུཏྟཱནཏྠམེཝ.

༩. ནཝམསིཀྑཱཔདཝཎྞནཱ

༩༦༩. ཨེཀིནྡྲིཡནྟི ཀཱཡིནྡྲིཡེནེཝ ཨེཀིནྡྲིཡཾ, ནིགཎྛཱནཾ ཨཙེལཀཱནཾ མཏཾ. ཀཱཔིལཱ པན ‘‘པཉྩིནྡྲིཡཱ’’ཏི མཉྙནྟཱ ཨེཝཾ ཝདནྟི ‘‘སཙཀྑུཀཏྟཱ ཨལཱབུམཱལུཝཱདཡོ ཡཏྠ ཨཱལམྦནཾ, ཏཏྠ གཙྪནྟི. སསོཏཀཏྟཱ ཀདལིཡོ མེགྷགཛྫིཏཾ སུཏྭཱ གབྦྷཾ གཎྷནྟི. སགྷཱནཀཏྟཱ པནསཱདཡོ ཀུཎཔགནྡྷེན ཕལནྟི. སཛིཝ྄ཧཀཏྟཱ ཨུདཀཾ པིཝནྟི ཡེན, སབྦེཔི ‘པཱདཔཱ’ཏི ཝུཙྩནྟི. སཀཱཡཔསཱདཏྟཱ ཨིཏྠིསམྥསྶེན ཨསོཀརུཀྑཱ པུཔྥནྟཱི’’ཏི. སངྒྷཱཏནྟི ཝིནཱསཾ.

༩༧༠. ཨིདྷ ¶ ཙ ཝསྶཙྪེདེན དུཀྐཊཾ. པཋམཾ ཨཱཝསིཏྭཱ པཙྪཱ ཙཱརིཀཱ ཙརཎཔཙྩཡཱ པཱཙིཏྟིཡཾ ཨཱཔཛྫཏཱིཏི ཝེདིཏབྦཾ. ཨཐ ཝསྶཾ ཨཝསིཏྭཱ ཙརཏི, ཨཝསྶུཔགམནཔཙྩཡཱ ¶ དུཀྐཊཾ ཨཱཔཛྫཏི. པོརཱཎགཎྛིཔདེ པན ‘‘ཨནྟོསཏྟཱཧེ ཨནྟོཝསྶེ ཙཱརིཀཾ ཙརནྟིཡཱ པཱཙིཏྟིཡཾ. སཏྟཱཧཀརཎཱིཡེན པན ཝཊྚཏི, བྷིཀྑུནོ དུཀྐཊཾ ཧོཏཱི’’ཏི ཝུཏྟཾ.

༩༧༢. ཀེནཙི ཨུབྦཱལ༹ྷཱཏི ཝསྶཙྪེདཀཱརཎེནཱཏི ནོ ཏཀྐོཏི ཨཱཙརིཡོ. ཀིཏྟཱཝཏཱ ཙཱརིཀཱ ཧོཏཱིཏི? ཨིདཾ ན སབྦཏྠ ཝིཙཱརིཏཾ. ཨནནྟརསིཀྑཱཔདེ ‘‘ཨནྟམསོ ཚཔྤཉྩཡོཛནཱནིཔཱི’’ཏི ཝུཏྟཏྟཱ སོ ཙ མཉྙེ ཧེཊྛིམཔརིཙྪེདོཏི.

ནཝམསིཀྑཱཔདཝཎྞནཱ ནིཊྛིཏཱ.

༡༠. དསམསིཀྑཱཔདཝཎྞནཱ

༩༧༣. དསམེ ‘‘ཨཱཧུནྡརིཀཱ’’ཏི པཋནྟི ཀིར.

དསམསིཀྑཱཔདཝཎྞནཱ ནིཊྛིཏཱ.

ཏུཝཊྚཝགྒཝཎྞནཱ ནིཊྛིཏཱ.

༥. ཙིཏྟཱགཱརཝགྒཝཎྞནཱ

༡. པཋམསིཀྑཱཔདཝཎྞནཱ

༩༧༨. ཀཱིལ༹ནཨུཔཝནཾ ནཱམ ཀཉྩིནགརསྶ ནགརུཔཝནཾ ཝིཡ དཊྛབྦཾ. ཨུཡྻཱནཾ ནཱམ ཏཏྠེཝ ནནྡཝནཨུཡྻཱནཾ ཝིཡ དཊྛབྦཾ. ‘‘ཏཏྠེཝ ཋཏྭཱ ཏཾ ཏཾ དིསཱབྷཱགཾ ཝིལོཀེཏྭཱ པསྶནྟིཡཱ པན པཱཊེཀྐཱ ཨཱཔཏྟིཡོ’’ཏི པཱཋོ. ཨེཝཾ ཝུཏྟེ ཡཾ པུབྦེ ཝུཏྟཾ པདཾ ‘‘ཨནུདྡྷརམཱནཱ’’ཏི, ཏཾ ཨེཀསྨིཾཡེཝ དིསཱབྷཱགེཏི སིདྡྷནྟི ཨེཀེ. ཨུཔཙཱརོ དྭེ ལེཌྜུཔཱཏོཏི ཙ.

པཋམསིཀྑཱཔདཝཎྞནཱ ནིཊྛིཏཱ.

༢. དུཏིཡསིཀྑཱཔདཝཎྞནཱ

༩༨༤. ‘‘ཨཱཧརིམེཧི ¶ ¶ ཝཱལེ༹ཧཱི’’ཏི ‘‘ཨསཾཧཱརིམེནཱ’’ཏི ཙ དུཝིདྷོ པཱཋོ. ‘‘ཝིསུཾ ཀཏྭཱ པཙྪཱ སདྡྷིཾ ཏེཧི ཝཱལེ༹ཧཱི’’ཏི ལིཁིཏཾ. ཡཐཱ ཏཐཱ ཝཱལ༹རཱུཔེ ཨུཊྛཔེཏྭཱ ཀཏཔཱདཾ ‘‘པལླངྐ’’ནྟི ཝུཙྩཏི ཨནཱཔཏྟིཝཱརེ ‘‘ཨསཾཧཱརིམེཧི ཝཱལེ༹ཧི ཀཏཾ པརིབྷུཉྫཏཱི’’ཏི ཝཙནཱབྷཱཝཏོ.

དུཏིཡསིཀྑཱཔདཝཎྞནཱ ནིཊྛིཏཱ.

༣. ཏཏིཡསིཀྑཱཔདཝཎྞནཱ

༩༨༨. ‘‘ཨུཛྫཝུཛྫཝེཏི ཧཏྠཔྤསཱརཎེ’’ཏི ལིཁིཏཾ, ཏཾ ན ཡུཏྟཾ ‘‘ཡཏྟཀཾ ཧཏྠེན ཨཉྪིཏཾ ཧོཏི, ཏསྨིཾ ཏཀྐམྷི ཝེཋིཏེ ཨེཀཱཔཏྟཱི’’ཏི ཝཙནཏོ.

ཏཏིཡསིཀྑཱཔདཝཎྞནཱ ནིཊྛིཏཱ.

༤. ཙཏུཏྠསིཀྑཱཔདཝཎྞནཱ

༩༩༣. ‘‘ཡཱགུཔཱནེཏི ཡཱགུདཱནེ’’ཏི ལིཁིཏཾ. པོརཱཎགཎྛིཔདེ ‘‘མཱཏཱཔིཏཱུནཾ དཱཏུཾ ཝཊྚཏཱི’’ཏི ཝུཏྟཾ.

ཙཏུཏྠསིཀྑཱཔདཝཎྞནཱ ནིཊྛིཏཱ.

༩༩༤. པཉྩམསིཀྑཱཔདཾ ཨུཏྟཱནཏྠམེཝ.

༦. ཚཊྛསིཀྑཱཔདཝཎྞནཱ

༡༠༠༡. ཚཊྛེ བྷིཀྑུཝིབྷངྒེ ཨཙེལཀསིཀྑཱཔདེན ཨེཀཔརིཙྪེདཾ. ཨིདྷ ཨགཱརིཀོ ཝིསེསོ, ཏསྨཱ ‘‘ཨསཱདྷཱརཎ’’ནྟི ཝདནྟི.

ཚཊྛསིཀྑཱཔདཝཎྞནཱ ནིཊྛིཏཱ.

༡༠༠༣-༨. སཏྟམཊྛམེསུ ¶ ཝཏྟབྦཾ ནཏྠི.

༩. ནཝམསིཀྑཱཔདཝཎྞནཱ

༡༠༡༥. ‘‘ཁཱིལནམནྟཾ ¶ དཱརུསཱརཁཱིལཾ མནྟེཏྭཱ པཐཝིཡཾ པཝེསེཏྭཱ མཱརཎམནྟཾ. ནཱགམཎྜལཾནཱམ ནཱགརོདྷམནྟཾ, པིཊྛཱདཱིཧི ཝཱ པརིཀྑེཔཾ ཀཏྭཱ ཏཏྠ མནུསྶེ པཝེསེནྟི གུཏྟཏྠཱཡཱ’’ཏི ལིཁིཏཾ.

ནཝམསིཀྑཱཔདཝཎྞནཱ ནིཊྛིཏཱ.

༡༠༡༧. དསམསིཀྑཱཔདཾ ཨུཏྟཱནཏྠམེཝ.

ཙིཏྟཱགཱརཝགྒཝཎྞནཱ ནིཊྛིཏཱ.

༦. ཨཱརཱམཝགྒཝཎྞནཱ

༡༠༢༡. པཋམསིཀྑཱཔདཾ ཨུཏྟཱནཏྠམེཝ.

༢. དུཏིཡསིཀྑཱཔདཝཎྞནཱ

༡༠༣༠. བྷིཀྑུནཱི ཙེ བྷིཀྑུཾ ཨཀྐོསཏི, ཨིམིནཱ སིཀྑཱཔདེན པཱཙིཏྟིཡཾ. བྷིཀྑུནིཾ ཙེ ཨཀྐོསཏི, ཨོམསཝཱདེན ཨཱཔཛྫཏི. ཨོམསཝཱདེ སམྨུཁཱཝ རུཧཏི, ཨིདྷ པན པརམྨུཁཱཔི.

ཏཏྲཱཡཾ ཝིཙཱརཎཱ – བྷིཀྑུཝིབྷངྒེ ཨོསམཝཱདསིཀྑཱཔདེ བྷིཀྑུནཱི ཨནུཔསམྤནྣཊྛཱནེ ཏིཊྛཏཱིཏི ཀཏྭཱ བྷིཀྑུནིཝིབྷངྒེཔི ཨོམསཝཱདསིཀྑཱཔདེ བྷིཀྑུ བྷིཀྑུནིཡཱ ཨནུཔསམྤནྣཊྛཱནེ ཏིཊྛཏཱིཏི སིདྡྷཾ. ཨིདྷ ཙ ཨནུཔསམྤནྣསྶ ཨཀྐོསནེ དུཀྐཊཾ ཝུཏྟཾ, བྷིཀྑུསྶ ཨུཔསམྤནྣསྶ ཨཀྐོསནེ པཱཙིཏྟིཡཾ ཝུཏྟཾ, ཏསྨཱ ཨིམཱནི དྭེ སིཀྑཱཔདཱནི བྷིཀྑུམྷི ¶ སཾསནྡིཡམཱནཱནི ཨཉྙམཉྙཾ ན སམེནྟི. ཡཐཱ སམེནྟི, ཏཐཱ ཛཱནིཏབྦཾ. ཏཏྠ པོརཱཎགཎྛིཔདེ ཝུཏྟནཡེན བྷིཀྑུནཱིནཾ ཨོམསཝཱདསིཀྑཱཔདེ ཨནུཔསམྤནྣོཏི ན གཧེཏབྦོ, ཨིདམེཏྠ ཡུཏྟཾ. པརིབྷཱསེཡྻཱཏི ཨཉྙཏྲ ཨཀྐོསཝཏྠཱུཧི. ཏེསུ ཧི ཨཉྙཏརསྨིཾ སཏི ཨོམསཝཱདཔཱཙིཏྟིཡམེཝཱཏི ཨེཀེ, ཏཾ ན ཡུཏྟཾ ¶ . ཨོམསཝཱདེ པཱལི༹མུཏྟཀཨཀྐོསེ ཧི དུཀྐཊཾ ཧོཏཱིཏི. དུཀྐཊོཀཱསེ ཨིདཾ པཱཙིཏྟིཡཾ ཏེཧི ནིདྡིཊྛཾ ཧོཏི, ཏསྨཱ ‘‘བཱལཱ ཨེཏཱ’’ཏི པཱལི༹ཡཾ ཨིདྷ ཨཱགཏཔདཱནཾཡེཝ ཝསེན པརིབྷཱསནཾ ཝེདིཏབྦཾ.

དུཏིཡསིཀྑཱཔདཝཎྞནཱ ནིཊྛིཏཱ.

༡༠༣༣. ཏཏིཡསིཀྑཱཔདཾ ཨུཏྟཱནཏྠམེཝ.

༤. ཙཏུཏྠསིཀྑཱཔདཝཎྞནཱ

༡༠༣༨. ནིམནྟིཏཱ ཝཱ པཝཱརིཏཱ ཝཱཏི ཨེཏྠ པོརཱཎགཎྛིཔདེ ཏཱཝ ཨེཝཾ ཝུཏྟཾ ‘‘པཝཱརིཏཱཔི ཡཱགུཾ པཱཏུཾ ལབྷཏི, བྷོཛྫཡཱགུཾ ན ལབྷཏི. ཡཱགུ པནེཏྠ ཁཱདནཱིཡབྷོཛནཱིཡསངྑྱཾ ན གཙྪཏི. ནིམནྟིཏཱ བྷིཀྑུནཱི པིཎྜཱཡ ཙརིཏྭཱ བྷུཉྫིཏུཀཱམཱ སཱམིཀེ ཨཔལོཀེཏྭཱཝ བྷུཉྫིཏུཾ ལབྷཏི. པརམྤརབྷོཛནཱཔཏྟི བྷིཀྑུནཱིནཾ ནཏྠི. ནིམནྟིཏཱ ཏཾ བྷཏྟཾ བྷུཉྫིཏྭཱ ཝཱ ཨབྷུཉྫིཏྭཱ ཝཱ པཝཱརིཏཱ ཀཔྤིཡཾ ཀཱརཱཔེཏྭཱ བྷུཉྫིཏུཾ ན ལབྷཏི, ཨཀཔྤིཡནིམནྟནེན ནིམནྟིཡམཱནཱ དྭེ ནིམནྟནཱནི སམྤཊིཙྪིཏུཉྩ ན ལབྷཏཱི’’ཏི. ཏཏྠ ‘‘པཝཱརིཏཱཔི ཡཱགུཾ པཱཏུཾ ལབྷཏཱི’’ཏི ཝུཏྟཾ པཱལི༹ཡཾ, ཨཊྛཀཐཱཡཉྩ ཨནུཉྙཱཏཏྟཱ. ‘‘ནིམནྟིཏཱ ཨཔྤཝཱརིཏཱ ཡཱགུཾ པིཝཏཱི’’ཏི ཧི པཱལི༹ཡཾ ཝུཏྟཾ. ཏཏྲིདཾ སིཀྑཱཔདཝཎྞནཱཔུབྦངྒམསནྣིཊྛཱནཾ – ནིམནྟིཏཱ ཝཱ པཝཱརིཏཱ ཝཱཏི ཨེཏྠ ཝཱསདྡེན ཨཀཔྤིཡནིམནྟནེན ནིམནྟིཏཱ ཨཔྤཝཱརིཏཱ ཋཔེཏྭཱ ཡཱགུཾ ཨཉྙཾ ཁཱདནཱིཡཾ ཝཱ བྷོཛནཱིཡཾ ཝཱ ཁཱདེཡྻ ཝཱ བྷུཉྫེཡྻ ཝཱ, པཱཙིཏྟིཡཾ ཨཉྙཏྲ སཱམིཀཱནཾ ཨཔལོཀནཱ. པརམྤརབྷོཛནཱབྷཱཝེན བྷིཀྑུནཱིནཾ ཀོ གུཎོ ཛཱཏོཏི? ན ཨེཏཱསཾ གུཎལཱབྷོ, ཀེཝལཾ པཱཀཊཏརཾ ཛཱཏཾ. བྷིཀྑཱུཔི ཝིཀཔྤེཏྭཱ མིསྶེཏྭཱཝ བྷུཉྫིཏུཾ ལབྷནྟི. སམཡེ ཡཐཱསུཁཾ ལབྷནྟི. ཨིམིནཱ ཨཔལོཀནེན ཀིནྟི? པཝཱརིཏཱ ཝཱ ཨནིམནྟིཏཱ ཝཱ ན ཀིཉྩི ཀཔྤིཡཾ ཀཱརཱཔེཏྭཱ གིལཱནཱཏིརིཏྟམྤི ལབྷནྟི, ནིམནྟིཏཱ ཙ པཝཱརིཏཱ ཙ ཡཱགུམྤི ན ལབྷནྟི, ཨཔལོཀེཏྭཱཔི ན ལབྷནྟཱིཏི.

ཙཏུཏྠསིཀྑཱཔདཝཎྞནཱ ནིཊྛིཏཱ.

ཨཱརཱམཝགྒཝཎྞནཱ ནིཊྛིཏཱ.

༧. གབྦྷིནིཝགྒཝཎྞནཱ

༡. པཋམཱདིསིཀྑཱཔདཝཎྞནཱ

༡༠༦༧. ‘‘གབྦྷིནི’’ནྟི ¶ ¶ དསྶནཱདཱིཧིཔི གབྦྷསམྦྷཝཏོ ཝུཏྟཾ. པདབྷཱཛནེཔི པཝཱརིཏབྷཱཝོ ན དིསྶཏི.

༡༠༧༤. དྷཱཏི ཝཱཏི ཨེཏྠ དཱརཀཾ སཱམིཀཱནཾ དཏྭཱ ཨཱཧཊེ ཝཌྜྷེཏི, ཏཐཱ མཱཏཱཔཱིཏི ཀེཙི.

༡༠༨༠. ‘‘སིཀྑམཱན’’ནྟི པཱཋཾ དཱིཔཝཱསིནོ རོཙེནྟི ཀིརིཡཱཀིརིཡཏྟཱ, ཛམྦུདཱིཔཝཱསིནོ ‘‘སིཀྑམཱནཱ’’ཏི. ཏསྶཏྠོ སིཀྑཱདྷམྨམཱནནཏོ སིཀྑམཱནཱཏི. ཨིདྷ ཀིརིཡཱ ན ཧོཏི, སཉྙཱཝ ཨདྷིཔྤེཏཱ. ན ཨེཏཱསུ ཨསིཀྑིཏཱ ཨུཔསམྤཱདེཏབྦཱ ཨུཔཛ྄ཛྷཱཡིནཱིཨཱདཱིནཾ ཨཱཔཏྟིབྷཱཝཱ. ‘‘ཏསྶཱ ཨུཔསམྤདཱ ཧོཏི ཨེཝཱ’’ཏི ཝདནྟི.

༡༠༨༢. དྷམྨཀམྨེཏི ཨུཔསམྤདཀམྨཾ ཨདྷིཔྤེཏཾ.

༡༡༡༢. ཝུཊྛཱཔིཏནྟི སཱམཎེརིབྷཱུམིཏོ ཡཱཡ ཐེརིཡཱ ཨུཔསམྤདཱཔེཀྑཱ ཝུཊྛཔིཏཱ, སཱ ཐེརཱི ཝུཊྛཱཔིཏཱ ནཱམ, ཏེནེཝ པུན ཝིསེསནཏྠཾ ‘‘པཝཏྟིནི’’ནྟི ཨཱཧ.

པཋམཱདིསིཀྑཱཔདཝཎྞནཱ ནིཊྛིཏཱ.

གབྦྷིནིཝགྒཝཎྞནཱ ནིཊྛིཏཱ.

༨. ཀུམཱརིབྷཱུཏཝགྒཝཎྞནཱ

༢. དུཏིཡཱདིསིཀྑཱཔདཝཎྞནཱ

༡༡༢༤. ‘‘ཨནུཛཱནཱམི ¶ , བྷིཀྑཝེ, ཨཊྛཱརསཝསྶཱཡ ཀུམཱརིབྷཱུཏཱཡ…པེ… སིཀྑཱསམྨུཏིཾ དཱཏུ’’ནྟི ཨིདྷ ཝུཏྟཾ ཝིཡ ‘‘ཨནུཛཱནཱམི, བྷིཀྑཝེ, དསཝསྶཱཡ གིཧིགཏཱཡ…པེ… སིཀྑཱསམྨུཏིཾ དཱཏུ’’ནྟི ན ཝུཏྟཾ, ཏསྨཱ ‘‘པརིཔུཎྞདྭཱདསཝསྶཱཡ ཨེཝ གིཧིགཏཱཡ སིཀྑཱསམྨུཏི དཱཏབྦཱ’’ཏི ཝུཏྟཾ. གིཧིགཏཱཡ སིཀྑཱསམྨུཏི དཱཏབྦཱཏི ཨེཀེཏི ཀཏྭཱ དསཝསྶཱཡཔི ཝཊྚཏི ¶ . ཀསྨཱ? ‘‘ཨནཱཔཏྟི པརིཔུཎྞདྭཱདསཝསྶཾ པརིཔུཎྞསཉྙཱ ཝུཊྛཱཔེཏཱི’ཏི (པཱཙི. ༡༠༩༣-༡༠༩༥) ཙ ‘ཨནཱཔཏྟི པརིཔུཎྞདྭཱདསཝསྶཾ གིཧིགཏཾ…པེ… སིཀྑིཏསིཀྑཾ ཝུཊྛཱཔེཏཱི’ཏི (པཱཙི. ༡༠༩༧-༡༡༠༡) ཙ ཝུཏྟཏྟཱ’’ཏི པོརཱཎགཎྛིཔདེ ཝུཏྟཾ. ཀིཾ ཨིམིནཱ པརིཧཱརེན. ‘‘དསཝསྶཱཡ གིཧིགཏཱཡ སིཀྑཱསམྨུཏི དཱཏབྦཱ’’ཏི ཧི ཝུཏྟཾ. ‘‘གིཧིགཏཱཏིཔི ཝཏྟུཾ ན ཝཊྚཏཱི’ཏི སཙེ ཝདནྟི, ཀམྨཾ ཀུཔྤཏཱི’’ཏི ལིཁིཏཾ.

༡༡༤༦. ཨཧམེཝ ནཱུན…པེ… ཨལཛྫིནཱི, ཡཱ སངྒྷོཏི ཨེཏྠ ཡཱ ཨཧམེཝ ནཱུན བཱལཱཏི ཨཏྠོ. ‘‘ཡཾ སངྒྷོ’’ཏིཔི ཨཏྠི, ཏཏྠ ཡཾ ཡསྨཱ དེཏི, ཏསྨཱ ཨཧམེཝ ནཱུན བཱལཱཏི ཨཏྠོ.

༡༡༥༩. པུརིསསཾསཊྛཱ ཀུམཱརཀསཾསཊྛཱ ཙཎྜཱི སོཀཱཝཱསཱཝཀཐཾ སིཀྑམཱནཱཏི ཝུཙྩཏི, པདབྷཱཛནེ ཨེཝ ཙཱཡཾ སིཀྑམཱནཱ ‘‘ཚསུ དྷམྨེསུ སིཀྑིཏསིཀྑཱ’’ཏི ཀསྨཱ ཝུཏྟནྟི? པུབྦེ གཧིཏསིཀྑཏྟཱ, པུབྦེ པརིཔུཎྞསིཀྑཏྟཱ ཙ ཨེཝཾ ཝུཙྩཏཱིཏི ཝེདིཏབྦཾ.

༡༡༦༦-༧. པཧཱུཏཾ ཁཱདནཱིཡཾ བྷོཛནཱིཡཾ པསྶིཏྭཱཏི ཨེཏྠ ‘‘སིཀྑམཱནཱཡ ཉཱཏཀཱ ཀིར སམྤཱདཡིཾསུ, ཏཾ པསྶིཏྭཱ ཐེརེ བྷིཀྑཱུ ཨུཡྻོཛེསི. ཨུཡྻོཛེཏྭཱ ཏེསཾ ཚནྡཾ གཧེཏྭཱ པུབྦེ ཚནྡདཱཡཀེ གཎཾ ཀཏྭཱ སེསཱནཾ ཚནྡཾ ཚནྡམེཝ ཀཏྭཱ ཀམྨཾ ཀཱརཱཔེསཱི’’ཏི པོརཱཎགཎྛིཔདེ ཝུཏྟཾ. ཚནྡཾ ཝིསྶཛྫེཏྭཱཏི ཨེཏྠ ཨནུགཎྛིཔདེ ཨེཝཾ ཝུཏྟཾ ‘‘ཨིདཾ ཀམྨཾ ཨཛྫ ན ཀཏྟབྦཾ. ‘ཡཐཱསུཁ’ནྟི ཝཏྭཱ ཝིསྶཛྫིཏཾ ཧོཏི, ཏསྨཱ ཡོ ཀོཙི མུཁརོ, བཱལོ ཝཱ ཀིཉྩཱཔི ‘ཡཐཱསུཁ’ནྟི ཝདཏི, ཐེརཱཡཏྟཏྟཱ པན ཐེརསྶ ཨནུམཏིཡཱ སཏིཡཱ ཝིསྶཛྫིཏོ ཧོཏི, ཨསཏིཡཱ ¶ ན ཧོཏི, ཏཐཱཔི པུན ཚནྡཾ གཧེཏྭཱཝ ཀམྨཾ ཀརོནྟི, ཨཡཾ པཡོགོ. གཧཎེ པཡོཛནཾ པན ནཏྠི. སངྒྷཏྠེརོ ཙེ ཝིསྶཛྫེཏི, ཚནྡཾ གཧེཏྭཱཝ ཀཱཏབྦཾ. ཚནྡཾ ཝིསྶཛྫེཏྭཱ ཀཱཡེན ཝུཊྛིཏཱཡཱཏི ཨེཏྠ ཨིདྷ སམྦཱདྷོ, ‘ཨམུཀམྷི ཋཱནེ ཀརིསྶཱམཱ’ཏི ཧཏྠཔཱསཾ ཝིཛཧིཏྭཱཔི གཙྪནྟི ཙེ, ནཏྠི དོསོ. ཀིཉྩཱཔི ནཏྠི, ཏཱ པན ཧཏྠཔཱསཾ ཨཝིཛཧིཏྭཱཝ གཙྪནྟི, ཨཡཾ པཡོགོ’’ཏི. ‘‘རཏྟིཔཱརིཝཱསིཡེ ཨུཔོསཐཔཝཱརཎཱཝ ན ཝཊྚཏི, ཨཉྙཀམྨཾ པན ཝཊྚཏི. ཨུཔོསཐཔཝཱརཎཱཔི ཨནུཔོསཐཔཝཱརཎདིཝསེ ན ཝཊྚནྟི, ཨིཏརཾ སབྦཀཱལཾ ཝཊྚཏི. པརིསཔཱརིཝཱསིཡེ ¶ ཧཏྠཔཱསཾ ཨཝིཛཧིཏྭཱ ཙཏཱུསུ གཏེསུ ཙཏུཝགྒཀརཎཱིཡེ ཨཉྙསྨིཾ པཉྩསུ དསསུ ཝཱིསཏཱིསུ གཏེསུ སེསེཧི ཝིསུཾ ཏཧིཾ ཏཧིཾ གནྟྭཱཔི པུན སནྣིཔཱཏཊྛཱནཾ ཨཱགནྟྭཱ ཀཱཏུཾ ཝཊྚཏི. ཨཛ྄ཛྷཱསཡཔཱརིཝཱསིཡེ ཧཏྠཔཱསཾ ཨཝིཛཧིཏྭཱ ཡཐཱནིསིནྣཱཝ ནིསིནྣཱ ཙེ, པུན ཀཱཏུཾ ཝཊྚཏི ཧཏྠཔཱསསྶ ཨཝིཛཧིཏཏྟཱ’’ཏི པོརཱཎགཎྛིཔདེ ཝུཏྟཾ. ཏེསཾ པོརཱཎཱནཾ མཏེན ཚནྡཔཱརིཝཱསིཡམེཝེཀཾ ན ཝཊྚཏཱིཏི ཨཱཔནྣངྒཉྩ དསྶིཏཾ, ཨིདྷཱཔི ཏཾ ཝིསུཾ ན དསྶིཏཾ ཨསམྦྷཝཏོཏི ཨེཀེ. ཚནྡདཱཡཀེ པརིསཾ པཏྭཱ གཏེ ཏསྶ པུབྦཚནྡདཱནཾ ཚནྡཔཱརིཝཱསིཡནྟི ནོ ཏཀྐོཏི ཨཱཙརིཡོ.

ཏཏྲིདཾ སནྣིཊྛཱནཾ – པརིསཔཱརིཝཱསིཡེ ཨཊྛཀཐཱཡཾ ‘‘ཨཉྙཏྲ གཙྪཱམཱཏི ཚནྡཾ ཨཝིསྶཛྫེཏྭཱཝ ཨུཊྛཧནྟི…པེ… ཀམྨཾ ཀཱཏུཾ ཝཊྚཏཱི’’ཏི ཝུཏྟཝཙནེ ཧཏྠཔཱསཱ ཝིཛཧནཾ ན པཉྙཱཡཏི. ཨེཏྠ པན ཀམྨཔྤཏྟཱནཾ ཧཏྠཔཱསསྶ ཨཝིཛཧནམེཝ ཨིཙྪིཏབྦནྟི ཀཏྭཱ པོརཱཎགཎྛིཔདེ ཝུཏྟཾ. ཀིཉྩཱཔི ན པཉྙཱཡཏི, ཨཔྤཊིཀྑིཏྟཏྟཱ པན ཝཊྚཏཱིཏི ཙེ? ན, པཊིཀྑིཏྟཏྟཱ. ཀཐཾ? ཚནྡོ ནཱམ ཀམྨཔྤཏྟེསུ བྷིཀྑཱུསུ ཨེཀསཱིམཱཡ སནྣིཔཏིཏེསུ ཨཱགཙྪཏི, ནཱསནྣིཔཏིཏེསུ. ཨིདྷ ཧི ‘‘ཚནྡཾ ཨཝིསྶཛྫེཏྭཱ’’ཏི ཙ ‘‘ཚནྡསྶ པན ཨཝིསྶཊྛཏྟཱ’’ཏི ཙ ཝུཏྟཾ. ‘‘ཨཛ྄ཛྷཱསཡཾ ཨཝིསྶཛྫེཏྭཱ’’ཏི ཙ ‘‘ཨཛ྄ཛྷཱསཡསྶ ཨཝིསྶཊྛཏྟཱ’’ཏི ཙ ན ཝུཏྟཾ, ཏསྨཱ ཚནྡསྶ ཨཝིསྶཛྫནཾ ཀམྨཔྤཏྟཱནཾ ཧཏྠཔཱསཱཝིཛཧནེནེཝ ཧོཏི, ན ཝིཛཧནེཏི སིདྡྷཾ.

ཧོཏི ཙེཏྠ –

‘‘ཡཏོ ཨཱགམནཾ ཡསྶ, ཏདབྷཱཝསྶ ནིགྒཧེ;

ཏསྨཱ སནྣིཔཏིཏེསུ, བྷིཀྑཱུསུ ཏསྶ བྷེདཏོ’’ཏི.

རཏྟིཔཱརིཝཱསིཡཚནྡོ ཝིཡ རཏྟིཔཱརིཝཱསིཡཔཱརིསུདྡྷིཔཱིཏི ཏདནུལོམེན ཝཊྚཏི སྭཱཏནཱཡ ཚནྡོ ¶ ཝཱ པཱརིསུདྡྷི ཝཱ པཝཱརཎཱ ཝཱ, ཏཱཡ ཀམྨཾ ཀཱཏུཾ ཝཊྚཏི. ཨུཔོསཐཔཝཱརཎཱ པན ཨནུཔོསཐདིཝསེ ན ཝཊྚཏི, ཨིཏརཾ ཝཊྚཏི. པནྣརསིཨུཔོསཐཾ ཙཱཏུདྡསིཡཾ ཀཱཏུཾ ཝཊྚཏི ཁེཏྟཏྟཱ. ན ཙཱཏུདྡསིཨུཔོསཐཾ པནྣརསིཡཾ ཨཁེཏྟཏྟཱ ཨནུཔོསཐདིཝསཏྟཱ པཱཊིཔདདིཝསཏྟཱཏི ཨེཀཙྩེ ཨཱཙརིཡཱ, ཏསྨཱ ཏེསཾ ¶ མཏེན ཙཱཏུདྡསིཨུཔོསཐཾ ཏཏིཡཾ, སཏྟམཾ ཝཱ པནྣརསིཡཾ ཀཱཏུཾ ན ཝཊྚཏི. ཡཾ པནེཏྠ ཝུཏྟཾ ཨཊྛཀཐཱཡཾ ‘‘སཙེ ཙཱཏུདྡསིཀཾ ཨུཔོསཐཾ ཀརིསྶཱམཱཏི ནིསིནྣཱ, པནྣརསོཏི ཀཱཏུཾ ཝཊྚཏཱི’’ཏི. ཏཏོ ‘‘པནྣརསིཡམེཝ ‘ཙཱཏུདྡསིཀཾ ཨུཔོསཐཾ ཀརིསྶཱམཱ’ཏི ནིསིནྣཱ པུནདིཝསེ ཨཏྟནོ ཏཾ ཨུཔོསཐཾ ‘པནྣརསོ’ཏི ཀཱཏུཾ ཝཊྚཏཱིཏི ཨཏྠོ’’ཏི ཨེཝཾ པརིཧརནྟི, ཏཾ ཏེསཾ མཏཾ ‘‘ཏཐཱརཱུཔཔཙྩཡེ སཏི ཨཉྙསྨིམྤི ཙཱཏུདྡསེ ཨུཔོསཐཾ ཀཱཏུཾ ཝཊྚཏཱི’’ཏི (ཀངྑཱ. ཨཊྛ. ནིདཱནཝཎྞནཱ) ཨིམིནཱ མཱཏིཀཱཊྛཀཐཱཝཙནེན ན སམེཏི. ན ཧི ཏཏྠ ‘‘ཨཉྙསྨིམྤི པནྣརསེ ཙཱཏུདྡསིཀཾ ཀཱཏུཾ ཝཊྚཏཱི’’ཏི ཝུཏྟཾ. ཨེཝཾ སནྟེཔི ‘‘སཀིཾ པཀྑསྶ ཙཱཏུདྡསེ ཝཱ པནྣརསེ ཝཱ’’ཏི ཨནུཉྙཱཏདིཝསེ པརིཡཱཔནྣཏྟཱ ཚནྣཾ ཙཱཏུདྡསིཀཱནཾ པཙྪིམཱ པནྣརསཱི ཨནུཔོསཐདིཝསོ ན ཧོཏཱིཏི སིདྡྷཾ ཧོཏི. ཀིཉྩཱཔི སིདྡྷཾ, ཨིམིནཱ པན ‘‘ཨཱཝཱསིཀཱནཾ པནྣརསོ, ཨཱགནྟུཀཱནཾ ཙཱཏུདྡསོ, ཨཱགནྟུཀེཧི ཨཱཝཱསིཀཱནཾ སམསམེཧི ཝཱ ཨཔྤཏརེཧི ཝཱ ཨནུཝཏྟིཏབྦ’’ནྟི ཝཙནམེཏྠ ནིརཏྠཀཾ ཧོཏཱིཏི ཝེདིཏབྦཾ.

དུཏིཡཱདིསིཀྑཱཔདཝཎྞནཱ ནིཊྛིཏཱ.

ཀུམཱརིབྷཱུཏཝགྒཝཎྞནཱ ནིཊྛིཏཱ.

༩. ཚཏྟུཔཱཧནཝགྒཝཎྞནཱ

༡༡. ཨེཀཱདསམཱདིསིཀྑཱཔདཝཎྞནཱ

༡༢༡༤. ཨུཔཙཱརཾ སནྡྷཱཡ ཀཐིཏནྟི ‘‘དྭཱདསཧཏྠཾ ཨུཔཙཱརོ’’ཏི ལིཁིཏཾ.

༡༢༢༡. སུཏྟནྟེ ཨོཀཱསཾ ཀཱརཱཔེཏྭཱ ཝིནཡཾ ཝཱ ཨབྷིདྷམྨཾ ཝཱ པུཙྪཏཱིཏི ཨེཏྠ ཙ ཏཱིཎི པིཊཀཱནི ཨཏྟནོ ཨཏྟནོ ནཱམེན ཝུཏྟཱནཱིཏི ཀཏྭཱ ཨབྷིདྷམྨོ བུདྡྷེན བྷཱསིཏོ ཨེཝཱཏི དཱིཔིཏཾ ཧོཏི.

༡༢༢༤-༥. ཐནོ ¶ ཙ ཨུདརོ ཙ ཐནུདརཱ. ‘‘སཾཀཙྩིཀཱཡ པམཱཎཾ ཏིརིཡཾ དིཡཌྜྷཧཏྠཱ’’ཏི པོརཱཎགཎྛིཔདེ ཝུཏྟཾ. ‘‘ཨཔརིཀྑིཏྟསྶ གཱམསྶ ཨུཔཙཱརཾ ¶ ཨོཀྐམནྟིཡཱ’’ཏི བཧཱུསུ པོཏྠཀེསུ, སངྒྷཱདིསེསཀཎྜེ ཝིཡ ‘‘ཨུཔཙཱརཾ ཨཏིཀྐམནྟིཡཱ’’ཏི པཱཋོ ཨཔྤཀེསུ, སོཝ པཱཋོ. ཨཊྛཀཐཱཡཾ ‘‘པརིཀྑེཔཾ ཨཏིཀྐམནྟིཡཱཏི ཨེཀེན པཱདེན ཨཏིཀྐནྟེ དུཀྐཊཾ, དུཏིཡེན པཱཙིཏྟིཡཾ. ཨུཔཙཱརེཔི ཨེསེཝ ནཡོ’’ཏི ཝཙནམྤི ‘‘ཨུཔཙཱརཾ ཨཏིཀྐམནྟིཡཱ’’ཏི པཱཋོཏི དཱིཔེཏཱིཏི ནོ ཏཀྐོཏི ཨཱཙརིཡོ.

ཨེཀཱདསམཱདིསིཀྑཱཔདཝཎྞནཱ ནིཊྛིཏཱ.

ཚཏྟུཔཱཧནཝགྒཝཎྞནཱ ནིཊྛིཏཱ.

ནིགམནཝཎྞནཱ

གིརགྒསམཛྫཱདཱིནི ‘‘ཨཙིཏྟཀཱནི ལོཀཝཛྫཱནཱི’’ཏི ཝུཏྟཏྟཱ ‘‘ནཙྩ’’ནྟི ཝཱ ‘‘གནྡྷོ’’ཏི ཝཱ ཨཛཱནིཏྭཱཔི དསྶནེན, ཝིལིམྤནེན ཝཱ ཨཱཔཛྫནཏོ ཝཏྠུཨཛཱནནཙིཏྟེན ཨཙིཏྟཀཱནི. ‘‘ནཙྩ’’ནྟི ཝཱ ‘‘གནྡྷོ’’ཏི ཝཱ ཛཱནིཏྭཱ པསྶནྟིཡཱ, ཝིལིམྤནྟིཡཱ ཙ ཨཀུསལཏྟཱ ཨེཝ ལོཀཝཛྫཱནི. ཙོརིཝུཊྛཱཔནཱདཱིནི ‘‘ཙོརཱི’’ཏིཨཱདིནཱ ཝཏྠུཾ ཛཱནིཏྭཱ ཀརཎེ ཨེཝ ཨཱཔཏྟིསབྦྷཱཝཏོ སཙིཏྟཀཱནི. ཨུཔསམྤདཱདཱིནཾ ཨེཀནྟེན ཨཀུསལཙིཏྟེནེཝ ཨཀཏྟབྦཏྟཱ པཎྞཏྟིཝཛྫཱནི. ‘‘ཨིདྷ སཙིཏྟཀཱཙིཏྟཀཏཱ པཎྞཏྟིཛཱནནཱཛཱནནཏཱཡ ཨགྒཧེཏྭཱ ཝཏྠུཛཱནནཱཛཱནནཏཱཡ གཧེཏབྦཱ’’ཏི ལིཁིཏཾ. ཨནུགཎྛིཔདེ པན ‘‘གིརགྒསམཛྫཱདཱིནི ‘ཨཙིཏྟཀཱནི ལོཀཝཛྫཱནཱི’ཏི ཝུཏྟཏྟཱ ‘ནཙྩ’ནྟི ཝཱ ‘སངྒྷཱཎཱི’ཏི ཝཱ ‘གནྡྷོ’ཏི ཝཱ ཏསྶ ནཱམཝསེན ཨཛཱནིཏྭཱ མཱཡཱཀཱརསྶ མཱཡཱནི སཱིསཊྛིཨཱདཱིནི པཊིསངྑཱཡ པསྶནྟིཡཱ, ཨཀྑམཱལཱདིཨཏྠཱཡ སངྒྷཱཎིཾ ཀཊིཡཱ བནྡྷནྟིཡཱ, ‘སེདགནྡྷཾ ཨཔནེཏྭཱ བུདྡྷཔཱུཛཾ ཀརིསྶཱམཱི’ཏི ཨུཔྤནྣེན ཙིཏྟེན གནྡྷཾ ཝིལིམྤེཏྭཱ ནཧཱཡནྟིཡཱ ཙ ཨཱཔཏྟིསབྦྷཱཝཏོ ནཱམེན སདྡྷིཾ ནཱམཝསེན ཝཱ ཝཏྠུསྶ ཨཛཱནནཙིཏྟེན ཨཙིཏྟཀཱནི ནཱམ. ན ཨནྡྷཀཱརེ ‘ཀཊིསུཏྟམིད’ནྟི སཉྙཱཡ སངྒྷཱཎིཾ གཧེཏྭཱ ཀཊིཡཾ དྷཱརཎཀཱལེ, མཏྟིཀཱསཉྙཱཡ ཙ གནྡྷཾ གཧེཏྭཱ ཝིལིམྤནཀཱལེ ཨཱཔཏྟིསབྦྷཱཝཏོ ‘ཨཙིཏྟཀཱནཱི’ཏི ཝཏྟབྦཱནི. ཏསྨིཾ ཀཱལེ ཨནཱཔཏྟི, ཏེནེཝ སངྒྷཱཎིཡཱ ཨསངྒྷཱཎིསཉྙཱཝཱརེཔི ‘ཨཱཔཏྟི པཱཙིཏྟིཡསྶཱ’ཏི པཱལི༹ ན ཝུཏྟཱ. ཡཐཱ ‘ཁེཏྟཨཱབཱདྷཔཙྩཡཱ, ཀཊིསུཏྟཀཾ དྷཱརེཏཱི’ཏི ཝཙནཏོ ཝིནཱཔི ཨཀུསལེན སངྒྷཱཎིཨཱདཱིནི སཀྐཱ དྷཱརེཏུནྟི སིདྡྷཾ, ཨེཝཾ ¶ ཨཱབཱདྷཔཙྩཡཱ ཝིནཱཔི ཨཀུསལེན ན སཀྐཱ སུརཾ ¶ པཱཏུནྟི སིདྡྷཾ ‘ཨནཱཔཏྟི ཨཱབཱདྷཔཙྩཡཱ མཛྫཾ པིཝཏཱི’ཏི པཱལི༹ཡཱ ཨབྷཱཝཏོ. ཨཀུསལེན ཝིནཱ མདྷུཔུཎྞམུཊྛིཡཾ པཀྑིཏྟམཛྫསྶ ཨཛ྄ཛྷོཧརཎཀཱལཱདཱིསུ སུརཱཔཱནཱཔཏྟིཾ ཨཱཔཛྫཏཱིཏི ཙ སིདྡྷཾ ‘མཛྫེ ཨམཛྫསཉྙཱི པིཝཏི, ཨཱཔཏྟི པཱཙིཏྟིཡསྶཱ’ཏི (པཱཙི. ༣༢༨) ཝུཏྟཏྟཱ. ཀིཾབཧུནཱ, ཀཱམབྷོགསཉྙཱཡ སདྡྷིཾ ‘སངྒྷཱཎཱི’ཏི ཙ ‘གནྡྷོ’ཏི ཙ ཛཱནིཏྭཱ ཝིནཱ ཨནཱཔཏྟིཀཱརཎེན དྷཱརེནྟིཡཱ ཨེཀནྟཱཀུསལཏྟཱ ལོཀཝཛྫཱནི ནཱམ ཝུཙྩནྟི. ཨིམིནཱ ཨུཔཱཡེན སེསེསུཔི ནཡོ ནེཏབྦོ. ཨེཏྠ སུརཱཔཱནཱདྷིཀཱརེ ཨུཔཏིསྶཏྠེརཝཱདོ’’ཏི ཝུཏྟཾ. ཨསཾཀཙྩིཀསིཀྑཱཔདེ ‘‘ཨཔརིཀྑིཏྟསྶ གཱམསྶ ཨུཔཙཱརཾ ཨོཀྐམནྟིཡཱཏི པཱཋོ’’ཏི ཙ ‘‘པཎཱིཏབྷོཛནཝིཉྙཏྟི, ཨཙེལཀསིཀྑཱཔདཾ, ནིམནྟིཏསྶ ཙཱརིཏྟཱཔཛྫནཾ, དུཊྛུལླཔྤཊིཙྪཱདནཾ, ཨཱུནཝཱིསཏིཝསྶུཔསམྤདཾ, མཱཏུགཱམེན སདྡྷིཾ སཾཝིདྷཱཡ ཨདྡྷཱནགམནཾ, རཱཛནྟེཔུརཔྤཝེསནཾ, སནྟཾ བྷིཀྑུཾ ཨནཱཔུཙྪཱ ཝིཀཱལེ གཱམཔྤཝེསནཾ, ནིསཱིདནཾ, ཝསྶིཀསཱཊིཀནྟི པཱཋོ’’ཏི ཙ ཝུཏྟཾ.

ནིགམནཝཎྞནཱ ནིཊྛིཏཱ.

པཱཙིཏྟིཡཀཎྜཝཎྞནཱ ནིཊྛིཏཱ.

ཨུབྷཏོཝིབྷངྒཊྛཀཐཱཝཎྞནཱ ནིཊྛིཏཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

མཧཱཝགྒཝཎྞནཱ

༡. མཧཱཁནྡྷཀཝཎྞནཱ

བོདྷིཀཐཱཝཎྞནཱ

ཡཾ ¶ ¶ ཁནྡྷཀེ ལཱིནཔདཱདིབྷེད-པཀཱསནཾ དཱནི སུཔཏྟཀཱལཾ;

ཏསྨཱ ཨཔུབྦཾ ཝིནཡཏྠམེཝ, ཝཀྑཱམི སངྑེཔགཧཎཏྠཾ.

ཏཏྠ ཀེནཊྛེནཱཡཾ ཁནྡྷཀོཏི? ཁནྡྷཱནཾ སམཱུཧཏྟཱ ཝིབྷངྒོ ཝིཡ. ཏེ པན ཀཐནྟི? ཁནྡྷཱནཾ པཀཱསནཏོ དཱིཔནཏོ. ཁནྡྷཱཏི ཙེཏྠ པབྦཛྫཱདིཝིནཡཀམྨསངྑཱཏཱ, ཙཱརིཏྟཝཱརིཏྟསིཀྑཱཔདསངྑཱཏཱ ཙ པཉྙཏྟིཡོ ཨདྷིཔྤེཏཱ. པབྦཛྫཱདཱིནི ཧི བྷགཝཏཱ པཉྙཏྟཏྟཱ ‘‘པཉྙཏྟིཡོ’’ཏི ཝུཙྩནྟི. པཉྙཏྟིཡཉྩ ཁནྡྷ-སདྡོ དིསྶཏི ‘‘དཱརུཀྑནྡྷོ ཨགྒིཀྑནྡྷོ ཨུདཀཀྑནྡྷོ’’ཏིཨཱདཱིསུ ཝིཡ. ཏེསཾ པཉྙཏྟིསངྑཱཏཱནཾ ཁནྡྷཱནཾ པཀཱསནཏོ ཝཎྞནཏོ པབྦཛྫཀྑནྡྷཀཱདཡོ ཝཱིསཏི ‘‘ཁནྡྷཀཱ’’ཏི ཝུཏྟཱ, ཨཝསཱནེ དྭེ ཏཾསདིསཏྟཱ ཝེལཱཡ སདིསཏྟཱ སཱིལསྶ ཝེལཱཏི ཝཙནཾ ཝིཡ. ཨཔིཙ བྷཱགརཱསཏྠཏཱཔེཏྠ ཡུཛྫཏེ ཏེསཾ པཉྙཏྟཱིནཾ བྷཱགཏོ ཙ རཱསིཏོ ཙ ཝིབྷཏྟཏྟཱ. ཀིཾ པནེཏེསཾ ཁནྡྷཀཱནཾ ཨནུཔུབྦཀཱརཎནྟི? ནཱཡཾ པུཙྪཱ སམྦྷཝཏི, ཨཉྙཐཱ ཝུཏྟེསུཔི ཏཔྤསངྒཱནཏིཀྐམནཏོ. ཨཐ ཝཱ པབྦཛྫུཔསམྤདཱཔུབྦངྒམཏྟཱ སཱསནཔྤཝེསནསྶ ཏདཏྠསངྒཧཀོ མཧཱཁནྡྷཀོ པཋམཾ ཝུཏྟོ. ཀེནཱཏི ¶ ཙེ? དྷམྨསངྒཱཧཀཏྠེརེཧི. བྷགཝཏཱ པན ཏཏྠ ཏཏྠ ཨུཔྤནྣཝཏྠུཾ པཊིཙྩ ཏཐཱ ཏཐཱ ཝུཏྟཱནི, ན ཨིམིནཱ ཨནུཀྐམེན. ཐེརཱ པན ཏཾ ཏཾ པཡོཛནཾ པཊིཙྩ སམཱནཛཱཏིཀེ ཨེཀཛ྄ཛྷཾ ཀཏྭཱ ཨནུཀྐམེན སཛ྄ཛྷཱཡིཾསུ. སེསཱནཾ པཡོཛནཾ ཏཏྠ ཏཏྠེཝ ཨཱཝི བྷཝིསྶཏི.

ཁནྡྷཀོཝིདཱཏི པཉྙཏྟིབྷཱགརཱསཊྛེན ནེསཾ ཁནྡྷཏྠཀོཝིདཱ, ནིརུཏྟིཔཊིསམྦྷིདཱཔཱརཔྤཏྟཱཏི ཨཏྠོ. ཏེསཾ ཨནུཏྟཱནཏྠཱནཾ པདཱནཾ སཾཝཎྞནཱ. ཀསྨཱ པནེཝཾ ཝིསེསིཏནྟི? ཏཏོ སེསབྷཱགཱ ཡུཏྟཱ. མཱཏིཀཱཊྛུཔྤཏྟིགྒཧཎམྤེཏྠ ¶ པདབྷཱཛནིཡགྒཧཎེནེཝ ཝེདིཏབྦཾ. ཡེཧི ཨཏྠཱ ཡེསཾ པདཝིསེསཱནཾ ཨཊྛཀཐཱཡཾ པཀཱསིཏཱ, ཏེསཾ ཏེ པདཝིསེསེ པུན ཨིདྷ ཝདེཡྻཱམ, ཝཎྞནཱཡ པརིཡོསཱནཾ ཀདཱ བྷཝེ ཏེ ཏེ ཨཏྠེཏི ཝུཏྟཾ, ཏཾ ཏསྶ ནིདྡེསེན ཡུཛྫཏི. ཨུཏྟཱནཱ ཙེཝ ཡཱ པཱལི༹, ཏསྶཱ སཾཝཎྞནཱཡ ཀིནྟི ཝཏྟབྦཾ? ན ཧི ཨཏྠཱ ཨུཏྟཱནཱཏི སམྦྷཝཏི. ཨདྷིཔྤཱཡཱནུསནྡྷཱིཧཱིཏིཨཱདིཝཙནེཧིཔི ཏཾ ཝཙནཾ སམྦྷཝཏཱིཏི ཙེ? ན, ཨཏྠགྒཧཎེན ཙེཏྠ པདཝིསེསཱནཾ གཧིཏཏྟཱ. ཏེ ཧི ཨཏྠཏོ ཨནཔེཏཏྠེན, ཨབྷིདྷཱནཏྠེན ཝཱ ཨཏྠོཔཙཱརེན ཝཱ ཨཏྠཱཏི ཝེདིཏབྦཱ. སཾཝཎྞནཱནཡོཏི སཾཝཎྞནཱ ནཱམ ཨཝུཏྟེསུ ཨུཧཱཔོཧཀྐམནིདསྶནཏོ ‘‘ནཡོ’’ཏི ཝུཏྟོ.

༡. ཨུརུཝེལཱཏི ཡཐཱཝུཏྟཝཱལིཀརཱསིཝསེན ལདྡྷནཱམཀོ གཱམོ, ཏསྨཱ སམཱིཔཏྠེ ཨེཏཾ བྷུམྨཾ. ཏཐཱབྷཱཝདསྶནཏྠཾ ‘‘ནཛྫཱ ནེརཉྫརཱཡ ཏཱིརེ’’ཏིཨཱདི ཝུཏྟཾ. ཨཉྙཐཱ ཏསྨིཾ ཝཱལིཀརཱསིམྷི ཝིཧརཏཱིཏི ཨཱཔཛྫཏི, ‘‘ཨུརུཝེལཾ པིཎྜཱཡ པཱཝིསཱིཏི ཡེན ཨུརུཝེལསེནཱནིགམོ’’ཏིཨཱདིཝཙནཝིརོདྷོ ཙ. ཨཊྛཀཐཱཡཾ པན མཱུལཀཱརཎམེཝ དསྶིཏཾ. ཏཏྠ ཏཾ སནྡྷཱཡ ཝུཏྟཾ…པེ… དཊྛབྦོཏི ནིགམནཝཙནཾ. ཏཾ ཀིམཏྠནྟི ཙེ? གཱམཾ སནྡྷཱཡ ཡཐཱཝུཏྟཔདཏྠསམྦྷཝདསྶནཏྠཾ. ‘‘སོ པན གཱམོ ཏདུཔཙཱརེན ཨེཝཾ ནཱམཾ ལབྷཏཱི’’ཏི ཝཙནཾ པན ཨཝུཏྟསིདྡྷནྟི ཀཏྭཱ ན ཝུཏྟནྟི ཝེདིཏབྦཾ, ཨཐ ཝཱ ཡསྶ ‘‘ཨུརུཝེལཱ’’ཏི ཡཐཱཝུཏྟཝཱལིཀརཱསིསྶ, ཏསྶ སམཱིཔགཱམསྶཔི ནཱམཾ. ཏཏྠ ཨཱཡསྨཱ ཨུཔཱལིཏྠེརོ ན ཨིདྷ གཱམཾ སནྡྷཱཡ ‘‘ཨུརུཝེལཱཡཾ ཝིཧརཏཱི’’ཏི ཨཱཧ གོཙརགཱམཔཡོཛནཱབྷཱཝཏོ. ན ཧི བྷགཝཱ ཏཾ གཱམཾ གོཙརཾ ཀཏྭཱ ཏདཱ ཏཏྠ ཝིཧཱསི, ཏསྨཱ ཨེཏྠ ཝཱལིཀརཱསིསྶ སམཱིཔེ བོདྷིརུཀྑམཱུལེ ཝིཧཱརཾ སནྡྷཱཡ སོ ཨེཝམཱཧཱཏི དསྶེཏུཀཱམོ ཨཊྛཀཐཱཙརིཡོ ཨེཝམཱཧཱཏི ཝེདིཏབྦཾ, ཏསྨཱ བྷགཝཏོ གཱམཏོ དཱུརཏརེ ཨརཉྙེ ཨབྷིསམྦོདྷིདཱིཔནེན དུཏིཡུཔྤཏྟིཊྛཱནནིཡམཾ ཏཱིཧི པདེཧི ཨཀཱསི ཐེརོཏི ཝེདིཏབྦཾ, ཨཉྙཐཱ པདཏྟཡཝཙནཔཡོཛནཱབྷཱཝཏོ. ཏཏྠ ནདནྟཱ གཙྪཏཱིཏི ནདཱི. ནེལཉྫལཱཡཱཏི ཝཏྟབྦེ ལ-ཀཱརསྶ ར-ཀཱརཾ ཀཏྭཱ ‘‘ནེརཉྫརཱཡཱ’’ཏི ཝུཏྟཾ, ཀདྡམསེཝཱལཝིརཧིཏཏྟཱ ནིདྡོསཛལཱཡཱཏི ཨཏྠོ, ནཱིལཛལཱཡཱཏི ཏསྶཱ ནཱམམེཝ ཝཱ ཨེཏཾ.

བོདྷིརུཀྑམཱུལེཏི ¶ ¶ ཨེཏྠ ཙ བོདྷི ཝུཙྩཏི ཨབྷིསམྦོདྷོ. སོ ཙ ཨཏྠཏོ བྷགཝཏོ ཙཏུཏྠམགྒཉཱཎཾ ཧོཏི ‘‘ཝིམོཀྑནྟིཀམེཏཾ ནཱམ’’ནྟི (པཊི. མ. ༡.༡༦༢) པཊིསམྦྷིདཱཝཙནཏོ. ཀིཉྩཱཔི ཏཾ ནཱམཀརཎབྷཱུཏཾ ཙཏུཏྠཕལཉཱཎམྤི ཝཏྟུཾ སམྦྷཝཏི, ཀཏྟབྦཀིཙྩཱནཾ པན ཀརཎཏོ ཏཾ ཙཏུཏྠམགྒཉཱཎམེཝ ཨེཏྠ བོདྷཱིཏི ཝེདིཏབྦཾ. ཏེནེཝ པཱལི༹ཡཾ ‘‘ཏཏིཡཝིཛྫཱཡ ཨཱསཝཱནཾ ཁཡཉཱཎཱཡཱ’’ཏི ཏདེཝ དསྶིཏཾ. ཨཊྛཀཐཱཡཾ པན ‘‘བོཛ྄ཛྷངྒཱ’’ཏི, ‘‘བོདྷིཔཀྑིཡཱ དྷམྨཱ’’ཏི ཙ. ཏཏྠ ཡསྨཱ ཙཏཱུསུ མགྒེསུ ཉཱཎཾ ‘‘བོདྷཱི’’ཏི ཝུཙྩཏི, ཏསྨཱ སཱམཉྙཏོ ཝཏྟུཀཱམཏཱདྷིཔྤཱཡཝསེན ‘‘བོདྷི ཝུཙྩཏི ཙཏཱུསུ མགྒེསུ ཉཱཎ’’ནྟི (ཙཱུལ༹ནི. ཁགྒཝིསཱཎསུཏྟནིདྡེས ༡༢༡) ཝུཏྟཾ ཨིདྷཱདྷིཔྤེཏཉཱཎསྶཔི ཏདནྟོགདྷཏྟཱ. ཨཐ ཝཱ པཱལི༹ཡཾ བྷགཝཏོ ཨཱདིམགྒཏྟཡཝཙནསྶ ཝུཏྟཊྛཱནཱབྷཱཝཱ ཙཏུཏྠམགྒཉཱཎམེཝ བྷགཝཏོ ཨུཔྤནྣཾ, ན བྷགཝཱ སོཏཱཔནྣཱདིབྷཱཝཾ པཏྭཱ བུདྡྷོ ཛཱཏོཏི སམཡནྟརཔྤསངྒནིཝཱརཎཏྠཾ ‘‘ཙཏཱུསཱུ’’ཏི ཝུཏྟཾ ཨཱདིཏྟཡསྶ ཙཏུཏྠཨུཔནིསྶཡསམྦྷཝེན བོདྷིཔརིཡཱཡསིདྡྷིཏོ. ‘‘པུགྒལོཔི སེནཱསནམྤི ཨུཔནིསྶཡཔཙྩཡེན པཙྩཡོ’’ཏི (པཊྛཱ. ༡.༡.༩ པཙྩཡནིདྡེས) ཝཙནཏོ ཕལཧེཏུཀོ ཕལཛནཀོ རུཀྑོ ཕལརུཀྑོཏི ཝིཡ བོདྷིཧེཏུརུཀྑོ བོདྷིརུཀྑོཏི ཝེདིཏབྦོ. ཨེཏྠ ‘‘ཡསྨཱ ཀེཝལཾ བོདྷཱིཏི རུཀྑསྶཔི ནཱམཾ, ཏསྨཱ བོདྷཱི’’ཏི པརཏོ ཝུཏྟཾ. ནིགྲོདྷཱདིརུཀྑཏོ ཨསྶ ཝིསེསནཝཙནཾ པན ཏདཉྙབོདྷིམཱུལཔྤསངྒནིཝཱརཎཏྠཾ. མགྒཉཱཎཉྷི ཀུསལམཱུལཏྟཱ བོདྷི ཙ ཏཾ མཱུལཉྩཱཏི སངྑྱཾ ལབྷེཡྻ. པཋམཱབྷིསམྦུདྡྷོ ནིསཱིདཏཱིཏི སམྦནྡྷོ. ཏེན ཨབྷིསམྦུདྡྷདིཝསེན སདྡྷིཾ ཨཊྛཱཧཾ ཨེཀཔལླངྐེན ནིསིནྣབྷཱཝཾ དསྶེཏི. ཨེཏྠ ཨེཀ-སདྡོ ཏསྶ ནིསཛྫཱསངྑཱཏསྶ པབྦཛྫཱནུཡོགཱནུརཱུཔསྶ པལླངྐསྶ ཨཉྙེན ཨིརིཡཱཔཐེན ཨནནྟརིཡབྷཱཝཾ ཨཐསྶ ཨཀོཔིཏབྷཱཝཾ དསྶེཏི. ཝིམུཏྟིསུཁནྟི ཨེཏྠ ཝིམུཏྟིཡཾ ཝཱ སུཁནྟི ན སམྦྷཝཏི. པཉྩམཛ྄ཛྷཱནིཀཏྟཱ བྷགཝཏོ ཕལསམཱཔཏྟིསངྑཱཏཱ ཝིམུཏྟི ཨེཝ ཨནུཛངྒྷནཊྛེན ནིབྦཱནསུཁནྟི ཝིམུཏྟིསུཁཾ, ཏཾ སམཱཔཛྫནེན པཊིསཾཝེདཱི ཨནུབྷཝནྟོ ནིསཱིདི. ཝེནེཡྻཀཱལཱནཏིཀྐམནཏོ ཏཾ ཨཔེཀྑམཱནོ ནིསཱིདི, ན ཝིམུཏྟིསུཁསངྒེན.

ཨཐ ཁོཏི ཨདྷིཀཱརནྟརཱརམྦྷེ ནིཔཱཏདྭཡཾ. ཏེན ཝིམུཏྟིསུཁཾ པཊིསཾཝེདཡམཱནོ ན པཊིཙྩསམུཔྤཱདཾ མནསཱཀཱསི, ཀིནྟུ ཏཏོ ཝུཊྛཱཡཱཏི དསྶེཏི ¶ . པཊིཝེདྷཝསེནེཝ སུམནསིཀཏསྶ པཊིཙྩསམུཔྤཱདསྶ པུནཔྤུནཾ མནསིཀརཎཾ གམྦྷཱིརཏྟཱ ཨསྶཱདཛནནཏོ, ན ཨཔུབྦནཡདསྶནཱདྷིཔྤཱཡཏོ. པཙྩཀྑབྷཱུཏསབྦདྷམྨཏྟཱ བྷགཝཏོ ཨསམྨོཧཏོ, པཊིཝིདྡྷསྶ ཝིསཡཏོ ཝཱ མནསིཀརཎཾ པན ཝིཛིཏདེསཔཙྩཝེཀྑཎཾ ཝིཡ རཉྙོ ཨཔུབྦཾ པཱིཏིཾ ཛནེཏི. ཝུཏྟཉྷི ‘‘ཨམཱནུསཱི རཏཱི ཧོཏི, སམྨཱ དྷམྨཾ ཝིཔསྶཏོ’’ཏི (དྷ. པ. ༣༧༣). རཏྟིཡཱ པཋམཾ ཡཱམནྟི ཨཙྩནྟསཾཡོགཝསེན ཨུཔཡོགཝཙནཾ, ཏེན ཏསྶ ཝིཀཔྤནཱནཏྟཏཾ དསྶེཏི. ཀིཉྩཱཔི ¶ ‘‘ཨནུལོམཔཊིལོམཾ མནསཱཀཱསཱི’’ཏི ཨེཀཏོཝ ཝུཏྟཾ, ཏཐཱཔི ཨིམིནཱ ཨནུཀྐམེནཱཏི དསྶནཏྠཾ ‘‘ཨཝིཛྫཱཔཙྩཡཱ’’ཏིཨཱདི. ཏཏྠ ཙ ཀིཉྩཱཔི པཝཏྟིམཏྟཔཙྩཝེཀྑཎཱ ཨདྷིཔྤེཏཱ ཀཐཾ པཉྙཱཡཏཱིཏི? པཋམབྷཱཝཱཡ, པཊིལོམམནསིཀརཎཾ པན ཨནུལོམེ པཙྩཡཱནཾ, པཙྩཡུཔྤནྣཱནཉྩ ཏཐཱབྷཱཝསཱདྷནཏྠཾ. ཡསྨཱ ཨཝིཛྫཱཡ ཨེཝ ནིརོདྷཱ སངྑཱརནིརོདྷོ, ན ཨཉྙཐཱ, ཏསྨཱ སངྑཱརཱནཾ ཨཝིཛྫཱ པཙྩཡོ, ཏསྶཱ ཙ སངྑཱརཱ ཕལནྟི དཱིཔནཏོ. ཏཐཱ ནིབྦཱནཔཙྩཝེཀྑཎཱཡ ཨནུལོམམནསིཀརཎཾ ཀཱརཎནིརོདྷཱ ཕལནིརོདྷསཱདྷནཏྠཾ. ཨེཏྠ ཙ ཨནུབྷཱཝཏོ ནིབྦཱནཾ དསྶིཏཾ. ན ཧི ཏཾ ཨཝིཛྫཱདིནིརོདྷམཏྟནྟི. ཏཏྠ ‘‘ཡཏོ ཁཡཾ པཙྩཡཱནཾ ཨཝེདཱི’’ཏི ཝཙནེན ཨནུལོམོ ནཱདྷིཔྤེཏོཏི སིདྡྷཾ. མགྒཔཙྩཝེཀྑཎཱཡ ཝཏྟབྦཾ ནཏྠི, ཨུབྷཡཏྠཔི ཀིཙྩཏོ, ཨཱརམྨཎཏོ ཙ ཏསྶ མགྒསྶ ཝིསཡཏོ ཙ ཏཏྠ མགྒོ དསྶིཏོ.

ཏཏྠཱཧ – ‘‘པཊིཙྩསམུཔྤཱདཾ པཊིལོམཾ མནསཱཀཱསཱི’’ཏི ན ཡུཛྫཏི, ན ཧི པཊིལོམཱཔདེསེན ནིདྡིཊྛཾ ནིབྦཱནཾ པཊིཙྩསམུཔྤཱདོ བྷཝིཏུམརཧཏཱིཏི? ཝུཙྩཏེ – ན, ཏདཏྠཛཱནནཏོ. ཨནུལོམཔཊིལོམནྟི ཧི བྷཱཝནཔུཾསཀཾ. ཨནུལོམཏོ, པཊིལོམཏོ ཙ ཏཾ པཊིཙྩསམུཔྤཱདཾ མནསཱཀཱསཱིཏི ཧི ཏཏྠ ཨཏྠོ. ཨཉྙཐཱ ནིརོདྷསྶ པཊིལོམཔྤསངྒཱཔཏྟིཡེཝཱཔཛྫཏི. པཊིལོམེ ཙ པནེཏསྨིཾ ཨནུཀྐམནིཡམོ ཨནུལོམེ ཨནུཀྐམནིཡམཏོ སིདྡྷོཏི ཝེདིཏབྦཾ. ཨེཝཾ སཏི པཊིཙྩསམུཔྤཱདསྶ པཊིལོམོ ནཱམ ཨཔཊིཙྩསམུཔྤཱདོཏི སིདྡྷཾ ཧོཏི. ཏེན ཝུཏྟཾ ཨཊྛཀཐཱཡཾ ‘‘ནིརོདྷོ ཧོཏཱིཏི ཨནུཔྤཱདོ ཧོཏཱི’’ཏིཨཱདི. ཨེཝཾ སནྟེ པུབྦཱཔརཝིརོདྷོ ཧོཏི. ཀཐཾ? པཊིཙྩཱཏི ཧི ཨིམིནཱ ཕལསྶ པཙྩཡཔརིགྒཧེན, པཙྩཡཱནཉྩ པཙྩཡཱཡཏྟུཔགམནེན ཏསྶ ཨུཔྤཱདཱབྷིམུཁབྷཱཝདཱིཔནཏོ ¶ ཨསམུཔྤཱདོ ན སམྦྷཝཏི, ཏསྨཱ ཨཔཊིཙྩསམུཔྤཱདོཏི ཨེཝཾ ཨུབྷཡཔཊིཀྑེཔེན པནསྶ པཊིལོམཏཱ ཝེདིཏབྦཱཏི ཨེཀེ. ཏཾ ཨཡུཏྟཾ ཏསྶ ཨནུལོམབྷཱཝནིཡམནཏོ, ཨཏྠཱཏིསཡཱབྷཱཝཏོ, ཏསྨཱ ཨཔྤཊིཙྩསམུཔྤཱདོ ཏསྶ པཊིལོམོཏི ཝེདིཏབྦཾ. ཏེནེཝ བྷགཝཏཱ པཱལི༹ཡཾ པཙྩཡཔཙྩཡུཔྤནྣནིརོདྷོ ཝུཏྟོ. ཏཏྠ ཧི ‘‘ཨཝིཛྫཱཡ ཏྭེཝ ཨསེསཝིརཱགནིརོདྷཱ’’ཏི ཨེཝཾ པཙྩཡསྶ སམུཙྪིནྣཔཙྩཡབྷཱཝཝསེན པཙྩཡནིརོདྷཾ, ཕལསྶ པཙྩཡཔཊིགྒཧཱབྷཱཝཝསེན པཙྩཡུཔྤནྣནིརོདྷཉྩ དཱིཔེཏི. དུཝིདྷོ པཱལི༹ཡཾ ནིརོདྷོ ཨཏྠཏོ ཨནུཔྤཱདོ ནཱམ ཧོཏཱིཏི ཀཏྭཱ ཨཊྛཀཐཱཡཾ ‘‘ནིརོདྷོ ཧོཏཱིཏི ཨནུཔྤཱདོ ཧོཏཱི’’ཏི ཝུཏྟཾ. ཨེཝཾ སནྟེ ནིབྦཱནཾ པཙྩཡཔཙྩཡུཔྤནྣཱནཾ ནིརོདྷམཏྟནྟི ཨཱཔཛྫཏཱིཏི ཙེ? ན, ཏསྶཱནུབྷཱཝདཱིཔནཱདྷིཔྤཱཡཏོ. ཝིདིཏཝེལཱཡནྟི མནསིཀཏཝེལཱཡནྟི ཨཏྠོ, ཨཉྙཐཱ ཏཏོ པུབྦེ ཨཝིདིཏཔྤསངྒཏོ.

ཛྷཱཡཏོཏི ¶ ཨེཏྠ ཀཱམཾ ལཀྑཎཱུཔནིཛ྄ཛྷཱནེན ཛྷཱཡཏོ བོདྷིཔཀྑིཡདྷམྨཱ པཱཏུབྷཝནྟི, ཙཏུཨརིཡསཙྩདྷམྨཱ ཝཱ པཀཱསནྟི, ཏཐཱཔི པུབྦབྷཱགེ སམཐཱདིཡཱནིཀཝིབྷཱགདསྶནཏྠཾ ཨཱརམྨཎཱུཔནིཛ྄ཛྷཱནགྒཧཎཾ. ཙཏུསཙྩདྷམྨགྒཧཎཾ ཀཱམཾ ཨནུལོམཔཊིཙྩསམུཔྤཱདདསྶནཱདྷིཀཱརེན ཝིརུཛ྄ཛྷཏི, ཏཐཱཔི ‘‘ཡོ དུཀྑཾ པརིཛཱནཱཏི, སོ སམུདཡཾ པཛཧཏཱི’’ཏི ལདྡྷིཝསེན ཀཏནྟི ཝེདིཏབྦཾ.

༢. ‘‘པཙྩཡཀྑཡསྶཱ’’ཏི ཀིཙྩཔརིཡཱཡཝསེན ཝུཏྟཾ. ཏེན པཙྩཡནིབྦཱནཾ, ཏདུཔནིསྶཡནིབྦཱནཉྩཱཏི དུཝིདྷཾ ནིབྦཱནཾ དསྶིཏཾ ཧོཏཱིཏི. ཀཱམཉྩ ཏཾ ན ཀེཝལཾ པཙྩཡཀྑཡམཏྟཾ ཀརོཏི, ཨཐ ཁོ པཙྩཡུཔྤནྣཀྑཡམྤི ཀརོཏི. ཡཏོ ཨུབྷིནྣམྤི ནིརོདྷོ དསྶིཏོ, ཏཐཱཔི ཧེཏུནིརོདྷཱ ཕལནིརོདྷོཏི ཀཏྭཱ ‘‘པཙྩཡཀྑཡསྶཱ’’ཏི ཝུཏྟཾ. ཝུཏྟཔྤཀཱརཱ དྷམྨཱཏི ཨེཏྠ ཙཏུསཙྩགྒཧཎཾ པཋམགཱཐཱཡཾ ཝུཏྟནཡཝིཔལླཱསེན ཀཏནྟི ཝེདིཏབྦཾ.

༣. སམུདཡནིརོདྷསངྑཱཏོ ཨཏྠོཏི ཨེཏྠ སམུདཡོ ཀིཙྩཝསེན, ནིརོདྷོ ཨཱརམྨཎཀིརིཡཱཡ. ཨེཏེན དྭིཔྤཀཱརཱ ནིརོདྷཱ དསྶིཏཱ ཧོནྟི ཏསྶ ཨནུབྷཱཝསྶ ཝསེནཱཏི ཨཏྠོ. ཡསྨཱ པལླངྐཱབྷུཛིཏཊྛཱནཉྩ ‘‘པལླངྐོ’’ཏི ཝུཙྩཏི, ཏསྨཱ ཕལཱདྷིགམཊྛཱནཾ ‘‘པལླངྐ’’ནྟི ཝུཏྟཾ.

ཨཛཔཱལཀཐཱཝཎྞནཱ

༤. སམྨོདཱིཏི ¶ ཧིཏཀཱམཏཱཡ བྷགཝཱ ཏེན བྲཱཧྨཎེན སདྡྷིཾ སམྨོདི. ཝེདེཧི ཨནྟནྟི ཨེཏྠ ནིབྦཱནཾ ཨནྟོ ནཱམ. ཝེདཱནཾ ཝཱ ཨནྟཾ གཏཏྟཱཏི ཨེཏྠ ཨརཧཏྟཾ. ཏཏྠ པཋམེན ཝེདནྟགཱུ ཡསྨཱ, ཏསྨཱ ཨེཝ ཝུསིཏབྲཧྨཙརིཡོ. དུཏིཡེན ཝེདནྟགཱུ ཡསྨཱ, ཏསྨཱ ཝུསིཏབྲཧྨཙརིཡོཏི ཨེཝཾ ཡོཛནཱ ཀཱཏབྦཱ. ཀིཉྩཱཔི བྲཱཧྨཎསྶ ཙཏུསཙྩཡུཏྟཾ ཨཏྠཏོ ཝུཏྟཾ, ཨུདཱནགཱཐཱཡཾ ཝུཏྟཔཊིཝེདྷཱབྷཱཝཾ སནྡྷཱཡ ‘‘དྷམྨཙཀྐཔྤཝཏྟན’’ནྟི ཝུཙྩཏཱིཏི པརིཧཱརོ.

ཨཛཔཱལཀཐཱཝཎྞནཱ ནིཊྛིཏཱ.

མུཙལིནྡཀཐཱཝཎྞནཱ

༥. མུཙལིནྡཝཏྠུམྷི ཨེཏམཏྠནྟི ཨིདཱནི ཝཏྟབྦམཏྠཾ སནྡྷཱཡ ཝུཏྟཾ. ཏཾ ཝིཝེཀནྟི ཨུཔདྷིཝིཝེཀཾ ¶ . ‘‘ཨབྱཱཔཛྫཾ སུཁཾ ལོཀེ’’ཏི ཨིམིནཱ པཋམམགྒཾ དསྶེཏི ཏེན སཏྟེསུ མཱརཎཝསེན ཨུཔྤཛྫནཀབྱཱཔཱདཔྤཧཱནསིདྡྷིཏོ. ‘‘པཱཎབྷཱུཏེསུ སཾཡམོ’’ཏི ཨིམིནཱ དུཏིཡམགྒཾ དསྶེཏི. མགྒཱི ཧི པུགྒལོ ཨཝསིཊྛབྱཱཔཱདཏནུཏྟཝསེན པཱཎབྷཱུཏེསུ སཾཡཏོ ཧོཏི ཝིཧིཾསཱདྷིཔྤཱཡཱབྷཱཝཏོ. ཨེཝཾ ཙཏྟཱརོ ཧི མགྒཱ ཨནུཀྐམེནཱཔི གཧིཏཱ ཧོནྟི.

མུཙལིནྡཀཐཱཝཎྞནཱ ནིཊྛིཏཱ.

རཱཛཱཡཏནཀཐཱཝཎྞནཱ

༦. རཱཛཱཡཏནཾ པཱཏལི. ‘‘ཙཏུདྡིསཱ ཨཱགནྟྭཱ’’ཏི པཱཋསེསོ. མུཁཝཊྚིཡཾ ཀིརསྶ དིནྣཱནཾ ཙཏུནྣམྤི ལེཁཱཔརིཙྪེདོ ཨཏྠི, ཏེ ཝཱཎིཛཱ དེཝཏཱཡ གཱརཝདསྶནེན བྷགཝཏོ རཱུཔཀཱཡདསྶནེན པསནྣཏྟཱ སརཎཾ ཨགྒཧེསུཾ. དེཝཏཱཡ ‘‘བྷགཝཱ རཱཛཱཡཏནམཱུལེ པཋམཱབྷིསམྦུདྡྷོ’’ཏི ཝཙནཾ སུཏྭཱ སཱཝཀསངྒྷཱབྷཱཝཾ, ཨབྷིསམྦུདྡྷདྷམྨསབྦྷཱཝཉྩ ཛཱནིཾསཱུཏི ཝེདིཏབྦཾ. ཛཱནནྟཱིཏི བུདྡྷཱཏི སམྦནྡྷོ.

རཱཛཱཡཏནཀཐཱཝཎྞནཱ ནིཊྛིཏཱ.

བྲཧྨཡཱཙནཀཐཱཝཎྞནཱ

༧. ཨདྷིགཏོ ¶ ཁོ མྱཱཡནྟིཨཱདིམྷི དྷམྨོཏི ཙཏུསཙྩདྷམྨོ, གམྦྷཱིརཏྟཱ དུདྡསོ. དུདྡསཏྟཱ དུརནུབོདྷོ. སནྟོཏི ནིབྦུཏོ. པཎཱིཏོཏི ཨཏཔྤཀོ. ཨིདཾ དྭཡཾ ལོཀུཏྟརམེཝ སནྡྷཱཡ ཝུཏྟཾ. ཨཏཀྐཱཝཙརོཏི ཏཀྐེན ཨཱཀཱརཔརིཝིཏཀྐེན ཨོགཱཧིཏབྦོ ན ཧོཏི, ཉཱཎེནེཝ ཨཝཙརིཏབྦོཏི ཨཏྠོ. པཎྜིཏཝེདནཱིཡོཏི སམྨཱཔཊིཔདཾ པཊིཔནྣེཧི པཎྜིཏེཧི ཝེདནཱིཡོ. སབྦསངྑཱརསམཐོཏིཨཱདི སབྦཾ ནིབྦཱནམེཝ. ཏཉྷི ཕལཱུཔཙཱརེན ཨེཀམྤི སམཱནཾ ཏཐཱ ཏཐཱ ཝུཙྩཏི. རཱམཱཏི པཛཱ. ཨནུ ཨནུ ཨཙྪརིཡཱ ཨནཙྪརིཡཱ. ཏེསཾ བྷགཝཏོ པུབྦབྷཱགཔཊིཔདཾ སུཏཔུབྦཱནཾ, དྷམྨསྶ ཝཱ གམྦྷཱིརབྷཱཝཾ ཨདྷིགཏཔུབྦཱནཾ. ཀིཉྩཱཔི བྷགཝཏོ ཙཏྟཱརོཔི མགྒཱ སུཁཔྤཊིཔདཱ, ཏཐཱཔི བོདྷིསཏྟཔཊིཔདཾ སནྡྷཱཡ ‘‘ཀིཙྪེན མེ’’ཏི ཝུཏྟཾ. ‘‘པཀཱསིཏཾ པཀཱསིཏུ’’ནྟི ཨུབྷཡཐཱཔི པཱཋོ. པརེཏེཧི ཡུཏྟེཧི. རཱགརཏྟཱཏི ཀཱམརཱགདིཊྛིརཱགེཧི རཏྟཱ. ཨཏྟནིཙྩཱདིགཱཧཀཱ ན དཀྑནྟི ན པསྶིསྶནྟི.

༨. སཧཾཔཏི ¶ ཀིར ‘‘ནསྶཏི ཝཏ བྷོ ལོཀོ’’ཏི ཨིམཾ སདྡཾ ཏཐཱ ནིཙྪཱརེཏི, ཡཐཱ དསསཧསྶིལོཀདྷཱཏུབྲཧྨཱནོ སུཏྭཱ སནྣིཔཏིཾསུ. པཉྙཱམཡེ ཨཀྑིམྷི སནྟཱནཱནུསཡིཏཝསེན ཨཔྤཾ པརིཏྟཾ རཱགཱདིརཛཾ ཨེཏེསཾ, ཨེཝཾསབྷཱཝཱཏི ཨཔྤརཛཀྑཛཱཏིཀཱ. ཨསྶཝནཏཱཏི ཨསྶཝནཏཱཡ.

སམལེཧི སཏྠཱརེཧི. ཨཔཱཔུརེཏནྟི ཝིཝར ཨེཏཾ. ཨམཏསྶ དྭཱརནྟི ཨརིཡམགྒཾ, ཙཏུསཙྩདྷམྨཾ ཝཱ. ཝིཛྫཏྟཡཙཏུམགྒཉཱཎེཧི པུནཔྤུནཾ བུདྡྷཾ པཊིཝིདྡྷཾ. སེལེཏི སིལཱམཡེ. ཝིགཏརཛཏྟཱ སུཁདསྶནཡོགྒེ ཨིཏོ ཙ ཨེཏྟོ ཙ ཨཱགནྟྭཱ ཡཐཱ ཋིཏོ ཙཀྑུམཱ པུརིསོ སམནྟཏོ ཛནཏཾ པསྶེཡྻ. ཏྭམྤི སུམེདྷ སུནྡརཔཉྙ སབྦཉྙུཏཉྙཱཎཱདྷིགམཱཡ སམནྟཙཀྑུ. སབྦཀིལེསསངྒཱམཱནཾ ཝིཛིཏཏྟཱ ཝིཛིཏསངྒཱམ. ཛཱཏིཀནྟཱརཱདིནིཏྠརཎཏྠཾ ཝེནེཡྻཛནསཏྠཝཱཧནསམཏྠཏཱཡ སཏྠཝཱཧ. ཀཱམཙྪནྡཨིཎསྶ ཨབྷཱཝཏོ ཨཎཎ.

༩. བུདྡྷཙཀྑུནཱ ཨིནྡྲིཡཔརོཔརིཡཏྟཉཱཎེན ཙ ཨཱསཡཱནུསཡཉཱཎེན ཙ. ཨིམེསཉྷི དྭིནྣཾ ཉཱཎཱནཾ ‘‘བུདྡྷཙཀྑཱུ’’ཏི ནཱམཾ. ཨུཔྤལིནིཡནྟི ཨུཔྤལཝནེ. ཨེཝཾ སེསེསུཔི ¶ . ཨནྟོ ནིམུགྒཔོསཱིནཱིཏི ཡཱནི ཨནྟོ ནིམུགྒཱནེཝ པོསིཡནྟི, ཏཏྠ ཡཱནི ཨུདཀཾ ཨཙྩུགྒམྨ ཋིཏཱནི, ཏཱནི སཱུརིཡརཾསིསམྥསྶཾ ཨཱགམཡམཱནཱནི ཋིཏཱནི ཨཛྫ པུཔྥནཀཱནི. ཡཱནི སམོདཀཾ ཋིཏཱནི, ཏཱནི སྭེ པུཔྥནཀཱནི. ཡཱནི ཨུདཀཱནུགྒཏཱནི, ཏཱནི ཏཏིཡདིཝསེ པུཔྥནཀཱནི. ཨུདཀཱ པན ཨནུགྒཏཱནི ཨཉྙཱནིཔི སརོགཨུཔྤལཱདཱིནི ནཱམ ཧོནྟི. ཡཱནི ནེཝ པུཔྥིསྶནྟི མཙྪཀཙྪཔབྷཀྑཱནེཝ བྷཝིསྶནྟི, ཏཱནི པཱལི༹ནཱརུལ༹ྷཱནི, ཨཱཧརིཏྭཱ པན དཱིཔེཏབྦཱནི. ཨེཏེཧི ཨུགྒྷཊིཏཉྙཱུ ཝིཔཉྩིཏཉྙཱུ ནེཡྻོ པདཔརམོཏི ཙཏྟཱརོ པུགྒལཱ ཡོཛེཏབྦཱ. པཙྩབྷཱསཱིཏི པཏི ཨབྷཱསི.

ཨཔཱརུཏཱཏི ཝིཝཊཱ. པཙྪིམསྶ པདདྭཡསྶ ཨཡམཏྠོ. ཨཧཉྷི ཨཏྟནོ པགུཎཾ སུཔྤཝཏྟམྤི ཨིམཾ པཎཱིཏཾ ཨུཏྟམཾ དྷམྨཾ ཀཱཡཝཱཙཱཀིལམཐསཉྙཱི ཧུཏྭཱ ནཱབྷཱསི.

བྲཧྨཡཱཙནཀཐཱཝཎྞནཱ ནིཊྛིཏཱ.

པཉྩཝགྒིཡཀཐཱཝཎྞནཱ

༡༠. ཨིདཱནི པན སབྦོ ཛནོ སདྡྷཱབྷཱཛནཾ ཨུཔནེཏུ, པཱུརེསྶཱམི ནེསཾ སངྐཔྤནྟི. ཨཔྤརཛཀྑཛཱཏིཀོཏི ¶ སམཱཔཏྟིཡཱ ཝིཀྑམྦྷིཏཀིལེསཏྟཱ ནིཀྐིལེསཛཱཏིཀོ. ཨཱཛཱནིསྶཏཱིཏི ཙེ ན ནིཊྛཱནམཀཾསུ དྷམྨསངྒཱཧཀཱ ཏེ ཝིནཡཀྐམཉྙཱ, ཨཧཾ དེསེཡྻཾ པཊིཝིཛ྄ཛྷིསྶཏཱིཏི ཨདྷིཔྤཱཡོ, ‘‘མུདྡྷཱཔི ཏསྶ ཝིཔཏེཡྻཱ’’ཏི (ཨ. ནི. ༨.༡༡; པཱརཱ. ༢) ཨེཏྠ ཝིཡ ཨབྷཱུཏཔརིཀཔྤོ ཀིརེསོ. ལོཀེ ཏསྶ ཨདྷིམུཏྟབྷཱཝདཱིཔནཏྠཉྷི ཨིདཾ ཝཙནཾ ཨཏྟནོ ཏདུཔདེསེན ཨཝིདིཏབྷཱཝདཱིཔནཏྠཾ. ཏསྶ ཨནནྟེཝཱསིཀབྷཱཝདཱིཔནཏྠནྟི ཨེཝམཱདཱིནི པནེཏྠ པཡོཛནཱནི. བྷགཝཏོཔི ཁོ ཉཱཎནྟི སབྦཉྙུཏཉྙཱཎཾ ཏསྶ མརཎཱརམྨཎཾ ཨུཔྤཛྫི. ཏེན ཏཏོ པུབྦེ ཏསྶ སཏི དྷམྨདེསནཱཡ ཁིཔྤཾ ཛཱནནབྷཱཝཱརམྨཎནྟི དཱིཔེཏི. པརོཔདེསཏོ ཨཛཱནིཏྭཱ པཙྩཀྑཏོ མརཎསཙྪིཀིརིཡམྤི དསྶེཏི. བུདྡྷཱནམྤི ཨནེཀཉཱཎསམོདྷཱནཱབྷཱཝཏོ སུཝུཏྟམེཏཾ. ཙིཏྟཔུབྦིཀཱ ཧི ཙིཏྟཔྤཝཏྟི, ཨཉྙཐཱ ནཝསཏྟཔཱཏུབྷཱཝཔྤསངྒོ. སབྦདྷམྨཱནཾ ཨེཀཏོ གཧཎེ ཝིརུདྡྷཀཱལཱནཾ ཨེཀཏོ ¶ ཛཱནནཔྤསངྒོ. ཏཏོ ཨེཀཉཱཎསྶ ཝིཏཐབྷཱཝཔྤཏྟིདོསོ, ཏསྨཱ སབྦསྶ ཝིནཱནེཀཉཱཎསམོདྷཱནཾ ཨཱཔཛྫིཏདྷམྨེསུ ཨཔྤཊིཧཏཉཱཎཝནྟཏྟཱ པན སབྦཉྙཱུ ཨེཝ བྷགཝཱཏི ཝེདིཏབྦཾ, ན སབྦཀཱལཾ ཨེཀཏོ. ཨཱལཱ༹རཱདཱིནཾ མརཎཱཛཱནནཏོཏི ཙེ? ན, ཏསྶ ཛཱནནེན པུཐུཛྫནསྶཱཔི སབྦཉྙུཏཱཔཏྟིཔྤསངྒཏོ. ཡདཱབྷཱཝེན ཡདཱབྷཱཝོ ཏབྦྷཱཝེན ཏསྶཱབྷཱཝཔྤསངྒོ ལོཀེ སིདྡྷོཏི. ‘‘བྷགཝཏོཔི ཁོ ཉཱཎཾ ཨུདཔཱདཱི’’ཏི ཝཙནཏོ ཏསྶ མརཎཛཱནནཾ སིདྡྷནྟི ཀཏྭཱ བྷཝཾ མཏེནེཝ བྷགཝཱ སབྦཉྙཱུཏི སིདྡྷཾ ན དེཝཏཱརོཙནཏོ པུབྦེ ཨཛཱནནཏོཏི ཙེ? ན, ཝིསེསཾ པརིགྒཧེཏྭཱ ཨནྟརཱ པཛཱནནཏོ, དེཝཏཱཡ སབྦཉྙུབྷཱཝཔྤཏྟིདོསཏོ ཙ. ན ཧི སོ ཀསྶཙི ཝཙནེན ཨཉྙཱསཱིཏི.

ཨཔིཙ ཀིམིདཾ ཏཏྠ ཛཱནནཾ ནཱམ ཏདཱརམྨཎཉཱཎུཔྤཏྟཱིཏི ཙེ? ན, ལོཀེ སབྦཉྙུནོ ཨཙྩནྟཱབྷཱཝཔྤསངྒཏོ. སཱདྷིཀཱ ཧི མཡཱ ཨེཀཉཱཎཀྑཎེ སབྦཾ ཉཱཎཾ, ཏདཉྙེསཉྩ ཏདཉྙཱཎཱནུཔྤཏྟི. ཨཔིཙ སབྦཉྙུནོ སབྦདྷམྨཝིསཡེ ཉཱཎཔཙྩུཔཊྛཱནསིདྡྷི ཏསྶ ཉཱཎསྶ ཨཏྟནཱཝ ཨཏྟནོ ཨཝིསཡོཏི ཙེ? ན, ཧེཏུནིདསྶནཱནུཔྤཏྟིཏོ. ཨཔིཙ ‘‘བྷགཝཏོཔི ཁོ ཉཱཎཾ ཨུདཔཱདཱི’’ཏི ཨེཏྠ ཝིསེསཝཙནཾ ཨཏྠི. ཡེན དེཝཏཱརོཙནུཏྟརཀཱལམེཝ བྷགཝཏོ ཉཱཎཾ ཨུདཔཱདཱིཏི པཉྙཱཡཏི. ན ཧི ཝཙནཔུབྦཱཔརིཡབྷཱཝམཏྟེན ཏདཏྠཔུབྦཱཔརིཡཏཱ ཧོཏི, ཏསྨཱ ཨཡུཏྟམེཏཾ. ཨབྷིདོསཀཱལཾཀཏོཏི པཋམཡཱམེ ཀཱལཾཀཏོ. ‘‘མཛ྄ཛྷིམཡཱམེ’’ཏིཔི ཝདནྟི. ཨུབྷཡཏྠཔི མཧཱཛཱནིཡོ. སཏྟདིཝསབྦྷནྟརེ, ཨེཀདིཝསབྦྷནྟརེ ཙ པཏྟབྦམགྒཕལཏོ པརིཧཱིནཏྟཱ མཧཏཱི ཛཱནི ཨསྶཱཏི མཧཱཛཱནི. ཏེསུ ཧི དྭཱིསུ ཨཱལཱ༹རོ ཨཱཀིཉྩཉྙཱཡཏནབྷཝེ ནིབྦཏྟོ, ཨུདཀོ བྷཝགྒེ, ཏསྨཱ ནེསཾ དྷམྨདེསནཱཡ ཨཀྑཎེ ནིབྦཏྟབྷཱཝཾ སནྡྷཱཡ བྷགཝཱ ཨེཝཾ ཙིནྟེསི, ན ཨིཏོ མནུསྶལོཀཏོ ཙུཏིབྷཱཝཾ སནྡྷཱཡཱཏི ཝེདིཏབྦཾ. ཨབུདྡྷཝེནེཡྻཏཉྩ སནྡྷཱཡཱཏི ནོ ཏཀྐོ, ཨཉྙཐཱ ཨནིཊྛཔྤསངྒོཏི ཨཱཙརིཡོ.

བོདྷིསཏྟསྶ ¶ ཛཱཏཀཱལེ སུཔིནཔཊིགྒཱཧཀཱ ཙེཝ ལཀྑཎཔརིགྒཱཧཀཱ ཙ ཨཊྛ བྲཱཧྨཎཱ. ཏེསུ ཏཡོ དྭིདྷཱ བྱཱཀརིཾསུ ‘‘ཨིམེཧི ལཀྑཎེཧི སམནྣཱགཏོ ཨགཱརཾ ཨཛ྄ཛྷཱཝསནྟོ རཱཛཱ ཧོཏི ཙཀྐཝཏྟི, པབྦཛནྟོ བུདྡྷོ’’ཏི. པཉྩ བྲཱཧྨཎཱ ‘‘ཨགཱརེ ན ཏིཊྛཏི, བུདྡྷོཝ ཧོཏཱི’’ཏི ཨེཀཾསབྱཱཀརཎཱཝ ཨཧེསུཾ. ཏེསུ པུརིམཱ ཏཡོ ཡཐཱམནྟཔཱརཾ ¶ གཏཱ. ཨིམེ པན མནྟཔཱརཾ ཨཏིཀྐམནྟཱ ཨཏྟནཱ ལདྡྷཾ པུཉྙམཧཏྟཾ ཝིསྶཛྫེཏྭཱ བོདྷིསཏྟཾ ཨུདྡིསྶ པུརེཏརམེཝ པབྦཛིཾསུ. ཨིམེ སནྡྷཱཡ ཝུཏྟཾ ‘‘པཉྩཝགྒིཡཱ’’ཏི. ‘‘ཏེསཾ པུཏྟཱ’’ཏིཔི ཝདནྟི, ཏཾ ཨཊྛཀཐཱཡཾ པཊིཀྑིཏྟཾ. ཀསྨཱ པནེཏྠ བྷགཝཱ ‘‘བཧཱུཔཀཱརཱ ཁོ མེ’’ཏི ཙིནྟེསི. ཀིཾ ཨུཔཀཱརཀཱནཾ ཨེཝ ཨེས དྷམྨཾ དེསེཏི, ཨིཏརེསཾ ན དེསེཏཱིཏི? ནོ ན དེསེཏི. ཨུཔཀཱརཱནུསྶརཎམཏྟཀེནེཝ ཝུཏྟནྟི ཨཊྛཀཐཱནཡོ. ཨཏྟནོ ཀཏཉྙུཀཏཝེདིབྷཱཝཔྤཀཱསནཏྠཾ, ཀཏཉྙུཏཱདིཔསཾསནཏྠཾ, པརེསཉྩ ཀཏཉྙུབྷཱཝཱདིནིཡོཛནཏྠཾ, ཁིཔྤཛཱནནཔྤསངྒནིཝཱརཎཏྠཾ.

༡༡. ཨནྟརཱ ཙ གཡཾ ཨནྟརཱ ཙ བོདྷིནྟི གཡཱཡ ཙ བོདྷིཡཱ ཙ མཛ྄ཛྷེ ཏིགཱཝུཏནྟརེ ཋཱནེ. བོདྷིམཎྜཏོ ཧི གཡཱ ཏཱིཎི གཱཝུཏཱནི. བཱརཱཎསིནགརཾ ཨཊྛཱརས ཡོཛནཱནི. ཨུཔཀོ པན བོདྷིམཎྜསྶ ཙ གཡཱཡ ཙ ཨནྟརེ བྷགཝནྟཾ ཨདྡས. ཨནྟརཱ-སདྡེན པན ཡུཏྟཏྟཱ ཨུཔཡོགཝཙནཾ ཀཏཾ. ཨཱིདིསེསུ ཙ ཋཱནེསུ ཨཀྑརཙིནྟཀཱ ཨེཀམེཝ ཨནྟརཱསདྡཾ པཡུཛྫནྟི, སོ དུཏིཡཔདེཔི ཡོཛེཏབྦོ. ཨཡོཛིཡམཱནེ པན ཨུཔཡོགཝཙནཾ ན པཱཔུཎཱཏི. ཨིདྷ པན ཡོཛེཏྭཱཝ ཝུཏྟོཏི.

སབྦཱབྷིབྷཱུཏི སབྦཾ ཏེབྷཱུམཀདྷམྨཾ ཨབྷིབྷཝིཏྭཱ ཋིཏོ. ཏཎྷཀྑཡེཏི ནིབྦཱནེ. ཝིམུཏྟོཏི ཨཱརམྨཎཏོ ཝིམུཏྟོ. ནཏྠི མེ པཊིཔུགྒལོཏི མཡ྄ཧཾ པཊིཔུགྒལོ ནཱམ ནཏྠི, ཨསདིསོཏི ཨཏྠོ, མམ སབྦཉྙུབྷཱཝེ དོསཾ དསྶེཏྭཱ ལོཀེ ཋཱཏུཾ ཨསམཏྠཏཱཡ མམ པཙྩཏྠིཀཔུགྒལོ ཝཱ ནཏྠཱིཏི ཨཏྠོ. ཨཱཧཉྪཾ ཨམཏདུནྡུབྷིནྟི དྷམྨཙཀྑུཔཊིལཱབྷཱཡ ཨམཏབྷེརིཾ པཧརིསྶཱམཱིཏི གཙྪཱམི.

ཨརཧསི ཨནནྟཛིནོ བྷཝིཏུཾ ཡུཏྟོ ཏྭནྟི ཨཏྠོ. ཨིདམྤི ཨཏྟནོ སཏྠུནཱམཾ. ཧུཔེཡྻཱསཱིཏི ཨཱཝུསོ ཨེཝམྤི ནཱམ བྷཝེཡྻ. པཀྐཱམཱིཏི ཝངྐཧཱརཛནཔདཾ ནཱམ ཨགམཱསི. བྷགཝཱཔི ‘‘ཏཏྠ ཏསྶ མིགལུདྡཀསྶ དྷཱིཏུཡཱ ཙཱཔཱཡ ཨུཀྐཎྛིཏྭཱ པུན ཨཱགནྟྭཱ ཨནཱགཱམཱི ཨཡཾ བྷཝིསྶཏཱི’’ཏི ཨུཔནིསྶཡསམྤཏྟིཾ དིསྭཱ ཏེན སདྡྷིཾ ཨཱལཔི. སོ ཙ ཏཐེཝཱགནྟྭཱ པབྦཛིཏྭཱ ཨནཱགཱམཱི ཧུཏྭཱ ཨནུཀྐམེན ཀཱལཾ ཀཏྭཱ ཨཝིཧེསུ ཨུཔྤཛྫིཏྭཱ ཨརཧཏྟཾ པཱཔུཎི.

༡༢. སཎྛཔེསུནྟི ¶ ¶ ཀཏིཀཾ ཨཀཾསུ. པདྷཱནཝིབྦྷནྟོཏི པདྷཱནཏོ བྷཊྛོ པརིཧཱིནོ. ‘‘ཨབྷིཛཱནཱཐ ནུ བྷཱསིཏམེཏ’’ནྟི, ‘‘ཝཱཙཾ བྷཱསིཏམེཝ’’ནྟི ཙ ཨེཝརཱུཔཾ ཀཉྩི ཝཙནབྷེདཾ ཨཀཱསཱིཏི ཨདྷིཔྤཱཡོ. བྷགཝནྟཾ སུསྶཱུསིཾསཱུཏི བྷགཝཏོ ཝཙནཾ སོཏུཀཱམཱ ཨཧེསུཾ. ཨཉྙཱཏི ཨཉྙཱཡ, ཛཱནིཏུནྟི ཨཏྠོ.

༡༣. ཨཐ ཀིམཏྠཾ ཨཱམནྟེསཱིཏི? ཏཏོཔི སུཊྛུཏརཾ པཊིཛཱནནཏྠཾ, དྷམྨསྶ ཨབྷིབྷཱརིཡདུལླབྷབྷཱཝདཱིཔནཏྠཾ, ཨཀྑརཝིཀྑེཔནིཝཱརཎཏྠཉྩ. ཏཏྠ དྭེམེཏི ཨནྟདྭཡཝཙནཾ ཨཉྙེསམྤི ཏདནྟོགདྷབྷཱཝཏོ. ཨཔིཙ ཡོཛནཱཝསེན. ཏཎྷཱཨཝིཛྫཱཏི ཧི སཾསཱརཔྤཝཏྟིཡཱ སཱིསབྷཱུཏཱ དྭེ ཀིལེསཱ. ཏེ ཙ སམཐཝིཔསྶནཱནཾ པཊིཔཀྑབྷཱུཏཏྟཱ ཨནྟཱ ནཱམ. ཏེསུ ཏཎྷཱཝསེན ཀཱམསུཁལླིཀཱནུཡོགཾ བྷཛནྟོ སམཐཾ པརིཧཱཔེཏི བཱལོ, ཏཐཱ ཨཝིཛྫཱཝསེན ཨཏྟཀིལམཐཱནུཡོགཾ བྷཛནྟོ གཙྪནྟོ ཝིཔསྶནནྟི ན སཀྐཱ ཨུབྷོ དྭེ ཨནྟེ ཨཔྤཧཱཡ ཨམཏཾ ཨདྷིགནྟུནྟི ཨེཝཾ ཝུཏྟཱ. ཨཔིཙ ལཱིནུདྡྷཙྩཔཧཱནདསྶནམེཏཾ. ལཱིནོ ཧི ནིཀྑིཏྟཝཱིརིཡཱརམྦྷོ ཀཱམསུཁཉྩ བྷཛཏི, ཨིཏརོ ཨཙྩཱརདྡྷཝཱིརིཡོ ཨཏྟཀིལམཐཾ. ཨུབྷོཔི ཏེ ཝཱིརིཡསམཏཱཡ པཊིཔཀྑཏྟཱ ཨནྟཱ ནཱམ. ཨཔིཙ ཏིསྶོ སཱསནེ པཊིཔདཱ ཝུཏྟཱ ཨཱགཱལ༹ྷཱ, ནིཛ྄ཛྷཱམཱ, མཛ྄ཛྷིམཱ ཙ. ཏཏྠ ཨཱགཱལ༹ྷཱ ‘‘པཱཎཱཏིཔཱཏཱི ཧོཏི, ནཏྠི ཀཱམེསུ དོསོ’’ཏི ཨེཝམཱདིཀཱ. ནིཛ྄ཛྷཱམཱ ‘‘ཨཙེལཀོ ཧོཏི, མུཏྟཱཙཱརོ’’ཏི ཨེཝམཱདིཀཱ, མཛ྄ཛྷིམཱ ‘‘ཨཡམེཝ ཨརིཡོ ཨཊྛངྒིཀོ མགྒོ’’ཏི ཨེཝམཱདིཀཱ. ཏཏྠ ཀཱམསུཁལླིཀཱནུཡོགོ ཨཱགཱལ༹ྷཱ ནཱམ པཊིཔདཱ ཧོཏི སབྦཱཀུསལམཱུལཏྟཱ. ཨཏྟཀིལམཐཱནུཡོགོ ནིཛ྄ཛྷཱམཱ ནཱམ ཨཏྟཛ྄ཛྷཱཔནཏོ. ཨུབྷོཔེཏེ མཛ྄ཛྷིམཱཡ པཊིཔདཱཡ པཊིཔཀྑབྷཱུཏཏྟཱ ཨནྟཱ ནཱམ, ཏསྨཱ ཨིམེཝ སནྡྷཱཡ དྭེམེཏི. ཀིམཏྠཾ བྷགཝཱ ‘‘པབྦཛིཏེན ན སེཝིཏབྦཱ’’ཏི པབྦཛིཏེ ཨེཝ ཨདྷིཀརོཏི, ན གཧཊྛེཏི? པབྦཛིཏཱནཾ ཏདདྷིམུཏྟཏྟཱ, སུཁཔརིཝཛྫནསམཏྠཏཱཡ, ཏདདྷིཀཏཏྟཱ ཙ པབྦཛིཏཱ ཨེཏྠ ཨདྷིཀཏཱ, ན གཧཊྛཱ. ཡདི ཨེཝཾ ཀིམཏྠཾ ཀཱམསུཁལླིཀཱནུཡོགམཱཧ, ནནུ ཏེ པཀཏིཡཱཔི ཀཱམཔརིཙྩཱགཾ ཀཏྭཱ ཏཾ ནིསྶརཎཏྠཾ པབྦཛིཏཱཏི? ན, ཏེསཾ ཨནྟདྭཡནིསྶིཏཏྟཱ. ཏེ ཧི ཨིདྷ ལོཀེ ཀཱམེན ཝིསུདྡྷིམིཙྪནྟི ཨཏྟཀིལམཐཱནུཡོགམནུཡུཏྟཱ ཏསྶེཝ ཏཔསྶ ཕལེན པེཙྩ དིབྦེ ཀཱམེ ཨཱསཱིསམཱནཱ དལ༹ྷཏརཾ ཀཱམསུཁལླིཀཱནུཡོགམནུཡུཏྟཱཏི ཝེདིཏབྦཱ ¶ . ཨནྟཏྠོ པན ཨིདྷ ཀུཙྪིཏཊྛེན ཝེདིཏབྦོ ‘‘ཨནྟམིདཾ, བྷིཀྑཝེ, ཛཱིཝིཀཱནཾ, ཡདིདཾ པིཎྜོལྱ’’ནྟིཨཱདཱིསུ (ཨིཏིཝུ. ༩༡; སཾ. ནི. ༣.༨༠) ཝིཡ.

ཡོ ཙཱཡཾ ཀཱམེསུ ཀཱམསུཁལླིཀཱནུཡོགོཏི ཨེཏྠ ཀཱམེསཱུཏི ཝཏྠུཀཱམོ ཨདྷིཔྤེཏོ, དུཏིཡོ ཀིལེསཀཱམོ ¶ . ཏཾསམྤཡུཏྟསུཁམེཏྠ ཀཱམསུཁཾ ནཱམ. ཏེན ཝིཔཱཀསུཁསྶ ནིརཝཛྫབྷཱཝཾ དཱིཔེཏཱིཏི. ཨལླཱིཡནཾ ནཱམ ཏདབྷིནནྡནཱ. ཨནུཡོགོ ནཱམ བྷཝནྟརེ ཏདནུཡོགཔཏྠནཱ. ཧཱནབྷཱགིཡཀརཏྟཱ ཀུསལཔཀྑསྶ, ཧཱིནཔུགྒལབྷཱཝིཏཏྟཱ, ཧཱིནདྷཱཏུཔབྷཝཏྟཱ ཙ ལཱམཀཊྛེན ཧཱིནོ. གཱམནིཝཱསིསཏྟདྷམྨཏྟཱ གམྨོ. པུཐུཛྫནསཱདྷཱརཎཏྟཱ པོཐུཛྫནིཀོ. ཨནརིཡོཏི ཨརིཡཱནཾ ཨནདྷིཔྤེཏཏྟཱ, ཨརིཡདྷམྨཔཊིཔཀྑཏྟཱ, ཨནརིཡཀརཏྟཱ, ཨནརིཡདྷམྨཏྟཱ, ཨནརིཡཱཙིཎྞཏྟཱ ཙ ཝེདིཏབྦོ. ཨནཏྠསངྑཱཏསཾསཱརབྷཡཱཝཧཏྟཱ, ཨནཏྠཕལནིབྦཏྟཀཏྟཱ ཙ ཨནཏྠསཾཧིཏོ. ཨཏྟནོ ཀེཝལཾ ཁེདཱུཔགམོ ཨཏྟཀིལམཐོ ནཱམ. སོ དིཊྛིགཏཔུབྦཀཏྟཏཔཱནུཀྐམཀིརིཡཱཝིསེསཾ ནིསྶཱཡ པཝཏྟཏི, ཏསྶ དིཊྛིཝསེན ཨནུཡོགོ ཨཏྟཀིལམཐཱནུཡོགོ ནཱམ. ཨཏྟཝིཡོགཝིཏྟཱཔརིསྶམཏྟཱ, ཨནུཔཱཡཔཝཏྟཏྟཱ སམྤཛྫམཱནོ མིགཡོནིགོཡོནིཀུཀྐུརཡོནིསཱུཀརཡོནཱིསུ པཱཏཱཡཏི. ཝིཔཙྩམཱནོ ནརཀཾ ནེཏཱིཏི ཨནཏྠསཾཧིཏོ. ཨེཏེ ཏྭཱཏི ཨེཏེ ཏུ. ཏཐཱགཏེནཱཏི ཨཏྟཱནཾ ཨཝིཏཐཱགམནཾ ཨཱཝི ཀརོཏི, ཏེནེཏཾ དསྶེཏི ‘‘ན མཡཱ པརིཝིཏཀྐིཏམཏྟེན ཝིཏཀྐིཏཱ, ཀིནྟུ མཡཱ ཏཐཱགཏེནེཝ སཏཱ ཨབྷིསམྦོདྷིཉཱཎེན ཨབྷིསམྦུདྡྷོ’’ཏི. ཙཀྑུཀརཎཱིཏིཨཱདཱིཧི པན ཏམེཝ པཊིཔདཾ ཐོམེཏི. བྷེསཛྫཾ ཨཱཏུརསྶ ཝིཡ ‘‘ཙཀྑུཀརཎཱི’’ཏི ཨིམིནཱ ཉཱཎཙཀྑུཝིསོདྷནཾ ཝུཏྟཾ. ཉཱཎཀརཎཱིཏི ཨིམིནཱ ཨནྡྷཀཱརཝིདྷམནཾ ཝུཏྟཾ. ཨུཔསམཱཡཱཏི ཀིལེསཔརིལཱ༹ཧཔཊིཔྤསྶདྡྷི ཝུཏྟཱ. ཨབྷིཉྙཱཡཱཏི སཙྩཔཊིཝེདྷནཾ ཝུཏྟཾ. སམྦོདྷཱཡཱཏི སཙྩཔཊིཝིཛ྄ཛྷནཾ ཝུཏྟཾ. ནིབྦཱནཱཡཱཏི སོཔཱདིསེསནིབྦཱནདྷཱཏུཡཱ ཨནུཔཱདིསེསནིབྦཱནདྷཱཏུཡཱཏི ཨེཝཾ ཡཐཱསམྦྷཝཾ ཡོཛེཏྭཱ ཀཐེཏབྦཾ.

༡༤. ཀསྨཱ པནེཏྠ བྷགཝཱ ཨཉྙཏྠ ཝིཡ ཨནུཔུབྦིཾ ཀཐཾ ཨཀཐེཏྭཱ པཋམམེཝ ཨསེཝིཏབྦམནྟདྭཡཾ ཝཏྭཱ མཛ྄ཛྷིམཔཊིཔདཾ དེསེསཱིཏི? ཨཏྟཱདིམིཙྪཱབྷིམཱནནིཝཱརཎཏྠཾ, ཀུམྨགྒཔཊིཔཏྟིནིཝཱརཎཏྠཉྩ ཨནྟདྭཡཝཛྫནཾ ཝཏྭཱ ཨཏྟནོ ¶ ཝིསེསཱདྷིགམདཱིཔནནཡེན ཨབཱཧུལླིཀཱདིབྷཱཝདསྶནཏྠཾ, ཏེསཉྩ མཛ྄ཛྷིམཔཊིཔདཱདཱིཔནེན ཏཏྠ ཨནུཡོཛནཏྠཾ པཙྪཱ སམྨཱཔཊིཔདཾ དེསེསི, ཏཏོ ཏསྶ མཛ྄ཛྷིམཔཊིཔདཱསངྑཱཏསྶ ཨརིཡམགྒསྶ ཝིསཡདསྶནཏྠཾ ཙཏུསཙྩདྷམྨཾ སངྑེཔཝིཏྠཱརཝསེན དེསེཏུཀཱམོ ‘‘ཨིདཾ ཁོ པན, བྷིཀྑཝེ, དུཀྑ’’ནྟིཨཱདིམཱཧ, ཨཡམེཏྠ ཨནུསནྡྷི. ‘‘ཨིདཾ དུཀྑཾ ཨརིཡསཙྩནྟི མེ, བྷིཀྑཝེ’’ཏིཨཱདི སུཏྟཱནུསནྡྷིཔཀཨཱསནཏྠཾ ཨཡམནུཀྐམོ ཝེདིཏབྦོ. ཡཐཱཝུཏྟཾ པཊིཔདཾ སུཏྭཱ ཀིར ཀོཎྜཉྙོ ཨཱཧ ‘‘ཀཐཾ བྷགཝཏཱ ཝུཏྟཔཊིཔདཱཡ ཨུཔྤཏྟི སིཡཱ. ཨཡཉྷི པཊིཔདཱ ཀིལེསཱནཾ ཨནུཔྤཏྟིཡཱ སཏི སམྦྷཝཏི, ན ཨཉྙཐཱ. ཀིལེསཱནཉྩ ཡདི ལོབྷཏོ ཨུཔྤཏྟི ཁུཔྤིཔཱསཱནཾ ཝིཡ, ཏདཱསེཝནཱཡ ཨནུཔྤཏྟི སིཡཱ, ཏདཝཏྠུསྶ ཝཱ ཏེསཾ ཨུཔྤཏྟི. ཏདཝཏྠུཝིཔརཱིཏཀཱཡཀིལམཐཱསེཝནཱཡ ཨནུཔྤཏྟི སིཡཱ. ཨུབྷོཔེཏཱ བྷགཝཏཱ ‘ཨནྟཱ’ཏི ཝུཏྟཱ, ཏསྨཱ ཀཐཾ པནེཏིསྶཱཡ ¶ སམྨཱཔཊིཔདཱཡ ཨུཔྤཏྟི སམྦྷཝེཡྻཱ’’ཏི. བྷགཝཱ ཨཱཧ ཨནུཔཱཡཱསེཝནཏོ. ཀཐནྟི ཙེ? –

‘‘སཾསཱརམཱུལཏོ ཉཱཎཾ, ཏཉྩ ཉཱཎཱ པཧིཡྻཏི;

ཛཱིཝིཏེ སཏི ཏཾ ཧོཏི, ཏཉྩ ཛཱིཝིཏསཱདྷནེ.

‘‘ཏསྨཱ ཉཱཎཱཡ མེདྷཱཝཱི, རཀྑེ ཛཱིཝིཏམཏྟནོ;

ཉཱཎསཱདྷནབྷཱུཏཉྩ, སཱིལཉྩ པརིཔཱལཡེ.

‘‘ཛཱིཝིཏཉྩ ཡཐཱ ལོཀེ, བྷིནྣེ ཀཱཡེ ན ཝིཛྫཏི;

ཏཐེཝ བྷིནྣསཱིལསྶ, ནཏྠི ཉཱཎསྶ སམྦྷཝོ.

‘‘ཏསྨཱ ཨཱཡུཉྩ སཱིལཉྩ, ཉཱཎཏྠཾ རཀྑཏཱ སཏཱ;

སེཝིཏབྦཱ ན ཀཱམཱཔི, ནཱཔི ཀཱཡཝིནཱསནཱ.

‘‘ཀཱམེསུ གེདྷམུཔགམྨ ཧིནོ གམྨཉྩ,

ཨཙྩུདྡྷནོ ཀིལམཐཾ གམུཔེཏི མཱུལ༹ྷོ;

ཡོ མཛ྄ཛྷིམཾ པཊིཔདཾ པརམཾ ཨུཔེཏི,