📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིནཡཔིཊཀེ

ཝིམཏིཝིནོདནཱི-ཊཱིཀཱ (པཋམོ བྷཱགོ)

གནྠཱརམྦྷཀཐཱ

ཀརུཎཱཔུཎྞཧདཡཾ ¶ ¶ , སུགཏཾ ཧིཏདཱཡཀཾ;

ནཏྭཱ དྷམྨཉྩ ཝིམལཾ, སངྒྷཉྩ གུཎསམྤདཾ.

ཝཎྞནཱ ནིཔུཎཱཧེསུཾ, ཝིནཡཊྛཀཐཱཡ ཡཱ;

པུབྦཀེཧི ཀཏཱ ནེཀཱ, ནཱནཱནཡསམཱཀུལཱ.

ཏཏྠ ¶ ཀཱཙི སུཝིཏྠིཎྞཱ, དུཀྑོགཱཧཱ ཙ གནྠཏོ;

ཝིརདྡྷཱ ཨཏྠཏོ ཙཱཔི, སདྡཏོ ཙཱཔི ཀཏྠཙི.

ཀཱཙི ཀཏྠཙི ཨཔུཎྞཱ, ཀཱཙི སམྨོཧཀཱརིནཱི;

ཏསྨཱ ཏཱཧི སམཱདཱཡ, སཱརཾ སངྑེཔརཱུཔཏོ.

ལཱིནཏྠཉྩ པཀཱསེནྟོ, ཝིརདྡྷཉྩ ཝིསོདྷཡཾ;

ཨུཔཊྛིཏནཡཉྩཱཔི, ཏཏྠ ཏཏྠ པཀཱསཡཾ.

ཝིནཡེ ཝིམཏིཾ ཚེཏུཾ, བྷིཀྑཱུནཾ ལཧུཝུཏྟིནཾ;

སངྑེཔེན ལིཁིསྶཱམི, ཏསྶཱ ལཱིནཏྠཝཎྞནཾ.

གནྠཱརམྦྷཀཐཱཝཎྞནཱ

ཝིནཡསཾཝཎྞནཱརམྦྷེ རཏནཏྟཡཾ ནམསྶིཏུཀཱམོ ཏསྶ ཝིསིཊྛགུཎཡོགསནྡསྶནཏྠཾ ཡོ ཀཔྤཀོཊཱིཧིཔཱིཏིཨཱདིམཱཧ. ཝིསིཊྛགུཎཡོགེན ཧི ཝནྡནཱརཧབྷཱཝོ, ཝནྡནཱརཧེ ཙ ཀཏཱ ཝནྡནཱ ཡཐཱདྷིཔྤེཏམཏྠཾ སཱདྷེཏི ¶ . ཨེཏྠ ཙ སཾཝཎྞནཱརམྦྷེ རཏནཏྟཡཔཎཱམཀརཎཔྤཡོཛནཾ ཏཏྠ ཏཏྠ བཧུདྷཱ པཔཉྩེནྟི ཨཱཙརིཡཱ, མཡཾ པན ཨིདྷཱདྷིཔྤེཏམེཝ པཡོཛནཾ དསྶཡིསྶཱམ. ཏསྨཱ སཾཝཎྞནཱརམྦྷེ རཏནཏྟཡཔཎཱམཀརཎཾ ཡཐཱཔཊིཉྙཱཏསཾཝཎྞནཱཡ ཨནནྟརཱཡེན པརིསམཱཔནཏྠནྟི ཝེདིཏབྦཾ. ཏཐཱ ཧི ཝུཏྟཾ ‘‘ཏསྶཱནུབྷཱཝེན ཧཏནྟརཱཡོ’’ཏི. རཏནཏྟཡཔཎཱམཀརཎེན ཧི རཱགཱདིདོསཝིགམཏོ པཉྙཱདིགུཎཔཱཊཝཏོ ཨཱཡུཨཱདིཝཌྜྷནཏོ པུཉྙཱཏིསཡབྷཱཝཱདིཏོ ཙ ཧོཏེཝ ཡཐཱཔཊིཉྙཱཏསཾཝཎྞནཱཡ ཨནནྟརཱཡེན པརིསམཱཔནཾ.

ཏཏྠ པཋམཾ ཏཱཝ བྷགཝཏོ ཝནྡནཾ ཀཏྟུཀཱམོ ‘‘ཡོ ཀཔྤཀོཊཱིཧིཔི…པེ… ཏསྶཱ’’ཏི ཨཱཧ. ཨིམིསྶཱ པན ཝིནཡདེསནཱཡ ཀརུཎཱཔྤདྷཱནཉཱཎསམུཊྛིཏཏཱཡ ཀརུཎཱཔྤདྷཱནམེཝ ཐོམནཾ ཨཱརདྡྷཾ. ཨེསཱ ཧི ཨཱཙརིཡསྶ པཀཏི, ཡདིདཾ ཨཱརམྦྷཱནུརཱུཔཐོམནཱ. ཀརུཎཱགྒཧཎེན ཙེཏྠ ཨཔརིམེཡྻཔྤབྷཱཝཱ སབྦེཔི བུདྡྷགུཎཱ ནཡཏོ སངྒཧིཏཱཏི དཊྛབྦཱ ཏཾམཱུལཀཏྟཱ སེསབུདྡྷགུཎཱནཾ. ཏཏྠ ཡོཏི ཨིམསྶ ཨནིཡམཝཙནསྶ ནཱཐོཏི ཨིམིནཱ སམྦནྡྷོ. ཀཔྤཀོཊཱིཧིཔི ཨཔྤམེཡྻཾ ཀཱལནྟི ¶ ཀཔྤཀོཊིགཎནཱཝསེནཔི ‘‘ཨེཏྟཀཱ ཀཔྤཀོཊིཡོ’’ཏི པམེཏུཾ ཨསཀྐུཎེཡྻཾ ཀཱལཾ. ཨཔི-སདྡེན པགེཝ ཝསྶགཎནཱཡཱཏི དསྶེཏི. ཨཔྤམེཡྻཾ ཀཱལནྟི ཙ ཨཙྩནྟསཾཡོགེ ཨུཔཡོགཝཙནཾ, ཏེན ཀཔྤཀོཊིགཎནཱཝསེན པརིཙྪིནྡིཏུམསཀྐུཎེཡྻམཔི, ཨསངྑྱེཡྻཝསེན པན པརིཙྪིནྡིཏབྦཏོ སལཀྑཾ ཙཏུརསངྑྱེཡྻཀཔྤཀཱལཾ ཨཙྩནྟམེཝ ནིརནྟརཾ པཉྩམཧཱཔཨཙྩཱགཱདིཨཏིདུཀྐརཱནི ཀརོནྟོ ཁེདཾ ཀཱཡིཀཾ པརིསྶམཾ པཏྟོཏི དསྶེཏི.

ལོཀཧིཏཱཡཱཏི སཏྟལོཀསྶ ཧིཏཱཡ. ནཱཐཏཱིཏི ནཱཐོ, ཝེནེཡྻཱནཾ ཧིཏསུཁཾ ཨཱསཱིསཏཱིཏི ཨཏྠོ. ཨཐ ཝཱ ནཱཐཏི ཝེནེཡྻགཏེ ཀིལེསེ ཨུཔཏཱཔེཏི, ནཱཐཏི ཝཱ ཡཱཙཏི ཝེནེཡྻེ ཨཏྟནོ ཧིཏཀརཎེ ཡཱཙིཏྭཱཔི ནིཡོཛེཏཱིཏི ནཱཐོ, ལོཀཔཊིསརཎོ ལོཀསཱམཱི ལོཀནཱཡཀོཏི ཝུཏྟཾ ཧོཏི. མཧཱཀཱརུཎིཀསྶཱཏི ཡོ ཀརུཎཱཡ ཀམྤིཏཧདཡཏྟཱ ལོཀཧིཏཏྠཾ ཨཏིདུཀྐརཀིརིཡཱཡ ཨནེཀཔྤཀཱརཾ ཏཱདིསཾ དུཀྑཾ ཨནུབྷཝིཏྭཱ ཨཱགཏོ, ཏསྶ མཧཱཀཱརུཎིཀསྶཱཏི ཨཏྠོ. ཏཏྠ ཀིརཏཱིཏི ཀརུཎཱ, པརདུཀྑཾ ཝིཀྑིཔཏི ཨཔནེཏཱིཏི ཨཏྠོ. དུཀྑིཏེསུ ཝཱ ཀིརིཡཏི པསཱརིཡཏཱིཏི ཀརུཎཱ. ཨཐ ཝཱ ཀིཎཱཏཱིཏི ཀརུཎཱ, པརདུཀྑེ སཏི ཀཱརུཎིཀཾ ¶ ཧིཾསཏི ཝིབཱདྷེཏི, ཝིནཱསེཏི ཝཱ པརསྶ དུཀྑནྟི ཨཏྠོ. པརདུཀྑེ སཏི སཱདྷཱུནཾ ཀམྤནཾ ཧདཡཁེདཾ ཀརོཏཱིཏི ཝཱ ཀརུཎཱ. ཨཐ ཝཱ ཀམིཏི སུཁཾ, ཏཾ རུནྡྷཏཱིཏི ཀརུཎཱ. ཨེསཱ ཧི པརདུཀྑཱཔནཡནཀཱམཏཱལཀྑཎཱ ཨཏྟསུཁནིརཔེཀྑཏཱཡ ཀཱརུཎིཀཱནཾ སུཁཾ རུནྡྷཏི ཝིབཱདྷེཏི. ཀརུཎཱཡ ནིཡུཏྟོ ཀཱརུཎིཀོ, མཧནྟོ ཀཱརུཎིཀོ མཧཱཀཱརུཎིཀོ, ཏསྶ ནམོ ཨཏྠཱུཏི པཱཋསེསོ.

ཨེཝཾ ཀརུཎཱམུཁེན སངྑེཔཏོ སཀལསབྦཉྙུགུཎེཧི བྷགཝནྟཾ ཐོམེཏྭཱ ཨིདཱནི སདྡྷམྨཾ ཐོམེཏུཾ ཨསམྦུདྷནྟིཨཱདིམཱཧ. ཏཏྠ བུདྡྷནིསེཝིཏཾ ཡཾ ཨསམྦུདྷཾ ཛཱིཝལོཀོ བྷཝཱ བྷཝཾ གཙྪཏི, ཏསྶ དྷམྨཝརསྶ ནམོཏི སམྦནྡྷོ. ཏཏྠ ཨསམྦུདྷནྟི ཨསམྦུཛ྄ཛྷནྟོ, ཡཐཱསབྷཱཝཾ ཨཔྤཊིཝིཛ྄ཛྷནཏོཏི ཝུཏྟཾ ཧོཏི. ཧེཏུཨཏྠོ ཧེཏྠ ཨནྟཔཙྩཡོ. ཡནྟི ཨནིཡམཏོ སཔརིཡཏྟིཀོ ནཝལོཀུཏྟརདྷམྨོ ཀམྨབྷཱཝེན ནིདྡིཊྛོ. བུདྡྷནིསེཝིཏནྟི ཏསྶེཝ ཝིསེསནཾ, སམྨཱསམྦུདྡྷེན, པཙྩེཀབུདྡྷསཱཝཀབུདྡྷེཧིཔི ཝཱ གོཙརཱསེཝནབྷཱཝནཱསེཝནཱཧི ཡཐཱརཧཾ ནིསེཝིཏཾ, ཨཛཧིཏནྟི ཨཏྠོ. ཏཏྠ པརིཡཏྟིཕལནིབྦཱནཱནི གོཙརཱསེཝནཝསེནེཝ ནིསེཝིཏཱནི, མགྒོ པན བྷཱཝནཱསེཝནཝསེནཱཔི པཙྩཝེཀྑཎཉཱཎཱདིཝསེན གོཙརཱསེཝནཝསེནཱཔི ནིསེཝིཏོ. བྷཝཱབྷཝནྟི བྷཝཏོ བྷཝཾ. ཨཐ ཝཱ ཧཱིནཔཎཱིཏཱདིཝསེན ཁུདྡཀཾ མཧནྟཉྩ བྷཝནྟི ཨཏྠོ. ཝུཌྜྷཏྠོཔི ཧི ཨ-ཀཱརོ དིསྶཏི ཨསེཀྑཱ དྷམྨཱཏིཨཱདཱིསུ (དྷ. ས. ཏིཀམཱཏིཀཱ ༡༡) ཝིཡ. ཨཐ ཝཱ བྷཝོཏི ཝུཌྜྷི, ཨབྷཝོཏི ཧཱནི. བྷཝོཏི ཝཱ སསྶཏདིཊྛི, ཨབྷཝོཏི ཨུཙྪེདདིཊྛི ¶ . ཝུཏྟཔྤཀཱརོ བྷཝོ ཙ ཨབྷཝོ ཙ བྷཝཱབྷཝོ, ཏཾ བྷཝཱབྷཝཾ. གཙྪཏཱིཏི ཨུཔགཙྪཏི. ཛཱིཝལོཀོཏི སཏྟལོཀོ. ཨཝིཛྫཱདིཀིལེསཛཱལཝིདྡྷཾསིནོཏི དྷམྨཝིསེསནཾ. ཏཏྠ ན ཝིདཏི དྷམྨཱནཾ ཡཐཱསབྷཱཝཾ ན ཝིཛཱནཱཏཱིཏི ཨཝིཛྫཱ, ཨཉྙཱཎཾ. སཱ ཨཱདི ཡེསཾ ཏཎྷཱདཱིནཾ, ཏེཡེཝ ཀིལིསྶནྟི ཨེཏེཧི སཏྟཱཏི ཀིལེསཱ, ཏེཡེཝ ཙ སཏྟཱནཾ ཝིབཱདྷནཊྛེན ཛཱལསདིསཱཏི ཛཱལཾ, ཏཾ ཝིདྡྷཾསེཏི སབྦསོ ཝིནཱསེཏི སཱིལེནཱཏི ཨཝིཛྫཱདིཀིལེསཛཱལཝིདྡྷཾསཱི, ཏསྶ.

ནནུ ཙེཏྠ སཔརིཡཏྟིཀོ ནཝལོཀུཏྟརདྷམྨོ ཨདྷིཔྤེཏོ, ཏཏྠ ཙ མགྒོཡེཝ ཀིལེསེ ཝིདྡྷཾསེཏི, ནེཏརེཏི ཙེ? ཝུཙྩཏེ – མགྒསྶཱཔི ནིབྦཱནམཱགམྨ ¶ ཀིལེསཝིདྡྷཾསནཏོ ནིབྦཱནམྤི ཀིལེསེ ཝིདྡྷཾསེཏི ནཱམ, མགྒསྶ ཀིལེསཝིདྡྷཾསནཀིཙྩཾ ཕལེན ནིཊྛིཏནྟི ཕལམྤི ‘‘ཀིལེསཝིདྡྷཾསཱི’’ཏི ཝུཙྩཏི, པརིཡཏྟིདྷམྨོཔི ཀིལེསཝིདྡྷཾསནསྶ ཨུཔནིསྶཡཔཙྩཡཏྟཱ ‘‘ཀིལེསཝིདྡྷཾསཱི’’ཏི ཝཏྟུཾ ཨརཧཏཱིཏི ན ཀོཙི དོསོ. དྷམྨཝརསྶ ཏསྶཱཏི པུབྦེ ཨནིཡམིཏསྶ ནིཡཱམཀཝཙནཾ. ཏཏྠ ཡཐཱནུསིཊྛཾ པཊིཔཛྫམཱནེ ཙཏཱུསུ ཨཔཱཡེསུ སཾསཱརདུཀྑེ ཙ ཨཔཏམཱནེ དྷཱརེཏཱིཏི དྷམྨོ. ཝུཏྟཔྤཀཱརོ དྷམྨོ ཨེཝ ཨཏྟནོ ཨུཏྟརིཏརཱབྷཱཝེན ཝརོ པཝརོ ཨནུཏྟརོཏི དྷམྨཝརོ, ཏསྶ དྷམྨཝརསྶ ནམོ ཨཏྠཱུཏི ཨཏྠོ.

ཨེཝཾ སངྑེཔནཡེནེཝ སབྦདྷམྨགུཎེཧི སདྡྷམྨཾ ཐོམེཏྭཱ ཨིདཱནི ཨརིཡསངྒྷཾ ཐོམེཏུཾ གུཎེཧཱིཏིཨཱདིམཱཧ. ཏཏྠ གུཎེཧི ཡོ ཡུཏྟོ, ཏམརིཡསངྒྷཾ ནམཱམཱིཏི སམྦནྡྷོ. སཱིལཱདཡོ གུཎཱ ཙེཏྠ ལོཀིཡལོཀུཏྟརཱ ཨདྷིཔྤེཏཱ. ‘‘ཝིམུཏྟིཝིམུཏྟིཉཱཎ’’ནྟི ཝཏྟབྦེ ཨེཀདེསསརཱུཔེཀསེསནཡེན ‘‘ཝིམུཏྟིཉཱཎ’’ནྟི ཝུཏྟཾ, ཨཱདིསདྡཔརིཡཱཡེན པབྷུཏིསདྡེན ཝཱ ཝིམུཏྟིགྒཧཎཾ ཝེདིཏབྦཾ. ཏཏྠ ཝིམུཏྟཱིཏི ཕལཾ. ཝིམུཏྟིཉཱཎནྟི པཙྩཝེཀྑཎཉཱཎཾ. པབྷུཏི-སདྡེན ཚལ༹བྷིཉྙཱཙཏུཔཊིསམྦྷིདཱདཡོ གུཎཱ སངྒཧིཏཱཏི དཊྛབྦཱ. ཀུསལཏྠིཀཱནཾ ཛནཱནཾ པུཉྙཱཏིསཡཝུཌྜྷིཡཱ ཁེཏྟསདིསཏྟཱ ཁེཏྟནྟི ཨཱཧ ‘‘ཁེཏྟཾ ཛནཱནཾ ཀུསལཏྠིཀཱན’’ནྟི. ཁིཏྟཾ བཱིཛཾ མཧཔྥལབྷཱཝཀརཎེན ཏཱཡཏཱིཏི ཧི ཁེཏྟཾ. ཨརིཡསངྒྷནྟི ཨེཏྠ ཨཱརཀཏྟཱ ཀིལེསེཧི, ཨནཡེ ན ཨིརིཡནཏོ, ཨཡེ ཙ ཨིརིཡནཏོ, སདེཝཀེན ལོཀེན ‘‘སརཎ’’ནྟི ཨརཎཱིཡཏོ ཨུཔགནྟབྦཏོ, ཨུཔགཏཱནཉྩ ཏདཏྠསིདྡྷིཏོ ཨརིཡཱ, ཨཊྛ ཨརིཡཔུགྒལཱ, ཨརིཡཱནཾ སངྒྷོ སམཱུཧོཏི ཨརིཡསངྒྷོ, ཏཾ ཨརིཡསངྒྷཾ.

ཨིདཱནི རཏནཏྟཡཔཎཱམཛནིཏཾ ཀུསལཱབྷིསནྡཾ ཡཐཱདྷིཔྤེཏེ པཡོཛནེ ནིཡོཛེཏྭཱ ཨཏྟནཱ སཾཝཎྞིཡམཱནསྶ ཝིནཡསྶ སཀལསཱསནམཱུལབྷཱཝདསྶནམུཁེན སཾཝཎྞནཱཀརཎསྶཱཔི སཱསནམཱུལཏཾ ¶ དསྶེཏུཾ ཨིཙྩེཝམིཙྩཱདིགཱཐཱདྭཡམཱཧ. པུཉྙཱབྷིསནྡནྟི པུཉྙོགྷཾ, པུཉྙཔྤཝཱཧཾ པུཉྙརཱསིནྟི ཨཏྠོ. ཏསྶཱནུབྷཱཝེནཱཏི ཏསྶ ཡཐཱཝུཏྟསྶ པུཉྙཔྤཝཱཧསྶ ཨཱནུབྷཱཝེན བལེན ཧཏནྟརཱཡོ ཝིནཡཾ ཝཎྞཡིསྶནྟི སམྦནྡྷོ.

ཨཊྛིཏསྶ སུསཎྛིཏསྶ བྷགཝཏོ སཱསནཾ ཡསྨིཾ ཋིཏེ པཏིཊྛིཏཾ ཧོཏཱིཏི ཡོཛེཏབྦཾ. ཏཏྠ ཡསྨིནྟི ཡསྨིཾ ཝིནཡཔིཊཀེ. ཋིཏེཏི པཱལི༹ཏོ ཙ ཨཏྠཏོ ཙ ཨནཱུནཾ ཧུཏྭཱ ལཛྫཱིཔུགྒལེསུ པཝཏྟནཊྛེན ཋིཏེ. སཱསནནྟི ¶ སིཀྑཏྟཡསངྒཧིཏཾ སཱསནཾ. ཨཊྛིཏསྶཱཏི ཀཱམསུཁལླིཀཏྟཀིལམཐཱནུཡོགསངྑཱཏེ ཨནྟདྭཡེ ཨཊྛིཏསྶ, ‘‘པརིནིབྦུཏསྶཔི བྷགཝཏོ’’ཏིཔི ཝདནྟི. སུསཎྛིཏསྶཱཏི ཨནྟདྭཡཝིརཧིཏཱཡ མཛ྄ཛྷིམཱཡ པཊིཔདཱཡ སུཊྛུ ཋིཏསྶ. ཨམིསྶནྟི བྷཱཝནཔུཾསཀནིདྡེསོ, ནིཀཱཡནྟརལདྡྷཱིཧི ཨསམྨིསྶཾ ཀཏྭཱ ཨནཱཀུལཾ ཀཏྭཱ ཝཎྞཡིསྶནྟི ཝུཏྟཾ ཧོཏི. ནིསྶཱཡ པུབྦཱཙརིཡཱནུབྷཱཝནྟི པུབྦཱཙརིཡེཧི སཾཝཎྞིཏཾ ཨཊྛཀཐཾ ནིསྶཱཡ, ན ཨཏྟནོ བལེནཱཏི ཨདྷིཔྤཱཡོ.

ཨཐ པོརཱཎཊྛཀཐཱསུ ཝིཛྫམཱནཱསུ པུན ཝིནཡསཾཝཎྞནཱ ཀིཾཔཡོཛནཱཏི? ཨཱཧ ཀཱམཉྩཱཏིཨཱདི. ཏཏྠ ཀཱམནྟི ཨེཀནྟེན, ཡཐིཙྪཀཾ ཝཱ, སབྦསོཏི ཝུཏྟཾ ཧོཏི, ཏསྶ སཾཝཎྞིཏོཡཾ ཝིནཡོཏི ཨིམིནཱ སམྦནྡྷོ. པུབྦཱཙརིཡཱསབྷེཧཱིཏི མཧཱཀསྶཔཏྠེརཱདཡོ པུབྦཱཙརིཡཱ ཨེཝ ཨཀམྤིཡཊྛེན ཨུཏྟམཊྛེན ཙ ཨཱསབྷཱ, ཏེཧི པུབྦཱཙརིཡཝརེཧཱིཏི ཝུཏྟཾ ཧོཏི. ཀཱིདིསཱ པན ཏེ པུབྦཱཙརིཡཱཏི? ཨཱཧ ཉཱཎམྦཱུཏིཨཱདི. ཨགྒམགྒཉཱཎསངྑཱཏེན ཨམྦུནཱ སལིལེན ནིདྡྷོཏཱནི ནིསྶེསཏོ ཨཱཡཏིཾ ཨནུཔྤཏྟིདྷམྨཏཱཔཱདནེན དྷོཏཱནི ཝིསོདྷིཏཱནི རཱགཱདཱིནི ཏཱིཎི མལཱནི ཀཱམཱསཝཱདཡོ ཙ ཙཏྟཱརོ ཨཱསཝཱ ཡེཧི ཏེ ཉཱཎམྦུནིདྡྷོཏམལཱསཝཱ, ཏེཧི ཁཱིཎཱསཝེཧཱིཏི ཨཏྠོ. ཁཱིཎཱསཝབྷཱཝེཔི ན ཨེཏེ སུཀྑཝིཔསྶཀཱཏི ཨཱཧ ‘‘ཝིསུདྡྷཝིཛྫཱཔཊིསམྦྷིདེཧཱི’’ཏི. ཏཏྠ ཝིཛྫཱཏི ཏིསྶོ ཝིཛྫཱ, ཨཊྛ ཝིཛྫཱ ཝཱ. པཊིསམྦྷིདཱཔྤཏྟེསུཔི མཧཱཀསྶཔཏྠེརཱདཱིནཾ ཨུཙྩིནིཏྭཱ གཧིཏཏཱཡ ཏེསཾ སདྡྷམྨསཾཝཎྞནེ སཱམཏྠིཡཾ སཱཏིསཡནྟི དསྶེནྟོ ཨཱཧ ‘‘སདྡྷམྨསཾཝཎྞནཀོཝིདེཧཱི’’ཏི.

ཀིལེསཛཱཏཾ, པརིཀྑཱརབཱཧུལླཾ ཝཱ སལླིཁཏི ཏནུཾ ཀརོཏཱིཏི སལླེཁོ, ཨཔྤིཙྪཏཱདིགུཎསམཱུཧོ, ཨིདྷ པན ཁཱིཎཱསཝཱདྷིཀཱརཏྟཱ པརིཀྑཱརབཱཧུལླསྶ སལླིཁནཝསེནེཝ ཨཏྠོ གཧེཏབྦོ. སལླེཁེན ནིབྦཏྟཾ སལླེཁིཡཾ, ཏསྨིཾ སལླེཁིཡེ, དྷུཏངྒཔརིཧརཎཱདིསལླེཁཔཨཔཏྟིཡནྟི ཝུཏྟཾ ཧོཏི. ནོསུལབྷཱུཔམེཧཱིཏི སལླེཁཔཊིཔཏྟིཡཱ ‘‘ཨསུཀསདིསཱ’’ཏི ནཏྠི སུལབྷཱ ཨུཔམཱ ཨེཏེསནྟི ནོསུལབྷཱུཔམཱ, ཏེཧི. མཧཱཝིཧཱརསྶཱཏི ཨིམིནཱ ནིཀཱཡནྟརཾ པཊིཀྑིཔཏི ¶ . ཝིཧཱརསཱིསེན ཧེཏྠ ཏཏྠ ནིཝཱསཱིནཉྩེཝ ཏེཧི སམལདྡྷིཀཱནཉྩ སབྦེསཾ བྷིཀྑཱུནཾ གཧཎཾ དཊྛབྦཾ. ཏསྨཱ ཏེསཾ མཧཱཝིཧཱརཝཱསཱིནཾ དིཊྛིསཱིལཝིསུདྡྷིཡཱ པབྷཝཏྟེན སཉྙཱཎབྷཱུཏཏྟཱ ¶ དྷམྨསངྒཱཧཀཱ མཧཱཀསྶཔཏྠེརཱདཡོ ‘‘མཧཱཝིཧཱརསྶ དྷཛཱུཔམཱ’’ཏི ཝུཏྟཱ, ཏེཧི ཨཡཾ ཝིནཡོ སཾཝཎྞིཏོ སམྨཱ ཨནཱུནཾ ཀཏྭཱ ཝཎྞིཏོ. ཀཐནྟི ཨཱཧ ‘‘ཙིཏྟེཧི ནཡེཧཱི’’ཏི. ཝིཙིཏྟེཧི ནཡེཧི སམྦུདྡྷཝརནྭཡེཧི སབྦཉྙུབུདྡྷཝརཾ ཨནུགཏེཧི, བྷགཝཏོ ཨདྷིཔྤཱཡཱནུགཏེཧི ནཡེཧཱིཏི ཝུཏྟཾ ཧོཏི.

ཨེཝཾ པོརཱཎཊྛཀཐཱཡ ཨནཱུནབྷཱཝཾ དསྶེཏྭཱ ཨིདཱནི ཨཏྟནོ སཾཝཎྞནཱཡ པཡོཛནཝིསེསཾ ཨཛ྄ཛྷེསཀཉྩ དསྶེཏུཾ སཾཝཎྞནཱཏིཨཱདིམཱཧ. ཏཏྠ སངྑཏཏྟཱཏི རཙིཏཏྟཱ. ན ཀཉྩི ཨཏྠཾ ཨབྷིསམྦྷུཎཱཏཱིཏི ན ཀཉྩི ཨཏྠཾ སཱདྷེཏི.

སཾཝཎྞནཾ ཏཉྩཱཏིཨཱདིནཱ ཨཏྟནོ སཾཝཎྞནཱཡ ཀརཎཔྤཀཱརཾ དསྶེཏི. ཏཏྠ ཏཉྩ ཨིདཱནི ཝུཙྩམཱནཾ སཾཝཎྞནཾ སམཱརབྷནྟོ སཀལཱཡཔི མཧཱཨཊྛཀཐཱཡ ཨིདྷ གཧེཏབྦཏོ མཧཱཨཊྛཀཐཾ ཏསྶཱ ཨིདཱནི ཝུཙྩམཱནཱཡ སཾཝཎྞནཱཡ སརཱིརཾ ཀཏྭཱ མཧཱཔཙྩརིཡཾ ཡོ ཝིནིཙྪཡོ ཝུཏྟོ, ཏཐེཝ ཀུརུནྡཱིནཱམཱདཱིསུ ཝིསྶུཏཱསུ ཨཊྛཀཐཱསུ ཡོ ཝིནིཙྪཡོ ཝུཏྟོ, ཏཏོཔི ཝིནིཙྪཡཏོ ཡུཏྟམཏྠཾ ཨཔརིཙྩཛནྟོ ཨནྟོགདྷཏྠེརཝཱདཾ ཀཏྭཱ སཾཝཎྞནཾ སམྨཱ སམཱརབྷིསྶནྟི པདཏྠསམྦནྡྷོ ཝེདིཏབྦོ. ཨེཏྠ ཙ ཨཏྠོ ཀཐཱིཡཏི ཨེཏཱཡཱཏི ཨཊྛཀཐཱ ཏྠ-ཀཱརསྶ ཊྛ-ཀཱརཾ ཀཏྭཱ. མཧཱཔཙྩརིཡནྟི མཧཱཔཙྩརཱིནཱམིཀཾ. ཨེཏྠ ཙ པཙྩརཱིཏི ཨུལུ༹མྤཾ ཝུཙྩཏི, ཏསྨིཾ ནིསཱིདིཏྭཱ ཀཏཏྟཱ ཏམེཝ ནཱམཾ ཛཱཏཾ. ‘‘ཀུརུནྡཱིཝལླིཝིཧཱརོ ནཱམ ཨཏྠི, ཏཏྠ ཀཏཏྟཱ ‘ཀུརུནྡཱི’ཏི ནཱམཾ ཛཱཏ’’ནྟི ཝདནྟི. ཨཱདིསདྡེན ཨནྡྷཀཊྛཀཐཾ སངྑེཔཊྛཀཐཉྩ སངྒཎྷཱཏི.

ཡུཏྟམཏྠནྟི མཧཱཨཊྛཀཐཱནཡེན, ཙཏུབྦིདྷཝིནཡཡུཏྟིཡཱ ཝཱ ཡུཏྟམཏྠཾ. ‘‘ཨཊྛཀཐཾཡེཝ གཧེཏྭཱ སཾཝཎྞནཾ ཀརིསྶཱམཱི’’ཏི ཝུཏྟེ ཨཊྛཀཐཱསུ ཝུཏྟཏྠེརཝཱདཱནཾ བཱཧིརབྷཱཝོ སིཡཱཏི ཏེཔི ཨནྟོཀཏྟུཀཱམོ ‘‘ཨནྟོགདྷཐེརཝཱད’’ནྟི ཨཱཧ, ཐེརཝཱདེཔི ཨནྟོཀཏྭཱཏི ཝུཏྟཾ ཧོཏི.

ཏཾ མེཏི གཱཐཱཡ སོཏཱུཧི པཊིཔཛྫིཏབྦཝིདྷིཾ དསྶེཏི. ཏཏྠ དྷམྨཔྤདཱིཔསྶཱཏི དྷམྨོ ཨེཝ མོཧནྡྷཀཱརཝིདྡྷཾསནཏོ པདཱིཔསདིསཏྟཱ པདཱིཔོ ཨསྶཱཏི དྷམྨཔྤདཱིཔོ, བྷགཝཱ, ཏསྶ. པཏིམཱནཡནྟཱཏི པཱུཛེནྟཱ མནསཱ གརུཾ ཀརོནྟཱ ནིསཱམེནྟུ སུཎནྟུ.

བུདྡྷེནཱཏིཨཱདིནཱ ¶ ཨཏྟནོ སཾཝཎྞནཱཡ ཨཱགམནསུདྡྷིདསྶནམུཁེན པམཱཎབྷཱཝཾ དསྶེཏྭཱ ཨནུསིཀྑིཏབྦཏཾ ¶ དསྶེཏི. ཏཏྠ ཡཐེཝ བུདྡྷེན ཡོ དྷམྨོ ཝིནཡོ ཙ ཝུཏྟོ, སོ ཏསྶ བུདྡྷསྶ ཡེཧི པུཏྟེཧི མཧཱཀསྶཔཏྠེརཱདཱིཧི ཏཐེཝ ཉཱཏོ, ཏེསཾ བུདྡྷཔུཏྟཱནཾ མཏིམཙྩཛནྟཱ སཱིཧལ༹ཊྛཀཐཱཙརིཡཱ ཡསྨཱ པུརེ ཨཊྛཀཐཱ ཨཀཾསཱུཏི སམྦནྡྷོ ཝེདིཏབྦོ. ཏཏྠ དྷམྨོཏི སུཏྟཱབྷིདྷམྨེ སངྒཎྷཱཏི. ཝིནཡོཏི སཀལཾ ཝིནཡཔིཊཀཾ. ཝུཏྟོཏི པཱལི༹ཏོ ཙ ཨཏྠཏོ ཙ བུདྡྷེན བྷགཝཏཱ ཝུཏྟོ. ན ཧི བྷགཝཏཱ ཨབྱཱཀཏཾ ནཱམ ཏནྟིཔདཾ ཨཏྠི, ཏཏྠ ཏཏྠ བྷགཝཏཱ པཝཏྟིཏཔཀིཎྞཀདེསནཱཡེཝ ཧི ཨཊྛཀཐཱ. ཏཐེཝ ཉཱཏོཏི ཡཐེཝ བུདྡྷེན ཝུཏྟོ, ཏཐེཝ ཨེཀཔདམྤི ཨེཀཀྑརམྤི ཨཝིནཱསེཏྭཱ ཨདྷིཔྤཱཡཉྩ ཨཝིཀོཔེཏྭཱ ཉཱཏོ ཝིདིཏོཏི ཨཏྠོ. ཏེསཾ མཏིམཙྩཛནྟཱཏི ཏེསཾ བུདྡྷཔུཏྟཱནཾ མཏིསངྑཱཏཾ ཐེརཔརམྤརཱཡ ཨུགྒཧེཏྭཱ ཨཱབྷཏཾ ཨབྦོཙྪིནྣཾ པཱལི༹ཝཎྞནཱཝསེན ཙེཝ པཱལི༹མུཏྟཀཝསེན ཙ པཝཏྟཾ སབྦཾ ཨཊྛཀཐཱཝིནིཙྪཡཾ ཨཔརིཙྩཛནྟཱ. ཨཊྛཀཐཱ ཨཀཾསཱུཏི མཧཱཨཊྛཀཐཱམཧཱཔཙྩརིཨཱདིཀཱ སཱིཧལ༹ཊྛཀཐཱཡོ ཨཀཾསུ. ‘‘ཨཊྛཀཐཱམཀཾསཱུ’’ཏིཔི པཱཋོ, ཏཏྠཱཔི སོཡེཝཏྠོ.

ཏསྨཱཏི ཡསྨཱ ཏེསཾ བུདྡྷཔུཏྟཱནཾ ཨདྷིཔྤཱཡཾ ཨཝིཀོཔེཏྭཱ པུརེ ཨཊྛཀཐཱ ཨཀཾསུ, ཏསྨཱ. ཡཾ ཨཊྛཀཐཱསུ ཝུཏྟཾ, ཏཾ སབྦམྤི པམཱཎནྟི ཡོཛནཱ. ཧཱིཏི ནིཔཱཏམཏྟཾ ཧེཏུཨཏྠསྶ ཏསྨཱཏི ཨིམིནཱཡེཝ པཀཱསིཏཏྟཱ, ཨཝདྷཱརཎཏྠོ ཝཱ, པམཱཎམེཝཱཏི. ཡདི ཨཊྛཀཐཱསུ ཝུཏྟཾ སབྦམྤི པམཱཎཾ, ཨེཝཾ སཏི ཏཏྠ པམཱདལེཁཱཔི པམཱཎཾ སིཡཱཏི ཨཱཧ ‘‘ཝཛྫཡིཏྭཱན པམཱདལེཁ’’ནྟི, ཨཔརཱཔརཾ ལིཁནྟེཧི པམཱདེན སཏིཾ ཨཔཙྩུཔཊྛཔེཏྭཱ ཨཉྙཏྠ ལིཁིཏབྦཾ ཨཉྙཏྠ ལིཁནཱདིཝསེན པཝཏྟིཏཱ པམཱདལེཁཱ ནཱམ, སཱ ཙ སམནྟཔཱསཱདིཀཱཡཾ ཏཏྠ ཏཏྠ སཡམེཝ ཨཱཝིབྷཝིསྶཏི. པུན ཡསྨཱཏི པདསྶ སམྦནྡྷདསྶནཝསེན ཨཡཾ ཨཏྠཡོཛནཱ – ཡསྨཱ ཨཊྛཀཐཱསུ ཝུཏྟཾ ཨིདྷ ཨིམསྨིཾ སཱསནེ སིཀྑཱསུ སགཱརཝཱནཾ པཎྜིཏཱནཾ པམཱཎམེཝ, ཡསྨཱ ཙ ཨཡཾ ཝཎྞནཱཔི བྷཱསནྟརཔརིཙྩཱགཱདིམཏྟཝིསིཊྛཏཱཡ ཨཏྠཏོ ཨབྷིནྣཱ, ཏཏོ ཨེཝ པམཱཎབྷཱུཏཱཝ ཧེསྶཏི, ཏསྨཱ ཨནུསིཀྑིཏབྦཱཏི.

ཏཏོཏི ཏཱཧི ཨཊྛཀཐཱཧི. བྷཱསནྟརམེཝ ཧིཏྭཱཏི སཱིཧལ༹བྷཱསཾཡེཝ ཨཔནེཏྭཱ. ཝིཏྠཱརམགྒཉྩ སམཱསཡིཏྭཱཏི པོརཱཎཊྛཀཐཱསུ ཡཐཱཋཱནེ ¶ ཝཏྟབྦམྤི པདཏྠཝིནིཙྪཡཱདིཀཾ ཨཏིཝིཏྠིཎྞེན ཝཙནཀྐམེན ཙེཝ ཝུཏྟམེཝ ཨཏྠནཡཾ ཨཔྤམཏྟཀཝིསེསེན པུནཔྤུནཾ ཀཐནེན ཙ ཏཏྠ ཏཏྠ པཔཉྩིཏཾ ཏཱདིསཾ ཝིཏྠཱརམགྒཾ པཧཱཡ སལླཧུཀེན ཨཏྠཝིཉྙཱཔཀེན པདཀྐམེན ཙེཝ ཝུཏྟནཡསདིསཾ ཝཏྟབྦཾ ཨཏིདིསིཏྭཱ ཙ སངྑེཔནཡེནེཝ ཝཎྞཡིསྶཱམཱཏི ཨདྷིཔྤཱཡོ. སཱརཏྠདཱིཔནིཡཾ པན ཝིནཡཊཱིཀཱཡཾ ‘‘པོརཱཎཊྛཀཐཱསུ ཨུཔརི ཝུཙྩམཱནམྤི ཨཱནེཏྭཱ ཏཏྠ ཏཏྠ པཔཉྩིཏཾ ཉཏྟིཙཏུཏྠེན ཀམྨེན…པེ… ཨུཔསམྤནྣོཏི བྷིཀྑཱུཏི ཨེཏྠ ཨཔལོཀནཱདཱིནཾ ཙཏུནྣམྤི ¶ ཀམྨཱནཾ ཝིཏྠཱརཀཐཱ ཝིཡ ཏཱདིསཾ ཝིཏྠཱརམགྒཾ སངྑིཔིཏྭཱ’’ཏི ཝུཏྟཾ, ཏཾ ཏནྟིཀྐམཾ ཀཉྩི ཨཝོཀྐམིཏྭཱཏི ཨེཏྠེཝ ཝཏྟུཾ ཡུཏྟཾ. ཨཉྙཏྠ པཱལི༹ཡཱ ཝཏྟབྦཾ ཨཉྙཏྠ ཀཐནཉྷི ཏནྟིཀྐམཾ ཝོཀྐམིཏྭཱ ཀཐནཾ ནཱམ. ཏཐཱ ཧི ཝུཏྟཾ ‘‘ཏཐེཝ ཝཎྞིཏུཾ ཡུཏྟརཱུཔཾ ཧུཏྭཱ ཨནུཀྐམེན ཨཱགཏཾ པཱལི༹ཾ པརིཙྩཛིཏྭཱ སཾཝཎྞནཏོ སཱིཧལ༹ཊྛཀཐཱསུ ཨཡུཏྟཊྛཱནེ ཝཎྞིཏཾ ཡཐཱཋཱནེཡེཝ ཝཎྞནཏོ ཙ ཝུཏྟཾ ‘ཏནྟིཀྐམཾ ཀཉྩི ཨཝོཀྐམིཏྭཱ’’’ཏི. ཏསྨཱ ཡཐཱཝུཏྟནཡེནེཝ ཨཏྠོ གཧེཏབྦོ. ཀཐཾ པན ཝིཏྠཱརམགྒསྶ སངྑིཔནེ ཝིནིཙྪཡོ ན ཧཱིཡཏཱིཏི? ཨཱཧ ‘‘ཝིནིཙྪཡཾ སབྦམསེསཡིཏྭཱ’’ཏི. སངྑིཔནྟོཔི པུནཔྤུནཾ ཝཙནཱདིམེཝ སངྑིཔནྟོ, ཝིནིཙྪཡཾ པན ཨཊྛཀཐཱསུ སབྦཱསུཔི ཝུཏྟཾ སབྦམྤི ཨསེསཡིཏྭཱ, ཀིཉྩིམཏྟམྤི ཨཔརིཧཱཔེཏྭཱཏི ཝུཏྟཾ ཧོཏི. ཏནྟིཀྐམཾ ཀཉྩི ཨཝོཀྐམིཏྭཱཏི ཀཉྩི པཱལི༹ཀྐམཾ ཨནཏིཀྐམིཏྭཱ, ཨནུཀྐམེནེཝ པཱལི༹ཾ ཝཎྞཡིསྶཱམཱཏི ཨཏྠོ.

སུཏྟནྟིཀཱནཾ ཝཙནཱནམཏྠནྟི ཝེརཉྫཀཎྜཱདཱིསུ ཨཱགཏཱནཾ ཛྷཱནཀཐཱདཱིནཾ སུཏྟནྟཝཙནཱནཾ སཱིཧལ༹ཊྛཀཐཱསུ ‘‘སུཏྟནྟིཀཱནཾ བྷཱརོ’’ཏི ཝཏྭཱ ཨཝཎྞིཏབྦཊྛཱནཾ ཨཏྠཾ ཏཾཏཾསུཏྟཱནུརཱུཔཾ སབྦསོ པརིདཱིཔཡིསྶཱམཱཏི ཨདྷིཔྤཱཡོ. ཧེསྶཏཱིཏི བྷཝིསྶཏི, ཀརཱིཡིསྶཏཱིཏི ཝཱ ཨཏྠོ. ཨེཏྠ ཙ པཋམསྨིཾ ཨཏྠཝིཀཔྤེ ‘‘བྷཱསནྟརཔརིཙྩཱགཱདིཀཾ ཙཏུབྦིདྷཾ ཀིཙྩཾ ནིཔྥཱདེཏྭཱ སུཏྟནྟིཀཱནཾ ཝཙནཱནམཏྠཾ པརིདཱིཔཡནྟཱི ཨཡཾ ཝཎྞནཱ བྷཝིསྶཏཱི’’ཏི ཝཎྞནཱཝསེན སམཱནཀཏྟུཀཏཱ ཝེདིཏབྦཱ. པཙྪིམསྨིཾ ཨཏྠཝིཀཔྤེ པན ‘‘ཧེཊྛཱ ཝུཏྟབྷཱསནྟརཔརིཙྩཱགཱདིཀཾ ཀཏྭཱ སུཏྟནྟིཀཱནཾ ཝཙནཱནམཏྠཾ པརིདཱིཔཡནྟཱི ཨཡཾ ཝཎྞནཱ ཨམྷེཧི ཀརཱིཡིསྶཏཱི’’ཏི ཨེཝཾ ཨཱཙརིཡཝསེན སམཱནཀཏྟུཀཏཱ ཝེདིཏབྦཱ.

གནྠཱརམྦྷཀཐཱཝཎྞནཱནཡོ ནིཊྛིཏོ.

བཱཧིརནིདཱནཀཐཱ

ཨིདཱནི ¶ སཾཝརཝིནཡཔཧཱནཝིནཡཱདཱིསུ བཧཱུསུ ཝིནཡེསུ ཨཏྟནཱ ‘‘ཏཾ ཝཎྞཡིསྶཾ ཝིནཡ’’ནྟི ཨེཝཾ སཾཝཎྞེཏབྦབྷཱཝེན པཊིཉྙཱཏཾ ཝིནཡཾ དསྶེནྟོ ཨཱཧ ཏཏྠཱཏིཨཱདི. ཏཏྠ ཏཏྠཱཏི ཡཐཱཝུཏྟཱསུ གཱཐཱསུ. ཏཱཝ-སདྡོ པཋམནྟི ཨིམསྨིཾ ཨཏྠེ དཊྛབྦོ, ཏེན པཋམཾ ཝིནཡཾ ཝཝཏྠཔེཏྭཱ ¶ པཙྪཱ ཏསྶ ཝཎྞནཾ ཀརིསྶཱམཱཏི དཱིཔེཏི. ཝཝཏྠཔེཏབྦོཏི ནིཡམེཏབྦོ. ཏེནེཏཾ ཝུཙྩཏཱིཏི ཡསྨཱ ཝཝཏྠཔེཏབྦོ, ཏེན ཧེཏུནཱ ཨེཏཾ ཝིནཡོ ནཱམཱཏིཨཱདིཀཾ ནིཡཱམཀཝཙནཾ ཝུཙྩཏཱིཏི ཨཏྠོ. ཨསྶཱཏི ཝིནཡསྶ. མཱཏིཀཱཏི ཨུདྡེསོ. སོ ཧི ནིདྡེསཔདཱནཾ ཛནནཱིཋཱནེ ཋིཏཏྟཱ མཱཏཱ ཝིཡཱཏི ‘‘མཱཏིཀཱ’’ཏི ཝུཙྩཏི.

ཨིདཱནི སཾཝཎྞེཏབྦམཏྠཾ མཱཏིཀཾ པཊྛཔེཏྭཱ དསྶེནྟོ ཨཱཧ ཝུཏྟཾ ཡེནཱཏིཨཱདི. ཨིདཾ ཝུཏྟཾ ཧོཏི – ཨེཏཾ ཏེན སམཡེན བུདྡྷོ བྷགཝཱ ཝེརཉྫཱཡཾ ཝིཧརཏཱིཏིཨཱདིནིདཱནཝཙནཔཊིམཎྜིཏཾ ཝིནཡཔིཊཀཾ ཡེན པུགྒལེན ཝུཏྟཾ, ཡསྨིཾ ཀཱལེ ཝུཏྟཾ, ཡསྨཱ ཀཱརཎཱ ཝུཏྟཾ, ཡེན དྷཱརིཏཾ, ཡེན ཙ ཨཱབྷཏཾ, ཡེསུ པཏིཊྛིཏཾ, ཨེཏཾ ཡཐཱཝུཏྟཝིདྷཱནཾ ཝཏྭཱ ཏཏོ ཏེན སམཡེནཱཏིཨཱདིཔཱཋསྶ ཨཏྠཾ ཨནེཀཔྤཀཱརཏོ དསྶེནྟོ ཝིནཡསྶ ཨཏྠཝཎྞནཾ ཀརིསྶཱམཱིཏི.

ཨེཏྠ ཙ ཝུཏྟཾ ཡེན ཡདཱ ཡསྨཱཏི ཨིདཾ ཝཙནཾ ཏེན སམཡེན བུདྡྷོ བྷགཝཱཏིཨཱདིནིདཱནཝཙནམཏྟཾ ཨཔེཀྑིཏྭཱ ཝཏྟུཀཱམོཔི ཝིསུཾ ཨཝཏྭཱ ‘‘ནིདཱནེན ཨཱདིཀལྱཱཎཾ, ཨིདམཝོཙཱཏི ནིགམནེན པརིཡོསཱནཀལྱཱཎ’’ནྟི ཝཙནཏོ ནིདཱནནིགམནཱནིཔི སཏྠུདེསནཱཡ ཨནུཝིདྷཱནཏྟཱ ཏདནྟོགདྷཱནེཝཱཏི ནིདཱནསྶཱཔི ཝིནཡཔཱལི༹ཡཾཡེཝ ཨནྟོགདྷཏྟཱ ཝུཏྟཾ ཡེན ཡདཱ ཡསྨཱཏི ཨིདམྤི ཝིནཡཔིཊཀསམྦནྡྷཾཡེཝ ཀཏྭཱ མཱཏིཀཾ ཋཔེཏི. མཱཏིཀཱཡ ཧི ཨེཏནྟི ཝུཏྟཾ ཝིནཡཔིཊཀཾཡེཝ སཱམཉྙཏོ སབྦཏྠ སམྦནྡྷམུཔགཙྪཏི.

ཨིདཱནི པན ཏཾ ཝིསུཾ ནཱིཧརིཏྭཱ དསྶེནྟོ ཏཏྠ ཝུཏྟཾ ཡེནཱཏིཨཱདིམཱཧ. ཏཏྠཱཏི ཏེསུ མཱཏིཀཱཔདེསུ. ཨིདནྟི ཏེན སམཡེནཱཏིཨཱདིནིདཱནཝཙནཾ. ཧི-སདྡོ ཡསྨཱཏི ཨཏྠོ དཊྛབྦོ, ཡསྨཱ བུདྡྷསྶ བྷགཝཏོ ཨཏྟཔཙྩཀྑཝཙནཾ ན ཧོཏི, ཏསྨཱཏི ཝུཏྟཾ ཧོཏི. ཨཏྟཔཙྩཀྑཝཙནཾ ན ཧོཏཱིཏི ཨཏྟནཱ པཙྩཀྑཾ ཀཏྭཱ ཝུཏྟཝཙནཾ ན ཧོཏི. ཨཐ ¶ ཝཱ ཨཏྟནོ པཙྩཀྑཀཱལེ དྷརམཱནཀཱལེ ཝུཏྟཝཙནཾ ན ཧོཏི. ཏདུབྷཡེནཱཔི བྷགཝཏོ ཝུཏྟཝཙནཾ ན ཧོཏཱིཏི ཨཏྠོ.

པཋམམཧཱསངྒཱིཏིཀཐཱཝཎྞནཱ

པཋམམཧཱསངྒཱིཏི ནཱམ ཙེསཱཏི ཨེཏྠ ཙ-སདྡོ ཝཏྟབྦསམྤིཎྜནཏྠོ, ཨུཔཉྙཱསཏྠོ ཝཱ, ཨུཔཉྙཱསོཏི ཙ ཝཱཀྱཱརམྦྷོ ཝུཙྩཏི. ཨེསཱ ཧི གནྠཀཱརཱནཾ པཀཏི, ཡདིདཾ ཀིཉྩི ཝཏྭཱ པུན ཨཔརཾ ཝཏྟུམཱརབྷནྟཱནཾ ཙ-སདྡཔྤཡོགོ. ཡཐཱཔཙྩཡཾ ཏཏྠ ཏཏྠ དེསིཏཏྟཱ ཝིཔྤཀིཎྞཱནཾ དྷམྨཝིནཡཱནཾ ¶ སབྷཱགཏྠཝསེན སངྒཧེཏྭཱ གཱཡནཾ ཀཐནཾ སངྒཱིཏི, མཧཱཝིསཡཏྟཱ པཱུཛནཱིཡཏྟཱ ཙ མཧཏཱི སངྒཱིཏི མཧཱསངྒཱིཏི. དུཏིཡཱདིཾ ཨུཔཱདཱཡ ཙེསཱ ‘‘པཋམམཧཱསངྒཱིཏཱི’’ཏི ཝུཏྟཱ. ནིདདཱཏི དེསནཾ དེསཀཱལཱདིཝསེན ཨཝིདིཏཾ ཝིདིཏཾ ཀཏྭཱ ནིདསྶེཏཱིཏི ནིདཱནཾ, ཏཏྠ ཀོསལླཏྠཾ.

ཝེནེཡྻཱནཾ མགྒཕལུཔྤཏྟིཧེཏུབྷཱུཏཱཝ ཀིརིཡཱ ནིཔྤརིཡཱཡེན བུདྡྷཀིཙྩནྟི ཨཱཧ ‘‘དྷམྨཙཀྐཔྤཝཏྟནཉྷི ཨཱདིཾ ཀཏྭཱ’’ཏི. ཏཏྠ སཏིཔཊྛཱནཱདིདྷམྨོ ཨེཝ པཝཏྟནཊྛེན ཙཀྐནྟི དྷམྨཙཀྐཾ, ཙཀྐནྟི ཝཱ ཨཱཎཱ, ཏཾ དྷམྨཏོ ཨནཔེཏཏྟཱ དྷམྨཙཀྐཾ, དྷམྨེན ཉཱཡེན ཙཀྐནྟིཔི དྷམྨཙཀྐཾ. ཀཏབུདྡྷཀིཙྩེཏི ནིཊྛིཏབུདྡྷཀིཙྩེ བྷགཝཏི ལོཀནཱཐེཏི སམྦནྡྷོ. ཀུསིནཱརཱཡནྟི སམཱིཔཏྠེ ཨེཏཾ བྷུམྨཝཙནཾ. ཨུཔཝཏྟནེ མལླཱནཾ སཱལཝནེཏི ཏསྶ ནགརསྶ ཨུཔཝཏྟནབྷཱུཏཾ མལླརཱཛཱུནཾ སཱལཝནུཡྻཱནཾ དསྶེཏི. ཏཏྠ ནགརཾ པཝིསནྟཱ ཨུཡྻཱནཏོ ཨུཔེཙྩ ཝཏྟནྟི གཙྪནྟི ཨེཏེནཱཏི ‘‘ཨུཔཝཏྟན’’ནྟི ཨུཡྻཱནསྶ ཙ ནགརསྶ ཙ མཛ྄ཛྷེ སཱལཝནཾ ཝུཙྩཏི. ཀུསིནཱརཱཡ ཧི དཀྑིཎཔཙྪིམདིསཱཡ ཏཾ ཨུཡྻཱནཾ ཧོཏི, ཏཏོ ཨུཡྻཱནཏོ སཱལཝནརཱཛིཝིརཱཛིཏོ མགྒོ པཱཙཱིནཱབྷིམུཁོ གནྟྭཱ ནགརསྶ དཀྑིཎདྭཱརཱབྷིམུཁོ ཨུཏྟརེན ནིཝཏྟོ, ཏེན མགྒེན མནུསྶཱ ནགརཾ པཝིསནྟི, ཏསྨཱ ཏཾ ‘‘ཨུཔཝཏྟན’’ནྟི ཝུཙྩཏི. ཏཏྠ ཀིར ཨུཔཝཏྟནེ ཨཉྙམཉྙསཾསཊྛཝིཊཔཱནཾ སམྤནྣཚཱཡཱནཾ སཱལཔནྟཱིནམནྟརེ བྷགཝཏོ པརིནིབྦཱནམཉྩོ པཉྙཏྟོ, ཏཾ སནྡྷཱཡ ཝུཏྟཾ ‘‘ཡམཀསཱལཱནམནྟརེ’’ཏི. ཨུཔཱདཱིཡཏི ཀམྨཀིལེསེཧཱིཏི ཨུཔཱདི, ཝིཔཱཀཀྑནྡྷཱ ཀཊཏྟཱ ཙ རཱུཔཾ. ཏདེཝ ཀམྨཀིལེསེཧི སམྨཱ ཨཔྤཧཱིནཏཱཡ སེསོ, ནཏྠི ཨེཏྠ ཨུཔཱདིསེསོཏི ཨནུཔཱདིསེསཱ, ནིབྦཱནདྷཱཏུ, ཏཱཡ. ཨིཏྠམྦྷཱུཏལཀྑཎེ ¶ ཙཱཡཾ ཀརཎནིདྡེསོ. པརིནིབྦཱནེཏི ནིམིཏྟཏྠེ བྷུམྨཾ, པརིནིབྦཱནཧེཏུ ཏསྨིཾ ཋཱནེ སནྣིཔཏིཏཱནནྟི ཨཏྠོ. སངྒྷསྶ ཐེརོ ཛེཊྛོ སངྒྷཏྠེརོ. ཨེཏྠ ཙ སངྒྷསདྡསྶ བྷིཀྑུསཏསཧསྶསདྡསཱཔེཀྑཏྟེཔི གམཀཏྟཱ ཐེརསདྡེན སམཱསོ ཡཐཱ དེཝདཏྟསྶ གརུཀུལནྟི. ཨཱཡསྨཱ མཧཱཀསྶཔོ དྷམྨཝིནཡསངྒཱཡནཏྠཾ བྷིཀྑཱུནཾ ཨུསྶཱཧཾ ཛནེསཱིཏི སམྦནྡྷོ.

ཏཐཱ ཨུསྶཱཧཾ ཛནནསྶ ཀཱརཎམཱཧ སཏྟཱཧཔརིནིབྦུཏེཏིཨཱདི. སཏྟ ཨཧཱནི སམཱཧཊཱནི སཏྟཱཧཾ, སཏྟཱཧཾ པརིནིབྦུཏསྶ ཨསྶཱཏི སཏྟཱཧཔརིནིབྦུཏོ, སཏྟཱཧཔརིནིབྦུཏེ སུབྷདྡེན ཝུཌྜྷཔབྦཛིཏེན ཝུཏྟཝཙནམནུསྶརནྟོཏི སམྦནྡྷོ. ཨལཾ, ཨཱཝུསོཏིཨཱདིནཱ ཏེན ཝུཏྟཝཙནཾ དསྶེཏི. ཏཏྠ ཨལནྟི པཊིཀྑེཔཝཙནཾ. ཏེན མཧཱསམཎེནཱཏི ནིསྶཀྐེ ཀརཎཝཙནཾ, ཏཏོ མཧཱསམཎཏོ སུཊྛུ མུཏྟཱ མཡནྟི ཨཏྠོ, ཨུཔདྡུཏཱ ཙ ཧོམ ཏདཱཏི ཨདྷིཔྤཱཡོ, ཧོམཱཏི ཝཱ ཨཏཱིཏཏྠེ ཝཏྟམཱནཝཙནཾ, ཨཧུམྷཱཏི ཨཏྠོ. ཋཱནཾ ཁོ པནེཏཾ ཝིཛྫཏཱིཏི ཏིཊྛཏི ཨེཏྠ ཕལཾ ཏདཱཡཏྟཝུཏྟིཏཱཡཱཏི ¶ ཋཱནཾ, ཧེཏུ. ཁོཏི ཨཝདྷཱརཎེ, ཨེཏཾ ཀཱརཎཾ ཝིཛྫཏེཝ, ནོ ན ཝིཛྫཏཱིཏི ཨཏྠོ. ཀིཾ ཏཾ ཀཱརཎནྟི? ཨཱཧ ཡཾ པཱཔབྷིཀྑཱུཏིཨཱདི. ཨེཏྠ ཡནྟི ནིཔཱཏམཏྟཾ, ཀཱརཎནིདྡེསོ ཝཱ, ཡེན ཀཱརཎེན ཨནྟརདྷཱཔེཡྻུཾ, ཏདེཏཾ ཀཱརཎཾ ཝིཛྫཏཱིཏི ཨཏྠོ. ཨཏཱིཏོ ཨཏིཀྐནྟོ སཏྠཱ ཨེཏྠ, ཨེཏསྶཱཏི ཝཱ ཨཏཱིཏསཏྠུཀཾ, པཱཝཙནཾ. པདྷཱནཾ ཝཙནཾ པཱཝཙནཾ, དྷམྨཝིནཡནྟི ཝུཏྟཾ ཧོཏི. པཀྑཾ ལབྷིཏྭཱཏི ཨལཛྫཱིཔཀྑཾ ལབྷིཏྭཱ. ན ཙིརསྶེཝཱཏི ན ཙིརེནེཝ. ཡཱཝ ཙ དྷམྨཝིནཡོ ཏིཊྛཏཱིཏི ཡཏྟཀཾ ཀཱལཾ དྷམྨོ ཙ ཝིནཡོ ཙ ལཛྫཱིཔུགྒལེསུ ཏིཊྛཏི.

ཝུཏྟཉྷེཏཾ བྷགཝཏཱཏི པརིནིབྦཱནམཉྩེ ནིཔནྣེན བྷགཝཏཱ ཝུཏྟནྟི ཨཏྠོ. དེསིཏོ པཉྙཏྟོཏི སུཏྟཱབྷིདྷམྨཔིཊཀསངྒཧིཏསྶ དྷམྨསྶ ཙེཝ ཝིནཡཔིཊཀསངྒཧིཏསྶ ཝིནཡསྶ ཙ ཨཏིསཛྫནཾ པབོདྷནཾ དེསནཱ. ཏསྶེཝ པཀཱརཏོ ཉཱཔནཾ ཨསངྐརཏོ ཋཔནཾ པཉྙཱཔནཾ. སོ ཝོ མམཙྩཡེན སཏྠཱཏི སོ དྷམྨཝིནཡོ ཏུམྷཱཀཾ མམཙྩཡེན སཏྠཱ མཡི པརིནིབྦུཏེ སཏྠུཀིཙྩཾ སཱདྷེསྶཏི. སཱསནནྟི པརིཡཏྟིཔཊིཔཏྟིཔཊིཝེདྷཝསེན ཏིཝིདྷཾ སཱསནཾ, ནིཔྤརིཡཱཡཏོ པན སཏྟཏྟིཾས བོདྷིཔཀྑིཡདྷམྨཱ. ཨདྡྷནིཡནྟི ཨདྡྷཱནཀྑམཾ, ཏདེཝ ཙིརཊྛིཏིཀཾ ཨསྶ བྷཝེཡྻཱཏི སམྦནྡྷོ.

ཨིདཱནི ¶ སམྨཱསམྦུདྡྷེན ཨཏྟནོ ཀཏཾ ཨནུགྒཧཝིསེསཾ ཝིབྷཱཝེནྟོ ཨཱཧ ཡཉྩཱཧཾ བྷགཝཏཱཏིཨཱདི. ཏཏྠ ཡཉྩཱཧནྟི ཨེཏསྶ ཨནུགྒཧིཏོཏི ཨེཏེན སམྦནྡྷོ. ཏཏྠ ཡནྟི ཡསྨཱ, ཡེན ཀཱརཎེནཱཏི ཝུཏྟཾ ཧོཏི. ཀིརིཡཱཔརཱམསནཾ ཝཱ ཨེཏཾ, ཏེན ཨནུགྒཧིཏོཏི ཨེཏྠ ཨནུགྒཧཎཾ པརཱམསཏི. དྷཱརེསྶསཱིཏིཨཱདིཀཾ བྷགཝཏཱ མཧཱཀསྶཔཏྠེརེན སདྡྷིཾ ཙཱིཝརཔརིཝཏྟནཾ ཀཱཏུཀཱམེན ཝུཏྟཝཙནཾ. དྷཱརེསྶསི པན མེ ཏྭཾ ཀསྶཔཱཏི ‘‘ཀསྶཔ, ཏྭཾ ཨིམཱནི པརིབྷོགཛིཎྞཱནི པཾསུཀཱུལཱནི པཱརུཔིཏུཾ སཀྑིསྶསཱི’’ཏི ཝདཏི, ཏཉྩ ཁོ ན ཀཱཡབལཾ སནྡྷཱཡ, པཊིཔཏྟིཔཱུརཎཾ པན སནྡྷཱཡ ཨེཝམཱཧ. སཱཎཱནི པཾསུཀཱུལཱནཱིཏི མཏཀལེ༹ཝརཾ པལིཝེཋེཏྭཱ ཚཌྜིཏཱནི ཏུམྦམཏྟེ ཀིམཡོ པཔྥོཊེཏྭཱ གཧིཏཱནི སཱཎཝཱཀམཡཱནི པཾསུཀཱུལཙཱིཝརཱནི. རཐིཀཱདཱིནཾ ཡཏྠ ཀཏྠཙི པཾསཱུནཾ ཨུཔརི ཋིཏཏྟཱ ཨབྦྷུགྒཏཊྛེན ཏེསུ ཀཱུལམིཝཱཏི པཾསུཀཱུལཾ. ཨཐ ཝཱ པཾསུ ཝིཡ ཀུཙྪིཏབྷཱཝཾ ཨུལཏི གཙྪཏཱིཏི པཾསུཀཱུལནྟི པཾསུཀཱུལསདྡསྶ ཨཏྠོ དཊྛབྦོ. ནིབྦསནཱནཱིཏི ནིཊྛིཏཝསནཀིཙྩཱནི, པརིབྷོགཛིཎྞཱནཱིཏི ཨཏྠོ. ཨེཀམེཝ ཏཾ ཙཱིཝརཾ ཨནེཀཱཝཡཝཏྟཱ བཧུཝཙནཾ ཀཏཾ. སཱདྷཱརཎཔརིབྷོགེནཱཏི ཨཏྟནཱ སམཱནཔརིབྷོགེན, སཱདྷཱརཎཔརིབྷོགེན ཙ སམསམཊྛཔནེན ཙ ཨནུགྒཧིཏོཏི སམྦནྡྷོ.

ཨིདཱནི ¶ ནཝཱནུཔུབྦཝིཧཱརཚལ༹བྷིཉྙཱཔྤབྷེདེ ཨུཏྟརིམནུསྶདྷམྨེ ཨཏྟནཱ སམསམཊྛཔནཏྠཱཡ བྷགཝཏཱ ཝུཏྟཾ ཀསྶཔསཾཡུཏྟེ (སཾ. ནི. ༢.༡༥༢) ཨཱགཏཾ པཱལི༹ཾ པེཡྻཱལམུཁེན ཨཱདིགྒཧཎེན ཙ སངྑིཔིཏྭཱ དསྶེནྟོ ཨཱཧ ཨཧཾ, བྷིཀྑཝེཏིཨཱདི. ཏཏྠ ཡཱཝདེ ཨཱཀངྑཱམཱིཏི ཡཱཝདེཝ ཨཱཀངྑཱམི, ཡཏྟཀཾ ཀཱལཾ ཨིཙྪཱམཱིཏི ཨཏྠོ, ‘‘ཡཱཝདེཝཱ’’ཏིཔི པཱཋོ. ནཝཱནུཔུབྦཝིཧཱརཚལ༹བྷིཉྙཱཔྤབྷེདེཏི ཨེཏྠ ནཝཱནུཔུབྦཝིཧཱརོ ནཱམ ཨནུཔཊིཔཱཊིཡཱ སམཱཔཛྫིཏབྦབྷཱཝཏོ ཨེཝཾསཉྙིཏཱ ནིརོདྷསམཱཔཏྟིཡཱ སཧ ཨཊྛ རཱུཔཱརཱུཔསམཱཔཏྟིཡོ. ཚལ༹བྷིཉྙཱ ནཱམ ཨཱསཝཀྑཡཉཱཎེན སདྡྷིཾ པཉྩཱབྷིཉྙཱཡོ. ཨཏྟནཱ སམསམཊྛཔནེནཱཏི ‘‘ཨཧཾ ཡཏྟཀཾ ཀཱལཾ ཡཏྟཀེ སམཱཔཏྟིཝིཧཱརེ ཨབྷིཉྙཱཡོ ཙ ཝལ༹ཉྫེམི, ཏཐཱ ཀསྶཔོཔཱི’’ཏི ཨེཝཾ ཡཐཱཝུཏྟཨུཏྟརིམནུསྶདྷམྨེ ཨཏྟནཱ སམསམཾ ཀཏྭཱ ཋཔནེན, ཨིདཉྩ ཨུཏྟརིམནུསྶདྷམྨསཱམཉྙེན ཐེརསྶ པསཾསཱམཏྟེན ཝུཏྟཾ, ན ¶ བྷགཝཏཱ སདྡྷིཾ སབྦཐཱ སམཏཱཡ. བྷགཝཏོ ཧི གུཎཝིསེསཾ ཨུཔཱདཱཡ སཱཝཀཱ པཙྩེཀབུདྡྷཱ ཙ ཀལམྤི ཀལབྷཱགམྤི ན ཨུཔེནྟི, ཏསྶ ཀིམཉྙཾ ཨཱཎཎྱཾ བྷཝིསྶཏི ཨཉྙཏྲ དྷམྨཝིནཡསངྒཱཡནཱཏི ཨདྷིཔྤཱཡོ. ཏཏྠ ཏསྶཱཏི ཏསྶ ཨནུགྒཧསྶ, ཏསྶ མེཏི ཝཱ ཨཏྠོ གཧེཏབྦོ. པོཏྠཀེསུ ཧི ཀེསུཙི ‘‘ཏསྶ མེ’’ཏི པཱཋོ དིསྶཏི. ཨཱཎཎྱཾ ཨཎཎབྷཱཝོ. སཀཀཝཙཨིསྶརིཡཱནུཔྤདཱནེནཱཏི ཨེཏྠ ཙཱིཝརསྶ ནིདསྶནཝསེན ཀཝཙསྶེཝ གཧཎཾ ཀཏཾ, སམཱཔཏྟིཡཱ ནིདསྶནཝསེན ཨིསྶརིཡཾ གཧིཏཾ.

ཨིདཱནི ཡཐཱཝུཏྟམཏྠཾ པཱལི༹ཡཱ ཝིབྷཱཝེནྟོ ཨཱཧ ཡཐཱཧཱཏིཨཱདི. ཏཏྠ ཨེཀམིདཱཧནྟི ཨེཏྠ ཨིདནྟི ནིཔཱཏམཏྟཾ. ཨེཀཾ སམཡནྟི ཨེཀསྨིཾ སམཡེཏི ཨཏྠོ. པཱཝཱཡཱཏི པཱཝཱནགརཏོ. ཨདྡྷཱནམགྒཔྤཊིཔནྣོཏི དཱིགྷམགྒཔྤཊིཔནྣོ. དཱིགྷཔརིཡཱཡོ ཧེཏྠ ཨདྡྷཱནསདྡོ. སབྦཾ སུབྷདྡཀཎྜཾ ཝིཏྠཱརཏོ ཝེདིཏབྦནྟི པཉྩསཏིཀཀྑནྡྷཀེ ཨཱགཏཾ སུབྷདྡཀཎྜཾ ཨིདྷ ཨཱནེཏྭཱ ཝིཏྠཱརེཏབྦཾ.

ཏཏོ པརནྟི སུབྷདྡཀཎྜཏོ པརཾ. སབྦཾ སུབྷདྡཀཎྜཾ ཝིཏྠཱརཏོ ཝེདིཏབྦནྟི ཨིམིནཱ ‘‘ཡཾ ན ཨིཙྪིསྶཱམ, ན ཏཾ ཀརིསྶཱམཱ’’ཏི ཨེཏཾ པརིཡནྟཾ སུབྷདྡཀཎྜཔཱལི༹ཾ དསྶེཏྭཱ ཨིདཱནི ཨཝསེསཾ ཨུསྶཱཧཛནནཔྤཀཱརཔྤཝཏྟཾ པཱལི༹མེཝ དསྶེནྟོ ཧནྡ མཡཾ ཨཱཝུསོཏིཨཱདིམཱཧ. ཏཏྠ པུརེ ཨདྷམྨོ དིཔྤཏཱིཏི ཨེཏྠ ‘‘ཨདྷམྨོ ནཱམ དསཀུསལཀམྨཔཐཔཊིཔཀྑབྷཱུཏོ ཨདྷམྨོ’’ཏི སཱརཏྠདཱིཔནིཡཾ (སཱརཏྠ. ཊཱི. ༡.པཋམམཧཱསངྒཱིཏིཀཐཱཝཎྞནཱ) ཝུཏྟཾ. དྷམྨསངྒཧཎཏྠཾ ཨུསྶཱཧཛནནཔྤསངྒཏྟཱ པན དྷམྨཝིནཡཱནཾ ཨསངྒཱཡནཧེཏུདོསགཎོ སམྦྷཝཏི, སོ ཨེཝ ཨེཏྠ ཨདྷམྨོ དིཔྤཏི ཏཔྤཊིཔཀྑོ དྷམྨོ ཙ པཊིབཱཧཱིཡཏཱིཏི ཝཏྟབྦཾ. ཨཔི ཙ ‘‘ཨདྷམྨཝཱདིནོ བལཝནྟོ ཧོནྟི དྷམྨཝཱདིནོ དུབྦལཱ ཧོནྟཱི’’ཏི ཝུཙྩམཱནཏྟཱ ཡེན ཨདྷམྨེན ཏེ སུབྷདྡཝཛྫིཔུཏྟཀཱདཡོ ཨདྷམྨཝཱདིནོ, ཡེན ཙ དྷམྨེན ཨིཏརེ དྷམྨཝཱདིནོཝ ཧོནྟི. ཏེཡེཝ ཨིདྷ ‘‘ཨདྷམྨོ’’ ¶ ‘‘དྷམྨོ’’ཏི ཙ ཝཏྟབྦཱ. ཏསྨཱ སཱིལཝིཔཏྟིཨཱདིཧེཏུཀོ པཱཔིཙྪཏཱདིདོསགཎོ ཨདྷམྨོ, ཏཔྤཊིཔཀྑོ སཱིལསམྤདཱདིཧེཏུཀོ ཨཔྤིཙྪཏཱདིགུཎསམཱུཧོ དྷམྨོཏི ཙ གཧེཏབྦཾ. པུརེ དིཔྤཏཱིཏི ཨཔི ནཱམ དིཔྤཏི. ཨཐ ཝཱ ཡཱཝ ཨདྷམྨོ དྷམྨཾ པཊིབཱཧིཏུཾ སམཏྠོ ཧོཏི, ཏཏོ པུརེཏརམེཝཱཏི ¶ ཨཏྠོ. དིཔྤཏཱིཏི དིཔྤིསྶཏི. པུརེསདྡཡོགེན ཧི ཨནཱགཏཏྠེ ཨཡཾ ཝཏྟམཱནཔྤཡོགོ, ཡཐཱ པུརཱ ཝསྶཏི དེཝོཏི. ཨཝིནཡོཏི པཧཱནཝིནཡཱདཱིནཾ པཊིཔཀྑབྷཱུཏོ ཨཝིནཡོ.

ཏེན ཧཱིཏི ཨུཡྻོཛནཏྠེ ནིཔཱཏོ. སཀལནཝངྒསཏྠུསཱསནཔརིཡཏྟིདྷརེཏི སཀལཾ སུཏྟགེཡྻཱདིནཝངྒཾ ཨེཏྠ, ཨེཏསྶ ཝཱ ཨཏྠཱིཏི སཀལནཝངྒཾ, སཏྠུསཱསནཾ. ཨཏྠཀཱམེན པརིཡཱཔུཎིཏབྦཏོ དིཊྛདྷམྨིཀཱདིཔུརིསཏྠཔརིཡཏྟིབྷཱཝཏོ ཙ ‘‘པརིཡཏྟཱི’’ཏི ཏཱིཎི པིཊཀཱནི ཝུཙྩནྟི, ཏཾ སཀལནཝངྒསཏྠུསཱསནསངྑཱཏཾ པརིཡཏྟིཾ དྷཱརེནྟཱིཏི སཀལནཝངྒསཏྠུསཱསནཔཨཡཏྟིདྷརཱ, ཏཱདིསེཏི ཨཏྠོ. སམཐབྷཱཝནཱསིནེཧཱབྷཱཝེན སུཀྑཱ ལཱུཁཱ ཨསིནིདྡྷཱ ཝིཔསྶནཱ ཨེཏེསནྟི སུཀྑཝིཔསྶཀཱ. ཏིཔིཊཀསབྦཔརིཡཏྟིཔྤབྷེདདྷརེཏི ཏིཎྞཾ པིཊཀཱནཾ སམཱཧཱརོ ཏིཔིཊཀཾ, ཏདེཝ ནཝངྒཱདིཝསེན ཨནེཀབྷེདབྷིནྣཾ སབྦཾ པརིཡཏྟིཔྤབྷེདཾ དྷཱརེནྟཱིཏི ཏིཔིཊཀསབྦཔརིཡཏྟིཔྤབྷེདདྷརཱ.

ཀིསྶ པནཱཏི ཀསྨཱ པན. སིཀྑཏཱིཏི སེཀྑོ. ཏམེཝཱཧ ‘‘སཀརཎཱིཡོ’’ཏི. ཨུཔརིམགྒཏྟཡཀིཙྩསྶ ཨཔརིཡོསིཏཏྟཱ སཀིཙྩོཏི ཨཏྠོ. ཨསྶཱཏི ཨནེན. བཧུཀཱརཏྟཱཏི བཧུཔཀཱརཏྟཱ. ཨསྶཱཏི བྷཝེཡྻ. ཨཏིཝིཡ ཝིསྶཏྠོཏི ཨཏིཝིཡ ཝིསྶཱསིཀོ. ནནྟི ཨཱནནྡཏྠེརཾ ཨོཝདཏཱིཏི སམྦནྡྷོ. ཨཱནནྡཏྠེརསྶ ཀདཱཙི ཨསཉྙཏཱཡ ནཝཀཱཡ སདྡྷིཝིཧཱརིཀཔརིསཱཡ ཛནཔདཙཱརིཀཱཙརཎཾ, ཏེསཉྩ སདྡྷིཝིཧཱརིཀཱནཾ ཨེཀཀྑཎེ ཨུཔྤབྦཛྫནཉྩ པཊིཙྩ མཧཱཀསྶཔཏྠེརོ ཏཾ ནིགྒཎྷནྟོ ཨེཝམཱཧ ‘‘ན ཝཱཡཾ ཀུམཱརཀོ མཏྟམཉྙཱསཱི’’ཏི. ཨེཏྠ ཙ ཝཱ-སདྡོ པདཔཱུརཎོ, ཨཡཾ ཀུམཱརོ ཨཏྟནོ པམཱཎཾ ན པཊིཛཱནཱཏཱིཏི ཐེརཾ ཏཛྫེནྟོ ཨཱཧ. ཏཏྲཱཏི ཨེཝཾ སཏི.

ཀིཉྩཱཔི སེཀྑོཏི ཨིདཾ ན སེཀྑཱནཾ ཨགཏིགམནསབྦྷཱཝེན ཝུཏྟཾ, ཨསེཀྑཱནཉྙེཝ པན ཨུཙྩིནིཏྭཱ གཧིཏཏྟཱཏི དཊྛབྦཾ. ཏསྨཱ ‘‘ཀིཉྩཱཔི སེཀྑོ, ཏཐཱཔི ཐེརོ ཨཱཡསྨནྟམྤི ཨཱནནྡཾ ཨུཙྩིནཏཱུ’’ཏི ཨེཝམེཏྠ སམྦནྡྷོ ཝེདིཏབྦོ, ན པན ཀིཉྩཱཔི སེཀྑོ, ཏཐཱཔི ཨབྷབྦོ ཨགཏིཾ གནྟུནྟི ཡོཛེཏབྦཾ. ཨབྷབྦོཏིཨཱདི པནསྶ སབྷཱཝཀཐནཾ. ཏཏྠ ¶ ཚནྡཱཏི ཚནྡེན སིནེཧེན. ཨགཏིཾ གནྟུནྟི ཨཀཏྟབྦཾ ཀཱཏུཾ. པརིཡཏྟོཏི ཨདྷཱིཏོ ཨུགྒཧིཏོ.

རཱཛགཧཾ ¶ ཁོ མཧཱགོཙརནྟི ཨེཏྠ གཱཝོ ཙརནྟི ཨེཏྠཱཏི གོཙརོ, གུནྣཾ གོཙརཊྛཱནཾ. གོཙརོ ཝིཡཱཏི གོཙརོ, བྷིཀྑཱཙརཎཊྛཱནཾ. སོ མཧནྟོ ཨསྶཱཏི མཧཱགོཙརཾ, རཱཛགཧཾ. ཨུཀྐོཊེཡྻཱཏི ནིཝཱརེཡྻ.

སཏྟསུ སཱདྷུཀཱིལ༹ནདིཝསེསཱུཏི ཨེཏྠ སཾཝེགཝཏྠུཾ ཀིཏྟེཏྭཱ ཀིཏྟེཏྭཱ སཱདྷུཀཾ ཨེཝ པཱུཛཱཝསེན ཀཱིལ༹ནཏོ སཱདྷུཀཱིལ༹ནཾ. ཨུཔཀཊྛཱཏི ཨཱསནྣཱ. ཝསྶཾ ཨུཔནེཏི ཨུཔགཙྪཏི ཨེཏྠཱཏི ཝསྶཱུཔནཱཡིཀཱ.

ཏཏྲ སུདནྟི ཏསྶཾ སཱཝཏྠིཡཾ, སུདནྟི ནིཔཱཏམཏྟཾ. ཨུསྶནྣདྷཱཏུཀནྟི ཨུཔཙིཏཔིཏྟསེམྷཱདིདྷཱཏུཀཾ. སམསྶཱསེཏུནྟི སནྟཔྤེཏུཾ. དུཏིཡདིཝསེཏི ཛེཏཝནཝིཧཱརཾ པཝིཊྛདིཝསཏོ དུཏིཡདིཝསེཏི ཝདནྟི. ཝིརིཙྩཏི ཨེཏེནཱཏི ཝིརེཙནཾ. ཨོསདྷཔརིབྷཱཝིཏཾ ཁཱིརམེཝ ཝིརེཙནནྟི ཁཱིརཝིརེཙནཾ. ཡཾ སནྡྷཱཡཱཏི ཡཾ བྷེསཛྫཔཱནཾ སནྡྷཱཡ ཝུཏྟཾ. བྷེསཛྫམཏྟཱཏི ཨཔྤམཏྟཀཾ བྷེསཛྫཾ. ཨཔྤཏྠོ ཧི ཨཡཾ མཏྟཱ-སདྡོ མཏྟཱ སུཁཔརིཙྩཱགཱཏིཨཱདཱིསུ (དྷ. པ. ༢༩༠) ཝིཡ.

ཁཎྜཕུལླཔྤཊིསངྑརཎནྟི ཨེཏྠ ཁཎྜནྟི ཚིནྣཾ, ཕུལླནྟི བྷིནྣཾ, ཏེསཾ པཊིསངྑརཎཾ ཨབྷིནཝཀརཎཾ.

པརིཙྪེདཝསེན ཝེདིཡཏི དིསྶཏཱིཏི པརིཝེཎཾ. ཏཏྠཱཏི ཏེསུ ཝིཧཱརེསུ ཁཎྜཕུལླཔྤཊིསངྑརཎནྟི སམྦནྡྷོ. པཋམཾ མཱསནྟི ཝསྶཱནསྶ པཋམཾ མཱསཾ, ཨཙྩནྟསཾཡོགེ ཙེཏཾ ཨུཔཡོགཝཙནཾ. སེནཱསནཝཏྟཱནཾ བཧཱུནཾ པཉྙཏྟཏྟཱ, སེནཱསནཀྑནྡྷཀེ (ཙཱུལ༹ཝ. ༢༩༤ ཨཱདཡོ) སེནཱསནཔཊིབདྡྷཱནཾ བཧཱུནཾ ཀམྨཱནཾ ཝིཧིཏཏྟཱ ‘‘བྷགཝཏཱ…པེ… ཝཎྞིཏ’’ནྟི ཝུཏྟཾ.

དུཏིཡདིཝསེཏི ‘‘ཁཎྜཕུལླཔྤཊིསངྑརཎཾ ཀརོམཱ’’ཏི ཙིནྟིཏདིཝསཏོ དུཏིཡདིཝསེ. ཝསྶཱུཔནཱཡིཀདིཝསེཡེཝ ཏེ ཨེཝཾ ཙིནྟེསུཾ. སིརིཡཱ ནིཀེཏནམིཝཱཏི སིརིཡཱ ནིཝཱསནཊྛཱནཾ ཝིཡ. ཨེཀསྨིཾ པཱནཱིཡཏིཏྠེ སནྣིཔཏནྟཱ པཀྑིནོ ཝིཡ སབྦེསཾ ཛནཱནཾ ཙཀྑཱུནི མཎྜཔེཡེཝ ནིཔཏནྟཱིཏི ཝུཏྟཾ ‘ཨེཀནིཔཱཏཏིཏྠམིཝ ཙ དེཝམནུསྶནཡནཝིཧངྒཱན’’ནྟི. ལོཀརཱམཎེཡྻཀནྟི ལོཀེ རམཎཱིཡབྷཱཝཾ, རམཎཾ ཨརཧཏཱིཏི ཝཱ ལོཀརཱམཎེཡྻཀཾ ¶ . དཊྛབྦསཱརམཎྜནྟི དཊྛབྦེསུ སཱརཾ དཊྛབྦསཱརཾ, ཏཏོ ཝིཔྤསནྣནྟི དཊྛབྦསཱརམཎྜཾ. ཨཐ ཝཱ དཊྛབྦོ སཱརབྷཱུཏོ ཝིསིཊྛཏརོ མཎྜོ ¶ མཎྜནཾ ཨལངྐཱརོ ཨེཏསྶཱཏི དཊྛབྦསཱརམཎྜོ, མཎྜཔོ. མཎྜཾ སཱུརིཡརསྨིཾ པཱཏི ནིཝཱརེཏཱིཏི མཎྜཔོ. ཝིཝིདྷཱནི ཀུསུམདཱམཱནི ཙེཝ མུཏྟོལམྦཀཱནི ཙ ཝིནིགྒལནྟཾ ཝམེནྟཾ ནིཀྑཱམེནྟམིཝ ཙཱརུ སོབྷནཾ ཝིཏཱནཾ ཨེཏྠཱཏི ཝིཝིདྷཀུསུམདཱམོལམྦཀཝིནིགྒལནྟཙཱརུཝིཏཱནོ. ནཱནཱཔུཔྥཱུཔཧཱརཝིཙིཏྟསུཔརིནིཊྛིཏབྷཱུམིཀམྨཏྟཱ ཨེཝ ‘‘རཏནཝིཙིཏྟམཎིཀོཊྚིམཏལམིཝཱ’’ཏི ཝུཏྟཾ. ཨེཏྠ ཙ མཎིཡོ ཀོཊྚེཏྭཱ ཀཏཏལཾ མཎིཀོཊྚིམཏལཾ ནཱམ, ཏམིཝཱཏི ཝུཏྟཾ ཧོཏི. ཨཱསནཱརཧནྟི ནིསཱིདནཱརཧཾ. དནྟཁཙིཏནྟི དནྟེཧི ཁཙིཏཾ.

ཨཱཝཛྫེསཱིཏི ཨུཔནཱམེསི. ཨནུཔཱདཱཡཱཏི ཏཎྷཱདིཊྛིཝསེན ཀཉྩི དྷམྨཾ ཨགྒཧེཏྭཱ. ཀཐཱདོསོཏི ཀཐཱཡ ཨསཙྩཾ ནཱམ ནཏྠི.

ཡཐཱཝུཌྜྷནྟི ཝུཌྜྷཔཊིཔཱཊིཾ ཨནཏིཀྐམིཏྭཱ. ཨེཀེཏི མཛ྄ཛྷིམབྷཱཎཀཱནཾཡེཝ ཨེཀེ. པུབྦེ ཝུཏྟམྤི ཧི སབྦཾ མཛ྄ཛྷིམབྷཱཎཀཱ ཝདནྟིཡེཝཱཏི ཝེདིཏབྦཾ. དཱིགྷབྷཱཎཀཱ པན ‘‘པདསཱཝ ཐེརོ སནྣིཔཱཏམཱགཏོ’’ཏི ཝདནྟི. ཏེསུ ཀེཙི ‘‘ཨཱཀཱསེནཱ’’ཏི, ‘‘ཏེ སབྦེཔི ཏཐཱ ཏཐཱ ཨཱགཏདིཝསཱནམྤི ཨཏྠིཏཱཡ ཨེཀམེཀཾ གཧེཏྭཱ ཏཐཱ ཏཐཱ ཝདིཾསཱུ’’ཏི ཝདནྟི.

ཀཾ དྷུརཾ ཀཏྭཱཏི ཀཾ ཛེཊྛཀཾ ཀཏྭཱ. བཱིཛནིཾ གཧེཏྭཱཏི ཨེཏྠ བཱིཛནཱིགཧཎཾ པརིསཱཡ དྷམྨཀཐིཀཱནཾ ཧཏྠཀུཀྐུཙྩཝིནོདནམུཁཝིཀཱརཔཊིཙྪཱདནཏྠཾ དྷམྨཏཱཝསེན ཨཱཙིཎྞནྟི ཝེདིཏབྦཾ. ཏེནེཝ ཧི ཨཙྩནྟསཉྙཏཔྤཏྟཱ བུདྡྷཱཔི སཱཝཀཱཔི དྷམྨཀཐིཀཱནཾ དྷམྨཏཱདསྶནཏྠམེཝ ཙིཏྟབཱིཛནིཾ གཎྷནྟི. པཋམཾ, ཨཱཝུསོ ཨུཔཱལི, པཱརཱཛིཀཾ ཀཏྠ པཉྙཏྟནྟི ཨེཏྠ ཀཐཾ སངྒཱིཏིཡཱ པུབྦེ པཋམབྷཱཝོ སིདྡྷོཏི? པཱཏིམོཀྑུདྡེསཱནུཀྐམཱདིནཱ པུབྦེ པཋམབྷཱཝསྶ སིདྡྷཏྟཱ. ཡེབྷུཡྻེན ཧི ཏཱིཎི པིཊཀཱནི བྷགཝཏོ དྷརམཱནཀཱལེཡེཝ ཨིམིནཱ ཨནུཀྐམེན སཛ྄ཛྷཱཡིཏཱནི, ཏེནེཝ ཀམེན པཙྪཱཔི སངྒཱིཏཱནི ཝིསེསཏོ ཝིནཡཱབྷིདྷམྨཔིཊཀཱནཱིཏི དཊྛབྦཾ. ཀིསྨིཾ ཝཏྠུསྨིནྟི ནིམིཏྟཏྠེ བྷུམྨཾ. ཨནྟརཱ ཙ, བྷནྟེ, རཱཛགཧཾ ཨནྟརཱ ཙ ནཱལ༹ནྡནྟི རཱཛགཧསྶ ཙ ནཱལ༹ནྡཱཡ ཙ ཨནྟརཱ, ཝིཝརེ མཛ྄ཛྷེཏི ཨཏྠོ. ཨནྟརཱ-སདྡེན པན ཡུཏྟཏྟཱ ¶ ཨུཔཡོགཝཙནཾ ཀཏཾ. རཱཛཱགཱརཀེཏི རཉྙོ ཀཱིལ༹ནཏྠཱཡ ཀཏེ ཨགཱརཀེ. ཨམྦལཊྛིཀཱཡནྟི རཉྙོ ཨེཝཾནཱམཀཾ ཨུཡྻཱནཾ. ཀེན སདྡྷིནྟི ཨིདྷ ཀསྨཱ ཝུཏྟནྟི? ཡསྨཱ པནེཏཾ ན བྷགཝཏཱ ཨེཝ ཝུཏྟཾ, རཉྙཱཔི ཀིཉྩི ཀིཉྩི ཝུཏྟམཏྠི, ཏསྨཱ ‘‘ཀམཱརབྦྷཱ’’ཏི ཨཝཏྭཱ ཨེཝཾ ཝུཏྟནྟི དཊྛབྦཾ. ཝེདེཧིཔུཏྟེནཱཏི ཨཡཾ ཀོསལརཉྙོ དྷཱིཏཱཡ པུཏྟོ, ན ཝིདེཧརཉྙོ དྷཱིཏཱཡ. ཡསྨཱ མཱཏཱ པནསྶ པཎྜིཏཱ, ཏསྨཱ སཱ ཝེདེན ཉཱཎེན ཨཱིཧཏི གྷཊཏི ཝཱཡམཏཱིཏི ‘‘ཝེདེཧཱི’’ཏི པཱཀཊནཱམཱ ཛཱཏཱཏི ཝེདིཏབྦཱ.

ཨེཝཾ ¶ ནིམིཏྟཔཡོཛནཀཱལདེསདེསཀཀཱརཀཀརཎཔྤཀཱརེཧི པཋམམཧཱསངྒཱིཏིཾ དསྶེཏྭཱ ཨིདཱནི ཏཏྠ ཝཝཏྠཱཔིཏེསུ དྷམྨཝིནཡེསུ ནཱནཔྤཀཱརཀོསལླཏྠཾ ཨེཀཝིདྷཱདིབྷེདེ དསྶེཏུཾ ཏདེཏཾ སབྦམྤཱིཏིཨཱདིམཱཧ. ཏཏྠ ཨནུཏྟརཾ སམྨཱསམྦོདྷིནྟི ཨེཏྠ ཨནཱཝརཎཉཱཎཔདཊྛཱནཾ མགྒཉཱཎཾ, མགྒཉཱཎཔདཊྛཱནཉྩ ཨནཱཝརཎཉཱཎཾ ‘‘སམྨཱསམྦོདྷཱི’’ཏི ཝུཙྩཏི. པཙྩཝེཀྑནྟེན ཝཱཏི ཨུདཱནཱདིཝསེན པཝཏྟདྷམྨཾ སནྡྷཱཡཱཧ. ཝིམུཏྟིརསནྟི ཨརཧཏྟཕལསྶཱདཾ, ཝིམུཏྟིསམྤཏྟིཀཾ ཝཱ ཨགྒཕལནིཔྥཱདནཏོ, ཝིམུཏྟིཀིཙྩཾ ཝཱ ཀིལེསཱནཾ ཨཙྩནྟཝིམུཏྟིསམྤཱདནཏོ. ཨཝསེསཾ བུདྡྷཝཙནཾ དྷམྨོཏི ཨེཏྠ ཡདིཔི དྷམྨོ ཨེཝ ཝིནཡོཔི པརིཡཏྟིཡཱདིབྷཱཝཏོ, ཏཐཱཔི ཝིནཡསདྡསནྣིདྷཱནེན བྷིནྣཱདྷིཀརཎབྷཱཝེན པཡུཏྟོ དྷམྨ-སདྡོ ཝིནཡཏནྟིཝིརཧིཏཾ ཏནྟིཾ དཱིཔེཏི, ཡཐཱ པུཉྙཉཱཎསམྦྷཱརོ གོབལིབདྡནྟིཨཱདི.

ཨནེཀཛཱཏིསཾསཱརནྟི ཨིམིསྶཱ གཱཐཱཡ ཨཡཾ སངྑེཔཏྠོ – ཨཧཾ ཨིམསྶ ཨཏྟབྷཱཝགེཧསྶ ཀཱརཀཾ ཏཎྷཱཝཌྜྷཀིཾ གཝེསནྟོ ཡེན ཉཱཎེན ཏཾ དཊྛུཾ སཀྐཱ, ཏཾ བོདྷིཉཱཎཾ ཨནིབྦིསཾ ཨལབྷནྟོ ཨེཝ ཨབྷིནཱིཧཱརཏོ པབྷུཏི ཨེཏྟཀཾ ཀཱལཾ ཨནེཀཛཱཏིསཏསཧསྶསངྑྱཾ ཨིམཾ སཾསཱརཝཊྚཾ སནྡྷཱཝིསྶཾ སཾསརིཾ, ཡསྨཱ ཛརཱབྱཱདྷིམརཎམིསྶཏཱཡ ཛཱཏི ནཱམེསཱ པུནཔྤུནཾ ཨུཔགནྟུཾ དུཀྑཱ, ན ཙ སཱ ཏསྨིཾ ཨདིཊྛེ ནིཝཏྟཏི, ཏསྨཱ ཏཾ གཝེསནྟོ སནྡྷཱཝིསྶནྟི ཨཏྠོ. དིཊྛོསཱིཏི ཨིདཱནི མཡཱ སབྦཉྙུཏཉྙཱཎཾ པཊིཝིཛ྄ཛྷནྟེན དིཊྛོ ཨསི. པུན གེཧནྟི པུན ཨིམཾ ཨཏྟབྷཱཝསངྑཱཏཾ མམ གེཧཾ. ན ཀཱཧསཱིཏི ན ཀརིསྶསི. ཀཱརཎམཱཧ སབྦཱ ཏེཏིཨཱདི. ཏཝ སབྦཱ ཨཝསེསཀིལེསཕཱསུཀཱ མཡཱ བྷགྒཱ. ཨིམསྶ ཏཡཱ ཀཏསྶ ཨཏྟབྷཱཝགེཧསྶ ཨཝིཛྫཱསངྑཱཏཾ ཀཱུཊཾ ཀཎྞིཀམཎྜལཾ ¶ ཝིསངྑཏཾ ཝིདྡྷཾསིཏཾ. ཝིསངྑཱརཾ ནིབྦཱནཾ ཨཱརམྨཎཀརཎཝསེན གཏཾ མམ ཙིཏྟཾ. ཨཧཉྩ ཏཎྷཱནཾ ཁཡསངྑཱཏཾ ཨརཧཏྟམགྒཕལཾ ཨཛ྄ཛྷགཱ པཏྟོསྨཱིཏི ཨཏྠོ. ཀེཙི པན ‘‘ཝིསངྑཱརགཏཾ ཙིཏྟམེཝ ཏཎྷཱནཾ ཁཡཾ ཨཛ྄ཛྷགཱ’’ཏི ཨེཝམྤི ཨཏྠཾ ཝདནྟི.

ཀེཙཱིཏི ཁནྡྷཀབྷཱཎཀཱ. པཱཊིཔདདིཝསེཏི ཨིདཾ པཙྩཝེཀྑནྟསྶ ཨུཔྤནྣཱཏི ཨེཏེན སམྦནྡྷིཏབྦཾ, ན སབྦཉྙུབྷཱཝཔྤཏྟསྶཱཏི ཨེཏེན. སོམནསྶམཡཉཱཎེནཱཏི སོམནསྶསམྤཡུཏྟཉཱཎེན. ཨཱམནྟཡཱམཱིཏི ནིཝེདཡཱམི, བོདྷེམཱིཏི ཨཏྠོ. ཨནྟརེཏི ཨནྟརཱལེ༹, ཝེམཛ྄ཛྷེཏི ཨཏྠོ.

སུཏྟནྟཔིཊཀནྟི ཡཐཱ ཀམྨམེཝ ཀམྨནྟཾ, ཨེཝཾ སུཏྟམེཝ སུཏྟནྟནྟི ཝེདིཏབྦཾ. ཨསངྒཱིཏནྟི སངྒཱིཏིཀྑནྡྷཀ (ཙཱུལ༹ཝ. ༤༣༧ ཨཱདཡོ) ཀཐཱཝཏྠུཔྤཀརཎཱདིཀཾ. སོལ༹སཧི ཝཱརེཧི ¶ ཨུཔལཀྑིཏཏྟཱ ‘‘སོལ༹ས པརིཝཱརཱ’’ཏི ཝུཏྟཾ. ཏཐཱ ཧི པརིཝཱརཔཱལི༹ཡཾ (པརི. ༡ ཨཱདཡོ) པཋམཾ པཱརཱཛིཀཾ ཀཏྠ པཉྙཏྟནྟིཨཱདིནཱ ཝུཏྟཾ. པཉྙཏྟིཝཱརོ ཀཐཱཔཏྟིཝཱརོ ཝིཔཏྟིཝཱརོ སངྒཧཝཱརོ སམུཊྛཱནཝཱརོ ཨདྷིཀརཎཝཱརོ སམཐཝཱརོ སམུཙྩཡཝཱརོཏི ཨིམེ ཨཊྛ ཝཱརཱ, ཏདནནྟརཾ ‘‘མེཐུནཾ དྷམྨཾ པཊིསེཝནཔཙྩཡཱ པཱརཱཛིཀཾ ཀཏྠ པཉྙཏྟ’’ནྟི (པརི. ༡༨༨) ཨེཝཾ པཙྩཡམཏྟཝིསེསེན པུན ཝུཏྟཱ ཏེཡེཝ ཨཊྛ ཝཱརཱ ཙཱཏི ཨིམེསཾ སོལ༹སནྣཾ ཝཱརཱནཾ ཝསེན བྷིཀྑུཝིབྷངྒསྶ ཙ བྷིཀྑུནཱིཝིབྷངྒསྶ ཙ པཀཱསིཏཏྟཱ སོལ༹སཧི ཝཱརེཧི ཨུཔལཀྑིཏོ པརིཝཱརོ ‘‘སོལ༹སཔརིཝཱརོ’’ཏི ཝུཏྟོཏི ཝེདིཏབྦོ.

དལ༹ྷཱིཀམྨསིཐིལཀརཎཔྤཡོཛནཱཏི ཨིདཾ ལོཀཝཛྫཔཎྞཏྟིཝཛྫེསུ ཡཐཱཀྐམཾ ཡོཛེཏབྦཾ. སཉྙམཝེལཾ ཨབྷིབྷཝིཏྭཱ པཝཏྟོ ཨཱཙཱརོ ཨཛ྄ཛྷཱཙཱརོ, ཝཱིཏིཀྐམོ. ཏེནཱཏི ཝིཝིདྷནཡཏྟཱདིཧེཏུནཱ. ཨེཏནྟི ཝིཝིདྷཝིསེསནཡཏྟཱཏིཨཱདིགཱཐཱཝཙནཾ. ཨེཏསྶཱཏི ཝིནཡསྶ.

ཨིཏརཾ པནཱཏི སུཏྟཾ. ཨཏྟཏྠཔརཏྠཱདིབྷེདེཏི ཨེཏྠ ཨཱདི-སདྡེན དིཊྛདྷམྨིཀསམྤརཱཡིཀཏྠེ ལོཀིཡལོཀུཏྟརཱདིཨཏྠེ ཙ སངྒཎྷཱཏི. ཝེནེཡཛ྄ཛྷཱསཡཱནུལོམེན ཝུཏྟཏྟཱཏི ཝིནཡཾ ཝིཡ ཨིསྶརབྷཱཝཏོ ཨཱཎཱཔཏིཊྛཱཔནཝསེན ཨདེསེཏྭཱ ཝེནེཡྻཱནཾ ཨཛ྄ཛྷཱསཡཱནུལོམེན ཙརིཏཱནུརཱུཔཾ ཝུཏྟཏྟཱ. ཨནུཔུབྦསིཀྑཱདིཝསེན ཨདེསེཏྭཱ ཝེནེཡྻཱནཾ ¶ ཀཱལནྟརེ ཨབྷིནིབྦཏྟིཾ དསྶེནྟོ ཨཱཧ ‘‘སསྶམིཝ ཕལ’’ནྟི. ཨུཔཱཡསམངྒཱིནཾཡེཝ ནིཔྤཛྫནབྷཱཝཾ དསྶེནྟོ ‘‘དྷེནུ ཝིཡ ཁཱིར’’ནྟི ཨཱཧ. ན ཧི དྷེནུཾ ཝིསཱཎཱདཱིསུ, ཨཀཱལེ ཝཱ ཨཝིཛཱཏཾ ཝཱ དོཧནྟོ ཁཱིརཾ པཊིལབྷཏི.

ཡནྟི ཡསྨཱ. ཨེཏྠཱཏི ཨབྷིདྷམྨེ. ཨབྷིདྷམྨེཏི སུཔིནནྟེན སུཀྐཝིསྶཊྛིཡཱ ཨནཱཔཏྟིབྷཱཝེཔི ཨཀུསལཙེཏནཱ ཨུཔལབྦྷཏཱིཏིཨཱདིནཱ ཝིནཡཔཉྙཏྟིཡཱ སངྐརཝིརཧིཏེ དྷམྨེ, ‘‘པུབྦཱཔརཝིརོདྷཱབྷཱཝཏོ སངྐརཝིརཧིཏེ དྷམྨེ’’ཏིཔི ཝདནྟི. ཨཱརམྨཎཱདཱིཧཱིཏི ཨཱརམྨཎསམྤཡུཏྟཀམྨདྭཱརཔཊིཔདཱདཱིཧི. ལཀྑཎཱིཡཏྟཱཏི སཉྫཱནིཏབྦཏྟཱ. ཡཾ པནེཏྠ ཨཝིསིཊྛནྟི ཨེཏྠ ཝིནཡཔིཊཀནྟིཨཱདཱིསུ ཏཱིསུ སདྡེསུ ཡཾ ཨཝིསིཊྛཾ སམཱནཾ, ཏཾ པིཊཀསདྡནྟི ཨཏྠོ. མཱ པིཊཀསམྤདཱནེནཱཏི པཱལི༹སམྤདཱནཝསེན མཱ གཎྷིཏྠཱཏི ཝུཏྟཾ ཧོཏི. ཡཐཱཝུཏྟེནཱཏི ཨེཝཾ དུཝིདྷཏྠེནཱཏིཨཱདིནཱ ཝུཏྟཔྤཀཱརེན.

དེསནཱསཱསནཀཐཱབྷེདནྟི ཨེཏྠ དེསནཱབྷེདཾ སཱསནབྷེདཾ ཀཐཱབྷེདནྟི བྷེདསདྡོ པཙྩེཀཾ ཡོཛེཏབྦོ. བྷེདནྟི ཙ ནཱནཏྟནྟི ཨཏྠོ. ཏེསཱུཏི པིཊཀེསུ. སིཀྑཱ ཙ པཧཱནཱནི ཙ གམྦྷཱིརབྷཱཝོ ¶ ཙ སིཀྑཱཔཧཱནགམྦྷཱིརབྷཱཝོ, ཏཉྩ ཡཐཱརཧཾ པརིདཱིཔཡེཏི ཨཏྠོ. པརིཡཏྟིབྷེདནྟི པརིཡཱཔུཎནབྷེདཾ ཝིབྷཱཝཡེཏི སམྦནྡྷོ. ཡཧིཾ ཡསྨིཾ ཝིནཡཱདིཀེ ཡཾ སམྤཏྟིཉྩ ཝིཔཏྟིཉྩ ཡཐཱ པཱཔུཎཱཏི, ཏམྤི སབྦཾ ཝིབྷཱཝཡེཏི སམྦནྡྷོ. ཨཐ ཝཱ ཡཾ པརིཡཏྟིབྷེདཾ སམྤཏྟིཾ ཝིཔཏྟིཉྩ ཡཧིཾ ཡཐཱ པཱཔུཎཱཏི, ཏམྤི སབྦཾ ཝིབྷཱཝཡེཏི ཡོཛེཏབྦཾ. པརིདཱིཔནཱ ཝིབྷཱཝནཱ ཙཱཏི ཧེཊྛཱ གཱཐཱསུ ཝུཏྟསྶ ཨནུརཱུཔཏོ ཝུཏྟཾ, ཨཏྠཏོ པན ཨེཀམེཝ.

ཨཱཎཱརཧེནཱཏི ཨཱཎཾ པཎེཏུཾ ཨརཧཏཱིཏི ཨཱཎཱརཧོ, བྷགཝཱ སམྨཱསམྦུདྡྷཏྟཱ. སོ ཧི མཧཱཀཱརུཎིཀཏཱཡ ཙ ཨཝིཔརཱིཏཏོ དེསཀབྷཱཝེན པམཱཎཝཙནཏྟཱ ཙ ཨཱཎཾ པཎེཏུཾ ཨརཧཏི. ཝོཧཱརཔརམཏྠཱནམྤི སམྦྷཝཏོ ཨཱཧ ‘‘ཨཱཎཱབཱཧུལླཏོ’’ཏི. ཨིཏོ པརེསུཔི ཨེསེཝ ནཡོ. པཋམནྟི ཝིནཡཔིཊཀཾ. པཙུརཱཔརཱདྷཱ སེཡྻསཀཏྠེརཱདཡོ. ཏེ ཧི དོསབཱཧུལླཏོ ‘‘པཙུརཱཔརཱདྷཱ’’ཏི ཝུཏྟཱ ¶ . པཙུརོ བཧུཀོ བཧུལོ ཨཔརཱདྷོ དོསོ ཝཱིཏིཀྐམོ ཡེསནྟེ པཙུརཱཔརཱདྷཱ. ཨནེཀཛ྄ཛྷཱསཡཱཏིཨཱདཱིསུ ཨཱསཡོཝ ཨཛ྄ཛྷཱསཡོ, སོ ཙ ཨཏྠཏོ དིཊྛི ཉཱཎཉྩ. ཙརིཡཱཏི རཱགཙརིཡཱདིཀཱ ཚ མཱུལཙརིཡཱ. ཨཐ ཝཱ ཙརིཡཱཏི ཙརིཏཾ, ཏཾ སུཙརིཏདུཙྩརིཏཝསེན དུཝིདྷཾ. ཨདྷིམུཏྟི ནཱམ སཏྟཱནཾ པུབྦཔརིཙཡཝསེན ཨབྷིརུཙི, སཱ དུཝིདྷཱ ཧཱིནཔཎཱིཏབྷེདེན. ཡཐཱནུལོམནྟི ཨཛ྄ཛྷཱསཡཱདཱིནཾ ཨནུརཱུཔཾ. ཡཐཱདྷམྨནྟི དྷམྨསབྷཱཝཱནུརཱུཔཾ.

སཾཝརཱསཾཝརོཏི ཨེཏྠ ཁུདྡཀོ མཧནྟོ ཙ སཾཝརོཏི ཨཏྠོ. ཝུཌྜྷིཨཏྠོ ཧེཏྠ ཨ-ཀཱརོ. དིཊྛིཝིནིཝེཋནཱཏི དིཊྛིཡཱ ཝིམོཙནཾ. སུཏྟནྟཔཱལི༹ཡཾ ཝིཝིཙྩེཝ ཀཱམེཧཱིཏིཨཱདིནཱ (དཱི. ནི. ༡.༢༢༦; སཾ. ནི. ༢.༡༥༢) སམཱདྷིདེསནཱབཱཧུལླཏོ སུཏྟནྟཔིཊཀེ ‘‘ཨདྷིཙིཏྟསིཀྑཱ’’ཏི ཝུཏྟཾ. ཝཱིཏིཀྐམཔྤཧཱནཾ ཀིལེསཱནནྟི སཾཀིལེསདྷམྨཱནཾ, ཀམྨཀིལེསཱནཾ ཝཱ ཡོ ཀཱཡཝཙཱིདྭཱརེཧི ཝཱིཏིཀྐམོ, ཏསྶ པཧཱནཾ. ཨནུསཡཝསེན སནྟཱནམནུཝཏྟནྟཱ ཀིལེསཱ པརིཡུཊྛིཏཱཔི སཱིལབྷེདཝསེན ཝཱིཏིཀྐམིཏུཾ ན ལབྷནྟཱིཏི ཨཱཧ ‘‘ཝཱིཏིཀྐམཔཊིཔཀྑཏྟཱ སཱིལསྶཱ’’ཏི. པརིཡུཊྛཱནཔྤཧཱནནྟི ཨོཀཱསདཱནཝསེན ཙིཏྟེ ཀུསལཔྤཝཏྟིཾ པརིཡཱདིཡིཏྭཱ སམུཔྤཏྟིཝསེན ཋཱནཾ པརིཡུཊྛཱནཾ, ཏསྶ པཧཱནཾ. ཨནུསཡཔྤཧཱནནྟི ཨརིཡམགྒེན ཨཔྤཧཱིནབྷཱཝེན སནྟཱནེ ཀཱརཎལཱབྷེ ཨུཔྤཛྫནཱརཧཱ ཐཱམགཏཱ ཀཱམརཱགཱདཡོ སཏྟ ཀིལེསཱ སནྟཱནེ ཨནུ ཨནུ སཡནཏོ ཨནུསཡཱ ནཱམ, ཏེསཾ པཧཱནཾ.

ཏདངྒཔྤཧཱནནྟི ཏེན ཏེན དཱནསཱིལཱདིཀུསལངྒེན ཏསྶ ཏསྶ ཨཀུསལངྒསྶ པཧཱནཾ ཏདངྒཔྤཧཱནཾ. དུཙྩརིཏསཾཀིལེསསྶ པཧཱནནྟི ཀཱཡཝཙཱིདུཙྩརིཏམེཝ ཡཏྠ ཨུཔྤཛྫཏི, ཏཾ སནྟཱནཾ སམྨཱ ¶ ཀིལེསེཏི ཨུཔཏཱཔེཏཱིཏི སཾཀིལེསོ, ཏསྶ ཏདངྒཝསེན པཧཱནཾ. སམཱདྷིསྶ ཀཱམཙྪནྡཔཊིཔཀྑཏྟཱ སུཏྟནྟཔིཊཀེ ཏཎྷཱསཾཀིལེསསྶ པཧཱནཾ ཝུཏྟཾ. ཨཏྟཱདིསུཉྙསབྷཱཝདྷམྨཔྤཀཱསནཏོ ཨབྷིདྷམྨཔིཊཀེ དིཊྛིསཾཀིལེསསྶ པཧཱནཾ ཝུཏྟཾ.

ཨེཀམེཀསྨིཉྩེཏྠཱཏི ཨེཏྠ ཨེཏེསུ ཏཱིསུ པིཊཀེསུ ཨེཀེཀསྨིཾ པིཊཀེཏི ཨཏྠོ. དྷམྨོཏི པཱལཱི༹ཏི ཨེཏྠ དྷམྨསྶ སཱིལཱདིཝིསིཊྛཏྠཡོགཏོ, བུདྡྷཱནཾ སབྷཱཝནིརུཏྟིབྷཱཝཏོ ཙ པཀཊྛཱནཾ ཨུཀྐཊྛཱནཾ ཝཙནཔྤབནྡྷཱནཾ ¶ ཨཱལི༹ པནྟཱིཏི པཱལི༹, པརིཡཏྟིདྷམྨོ. སམྨུཏིཔརམཏྠབྷེདསྶ ཨཏྠསྶ ཨནུརཱུཔཝཱཙཀབྷཱཝེན པརམཏྠསདྡེསུ ཨེཀནྟེན བྷགཝཏཱ མནསཱ ཝཝཏྠཱཔིཏོ ནཱམཔཉྙཏྟིཔྤབནྡྷོ པཱལི༹དྷམྨོ ནཱམ. དེསནཱཡ དྷམྨསྶ ཙ ཀོ ཝིསེསོཏི ཙེ? ཡཐཱཝུཏྟནཡེན མནསཱ ཝཝཏྠཱཔིཏདྷམྨསྶ པརེསཾ བོདྷནབྷཱཝེན ཨཏིསཛྫནཱ ཝཱཙཱཡ པཀཱསནཱ ‘‘དེསནཱ’’ཏི ཝེདིཏབྦཱ. ཏེནཱཧ – ‘‘དེསནཱཏི ཏསྶཱ མནསཱ ཝཝཏྠཱཔིཏཱཡ པཱལི༹ཡཱ དེསནཱ’’ཏི. ཏདུབྷཡམྤི པན པརམཏྠཏོ སདྡོ ཨེཝ པརམཏྠཝིནིམུཏྟཱཡ སམྨུཏིཡཱ ཨབྷཱཝཱ. ཨིམམེཝ ནཡཾ གཧེཏྭཱ ཀེཙི ཨཱཙརིཡཱ ‘‘དྷམྨོ ཙ དེསནཱ ཙ པརམཏྠཏོ སདྡོ ཨེཝཱ’’ཏི ཝོཧརནྟི, ཏེཔི ཨནུཔཝཛྫཱཡེཝ. ཡཐཱ ‘‘ཀཱམཱཝཙརཔཊིསནྡྷིཝིཔཱཀཱ པརིཏྟཱརམྨཎཱ’’ཏི ཝུཙྩནྟི, ཨེཝཾསམྤདམིདཾ དཊྛབྦཾ. ན ཧི ‘‘ཀཱམཱཝཙརཔཊིསནྡྷིཝིཔཱཀཱ ནིབྦཏྟིཏཔརམཏྠཝིསཡཱཡེཝཱ’’ཏི སཀྐཱ ཝཏྟུཾ ཨིཏྠིཔུརིསཱདིཨཱཀཱརཔརིཝིཏཀྐཔུབྦཀཱནཾ རཱགཱདིཨཀུསལཱནཾ མེཏྟཱདིཀུསལཱནཉྩ ཨཱརམྨཎཾ གཧེཏྭཱཔི སམུཔྤཛྫནཏོ. པརམཏྠདྷམྨམཱུལཀཏྟཱ པནསྶ པརིཀཔྤསྶ པརམཏྠཝིསཡཏཱ སཀྐཱ པཉྙཔེཏུཾ, ཨེཝམིདྷཱཔཱིཏི དཊྛབྦཾ. ཏཱིསུཔི ཙེཏེསུ ཨེཏེ དྷམྨཏྠདེསནཱཔཊིཝེདྷཱ གམྦྷཱིརཱཏི སམྦནྡྷོ. ཨེཏྠ ཙ པིཊཀཱཝཡཝཱནཾ དྷམྨཱདཱིནཾ ཝུཙྩམཱནོ གམྦྷཱིརབྷཱཝོ ཏཾསམུདཱཡསྶ པིཊཀསྶཱཔི ཝུཏྟོ ཡེཝཱཏི དཊྛབྦོ. དུཀྑེན ཨོགཡ྄ཧནྟི, དུཀྑོ ཝཱ ཨོགཱཧོ ཨོགཱཧནཾ ཨནྟོཔཝིསནམེཏེསཱུཏི དུཀྑོགཱཧཱ. ཨེཏྠཱཏི ཨེཏེསུ པིཊཀེསུ, ནིདྡྷཱརཎེ ཙེཏཾ བྷུམྨཝཙནཾ.

ཧེཏུནོ ཕལཾ ཧེཏུཕལཾ. དྷམྨཱབྷིལཱཔོཏི ཨཏྠབྱཉྫནཀོ ཨཝིཔརཱིཏཱབྷིལཱཔོ. ཝིསཡཏོ ཨསམྨོཧཏོ ཙཱཏི ལོཀིཡལོཀུཏྟརཱནཾ ཡཐཱཀྐམཾ ཨཝབོདྷཔྤཀཱརདསྶནཾ, ཨེཏསྶ ཨཝབོདྷོཏི ཨིམིནཱ སམྦནྡྷོ. ལོཀིཡོ ཧི དྷམྨཏྠཱདིཾ ཨཱལམྦིཏྭཱཝ པཝཏྟནཏོ ཝིསཡཏོ ཨཝབོདྷོཏི ཝུཙྩཏི. ལོཀུཏྟརོ པན ནིབྦཱནཱརམྨཎཏཱཡ ཏཾ ཨནཱལམྦམཱནོཔི ཏབྦིསཡམོཧཝིདྡྷཾསནེན དྷམྨཱདཱིསུ པཝཏྟནཏོ ཨསམྨོཧཏོ ཨཝབོདྷོཏི ཝུཙྩཏི. ཨཏྠཱནུརཱུཔཾ དྷམྨེསཱུཏི ཀཱརིཡཱནུརཱུཔཾ ཀཱརཎེསཱུཏི ཨཏྠོ. པཉྙཏྟིཔཐཱནུརཱུཔཾ པཉྙཏྟཱིསཱུཏི ཚབྦིདྷནཱམཔཉྙཏྟིཡཱ པཐོ པཉྙཏྟིཔཐོ, ཏསྶ ཨནུརཱུཔཾ པཉྙཏྟཱིསཱུཏི ཨཏྠོ.

དྷམྨཛཱཏནྟི ¶ ¶ ཀཱརཎཔྤབྷེདོ ཀཱརཎམེཝ ཝཱ. ཨཏྠཛཱཏནྟི ཀཱརིཡཔྤབྷེདོ, ཀཱརིཡམེཝ ཝཱ. ཡཱ ཙཱཡཾ དེསནཱཏི སམྦནྡྷོ. ཡོ ཙེཏྠཱཏི ཨེཏཱསུ དྷམྨཏྠདེསནཱསུ ཡོ པཊིཝེདྷོཏི ཨཏྠོ. ཨེཏྠཱཏི ཨེཏེསུ ཏཱིསུ པིཊཀེསུ.

ཨལགདྡཱུཔམཱཏི ཨེཏྠ ཨལགདྡསདྡེན ཨལགདྡགྒཧཎཾ ཝུཙྩཏི ཝཱིཎཱཝཱདནཾ ཝཱིཎཱཏིཨཱདཱིསུ ཝིཡ, གཧཎཉྩེཏྠ ཡཐཱ ཌཾསཏི, ཏཐཱ དུགྒཧཎཾ དཊྛབྦཾ, ཨིཏརགྒཧཎེ ཝིརོདྷཱབྷཱཝཱ. ཏསྨཱ ཨལགདྡསྶ གཧཎཾ ཨུཔམཱ ཨེཏིསྶཱཏི ཨལགདྡཱུཔམཱ. ཨལགདྡོཏི ཙེཏྠ ཨཱསིཝིསོ ཝུཙྩཏི. སོ ཧི ཨལཾ པརིཡཏྟོ, ཛཱིཝིཏཧརཎསམཏྠོ ཝཱ ཝིསསངྑཱཏོ གདོ ཨསྶཱཏི ‘‘ཨལཾགདོ’’ཏི ཝཏྟབྦེ ‘‘ཨལགདྡོ’’ཏི ཝུཙྩཏི.

ཝཊྚཏོ ནིསྶརཎཾ ཨཏྠོ པཡོཛནཾ ཨེཏིསྶཱཏི ནིསྶརཎཏྠཱ. བྷཎྜཱགཱརིཀོ ཝིཡཱཏི བྷཎྜཱགཱརིཀོ, དྷམྨརཏནཱནུཔཱལཀོ, ཏསྶ ཨཏྠནིརཔེཀྑསྶ པརིཡཏྟི བྷཎྜཱགཱརིཀཔརིཡཏྟི. དུགྒཧིཏཱནཱིཏི དུཊྛུ གཧིཏཱནི. ཏེནཱཧ ‘‘ཨུཔཱརམྦྷཱདིཧེཏུ པརིཡཱཔུཊཱ’’ཏི. ཨེཏྠ ཙ ཨུཔཱརམྦྷོ ནཱམ པརིཡཏྟིཾ ནིསྶཱཡ པརཝམྦྷནཾ. ཨཱདི-སདྡེན ཨིཏིཝཱདཔྤམོཀྑལཱབྷསཀྐཱརཱདིཾ སངྒཎྷཱཏི. ཡཾ སནྡྷཱཡཱཏི ཡཾ པརིཡཏྟིདུགྒཧཎཾ སནྡྷཱཡ. ཝུཏྟནྟི ཨལགདྡཱུཔམསུཏྟེ (མ. ནི. ༡.༢༣༨) ཝུཏྟཾ. ཏཉྩསྶ ཨཏྠཾ ནཱནུབྷོནྟཱིཏི ཏཉྩ ཨསྶ དྷམྨསྶ སཱིལཔརིཔཱུརཎཱདིསངྑཱཏཾ ཨཏྠཾ ཨེཏེ དུགྒཧིཏགཱཧིནོ ནཱནུབྷོནྟི ན ཝིནྡནྟི. པཊིཝིདྡྷཱཀུཔྤོཏི པཊིཝིདྡྷཨརཧཏྟཕལོ.

ཨིདཱནི ཏཱིསུ པིཊཀེསུ ཡཐཱརཧཾ སམྤཏྟིཝིཔཏྟིཡོ ནིདྡྷཱརེཏྭཱ དསྶེནྟོ ཨཱཧ ཝིནཡེ པནཱཏིཨཱདི. ཏཏྠ ཏཱསཾཡེཝཱཏི ཨཝདྷཱརཎཾ ཚལ༹བྷིཉྙཱཙཏུཔཊིསམྦྷིདཱནཾ ཝིནཡེ པབྷེདཝཙནཱབྷཱཝཾ སནྡྷཱཡ ཝུཏྟཾ. ཝེརཉྫཀཎྜེ (པཱརཱ. ༡༢) ཧི ཏིསྶོ ཝིཛྫཱཝ ཝིབྷཏྟཱ. དུཏིཡེ ཏཱསཾཡེཝཱཏི ཨཝདྷཱརཎཾ ཙཏསྶོ པཊིསམྦྷིདཱ ཨཔེཀྑིཏྭཱ ཀཏཾ ཏིསྶནྣམྤི ཝིཛྫཱནཾ ཚསུ ཨབྷིཉྙཱསུ ཨནྟོཔཝིཊྛཏྟཱ. ཏཱསཉྩཱཏི ཨེཏྠ ཙ-སདྡེན སེསཱནམྤི ཏཏྠ ཨཏྠིབྷཱཝཾ དཱིཔེཏི. ཨབྷིདྷམྨཔིཊཀེ ཧི ཏིསྶོ ཝིཛྫཱ ཚ ཨབྷིཉྙཱ ཙཏསྶོ པཊིསམྦྷིདཱ ཙ ཝུཏྟཱ ཨེཝ. པཊིསམྦྷིདཱནཾ ཏཏྠེཝ སམྨཱ ཝིབྷཏྟབྷཱཝཾ དཱིཔེཏུཾ ཏཏྠེཝཱཏི ཨཝདྷཱརཎཾ ཀཏཾ. ཨུཔཱདིནྣཕསྶོཏི མགྒེན མགྒཔཊིཔཱདནཕསྶོ. ཏེསནྟི ཏེསཾ པིཊཀཱནཾ. ཨེཏནྟི ཨེཏཾ བུདྡྷཝཙནཾ.

ཙཏུཏྟིཾསེཝ ¶ སུཏྟནྟཱཏི གཱཐཱཡ ཨཡམཏྠཡོཛནཱ – ཡསྶ ནིཀཱཡསྶ སུཏྟགཎནཏོ ཙཏུཏྟིཾསེཝ སུཏྟནྟཱ ཝགྒསངྒཧཝསེན ཏཡོ ཝགྒཱ ཡསྶ སངྒཧསྶཱཏི ཏིཝགྒོ སངྒཧོ, ཨེས པཋམོ ནིཀཱཡོ ཨིདྷ དཱིགྷནིཀཱཡོཏི. ཨནུལོམིཀོཏི ཨཔཙྩནཱིཀོ, ཨཏྠཱནུལོམནཏོ ཨནྭཏྠནཱམོཏི ¶ ཝུཏྟཾ ཧོཏི. ཨེཀནིཀཱཡམྤཱིཏི ཨེཀསམཱུཧམྤི. ཨེཝཾ ཙིཏྟནྟི ཨེཝཾ ཝིཙིཏྟཾ. ཡཐཡིདནྟི ཡཐཱ ཨིམེ. པོཎིཀཙིཀྑལླིཀཱ ཁཏྟིཡཱ, ཏེསཾ ནིཝཱསོ ‘‘པོཎིཀནིཀཱཡོ ཙིཀྑལླིཀནིཀཱཡོ’’ཏི ཝུཙྩཏི. པཉྩདསཝགྒཔརིགྒཧོཏི པཉྩདསཧི ཝགྒེཧི པརིགྒཧིཏོ. སུཏྟནྟཱནཾ སཧསྶཱནི སཏྟ སུཏྟསཏཱནི ཙཱཏི པཱཋེ སུཏྟནྟཱནཾ སཏྟསཧསྶཱནི སཏྟ སུཏྟསཏཱནི ཙཱཏི ཡོཛེཏབྦཾ. ཀཏྠཙི པན ‘‘སཏྟ སུཏྟསཧསྶཱནི, སཏྟ སུཏྟསཏཱནི ཙཱ’’ཏི པཱཋོ. པུབྦེ ནིདསྶིཏཱཏི སུཏྟནྟཔིཊཀནིདྡེསེ ནིདསྶིཏཱ.

ཝེདནྟི ཉཱཎཾ. ཏུཊྛིནྟི པཱིཏིཾ. དྷམྨཀྑནྡྷཝསེནཱཏི དྷམྨརཱསིཝསེན. དྭཱསཱིཏིསཧསྶཱནི བུདྡྷཏོ གཎྷིནྟི སམྦནྡྷོ. དྭེ སཧསྶཱནི བྷིཀྑུཏོཏི དྷམྨསེནཱཔཏིཨཱདཱིནཾ བྷིཀྑཱུནཾ སནྟིཀཱ ཏེཧིཡེཝ དེསིཏཱནི དྭེ སཧསྶཱནི གཎྷིཾ. མེཏི མམ ཧདཡེ, ཨིཏི ཨཱནནྡཏྠེརོ ཨཏྟཱནཾ ནིདྡིསཏི. ཡེ དྷམྨཱ མམ ཧདཡེ པཝཏྟིནོ, ཏེ ཙཏུརཱསཱིཏིསཧསྶཱནཱིཏི ཡོཛནཱ. ཨིདཉྩ བྷགཝཏོ དྷརམཱནཀཱལེ ཨུགྒཧིཏདྷམྨཀྑནྡྷཝསེན ཝུཏྟཾ, པརིནིབྦུཏེ པན བྷགཝཏི ཨཱནནྡཏྠེརེན དེསིཏཱནཾ སུབྷསུཏྟ(དཨཱི. ནི. ༡.༤༤༤ ཨཱདཡོ) གོཔཀམོགྒལླཱནསུཏྟཱནཾ (མ. ནི. ༣.༧༩ ཨཱདཡོ), ཏཏིཡསངྒཱིཏིཡཾ མོགྒལིཔུཏྟཏིསྶཏྠེརེན ཀཐིཏཀཐཱཝཏྠུཔྤཀརཎསྶ ཙ ཝསེན དྷམྨཀྑནྡྷཱནཾ ཙཏུརཱསཱིཏིསཧསྶཏོཔི ཨདྷིཀཏཱ ཝེདིཏབྦཱ.

ཨེཀཱནུསནྡྷིཀཾ སུཏྟནྟི སཏིཔཊྛཱནཱདི (དཱི. ནི. ༢.༣༧༢ ཨཱདཡོ; མ. ནི. ༡.༡༠༥ ཨཱདཡོ). ཨནེཀཱནུསནྡྷིཀནྟི པརིནིབྦཱནསུཏྟཱདི (དཱི. ནི. ༢.༡༣༤ ཨཱདཡོ). ཏཉྷི ནཱནཱཋཱནེསུ ནཱནཱདྷམྨདེསནཱནཾ ཝསེན པཝཏྟཾ. ཏིཀདུཀབྷཱཛནཾ དྷམྨསངྒཎིཡཾ ནིཀྑེཔཀཎྜ(དྷ. ས. ༩༨༥ ཨཱདཡོ) ཨཊྛཀཐཱཀཎྜཝསེན (དྷ. ས. ༡༣༨༤ ཨཱདཡོ) གཧེཏབྦཾ. ཙིཏྟཝཱརབྷཱཛནནྟི ཨིདཾ ཙིཏྟུཔྤཱདཀཎྜཝསེན (དྷ. ས. ༡ ཨཱདཡོ) ཝུཏྟཾ. ཨཏྠི ཝཏྠཱུཏིཨཱདཱིསུ ཝཏྠུ ནཱམ སུདིནྣཀཎྜཱདི (པཱརཱ. ༢༤ ཨཱདཡོ). མཱཏིཀཱཏི སིཀྑཱཔདཾ. ཨནྟརཱཔཏྟཱིཏི སིཀྑཱཔདནྟརེསུ ཨཉྙསྨིཾ ཝཏྠུསྨིཾ པཉྙཏྟཱ ཨཱཔཏྟི. ཏིཀཙྪེདོཏི ཏིཀཔཱཙིཏྟིཡཱདིཏིཀཔརིཙྪེདོ ¶ . བུདྡྷཝཙནཾ སངྒཧིཏནྟི སམྦནྡྷོ. ཨསྶཱཏི བུདྡྷཝཙནསྶ. སངྒཱིཏིཔརིཡོསཱནེ སཱདྷུཀཱརཾ དདམཱནཱ ཝིཡཱཏི སམྦནྡྷོ. ཨཙྪརཾ པཧརིཏུཾ ཡུཏྟཱནི ཨཙྪརིཡཱནི, པུཔྥཝསྶཙེལུཀྑེཔཱདཱིནི. ཡཱ ‘‘པཉྩསཏཱ’’ཏི ཙ ‘‘ཐེརིཀཱ’’ཏི ཙ པཝུཙྩཏི, ཨཡཾ པཋམམཧཱསངྒཱིཏི ནཱམཱཏི སམྦནྡྷོ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

པཋམམཧཱསངྒཱིཏིཀཐཱཝཎྞནཱནཡོ ནིཊྛིཏོ.

དུཏིཡསངྒཱིཏིཀཐཱཝཎྞནཱ

ཨེཝཾ ¶ པཋམམཧཱསངྒཱིཏིཾ དསྶེཏྭཱ ཡདཏྠཾ སཱ ཨིདྷ དསྶིཏཱ, ཏཾ ནིགམནཝསེན དསྶེནྟོ ཨིམིསྶཱཏིཨཱདིམཱཧ. ཏཏྲཱཡཾ ཨཱཙརིཡཔརམྤརཱཏི ཏསྨིཾ ཛམྦུདཱིཔེ ཨཡཾ ཨཱཙརིཡཱནཾ པཝེཎཱི པཊིཔཱཊི. ཝིཛིཏཱཝིནོཏི ཝིཛིཏསབྦཀིལེསཔཊིཔཀྑཏྟཱ ཝིཛིཏཝནྟོ. ཛམྦུསིརིཝ྄ཧཡེཏི ཛམྦུསདིསོ སིརིམནྟོ ཨཝ྄ཧཡོ ནཱམཾ ཡསྶ དཱིཔསྶ, ཏསྨིཾ ཛམྦུདཱིཔེཏི ཝུཏྟཾ ཧོཏི. མཧནྟེན ཧི ཛམྦུརུཀྑེན ཨབྷིལཀྑིཏཏྟཱ དཱིཔོཔི ‘‘ཛམྦཱུ’’ཏི ཝུཙྩཏི. ཨཙྪིཛྫམཱནཾ ཨཝིནསྶམཱནཾ ཀཏྭཱ. ཝིནཡཝཾསནྟིཨཱདཱིཧི ཏཱིཧི ཝིནཡཔཱལི༹ཡེཝ ཀཐིཏཱ པརིཡཱཡཝཙནཏྟཱ ཏེསཾ. པཀཏཉྙུཏནྟི ཝེཡྻཏྟིཡཾ, པཊུབྷཱཝནྟི ཝུཏྟཾ ཧོཏི. དྷུརགྒཱཧོཏི པདྷཱནགྒཱཧཱི, སབྦེསཾ པཱམོཀྑོ ཧུཏྭཱ གཎྷཱིཏི ཝུཏྟཾ ཧོཏི. བྷིཀྑཱུནཾ སམུདཱཡོ སམཱུཧོ བྷིཀྑུསམུདཱཡོ.

ཡདཱཏི ནིབྦཱཡིཾསཱུཏི སམྦནྡྷོ. ཛོཏཡིཏྭཱ ཙ སབྦདྷཱིཏི ཏམེཝ སདྡྷམྨཾ སབྦཏྠ པཀཱསཡིཏྭཱ. ཛུཏིམནྟོཏི པཉྙཱཛུཏིཡཱ ཡུཏྟཱ, ཏེཛཝནྟོ ཝཱ, མཧཱནུབྷཱཝཱཏི ཨཏྠོ. ནིབྦཱཡིཾསཱུཏི ཨནུཔཱདིསེསཱཡ ནིབྦཱནདྷཱཏུཡཱ ནིབྦཱཡིཾསུ. ཨནཱལཡཱཏི ཨསངྒཱ.

ཨཐཱཏི པཙྪཱ, ཡདཱ པརིནིབྦཱཡིཾསུ, ཏཏོ པརནྟི ཨཏྠོ. ཀཔྤཏི སིངྒཱིལོཎཀཔྤོཏི ཨེཏྠ ཀཔྤ-སདྡོ ཝིཀཔྤཏྠོ, ཏེན སིངྒཱིལོཎཝིཀཔྤོཔི ཀཔྤཏི. ཨིདམྤི པཀྑནྟརཾ ཀཔྤཏཱིཏི ཨཏྠོ, ཨེཝཾ སབྦཏྠ. ཏཏྠ སིངྒེན ལོཎཾ པརིཧརིཏྭཱ ཨལོཎཀཔིཎྜཔཱཏེན སདྡྷིཾ བྷུཉྫིཏུཾ ཀཔྤཏི ¶ , སནྣིདྷིཾ ན ཀརོཏཱིཏི ཨདྷིཔྤཱཡོ. ཀཔྤཏི དྭངྒུལཀཔྤོཏི དྭངྒུལཾ ཨཏིཀྐནྟཱཡ ཚཱཡཱཡ ཝིཀཱལེ བྷོཛནཾ བྷུཉྫིཏུཾ ཀཔྤཏཱིཏི ཨཏྠོ. ཀཔྤཏི གཱམནྟརཀཔྤོཏི ‘‘གཱམནྟརཾ གམིསྶཱམཱི’’ཏི པཝཱརིཏེན ཨནཏིརིཏྟབྷོཛནཾ བྷུཉྫིཏུཾ ཀཔྤཏཱིཏི ཨཏྠོ. ཀཔྤཏི ཨཱཝཱསཀཔྤོཏི ཨེཀསཱིམཱཡ ནཱནཱསེནཱསནེསུ ཝིསུཾ ཝིསུཾ ཨུཔོསཐཱདཱིནི སངྒྷཀམྨཱནི ཀཱཏུཾ ཝཊྚཏཱིཏི ཨཏྠོ. ཀཔྤཏི ཨནུམཏིཀཔྤོཏི ‘‘ཨནཱགཏཱནཾ ཨཱགཏཀཱལེ ཨནུམཏིཾ གཧེསྶཱམཱ’’ཏི ཏེསུ ཨནཱགཏེསུཡེཝ ཝགྒེན སངྒྷེན ཀམྨཾ ཀཏྭཱ པཙྪཱ ཨནུམཏིཾ གཧེཏུཾ ཀཔྤཏི, ཝགྒཀམྨཾ ན ཧོཏཱིཏི ཨདྷིཔྤཱཡོ. ཀཔྤཏི ཨཱཙིཎྞཀཔྤོཏི ཨཱཙརིཡུཔཛ྄ཛྷཱཡེཧི ཨཱཙིཎྞོ ཀཔྤཏཱིཏི ཨཏྠོ. སོ པན ཨེཀཙྩོ ཀཔྤཏི དྷམྨིཀོ, ཨེཀཙྩོ ན ཀཔྤཏི ཨདྷམྨིཀོཏི ཝེདིཏབྦོ. ཀཔྤཏི ཨམཐིཏཀཔྤོཏི ཡཾ ཁཱིརཾ ཁཱིརབྷཱཝཾ ཝིཛཧིཏཾ དདྷིབྷཱཝཾ ཨསམྤཏྟཾ, ཏཾ བྷུཏྟཱཝིནཱ པཝཱརིཏེན ཨནཏིརིཏྟཾ བྷུཉྫིཏུཾ ཀཔྤཏཱིཏི ཨཏྠོ. ཀཔྤཏི ཛལོ༹གིཾ པཱཏུནྟི ཨེཏྠ ཛལོ༹གཱིཏི ཏརུཎསུརཱ, ཡཾ མཛྫསམྦྷཱརཾ ཨེཀཏོ ཀཏཾ མཛྫབྷཱཝམསམྤཏྟཾ, ཏཾ པཱཏུཾ ཝཊྚཏཱིཏི ཨདྷིཔྤཱཡོ. ཛཱཏརཱུཔརཛཏནྟི ཨེཏྠ སརསཏོ ཝིཀཱརཾ ཨནཱཔཛྫིཏྭཱ སབྦདཱ ཛཱཏརཱུཔམེཝ ཧོཏཱིཏི ཛཱཏཾ རཱུཔཾ ¶ ཨེཏསྶཱཏི ཛཱཏརཱུཔཾ, སུཝཎྞཾ. དྷཝལསབྷཱཝཏཱཡ རཱཛཏཱིཏི རཛཏཾ, རཱུཔིཡཾ. སུསུནཱགཔུཏྟོཏི སུསུནཱགསྶ པུཏྟོ. ཀཱཀཎྜཀཔུཏྟོཏི ཀཱཀཎྜཀསྶ བྲཱཧྨཎསྶ པུཏྟོ. ཝཛྫཱིསཱུཏི ཛནཔདནཱམཏྟཱ བཧུཝཙནཾ ཀཏཾ.

ཏདཧུཔོསཐེཏི ཨེཏྠ ཏདཧཱུཏི ཏསྨིཾ ཨཧནི. ཨུཔཝསནྟི ཨེཏྠཱཏི ཨུཔོསཐོ, ཨུཔཝསནྟཱིཏི ཙ སཱིལསམཱདཱནེན ཝཱ ཨནསནཱདིནཱ ཝཱ ཨུཔེཏཱ ཧུཏྭཱ ཝསནྟཱིཏི ཨཏྠོ. ཀཾསཔཱཏིནྟི སུཝཎྞཔཱཏིཾ. མཱསཀརཱུཔནྟི མཱསཀོ ཨེཝ. སབྦཾ ཏཱཝ ཝཏྟབྦནྟི ཨིམིནཱ སཏྟསཏིཀཀྑནྡྷཀེ (ཙཱུལ༹ཝ. ༤༤༦ ཨཱདཡོ) ཨཱགཏཱ སབྦཱཔི པཱལི༹ ཨིདྷ ཨཱནེཏྭཱ ཝཏྟབྦཱཏི དསྶེཏི. སངྒཱཡིཏསདིསམེཝ སངྒཱཡིཾསཱུཏི སམྦནྡྷོ.

སཱ པནཱཡཾ སངྒཱིཏཱིཏི སམྦནྡྷོ. ཏེསཱུཏི ཏེསུ སངྒཱིཏིཀཱརཀེསུ ཐེརེསུ. ཝིསྶུཏཱ ཨེཏེ སདྡྷིཝིཧཱརིཀཱ ཉེཡྻཱཏི སམྦནྡྷོ. སཱཎསམྦྷཱུཏོཏི སཱཎདེསཝཱསཱི སམྦྷཱུཏཏྠེརོ. དུཏིཡོ སངྒཧོཏི སམྦནྡྷིཏབྦཾ. པནྣབྷཱརཱཏི པཏིཏཀྑནྡྷབྷཱརཱ.

ཨབྦུདནྟི ¶ ཨུཔདྡཝཾ ཝདནྟི. ‘‘བྷགཝཏོ ཝཙནཾ ཐེནེཏྭཱ ཨཏྟནོ ཝཙནསྶ དཱིཔནཏོ ཨབྦུདནྟི ཙོརཀམྨ’’ནྟི ཨེཀེ. ཨིདནྟི ཝཀྑམཱནནིདསྶནཾ. སནྡིསྶམཱནཱ མུཁཱ སམྨུཁཱ. བྷཱཝིཏམགྒནྟི ཨུཔྤཱདིཏཛ྄ཛྷཱནཾ. སཱདྷུ སཔྤུརིསཱཏི ཨེཏྠ སཱདྷཱུཏི ཨཱཡཱཙནཏྠེ ནིཔཱཏོ, ཏཾ ཡཱཙཱམཱིཏི ཨཏྠོ. ཧཊྛཔཧཊྛོཏི པུནཔྤུནཾ སནྟུཊྛོ. ཨུདགྒུདགྒོཏི སརཱིརཝིཀཱརུཔྤཱདནཔཱིཏིཝསེན ཨུདགྒུདགྒོ, པཱིཏིམཱ ཧི པུགྒལོ ཀཱཡཙིཏྟཱནཾ ཨུགྒཏཏྟཱ ‘‘ཨུདགྒུདགྒོ’’ཏི ཝུཙྩཏི.

ཏེན ཁོ པན སམཡེནཱཏི ཡསྨིཾ སམཡེ དུཏིཡཾ སངྒཱིཏིཾ ཨཀརིཾསུ, ཏསྨིཾ སམཡེཏི ཨཏྠོ. ཏཾ ཨདྷིཀརཎཾ ན སམྤཱཔུཎིཾསཱུཏི ཏཾ ཝཛྫིཔུཏྟཀེཧི ཨུཔྤཱདིཏཾ ཨདྷིཀརཎཾ ཝིནིཙྪིནིཏུཾ ན སམྤཱཔུཎིཾསུ ནཱགམིཾསུ. ནོ ཨཧུཝཏྠཱཏི སམྦནྡྷོ. ཡཱཝཏཱཡུཀཾ ཋཏྭཱ པརིནིབྦུཏཱཏི སམྦནྡྷོ. ཀིཾ པན ཀཏྭཱ ཐེརཱ པརིནིབྦུཏཱཏི? ཨཱཧ དུཏིཡཾ སངྒཧཾ ཀཏྭཱཏིཨཱདི. ཨནིཙྩཏཱཝསནྟི ཨནིཙྩཏཱདྷཱིནཏཾ. ཛམྨིནྟི ལཱམཀཾ. དུརབྷིསམྦྷཝཾ ཨནབྷིབྷཝནཱིཡཾ ཨཏིཀྐམིཏུཾ ཨསཀྐུཎེཡྻཾ ཨནིཙྩཏཾ ཨེཝཾ ཉཏྭཱཏི སམྦནྡྷོ.

དུཏིཡསངྒཱིཏིཀཐཱཝཎྞནཱནཡོ ནིཊྛིཏོ.

ཏཏིཡསངྒཱིཏིཀཐཱཝཎྞནཱ

སཏྟ ¶ ཝསྶཱནཱིཏི ཨཙྩནྟསཾཡོགེ ཨུཔཡོགཝཙནཾ. ཨཏིཙྪཐཱཏི ཨཏིཀྐམིཏྭཱ ཨིཙྪཐ, ཨིཏོ ཨཉྙཏྠ གནྟྭཱ བྷིཀྑཾ པརིཡེསཐཱཏི ཨཏྠོ. བྷཏྟཝིསྶགྒཀརཎཏྠཱཡཱཏི བྷཏྟསྶ ཨཛ྄ཛྷོཧརཎཀིཙྩཏྠཱཡ, བྷུཉྫནཏྠཱཡཱཏི ཨཏྠོ. ‘‘སོལ༹སཝསྶོ’’ཏི ཨུདྡེསོ ཀཐནཾ ཨསྶ ཨཏྠཱིཏི སོལ༹སཝསྶུདྡེསིཀོ, ‘‘སོལ༹སཝསྶིཀོ’’ཏི ཨཏྠོ.

ཏཱིསུ ཝེདེསཱུཏིཨཱདཱིསུ ཨིརུཝེདཡཛུཝེདསཱམཝེདསངྑཱཏེསུ ཏཱིསུ ཝེདེསུ. ཏཡོ ཨེཝ ཀིར ཝེདཱ ཨཊྛཀཱདཱིཧི དྷམྨིཀེཧི ཨིསཱིཧི ལོཀསྶ སགྒམགྒཝིབྷཱཝནཏྠཱཡ ཀཏཱ. ཏེནེཝ ཧི ཏེ ཏེཧི ཝུཙྩནྟི. ཨཱཐབྦཎཝེདོ པན པཙྪཱ ཨདྷམྨིཀེཧི བྲཱཧྨཎེཧི པཱཎཝདྷཱདིཨཏྠཱཡ ཀཏོ. པུརིམེསུ ཙ ཏཱིསུ ཝེདེསུ ཏེཧེཝ དྷམྨིཀསཱཁཱཡོ ཨཔནེཏྭཱ ཡཱགཝདྷཱདིདཱིཔིཀཱ ཨདྷམྨིཀསཱཁཱ པཀྑིཏྟཱཏི ཝེདིཏབྦཱ. ནིགྷཎྜཱུཏི རུཀྑཱདཱིནཾ ཝེཝཙནཔྤཀཱསཀཾ པརིཡཱཡནཱམཱནུརཱུཔཾ སཏྠཾ. ཏཉྷི ལོཀེ ‘‘ནིགྷཎྜཱུ’’ཏི ¶ ཝུཙྩཏི. ཀེཊུབྷནྟི ཀིཊཏི གམེཏི ཀིརིཡཱདིཝིབྷཱགནྟི ཀེཊུབྷཾ, ཀིརིཡཱཀཔྤཝིཀཔྤོ ཀཝཱིནཾ ཨུཔཀཱརསཏྠཾ. ཨེཏྠ ཙ ཀིརིཡཱཀཔྤཝིཀཔྤོཏི ཝཙཱིབྷེདཱདིལཀྑཎཱ ཀིརིཡཱ ཀཔྤཱིཡཏི ཝིཀཔྤཱིཡཏི ཨེཏེནཱཏི ཀིརིཡཱཀཔྤོ, སོ པན ཝཎྞཔདབནྡྷཔདཏྠཱདིཝིབྷཱགཏོ བཧུཝིཀཔྤོཏི ‘‘ཀིརིཡཱཀཔྤཝིཀཔྤོ’’ཏི ཝུཙྩཏི. ཨིདཉྩ མཱུལཀིརིཡཱཀཔྤགནྠཾ སནྡྷཱཡ ཝུཏྟཾ. སཧ ནིགྷཎྜུནཱ ཀེཊུབྷེན ཙ སནིགྷཎྜུཀེཊུབྷཱ, ཏཡོ ཝེདཱ, ཏེསུ སནིགྷཎྜུཀེཊུབྷེསུ. ཋཱནཀརཎཱདིཝིབྷཱགཏོ ཙ ནིབྦཙནཝིབྷཱགཏོ ཙ ཨཀྑརཱ པབྷེདཱིཡནྟི ཨེཏེནཱཏི ཨཀྑརཔྤབྷེདོ, སིཀྑཱ ཙ ནིརུཏྟི ཙ. སཧ ཨཀྑརཔྤབྷེདེནཱཏི སཱཀྑརཔྤབྷེདཱ, ཏེསུ སཱཀྑརཔྤབྷེདེསུ. ཨཱཐབྦཎཝེདཾ ཙཏུཏྠཾ ཀཏྭཱ ‘‘ཨིཏིཧ ཨཱས ཨིཏིཧ ཨཱསཱ’’ཏི ཨཱིདིསཝཙནཔཊིསཾཡུཏྟོ པོརཱཎཀཐཱསངྑཱཏོ ཨིཏིཧཱསོ པཉྩམོ ཨེཏེསནྟི ཨིཏིཧཱསཔཉྩམཱ, ཏཡོ ཝེདཱ, ཏེསུ ཨིཏིཧཱསཔཉྩམེསུ.

ཡསྶ ཙིཏྟནྟིཨཱདི པཉྷདྭཡཾ ཁཱིཎཱསཝཱནཾ ཙུཏིཙིཏྟསྶ ཨུཔྤཱདཀྑཎཾ སནྡྷཱཡ ཝུཏྟཾ. ཏཏྠ པཋམཔཉྷེ ཨུཔྤཛྫཏཱིཏི ཨུཔྤཱདཀྑཎསམངྒིཏཱཡ ཨུཔྤཛྫཏི. ན ནིརུཛ྄ཛྷཏཱིཏི ནིརོདྷཀྑཎཾ ཨཔྤཏྟཏཱཡ ན ནིརུཛ྄ཛྷཏི. ཏསྶ ཙིཏྟནྟི ཏསྶ པུགྒལསྶ ཏཾ ཙིཏྟཾ ཀིཾ ནིརུཛ྄ཛྷིསྶཏི ཨཱཡཏིཉྩ ནུཔྤཛྫིསྶཏཱིཏི པུཙྪཱ, ཏསྶཱ ཙ ཝིབྷཛྫབྱཱཀརཎཱིཡཏཱཡ ཨེཝམེཏྠ ཝིསྶཛྫནཾ ཝེདིཏབྦཾ. ཨརཧཏོ པཙྪིམཙིཏྟསྶ ཨུཔྤཱདཀྑཎེ ཏསྶ ཙིཏྟཾ ཨུཔྤཛྫཏི, ན ནིརུཛ྄ཛྷཏི, ཨཱཡཏིཉྩ ནུཔྤཛྫིསྶཏི, ཨཝསྶམེཝ ནིརོདྷཀྑཎཾ པཏྭཱ ནིརུཛ྄ཛྷིསྶཏི, ཏཏོ ཨཔྤཊིསནྡྷིཀཏྟཱ ཨཉྙཾ ནུཔྤཛྫིསྶཏི. ཋཔེཏྭཱ པན པཙྪིམཙིཏྟསམངྒིཾ ཁཱིཎཱསཝཾ ཨིཏརེསཾ ཨུཔྤཱདཀྑཎསམངྒིཙིཏྟཾ ¶ ཨུཔྤཱདཀྑཎསམངྒིཏཱཡ ཨུཔྤཛྫཏི བྷངྒཾ ཨཔྤཏྟཏཱཡ ན ནིརུཛ྄ཛྷཏི, བྷངྒཾ པན པཏྭཱ ནིརུཛ྄ཛྷིསྶཏེཝ, ཨཉྙཾ པན ཏསྨིཾ ཝཱ ཨཉྙསྨིཾ ཝཱ ཨཏྟབྷཱཝེ ཨུཔྤཛྫིསྶཏི ཙེཝ ནིརུཛ྄ཛྷིསྶཏི ཙཱཏི. ཡསྶ ཝཱ པནཱཏིཨཱདི དུཏིཡཔཉྷེ པན ནིརུཛ྄ཛྷིསྶཏི ནུཔྤཛྫིསྶཏཱིཏི ཡསྶ ཙིཏྟཾ ཨུཔྤཱདཀྑཎསམངྒིཏཱཡ བྷངྒཀྑཎཾ པཏྭཱ ནིརུཛ྄ཛྷིསྶཏི ཨཔྤཊིསནྡྷིཀཏཱཡ ནུཔྤཛྫིསྶཏི, ཏསྶ ཁཱིཎཱསཝསྶ ཏཾ ཙིཏྟཾ ཀིཾ ཨུཔྤཛྫཏི ན ནིརུཛ྄ཛྷཏཱིཏི པུཙྪཱ, ཏསྶཱ ཨེཀཾསབྱཱཀརཎཱིཡཏཱཡ ‘‘ཨཱམནྟཱ’’ཏི ཝིསྶཛྫནཾ ཝེདིཏབྦཾ. ཨུདྡྷཾ ཝཱ ཨདྷོ ཝཱ ཧརིཏུཾ ཨསཀྐོནྟོཏི ཨུཔརིམཔདེ ཝཱ ཧེཊྛིམཔདཾ ཧེཊྛིམཔདེ ཝཱ ཨུཔརིམཔདཾ ཨཏྠཏོ སམནྣཱཧརིཏུཾ གྷཊེཏུཾ པུབྦེནཱཔརཾ ཡོཛེཏྭཱ ཨཏྠཾ པརིཙྪིནྡིཏུཾ ཨསཀྐོནྟོཏི ཨཏྠོ.

སོཏཱཔནྣཱནཾ ¶ སཱིལེསུ པརིཔཱུརཀཱརིཏཱཡ སམཱདིནྣསཱིལཏོ ནཏྠི པརིཧཱནཱིཏི ཨཱཧ ‘‘ཨབྷབྦོ དཱནི སཱསནཏོ ནིཝཏྟིཏུ’’ནྟི. ཝཌྜྷེཏྭཱཏི ཨུཔརིམགྒཏྠཱཡ ཀམྨཊྛཱནཾ ཝཌྜྷེཏྭཱ. དནྟེ པུནནྟི ཝིསོདྷེནྟི ཨེཏེནཱཏི དནྟཔོནཾ ཝུཙྩཏི དནྟཀཊྛཾ. ཨབྷིནཝཱནཾ ཨཱགནྟུཀཱནཾ ལཛྫཱིསབྷཱཝཾ ཁནྟིམེཏྟཱདིགུཎསམངྒིཏཉྩ ཀཏིཔཱཧཾ སུཊྛུ ཝཱིམཾསིཏྭཱཝ ཧཏྠཀམྨཱདིསམྤཊིཙྪནཾ སངྒཧཀརཎཉྩ ཡུཏྟནྟི སཱམཎེརསྶ ཙེཝ ཨཉྙེསཉྩ བྷིཀྑཱུནཾ དིཊྛཱནུགཏིཾ ཨཱཔཛྫནྟཱནཾ ཉཱཔནཏྠཾ ཐེརོ ཏསྶ བྷབྦརཱུཔཏཾ ཨབྷིཉྙཱཡ ཉཏྭཱཔི པུན སམྨཛྫནཱདིཾ ཨཀཱསི. ‘‘ཏསྶ ཙིཏྟདམནཏྠ’’ནྟིཔི ཝདནྟི. བུདྡྷཝཙནཾ པཊྛཔེསཱིཏི བུདྡྷཝཙནཾ ཨུགྒཎྷཱཔེཏུཾ ཨཱརབྷི. སཀལཝིནཡཱཙཱརཔཊིཔཏྟི ཨུཔསམྤནྣཱནམེཝ ཝིཧིཏཱཏི ཏཔྤརིཡཱཔུཎནམཔི ཏེསཉྙེཝ ཨནུརཱུཔནྟི ཨཱཧ ‘‘ཋཔེཏྭཱ ཝིནཡཔིཊཀ’’ནྟི. ཏསྶ ཙིཏྟེ ཋཔིཏམྤི བུདྡྷཝཙནཾ སངྒོཔནཏྠཱཡ ནིཡྻཱཏིཏབྷཱཝཾ དསྶེཏུཾ ‘‘ཧཏྠེ པཏིཊྛཱཔེཏྭཱ’’ཏི ཝུཏྟཾ.

ཨེཀརཛྫཱབྷིསེཀནྟི སཀལཛམྦུདཱིཔེ ཨེཀཱདྷིཔཙྩཝསེན ཀརིཡམཱནཾ ཨབྷིསེཀཾ. རཱཛིདྡྷིཡོཏི རཱཛཱནུབྷཱཝཱནུགཏཔྤབྷཱཝཱ. ཡཏོཏི ཡཏོ སོལ༹སགྷཊཏོ. དེཝཏཱ ཨེཝ དིཝསེ དིཝསེ ཨཱཧརནྟཱིཏི སམྦནྡྷོ. དེཝསིཀནྟི དིཝསེ དིཝསེ. ཨགདཱམལཀནྟི ཨཔྤཀེནེཝ སརཱིརསོདྷནཱདིསམཏྠཾ སབྦདོསཧརཾ ཨོསདྷཱམལཀཾ. ཚདྡནྟདཧཏོཏི ཚདྡནྟདཧསམཱིཔེ ཋིཏདེཝཝིམཱནཏོ, ཀཔྤརུཀྑཏོ ཝཱ, ཏཏྠ ཏཱདིསཱ ཀཔྤརུཀྑཝིསེསཱ སནྟི, ཏཏོ ཝཱ ཨཱཧརནྟཱིཏི ཨཏྠོ. ཨསུཏྟམཡིཀནྟི སུཏྟེཧི ཨབདྡྷཾ དིབྦསུམནཔུཔྥེཧེཝ ཀཏཾ སུམནཔུཔྥཔཊཾ. ཨུཊྛིཏསྶ སཱལིནོཏི སཡཾཛཱཏསཱལིནོ, སམུདཱཡཱཔེཀྑཉྩེཏྠ ཨེཀཝཙནཾ, སཱལཱིནནྟི ཨཏྠོ. ནཝ ཝཱཧསཧསྶཱནཱིཏི ཨེཏྠ ཙཏསྶོ མུཊྛིཡོ ཨེཀོ ཀུཌུཝོ, ཙཏྟཱརོ ཀུཌུཝཱ ཨེཀོ པཏྠོ, ཙཏྟཱརོ པཏྠཱ ཨེཀོ ཨཱལ༹ྷཀོ, ཙཏྟཱརོ ཨཱལ༹ྷཀཱ ཨེཀཾ དོཎཾ, ཙཏྟཱརི དོཎཱནི ཨེཀཱ མཱནིཀཱ ¶ , ཙཏསྶོ མཱནིཀཱ ཨེཀཱ ཁཱརཱི, ཝཱིསཏི ཁཱརིཀཱ ཨེཀོ ཝཱཧོ, ཏདེཝ ‘‘ཨེཀཾ སཀཊ’’ནྟི སུཏྟནིཔཱཏཊྛཀཐཱདཱིསུ (སུ. ནི. ཨཊྛ. ༢.ཀོཀཱལིཀསུཏྟཝཎྞནཱ) ཝུཏྟཾ. ནིཏྠུསཀཎེ ཀརོནྟཱིཏི ཐུསཀུཎྜཀརཧིཏེ ཀརོནྟི. ཏེན ནིམྨིཏཾ བུདྡྷརཱུཔཾ པསྶནྟོཏི སམྦནྡྷོ. པུཉྙཔྤབྷཱཝནིབྦཏྟགྒཧཎཾ ནཱགརཱཛནིམྨིཏཱནཾ པུཉྙཔྤབྷཱཝནིབྦཏྟེཧི སདིསཏཱཡ ཀཏཾ. ཝིམལཀེཏུམཱལཱཏི ཨེཏྠ ཀེཏུམཱལཱ ནཱམ སཱིསཏོ ནིཀྑམིཏྭཱ ཨུཔརིམུདྡྷནི པུཉྫོ ཧུཏྭཱ དིསྶམཱནརསྨིརཱསཱིཏི ཝདནྟི.

བཱཧིརཀཔཱསཎྜནྟི ¶ བཱཧིརཀཔྤཝེདིཏཾ སམཡཝཱདཾ. པརིགྒཎྷཱིཏི ཝཱིམཾསམཱནོ པརིགྒཧེསི. བྷདྡཔཱིཋཀེསཱུཏི ཝེཏྟམཡཔཱིཋེསུ. སཱརོཏི གུཎསཱརོ. སཱིཧཔཉྫརེཏི མཧཱཝཱཏཔཱནསམཱིཔེ. ཀིལེསཝིཔྥནྡརཧིཏཙིཏྟཏཱཡ དནྟཾ. ནིཙྩཾ པཙྩུཔཊྛིཏསཏཱརཀྑཏཱཡ གུཏྟཾ. ཁུརགྒེཡེཝཱཏི ཀེསོརོཔནཱཝསཱནེ. ཨཏིཝིཡ སོབྷཏཱིཏི སམྦནྡྷོ. ཝཱཎིཛཀོ ཨཧོསཱིཏི མདྷུཝཱཎིཛཀོ ཨཧོསི.

པུབྦེ ཝ སནྣིཝཱསེནཱཏི པུབྦེ ཝཱ པུབྦཛཱཏིཡཾ ཝཱ སཧཝཱསེནཱཏི ཨཏྠོ. པཙྩུཔྤནྣཧིཏེན ཝཱཏི ཝཏྟམཱནབྷཝེ ཧིཏཙརཎེན ཝཱ. ཨེཝཾ ཨིམེཧི དྭཱིཧི ཀཱརཎེཧི ཏཾ སིནེཧསངྑཱཏཾ པེམཾ ཛཱཡཏེ. ཀིཾ ཝིཡཱཏི? ཨཱཧ ‘‘ཨུཔྤལཾ ཝ ཡཐོདཀེ’’ཏི. ཨུཔྤལཾ ཝཱཏི རསྶཀཏོ ཝཱ-སདྡོ ཨཝུཏྟསམྤིཎྜནཏྠོ. ཡཐཱ-སདྡོ ཨུཔམཱཡཾ. ཨིདཾ ཝུཏྟཾ ཧོཏི – ཡཐཱ ཨུཔྤལཉྩ སེསཉྩ པདུམཱདི ཨུདཀེ ཛཱཡམཱནཾ དྭེ ཀཱརཎཱནི ནིསྶཱཡ ཛཱཡཏི ཨུདཀཉྩེཝ ཀལལཉྩ, ཨེཝཾ པེམམྤཱིཏི (ཛཱ. ཨཊྛ. ༢.༢.༡༧༤).

དྷུཝབྷཏྟཱནཱིཏི ནིཙྩབྷཏྟཱནི. ཝཛྫཱཝཛྫནྟི ཁུདྡཀཾ མཧནྟཉྩ ཝཛྫཾ. མོགྒལིཔུཏྟཏིསྶཏྠེརསྶ བྷཱརམཀཱསཱིཏི ཐེརསྶ མཧཱནུབྷཱཝཏཾ, ཏདཱ སཱསནཀིཙྩསྶ ནཱཡཀབྷཱཝེན སངྒྷཔརིཎཱཡཀཏཉྩ རཉྙོ ཉཱཔེཏུཾ སངྒྷོ ཏསྶ བྷཱརམཀཱསཱིཏི ཝེདིཏབྦཾ, ན ཨཉྙེསཾ ཨཛཱནནཏཱཡ. སཱསནསྶ དཱཡཱདོཏི སཱསནསྶ ཨབྦྷནྟརོ ཉཱཏཀོ ཧོམི ན ཧོམཱིཏི ཨཏྠོ. ཡེ སཱསནེ པབྦཛིཏུཾ པུཏྟདྷཱིཏརོ པརིཙྩཛནྟི, ཏེ བུདྡྷསཱསནེ སཱལོཧིཏཉཱཏཀཱ ནཱམ ཧོནྟི, སཀལསཱསནདྷཱརཎེ སམཏྠཱནཾ ཨཏྟནོ ཨོརསཔུཏྟཱནཾ པརིཙྩཏྟཏྟཱ ན པཙྩཡམཏྟདཱཡཀཱཏི ཨིམམཏྠཾ སནྡྷཱཡ ཐེརོ ‘‘ན ཁོ, མཧཱརཱཛ, ཨེཏྟཱཝཏཱ སཱསནསྶ དཱཡཱདོ ཧོཏཱི’’ཏི ཨཱཧ. ཀཐཉྩརཧཱིཏི ཨེཏྠ ཙརཧཱིཏི ནིཔཱཏོ ཨཀྑནྟིཾ དཱིཔེཏི. ཏིསྶཀུམཱརསྶཱཏི རཉྙོ ཨེཀམཱཏུཀསྶ ཀནིཊྛསྶ. སཀྑསཱིཏི སཀྑིསྶསི. སིཀྑཱཡ པཏིཊྛཱཔེསུནྟི པཱཎཱཏིཔཱཏཱ ཝེརམཎིཨཱདཱིསུ ཝིཀཱལབྷོཛནཱ ཝེརམཎིཔརིཡོསཱནཱསུ ཚསུ སིཀྑཱསུ པཱཎཱཏིཔཱཏཱ ཝེརམཎིཾ དྭེ ¶ ཝསྶཱནི ཨཝཱིཏིཀྐམྨ སམཱདཱནཾ སམཱདིཡཱམཱིཏིཨཱདིནཱ (པཱཙི. ༡༠༧༩) སམཱདཱནཝསེན སིཀྑཱསམྨུཏིདཱནཱནནྟརཾ སིཀྑཱཡ པཏིཊྛཱཔེསུཾ. ཚ ཝསྶཱནི ཨབྷིསེཀསྶ ཨསྶཱཏི ཚཝསྶཱབྷིསེཀོ.

སབྦཾ ¶ ཐེརཝཱདནྟི དྭེ སངྒཱིཏིཡོ ཨཱརུལ༹ྷཱ པཱལི༹. སཱ ཧི མཧཱསངྒྷིཀཱདིབྷིནྣལདྡྷིཀཱཧི ཝིཝེཙེཏུཾ ‘‘ཐེརཝཱདོ’’ཏི ཝུཏྟཱ. ཨཡཉྷི ཝིབྷཛྫཝཱདོ མཧཱཀསྶཔཏྠེརཱདཱིཧི ཨསངྐརཏོ རཀྑིཏོ ཨཱནཱིཏོ ཙཱཏི ‘‘ཐེརཝཱདོ’’ཏི ཝུཙྩཏི, ‘‘སཐེརཝཱད’’ནྟིཔི ལིཁནྟི. ཏཏྠ ‘‘ཨཊྛཀཐཱསུ ཨཱགཏཐེརཝཱདསཧིཏཾ སཱཊྛཀཐཾ ཏིཔིཊཀསངྒཧིཏཾ བུདྡྷཝཙན’’ནྟི ཨཱནེཏྭཱ ཡོཛེཏབྦཾ. ཏེཛོདྷཱཏུཾ སམཱཔཛྫིཏྭཱཏི ཏེཛོཀསིཎཱརམྨཎཾ ཛྷཱནཾ སམཱཔཛྫིཏྭཱ.

སབྷཱཡནྟི ནགརམཛ྄ཛྷེ ཝིནིཙྪཡསཱལཱཡཾ. དིཊྛིགཏཱནཱིཏི དིཊྛིཡོཝ. ན ཁོ པནེཏཾ སཀྐཱ ཨིམེསཾ མཛ྄ཛྷེ ཝསནྟེན ཝཱུཔསམེཏུནྟི ཏེསཉྷི མཛ྄ཛྷེ ཝསནྟོ ཏེསུཡེཝ ཨནྟོགདྷཏྟཱ ཨཱདེཡྻཝཙནོ ན ཧོཏི, ཏསྨཱ ཨེཝཾ ཙིནྟེསི. ཨཧོགངྒཔབྦཏནྟི ཨེཝཾནཱམཀཾ པབྦཏཾ. ‘‘ཨདྷོགངྒཱཔབྦཏ’’ནྟིཔི ལིཁནྟི, ཏཾ ན སུནྡརཾ. པཉྩཱཏཔེན ཏཔྤེནྟཱིཏི ཙཏཱུསུ ཋཱནེསུ ཨགྒིཾ ཛཱལེཏྭཱ མཛ྄ཛྷེ ཋཏྭཱ སཱུརིཡམཎྜལཾ ཨུལློཀེནྟཱ སཱུརིཡཱཏཔེན ཏཔྤེནྟི. ཨཱདིཙྩཾ ཨནུཔརིཝཏྟནྟཱིཏི ཨུདཡཀཱལཏོ པབྷུཏི སཱུརིཡཾ ཨོལོཀཡམཱནཱ ཡཱཝ ཨཏྠངྒམནཱ སཱུརིཡཱབྷིམུཁཱཝ པརིཝཏྟནྟི. ཝོབྷིནྡིསྶཱམཱཏི པགྒཎྷིཾསཱུཏི ཝིནཱསེསྶཱམཱཏི ཨུསྶཱཧམཀཾསུ.

ཝིསྶཊྛོཏི མརཎསངྐཱརཧིཏོ, ནིབྦྷཡོཏི ཨཏྠོ. མིགཝཾ ནིཀྑམིཏྭཱཏི ཨརཉྙེ ཝིཙརིཏྭཱ མིགམཱརཎཀཱིལཱ༹ མིགཝཾ, ཏཾ ཨུདྡིསྶ ནིཀྑམིཏྭཱ མིགཝདྷཏྠཾ ནིཀྑམིཏྭཱཏི ཨཏྠོ. ཨཧིནཱགཱདིཏོ ཝིསེསནཏྠཾ ‘‘ཧཏྠིནཱགེནཱ’’ཏི ཝུཏྟཾ. ཏསྶ པསྶནྟསྶེཝཱཏི ཨནཱདརེ སཱམིཝཙནཾ, ཏསྨིཾ པསྶནྟེཡེཝཱཏི ཨཏྠོ. ཨཱཀཱསེ ཨུཔྤཏིཏྭཱཏི ཨེཏྠ ཨཡཾ ཝིཀུབྦནིདྡྷི ན ཧོཏཱིཏི གིཧིསྶཱཔི ཨིམཾ ཨིདྡྷིཾ དསྶེསི ཨདྷིཊྛཱནིདྡྷིཡཱ ཨཔྤཊིཀྑིཏྟཏྟཱ. པཀཏིཝཎྞཉྷི ཝིཛཧིཏྭཱ ནཱགཝཎྞཱདིདསྶནཾ ཝིཀུབྦནིདྡྷི. ཚཎཝེསནྟི ཨུསྶཝཝེསཾ. པདྷཱནགྷརནྟི བྷཱཝནཱནུཡོགཝསེན ཝཱིརིཡཱརམྦྷསྶ ཨནུརཱུཔཾ ཝིཝིཏྟསེནཱསནཾ. སོཔཱིཏི རཉྙོ བྷཱགིནེཡྻཾ སནྡྷཱཡ ཝུཏྟཾ.

ཀུསལཱདྷིཔྤཱཡོཏི མནཱཔཛ྄ཛྷཱསཡོ. དྭེལ༹ྷཀཛཱཏོཏི སཾསཡམཱཔནྣོ. ཨེཀེཀཾ བྷིཀྑུསཧསྶཔརིཝཱརནྟི ཨེཏྠ ‘‘གཎྷིཏྭཱ ཨཱགཙྪཐཱ’’ཏི ཨཱཎཱཀཱརེན ཝུཏྟེཔི ཐེརཱ བྷིཀྑཱུ སཱསནཧིཏཏྟཱ གཏཱ. ཀཔྤིཡསཱསནཉྷེཏཾ, ན གིཧཱིནཾ གིཧིཀམྨཔཊིསཾཡུཏྟཾ. ཐེརོ ནཱགཙྪཱིཏི ཀིཉྩཱཔི ¶ ‘‘རཱཛཱ ¶ པཀྐོསཏཱི’’ཏི ཝུཏྟེཔི དྷམྨཀམྨཏྠཱཡ ཨཱགནྟུཾ ཝཊྚཏི, དྭིཀྑཏྟུཾ པན པེསིཏེཔི ‘‘ཨནནུརཱུཔཱ ཡཱཙནཱ’’ཏི ནཱགཏོ, ‘‘མཧཱནུབྷཱཝོ ཐེརོ ཡཐཱནུསིཊྛཾ པཊིཔཏྟིཀོ པམཱཎབྷཱུཏོ’’ཏི རཉྙོ ཙེཝ ཨུབྷཡཔཀྑིཀཱནཉྩ ཨཏྟནི བཧུམཱནུཔྤཱདནཝསེན ཨུདྡྷཾ ཀཏྟབྦཀམྨསིདྡྷིཾ ཨཱཀངྑནྟོ ཨསཱརུཔྤཝཙནལེསེན ནཱགཙྪི. ཨེཀཏོ སངྒྷཊིཏཱ ནཱཝཱ ནཱཝཱསངྒྷཱཊཾ. སཱསནཔཙྩཏྠིཀཱནཾ བཧུབྷཱཝཏོ ཨཱཧ ‘‘ཨཱརཀྑཾ སཾཝིདྷཱཡཱ’’ཏི. ཡནྟི ཡསྨཱ. ཨབྦཱཧིཾསཱུཏི ཨཱཀཌྜྷིཾསུ. བཱཧིརཏོཏི ཨུཡྻཱནསྶ བཱཧིརཏོ. པསྶནྟཱནཾ ཨཏིདུཀྐརབྷཱཝེན ཨུཔཊྛཱནཾ སནྡྷཱཡ ‘‘པདེསཔཐཝཱིཀམྤནཾ དུཀྐར’’ནྟི ཨཱཧ. ཨདྷིཊྛཱནེ པནེཏྠ ཝིསུཾ དུཀྐརཏཱ ནཱམ ནཏྠི.

དཱིཔཀཏིཏྟིརོཏི སཱཀུཎིཀེཧི སམཛཱཏིཀཱནཾ གཧཎཏྠཱཡ པོསེཏྭཱ སིཀྑེཏྭཱ པཱསཊྛཱནེ ཋཔནཀཏིཏྟིརོ. ན པཊིཙྩ ཀམྨཾ ཕུསཏཱིཏི གཱཐཱཡ ཡདི ཏཝ པཱཔཀིརིཡཱཡ མནོ ནཔྤདུསྶཏི, ལུདྡེན ཏཾ ནིསྶཱཡ ཀཏམྤི པཱཔཀམྨཾ ཏཾ ན ཕུསཏི. པཱཔཀིརིཡཱཡ ཧི ཨཔྤོསྶུཀྐསྶ ནིརཱལཡསྶ བྷདྲསྶ སཏོ ཏཝ ཏཾ པཱཔཾ ན ཨུཔལིམྤཏི, ཏཝ ཙིཏྟཾ ན ཨལླཱིཡཏཱིཏི ཨཏྠོ.

ཀིཾ ཝདཏི སཱིལེནཱཏི ཀིཾཝཱདཱི. ཨཐ ཝཱ ཀོ ཀཏམོ ཝཱདོ ཀིཾཝཱདོ, སོ ཨེཏསྶ ཨཏྠཱིཏི ཀིཾཝཱདཱི. ཨཏྟཱནཉྩ ལོཀཉྩ སསྶཏོཏི ཝཱདོ ཨེཏེསནྟི སསྶཏཝཱདིནོ. སཏྟེསུ སངྑཱརེསུ ཝཱ ཨེཀཙྩཾ སསྶཏནྟི པཝཏྟོ ཝཱདོ ཨེཀཙྩསསྶཏོ, ཏསྨིཾ ནིཡུཏྟཱ ཨེཀཙྩསསྶཏིཀཱ. ‘‘ཨནྟོ, ཨནནྟོ, ཨནྟཱནནྟོ, ནེཝནྟོ ནཱནནྟོ’’ཏི ཨེཝཾ ཨནྟཱནནྟཾ ཨཱརབྦྷ པཝཏྟཱ ཙཏྟཱརོ ཝཱདཱ ཨནྟཱནནྟཱ, ཏེསུ ནིཡུཏྟཱ ཨནྟཱནནྟིཀཱ. ན མརཏི ན ཨུཔཙྪིཛྫཏཱིཏི ཨམརཱ, ཨེཝནྟིཔི མེ ནོ, ཏཐཱཏིཔི མེ ནོཏིཨཱདིནཱ (དཱི. ནི. ༡.༦༢) པཝཏྟཱ དིཊྛི ཙེཝ ཝཱཙཱ ཙ, ཏསྶཱ ཝིཀྑེཔོ ཨེཏེསནྟི ཨམརཱཝིཀྑེཔིཀཱ. ཨཐ ཝཱ ཨམརཱ ནཱམ མཙྪཛཱཏི དུགྒཧཱ ཧོཏི, ཏསྶཱ ཨམརཱཡ ཝིཡ ཝིཀྑེཔོ ཨེཏེསནྟི ཨམརཱཝིཀྑེཔིཀཱ. ཨདྷིཙྩ ཡདིཙྪཀཾ ཡཾ ཀིཉྩི ཀཱརཎཾ ཨནཔེཀྑིཏྭཱ སམུཔྤནྣོ ཨཏྟཱ ཙ ལོཀོ ཙཱཏི ཝཱདེ ནིཡུཏྟཱ ཨདྷིཙྩསམུཔྤནྣིཀཱ. སཉྙཱི ཨཏྟཱཏི ཝཱདོ ཡེསནྟེ སཉྙཱིཝཱདཱ. ཨེཝཾ ཨསཉྙཱིཝཱདཱ ནེཝསཉྙཱིནཱསཉྙཱིཝཱདཱཏི ཨེཏྠཱཔི. ‘‘ཀཱཡསྶ བྷེདཱ སཏྟོ ཨུཙྪིཛྫཏཱི’’ཏི (དཱི. ནི. ༡.༨༥-༨༦) ཨེཝཾ ¶ ཨུཙྪེདཾ ཝདནྟཱིཏི ཨུཙྪེདཝཱདཱ. དིཊྛདྷམྨོཏི པཙྩཀྑོ ཡཐཱསཀཾ ཨཏྟབྷཱཝོ, ཏསྨིཾཡེཝ ཡཐཱཀཱམཾ པཉྩཀཱམགུཎཔརིབྷོགེན ནིབྦཱནཾ དུཀྑཱུཔསམཾ ཝདནྟཱིཏི དིཊྛདྷམྨནིབྦཱནཝཱདཱ. ཝིབྷཛིཏྭཱ ཝཱདོ ཨེཏསྶཱཏི ཝིབྷཛྫཝཱདཱི, བྷགཝཱ. སབྦཾ ཨེཀརཱུཔེན ཨཝཏྭཱ ཡཐཱདྷམྨཾ ཝིབྷཛིཏྭཱ ནིཛྫཊཾ ནིགུམྦཾ ཀཏྭཱ ཡཐཱ དིཊྛིསནྡེཧཱདཡོ ཝིགཙྪནྟི, སམྨུཏིཔརམཏྠཱ ¶ ཙ དྷམྨཱ ཨསངྐརཱ པཊིབྷནྟི, ཨེཝཾ ཨེཀནྟཝིབྷཛནསཱིལོཏི ཝུཏྟཾ ཧོཏི. པརཔྤཝཱདཾ མདྡམཱནོཏི ཏསྨིཾ ཀཱལེ ཨུཔྤནྣཾ, ཨཱཡཏིཾ ཨུཔྤཛྫནཀཉྩ སབྦཾ པརཝཱདཾ ཀཐཱཝཏྠུམཱཏིཀཱཝིཝརཎམུཁེན ནིམྨདྡནཾ ཀརོནྟོཏི ཨཏྠོ.

ཏཏིཡསངྒཱིཏིཀཐཱཝཎྞནཱནཡོ ནིཊྛིཏོ.

ཨཱཙརིཡཔརམྤརཀཐཱཝཎྞནཱ

ཀེནཱབྷཏནྟི ཨིམཾ པཉྷཾ ཝིསྶཛྫེནྟེན ཛམྦུདཱིཔེ ཏཱཝ ཡཱཝ ཏཏིཡསངྒཱིཏི, ཏཱཝ དསྶེཏྭཱ ཨིདཱནི སཱིཧལ༹དཱིཔེ ཨཱཙརིཡཔརམྤརཾ དསྶེཏུཾ ཏཏིཡསངྒཧཏོ པན ཨུདྡྷནྟིཨཱདི ཨཱརདྡྷཾ. ཨིམཾ དཱིཔནྟི ཏམྦཔཎྞིདཱིཔཾ. ཏསྨིཾ དཱིཔེ ནིསཱིདིཏྭཱ ཨཱཙརིཡེན ཨཊྛཀཐཱཡ ཀཏཏྟཱ ‘‘ཨིམཾ དཱིཔ’’ནྟི ཝུཏྟཾ. ཀཉྩི ཀཱལནྟི ཨཙྩནྟསཾཡོགེ ཨུཔཡོགཝཙནཾ, ཀིསྨིཉྩི ཀཱལེཏི ཨཏྠོ. པོརཱཎཱཏི སཱིཧལ༹དཱིཔེ སཱིཧལ༹ཊྛཀཐཱཀཱརཀཱ. བྷདྡནཱམོཏི བྷདྡསཱལཏྠེརོ. ཨཱགུཾ པཱཔཾ ན ཀརོནྟཱིཏི ནཱགཱ. ཝིནཡཔིཊཀཾ ཝཱཙཡིཾསཱུཏི སམྦནྡྷོ. ཏམྦཔཎྞིཡཱཏི བྷུམྨཝཙནཾ. ནིཀཱཡེ པཉྩཱཏི ཝིནཡཱབྷིདྷམྨཱནཾ ཝིསུཾ གཧིཏཏྟཱ ཏབྦིནིམུཏྟཱ པཉྩ ནིཀཱཡཱ གཧེཏབྦཱ. པཀརཎེཏི ཨབྷིདྷམྨཔཀརཎེ ཝཱཙེསུནྟི ཡོཛནཱ. ཏཱིཎི པིཊཀཱནི སྭཱགཏཱནི ཨསྶཱཏི ‘‘ཏེཔིཊཀོ’’ཏི ཝཏྟབྦེ ‘‘ཏིཔེཊཀོ’’ཏི ཚནྡཱནུརཀྑཎཏྠཾ ཝུཏྟཾ. ཏཱརཀརཱཛཱཏི ཙནྡིམཱ. པུཔྥནཱམོཏི ཨེཏྠ མཧཱཔདུམཏྠེརོ སུམནཏྠེརོ ཙ ཉཱཏབྦོཏི དྭིཀྑཏྟུཾ ‘‘པུཔྥནཱམོ’’ཏི ཝུཏྟཾ.

ཝནཝཱསིནྟི ཝནཝཱསཱིརཊྛཾ. ཀརཀཝསྶནྟི ཧིམཔཱཏནཀཝསྶཾ, ཀརཀདྷཱརཱསདིསཾ ཝཱ ཝསྶཾ. ཧརཱཔེཏྭཱཏི ཨུདཀོགྷེན ཧརཱཔེཏྭཱ. ཚིནྣབྷིནྣཔཊདྷརོཏི སཏྠཀེན ཚིནྣཾ རངྒེན བྷིནྣཾ པཊཾ དྷཱརཎཀོ. བྷཎྜཱུཏི མུཎྜཀོ. མཀྑཾ ཨསཧམཱནོཏི ཐེརསྶ ཨཱནུབྷཱཝཾ པཊིཙྩ ཨཏྟནོ ¶ ཨུཔྤནྣཾ པརེསཾ གུཎམཀྑནལཀྑཎཾ མཀྑཾ ཏཐཱ པཝཏྟཾ ཀོདྷཾ ཨསཧམཱནོ. ཨསནིཡོ ཕལནྟཱིཏི གཛྫནྟཱ པཏནྟི. མེ མམ བྷཡབྷེརཝཾ ཛནེཏུཾ པཊིབལོ ན ཨསྶ ན བྷཝེཡྻཱཏི ཡོཛནཱ. ཨཉྙདཏྠཱུཏི ཨེཀཾསེན. ཀསྨཱིརགནྡྷཱརཱཏི ཀསྨཱིརགནྡྷཱརརཊྛཝཱསིནོ. ཨིསིཝཱཏཔཊིཝཱཏཱཏི བྷིཀྑཱུནཾ ཙཱིཝརཙལནཀཱཡཙལནེཧི སཉྫནིཏཝཱཏེཧི པརིཏོ སམནྟཏོ བཱིཛཡམཱནཱ ཨཧེསུཾ. དྷམྨཙཀྑུནྟི ཧེཊྛཱམགྒཏྟཡེ ཉཱཎཾ. ཨནམཏགྒིཡནྟི ཨནམཏགྒསཾཡུཏྟཾ (སཾ. ནི. ༢.༡༢༤ ཨཱདཡོ). སམདྷིཀཱནཱིཏི སཱདྷིཀཱནི. པཉྩ རཊྛཱནཱིཏི པཉྩ ཙིནརཊྛཱནི. ཝེགསཱཏི ཝེགེན. སམནྟཏོ རཀྑཾ ཋཔེསཱིཏི ཏེསཾ ཨཔྤཝེསནཏྠཱཡ ཨདྷིཊྛཱནཝསེན རཀྑཾ ཋཔེསི. ཨཌྜྷུཌྜྷཱནི སཧསྶཱནཱིཏི ཨཌྜྷེན ཙཏུཏྠཱནི ཨཌྜྷུཌྜྷཱནི, ཨཏིརེཀཔཉྩསཏཱནི ཏཱིཎི སཧསྶཱནཱིཏི ཨཏྠོ. དིཡཌྜྷསཧསྶནྟི ¶ ཨཌྜྷེན དུཏིཡཾ དིཡཌྜྷཾ, ཨཏིརེཀཔཉྩསཏིཀཾ སཧསྶནྟི ཨཏྠོ. ནིདྡྷམེཏྭཱནཱཏི པལཱཔེཏྭཱ.

རཱཛགཧནགརཔརིཝཏྟཀེནཱཏི རཱཛགཧནགརཾ པརིཝཏྟེཏྭཱ ཏཏོ བཧི ཏཾ པདཀྑིཎཾ ཀཏྭཱ གཏམགྒེན, གམནེན ཝཱ. ཨཱརོཔེསཱིཏི པཊིཔཱདེསི. པལི༹ནཱཏི ཨཱཀཱསཾ པཀྑནྡིཾསུ. ནགུཏྟམེཏི ཙེཏིཡགིརིམཱཧ. པུརཏོཏི པཱཙཱིནདིསཱབྷཱགེ. པུརསེཊྛསྶཱཏི སེཊྛསྶ ཨནུརཱདྷཔུརསྶ. སིལཀཱུཊམྷཱིཏི ཨེཝཾནཱམཀེ པབྦཏཀཱུཊེ. སཱིཧཀུམཱརསྶ པུཏྟོཏི ཨེཏྠ ‘‘ཀལིངྒརཱཛདྷཱིཏུ ཀུཙྪིསྨིཾ སཱིཧསྶ ཛཱཏོ སཱིཧཀུམཱརོ’’ཏི ཝདནྟི. ཛེཊྛམཱསསྶ པུཎྞམིཡཾ ཛེཊྛནཀྑཏྟཾ ཝཱ མཱུལནཀྑཏྟཾ ཝཱ ཧོཏཱིཏི ཨཱཧ ‘‘ཛེཊྛམཱུལནཀྑཏྟཾ ནཱམ ཧོཏཱི’’ཏི. མིགཱནཾ ཝཱནཏོ ཧིཾསནཏོ བཱདྷནཏོ མིགཝཾ, མིགཝིཛ྄ཛྷནཀཱིལཱ༹. རོཧིཏམིགརཱུཔནྟི གོཀཎྞམིགཝེསཾ. རཐཡཊྛིཔྤམཱཎཱཏི རཐཔཏོདཔྤམཱཎཱ. ཨེཀཱ ལཏཱཡཊྛི ནཱམཱཏི ཨེཀཱ རཛཏམཡཱ ཀཉྩནལཏཱཡ པཊིམཎྜིཏཏྟཱ ཨེཝཾ ལདྡྷནཱམཱ. པུཔྥཡཊྛིཡཾ ནཱིལཱདཱིནི པུཔྥཱནི, སཀུཎཡཊྛིཡཾ ནཱནཔྤཀཱརཱ མིགཔཀྑིནོ ཝིཙིཏྟཀམྨཀཏཱ ཝིཡ ཁཱཡནྟཱིཏི དཊྛབྦཾ. རཱཛཀཀུདྷབྷཎྜཱནཱིཏི རཱཛཱརཧཨུཏྟམབྷཎྜཱནི. སངྑནྟི དཀྑིཎཱཝཊྚཾ ཨབྷིསེཀསངྑཾ. ཝཌྜྷམཱནནྟི ཨལངྐཱརཙུཎྞཾ, ‘‘ནཧཱནཙུཎྞ’’ནྟི ཀེཙི. ཝཊཾསཀནྟི ཀཎྞཔིལ༹ནྡྷནཾ ཝཊཾསཀནྟི ཝུཏྟཾ ཧོཏི. ནནྡིཡཱཝཊྚནྟི ནནྡིཡཱཝཊྚཔུཔྥཱཀཱརེན མངྒལཏྠཾ སུཝཎྞེན ཀཏཾ. ཀཉྙནྟི ཁཏྟིཡཀུམཱརིཾ. ཧཏྠཔུཉྪནནྟི པཱིཏཝཎྞཾ མཧགྒྷཧཏྠཔུཉྪནཝཏྠཾ. ཨརུཎཝཎྞམཏྟིཀནྟི ནཱགབྷཝནསམྦྷཝཾ. ཝཏྠཀོཊིཀནྟི ཝཏྠཡུགམེཝ. ནཱགམཱཧཊནྟི ནཱགེཧི ¶ ཨཱཧཊཾ. ཨམཏོསདྷནྟི ཨེཝཾནཱམིཀཱ གུལི༹ཀཛཱཏི. ཨམཏསདིསཀིཙྩཏྟཱ ཨེཝཾ ཝུཙྩཏི. བྷཱུམཏྠརཎསངྑེཔེནཱཏི བྷཱུམཏྠརཎཱཀཱརེན. ཨུཔྤཱཏཔཱཋཀཱཏི ནིམིཏྟཔཱཋཀཱ. ཨལཾ གཙྪཱམཱཏི ‘‘པུརསྶ ཨཙྩཱསནྣཏྟཱ སཱརུཔྤཾ ན ཧོཏཱི’’ཏི པཊིཀྑིཔནྟོ ཨཱཧ. ཨཌྜྷནཝམཱནཾ པཱཎསཧསྶཱནནྟི (ཨ. ནི. ༦.༥༣) པཉྩསཏཱདྷིཀཱནཾ ཨཊྛནྣཾ པཱཎསཧསྶཱནཾ. ཨཔྤམཱདསུཏྟནྟི ཨངྒུཏྟརནིཀཱཡེ མཧཱཨཔྤམཱདསུཏྟཾ, རཱཛོཝཱདསུཏྟནྟི ཝུཏྟཾ ཧོཏི.

མཧཙྩཱཏི མཧཏཱ. ཨུཔསངྐམནྟོཏི ཨཏིཝིཡ ཀིལནྟརཱུཔོ ཧུཏྭཱ ཨུཔསངྐམཱིཏི ཨཏྠོ. ཏུམྷེ ཛཱནནཏྠནྟི སམྦནྡྷོ. པཉྩཔཎྞཱསཱཡཱཏི ཨེཏྠ ‘‘ཙཏུཔཉྙཱསཱཡཱཏི ཝཏྟབྦཾ. ཨེཝཉྷི སཏི ཨུཔརི ཝུཙྩམཱནཾ དྭཱསཊྛི ཨརཧནྟོཏི ཝཙནཾ སམེཏཱི’’ཏི སཱརཏྠདཱིཔནིཡཾ (སཱརཏྠ. ཊཱི. ༡.ཨཱཙརིཡཔརམྤརཀཐཱཝཎྞནཱ) ཝུཏྟཾ. དསབྷཱཏིཀསམཱཀུལནྟི མུཊསིཝསྶ པུཏྟེཧི དེཝཱནཾཔིཡཏིསྶཱདཱིཧི དསཧི བྷཱཏིཀེཧི སམཱཀིཎྞཾ. ཙིརདིཊྛོ སམྨཱསམྦུདྡྷོཏི དྷཱཏུཡོ སནྡྷཱཡཱཧ. སབྦཏཱལཱ༹ཝཙརེཏི སབྦཱནི ཏུརིཡབྷཎྜཱནི, ཏཾསཧཙརིཏེ ཝཱ ཝཱདཀེ. ཨུཔཊྛཱཔེཏྭཱཏི ཨུཔཧཱརཀཱརཱཔནཝསེན སནྣིཔཱཏེཏྭཱ. ཝཌྜྷམཱནཀཙྪཱཡཱཡཱཏི པཙྪཱབྷཏྟཾ. པོཀྑརཝསྶནྟི པོཀྑརཔཏྟེ ¶ ཝིཡ ཨཏེམིཏུཀཱམཱནཾ ཨུཔརི ཨཏེམེཏྭཱ པཝཏྟནཀཝསྶཾ. མཧཱཝཱིརོཏི སཏྠུཝོཧཱརེན དྷཱཏུ ཨེཝ ཝུཏྟཱ. པཙྪིམདིསཱབྷིམུཁོཝ ཧུཏྭཱ ཨཔསཀྐནྟོཏི ཨེཏྠ པུརཏྠཱབྷིམུཁོ ཋིཏོཝ པིཊྛིཏོ ཨཔསཀྐནེན པཙྪིམདིསཱཡ གཙྪནྟོ ཏཱདིསོཔསངྐམནཾ སནྡྷཱཡ ‘‘པཙྪིམདིསཱབྷིམུཁོ’’ཏི ཝུཏྟོ. ‘‘མཧེཛཝཏྠུ ནཱམ ཨེཝཾནཱམཀཾ དེཝཊྛཱན’’ནྟི ཝདནྟི.

པཛྫརཀེནཱཏི ཨམནུསྶསམུཊྛཱཔིཏེན པཛྫརཀརོགེན. དེཝོཏི མེགྷོ. ཨནུཔྤཝེཙྪཱིཏི ཝིམུཙྩི. ཝིཝཱདོ ཧོཏཱིཏི ཨེཏྠ ཀིརིཡཱཀཱལམཔེཀྑིཏྭཱ ཝཏྟམཱནཔྤཡོགོ དཊྛབྦོ. ཨེཝཾ ཨཱིདིསེསུ སབྦཏྠ. ཏདེཏནྟི ཋཱནཾ ཏིཊྛཏཱིཏི སམྦནྡྷོ. ‘‘ཚནྣཾ ཝཎྞཱནཾ སམྦནྡྷབྷཱུཏཱནཾ རཾསིཡོ ཙཱ’’ཏི ཨཛ྄ཛྷཱཧརིཏབྦཾ, ‘‘ཚནྣཾ ཝཎྞཱནཾ ཨུདཀདྷཱརཱ ཙཱ’’ཏི ཨེཝམྤེཏྠ སམྦནྡྷཾ ཝདནྟི. པརིནིབྦུཏེཔི བྷགཝཏི ཏསྶཱནུབྷཱཝེན ཨེཝརཱུཔཾ པཱཊིཧཱརིཡཾ ཨཧོསི ཨེཝཱཏི དསྶེཏུཾ ཨེཝཾ ཨཙིནྟིཡཱཏིཨཱདིགཱཐམཱཧ. རཀྑཾ ཀརོནྟོཏི ཨཏྟནཱ ཨུཔཱཡེན པལཱཔིཏཱནཾ ཡཀྑཱནཾ པུན ཨཔྤཝིསནཏྠཱཡ པརིཏྟཱནཾ ཀརོནྟོ. ཨཱཝིཛྫཱིཏི པརིཡཱཡི.

རཉྙོ ¶ བྷཱཏཱཏི རཉྙོ ཀནིཊྛབྷཱཏཱ. ཨནུལཱ༹དེཝཱི ནཱམ རཉྙོ ཛེཊྛབྷཱཏུ ཛཱཡཱ. སརསརཾསིཛཱལཝིསྶཛྫནཀེནཱཏི སིནིདྡྷཏཱཡ རསཝནྟཾ ཨོཛཝནྟཾ རཾསིཛཱལཾ ཝིསྶཛྫེནྟེན. ཨེཀདིཝསེན ཨགམཱསཱིཏི སམྦནྡྷོ. ཨཔྤེསཱིཏི ལེཁསཱསནཾ པཏིཊྛཱཔེསི. ཨུདིཀྑཏཱིཏི ཨཔེཀྑཏི པཏྠེཏི. བྷཱརིཡནྟི གརུཀཾ, ཨནཏིཀྐམནཱིཡནྟི ཨཏྠོ. མཾ པཊིམཱནེཏཱིཏི མཾ ཨུདིཀྑཏི. ཀམྨཱརཝཎྞནྟི རཉྙོ པཀཏིསུཝཎྞཀཱརཝཎྞཾ. ཏིཧཏྠཝིཀྑམྦྷནྟི ཏིཧཏྠཝིཏྠཱརཾ. སཀལཛམྦུདཱིཔརཛྫེནཱཏི ཨེཏྠ རཉྙོ ཨིདནྟི རཛྫཾ, སཀལཛམྦུདཱིཔཏོ ཨུཔྤཛྫནཀཨཱཡོ ཙེཝ ཨཱཎཱདཡོ ཙ, ཏེན པཱུཛེམཱིཏི ཨཏྠོ, ན སཀལཔཐཝཱིཔཱསཱདཱདིཝཏྠུནཱ ཏསྶ སཏྟཱཧཾ དེམཱིཏིཨཱདིནཱ ཀཱལཔརིཙྪེདཾ ཀཏྭཱ དཱཏུཾ ཨཡུཏྟཏྟཱ. ཨེཝཉྷི དེནྟོ ཏཱཝཀཱལིཀཾ དེཏི ནཱམ ཝཏྠུཔརིཙྩཱགལཀྑཎཏྟཱ དཱནསྶ, པཐཝཱདིཝཏྠུཔརིཙྩཱགེན ཙ པུན གཧཎསྶ ཨཡུཏྟཏྟཱ. ནིཡམིཏཀཱལེ པན ཨཱཡཱདཡོ པརིཙྩཏྟཱ ཨེཝཱཏི ཏཏོ པརཾ ཨཔརིཙྩཏྟཏྟཱ གཧེཏུཾ ཝཊྚཏི. ཏསྨཱ ཝུཏྟནཡེནེཏྠ ཨིཏོ པརམྤི ཨཱཡཱདིདཱནཝསེནེཝ རཛྫདཱནཾ ཝེདིཏབྦཾ. པུཔྥུལ༹ཀཱ ཧུཏྭཱཏི ཀེཏཀཱིཔཱརོཧངྐུརཱ ཝིཡ ཨུདཀཔུཔྥུལ༹ཀཱཀཱརཱ ཧུཏྭཱ. གཝཀྑཛཱལསདིསནྟི བྷཱཝནཔུཾསཀཾ, ཝཱཏཔཱནེསུ ཛཱལཱཀཱརེན ཋཔིཏདཱརུཔཊསདིསནྟི ཨཏྠོ, གཝཀྑེན ཙ སུཏྟཱདིམཡཛཱལེན ཙ སདིསནྟི ཝཱ ཨཏྠོ.

དེཝདུནྡུབྷིཡོཏི ཨེཏྠ དེཝོཏི མེགྷོ, ཏསྶ ཨཙྪསུཀྑཏཱཡ ཨཱཀཱསམིཝ ཁཱཡམཱནསྶ ཨནིམིཏྟགཛྫིཏཾ དེཝདུནྡུབྷི ནཱམ, ཡཾ ‘‘ཨཱཀཱསདུནྡུབྷཱི’’ཏིཔི ཝདནྟི. ཕལིཾསཱུཏི ཐནིཾསུ. པབྦཏཱནཾ ¶ ནཙྩེཧཱིཏི པཐཝཱིཀམྤེན ཨིཏོ ཙིཏོ ཙ བྷམནྟཱནཾ པབྦཏཱནཾ ནཙྩེཧི. ཝིམྷཡཛཱཏཱ ཡཀྑཱ ‘‘ཧི’’ནྟིསདྡཾ ནིཙྪཱརེནྟཱིཏི ཨཱཧ ‘‘ཡཀྑཱནཾ ཧིངྐཱརེཧཱི’’ཏི. སཀསཀཔཊིབྷཱནེཧཱིཏི ཨཏྟནོ ཨཏྟནོ སིཔྤཀོསལླེཧི. ཨབྷིསེཀཾ དཏྭཱཏི ཨནོཏཏྟདཧོདཀེན ཨབྷིསེཀཾ དཏྭཱ.

དེཝཏཱཀུལཱནཱིཏི མཧཱབོདྷིཾ པརིཝཱརེཏྭཱ ཋིཏནཱགཡཀྑཱདིདེཝཏཱཀུལཱནི དཏྭཱཏི སམྦནྡྷོ. གོཔཀརཱཛཀམྨིནོ ཏཐཱ ‘‘ཏརཙྪཱ’’ཏི ཝདནྟི. ཨིམིནཱ པརིཝཱརེནཱཏི སཧཏྠེ ཀརཎཝཙནཾ, ཨིམིནཱ པརིཝཱརེན སཧཱཏི ཨཏྠོ. ཏཱམལིཏྟིནྟི ཨེཝཾནཱམཀཾ སམུདྡཏཱིརེ པཊྚནཾ. ཨིདམསྶ ཏཏིཡནྟི སུཝཎྞཀཊཱཧེ པཏིཊྛིཏསཱཁཱབོདྷིཡཱ རཛྫསམྤདཱནཾ སནྡྷཱཡ ཝུཏྟཾ. ཏཏོ པན པུབྦེ ཨེཀཝཱརཾ རཛྫསམྤདཱནཾ ཨཙྪིནྣཱཡ སཱཁཱཡ མཧཱབོདྷིཡཱ ཨེཝ ཀཏཾ, ཏེན ¶ སདྡྷིཾ ཙཏུཀྑཏྟུཾ རཱཛཱ རཛྫེན པཱུཛེསི. རཛྫེན པཱུཛིཏདིཝསེསུ ཀིར སཀལདཱིཔཏོ ཨུཔྤནྣཾ ཨཱཡཾ གཧེཏྭཱ མཧཱབོདྷིམེཝ པཱུཛེསི.

པཋམཔཱཊིཔདདིཝསེཏི སུཀྐཔཀྑཔཱཊིཔདདིཝསེ. ཏཉྷི ཀཎྷཔཀྑཔཱཊིཔདདིཝསཾ ཨཔེཀྑིཏྭཱ ‘‘པཋམཔཱཊིཔདདིཝས’’ནྟི ཝུཏྟཾ, ཨིདཉྩ ཏསྨིཾ ཏམྦཔཎྞིདཱིཔེ ཝོཧཱརཾ གཧེཏྭཱ ཝུཏྟཾ, ཨིདྷ པན པུཎྞམིཏོ པཊྛཱཡ ཡཱཝ ཨཔརཱ པུཎྞམཱི, ཏཱཝ ཨེཀོ མཱསོཏི ཝོཧཱརོ. ཏསྨཱ ཨིམིནཱ ཝོཧཱརེན ‘‘དུཏིཡཔཱཊིཔདདིཝསེ’’ཏི ཝཏྟབྦཾ སིཡཱ ཀཎྷཔཀྑཔཱཊིཔདསྶ ཨིདྷ པཋམཔཱཊིཔདཏྟཱ. གཙྪཏི ཝཏརེཏི ཨེཏྠ ཨརེཏི ཁེདེ. སམནྟཱཡོཛནནྟི ཨཙྩནྟསཾཡོགེ ཨུཔཡོགཝཙནཾ, ཡོཛནཔྤམཱཎེ པདེསེ སབྦཏྠཱཏི ཨཏྠོ. སུཔཎྞརཱུཔེནཱཏི མཧཱབོདྷིཾ བལཀྐཱརེན གཧེཏྭཱ ནཱགབྷཝནཾ ནེཏུཀཱམཱནི ནཱགརཱཛཀུལཱནི ཨིདྡྷིཡཱ གཧིཏེན གརུལ༹རཱུཔེན སནྟཱསེཏི. ཏཾ ཝིབྷཱུཏིཾ པསྶིཏྭཱཏི དེཝཏཱདཱིཧི ཀརཱིཡམཱནཾ པཱུཛཱམཧཏྟཾ, མཧཱབོདྷིཡཱ ཙ ཨཱནུབྷཱཝམཧཏྟཾ དིསྭཱ སཡམྤི ཏཐཱ པཱུཛེཏུཀཱམཱ ཐེརིཾ ཡཱཙིཏྭཱཏི ཡོཛནཱ. སམུདྡསཱལཝཏྠུསྨིནྟི ཡསྨིཾ པདེསེ ཋཏྭཱ རཱཛཱ སམུདྡེ ཨཱགཙྪནྟཾ བོདྷིཾ ཐེརཱནུབྷཱཝེན ཨདྡས, ཡཏྠ ཙ པཙྪཱ སམུདྡསྶ དིཊྛཊྛཱནནྟི པཀཱསེཏུཾ སམུདྡསཱལཾ ནཱམ སཱལཾ ཨཀཾསུ, ཏསྨིཾ སམུདྡསཱལཱཡ ཝཏྠུབྷཱུཏེ པདེསེ. ཐེརསྶཱཏི མཧཱམཧིནྡཏྠེརསྶ. པུཔྥཨགྒྷིཡཱནཱིཏི ཀཱུཊཱགཱརསདིསཱནི པུཔྥཙེཏིཡཱནི. ཨཱགཏོ ཝཏརེཏི ཨེཏྠ ཨརེཏི པམོདེ. ཨཊྛཧི ཨམཙྩཀུལེཧི ཨཊྛཧི བྲཱཧྨཎཀུལེཧི ཙཱཏི སོལ༹སཧི ཛཱཏིསམྤནྣཀུལེཧི. རཛྫཾ ཝིཙཱརེསཱིཏི རཛྫཾ ཝིཙཱརེཏུཾ ཝིསྶཛྫེསི. རཱཛཝཏྠུདྭཱརཀོཊྛཀཊྛཱནེཏི རཱཛུཡྻཱནསྶ དྭཱརཀོཊྛཀཊྛཱནེ. ཨནུཔུབྦཝིཔསྶནནྟི ཨུདཡབྦཡཱདིཨནུཔུབྦཝིཔསྶནཾ. ‘‘སཧ བོདྷིཔཏིཊྛཱནེནཱ’’ཏི ཀརཎཝཙནེན ཝཏྟབྦེ ཝིབྷཏྟིཔརིཎཱམེན ‘‘སཧ བོདྷིཔཏིཊྛཱནཱ’’ཏི ནིསྶཀྐཝཙནཾ ཀཏཾ. སཏི ཧི སཧསདྡཔྤཡོགེ ཀརཎཝཙནེནེཝ བྷཝིཏབྦཾ. དསྶིཾསཱུཏི པཉྙཱཡིཾསུ. མཧཱཨཱསནཊྛཱནེཏི པུབྦཔསྶེ མཧཱསིལཱསནེན པཏིཊྛིཏཊྛཱནེ. པཱུཛེཏྭཱ ཝནྡཱིཏི ཨཱགཱམིནཾ ¶ མཧཱཙེཏིཡཾ ཝནྡི. པུརིམེ པན མཧཱཝིཧཱརཊྛཱནེ པཱུཛཱམཏྟསྶེཝ ཀཏཏྟཱ ཨནཱགཏེ སངྒྷསྶཔི ནཝཀཏཱ ཨཝནྡིཏབྦཏཱ ཙ པཀཱསིཏཱཏི ཝེདིཏབྦཱ. ཨནཱགཏེ པན མེཏྟེཡྻཱདིབུདྡྷཱ པཙྩེཀབུདྡྷཱ ཙ བུདྡྷབྷཱཝཀྑཎཾ ཨུདྡིསྶ ཝནྡིཏབྦཱཝ སབྷཱཝེན ཝིསིཊྛཔུགྒལཏྟཱཏི གཧེཏབྦཾ.

མཧཱཨརིཊྛོཏི ¶ པཉྩཔཉྙཱསཱཡ བྷཱཏུཀེཧི སདྡྷིཾ ཙེཏིཡགིརིམྷི པབྦཛིཏཾ སནྡྷཱཡ ཝུཏྟཾ. མེགྷཝཎྞཱབྷཡཨམཙྩསྶ པརིཝེཎཊྛཱནེཏི མེགྷཝཎྞཨབྷཡསྶ རཉྙོ ཨམཙྩེན ཀཏྟབྦསྶ པརིཝེཎསྶ ཝཏྠུབྷཱུཏེ ཋཱནེ. མངྒལནིམིཏྟབྷཱཝེན ཨཱཀཱསེ སམུཔྤནྣོ མནོཧརསདྡོ ཨཱཀཱསསྶ རཝོ ཝིཡ ཧོཏཱིཏི ཝུཏྟཾ ‘‘ཨཱཀཱསཾ མཧཱཝིརཝཾ རཝཱི’’ཏི. ན ཧི ཨཱཀཱསོ ནཱམ ཀོཙི དྷམྨོ ཨཏྠི, ཡོ སདྡཾ སམུཊྛཱཔེཡྻ, ཨཱཀཱསགཏཨུཏུཝིསེསསམུཊྛིཏོཝ སོ སདྡོཏི གཧེཏབྦོ. པཋམཀཏྟིཀཔཝཱརཎདིཝསེ…པེ… ཝིནཡཔིཊཀཾ པཀཱསེསཱིཏི ཨིདཾ ཝིནཡཾ ཝཱཙེཏུཾ ཨཱརདྡྷདིཝསཾ སནྡྷཱཡ ཝུཏྟཾ. ཨནུསིཊྛིཀརཱནནྟི ཨནུསཱསནཱིཀརཱནཾ. རཱཛིནོཏི ཨུཔཡོགཏྠེ སཱམིཝཙནཾ, དེཝཱནཾཔིཡཏིསྶརཱཛཱནནྟི ཨཏྠོ. ཨཉྙེཔཱིཏི མཧིནྡཱདཱིཧི ཨཊྛསཊྛིམཧཱཐེརེཧི ཨཉྙེཔི, ཏེསཾ སརཱུཔཾ དསྶེནྟོ ཨཱཧ ཏེསཾ ཐེརཱནནྟིཨཱདི. ཏཏྠ ཏེསཾ ཐེརཱནཾ ཨནྟེཝཱསིཀཱཏི མཧིནྡཏྠེརཱདཱིནཾ ཨཊྛསཊྛིམཧཱཐེརཱནཾ ཨརིཊྛཱདཡོ ཨནྟེཝཱསིཀཱ ཙ མཧཱཨརིཊྛཏྠེརསྶ ཨནྟེཝཱསིཀཱ ཏིསྶདཏྟཀཱལ༹སུམནཱདཡོ ཙཱཏི ཡོཛེཏབྦཾ. ཨནྟེཝཱསིཀཱནཾ ཨནྟེཝཱསིཀཱཏི ཨུབྷཡཏྠ ཝུཏྟཨནྟེཝཱསིཀཱནཾ ཨནྟེཝཱསིཀཔརམྤརཱ ཙཱཏི ཨཏྠོ. པུབྦེ ཝུཏྟཔྤཀཱརཱཏི མཧིནྡོ ཨིཊྚིཡོ ཨུཏྟིཡོཏིཨཱདིགཱཐཱཧི (པཱརཱ. ཨཊྛ. ༡.ཏཏིཡསངྒཱིཏིཀཐཱ) པཀཱསིཏཱ ཨཱཙརིཡཔརམྤརཱ.

ན པགྒྷརཏཱིཏི ན གལ༹ཏི, ན པམུསྶཏཱིཏི ཨཏྠོ. སཏིགཏིདྷིཏིམནྟེསཱུཏི ཨེཏྠ སཏཱིཏི ཨུགྒཧདྷཱརཎེ སཏི. གཏཱིཏི སདྡཏྠཝིབྷཱགགྒཧཎེ ཉཱཎཾ. དྷིཏཱིཏི ཨུགྒཧཔརིཧརཎཱདཱིསུ ཝཱིརིཡཾ. ཀུཀྐུཙྩཀེསཱུཏི ‘‘ཀཔྤཏི ན ཀཔྤཏཱི’’ཏི ཝཱིམཾསཀུཀྐུཙྩཀཱརཱིསུ. མཱཏཱཔིཏུཊྛཱནིཡོཏི ཝཏྭཱ ཏམེཝཏྠཾ སམཏྠེཏུཾ ཨཱཧ ཏདཱཡཏྟཱཧཱིཏིཨཱདི. ཝིནཡཔརིཡཏྟིཾ ནིསྶཱཡཱཏི ཝིནཡཔིཊཀཔརིཡཱཔུཎནཾ ནིསྶཱཡ. ཨཏྟནོ སཱིལཀྑནྡྷོ སུགུཏྟོཏི ལཛྫིནོ ཝིནཡདྷཱརཎསྶ ཨལཛྫིཨཉྙཱཎཏཱདཱིཧི ཚཧི ཨཱཀཱརེཧི ཨཱཔཏྟིཡཱ ཨནཱཔཛྫནཏོ ཨཏྟནོ སཱིལཀྑནྡྷོ ཁཎྜཱདིདོསཝིརཧིཏོ སུགུཏྟོ སུརཀྑིཏོ ཧོཏི. ཀུཀྐུཙྩཔཀཏཱནནྟི ཀཔྤིཡཱཀཔྤིཡཾ ནིསྶཱཡ ཨུཔྤནྣེན ཀུཀྐུཙྩེན པཀཏཱནཾ ཨུཔདྡུཏཱནཾ ཨབྷིབྷཱུཏཱནཾ ཡཐཱཝིནཡཾ ཀུཀྐུཙྩཾ ཝིནོདེཏྭཱ སུདྡྷནྟེ པཏིཊྛཱཔནེན པཊིསརཎཾ ཧོཏི. ཝིགཏོ སཱརདོ བྷཡམེཏསྶཱཏི ཝིསཱརདོ. ‘‘ཨེཝཾ ཀཐེནྟསྶ དོསོ ཨེཝཾ ན དོསོ’’ཏི ཉཏྭཱཝ ཀཐནཏོ ནིབྦྷཡོཝ སངྒྷམཛ྄ཛྷེ ཝོཧརཏི ¶ . པཙྩཏྠིཀེཏི ཨཏྟཔཙྩཏྠིཀེ ཙེཝ ཝཛྫིཔུཏྟཀཱདིསཱསནཔཙྩཏྠིཀེ ཙ. སཧདྷམྨེནཱཏི སཀཱརཎེན ཝཙནེན སིཀྑཱཔདཾ དསྶེཏྭཱ ཡཐཱ ཏེ ཨསདྡྷམྨཾ པཏིཊྛཱཔེཏུཾ ན སཀྐོནྟི, ཨེཝཾ སུནིགྒཧིཏཾ ཀཏྭཱ ནིགྒཎྷཱཏི. སདྡྷམྨཊྛིཏིཡཱཏི ¶ པརིཡཏྟིཔཊིཔཏྟིཔཊིཝེདྷསངྑཱཏསྶ ཏིཝིདྷསྶཱཔི སདྡྷམྨསྶ ཋིཏིཡཱ, པཝཏྟིཡཱཏི ཨཏྠོ.

ཝིནཡོ སཾཝརཏྠཱཡཱཏིཨཱདཱིསུ ཝིནཡཔརིཡཱཔུཎནཾ ཝིནཡོ, ཝིནཡཔཉྙཏྟི ཝཱ ཀཱཡཝཙཱིདྭཱརསཾཝརཏྠཱཡ. ཨཝིཔྤཊིསཱརོཏི ཀཏཱཀཏཾ ནིསྶཱཡ ཝིཔྤཊིསཱརཱབྷཱཝོ སནྟཱཔཱབྷཱཝོ. པཱམོཛྫཾ ཏརུཎཔཱིཏི. པཱིཏི ནཱམ བལཝཔཱིཏི. པསྶདྡྷཱིཏི ཀཱཡཙིཏྟཔསྶདྡྷི. ཡཐཱབྷཱུཏཉཱཎདསྶནནྟི སཔྤཙྩཡནཱམརཱུཔཔརིགྒཧོ. ནིབྦིདཱཏི ཝིཔསྶནཱ. ཝིརཱགོཏི ཨརིཡམགྒོ. ཝིམུཏྟཱིཏི ཨགྒཕལཾ. ཝིམུཏྟིཉཱཎདསྶནནྟི པཙྩཝེཀྑཎཉཱཎཾ. ཨནུཔཱདཱཏི ཀཉྩི དྷམྨཾ ཨནུཔཱདིཡིཏྭཱ པརིཙྩཛིཏྭཱ. པརིནིབྦཱནཏྠཱཡཱཏི པཙྩཝེཀྑཎཉཱཎེ ཨནུཔྤནྣེ ཨནྟརཱ པརིནིབྦཱནཱབྷཱཝེན ཏཾཔརིནིབྦཱནཏྠཱཡཱཏི པཙྩཡཏྟེན ཝུཏྟཾ ཨནནྟརཱདིཔཙྩཡཏྟཱ. ཨེཏདཏྠཱ ཀཐཱཏི ཨཡཾ ཝིནཡཀཐཱ ནཱམ ཨེཏསྶ ཨནུཔཱདཱཔརིནིབྦཱནསྶ ཨཏྠཱཡཱཏི ཨཏྠོ. མནྟནཱཏི ཝིནཡམནྟནཱཡེཝ, བྷིཀྑཱུནཾ ‘‘ཨེཝཾ ཀརིསྶཱམ, ཨེཝཾ ན ཀརིསྶཱམཱ’’ཏི ཝིནཡཔཊིབདྡྷམནྟནཱ. ཨུཔནིསཱཏི ཨུཔནིསཱིདཏི ཨེཏྠ ཕལནྟི ཨུཔནིསཱ, ཀཱརཎཾ. ཝིནཡོ སཾཝརཏྠཱཡཱཏིཨཱདིཀཱརཎཔརམྤརཱཔི ཨེཏདཏྠཱཏི ཨཏྠོ. སོཏཱཝདྷཱནནྟི ཨིམིསྶཱ པརམྤརཔཙྩཡཀཐཱཡ ཨཏྟཱནཾ སམནཏྠཱཡ སོཏཱཝདྷཱནཾ, ཏམྤི ཨེཏམཏྠཾ. ཡདིདནྟི ནིཔཱཏོ. ཡོ ཨཡཾ ཙཏཱུཧི ཨུཔཱདཱནེཧི ཨནུཔཱདིཡིཏྭཱ ཙིཏྟསྶ ཨརཧཏྟམགྒསངྑཱཏོ, ཏཔྥལསངྑཱཏོ ཝཱ ཝིམོཀྑོ, སོཔི ཨེཏདཏྠཱཡ ཨནུཔཱདཱཔརིནིབྦཱནཏྠཱཡ. ཨཐ ཝཱ ཡོ ཨཡཾ ཀཉྩི དྷམྨཾ ཨནུཔཱདཱཙིཏྟསྶ ཝིམོཀྑོ ཝིམུཙྩནཾ ཝིགམོ པརིནིབྦཱནཾ ཨེཏདཏྠཱ ཀཐཱཏི ཨེཝཾ ཨུཔསཾཧརཎཝསེན ཡོཛེཏུམྤི ཝཊྚཏི མགྒཕལཝིམོཀྑསྶ པུབྦེ ཝུཏྟཏྟཱ. ཨཱཡོགོཏི ཨུགྒཧཎཱདིཝསེན པུནཔྤུནཾ ཨབྷིཡོགོ.

ཨཱཙརིཡཔརམྤརཀཐཱཝཎྞནཱནཡོ ནིཊྛིཏོ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

བཱཧིརནིདཱནཀཐཱཝཎྞནཱནཡོ ནིཊྛིཏོ.

ཝེརཉྫཀཎྜཝཎྞནཱ

སེཡྻཐིདནྟི ¶ ¶ ཏཾ ཀཏམཾ, ཏཾ ཀཐནྟི ཝཱ ཨཏྠོ. ཨནིཡམནིདྡེསཝཙནནྟི ཨཏྟནོ ཨཏྠཾ སརཱུཔེན ནིཡམེཏྭཱ ནིདྡིསཏཱིཏི ནིཡམནིདྡེསོ, ན ནིཡམནིདྡེསོ ཨནིཡམནིདྡེསོ. སོཝ ཝུཙྩཏེ ཨནེནཱཏི ཝཙནནྟི ཨནིཡམནིདྡེསཝཙནཾ. ཏསྶཱཏི ཏེནཱཏིཔདསྶ. པརིཝིཏཀྐོཏི ‘‘ཀཏམེསཱནཾ ཁོ བུདྡྷཱནཾ བྷགཝནྟཱནཾ བྲཧྨཙརིཡཾ ན ཙིརཊྛིཏིཀཾ ཨཧོསཱི’’ཏིཨཱདིནཱ (པཱརཱ. ༡༨) པཝཏྟོ. པུབྦེ ཝཱ པཙྪཱ ཝཱཏི ཏེནཱཏིཔདཏོ ཧེཊྛཱ ཝུཏྟཔཱཋེ ཝཱ ཨུཔརི ཝཀྑམཱནཔཱཋེ ཝཱཏི ཨཏྠོ. ཨཏྠཏོ སིདྡྷེནཱཏི སཱམཏྠིཡཏོ སིདྡྷེན. ཏཏྲིདཾ མུཁམཏྟནིདསྶནནྟི ཏསྶཱ ཡཐཱཝུཏྟཡུཏྟིཡཱ པརིདཱིཔནེ ཨིདཾ ཨུཔཱཡམཏྟནིདསྶནཾ. མུཁཾ དྭཱརཾ ཨུཔཱཡོཏི ཧི ཨཏྠཏོ ཨེཀཾ.

སམཡསདྡོ དིསྶཏཱིཏི སམྦནྡྷོ. ཨསྶཱཏི སམཡསདྡསྶ སམཝཱཡོ ཨཏྠོཏི སམྦནྡྷོ. ཀཱལཉྩ སམཡཉྩ ཨུཔཱདཱཡཱཏི ཨེཏྠ ཀཱལོ ནཱམ ཨུཔསངྐམནསྶ ཡུཏྟཀཱལོ, སམཡོ ནཱམ སརཱིརབལཱདིཀཱརཎསམཝཱཡོ, ཏེ ཨུཔཱདཱཡ པཊིཙྩཱཏི ཨཏྠོ. ཁཎོཏི ཨོཀཱསོ. བུདྡྷུཔྤཱདཱདཡོ ཧི མགྒབྲཧྨཙརིཡསྶ ཨོཀཱསོ. སོ ཨེཝ སམཡོ. ཏེནེཝ ‘‘ཨེཀོཝཱ’’ཏི ཝུཏྟཾ. མཧཱསམཡོཏི མཧཱསམཱུཧོ. པཝནསྨིནྟི ཝནསཎྜེ. སམཡོཔི ཁོ ཏེ བྷདྡཱལཱིཏི ཨེཏྠ སམཡོཏི སིཀྑཱཔདཱཝིལངྒྷནསྶ ཧེཏུ, ཀོ སོ? ཨཏྟནོ ཝིཔྤཊིཔཏྟིཡཱ བྷགཝཏོ ཛཱནནཾ, སོ སམཡསངྑཱཏོ ཧེཏུ ཏསྶཱ ཨཔྤཊིཝིདྡྷོཏི ཨཏྠོ. བྷགཝཱཏིཨཱདི ཏསྶ པཊིཝིཛ྄ཛྷནཱཀཱརདསྶནཾ. ཨུགྒཧམཱནོཏི ཀིཉྩི ཀིཉྩི ཨུགྒཧེཏུཾ སམཏྠཏཱཡ ཨུགྒཧམཱནོ, སུམནཔརིབྦཱཛཀསྶེཝེཏཾ ནཱམཾ. སམཡཾ དིཊྛིཾ པཝདནྟི ཨེཏྠཱཏི སམཡཔྤཝཱདཀོ, མལླིཀཱཡ ཨཱརཱམོ. སྭེཝ ཏིནྡུཀཱཙཱིརསངྑཱཏཱཡ ཏིམྦརུརུཀྑཔནྟིཡཱ པརིཀྑིཏྟཏྟཱ ‘‘ཏིནྡུཀཱཙཱིར’’ནྟི ཙ, ཨེཀཱཝ ནིཝཱསཱ སཱལཱ ཨེཏྠཱཏི ‘‘ཨེཀསཱལཀོ’’ཏི ཙ ཝུཙྩཏི. ཨཏྠཱབྷིསམཡཱཏི ཡཐཱཝུཏྟསྶ དིཊྛདྷམྨིཀསམྤརཱཡིཀསྶ ཨཏྠསྶ ཧིཏསྶ པཊིལཱབྷཏོ. མཱནཱབྷིསམཡཱཏི མཱནཔྤཧཱནཱ. པཱིལ༹ནཊྛོཏི པཱིལ༹ནཾ ཏཾསམངྒིནོ ཧིཾསནཾ, ཨཝིཔྥཱརིཀཏཱཀརཎཾ, པཱིལ༹ནམེཝ ཨཏྠོ པཱིལ༹ནཊྛོ ¶ . སནྟཱཔོཏི དུཀྑདུཀྑཏཱདིཝསེན སནྟཱཔནཾ. ཝིཔརིཎཱམོཏི ཛརཱཡ མརཎེན ཙཱཏི དྭིདྷཱ ¶ ཝིཔརིཎཱམེཏབྦཏཱ ཨབྷིསམེཏབྦོ པཊིཝིཛ྄ཛྷིཏབྦོཏི ཨབྷིསམཡོ, སོཝ ཨབྷིསམཡཊྛོ, པཱིལ༹ནཱདཱིནི.

ཨེཏྠ ཙ ཨུཔསགྒཱནཾ ཛོཏཀམཏྟཏྟཱ སམཡསདྡསྶ ཨཏྠུདྡྷཱརེཔི སཨུཔསགྒོ ཨབྷིསམཡསདྡོ ཨུདྡྷཊོ. ཏཏྠ སངྒམཝསེན པཙྩཡཱནཾ ཕལུཔྤཱདནཾ པཊི ཨཡནཾ ཨེཀཏོ པཝཏྟི ཨེཏྠཱཏི སམཡོ, སམཝཱཡོ. ཝིཝཊྚཱུཔནིསྶཡསངྒམེ སཏི ཨེནྟི ཨེཏྠ སཏྟཱ པཝཏྟནྟཱིཏི སམཡོ, ཁཎོ. སམེཏི ཨེཏྠ སངྑཏདྷམྨོ, སཡཾ ཝཱ ཨེཏི ཨཱགཙྪཏི ཝིགཙྪཏི ཙཱཏི སམཡོ, ཀཱལོ. སམེནྟི ཨཝཡཝཱ ཨེཏསྨིཾ, སཡཾ ཝཱ ཏེསཱུཏི སམཡོ, སམཱུཧོ. པཙྩཡནྟརསངྒམེ ཨེཏི ཨཱགཙྪཏི ཨེཏསྨཱ ཕལནྟི སམཡོ, ཧེཏུ. སཉྙཱཝསེན ཝིཔལླཱསཏོ དྷམྨེསུ ཨེཏི ཨབྷིནིཝིསཏཱིཏི སམཡོ, དིཊྛི. སམཱིཔཾ ཨཡནཾ ཨུཔགམནཾ སམཡོ, པཊིལཱབྷོ. སམྨདེཝ སཧིཏཱནཾ ཝཱཙཱནཾ ཨཡནཾ ཝིགམོཏི སམཡོ, པཧཱནཾ. སམྨདེཝ, སཧིཏཱནཾ ཝཱ སཙྩཱནཾ ཨཡནཾ ཛཱནནནྟི སམཡོ, པཊིཝེདྷོ. ཨེཝཾ ཏསྨིཾ ཏསྨིཾ ཨཏྠེ སམཡསདྡསྶ པཝཏྟི ཝེདིཏབྦཱ.

ཨེཏྠ ཙ སམཡསདྡསྶ སཱམཉྙེན ཨནེཀཏྠཏཱ ཝུཏྟཱ. ན ཧི ཨེཀསྨིཾ ཨཏྠཝིསེསེ ཝཏྟམཱནོ སདྡོ ཏདཉྙེཔི ཝཏྟཏི. ཏསྨཱ ཨཏྠཱ ཝིཡ ཏཾཏཾཝཱཙཀཱ སམཡསདྡཱཔི བྷིནྣཱ ཨེཝཱཏི གཧེཏབྦཱ. ཨེཝཾ སབྦཏྠ ཨཏྠུདྡྷཱརེསུ.

ཏཏྠ ཏཐཱཏི ཏེསུ སུཏྟཱབྷིདྷམྨེསུ ཨུཔཡོགབྷུམྨཝཙནེཧི. ཨིདྷཱཏི ཝིནཡེ, ཨཉྙཐཱཏི ཀརཎཝཙནེན. ཨཙྩནྟམེཝཱཏི ནིརནྟརམེཝ. བྷཱཝོ ནཱམ ཀིརིཡཱ, ཀིརིཡཱཡ ཀིརིཡནྟརཱུཔལཀྑཎཾ བྷཱཝེནབྷཱཝལཀྑཎཾ, ཡཐཱ ཨུདཡེ སཏི ཙནྡེ ཛཱཏོ རཱཛཔུཏྟོཏི. ཨདྷིཀརཎཉྷཱིཏིཨཱདི ཨབྷིདྷམྨེ སམཡསདྡོ ཀཱལསམཱུཧཁཎསམཝཱཡཧེཏུསངྑཱཏེསུ པཉྩསུ ཨཏྠེསུ ཝཏྟཏི, ན ཝིནཡེ ཝིཡ ཀཱལེ ཨེཝ, ཏེསུ ཙ ཀཱལསམཱུཧཏྠཱ དྭེ ཏཏྠ ཝུཏྟཱནཾ ཕསྶཱདིདྷམྨཱནཾ ཨདྷིཀརཎབྷཱཝེན ནིདྡིསིཏུཾ ཡུཏྟཱ. ཁཎསམཝཱཡཧེཏུཨཏྠཱ པན ཏཡོཔི ཨཏྟནོ བྷཱཝེན ཕསྶཱདཱིནཾ བྷཱཝསྶ ཨུཔལཀྑཎབྷཱཝེན ¶ ནིདྡིསིཏུཾ ཡུཏྟཱཏི ཝིབྷཱཝནམུཁེན ཡཐཱཝུཏྟམཏྠཾ སམཏྠེཏུཾ ཝུཏྟཾ. ཏཏྠ ཡསྨིཉྷི ཀཱལེ, དྷམྨསམཱུཧེ ཝཱ སམཡེ ཨདྷིཀརཎབྷཱུཏེ ཀུསལཾ ཨུཔྤནྣཾ, ཏསྨིཉྙེཝ ཀཱལེ, དྷམྨསམཱུཧེ ཝཱ སམཡེ ཕསྶཱདཡོ ཧོནྟཱིཏི ཨེཝཾ ཨདྷིཀརཎཏྠཡོཛནཱ, ཡསྨིཾ པན ཁཎེ, སམཝཱཡེ ཧེཏུམྷི ཝཱ སམཡེ སཏི ཝིཛྫམཱནེ ཀུསལཾ ཨུཔྤནྣཾ, ཏསྨིཉྙེཝ ཁཎཱདིམྷི སམཡེཔི ཝིཛྫམཱནེ ཕསྶཱདཡོ ཧོནྟཱིཏི བྷཱཝེནབྷཱཝལཀྑཎཏྠཡོཛནཱ ཙ ཝེདིཏབྦཱ.

ཧོཏི ¶ ཙེཏྠཱཏི ཨེཏྠ ཡཐཱཝུཏྟཨཏྠཝིསཡེ སངྒཧགཱཐཱ ཧོཏི. ཨཉྙཏྲཱཏི སུཏྟཱབྷིདྷམྨེསུ. ཨབྷིལཱཔམཏྟབྷེདོཏི དེསནཱཝིལཱསཏོ སདྡམཏྟེནེཝ བྷེདོ, ན ཨཏྠཏོ.

ཨཝིསེསེནཱཏི སཱམཉྙེན. ཨིརིཡཱཔཐོཏིཨཱདཱིསུ ཨིརིཡཱཡ སབྦདྭཱརིཀཀིརིཡཱཡ པཐོ པཝཏྟནཊྛཱནཾ ཏབྦིནིམུཏྟཀམྨསྶ ཨབྷཱཝཱཏི ཋཱནཱདཡོ ཨིརིཡཱཔཐོ, སོཝ ཝིཧཱརོ. བྲཧྨབྷཱུཏཱ སེཊྛབྷཱུཏཱ པརཧིཏཙིཏྟཱདིཝསཔྤཝཏྟིཏོ མེཏྟཱདཡོ བྲཧྨཝིཧཱརོ ནཱམ. ཏདཝསེསཱ པན མཧགྒཏཱ སབྦནཱིཝརཎཝིགམནཱདིསིདྡྷེན ཛོཏནཱདིཨཏྠེན དིབྦཝིཧཱརོ ནཱམ. བྲཧྨཝིཧཱརབྷཱཝེན ཝིསུཾ གཧིཏཏྟཱ མེཏྟཱདཡོ ཨིདྷ ཨསངྒཧིཏཱ. ཨརིཡཱནམེཝ ཝིཧཱརོཏི ཕལསམཱཔཏྟིཡོ ཨརིཡཝིཧཱརོ ནཱམ.

རུཀྑཱདིམཱུལེཡེཝ མཱུལསདྡསྶ ནིརུལ༹ྷབྷཱཝཾ དསྶེཏུཾ ཨཔརེན མཱུལསདྡེན ཝིསེསེཏྭཱ ‘‘མཱུལམཱུལེ’’ཏི ཝུཏྟཾ, ཡཐཱ དུཀྑདུཀྑནྟི (ཝིབྷ. ཨཊྛ. ༡༩༠). ལོབྷཱདཱིནཾ དོསམཱུལཱདིཙིཏྟཱསཱདྷཱརཎཏྟཱ ‘‘ཨསཱདྷཱརཎཧེཏུམྷཱི’’ཏི ཝུཏྟཾ.

ཏཏྠ སིཡཱཏི ཏཏྠ ཝེརཉྫཱཡནྟིཨཱདཱིསུ པདེསུ ཀསྶཙི ཙོདནཱ སིཡཱཏི ཨཏྠོ. ཨུབྷཡཐཱ ནིདཱནཀིཏྟནསྶ པན ཀིཾ པཡོཛནནྟི? ཨཱཧ གོཙརགཱམནིདསྶནཏྠནྟིཨཱདི. ཏཏྠ ཨསྶཱཏི བྷགཝཏོ.

ཀིལམོཝ ཀིལམཐོ, ཨཏྟནོ ཨཏྟབྷཱཝསྶ ཀིལམཐོ ཨཏྟཀིལམཐོ, ཏསྶ ཨནུ ཨནུ ཡོགོ པུནཔྤུནཾ པཝཏྟནཾ ཨཏྟཀིལམཐཱནུཡོགོ. ཝཏྠུཀཱམཱརམྨཎེ སུཁེ སམྤཡོགཝསེན ལཱིནཱ ཡུཏྟཱ, ཀཱམཏཎྷཱ ¶ , ཏཾསཧཙརིཏེ ཀཱམེ སུཁེ ཝཱ ཨཱརམྨཎབྷཱུཏེ ཨལླཱིནཱ པཝཏྟཏཱིཏི ཀཱམསུཁལླིཀཱ ཏཎྷཱ, ཏསྶཱ ཀཱམསུཁལླིཀཱཡ ཨནུ ཨནུ ཡོགོ ཀཱམསུཁལླིཀཱནུཡོགོ. ལོཀེ སཾཝཌྜྷབྷཱཝནྟི ཨཱམིསོཔབྷོགེན སཾཝཌྜྷིཏབྷཱཝཾ. ཨུཔྤཛྫམཱནོ བཧུཛནཧིཏཱདིཨཏྠཱཡེཝ ཨུཔྤཛྫཏཱིཏི ཡོཛནཱ.

དིཊྛིསཱིལསཱམཉྙེན སཾཧཏཏྟཱ སངྒྷོཏི ཨིམམཏྠཾ ཝིབྷཱཝེནྟོ ཨཱཧ དིཊྛཱིཏིཨཱདི. ཨེཏྠ ཙ ‘‘ཡཱཡཾ དིཊྛི ཨརིཡཱ ནིཡྻཱནིཀཱ ནིཡྻཱཏི ཏཀྐརསྶ སམྨཱ དུཀྑཀྑཡཱཡ, ཏཐཱརཱུཔཱཡ དིཊྛིཡཱ དིཊྛིསཱམཉྙགཏོ ཝིཧརཏཱི’’ཏི (དཱི. ནི. ༣.༣༢༤, ༣༥༦; མ. ནི. ༡.༤༩༢; ༣.༥༤; ཨ. ནི. ༦.༡༢; པརི. ༢༧༤) ཨེཝཾ ཝུཏྟཱཡ དིཊྛིཡཱ. ‘‘ཡཱནི ཏཱནི སཱིལཱནི ཨཁཎྜཱནི…པེ… སམཱདྷིསཾཝཏྟནིཀཱནི, ཏཐཱརཱུཔེསུ སཱིལེསུ སཱིལསཱམཉྙགཏོ ཝིཧརཏཱི’’ཏི ¶ (དཱི. ནི. ༣.༣༢༤, ༣༥༦; མ. ནི. ༡.༤༩༢; ༣.༥༤; ཨ. ནི. ༦.༡༢; པརི. ༢༧༤) ཨེཝཾ ཝུཏྟཱནཉྩ སཱིལཱནཾ སཱམཉྙསངྑཱཏེན སངྒྷཱཏོ སངྒྷཊིཏོ སམཎགཎོ, ཏེནཱཏི ཨཏྠོ. ‘‘དིཊྛིསཱིལསཱམཉྙསངྒྷཱཏསངྒྷཱཏེནཱ’’ཏི ཝཱ པཱཋེནེཏྠ བྷཝིཏབྦཾ, ཏསྶ དིཊྛིསཱིལསཱམཉྙབྷཱུཏེན སཾཧནནེན སངྒྷཱཏོ སམཎགཎོ, ཏེནཱཏི ཨཏྠོ. ཨེཝཉྷི པཱཋེ སདྡཏོ ཨཏྠོ ཡུཏྟཏརོ ཧོཏི. ཨསྶཱཏི མཧཏོ བྷིཀྑུསངྒྷསྶ.

བྲཧྨཾ ཨཎཏཱིཏི ཨེཏྠ བྲཧྨ-སདྡེན ཝེདོ ཝུཙྩཏི, སོ མནྟབྲཧྨཀཔྤཝསེན ཏིཝིདྷོ. ཏཏྠ ཨིརུཝེདཱདཡོ ཏཡོ ཝེདཱ མནྟཱ, ཏེ ཙ པདྷཱནཱ, ཨིཏརེ པན སནྣིསྶིཏཱ, ཏེན པདྷཱནསྶེཝ གཧཎཾ. མནྟེ སཛ྄ཛྷཱཡཏཱིཏི ཨིརུཝེདཱདིཀེ མནྟསཏྠེ སཛ྄ཛྷཱཡཏཱིཏི ཨཏྠོ. ཨིརུཝེདཱདཡོ ཧི གུཏྟབྷཱསིཏབྦཏཱཡ ‘‘མནྟཱ’’ཏི ཝུཙྩནྟི. ‘‘བཱཧིཏཔཱཔཏྟཱ བྲཱཧྨཎོ, སམིཏཔཱཔཏྟཱ སམཎོ’’ཏི ཡཐཱཝུཏྟམཏྠདྭཡཾ ཨུདཱཧརཎདྭཡེན ཝིབྷཱཝེཏུཾ ཝུཏྟཉྷེཏནྟིཨཱདི ཝུཏྟཾ. ‘‘སམིཏཏྟཱ ཧི པཱཔཱནཾ ‘སམཎོ’ཏི པཝུཙྩཏཱི’’ཏི ཧི ཨིདཾ ཝཙནཾ གཧེཏྭཱ ‘‘སམིཏཔཱཔཏྟཱ ‘སམཎོ’ཏི ཝུཙྩཏཱི’’ཏི ཝུཏྟཾ, བཱཧིཏཔཱཔོཏི ཨིདཾ པན ཨཉྙསྨིཾ གཱཐཱབནྡྷེ ཝུཏྟཝཙནཾ. ཡཐཱབྷུཙྩགུཎཱདྷིགཏནྟི ཡཐཱབྷཱུཏགུཎཱདྷིགཏཾ. སཀིཉྩནོཏི སདོསོ.

གོཏྟཝསེནཱཏི ཨེཏྠ གཾ ཏཱཡཏཱིཏི གོཏྟཾ, གོ-སདྡེན ཙེཏྠ ཨབྷིདྷཱནཾ བུདྡྷི ཙ ཝུཙྩཏི. ཀེནཙི པཱརིཛུཉྙེནཱཏི ཉཱཏིཔཱརིཛུཉྙཱདིནཱ ཀེནཙི པཱརིཛུཉྙེན ¶ , པརིཧཱནིཡཱཏི ཨཏྠོ. ཏཏོ པརནྟི ཝེརཉྫཱཡནྟིཨཱདིཝཙནཾ. ཨིཏྠམྦྷཱུཏཱཁྱཱནཏྠེ ཨུཔཡོགཝཙནནྟི ཨིཏྠཾ ཨིམཾ པཀཱརཾ བྷཱུཏོ ཨཱཔནྣོཏི ཨིཏྠམྦྷཱུཏོ, ཏསྶ ཨཱཁྱཱནཾ ཨིཏྠམྦྷཱུཏཱཁྱཱནཾ, སོཡེཝཏྠོ ཨིཏྠམྦྷཱུཏཱཁྱཱནཏྠོ. ཨཐ ཝཱ ‘‘ཨིཏྠཾ ཨེཝཾཔཀཱརོ བྷཱུཏོ ཛཱཏོ’’ཏི ཨེཝཾ ཀཐནཏྠོ ཨིཏྠམྦྷཱུཏཱཁྱཱནཏྠོ, ཏསྨིཾ ཨུཔཡོགཝཙནནྟི ཨཏྠོ. ཨེཏྠ ཙ ཨབྦྷུགྒཏོཏི ཨེཏྠ ཨབྷི-སདྡོ ཨིཏྠམྦྷཱུཏཱཁྱཱནཏྠཛོཏཀོ ཨབྷིབྷཝིཏྭཱ ཨུགྒམནཔྤཀཱརསྶ དཱིཔནཏོ, ཏེན ཡོགཏོ ཏཾ ཁོ པན བྷཝནྟཾ གོཏམནྟི ཨིདཾ ཨུཔཡོགཝཙནཾ སཱམིཨཏྠེཔི སམཱནེ ཨིཏྠམྦྷཱུཏཱཁྱཱནདཱིཔནཏོ ‘‘ཨིཏྠམྦྷཱུཏཱཁྱཱནཏྠེ’’ཏི ཝུཏྟཾ, ཏེནེཝཱཧ ‘‘ཏསྶ ཁོ པན བྷོཏོ གོཏམསྶཱཏི ཨཏྠོ’’ཏི.

ཨིདཾ ཝུཏྟཾ ཧོཏི – ཡཐཱ སཱདྷུ དེཝདཏྟོ མཱཏརམབྷཱིཏི ཨེཏྠ ཨབྷིསདྡཡོགཏོ ཨིཏྠམྦྷཱུཏཱཁྱཱནེ ཨུཔཡོགཝཙནཾ ཀཏཾ, ཨེཝམིདྷཱཔི ཏཾ ཁོ པན བྷཝནྟཾ གོཏམཾ ཨབྷི ཨེཝཾ ཀལྱཱཎོ ཀིཏྟིསདྡོ ཨུགྒཏོཏི ཨབྷིསདྡཡོགཏོ ཨིཏྠམྦྷཱུཏཱཁྱཱནེ ཨུཔཡོགཝཙནནྟི. སཱདྷུ དེཝདཏྟོ མཱཏརམབྷཱིཏི ཨེཏྠ ཧི ‘‘དེཝདཏྟོ མཱཏརམབྷི མཱཏརི ཝིསཡེ མཱཏུཡཱ ཝཱ སཱདྷཱུ’’ཏི ཨེཝཾ ཨདྷིཀརཎཏྠེ ཝཱ སཱམིཨཏྠེ ཝཱ བྷུམྨཝཙནསྶ སཱམིཝཙནསྶ ཝཱ པསངྒེ ཨིཏྠམྦྷཱུཏཱཁྱཱནཏྠཛོཏཀེན ¶ ཨབྷིསདྡེན ཡོགེ ཨུཔཡོགཝཙནཾ ཀཏཾ, ཡཐཱ ཙེཏྠ དེཝདཏྟོ མཱཏུཝིསཡེ མཱཏུསམྦནྡྷཱི ཝཱ སོ ཝུཏྟཔྤཀཱརཔྤཏྟོཏི ཨཡམཏྠོ ཝིཉྙཱཡཏི, ཨེཝམིདྷཱཔི བྷོཏོ གོཏམསྶ སམྦནྡྷཱི ཀིཏྟིསདྡོ ཨབྦྷུགྒཏོ ཨབྷིབྷཝིཏྭཱ ཨུགྒམནཔཀཱརཔྤཏྟོཏི ཨཡམཏྠོ ཝིཉྙཱཡཏི. ཏཏྠ ཧི དེཝདཏྟགྒཧཎཾ ཝིཡ ཨིདྷ ཀིཏྟིསདྡགྒཧཎཾ, ཏཏྠ མཱཏརནྟི ཝཙནཾ ཝིཡ ཨིདྷ ཏཾ ཁོ པན བྷཝནྟཾ གོཏམནྟི ཝཙནཾ, ཏཏྠ སཱདྷུསདྡགྒཧཎཾ ཝིཡ ཨིདྷ ཨུགྒཏསདྡགྒཧཎཾ ཝེདིཏབྦཾ. ཀིཏྟིསདྡོཏི ཀིཏྟིབྷཱུཏོ སདྡོ, ན ཀེཝལོཏི དསྶནཏྠཾ ཝིསེསིཏནྟི ཨཱཧ ‘‘ཀིཏྟི ཨེཝཱ’’ཏི. ཏཏོ ཀིཏྟཱིཏི ཐུཏི, ཏསྶཱ པཀཱསཀོ སདྡོ ཀིཏྟིསདྡོཏི དསྶེཏུཾ ‘‘ཐུཏིགྷོསོ ཝཱ’’ཏི ཝུཏྟཾ.

སོ བྷགཝཱཏི ཨེཏྠ སོཏི པསིདྡྷིཡཾ, ཡོ སོ སམཏྟིཾས པཱརམིཡོ པཱུརེཏྭཱ སབྦཀིལེསེ བྷཉྫིཏྭཱ དསསཧསྶིལོཀདྷཱཏུཾ ཀམྤེནྟོ ཨནུཏྟརཾ ¶ སམྨཱསམྦོདྷིཾ ཨབྷིསམྦུདྡྷོ, སོ ལོཀེ ཨཏིཔཱཀཊོཏི ‘‘སོ བྷགཝཱ’’ཏི ཝུཏྟཾ. བྷགཝཱཏི ཙ ཨིདཾ སཏྠུ ནཱམཀིཏྟནཾ, ན གུཎཀིཏྟནཾ. པརཏོ པན བྷགཝཱཏི གུཎཀིཏྟནམེཝ. ཨིམིནཱ ཙ ཨིམིནཱ ཙཱཏི ཨེཏེན ཨརཧནྟིཨཱདིཔདཱནཾ པཙྩེཀཾ ཨནེཀགུཎགཎཾ པཊིཙྩ པཝཏྟབྷཱཝཾ དསྶེཏི.

སུཝིདཱུརཝིདཱུརེཏི དྭཱིཧི སདྡེཧི ཨཏིཝིཡ དཱུརེཏི དསྶེཏི, སུཝིདཱུརཏཱ ཨེཝ ཧི ཝིདཱུརཏཱ. སཝཱསནཱནཾ ཀིལེསཱནཾ ཝིདྡྷཾསིཏཏྟཱཏི ཨིམིནཱ པཙྩེཀབུདྡྷཱདཱིཧི ཨསཱདྷཱརཎཾ བྷགཝཏོ ཨརཧཏྟནྟི དསྶེཏི ཏེསཾ ཝཱསནཱཡ ཨཔྤཧཱིནཏྟཱ, ཝཱསནཱ ཙ ནཱམ ནིཀྐིལེསསྶཱཔི སཀལཉེཡྻཱནཝབོདྷཱདིདྭཱརཏྟཡཔྤཡོགཝིགུཎཏཱཧེཏུབྷཱུཏོ ཀིལེསནིཧིཏོ ཨཱཀཱརོ ཙིརནིགལི༹ཏཔཱདཱནཾ ནིགལ༹མོཀྑེཔི སངྐུཙིཏཏཱགམནཧེཏུཀོ ནིགལ༹ནིཧིཏོ ཨཱཀཱརོ ཝིཡ. ཡཱཡ པིལིནྡཝཙྪཱདཱིནཾ ཝསལཝོཧཱརཱདིཝིགུཎཏཱ ཧོཏི, ཨཡཾ ཝཱསནཱཏི གཧེཏབྦཱ. ཨཱརཀཱཏི ཨེཏྠ ཨཱཀཱརསྶ རསྶཏྟཾ ཀ-ཀཱརསྶ ཙ ཧ-ཀཱརཾ སཱནུསྶརཾ ཀཏྭཱ ནིརུཏྟིནཡེན ‘‘ཨརཧ’’ནྟི པདསིདྡྷི ཝེདིཏབྦཱ. ཨེཝཾ ཨུཔརིཔི ཡཐཱརཧཾ ནིརུཏྟིནཡེན པདསིདྡྷི ཝེདིཏབྦཱ. ཡཉྩེཏཾ སཾསཱརཙཀྐནྟི སམྦནྡྷོ. པུཉྙཱདཱིཏི ཨཱདི-སདྡེན ཨཔུཉྙཱབྷིསངྑཱརཨཱནེཉྫཱབྷིསངྑཱརེ སངྒཎྷཱཏི. ཨཱསཝཱ ཨེཝ ཨཝིཛྫཱདཱིནཾ ཀཱརཎཏྟཱ སམུདཡོཏི ཨཱཧ ‘‘ཨཱསཝསམུདཡམཡེནཱ’’ཏི. ‘‘ཨཱསཝསམུདཡཱ ཨཝིཛྫཱསམུདཡོ’’ཏི (མ. ནི. ༡.༡༠༣) ཧི ཝུཏྟཾ. ཝིཔཱཀཀཊཏྟཱརཱུཔཔྤབྷེདོ ཏིབྷཝོ ཨེཝ རཐོ, ཏསྨིཾ ཏིབྷཝརཐེ. སཾསཱརཙཀྐནྟི ཡཐཱཝུཏྟཀིལེསཀམྨཝིཔཱཀསམུདཡོ.

‘‘ཁནྡྷཱནཉྩ ¶ པཊིཔཱཊི, དྷཱཏུཨཱཡཏནཱན ཙ;

ཨབྦོཙྪིནྣཾ ཝཏྟམཱནཱ, ‘སཾསཱརོ’ཏི པཝུཙྩཏཱི’’ཏི. (ཝིསུདྡྷི. ༢.༦༡༨; དཱི. ནི. ཨཊྛ. ༢.༩༥ ཨཔསཱདནཱཝཎྞནཱ; སཾ. ནི. ཨཊྛ. ༢.༢.༦༠; ཨ. ནི. ཨཊྛ. ༢.༤.༡༩༩; དྷ. ས. ཨཊྛ. ནིདཱནཀཐཱ; ཝིབྷ. ཨཊྛ. ༢༢༦ སངྑཱརཔདནིདྡེས; སུ. ནི. ཨཊྛ. ༢.༥༢༣; ཨུདཱ. ཨཊྛ. ༣༩; ཨིཏིཝུ. ཨཊྛ. ༡༤, ༥༨; ཐེརགཱ. ཨཊྛ. ༡.༦༧, ༩༩; བུ. ཝཾ. ཨཊྛ. ༥༨; པཊི. མ. ཨཊྛ. ༢.༡.༡༡༧; ཙཱུལ༹ནི. ཨཊྛ. ༦) –

ཨེཝཾ ཝུཏྟོ སཾསཱརོཝ ཙཀྐཾ ཝིཡ པརིབྦྷམནཏོ ཙཀྐཾ, ཏསྶ ཙཀྐསྶ སབྦེ ཨརཱ ཧཏཱཏི སམྦནྡྷོ. ཨནེནཱཏི བྷགཝཏཱ. བོདྷཱིཏི ཉཱཎཾ, ཏཾ ¶ ཨེཏྠ མཎྜཾ པསནྣཾ ཛཱཏནྟི བོདྷིམཎྜོ. ཀམྨཀྑཡཀརཾ ཉཱཎཕརསུནྟི ཨརཧཏྟམགྒཉཱཎཾ ཝུཏྟཾ, ཏཾ ཚིནྡིཏབྦཾ ཨབྷིསངྑཱརསངྑཱཏཾ ཀམྨཾ པརིཙྪིནྡཏཱིཏི དསྶེཏུཾ ཀམྨཀྑཡཀརཝིསེསནཝིསིཊྛཾ ཝུཏྟནྟི ཝེདིཏབྦཾ.

ཨེཝཾ ཀཏིཔཡངྒེཧི སཾསཱརཙཀྐཾ ཏདཝསེསངྒེཧི ཕལབྷཱུཏནཱམརཱུཔདྷམྨེཧི ཏིབྷཝརཐཉྩ ཏསྨིཾ རཐེ ཡོཛིཏསཾསཱརཙཀྐཱརཱནཾ ཧནནཔྤཀཱརཉྩ དསྶེཏྭཱ ཨིདཱནི སབྦེཧིཔི དྭཱདསཧི པཊིཙྩསམུཔྤཱདངྒེཧི རཐཝིརཧིཏམེཝ ཀེཝལཾ སཾསཱརཙཀྐཾ, ཏསྶ ཨརགྷཱཏནཔྤཀཱརབྷེདཉྩ དསྶེཏུཾ ཨཐཝཱཏིཨཱདི ཝུཏྟཾ. ཏཏྠ ཨནམཏགྒནྟི ཨནུ ཨནུ ཨམཏགྒཾ, སབྦཐཱ ཨནུགཙྪནྟེཧིཔི ཨཝིཉྙཱཏཀོཊིཀནྟི ཨཏྠོ. ཨཝིཛྫཱམཱུལཀཏྟཱ ཛརཱམརཎཔརིཡོསཱནཏྟཱཏི ཨིདཾ སངྑཱརཱདཱིནཾ དསནྣཾ ཨརབྷཱཝེན ཨེཀཏྟཾ སམཱརོཔེཏྭཱཏི ཝུཏྟཾ. ན ཧི ཏེསཾ པཙྩེཀཾ ཨཝིཛྫཱམཱུལཀཏཱ ཛརཱམརཎཔརིཡོསཱནཏཱ ཙ ཨཏྠི ཏཐཱ པཊིཙྩསམུཔྤཱདཔཱལི༹ཡཾ ཨཝུཏྟཏྟཱ. ཨཐ ཝཱ ཏེསམྤི ཡཐཱརཧཾ ཨཏྠཏོ ཨཝིཛྫཱམཱུལཀཏྟཾ, ཨཏྟནོ ཨཏྟནོ ལཀྑཎབྷཱུཏཁཎིཀཛརཱམརཎཝསེན ཏཔྤརིཡོསཱནཏཉྩ སནྡྷཱཡེཏཾ ཝུཏྟནྟི ཝེདིཏབྦཾ. ཨེཝཉྩ ཏེསཾ པཙྩེཀཾ ཨརབྷཱཝོ སིདྡྷོ ཧོཏི.

ཨེཝཾ སབྦཱཀཱརཾ སཾསཱརཙཀྐམེཝ དསྶེཏྭཱ ཨིདཱནི ཡེན ཉཱཎེན ཨིམསྶ སཾསཱརཙཀྐསྶ ཨརཱནཾ ཚེདོ བྷགཝཏོ སིདྡྷོ, ཏསྶ དྷམྨཊྛིཏིཉཱཎསྶ ‘‘པཙྩཡཔརིགྒཧེ པཉྙཱ དྷམྨཊྛིཏིཉཱཎ’’ནྟི (པཊི. མ. ༤; ༡.༤༥) མཱཏིཀཱ ཝུཏྟཏྟཱ བྷཝཙཀྐཱཝཡཝེསུ ཨཝིཛྫཱདཱིསུ པཙྩཡཔཙྩཡུཔྤནྣཏྟཱ པརིགྒཧཝསེན པཝཏྟིཨཱཀཱརཾ དསྶེཏྭཱ པརཏོ ཏསྶ ཨཏྠསྶ ནིགམནཝསེན ཝུཏྟེན ཨེཝམཡཾ ཨཝིཛྫཱཧེཏཱུཏིཨཱདིཀེན པཊིསམྦྷིདཱཔཱལི༹སཧིཏེན (པཊི. མ. ༡.༤༥) པཱཋེན ¶ སརཱུཔཏོ དྷམྨཊྛིཏིཉཱཎཾ, ཏསྶ ཙ ཏེསུཡེཝ ཨཝིཛྫཱདཱིསུ ཙཏུསངྑེཔཱདིཝསེན པཝཏྟིཝིབྷཱགཉྩ དསྶེཏྭཱ ཏཏོ པརཾ ཨིཏི བྷགཝཱཏིཨཱདིཔཱཋེན བྷགཝཏོ ཏེན དྷམྨཊྛིཏིཉཱཎེན པཊིཙྩསམུཔྤཱདསྶ སབྦཱཀཱརཏོ པཊིཝིདྡྷབྷཱཝཾ དསྶེཏྭཱ པུན ཨིམིནཱ དྷམྨཊྛིཏིཉཱཎེནཱཏིཨཱདིནཱ བྷགཝཏོ ཏེན ཉཱཎེན སཾསཱརཙཀྐཱརཱནཾ ཝིདྡྷཾསིཏབྷཱཝཾ དསྶེཏུཾ ཏཏྠ དུཀྑཱདཱིསུ ཨཉྙཱཎཾ ཨཝིཛྫཱཏིཨཱདི ཝུཏྟཾ. ཏཏྠ ཏིཎྞཾ ཨཱཡཏནཱནནྟི ཙཀྑུསོཏམནཱཡཏནཱནཾ ཏིཎྞཾ. ཨེས ནཡོ ཏིཎྞཾ ཕསྶཱནནྟིཨཱདཱིསུཔི. རཱུཔཏཎྷཱདིཝསེན ཚ ཏཎྷཱཀཱཡཱ ཨེཝ ཝེདིཏབྦཱ.

སགྒསམྤཏྟིནྟི ¶ ཀཱམསུགཏཱིསུ སམྤཏྟིཾ. ཏཐེཝཱཏི ཀཱམུཔཱདཱནཔཙྩཡཱ ཨེཝ. བྲཧྨལོཀསམྤཏྟིནྟི རཱུཔཱིབྲཧྨལོཀསམྤཏྟིཾ. ཏེབྷཱུམཀདྷམྨཝིསཡསྶ སབྦསྶཱཔི རཱགསྶ ཀིལེསཀཱམབྷཱཝཏོ བྷཝརཱགོཔི ཀཱམུཔཱདཱནམེཝཱཏི ཨཱཧ ‘‘ཀཱམུཔཱདཱནཔཙྩཡཱཡེཝ མེཏྟཾ བྷཱཝེཏཱི’’ཏི. སེསུཔཱདཱནམཱུལིཀཱསུཔཱིཏི དིཊྛུཔཱདཱནསཱིལབྦཏུཔཱདཱནཨཏྟཝཱདུཔཱདཱནམཱུལིཀཱསུཔི ཡོཛནཱསུ. ཏཏྲཱཡཾ ཡོཛནཱནཡོ – ཨིདྷེཀཙྩོ ‘‘ནཏྠི པརལོཀོ ཨུཙྪིཛྫཏི ཨཏྟཱ’’ཏི (དཱི. ནི. ༡.༨༥-༨༦ ཨཏྠཏོ སམཱནཾ) དིཊྛིཾ གཎྷཱཏི, སོ དིཊྛུཔཱདཱནཔཙྩཡཱ ཀཱཡེན དུཙྩརིཏཾ ཙརཏཱིཏིཨཱདིནཱ, ཨཔརོ ‘‘ཨསུཀསྨིཾ བྷཝེ ཨཏྟཱ ཨུཙྪིཛྫཏཱི’’ཏི དིཊྛིཾ གཧེཏྭཱ ཀཱམརཱུཔཱརཱུཔབྷཝཱུཔཔཏྟིཡཱ ཏཾ ཏཾ ཀུསལཾ ཀརོཏཱིཏིཨཱདིནཱ ཙ དིཊྛུཔཱདཱནམཱུལིཀཱ ཡོཛནཱ, ཨིམིནཱཝ ནཡེན ཨཏྟཝཱདུཔཱདཱནམཱུལིཀཱ ཡོཛནཱ ཝེདིཏབྦཱ. ཨཔརོ ‘‘སཱིལེན སུདྡྷི ཝཏེན སུདྡྷཱི’’ཏི ཨསུདྡྷིམགྒཾ ‘‘སུདྡྷིམགྒོ’’ཏི པརཱམསནྟོ སཱིལབྦཏུཔཱདཱནཔཙྩཡཱ ཀཱཡེན དུཙྩརིཏཾ ཙརཏཱིཏིཨཱདིནཱ སབྦབྷཝེསུ སཱིལབྦཏུཔཱདཱནམཱུལིཀཱ ཡོཛནཱ ཝེདིཏབྦཱ.

ཨིདཱནི ཡསྶ སཾསཱརཙཀྐཱརཱནཾ གྷཱཏནསམཏྠསྶ དྷམྨཊྛིཏིཉཱཎསྶ ཨཝིཛྫཱདིཔཙྩཡཔཨགྒཧཱཀཱརཾ དསྶེཏུཾ ཀཱམབྷཝེ ཙ ཨཝིཛྫཱ ཀཱམབྷཝེ སངྑཱརཱནཾ པཙྩཡོ ཧོཏཱིཏིཨཱདིནཱ ཨཝིཛྫཱདཱིནཾ པཙྩཡཔཙྩཡུཔྤནྣབྷཱཝོ དསྶིཏོ, ཏམེཝ ཉཱཎཾ ཨཝིཛྫཱདཱིསུ པཝཏྟིཨཱཀཱརེན སདྡྷིཾ པཊིསམྦྷིདཱམགྒཔཱལི༹ཾ ཨཱནེཏྭཱ ནིགམནཝསེན དསྶེནྟོ ཨེཝམཡནྟིཨཱདིམཱཧ. ཝིསུདྡྷིམགྒཊཱིཀཱཡཾ པན ‘‘ཨིདཱནི ཡྭཱཡཾ སཾསཱརཙཀྐཾ དསྶེནྟེན ཀཱམབྷཝེ ཨཝིཛྫཱ ཀཱམབྷཝེ སངྑཱརཱནཾ པཙྩཡོ ཧོཏཱིཏིཨཱདིནཱ ཨཝིཛྫཱདཱིནཾ པཙྩཡབྷཱཝོ སངྑཱརཱདཱིནཾ པཙྩཡུཔྤནྣབྷཱཝོ དསྶིཏོ, ཏམེཝ པཊིསམྦྷིདཱམགྒཔཱལི༹ཾ ཨཱནེཏྭཱ ནིགམནཝསེན དསྶེནྟོ ཨེཝམཡནྟིཨཱདིམཱཧཱ’’ཏི ཝུཏྟཾ. སཱརཏྠདཱིཔནིཡཱ ཝིནཡཊཱིཀཱཡཔི ཨཡམེཝ པཱཋོ ལིཁིཏོ. ཏཏྠ ཙ ཀཱམབྷཝེ ཙ ཨཝིཛྫཱཏིཨཱདིནཱ ཨཝིཛྫཱདཱིནཾ པཙྩཡཔཙྩཡུཔྤནྣབྷཱཝོ སཾསཱརཙཀྐཾ དསྶེནྟེན ཝུཏྟོ ན ཧོཏི ཏསྶ ཙ ཨཝིཛྫཱ ནཱབྷི, མཱུལཏྟཱཏིཨཱདིནཱ པུབྦེཝ དསྶིཏཏྟཱ ཨུཔརི ཙཀྐརཱུཔཏོ ¶ པཡོགཏྟེན ཨུཔསཾཧཱརཱབྷཱཝཱ ཙ. ‘‘ཨཔི ཙ ཏམེཝ པཙྩཡཔཙྩཡུཔྤནྣབྷཱཝཾ ནིགམནཝསེན དསྶེནྟོ’’ཏི ཙ ཝུཏྟཾ, ན ཙེཏྠ པཙྩཡཔཙྩཡུཔྤནྣབྷཱཝོ ནིགམནཝསེན པདྷཱནཏྟེན དསྶིཏོ, ཨཐ ཁོ པཙྩཡཔརིགྒཧཝསཔྤཝཏྟཾ དྷམྨཊྛིཏིཉཱཎམེཝ ¶ ཡཐཱཝུཏྟཔཙྩཡཔརིགྒཧཱཀཱརསྶ ནིགམནཝསེན དསྶིཏཾ. ཏཐཱ ཧི ‘‘ཨེཝམཡཾ ཨཝིཛྫཱ ཧེཏུ, སངྑཱརཱ ཧེཏུསམུཔྤནྣཱ, ཨུབྷོཔེཏེ དྷམྨཱ ཧེཏུསམུཔྤནྣཱཏི པཙྩཡཔརིགྒཧེ པཉྙཱ དྷམྨཊྛིཏིཉཱཎཾ. ཨཏཱིཏམྤི ཨདྡྷཱནཾ. ཨནཱགཏམྤི ཨདྡྷཱནཾ ཨཝིཛྫཱ ཧེཏུ…པེ… དྷམྨཊྛིཏིཉཱཎ’’ནྟི (པཊི. མ. ༡.༤༦) དྷམྨཊྛིཏིཉཱཎམེཝ པདྷཱནཏྟེན དསྶིཏཾ. ‘‘ཨཝིཛྫཱ ཧེཏུ, སངྑཱརཱ ཧེཏུསམུཔྤནྣཱ’’ཏིཨཱདི པན པཙྩཡཔརིགྒཧེ པཉྙཱ དྷམྨཊྛིཏིཉཱཎནྟི (པཊི. མ. མཱཏིཀཱ ༤; ༡.༤༥) ཝུཙྩམཱནཏྟཱ ཏསྶ པཙྩཡཔརིགྒཧཱཀཱརཔརིདཱིཔནཏྠཾ ཝིསཡཏྟེན ཝུཏྟཾ, ན པདྷཱནཏྟེན.

ཨཡཉྷེཏྠ ཨཏྠོ – ཨེཝནྟི ཨནནྟརེ ཝུཏྟནཡེན ཨཡཾ ཨཝིཛྫཱ སངྑཱརཱནཾ ཧེཏུ, སངྑཱརཱ ཙ ཏེན ཧེཏུནཱ སམུཔྤནྣཱ. ཨུབྷོཔེཏེཏི ཡསྨཱ ཨཡཾ ཨཝིཛྫཱ པརཔརིཀཔྤིཏཔཀཏིཨིསྶརཱདི ཝིཡ ཨཧེཏུཀཱ ནིཙྩཱ དྷུཝཱ ན ཧོཏི, ཨཐ ཁོ ‘‘ཨཱསཝསམུདཡཱ ཨཝིཛྫཱསམུདཡོ’’ཏི (མ. ནི. ༡.༡༠༣) ཝཙནཏོ སཡམྤི སཧེཏུཀཱ སངྑཏཱ ཨནིཙྩཱཡེཝ ཧོཏི, ཏསྨཱ ཨུབྷོཔེཏེ ཨཝིཛྫཱསངྑཱརཱ ཧེཏུསམུཔྤནྣཱཡེཝ. ཨིཏཱིཏི ཨེཝཾ ཡཐཱཝུཏྟནཡེན པཙྩཡཔརིགྒཎྷནེ ཡཱ པཉྙཱ, ཏཾ དྷམྨཱནཾ ཋིཏིསངྑཱཏེ ཀཱརཎེ ཡཱཐཱཝཏོ པཝཏྟཏྟཱ དྷམྨཊྛིཏིཉཱཎཾ ནཱམཱཏི.

ཨེཏྠ ཧི ཉཱཎསྶ ཝིསཡཝིབྷཱཝནཝསེནེཝ ཨཝིཛྫཱདཱིནཾ པཙྩཡཱདིབྷཱཝོ ཝུཏྟོ, ན པདྷཱནཏྟེན, ཉཱཎམེཝ པནེཏྠ པདྷཱནཏོ ཝུཏྟཾ, ཏསྨཱ ཨེཏསྶ ཉཱཎསྶ པཙྩཡཔརིགྒཧཱཀཱརདསྶནཏྠམེཝ ཧེཊྛཱཔི ཀཱམབྷཝེ ཙ ཨཝིཛྫཱཏིཨཱདིནཱ ཨཝིཛྫཱདཱིནཾ པཙྩཡཱདིབྷཱཝོ ཝུཏྟོ, ཨིདྷཱཔི ནིགམནཝསེན ཨུཔསཾཧཊོ, ན བྷཝཙཀྐདསྶནཏྠནྟི ཨཡམེཏྠ ཨཏྟནོ མཏི.

ཏཏྠ ཙ པཙྩཡུཔྤནྣདྷམྨེསུ ཨདིཊྛེསུ ཧེཏཱུནཾ པཙྩཡབྷཱཝོཔི ན སཀྐཱ དཊྛུནྟི ‘‘སངྑཱརཱ ཧེཏུསམུཔྤནྣཱ’’ཏི པཙྩཡཔརིགྒཧཉཱཎནིདྡེསེ (པཊི. མ. ༡.༤༥) པཙྩཡུཔྤནྣདྷམྨཱནམྤི གཧཎཾ ཀཏནྟི ཝེདིཏབྦཾ. ཨེཏེན ནཡེནཱཏི ཨཝིཛྫཱཡཾ ཝུཏྟནཡེན སངྑཱརཱ ཧེཏུ, ཝིཉྙཱཎཾ ཧེཏུསམུཔྤནྣནྟིཨཱདིནཱ སབྦཱནི ཛཱཏིཔརིཡོསཱནཱནི པདཱནི ཝིཏྠཱརེཏབྦཱནི.

ཨེཝཾ པཊིསམྦྷིདཱམགྒཔཱལི༹ཡཱ དྷམྨཊྛིཏིཉཱཎསྶ ཨཝིཛྫཱདཱིསུ པཝཏྟིཨཱཀཱརཾ དསྶེཏྭཱ ཨིདཱནི ཏསྶ ཏེསུ པཙྩཡེསུ ཨཉྙེཧིཔི ཨཱཀཱརེཧི པཝཏྟིཨཱཀཱརཾ ¶ དསྶེཏུཾ ཏཏྠཱཏིཨཱདི ཝུཏྟཾ. ཏཏྠ ཏཏྠཱཏི ཏེསུ པཊིཙྩསམུཔྤཱདངྒེསུ. སངྑིཔྤནྟི ཨེཏྠ ཨཝིཛྫཱདཡོ ཧེཏུསཱམཉྙེན ཕལསཱམཉྙེན ¶ ཝཱཏི སངྑེཔོ, སངྒཧོ, ཀོཊྛཱསོ རཱསཱིཏི ཨཏྠོ. སོ པན ཛཱཏིཏོ དུཝིདྷོཔི ཀཱལབྷེདཝསེན ཙཏུབྦིདྷོ ཛཱཏོ. པཙྩུཔྤནྣོ ཨདྡྷཱཏི ཨནུཝཏྟཏི. ཏཎྷུཔཱདཱནབྷཝཱ གཧིཏཱ ཀིལེསཀམྨསཱམཉྙཏོ ཏདཝིནཱབྷཱཝཏོ ཙ. ཨཝིཛྫཱདིཀིལེསཝཊྚམྤི ཝིཔཱཀདྷམྨདྷམྨཏཱསརིཀྑཏཱཡ ཨིདྷ ཀམྨཝཊྚམེཝཱཏི ཨཱཧ ཨིམེ པཉྩ དྷམྨཱཏིཨཱདི. ཝིཔཱཀཱ དྷམྨཱཏིཨཱདཱིསུ ཀམྨཛཨརཱུཔཀྑནྡྷཱནམེཝ ཝིཔཱཀསདྡཝཙནཱིཡཏྟེཔི ནཱམརཱུཔཱདིཔདེསུ རཱུཔམིསྶམྤི ཕལཔཉྩཀཾ ཨརཱུཔཔྤདྷཱནཏཱཡ ཙ ཏབྦཧུལཏཱཡ ཙ ‘‘ཝིཔཱཀཝཊྚ’’ནྟི ཝུཏྟཾ. ཝིཔཱཀཔྤདྷཱནཾ ཝཊྚཾ, ཝིཔཱཀབཧུལཾ ཝཱ ཝཊྚནྟི ཨཏྠོ. ཀམྨཛཔརིཡཱཡོ ཝཱ ཨེཏྠ ཝིཔཱཀ-སདྡོ དཊྛབྦོ. ཛཱཏིཛརཱམརཎཱཔདེསེནཱཏི པརམཏྠདྷམྨཝིནིམུཏྟཛཱཏིཛརཱམརཎཾ ནཱམ ནཏྠཱིཏི ཏདཔདེསེན ཏེསཾ ཀཐནེན ཏཾམུཁེནཱཏི ཨཏྠོ. ཨཱཀིརཱིཡནྟི པཀཱསཱིཡནྟཱིཏི ཨཱཀཱརཱ, ཨཝིཛྫཱདིསརཱུཔཱ, ཏཏོ པཙྩཡཱཀཱརཏོཏི ཨཏྠོ. ཨེཀོ སནྡྷཱིཏི ཨཝིཙྪེདཔྤཝཏྟིཧེཏུབྷཱུཏོ ཧེཏུཕལསནྡྷི, དུཏིཡོ ཕལཧེཏུསནྡྷི, ཏཏིཡོ ཧེཏུཕལསནྡྷཱིཏི དཊྛབྦཾ.

ཨེཝཾ དྷམྨཊྛིཏིཉཱཎསྶ ཨཝིཛྫཱདཱིསུ ཨནེཀེཧི པཀཱརེཧི པཝཏྟིཨཱཀཱརཾ དསྶེཏྭཱ ཨིདཱནི ཏེཧི, ཨཝུཏྟེཧི ཙ སབྦེཧི ཨཱཀཱརེཧི བྷགཝཏོ པཊིཙྩསམུཔྤཱདསྶ པཊིཝིདྡྷབྷཱཝཾ, ཏསྶ ཙ ཉཱཎསྶ དྷམྨཊྛིཏིཉཱཎསདྡཔྤཝཏྟིནིམིཏྟཏཾ པཊིསམྦྷིདཱཔཱལི༹ནཡེན དསྶེཏུཾ ཨུཔསཾཧཱརཝསེན ཨིཏི བྷགཝཱཏིཨཱདི ཝུཏྟཾ. ཏཏྠ ཨིཏཱིཏི ཝུཏྟཔྤཀཱརཔརཱམསནཾ, ཏེནཱཧ ཙཏུསངྑེཔནྟིཨཱདི. སབྦཱཀཱརཏོཏི ཨིདྷ ཀཱམབྷཝེ ཙ ཨཝིཛྫཱ ཀཱམབྷཝེ སངྑཱརཱནཾ པཙྩཡོཏིཨཱདིནཱ ཨིདྷ ཝུཏྟེཧི ཙ ཨཝུཏྟེཧི ཙ པཊིཙྩསམུཔྤཱདཝིབྷངྒཱདཱིསུ (ཝིབྷ. ༢༢༥ ཨཱདཡོ) ཨཱགཏེཧི སབྦེཧི པཀཱརེཧི པཊིཝིཛ྄ཛྷཏི. ཏནྟི ཡེན ཉཱཎེན བྷགཝཱ ཨེཝཾ ཛཱནཱཏི, ཏཾ ཉཱཎཾ. ཉཱཏཊྛེནཱཏི ཛཱནནཊྛེན. པཛཱནནཊྛེནཱཏི པཊིཝིཛ྄ཛྷནཊྛེན.

ཨིདཱནི ཡམིདཾ དྷམྨཊྛིཏིཉཱཎཾ པཙྩཡཔརིགྒཧཱཀཱརབྷེདེཧི སདྡྷིཾ པཔཉྩཏོ དསྶིཏཾ, ཏསྨིཾ ཨརགྷཱཏེ ཨེཏསྶ ཨུཔཡོགིཏཾ དསྶེཏུཾ ཨིམིནཱ དྷམྨཊྛིཏིཉཱཎེནཱཏིཨཱདི ཝུཏྟཾ. ཏཏྠ དྷམྨཊྛིཏིཉཱཎེན ཨརེ ཧནཱིཏི སམྦནྡྷོ. ཀཐནྟི? ཨཱཧ ‘‘ཏེ དྷམྨེ’’ཏིཨཱདི. ཏེ ཨཝིཛྫཱདིཀེ དྷམྨེ མཧཱཝཛིརཉཱཎཱཝུདྷེན ¶ ཏེན དྷམྨཊྛིཏིཉཱཎེན ཡཐཱབྷཱུཏཾ ཉཏྭཱ ཏེན བལཝཝིཔསྶནཱཝུདྷེན ནིབྦིནྡནྟོ ཨརིཡམགྒཱཝུདྷེན ཝིརཛྫནྟོ ཝིམུཙྩནྟོ ཨརེ ཧནཱིཏི ཡོཛནཱ. ཨརིཡམགྒཉཱཎམྤི ཧི ཀིཙྩཏོ སམུདཡསཙྩཱདིབོདྷཏོ ‘‘དྷམྨཊྛིཏིཉཱཎ’’ནྟི ཝུཙྩཏི.

ཨེཀེཀཾ དྷམྨཀྑནྡྷཾ ཨེཀེཀཝིཧཱརེན པཱུཛེམཱིཏི དྷམྨཀྑནྡྷཾ ཨཱརབྦྷ པཝཏྟཱཔི ཝིཧཱརཀརཎཔཱུཛཱ བྷགཝཏི པེམེནེཝ པཝཏྟཏྟཱ སདྷཱཏུཀཱདིཙེཏིཡཔཊིམཎྜིཏཏྟཱ ཙ བྷགཝཏོཝ པཱུཛཱཏི ¶ ཨཱཧ བྷགཝནྟཾ ཨུདྡིསྶཱཏིཨཱདི. ཀིལེསཱརཱིན སོ མུནཱིཏི ཨེཏྠ ནིགྒཧཱིཏལོཔོ, ཀིལེསཱརཱིནཾ ཧཏཏྟཱཏི ཨཏྠོ. པཙྩཡཱདཱིན ཙཱརཧོཏི ཨེཏྠཱཔི ནིགྒཧཱིཏལོཔོ དཊྛབྦོ.

སམྨཱསམྦུདྡྷོཏི ཨེཏྠ སཾ-སདྡོ སཡནྟི ཨཏྠེ པཝཏྟཏཱིཏི ཨཱཧ ‘‘སཱམ’’ནྟི, ཨཔརནེཡྻོ ཧུཏྭཱཏི ཨཏྠོ. སབྦདྷམྨཱནནྟི ཨིདཾ ཀསྶཙི ཝིསཡཝིསེསསྶ ཨགྒཧིཏཏྟཱ སིདྡྷཾ. པདེསགྒཧཎེ ཧི ཨསཏི གཧེཏབྦསྶ ནིཔྤདེསཏཱཝ ཝིཉྙཱཡཏི, ཡཐཱ དིཀྑིཏོ ན དདཱཏཱིཏི. ཨེཝཉྩ ཀཏྭཱ ཨཏྠཝིསེསཱནཔེཀྑཱ ཀཏྟརིཡེཝ བུདྡྷ-སདྡསིདྡྷི ཝེདིཏབྦཱ ཀམྨཝཙནིཙྪཱཡ ཨབྷཱཝཏོ. ‘‘སམྨཱ སཱམཾ བུདྡྷཏྟཱ སམྨཱསམྦུདྡྷོ’’ཏི ཨེཏྟཀམེཝ ཧི ཨིདྷ སདྡཏོ ལབྦྷཏི. སབྦདྷམྨཱནནྟི ཨིདཾ པན ཨཏྠཏོ ལབྦྷམཱནཾ གཧེཏྭཱ ཝུཏྟཾ, ན ཧི བུཛ྄ཛྷནཀིརིཡཱ ཨཝིསཡཱ ཡུཛྫཏི. ཨབྷིཉྙེཡྻེཏི ལཀྑཎཱདིཏོ ཨནིཙྩཱདིཏོ ཙ ཨབྷིཝིསིཊྛེན ལོཀིཡལོཀུཏྟརཉཱཎེན ཛཱནིཏབྦེ ཙཏུསཙྩདྷམྨེ. པརིཉྙེཡྻེཏི ཨནིཙྩཱདིཝསེན པརིཙྪིནྡིཏྭཱ ཛཱནིཏབྦཾ དུཀྑཾ ཨརིཡསཙྩམཱཧ. པཧཱཏབྦེཏི སམུདཡསཙྩཾ. སཙྪིཀཱཏབྦེཏི ནིརོདྷསཙྩཾ. བཧུཝཙནནིདྡེསོ པནེཏྠ སོཔཱདིསེསཱདིཀཾ པརིཡཱཡསིདྡྷཾ བྷེདཾ ཨཔེཀྑིཏྭཱ ཀཏོ.

ཨབྷིཉྙེཡྻནྟི གཱཐཱཡ པཧཱཏབྦབྷཱཝེཏབྦཱནཾ སམུདཡམགྒསཙྩཱནཾ ཧེཏུདྷམྨཱནཾ གཧཎེནེཝ ཏཔྥལཱནཾ དུཀྑསཙྩནིརོདྷསཙྩཱནམྤི སིདྡྷིཏོ པརིཉྙཱཏབྦཉྩ པརིཉྙཱཏཾ སཙྪིཀཱཏབྦཉྩ སཙྪིཀཏནྟི ཨིདམྤེཏྠ སངྒཧིཏམེཝཱཏི དཊྛབྦཾ, ཏེནཱཧ ‘‘ཏསྨཱ བུདྡྷོསྨཱི’’ཏི. ཡསྨཱ ཙཏྟཱརིཔི སཙྩཱནི མཡཱ བུདྡྷཱནི, ཏསྨཱ སབྦམྤི ཉེཡྻཾ བུདྡྷོསྨི, ཨབྦྷཉྙཱསིནྟི ཨཏྠོ.

ཝིཙིཏྟཝིསཡཔཏྠནཱཀཱརཔྤཝཏྟིཡཱ ཏཎྷཱ དུཀྑཝིཙིཏྟཏཱཡ པདྷཱནཀཱརཎནྟི ཨཱཧ ‘‘མཱུལཀཱརཎབྷཱཝེནཱ’’ཏི. ཨུབྷིནྣནྟི ཙཀྑུསྶ ཏཾསམུདཡསྶ ཙ. ཨཔྤཝཏྟཱིཏི ཨཔྤཝཏྟིནིམིཏྟཾ, ན ཨབྷཱཝམཏྟཾ. ཏསྶ ཨཝཏྠུཏྟཱ ¶ སཔྤཙྩཡཏྟཱདིཨནེཀབྷེདཱ སབྦསངྒཧིཏཱ. ནིརོདྷཔྤཛཱནནཱཏི སཙྪིཀིརིཡཱབྷིསམཡཝསེན ནིརོདྷསྶ པཊིཝིཛ྄ཛྷནཱ. ཨེཀེཀཔདུདྡྷཱརེནཱཔཱིཏི ཙཀྑུ ཙཀྑུསམུདཡོཏིཨཱདིནཱ ཨེཀེཀཀོཊྛཱསནིདྡྷཱརཎེནཱཔི, ན དུཀྑསཙྩཱདིསཱམཉྙཏོ ཨེཝཱཏི ཨདྷིཔྤཱཡོ. ཏཎྷཱཡཔི སངྑཱརདུཀྑཔརིཡཱཔནྣཏཱཡ པརིཉྙེཡྻཏྟཱ དུཀྑསཙྩབྷཱཝཾ དསྶེཏུཾ ‘‘ཚ ཏཎྷཱཀཱཡཱ’’ཏི ཝུཏྟཾ. ཡསྨིཾ པན ཨཏྟབྷཱཝེ སཱ ཨུཔྤཛྫཏི, ཏསྶ མཱུལཀཱརཎབྷཱཝེན སམུཊྛཱཔིཀཱ པུརིམབྷཝསིདྡྷཱ ཏཎྷཱ སམུདཡསཙྩནྟི གཧེཏབྦཱ. ཀསིཎཱནཱིཏི ཀསིཎཱརམྨཎཱནི ཛྷཱནཱནི. དྭཏྟིཾསཱཀཱརཱཏི ཀེསཱདཡོ ཏདཱརམྨཎཛ྄ཛྷཱནཱནི ཙ. ནཝ བྷཝཱཏི ཀཱམབྷཝཱདཡོ ཏཡོ སཉྙཱིབྷཝཱདཡོ ཏཡོ ཨེཀཝོཀཱརབྷཝཱདཡོ ཏཡོ ཙཱཏི ནཝ བྷཝཱ. ཙཏྟཱརི ཛྷཱནཱནཱིཏི ཨཱརམྨཎཝིསེསཾ ཨནཔེཀྑིཏྭཱ སཱམཉྙཏོ ཙཏྟཱརི ཛྷཱནཱནི ཝུཏྟཱནི. ཝིཔཱཀཀིརིཡཱནམྤི ཡཐཱརཧཾ ¶ སབྦཏྠ སངྒཧོ དཊྛབྦོ. ཨེཏྠ ཙ ཀུསལདྷམྨཱནཾ ཨུཔནིསྶཡབྷཱུཏཱ ཏཎྷཱསམུཊྛཱཔིཀཱཏི ཝེདིཏབྦཱ, ཀིརིཡདྷམྨཱནཾ པན ཏསྶ ཨཏྟབྷཱཝསྶ ཀཱརཎབྷཱུཏཱ ཏཎྷཱ. ཨནུལོམཏོཏི ཨེཏྠ ཨཝིཛྫཱ དུཀྑསཙྩཾ, ཏཾསམུཊྛཱཔིཀཱ པུརིམཏཎྷཱ ཨཱསཝཱ སམུདཡསཙྩནྟི ཡོཛེཏབྦཾ. སངྑཱརཱདཱིསུ པན ཨཝིཛྫཱདཡོཝ སམུདཡསཙྩབྷཱཝེན ཡོཛེཏབྦཱ. ཏེནཱཏི ཏསྨཱ.

ཝིཛྫཱཏི ཨཏྟནོ ཝིསཡཾ ཝིདིཏཾ ཀརོཏཱིཏི ཝིཛྫཱ. སམྤནྣཏྟཱཏི སམནྣཱགཏཏྟཱ, སམྤུཎྞཏྟཱ ཝཱ. ཏཏྲཱཏི ཨམྦཊྛསུཏྟེ. མནོམཡིདྡྷིཡཱཏི ཨེཏྠ ‘‘ཨིདྷ བྷིཀྑུ ཨིམམྷཱ ཀཱཡཱ ཨཉྙཾ ཀཱཡཾ ཨབྷིནིམྨིནཱཏཱི’’ཏི (དཱི. ནི. ༡.༢༣༦) ཝུཏྟཏྟཱ སརཱིརབྦྷནྟརཛྷཱནམནེན ཨཉྙསྶ སརཱིརསྶ ནིབྦཏྟིཝསེན པཝཏྟཱ མནོམཡིདྡྷི ནཱམ, སཱ ཨཏྠཏོ ཛྷཱནསམྤཡུཏྟཱ པཉྙཱཡེཝ. སཏྟ སདྡྷམྨཱ ནཱམ སདྡྷཱ ཧིརཱི ཨོཏྟཔྤཾ བཱཧུསཙྩཾ ཝཱིརིཡཾ སཏི པཉྙཱ ཙ. གཙྪཏི ཨམཏཾ དིསནྟི དུཀྑནིཏྠརཎཏྠིཀེཧི དཊྛབྦཏོ ཨམཏཾ ནིབྦཱནམེཝ དིསཾ གཙྪཏི, ཨིམིནཱ ཙ ཙརཎཱནཾ སིཀྑཏྟཡསངྒཧིཏཨརིཡམགྒབྷཱཝཏོ ནིབྦཱནཏྠིཀེཧི ཨེཀཾསེན ཨིཙྪིཏབྦཏཾ དསྶེཏི. ཨིདཱནིསྶཱ ཝིཛྫཱཙརཎསམྤདཱཡ སཱཝཀཱདིཨསཱདྷཱརཎཏཾ དསྶེཏུཾ ཏཏྠ ཝིཛྫཱསམྤདཱཏིཨཱདི ཝུཏྟཾ. ཏཏྠ ཨཱསཝཀྑཡཝིཛྫཱཝསེན སབྦཉྙུཏཱ སིཛ྄ཛྷཏི, ཙརཎདྷམྨབྷཱུཏེསུ ཛྷཱནེསུ ¶ ཨནྟོགདྷཱཡ མཧཱཀརུཎཱསམཱཔཏྟིཡཱ ཝསེན མཧཱཀཱརུཎིཀཏཱ སིཛ྄ཛྷཏཱིཏི ཨཱཧ ‘‘ཝིཛྫཱ…པེ… མཧཱཀཱརུཎིཀཏ’’ནྟི. ཡཐཱ ཏནྟི ཨེཏྠ ཏནྟི ནིཔཱཏམཏྟཾ, ཡཐཱ ཨཉྙོཔི ཝིཛྫཱཙརཎསམྤནྣོ བུདྡྷོ ནིཡོཛེཏི, ཏཐཱ ཨཡམྤཱིཏི ཨཏྠོ. ཏེནཱཏི ཨནཏྠཔརིཝཛྫནཨཏྠནིཡོཛནེན. ཨཏྟནྟཔཱདཡོཏི ཨཱདི-སདྡེན པརནྟཔཨུབྷཡནྟཔཱ གཧིཏཱ. ཨསཛྫམཱནོ བྷཝེསུ ཨཔཙྩཱགཙྪནྟོཏི པཧཱིནཱནཾ པུནཱནུཔྤཏྟིཏོ ན པུན ཨུཔགཙྪནྟོ.

ཏཏྲཱཏི ཡུཏྟཝཱཙཱབྷཱསནེ སཱདྷེཏབྦེ ཙེཏཾ བྷུམྨཾ. ཨབྷཱུཏནྟི ཨབྷཱུཏཏྠཾ. ཨཏཙྪནྟི ཏསྶེཝ ཝེཝཙནཾ. ཨནཏྠསཾཧིཏནྟི པིསུཎཱདིདོསཡུཏྟཾ. སམྨཱགདཏྟཱཏི སུནྡརཝཙནཏྟཱ, གདནཾ གདོ, ཀཐནནྟི ཨཏྠོ. སུནྡརོ གདོ ཝཙནམསྶཱཏི ‘‘སུགདོ’’ཏི ཝཏྟབྦེ ནིརུཏྟིནཡེན ད-ཀཱརསྶ ཏ-ཀཱརཾ ཀཏྭཱ ‘‘སུགཏོ’’ཏི ཝུཏྟཾ.

སབྷཱཝཏོཏི དུཀྑསབྷཱཝཏོ. ལོཀནྟི ཁནྡྷཱདིལོཀཾ. ཡཐཱཝུཏྟམཏྠཾ སུཏྟཏོ ཨཱཧ ཡཏྠཱཏིཨཱདི. ཏཏྠ ཡཏྠཱཏི ཡསྨིཾ ལོཀནྟསངྑཱཏེ ནིབྦཱནེ. ཏནྟི ལོཀསྶནྟཾ, ཨོཀཱསལོཀེ ཀཱཡགམནེན ཉཱཏབྦཾ པཏྟབྦནྟི ནཱཧཾ ཝདཱམཱིཏི ཡོཛནཱ. ཨིདཉྩ རོཧིཏདེཝཔུཏྟེན ལོཀསྶ ཀཱཡགཏིཝསེན ཨནྟགམནསྶ པུཙྪིཏཏྟཱ ཝུཏྟཾ. ཨཔྤཏྭཱ ལོཀསྶནྟནྟི ཁནྡྷཱདིལོཀཾ སནྡྷཱཡ ཝུཏྟཾ.

ཀིནྟེ ¶ པདསཱ ཨོཀཱསལོཀཔརིབྦྷམནེན, པརིམིཏཊྛཱནེ ཨེཝ ཏཾ ཉཱཎགམནེན གཙྪནྟཱནཾ དསྶེམཱིཏི དསྶེནྟོ ཨཔི ཙཱཏིཨཱདིམཱཧ. ཏཏྠ བྱཱམམཏྟེ ཀལེ༹ཝརེཏི སརཱིརེ. ཏེན རཱུཔཀྑནྡྷཾ དསྶེཏི. སསཉྙིམྷཱིཏི སཉྙཱསཱིསེན ཝེདནཱདཡོ ཏཡོ ཁནྡྷེ. སམནཀེཏི ཝིཉྙཱཎཀྑནྡྷཾ. ལོཀནྟི ཁནྡྷཱདིལོཀཾ, དུཀྑནྟི ཨཏྠོ. ལོཀནིརོདྷནྟི ནིབྦཱནེན ལོཀསྶ ནིརུཛ྄ཛྷནཾ, ནིབྦཱནམེཝ ཝཱ. ཨདེསམྤི ཧི ནིབྦཱནཾ ཡེསཾ ནིརོདྷཱཡ ཧོཏི, ཨུཔཙཱརཏོ ཏནྣིསྶིཏཾ ཝིཡ ཧོཏཱིཏི ‘‘བྱཱམམཏྟེ ཀལེ༹ཝརེ ལོཀནིརོདྷམྤི པཉྙཔེམཱི’’ཏི ཝུཏྟཾ, ཙཀྑུ ལོཀེ པིཡརཱུཔཾ, སཱཏརཱུཔཾ, ཨེཏྠེསཱ ཏཎྷཱ ནིརུཛ྄ཛྷམཱནཱ ནིརུཛ྄ཛྷཏཱིཏིཨཱདཱིསུ (དཱི. ནི. ༢.༤༠༡; ཝིབྷ. ༢༠༤) ཝིཡ. ཀུདཱཙནནྟི ཀདཱཙིཔི. ཨཔྤཏྭཱཏི ཨགྒམགྒེན ཨནདྷིགནྟྭཱ. ཏསྨཱཏི ཡསྨཱ ཏཾ གམནེན པཏྟུཾ ན སཀྐཱ, ཏསྨཱ. ཧཝེཏི ནིཔཱཏམཏྟཾ, ཨེཀཾསཏྠེ ཝཱ ¶ . ལོཀཝིདཱུཏི སབྷཱཝཱདིཏོ ཁནྡྷཱདིཛཱནནཀོ. ཙཏུསཙྩདྷམྨཱནཾ ཨབྷིསམིཏཏྟཱ སམིཏཱཝཱི, སམིཏཀིལེསོཏི ཝཱ ཨཏྠོ. ནཱསཱིསཏི ན པཏྠེཏི ཨཔྤཊིསནྡྷིཀཏྟཱ.

ཨེཝཾ སངྑེཔཏོ ལོཀཾ དསྶེཏྭཱ ཨིདཱནི ཝིཏྠཱརཏོ ཏཾ དསྶེཏུཾ ཨཔི ཙ ཏཡོ ལོཀཱཏིཨཱདི ཝུཏྟཾ. ཏཏྠ ཨིནྡྲིཡབདྡྷཱནཾ ཁནྡྷཱནཾ སམཱུཧསནྟཱནབྷཱུཏོ སཏྟལོཀོ. སོ ཧི རཱུཔཱདཱིསུ སཏྟཝིསཏྟཏཱཡ ‘‘སཏྟོ’’ཏི ཙ, ལོཀིཡནྟི ཨེཏྠ ཀམྨཀིལེསཱ ཏབྦིཔཱཀཱ ཙཱཏི ‘‘ལོཀོ’’ཏི ཙ ཝུཙྩཏི. ཨནིནྡྲིཡབདྡྷཱནཾ ཨུཏུཛརཱུཔཱནཾ སམཱུཧསནྟཱནབྷཱུཏོ ཨོཀཱསལོཀོ. སོ ཧི སཏྟསངྑཱརཱནཾ ཨཱདྷཱརཏོ ‘‘ཨོཀཱསོ’’ཏི ཙ, ལོཀིཡནྟི ཨེཏྠ ཏསྶཱདྷཱརཱ ཙ ཨཱདྷེཡྻབྷཱུཏཱཏི ‘‘ལོཀོ’’ཏི ཙ པཝུཙྩཏི. ཨིནྡྲིཡཱནིནྡྲིཡབདྡྷཱ པན སབྦེཝ ཨུཔཱདཱནཀྑནྡྷཱ པཙྩཡེཧི སངྑཏཊྛེན ལུཛྫནཔལུཛྫནཊྛེན ཙ ‘‘སངྑཱརལོཀོ’’ཏི ཙ ཝུཙྩཏི. ཨཱཧརཏི ཨཏྟནོ ཕལནྟི ཨཱཧཱརོ, པཙྩཡོ. ཏེན ཏིཊྛནསཱིལཱ ཨུཔྤཛྫིཏྭཱ ཡཱཝ བྷངྒཱ པཝཏྟནསཱིལཱཏི ཨཱཧཱརཊྛིཏིཀཱ, སབྦེ སངྑཏདྷམྨཱ. སབྦེ སཏྟཱཏི ཙ ཨིམིནཱཔི ཝེནེཡྻཱནུརཱུཔཏོ པུགྒལཱདྷིཊྛཱནཏྟཱ དེསནཱཡ སངྑཱརཱཝ གཧིཏཱ.

ཡཱཝཏཱ ཙནྡིམསཱུརིཡཱ པརིཧརནྟཱིཏི ཡཏྟཀེ ཋཱནེ ཙནྡིམསཱུརིཡཱ པརིཝཏྟནྟི པཝཏྟནྟི. ཝིརོཙནཱཏི ཏེསཾ ཝིརོཙནཧེཏུ ཨོབྷཱསནཧེཏཱུཏི ཧེཏུམྷི ནིསྶཀྐཝཙནཾ. དིསཱ བྷནྟཱིཏི སབྦཱ དིསཱ ཡཱཝཏཱ ཝིགཏནྡྷཀཱརཱ པཉྙཱཡནྟི. ཨཐ ཝཱ དིསཱཏི ཨུཔཡོགབཧུཝཙནཾ. ཏསྨཱ ཝིརོཙམཱནཱ ཙནྡིམསཱུརིཡཱ ཡཏྟཀཱ དིསཱ བྷནྟི ཨོབྷཱསེནྟཱིཏི ཨཏྠོ. ཏཱཝ སཧསྶདྷཱ ལོཀོཏི ཏཏྟཀེན པམཱཎེན སཧསྶཔྤཀཱརོ ཨོཀཱསལོཀོ, སཧསྶཙཀྐཝཱལཱ༹ནཱིཏི ཨཏྠོ. ཨེཏྠཱཏི སཧསྶཙཀྐཝཱལེ༹. ཝསོཏི ཨིདྡྷིསངྑཱཏོ ཝསོ ཝཏྟཏཱིཏི ཨཏྠོ.

ཏམྤཱིཏི ¶ ཏིཝིདྷམྤི ལོཀཾ. ཨསྶཱཏི ཨནེན བྷགཝཏཱ སངྑཱརལོཀོཔི སབྦཐཱ ཝིདིཏོཏི སམྦནྡྷོ. ཨེཀོ ལོཀོཏི ཡྭཱཡཾ ཧེཊྛཱ ཝུཏྟནཡེན སབྦསངྑཏཱནཾ པཙྩཡཱཡཏྟཝུཏྟིཏོ ཏེན སཱམཉྙེན སངྑཱརལོཀོ ཨེཀོ ཨེཀཝིདྷོ, ཨེས ནཡོ སེསེསུཔི. སབྦཏྠཱཔི ལོཀིཡདྷམྨཱཝ ལོཀོཏི ཨདྷིཔྤེཏཱ ལོཀུཏྟརཱནཾ པརིཉྙེཡྻཏྟཱབྷཱཝཱ. ཨུཔཱདཱནཱནཾ ཨཱརམྨཎབྷཱུཏཱ ཁནྡྷཱ ཨུཔཱདཱནཀྑནྡྷཱ. སཏྟ ཝིཉྙཱཎཊྛིཏིཡོཏི ¶ ཏཐཱ ཏཐཱ སམུཔྤནྣཱ པཛཱཡེཝ ཝུཙྩནྟི. ནཱནཏྟཀཱཡཱ ནཱནཏྟསཉྙིནོ, ནཱནཏྟཀཱཡཱ ཨེཀཏྟསཉྙིནོ, ཨེཀཏྟཀཱཡཱ ནཱནཏྟསཉྙིནོ, ཨེཀཏྟཀཱཡཱ ཨེཀཏྟསཉྙིནོ, ཧེཊྛིམཱ ཙ ཏཡོ ཨཱརུཔྤཱཏི ཨིམཱ སཏྟཝིདྷཱ པཛཱཡེཝ ཝིཉྙཱཎཾ ཏིཊྛཏི ཨེཏྠཱཏི ཝིཉྙཱཎཊྛིཏིཡོ ནཱམ. ཏཏྠ ནཱནཏྟཾ ཀཱཡོ ཨེཏེསམཏྠཱིཏི ནཱནཏྟཀཱཡཱ. ནཱནཏྟཾ སཉྙཱ ཨེཏེསནྟི ནཱནཏྟསཉྙིནོ. སཉྙཱསཱིསེནེཏྠ པཊིསནྡྷིཝིཉྙཱཎཾ གཧིཏཾ, ཨེས ནཡོ སེསེསུཔི.

ཏཏྠ སབྦམནུསྶཱ ཙ ཚ ཀཱམཱཝཙརདེཝཱ ཙ ནཱནཏྟཀཱཡཱ ནཱནཏྟསཉྙིནོ ནཱམ. ཏེསཉྷི ཨཉྙམཉྙཾ ཝིསདིསཏཱཡ ནཱནཱ ཀཱཡོ, པཊིསནྡྷིསཉྙཱ ཙ ནཝཝིདྷཏཱཡ ནཱནཱ. ཏཱིསུ པཋམཛ྄ཛྷཱནབྷཱུམཱིསུ བྲཧྨཀཱཡིཀཱ ཙེཝ ཙཏཱུསུ ཨཔཱཡེསུ སཏྟཱ ཙ ནཱནཏྟཀཱཡཱ ཨེཀཏྟསཉྙིནོ ནཱམ. ཏེསུ ཧི བྲཧྨཔཱརིསཛྫཱདཱིནཾ ཏིཎྞམྤི སརཱིརཾ ཨཉྙམཉྙཾ ཝིསདིསཾ, པཊིསནྡྷིསཉྙཱ པན པཋམཛ྄ཛྷཱནཝིཔཱཀཝསེན ཨེཀཱཝ, ཏཐཱ ཨཱཔཱཡིཀཱནམྤི, ཏེསཾ པན སབྦེསཾ ཨཀུསལཝིཔཱཀཱཧེཏུཀཱཝ པཊིསནྡྷིསཉྙཱ. དུཏིཡཛ྄ཛྷཱནབྷཱུམིཀཱ ཙ པརིཏྟཱབྷ ཨཔྤམཱཎཱབྷ ཨཱབྷསྶརཱ ཨེཀཏྟཀཱཡཱ ནཱནཏྟསཉྙིནོ ནཱམ. ཏེསཉྷི སབྦེསཾ ཨེཀཔྤམཱཎོཝ ཀཱཡོ, པཊིསནྡྷིསཉྙཱ པན དུཏིཡཏཏིཡཛ྄ཛྷཱནཝིཔཱཀཝསེན ནཱནཱ ཧོཏི. ཏཏིཡཛ྄ཛྷཱནབྷཱུམིཡཾ པརིཏྟསུབྷཱདཡོ ཏཡོ, ཙཏུཏྠཛ྄ཛྷཱནབྷཱུམིཡཾ ཨསཉྙསཏྟཝཛྫིཏཱ ཝེཧཔྥལཱ, པཉྩ ཙ སུདྡྷཱཝཱསཱཏི ནཝསུ བྷཱུམཱིསུ སཏྟཱ ཨེཀཏྟཀཱཡཱ ཨེཀཏྟསཉྙིནོ ནཱམ. ཨཱབྷཱནཱནཏྟེན པན སབྦཏྠ ཀཱཡནཱནཏྟཾ ན གཡ྄ཧཏི, སཎྛཱནནཱནཏྟེནེཝ གཡ྄ཧཏཱིཏི. ཨསཉྙསཏྟཱ ཝིཉྙཱཎཱབྷཱཝེན ཝིཉྙཱཎཊྛིཏིསངྑྱཾ ན གཙྪནྟི. ནེཝསཉྙཱ ནཱསཉྙཱཡཏནཾ པན ཡཐཱ སཉྙཱཡ, ཨེཝཾ ཝིཉྙཱཎསྶཱཔི སུཁུམཏྟཱ ནེཝཝིཉྙཱཎཾ ནཱཝིཉྙཱཎཾ, ཏསྨཱ པརིབྱཏྟཝིཉྙཱཎཀིཙྩཝནྟེསུ ཝིཉྙཱཎཊྛིཏཱིསུ ན གཡ྄ཧཏི. ཏསྨཱ སེསཱནི ཨཱཀཱསཱནཉྩཱཡཏནཱདཱིནི ཏཱིཎིཡེཝ གཧིཏཱནི, ཏེཧི སདྡྷིཾ ཨིམཱ སཏྟ ཝིཉྙཱཎཊྛིཏིཡོཏི ཝེདིཏབྦཱ.

ཨཊྛ ལོཀདྷམྨཱཏི ལཱབྷོ ཨལཱབྷོ ཡསོ ཨཡསོ ནིནྡཱ པསཾསཱ སུཁཾ དུཀྑནྟི ཨིམེ ཨཊྛ ལོཀསྶ སབྷཱཝཏྟཱ ལོཀདྷམྨཱ. ལཱབྷཱལཱབྷཱདིཔཙྩཡཱ ཨུཔྤཛྫནཀཱ པནེཏྠ ཨནུརོདྷཝིརོདྷཱ ཝཱ ལཱབྷཱདིསདྡེཧི ཝུཏྟཱཏི ཝེདིཏབྦཱ. ནཝ སཏྟཱཝཱསཱཏི ཧེཊྛཱ ཝུཏྟཱ སཏྟ ཝིཉྙཱཎཊྛིཏིཡོ ¶ ཨེཝ ¶ ཨསཉྙསཏྟཙཏུཏྠཱརུཔྤེཧི སདྡྷིཾ ‘‘ནཝ སཏྟཱཝཱསཱ’’ཏི ཝུཙྩནྟི. སཏྟཱ ཨཱཝསནྟི ཨེཏྠཱཏི སཏྟཱཝཱསཱ, སཏྟནིཀཱཡོ, ཨཏྠཏོ ཏཐཱ པཝཏྟཱ པཛཱ ཨེཝ ཨིདྷ སངྑཱརལོཀབྷཱཝེན གཡ྄ཧནྟཱིཏི ཝེདིཏབྦཱ. དསཱཡཏནཱནཱིཏི དྷམྨཱཡཏནམནཱཡཏནཝཛྫིཏཱནི དས.

ཨེཏྠ ཙ ཏཱིསུ བྷཝེསུ ཨསྶཱདདསྶནཝསེན ཏིསྶོ ཝེདནཱཝ ལོཀབྷཱཝེན ཝུཏྟཱ, ཏཐཱ པཙྩཡདསྶནཝསེན ཙཏྟཱརོཝ ཨཱཧཱརཱ. ཨཏྟགྒཱཧནིམིཏྟདསྶནཝསེན ཚ ཨཛ྄ཛྷཏྟིཀཱནེཝ ཨཱཡཏནཱནི. ཐཱུལསཉྙཱིབྷཝདསྶནཝསེན སཏྟ ཝིཉྙཱཎཊྛིཏིཡོཝ, ཨནུརོདྷཝིརོདྷདསྶནཝསེན ཨཊྛ ལོཀདྷམྨཱ ཝཱ, ཐཱུལཱཡཏནདསྶནཝསེན དསཱཡཏནཱནེཝ ལོཀབྷཱཝེན ཝུཏྟཱནི. ཏེསཾ གཧཎེནེཝ ཏནྣིསྶཡཏཔྤཊིབདྡྷཱ ཏདཱརམྨཎཱ སབྦེ ཏེབྷཱུམཀཱ ནཱམརཱུཔདྷམྨཱ ཨཏྠཏོ གཧིཏཱ ཨེཝ ཧོནྟི. སེསེཧི པན ཨེཀཝིདྷཱདིཀོཊྛཱསེཧི སརཱུཔེནེཝ ཏེ གཧིཏཱཏི ཝེདིཏབྦཾ.

ཨཱསཡཾ ཛཱནཱཏཱིཏིཨཱདཱིསུ ཨཱཧཙྩ ཙིཏྟཾ ཨེཏྠ སེཏཱིཏི ཨཱསཡོ, ཨཉྙསྨིཾ ཝིསཡེ པཝཏྟིཏྭཱཔི ཙིཏྟཾ ཡཏྠ སརསེན པཝིསིཏྭཱ ཏིཊྛཏི, སོ ཝཊྚཱསཡོ ཝིཝཊྚཱསཡོཏི དུཝིདྷོ. ཏཏྠ ཝཊྚཱསཡོཔི སསྶཏུཙྪེདདིཊྛིཝསེན དུཝིདྷོ. ཝིཝཊྚཱསཡོ པན ཝིཔསྶནཱསངྑཱཏཱ ཨནུལོམིཀཱ ཁནྟི, མགྒསངྑཱཏཾ ཡཐཱབྷཱུཏཉཱཎཉྩཱཏི དུཝིདྷོ. ཡཐཱཧ –

‘‘སསྶཏུཙྪེདདིཊྛི ཙ, ཁནྟི ཙེཝཱནུལོམིཀཾ;

ཡཐཱབྷཱུཏཉྩ ཡཾ ཉཱཎཾ, ཨེཏཾ ཨཱསཡསདྡིཏ’’ནྟི. (སཱརཏྠ. ཊཱི. ༡.ཝེརཉྫཀཎྜཝཎྞནཱ);

ཨེཏཾ དུཝིདྷམྤི ཨཱསཡཾ སཏྟཱནཾ ཨཔྤཝཏྟིཀྑཎེཡེཝ བྷགཝཱ སབྦཐཱ ཛཱནཱཏི. ཨནུསཡནྟི ཀཱམརཱགཱནུསཡཱདིཝསེན སཏྟཝིདྷཾ ཨནུསཡཾ. ཙརིཏནྟི ‘‘སུཙརིཏདུཙྩརིཏ’’ནྟི ནིདྡེསེ ཝུཏྟཾ. ཨཐ ཝཱ ཙརིཏནྟི ཙརིཡཱ, ཏེ རཱགཱདཡོ ཚ མཱུལཙརིཡཱ, སཾསགྒསནྣིཔཱཏཝསེན ཨནེཀཝིདྷཱ ཧོནྟི. ཨདྷིམུཏྟིནྟི ཨཛ྄ཛྷཱསཡདྷཱཏུཾ, ཏཏྠ ཏཏྠ ཙིཏྟསྶ ཨབྷིརུཙིཝསེན ནིནྣཏཱ, སཱ དུཝིདྷཱ ཧཱིནཱདྷིམུཏྟི པཎཱིཏཱདྷིམུཏྟཱིཏི. ཡཱཡ དུསྶཱིལཱདིཀེ ཧཱིནཱདྷིམུཏྟིཀེ ¶ སེཝནྟི, སཱ ཧཱིནཱདྷིམུཏྟི. ཡཱཡ པཎཱིཏཱདྷིམུཏྟིཀེ སེཝནྟི, སཱ པཎཱིཏཱདྷིམུཏྟི. ཏཾ དུཝིདྷམྤི ཨདྷིམུཏྟིཾ བྷགཝཱ སབྦཱཀཱརཏོ ཛཱནཱཏི. ཨཔྤཾ རཱགཱདིརཛཾ ཨེཏེསནྟི ཨཔྤརཛཀྑཱ, ཨནུསྶདརཱགཱདིདོསཱ. ཨུསྶདརཱགཱདིདོསཱ མཧཱརཛཀྑཱ. ཨུཔནིསྶཡབྷཱུཏེཧི ཏིཀྑེཧི སདྡྷཱདིཨིནྡྲིཡེཧི མུདུཀེཧི ཙ སམནྣཱགཏཱ ཏིཀྑིནྡྲིཡཱ མུདིནྡྲིཡཱ ཙ. ཧེཊྛཱ ཝུཏྟེཧི ཨཱསཡཱདཱིཧི སུནྡརེཧི ཨསུནྡརེཧི ཙ སམནྣཱགཏཱ སྭཱཀཱརཱ དྭཱཀཱརཱ ཙ ཝེདིཏབྦཱ. སམྨཏྟནིཡཱམཾ ¶ ཝིཉྙཱཔེཏུཾ སུཀརཱ སུཝིཉྙཱཔཡཱ, ཝིཔརཱིཏཱ དུཝིཉྙཱཔཡཱ. མགྒཕལཔཊིཝེདྷཱཡ ཨུཔནིསྶཡསམྤནྣཱ བྷབྦཱ, ཝིཔརཱིཏཱ ཨབྷབྦཱ. ཨེཝཾ སཏྟསནྟཱནགཏདྷམྨཝིསེསཛཱནནེནེཝ སཏྟལོཀོཔི ཝིདིཏོ དྷམྨཝིནིམུཏྟསྶ སཏྟསྶ ཨབྷཱཝཱཏི ཝེདིཏབྦཾ.

ཨེཀཾ ཙཀྐཝཱལ༹ཾ…པེ… པཉྙཱསཉྩ ཡོཛནཱནཱིཏི ཨེཏྠ ཧོཏཱིཏི སེསོ. པརིཀྑེཔཏོ པམཱཎཾ ཝུཙྩཏཱིཏི སེསོ. ཙཀྐཝཱལ༹སྶ སབྦཾ པརིམཎྜལཾ ཚཏྟིཾས སཏསཧསྶཱནི…པེ… སཏཱནི ཙ ཧོནྟཱིཏི ཡོཛེཏབྦཾ. ཏཏྠཱཏི ཙཀྐཝཱལེ༹, དྭེ སཏསཧསྶཱནི ཙཏྟཱརི ནཧུཏཱནི ཙ ཡོཛནཱནི ཡཱནི ཨེཏྟཀཾ ཨེཏྟཀཔྤམཱཎཾ བཧལཏྟེན ཨཡཾ ཝསུནྡྷརཱ སངྑཱཏཱཏི ཡོཛནཱ. ཏཏྠ ཨེཏྟཀནྟི ཀིརིཡཱཝིསེསནཾ དཊྛབྦཾ. སནྡྷཱརཀཾ ཛལཾ ཨེཏྟཀཾ ཨེཏྟཀཔྤམཱཎཾ ཧུཏྭཱ པཏིཊྛིཏནྟི ཡོཛནཱ. ཨེཏྠཱཏི ཙཀྐཝཱལེ༹. ཨཛ྄ཛྷོགཱལ༹ྷུགྒཏཱཏི ཨཛ྄ཛྷོགཱལ༹ྷཱ ཙ ཨུགྒཏཱ ཙ. བྲཧཱཏི མཧནྟཱ. ཡོཛནཱནཾ སཏཱནུཙྩོ, ཧིམཝཱ པཉྩཱཏི ཡོཛནཱནཾ པཉྩསཏཱནི ཨུཙྩོ ཨུབྦེདྷོ. ཏིཔཉྩཡོཛནཀྑནྡྷཔརིཀྑེཔཱཏི པནྣརསཡོཛནཔྤམཱཎཀྑནྡྷཔརིཎཱཧཱ. ནགཝ྄ཧཡཱཏི རུཀྑཱབྷིདྷཱནཱ ཛམྦཱུཏི ཡོཛནཱ. སམནྟཏོཏི སབྦསོབྷཱགེན, ཨཱཡཱམཏོ ཙ ཝིཏྠཱརཏོ ཙ སཏཡོཛནཝིཏྠཱརཱཏི ཨཏྠོ. ཡསྶཱནུབྷཱཝེནཱཏི ཡསྶཱ མཧནྟཏཱཀཔྤཊྛཱཡིཀཱདིཔྤཀཱརེན པབྷཱཝེན. པརིཀྑིཔིཏྭཱ ཏཾ སབྦཾ, ལོཀདྷཱཏུམཡཾ ཋིཏོཏི ཧེཊྛཱ ཝུཏྟཾ སབྦམྤི ཏཾ པརིཀྑིཔིཏྭཱ ཙཀྐཝཱལ༹སིལུཙྩཡོ ཋིཏོ, ཨཡཾ ཨེཀཱ ལོཀདྷཱཏུ ནཱམཱཏི ཨཏྠོ, མ-ཀཱརོ པདསནྡྷིཝསེན ཝུཏྟོ. ཨཐ ཝཱ ཏཾ སབྦཾ ལོཀདྷཱཏུཾ པརིཀྑིཔིཏྭཱ ཨཡཾ ཙཀྐཝཱལ༹སིལུཙྩཡོ ཋིཏོཏི ཡོཛེཏབྦཾ.

ཏཏྠཱཏི ¶ ཏསྶཾ ལོཀདྷཱཏུཡཾ. ཏཱཝཏིཾསབྷཝནནྟི ཏིདསཔུརཾ. ཨསུརབྷཝནནྟི ཨསུརཔུརཾ. ཨཝཱིཙིམཧཱནིརཡོ ཙ ཏཐཱ དསསཧསྶཡོཛནོ, སོ པན ཙཏུནྣཾ ལོཧབྷིཏྟཱིནམནྟརཱ ཡོཛནསཏཱཡཱམཝིཏྠཱརོཔི སམནྟཱ སོལ༹སཧི ཨུསྶདནིརཡེཧི སདྡྷིཾ དསསཧསྶཡོཛནོ ཝུཏྟོཏི ཝེདིཏབྦོ. ཏདནནྟརེསཱུཏི ཏེསཾ ཙཀྐཝཱལཱ༹ནཾ ཨནྟརེསུ. ལོཀཱནཾ ཙཀྐཝཱལཱ༹ནཾ ཨནྟརེ ཝིཝརེ བྷཝཏྟཱ ལོཀནྟརིཀཱ. ཏིཎྞཉྷི སཀཊཙཀྐཱནཾ པཏྟཱནཾ ཝཱ ཨཱསནྣཊྛཔིཏཱནཾ ཨནྟརསདིསེ ཏིཎྞཾ ཏིཎྞཾ ཙཀྐཝཱལཱ༹ནཾ ཨནྟརེསུ ཨེཀེཀོ ལོཀནྟརིཀནིརཡོ ཨཊྛཡོཛནསཧསྶཔྤམཱཎོ སཱིཏནརཀོ སཏྟཱནཾ ཨཀུསལཝིཔཱཀེན ནིབྦཏྟཏི. ཨནནྟཱནཱིཏི ཏིརིཡཾ ཨཊྛསུ དིསཱསུ ཙཀྐཝཱལཱ༹ནི ཨཱཀཱསོ ཝིཡ ཨནནྟཱནི. ཨུདྡྷཾ པན ཨདྷོ ཙ ཨནྟཱནེཝ. ཨནནྟེན བུདྡྷཉཱཎེནཱཏི ཨེཏྠ ཨནནྟཉེཡྻཔཊིཝེདྷསཱམཏྠིཡཡོགཏོཝ ཉཱཎཾ ‘‘ཨནནྟ’’ནྟི ཝེདིཏབྦཾ.

ཨཏྟནོཏི ནིསྶཀྐེ སཱམིཝཙནམེཏཾ, ཨཏྟཏོཏི ཨཏྠོ. གུཎེཧི ཨཏྟནོ ཝིསིཊྛཏརསྶཱཏི ¶ སམྦནྡྷོ, ཏརགྒཧཎཉྩེཏྠ ཨནུཏྟརོཏི པདསྶ ཨཏྠནིདྡེསཝསེན ཀཏཾ, ན ཝིསིཊྛསྶ ཀསྶཙི ཨཏྠིཏཱཡ. སདེཝཀེ ཧི ལོཀེ སདིསཀཔྤོཔི ནཱམ ཀོཙི ཏཐཱགཏསྶ ནཏྠི, ཀུཏོ སདིསོ, ཏེནཱཧ སཱིལགུཎེནཱཔི ཨསམོཏིཨཱདི. ཏཏྠ ཨསམེཧི སམྨཱསམྦུདྡྷེཧི སམོ ཨསམསམོ. ནཏྠི པཊིམཱ ཨེཏསྶཱཏི ཨཔྤཊིམོ. ཨེས ནཡོ སེསེསུཔི. ཏཏྠ ཨུཔམཱམཏྟཾ པཊིམཱ, སདིསཱུཔམཱ པཊིབྷཱགོ. ཡུགགྒཱཧཝསེན ཋིཏོ པཊིམོ པུགྒལོཏི ཝེདིཏབྦོ. ཨཏྟནཱཏི ཨཏྟཏོ. པུརིསདམྨེཏིཨཱདཱིསུ དམིཏབྦཱ དམྨཱ, ‘‘དམྨཔུརིསཱ’’ཏི ཝཏྟབྦེ ཝིསེསནསྶ པརནིཔཱཏཾ ཀཏྭཱ ‘‘པུརིསདམྨཱ’’ཏི ཝུཏྟཾ, པུརིསགྒཧཎཉྩེཏྠ ཨུཀྐཊྛཝསེན ཨིཏྠཱིནམྤི དམེཏབྦཏོ. ནིབྦིསཱ ཀཏཱ དོསཝིསསྶ ཝིནོདནེན. ཨཏྠཔདནྟི ཨཏྠཱབྷིབྱཉྫནཀཾ པདཾ, ཝཱཀྱནྟི ཨཏྠོ. ཨེཀཔདབྷཱཝེན ཙ ཨནཉྙསཱདྷཱརཎོ སཏྠུ པུརིསདམྨསཱརཐིབྷཱཝོ དསྶིཏོ ཧོཏི, ཏེནཱཧ བྷགཝཱ ཧཱིཏིཨཱདི. ཨཊྛ དིསཱཏི ཨཊྛ སམཱཔཏྟིཡོ. ཨསཛྫམཱནཱཏི ཝསཱིབྷཱཝཔྤཏྟིཡཱ ནིསྶངྒཙཱརཱ.

དིཊྛདྷམྨོ ཝུཙྩཏི པཙྩཀྑོ ཨཏྟབྷཱཝོ, ཏཏྠ ནིཡུཏྟོཏི དིཊྛདྷམྨིཀོ, ཨིདྷལོཀཏྠོ. ཀམྨཀིལེསཝསེན སམྤརེཏབྦཏོ སམཱགནྟབྦཏོ སམྤརཱཡོ ¶ , པརལོཀོ, ཏཏྠ ནིཡུཏྟོཏི སམྤརཱཡིཀོ, པརལོཀཏྠོ. པརམོ ཨུཏྟམོ ཨཏྠོ པརམཏྠོ, ནིབྦཱནཾ. སཧ ཨཏྠེན ཝཏྟཏཱིཏི སཏྠོ, བྷཎྜམཱུལེན ཝཱཎིཛྫཱཡ དེསནྟརཾ གཙྪནྟོ ཛནསམཱུཧོ. སོ ཨསྶ ཨཏྠཱིཏི སཏྠཱ, སཏྠཝཱཧོཏི ནིརུཏྟིནཡེན. སོ ཝིཡ བྷགཝཱཏི ཨཱཧ ‘‘སཏྠཱ, བྷགཝཱ སཏྠཝཱཧོ’’ཏི. ཨིདཱནི ཏམཏྠཾ ནིདྡེསཔཱལི༹ནཡེན དསྶེཏུཾ ཡཐཱ སཏྠཝཱཧོཏིཨཱདི ཝུཏྟཾ. ཏཏྠ སཏྠེཏི སཏྠིཀེ ཛནེ. ཀཾ ཨུདཀཾ ཏཱརེནྟི ཨེཏྠཱཏི ཀནྟཱརོ, ནིརུདཀོ ཨརཉྙཔྤདེསོ. ཙོརཱདཱིཧི ཨདྷིཊྛིཏཨརཉྙཔྤདེསཱཔི དུགྒམནཊྛེན ཏཾསདིསཏཱཡ ཀནྟཱརཱཏྭེཝ ནིརུལ༹ྷཱཏི སཱམཉྙཏོ ‘‘ཀནྟཱརཾ ཏཱརེཏཱི’’ཏི ཝཏྭཱ ཏཾ ཝིཝརནྟོ ཙོརཀནྟཱརནྟིཨཱདིམཱཧ.

བྷགཝཏོཏི ནིསྶཀྐེ སཱམིཝཙནཾ, བྷགཝནྟཏོ དྷམྨསྶཝནེནཱཏི ཨཏྠོ. ཡཐཱ ‘‘ཨུཔཛ྄ཛྷཱཡཏོ ཨཛ྄ཛྷེཏཱི’’ཏི, བྷགཝཏོ སནྟིཀེཏི ཝཱ ཨཏྠོ. སརེ ནིམིཏྟཾ ཨགྒཧེསཱིཏི པུབྦབུདྡྷུཔྤཱདེསུ སདྡྷམྨསྶཝནཔརིཙཡེན ‘‘དྷམྨོ ཨེསོ ཝུཙྩཏཱི’’ཏི སརེ ཨཱཀཱརཾ གཎྷི. པུབྦཱབྷིཡོགཝསེནེཝ ཧི ཨཱིདིསཱནཾ ཏིརཙྪཱནཱནཾ དྷམྨསྶཝནཱདཱིསུ པསཱདོ ཨུཔྤཛྫཏི ཝགྒུལིཨཱདཱིནཾ ཝིཡ. ཨིཏརཐཱ སབྦཏིརཙྪཱནཱནམྤི ཏཐཱ པསཱདུཔྤཏྟིཔྤསངྒཏོ. ཡདི ཧི ཨུཔྤཛྫེཡྻ, བྷགཝཱ ཨནནྟཙཀྐཝཱལེ༹སུ སབྦསཏྟཱནམྤི ཨེཀཀྑཎེ སཔྤཱཊིཧཱརིཡདྷམྨཾ སཱཝེཏུཾ སཀྐོཏཱིཏི སབྦསཏྟཱནམྤི ཨིཏོ པུབྦེཝ ཝིམུཏྟིཔྤསངྒོ སིཡཱ. ཡེ པན དེཝམནུསྶནཱགསུཔཎྞཱདཡོ པཀཏིཡཱཝ ཀམྨསྶཀཏཉྙཱཎཱདིཡུཏྟཱ ཧོནྟི, ཏེཡེཝ པུབྦེ ཨནུཔནིསྶཡཱཔི ¶ བྷགཝཏོ སདྡྷམྨསྶཝནཱདིནཱ པཋམཾ ཝིཝཊྚཱུཔནིསྶཡཾ པསཱདཾ ཨུཔྤཱདེཏུཾ སཀྐོནྟི, ན ཨིཏརེཏི གཧེཏབྦཾ. ཨརེ ཨཧམྤི ནཱམཱཏི ཨེཏྠ ‘‘ཀུཏོཧཾ ཨིདྷ ནིབྦཏྟོཏི ཨོལོཀེཏྭཱ མཎྜཱུཀབྷཱཝཏོཏི ཉཏྭཱ’’ཏི ཨིདཾ ཨེཏྟཀམྤི ཨརེ ཨཧམྤི ནཱམཱཏི ཝིམྷཡཝཙནེནེཝ སིཛ྄ཛྷཏཱིཏི ཨཝུཏྟནྟི ཝེདིཏབྦཾ. ཛལནྟི ཛལནྟོ ཝིཛྫོཏམཱནོ. མཎྜཱུཀོཧནྟི གཱཐཱཡ ཨུདཀེཏི སཉྫཱཏཊྛཱནདསྶནཾ, ཏེན ཐལམཎྜཱུཀཏཱ ནིཝཏྟནཾ ཀཏཾ ཧོཏི. ཨུདཀེ ཛཱཏཱནམྤི ཀཙྪཔཱདཱིནཾ ཐལགོཙརཏཱཔི ཨཏྠཱིཏི ཏཾ ནིཝཏྟནཏྠཾ ‘‘ཝཱརིགོཙརོ’’ཏི ཝུཏྟཾ, ཨུདཀསཉྩཱརཱིཏི ཨཏྠོ.

ཝིམོཀྑནྟིཀཉཱཎཝསེནཱཏི ཨེཏྠ སབྦསོ ཀིལེསེཧི ཝིམུཙྩཏཱིཏི ཝིམོཀྑོ, ཨགྒམགྒོ, ཏསྶ ཨནྟོ, ཨགྒཕལཾ, ཏཏྠ བྷཝཾ ཝིམོཀྑནྟིཀཾ, སབྦཉྙུཏཉྙཱཎེན སདྡྷིཾ སབྦམྤི བུདྡྷཉཱཎཾ. ཨིདཱནི སམྨཱསམྦུདྡྷཔདཏོ བུདྡྷཔདསྶ ¶ ཝིསེསཾ དསྶེཏུཾ ཡསྨཱ ཝཱཏིཨཱདི ཝུཏྟཾ. སམྨཱསམྦུདྡྷཔདེན ཧི སཏྠུ པཊིཝེདྷཉཱཎཱནུབྷཱཝོ ཝུཏྟོ, ཨིམིནཱ པན བུདྡྷཔདེན དེསནཱཉཱཎཱནུབྷཱཝོཔི, ཏེནཱཧ ཨཉྙེཔི སཏྟེ བོདྷེསཱིཏིཨཱདི.

གུཎཝིསིཊྛསཏྟུཏྟམགརུགཱརཝཱདྷིཝཙནནྟི སབྦེཧི སཱིལཱདིགུཎེཧི ཝིསིཊྛསྶ ཏཏོ ཨེཝ སབྦསཏྟེཧི ཨུཏྟམསྶ གརུནོ གཱརཝཝསེན ཝུཙྩམཱནཝཙནམིདཾ བྷགཝཱཏི. སེཊྛནྟི སེཊྛཝཱཙཀཾ ཝཙནཾ སེཊྛགུཎསཧཙརཎཏོ. ཨཐ ཝཱ ཝུཙྩཏཱིཏི ཝཙནཾ, ཨཏྠོ, སོ སེཊྛོཏི ཨཏྠོ. ཨུཏྟམནྟི ཨེཏྠཱཔི ཨེསེཝ ནཡོ. གརུགཱརཝཡུཏྟོཏི ཨེཏྠ གརུབྷཱཝོ གཱརཝཾ, གརུགུཎཡོགཏོ གརུཀརཎཾ ཝཱ གཱརཝཾ, ཏེན སཱཝཀཱདཱིནཾ ཨསཱདྷཱརཎཏཱཡ གརུབྷཱུཏེན མཧནྟེན གཱརཝེན ཡུཏྟོཏི གརུགཱརཝཡུཏྟོ. ཨཐ ཝཱ གརུ ཙ སབྦལོཀསྶ སིཀྑཀཏྟཱ ཏེནེཝ གཱརཝཡུཏྟོ ཙཱཏིཔི ཡོཛེཏབྦཾ.

ཨཝཏྠཱཡ ཝིདིཏཾ ཨཱཝཏྠིཀཾ. ཨེཝཾ ལིངྒིཀཾ. ནིམིཏྟཏོ ཨཱགཏཾ ནེམིཏྟིཀཾ. ཨདྷིཙྩ ཡཾཀིཉྩི ནིམིཏྟཾ ཨདྷིཝཙནཝསེན ཨནཔེཀྑིཏྭཱ པཝཏྟཾ ཨདྷིཙྩསམུཔྤནྣཾ, ཏེནཱཧ ‘‘ཝཙནཏྠམནཔེཀྑིཏྭཱ’’ཏི. ཡདིཙྪཱཡ ཨཱགཏཾ ཡཱདིཙྪཀཾ. ཨེཏྠ ཙ བཱཧིརཾ དཎྜཱདི ལིངྒཾ, ཨབྦྷནྟརཾ ཏེཝིཛྫཱདི ནིམིཏྟཾ. པཙུརཛནཝིསཡཾ ཝཱ དིསྶམཱནཾ ལིངྒཾ, ཏབྦིཔརཱིཏཾ ནིམིཏྟནྟི ཝེདིཏབྦཾ. སཙྪིཀཱཔཉྙཏྟཱིཏི སབྦདྷམྨཱནཾ སཙྪིཀིརིཡཱནིམིཏྟཱ པཉྙཏྟི. ཨཐ ཝཱ སཙྪིཀཱཔཉྙཏྟཱིཏི པཙྩཀྑསིདྡྷཱ པཉྙཏྟི. ཡཾགུཎནིམིཏྟཱ ཧི སཱ, ཏེ གུཎཱ སཏྠུ པཙྩཀྑབྷཱུཏཱཏི གུཎཱ ཝིཡ སཱཔི སཙྪིཀཏཱ ཨེཝ ནཱམ ཧོཏི, ན པརེསཾ, ཝོཧཱརམཏྟེནཱཏི ཨདྷིཔྤཱཡོ. ཡཾགུཎནེམིཏྟིཀནྟི ཡེཧི གུཎེཧི ནིམིཏྟབྷཱུཏེཧི ཨེཏཾ ནཱམཾ ནེམིཏྟིཀཉྩ ཛཱཏཾ. ཝདནྟཱིཏི དྷམྨསེནཱཔཏིསྶ གརུབྷཱཝཏོ བཧུཝཙནེནཱཧ, སངྒཱིཏིཀཱརེཧི ཝཱ ཀཏམནུཝཱདཾ སནྡྷཱཡ.

ཨིསྶརིཡཱདིབྷེདོ ¶ བྷགོ ཨསྶ ཨཏྠཱིཏི བྷགཱི. མགྒཕལཱདིཨརིཡགུཎཾ ཨརཉྙཱདིཝིཝེཀཊྛཱནཉྩ བྷཛི སེཝི སཱིལེནཱཏི བྷཛཱི. ཙཱིཝརཱདིཔཙྩཡཱནཾ ཨཏྠརསཱདཱིནཉྩ སཱིལཱདིགུཎཱནཉྩ བྷཱགཱི, དཱཡཱདོཏི ཨཏྠོ. ཝིབྷཛི ཨུདྡེསནིདྡེསཱདིཔྤཀཱརེཧི དྷམྨརཏནཾ པཝིབྷཛཱིཏི ཝིབྷཏྟཝཱ. རཱགཱདིཔཱཔདྷམྨཾ བྷགྒཾ ཨཀཱསཱིཏི བྷགཝཱཏི ཝུཙྩཏཱིཏི སབྦཏྠ སམྦནྡྷོ. གརུཔི ལོཀེ བྷགཝཱཏི ཝུཙྩཏཱིཏི ཨཱཧ ‘‘གརཱུ’’ཏི, ཡསྨཱ གརུ, ཏསྨཱཔི བྷགཝཱཏི ཨཏྠོ. པཱརམིཏཱསངྑཱཏཾ ¶ བྷགྱམསྶ ཨཏྠཱིཏི བྷགྱཝཱ. བཧཱུཧི ཉཱཡེཧཱིཏི ཀཱཡབྷཱཝནཱདིཀེཧི ཨནེཀེཧི བྷཱཝནཱཀྐམེཧི. སུབྷཱཝིཏཏྟནོཏི པཙྩཏྟེ ཨེཏཾ སཱམིཝཙནཾ, ཏེན སུབྷཱཝིཏསབྷཱཝོཏི ཨཏྠོ. བྷཝཱནཾ ཨནྟཾ ནིབྦཱནཾ གཏོཏི བྷཝནྟགོ. ཏཏྠ ཏཏྠ བྷགཝཱཏི སདྡསིདྡྷི ནིརུཏྟིནཡེནེཝ ཝེདིཏབྦཱ.

ཨིདཱནི བྷགཱི བྷཛཱིཏི ནིདྡེསགཱཐཱཡ ནཝཧི པདེཧི དསྶིཏམཏྠཾ བྷགྱཝཱཏི གཱཐཱཡ ཚཧི པདེཧི སངྒཧེཏྭཱ པདསིདྡྷིཾ ཨཏྠཡོཛནཱནཡབྷེདེཧི སདྡྷིཾ དསྶེཏུཾ ཨཡཾ པན ཨཔརོ ནཡོཏིཨཱདི ཝུཏྟཾ. ཏཏྠ ཝཎྞཝིཔརིཡཡོཏི ཨེཏྠ ཨིཏི-སདྡོ ཨཱདིཨཏྠོ, ཏེནེཝ ཝཎྞཝིཀཱརོ ཝཎྞལོཔོ དྷཱཏུཨཏྠེན ནིཡོཛནཉྩཱཏི ཨིམཾ ཏིཝིདྷཾ ལཀྑཎཾ སངྒཎྷཱཏི. སདྡནཡེནཱཏི སདྡལཀྑཎནཡེན. པིསོདརཱདཱིནཾ སདྡཱནཾ ཨཱཀཏིགཎབྷཱཝཏོ ཝུཏྟཾ ‘‘པིསོདརཱདིཔཀྑེཔལཀྑཎཾ གཧེཏྭཱ’’ཏི. པཀྑིཔནམེཝ ལཀྑཎཾ. ཏཔྤརིཡཱཔནྣཏཱཀརཎཉྷི པཀྑིཔནཾ. བྷགྱནྟི ཀུསལཾ.

ལོབྷཱདཡོ ཙཏྟཱརོ དོསཱ ཨེཀཀཝསེན གཧིཏཱ. ཨཧིརིཀཱདཡོ དུཀཝསེན. ཨཀྐོཙྪིམནྟིཨཱདིནཱ (དྷ. པ. ༣-༤) པུནཔྤུནཾ ཀུཛ྄ཛྷནཝསེན ཙིཏྟཔརིཡོནནྡྷནོ ཀོདྷོཝ ཨུཔནཱཧོ. པརེསཾ པུབྦཀཱརིཏཱལཀྑཎསྶ གུཎསྶ ནིཔུཉྪནོ མཀྑོ ནཱམ. བཧུསྶུཏཱདཱིཧི སདྡྷིཾ ཡུགགྒཱཧོ ཨཏྟནོ སམཀརཎཾ པལཱསོ. ཨཏྟནོ ཝིཛྫམཱནདོསཔཊིཙྪཱདནཱ མཱཡཱ. ཨཝིཛྫམཱནགུཎཔྤཀཱསནཾ སཱཋེཡྻཾ. གརཱུསུཔི ཐདྡྷཏཱ ཨནོནཏཏཱ ཐམྦྷོ. ཏདུཏྟརིཀརཎལཀྑཎོ སཱརམྦྷོ. ཛཱཏིཨཱདིཾ ནིསྶཱཡ ཨུནྣཏིལཀྑཎོ མཱནོ. ཨབྦྷུནྣཏིལཀྑཎོ ཨཏིམཱནོ. ཛཱཏིཨཱདིཾ ནིསྶཱཡ མཛྫནཱཀཱརཔྤཏྟོ མཱནོཝ མདོ ནཱམ. སོ སཏྟཝཱིསཏིཝིདྷོ. ཀཱམགུཎེསུ ཙིཏྟསྶ ཝོསྶགྒོ པམཱདོ. ཀཱཡདུཙྩརིཏཱདཱིནི ཏིཝིདྷདུཙྩརིཏཱནི. ཏཎྷཱདིཊྛིདུཙྩརིཏཝསེན ཏིཝིདྷསཾཀིལེསཱ. རཱགདོསམོཧཱཝ མལཱནི. ཏེཡེཝ ཀཱཡདུཙྩརིཏཱདཡོ ཙ ཏིཝིདྷཝིསམཱནི. ཀཱམབྱཱཔཱདཝིཧིཾསཱསཉྙཱ ཏིཝིདྷསཉྙཱ ནཱམ. ཏེཡེཝ ཝིཏཀྐཱ. ཏཎྷཱདིཊྛིམཱནཱ པཔཉྩཱ. སུབྷསུཁནིཙྩཨཏྟཝིཔརིཡེསཱ ཙཏུབྦིདྷཝིཔརིཡེསཱ. ཚནྡཱདཡོ ཨགཏི. ཙཱིཝརཱདཱིསུ པཙྩཡེསུ ལོབྷཱ ཙཏྟཱརོ ཏཎྷུཔཱདཱ. བུདྡྷདྷམྨསངྒྷསིཀྑཱསུ ཀངྑཱ, སབྲཧྨཙཱརཱིསུ ཀོཔོ ཙ ¶ པཉྩ ཙེཏོཁཱིལཱ. ཀཱམེ ཀཱཡེ རཱུཔེ ཙ ཨཝཱིཏརཱགཏཱ, ཡཱཝདཏྠཾ བྷུཉྫིཏྭཱ སེཡྻསུཁཱདིཨནུཡོགོ, ཨཉྙཏརཾ ¶ དེཝནིཀཱཡཾ པཎིདྷཱཡ བྲཧྨཙརིཡཙརཎཉྩ པཉྩ ཙེཏོཝིནིབནྡྷཱ. རཱུཔཱབྷིནནྡནཱདཡོ པཉྩ ཨབྷིནནྡནཱ. ཀོདྷམཀྑཨིསྶཱསཱཋེཡྻཔཱཔིཙྪཏཱསནྡིཊྛིཔརཱམཱསཱ ཚ ཝིཝཱདམཱུལཱནི. རཱུཔཏཎྷཱདཡོ ཚ ཏཎྷཱཀཱཡཱ. མིཙྪཱདིཊྛིཨཱདཡོ ཨཊྛམགྒངྒཔཊིཔཀྑཱ མིཙྪཏྟཱ. ཏཎྷཾ པཊིཙྩ པརིཡེསནཱ, པརིཡེསནཾ པཊིཙྩ ལཱབྷོ, ལཱབྷཾ པཊིཙྩ ཝིནིཙྪཡོ, ཏཾ པཊིཙྩ ཚནྡརཱགོ, ཏཾ པཊིཙྩ ཨཛ྄ཛྷོསཱནཾ, ཏཾ པཊིཙྩ པརིགྒཧོ, ཏཾ པཊིཙྩ མཙྪརིཡཾ, ཏཾ པཊིཙྩ ཨཱརཀྑཱ, ཨཱརཀྑཱདྷིཀརཎཾ དཎྜཱདཱནཱདིཨནེཀཱཀུསལརཱསཱིཏི ནཝ ཏཎྷཱམཱུལཀཱ དྷམྨཱ. པཱཎཱཏིཔཱཏཱདཡོ དས ཨཀུསལཀམྨཔཐཱ. ཙཏྟཱརོ སསྶཏཝཱདཱ ཏཐཱ ཨེཀཙྩསསྶཏཝཱདཱ ཨནྟཱནནྟིཀཱ ཨམརཱཝིཀྑེཔིཀཱ དྭེ ཨདྷིཙྩསམུཔྤནྣིཀཱ སོལ༹ས སཉྙཱིཝཱདཱ ཨཊྛ ཨསཉྙཱིཝཱདཱ ཨཊྛ ནེཝསཉྙཱིནཱསཉྙཱིཝཱདཱ སཏྟ ཨུཙྪེདཝཱདཱ པཉྩ དིཊྛདྷམྨནིབྦཱནཝཱདཱཏི ཨེཏཱནི དྭཱསཊྛི དིཊྛིགཏཱནི. རཱུཔཏཎྷཱདིཚཏཎྷཱ ཨེཝ པཙྩེཀཾ ཀཱམཏཎྷཱབྷཝཏཎྷཱཝིབྷཝཏཎྷཱཝསེན ཨཊྛཱརས ཧོནྟི, ཏཱ ཨཛ྄ཛྷཏྟབཧིདྡྷརཱུཔཱདཱིསུ པཝཏྟིཝསེན ཚཏྟིཾས, པུན ཀཱལཏྟཡཝསེན ཨཊྛསཏཏཎྷཱཝིཙརིཏཱནི ཧོནྟི. པབྷེད-སདྡཾ པཙྩེཀཾ སམྦནྡྷིཏྭཱ ལོབྷཔྤབྷེདོཏིཨཱདིནཱ ཡོཛེཏབྦཾ. སབྦདརཐཔརིལཱ༹ཧཀིལེསསཏསཧསྶཱནཱིཏི སབྦཱནི སཏྟཱནཾ དརཐསངྑཱཏཔརིལཱ༹ཧཀརཱནི ཀིལེསཱནཾ ཨནེཀཱནི སཏསཧསྶཱནི, ཨཱརམྨཎཱདིཝིབྷཱགཏོ པཝཏྟིཨཱཀཱརཝིབྷཱགཏོ ཙ ནེསཾ ཨེཝཾ པབྷེདོ ཝེདིཏབྦོ. པཉྩ མཱརེ ཨབྷཉྫཱིཏི སམྦནྡྷོ. པརིསྶཡཱནནྟི ཨུཔདྡཝཱནཾ.

ཨེཝཾ བྷགྱཝཱ བྷགྒཝཱཏི དྭིནྣཾ པདཱནཾ ཨཏྠཾ ཝིབྷཛིཏྭཱ ཨིདཱནི ཏེཧི དྭཱིཧི གཧིཏམཏྠཾ དསྶེཏུཾ བྷགྱཝནྟཏཱཡ ཙསྶཱཏིཨཱདི ཝུཏྟཾ. ཏཏྠ སཏཔུཉྙཛལཀྑཎདྷརསྶཱཏི ཨནེཀསཏཔུཉྙནིབྦཏྟམཧཱཔུརིསལཀྑཎདྷརསྶ བྷགཝཏོ. སཀཙིཏྟེ ཨིསྶརིཡཾ ནཱམ པཊིཀྐཱུལཱདཱིསུ ཨཔྤཊིཀྐཱུལསཉྙིཏཱདིཝསཔྤཝཏྟིཡཱ ཙེཝ ཙེཏོསམཱདྷིཝསེན ཙ ཨཏྟནོ ཙིཏྟསྶ ཝསཱིབྷཱཝཱཔཱདནམེཝ. ཨཎིམཱ ལགྷིམཱདིཀནྟི ཨཱདི-སདྡེན མཧིམཱ པཏྟི པཱཀམྨཾ ཨཱིསིཏཱ ཝསིཏཱ ཡཏྠཀཱམཱཝསཱཡིཏཱཏི ཨིམེ ཚཔི སངྒཧིཏཱ. ཏཏྠ ཀཱཡསྶ ཨཎུབྷཱཝཀརཎཾ ཨཎིམཱ. ཨཱཀཱསེ པདསཱ ¶ གམནཱདིཨརཧབྷཱཝེན ལཧུབྷཱཝོ ལགྷིམཱ. ཀཱཡསྶ མཧནྟཏཱཔཱདནཾ མཧིམཱ. ཨིཊྛདེསསྶ པཱཔུཎནཾ པཏྟི. ཨདྷིཊྛཱནཱདིཝསེན ཨིཙྪིཏཏྠནིཔྥཱདནཾ པཱཀམྨཾ. སཡཾཝསིཏཱ ཨིསྶརབྷཱཝོ ཨཱིསིཏཱ. ཨིདྡྷིཝིདྷེ ཝསཱིབྷཱཝོ ཝསིཏཱ. ཨཱཀཱསེན ཝཱ གཙྪཏོ, ཨཉྙཾ ཝཱ ཀིཉྩི ཀརོཏོ ཡཏྠ ཀཏྠཙི ཝོསཱནཔྤཏྟི ཡཏྠཀཱམཱཝསཱཡིཏཱ, ‘‘ཀུམཱརཀརཱུཔཱདིདསྶན’’ནྟིཔི ཝདནྟི. སབྦངྒཔཙྩངྒསིརཱིཏི སབྦེསཾ ཨངྒཔཙྩངྒཱནཾ སོབྷཱ. ཨཏྠཱིཏི ཨནུཝཏྟཏི. ལཧུསཱདྷནཾ ཏཾ ཏཾ ཀཱལིཀཾ ཨིཙྪིཏཾ, གརུསཱདྷནཾ ཙིརཀཱལིཀཾ བུདྡྷཏྟཱདིཔཏྠིཏཾ ¶ . བྷགཱ ཨསྶ སནྟཱིཏི བྷགཝཱཏི ཨིདཾ སདྡསཏྠནཡེན སིདྡྷཾ, སེསཾ སབྦཾ ནིརུཏྟིནཡེན སིདྡྷནྟི ཝེདིཏབྦཾ.

པཱིལ༹ནསངྑཏསནྟཱཔཝིཔརིཎཱམཊྛེནཱཏིཨཱདཱིསུ པཱིལ༹ནཊྛོ སངྑཏཊྛོཏིཨཱདིནཱ ཨཏྠ-སདྡོ པཙྩེཀཾ ཡོཛེཏབྦོ. ཏཏྠ ཨཏྟནོ སབྷཱཝེན པཱིལ༹ནལཀྑཎཾ དུཀྑཾ. ཏསྶ ཡོ པཱིལ༹ནམེཝ ཨཏྠོ ‘‘པཱིལ༹ནཊྛོ’’ཏི ཝུཙྩཏི, སོ སབྷཱཝོ. ཡསྨཱ པན ཏཾསམུདཡེན སངྑཏཾ, ཏསྨཱ སངྑཏཊྛོ སམུདཡདསྶནེན ཨཱཝིབྷཱུཏོ. ཡསྨཱ ཙ མགྒོ ཀིལེསསནྟཱཔཧརཏྟཱ སུསཱིཏལོ, ཏསྨཱསྶ མགྒདསྶནེན སནྟཱཔཊྛོ ཨཱཝིབྷཱུཏོ ཏཔྤཊིཡོགཏྟཱ. ཨཝིཔརིཎཱམདྷམྨསྶ པན ནིརོདྷསྶ དསྶནེན ཝིཔརིཎཱམཊྛོ ཨཱཝིབྷཱུཏོཏི. ཨེཀསྶེཝ སབྷཱཝདྷམྨསྶ སཀབྷཱཝཏོ ཨིཏརསཙྩཏྟཡནིཝཏྟིཏོ ཙ པརིཀཔྤེཏབྦཏྟཱ ཙཏྟཱརོ ཨཏྠཱ ཝུཏྟཱ. སམུདཡསྶ པན རཱསིཀརཎཏོ ཨཱཡཱུཧནཊྛོ སབྷཱཝོ, ཏསྶེཝ དུཀྑདསྶནེན ནིདཱནཊྛོ ཨཱཝིབྷཱུཏོ. ཝིསཾཡོགབྷཱུཏསྶ ནིརོདྷསྶ དསྶནེན སཾཡོགཊྛོ. ནིཡྻཱནབྷཱུཏསྶ མགྒསྶ དསྶནེན པལིབོདྷཊྛོ ཨཱཝིབྷཱུཏོ.

ནིརོདྷསྶ པན ནིསྶརཎཊྛོ སབྷཱཝོ, ཏསྶེཝ སམུདཡདསྶནེན ཝིཝེཀཊྛོ ཨཱཝིབྷཱུཏོ. སངྑཏསྶ མགྒསྶ དསྶནེན ཨསངྑཏཊྛོ, ཝིསཡབྷཱུཏསྶ མརཎདྷམྨསྶ ཝཱ དུཀྑསྶ དསྶནེན ཨམཏཊྛོ. མགྒསྶ པན ནིཡྻཱནཊྛོ སབྷཱཝོ, ཏསྶེཝ སམུདཡདསྶནེན དུཀྑསྶེཝཱཡཾ ཧེཏུ, ནིབྦཱནཔྤཏྟིཡཱ པན ཨཡམེཝ ཧེཏཱུཏི ཧེཏྭཊྛོ, ཨཏིསུཁུམནིརོདྷདསྶནེན ཨིདྷམེཝ དསྶནནྟི དསྶནཊྛོ, ཨདྷིཀཔཎསྶ དུཀྑསྶ དསྶནེན ཨདྷིཔཏེཡྻཊྛོ ཨཱཝིབྷཱུཏོ. ཨེཏེ ཨེཝ ཙ པཱིལ༹ནཱདཡོ སོལ༹ས ཨཱཀཱརཱཏི ཝུཙྩནྟི.

ཀཱམེཧི ¶ ཝིཝེཀཊྛཀཱཡཏཱ ཀཱཡཝིཝེཀོ. ནཱིཝརཎཱདཱིཧི ཝིཝིཏྟཱ ཨཊྛ སམཱཔཏྟིཡོ ཙིཏྟཝིཝེཀོ. ཨུཔདྷཱིཡནྟི ཨེཏྠ ཡཐཱསཀཾ ཕལཱནཱིཏི ཨུཔདྷཡོ, པཉྩཀཱམགུཎསངྑཱཏཀཱམཁནྡྷཀིལེསཨབྷིསངྑཱརཱ, ཏེཧི ཙཏཱུཧི ཝིཝིཏྟཾ ནིབྦཱནཾ ཨུཔདྷིཝིཝེཀོ ནཱམ.

ཨནཏྟཱནུཔསྶནཱཡ པཊིལདྡྷོ དུཀྑཱནིཙྩཱནུཔསྶནཱཧི ཙ པཊིལདྡྷོ ཨརིཡམགྒོ ཨཱགམནཝསེན ཡཐཱཀྐམཾ སུཉྙཏཨཔྤཎིཧིཏཨནིམིཏྟཝིམོཀྑསཉྙཾ པཊིལབྷཏི, ཀིལེསེཧི ཝིམུཏྟཏྟཱ ཧི ཨེས ཝིམོཀྑོཏི.

ཡཐཱ ལོཀེ ཨེཀེཀཔདཏོ ཨེཀེཀམཀྑརཾ གཧེཏྭཱ ‘‘མེཁལཱ’’ཏི ཝུཏྟཾ, ཨེཝམིདྷཱཔཱིཏི ཨཏྠོ. མེཧནསྶཱཏི གུཡ྄ཧཔྤདེསསྶ. ཁསྶཱཏི ཨོཀཱསསྶ.

སཧ ¶ དེཝེཧཱིཏིཨཱདཱིསུ སཧ དེཝེཧི ཝཏྟཏཱིཏི སདེཝཀོ ལོཀོ. ཏཾ སདེཝཀནྟིཨཱདིནཱ ཡོཛནཱ ཝེདིཏབྦཱ. སདེཝཀཝཙནེནཱཏི སདེཝཀ-སདྡེ ཝིསེསནབྷཱཝེན ཋིཏདེཝཝཙནེན. ཏསྶཱཔི སདེཝཀཔདེ ཨནྟོབྷཱུཏཏྟཱ ཨཝཡཝེ སམུདཱཡོཔཙཱརཝསེན ཝོཧཱརོ ཀཏོ. ཨིཏརཐཱ ཏེན དེཝཝིསིཊྛལོཀསྶེཝ གཧཎཏོ པཉྩཀཱམཱཝཙརདེཝགྒཧཎཾ ན སིཡཱ, ཨེཝཾ ཨུཔརིཔི. སམཱརཀཝཙནེན མཱརསདྡེན ཏེན སཧཙརིཏཱ སབྦེ ཝསཝཏྟིདེཝཱ ཙ གཧིཏཱཏི ཨཱཧ ‘‘ཚཊྛཀཱམཱཝཙརདེཝགྒཧཎ’’ནྟི. བྲཧྨཀཱཡིཀཱ ནཱམ པཋམཛ྄ཛྷཱནབྷཱུམིཀཱ. ཏེ ཨཱདི ཡེསཾ ཨཱརུཔྤཔརིཡནྟཱནཾ བྲཧྨཱནཾ ཏེསཾ བྲཧྨཱནཾ གཧཎཾ བྲཧྨཀཱཡིཀཱདིབྲཧྨགྒཧཎཾ. ལོཀ-སདྡསྶ ཨོཀཱསལོཀཱདཱིནམྤི སཱདྷཱརཎཏྟཱ སཏྟལོཀཱཝེཎིཀམེཝ པཛཱགཧཎཾ ཀཏནྟི ཨཱཧ ‘‘པཛཱཝཙནེན སཏྟལོཀགྒཧཎ’’ནྟི. སདེཝཀཱདིཝཙནེན ཨུཔཔཏྟིདེཝཱནཾ, སསྶམཎཝཙནེན ཝིསུདྡྷིདེཝཱནཉྩ གཧིཏཏྟཱ ཨཱཧ ‘‘སདེཝམནུསྶཝཙནེན སམྨུཏིདེཝཨཝསེསམནུསྶགྒཧཎ’’ནྟི. ཏཏྠ སམྨུཏིདེཝཱ རཱཛཱནོ, ཨཝསེསམནུསྶཱ སམྨུཏིདེཝསམཎབྲཱཧྨཎེཧི ཨཝསིཊྛཱ. སཏྟལོཀཱཝེཎིཀསྶ པཛཱསདྡསྶ ཝིསུཾ གཧིཏཏྟཱ སདེཝཀཾ ལོཀནྟི ཨེཏྠ ལོཀསདྡགྒཧཎཾ ཨོཀཱསལོཀམེཝ ནིཡམེཏཱིཏི ཨཱཧ ‘‘ཏཱིཧི པདེཧི ཨོཀཱསལོཀོ’’ཏི. ཨིདཉྩ སདེཝཀཱདིཔདཏྟཡཝཙནཱིཡསྶ པདྷཱནཏྠསྶ ཝསེན ཝུཏྟཾ. ཨོཀཱསལོཀཝིསེསནསྶ པནེཏྠ དེཝམཱརཱདིསཏྟལོཀསྶཱཔི གཧཎཾ ཝེདིཏབྦཾ ¶ སཱམཏྠིཡཏོ གམྱམཱནཏྟཱ སཔུཏྟོ ཨཱགཏོཏིཨཱདཱིསུ པུཏྟཱདཱིནཾ ཝིཡ. ཨིམསྨིཉྩ ནཡེ སདེཝཀཾ སམཱརཀཾ སབྲཧྨཀཾ ཨོཀཱསལོཀཾ སསྶམཎབྲཱཧྨཎིཾ སདེཝམནུསྶཾ པཛཉྩཱཏི ཙ-ཀཱརཾ ཨཱནེཏྭཱ ཡོཛེཏབྦཾ, ཨོཀཱསསཏྟལོཀཱནཾ གཧཎེན ཙེཏྠ ཏདུབྷཡསམྨུཏིནིམིཏྟབྷཱུཏོ སངྑཱརལོཀོཔི ཏདཝིནཱབྷཱཝཏོ གཧིཏོ ཨེཝཱཏི དཊྛབྦོ. ཨཔརེ པན ‘‘སདེཝཀནྟིཨཱདཱིཧི པཉྩཧི པདེཧི སཏྟལོཀོཝ ཨཏྟནོ ཨཝཡཝབྷཱུཏདེཝཱདིཝིསེསནེཧི ཝིསེསེཏྭཱ གཧིཏོ, ཏགྒཧཎེན ཏདཱདྷཱརོ ཨོཀཱསལོཀོ, ཏདུབྷཡཔཉྙཏྟིཝིསཡོ སངྑཱརལོཀོ ཙ གཧིཏཱ ཨེཝ ཧོནྟཱི’’ཏི ཝདནྟི. ཏེསཉྩ པཛནྟི ཨིདཾ ལོཀསདྡསྶ ཝིསེསནཾ ཀཏྭཱ སདེཝཀཾ པཛཾ ལོཀཾ…པེ… སདེཝམནུསྶཾ པཛཾ ལོཀནྟི ཡོཛེཏབྦཾ.

ཨརཱུཔཱཝཙརལོཀོ གཧིཏོ པཱརིསེསཉཱཡེན ཨིཏརེསཾ པདནྟརེཧི གཧིཏཏྟཱ. མཱརགྒཧཎེན ཏཔྤདྷཱནཱ ཏཾསདིསཱ ཙ ཨུཔཔཏྟིདེཝཱ སངྒཡ྄ཧནྟཱིཏི ཨཱཧ ‘‘ཚཀཱམཱཝཙརདེཝལོཀོ’’ཏི. ཁཏྟིཡཔརིསཱ བྲཱཧྨཎགཧཔཏིསམཎཙཱཏུམཧཱརཱཛིཀཏཱཝཏིཾསམཱརབྲཧྨཔརིསཱཏི ཨིམཱསུ ཨཊྛསུ པརིསཱསུ ཙཱཏུམཧཱརཱཛིཀཱདཱིནཾ ཙཏུནྣཾ པརིསཱནཾ སདེཝཀཱདིཔདེཧི སངྒཧིཏཏྟཱ ཨིདྷ སསྶམཎབྲཱཧྨཎིནྟི ཨིམིནཱ སམཎཔརིསཱ བྲཱཧྨཎཔརིསཱ ཙ, སདེཝམནུསྶནྟི ཨིམིནཱ ཁཏྟིཡཔརིསཱ གཧཔཏིཔརིསཱ ཙ ཝུཏྟཱཏི ཨཱཧ ‘‘ཙཏུཔརིསཝསེནཱ’’ཏི. ཏསྶ མནུསྶལོཀོ གཧིཏོཏི ¶ ཨིམིནཱ སམྦནྡྷོ. ཏཏྠ མནུསྶལོཀོཏི མནུསྶསམཱུཧོ, ཏེནཱཧ ‘‘ཨཝསེསསབྦསཏྟལོཀོ ཝཱ’’ཏི.

ཝིཀཔྤནྟརཾ དསྶེནྟོ ཨཱཧ ‘‘སམྨུཏིདེཝེཧི ཝཱ སཧ མནུསྶལོཀོ’’ཏི. དེཝཔདེན སམྨུཏིདེཝཱ, སམཎབྲཱཧྨཎམནུསྶཔདེཧི སེསམནུསྶཱ ཙ གཧིཏཱཏི ཨེཝཾ ཝིཀཔྤདྭཡེཔི མནུསྶཾ པཛཾ མནུསྶིཾ པཛནྟི པཛཱ-སདྡཾ མནུསྶ-སདྡེན ཝིསེསེཏྭཱ ཏཾ པུན སཧ དེཝེཧི ཝཏྟཏཱིཏི སདེཝཱ, པཛཱ. སདེཝཱ ཙ སཱ མནུསྶཱ ཙཱཏི སདེཝམནུསྶཱ, ཏཾ སདེཝམནུསྶཾ པཛཾ. པུན ཀིཾ བྷཱུཏཾ སསྶམཎབྲཱཧྨཎིནྟི ཨེཝཾ ཡཐཱ པཛཱསདྡེན མནུསྶཱནཉྙེཝ གཧཎཾ སིཡཱ, ཏཐཱ ནིབྦཙནཾ ཀཱཏབྦཾ, ཨིཏརཐཱ མནུསྶཱནཉྙེཝ གཧཎཾ ན སམྤཛྫཏི སབྦམནུསྶཱནཾ ཝིསེསནབྷཱཝེན གཧིཏཏྟཱ ཨཉྙཔདཏྠབྷཱུཏསྶ ཀསྶཙི མནུསྶསྶ ཨབྷཱཝཱ. ཨིདཱནི པཛནྟི ཨིམིནཱ ¶ ཨཝསེསནཱགཱདིསཏྟེཔི སངྒཧེཏྭཱ དསྶེཏུཀཱམོ ཨཱཧ ‘‘ཨཝསེསསབྦསཏྟལོཀོ ཝཱ’’ཏི. ཨེཏྠཱཔི ཙཏུཔརིསཝསེན ཨཝསེསསབྦསཏྟལོཀོ སམྨུཏིདེཝམནུསྶེཧི ཝཱ སཧ ཨཝསེསསབྦསཏྟལོཀོཏི ཡོཛེཏབྦཾ.

ཨེཏྟཱཝཏཱ བྷཱགསོ ལོཀཾ གཧེཏྭཱ ཡོཛནཾ དསྶེཏྭཱ ཨིདཱནི ཨེཀེཀཔདེན ཨབྷཱགསོ སབྦལོཀཱནཾ གཧཎཔཀྑེཔི ཏསྶ ཏསྶ ཝིསེསནསྶ སཔྥལཏཾ དསྶེཏུཾ ཨཔི ཙེཏྠཱཏིཨཱདི ཝུཏྟཾ. ཨུཀྐཊྛཔརིཙྪེདཏོཏི ཨུཀྐཊྛཱནཾ དེཝགཏིཔརིཡཱཔནྣཱནཾ པརིཙྪིནྣཝསེན ཛཱནནཝསེན ཀིཏྟིསདྡོ སཡཾ ཨཏྟནོ ཨཝཡཝབྷཱུཏེན སདེཝཀཝཙནེན ཏཾ སུཎནྟཱནཾ སཱཝེནྟོ ཨབྦྷུགྒཏོཏི ཡོཛནཱ. ཨནུསནྡྷིཀྐམོཏི ཨཏྠཱནཉྩེཝ པདཱནཉྩ ཨནུསནྡྷཱནཀྐམོ, ཛཱནནཀྐམོཏི ཨཏྠོ.

ཨབྷིཉྙཱཏི ཡ-ཀཱརལོཔེན ནིདྡེསོཏི ཨཱཧ ‘‘ཨབྷིཉྙཱཡཱ’’ཏི. སམནྟབྷདྲཀཏྟཱཏི སབྦབྷཱགེཧི སུནྡརཏྟཱ. སཱསནདྷམྨོཏི པཊིཔཏྟིཔཊིཝེདྷསཱསནསྶ པཀཱསཀོ པརིཡཏྟིདྷམྨོ. བུདྡྷསུབོདྷིཏཏཱཡཱཏི ཨིདཾ ཏིཀཾ དྷམྨསྶ ཧེཏུསརཱུཔཕལཝསེན ཝུཏྟཾ, ཏཐཱ ནཱཐཔབྷཝཏྟིཀམྤི. མཛ྄ཛྷེ ཏིཀདྭཡཾ ཕལཝསེནེཝ ཝུཏྟནྟི ཝེདིཏབྦཾ. ཀིཙྩསུདྡྷིཡཱཏི དྷམྨཾ སུཏྭཱ ཡཐཱསུཏཝསེན པཊིཔཛྫནྟཱནཾ སུཔྤཊིཔཏྟིསངྑཱཏཀིཙྩསུདྡྷིཡཱ.

ཨིདཱནི ཨཱདིཀལྱཱཎཱདིཔྤཀཱརམེཝ དྷམྨཾ དེསེནྟོ བྷགཝཱ སོཏཱུནཾ ཡཾ སཱསནབྲཧྨཙརིཡཾ མགྒབྲཧྨཙརིཡཉྩ པཀཱསེཏི, ཏཔྤཀཱསཀསྶ བྲཧྨཙརིཡཔདསྶ སཱཏྠནྟིཨཱདཱིནི པདཱནི ཝིསེསནབྷཱཝེན ཝུཏྟཱནི, ན དྷམྨཔདསྶཱཏི དསྶནམུཁེན ནཱནཔྤཀཱརཏོ ཨཏྠཾ ཝིཝརིཏུཀཱམོ སཱཏྠཾ སབྱཉྫནནྟི ཨེཝམཱདཱིསུ པནཱཏིཨཱདིམཱཧ. ཏཏྠ ཏིསྶོ སིཀྑཱ སཀལོ ཙ ཏནྟིདྷམྨོ སཱསནབྲཧྨཙརིཡཾ ¶ ནཱམ. བྷགཝཱ ཧི དྷམྨཾ དེསེནྟོ སཱིལཱདིཀེ ཝིཡ ཏཔྤཀཱསཀཾ ཏནྟིདྷམྨམྤི པཀཱསེཏི ཨེཝ སདྡཏྠསམུདཱཡཏྟཱ པརིཡཏྟིདྷམྨསྶ. ཡཐཱནུརཱུཔནྟི ཡཐཱརཧཾ. སིཀྑཏྟཡསངྒཧིཏཉྷི སཱསནབྲཧྨཙརིཡཾ མགྒབྲཧྨཙརིཡཉྩ ཨཏྠསམྤཏྟིཡཱ སམྤནྣཏྠཏཱཡ, ཨུཔརཱུཔརི ཨདྷིགནྟབྦཝིསེསསངྑཱཏཨཏྠསམྤཏྟིཡཱ ཙ སཧ ཨཏྠེན པཡོཛནེན ཝཏྟཏཱིཏི སཱཏྠམེཝ, ན ཏུ སབྱཉྫནཾ, ཏནྟིདྷམྨསངྑཱཏཾ སཱསནབྲཧྨཙརིཡཾ ཡཐཱཝུཏྟེན ཨཏྠེན སཱཏྠཾ སབྱཉྫནཉྩ. ཀིརཱཏཱདིམིལཀྑཝཙནཱནམྤི སཱཏྠསབྱཉྫནཏྟེ སམཱནེཔི ཝིསིཊྛཏྠབྱཉྫནཡོགཾ སནྡྷཱཡ སཧཏྠོ ¶ དེཝདཏྟོ སཝིཏྟོཏིཨཱདི ཝིཡ ‘‘སཱཏྠཾ སབྱཉྫན’’ནྟི ཝུཏྟནྟི ཨཱཧ ‘‘ཨཏྠསམྤཏྟིཡཱ སཱཏྠཾ, བྱཉྫནསམྤཏྟིཡཱ སབྱཉྫན’’ནྟི. ཏཏྠ ཡཾ ཨཏྠཾ སུཏྭཱ ཏཐཱ པཊིཔཛྫནྟཱ སབྦདུཀྑཀྑཡཾ པཱཔུཎནྟི, ཏསྶ ཏཱདིསསམྤཏྟི ཨཏྠསམྤཏྟི ནཱམ, སམྤནྣཏྠཏཱཏི ཨཏྠོ. བྱཉྫནསམྤཏྟི ནཱམ སིཐིལདྷནིཏཱདིབྱཉྫནཔརིཔུཎྞཱཡ མཱགདྷིཀཱཡ སབྷཱཝནིརུཏྟིཡཱ གམྦྷཱིརམྤི ཨཏྠཾ ཨུཏྟཱནཾ ཀཏྭཱ དསྶནསམཏྠཏཱ སམྤནྣབྱཉྫནཏཱཏི ཨཏྠོ.

ཨིདཱནི ནེཏྟིཔྤཀརཎནཡེནཱཔི (ནེཏྟི ༤ དྭཱདསཔད) ཨཏྠཾ དསྶེཏུཾ སངྐཱསནཱཏིཨཱདི ཝུཏྟཾ. ཏཏྠ སངྑེཔཏོ ཀཱསཱིཡཏི དཱིཔཱིཡཏཱིཏི སངྐཱསནནྟི ཀམྨསཱདྷནཝསེན ཨཏྠོ དཊྛབྦོ, ཨེཝཾ སེསེསུཔི. པཋམཾ ཀཱསནཾ པཀཱསནཾ. ཨུབྷཡམྤེཏཾ ཨུདྡེསཏྠཝཙནསངྑཱཏསྶ ཝིཏྠཱརཝཙནཾ. སཀིཾ ཝུཏྟསྶ པུན ཝཙནཉྩ ཝིཝརཎཝིབྷཛནཱནི. ཨུབྷཡམྤེཏཾ ནིདྡེསཏྠཝཙནཾ. ཝིཝཊསྶ ཝིཏྠཱརཏརཱབྷིདྷཱནཾ ཝིབྷཏྟསྶ ཙ པཀཱརེཧི ཉཱཔནཾ ཨུཏྟཱནཱིཀརཎཔཉྙཏྟིཡོ. ཨུབྷཡམྤེཏཾ པཊིནིདྡེསཏྠཝཙནསངྑཱཏསྶ ཝིཏྠཱརཝཙནཾ. ཨཏྠཔདསམཱཡོགཏོཏི ཡཐཱཝུཏྟཱནི ཨེཝ ཚ པདཱནི པརིཡཏྟིཡཱ ཨཏྠཝིབྷཱགཏྟཱ ཨཏྠཔདཱནི, ཏེཧི སཧིཏཏཱཡ ཨཏྠཀོཊྛཱསཡུཏྟཏྟཱཏི ཨཏྠོ. ཨཔརིཡོསིཏེ པདེ ཨཱདིམཛ྄ཛྷགཏཝཎྞོ ཨཀྑརཾ, ཨེཀཀྑརཾ, པདཾ ཝཱ ཨཀྑརཾ. ཝིབྷཏྟིཡནྟཾ པདཾ. པདཱབྷིཧིཏཾ ཨཏྠཾ བྱཉྫེཏཱིཏི བྱཉྫནཾ, ཝཱཀྱཾ. ཀཐིཏསྶེཝཏྠསྶ ཨནེཀཝིདྷེན ཝིབྷཱགཀརཎཾ ཨཱཀཱརོ ནཱམ. ཨཱཀཱརཱབྷིཧིཏསྶ ནིབྦཙནཾ ནིརུཏྟི. ནིབྦཙནཏྠཝིཏྠཱརོ ནིདྡེསོ. ཨཐ ཝཱ ‘‘ཨཀྑརེཧི སངྐཱསེཏི, པདེཧི པཀཱསེཏི, བྱཉྫནེཧི ཝིཝརཏི, ཨཱཀཱརེཧི ཝིབྷཛཏི, ནིརུཏྟཱིཧི ཨུཏྟཱནིཾ ཀརོཏི, ནིདྡེསེཧི པཉྙཔེཏཱི’’ཏི ཝཙནཏོ སངྐཱསནཔཀཱསནསངྑཨཱཏཨུདྡེསཏྠཝཱཙཀཱནི ཝཙནཱནི ཨཀྑརཔདཱནི ནཱམ. ཝིཝརཎཝིབྷཛནསངྑཱཏནིདྡེསཏྠཝཱཙཀཱནི ཝཙནཱནི བྱཉྫནཱཀཱརཱ ནཱམ. ཨུཏྟཱནཱིཀརཎཔཉྙཏྟིསངྑཱཏཔཊིནིདྡེསཏྠཝཱཙཀཱནི ཝཙནཱནི ནིརུཏྟིནིདྡེསཱ ནཱམ, ཏེསཾ སམྤཏྟིཡཱ སབྱཉྫནནྟི ཨཏྠོ.

ཨཏྠགམྦྷཱིརཏཱཏིཨཱདཱིསུ ཨཏྠོ ནཱམ ཏནྟིཨཏྠོ, ཧེཏུཕལཾ ཝཱ. དྷམྨོ ནཱམ ཏནྟི, ཧེཏུ ཝཱ. དེསནཱ ནཱམ ཡཐཱདྷམྨཾ དྷམྨཱབྷིལཱཔོ. པཊིཝེདྷོ ནཱམ ཡཐཱཝུཏྟཨཏྠཱདཱིནཾ ཨཝིཔརཱིཏཱཝབོདྷོ. ཏེ ¶ པནེཏེ ཨཏྠཱདཡོ ཡསྨཱ སསཱདཱིཧི ཝིཡ མཧཱསམུདྡོ མནྡབུདྡྷཱིཧི དུཀྑོགཱཧཱ ཨལབྦྷནེཡྻཔཏིཊྛཱ ཙ, ཏསྨཱ གམྦྷཱིརཱ. ཏེསུ པཊིཝེདྷསྶཱཔི ཨཏྠསནྣིསྶིཏཏྟཱ ¶ ཨཏྠསབྷཱགཏྟཱ ཙ ཝུཏྟཾ ‘‘ཨཏྠགམྦྷཱིརཏཱཔཊིཝེདྷགམྦྷཱིརཏཱཧི སཱཏྠ’’ནྟི. དྷམྨདེསནཱནཾ ཨཏྠསནྣིསྶིཏཏྟེཔི སཡཾ བྱཉྫནརཱུཔཏྟཱ ཝུཏྟཾ ‘‘དྷམྨགམྦྷཱིརཏཱདེསནཱགམྦྷཱིརཏཱཧི སབྱཉྫན’’ནྟི. ཡཐཱཝུཏྟཨཏྠཱདཱིསུ པབྷེདགཏཱནི ཉཱཎཱནི ཨཏྠཔཊིསམྦྷིདཱདཡོ. ཏཏྠ ནིརུཏྟཱིཏི ཏནྟིཔདཱནཾ ནིདྡྷཱརེཏྭཱ ཝཙནཾ, ནིབྦཙནནྟི ཨཏྠོ. ཏཱིསུ པཊིསམྦྷིདཱསུ ཉཱཎཾ པཊིབྷཱནཔཊིསམྦྷིདཱ. ལོཀིཡཱ སདྡྷེཡྻཝཙནམུཁེནེཝ ཨཏྠེསུ པསཱིདནྟི, ན ཨཏྠམུཁེནཱཏི ཨཱཧ སདྡྷེཡྻཏོཏིཨཱདི. ཀེཝལསདྡོ སཀལཱདྷིཝཙནནྟི ཨཱཧ ‘‘སཀལཔརིཔུཎྞབྷཱཝེནཱ’’ཏི. བྲཧྨཙརིཡ-སདྡོ ཨིདྷ སིཀྑཏྟཡསངྒཧཾ སཀལཾ སཱསནཾ དཱིཔེཏཱིཏི ཨཱཧ སིཀྑཏྟཡཔརིགྒཧིཏཏྟཱཏིཨཱདི.

ཡཐཱཝུཏྟམེཝཏྠཾ ཨཔརེནཱཔི པརིཡཱཡེན དསྶེཏུཾ ཨཔི ཙཱཏིཨཱདི ཝུཏྟཾ. ཏཏྠ སནིདཱནནྟི དེསཀཱལཱདིདཱིཔཀེན ནིདཱནཝཙནེན སནིདཱནཾ. སཨུཔྤཏྟིཀནྟི ཨཊྛུཔྤཏྟིཨཱདིཡུཏྟིཡུཏྟཾ. ཏཏྲཱཡཾ པཱལི༹ཡོཛནཱཀྐམོ – ‘‘ཝེརཉྫོ བྲཱཧྨཎོ སམཎོ ཁལུ བྷོ…པེ… ཝིཧརཏཱི’’ཏི ཙ, ‘‘ཏཾ ཁོ པན བྷཝནྟཾ གོཏམཾ ‘ཨིཏིཔི སོ…པེ… པཝེདེཏཱི’ཏི ཨེཝཾ ཀལྱཱཎོ ཀིཏྟིསདྡོ ཨབྦྷུགྒཏོ’’ཏི ཙ, ‘‘སོ དྷམྨཾ དེསེཏི…པེ… པརིཡོསཱནཀལྱཱཎཾ, དེསེནྟོ ཙ སཱཏྠསབྱཉྫནཱདིགུཎསཾཡུཏྟཾ བྲཧྨཙརིཡཾ པཀཱསེཏཱི’’ཏི ཙ, ‘‘སཱདྷུ ཁོ པན ཏཐཱརཱུཔཱནཾ ཨརཧཏཾ དསྶནཾ ཧོཏཱི’’ཏི ཙ ཨསྶོསི, སུཏྭཱ ཙ ཨཐ ཁོ ཝེརཉྫོ བྲཱཧྨཎོ ཡེན བྷགཝཱ ཏེནུཔསངྐམཱིཏི.

ཨཊྛཀཐཱཡཾ པན ཀིཉྩཱཔི ‘‘དསྶནམཏྟམྤི སཱདྷུ ཧོཏཱིཏི ཨེཝཾ ཨཛ྄ཛྷཱསཡཾ ཀཏྭཱ ཨཐ ཁོ ཝེརཉྫོ…པེ… ཨུཔསངྐམཱི’’ཏི ཨེཝཾ སཱདྷུ ཁོ པནཱཏིཨཱདིཔཱཋསྶ བྲཱཧྨཎསྶ པརིཝིཏཀྐནབྷཱཝེན ཝུཏྟཏྟཱ བྲཧྨཙརིཡཾ པཀཱསེཏཱིཏི པདཱནནྟརམེཝ ཨསྶོསཱིཏི པདཾ སམྦནྡྷིཏབྦཾ ཝིཡ པཉྙཱཡཏི, ཏཐཱཔི ‘‘སཱདྷུ ཁོ པན ཏཐཱརཱུཔཱནཾ ཨརཧཏཾ དསྶནཾ ཧོཏཱི’’ཏི ཨེཝཾ ཡཐཱཝུཏྟནིདསྶནཏྠེན ཨིཏི-སདྡེན པརིཙྪིནྡིཏྭཱ ཝུཏྟཏྟཱ པན ཨཉྙཏྠ ཨིཏི-སདྡསྶ ཨདསྶནཏོ ཙ ཨཐ ཁོ ཝེརཉྫོཏིཨཱདིནཱ ཀཏྟབྦནྟརདསྶནམུཁེན པཱལི༹ཡཱ པཀཱརནྟརེ པཝཏྟིཏོ ཙ ཡཐཱཝུཏྟཝསེནེཝ ‘‘སཱདྷུ ཁོ པན ཏཐཱརཱུཔཱནཾ ཨརཧཏཾ དསྶནཾ ཧོཏཱི’’ཏི ཝཙནཱནནྟརམེཝ ཨསྶོསཱིཏི པདཾ ཨཱནེཏྭཱ སམྦནྡྷནཾ ཡུཏྟཾ. ཨཊྛཀཐཱཙརིཡེན ཧི བྲཱཧྨཎསྶ ཨཏྟནཱ སུཏཝསེནེཝ ཨཛ྄ཛྷཱསཡོ ཨུཔྤཛྫཏཱིཏི ¶ ཨུཔསངྐམནཧེཏུདསྶནམུཁེན དསྶནམཏྟམྤི སཱདྷུ ཧོཏཱིཏི ཨེཝཾ ཨཛ྄ཛྷཱསཡཾ ཀཏྭཱཏིཨཱདི ཝུཏྟནྟི གཧེཏབྦཾ.

༢. སཱིཏོདཀཾ ¶ ཝིཡ ཨུཎྷོདཀེནཱཏི ཨིདཾ ཨུཀྐམེན མུཁཱརུལ༹ྷཝསེན ཝུཏྟཾ, ཨནུཔསནྟསབྷཱཝཏཱཡ བྲཱཧྨཎསྶེཝ ཨུཎྷོདཀཾ ཝིཡ སཱིཏོདཀེནཱཏི ཨཏྠོ གཧེཏབྦོ, ཉཱཎཏེཛཡུཏྟཏཱཡ ཝཱ བྷགཝཱ ཨུཎྷོདཀོཔམོཏི ཀཏྭཱ ཏབྦིརཧིཏཾ བྲཱཧྨཎཾ སཱིཏོདཀཾ ཝིཡ ཀཏྭཱ ཏཐཱ ཝུཏྟནྟི གཧེཏབྦཾ. ཨེཀཱིབྷཱཝནྟི སམྨོདནཀིརིཡཱཡ ཨེཀརཱུཔཏཾ. ཡཱཡཱཏིཨཱདཱིསུ ཡཱཡ ཀཐཱཡ སམྨོདི བྲཱཧྨཎོ, ཏཾ སམྨོདནཱིཡཾ ཀཐནྟི ཡོཛནཱ. ཏཏྠ ཁམནཱིཡནྟི དུཀྑབཧུལཾ ཨིདཾ སརཱིརཾ, ཀཙྩི ཁམིཏུཾ སཀྐུཎེཡྻཾ. ཡཱཔནཱིཡནྟི ཙིརཔྤབནྡྷསངྑཱཏཱཡ ཡཱཔནཱཡ ཡཱཔེཏུཾ སཀྐུཎེཡྻཾ. རོགཱབྷཱཝེན ཨཔྤཱབཱདྷཾ. དུཀྑཛཱིཝིཏཱབྷཱཝེན ཨཔྤཱཏངྐཾ. ཏཾཏཾཀིཙྩཀརཎཏྠཱཡ ལཧུཾ ཨཀིཙྪེན ཨུཊྛཱཏུཾ ཡོགྒཏཱཡ ལཧུཊྛཱནཾ. བལནྟི སརཱིརསྶ སབྦཀིཙྩཀྑམཾ བལཾ ཀཙྩི ཨཏྠཱིཏི པུཙྪཏི. ཕཱསུཝིཧཱརོཏི སུཁཝིཧཱརོ. སརཎཱིཡམེཝ དཱིགྷཾ ཀཏྭཱ ‘‘སཱརཎཱིཡ’’ནྟི ཝུཏྟནྟི ཨཱཧ ‘‘སརིཏབྦབྷཱཝཏོ ཙ སཱརཎཱིཡ’’ནྟི. པརིཡཱཡེཧཱིཏི ཀཱརཎེཧི.

བྷཱཝོཏི ཀིརིཡཱ, ཏསྨིཾ ཝཏྟམཱནོ ནཔུཾསཀ-སདྡོ བྷཱཝནཔུཾསཀནིདྡེསོ ནཱམ, ཀིརིཡཱཝིསེསནསདྡོཏི ཨཏྠོ. ཨེཀམནྟེ ཨེཀསྨིཾ ཨནྟེ ཡུཏྟཔྤདེསེཏི ཨཏྠོ. ཁཎྜིཙྩཱདིབྷཱཝནྟི ཁཎྜིཏདནྟཔལིཏཀེསཱདིབྷཱཝཾ. རཱཛཔརིཝཊྚེཏི རཱཛཱུནཾ པརིཝཏྟནཾ, པཊིཔཱཊིཡོཏི ཨཏྠོ. པུརཱཏནུཙྩཀུལཔྤསུཏཏཱཡ ཛིཎྞཏཱ, ན ཝཡསཱཏི ཨཱཧ ‘‘ཙིརཀཱལཔྤཝཏྟཀུལནྭཡེ’’ཏི. ཝིབྷཝཱནཾ མཧནྟཏྟཾ ལཱཏི གཎྷཱཏཱིཏི མཧལླཀོཏི ཨཱཧ ‘‘ཝིབྷཝམཧཏྟཏཱཡ སམནྣཱགཏེ’’ཏི. ཝིབྷཱཝནེ ནཱམ ཨཏྠེཏི པཀཏིཝིབྷཱཝནསངྑཱཏེ ཨཏྠེ. ན ཨབྷིཝཱདེཏི ཝཱཏི ཨབྷིཝཱདེཏབྦནྟི ན སལླཀྑེཏི, ཨེཝཾ ཨསལླཀྑཎཔཀཏིཀོཏི ཝུཏྟཾ ཧོཏི. རཱུཔཾ ནིཙྩཾ ཝཱ ཨནིཙྩཾ ཝཱཏི ཨེཏྠཱཔི ནིཙྩཔཀཏིཀཾ ཨནིཙྩཔཀཏིཀཾ ཝཱཏི ཨཏྠོ. ཨནིཙྩཾ ཝཱཏི ཨེཏྠ ཝཱ-སདྡོ ཨཝདྷཱརཎཏྠོ.

སམྤཏིཛཱཏོཏི མུཧུཏྟཛཱཏོ, ཛཱཏསམནནྟརམེཝཱཏི ཨཏྠོ. སཏྟཔདཝཱིཏིཧཱརེན གནྟྭཱ…པེ… ཨོལོཀེསཱིཏི ཨེཏྠ དྭཱརཾ པིདྷཱཡ ནིཀྑནྟོཏིཨཱདཱིསུ ཝིཡ གམནཏོ པུརེ ཀཏམྤི ཨོལོཀནཾ པཙྪཱ ཀཏཾ ¶ ཝིཡ ཝུཏྟནྟི དཊྛབྦཾ. ཨོལོཀེསིནྟི ཙ ལོཀཝིཝརཎཔཱཊིཧཱརིཡེ ཛཱཏེ མཾསཙཀྑུནཱ ཝོལོཀེསཱིཏི ཨཏྠོ. སེཊྛོཏི པསཏྠཏརོ. པཏིམཱནེསཱིཏི པཱུཛེསི. ཨཱསབྷིནྟི ཨུཏྟམཾ.

༣. ཏཾ ཝཙནནྟི ནཱཧཾ ཏཾ བྲཱཧྨཎཱཏིཨཱདིཝཙནཾ. ཨཉྙཱཡ སཎྛཧེཡྻཱཏི ཨརཧཏྟེ པཏིཊྛཧེཡྻ. ཛཱཏིཝསེནཱཏི ཁཏྟིཡཱདིཛཱཏིཝསེན. ཨུཔཔཏྟིཝསེནཱཏི དེཝེསུ ཨུཔཔཏྟིཝསེན. ཨཱཝིཉྪནྟཱིཏི ¶ ཨཱཀཌྜྷནྟི. ཡསྶ ཨབྷིཝཱདཱདིཀརཎསངྑཱཏསྶ སཱམགྒིརསསྶ བྷགཝཏི ཨབྷཱཝཾ མཉྙམཱནོ བྲཱཧྨཎོ ‘‘ཨརསརཱུཔོ’’ཏི ཨཱཧ, ཏབྦིདྷུརསྶ རཱུཔཏཎྷཱདིཀསྶེཝ སཱམགྒིརསསྶ ཨབྷཱཝེན བྷགཝཱ ‘‘ཨརསརཱུཔོ’’ཏི དསྶེཏུཾ སཱམགྒིརསསདྡསྶ རཱུཔརསཱདཱིསུ ཝཏྟནཔྤཀཱརཾ དསྶེནྟོ ཨཱཧ ཝཏྠཱརམྨཎཱདཱིཏིཨཱདི.

ཏཱལཱཝཏྠུཀཏཱཏི ཨུཙྪིནྣམཱུལཱནཾ ཏཱལཱནཾ ཝཏྠུ ཝིཡ ནེསཾ རཱུཔརསཱདཱིནཾ ཝཏྠུ ཙིཏྟསནྟཱནཾ ཀཏནྟི ཨིམསྨིཾ ཨཏྠེ མཛ྄ཛྷེཔདལོཔཾ དཱིགྷཉྩ ཀཏྭཱ ནིདྡེསོཏི ཨཱཧ ཏཱལཝཏྠུ ཝིཡཱཏིཨཱདི. ཏཱལཝཏྠུ ཝིཡ ཡེསཾ ཝཏྠུ ཀཏཾ ཏེ ཏཱལཱཝཏྠུཀཏཱཏི ཝིསེསནསྶ པརནིཔཱཏོ དཊྛབྦོ, ཀཏཏཱལཝཏྠུཀཱཏི ཨཏྠོ. མཏྠཀཙྪིནྣཏཱལོཡེཝ པཏྟཕལཱདཱིནཾ ཨཀཱརཎཏཱཡ ཨཝཏྠཱུཏི ཏཱལཱཝཏྠུ, ཏཾ ཝིཡ ཡེསཾ ཝཏྠུ ཀཏཾ ཏེ རཱུཔརསཱདཡོ ཏཱལཱཝཏྠུཀཏཱ, ཨཡཾ ཨཉྙཔདཏྠཝསེན ཨཏྠགྒཱཧོ ཧེཊྛཱ ཝུཏྟནཡེན སུགམོཏི ཝིསེསམཏྠཾ དསྶེནྟོ ཨཱཧ ‘‘མཏྠཀཙྪིནྣཏཱལོ ཝིཡ ཀཏཱ’’ཏི. ཨེཝཉྩ མཏྠཀསདིསེསུ རཱུཔརསཱདཱིསུ རཱགེསུ ཚིནྣེསུཔི ཏབྦཏྠུབྷཱུཏསྶ ཏཱལཱཝཏྠུསདིསསྶ ཙིཏྟསནྟཱནསྶ ཡཱཝ པརིནིབྦཱནཊྛཱནཾ ཨུཔཔནྣམེཝ ཧོཏི. ཡཐཱརུཏཏོ པན ཝིསེསནསམཱསཝསེན ཨཏྠེ གཡ྄ཧམཱནེ རཱུཔརསཱདཱིནཾ ཏཱལཱཝཏྠུསདིསཏཱཡ ཋཱནཾ ཨཱཔཛྫཏི. ཡཾ པན སཱརཏྠདཱིཔནིཡཾ (སཱརཏྠ. ཊཱི. ༡.༣) ཨེཏཾ དོསཾ པརིཧརིཏུཾ རཱུཔརསཱདཱིནཾ ཀུསལཱཀུསལཏྟཾ ཝུཏྟཾ, ཏཾ ཏེ ཏཐཱགཏསྶ པཧཱིནཱཏིཨཱདིཔཱལི༹ཡཱ, ཀཱམསུཁསྶཱདསངྑཱཏཱ རཱུཔརསཱཏིཨཱདིཨཊྛཀཐཱཡ ཙ ན སམེཏི, ཁཱིཎཱསཝཱནམྤི ཡཱཝ པརིནིབྦཱནཱ ཀུསལཱཀུསལཱནཾ ཕལུཔྤཏྟིཏོ ཏེསཾ མཏྠཀཙྪིནྣཏཱལསདིསཏཱཔི ན ཡུཏྟཱཏི གཧེཏབྦཾ. ཨཐ ཝཱ མཏྠཀཙྪིནྣཏཱལསྶ ཋིཏཾ ཨཊྛིཏཉྩ ཨམནསིཀཏྭཱ པུན ཨནུཔྤཏྟིདྷམྨཏཱསདིསམཏྟཾ ཨུཔམེཏྭཱ ཏཱལཱཝཏྠུ ཝིཡ ཀཏཱཏི ཝིསེསནསམཱསཝསེན ¶ ཨཏྠགྒཧཎེཔི ན ཀོཙི དོསོ. ཨནུ-སདྡོ པཙྪཱཏི ཨཏྠེ ཝཏྟཏཱིཏི ཨཱཧ པཙྪཱབྷཱཝོ ན ཧོཏཱིཏིཨཱདི. ཨནུ ཨབྷཱཝཾ གཏཱཏི པཙྪཱ ཨནུཔྤཏྟིདྷམྨཏཱཝསེན ཨབྷཱཝཾ གཏཱ. ཨནཙྪརིཡཱཏི ཨནུ ཨནུ ཨུཔརཱུཔརི ཝིམྷཡཀཏཱཏི ཨཏྠོ. ཡཉྩ ཁོ ཏྭཾ ཝདེསཱིཏི ཡཾ ཝནྡནཱདིསཱམགྒཱིརསཱབྷཱཝསངྑཱཏཾ ཀཱརཎཾ ཨརསརཱུཔཏཱཡ ཝདེསི, ཏཾ ཀཱརཎཾ ན ཝིཛྫཏཱིཏི ཨཏྠོ.

༤. སནྡྷཱཡ བྷཱསིཏམཏྠནྟི ཡཾ ཨཏྠཾ སནྡྷཱཡ བྲཱཧྨཎོ ནིབྦྷོགོ བྷཝཾ གོཏམོཏིཨཱདིམཱཧ, བྷགཝཱ ཙ ཡཾ སནྡྷཱཡ ནིབྦྷོགཏཱདིཾ ཨཏྟནི ཨནུཛཱནཱཏི, ཏཾ སནྡྷཱཡ བྷཱསིཏམཏྠཾ.

༥. ཀུལསམུདཱཙཱརཀམྨནྟི ¶ ཀུལཱཙཱརཀམྨཾ. ཀཱཡཏོ ཀཱཡདྭཱརཏོ པཝཏྟཾ དུཙྩརིཏཾ ཀཱཡདུཙྩརིཏཾ. ཨནེཀཝིཧིཏཱཏི ཨནེཀཔྤཀཱརཱ.

༦. པཉྩཀཱམགུཎིཀརཱགསྶཱཏི རཱུཔཱདཱིསུ པཉྩསུ ཀཱམཀོཊྛཱསེསུ ཨཏིཝིཡ སངྒཝསེན ནིཡུཏྟསྶ ཀཱམརཱགསྶ, ཨེཏེན ཨནཱགཱམཱིནཾ ཝཏྠཱབྷརཎཱདཱིསུ སངྒནིཀནྟིཝསེན ཨུཔྤཛྫནཀཱམརཱགསྶ ཀཱམརཱགཏཱབྷཱཝཾ དསྶེཏི ཏསྶ རཱུཔརཱགཱདཱིསུ སངྒཧཏོ. ཨཝསེསཱནནྟི ཨེཏྠ སཀྐཱཡདིཊྛིཝིཙིཀིཙྪཱནཾ པཋམེན མགྒེན, སེསཱནཾ ཙཏཱུཧིཔི ཨུཙྪེདཾ ཝདཏི, ཏེནཱཧ ‘‘ཡཐཱནུརཱུཔ’’ནྟི.

༧. ཛིགུཙྪཏི མཉྙེཏི ཛིགུཙྪཏི ཝིཡ, ‘‘ཛིགུཙྪཏཱི’’ཏི ཝཱ སལླཀྑེམི. ཨཀོསལླསམྦྷཱུཏཊྛེནཱཏི ཨཉྙཱཎསམྦྷཱུཏཊྛེན.

༨-༡༠. ཏཏྲཱཏི ཡཐཱཝུཏྟེསུ དྭཱིསུ ཨཏྠཝིཀཔྤེསུ. པཊིསནྡྷིཔརིཡཱཡོཔི ཨིདྷ གབྦྷསདྡོཏི ཨཱཧ ‘‘དེཝལོཀཔཊིསནྡྷིཔཊིལཱབྷཱཡཱ’’ཏི. ཨཔུནབྦྷཝབྷཱུཏཱཏི ཁཎེ ཁཎེ ཨུཔྤཛྫམཱནཱནཾ དྷམྨཱནཾ ཨབྷིནིབྦཏྟི.

༡༡. དྷམྨདྷཱཏུནྟི སབྦཉྙུཏཉྙཱཎཾ. ཏཉྷི དྷམྨེ ཡཱཐཱཝཏོ དྷཱརེཏི ཨུཔདྷཱརེཏཱིཏི ‘‘དྷམྨདྷཱཏཱུ’’ཏི ཝུཙྩཏི. དེསནཱཝིལཱསཔྤཏྟོཏི ཨབྷིརུཙིཝསེན པརིཝཏྟེཏྭཱ དེསེཏུཾ སམཏྠཏཱ དེསནཱཝིལཱསོ, ཏཾ པཏྟོ. ཀརུཎཱཝིཔྥཱརནྟི སབྦསཏྟེསུ མཧཱཀརུཎཱཡ ཕརཎཾ. ཏཱདིགུཎལཀྑཎམེཝ ཨུཔམཱཡ ཝིབྷཱཝེནྟོ ཨཱཧ ‘‘པཐཝཱིསམཙིཏྟཏ’’ནྟི. ཏཏོཡེཝ ¶ ཨཀུཛ྄ཛྷནསབྷཱཝཏོ ཨཀུཔྤདྷམྨཏཱ. ཛཱཏིཡཱ ཨནུགཏནྟི ཛཱཏིཡཱ ཨནུབདྡྷཾ. ཛརཱཡ ཨནུསཊནྟི ཛརཱཡ པལིཝེཋིཏཾ. ཝཊྚཁཱཎུབྷཱུཏནྟི ཝཊྚཏོ ཨུདྡྷརིཏུཾ ཨསཀྐུཎེཡྻཏཱཡ ཝཊྚེ ནིཙྩལབྷཱཝེན ཋིཏཾ ཁཱཎུ ཝིཡ བྷཱུཏཾ. ཛཱཏཱནཾ མཙྩཱནཾ ནིཙྩཾ མརཎཏོ བྷཡནྟི ཨཱཧ ཨཛྫ མརིཏྭཱཏིཨཱདི. ཨཔྤཊིསམཾ པུརེཛཱཏབྷཱཝནྟི ཨསདིསཾ ཨརིཡཱཡ ཛཱཏིཡཱ པཋམཛཱཏབྷཱཝཾ, སབྦཛེཊྛབྷཱཝནྟི ཨཏྠོ.

‘‘ཨཔཱི’’ཏི ཨཝཏྭཱ ‘‘པཱི’’ཏི ཝདནྟོ པི-སདྡོ ཝིསུཾ ཨཏྠི ནིཔཱཏོཏི དསྶེཏི. སམྨཱ ཨདྷིསཡིཏཱནཱིཏི པཱདཱདཱིཧི ཨུཔགྷཱཏཾ ཨཀརོནྟིཡཱ སམྨདེཝ ཨུཔརི སཡིཏཱནི, ཨཀམྨཀསྶཱཔི སཡཏིདྷཱཏུནོ ཨདྷིཔུབྦཏཱཡ སཀམྨཀཏཱ དཊྛབྦཱ. ནཁསིཁཱཏི ནཁགྒཱནི. སཀུཎཱནཾ ¶ པཀྑཱ ཧཏྠཔཱདཊྛཱནིཡཱཏི ཨཱཧ ‘‘སངྐུཊིཏཧཏྠཔཱདཱ’’ཏི. ཨེཏྠཱཏི ཨཱལོཀཊྛཱནེ. ནིཀྑམནྟཱནནྟི ནིཀྑམནྟེསུ, ནིདྡྷཱརཎེ ཧེཏཾ སཱམིཝཙནཾ. ཨཎྜཀོསནྟི ཨཎྜཀཔཱལཾ.

ལོཀོཡེཝ ལོཀསནྣིཝཱསོ. ཨབུཛ྄ཛྷི ཨེཏྠཱཏི རུཀྑོ བོདྷི, སཡཾ བུཛ྄ཛྷཏི, བུཛ྄ཛྷནྟི ཝཱ ཏེནཱཏི མགྒོཔི སབྦཉྙུཏཉྙཱཎམྤི བོདྷི. བུཛ྄ཛྷཱིཡཏཱིཏི ནིབྦཱནཾ བོདྷི. ཨནྟརཱ ཙ བོདྷིནྟི དུཏིཡམུདཱཧརཎཾ ཝིནཱཔི རུཀྑ-སདྡེན བོདྷི-སདྡསྶ རུཀྑཔྤཝཏྟིདསྶནཏྠཾ. ཝརབྷཱུརིམེདྷསོཏི མཧཱཔཐཝཱི ཝིཡ པཏྠཊཔཉྙོཏི ཨཏྠོ. ཏིསྶོ ཝིཛྫཱཏི ཨརཧཏྟམགྒོ ཨཏྟནཱ སཧ ཝཏྟམཱནཾ སམྨཱདིཊྛིསངྑཱཏཾ ཨཱསཝཀྑཡཉཱཎཉྩེཝ ཨིཏརཱ དྭེ མཧགྒཏཝིཛྫཱ ཙ ཏབྦིནིབནྡྷཀཀིལེསཝིདྡྷཾསནཝསེན ཨུཔྤཱདནཏོ ‘‘ཏིསྶོ ཝིཛྫཱ’’ཏི ཝུཙྩཏི. ཚ ཨབྷིཉྙཱཏི ཨེཏྠཱཔི ཨེསེཝ ནཡོ. སཱཝཀཔཱརམཱིཉཱཎནྟི ཨགྒསཱཝཀེཧི པཊིལབྷིཏབྦཾ སབྦམེཝ ལོཀིཡལོཀུཏྟརཉཱཎཾ. པཙྩེཀབོདྷིཉཱཎནྟི ཨེཏྠཱཔི ཨེསེཝ ནཡོ.

ཨོཔམྨསམྤཊིཔཱདནནྟི ཨོཔམྨཏྠསྶ ཨུཔམེཡྻེན སམཾ པཊིཔཱདནཾ. ཨཏྠེནཱཏི ཨུཔམེཡྻཏྠེན. ཏིཀྑཁརཝིཔྤསནྣསཱུརབྷཱཝོཏི ཨིམིནཱ སངྑཱརུཔེཀྑཱཔཏྟཏཾ ཝིཔསྶནཱཡ དསྶེཏི. པརིཎཱམཀཱལོཏི ཨིམིནཱ ཝུཊྛཱནགཱམིནིབྷཱཝཱཔཏྟིཾ. ཏདཱ ཙ སཱ མགྒཉཱཎགབྦྷཾ དྷཱརེནྟཱི ཝིཡ ཧོཏཱིཏི ཨཱཧ ‘‘གབྦྷགྒཧཎཀཱལོ’’ཏི. ཨནུཔུབྦཱདྷིགཏེནཱཏི པཋམམགྒཱདིཔཊིཔཱཊིཡཱ ཨདྷིགཏེན. ཙཏུརངྒསམནྣཱགཏནྟི ‘‘ཀཱམཾ ཏཙོ ཙ ནྷཱརུ ཙ ཨཊྛི ཙ ཨཝསིསྶཏུ ¶ (མ. ནི. ༢.༡༨༤; སཾ. ནི. ༢.༢༢; ཨ. ནི. ༢.༥; མཧཱནི. ༡༩༦), སརཱིརེ ཨུཔསུསྶཏུ མཾསལོཧིཏ’’ནྟི ཨེཝཾ ཝུཏྟཙཏུརངྒསམནྣཱགཏཾ ཝཱིརིཡཾ.

ཚནྡོ ཀཱམོཏིཨཱདཱིསུ པཏྠནཱཀཱརེན པཝཏྟོ དུབྦལོ ལོབྷོ ཨིཙྪནཊྛེན ཚནྡོ. ཏཏོ བལཝཱ རཉྫནཊྛེན རཱགོ. ཏཏོཔི བལཝཏརོ ཚནྡརཱགོ. ནིམིཏྟཱནུབྱཉྫནསངྐཔྤཝསེན པཝཏྟོ སངྐཔྤོ. ཏཏོཔི བལཝསངྐཔྤཝསེནེཝ པཝཏྟོ རཱགོ. ཏཏོཔི བལཝཏརོ སངྐཔྤརཱགོ. སྭཱཡཾ པབྷེདོ ཨེཀསྶེཝ ལོབྷསྶ པཝཏྟིཨཱཀཱརབྷེདེན ཨཝཏྠཱབྷེདེན ཙ ཝུཏྟོ.

པཋམཛ྄ཛྷཱནཀཐཱཝཎྞནཱ

སེཡྻཐིདནྟི ཏཾ ཀཐནྟི ཨཏྠོ. ཨེཏནྟི པུབྦཔདེཡེཝ ཨཝདྷཱརཎཀརཎཾ, ཨེཏཾ ཨཏྠཛཱཏཾ ཝཱ. ཏནྣིསྶརཎཏོཏི ཏེསཾ ཀཱམཱནཾ ནིསྶརཎཏྟཱ. ཨེསཱཏི ཨེཝ-ཀཱརོ. ཀཱམདྷཱཏུ ནཱམ ཀཱམབྷཝོ, ནེཀྑམྨནྟི པཋམཛ྄ཛྷཱནཾ. ཨེསཱཏི ནིཡམོ. ཏདངྒཝིཀྑམྦྷནསམུཙྪེདཔཊིཔྤསྶདྡྷིནིསྶརཎཝིཝེཀཱ ¶ ཏདངྒཝིཝེཀཱདཡོ. ཀཱཡཙིཏྟཨུཔདྷིཝིཝེཀཱ ཀཱཡཝིཝེཀཱདཡོ, ཏཡོ ཨེཝ ཨིདྷ ཛྷཱནཀཐཱཡ, སམུཙྪེདཝིཝེཀཱདཱིནཾ ཨསམྦྷཝཱ. ནིདྡེསེཏི མཧཱནིདྡེསེ. ཏཏྠེཝཱཏི མཧཱནིདྡེསེ ཨེཝ. ཝིབྷངྒེཏི ཛྷཱནཝིབྷངྒེ. ཨེཝཉྷི སཏཱིཏི ཨུབྷཡེསམྤི ཀཱམཱནཾ སངྒཧེ སཏི.

པུརིམེནཱཏི ཀཱཡཝིཝེཀེན. ཨེཏྠཱཏི ཨེཏསྨིཾ ཀཱཡཙིཏྟཝིཝེཀདྭཡེ. དུཏིཡེནཱཏི ཙིཏྟཝིཝེཀེན. ཨེཏེསནྟི ཡཐཱཝུཏྟནཡེན ཝཏྠུཀཱམཀིལེསཀཱམཝིཝེཀདྭཡསྶ ཝཱཙཀབྷཱུཏཱནཾ ཝིཝིཙྩེཝ ཀཱམེཧི ཝིཝིཙྩ ཨཀུསལེཧཱིཏི ཨིམེསཾ པདཱནཾ, ནིདྡྷཱརཎེ ཙེཏཾ སཱམིཝཙནཾ. བཱལབྷཱཝསྶ ཧེཏུཔརིཙྩཱགོཏི ཨནུཝཏྟཏི. ཨཀུསལདྷམྨོ ཧི བཱལབྷཱཝསྶ ཧེཏུ. ཨཱསཡཔོསནནྟི ཨཱསཡསྶ ཝིསོདྷནཾ ཝཌྜྷནཉྩ. ཝིབྷངྒེ ནཱིཝརཎཱནེཝ ཝུཏྟཱནཱིཏི སམྦནྡྷོ. ཏཏྠ ཀཱརཎམཱཧ ‘‘ཨུཔརིཛྷཱནངྒཔཙྩནཱིཀཔཊིཔཀྑབྷཱཝདསྶནཏོ’’ཏི. ཏཏྠ ཨུཔརི སཝིཏཀྐནྟིཨཱདིནཱ ཝུཙྩམཱནཱནི ཛྷཱནངྒཱནི, ཏེསཾ ཨཏྟནོ པཙྩནཱིཀཱནཾ པཊིཔཀྑབྷཱཝདསྶནཏོཏི ཨཏྠོ. ཨུཔརིཛྷཱནངྒཱནཾ པཙྩནཱིཀཔཊིཔཀྑབྷཱཝསྶ དསྶནཏོཏིཔི པཱཋོ. ཏཏྠ ‘‘ཨུཔརི ཝུཙྩམཱནཛྷཱནངྒཱནཾ ཨུཛུཝིཔཙྩནཱིཀཝསེན པཊིཔཀྑབྷཱཝདསྶནཏོ’’ཏི ‘‘ནཱིཝརཎཱནཾ ཏཱནེཝ ཝིབྷངྒེ ཝུཏྟཱནཱི’’ཏིཔི ཨཏྠཾ ཝདནྟི ¶ . པེཊཀེཏི མཧཱཀཙྩཱཡནཏྠེརེན ཀཏཾ ནེཏྟིཔྤཀརཎནཡཱནུསཱརིཔཀརཎཾ, ཏཾ པན པིཊཀཱནཾ ཝཎྞནཱབྷཱུཏཏྟཱ ‘‘པེཊཀ’’ནྟི ཝུཏྟཾ, ཏསྨིནྟི ཨཏྠོ.

ཝིཏཀྐནཾ ནཱམ ཨཱརམྨཎཔརིཀཔྤནནྟི ཨཱཧ ‘‘ཨཱུཧན’’ནྟི. རཱུཔཾ རཱུཔནྟིཨཱདིནཱ ཝིསཡེ ཨཱཀོཊེནྟསྶ ཝིསཡཔྤཝཏྟིཨཱཧནནཾ ཨུཔརི ཨཱཧནནནྟི ཝེདིཏབྦཾ. ཨཱརམྨཎེ ཙིཏྟསྶ ཨཱནཡནཾ ནཱམ ཨཱརམྨཎཱབྷིམུཁཀརཎཾ. ཨནུསཉྩརཎནྟི ཨནུཔརིབྦྷམནཾ, ཏཉྩ ཁཎནྟརསྶ ཏཐཱཀཱརེན ཨུཔྤཱདནམེཝ, ན ཧི པརམཏྠཏོ ཨེཀསྶ སཉྩརཎམཏྠི, ཨེཝམཉྙཏྠཱཔི ཨཱིདིསེསུ. ཨནུམཛྫནནྟི པརིམཛྫནཾ. ཏཏྠཱཏི ཨཱརམྨཎེ. སཧཛཱཏཱནུཡོཛནཾ སཀིཙྩཱནུཝཏྟིཏཱཀརཎེན. ཀཏྠཙཱིཏི དུཏིཡཛ྄ཛྷཱནཝིརཧིཏེསུ སཝིཙཱརཙིཏྟེསུ སབྦཏྠཱཏི ཨཏྠོ. ཝིཙཱརེན སཧ ཨུཔྤཛྫམཱནོཔི ཝིཏཀྐོ ཨཱརམྨཎེ ཨབྷིནིརོཔནཱཀཱརེན པཝཏྟིཾ སནྡྷཱཡ ‘‘པཋམཱབྷིནིཔཱཏོ’’ཏི ཝུཏྟོ. ཝིཔྥཱརཝཱཏི ཨཝཱུཔསནྟསབྷཱཝཏཱཡ ཝེགཝཱ, ཏེནེཝེས དུཏིཡཛ྄ཛྷཱནེ པཧཱནངྒཾ ཛཱཏཾ. པཋམདུཏིཡཛ྄ཛྷཱནེསཱུཏི པཉྩཀནཡཾ སནྡྷཱཡ ཝུཏྟཾ. ཨངྒཝིནིམུཏྟསྶ ཛྷཱནསྶ ཨབྷཱཝཾ དསྶེནྟོ རུཀྑོ ཝིཡཱཏིཨཱདིམཱཧ.

ཝིཝེཀ-སདྡསྶ བྷཱཝསཱདྷནཔཀྑེ ‘‘ཏསྨཱ ཝིཝེཀཱ’’ཏི ཝུཏྟཾ, ཨིཏརཔཀྑེ ‘‘ཏསྨིཾ ཝིཝེཀེ’’ཏི. པིནཡཏཱིཏི ཏཔྤེཏི, ཝཌྜྷེཏི ཝཱ. ཕརཎརསཱཏི པཎཱིཏརཱུཔེཧི ཀཱཡེ བྱཱཔནརསཱ. སཱཏལཀྑཎནྟི ¶ ཨིཊྛསབྷཱཝཾ, མདྷུརནྟི ཨཏྠོ. སམྤཡུཏྟཱནཾ པཱིལ༹ནཛ྄ཛྷུཔེཀྑནཾ ཨཀཏྭཱ ཨནུ ཨནུ གཎྷནཾ ཨུཔཀཱརིཏཱ ཝཱ ཨནུགྒཧོ. ཝནམེཝ ཝནནྟཾ. ཨུདཀམེཝ ཨུདཀནྟཾ. ཏསྨིཾ ཏསྨིཾ སམཡེ པཱཀཊབྷཱཝཏོཏི ཨིམིནཱ ཨིཊྛཱརམྨཎཱདིཔཊིལཱབྷསམཡེཔི སུཁཾ ཝིཛྫམཱནམྤི ཨཔཱཀཊཾ, པཱིཏིཡེཝ ཏཏྠ པཱཀཊཱ, པཊིལདྡྷརསཱནུབྷཝནསམཡེ ཙ ཝིཛྫམཱནཔཱིཏིཏོཔི སུཁམེཝ པཱཀཊཏརནྟི དསྶེཏི. ཨེཏྠ ཙ ཙེཏསིཀསུཁཝསེནེཝ པཊིལདྡྷརསཱནུབྷཝནཾ ཝེདིཏབྦཾ, ན ཀཱཡིཀསུཁཝསེན ཏསྶ པཱིཏིསམྤཡོགསྶེཝ ཨབྷཱཝེན ཨིདྷཱནདྷིཔྤེཏཏྟཱ. ཨཡཉྩ པཱིཏཱིཏིཨཱདི ཨཉྙཔདཏྠསམཨཱསདསྶནཾ, ཨསྶཏྠིཔཀྑེ ཏདྡྷིཏཔཙྩཡདསྶནཾ ཝཱ. དུཏིཡཝིཀཔྤེན ཨཉྙཔདཏྠསམཱསཝསེནེཝ ‘‘ཝིཝེཀཛཾ པཱིཏིསུཁ’’ནྟི ཨིདཾ ཨེཀཾ པདནྟི དསྶེཏི, ཝིབྷཏྟིཡཱ ཙ ཨལོཔཾ.

གཎནཱནུཔུབྦཏཱཏི ¶ དེསནཱཀྐམཾ སནྡྷཱཡ ཝུཏྟཾ. པཋམཾ སམཱཔཛྫཏཱིཏི ཨིདཾ ཨཱདིཀམྨིཀཝསེན ཝུཏྟཾ, ཙིཎྞཝསཱིནཾ པན ཡོགཱིནཾ ཨུཔྤཊིཔཱཊིཡཱཔི ཛྷཱནཾ ཨུཔྤཛྫཏེཝ. ཛྷཱཔེཏཱིཏི དཧཏི. ཨནིཙྩཱདིལཀྑཎཝིསཡཱཡ ཝིཔསྶནཱཡ ཨུཔནིཛ྄ཛྷཱཡནཾ ཀཐཾ ནིབྦཱནཱལམྦནསྶ མགྒསྶ ཧོཏཱིཏི ཨཱཧ ཝིཔསྶནཱཡཱཏིཨཱདི. ཏཏྠ མགྒེན སིཛ྄ཛྷཏཱིཏི ནིཙྩཱདིཝིཔལླཱསཔྤཧཱཡཀེན སཧ མགྒེནེཝ ཏཾ ལཀྑཎཱུཔནིཛ྄ཛྷཱནཾ ཨསམྨོཧཏོ ཨཏྟནོ སིཛ྄ཛྷཏི. ཨཐ ཝཱ མགྒེནཱཏི མགྒཀིཙྩེན, ཝིཔལླཱསཔྤཧཱནེནཱཏི ཨཏྠོ.

ཨཉྙོཏི སཏྟོ. ཨཝུཏྟཏྟཱཏི ‘‘སཙིཏྟེཀགྒཏ’’ནྟི ཛྷཱནཔཱལི༹ཡཾ (ཝིབྷ. ༥༠༨ ཨཱདཡོ) ཨཝུཏྟཏྟཱ. ཝུཏྟཏྟཱཏི ཏསྶཱ ཛྷཱནཔཱལི༹ཡཱ ཝིབྷངྒེ ཝུཏྟཏྟཱ.

དུཏིཡཛ྄ཛྷཱནཀཐཱཝཎྞནཱ

ཨཛ྄ཛྷཏྟནྟི ཛྷཱནཝིསེསནཏྟཱ ཝུཏྟཾ ‘‘ཨིདྷ ནིཡཀཛ྄ཛྷཏྟམདྷིཔྤེཏ’’ནྟི. ཛྷཱནཉྷི ཨཛ྄ཛྷཏྟཛ྄ཛྷཏྟཾ ན ཧོཏི ཚལི༹ནྡྲིཡཱནམེཝ ཏབྦྷཱཝཏོ. ཁུདྡཀཱ ཨཱུམིཡོ ཝཱིཙིཡོ. མཧཏིཡོ ཏརངྒཱ. སནྟཱ ཧོནྟི སམིཏཱཏིཨཱདཱིནི ཨཉྙམཉྙཝེཝཙནཱནི, ཛྷཱནབལེན སམཏིཀྐནྟཱཏི ཨདྷིཔྤཱཡོ. ཨཔྤིཏཱཏི གམིཏཱ ཝིནཱསཾ པཱཔིཏཱ. པརིཡཱཡོཏི ཛྷཱནཔརིཀྑཱརེ ཛྷཱནཝོཧཱརཏྟཱ ཨཔརམཏྠཏོ.

ཏཏིཡཛ྄ཛྷཱནཀཐཱཝཎྞནཱ

ཏདདྷིགམཱཡཱཏི ཏཏིཡམགྒཱདྷིགམཱཡ. ཨུཔཔཏྟིཏོ ཨིཀྑཏཱིཏི པཉྙཱཡ སཧཙརཎཔརིཙཡེན ཡཐཱ ¶ སམཝཱཧིབྷཱཝོ ཧོཏི, ཨེཝཾ ཡུཏྟིཏོ པསྶཏི. ཝིཔུལཱཡཱཏི མཧགྒཏབྷཱཝཔྤཏྟཱཡ. ཐཱམགཏཱཡཱཏི ཝིཏཀྐཝིཙཱརཔཱིཏིཝིགམེན ཐིརབྷཱཝཔྤཏྟིཡཱ, ཏེནེཝ ཝཀྑཏི ‘‘ཝིཏཀྐཝིཙཱརཔཱིཏཱིཧི ཨནབྷིབྷཱུཏཏྟཱ’’ཏིཨཱདི. (པཱརཱ. ཨཊྛ. ༡.༡༡ ཏཏིཡཛ྄ཛྷཱནཀཐཱ). ཨུཔེཀྑཱབྷེདཾ དསྶེཏྭཱ ཨིདྷཱདྷིཔྤེཏཾ ཨུཔེཀྑཾ པཀཱསེཏུཾ ཨུཔེཀྑཱ པནཱཏིཨཱདི ཝུཏྟཾ. ཏཏྠ ཏཏྲམཛ྄ཛྷཏྟཏཱཝ ཁཱིཎཱསཝཱནཾ ཨིཊྛཱནིཊྛཚལཱ༹རམྨཎཱཔཱཐེ པརིསུདྡྷཔཀཏིབྷཱཝཱཝིཛཧནཱཀཱརེན ཨཛ྄ཛྷུཔེཀྑནཏོ ‘‘ཚལ༹ངྒུཔེཀྑཱ’’ཏི ཙ, སཏྟེསུ མཛ྄ཛྷཏྟཱཀཱརཔྤཝཏྟཏྟཱ ‘‘བྲཧྨཝིཧཱརུཔེཀྑཱ’’ཏི ཙ, སཧཛཱཏདྷམྨཱནཾ མཛ྄ཛྷཏྟཱཀཱརབྷཱུཏཱ ‘‘བོཛ྄ཛྷངྒུཔེཀྑཱ’’ཏི ཙ, ཀེཝལཱ ‘‘ཏཏྲམཛ྄ཛྷཏྟུཔེཀྑཱ’’ཏི ¶ ཙ, ཏཏིཡཛ྄ཛྷཱནསཧགཏཱ ཨགྒསུཁེཔི ཏསྨིཾ ཨཔཀྑཔཱཏབྷཱུཏཱ ‘‘ཛྷཱནུཔེཀྑཱ’’ཏི ཙ, ཙཏུཏྠཛ྄ཛྷཱནསཧགཏཱ སབྦཔཙྩནཱིཀཔརིསུདྡྷིཏཱཡ ‘‘པཱརིསུདྡྷུཔེཀྑཱ’’ཏི ཙ ཏེན ཏེན ཨཝཏྠཱབྷེདེན ཚདྷཱ ཝུཏྟཱ.

ཝཱིརིཡམེཝ པན ཨནཙྩཱརདྡྷཨནཏིསིཐིལེསུ སཧཛཱཏེསུ སངྑཱརེསུ ཨུཔེཀྑནཱཀཱརེན པཝཏྟཾ ‘‘ཝཱིརིཡུཔེཀྑཱ’’ཏི ཝུཏྟཾ. ཨཊྛནྣཾ རཱུཔཱརཱུཔཛ྄ཛྷཱནཱནཾ པཊིལཱབྷཏོ པུབྦབྷཱགེ ཨེཝ ནཱིཝརཎཝིཏཀྐཝིཙཱརཱདཱིནཾ པཧཱནཱབྷིམུཁཱིབྷཱུཏཏྟཱ ཏེསཾ པཧཱནེཔི ཨབྱཱཔཱརབྷཱཝཱུཔགམནེན མཛ྄ཛྷཏྟཱཀཱརཔྤཝཏྟཱ སམཱདྷིཝསེན ཨུཔྤནྣཱ ཨཊྛ པཉྙཱ ཙེཝ ཨུཔཱདཱནཀྑནྡྷབྷཱུཏེསུ སངྑཱརེསུ ཨཛ྄ཛྷུཔེཀྑནཱཀཱརཔྤཝཏྟཱ ཝིཔསྶནཱཝསེན ཨུཔྤནྣཱ ཙཏུནྣཾ མགྒཱནཾ པུབྦབྷཱགེ ཏསྶ ཏསྶ ཨདྷིགམཱཡ ཙཏསྶོ ཙཏུནྣཾ ཕལསམཱཔཏྟཱིནཾ པུབྦབྷཱགེ ཏསྶ ཏསྶ ཨདྷིགམཱཡ ཨཔྤཎིཧིཏཝིམོཀྑཝསེན པཝཏྟཱ ཙཏསྶོ སུཉྙཏཨནིམིཏྟཝིམོཀྑཝསེན དྭེཏི དས པཉྙཱ ཙཱཏི ཨིམེ ཨཊྛཱརས པཉྙཱ སངྑཱརུཔེཀྑཱ ནཱམ. ཡཐཱཝུཏྟཝིཔསྶནཱཔཉྙཱཝ ལཀྑཎཝིཙིནནེཔི མཛ྄ཛྷཏྟབྷཱུཏཱ ཝིཔསྶནུཔེཀྑཱ ནཱམ. ཨདུཀྑམསུཁཝེདནཱ ཝེདནུཔེཀྑཱ ནཱམ. ཨིམཱསཾ པན དསནྣམྤི ཨུཔེཀྑཱནཾ ‘‘ཏཏྠ ཏཏྠ ཨཱགཏནཡཏོ ཝིབྷཱགོ དྷམྨསངྒཧཊྛཀཐཱཡཾ ཝུཏྟནཡེན ཝེདིཏབྦོ’’ཏི དསྶེནྟོ ཨཱཧ ཨེཝམཡཾ དསཝིདྷཱཔཱིཏིཨཱདི. ཏཏྠ ཏཏྠ ཨཱགཏནཡཏོཏི ཨིདམྤི ཧི ཏཱསཾ ཝིབྷཱགདསྶནསྶ བྷཱུམིཔུགྒལཱདིཔདཾ ཝིཡ ཝིསུཾ མཱཏིཀཱཔདཝསེན ཝུཏྟཾ, ན པན བྷཱུམིཔུགྒལཱདིཝསེན ཝིབྷཱགདསྶནསྶ ཨཱགཏཊྛཱནཔརཱམསནཾ ཨཱགཏཊྛཱནསྶ ཨཊྛསཱལིནིཡཱཏིཨཱདིནཱ ཝུཏྟཏྟཱ, ཏསྨཱ སཱརཏྠདཱིཔནིཡཾ (སཱརཏྠ. ཊཱི. ༡.༡༡ ཏཏིཡཛ྄ཛྷཱནཀཐཱ) ཡཾ ཝུཏྟཾ ‘‘ཨིམཱསཾ པན དསནྣམྤི ཨུཔེཀྑཱནཾ བྷཱུམིཔུགྒལཱདིཝསེན ཝིབྷཱགོ ཏཏྠ ཏཏྠ ཝུཏྟནཡེནེཝ ཝེདིཏབྦོཏི དསྶེནྟོ ཨཱཧ ཨེཝམཡཾ དསཝིདྷཱཏིཨཱདཱི’’ཏི, ཏཾ ཨམནསིཀཏྭཱ ཝུཏྟནྟི གཧེཏབྦཾ. ཏཏྠ ཏཏྠ ཨཱགཏནཡཏོཏི ‘‘ཨིདྷ (ཁཱིཎཱསཝོ) བྷིཀྑུ ཙཀྑུནཱ རཱུཔཾ དིསྭཱ ནེཝ སུམནོ ཧོཏི, ན དུམྨནོ, ཨུཔེཀྑཀོ ཝིཧརཏི སཏོ སམྤཛཱནོ’’ཏིཨཱདིནཱ (དཱི. ནི. ༣.༣༤༨; ཨ. ནི. ༦.༡) ཚལ༹ངྒུཔེཀྑཱ ཨཱགཏཱ, ‘‘ཨུཔེཀྑཱསཧགཏེན ¶ ཙེཏསཱ ཨེཀཾ དིསཾ ཕརིཏྭཱ ཝིཧརཏཱི’’ཏི (དཱི. ནི. ༣.༣༠༨; མ. ནི. ༡.༧༧; ༢.༣༠༩; ༣.༢༣༠) ཨེཝཾ བྲཧྨཝིཧཱརུཔེཀྑཱ ཨཱགཏཱཏི ཨིམིནཱ ནཡེན ¶ དསནྣམྤི ཨུཔེཀྑཱནཾ ཏཏྠ ཏཏྠ ཝུཏྟཔདེསེསུ ཨཱགཏནཡདསྶནཏོ ཙ ཨཡཾ དསཝིདྷཱཔི ཨུཔེཀྑཱ དྷམྨསངྒཧཊྛཀཐཱཡཾ ཝུཏྟནཡེནེཝ ཝེདིཏབྦཱཏི སམྦནྡྷོ.

བྷཱུམཱིཏིཨཱདཱིསུ པན ཚལ༹ངྒུཔེཀྑཱ ཀཱམཱཝཙརཱ, བྲཧྨཝིཧཱརུཔེཀྑཱ རཱུཔཱཝཙརཱཏིཨཱདིནཱ བྷཱུམིཏོ ཙ, ཚལ༹ངྒུཔེཀྑཱ ཨསེཀྑཱནམེཝ, བྲཧྨཝིཧཱརུཔེཀྑཱ པུཐུཛྫནཱདཱིནཾ ཏིཎྞམྤི པུགྒལཱནནྟིཨཱདིནཱ པུགྒལཏོ ཙ, ཚལ༹ངྒུཔེཀྑཱ སོམནསྶུཔེཀྑཱསཧགཏཙིཏྟསམྤཡུཏྟཱཏིཨཱདིནཱ ཙིཏྟཏོ ཙ, ཚལ༹ངྒུཔེཀྑཱ ཚལཱ༹རམྨཎཱཏིཨཱདིནཱ ཨཱརམྨཎཏོ ཙ, ‘‘ཝེདནུཔེཀྑཱ ཝེདནཱཀྑནྡྷེན སངྒཧིཏཱ, ཨིཏརཱ ནཝ སངྑཱརཀྑནྡྷེནཱ’’ཏི ཁནྡྷསངྒཧཝསེན ཙ, ‘‘ཚལ༹ངྒུཔེཀྑཱ བྲཧྨཝིཧཱརབོཛ྄ཛྷངྒཛྷཱན པཱརིསུདྡྷིཏཏྲམཛ྄ཛྷཏྟུཔེཀྑཱ ཙ ཨཏྠཏོ ཨེཀཱ. ཏསྨཱ ཨེཀཀྑཎེ ཙ ཏཱསུ ཨེཀཱཡ སཏི ཨིཏརཱ ན ཨུཔྤཛྫནྟི, ཏཐཱ སངྑཱརུཔེཀྑཱ ཝིཔསྶནུཔེཀྑཱཔི ཝེདིཏབྦཱ. ཝེདནཱཝཱིརིཡུཔེཀྑཱནམེཀཀྑཎེ སིཡཱ ཨུཔྤཏྟཱི’’ཏི ཨེཀཀྑཎཝསེན ཙ, ‘‘ཚལ༹ངྒུཔེཀྑཱ ཨབྱཱཀཏཱ བྲཧྨཝིཧཱརུཔེཀྑཱ ཀུསལཱབྱཱཀཏཱ, ཏཐཱ སེསཱ. ཝེདནུཔེཀྑཱ པན སིཡཱ ཨཀུསལཱཔཱི’’ཏི ཨེཝཾ ཀུསལཏྟིཀཝསེན ཙ, ‘‘སངྑེཔཏོ ཙཏྟཱརོ ཙ དྷམྨཱ ཝཱིརིཡཝེདནཱཏཏྲམཛ྄ཛྷཏྟཏཱཉཱཎཝསེནཱ’’ཏི ཨེཝཾ སངྑེཔཝསེན ཙ ཨཡཾ དསཝིདྷཱཔི ཨུཔེཀྑཱ དྷམྨསངྒཧཊྛཀཐཱཡཾ ཝུཏྟནཡེནེཝ ཝེདིཏབྦཱཏི ཡོཛནཱ.

ཨེཏྠ ཙེཏཱ ཀིཉྩཱཔི ཨཊྛསཱལིནིཡཾ བྷཱུམིཔུགྒལཱདིཝསེན སརཱུཔཏོ ཨུདྡྷརིཏྭཱ ན ཝུཏྟཱ, ཏཐཱཔི ཏཏྠ ཝུཏྟཔྤཀཱརེཧེཝ ཏཱསཾ བྷཱུམིཔུགྒལཱདིཝིབྷཱགོ ནཡཏོ ཨུདྡྷརིཏྭཱ སཀྐཱ ཉཱཏུནྟི ཏཏྠ སརཱུཔཏོ ཝུཏྟཉྩ ཨཝུཏྟཉྩ ཨེཀཏོ སངྒཧེཏྭཱ ཏཏྠ ཏཏྠ ཨཱགཏནཡཏོཏིཨཱདཱིཧི ནཝཧི པཀཱརེཧི ཨཏིདེསོ ཀཏོ, ཏེནེཝ ‘‘དྷམྨསངྒཧཊྛཀཐཱཡཾ ཝུཏྟཝསེནཱ’’ཏི ཨཝཏྭཱ ‘‘ཝུཏྟནཡེནེཝཱ’’ཏི ཝུཏྟཾ. ཏཐཱཧི ཁཱིཎཱསཝོ བྷིཀྑུ ཙཀྑུནཱ རཱུཔཾ དིསྭཱཏི ཨཱདིམྷི ཝུཏྟེ ཚལ༹ངྒུཔེཀྑཱ རཱུཔཱདིཨཱརམྨཎཏཱཡ བྷཱུམིཏོ ཀཱམཱཝཙརཱ ཙ པུགྒལཏོ ཨསེཀྑཱནམེཝ ཙ ཨུཔྤཛྫཏི, ཙིཏྟཏོ སོམནསྶུཔེཀྑཱཙིཏྟསམྤཡུཏྟཱ, ཨཱརམྨཎཏོ ཚལཱ༹རམྨཎཱ, ཀུསལཏྟིཀཏོ ཨབྱཱཀཏཱ ཙཱཏི པཎྜིཏེཧི སཀྐཱ ¶ ཉཱཏུཾ, ཏཐཱ ཚལ༹ངྒུཔེཀྑཱ ཙ བྲཧྨཝིཧཱརུཔེཀྑཱ ཙ ཏཏྲམཛ྄ཛྷཏྟུཔེཀྑཱ ཙ ཛྷཱནུཔེཀྑཱ ཙ པཱརིསུདྡྷུཔེཀྑཱ ཙ ཨཏྠཏོ ཨེཀཱཏིཨཱདིམྷི ཝུཏྟེ པནསྶ སངྑཱརཀྑནྡྷསངྒཧིཏཏྟཱ བྲཧྨཝིཧཱརུཔེཀྑཱདཱིཧི སཧ ཨེཀཀྑཎེ ཨནུཔྤཏྟིཨཱདཡོ ཙ སཀྐཱ ཉཱཏུཾ, ཡཐཱ ཙ ཚལ༹ངྒུཔེཀྑཱ, ཨེཝཾ སེསཱནམྤི ཡཐཱརཧཾ ཨཊྛསཱལིནིཡཾ ཝུཏྟནཡཏོ བྷཱུམིཨཱདིཝིབྷཱགུདྡྷཱརནཡོ ¶ ཉཱཏབྦོ. ཨནཱབྷོགརསཱཏི པཎཱིཏསུཁེཔི ཏསྨིཾ ཨཝནཏིཔཊིཔཀྑཀིཙྩཱཏི ཨཏྠོ.

པུགྒལེནཱཏི པུགྒལཱདྷིཊྛཱནེན. ཀིལེསེཧི སམྤཡུཏྟཱནཾ ཨཱརཀྑཱ. ཏཱིརཎཾ ཀིཙྩསྶ པཱརགམནཾ. པཝིཙཡོ ཝཱིམཾསཱ. ཨིདནྟི སཏིསམྤཛཉྙཾ. ཡསྨཱ ཏསྶ ནཱམཀཱཡེན སམྤཡུཏྟཾ སུཁནྟི ཨིམསྶ ཏསྨཱ ཨེཏམཏྠནྟིཨཱདིནཱ སམྦནྡྷོ. ཏསྶཱཏི ཛྷཱནསམངྒིནོ. ཏཾསམུཊྛཱནེནཱཏི ཏཾ ཡཐཱཝུཏྟནཱམཀཱཡསམྤཡུཏྟཾ སུཁཾ སམུཊྛཱནཾ ཀཱརཎཾ ཡསྶ རཱུཔསྶ ཏེན ཏཾསམུཊྛཱནེན རཱུཔེན. ཨསྶཱཏི ཡོགིནོ. ཡསྶཱཏི རཱུཔཀཱཡསྶ. ཕུཊཏྟཱཏི ཨཏིཔཎཱིཏེན རཱུཔེན ཕུཊཏྟཱ. ཨེཏམཏྠཾ དསྶེནྟོཏི ཀཱཡིཀསུཁཧེཏུབྷཱུཏརཱུཔསམུཊྛཱཔཀནཱམཀཱཡསུཁཾ པཊིསཾཝེདིཡམཱནོ ཨེཝ ཛྷཱནསམངྒིཏཱཀརཎེ ཀཱརིཡོཔཙཱརཏོ ‘‘སུཁཉྩ ཀཱཡེན པཊིསཾཝེདེཏཱི’’ཏི ཝུཙྩཏཱིཏི ཨིམམཏྠཾ དསྶེནྟོཏི ཨཏྠོ. ཡནྟི ཧེཏུཨཏྠེ ནིཔཱཏོཏི ཨཱཧ ‘‘ཡཾཛྷཱནཧེཏཱུ’’ཏི. སུཁཔཱརམིཔྤཏྟེཏི སུཁསྶ ཨུཀྐཾསཔརིཡནྟཾ པཏྟེ. ཨེཝམེཏེསཾ པཧཱནཾ ཝེདིཏབྦནྟི སམྦནྡྷོ. ཨཐ ཀསྨཱ ཛྷཱནེསྭེཝ ནིརོདྷོ ཝུཏྟོཏི སམྦནྡྷོ.

ཙཏུཏྠཛ྄ཛྷཱནཀཐཱཝཎྞནཱ

ཀཏྠ ཙུཔྤནྣནྟི ཨེཏྠ ཀཏྠཱཏི ཧེཏུམྷི བྷུམྨཾ, ཀསྨིཾ ཧེཏུམྷི སཏཱིཏི ཨཏྠོ. ནཱནཱཝཛྫནེཏི ཨཔྤནཱཝཱིཐིཨཱཝཛྫནཏོ ནཱནཱ བྷིནྣཾ པུརིམཝཱིཐཱིསུ ཨཱཝཛྫནཾ ཡསྶ ཨུཔཙཱརསྶ, ཏསྨིཾ ནཱནཱཝཛྫནེ. ཝིསམནིསཛྫཱཡ ཨུཔྤནྣཀིལམཐོ ཝིསམཱསནུཔཏཱཔོ. ཨུཔཙཱརེ ཝཱཏིཨཱདི པཀྑནྟརདསྶནཾ ཨེཀཱཝཛྫནཱུཔཙཱརེཔི ཝཱཏི ཨཏྠོ. པཱིཏིཕརཎེནཱཏི ཨིམིནཱ ཨཔྤནཱཝཱིཐིཡཱ ཝིཡ ཨེཀཝཱིཐིཡམྤི ཀཱམཱཝཙརཔཱིཏིཡཱ ཕརཎམཏྟསྶ ཨབྷཱཝཾ དསྶེཏི. དོམནསྶིནྡྲིཡསྶ ཨསྶ སིཡཱ ཨུཔྤཏྟཱིཏི སམྦནྡྷོ. ཨེཏནྟི དོམནསྶིནྡྲིཡཾ ཨུཔྤཛྫཏཱིཏི སམྦནྡྷོ. ཝིཏཀྐཝིཙཱརཔྤཙྩཡེཔཱིཏི པི-སདྡོ ཨཊྛཱནཔྤཡུཏྟོ. སོ ‘‘པཧཱིནསྶཱ’’ཏི ཧེཊྛཱ ཝུཏྟཔདཱནནྟརཾ ཡོཛེཏབྦོ ¶ ‘‘པཧཱིནསྶཱཔི དོམནསྶིནྡྲིཡསྶཱ’’ཏི. ཝིཏཀྐཝིཙཱརབྷཱཝེཏི ཨེཏྠ ‘‘ཨུཔྤཛྫཏི དོམནསྶིནྡྲིཡ’’ནྟི ཨཱནེཏྭཱ སམྦནྡྷིཏབྦཾ. ནིམིཏྟཏྠེ ཙེཏཾ བྷུམྨཾ, ཝིཏཀྐཝིཙཱརབྷཱཝཧེཏཱུཏི ཨཏྠོ. ཝིཏཀྐཝིཙཱརཱཏི ཨེཏྠ ཨིཏི-སདྡོ ཏསྨཱཏི ཨེཏསྨིཾ ཨཏྠེ དཊྛབྦོ, ཏེན ཡསྨཱ ཨེཏཾ དོམནསྶིནྡྲིཡཾ ཝིཏཀྐཝིཙཱརཔཙྩཡེ…པེ… ནེཝ ཨུཔྤཛྫཏི, ཡཏྠ པན ཨུཔྤཛྫཏི, ཏཏྠ ཝིཏཀྐཝིཙཱརབྷཱཝེཡེཝ ཨུཔྤཛྫཏི. ཡསྨཱ ཙ ཨཔྤཧཱིནཱཡེཝ དུཏིཡཛ྄ཛྷཱནཱུཔཙཱརེ ཝིཏཀྐཝིཙཱརཱ, ཏསྨཱ ཏཏྠསྶ སིཡཱ ཨུཔྤཏྟཱིཏི ཨེཝམེཏྠ ཡོཛནཱ ཝེདིཏབྦཱ.

ཏཏྠཱཏི ¶ དུཏིཡཛ྄ཛྷཱནཱུཔཙཱརེ. ཨསྶཱཏི དོམནསྶིནྡྲིཡསྶ. སིཡཱ ཨུཔྤཏྟཱིཏི ཨིདཉྩ པཙྩཡམཏྟདསྶནེན སམྦྷཱཝནམཏྟཏོ ཝུཏྟཾ. དོམནསྶུཔྤཏྟིསམྦྷཱཝནཱཔི ཧི ཨུཔཙཱརཀྑཎེཡེཝ ཀཱཏུཾ ཡུཏྟཱ, ཝིཏཀྐཝིཙཱརརཧིཏེ པན དུཏིཡཛ྄ཛྷཱནཀྑཎེ ཏདུཔྤཏྟིསམྦྷཱཝནཱཔི ན ཡུཏྟཱ ཀཱཏུནྟི. ཨིཏརཐཱ ཀུསལཙིཏྟཀྑཎེ ཨཀུསལདོམནསྶུཔྤཏྟིཡཱ ཨསམྦྷཝཏོ ‘‘ཏཏྠསྶ སིཡཱ ཨུཔྤཏྟཱི’’ཏི ན ཝཏྟབྦཾ སིཡཱ. སམཱིཔཏྠེ ཝཱ ཨེཏཾ བྷུམྨཾ, ཨུཔཙཱརཛ྄ཛྷཱནཱནནྟརཝཱིཐཱིསཱུཏི ཨཏྠོ. དུཏིཡཛ྄ཛྷཱནེཏི ཨེཏྠཱཔི ཨནནྟརཝཱིཐཱིསུཔི ན ཏྭེཝ ཨུཔྤཛྫཏཱིཏི ཨཏྠོ, ཨེཝཾ ཨུཔརི སུཁིནྡྲིཡེཔི. སོམནསྶིནྡྲིཡསྶ ཨུཔྤཏྟཱིཏི སམྦནྡྷོ. པཧཱིནཱཏི ཝུཏྟཱཏི ཨིདཾ ‘‘པཉྩནྣཾ ཨོརམྦྷཱགིཡཱནཾ སཾཡོཛནཱནཾ པརིཀྑཡཱ’’ཏི ཝུཏྟཏྟཱ ཝུཏྟཾ. དུཀྑཱབྷཱཝེནཱཏི དུཀྑཏཱབྷཱཝེན. ཨེཝཾ སུཁཱབྷཱཝེནཱཏི ཨེཏྠཱཔི. ཨེཏེནཱཏི དུཀྑསུཁཔཊིཀྑེཔཝཙནེན. ཨིཊྛཱནིཊྛཝིཔརཱིཏཱནུབྷཝནལཀྑཎཱཏི ཨཏིཨིཊྛཨཏིཨནིཊྛཱནཾ ཝིཔརཱིཏསྶ མཛ྄ཛྷཏྟཱརམྨཎསྶ ཨནུབྷཝནལཀྑཎཱ, མཛ྄ཛྷཏྟཱརམྨཎམྤི ཧི ཨིཊྛཱནིཊྛེསུ ཨེཝ པཝིཊྛཾ ཏབྦིནིམུཏྟསྶ ཨབྷཱཝཱ.

ཛྷཱནཙཏུཀྐཀཐཱཝཎྞནཱནཡོ ནིཊྛིཏོ.

པུབྦེནིཝཱསཀཐཱཝཎྞནཱ

༡༢. ཨརཱུཔཛ྄ཛྷཱནཱནམྤི ཨངྒསམཏཱཡ ཙཏུཏྠཛ྄ཛྷཱནེ སངྒཧོཏི ཨཱཧ ཀེསཉྩི ཨབྷིཉྙཱཔཱདཀཱནཱིཏིཨཱདི, ཏེནེཝ ཝཀྑཏི ‘‘ཨཊྛ སམཱཔཏྟིཡོ ནིབྦཏྟེཏྭཱ’’ཏིཨཱདི (པཱརཱ. ཨཊྛ. ༡.༡༢). ཏེསུ ཙ ཙཏུཏྠཛ྄ཛྷཱནམེཝ ཨབྷིཉྙཱཔཱདཀཾ ནིརོདྷཔཱདཀཾ ¶ ཧོཏི, ན ཨིཏརཱནི. དཱུརཀཱརཎཏཾ པན སནྡྷཱཡ ‘‘ཙཏྟཱརི ཛྷཱནཱནཱི’’ཏི ནེསམྤི ཨེཀཏོ གཧཎཾ ཀཏནྟི དཊྛབྦཾ. ཙིཏྟེཀགྒཏཏྠཱནཱིཏི ཨིདཾ དིཊྛདྷམྨསུཁཝིཧཱརཾ སནྡྷཱཡ ཝུཏྟནྟི ཨཱཧ ཁཱིཎཱསཝཱནནྟིཨཱདི. སབྦཀིཙྩསཱདྷཀནྟི དིབྦཝིཧཱརཱདིསབྦབུདྡྷཀིཙྩསཱདྷཀཾ. སབྦལོཀིཡལོཀུཏྟརགུཎདཱཡཀནྟི ཨིམིནཱ ཡཐཱཝུཏྟཾ ཝིཔསྶནཱཔཱདཀཏྟཱདིསབྦཾ སམྤིཎྜེཏི. ཨིདཉྷི ཛྷཱནཾ བྷགཝཏོ སབྦབུདྡྷགུཎདཱཡཀསྶ མགྒཉཱཎསྶ པདཊྛཱནཏྟཱ ཨེཝཾ ཝུཏྟནྟི དཊྛབྦཾ. ཡཐཡིདནྟི ཡཐཱ ཨིདཾ. ཨབྷིནཱིཧཱརཀྑམནྟི ཨིདྡྷིཝིདྷཱདིཨཏྠཾ ཏདབྷིམུཁཾ ནཱིཧརཎཡོགྒཾ.

ཛྷཱནཔྤཊིལཱབྷཔཙྩཡཱནནྟི ཛྷཱནཔྤཊིལཱབྷཧེཏུཀཱནཾ ཛྷཱནཔྤཊིལཱབྷཾ ནིསྶཱཡ ཨུཔྤཛྫནཀཱནཾ. པཱཔཀཱནནྟི ལཱམཀཱནཾ. ཨིཙྪཱཝཙརཱནནྟི ཨིཙྪཱཡ ཝསེན ཨོཏིཎྞཱནཾ ནཱིཝརཎབྷཱཝཾ ཏདེཀཊྛཏཉྩ ཨཔྤཏྟཱནཾ ཨཏྟུཀྐཾསནཱདིཝསཔྤཝཏྟཱནཾ ཨཧོ ཝཏ མམེཝ སཏྠཱ པཊིཔུཙྪིཏྭཱ བྷིཀྑཱུནཾ ཨེཝརཱུཔཾ དྷམྨཾ དེསེཡྻཱཏིཨཱདིནཡཔྤཝཏྟཱནཾ མཱནཱདཱིནཾ. པོཏྠཀེསུ པན ‘‘ཛྷཱནཔྤཊིལཱབྷཔཙྩནཱིཀཱན’’ནྟིཔི ¶ པཱཋཾ ལིཁནྟི, སོ པམཱདཔཱཋོཏི གཧེཏབྦོ ‘‘ཛྷཱནཔྤཊིལཱབྷཔཙྩནཱིཀཱནཾ ནཱིཝརཎཱནཾ ཨབྷཱཝསྶ ནཱིཝརཎདཱུརཱིབྷཱཝེན པརིསུདྡྷོ’’ཏི ཨེཝཾ པུབྦེ པརིསུདྡྷཔདེཡེཝ ཝུཏྟཏྟཱ. སཱརཏྠདཱིཔནིཡཾ (སཱརཏྠ. ཊཱི. ༡.༡༢) པན ‘‘ཨིཙྪཱཝཙརཱནནྟི ཨིཙྪཱཡ ཨཝཙརཱནཾ ཨིཙྪཱཝསེན ཨོཏིཎྞཱནཾ པཝཏྟཱནཾ ནཱནཔྤཀཱརཱནཾ ཀོཔཨཔྤཙྩཡཱནནྟི ཨཏྠོཏི ཨཡམྤི པཱཋོ ཨཡུཏྟོ ཨེཝཱཏི གཧེཏབྦཾ. ཏཏོ ཨེཝ ཙ ཝིསུདྡྷིམགྒེ ཨཡཾ པཱཋོ སབྦེན སབྦཾ ན དསྶིཏོ’’ཏི ཝུཏྟཾ. ཏཏྠ ཙ ནཱནཔྤཀཱརཱནཾ ཀོཔཨཔྤཙྩཡཱནནྟི ཨེཝཾ ནཱིཝརཎབྷཱཝཔྤཏྟདོསཱནཾ པརཱམཊྛཏྟཱ ཨཡཾ པཱཋོ པཊིཀྑིཏྟོཏི ཝེདིཏབྦོ.

ཨབྷིཛ྄ཛྷཱདཱིནནྟི ཨེཏྠ ཨབྷིཛ྄ཛྷཱ-སདྡེན ཙ ཨནཱིཝརཎསབྷཱཝསྶེཝ ལོབྷསྶ མཱནཱདཱིནཉྩ གཧཎཾ ཛྷཱནཔྤཊིལཱབྷཔཙྩཡཱནནྟི ཨནུཝཏྟམཱནཏྟཱ. ཨུབྷཡམྤཱིཏི ཨནངྒཎཏྟཾ ཝིགཏཱུཔཀྐིལེསཏྟཉྩཱཏི ཨེཏཾ ཨུབྷཡམྤི ཡཐཱཀྐམཾ ཨནངྒཎསུཏྟཝཏྠསུཏྟཱནུསཱརེནེཝ ཝེདིཏབྦཾ. ཏེསུ ཙ སུཏྟེསུ ཀིཉྩཱཔི ནཱིཝརཎསབྷཱཝཔྤཏྟཱ ཐཱུལདོསཱཔི ཝུཏྟཱ, ཏཐཱཔི ཨདྷིགཏཙཏཨུཏྠཛ྄ཛྷཱནསྶ ཝསེན ཝུཏྟཏྟཱ ཨིདྷ སུཁུམཱ ཨེཝ ཏེ གཧིཏཱ. ཨངྒཎུཔཀྐིལེསསཱམཉྙེན པནེཏྠ སུཏྟཱནཾ ཨཔདིསནཾ. ཏཐཱ ཧི ‘‘སུཏྟཱནུསཱརེནཱ’’ཏི ཝུཏྟཾ, ན པན སུཏྟཝསེནཱཏི.

པུབྦེནིཝཱསཱནུསྶཏིཡཾ ¶ ཉཱཎཾ པུབྦེནིཝཱསཱནུསྶཏིཉཱཎནྟི ནིབྦཙནཾ དསྶེནྟོ ཨཱཧ པུབྦེནིཝཱསཱནུསྶཏིམྷཱིཏིཨཱདི. ཨིདཱནི པུབྦེནིཝཱསཾ པུབྦེནིཝཱསཱནུསྶཏིཾ ཏཏྠ ཉཱཎཉྩ ཝིབྷཱགཏོ དསྶེཏུཾ ཏཏྠཱཏིཨཱདི ཝུཏྟཾ. པུབྦ-སདྡོ ཨཏཱིཏབྷཝཝིསཡོ, ནིཝཱས-སདྡོ ཙ ཀམྨསཱདྷནོཏི ཨཱཧ ‘‘པུབྦེ ཨཏཱིཏཛཱཏཱིསུ ནིཝུཏྠཀྑནྡྷཱ’’ཏི. ནིཝུཏྠཏཱ ཙེཏྠ སཀསནྟཱནེ པཝཏྟཏཱ, ཏེནཱཧ ཨནུབྷཱུཏཱཏིཨཱདི. ཨིདཱནི སཔརསནྟཱནསཱདྷནཝསེན ནིཝཱས-སདྡསྶ ཨཏྠཾ དསྶེཏུཾ ‘‘ནིཝུཏྠདྷམྨཱ ཝཱ ནིཝུཏྠཱ’’ཏི ཝཏྭཱ ཏཾ ཝིཝརིཏུཾ གོཙརནིཝཱསེནཱཏིཨཱདི ཝུཏྟཾ. གོཙརབྷཱུཏཱཔི ཧི དྷམྨཱ ཉཱཎེན ནིཝུཏྠཱ ནཱམ ཧོནྟི, ཏེ པན སཔརཝིཉྙཱཎགོཙརཏཱཡ དུཝིདྷཱཏི དསྶེཏུཾ ཨཏྟནོཏིཨཱདི ཝུཏྟཾ. པརཝིཉྙཱཎཝིཉྙཱཏཱཔི ཝཱ ནིཝུཏྠཱཏི སམྦནྡྷོ. ཨིདྷཱཔི པརིཙྪིནྣཱཏི པདཾ ཨཱནེཏྭཱ སམྦནྡྷིཏབྦཾ. ཨནམཏགྒེཔི ཧི སཾསཱརེ ཨཏྟནཱ ཨཝིཉྙཱཏཔུབྦཱནཾ སཏྟཱནཾ ཁནྡྷཱ པརེཧེཝ ཀེཧིཙི ཝིཉྙཱཏཏྟཱ པརཝིཉྙཱཎཝིཉྙཱཏཱ ནཱམ ཝུཏྟཱ, ཏེསཾ ཨནུསྶརཎཾ པུརིམཏོ དུཀྐརཾ ཡེཧི པརེཧི ཝིཉྙཱཏཏཱཡ ཏེ པརཝིཉྙཱཎཝིཉྙཱཏཱ ནཱམ ཛཱཏཱ, ཏེསཾ ཝཏྟམཱནསནྟཱནཱནུསཱརེན ཝིཉྙཱཏབྦཏོ. ཏེ ཙ པརཝིཉྙཱཎཝིཉྙཱཏཱ དུཝིདྷཱ པརིནིབྦུཏཱ ཨཔརིནིབྦུཏཱཏི. ཏེསུ ཙ པརིནིབྦུཏཱནུསྶརཎཾ དུཀྐརཾ སབྦསོ སུསམུཙྪིནྣསནྟཱནཏྟཱ. ཏཾ པན སིཁཱཔྤཏྟཔརཝིཉྙཱཏཾ པུབྦེནིཝཱསཾ དསྶེཏུཾ ‘‘ཚིནྣཝཊུམཀཱནུསྶརཎཱདཱིསཱུ’’ཏི ཝུཏྟཾ. ཏཏྠ ཚིནྣཝཊུམཀཱ ཨཏཱིཏེ པརིནིབྦུཏཱ ཁཱིཎཱསཝཱ ཚིནྣསཾསཱརམགྒཏྟཱ ¶ . ཨཱདི-སདྡེན ཨཔརིནིབྦུཏཱནཾ པརཝིཉྙཱཎཝིཉྙཱཏཱནམྤི སཱིཧོཀྐནྟིཀཝསཨེན ཨནུསྶརཎཾ གཧིཏཾ. ཡཱཡ སཏིཡཱ པུབྦེནིཝཱསཾ ཨནུསྶརཏི, སཱ པུབྦེནིཝཱསཱནུསྶཏཱིཏི ཨཱནེཏྭཱ སམྦནྡྷིཏབྦཾ.

ཝིཧིཏ-སདྡོ ཝིདྷ-སདྡཔརིཡཱཡོཏི ཨཱཧ ‘‘ཨནེཀཝིདྷ’’ནྟི, བྷཝཡོནིཨཱདིཝསེན བཧུཝིདྷནྟི ཨཏྠོ. ཝིཧིཏནྟི ཝཱ པཡུཏྟཾ ཝཎྞིཏནྟི ཨཏྠཾ གཧེཏྭཱ ‘‘ཨནེཀེཧི པཀཱརེཧི ཝིཧིཏ’’ནྟི ཝཏྟབྦེ མཛ྄ཛྷེཔདལོཔཾ ཀཏྭཱ ནིདྡིཊྛནྟི ཨཱཧ ‘‘ཨནེཀེཧི…པེ… སཾཝཎྞིཏ’’ནྟི. པཀཱརེཧཱིཏི ནཱམགོཏྟཱདིཔཀཱརེཧི. སཾཝཎྞིཏནྟི བུདྡྷཱདཱིཧི ཀཐིཏཾ. ཨནུ-སདྡོ ཨནནྟརཏྠདཱིཔཀོཏི ཨཱཧ ‘‘ཨབྷིནིནྣཱམིཏམཏྟེ ཨེཝཱ’’ཏི, ཨེཏེན ཙ པརིཀམྨསྶ ཨཱརདྡྷཏཾ དསྶེཏི. པཱུརིཏཔཱརམཱིནཉྷཱིཏིཨཱདིནཱ པརིཀམྨཾ ཝིནཱཔི སིདྡྷིཾ དསྶེཏི.

ཨཱརདྡྷཔྤཀཱརདསྶནཏྠེཏི ¶ ཨནུསྶརིཏུཾ ཨཱརདྡྷཱནཾ པུབྦེ ནིཝུཏྠཀྑནྡྷཱནཾ དསྶནཏྠེ. ཛཱཡཏཱིཏི ཛཱཏི, བྷཝོ. སོ ཨེཀཀམྨམཱུལཀོ ཨཱདཱནནིཀྑེཔཔརིཙྪིནྣོ ཁནྡྷཔྤབནྡྷོ ཨིདྷ ‘‘ཛཱཏཱི’’ཏི ཨདྷིཔྤེཏོཏི ཨཱཧ ཨེཀམྤཱིཏིཨཱདི. ཀཔྤོཏི ཨསངྑྱེཡྻཀཔྤོ, སོ པན ཨཏྠཏོ ཀཱལོ ཏཐཱཔཝཏྟདྷམྨམུཔཱདཱཡ པཉྙཏྟོ, ཏེསཾ ཝསེནསྶ པརིཧཱནི ཙ ཝཌྜྷི ཙ ཝེདིཏབྦཱ. སཾཝཊྚོ སཾཝཊྚནཾ ཝིནཱསོ ཨསྶ ཨཏྠཱིཏི སཾཝཊྚོ, ཨསངྑྱེཡྻཀཔྤོ. སཾཝཊྚེན ཝིནཱསེན སཧ ཏིཊྛཏི སཱིལེནཱཏི སཾཝཊྚཊྛཱཡཱི. ཨེཝཾ ཝིཝཊྚོཏིཨཱདཱིསུཔི. ཏཏྠ ཝིཝཊྚནཾ ཝིཝཊྚོ, ཨུཔྤཏྟི, ཝཌྜྷི ཝཱ. ཏེཛེན ཝིནཱསོ ཏེཛོསཾཝཊྚོ. ཝིཏྠཱརཏོ པནཱཏི པུཐུལཏོ པན སཾཝཊྚསཱིམཱབྷེདོ ནཏྠི, ཏེནཱཧ ‘‘སདཱཔཱི’’ཏི. ཨེཀནགརིཡཱ ཝིཡ ཨསྶ ཛཱཏཀྑཎེ ཝིཀཱརཱཔཛྫནཏོ ཛཱཏིཀྑེཏྟཝོཧཱརོཏི དསྶེཏུཾ ‘‘པཊིསནྡྷིཨཱདཱིསུ ཀམྤཏཱི’’ཏི ཝུཏྟཾ. ཨཱནུབྷཱཝོ པཝཏྟཏཱིཏི ཏདནྟོགདྷཱནཾ སབྦེསཾ སཏྟཱནཾ རོགཱདིཨུཔདྡཝོ ཝཱུཔསམྨཏཱིཏི ཨདྷིཔྤཱཡོ. ཡཾ ཡཱཝཏཱ ཝཱ པན ཨཱཀངྑེཡྻཱཏི ཝུཏྟནྟི ཡཾ ཝིསཡཀྑེཏྟཾ སནྡྷཱཡ ཨེཀསྨིཾ ཨེཝ ཁཎེ སབྦཏྠ སརེན ཨབྷིཝིཉྙཱཔནཾ, ཨཏྟནོ རཱུཔཀཱཡདསྶནཉྩ པཊིཛཱནནྟེན བྷགཝཏཱ ‘‘ཡཱཝཏཱ ཝཱ པན ཨཱཀངྑེཡྻཱ’’ཏི ཝུཏྟཾ.

ཨེཏེསཱུཏི ནིདྡྷཱརཎེ བྷུམྨཾ. པཝཏྟཕལབྷོཛནོཏི སཡཾཔཏིཏཕལཱཧཱརོ, ཨིདཉྩ ཏཱཔསཀཱལཾ སནྡྷཱཡ ཝུཏྟཾ. ཨིདྷཱུཔཔཏྟིཡཱཏི ཨིདྷ ཙརིམབྷཝེ ཨུཔཔཏྟིཡཱ. ཨེཀགོཏྟོཏི ཏུསིཏགོཏྟེན ཨེཀགོཏྟོ. ཨིཏརེཏི ཝཎྞཱདཡོ. ཏིཏྠིཡཱཏི ཀམྨཕལཝཱདིནོ. ཨབྷིནཱིཧཱརོཏི ཨབྷིནཱིཧཱརོཔལཀྑིཏོ པུཉྙཉཱཎསམྦྷརཎཀཱལོ ཝུཏྟོ. ཙུཏིཔཊིསནྡྷིཝསེནཱཏི ཨཏྟནོ པརསྶ ཝཱ ཏསྨིཾ ཏསྨིཾ ཨཏྟབྷཱཝེ ཙུཏིཾ དིསྭཱ ཨནྟརཱ ཀིཉྩི ཨནཱམསིཏྭཱ པཊིསནྡྷིཡཱ ཨེཝ གཧཎཝསེན ཨེཝཾ ཛཱནནཾ ཨིཙྪིཏཔྤདེསོཀྐམནནྟི ཨཱཧ ཏེསཉྷཱིཏིཨཱདི. ཨུབྷཡཐཱཔཱིཏི ཁནྡྷཔཊིཔཱཊིཡཱཔི ¶ ཙུཏིཔཊིསནྡྷིཝསེནཔི. སཱིཧོཀྐནྟཝསེནཔཱིཏི སཱིཧནིཔཱཏཝསེནཔི. ཀིལེསཱནཾ ཨཱཏཱཔནཔརིཏཱཔནཊྛེན ཝཱིརིཡཾ ཨཱཏཱཔོཏི ཨཱཧ ‘‘ཝཱིརིཡཱཏཱཔེནཱ’’ཏི.

དིབྦཙཀྑུཉཱཎཀཐཱཝཎྞནཱ

༡༣. དིཝི ¶ བྷཝཏྟཱ དིབྦནྟི དེཝཱནཾ པསཱདཙཀྑུ ཝུཙྩཏཱིཏི ཨཱཧ ‘‘དིབྦསདིསཏྟཱ’’ཏི. དཱུརེཔཱིཏི པི-སདྡེན སུཁུམསྶཱཔི ཨཱརམྨཎསྶ གཧཎཾ. ཝཱིརིཡཱརམྦྷཝསེན ཨིཛ྄ཛྷནཏོ སབྦཱཔི བྷཱཝནཱ, པདྷཱནསངྑཱརསམནྣཱགཏོ ཝཱ ཨིདྡྷིཔཱདབྷཱཝནཱཝིསེསཏོ ཝཱིརིཡབྷཱཝནཱཏི ཨཱཧ ‘‘ཝཱིརིཡབྷཱཝནཱབལནིབྦཏྟ’’ནྟི. དིབྦཝིཧཱརཝསེནཱཏི ཀསིཎཱདིཛ྄ཛྷཱནཙཏཨུཀྐཝསེན. ཨིམིནཱ དཱུརཀཱརཎཏྠེ ཨསྶ དིབྦབྷཱཝམཱཧ. དིབྦཝིཧཱརསནྣིསྶིཏཏྟཱཏི ཨིམིནཱ ཨཱསནྣཀཱརཎབྷཱུཏཔཱདཀཛ྄ཛྷཱནཏོ ནིབྦཏྟནྟི དིབྦཝིཧཱརསནྣིསྶིཏཏྟཱཏི ཨིམསྶ དིབྦཝིཧཱརཔཨཡཱཔནྣཾ ཨཏྟནཱ སམྤཡུཏྟཾ རཱུཔཱཝཙརཙཏུཏྠཛ྄ཛྷཱནཾ ནིསྶཡཔཙྩཡབྷཱུཏཾ ནིསྶཱཡ དིབྦཙཀྑུཉཱཎསྶ པཝཏྟཏྟཱཏིཔི ཨཏྠོ. དིཝུདྷཱཏུསྶ ཛུཏིགཏིཡོགཾ སནྡྷཱཡ ཨཱལོཀཔཨགྒཧེནཱཏིཨཱདི ཝུཏྟཾ. ཏཏྠ ཨཱལོཀཔརིགྒཧེནཱཏི ཀསིཎཱལོཀཔརིགྒཧཝསེན. དསྶནཊྛེནཱཏི རཱུཔདསྶནབྷཱཝེན, ཨིམིནཱ ‘‘ཙཀྑཏི རཱུཔཾ ཝིབྷཱཝེཏཱི’’ཏི ནིབྦཙནཏོ ཙཀྑུཏྟཾ དསྶེཏི. ཙཀྑུཀིཙྩཀརཎེནཱཏི ཨིདཾ ཙཀྑུམིཝ ཙཀྑཱུཏི ཨུཔམཱཡ སདིསནིམིཏྟདསྶནཾ, སམཝིསམཱདིདསྶནསངྑཱཏསྶ ཙཀྑུཀིཙྩསྶ ཀརཎཏོཏི ཨཏྠོ.

ཡཐཱཧཱཏི ཨུཔཀྐིལེསསུཏྟཔྤདེསཾ (མ. ནི. ༣.༢༤༢) ནིདསྶེཏི. ཏཏྠ ཝིཙིཀིཙྪཱཏིཨཱདཱིསུ བྷགཝཏོ བོདྷིམཱུལེ ཨནབྷིསམྦུདྡྷསྶེཝ དིབྦཙཀྑུནཱ ནཱནཱཝིདྷཱནི རཱུཔཱནི པསྶནྟསྶ ‘‘ཨིདཾ ནུ ཁོ ཀིཾ, ཨིདཾ ནུ ཁོ ཀི’’ནྟི ཝིཙིཀིཙྪཱ ཨུཔྤནྣཱ, ཏཏོ པན ཝིཙིཀིཙྪཱནིཝཏྟནཏྠཾ ཏཱནི རཱུཔཱནི ཨམནསིཀརོཏོ ཨམནསིཀརོནྟསྶ ཐིནམིདྡྷཾ ཨུཔྤནྣཾ, ཏཏོ ནིཝཏྟནཏྠཾ པུན སབྦརཱུཔཱནི མནསིཀརོཏོ རཀྑསཱདཱིསུ ཚམྦྷིཏཏྟཾ ཨུཔྤནྣཾ, ‘‘ཀིམེཏྠ བྷཱཡིཏབྦ’’ནྟི བྷཡཝིནོདནཝསེན མནསིཀརོཏོ ཨཏྟནོ མནསིཀཱརཀོསལླཾ པཊིཙྩ ཨུཔྤིལསངྑཱཏཱ སམཱདྷིདཱུསིཀཱ གེཧསིཏཔཱིཏི ཨུཔྤནྣཱ, ཏནྣིསེདྷཱཡ མནསིཀཱརཝཱིརིཡཾ སིཐིལཾ ཀརོནྟསྶ ཀཱཡཱལསིཡསངྑཱཏཾ དུཊྛུལླཾ, ཏནྣིསེདྷཱཡ པུན ཝཱིརིཡཾ པགྒཎྷཏོ ཨཙྩཱརདྡྷཝཱིརིཡཾ, པུན ཏནྣིསེདྷཱཡ ཝཱིརིཡཾ སིཐིལཡཏོ ཨཏིལཱིནཝཱིརིཡཾ ཨུཔྤནྣཾ, ཏནྣིསེདྷེཏྭཱ དིབྦརཱུཔཱནི པསྶཏོ ཨབྷིཛཔྤཱསངྑཱཏཱ ཏཎྷཱ ཨུཔྤནྣཱ, ཏནྣིསེདྷཱཡ ཧཱིནཱདིནཱནཱརཱུཔཱནི མནསིཀརོཏོ ནཱནཱརམྨཎཝིཀྑེཔསངྑཱཏཱ ནཱནཏྟསཉྙཱ ཨུཔྤནྣཱ. པུན ཏཾ ཝིཧཱཡ ཨེཀམེཝ མནསིཀརོཏོ ཨཏིནིཛ྄ཛྷཱཡིཏཏྟཾ རཱུཔཱནཾ ཨཏིཝིཡ ¶ ཙིནྟནཾ ཨུཔྤནྣཾ. ཨོབྷཱསནྟི པརིཀམྨསམུཊྛིཏཾ ཨོབྷཱསཾ ¶ . ན ཙ རཱུཔཱནི པསྶཱམཱིཏི ‘‘པརིཀམྨོབྷཱསམནསིཀཱརཔསུཏཏཱཡ དིབྦཙཀྑུནཱ རཱུཔཱནི ན པསྶཱམཱི’’ཏི ཨེཝཾ ཨུཔྤཏྟིཀྐམསཧིཏོ ཨཏྠོ ཝེདིཏབྦོ, མནུསྶཱནཾ ཨིདནྟི མཱནུསཀཾ མཱནུསཀཙཀྑུགོཙརཾ ཐཱུལརཱུཔཾ ཝུཙྩཏི. ཏདེཝ མནུསྶཱནཾ དསྶནཱུཔཙཱརཏྟཱ མནུསྶཱུཔཙཱརོཏི ཨཱཧ ‘‘མནུསྶཱུཔཙཱརཾ ཨཏིཀྐམིཏྭཱ’’ཏི. རཱུཔདསྶནེནཱཏི དཱུརསུཁུམཱདིརཱུཔདསྶནེན.

ཡསྨཱ ནིཡམེན པུརེཛཱཏཊྛིཏརཱུཔཱརམྨཎཾ དིབྦཙཀྑུཉཱཎཾ ཨཱཝཛྫནཔརིཀམྨེཧི ཝིནཱ ན ཨུཔྤཛྫཏི, ན ཙ ཨུཔྤཛྫམཱནཾ བྷིཛྫམཱནཾ རཱུཔམསྶ ཨཱརམྨཎཾ ཧོཏི དུབྦལཏྟཱ, ཙུཏིཙིཏྟཉྩ ཀམྨཛརཱུཔསྶ བྷངྒཀྑཎེ ཨེཝ ཨུཔྤཛྫཏི, པཊིསནྡྷིཙིཏྟཉྩ ཨུཔཔཏྟིཀྑཎེ, ཏསྨཱ ཨཱཧ ཙུཏིཀྑཎེཏིཨཱདི. རཱུཔདསྶནམེཝེཏྠ སཏྟདསྶནནྟི ཙཝམཱནེཏིཨཱདིནཱ པུགྒལཱདྷིཊྛཱནེན ཝུཏྟཾ. ཨབྷིརཱུཔེ ཝིརཱུཔེཏིཔཱིཏི ཨིདཾ ཝཎྞ-སདྡསྶ སཎྛཱནཝཱཙཀཏཾ སནྡྷཱཡ ཝུཏྟཾ མཧནྟཾ ཧཏྠིརཱཛཝཎྞཾ ཨབྷིནིམྨིནིཏྭཱཏིཨཱདཱིསུ (སཾ. ནི. ༡.༡༣༨) ཝིཡ. སུནྡརཾ གཏིཾ གཏཱ སུགཏཱཏི ཨཱཧ ‘‘སུགཏིགཏེ’’ཏི. ཨིམིནཱ པན པདེནཱཏི ཡཐཱཀམྨུཔགེཏི ཨིམིནཱ པདེན.

ནེརཡིཀཱནཾ ཨགྒིཛཱལསཏྠནིཔཱཏཱདཱིཧི ཝིབྷིནྣསརཱིརཝཎྞཾ དིསྭཱ ཏདནནྟརེཧི ཀཱམཱཝཙརཛཝནེཧེཝ ཉཱཏཾ ཏེསཾ དུཀྑཱནུབྷཝནམྤི དསྶནཕལཱཡཏྟཏཱཡ ‘‘དིབྦཙཀྑུཀིཙྩམེཝཱ’’ཏི ཝུཏྟཾ. ཨེཝཾ མནསིཀརོཏཱིཏི ཏེསཾ ཀམྨསྶ ཉཱཏུཀཱམཏཱཝསེན པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ པརིཀམྨཝསེན ཀིནྣུ ཁོཏིཨཱདིནཱ མནསིཀརོཏི. ཨཐསྶ ཏཾ ཀམྨཾ ཨཱརམྨཎཾ ཀཏྭཱ ཨཱཝཛྫནཔརིཀམྨཱདཱིནཾ ཨུཔརི ཨུཔྤནྣེན རཱུཔཱཝཙརཙཏུཏྠཛ྄ཛྷཱནེན སམྤཡུཏྟཾ ཡཾ ཉཱཎཾ ཨུཔྤཛྫཏི, ཨིདཾ ཡཐཱཀམྨུཔགཉཱཎཾ ནཱམཱཏི ཡོཛནཱ. དེཝཱནཾ དསྶནེཔི ཨེསེཝ ནཡོ. ཝིསུཾ པརིཀམྨནྟི པུབྦེནིཝཱསཱདཱིནཾ ཝིཡ དིབྦཙཀྑུཉཱཎཔརིཀམྨཾ ཝིནཱ ཝིསུཾ པརིཀམྨཾ ནཏྠི. ཀེཙི པནེཏྠ ‘‘པཱདཀཛ྄ཛྷཱནསམཱཔཛྫནཔརིཀམྨེཧི ཀིཙྩཾ ནཏྠི, ཀིནྣུ ཁོ ཀམྨནྟིཨཱདིམནསིཀཱརཱནནྟརམེཝ ཀམྨཾ. ཀམྨསཱིསེན ཏཾསམྤཡུཏྟེ ཙ དྷམྨེ ཨཱརམྨཎཾ ཀཏྭཱ ཨཔྤནཱཝཱིཐི ཨུཔྤཛྫཏི. ཨེཝམནཱགཏཾསཉཱཎེཔི, ཏེནེཝ ཝིསུཾ པརིཀམྨཾ ནཱམ ནཏྠི…པེ… དིབྦཙཀྑུནཱ སཧེཝ ཨིཛ྄ཛྷནྟཱིཏི ཝུཏྟ’’ནྟི ཝདནྟི. ཏཾ ན གཧེཏབྦཾ ཝསཱིབྷཱུཏཱནམྤི ཨབྷིཉྙཱནཾ པཱདཀཛ྄ཛྷཱནཱདིཔརིཀམྨཾ ཝིནཱ ཨནུཔྤཏྟིཏོ. པཱདཀཛ྄ཛྷཱནཱདིམཏྟེན ཙ ཝིསུཾ པརིཀམྨཾ ནཱམ ན ཧོཏཱིཏི དིབྦཙཀྑུནཱཝ ཨེཏཱནི ཉཱཎཱནི ¶ སིདྡྷཱནཱིཏི གཧེཏབྦཾ. ཨེཝཾ ཨནཱགཏཾསཉཱཎསྶཱཔཱིཏི དིབྦཙཀྑུནཱ དིཊྛསྶ སཏྟསྶ ཨནཱགཏེ པཝཏྟིཾ ཉཱཏུཀཱམཏཱཡ པཱདཀཛ྄ཛྷཱནཱདཱིནམནནྟརཾ ཉཱཎབལཱནུརཱུཔཾ ཨནཱགཏེསུ ཨནེཀཀཔྤེསུ ཨུཔྤཛྫནཱརཧེ པུབྦེ ཨཏྟབྷཱཝཔརིཡཱཔནྣེ ¶ པཉྩཀྑནྡྷེ ཏཔྤཊིབདྡྷེ ཏདཱརམྨཎེ ཙ སབྦེ ལོཀིཡལོཀུཏྟརདྷམྨེ སམྨུཏིཉྩ ཨེཀཀྑཎེ ཨཱལམྦིཏྭཱ ཨུཔྤཛྫནཀསྶ ཙཏུཏྠཛ྄ཛྷཱནསམྤཡུཏྟསྶ ཨནཱགཏཾསཉཨཱཎསྶཱཔི ཝིསུཾ པརིཀམྨཾ ནཱམ ནཏྠཱིཏི ཡོཛནཱ.

ཀེཙི པནེཏྠ ‘‘པུབྦེནིཝཱསཱནུསྶཏིཡཾ ཝིཡ ནཱམགོཏྟཱདིགཧཎམྤི ཨཏྠེཝ, ཏཉྩ ན ཨབྷིཉྙཱཀྑཎེ, ཨཐ ཁོ ཏདནནྟརེསུ ཀཱམཱཝཙརཛཝནཀྑཎེསུ ཨེཝ ཧོཏི ནཱམཔརིཀཔྤཀཱལེ ཨིཏརཔརིཀཔྤཱསམྦྷཝཱ ཀམྨེནུཔྤཏྟིཡཉྩ པརིཡནྟཱབྷཱཝཱ. སབྦཔརིཀམྨནིམིཏྟེསུ པན དྷམྨེསུ ཨཏྠེསུཔི ཨེཀཀྑཎེ ཨབྷིཉྙཱཡ དིཊྛེསུ ཡཐཱརུཙིཝསེན པཙྪཱ ཨེཝཾནཱམོཏིཨཱདིནཱ ཀཱམཱཝཙརཙིཏྟེན ཝིཀཔྤོ ཨུཔྤཛྫཏི ཙཀྑུནཱ དིཊྛེསུ བཧཱུསུ རཱུཔེསུ ཐམྦྷཀུམྦྷཱདིཝིཀཔྤོ ཝིཡ. ཡཉྩ ཀཏྠ ཨཝིཀཔྤིཏཾ, ཏམྤི ཝིཀཔྤནཱརཧནྟི སབྦཾ ནཱམགོཏྟཱདིཏོ ཝིཀཔྤིཏམེཝ ཧོཏི. ཡཐཱ ཙེཏྠ, ཨེཝཾ པུབྦེནིཝཱསཱནུསྶཏིཡམྤི པརིཀཔྤཱརཧཏམྤི སནྡྷཱཡ པཱལི༹ཡཾ ཨེཝཾནཱམོཏིཨཱདིནཱ ཨཔདེསསཧིཏམེཝ ཝུཏྟ’’ནྟི ཝདནྟི. ཨཉྙེ པན ‘‘ནཱམགོཏྟཱདིཀཾ སབྦམྤི ཨེཀཀྑཎེ པཉྙཱཡཏི, ཨབྷིརུཙིཏཾ པན ཝཙསཱ ཝོཧརནྟཱི’’ཏི ཝདནྟི, ཏེཔི ཨཏྠཏོ པུརིམེཧི སདིསཱ ཨེཝ, པུབྦེ དིཊྛསྶ པུན ཝོཧཱརཀཱལེཔི པརིཀཔྤེཏབྦཏོ པརིཀཔྤཱརཧདྷམྨདསྶནམེཝ ཏེཧིཔི ཨཏྠཏོ ཨུཔགཏཾ. ཨེཀེ པན ‘‘སོ ཏཏོ ཙུཏོ ཨམུཏྲ ཨུདཔཱདིནྟིཨཱདིཝཙནཏོ ཀམེནེཝ ཨཏཱིཏཱནཱགཏདྷམྨཛཱནནེན ནཱམགོཏྟཱདཱིཧི སདྡྷིཾ གཧཎཾ སུཀར’’ནྟི ཝདནྟི, ཏཾ ཨཡུཏྟམེཝ བུདྡྷཱནམྤི སབྦཾ ཉཱཏུཾ ཨསཀྐུཎེཡྻཏཱཡ སབྦཉྙུཏཱཧཱནིཔྤསངྒཏོ. པཱལི༹ཡཾ ཨིམེ ཝཏ བྷོནྟོཏིཨཱདི ཡཐཱཀམྨུཔགཉཱཎསྶ པཝཏྟིཨཱཀཱརདསྶནཾ. ཀཱཡཝཱཙཱདི ཙེཏྠ ཀཱཡཝཙཱིཝིཉྙཏྟིཡོ.

བྷཱརིཡནྟི ཨཱནནྟརིཡསདིསཏྟཱ ཝུཏྟཾ. ཁམཱཔནེ ཧི ཨསཏི ཨཱནནྟརིཡམེཝ. ཏསྶཱཏི བྷཱརིཡསབྷཱཝསྶ ཨུཔཝཱདསྶ. མཧལླཀོཏི ཀེཝལཾ ཝཡསཱཝ མཧལླཀོ, ན ཉཱཎེན, ‘‘ནཱཡཾ ཀིཉྩི ལོཀཝོཧཱརམཏྟམྤི ཛཱནཱཏི, པརིསདཱུསཀོ ཨེཝ ཨམྷཱཀཾ ལཛྫིཏབྦསྶ ཀརཎཏོ’’ཏི ཨདྷིཔྤཱཡེན ཧཱིལེ༹ཏྭཱ ཝུཏྟཏྟཱ གུཎཔརིདྷཾསནེན ཨུཔཝདཏཱིཏི ཝེདིཏབྦཾ. ཨཱཝུསོཏིཨཱདིནཱ ¶ ཐེརོ ཨུཔརིམགྒུཔྤཏྟིམསྶ ཨཱཀངྑནྟོ ཀརུཎཱཡ ཨཏྟཱནམཱཝིཀཱསི. པཱཀཏིཀཾ ཨཧོསཱིཏི མགྒཱཝརཎཾ ནཱཧོསཱིཏི ཨདྷིཔྤཱཡོ. ཨཏྟནཱ ཝུཌྜྷཏརོཏི སཡམྤི ཝུཌྜྷོ. ཨེཏྠཱཔི ‘‘ཨུཀྐུཊིཀཾ ནིསཱིདིཏྭཱ’’ཏི ཝིསུདྡྷིམགྒེ ཝུཏྟཾ. ཨནཱགཱམཱི ཨརཧཱ ཙ ཨཱཡཏིཾ སཾཝརཏྠཱཡ ན ཁམེཡྻུཾ, སེསཱ དོསེནཔཱིཏི ཨཱཧ ‘‘སཙེ སོ ན ཁམཏཱི’’ཏི.

ཡེ ཙ…པེ… སམཱདཔེནྟི, ཏེཔི མིཙྪཱདིཊྛིཀམྨསམཱདཱནཱཏི ཡོཛེཏབྦཾ. སཱིལསམྤནྣོཏིཨཱདཱིསུ ¶ ནིཔྤརིཡཱཡཏོ ཨགྒམགྒཊྛོ ཨདྷིཔྤེཏོ ཏསྶེཝ ཨཉྙཱརཱདྷནཱ ནིཡམཏོ, སེསཱཔི ཝཱ པཙྪིམབྷཝིཀཱ སཱིལཱདཱིསུ ཋིཏཱ ཏེསམྤི ཨཉྙུཔྤཏྟིནིཡམཏོ. ཨཉྙནྟི ཨརཧཏྟཕལཾ. ཨེཝཾ སམྤདནྟི ཨེཝཾ ནིབྦཏྟིཀཾ. ཡཐཱ ཏཾ ཨཝིརཛ྄ཛྷནཀནིབྦཏྟིཀཾ, ཨེཝམིདམྤི ཨེཏསྶ ནིརཡེ ནིབྦཏྟནནྟི ཨཏྠོ. ཡཾ སནྡྷཱཡ ‘‘ཨེཝཾསམྤདམིད’’ནྟི ནིདྡིཊྛཾ, ཏཾ དསྶེཏུཾ ཏཾ ཝཱཙནྟིཨཱདི ཝུཏྟཾ. ཏཾ ཝཱཙནྟི ཨརིཡཱུཔཝཱདཾ. ཙིཏྟནྟི ཨརིཡཱུཔཝཱདཀཙིཏྟཾ. དིཊྛིནྟི ཨརིཡཱུཔཝཱདེ དོསཱབྷཱཝདསྶནདིཊྛིཾ. ‘‘སབྦམེཏཾ པཛཧིསྶཱམཱི’’ཏི ཙིཏྟེན ཨཙྩཡཾ དེསེཏྭཱ ཁམཱཔནཝསེན ཨཔྤཧཱཡ ཨཔྤཊིནིསྶཛྫིཏྭཱ. ཡཐཱབྷཏཾ ནིཀྑིཏྟོ ཨེཝཾ ནིརཡེཏི ཡཐཱ ནིརཡཔཱལེཧི ཨཱཧརིཏྭཱ ནིརཡེ ཋཔིཏོ, ཨེཝཾ ནིརཡེ ཋཔིཏོ ཨེཝ, ཨརིཡཱུཔཝཱདེནེཝསྶ ཨིདཾ ནིཡམེན ནིརཡེ ནིབྦཏྟནཾ ཡཐཱ མགྒེན ཕལཾ སམྤཛྫཏི, ཨེཝཾ སམྤཛྫནཀནྟི ཨདྷིཔྤཱཡོ.

མིཙྪཱདིཊྛི སབྦཔཱཔམཱུལཏྟཱ པརམཱ པདྷཱནཱ ཡེསཾ ཝཛྫཱནཾ ཏཱནི མིཙྪཱདིཊྛིཔརམཱནི ཝཛྫཱནི, སབྦཝཛྫེཧི མིཙྪཱདིཊྛིཡེཝ པརམཾ ཝཛྫནྟི ཨཏྠོ. ཨཝཱིཏརཱགསྶ མརཎཏོ པརཾ ནཱམ བྷཝནྟརུཔཱདཱནམེཝཱཏི ཨཱཧ ‘‘པརཾ མརཎཱཏི ཏདནནྟརཾ ཨབྷིནིབྦཏྟཀྑནྡྷགྒཧཎེ’’ཏི. ཡེན ཏིཊྛཏི, ཏསྶ ཨུཔཙྪེདེནེཝ ཀཱཡོ བྷིཛྫཏཱིཏི ཨཱཧ ‘‘ཀཱཡསྶ བྷེདཱཏི ཛཱིཝིཏིནྡྲིཡསྶུཔཙྪེདཱ’’ཏི. ཨེཏི ཨེཏསྨཱ སུཁནྟི ཨཡོ, པུཉྙཾ. ཨཱཡསྶཱཏི ཨཱགམནསྶ, ཧེཏུསྶ ཝཱ. ཨཡཏི ཨིཊྛཱརམྨཎཱདཱིཧི པཝཏྟཏཱིཏི ཨཱཡོ, ཨསྶཱདོ. ཨསུརསདིསནྟི པེཏཱསུརསདིསཾ.

ཨཱསཝཀྑཡཉཱཎཀཐཱཝཎྞནཱ

༡༤. སརསལཀྑཎཔཊིཝེདྷེནཱཏི ¶ སབྷཱཝསངྑཱཏསྶ ལཀྑཎསྶ ཨསམྨོཧཏོ པཊིཝིཛ྄ཛྷནེན. ནིབྦཏྟིཀནྟི ནིཔྥཱདནཾ. ཡཾ ཋཱནཾ པཏྭཱཏི ཡཾ ནིབྦཱནཾ མགྒསྶ ཨཱརམྨཎཔཙྩཡཊྛེན ཋཱནཾ ཀཱརཎབྷཱུཏཾ ཨཱགམྨ. ཨཔྤཝཏྟིནྟི ཨཔྤཝཏྟིཧེཏུཾ. ཀིལེསཝསེནཱཏི ཡེསཾ ཨཱསཝཱནཾ ཁེཔནེན ཨིདཾ ཉཱཎཾ ཨཱསཝཀྑཡཉཱཎཾ ཛཱཏཾ, ཏེསཾ ཀིལེསཱནཾ ཝསེན, ཏེསཾ ཨཱསཝཱནཾ ཝསེན སབྦཀིལེསཱནཾ སངྒཧཎཏོ པརིཡཱཡཏོ པཀཱརནྟརཏོཏི ཨཏྠོ. པཱལི༹ཡཾ ཨཏཱིཏཀཱལཝསེན ‘‘ཨབྦྷཉྙཱསི’’ནྟི ཝཏྭཱཔི ཨབྷིསམཡཀཱལེ ཏསྶ ཏསྶ ཛཱནནསྶ པཙྩུཔྤནྣཏཾ ཨུཔཱདཱཡ ‘‘ཨེཝཾ ཛཱནཏོ ཨེཝཾ པསྶཏོ’’ཏི ཝཏྟམཱནཀཱལེན ནིདྡེསོ ཀཏོ. ཀཱམཱསཝཱདཱིནཾ ཝིམུཙྩནེནེཝ ཏདཝིནཱབྷཱཝཏོ དིཊྛཱསཝསྶཱཔི ཝིམུཏྟི ཝེདིཏབྦཱ.

‘‘ཁཱིཎཱ ཛཱཏཱི’’ཏི ཛཱནནཾ ཀིལེསཀྑཡཔཙྩཝེཀྑཎཝསེན, ཝུསིཏཾ བྲཧྨཙརིཡནྟིཨཱདིཛཱནནཾ ¶ མགྒཕལནིབྦཱནཔཙྩཝེཀྑཎཝསེན ཧོཏཱིཏི ཨཱཧ ‘‘ཁཱིཎཱ ཛཱཏཱིཏིཨཱདཱིཧི ཏསྶ བྷཱུམི’’ནྟི. ཏཏྠ བྷཱུམིནྟི ཝིསཡཾ, ཏཱིསུ ཀཱལེསུཔི ཛཱཏིཀྑཡཾ པཏི ཨུཛུཀམེཝ ཝཱཡཱམཱསམྦྷཝེཔི ཏཾ པཏི ཝཱཡཱམཀརཎསྶ སཱཏྠཀཏཾ, ཏསྶ ཨནཱགཏཀྑནྡྷཱནུཔྤཏྟིཕལཏཉྩ དསྶེཏུཾ ཡཱ པནཱཏིཨཱདི ཝུཏྟཾ. ཡཱ པན མགྒསྶ ཨབྷཱཝིཏཏྟཱཏིཨཱདིནཱ ཧི མགྒེནཱཝིཧཏཀིལེསེཧེཝ ཨཱཡཏིཾ ཁནྡྷཱནཾ ཛཱཏི ཧེསྶཏི, ཏེསཉྩ ཀིལེསཱནཾ མགྒེན ཝིནཱསེ སཏི ཁནྡྷཱ ན ཛཱཡིསྶནྟི, ཀིལེསཱནཉྩ ཏེཀཱལིཀཏཱཡ ཛཱཏིཡཾ ཝུཏྟནཡེན ཀེནཙི པཙྩཡེན ཝིནཱསཡོགེཔི ཙིཏྟསནྟཱནེ ཀིལེསཝིརུདྡྷཨརིཡམགྒཀྑཎུཔྤཱདནམེཝ ཏབྦིནཱསོ ཝིརུདྡྷཔཙྩཡོཔནིཔཱཏེན ཨཱཡཏིཾ ཨནུཔྤཛྫནཏོ བཱིཛསནྟཱནེ ཨགྒིཀྑནྡྷོཔནིཔཱཏེན ཨཱཡཏིཾ བཱིཛཏྟཱནུཔྤཏྟི ཝིཡ, ཨིཏི མགྒཀྑཎུཔྤཏྟིསངྑཱཏཀིལེསཱབྷཱཝེན ཀིལེསཕལཱནཾ ཁནྡྷཱནཾ ཨཱཡཏིཾ ཨནུཔྤཏྟིཡེཝ ཛཱཏིཀྑཡོཏི ཨཡམཏྠོ ཝིབྷཱཝཱིཡཏི, ཏེནཱཧ ‘‘མགྒསྶ བྷཱཝིཏཏྟཱ ཨནུཔྤཱདདྷམྨཏཾ ཨཱཔཛྫནེན ཁཱིཎཱ’’ཏི. ཨེཏྠ ཙཱཡམཏྠོ ཀིལེསཱབྷཱཝསངྑཱཏསྶ མགྒསྶ བྷཱཝིཏཏྟཱ ཨུཔྤཱདིཏཏྟཱ པཙྩཡཱབྷཱཝེན ཨནུཔྤཛྫནྟཱི ཁནྡྷཱནཾ ཛཱཏི ཏེན ཨཱཡཏིཾ ཨནུཔྤཛྫནསངྑཱཏེན ཨནུཔྤཱདདྷམྨཏཾ ཨཱཔཛྫནེན ཝོཧཱརཏོ ཁཱིཎཱ མེ ཛཱཏཱིཏི. ན ཧི སངྑཏདྷམྨཱནཾ པཙྩཡནྟརེན ཝིནཱསོ སམྦྷཝཏི, སམྦྷཝེ ཙ ¶ ཏསྶ པཙྩཡནྟརཏཱདིཔྤསངྒཏོ. ཏབྦིརུདྡྷཀྑཎུཔྤཱདནམེཝ ཏབྦིནཱསུཔྤཱདནཾ. ཏནྟི ཁཱིཎཛཱཏིཾ ཨབྦྷཉྙཱསིནྟི སམྦནྡྷོ. ཨིཏྠཏྟཱཡཱཏི ཨིམེ པཀཱརཱ ཨིཏྠཾ, ཏབྦྷཱཝོ ཨིཏྠཏྟཾ, ཏདཏྠཱཡ. དསྶེནྟོཏི ནིགམནཝསེན དསྶེནྟོཏི.

ཝིཛྫཱཏྟཡཀཐཱཝཎྞནཱནཡོ ནིཊྛིཏོ.

ཨུཔཱསཀཏྟཔཊིཝེདནཱཀཐཱཝཎྞནཱ

༡༥. ཨཉྙཱཎནྟི དྷི-སདྡཡོགེན སཱམིཨཏྠེ ཨུཔཡོགཝཙནཾ. པཱདཱནཱིཏི པཱདེ. ཡསསཱཏི པརིཝཱརེན. ཀོཏཱུཧལཙྪརེཏི ཀོཏཱུཧལེ ཨཙྪརེ ཙ. ཨཡནྟི ཨམིཀྐནྟ-སདྡོ. ནཡིདཾ ཨཱམེཌིཏཝསེན དྭིཀྑཏྟུཾ, ཨཐ ཁོ ཨཏྠདྭཡཝསེནཱཏི དསྶེནྟོ ཨཐ ཝཱཏིཨཱདིམཱཧ. ཨཝིསེསེན ཨཏྠསཱམཉྙེན ནིཔྥནྣོ ཨབྷིཀྐནྟནྟི བྷཱཝནཔུཾསཀནིདྡེསོ, དེསནཱཔསཱདཱདིཝིསེསཱཔེཀྑཱཡཔི ཏཐེཝ ཏིཊྛཏི པུབྦེ ནིཔྥནྣཏྟཱཏི ཨཱཧ ‘‘ཨབྷིཀྐནྟཾ…པེ… པསཱདོ’’ཏི. ཨདྷོམུཁཋཔིཏཾ ཀེནཙི. ཧེཊྛཱམུཁཛཱཏཾ སཡམེཝ. པརིཡཱཡེཧཱིཏི པཀཱརེཧི, ཨརསརཱུཔཏྟཱདིཔཊིཔཱདཀཀཱརཎེཧི ཝཱ.

གམུདྷཱཏུསྶ ¶ དྭིཀམྨཀཏྟཱབྷཱཝཱ གོཏམཾ སརཎནྟི ཨིདཾ པདདྭཡམྤི ན ཨུཔཡོགཝཙནཾ. ཨཔི ཙ ཁོ པུརིམམེཝ, པཙྪིམཾ པན པཙྩཏྟཝཙནནྟི དསྶེཏུཾ ‘‘གོཏམཾ སརཎནྟི གཙྪཱམཱི’’ཏི ཝུཏྟཾ. ཏེན ཙ ཨིཏི-སདྡོ ལུཏྟནིདྡིཊྛོཏི དསྶེཏི. ཨགྷསྶཱཏི ཨགྷཏོ པཱཔཏོ. ཏཱཏཱཏི ཧི པདཾ ཨཔེཀྑིཏྭཱ ནིསྶཀྐསྶེཝ ཡུཏྟཏྟཱ. ཨདྷིགཏམགྒེ སཙྪིཀཏནིརོདྷེཏི པདདྭཡེནཱཔི ཕལཊྛཱ ཨེཝ དསྶིཏཱ, ན མགྒཊྛཱཏི དསྶེནྟོ ‘‘ཡཐཱནུསིཊྛཾ པཊིཔཛྫམཱནེ ཙཱ’’ཏི ཨཱཧ. ཝིཏྠཱརོཏི ཨིམིནཱ ‘‘ཡཱཝཏཱ, བྷིཀྑཝེ, དྷམྨཱ སངྑཏཱ ཝཱ ཨསངྑཏཱ ཝཱ, ཝིརཱགོ ཏེསཾ ཨགྒམཀྑཱཡཏཱི’’ཏི (ཨིཏིཝུ. ༩༠; ཨ. ནི. ༤.༣༤) ཝུཏྟཔདཾ སངྒཎྷཱཏི. ཨནེཛནྟི ནིཏྟཎྷཾ. ཨཔྤཊིཀཱུལནྟི ཨཝིརོདྷཏྠདཱིཔནཏོ ཨཝིརུདྡྷསུཙིཾ པཎཱིཏཾ ཝཱ. ཝཱཙཱཡ པགུཎཱིཀཏྟབྦཏོ, པཀཊྛེཧི སདྡཏྠགུཎེཧི ཡོགཏོ ཝཱ པགུཎཾ. སཾཧཏོཏི གྷཊིཏོ སམེཏོ ¶ . ཡཏྠཱཏི ཡེསུ པུརིསཡུགེསཱུཏི སམྦནྡྷོ. ཨཊྛ ཙ པུགྒལདྷམྨདསཱ ཏེཏི ཏེ ཨཊྛ པུགྒལཱ ཨརིཡདྷམྨསྶ དིཊྛཏྟཱ དྷམྨདསཱ.

སརཎནྟིཨཱདཱིསུ ཨཡཾ སངྑེཔཏྠོ – བྷཡཧིཾསནཱདིཨཏྠེན རཏནཏྟཡཾ སརཎཾ ནཱམ, ཏདེཝ མེ རཏནཏྟཡཾ ཏཱཎཾ ལེཎཾ པརཱཡཎནྟི བུདྡྷསུབུདྡྷཏཱདིགུཎཝསེན ཏཔྤརཱཡཎཏཱཀཱརཔྤཝཏྟོ ཙིཏྟུཔྤཱདོ སརཎགམནཾ ནཱམ. ཡཐཱཝུཏྟེན ཨིམིནཱ ཙིཏྟུཔྤཱདེན སམནྣཱགཏོ སརཎཾ གཙྪཏི ནཱམ. ཨེཏསྶ ཙ སརཎགམནསྶ ལོཀིཡལོཀུཏྟརཝསེན དུཝིདྷོ པབྷེདོ. ཏཏྠ ལོཀུཏྟརཾ སརཎགམནཱུཔཀྐིལེསསམུཙྪེདེན མགྒཀྑཎེཡེཝ སིཛ྄ཛྷཏི. ལོཀིཡསརཎགམནཾ ཙཏུདྷཱ པཝཏྟཏི ཨཧཾ ཨཏྟཱནཾ བུདྡྷསྶ པརིཙྩཛཱམཱིཏིཨཱདིནཱ ཨཏྟནིཡྻཱཏནེན, ཡཐཱཝུཏྟཏཔྤརཱཡཎཏཱཡ, སིསྶབྷཱཝཱུཔགམནེན, པཎིཔཱཏེན ཙཱཏི. སབྦཏྠཱཔི ཙེཏྠ སེཊྛདཀྑིཎེཡྻབྷཱཝཝསེནེཝ སརཎགམནཾ ཧོཏི, ན ཉཱཏིབྷཡཱཙརིཡཱདིཝསེནཱཏི ཝེདིཏབྦཾ. ཨེཝཾ ཉཱཏིཨཱདིཝསེན ཏིཏྠིཡཾ ཝནྡཏོ སརཎཾ ན བྷིཛྫཏི, དཀྑིཎེཡྻབྷཱཝེན ཨཉྙཾ ཝནྡཏོ སརཎཾ བྷིཛྫཏི. ལོཀིཡསྶ སརཎགམནསྶ ནིབྦཱནཔྤཏྟིནིཡམཾ སདིསཕལཾ སརཎགཏསྶ ཨནཱགཏེ ནིབྦཱནཔྤཏྟིནིཡམཏོ. སབྦལོཀིཡསམྤཏྟིསམདྷིགམོ པན ཨཔཱཡདུཀྑཱདིསམཏིཀྐམོ ཙ ཨཱནིསཾསཕལཾ. ཏཱིསུ ཝཏྠཱུསུ ཙསྶ སཾསཡམིཙྪཱཉཱཎཱདི སཾཀིལེསོ. བྷེདོཔིསྶ སཱཝཛྫཱནཝཛྫཝསེན དུཝིདྷོ. ཏཏྠ པཋམོ མིཙྪཱདིཊྛིཔུབྦཀེཧི ཏིཏྠིཡཔཎིཔཱཏཱདཱིཧི ཧོཏི, སོ ཙ ཨནིཊྛཕལཏྟཱ སཱཝཛྫོ. ཨནཝཛྫོ པན ཀཱལཀིརིཡཱཡ ཧོཏི. ལོཀུཏྟརསརཎགམནསྶ སབྦཐཱ སཾཀིལེསོ ཝཱ བྷེདོ ཝཱ ནཏྠཱིཏི ཝེདིཏབྦཾ.

ཀོ ཨུཔཱསཀོཏིཨཱདི ཨུཔཱསཀཏྟསརཱུཔཀཱརཎཱདིཔུཙྪཱ. ཏཏྠ ཡོ གཧཊྛོ མནུསྶོ ཝཱ ཨམནུསྶོ ཝཱ ཝུཏྟནཡེན ཏིསརཎཾ གཏོ, ཨཡཾ ཨུཔཱསཀོ. ཡོ ཙ སརཎགམནཱདིཀིརིཡཱཡ རཏནཏྟཡཾ ¶ ཨུཔཱསནཏོ ‘‘ཨུཔཱསཀོ’’ཏི ཝུཙྩཏི. པཉྩ ཝེརམཎིཡོ ཙསྶ སཱིལཾ. པཉྩམིཙྪཱཝཱཎིཛྫཱདིཔཱཔཱཛཱིཝཾ པཧཱཡ དྷམྨེན སམེན ཛཱིཝིཏཀཔྤནམསྶ ཨཱཛཱིཝོ. ཨསྶདྡྷིཡདུསྶཱིལཏཱདཡོ ཨུཔཱསཀཏྟསྶ ཝིཔཏྟི, ཏདབྷཱཝོ སམྤཏྟཱིཏི ཝེདིཏབྦཱ.

ཝིཧཱརགྒེནཱཏི ¶ ཨོཝརཀཱདིཝསནཊྛཱནཀོཊྛཱསེན. ཨཛྫབྷཱཝནྟི ཨསྨིཾ ཨཧནི པཝཏྟཾ པསཱདཱདིཾ. ཀཱཡཝིཉྙཏྟིཧེཏུཀོ སརཱིརཱཝཡཝོ ཀཱཡངྒཾ. ཝཙཱིཝིཉྙཏྟིཧེཏུཀཾ ཨོཊྛཛིཝ྄ཧཱདི ཝཱཙངྒཾ. ཨཙོཔེཏྭཱཏི ཨཙཱལེཏྭཱ. ཨེཏེན ཙ ཝཙཱིཔཝཏྟིཡཱ པུབྦབྷཱགེ ཋཱནཀརཎཱནཾ ཙལནཔཙྩཡོ ཝཱཡོདྷཱཏུཡཱ ཝིཀཱརཱཀཱརོ ཝིསུཾ ཀཱཡཝིཉྙཏྟི ན ཧོཏི, ཏེན ཝིསུཾ ཝིཉྙཱཔེཏབྦསྶ ཨདྷིཔྤཱཡསྶ ཨབྷཱཝཱ ཝཙཱིཝིཉྙཏྟིཡམེཝ སངྒཡ྄ཧཏི ཏདུཔཀཱརཏྟཱ. ཡཐཱ ཀཱཡེན ཀཱཡཀཎྜུཡནཱདཱིསུ སདྡུཔྤཏྟིཧེཏུབྷཱུཏོ པཐཝཱིདྷཱཏུཡཱ ཨཱཀཱརཝིཀཱརོ ཝིསུཾ ཨདྷིཔྤཱཡསྶ ཨཝིཉྙཱཔནཏོ ཝཙཱིཝིཉྙཏྟི ན ཧོཏི, ཨེཝམཡམྤཱིཏི དསྶེཏི. ཨདྷིཔྤཱཡཝིཉྙཱཔནཏོ ཧེཏཱ ཝིཉྙཏྟིཡོ ནཱམ ཛཱཏཱ, ན ཀེཝལཾ ཝཱཡུཔཐཝཱིནཾ ཙལནསདྡུཔྤཏྟིཔཙྩཡབྷཱུཏཝིཀཱརཱཀཱརམཏྟཏཱཡ. ཨེཝཉྩ བཧིདྡྷཱ རུཀྑཱདཱིསུ ཙལནསདྡུཔྤཏྟིཔཙྩཡཱནཾ ཡཐཱཝུཏྟཔྤཀཱརཱནཾ ཝིཀཱརཱཀཱརཱནཾ ཨཝིཉྙཏྟིཏཱ སམཏྠིཏཱ ཧོཏཱིཏི ཝེདིཏབྦཱ. ཀེཙི ཝཱཙངྒནྟི ‘‘ཧོཏུ སཱདྷཱུ’’ཏི ཨེཝམཱདིཝཱཙཱཡ ཨཝཡཝནྟིཨཱདིཾ ཝདནྟི, ཏཾ ཨཙོཔེཏྭཱཏི ཨིམིནཱ ན སམེཏི. ཁནྟིཾ ཙཱརེཏྭཱཏི ཨནུམཏིཾ པཝཏྟེཏྭཱ. ‘‘ཁནྟིཾ དྷཱརེཏྭཱ’’ཏིཔི པཱཋོ, བཧི ཨནིཀྑམནཝསེན གཎྷིཏྭཱཏི ཨཏྠོ. པཊིམུཁོཏི བྷགཝཏི པཊིནིཝཏྟམུཁོ, ཏེནཱཧ ‘‘ཨཔཀྐམིཏྭཱ’’ཏི.

༡༦. ཡཱཙདྷཱཏུསྶ དྭིཀམྨཀཏྟཱ ‘‘བྷགཝཱ ཝསྶཱཝཱསཾ ཡཱཙིཏོ’’ཏི ཝུཏྟཾ. སུསསྶཀཱལེཔཱིཏི ཝུཏྟམེཝཏྠཾ པཱཀཊཾ ཀཱཏུཾ ‘‘ཨཏིསམགྒྷེཔཱི’’ཏི ཝུཏྟཾ. ཨཏིཝིཡ ཨཔྤགྒྷེཔི ཡདཱ ཀིཉྩིདེཝ དཏྭཱ བཧུཾ པུབྦཎྞཱཔརཎྞཾ གཎྷནྟི, ཏཱདིསེ ཀཱལེཔཱིཏི ཨཏྠོ. བྷིཀྑམཱནཱཏི ཡཱཙམཱནཱ. ཝུཏྟསསྶནྟི ཝཔིཏསསྶཾ. ཏཏྠཱཏི ཝེརཉྫཱཡཾ, ཨེཏེན ‘‘ཝུཏྟཾ སལཱཀཱ ཨེཝ ཧོཏི ཨེཏྠཱཏི སལཱཀཱཝུཏྟཱ’’ཏི ཝིསེསནསྶ པརནིཔཱཏེན ནིབྦཙནཾ དསྶེཏི. ཨཐ ཝཱ ‘‘སབྦཾ སསྶཾ སལཱཀཱམཏྟམེཝ ཝུཏྟཾ ནིབྦཏྟཾ སམྤནྣཾ ཨེཏྠཱཏི སལཱཀཱཝུཏྟཱ’’ཏིཔི ནིབྦཙནཾ དཊྛབྦཾ, ཏེནཱཧ ‘‘སལཱཀཱ ཨེཝ སམྤཛྫཏཱི’’ཏི. ‘‘སལཱཀཱཡ ཝུཏྟཾ ཛཱིཝིཀཱ ཨེཏིསྶནྟི སལཱཀཱཝུཏྟཱ’’ཏིཔི ནིབྦཙནཾ དསྶེཏུཾ སལཱཀཱཡ ཝཱཏིཨཱདི ཝུཏྟཾ. དྷཉྙཀརཎཊྛཱནེཏི དྷཉྙམིནནཊྛཱནེ. ཝཎྞཛ྄ཛྷཀྑནྟི ཀཧཱཔཎཔརིཀྑཀཾ.

ཨུཉྪེན པགྒཧེནཱཏི ཨེཏྠ པགྒཧེནཱཏི པཏྟེན, ཏཾ གཧེཏྭཱཏི ཨཏྠོ. པགྒཡ྄ཧཏི ཨེཏེན བྷིཀྑཱཏི ¶ ཧི པགྒཧོ, པཏྟོ. ཏེནཱཧ པགྒཧེན ¶ ཡོ ཨུཉྪོཏིཨཱདི. ཨཐ ཝཱ པགྒཧེནཱཏི གཧཎེན, ཨུཉྪཏྠཱཡ གཧེཏབྦོ པཏྟོཏི སིཛ྄ཛྷཏཱིཏི ཨཱཧ ‘‘པཏྟཾ གཧེཏྭཱ’’ཏི.

གངྒཱཡ ཨུཏྟརདིསཱཔདེསོ ཨུཏྟརཱཔཐོ, སོ ནིཝཱསོ ཨེཏེསཾ, ཏཏོ ཝཱ ཨཱགཏཱཏི ཨུཏྟརཱཔཐཀཱ, ཏེནཱཧ ཨུཏྟརཱཔཐཝཱསིཀཱཏིཨཱདི. ‘‘ཨུཏྟརཱཧཀཱ’’ཏིཔི པཱཋོ, སོ ཨེཝ ཨཏྠོ ནིརུཏྟིནཡེན. མནྡིརནྟི ཨསྶསཱལཾ. ‘‘མནྡར’’ནྟིཔི ལིཁནྟི, ཏཾ ན སུནྡརཾ. སཱ ཙ མནྡིརཱ ཡསྨཱ པརིམཎྜལཱཀཱརེན བཧུཝིདྷཱ ཙ ཀཏཱ, ཏསྨཱ ‘‘ཨསྶམཎྜལིཀཱཡོ’’ཏི ཝུཏྟཱ.

གངྒཱཡ དཀྑིཎཱཡ དིསཱཡ དེསོ དཀྑིཎཱཔཐོ, ཏཏྠ ཛཱཏཱ མནུསྶཱ དཀྑིཎཱཔཐམནུསྶཱ. བུདྡྷཾ མམཱཡནྟི མམེཝཱཡནྟི གཎྷནསཱིལཱ བུདྡྷམཱམཀཱ, ཨེཝཾ སེསེསུཔི. ཨེཝནྟི པཙྪཱ ཝུཏྟནཡེན ཨཏྠེ གཡ྄ཧམཱནེ. པཊིཝཱིསནྟི ཀོཊྛཱསཾ. ཏདུཔིཡནྟི ཏདནུརཱུཔཾ ཏཔྤཧོནཀཾ. ལདྡྷཱཏི ལབྷིཏྭཱ ནོ ཧོཏཱིཏི སམྦནྡྷོ. ‘‘ལདྡྷོ’’ཏི ཝཱ པཱཋོ, ཨུཔཊྛཱཀཊྛཱནཾ ནེཝ ལབྷིནྟི ཨཏྠོ. ཉཱཏི ཙ པསཏྠཏམགུཎཡོགཏོ སེཊྛོ ཙཱཏི ཉཱཏིསེཊྛོ. ཨེཝརཱུཔེསུ ཋཱནེསུ ཨཡམེཝ པཏིརཱུཔོཏི ཨཱམིསསྶ དུལླབྷཀཱལེསུ པརིཀཐོབྷཱསཱདིཾ ཨཀཏྭཱ པརམསལླེཁཝུཏྟིཡཱ ཨཱཛཱིཝསུདྡྷིཡཾ ཋཏྭཱ བྷགཝཏོ ཨདྷིཔྤཱཡཱནུགུཎཾ ཨཱམིསཾ ཝིཙཱརེནྟེན ནཱམ ཉཱཏིསིནེཧཡུཏྟེན ཨརིཡསཱཝཀེནེཝ ཀཱཏུཾ ཡུཏྟནྟི ཨདྷིཔྤཱཡོ.

མཱརཱཝཊྚནཱཡཱཏི མཱརེན ཀཏཙིཏྟཔརིཝཊྚནེན, ཙིཏྟསམྨོཧནེནཱཏི ཨཏྠོ. ཏམྤཱིཏི ཨུཏྟརཀུརུཾ ཝཱ ཏིདསཔུརཾ ཝཱ ཨཱཝཊྚེཡྻ.

‘‘ཕུསྶསྶཱཧཾ པཱཝཙནེ, སཱཝཀེ པརིབྷཱསཡིཾ;

ཡཝཾ ཁཱདཐ བྷུཉྫཐ, མཱ ཙ བྷུཉྫཐ སཱལཡོ’’ཏི. (ཨཔ. ཐེར ༡.༣༩.༨༨) –

ཨཔདཱནེ ཝུཏྟསྶ ཨཀུསལསྶ ཏདཱ ཨོཀཱསཀཏཏྟཱ. ནིབདྡྷདཱནསྶཱཏི ‘‘དསྶཱམཱ’’ཏི ཝཱཙཱཡ ནིཡམིཏདཱནསྶ. ཨཔྤིཏཝཏྟསྶཱཏི ཀཱཡེན ཨཏིཧརིཏྭཱ དིནྣཝཏྠུནོཔི. ཝིསཧཏཱིཏི སཀྐོཏི. སངྑེཔེནཱཏི ནཱིཧཱརེན. བྱཱམཔྤབྷཱཡཱཏི སམནྟཏོ ཧེཊྛཱ ཙ ཨུཔརི ཙ ཨསཱིཏིཧཏྠམཏྟེ ཋཱནེ གྷནཱིབྷཱུཏཱཡ ཚབྦཎྞཱཡ པབྷཱཡ, ཡཏོ ཚབྦཎྞརཾསིཡོ ཏལཱ༹ཀཏོ མཱཏིཀཱཡོ ཝིཡ ནིཀྑམིཏྭཱ དསསུ དིསཱསུ ¶ དྷཱཝནྟི, སཱ ཡསྨཱ བྱཱམམཏྟཱ ཝིཡ ཁཱཡཏི, ཏསྨཱ ‘‘བྱཱམཔྤབྷཱ’’ཏི ཝུཙྩཏི. ཡསྨཱ ཨནུབྱཉྫནཱནི ཙ པཙྩེཀཾ བྷགཝཏོ སརཱིརེ པབྷཱསམྤཏྟིཡུཏྟཱ ¶ ཨཱཀཱསེ ཙནྡསཱུརིཡཱདཡོ ཝིཡ ཝིབྷཱཏཱ ཝིརོཙནྟི, ཏསྨཱ ཏཱནི བྱཱམཔྤབྷཱཡ སཧ ཀེནཙི ཨནབྷིབྷཝནཱིཡཱནི ཝུཏྟཱནི.

ཨནཏྠསཉྷིཏེཏི གྷཱཏཱཔེཀྑཾ སཱམིཨཏྠེ བྷུམྨཝཙནཾ, ཏེནཱཧ ‘‘ཏཱདིསསྶ ཝཙནསྶ གྷཱཏོ’’ཏི. ཨཏྠོ དྷམྨདེསནཱཡ ཧེཏུ ཨུཔྤཛྫཏི ཨེཏྠ, དྷམྨདེསནཱདིཀོ ཝཱ ཨཏྠོ ཨུཔྤཛྫཏི ཨེཏཱཡཱཏི ཨཊྛུཔྤཏྟི, པཙྩུཔྤནྣཝཏྠུ.

ཨེཀཾ གཧེཏྭཱཏི དྷམྨདེསནཱསིཀྑཱཔདཔཉྙཏྟིསངྑཱཏེསུ དྭཱིསུ དྷམྨདེསནཱཀཱརཎཾ གཧེཏྭཱ. རཏྟིཙྪེདོ ཝཱཏི སཏྟཱཧཀརཎཱིཡཝསེན གནྟྭཱ བཧི ཨརུཎུཊྛཱཔནཝསེན ཝུཏྟོ, ན ཝསྶཙྪེདཝསེན ཏསྶ ཝིསུཾ ཝུཙྩམཱནཏྟཱ. ཨེཏེན ཙ ཝསྶཙྪེདཔཙྩཡེ སཏྟཱཧཀརཎཱིཡེན གམནཾ ཨནུཉྙཱཏནྟི ཝེདིཏབྦཾ. ན ཀིསྨིཉྩཱིཏི ཀིསྨིཉྩི གུཎེ སམྦྷཱཝནཱཝསེན ན མཉྙནྟི. པཙྪཱ སཱིལཾ ཨདྷིཊྛཧེཡྻཱམཱཏི ཨཱཛཱིཝཧེཏུ སནྟགུཎཔྤཀཱསནེན ཨཱཛཱིཝཝིཔཏྟིཾ སནྡྷཱཡ ཝུཏྟཾ. ཨཏིམཉྙིསྶཏཱིཏི ཨཝམཉྙིསྶཏི.

༡༧. ‘‘ཨཱཡསྨཱཏི པིཡཝཙནམེཏ’’ནྟི ཨུཙྩནཱིཙཛནསཱམཉྙཝསེན ཝཏྭཱ པུན ཨུཙྩཛནཱཝེཎིཀཝསེནེཝ དསྶེནྟོ ‘‘གརུགཱརཝསཔྤཏིསྶཱདྷིཝཙན’’ནྟི ཨཱཧ. ཏཏྠ སཧ པཏིསྶཡེན ནིསྶཡེནཱཏི སཔྤཏིསྶོ, སནིསྶཡོ, ཏསྶ གརུགུཎཡུཏྟེསུ གཱརཝཝཙནནྟི ཨཏྠོ. ཨིདྷ པན ཝཙནམེཝ ཨདྷིཝཙནཾ. པཔྤཊཀོཛནྟི ཨཱདིཀཔྤེ ཨུདཀཱུཔརི པཋམཾ པཐཝཱིབྷཱཝེན སཉྫཱཏཾ ནཝནཱིཏཔིཎྜསདིསཾ ཨུདཀེཔི ཨུཔྤིལནསབྷཱཝཾ ཨཝིལཱིཡནཀཾ ཨཏིསིནིདྡྷམདྷུརཾ ཨནེཀཡོཛནསཧསྶབཧལཾ རསཱཏལསངྑཱཏཾ པཐཝོཛཾ. ཡཾ ཨཱདིཀཔྤིཀེཧི མནུསྶེཧི རསཏཎྷཱཡ གཧེཏྭཱ བྷུཉྫམཱནཾ ཏེསཾ ཀམྨབལེན ཨུཔརིབྷཱགེ ཀཀྑལ༹བྷཱཝཾ ཨཱཔཛྫིཏྭཱ ཧེཊྛཱ པུརིམཱཀཱརེནེཝ ཋིཏཾ, ཡསྶ ཙ བལེན ཨཡཾ མཧཱཔཐཝཱི སཔབྦཏསམུདྡཀཱནནཱ ཧེཊྛཱཨུདཀེ ཨནིམུཛྫམཱནཱ ཨཝིཀིརིཡམཱནཱ ཀུལླུཔརི ཝིཡ ནིཙྩལཱ ཏིཊྛཏི, ཏཾ པཐཝཱིསཱརམཎྜནྟི ཨཏྠོ, ཏེནཱཧ པཐཝཱིམཎྜོཏིཨཱདི. སམྤནྣནྟི མདྷུརརསེན ཨུཔེཏཾ, ཏེནཱཧ ‘‘སཱདུརས’’ནྟི. ཨུཔཔནྣཕལོཏི ¶ བཧུཕལོ. ‘‘ནིམྨཀྑིཀ’’ནྟི ཝཏྭཱ པུན ‘‘ནིམྨཀྑིཀཎྜ’’ནྟི མཀྑིཀཎྜཱནམྤི ཨབྷཱཝཾ དསྶེཏི. ཡེ པཐཝཱིནིསྶིཏཱ པཱཎཱ, ཏེ ཏཏྠ སངྐཱམེསྶཱམཱིཏི ཨེཏྠ མནུསྶཱམནུསྶཏིརཙྪཱནགཏིཏྠཱིནམྤི ཧཏྠསངྐཱམནེ ཀིཾ ཨནཱམཱསདོསོ ན ཧོཏཱིཏི? ན ཧོཏི, ཀསྨཱ? ‘‘ཨནཱཔཏྟི, བྷིཀྑཝེ, ཨིདྡྷིམསྶ ཨིདྡྷིཝིསཡེ’’ཏི (པཱརཱ. ༡༥༩) ཝཙནཏོ, ཏེནེཝ བྷགཝཱཔི ཨནཱམཱསདོསཾ ཨདསྶེཏྭཱ ‘‘ཝིཔལླཱསམྤི སཏྟཱ པཊིལབྷེཡྻུ’’ནྟི ཨཱཧ, ཁུདྡཀོ གཱམོ. མཧནྟོ སཱཔཎོ ནིགམོ. པདཝཱིཏིཧཱརེནཱཏི པདནིཀྑེཔེན.

ཝིནཡཔཉྙཏྟིཡཱཙནཀཐཱཝཎྞནཱ

༡༨. ཝིནཡཔཉྙཏྟིཡཱ ¶ མཱུལཏོ པབྷུཏཱིཏི པཱརཱཛིཀཱདིགརུཀཱནཾ, ཏདཉྙེསཉྩ སིཀྑཱཔདཱནཾ པཱཏིམོཀྑུདྡེསཀྐམེན ཡེབྷུཡྻེན ཨཔཉྙཏྟཏཾ སནྡྷཱཡ ཝུཏྟཾ, ན སབྦེན སབྦཾ ཨཔཉྙཏྟཏཱཡ. ཏེནེཝ ཐེརོ བྷགཝནྟཾ ‘‘སཱཝཀཱནཾ སིཀྑཱཔདཾ པཉྙཔེཡྻ ཨུདྡིསེཡྻ པཱཏིམོཀྑ’’ནྟི པཱཏིམོཀྑུདྡེསེན སཧ སིཀྑཱཔདཔཉྙཏྟིཾ ཡཱཙི. ཁནྡྷཀེ ཧི ཨཱནནྡཏྠེརཱདཱིནཾ པབྦཛྫཏོ པུརེཏརམེཝ རཱཧུལབྷདྡསྶ པབྦཛྫཱཡ ‘‘ན, བྷིཀྑཝེ, ཨནནུཉྙཱཏོ མཱཏཱཔིཏཱུཧི པུཏྟོ པབྦཱཛེཏབྦོ, ཡོ པབྦཱཛེཡྻ ཨཱཔཏྟི དུཀྐཊསྶཱ’’ཏི (མཧཱཝ. ༡༠༥) པཉྙཏྟསིཀྑཱཔདཾ དིསྶཏི. ཨིདྷེཝ ཨཊྛཀཐཱཡམྤི ‘‘སཱམམྤི པཙནཾ…པེ… ན ཝཊྚཏཱི’’ཏི ཙ, ‘‘རཏྟིཙྪེདོ ཝསྶཙྪེདོ ཝཱ ན ཀཏོ’’ཏི ཙ ཝུཏྟཏྟཱ པུབྦེཝ སཱམཔཱཀཱདིཔཊིཀྑེཔོ ཨཏྠཱིཏི པཉྙཱཡཏི. ཨེཝཾ ཀཏིཔཡསིཀྑཱཔདཱནཾ པཉྙཏྟིསབྦྷཱཝེཔི ཨཔཉྙཏྟཔཱརཱཛིཀཱདིཀེ སནྡྷཱཡ ‘‘ན ཏཱཝ, སཱརིཔུཏྟ, སཏྠཱ སཱཝཀཱནཾ སིཀྑཱཔདཾ པཉྙཔེཏཱི’’ཏི ཝུཏྟནྟི གཧེཏབྦཾ. པུཐུཏྟཱརམྨཎཏོ པཊིནིཝཏྟིཏྭཱ སམྨདེཝ ཨེཀཱརམྨཎེ ཙིཏྟེན ལཱིནོ པཊིསལླཱིནོ ནཱམཱཏི ཨཱཧ ‘‘ཨེཀཱིབྷཱཝཾ གཏསྶཱ’’ཏི, ཙིཏྟཝིཝེཀཾ གཏསྶཱཏི ཨཏྠོ. ཙིརནྟི ཨཙྩནྟསཾཡོགེ ཨུཔཡོགཝཙནཾ.

སོལ༹སཝིདྷཱཡ པཉྙཱཡཱཏི མཛ྄ཛྷིམནིཀཱཡེ ཨནུཔདསུཏྟནྟདེསནཱཡཾ ‘‘མཧཱཔཉྙོ, བྷིཀྑཝེ, སཱརིཔུཏྟོ པུཐུཔཉྙོ ཧཱསཔཉྙོ ཛཝནཔཉྙོ ཏིཀྑཔཉྙོ ནིབྦེདྷིཀཔཉྙོ’’ཏི ཨཱགཏཱ ཚ པཉྙཱ ཙ ནཝཱནུཔུབྦཝིཧཱརསམཱཔཏྟིཔཉྙཱ ཙ ཨརཧཏྟམགྒཔཉྙཱ ཙཱཏི ཨེཝཾ སོལ༹སཝིདྷེན ཨཱགཏཱཡ པཉྙཱཡ. ཡེསཾ བུདྡྷཱནཾ སཱཝཀཱ སུདྡྷཱཝཱསེསུ སནྡིསྶནྟི, ཏེཡེཝ ¶ ལོཀེ པཱཀཊཱཏི ཝིཔསྶཱིཨཱདཡོཝ ཨིདྷ ཨུདྡྷཊཱ, ན ཨིཏརེ པུབྦབུདྡྷཱ. ཏེནེཝ ཨཱཊཱནཱཊིཡསུཏྟེ (དཱི. ནི. ༣.༢༧༥ ཨཱདཡོ) དེཝཱཔི ཨཏྟནོ པཱཀཊཱནཾ ཏེསཉྙེཝ གཧཎཾ ཨཀཾསུ, ནཱཉྙེསནྟི ཝེདིཏབྦཾ.

༡༩. ཀིལཱསུནོཏི ཨཔྤོསྶུཀྐཱ པཡོཛནཱབྷཱཝེན ནིརུསྶཱཧཱ ཨཧེསུཾ, ན ཨཱལསིཡེན, ཏེནཱཧ ན ཨཱལསིཡཀིལཱསུནོཏིཨཱདི. ནིདྡོསཏཱཡཱཏི ཀཱཡཝཙཱིཝཱིཏིཀྐམསམུཊྛཱཔཀདོསཱབྷཱཝཱ. པཱཎཾ ན ཧནེ ན ཙཱདིནྣམཱདིཡེཏིཨཱདིནཱ (སུ. ནི. ༤༠༢) ཨོཝཱདསིཀྑཱཔདཱནཾ ཝིཛྫམཱནཏྟཱ ཝུཏྟཾ སཏྟཱཔཏྟིཀྑནྡྷཝསེནཱཏིཨཱདི. ཚནྣཾ ཚནྣཾ ཝསྶཱནཾ ཨོསཱནདིཝསཾ ཨཔེཀྑིཏྭཱ ‘‘སཀིཾ སཀི’’ནྟི ཝུཏྟཏྟཱ ཏདཔེཀྑམེཏྠ སཱམིཝཙནཾ. སཀལཛམྦུདཱིཔེ སབྦོཔི བྷིཀྑུསངྒྷོ ཨུཔོསཐཾ ཨཀཱསཱིཏི སམྦནྡྷོ.

ཁནྟཱི པརམནྟིཨཱདཱིསུ ཏིཏིཀྑཱསངྑཱཏཱ ཁནྟི སཏྟསངྑཱརེཧི ནིབྦཏྟཱནིཊྛཱཁམནཀིལེསཏཔནཏོ པརམཾ ཏཔོ ནཱམ. ཝཱནསངྑཱཏཱཡ ཏཎྷཱཡ ནིཀྑནྟཏྟཱ ནིབྦཱནཾ སབྦདྷམྨེཧི པརམཾ ཨུཏྟམནྟི བུདྡྷཱ ཝདནྟི. ཡཐཱཝུཏྟཁནྟིཡཱ ཨབྷཱཝེན པཱཎཝདྷཾ ཝཱ ཚེདནཏཱལ༹ནཱདིཾ ཝཱ ཀརོནྟོ པརཱུཔགྷཱཏཱི པརསྶཧརཎཔརདཱརཱཏིཀྐམནཱདཱིཧི མུསཱཔེསུཉྙཕརུསཱདཱིཧི ཙ པརཾ ཝིཧེཋཡནྟོ ཙ བཱཧིཏཔཱཔཏཱཡ ཨབྷཱཝེན པབྦཛིཏོ ཝཱ སམིཏཔཱཔཏཱཡ ཨབྷཱཝེན སམཎོ ཝཱ ན ཧོཏཱིཏི ཨཏྠོ. སཱིལསཾཝརེན སབྦཔཱཔསྶ ཨནུཔྤཱདནཾ ལོཀིཡསམཱདྷིཝིཔསྶནཱཧི ཀུསལསྶ ཨུཔསམྤཱདནཾ ནིཔྥཱདནཾ སབྦེཧི མགྒཕལེཧི ཨཏྟནོ ཙིཏྟསྶ པརིསོདྷནཾ པབྷསྶརབྷཱཝཀརཎཾ ཡཾ, ཏམེཏཾ བུདྡྷཱནཾ སཱསནཾ ཨནུསིཊྛི. ཨནུཔཝཱདོཏི ཝཱཙཱཡ ཀསྶཙི ཨནུཔཝདནཾ. ཨནུཔགྷཱཏོཏི ཀཱཡེན ཀསྶཙི ཨུཔགྷཱཏཱཀརཎཾ ཝུཏྟཱཝསེསེ ཙ པཱཏིམོཀྑསངྑཱཏེ སཱིལེ ཨཏྟཱནཾ སཾཝརཎཾ. བྷཏྟསྨིཾ མཏྟཉྙུཏཱསངྑཱཏཨཱཛཱིཝཔཱརིསུདྡྷིཔཙྩཡསནྣིསྶིཏསཱིལསམཱཡོགོ ཏམྨུཁེན ཨིནྡྲིཡསཾཝརོ པནྟསེནཱསནསངྑཱཏཾ ཨརཉྙཝཱསཾ ཏམྨུཁེན པཀཱསིཏེ ཙཏུཔཙྩཡསནྟོསབྷཱཝནཱརཱམཏཱསངྑཱཏམཧཱཨརིཡཝཾསེ པཏིཊྛཱནཉྩ ཨདྷིཙིཏྟསངྑཱཏེ ལོཀིཡལོཀུཏྟརསམཱདྷིམྷི ཏདུཔྤཱདནཝསེན ཨཱཡོགོ ཨནུཡོགོ ཙ ཡཾ, ཏམེཏཾ བུདྡྷཱནཾ ཨནུསིཊྛཱིཏི ཡོཛནཱ.

‘‘ཡཱཝ ¶ སཱསནཔརིཡནྟཱ’’ཏི ཨཱཎཱཔཱཏིམོཀྑསྶ ཨབྷཱཝཏོ ཝུཏྟཾ. པརིནིབྦཱནཏོ པན ཨུདྡྷཾ ཨོཝཱདཔཱཏིམོཀྑུདྡེསོཔི ནཏྠེཝ, བུདྡྷཱ ཨེཝ ཧི ཏཾ ཨུདྡིསནྟི, ན སཱཝཀཱ. པཋམབོདྷིཡནྟི བོདྷིཏོ ཝཱིསཏིཝསྶཔརིཙྪིནྣེ ཀཱལེ, ཨཱཙརིཡདྷམྨཔཱལཏྠེརེན པན ‘‘པཉྩཙཏྟཱལཱིསཱཡ ཝསྶེསུ ཨཱདིཏོ པནྣརས ཝསྶཱནི པཋམབོདྷཱི’’ཏི ཝུཏྟཾ, སིཀྑཱཔདཔཉྙཏྟིཀཨཱལཏོ པན པབྷུཏི ཨཱཎཱཔཱཏིམོཀྑམེཝ ཨུདྡིསནྟཱིཏི ཨིདཾ པཱཏིམོཀྑུདྡེསཀྐམེནེཝ པརིཔུཎྞཾ ཀཏྭཱ སིཀྑཱཔདཔཉྙཏྟིཀཱལཾ སནྡྷཱཡ ཝུཏྟཾ. ཨཊྛཱནཾ ཨནཝཀཱསོཏི ཡཐཱཀྐམཾ ཧེཏུཔཙྩཡཔཊིཀྑེཔཝསེན ཀཱརཎཔཊིཀྑེཔོ. ཡནྟི ཡེན ཀཱརཎེན. ཨཔརིསུདྡྷཱཡ པརིསཱཡཱཏི ཨལཛྫཱིཔུགྒལེཧི ཝོམིསྶཏཱཡ ཨསུདྡྷཱཡ པརིསཱཡ, ན ཀེཝལཾ བུདྡྷཱནཉྙེཝ ཨཔརིསུདྡྷཱཡ པརིསཱཡ པཱཏིམོཀྑུདྡེསོ ཨཡུཏྟོ, ཨཐ ཁོ སཱཝཀཱནམྤི. ཙོདནཱསཱརཎཱདིཝསེན པན སོདྷེཏྭཱ སཾཝཱསཀརཎཾ སཱཝཀཱནཉྙེཝ བྷཱརོ, བུདྡྷཱ པན སིཀྑཱཔདཱནི པཉྙཔེཏྭཱ ཨུཔོསཐཱདིཀརཎཝིདྷཱནཾ སིཀྑཱཔེཏྭཱ ཝིསྶཛྫེནྟི, ཙོདནཱསཱརཎཱདཱིནི ན ཀརོནྟི, ཏེནེཝ བྷགཝཱ ཨསུདྡྷཱཡ པརིསཱཡ པཱཏིམོཀྑཾ ཨནུདྡིསིཏྭཱ སཀལརཏྟིཾ ཏུཎྷཱིབྷཱུཏོ ནིསཱིདི. བྷིཀྑཱུ ཙ བྷགཝཏོ ཨདྷིཔྤཱཡཾ ཉཏྭཱ ཨསུདྡྷཔུགྒལཾ བཧི ནཱིཧརིཾསུ. ཏསྨཱ སཱཝཀཱནམྤི ཨསུདྡྷཱཡ པརིསཱཡ ཉཏྭཱ ཨུཔོསཐཱདིསངྒྷཀམྨཀརཎཾ བྲཧྨཙརིཡནྟརཱཡཀརཎཾ ཝིནཱ ན ཝཊྚཏཱིཏི ཝེདིཏབྦཾ.

སམྨུཁསཱཝཀཱནནྟི ¶ བུདྡྷཱནཾ སམྨུཁེ དྷརམཱནཀཱལེ པབྦཛིཏཱནཾ སབྦནྟིམཱནཾ སཱཝཀཱནཾ. ཨུལཱ༹རཱཏིསཡཛོཏནཏྠཾ ‘‘ཨུལཱ༹རུལཱ༹རབྷོགཱདིཀུལཝསེན ཝཱ’’ཏི པུན ཨུལཱ༹རསདྡགྒཧཎཾ ཀཏཾ. ཨཱདི-སདྡེན ཨུལཱ༹རམཛ྄ཛྷཏྟཨནུལཱ༹རཱདཱིནཾ གཧཎཾ ཝེདིཏབྦཾ. ཏེ པཙྪིམཱ སཱཝཀཱ ཨནྟརདྷཱཔེསུནྟི སམྦནྡྷོ.

ཨཔཉྙཏྟེཔི སིཀྑཱཔདེ ཡདི སཱཝཀཱ སམཱནཛཱཏིཨཱདིཀཱ སིཡུཾ, ཨཏྟནོ ཀུལཱནུགཏགནྠཾ ཝིཡ བྷགཝཏོ ཝཙནཾ ན ནཱསེཡྻུཾ. ཡསྨཱ པན སིཀྑཱཔདཉྩ ན པཉྙཏྟཾ, ཨིམེ ཙ བྷིཀྑཱུ ན སམཱནཛཱཏིཨཱདིཀཱ, ཏསྨཱ ཝིནཱསེསུནྟི ཨིམམཏྠཾ དསྶེཏུཾ ཡསྨཱ ཨེཀནཱམཱ…པེ… ཏསྨཱ ཨཉྙམཉྙཾ ཝིཧེཋེནྟཱཏིཨཱདི ཝུཏྟཾ. ཙིརཊྛིཏིཀཝཱརེ པན སཱཝཀཱནཾ ནཱནཱཛཙྩཱདིབྷཱཝེ སམཱནེཔི སིཀྑཱཔདཔཉྙཏྟིཡཱ པརིཔུཎྞཏཱཡ སཱསནསྶ ཙིརཔྤཝཏྟི ཝེདིཏབྦཱ. ཡདི ཨེཝཾ ཀསྨཱ སབྦེཔི བུདྡྷཱ སིཀྑཱཔདཱནི ན པཉྙཔེནྟཱིཏི? ཡསྨཱ ¶ ཙ སཱསནསྶ ཙིརཔྤཝཏྟིཡཱ ན ཀེཝལཾ སིཀྑཱཔདཔཉྙཏྟིཡེཝ ཧེཏུ, ཨཐ ཁོ ཨཱཡཏིཾ དྷམྨཝིནཡཾ གཧེཏྭཱ སཱཝཀེཧི ཝིནེཏབྦཔུགྒལཱནཾ སམྦྷཝོཔི, ཏསྨཱ ཏེསཾ སམྦྷཝེ སཏི བུདྡྷཱ སིཀྑཱཔདཾ པཉྙཔེནྟི, ནཱསཏཱིཏི པརིཔུཎྞཱཔཉྙཏྟིཡེཝ ཝེནེཡྻསམྦྷཝསྶཱཔི སཱུཙནཏོ སཱསནསྶ ཙིརཔྤཝཏྟིཡཱ ཧེཏུ ཝུཏྟཱཏི ཝེདིཏབྦཱ. པཱལི༹ཡཾ སཧསྶཾ བྷིཀྑུསངྒྷཾ…པེ… ཨོཝདཏཱིཏི ཨེཏྠ སཧསྶསངྑྱཱཔརིཙྪིནྣོ སངྒྷོ སཧསྶོ སཧསྶིལོཀདྷཱཏཱུཏིཨཱདཱིསུ (དཱི. ནི. ༢.༡༨) ཝིཡ. ཏཾ སཧསྶཾ བྷིཀྑུསངྒྷནྟི ཡོཛནཱ. སཧསྶསདྡསྶ ཨེཀཝཙནནྟཏཱཡ ‘‘བྷིཀྑུསཧསྶསྶཱ’’ཏི ཝཏྭཱ ཨཝཡཝཱཔེཀྑཱཡ ‘‘ཨོཝདིཡམཱནཱན’’ནྟི བཧུཝཙནནིདྡེསོ ཀཏོཏི དཊྛབྦོ.

ཨནུཔཱདཱཡ ཨཱསཝེཧི ཙིཏྟཱནི ཝིམུཙྩིཾསཱུཏི ཨེཏྠ ཨཱསཝེཧཱིཏི ཀཏྟུཨཏྠེ ཀརཎཝཙནཾ. ཙིཏྟཱནཱིཏི པཙྩཏྟབཧུཝཙནཾ. ཝིམུཙྩིཾསཱུཏི ཀམྨསཱདྷནཾ. ཏསྨཱ ཨཱསཝེཧི ཀཏྟུབྷཱུཏེཧི ཨནུཔཱདཱཡ ཨཱརམྨཎཀརཎཝསེན ཨགྒཧེཏྭཱ ཙིཏྟཱནི ཝིམོཙིཏཱནཱིཏི ཨེཝམེཏྠ ཨཏྠོ གཧེཏབྦོཏི ཨཱཧ ཏེསཉྷི ཙིཏྟཱནཱིཏིཨཱདི. ཡེཧི ཨཱསཝེཧཱིཏི ཨེཏྠཱཔི ཀཏྟུཨཏྠེ ཨེཝ ཀརཎཝཙནཾ. ཝིམུཙྩིཾསཱུཏི ཀམྨསཱདྷནཾ. ཏེཏི ཨཱསཝཱ. ཏཱནཱིཏི ཙིཏྟཱནི, ཨུཔཡོགབཧུཝཙནཉྩེཏཾ. ཝིམུཙྩིཾསཱུཏི ཀཏྟུསཱདྷནཾ, ཝིམོཙེསུནྟི ཨཏྠོ. ཨགྒཧེཏྭཱ ཝིམུཙྩིཾསཱུཏི ཨཱརམྨཎཝསེན ཏཱནི ཙིཏྟཱནི ཨགྒཧེཏྭཱ ཨཱསཝཱ ཏེཧི ཙིཏྟེཧི མུཏྟཝནྟོ ཨཧེསུནྟི ཨཏྠོ. ཨཐ ཝཱ ཨཱསཝེཧཱིཏི ནིསྶཀྐཝཙནཾ, ཝིམུཙྩིཾསཱུཏི ཀཏྟུསཱདྷནཾ. ཏསྨཱ ཀཉྩི སངྑཏདྷམྨཾ ཏཎྷཱདིཝསེན ཨནུཔཱདིཡིཏྭཱ ཙིཏྟཱནི ཝིམུཏྟཝནྟཱནི ཨཧེསུནྟི ཨཏྠོ གཧེཏབྦོ. པུརིམཝཙནཱཔེཀྑནྟི ཨཉྙཏརསྨིཾ བྷིཾསནཀེ ཝནསཎྜེཏི ཝུཏྟཝཙནསྶ ཨཔེཀྑནཾ ཏསྨིཾ པུརིམཝཙནེཏི ཨེཝཾ ཨཔེཀྑནནྟི ཨཏྠོ, ཏེནཱཧ ཡཾ ཝུཏྟནྟིཨཱདི. བྷིཾསནསྶ བྷཡསྶ ཀཏཾ ཀརཎཾ ¶ ཀིརིཡཱ བྷིཾསནཀཏཾ, ཏསྨིཾ བྷིཾསནཀིརིཡཱཡཱཏི ཨཏྠཾ དསྶེནྟོ ཨཱཧ ‘‘བྷིཾསནཀིརིཡཱཡཱ’’ཏི. བྷིཾསཡཏཱིཏི བྷིཾསནོ, སོཝ བྷིཾསནཀོ, ཏསྶ བྷཱཝོ ‘‘བྷིཾསནཀཏྟ’’ནྟི ཝཏྟབྦེ ཏ-ཀཱརསྶ ལོཔཾ ཀཏྭཱ ཝུཏྟནྟི པཀཱརནྟརེན ཨཏྠཾ དསྶེནྟོ ཨཱཧ ‘‘ཨཐ ཝཱ’’ཏིཨཱདི. བཧུཏརཱནཾ སཏྟཱནཾ ཝཱཏི ཡེབྷུཡྻེནཱཏི པདསྶ ཨཏྠདསྶནཾ. ཏེན ཙ ཡོ ཀོཙཱིཏི པདསྶཱཔི ཡོ ཡོ ¶ པཝིསཏཱིཏི ཝིཙྪཱཝསེན ནཱནཏྠེན ཨཏྠོ གཧེཏབྦོཏི དསྶེཏི, ཡོ ཡོ པཝིསཏི, ཏེསུ བཧུཏརཱནནྟི ཨཏྠསམྦྷཝཏོ.

ནིགམནནྟི པཀཏེ ཨཏྠེ ཡཐཱཝུཏྟསྶ ཨཏྠསྶ ཨུཔསཾཧཱརོ. ཨཡཉྷེཏྠ ནིགམནཀྐམོ – ཡཱ ཧི, སཱརིཔུཏྟ, ཝིཔསྶཱིཨཱདཱིནཾ ཏིཎྞཾ བུདྡྷཱནཾ ཨཏྟནོ པརིནིབྦཱནཏོ ཨུཔརི པརིཡཏྟིཝསེན ཝིནེཏབྦཱནཾ པུགྒལཱནཾ ཨབྷཱཝེན ཏེསཾ ཨཏྠཱཡ ཝིཏྠཱརཏོ སིཀྑཱཔདཔཉྙཏྟིཡཾ ཀིལཱསུཏཱ ཨཔྤོསྶུཀྐཏཱ, ཡཱ ཙ ཨུཔནིསྶཡསམྤནྣཱནཾ ཝེནེཡྻཱནཾ ཙེཏསཱ ཙེཏོ པརིཙྩ བྷིཾསནཀཝནསཎྜེཔི གནྟྭཱ ཨོཝདནྟཱནཾ ཏེསཾ མགྒཕལུཔྤཱདནཏྠཱཡ དྷམྨདེསནཱཡ ཨེཝ ཨཀིལཱསུཏཱ སཨུསྶཱཧཏཱ, ན ཝིཏྠཱརཏོ དྷམྨཝིནཡདེསནཱཡ, ཨཡཾ ཁོ, སཱརིཔུཏྟ, ཧེཏུ, ཨཡཾ པཙྩཡོ, ཡེན ཝིཔསྶཱིཨཱདཱིནཾ ཏིཎྞཾ བུདྡྷཱནཾ བྲཧྨཙརིཡཾ ན ཙིརཊྛིཏིཀཾ ཨཧོསཱིཏི. པུརིསཡུགཝསེནཱཏི པུརིསཱནཾ ཡུགཾ པཝཏྟིཀཱལོ, ཏསྶ ཝསེན, པུརིསཝསེནཱཏི ཨཏྠོ. སབྦཔཙྪིམཀོཏི པརིནིབྦཱནདིཝསེ པབྦཛིཏོ སུབྷདྡསདིསོ. སཏསཧསྶཾ སཊྛིམཏྟཱནི ཙ ཝསྶསཧསྶཱནཱིཏི ཨིདཾ བྷགཝཏོ ཛཱཏིཏོ པཊྛཱཡ ཝུཏྟཾ, བོདྷིཏོ པཊྛཱཡ པན གཎིཡམཱནཾ ཨཱུནཾ ཧོཏཱིཏི དཊྛབྦཾ. དྭེཡེཝཱཏི དྷརམཱནེ བྷགཝཏི ཨེཀཾ, པརིནིབྦུཏེ ཨེཀནྟི དྭེ ཨེཝ པུརིསཡུགཱནི.

༢༠-༡. ཨསམྦྷུཎནྟེནཱཏི ཨཔཱཔུཎནྟེན. ཀོ ཨནུསནྡྷཱིཏི པུརིམཀཐཱཡ ཨིམསྶ ཀོ སམྦནྡྷོཏི ཨཏྠོ. ཡཾ ཝུཏྟནྟི ཡཾ ཡཱཙིཏནྟི ཨཏྠོ. ཡེསཱུཏི ཝཱིཏིཀྐམདྷམྨེསུ. ནེསནྟི དིཊྛདྷམྨིཀཱདིཨཱསཝཱནཾ. ཏེཏི ཝཱིཏིཀྐམདྷམྨཱ. ཉཱཏིཡེཝ པིཏཱམཧཔིཏུཔུཏྟཱདིཝསེན པརིཝཊྚནཏོ པརིཝཊྚོཏི ཉཱཏིཔརིཝཊྚོ. ལོཀཱམིསབྷཱུཏནྟི ལོཀཔརིཡཱཔནྣཾ ཧུཏྭཱ ཀིལེསེཧི ཨཱམསིཏབྦཏོ ལོཀཱམིསབྷཱུཏཾ. པབྦཛྫཱསངྑེཔེནེཝཱཏི དསསིཀྑཱཔདདཱནཱདིཔབྦཛྫཱམུཁེན. ཨེཏནྟི མེཐུནཱདཱིནཾ ཨཀརཎཾ. ཐཱམནྟི སིཀྑཱཔདཔཉྙཱཔནསཱམཏྠིཡཾ. སཉྪཝིནྟི སུཀྐཙྪཝིཾ པཀཏིཙྪཝིཾ, སུནྡརཙྪཝིཾ ཝཱ. སེསནྟི སེསཔདཡོཛནདསྶནཾ. ཨིདཱནི ཨཏྠཡོཛནཾ དསྶེནྟོ ཨཱཧ ཨཡཾ ཝཱ ཧེཏྠཱཏིཨཱདི. ཏཏྠ ཝཱ-སདྡོ ཨཝདྷཱརཎེ. ཧི-སདྡོ པསིདྡྷིཡཾ, ཨཡམེཝ ཧེཏྠཱཏི ཨཏྠོ. ཨཐ སཏྠཱཏི པདསྶ ཨཏྠཾ དསྶེཏི ‘‘ཏདཱ སཏྠཱ’’ཏི. རོཔེཏྭཱཏི ཕཱལིཏཊྛཱནེ ¶ ནིནྣཾ མཾསཾ སམཾ ཝཌྜྷེཏྭཱ. སཀེ ཨཱཙརིཡཀེཏི ཨཏྟནོ ཨཱཙརིཡབྷཱཝེ, ཨཱཙརིཡཀམྨེ ཝཱ.

ཝིཔུལབྷཱཝེནཱཏི ¶ བཧུབྷཱཝེན. ཨཡོནིསོ ཨུམྨུཛྫམཱནཱཏི ཨནུཔཱཡེན ཨབྷིནིཝིསམཱནཱ, ཝིཔརཱིཏཏོ ཛཱནམཱནཱཏི ཨཏྠོ. རསེན རསཾ སཾསནྡིཏྭཱཏི ཨནཝཛྫསབྷཱཝེན སཱཝཛྫསབྷཱཝཾ སམྨིསྶེཏྭཱ. ཨུདྡྷམྨཾ ཨུབྦིནཡནྟི ཨུགྒཏདྷམྨཾ ཨུགྒཏཝིནཡཉྩ, ཡཐཱ དྷམྨོ ཙ ཝིནཡོ ཙ ཝིནསྶིསྶཏི, ཨེཝཾ ཀཏྭཱཏི ཨཏྠོ. ཨིམསྨིཾ ཨཏྠེཏི ཨིམསྨིཾ སངྒྷཱདྷིཀཱརེ. པབྷསྶརོཏི པབྷཱསནསཱིལོ. ཨེཝཾནཱམོ ཨེཝཾགོཏྟོཏི སོཡམཱཡསྨཱ སོཏཱཔནྣོཏིནཱམགོཏྟེན སམནྣཱགཏོ, ཨཡཾ ཝུཙྩཏི སོཏཱཔནྣོཏི པཀཏེན སམྦནྡྷོ. ཨཝིནིཔཱཏདྷམྨོཏི ཨེཏྠ དྷམྨ-སདྡོ སབྷཱཝཝཱཙཱི, སོ ཙ ཨཏྠཏོ ཨཔཱཡེསུ ཁིཔནཀོ དིཊྛིཨཱདིཨཀུསལདྷམྨོ ཨེཝཱཏི ཨཱཧ ‘‘ཡེ དྷམྨཱ’’ཏིཨཱདི. ཨིདཱནི སབྷཱཝཝསེནེཝ ཨཏྠཾ དསྶེཏུཾ ཝིནིཔཏནཾ ཝཱཏིཨཱདི ཝུཏྟཾ. ནིཡཏོཏི སཏྟབྷཝབྦྷནྟརེ ནིཡཏཀྑནྡྷཔརིནིབྦཱནོ. ཏསྶ ཀཱརཎམཱཧ ‘‘སམྦོདྷིཔརཱཡཎོ’’ཏི.

༢༢. ཨནུདྷམྨཏཱཏི ལོཀུཏྟརདྷམྨཱནུགཏོ སབྷཱཝོ. པཝཱརཎཱསངྒཧཾ དཏྭཱཏི ‘‘ཨཱགཱམིནིཡཱ པུཎྞམིཡཱ པཝཱརེསྶཱམཱ’’ཏི ཨནུམཏིདཱནཝསེན དཏྭཱ, པཝཱརཎཾ ཨུཀྐཌྜྷིཏྭཱཏི ཨཏྠོ, ཨེཏེན ནཡེན ཀེནཙི པཙྩཡེན པཝཱརཎུཀྐཌྜྷནཾ ཀཱཏུཾ ཝཊྚཏཱིཏི དཱིཔིཏཾ ཧོཏི. མཱགསིརསྶ པཋམདིཝསེཏི ཙནྡམཱསཝསེན ཝུཏྟཾ, ཨཔརཀཏྟིཀཔུཎྞམཱཡ ཨནནྟརེ པཱཊིཔདདིཝསེཏི ཨཏྠོ. ཕུསྶམཱསསྶ པཋམདིཝསེཏི ཨེཏྠཱཔི ཨེསེཝ ནཡོ. ཨིདཉྩ ནིདསྶནམཏྟཾ ཝེནེཡྻཱནཾ ཨཔརིཔཱཀཾ པཊིཙྩ ཕུསྶམཱསཏོ པརཉྩ ཨེཀདྭིཏིཙཏུམཱསམྤི ཏཏྠེཝ ཝསིཏྭཱ སེསམཱསེཧི ཙཱརིཀཱཡ པརིཡོསཱཔནཏོ. དསསཧསྶཙཀྐཝཱལེ༹ཏི ཨིདཾ དེཝབྲཧྨཱནཾ ཝསེན ཝུཏྟཾ. མནུསྶཱ པན ཨིམསྨིཾཡེཝ ཙཀྐཝཱལེ༹ བོདྷནེཡྻཱ ཧོནྟི. ཨིཏརཙཀྐཝཱལེ༹སུ པན མནུསྶཱནཾ ཨིམསྨིཾ ཙཀྐཝཱལེ༹ ཨུཔྤཏྟིཡཱ ཚནྡུཔྤཱདནཏྠཾ ཨནནྟམྤི ཙཀྐཝཱལ༹ཾ ཨོལོཀེཏྭཱ ཏདནུགུཎཱནུསཱསནཱི པཱཊིཧཱརིཡཾ ཀརོནྟིཡེཝ.

ཨཱཡཱམཱཏི ¶ ཨེཏྠ ཨཱ-སདྡོ ཨཱགཙྪཱཏི ཨིམིནཱ སམཱནཏྠོཏི ཨཱཧ ‘‘ཨཱགཙྪ ཡཱམཱ’’ཏི, ཨེཧི གཙྪཱམཱཏི ཨཏྠོ. སུཝཎྞརསཔིཉྫརཱཧཱིཏི ཝིལཱིནསུཝཎྞཛལཾ ཝིཡ པིཉྫརཱཧི སུཝཎྞཝཎྞཱཧཱིཏི ཨཏྠོ. པཱལི༹ཡཾ ནིམནྟིཏམྷཱཏིཨཱདཱིསུ ‘‘ནིམནྟིཏཱ ཝསྶཾཝུཏྠཱ ཨམྷཱ’’ཏི ཙ, ‘‘ནིམནྟིཏཱ ཝསྶཾཝུཏྠཱ ཨཏྠཱ’’ཏི ཙ སམྦནྡྷོ.

ཡནྟི དེཡྻདྷམྨཛཱཏཾ, ཡཾ ཀིཉྩཱིཏི ཨཏྠོ. ནོ ནཏྠཱིཏི ཨམྷཱཀཾ ནཏྠི, ནོཏི ཝཱ ཨེཏསྶ ཝིཝརཎཾ ནཏྠཱིཏི. ཨེཏྠཱཏི གྷརཱཝཱསེ. ཏནྟི ཏཾ ཀཱརཎཾ, ཀིཙྩཾ ཝཱ. ཀུཏོཏི ཀཏརཧེཏུཏོ. ཡནྟི ཡེན ཀཱརཎེན, ཀིཙྩེན ཝཱ. དུཏིཡེ ཨཏྠཝིཀཔྤེ ཨེཏྠཱཏི ཨིམསྶ ཝིཝརཎཾ ཨིམསྨིཾ ཏེམཱསབྦྷནྟརེཏི. ཏནྟི ཏཾ དེཡྻདྷམྨཾ.

ཏཏྠ ¶ ཙཱཏི ཀུསལེ. ཏིཀྑཝིསདབྷཱཝཱཔཱདནེན སམུཏྟེཛེཏྭཱ. ཝསྶེཏྭཱཏི ཨཱཡཏིཾ ཝཱསནཱབྷཱགིཡཾ དྷམྨརཏནཝསྶཾ ཨོཏཱརེཏྭཱ. ཡཾ དིཝསནྟི ཡསྨིཾ དིཝསེ.

༢༣. པཏྟུཎྞཔཏྟཔཊེ ཙཱཏི པཏྟུཎྞཔཊེ ཙཱིནཔཊེ ཙ. ཏུམྦཱནཱིཏི ཙམྨམཡཏེལབྷཱཛནཱནི. ཨནུབནྡྷིཏྭཱཏི ཨནུཔགམནཾ ཀཏྭཱ. ཨབྷིརནྟ-སདྡོ ཨིདྷ ཨབྷིརུཙིཔརིཡཱཡོཏི ཨཱཧ ‘‘ཡཐཱཛ྄ཛྷཱསཡ’’ནྟིཨཱདི. སོརེཡྻཱདཱིནི མཧཱམཎྜལཙཱརིཀཱཡ མགྒབྷཱུཏཱནི སོརེཡྻནགརཱདཱིནི. པཡཱགཔཏིཊྛཱནནྟི གངྒཱཡ ཨེཀསྶ ཏིཏྠཝིསེསསྶཱཔི, ཏཾསམཱིཔེ གཱམསྶཱཔི ནཱམཾ. སམནྟཔཱསཱདིཀཱཡཱཏི སམནྟཏོ སབྦསོ པསཱདཾ ཛནེཏཱིཏི སམནྟཔཱསཱདིཀཱ, ཏསྶཱ.

ཡེ པན པཀཱརེ སནྡྷཱཡ ‘‘སམནྟཏོ’’ཏི ཝུཙྩཏི, ཏེ པཀཱརེ ཝིཏྠཱརེཏྭཱ དསྶེཏུཾ ཏཏྲིདནྟིཨཱདི ཝུཏྟཾ. ཏཏྠ ‘‘སམནྟཔཱསཱདིཀཱ’’ཏི ཡཱ སཾཝཎྞནཱ ཝུཏྟཱ, ཏཏྲ ཏསྶཾ སམནྟཔཱསཱདིཀཱཡཾ སམནྟཔསཱདིཀབྷཱཝེ ཨིདཾ ཝཀྑམཱནགཱཐཱཝཙནཾ ཧོཏཱིཏི ཡོཛནཱ. བཱཧིརནིདཱནཨབྦྷནྟརནིདཱནསིཀྑཱཔདནིདཱནཱནཾ ཝསེན ནིདཱནཔྤབྷེདདཱིཔནཾ ཝེདིཏབྦཾ. ‘‘ཐེརཝཱདཔྤཀཱསནཾ ཝཏྠུཔྤབྷེདདཱིཔན’’ནྟིཔི ཝདནྟི. ‘‘སིཀྑཱཔདཱནཾ པཙྩུཔྤནྣཝཏྠུཔྤབྷེདདཱིཔན’’ནྟིཔི ཝཏྟུཾ ཝཊྚཏི. སིཀྑཱཔདནིདཱནནྟི པན ཝེསཱལཱིཨཱདི སིཀྑཱཔདཔཉྙཏྟིཡཱ ¶ ཀཱརཎབྷཱུཏདེསཝིསེསོ ཝེདིཏབྦོ. ཨེཏྠཱཏི སམནྟཔཱསཱདིཀཱཡ. སམྤསྶཏཾ ཝིཉྙཱུནནྟི སམྦནྡྷོ, ཏསྨཱ ཨཡཾ སམནྟཔཱསཱདིཀཱཏྭེཝ པཝཏྟཱཏི ཡོཛེཏབྦཱ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

ཝེརཉྫཀཎྜཝཎྞནཱནཡོ ནིཊྛིཏོ.

༡. པཱརཱཛིཀཀཎྜོ

༡. པཋམཔཱརཱཛིཀཾ

སུདིནྣབྷཱཎཝཱརཝཎྞནཱ

༢༤. ཝིཀྐཱཡིཀབྷཎྜསྶ ¶ ¶ ཝིཀྐིཎནཾ ཨིཎདཱནཉྩ བྷཎྜཔྤཡོཛནཾ ནཱམ. ཨེཝཾ པཡོཛིཏསྶ མཱུལསྶ སཧ ཝཌྜྷིཡཱ གཧཎཝཱཡཱམོ ཨུདྡྷཱརོ ནཱམ. ཨསུཀདིཝསེ དིནྣནྟིཨཱདིནཱ པམུཊྛསྶ སཏུཔྤཱདནཱདི སཱརཎཾ ནཱམ. ཙཏུབྦིདྷཱཡཱཏི ཁཏྟིཡབྲཱཧྨཎགཧཔཏིསམཎཱནཾ ཝསེན, བྷིཀྑུཨཱདཱིནཾ ཝཱ ཝསེན ཙཏུབྦིདྷཱཡ. དིསྭཱནསྶ ཨེཏདཧོསཱིཏི ཧེཏུཨཏྠེ ཨཡཾ དིསྭཱན-སདྡོ ཨསམཱནཀཏྟུཀཏྟཱ, ཡཐཱ གྷཏཾ པིཝིཏྭཱ བལཾ ཧོཏཱིཏི, ཨེཝམཉྙཏྠཱཔི ཨེཝརཱུཔེསུ. བྷབྦཀུལཔུཏྟོཏི ཨུཔནིསྶཡམཏྟསབྷཱཝེན ཝུཏྟཾ, ན པཙྪིམབྷཝིཀཏཱཡ. ཏེནེཝསྶ མཱཏཱདིཨཀལྱཱཎམིཏྟསམཱཡོགེན ཀཏཝཱིཏིཀྐམནཾ ནིསྶཱཡ ཨུཔྤནྣཝིཔྤཊིསཱརེན ཨདྷིགམནྟརཱཡོ ཛཱཏོ. པཙྪིམབྷཝིཀཱནཾ པུབྦབུདྡྷུཔྤཱདེསུ ལདྡྷབྱཱཀརཎཱནཾ ན སཀྐཱ ཀེནཙི ཨནྟརཱཡཾ ཀཱཏུཾ. ཏེནེཝ ཨངྒུལིམཱལཏྠེརཱདཡོ ཨཀུསལཾ ཀཏྭཱཔི ཨདྷིགམསམྤནྣཱ ཨེཝ ཨཧེསུནྟི. ཙརིམཀཙིཏྟནྟི ཙུཏིཙིཏྟཾ. སངྑཾ ཝིཡ ལིཁིཏཾ གྷཾསིཏྭཱ དྷོཝིཏཾ སངྑལིཁིཏནྟི ཨཱཧ དྷོཏཨིཙྩཱདི. ཨཛ྄ཛྷཱཝསཏཱཏི ཨདྷི-སདྡཡོགེན ཨགཱརནྟི བྷུམྨཏྠེ ཨུཔཡོགཝཙནནྟི ཨཱཧ ‘‘ཨགཱརམཛ྄ཛྷེ’’ཏི. ཀསཱཡརསརཏྟཱནི ཀཱསཱཡཱནཱིཏི ཨཱཧ ‘‘ཀསཱཡརསཔཱིཏཏཱཡཱ’’ཏི. ཀསཱཡཏོ ནིབྦཏྟཏཱཡ ཙ ཧི རསོཔི ‘‘ཀསཱཡརསོ’’ཏི ཝུཙྩཏི.

༢༦. ཡདཱ ཛཱནཱཏི-སདྡོ བོདྷནཏྠོ ན ཧོཏི, ཏདཱ ཏསྶ པཡོགེ སཔྤིནོ ཛཱནཱཏི མདྷུནོ ཛཱནཱཏཱིཏིཨཱདཱིསུ ཝིཡ ཀརཎཏྠེ སཱམིཝཙནཾ སདྡསཏྠཝིདཱུ ཨིཙྪནྟཱིཏི ཨཱཧ ‘‘ཀིཉྩི དུཀྑེན ནཱནུབྷོསཱི’’ཏི. ཀེནཙི དུཀྑེན ནཱནུབྷོསཱིཏི ཨཏྠོ, ཀིཉྩཱིཏི ཨེཏྠཱཔི ཧི ཀརཎཏྠེ སཱམིཝཙནསྶ ལོཔོ ཀཏོ, ཏེནེཝ ཝཀྑཏི ‘‘ཝིཀཔྤདྭཡེཔི པུརིམཔདསྶ ཨུཏྟརཔདེན སམཱནཝིབྷཏྟིལོཔོ ¶ དཊྛབྦོ’’ཏི. ཡདཱ པན ཛཱནཱཏི-སདྡོ སརཎཏྠོ ཧོཏི, ཏདཱ མཱཏུ སརཏཱིཏིཨཱདཱིསུ ཝིཡ ཨུཔཡོགཏྠེ སཱམིཝཙནཾ ¶ སདྡསཏྠཝིདཱུ ཝདནྟཱིཏི ཨཱཧ ‘‘ཨཐ ཝཱ ཀིཉྩི དུཀྑཾ ནསྶརཏཱིཏི ཨཏྠོ’’ཏི, ཀསྶཙི དུཀྑསྶ ཨནནུབྷཱུཏཏཱཡ ནསྶརཏཱིཏི ཨཏྠོ. ཝིཀཔྤདྭཡེཔཱིཏི ཨནུབྷཝནསརཎཏྠཝསེན ཝུཏྟེ དུཏིཡཏཏིཡཝིཀཔྤདྭཡེ. པུརིམཔདསྶཱཏི ཀིཉྩཱིཏི པདསྶ. ཨུཏྟརཔདེནཱཏི དུཀྑསྶཱཏིཔདེན. སམཱནཱཡ སཱམིཝཙནབྷཱུཏཱཡ ཝིབྷཏྟིཡཱ ‘‘ཀསྶཙི དུཀྑསྶཱ’’ཏི ཝཏྟབྦེ ‘‘ཀིཉྩི དུཀྑསྶཱ’’ཏི ལོཔོཏི དཊྛབྦོ. མརཎེནཔི མཡཾ ཏེཏི ཨེཏྠ ཏེཏི པདསྶ སཧཏྠེ ཀརཎཝསེནཔི ཨཏྠཾ དསྶེཏུཾ ཏཡཱ ཝིཡོགཾ ཝཱ པཱཔུཎིསྶཱམཱཏི ཨཏྠནྟརཾ ཝུཏྟཾ.

༢༨. གནྡྷབྦཱ ནཱམ གཱཡནཀཱ. ནཊཱ ནཱམ རངྒནཊཱ. ནཱཊཀཱ ལངྒྷནཀཱདཡོ. སུཁཱུཔཀརཎེཧི ཨཏྟནོ པརིཙརཎཾ ཀརོནྟོ ཡསྨཱ ལལ༹ནྟོ ཀཱིལ༹ནྟོ ནཱམ ཧོཏི, ཏསྨཱ དུཏིཡེ ཨཏྠཝིཀཔྤེ ལལཱ༹ཏིཨཱདི ཝུཏྟཾ. དཱནཔྤདཱནཱདཱིནཱིཏི ཨེཏྠ ནིཙྩདཱནཾ དཱནཾ ནཱམ, ཝིསེསདཱནཾ པདཱནཾ ནཱམ, ཨཱདི-སདྡེན སཱིལཱདཱིནི སངྒཎྷཱཏི.

༣༠. ཙུདྡས བྷཏྟཱནཱིཏི སངྒྷབྷཏྟཾ ཨུདྡེསབྷཏྟཾ ནིམནྟནཾ སལཱཀཾ པཀྑིཀཾ ཨུཔོསཐིཀཾ པཱཊིཔདིཀཾ ཨཱགནྟུཀཾ གམིཀཾ གིལཱནཾ གིལཱནུཔཊྛཱཀཾ ཝིཧཱར-དྷུར-ཝཱརབྷཏྟནྟི ཨིམཱནི ཙུདྡས བྷཏྟཱནི. ཨེཏྠ ཙ སེནཱསནཱདིཔཙྩཡཏྟཡནིསྶིཏེསུ ཨཱརཉྙཀངྒཱདིཔདྷཱནངྒཱནཾ གཧཎཝསེན སེསདྷུཏངྒཱནིཔི གཧིཏཱནེཝ ཧོནྟཱིཏི ཝེདིཏབྦཾ. ཝཛྫཱིནནྟི ཝཛྫཱིརཱཛཱུནཾ. ཝཛྫཱིསཱུཏི ཛནཔདཱཔེཀྑཾ བཧུཝཙནཾ, ཝཛྫཱིནཱམཀེ ཛནཔདེཏི ཨཏྠོ. པཉྩཀཱམགུཎཱཡེཝ ཨུཔབྷུཉྫིཏབྦཏོ པརིབྷུཉྫིཏབྦཏོ ཙ ཨུཔབྷོགཔརིབྷོགཱ, ཨིཏྠིཝཏྠཱདཱིནི ཙ ཏདུཔཀརཎཱནཱིཏི ཨཱཧ ‘‘ཡེཧི ཏེས’’ནྟིཨཱདི. ཨུཀྐཊྛཔིཎྜཔཱཏིཀཏྟཱཏི སེསདྷུཏངྒཔརིཝཱརིཏེན ཨུཀྐཊྛཔིཎྜཔཱཏིཀདྷུཏངྒེན སམནྣཱགཏཏྟཱ, ཏེནཱཧ ‘‘སཔདཱནཙཱརཾ ཙརིཏུཀཱམོ’’ཏི.

༣༡. དོསཱཏི རཏྟི. ཏཏྠ ཨབྷིཝུཏྠཾ པརིཝུསིཏཾ ཨཱབྷིདོསིཀཾ, ཨབྷིདོསཾ ཝཱ པཙྩཱུསཀཱལཾ གཏོ པཏྟོ ཨཏིཀྐནྟོ ཨཱབྷིདོསིཀོ, ཏེནཱཧ ཨེཀརཏྟཱཏིཀྐནྟསྶ ཝཱཏིཨཱདི.

༣༢. ཨུདཀཀཉྫིཡནྟི པཱནཱིཡཔརིབྷོཛནཱིཡཨུདཀཉྩ ཡཱགུ ཙ. ཏཐཱཏི སམུཙྩཡཏྠེ.ཨནོཀཔྤནཾ ཨསདྡཧནཾ, ཨམརིསནཾ ཨསཧནཾ.

༣༤. ཏདྡྷིཏལོཔནྟི ¶ པིཏཱམཧཏོ ཨཱགཏཾ ‘‘པེཏཱམཧ’’ནྟི ཝཏྟབྦེ ཏདྡྷིཏཔཙྩཡནིམིཏྟསྶ ¶ ཨེ-ཀཱརསྶ ལོཔཾ ཀཏྭཱཏི ཨཏྠོ. ཡེསཾ སནྟཀཾ དྷནཾ གཧིཏཾ, ཏེ ཨིཎཱཡིཀཱ. པལིབུདྡྷོཏི ‘མཱ གཙྪ མཱ བྷུཉྫཱ’ཏིཨཱདིནཱ ཀཏཱཝརཎོ, པཱིལི༹ཏོཏི ཨཏྠོ.

༣༥. ཨཏྟནཱཏི སཡཾ. སཔཏིནོ དྷནསཱམིནོ ཨིདཾ སཱཔཏེཡྻཾ, དྷནཾ. ཏདེཝ ཝིབྷཝོ.

༣༦. བྷིཛྫནྟཱིཏི ཨགཧིཏཔུབྦཱ ཨེཝ བྷིཛྫནྟི. དིནྣཱཔི པཊིསནྡྷཱིཏི པིཏརཱ དིནྣཾ སུཀྐཾ ནིསྶཱཡ ཨུཔྤནྣསྶ སཏྟསྶ པཊིསནྡྷིཔི ཏེན དིནྣཱ ནཱམ ཧོཏཱིཏི ཝུཏྟཾ. སུཀྐམེཝ ཝཱ ཨིདྷ པཊིསནྡྷིནིསྶཡཏྟཱ ‘‘པཊིསནྡྷཱི’’ཏི ཝུཏྟཾ, ཏེནཱཧ ‘‘ཁིཔྤཾ པཏིཊྛཱཏཱི’’ཏི. ན ཧི པིཏུ སཾཡོགཀྑཎེཡེཝ སཏྟསྶ ཨུཔྤཏྟིནིཡམོ ཨཏྠི སུཀྐམེཝ ཏཐཱ པཏིཊྛཱནནིཡམཏོ. སུཀྐེ པན པཏིཊྛིཏེ ཡཱཝ སཏྟ དིཝསཱནི, ཨཌྜྷམཱསམཏྟཾ ཝཱ, ཏཾ གབྦྷསཎྛཱནསྶ ཁེཏྟམེཝ ཧོཏི མཱཏུ མཾསསྶ ལོཧིཏལེསསྶ སབྦདཱཔི ཝིཛྫམཱནཏྟཱ. པུབྦེཔི པཉྙཏྟསིཀྑཱཔདཱནཾ སབྦྷཱཝཏོ ཨཔཉྙཏྟེ སིཀྑཱཔདེཏི ཨིམསྶ པཋམཔཱརཱཛིཀསིཀྑཱཔདེ ཨཊྛཔིཏེཏི ཨཏྠོ ཝུཏྟོ. ཨེཝརཱུཔནྟི ཨེཝཾ གརུཀསབྷཱཝཾ, པཱརཱཛིཀསངྒྷཱདིསེསཝཏྠུབྷཱུཏནྟི ཨཏྠོ, ཏེནཱཧ ‘‘ཨཝསེསེ པཉྩཁུདྡཀཱཔཏྟིཀྑནྡྷེ ཨེཝ པཉྙཔེསཱི’’ཏི. ཡཾ ཨཱདཱིནཝནྟི སམྦནྡྷོ. ཀཱཡཝིཉྙཏྟིཙོཔནཏོཏི ཀཱཡཝིཉྙཏྟིཡཱ ནིབྦཏྟཙལནཏོ.

ཏེནེཝཱཏི ཨཝདྷཱརཎེན ཡཱནི གབྦྷགྒཧཎཀཱརཎཱནི ནིཝཏྟིཏཱནི, ཏཱནིཔི དསྶེཏུཾ ཀིཾ པནཱཏིཨཱདི ཝུཏྟཾ. ཏཏྠ ཨུབྷཡེསཾ ཚནྡརཱགཝསེན ཀཱཡསཾསགྒོ ཝུཏྟོ. ཨིཏྠིཡཱ ཨེཝ ཚནྡརཱགཝསེན ནཱབྷིཔརཱམསནཾ ཝིསུཾ ཝུཏྟཾ. སཱམཔཎྜིཏསྶ ཧི མཱཏཱ པུཏྟུཔྤཏྟིཡཱ སཉྫཱཏཱདརཱ ནཱབྷིཔརཱམསནཀཱལེ ཀཱམརཱགསམཱཀུལཙིཏྟཱ ཨཧོསི, ཨིཏརཐཱ པུཏྟུཔྤཏྟིཡཱ ཨེཝ ཨསམྦྷཝཏོ. ‘‘སཀྐོ ཙསྶཱ ཀཱམརཱགསམུཔྤཏྟིནིམིཏྟཱནི ཨཀཱསཱི’’ཏིཔི ཝདནྟི, ཝཏྠུཝསེན ཝཱ ཨེཏཾ ནཱབྷིཔརཱམསནཾ ཀཱཡསཾསགྒཏོ ཝིསུཾ ཝུཏྟནྟི དཊྛབྦཾ. མཱཏངྒཔཎྜིཏསྶ དིཊྛམངྒལིཀཱཡ ནཱབྷིཔརཱམསནེན མཎྜབྱསྶ ནིབྦཏྟི ཨཧོསི. ཙཎྜཔཛྫོཏམཱཏུ ནཱབྷིཡཾ ཝིཙྪིཀཱ ཕརིཏྭཱ ¶ གཏཱ, ཏེན ཙཎྜཔཛྫོཏསྶ ནིབྦཏྟི ཨཧོསཱིཏི ཨཱཧ ཨེཏེནེཝ ནཡེནཱཏིཨཱདི.

ཨཡནྟི སུདིནྣསྶ པུརཱཎདུཏིཡིཀཱ. ཡཾ སནྡྷཱཡཱཏི ཡཾ ཨཛ྄ཛྷཱཙཱརཾ སནྡྷཱཡ. མཱཏཱཔིཏརོ ཙ སནྣིཔཏིཏཱ ཧོནྟཱིཏི ཨིམིནཱ སུཀྐསྶ སམྦྷཝཾ དཱིཔེཏི, མཱཏཱ ཙ ཨུཏུནཱི ཧོཏཱིཏི ཨིམིནཱ སོཎིཏསྶ. གནྡྷབྦོཏི ཏཏྲུཔགོ སཏྟོ ཨདྷིཔྤེཏོ, གནྟབྦོཏི ཝུཏྟཾ ཧོཏི, ཏ-ཀཱརསྶ ཙེཏྠ དྷ-ཀཱརོ ཀཏོ. ཨཐ ཝཱ གནྡྷབྦཱ ནཱམ རངྒནཊཱ, ཏེ ཝིཡ ཏཏྲ ཏཏྲ བྷཝེསུ ནཱནཱཝེསགྒཧཎཏོ ཨཡམྤི ‘‘གནྡྷབྦོ’’ཏི ཝུཏྟོ, སོ མཱཏཱཔིཏཱུནཾ སནྣིཔཱཏཀྑཎཏོ པཙྪཱཔི སཏྟཱཧབྦྷནྟརེ ¶ ཏཏྲ ཨུཔཔནྣོ ‘‘པཙྩུཔཊྛིཏོ’’ཏི ཝུཏྟོ. གབྦྷསྶཱཏི ཀལལརཱུཔསཧིཏསྶ པཊིསནྡྷིཝིཉྙཱཎསྶ. ཏཉྷི ཨིདྷ ‘‘གབྦྷོ’’ཏི ཨདྷིཔྤེཏཾ སཱ ཏེན གབྦྷཾ གཎྷཱིཏིཨཱདཱིསུ (པཱརཱ. ༣༦) ཝིཡ. ཨསྶ ཏཾ ཨཛ྄ཛྷཱཙཱརནྟི སམྦནྡྷོ. པཱལི༹ཡཾ ནིརབྦུདོ ཝཏ བྷོ བྷིཀྑུསངྒྷོ ནིརཱདཱིནཝོཏི ཨིམསྶ ཨནནྟརཾ ཏསྨིཾ བྷིཀྑུསངྒྷེཏི ཨཛ྄ཛྷཱཧརིཏྭཱ སུདིནྣེན…པེ… ཨཱདཱིནཝོ ཨུཔྤཱདིཏོཏི ཡོཛནཱ ཝེདིཏབྦཱ. ཨིཏིཧཱཏི ནིཔཱཏསམུདཱཡསྶ ཨེཝནྟི ཨིདཾ ཨཏྠབྷཝནཾ. མུཧུཏྟེནཱཏི ཨིདཾ ཁཎེནཱཏི པདསྶ ཝེཝཙནཾ. ཡཱཝ བྲཧྨལོཀཱ ཨབྦྷུགྒཏོཔི དེཝཱནཾ ཏཱཝམཧནྟོ སདྡོ ཏེསཾ རཱུཔཾ ཝིཡ མནུསྶཱནཾ གོཙརོ ན ཧོཏི. ཏསྨཱ པཙྪཱ སུདིནྣེན ཝུཏྟེ ཨེཝ ཛཱནིཾསཱུཏི དཊྛབྦཾ.

༣༧. མགྒབྲཧྨཙརིཡནྟི མགྒཔདཊྛཱནཾ སིཀྑཏྟཡམེཝ ཨུཔཙཱརཏོ ཝུཏྟཾ ཏསྶེཝ ཡཱཝཛཱིཝཾ ཙརིཏབྦཏྟཱ. ཨཝིཔྥཱརིཀོཏི ཨུདྡེསཱདཱིསུ ཨབྱཱཝཊོ. ཝཧཙྪིནྣོཏི ཚིནྣཔཱདོ, ཚིནྣཁནྡྷོ ཝཱ. ཙིནྟཡཱིཏི ཨིམིནཱ པཛ྄ཛྷཱཡཱིཏི པདསྶ ཀིརིཡཱཔདཏྟཾ དསྶེཏི. ཏེན ‘‘ཀིསོ ཨཧོསི…པེ… པཛ྄ཛྷཱཡི ཙཱ’’ཏི ཙ-ཀཱརཾ ཨཱནེཏྭཱ པཱལི༹ཡོཛནཱ ཀཱཏབྦཱ.

༣༨. གཎེ ཛནསམཱགམེ སནྣིཔཱཏནཾ གཎསངྒཎིཀཱ, སཱཝ པཔཉྩཱ, ཏེན གཎསངྒཎིཀཱཔཔཉྩེན. ཡསྶཱཏི ཡེ ཨསྶ. ཀཐཱཕཱསུཀཱཏི ཝིསྶཱསིཀབྷཱཝེན ཕཱསུཀཀཐཱ, སུཁསམྦྷཱསཱཏི ཨཏྠོ. ཨུཔཱདཱརཱུཔཾ བྷཱུཏརཱུཔམུཁེནེཝ མནྡནཾ པཱིནནཉྩ ཧོཏཱིཏི ཨཱཧ པསཱདཨིཙྩཱདི. དཱནཱིཏི ནིཔཱཏོ ཨིདྷ པན-སདྡཏྠེ ཝཏྟཏི ཏཀྐཱལཝཱཙིནོ ཨེཏརཧི-པདསྶ ཝིསུཾ ཝུཙྩམཱནཏྟཱཏི ཨཱཧ ‘‘སོ པན ཏྭ’’ནྟི. ནོ-སདྡོཔི ནུ-སདྡོ ཝིཡ ¶ པུཙྪནཏྠོཏི ཨཱཧ ‘‘ཀཙྩི ནུ ཏྭ’’ནྟི. ཏམེཝཱཏི གིཧིབྷཱཝཔཏྠནཱལཀྑཎམེཝ. ཨནབྷིརཏིམེཝཱཏི ཨེཝ-ཀཱརེན ནིཝཏྟིཏཱཡ པན ཏདཉྙཱཡ ཨནབྷིརཏིཡཱ ཝིཛྫམཱནཏྟཾ དསྶེཏུཾ ཨདྷིཀུསལཱནནྟིཨཱདི ཝུཏྟཾ, སམཐཝིཔསྶནཱ ཨདྷིཀུསལཱ ནཱམ. ཨིདཾ པནཱཏིཨཱདི ཨུཔརི ཝཏྟབྦཝིསེསདསྶནཾ. པརིཡཱཡཝཙནམཏྟནྟི སདྡཏྠཀཐནམཏྟཾ.

ཏསྨིནྟི དྷམྨེ, ཨེཝཾ ཝིརཱགཱཡ དེསིཏེ སཏཱིཏི ཨཏྠོ. ནཱམཱཏི གརཧཱཡཾ. ལོཀུཏྟརནིབྦཱནནྟི ཝིརཱགཱཡཱཏིཨཱདིནཱ ཝུཏྟཀིལེསཀྑཡནིབྦཱནཏོ ཝིསེསེཏི. ཛཱཏིཾ ནིསྶཱཡ ཨུཔྤཛྫནཀམཱནོ ཨེཝ མདཛནནཊྛེན མདོཏི མཱནམདོ. ‘‘ཨཧཾ པུརིསོ’’ཏི པཝཏྟོ མཱནོ པུརིསམདོ. ‘‘ཨསདྡྷམྨསེཝནཱསམཏྠཏཾ ནིསྶཱཡ མཱནོ, རཱགོ ཨེཝ ཝཱ པུརིསམདོ’’ཏི ཀེཙི. ཨཱདི-སདྡེན བལམདཱདིཾ སངྒཎྷཱཏི. ཏེབྷཱུམཀཝཊྚནྟི ཏཱིསུ བྷཱུམཱིསུ ཀམྨཀིལེསཝིཔཱཀཱ པཝཏྟནཊྛེན ¶ ཝཊྚཾ. ཝིརཛྫཏཱིཏི ཝིགཙྪཏི. ཡོནིཡོཏི ཨཎྜཛཱདཡོ, ཏཱ པན ཡཝནྟི ཏཱཧི སཏྟཱ ཨམིསྶིཏཱཔི སམཱནཛཱཏིཏཱཡ མིསྶིཏཱ ཧོནྟཱིཏི ‘‘ཡོནིཡོ’’ཏི ཝུཏྟཱ.

ཉཱཏཏཱིརཎཔཧཱནཝསེནཱཏི ཨེཏྠ ལཀྑཎཱདིཝསེན སཔྤཙྩཡནཱམརཱུཔཔརིགྒཧོ ཉཱཏཔརིཉྙཱ ནཱམ. ཀལཱཔསམྨསནཱདིཝསེན པཝཏྟཱ ལོཀིཡཝིཔསྶནཱ ཏཱིརཎཔརིཉྙཱ ནཱམ. ཨརིཡམགྒོ པཧཱནཔརིཉྙཱ ནཱམ. ཨིདྷ པན ཉཱཏཏཱིརཎཀིཙྩཱནམྤི ཨསམྨོཧཏོ མགྒཀྑཎེ སིཛ྄ཛྷནཏོ ཨརིཡམགྒམེཝ སནྡྷཱཡ ཏིཝིདྷཱཔི པརིཉྙཱ ཝུཏྟཱ, ཏེནེཝ ‘‘ལོཀུཏྟརམགྒོཝ ཀཐིཏོ’’ཏི ཝུཏྟཾ. ཀཱམེསུ པཱཏབྱཏཱནནྟི ཝཏྠུཀཱམེསུ པཱཏབྱཏཱསངྑཱཏཱནཾ སུབྷཱདིཨཱཀཱརཱནཾ ཏདཱཀཱརགཱཧིཀཱནཾ ཏཎྷཱནནྟི ཨཏྠོ. ཝིསཡམུཁེན ཧེཏྠ ཝིསཡིནོ གཧིཏཱ. ཏཱིསུ ཋཱནེསཱུཏི ‘‘ཝིརཱགཱཡ དྷམྨོ དེསིཏོ…པེ… ནོ སཨུཔཱདཱནཱཡཱ’’ཏི ཨེཝཾ ཝུཏྟེསུ.

༣༩. ཀལིསཱསནཱརོཔནཏྠཱཡཱཏི དོསཱརོཔནཏྠཱཡ. ཀལཱིཏི ཀོདྷསྶ ནཱམཾ, ཏསྶ སཱསནཾ ཀལིསཱསནཾ, ཀོདྷཝསེན ཝུཙྩམཱནཱ གརཧཱ. ཨཛ྄ཛྷཱཙཱརོཝ ཝཱིཏིཀྐམོ. སམཎཀརཎཱནཾ དྷམྨཱནནྟི སམཎབྷཱཝཀརཱནཾ ཧིརོཏྟཔྤཱདིདྷམྨཱནཾ. པཱལི༹ཡཾ ཀཐཾ-སདྡཡོགེན ན སཀྑིསྶསཱིཏི ཨནཱགཏཝཙནཾ ཀཏཾ, ‘‘ནཱམ-སདྡཡོགེནཱ’’ཏིཔི ཝདནྟི. ཨཏིཝིཡ དུཀྑཝིཔཱཀནྟི ¶ གཧཊྛཱནཾ ནཱཏིསཱཝཛྫམྤི ཀམྨཾ པབྦཛིཏཱནཾ བྷགཝཏོ ཨཱཎཱཝཱིཏིཀྐམཏོ ཙེཝ སམཱདིནྣསིཀྑཏྟཡཝིནཱསནཏོ ཙ མཧཱསཱཝཛྫཾ ཧོཏཱིཏི ཝུཏྟཾ. ཨུདཀེ བྷཝཾ ཨོདཀཾ, དྷོཝནཀིཙྩནྟི ཨཱཧ ཨུདཀཀིཙྩནྟིཨཱདི. སམཱཔཛྫིསྶསཱིཏི ཨནཱགཏཝཙནཾ ནཱམ-སདྡཡོགེན ཀཏནྟི ཨཱཧ ‘‘ནཱམ-སདྡེན ཡོཛེཏབྦ’’ནྟི. དུབྦྷརཏཱདཱིནཾ ཧེཏུབྷཱུཏོ ཨསཾཝརོ ཨིདྷ དུབྦྷརཏཱདི-སདྡེན ཝུཏྟོ ཀཱརཎེ ཀཱརིཡོཔཙཱརེནཱཏི ཨཱཧ ‘‘དུབྦྷརཏཱདཱིནཾ ཝཏྠུབྷཱུཏསྶ ཨསཾཝརསྶཱ’’ཏི. ཨཏྟཱཏི ཨཏྟབྷཱཝོ. དུབྦྷརཏནྟི ཨཏྟནཱ ཨུཔཊྛཱཀེཧི ཙ དུཀྑེན བྷརིཏབྦཏཾ. སཏྟེཧི ཀིལེསེཧི ཙ སངྒཎནཾ སམོདྷཱནཾ སངྒཎིཀཱཏི ཨཱཧ གཎསངྒཎིཀཱཡཱཏིཨཱདི. ཨཊྛཀུསཱིཏཝཏྠུཔཱརིཔཱུརིཡཱཏི ཨེཏྠ ཀམྨཾ ཀཱཏབྦནྟི ཨེཀཾ, ཏཐཱ ཨཀཱསིནྟི, མགྒོ གནྟབྦོཏི ཨགམཱསིནྟི, ནཱལཏྠཾ བྷོཛནསྶ པཱརིཔཱུརིནྟི, ཨལཏྠནྟི, ཨུཔྤནྣོ མེ ཨཱབཱདྷོཏི, ཨཙིརཝུཊྛིཏོ གེལཉྙཱཏི ཨེཀནྟི ཨིམཱནི ཨཊྛ ཀུསཱིཏཝཏྠཱུནི ནཱམ. ཨེཏྠ ཙ ཀོསཛྫཾ ཀུསཱིཏ-སདྡེན ཝུཏྟཾ. ཝིནཱཔི ཧི བྷཱཝཛོཏནཔཙྩཡཾ བྷཱཝཏྠོ ཝིཉྙཱཡཏི ཡཐཱ པཊསྶ སུཀྐནྟི. སབྦཀིལེསཱཔཙཡབྷཱུཏཱཡ ཝིཝཊྚཱཡཱཏི རཱགཱདིསབྦཀིལེསཱནཾ ཨཔཙཡཧེཏུབྷཱུཏཱཡ ནིབྦཱནཱཡ, ནིབྦཱནཏྠནྟི ཨཏྠོ. སཾཝརཔྤཧཱནཔཊིསཾཡུཏྟནྟི སཱིལསཾཝརཱདཱིཧི པཉྩཧི སཾཝརེཧི ཙེཝ ཏདངྒཔྤཧཱནཱདཱིཧི པཉྩཧི པཧཱནེཧི ཙ ཨུཔེཏཾ. ཨསུཏྟནྟ ཝིནིབདྡྷནྟི ཏཱིསུ པིཊཀེསུ པཱལི༹སངྑཱཏསུཏྟནྟཝསེན ཨརཙིཏཾ, སངྒཱིཏིཀཱརེཧི ཙ ཨནཱརོཔིཏཾ, ཏེནཱཧ ‘‘པཱལི༹ཝིནིམུཏྟ’’ནྟི. ཏེན ཙ ཨཊྛཀཐཱསུ ཡཐཱནུརཱུཔཾ སངྒཧིཏནྟི ¶ དསྶེཏི. ཨེཝརཱུཔཱ ཧི པཀིཎྞཀདེསནཱ ཨཊྛཀཐཱཡ མཱུལཾ. ཨོཀྐནྟིཀདྷམྨདེསནཱ ནཱམ ཏསྨིཾ ཏསྨིཾ པསངྒེ ཨོཏཱརེཏྭཱ ཨོཏཱརེཏྭཱ ནཱནཱནཡེཧི ཀཐིཡམཱནཱ དྷམྨདེསནཱ, ཏེནཱཧ བྷགཝཱ ཀིརཱཏིཨཱདི. པཊིཀྑིཔནཱདྷིཔྤཱཡཱཏི པཉྙཏྟམྤི སིཀྑཱཔདཾ ‘‘ཀིམེཏེནཱ’’ཏི མདྡནཙིཏྟཱ.

ཝུཏྟཏྠཝསེནཱཏི པཏིཊྛཱཨདྷིགམུཔཱཡཝསེན. སིཀྑཱཔདཝིབྷངྒེ ཡཱ ཏསྨིཾ སམཡེ ཀཱམེསུམིཙྪཱཙཱརཱ ཨཱརཏི ཝིརཏཱིཏིཨཱདིནཱ (ཝིབྷ. ༧༠༦) ནིདྡིཊྛཝིརཏིཡོ ཙེཝ, ཡཱ ཏསྨིཾ སམཡེ ཙེཏནཱ སཉྩེཏནཱཏིཨཱདིནཱ (ཝིབྷ. ༧༠༤) ནིདྡིཊྛཙེཏནཱ ཙ, ཀཱམེསུམིཙྪཱཙཱརཱ ཝིརམནྟསྶ ཕསྶོ…པེ… ཨཝིཀྑེཔོཏིཨཱདིནཱ (ཝིབྷ. ༧༠༥) ནིདྡིཊྛཕསྶཱདིདྷམྨཱ ཙ སིཀྑཱཔདནྟི དསྶེཏུཾ ‘‘ཨཡཉྩ ཨཏྠོ ¶ སིཀྑཱཔདཝིབྷངྒེ ཝུཏྟནཡེནེཝ ཝེདིཏབྦོ’’ཏི ཝུཏྟཾ. ‘‘ཡོ ཏཏྠ ནཱམཀཱཡོ པདཀཱཡོཏི ཨིདཾ མཧཱཨཊྛཀཐཱཡཾ ཝུཏྟ’’ནྟི ཝདནྟི. ནཱམཀཱཡོཏི ནཱམསམཱུཧོ ནཱམཔཉྙཏྟིཡེཝ, སེསཱནིཔི ཏསྶེཝ ཝེཝཙནཱནི. སིཀྑཱཀོཊྛཱསོཏི ཝིརཏིཨཱདཡོ ཝུཏྟཱ ཏཔྤཀཱསཀཉྩ ཝཙནཾ.

ཨཏྠཝསེཏི ཧིཏཝིསེསེ ཨཱནིསཾསཝིསེསེ, ཏེ ཙ སིཀྑཱཔདཔཉྙཏྟིཡཱ ཧེཏཱུཏི ཨཱཧ ‘‘ཀཱརཎཝསེ’’ཏི. སུཁཝིཧཱརཱབྷཱཝེ སཧཛཱིཝནསྶ ཨབྷཱཝཏོ སཧཛཱིཝིཏཱཏི སུཁཝིཧཱརོཝ ཝུཏྟོ. དུསྶཱིལཔུགྒལཱཏི ནིསྶཱིལཱ དཱུསིཏསཱིལཱ ཙ. པཱརཱཛིཀསིཀྑཱཔདཔྤསངྒེ ཧི ནིསྶཱིལཱ ཨདྷིཔྤེཏཱ, སེསསིཀྑཱཔདཔསངྒེ ཏེཧི ཏེཧི ཝཱིཏིཀྐམེཧི ཁཎྜཚིདྡཱདིབྷཱཝཔྤཏྟིཡཱ དཱུསིཏསཱིལཱ ཨདྷིཔྤེཏཱ. ཨུབྷཡེནཔི ཨལཛྫིནོཝ ཨིདྷ ‘‘དུསྶཱིལཱ’’ཏི ཝུཏྟཱཏི ཝེདིཏབྦཱ. སབྦསིཀྑཱཔདཱནམྤི དས ཨཏྠཝསེ པཊིཙྩེཝ པཉྙཏྟཏྟཱ ཨུཔརི དུསྶཱིལཔུགྒལེ ནིསྶཱཡཱཏི ཨེཏྠཱཔི ཨེསེཝ ནཡོ, ཏེནེཝ ‘‘ཡེ མངྐུཏཾ…པེ… ནིགྒཧེསྶཏཱི’’ཏི སབྦསིཀྑཱཔདསཱདྷཱརཎཝསེན ཨཏྠོ ཝུཏྟོ. ཏཏྠ མངྐུཏནྟི ནིཏྟེཛཏཾ ཨདྷོམུཁཏཾ. དྷམྨེནཱཏིཨཱདཱིསུ དྷམྨོཏི བྷཱུཏཾ ཝཏྠུ. ཝིནཡོཏི ཙོདནཱ ཙེཝ སཱརཎཱ ཙ. སཏྠུསཱསནནྟི ཉཏྟིསམྤདཱ ཙེཝ ཨནུསཱཝནསམྤདཱ ཙ. སནྡིཊྛམཱནཱཏི སཾསཡཾ ཨཱཔཛྫམཱནཱ. ཨུབྦཱལ༹ྷཱཏི པཱིལི༹ཏཱ. དུསྶཱིལཔུགྒལེ ནིསྶཱཡ ཧི ཨུཔོསཐོ ན ཏིཊྛཏི, པཝཱརཎཱ ན ཏིཊྛཏི, སངྒྷཀམྨཱནི ནཔྤཝཏྟནྟི, སཱམགྒཱི ན ཧོཏཱིཏི ཨིམིནཱ ཨལཛྫཱིཧི སདྡྷིཾ ཨུཔོསཐཱདིསཀལསངྒྷཀམྨཾ ཀཱཏུཾ ན ཝཊྚཏི དྷམྨཔརིབྷོགཏྟཱཏི དསྶེཏི. ཨུཔོསཐཔཝཱརཎཱནཾ ནིཡཏཀཱལིཀཏཱཡ ཙ ཨཝསྶཾ ཀཏྟབྦཏྟཱ སངྒྷཀམྨཏོ ཝིསུཾ གཧཎཾ ཝེདིཏབྦཾ. ཨཀིཏྟི གརཧཱ. ཨཡསོ པརིཝཱརཧཱནི.

ཙུདྡས ཁནྡྷཀཝཏྟཱནི ནཱམ ཝཏྟཀྑནྡྷཀེ (ཙཱུལ༹ཝ. ༣༥༦ ཨཱདཡོ) ཝུཏྟཱནི ཨཱགནྟུཀཝཏྟཾ ¶ ཨཱཝཱསིཀགམིཀཨནུམོདནབྷཏྟགྒཔིཎྜཙཱརིཀཨཱརཉྙཀསེནཱསནཛནྟཱགྷརཝཙྩཀུཊིཨུཔཛ྄ཛྷཱཡསདྡྷིཝིཧཱརིཀཨཱཙརིཡཨནྟེཝཱསིཀཝཏྟནྟི ཨིམཱནི ཙུདྡས ཝཏྟཱནི, ཨེཏཱནི ཙ སབྦེསཾ བྷིཀྑཱུནཾ སབྦདཱ ཙ ཡཐཱརཧཾ ཙརིཏབྦཱནི. དྭེ ཨསཱིཏི མཧཱཝཏྟཱནི པན ཏཛྫནཱིཡཀམྨཀཏཱདིཀཱལེཡེཝ ཙརིཏབྦཱནི, ན སབྦདཱ. ཏསྨཱ ཝིསུཾ གཎིཏཱནི. ཏཱནི པན ‘‘པཱརིཝཱསིཀཱནཾ བྷིཀྑཱུནཾ ཝཏྟཾ པཉྙཔེསྶཱམཱི’’ཏི (ཙཱུལ༹ཝ. ༧༥) ཨཱརབྷིཏྭཱ ‘‘ན ཨུཔསམྤཱདེཏབྦཾ…པེ… ན ཚམཱཡ ཙངྐམནྟེ ¶ ཙངྐམེ ཙངྐམིཏབྦ’’ནྟི ཝུཏྟཱཝསཱནཱནི ཚསཊྛི, ཏཏོ པརཾ ‘‘ན, བྷིཀྑཝེ, པཱརིཝཱསིཀེན བྷིཀྑུནཱ པཱརིཝཱསིཀེན ཝུཌྜྷཏརེན བྷིཀྑུནཱ སདྡྷིཾ, མཱུལཱཡཔཊིཀསྶནཱརཧེན, མཱནཏྟཙཱརིཀེན, མཱནཏྟཱརཧེན, ཨབྦྷཱནཱརཧེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ཝཏྠབྦ’’ནྟིཨཱདིནཱ (ཙཱུལ༹ཝ. ༨༢) ཝུཏྟཝཏྟཱནི པཀཏཏྟེན ཙརིཏབྦེཧི ཨནཉྙཏྟཱ ཝིསུཾ ཨགཎེཏྭཱ པཱརིཝཱསིཀཝུཌྜྷཏརཱདཱིསུ པུགྒལནྟརེསུ ཙརིཏབྦཏྟཱ ཏེསཾ ཝསེན སམྤིཎྜེཏྭཱ ཨེཀེཀཾ ཀཏྭཱ གཎིཏཱནི པཉྩཱཏི ཨེཀསཏྟཏིཝཏྟཱནི ཙ ཨུཀྑེཔནཱིཡཀམྨཀཏཝཏྟེསུ ཙ ཝུཏྟཾ ‘‘ན པཀཏཏྟསྶ བྷིཀྑུནོ ཨབྷིཝཱདནཾ པཙྩུཊྛཱནཾ…པེ… ནཧཱནེ པིཊྛིཔརིཀམྨཾ སཱདིཏབྦ’’ནྟི (ཙཱུལ༹ཝ. ༨༦) ཨིདཾ ཨབྷིཝཱདནཱདཱིནཾ ཨསཱདིཡནཾ ཨེཀཾ, ‘‘ན པཀཏཏྟོ བྷིཀྑུ སཱིལཝིཔཏྟིཡཱ ཨནུདྡྷཾསེཏབྦོ’’ཏིཨཱདཱིནི (ཙཱུལ༹ཝ. ༥༡) ཙ དསཱཏི ཨེཝཾ དྭཱསཱིཏི ཝཏྟཱནི ཧོནྟི, ཨེཏེསྭེཝ པན ཀཱནིཙི ཏཛྫནཱིཡཀམྨཱདིཝཏྟཱནི ཀཱནིཙི པཱརིཝཱསིཀཱདིཝཏྟཱནཱིཏི ཨགྒཧིཏགྒཧཎེན དྭཱསཱིཏིཡེཝ. ཨཉྙཏྠ པན ཨཊྛཀཐཱཔདེསེ ཨཔྤཀཾ ཨཱུནམདྷིཀཾ ཝཱ གཎནཱུཔགཾ ན ཧོཏཱིཏི ཨསཱིཏིཁནྡྷཀཝཏྟཱནཱིཏི ཨཱགཏཾ. ཨཐ ཝཱ པུརིམེཧི ཙུདྡསཝཏྟེཧི ཨསངྒཧིཏཱནི ཝིནཡཱགཏཱནི སབྦཱནི ཝཏྟཱནི ཡཐཱ དྭཱསཱིཏི ཝཏྟཱནི, ཨསཱིཏི ཝཏྟཱནི ཨེཝ ཝཱ ཧོནྟི, ཏཐཱ སངྒཧེཏྭཱ ཉཱཏབྦཱནི.

སཾཝརཝིནཡོཏི སཱིལསཾཝརོ སཏིསཾཝརོ ཉཱཎསཾཝརོ ཁནྟིསཾཝརོ ཝཱིརིཡསཾཝརོཏི པཉྩཝིདྷོཔི སཾཝརོ ཡཐཱསཀཾ སཾཝརིཏབྦཱནཾ ཝིནེཏབྦཱནཉྩ ཀཱཡདུཙྩརིཏཱདཱིནཾ སཾཝརཎཏོ སཾཝརོ, ཝིནཡནཏོ ཝིནཡོཏི ཝུཙྩཏི. པཧཱནཝིནཡོཏི ཏདངྒཔྤཧཱནཾ ཝིཀྑམྦྷནཔྤཧཱནཾ སམུཙྪེདཔྤཧཱནཾ པཊིཔྤསྶདྡྷིཔྤཧཱནཾ ནིསྶརཎཔྤཧཱནནྟི པཉྩཝིདྷམྤི པཧཱནཾ, ཡསྨཱ ཙཱགཊྛེན པཧཱནཾ, ཝིནཡནཊྛེན ཝིནཡོ, ཏསྨཱ ‘‘པཧཱནཝིནཡོ’’ཏི ཝུཙྩཏི. སམཐཝིནཡོཏི སཏྟ ཨདྷིཀརཎསམཐཱ. པཉྙཏྟིཝིནཡོཏི སིཀྑཱཔདམེཝ. ཏམྤི ཧི བྷགཝཏོ སིཀྑཱཔདཔཉྙཏྟིཡཱཝ ཨནུགྒཧིཏཾ ཧོཏི ཏབྦྷཱཝེ ཨེཝ བྷཱཝཏོ. སངྑལིཀནཡཾ ཀཏྭཱ དསཀྑཏྟུཾ ཡོཛནཉྩ ཀཏྭཱ ཡཾ ཝུཏྟནྟི སམྦནྡྷོ. ཏཏྠ པུརིམཔུརིམཔདསྶ ཨནནྟརཔདེནེཝ ཡོཛིཏཏྟཱ ཨཡོསངྑལིཀསདིསནྟི ‘‘སངྑལིཀནཡ’’ནྟི ཝུཏྟཾ. དསསུ པདེསུ ཨེཀམེཀཾ པདཾ ཏདཝསེསེཧི ནཝནཝཔདེཧི ཡོཛིཏཏྟཱ ‘‘ཨེཀེཀཔདམཱུལིཀ’’ནྟི ཝུཏྟཾ.

ཨཏྠསཏཾ ¶ ¶ དྷམྨསཏནྟི ཨེཏྠ ཡོ ཧི སོ པརིཝཱརེ (པརི. ༣༣༤) ཡཾ སངྒྷསུཊྛུ, ཏཾ སངྒྷཕཱསཱུཏི ཨཱདིཾཀཏྭཱ ཡཾ སདྡྷམྨཊྛིཏིཡཱ, ཏཾ ཝིནཡཱནུགྒཧཱཡཱཏི པརིཡོསཱནཾ ཁཎྜཙཀྐཝསེནེཝ སངྑལིཀནཡོ ཝུཏྟོ, ཏསྨིཾ ཨེཀམཱུལཀནཡེ ཨཱགཏབདྡྷཙཀྐནཡེན ཡཾ ཝིནཡཱནུགྒཧཱཡ, ཏཾ སངྒྷསུཊྛཱུཏི ཨིདམྤི ཡོཛེཏྭཱ བདྡྷཙཀྐེ ཀཏེ པུརིམཔུརིམཱནི དས དྷམྨཔདཱནི, པཙྪིམཔཙྪིམཱནི དས ཨཏྠཔདཱནི ཙཱཏི ཝཱིསཏི པདཱནི ཧོནྟི. ཨེཀམཱུལཀནཡེ པན ཨེཀསྨིཾ ཝཱརེ ནཝེཝ ཨཏྠཔདཱནི ལབྦྷནྟི. ཨེཝཾ དསཧི ཝཱརེཧི ནཝུཏི ཨཏྠཔདཱནི ནཝུཏི དྷམྨཔདཱནི ཙ ཧོནྟི, ཏཱནི སངྑལིཀནཡེ ཝུཏྟེཧི དསཧི ཨཏྠཔདེཧི དསཧི དྷམྨཔདེཧི ཙ སདྡྷིཾ ཡོཛིཏཱནི ཡཐཱཝུཏྟཾ ཨཏྠསཏཾ དྷམྨསཏཉྩ ཧོནྟཱིཏི ཝེདིཏབྦཾ. ཡཾ པནེཏྠ སཱརཏྠདཱིཔནིཡཾ (སཱརཏྠ ཊཱི. པཱརཱཛིཀཀཎྜ ༢.༣༩) སངྑལིཀནཡེཔི ཨེཀམཱུལཀནཡེཔི པཙྩེཀཾ ཨཏྠསཏསྶ དྷམྨསཏསྶ ཡོཛནཱམུཁཾ ཝུཏྟཾ, ཏཾ ཏཐཱ སིདྡྷེཔི ཨཏྠསཏཾ དྷམྨསཏནྟི (པརི. ༣༣༤) གཱཐཱཡ ན སམེཏི དྭེ ཨཏྠསཏཱནི དྭེ དྷམྨསཏཱནི ཙཏྟཱརི ནིརུཏྟིསཏཱནི ཨཊྛ ཉཱཎསཏཱནཱིཏི ཝཏྟབྦཏོ. ཏསྨཱ ཨིདྷ ཝུཏྟནཡེནེཝ ཨཏྠསཏཾ དྷམྨསཏནྟི ཝུཏྟནྟི གཧེཏབྦཾ. དྭེ ཙ ནིརུཏྟིསཏཱནཱིཏི ཨཏྠཛོཏིཀཱནཾ ནིརུཏྟཱིནཾ ཝསེན ནིརུཏྟིསཏཾ, དྷམྨབྷཱུཏཱནཾ ནིརུཏྟཱིནཉྩ ཝསེན ནིརུཏྟིསཏནྟི དྭེ ནིརུཏྟིསཏཱནི. ཙཏྟཱརི ཙ ཉཱཎསཏཱནཱིཏི ཨཏྠསཏེ ཉཱཎསཏཾ, དྷམྨསཏེ ཉཱཎསཏཾ, དྭཱིསུ ནིརུཏྟིསཏེསུ དྭེ ཉཱཎསཏཱནཱིཏི ཙཏྟཱརི ཉཱཎསཏཱནི. ཨཏིརེཀཱནཡནཏྠོཏི ཨཝུཏྟསམུཙྩཡཏྠོ.

པཋམཔཉྙཏྟིཀཐཱཝཎྞནཱནཡོ ནིཊྛིཏོ.

སུདིནྣབྷཱཎཝཱརཝཎྞནཱ ནིཊྛིཏཱ.

མཀྐཊཱིཝཏྠུཀཐཱཝཎྞནཱ

༤༠. པཙུརཏྠེ ཧི ཝཏྟམཱནཝཙནནྟི ཨེཀདཱ པཊིསེཝིཏྭཱ པཙྪཱ ཨནོརམིཏྭཱ དིཝསེ དིཝསེ སེཝནིཙྪཱཡ ཝཏྟམཱནཏྟཱ སེཝནཱཡ ཨབྷཱཝཀྑཎེཔི ཨིཧ མལླཱ ཡུཛ྄ཛྷནྟཱིཏིཨཱདཱིསུ ཝིཡ ཨབྦོཙྪིནྣཏཾ བཱཧུལླཝུཏྟིཏཉྩ ཨུཔཱདཱཡ པཊིསེཝཏཱིཏི ཝཏྟམཱནཝཙནཾ ཀཏནྟི ཨཏྠོ. ཨཱཧིཎྜནྟཱཏི ཝིཙརནྟཱ.

༤༡. སཧོཌྜྷགྒཧིཏོཏི ¶ སབྷཎྜགྒཧིཏོ, ཨཡམེཝ ཝཱ པཱཋོ. ཏཾ སིཀྑཱཔདཾ ཏཐེཝ ཧོཏཱིཏི མནུསྶཱམནུསྶཱདིཔུགྒལཝིསེསཾ ཀིཉྩི ཨནུཔཱདིཡིཏྭཱ སཱམཉྙཏོ ‘‘ཡོ པན བྷིཀྑུ མེཐུནཾ དྷམྨཾ པཊིསེཝེཡྻཱ’’ཏི (པཱརཱ. ༣༩) ཝུཏྟཏྟཱ མནུསྶཱམནུསྶཏིརཙྪཱནགཏཱནཾ ཨིཏྠིཔུརིསཔཎྜཀཨུབྷཏོབྱཉྫནཱནཾ ¶ ཏིཾསཝིདྷེཔི མགྒེ མེཐུནཾ སེཝནྟསྶ ཏཾ སིཀྑཱཔདཾ མཱུལཙྪེཛྫཀརཾ ཧོཏི ཨེཝཱཏི ཨདྷིཔྤཱཡོ. ཨེཏེན ཡཾ ཨནུཔཉྙཏྟིམཱུལཔཉྙཏྟིཡཱ ཨེཝ ཨདྷིཔྤཱཡཔྤཀཱསནཝསེན སུབོདྷཏྠཱཡ ཝཏྠུཝསེན པཝཏྟཱནཾ ཝིསེསཏྠཛོཏཀཝསེནཱཏི དསྶིཏཾ ཧོཏི. ཨཱམསནཾ ཨཱམཊྛམཏྟཾ. ཏཏོ དལ༹ྷཏརཾ ཕུསནཾ. གྷཊྚནཾ པན ཏཏོ དལ༹ྷཏརཾ ཀཏྭཱ སརཱིརེན སརཱིརསྶ སངྒྷཊྚནཾ. ཏཾ སབྦམྤཱིཏི ཨནུརཱགེན པཝཏྟིཏཾ དསྶནཱདིསབྦམྤི.

༤༢. པཱཎཱཏིཔཱཏཱདིསཙིཏྟཀསིཀྑཱཔདཱནཾ སུརཱཔཱནཱདིཨཙིཏྟཀསིཀྑཱཔདཱནཉྩ (པཱཙི. ༣༢༦ ཨཱདཡོ) ཨེཀེནེཝ ལཀྑཎཝཙནེན ལོཀཝཛྫཏཾ དསྶེཏུཾ ‘‘ཡསྶ སཙིཏྟཀཔཀྑེ ཙིཏྟཾ ཨཀུསལམེཝ ཧོཏི, ཏཾ ལོཀཝཛྫཾ ནཱམཱ’’ཏི ཝུཏྟཾ. ཏཏྠ སཙིཏྟཀཔཀྑེཏི ཨིདཾ ཀིཉྩཱཔི ཨཙིཏྟཀསིཀྑཱཔདཾ སནྡྷཱཡེཝ ཝཏྟུཾ ཡུཏྟཾ ཏསྶེཝ སཙིཏྟཀཔཀྑསམྦྷཝཏོ, ཏཐཱཔི སཙིཏྟཀསིཀྑཱཔདཱནམྤི ཨསཉྩིཙྩ ཙངྐམནཱདཱིསུ ལོཀེ པཱཎགྷཱཏཝོཧཱརསམྦྷཝེན ཨཙིཏྟཀཔཀྑཾ པརིཀཔྤེཏྭཱ ཨུབྷིནྣམྤི སཙིཏྟཀཱཙིཏྟཀསིཀྑཱཔདཱནཾ སཱདྷཱརཎཝསེན ‘‘སཙིཏྟཀཔཀྑེ’’ཏི ཝུཏྟཾ. ཨིཏརཐཱ སཙིཏྟཀསིཀྑཱཔདཱནཾ ཨིམསྨིཾ ཝཱཀྱེ ལོཀཝཛྫཏཱལཀྑཎཾ ན ཝུཏྟཾ སིཡཱ. ‘‘སཙིཏྟཀཔཀྑེ ཙིཏྟཾ ཨཀུསལམེཝཱ’’ཏི ཝུཏྟེ པན སཙིཏྟཀསིཀྑཱཔདཱནཾ ཙིཏྟཾ ཨཀུསལམེཝ, ཨིཏརེསཾ སཙིཏྟཀཔཀྑེཡེཝ ཨཀུསལནིཡམོ, ན ཨཙིཏྟཀཔཀྑེ. ཏཏྠ པན ཡཐཱསམྦྷཝཾ ཀུསལཾ ཝཱ སིཡཱ, ཨཀུསལཾ ཝཱ, ཨབྱཱཀཏཾ ཝཱཏི ཨཡམཏྠོ སཱམཏྠིཡཏོ སིཛ྄ཛྷཏཱིཏི ཝེདིཏབྦཾ. སཙིཏྟཀཔཀྑེཏི ཝཏྠུཝཱིཏིཀྐམཝིཛཱནནཙིཏྟེན སཙིཏྟཀཔཀྑེཏི གཧེཏབྦཾ, ན པཎྞཏྟིཝིཛཱནནཙིཏྟེན ཏཐཱ སཏི སབྦསིཀྑཱཔདཱནམྤི ལོཀཝཛྫཏཱཔསངྒཏོ. ‘‘པཊིཀྑིཏྟམིདཾ ཀཱཏུཾ ན ཝཊྚཏཱི’’ཏི ཛཱནནྟསྶ ཧི པཎྞཏྟིཝཛྫེཔི ཨནཱདརིཡཝསེན པཊིགྷཙིཏྟམེཝ ཨུཔྤཛྫཏི, ཏསྨཱ ཨིདཾ ཝཱཀྱཾ ནིརཏྠཀམེཝ སིཡཱ སབྦསིཀྑཱཔདཱནིཔི ལོཀཝཛྫཱནཱིཏི ཨེཏྟཀམཏྟསྶེཝ ཝཏྟབྦཏཱཔསངྒཏོ.

ཨེཏྠ ¶ ཙ སཙིཏྟཀཔཀྑེཡེཝ ཙིཏྟཾ ཨཀུསལནྟི ནིཡམསྶ ཨཀཏཏྟཱ སུརཱཔཱནཱདཱིསུ ཨཙིཏྟཀཔཀྑེ ཙིཏྟཾ ཨཀུསལཾ ན ཧོཏེཝཱཏི ན སཀྐཱ ནིཡམེཏུཾ, ཀེཝལཾ པན སཙིཏྟཀཔཀྑེ ཙིཏྟཾ ཨཀུསལམེཝ, ན ཀུསལཱདཱིཏི ཨེཝམེཏྠ ནིཡམོ སིཛ྄ཛྷཏི, ཨེཝཉྩ སུརཱཏི ཨཛཱནིཏྭཱ པིཝནྟཱནམྤི ཨཀུསལཙིཏྟེནེཝ པཱནཾ གནྡྷཝཎྞཀཱདིབྷཱཝཾ ཨཛཱནིཏྭཱ ལིམྤནྟཱིནཾ བྷིཀྑུནཱིནཾ ཝིནཱཔི ཨཀུསལཙིཏྟེན ལིམྤནཉྩ, ཨུབྷཡཏྠཱཔི ཨཱཔཏྟིསམྦྷཝོ ཙ སམཏྠིཏོ ཧོཏི. ཡཾ པན སཱརཏྠདཱིཔནིཡཾ (སཱརཏྠ. ཊཱི. པཱརཱཛིཀཀཎྜ ༢.༤༢) ‘‘སཙིཏྟཀཔཀྑེ ཙིཏྟཾ ཨཀུསལམེཝཱཏི ཝཙནཏོ ཨཙིཏྟཀསྶ ཝཏྠུཨཛཱནནཝསེན ཨཙིཏྟཀཔཀྑེ ཙིཏྟཾ ཨཀུསལམེཝཱཏི ཨཡཾ ནིཡམོ ནཏྠཱིཏི ཝིཉྙཱཡཏཱི’’ཏི ཝུཏྟཾ, ཏཾ ན ཡུཏྟཾ ¶ . ཨཙིཏྟཀེསུ ཧི ཏེརསསུ ལོཀཝཛྫེསུ སུརཱཔཱནསྶེཝ ཨཙིཏྟཀཔཀྑེཔི ཨཀུསལཙིཏྟནིཡམོ, ན ཨིཏརེསཾ དྭཱདསནྣཾ ཨཀུསལཱདིཙིཏྟེནཱཔི ཨཱཔཛྫིཏབྦཏོ. ཡཾ པན ཨེཝཾ ཀེནཙི ཨནིཙྪམཱནཾ སདྡཏོཔི ཨཔཏཱིཡམཱནམིམཾ ནིཡམཾ པརཱདྷིཔྤཱཡཾ ཀཏྭཱ དསྶེཏུཾ ‘‘ཡདི ཧི ཨཙིཏྟཀསྶ ཨཙིཏྟཀཔཀྑེཔི ཙིཏྟཾ ཨཀུསལམེཝ སིཡཱ, སཙིཏྟཀཔཀྑེཏི ཨིདཾ ཝིསེསནཾ ནིརཏྠཀཾ སིཡཱ’’ཏིཨཱདི ཝུཏྟཾ, ཏཾ ནིརཏྠཀམེཝ ཨེཝཾ ནིཡམསྶ ཀེནཙི ཨནདྷིཔྤེཏཏྟཱ. ན ཧི ཀོཙི སདྡསཏྠཝིདཱུ ནིཡམཾ ཨིཙྪཏི, ཡེན སཙིཏྟཀཔཀྑེཏི ཨིདཾ ཝིསེསནཾ ནིརཏྠཀཾ སིཡཱཏིཨཱདི ཝུཏྟཾ བྷཝེཡྻ, ཀིནྟུ སཙིཏྟཀཔཀྑེ ཙིཏྟཾ ཨཀུསལམེཝ, ཨཙིཏྟཀཔཀྑེ པན ཙིཏྟཾ ཨནིཡཏཾ ཨཀུསལམེཝ ཝཱ སིཡཱ, ཀུསལཱདཱིསུ ཝཱ ཨཉྙཏརནྟི ཨེཝམེཝ ཨིཙྪཏི. ཏེན སཙིཏྟཀཔཀྑེཏི ཝིསེསནམྤི སཱཏྠཀཾ སིཡཱ. ཨཙིཏྟཀསིཀྑཱཔདཱནཾ སཙིཏྟཀཔཀྑེསུ ཨཀུསལནིཡམེན ལོཀཝཛྫཏཱ ཙ སིཛ྄ཛྷཏི. ཏེསུ ཙ སུརཱཔཱནསྶེཝ ཨཙིཏྟཀཔཀྑེཔི ལོཀཝཛྫཏཱ ཨཀུསལཙིཏྟཏཱ ཙ, ཨིཏརེསཾ པན སཙིཏྟཀཔཀྑེ ཨེཝཱཏི ཝཱདོཔི ན ཝིརུཛ྄ཛྷཏཱིཏི ན ཀིཉྩེཏྠ ཨནུཔཔནྣཾ ནཱམ.

ཡཾ པནེཏྠ ‘‘སུརཱཏི ཨཛཱནིཏྭཱ པིཝནྟསྶ…པེ… ཝིནཱཔི ཨཀུསལཙིཏྟེན ཨཱཔཏྟིསམྦྷཝཏོ…པེ… སུརཱཔཱནཱདིཨཙིཏྟཀསིཀྑཱཔདཱནཾ ལོཀཝཛྫཏཱ ན སིཡཱ’’ཏིཨཱདི ཝུཏྟཾ. ཡཉྩ ཏམཏྠཾ སཱདྷེཏུཾ གཎྛིཔདེསུ ཨཱགཏཝཙནཾ དསྶེཏྭཱ བཧུཾ པཔཉྩིཏཾ, ཏཾ ན སཱརཏོ པཙྩེཏབྦཾ ཨཊྛཀཐཱཧི ཝིརུདྡྷཏྟཱ. ཏཐཱ ཧི ‘‘ཝཏྠུཨཛཱནནཏཱཡ ཙེཏྠ ཨཙིཏྟཀཏཱ ཝེདིཏབྦཱ ཨཀུསལེནེཝ པཱཏབྦཏཱཡ ལོཀཝཛྫཏཱ’’ཏི ཝུཏྟཾ. ཡཉྩེཏསྶ ‘‘སཙིཏྟཀཔཀྑེ ¶ ཨཀུསལེནེཝ པཱཏབྦཏོ ལོཀཝཛྫཏཱ’’ཏི ཝུཏྟཾ ཨཊྛཀཐཱཝཙནཾ, ཏཾ ན སུནྡརཾ. ‘‘སཙིཏྟཀཔཀྑེ ཙིཏྟཾ ཨཀུསལམེཝཱ’’ཏི སབྦེསཾ ལོཀཝཛྫཱནཾ ཨིདྷེཝ པཱརཱཛིཀཊྛཀཐཱཡ སཱམཉྙཏོ ཝཏྭཱ སུརཱཔཱནསིཀྑཱཔདཊྛཀཐཱཡཾ ‘‘ཨཀུསལེནེཝ པཱཏབྦཏཱཡཱ’’ཏི ཨེཝཾ ཨཙིཏྟཀཔཀྑེཔི ཨཀུསལཙིཏྟཏཱཡ ཝིསེསེཏྭཱ ཝུཏྟཏྟཱ. ན ཧི ‘‘སཱམཉྙཏོ ཨིདྷ ཝུཏྟོཝ ཨཏྠོ པུན སུརཱཔཱནཊྛཀཐཱཡམྤི ཝུཏྟོ’’ཏི སཀྐཱ ཝཏྟུཾ ཝུཏྟསྶེཝ པུན ཝཙནེ པཡོཛནཱབྷཱཝཱ, ཏདཉྙེསུཔི ཨཙིཏྟཀལོཀཝཛྫེསུ ཝཏྟབྦཏཱཔསངྒཏོ ཙ, ནཱཔི ཨེཀཏྠ ཝུཏྟོ ནཡོ ཏདཉྙེསུཔི ཨེཀལཀྑཎཏཱཡ ཝུཏྟོ ཨེཝ ཧོཏཱིཏི ‘‘སུརཱཔཱནསིཀྑཱཔདེཡེཝ (པཱཙི. ༣༢༦ ཨཱདཡོ) ཝུཏྟོ’’ཏི སཀྐཱ ཝཏྟུཾ ཨཙིཏྟཀལོཀཝཛྫཱནཾ སབྦཔཋམེ ཨུཡྻུཏྟསིཀྑཱཔདེཡེཝ (པཱཙི. ༣༡༡ ཨཱདཡོ) ཝཏྟབྦཏོ, སུརཱཔཱནསིཀྑཱཔདེཡེཝ ཝཱ ཝཏྭཱ ཨེསེཝ ནཡོ སེསེསུ ཨཙིཏྟཀལོཀཝཛྫེསུཔཱིཏི ཨཏིདིསིཏབྦཏོ ཙ.

ཨཔིཙ ཝུཏྟམེཝཏྠཾ ཝདནྟེན ‘‘སཙིཏྟཀཔཀྑེ ཨཀུསལེནེཝ པཱཏབྦཏཱཡཱ’’ཏི པུབྦེ ཝུཏྟཀྐམེནེཝ ¶ ཝཏྟབྦཾ སནྡེཧཱདིཝིགམཏྠཏྟཱ པུན ཝཙནསྶ. སིཀྑཱཔདཝིསཡེ ཙ ཝིསེསིཏབྦཾ ཝིསེསེཏྭཱཝ ཝུཙྩཏི, ཨིཏརཐཱ ཨཱཔཏྟཱནཱཔཏྟཱདིབྷེདསྶ དུཝིཉྙེཡྻཏྟཱ. ཏཐཱ ཧི བྷིཀྑུནཱིཝིབྷངྒཊྛཀཐཱཡཾ ‘‘ཝིནཱཔི ཙིཏྟེན ཨཱཔཛྫིཏབྦཏྟཱ ཨཙིཏྟཀཱནི, ཙིཏྟེ པན སཏི ཨཀུསལེནེཝ ཨཱཔཛྫིཏབྦཏྟཱ ལོཀཝཛྫཱནི ཙེཝ ཨཀུསལཙིཏྟཱནི ཙཱ’’ཏི གིརགྒསམཛྫཱདཱིནཾ སཙིཏྟཀཔཀྑེ ཨེཝ ལོཀཝཛྫཏཱ ཨཀུསལཙིཏྟཏཱ ཙ ཝིསེསེཏྭཱ ཝུཏྟཱ, ན ཨེཝཾ སུརཱཔཱནསྶ. ཏསྶ པན པཀྑདྭཡསྶཱཔི སཱདྷཱརཎཝསེན ‘‘ཨཀུསལེནེཝ པཱཏབྦཏཱཡཱ’’ཏི ཝུཏྟཾ, ན པན ‘‘སཙིཏྟཀཔཀྑེ’’ཏི ཝིསེསེཏྭཱ. ཏསྨཱ ཨིདཾ སུརཱཔཱནཾ སཙིཏྟཀཱཙིཏྟཀཔཀྑདྭཡེཔི ལོཀཝཛྫཾ ཨཀུསལཙིཏྟཉྩཱཏི དསྶེཏུམེཝ ‘‘ཨཀུསལེནེཝ པཱཏབྦཏཱཡ ལོཀཝཛྫཏཱ’’ཏི ཝིསུཾ ཝུཏྟནྟི སུཊྛུ སིཛ྄ཛྷཏི. ཨེཏེནེཝ ཡཾ སཱརཏྠདཱིཔནིཡཾ ‘‘སཙིཏྟཀཔཀྑེ ཨཀུསལེནེཝ པཱཏབྦཏཱཡ ལོཀཝཛྫཏཱ’’ཏི ཝུཏྟསྶ ཨིམསྶེཝ ཨདྷིཔྤཱཡསྶ པཊིཔཱདཀམེཏནྟི སཉྙཱཡ ཨིམིནཱ ཨེཝ ཧི ཨདྷིཔྤཱཡེན ཨཉྙེསུཔི ལོཀཝཛྫེསུ ཨཙིཏྟཀསིཀྑཱཔདེསུ ཨཀུསལཙིཏྟཏཱ ཨེཝ ཝུཏྟཱ, ན པན ཏིཙིཏྟཏཱ. ཏེནེཝ བྷིཀྑུནཱིཝིབྷངྒཊྛཀཐཱཡཾ ¶ ཝུཏྟཾ ‘‘གིརགྒསམཛྫཾ ཙིཏྟཱགཱརསིཀྑཱཔདཾ སངྒྷཱཎི ཨིཏྠཱལངྐཱརོ གནྡྷཝཎྞཀོ ཝཱསིཏཀཔིཉྙཱཀོ བྷིཀྑུནཱིཨཱདཱིཧི ཨུམྨདྡནཔརིམདྡནཱནཱིཏི ཨིམཱནི དས སིཀྑཱཔདཱནི ཨཙིཏྟཀཱནི ཨཀུསལཙིཏྟཱནི, ཨཡཾ པནེཏྠ ཨདྷིཔྤཱཡོ ཝིནཱཔི ཙིཏྟེན ཨཱཔཛྫིཏབྦཏྟཱ ཨཙིཏྟཀཱནི, ཙིཏྟེ པན སཏི ཨཀུསལེནེཝ ཨཱཔཛྫིཏབྦཏྟཱ ལོཀཝཛྫཱནི ཙེཝ ཨཀུསལཙིཏྟཱནི ཙཱ’’ཏི ཝུཏྟཾ, ཏམྤི པཊིསིདྡྷཾ ཧོཏི ཏབྦིཔརཱིཏསྶེཝ ཨཏྠསྶ ཡཐཱཝུཏྟནཡེན སཱདྷནཏོ. ཏསྨཱ སུརཱཔཱནསྶ ཨཙིཏྟཀཔཀྑེཔི ཙིཏྟཾ ཨཀུསལམེཝཱཏི ཨིམཾ ཝིསེསཾ དསྶེཏུམེཝ ཨིདཾ ཝཙནཾ ཝུཏྟནྟི གཧེཏབྦཾ. ཨཡཉྷེཏྠ ཨཏྠོ ཝཏྠུཨཛཱནནཏཱཡ ཙེཏྠཱཏི ཨེཏྠ ཙ-ཀཱརོ ཝིསེསཏྠཛོཏཀོ ཨཔིཙཱཏི ཨིམིནཱ སམཱནཏྠོ. ཏསྨཱ ཡདིདཾ ཨཉྙེསུ ཨཙིཏྟཀལོཀཝཛྫེསུ ཝིནཱཔི ཙིཏྟེན ཨཱཔཛྫིཏབྦཏྟཱ ཨཙིཏྟཀཱནི, ཙིཏྟེ པན སཏི ཨཀུསལེནེཝ ཨཱཔཛྫིཏབྦཏྟཱ ལོཀཝཛྫཱནི ཙེཝ ཨཀུསལཙིཏྟཱནི ཙཱཏི ལོཀཝཛྫཏཱཡ ཨཀུསལཙིཏྟཏཱཡ ཙ ལཀྑཎཾ ཝུཙྩཏི, ཏཾ ཨེཏྠ སུརཱཔཱནསིཀྑཱཔདེ ནཱགཙྪཏི, ཨིདྷ པན ཝིསེསོ ཨཏྠཱིཏི ཝུཏྟཾ ཧོཏི. སོ ཀཏརོཏི ཙེ? ཝཏྠུཨཛཱནནཏཱཡ ཨེཝ ཝཏྠུཛཱནནཙིཏྟེན ཝིནཱཔི ཨཱཔཛྫིཏབྦཏཱཡ ཨེཝ ཨཙིཏྟཀཏཱ ཝེདིཏབྦཱ, ནཏྠེཏྠ ཨཙིཏྟཀཏཱཡ ཝིསེསོ. ཀིནྟུ ཝཏྠུཨཛཱནནསངྑཱཏཨཙིཏྟཀཔཀྑེཔི ཨཀུསལཙིཏྟེནེཝ སུརཱམེརཡསྶ ཨཛ྄ཛྷོཧརིཏབྦཏཱཡཱཏི ཨིམསྶ སིཀྑཱཔདསྶ སཙིཏྟཀཔཀྑེཔི ཨཙིཏྟཀཔཀྑེཔི ལོཀཝཛྫཏཱ ཨཀུསལཙིཏྟཏཱ ཙ ཝེདིཏབྦཱཏི ཨཡམེཏྠ ཝིསེསོ. ཨིདྷ ཧི ‘‘ཙིཏྟེ པན སཏཱི’’ཏི ཨཝིསེསེཏྭཱ ‘‘ཨཀུསལེནེཝཱ’’ཏི སཱམཉྙཏོ ཝུཏྟཏྟཱ ཨུབྷཡཔཀྑེཔི ལོཀཝཛྫཏཱ ཨཀུསལཙིཏྟཏཱ ཙ སིདྡྷཱཏི ཝེདིཏབྦཱ. ཏེནེཝ པརམཏྠཛོཏིཀཱཡ (ཁུ. པཱ. ཨཊྛ. ༢.པཙྪིམཔཉྩསིཀྑཱཔདཝཎྞནཱ) ཁུདྡཀཊྛཀཐཱཡ སིཀྑཱཔདཝཎྞནཱཡ ‘‘སུརཱམེརཡམཛྫཔམཱདཊྛཱནཾ ¶ ཀཱཡཏོ ཙ ཀཱཡཙིཏྟཏོ ཙཱཏི དྭིསམུཊྛཱན’’ནྟི ཝུཏྟཾ. སུརཱཏི ཛཱནནཙིཏྟཱབྷཱཝེནེཝ ཧེཏྠ ཙིཏྟངྒཝིརཧིཏོ ཀེཝལོཔི ཀཱཡོ ཨེཀསམུཊྛཱནཾ ཝུཏྟོ, ཏསྨིཉྩ ཨེཀསམུཊྛཱནཀྑཎེཔི ཡཱཡ ཙེཏནཱཡ པིཝཏི, སཱ ཨེཀནྟཨཀུསལཱ ཨེཝ ཧོཏི. ཏེནེཝ ཏཏྠེཝ ཨཊྛཀཐཱཡཾ ‘‘པཋམཱ ཙེཏྠ པཉྩ ཨེཀནྟཨཀུསལཙིཏྟསམུཊྛཱནཏྟཱ པཱཎཱཏིཔཱཏཱདཱིནཾ པཀཏིཝཛྫཏོ ཝེརམཎིཡོ, སེསཱ པཎྞཏྟིཝཛྫཏོ’’ཏི ཨེཝཾ པཉྩནྣམྤི སཱམཉྙཏོ ཨཀུསལཙིཏྟཏཱ ལོཀཝཛྫཏཱསངྑཱཏཱ པཀཏིཝཛྫཏཱ ཙ ཝུཏྟཱ. ཨངྒེསུ ཙ ཛཱནནངྒཾ ན ཝུཏྟཾ. ཏཐཱ ཧི ‘‘སུརཱམེརཡམཛྫཔམཱདཊྛཱནསྶ ¶ པན སུརཱདཱིནཾ ཨཉྙཏརཾ ཧོཏི མདནཱིཡཾ, པཱཏུཀཱམཏཱཙིཏྟཉྩ པཙྩུཔཊྛིཏཾ ཧོཏི, ཏཛྫཉྩ ཝཱཡཱམཾ ཨཱཔཛྫཏི, པཱིཏེ ཙ པཝིསཏཱིཏི ཨིམཱནི ཙཏྟཱརི ཨངྒཱནཱི’’ཏི ཝུཏྟཾ, ན པན སུརཱཏི ཛཱནནངྒེན སདྡྷིཾ པཉྩཱཏི. ཡདི ཧི སུརཱཏི ཛཱནནམྤི ཨངྒཾ སིཡཱ, ཨཝསྶམེཝ ཏཾ ཝཏྟབྦཾ སིཡཱ, ན ཙ ཝུཏྟཾ. ཡཐཱ ཙེཏྠ, ཨེཝཾ ཨཉྙཱསུཔི སུཏྟཔིཊཀཱདིཨཊྛཀཐཱསུ ཀཏྠཙི ཛཱནནངྒཾ ན ཝུཏྟཾ. ཏསྨཱ ‘‘ཨཀུསལེནེཝ པཱཏབྦཏཱཡ ལོཀཝཛྫཏཱ’’ཏི ཨིམསྶ ཨཊྛཀཐཱཔཱཋསྶ ཨཙིཏྟཀཔཀྑེཔི ‘‘ཨཀུསལེནེཝ པཱཏབྦཏཱཡ ལོཀཝཛྫཏཱ’’ཏི ཨེཝམེཝ ཨཏྠོཏི ནིཊྛམེཏྠ གནྟབྦཾ.

ཨཔིཙ ཡཾ གཎྛིཔདེསུ ‘‘ཨེཏཾ སཏྟཾ མཱརེསྶཱམཱིཏི ཏསྨིཾཡེཝ པདེསེ ནིཔནྣཾ ཨཉྙཾ མཱརེནྟསྶ པཱཎསཱམཉྙསྶ ཨཏྠིཏཱཡ ཡཐཱ པཱཎཱཏིཔཱཏོ ཧོཏི, ཨེཝཾ ཨེཏཾ མཛྫཾ པིཝིསྶཱམཱིཏི ཨཉྙཾ མཛྫཾ པིཝནྟསྶ མཛྫསཱམཉྙསྶ ཨཏྠིཏཱཡ ཨཀུསལམེཝ ཧོཏི, ཡཐཱ པན ཀཊྛསཉྙཱཡ སཔྤཾ གྷཱཏེནྟསྶ པཱཎཱཏིཔཱཏོ ན ཧོཏི, ཨེཝཾ ནཱལི༹ཀེརཔཱནསཉྙཱཡ མཛྫཾ པིཝནྟསྶ ཨཀུསལཾ ན ཧོཏཱི’’ཏི པཱཎཱཏིཔཱཏེན སདྡྷིཾ སབྦཐཱ སམཱནཏྟེན ཨུཔམེཏྭཱ ཝུཏྟཾ, ཏཾ ཨཏིཝིཡ ཨཡུཏྟཾ སབྦེསཾ སིཀྑཱཔདཱནཾ པཱཎཱཏིཔཱཏཱདིཨཀུསལཱནཉྩ ཨཉྙམཉྙཾ སམཱནཏཱཡ ནིཡམཱབྷཱཝཱ. པཱཎཱཏིཔཱཏོ ཧི པརིཡཱཡེནཱཔི སིཛ྄ཛྷཏི, ན ཏཐཱ ཨདིནྣཱདཱནཾ. ཏཾ པན ཨཱཎཏྟིཡཱཔི སིཛ྄ཛྷཏི, ན ཙ མེཐུནཱདཱིསུ. ཏསྨཱ པཡོགངྒཱདཱིཧིཔི བྷིནྣཱནམེཝ སཾསཊྛཾ སབྦཐཱ སམཱིཀརཎཾ ཨཡུཏྟམེཝ. ‘‘པཱཎཱཏིཔཱཏོ ཝིཡ ཨདིནྣཱདཱནམེཐུནཱདཱིནིཔི པརིཡཱཡཀཐཱདཱིཧི སིཛ྄ཛྷནྟཱི’’ཏི ཀེནཙི ཝུཏྟེ ཏཾ ཀིནྟི ན གཡ྄ཧཏི ཏཐཱ ཝཙནཱབྷཱཝཱཏི ཙེ? ཨིདྷཱཔི ‘‘ཏཐཱ པཱཎཱཏིཔཱཏསདིསཾ སུརཱཔཱན’’ནྟི ཝཙནཱབྷཱཝཱ ཨིདམྤི ན གཧེཏབྦམེཝ. ཀིཉྩི ཨཊྛཀཐཱཝཙནེནེཝ སིདྡྷམེཝཏྠཾ པཊིབཱཧནྟེན ཝིནཡཉྙུནཱ སུཏྟསུཏྟཱནུལོམཱདཱིཧི ཏསྶ ཝིརོདྷཾ དསྶེཏྭཱ པཊིབཱཧེཏབྦཾ, ན པན པཡོགངྒཱདཱིཧི ཨཙྩནྟཝིབྷིནྣེན སིཀྑཱཔདནྟརེན སཧ སམཱིཀརཎམཏྟེན. ན ཧི ‘‘སུརཱཏི ཨཛཱནིཏྭཱ པིཝནྟསྶཱཔི ཨཀུསལམེཝཱ’’ཏི ཨེཏྠ སུཏྟཱདིཝིརོདྷོ ཨཏྠི, ཝིནཡཔིཊཀེ ཏཱཝ ཨེཏསྶ ཨཏྠསྶ ཝིརུདྡྷཾ སུཏྟཱདིཀཾ ན དིསྶཏི, ནཱཔི སུཏྟཔིཊཀཱདཱིསུ.

ཡཾ ¶ པནེཏྠ ཀེཙི ཝདནྟི ‘‘མནོཔུབྦངྒམཱ དྷམྨཱཏི (དྷ. པ. ༡, ༢) ཝུཏྟཏྟཱ སབྦཱནི ཨཀུསལཱནི པུབྦེ ཝཱིཏིཀྐམཝཏྠུཾ ཛཱནནྟསྶེཝ ཧོནྟཱི’’ཏི. ཏཾ ཏེསཾ སུཏྟཱདྷིཔྤཱཡཱནབྷིཉྙཱཏམེཝ ¶ པཀཱསེཏི. ན ཧི ‘‘མནོཔུབྦངྒམཱ དྷམྨཱ’’ཏི ཨིདཾ ཝཙནཾ པུབྦེ ཝཱིཏིཀྐམཝཏྠུཾ ཛཱནནྟསྶེཝ ཨཀུསལཱ དྷམྨཱ ཨུཔྤཛྫནྟཱིཏི ཨིམམཏྠཾ དཱིཔེཏི, ཨཐ ཁོ ཀུསལཱཀུསལཱ དྷམྨཱ ཨུཔྤཛྫམཱནཱ ཨུཔྤཱདཔཙྩཡཊྛེན པུབྦངྒམབྷཱུཏཾ སཧཛཱཏཙིཏྟཾ ནིསྶཱཡེཝ ཨུཔྤཛྫནྟི, ན ཝིནཱ ཙིཏྟེནཱཏི ཨིམམཏྠཾ དཱིཔེཏི. ན ཧེཏྠ ‘‘སུརཱཏི ཨཛཱནིཏྭཱ པིཝནྟསྶ ཨཀུསལམེཝཱ’’ཏི ཝུཏྟེ སཧཛཱཏཙིཏྟཾ ཝིནཱཔི ལོབྷཱདིཨཀུསལཙེཏསིཀཱ དྷམྨཱ ཨུཔྤཛྫནྟཱིཏི ཨཡམཏྠོ ཨཱཔཛྫཏི. ཡེན ཏཾ ནིསེདྷཱཡ ཨིདཾ སུཏྟཾ ཨཱཧརཎཱིཡཾ སིཡཱ, ཨབྷིདྷམྨཝིརོདྷོཔེཏྠ ནཏྠི པུབྦེ ནཱམཛཱཏིཨཱདིཝསེན ཨཛཱནནྟསྶེཝ པཉྩཝིཉྙཱཎཝཱིཐིཡཾ ཀུསལཱཀུསལཛཝནུཔྤཏྟིཝཙནཏོ.

ཨཔིཙ བཱལཔུཐུཛྫནཱནཾ ཚསུ དྭཱརེསུ ཨུཔྤཛྫམཱནཱནི ཛཝནཱནི ཡེབྷུཡྻེན ཨཀུསལཱནེཝ ཨུཔྤཛྫནྟི. ཀུསལཱནི པན ཏེསཾ ཀལྱཱཎམིཏྟཱདིཨུཔནིསྶཡབལེན ཨཔྤཀཱནེཝ ཨུཔྤཛྫནྟི, ཏུཎྷཱིབྷཱུཏཱནམྤི ནིདྡཱཡིཏྭཱ སུཔིནཾ པསྶནྟཱནམྤི ཨུདྡྷཙྩཱདིཨཀུསལཛཝནསྶེཝ ཡེབྷུཡྻཔྤཝཏྟིཏོ ཀུསལཱཀུསལཝིརཧིཏསྶ ཛཝནསྶ ཏེསཾ ཨབྷཱཝཱ. ཨཀུསལཱ ཧི ཝིསཡཱནུགུཎཾ ཝཱསནཱནུགུཎཉྩ ཡཐཱཔཙྩཡཾ སམུཔྤཛྫནྟི, ཏཏྠ ཀིཾ པུབྦེ ཛཱནནཱཛཱནནནིབདྡྷེན. ཡེ པན ཛཱནནཱདིཨངྒསམྤནྣཱ པཱཎཱཏིཔཱཏཱདཡོ, ཡེ ཙ ཛཱནནཱདིཾ ཝིནཱཔི སིཛ྄ཛྷམཱནཱ སུརཱཔཱནམིཙྪཱདིཊྛིཨཱདཡོ, ཏེ ཏེ ཏཐཱ ཏཐཱ ཡཱཐཱཝཏོ ཉཏྭཱ སམྨཱསམྦུདྡྷེན ནིདྡིཊྛཱ, ཏེསཉྩ ཡཐཱནིདྡིཊྛཝསེན གཧཎེ ཀོ ནཱམ ཨབྷིདྷམྨཝིརོདྷོ. ཨེཝཾ སུཏྟཱདིཝིརོདྷཱབྷཱཝཏོ, ཨཊྛཀཐཱཡ ཙ ཝུཏྟཏྟཱ ཡཐཱཝུཏྟཝསེནེཝེཏྠ ཨཏྠོ གཧེཏབྦོ. ཡདི ཨེཝཾ ཀསྨཱ ‘‘སཱམཎེརོ ཛཱནིཏྭཱ པིཝནྟོ སཱིལབྷེདཾ ཨཱཔཛྫཏི, ན ཨཛཱནིཏྭཱ’’ཏི ཨཊྛཀཐཱཡཾ ཝུཏྟནྟི? ནཱཡཾ དོསོ སཱིལབྷེདསྶ བྷགཝཏོ ཨཱཎཱཡཏྟཏྟཱ ཨུཀྑིཏྟཱནུཝཏྟིཀཱདཱིནཾ སཱིལབྷེདོ ཝིཡ. ན ཧི ཏཱསཾ ཨཀུསལུཔྤཏྟིཡཱ ཨེཝ སཱིལབྷེདོ ཧོཏི སངྒྷཱཡཏྟསམནུབྷཱསནཱནནྟརེཡེཝ ཝིཧིཏཏྟཱ. ཨེཝམིདྷཱཔི ཛཱནིཏྭཱ པིཝནེ ཨེཝ ཝིཧིཏོ, ན ཨཛཱནིཏྭཱ པིཝནེ. ཨཉྙོ ཧི སིཀྑཱཔདཝིསཡོ, ཨཉྙོ ཨཀུསལཝིསཡོ. ཏེནེཝ སཱམཎེརཱནཾ པུརིམེསུ པཉྩསུ སིཀྑཱཔདེསུ ཨེཀསྨིཾ བྷིནྣེ སབྦཱནིཔི སིཀྑཱཔདཱནི བྷིཛྫནྟི. ཨཀུསལཾ པན ཡཾ བྷིནྣཾ, ཏེན ཨེཀེནེཝ ཧོཏི, ནཱཉྙེཧི. ཏསྨཱ སཱམཎེརསྶ ¶ ཨཛཱནིཏྭཱ པིཝནྟསྶ སཱིལབྷེདཱབྷཱཝེཔི ཀམྨཔཐཔྤཏྟཾ ཨཀུསལམེཝཱཏི གཧེཏབྦཾ.

ཡཾ པན སཱརཏྠདཱིཔནིཡཾ (སཱརཏྠ. ཊཱི. པཱརཱཛིཀཀཎྜ ༢.༤༢) ‘‘སཱམཎེརསྶ སུརཱཏི ཨཛཱནིཏྭཱ ¶ པིཝནྟསྶ པཱརཱཛིཀཾ ནཏྠི, ཨཀུསལཾ པན ཧོཏཱི’’ཏི ཀེཧིཙི ཝུཏྟཝཙནཾ ‘‘ཏཾ ཏེསཾ མཏིམཏྟ’’ནྟི པཊིཀྑིཔིཏྭཱ ‘‘བྷིཀྑུནོ ཨཛཱནིཏྭཱཔི བཱིཛཏོ པཊྛཱཡ མཛྫཾ པིཝནྟསྶ པཱཙིཏྟིཡཾ. སཱམཎེརོ ཛཱནིཏྭཱ པིཝནྟོ སཱིལབྷེདཾ ཨཱཔཛྫཏི, ན ཨཛཱནིཏྭཱཏི ཨེཏྟཀམེཝ ཧི ཨཊྛཀཐཱཡཾ ཝུཏྟཾ, ཨཀུསལཾ པན ཧོཏཱིཏི ན ཝུཏྟ’’ནྟི ཏཏྠ ཀཱརཎཾ ཝུཏྟཾ, ཏཾ ཨཀཱརཎཾ. ན ཧི ཨཊྛཀཐཱཡཾ སཱམཎེརཱནཾ ཛཱནིཏྭཱ པིཝནེ ཨེཝ སཱིལབྷེདོ, ན ཨཛཱནིཏྭཱཏི སཱིལབྷེདཀཐནཊྛཱནེ ཨཀུསལཾ པན ཧོཏཱིཏི ཨཝཙནཾ ཨཛཱནནཔཀྑེ ཨཀུསལཱབྷཱཝསྶ ཀཱརཎཾ ཧོཏི, ཏཏྠ པསངྒཱབྷཱཝཱ, ཝཏྟབྦཊྛཱནེ ཨེཝ ‘‘ཨཀུསལེནེཝ པཱཏབྦཏཱཡ ལོཀཝཛྫཏཱ’’ཏི ཝུཏྟཏྟཱ ཙ. ན ཙ ཏེ ‘‘ཨཀུསལཾ པན ཧོཏཱི’’ཏི ཝདནྟཱ ཨཱཙརིཡཱ ཨིམཾ སཱམཎེརཱནཾ སཱིལབྷེདཔྤཀཱསཀཾ ཁནྡྷཀཊྛཀཐཱཔཱཋམེཝ གཧེཏྭཱ ཨཝོཙུཾ, ཡེན ‘‘ཨེཏྟཀམེཝ ཨཊྛཀཐཱཡཾ ཝུཏྟ’’ནྟི ཝཏྟབྦཾ སིཡཱ, ཨཐ ཁོ སུརཱཔཱནཊྛཀཐཱགཏཾ སུཏྟཔིཊཀཊྛཀཐཱགཏཉྩ ཨནེཀཝིདྷཾ ཝཙནཾ, མཧཱཝིཧཱརཝཱསཱིནཾ པརམྤརོཔདེསཉྩ གཧེཏྭཱ ཨཝོཙུཾ. བྷིནྣལདྡྷིཀཱནཾ ཨབྷཡགིརིཀཱདཱིནཾ མཏཉྷེཏཾ, ཡདིདཾ ཛཱནིཏྭཱ པིཝནྟསྶེཝ ཨཀུསལནྟི གཧཎཾ. ཏསྨཱ ཡཾ ཝུཏྟཾ ཀེཧིཙི ‘‘སཱམཎེརསྶ སུརཱཏི ཨཛཱནིཏྭཱ པིཝནྟསྶ པཱརཱཛིཀཾ ནཏྠི, ཨཀུསལཾ པན ཧོཏཱི’’ཏི, ཏཾ སུཝུཏྟནྟི གཧེཏབྦཾ.

ཡཉྩ སཱརཏྠདཱིཔནིཡཾ (སཱརཏྠ. ཊཱི. པཱརཱཛིཀཀཎྜ ༢.༤༢) ‘‘ཨཛཱནིཏྭཱ པིཝནྟསྶཱཔི སོཏཱཔནྣསྶ མུཁཾ སུརཱ ན པཝིསཏི ཀམྨཔཐཔྤཏྟཨཀུསལཙིཏྟེནེཝ པཱཏབྦཏོ’’ཏི ཀེཧིཙི ཝུཏྟཝཙནཾ ‘‘ན སུནྡར’’ནྟི པཊིཀྑིཔིཏྭཱ ‘‘བོདྷིསཏྟེ ཀུཙྪིགཏེ བོདྷིསཏྟམཱཏུ སཱིལཾ ཝིཡ ཧི ཨིདམྤི ཨརིཡསཱཝཀཱནཾ དྷམྨཏཱསིདྡྷནྟི ཝེདིཏབྦ’’ནྟི ཝཏྭཱ དྷམྨཏཱསིདྡྷཏྟཾཡེཝ སམཏྠེཏུཾ ‘‘བྷཝནྟརེཔི ཧི ཨརིཡསཱཝཀོ ཛཱིཝིཏཧེཏུཔི ནེཝ པཱཎཾ ཧནཏི, ན སུརཾ པིཝཏི. སཙེ པིསྶ སུརཉྩ ཁཱིརཉྩ མིསྶེཏྭཱ མུཁེ པཀྑིཔནྟི, ཁཱིརམེཝ པཝིསཏི, ན སུརཱ. ཡཐཱ ཀིཾ? ཡཐཱ ཀོཉྩསཀུཎཱནཾ ཁཱིརམིསྶཀེ ཨུདཀེ ཁཱིརམེཝ པཝིསཏི, ན ཨུདཀཾ. ཨིདཾ ཡོནིསིདྡྷནྟི ཙེ, ཨིདམྤི དྷམྨཏཱསིདྡྷནྟི ཝེདིཏབྦ’’ནྟི ཨིདཾ ཨཊྛཀཐཱཝཙནཾ དསྶིཏཾ, ཏམྤི ན ཡུཏྟམེཝ. ཡཐཱ ཧི བོདྷིསཏྟམཱཏུ སཱིལཾ ཝིཡ ཨརིཡསཱཝཀཱནཾ དྷམྨཏཱསིདྡྷནྟི ཨེཏྠ ¶ བོདྷིསཏྟམཱཏུ དྷམྨཏཱ ནཱམ བོདྷིསཏྟསྶ ཙ ཨཏྟནོ ཙ པཱརམིཏཱནུབྷཱཝེན ཨཀུསལཱནུཔྤཏྟིནིཡམོ ཨེཝ. ཏཐཱ ཨརིཡསཱཝཀཱནམྤི བྷཝནྟརེ པཱཎཱཏིཔཱཏཱདཱིནཾ དསནྣཾ ཀམྨཔཐཱནཾ ཨཉྙེསཉྩ ཨཔཱཡཧེཏུཀཱནཾ ཨཀུསལཱནཾ ཨཙྩནྟཔྤཧཱཡཀསྶ མགྒསྶ ཨཱནུབྷཱཝེན ཏཾཏཾསཱིལཝཱིཏིཀྐམཧེཏུཀསྶ ཨཀུསལསྶ ཨནུཔྤཏྟིནིཡམོ ཨེཝ དྷམྨཏཱ. ན ཧི སབྷཱཝཝཱདཱིནཾ དྷམྨཏཱ ཝིཡ ཨཧེཏུཀཏཱ ཨིདྷ དྷམྨཏཱ ནཱམ. ཡཐཱ ཝཱ ཨེཝཾདྷམྨཏཱནཡེ ཀཱརཎསྶ བྷཱཝེ ཨབྷཱཝེ ཙ ཀཱརིཡསྶ བྷཱཝོ ཨབྷཱཝོ ཙ དྷམྨཏཱ, ན ཨཧེཏུཨཔྤཙྩཡཱབྷཱཝཱབྷཱཝོ, ཨེཝམིདྷཱཔི པཱཎཱཏིཔཱཏཱདིཀམྨཔཐཱནཾ ཧེཏུབྷཱུཏསྶ ཀིལེསསྶ ཨཙྩནྟཱབྷཱཝེན ཏེསཾ ཨབྷཱཝོ, ཏདཝསེསཱནཾ ཨཀུསལཱནཾ ཧེཏུནོ བྷཱཝེན བྷཱཝོ ཙ དྷམྨཏཱ ¶ , ན ཨཧེཏུཀཏཱ. ཏསྨཱ ཨཔཱཡཧེཏུནོ རཱགསྶ ཨབྷཱཝེནེཝ ཨརིཡཱནཾ ཨཛཱནིཏྭཱཔི སུརཱཡ ཨནཛ྄ཛྷོཧརཎནྟི སུཝུཏྟམེཝིདཾ ཀེཧིཙི ‘‘ཨཛཱནིཏྭཱ པིཝནྟསྶཱཔི སོཏཱཔནྣསྶ མུཁཾ སུརཱ ན པཝིསཏི ཀམྨཔཐཔྤཏྟཨཀུསལཙིཏྟེནེཝ པཱཏབྦཏོ’’ཏི, ཏཾ ཀེན ཧེཏུནཱ ན སུནྡརཾ ཛཱཏནྟི ན ཉཱཡཏི, དྷམྨཏཱསིདྡྷནྟི ཝཱ ཀཐནེན ཀཐཾ ཏཾ པཊིཀྑིཏྟནྟི.

ཡམྤི དཱིགྷནིཀཱཡཊྛཀཐཱཡཾ (དཱི. ནི. ཨཊྛ. ༡.༣༥༢) ‘‘སུརཉྩ ཁཱིརཉྩ མིསྶེཏྭཱ…པེ… ཨིདཾ དྷམྨཏཱསིདྡྷ’’ནྟི ཝཙནཾ, ཏམྤི སུརཱཔཱནསྶ ཨཙིཏྟཀཔཀྑེཔི ཨཀུསལཙིཏྟཉྙེཝ སཱདྷེཏི. ཏཐཱ ཧི ‘‘བྷཝནྟརེཔི ཧི ཨརིཡསཱཝཀོ ཛཱིཝིཏཧེཏུཔི པཱཎཾ ན ཧནཏི, ནཱདིནྣཾ ཨཱདིཡཏི…པེ… ན སུརཾ པིཝཏཱི’’ཏི ཝུཏྟེ ‘‘པུརིམཱནཾ ཏཱཝ ཙཏུནྣཾ ཀམྨཔཐཱནཾ སཙིཏྟཀཏྟཱ ཝིརམཎཾ སུཀརཾ, པཙྪིམསྶ པན སུརཱཔཱནསྶ ཨཙིཏྟཀཏྟཱ ཀཐཾ ཝིརམཎཾ བྷཝེཡྻཱ’’ཏི ཙོདནཱསམྦྷཝཾ མནསིཀཏྭཱ ཝཏྠུཨཛཱནནཝསེན ཨཙིཏྟཀཏྟེཔི ཡསྨཱ ཀམྨཔཐཔྤཏྟཨཀུསལེནེཝ སུརཱ ཨཛ྄ཛྷོཧརིཏབྦཱ, ཏཱདིསཱི ཙ ཨཀུསལཔྤཝཏྟི ཨརིཡསཱཝཀསྶ མགྒེནེཝ ཧཏཱ, ཏསྨཱསྶ པརགལཾ སུརཱཡ པཝིསནཾ ནཏྠཱིཏི ཨཏྠཏོ གམྱམཱནཏྠཾ པརིཧཱརཝཙནཾ ཝདཏཱ ‘‘སཙེ པིསྶ སུརཉྩ ཁཱིརཉྩཱ’’ཏིཨཱདི ཝུཏྟཾ. ཏཏྠ ཁཱིརམེཝ པཝིསཏི, ན སུརཱཏི ཨིདཾ སུརཱཡ སབྦཐཱཔི པརགལཔྤཝེསཱབྷཱཝདསྶནཔརཾ, ན པན སུརཱམིསྶཁཱིརསྶ སུརཱཡ ཝིཡོཛནསཱམཏྠིཡདསྶནཔརཾ. ཨཡཉྷེཏྠ ཨདྷིཔྤཱཡོ – ཡདི ཧི སུརཱམིསྶེ ཁཱིརེ ཀིཉྩི པཝིསེཡྻ, ཁཱིརམེཝ པཝིསེཡྻ, ན སུརཱ. ཁཱིརེ པན སུརཱཡ ཨཝིཡུཏྟེ ན ཀིཉྩི པཝིསཏཱིཏི ¶ . ཨིདཾ ཡོནིསིདྡྷནྟི ཨུདཀསྶ མུཁེ ཨཔྤཝིསནཾ ཡོནིསིདྡྷཾ. ཡོནཱིཏི ཙེཏྠ ཛཱཏི ཨདྷིཔྤེཏཱ. ཏསྨཱ ཀོཉྩཛཱཏིཀཱནཾ མུཁཏུཎྜསངྑཱཏཱནཾ རཱུཔདྷམྨཱནཾ ཁཱིརམིསྶཨུདཀཛ྄ཛྷོཧརཎཧེཏུཏྟཱབྷཱཝེན ཏཾ ཨཔྤཝིསནཾ སིདྡྷནྟི ཨཏྠོ. ཨིདམྤི ཧི ཁཱིརམིསྶཱཡ སུརཱཡ ཁཱིརེ པཝིསནྟེཔི པརགལཱཔཝིསནནྟི. དྷམྨཏཱསིདྡྷནྟི ཨརིཡསཱཝཀསྶ ཨརཱུཔདྷམྨཱནཾ སུརཱཔིཝནཧེཏུབྷཱུཏཀིལེསསཧིཏཏྟཱབྷཱཝསངྑཱཏཱཡ དྷམྨཏཱཡ སིདྡྷཾ. ཨེཝམེཏྠ ཨཙིཏྟཀཔཀྑེཔི སུརཱཡ ཨཀུསལཙིཏྟེནེཝ པཱཏབྦཏོ ཨརིཡསཱཝཀཱནཾ ཨཔིཝནཾ སམཏྠིཏནྟི ཝེདིཏབྦཾ. ཨཐཱཔི སིཡཱ ཨཛཱནནཔཀྑེ ཨཀུསལཙིཏྟེན ཝིནཱཝ པཱཏབྦཏྟེཔི སུརཱཡ ཨཔིཝནཾ ཨརིཡཱནཾ དྷམྨཏཱཏི ¶ སམཏྠནཔརམེཏནྟི, ཏཾ ན, ཨཊྛཀཐཱཝཙནནྟརེཧི ཝིརུཛ྄ཛྷནཏོ. ཡཐཱ ཧི ཝཙནནྟརེཧི ན ཝིརུཛ྄ཛྷཏི, ཏཐཱཡེཝ ཨཏྠོ གཧེཏབྦོ.

ཨཔིཙ པཱཎཱཏིཔཱཏཱདཱིནཾ པཉྩནྣཾ ཀམྨཔཐཱནཾ བྷཝནྟརེཔི ཨཀརཎཾ ཨརིཡཱནཾ དྷམྨཏཱསཱིལམེཝ, ཏེསཉྩ ཡདི སཙིཏྟཀཏཾ སམཱནཾ. སུརཱཔཱནཾ ཝིཡ ཨིཏརཱནིཔི ཙཏྟཱརི ཨཛཱནནྟེནཱཔི ཨརིཡསཱཝཀེན ན ཀཏྟབྦཱནི སིཡུཾ, ཏཐཱ ཙ ཨཛཱནནྟཱནཾ ཨརིཡཱནཾ ཀུསལཱབྱཱཀཏཙིཏྟེཧིཔི ཝིརམཎཔརམཱརཎཔརསནྟཀགཧཎཱདཱིསུ ཀཱཡཝཙཱིཔཝཏྟི ན སམྤཛྫེཡྻ, ནོ ཙེ སམྤཛྫཏི, ཙཀྑུཔཱལཏྠེརསྶ ཙངྐམནེན པཱཎཝིཡོགསྶ, ཨུཔྤལཝཎྞཏྠེརིཡཱ བལཀྐཱརེན མགྒེནམགྒཕུསནསྶ ཙ པཝཏྟཏྟཱ. ཏསྨཱ སུརཱཔཱནསྶ ཨཙིཏྟཀཔཀྑེཔི ཨཀུསལེནེཝ པཱཏབྦཏཱཡ སུརཱ ཨརིཡཱནཾ པརགལཾ ན པཝིསཏཱིཏི ཝིསེསེཏྭཱ ཝུཏྟནྟི ཝེདིཏབྦཾ.

ནནུ ཝཏྠུཾ ཛཱནནྟསྶེཝ སབྦེ ཀམྨཔཐཱ ཝུཏྟཱཏི? ན, མིཙྪཱདིཊྛིཡཱ ཝིཔརཱིཏགྒཧཎེནེཝ པཝཏྟཏྟཱ. ཀཐཉྷི ནཱམ ཨསབྦཉྙུཾ སབྦཉྙུཏོ, ཨནིཙྩཱདིཾ ནིཙྩཱདིཏོ ཙ གཧཎནྟཱི དིཊྛི ཝཏྠུཾ ཝིཛཱནཱཏི. ཡདི ཧི ཛཱནེཡྻ, མིཙྪཱདིཊྛིཡེཝ ན སིཡཱ. སཱ ཙ ཀམྨཔཐེསུ གཎིཏཱཏི ཀུཏོ ཛཱནནྟསྶེཝ ཀམྨཔཐཔྤཝཏྟིནིཡམོ. ཨཐ སབྦཉྙུཾ སབྦཉྙཱུཏི གཎྷནྟཱིཔི ‘‘ཨཡཾ སཏྟོ’’ཏི ཏསྶ སརཱུཔགྒཧཎཏོ དིཊྛིཔི ཝཏྠུཾ ཝིཛཱནཱཏཱིཏི ཙེ? ན, སུརཱཔཱནསྶཔི ‘‘ཨཡཾ ན སུརཱ’’ཏི སརཱུཔགྒཧཎསྶ སམཱནཏྟཱ. ‘‘ཨཡ’’ནྟི ཙ ཝཏྠུཔརཱམསནེཔི ‘‘སུརཱ’’ཏི ཝིསེསཝིཛཱནནཱབྷཱཝཱ ན ཛཱནཱཏཱིཏི ཙེ? ‘‘ཨཡ’’ནྟི པུགྒལཏྟཾ ཛཱནནྟཱིཔི ‘‘ཨསབྦཉྙཱུ’’ཏིཔི ཝིསེསཛཱནནཱབྷཱཝཱ དིཊྛིཔི ཝཏྠུཾ ན ཛཱནཱཏཱིཏི སམཱནམེཝ. ཨེཝཉྷི ཏེསཾ ¶ བུདྡྷཱཏི ཨཧིཏོཏི ཨཧིཏཾ ཝཱ པཱུརཎཀསྶཔཱདིཾ ཧིཏོ པཊིགྷསྶ ཝཱ ཨནུནཡསྶ ཝཱ ཨུཔྤཱདནེཔི ཨེསེཝ ནཡོ. ཝིཔལླཱསཔུབྦཀཉྷི སབྦཾ ཨཀུསལཾ.

ཨཔིཙ སུརཱཡ པཱིཡམཱནཱཡ ནིཡམེན ཨཀུསལུཔྤཱདནཾ སབྷཱཝོ པཱིཏཱཡ ཝིཡ. ཁཱིརཱདིསཉྙཱཡ པཱིཏསུརསྶ པུགྒལསྶ མཱཏུབྷགིནིཨཱདཱིསུཔི རཱགདོསཱདིཨཀུསལཔྤབནྡྷོ ཝཏྠུསབྷཱཝེནེཝ ཨུཔྤཛྫཏི, ཨེཝཾ པཱིཡམཱནཀྑཎེཔི ཏིཁིཎོ རཱགོ ཨུཔྤཛྫཏེཝ, ཏེནེཝ སཱགཏཏྠེརསྶ ཨཛཱནིཏྭཱ པིཝནཀཱལེ པཉྩཱབྷིཉྙཱདིཛྷཱནཔརིཧཱནི, པཙྪཱ ཙ བུདྡྷཱདཱིསུ ཨགཱརཝཱདིཨཀུསལཔྤབནྡྷོ ཡཱཝ སུརཱཝིགམཱ པཝཏྟིཏྠ. ཏེནེཝ བྷགཝཱཔི ཏསྶ ཨགཱརཝཱདིཨཀཨུསལཔྤཝཏྟིདསྶནམུཁེན སུརཱདོསཾ པཀཱསེཏྭཱ སིཀྑཱཔདཾ པཉྙཔེསི. ན ཧི པཉྩནཱིཝརཎུཔྤཏྟིཾ ཝིནཱ ཛྷཱནཔརིཧཱནི ཧོཏི. ཏསྨཱ ཨཛཱནནྟསྶཱཔི སུརཱ པཱིཡམཱནཱ པཱིཏཱ ཙ ཨཏྟནོ སབྷཱཝེནེཝ ཨཀུསལུཔྤཱདིཀཱཏི ཨཡམཏྠོ སཱགཏཏྠེརསྶ ཛྷཱནཔརིཧཱནིཡཱ ཨནྭཡཏོཔི, ཨརིཡཱནཾ ཀིལེསཱབྷཱཝེན མུཁེན སུརཱཡ ཨཔྤཝེསསངྑཱཏབྱཏིརེཀཏོཔི སིཛ྄ཛྷཏཱིཏི ནིཊྛམེཏྠ གནྟབྦཾ, ཨེཝཾ གཧཎམེཝ ཧི ཝིབྷཛྫཝཱདཱིམཏཱནུསཱརཾ.

ཡཾ པན ‘‘ཛཱནིཏྭཱ པིཝནྟསྶེཝ ཨཀུསལ’’ནྟི གཧཎཾ, ཏཾ བྷིནྣལདྡྷིཀཱནཾ ཨབྷཡགིརིཀཱདཱིནམེཝ ¶ མཏཾ, ཏཾ པན གཎྛིཔདཀཱརཀཱདཱིཧི ‘‘པརཝཱདོ’’ཏི ཨཛཱནནྟེཧི ཨཏྟནོ མཏིཡཱ སཾསནྡིཏྭཱ ལིཁིཏཾ ཝིབྷཛྫཝཱདཱིམཎྜལམྤི པཝིསིཏྭཱ ཡཱཝཛྫཏནཱ སཱསནཾ དཱུསེཏི, པུརཱཔི ཀིར ཨིམསྨིམྤི དམིལ༹རཊྛེ ཀོཙི བྷིནྣལདྡྷིཀོ ནཱགསེནོ ནཱམ ཐེརོ ཀུཎྜལཀེསཱིཝཏྠུཾ པརཝཱདམཐནནཡདསྶནཏྠཾ དམིལ༹ཀབྦརཱུཔེན ཀཱརེནྟོ ‘‘ཨིམཾ སུརཱཔཱནསྶ ཛཱནིཏྭཱཝ པིཝནེ ཨཀུསལནཡཾ, ཨཉྙཉྩ དེསཀཱལཱདིབྷེདེན ཨནནྟམྤི ཉེཡྻཾ སབྦཉྙུཏཉྙཱཎཾ སལཀྑཎཝསེནེཝ ཉཱཏུཾ ན སཀྐོཏི ཉཱཎེན པརིཙྪིནྣཏྟེན ཉེཡྻསྶ ཨནནྟཏྟཧཱནིཔྤསངྒཏོ. ཨནིཙྩཱདིསཱམཉྙལཀྑཎཝསེནེཝ པན ཉཱཏུཾ སཀྐོཏཱི’’ཏི ཙ, ‘‘པརམཏྠདྷམྨེསུ ནཱམརཱུཔནྟིཨཱདིབྷེདོ ཝིཡ པུགྒལཱདིསམྨུཏིཔི ཝིསུཾ ཝཏྠུབྷེདོ ཨེཝཱ’’ཏི ཙ ཨེཝམཱདིཀཾ བཧུཾ ཝིཔརཱིཏཏྠནཡཾ ཀབྦཱཀཱརསྶ ཀཝིནོ ཨུཔདིསིཏྭཱ ཏསྨིཾ པབནྡྷེ ཀཱརཎཱབྷཱསེཧི སཏིཾ སམྨོཧེཏྭཱ པབནྡྷཱཔེསི, ཏཉྩ ཀབྦཾ ནིསྶཱཡ ཨིམཾ བྷིནྣལདྡྷིཀམཏཾ ཨིདྷ ཝིབྷཛྫཝཱདཱིམཏེ ¶ སམྨིསྶཾ ཙིརཾ པཝཏྟིཏྠ. ཏཾ པན པཙྪཱ ཨཱཙརིཡབུདྡྷཔྤིཡམཧཱཐེརེན བཱཧིརབྦྷརིཀཾ དིཊྛིཛཱལཾ ཝིགྷཱཊེཏྭཱ ཨིདྷ པརིསུདྡྷཾ སཱསནཾ པཏིཊྛཱཔེནྟེན སོདྷིཏམྤི སཱརཏྠདཱིཔནིཡཱ (སཱརཏྠ. ཊཱི. པཱརཱཛིཀཀཎྜ ༢.༤༢) ཝིནཡཊཱིཀཱཡ སུརཱཔཱནསྶ སཙིཏྟཀཔཀྑེཡེཝ ཙིཏྟཾ ཨཀུསལནྟི སམཏྠནཝཙནཾ ནིསྶཱཡ ཀེཧིཙི ཝིཔལླཏྟཙིཏྟེཧི པུན ཨུཀྑིཏྟསིརཾ ཛཱཏཾ, ཏཉྩ མཧཱཐེརེཧི ཝིནིཙྪིནིཏྭཱ གཱརཡ྄ཧཝཱདཾ ཀཏྭཱ མདྡིཏྭཱ ལདྡྷིགཱཧཀེ ཙ བྷིཀྑཱུ ཝིཡོཛེཏྭཱ དྷམྨེན ཝིནཡེན སཏྠུསཱསནེན ཙིརེནེཝ ཝཱུཔསམིཏཾ. ཏེནེཝེཏྠ མཡཾ ཨེཝཾ ཝིཏྠཱརཏོ ཨིདཾ པཊིཀྑིཔིམྷ ‘‘མཱ ཨཉྙེཔི ཝིབྷཛྫཝཱདིནོ ཨཡཾ ལདྡྷི དཱུསེསཱི’’ཏི. ཏསྨཱ ཨིདྷ ཝུཏྟཱནི ཨཝུཏྟཱནི ཙ ཀཱརཎཱནི སུཊྛུ སལླཀྑེཏྭཱ ཡཐཱ ཨཱགམཝིརོདྷོ ན ཧོཏི, ཏཐཱ ཨཏྠོ གཧེཏབྦོ.

སེསནྟི ཡསྶ ཝཏྠུཝིཛཱནནཙིཏྟེན སཙིཏྟཀཔཀྑེཔི ཙིཏྟཾ ཨཀུསལམེཝཱཏི ནིཡམོ ནཏྠི, ཏཾ སབྦནྟི ཨཏྠོ. རུནྡྷནྟཱིཏི ‘‘ཏིརཙྪཱནགཏིཏྠིཡཱ དོསོ ནཏྠཱི’’ཏིཨཱདིནཱ ཨནཱཔཏྟིཡཱ ལེསགྒཧཎཾ ནིཝཱརེནྟཱི. དྭཱརཾ པིདཧནྟཱིཏི ‘‘ཏཉྩ ཁོ མནུསྶིཏྠིཡཱ’’ཏིཨཱདིནཱ (པཱརཱ. ༤༡) ལེསགྒཧཎསྶ ཀཱརཎསངྑཱཏཾ དྭཱརཾ པིདཧནྟཱི. སོཏཾ པཙྪིནྡམཱནཱཏི ཏདུབྷཡལེསགྒཧཎདྭཱརཱནཾ ཝསེན ཨཝིཙྪིནྣཾ ཝཱིཏིཀྐམསོཏཾ པཙྪིནྡམཱནཱ. གཱལ༹ྷཏརཾ ཀརོནྟཱིཏི ཡཐཱཝུཏྟེཧི ཀཱརཎེཧི པཋམཔཉྙཏྟིསིདྡྷཾ ཨཱཔཏྟིཉྙེཝ དལ༹ྷཾ ཀརོནྟཱི, ཨནཱཔཏྟིཡཱ ཨོཀཱསཾ ཨདདམཱནཱཏི ཨཏྠོ. སཱ ཙ ཡསྨཱ ཝཱིཏིཀྐམཱབྷཱཝེ, ཨཝིསཡཏཱཡ ཨབྦོཧཱརིཀེ ཝཱིཏིཀྐམེ ཙ ལོཀཝཛྫེཔི སིཐིལཾ ཀརོནྟཱི ཨུཔྤཛྫཏི, ཏསྨཱ ཏཐཱ ཨུཔྤཏྟིཾ ཨུཔྤཏྟིཀཱརཎཉྩ དསྶེནྟོ ཨཱཧ ཨཉྙཏྲ ཨདྷིམཱནཱཏིཨཱདི. ཨཉྙཏྲ ཨདྷིམཱནཱཏི ཨིམིསྶཱ ཨནུཔཉྙཏྟིཡཱ ‘‘ཝཱིཏིཀྐམཱབྷཱཝཱ’’ཏི ཀཱརཎཾ ཝུཏྟཾ. ཨཉྙཏྲ སུཔིནནྟཱཏི ཨིམིསྶཱ ‘‘ཨབྦོཧཱརིཀཏྟཱ’’ཏི ཀཱརཎཾ ཝུཏྟཾ. ཏཏྠ ཝཱིཏིཀྐམཱབྷཱཝཱཏི པཱཔིཙྪཱཡ ཨཝིཛྫམཱནསྶ ཨུཏྟརིམནུསྶདྷམྨསྶ ཝིཛྫམཱནཏོ ¶ པཀཱསནཝསཔྤཝཏྟཝིསཾཝཱདནཱདྷིཔྤཱཡསངྑཱཏསྶ ཝཱིཏིཀྐམསྶ ཨབྷཱཝཏོ. ཨདྷིམཱནིཀསྶ ཧི ཨནདྷིགཏེ ཨདྷིགཏསཉྙིཏཱཡ ཡཐཱཝུཏྟཝཱིཏིཀྐམོ ནཏྠི. ཨབྦོཧཱརིཀཏྟཱཏི ‘‘ཨཏྠེསཱ, བྷིཀྑཝེ, ཙེཏནཱ, སཱ ཙ ཁོ ཨབྦོཧཱརིཀཱ’’ཏི (པཱརཱ. ༢༣༥) ཝཙནཏོ མོཙནསྶཱདཙེཏནཱཡ ཨུཔཀྐམནསྶ ཙ ཝིཛྫམཱནཏྟེཔི ཐིནམིདྡྷེན ཨབྷིབྷཱུཏཏཱཡ ¶ ཨཝསཏྟེན ཨབྦོཧཱརིཀཏྟཱ, ཨཱཔཏྟིཀཱརཎཝོཧཱརཱབྷཱཝཱཏི ཨཏྠོ. ཝཱ-སདྡོ ཙེཏྠ སམུཙྩཡཏྠོ དཊྛབྦོ, ‘‘ཨབྦོཧཱརིཀཏྟཱ ཙཱ’’ཏི ཝཱ པཱཋོ. ཝུཏྟཱཏི དུཝིདྷཱཔི ཙེསཱ ཨནུཔཉྙཏྟི ཨནཱཔཏྟིཀརཱ ཝུཏྟཱཏི ཨདྷིཔྤཱཡོ.

ཨཀཏེ ཝཱིཏིཀྐམེཏི ཨཱཔདཱསུཔི བྷིཀྑཱུཧི སིཀྑཱཔདཝཱིཏིཀྐམེ ཨཀཏེ, ཀུཀྐུཙྩཱ ན བྷུཉྫིཾསཱུཏིཨཱདཱིསུ ཝིཡ ཝཱིཏིཀྐམཾ ཨཀཏྭཱ བྷིཀྑཱུཧི ཨཏྟནོ དུཀྑུཔྤཏྟིཡཱ ཨཱརོཙིཏཱཡཱཏི ཨཏྠོ. སིཐིལཾ ཀརོནྟཱིཏི པཋམཾ སཱམཉྙཏོ བདྡྷསིཀྑཱཔདཾ མོཙེཏྭཱ ཨཏྟནོ ཝིསཡེ ཨནཱཔཏྟིཀརཎཝསེན སིཐིལཾ ཀརོནྟཱི. དྭཱརཾ དདམཱནཱཏི ཨནཱཔཏྟིཡཱ དྭཱརཾ དདམཱནཱ. ཨཔརཱཔརམྤི ཨནཱཔཏྟིཾ ཀུརུམཱནཱཏི དིནྣེན ཏེན དྭཱརེན ཨུཔརཱུཔརི ཨནཱཔཏྟིབྷཱཝཾ དཱིཔེནྟཱི. པཉྙཏྟེཔི སིཀྑཱཔདེ ཨུདཱཡིནཱ ‘‘མུཧུཏྟིཀཱཡ ཝེསིཡཱ ན དོསོ’’ཏི ལེསེན ཝཱིཏིཀྐམིཏྭཱ སཉྩརིཏྟཱཔཛྫནཝཏྠུསྨིཾ (པཱརཱ. ༢༩༦ ཨཱདཡོ) པཉྙཏྟཏྟཱ ‘‘ཀཏེ ཝཱིཏིཀྐམེ’’ཏི ཝུཏྟཾ. པཉྙཏྟིགཏིཀཱཏི ཨཏྠཏོ མཱུལཔཉྙཏྟིཡེཝཱཏི ཨདྷིཔྤཱཡོ.

མཀྐཊཱིཝཏྠུཀཐཱཝཎྞནཱནཡོ ནིཊྛིཏོ.

སནྠཏབྷཱཎཝཱརོ

ཝཛྫིཔུཏྟཀཝཏྠུཀཐཱཝཎྞནཱ

༤༣-༤༤. ཝཛྫིཔུཏྟཀཝཏྠུཀཐཱཡ པཱལི༹ཡཾ ‘‘ཝེསཱལིཀཱ…པེ… མེཐུནཾ དྷམྨཾ པཊིསེཝིཾསཱུ’’ཏི ཨེཏྠ ཏེ ཉཱཏིཀུལཾ གནྟྭཱ གིཧིལིངྒཾ གཧེཏྭཱ ‘‘གིཧིབྷཱུཏཱ མཡ’’ནྟི སཉྙཱཡ མེཐུནཾ པཊིསེཝིཾསཱུཏི གཧེཏབྦཾ, ཏེནཱཧ ཉཱཏིབྱསནེནཔི ཕུཊྛཱཏིཨཱདི. ཉཱཏཱིནཾ ཝིནཱསོ རཱཛདཎྜཱདིཀཱརཎེན ཧོཏཱིཏི ཨཱཧ རཱཛདཎྜཨིཙྩཱདི. དྷཉྙཧིརཉྙདཱསིདཱསགོམཧིཾསཱདིདྷནཱནི བྷོགཱ ནཱམ, ཏེསམྤི རཱཛདཎྜཱདིནཱཝ ཝིནཱསོཏི ཨཱཧ ‘‘ཨེས ནཡོ དུཏིཡཔདེཔཱི’’ཏི. ན སབྦཉྙུབུདྡྷོཏིཨཱདིནཱ ¶ ཏཱིསུ ཝཏྠཱུསུ ཨཔྤསནྣཱཝ སཱསནེ ཨབྷབྦཱཏི སཉྙཱཡ ཨཏྟནོ བྷབྦཏཾ པཀཱསེནྟཱ ན མཡནྟིཨཱདིམཱཧཾསཱུཏི ཝེདིཏབྦཾ. ‘‘ཨཊྛཏིཾསཱརམྨཎེསཱུ’’ཏི པཱལི༹ཡཾ ཨནཱགཏེ ཨཱལོཀཱཀཱསཀསིཎེ ཝཛྫེཏྭཱ ཝུཏྟཾ, ཏེཧི པན ¶ སདྡྷིཾ ཙཏྟཱལཱིས ཧོནྟི. ཝིབྷཏྟཱ ཀུསལཱ དྷམྨཱཏི ‘‘ཨིམསྨིཾ ཨཱརམྨཎེ ཨིདཾ ཧོཏཱི’’ཏི ཝིབྷཱགསོ དསྶིཏཱ སཨུཔཙཱརཛ྄ཛྷཱནཱ མཧགྒཏཀུསལཱ དྷམྨཱ. གིཧིཔལིབོདྷནྟི སཧསོཀིཏཱདིཝསེན གིཧཱིསུ བྱཱཝཊཏཾ. ཨཱཝཱསཔལིབོདྷནྟི སེནཱསནེསུ ནཝཀམྨཱདིཝསེན ནིཙྩབྱཱཝཊཏཾ. དུཔྤརིཙྩཱགཱནཾ ཨིམེསཾ དྭིནྣཾ པལིབོདྷཱནཾ ཝསེན སབྦེཔི པལིབོདྷཱ སངྒཧིཏཱ ཨེཝཱཏི ཝེདིཏབྦཾ.

ཡེནཱཏི ཀཱརཎེན. ཨསཾཝཱསོཏི ཨིདཾ ཏསྨིཾ ཨཏྟབྷཱཝེ ཀེནཙིཔི པརིཡཱཡེན བྷིཀྑུ ཧུཏྭཱ བྷིཀྑཱུཧི སདྡྷིཾ སཾཝཱསཾ ནཱརཧཏཱིཏི ཨིམམཏྠཾ སནྡྷཱཡ ཝུཏྟནྟི ཨཱཧ ‘‘ཨསཾཝཱསོ’’ཏི. པཉྙཏྟཾ སམཱུཧནེཡྻཱཏི ‘‘སོ ཨཱགཏོ ན པབྦཱཛེཏབྦོ’’ཏི ཨཝཏྭཱ ‘‘ན ཨུཔསམྤཱདེཏབྦོ’’ཏི ཨེཏྟཀསྶེཝ ཝུཏྟཏྟཱ པཱརཱཛིཀསྶ སཱམཎེརབྷཱུམི ཨནུཉྙཱཏཱཏི ཝིཉྙཱཡཏི, ཏེནཱཧ སཱམཎེརབྷཱུམིཡཾ པན ཋིཏོཏིཨཱདི. ‘‘ཡོ པན བྷིཀྑཱུ’’ཏི ཝུཏྟཏྟཱ (པཱརཱ. ༣༩) པཙྩཀྑཱཏསིཀྑོ ཡསྨཱ བྷིཀྑུ ན ཧོཏི, མེཐུནསེཝནེ ཙ པཱརཱཛིཀཾ ནཱཔཛྫཏི, ཏསྨཱསྶ ‘‘ཨཱགཏོ ཨུཔསམྤཱདེཏབྦོ’’ཏི ཨུཔསམྤདཾ ཨནུཛཱནནྟོ པཱརཱཛིཀཾ ན སམཱུཧནཏི ནཱམ, ཏེནཱཧ ‘‘བྷིཀྑུབྷཱཝེ ཋཏྭཱ ཨཝིཔནྣསཱིལཏཱཡཱ’’ཏི. ཨུཏྟམཏྠཾ ཨརཧཏྟཾ, ནིབྦཱནམེཝ ཝཱ.

ཙཏུབྦིདྷཝིནཡཱདིཀཐཱཝཎྞནཱ

༤༥. ནཱིཧརིཏྭཱཏི པཱལི༹ཏོ ཨུདྡྷརིཏྭཱ, ཏཐཱ ཧི ‘‘པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ ནཱནུཡུཉྫིཏབྦཾ. ཀཏམེཧི པཉྩཧི? སུཏྟཾ ན ཛཱནཱཏི, སུཏྟཱནུལོམཾ ན ཛཱནཱཏཱི’’ཏིཨཱདིཔཱལི༹ཏོ སུཏྟཾ སུཏྟཱནུལོམཉྩ ནཱིཧརིཾསུ. ‘‘ཨནཱཔཏྟི ཨེཝཾ ཨམྷཱཀཾ ཨཱཙརིཡཱནཾ ཨུགྒཧོ པརིཔུཙྪཱཏི བྷཎཏཱི’’ཏི ཨེཝམཱདིཏོ ཨཱཙརིཡཝཱདཾ. ‘‘ཨཱཡསྨཱ ཨུཔཱལི ཨེཝམཱཧ – ‘ཨནཱཔཏྟི, ཨཱཝུསོ, སུཔིནནྟེནཱ’ཏི’’ ཨེཝམཱདིཏོ ཨཏྟནོ མཏིཾ ནཱིཧརིཾསུ, སཱ ཙ ཐེརསྶ ཨཏྟནོམཏི སུཏྟེན སངྒཧིཏཏྟཱ སུཏྟཾ ཛཱཏཾ, ཨེཝམཉྙཱཔི སུཏྟཱདཱིཧི སངྒཧིཏཱཝ གཧེཏབྦཱ, ནེཏརཱཏི ཝེདིཏབྦཾ. ཨཐ ཝཱ ནཱིཧརིཏྭཱཏི ཝིབྷཛིཏྭཱ སཱཊྛཀཐཾ སཀལཾ ཝིནཡཔིཊཀཾ སུཏྟཱདཱིསུ ཙཏཱུསུ པདེསེསུ པཀྑིཔིཏྭཱ ཙཏུདྷཱ ཝིབྷཛིཏྭཱ ཝིནཡཾ པཀཱསེསུཾ ¶ ཏབྦིནིམུཏྟསྶ ཨབྷཱཝཱཏི ཨདྷིཔྤཱཡོ. ཝུཏྟནྟི ནཱགསེནཏྠེརེན མིལིནྡཔཉྷེ ཝུཏྟཾ. ཀཎྛཱདིཝཎྞུཔྤཏྟིཊྛཱནཀརཎཱདཱིཧི ཨཱཧརིཏྭཱ ཨཏྟནོ ཝཙཱིཝིཉྙཏྟིཡཱཝ བྷཱསིཏཝཙནཾ ཨཱཧཙྩཔདཾ. རསོཏི སཱརོ ‘‘པཏྟརསོ’’ཏིཨཱདཱིསུ (དྷ. ས. ༦༢༨-༦༣༠) ཝིཡ, པཊིཀྑིཏྟཨནུཉྙཱཏསུཏྟསཱརོཏི ¶ ཨཏྠོ, རསོཏི ཝཱ ལཀྑཎཾ པཊིཝཏྠུཀཾ ཨནུདྡྷརིཏྭཱ ལཀྑཎཱནུལོམེན ཝུཏྟཏྟཱ. དྷམྨསངྒཱཧཀཱདིཨཱཙརིཡཝཾསེན ཨཱབྷཏཱ ཨཊྛཀཐཱ ཨཱཙརིཡཝཾསོཏི ཨཱཧ ‘‘ཨཱཙརིཡཝཾསོཏི ཨཱཙརིཡཝཱདོ’’ཏི.

ཝིནཡཔིཊཀེ པཱལཱི༹ཏི ཨིདྷ ཨདྷིཀཱརཝསེན ཝུཏྟཾ. སེསཔིཊཀེསུཔི སུཏྟཱདིཙཏུནཡཱ ཡཐཱནུརཱུཔཾ ལབྦྷནྟེཝ. མཧཱཔདེསཱཏི མཧཱཨོཀཱསཱ མཧཱཝིསཡཱ, ཏེ ཨཏྠཏོ ‘‘ཡཾ, བྷིཀྑཝེ’’ཏིཨཱདིཔཱལི༹ཝསེན ཨཀཔྤིཡཱནུལོམཏོ ཀཔྤིཡཱནུལོམཏོ ཙ པུགྒལེཧི ནཡཏོ ཏཐཱ ཏཐཱ གཡ྄ཧམཱནཱ ཨཏྠནཡཱ ཨེཝ. ཏེ ཧི བྷགཝཏཱ སརཱུཔཏོ ཨཝུཏྟེསུཔི པཊིཀྑིཏྟཱནུལོམེསུ, ཨནུཉྙཱཏཱནུལོམེསུ ཙ སེསེསུ ཀིཙྩེསུ ནིཝཏྟིཔཝཏྟིཧེཏུཏཱཡ མཧཱགོཙརཱཏི ‘‘མཧཱཔདེསཱ’’ཏི ཝུཏྟཱ, ན པན ‘‘ཡཾ, བྷིཀྑཝེ, མཡཱ ཨིདཾ ན ཀཔྤཏཱི’’ཏིཨཱདིནཱ ཝུཏྟཱ སཱདྷིཔྤཱཡཱ པཱལི༹ཡེཝ ཏསྶཱ སུཏྟེ པཝིཊྛཏྟཱ. ‘‘སུཏྟཱནུལོམམྤི སུཏྟེ ཨོཏཱརེཏབྦཾ…པེ… སུཏྟམེཝ བལཝཏར’’ནྟི (པཱརཱ. ཨཊྛ. ༡.༤༥) ཧི ཝུཏྟཾ, ན ཧེསཱ སཱདྷིཔྤཱཡཱ པཱལི༹ སུཏྟེ ཨོཏཱརེཏབྦཱ, ན གཧེཏབྦཱ ཝཱ ཧོཏི, ཡེནཱཡཾ སུཏྟཱནུལོམཾ སིཡཱ. ཏསྨཱ ཨིམཾ པཱལི༹ཨདྷིཔྤཱཡཾ ནིསྶཱཡ པུགྒལེཧི གཧིཏཱ ཡཐཱཝུཏྟཨཏྠཱཝ སུཏྟཱནུལོམཾ. ཏཔྤཀཱསཀཏྟཱ པན ཨཡཾ པཱལི༹པི སུཏྟཱནུལོམནྟི གཧེཏབྦཾ, ཏེནཱཧ ཡེ བྷགཝཏཱ ཨེཝཾ ཝུཏྟཱཏིཨཱདི. ཡཾ བྷིཀྑཝེཏིཨཱདིཔཱལི༹ནཡེན ཧི པུགྒལེཧི གཧེཏབྦཱ ཡེ ཨཀཔྤིཡཱནུལོམཱདཡོ ཨཏྠཱ ཝུཏྟཱ, ཏེ མཧཱཔདེསཱཏི ཨཏྠོ.

བྷགཝཏོ པཀིཎྞཀདེསནཱབྷཱུཏཱ ཙ སུཏྟཱནུལོམབྷཱུཏཱ ཙ ཨཊྛཀཐཱ. ཡསྨཱ དྷམྨསངྒཱཧཀཏྠེརེཧི པཱལི༹ཝཎྞནཱཀྐམེན སངྒཧེཏྭཱ ཝུཏྟཱ, ཏསྨཱ ‘‘ཨཱཙརིཡཝཱདོ’’ཏི ཝུཏྟཱ, ཨེཏེན ཙ ཨཊྛཀཐཱ སུཏྟསུཏྟཱནུལོམེསུ ཨཏྠཏོ སངྒཡ྄ཧཏཱིཏི ཝེདིཏབྦཱ. ཡཐཱ ཙ ཨེསཱ, ཨེཝཾ ཨཏྟནོམཏིཔི པམཱཎབྷཱུཏཱ. ན ཧི བྷགཝཏོ ཝཙནཾ ཝཙནཱནུལོམཉྩ ཨནིསྶཱཡ ཨགྒསཱཝཀཱདཡོཔི ཨཏྟནོ ཉཱཎབལེན སུཏྟཱབྷིདྷམྨཝིནཡེསུ ¶ ཀཉྩི སམྨུཏིཔརམཏྠབྷེདཾ ཨཏྠཾ ཝཏྟུཾ སཀྐོནྟི, ཏསྨཱ སབྦམྤི ཝཙནཾ སུཏྟེ སུཏྟཱནུལོམེ ཙ སངྒཡ྄ཧཏི. ཝིསུཾ པན ཨཊྛཀཐཱདཱིནཾ སངྒཧིཏཏྟཱ ཏདཝསེསཾ སུཏྟསུཏྟཱནུལོམཏོ གཧེཏྭཱ ཙཏུདྷཱ ཝིནཡོ ནིདྡིཊྛོ. སུཏྟཱདཡོ ནིསྶཱཡེཝ པཝཏྟཱཔི ཨཏྟནོམཏི ཏེསུ སརཱུཔེན ཨནཱགཏཏྟཱ ཝུཏྟཾ ‘‘སུཏྟསུཏྟཱནུལོམཨཱཙརིཡཝཱདེ མུཉྩིཏྭཱ’’ཏི, ཏེནཱཧ ‘‘ཨནུབུདྡྷིཡཱ ནཡགྒཱཧེནཱ’’ཏི. ཏཏྠ སུཏྟཱདཱིནི ཨནུགཏཱཡ ཨེཝ བུདྡྷིཡཱ ཏེཧི ལདྡྷནཡགྒཱཧེན ཙཱཏི ཨཏྠོ.

ཐེརཝཱདོཏི མཧཱསུམཏྠེརཱདཱིནཾ གཱཧོ. སུཏྟཱདིཾ ནིསྶཱཡེཝ ཝིཔརཱིཏཏོཔི ཨཏྟནོམཏི ཨུཔྤཛྫཏཱིཏི ¶ ཨཱཧ ཏཾ པནཱཏིཨཱདི. ཨཏྠེནཱཏི ཨཏྟནཱ ནཡགྒཧིཏེན ཨཏྠེན. པཱལི༹ནྟི ཨཏྟནོ གཱཧསྶ ནིསྶཡབྷཱུཏཾ སཱཊྛཀཐཾ པཱལི༹ཾ. པཱལི༹ཡཱཏི ཏཔྤཊིཀྑེཔཏྠཾ པརེནཱཧཊཱཡ སཱཊྛཀཐཱཡ པཱལི༹ཡཱ, ཨཏྟནཱ གཧིཏཾ ཨཏྠཾ ནིསྶཱཡ པཱལི༹ཉྩ སཾསནྡིཏྭཱཏི ཨཏྠོ. ཨཱཙརིཡཝཱདེཏི ཨཏྟནཱ པརེན ཙ སམུདྡྷཊཨཊྛཀཐཱཡ. ཨོཏརཏི ཙེཝ སམེཏི ཙཱཏི ཨཏྟནཱ ཨུདྡྷཊེཧི སཾསནྡནཝསེན ཨོཏརཏི, པརེན ཨུདྡྷཊེན སམེཏི. སབྦདུབྦལཱཏི ཨསབྦཉྙུཔུགྒལསྶ དོསཝཱསནཱཡ ཡཱཐཱཝཏོ ཨཏྠསམྤཊིཔཏྟིཨབྷཱཝཏོ ཝུཏྟཾ. པམཱདཔཱཋཝསེན ཨཱཙརིཡཝཱདསྶ སུཏྟཱནུལོམེན ཨསཾསནྡནཱཔི སིཡཱཏི ཨཱཧ ‘‘ཨིཏརོ ན གཧེཏབྦོ’’ཏི.

སམེནྟམེཝ གཧེཏབྦནྟི ཡེ སུཏྟེན སཾསནྡནྟི, ཨེཝརཱུཔཱཝ ཨཏྠཱ མཧཱཔདེསཏོ ཨུདྡྷརིཏབྦཱཏི དསྶེཏི ཏཐཱ ཏཐཱ ཨུདྡྷཊཨཏྠཱནམེཝ སུཏྟཱནུལོམཏྟཱ, ཏེནཱཧ ‘‘སུཏྟཱནུལོམཏོ ཧི སུཏྟམེཝ བལཝཏར’’ནྟི. ཨཔྤཊིཝཏྟིཡནྟི ཨཔྤཊིབཱཧིཡཾ. ཀཱརཀསངྒྷསདིསནྟི པམཱཎཏྟཱ སངྒཱིཏིཀཱརཀསངྒྷསདིསཾ. བུདྡྷཱནཾ ཋིཏཀཱལསདིསནྟི དྷརམཱནཀབུདྡྷསདིསནྟི ཨཏྠོ. སཀཝཱདཱི སུཏྟཾ གཧེཏྭཱ ཀཐེཏཱིཏིཨཱདཱིསུ ཡོ ཡཐཱབྷཱུཏམཏྠཾ གཧེཏྭཱ ཀཐནསཱིལོ, སོ སཀཝཱདཱི. སུཏྟནྟི སངྒཱིཏིཏྟཡཱརུལ༹ྷཾ པཱལི༹ཝཙནཾ. པརཝཱདཱིཏི མཧཱཝིཧཱརཝཱསཱི ཝཱ ཧོཏུ ཨཉྙནིཀཱཡཝཱསཱི ཝཱ, ཡོ ཝིཔརཱིཏཏོ ཨཏྠཾ གཧེཏྭཱ ཀཐནསཱིལོ, སོཝ ཨིདྷ ‘‘པརཝཱདཱི’’ཏི ཝུཏྟོ. སུཏྟཱནུལོམནྟི སངྒཱིཏིཏྟཡཱརུལ༹ྷཾ ཝཱ ཨནཱརུལ༹ྷཾ ཝཱ ཡཾཀིཉྩི ཝིཔལླཱསཏོ ཝཱ ཝཉྩནཱཡ ཝཱ ‘‘སངྒཱིཏིཏྟཡཱགཏམིད’’ནྟི དསྶིཡམཱནཾ སུཏྟཱནུལོམཾ. ཀེཙི ‘‘ཨཉྙནིཀཱཡེ སུཏྟཱནུལོམ’’ནྟི ¶ ཝདནྟི, ཏཾ ན ཡུཏྟཾ སཀཝཱདཱིཔརཝཱདཱིནཾ ཨུབྷིནྣམྤི སངྒཱིཏིཏྟཡཱརུལ༹ྷསུཏྟཱདཱིནཾ ཨེཝ གཧེཏབྦཏོ. ཏཐཱ ཧི ཝཀྑཏི ‘‘ཏིསྶོ སངྒཱིཏིཡོ ཨཱརུལ༹ྷཾ པཱལི༹ཨཱགཏཾ པཉྙཱཡཏི, གཧེཏབྦ’’ནྟིཨཱདི. ན ཧི སཀཝཱདཱི ཨཉྙནིཀཱཡསུཏྟཱདིཾ པམཱཎཏོ གཎྷཱཏི, ཡེན ཏེསུ སུཏྟཱདཱིསུ དསྶིཏེསུ ཏཏྠ ཋཱཏབྦཾ བྷཝེཡྻ, ཝཀྑཏི ཙ ‘‘པརོ ཏསྶ ཨཀཔྤིཡབྷཱཝསཱདྷཀཾ སུཏྟཏོ བཧུཾ ཀཱརཎཉྩ ཝིནིཙྪཡཉྩ དསྶེཏི…པེ… ‘སཱདྷཱུ’ཏི སམྤཊིཙྪིཏྭཱ ཨཀཔྤིཡེཡེཝ ཋཱཏབྦ’’ནྟི (པཱརཱ. ཨཊྛ. ༡.༤༥). ཏསྨཱ པརཝཱདིནཱཔི སངྒཱིཏིཏྟཡེ ཨནཱརུལ༹ྷམྤི ཨནཱརུལ༹ྷམིཙྩེཝ དསྶཱིཡཏི, ཀེཝལཾ ཏསྶ ཏསྶ སུཏྟཱདིནོ སངྒཱིཏིཏྟཡེ ཨནཱགཏསྶ ཀཱུཊཏཱ, ཨཱགཏསྶ ཙ བྱཉྫནཙྪཱཡཱཡ ཨཉྙཐཱ ཨདྷིཔྤཱཡཡོཛནཱ ཙ ཝིསེསོ. ཏཏྠ ཙ ཡཾ ཀཱུཊཾ, ཏཾ ཨཔནཱིཡཏི. ཡཾ ཨཉྙཐཱ ཡོཛིཏཾ, ཏསྶ ཝིཔརཱིཏཏཱསནྡསྶནཏྠཾ ཏདཉྙེན སུཏྟཱདིནཱ སཾསནྡནཱ ཀརཱིཡཏི. ཡོ པན པརཝཱདིནཱ གཧིཏོ ཨདྷིཔྤཱཡོ སུཏྟནྟཱདིནཱ སཾསནྡཏི, སོ སཀཝཱདིནཱཔི ཨཏྟནོ གཱཧཾ ཝིསྶཛྫེཏྭཱ གཧེཏབྦོཏི ཨུབྷིནྣམྤི སངྒཱིཏིཏྟཡཱགཏམེཝ སུཏྟཱདིཔམཱཎནྟི ཝེདིཏབྦཾ. ཏེནེཝ ཀཐཱཝཏྠུཔྤཀརཎེ སཀཝཱདེ པཉྩ སུཏྟསཏཱནི པརཝཱདེ པཉྩཱཏི (དྷ. ས. ཨཊྛ. ནིདཱནཀཐཱ; ཀཐཱ. ཨཊྛ. ནིདཱནཀཐཱ) ¶ སུཏྟསཧསྶམྤི ཨདྷིཔྤཱཡགྒཧཎནཱནཏྟེན སངྒཱིཏིཏྟཡཱགཏམེཝ གཧིཏཾ, ན ནིཀཱཡནྟརེ ཀིཉྩཱིཏི.

ཁེཔནྟི ‘‘ཀིཾ ཨིམིནཱ’’ཏི པཊིཀྑེཔཾ ཚཌྜནཾ. གརཧནྟི ‘‘ཀིམེས བཱལོ ཛཱནཱཏཱི’’ཏི ནིནྡནཾ. སུཏྟེ ཨོཏཱརེཏབྦནྟི ཡསྶ སུཏྟསྶ ཨནུལོམནཏོ ཨིདཾ སུཏྟཱནུལོམཾ ཨཀཱསི, ཏསྨིཾ, ཏདནུརཱུཔེ ཝཱ ཨཉྙཏརསྨིཾ སུཏྟེ ཨཏྟནཱ གཧིཏཾ སུཏྟཱནུལོམཾ ཨཏྠཏོ སཾསནྡནཝསེན ཨོཏཱརེཏབྦཾ, ‘‘ཨིམིནཱ ཙ ཨིམིནཱ ཙ ཀཱརཎེན ཨིམསྨིཾ སུཏྟེ སཾསནྡཏཱི’’ཏི སཾསནྡིཏྭཱ དསྶེཏབྦནྟི ཨཏྠོ. ཨཡནྟི སཀཝཱདཱི. པརོཏི པརཝཱདཱི. ཨཱཙརིཡཝཱདོ སུཏྟེ ཨོཏཱརེཏབྦོཏི ཡསྶ སུཏྟསྶ ཝཎྞནཱཝསེན ཨཡཾ ཨཱཙརིཡཝཱདོ པཝཏྟོ, ཏསྨིཾ, ཏཱདིསེ ཙ ཨཉྙཏརསྨིཾ སུཏྟེ པུབྦཱཔརཨཏྠསཾསནྡནཝསེན ཨོཏཱརེཏབྦཾ. གཱརཡ྄ཧཱཙརིཡཝཱདོཏི པམཱདལིཁིཏོ, བྷིནྣལདྡྷིཀེཧི ཝཱ ཋཔིཏོ, ཨེས ནཡོ སབྦཏྠ.

ཡཾ ཀིཉྩི ཀཱུཊསུཏྟཾ བཱཧིརཀསུཏྟཱདིཝཙནཾ ན གཧེཏབྦནྟི དསྶེཏུཾ སུཏྟཾ སུཏྟཱནུལོམེ ཨོཏཱརེཏབྦནྟིཨཱདི ཝུཏྟཾ. གུལ༹ྷཝེསྶནྟརཱདཱིནི མཧཱསངྒྷིཀཱདིབྷིནྣལདྡྷིཀཱནཾ པཀརཎཱནི. ཨཱདི-སདྡེན གུལ༹ྷཨུམྨགྒཱདཱིནཾ གཧཎཾ ¶ . སཀཝཱདཱི སུཏྟཾ གཧེཏྭཱ ཀཐེཏི, པརཝཱདཱིཔི སུཏྟནྟིཨཱདིནཱ ཨཉྙེཔི ཝཱདཱལམྦནཱ ཝུཏྟནཡེན སཀྐཱ ཉཱཏུནྟི ཨིདྷ ན ཝུཏྟཱ.

ཨེཝཾ སུཏྟསུཏྟཱནུལོམཱདིམུཁེན སཱམཉྙཏོ ཝིཝཱདཾ དསྶེཏྭཱ ཨིདཱནི ཝིསེསཏོ ཝིཝཱདཝཏྠུཾ ཏབྦིནིཙྪཡམུཁེན སུཏྟཱདཱིནཉྩ དསྶེཏུཾ ཨཐ པནཱཡཾ ཀཔྤིཡནྟིཨཱདི ཝུཏྟཾ. སུཏྟེ ཙ སུཏྟཱནུལོམེ ཙཱཏི ཨེཏྠ ཙ-ཀཱརོ ཝིཀཔྤཏྠོ, ཏེན ཨཱཙརིཡཝཱདཱདཱིནམྤི སངྒཧོ, ཏེནཱཧ ‘‘ཀཱརཎཉྩ ཝིནིཙྪཡཉྩ དསྶེཏཱི’’ཏི. ཏཏྠ ཀཱརཎནྟི སུཏྟཱདིནཡཾ ནིསྶཱཡ ཨཏྟནོམཏིཡཱ ཨུདྡྷཊཾ ཧེཏུཾ. ཝིནིཙྪཡནྟི ཨཊྛཀཐཱཝིནིཙྪཡཾ. ཀཱརཎཙྪཱཡཱཏི སུཏྟཱདཱིསུ ‘‘ཀཔྤིཡ’’ནྟི གཱཧསྶ, ‘‘ཨཀཔྤིཡ’’ནྟི གཱཧསྶ ཙ ནིམིཏྟབྷཱུཏཾ ཀིཙྪེན པཊིཔཱདནཱིཡཾ ཨཝིབྷཱུཏཀཱརཎཾ ཀཱརཎཙྪཱཡཱ, ཀཱརཎཔཏིརཱུཔཀནྟི ཨཏྠོ. ཝིནཡཉྷི པཏྭཱཏི ཨིམསྶ ཝིཝརཎཾ ཀཔྤིཡཱཀཔྤིཡཝིཙཱརཎམཱགམྨཱཏི. རུནྡྷིཏབྦནྟི ཀཔྤིཡསཉྙཱཡ ཝཱིཏིཀྐམཀརཎཾ རུནྡྷིཏབྦཾ, ཏཾནིཝཱརཎཙིཏྟཾ དལ༹ྷཏརཾ ཀཱཏབྦཾ. སོཏཾ པཙྪིནྡིཏབྦནྟི ཏཏྠ ཝཱིཏིཀྐམཔྤཝཏྟི པཙྪིནྡིཏབྦཱ. གརུཀབྷཱཝེཏི ཨཀཔྤིཡབྷཱཝེ. སུཏྟཝིནིཙྪཡཀཱརཎེཧཱིཏི སུཏྟེན ཨཊྛཀཐཱཝིནིཙྪཡེན ཙ ལདྡྷཀཱརཎེཧི. ཨེཝནྟིཨཱདི ཡཐཱཝུཏྟསྶ ཨཏྠསྶ ནིགམནཝཙནཾ. ཨཏིརེཀཀཱརཎནྟི སུཏྟཱདཱིསུ པུརིམཾ པུརིམཾ ཨཏིརེཀཀཱརཎཾ ནཱམ, བཧུཀཱརཎཾ ཝཱ.

ཝཱཙུགྒཏནྟི ¶ ཝཱཙཱཡ ཨུགྒཏཾ, ཏཏྠ ནིརནྟརཾ ཋིཏནྟི ཨཏྠོ. ‘‘སུཏྟཾ ནཱམ སཀལཾ ཝིནཡཔིཊཀ’’ནྟི ཝུཏྟཏྟཱ པུན སུཏྟཏོཏི ཏདཏྠཔཊིཔཱདཀཾ སུཏྟཱབྷིདྷམྨཔཱལི༹ཝཙནཾ ཨདྷིཔྤེཏཾ. ཨནུབྱཉྫནཏོཏི ཨིམསྶ ཝིཝརཎཾ པརིཔུཙྪཏོ ཙ ཨཊྛཀཐཱཏོ ཙཱཏི. ཏཏྠ པརིཔུཙྪཱཏི ཨཱཙརིཡསྶ སནྟིཀཱ པཱལི༹ཡཱ ཨཏྠསཝནཾ. ཨཊྛཀཐཱཏི པཱལི༹མུཏྟཀཝིནིཙྪཡོ. ཏདུབྷཡམྤི ཧི པཱལི༹ཾ ཨནུགནྟྭཱ ཨཏྠསྶ བྱཉྫནཏོ ‘‘ཨནུབྱཉྫན’’ནྟི ཝུཏྟཾ. ཝིནཡེཏི ཝིནཡཱཙཱརེ, ཏེནེཝ ཝཀྑཏི ཝིནཡཾ ཨཝིཛཧནྟོ ཨཝོཀྐམནྟོཏིཨཱདི. ཏཏྠ པཏིཊྛཱནཾ ནཱམ སཉྩིཙྩ ཨཱཔཏྟིཡཱ ཨནཱཔཛྫནཱདི ཧོཏཱིཏི ཨཱཧ ‘‘ལཛྫཱིབྷཱཝེན པཏིཊྛིཏོ’’ཏི, ཏེན ལཛྫཱི ཧོཏཱིཏི ཝུཏྟཾ ཧོཏི. ཝིནཡདྷརསྶ ལཀྑཎེ ཝཏྟབྦེ ཀིཾ ཨིམིནཱ ལཛྫཱིབྷཱཝེནཱཏི ཨཱཧ ཨལཛྫཱི ཧཱིཏིཨཱདི. ཏཏྠ བཧུསྶུཏོཔཱིཏི ཨིམིནཱ པཋམལཀྑཎསམནྣཱགམཾ དསྶེཏི. ལཱབྷགརུཏཱཡཱཏིཨཱདིནཱ ཝིནཡེ ཋིཏཏཱཡ ཨབྷཱཝེ པཋམལཀྑཎཡོགོ ཀིཙྩཀརོ ན ཧོཏི, ཨཐ ¶ ཁོ ཨཀིཙྩཀརོ ཨནཏྠཀརོ ཨེཝཱཏི དསྶེཏི. སངྒྷབྷེདསྶ པུབྦབྷཱགོ ཀལཧོ སངྒྷརཱཛི.

ཝིཏྠུནཏཱིཏི ཝིཏྠམྦྷཏི, ནིཏྠུནཏི ཝཱ སནྟིཊྛིཏུཾ ན སཀྐོཏི, ཏེནཱཧ ཡཾ ཡནྟིཨཱདི. ཨཱཙརིཡཔརམྤརཱཏི ཨཱཙརིཡཱནཾ ཝིནིཙྪཡཔརམྤརཱ, ཏེནེཝ ཝཀྑཏི ‘‘ཨཏྟནོ མཏིཾ པཧཱཡ…པེ… ཡཐཱ ཨཱཙརིཡོ ཙ ཨཱཙརིཡཱཙརིཡོ ཙ པཱལི༹ཉྩ པརིཔུཙྪཉྩ ཝདནྟི, ཏཐཱ ཉཱཏུཾ ཝཊྚཏཱི’’ཏི. ན ཧི ཨཱཙརིཡཱནཾ ནཱམམཏྟཏོ པརམྤརཱཛཱནནེ པཡོཛནམཏྠི. པུབྦཱཔརཱནུསནྡྷིཏོཏི པུབྦཝཙནསྶ ཨཔརཝཙནེན སཧ ཨཏྠསམྦནྡྷཛཱནནཏོ. ཨཏྠཏོཏི པདཏྠཔིཎྜཏྠཨདྷིཔྤེཏཏྠཱདིཏོ. ཀཱརཎཏོཏི ཏདཏྠུཔཔཏྟིཏོ. ཐེརཝཱདངྒནྟི ཐེརཝཱདཔཊིཔཱཊིཾ, ཏེསཾ ཝིནིཙྪཡཔཊིཔཱཊིནྟི ཨཏྠོ.

ཨིམེཧི ཙ པན ཏཱིཧི ལཀྑཎེཧཱིཏི ཨེཏྠ པཋམེན ལཀྑཎེན ཝིནཡསྶ སུཊྛུ ཨུགྒཧིཏབྷཱཝོ ཝུཏྟོ. དུཏིཡེནསྶ ལཛྫཱིབྷཱཝེན ཙེཝ ཨཙལཏཱཡ ཙ པཏིཊྛིཏཏཱ. ཏཏིཡེན པཱལི༹ཨཊྛཀཐཱསུ ཨནུརཱུཔེན ཨནཱགཏམྤི ཏདནུལོམཏོ ཨཱཙརིཡེཧི དིནྣནཡཏོ ཝིནིཙྪིནིཏུཾ སམཏྠཏཱ. ཨོཏིཎྞེ ཝཏྠུསྨིནྟི ཙོདནཱཝསེན ཝཱིཏིཀྐམཝཏྠུསྨིཾ སངྒྷམཛ྄ཛྷེ ཨོཏིཎྞེ. ཙོདཀེན ཙུདིཏཀེན ཙ ཝུཏྟེ ཝཏྟབྦེཏི ཨེཝཾ ཨོཏིཎྞེ ཝཏྠུཾ ནིསྶཱཡ ཙོདཀེན ‘‘དིཊྛཾ སུཏ’’ནྟིཨཱདིནཱ ཙུདིཏཀེན ‘‘ཨཏྠི ནཏྠཱི’’ཏིཨཱདིནཱ ཙ ཡཾ ཝཏྟབྦཾ, ཏསྨིཾ ཝཏྟབྦེ ཝུཏྟེཏི ཨཏྠོ. ཐུལླཙྩཡདུབྦྷཱསིཏཱནཾ མཱཏིཀཱཡ ཨནཱགཏཏྟཱ ‘‘པཉྩནྣཾ ཨཱཔཏྟཱིན’’ནྟི ཝུཏྟཾ. ཏིཀདུཀྐཊནྟི ‘‘ཨནུཔསམྤནྣེ ཨུཔསམྤནྣསཉྙཱི ཨུཛ྄ཛྷཱཡཏི ཝཱ ཁཱིཡཏི ཝཱ ཨཱཔཏྟི དུཀྐཊསྶཱ’’ཏིཨཱདིནཱ (པཱཙི. ༡༠༦ ཐོཀཾ ཝིསདིསཾ) ཨཱགཏཾ ཏིཀདུཀྐཊཾ. ཨཉྙཏརཾ ཝཱ ཨཱཔཏྟིནྟི ‘‘ཀཱལེ ཝིཀཱལསཉྙཱི ཨཱཔཏྟི དུཀྐཊསྶ, ཀཱལེ ཝེམཏིཀོ ཨཱཔཏྟི དུཀྐཊསྶཱ’’ཏིཨཱདིཀཾ (པཱཙི. ༢༥༠) དུཀདུཀྐཊཾ ¶ སནྡྷཱཡ ཝུཏྟཾ. ཨནྟརཱཔཏྟིནྟི ཏསྨིཾ ཏསྨིཾ སིཀྑཱཔདེ ཨཱགཏཝཏྠུཝཱིཏིཀྐམཾ ཝིནཱ ཨཉྙསྨིཾ ཝཏྠུཝཱིཏིཀྐམེ ནིདཱནཏོ པབྷུཏི ཝིནཱིཏཝཏྠུཔརིཡོསཱནཱ ཨནྟརནྟརཱ ཝུཏྟཾ ཨཱཔཏྟིཾ. ཨིདྷ པན ‘‘ཝཏྠུཾ ཨོལོཀེཏཱི’’ཏི ཝིསུཾ གཧིཏཏྟཱ ཏདཝསེསཱ ཨནྟརཱཔཏྟཱིཏི གཧིཏཱ. པཊིལཱཏཾ ཨུཀྑིཔཏཱིཏི ཨིདཾ ཝིསིབྦནསིཀྑཱཔདེ (པཱཙི. ༣༥༠-༣༥༡) ཨཱགཏཾ. ཏཏྠ ཌཡ྄ཧམཱནཾ ཨལཱཏཾ ཨགྒིཀཔཱལཱདིཏོ བཧི པཏིཏཾ ཨཝིཛ྄ཛྷཱཏམེཝ པཊིཨུཀྑིཔཏི ¶ , པུན ཡཐཱཋཱནེ ཋཔེཏཱིཏི ཨཏྠོ. ཝིཛ྄ཛྷཱཏཾ པན པཀྑིཔནྟསྶ པཱཙིཏྟིཡམེཝ. ཨནཱཔཏྟིནྟི ཨེཏྠ ཨནྟརནྟརཱ ཝུཏྟཱ ཨནཱཔཏྟིཔི ཨཏྠི, ‘‘ཨནཱཔཏྟི, བྷིཀྑཝེ, ཨིདྡྷིམསྶ ཨིདྡྷིཝིསཡེ’’ཏིཨཱདི (པཱརཱ. ༡༥༩) ཝིཡ སཱཔི སངྒཡ྄ཧཏི.

པཱརཱཛིཀཱཔཏྟཱིཏི ན ཏཱཝ ཝཏྟབྦནྟི ཨིདཾ ཨཱཔནྣཔུགྒལེན ལཛྫཱིདྷམྨེ ཋཏྭཱ ཡཐཱབྷཱུཏཾ ཨཱཝིཀརཎེཔི དུབྦིནིཙྪཡཾ ཨདིནྣཱདཱནཱདིཾ སནྡྷཱཡ ཝུཏྟཾ. ཡཾ པན མེཐུནཱདཱིསུ ཝིཛཱནནཾ, ཏཾ ཝཏྟབྦམེཝ, ཏེནཱཧ མེཐུནདྷམྨཝཱིཏིཀྐམོ ཧཱིཏིཨཱདི. ཡོ པན ཨལཛྫིཏཱཡ པཊིཉྙཾ ཨདཏྭཱ ཝིཀྑེཔཾ ཀརོཏི, ཏསྶ ཨཱཔཏྟི ན སཀྐཱ ཨོལཱ༹རིཀཱཔི ཝིནིཙྪིནིཏུཾ, ཡཱཝ སོ ཡཐཱབྷཱུཏཾ ནཱཝི ཀརོཏི, སངྒྷསྶ ཙ ཨཱཔཏྟིསནྡེཧོ ན ཝིགཙྪཏི, ཏཱཝ ནཱསིཏཀོཝ བྷཝིསྶཏི. སུཁུམཱཏི ཙིཏྟཔརིཝཏྟིཡཱ སུཁུམཏཱཡ སུཁུམཱ. ཏེནཱཧ ‘‘ཙིཏྟལཧུཀཱ’’ཏི, ཙིཏྟཾ ཏསྶ ལཧུཀནྟི ཨཏྠོ. ཏེཏི ཝཱིཏིཀྐམེ. ཏཾཝཏྠུཀནྟི ཨདིནྣཱདཱནཱདིམཱུལཀཾ. ཡཾ ཨཱཙརིཡོ བྷཎཏི, ཏཾ ཀརོཧཱིཏིཨཱདི སབྦཾ ལཛྫཱིཔེསལཾ ཀུཀྐུཙྩཀམེཝ སནྡྷཱཡ ཝུཏྟཾ. ཡོ ཡཱཐཱཝཏོ པཀཱསེཏྭཱ སུདྡྷིམེཝ གཝེསཏི, ཏེནཱཔི, པཱརཱཛིཀོསཱིཏི ན ཝཏྟབྦོཏི ཨནཱཔཏྟིཀོཊིཡཱཔི སངྐིཡམཱནཏྟཱ ཝུཏྟཾ, ཏེནེཝ ‘‘པཱརཱཛིཀཙྪཱཡཱ’’ཏི ཝུཏྟཾ. སཱིལཱནི སོདྷེཏྭཱཏི ཡསྨིཾ ཝཱིཏིཀྐམེ པཱརཱཛིཀཱསངྐཱ ཝཏྟཏི, ཏཏྠ པཱརཱཛིཀཱབྷཱཝཔཀྑཾ གཧེཏྭཱ དེསནཱཝུཊྛཱནགཱམིནཱིནཾ ཨཱཔཏྟཱིནཾ སོདྷནཝསེན སཱིལཱནི སོདྷེཏྭཱ. དྭཏྟིཾསཱཀཱརནྟི པཱཀཊབྷཱཝཏོ ཨུཔལཀྑཎཝསེན ཝུཏྟཾ, ཡཾ ཀིཉྩི ཨབྷིརུཙིཏཾ མནསིཀཱཏུཾ ཝཊྚཏེཝ. ཀམྨཊྛཱནཾ གྷཊིཡཏཱིཏི ཝིཔྤཊིསཱརམཱུལཀེན ཝིཀྑེཔེན ཨནྟརནྟརཱ ཁཎྜཾ ཨདསྶེཏྭཱ པབནྡྷཝསེན ཙིཏྟེན སངྒྷཊིཡཏི. སངྑཱརཱཏི ཝིཔསྶནཱཀམྨཊྛཱནཝསེན ཝུཏྟཾ. སཱཔཏྟིཀསྶ ཧི པགུཎམྤི ཀམྨཊྛཱནཾ ན སུཊྛུ ཨུཔཊྛཱཏི, པགེཝ པཱརཱཛིཀསྶ. ཏསྶ ཧི ཝིཔྤཊིསཱརནིནྣཏཱཡ ཙིཏྟཾ ཨེཀགྒཾ ན ཧོཏི. ཨེཀསྶ པན ཝིཏཀྐཝིཀྑེཔཱདིབཧུལསྶ སུདྡྷསཱིལསྶཔི ཙིཏྟཾ ན སམཱདྷིཡཏི, ཏཾ ཨིདྷ པཱརཱཛིཀམཱུལཀནྟི ན གཧེཏབྦཾ. ཀཏཔཱཔམཱུལཀེན ཝིཔྤཊིསཱརེནེཝེཏྠ ཙིཏྟསྶ ཨསམཱདྷིཡནཾ སནྡྷཱཡ ‘‘ཀམྨཊྛཱནཾ ན གྷཊིཡཏཱི’’ཏི ཝུཏྟཾ, ཏེནཱཧ ཝིཔྤཊིསཱརགྒིནཱཏིཨཱདི. ཨཏྟནཱཏི ཙིཏྟེན ཀརཎབྷཱུཏེན པུགྒལོ ཀཏྟཱ ཛཱནཱཏི, པཙྩཏྟེ ཝཱ ཀརཎཝཙནཾ, ཨཏྟཱ སཡཾ པཛཱནཱཏཱིཏི ཨཏྠོ.

ཙཏུབྦིདྷཝིནཡཱདིཀཐཱཝཎྞནཱནཡོ ནིཊྛིཏོ.

པདབྷཱཛནཱིཡཝཎྞནཱ

ཡོ ¶ ¶ ཝིཡ དིསྶཏཱིཏི ཡཱདིསོ, ཡཾ-སདྡཏྠེ ཡཐཱ-སདྡོ ཝཏྟཏཱིཏི ཨཱཧ ‘‘ཡེན ཝཱ ཏེན ཝཱ ཡུཏྟོ’’ཏི. ཡེན ཏེནཱཏི ཧི པདདྭཡེན ཨནིཡམཏོ ཡཾ-སདྡཏྠོཝ དསྶིཏོ. ཝཱསདྷུརཡུཏྟོཏི ཝིཔསྶནཱདྷུརཡུཏྟོ. ཡཱ ཛཱཏི ཨསྶཱཏི ཡཾཛཱཏི, པུགྒལོ, སོཝ ཡཾཛཙྩོ སཀཏྠེ ཡཔཙྩཡཾ ཀཏྭཱ. གོཏྟཝསེན ཡེན ཝཱ ཏེན ཝཱ གོཏྟེན ཡཐཱགོཏྟོ ཝཱ ཏཐཱགོཏྟོ ཝཱ ཧོཏཱུཏི སམྦནྡྷོ. སཱིལེསཱུཏི པཀཏཱིསུ. ཨཐ ཁོཏི ཨིདཾ ཀིནྟཱུཏི ཨིམསྨིཾ ཨཏྠེ. ཀིཾ ཝུཏྟཾ ཧོཏཱིཏི ཨཏྠོ. ཨིམསྨིཾ ཨཏྠེཏི ཨིམསྨིཾ པཱརཱཛིཀཝིསཡེ. ཨེསོཏི ཡཐཱཝུཏྟེཧི པཀཱརེཧི ཡུཏྟོ. ཨརིཡཱཡཱཏི ‘‘ཨུདྡིསྶ ཨརིཡཱ ཏིཊྛནྟི, ཨེསཱ ཨརིཡཱནཾ ཡཱཙནཱ’’ཏི ཨེཝཾ ཝུཏྟཱཡ, ན, ‘‘དེཧི མེ’’ཏི ཀཔཎཱཡ. ལིངྒསམྤཊིཙྪནེནཱཏི ‘‘བྷིཀྑཾ ཙརིསྶཱམཱི’’ཏི ཙིཏྟཱབྷཱཝེཔི བྷིཀྑཱཧཱརནིསྶིཏཔབྦཛྫཱལིངྒསྶ སམྤཊིཙྪནེན. ཀཱཛབྷཏྟནྟི ཀཱཛེཧི ཨཱནཱིཏབྷཏྟཾ. ཨདྷམྨིཀཱཡཱཏི ཨདྷིསཱིལསིཀྑཱདིབྷིཀྑུགུཎཱབྷཱཝཏོ ཝུཏྟཾ, ཏེནཱཧ ‘‘ཨབྷཱུཏཱཡཱ’’ཏི. ‘‘མཡཾ བྷིཀྑཱུ’’ཏི ཝདནྟཱ པཊིཉྙཱམཏྟེནེཝ བྷིཀྑཱུ, ན ཨཏྠཏོཏི ཨཏྠོ. ཨིདཉྩ ‘‘མཡཾ བྷིཀྑཱུ’’ཏི པཊིཛཱནནསྶཱཔི སམྦྷཝཏོ ཝུཏྟཾ. ‘‘མཡཾ བྷིཀྑཱུ’’ཏི ཨཔྤཊིཛཱནནྟཱཔི ཧི བྷིཀྑུཝོཧཱརནིམིཏྟསྶ ལིངྒསྶ གཧཎེན ཙེཝ བྷིཀྑཱུནཾ དིནྣཔཙྩཡབྷཱགགྒཧཎཱདིནཱ ཙ བྷིཀྑུཔཊིཉྙཱ ཨེཝ ནཱམ ཧོནྟི. ཏཐཱ ཧི ཝུཏྟཾ པུགྒལཔཉྙཏྟིཨཊྛཀཐཱཡཾ –

‘‘‘ཨབྲཧྨཙཱརཱི བྲཧྨཙཱརིཔཊིཉྙོ’ཏི ཨཉྙེ བྲཧྨཙཱརིནོ སུནིཝཏྠེ སུཔཱརུཏེ སུམྦྷཀཔཏྟདྷརེ གཱམནིགམཛནཔདརཱཛདྷཱནཱིསུ པིཎྜཱཡ ཙརིཏྭཱ ཛཱིཝིཀཾ ཀཔྤེནྟེ དིསྭཱ སཡམྤི ཏཱདིསེན ཨཱཀཱརེན ཏཐཱ པཊིཔཛྫནཏོ ‘ཨཧཾ བྲཧྨཙཱརཱི’ཏི པཊིཉྙཾ དེནྟོ ཝིཡ ཧོཏི. ‘ཨཧཾ བྷིཀྑཱུ’ཏི ཝཏྭཱ ཨུཔོསཐགྒཱདཱིནི པཝིསནྟོ པན བྲཧྨཙཱརིཔཊིཉྙོ ཧོཏིཡེཝ, ཏཐཱ སངྒྷིཀཾ ལཱབྷཾ གཎྷནྟོ’’ཏི (པུ. པ. ཨཊྛ. ༩༡).

ཏསྨཱ ཨེཝརཱུཔེཧི པཊིཉྙཱཡ བྷིཀྑཱུཧི གོཏྲབྷུཔརིཡོསཱནེཧི སདྡྷིཾ སམྦྷོགཔརིབྷོགོ ན ཝཊྚཏི, ཨལཛྫཱིཔརིབྷོགོཝ ཧོཏི. སཉྩིཙྩ ཨཱཔཏྟིཨཱཔཛྫནཱདིཨལཛྫཱིལཀྑཎཾ པན ཨུཀྐཊྛཱནཾ བྷིཀྑཱུནཾ ཝསེན ཝུཏྟཾ སཱམཎེརཱདཱིནམྤི ¶ ཨལཛྫཱིཝོཧཱརདསྶནཏོ. ‘‘ཨལཛྫཱིསཱམཎེརེཧི ཧཏྠཀམྨམྤི ན ཀཱརེཏབྦ’’ནྟི ཧི ཝུཏྟཾ. ཡཐཱཝིཧིཏཔཊིཔཏྟིཡཾ ཨཏིཊྛནཉྷི སབྦསཱདྷཱརཎཾ ཨལཛྫཱིལཀྑཎཾ. དུསྶཱིལཱ ལིངྒགྒཧཎཏོ པཊྛཱཡ ཡཐཱཝིཧིཏཔཊིཔཏྟིཡཱ ཨབྷཱཝཏོ ཨེཀནྟཱ ལཛྫིནོཝ མཧཱསངྒྷིཀཱདིནིཀཱཡནྟརིཀཱ ཝིཡ, ལིངྒཏྠེནཀཱདཡོ ཝིཡ, ཙ. ཡཱཝ ༡༡ ཙ ཏེསཾ བྷིཀྑུཔཊིཉྙཱ ཨནུཝཏྟཏི, ཏཱཝ བྷིཀྑུ ཨེཝ, ཏེཧི ཙ པརིབྷོགོ ཨལཛྫིཔཨབྷོགོཝ, ཏེསཉྩ བྷིཀྑུསངྒྷསཉྙཱཡ དིནྣཾ སངྒྷེ དིནྣཾ ནཱམ ཧོཏི. ཝུཏྟཉྷི བྷགཝཏཱ –

‘‘བྷཝིསྶནྟི ཁོ པནཱནནྡ, ཨནཱགཏམདྡྷཱནཾ གོཏྲབྷུནོ ཀཱསཱཝཀཎྛཱ དུསྶཱིལཱ པཱཔདྷམྨཱ, ཏེསུ དུསྶཱིལེསུ སངྒྷཾ ཨུདྡིསྶ དཱནཾ དསྶནྟི, ཏདཱཔཱཧཾ, ཨཱནནྡ, སངྒྷགཏཾ དཀྑིཎཾ ཨསངྑྱེཡྻཾ ཨཔྤམེཡྻཾ ཝདཱམཱི’’ཏི (མ. ནི. ༣.༣༨༠).

བྷགཝཏོ སངྒྷཾ ཨུདྡིསྶ དིནྣཏྟཱ དཀྑིཎཱ ཨསངྑྱེཡྻཱ ཨཔྤམེཡྻཱ ཛཱཏཱ. དུསྶཱིལཱནཾ དིནྣཏྟཱ ནཱཏི ཙེ? ན, ཏེསུ སངྒྷཾ ཨུདྡིསྶཱཏི གོཏྲབྷཱུནཾ པཊིགྒཱཧཀཏྟེན པརཱམཊྛཏྟཱ, ཨིཏརཐཱ ‘‘ཡེསུ ཀེསུཙི གཧཊྛེསུ ཝཱ པབྦཛིཏེསུ ཝཱ སངྒྷཾ ཨུདྡིསྶཱ’’ཏི ཝཏྟབྦཏཱཔསངྒཏོ, ཏཐཱ ཙ ‘‘ཏདཱཔཱཧཾ, ཨཱནནྡཱ’’ཏི ཧེཊྛིམཀོཊིདསྶནསྶ པཡོཛནཾ ན སིཡཱ. ཏསྨཱ གོཏྲབྷཱུནམྤི ཨབྷཱཝེ སངྒྷཾ ཨུདྡིསྶ དཱནཾ ནཏྠི, ཧེཊྛིམཀོཊིཡཱ ཏེསུཔི དིནྣཱ སངྒྷགཏཱ དཀྑིཎཱ ཨསངྑྱེཡྻཱ, ན ཏཏོ པརཾ སིཛ྄ཛྷཏཱིཏི ཏེཔི པཊིཉྙཱཡ བྷིཀྑུ ཨེཝཱཏི གཧེཏབྦཾ.

བྲཧྨགྷོསནྟི ཨུཏྟམགྷོསཾ, བྲཧྨུནོ གྷོསསདིསཾ ཝཱ གྷོསཾ. ཨེཧི བྷིཀྑཱུཏི ‘‘བྷིཀྑཱུ’’ཏིསམྦོདྷནཾ. སཾསཱརེ བྷཡཨིཀྑཀ ཏསྶ བྷཡསྶ སབྦསོ ཝིནཱསནཏྠཾ ཏིསརཎཾ, སཱསནཾ ཝཱ ཨེཧི མནསཱ ‘‘ཏཱཎཾ ལེཎ’’ནྟི པཝིས ཨུཔགཙྪ. ཨུཔགནྟྭཱཔི ཙར བྲཧྨཙརིཡནྟི སཱསནབྲཧྨཙརིཡཾ མགྒབྲཧྨཙརིཡཉྩ ཙརསྶུ. བྷཎྜཱུཏི མུཎྜིཏཀེསོ. ཝཱསཱིཏི དནྟཀཊྛཱདིཙྪེདནཝཱསི. བནྡྷནནྟི ཀཱཡབནྡྷནཾ. ཡུཏྟོ ཡོགོ སམཱདྷིཔཉྙཱཝསེན སོ ཡུཏྟཡོགོ, ཏསྶ ཨཊྛེཏེ པརིཀྑཱརཱཏི སེསོ. སརཱིརེ པཊིམུཀྐེཧིཡེཝ ཨུཔལཀྑིཏོཏི སེསོ. ‘‘ཏཱིཎི སཏཱནཱི’’ཏི ཝཏྟབྦེ གཱཐཱབནྡྷསུཁཏྠཾ ‘‘ཏཱིཎི སཏ’’ནྟི ཝུཏྟཾ.

ཏསྨཱཏི ¶ བྷགཝཱ ཧེཊྛཱ ཝུཏྟཾ པརཱམསཏི. ཧེཊྛཱ ཧི ‘‘ཨཧཾ ཁོ པན, ཀསྶཔ, ཛཱནཉྙེཝ ཝདཱམི ‘ཛཱནཱམཱི’ཏི, པསྶཉྙེཝ ཝདཱམི ‘པསྶཱམཱི’’’ཏི (སཾ. ནི. ༢.༡༥༤) ཝུཏྟཾ, ཏཾ པརཱམསཏི, ཡསྨཱ ཨཧཾ ཛཱནཾ ཝདཱམི, ཏསྨཱཏི ཨཏྠོ. ཨིཧཱཏི ཨིམསྨིཾ སཱསནེ. ཏིབྦནྟི མཧནྟཾ. པཙྩུཔཊྛིཏཾ བྷཝིསྶཏཱིཏི ཐེརཱདིཨུཔསངྐམནཏོ པུརེཏརམེཝ ཏེསུ ཡཾནཱུན མེ ཧིརོཏྟཔྤཾ ཨུཔཊྛིཏཾ བྷཝིསྶཏཱིཏི ཨཏྠོ. ཀུསལཱུཔསཾཧིཏནྟི ཨནཝཛྫདྷམྨནིསྶིཏཾ. ཨཊྛིཾ ཀཏྭཱཏི ཨཏྟཱནཾ ཏེན དྷམྨེན ཨཊྛིཀཾ ཀཏྭཱ, ཏཾ ཝཱ དྷམྨཾ ‘‘ཨེས མེ ཨཏྠོ’’ཏི ཨཏྠཾ ཀཏྭཱ. ཨོཧིཏསོཏོཏི དྷམྨེ ནིཧིཏསོཏོ. ཨེཝཉྷི ཏེ, ཀསྶཔ, སིཀྑིཏབྦནྟི ཉཱཎསོཏཉྩ པསཱདསོཏཉྩ ཨོདཧིཏྭཱ ‘‘དྷམྨཾ སཀྐཙྩམེཝ སུཎིསྶཱམཱི’’ཏི ཨེཝམེཝ ཏཡཱ སིཀྑིཏབྦཾ. སཱཏསཧགཏཱ ཙ མེ ཀཱཡགཏཱསཏཱིཏི ¶ ཨསུབྷེསུ ཙེཝ ཨཱནཱཔཱནེ ཙ པཋམཛ྄ཛྷཱནཝསེན སུཁསམྤཡུཏྟཀཱཡགཏཱསཏི. ཡཾ པནེཏསྶ ཨོཝཱདསྶ སཀྐཙྩཔཊིགྒཧཎཾ, ཨཡམེཝ ཐེརསྶ པབྦཛྫཱ ཙ ཨུཔསམྤདཱ ཙ ཨཧོསི (སཾ. ནི. ཨཊྛ. ༢.༢.༡༥༤).

ཨུདྡྷུམཱཏཀཔཊིབྷཱགཱརམྨཎཾ ཛྷཱནཾ ཨུདྡྷུམཱཏཀསཉྙཱ. ཀསིཎཱརམྨཎཾ རཱུཔཱཝཙརཛ྄ཛྷཱནཾ རཱུཔསཉྙཱ. ཨིམེཏི སཉྙཱསཱིསེན ནིདྡིཊྛཱ ཨིམེ དྭེ ཛྷཱནདྷམྨཱ. སོཔཱཀོ ཙ བྷགཝཏཱ པུཊྛོ ‘‘རཱུཔཱཝཙརབྷཱཝེན ཨེཀཏྠཱ, བྱཉྫནམེཝ ནཱན’’ནྟི ཨཱཧ. ཨཱརདྡྷཙིཏྟོཏི ཨཱརཱདྷིཏཙིཏྟོ. གརུདྷམྨཔཊིགྒཧཎཱདིཨུཔསམྤདཱ ཨུཔརི སཡམེཝ ཨཱཝི བྷཝིསྶཏི.

སབྦནྟིམེན པརིཡཱཡེནཱཏི སབྦནྟིམེན པརིཙྪེདེན. ཉཏྟིཙཏུཏྠཱ ཀམྨཝཱཙཱ ཨུཔསམྤདཱཀམྨསྶ ཀཱརཎཏྟཱ ཋཱནཾ, ཏསྶ ཋཱནསྶ ཨརཧཾ ཨནུཙྪཝིཀནྟི ཝཏྠུདོསཱདིཝིནིམུཏྟཀམྨཾ ‘‘ཋཱནཱརཧ’’ནྟི ཝུཏྟཾ ཝཏྠཱདིདོསཡུཏྟསྶ ཀམྨསྶ སབྷཱཝཏོ ཀམྨཝཱཙཱརཧཏྟཱབྷཱཝཱ. ཨཐ ཝཱ ཋཱནནྟི ནིབྦཱནཔྤཏྟིཧེཏུཏོ སིཀྑཏྟཡསངྒཧཾ སཱསནཾ ཝུཙྩཏི, ཏསྶ ཨནུཙྪཝིཀཾ ཀམྨཾ ཋཱནཱརཧཾ. ཡཐཱཝིཧིཏལཀྑཎེན ཧི ཀམྨེན ཨུཔསམྤནྣོཝ སཀལཾ སཱསནཾ སམཱདཱཡ པརིཔཱུརེཏུམརཧཏི. ཏསྨཱ པརིསུདྡྷཀམྨཝཱཙཱཔརིཡོསཱནཾ སབྦཾ སངྒྷཀིཙྩཾ ཋཱནཱརཧཾ ནཱམ, ཏེནཱཧ ‘‘སཏྠུསཱསནཱརཧེནཱ’’ཏི, སཱིལཱདིསཀལསཱསནཔརིཔུཎྞསྶ ཨནུཙྪཝིཀེནཱཏི ཨཏྠོ. ཨཡཾ ཨིམསྨིཾ ཨཏྠེཏི ཉཏྟིཙཏུཏྠཀམྨེན ཨུཔསམྤནྣསྶེཝ སབྦསིཀྑཱཔདེསུ ཝུཏྟཏྟཱ ཀིཉྩཱཔི ཨེཧིབྷིཀྑཱུཔསམྤདཱདཱིཧི ཨུཔསམྤནྣཱནཾ སུདྡྷསཏྟཱནཾ པཎྞཏྟིཝཛྫསིཀྑཱཔདཝཱིཏིཀྐམེཔི ཨབྷབྦཏཱ ཝཱ དོསཱབྷཱཝོ ཝཱ ¶ སདྡཏོ པཉྙཱཡཏི, ཏཐཱཔི ཨཏྠཏོ ཏེསམྤི པཎྞཏྟིཝཛྫེསུ, ལོཀཝཛྫེསུཔི ཝཱ སུརཱཔཱནཱདིལཧུཀེསུ མགྒུཔྤཏྟིཏོ པུབྦེ ཨསཉྩིཙྩཱདིནཱ ཨཱཔཏྟིཨཱཔཛྫནཾ སིཛ྄ཛྷཏིཡེཝ. ཏཐཱ ཧི ‘‘དྭེ པུགྒལཱ ཨབྷབྦཱ ཨཱཔཏྟིཾ ཨཱཔཛྫིཏུཾ བུདྡྷཱ ཙ པཙྩེཀབུདྡྷཱ ཙ. དྭེ པུགྒལཱ བྷབྦཱ ཨཱཔཏྟིཾ ཨཱཔཛྫིཏུཾ བྷིཀྑཱུ ཙ བྷིཀྑུནིཡོ ཙཱ’’ཏི (པརི. ༣༢༢) ཝུཏྟཾ. ཉཏྟིཙཏུཏྠེན ཀམྨེན ཨུཔསམྤནྣོཏི ཨིདཾ པན སབྦསིཀྑཱཔདཝཱིཏིཀྐམཱརཧེ སབྦཀཱལིཀེ ཙ བྷིཀྑཱུ གཧེཏྭཱ ཡེབྷུཡྻཝསེན ཝུཏྟཾ. ནིརུཏྟིཝསེནཱཏི ནིབྦཙནཝསེན. ཨབྷིལཱཔཝསེནཱཏི ཝོཧཱརཝསེན. གུཎཝསེནཱཏི བྷིཀྑུཝོཧཱརནིམིཏྟཱནཾ གུཎཱནཾ ཝསེན.

སཱཛཱིཝཔདབྷཱཛནཱིཡཝཎྞནཱ

ཝིཝཊྚཱུཔནིསྶཡཱ སཱིལཱདཡོ ལོཀིཡེཧི ཨབྷིཝིསིཊྛཏྟཱ ཨདྷིསཱིལཱདིཝོཧཱརེན ཝུཏྟཱཏི དསྶེཏུཾ ¶ ཀཏམཾ པནཱཏིཨཱདི ཨཱརདྡྷཾ. ཏཏྠ པཉྩངྒདསངྒསཱིལནྟི ཨབུདྡྷུཔྤཱདཀཱལེ སཱིལཾ སནྡྷཱཡ ཝུཏྟཾ ཏསྶ ཝིཝཊྚཱུཔནིསྶཡཏྟཱབྷཱཝཱ. ཡཾ པན བུདྡྷུཔྤཱདེ རཏནཏྟཡགུཎཾ ཏཐཏོ ཉཏྭཱ སཱསནེ སུནིཝིཊྛསདྡྷཱཧི ཨུཔཱསཀོཔཱསིཀཱཧི ཙེཝ སཱམཎེརསིཀྑམཱནཱཧི ཙ རཀྑིཡམཱནཾ པཉྩངྒཨཊྛངྒདསངྒསཱིལཾ, ཏམྤི ཨདྷིསཱིལམེཝ མགྒུཔྤཏྟིཧེཏུཏོ. ཝིཔསྶནཱམགྒུཔྤཏྟིནིམིཏྟཏཱཡ ཧི པཱཏིམོཀྑསཾཝརསཱིལཾ ལོཀིཡཱནཾ སཱིལེཧི ཨདྷིསཱིལཾ ཛཱཏཾ ཨདྷིཙིཏྟཾ ཝིཡ. ན ཧི ཝིཔསྶནཱམགྒནིམིཏྟཏཾ མུཉྩིཏྭཱ ལོཀིཡཙིཏྟཏོ ཨདྷིཙིཏྟསྶ ཨཉྙོ ཀོཙི ཝིསེསོ ཨུཔལབྦྷཏི, ཏདུབྷཡཉྩ ཨནཱདིམཏོ སཾསཱརཝཊྚསྶ ཨཏྟཱདིསཱརཝིརཧིཏཏཱཡ ཏིལཀྑཎབྦྷཱཧཏཏྟཾ, ‘‘ཨཧཾ མམཱ’’ཏི ཨཱཀཱརེན པཝཏྟཨཝིཛྫཱཏཎྷཱདིདོསམཱུལཀཏྟཉྩ, ཏཾདོསམཱུལཝིདྡྷཾསནསམཏྠཱཡ སཱིལཙིཏྟབལོཔཏྠདྡྷཱཡ ཝིཔསྶནཱཡ ཨུཀྐཾསེནེཝ ཏསྶ སཾསཱརཝཊྚསྶ ཝིགམཉྩ, ཏདུཔདེསཀསྶ སམྨཱསམྦུདྡྷསྶ སབྦཉྙུཏཱདིཨཔརིམིཏགུཎགཎཡོགེན ཨཝིཔརཱིཏསདྡྷམྨདེསཀཏྟཉྩ ཡཱཐཱཝཏོ ཉཏྭཱ པཊིཔནྣེན སམཱདཱཡ སིཀྑིཏབྦཏཱཡ ཝིཝཊྚཱུཔནིསྶཡཾ ཛཱཏཾ, ན ཨཉྙེན ཀཱརཎེན, ཏཉྩ ཝིཝཊྚཱུཔནིསྶཡཏྟཾ ཡདི སཱསནེ པཉྩསཱིལཱདིསྶཱཔི སམཱནཾ, ཀིམིདཾ ཨདྷིསཱིལཾ ན སིཡཱ. པཉྩསཱིལཱདིམཏྟེ ཋིཏཱནཉྷི ཨནཱཐཔིཎྜིཀཱདཱིནཾ གཧཊྛཱནམྤི མགྒོ ཨུཔྤཛྫཏི. ན ཧི ཨདྷིསཱིལཱདྷིཙིཏྟཾ ཝིནཱ མགྒུཔྤཏྟི ཧོཏི, ཏཉྩ ཀིཉྩཱཔི ཀེསཉྩི ¶ ཨནུཔནིསྶཡཏཱཡ ཏསྨིཾ ཨཏྟབྷཱཝེ མགྒུཔྤཏྟིཡཱ ཧེཏུ ན ཧོཏི, ཏཐཱཔི བྷཝནྟརེ ཨཝསྶཾ ཧོཏེཝཱཏི ཨདྷིསཱིལམེཝ ཀཱལཾ ཀརོནྟཱནཾ ཀལྱཱཎཔུཐུཛྫནཱནཾ པཱཏིམོཀྑསཾཝརསཱིལཾ ཝིཡ, ཏེནཱཧ བུདྡྷུཔྤཱདེཡེཝ ཙ པཝཏྟཏཱིཏིཨཱདི. ཝིཝཊྚཾ པཏྠེཏྭཱ རཀྑིཡམཱནམྤི པཉྩསཱིལཱདི བུདྡྷུཔྤཱདེཡེཝ པཝཏྟཏི. ན ཧི ཏཾ པཉྙཏྟིནྟིཨཱདི པན ཨུཀྐཊྛཝསེན སབྦཾ པཱཏིམོཀྑཾ སནྡྷཱཡ ཝུཏྟཾ. ཏདེཀདེསབྷཱུཏམྤི ཧི པཱཎཱཏིཔཱཏཱདིནྣཱདཱནཱདིགཧཊྛསཱིལམྤི. བུདྡྷཱཡེཝ ཝིནཡེ པཱརཱཛིཀསུཏྟཝིབྷངྒཱདཱིསུ ཨཱགཏཝསེན སབྦསོ ཀཱཡཝཙཱིདྭཱརེསུ མགྒུཔྤཏྟིཡཱ ཝིབནྡྷཀཨཛ྄ཛྷཱཙཱརསོཏཾ ཝིཙྪིནྡིཏྭཱ མགྒུཔྤཏྟིཡཱ པདཊྛཱནབྷཱཝེན པཉྙཔེཏུཾ སཀྐོནྟི, ན ཨཉྙེ. མགྒུཔྤཏྟིཾ སནྡྷཱཡ ཧིསྶ ཨདྷིསཱིལཏཱ ཝུཏྟཱ. ཏེནཱཧ ‘‘པཱཏིམོཀྑསཾཝརཏོཔི ཙ མགྒཕལསམྤཡུཏྟམེཝ སཱིལཾ ཨདྷིསཱིལ’’ནྟི. ཏསྶེཝ ཧི ཨདྷིསཱིལནྟི ཨབྱཝདྷཱནེན མགྒཱདྷིཊྛཱནཱཏི. ཨིདྷ ཨནདྷིཔྤེཏནྟི ཨིམསྨིཾ པཋམཔཱརཱཛིཀཝིསཡེ ‘‘སིཀྑཱ’’ཏི ཨནདྷིཔྤེཏཾ.

ལོཀིཡཨཊྛསམཱཔཏྟིཙིཏྟཱནཱིཏི སཱསནསབྷཱཝཾ ཨཛཱནནྟེཧི ལོཀིཡཛནེཧི སམཱཔཛྫིཏབྦཱནི ཨཊྛ རཱུཔཱརཱུཔཛ྄ཛྷཱནསམྤཡུཏྟཙིཏྟཱནི སནྡྷཱཡ ཝུཏྟཾ. ན ཧི མཧགྒཏེསུ ལོཀིཡལོཀུཏྟརབྷེདོ ཨཏྠི, ཡེན ལོཀིཡཝིསེསནཾ ལོཀུཏྟརནིཝཏྟནཾ སིཡཱ. ཏསྨཱ སཱསནིཀེཧི སམཱཔཛྫིཏབྦམཧགྒཏཛ྄ཛྷཱནནིཝཏྟནམེཝ ལོཀིཡཝིསེསནཾ ཀཏཾ. ཡཐཱ ཙེཏྠ, ཨེཝཾ ཀཱམཱཝཙརཱནི པན ཨཊྛ ཀུསལཙིཏྟཱནཱིཏི ཨེཏྠཱཔི ལོཀིཡཝིསེསནཾ ཀཱཏབྦམེཝ. ཨཡམེཝ ཧི ཨདྷིཙིཏྟཏོ ¶ ཙིཏྟསྶ བྷེདོ, ཡཾ སཱསནཾ ཨཛཱནནྟསྶ པུགྒལསྶ སམུཔྤཛྫནཾ. ཨེཝཉྩ ཨབུདྡྷུཔྤཱདེཔི སཱསནསབྷཱཝཾ ཛཱནནྟཱནཾ པཙྩེཀབུདྡྷཱདཱིནམྤི སཱིལཙིཏྟཱནཾ ཨདྷིསཱིལཱདྷིཙིཏྟཏཱ སམཏྠིཏཱ ཧོཏི. ན ཝིནཱ བུདྡྷུཔྤཱདཱཏི ཨིདཾ པན ཨཉྙེསཾ ཨབྷིསམཡཧེཏུབྷཱཝེན པཙྩེཀབུདྡྷབོདྷིསཏྟཱདཱིནཾ དེསནཱསཱམཏྠིཡཱབྷཱཝཏོ ཝུཏྟཾ. ཨཱཡཏིཾ ཝཱསནཱཧེཏུཾ པན སཱིལཙིཏྟཾ ཏེཔི དེསེནྟིཡེཝ, ཏཉྩ མགྒཧེཏུཏཱཡ ཨདྷིསཱིལཱདྷིཙིཏྟམྤི ཧོནྟཾ ཨཔྤཀཏཱཡ ཝིཔྥཱརིཀཏཱབཱཧུཛཉྙཏྟཱབྷཱཝེན ཨབྦོཧཱརིཀནྟི ‘‘བུདྡྷུཔྤཱདེཡེཝཱ’’ཏི ཨཝདྷཱརཎཾ ཀཏནྟི ཝེདིཏབྦཾ. ན ཧི ཏཾསམཱཔནྣོཏིཨཱདིཨཊྛཀཐཱཝཙནེཧི ཨིདྷ ཨདྷིཙིཏྟནིདྡེསེ, ཨུཔརི ཨདྷིཔཉྙཱནིདྡེསེ ཙ མགྒཕལསམྤཡུཏྟཨདྷིཙིཏྟཨདྷིཔཉྙཱནམེཝ པཊིཀྑེཔཏོ ལོཀིཡཱདྷིཙིཏྟཱདྷིཔཉྙཱནཾ ¶ ཨིདྷ ཨདྷིཔྤེཏཏཱ, ཏཾ དྭཡཾ སམཱཔནྣསྶཱཔི མེཐུནདྷམྨསམཱཔཛྫནསབྷཱཝོ ཙ ཝིཉྙཱཡཏི, པཱལི༹ཡཾ པན ‘‘ཡཱཡཾ ཨདྷིསཱིལསིཀྑཱ, ཨཡཾ ཨིམསྨིཾ ཨཏྠེ ཨདྷིཔྤེཏཱ སིཀྑཱ’’ཏི ཝུཏྟཏྟཱ ལོཀིཡཱཔི ཨདྷིཙིཏྟཱདྷིཔཉྙཱ ཨནདྷིཔྤེཏཱཏི ཝིཉྙཱཡཏི. ཏསྨཱ པཱལི༹ཡཾ ཨཊྛཀཐཱཡཉྩ ཨེཝམདྷིཔྤཱཡོ ཝེདིཏབྦོ – ‘‘མེཐུནཾ དྷམྨཾ པཊིསེཝིསྶཱམཱི’’ཏི ཙིཏྟེ ཨུཔྤནྣམཏྟེ ལོཀིཡཾ ཨདྷིཙིཏྟཾ ཨདྷིཔཉྙཱ ཙ པརིཧཱཡཏི, ཨདྷིསཱིལཾ པན ཙིཏྟུཔྤཱདམཏྟེན ན པརིཧཱཡཏཱིཏི པཱལི༹ཡཾ ཨདྷིསཱིལསིཀྑཱཝ ཝུཏྟཱ. ཨཊྛཀཐཱཡཾ པན པཊིལདྡྷལོཀུཏྟརམགྒསྶ བྷིཀྑུནོ ‘‘མེཐུནཾ པཊིསེཝིསྶཱམཱི’’ཏི ཙིཏྟམྤི ན ཨུཔྤཛྫཏི སབྦསོ ཨཀུཔྤདྷམྨཏྟཱ, པུཐུཛྫནཱནཾ སམཱཔཏྟིལཱབྷཱིནམྤི ཀེནཙི ཀཱརཎེན ཨུཔྤཛྫཏི ཀུཔྤདྷམྨཏྟཱཏི ཨིམཾ ཝིསེསཾ དསྶེཏུཾ ‘‘ན ཧི ཏཾསམཱཔནྣོ’’ཏི ལོཀུཏྟརཱཝ པཊིཀྑིཏྟཱཏི ཝེདིཏབྦཾ.

ཨཏྠི དིནྣནྟི ཨེཏྠ དིནྣནྟི དཱནཙེཏནཱ ཨདྷིཔྤེཏཱ, ཏསྶ དིནྣསྶ ཕལཾ ཨཏྠཱིཏི ཨཏྠོ. ཨེས ནཡོ ཨཏྠི ཡིཊྛནྟི ཨེཏྠཱཔི. ཨཱདི-སདྡེན ཧུཏཱདཱིནཾ སངྒཧོ. ཏཏྠ ཡིཊྛནྟི མཧཱཡཱགོ སབྦསཱདྷཱརཎཾ མཧཱདཱནམེཝ. ཧུཏནྟི པཧོནཀསཀྐཱརོ, ཨཏྟནོ ཝཱ ཧོཏུ, པརེསཾ ཝཱ དས ཨཀུསལཀམྨཔཐཱ, སབྦེཔི ཝཱ ཨཀུསལཱ དྷམྨཱ ཨནཏྠུཔྤཱདནཏོ ན སཀཾ ཀམྨཾ ནཱམ, ཏབྦིཔརཱིཏཱ ཀུསལཱ དྷམྨཱ སཀཾ ནཱམ, ཏདུབྷཡམྤི ཝཱ ཀུསལཱཀུསལཾ ཀམྨསྶཀོམྷཱིཏིཨཱདིཝཙནཏོ སཏི སཾསཱརཔྤཝཏྟིཡཾ ཨདྷིམུཙྩནཊྛེན སཏྟཱནཾ སཀནྟི ཨེཝཾ ཀམྨསྶཀཏཱཡ སཀབྷཱཝེ ཨཏྟནོ སནྟཀཏཱཡ ཨུཔྤཛྫནཀཉཱཎཾ ཀམྨསྶཀཏཉྙཱཎཾ, ཨུཔལཀྑཎམཏྟཉྩེཏཾ. སཱསནནིསྶིཏཱ པན སབྦཱཔི ཝཊྚགཱམིནིཀུསལཔཉྙཱ ཀམྨསྶཀཏཉྙཱཎེ པཝིཊྛཱ. སཱསནནིསྶིཏཱ ཧི ཝིཝཊྚགཱམིནཱི སབྦཱཔི པཉྙཱ ‘‘སཙྩཱནུལོམིཀཉཱཎ’’ནྟི ཝུཙྩཏི. སཱ ཨེཝ ཙ ཨདྷིཔཉྙཱ ཏདཝསེསཾ སབྦཾ ཀམྨསྶཀཏཉྙཱཎནྟི ཝེདིཏབྦཾ, ཏེནེཝ བྷགཝཱ ‘‘ཀམྨསྶཀཏཉྙཱཎཾ སཙྩཱནུལོམིཀཉཱཎཾ མགྒསམངྒིསྶ ཉཱཎཾ ཕལསམངྒིསྶ ཉཱཎ’’ནྟི སབྦམྤི ཉཱཎཙཏུཀྐེཡེཝ སངྒཧེསི. ཏིལཀྑཎཱཀཱརཔརིཙྪེདཀཾ པན ཝིཔསྶནཱཉཱཎནྟི ཨིདཾ པན མགྒསྶ ¶ ཨཱསནྣཔཙྩཡཏཱཡ ཨུཀྐཊྛཝསེན ཝུཏྟཾ. ཏདིཏརཱསཉྷི རཏནཏྟཡཱནུསྶརཎཱདིཔཉྙཱནམྤི མགྒཧེཏུཏཱཡ ཨདྷིཔཉྙཏཱ སམཱནཱཝཱཏི གཧེཏབྦཾ.

སཱཛཱིཝཔདབྷཱཛནཱིཡཝཎྞནཱནཡོ ནིཊྛིཏོ.

པཙྩཀྑཱནཝིབྷངྒཝཎྞནཱ

དུབྦལྱེ ¶ ཨཱཝིཀཏེཏི ཡཾནཱུནཱཧཾ བུདྡྷཾ པཙྩཀྑེཡྻནྟིཨཱདིནཱ དུབྦལབྷཱཝེ པཀཱསིཏེ. མུཁཱརུལ༹ྷཏཱཏི ལོཀཛནཱནཾ སཏྟཊྛཱཏིཨཱདཱིསུ མུཁཱརུལ༹ྷཉཱཡེནཱཏི ཨདྷིཔྤཱཡོ. དིརཏྟཏིརཏྟནྟི (པཱཙི. ༥༢) ཨེཏྠ ཡཐཱ ཨནྟརནྟརཱ སཧསེཡྻཱཝསེན ཏིརཏྟཾ ཨགྒཧེཏྭཱ ནིརནྟརམེཝ ཏིསྶོ རཏྟིཡོ ཨནུཔསམྤནྣེན སདྡྷིཾ སཧསེཡྻཱཡ ཨརུཎུཊྛཱཔནཝསེན ཏིརཏྟགྒཧཎཏྠཾ ‘‘དིརཏྟཏིརཏྟ’’ནྟི ཨབྱཝདྷཱནེན ཝུཏྟནྟི དིརཏྟགྒཧཎསྶ པཡོཛནམྤི སཀྐཱ གཧེཏུཾ, ཨེཝམིདྷཱཔི དུབྦལྱཾ ཨནཱཝིཀཏྭཱཏི ཨིམསྶཱཔི གཧཎསྶ པཡོཛནམཏྠེཝཱཏི དསྶེཏུཾ ཡསྨཱ ཝཱ སིཀྑཱཔཙྩཀྑཱནསྶཱཏིཨཱདི ཝུཏྟཾ.

ཨིདཱནི དུབྦལྱཾ ཨནཱཝིཀཏྭཱཏི ཨིམསྶ པུརིམཔདསྶེཝ ཝིཝརཎབྷཱཝཾ ཝིནཱཔི ཝིསུཾ ཨཏྠསབྦྷཱཝཾ དསྶེཏུཾ ཨཔིཙཱཏིཨཱདི ཝུཏྟཾ. ཝིསེསཱཝིསེསནྟི ཨེཏྠ ཡེན ཝཱཀྱེན དུབྦལྱཱཝིཀམྨམེཝ ཧོཏི, ན སིཀྑཱཔཙྩཀྑཱནཾ, ཏཏྠ སིཀྑཱཔཙྩཀྑཱནདུབྦལྱཱཝིཀམྨཱནཾ ཨཉྙམཉྙཾ ཝིསེསོ ཧོཏི. ཡེན པན ཝཙནེན ཏདུབྷཡམྤི ཧོཏི, ཏཏྠ ནེཝཏྠི ཝིསེསོ ཨཝིསེསོཔི, ཏཾ ཝིསེསཱཝིསེསཾ. ‘‘ཀཋ ཀིཙྪཛཱིཝནེ’’ཏི དྷཱཏཱུསུ པཋིཏཏྟཱ ཝུཏྟཾ ‘‘ཀིཙྪཛཱིཝིཀཔྤཏྟོ’’ཏི. ཨུཀྐཎྛནཉྷི ཨུཀྐཎྛཱ, ཏཾ ཨིཏོ གཏོཏི ཨུཀྐཎྛིཏོ, ཀིཙྪཛཱིཝིཀཾ པཏྟོཏི ཨཏྠོ. ཨུདྡྷཾ གཏོ ཀཎྛོ ཨེཏིསྶཱཏི ཨུཀྐཎྛཱ, ཨནབྷིརཏིཡཱ ཝཛེ ནིརུདྡྷགོགཎོ ཝིཡ གམནམགྒཾ གཝེསནྟོ པུགྒལོ ཨུཀྐཎྛོ ཧོཏི, ཏཾ ཨུཀྐཎྛཾ. ཨནབྷིརཏིཾ ཨིཏོཏིཔི ཨུཀྐཎྛིཏོཏི ཨཏྠཾ དསྶེནྟོ ཨཱཧ – ‘‘ཨུདྡྷཾ ཀཎྛཾ ཀཏྭཱ ཝིཧརམཱནོ’’ཏི. སཱ ཙ ཨུཀྐཎྛཏཱ ཝིཀྑེཔེནེཝཱཏི ཝིཀྑིཏྟོཏིཨཱདི ཝུཏྟཾ.

སམཎབྷཱཝཏོཏི ཨུཔསམྤདཏོ. བྷཱཝཝིཀཔྤཱཀཱརེནཱཏི བྷིཀྑུབྷཱཝཏོ ཙཝིཏྭཱ ཡཾ ཡཾ གིཧིཨཱདིབྷཱཝཾ པཏྟུཀཱམོ ‘‘ཨཧཾ ཨསྶ’’ནྟི ཨཏྟནོ བྷཝནཾ ཝིཀཔྤེཏི, ཏེན ཏེན གིཧིཨཱདིཨཱཀཱརེན, ཨཏྟནོ བྷཝནསྶ ཝིཀཔྤནཱཀཱརེནཱཏི ཨདྷིཔྤཱཡོ.

༤༦. པཱལི༹ཡཾ ¶ ཡདི པནཱཧནྟི ཨཧཾ ཡདི བུདྡྷཾ པཙྩཀྑེཡྻཾ, སཱདྷུ ཝཏསྶཱཏི ཨཏྠོ. ཨཔཱཧཾ, ཧནྡཱཧནྟི ཨེཏྠཱཔི ཝུཏྟནཡེནེཝ ཨཏྠོ གཧེཏབྦོ. ‘‘ཧོཏི མེ བུདྡྷཾ པཙྩཀྑེཡྻ’’ནྟི མམ ཙིཏྟཾ ཨུཔྤཛྫཏཱིཏི ཝདཏི.

༥༠. ན ¶ རམཱམཱིཏི པབྦཛྫཱཡ དུཀྑབཧུལཏཱཡ སུཁཱབྷཱཝཾ དསྶེཏི. ནཱབྷིརམཱམཱིཏི པབྦཛྫཱཡ ཝིཛྫམཱནེཔི ཨནཝཛྫསུཁེ ཨཏྟནོ ཨབྷིརཏིཨབྷཱཝཾ དསྶེཏི.

༥༡. ཏེནེཝ ཝཙཱིབྷེདེནཱཏི ཝཙཱིབྷེདཾ ཀཏྭཱཔི ཨཉྙེན ཀཱཡཔྤཡོགེན ཝིཉྙཱཔནཾ ནིཝཏྟེཏི. ཨཡཾ སཱསནཾ ཛཧིཏུཀཱམོཏིཨཱདིནཱ བྷཱསཱཀོསལླཱབྷཱཝེན སབྦསོ པདཏྠཱཝབོདྷཱབྷཱཝེཔི ‘‘ཨཡཾ ཨཏྟནོ པབྦཛིཏབྷཱཝཾ ཛཧིཏུཀཱམོ ཨིམཾ ཝཱཀྱབྷེདཾ ཀརོཏཱི’’ཏི ཨེཏྟཀཾ ཨདྷིཔྤེཏཏྠམཏྟཾ ཙེཔི སོ ཏཱཝ ཛཱནཱཏི, པཙྩཀྑཱནམེཝ ཧོཏཱིཏི དསྶེཏི. ཏེནཱཧ ‘‘ཨེཏྟཀམཏྟམྤི ཛཱནཱཏཱི’’ཏི. པདཔཙྪཱབྷཊྛནྟི པདཔརཱཝཏྟི, མཱགདྷབྷཱསཏོ ཨཝསིཊྛཱ སབྦཱཔི བྷཱསཱ ‘‘མིལཀྑབྷཱསཱ’’ཏི ཝེདིཏབྦཱ. ཁེཏྟམེཝ ཨོཏིཎྞནྟི སིཀྑཱཔཙྩཀྑཱནསྶ རུཧནཊྛཱནབྷཱུཏཾ ཁེཏྟམེཝ ཨོཏིཎྞཾ.

དཱུཏནྟི མུཁསཱསནཾ. སཱསནནྟི པཎྞསཱསནཾ, བྷིཏྟིཐམྦྷཱདཱིསུ ཨཀྑརཾ ཝཱ ཚིནྡིཏྭཱ དསྶེཏི. པཙྩཀྑཱཏུཀཱམཏཱཙིཏྟེ དྷརནྟེཡེཝ ཝཙཱིབྷེདསམུཔྤཏྟིཾ སནྡྷཱཡ ‘‘ཙིཏྟསམྤཡུཏྟ’’ནྟི ཝུཏྟཾ, ཙིཏྟསམུཊྛཱནནྟི ཨཏྠོ. ནིཡམིཏཱནིཡམིཏཝསེན ཝིཛཱནནབྷེདཾ དསྶེཏུམཱཧ ཡདི ཨཡམེཝ ཛཱནཱཏཱུཏིཨཱདི. ཨཡཉྩ ཝིབྷཱགོ ཝདཏི ཝིཉྙཱཔེཏཱིཏི ཨེཏྠ ཡསྶ ཝདཏི, ཏསྶེཝ ཝིཛཱནནཾ ཨདྷིཔྤེཏནྟི ཨིམིནཱ ཝུཏྟནཡེན ལདྡྷོཏི དཊྛབྦཾ, ན ཧེཏྠ ཨེཀསྶ ཝདཏི ཨཉྙསྶ ཝིཉྙཱཔེཏཱིཏི ཨཡམཏྠོ སམྦྷཝཏི. ‘‘ཏེསུ ཨེཀསྨིཾ ཛཱནནྟེཔཱི’’ཏི ཝུཏྟཏྟཱ ‘‘དྭེཡེཝ ཛཱནནྟུ ཨེཀོ མཱ ཛཱནཱཏཱུ’’ཏི ཨེཝཾ དྭིནྣམྤི ཛནཱནཾ ནིཡམེཏྭཱ ཨཱརོཙིཏེཔི ཏེསུ ཨེཀསྨིམྤི ཛཱནནྟེ པཙྩཀྑཱནཾ ཧོཏིཡེཝཱཏི གཧེཏབྦཾ. པརིསངྐམཱནོཏི ‘‘ཝཱརེསྶནྟཱི’’ཏི ཨཱསངྐམཱནོ. སམཡཉྙཱུཏི སཱསནསངྐེཏཉྙཱུ, ཨིདྷ པན ཨདྷིཔྤཱཡམཏྟཛཱནནེནཱཔི སམཡཉྙཱུ ནཱམ ཧོཏི, ཏེནཱཧ ཨུཀྐཎྛིཏོཏིཨཱདི. ཏསྨཱ བུདྡྷཾ པཙྩཀྑཱམཱིཏིཨཱདིཁེཏྟཔདཱནཾ སབྦསོ ཨཏྠཾ ཉཏྭཱཔི སཙེ ‘‘བྷིཀྑུབྷཱཝཏོ ཙཝིཏུཀཱམཏཱཡ ཨེས ཝདཏཱི’’ཏི ཨདྷིཔྤཱཡཾ ན ཛཱནཱཏི, ཨཔྤཙྩཀྑཱཏཱཝ ཧོཏི སིཀྑཱ. ཨཏྠཾ པན ཨཛཱནིཏྭཱཔི ‘‘ཨུཀྐཎྛིཏོ ཝདཏཱི’’ཏི ཏཾ ཛཱནཱཏི, པཙྩཀྑཱཏཱཝ ཧོཏི སིཀྑཱ. སོཏཝིཉྙཱཎཝཱིཐིཡཱ སདྡམཏྟགྒཧཎམེཝ, ཨཏྠགྒཧཎཾ པན མནོཝིཉྙཱཎཝཱིཐིཔརམྤརཱཡཱཏི ཨཱཧ ཏངྑཎཉྙེཝཱཏིཨཱདི.

༥༣. ཝཎྞཔཊྛཱནནྟི ¶ ¶ སཏྠུགུཎཝཎྞཔྤཀཱསཀཾ པཀརཎཾ. ཨུཔཱལིགཱཐཱསཱུཏི ཨུཔཱལིསུཏྟེ ཨུཔཱལིགཧཔཏིནཱ དྷཱིརསྶ ཝིགཏམོཧསྶཱཏིཨཱདིནཱ ཝུཏྟགཱཐཱསུ. ཡཐཱརུཏནྟི པཱལི༹ཡཾ ཝུཏྟམེཝཱཏི ཨཏྠོ. ཨནནྟབུདྡྷཱིཏིཨཱདཱིནི ཝཎྞཔཊྛཱནེ ཨཱགཏནཱམཱནི. དྷཱིརནྟིཨཱདཱིནི (མ. ནི. ༢.༧༦) པན ཨུཔཱལིགཱཐཱསུ. ཏཏྠ བོདྷི ཝུཙྩཏི སབྦཉྙུཏཉྙཱཎཾ, སཱ ཛཱནནཧེཏུཏྟཱ པཉྙཱཎཾ ཨེཏསྶཱཏི བོདྷིཔཉྙཱཎོ. སྭཱཀྑཱཏཾ དྷམྨནྟིཨཱདཱིསུ དྷམྨ-སདྡོ སྭཱཀྑཱཏཱདིཔདཱནཾ དྷམྨཝེཝཙནབྷཱཝཾ དསྶེཏུཾ ཝུཏྟོ. ཏསྨཱ སྭཱཀྑཱཏཾ པཙྩཀྑཱམཱིཏིཨཱདིནཱ ཝུཏྟེཡེཝ ཝེཝཙནེན པཙྩཀྑཱནཾ ནཱམ ཧོཏི. དྷམྨ-སདྡེན སཧ ཡོཛེཏྭཱ ཝུཏྟེ པན ཡཐཱརུཏཝསེན པཙྩཀྑཱནནྟི ཝེདིཏབྦཾ. སུཔྤཊིཔནྣཾ སངྒྷནྟིཨཱདཱིསུཔི ཨེསེཝ ནཡོ. ཀུསལཾ དྷམྨནྟིཨཱདཱིནིཔི ཀུསལཱ དྷམྨཱ ཨཀུསལཱ དྷམྨཱཏིཨཱདིདྷམྨམེཝ (དྷ. ས. ཏིཀམཱཏིཀཱ ༡) སནྡྷཱཡ ཝུཏྟནཱམཱནི, ཨིཏརཐཱ ཨཀུསལདྷམྨཔཙྩཀྑཱནེ དོསཱབྷཱཝཔྤསངྒཏོཏི, ཏེནཱཧ ཙཏུརཱསཱིཏིདྷམྨཀྑནྡྷསཧསྶེསཱུཏིཨཱདི. པཋམཔཱརཱཛིཀནྟིཨཱདིནཱ སིཀྑཱཔདཱནཾཡེཝ གཧཎཾ ཝེདིཏབྦཾ, ན ཨཱཔཏྟཱིནཾ.

ཡསྶ མཱུལེནཱཏི ཡསྶ སནྟིཀེ. ཨཱཙརིཡཝེཝཙནེསུ ཡོ ཨུཔཛ྄ཛྷཾ ཨདཏྭཱ ཨཱཙརིཡོཝ ཧུཏྭཱ པབྦཱཛེསི, ཏཾ སནྡྷཱཡ ‘‘ཡོ མཾ པབྦཱཛེསཱི’’ཏི ཝུཏྟཾ. ཏསྶ མཱུལེནཱཏི ཏསྶ སནྟིཀེ. ཨོཀལླཀོཏི ཁུཔྤིཔཱསཱདིདུཀྑཱཏུརཱནཾ ཀིསལཱུཁསརཱིརཝེསཱནཾ གཧཊྛམནུསྶཱནཾ ཨདྷིཝཙནཾ. མོལི༹བདྡྷོཏི བདྡྷཀེསཀལཱཔོ གཧཊྛོ. ཀུམཱརཀོཏི ཀུམཱརཱཝཏྠོ ཨཏིཝིཡ དཧརོ སཱམཎེརོ. ཙེལླཀོཏི ཏཏོ ཀིཉྩི མཧནྟོ. ཙེཊཀོཏི མཛ྄ཛྷིམོ. མོལི༹གལློཏི མཧཱསཱམཎེརོ. སམཎུདྡེསོཏི ཨཝིསེསཏོ སཱམཎེརཱདྷིཝཙནཾ. ཨསུཙིསངྐསྶརསམཱཙཱརོཏི ཨསུཙི ཧུཏྭཱ ‘‘མཡཱ ཀཏཾ པརེ ཛཱནནྟི ནུ ཁོ, ན ནུ ཁོ’’ཏི ཨཏྟནཱ, ‘‘ཨསུཀེན ནུ ཁོ ཨིདཾ ཀཏ’’ནྟི པརེཧི ཙ སངྐཱཡ སརིཏབྦེན ཨནུསྶརིཏབྦེན སམཱཙཱརེན ཡུཏྟོ. སཉྫཱཏརཱགཱདིཀཙཝརཏྟཱ ཀསམྦུཛཱཏོ. ཀོཎྛོཏི དུསྶཱིལཱདྷིཝཙནམེཏཾ.

༥༤. ཏིཧེཏུཀཔཊིསནྡྷིཀཱཏི ཨཏིཁིཔྤཾ ཛཱནནསམཏྠེ སནྡྷཱཡ ཝུཏྟཾ, ན དུཧེཏུཀཱནཾ ཏཏྠ ཨསམྦྷཝཏོ. སབྷཱགསྶཱཏི པུརིསསྶ. ཝིསབྷཱགསྶཱཏི མཱཏུགཱམསྶ. པོཏྠཀརཱུཔསདིསསྶཱཏི མཏྟིཀཱདཱིཧི ཀཏརཱུཔསདིསསྶ ¶ . གརུམེདྷསྶཱཏི ཨཱརམྨཎེསུ ལཧུཔྤཝཏྟིཡཱ ཨབྷཱཝཏོ དནྡྷགཏིཀཏཱཡ གརུཔཉྙསྶ, མནྡཔཉྙསྶཱཏི ཝུཏྟཾ ཧོཏི.

ཨིདཱནེཏྠ སིཀྑཱཔཙྩཀྑཱནཝཱརསྶ པཱལི༹ཡཾ ཨཊྛཀཐཱཡཉྩ ཝུཏྟནཡཱནཾ སམྤིཎྜནཏྠཝསེན ཨེཝཾ ཝིནིཙྪཡོ ཝེདིཏབྦོ – ཏཏྠ ཧི སཱམཉྙཱ ཙཝིཏུཀཱམོཏིཨཱདཱིཧི པདེཧི ཙིཏྟནིཡམཾ དསྶེཏི. བུདྡྷནྟིཨཱདཱིཧི པདེཧི ཁེཏྟནིཡམཾ, པཙྩཀྑཱམི དྷཱརེཏཱིཏི ཨེཏེན ཀཱལནིཡམཾ, ཝདཏཱིཏི ¶ ཨིམིནཱ པཡོགནིཡམཾ, ཨལཾ མེ བུདྡྷེན, ཀིཾ ནུ མེ, ན མམཏྠོ, སུམུཏྟཱཧནྟིཨཱདཱིཧི ཨནཱམཊྛཀཱལཝསེནཔི པཙྩཀྑཱནཾ ཧོཏཱིཏི དསྶེཏི, ཝིཉྙཱཔེཏཱིཏི ཨིམིནཱ ཝིཛཱནནནིཡམཾ, ཨུམྨཏྟཀོ སིཀྑཾ པཙྩཀྑཱཏི ཨུམྨཏྟཀསྶ སནྟིཀེཏིཨཱདཱིཧི པུགྒལནིཡམཾ, སོ ཙ ནཔྤཊིཝིཛཱནཱཏཱིཏིཨཱདཱིཧི ཝིཛཱནནནིཡམཱབྷཱཝེན པཙྩཀྑཱནཱབྷཱཝཾ དསྶེཏི, དཝཱཡཱཏིཨཱདཱིཧི ཙིཏྟནིཡམཱབྷཱཝེན, སཱཝེཏུཀཱམོ ན སཱཝེཏཱིཏི ཨིམིནཱ པཡོགནིཡམཱབྷཱཝེན, ཨཝིཉྙུསྶ སཱཝེཏི ཝིཉྙུསྶ ན སཱཝེཏཱིཏི ཨེཏེཧི ཡཾ པུགྒལཾ ཨུདྡིསྶ སཱཝེཏི, ཏསྶེཝ སཝནེ སཱིསཾ ཨེཏི, ནཱཉྙསྶཱཏི. སབྦསོ ཝཱ པན ན སཱཝེཏི ཨཔྤཙྩཀྑཱཏཱ ཧོཏི སིཀྑཱཏི ཨིདཾ པན ཙིཏྟཱདིནིཡམེནེཝ སིཀྑཱཔཙྩཀྑཱནཾ ཧོཏི, ན ཨཉྙཐཱཏི དསྶནཏྠཾ ཝུཏྟཾ. ཏསྨཱ ཙིཏྟཁེཏྟཀཱལཔཡོགཔུགྒལཝིཛཱནནཝསེན སིཀྑཱཡ པཙྩཀྑཱནཾ ཉཏྭཱ ཏདབྷཱཝེན ཨཔྤཙྩཀྑཱནཾ ཝེདིཏབྦཾ.

ཀཐཾ? ཨུཔསམྤནྣབྷཱཝཏོ ཙཝིཏུཀཱམཏཱཙིཏྟེནེཝ ཧི སིཀྑཱཔཙྩཀྑཱནཾ ཧོཏི, ན དཝཱ ཝཱ རཝཱ ཝཱ བྷཎནྟསྶ. ཨེཝཾ ཙིཏྟཝསེན སིཀྑཱཔཙྩཀྑཱནཾ ཧོཏི, ན ཏདབྷཱཝེན. ཏཐཱ བུདྡྷཾ པཙྩཀྑཱམཱིཏིཨཱདིནཱ ཝུཏྟཱནཾ བུདྡྷཱདཱིནཾ སབྲཧྨཙཱརིཔརིཡོསཱནཱནཾ ཙཏུདྡསནྣཉྩེཝ གིཧཱིཏི མཾ དྷཱརེཧཱིཏིཨཱདིནཱ ཝུཏྟཱནཾ གིཧིཨཱདཱིནཾ ཨསཀྱཔུཏྟིཡཔརིཡོསཱནཱནཾ ཨཊྛནྣཉྩཱཏི ཨིམེསཾ དྭཱཝཱིསཏིཡཱ ཁེཏྟཔདཱནཾ ཡསྶ ཀསྶཙི སཝེཝཙནསྶ ཝསེན ཏེསུ ཡཾ ཀིཉྩི ཝཏྟུཀཱམསྶ ཡཾ ཀིཉྩི ཝདཏོཔི སིཀྑཱཔཙྩཀྑཱནཾ ཧོཏི. ཨེཝཾ ཁེཏྟཝསེན སིཀྑཱཔཙྩཀྑཱནཾ ཧོཏི, ན ཏདབྷཱཝེན. ཏཏྠ ཡདེཏཾ ‘‘པཙྩཀྑཱམཱིཏི ཙ མཾ དྷཱརེཧཱིཏི ཙཱ’’ཏི ཝུཏྟཾ ཝཏྟམཱནཀཱལཝཙནཾ, ཡཱནི ཙ ‘‘ཨལཾ མེ བུདྡྷེན, ཀིཾ ནུ མེ བུདྡྷེན, ན མམཏྠོ བུདྡྷེན, སུམུཏྟཱཧཾ བུདྡྷེནཱ’’ཏིཨཱདིནཱ ནཡེན ཨཱཁྱཱཏཝསེན ཀཱལཾ ཨནཱམསིཏྭཱ པུརིམེཧི ཙུདྡསཧི པདེཧི སདྡྷིཾ ཡོཛེཏྭཱ ཝུཏྟཱནི ཨལཾ མེཏིཨཱདཱིནི ཙཏྟཱརི པདཱནི, ཏེསཾཡེཝ ཙ སཝེཝཙནཱནཾ ཝསེན ¶ པཙྩཀྑཱནཾ ཧོཏི, ན པན ‘‘པཙྩཀྑཱསི’’ནྟི ཝཱ, ‘‘པཙྩཀྑིསྶ’’ནྟི ཝཱ, ‘‘མཾ དྷཱརེསཱི’’ཏི ཝཱ, ‘‘མཾ དྷཱརེསྶསཱི’’ཏི ཝཱ, ‘‘ཡཾནཱུན པཙྩཀྑེཡྻ’’ནྟི ཝཱཏིཨཱདཱིནི ཨཏཱིཏཱནཱགཏཔརིཀཔྤཝཙནཱནི བྷཎནྟསྶ. ཨེཝཾ ཝཏྟམཱནཀཱལཝསེན ཙེཝ ཨནཱམཊྛཀཱལཝསེན ཙ པཙྩཀྑཱནཾ ཧོཏི, ན ཏདབྷཱཝེན. པཡོགོ པན དུཝིདྷོ ཀཱཡིཀོ ཝཱཙསིཀོ, ཏཏྠ བུདྡྷཾ པཙྩཀྑཱམཱིཏིཨཱདིནཱ ནཡེན ཡཱཡ ཀཱཡཙི བྷཱསཱཡ ཝཙཱིབྷེདཾ ཀཏྭཱ ཝཱཙསིཀཔཡོགེནེཝ པཙྩཀྑཱནཾ ཧོཏི, ན ཨཀྑརལིཁནཾ ཝཱ ཧཏྠམུདྡཱདིདསྶནཾ ཝཱ ཀཱཡཔཡོགཾ ཀརོནྟསྶ. ཨེཝཾ ཝཱཙསིཀཔཡོགེནེཝ པཙྩཀྑཱནཾ ཧོཏི, ན ཏདབྷཱཝེན.

པུགྒལོ ¶ པན དུཝིདྷོ ཡོ ཙ པཙྩཀྑཱཏི, ཡསྶ ཙ པཙྩཀྑཱཏི, ཏཏྠ ཡོ པཙྩཀྑཱཏི, སོ སཙེ ཨུམྨཏྟཀཁིཏྟཙིཏྟཝེདནཊྚཱནཾ ཨཉྙཏརོ ན ཧོཏི, ཡསྶ པན པཙྩཀྑཱཏི, སོ སཙེ མནུསྶཛཱཏིཀོ ཧོཏི, ན ཙ ཨུམྨཏྟཀཱདཱིནཾ ཨཉྙཏརོ སམྨུཁཱིབྷཱུཏོ ཙ, སིཀྑཱཔཙྩཀྑཱནཾ ཧོཏི. ན ཧི ཨསམྨུཁཱིབྷཱུཏསྶ དཱུཏེན ཝཱ པཎྞེན ཝཱ ཨཱརོཙནཾ རུཧཏི. ཨེཝཾ ཡཐཱཝུཏྟཔུགྒལཝསེན པཙྩཀྑཱནཾ ཧོཏི, ན ཏདབྷཱཝེན. ཝིཛཱནནམྤི ནིཡམིཏཱནིཡམིཏཝསེན དུཝིདྷཾ. ཏཏྠ ཡསྶ ཡེསཾ ཝཱ ནིཡམེཏྭཱ ཨིམསྶ ཨིམེསཾ ཝཱ ཨཱརོཙེམཱིཏི ཝདཏི, སཙེ ཏེ ཡཐཱ པཀཏིཡཱ ལོཀེ མནུསྶཱ ཝཙནཾ སུཏྭཱ ཨཱཝཛྫནསམཡེ ཛཱནནྟི, ཨེཝཾ ཏསྶ ཝཙནཱནནྟརམེཝ ‘‘ཨཡཾ ཨུཀྐཎྛིཏོ’’ཏི ཝཱ, ‘‘གིཧིབྷཱཝཾ པཏྠཡཏཱི’’ཏི ཝཱ ཡེན ཀེནཙི ཨཱཀཱརེན མནུསྶཛཱཏིཀོ ཝཙནཏྠཾ ཛཱནཱཏི, པཙྩཀྑཱཏཱཝ ཧོཏི སིཀྑཱ. ཨཐ ཨཔརབྷཱགེ ‘‘ཀིཾ ཨིམིནཱ ཝུཏྟ’’ནྟི ཙིནྟེཏྭཱ ཛཱནནྟི, ཨཉྙེ ཝཱ ཛཱནནྟི, ཨཔྤཙྩཀྑཱཏཱཝ ཧོཏི. ཨནིཡམེཏྭཱ ཨཱརོཙེནྟསྶ པན སཙེ ཝུཏྟནཡེན ཡོ ཀོཙི མནུསྶཛཱཏིཀོ ཝཙནཏྠཾ ཛཱནཱཏི, པཙྩཀྑཱཏཱ ཧོཏི སིཀྑཱ, ཨེཝཾ ཛཱནནཝསེན པཙྩཀྑཱནཾ ཧོཏི, ན ཏདབྷཱཝེན. ཨིཏི ཨིམེསཾ ཝུཏྟཔྤཀཱརཱནཾ ཙིཏྟཱདཱིནཾ ཝསེནེཝ སིཀྑཱཔཙྩཀྑཱནཾ ཧོཏི, ན ཨཉྙཐཱཏི དཊྛབྦཾ.

སིཀྑཱཔཙྩཀྑཱནཝཎྞནཱནཡོ ནིཊྛིཏོ.

མཱུལཔཉྙཏྟིཝཎྞནཱ

༥༥. ཨིཏོ ¶ པཊྛཱཡཱཏི དུཊྛུལླཔདཏོ པཊྛཱཡ. མེཐུནདྷམྨོ ཡཐཱ སརཱུཔེནེཝ དུཊྛུལླཾ, ཨེཝཾ དསྶནཱདིདུཊྛུལླདྷམྨཔརིཝཱརཏྟཱཔི དུཊྛུལླནྟི དསྶེཏུཾ ཡསྨཱཏིཨཱདི ཝུཏྟཾ. ཨཝསྶུཏཱནནྟི མེཐུནརཱགེན ཏིནྟཱནཾ. པརིཡུཊྛིཏཱནནྟི མེཐུནརཱགེན ཨབྷིབྷཱུཏཙིཏྟཱནཾ. མེཐུན-སདྡསྶ སདིསསདྡཔཨཡཱཡཏྟཱ ཝུཏྟཾ ‘‘སདིསཱན’’ནྟི, རཏྟཏཱདཱིཧི སདིསཱནནྟི ཨཏྠོ. ཨིདཉྩ ཡེབྷུཡྻཏོ ཝུཏྟཾ ཨུབྷོསུ ཨཉྙཏརསྶ རཱགཱབྷཱཝེཔི ཨིཏརསྶ མེཐུནསེཝནསཾསིདྡྷིཏོ. མེཐུན-སདྡོ ཝཱ ཨུབྷཡསདྡཔཨཡཱཡོ, མེཐུནཾ ཡུགལ༹ཾ ཡམཀཾ ཨུབྷཡནྟི ཧི ཨཏྠཏོ ཨེཀཾ, ཏེནཱཧ ‘‘ཨུབྷིནྣཾ རཏྟཱན’’ནྟི. ‘‘དྭཡཾདྭཡསམཱཔཏྟཱི’’ཏི ཧི པཱལི༹ཡམྤི ཝུཏྟཾ. ནིམིཏྟེནཱཏི བྷུམྨཏྠེ ཀརཎཝཙནཾ, ཨིཏྠིནིམིཏྟེ ཨཏྟནོ ནིམིཏྟཾ པཝེསེཏཱིཏི ཨཏྠོ. ནིམིཏྟཾ ཨངྒཛཱཏནྟི ཨཏྠཏོ ཨེཀཾ. ཏིལཕལནྟི སཱསཔམཏྟཾ ཏིལབཱིཛཾ ཨདྷིཔྤེཏཾ, ན ཀོསསཧིཏཾ ཕལནྟི ཨཱཧ ‘‘ཏིལབཱིཛམཏྟམྤཱི’’ཏི. ཨལློཀཱསེཏི སབྷཱཝེན པིཧིཏསྶ ནིམིཏྟསྶ པཀཏིཝཱཏེན ཨསམྥུཊྛེ ཏིནྟཔྤདེསེ. ཏཱདིསོ པདེསོ ¶ སཙེཔི ཀེནཙི ཝཱཏཱདིཝིཀཱརེན སུཀྑཏི, ཏཐཱཔི ཨནལློཀཱསོཏི ཨུཔཀྐམཏོ པཱརཱཛིཀམེཝ.

ཝེམཛ྄ཛྷནྟི ཡཐཱ ཙཏྟཱརི པསྶཱནི ཨཕུསནྟོ པཝེསེཏི, ཨེཝཾ ཀཏཝིཝརསྶ ཨིཏྠིནིམིཏྟསྶ ཨབྦྷནྟརཏལཾ ཝུཙྩཏི. པུརིསནིམིཏྟེ པན མཛ྄ཛྷནྟི ཨགྒཀོཊིཾ སནྡྷཱཡ ཝདཏི. ཨུཔརཱིཏི མཛ྄ཛྷིམཔབྦེན སམིཉྫིཏྭཱ པཝེསིཡམཱནསྶ ཨངྒཛཱཏསྶ སམིཉྫིཏངྒུལིཡཱ མཛ྄ཛྷིམཔབྦཔིཊྛིསདིསཨགྒཀོཊིཡེཝ. ཧེཊྛཱ པཝེསེནྟོཏི ཨིཏྠིནིམིཏྟསྶ ཧེཊྛཱབྷཱགེན ཚུཔིཡམཱནཾ པཝེསེནྟོ, ཡཐཱ ཨིཏྠིནིམིཏྟསྶ ཨལློཀཱསཾ ཧེཊྛིམཏལཾ ཏིལབཱིཛམཏྟམྤི ཨཏྟནོ ནིམིཏྟེན ཚུཔཏི, ཨེཝཾ པཝེསེནྟོཏི ཨཏྠོ. ཚུཔནམེཝ ཧེཏྠ པཝེསནཾ, ཨེཝཾ སེསེསུཔི. མཛ྄ཛྷེན པཝེསེནྟོཏི ཨབྦྷནྟརཏལེན ཚུཔིཡམཱནཾ པཝེསེནྟོ, ཡཐཱ ཨབྦྷནྟརཏལཾ ཚུཔཏི, ཨེཝཾ པཝེསེནྟོཏི ཨཏྠོ. ཀཏྠཙི ཨཙྪུཔནྟཾ པཝེསེཏྭཱ ཨཱཀཱསགཏམེཝ ནཱིཧརནྟསྶ ནཏྠི པཱརཱཛིཀཾ, དུཀྐཊཾ པན ཧོཏི ཚིནྣསཱིསཝཏྠུསྨིཾ (པཱརཱ. ༧༣) ཝིཡ. མཛ྄ཛྷེནེཝ ཚུཔནྟཾ པཝེསེནྟོཏི ཨགྒཀོཊིཡཱ ཚུཔནྟཾ པཝེསེནྟོ. མཛ྄ཛྷིམཔབྦཔིཊྛིཡཱ སངྐོཙེཏྭཱཏི ནིམིཏྟཾ ཨཏྟནོ མཛ྄ཛྷིམཔབྦཔིཊྛིཡཱ ¶ སམིཉྫིཏྭཱ ཨུཔརིབྷཱགེན ཚུཔནྟཾ པཝེསེནྟོཔི. ཀིཾ ཝིཡ? སམིཉྫིཏངྒུལི ཝིཡཱཏི ཡོཛནཱ. ཨཐ ཝཱ མཛ྄ཛྷིམཔབྦཔིཊྛིཡཱ སམིཉྫིཏངྒུལི ཝིཡཱཏི སམྦནྡྷོ, སམིཉྫིཏངྒུལིཾ ཝཱ མཛ྄ཛྷིམཔབྦཔིཊྛིཡཱ པཝེསེནྟོ ཝིཡཱཏིཔི ཡོཛེཏབྦཾ. ཨུཔརིབྷཱགེནཱཏི སངྐོཙིཏསྶ ནིམིཏྟསྶ ཨུཔརིཀོཊིཡཱ.

ཨིདཱནི པུརིསནིམིཏྟསྶ ཧེཊྛཱ ཝུཏྟེསུ ཚསུ ‘‘ཨུཔརཱི’’ཏི ཝུཏྟསྶ ཚཊྛསྶ ཋཱནསྶ ཝསེན ཝིསུཾ ཙཏྟཱརི པསྶཱནི གཧེཏྭཱ པུརིསནིམིཏྟེ དསཊྛཱནབྷེདཾ དསྶེནྟོ ཏཏྠཱཏིཨཱདིམཱཧ. ཧེཊྛཱ པན ཨགཧིཏགྒཧཎཝསེན ཚ ཋཱནཱནི ཝུཏྟཱནི. ཏུལཱདཎྜསདིསཾ པཝེསེནྟསྶཱཔཱིཏི ཨསམིཉྫིཏྭཱ ཨུཛུཀཾ པཝེསེནྟསྶ. ཙམྨཁཱིལནྟི ཨེལ༹ཀཱདཱིནཾ གཱིཝཱཡ ཝིཡ ནིམིཏྟེ ཛཱཏཾ ཙམྨངྐུརཾ, ‘‘ཨུཎྞིགཎྜོ’’ཏིཔི ཝདནྟི. ‘‘ཨུཔཧཏཀཱཡཔྤསཱད’’ནྟི ཨཝཏྭཱ ནཊྛཀཱཡཔྤསཱདནྟི ཝཙནེན ཨུཔཱདིནྣབྷཱཝེ སཏི ཀེནཙི པཙྩཡེན ཨུཔཧཏེཔི ཀཱཡཔྤསཱདེ ཨུཔཧཏིནྡྲིཡཝཏྠུསྨིཾ (པཱརཱ. ༧༣) ཝིཡ པཱརཱཛིཀམེཝཱཏི དསྶེཏི. ཨིཏྠིནིམིཏྟསྶ པན ནཊྛེཔི ཨུཔཱདིནྣབྷཱཝེ སཏི མཏསརཱིརེ ཝིཡ པཱརཱཛིཀཀྑེཏྟཏཱ ན ཝིཛཧཏཱིཏི ཝེདིཏབྦཱ. མེཐུནསྶཱདེནཱཏི ཨིདཾ ཀཱཡསཾསགྒརཱགེ སཏི སངྒྷཱདིསེསོ ཧོཏཱིཏི ཝུཏྟཾ. བཱིཛཱནཱིཏི ཨཎྜཱནི.

མུཁཾ ཨཔིདྷཱཡཱཏི པམཱདེན སམུཔྤནྣམྤི ཧཱསཾ བཱིཛནིཡཱ པཊིཙྪཱདནམྤི ཨཀཏྭཱ ནིསཱིདནཾ ཨགཱརཝནྟི ཝུཏྟཾ. ཨཐ ཝཱ ཨཔིདྷཱཡཱཏི པིདཧིཏྭཱ, བཱིཛནིཡཱ མུཁཾ པཊིཙྪཱདེཏྭཱ ཧསམཱནེན ¶ ན ནིསཱིདིཏབྦནྟི ཨཏྠོ. དནྟཝིདཾསཀནྟི དནྟེ དསྶེཏྭཱ. གབྦྷིཏེནཱཏི ‘‘ཨཡུཏྟཀཐཱ’’ཏི སངྐོཙཾ ཨནཱཔཛྫནྟེན, ནིརཝསེསཱདྷིཔྤཱཡཀཐནེ སཉྫཱཏུསྶཱཧེནཱཏི ཨཏྠོ.

ཨནུཔཉྙཏྟིཝཎྞནཱ

པཱརཱཛིཀཝཏྠུབྷཱུཏཱཏི ཡེསཾ ཏཱིསུ མགྒེསུ ཏིལབཱིཛམཏྟམྤི ནིམིཏྟསྶ པཝེསོཀཱསོ ཧོཏི, ཏེ ཨིཏྠིཔུརིསཱདིབྷེདཱ སབྦེ སངྒཡ྄ཧནྟི, ན ཨིཏརེ. ཨིདྷ པན ཏིརཙྪཱནགཏཱཡཱཏི-པཱལི༹པདཱནུརཱུཔཏོ ན སབྦཱཏིཨཱདིནཱ ཨིཏྠིལིངྒཝསེན ཝུཏྟཾ. གོནསཱཏི སཔྤཝིསེསཱ, ཡེསཾ པིཊྛཱིསུ མཧནྟམཧནྟཱནི མཎྜལཱནི ཧོནྟི. ཀཙྪཔམཎྜཱུཀཱནཾ ཙཏུཔྤདཏྟེཔི ཨོདཀཏཱསཱམཉྙེན ¶ ཨཔདེཧི སཧ གཧཎཾ. མུཁསཎྛཱནནྟི ཨོཊྛཙམྨསཎྛཱནཾ. ཝཎསངྑེཔནྟི ཝཎསངྒཧཾ. ཝཎེ ཐུལླཙྩཡཉྩ ‘‘ཨམགྒེན ཨམགྒཾ པཝེསེཏི, ཨཱཔཏྟི ཐུལླཙྩཡསྶཱ’’ཏི (པཱརཱ. ༦༦) ཨིམསྶ སུཏྟསྶ ཝསེན ཝེདིཏབྦཾ. མངྒུསཱཏི ནཀུལཱ. ཨེཏམེཝ ཧི ཨཏྠནྟི ཡོ ནཾ ཨཛ྄ཛྷཱཔཛྫཏི, ཏཾ པརཱཛེཏཱིཏི ཨིམམཏྠཾ ཝུཏྟཱནཾཡེཝ པཱརཱཛིཀཱདིསདྡཱནཾ ནིབྦཙནཔྤསངྒེ ཨིམིསྶཱ པརིཝཱརགཱཐཱཡ པཝཏྟཏྟཱ. བྷཊྛོཏི སཱསནཏོ པརིཧཱིནོ. ནིརངྐཏོཏི ནིརཱཀཏོ. ཨེཏནྟི ཨཱཔཏྟིརཱུཔཾ པཱརཱཛིཀཾ. ཚིནྣོཏི ཨནྟརཱཁཎྜིཏོ.

པཀཏཏྟེཧི བྷིཀྑཱུཧཱིཏི ཨེཏྠ པཀཏཏྟཱ ནཱམ པཱརཱཛིཀཾ ཨནཱཔནྣཱ ཨནུཀྑིཏྟཱ ཙ. ཀེཙི པན ‘‘པཀཏཏྟེཧི བྷིཀྑཱུཧི ཨེཀཏོ ཀཏྟབྦཏྟཱཏི ཨཊྛཀཐཱཡཾ ཝུཏྟཏྟཱ པཀཏཏྟབྷཱུཏེཧི ཨལཛྫཱིཧིཔི སདྡྷིཾ ཨུཔོསཐཱདིསངྒྷཀམྨཀརཎེ དོསོ ནཏྠཱི’’ཏི ཝདནྟི, ཏཾ ན ཡུཏྟཾ, ཨིམིནཱ ཝཙནེན ཏསྶ ཨཏྠསྶ ཨསིཛ྄ཛྷནཏོ. ཡདི ཧི སངྒྷཀམྨཾ ཀརཱིཡཏི, པཀཏཏྟེཧེཝ ཀརཱིཡཏི, ན ཨཔཀཏཏྟེཧཱིཏི ཨེཝཾ ཨཔཀཏཏྟེཧི སཧསཾཝཱསཔཊིཀྑེཔཔརཾ ཨིདཾ ཝཙནཾ, ན པན པཀཏཏྟེཧི སབྦེཧི ཨལཛྫཱིཨཱདཱིཧི ཨེཀཏོ སངྒྷཀམྨཾ ཀཏྟབྦམེཝཱཏི. ཨེཝཾ སཾཝཱསཝིདྷཱནཔརཾ པཀཏཏྟེསུཔི སབྷཱགཱཔཏྟིཾ ཨཱཔནྣེཧི ཨཉྙམཉྙཉྩ ཨལཛྫཱིཧི ཙ སདྡྷིཾ ཨེཀཏོ ཀམྨཀརཎསྶ པཊིཀྑིཏྟཏྟཱ. ཝུཏྟཉྷི ‘‘སཙེ སབྦོ སངྒྷོ སབྷཱགཱཔཏྟིཡཱ སཏི ཝུཏྟཝིདྷིཾ ཨཀཏྭཱ ཨུཔོསཐཾ ཀརོཏི, ཝུཏྟནཡེནེཝ སབྦོ སངྒྷོ ཨཱཔཏྟིཾ ཨཱཔཛྫཏཱི’’ཏིཨཱདི (ཀངྑཱ. ཨཊྛ. ནིདཱནཝཎྞནཱ). ‘‘ཡཏྠ ཨཱམིསཔརིབྷོགོ ཝཊྚཏི, དྷམྨཔརིབྷོགོཔི ཏཏྠ ཝཊྚཏཱི’’ཏི ཨལཛྫཱིཧི སཧ པརིབྷོགོ ཙ ཨཊྛཀཐཱཡཾ པཊིཀྑིཏྟོ ཨེཀཏོ ཀམྨཀརཎསྶཱཔི དྷམྨཔརིབྷོགཏྟཱ. ཏསྨཱ ཡཐཱ ཧི པཱལི༹ཡཾ པཱརཱཛིཀཱཔཏྟིཨཱཔཛྫནཀཔུགྒལནིཡམཏྠཾ ཡྭཱཡཾ ཉཏྟིཙཏུཏྠེན ཀམྨེན…པེ… ཨུཔསམྤནྣོ, ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི ཨིམསྨིཾ ཝཙནེ སབྦེཔི ཉཏྟིཙཏུཏྠཀམྨེན ཨུཔསམྤནྣཱ པཱརཱཛིཀཱཔཛྫནཀཔུགྒལཱཡེཝཱཏི ནིཡམོ ན སིཛ྄ཛྷཏི ¶ པཱརཱཛིཀཱནཱཔཛྫནཀཱནམྤི སེཀྑཱདཱིནཾ སམྦྷཝཱ, ཨཐ ཁོ ཉཏྟིཙཏུཏྠཀམྨེན ཨུཔསམྤནྣེསུཡེཝ པཱརཱཛིཀཱཔཏྟིཨཱཔཛྫནཀཱ ཨལཛྫཱི བཱལཔུཐུཛྫནཱ ལབྦྷནྟི, ན པན ཨེཧིབྷིཀྑུཨཱདཱིསཱུཏི ཨེཝཾ ནིཡམོ སིཛ྄ཛྷཏི, ཨེཝམིདྷཱཔི པཀཏཏྟེསུཡེཝ ཨེཀཏོ ཀམྨཀརཎཱརཧཱ ཨནཱཔཏྟིཀཱ ལཛྫཱི ཀུཀྐུཙྩཀཱ སིཀྑཱཀཱམཱ ཨུཔལབྦྷནྟི ¶ , ན ཨཔཀཏཏྟེསཱུཏི ཨེཝམེཝ ནིཡམོ སིཛ྄ཛྷཏི ཨཔཀཏཏྟཱནཾ གཎཔཱུརཎཏྟཱབྷཱཝེན ཨསཾཝཱསིཀཏྟནིཡམཏོ. ཨལཛྫིནོ པན གཎཔཱུརཀཱ ཧུཏྭཱ ཀམྨསྶ སཱདྷནཏོ ཨསཾཝཱསིཀེསུ ན གཧིཏཱ ཀཏྟབྦཝིདྷིཾ ཨཀཏྭཱ ཏེཧི སཧ མདྡིཏྭཱ ཀམྨཾ ཀརོནྟཱནཾ ཨཱཔཏྟི ཨལཛྫིཏཱ ཙ ན ཝིགཙྪཏཱིཏི ཝེདིཏབྦཾ. ‘‘ཨེཀོ ཨལཛྫཱི ཨལཛྫཱིསཏམྤི ཀརོཏཱི’’ཏི (པཱརཱ. ཨཊྛ. ༢.༥༨༥) ཧི ཝུཏྟཾ, ཏེནེཝ ཝཀྑཏི ‘‘སབྦེཔི ལཛྫིནོ ཨེཏེསུ ཀམྨཱདཱིསུ སཧ ཝསནྟཱི’’ཏིཨཱདི. ཨཡཉྩཏྠོ ཨུཔརི ཝིཏྠཱརཏོ ཨཱཝི བྷཝིསྶཏི.

ཏཐཱཏི སཱིམཱཔརིཙྪིནྣེཧཱིཏིཨཱདིཾ པརཱམསཏི. ཨེཀཏོ ཝནྡནབྷུཉྫནགཱམཔྤཝེསནཝཏྟཱཔཊིཝཏྟཀརཎཨུགྒཧཔརིཔུཙྪཱསཛ྄ཛྷཱཡཀརཎཱདིསཱམགྒིཀིརིཡཱཝསེན བྷགཝཏཱ པཉྙཏྟསིཀྑཱཔདསིཀྑནཾ སམསིཀྑཏཱ ནཱམ, ཏཉྩ ལཛྫཱིཧེཝ སམཾ སིཀྑིཏབྦཾ, ན ཨལཛྫཱིཧཱིཏི དསྶེཏུཾ ‘‘པཉྙཏྟཾ པན…པེ… སམསིཀྑཏཱ ནཱམཱ’’ཏི ཝུཏྟཾ. ཏཏྠ ཨནཏིཀྐམནཝསེན ཨུགྒཧཔརིཔུཙྪཱདིཝསེན ཙ ལཛྫཱིཔུགྒལེཧི སམཾ ཨེཀཏོ སིཀྑིཏབྦཱ སམསིཀྑཱཏི སིཀྑཱཔདཱནི ཝུཏྟཱནི, ཏཱསཾ སམསིཀྑནཾ ཡཐཱཝུཏྟནཡེན ལཛྫཱིཧི སིཀྑིཏབྦབྷཱཝོ སམསིཀྑཏཱ ནཱམཱཏི ཨདྷིཔྤཱཡོ. ཡཐཱཝུཏྟེསུ ཨེཀཀམྨཱདཱིསུ ཨལཛྫཱིནཾ ལཛྫིདྷམྨེ ཨནོཀྐནྟེ ལཛྫཱིཧི སཧ སཾཝཱསོ ནཏྠི, ཏཏོ བཧིཡེཝ ཏེ སནྡིསྶནྟཱིཏི ཨཱཧ སབྦེཔི ལཛྫིནོཏིཨཱདི.

༥༦. ཡཾ ཏཾ ཝུཏྟནྟི སམྦནྡྷོ. ཝཏྠུམེཝ ན ཧོཏཱིཏི སུཝཎྞཱདཱིཧི ཀཏཨིཏྠིརཱུཔཱནཾ ཨངྒཛཱཏེསུཔི ནིམིཏྟཝོཧཱརདསྶནཏོ ཏཏྠ པཱརཱཛིཀཱསངྐཱནིཝཏྟནཏྠཾ ཝུཏྟཾ. ཏེནེཝ ཝིནཱིཏཝཏྠཱུསུ ལེཔཙིཏྟཱདིཝཏྠཱུསུ སཉྫཱཏཀུཀྐུཙྩསྶ པཱརཱཛིཀེན ཨནཱཔཏྟི ཝུཏྟཱ.

པཋམཙཏུཀྐཝཎྞནཱ

༥༧. ཨསྶཱཏི ཨཱཁྱཱཏཔདནྟི ཏསྶ ཨཏྠཾ དསྶེནྟོ ‘‘ཧོཏཱི’’ཏི ཨཱཧ, བྷཝེཡྻཱཏི ཨཏྠོ, ཧོཏཱིཏི ཝུཏྟཾ ཧོཏི. དུཏིཡེ ཨཏྠཝིཀཔྤེ ‘‘ཧོཏཱི’’ཏི ཨིདཾ ཝཙནསེསོ.

༥༨. སཱདིཡནྟསྶེཝཱཏི ¶ ཨེཏྠ སཱདིཡནཾ ནཱམ སེཝེཏུཀཱམཏཱཙིཏྟསྶ ཨུཔྤཱདནམེཝཱཏི ཨཱཧ ‘‘པཊིསེཝནཙིཏྟསམངྒིསྶཱ’’ཏི. པཊིཔཀྑནྟི ཨནིཊྛཾ ¶ ཨཧིཏཾ. ‘‘བྷིཀྑཱུནཾ པཙྩཏྠིཀཱ བྷིཀྑུཔཙྩཏྠིཀཱ’’ཏི ཝུཏྟེ ཨུཔརི ཝུཙྩམཱནཱ རཱཛཔཙྩཏྠིཀཱདཡོཔི ཨིདྷེཝ པཝིསནྟཱིཏི ཏཾ ནིཝཏྟནཏྠཾ བྷིཀྑཱུ ཨེཝ པཙྩཏྠིཀཱཏི རཱཛཔཙྩཏྠིཀཱནུརཱུཔེན ཨཏྠོ དསྶིཏོ. ཏསྨིཾ ཁཎེཏི པཝེསནཀྑཎེ. ཨགྒཏོ ཧི ཡཱཝ མཱུལཱ པཝེསནཀིརིཡཱཡ ཝཏྟམཱནཀཱལོ པཝེསནཀྑཎོ ནཱམ. པཝིཊྛཀཱལེཏི ཨངྒཛཱཏསྶ ཡཏྟཀཾ ཋཱནཾ པཝེསནཱརཧཾ, ཏཏྟཀཾ ཨནཝསེསཏོ པཝིཊྛཀཱལེ, པཝེསནཀིརིཡཱཡ ནིཊྛིཏཀྑཎེཏི ཨཏྠོ. ཨེཝཾ པཝིཊྛསྶ ཨུདྡྷརཎཱརམྦྷཏོ ཨནྟརཱ ཋིཏཀཱལེ ཋིཏཾ ཨངྒཛཱཏཾ, ཏསྶ ཋིཏི ཝཱ ཋིཏཾ ནཱམ, ཨཊྛཀཐཱཡཾ པན མཱཏུགཱམསྶ སུཀྐཝིསྶཊྛིཾ པཏྭཱ སབྦཐཱ ཝཱཡཱམཏོ ཨོརམིཏྭཱ ཋིཏཀཱལཾ སནྡྷཱཡ ‘‘སུཀྐཝིསྶཊྛིསམཡེ’’ཏི ཝུཏྟཾ, ཏདུབྷཡམྤི ཋིཏམེཝཱཏི གཧེཏབྦཾ. ཨུདྡྷརཎཾ ནཱམ ཡཱཝ ཨགྒཱ ནཱིཧརཎཀིརིཡཱཡ ཝཏྟམཱནཀཱལོཏི ཨཱཧ ‘‘ནཱིཧརཎཀཱལེ པཊིསེཝནཙིཏྟཾ ཨུཔཊྛཱཔེཏཱི’’ཏི.

ཨེཏྠ ཙ ཡསྨཱ པརེཧི ཨུཔཀྐམིཡམཱནསྶ ཨངྒཛཱཏཱདིཀཱཡཙལནསྶ ཝིཛྫམཱནཏྟཱ སེཝནཙིཏྟེ ཨུཔཊྛིཏམཏྟེ ཏསྨིཾ ཁཎེ ཙིཏྟཛརཱུཔེན སཉྫཱཡམཱནཾ ཨངྒཛཱཏཱདིཙལནཾ ཨིམིནཱ སེཝནཙིཏྟེན ཨུཔྤཱདིཏམེཝ ཧོཏི. ཨཔིཙ སེཝནཙིཏྟེ ཨུཔྤནྣེ པརེཧི ཨནུཔཀྐམིཡམཱནསྶཱཔི ཨངྒཛཱཏེ ཙལནཾ ཧོཏེཝ, ཏཉྩ ཏེན ཀཏཾ ནཱམ ཧོཏི, ཏསྨཱ ཀཱཡཙིཏྟཏོ སམུཊྛིཏཾ པཱརཱཛིཀཱཔཏྟིཾ སོ ཨཱཔཛྫཏིཡེཝ ཨུབྦྷཛཱཎུམཎྜལིཀཱ (པཱཙི. ༦༥༧-༦༥༨) ཝིཡ. ཏཏྠཱཔི ཧི ‘‘ཨདྷཀྑཀཾ ཨུབྦྷཛཱཎུམཎྜལཾ ཨཱམསནཾ ཝཱ…པེ… པཊིཔཱིལ༹ནཾ ཝཱ སཱདིཡེཡྻཱ’’ཏི (པཱཙི. ༦༥༧) སཱདིཡནམཏྟེཡེཝ ཨཱཔཏྟི ཝུཏྟཱ, བྷིཀྑུནོ ཀཱཡསཾསགྒེ པན ‘‘ཀཱཡསཾསགྒཾ སམཱཔཛྫེཡྻཱ’’ཏི (པཱརཱ. ༢༧༠) ཨཏྟནོ ཨུཔཀྐམསྶ ཨཱཔཏྟིནིམིཏྟབྷཱཝེན ཝུཏྟཏྟཱ ཨིཏྠིཡཱ ཕུསིཡམཱནསྶ ཀཱཡསཾསགྒརཱགེ ཙ ཨིཏྠིཡཱ སཉྫནིཏཀཱཡཙལནེ ཙ ཝིཛྫམཱནེཔི ཨཏྟནོ པཡོགཱབྷཱཝེན ཨནཱཔཏྟིཡེཝ ཝུཏྟཱཏི གཧེཏབྦཾ. ཀེཙི པན ‘‘པཋམསངྒྷཱདིསེསཝིསཡེཔི པརེཧི བལཀྐཱརེན ཧཏྠཱདཱིཧི ཨུཔཀྐམིཡམཱནསྶ མོཙནསྶཱདོ ཙ ཨུཔྤཛྫཏི, ཏེན ཙ ཨསུཙིམྷི མུཏྟེ སངྒྷཱདིསེསོ, ཨམུཏྟེ ཐུལླཙྩཡཾ ཨེཝཱ’’ཏི ཝདནྟི. ཨངྒཱརཀཱསུནྟི ཨངྒཱརརཱསིཾ, ཨངྒཱརཔུཎྞཱཝཱཊཾ ཝཱ. ཨིཏྠིཡཱ ཨུཔཀྐམིཡམཱནེ ཨསཱདིཡནཾ ནཱམ ན སབྦེསཾ ཝིསཡོཏི ¶ ཨཱཧ ཨིམཉྷཱིཏིཨཱདི. ཨེཀཱདསཧི ཨགྒཱིཧཱིཏི རཱགདོསམོཧཛཱཏིཛརཱམརཎསོཀཔརིདེཝདུཀྑདོམནསྶུཔཱཡཱསསངྑཱཏེཧི ཨེཀཱདསགྒཱིཧི. ཨསྶཱཏི ཨསཱདིཡནྟསྶ. ཙཏུཀྐཾ ནཱིཧརིཏྭཱ ཋཔེསཱིཏི ཨེཏྠ ཨེཀཔུགྒལཝིསཡཏཱཡ ཨེཀོཔི ཨནཱཔཏྟིཝཱརོ པཝེསནཔཝིཊྛཋིཏཨུདྡྷརཎསངྑཨཱཏཱནཾ ཙཏུནྣཾ པདཱནཾ ཝསེན ‘‘ཙཏུཀྐ’’ནྟི ཝུཏྟོ. པཋམཙཏུཀྐཀཐཱཏི ཨེཏྠ པན ཨནཱཔཏྟིཝཱརེན སདྡྷིཾ པཉྩནྣཾ ཝཱརཱནཾ ཝུཏྟནཡེན ‘‘པཉྩ ཙཏུཀྐཱ’’ཏི ཝཏྟབྦེཔི ཨེཀམགྒཝིསཡཏཱཡ ¶ ཏེསཾ ཨེཀཏྟཾ ཨཱརོཔེཏྭཱ པཋམཙཏུཀྐཏཱ ཝུཏྟཱ. ཏེནེཝ ཝཀྑཏི ཏིཎྞཾ མགྒཱནཾ ཝསེན ཏཱིཎི སུདྡྷིཀཙཏུཀྐཱནཱིཏིཨཱདི.

ཨེཀཱུནསཏྟཏིདྭིསཏཙཏུཀྐཀཐཱཝཎྞནཱ

༥༩-༦༠. མཏྟནྟི སུརཱདཱིཧི མཏྟཾ. ཨཀྑཱཡིཏནིམིཏྟཱ ཨིདྷ ཨུཏྟརཔདལོཔེན ཨཀྑཱཡིཏསདྡེན ཝུཏྟཱཏི ཨཱཧ ‘‘ཨཀྑཱཡིཏནིམིཏྟ’’ནྟི. ཛཱགརནྟིནྟིཨཱདི ཝིསེསནརཧིཏཏྟཱ ‘‘སུདྡྷིཀཙཏུཀྐཱནཱི’’ཏི ཝུཏྟཾ. སམཱནཱཙརིཡཀཱཐེརཱཏི ཨེཀཱཙརིཡསྶ ཨུདྡེསནྟེཝཱསིཀཱ. གངྒཱཡ ཨཔརབྷཱགོ ཨཔརགངྒཾ. ཝཏརེཏི གརཧཏྠེ ནིཔཱཏོ. ཨེཝཾ ཝིནཡགརུཀཱནནྟི ཨིམིནཱ ཨུཔརི ཨུཔཏིསྶཏྠེརེན ཝུཙྩམཱནཝིནིཙྪཡསྶ གརུཀརཎཱིཡཏཱཡ ཀཱརཎཾ ཝུཏྟཾ. སབྦཾ པརིཡཱདིཡིཏྭཱཏི སབྦཾ པཱརཱཛིཀཁེཏྟཾ ཨནཝསེསཏོ གཧེཏྭཱ. ཡདི ཧི སཱཝསེསཾ ཀཏྭཱ པཉྙཔེཡྻ, ཨལཛྫཱིནཾ ཏཏྠ ལེསེན ཨཛ྄ཛྷཱཙཱརསོཏོ པཝཏྟཏཱིཏི ཨཱཧ ‘‘སོཏཾ ཚིནྡིཏྭཱ’’ཏི. སཧསེཡྻཱདིཔཎྞཏྟིཝཛྫསིཀྑཱཔདེསུཡེཝ (པཱཙི. ༤༩-༥༡) སཱཝསེསཾ ཀཏྭཱཔི པཉྙཱཔནཾ སམྦྷཝཏི, ན ལོཀཝཛྫེསཱུཏི ཨཱཧ ཨིདཉྷཱིཏིཨཱདི. སཧསེཡྻསིཀྑཱཔདེ ཧི (པཱཙི. ༤༩ ཨཱདཡོ) ཀིཉྩཱཔི ཡེབྷུཡྻཙྪནྣེ ཡེབྷུཡྻཔརིཙྪནྣེ ཧེཊྛིམཔརིཙྪེདཏོ པཱཙིཏྟིཡཾ དསྶིཏཾ, ཨུཔཌྜྷཙྪནྣེ ཨུཔཌྜྷཔརིཙྪནྣེ དུཀྐཊཾ, ཏཐཱཔི སཱཝསེསཏྟཱ པཉྙཏྟིཡཱ ཡེབྷུཡྻཙྪནྣཨུཔཌྜྷཔརིཙྪནྣཱདཱིསུཔི ཨཊྛཀཐཱཡཾ པཱཙིཏྟིཡམེཝ དསྶིཏཾ. ཨིདྷ པན ནིརཝསེསཏྟཱ པཉྙཏྟིཡཱ བྷགཝཏཱ དསྶིཏཾ ཡེབྷུཡྻེན ཨཀྑཱཡིཏནིམིཏྟཏོ ཧེཊྛཱ པཱརཱཛིཀཀྑེཏྟཾ ནཏྠི, ཐུལླཙྩཡཱདིམེཝ ཏཏྠ ལབྦྷཏི.

ཨུཔཏིསྶཏྠེརེན ཝུཏྟསྶེཝ ཝིནིཙྪཡསྶ ཨཉྙམྤི ཨུཔཏྠམྦྷཀཱརཎཾ དསྶེནྟོ ཨཔིཙཱཏིཨཱདིམཱཧ. ནིམིཏྟེ ཨཔྤམཏྟིཀཱཔི མཾསརཱཛི སཙེ ཨཝསིཊྛཱ ¶ ཧོཏི, ཏཾ ཡེབྷུཡྻཀྑཱཡིཏམེཝ ཧོཏི, ཏཏོ པརཾ པན སབྦསོ ཁཱཡིཏེ ནིམིཏྟེ དུཀྐཊམེཝཱཏི དསྶེནྟོ ཨཱཧ ‘‘ཏཏོ པརཾ ཐུལླཙྩཡཾ ནཏྠཱི’’ཏི. ཀེཙི པནེཏྠ ཝཙྩམགྒཱདིཾ ཙཏྟཱརོ ཀོཊྛཱསེ ཀཏྭཱ ‘‘ཏེསུ དྭེ ཀོཊྛཱསེ ཨཏིཀྐམྨ ཡཱཝ ཏཏིཡཀོཊྛཱསསྶ པརིཡོསཱནཱ ཁཱཡིཏཾ ཡེབྷུཡྻཀྑཱཡིཏཾ ནཱམ, ཏཏོ པརཾ ཐུལླཙྩཡཾ ནཏྠི, ཡཱཝ ཙཏུཏྠཀོཊྛཱསསྶ པརིཡོསཱནཱ ཁཱཡིཏཾ, ཏམྤི དུཀྐཊཝཏྠུཡེཝཱ’’ཏི ཙ ཝདནྟི, ཏཾ ན ཡུཏྟཾ. མཏསརཱིརསྨིཾཡེཝ ཝེདིཏབྦནྟི མཏཾ ཡེབྷུཡྻེན ཨཀྑཱཡིཏནྟིཨཱདིཝཙནཏོ ཝུཏྟཾ. ཡདིཔི ནིམིཏྟནྟིཨཱདི ཛཱིཝམཱནཀསརཱིརམེཝ སནྡྷཱཡ ཝུཏྟཾ ཏསྶེཝ ཨདྷིཀཏཏྟཱ. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. པཋམཔཱརཱཛིཀཝཎྞནཱ) ‘‘ཛཱིཝམཱནཀསརཱིརསྶ ཝུཏྟཔྤཀཱརེ མགྒེ སཙེཔི ཏཙཱདཱིནི ཨནཝསེསེཏྭཱ སབྦསོ ཚིནྣེ’’ཏིཨཱདི ¶ ཝུཏྟཾ. སབྦསོ ཁཱཡིཏནྟི ནིམིཏྟམཾསཾ སབྦཾ ཚིནྣནྟི ཨཏྠོ. ནིམིཏྟསཎྛཱནནྟི ཚིནྣམཾསསྶ ཨནྟོ ཡཱཝ མུཏྟཝཏྠིཀོསཱ ཚིདྡཱཀཱརོ ཨབྦྷནྟརཚཝིཙམྨམཏྟོ ཨིཏྠིནིམིཏྟཱཀཱརོ, ཏེནཱཧ ‘‘པཝེསནཾ ཛཱཡཏཱི’’ཏི. ནིམིཏྟསཎྛཱནཾ པན ཨནཝསེསེཏྭཱཏི པཝེསནཱརཧཚིདྡཱཀཱརེན ཋིཏཨབྦྷནྟརམཾསཱདིཾ ཨནཝསེསེཏྭཱ. ཨེཏེན ཡཱཝ པཝེསོ ལབྦྷཏི, ཏཱཝ མགྒོཡེཝཱཏི དསྶེཏི. ནིམིཏྟཏོ པཏིཏཱཡ མཾསཔེསིཡཱཏི ཨིདཾ ནིམིཏྟསཎྛཱནཝིརཧིཏཾ ཨབྦྷནྟརམཾསཁཎྜཾ སནྡྷཱཡ ཝུཏྟཾ. ནིམིཏྟསཎྛཱནཾ ཨཀོཔེཏྭཱ སམནྟཏོ ཚིནྡིཏྭཱ ཨུདྡྷཊམཾསཔེསིཡཱ པན མཏསརཱིརེ ཡེབྷུཡྻེན ཨཀྑཱཡིཏནིམིཏྟེ ཝིཡ ཨུཔཀྐམནྟསྶ པཱརཱཛིཀམེཝ.

ཨེཝཾ ཛཱིཝམཱནཀམནུསྶསརཱིརེ ལབྦྷམཱནཝིསེསཾ དསྶེཏྭཱ ཨིདཱནི མཏསརཱིརེ དསྶེཏུཾ མཏསརཱིརེ པནཱཏིཨཱདིམཱཧ. ཝཏྠིཀོསེསཱུཏི པུརིསཱནཾ ཨངྒཛཱཏཀོསཙམྨེསུ. ‘‘ནཝདྭཱརོ མཧཱཝཎོ’’ཏིཨཱདི (མི. པ. ༢.༦.༡) ཝཙནཏོ མནུསྶཱནཾ ཨཀྑིནཱསཱདཱིནི ཝཎསངྑེཔེན ཐུལླཙྩཡཀྑེཏྟཱནཱིཏི ཏེསུཔི ཐུལླཙྩཡཾ ཝུཏྟཾ, ཨེཝཾ མནུསྶཱནཾ མཏསརཱིརེཔི, ཏེནཱཧ མཏེ ཨལླསརཱིརེཏིཨཱདི. ཏཏྠ ཨལླསརཱིརེཏི ཨཀུཐིཏཾ སནྡྷཱཡ ཝུཏྟཾ. པཱརཱཛིཀཀྑེཏྟེཏི ཡེབྷུཡྻེན ཨཀྑཱཡིཏམྤི སནྡྷཱཡ ཝུཏྟཾ. ཐུལླཙྩཡཀྑེཏྟེཏི ཨུཔཌྜྷཀྑཱཡིཏཱདིམྤི སནྡྷཱཡ ཝུཏྟཾ. ཨེཏྠ ཙ ཨཀྑིནཱསཱདིཐུལླཙྩཡཀྑེཏྟེསུ ཡེབྷུཡྻེན ཨཀྑཱཡིཏེསུཔི ཐུལླཙྩཡཾ, ཨུཔཌྜྷཀྑཱཡིཏཱདཱིསུ དུཀྐཊནྟི ཝེདིཏབྦཾ. སབྦེསམྤཱིཏི ཡཐཱཝུཏྟཧཏྠིཨཱདཱིཧི ཨཉྙེསཾ ཏིརཙྪཱནཱནཾ ¶ སངྒཎྷནཏྠཾ ཝུཏྟཾ. ཏིརཙྪཱནགཏཱནཾ ཨཀྑིཀཎྞཝཎེསུ དུཀྐཊཾ པན ཨཊྛཀཐཱཔྤམཱཎེན གཧེཏབྦཾ, ‘‘ཨམགྒེན ཨམགྒཾ པཝེསེཏི, ཨཱཔཏྟི ཐུལླཙྩཡསྶཱ’’ཏི (པཱརཱ. ༦༦) ཧི སཱམཉྙཏོ ཝུཏྟཾ, ན པན མནུསྶཱནནྟི ཝིསེསེཏྭཱ. ཡདི ཧི མནུསྶཱནཉྙེཝ ཝཎེསུ ཐུལླཙྩཡཾ སིཡཱ, ཧཏྠིཨསྶཱདཱིནཾ ནཱསཝཏྠིཀོསེསུཔི པཊངྒམུཁམཎྜཱུཀསྶ མུཁསཎྛཱནེཔི ཙ ཝཎསངྑེཔཏོ ཐུལླཙྩཡཾ ན ཝཏྟབྦཾ སིཡཱ, ཝུཏྟཉྩ. ཏསྨཱ ཨཊྛཀཐཱཙརིཡཱ ཨེཝེཏྠ པམཱཎཾ. མཏཱནཾ ཏིརཙྪཱནགཏཱནནྟི མཏཀེན སམྦནྡྷོ.

མེཐུནརཱགེན ཝཏྠིཀོསཾ པཝེསེནྟསྶ ཐུལླཙྩཡཾ ཝུཏྟནྟི ཨཱཧ ‘‘ཝཏྠིཀོསཾ ཨཔྤཝེསེནྟོ’’ཏི. མེཐུནརཱགོ ཙ ནཱམ ཀཱཡསཾསགྒརཱགཾ མོཙནསྶཱདཉྩ མུཉྩིཏྭཱ ཝིསུཾ དྭཡཾདྭཡསམཱཔཏྟིཡཱ རཱགོ, སོ ཙ པུརིསཱདཱིསུཔི ཨུཔྤཛྫཏི, ཏེན ཙ ཨཔཱརཱཛིཀཀྑེཏྟེ ཨིཏྠིསརཱིརེཔི ཨུཔཀྐམནྟསྶ ཨསུཙིམྷི མུཏྟེཔི སངྒྷཱདིསེསོ ན ཧོཏི, ཁེཏྟཱནུརཱུཔཾ ཐུལླཙྩཡདུཀྐཊམེཝ ཧོཏཱིཏི ཝེདིཏབྦཾ. ཨཔྤཝེསེནྟོཏི ཨིམིནཱ ཏཱིསུ མགྒེསུ པཝེསནཱདྷིཔྤཱཡེ ཨསཏིཔི མེཐུནརཱགེན བཧི གྷཊྚནཾ སམྦྷཝཏཱིཏི དསྶེཏི, ཏེནེཝ ཐུལླཙྩཡཾ ཝུཏྟཾ, ཨིཏརཐཱ པཝེསནཱདྷིཔྤཱཡེན ¶ བཧི ཚུཔནྟསྶ མེཐུནསྶ པུབྦཔཡོགཏྟཱ དུཀྐཊམེཝ ཝཏྟབྦཾ སིཡཱ. ནིམིཏྟེན ནིམིཏྟཾ ཚུཔཏི ཐུལླཙྩཡནྟི ཨིདཉྩ ‘‘ན ཙ, བྷིཀྑཝེ, རཏྟཙིཏྟེན ཨངྒཛཱཏཾ ཚུཔིཏབྦཾ, ཡོ ཚུཔེཡྻ, ཨཱཔཏྟི ཐུལླཙྩཡསྶཱ’’ཏི (མཧཱཝ. ༢༥༢) ཨིམསྶ ཙམྨཀྑནྡྷཀེ ཨཱགཏསྶ སུཏྟསྶ ཝསེན ཝུཏྟཾ. ཏཏྠ ཙ ཀེསཉྩི ཨཉྙཐཱཔི ཨཏྠཝིཀཔྤསྶ བཱིཛཾ དསྶེནྟོ མཧཱཨཊྛཀཐཱཡཾ པནཱཏིཨཱདིམཱཧ. མུཁེནེཝ ཚུཔནཾ སནྡྷཱཡཱཏི ཨོཊྛཛིཝ྄ཧཱདིམུཁཱཝཡཝེན ཚུཔནཾ སནྡྷཱཡ. ཨོལཱ༹རིཀཏྟཱཏི ཨཛ྄ཛྷཱཙཱརསྶ ཐུལླཏྟཱ. ཏཾ སནྡྷཱཡབྷཱསིཏནྟི ཏཾ ཡཐཱཝུཏྟསུཏྟཾ. སུཏྟཉྷི ཨཛ྄ཛྷཱཙཱརཾ སནྡྷཱཡ པཊིཙྩ ཝུཏྟཏྟཱ ‘‘སནྡྷཱཡབྷཱསིཏ’’ནྟི ཝུཙྩཏི. སུཊྛུསལླཀྑེཏྭཱཏི པིཊྛིཾ ཨབྷིརུཧནྟཱནཾ ཨངྒཛཱཏམུཁེནེཝ ནིམིཏྟཚུཔནསྶ སམྦྷཝཾ མེཐུནརཱགཱིནཉྩ ཨངྒཛཱཏེན ཚུཔནསྶེཝ ཨནུརཱུཔཏཉྩ སུཏྟེ ཙ ‘‘མུཁེནཱ’’ཏི ཨཝུཏྟཏཉྩ ཨཉྙཉྩ ནཡཾ ཡཐཱབལཾ སུཊྛུ སལླཀྑེཏྭཱཏི ཨཏྠོ. སངྒྷཱདིསེསོཏི མནུསྶིཏྠིཾ སནྡྷཱཡ ཝུཏྟཾ. པསྶཱཝམགྒནྟི ཨིདཾ ཙམྨཀྑནྡྷཀེ ནིདཱནཝསེན ཝུཏྟཾ. ཨིཏརམགྒདྭཡཾ པན ནིམིཏྟམུཁེན ཚུཔནྟསྶ ཝཎསངྑེཔེན ཐུལླཙྩཡམེཝ. ཝུཏྟནཡེནེཝཱཏི མེཐུནརཱགེནེཝ. ནིམིཏྟམུཁེན པན ཝིནཱ མེཐུནརཱགེན མནུསྶིཏྠིཡཱ ཝཱ ཏིརཙྪཱནགཏིཏྠིཡཱ ཝཱ པསྶཱཝམགྒཾ ¶ པཀཏིམུཁེན ཚུཔནྟསྶ དུཀྐཊམེཝ པཀཏིམུཁེན པཀཏིམུཁཚུཔནེ ཝིཡ, ཨིཏརཐཱ ཏཏྠཱཔི ཐུལླཙྩཡེན བྷཝིཏབྦཾ, ཏཉྩ ན ཡུཏྟཾ ཁནྡྷཀསུཏྟེཔི ཏཐཱ ཨཝུཏྟཏྟཱ. ཀཱཡསཾསགྒརཱགེན དུཀྐཊནྟི ནིམིཏྟམུཁེན ཝཱ པཀཏིམུཁཱདིཾ ཨིཏརཀཱཡེན ཝཱ ཀཱཡསཾསགྒརཱགེན ཚུཔནྟསྶ དུཀྐཊམེཝ.

ཨེཏྠ ཙ ཀཱཡསཾསགྒརཱགེན བཧིནིམིཏྟེ ཨུཔཀྐམཏོ ཨཛཱནནྟསྶེཝ ཨངྒཛཱཏཾ ཡདི པཱརཱཛིཀཀྑེཏྟཾ ཚུཔཏི, ཏཏྠ ཀིཾ ཧོཏཱིཏི? ཀེཙི ཏཱཝ ‘‘མེཐུནརཱགསྶ ཨབྷཱཝཱ མནུསྶིཏྠིཡཱ སངྒྷཱདིསེསོ, སེསེསུ ཝཏྠུཝསེན ཐུལླཙྩཡདུཀྐཊཱནཱི’’ཏི ཝདནྟི. ཨཉྙེ པན ‘‘པཝེསནཀྑཎེ ཕསྶསྶ སཱདིཡནསམྦྷཝཏོ བལཀྐཱརེན ཨུཔཀྐམནཀྑཎེ ཝིཡ པཱརཱཛིཀམེཝཱ’’ཏི ཝདནྟི, ཨིདམེཝ ཡུཏྟཏརཾ. མགྒཏྟཡཏོ ཧི ཨཉྙསྨིཾ པདེསེཡེཝ ཀཱཡསཾསགྒཱདིརཱགབྷེདཏོ ཨཱཔཏྟིབྷེདོ ལབྦྷཏི, ན མགྒཏྟཡེ. ཏཏྠ པན ཡེན ཀེནཙི ཨཱཀཱརེན ཕསྶསྶ སཱདིཡནཀྑཎེ པཱརཱཛིཀམེཝ, ཏེནེཝ པརོཔཀྐམེན པཝེསནཱདཱིསུ རཱགབྷེདཾ ཨནུདྡྷརིཏྭཱ སཱདིཡནམཏྟེན པཱརཱཛིཀཾ ཝུཏྟཾ.

སནྠཏཙཏུཀྐབྷེདཀཐཱཝཎྞནཱ

༦༡-༢. པཊིཔནྣཀསྶཱཏི ཨཱརདྡྷཝིཔསྶཀསྶ. ཨུཔཱདིནྣཀནྟི ཀཱཡིནྡྲིཡཾ སནྡྷཱཡ ཝུཏྟཾ. ཨུཔཱདིནྣཀེན ཕུསཏཱིཏི ཨུཔཱདིནྣཀསརཱིརེན ཕུསཱིཡཏཱིཏི ཀམྨསཱདྷནེན ཨཏྠོ དཊྛབྦོ. ཨཐ ཝཱ ཨེཝཾ ¶ ཀརོནྟོ བྷིཀྑུ ཀིཉྩི ཨུཔཱདིནྣཀཾ ཨུཔཱདིནྣཀེན ན ཕུསཏཱིཏི ཨཏྠོ. ལེསཾ ཨོཌྜེསྶནྟཱིཏི ལེསཾ ཋཔེསྶནྟི, པརིཀཔྤེསྶནྟཱིཏི ཨཏྠོ. སནྠཏཱདིབྷེདེཧི བྷིནྡིཏྭཱཏི སནྠཏཱདིཝིསེསནེཧི ཝིསེསེཏྭཱ. སནྠཏཱཡཱཏི སམུདཱཡེ ཨེཀདེསཝོཧཱརོ དཌྜྷསྶ པཊསྶ ཚིདྡནྟིཨཱདཱིསུ ཝིཡ. ཡཐཱ ཧི པཊསྶ ཨེཀདེསོཝ ཝཏྠཏོ དཌྜྷོཏི ཝུཙྩཏི, ཏཾ ཨེཀདེསཝོཧཱརཾ སམུདཱཡེ པཊེ ཨུཔཙཱརཏོ ཨཱརོཔེཏྭཱ པུན ཏཾ སམུདཱཡཾ དཌྜྷཔྤདེསསངྑཱཏཚིདྡསམྦནྡྷཱིབྷཱཝེན ‘‘དཌྜྷསྶ པཊསྶ ཚིདྡ’’ནྟི ཝོཧརནྟི, ཨེཝམིདྷཱཔི ཨིཏྠིཡཱ མགྒཔྤདེསཝོཧཱརཾ སམུདཱཡབྷཱུཏཱཡ ཨིཏྠིཡཱ ཨཱརོཔེཏྭཱ པུན ཏཾ ཨིཏྠིཾ སནྠཏམགྒསམྦནྡྷིནིཾ ཀཏྭཱ སནྠཏཱཡ ཨིཏྠིཡཱ ཝཙྩམགྒེནཱཏིཨཱདི ཝུཏྟཾ. སཱརཏྠདཱིཔནིཡཾ (སཱརཏྠ. ཊཱི. པཱརཱཛིཀཀཎྜ ༢.༦༡-༦༢) པནེཏྠ ‘‘ཨེཀདེསེ སམུདཱཡཝོཧཱརོ’’ཏི ཝུཏྟཾ, ཏཾ ན ¶ ཡུཏྟཾ ཨཝཡཝཝོཧཱརེན སམུདཱཡསྶེཝ པཏཱིཡམཱནཏྟཱ. ཨིཏརཐཱ ཧི སནྠཏཱཡ ཝཙྩམགྒེནཱཏི ཨིཏྠིལིངྒཏཱ མགྒསམྦནྡྷིཏཱ ཙ ན སིཡཱ, ཨེཀདེསེ སམུདཱཡོཔཙཱརསྶ པན ཨེཀདེསོཝ ཨཏྠོ སཱཁཱཡ ཚིཛྫམཱནཱཡ རུཀྑོ ཚིཛྫཏཱིཏིཨཱདཱིསུ ཝིཡ.

ཝཏྠཱདཱིནི མགྒསྶ ཨནྟོ ཨཔྤཝེསེཏྭཱ བཧིཡེཝ ཝེཋནཾ སནྡྷཱཡ ‘‘པལིཝེཋེཏྭཱ’’ཏི ཝུཏྟཾ. སམུདཱཡེ ཨཝཡཝཱུཔཙཱརེནེཝ བྷིཀྑུཔི སནྠཏོ ནཱམཱཏིཨཱདི ཝུཏྟཾ. ཡཏྟཀེ པཝིཊྛེཏི ཏིལབཱིཛམཏྟེ པཝིཊྛེ. ཨཀྑིནཱསཱདཱིནཾ སནྠཏཏྟེཔི ཡཐཱཝཏྠུཀམེཝཱཏི ཨཱཧ ཐུལླཙྩཡཀྑེཏྟེ ཐུལླཙྩཡནྟིཨཱདི. ཁཱཎུཾ གྷཊྚེནྟསྶ དུཀྐཊནྟི ཨིཏྠིནིམིཏྟསྶ ཨནྟོ ཁཱཎུཾ པཝེསེཏྭཱ སམཏལཾ, ཨཏིརིཏྟཾ ཝཱ ཋིཏཾ ཁཱཎུཾ སཙེ གྷཊྚེཏི, གྷཊྚེནྟསྶ དུཀྐཊཾ པཝེསཱབྷཱཝཏོ. སཙེ པན ཨཱིསཀཾ ཨནྟོ ཨལློཀཱསེ པཝེསེཏྭཱ ཋིཏཾ ཨནུཔཱདིནྣམེཝ ཁཱཎུསཱིསཾ ཨངྒཛཱཏེན ཚུཔཏི, པཱརཱཛིཀམེཝ. ཏསྶ ཏལནྟི ཝེལུ༹ནལཱ༹དིཀསྶ ཨནྟོཏལཾ. བཧིདྡྷཱ ཁཱཎུཀེཏི ཨནྟོ པཝེསིཏཝེལུ༹པབྦཱདིཀསྶ བཧི ནིཀྑནྟསཱིསཾ སནྡྷཱཡ ཝུཏྟཾ. ཡཐཱ ཙ ཨིཏྠིནིམིཏྟེཏིཨཱདཱིསུ ཡཐཱ ཨིཏྠིཡཱ པསྶཱཝམགྒེ ཁཱཎུཾ ཀཏྭཱ གྷཊྚནཱདིཀཾ ཝུཏྟཾ, ཨེཝཾ སབྦཏྠ ཝཙྩམགྒཱདཱིསུཔི ལཀྑཎཾ ཝེདིཏབྦནྟི ཨཏྠོ.

རཱཛཔཙྩཏྠིཀཱདིཙཏུཀྐབྷེདཀཐཱཝཎྞནཱ

༦༥. ཀེརཱཊིཀཱཏི ཝཉྩཀཱ. པཋམཾ ཨིཏྠིདྷུཏྟམེཝ དསྶེཏྭཱ ཨིདཱནི ཨིཏརདྷུཏྟེཔི སངྒཧེཏྭཱ དསྶེཏུཾ ‘‘ཨིཏྠིདྷུཏྟསུརཱདྷུཏྟཱདཡོ ཝཱ’’ཏི ཝུཏྟཾ.

ཨཱཔཏྟཱནཱཔཏྟིཝཱརཝཎྞནཱ

༦༦. པཊིཉྙཱཏཀརཎཾ ¶ ནཏྠི སེཝེཏུཀཱམཏཱ མགྒེན མགྒཔྤཊིཔཏྟཱིཏི དྭིནྣཾ ཨངྒཱནཾ སིདྡྷཏྟཱ. དཱུསིཏསྶ པན མགྒེན མགྒཔྤཊིཔཏྟི ཨེཝམེཀཾ ཨངྒཾ སིདྡྷཾ, སེཝེཏུཀཱམཏཱསངྑཱཏཾ སཱདིཡནཾ ཨསིདྡྷཾ. ཏསྨཱ སོ པུཙྪིཏྭཱ ‘‘སཱདིཡི’’ནྟི ཝུཏྟཔཊིཉྙཱཡ ནཱསེཏབྦོ. ཏཏྠེཝཱཏི ཝེསཱལིཡཾ མཧཱཝནེ ཨེཝ. སབྦངྒགཏནྟི སབྦཀཱཡགཏཾ. ‘‘ལོཧིཏཾ ཝིཡཱ’’ཏི ཝུཏྟཏྟཱ ཀེསཱདཱིནཾ ཝིནིམུཏྟཊྛཱནེ སབྦཏྠཱཏི གཧེཏབྦཾ. ནིཙྩམེཝ ཨུམྨཏྟཀོ ཧོཏཱིཏི ¶ ཡསྶ པིཏྟཀོསཏོ པིཏྟཾ ཙལིཏྭཱ སབྦདཱ བཧི ནིཀྑནྟཾ ཧོཏི, ཏཾ སནྡྷཱཡ ཝུཏྟཾ. ཡསྶ པན པིཏྟཾ ཙལིཏྭཱ པིཏྟཀོསེཡེཝ ཋིཏཾ ཧོཏི, ཀདཱཙི ཝཱ ནིཀྑནྟཾ པུན ནིཀྑམཏི, སོཔི ཨནྟརནྟརཱ སཉྙཾ པཊིལབྷཏི བྷེསཛྫེན ཙ པཀཏིཨཱརོགྱཾ པཊིལབྷཏཱིཏི ཝེདིཏབྦཾ.

པདབྷཱཛནཱིཡཝཎྞནཱནཡོ ནིཊྛིཏོ.

པཀིཎྞཀཀཐཱཝཎྞནཱ

པཀིཎྞཀནྟི ཝོམིསྶཀནཡཾ. སམུཊྛཱནནྟི ཨུཔྤཏྟིཀཱརཎཾ. ཀིརིཡཱཏིཨཱདི ནིདསྶནམཏྟཾ ཨཀིརིཡཱདཱིནམྤི སངྒཧཏོ. ཝེདནཱཡ སཧ ཀུསལཉྩ ཝེདིཏབྦནྟི ཡོཛེཏབྦཾ. སབྦསངྒཱཧཀཝསེནཱཏི སབྦེསཾ སིཀྑཱཔདཱནཾ སངྒཱཧཀཝསེན ‘‘ཀཱཡོ ཝཱཙཱ ཀཱཡཝཱཙཱ ཀཱཡཙིཏྟཾ ཝཱཙཱཙིཏྟཾ ཀཱཡཝཱཙཱཙིཏྟ’’ནྟི ཨེཝཾ ཝུཏྟཱནི ཚ ཨཱཔཏྟིསམུཊྛཱནཱནི. སམུཊྛཱནཱདཡོ ཧི ཨཱཔཏྟིཡཱ ཨེཝ ཧོནྟི, ན སིཀྑཱཔདསྶ. ཏཾཏཾསིཀྑཱཔདསྶ ནིཡཏཨཱཔཏྟིཡཱ ཨེཝ གཧཎཏྠཾ པན སིཀྑཱཔདསཱིསེན སམུཊྛཱནཱདཱིནཾ ཀཐནཾ. ཨེཝཉྷི ཨཱཔཏྟིཝིསེསོ པཉྙཱཡཏི ཨཱཔཏྟི-སདྡསྶ སབྦཱཔཏྟིསཱདྷཱརཎཏྟཱ, ཨིམེསུ པན ཚསུ སམུཊྛཱནེསུ པུརིམཱནི ཏཱིཎི ཨཙིཏྟཀཱནི, པཙྪིམཱནི སཙིཏྟཀཱནི. སམཱསཏོ ཏཾ ཨིམཾ པཀིཎྞཀཾ ཝིདིཏྭཱ ཝེདིཏབྦནྟི སམྦནྡྷོ. ཚ སམུཊྛཱནཱནི ཨེཏསྶཱཏི ཚསམུཊྛཱནཾ. ཨེཝཾ སེསེསུཔི.

ཨཏྠི ཀཐིནསམུཊྛཱནནྟིཨཱདི སམུཊྛཱནསཱིསཝསེན དྭིསམུཊྛཱནཨེཀསམུཊྛཱནཱནཾ དསྶནཾ. ཏེརས ཧི སམུཊྛཱནསཱིསཱནི པཋམཔཱརཱཛིཀསམུཊྛཱནཾ ཨདིནྣཱདཱནསམུཊྛཱནཾ སཉྩརིཏྟསམུཊྛཱནཾ སམནུབྷཱསནསམུཊྛཱནཾ ཀཐིནསམུཊྛཱནཾ ཨེལ༹ཀལོམསམུཊྛཱནཾ པདསོདྷམྨསམུཊྛཱནཾ ཨདྡྷཱནསམུཊྛཱནཾ ཐེཡྻསཏྠསམུཊྛཱནཾ དྷམྨདེསནཱསམུཊྛཱནཾ བྷཱུཏཱརོཙནསམུཊྛཱནཾ ཙོརཱིཝུཊྛཱཔནསམུཊྛཱནཾ ཨནནུཉྙཱཏསམཨུཊྛཱནནྟི. ཏཏྠ ཨཏྠི ཚསམུཊྛཱནནྟི ཨིམིནཱ སཉྩརིཏྟསམུཊྛཱནཾ ཝུཏྟཾ, པཉྩསམུཊྛཱནསྶ ཨབྷཱཝཏོ ¶ ‘‘ཨཏྠི པཉྩསམུཊྛཱན’’ནྟི ཨཝཏྭཱ ‘‘ཨཏྠི ཙཏུསམུཊྛཱན’’ནྟི ཝུཏྟཾ, ཨིམིནཱ ཙ ཨདྡྷཱནསམུཊྛཱནཾ ཨནནུཉྙཱཏསམུཊྛཱནཉྩ སངྒཧིཏཾ. ཡཉྷི པཋམཏཏིཡཙཏུཏྠཚཊྛེཧི སམུཊྛཱནེཧི སམུཊྛཱཏི ¶ , ཨིདཾ ཨདྡྷཱནསམུཊྛཱནཾ. ཡཾ པན དུཏིཡཏཏིཡཔཉྩམཚཊྛེཧི སམུཊྛཱཏི, ཨིདཾ ཨནནུཉྙཱཏསམུཊྛཱནཾ. ཨཏྠི ཏིསམུཊྛཱནནྟི ཨིམིནཱ ཨདིནྣཱདཱནསམུཊྛཱནཾ བྷཱུཏཱརོཙནསམུཊྛཱནཉྩ སངྒཧིཏཾ. ཡཉྷི སཙིཏྟཀེཧི ཏཱིཧི སམུཊྛཱཏི, ཨིདཾ ཨདིནྣཱདཱནསམུཊྛཱནཾ. ཡཾ པན ཨཙིཏྟཀེཧི ཏཱིཧི སམུཊྛཱཏི, ཨིདཾ བྷཱུཏཱརོཙནསམུཊྛཱནཾ. ཨཏྠི ཀཐིནསམུཊྛཱནནྟིཨཱདིནཱ པན ཨཝསེསསམཨུཊྛཱནསཱིསཝསེན དྭིསམུཊྛཱནཾ ཨེཀསམུཊྛཱནཉྩ སངྒཎྷཱཏི. ཏཏྠ ཧི ཡཾ ཏཏིཡཚཊྛེཧི སམུཊྛཱཏི, ཨིདཾ ཀཐིནསམུཊྛཱནཾ ནཱམ. ཡཾ པན པཋམཙཏུཏྠེཧི སམུཊྛཱཏི, ཨིདཾ ཨེལ༹ཀལོམསམུཊྛཱནཾ. ཡཾ ཚཊྛེནེཝ སམུཊྛཱཏི, ཨིདཾ དྷུརནིཀྑེཔསམུཊྛཱནཾ, ‘‘སམནུབྷཱསནསམཨུཊྛཱན’’ནྟིཔི ཏསྶེཝ ནཱམཾ. ཨིཏི སརཱུཔེན ཨཊྛ ཨཱཔཏྟིསཱིསཱནི དསྶིཏཱནི. ཨཱདིསདྡེན པནེཏྠ ཨཝསེསཱནི པཋམཔཱརཱཛིཀསམུཊྛཱནཔདསོདྷམྨཐེཡྻསཏྠདྷམྨདེསནཱཙོརཱིཝུཊྛཱཔནསམུཊྛཱནཱནི པཉྩཔི སམུཊྛཱནསཱིསཱནི སངྒཧིཏཱནི. ཏཏྠ ཡཾ ཀཱཡཙིཏྟཏོ སམུཊྛཱཏི, ཨིདཾ པཋམཔཱརཱཛིཀསམུཊྛཱནཾ. ཡཾ དུཏིཡཔཉྩམེཧི སམུཊྛཱཏི, ཨིདཾ པདསོདྷམྨསམུཊྛཱནཾ. ཡཾ ཙཏུཏྠཚཊྛེཧི སམུཊྛཱཏི, ཨིདཾ ཐེཡྻསཏྠསམུཊྛཱནཾ. ཡཾ པཉྩམེནེཝ སམུཊྛཱཏི, ཨིདཾ དྷམྨདེསནཱསམཨུཊྛཱནཾ. ཡཾ པཉྩམཚཊྛེཧི སམུཊྛཱཏི, ཨིདཾ ཙོརཱིཝུཊྛཱཔནསམུཊྛཱནཾ. ཨེཏྠ ཙ པཙྪིམེསུ ཏཱིསུ སཙིཏྟཀསམུཊྛཱནེསུ ཨེཀེཀསམུཊྛཱནཝསེན ཨེཀསམུཊྛཱནཱནི ཏིཝིདྷཱནི. དྭིསམུཊྛཱནཱནི པན པཋམཙཏུཏྠེཧི ཝཱ དུཏིཡཔཉྩམེཧི ཝཱ ཏཏིཡཚཊྛེཧི ཝཱ ཙཏུཏྠཚཊྛེཧི ཝཱ པཉྩམཚཊྛེཧི ཝཱ སམུཊྛཱནཝསེན པཉྩཝིདྷཱནཱིཏི ཝེདིཏབྦཱནི.

ཨེཝཾ སམུཊྛཱནཝསེན སབྦསིཀྑཱཔདཱནི ཏེརསདྷཱ དསྶེཏྭཱ ཨིདཱནི ཀིརིཡཱཝསེན པཉྩདྷཱ དསྶེཏུཾ ཏཏྲཱཔཱིཏིཨཱདི ཝུཏྟཾ. ཀིཉྩཱིཏི སིཀྑཱཔདཾ. ཀིརིཡཏོཏི པཐཝཱིཁཎནཱདི (པཱཙི. ༨༤-༨༥) ཝིཡ ཀཱཡཝཙཱིཝིཉྙཏྟིཛནིཏཀམྨཏོ. ཨཀིརིཡཏོཏི པཋམཀཐིནཱདི (པཱརཱ. ༤༥༩ ཨཱདཡོ) ཝིཡ ཀཏྟབྦསྶ ཨཀརཎེནེཝ. ཀིརིཡཱཀིརིཡཏོཏི ཨཉྙཱཏིཀཱཡ བྷིཀྑུནིཡཱ ཧཏྠཏོ ཙཱིཝརཔཊིགྒཧཎཱདི (པཱརཱ. ༥༠༨ ཨཱདཡོ) ཝིཡ. སིཡཱ ཀིརིཡཏོ, སིཡཱ ཨཀིརིཡཏོ རཱུཔིཡཔཊིགྒཧཎཱདི (པཱརཱ. ༥༨༢ ཨཱདཡོ) ཝིཡ, སིཡཱ ཀིརིཡཏོ, སིཡཱ ཀིརིཡཱཀིརིཡཏོ ཀུཊིཀཱརཱདི (པཱརཱ. ༣༤༢) ཝིཡ. ཝཱིཏིཀྐམསཉྙཱཡ ཨབྷཱཝེན ཝིམོཀྑོ ཨསྶཱཏི སཉྙཱཝིམོཀྑནྟི མཛ྄ཛྷེཔདལོཔཱིསམཱསོ དཊྛབྦོ. ཙིཏྟངྒཾ ལབྷཏི སཙིཏྟཀསམུཊྛཱནེཧེཝ ¶ སམུཊྛཧནཏོ. ཨིཏརནྟི ཡསྶ ཙིཏྟངྒནིཡམོ ནཏྠི, ཏཾ, ཨནཱཔཏྟིམུཁེན ཙེཏཾ སཉྙཱདུཀཾ ཝུཏྟཾ, ཨཱཔཏྟིམུཁེན སཙིཏྟཀདུཀནྟི ཨེཏྟཀམེཝ ཝིསེསོ, ཨཏྠཏོ སམཱནཱཝ.

ཀཱཡཝཙཱིདྭཱརེཧི ¶ ཨཱཔཛྫིཏབྦམྤི ཀཱཡཀམྨེ ཝཱ ཝཙཱིཀམྨེ ཝཱ སངྒཡ྄ཧཏི. ཏཏྠ བཱཧུལླཝུཏྟིཏོ ཨདིནྣཱདཱནམུསཱཝཱདཱདཡོ ཝིཡཱཏི ཨཏྠི སིཀྑཱཔདཾ ཀཱཡཀམྨནྟིཨཱདིནཱ ཀཱཡཀམྨཾ ཝཙཱིཀམྨཉྩཱཏི དུཀམེཝ ཝུཏྟཾ, ཝིབྷཱགཏོ པན ཀཱཡཝཙཱིཀམྨེན སདྡྷིཾ ཏིཀམེཝ ཧོཏི. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. པཋམཔཱརཱཛིཀཝཎྞནཱ) ཝུཏྟཾ ‘‘སབྦཱ ཙ ཀཱཡཀམྨཝཙཱིཀམྨཏདུབྷཡཝསེན ཏིཝིདྷཱ ཧོནྟཱི’’ཏི. ཏཏོཡེཝ ཨིདྷཱཔི ཨདིནྣཱདཱནཱདཱིསུ (པཱརཱ. ༨༩) ཀཱཡཀམྨཝཙཱིཀམྨནྟི ཏདུབྷཡཝསེན དསྶིཏཾ. ཨཏྠི པན སིཀྑཱཔདཾ ཀུསལནྟིཨཱདི ཨཱཔཏྟིསམུཊྛཱཔཀཙིཏྟཝསེན ཀཱརིཡེ ཀཱརཎོཔཙཱརེན ཝུཏྟཾ, ན པན ཨཱཔཏྟིཡཱ ཀུསལཱདིཔརམཏྠདྷམྨཏཱཝསེན ཨཱཔཏྟིཡཱ སམྨུཏིསབྷཱཝཏྟཱ. ཀུསལཱཀུསལཱདིཔརམཏྠདྷམྨེ ཨུཔཱདཱཡ ཧི བྷགཝཏཱ ཨཱཔཏྟིསམྨུཏི པཉྙཏྟཱ. ཝཀྑཏི ཧི ‘‘ཡཾ ཀུསལཙིཏྟེན ཨཱཔཛྫཏི, ཏཾ ཀུསལ’’ནྟིཨཱདི (པཱརཱ. ཨཊྛ. ༡.༦༦ པཀཎྞཀཀཐཱ). ན ཧི བྷགཝཏོ ཨཱཎཱཡཏྟཱ ཨཱཔཏྟི ཀུསལཱདིཔརམཏྠསབྷཱཝཱ ཧོཏི ཨནུཔསམྤནྣཱནཾ ཨཱདིཀམྨིཀཱནཉྩ ཨཱཔཏྟིཔྤསངྒཏོ, ཏསྶཱ དེསནཱདཱིཧི ཝིསུདྡྷིཨབྷཱཝཔྤསངྒཏོ ཙ. ན ཧི ཀཱརཎབལེན ཨུཔྤཛྫམཱནཱ ཀུསལཱདིསབྷཱཝཱ ཨཱཔཏྟི ཨནུཔསམྤནྣཱདཱིསུ ནིཝཏྟཏི, ཨུཔྤནྣཱཡ ཙ ཏསྶཱ ཀེནཙི ཝིནཱསོ ན སམྦྷཝཏི. སརསཝིནཱསཏོ དེསནཱདིནཱ ཙ ཨཱཔཏྟི ཝིགཙྪཏཱིཏི ཝཙནམཏྠི, ན པན ཏེན ཨཀུསལཱདི ཝིགཙྪཏི. པིཏུགྷཱཏཱདིཀམྨེན ཧི པཱརཱཛིཀཾ ཨཱཔནྣསྶ བྷིཀྑུནོ གིཧིལིངྒཾ གཧེཏྭཱ བྷིཀྑུབྷཱཝཔརིཙྩཱགེན པཱརཱཛིཀཱཔཏྟི ཝིགཙྪཏི, ན པཱཎཱཏིཔཱཏཱདིཨཀུསལཾ ཨཱནནྟརིཡཱདིབྷཱཝཏོ. ཏསྨཱ དུམྨངྐཱུནཾ ནིགྒཧཱདིདསཨཏྠཝསེ (པཱརཱ. ༣༩; པརི. ༢) པཊིཙྩ བྷགཝཏཱ ཡཐཱཔཙྩཡཾ སམུཔྤཛྫམཱནེ ཀུསལཱཀུསལཱདིནཱམརཱུཔདྷམྨེ ཨུཔཱདཱཡ པཉྙཏྟཱ སམྨུཏིཡེཝ ཨཱཔཏྟི, སཱ ཙ ཡཐཱཝིདྷིཔཊིཀམྨཀརཎེན ཝིགཏཱ ནཱམ ཧོཏཱིཏི ཝེདིཏབྦཾ, ཏེནཱཧ དྭཏྟིཾསེཝ ཧི ཨཱཔཏྟིསམུཊྛཱཔཀཙིཏྟཱནཱིཏིཨཱདི. ཨཱཔཏྟིསམུཊྛཱཔཀཏྟེནེཝ ཧེཏྠ ཀུསལཱདཱིནཾ ཨཱཔཏྟིཏོ བྷེདོ སིདྡྷོ. ན ¶ ཧི ཏཾསམུཊྛིཏསྶ ཏཏོ ཨབྷེདོ ཡུཏྟོ སམུཊྛཱནསམུཊྛིཏབྷེདབྱཝཧཱརུཔཙྪེདཔྤསངྒཏོ. སཱརཏྠདཱིཔནིཡཾ (སཱརཏྠ. ཊཱི. པཱརཱཛིཀཀཎྜ ༢.༦༦ པཀིཎྞཀཀཐཱཝཎྞནཱ) པན ཨཱཔཏྟིཡཱ པརམཏྠཏོ ཀུསལཏྟམེཝ ན སམྦྷཝཏི ‘‘ཨཱཔཏྟཱདྷིཀརཎཾ སིཡཱ ཨཀུསལཾ, སིཡཱ ཨབྱཱཀཏཾ, ནཏྠི ཨཱཔཏྟཱདྷིཀརཎཾ ཀུསལ’’ནྟི ཝཙནཏོ, ‘‘ཨཀུསལཏྟཾ པན ཨབྱཱཀཏཏྟཉྩ ཨཱཔཏྟིཡཱ སམྦྷཝཏཱི’’ཏི སཉྙཱཡ ཀུསལཙིཏྟསམུཊྛཱནཀྑཎེཔི རཱུཔཱབྱཱཀཏཏྟཾ ཨཱཔཏྟིཡཱ སམཏྠེཏུཾ ཡཾ ཀུསལཙིཏྟེན ཨཱཔཛྫཏི, ཏཾ ཀུསལཾ, ཨིཏརེཧི ཨིཏརནྟི (པཱརཱ. ཨཊྛ. ༡.༦༦ པཀིཎྞཀཀཐཱ) ཨིམཾ ཨཊྛཀཐཱཝཙནཾ ནིསྶཱཡ ཝུཏྟཾ ‘‘ཡཾ ཀུསལཙིཏྟེན ཨཱཔཛྫཏཱིཏི ཡཾ སིཀྑཱཔདསཱིསེ གཧིཏཾ ཨཱཔཏྟིཾ ཀུསལཙིཏྟསམངྒཱི ཨཱཔཛྫཏི, ཨིམིནཱ པན ཝཙནེན ཏཾ ཀུསལནྟི ཨཱཔཏྟིཡཱ ཝུཙྩམཱནོ ཀུསལབྷཱཝོ པརིཡཱཡཏོ, ན པརམཏྠཏོཏི དསྶེཏི. ཀུསལཙིཏྟེན ཧི ཨཱཔཏྟིཾ ཨཱཔཛྫནྟོ སཝིཉྙཏྟིཀཾ ¶ ཨཝིཉྙཏྟིཀཾ ཝཱ སིཀྑཱཔདཝཱིཏིཀྐམཱཀཱརཔྤཝཏྟཾ རཱུཔཀྑནྡྷསངྑཱཏཾ ཨབྱཱཀཏཱཔཏྟིཾ ཨཱཔཛྫཏཱི’’ཏི. ཏཏྠ ཡཾ ཀུསལཙིཏྟེན ཨཱཔཛྫཏཱིཏི ཨིམཾ ཝཙནཾ ཨུདྡིསྶ ‘‘ཨིམིནཱ པན ཝཙནེན ཏཾ ཀུསལནྟི ཨཱཔཏྟིཡཱ ཝུཙྩམཱནོ ཀུསལབྷཱཝོ པརིཡཱཡཏོ, ན པརམཏྠཏོཏི དསྶེཏཱི’’ཏི ཝུཏྟཾ, ཨེཝཾ ཨིཏརེཧི ཨིཏརནྟི ཝཙནེན ‘‘ཡཾ ཨཀུསལཙིཏྟེན ཨཱཔཛྫཧི, ཏཾ ཨཀུསལཾ, ཡཾ ཨབྱཱཀཏཙིཏྟེན ཨཱཔཛྫཏི, ཏཾ ཨབྱཱཀཏ’’ནྟི ཨིམསྶ ཨཏྠསྶ ཝུཏྟཏྟཱ ཨིཏརེཧཱིཏི ཝཙནཾ ཨུདྡིསྶ ‘‘ཨིམིནཱཔི ཝཙནེན ཨིཏརནྟི ཨཱཔཏྟིཡཱ ཝུཙྩམཱནོ ཨཀུསལབྷཱཝོ ཨབྱཱཀཏབྷཱཝོ ཙ པརིཡཱཡཏོ དསྶེཏཱི’’ཏི ཝཏྟབྦཾ. ཨེཝཾ ཨཝཏྭཱ ཀུསལཔཀྑེ ཨེཝ ཀཐནསྶ ཀཱརཎཾ ན པསྶཱམ. ཡཾ པན ཨཱཔཏྟཱདྷིཀརཎཾ སིཡཱ ཨཀུསལནྟིཨཱདིཝཙནཾ ཀཱརཎཏྟེན ཝུཏྟཾ, ཏམྤི ཨཀཱརཎཾ ཡཾ ཨཀུསལཙིཏྟེན ཨཱཔཛྫཏི, ཏཾ ཨཀུསལནྟིཨཱདིནཱ ཧེཊྛཱ ཝུཏྟནཡེན ཨཀུསལཱདིབྷཱཝསྶ པརིཡཱཡདེསིཏཏྟཱ, ཨཱཔཏྟིཡཱ ཀུསལཝོཧཱརསྶ ཨཡུཏྟཏཱཡ ནཏྠི ཨཱཔཏྟཱདྷིཀརཎཾ ཀུསལནྟི ཝུཏྟཏྟཱ ཙ. ཨཱཔཏྟིཡཱ ཧི ཀུསལཙིཏྟསམུཊྛིཏཏྟེཔི བྷགཝཏཱ པཊིཀྑིཏྟབྷཱཝེན སཱཝཛྫདྷམྨཏྟཱ ཀཱརཎཱུཔཙཱརེནཱཔི ཨནཝཛྫཀུསལཝོཧཱརོ ན ཡུཏྟོ སཱཝཛྫཱནཝཛྫཱནཾ ཨཉྙམཉྙཝིརུདྡྷཏྟཱ. ཡཐཱ ཨཱཀཱསཱདིསམྨུཏིསཙྩཱནཾ ཨུཔྤནྣཏཱདིཝོཧཱརོ ཝིཡ ཛཱཏིཛརཱབྷངྒཱནཾ ཨུཔྤནྣཏཱདིཝོཧཱརོ ཨནཝཊྛཱནཱདིདེསཏོ ཨཡུཏྟོ, ཨེཝམིདྷཱཔི ཀུསལཝོཧཱརོ ཨཡུཏྟོ ཝིརུདྡྷཏྟཱ. ཨཀུསལཱདིཝོཧཱརོ པན ཡུཏྟོ ¶ , ཀཱརཎཱུཔཙཱརེན པན ཨཀུསལཱདིསབྷཱཝཏཱ ཡཐཱཝུཏྟདོསཱནཏིཝཏྟནཏོ. སུཏྟསྶཱཔི ཧི ཡཐཱ སུཏྟསུཏྟཱནུལོམཱདཱིཧི ཝིརོདྷོ ན ཧོཏི, ཏཐེཝ ཨཏྠོ གཧེཏབྦོ.

ཡཾ པན ཝུཏྟཾ ‘‘ཀུསལཙིཏྟེན ཧི ཨཱཔཏྟིཾ ཨཱཔཛྫནྟོ…པེ… རཱུཔཀྑནྡྷསངྑཱཏཾ ཨབྱཱཀཏཱཔཏྟིཾ ཨཱཔཛྫཏཱི’’ཏི, ཏཾ ཨཡུཏྟམེཝ རཱུཔཀྑནྡྷསྶ ཁཎིཀཏཱཡ ཨཱཔཏྟིཡཱཔི དེསནཱདིཔཊིཀམྨཾ ཝིནཱཝ པཊིཔསྶདྡྷིཔྤསངྒཏོ. རཱུཔཔརམྤརཱ ཨཱཔཏྟཱིཏི ཙེ? ཏནྣ, པཊིཀམྨེནཱཔི ཨཝིགམཔྤསངྒཏོ. ན ཧི རཱུཔསནྟཏིདེསནཱདཱིཧི ཝིགཙྪཏི སཀཱརཎཱཡཏྟཏྟཱ, ཨིཏི སབྦཐཱ ཨཱཔཏྟིཡཱ པརམཏྠཏཱ ཨཡུཏྟཱ, ཨེཏེནེཝ ཡཾ ཝུཏྟཾ ‘‘ནིཔཛྫིཏྭཱ ནིརོདྷསམཱཔནྣསྶ སཧསེཡྻཝསེན ཏཐཱཀཱརཔྤཝཏྟརཱུཔདྷམྨསྶེཝ ཨཱཔཏྟིབྷཱཝཏོ’’ཏིཨཱདི, ཏམྤི པཊིསིདྡྷནྟི ཝེདིཏབྦཾ. ཨིདྷ པན ནིརོདྷསམཱཔནྣཱནཾ རཱུཔདྷམྨམེཝ པཊིཙྩ ཨུཔྤནྣཏྟཱ ཨཱཔཏྟི ཨཙིཏྟཱ ཨཝེདནཱ, ཨཉྙཏྠ པན སཙིཏྟཱ སཝེདནཱཝ, སབྦཏྠཱཔི པཉྙཏྟིསབྷཱཝཱཏི ཝེདིཏབྦཱ. ཏེནེཝ དུཊྛདོསསིཀྑཱཔདཊྛཀཐཱཡཾ ཨཱཔཏྟིཡཱ ཨཀུསལཱདིསབྷཱཝཾ པརཔརིཀཔྤིཏཾ ནིསེདྷེཏུཾ ‘‘ཨཱདིཀམྨིཀསྶ ཨནཱཔཏྟིཝཙནཏོ…པེ… པཎྞཏྟིམཏྟམེཝ ཨཱཔཏྟཱདྷིཀརཎནྟི ཝེདིཏབྦ’’ནྟི སཡམེཝ ཝཀྑཏི, ཏསྨཱ ‘‘ཏཾཏཾཀུསལཱདིདྷམྨསམུཔྤཏྟིཡཱ བྷགཝཏཱ པཉྙཏྟཱ ཨཱཔཏྟིསམྨུཏི སམུཊྛིཏཱ’’ཏི ཙ, ‘‘ཡཱཝ པཊིཔྤསྶདྡྷིཀཱརཎཱ ཏིཊྛཏཱི’’ཏི ཙ, ‘‘པཊིཔྤསྶདྡྷིཀཱརཎེཧི ¶ ཝིནསྶཏཱི’’ཏི ཙ ཝོཧརཱིཡཏི. ཨཱཔཏྟིཡཱ ཙ སམྨུཏིསབྷཱཝཏྟེཔི ཧི སཉྩིཙྩ ཏཾ ཨཱཔཛྫནྟསྶ, པཊིཀིརིཡཾ ཨཀརོནྟསྶ ཙ ཨནཱདརེ ཨཀུསལརཱསི ཙེཝ སགྒམགྒནྟརཱཡོ ཙ ཧོཏཱིཏི ལཛྫིནོ ཡཐཱཝིདྷིཾ ནཱཏིཀྐམནྟི, ཨནཏིཀྐམནཔྤཙྩཡཱ ཙ ཏེསཾ ཨནནྟཔྤབྷེདཱ སཱིལཱདཡོ དྷམྨཱ པརིཝཌྜྷནྟཱིཏི གཧེཏབྦཾ. དྭཏྟིཾསེཝཱཏི ནིཡམོ ཨཱཔཏྟིནིམིཏྟཱནཾ ཀཱཡཝཙཱིཝིཉྙཏྟཱིནཾ ཨེཏེཧེཝ སམུཔྤཛྫནཏོ ཀཏོ, ན པན སབྦཱཔཏྟཱིནམྤི ཨེཏེཧེཝ སམུཔྤཛྫནཏོ. ནིཔཛྫིཏྭཱ ནིདྡཱཡནྟཱནཉྷི ཛྷཱནནིརོདྷསམཱཔནྣཱནཉྩ ཨཝིཉྙཏྟིཛནཀེཧི ཝིཔཱཀཨཔྤནཱཙིཏྟེཧི ཙེཝ རཱུཔདྷམྨེཧི ཙ སཧསེཡྻཱདིཨཱཔཏྟི སམྦྷཝཏི.

དསཱཏི ཀིརིཡཱཧེཏུཀམནོཝིཉྙཱཎདྷཱཏུདྭཡེན སཧ ཨཊྛ མཧཱཀིརིཡཙིཏྟཱནི. པཉྙཏྟིཾ ཨཛཱནིཏྭཱ ཨིདྡྷིཝིཀུབྦནཱདཱིསུ ཨབྷིཉྙཱནཾ ཨཱཔཏྟིསམུཊྛཱཔཀཏྟཾ ཝེདིཏབྦཾ. ཨེཏྠ ཙ ཀིཉྩི སིཀྑཱཔདཾ ཨཀུསལཙིཏྟམེཝ, ཀིཉྩི ¶ ཀུསལཱབྱཱཀཏཝསེན དྭིཙིཏྟཾ, ཀིཉྩི ཏིཙིཏྟནྟི ཨཡམེཝ བྷེདོ ལབྦྷཏི, ནཱཉྙོཏི ཝེདིཏབྦཾ. ཀིརིཡཱསམུཊྛཱནནྟི པརཱུཔཀྐམེན ཛཱཡམཱནཾ ཨངྒཛཱཏཱདིཙལནཾ སཱདིཡནཙིཏྟསངྑཱཏེ སེཝནཙིཏྟེ ཨུཔྤནྣེ ཏེན ཙིཏྟེན སམུཔྤཱདིཏམེཝ ཧོཏཱིཏི ཝུཏྟཾ ཨིཏརཐཱ ‘‘སིཡཱ ཀིརིཡསམུཊྛཱནཾ, སིཡཱ ཨཀིརིཡསམུཊྛཱན’’ནྟི ཝཏྟབྦཏོ.

ཡཾ པན སཱརཏྠདཱིཔནིཡཾ (སཱརཏྠ. ཊཱི. པཱརཱཛིཀཀཎྜ ༢.༦༦ པཀིཎྞཀཀཐཱཝཎྞནཱ) ཝུཏྟཾ ‘‘ཀིརིཡསམུཊྛཱནནྟི ཨིདཾ ཡེབྷུཡྻཝསེན ཝུཏྟཾ པརཱུཔཀྐམེ སཏི སཱདིཡནྟསྶ ཨཀིརིཡསམུཊྛཱནབྷཱཝཏོ’’ཏིཨཱདི, ཏཾ ན གཧེཏབྦཾ པཋམཔཱརཱཛིཀསྶ ཨཀིརིཡསམུཊྛཱནཏཱཡ པཱལི༹ཨཊྛཀཐཱསུ ཨཝུཏྟཏྟཱ. ‘‘མནོདྭཱརེ ཨཱཔཏྟི ནཱམ ནཏྠཱི’’ཏི (ཀངྑཱ. ཨཊྛ. པཋམཔཱརཱཛིཀཝཎྞནཱ; པཱརཱ. ཨཊྛ. ༢.༥༨༣-༤) ཧི ཝུཏྟཾ. ཀཐཉྷི ནཱམ པརཱུཔཀྐམེན མེཐུནཾ སཱདིཡནྟོ ཨཏྟནོ ཨངྒཛཱཏཱདིཀཱཡཙལནཾ ན སཱདིཡེཡྻ, སཱདིཡནཙིཏྟཱནུགུཎམེཝ པན སཀལསརཱིརེ ཙིཏྟཛརཱུཔསམུཔྤཏྟིཡཱ ཝིཉྙཏྟིཔི སུཁུམཱ སམུཔྤནྣཱ ཨེཝ ཧོཏཱིཏི དཊྛབྦཾ, ཏེནཱཧ ཀཱཡདྭཱརེནེཝ སམུཊྛཱནཏོ ཀཱཡཀམྨནྟིཨཱདི. ཙིཏྟཾ པནེཏྠ ཨངྒམཏྟཾ ཧོཏཱིཏི ཀཱཡཝིཉྙཏྟི ཨེཝ ཀཱཡཀམྨབྷཱཝེ ཀཱརཎཾ, ན ཙིཏྟཾ. ཏཾ པནེཏྠ ཀཱཡསངྑཱཏཱཡ ཝིཉྙཏྟིཡཱཡེཝ ཨངྒམཏྟཾ, ན ཀཱཡཀམྨབྷཱཝསྶ, ཨིཏརཐཱ མེཐུནསྶ ‘‘མནོཀམྨ’’ནྟི ཝཏྟབྦཏོ, ཏེནཱཧ ‘‘ན ཏསྶ ཝསེན ཀམྨབྷཱཝོ ལབྦྷཏཱི’’ཏི. ཀམྨབྷཱཝོཏི ཀཱཡཀམྨབྷཱཝོ. སབྦཉྩེཏནྟི ཨེཏཾ སམུཊྛཱནཱདིཀཾ. སིཀྑཱཔདསཱིསེནཱཏི ཏཾཏཾསིཀྑཱཔདནིཡཏཨཱཔཏྟིཡཱ ཨེཝ གཧཎཏྠཾ སིཀྑཱཔདམུཁེན.

པཀིཎྞཀཀཐཱཝཎྞནཱནཡོ ནིཊྛིཏོ.

ཝིནཱིཏཝཏྠུཝཎྞནཱ

ཨིདཾ ¶ ཀིནྟི ཀཐེཏུཀཱམཏཱཔུཙྪཱ. ཨིམཱཏིཨཱདི ཝིསྶཛྫནཾ. ཝིནཱིཏཱནི ཨཱཔཏྟིཾ ཏྭཾ བྷིཀྑུ ཨཱཔནྣོཏིཨཱདིནཱ (པཱརཱ. ༦༧) བྷགཝཏཱ ཝིནིཙྪིནིཏཱནི ཝཏྠཱུནི ཝིནཱིཏཝཏྠཱུནི. ཏཾ ཏཾ ཝཏྠུཾ ཨུདྡྷརིཏྭཱ དཱནཏོ དསྶནཏོ ཨུདྡཱནབྷཱུཏཱ གཱཐཱ ཨུདྡཱནགཱཐཱ, སངྒཧགཱཐཱ, ཨུདྡེསགཱཐཱཏི ཝུཏྟཾ ཧོཏི. ཝཏྠུ གཱཐཱཏི ཏེན ཁོ པན སམཡེན ཨཉྙཏརོ བྷིཀྑཱུཏིཨཱདིཀཱ ཝིནཱིཏཝཏྠུཔཱལི༹ཡེཝ ཏེསཾ ཏེསཾ ཝིནཱིཏཝཏྠཱུནཾ གནྠནཏོ ‘‘ཝཏྠུགཱཐཱ’’ཏི ཝུཏྟཱ ¶ , ན ཚནྡོཝིཙིཏིལཀྑཎེན. ཨུདྡཱནགཱཐཱནཾ ཝཏྠུ ཝཏྠུགཱཐཱཏི ཨེཝཾ ཝཱ ཨེཏྠ ཨཏྠོ དཊྛབྦོ. ཨེཏྠཱཏི ཝིནཱིཏཝཏྠཱུསུ. དུཏིཡཱདཱིནནྟི དུཏིཡཔཱརཱཛིཀཱདཱིནཾ. ཡཾ པསྶིཏྭཱ ཙིཏྟཀཱརཱདཡོ སིཔྤིཀཱ ཙིཏྟཀམྨཱདཱིནི སིཀྑནྟི, ཏཾ པཊིཙྪནྣཀརཱུཔཾ, པཊིམཱརཱུཔནྟི ཨཏྠོ.

༦༧. པུརིམཱནི དྭེཏི མཀྐཊཱིཝཛྫིཔུཏྟཀཝཏྠཱུནི དྭེ. ཏཱནིཔི བྷགཝཏཱ ཝིནཱིཏབྷཱཝེན པུན ཝིནཱིཏཝཏྠཱུསུ པཀྑིཏྟཱནི. ཏཏྠ ཏསྶ ཀུཀྐུཙྩཾ ཨཧོསཱིཏིཨཱདི པན ཀིཉྩཱཔི ཏེསཾ པཋམཾ ཀུཀྐུཙྩཾ ན ཨུཔྤནྣཾ, བྷིཀྑཱུཧི པན བྷགཝཏཱ ཙ གརཧིཏྭཱ ཝུཏྟཝཙནཾ སནྡྷཱཡ པཙྪཱ ཨུཔྤནྣཏྟཾ སནྡྷཱཡ ཝུཏྟཾ. བྷགཝཏོ ཨེཏམཏྠཾ ཨཱརོཙེསུནྟིཨཱདི ཙ བྷིཀྑཱུཧི ཨཱནནྡཏྠེརེན ཙ པཋམཾ བྷགཝཏོ ཨཱརོཙིཏེ, བྷགཝཏཱ ཙ ཏེསཾ པཱརཱཛིཀཏྟེ པཀཱསིཏེ བྷཱིཏཱ ཏེ སཡམྤི གནྟྭཱ ཨཏྟནོ ཀུཀྐུཙྩཾ པཙྪཱ ཨཱརོཙེནྟི ཨེཝ. ‘‘སཙྩཾ ཀིར ཏྭ’’ནྟིཨཱདིནཱ བྷགཝཏཱ པུཊྛཱ པན ‘‘སཙྩཾ བྷགཝཱ’’ཏི པཊིཛཱནནཝསེནཱཔི ཨཱརོཙེནྟི. བྷགཝཱཔི ཨཱཔཏྟིཾ ཏྭནྟིཨཱདིནཱ ཏེསཾ པཱརཱཛིཀཏྟཾ ཝིནིཙྪིནོཏི ཨེཝ. ཨནུཔཉྙཏྟིཀཐཱཡཾ པན ཏཾ སབྦཾ ཨཝཏྭཱ ཨནུཔཉྙཏྟིཡཱ ཨནུགུཎམེཝ ཀིཉྩིམཏྟཾ ཝུཏྟཾ, ཨིདྷཱཔི ཏེསཾ ཝཏྠཱུནཾ བྷགཝཏཱ ཝིནཱིཏབྷཱཝདསྶནཏྠཾ ཨེཝཾ ཝུཏྟནྟི ཝེདིཏབྦཾ. ཀེཙི ཨིམཾ ཨདྷིཔྤཱཡཾ ཨམནསིཀཏྭཱ ‘‘ཨཉྙཱནེཝེཏཱནི ཝཏྠཱུནཱི’’ཏི ཝདནྟི. ཀུསེཏི ཀུསཏིཎཱནི. ཀེསེཧཱིཏི མནུསྶཀེསེཧི.

༦༨. ཝཎྞཔོཀྑརཏཱཡཱཏི ཨེཏྠ པོཀྑལཾ ནཱམ སམིདྡྷཾ སུནྡརཉྩ, ཏསྶ བྷཱཝོ ‘‘པོཀྑརཏཱ’’ཏི ར-ཀཱརཾ ཀཏྭཱ ཝུཏྟོ, སམིདྡྷཏཱ སུནྡརཏཱཏི ཨཏྠོ. པདྷཾསེསཱིཏི ཨབྷིབྷཝི. ན ལིམྤཏཱིཏི ན ཨལླཱིཡཏི.

༦༩. ཨེཝརཱུཔཱ པརིཝཏྟལིངྒཱ བྷིཀྑུནིཡོ ཨཏྠཏོ ཨེཀཏོ ཨུཔསམྤནྣཱཔི ཨུབྷཏོསངྒྷེ ཨུཔསམྤནྣཱསུཡེཝ སངྒཡ྄ཧནྟི བྷིཀྑཱུཔསམྤདཱཡ བྷིཀྑུནཱིཨུཔསམྤདཏོཔི ཨུཀྐཊྛཏྟཱ. པཱལི༹ཡཾ ‘‘ཏཱཧི ཨཱཔཏྟཱིཧི ཨནཱཔཏྟི’’ནྟི ཨུཔཡོགཝཙནཾ ཀཏྭཱ ཨནུཛཱནཱམཱིཏི པདེན སམྦནྡྷིཏབྦཾ. ཨིཏྠིལིངྒནྟི ¶ ཐནཱདིཀཾ ཨིཏྠིསཎྛཱནཾ ཝུཏྟནྟི ཨཱཧ – ‘‘པུརིས…པེ… ཨིཏྠིསཎྛཱནཾ ཨུཔྤནྣ’’ནྟི. ཏཾ ནཱནནྟརིཀཏོ པན ‘‘པུརིསིནྡྲིཡམྤི ཨནྟརཧིཏཾ, ཨིཏྠིནྡྲིཡཉྩ ཨུཔྤནྣ’’ནྟི ཝུཏྟམེཝ ཧོཏི, ཨེཝཾ ཨུཔརིཔི ལིངྒགྒཧཎེནེཝ ཨིཏྠིནྡྲིཡཱདིགྒཧཎཾ ཝེདིཏབྦཾ. ཏཱཏི ཨཱཔཏྟིཡོ, ཏསྶ ཝུཊྛཱཏུནྟི ཨིམིནཱ སམྦནྡྷོ, ཏཱཧི ཨཱཔཏྟཱིཧི ཝུཊྛཱཔེཏུནྟི ¶ ཨཏྠོ. ཀཐནྟི ཨཱཧ ཏཱ སབྦཱཔི བྷིཀྑུནཱིཧི ཀཱཏབྦནྟིཨཱདི. ཏེན པཊིཙྪནྣཱཡཔི ཨཔྤཊིཙྪནྣཱཡཔི གརུཀཱཔཏྟིཡཱ པཀྑམཱནཏྟཙརཎཱདིཀཾ ཝིདྷིཾ དསྶེཏི.

ཨོཀྐནྟིཀཝིནིཙྪཡོཏི པསངྒཱནུགུཎཾ ཨོཏརཎཀཝིནིཙྪཡོ. བལཝཨཀུསལེནཱཏི པརདཱརིཀཀམྨཱདིནཱ. དུབྦལཀུསལེནཱཏི ཡཐཱཝུཏྟབལཝཱཀུསལོཔཧཏསཏྟིནཱ ཏཏོ ཨེཝ དུབྦལབྷཱུཏེན ཀུསལེན. དུབྦལཨཀུསལེནཱཏི པུརིསབྷཱཝུཔྤཱདཀབྲཧྨཙརིཡཱདིབལཝཀུསལོཔཧཏསཏྟིནཱ ཏཏོ ཨེཝ དུབྦལབྷཱུཏེན པརདཱརིཀཱདིཨཀུསལེན. སུགཏིཡཾ བྷཱཝདྭཡསྶ ཀུསལཀམྨཛཏྟཱ ཨཀུསལེནེཝ ཝིནཱསོ ཀུསལེནེཝ ཨུཔྤཏྟཱིཏི ཨཱཧ ཨུབྷཡམྤཱིཏིཨཱདི. དུགྒཏིཡཾ པན ཨཀུསལེནེཝ ཨུབྷིནྣམྤི ཨུཔྤཏྟི ཙ ཝིནཱསོ ཙ, ཏཏྠ དུབྦལབལཝབྷཱཝོཝ ཝིསེསོ.

‘‘ཨེཧི མཡཾ གམིསྶཱམཱ’’ཏི བྷིཀྑུནིཡཱ སདྡྷིཾ སཾཝིདྷཱཡ ཨེཀདྡྷཱནགམནེ པཱཙིཏྟིཡཱཔཏྟིཔརིཧཱརཏྠཾ ཝུཏྟཾ ‘‘སཾཝིདཧནཾ པརིམོཙེཏྭཱ’’ཏི. ཏེན ཨེཀགཱམཀྑེཏྟེཔི བཧིགཱམཏོ ཨནྟརགྷརཾ སཾཝིདྷཱཡ གམནམྤི ཨཱཔཏྟིཀརམེཝཱཏི དསྶེཏི. པརིམོཙནཝིདྷིཾ དསྶེནྟོ ཨཱཧ མཡནྟིཨཱདི. བཧིགཱམེཏི གཱམནྟརེ. དུཏིཡིཀཱ བྷིཀྑུནཱི པཀྐནྟཱ ཝཱ ཧོཏཱིཏིཨཱདིནཱ (པཱཙི. ༦༩༣) ཝུཏྟཨནཱཔཏྟིལཀྑཎཾ ཨནུལོམེཏཱིཏི ཝུཏྟཾ ‘‘གཱམནྟར…པེ… ཨནཱཔཏྟཱི’’ཏི. ཀོཔེཏྭཱཏི པརིཙྩཛིཏྭཱ. ལཛྫིནིཡོ…པེ… ལབྦྷཏཱིཏི ལིངྒཔརིཝཏྟནདུཀྑཔཱིལི༹ཏསྶ སངྒཧེཔི ཨསཏི ཧཱིནཱཡཱཝཏྟནམྤི བྷཝེཡྻཱཏི ‘‘ཨཱཔདཱསཱུ’’ཏི ཝུཏྟཨནཱཔཏྟིཨནུལོམེན ཝུཏྟཾ. ཏཱཡ དུཏིཡིཀཾ གཧེཏྭཱཝ གནྟབྦཾ. ཨལཛྫིནིཡོ…པེ… ལབྦྷཏཱིཏི ཨལཛྫིནཱིཧི སདྡྷིཾ ཨེཀཀམྨཱདིསཾཝཱསེ ཨཱཔཏྟིསམྦྷཝཏོ ཏཱ ཨསནྟཔཀྑཾ བྷཛནྟཱིཏི ཝུཏྟཾ, ཨིམིནཱཔེཏཾ ཝེདིཏབྦཾ ‘‘ཨལཛྫིནཱིཧི སདྡྷིཾ པརིབྷོགོ ན ཝཊྚཏཱི’’ཏི. ཡདི ཧི ཝཊྚེཡྻ, ཏཏོཔི དུཏིཡིཀཾ ཝིནཱ གཱམནྟརགམནཱདཱིསུ ཨཱཔཏྟི ཨེཝ སིཡཱ སངྒཱཧིཀཏྟཱ ཏཱསཾ སངྒཱཧིཀལཛྫིནིགཎཏོ ཝིཡ. ཉཱཏིཀཱ ན ཧོནྟི…པེ… ཝཊྚཏཱིཏི ཝདནྟཱིཏི ཨིམིནཱ ཨཊྛཀཐཱསུ ཨནཱགཏབྷཱཝཾ དཱིཔེཏི. ཏཏྠཱཔི ཝིསྶཱསིཀཉཱཏིཀབྷིཀྑུནིཡོ ཝིནཱ བྷིཀྑུནིབྷཱཝེ ཨརམནྟསྶ མཱནཔཀཏིཀསྶ ཨཱཔདཱཊྛཱནསམྦྷཝེན ཏཾ ཝཙནཾ ཨཔྤཊིཀྑིཏྟམྤི ཏདཉྙེསཾ ན ཝཊྚཏིཡེཝཱཏི གཧེཏབྦཾ. བྷིཀྑུབྷཱཝེཔཱིཏི བྷིཀྑུཀཱལེཔི ¶ . ཏཾ ནིསྶཱཡཱཏི ཏཾ ནིསྶཡཱཙརིཡཾ ཀཏྭཱ. ཨུཔཛ྄ཛྷཱ གཧེཏབྦཱཏི ཨུཔསམྤདཱགཧཎཏྠཾ ཨུཔཛ྄ཛྷཱ གཧེཏབྦཱ.

ཝིནཡཀམྨནྟི ¶ ཝིཀཔྤནཾ སནྡྷཱཡ ཝུཏྟཾ. པུན ཀཱཏབྦནྟི པུན ཝིཀཔྤེཏབྦཾ. པུན པཊིགྒཧེཏྭཱ སཏྟཱཧཾ ཝཊྚཏཱིཏི ‘‘ཨནུཛཱནཱམི, བྷིཀྑཝེ, བྷིཀྑུནཱིནཾ སནྣིདྷིཾ བྷིཀྑཱུཧི, བྷིཀྑཱུནཾ སནྣིདྷིཾ བྷིཀྑུནཱིཧི ཙ པཊིགྒཱཧཱཔེཏྭཱ པརིབྷུཉྫིཏུ’’ནྟི (ཙཱུལ༹ཝ. ༤༢༡) ཝཙནཏོ པུན པཊིགྒཧེཏྭཱ པརིབྷུཉྫིཏུཾ ཝཊྚཏཱིཏི དསྶནཏྠཾ ཝུཏྟཾ. སཏྟམེ དིཝསེཏི ཨིདཉྩ ནིསྶགྒིཡཾ ཨནཱཔཛྫིཏྭཱཝ པུནཔི སཏྟཱཧཾ པརིབྷུཉྫིཏུཾ ཝཊྚཏཱིཏི དསྶནཏྠཾ ཝུཏྟཾ. པཀཏཏྟོཏི ཨཔརིཝཏྟལིངྒོ. རཀྑཏཱིཏི ཏཾ པཊིགྒཧཎཝིཛཧནཏོ རཀྑཏི, ཨཝིབྷཏྟཏཱཡ པཊིགྒཧཎཾ ན ཝིཛཧཏཱིཏི ཨདྷིཔྤཱཡོ.

སཱམཾ གཧེཏྭཱན ནིཀྑིཔེཡྻཱཏི སཧཏྠེན པཊིགྒཧེཏྭཱན ནིཀྑིཔེཡྻ. པརིབྷུཉྫནྟསྶ ཨཱཔཏྟཱིཏི ལིངྒཔརིཝཏྟེ ཛཱཏེ པུན ཨཔྤཊིགྒཧེཏྭཱ པརིབྷུཉྫནྟསྶ ཨཱཔཏྟི.

ཧཱིནཱཡཱཝཏྟནེནཱཏི ཨེཏྠ ཀེཙི ‘‘པཀཏཏྟསྶ བྷིཀྑུནོ སིཀྑཾ ཨཔྤཙྩཀྑཱཡ ‘གིཧཱི བྷཝིསྶཱམཱི’ཏི གིཧིལིངྒགྒཧཎཾ ཧཱིནཱཡཱཝཏྟན’’ནྟི ཝདནྟི, ཏཾ ན ཡུཏྟཾ ཏཏྟཀེན བྷིཀྑུབྷཱཝསྶ ཨཝིཛཧནཏོ. ཨཉྙེ པན ‘‘པཱརཱཛིཀཾ ཨཱཔནྣསྶ བྷིཀྑུཔཊིཉྙཾ པཧཱཡ གིཧིལིངྒབྷཱཝཱུཔགམནམྤི ཧཱིནཱཡཱཝཏྟན’’ནྟི ཝདནྟི, ཏཾ ཡུཏྟམེཝ. པཱརཱཛིཀཾ ཨཱཔནྣོ ཧི ཏཾ པཊིཙྪཱདེཏྭཱ ཡཱཝ བྷིཀྑུཔཊིཉྙོ ཧོཏི, ཏཱཝ བྷིཀྑུ ཨེཝ ཧོཏི བྷིཀྑཱུནམེཝ པཱརཱཛིཀསྶ པཉྙཏྟཏྟཱ. ‘‘ཡོ པན བྷིཀྑཱུ’’ཏི ཧི ཝུཏྟཾ. ཏཐཱ ཧི སོ སཾཝཱསཾ སཱདིཡནྟོཔི ཐེཡྻསཾཝཱསཀོ ན ཧོཏི, སཧསེཡྻཱདིཨཱཔཏྟིཉྩ ན ཛནེཏི, ཨཏྟཱནཾ ཨོམསནྟསྶ པཱཙིཏྟིཡཉྩ ཛནེཏི. ཝུཏྟཉྷི –

‘‘ཨསུདྡྷོ ཧོཏི པུགྒལོ ཨཉྙཏརཾ པཱརཱཛིཀཾ དྷམྨཾ ཨཛ྄ཛྷཱཔནྣོ, ཏཉྩེ སུདྡྷདིཊྛི སམཱནོ ཨོཀཱསཾ ཀཱརཱཔེཏྭཱ ཨཀྐོསཱདྷིཔྤཱཡོ ཝདེཏི, ཨཱཔཏྟི ཨོམསཝཱདསྶཱ’’ཏི (པཱརཱ. ༣༨༩).

ཨེཀེ པན ‘‘པཱརཱཛིཀཾ ཨཱཔནྣཱནཾ དོསཾ པཊིཛཱནིཏྭཱ གིཧིལིངྒགྒཧཎཾ ནཱམ སིཀྑཱཔཙྩཀྑཱནེ སམོདྷཱནཾ གཙྪཏི ཏེནཱཔི པཊིཉྙཱཡ བྷིཀྑུབྷཱཝསྶ ཝིཛཧནཏོ. ཏེནེཝ ཝིནཡཝིནིཙྪཡཱདཱིསུ ཧཱིནཱཡཱཝཏྟནཾ སིཀྑཱཔཙྩཀྑཱནེ སམོདྷཱནེཏྭཱ ¶ ཝིསུཾ ཏཾ ན ཝུཏྟཾ. ཏསྨཱ བྷིཀྑུནཱིནཾ ཝིབྦྷམིཏུཀཱམཏཱཡ གིཧིལིངྒགྒཧཎཾ ཨིདྷ ཧཱིནཱཡཱཝཏྟནཾ ཏཱསཾ སིཀྑཱཔཙྩཀྑཱནསྶ ཨབྷཱཝཏོ. ཏཱསཾ པཊིགྒཧཎཝིཛཧནསྶཱཔི སབྦསོ ཝཏྟབྦཏྟཱ’’ཏི ཝདནྟི, ཏམྤི ཨཔྤཊིབཱཧིཡམེཝ. ཏསྨཱ པཱརཱཛིཀཱནཾ བྷིཀྑུནཱིནཉྩ ‘‘ཨུཔྤབྦཛིསྶཱམཱི’’ཏི གིཧིལིངྒགྒཧཎཾ ¶ ཧཱིནཱཡཱཝཏྟནནྟི གཧེཏབྦཾ. ཝིབྦྷམོཏིཔི ཨེཏསྶེཝ ནཱམཾ, ཏེནེཝ ཏཾ ཁུདྡསིཀྑཱཡཾ ‘‘ཨཙྪེདཝིསྶཛྫནགཱཧཝིབྦྷམཱ’’ཏི ཨདྷིཊྛཱནཝིཛཧནེ ཝིབྦྷམནཱམེན ཝུཏྟཾ.

ཨནཔེཀྑཝིསྶཛྫནེནཱཏི ཨཉྙསྶ ཨདཏྭཱཝ ཨནཏྠིཀསྶེཝ པཊིགྒཧིཏཝཏྠཱུནཾ བཧི ཚཌྜནེན. ཀེཙི ‘‘པཊིགྒཧིཏཝཏྠཱུསུ སཱཔེཀྑསྶ པུརེ པཊིགྒཧིཏབྷཱཝཏོ པརིམོཙནཏྠཾ ཏཏྠ པཊིགྒཧམཏྟསྶ ཝིསྶཛྫནམྤི ཨནཔེཀྑཝིསྶཛྫནམེཝ ཙཱིཝརཱདིཨདྷིཊྛཱནཔཙྩུདྡྷཱརོ ཝིཡཱ’’ཏི ཝདནྟི, ཏཾ ན སུནྡརཾ ཏཐཱཝཙནཱབྷཱཝཱ. ཡཐེཝ ཧི ཙཱིཝརཱདཱིསུ ཨནཔེཀྑཝིསྶཛྫནེན ཨདྷིཊྛཱནཝིཛཧནཾ ཝཏྭཱཔི ཝིསུཾ པཙྩུདྡྷཱརོ ཙ ཝུཏྟོ, ཨེཝམིདྷཱཔི ཝཏྟབྦཾ, ཡཐཱ ཙ ཙཱིཝརཱདཱིསུ ཀཱཡཔཊིབདྡྷེསུཔི པཙྩུདྡྷཱརེན ཨདྷིཊྛཱནཾ ཝིགཙྪཏི, ན ཨེཝམིདྷ. ཨིདྷ པན པཊིགྒཧིཏཝཏྠུསྨིཾ ཨནཔེཀྑསྶཱཔི ཀཱཡཏོ མུཏྟེཡེཝ ཏསྨིཾ པཊིགྒཧཎཾ ཝིཛཧཏི. ཏཐཱ ཧི ཝུཏྟཾ ‘‘སཏཀྑཏྟུམྤི པརིཙྩཛཏུ, ཡཱཝ ཨཏྟནོ ཧཏྠགཏཾ པཊིགྒཧིཏམེཝཱ’’ཏི. ཨནཔེཀྑཝིསྶཛྫནེནཱཏི ཨེཏྠ ཙ ‘‘ཨནཔེཀྑཱཡཱ’’ཏི ཨེཏྟཀམེཝ ཝཏྟབྦཾ ཨནཔེཀྑཏཾ མུཉྩིཏྭཱ ཨིདྷ ཝིསུཾ ཝིསྶཛྫནསྶ ཨབྷཱཝཱ. ན ཧེཏྠ པཙྩུདྡྷཱརེ ཝིཡ ཝིསྶཛྫནཝིདྷཱནམཏྠི. ཨཔིཙ པཊིགྒཧཎམཏྟཝིསྶཛྫནེ སཏི པུརེ པཊིགྒཧིཏོཔི ཨཱཧཱརོ བྷུཉྫིཏུཀམྱཏཱཡ ཨུཔྤནྣཱཡ པཊིགྒཧཎམཏྟཾ ཝིསྶཛྫེཏྭཱ པུན པཊིགྒཧེཏྭཱ ཡཐཱསུཁཾ བྷུཉྫིཏབྦོ སིཡཱཏི, ཏཐཱ ཙ སནྣིདྷིཀཱརཀསིཀྑཱཔདེ ཝུཏྟཱ སབྦཱཔི ཝིནིཙྪཡབྷེདཱ ནིརཏྠཀཱ ཨེཝ སིཡུཾ. ཝུཏྟཉྷི ཏཏྠ –

‘‘གཎྛིཀཔཏྟསྶ ཝཱ གཎྛིཀནྟརེ སྣེཧོ པཝིཊྛོ ཧོཏི…པེ… ཏཱདིསེ པཏྟེཔི པུནདིཝསེ བྷུཉྫནྟསྶ པཱཙིཏྟིཡ’’ནྟིཨཱདི (པཱཙི. ཨཊྛ. ༢༥༣).

ཏཏྠ པན ‘‘པཊིགྒཧཎཾ ཨནཔེཀྑཙིཏྟེན ཝིསྶཛྫེཏྭཱ བྷུཉྫིཏབྦ’’ནྟི ཨེཏྟཀམེཝ ཝཏྟབྦཾ, ན ཙ ཝུཏྟཾ. ཀཏྠཙི ཨཱིདིསེསུ ཙ གཎྛིཀཔཏྟཱདཱིསུ པཊིགྒཧཎེ ཨཔེཀྑཱ ཀསྶཙིཔི ནཏྠེཝ ཏཔྤཧཱནཱཡ ཝཱཡཱམཏོ, ཏཐཱཔི ཏཏྠགཏཨཱམིསེ པཊིགྒཧཎཾ ན ཝིགཙྪཏི. ཀསྨཱ? བྷིཀྑུསྶ པཏྟེ པུན བྷུཉྫིཏུཀཱམཏཱཔེཀྑཱཡ ¶ ཝིཛྫམཱནཏྟཱ པཏྟགཏིཀེ ཨཱཧཱརེཔི ཏསྶཱ ཝཏྟནཏོ. ན ཧི པཏྟཾ ཨཝིསྶཛྫེཏྭཱ ཏགྒཏིཀཾ ཨཱཧཱརཾ ཝིསྶཛྫེཏུཾ སཀྐཱ, ནཱཔི ཨཱཧཱརཾ ཨཝིསྶཛྫེཏྭཱ ཏགྒཏིཀཾ པཊིགྒཧཎཾ ཝིསྶཛྫེཏུཾ. ཏསྨཱ ཝཏྠུནོ ཝིསྶཛྫནམེཝ ཨནཔེཀྑཝིསྶཛྫནཾ, ན པཊིགྒཧཎསྶཱཏི ནིཊྛམེཏྠ གནྟབྦཾ. ཏེནེཝ སནྣིདྷིསིཀྑཱཔདསྶ ཨནཱཔཏྟིཝཱརེ –

‘‘ཨནྟོསཏྟཱཧཾ ¶ ཨདྷིཊྛེཏི, ཝིསྶཛྫེཏི, ནསྶཏི, ཝིནསྶཏི, ཌཡ྄ཧཏི, ཨཙྪིནྡིཏྭཱ གཎྷནྟི, ཝིསྶཱསཾ གཎྷནྟི, ཨནུཔསམྤནྣསྶ ཙཏྟེན ཝནྟེན མུཏྟེན ཨནཔེཀྑོ དཏྭཱ པཊིལབྷིཏྭཱ པརིབྷུཉྫཏཱི’’ཏི –

ཨེཝཾ སབྦཏྠ ཝཏྠུཝིསྶཛྫནམེཝ ཝུཏྟཾ. ཨེཏྠ ཙ ‘‘ཨནྟོསཏྟཱཧཾ ཨདྷིཊྛེཏཱི’’ཏི བཱཧིརཔརིབྷོགཱཡ ཨདྷིཊྛཱནཝཙནཏོ ཝཏྠུཾ ཨཝིསྶཛྫེཏྭཱཔི ཀེཝལཾ ཨནཛ྄ཛྷོཧརིཏུཀཱམཏཱཡ སུདྡྷཙིཏྟེན བཱཧིརཔརིབྷོགཏྠཱཡ ནིཡམནམྤི ཝིསུཾ ཨེཀཾ པཊིགྒཧཎཝིཛཧནཀཱརཎམེཝ, ཨིདཉྩ སནྡྷཱཡ པཊིགྒཧཎམཏྟཝིསྶཛྫནཾ ཝུཏྟཾ སིཡཱ, སུཝུཏྟམེཝ སིཡཱ, ཏཐཱ ཙ ‘‘པུན པཊིགྒཧེཏྭཱ པརིབྷུཉྫིསྶཱམཱི’’ཏི པཊིགྒཧཎཝིསྶཛྫནཾ ན ཝཏྟབྦཾ སིཡཱ བཱཧིརཔརིབྷོགཱདྷིཊྛཱནསྶ ཨིདྷཱདྷིཔྤེཏཏྟཱ.

སཱརཏྠདཱིཔནིཡཉྷི (སཱརཏྠ. དཱི. པཱརཱཛིཀཀཎྜ ༢.༦༩) ‘‘ཨནཔེཀྑཝིསྶཛྫནེནཱཏི ཨེཏྠ ཨཉྙསྶ ཨདཏྭཱཝ ཨནཏྠིཀཏཱཡ ‘ནཏྠི ཨིམིནཱ ཀམྨཾ ན དཱནི ནཾ པརིབྷུཉྫིསྶཱམཱི’ཏི ཝཏྠཱུསུ ཝཱ, ‘པུན པཊིགྒཧེཏྭཱ པཊིབྷུཉྫིསྶཱམཱི’ཏི པཊིགྒཧཎེ ཝཱ ཨནཔེཀྑཝིསྶཛྫནེནཱ’’ཏི ཨེཝཾ པརིབྷུཉྫིཏུཀཱམསྶེཝ པཊིགྒཧཎམཏྟཝིསྶཛྫནམྤི པཊིགྒཧཎཝིཛཧནཀཱརཎཾ ཝུཏྟཾ, ཏཾ ན གཧེཏབྦཾ. པུརིམམེཝ པན བཱཧིརཔརིབྷོགཱདྷིཊྛཱནཾ གཧེཏབྦཾ. ཨིདཾ པན ཨཊྛཀཐཱསུ ‘‘ཨནཔེཀྑཝིསྶཛྫནསངྑཱཏེ ཝིསྶཛྫེཏཱི’’ཏི ཝུཏྟཔཱལི༹པདཏྠེ སངྒཧེཏྭཱ ཝིསུཾ ན ཝུཏྟཾ. ནསྶཏི, ཝིནསྶཏི, ཌཡ྄ཧཏི, ཝིསྶཱསཾ ཝཱ གཎྷནྟཱིཏི ཨིམཱནི པན པདཱནི ཨཙྪིནྡིཏྭཱ གཎྷནྟཱིཏི ཨིམསྨིཾ པདེ སངྒཧིཏཱནཱིཏི ཝེདིཏབྦཾ.

ཨཙྪིནྡིཏྭཱ གཧཎེནཱཏི ཨནུཔསམྤནྣཱནཾ བལཀྐཱརཱདིནཱ ཨཙྪིནྡིཏྭཱ གཧཎེན. ཨུཔསམྤནྣཱནཉྷི ཨཙྪིནྡནཝིསྶཱསགྒཱཧེསུ པཊིགྒཧཎཾ ན ཝིཛཧཏི. ཨེཏྠཱཏི བྷིཀྑུཝིཧཱརེ. ཨུཔརོཔཀཱཏི ཏེན རོཔིཏཱ རུཀྑགཙྪཱ. ཏེརསསུ ¶ སམྨུཏཱིསཱུཏི བྷཏྟུདྡེསཀསེནཱསནཔཉྙཱཔཀབྷཎྜཱགཱརིཀཙཱིཝརཔཊིགྒཱཧཀཙཱིཝརབྷཱཛཀཡཱགུབྷཱཛཀཕལབྷཱཛཀཁཛྫབྷཱཛཀཨཔྤམཏྟཀཝིསྶཛྫཀསཱདིཡགཱཧཱཔཀཔཏྟགཱཧཱཔཀཨཱརཱམིཀཔེསཀསཱམཎེརཔེསཀསམྨུཏིསངྑཱཏཱསུ ཏེརསསུ སམྨུཏཱིསུ.

པཙྪིམིཀཱཡ སེནཱསནགྒཱཧེ པཊིཔྤསྶདྡྷེཔི ཨཔྤཊིཔྤསྶདྡྷེཔི ཀཐིནཏྠཱརསྶ, ཏམྨཱུལཀཱནཾ པཉྩཱནིསཾསཱནཉྩ ཨབྷཱཝསྶ སམཱནཏྟཱ ཏཏྠ ཝིཛྫམཱནམྤི སེནཱསནགྒཱཧཔཊིཔྤསྶདྡྷིཾ ཨདསྶེཏྭཱ ཏཏྠ བྷིཀྑཱུཧི ཀཏྟབྦཾ སངྒཧམེཝ དསྶེཏུཾ སཙེ པཙྪིམིཀཱཡཱཏིཨཱདི ཝུཏྟཾ. སཙེ ཨཀུསལཝིཔཱཀེ ¶ …པེ… ཚཱརཏྟཾ མཱནཏྟམེཝ དཱཏབྦནྟི ཨིདཾ པཊིཙྪནྣཱཡ སཱདྷཱརཎཱཔཏྟིཡཱ པརིཝསནྟསྶ ཨསམཱདིནྣཔརིཝཱསསྶ ཝཱ ལིངྒེ པརིཝཏྟེ པཀྑམཱནཏྟཾ ཙརནྟསྶ ཝསེན ཝུཏྟཾ. སཙེ པནསྶ པཀྑམཱནཏྟེ ཨསམཱདིནྣེ ཨེཝ པུན ལིངྒཾ པརིཝཏྟཏི, པརིཝཱསཾ དཏྭཱ པརིཝུཏྠཔརིཝཱསསྶེཝ ཚཱརཏྟཾ མཱནཏྟཾ དཱཏབྦཾ. པརིཝཱསདཱནཾ ནཏྠི བྷིཀྑུཀཱལེ ཨཔྤཊིཙྪནྣབྷཱཝཏོ. སཙེ པན བྷིཀྑུཀཱལེཔི སཉྩིཙྩ ནཱརོཙེཏི, ཨཱཔཏྟི པཊིཙྪནྣཱཝ ཧོཏི, ཨཱཔཏྟིཔཊིཙྪནྣབྷཱཝཏོ པརིཝཱསོ ཙ དཱཏབྦོཏི ཝདནྟི. པཱརཱཛིཀཾ ཨཱཔནྣཱནཾ ཨིཏྠིཔུརིསཱནཾ ལིངྒེ པརིཝཏྟེཔི པཱརཱཛིཀཏྟསྶ ཨེཀསྨིཾ ཨཏྟབྷཱཝེ ཨཝིཛཧནཏོ པུན ཨུཔསམྤདཱ ན དཱཏབྦཱཏི གཧེཏབྦཾ. ཏེནེཝ ཏེསཾ སཱིསཙྪིནྣཔུརིསཱདཡོ ནིདསྶིཏཱ.

༧༡. ཏཐེཝཱཏི མུཙྩཏུ ཝཱ མཱ ཝཱཏི ཨིམམཏྠཾ ཨཏིདིསཏི. ཨཉྙེསནྟི པུཐུཛྫནེ སནྡྷཱཡ ཝུཏྟཾ. ཏེསཉྷི ཨཱིདིསེ ཋཱནེ ཨསཱདིཡནཾ དུཀྐརཾ སོཏཱཔནྣཱདིཨརིཡཱནཾ ཏཏྠ དུཀྐརཏྟཱབྷཱཝཱ. ན ཧི ཨརིཡཱ པཱརཱཛིཀཱདིལོཀཝཛྫཱཔཏྟིཾ ཨཱཔཛྫནྟི.

༧༣. སུཕུསིཏཱཏི ཨུཔརིམཱཡ དནྟཔནྟིཡཱ ཧེཊྛིམཱ དནྟཔནྟི ཨཱཧཙྩ ཋིཏཱ, ཨཝིཝཊཱཏི ཨཏྠོ. ཏེནཱཧ ‘‘ཨནྟོམུཁེ ཨོཀཱསོ ནཏྠཱི’’ཏི. ཨུཔྤཱཊིཏེ པན ཨོཊྛམཾསེ དནྟེ སུཡེཝ ཨུཔཀྐམནྟསྶ ཐུལླཙྩཡནྟི ནིམིཏྟེན བཧིནིམིཏྟེ ཚུཔནཏྟཱ ཝུཏྟཾ. བཧིནིཀྑནྟདནྟཛིཝ྄ཧཱསུཔི ཨེསེཝ ནཡོ. ནིཛ྄ཛྷཱམཏཎྷིཀཱ ནཱམ ལོམཀཱུཔེཧི སམུཊྛིཏཨགྒིཛཱལཱཧི དཌྜྷསརཱིརཏཱཡ ཨཏིཝིཡ ཏསིཏརཱུཔཱ. ཨཱདི-སདྡེན ཁུཔྤིཔཱསཱསུརཱ ཨཊྛིཙམྨཱཝསིཊྛཱ བྷཡཱནཀསརཱིརཱ པེཏིཡོ སངྒཧིཏཱ. ཝིསཉྙཾ ཀཏྭཱཏི ཡཐཱ སོ ཀཏམྤི ¶ ཨུཔཀྐམཾ ན ཛཱནཱཏི, ཨེཝཾ ཀཏྭཱ. ཏེན ཙ ཝིསཉྙཱི ཨཧུཏྭཱ སཱདིཡནྟསྶ པཱརཱཛིཀམེཝཱཏི དསྶེཏི. ཨུཔཧཏཀཱཡཔྤསཱདོཏི ཝཱཏཔིཏྟཱདིདོསེཧི ཀཱཡཝིཉྙཱཎཱནུཔྤཱདཀབྷཱཝེན དཱུསིཏཀཱཡཔྤསཱདོ, ན པན ཝིནཊྛཀཱཡཔྤསཱདོ. སཱིསེ པཏྟེཏི མགྒེན མགྒཔྤཊིཔཱདནེ ཛཱཏེ. ཨཔྤཝེསེཏུཀཱམཏཱཡ ཨེཝ ནིམིཏྟེན ནིམིཏྟཚུཔནེ ཐུལླཙྩཡཾ ཝུཏྟཾ, སེཝེཏུཀཱམསྶ པན ཏཏྠཱཔི དུཀྐཊམེཝཱཏི ཨཱཧ ‘‘དུཀྑཊམེཝ སཱམནྟ’’ནྟི.

༧༤. ཛཱཏི-སདྡེན སུམནཔུཔྥཔརིཡཱཡེན ཏནྣིསྶཡོ གུམྦོ ཨདྷིཔྤེཏོཏི ཨཱཧ ‘‘ཛཱཏིཔུཔྥགུམྦཱན’’ནྟི. ཏེན ཙ ཛཱཏིཡཱ ཨུཔལཀྑིཏཾ ཝནཾ ཛཱཏིཡཱཝནནྟི ཨལུཏྟསམཱསོཏི དསྶེཏི. ཨེཀརསནྟི ཝཱིཐིཙིཏྟེཧི ཨསམྨིསྶཾ.

༧༧. ཨུཔྤནྣེ ཝཏྠུམྷཱིཏི ཨིཏྠཱིཧི ཀཏཨཛ྄ཛྷཱཙཱརཝཏྠུསྨིཾ. རུཀྑསཱུཙིཀཎྚཀདྭཱརནྟི རུཀྑསཱུཙིདྭཱརཾ ¶ ཀཎྚཀདྭཱརཾ, ཨེཝམེཝ ཝཱ པཱཋོ. ཏཏྠ ཡཾ ཨུབྷོསུ པསྶེསུ རུཀྑཐམྦྷེ ནིཁནིཏྭཱ ཏཏྠ མཛ྄ཛྷེ ཝིཛ྄ཛྷིཏྭཱ དྭེ ཏིསྶོ རུཀྑསཱུཙིཡོ པཝེསེཏྭཱ ཀརོནྟི, ཏཾ རུཀྑསཱུཙིདྭཱརཾ ནཱམ. པཝེསནནིཀྑམནཀཱལེ པན ཨཔནེཏྭཱ ཐཀནཀཡོགྒེན ཀཎྚཀསཱཁཱཔཊལེན ཡུཏྟཾ དྭཱརཾ ཀཎྚཀདྭཱརཾ ནཱམ. གཱམདྭཱརསྶ པིདྷཱནཏྠཾ པདརེན ཀཎྚཀསཱཁཱདཱིཧི ཝཱ ཀཏསྶ ཀཝཱཊསྶ ཨུདུཀྑལཔཱསརཧིཏཏཱཡ ཨེཀེན སཾཝརིཏུཾ ཝིཝརིཏུཉྩ ཨསཀྐུཎེཡྻསྶ ཧེཊྛཱ ཨེཀཾ ཙཀྐཾ ཡོཛེནྟི, ཡེན པརིཝཏྟམཱནེན ཏཾ ཀཝཱཊཾ སུཁཐཀནཾ ཧོཏི, ཏཾ སནྡྷཱཡ ཝུཏྟཾ ‘‘ཙཀྐལཀཡུཏྟདྭཱར’’ནྟི. ཙཀྐམེཝ ཧི ལཱཏབྦཊྛེན སཾཝརཎཝིཝརཎཏྠཱཡ གཧེཏབྦཊྛེན ཙཀྐལཀཾ, ཏེན ཡུཏྟམྤི ཀཝཱཊཾ ཙཀྐལཀཾ ནཱམ, ཏེན ཡུཏྟཾ དྭཱརཾ ཙཀྐལཀཡུཏྟདྭཱརཾ. མཧཱདྭཱརེསུ པན དྭེ ཏཱིཎིཔི ཙཀྐལཀཱནི ཡོཛེནྟཱིཏི ཨཱཧ ཕལཀེསཱུཏིཨཱདི. ཀིཊིཀཱསཱུཏི ཝེལུ༹པེསིཀཱཧི ཀཎྚཀསཱཁཱདཱིཧི ཙ ཀཏཐཀནཀེསུ. སཾསརཎཀིཊིཀདྭཱརནྟི ཙཀྐལཀཡནྟེན སཾསརཎཀིཊིཀཱཡུཏྟམཧཱདྭཱརཾ. གོཔྥེཏྭཱཏི ཨཱཝུཎིཏྭཱ, རཛྫཱུཧི གནྠེཏྭཱ ཝཱ. ཨེཀཾ དུསྶསཱཎིདྭཱརམེཝཱཏི ཨེཏྠ ཀིལཉྫསཱཎིདྭཱརམྤི སངྒཧཾ གཙྪཏི ཏགྒཏིཀཏྟཱ. ཨཐ བྷིཀྑཱུ…པེ… ནིསིནྣཱ ཧོནྟཱིཏི ཨིདཾ བྷིཀྑཱུནཾ སནྣིཧིཏབྷཱཝདསྶནཏྠཾ ཝུཏྟཾ. ནིཔནྣེཔི ཨཱབྷོགཾ ཀཱཏུཾ ཝཊྚཏི, ནིཔཛྫིཏྭཱ ནིདྡཱཡནྟེ པན ཨཱབྷོགཾ ཀཱཏུཾ ན ཝཊྚཏི ཨསནྟཔཀྑེ ཋིཏཏྟཱ. རཧོ ¶ ནིསཛྫཱཡ ཝིཡ དྭཱརསཾཝརཎཾ ནཱམ མཱཏུགཱམཱནཾ པཝེསནནིཝཱརཎཏྠཾ ཨནུཉྙཱཏནྟི ཨཱཧ བྷིཀྑུནིཾ ཝཱཏིཨཱདི. ནིསྶེཎིཾ ཨཱརོཔེཏྭཱཏི ཨིདཾ ཧེཊྛིམཏལསྶ སདྭཱརབནྡྷཏཱཡ ཝུཏྟཾ. ཙཏཱུསུ དིསཱསུ པརིཀྑིཏྟསྶ ཀུཊྚསྶ ཨེཀཱབདྡྷཏཱཡ ‘‘ཨེཀཀུཊྚཀེ’’ཏི ཝུཏྟཾ. པཙྪིམཱནཾ བྷཱརོཏི པཱལི༹ཡཱ ཨཱགཙྪནྟེ སནྡྷཱཡ ཝུཏྟཾ. ཡེན ཀེནཙི པརིཀྑིཏྟེཏི ཨེཏྠ པརིཀྑེཔསྶ ཨུབྦེདྷཏོ པམཱཎཾ སཧསེཡྻཔྤཧོནཀེ ཝུཏྟསདིསམེཝ.

མཧཱཔརིཝེཎནྟི མཧནྟཾ ཨངྒཎཾ, ཏེན ཙ བཧུཛནསཉྩཱརཾ དསྶེཏི, ཏེནཱཧ མཧཱབོདྷཱིཏིཨཱདི. ཨརུཎེ ཨུགྒཏེ ཝུཊྛཧཏི, ཨནཱཔཏྟི ཨནཱཔཏྟིཁེཏྟབྷཱུཏཱཡ རཏྟིཡཱ སུདྡྷཙིཏྟེན ནིཔནྣཏྟཱ. པབུཛ྄ཛྷིཏྭཱ པུན སུཔཏི ཨཱཔཏྟཱིཏི ཨརུཎེ ཨུགྒཏེ པབུཛ྄ཛྷིཏྭཱ ཨརུཎུགྒམནཾ ཉཏྭཱ ཝཱ ཨཉཏྭཱ ཝཱ ཨནུཊྛཧིཏྭཱ སཡིཏསནྟཱནེན སུཔཏི ཨུཊྛཧིཏྭཱ ཀཏྟབྦསྶ དྭཱརསཾཝརཎཱདིནོ ཨཀཏཏྟཱ ཨཀིརིཡསམུཊྛཱནཱ ཨཱཔཏྟི ཧོཏི ཨནཱཔཏྟིཁེཏྟེ ཀཏནིཔཛྫནཀིརིཡཱཡ ཨནངྒཏྟཱ. ཨཡཉྷི ཨཱཔཏྟི ཨཱིདིསེ ཋཱནེ ཨཀིརིཡཱ, དིཝཱ ཨསཾཝརིཏྭཱ ནིཔཛྫནཀྑཎེ ཀིརིཡཱ ཙ ཨཙིཏྟཀཱ ཙཱཏི ཝེདིཏབྦཱ. པུརཱརུཎཱ པབུཛ྄ཛྷིཏྭཱཔི ཡཱཝ ཨརུཎུགྒམནཱ སཡནྟསྶཱཔི པུརིམནཡེན ཨཱཔཏྟིཡེཝ. ཨརུཎེ ཨུགྒཏེ ཝུཊྛཧིསྶཱམཱིཏི…པེ… ཨཱཔཏྟིཡེཝཱཏི ཨེཏྠ ཀདཱ ཏསྶ ཨཱཔཏྟཱིཏི? ཝུཙྩཏེ – ན ཏཱཝ རཏྟིཡཾ ‘‘དིཝཱ ཨཱཔཛྫཏི ནོ རཏྟི’’ནྟི (པརི. ༣༢༣) ཝུཏྟཏྟཱ. ‘‘ཨནཱདརིཡདུཀྐཊཱ ན མུཙྩཏཱི’’ཏི ཝུཏྟདུཀྐཊཾ པན དིཝཱསཡནདུཀྐཊམེཝ ན ¶ ཧོཏི ཨནཱདརིཡདུཀྐཊཏྟཱ. ཨེཝཾ ཨརུཎུགྒམནེ པན ཨཙིཏྟཀཾ ཨཀིརིཡསམུཊྛཱནཾ ཨཱཔཏྟིཾ ཨཱཔཛྫཏཱིཏི ཝེདིཏབྦཾ. སོ སཙེ དྭཱརཾ སཾཝརིཏྭཱ ‘‘ཨརུཎེ ཨུགྒཏེ ཝུཊྛཧིསྶཱམཱི’’ཏི ནིཔཛྫཏི, དྭཱརེ ཙ ཨཉྙེཧི ཨརུཎུགྒམནཀཱལེ ཝིཝཊེཔི ཏསྶ ཨནཱཔཏྟིཡེཝ དྭཱརཔིདཧནསྶ རཏྟིདིཝཱབྷཱགེསུ ཝིསེསཱབྷཱཝཱ. ཨཱཔཏྟིཨཱཔཛྫནསྶེཝ ཀཱལཝིསེསོ ཨིཙྪིཏབྦོ, ན ཏཔྤརིཧཱརསྶཱཏི གཧེཏབྦཾ, ‘‘དྭཱརཾ ཨསཾཝརིཏྭཱ རཏྟིཾ ནིཔཛྫཏཱི’’ཏི (པཱརཱ. ཨཊྛ. ༡.༧༧) ཧི ཝུཏྟཾ. དིཝཱ སཾཝརིཏྭཱ ནིཔནྣསྶ ཀེནཙི ཝིཝཊེཔི དྭཱརེ ཨནཱཔཏྟིཡེཝ. ཨཏྟནཱཔི ཨནུཊྛཧིཏྭཱཝ སཏི པཙྩཡེ ཝིཝཊེཔི ཨནཱཔཏྟཱིཏི ཝདནྟི. ཡཐཱཔརིཙྪེདམེཝ ཙ ན ཝུཊྛཱཏཱིཏི ཨརུཎེ ཨུགྒཏེཡེཝ ཨུཊྛཱཏི. ཨཱཔཏྟིཡེཝཱཏི མཱུལཱཔཏྟིཾཡེཝ སནྡྷཱཡ ཝུཏྟཾ, ཨནཱདརིཡཨཱཔཏྟི པན པུརཱརུཎཱ ཨུཊྛིཏསྶཱཔི ཏསྶ ཧོཏེཝ ‘‘དུཀྐཊཱ ¶ ན མུཙྩཏཱི’’ཏི ཝུཏྟཏྟཱ, དུཀྐཊཱ ན མུཙྩཏཱིཏི ཙ པུརཱརུཎཱ ཨུཊྛཧིཏྭཱ མཱུལཱཔཏྟིཡཱ མུཏྟོཔི ཨནཱདརིཡདུཀྐཊཱ ན མུཙྩཏཱིཏི ཨདྷིཔྤཱཡོ.

ནིདྡཱཝསེན ནིཔཛྫཏཱིཏི ཝོཧཱརཝསེན ཝུཏྟཾ, པཱདཱནཾ པན བྷཱུམིཏོ ཨམོཙིཏཏྟཱ ཨཡཾ ནིཔནྣོ ནཱམ ན ཧོཏི, ཏེནེཝ ཨནཱཔཏྟི ཝུཏྟཱ. ཨཔསྶཱཡ སུཔནྟསྶཱཏི ཀཊིཊྛིཏོ ཨུདྡྷཾ པིཊྛིཀཎྚཀེ ཨཔྤམཏྟཀམྤི པདེསཾ བྷཱུམིཾ ཨཕུསཱཔེཏྭཱ ཐམྦྷཱདིཾ ཨཔསྶཱཡ སུཔནྟསྶ. ཀཊིཊྛིཾ པན བྷཱུམིཾ ཕུསཱཔེནྟསྶ སཡནཾ ནཱམ ཧོཏི. པིཊྛིཔསཱརཎལཀྑཎཱ ཧི སེཡྻཱ. དཱིགྷཝནྡནཱདཱིསུཔི ཏིརིཡཾ པིཊྛིཀཎྚཀཱནཾ པསཱརིཏཏྟཱ ནིཔཛྫནམེཝཱཏི ཨཱཔཏྟི པརིཧརིཏབྦཱཝ ‘‘ཝནྡཱམཱིཏི པཱདམཱུལེ ནིཔཛྫཱི’’ཏིཨཱདཱིསུ ནིཔཛྫནསྶེཝ ཝུཏྟཏྟཱ. ཏསྶཱཔི ཨནཱཔཏྟི པཏནཀྑཎེ ཨཝིསཡཏྟཱ, ཝིསཡེ ཛཱཏེ སཧསཱ ཝུཊྛིཏཏྟཱ ཙ. ཡསྶ པན ཝིསཉྙིཏཱཡ པཙྪཱཔི ཨཝིསཡོ, ཨེཏསྶ ཨནཱཔཏྟིཡེཝ པཏིཏཀྑཎེ ཝིཡ. ཏཏྠེཝ སཡཏི ན ཝུཊྛཱཏཱིཏི ཨིམིནཱ ཝིསཡེཔི ཨཀརཎཾ དསྶེཏི, ཏེནེཝ ‘‘ཏསྶ ཨཱཔཏྟཱི’’ཏི ཝུཏྟཾ.

ཨེཀབྷངྒེནཱཏི ཨུབྷོ པཱདེ བྷཱུམིཏོ ཨམོཙེཏྭཱཝ ཨེཀཔསྶེན སརཱིརཾ བྷཉྫིཏྭཱ ནིཔནྣོ. མཧཱཨཊྛཀཐཱཡཾ པན མཧཱཔདུམཏྠེརེན ཝུཏྟནྟི སམྦནྡྷོ, ཏེན ‘‘མཧཱཨཊྛཀཐཱཡ ལིཁིཏམཧཱཔདུམཏྠེརཝཱདོ ཨཡ’’ནྟི དསྶེཏི. ཏཏྠ སུཔནྟསྶཱཔི ཨཝིསཡཏྟམཏྠཱིཏི མཧཱཔདུམཏྠེརེན ‘‘ཨཝིསཡཏྟཱ པན ཨཱཔཏྟི ན དིསྶཏཱི’’ཏི ཝུཏྟཾ. ཨཱཙརིཡཱ པན སུཔནྟསྶ ཝིསཉྙཏྟཱབྷཱཝེན ཝིསཡཏྟཱ ཨནཱཔཏྟིཾ ན ཀཐཡནྟི. ཝིསཉྙཏྟེ སཏི ཨནཱཔཏྟིཡེཝ. དྭེ པན ཛནཱཏིཨཱདིཔི མཧཱཨཊྛཀཐཱཡམེཝ ཝཙནཾ, ཏདེཝ པཙྪཱ ཝུཏྟཏྟཱ པམཱཎཾ. ཡཀྑགཧིཏགྒཧཎེནེཝ ཙེཏྠ ཝིསཉྙཱིབྷཱུཏོཔི སངྒཧིཏོ. ཨེཀབྷངྒེན ནིཔནྣོ པན ཨནིཔནྣཏྟཱ ཨཱཔཏྟིཏོ མུཙྩཏིཡེཝཱཏི གཧེཏབྦཾ.

༧༨. ཨཔདེཏི ¶ ཨཱཀཱསེ. པདནྟི པདཝལ༹ཉྫཾ, ཏེནཱཧ ‘‘ཨཱཀཱསེ པད’’ནྟི. ཨེཏདགྒནྟི ཨེསོ ཨགྒོ. ཡདིདནྟི ཡོ ཨཡཾ. སེསཾ ཨུཏྟཱནམེཝ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

པཋམཔཱརཱཛིཀཝཎྞནཱནཡོ ནིཊྛིཏོ.

༢. དུཏིཡཔཱརཱཛིཀཾ

ཨདུཏིཡེནཱཏི ¶ ¶ ཨསདིསེན ཛིནེན ཡཾ དུཏིཡཾ པཱརཱཛིཀཾ པཀཱསིཏཾ, ཏསྶ ཨིདཱནི ཡསྨཱ སཾཝཎྞནཱཀྐམོ པཏྟོ, ཏསྨཱ ཨསྶ དུཏིཡསྶ ཨཡཾ སཾཝཎྞནཱ ཧོཏཱིཏི ཡོཛནཱ.

དྷནིཡཝཏྠུཝཎྞནཱ

༨༤. རཱཛཱུཧི གཧིཏནྟི རཱཛགཧནྟི ཨཱཧ ‘‘མནྡྷཱཏཱུ’’ཏི. རཱཛཔུརོཧིཏེན པརིགྒཧིཏམྤི རཱཛཔརིགྒཧིཏམེཝཱཏི མཧཱགོཝིནྡགྒཧཎཾ, ནགརསདྡཱཔེཀྑཱཡ ཙེཏྠ ‘‘རཱཛགཧ’’ནྟི ནཔུཾསཀནིདྡེསོ. ཨཉྙེཔེཏྠ པཀཱརེཏི སུསཾཝིཧིཏཱརཀྑཏྟཱ རཱཛཱུནཾ གཧཾ གེཧབྷཱུཏནྟི རཱཛགཧནྟིཨཱདིཀེ པཀཱརེ. ཝསནྟཝནནྟི ཀཱིལཱ༹ཝནཾ, ཝསནྟཀཱལེ ཀཱིལཱ༹ཡ ཡེབྷུཡྻཏྟཱ པན ཝསནྟཝནནྟི ཝུཏྟཾ.

སདྭཱརབནྡྷཱཏི ཝསྶཱུཔགམནཡོགྒཏཱདསྶནཾ. ནཱལཀཔཊིཔདནྟི སུཏྟནིཔཱཏེ (སུ. ནི. ༦༨༤ ཨཱདཡོ) ནཱལཀཏྠེརསྶ དེསིཏཾ མོནེཡྻཔཊིཔདཾ. པཉྩནྣཾ ཚདནཱནནྟི ཏིཎཔཎྞཨིཊྛཀསིལཱསུདྷཱསངྑཱཏཱནཾ པཉྩནྣཾ. ནོ ཙེ ལབྷཏི…པེ… སཱམམྤི ཀཱཏབྦནྟི ཨིམིནཱ ནཱཝཱསཏྠཝཛེ ཋཔེཏྭཱ ཨཉྙཏྠ ‘‘ཨསེནཱསནིཀོ ཨཧ’’ནྟི ཨཱལཡཀརཎམཏྟེན ཨུཔགམནཾ ན ཝཊྚཏི. སེནཱསནཾ པརིཡེསིཏྭཱ ཝཙཱིབྷེདཾ ཀཏྭཱ ཝསྶཾ ཨུཔགནྟབྦམེཝཱཏི དསྶེཏི. ‘‘ན, བྷིཀྑཝེ, ཨསེནཱསནིཀེནཱ’’ཏིཨཱདིནཱ (མཧཱཝ. ༢༠༤) ཧི པཱལི༹ཡཾ ‘‘ནཱལཀཔཊིཔདཾ པཊིཔནྣེནཱཔཱི’’ཏི ཨཊྛཀཐཱཡཉྩ ཨཝིསེསེན དལ༹ྷཾ ཀཏྭཱ ཝུཏྟཾ, ནཱཝཱསཏྠཝཛེསུཡེཝ ཙ ‘‘ཨནུཛཱནཱམི, བྷིཀྑཝེ, ནཱཝཱཡ ཝསྶཾ ཨུཔགནྟུ’’ནྟིཨཱདིནཱ (མཧཱཝ. ༢༠༣) ཨསཏིཔི སེནཱསནེ ཨཱལཡཀརཎཝསེན ཝསྶཱུཔགམནཾ ཨནུཉྙཱཏཾ, ནཱཉྙཏྠཱཏི གཧེཏབྦཾ. ཨཡམནུདྷམྨཏཱཏི སཱམཱིཙིཝཏྟཾ. ཀཏིཀཝཏྟཱནཱིཏི བྷསྶཱརཱམཏཱདིཾ ཝིཧཱཡ སབྦདཱ ཨཔྤམཏྟེཧི བྷཝིཏབྦནྟིཨཱདིཀཏིཀཝཏྟཱནི. ཁནྡྷཀཝཏྟཱནཱིཏི ‘‘ཨཱགནྟུཀཱདིཁནྡྷཀཝཏྟཾ པཱུརེཏབྦ’’ནྟི ཨེཝཾ ཁནྡྷཀཝཏྟཱནི ཙ ཨདྷིཊྛཧིཏྭཱ.

ཝསྶཾཝུཏྠཱཏི པདསྶ ཨཊྛཀཐཱཡཾ ‘‘པུརིམིཀཱཡ ཨུཔགཏཱ མཧཱཔཝཱརཎཱཡ པཝཱརིཏཱ པཱཊིཔདདིཝསཏོ ¶ པཊྛཱཡ ‘ཝུཏྠཝསྶཱ’ཏི ཝུཙྩནྟཱི’’ཏི ཝུཏྟཏྟཱ མཧཱཔཝཱརཎཱདིཝསེ པཝཱརེཏྭཱ ཝཱ ཨཔྤཝཱརེཏྭཱ ཝཱ ཨཉྙཏྠ གཙྪནྟེཧི ¶ སཏྟཱཧཀརཎཱིཡནིམིཏྟེ སཏི ཨེཝ གནྟབྦཾ, ནཱསཏི, ཨིཏརཐཱ ཝསྶཙྪེདོ དུཀྐཊཉྩ ཧོཏཱིཏི ཝེདིཏབྦཾ. ‘‘ཨིམཾ ཏེམཱསཾ ཝསྶཾ ཨུཔེམཱི’’ཏི ཧི ‘‘ན, བྷིཀྑཝེ, ཝསྶཾ ཨུཔགནྟྭཱ པུརིམཾ ཝཱ ཏེམཱསཾ པཙྪིམཾ ཝཱ ཏེམཱསཾ ཨཝསིཏྭཱ ཙཱརིཀཱ པཀྐམིཏབྦཱ’’ཏི (མཧཱཝ. ༡༨༥) ཙ ཝུཏྟཾ. ཨིདྷེཝ ཙ ཝསྶཾཝུཏྠཱ ཏེམཱསཙྩཡེན…པེ… པཀྐམིཾསཱུཏི ཝུཏྟཾ. པཝཱརཎཱདིཝསོཔི ཏེམཱསཔརིཡཱཔནྣོཝ. ཀེཙི པན ‘‘ཨནུཛཱནཱམི, བྷིཀྑཝེ, ཝསྶཾཝུཏྠཱནཾ བྷིཀྑཱུནཾ ཏཱིཧི ཋཱནེཧི པཝཱརེཏུནྟི (མཧཱཝ. ༢༠༩) པཝཱརཎཱཀམྨསྶ པུབྦེཡེཝ ཝསྶཾཝུཏྠཱནནྟི ཝུཏྠཝསྶཏཱཡ ཝུཏྟཏྟཱ མཧཱཔཝཱརཎཱདིཝསེ སཏྟཱཧཀརཎཱིཡནིམིཏྟཾ ཝིནཱཔི ཡཐཱསུཁཾ གནྟུཾ ཝཊྚཏཱི’’ཏི ཝདནྟི, ཏཾ ཏེསཾ མཏིམཏྟཾ, ཝུཏྠཝསྶཱནཉྷི པཝཱརཎཱནུཛཱནནཾ ཨནུཔགཏཚིནྣཝསྶཱདཱིནཾ ནིཝཏྟནཏྠཾ ཀཏཾ, ན པན པཝཱརཎཱདིཝསེ ཨཝསིཏྭཱ པཀྐམིཏབྦནྟི དསྶནཏྠཾ ཏདཏྠསྶ ཨིདྷ པསངྒཱབྷཱཝཱ, པཝཱརཎཾ ཀཱཏུཾ ཨནུཙྪཝིཀཱནཾ པཝཱརཎཱ ཨིདྷ ཝིདྷཱིཡཏི, ཡེ ཙ ཝསྶཾ ཨུཔགནྟྭཱ ཝསྶཙྪེདཉྩ ཨཀཏྭཱ ཡཱཝ པཝཱརཎཱདིཝསཱ ཝསིཾསུ, ཏེ ཏཏྟཀེན པཝཱརཎཱཀམྨཾ པཏི པརིཡཱཡཏོ ཝུཏྠཝསྶཱཏི ཝུཙྩནྟི, ཨཔྤཀཾ ཨཱུནམདྷིཀཾ ཝཱ གཎནཱུཔགཾ ན ཧོཏཱིཏི ཉཱཡཏོ, ན ཀཐིནཀམྨཾ པཏི ཏེམཱསསྶ ཨཔརིཔུཎྞཏྟཱ, ཨིཏརཐཱ ཏསྨིཾ མཧཱཔཝཱརཎཱདིཝསེཔི ཀཐིནཏྠཱརཔྤསངྒཏོ. ‘‘ཨནུཛཱནཱམི, བྷིཀྑཝེ, ཝསྶཾཝུཏྠཱནཾ བྷིཀྑཱུནཾ ཀཐིནཾ ཨཏྠརིཏུ’’ནྟི (མཧཱཝ. ༣༠༦) ཨིདཾ པན ‘‘ན, བྷིཀྑཝེ, ཝསྶཾ ཨུཔགནྟྭཱ པུརིམཾ ཝཱ ཏེམཱསཾ པཙྪིམཾ ཝཱ ཏེམཱསཾ ཨཝསིཏྭཱ ཙཱརིཀཱ པཀྐམིཏབྦཱ’’ཏིཨཱདི (མཧཱཝ. ༡༨༥) ཙ ནིཔྤརིཡཱཡཏོ མཧཱཔཝཱརཎཱཡ ཨནནྟརཔཱཊིཔདདིཝསཏོ པཊྛཱཡ ཀཐིནཏྠཱརཾ པཀྐམནཉྩ སནྡྷཱཡ ཝུཏྟཾ, པརིཝཱརེ ཙ ‘‘ཀཐིནསྶ ཨཏྠཱརམཱསོ ཛཱནིཏབྦོ’’ཏི (པརི. ༤༡༢) ཝཏྭཱ ‘‘ཝསྶཱནསྶ པཙྪིམོ མཱསོ ཛཱནིཏབྦོ’’ཏི (པརི. ༤༡༢) ཝུཏྟཾ. ཡོ ཧི ཀཐིནཏྠཱརསྶ ཀཱལོ, ཏཏོ པཊྛཱཡེཝ ཙཱརིཀཱཔཀྐམནསྶཱཔི ཀཱལོ, ན ཏཏོ པུརེ ཝསྶཾཝུཏྠཱནཾཡེཝ ཀཐིནཏྠཱརཱརཧཏྟཱ. ཡདགྒེན ཧི པཝཱརཎཱདིཝསེ ཀཐིནཏྠཱརོ ན ཝཊྚཏི, ཏདགྒེན བྷིཀྑཱུཔི ཝུཏྠཝསྶཱ ན ཧོནྟི པཝཱརཎཱདིཝསསྶ ཨཝུཏྠཏྟཱ.

ཡཾ པན སཱརཏྠདཱིཔནིཡཾ (སཱརཏྠ. ཊཱི. པཱརཱཛིཀཀཎྜ ༢.༨༤) ‘‘ཨེཀདེསེན ཨཝུཏྠམྤི ཏཾ དིཝསཾ ཝུཏྠབྷཱགཱཔེཀྑཱཡ ཝུཏྠམེཝ ཧོཏཱི’’ཏིཨཱདི ཝུཏྟཾ, ཏཾ ན ཡུཏྟཾ, ཏཾདིཝསཔརིཡོསཱནེ ཨརུཎུགྒམནཀཱལེ ཝསནྟོཝ ཧི ཏཾ དིཝསཾ ཝུཏྠོ ནཱམ ཧོཏི ¶ པརིཝཱསཨརཉྙཝཱསཱདཱིསུ ཝིཡ, ཨཡཉྩ ཝིཙཱརཎཱ ཨུཔརི ཝསྶཱུཔནཱཡིཀཀྑནྡྷཀེ ཨཱཝི བྷཝིསྶཏཱིཏི ཏཏྠེཝ ཏཾ པཱཀཊཾ ཀརིསྶཱམ.

མཧཱཔཝཱརཎཱཡ ¶ པཝཱརིཏཱཏི པུརིམིཀཱཡ ཝསྶཾ ཨུཔགནྟྭཱ ཨཙྪིནྣཝསྶཏཱདསྶནཔརཾ ཨེཏཾ ཀེནཙི ཨནྟརཱཡེན ཨཔྤཝཱརིཏཱནམྤི ཝུཏྠཝསྶཏྟཱ. ན ཨོཝསྶིཡཏཱིཏི ཨནོཝསྶཀནྟི ཀམྨསཱདྷནཾ དཊྛབྦཾ, ཡཐཱ ན ཏེམིཡཏི, ཏཐཱ ཀཏྭཱཏི ཨཏྠོ. ཨནཝཡོཏི ཨེཏྠ ཨནུསདྡོ ཝིཙྪཱཡཾ ཝཏྟཏཱིཏི ཨཱཧ ཨནུ ཨནུ ཨཝཡོཏིཨཱདི. ཨཱཙརིཡསྶ ཀམྨཾ ཨཱཙརིཡཀནྟི ཨཱཧ ‘‘ཨཱཙརིཡཀམྨེ’’ཏི. ཀཊྛཀམྨཾ ཐམྦྷཱདི. ཏེལཏམྦམཏྟིཀཱཡཱཏི ཏེལམིསྶཱཡ ཏམྦམཏྟིཀཱཡ.

༨༥. ཀུཊིཀཱཡ ཀརཎབྷཱཝནྟི ཀུཊིཡཱ ཀཏབྷཱཝཾ. ཀིཾ-སདྡཔྤཡོགེ ཨནཱགཏཔྤཙྩཡཝིདྷཱནཾ སནྡྷཱཡ ཏསྶ ལཀྑཎནྟིཨཱདི ཝུཏྟཾ. ཀིཉྩཱཔི ཐེརསྶ པཱཎགྷཱཏཱདྷིཔྤཱཡོ ནཏྠི, ཨནུཔཔརིཀྑིཏྭཱ ཀརཎེན པན བཧཱུནཾ པཱཎཱནཾ མརཎཏྟཱ པཱཎེ བྱཱབཱདྷེནྟསྶཱཏིཨཱདི ཝུཏྟཾ. པཱཏབྱབྷཱཝནྟི ཝིནཱསེཏབྦཏཾ. པཱཎཱཏིཔཱཏཾ ཀརོནྟཱནནྟི ཐེརེན ཨཀཏེཔི པཱཎཱཏིཔཱཏེ པཱཎཀཱནཾ མརཎམཏྟེན པཙྪིམཱནཾ ལེསེན གཧཎཱཀཱརཾ དསྶེཏི, ཏེན ཙ ‘‘མམ ཏཱདིསཾ ཨཀུསལཾ ནཏྠཱི’’ཏི པཙྪིམཱནཾ ཝིཔལླཱསལེསགྒཧཎནིམིཏྟཀིཙྩཾ ན ཀཏྟབྦནྟི དཱིཔིཏཾ ཧོཏི. དིཊྛཱནུགཏིནྟི དིཊྛསྶ ཀམྨསྶ ཨནུཔགམནཾ ཨནུཀིརིཡཾ, དིཊྛིཡཱ ཝཱ ལདྡྷིཡཱ ཨནུགམནཾ གཱཧཾ. གྷཾསིཏབྦེཏི མདྡིཏབྦེ, ཝིནཱསིཏབྦེཏི ཨཏྠོ. ཀཏཾ ལབྷིཏྭཱ ཏཏྠ ཝསནྟཱནམྤི དུཀྐཊམེཝཱཏི ཨིདཾ བྷགཝཏཱ ཀུཊིཡཱ བྷེདཱཔནཝཙནེན སིདྡྷཾ, སཱཔི ཏིཎདབྦསམྦྷཱརེཧི ཏུལཱཐམྦྷཱདཱིཧི ཨམིསྶཱ སུདྡྷམཏྟིཀཱམཡཱཔི ཨིཊྛཀཱཧི ཀཏཱ ཝཊྚཏི. ཀེཙི ཧི ཨིཊྛཀཱཧིཡེཝ ཐམྦྷེ ཙིནིཏྭཱ ཏདུཔརི ཨིཊྛཀཱཧིཡེཝ ཝིཏཱནཱདིསཎྛཱནེན ཏུལཱདིདཱརུསམྦྷཱརཝིརཧིཏཾ ཚདནམྤི བནྡྷིཏྭཱ ཨིཊྛཀཱམཡམེཝ ཨཱཝསཐཾ ཀརོནྟི, ཏཱདིསཾ ཝཊྚཏི. གིཉྫཀཱཝསཐསངྑེཔེན ཀཏཱཏི ཨེཏྠ གིཉྫཀཱ ཝུཙྩནྟི ཨིཊྛཀཱ, ཏཱཧིཡེཝ ཀཏོ ཨཱཝསཐོ གིཉྫཀཱཝསཐོ. ཝཡཀམྨམྤཱིཏི མཏྟིཀུདྡྷཱརཎཨིཊྛཀདཱརུཙྪེདནཱདིཀཱརཀཱནཾ དིནྣབྷཏྟཝེཏྟནཱདིཝཏྠུབྦཡེན ནིཔྥནྣཀམྨམྤི ཨཏྠི, ཨེཏེན ཀུཊིབྷེདཀཱནཾ གཱིཝཱདིབྷཱཝཾ པརིསངྐཏི. ཏིཏྠིཡདྷཛོཏི ཏིཏྠིཡཱནམེཝ སཉྙཱཎབྷཱུཏཏྟཱ ཝུཏྟཾ. ཏེ ཧི ཨཱིདིསེསུ ཙཱཊིཨཱདཱིསུ ཝསནྟི. ཨཉྙཱནིཔཱིཏི པི-སདྡེན ཨཏྟནཱ ཝུཏྟཀཱརཎདྭཡམྤི མཧཱཨཊྛཀཐཱཡམེཝ ཝུཏྟནྟི དསྶེཏི. ཡསྨཱ སབྦམཏྟིཀཱམཡཱ ¶ ཀུཊི སཱིཏཀཱལེ ཨཏིསཱིཏཱ ཨུཎྷཀཱལེ ཙ ཨུཎྷཱ སུཀརཱ ཙ ཧོཏི ཙོརེཧི བྷིནྡིཏུཾ, ཏསྨཱ ཏཏྠ ཋཔིཏཔཏྟཙཱིཝརཱདིཀཾ སཱིཏུཎྷཙོརཱདཱིཧི ཝིནསྶཏཱིཏི ཝུཏྟཾ ‘‘པཏྟཙཱིཝརགུཏྟཏྠཱཡཱ’’ཏི. ཚིནྡཱཔེཡྻ ཝཱ བྷིནྡཱཔེཡྻ ཝཱ ཨནུཔཝཛྫོཏི ཨིདཾ ཨཡཾ ཀུཊི ཝིཡ སབྦཐཱ ཨནུཔཡོགཱརཧཾ སནྡྷཱཡ ཝུཏྟཾ. ཡཾ པན པཉྩཝཎྞསུཏྟེཧི ཝིནདྡྷཚཏྟཱདིཀཾ, ཏཏྠ ཨཀཔྤིཡབྷཱགོཝ ཚིནྡིཏབྦོ, ན ཏདཝསེསོ ཏསྶ ཀཔྤིཡཏྟཱ, ཏཾ ཚིནྡནྟོ ཨུཔཝཛྫོཝ ཧོཏི. ཏེནེཝ ཝཀྑཏི ‘‘གྷཊཀམྤི ཝཱལ༹རཱུཔམྤི བྷིནྡིཏྭཱ དྷཱརེཏབྦ’’ནྟིཨཱདི.

པཱལི༹མུཏྟཀཝིནིཙྪཡཝཎྞནཱ

ཚཏྟདཎྜགྒཱཧཀཾ ¶ སལཱཀཔཉྫརནྟི ཨེཏྠ ཡོ པཉྫརསལཱཀཱནཾ མཛ྄ཛྷཊྛོ བུནྡེ པུཐུལོ ཨཧིཙྪཏྟཀསདིསོ ཨགྒེ སཚིདྡོ ཡཏྠ དཎྜནྟརཾ པཝེསེཏྭཱ ཚཏྟཾ གཎྷནྟི, ཡོ ཝཱ སཡམེཝ དཱིགྷཏཱཡ གཧཎདཎྜོ ཧོཏི, ཨཡཾ ཚཏྟདཎྜོ ནཱམ, ཏསྶ ཨཔརིགལ༹ནཏྠཱཡ ཚཏྟསལཱཀཱནཾ མཱུལཔྤདེསདཎྜསྶ སམནྟཏོ དལ༹ྷཔཉྫརཾ ཀཏྭཱ སུཏྟེཧི ཝིནནྡྷནྟི, སོ པདེསོ ཚཏྟདཎྜགཱཧཀསལཱཀཔཉྫརཾ ནཱམ, ཏཾ ཝིནནྡྷིཏུཾ ཝཊྚཏི. ན ཝཎྞམཊྛཏྠཱཡཱཏི ཨིམིནཱ ཐིརཀརཎཏྠམེཝ ཨེཀཝཎྞསུཏྟེན ཝིནནྡྷིཡམཱནཾ ཡདི ཝཎྞམཊྛཾ ཧོཏི, ན ཏཏྠ དོསོཏི དསྶེཏི. ཨཱརགྒེནཱཏི ནིཁཱདནམུཁེན. དཎྜབུནྡེཏི དཎྜམཱུལེ ཀོཊིཡཾ. ཚཏྟམཎྜལིཀནྟི ཚཏྟཔཉྫརེ མཎྜལཱཀཱརེན བདྡྷདཎྜཝལཡཾ. ཨུཀྐིརིཏྭཱཏི ནིནྣཾ, ཨུནྣཏཾ ཝཱ ཀཏྭཱ.

ནཱནཱསུཏྟཀེཧཱིཏི ནཱནཱཝཎྞེཧི སུཏྟེཧི. ཨིདཉྩ ཏཐཱ ཀརོནྟཱནཾ ཝསེན ཝུཏྟཾ, ཨེཀཝཎྞསུཏྟཀེནཱཔི ན ཝཊྚཏིཡེཝ, ‘‘པཀཏིསཱུཙིཀམྨམེཝ ཝཊྚཏཱི’’ཏི ཧི ཝུཏྟཾ. པཊྚམུཁེཏི དྭིནྣཾ པཊྚཱནཾ སངྒྷཊིཏཊྛཱནཾ སནྡྷཱཡེཏཾ ཝུཏྟཾ. པརིཡནྟེཏི ཙཱིཝརཔརིཡནྟེ, ཨནུཝཱཏཾ སནྡྷཱཡེཏཾ ཝུཏྟཾ. ཝེཎིནྟི ཝརཀསཱིསཱཀཱརེན སིབྦནཾ. སངྑལིཀནྟི དིགུཎསངྑལིཀཱཀཱརེན སིབྦནཾ, ཝེཎིཾ ཝཱ སངྑལིཀཾ ཝཱ ཀརོནྟཱིཏི པཀཏེན སམྦནྡྷོ. ཨགྒྷིཡཾ ནཱམ ཙེཏིཡསཎྛཱནཾ, ཡཾ ཨགྒྷིཡཏྠམྦྷོཏི ཝདནྟི. ཨུཀྐིརནྟཱིཏི ཨུཊྛཔེནྟི. ཙཏུཀོཎམེཝ ཝཊྚཏཱིཏི གཎྛིཀཔཱསཀཔཊྚཱནི སནྡྷཱཡ ཝུཏྟཾ. ཀོཎསུཏྟཔིལ༹ཀཱཏི གཎྛིཀཔཱསཀཔཊྚཱནཾ ཀོཎེཧི བཧི ནིགྒཏསུཏྟཱནཾ ¶ པིལ༹ཀཱཀཱརེན ཋཔིཏཀོཊིཡོཏི ཀེཙི ཝདནྟི, ཏེ པིལ༹ཀེ ཚིནྡིཏྭཱ དུཝིཉྙེཡྻཱ ཀཱཏབྦཱཏི ཏེསཾ ཨདྷིཔྤཱཡོ. ཀེཙི པན ‘‘ཀོཎསུཏྟཱ ཙ པིལ༹ཀཱཏི དྭེཡེཝཱ’’ཏི ཝདནྟི, ཏེསཾ མཏེན གཎྛིཀཔཱསཀཔཊྚཱནཾ ཀོཎཏོ ཀོཎེཧི ནཱིཧཏསུཏྟཱ ཀོཎསུཏྟཱ ནཱམ. སམནྟཏོ པན པརིཡནྟེན ཀཏཱ ཙཏུརསྶསུཏྟཱ པིལ༹ཀཱ ནཱམ. ཏཾ དུཝིདྷམྤི ཀེཙི ཙཱིཝརཏོ ཝིསུཾ པཉྙཱཡནཏྠཱཡ ཝིཀཱརཡུཏྟཾ ཀརོནྟི, ཏཾ ནིསེདྷཱཡ ‘‘དུཝིཉྙེཡྻརཱུཔཱ ཝཊྚནྟཱི’’ཏི ཝུཏྟཾ, ན པན སབྦཐཱ ཨཙཀྑུགོཙརབྷཱཝེན སིབྦནཏྠཱཡ ཏཐཱསིབྦནསྶ ཨསཀྐུཎེཡྻཏྟཱ. ཡཐཱ པཀཏིཙཱིཝརཏོ ཝིཀཱརོ ན པཉྙཱཡཏི, ཨེཝཾ སིབྦིཏབྦནྟི ཨདྷིཔྤཱཡོ. རཛནཀམྨཏོ པུབྦེ པཉྙཱཡམཱནོཔི ཝིསེསོ ཙཱིཝརེ རཏྟེ ཨེཀཝཎྞཏཱཡ ན པཉྙཱཡཏཱིཏི ཨཱཧ ‘‘ཙཱིཝརེ རཏྟེ’’ཏི. མཎིནཱཏི ནཱིལམཎིཨཱདིམཊྛཔཱསཱཎེན, ཨཾསཝདྡྷཀཀཱཡབནྡྷནཱདིཀཾ པན ཨཙཱིཝརཏྟཱ སངྑཱདཱིཧི གྷཾསིཏུཾ ཝཊྚཏཱིཏི ཝདནྟི. ཀཎྞསུཏྟཀནྟི ཙཱིཝརསྶ དཱིགྷཏོ ཏིརིཡཉྩ སིབྦིཏཱནཾ ཙཏཱུསུ ཀཎྞེསུ ཀོཎེསུ ཙ ནིཀྑནྟཱནཾ སུཏྟསཱིསཱནམེཏཾ ནཱམཾ, ཏཾ ཚིནྡིཏྭཱཝ པཱརུཔིཏབྦཾ, ཏེནཱཧ ‘‘རཛིཏཀཱལེ ཚིནྡིཏབྦ’’ནྟི. བྷགཝཏཱ ཨནུཉྙཱཏཾ ཨེཀཾ ཀཎྞསུཏྟམྤི ཨཏྠི, ཏཾ པན ནཱམེན ¶ སདིསམྤི ཨིཏོ ཨཉྙམེཝཱཏི དསྶེཏུཾ ཡཾ པནཱཏིཨཱདི ཝུཏྟཾ. ལགྒནཏྠཱཡཱཏི ཙཱིཝརརཛྫུཡཾ ཙཱིཝརབནྡྷནཏྠཱཡ. གཎྛིཀེཏི དནྟཱདིམཡེ. པཱིལ༹ཀཱཏི བིནྡུཾ བིནྡུཾ ཀཏྭཱ ཨུཊྛཱཔེཏབྦཔཱིལ༹ཀཱ.

ཐཱལཀེ ཝཱཏི ཏམྦཱདིམཡེ པུགྒལིཀེ ཏིཝིདྷེཔི ཀཔྤིཡཐཱལཀེ. ན ཝཊྚཏཱིཏི མཎིཝཎྞཀརཎཔྤཡོགོ ན ཝཊྚཏི, ཏེལཝཎྞཀརཎཏྠཾ པན ཝཊྚཏི. པཏྟམཎྜལེཏི ཏིཔུསཱིསཱདིམཡེ. ‘‘ན, བྷིཀྑཝེ, ཙིཏྟཱནི པཏྟམཎྜལཱནི དྷཱརེཏབྦཱནི རཱུཔཀཱཀིཎྞཱནི བྷིཏྟིཀམྨཀཏཱནཱི’’ཏི (ཙཱུལ༹ཝ. ༢༥༣) ཝུཏྟཏྟཱ ‘‘བྷིཏྟིཀམྨཾ ན ཝཊྚཏཱི’’ཏི ཝུཏྟཾ. ‘‘ཨནུཛཱནཱམི, བྷིཀྑཝེ, མཀརདནྟཀཾ ཚིནྡིཏུ’’ནྟི (ཙཱུལ༹ཝ. ༢༥༣) ཝུཏྟཏྟཱ ‘‘མཀརདནྟཀཾ པན ཝཊྚཏཱི’’ཏི ཝུཏྟཾ, ཨིདཾ པན པཱལི༹ཡཱ ལདྡྷམྤི ཨིདྷ པཱལི༹ཡཱ མུཏྟཏྟཱ པཱལི༹མུཏྟཀནཡེ ཝུཏྟཾ. ཨེཝམཉྙམྤི ཨཱིདིསཾ.

ལེཁཱ ན ཝཊྚཏཱིཏི ཨཱརགྒེན དིནྣལེཁཱཝ ན ཝཊྚཏི, ཛཱཏིཧིངྒུལིཀཱདིཝཎྞེཧི ཀཏལེཁཱ ཝཊྚཏི. ཚཏྟམུཁཝཊྚིཡནྟི དྷམཀརཎསྶ ཧཏྠེན གཧཎཚཏྟཱཀཱརསྶ ¶ མུཁཝཊྚིཡཾ, ‘‘པརིསྶཱཝནཙོལ༹བནྡྷནཊྛཱནེ’’ཏི ཀེཙི.

དེཌྜུབྷསཱིསནྟི ཨུདཀསཔྤསཱིསཾ. ཨཙྪཱིནཱིཏི ཀུཉྫརཙྪིསཎྛཱནཱནི. ཨེཀམེཝ ཝཊྚཏཱིཏི ཨེཏྠ ཨེཀརཛྫུཀཾ དིགུཎཾ ཏིགུཎཾ ཀཏྭཱཔི བནྡྷིཏུཾ ན ཝཊྚཏི, ཨེཀམེཝ པན སཏཝཱརམྤི སརཱིརཾ པརིཀྑིཔིཏྭཱ བནྡྷིཏུཾ ཝཊྚཏི, བཧུརཛྫུཀེ ཨེཀཏོ ཀཏྭཱ ཨེཀེན ནིརནྟརཾ ཝེཋེཏྭཱ ཀཏཾ ‘‘བཧུརཛྫུཀ’’ནྟི ན ཝཏྟབྦཾ ‘‘ཝཊྚཏཱི’’ཏི ཝུཏྟཏྟཱ, ཏཾ མུརཛསངྑཾ ན གཙྪཏཱིཏི ཝེདིཏབྦཾ. མུརཛཉྷི ནཱནཱཝཎྞེཧི སུཏྟེཧི མུརཛཝཊྚིསཎྛཱནཾ ཝེཋེཏྭཱ ཀཏཾ, ཨིདཾ པན མུརཛཾ མདྡཝཱིཎསངྑཱཏཾ པཱམངྒསཎྛཱནཉྩ དསཱསུ ཝཊྚཏི ‘‘ཀཱཡབནྡྷནསྶ དསཱ ཛཱིརནྟི; ཨནུཛཱནཱམི, བྷིཀྑཝེ, མུརཛཾ མདྡཝཱིཎ’’ནྟི (ཙཱུལ༹ཝ. ༢༧༨) ཝུཏྟཏྟཱ.

ཝིདྷེཏི དསཱཔརིཡོསཱནེ ཐིརབྷཱཝཱཡ དནྟཝིསཱཎསུཏྟཱདཱིཧི ཀཏྟབྦེ ཝིདྷེ. ཨཊྛ མངྒལཱནི ནཱམ སངྑོ ཙཀྐཾ པུཎྞཀུམྦྷོ གཡཱ སིརཱིཝཙྪོ ཨངྐུསོ དྷཛཾ སོཝཏྟིཀནྟི ཝདནྟི. མཙྪཡུགལ༹ཚཏྟནནྡིཡཱཝཊྚཱདིཝསེནཔི ཝདནྟི. པརིཙྪེདལེཁཱམཏྟནྟི དནྟཱདཱིཧི ཀཏཝིདྷསྶ ཨུབྷོསུ ཀོཊཱིསུ ཀཏཔརིཙྪེདརཱཛིམཏྟཾ.

‘‘ཨུཛུཀམེཝཱ’’ཏི ཝུཏྟཏྟཱ ཙཏུརསྶཱདིསཎྛཱནཱཔི ཨཉྫནཱི ཝངྐགཏིཀཱ ན ཝཊྚཏི. སིཔཱཊིཀཱཡཱཏི ¶ ཝཱསིཨཱདིབྷཎྜནིཀྑིཔནཔསིབྦཀེ. ཨཱརཀཎྚཀཾ ནཱམ པོཏྠཀཱདིཨཨསངྑཱརཎཏྠཾ ཀཏདཱིགྷམུཁསཏྠཀནྟི ཝདནྟི. ‘‘བྷམཀཱརཱནཾ དཱརུཨཱདིལིཁནསཏྠཀ’’ནྟི ཀེཙི. ཝཊྚམཎིཀནྟི ཝཊྚཾ ཀཏྭཱ ཨུཊྛཔེཏབྦཾ པུཔྥུལ༹ཀཾ. ཨཉྙནྟི ཨིམིནཱ པིལ༹ཀཱདིཾ སངྒཎྷཱཏི. པིཔྥལིཀེཏི ཡཾ ཀིཉྩི ཚེདནཀེ ཁུདྡཀསཏྠེ. ཝལིཏཀནྟི ནཁཙྪེདནཀཱལེ དལ༹ྷགྒཧཎཏྠཾ ཝལཱིཧི ཡུཏྟམེཝ ཀརོནྟི. ཏསྨཱ ཏཾ ཝཊྚཏཱིཏི ཨིམིནཱ ཡཾ ཨཉྙམྤི ཝིཀཱརཾ དལ༹ྷཱིཀམྨཱདིཨཏྠཱཡ ཀརོནྟི, ན ཝཎྞམཊྛཏྠཱཡ, ཏཾ ཝཊྚཏཱིཏི དཱིཔིཏཾ, ཏེན ཙ ཀཏྟརདཎྜཀོཊིཡཾ ཨཉྙམཉྙམྤི གྷཊྚནེན སདྡནིཙྪརཎཏྠཱཡ ཀཏཾ ཨཡོཝལཡཱདིཀཾ སཾཡུཏྟམྤི ཀཔྤིཡཏོ ཨུཔཔནྣཾ ཧོཏི. མཎྜལནྟི ཨུཏྟརཱརཎིཡཱ པཝེསནཏྠཾ ཨཱཝཱཊམཎྜལཾ ཧོཏི. ཨུཛུཀམེཝ བནྡྷིཏུནྟི སམྦནྡྷོ, ཨུབྷོསུ ཝཱ པསྶེསུ ཨེཀཔསྶེ ཝཱཏི ཝཙནསེསོ. ཝཱསིདཎྜསྶ ཨུབྷོསུ པསྶེསུ དཎྜཀོཊཱིནཾ ཨཙལནཏྠཾ བནྡྷིཏུནྟི ཨཏྠོ.

ཨཱམཎྜསཱརཀེཏི ¶ ཨཱམལཀཕལཱནི པིསིཏྭཱ ཏེན ཀཀྐེན ཀཏཏེལབྷཱཛནེ. ཏཏྠ ཀིར པཀྑིཏྟཾ ཏེལཾ སཱིཏལཾ ཧོཏི. བྷཱུམཏྠརཎེཏི ཀཊསཱརཱདིམཡེ པརིཀམྨཀཏཱཡ བྷཱུམིཡཱ ཨཏྠརིཏབྦཨཏྠརཎེ. པཱནཱིཡགྷཊེཏི སབྦཾ བྷཱཛནཝིཀཏིཾ སངྒཎྷཱཏི. སབྦཾ…པེ… ཝཊྚཏཱིཏི ཡཐཱཝུཏྟེསུ མཉྩཱདཱིསུ ཨིཏྠིཔུརིསརཱུཔམྤི ཝཊྚཏི ཏེལབྷཱཛནེསུཡེཝ ཨིཏྠིཔུརིསརཱུཔཱནཾ པཊིཀྑིཏྟཏྟཱ, ཏེལབྷཱཛནེན སཧ ཨགཎེཏྭཱ ཝིསུཾ མཉྩཱདཱིནཾ གཧིཏཏྟཱ ཙཱཏི ཝདནྟི, ཀིཉྩཱཔི ཝདནྟི, ཨེཏེསཾ པན མཉྩཱདཱིནཾ ཧཏྠེན ཨཱམསིཏབྦབྷཎྜཏྟཱ ཨིཏྠིརཱུཔམེཝེཏྠ ན ཝཊྚཏཱིཏི གཧེཏབྦཾ. ཨཉྙེསནྟི སཱིམསཱམིཀཱནཾ. རཱཛཝལླབྷེཧཱིཏི ལཛྫཱིཔེསལཱདཱིནཾ ཨུཔོསཐཱདིཨནྟརཱཡཀརཱ ཨལཛྫིནོ བྷིནྣལདྡྷིཀཱ ཙ བྷིཀྑཱུ ཨདྷིཔྤེཏཱ ཏེཧི སཧ ཨུཔོསཐཱདིཀརཎཱཡོགཱ, ཏེནེཝ ‘‘སཱིམཱཡཱ’’ཏི ཝུཏྟཾ. ཏེསཾ ལཛྫཱིཔརིསཱཏི ཏེསཾ སཱིམཱསཱམིཀཱནཾ ཨནུབལཾ དཱཏུཾ སམཏྠཱ ལཛྫཱིཔརིསཱ. བྷིཀྑཱུཧི ཀཏནྟི ཡཾ ཨལཛྫཱིནཾ སེནཱསནབྷེདནཱདིཀཾ ལཛྫཱིབྷིཀྑཱུཧི ཀཏཾ, སབྦཉྩེཏཾ སུཀཏམེཝ ཨལཛྫཱིནིགྒཧཏྠཱཡ པཝཏྟིཏབྦཏོ.

༨༨. ཨཝཛ྄ཛྷཱཡནྟཱིཏི ནཱིཙཏོ ཙིནྟེནྟི. ཨུཛ྄ཛྷཱཡནཏྠོཏི བྷིཀྑུནོ ཐེཡྻཀམྨནིནྡནཏྠོ ‘‘ཀཐཉྷི ནཱམ ཨདིནྣཾ ཨཱདིཡིསྶཏཱི’’ཏི, ན པན དཱརུ-སདྡཝིསེསནཏྠོ ཏསྶ བཧུཝཙནཏྟཱ. ཝཙནབྷེདེཏི ཨེཀཝཙནབཧུཝཙནཱནཾ བྷེདེ. སབྦཱཝནྟནྟི བྷིཀྑུབྷིཀྑུནཱིཨཱདིསབྦཱཝཡཝཝནྟཾ. བིམྦིསཱརོཏི ཏསྶ ནཱམནྟི ཨེཏྠ བིམྦཱིཏི སུཝཎྞཾ. ཏསྨཱ སཱརསུཝཎྞསདིསཝཎྞཏཱཡ ‘‘བིམྦིསཱརོ’’ཏི ཝུཙྩཏཱིཏི ཝེདིཏབྦཾ. པོརཱཎསཏྠཱནུརཱུཔཾ ཨུཔྤཱདིཏོ ཝཱིསཏིམཱསཔྤམཱཎཨུཏྟམསུཝཎྞགྒྷནཀོ ལཀྑཎསམྤནྣོ ནཱིལཀཧཱཔཎོཏི ཝེདིཏབྦོ. རུདྲདཱམེན ནཱམ ཀེནཙི ཨུཔྤཱདིཏོ རུདྲདཱམཀོ. སོ ཀིར ནཱིལཀཧཱཔཎསྶ ཏིབྷཱགཾ ཨགྒྷཏི. ཡསྨིཾ པན དེསེ ནཱིལཀཧཱཔཎཱ ¶ ན སནྟི, ཏཏྠཱཔི ཀཱལ༹ཀཝིརཧིཏསྶ ནིདྡྷནྟསུཝཎྞསྶ པཉྩམཱསགྒྷནཀེན བྷཎྜེན པཱདཔརིཙྪེདོ ཀཱཏབྦོ. ཏེནཱཏི ནཱིལཀཧཱཔཎསྶ ཙཏུཏྠབྷཱགབྷཱུཏེན. པཱརཱཛིཀཝཏྠུམྷི ཝཱཏིཨཱདི པཱརཱཛིཀཱནཾ སབྦབུདྡྷེཧི པཉྙཏྟབྷཱཝེན ཝུཏྟཾ, སངྒྷཱདིསེསཱདཱིསུ པན ཨིཏརཱཔཏྟཱིསུཔི ཏབྦཏྠཱུསུ ཙ ནཱནཏྟཾ ནཏྠེཝ, ཀེཝལཾ ཀེཙི སབྦཱཀཱརེན པཉྙཔེནྟི, ཀེཙི ཨེཀདེསེནཱཏི ཨེཏྟཀམེཝ ཝིསེསོ. ན ཧི ཀདཱཙིཔི སམྨཱསམྦུདྡྷཱ ཡཐཱཔརཱདྷཾ ཨཏིཀྐམྨ ཨཱུནམདྷིཀཾ ཝཱ སིཀྑཱཔདཾ པཉྙཔེནྟི.

པདབྷཱཛནཱིཡཝཎྞནཱ

༩༢. པུནཔི ¶ ‘‘ཨཱགནྟུཀཱམཱ’’ཏི ཝུཏྟཏྟཱ ཙ སབྦཐཱ མནུསྶེཧི ཨནིཝུཏྠཔུབྦེ ཨབྷིནཝམཱཔིཏེ, ‘‘པུན ན པཝིསིསྶཱམཱ’’ཏི ནིརཱལཡེཧི པརིཙྩཏྟེ ཙ གཱམེ གཱམཝོཧཱརཱབྷཱཝཱ གཱམཔྤཝེསནཱཔུཙྪནཱདིཀིཙྩཾ ནཏྠཱིཏི ཝེདིཏབྦཾ. ཨརཉྙཔརིཙྪེདདསྶནཏྠནྟི གཱམགཱམཱུཔཙཱརེསུ དསྶིཏེསུ ཏདཉྙཾ ཨརཉྙནྟི ཨརཉྙཔརིཙྪེདོ སཀྐཱ ཉཱཏུནྟི ཝུཏྟཾ. མཱཏིཀཱཡཾ པན གཱམགྒཧཎེནེཝ གཱམཱུཔཙཱརོཔི གཧིཏོཏི དཊྛབྦོ. ཨིནྡཁཱིལེཏི ཨུམྨཱརེ. ཨརཉྙསངྑེཔཾ གཙྪཏི ཏཐཱ ཨབྷིདྷམྨེ ཝུཏྟཏྟཱ. ཨསཏིཔི ཨིནྡཁཱིལེ ཨིནྡཁཱིལཊྛཱནིཡཏྟཱ ‘‘ཝེམཛ྄ཛྷམེཝ ཨིནྡཁཱིལོཏི ཝུཙྩཏཱི’’ཏི ཝུཏྟཾ. ཡཏྠ པན དྭཱརབཱཧཱཔི ནཏྠི, ཏཏྠ པཱཀཱརཝེམཛ྄ཛྷམེཝ ཨིནྡཁཱིལོཏི གཧེཏབྦཾ. ལུཋིཏྭཱཏི པཝཊྚིཏྭཱ.

མཛ྄ཛྷིམསྶ པུརིསསྶ སུཔྤཔཱཏོ ཝཱཏིཨཱདི མཱཏུགཱམསྶ ཀཱཀུཊྛཱཔནཝསེན གཧེཏབྦཾ, ན བལདསྶནཝསེན ‘‘མཱཏུགཱམོ བྷཱཛནདྷོཝནཨུདཀཾ ཚཌྜེཏཱི’’ཏི (པཱརཱ. ཨཊྛ. ༡.༩༢) ཨུཔརི ཝུཙྩམཱནཏྟཱ, ཏེནེཝ ‘‘ལེཌྜུཔཱཏོ’’ཏི ཨཝཏྭཱ སུཔྤཔཱཏོཏིཨཱདི ཝུཏྟཾ. ཀུརུནྡཊྛཀཐཱཡཾ མཧཱཔཙྩརིཡཉྩ གྷརཱུཔཙཱརོཝ གཱམོཏི ཨདྷིཔྤཱཡེན ‘‘གྷརཱུཔཙཱརེ ཋིཏསྶ ལེཌྜུཔཱཏོ གཱམཱུཔཙཱརོ’’ཏི ཝུཏྟཾ. ཀཏཔརིཀྑེཔོཏི ཨིམིནཱ པརིཀྑེཔཏོ བཧི ཨུཔཙཱརོ ན གཧེཏབྦོཏི དསྶེཏི. སུཔྤམུསལཔཱཏོཔི ཨཔརིཀྑིཏྟགེཧསྶེཝ, སོ ཙ ཡཏོ པཧོཏི, ཏཏྠེཝ གཧེཏབྦོ, ཨཔྤཧོནཊྛཱནེ པན ཝིཛྫམཱནཊྛཱནམེཝ གཧེཏབྦཾ. ཡསྶ པན གྷརསྶ སམནྟཏོ པཱཀཱརཱདཱིཧི པརིཀྑེཔོ ཀཏོ ཧོཏི, ཏཏྠ སོཝ པརིཀྑེཔོ གྷརཱུཔཙཱརོཏི གཧེཏབྦཾ.

པུབྦེ ཝུཏྟནཡེནཱཏི པརིཀྑིཏྟགཱམེ ཝུཏྟནཡེན. སངྐརཱིཡཏཱིཏི མིསྶཱིཡཏི. ཝིཀཱལེ གཱམཔྤཝེསནེ ‘‘པརིཀྑིཏྟསྶ གཱམསྶ པརིཀྑེཔཾ ཨཏིཀྐམནྟསྶ ཨཱཔཏྟི པཱཙིཏྟིཡསྶ. ཨཔརིཀྑིཏྟསྶ གཱམསྶ ཨུཔཙཱརཾ ཨོཀྐམནྟསྶ ཨཱཔཏྟི པཱཙིཏྟིཡསྶཱ’’ཏི (པཱཙི. ༥༡༣) ཝུཏྟཏྟཱ ¶ གཱམགཱམཱུཔཙཱརཱནཾ ཨསངྐརཏཱ ཨིཙྪིཏབྦཱཏི ཨཱཧ ཨསངྐརཏོ ཙཱཏིཨཱདི. ཀེཙི པནེཏྠ པཱལི༹ཡཾ ‘‘ཨཔརིཀྑིཏྟསྶ གཱམསྶ ཨུཔཙཱརཾ ཨོཀྐམནྟསྶཱཏི ཨིདཾ པརིཀྑེཔཱརཧཊྛཱནཾ སནྡྷཱཡ ཝུཏྟཾ, ན ཏཏོ པརཾ ཨེཀལེཌྜུཔཱཏཔརིཙྪིནྣཾ ཨུཔཙཱརཾ ¶ . ཏསྨཱ པརིཀྑེཔཱརཧཊྛཱནསངྑཱཏཾ གཱམཾ ཨོཀྐམནྟསྶེཝ ཨཱཔཏྟི, ན ཨུཔཙཱར’’ནྟི ཝདནྟི, ཏཾ ན གཧེཏབྦཾ ‘‘གྷརཱུཔཙཱརེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏབྦྷནྟརཾ གཱམོ ནཱམ. ཏཏོ ཨཉྙསྶ ལེཌྜུཔཱཏསྶ ཨབྦྷནྟརཾ གཱམཱུཔཙཱརོ ནཱམཱ’’ཏི (པཱརཱ. ཨཊྛ. ༡.༩༢) ཨིདྷེཝ ཨཊྛཀཐཱཡཾ ཝུཏྟཏྟཱ. ཝིཀཱལེ གཱམཔྤཝེསནསིཀྑཱཔདཊྛཀཐཱཡཉྷི ཨཔརིཀྑིཏྟསྶ གཱམསྶ ཨུཔཙཱརོ ཨདིནྣཱདཱནེ ཝུཏྟནཡེནེཝ ཝེདིཏབྦོཏི (པཱཙི. ཨཊྛ. ༥༡༢) ཨཡམེཝ ནཡོ ཨཏིདིསིཏོ. ཏེནེཝ མཱཏིཀཱཊྛཀཐཱཡམྤི ‘‘ཡྭཱཡཾ ཨཔརིཀྑིཏྟསྶ གཱམསྶ ཨུཔཙཱརོ དསྶིཏོ, ཏསྶ ཝསེན ཝིཀཱལེ གཱམཔྤཝེསནཱདཱིསུ ཨཱཔཏྟི པརིཙྪིནྡིཏབྦཱ’’ཏི (ཀངྑཱ. ཨཊྛ. དུཏིཡཔཱརཱཛིཀཝཎྞནཱ) ཝུཏྟཾ, ཏསྨཱ པརིཀྑིཏྟསྶ གཱམསྶ པརིཀྑེཔཾ ཨཏིཀྐམནྟསྶ, ཨཔརིཀྑིཏྟསྶ གཱམསྶ གྷརཱུཔཙཱརཏོ པཊྛཱཡ དུཏིཡལེཌྜུཔཱཏསངྑཱཏཾ གཱམཱུཔཙཱརཾ ཨོཀྐམནྟསྶ ཝིཀཱལེ གཱམཔྤཝེསནཱཔཏྟི ཧོཏི, མཱཏིཀཱཡཉྩ ཝིཀཱལེ གཱམཾ པཝིསེཡྻཱཏི གཱམགྒཧཎེནེཝ གཱམཱུཔཙཱརོཔི གཧིཏོཏི ཝེདིཏབྦཾ. ཝིཀཱལེ གཱམཔྤཝེསནཱདཱིསཱུཏི ཨཱདི-སདྡེན གྷརགྷརཱུཔཙཱརཱདཱིསུ ཋིཏཱནཾ ཨུཔྤནྣལཱབྷབྷཱཛནཱདིཾ སངྒཎྷཱཏི.

ནིཀྑམིཏྭཱ བཧི ཨིནྡཁཱིལཱཏི ཨིནྡཁཱིལཏོ བཧི ནིཀྑམིཏྭཱ ཋིཏཾ ཡཾ ཋཱནཾ སབྦམེཏཾ ཨརཉྙནྟི ཡོཛནཱ. ཨཱཙརིཡདྷནུ ནཱམ པཀཏིཧཏྠེན ནཝཝིདཏྠིཔམཱཎཾ, ཛིཡཱཡ པན ཨཱརོཔིཏཱཡ སཏྟཊྛཝིདཏྠིམཏྟནྟི ཝདནྟི.

ཀཔྤིཡནྟི ཨནུརཱུཔཝསེན ཝུཏྟཾ ཨཀཔྤིཡསྶཱཔི ཨཔྤཊིགྒཧིཏསྶ པརིབྷོགེ པཱཙིཏྟིཡཏྟཱ. པརིཙྩཱགཱདིམྷི ཨཀཏེ ‘‘ཨིདཾ མཡ྄ཧཾ སནྟཀ’’ནྟི ཝཏྠུསཱམིནཱ ཨཝིདིཏམྤི པརིགྒཧིཏམེཝ བཱལུམྨཏྟཱདཱིནཾ སནྟཀཾ ཝིཡ, ཏཱདིསཾ ཨཝཧརནྟོཔི ཉཱཏཀཱདཱིཧི པཙྪཱ ཉཏྭཱ ཝཏྠུསཱམིནཱ ཙ ཨནུབནྡྷིཏབྦཏོ པཱརཱཛིཀོཝ ཧོཏི. ཡསྶ ཝསེན པུརིསོ ཐེནོ ཧོཏི, ཏཾ ཐེཡྻནྟི ཨཱཧ ‘‘ཨཝཧརཎཙིཏྟསྶེཏཾ ཨདྷིཝཙན’’ནྟི. པཔཉྩསངྑཱཏི ཏཎྷཱམཱནདིཊྛིསངྑཱཏཱ པཔཉྩཀོཊྛཱསཱ. ཨེཀོ ཙིཏྟཀོཊྛཱསོཏི ཋཱནཱཙཱཝནཔཡོགསམུཊྛཱཔཀོ ཨེཀོ ཙིཏྟཀོཊྛཱསོཏི ཨཏྠོ.

ཨབྷིཡོགཝསེནཱཏི ཨཊྚཀརཎཝསེན. སཝིཉྙཱཎཀེནེཝཱཏི ཨིདཾ སཝིཉྙཱཎཀཱནཉྙེཝ ཨཱཝེཎིཀཝིནིཙྪཡཾ སནྡྷཱཡ ཝུཏྟཾ. པཱཎོ ཨཔདནྟིཨཱདཱིསུ ཧི ‘‘པདསཱ ནེསྶཱམཱི’’ཏི པཋམཾ པཱདཾ ¶ སངྐཱམེཏི, ཨཱཔཏྟི ཐུལླཙྩཡསྶཱཏིཨཱདིནཱ པཱལི༹ཡཾ (པཱརཱ. ༡༡༡), བྷིཀྑུ དཱསཾ དིསྭཱ སུཁདུཀྑཾ པུཙྪིཏྭཱ ¶ ཝཱ ཨཔུཙྪིཏྭཱ ཝཱ ‘‘གཙྪ, པལཱཡིཏྭཱ སུཁཾ ཛཱིཝཱ’’ཏི ཝདཏི, སོ ཙེ པལཱཡཏི, དུཏིཡཔདཝཱརེ པཱརཱཛིཀནྟིཨཱདིནཱ (པཱརཱ. ཨཊྛ. ༡.༡༡༤) ཨཊྛཀཐཱཡཉྩ ཡོ སཝིཉྙཱཎཀཱནཉྙེཝ ཨཱཝེཎིཀོ ཝིནིཙྪཡོ ཝུཏྟོ, སོ ཨཱརཱམཱདིཨཝིཉྙཱཎཀེསུ ན ལབྦྷཏཱིཏི ཏཱདིསཾ སནྡྷཱཡ ‘‘སཝིཉྙཱཎཀེནེཝཱ’’ཏི ཝུཏྟཾ. ཡོ པན ཝིནིཙྪཡོ ཨཱརཱམཱདིཨཝིཉྙཱཎཀེསུ ལབྦྷཏི, སོ ཡསྨཱ སཝིཉྙཱཎཀེསུ ཨལབྦྷནཀོ ནཱམ ནཏྠི, ཏསྨཱ ཝུཏྟཾ ‘‘ནཱནཱབྷཎྜཝསེན སཝིཉྙཱཎཀཱཝིཉྙཱཎཀམིསྶཀེནཱ’’ཏི. སཝིཉྙཱཎཀེན ཙ ཨཝིཉྙཱཎཀེན ཙཱཏི ཨཏྠོ. ཡསྨཱ ཙེཏྠ ཨཝིཉྙཱཎཀེནེཝ ཨཱདིཡནཱདཱིནི ཚཔི པདཱནི ན སཀྐཱ ཡོཛེཏུཾ ཨིརིཡཱཔཐཝིཀོཔནསྶ སཝིཉྙཱཎཀཝསེནེཝ ཡོཛེཏབྦཏོ, ཏསྨཱ ‘‘ཨཝིཉྙཱཎཀེནེཝཱ’’ཏི ཏཏིཡཾ པཀཱརཾ ན ཝུཏྟནྟི དཊྛབྦཾ.

ཨཱརཱམནྟི ཨིདཾ ཨུཔལཀྑཎམཏྟཾ དཱསཱདིསཝིཉྙཱཎཀསྶཱཔི ཨིདྷ སངྒཧེཏབྦཏོ, ནཱནཱབྷཎྜཝསེན ཧེཏྠ ཡོཛནཱ དསྶིཡཏི. པརིཀཔྤིཏཊྛཱནནྟི པརིཀཔྤིཏོཀཱསཾ. སུངྐགྷཱཏནྟི ཨེཏྠ མགྒཾ གཙྪནྟེཧི སཏྠིཀེཧི ཨཏྟནཱ ནཱིཡམཱནབྷཎྜཏོ རཉྙོ དཱཏབྦབྷཱགོ སུངྐོ ནཱམ, སོ ཨེཏྠ ཧཉྙཏི ཨདཏྭཱ གཙྪནྟེཧི ཨཝཧརཱིཡཏི, ཏཾ ཝཱ ཧནྟི ཨེཏྠ རཱཛཔུརིསཱ ཨདདནྟཱནཾ སནྟཀཾ བལཀྐཱརེནཱཏི སུངྐགྷཱཏོ, ‘‘ཨེཏྠ པཝིཊྛེཧི སུངྐོ དཱཏབྦོ’’ཏི རུཀྑཔབྦཏཱདིསཉྙཱཎེན ནིཡམིཏཔྤདེསསྶེཏཾ ཨདྷིཝཙནཾ.

པཉྩཝཱིསཏིཨཝཧཱརཀཐཱཝཎྞནཱ

ཀཏྠཙཱིཏི ཨེཀིསྶཱ ཨཊྛཀཐཱཡཾ. ཨེཀཾ པཉྩཀཾ དསྶིཏནྟི ‘‘པརཔརིགྒཧིཏཉྩ ཧོཏི, པརཔརིགྒཧིཏསཉྙཱི ཙ, གརུཀོ ཙ ཧོཏི པརིཀྑཱརོ པཉྩམཱསཀོ ཝཱ ཨཏིརེཀཔཉྩམཱསཀོ ཝཱ, ཐེཡྻཙིཏྟཉྩ པཙྩུཔཊྛིཏཾ ཧོཏི, ཋཱནཱ ཙཱཝེཏཱི’’ཏི (པཱརཱ. ༡༢༢) ཝུཏྟཔཉྩཨཝཧཱརངྒཱནི ཨེཀཾ པཉྩཀནྟི དསྶིཏཾ. དྭེ པཉྩཀཱནི དསྶིཏཱནཱིཏི ‘‘ཚཧི ཨཱཀཱརེཧི ཨདིནྣཾ ཨཱདིཡནྟསྶ ཨཱཔཏྟི པཱརཱཛིཀསྶ. ན ཙ སཀསཉྙཱི, ན ཙ ཝིསྶཱསགྒཱཧཱི, ན ཙ ཏཱཝཀཱལིཀཾ, གརུཀོ ཙ ཧོཏི པརིཀྑཱརོ པཉྩམཱསཀོ ཝཱ ཨཏིརེཀཔཉྩམཱསཀོ ཝཱ, ཐེཡྻཙིཏྟཉྩ པཙྩུཔཊྛིཏཾ ཧོཏི, ཋཱནཱ ཙཱཝེཏི, ཨཱཔཏྟི པཱརཱཛིཀསྶཱ’’ཏི (པཱརཱ. ༡༢༥) ཨེཝཾ ཝུཏྟེསུ ཚསུ པདེསུ ཨེཀཾ ཨཔནེཏྭཱ སེསཱནི ¶ པཉྩ པདཱནི ཨེཀཾ པཉྩཀཾ ཀཏྭཱ ཧེཊྛཱ ཝུཏྟཔཉྩཀཉྩ གཧེཏྭཱ དྭེ པཉྩཀཱནི དསྶིཏཱནི. ཨེཏྠ པནཱཏི པཉྩཧཱཀཱརེཧཱིཏིཨཱདཱིསུ. སབྦེཧིཔི པདེཧཱིཏི པརཔརིགྒཧིཏཉྩ ཧོཏཱིཏིཨཱདཱིཧི སབྦེཧི པཉྩཧི པདེཧི.

པཉྩནྣཾ ¶ ཨཝཧཱརཱནཾ སམཱུཧོ པཉྩཀཾ. སཀོ ཧཏྠོ སཧཏྠོ, ཏེན ནིབྦཏྟོ, ཏསྶ ཝཱ སམྦནྡྷཱིཏི སཱཧཏྠིཀོ, ཨཝཧཱརོ. སཱཧཏྠིཀཱདི པཉྩཀཾ སཱཧཏྠིཀཔཉྩཀནྟིཨཱདིཔདཝསེན ནཱམལཱབྷོ དཊྛབྦོ. ཨེཝཾ སེསེསུཔི. ཏཏིཡཔཉྩམེསུ པཉྩཀེསཱུཏི སཱཧཏྠིཀཔཉྩཀཐེཡྻཱཝཧཱརཔཉྩཀེསུ. ལབྦྷམཱནཔདཝསེནཱཏི སཱཧཏྠིཀཔཉྩཀེ ལབྦྷམཱནསྶ ནིསྶགྒིཡཱཝཧཱརཔདསྶ ཝསེན, ཐེཡྻཱཝཧཱརཔཉྩཀེ ལབྦྷམཱནསྶ པརིཀཔྤཱཝཧཱརཔདསྶ ཙ ཝསེན ཡོཛེཏབྦནྟི ཨཏྠོ.

ནིསྶགྒིཡོ ནཱམ…པེ… པཱརཱཛིཀསྶཱཏི ཨིམིནཱ བཧིསུངྐགྷཱཏཔཱཏནཾ ནིསྶགྒིཡཔཡོགོཏི དསྶེཏི. ‘‘ཧཏྠེ བྷཱརཾ ཐེཡྻཙིཏྟོ བྷཱུམིཡཾ ནིཀྑིཔཏི, ཨཱཔཏྟི པཱརཱཛིཀསྶཱ’’ཏི (པཱརཱ. ༡༠༡) ཝུཏྟཏྟཱ པན སུདྡྷཙིཏྟེན གཧིཏཔརབྷཎྜསྶ ཐེཡྻཙིཏྟེན གུམྦཱདིཔཊིཙྪནྣཊྛཱནེ ཁིཔནམྤི ཨིམསྨིཾ ནིསྶགྒིཡཔཡོགེ སངྒཡ྄ཧཏཱིཏི དཊྛབྦཾ. ཀིརིཡཱསིདྡྷིཏོ པུརེཏརམེཝ པཱརཱཛིཀཱཔཏྟིསངྑཱཏཾ ཨཏྠཾ སཱདྷེཏཱིཏི ཨཏྠསཱདྷཀོ. ཨཐ ཝཱ ཨཏྟནོ ཝཏྟམཱནཀྑཎེ ཨཝིཛྫམཱནམྤི ཀིརིཡཱསིདྡྷིསངྑཱཏཾ ཨཏྠཾ ཨཝསྶཾ ཨཱཔཏྟིཾ སཱདྷེཏཱིཏིཔི ཨཏྠསཱདྷཀོ. ཨསུཀཾ ནཱམ བྷཎྜཾ ཡདཱ སཀྐོསཱིཏི ཨིདཾ ནིདསྶནམཏྟཾ པརསྶ ཏེལཀུམྦྷིཡཱ ཨུཔཱཧནཱདཱིནཾ ནིཀྑེཔཔཡོགསྶཱཔི ཨཏྠསཱདྷཀཏྟཱ. ཏཐཱ ཧི ཝུཏྟཾ མཱཏིཀཱཊྛཀཐཱཡཾ –

‘‘ཨཏྠསཱདྷཀོ ནཱམ ‘ཨསུཀསྶ བྷཎྜཾ ཡདཱ སཀྐོཏི, ཏདཱ ཏཾ ཨཝཧརཱ’ཏི ཨཉྙཾ ཨཱཎཱཔེཏི. ཏཏྠ སཙེ པརོ ཨནནྟརཱཡིཀོ ཧུཏྭཱ ཏཾ ཨཝཧརཏི, ཨཱཎཱཔཀསྶ ཨཱཎཏྟིཀྑཎེཡེཝ པཱརཱཛིཀཾ. པརསྶ ཝཱ པན ཏེལཀུམྦྷིཡཱ པཱདགྒྷནཀཏེལཾ ཨཝསྶཾ པིཝནཀཱནི ཨུཔཱཧནཱདཱིནི པཀྑིཔཏི, ཧཏྠཏོ མུཏྟམཏྟེཡེཝ པཱརཱཛིཀ’’ནྟི (ཀངྑཱ. ཨཊྛ. དུཏིཡཔཱརཱཛིཀཝཎྞནཱ).

ཨིམསྶ ¶ ཨཏྠསཱདྷཀསྶ ཨཱཎཏྟིཡཱ ཙ ཀོ ཝིསེསོཏི? ཏངྑཎཉྙེཝ གཧཎེ ནིཡུཉྫནཾ ཨཱཎཏྟིཀཔཡོགོ, ཀཱལནྟརེན གཧཎཏྠཾ ནིཡོགོ ཨཏྠསཱདྷཀོཏི ཨཡཾ ནེསཾ ཝིསེསོ. ཏེནེཝཱཧ ‘‘ཨསུཀཾ ནཱམ བྷཎྜཾ ཡདཱ སཀྐོསཱི’’ཏིཨཱདི. དྷུརནིཀྑེཔོ པན ཨུཔནིཀྑིཏྟབྷཎྜཝསེན ཝེདིཏབྦོཏི ཨིདཾ ནིདསྶནམཏྟཾ, ཨཱརཱམཱབྷིཡུཉྫནཱདཱིསུཔི ཏཱཝཀཱལིཀབྷཎྜདེཡྻཱནཾ ཨདཱནེཔི ཨེསེཝ ནཡོ. བྷཎྜགྒཧཎཔྤཡོགཏོ ཨཱཎཏྟིཡཱ པུབྦཏྟཱ ཨཱཧ ‘‘ཨཱཎཏྟིཝསེན པུབྦཔཡོགོ ཝེདིཏབྦོ’’ཏི. པཡོགེན སཧ ཝཏྟམཱནོ ཨཝཧཱརོ སཧཔཡོགོཏི ཨཱཧ ‘‘ཋཱནཱཙཱཝནཝསེནཱ’’ཏི, ཨིདཉྩ ནིདསྶནམཏྟཾ ཁཱིལསངྐམནཱདཱིསུཔི ཨསཏི ཋཱནཱཙཱཝནེ སཧཔཡོགཏྟཱ. ཝུཏྟཉྷི ¶ མཱཏིཀཱཊྛཀཐཱཡཾ ‘‘ཋཱནཱཙཱཝནཝསེན ཁཱིལཱདཱིནི སངྐཱམེཏྭཱ ཁེཏྟཱདིགྒཧཎཝསེན ཙ སཧཔཡོགོ ཝེདིཏབྦོ’’ཏི (ཀངྑཱ. ཨཊྛ. དུཏིཡཔཱརཱཛིཀཝཎྞནཱ).

ཏུལཡིཏྭཱཏི ཨུཔཔརིཀྑིཏྭཱ. སཱམཱིཙཱིཏི ཝཏྟཾ. སཀསཉྙཱཡ ཨདེནྟསྶ ཨཱཔཏྟི ནཏྠཱིཏི ཝདནྟི. སམྨདྡོཏི ནིཝིདྡྷཏཱསངྑོབྷོ. བྷཊྛེ ཛནཀཱཡེཏི ཨཔགཏེ ཛནསམཱུཧེ. ཨཏྟནོ སནྟཀཾ ཀཏྭཱ ཨེཏསྶེཝ བྷིཀྑུནོ དེཧཱིཏི ཨིདཾ ཨུབྷིནྣམྤི ཀུཀྐུཙྩཝིནོདནཏྠཾ ཝུཏྟཾ. ཨཝཧཱརཀསྶ ཧི ‘‘མཡཱ སཧཏྠེན ན དིནྣཾ, བྷཎྜདེཡྻཾ ཨེཏ’’ནྟི ཀུཀྐུཙྩཾ ཨུཔྤཛྫེཡྻ, ཨིཏརསྶ ཙ ‘‘མཡཱ པཋམཾ དྷུརནིཀྑེཔཾ ཀཏྭཱ པཙྪཱ ཨདིནྣཾ གཧིཏ’’ནྟི ཀུཀྐུཙྩཾ ཨུཔྤཛྫེཡྻཱཏི.

སམགྒྷནྟི ཨཔྤགྒྷཾ. དཱརུཨཏྠཾ ཕརཏཱིཏི དཱརཱུཧི ཀཏྟབྦཀིཙྩཾ སཱདྷེཏི. ཨེཀདིཝསཾ དནྟཀཊྛཙྪེདནཱདིནཱ ཡཱ ཨཡཾ ཨགྒྷཧཱནི ཝུཏྟཱ, སཱ སབྦཱ བྷཎྜསཱམིནཱ ཀིཎིཏྭཱ གཧིཏམེཝ སནྡྷཱཡ ཝུཏྟཱ. སབྦཾ པནེཏཾ ཨཊྛཀཐཱཙརིཡཔྤམཱཎེན ཝེདིཏབྦཾ. པཱསཱཎཉྩ སཀྑརཉྩ པཱསཱཎསཀྑརཾ.

ཨཀྑདསྶཱཏི ཨེཏྠ ཨཀྑ-སདྡེན ཀིར ཝིནིཙྪཡསཱལཱ ཝུཙྩཏི, ཏཏྠ ནིསཱིདིཏྭཱ ཝཛྫཱཝཛྫཾ ནིརཱུཔཡནྟཱིཏི ‘‘ཨཀྑདསྶཱ’’ཏི ཝུཙྩནྟི དྷམྨཝིནིཙྪནཀཱ. ཧནནཾ ནཱམ ཧཏྠཔཱདཱདཱིཧི པོཐནཉྩེཝ ཧཏྠནཱསཱདིཙྪེདནཉྩ ཧོཏཱིཏི ཨཱཧ ‘‘ཧནེཡྻུནྟི པོཐེཡྻུཉྩེཝ ཚིནྡེཡྻུཉྩཱ’’ཏི.

པདབྷཱཛནཱིཡཉྩ ‘‘ཧཏྠེན ཝཱ པཱདེན ཝཱ ཀསཱཡ ཝཱ ཝེཏྟེན ཝཱ ཨཌྜྷདཎྜཀེན ཝཱ ཚཛྫཱཡ ཝཱ ཧནེཡྻུ’’ནྟི (པཱརཱ. ༩༢) ཝུཏྟཾ. ཏཏྠ ཨཌྜྷདཎྜཀེནཱཏི དྭིཧཏྠཔྤམཱཎེན ¶ རསྶམུགྒརེན, ཝེལུ༹པེསིཀཱཡ ཝཱ. ཚེཛྫཱཡ ཝཱཏི ཧཏྠཱདཱིནཾ ཚེདནེན. ཚིནྡནྟི ཨེཏཱཡ ཧཏྠཔཱདཱདཱིནཱིཏི ཚེཛྫཱ, སཏྠཾ, ཏེན སཏྠེནཱཏིཔི ཨཏྠོ. ནཱིཧརེཡྻུནྟི རཊྛཏོ ནཱིཧརེཡྻུཾ. ‘‘ཙོརོསི…པེ… ཐེནོསཱི’’ཏི ཨེཏྠ པརིབྷཱསེཡྻུནྟི པདཾ ཨཛ྄ཛྷཱཧརིཏྭཱ ཨཏྠོ ཝེདིཏབྦོཏི ཨཱཧ ‘‘ཙོརོསི…པེ… པརིབྷཱསེཡྻུ’’ནྟི. ཡཾ ཏཾ བྷཎྜཾ དསྶིཏནྟི སམྦནྡྷོ.

༩༣. ཡཏྠ ཡཏྠ ཋིཏནྟི བྷཱུམིཡཱདཱིསུ ཡཏྠ ཡཏྠ ཋིཏཾ. ཡཐཱ ཡཐཱ ཨཱདཱནཾ གཙྪཏཱིཏི ཡེན ཡེན ཨཱཀཱརེན གཧཎཾ ཨུཔགཙྪཏི.

བྷཱུམཊྛཀཐཱཝཎྞནཱ

༩༤. ཝཱཙཱཡ ¶ ཝཱཙཱཡཱཏི ཨེཀེཀཏྠདཱིཔིཀཱཡ ཝཱཙཱཡ ཝཱཙཱཡ. ཨུཔལདྡྷོཏི ཉཱཏོ. པཱལི༹ཡཾ སེསཨཊྛཀཐཱསུ ཙ ཀུདཱལཾ ཝཱ པིཊཀཾ ཝཱཏི ཨིདམེཝ དྭཡཾ ཝཏྭཱ ཝཱསིཕརསཱུནཾ ཨཝུཏྟཏྟཱ ཏེསམྤི སངྑེཔཊྛཀཐཱདཱིསུ ཨཱགཏབྷཱཝཾ དསྶེཏུཾ སངྑེཔཊྛཀཐཱཡནྟིཨཱདི ཝུཏྟཾ. ཐེཡྻཙིཏྟེན ཀཏཏྟཱ ‘‘དུཀྐཊེཧི སདྡྷིཾ པཱཙིཏྟིཡཱནཱི’’ཏི ཝུཏྟཾ.

ཨཊྛཝིདྷཾ ཧེཏནྟིཨཱདཱིསུ ཨེཏཾ དུཀྐཊཾ ནཱམ ཐེརེཧི དྷམྨསངྒཱཧཀེཧི ཨིམསྨིཾ ཋཱནེ སམོདྷཱནེཏྭཱ ཨཊྛཝིདྷནྟི དསྶིཏནྟི ཡོཛནཱ. སབྦེསམྤི དུཀྐཊཱནཾ ཨིམེསུཡེཝ ཨཊྛསུ སངྒཧེཏབྦབྷཱཝཏོ པན ཨིཏརེཧི སཏྟཧི དུཀྐཊེཧི ཝིནིམུཏྟཾ ཝིནཡདུཀྐཊེཡེཝ སངྒཧེཏབྦཾ. དསཝིདྷཾ རཏནནྟི ‘‘མུཏྟཱ མཎི ཝེལུ༹རིཡོ སངྑོ སིལཱ པཝཱལ༹ཾ རཛཏཾ ཛཱཏརཱུཔཾ ལོཧིཏཀོ མསཱརགལླ’’ནྟི ཨེཝམཱགཏཾ དསཝིདྷཾ རཏནཾ.

‘‘མུཏྟཱ མཎི ཝེལུ༹རིཡོ ཙ སངྑོ,

སིལཱ པཝཱལ༹ཾ རཛཏཉྩ ཧེམཾ;

ལོཧིཏཀཉྩ མསཱརགལླཾ,

དསེཏེ དྷཱིརོ རཏནཱནི ཛཉྙཱ’’ཏི. –

ཧི ཝུཏྟཾ. སཏྟཝིདྷཾ དྷཉྙནྟི སཱལི ཝཱིཧི ཡཝོ ཀངྒུ ཀུདྲཱུསཾ ཝརཀོ གོདྷུམོཏི ཨིམཾ སཏྟཝིདྷཾ དྷཉྙཾ. ཨཱཝུདྷབྷཎྜཱདིནྟི ཨཱདི-སདྡེན ཏུརིཡབྷཎྜཨིཏྠིརཱུཔཱདིཾ སངྒཎྷཱཏི. ཨནཱམསིཏབྦེ ཝཏྠུམྷི དུཀྐཊཾ ཨནཱམཱསདུཀྐཊཾ. དུརཱུཔཙིཎྞདུཀྐཊནྟི ‘‘ཨཀཏྟབྦ’’ནྟི ཝཱརིཏསྶ ཀཏཏྟཱ དུཊྛུ ¶ ཨུཔཙིཎྞཾ ཙརིཏནྟི དུརཱུཔཙིཎྞཾ, ཏསྨིཾ དུཀྐཊཾ དུརཱུཔཙིཎྞདུཀྐཊཾ. ཝིནཡེ པཉྙཏྟཾ ཨཝསེསཾ དུཀྐཊཾ ཝིནཡདུཀྐཊཾ. ཨེཀཱདས སམནུབྷཱསནཱ ནཱམ བྷིཀྑུཔཱཏིམོཀྑེ ཙཏྟཱརོ ཡཱཝཏཏིཡཀཱ སངྒྷཱདིསེསཱ ཨརིཊྛསིཀྑཱཔདནྟི པཉྩ, བྷིཀྑུནཱིཔཱཏིམོཀྑེ ཨེཀཾ ཡཱཝཏཏིཡཀཔཱརཱཛིཀཾ ཙཏྟཱརོ སངྒྷཱདིསེསཱ ཙཎྜཀཱལཱི༹སིཀྑཱཔདནྟི ཚ.

སཧཔཡོགཏོ པཊྛཱཡ ཙེཏྠ པུརིམཔུརིམཱ ཨཱཔཏྟིཡོ པཊིཔྤསྶམྦྷནྟཱིཏི ཨཱཧ ཨཐ དྷུརནིཀྑེཔཾ ཨཀཏྭཱཏིཨཱདི. ‘‘དྷུརནིཀྑེཔཾ ཨཀཏྭཱ’’ཏི ཝུཏྟཏྟཱ དྷུརནིཀྑེཔཾ ཀཏྭཱ པུན ཁཎནྟསྶ པུརིམཱཔཏྟིཡོ ན པཊིཔྤསྶམྦྷནྟཱིཏི ཝདནྟི. ‘‘ཚེདནཔཙྩཡཱ དུཀྐཊཾ དེསེཏྭཱ མུཙྩཏཱི’’ཏི ¶ ཝཏྭཱ པུབྦཔཡོགེ ཨཱཔཏྟཱིནཾ དེསེཏབྦཏཱཡ ཨཝུཏྟཏྟཱ སཧཔཡོགེ པཏྟེ པུབྦཔཡོགེ ཨཱཔཏྟིཡོ པཊིཔྤསྶམྦྷནྟཱིཏི ཝེདིཏབྦཾ.

ཨཔརདྡྷཾ ཝིརདྡྷཾ ཁལིཏནྟི སབྦམེཏཾ ཡཉྩ དུཀྐཊནྟི ཨེཏྠ ཝུཏྟསྶ དུཀྐཊསྶ པརིཡཱཡཝཙནཾ, ཡཾ མནུསྶོ ཀརེཏིཨཱདི པནེཏྠ ཨོཔམྨནིདསྶནཾ. སཾཡོགབྷཱཝོཏི དྭིཏྟཾ སནྡྷཱཡ ཝུཏྟཾ, ཏེན རསྶཏྟསྶཱཔི ནིམིཏྟཾ དསྶིཏནྟི ཝེདིཏབྦཾ. ཨེཀསྶ མཱུལེཏི ཨེཀསྶ སནྟིཀེ. སབྦཏྠཱཔི ཨཱམསནེ དུཀྐཊཾ, ཕནྡཱཔནེ ཐུལླཙྩཡཉྩ ཝིསུཾ ཝིསུཾ ཨཱམསནཕནྡཱཔནཔཡོགཾ ཀརོནྟསྶེཝ ཧོཏི, ཨེཀཔཡོགེན གཎྷནྟསྶ པན ཨུདྡྷཱརེ པཱརཱཛིཀམེཝ, ན དུཀྐཊཐུལླཙྩཡཱནཱིཏི ཝདནྟི, ཨེཀཔཡོགེན གཎྷནྟསྶཱཔི ཨཱམསནཕནྡཱཔནཱནམྤི ལབྦྷམཱནཏྟཱ ཏཾ ན གཧེཏབྦཾ. ན ཧི སཀྐཱ ཨནཱམསིཏྭཱ ཨཕནྡཱཔེཏྭཱ ཙ ཀིཉྩི གཧེཏུཾ. ‘‘ཨེཀམེཝ དེསེཏྭཱ མུཙྩཏཱི’’ཏི པཾསུཁཎནཱདིསམཱནཔཡོགེཔི པུརིམཱ ཨཱཔཏྟི ཨུཏྟརམུཏྟརཾ ཨཱཔཏྟིཾ པཏྭཱ པཊིཔྤསྶམྦྷནྟཱིཏི སཉྙཱཡ ཀུརུནྡཊྛཀཐཱཡཾ ཝུཏྟཾ, ཨིཏརཊྛཀཐཱསུ པན ཁཎནཔཡོགབྷེདེཧི པཡོགེ པཡོགེ ཨཱཔནྣཱ ཨཱཔཏྟིཡོ ཨུཏྟརམུཏྟརཾ པཏྭཱ ན པཊིཔྤསྶམྦྷནྟི ཨཉྙམཉྙཾ སདིསཏྟཱ ཝིཡཱུཧནཾ པཏྭཱ ཏཱ སབྦཱཔི པཊིཔྤསྶམྦྷནྟི ཝིསདིསཔཡོགཏྟཱཏི ཨིམིནཱ ཨདྷིཔྤཱཡེན པཊིཔྤསྶདྡྷིཝིདྷཱནཾ ཝུཏྟནྟི ཝེདིཏབྦཾ. ཨིམིནཱ ཧི ཨཝཧཱརཀསྶ ཨཱསནྣཾ ཨོརིམནྟཾ པརཱམསཏི.

ཏཏྠེཝཱཏི མུཁཝཊྚིཡམེཝ. བུནྡེནཱཏི ཀུམྦྷིཡཱ ཧེཊྛིམཏལེན. ཨེཀཊྛཱནེ ཋིཏཱཡ ཀུམྦྷིཡཱ ཋཱནཱ ཙཱཝནཾ ཚཧི ཨཱཀཱརེཧི ཝེདིཏབྦནྟི སམྦནྡྷོ. ཨེཀཊྛཱནེཏི ཙ སངྑལིཀབདྡྷབྷཱཝེན ཨེཀསྨིཾ པཏིཊྛིཏོཀཱསཊྛཱནེཏི ¶ ཨཏྠོ. ཁཱཎུཀཾ ཀེསགྒམཏྟམྤི ཋཱནཱ ཙཱཝེཏཱིཏི ཁཱཎུཀཾ ཨཏྟནོ པཏིཊྛིཏཊྛཱནཏོ པཉྩཧི ཨཱཀཱརེཧི ཋཱནཱ ཙཱཝེཏི. ཚིནྣམཏྟེ པཱརཱཛིཀནྟི ཨཝསྶཾ ཙེ པཏཏི, ཚིནྣམཏྟེ པཱརཱཛིཀཾ. པརིཙྪེདོཏི པཉྩམཱསཀཱདིགརུབྷཱཝཔརིཙྪེདོ. ཨཔབྱཱུཧནྟོཏི ཋིཏཊྛཱནཏོ ཨཔནཡནཝསེན ཝིཡཱུཧནྟོ རཱསིཾ ཀརོནྟོ. ཨེཝཾ ཀཏྭཱཏི བྷཱཛནམུཁཝཊྚིཡཱ ཀུམྦྷིགཏེན བྷཱཛནགཏསྶ ཨེཀཱབདྡྷབྷཱཝཾ ཝིཡོཛེཏྭཱཏི ཨཏྠོ. ཨུཔཌྜྷཀུམྦྷཱིཡནྟི ཨུཔཌྜྷཔུཎྞཱཡ ཀུམྦྷིཡཱ. ཝིནཡདྷམྨཏཱཏི ཨདྷིཀཀཱརཎཱལཱབྷེ ཝིནཡཝིནིཙྪཡདྷམྨཏཱཏི ཨདྷིཔྤཱཡོ. ན ཀེཝལཉྩེཏྠ གརུཀཏཱཝ, སུཏྟཱནུགམནམྤི ཨཏྠཱིཏི དསྶེནྟོ ཨཔིཙཱཏིཨཱདིམཱཧ. ཀཎྛེན པན པརིཙྪིནྣཀཱལེཏི མུཁགཏཾ ཨཛ྄ཛྷོཧཊཀཱལེཏི ཨཏྠོ. ཨཛ྄ཛྷོཧརཎམེཝ ཧེཏྠ པརིཙྪིནྡནཾ, ན ཀཎྛཔིདཧནཾ. ཙིཀྐནནྟི ཐདྡྷཾ, བཧལཾ གྷནནྟི ཨཏྠོ.

ཡོཔི ཐེཡྻཙིཏྟེན པརསྶ ཀུམྦྷིཡཱ པཱདགྒྷནཀཾ སཔྤིཾ ཝཱ ཏེལཾ ཝཱ ཨཝསྶཾ པིཝནཀཾ ཡཾ ཀིཉྩི ¶ དུཀཱུལསཱཊཀཾ ཝཱ ཙམྨཁཎྜཱདཱིནཾ ཝཱ ཨཉྙཏརཾ པཀྑིཔཏི, ཧཏྠཏོ མུཏྟམཏྟེ པཱརཱཛིཀནྟི ཨེཏྠ ཨཝཧཱརོ ཝཱིམཾསིཏབྦོ. ཡདི ཙ དུཀཱུལཱདཱིསུ སཔྤིཏེལཱནཾ པཝིསནཾ སནྡྷཱཡ པཱརཱཛིཀཾ བྷཝེཡྻ, ཏཏྠ པཝིཊྛཏེལཱདིནོ ཀུམྦྷིགཏེན ཨེཀཱབདྡྷཏཱཡ ན ཏཱཝ ཨཝཧཱརོ བྷཱཛནནྟརཾ པཝེསེཏྭཱ གཧཎཀཱལེ ཝིཡ. ཏཐཱ ཧི ཝུཏྟཾ – ‘‘བྷཱཛནཾ པན ནིམུཛྫཱཔེཏྭཱ གཎྷནྟསྶ ཡཱཝ ཨེཀཱབདྡྷཾ ཧོཏི, ཏཱཝ རཀྑཏཱི’’ཏིཨཱདི. ཨཐ ཏེལཱདིཝིནཱསེན པཱརཱཛིཀཾ བྷཝེཡྻ, ཏདཱཔི ཏིཎཛ྄ཛྷཱཔནཱདཱིསུ ཝིཡ ཨཝཧཱརོ ནཏྠི, དུཀྐཊེན སདྡྷིཾ བྷཎྜདེཡྻམེཝ ཧོཏི, ཏཐཱ ཙ པཱདགྒྷནཀཾ ཏེལཱདིཾ པཱིཏཾ དུཀཱུལཱདིཾ ཨུདྡྷརནྟསྶཱཔི པཱརཱཛིཀཾ ན སིཡཱ ཏཏྠ པཝིཊྛསྶ ཏེལཱདིནོ ཝིནཊྛཊྛེན གཧཎཀྑཎེ ཨཝིཛྫམཱནཏྟཱ, ཝིཛྫམཱནཏྟེན ཙ ཨུདྡྷཱརེཡེཝ པཱརཱཛིཀཾ ཝཏྟབྦཾ, ན ཧཏྠཏོ མུཏྟམཏྟེཏི. སབྦཨཊྛཀཐཱསུ ཙ དུཀཱུལཱདཱིནཾ པཀྑིཔནེ ཧཏྠཏོ མུཏྟམཏྟེ པཱརཱཛིཀསྶ ཝུཏྟཏྟཱ ན ཏཾ པཊིཀྑིཔིཏུཾ སཀྐཱ. ཨཊྛཀཐཱཔྤམཱཎེན པནེཏཾ གཧེཏབྦཾ, ཡུཏྟི པནེཏྠ པཎྜིཏེཧི པུབྦཱཔརཾ སཾསནྡིཏྭཱ ཨུདྡྷཱརེཏབྦཱ.

པལིབུཛ྄ཛྷིསྶཏཱིཏི ནིཝཱརེསྶཏི. ཝུཏྟནཡེན པཱརཱཛིཀནྟི ཧཏྠཏོ མུཏྟམཏྟེཡེཝ པཱརཱཛིཀཾ. ནེཝ ཨཝཧཱརོ, ན གཱིཝཱཏི ཨཏྟནོ བྷཱཛནཏྟཱ ¶ ཝུཏྟཾ, ཨནཱཔཏྟིམཏྟམེཝ ཝུཏྟཾ, ན པན ཨེཝཾ ཝིཙཱརིཏནྟི ཨདྷིཔྤཱཡོ. བཧིགཏཾ ནཱམ ཧོཏཱིཏི ཏཏོ པཊྛཱཡ ཏེལསྶ ཨཊྛཱནཏོ ཨདྷོམུཁབྷཱཝཏོ ཙ བཧིགཏཾ ནཱམ ཧོཏི. ཨནྟོ པཊྛཱཡ ཚིདྡེ ཀརིཡམཱནེ ཏེལསྶ ནིཀྑམིཏྭཱ གཏགཏཊྛཱནཾ བྷཱཛནསངྑྱམེཝ གཙྪཏཱིཏི ཨཱཧ ‘‘བཱཧིརནྟཏོ པཱདགྒྷནཀེ གལི༹ཏེ པཱརཱཛིཀ’’ནྟི. ཡཐཱ ཏཐཱ ཝཱ ཀཏསྶཱཏི བཱཧིརནྟཏོ ཝཱ ཨབྦྷནྟརནྟཏོ ཝཱ པཊྛཱཡ ཀཏསྶ. མཛ྄ཛྷེ ཋཔེཏྭཱ ཀཏཚིདྡེཏི མཛ྄ཛྷེ ཐོཀཾ ཀཔཱལཾ ཋཔེཏྭཱ པཙྪཱ ཏཾ ཚིནྡནྟེན ཀཏཚིདྡེ.

པཏྠཱིནསྶ ཁཱདནཾ ཨིཏརསྶ པཱནཉྩ སཔྤིཨཱདཱིནཾ པརིབྷོགོཏི ཨཱཧ ‘‘ཨཁཱདིཏབྦཾ ཝཱ ཨཔཱཏབྦཾ ཝཱ ཀརོཏཱི’’ཏི. ཀསྨཱ པནེཏྠ དུཀྐཊཾ ཝུཏྟནྟི ཨཱཧ ‘‘ཋཱནཱཙཱཝནསྶ ནཏྠིཏཱཡ དུཀྐཊ’’ནྟི. པུརིམདྭཡནྟི བྷེདནཾ ཚཌྜནཉྩ. ཀུམྦྷིཛཛྫརཀརཎེནཱཏི པུཎྞཀུམྦྷིཡཱ ཛཛྫརཀརཎེན. མཱཏིཀཱཨུཛུཀརཎེནཱཏི ཨུདཀཔུཎྞཱཡ མཱཏིཀཱཡ ཨུཛུཀརཎེན. ཨེཀལཀྑཎནྟི བྷེདནཾ ཀུམྦྷིཡཱ ཛཛྫརཀརཎེན, ཚཌྜནཾ མཱཏིཀཱཡ ཨུཛུཀརཎེན ཙ སདྡྷིཾ ཨེཀསབྷཱཝཾ. པཙྪིམཾ པན དྭཡནྟི ཛྷཱཔནཾ ཨཔརིབྷོགཀརཎཉྩ. ཨེཏྠ ཨེཝཾ ཝིནིཙྪཡཾ ཝདནྟཱིཏི ཨེཏསྨིཾ མཧཱཨཊྛཀཐཱཡཾ ཝུཏྟེ ཨཏྠེ ཨེཀེ ཨཱཙརིཡཱ ཨེཝཾ ཝིནིཙྪཡཾ ཝདནྟི. པཙྪིམདྭཡཾ སནྡྷཱཡ ཝུཏྟནྟི ཨེཏྠ པུརིམཔདདྭཡེ ཝིནིཙྪཡོ ཧེཊྛཱ ཝུཏྟཱནུསཱརེན སཀྐཱ ཝིཉྙཱཏུནྟི ཏཏྠ ཀིཉྩི ཨཝཏྭཱ པཙྪིམཔདདྭཡཾ སནྡྷཱཡ ‘‘ཋཱནཱཙཱཝནསྶ ནཏྠིཏཱཡ དུཀྐཊ’’ནྟི ཨིདཾ ཝུཏྟནྟི ཨདྷིཔྤཱཡོ ¶ . ཐེཡྻཙིཏྟེནཱཏི ཨཏྟནོ ཝཱ པརསྶ ཝཱ ཀཱཏུཀཱམཏཱཝསེན ཨུཔྤནྣཐེཡྻཙིཏྟེན. ཝིནཱསེཏུཀཱམཏཱཡཱཏི ཧཏྠཔཱདཱདཱིནི ཚིནྡནྟོ ཝིཡ ཀེཝལཾ ཝིནཱསེཏུཀཱམཏཱཡ. ཝུཏྟནཡེན བྷིནྡནྟསྶ ཝཱ ཚཌྜེནྟསྶ ཝཱཏི མུགྒརེན པོཐེཏྭཱ བྷིནྡནྟསྶ ཝཱ ཨུདཀཾ ཝཱ ཝཱལིཀཾ ཝཱ ཨཱཀིརིཏྭཱ ཨུཏྟརཱཔེནྟསྶ ཝཱཏི ཨཏྠོ. ཨཡུཏྟནྟི ཙེཏི པཱལི༹ཡཾ པུརིམདྭཡེཔི དུཀྐཊསྶེཝ ཝུཏྟཏྟཱ ‘‘པུརིམདྭཡེ པཱརཱཛིཀ’’ནྟི ཨིདཾ ཨཡུཏྟནྟི ཡདི ཏུམྷཱཀཾ སིཡཱཏི ཨཏྠོ. ནཱཏི ཨཡུཏྟབྷཱཝཾ ནིསེདྷེཏྭཱ ཏཏྠ ཀཱརཎམཱཧ ‘‘ཨཉྙཐཱ གཧེཏབྦཏྠཏོ’’ཏི.

ཨེཝམེཀེ ཝདནྟཱིཏི ཧེཊྛཱ ཝུཏྟསྶ ཨཏྠནཡསྶ ཨཏྟནཱ ཨནབྷིམཏབྷཱཝཾ དསྶེཏྭཱ སཡཾ ཨཉྙཐཱཔི པཱལི༹ཾ ཨཊྛཀཐཉྩ སཾསནྡིཏྭཱ ཨཏྠཾ དསྶེཏུཀཱམོ ¶ ཨཡཾ པནེཏྠ སཱརོཏིཨཱདིམཱཧ. ཨཙཱཝེཏུཀཱམོཝཱཏི ཐེཡྻཙིཏྟེན ཋཱནཱ ཨཙཱཝེཏུཀཱམོཝ. ཨཚཌྜེཏུཀཱམོཡེཝཱཏི ཨེཏྠཱཔི ཐེཡྻཙིཏྟེནཱཏི སམྦནྡྷིཏབྦཾ. ཨིདཉྷི ཐེཡྻཙིཏྟཔཀྑཾ སནྡྷཱཡ ཝུཏྟཾ ནཱསེཏུཀཱམཏཱཔཀྑསྶ ཝཀྑམཱནཏྟཱ. ཏེནེཝཱཧ ནཱསེཏུཀཱམཏཱཔཀྑེ པནཱཏིཨཱདི. ཨིཏརཐཱཔི ཡུཛྫཏཱིཏི ཐེཡྻཙིཏྟཱབྷཱཝཱ ཋཱནཱ ཙཱཝེཏུཀཱམསྶཱཔི དུཀྐཊཾ ཡུཛྫཏཱིཏི ཝུཏྟཾ ཧོཏི.

བྷཱུམཊྛཀཐཱཝཎྞནཱནཡོ ནིཊྛིཏོ.

ཨཱཀཱསཊྛཀཐཱཝཎྞནཱ

༩༦. ཨཱཀཱསཊྛཀཐཱཡཾ ཨནྟོཝཏྠུམྷཱིཏི པརིཀྑིཏྟསྶ ཝཏྠུསྶ ཨནྟོ. ཨནྟོགཱམེཏི པརིཀྑིཏྟསྶ གཱམསྶ ཨནྟོ. ཨཔརིཀྑིཏྟེ པན ཝཏྠུམྷི གཱམེ ཝཱ ཋིཏཊྛཱནམེཝ ཋཱནཾ. ཨཊཝིམུཁཾ ཀརོཏི…པེ… རཀྑཏཱིཏི ཏེན པཡོགེན ཏསྶ ཨིཙྪིཏཊྛཱནཾ ཨཱགཏཏྟཱ རཀྑཏི. གཱམཏོ ནིཀྑནྟསྶཱཏི པརིཀྑིཏྟགཱམཏོ ནིཀྑནྟསྶ. ཀཔིཉྫརོ ནཱམ ཨཉྙམཉྙཾ ཡུཛ྄ཛྷཱཔནཏྠཱཡ བཱལཛནེཧི པོསཱཝནིཡཔཀྑིཛཱཏི.

ཝེཧཱསཊྛཀཐཱཝཎྞནཱ

༩༧. ཝེཧཱསཊྛཀཐཱཡཾ ཚིནྣམཏྟེ མུཏྟམཏྟེཏི ཡཐཱ ཚིནྣཾ མུཏྟཉྩ པཀཏིཊྛཱནེ ན ཏིཊྛཏི, ཏཐཱ ཚེདནཾ མོཙནཉྩ སནྡྷཱཡ ཝུཏྟཾ.

ཨུདཀཊྛཀཐཱཝཎྞནཱ

༩༨. ཨུདཀཊྛཀཐཱཡཾ ¶ སནྡམཱནཨུདཀེ ནིཀྑིཏྟཾ ན ཏིཊྛཏཱིཏི ཨཱཧ ‘‘ཨསནྡནཀེ ཨུདཀེ’’ཏི. ཨནཱཔཏྟཱིཏི ཧཏྠཝཱརཔདཝཱརེསུ དུཀྐཊཱཔཏྟིཡཱ ཨབྷཱཝཾ སནྡྷཱཡ ཝུཏྟཾ. ཀཌྜྷཏཱིཏི ཧེཊྛཏོ ཨོསཱརེཏི. སཀལམུདཀནྟི དཎྜེན ཕུཊྛོཀཱསགཏཾ སཀལམུདཀཾ. ན ཨུདཀཾ ཋཱནནྟི ཨཏྟནཱ ཀཏཊྛཱནསྶ ཨཊྛཱནཏྟཱ. པདུམིནིཡནྟི པདུམགཙྪེ. ཀལཱཔབནྡྷནྟི ཧཏྠཀཝསེན ཁུདྡཀཾ ཀཏྭཱ བདྡྷཾ ཀལཱཔབདྡྷཾ. བྷཱརབདྡྷཾ ནཱམ སཱིསབྷཱརཱདིཝསེན བདྡྷཾ. མུལཱ༹ལནྟི ཀནྡཾ. པཏྟཾ ཝཱ པུཔྥཾ ཝཱཏི ཨིདཾ ཀདྡམསྶ ཨནྟོ ¶ པཝིསིཏྭཱ ཋིཏཾ སནྡྷཱཡ ཝུཏྟཾ. ནིདྡྷམནཏུམྦནྟི ཝཱཔིཡཱ ཨུདཀསྶ ནིཀྑམནནཱལ༹ཾ. ཨུདཀཝཱཧཀནྟི མཧཱམཱཏིཀཾ. ཨཝཧཱརེན སོ ན ཀཱརེཏབྦོཏི ཨིམིནཱ པཱཎཾ ཛཱིཝིཏཱ ཝོརོཔནེ ཨཱཔཏྟིཡཱ སབྦཏྠ ན མུཙྩཏཱིཏི དཱིཔེཏི. མཱཏིཀཾ ཨཱརོཔེཏྭཱཏི ཁུདྡཀམཱཏིཀཾ ཨཱརོཔེཏྭཱ. མརིཏྭཱ…པེ… ཏིཊྛནྟཱིཏི ཨེཏྠ མཏམཙྪཱནཾཡེཝ ཏེསཾ སནྟཀཏྟཱ ཨམཏེ གཎྷནྟསྶ ནཏྠི ཨཝཧཱརོ.

ནཱཝཊྛཀཐཱཝཎྞནཱ

༩༩. ནཱཝཊྛཀཐཱཡཾ ཐུལླཙྩཡམྤི པཱརཱཛིཀམྤི ཧོཏཱིཏི ཨེཏྠ པཋམཾ ཋཱནཱ ཨཙཱཝེཏྭཱ མུཏྟེ ཐུལླཙྩཡཾ, པཋམཾ པན ཋཱནཱ ཙཱཝེཏྭཱ མུཏྟེ པཱརཱཛིཀནྟི ཝེདིཏབྦཾ. པཱསེ བདྡྷསཱུཀརོ ཝིཡཱཏིཨཱདིནཱ ཝུཏྟཾ སནྡྷཱཡཱཧ ‘‘ཏཏྠ ཡུཏྟི པུབྦེ ཝུཏྟཱཨེཝཱ’’ཏི. ཝིཔནྣཊྛནཱཝཱཏི ཝིསམཝཱཏེཧི དེསནྟརཾ པལཱཏཱ, བྷིཛྫིཏྭཱ ཝཱ ཝིནཱསཾ པཏྭཱ ཨུདཀེ ནིམུཛྫིཏྭཱ ཧེཊྛཱ བྷཱུམིཏལཾ ཨཔྤཏྭཱ སཱམིཀེཧི ཙ ཨཔརིཙྩཏྟཱལཡཱ ཝུཙྩཏི. བལཝཱ ཙ ཝཱཏོ ཨཱགམྨཱཏི ཨིམིནཱ ཨསཏི ཝཱཏེ ཨཡཾ པཡོགོ ཀཏོཏི དསྶེཏི. པུགྒལསྶ ནཏྠི ཨཝཧཱརོཏི སུཀྑམཱཏིཀཱཡཾ ཨུཛུཀརཎནཡེན ཝུཏྟཾ. ཏཾ ཨཏྟནོ པཱདེན ཨནཀྐམིཏྭཱ ཧཏྠེན ཙ ཨནུཀྑིཔིཏྭཱ ཨཉྙསྨིཾ དཎྜཱདཱིསུ བནྡྷིཏྭཱ ཋཔིཏེ ཡུཛྫཏི, ཨཏྟནོ པཱདེན ཨཀྐམིཏྭཱ ཧཏྠེན ཙ ཨུཀྑིཔིཏྭཱ ཋིཏསྶ པན བལཝཝཱཏེན ཚཏྟཙཱིཝརཱདཱིསུ པཧཊེསུ པཀཏིཾ ཝིཛཧིཏྭཱ དལ༹ྷཏརཾ ཨཀྐམནགཧཎཱདིཔཡོགོ ཨབྷིནཝོ ཀཱཏབྦོ སིཡཱ. ཨིཏརཐཱ ཚཏྟཙཱིཝརཱདཱིནི ཝཱ ཝིགཙྪནྟི, ཨཝཧཱརཀོ ཝཱ སཡཾ པཏིསྶཏི, ནཱཝཱ ཙ ཏདཱ ན གམིསྶཏི. ཏསྨཱ ཨཱིདིསེ ཨབྷིནཝཔྤཡོགེ སཏི ཨཝཧཱརེན བྷཝིཏབྦཾ. སུཀྑམཱཏིཀཱཡཾ ཨུཛུཀཏཱཡ ཨུདཀཱགམནཀཱལེ ཀཱཏབྦཀིཙྩཾ ནཏྠཱིཏི ཏཾ ཨིདྷ ནིདསྶནཾ ན ཧོཏི. དཱསཾ པན པཀཏིཡཱ པལཱཡནྟཾ ‘‘སཱིགྷཾ ཡཱཧཱི’’ཏི ཝཏྭཱ པཀཏིགམནཏོ ཏུརིཏགམནུཔྤཱདནཱདིནཱ ཨིདྷ ནིདསྶནེན བྷཝིཏབྦནྟི ཨམྷཱཀཾ ཁནྟི ¶ , ཝཱིམཾསིཏྭཱ གཧེཏབྦཾ. ཝཱཏེ ཨཱགཏེཔི ཡཏྠ ཨཏིལཧུཀཏྟཱ ནཱཝཱཡ ཀཉྩི པཡོགཾ ཨཀཏྭཱ པཀཏིཡཱ ཨཝཧཱརཀོ ཏིཊྛཏི, ཏཏྠིདཾ ཨཊྛཀཐཱཡཾ ཝུཏྟནྟི གཧེཏབྦཾ.

ཡཱནཊྛཀཐཱཝཎྞནཱ

༡༠༠. ཡཱནཊྛཀཐཱཡཾ ¶ ཨུབྷོསུ པསྶེསཱུཏི ཙཏུནྣཾ ཐམྦྷཱནཾ ཨུཔརི ཙཏུརསྶཾ དཱརུསངྒྷཱཊཾ ཨཱརོཔེཏྭཱ ཏསྶ ཝཱམདཀྑིཎཔསྶེསུ ཨུབྷོསུ ཝཱཏཱཏཔཱདིཔརིསྶཡཝིནོདནཏྠཾ གརུལ༹པཀྑིནོ ཨུབྷོ པཀྑཱ ཝིཡ ཀཏཱ སནྡམཱནིཀཱ. དུཀཡུཏྟསྶཱཏི དྭཱིཧི གོཎེཧི ཡུཏྟསྶ. ཨཡུཏྟཀནྟི གོཎེཧི ཨཡུཏྟཾ. ཀཔྤཀཏཱཏི དྭིནྣཾ སིཁཱནཾ སནྡྷིཊྛཱནེ གོསིངྒཱནི ཝིཡ དྭེ ཀོཊིཡོ ཋཔེཏྭཱ ཨུཔཏྠམྦྷནཱི ཀཔྤཀཏཱ ནཱམ, སཱ དྭཱིཧིཔི ཀོཊཱིཧི བྷཱུམིཡཾ པཏིཊྛཱཏི, ཏེནཱཧ ‘‘ཚ ཋཱནཱནཱི’’ཏི. ཏཱིཎི ཝཱ ཙཏྟཱརི ཝཱ ཋཱནཱནཱིཏི ཨཀཔྤཀཏཱཡ ཨུཔཏྠམྦྷནིཡཱ ཙ དྭིནྣཾ ཙཀྐཱནཉྩ ཝསེན ཏཱིཎི ཋཱནཱནི, ཀཔྤཀཏཱཡ ཝསེན ཙཏྟཱརི ཋཱནཱནི, ཏཐཱ པཐཝིཡཾ ཋཔིཏསྶ ཏཱིཎི ཋཱནཱནཱིཏི སམྦནྡྷོ. ཨཀྑསཱིསེཧཱིཏི ཨཀྑདཱརུནོ དྭཱིཧི ཀོཊཱིཧི. ཨཀྑུདྡྷཱིཧཱིཏི ཨཀྑདཱརུནཱ སམྤཊིཙྪཀཱ ཧེཊྛིམབྷཱགེ ཀཔྤཀཏཱ དྭེ དཱརུཁཎྜཱ ཨཀྑུདྡྷིཡོ ནཱམ, ཏཱསཾ ཀཔྤཀཏཱནཾ དྭིནྣཾ ཀཔྤསཱིསཱནི ཙཏྟཱརི ཨིདྷ ‘‘ཨཀྑུདྡྷིཡོ’’ཏི ཝུཙྩནྟི, ཏེནཱཧ ‘‘ཙཏཱུཧི ཙ ཨཀྑུདྡྷཱིཧཱི’’ཏི. ཏཱཧི པཏིཊྛིཏཱཧི པཏིཊྛིཏཊྛཱནཱནི ཙཏྟཱརི དྷུརེན པཏིཊྛིཏཊྛཱནཾ ཨེཀནྟི པཉྩ ཋཱནཱནི ཧོནྟི. ཨུདྡྷིཡོཝ ‘‘ཨུདྡྷིཁཱཎུཀཱ’’ཏི ཝུཏྟཱ, ཨུདྡྷིཁཱཎུཀཱནཾ ཨབྷཱཝེ ཨཀྑསཱིསཱནཾ པཏིཊྛཱནོཀཱསཾ དསྶེནྟོ ཨཱཧ སམམེཝ བཱཧཾ ཀཏྭཱཏིཨཱདི. ཏཏྠ སམམེཝཱཏི ཨུདྡྷིཡོ ཧེཊྛཱ ཨནོལམྦེཏྭཱ བཱཧུནོ ཧེཊྛིམབྷཱགཾ སམཾ ཀཏྭཱ དྭིནྣཾ བཱཧུདཱརཱུནཾ མཛ྄ཛྷེ ཨཀྑསཱིསཔྤམཱཎེན ཚིདྡཾ ཀཏྭཱ ཏཏྠ ཨཀྑསཱིསཱནི པཝེསིཏཱནི ཧོནྟི, ཏེན བཱཧཱནཾ ཧེཊྛཱབྷཱགཾ སབྦཾ བྷཱུམིཾ ཕུསིཏྭཱ ཏིཊྛཏི, ཏེནཱཧ ‘‘སབྦཾ པཐཝིཾ ཕུསིཏྭཱ ཏིཊྛཏཱི’’ཏི. སེསཾ ནཱཝཱཡཾ ཝུཏྟསདིསནྟི ཨིམིནཱ ཡདི པན ཏཾ ཨེཝཾ གཙྪནྟཾ པཀཏིགམནཾ པཙྪིནྡིཏྭཱ ཨཉྙཾ དིསཱབྷཱགཾ ནེཏི, པཱརཱཛིཀཾ. སཡམེཝ ཡཾ ཀིཉྩི ཋཱནཾ སམྤཏྟཾ ཋཱནཱ ཨཙཱལེནྟོཝ ཝིཀྐིཎིཏྭཱ གཙྪཏི, ནེཝཏྠི ཨཝཧཱརོ, བྷཎྜདེཡྻཾ པན ཧོཏཱིཏི ཨིམཾ ནཡཾ ཨཏིདིསཏི.

བྷཱརཊྛཀཐཱཝཎྞནཱ

༡༠༡. བྷཱརཊྛཀཐཱཡཾ བྷཱརཊྛནྟི མཱཏིཀཱཔདསྶ བྷཱརོ ནཱམཱཏི ཨིདཾ ཨཏྠདསྶནནྟི ཨཱཧ ‘‘བྷཱརོཡེཝ བྷཱརཊྛ’’ནྟི. པུརིམགལེཏི གལསྶ པུརིམབྷཱགེ. གལཝཱཊཀོཏི གཱིཝཱཡ ཨུཔརིམགལཝཱཊཀོ. ཨུརཔརིཙྪེདམཛ྄ཛྷེཏི ¶ ཨུརཔརིཡནྟསྶ མཛ྄ཛྷེ. སཱམིཀེཧི ཨནཱཎཏྟོཏི ཨིདཾ ཡདི ¶ སཱམིཀེཧི ‘‘ཨིམཾ བྷཱརཾ ནེཏྭཱ ཨསུཀཊྛཱནེ དེཧཱི’’ཏི ཨཱཎཏྟོ བྷཝེཡྻ, ཏདཱ ཏེན གཧིཏབྷཎྜཾ ཨུཔནིཀྑིཏྟཾ སིཡཱ, ཏཉྩ ཐེཡྻཙིཏྟེན སཱིསཱདིཏོ ཨོརོཔེནྟསྶཱཔི ཨཝཧཱརོ ན སིཡཱ, སཱམིཀཱནཾ པན དྷུརནིཀྑེཔེ ཨེཝ སིཡཱཏི ཏཏོ ཨུཔནིཀྑིཏྟབྷཎྜབྷཱཝཏོ ཝིཡོཛེཏུཾ ཝུཏྟཾ, ཏེནེཝ ཝཀྑཏི ‘‘ཏེཧི པན ཨནཱཎཏྟཏྟཱ པཱརཱཛིཀ’’ནྟི. གྷཾསནྟོཏི སཱིསཏོ ཨནུཀྑིཔནྟོ, ཡདི ཨུཀྑིཔེཡྻ, ཨུཀྑིཏྟམཏྟེ པཱརཱཛིཀཾ, ཏེནཱཧ སཱིསཏོ ཀེསགྒམཏྟམྤཱིཏིཨཱདི. ཡོ ཙཱཡནྟི ཡོ ཨཡཾ ཝིནིཙྪཡོ.

ཨཱརཱམཊྛཀཐཱཝཎྞནཱ

༡༠༢. ཨཱརཱམཊྛཀཐཱཡཾ ཨཱརཱམཾ ཨབྷིཡུཉྫཏཱིཏི ཨིདཾ ཨབྷིཡོགཀརཎཾ པརེསཾ བྷཱུམཊྛབྷཎྜཱདཱིསུཔི ཀཱཏུཾ ཝཊྚཏིཡེཝ. ཨཱརཱམཱདིཐཱཝརེསུ པན ཡེབྷུཡྻེན ཨབྷིཡོགཝསེནེཝ གཧཎསམྦྷཝཏོ ཨེཏྠེཝ པཱལི༹ཡཾ ཨབྷིཡོགོ ཝུཏྟོ, ཨིཏི ཨིམིནཱ ནཡེན སབྦཏྠཱཔི སཀྐཱ ཉཱཏུནྟི གཧེཏབྦཾ. ཨདིནྣཱདཱནསྶ པཡོགཏྟཱཏི སཧཔཡོགམཱཧ. ཝཏྠུམྷིཡེཝ ཀཏཔཡོགཏྟཱ སཧཔཡོགཝསེན ཧེཏཾ དུཀྐཊཾ. སཡམྤཱིཏི ཨབྷིཡུཉྫཀོཔི. ‘‘ཀིཾ ཀརོམི ཀིཾ ཀརོམཱི’’ཏི ཨེཝཾ ཀིངྐཱརམེཝ པཊིསྶུཎནྟོ ཝིཡ ཙརཏཱིཏི ཀིངྐཱརཔཊིསྶཱཝཱི, ཏསྶ བྷཱཝོ ཀིངྐཱརཔཊིསྶཱཝིབྷཱཝོ, ཏསྨིཾ, ཨཏྟནོ ཝསཝཏྟིབྷཱཝེཏི ཝུཏྟཾ ཧོཏི. ཨུཀྐོཙནྟི ལཉྫཾ. སབྦེསཾ པཱརཱཛིཀནྟི ཀཱུཊཝིནིཙྪཡིཀཱདཱིནཾ. ཨཡཾ ཝཏྠུསཱམཱིཏིཨཱདིཀསྶ ཨུབྷིནྣཾ དྷུརནིཀྑེཔཀརཎཧེཏུནོ པཡོགསྶ ཀརཎཀྑཎེཝ པཱརཱཛིཀཾ ཧོཏཱིཏི ཝེདིཏབྦཾ. སཙེ པན སཱམིཀསྶ ཝིམཏི ཙ དྷུརནིཀྑེཔོ ཙ ཀམེན ཨུཔྤཛྫནྟི, པཡོགསམུཊྛཱཔཀཙིཏྟཀྑཎེ པཱརཱཛིཀམེཝ ཧོཏི, ན ཐུལླཙྩཡཾ. ཡདི ཝིམཏིཡེཝ ཨུཔྤཛྫཏི, ཏདཱ ཐུལླཙྩཡམེཝཱཏི ཝེདིཏབྦཾ, ཨཡཾ ནཡོ སབྦཏྠ ཡཐཱནུརཱུཔཾ གཧེཏབྦོ. དྷུརནིཀྑེཔཝསེནེཝ པརཱཛཡོཏི སཱམིཀོ ‘‘ཨཧཾ ན མུཙྩཱམཱི’’ཏི དྷུརཾ ཨནིཀྑིཔནྟོ ཨཊྚོ པརཱཛིཏོ ནཱམ ན ཧོཏཱིཏི དསྶེཏི.

ཝིཧཱརཊྛཀཐཱཝཎྞནཱ

༡༠༣. ཝིཧཱརཊྛཀཐཱཡཾ ¶ ཝིཧཱརནྟི ཨུཔཙཱརསཱིམཱསངྑཱཏཾ སཀལཾ ཝིཧཱརཾ. པརིཝེཎནྟི ཏསྶ ཝིཧཱརསྶ ཨབྦྷནྟརེ ཝིསུཾ ཝིསུཾ པཱཀཱརཱདིཔརིཙྪིནྣཊྛཱནཾ. ཨཱཝཱསནྟི ཨེཀཾ ཨཱཝསཐམཏྟཾ. གཎསནྟཀེ པརིཙྪིནྣསཱམིཀཏྟཱ སཀྐཱ དྷུརཾ ནིཀྑིཔཱཔེཏུནྟི ཨཱཧ ‘‘དཱིགྷབྷཱཎཀཱདིབྷེདསྶ པན གཎསྶཱ’’ཏི. ཨིདྷཱཔི སཙེ ཨེཀོཔི དྷུརཾ ན ནིཀྑིཔཏི, རཀྑཏིཡེཝ. ཨེས ནཡོ བཧཱུནཾ སནྟཀེ སབྦཏྠ.

ཁེཏྟཊྛཀཐཱཝཎྞནཱ

༡༠༤. ཁེཏྟཊྛཀཐཱཡཾ ¶ ནིརུམྦྷིཏྭཱ ཝཱཏིཨཱདཱིསུ གཎྷནྟསྶཱཏི པཙྩེཀཾ ཡོཛེཏབྦཾ, ཏཏྠ ནིརུམྦྷིཏྭཱ གཧཎཾ ནཱམ ཝཱིཧིསཱིསཾ ཨཙྪིནྡིཏྭཱ ཡཐཱཋིཏམེཝ ཧཏྠེན གཧེཏྭཱ ཨཱཀཌྜྷིཏྭཱ བཱིཛམཏྟསྶེཝ གཧཎཾ. ཨེཀམེཀནྟི ཨེཀཾ ཝཱིཧིསཱིསཾ. ཡསྨིཾ བཱིཛེ ཝཱཏིཨཱདི ནིརུམྦྷིཏྭཱ གཧཎཱདཱིསུ ཡཐཱཀྐམཾ ཡོཛེཏབྦཾ. ‘‘ཏསྨིཾ བནྡྷནཱ མོཙིཏམཏྟེ’’ཏི ཝཙནཏོ ཏསྨིཾ བཱིཛཱདིམྷི བནྡྷནཱ མུཏྟེ སཏི ཏཏོ ཨནཔནཱིཏེཔི ཋཱནནྟརསྶ ཨབྷཱཝཱ པཱརཱཛིཀམེཝ. ཡསྶ པན སཱིསཱདིཀསྶ སནྟརཱདིནཱ སཧ སཾསིབྦནཾ ཝཱ ཨེཀཱབདྡྷཏཱ ཝཱ ཧོཏི, ཏསྶ བནྡྷནཱ མོཙིཏེ ཐུལླཙྩཡཾ, ཨིཏརཊྛཱནཏོ མོཙིཏེ པཱརཱཛིཀནྟི གཧེཏབྦཾ, ཏེནཱཧ ཝཱིཧིནཱལ༹ནྟིཨཱདི. སབྷུསནྟི པལཱལསཧིཏཾ. ཁཱིལེནཱཏི ཁཱཎུཀེན. ཨེཏྠ ཙ ཁཱིལསངྐམནཱདཱིསུ སཧཔཡོགོ དྷུརནིཀྑེཔོ ཙཱཏི ཨུབྷཡཾ སམྦྷཝཏི. ཁཱིལསངྐམནཱདི ཨེཏྠ སཧཔཡོགོ. ཏསྨིཉྩ ཀཏེ ཡདི སཱམིཀཱ དྷུརཾ ན ནིཀྑིཔནྟི པུན གཎྷིཏུཀཱམཱཝ ཧོནྟི, ན ཏཱཝ ཨཝཧཱརོ, ‘‘ཁཱིལཾ སངྐཱམེཏྭཱ ཁེཏྟཱདིཾ ཨསུཀོ རཱཛཝལླབྷོ བྷིཀྑུ གཎྷིཏུཀཱམོ’’ཏི ཉཏྭཱ ཏསྶ བལཾ ཀཀྑལཱ༹དིབྷཱཝཉྩ ནིསྶཱཡ ཁཱིལསངྐམནཱདིཀིརིཡཱནིཊྛཱནཏོ པཋམམེཝ སཱམིཀཱ དྷུརཾ ནིཀྑིཔནྟི, ན ཨཝཧཱརོ ཨེཏསྶ པཡོགནིཊྛཱནཏོ པུརེཏརམེཝ དྷུརསྶ ནིཀྑིཏྟཏྟཱ. ཡདཱ པན ཁཱིལསངྐམནཱདིཔཡོགེནེཝ དྷུརནིཀྑེཔོ ཧོཏི, ཏདཱཡེཝ ཨཝཧཱརོ, ཏེནེཝེཏྠ ‘‘ཏཉྩ ཁོ སཱམིཀཱནཾ དྷུརནིཀྑེཔེནཱ’’ཏི ཝུཏྟཾ. ཁཱིལཱདཱིནཾ སངྐམིཏབྷཱཝཾ ཨཛཱནིཏྭཱ སཱམིཀཱནཾ སམྤཊིཙྪནམྤེཏྠ དྷུརནིཀྑེཔོཏི ཝེདིཏབྦོ. ཨེཝཾ སབྦཏྠཱཏི ཡཐཱཝུཏྟམཏྠཾ རཛྫུསངྐམནཱདཱིསུཔི ཨཏིདིསཏི. ཡཊྛིནྟི མཱནདཎྜཾ. ཨེཀསྨིཾ ཨནཱགཏེ ཐུལླཙྩཡཾ, ཏསྨིཾ ཨཱགཏེ པཱརཱཛིཀནྟི ¶ སཙེ དཱརཱུནི ནིཁཎིཏྭཱ ཏཏྟཀེནེཝ གཎྷིཏུཀཱམོ ཧོཏི, ཨཝསཱནེ དཱརུམྷི པཱརཱཛིཀཾ. སཙེ ཏཏྠ ཀཎྚཀསཱཁཱདཱིཧི པཱདཱནཾ ཨནྟརཾ པཊིཙྪཱདེཏྭཱ ཀསྶཙི ཨཔྤཝེསཱརཧཾ ཀཏྭཱ གཧེཏུཀཱམོ ཧོཏི, ཨཝསཱནསཱཁཱཡ པཱརཱཛིཀཾ, ཏེནཱཧ ‘‘སཱཁཱཔརིཝཱརེནེཝ ཨཏྟནོ ཀཱཏུཾ སཀྐོཏཱི’’ཏི, དཱརཱུནི ཙ ནིཁཎིཏྭཱ སཱཁཱཔརིཝཱརཉྩ ཀཏྭཱ ཨེཝ ཨཏྟནོ སནྟཀཾ ཀཱཏུཾ སཀྐོཏཱིཏི ཨཏྠོ. ཁེཏྟམརིཡཱདནྟི ཝུཏྟམེཝཏྠཾ ཝིབྷཱཝེཏུཾ ‘‘ཀེདཱརཔཱལི༹’’ནྟི ཝུཏྟཾ. ཨིདཉྩ ཁཱིལསངྐམནཱདིནཱ གཧཎཾ ཨཱརཱམཱདཱིསུཔི ལབྦྷཏེཝ.

ཝཏྠུཊྛཀཐཱཝཎྞནཱ

༡༠༥. ཝཏྠུཊྛཀཐཱཡཾ ཏིཎྞཾ པཱཀཱརཱནནྟི ཨིཊྛཀསིལཱདཱརཱུནཾ ཝསེན ཏིཎྞཾ པཱཀཱརཱནཾ.

༡༠༦. གཱམཊྛཀཐཱཡཾ ¶ ‘‘གཱམོ ནཱམཱ’’ཏི པཱལི༹ཡཾ ན ཝུཏྟཾ སབྦསོ གཱམལཀྑཎསྶ པུབྦེ ཝུཏྟཏྟཱ.

ཨརཉྙཊྛཀཐཱཝཎྞནཱ

༡༠༧. ཨརཉྙཊྛཀཐཱཡཾ ཝིནིཝིཛ྄ཛྷིཏྭཱཏི ཨུཛུཀམེཝ ཝིནིཝིཛ྄ཛྷིཏྭཱ. ལཀྑཎཙྪིནྣསྶཱཏི ཨརཉྙསཱམིཀཱནཾ ཧཏྠཏོ ཀིཎིཏྭཱ གཎྷནྟེཧི ཀཏཨཀྑརཱདིསཉྙཱཎསྶ. ཚལླིཡཱ པརིཡོནདྡྷནྟི ཨིམིནཱ སཱམིཀཱནཾ ནིརཱཔེཀྑཏཱཡ ཙིརཚཌྜིཏབྷཱཝཾ དཱིཔེཏི, ཏེནཱཧ ‘‘གཧེཏུཾ ཝཊྚཏཱི’’ཏི. ཡདི སཱམིཀཱནཾ སཱཔེཀྑཏཱ ཨཏྠི, ན ཝཊྚཏི. ཏཱནི ཀཏཱནི ཨཛ྄ཛྷཱཝུཏྠཱནི ཙ ཧོནྟཱིཏི ཏཱནི གེཧཱདཱིནི ཀཏཱནི པརིནིཊྛིཏཱནི མནུསྶེཧི ཙ ཨཛ྄ཛྷཱཝུཏྠཱནི ཙ ཧོནྟི. དཱརཱུནཱིཏི གེཧཱདཱིནཾ ཀཏཏྟཱ ཨཝསིཊྛདཱརཱུནི. གཧེཏུཾ ཝཊྚཏཱིཏི སཱམིཀཱནཾ ཨནཱལཡཏྟཱ ཝུཏྟཾ, ཏེ ཙ ཡདི གཧཎཀཱལེ དིསྭཱ སཱལཡཱ ཧུཏྭཱ ཝཱརེནྟི, གཧེཏུཾ ན ཝཊྚཏིཡེཝ. ‘‘དེཧཱི’’ཏི ཝུཏྟེ དཱཏབྦམེཝཱཏི ‘‘དེཧཱི’’ཏི ཝུཏྟེ ‘‘དསྶཱམཱི’’ཏི ཨཱབྷོགཾ ཀཏྭཱ གཙྪནྟསྶ ‘‘དེཧཱི’’ཏི ཨཝུཏྟེ ཨདཏྭཱ གམནེ ཨཱཔཏྟི ནཏྠི. པཙྪཱཔི ཏེཧི ཙོདིཏེ དཱཏབྦམེཝ.

ཨདིསྭཱ གཙྪཏི, བྷཎྜདེཡྻནྟི སུདྡྷཙིཏྟེན གཏསྶ བྷཎྜདེཡྻཾ. ཨཱརཀྑཊྛཱནམྤི སུདྡྷཙིཏྟེན ཨཏིཀྐམིཏྭཱ ཐེཡྻཙིཏྟེ ཨུཔྤནྣེཔི ཨཝཧཱརོ ནཏྠི ¶ ཨཱརཀྑཊྛཱནསྶ ཨཏིཀྐནྟཏྟཱ. ཀེཙི པན ‘‘ཡཏྠ ཀཏྠཙི ནཱིཏཱནམྤི དཱརཱུནཾ ཨརཉྙསཱམིཀཱནཉྙེཝ སནྟཀཏྟཱ པུན ཐེཡྻཙིཏྟཾ ཨུཔྤཱདེཏྭཱ གཙྪཏི, པཱརཱཛིཀམེཝཱ’’ཏི ཝདནྟི, ཏཾ ན ཡུཏྟཾ ‘‘ཨཱརཀྑཊྛཱནཾ པཏྭཱ…པེ… ཨསྶཏིཡཱ ཨཏིཀྐམཏཱི’’ཏི, སཧསཱ ཏཾ ཋཱནཾ ཨཏིཀྐམཏཱིཏིཨཱདིནཱ (པཱརཱ. ཨཊྛ. ༡.༡༠༧) ཙ ཨཱརཀྑཊྛཱནཱཏིཀྐམེཡེཝ ཨཱཔཏྟིཡཱ ཝུཙྩམཱནཏྟཱ, ཨཱརཀྑཊྛཱནཱཏིཀྐམམེཝ སནྡྷཱཡ ‘‘ཨིདཾ པན ཐེཡྻཙིཏྟེན པརིཧརནྟསྶ ཨཱཀཱསེན གཙྪཏོཔི པཱརཱཛིཀམེཝཱ’’ཏི ཝུཏྟཾ. ཡཉྩ ‘‘ཡཏྠ ཀཏྠཙི ནཱིཏཱནམྤི དཱརཱུནཾ ཨརཉྙསཱམིཀཱནཉྙེཝ སནྟཀཏྟཱ’’ཏི ཀཱརཎཾ ཝུཏྟཾ, ཏམྤི ཨཱརཀྑཊྛཱནཏོ བཧི པཱརཱཛིཀཱཔཛྫནསྶ ཀཱརཎཾ ན ཧོཏི བྷཎྜདེཡྻབྷཱཝསྶེཝ ཀཱརཎཏྟཱ. ཏེསཾ སནྟཀཏྟེནེཝ ཧི བཧི ཀཏསྶཱཔི བྷཎྜདེཡྻཾ ཛཱཏཾ, ཨིཏརཐཱ ཙ བྷཎྜདེཡྻམྤི ན སིཡཱ སུངྐགྷཱཏཱཏིཀྐམེ ཝིཡ. ཨདྡྷིཀེཧི དིནྣམེཝ སུངྐིཀཱནཾ སནྟཀཾ ཧོཏི, ནཱདིནྣཾ, ཏེན ཏཾ ཋཱནཾ ཡཏོ ཀུཏོཙི པཙྩཡཏོ སུདྡྷཙིཏྟེན ཨཏིཀྐནྟསྶ བྷཎྜདེཡྻམྤི ན ཧོཏི. ཨིདྷ པན ཨརཉྙསཱམིཀཱནཾ སནྟཀཏྟཱ སབྦཏྠཱཔི བྷཎྜདེཡྻམེཝ ཧོཏི, ཏེནེཝེཏཾ ཨརཉྙེ ཨཱརཀྑཊྛཱནཾ སུངྐགྷཱཏཏོཔི གརུཏརཾ ¶ ཛཱཏཾ. ཡདི ཧི ཨཱརཀྑཊྛཱནཏོ བཧིཔི ཐེཡྻཙིཏྟེ སཏི ཨཝཧཱརོ བྷཝེཡྻ, ཨཱརཀྑཊྛཱནཾ པཏྭཱཏིཨཱདིནཱ ཋཱནནིཡམོ ནིརཏྠཀོ སིཡཱ ཡཏྠ ཀཏྠཙི ཐེཡྻཙིཏྟེ ཨུཔྤནྣེ པཱརཱཛིཀནྟི ཝཏྟབྦཏོ. ཏསྨཱ ཨཱརཀྑཊྛཱནཏོ བཧི ཐེཡྻཙིཏྟེན གཙྪནྟསྶ ཨཝཧཱརོ ན བྷཝཏི ཨེཝཱཏི ནིཊྛམེཏྠ གནྟབྦཾ. ཨིདཾ པན ཐེཡྻཙིཏྟེན པརིཧརནྟསྶཱཏི ཡསྨིཾ པདེསེ ཨཏིཀྐནྟེ ཏེསཾ ཨརཉྙཾ ཨཱརཀྑཊྛཱནཉྩ ཨཏིཀྐནྟོ ནཱམ ཧོཏི, ཏཾ པདེསཾ ཨཱཀཱསེནཱཔི ཨཏིཀྐམནཝསེན གཙྪནྟསྶཱཔཱིཏི ཨཏྠོ.

ཨུདཀཀཐཱཝཎྞནཱ

༡༠༨. ཨུདཀཀཐཱཡཾ མཧཱཀུཙྪིཀཱ ཨུདཀཙཱཊི ཨུདཀམཎིཀོ, ‘‘སམེཁལཱ ཙཱཊི ཨུདཀམཎིཀོ’’ཏིཔི ཝདནྟི. ཏཏྠཱཏི ཏེསུ བྷཱཛནེསུ. བྷཱུཏགཱམེན སདྡྷིམྤཱིཏི པི-སདྡེན ཨཀཔྤིཡཔཐཝིམྤི སངྒཎྷཱཏི. ཏལཱ༹ཀརཀྑཎཏྠཱཡཱཏི ‘‘མཧོདཀཾ ཨཱགནྟྭཱ ཏལཱ༹ཀམརིཡཱདཾ མཱ ཚིནྡཱི’’ཏི ཏལཱ༹ཀརཀྑཎཏྠཾ. ནིབྦཧནཨུདཀནྟི ཨེཏྠ ཏལཱ༹ཀསྶ ཨེཀེན ཨུནྣཏེན པསྶེན ཨདྷིཀཛལཾ ནིབྦཧཏི ནིགཙྪཏི ཨེཏེནཱཏི ‘‘ནིབྦཧན’’ནྟི ཨདྷིཀཛལནིཀྑམནམཱཏིཀཱ ¶ ཝུཙྩཏི. ཏཏྠ གཙྪམཱནཾ ཨུདཀཾ ནིབྦཧནཨུདཀཾ ནཱམ. ནིདྡྷམནཏུམྦནྟི སསྶཱདཱིནཾ ཨཏྠཱཡ ཨིཊྛཀཱདཱིཧི ཀཏཾ ཨུདཀནིཀྑམནཔནཱལི༹. མརིཡཱདཾ དུབྦལཾ ཀཏྭཱཏི ཨེཏྠ དུབྦལཾ ཨཀཏྭཱཔི ཡཐཱཝུཏྟཔྤཡོགེ ཀཏེ མརིཡཱདཾ ཚིནྡིཏྭཱ ནིཀྑནྟཨུདཀགྒྷཱནུརཱུཔེན ཨཝཧཱརེན ཀཏྟབྦམེཝ. ཡཏྟཀཾ ཏཔྤཙྩཡཱ སསྶཾ ཨུཔྤཛྫཏཱིཏི བཱིཛཀསིཀམྨཱདིབྦཡཾ ཋཔེཏྭཱ ཡཾ ཨདྷིཀལཱབྷཾ ཨུཔྤཛྫཏི, ཏཾ སནྡྷཱཡ ཝུཏྟཾ. ན ཧི ཏེཧི ཀཱཏབྦཾ ཝཡཀརཎམྤི ཨེཏསྶ དཱཏབྦཾ. ཨིདཉྩ ཏརུཎསསྶེ ཛཱཏེ ཨུདཀཾ ཝིནཱསེནྟསྶ ཡུཛྫཏི, སསྶེ པན སབྦཐཱ ཨཀཏེཡེཝ ཨུདཀཾ ཝིནཱསེནྟེན ཙ ཨུདཀགྒྷམེཝ དཱཏབྦཾ, ན ཏཔྤཙྩཡཱ སཀལཾ སསྶཾ ཏེན ཝིནཱསིཏབྷཎྜསྶེཝ བྷཎྜདེཡྻཏྟཱ, ཨིཏརཐཱ ཝཱཎིཛྫཱདིཨཏྠཱཡ པརེཧི ཋཔིཏབྷཎྜཾ ཨཝཧརནྟསྶ ཏདུབྷཡམྤི གཧེཏྭཱ བྷཎྜགྒྷཾ ཀཱཏབྦཾ སིཡཱ, ཏཉྩ ན ཡུཏྟནྟི ཨམྷཱཀཾ ཁནྟི. སཱམིཀཱནཾ དྷུརནིཀྑེཔེནཱཏི ཨེཏྠ ཨེཀསྶ སནྟཀེ ཏལཱ༹ཀེ ཁེཏྟེ ཙ ཛཱཏེ ཏསྶེཝ དྷུརནིཀྑེཔེན པཱརཱཛིཀཾ, ཡདི པན ཏཾ ཏལཱ༹ཀཾ སབྦསཱདྷཱརཎཾ, ཁེཏྟཱནི པཱཊིཔུགྒལིཀཱནི, ཏསྶ ཏསྶ པུགྒལསྶེཝ དྷུརནིཀྑེཔེ ཨཝཧཱརོ, ཨཐ ཁེཏྟཱནིཔི སབྦསཱདྷཱརཎཱནི, སབྦེསཾ དྷུརནིཀྑེཔེཡེཝ པཱརཱཛིཀཾ, ནཱསཏཱིཏི དཊྛབྦཾ.

ཨནིགྒཏེཏི ཨནིཀྑནྟེ, ཏལཱ༹ཀེཡེཝ ཋིཏེཏི ཨཏྠོ. པརེསཾ མཱཏིཀཱམུཁནྟི ཁུདྡཀམཱཏིཀཱམུཁཾ. ཨསམྤཏྟེཝཱཏི ཏལཱ༹ཀཏོ ནིཀྑམིཏྭཱ མཧཱམཱཏིཀཱཡཾ ཨེཝ ཋིཏེ. ཨནིཀྑནྟེ བདྡྷཱ སུབདྡྷཱཏི ཏལཱ༹ཀཏོ ཨནིཀྑནྟེ བྷཎྜདེཡྻམྤི ན ཧོཏི སབྦསཱདྷཱརཎཏྟཱ ཨུདཀསྶཱཏི ¶ ཨདྷིཔྤཱཡོ. ནིཀྑནྟེ པན པཱཊིཔུགྒལིཀཾ ཧོཏཱིཏི ཨཱཧ ‘‘ནིཀྑནྟེ བདྡྷཱ བྷཎྜདེཡྻ’’ནྟི. ཨིདྷ པན ཁུདྡཀམཱཏིཀཱཡཾ ཨཔྤཝིཊྛཏྟཱ ཨཝཧཱརོ ན ཛཱཏོ, ‘‘ཏལཱ༹ཀཏོ ཨནིགྒཏེ པརེསཾ མཱཏིཀཱམུཁཾ ཨསམྤཏྟེཝཱ’’ཏི ཧེཊྛཱ ཝུཏྟསྶ ཝིཀཔྤདྭཡསྶ ‘‘ཨནིཀྑནྟེ བདྡྷཱ སུབདྡྷཱ, ནིཀྑནྟེ བདྡྷཱ བྷཎྜདེཡྻ’’ནྟི ཨིདཾ དྭཡཾ ཡཐཱཀྐམེན ཡོཛནཏྠཾ ཝུཏྟཾ. ནཏྠི ཨཝཧཱརོཏི ཨེཏྠ ‘‘ཨཝཧཱརོ ནཏྠི, བྷཎྜདེཡྻཾ པན ཧོཏཱི’’ཏི ཀེཙི ཝདནྟི, ཏཾ ན ཡུཏྟཾ. ཝཏྠུཾ…པེ… ན སམེཏཱིཏི ཨེཏྠ ཏལཱ༹ཀགཏཨུདཀསྶ སབྦསཱདྷཱརཎཏྟཱ པརསནྟཀཝཏྠུ ན ཧོཏཱིཏི ཨདྷིཔྤཱཡོ.

དནྟཔོནཀཐཱཝཎྞནཱ

༡༠༩. དནྟཀཊྛཀཐཱཡཾ ¶ ཏཏོ པཊྛཱཡ ཨཝཧཱརོ ནཏྠཱིཏི ‘‘ཡཐཱསུཁཾ བྷིཀྑུསངྒྷོ པརིབྷུཉྫཏཱུ’’ཏི ཨབྷཱཛེཏྭཱཝ ཡཱཝདིཙྪཀཾ གཧཎཏྠམེཝ ཋཔིཏཏྟཱ ཨརཀྑིཏཏྟཱ སབྦསཱདྷཱརཎཏྟཱ ཙ ཨཉྙཾ སངྒྷིཀཾ ཝིཡ ན ཧོཏཱིཏི ཐེཡྻཙིཏྟེན གཎྷནྟསྶཱཔི ནཏྠི ཨཝཧཱརོ. ཁཱདནྟུ, པུན སཱམཎེརཱ ཨཱཧརིསྶནྟཱིཏི ཀེཙི ཐེརཱ ཝདེཡྻུནྟི ཡོཛེཏབྦཾ.

ཝནཔྤཏིཀཐཱཝཎྞནཱ

༡༡༠. ཝནཔྤཏིཀཐཱཡཾ སནྡྷཱརིཏཏྟཱཏི ཚིནྣསྶ རུཀྑསྶ པཏིཏུཾ ཨཱརདྡྷསྶ སནྡྷཱརཎམཏྟེན ཝུཏྟཾ, ན པན མརིཙཝལླིཨཱདཱིཧི པུབྦེ ཝེཋེཏྭཱ ཋིཏབྷཱཝེན. ཏཱདིསེ ཧི ཚིནྣེཔི ཨཝཧཱརོ ནཏྠི ཨརཉྙཊྛཀཐཱཡཾ ཝེཋིཏཝལླིཡཾ ཝིཡ. ཨུཛུཀམེཝ ཏིཊྛཏཱིཏི ཨིམིནཱ སབྦསོ ཚིནྡནམེཝ ཝལླིཨཱདཱིཧི ཨསམྦདྡྷསྶ རུཀྑསྶ ཋཱནཱཙཱཝནཾ པུབྦེ ཝིཡ ཨཱཀཱསཱདཱིསུ ཕུཊྛསཀལཔདེསཏོ མོཙནནྟི ཨཱཝེཎིཀམིདྷ ཋཱནཱཙཱཝནཾ དསྶེཏི. ཀེཙི པན ‘‘རུཀྑབྷཱརེན ཀིཉྩིདེཝ བྷསྶིཏྭཱ ཋིཏཏྟཱ ཧོཏིཡེཝ ཋཱནཱཙཱཝན’’ནྟི ཝདནྟི, ཏནྣ, རུཀྑེན ཕུཊྛསྶ སཀལསྶ ཨཱཀཱསཔདེསསྶ པཉྩཧི ཚཧི ཝཱ ཨཱཀཱརེཧི ཨནཏིཀྐམིཏཏྟཱ. ཝཱཏམུཁཾ སོདྷེཏཱིཏི ཡཐཱ ཝཱཏོ ཨཱགནྟྭཱ རུཀྑཾ པཱཏེཏི, ཨེཝཾ ཝཱཏསྶ ཨཱགམནམགྒཾ རུནྡྷིཏྭཱ ཋིཏཱནི སཱཁཱགུམྦཱདཱིནི ཚིནྡིཏྭཱ ཨཔནེནྟོ སོདྷེཏི. མཎྜཱུཀཀཎྚཀཾ ཝཱཏི མཎྜཱུཀཱནཾ ནངྒུཊྛེ ཨགྒཀོཊིཡཾ ཋིཏཀཎྚཀནྟི ཝདནྟི, ཨེཀེ ‘‘ཝིསམཙྪཀཎྚཀ’’ནྟིཔི ཝདནྟི.

ཧརཎཀཀཐཱཝཎྞནཱ

༡༡༡. ཧརཎཀཀཐཱཡཾ ¶ ཧརཎཀནྟི ཝཏྠུསཱམིནཱ ཧརིཡམཱནཾ. སོ ཙ པཱདཾ ཨགྒྷཏི, པཱརཱཛིཀམེཝཱཏི ‘‘ཨནྟཾ ན གཎྷིསྶཱམཱི’’ཏི ཨསལླཀྑིཏཏྟཱ སཱམཉྙཏོ ‘‘གཎྷིསྶཱམི ཨེཏ’’ནྟི སལླཀྑིཏསྶེཝ པཊསྶ ཨེཀདེསཏཱཡ ཏམྤི གཎྷིཏུཀཱམོཝཱཏི པཱརཱཛིཀཾ ཝུཏྟཾ. སབྷཎྜཧཱརཀནྟི སཧབྷཎྜཧཱརཀཾ, སཀཱརཱདེསསྶ ཝིཀཔྤཏྟཱ སཧ སདྡོཝ ཋིཏོ, བྷཎྜཧཱརཀེན སཧ ཏཾ བྷཎྜནྟི ཨཏྠོ. སཱསངྐོཏི ‘‘ཡདི ཨུཔསངྐམིཏྭཱ ¶ བྷཎྜཾ གཎྷིསྶཱམི, ཨཱཝུདྷེན མཾ པཧརེཡྻཱ’’ཏི བྷཡེན སཉྫཱཏཱསངྐོ. ཨེཀམནྟཾ པཊིཀྐམྨཱཏི བྷཡེནེཝ ཨནུཔགནྟྭཱ མགྒཏོ སཡཾ པཊིཀྐམྨ. སནྟཛྫེཏྭཱཏི ཕརུསཝཱཙཱཡ ཙེཝ ཨཱཝུདྷཔརིཝཏྟནཱདིཀཱཡཝིཀཱརེན ཙ སནྟཛྫེཏྭཱ. ཨནཛ྄ཛྷཱཝུཏྠཀནྟི ཨཔརིགྒཧིཏཀཾ. ཨཱལཡེན ཨནདྷིམུཏྟམྤི བྷཎྜཾ ཨནཛ྄ཛྷཱཝུཏྠཀཾ ནཱམ ཧོཏཱིཏི ཨཱཧ ‘‘ཨཱཧརཱཔེནྟེ དཱཏབྦ’’ནྟི, ཨིམིནཱ པཋམཾ པརིཙྩཏྟཱལཡཱནམྤི ཡདི པཙྪཱཔི སཀསཉྙཱ ཨུཔྤཛྫཏི, ཏེསཉྙེཝ ཏཾ བྷཎྜཾ ཧོཏི, བལཀྐཱརེནཱཔི སཀསཉྙཱཡ ཏསྶ གཧཎེ དོསོ ནཏྠི, ཨདདནྟསྶེཝ ཨཝཧཱརོཏི དསྶེཏི. ཡདི པན སཱམིནོ ‘‘པརིཙྩཏྟཾ མཡཱ པཋམཾ, ཨིདཱནི མམ སནྟཀཾ ཝཱ ཨེཏཾ, ནོ’’ཏི ཨཱསངྐཱ ཧོཏི, བལཀྐཱརེན གཧེཏུཾ ན ཝཊྚཏི སཀསཉྙཱབལེནེཝ པུན གཧེཏབྦབྷཱཝསྶ ཨཱཔནྣཏྟཱ. ‘‘ཨདེནྟསྶ པཱརཱཛིཀ’’ནྟི ཝཙནཏོ ཙོརསྶ སཀསཉྙཱཡ ཝིཛྫམཱནཱཡཔི སཱམིཀེསུ སཱལཡེསུ ཨདཱཏུཾ ན ཝཊྚཏཱིཏི དཱིཔིཏཾ ཧོཏི. ཨཉྙེསཱུཏི མཧཱཔཙྩརིཡཱདཱིསུ. ཝིཙཱརཎཱཡེཝ ནཏྠཱིཏི ཨིམིནཱ ཏཏྠཱཔི པཊིཀྑེཔཱབྷཱཝཏོ ཨཡམེཝ ཨཏྠོཏི དསྶེཏི.

ཨུཔནིདྷིཀཐཱཝཎྞནཱ

༡༡༢. ཨུཔནིདྷིཀཐཱཡཾ སངྒོཔནཏྠཱཡ ཨཏྟནོ ཧཏྠེ ནིཀྑིཏྟསྶ བྷཎྜསྶ གུཏྟཊྛཱནེ པཊིསཱམནཔྤཡོགཾ ཝིནཱ ནཱཧཾ གཎྷཱམཱིཏིཨཱདིནཱ ཨཉྙསྨིཾ པཡོགེ ཨཀཏེ རཛྫསངྑོབྷཱདིཀཱལེ ‘‘ན དཱནི ཏསྶ དསྶཱམི, ན མཡ྄ཧཾ དཱནི དསྶཏཱི’’ཏི ཨུབྷོཧིཔི སཀསཀཊྛཱནེ ནིསཱིདིཏྭཱ དྷུརནིཀྑེཔེ ཀཏེཔི ཨཝཧཱརོ ནཏྠི. ཀེཙི པནེཏྠ ‘‘པཱརཱཛིཀམེཝ པཊིསཱམནཔྤཡོགསྶ ཀཏཏྟཱ’’ཏི ཝདནྟི, ཏཾ ཏེསཾ མཏིམཏྟཾ, ན སཱརཏོ པཙྩེཏབྦཾ. པཊིསཱམནཀཱལེ ཧིསྶ ཐེཡྻཙིཏྟཾ ནཏྠི, ‘‘ན དཱནི ཏསྶ དསྶཱམཱི’’ཏི ཐེཡྻཙིཏྟུཔྤཏྟིཀྑཎེ པན སཱམིནོ དྷུརནིཀྑེཔཙིཏྟུཔྤཏྟིཡཱ ཧེཏུབྷཱུཏོ ཀཱཡཝཙཱིཔཡོགོ ནཏྠི, ཡེན སོ ཨཱཔཏྟིཾ ཨཱཔཛྫེཡྻ. ན ཧི ཨཀིརིཡསམུཊྛཱནཱཡཾ ཨཱཔཏྟཱིཏི. དཱནེ སཨུསྶཱཧོ, རཀྑཏི ཏཱཝཱཏི ཨཝཧཱརཾ སནྡྷཱཡ ཨཝུཏྟཏྟཱ ནཱཧཾ གཎྷཱམཱིཏིཨཱདིནཱ མུསཱཝཱདཀརཎེ པཱཙིཏྟིཡམེཝ ཧོཏི, ན དུཀྐཊཾ ¶ ཐེཡྻཙིཏྟཱབྷཱཝེན སཧཔཡོགསྶཱཔི ཨབྷཱཝཏོཏི གཧེཏབྦཾ. ཡདིཔི མུཁེན དསྶཱམཱིཏི ཝདཏི…པེ… པཱརཱཛིཀནྟི ཨེཏྠ ཀཏརཔཡོགེན ཨཱཔཏྟི, ན ཏཱཝ པཋམེན བྷཎྜཔཊིསཱམནཔྤཡོགེན ཏདཱ ཐེཡྻཙིཏྟཱབྷཱཝཱ, ནཱཔི ‘‘དསྶཱམཱི’’ཏི ¶ ཀཐནཔྤཡོགེན ཏདཱ ཐེཡྻཙིཏྟེ ཝིཛྫམཱནེཔི པཡོགསྶ ཀཔྤིཡཏྟཱཏི? ཝུཙྩཏེ – སཱམིནཱ ‘‘དེཧཱི’’ཏི བཧུསོ ཡཱཙིཡམཱནོཔི ཨདཏྭཱ ཡེན པཡོགེན ཨཏྟནོ ཨདཱཏུཀཱམཏཾ སཱམིཀསྶ ཉཱཔེཏི, ཡེན ཙ སོ ‘‘ཨདཱཏུཀཱམོ ཨཡཾ ཝིཀྑིཔཏཱི’’ཏི ཉཏྭཱ དྷུརཾ ནིཀྑིཔཏི, ཏེནེཝ པཡོགེནསྶ ཨཱཔཏྟི. ན ཧེཏྠ ཨུཔནིཀྑིཏྟབྷཎྜེ པརིཡཱཡེན མུཏྟི ཨཏྠི. ཨདཱཏུཀཱམཏཱཡ ཧི ཀདཱ ཏེ དིནྣཾ, ཀཏྠ ཏེ དིནྣནྟིཨཱདིཔརིཡཱཡཝཙནེནཱཔི སཱམིཀསྶ དྷུརེ ནིཀྑིཔཱཔིཏེ ཨཱཔཏྟིཡེཝ. ཏེནེཝ ཨཊྛཀཐཱཡཾ ཝུཏྟཾ – ‘‘ཀིཾ ཏུམྷེ བྷཎཐ…པེ… ཨེཝཾ ཨུབྷིནྣཾ དྷུརནིཀྑེཔེན བྷིཀྑུནོ པཱརཱཛིཀ’’ནྟི (པཱརཱ. ཨཊྛ. ༡.༡༡༡). པརསནྟཀསྶ པརེཧི གཎྷཱཔནེ ཨེཝ པརིཡཱཡཏོ མུཏྟི, ན སབྦཏྠཱཏི གཧེཏབྦཾ. ཨཏྟནོ ཧཏྠེ ནིཀྑིཏྟཏྟཱཏི ཨེཏྠ ཨཏྟནོ ཧཏྠེ སཱམིནཱ དིནྣཏཱཡ བྷཎྜཱགཱརིཀཊྛཱནེ ཋིཏཏྟཱ ཙ ཋཱནཱཙཱཝནེཔི ནཏྠི ཨཝཧཱརོ, ཐེཡྻཙིཏྟེན པན གཧཎེ དུཀྐཊཏོ ན མུཙྩཏཱིཏི ཝེདིཏབྦཾ.

ཨེསེཝ ནཡོཏི ཨུདྡྷཱརེཡེཝ ཙོརསྶ པཱརཱཛིཀཾ, ཀསྨཱ? ཨཉྙེཧི སཱདྷཱརཎསྶ ཨབྷིཉྙཱཎསྶ ཝུཏྟཏྟཱ. ཨཉྙཾ ཏཱདིསམེཝ གཎྷནྟེ ཡུཛྫཏཱིཏི སཉྙཱཎཏོ ཨོཀཱསཏོ ཙ ཏེན སདིསམེཝ ཨཉྙཾ གཎྷནྟེ ཡུཛྫཏི, ཙོརེན སལླཀྑིཏཔྤདེསཏོ ཏཾ ཨཔནེཏྭཱ ཀེཧིཙི ཏཏྠ ཏཱདིསེ ཨཉྙསྨིཾ པཏྟེ ཋཔིཏེ ཏཾ གཎྷནྟེཡེཝ ཡུཛྫཏཱིཏི ཨདྷིཔྤཱཡོ, ཏེན ཙོརེན དིཝཱ སལླཀྑིཏཔཏྟཾ ཨཉྙཏྠ ཨཔནེཏྭཱ ཏདཉྙེ ཏཱདིསེ པཏྟེ ཏཏྠ ཋཔིཏེཔི ཙོརསྶ པཙྪཱ རཏྟིབྷཱགེ ཨུཔྤཛྫམཱནཾ ཐེཡྻཙིཏྟཾ དིཝཱ སལླཀྑིཏཔྤདེསེ ཋཔིཏཾ ཨཉྙཾ ཏཱདིསཾ པཏྟམེཝ ཨཱལམྦིཏྭཱ ཨུཔྤཛྫཏཱིཏི དསྶིཏཾ ཧོཏི. པདཝཱརེནཱཏི ཐེརེན ནཱིཧརིཏྭཱ དིནྣཾ པཏྟཾ གཧེཏྭཱ གཙྪཏོ ཙོརསྶ པདཝཱརེན. ཨཏཱདིསམེཝ གཎྷནྟེ ཡུཛྫཏཱིཏི ཨཏཱདིསསྶ ཐེརེན གཧཎཀྑཎེ ཨཝཧཱརཱབྷཱཝཏོ པཙྪཱ ཧཏྠཔཏྟཾ ‘‘ཏ’’ནྟི ཝཱ ‘‘ཨཉྙ’’ནྟི ཝཱ སཉྙཱཡ ‘‘ཨིདཾ གཧེཏྭཱ གཙྪཱམཱི’’ཏི གམནེ པདཝཱརེནེཝ ཨཝཧཱརོ ཡུཛྫཏཱིཏི ཨདྷིཔྤཱཡོ.

པཱརཱཛིཀཾ ནཏྠཱིཏི པདཝཱརེཔི པཱརཱཛིཀཾ ནཏྠི ཨུཔནིདྷིབྷཎྜེ ཝིཡཱཏི གཧེཏབྦཾ. གཱམདྭཱརནྟི བཧིགཱམེ ཝིཧཱརསྶ པཏིཊྛིཏཏྟཱ གཱམཔྤཝེསསྶ ཨཱརམྦྷཔྤདེསདསྶནཝསེན ཝུཏྟཾ, ཨནྟོགཱམནྟི ཨཏྠོ. དྭིནྣམྤི ཨུདྡྷཱརེཡེཝ ¶ པཱརཱཛིཀནྟི ཐེརསྶ ཨབྷཎྜཱགཱརིཀཏྟཱ ཝུཏྟཾ. ཡདི ཧི སོ བྷཎྜཱགཱརིཀོ བྷཝེཡྻ, སབྦམྤི ཨུཔནིཀྑིཏྟམེཝ སིཡཱ, ཨུཔནིཀྑིཏྟབྷཎྜེ ཙ ཐེཡྻཙིཏྟེན གཎྷཏོཔི ན ཏཱཝ ཐེརསྶ ཨཝཧཱརོ ཧོཏི, ཙོརསྶེཝ ཨཝཧཱརོ. ཨུབྷིནྣམྤི དུཀྐཊནྟི ¶ ཐེརསྶ ཨཏྟནོ སནྟཀཏཱཡ ཙོརསྶ སཱམིཀེན དིནྣཏྟཱ ཨཝཧཱརོ ན ཛཱཏོ, ཨུབྷིནྣམྤི ཨསུདྡྷཙིཏྟེན གཧིཏཏྟཱ དུཀྐཊནྟི ཨཏྠོ.

ཨཱཎཏྟིཡཱ གཧིཏཏྟཱཏི ‘‘པཏྟཙཱིཝརཾ གཎྷཱ’’ཏི ཨེཝཾ ཐེརེན ཀཏཨཱཎཏྟིཡཱ གཧིཏཏྟཱ. ཨཊཝིཾ པཝིསཏི, པདཝཱརེན ཀཱརེཏབྦོཏི ‘‘པཏྟཙཱིཝརཾ གཎྷ, ཨསུཀཾ ནཱམ གཱམཾ གནྟྭཱ པིཎྜཱཡ ཙརིསྶཱམཱ’’ཏི ཐེརེན ཝིཧཱརཏོ པཊྛཱཡ གཱམམགྒེཔི སཀལེཔི གཱམེ ཝིཙརཎསྶ ནིཡམིཏཏྟཱ མགྒཏོ ཨོཀྐམྨ གཙྪནྟསྶེཝ པདཝཱརེན ཨཱཔཏྟི ཝུཏྟཱ. ཝིཧཱརསྶ ཧི པརབྷཱགེ ཨུཔཙཱརཏོ པཊྛཱཡ ཡཱཝ ཏསྶ གཱམསྶ པརཏོ ཨུཔཙཱརོ, ཏཱཝ སབྦཾ དཧརསྶ ཐེརཱཎཏྟིཡཱ སཉྩརཎཱུཔཙཱརོཝ ཧོཏི, ན པན ཏཏོ པརཾ. ཏེནེཝ ‘‘ཨུཔཙཱརཱཏིཀྐམེ པཱརཱཛིཀཾ. གཱམཱུཔཙཱརཱཏིཀྐམེ པཱརཱཛིཀ’’ནྟི ཙ ཝུཏྟཾ. པཊིནིཝཏྟནེ ཙཱིཝརདྷོཝནཱདིཨཏྠཱཡ པེསནེཔི ཨེསེཝ ནཡོ. ཨཊྛཏྭཱ ཨནིསཱིདིཏྭཱཏི ཨེཏྠ ཝིཧཱརཾ པཝིསིཏྭཱ སཱིསཱདཱིསུ བྷཱརཾ བྷཱུམིཡཾ ཨནིཀྑིཔིཏྭཱ ཏིཊྛནྟོ ཝཱ ནིསཱིདནྟོ ཝཱ ཝིསྶམིཏྭཱ ཐེཡྻཙིཏྟེ ཝཱུཔསནྟེ པུན ཐེཡྻཙིཏྟཾ ཨུཔྤཱདེཏྭཱ གཙྪཏི ཙེ, པཱདུདྡྷཱརེན ཀཱརེཏབྦོ. སཙེ བྷཱུམིཡཾ ནིཀྑིཔིཏྭཱ པུན ཏཾ གཧེཏྭཱ གཙྪཏི, ཨུདྡྷཱརེན ཀཱརེཏབྦོ. ཀསྨཱ? ཨཱཎཱཔཀསྶ ཨཱཎཏྟིཡཱ ཡཾ ཀཏྟབྦཾ, ཏསྶ ཏཱཝཏཱ པརིནིཊྛིཏཏྟཱ. ‘‘ཨསུཀཾ ནཱམ གཱམ’’ནྟི ཨནིཡམེཏྭཱ ‘‘ཨནྟོགཱམཾ གམིསྶཱམཱ’’ཏི ཨཝིསེསེན ཝུཏྟེ ཝིཧཱརསཱམནྟཱ པུབྦེ པིཎྜཱཡ པཝིཊྛཔུབྦཱ སབྦེ གོཙརགཱམཱཔི ཁེཏྟམེཝཱཏི ཝདནྟི. སེསནྟི མགྒུཀྐམནཝིཧཱརཱབྷིམུཁགམནཱདི སབྦཾ. པུརིམསདིསམེཝཱཏི ཨནཱཎཏྟིཡཱ གཧིཏེཔི སཱམིཀསྶ ཀཐེཏྭཱ གཧིཏཏྟཱ ཧེཊྛཱ ཝུཏྟཝིཧཱརཱུཔཙཱརཱདི སབྦཾ ཁེཏྟམེཝཱཏི ཀཏྭཱ ཝུཏྟཾ. ཨེསེཝ ནཡོཏི ཨནྟརཱམགྒེ ཐེཡྻཙིཏྟཾ ཨུཔྤཱདེཏྭཱཏིཨཱདིནཱ (པཱརཱ. ཨཊྛ. ༡.༡༡༢) ཝུཏྟཾ ནཡཾ ཨཏིདིསཏི.

ནིམིཏྟེ ཝཱ ཀཏེཏི ཙཱིཝརཾ མེ ཀིལིཊྛཾ, ཀོ ནུ ཁོ རཛིཏྭཱ དསྶཏཱིཏིཨཱདིནཱ ནིམིཏྟེ ཀཏེ. ཝུཏྟནཡེནེཝཱཏི ཨནཱཎཏྟསྶ ཐེརེན ¶ སདྡྷིཾ པཏྟཙཱིཝརཾ གཧེཏྭཱ གམནཝཱརེ ཝུཏྟནཡེནེཝ. ཨེཀཔསྶེཏི ཝིཧཱརསྶ མཧནྟཏཱཡ ཨཏྟཱནཾ ཨདསྶེཏྭཱ ཨེཀསྨིཾ པསྶེ. ཐེཡྻཙིཏྟེན པརིབྷུཉྫནྟོ ཛཱིརཱཔེཏཱིཏི ཐེཡྻཙིཏྟེ ཨུཔྤནྣེ ཋཱནཱཙཱཝནཾ ཨཀཏྭཱ ནིཝཏྠཔཱརུཏནཱིཧཱརེནེཝ པརིབྷུཉྫནྟོ ཛཱིརཱཔེཏི, ཋཱནཱ ཙཱཝེནྟསྶ པན ཐེཡྻཙིཏྟེ སཏི པཱརཱཛིཀམེཝ སཱིསེ བྷཱརཾ ཁནྡྷེ ཀརཎཱདཱིསུ ཝིཡ (པཱརཱ. ༡༠༡). ཡཐཱ ཝཱ ཏཐཱ ཝཱ ནསྶཏཱིཏི ཨགྒིཨཱདིནཱ ནསྶཏི, ཨཉྙོ ཝཱ ཀོཙཱིཏི ཨིམིནཱ ཡེན ཋཔིཏཾ, སོཔི སངྒཧིཏོཏི ཝེདིཏབྦཾ.

ཨིཏརསྶཱཏི ¶ ཙོརསྶ. ཨིཏརཾ གཎྷཏོ ཨུདྡྷཱརེ པཱརཱཛིཀནྟི ཨེཏྠ ‘‘པཝིསིཏྭཱ ཏཝ སཱཊཀཾ གཎྷཱཧཱི’’ཏི ཨིམིནཱཝ ཨུཔནིདྷིབྷཱཝཏོ མོཙིཏཏྟཱ, སཱམིཀསྶ ཨིཏརཾ གཎྷཏོ ཨཏྟནོ སཱཊཀེ ཨཱལཡསྶ སབྦྷཱཝཏོ ཙ ‘‘ཨུདྡྷཱརེ པཱརཱཛིཀ’’ནྟི ཝུཏྟཾ. སཱམིཀོ ཙེ ‘‘མམ སནྟཀཾ ཨིདཾ ཝཱ ཧོཏུ, ཨཉྙཾ ཝཱ, ཀིཾ ཏེན, ཨལཾ མཡ྄ཧཾ ཨིམིནཱ’’ཏི ཨེཝཾ སུཊྛུ ནིརཱལཡོ ཧོཏི, ཙོརསྶ པཱརཱཛིཀཾ ནཏྠཱིཏི གཧེཏབྦཾ. ན ཛཱནནྟཱིཏི ཏེན ཝུཏྟཝཙནཾ ཨསུཎནྟཱ ན ཛཱནནྟི. ཨེསེཝ ནཡོཏི ཨེཏྠ སཙེ ཛཱནིཏྭཱཔི ཙིཏྟེན ན སམྤཊིཙྪནྟི, ཨེསེཝ ནཡོཏི དཊྛབྦཾ. པཊིཀྑིཔནྟཱིཏི ཨེཏྠ ཙིཏྟེན པཊིཀྑེཔོཔི སངྒཧིཏོཝཱཏི ཝེདིཏབྦཾ. ཨུཔཙཱརེ ཝིཛྫམཱནེཏི བྷཎྜཱགཱརསྶ སམཱིཔེ ཨུཙྩཱརཔསྶཱཝཊྛཱནེ ཝིཛྫམཱནེ. མཡི ཙ མཏེ སངྒྷསྶ ཙ སེནཱསནེ ཝིནཊྛེཏི ཨེཏྠ ‘‘ཏཾ མཱརེསྶཱམཱ’’ཏི ཨེཏྟཀེ ཝུཏྟེཔི ཝིཝརིཏུཾ ཝཊྚཏི གིལཱནཔཀྑེ ཋིཏཏྟཱ ཨཝིསཡོཏི ཝུཏྟཏྟཱ. མརཎཏོ ཧི པརཾ གེལཉྙཾ ཨཝིསཡཏྟཉྩ ནཏྠི. ‘‘དྭཱརཾ ཚིནྡིཏྭཱ པརིཀྑཱརཾ ཧརིསྶཱམཱ’’ཏི ཨེཏྟཀེ ཝུཏྟེཔི ཝིཝརིཏུཾ ཝཊྚཏིཡེཝ. སཧཱཡེཧི བྷཝིཏབྦནྟི ཏེཧིཔི བྷིཀྑཱཙཱརཱདཱིཧི པརིཡེསིཏྭཱ ཨཏྟནོ སནྟཀེཔི ཀིཉྩི ཀིཉྩི དཱཏབྦནྟི ཝུཏྟཾ ཧོཏི. ཨཡཾ སཱམཱིཙཱིཏི བྷཎྜཱགཱརེ ཝསནྟཱནཾ ཨིདཾ ཝཏྟཾ.

ལོལམཧཱཐེརོཏི མནྡོ མོམཱུཧོ ཨཱཀིཎྞཝིཧཱརཱི. ཨིཏརེཧཱིཏི ཏསྨིཾཡེཝ གབྦྷེ ཝསནྟེཧི ཨིཏརབྷིཀྑཱུཧི. ཝིཧཱརརཀྑཎཝཱརེ ནིཡུཏྟོ ཝིཧཱརཝཱརིཀོ, ཝུཌྜྷཔཊིཔཱཊིཡཱ ཨཏྟནོ ཝཱརེ ཝིཧཱརརཀྑཎཀོ. ནིཝཱཔནྟི བྷཏྟཝེཏནཾ. ཙོརཱནཾ པཊིཔཐཾ གཏེསཱུཏི ཙོརཱནཾ ཨཱགམནཾ ཉཏྭཱ ‘‘པཋམཏརཉྙེཝ གནྟྭཱ སདྡཾ ཀརིསྶཱམཱ’’ཏི ཙོརཱནཾ ཨབྷིམུཁཾ ¶ གཏེསུ, ‘‘ཙོརེཧི ཧཊབྷཎྜཾ ཨཱཧརིསྶཱམཱ’’ཏི ཏདནུཔཐཾ གཏེསུཔི ཨེསེཝ ནཡོ. ནིབདྡྷཾ ཀཏྭཱཏི ‘‘ཨསུཀཀུལེ ཡཱགུབྷཏྟཾ ཝིཧཱརཝཱརིཀཱནཉྙེཝཱ’’ཏི ཨེཝཾ ནིཡམནཾ ཀཏྭཱ. དྭེ ཏིསྶོ ཡཱགུསལཱཀཱ ཙཏྟཱརི པཉྩ སལཱཀབྷཏྟཱནི ཙ ལབྷམཱནོཝཱཏི ཨིདཾ ནིདསྶནམཏྟཾ, ཏཏོ ཨཱུནཾ ཝཱ ཧོཏུ ཨདྷིཀཾ ཝཱ ཨཏྟནོ ཝེཡྻཱཝཙྩཀརསྶ ཙ ཡཱཔནམཏྟཾ ལབྷནམེཝ པམཱཎནྟི གཧེཏབྦཾ. ནིསྶིཏཀེ ཛགྒེནྟཱིཏི ཏེཧི ཝིཧཱརཾ ཛགྒཱཔེནྟཱིཏི ཨཏྠོ. ཨསཧཱཡཀསྶཱཏི སཧཱཡརཧིཏསྶ. ཨཏྟདུཏིཡསྶཱཏི ཨཔྤིཙྪསྶ ཨཏྟཱ སརཱིརམེཝ དུཏིཡོ ཨསྶ ནཱཉྙོཏི ཨཏྟདུཏིཡོ. ཏདུབྷཡསྶཱཔི ཨཏྠསྶ ཝིབྷཱཝནཾ ཡསྶཱཏིཨཱདི, ཨེཏེན སབྦེན ཨེཀེཀསྶ ཝཱརོ ན པཱཔེཏབྦོཏི དསྶིཏནྟི ཝེདིཏབྦཾ. པཱཀཝཏྟཏྠཱཡཱཏི ནིཙྩཾ པཙིཏབྦཡཱགུབྷཏྟསངྑཱཏཝཏྟཏྠཱཡ. ཋཔེནྟཱིཏི དཱཡཀཱ ཋཔེནྟི. ཏཾ གཧེཏྭཱཏི ཏཾ ཨཱརཱམིཀཱདཱིཧི དིཡྻམཱནཾ བྷཱགཾ གཧེཏྭཱ. ན གཱཧཱཔེཏབྦོཏི ཨེཏྠ ཨབྦྷོཀཱསིཀསྶཱཔི ཨཏྟནོ ཨདྷིཀཔརིཀྑཱརོ ཝཱ ཋཔིཏོ ཨཏྠི, ཙཱིཝརཱདིསངྒྷིཀབྷཱགེཔི ཨཱལཡོ ཝཱ ཨཏྠི, སོཔི གཱཧཱཔེཏབྦོཝ. དིགུཎནྟི ཨཉྙེཧི ལབྦྷམཱནཏོ དིགུཎཾ. པཀྑཝཱརེནཱཏི ཨཌྜྷམཱསཝཱརེན.

སུངྐགྷཱཏཀཐཱཝཎྞནཱ

༡༡༣. སུངྐགྷཱཏཀཐཱཡཾ ¶ སུངྐཾ ཡཏྠ རཱཛཔུརིསཱ ཧནནྟི ཨདདནྟཱནཾ སནྟཀཾ ཨཙྪིནྡིཏྭཱཔི གཎྷནྟི, ཏཾ ཋཱནཾ སུངྐགྷཱཏནྟི ཨེཝམྤི ཨཏྠོ དཊྛབྦོ. ཝུཏྟམེཝཏྠཾ པཱཀཊཾ ཀཱཏུཾ ཏཉྷཱིཏིཨཱདི ཝུཏྟཾ. དུཏིཡཾ པཱདཾ ཨཏིཀྐཱམེཏཱིཏི ཨེཏྠ པཋམཔཱདཾ པརིཙྪེདཏོ བཧི ཋཔེཏྭཱ དུཏིཡཔཱདེ ཨུདྡྷཊམཏྟེ པཱརཱཛིཀཾ. ཨུདྡྷརིཏྭཱ བཧི ཨཊྛཔིཏེཔི བཧི ཋིཏོ ཨེཝ ནཱམ ཧོཏཱིཏི ཀཏྭཱ ཨེཝཾ སབྦཏྠ པདཝཱརེསུཔཱིཏི དཊྛབྦཾ. པརིཝཏྟིཏྭཱ ཨབྦྷནྟརིམཾ བཧི ཋཔེཏི, པཱརཱཛིཀནྟི ཨིདཾ སཡཾ བཧི ཋཏྭཱ པཋམཾ ཨབྦྷནྟརིམཾ ཨུཀྑིཔིཏྭཱ ཝཱ སམཀཾ ཨུཀྑིཔིཏྭཱ ཝཱ པརིཝཏྟནཾ སནྡྷཱཡ ཝུཏྟཾ. བཧི ཋཏྭཱ ཨུཀྑིཏྟམཏྟེ ཧི སབྦཾ བཧིགཏམེཝ ཧོཏཱིཏི. སཙེ པན སོ བཧི ཋཏྭཱཔི བཱཧིརཔུཊཀཾ པཋམཾ ཨནྟོ ཋཔེཏྭཱ པཙྪཱ ཨབྦྷནྟརིམཾ ཨུཀྑིཔིཏྭཱ བཧི ཋཔེཏི, ཏདཱཔི ཨེཀཱབདྡྷཏཱཡ ཨཝིཛཧིཏཏྟཱ ཨཝཧཱརོ ན དིསྶཏི. ཀེཙི པན ‘‘བྷཱུམིཡཾ པཏིཏྭཱ ཝཏྟནྟཾ པུན ཨནྟོ པཝིསཏི, པཱརཱཛིཀམེཝཱཏི (པཱརཱ. ཨཊྛ. ༡.༡༡༣) ཝུཏྟཏྟཱ བཱཧིརཔུཊཀེ ¶ ཨནྟོཔཝིཊྛེཔི བཧིགཏབྷཱཝཏོ ན མུཙྩཏི, ཨནྟོགཏཾ པན པུཊཀཾ པཋམཾ, པཙྪཱ ཨེཝ ཝཱ བཧི ཋཔིཏམཏྟེ ཝཱ པཱརཱཛིཀམེཝཱ’’ཏི ཝདནྟི, ཏཾ ན ཡུཏྟཾ. བཧི བྷཱུམིཡཾ པཱཏིཏསྶ ཀེནཙི སདྡྷིཾ ཨེཀཱབདྡྷཏཱཡ ཨབྷཱཝེན ཨནྟོཔཝིཊྛེཔི པཱརཱཛིཀམེཝཱཏི ཝཏྟུཾ ཡུཏྟཾ, ཨིདཾ པན ཨེཀཱབདྡྷཏྟཱ ཏེན སདྡྷིཾ ན སམེཏི. ཏསྨཱ ཡཐཱ ཨནྟོབྷཱུམིགཏེན ཨེཀཱབདྡྷཏཱ ན ཧོཏི, ཨེཝཾ ཨུབྷཡསྶཱཔི བཧིགཏབྷཱཝེ སཱདྷིཏེཡེཝ ཨཝཧཱརོཏི ཝིཉྙཱཡཏི, ཝཱིམཾསིཏྭཱ གཧེཏབྦཾ. ཡེ པན པརིཝཏྟིཏྭཱཏི ཨིམསྶ ནིཝཏྟིཏྭཱཏི ཨཏྠཾ ཝདནྟི, ཏེཧི པན ཨབྦྷནྟརིམཾ བཧི ཋཔེཏཱིཏི ཨཡམཏྠོ གཧིཏོ ཧོཏཱིཏི ཏཏྠ སངྐཱཡེཝ ནཏྠི. ཨེཀཱབདྡྷནྟི ཀཱཛཀོཊིཡཾ རཛྫུཡཱ བནྡྷནཾ སནྡྷཱཡ ཝུཏྟཾ. ཨབནྡྷིཏྭཱ ཀཱཛཀོཊིཡཾ ཋཔིཏམཏྟམེཝ ཧོཏི, པཱརཱཛིཀནྟི བཧི གཧིཏཀཱཛཀོཊིཡཾ ཋཔིཏཾ ཡདི པཱདཾ ཨགྒྷཏི, པཱརཱཛིཀམེཝ, ཨནྟོཋཔིཏེན ཨེཀཱབདྡྷཏཱཡ ཨབྷཱཝཱཏི ཨདྷིཔྤཱཡོ. གཙྪནྟེ ཡཱནེ ཝཱ…པེ… ཋཔེཏཱིཏི སུངྐགྷཱཏཾ པཝིསིཏྭཱ ཨཔྤཝིསིཏྭཱ ཝཱ ཋཔེཏི. སུངྐཊྛཱནསྶ བཧི ཋིཏནྟི ཡཱནཱདཱིཧི ནཱིཧཊཏྟཱ བཧི ཋིཏཾ. ཀེཙི པན ‘‘བཧི ཋཔིཏ’’ནྟི པཱཋཾ ཝིཀཔྤེཏྭཱ སུངྐཊྛཱནཏོ པུབྦེཝ བཧི ཋཔིཏནྟི ཨཏྠཾ ཝདནྟི, ཏཾ ན སུནྡརཾ; སུངྐཊྛཱནེ པཝིསིཏྭཱ ཡཱནེ ཋཔིཏེཔི པཝཏྟིཏྭཱ གཏེ ཝིཡ དོསཱབྷཱཝཏོ. ཡོ པན སུངྐཊྛཱནསྶ ཨནྟོཝ པཝིསིཏྭཱ ‘‘སུངྐཊྛཱན’’ནྟི ཉཏྭཱ ཐེཡྻཙིཏྟེན ཨཱགཏམགྒེན པཊིནིཝཏྟིཏྭཱ གཙྪཏི, ཏསྶཱཔི ཡདི ཏེན དིསཱབྷཱགེན གཙྪནྟཱནམྤི ཧཏྠཏོ སུངྐཾ གཎྷནྟི, པཱརཱཛིཀམེཝ. ཨིམསྨིཾ ཋཱནེཏི ཡཱནཱདཱིཧི ནཱིཧརཎེ. ཏཏྲཱཏི ཏསྨིཾ ཨེལ༹ཀལོམསིཀྑཱཔདེ (པཱརཱ. ༥༧༡ ཨཱདཡོ).

པཱཎཀཐཱཝཎྞནཱ

༡༡༤. པཱཎཀཐཱཡཾ ¶ ཨཱཋཔིཏོཏི མཱཏཱཔིཏཱུཧི ཨིཎཾ གཎྷནྟེཧི ‘‘ཡཱཝ ཨིཎདཱནཱ ཨཡཾ ཏུམྷཱཀཾ སནྟིཀེ ཧོཏཱུ’’ཏི ཨིཎདཱཡཀཱནཾ ནིཡྻཱཏིཏོ. ཨཝཧཱརོ ནཏྠཱིཏི མཱཏཱཔིཏཱུཧི པུཏྟསྶ ཨཔརིཙྩཏྟཏྟཱ མཱཏཱཔིཏཱུནཉྩ ཨསནྟཀཏྟཱ ཨཝཧཱརོ ནཏྠི. དྷནཾ པན གཏཊྛཱནེ ཝཌྜྷཏཱིཏི ཨིམིནཱ ཨཱཋཔེཏྭཱ གཧིཏདྷནཾ ཝཌྜྷིཡཱ སཧ ཨཱཋཔིཏཔུཏྟཧཱརཀསྶ གཱིཝཱཏི དསྶིཏནྟི ཝདནྟི. དཱསསྶ ཛཱཏོཏི ཨུཀྐཊྛལཀྑཎཾ དསྶེཏུཾ ཝུཏྟཾ. དཱསིཀུཙྪིཡཾ པན ཨདཱསསྶ ཛཱཏོཔི ཨེཏྠེཝ སངྒཧིཏོ ¶ . པརདེསཏོ པཧརིཏྭཱཏི པརདེསཝིལུམྤཀེཧི རཱཛཙོརཱདཱིཧི པཧརིཏྭཱ. སུཁཾ ཛཱིཝཱཏི ཝདཏཱིཏི ཐེཡྻཙིཏྟེན སཱམིཀཱནཾ སནྟིཀཏོ པལཱཔེཏུཀཱམཏཱཡ ཝདཏི, ཏཐཱ པན ཨཙིནྟེཏྭཱ ཀཱརུཉྙེན ‘‘སུཁཾ གནྟྭཱ ཛཱིཝཱ’’ཏི ཝདནྟསྶ ནཏྠི ཨཝཧཱརོ, གཱིཝཱ པན ཧོཏི. དུཏིཡཔདཝཱརེཏི ཡདི དུཏིཡཔདཾ ཨཝསྶཾ ཨུདྡྷརིསྶཏི, བྷིཀྑུསྶ ‘‘པལཱཡིཏྭཱ སུཁཾ ཛཱིཝཱ’’ཏི ཝཙནཀྑཎེཡེཝ པཱརཱཛིཀཾ. ཨནཱཔཏྟི པཱརཱཛིཀསྶཱཏི ཏསྶ ཝཙནེན ཝེགཝཌྜྷནེ ཨཀཏེཔི དུཀྐཊཱ ན མུཙྩཏཱིཏི དསྶེཏི. ‘‘ཨདིནྣཾ ཐེཡྻསངྑཱཏཾ ཨཱདིཡེཡྻཱ’’ཏི (པཱརཱ. ༨༩, ༩༡) ཨཱདཱནསྶེཝ ཝུཏྟཏྟཱ ཝུཏྟཔརིཡཱཡེན མུཙྩཏཱིཏི.

ཙཏུཔྤདཀཐཱཝཎྞནཱ

༡༡༧. ཙཏུཔྤདཀཐཱཡཾ པཱལི༹ཡཾ ཨཱགཏཱཝསེསཱཏི པཱལི༹ཡཾ ཨཱགཏེཧི ཧཏྠི ཨཱདཱིཧི ཨཉྙེ པསུ-སདྡསྶ སབྦསཱདྷཱརཎཏྟཱ. བྷིངྐཙྪཱཔནྟི ‘‘བྷིངྐཱ བྷིངྐཱ’’ཏི སདྡཱཡནཏོ ཨེཝཾ ལདྡྷནཱམཾ ཧཏྠིཔོཏཀཾ. ཨནྟོཝཏྠུམྷཱིཏི པརིཀྑིཏྟེ. བཧིནགརེ ཋིཏསྶཱཏི པརིཀྑིཏྟནགརཾ སནྡྷཱཡ ཝུཏྟཾ, ཨཔརིཀྑིཏྟནགརེ པན ཨནྟོནགརེ ཋིཏསྶཱཔི ཋིཏཊྛཱནམེཝ ཋཱནཾ. ཁཎྜདྭཱརནྟི ཨཏྟནཱ ཁཎྜིཏདྭཱརཾ. ཨེཀོ ནིཔནྣོཏི ཨེཏྠཱཔི བནྡྷོཏི ཨཱནེཏྭཱ སམྦནྡྷིཏབྦཾ, ཏེནཱཧ ‘‘ནིཔནྣསྶ དྭེ’’ཏི. གྷཱཏེཏཱིཏི ཨེཏྠ ཐེཡྻཙིཏྟེན ཝིནཱསེནྟསྶ སཧཔཡོགཏྟཱ དུཀྐཊམེཝཱཏི ཝདནྟི.

ཨོཙརཀཀཐཱཝཎྞནཱ

༡༡༨. ཨོཙརཀཀཐཱཡཾ པརིཡཱཡེན ཧི ཨདིནྣཱདཱནཏོ མུཙྩཏཱིཏི ཨིདཾ ཨཱཎཏྟིཀཔཡོགཾ སནྡྷཱཡ ཝུཏྟཾ, སཡམེཝ པན ཨབྷིཡུཉྫནཱདཱིསུ པརིཡཱཡེནཔི མོཀྑོ ནཏྠི.

ཨོཎིརཀྑཀཐཱཝཎྞནཱ

ཨོཎིརཀྑཀཐཱཡཾ ¶ ཨོཎིནྟི ཨོཎཱིཏཾ, ཨཱནཱིཏནྟི ཨཏྠོ. ཨོཎིརཀྑསྶ སནྟིཀེ ཋཔིཏབྷཎྜཾ ཨུཔནིདྷི (པཱརཱ. ༡༡༢) ཝིཡ གུཏྟཊྛཱནེ ཋཔེཏྭཱ སངྒོཔནཏྠཱཡ ཨནིཀྑིཔིཏྭཱ ཡཐཱཋཔིཏཊྛཱནེ ཨེཝ མུཧུཏྟམཏྟཾ ཨོལོཀནཏྠཱཡ ཋཔིཏཏྟཱ ཏསྶ བྷཎྜསྶ ཋཱནཱཙཱཝནམཏྟེན ཨོཎིརཀྑཀསྶ པཱརཱཛིཀཾ ཧོཏི.

སཾཝིདཱཝཧཱརཀཐཱཝཎྞནཱ

སཾཝིདཱཝཧཱརཀཐཱཡཾ ¶ སཾཝིདྷཱཡཱཏི སཾཝིདཧིཏྭཱ. ཏེན ནེསཾ དུཀྐཊཱཔཏྟིཡོཏི ཨཱཎཏྟིཝསེན པཱརཱཛིཀཱཔཏྟིཡཱ ཨསམྦྷཝེ སཏཱིཏི ཝུཏྟཾ. ཡདི ཧི ཏེན ཨཱཎཏྟཱ ཡཐཱཎཏྟིཝསེན ཧརནྟི, ཨཱཎཏྟིཀྑཎེ ཨེཝ པཱརཱཛིཀཱཔཏྟིཾ ཨཱཔཛྫནྟི. པཱལི༹ཡཾ ‘‘སམྦཧུལཱ སཾཝིདཧིཏྭཱ ཨེཀོ བྷཎྜཾ ཨཝཧརཏི, ཨཱཔཏྟི སབྦེསཾ པཱརཱཛིཀསྶཱ’’ཏི (པཱརཱ. ༡༡༨) ཨེཏྠཱཔི ཨཱཎཱཔཀཱནཾ ཨཱཎཏྟིཀྑཎེཡེཝ ཨཱཔཏྟི, ཨཝཧཱརཀསྶ ཨུདྡྷཱརེཏི གཧེཏབྦོ. སམྦཧུལཱ བྷིཀྑཱུ ཨེཀཾ ཨཱཎཱཔེནྟི ‘གཙྪེཏཾ ཨཱཧརཱ’ཏི, ཏསྶུདྡྷཱརེ སབྦེསཾ པཱརཱཛིཀནྟིཨཱདཱིསུཔི ཨེཝམེཝ ཨཏྠོ གཧེཏབྦོ. སཱཧཏྠིཀཾ ཝཱ ཨཱཎཏྟིཀསྶ ཨཱཎཏྟིཀཾ ཝཱ སཱཧཏྠིཀསྶ ཨངྒཾ ན ཧོཏཱིཏི བྷིནྣཀཱལིཀཏྟཱ ཨཉྙམཉྙསྶ ཨངྒཾ ན ཧོཏི. ཏཐཱ ཧི སཧཏྠཱ ཨཝཧརནྟསྶ ཋཱནཱཙཱཝནཀྑཎེ ཨཱཔཏྟི, ཨཱཎཏྟིཡཱ པན ཨཱཎཏྟིཀྑཎེཡེཝཱཏི བྷིནྣཀཱལིཀཏྟཱ ཨཱཔཏྟིཡོཏི.

སངྐེཏཀམྨཀཐཱཝཎྞནཱ

༡༡༩. སངྐེཏཀམྨཀཐཱཡཾ ཨོཙརཀེ ཝུཏྟནཡེནེཝཱཏི ཨེཏྠ ཨཝསྶཾ ཧཱརིཡེ བྷཎྜེཏིཨཱདིནཱ (པཱརཱ. ཨཊྛ. ༡.༡༡༨) ཝུཏྟནཡེནེཝ. པཱལི༹ཡཾ ‘‘ཏཾ སངྐེཏཾ པུརེ ཝཱ པཙྪཱ ཝཱ’’ཏི ཏསྶ སངྐེཏསྶ པུརེ ཝཱ པཙྪཱ ཝཱཏི ཨཏྠོ. ‘‘ཏཾ ནིམིཏྟཾ པུརེ ཝཱ པཙྪཱ ཝཱ’’ཏི ཨེཏྠཱཔི ཨེསེཝ ནཡོ.

ནིམིཏྟཀམྨཀཐཱཝཎྞནཱ

༡༢༠. ནིམིཏྟཀམྨཀཐཱཡཾ ཨཀྑིནིཁཎནཱདིནིམིཏྟཀམྨཾ པན ལཧུཀཾ ཨིཏྟརཀཱལཾ, ཏསྨཱ ཏངྑཎེཡེཝ ཏཾ བྷཎྜཾ ཨཝཧརིཏུཾ ན སཀྐཱ. ནིམིཏྟཀམྨཱནནྟརམེཝ གཎྷིཏུཾ ཨཱརདྡྷཏྟཱ ཏེནེཝ ¶ ནིམིཏྟེན ཨཝཧརཏཱིཏི ཝུཙྩཏི. ཡདི ཨེཝཾ པུརེབྷཏྟཔྤཡོགོཝ ཨེསོཏི ཝཱདོ པམཱཎབྷཱཝཾ ཨཱཔཛྫཏཱིཏི? ནཱཔཛྫཏི. ན ཧི སངྐེཏཀམྨཾ (པཱརཱ. ༡༡༩) ཝིཡ ནིམིཏྟཀམྨཾ ཀཱལཔརིཙྪེདཡུཏྟཾ. ཀཱལཝསེན ཧི སངྐེཏཀམྨཾ ཝུཏྟཾ, ཀིརིཡཱཝསེན ནིམིཏྟཀམྨནྟི ཨཡམེཝ ཏེསཾ ཝིསེསོ. ‘‘ཏཾ ནིམིཏྟཾ པུརེ ཝཱ པཙྪཱ ཝཱ ཏཾ བྷཎྜཾ ཨཝཧརཏི, མཱུལཊྛསྶ ཨནཱཔཏྟཱི’’ཏི ཨིདཾ པན ནིམིཏྟཀརཎཏོ པུརེ ¶ གཎྷནྟསྶ ཙེཝ ནིམིཏྟཀམྨེ ཙ ཀཏེཔི གཎྷིཏུཾ ཨནཱརབྷིཏྭཱ པཙྪཱ སཡམེཝ གཎྷནྟསྶ ཙ ཝསེན ཝུཏྟཾ.

ཨཱཎཏྟིཀཐཱཝཎྞནཱ

༡༢༡. ཨཱཎཏྟིཀཐཱཡཾ ཨསམྨོཧཏྠནྟི ཡསྨཱ སངྐེཏཀམྨནིམིཏྟཀམྨཱནི ཀརོནྟོ ན ཀེཝལཾ པུརེབྷཏྟཱདིཀཱལསངྐེཏཀམྨཾ ཨཀྑིནིཁཎནཱདིནིམིཏྟཀམྨམེཝ ཝཱ ཀརོཏི, ཨཐ ཁོ ཨེཝཾཝཎྞསཎྛཱནབྷཎྜཾ གཎྷཱཏི, བྷཎྜནིཡམམྤི ཀརོཏི, ཏྭཾ ཨིཏྠནྣཱམསྶ པཱཝད, སོ ཨཉྙསྶ པཱཝདཏཱུཏིཨཱདིནཱ པུགྒལཔཊིཔཱཊིཡཱ ཙ ཨཱཎཱཔེཏི, ཏསྨཱ པུབྦཎྷཱདིཀཱལཝསེན ཨཀྑིནིཁཎནཱདིཀིརིཡཱཝསེན བྷཎྜཔུགྒལཔཊིཔཱཊིཝསེན ཙ ཨཱཎཏྟེ ཨེཏེསུ སངྐེཏཀམྨནིམིཏྟཀམྨེསུ ཝིསངྐེཏཱ ཝིསངྐེཏབྷཱཝེ སམྨོཧོ ཛཱཡཏི, ཏདཔགམེན ཨསམྨོཧཏྠཾ. ཡཾ ཨཱཎཱཔཀེན ནིམིཏྟསཉྙཾ ཀཏྭཱ ཝུཏྟནྟི པུབྦཎྷཱདཱིསུ ཨཀྑིནིཁཎནཱདཱིསུ ཝཱ གཧཎཏྠཾ ཨཱཎཱཔེནྟེན ཨཱིདིསཝཎྞསཎྛཱནཱདིཡུཏྟཾ གཎྷཱཏི ཨེཝཾ གཧཎསྶ ནིམིཏྟབྷཱུཏསཉྙཱཎཾ ཀཏྭཱ ཡཾ བྷཎྜཾ ཝུཏྟཾ. ཨཡཾ ཡུཏྟི སབྦཏྠཱཏི ཧེཊྛཱ ཝུཏྟེསུ ཨུཔརི ཝཀྑམཱནེསུ ཙ སབྦཏྠ ཨཱཎཏྟིཔྤསངྒེསུ ཨཱཎཏྟིཀྑཎེཡེཝ པཱརཱཛིཀཱདཱིནཾ བྷཱཝསངྑཱཏཱ ཝིནཡཡུཏྟི, སཱ ཙ ཨཱཎཏྟསྶ ཀིརིཡཱནིཊྛཱཔནཀྑཎེ ཨཱཎཱཔཀསྶ པཡོགེ ཐེཡྻཙིཏྟཱནཾ ཨབྷཱཝཱ ཨཱཎཏྟིཀྑཎེ ཨེཀཱ ཨེཝ ཨཱཔཏྟི ཧོཏཱིཏི ཨེཝཾ ཨུཔཔཏྟིཡཱ པཝཏྟཏྟཱ ཡུཏྟཱིཏི ཝུཏྟཱ. ‘‘མཱུལཊྛསྶ ཐུལླཙྩཡ’’ནྟི ཝུཏྟཏྟཱ སངྒྷརཀྑིཏེན པཊིགྒཧིཏེཔི བུདྡྷརཀྑིཏདྷམྨརཀྑིཏཱནཾ དུཀྐཊམེཝ, ཀསྨཱ པནེཏྠ ཨཱཙརིཡསྶ ཐུལླཙྩཡནྟི ཨཱཧ ‘‘མཧཱཛནོ ཧཱི’’ཏིཨཱདི. མཧཱཛནོཏི ཙ བུདྡྷརཀྑིཏདྷམྨརཀྑིཏསངྒྷརཀྑིཏེ སནྡྷཱཡ ཝུཏྟཾ. མཱུལཊྛསྶེཝ དུཀྐཊནྟི བུདྡྷརཀྑིཏསྶ དུཀྐཊཾ. ཨིདཉྩ མཱུལཊྛསྶ ཐུལླཙྩཡཱབྷཱཝདསྶནཏྠཾ པཋམཾ ཨཱཎཏྟིཀྑཎེ དུཀྐཊཾ སནྡྷཱཡ ཝུཏྟཾ, ན པན སངྒྷརཀྑིཏསྶ པཊིགྒཧཎཔཙྩཡཱ པུན དུཀྐཊསམྦྷཝཾ སནྡྷཱཡ. ན ཧི སོ ཨེཀཔཡོགེན དུཀྐཊདྭཡཾ ཨཱཔཛྫཏི. ཀེཙི པན ‘‘ཝིསངྐེཏཏྟཱ པཱལི༹ཡཾ ‘མཱུལཊྛསྶཱ’ཏི ཨཝཏྭཱ ‘པཊིགྒཎྷཱཏི, ཨཱཔཏྟི དུཀྐཊསྶཱ’ཏི སཱམཉྙེན ཝུཏྟཏྟཱ ཨིདཾ སངྒྷརཀྑིཏསྶ དུཀྐཊཾ སནྡྷཱཡ ཝུཏྟ’’ནྟི ཝདནྟི, ཏཾ ཀིཉྩཱཔི ཨཊྛཀཐཱཡ ན སམེཏི, པཱལི༹ཏོ པན ཡུཏྟཾ ཝིཡ དིསྶཏི. ན ཧི ཏསྶ པཊིགྒཧཎཔྤཡོགེ ཨནཱཔཏྟི ཧོཏཱིཏི. ཨིམིནཱཝ ཧེཊྛཱ ཨཱགཏཝཱརེསུཔི པཊིགྒཎྷནྟཱནཾ ¶ ¶ དུཀྐཊཾ ཝེདིཏབྦཾ. ‘‘པཎྞེ ཝཱ སིལཱདཱིསུ ཝཱ ‘ཙོརིཡཾ ཀཱཏབྦ’ནྟི ལིཁིཏྭཱ ཋཔིཏེ པཱརཱཛིཀམེཝཱ’’ཏི ཀེཙི ཝདནྟི, ཏཾ པན ‘‘ཨསུཀསྶ གེཧེ བྷཎྜ’’ནྟི ཨེཝཾ ནིཡམེཏྭཱ ལིཁིཏེ ཡུཛྫཏི, ན ཨནིཡམེཏྭཱ ལིཁིཏེཏི ཝཱིམཾསིཏབྦཾ. མགྒཱནནྟརཕལསདིསཱཏི ཨིམིནཱ ཡཐཱ ཨརིཡཔུགྒལཱནཾ མགྒཱནནྟརེ ཕལེ ཨུཔྤནྣེ ཀིལེསཔཊིཔྤསྶདྡྷིཔརིཡོསཱནཾ བྷཱཝནཱཀིཙྩཾ ནིཔྥནྣཾ ནཱམ ཧོཏི, ཨེཝམེཏིསྶཱ ཨཏྠསཱདྷཀཙེཏནཱཡ ཨུཔྤནྣཱཡ ཨཱཎཏྟིཀིཙྩཾ ནིཔྥནྣམེཝཱཏི དསྶེཏི, ཏེནཱཧ ‘‘ཏསྨཱ ཨཡཾ ཨཱཎཏྟིཀྑཎེཡེཝ པཱརཱཛིཀོ’’ཏི, ཨཱཎཏྟིཝཙཱིཔཡོགསམུཊྛཱཔཀཙེཏནཱཀྑཎེཡེཝ པཱརཱཛིཀོ ཧོཏཱིཏི ཨཏྠོ.

ཨཱཎཏྟིཀཐཱཝཎྞནཱནཡོ ནིཊྛིཏོ.

ཨཱཔཏྟིབྷེདཝཎྞནཱ

༡༢༢. ཏཏྠ ཏཏྠཱཏི བྷཱུམཊྛཐལཊྛཱདཱིསུ. པཱལི༹ཡཾ མནུསྶཔརིགྒཧིཏཾ སནྡྷཱཡ ‘‘པརཔརིགྒཧིཏ’’ནྟི ཝུཏྟཾ. ཨཱམསཏི ཕནྡཱཔེཏི ཋཱནཱ ཙཱཝེཏཱིཏི ཨིམེཧི ཏཱིཧི པདེཧི པུབྦཔཡོགསཧིཏཾ པཉྩམཾ ཨཝཧཱརངྒཾ ཝུཏྟཾ, ཋཱནཱ ཙཱཝེཏཱིཏི ཙ ཨིདཾ ཨུཔལཀྑཎམཏྟཾ. ཨཱཎཏྟིཀཱདཡོ སབྦེཔི པཡོགཱ དྷུརནིཀྑེཔོ ཙ ཨིདྷ སངྒཧེཏབྦཱཝཱཏི དཊྛབྦཾ.

༡༢༥. ཋཱནཱཙཱཝནནྟི ཨིདཾ པཱལི༹ཨནུསཱརཏོ ཝུཏྟཾ དྷུརནིཀྑེཔསྶཱཔི སངྒཧེཏབྦཏོ. ཨེས ནཡོ ཨུཔརིཔི སབྦཏྠ. ཏཏྠ ཧི ན ཙ སཀསཉྙཱིཏི ཨིམིནཱ པརཔརིགྒཧིཏཏཱ ཝུཏྟཱ, ན ཙ ཝིསྶཱསགྒཱཧཱི ན ཙ ཏཱཝཀཱལིཀནྟི ཨིམེཧི པརཔརིགྒཧིཏསཉྙིཏཱ, ཏཱིཧི ཝཱ ཨེཏེཧི པརཔརིགྒཧིཏཏཱ པརཔརིགྒཧིཏསཉྙིཏཱ ཙ ཝུཏྟཱཏི ཝེདིཏབྦཱ. ཨནཛ྄ཛྷཱཝུཏྠཀནྟི ‘‘མམེད’’ནྟི པརིགྒཧཝསེན ཨནཛ྄ཛྷཱཝུཏྠཀཾ ཨརཉྙེ དཱརུཏིཎཔཎྞཱདི. ཚཌྜིཏནྟི པཋམཾ པརིགྒཧེཏྭཱ པཙྪཱ ཨནཏྠིཀཏཱཡ ཚཌྜིཏཾ ཡཾ ཀིཉྩི. ཚིནྣམཱུལཀནྟི ནཊྛཾ པརིཡེསིཏྭཱ ཨཱལཡསངྑཱཏསྶ མཱུལསྶ ཚིནྣཏྟཱ ཚིནྣམཱུལཀཾ. ཨསྶཱམིཀནྟི ཨནཛ྄ཛྷཱཝུཏྠཀཱདཱིཧི ཏཱིཧི ཨཱཀཱརེཧི དསྶིཏཾ ཨསྶཱམིཀཝཏྠུ. ཨུབྷཡམྤཱིཏི ཨསྶཱམིཀཾ ཨཏྟནོ སནྟཀཉྩ.

ཨནཱཔཏྟིབྷེདཝཎྞནཱ

༡༣༡. ཏསྨིཾཡེཝ ¶ ཨཏྟབྷཱཝེ ནིབྦཏྟཱཏི ཏསྨིཾཡེཝ མཏསརཱིརེ པེཏཏྟབྷཱཝེན ནིབྦཏྟཱ. རུཀྑཱདཱིསུ ལགྒིཏསཱཊཀེ ཝཏྟབྦམེཝ ནཏྠཱིཏི མནུསྶེཧི ཨགོཔིཏཾ སནྡྷཱཡ ཝུཏྟཾ, སཙེ པནེཏཾ དེཝཱལཡཙེཏིཡརུཀྑཱདཱིསུ ¶ ནིཡུཏྟེཧི པུརིསེཧི རཀྑིཏགོཔིཏཾ ཧོཏི, གཧེཏུཾ ན ཝཊྚཏི. ཐོཀེ ཁཱཡིཏེ…པེ… གཧེཏུཾ ཝཊྚཏཱིཏི ཨིདཾ ཨདིནྣཱདཱནཱབྷཱཝཾ སནྡྷཱཡ ཝུཏྟཾ. ཛིགྷཙྪིཏཔཱཎིནཱ ཁཱདིཡམཱནམཾསསྶ ཨཙྪིནྡིཏྭཱ ཁཱདནཾ ནཱམ ཀཱརུཉྙཧཱནིཏོ ལོལབྷཱཝཏོ ཙ ཨསཱརུཔྤམེཝ. ཏེནེཝ ཧི ཨརིཡཝཾསིཀཱ ཨཏྟནོ པཏྟེ བྷཏྟཾ ཁཱདནྟམྤི སུནཁཱདིཾ ཏཛྫེཏྭཱ ན ཝཱརེནྟི, ཏིརཙྪཱནཱནཾ ཨཱམིསདཱནེ ཀུསལཾ ཝིཡ ཏེསཾ ཨཱམིསསྶ ཨཙྪིནྡནེཔི ཨཀུསལམེཝཱཏི གཧེཏབྦཾ, ཏེནེཝ ཝཀྑཏི ‘‘པརཱནུདྡཡཏཱཡ ཙ ན གཧེཏབྦ’’ནྟི (པཱརཱ. ཨཊྛ. ༡.༡༤༠).

པཀིཎྞཀཀཐཱཝཎྞནཱ

བཧུ ཨེཀཏོ དཱརུཨཱདིབྷཱརིཡསྶ ཨེཀསྶ བྷཎྜསྶ ཨུཀྑིཔནཀཱལེ ‘‘གཎྷཐ ཨུཀྑིཔཐཱ’’ཏི ཝཙཱིཔཡོགེན སདྡྷིཾ ཀཱཡཔཡོགསབྦྷཱཝཊྛཱནཾ སནྡྷཱཡ ‘‘སཱཧཏྠིཀཱཎཏྟིཀ’’ནྟི ཝུཏྟཾ. ‘‘ཏྭཾ ཨེཏཾ ཝཏྠུཾ གཎྷ, ཨཧཾ ཨཉྙ’’ནྟི ཨེཝཾ པཝཏྟེ པན ཨཝཧཱརེ ཨཏྟནཱ གཧིཏཾ སཱཧཏྠིཀམེཝ, པརེན གཱཧཱཔིཏཾ ཨཱཎཏྟིཀམེཝ, ཏེནེཝ ཏདུབྷཡགྒྷེན པཉྩམཱསེཔི པཱརཱཛིཀཾ ན ཧོཏི, ཨེཀེཀབྷཎྜགྒྷཝསེན ཐུལླཙྩཡཱདིམེཝ ཧོཏི. ཝུཏྟཉྷི ‘‘སཱཧཏྠིཀཾ ཝཱ ཨཱཎཏྟིཀསྶ ཨངྒཾ ན ཧོཏཱི’’ཏིཨཱདི. ཨུཔནིཀྑིཏྟབྷཎྜཾ བྷཎྜདེཡྻཉྩ ཨདཱཏུཀཱམཏཱཡ ‘‘དེམི དམྨཱི’’ཏི ཝིཀྑིཔནྟོ ཏུཎྷཱིབྷཱཝེན ཝིཧེཋེནྟོཔི ཏེན ཏེན ཀཱཡཝིཀཱརཱདིཀིརིཡཱཡ པརསྶ དྷུརཾ ནིཀྑིཔཱཔེསཱིཏི ‘‘ཀིརིཡཱསམུཊྛཱནཉྩཱ’’ཏི ཝུཏྟཾ.

པདབྷཱཛནཱིཡཝཎྞནཱནཡོ ནིཊྛིཏོ.

ཝིནཱིཏཝཏྠུཝཎྞནཱ

༡༣༥. ཝིནཱིཏཝཏྠཱུསུ ¶ ནིརུཏྟིཡེཝ ཏཾཏཾཨཏྠགྒཧཎསྶ ཨུཔཱཡཏཱཡ པཐོཏི ནིརུཏྟིཔཐོ, ཏེནེཝཱཧ ‘‘ཝོཧཱརཝཙནམཏྟེ’’ཏི. ཡཐཱཀམྨཾ གཏོཏི ཏཏོ པེཏཏྟབྷཱཝཏོ མཏབྷཱཝཾ དསྶེཏི. ཨབྦྷུཎྷེཏི ཨཱསནྣམརཎཏཱཡ སརཱིརསྶ ཨུཎྷསམངྒིཏཾ དསྶེཏི, ཏེནེཝཱཧ ‘‘ཨལླསརཱིརེ’’ཏི. ཀུཎཔབྷཱཝཾ ཨུཔགཏམྤི བྷིནྣམེཝ ཨལླབྷཱཝཏོ བྷིནྣཏྟཱ. ཝིསབྷཱགསརཱིརེཏི ཨིཏྠིསརཱིརེ. སཱིསེ ཝཱཏིཨཱདི ཨདྷཀྑཀེ ཨུབྦྷཛཱཎུམཎྜལེ པདེསེ ཙིཏྟཝིཀཱརཔྤཏྟིཾ སནྡྷཱཡ ཝུཏྟཾ, ཡཏྠ ཀཏྠཙི ཨནཱམསནྟེན ཀཏཾ སུཀཏམེཝ. མཏསརཱིརམྤི ཧི ཡེན ཀེནཙི ཨཱཀཱརེན སཉྩིཙྩ ཕུསནྟསྶ ཨནཱམཱསདུཀྐཊམེཝཱཏི ཝདནྟི, ཏཾ ཡུཏྟམེཝ. ན ཧི ཨཔཱརཱཛིཀཝཏྠུཀེཔི ཙིཏྟཱདིཨིཏྠིརཱུཔེ བྷཝནྟཾ དུཀྐཊཾ པཱརཱཛིཀཝཏྠུབྷཱུཏེ མཏིཏྠིསརཱིརེ ནིཝཏྟཏི.

ཀུསསངྐཱམནཝཏྠུཀཐཱཝཎྞནཱ

༡༣༨. བལསཱཏི ¶ བལེན. སཱཊཀོ བྷཝིསྶཏི, གཎྷིསྶཱམཱིཏི ཨནཱགཏཝཙནཾ པསིབྦཀགྒཧཎཏོ པུརེཏརཾ སམུཔྤནྣཔརིཀཔྤདསྶནཝསེན ཝུཏྟཾ. གཧཎཀྑཎེ པན ‘‘སཱཊཀོ ཙེ, གཎྷཱམཱི’’ཏི པསིབྦཀཾ གཎྷཱཏཱིཏི ཨེཝམེཏྠ ཨདྷིཔྤཱཡོ གཧེཏབྦོ, ན པན བཧི ནཱིཧརིཏྭཱ སཱཊཀབྷཱཝཾ ཉཏྭཱ གཧེསྶཱམཱིཏི, ཏེནཱཧ ‘‘ཨུདྡྷཱརེཡེཝ པཱརཱཛིཀ’’ནྟི. ཨིཏརཐཱ ‘‘ཨིདཱནི ན གཎྷཱམི, པཙྪཱ ཨནྡྷཀཱརེ ཛཱཏེ ཝིཛཱནནཀཱལེ ཝཱ གཎྷིསྶཱམི, ཨིདཱནི ཨོལོཀེནྟོ ཝིཡ ཧཏྠགཏཾ ཀརོམཱི’’ཏི གཎྷནྟསྶཱཔི གཧཎཀྑཎེ ཨཝཧཱརོ བྷཝེཡྻ, ན ཙ ཏཾ ཡུཏྟཾ ཏདཱ གཧཎེ སནྣིཊྛཱནཱབྷཱཝཱ. སནྣིཊྛཱཔཀཙེཏནཱཡ ཨེཝ ཧི པཱཎཱཏིཔཱཏཱདིཨཀུསལཾ ཝིཡ. ན ཧི ‘‘པཙྪཱ ཝདྷིསྶཱམཱི’’ཏི པཱཎཾ གཎྷནྟསྶ ཏདེཝ ཏསྨིཾ མཏེཔི པཱཎཱཏིཔཱཏོ ཧོཏི ཝདྷཀཙེཏནཱཡ པཡོགསྶ ཨཀཏཏྟཱ, ཨེཝམིདྷཱཔི ཨཏྠངྒཏེ སཱུརིཡེ ཨཝཧརིསྶཱམཱིཏིཨཱདིནཱ ཀཱལཔརིཀཔྤནཝསེན ཋཱནཱ ཙཱཝིཏེཔི ཏདཱཔི ཨཝཧཱརོ ན ཧོཏི ཨོཀཱསཔརིཀཔྤེ (པཱརཱ. ཨཊྛ. ༡.༡༣༨) ཝིཡ, ཏསྨིཾ པན ཡཐཱཔརིཀཔྤིཏཊྛཱནེ ཀཱལེ ཨཱགཏེ བྷཎྜཾ བྷཱུམིཡཾ ཨནིཀྑིཔིཏྭཱཔི ཐེཡྻཙིཏྟེན གཙྪཏོ པདཝཱརེན ཨཝཧཱརོཏི ཁཱཡཏི. ཏསྨཱ བྷཎྜཔརིཀཔྤོ ཨོཀཱསཔརིཀཔྤོ ཀཱལཔརིཀཔྤོཏི ཏིཝིདྷོཔི པརིཀཔྤོ ¶ གཧེཏབྦོ. ཨཊྛཀཐཱཡཾ པན ཨོཀཱསཔརིཀཔྤེ སམོདྷཱནེཏྭཱ ཀཱལཔརིཀཔྤོ ཝིསུཾ ན ཝུཏྟོཏི ཨམྷཱཀཾ ཁནྟི, ཝཱིམཾསིཏྭཱ གཧེཏབྦཾ. པདཝཱརེན ཀཱརེཏབྦོཏི བྷཱུམིཡཾ ཨནིཀྑིཔིཏྭཱ ཝཱིམཾསིཏཏྟཱ ཝུཏྟཾ. པརིཡུཊྛིཏོཏི ཨནུབདྡྷོ.

པརིཀཔྤོ དིསྶཏཱིཏི གཧཎཀྑཎེ པརིཀཔྤོ དིསྶཏི, ན ཏདཱ ཏེསཾ མཏེན ཨཝཧཱརོཏི དསྶེཏི. དིསྭཱ ཧཊཏྟཱ པརིཀཔྤཱཝཧཱརོ ན དིསྶཏཱིཏི པཙྪཱ པན བཧི ཝཱིམཾསིཏྭཱ སཱཊཀབྷཱཝཾ ཉཏྭཱ ཏཏོ པཙྪཱ ཐེཡྻཙིཏྟེན ཧཊཏྟཱ པུབྦེ ཀཏསྶ པརིཀཔྤསྶ ཨཝཧཱརཱནངྒཏྟཱ ‘‘སུཏྟ’’ནྟི ཉཏྭཱ ཧརཎེ ཝིཡ ཐེཡྻཱཝཧཱརོ ཨེཝ སིཡཱ. ཏསྨཱ པརིཀཔྤཱཝཧཱརོ ན དིསྶཏི. སཱཊཀོ ཙེ བྷཝིསྶཏཱིཏིཨཱདིཀསྶ པརིཀཔྤསྶ ཏདཱ ཨཝིཛྫམཱནཏྟཱ ཀེཝལཾ ཨཝཧཱརོ ཨེཝ, ན པརིཀཔྤཱཝཧཱརོཏི ཨདྷིཔྤཱཡོ, ཏེན བྷཎྜཔརིཀཔྤཱཝཧཱརསྶ ‘‘སཱཊཀོ ཙེ བྷཝིསྶཏི, གཧེསྶཱམཱི’’ཏི ཨེཝཾ བྷཎྜསནྣིཊྛཱནཱབྷཱཝཀྑཎེཡེཝ པཝཏྟིཾ དསྶེཏི, ཏེནཱཧ ‘‘ཡཾ པརིཀཔྤིཏཾ, ཏཾ ཨདིཊྛཾ པརིཀཔྤིཏབྷཱཝེ ཋིཏཾཡེཝ ཨུདྡྷརནྟསྶ ཨཝཧཱརོ’’ཏི. ཡདི ཨེཝཾ ཀསྨཱ ཨོཀཱསཔཨཔྤཱཝཧཱརོ བྷཎྜཾ དིསྭཱ ཨཝཧརནྟསྶ པརིཀཔྤཱཝཧཱརོ སིཡཱཏི? ནཱཡཾ དོསོ ཨབྷཎྜཝིསཡཏྟཱ ཏསྶ པརིཀཔྤསྶ, པུབྦེཝ དིསྭཱ ཉཱཏབྷཎྜསྶེཝ ཧི ཨོཀཱསཔརིཀཔྤོ ཝུཏྟོ. ཏཾ མཉྙམཱནོ ཏཾ ཨཝཧརཱིཏི ཨིདཾ སུཏྟཾ ཀིཉྩཱཔི ‘‘ཏཉྙེཝེཏ’’ནྟི ནིཡམེཏྭཱ གཎྷནྟསྶ ¶ ཝསེན ཝུཏྟཾ, ཏཐཱཔི ‘‘ཏཉྩེ གཎྷིསྶཱམཱི’’ཏི ཨེཝཾ པཝཏྟེ ཨིམསྨིཾ པརིཀཔྤེཔི ‘‘གཎྷིསྶཱམཱི’’ཏི གཧཎེ ནིཡམསབྦྷཱཝཱ ཨཝཧཱརཏྠསཱདྷཀཾ ཧོཏཱིཏི ཨུདྡྷཊཾ, ཏེནེཝ ‘‘སམེཏཱི’’ཏི ཝུཏྟཾ.

ཀེཙཱིཏི མཧཱཨཊྛཀཐཱཡམེཝ ཨེཀཙྩེ ཨཱཙརིཡཱ. མཧཱཔཙྩརིཡཾ པནཱཏིཨཱདིནཱཔི ཀེཙིཝཱདོ གཱརཡ྄ཧོ, མཧཱཨཊྛཀཐཱཝཱདོཝ ཡུཏྟཏརོཏི དསྶེཏི.

ཨལངྐཱརབྷཎྜནྟི ཨངྒུལིམུདྡིཀཱདི. ཀུསཾ པཱཏེཏྭཱཏི ཝིལཱིཝམཡཾ ཝཱ ཏཱལཔཎྞཱདིམཡཾ ཝཱ ཀཏསཉྙཱཎཾ པཱཏེཏྭཱ. པརཀོཊྛཱསཏོ ཀུསེ ཨུདྡྷཊེཔི ན ཏཱཝ ཀུསསྶ པརིཝཏྟནཾ ཛཱཏནྟི ཝུཏྟཾ ‘‘ཨུདྡྷཱརེ རཀྑཏཱི’’ཏི. ཧཏྠཏོ མུཏྟམཏྟེ པཱརཱཛིཀནྟི ཨིམིནཱ ཋཱནཱཙཱཝནཾ དྷུརནིཀྑེཔཉྩ ཝིནཱ ཀུསསངྐཱམནཾ ནཱམ ཝིསུཾ ཨེཀོཡཾ ཨཝཧཱརོཏི དསྶེཏི. སབྦེཔི ཧི ཨཝཧཱརཱ ¶ སཱཧཏྠིཀཱཎཏྟིཀཱདྷིཔྤཱཡཡོགེཧི ནིཔྥཱདིཡམཱནཱ ཨཏྠཏོ ཋཱནཱཙཱཝནདྷུརནིཀྑེཔཀུསསངྐཱམནེསུ ཏཱིསུ སམོསརནྟཱིཏི དཊྛབྦཾ. ཨིཏརོ ཏསྶ བྷཱགཾ ཨུདྡྷརཏི, ཨུདྡྷཱརེ པཱརཱཛིཀནྟི པུརིམསྶ ཨཏྟནོ ཀོཊྛཱསེ ཨཱལཡསྶ ཨཝིགཏཏྟཱ ཝུཏྟཾ, ཨཱལཡེ པན སབྦཐཱ ཨསཏི ཨཝཧཱརོ ན ཧོཏི, ཏེནཱཧ ‘‘ཝིཙིནིཏཱཝསེསཾ གཎྷནྟསྶཱཔི ཨཝཧཱརོ ནཏྠེཝཱ’’ཏི.

ནཱཡཾ མམཱཏི ཛཱནནྟོཔཱིཏི ཨེཏྠ པི-སདྡེན ཏཏྠ ཝེམཏིཀོཔི ཧུཏྭཱ ཐེཡྻཙིཏྟེན གཎྷནྟོཔི སངྒཡ྄ཧཏི. སིཝེཡྻཀནྟི སིཝིརཊྛེ ཛཱཏཾ.

༡༤༠-༡. ཀཔྤིཡཾ ཀཱརཱཔེཏྭཱཏི པཙཱཔེཏྭཱ. ཏསྨིཾ པཱཙིཏྟིཡནྟི ཨདིནྣཱདཱནབྷཱཝེན སཧཔཡོགསྶཱཔི ཨབྷཱཝཱ དུཀྐཊཾ ན ཝུཏྟནྟི ཝེདིཏབྦཾ. ཨཱཎཏྟེཧཱིཏི སམྨཏེན ཨཱཎཏྟེཧི. ཨཱཎཏྟེནཱཏི སཱམིཀེཧི ཨཱཎཏྟེན. བྷཎྜདེཡྻནྟི སམྨཏཱདཱིཧི དིནྣཏྟཱ ན པརཱཛིཀཾ ཛཱཏཾ, ཨསནྟཾ པུགྒལཾ ཝཏྭཱ གཧིཏཏྟཱ པན བྷཎྜདེཡྻཾ ཝུཏྟཾ. ཨཉྙེན དིཡྻམཱནནྟི སམྨཏཱདཱིཧི ཙཏཱུཧི ཨཉྙེན དིཡྻམཱནཾ. གཎྷནྟོཏི ‘‘ཨཔརསྶ བྷཱགཾ དེཧཱི’’ཏི ཝཏྭཱ གཎྷནྟོ. ཨཔརསྶཱཏི ཨསནྟཾ པུགྒལཾ ཨདསྶེཏྭཱ པན ‘‘ཨཔརཾ བྷཱགཾ དེཧཱི’’ཏི ཝཱ ཀཱུཊཝསྶཱནི གཎེཏྭཱ ཝཱ གཎྷཏོ གིཧིསནྟཀེ སཱམིནཱ ཙ ‘‘ཨིམསྶ དེཧཱི’’ཏི ཨེཝཾ ཨཱཎཏྟེན ཙ དིནྣེ བྷཎྜདེཡྻམྤི ན ཧོཏི, སངྒྷསནྟཀེ པན ཧོཏཱིཏི ཨིམཾ ཝིསེསཾ དསྶེཏུཾ ཨསམྨཏེན ཝཱ ཨནཱཎཏྟེན ཝཱཏིཨཱདི པུན ཝུཏྟཾ. ཨིཏརེཧི དིཡྻམཱནནྟི སམྨཏེན ཨཱཎཏྟེན ཝཱ དིཡྻམཱནཾ. ཨེཝཾ གཎྷཏོཏི ‘‘ཨཔརམྤི བྷཱགཾ དེཧཱི’’ཏི ཝཏྭཱ ཀཱུཊཝསྶཱནི གཎེཏྭཱ ཝཱ གཎྷཏོ. སཱམིཀེན པནཱཏི ཨེཏྠ པན-སདྡོ ཝིསེསཏྠཛོཏཀོ, ཏེན ‘‘ཨཔརམྤི བྷཱགཾ དེཧཱི’’ཏི ཝཱ ཀཱུཊཝསྶཱནི གཎེཏྭཱ ཝཱ གཎྷནྟེ སཱམིཀེན སཡཾ དེནྟེ ཝཱ དཱཔེནྟེ ཝཱ ཝིསེསོ ཨཏྠཱིཏི ཝུཏྟཾ ཧོཏི. སུདིནྣནྟི བྷཎྜདེཡྻཾ ན ཧོཏཱིཏི ཨདྷིཔྤཱཡོ. ཧེཊྛཱ པན སཱམིཀེན ཏེན ཨཱཎཏྟེན ཝཱ དིཡྻམཱནཾ གིཧིསནྟཀཾ ‘‘ཨཔརསྶ བྷཱགཾ དེཧཱི’’ཏི ཝཏྭཱ གཎྷཏོ ཨཔརསྶ ཨབྷཱཝཏོ སཱམིསནྟཀམེཝ ཧོཏཱིཏི བྷཎྜདེཡྻཾ ཛཱཏཾ, ཨིདྷ པན ཏེཧིཡེཝ དིཡྻམཱནཾ ‘‘ཨཔརམྤི བྷཱགཾ དེཧཱི’’ཏི ཝཏྭཱ ཝཱ ཀཱུཊཝསྶཱནི གཎེཏྭཱ ¶ ཝཱ གཎྷཏོ ‘‘དེཧཱི’’ཏི ཝུཏྟཏྟཱ ¶ ཨཉྙཱཏཀཝིཉྙཏྟིམཏྟཾ ཋཔེཏྭཱ བྷཎྜདེཡྻཾ ན ཧོཏཱིཏི སུདིནྣམེཝཱཏི ཝུཏྟཾ. ཨསྶཱམིཀེན པན ཨཱཎཏྟེན དིནྣཾ བྷཎྜཾ གཎྷཏོ བྷཎྜདེཡྻམེཝཱཏི ཝདནྟི, པཏྟཙཏུཀྐེ ཝིཡ ཨཝཧཱརཏཱཝེཏྠ ཡུཏྟཱ, སངྒྷསནྟཀེ པན ‘‘དེཧཱི’’ཏི ཝུཏྟེཔི སཱམིཀསྶ ཀསྶཙི ཨབྷཱཝཱ སམྨཏེན དིནྣེཔི བྷཎྜདེཡྻཾ ཝུཏྟནྟི གཧེཏབྦཾ.

༡༤༦-༩. ཨཱཧརཱཔེནྟེསུ བྷཎྜདེཡྻནྟི ‘‘གཧིཏེ ཨཏྟམནོ ཧོཏཱི’’ཏི ཝཙནཏོ ཨནཏྟམནསྶ སནྟཀཾ གཧིཏམྤི པུན དཱཏབྦམེཝཱཏི ཝུཏྟཾ. ‘‘སམྨུཁཱིབྷཱུཏེཧི བྷཱཛེཏབྦ’’ནྟི ཝཙནཏོ བྷཱཛནཱིཡབྷཎྜཾ ཨུཔཙཱརསཱིམཊྛཱནམེཝ པཱཔུཎཱཏཱིཏི ཨཱཧ ‘‘ཨནྟོཨུཔཙཱརསཱིམཱཡཾ ཋིཏསྶེཝ གཧེཏུཾ ཝཊྚཏཱི’’ཏི. བྷཎྜདེཡྻནྟི ཨུབྷིནྣཾ སཱལཡབྷཱཝེཔི ཙོརསྶ ཨདཏྭཱ སཱམིཀསྶེཝ དཱཏབྦཾ ཙོརེནཱཔི སཱམིཀསྶེཝ དཱཏབྦཏོ. ཨེསེཝ ནཡོཏི པཾསུཀཱུལསཉྙཱཡ གཧིཏེ བྷཎྜདེཡྻཾ, ཐེཡྻཙིཏྟེན པཱརཱཛིཀནྟི ཨཏྠོ.

ཝུཊྛཧནྟེསཱུཏི གཱམཾ ཚཌྜེཏྭཱ པལཱཡནྟེསུ. ཨཝིསེསེནཱཏི སཨུསྶཱཧཏཱདིཝིསེསཾ ཨཔརཱམསིཏྭཱ སཱམཉྙཏོ. སཨུསྶཱཧམཏྟམེཝ ཨཱཔཏྟིབྷཱཝསྶ པམཱཎཾ སཱམིཀཱནཾ པརིཙྪིནྣབྷཱཝཏོ. ཏཏོཏི གཎསནྟཀཱདིཏོ. ཀུལསངྒཧཎཏྠཱཡ དེཏཱིཏི པཾསུཀཱུལཝིསྶཱསིཀཱདིསཉྙཱཡ གཧེཏྭཱ དེཏི, ཏདཱ ཀུལསངྒཧཔཙྩཡཱ ཙ དུཀྐཊཾ བྷཎྜདེཡྻཉྩ, ཐེཡྻཙིཏྟེ པན སཏི ཀུལསངྒཧཎཏྠཱཡ གཎྷཏོཔི པཱརཱཛིཀམེཝ. ཨཱུནཔཉྩམཱསཀཱདཱིསུ ཀུལདཱུསཀདུཀྐཊེན སདྡྷིཾ ཐུལླཙྩཡདུཀྐཊཱནི. སེནཱསནཏྠཱཡ ནིཡམིཏནྟི ཨིདཾ ཨིསྶརཝཏཱཡ དདཏོ ཐུལླཙྩཡདསྶནཏྠཾ ཝུཏྟཾ. ཨིཏརཔཙྩཡཏྠཱཡ དིནྣམྤི ཨཐེཡྻཙིཏྟེན ཨིསྶརཝཏཱཡ ཀུལསངྒཧཎཏྠཱཡ ཝཱ ཉཱཏཀཱདཱིནཾ ཝཱ དདཏོ དུཀྐཊཾ བྷཎྜདེཡྻཉྩ ཧོཏེཝ. ཨིསྶརཝཏཱཡཱཏི ‘‘མཡི དེནྟེ ཀོ ནིཝཱརེསྶཏི, ཨཧམེཝེཏྠ པམཱཎ’’ནྟི ཨེཝཾ ཨཏྟནོ ཨིསྶརིཡབྷཱཝེན. ཐུལླཙྩཡནྟི ཀུལསངྒཧཎཏྠཱཡ ཝཱ ཨཉྙཐཱ ཝཱ ཀཱརཎེན དདཏོ སེནཱསནཏྠཱཡ ནིཡམིཏསྶ གརུབྷཎྜཏཱཡ ཐུལླཙྩཡཾ བྷཎྜདེཡྻཉྩ. གཱིཝཱཏི ཨེཏྠ སེནཱསནཏྠཱཡ ནིཡམིཏེ ཐུལླཙྩཡེན སདྡྷིཾ གཱིཝཱ, ཨིཏརསྨིཾ དུཀྐཊེན སདྡྷིནྟི ཝེདིཏབྦཾ. སུཁཱདིཏམེཝཱཏི ཨནྟོཨུཔཙཱརསཱིམཱཡཾ ཋཏྭཱ བྷཱཛེཏྭཱ ཨཏྟནོ སནྟཀཾ ཀཏྭཱ ཁཱདིཏཏྟཱ ཝུཏྟཾ. སངྒྷིཀཉྷི ཝིཧཱརཔཊིབདྡྷཾ ¶ ཝེབྷངྒིཡཾ བཧིཨུཔཙཱརསཱིམཊྛཾ བྷཎྜཾ ¶ ཨནྟོཨུཔཙཱརཊྛེཧི བྷིཀྑཱུཧི ཨེཝ བྷཱཛེཏབྦཾ, ན བཧི ཋིཏེཧི ཨུཔཙཱརསཱིམཱཡ བྷཱཛེཏབྦནྟི.

༡༥༠. ‘‘ཝུཏྟོ ཝཛྫེམཱི’’ཏི ཝུཏྟབྷིཀྑུསྨིཾ ‘‘ཝུཏྟོ ཝཛྫེཧཱི’’ཏི ཝུཏྟསྶ པཙྪཱ ཨུཔྤཛྫནཀཔཱརཱཛིཀཱདིདོསཱརོཔནཏོ, གཧཊྛཱནཾ ཝཱ ‘‘བྷདནྟཱ ཨཔརིཙྪེདཾ ཀཏྭཱ ཝདནྟཱི’’ཏི ཨེཝཾ དོསཱརོཔནཏོ.

༡༥༣-༥. ཚཱཏཛ྄ཛྷཏྟནྟི ཏེན ཚཱཏེན ཛིགྷཙྪཱཡ ཨུདརགྒིནཱ ཛྷཏྟཾ, དཌྜྷཾ པཱིལི༹ཏནྟི ཨཏྠོ. དྷནུཀནྟི ཁུདྡཀདྷནུསཎྛཱནཾ ལགྒནཀདཎྜཾ. མདྡནྟོ གཙྪཏི, བྷཎྜདེཡྻནྟི ཨེཏྠ ཨེཀསཱུཀརགྒྷནཀབྷཎྜཾ དཱཏབྦཾ ཨེཀསྨིཾ བནྡྷེ ཨཉྙེསཾ ཏཏྠ ཨབཛ྄ཛྷནཏོ. ཨདཱུཧལནྟི ཡནྟཔཱསཱཎོ, ཡེན ཨཛ྄ཛྷོཏྠཊཏྟཱ མིགཱ པལཱཡིཏུཾ ན སཀྐོནྟི. པཙྪཱ གཙྪཏཱིཏི ཏེན ཀཏཔཡོགེན ཨགནྟྭཱ པཙྪཱ སཡམེཝ གཙྪཏི, ཧེཊྛཱ ཝུཏྟེསུཔི ཨཱིདིསེསུ ཋཱནེསུ ཨེསེཝ ནཡོ. རཀྑཾ ཡཱཙིཏྭཱཏི རཱཛཔུརིསཱནཾ སནྟིཀཾ གནྟྭཱ ཨནུདྡིསྶ རཀྑཾ ཡཱཙིཏྭཱ. ཀུམཱིནམུཁནྟི ཀུམཱིནསྶ ཨནྟོ མཙྪཱནཾ པཝིསནམུཁཾ.

༡༥༦. ཐེརཱནནྟི ཨཱགནྟུཀཏྠེརཱནཾ. ཏེསམྤཱིཏི ཨཱཝཱསིཀབྷིཀྑཱུནམྤི. པརིབྷོགཏྠཱཡཱཏི སངྒྷིཀེ ཀཏྟབྦཝིདྷིཾ ཀཏྭཱ པརིབྷུཉྫནཏྠཱཡ. གཧཎེཏི པཱཋསེསོ དཊྛབྦོ. ཡཏྠཱཏི ཡསྨིཾ ཨཱཝཱསེ. ཨཉྙེསནྟི ཨཉྙེསཾ ཨཱགནྟུཀཱནཾ. ཏེསུཔི ཨཱགནྟུཀཱ ཨནིསྶརཱཏི སེནཱསནེ ནིརནྟརཾ ཝསནྟཱནཾ ཙཱིཝརཏྠཱཡ དཱཡཀེཧི བྷིཀྑཱུཧི ཝཱ ནིཡམེཏྭཱ དིནྣཏྟཱ བྷཱཛེཏྭཱ ཁཱདིཏུཾ ཨནིསྶརཱ, ཨཱགནྟུཀེཧིཔི ཨིཙྪནྟེཧི ཏསྨིཾ ཝིཧཱརེ ཝསྶཱནཱདཱིསུ པཝིསིཏྭཱ ཙཱིཝརཏྠཱཡ གཧེཏབྦཾ. ཏེསཾ ཀཏིཀཱཡ ཋཱཏབྦནྟི སབྦཱནི ཕལཱཕལཱནི ཨབྷཱཛེཏྭཱ ‘‘ཨེཏྟཀེསུ རུཀྑེསུ ཕལཱནི བྷཱཛེཏྭཱ པརིབྷུཉྫིསྶཱམ, ཨཉྙེསུ ཕལཱཕལེཧི སེནཱསནཱནི པཊིཛགྒིསྶཱམཱ’’ཏི ཝཱ, ‘‘པིཎྜཔཱཏཱདིཔཙྩཡཾ སམྤཱདེསྶཱམཱ’’ཏི ཝཱ, ‘‘ཀིཉྩིཔི ཨབྷཱཛེཏྭཱ ཙཏུཔཙྩཡཏྠཱཡེཝ ཨུཔནེམཱ’’ཏི ཝཱ ཨེཝཾ སམྨཱ ཨུཔནེནྟཱནཾ ཨཱཝཱསིཀཱནཾ ཀཏིཀཱཡ ཨཱགནྟུཀེཧི ཋཱཏབྦཾ. མཧཱཨཊྛཀཐཱཡཾ ‘‘ཨནིསྶརཱ’’ཏི ཝཙནེན དཱིཔིཏོ ཨེཝ ཨཏྠོ, མཧཱཔཙྩརིཡཾ ཙཏུནྣཾ པཙྩཡཱནནྟིཨཱདིནཱ ཝིཏྠཱརེཏྭཱ དསྶིཏོ. པརིབྷོགཝསེནེཝཱཏི ཨེཏྠ ཨེཝ-སདྡོ ཨཊྛཱནཔྤཡུཏྟོ, པརིབྷོགཝསེན ཏམེཝ བྷཱཛེཏྭཱཏི ཡོཛེཏབྦཾ. ཨེཏྠཱཏི ཨེཏསྨིཾ ཝིཧཱརེ, རཊྛེ ཝཱ.

སེནཱསནཔཙྩཡནྟི ¶ སེནཱསནཉྩ ཏདཏྠཱཡ ནིཡམེཏྭཱ ཋཔིཏཉྩ. ཨེཀཾ ཝཱ དྭེ ཝཱ ཝརསེནཱསནཱནི ཋཔེཏྭཱཏི ཝུཏྟམེཝཏྠཾ པུན བྱཏིརེཀམུཁེན དསྶེཏུཾ ‘‘མཱུལཝཏྠུཙྪེདཾ པན ཀཏྭཱ ན ཨུཔནེཏབྦ’’ནྟི ¶ ཝུཏྟཾ, སེནཱསནསངྑཱཏཝཏྠུནོ མཱུལཙྪེདཾ ཀཏྭཱ སབྦཱནི སེནཱསནཱནི ན ཝིསྶཛྫེཏབྦཱནཱིཏི ཨཏྠོ. ཀེཙི པནེཏྠ ‘‘ཨེཀཾ ཝཱ དྭེ ཝཱ ཝརསེནཱསནཱནི ཋཔེཏྭཱ ལཱམཀཏོ པཊྛཱཡ ཝིསྶཛྫེནྟེཧིཔི སེནཱསནབྷཱུམིཡོ ན ཝིསྶཛྫེཏབྦཱཏི ཨཡམཏྠོ ཝུཏྟོ’’ཏི ཝདནྟི, ཏམྤི ཡུཏྟམེཝ ཨིམསྶཱཔི ཨཏྠསྶ ཨཝསྶཾ ཝཏྟབྦཏོ, ཨིཏརཐཱ ཀེཙི སཧ ཝཏྠུནཱཔི ཝིསྶཛྫེཏབྦཾ མཉྙེཡྻུཾ.

པཎྞཾ ཨཱརོཔེཏྭཱཏི ‘‘ཨེཏྟཀེ རུཀྑེ རཀྑིཏྭཱ ཏཏོ ཨེཏྟཀཾ གཧེཏབྦ’’ནྟི པཎྞཾ ཨཱརོཔེཏྭཱ. ནིམིཏྟསཉྙཾ ཀཏྭཱཏི སངྐེཏཾ ཀཏྭཱ. དཱརཀཱཏི ཏེསཾ པུཏྟནཏྟཱདཡོ ཡེ ཀེཙི གོཔེནྟི, ཏེ སབྦེཔི ཨིདྷ ‘‘དཱརཀཱ’’ཏི ཝུཏྟཱ. ཏཏོཏི ཡཐཱཝུཏྟདཱརུསམྦྷཱརཏོ. ཨཱཔུཙྪིཏྭཱཏི ཀཱརཀསངྒྷཾ ཨཱཔུཙྪིཏྭཱ. ཏཾ སབྦམྤི ཨཱཧརིཏྭཱཏི ཨནཱཔུཙྪིཏྭཱཔི ཏཱཝཀཱལིཀཾ ཨཱཧརིཏྭཱ. ཨཡམེཝ བྷིཀྑུ ཨིསྶརོཏིཨཱདིཏོ པཊྛཱཡ ཨཏྟནོ སནྟཀེཧི དཱརུསམྦྷཱརཱདཱིཧི ཙ ཀཱརཱཔིཏཏྟཱ པཊིཛགྒིཏཏྟཱ ཙ སངྒྷིཀསེནཱསནེ བྷཱགིཏཱཡ ཙ ཨཡམེཝ ཨིསྶརོ, ན ཙ སོ ཏཏོ ཝུཊྛཱཔེཏབྦོཏི ཝུཏྟཾ ཧོཏི. ཨུདཀཔཱུཛནྟི ཙེཏིཡངྒཎེ སིཉྩནཱདིཔཱུཛཾ. ཝཏྟསཱིསེནཱཏི ཀེཝལཾ སདྡྷཱཡ, ན ཝེཏནཱདིཨཏྠཱཡ. སཝཏྠུཀནྟི སཧ བྷཱུམིཡཱ. ཀུཊྚནྟི གེཧབྷིཏྟིཾ. པཱཀཱརནྟི པརིཀྑེཔཔཱཀཱརཾ. ཏཏོཏི ཚཌྜིཏཝིཧཱརཏོ. ཏཏོ ཨཱཧརིཏྭཱ སེནཱསནཾ ཀཏཾ ཧོཏཱིཏི སཱམནྟགཱམཝཱསཱིཧི བྷིཀྑཱུཧི ཚཌྜིཏཝིཧཱརཏོ དཱརུསམྦྷཱརཱདིཾ ཨཱཧརིཏྭཱ སེནཱསནཾ ཀཏཾ ཧོཏི.

༡༥༧. ‘‘པུགྒལིཀཔརིབྷོགེན པརིབྷུཉྫཏཱི’’ཏི ཝུཏྟམཏྠཾཡེཝ པཱཀཊཾ ཀཱཏུཾ ‘‘ཨཱགཏཱགཏཱནཾ ཝུཌྜྷཏརཱནཾ ན དེཏཱི’’ཏི ཝུཏྟཾ. ཙཏུབྷཱགཨུདཀསམྦྷིནྣེཏི ཙཏུཏྠབྷཱགེན སམྦྷིནྣེ. པཱལི༹ཡཾ ‘‘ཨནཱཔཏྟི, བྷིཀྑཝེ, པཱརཱཛིཀསྶཱ’’ཏི (པཱརཱ. ༡༥༧) སཱམིཀེཧི ཐུལླནནྡཾ ཨུདྡིསྶ ཨེཏིསྶཱ ཧཏྠེ དིནྣཏྟཱ, ཨཐེཡྻཙིཏྟེན པརིབྷུཉྫིཏཏྟཱ ཙ ཝུཏྟཾ. ཐེཡྻཙིཏྟེན པརིབྷུཏྟེཔི ཙསྶཱ བྷཎྜདེཡྻམེཝ ཨུཔནིཀྑིཏྟབྷཎྜཊྛཱནིཡཏྟཱ. ཨོདནབྷཱཛནཱིཡཝཏྠུསྨིནྟི ‘‘ཨཔརསྶ བྷཱགཾ དེཧཱི’’ཏི ཨཱགཏཝཏྠུསྨིཾ (པཱརཱ. ༡༤༡).

༡༥༩. ཏསྶ ¶ ཀུལསྶ ཨནུཀམྤཱཡ པསཱདཱནུརཀྑཎཏྠཱཡཱཏིཨཱདིནཱ ཀུལསངྒཧཏྠཾ ནཱཀཱསཱིཏི དསྶེཏི. ‘‘ཡཱཝ དཱརཀཱ པཱསཱདཾ ཨཱརོཧནྟི, ཏཱཝ པཱསཱདོ ཏེསཾ སནྟིཀེ ཧོཏཱུ’’ཏི པུབྦེ ཀཱལཔརིཙྪེདཾ ཀཏྭཱ ཨདྷིཊྛིཏཏྟཱ ཨེཝ ཡཐཱཀཱལཔརིཙྪེདམེཝ ཏཏྠ ཏིཊྛཏི, ཏཏོ པརཾ པཱསཱདོ སཡམེཝ ཡཐཱཋཱནཾ གཙྪཏི, ཏཐཱགམནཉྩ ཨིདྡྷིཝིསྶཛྫནེན སཉྫཱཏཾ ཝིཡ ཧོཏཱིཏི ཝུཏྟཾ ‘‘ཐེརོ ཨིདྡྷིཾ པཊིསཾཧརཱི’’ཏི. ཡསྨཱ ཨེཝཾ ཨིདྡྷིཝིདྷཉཱཎེན ཀརོནྟསྶ ཀཱཡཝཙཱིཔཡོགཱ ¶ ན སནྟི ཐེཡྻཙིཏྟཉྩ ནཏྠི པཱསཱདསྶེཝ ཝིཙཱརིཏཏྟཱ, ཏསྨཱ ‘‘ཨེཏྠ ཨཝཧཱརོ ནཏྠཱི’’ཏི ཐེརོ ཨེཝམཀཱསཱིཏི དཊྛབྦཾ. ཨཐ ཝཱ དཱརཀེསུ ཨནུཀམྤཱཡ ཨཱནཡནཏྠམེཝ པཱསཱདེ ཨུཔནཱིཏེ པཱསེ བདྡྷསཱུཀརཱདཱིནཾ ཨཱམིསཾ དསྶེཏྭཱ ཋཱནཱཙཱཝནཾ ཝིཡ ཀརམརཱནཱིཏེསུ དཱརཀེསུ པཱསཱདཾ ཨཱརུལ༹ྷེསུཔི པུན པཊིསཾཧརཎེ ཙ ཨིདྷ ཨཝཧཱརོ ནཏྠི ཀཱརུཉྙཱདྷིཔྤཱཡཏྟཱ, བྷཎྜདེཡྻམྤི ན ཧོཏི ཀཱཡཝཙཱིཔཡོགཱབྷཱཝཱ. ཀཱཡཝཙཱིཔཡོགེ སཏིཡེཝ ཧི ཨཱཔཏྟི བྷཎྜདེཡྻཾ ཝཱ ཧོཏི, ཏེནེཝ བྷགཝཱ ‘‘ཨནཱཔཏྟི, བྷིཀྑཝེ, ཨཐེཡྻཙིཏྟསྶཱ’’ཏིཨཱདིཾ ཨཝཏྭཱ ‘‘ཨནཱཔཏྟི, བྷིཀྑཝེ, ཨིདྡྷིམསྶ ཨིདྡྷིཝིསཡེ’’ཏི (པཱརཱ. ༡༥༩) ཨེཏྟཀམེཝ ཨཝོཙ. ཨིདྡྷིཝིསཡེཏི ཙེཏྠ པརབྷཎྜཱདཱཡཀཀཱཡཝཙཱིཔཡོགཱསམུཊྛཱཔཀསྶ ཀེཝལཾ མནོདྭཱརིཀསྶ ཨཐེཡྻཙིཏྟབྷཱུཏསྶ ཨིདྡྷིཙིཏྟསྶ ཝིསཡེ ཨཱཔཏྟི ནཱམ ནཏྠཱིཏི ཨདྷིཔྤཱཡོ གཧེཏབྦོ. ཀིཾ པན པཊིཀྑིཏྟཾ ཨིདྡྷིཔཱཊིཧཱརིཡཾ ཀཱཏུཾ ཝཊྚཏཱིཏི ཙོདནཾ སནྡྷཱཡཱཧ ‘‘ཨཱིདིསཱཡ ཨདྷིཊྛཱནིདྡྷིཡཱ ཨནཱཔཏྟཱི’’ཏི. ‘‘ཨནཱཔཏྟི, བྷིཀྑཝེ, ཨིདྡྷིམསྶ ཨིདྡྷིཝིསཡེ’’ཏི ཧི ཨིམིནཱཡེཝ སུཏྟེན ཨདྷིཊྛཱནིདྡྷིཡཱ ཨཔྤཊིཀྑིཏྟབྷཱཝོ སིཛ྄ཛྷཏི. ཨཏྟནོ པཀཏིཝཎྞཾ ཨཝིཛཧིཏྭཱ བཧིདྡྷཱ ཧཏྠིཨཱདིདསྶནཾ, ‘‘ཨེཀོཔི ཧུཏྭཱ བཧུདྷཱ ཧོཏཱི’’ཏི (དཱི. ནི. ༡.༢༣༨, ༢༣༩; མ. ནི. ༡.༡༤༧; པཊི. མ. ༡.༡༠༢) ཨཱགཏཉྩ ཨདྷིཊྛཱནཝསེན ནིཔྥནྣཏྟཱ ཨདྷིཊྛཱནིདྡྷི ནཱམ, ‘‘སོ པཀཏིཝཎྞཾ ཝིཛཧིཏྭཱ ཀུམཱརཀཝཎྞཾ ཝཱ དསྶེཏི, ནཱགཝཎྞཾ…པེ… ཝིཝིདྷམྤི སེནཱབྱཱུཧཾ དསྶེཏཱི’’ཏི (པཊི. མ. ༣.༡༣) ཨེཝཾ ཨཱགཏཱ ཨིདྡྷི པཀཏིཝཎྞཝིཛཧནཝིཀཱརཝསེན པཝཏྟཏྟཱ ཝིཀུབྦནིདྡྷི ནཱམ. ཨཏྟནོ པན པཀཏིརཱུཔཾ ཡཐཱསབྷཱཝེན ཋཔེཏྭཱཝ བཧི ཧཏྠིཨཱདིདསྶནཾ ཝིཀུབྦནིདྡྷི ནཱམ ན ཧོཏི, ཨཏྟནོ རཱུཔམེཝ ཧཏྠིཨཱདིརཱུཔེན ནིམྨཱནཾ ཝིཀུབྦནིདྡྷཱིཏི ཝེདིཏབྦཾ.

པརཱཛིཏཀིལེསེནཱཏི ¶ ཝིཛིཏཀིལེསེན, ནིཀྐིལེསེནཱཏི ཨཏྠོ. ཨིདྷཱཏི ཨིམསྨིཾ སཱསནེ, ཏེན དུཏིཡཔཱརཱཛིཀསིཀྑཱཔདེན སམཾ ཨཉྙཾ ཨནེཀནཡཝོཀིཎྞཾ གམྦྷཱིརཏྠཝིནིཙྪཡཾ ཀིཉྩི སིཀྑཱཔདཾ ན ཝིཛྫཏཱིཏི ཡོཛནཱ. ཏཏྠ ཨཏྠོ ནཱམ པཱལི༹ཨཏྠོ, ཝིནིཙྪཡོ པཱལི༹མུཏྟཀཝིནིཙྪཡོ, ཏེ གམྦྷཱིརཱ ཡསྨིཾ, ཏཾ གམྦྷཱིརཏྠཝིནིཙྪཡཾ. ཝཏྠུམྷི ཨོཏིཎྞེཏི ཙོདནཱཝསེན ཝཱ ཨཏྟནཱཝ ཨཏྟནོ ཝཱིཏིཀྐམཱརོཙནཝསེན ཝཱ སངྒྷམཛ྄ཛྷེ ཨདིནྣཱདཱནཝཏྠུསྨིཾ ཨོཏིཎྞེ. ཨེཏྠཱཏི ཨོཏིཎྞཝཏྠུམྷི. ཝིནིཙྪཡོཏི ཨཱཔཏྟཱནཱཔཏྟིནིཡམནཾ. ཀཔྤིཡེཔི ཙ ཝཏྠུསྨིནྟི ཨཏྟནཱ གཧེཏུཾ ཡུཏྟེ མཱཏཱཔིཏཱདཱིནཾ སནྟཀེཔི.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

དུཏིཡཔཱརཱཛིཀཝཎྞནཱནཡོ ནིཊྛིཏོ.

༣. ཏཏིཡཔཱརཱཛིཀཾ

ཏཱིཧཱིཏི ¶ ཀཱཡཝཙཱིམནོདྭཱརེཧི.

པཋམཔཉྙཏྟིནིདཱནཝཎྞནཱ

༡༦༢. ཡཱ ཨཡཾ ཧེཊྛཱ ཏཾ པནེཏཾ བུདྡྷཀཱལེ ཙ ཙཀྐཝཏྟིཀཱལེ ཙ ནགརཾ ཧོཏཱིཏིཨཱདིནཱ (པཱརཱ. ཨཊྛ. ༡.༨༤) རཱཛགཧསྶ བུདྡྷུཔྤཱདེཡེཝ ཝེཔུལླཔྤཏྟི ཝུཏྟཱ, སཱ ཨེཏྠཱཔི སམཱནཱཏི དསྶེཏུཾ ‘‘ཨིདམྤི ཙ ནགར’’ནྟི ཝུཏྟཾ, ཏེན ཙ ན ཀེཝལཾ རཱཛགཧཱདཡོ ཨེཝཱཏི དསྶེཏི. མཧཱཝནཾ ནཱམཱཏིཨཱདི མཛ྄ཛྷིམབྷཱཎཀསཾཡུཏྟབྷཱཎཀཱནཾ མཏེན ཝུཏྟཾ, དཱིགྷབྷཱཎཀཱ པན ‘‘ཧིམཝནྟེན སདྡྷིཾ ཨེཀཱབདྡྷཾ ཧུཏྭཱ ཋིཏཾ མཧཱཝན’’ནྟི ཝདནྟི. ཧཾསཝཊྚཀཙྪདནེནཱཏི ཧཾསཝཊྚཀཔཊིཙྪནྣེན, ཧཾསམཎྜལཱཀཱརེནཱཏི ཨཏྠོ. ཀཱཡཝིཙྪནྡནིཡཀཐནྟི ཀརཛཀཱཡེ ཝིརཱགུཔྤཱདནཀཐཾ. ཚནྡོཏི དུབྦལརཱགོ. རཱགོཏི བལཝརཱགོ. ‘‘ཀེསལོམཱདི’’ནྟི སངྑེཔཏོ ཝུཏྟམཏྠཾ ཝིབྷཱགེན དསྶེཏུཾ ཡེཔི ཧཱིཏིཨཱདི ཝུཏྟཾ. པཉྩཔཉྩཔྤབྷེདེནཱཏི ཨེཏྠ པཉྩ པཉྩ པབྷེདཱ ཨེཏསྶ པརིཡཱཡསྶཱཏི པཉྩཔཉྩཔྤབྷེདོ ¶ , ཏེན པཉྩཔཉྩཔྤབྷེདེནཱཏི ཨེཝཾ བཱཧིརཏྠསམཱསཝསེན པརིཡཱཡཝིསེསནཏཱ དཊྛབྦཱ.

ཨསུབྷཱཡཱཏི ཨསུབྷམཱཏིཀཱཡ. ཝཎྞེཏབྦམཱཏིཀཉྷི ཨཔེཀྑིཏྭཱ ཨིཏྠིལིངྒེ སཱམིཝཙནཾ, ཏེནཱཧ མཱཏིཀཾ ནིཀྑིཔིཏྭཱཏིཨཱདི. ཏཾ ཝིབྷཛནྟོཏི མཱཏིཀཾ ཝིབྷཛནྟོ. ཕཱཏིཀམྨནྟི ནིཔྥཏྟིཀརཎཾ. པཉྩངྒཝིཔྤཧཱིནནྟི ཀཱམཙྪནྡཱདིཔཉྩནཱིཝརཎངྒཝིགམེན པཉྩངྒཝིཔྤཧཱིནཏཱ, ཨཔྤནཱཔྤཏྟཝིཏཀྐཱདིཛ྄ཛྷཱནངྒཱནཾ ཨུཔྤཏྟིཝསེན པཉྩངྒསམནྣཱགཏཏཱ ཙ ཝེདིཏབྦཱ. ཏིཝིདྷཀལྱཱཎཾ དསལཀྑཎསམྤནྣནྟི ཨེཏྠ པན ཛྷཱནསྶ ཨཱདིམཛ྄ཛྷཔརིཡོསཱནཱནཾ ཝསེན ཏིཝིདྷཀལྱཱཎཏཱ, ཏེསཾཡེཝ ཨཱདིམཛ྄ཛྷཔརིཡོསཱནཱནཾ ལཀྑཎཝསེན དསལཀྑཎསམྤནྣཏཱ ཙ ཝེདིཏབྦཱ. ཨཊྛཀཐཱཡཾ པན ‘‘དསལཀྑཎཝིབྷཱཝནེནེཝ ཏནྣིསྶཡབྷཱུཏཱ ཏིཝིདྷཀལྱཱཎཏཱཔི ཛྷཱནསྶ པཱཀཊཱ ཧོཏཱིཏི ཏཏྲིམཱནཱིཏིཨཱདི ཝུཏྟཾ.

ཏཏྲཱཡཾ ¶ པཱལཱི༹ཏི ཏསྨིཾ དསལཀྑཎཝིབྷཱཝནཝིསཡེ ཨཡཾ པཱལི༹. པཊིཔདཱཝིསུདྡྷཱིཏི གོཏྲབྷུཔརིཡོསཱནཱཡ པུབྦབྷཱགཔཊིཔདཱཡ ཛྷཱནསྶ ནཱིཝརཎཱདིཔརིབནྡྷཏོ ཝིསུདྡྷི, སཱཡཾ ཡསྨཱ ཨུཔེཀྑཱནུབྲཱུཧནཱདཱིནམྤི པཙྩཡཏྟེན པདྷཱནཱ པུརིམཀཱརཎསིདྡྷཱ ཙ, ཏསྨཱ ཝུཏྟཾ ‘‘པཊིཔདཱཝིསུདྡྷི ཨཱདཱི’’ཏི. ཨུཔེཀྑཱནུབྲཱུཧནཱཏི ཝིསོདྷེཏབྦཏཱདཱིནཾ ཨབྷཱཝཏོ ཏཏྲམཛ྄ཛྷཏྟུཔེཀྑཱཡ ཀིཙྩནིཔྥཏྟིཡཱ ཨནུབྲཱུཧནཱ, སཱ པན པརིབནྡྷཝིསུདྡྷིསམཀཱལཝིབྷཱཝིནཱིཔི ཏབྦིསུདྡྷིཡཱཝ ནིཔྥནྣཱཏི དཱིཔནཏྠམཱཧ ‘‘ཨུཔེཀྑཱནུབྲཱུཧནཱ མཛ྄ཛྷེ’’ཏི. སམྤཧཾསནཱཏི ཝཏྠུདྷམྨཱདཱིནཾ ཨནཏིཝཏྟནཱདིསཱདྷཀསྶ ཉཱཎསྶ ཀིཙྩནིཔྥཏྟིཝསེན པརིཡོདཔནཱ, སཱ པན ཡསྨཱ ཀཏྟབྦསྶ སབྦཀིཙྩསྶ ནིཔྥཏྟིཡཱཝ སིདྡྷཱ ནཱམ ཧོཏི, ཏསྨཱ ཝུཏྟཾ ‘‘སམྤཧཾསནཱ པརིཡོསཱན’’ནྟི. ཏཱིཎིཔི ཙེཏཱནི ཀལྱཱཎཱནི ཨེཀཀྑཎེ ལབྦྷམཱནཱནིཔི པཙྩཡཔཙྩཡུཔྤནྣཏཱདིཝསེན པཝཏྟནྟཱིཏི དསྶནཏྠཾ ཨཱདིམཛ྄ཛྷཔརིཡོསཱནབྷཱཝེན ཝུཏྟཱནི, ན པན ཛྷཱནསྶ ཨུཔྤཱདཱདིཀྑཎཏྟཡེ ཡཐཱཀྐམཾ ལབྦྷམཱནཏྟཱཏི དཊྛབྦཾ. མཛ྄ཛྷིམཾ སམཱདྷིནིམིཏྟཾ པཊིཔཛྫཏཱིཏིཨཱདཱིསུ མཛ྄ཛྷིམཾ སམཱདྷིནིམིཏྟཾ ནཱམ སམཔྤཝཏྟོ ཨཔྤནཱསམཱདྷིཡེཝ. སོ ཧི ལཱིནུདྡྷཙྩསངྑཱཏཱནཾ ཨུབྷིནྣཾ ཨནྟཱནཾ ཨནུཔགམནེན མཛ྄ཛྷིམོ, སཝིསེསཾ ཙིཏྟསྶ ཨེཀཏྟཱརམྨཎེ ཋཔནཏོ སམཱདྷིཡེཝ ཨུཔརིཝིསེསཱནཾ ཀཱརཎབྷཱཝཏོ ‘‘སམཱདྷིནིམིཏྟ’’ནྟི ཝུཙྩཏི, ཏཾ པཊིཔཛྫཏི པཊིལབྦྷཏཱིཏི ཨཏྠོ. ཨེཝཾ ¶ པཊིཔནྣཏྟཱ མཛ྄ཛྷིམེན སམཱདྷིནིམིཏྟེན ཏཏྠ ཨེཀཏྟཱརམྨཎེ ཨཔྤནཱགོཙརེ པཀྑནྡཏི ཨུཔཏིཊྛཏི, ཨེཝཾ ཝིསུདྡྷསྶ པན ཏསྶ ཙིཏྟསྶ པུན ཝིསོདྷེཏབྦཱབྷཱཝཏོ ཝིསོདྷནེ བྱཱཔཱརཾ ཨཀརོནྟོ པུགྒལོ ཝིསུདྡྷཾ ཙིཏྟཾ ཨཛ྄ཛྷུཔེཀྑཏི ནཱམ. སམཐབྷཱཝཱུཔགམནེན སམཐཔཊིཔནྣསྶ པུན སམཱདྷཱནེ བྱཱཔཱརཾ ཨཀརོནྟོ སམཐཔཊིཔནྣཾ ཨཛ྄ཛྷུཔེཀྑཏི, སམཐཔཊིཔནྣབྷཱཝཏོ ཨེཝམསྶ ཀིལེསསཾསགྒཾ པཧཱཡ ཨེཀཏྟེན ཨུཔཊྛིཏསྶ པུན ཨེཀཏྟུཔཊྛཱནེ བྱཱཔཱརཾ ཨཀརོནྟོ ཨེཀཏྟུཔཊྛཱནཾ ཨཛ྄ཛྷུཔེཀྑཏི ནཱམ.

ཏཏྠ ཛཱཏཱནནྟིཨཱདཱིསུ ཡེ པན ཏེ ཨེཝཾ ཨུཔེཀྑཱནུབྲཱུཧིཏེ ཏསྨིཾ ཛྷཱནཙིཏྟེ ཛཱཏཱ སམཱདྷིཔཉྙཱསངྑཱཏཱ ཡུགནདྡྷདྷམྨཱ, ཏེསཾ ཨཉྙམཉྙཾ ཨནཏིཝཏྟནསབྷཱཝེན སམྤཧཾསནཱ ཝིསོདྷནཱ པརིཡོདཔནཱ ཙ, སདྡྷཱདཱིནཾ ཨིནྡྲིཡཱནཾ ཀིལེསེཧི ཝིམུཏྟཏྟཱ ཝིམུཏྟིརསེན ཨེཀརསཏཱཡ སམྤཧཾསནཱ ཙ, ཡཉྩེཏཾ ཏདུཔགཾ ཏེསཾ ཨནཏིཝཏྟནཨེཀརསབྷཱཝཱནཾ ཨནུཙྪཝིཀཾ ཝཱིརིཡཾ, ཏསྶ ཏདུཔགཝཱིརིཡསྶ ཝཱཧནཊྛེན པཝཏྟནཊྛེན སམྤཧཾསནཱ ཙ, ཏསྨིཾ ཁཎེ ཡཐཱཝུཏྟདྷམྨཱནཾ ཨཱསེཝནཊྛེན སམྤཧཾསནཱ ཙ, པརིཡོདཔནཱ ཙ པརིཡོདཔནཀསྶ ཉཱཎསྶ ཀིཙྩནིཔྥཏྟིཝསེནེཝ ཨིཛ྄ཛྷཏཱིཏི ཝེདིཏབྦཾ. ཨེཝཾ ཏིཝིདྷཏྟགཏཾ ཙིཏྟནྟིཨཱདཱིནི ཏསྶེཝ ཙིཏྟསྶ ཐོམནཝཙནཱནི. ཝིཏཀྐསམྤནྣནྟི ཝིཏཀྐངྒེན སུནྡརབྷཱཝམུཔགཏཾ. ཙིཏྟསྶ ཨདྷིཊྛཱནསམྤནྣནྟི ཏསྨིཉྙེཝ ཨཱརམྨཎེ ¶ ཙིཏྟསྶ ནིརནྟརཔྤཝཏྟིསངྑཱཏེན སམཱདྷིནཱ སམྤནྣཾ, ཨིདཾ ཛྷཱནངྒཝསེན ཝུཏྟཾ. སམཱདྷིསམྤནྣནྟི ཨིདཾ པན ཨིནྡྲིཡཝསེནཱཏི ཝེདིཏབྦཾ.

པཊིཀུཊཏཱིཏི སངྐུཙཏི. པཊིཝཊྚཏཱིཏི པཊིནིཝཊྚཏི. ནྷཱརུདདྡུལནྟི ནྷཱརུཁཎྜཾ. པཡུཏྟཝཱཙནྟི པཙྩཡཔརིཡེསནེ ནིཡུཏྟཝཱཙཾ. དཎྜཝཱགུརཱཧཱིཏི དཎྜཔཊིབདྡྷཱཧི དཱིགྷཛཱལསངྑཱཏཱཧི ཝཱགུརཱཧི.

སམཎཀུཏྟཀོཏི ཀཱསཱཡནིཝཱསནཱདིསམཎཀིཙྩཀོ. ཝགྒུམུདཱཏི ཨེཏྠ ‘‘ཝགྒུམཏཱ’’ཏི ཝཏྟབྦེ ལོཀིཀཱ ‘‘མུདཱ’’ཏི ཝོཧརིཾསཱུཏི དསྶེནྟོ ཨཱཧ ‘‘ཝགྒུམཏཱ’’ཏི. ‘‘ཝགྒཱུ’’ཏི མཏཱ, སུདྡྷསམྨཏཱཏི ཨཏྠོ, ཏེནཱཧ ‘‘པུཉྙསམྨཏཱ’’ཏི. སཏྟཱནཾ པཱཔུནནེན སོདྷནེན སཱ པུཉྙསམྨཏཱ.

༡༦༣. མཱརསྶ དྷེཡྻཾ ཋཱནཾ, ཝཏྠུ ཝཱ ནིཝཱསོ མཱརདྷེཡྻཾ, སོ ཨཏྠཏོ ཏེབྷཱུམཀདྷམྨཱ ཨེཝ, ཨིདྷ པན པཉྩ ཀཱམགུཎཱ ཨདྷིཔྤེཏཱ, ཏཾ མཱརདྷེཡྻཾ ¶ . ‘‘ཨཡཾ སམཎཀུཏྟཀོ ཡཐཱསམུཔྤནྣསཾཝེགམཱུལཀེན སམཎབྷཱཝཱུཔགམནེན ཨཏིཀྐམིཏུཾ སཀྑིསྶཏཱི’’ཏི ཙིནྟེཏྭཱ ཨཝོཙ, ན པན ‘‘ཨརཧཏྟཔྤཏྟིཡཱ ཏཱིསུ བྷཝེསུ ཨཔྤཊིསནྡྷིཀཏཱཡ ཏཾ ཨཏིཀྐམིཏུཾ སཀྑིསྶཏཱི’’ཏི མརཎེནེཝ སཏྟཱནཾ སཾསཱརམོཙནལདྡྷིཀཏྟཱ དེཝཏཱཡ. ན ཧི མཏཱནཾ ཀཏྠཙི པཊིསནྡྷི གཙྪཏི. ཨིམིནཱ ཨཏྠེན ཨེཝམེཝ བྷཝིཏབྦནྟི ཨིམིནཱ པརེསཾ ཛཱིཝིཏཱ ཝོརོཔནཏྠེན ཨེཝམེཝ སཾསཱརམོཙནསབྷཱཝེནེཝ བྷཝིཏབྦཾ. ‘‘ཨཏྟནཱཔི ཨཏྟཱནཾ ཛཱིཝིཏཱ ཝོརོཔེནྟི, ཨཉྙམཉྙམྤི ཛཱིཝིཏཱ ཝོརོཔེནྟཱི’’ཏི (པཱརཱ. ༡༦༢) ཝུཏྟཏྟཱ སབྦཱནིཔི ཏཱནི པཉྩབྷིཀྑུསཏཱནི ཛཱིཝིཏཱ ཝོརོཔེསཱིཏི ཨིདཾ ཡེབྷུཡྻཝསེན ཝུཏྟནྟི གཧེཏབྦཾ. ཏསྨཱ ཡེ ཨཏྟནཱཔི ཨཏྟཱནཾ ཨཉྙམཉྙཉྩ ཛཱིཝིཏཱ ཝོརོཔེསུཾ, ཏེ པུཐུཛྫནབྷིཀྑཱུ ཋཔེཏྭཱ ཏདཝསེསེ ཙ པུཐུཛྫནབྷིཀྑཱུ, སབྦེ ཙ ཨརིཡེ ཨཡཾ ཛཱིཝིཏཱ ཝོརོཔེསཱིཏི ཝེདིཏབྦཾ.

༡༦༤. ཨེཀཱིབྷཱཝཏོཏི པཝིཝེཀཏོ. ཨུདྡེསཾ པརིཔུཙྪཾ གཎྷནྟཱིཏི ཨཏྟནོ ཨཏྟནོ ཨཱཙརིཡཱནཾ སནྟིཀེ གཎྷནྟི, གཧེཏྭཱ ཙ ཨཱཙརིཡེཧི སདྡྷིཾ བྷགཝནྟཾ ཨུཔཊྛཧནྟི. ཏདཱ པན ཨུདྡེསཱདིདཱཡཀཱ ཏནུབྷཱུཏེཧི བྷིཀྑཱུཧི བྷགཝནྟཾ ཨུཔགཏཱ, ཏཾ སནྡྷཱཡ བྷགཝཱ པུཙྪཏི.

ཨཱནཱཔཱནསྶཏིསམཱདྷིཀཐཱཝཎྞནཱ

༡༦༥. དསཱནུསྶཏཱིསུ ¶ ཨནྟོགདྷཱཔི ཨཱནཱཔཱནསྶཏི ཏདཱ བྷིཀྑཱུནཾ བཧཱུནཾ སཔྤཱཡཏཾ དསྶེཏུཾ པུན གཧིཏཱ. ཏཐཱ ཧི ཏཾ བྷགཝཱ ཏེསཾ དེསེསི. ཨཱཧཱརེ པཊིཀྐཱུལསཉྙཱ ཨསུབྷཀམྨཊྛཱནསདིསཱ, ཙཏྟཱརོ པན ཨཱརུཔྤཱ ཨཱདིཀམྨིཀཱནཾ ཨནནུརཱུཔཱཏི ཏེསཾ ཨིདྷ ཨགྒཧཎཾ དཊྛབྦཾ. ཨཉྙཾ པརིཡཱཡནྟི ཨརཧཏྟཱདྷིགམཏྠཱཡ ཨཉྙཾ ཀཱརཎཾ. ཨཏྠཡོཛནཱཀྐམནྟི ཨཏྠཉྩ ཡོཛནཱཀྐམཉྩ. ཨསྶཱསཝསེནཱཏི ཨསྶཱསཾ ཨཱརམྨཎཾ ཀཏྭཱཏི ཝུཏྟཾ ཧོཏི. ཨུཔཊྛཱནཾ སཏཱིཏི ཨཔྤམུསྶནཏཱཡ ཏམེཝ ཨསྶཱསཾ པསྶཱསཉྩ ཨུཔགནྟྭཱ ཋཱནཾ, ཏཐཱ ཏིཊྛནཀདྷམྨོ སཏི ནཱམཱཏི ཨཏྠོ. ཨིདཱནི སཏིཝསེནེཝ པུགྒལཾ ནིདྡིསིཏུཀཱམེན ཡོ ཨསྶསཏཱིཏིཨཱདི ཝུཏྟཾ. ཏཏྠ ཡོ ཨསྶསཏི, ཏསྶ སཏི ཨསྶཱསཾ ཨུཔགནྟྭཱ ཏིཊྛཏཱིཏིཨཱདིནཱ ཨཏྠོ གཧེཏབྦོ. ཨཀོསལླསམྦྷཱུཏེཏི ཨཝིཛྫཱསམྦྷཱུཏེ ¶ . ཁཎེནེཝཱཏི ཨཏྟནོ པཝཏྟིཀྑཎེནེཝ. ཨརིཡམགྒསྶ པཱདཀབྷཱུཏོ ཨཡཾ སམཱདྷི ཨནུཀྐམེན ཝཌྜྷིཏྭཱ ཨརིཡམགྒབྷཱཝཾ ཨུཔགཏོ ཝིཡ ཧོཏཱིཏི ཨཱཧ ‘‘ཨརིཡམགྒཝུཌྜྷིཔྤཏྟོ’’ཏི. ཨོཔམྨནིདསྶནནྟི ཨེཏྠ ཨུཔམཱཝ ཨོཔམྨཾ, ཏསྶ ནིདསྶནཾ.

བཱཧིརཀཱ ཨཱནཱཔཱནསྶཏིཾ ཛཱནནྟཱ ཨཱདིཏོ ཙཏུཔྤཀཱརམེཝ ཛཱནནྟི, ན སབྦཾ སོལ༹སཔྤཀཱརནྟི ཨཱཧ སབྦཔྤཀཱརཨིཙྩཱདི. ཨེཝམསྶེཏཾ སེནཱསནནྟི ཨེཏྠ ཨེཝནྟི བྷཱཝནཱསཏིཡཱ ཡཐཱཝུཏྟནཡེན ཨཱརམྨཎེ ཙིཏྟསྶ ནིབནྡྷནེ སཏིཡེཝ, ནཱསཏཱིཏི ཨཏྠོ, ཏེན མུཊྛསྶཏིསྶ ཨརཉྙཝཱསོ ནིརཏྠཀོ ཨནནུརཱུཔོཏི དསྶེཏི. ཨཝསེསསཏྟཝིདྷསེནཱསནནྟི ‘‘པབྦཏཾ ཀནྡརཾ གིརིགུཧཾ སུསཱནཾ ཝནཔཏྠཾ ཨབྦྷོཀཱསཾ པལཱལཔུཉྫ’’ནྟི (ཝིབྷ. ༥༠༨) ཨེཝཾ ཝུཏྟཾ. ཨུཏུཏྟཡཱནུཀཱུལཾ དྷཱཏུཙརིཡཱནུཀཱུལནྟི གིམྷཱནཱདིཨུཏུཏྟཡསྶ སེམྷཱདིདྷཱཏུཏྟཡསྶ མོཧཱདིཙརིཡཏྟཡསྶ ཙ ཨནུཀཱུལཾ. ནིསཛྫཱཡ དལ༹ྷབྷཱཝཾ པལླངྐཱབྷུཛནེན, ཨསྶཱསཔསྶཱསཱནཾ པཝཏྟནསུཁཏཾ ཨུཔརིམཀཱཡསྶ ཨུཛུཀཾ ཋཔནེན, ཨཱརམྨཎཔརིགྒཧཱུཔཱཡཾ པརིམུཁཾ སཏིཡཱ ཋཔནེན ཨུཔདིསནྟོ. ན པཎམནྟཱིཏི ན ཨོཎམནྟི. པརིགྒཧིཏནིཡྻཱནཾ སཏིནྟི སབྦཐཱ གཧིཏཾ སམྨོསཔཊིཔཀྑཏོ ནིགྒམནསངྑཱཏཾ སཏིཾ ཀཏྭཱ, པརམཾ སཏིནེཔཀྐཾ ཨུཔཊྛཔེཏྭཱཏི ཨཏྠོ.

སཏོཝཱཏི སཏིཡཱ སམནྣཱགཏོ ཨེཝ. བཱཏྟིཾསཱཡ ཨཱཀཱརེཧཱིཏི ཙཏཱུསུ ཙཏུཀྐེསུ ཨཱགཏཱནི དཱིགྷརསྶཱདཱིནི སོལ༹ས པདཱནི ཨསྶཱསཔསྶཱསཝསེན དྭིདྷཱ ཝིབྷཛིཏྭཱ ཝུཏྟེཧི དྭཏྟིཾསཱཀཱརེཧི. དཱིགྷཾཨསྶཱསཝསེནཱཏི དཱིགྷཨསྶཱསཝསེན, ཝིབྷཏྟིཨལོཔཾ ཀཏྭཱ ནིདྡེསོ, དཱིགྷནྟི ཝཱ བྷགཝཏཱ ཝུཏྟཨསྶཱསཝསེན. ཙིཏྟསྶ ཨེཀགྒཏཾ ཨཝིཀྑེཔནྟི ཝིཀྑེཔཔཊིཔཀྑབྷཱཝཏོ ‘‘ཨཝིཀྑེཔོ’’ཏི ལདྡྷནཱམཾ ཙིཏྟསྶ ཨེཀགྒབྷཱཝཾ པཛཱནཏོ. པཊིནིསྶགྒཱནུཔསྶཱི ཨསྶཱསཝསེནཱཏི ¶ པཊིནིསྶགྒཱནུཔསྶཱི ཧུཏྭཱ ཨསྶཱསཝསེན, ‘‘པཊིནིསྶགྒཱནུཔསྶིཨསྶཱསནཝསེནཱ’’ཏི ཝཱ པཱཋོ, ཏསྶ པཊིནིསྶགྒཱནུཔསྶིནོ ཨསྶཱསཝསེནཱཏི ཨཏྠོ. ཨཱ པཋམཾ བཧིམུཁཾ སསནཾ ཨསྶཱསོ, ཏཏོ ཨནྟོམུཁཾ པཊིསསནཾ པསྶཱསོཏི ཨཱཧ ཨསྶཱསོཏི བཧིནིཀྑམནཝཱཏོཏིཨཱདི, སུཏྟནྟཊྛཀཐཱསུ པན ཨཱཀཌྜྷནཝསེན ཨནྟོ སསནཾ ཨསྶཱསོ, བཧི པཊིསསནཾ པསྶཱསོཏི ཀཏྭཱ ཨུཔྤཊིཔཱཊིཡཱ ཝུཏྟཾ.

ཏཏྠཱཏི ¶ བཧིནིཀྑམནཨནྟོཔཝིསནཝཱཏེསུ, ཏསྶ ཙ པཋམཾ ཨབྦྷནྟརཝཱཏོ ནིཀྑམཏཱིཏི ཨིམིནཱ སམྦནྡྷོ. ‘‘སབྦེསམྤི གབྦྷསེཡྻཀཱནནྟིཨཱདིནཱ དཱརཀཱནཾ པཝཏྟིཀྐམེན ཨསྶཱསོ བཧིནིཀྑམནཝཱཏོཏི གཧེཏབྦནྟི དཱིཔེཏཱི’’ཏི ཀེཙི ཝདནྟི. སུཏྟནཡོ ཨེཝ ཙེཏྠ ‘‘ཨསྶཱསཱདིམཛ྄ཛྷཔརིཡོསཱནཾ སཏིཡཱ ཨནུགཙྪཏོ ཨཛ྄ཛྷཏྟཾ ཝིཀྑེཔགཏེན ཙིཏྟེན ཀཱཡོཔི ཙིཏྟམྤི སཱརདྡྷཱ ཙ ཧོནྟི ཨིཉྫིཏཱ ཙ ཕནྡིཏཱ ཙ པསྶཱསཱདིམཛ྄ཛྷཔརིཡོསཱནཾ སཏིཡཱ ཨནུགཙྪཏོ བཧིདྡྷཱ ཝིཀྑེཔགཏེན ཙིཏྟེན ཀཱཡོཔི ཙིཏྟམྤི སཱརདྡྷཱ ཙ ཧོནྟི ཨིཉྫིཏཱ ཙ ཕནྡིཏཱ ཙཱ’’ཏི ཨིམཱཡ པཱལི༹ཡཱ སམེཏཱིཏི གཧེཏབྦཾ. ཨདྡྷཱནཝསེནཱཏི ཀཱལདྡྷཱནཝསེན. ཨཡཉྷི ཨདྡྷཱན-སདྡོ ཀཱལསྶ དེསསྶ ཙ ཝཱཙཀོ. ཏཏྠ ཡཐཱ ཧཱིཏིཨཱདིནཱ དེསདྡྷཱནཾ ཨུཔམཱཝསེན དསྶིཏཾ. ཨིདཱནི ཏབྦིསིཊྛཀཱལདྡྷཱནཝསེན ཨསྶཱསཔསྶཱསཱནཾ དཱིགྷརསྶཏཾ ཨུཔམེཡྻཝསེན ཝིབྷཱཝེཏུཾ ཨེཝནྟིཨཱདི ཝུཏྟཾ. ཙུཎྞཝིཙུཎྞཱ ཨནེཀཀལཱཔབྷཱཝེན. ཨེཏྠ ཙ ཧཏྠིཨཱདིསརཱིརེ སུནཁཱདིསརཱིརེ ཙ ཨསྶཱསཔསྶཱསཱནཾ དེསདྡྷཱནཝིསིཊྛཀཱལདྡྷཱནཝསེནེཝ དཱིགྷརསྶཏཱ ཝུཏྟཱཏི ཝེདིཏབྦཱ ཨཏྟབྷཱཝསངྑཱཏཾ དཱིགྷཾ ཨདྡྷཱནཾ སཎིཀཾ པཱུརེཏྭཱཏིཨཱདིཝཙནཏོ. ཏེསནྟི སཏྟཱནཾ. ཏེཏི ཨསྶཱསཔསྶཱསཱ. ཨིཏྟརམདྡྷཱནནྟི ཨཔྤཀཾ ཀཱལཾ. ནཝཧཱཀཱརེཧཱིཏི བྷཱཝནམནུཡུཉྫནྟསྶ པུབྦེནཱཔརཾ ཨལདྡྷཝིསེསསྶ ཀེཝལཾ ཨདྡྷཱནཝསེན ཨཱདིཏོ ཝུཏྟཱ ཏཡོ ཨཱཀཱརཱ, ཏེ ཙ ཀསྶཙི ཨསྶཱསོཝ, ཀསྶཙི པསྶཱསོཝ, ཀསྶཙི ཏདུབྷཡམྤི ཨུཔཊྛཱཏཱིཏི ཏིཎྞཾ པུགྒལཱནཾ ཝསེན ཝུཏྟཱ, ཏཐཱ ཚནྡཝསེན ཏཡོ, ཏཐཱ པཱམོཛྫཝསེནཱཏི ཨིམེཧི ནཝཧི ཨཱཀཱརེཧི. ཨེཀེནཱཀཱརེནཱཏི དཱིགྷཾ ཨསྶཱསཱདཱིསུ ཨེཀེནཱཀཱརེན.

ཨདྡྷཱནསངྑཱཏེཏི དཱིགྷེ ཨོཀཱསདྡྷཱནསངྑཱཏེ ཨཏྟབྷཱཝེ ཀཱལདྡྷཱནེཔི ཝཱ, ཨེཝཾ ཨུཔརི ཨིཏྟརསངྑཱཏེཏི ཨེཏྠཱཔི. ཚནྡོ ཨུཔྤཛྫཏཱིཏི བྷཱཝནཱཡ པུབྦེནཱཔརཾ ཝིསེསཾ ཨཱཝཧནྟིཡཱ ལདྡྷསྶཱདཏྟཱ ཏཏྠ སཱཏིསཡོ ཀཏྟུཀཱམཏཱལཀྑཎོ ཀུསལཙྪནྡོ ཨུཔྤཛྫཏི. ཚནྡཝསེནཱཏི ཏཐཱཔཝཏྟཚནྡསྶ ཝསེན. པཱམོཛྫཾ ཨུཔྤཛྫཏཱིཏི ཨསྶཱསཔསྶཱསཱནཾ སུཁུམཏརབྷཱཝེ ཨཱརམྨཎསྶ སནྟཏརཏཱཡ, ཀམྨཊྛཱནསྶ ཙ ཝཱིཐིཔཊིཔནྣཏཱཡ བྷཱཝནཱཙིཏྟསཧགཏོ པམོདོ ཁུདྡཀཱདིབྷེདཱ ཏརུཎཱ པཱིཏི ཨུཔྤཛྫཏི. ཙིཏྟཾ ཝིཝཏྟཏཱིཏི པཊིབྷཱགནིམིཏྟེ ཨུཔྤནྣེ ¶ པཀཏིཨསྶཱསཔསྶཱསཏོ ¶ ཙིཏྟཾ ནིཝཏྟཏི. ཨུཔེཀྑཱ སཎྛཱཏཱིཏི ཏསྨིཾ པཊིབྷཱགནིམིཏྟེ ཨུཔཙཱརཔྤནཱབྷེདེ སམཱདྷིམྷི ཨུཔྤནྣེ པུན ཛྷཱནནིབྦཏྟནཏྠཾ བྱཱཔཱརཱབྷཱཝཏོ ཨཛ྄ཛྷུཔེཀྑནཾ ཧོཏི, སཱ པནཱཡཾ ཨུཔེཀྑཱ ཏཏྲམཛ྄ཛྷཏྟུཔེཀྑཱཏི ཝེདིཏབྦཱ. ཨནུཔསྶནཱཉཱཎནྟི སམཐཝསེན ནིམིཏྟསྶ ཨནུཔསྶནཱ, ཝིཔསྶནཱཝསེན ཨསྶཱསཔསྶཱསམུཁེན ཏནྣིསྶཡནཱམརཱུཔསྶ ཨནུཔསྶནཱ ཙ ཉཱཎཾ. ཀཱཡོ ཨུཔཊྛཱནནྟི ཨསྶཱསཔསྶཱསསངྑཱཏོ ཀཱཡོ ཨུཔགནྟྭཱ ཏིཊྛཏི ཨེཏྠ སཏཱིཏི ཨུཔཊྛཱནཾ, ནོ སཏི, སཏི པན སརསཏོ ཨུཔཏིཊྛནཊྛེན སརཎཊྛེན ཙ ཨུཔཊྛཱནཉྩེཝ སཏི ཙ. ཏེན ཝུཙྩཏཱིཏིཨཱདཱིསུ ཡཱ ཨཡཾ ཡཐཱཝུཏྟཨསྶཱསཔསྶཱསཀཱཡེ, ཏནྣིསྶཡབྷཱུཏེ ཀརཛཀཱཡེ ཙ ཀཱཡསྶེཝ ཨནུཔསྶནཱ ནིཙྩཱདིབྷཱཝཾ ཝཱ ཨིཏྠིཔུརིསསཏྟཛཱིཝཱདིབྷཱཝཾ ཝཱ ཨནནུཔསྶིཏྭཱ ཨསྶཱསཔསྶཱསཀཱཡམཏྟསྶེཝ ཨནིཙྩཱདིབྷཱཝསྶ ཙ ཨནུཔསྶནཱ, ཏཱཡ ཀཱཡཱནུཔསྶནཱཡ སཏིསངྑཱཏསྶ པཊྛཱནསྶ བྷཱཝནཱ ཝཌྜྷནཱ ཀཱཡེ ཀཱཡཱནུཔསྶནཱ སཏིཔཊྛཱནབྷཱཝནཱཏི ཨཡཾ སངྑེཔཏྠོ.

ཨིཏྟརཝསེནཱཏི པརིཏྟཀཱལཝསེན. ཏཱདིསོཏི དཱིགྷོ རསྶོ ཙ. ཝཎྞཱཏི དཱིགྷཱདིཨཱཀཱརཱ. ནཱསིཀགྒེཝ བྷིཀྑུནོཏི ནཱསིཀགྒེ ཝཱ, ཝཱ-སདྡེན ཨུཏྟརོཊྛེ ཝཱཏི ཨཏྠོ. ཏསྨཱཏི ཡསྨཱ ‘‘ཨཱདིམཛ྄ཛྷཔརིཡོསཱནཝསེན སབྦཾ ཨསྶཱསཔསྶཱསཀཱཡཾ ཝིདིཏཾ པཱཀཊཾ ཀརིསྶཱམཱི’’ཏི པུབྦེ པཝཏྟཨཱབྷོགཝསེན པཙྪཱ ཏཐཱ སམུཔྤནྣེན ཉཱཎསམྤཡུཏྟཙིཏྟེན ཏཾ ཨསྶཱསཔསྶཱསཀཱཡཾ ཨེཝཾ ཝིདིཏཾ པཱཀཊཾ ཀརོནྟོ ཨསྶསཏི ཙེཝ པསྶསཏི ཙ, ཏསྨཱ ཨེཝཾབྷཱུཏོ སབྦཀཱཡཔཊིསཾཝེདཱི ཨསྶསིསྶཱམི པསྶསིསྶཱམཱིཏི སིཀྑཏི ནཱམ, ན པན ‘‘ཨནཱགཏེ ཨེཝཾ ཀརིསྶཱམཱི’’ཏི ཙིནྟནམཏྟེན སོ ཨེཝཾ ཝུཙྩཏཱིཏི ཨདྷིཔྤཱཡོ. ཏཐཱབྷཱུཏསྶཱཏི ཨཱདིམཛ྄ཛྷཔརིཡོསཱནཾ ཝིདིཏཾ ཀརོནྟསྶ. སཾཝརོཏི སཏི ཝཱིརིཡམྤི ཝཱ. ན ཨཉྙཾ ཀིཉྩཱིཏི སབྦཀཱཡཾ ཝིདིཏཾ ཀརིསྶཱམཱིཏིཨཱདིཀཾ པུབྦཱབྷོགཾ སནྡྷཱཡ ཝདཏི. ཉཱཎུཔྤཱདནཱདཱིསཱུཏི ཨཱདི-སདྡེན ཀཱཡསངྑཱརཔསྶམྦྷནཔཱིཏིཔཊིསཾཝེདནཱདིཾ སངྒཎྷཱཏི. ཀཱཡསངྑཱརནྟི ཨསྶཱསཔསྶཱསཾ. སོ ཧི ཙིཏྟསམུཊྛཱནོཔི སམཱནོ ཀརཛཀཱཡཔཊིབདྡྷཝུཏྟིཏཱཡ ཏེན སངྑརཱིཡཏཱིཏི ཀཱཡསངྑཱརོཏི ཝུཙྩཏི. ཨཔརིགྒཧིཏཀཱལེཏི ཀམྨཊྛཱནསྶ ཨནཱརདྡྷཀཱལེ, ཏདཱརམྦྷཏྠཱཡ ཀཱཡཙིཏྟཱནམྤི ཨཔརིགྒཧིཏཀཱལེཏི ཨཏྠོ. ནིསཱིདཏི པལླངྐཾ ¶ ཨཱབྷུཛིཏྭཱ ཨུཛུཾ ཀཱཡཾ པཎིདྷཱཡཱཏི ཧི ཨིམིནཱ ཀཱཡཔརིགྒཧོ, པརིམུཁཾ སཏིཾ ཨུཔཊྛཔེཏྭཱཏི ཨིམིནཱ ཙིཏྟཔརིགྒཧོ ཝུཏྟོ. ཨདྷིམཏྟནྟི བལཝཾ ཨོལཱ༹རིཀཾ, ལིངྒཝིཔལླཱསེན ཝུཏྟཾ. ཀཱཡསངྑཱརོ ཧི ཨདྷིཔྤེཏོ. ཨདྷིམཏྟཾ ཧུཏྭཱ པཝཏྟཏཱིཏི ཀིརིཡཱཝིསེསནཾ ཝཱ ཨེཏཾ. སབྦེསཾཡེཝཱཏི ཨུབྷཡེསམྤི.

མཧཱབྷཱུཏཔརིགྒཧེ སུཁུམོཏི ཙཏུདྷཱཏུམུཁེན ཝིཔསྶནཱབྷིནིཝེསཾ སནྡྷཱཡ ཝུཏྟཾ. ལཀྑཎཱརམྨཎིཀཝིཔསྶནཱཡཱཏི ¶ ཀལཱཔསམྨསནམཱཧ. ནིབྦིདཱནུཔསྶནཏོ པཊྛཱཡ བལཝཝིཔསྶནཱ, ཏཏོ ཨོརཾ དུབྦལཝིཔསྶནཱ. པུབྦེ ཝུཏྟནཡེནཱཏི ཨཔརིགྒཧིཏཀཱལེཏིཨཱདིནཱ སམཐནཡེ ཝུཏྟནཡེན.

ཙོདནཱསོདྷནཱཧཱིཏི ཨནུཡོགཔརིཧཱརེཧི. ཀཐནྟིཨཱདི པཊིསམྦྷིདཱཔཱལི༹, ཏཏྠ ཀཐཾ སིཀྑཏཱིཏི སམྦནྡྷོ. ཨིཏི ཀིརཱཏིཨཱདི ཙོདཀཝཙནཾ. ཨིཏི ཀིརཱཏི ཨེཝཉྩེཏི ཨཏྠོ. ཨསྶཱསཔསྶཱསོ སབྦཐཱ ཨབྷཱཝཾ ཨུཔནེཏི ཙེཏི ཙོདཀསྶ ཨདྷིཔྤཱཡོ. ཝཱཏཱུཔལདྡྷིཡཱཏི ཨསྶཱསཔསྶཱསཝཱཏསྶ ཨབྷཱཝེན ཏབྦིསཡཱཡ ཨུཔལདྡྷིཡཱ བྷཱཝནཱཙིཏྟསྶ ཨུཔྤཱདོ ཝཌྜྷི ཙ ན ཧོཏཱིཏི ཨཏྠོ. ན ཙ ནནྟི ཨེཏྠ ནནྟི ནིཔཱཏམཏྟཾ. པུན ཨིཏི ཀིརཱཏིཨཱདི ཡཐཱཝུཏྟཱཡ ཙོདནཱཡ ཝིསྶཛྫནཱ, ཏཏྠ ཨིཏི ཀིར སིཀྑཏཱིཏི མཡཱ ཝུཏྟཱཀཱརེན ཡདི སིཀྑཏཱིཏི ཨཏྠོ. པབྷཱཝནཱ ཧོཏཱིཏི ཡདིཔི ཨོལཱ༹རིཀཱ ཀཱཡསངྑཱརཱ པཊིཔྤསྶམྦྷནྟི, སུཁུམཱ པན ཨཏྠེཝཱཏི བྷཱཝནཱཡཔི ཝཌྜྷི ཧོཏེཝཱཏི ཨདྷིཔྤཱཡོ. ཀཾསེཏི ཀཾསབྷཱཛནེ. ནིམིཏྟནྟི ནིམིཏྟསྶ, ཏེསཾ སདྡཱནཾ པཝཏྟིཨཱཀཱརསྶཱཏི ཨཏྠོ. སུཁུམཀཱ སདྡཱཏི ཨནུརཝེ ཨཱཧ. སུཁུམསདྡནིམིཏྟཱརམྨཎཏཱཔཱིཏི སུཁུམོ སདྡོཝ ནིམིཏྟཾ ཏདཱརམྨཎཏཱཡཔི.

ཨཱབྷིསམཱཙཱརིཀསཱིལནྟི ཨེཏྠ ཨབྷིསམཱཙཱརོཏི ཨུཏྟམསམཱཙཱརོ, ཏདེཝ ཨཱབྷིསམཱཙཱརིཀཾ སཱིལཾ, ཁནྡྷཀཝཏྟཔརིཡཱཔནྣསྶ སཱིལསྶེཏཾ ཨདྷིཝཙནཾ. ཨཧཾ སཱིལཾ རཀྑཱམཱིཏི ཨུབྷཏོཝིབྷངྒཔརིཡཱཔནྣཾ སཱིལཾ སནྡྷཱཡ ཝུཏྟཾ. ཨཱཝཱསོཏི ཨཱཝཱསཔལིབོདྷོ. ཀུལནྟིཨཱདཱིསུཔི ཨེསེཝ ནཡོ. ཀམྨནྟི ནཝཀམྨཾ. ཨིདྡྷཱིཏི པོཐུཛྫནིཀཱ ཨིདྡྷི, སཱ ཝིཔསྶནཱཡ པལིབོདྷོ. སོ ཨུཔཙྪིནྡིཏབྦོཏི ཝིསུདྡྷིམགྒེ (ཝིསུདྡྷི. ༡.༤༡) ཝུཏྟེན ཏསྶ ¶ ཏསྶ པལིབོདྷསྶ ཨུཔཙྪེདཔྤཀཱརེན ཨུཔཙྪིནྡིཏབྦོ. ཡོགཱནུཡོགོཏི ཡོགསྶ བྷཱཝནཱཡ ཨནུཡུཉྫནཾ. ཨཊྛཏིཾསཱརམྨཎེསཱུཏི ཨཱལོཀཱཀཱསཀསིཎདྭཡཾ ཝཛྫེཏྭཱ པཱལི༹ཡཾ ཨཱགཏཱནཾ ཨཊྛནྣཾ ཀསིཎཱནཾ ཝསེན ཝུཏྟཾ, ཙཏྟཱརཱིསཉྙེཝ པན ཀམྨཊྛཱནཱནི. ཡཐཱཝུཏྟེནེཝ ནཡེནཱཏི ཡོགཱནུཡོགཀམྨསྶ པདཊྛཱནཏྟཱཏི ཨིམམཏྠཾ ཨཏིདིསཏི. ཨིམིནཱཝ ཀམྨཊྛཱནེནཱཏི ཨིམིནཱ ཨཱནཱཔཱནསྶཏིཀམྨཊྛཱནེན. མཧཱཧཏྠིཔཐཾ ནཱིཧརནྟོ ཝིཡཱཏི ཀམྨཊྛཱནཝཱིཐིཾ མཧཱཧཏྠིམགྒཾ ཀཏྭཱ དསྶེནྟོ ཝིཡ.

ཝུཏྟཔྤཀཱརམཱཙརིཡནྟི ‘‘ཨིམིནཱཝ ཀམྨཊྛཱནེན ཙཏུཏྠཛ྄ཛྷཱནཾ ནིབྦཏྟེཏྭཱ ཝིཔསྶནཾ ཝཌྜྷེཏྭཱ ཨརཧཏྟཾ པཏྟསྶཱ’’ཏིཨཱདིནཱ ཧེཊྛཱ ཝུཏྟཔྤཀཱརཾ ཨཱཙརིཡཾ. ‘‘པིཡོ གརུ བྷཱཝནཱིཡོ’’ཏིཨཱདིནཱ (ཨ. ནི. ༧.༣༧; ནེཏྟི. ༡༡༣; མི. པ. ༦.༡.༡༠) ཝིསུདྡྷིམགྒེ (ཝིསུདྡྷི. ༡.༤༢) ཝུཏྟཔྤཀཱརམཱཙརིཡནྟིཔི ¶ ཝདནྟི. པཉྩསནྡྷིཀནྟི པཉྩཔབྦཾ, པཉྩབྷཱགནྟི ཨཏྠོ. ཀམྨཊྛཱནསྶ ཨུགྒཎྷནནྟི ཀམྨཊྛཱནགནྠསྶ ཨུགྒཎྷནཾ. ཏདཏྠཔརིཔུཙྪཱ ཀམྨཊྛཱནསྶ པརིཔུཙྪཱ, ཏཏྠ སཾསཡཔརིཔུཙྪཱ ཝཱ. ཀམྨཊྛཱནསྶ ཨུཔཊྛཱནནྟི ཨེཝཾ བྷཱཝནམནུཡུཉྫནྟསྶ ཨེཝམིདྷ ནིམིཏྟཾ ཨུཔཏིཊྛཏཱིཏི ཨུཔདྷཱརཎཾ. ཏཐཱ ཀམྨཊྛཱནཔྤནཱ ཨེཝཾ ཛྷཱནམཔྤེཏཱིཏི. ཀམྨཊྛཱནསྶ ལཀྑཎནྟི གཎནཱནུབནྡྷནཱཕུསནཱནཾ ཝསེན བྷཱཝནཾ ཨུསྶུཀྐཱཔེཏྭཱ ཋཔནཱཝསེན མཏྠཀཔྤཏྟི ཨིདྷ བྷཱཝནཱཏི ཀམྨཊྛཱནསབྷཱཝསྶ སལླཀྑཎཾ, ཏེནཱཧ ‘‘ཀམྨཊྛཱནསབྷཱཝཱུཔདྷཱརཎནྟི ཝུཏྟཾ ཧོཏཱི’’ཏི.

ཨཊྛཱརསསེནཱསནདོསཝིཝཛྫིཏནྟི མཧཏྟཾ ནཝཏྟཾ ཛིཎྞཏྟཾ པནྠནིསྶིཏཏྟཾ སོཎྜིཔཎྞཔུཔྥཕལཡུཏྟཏཱ པཏྠནཱིཡཏཱ ནགརདཱརུཁེཏྟསནྣིསྶིཏཏཱ ཝིསབྷཱགཱནཾ པུགྒལཱནཾ ཨཏྠིཏཱ པཊྚནསནྣིསྶིཏཏཱ པཙྩནྟསནྣིསྶིཏཏཱ རཛྫསཱིམསནྣིསྶིཏཏཱ ཨསཔྤཱཡཏཱ ཀལྱཱཎམིཏྟཱནཾ ཨལཱབྷོཏི ཨིམེཧི ཨཊྛཱརསཧི སེནཱསནདོསེཧི ཝིཝཛྫིཏཾ. པཉྩསེནཱསནངྒསམནྣཱགཏནྟི –

‘‘ཨིདྷ, བྷིཀྑཝེ, སེནཱསནཾ ནཱཏིདཱུརཾ ཧོཏི ནཱཙྩཱསནྣཾ གམནཱགམནསམྤནྣཾ དིཝཱ ཨཔྤཱཀིཎྞཾ རཏྟིཾ ཨཔྤསདྡཾ ཨཔྤནིགྒྷོསཾ ཨཔྤཌཾསམཀསཝཱཏཱཏཔསརཱིསཔསམྥསྶཾ, ཏསྨིཾ ཁོ པན སེནཱསནེ ཝིཧརནྟསྶ ཨཔྤཀསིརེན ཨུཔྤཛྫནྟི ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱ, ཏསྨིཾ ཁོ པན སེནཱསནེ ¶ ཐེརཱ བྷིཀྑཱུ ཝིཧརནྟི …པེ… ཨེཝཾ ཁོ, བྷིཀྑཝེ, སེནཱསནཾ པཉྩངྒསམནྣཱགཏཾ ཧོཏཱི’’ཏི (ཨ. ནི. ༡༠.༡༡) –

ཨེཝཾ བྷགཝཏཱ ཝུཏྟེཧི པཉྩཧི སེནཱསནངྒེཧི སམནྣཱགཏཾ, ཨེཏྠ ཙ ནཱཏིདཱུརཏཱདི ཨེཀཾ, དིཝཱ ཨཔྤཱཀིཎྞཏཱདི ཨེཀཾ, ཨཔྤཌཾསཱདིཏཱ ཨེཀཾ, ཙཱིཝརཱདིལཱབྷོ ཨེཀཾ, ཐེརཱནཾ བྷིཀྑཱུནཾ ནིཝཱསོ ཨེཀནྟི ཨེཝཾ པཉྩངྒཱནི ཝེདིཏབྦཱནི.

ཨུཔཙྪིནྣཁུདྡཀཔལིབོདྷེནཱཏི དཱིགྷཱནཾ ཀེསཱདཱིནཾ ཧརཎེན པཏྟཙཱིཝརཱདཱིནཾ པཙནཏུནྣཀརཎརཛནཱདིཀརཎེཧི ཙ ཨུཔཙྪིནྣཱ ཁུདྡཀཱ པལིབོདྷཱ ཡེན, ཏེན. བྷཏྟསམྨདནྟི བྷོཛནནིམིཏྟཾ པརིསྶམཾ. ཨཱཙརིཡཏོ ཨུགྒཧོ ཨཱཙརིཡུགྒཧོ, སབྦོཔི ཀམྨཊྛཱནཝིདྷི, ན པུབྦེ ཝུཏྟཨུགྒཧམཏྟཾ, ཏཏོ. ཨེཀཔདམྤཱིཏི ཨེཀཀོཊྛཱསམྤི.

ཨནུཝཧནཱཏི ཨསྶཱསཔསྶཱསཱནཾ ཨནུགམནཝསེན སཏིཡཱ ནིརནྟརཾ ཨནུཔྤཝཏྟནཱ. ཡསྨཱ པན གཎནཱདིཝསེན ཝིཡ ཕུསནཱཝསེན ཝིསུཾ མནསིཀཱརོ ནཏྠི, ཕུཊྛཕུཊྛཊྛཱནེ ཨེཝ གཎནཱདི ཀཱཏབྦནྟི ¶ དསྶེཏུཾ ཨིདྷ ཕུསནཱགཧཎནྟི དཱིཔེནྟོ ‘‘ཕུསནཱཏི ཕུཊྛཊྛཱན’’ནྟི ཨཱཧ. ཋཔནཱཏི སམཱདྷཱནཾ, སམཱདྷིཔྤདྷཱནཱ པན ཨཔྤནཱཏི ཨཱཧ ‘‘ཋཔནཱཏི ཨཔྤནཱ’’ཏི. ཨནིཙྩཏཱདཱིནཾ ལཀྑཎཏོ སལླཀྑཎཱ ཝིཔསྶནཱ. པཝཏྟཏོ ནིམིཏྟཏོ ཙ ཝིནིཝཊྚནཏོ ཝིནིཝཊྚནཱ མགྒོ. ཀིལེསཔཊིཔྤསྶདྡྷིབྷཱཝཏོ པཱརིསུདྡྷི ཕལཾ. ཏེསནྟི ཝིནིཝཊྚནཱཔཱརིསུདྡྷཱིནཾ. ཁཎྜནྟི ‘‘ཨེཀཾ ཏཱིཎི པཉྩཱ’’ཏི ཨེཀནྟརིཀཱདིབྷཱཝེན གཎནཱཡ ཁཎྜནཾ. ཨཐ ཝཱ ཁཎྜནྟི ཨནྟརནྟརཱ ཀཏིཔཡཀཱལཾ ཨགཎེཏྭཱ པུན གཎནཝསེན ཨནྟརཱ ཨོདྷིཔརིཙྪེདོ ན དསྶེཏབྦོ. ཏཐཱ ཁཎྜཾ དསྶེནྟསྶ ཧི ‘‘ཀམྨཊྛཱནནིནྣཾ པཝཏྟཏི ནུ ཁོ མེ ཙིཏྟཾ, ནོ’’ཏི ཝཱིམཾསུཔྤཏྟིཡཱ ཝིཀྑེཔོ ཧོཏི, ཏེནཱཧ སིཁཱཔྤཏྟཾ ནུ ཁོ མེཏིཨཱདི, ཨིདཉྩ ཨེཝཾ ཁཎྜཾ དསྶེཏྭཱ ཙིརཏརཾ གཎནཱཡ མནསིཀརོནྟསྶ ཝསེན ཝུཏྟཾ. སོ ཧི ཏཐཱ ལདྡྷཾ ཨཝིཀྑེཔམཏྟཾ ནིསྶཱཡ ཨེཝཾ མཉྙེཡྻ. ཡོ ཨུཔཊྛཱཏི, ཏཾ གཧེཏྭཱཏི ཨིདཾ ཨསྶཱསཔསྶཱསེསུ ཡསྶ ཨེཀོཝ པཋམཾ ཨུཔཊྛཱཏི, ཏཾ སནྡྷཱཡ ཝུཏྟཾ, ཡསྶ པན ཨུབྷོཔི ཨུཔཊྛཧནྟི, ཏེན ཨུབྷཡམྤི གཧེཏྭཱ གཎིཏབྦཾ. ཡོ ཨུཔཊྛཱཏཱིཏི ཨིམིནཱཝ དྭཱིསུ ནཱསཱཔུཊཝཱཏེསུ ཡོ པཱཀཊོ ཧོཏི, སོ གཧེཏབྦོཏི ¶ ཨཡམྤི ཨཏྠོ དཱིཔིཏོཏི གཧེཏབྦཾ. པཋམཾ ཨེཀེཀསྨིཾ ཨུཔཊྛིཏེཔི ཨུཔལཀྑེཏྭཱ གཎནྟསྶེཝ ཀམེན ཨུབྷོཔི པཱཀཊཱ ཧོནྟཱིཏི ཨཱཧ ‘‘ཨསྶཱསཔསྶཱསཱ པཱཀཊཱ ཧོནྟཱི’’ཏི. ཨེཝཾ སཱིགྷཾ སཱིགྷཾ གཎེཏབྦམེཝཱཏི སམྦནྡྷོ. ཨེཝཾ སཱིགྷགཎནཱརམྦྷསྶ ཨོཀཱསཾ དསྶེཏུཾ ཨིམསྶཱཔི པུརིམནཡེན གཎཡཏོཏིཨཱདི ཝུཏྟཾ. ཏཏྠ པུརིམནཡེནཱཏི དནྡྷགཎནཱཡ, པཱཀཊཱ ཧུཏྭཱཏི ཨིམིནཱ དནྡྷགཎནཱཡ ཨཱརདྡྷཀཱལེ ཙིཏྟསྶ ཨཝིསདཏཱཡ སུཁུམསྶཱསཱདཱིནཾ ཨཔཱཀཊཏཾ, པཙྪཱ ཝིསདཀཱལེ པཱཀཊཏཉྩ ཏེསུ ཙ པཱཀཊེསུ དནྡྷགཎནཾ པཧཱཡ སཱིགྷགཎནཱ ཀཱཏབྦཱཏི དསྶེཏི. སཱིགྷགཎནཱཡ ནིཔྤརིཡཱཡཏོ ནིརནྟརཔྤཝཏྟི ཨཔྤནཱཝཱིཐིཡམེཝ, ན ཀཱམཱཝཙརེ བྷཝངྒནྟརིཀཏྟཱཏི ཨཱཧ ‘‘ནིརནྟརཔྤཝཏྟཾ ཝིཡཱ’’ཏི. པུརིམནཡེནེཝཱཏི སཱིགྷགཎནཱཡ. ཨནྟོ པཝིསནྟཾ ཝཱཏཾ མནསིཀརོནྟོ ཨནྟོ ཙིཏྟཾ པཝེསེཏི ནཱམ.

ཨེཏནྟི ཨེཏཾ ཨསྶཱསཔསྶཱསཛཱཏཾ. ཨནུགམནནྟི ཕུཊྛཊྛཱནེ མནསིཀརཎམེཝ, ན ཨསྶཱསཔསྶཱསཱནཾ ཨནུཝཏྟནཾ, ཏེནཱཧ – ‘‘ཏཉྩ ཁོ ན ཨཱདིམཛ྄ཛྷཔརིཡོསཱནཱནུགམནཝསེནཱ’’ཏི. ཕུསནཱཋཔནཱཝསེན ཝིསུཾ མནསིཀཱརོ ནཏྠཱིཏི ཨིམིནཱ ཡཐཱ གཎནཱཡ ཕུསནཱཡ ཙ མནསིཀརོཏི, ཨེཝཾ ཨནུབནྡྷནཾ ཝིནཱ ཀེཝལཾ ཋཔནཱཡ ཙ ཕུསནཱཡ ཙ མནསིཀཱརོཔི ནཏྠཱིཏི དསྶེནྟེན གཎནཾ པཊིསཾཧརིཏྭཱ ཡཱཝ ཨཔྤནཱ ཨུཔྤཛྫཏི, ཏཱཝ ཨནུབནྡྷནཱཡ ཙ ཕུསནཱཡ ཙ མནསིཀརོཏི, ཨཔྤནཱཡ པན ཨུཔྤནྣཱཡ ཨནུབནྡྷནཱཡ ཋཔནཱཡ ཙ མནསིཀརོཏི ནཱམཱཏི དཱིཔིཏཾ ཧོཏི, ཨཊྛཀཐཱཡཾ པན ཨནུབནྡྷནཱཡ ཝིནཱ ཋཔནཱཡ མནསིཀཱརོ ནཏྠཱིཏི དསྶནཏྠཾ ‘‘ཨནུབནྡྷནཱཡ ཙ ཕུསནཱཡ ཙ ཋཔནཱཡ ཙ མནསིཀརོཏཱིཏི ཝུཙྩཏཱི’’ཏི ཨེཏྟཀམེཝ ཝུཏྟནྟི གཧེཏབྦཾ ¶ . ཡཱ ཨཙྩནྟཱཡ ན མིནོཏི ན ཝིནིཙྪནཏི, སཱ མཱནསྶ སམཱིཔེཏི ཨུཔམཱནཾ སིདྡྷསཱདིསེན སཱདྷྱསཱདྷནཾ ཡཐཱ གོ ཝིཡ གཝཡོཏི. པངྒུལོ༹ཏི པཱིཋསཔྤཱི. དོལཱཏི པེངྑོལོ. ཀཱིལ༹ཏནྟི ཀཱིལ༹ནྟཱནཾ. ཨུཔནིབནྡྷནཏྠམྦྷམཱུལེཏི ནཱསིཀགྒཾ མུཁནིམིཏྟཉྩ སནྡྷཱཡ ཝུཏྟཾ. ཨཱདིཏོ པབྷུཏཱིཏི ཨུཔམེཡྻཏྠདསྶནཏོ པཊྛཱཡ. ནིམིཏྟནྟི ཨུཔནིབནྡྷནནིམིཏྟཾ ནཱསིཀགྒཾ, མུཁནིམིཏྟཾ ཝཱ. ཨནཱརམྨཎམེཀཙིཏྟསྶཱཏི ཨསྶཱསཔསྶཱསཱནཾ ཨེཀཀྑཎེ ཨཔྤཝཏྟནཏོ ཨེཀསྶ ཙིཏྟསྶ ཏཡོཔི ཨཱརམྨཎཾ ན ཧོནྟི, ནིམིཏྟེན སཧ ཨསྶཱསོ པསྶཱསོ ཝཱཏི དྭེཡེཝ ཨེཀཀྑཎེ ཨཱརམྨཎཾ ¶ ཧོནྟཱིཏི ཨཏྠོ. ཨཛཱནཏོ ཙ ཏཡོ དྷམྨེཏི ནིམིཏྟཾ ཨསྶཱསོ པསྶཱསོཏི ཨིམེ ཏཡོ དྷམྨེ ཨཱརམྨཎཀརཎཝསེན ཨཝིནྡནྟསྶ, ཙ-སདྡོ བྱཏིརེཀོ, ཏེན ཨེཝཉྩ སཏི ཨཡཾ ཨནིཊྛཔྤསངྒོཏི བྱཏིརེཀཾ དསྶེཏི. བྷཱཝནཱཏི ཨཱནཱཔཱནསྶཏིབྷཱཝནཱ.

ཀཐཾ ཨིམེ…པེ… ཝིསེསམདྷིགཙྪཏཱིཏི ཨིདཾ པརིཧཱརགཱཐཱཡ ཝུཏྟམེཝཏྠཾ ཀཀཙོཔམཱཡ (མ. ནི. ༡.༢༢༢ ཨཱདཡོ) ཝིཝརིཏུཾ པུཙྪཱཋཔནཾ. ཏཏྠ ཀཐཾ-སདྡོ པཙྩེཀཾ ཡོཛེཏབྦོ ‘‘ཀཐམིམེ ཨཝིདིཏཱ…པེ… ཀཐཾ ཝིསེསམདྷིགཙྪཏཱི’’ཏི. པདྷཱནནྟི བྷཱཝནཱནིཔྥཱདཀཾ ཝཱིརིཡཾ. པཡོགནྟི ནཱིཝརཎཝིཀྑམྦྷཀཾ བྷཱཝནཱནུཡོགཾ. ཝིསེསནྟི ཨརཧཏྟཔརིཡོསཱནཝིསེསཾ. པདྷཱནནྟི རུཀྑསྶ ཚེདནཝཱིརིཡཾ. པཡོགནྟི ཏསྶེཝ ཚེདནཀཀིརིཡཾ. ཀིཉྩཱཔེཏྠ ‘‘ཝིསེསམདྷིགཙྪཏཱི’’ཏི ཨུཔམཱཡཾ ན ཝུཏྟཾ, ཏཐཱཔི ཨཏྠཏོ ཡོཛེཏབྦམེཝ. ཡཐཱ རུཀྑོཏིཨཱདི ཨུཔམཱསཾསནྡནཾ. ནཱསིཀགྒེ ཝཱ མུཁནིམིཏྟེ ཝཱཏི དཱིགྷནཱསིཀོ ནཱསིཀགྒེ, ཨིཏརོ མུཁཾ ནིམིཡཏི ཚཱདིཡཏི ཨེཏེནཱཏི མུཁནིམིཏྟནྟི ལདྡྷནཱམེ ཨུཏྟརོཊྛེ.

ཨིདཾ པདྷཱནནྟི ཡེན ཝཱིརིཡཱརམྦྷེན ཀཱཡོཔི ཙིཏྟམྤི བྷཱཝནཱཀམྨསྶ ཨརཧཾ ཨིདྷ པདྷཱནནྟི ཕལེན ཧེཏུཾ དསྶེཏི. ཨུཔཀྐིལེསཱཏི ནཱིཝརཎཱ. ཝིཏཀྐཱཏི ཀཱམཝིཏཀྐཱདིམིཙྪཱཝིཏཀྐཱ, ནཱིཝརཎཔྤཧཱནེན ཝཱ པཋམཛ྄ཛྷཱནཱདྷིགམཾ དསྶེཏྭཱ ཝིཏཀྐཱུཔསམཱཔདེསེན དུཏིཡཛ྄ཛྷཱནཱདཱིནམདྷིགམམཱཧ. ཨཡཾ པཡོགོཏི ཨཡཾ ཛྷཱནཱདྷིགམསྶ ཧེཏུབྷཱུཏོ ཀམྨཊྛཱནཱནུཡོགསངྑཱཏོ པཡོགོ. སཾཡོཛནཱ པཧཱིཡནྟཱིཏི དསཔི སཾཡོཛནཱནི མགྒཔཨཔཱཊིཡཱ སམུཙྪེདཝསེན པཧཱིཡནྟི. བྱནྟཱི ཧོནྟཱིཏི ཏཐཱ སཏྟཔི ཨནུསཡཱ བྷངྒམཏྟསྶཔི ཨནཝསེསཏོ ཝིགཏནྟཱ ཧོནྟི. ཨཡཾ ཝིསེསོཏི ཨིམཾ སམཱདྷིཾ ནིསྶཱཡ ཨནུཀྐམེན ལབྦྷམཱནོ ཨཡཾ སཾཡོཛནཔྤཧཱནཱདིཀོ ཨིམསྶ སམཱདྷིསྶ ཝིསེསོཏི ཨཏྠོ. ཨེཝཾ ཨིམེ ཏཡོ དྷམྨཱཏིཨཱདི ནིགམནཝཙནཾ. པརིཔུཎྞཱཏི སོལ༹སནྣཾ ཝཏྠཱུནཾ པཱརིཔཱུརིཡཱ སབྦསོ པུཎྞཱ. ཨནུཔུབྦནྟི ཨནུཀྐམེན. པརིཙིཏཱཏི པརིཙིཎྞཱ. ཨིམཾ ལོཀནྟི ཁནྡྷཱདིལོཀཾ པཉྙཱཔབྷཱསེན པབྷཱསེཏི.

ཨིདྷཱཏི ¶ ཨིམསྨིཾ ཋཱནེ. ཨསྶཱཏི ཨུཔམཱབྷཱུཏསྶ ཀཀཙསྶ. ཨཱནཡནེ པཡོཛནནྟི ཡོཛེཏབྦཾ. ནིམིཏྟནྟི པཊིབྷཱགནིམིཏྟཾ. ཨཝསེསཛྷཱནངྒཔཊིམཎྜིཏཱཏི ཝིཏཀྐཱདིཨཝསེསཛྷཱནངྒཔཊིམཎྜིཏཱཏི ཝདནྟི. ཝིཙཱརཱདཱིཧཱིཏི ¶ པན ཝཏྟབྦཾ ནིཔྤརིཡཱཡེན ཝིཏཀྐསྶ ཨཔྤནཱབྷཱཝཏོ. སོ ཧི ‘‘ཨཔྤནཱ བྱཔྤནཱ’’ཏི ནིདྡིཊྛོ. ཨེཝཉྷི སཏི ཨཝསེས-སདྡོ ཨུཔཔནྣོ ཧོཏི, ཝིཏཀྐསམྤཡོགཏོ ཝཱ ཛྷཱནངྒེསུ པདྷཱནབྷཱུཏོ སམཱདྷི ཨཔྤནཱཏི ཀཏྭཱ ‘‘ཨཝསེསཛྷཱནངྒཔཊིམཎྜིཏཱ ཨཔྤནཱསངྑཱཏཱ ཋཔནཱ ཙ སམྤཛྫཏཱི’’ཏི ཝུཏྟཾ. ཀསྶཙི པན གཎནཱཝསེནེཝ མནསིཀཱརཀཱལཏོ པབྷུཏཱིཏི ཨེཏྠ ‘‘ཨནུཀྐམཏོ…པེ… པཏྟཾ ཝིཡ ཧོཏཱི’’ཏི ཨུཔརི ཝཀྑམཱནོ གནྠོ པུརཱཎཔོཏྠཀེསུ དིསྶཏི, ཏསྨཱ ཨཡཾ པཱཋོ ཨེཏྠཱཔི ལིཁིཏབྦོ, ལེཁཀཱནཾ པན དོསེན གལི༹ཏོཏི ཝེདིཏབྦོ.

ཨོལཱ༹རིཀེ ཨསྶཱསཔསྶཱསེ ནིརུདྡྷེཏིཨཱདི ཧེཊྛཱ ཝུཏྟནཡམྤི ཝིཙེཏབྦཱཀཱརཔྤཏྟསྶ ཀཱཡསངྑཱརསྶ ཝིཙཡནཝིདྷིཾ དསྶེཏུཾ ཨཱནཱིཏཾ. དེསཏོཏི པུབྦེ ཕུསནཝསེན གཧིཏཊྛཱནཏོ. ནིམིཏྟཾ པཊྛཔེཏབྦནྟི པུབྦེ གཧིཏཱཀཱརནིམིཏྟགྒཱཧིཀཱ སཉྙཱ ཕུསནཊྛཱནེ པཊྛཔེཏབྦཱ. ཨིམམེཝ ཧི ཨཏྠཝསནྟི ཨིམཾ ཨནུཔཊྛཧནྟསྶ ཨཱརམྨཎསྶ ཨུཔཊྛཱནཝིདྷིསངྑཱཏཾ ཀཱརཎཾ པཊིཙྩ. ཨིཏོཏི ཨཱནཱཔཱནཀམྨཊྛཱནཏོ. གརུཀཏཱ ཙ བྷཱཝནཱདུཀྐརཏཱཡཱཏི ཨཱཧ ‘‘གརུཀབྷཱཝན’’ནྟི. ཙརིཏྭཱཏི གོཙརཾ གཧེཏྭཱ. ནིམིཏྟནྟི ཨུགྒཧནིམིཏྟཾ, པཊིབྷཱགནིམིཏྟཾ ཝཱ. ཨུབྷཡམྤི ཧི ཨིདྷ ཨེཀཛ྄ཛྷཾ ཝུཏྟཾ. ཏཐཱ ཧི ཏཱུལཔིཙུཨཱདིཨུཔམཏྟཡཾ ཨུགྒཧེ ཡུཛྫཏི, སེསཾ ཨུབྷཡཏྠ.

ཏཱརཀརཱུཔཾ ཝིཡཱཏི ཏཱརཀཱཡ སརཱུཔཾ ཝིཡ. སཉྙཱནཱནཏཱཡཱཏི ནིམིཏྟུཔཊྛཱནཏོ པུབྦེ པཝཏྟསཉྙཱནཾ ནཱནཏཱཡ. སཉྙཛནྟི བྷཱཝནཱསཉྙཱཡ པརིཀཔྤིཏཾ, ན ཨུཔྤཱདིཏཾ ཨཝིཛྫམཱནཏྟཱ, ཏེནཱཧ ‘‘ནཱནཏོ ཨུཔཊྛཱཏཱི’’ཏི. ཨེཝཾ ཧོཏཱིཏི བྷཱཝནམནུཡུཏྟསྶ ཨེཝཾ ཨུཔཊྛཱཏི. ཨེཝནྟི ཨེཝཾ སཏི, ཡཐཱཝུཏྟནཡེན ནིམིཏྟེ ཨེཝ ཙིཏྟསྶ ཋཔནེ སཏཱིཏི ཨཏྠོ. ཨིཏོ པབྷུཏཱིཏི ཨིཏོ པཊིབྷཱགནིམིཏྟུཔྤཏྟིཏོ པཊྛཱཡ. ནིམིཏྟེཏི པཊིབྷཱགནིམིཏྟེ. ཋཔཡནྟི ཋཔནཱཝསེན ཙིཏྟཾ ཋཔནྟོ. ནཱནཱཀཱརནྟི ‘‘ཙཏྟཱརོ ཝཎྞཱ’’ཏི ཨེཝཾ ཝུཏྟཾ ནཱནཱཀཱརཾ. ཝིབྷཱཝཡནྟི ཝིབྷཱཝེནྟོ ཨནྟརདྷཱཔེནྟོ. ནིམིཏྟུཔྤཏྟིཏོ པཊྛཱཡ ཧི ཏེ ཨཱཀཱརཱ ཨམནསིཀརོཏོ ཨནྟརཧིཏཱ ཝིཡ ཧོནྟི. ཨསྶཱསཔསྶཱསེཏི ཨསྶཱསེ པསྶཱསེ ཙ ཡོ ནཱནཱཀཱརོ, ཏཾ ཝིབྷཱཝཡཾ ཨསྶཱསཔསྶཱསསམྦྷཱུཏེ ཝཱ ནིམིཏྟེ ཙིཏྟཾ ཋཔཡཾ སཀཾ ཙིཏྟཾ ནིབནྡྷཏི ནཱམཱཏི ¶ ཡོཛནཱ. ཀེཙི པན ཝིབྷཱཝཡནྟི ཨེཏསྶ ཝིབྷཱཝེནྟོ ཝིདིཏཾ པཱཀཊཾ ཀརོནྟོཏི ཨཏྠཾ ཝདནྟི, ཏཾ པུབྦབྷཱགཝསེན ཡུཛྫེཡྻ. ཨཡཉྷེཏྠ ཨཏྠོ – ཨསྶཱསཔསྶཱསེ ནཱནཱཀཱརཾ ¶ ཝིབྷཱཝེནྟོ པཛཱནནྟོ ཏཏྠ ཡཾ ལདྡྷཾ ནིམིཏྟཾ, ཏསྨིཾ ཙིཏྟཾ ཋཔེནྟོ ཨནུཀྐམེན སཀཾ ཙིཏྟཾ ནིབནྡྷཏི ཨཔྤེཏཱིཏི.

ཀིལེསཱཏི ཨཝསེསཀིལེསཱ. སནྣིསིནྣཱཡེཝཱཏི ཨལདྡྷནཱིཝརཎསཧཱཡཱ ཨོལཱིནཱཡེཝ. ཨུཔཙཱརབྷཱུམིཡནྟི ཨུཔཙཱརཱཝཏྠཱཡཾ. ལཀྑཎཏོཏི ཝིཀྑམྦྷནཱདིསབྷཱཝཏོ ཝཱ ཨནིཙྩཱདིསབྷཱཝཏོ ཝཱ. གོཙརོཏི བྷིཀྑཱཙཱརགཱམོ. ཡཏྠ དུལླབྷཱ སཔྤཱཡབྷིཀྑཱ, སོ ཨསཔྤཱཡོ, ཨིཏརོ སཔྤཱཡོ. བྷསྶནྟི དསཀཐཱཝཏྠུནིསྶིཏཾ བྷསྶཾ, ཏཾ སཔྤཱཡཾ, ཨིཏརམསཔྤཱཡཾ. སེསེསུ ཨཱཝཱསཱདཱིསུ ཡཏྠ ཡཏྠ ཨསམཱཧིཏཾ ཙིཏྟཾ སམཱདྷིཡཏི, ཏཾ ཏཾ སཔྤཱཡཾ, ཨིཏརམསཔྤཱཡནྟི གཧེཏབྦཾ. ཡསྶ པན ཨེཝཾ སཏྟཝིདྷཾ ཨསཔྤཱཡཾ ཝཛྫེཏྭཱ སཔྤཱཡམེཝ སེཝནྟསྶཔི ཨཔྤནཱ ན ཧོཏི, ཏེན སམྤཱདེཏབྦཾ དསཝིདྷཾ ཨཔྤནཱཀོསལླཾ དསྶེནྟོ ཝཏྠུཝིསདཀིརིཡཱཏིཨཱདིམཱཧ. ཏཏྠ ཝཏྠུཝིསདཀིརིཡཱ ནཱམ ཀེསནཁཙྪེདནཱདཱིཧི ཨཛ྄ཛྷཏྟིཀསྶ སརཱིརཝཏྠུསྶ, ཙཱིཝརསེནཱསནཱདིདྷོཝནཔརིཀམྨཱདཱིཧི བཱཧིརཝཏྠུསྶ ཙ ཝིསདབྷཱཝཀརཎཾ. ཨེཝཉྷི ཉཱཎམྤི ཝིསདཀིཙྩནིཔྥཏྟིཀརཾ ཧོཏི. ཨིནྡྲིཡསམཏྟཔཊིཔཱདནཏཱ ནཱམ སདྡྷཱདཱིནཾ ཨིནྡྲིཡཱནཾ སམབྷཱཝཀརཎཾ. ནིམིཏྟཀུསལཏཱ ནཱམ བྷཱཝནཱཡ ལདྡྷནིམིཏྟསྶ རཀྑཎཀོསལླཾ. ཡསྨིཾ སམཡེ ཙིཏྟཾ ནིགྒཧེཏབྦནྟིཨཱདཱིསུ ཡསྨིཾ སམཡེ ཙིཏྟཾ ཨཙྩཱརདྡྷཏཱདཱིཧི ཀཱརཎེཧི ཨུདྡྷཏཏཱཡ ནིགྒཧེཏབྦཾ, ཏདཱ དྷམྨཝིཙཡསམྦོཛ྄ཛྷངྒཱདཡོ ཏཡོ ཨབྷཱཝེཏྭཱ པསྶདྡྷཱདཱིནཾ ཏིཎྞཾ བྷཱཝནེན ཙིཏྟསྶ ནིགྒཎྷནཱ ཧོཏི. ཡདཱསྶ ཙིཏྟཾ ཨཏིསིཐིལཝཱིརིཡཏཱདཱིཧི ལཱིནཏཱཡ པགྒཧེཏབྦཾ, ཏདཱ པསྶདྡྷིསམྦོཛ྄ཛྷངྒཱདཡོ ཏཡོ ཨབྷཱཝེཏྭཱ དྷམྨཝིཙཡཱདཱིནཾ ཏིཎྞཾ བྷཱཝནེན ཙིཏྟསྶ པགྒཎྷནཾ ཧོཏི. ཡདཱསྶ པཉྙཱཔཡོགམནྡཏཱདཱིཧི ནིརསྶཱདཾ ཙིཏྟཾ ཧོཏི, ཏདཱ ཏསྶ ཙིཏྟསྶ ཨཊྛསཾཝེགཝཏྠུཔཙྩཝེཀྑཎཱདིནཱ (ཨ. ནི. ཨཊྛ. ༡.༡.༤༡༨) སམྤཧཾསནསངྑཱཏཱ སཾཝེཛནཱ ཧོཏི. ཡདཱ པནསྶ ཨེཝཾ པཊིཔཛྫནཏོ ཨལཱིནཾ ཨནུདྡྷཏཾ ཨནིརསྶཱདཾ ཨཱརམྨཎེ སམཔྤཝཏྟཾ སམཐཝཱིཐིཔཊིཔནྣཉྩ ཙིཏྟཾ ཧོཏི, ཏདཱ ཏསྶ པགྒཧནིགྒཧསམྤཧཾསནེསུ ཨབྱཱཔཱརཏཱསམཱཔཛྫནེན ཨཛ྄ཛྷུཔེཀྑནཱ ཧོཏི.

ཏདདྷིམུཏྟཏཱ ¶ ནཱམ སམཱདྷིཨདྷིམུཏྟཏཱ, སམཱདྷིནིནྣཔོཎཔབྦྷཱརཏཱཏི ཨཏྠོ. ཨེཏྠཱཏི ཨེཏིསྶཾ ཀཱཡཱནུཔསྶནཱཡཾ.

པཱརིསུདྡྷིཾ པཏྟུཀཱམོཏི ཕལཾ ཨདྷིགནྟུཀཱམོ སམཱཔཛྫིཏུཀཱམོ ཙ. ཏཏྠ སལླཀྑཎཱཝིཝཊྚནཱཝསེན པཋམཾ མགྒཱནནྟརཕལཾ ཨདྷིགནྟུཀཱམོ. ཏཏོ པརཾ སལླཀྑཎཝསེན ཕལསམཱཔཏྟིཾ སམཱཔཛྫིཏུཀཱམོཔཱིཏི ཨེཝམཏྠོ གཧེཏབྦོ. ཨཱཝཛྫནསམཱཔཛྫན…པེ… ཝསིཔྤཏྟནྟི ¶ ཨེཏྠ པཊིལདྡྷཛྷཱནཏོ ཝུཊྛཱཡ ཝིཏཀྐཱདཱིསུ ཛྷཱནངྒེསུ ཨེཀེཀཾ ཨཱཝཛྫཡཏོ བྷཝངྒཾ ཨུཔཙྪིནྡིཏྭཱ ཨུཔྤནྣཱཝཛྫནཱནནྟརཾ ཝིཏཀྐཱདཱིསུ ཡཐཱཝཛྫིཏཛྷཱནངྒཱརམྨཎཱནི ཀཱམཱཝཙརཛཝནཱནི བྷཝངྒནྟརིཏཱནི ཡདཱ ནིརནྟརཾ པཝཏྟནྟི, ཨཐསྶ ཨཱཝཛྫནཝསཱི སིདྡྷཱ ཧོཏི. ཏཾ པན ཛྷཱནཾ སམཱཔཛྫིཏུཀཱམཏཱནནྟརཾ སཱིགྷཾ སམཱཔཛྫནསམཏྠཏཱ སམཱཔཛྫནཝསཱི ནཱམ. ཨཙྪརཱམཏྟཾ ཝཱ དསཙྪརཱམཏྟཾ ཝཱ ཁཎཾ ཛྷཱནཾ ཋཔེཏུཾ སམཏྠཏཱ ཨདྷིཊྛཱནཝསཱི ནཱམ. ཏཐེཝ ལཧུཾ ཁཎཾ ཛྷཱནསམངྒཱི ཧུཏྭཱ ཛྷཱནཏོ བྷཝངྒུཔྤཏྟིཝསེན ཝུཊྛཱཏུཾ སམཏྠཏཱ ཝུཊྛཱནཝསཱི ནཱམ. ‘‘ཨེཏྟཀམེཝ ཁཎཾ སམཱཔཛྫིསྶཱམཱི’’ཏི, ‘‘ཨེཏྟཀམེཝ ཁཎཾ ཛྷཱནསམངྒཱི ཧུཏྭཱ ཛྷཱནཏོ ཝུཊྛཧིསྶཱམཱི’’ཏི ཙ པཝཏྟཔུབྦཔརིཀམྨབྷེདེནེཏྠ ཨདྷིཊྛཱནཝུཊྛཱནཝསིཡོ བྷིནྣཱ, ན སརཱུཔབྷེདེན, ཡཱ ‘‘སམཱཔཏྟིཀུསལཏཱ, ཝུཊྛཱནཀུསལཏཱ’’ཏི ཝུཙྩནྟི. པཙྩཝེཀྑཎཝསཱི པན ཨཱཝཛྫནཝསིཡཱ ཨེཝ ཝུཏྟཱ. པཙྩཝེཀྑཎཝཱིཐིཡཉྷི སཱིགྷཾ ཨཱཝཛྫནུཔྤཏྟིཡཱ ཨཱཝཛྫནཝསཱི ཏདནནྟརཱནཾ ཛཝནཱནཾ སམུཔྤཏྟིཡཱ པཙྩཝེཀྑཎཝསཱིཏི ཨཱཝཛྫནཝསཱིསིདྡྷིཡཱཝ པཙྩཝེཀྑཎཝསཱི སིདྡྷཱ ཨེཝ ཧོཏཱིཏི ཝེདིཏབྦཱ. ཛྷཱནངྒཱནི པརིགྒཧེཏྭཱཏི ཛྷཱནཙིཏྟསམྤཡུཏྟཱནི ཛྷཱནངྒཱནི ལཀྑཎཱདིཝསེན པརིགྒཧེཏྭཱ. ཏེསཉྩ ནིསྶཡནྟི ཏེསཾ ཝཏྠུནིསྶཡཱནཾ བྷཱུཏཱནཾ ནིསྶཡཾ. ཨིདཉྩ ཀརཛཀཱཡསྶ ཝཏྠུདསཀསྶ བྷཱུཏནིསྶཡཏྟཱ སུཏྟནྟནཡེན ཝུཏྟཾ, ན པཊྛཱནནཡེན. ན ཧི ཀལཱཔནྟརགཏཱནི བྷཱུཏཱནི ཀལཱཔནྟརགཏཱནཾ བྷཱུཏཱནཾ ནིསྶཡཔཙྩཡཱ ཧོནྟི, སུཏྟནྟནཡེན པན ཨུཔནིསྶཡཔཙྩཡོཏི ཝེདིཏབྦཱནི. པཊྛཱནེ ཧི ཨསངྒཧིཏཱ སབྦེ པཙྩཡཱ སུཏྟནྟིཀནཡེན ཨུཔནིསྶཡཔཙྩཡེ སངྒཡ྄ཧནྟཱིཏི ཝེདིཏབྦཾ. ཏཾནིསྶིཏརཱུཔཱནཱིཏི ཨུཔཱདཱརཱུཔཱནི. ཡཐཱཔརིགྒཧིཏརཱུཔཝཏྠུདྭཱརཱརམྨཎཾ ཝཱཏི ཨེཏྠ ཡཐཱཔརིགྒཧིཏཀེསཱདིརཱུཔཱརམྨཎཾ ཏཏོ པུབྦེ ཝུཏྟནཡཝཏྠཱརམྨཎཉྩ ཏནྣིསྶཡཀརཛཀཱཡཔཨགྒཧམུཁེན ¶ ཨུཔཊྛིཏཙཀྑཱདིདྭཱརཉྩ སསམྤཡུཏྟདྷམྨཝིཉྙཱཎཾ ཝཱཏི ཡོཛེཏབྦཾ. ཀམྨཱརགགྒརཱིཏི ཀམྨཱརཱནཾ ཨགྒིདྷམནབྷསྟཱ. ཏཛྫནྟི ཏདནུརཱུཔཾ. ཏསྶཱཏི ནཱམརཱུཔསྶ. ཏཾ དིསྭཱཏི ཨཝིཛྫཱཏཎྷཱདིཔཙྩཡཾ དིསྭཱ. ཀངྑཾ ཝིཏརཏཱིཏི ཨཧོསིཾ ནུ ཁོ ཨཧཾ ཨཏཱིཏམདྡྷཱནནྟིཨཱདིནཡཔྤཝཏྟཾ (མ. ནི. ༡.༡༨; སཾ. ནི. ༢.༢༠) སོལ༹སཝཏྠུཀཾ ཝིཙིཀིཙྪཾ ཨཏིཀྐམཏི. ཀལཱཔསམྨསནཝསེནཱཏི ཡཾ ཀིཉྩི རཱུཔཾ ཨཏཱིཏཱནཱགཏཔཙྩུཔྤནྣནྟིཨཱདིནཱ (མ. ནི. ༡.༣༦༡; ༣.༨༦, ༨༩; ཨ. ནི. ༤.༡༨༡) པཉྩསུ ཁནྡྷེསུ ཨཏཱིཏཱདིཀོཊྛཱསཾ ཨེཀེཀཀལཱཔཏོ གཧེཏྭཱ ཨནིཙྩཱདིཝསེན སམྨསནཾ ཀལཱཔསམྨསནཾ, ཏསྶ ཝསེན. པུབྦབྷཱགེཏི པཊིཔདཱཉཱཎདསྶནཝིསུདྡྷིཔརིཡཱཔནྣཱཡ ཨུདཡབྦཡཱནུཔསྶནཱཡ པུབྦབྷཱགེ. ཨོབྷཱསཱདཡོཏི ཨོབྷཱསོ ཉཱཎཾ པཱིཏི པསྶདྡྷི སུཁཾ ཨདྷིམོཀྑོ པགྒཧོ ཨུཔེཀྑཱ ཨུཔཊྛཱནཾ ནིཀནྟི ཙ. ཏཏྠ ཨདྷིམོཀྑོཏི སདྡྷཱ. ཨུཔཊྛཱནནྟི སཏི. ཨུཔེཀྑཱཏི ཏཏྲམཛ྄ཛྷཏྟཏཱ. ཨེཏྠ ཙ ཨོབྷཱསཱདཡོ ནཝ ནིཀནྟིསངྑཱཏཏཎྷུཔཀྐིལེསཝཏྠུཏཱཡ ཨུཔཀྐིལེསཱ ཝུཏྟཱ ¶ , ནིཀནྟི པན ཨུཔཀྐིལེསཏཱཡ ཏབྦཏྠུཏཱཡ ཙ. ནིབྦིནྡནྟོ ཨཱདཱིནཝཱནུཔསྶནཱཔུབྦངྒམཱཡ ནིབྦིདཱནུཔསྶནཱཡ ནིབྦིནྡནྟོ. མུཉྩིཏུཀམྱཏཱཔཊིསངྑཱནུཔསྶནཱསངྑཱརུཔེཀྑཱནུལོམཉཱཎཱནཾ ཙིཎྞཔརིཡནྟེ ཨུཔྤནྣགོཏྲབྷུཉཱཎཱནནྟརཾ ཨུཔྤནྣེན མགྒཉཱཎེན སབྦསངྑཱརེསུ ཝིརཛྫནྟོ ཝིམུཙྩནྟོ. ཕལཀྑཎེ ཧི ཝིམུཏྟོ ནཱམ ཝུཙྩཏི, མགྒཀྑཎེ ཝིམུཙྩནྟོཏི. ཨེཀཱུནཝཱིསཏིབྷེདསྶཱཏི ཙཏུནྣཾ མགྒཝཱིཐཱིནཾ ཨནནྟརཾ པཙྩེཀཾ ཨུཔྤཛྫནྟསྶ མགྒཕལནིབྦཱནཔཧཱིནཱཝསིཊྛཀིལེསཱནཾ པཉྩནྣཾ པཙྩཝེཀྑིཏབྦཱནཾ ཝསེན ཨེཀཱུནཝཱིསཏིབྷེདསྶ. ཨརཧཏོ ཧི ཨཝསིཊྛཀིལེསཱབྷཱཝེན ཨེཀཱུནཝཱིསཏིཏཱ. ཨསྶཱཏི ཨཱནཱཔཱནཀམྨཊྛཱནིཀསྶ.

སཔྤཱིཏིཀེ དྭེ ཛྷཱནེཏི པཱིཏིསཧགཏཱནི ཙཏུཀྐནཡེ དྭེ པཋམདུཏིཡཛ྄ཛྷཱནཱནི. ཏསྶཱཏི ཏེན ཡོགིནཱ. སམཱཔཏྟིཀྑཎེཏི སམཱཔནྣཀྑཎེ. ཨཱརམྨཎཏོཏི པཊིབྷཱགཱརམྨཎགྒཧཎམུཁེན པཱིཏི པཊིསཾཝིདིཏཱ ཧོཏི, ཨཱརམྨཎསྶ པཊིསཾཝིདིཏཏྟཱ. ཨཱརམྨཎེ ཧི ཝིདིཏེ ཏབྦིསཡཱ ཙིཏྟཙེཏསིཀཱ དྷམྨཱ སཡཾ ཨཏྟནོ པཊིསཾཝིདིཏཱ ནཱམ ཧོཏི སལཀྑཎཏོ སཱམཉྙལཀྑཎཏོ ཙ པཙྪཱ གཧཎེ སནྡེཧཱབྷཱཝཏོ. ཝིཔསྶནཱཀྑཎེཏི ཝིཔསྶནཱཔཉྙཱཡ ཝིསཡཏོ དསྶནཀྑཎེ. ཨེཝཾ པཱིཏིཾ ཨནིཙྩཱདིཝསེན གཧཎམེཝ ཨསམྨོཧཏོ པཱིཏིཔཊིསཾཝེདནཾ ནཱམ.

དཱིགྷཾ ¶ ཨསྶཱསཝསེནཱཏི དཱིགྷསྶ ཨསྶཱསསྶ ཨཱརམྨཎབྷཱུཏསྶ ཝསེན, པཛཱནཏོ སཱ པཱིཏི པཊིསཾཝིདིཏཱ ཧོཏཱིཏི སམྦནྡྷོ. ཙིཏྟསྶ ཨེཀགྒཏཾ ཨཝིཀྑེཔཾ པཛཱནཏོཏི ཛྷཱནཔརིཡཱཔནྣཾ ཨཝིཀྑེཔཱཔནྣཾ ནཱམ ཙིཏྟསྶེཀགྒཏཾ ཏཾསམྤཡུཏྟཱཡ པཉྙཱཡ པཛཱནཏོ. ཡཐེཝ ཧི ཨཱརམྨཎམུཁེན པཱིཏི པཊིསཾཝིདིཏཱ ཧོཏི, ཨེཝཾ ཏཾསམྤཡུཏྟདྷམྨཱཔི པཊིསཾཝིདིཏཱ ཨེཝ ཧོནྟཱིཏི. སཏི ཨུཔཊྛིཏཱ ཧོཏཱིཏི དཱིགྷཾ ཨསྶཱསཝསེན ཛྷཱནསམྤཡུཏྟཱ སཏི ཏསྶ ཨཱརམྨཎེ ཨུཔཊྛིཏཱ ཏདཱརམྨཎཛ྄ཛྷཱནེཔི ཨུཔཊྛིཏཱ ནཱམ ཧོཏཱིཏི. དཱིགྷཾ པསྶཱསཝསེནཱཏིཨཱདཱིསུཔི ཨིམིནཱཝ ནཡེན ཨཏྠོ ཝེདིཏབྦོ. ཨེཝཾ དསྶིཏཾ པཱིཏིཔཊིསཾཝེདནཾ ཨཱརམྨཎཏོ ཨསམྨོཧཏོ ཙ ཝིབྷཱགཏོ དསྶེཏུཾ ཨཱཝཛྫཏོཏིཨཱདི ཝུཏྟཾ. ཏཏྠ ཨཱཝཛྫཏོཏི ཛྷཱནཾ ཨཱཝཛྫནྟསྶ. སཱ པཱིཏཱིཏི སཱ ཛྷཱནཔརིཡཱཔནྣཱ པཱིཏི. ཛཱནཏོཏི སམཱཔནྣཀྑཎེ ཨཱརམྨཎམུཁེན ཛཱནཏོ, ཏསྶ སཱ པཱིཏི པཊིསཾཝིདིཏཱ ཧོཏཱིཏི སམྦནྡྷོ. པསྶཏོཏི དསྶནབྷཱུཏེན ཉཱཎེན ཛྷཱནཏོ ཝུཊྛཱཡ པསྶནྟསྶ. པཙྩཝེཀྑཏོཏི ཛྷཱནཾ པཙྩཝེཀྑནྟསྶ. ཙིཏྟཾ ཨདྷིཊྛཧཏོཏི ‘‘ཨེཏྟཀཾ ཝེལཾ ཛྷཱནསམངྒཱི བྷཝིསྶཱམཱི’’ཏི ཛྷཱནཙིཏྟཾ ཨདྷིཊྛཧནྟསྶ. ཨེཝཾ པཉྩནྣཾ ཝསིབྷཱཝཱནཾ ཝསེན ཛྷཱནསྶ པཛཱནནམུཁེན ཨཱརམྨཎཏོ པཱིཏིཡཱ པཊིསཾཝེདནཱ དསྶིཏཱ. ཨདྷིམུཙྩཏོཏི སདྡཧནྟསྶ, སམཐཝིཔསྶནཱཝསེནཱཏི ཨདྷིཔྤཱཡོ. ཝཱིརིཡཾ པགྒཎྷཏོཏིཨཱདཱིསུཔི ཨེསེཝ ནཡོ. ཨབྷིཉྙེཡྻནྟི ཝིསིཊྛཱཡ པཉྙཱཡ ཛཱནིཏབྦཾ ཙཏུསཙྩཾ ཝིཔསྶནཱཔཉྙཱཔུབྦངྒམཱཡ མགྒཔཉྙཱཡ ¶ ཨབྷིཛཱནཏོཏིཨཱདི ཡོཛནཱ. ཨེཝཾ པརིཉྙེཡྻནྟིཨཱདཱིསུཔི པརིཛཱནཏོཏིཨཱདིནཱ ཡོཛནཱ ཝེདིཏབྦཱ. ཏཏྠ པརིཉྙེཡྻནྟི དུཀྑསཙྩཾ. ཨཝསེསཔདཱནཱིཏི སུཁཔཊིསཾཝེདཱི ཙིཏྟསངྑཱརཔཊིསཾཝེདཱིཏི པདཱནི.

ཝེདནཱདཡོཏི ཨཱདི-སདྡེན སཉྙཱ གཧིཏཱ, ཏེནཱཧ ‘‘དྭེ ཁནྡྷཱ’’ཏི. ཝིཔསྶནཱབྷཱུམིདསྶནཏྠནྟི ཀཱཡིཀསུཁཱདིསཱིསེན པཀིཎྞཀསངྑཱརདསྶནཏོ ཝུཏྟཾ སམཐེ ཀཱཡིཀསུཁཱབྷཱཝཏོ. སོཏི པསྶམྦྷནཔརིཡཱཡེན ཝུཏྟོ ནིརོདྷོ. ཝུཏྟནཡེནཱཏི ཨིམསྶ ཧི བྷིཀྑུནོ པུབྦེ ཨཔརིགྒཧིཏཀཱལེཏིཨཱདིནཱ (པཱརཱ. ཨཊྛ. ༢.༡༦༥) ཀཱཡསངྑཱརེ ཝུཏྟནཡེན. པཱིཏིསཱིསེན ཝེདནཱ ཝུཏྟཱཏི པཱིཏིཨཔདེསེན ཝེདནཱ ཝུཏྟཱ, སུཁགྒཧཎཏོ ¶ ཝེདནཱནུཔསྶནཱཔསངྒཏོཏི ཨདྷིཔྤཱཡོ. དྭཱིསུ ཙིཏྟསངྑཱརཔདེསཱུཏི ‘‘ཙིཏྟསངྑཱརཔཊིསཾཝེདཱི པསྶམྦྷཡཾ ཙིཏྟསངྑཱར’’ནྟི ཨིམེསུ དྭཱིསུ ཀོཊྛཱསེསུ. སཉྙཱསམྤཡུཏྟཱ ཝེདནཱཏི ཝེདནཱནུཔསྶནཱབྷཱཝཏོ ཝུཏྟཾ. ཙིཏྟཔཊིསཾཝེདིཏཱ ཝེདིཏབྦཱཏི ཨཱརམྨཎཏོ ཨསམྨོཧཏོཏིཨཱདིནཱ ཝུཏྟནཡཾ སནྡྷཱཡ ཝུཏྟཾ. ཙིཏྟནྟི ཛྷཱནསམྤཡུཏྟཾ ཝིཔསྶནཱསམྤཡུཏྟཉྩ ཙིཏྟཾ. ཨཱམོདེཏཱིཏི སམྤཡུཏྟཱཡ པཱིཏིཡཱ ཛྷཱནཝིསཡཱཡ མོདེཏི. ཝིཔསྶནཱཀྑཎེཏིཨཱདིནཱ ཝུཏྟབྷངྒཱནུཔསྶནཀྑཎེ.

ཨཱནཱཔཱནསྶཏིསམཱདྷིཀཐཱཝཎྞནཱནཡོ ནིཊྛིཏོ.

༡༦༧. ཡདིཔི ཨརིཡཱ ནེཝ ཨཏྟནཱཝ ཨཏྟཱནཾ ཨཉྙམཉྙཾ ཝཱ ཛཱིཝིཏཱ ཝོརོཔེནྟི, ནཱཔི པརེཧི སམཱདཔེནྟི, ཏཐཱཔི ཡཐཱཝུཏྟེཧི ཏཱིཧི པཀཱརེཧི མཏཱནཾ པུཐུཛྫནཱནཾ ཨནྟརེ མིགལཎྜིཀེན མཱརིཏཱནཾ ཨརིཡཔུགྒལཱནམྤི ཨཏྠིཏཱཡ ‘‘ཨརིཡཔུགྒལམིསྶཀཏྟཱ’’ཏི ཝུཏྟཾ. ཨཐ ཝཱ པུཐུཛྫནཀཱལེ ཨཏྟནཱཝ ཨཏྟཱནཾ གྷཱཏེཏྭཱ མརཎསམཡེ ཝིཔསྶནཾ ཝཌྜྷེཏྭཱ ཨརིཡམགྒཾ པཊིལབྷིཏྭཱ མཏཱནམྤི སབྦྷཱཝཏོ ཨེཝཾ ཝུཏྟནྟི གཧེཏབྦཾ.

པདབྷཱཛནཱིཡཝཎྞནཱ

༡༧༢. བྱཉྫནེ ཨཱདརཾ ཨཀཏྭཱཏི ཛཱནིཏྭཱ སཉྫཱནིཏྭཱཏིཨཱདིནཱ བྱཉྫནཱནུརཱུཔཾ ཨཝུཏྟཏྟཱ ཝུཏྟཾ. པཱཎོཏི ཛཱནནྟོཏི ཨིདཾ མནུསྶོཏི ཨཛཱནིཏྭཱཔི ཀེཝལཾ སཏྟསཉྙཱཡ ཨེཝ པཱརཱཛིཀབྷཱཝདསྶནཏྠཾ ཝུཏྟཾ. ཝདྷཀཙེཏནཱཝསེན ཙེཏེཏྭཱཏི ‘‘ཨིམཾ མཱརེམཱི’’ཏི ཝདྷཀཙེཏནཱཡ ཙིནྟེཏྭཱ. པཀཔྤེཏྭཱཏི ‘‘ཝདྷཱམི ན’’ནྟི ཨེཝཾ ཙིཏྟེན པརིཙྪིནྡིཏྭཱ. ཨབྷིཝིཏརིཏྭཱཏི སནྣིཊྛཱནཾ ཀཏྭཱ, ཏེནཱཧ ‘‘ནིརཱསངྐཙིཏྟཾ པེསེཏྭཱ’’ཏི. སིཁཱཔྤཏྟོ ཨཏྠོཏི སཉྩིཙྩཱཏི པུབྦཀཱལཀིརིཡཱཝསེན ¶ ཝུཏྟསྶཔི ཝཱིཏིཀྐམབྷཱུཏསྶ ཨཔརཀཱལཀིརིཡཱཡུཏྟདསྶནེན ཀོཊིཔྤཏྟོ ཨཏྠོ. ཛཱཏིཨུཎྞཱ ནཱམ ཏདཧུཛཱཏཨེལ༹ཀསྶ ལོམཾ. ཨེཝཾ ཝཎྞཔྤཊིབྷཱགནྟི ཨེཝཾ ཝཎྞསཎྛཱནཾ. ཏཏོ ཝཱ ཨུདྡྷནྟི དུཏིཡསཏྟཱཧཱདཱིསུ ཨབྦུདཱདིབྷཱཝཔྤཏྟཾ སནྡྷཱཡ ཝུཏྟཾ. པརིཧཱིནཝེགསྶ སནྟཱནསྶ པཙྩཡོ ཧོཏཱིཏི ¶ སཧཀཱརཱིཔཙྩཡོ ཧོཏི, ན ཛནཀོ. ཀམྨམེཝ ཧི ཁཎེ ཁཎེ ཨུཔྤཛྫམཱནཱནཾ ཀམྨཛརཱུཔཱནཾ ཛནཀཔཙྩཡོ, ཏཉྩ པཝཏྟིཡཾ པུབྦེ ཨུཔྤཛྫིཏྭཱ ཋིཏཾ ཨནུཔཧཏཾ ཙཏུསནྟཏིརཱུཔཾ སཧཀཱརཱིཔཙྩཡཾ ལབྷིཏྭཱཝ ཀཱཏུཾ སཀྐོཏི, ན ཨཉྙཐཱ, ཡེན ཀེནཙི ཝིརོདྷིཔཙྩཡེན ནིརུདྡྷཙཀྑཱདིཔྤསཱདཱནཾ པུགྒལཱནཾ ཝིཛྫམཱནམྤི ཀམྨཾ ཙཀྑཱདིཀཾ ཛནེཏུཾ ན སཀྐོཏཱིཏི སིདྡྷམེཝ ཧོཏི.

ཨཏིཔཱཏེནྟོཏི ཨཏིཔཱཏེནྟོ ཝིནཱསེནྟོ. ཝུཏྟཔཀཱརམེཝཱཏི ཛཱིཝིཏིནྡྲིཡཱཏིཔཱཏནཝིདྷཱནཾ ཝུཏྟཔྤཀཱརམེཝ. སརསེནེཝ པཏནསབྷཱཝསྶ སཎིཀཾ པཏིཏུཾ ཨདཏྭཱ ཨཏཱིཝ པཱཏནཾ སཱིགྷཔཱཏནཾ ཨཏིཔཱཏོ, པཱཎསྶ ཨཏིཔཱཏོ པཱཎཱཏིཔཱཏོ. ཨཱཐབྦཎིཀཱཏི ཨཐབྦཎཝེདིནོ. ཨཐབྦཎནྟི ཨཐབྦཎཝེདཝིཧིཏཾ. མནྟཾ པཡོཛེནྟཱིཏི ཨལོཎབྷོཛནདབྦསཡནསུསཱནགམནཱདཱིཧི པཡོགེཧི མནྟཾ པརིཝཏྟེནྟི, ཏེན ཡཐིཙྪིཏཔཱཎཝདྷཱདིཕལཾ ཨུཔཔཛྫཏི, ཏསྨཱ ཏཾ ཀཱཡཝཙཱིཀམྨེསུ པཝིཊྛཾ. ཨཱིཏིནྟི པཱིལ༹ཾ. ཨུཔདྡཝནྟི ཏཏོ ཨདྷིཀཏརཾ པཱིལ༹ཾ. པཛྫརཀནྟི ཝིསམཛྫརཾ. སཱུཙིཀནྟི སཱུཙཱིཧི ཝིཡ ཝིཛ྄ཛྷམཱནཾ སཱུལཾ. ཝིསཱུཙིཀནྟི སསཱུལཾ ཨཱམཱཏིསཱརཾ. པཀྑནྡིཡནྟི རཏྟཱཏིསཱརཾ. ཝིཛྫཾ པརིཝཏྟེཏྭཱཏི གནྡྷཱརཝིཛྫཱདིཀཾ ཨཏྟནོ ཝིཛྫཾ ཀཏཱུཔཙཱརཾ མནྟཔཋནཀྐམེན པརིཛཔྤིཏྭཱ. ཏེཧཱིཏི ཏེཧི ཝཏྠཱུཧི. པཡོཛནནྟི པཝཏྟནཾ. ཨཧོ ཝཏཱཡནྟི ཨཡཾ ཏཾ ཀུཙྪིགཏཾ. གབྦྷནྟི ཨིདཾ ཀུཙྪིགཏཾ གབྦྷཾ. ཀུལུམྦསྶཱཏི གབྦྷསྶ, ཀུལསྶེཝ ཝཱ, ཀུཊུམྦསྶཱཏི ཝུཏྟཾ ཧོཏི. བྷཱཝནཱམཡིདྡྷིཡཱཏི ཨདྷིཊྛཱནིདྡྷིཾ སནྡྷཱཡ ཝུཏྟཾ. ཏཾ ཏེསཾ ཨིཙྪཱམཏྟནྟི སུཏྟཏྠཏོ ན སམེཏཱིཏི ཨདྷིཔྤཱཡོ. ཨཐབྦཎིདྡྷིཝསེནེཝ ཧི སུཏྟེ ‘‘ཨིདྡྷིམཱ ཙེཏོཝསིཔྤཏྟོ’’ཏི ཝུཏྟཾ, ན བྷཱཝནཱམཡིདྡྷིཝསེནཱཏི དཊྛབྦཾ.

ཨིཏརཐཱཏི པརིཡེསེཡྻཱཏི པདསྶ གཝེསནམཏྟམེཝ ཡཐཱརུཏཝསེན ཨཏྠོ སིཡཱ, ཏདཱ པརིཡིཊྛམཏྟེན པརིཡེསིཏྭཱ སཏྠཱདཱིནཾ ལདྡྷམཏྟེནཱཏི ཨཏྠོ. སསནྟི ཧིཾསནྟི ཨེཏེནཱཏི སཏྠནྟི ཝདྷོཔཀརཎསྶ པཱསཱཎརཛྫུཨཱདིནོ སབྦསྶཱཔི ནཱམནྟི ཨཱཧ ལགུལཱ༹ཏིཨཱདི. ལགུལ༹ནྟི མུགྒརསྶེཏཾ ཨདྷིཝཙནཾ. སཏྠསངྒཧོཏི མཱཏིཀཱཡཾ སཏྠཧཱརཀནྟི ཨེཏྠ ཝུཏྟསཏྠསངྒཧོ. པརཏོ ཝུཏྟནཡཏྟཱཏི པརཏོ ¶ ནིགམནཝསེན ཝུཏྟསྶ དུཏིཡཔདསྶ པདབྷཱཛནེ ཝུཏྟནཡཏྟཱ. ཙིཏྟསདྡསྶ ཨཏྠདཱིཔནཏྠཾ ཝུཏྟོཏི ཙིཏྟ-སདྡསྶ ཝིཙིཏྟཱདིཨནེཀཏྠཝིསཡཏྟཱ ཨིཏརེཧི ནིཝཏྟེཏྭཱ ཝིཉྙཱཎཏྠཾ ནིཡམེཏུཾ ཝུཏྟོ.

༡༧༤. ཀམྨུནཱ ¶ བཛ྄ཛྷཏཱིཏི པཱཎཱཏིཔཱཏཀམྨུནཱ བཛ྄ཛྷཏི, ཏཾ ཀམྨམསྶ སིདྡྷནྟི ཨཏྠོ. ཨུབྷཡཐཱཔཱིཏི ཨུདྡིསཀཱནུདྡིསཀཝསེན. པཙྪཱ ཝཱ ཏེན རོགེནཱཏི ཨེཏེན ཨནཱགཏམྤི ཛཱིཝིཏིནྡྲིཡཾ ཨཱརབྦྷ པཱཎཱཏིཔཱཏསྶ པཝཏྟིཾ དསྶེཏི. ཨེཝཉྩ ‘‘ཡདཱ སཀྐོཏི, ཏདཱ ཏཾ ཛཱིཝིཏཱ ཝོརོཔེཧཱི’’ཏི ཨཱཎཏྟིཡཱ ཙིརེན སམིདྡྷིཡམྤི ཨཱཎཏྟིཀྑཎེཡེཝ པཱཎཱཏིཔཱཏོ. ཨོཔཱཏཁཎནཱདིཐཱཝརཔཡོགེསུ པཡོགཀརཎཏོ པཙྪཱ གཧིཏཔཊིསནྡྷིཀསྶཱཔི སཏྟསྶ མརཎེ པཱཎཱཏིཔཱཏོ ཙ ཨནཱགཏཱརམྨཎོ ཨུཔཔནྣོ ཧོཏི. ཡཾ པན སིཀྑཱཔདཝིབྷངྒེ ‘‘པཉྩ སིཀྑཱཔདཱནི པཙྩུཔྤནྣཱརམྨཎཱཡེཝཱ’’ཏི ཝུཏྟཾ, ཏཾ པཱཎཱཏིཔཱཏཱདིཏོ ཝིརཏིཾ སནྡྷཱཡ ཝུཏྟཾ, ན པཱཎཱཏིཔཱཏཱདིནྟི གཧེཏབྦཾ. ཨཉྙཙིཏྟེནཱཏི ཨམཱརེཏུཀཱམཏཱཙིཏྟེན. དུཏིཡཔྤཧཱརེན མརཏཱིཏི པཋམཔྤཧཱརཾ ཝིནཱ དུཏིཡེནེཝ མརཏཱིཏི ཨཏྠོ. པཋམཔྤཧཱརེནེཝཱཏི པཋམཔྤཧཱརསམུཊྛཱཔཀཙེཏནཱཀྑཎེཡེཝཱཏི ཨཏྠོ. ཀིཉྩཱཔི པཋམཔྤཧཱརོ སཡམེཝ ན སཀྐོཏི མཱརེཏུཾ, དུཏིཡཾ པན ལབྷིཏྭཱ སཀྐོནྟོ ཛཱིཝིཏཝིནཱསཧེཏུ ཧོཏི, ཏསྨཱ པཋམཔྤཧཱརཾ ཝིནཱ མརཎསྶ ཨསིདྡྷཏྟཱ ‘‘པཡོགོ ཏེན ཙ མརཎ’’ནྟི ཨིམིནཱ སཾསནྡནཏོ པཋམཔྤཧཱརེནེཝ ཀམྨབདྡྷོ ཡུཏྟོ, ན དུཏིཡེན ཏསྶ ཨཉྙཙིཏྟེན དིནྣཏྟཱ. ཡཐཱ ཙེཏྠ, ཨེཝཾ ཨཉྙེན པུགྒལེན དུཏིཡཔྤཧཱརདཱནཱདཱིསུ ཝིཡ. ཡདི པན དུཏིཡཔྤཧཱརདཱཡཀསྶཱཔི པུགྒལསྶ ཝདྷཀཙེཏནཱ ཨཏྠི, ཏསྶཱཔི ཨཏྟནོ པཡོགེནཱཔི མཏཏྟཱ པཡོགཀྑཎེ པཱཎཱཏིཔཱཏོཏི ཝེདིཏབྦཾ.

ཀམྨཱཔཏྟིབྱཏྟིབྷཱཝཏྠནྟི ཨཱནནྟརིཡཱདིཀམྨཝིབྷཱགསྶ པཱརཱཛིཀཱདིཨཱཔཏྟིཝིབྷཱགསྶ ཙ པཱཀཊབྷཱཝཏྠཾ. ‘‘ཨེལ༹ཀཾ མཱརེམཱི’’ཏི ཝིཔརཱིཏགྒཧཎེཔི ‘‘ཨིམ’’ནྟི ཡཐཱནིཔནྣསྶེཝ པརམཏྠཏོ གཧིཏཏྟཱ ཡཐཱཝཏྠུཀཾ ཀམྨབདྡྷོ ཧོཏིཡེཝཱཏི ཨཱཧ ཨིམཾ ཝཏྠུནྟིཨཱདི. གྷཱཏཀོ ཙ ཧོཏཱིཏི པཱཎཱཏིཔཱཏཀམྨེན བདྡྷོཏི ཨཏྠོ. མཱཏཱདིགུཎམཧནྟེ ཨཱརབྦྷ པཝཏྟཝདྷཀཙེཏནཱཡ ¶ མཧཱསཱཝཛྫཏཱཡ ཝུཏྟཾ ‘‘ཨིདྷ པན ཙེཏནཱ དཱརུཎཱ ཧོཏཱི’’ཏི.

ལོཧིཏཀནྟི ལོཧིཏམཀྑིཏཾ. ཀམྨཾ ཀརོནྟེཏི ཡུདྡྷཀམྨཾ ཀརོནྟེ. ཡཐཱདྷིཔྤཱཡཾ གཏེཏི ཡོདྷཾ ཝིཛ྄ཛྷིཏྭཱ པིཏརི ཝིདྡྷེ, ཡོདྷཾ པན ཨཝིཛ྄ཛྷིཏྭཱ ཀེཝལཾ པིཏརི ཝིདྡྷེཔི ཝིསངྐེཏོ ནཏྠིཡེཝ པིཏརིཔི ཝདྷཀཙིཏྟསྶ ཨཏྠིཏཱཡ, ཀེཝལཾ ཡོདྷེ ཝིདྡྷེཔི ཨེསེཝ ནཡོ. ཨཱནནྟརིཡཾ པན ནཏྠཱིཏི པིཏུཝིསཡཾ པཱཎཱཏིཔཱཏཀམྨཾ ནཏྠཱིཏི ཨཏྠོ.

ཨེཝཾ ཝིཛ྄ཛྷཱཏི ཨེཝཾ པཱདེཧི བྷཱུམིཡཾ ཋཏྭཱ ཨེཝཾ དྷནུཾ གཧེཏྭཱ ཨཱཀཌྜྷིཏྭཱཏིཨཱདིནཱ ཝིཛ྄ཛྷནཔྤཀཱརསིཀྑཱཔནམུཁེན ཨཱཎཱཔེཏཱིཏི ཨཏྠོ. ཨེཝཾ པཧརཱཏི དལ༹ྷཾ ཨསིཾ གཧེཏྭཱ ཨེཝཾ པཧར. ཨེཝཾ གྷཱཏེཧཱིཏི ཨེཝཾ ཀམྨཀཱརཎཾ ཀཏྭཱ མཱརེཧི. ཏཏྟཀཱ ཨུབྷིནྣཾ པཱཎཱཏིཔཱཏཱཏི ཨནུདྡིསིཏྭཱ ¶ ཡེསཾ ཀེསཉྩི མཱརཎཏྠཱཡ ཨུབྷོཧི པཡོགསྶ ཀཏཏྟཱ ཝུཏྟཾ. སཙེ ཧི ཨཱཎཱཔཀོ ‘‘ཨེཝཾ ཝིདྡྷེ ཨསུཀོ ཨེཝཾ མརཏཱི’’ཏི སཉྙཱཡ ‘‘ཨེཝཾ ཝིཛ྄ཛྷཱ’’ཏི ཨཱཎཱཔེཏི, ནིཡམིཏསྶེཝ མརཎེ ཨཱཎཱཔཀསྶ ཀམྨབདྡྷོཏི ཝདནྟི. སཙེ ཨཱཎཏྟོ ‘‘ཨསུཀ’’ནྟི ནིཡམེཏྭཱ ཨུདྡིསྶ སརཾ ཁིཔཏི, ཨཱཎཱཔཀོ ཨནིཡམེཏྭཱ ཨཱཎཱཔེཏི, ཨཱཎཱཔཀསྶ ཡེསཾ ཀེསཉྩི མརཎེཔི ཀམྨབདྡྷོ, ཨཱཎཏྟསྶ པན ནིཡམིཏམརཎེཡེཝཱཏི ཝེདིཏབྦཾ. མཛ྄ཛྷེཏི ཧཏྠིནོ པིཊྛིནོ མཛ྄ཛྷེ. ཨེཏེནཱཏི ཨདྷིཊྛཧིཏྭཱ ཨཱཎཱཔེཏཱིཏིཨཱདིཔཱལི༹ཝཙནེན. ཏཏྠཱཏི ཨཱཎཏྟིཀཔཡོགེ.

ཀིཉྩཱཔི ཀིརིཡཱཝིསེསོ ཨཊྛཀཐཱསུ ཨནཱགཏོ, པཱལི༹ཡཾ པན ‘‘ཨེཝཾ ཝིཛ྄ཛྷ, ཨེཝཾ པཧར, ཨེཝཾ གྷཱཏེཧཱི’’ཏི (པཱརཱ. ༡༧༤) ཀིརིཡཱཝིསེསསྶ པརཱམཊྛཏྟཱ ཨཱཙརིཡཔརམྤརཱ ཨཱགཏཾ ཀིརིཡཱཝིསེསམྤི པཱལི༹སཾསནྡནཏོ གཧེཏྭཱ དསྶེནྟོ ཨཔརོ ནཡོཏིཨཱདིམཱཧ. ཝིཛ྄ཛྷནནྟི ཨུསུསཏྟིཨཱདཱིཧི ཝིཛ྄ཛྷནཾ. ཚེདནནྟི ཨསིཨཱདཱིཧི ཧཏྠཔཱདཱདིཙྪེདནཾ. བྷེདནནྟི མུགྒརཱདཱིཧི སཱིསཱདིབྷེདནཾ དྭིདྷཱཀརཎཾ. སངྑམུཎྜཀནྟི སཱིསཀཊཱཧེ ཙམྨཾ སཧ ཀེསེཧི ཨུཔྤཱཊེཏྭཱ ཐཱུལསཀྑརཱཧི སཱིསཀཊཱཧཾ གྷཾསིཏྭཱ སངྑཝཎྞཀརཎཝསེན སངྑམུཎྜཀམྨཀརཎཾ. ཨེཝམཱདཱིཏི ཨཱདི-སདྡེན བིལ༹ངྒཐཱལིཀཱདིཾ སངྒཎྷཱཏི. ཨུརེ པཧརིཏྭཱ པིཊྛིཡཾ པཧརིཏྭཱ གཱིཝཱཡཾ པཧརིཏྭཱཏིཨཱདིནཱ སརཱིརཱཝཡཝཔྤདེསེསུ པཧརཎཝིཛ྄ཛྷནཱདིནིཡམོཔི ཀིརིཡཱཝིསེསེཡེཝ སངྒཡ྄ཧཏི ཨཊྛཀཐཱསུ སངྑམུཎྜཀཱདིསརཱིརཔྤདེསཝིསཡཱཡཔི གྷཱཏནཱཡ ཏཏྠ ¶ པཝེསིཏཏྟཱ, ཡཾ པན སཱརཏྠདཱིཔནིཡཾ (སཱརཏྠ. ཊཱི. པཱརཱཛིཀཀཎྜ ༢.༡༧༤ པཡོགཀཐཱཝཎྞནཱ) པུརཏོ པཧརིཏྭཱ མཱརེཧཱིཏིཨཱདིཀསྶ ཨཊྛཀཐཱཔཱཋསྶ ‘‘པུརིམཔསྶཱདཱིནམྤི ཝཏྠུསབྷཱགཏོ ཝཏྠུགྒཧཎེནེཝ གཧཎནྟི ཨཱཧ པུརཏོ པཧརིཏྭཱཏིཨཱདཱི’’ཏི ཨེཝམདྷིཔྤཱཡཀཐནཾ, ཏཾ སངྑམུཎྜཀཱདིཀསྶ སརཱིརཔྤདེསེ ཀམྨཀཱརཎཱཀརཎསྶ ཨཊྛཀཐཱཡ ཀིརིཡཱཝིསེསཝིསཡེ ཝུཏྟཏྟཱ ན ཡུཛྫཏི. ཡཐཱཎཏྟཾ མུཉྩིཏྭཱ པུགྒལནྟརམཱརཎམེཝ ཧི ཝཏྠུཝིསཾཝཱདོ, ན པཧརིཏུཾ ཨཱཎཏྟཾ སརཱིརཔྤདེསཝིསཾཝཱདནཾ, ཏེནཱཧ ‘‘ཝཏྠུཾ ཝིསཾ ཝཱདེཏྭཱ…པེ… ཏཏོ ཨཉྙཾ མཱརེཏི. པུརཏོ པཧརིཏྭཱ མཱརེཧཱིཏི ཝཱ…པེ… ནཏྠི ཀམྨབདྡྷོ’’ཏི, ཨིདཾ པན ཡཐཱཎཏྟཝཏྠུསྨིམྤི ཀིརིཡཱཝིསེསཝིསངྐེཏེན ཀམྨབདྡྷཱབྷཱཝཾ དསྶེཏུཾ ཝུཏྟནྟི པཉྙཱཡཏི. ཏེན ‘‘ཝཏྠུཾ ཨཝིསཾཝཱདེཏྭཱ མཱརེནྟཱི’’ཏི ཨེཏྟཀམེཝ ཨཝཏྭཱ ‘‘ཡཐཱཎཏྟིཡཱ’’ཏི ཀིརིཡཱཝིསེསནིཡམོཔི དསྶིཏོ, ཨིཏརཐཱ ཡཐཱཎཏྟིཡཱཏི ཝཙནསྶ ནིརཏྠཀཏཱཔཏྟིཏོ. ཝཏྠུནིདྡེསེ ཙ ‘‘ཝཏྠཱུཏི མཱརེཏབྦོ སཏྟོ’’ཏི (པཱརཱ. ཨཊྛ. ༢.༡༧༤) ཨེཏྟཀམེཝ ཝུཏྟཾ, ན པན ‘‘ཡཐཱཎཏྟསྶ པཧརིཏབྦསརཱིརཔྤདེསོཔཱི’’ཏི ཝུཏྟཾ. ཏསྨཱ པུརཏོ པཧརཎཱདིཔི ཀིརིཡཱཝིསེསེ ཨེཝ སངྒཡ྄ཧཏཱིཏི ཨམྷཱཀཾ ཁནྟི, ཝཱིམཾསིཏྭཱ གཧེཏབྦཾ. ཝཏྠུཝིསེསེནཱཏི མཱཏུཨཱདིམཏསཏྟཝིསེསེན. ¶ ཀམྨཝིསེསོཏི ཨཱནནྟརིཡཱདིཀམྨཝིསེསོ. ཨཱཔཏྟིཝིསེསོཏི པཱརཱཛིཀཱདིཨཱཔཏྟིཝིསེསོ.

ཡདཱ ཀདཱཙི པུབྦཎྷེཏི ཨཱཎཏྟདིཝསཏོ ཨཉྙསྶཔི ཡསྶ ཀསྶཙི དིཝསསྶ པུབྦཎྷེ. ཨེཏཾ གཱམེ ཋིཏནྟི གཱམོ པུགྒལནིཡམནཏྠཾ ཝུཏྟོ, ན ཨོཀཱསནིཡམནཏྠཾ, ཏསྨཱ ‘‘ཡཏྠ ཀཏྠཙི མཱརེཏི, ནཏྠི ཝིསངྐེཏོ’’ཏི ཝུཏྟཾ, ཨེཏེན ཀཱལོཀཱསཨཱཝུདྷཨིཨཡཱཔཐཀིརིཡཱཝིསེསཱནཾ ནིཡམིཙྪཱཡ ཨསཏི ཡེན ཀེནཙི པཀཱརེན མརཎམེཝ ཨིཙྪནྟསྶ ཨཱཎཱཔཀསྶ མུཁཱརུལ༹ྷཝསེན ཝུཏྟསྶ དེསཀཱལཱདིནིཡམསྶ ཝིསངྐེཏེཔི ཀམྨབདྡྷོཡེཝཱཏི ཉཱཔིཏཾ ཧོཏི. ཡོ པན ཙིཏྟེན ཡཏྠ ཀཏྠཙི ཡདཱ ཀདཱཙི ཡེན ཀེནཙི པཀཱརེན མརཎམེཝ ཨིཙྪནྟོཔི ཀཱལཱདིཝིསངྐེཏེན ཨཀུསལཏོ ཙོདནཏོ ཝཱ མུཙྩིཏུཀཱམོ ལེསེན ཀཱལཱདིནིཡམཾ ཀརོཏི, ཏསྶ མནུསྶཝིགྒཧཔཱརཱཛིཀཏོ པརིཡཱཡེན ཨམུཙྩནཏོ ཀཱལཱདིཝིསངྐེཏེཔི ཀམྨབདྡྷོཝཱཏི གཧེཏྭཱ ཝིཙཱརཎཏོ གཧེཏབྦཾ, ཀེཙི པནེཏཾ ན ཨིཙྪནྟི, ཝཱིམཾསིཏབྦཾ. ཏུཎྜེནཱཏི ¶ ཨགྒཀོཊིཡཱ. ཐརུནཱཏི ཁགྒམུཊྛིནཱ. ཨེཏཾ གཙྪནྟནྟི གམནེན པུགྒལོཝ ནིཡམིཏོ, ན ཨིརིཡཱཔཐོ, ཏེནཱཧ ‘‘ནཏྠི ཝིསངྐེཏ’’ནྟི.

‘‘དཱིགྷཾ མཱརེཧཱི’’ཏི ཝུཏྟེཔི དཱིགྷསཎྛཱནཱནཾ བཧུབྷཱཝཏོ ‘‘ཨིཏྠནྣཱམཾ ཨེཝརཱུཔཉྩ དཱིགྷ’’ནྟི ཨཉྙེསཾ ཨསཱདྷཱརཎལཀྑཎེན ཨནིདྡིཊྛཏྟཱ ‘‘ཨནིཡམེཏྭཱ ཨཱཎཱཔེཏཱི’’ཏི ཝུཏྟཾ, ཏེནེཝཱཧ ‘‘ཡཾ ཀིཉྩི ཏཱདིསཾ མཱརེམཱི’’ཏི. ཨེཏྠ ཙ ཙིཏྟེན བཧཱུསུ དཱིགྷསཎྛཱནེསུ ཨེཀཾ ནིཡམེཏྭཱ ཝུཏྟེཔི ཝཱཙཱཡ ཨནིཡམིཏཏྟཱ ཨཉྙསྨིཾ ཏཱདིསེ མཱརིཏེ ནཏྠི ཝིསངྐེཏོཏི ཝདནྟི. ཨཏྟཱནཾ མུཉྩིཏྭཱ པརཔཱཎིམྷི པཱཎསཉྙིཏཱལཀྑཎསྶ ཨངྒསྶ ཨབྷཱཝཏོ ནེཝཏྠི པཱཎཱཏིཔཱཏོཏི ཨཱཧ ‘‘ཨཱཎཱཔཀོ མུཙྩཏཱི’’ཏི. ཨཏྟཱནཾ ཨུདྡིསྶ ‘‘ཨསུཀཊྛཱནེ ནིསིནྣ’’ནྟི ཨོཀཱསནིཡམེ ཏསྨིཾ པདེསེ ནིསིནྣསྶ ཡསྶ ཀསྶཙི ཛཱིཝིཏིནྡྲིཡཾ ཨཱརབྦྷ ཝདྷཀཙིཏྟཾ ཨུཔྤཛྫཏཱིཏི ཝུཏྟཾ ‘‘ནེཝ ཝདྷཀོ མུཙྩཏི ན ཨཱཎཱཔཀོ’’ཏི. ཨོཀཱསཉྷི ནིཡམེཏྭཱ ནིདྡིསནྟོ ཏསྨིཾ ཨོཀཱསེ ནིསིནྣཾ མཱརེཏུཀཱམོ ཧོཏི, སཡཾ པན ཏདཱ ཏཏྠ ནཏྠི, ཏསྨཱ ཨོཀཱསེན སཧ ཏཏྠ ནིསིནྣསྶེཝ ཛཱིཝིཏིནྡྲིཡཾ ཨཱརམྨཎཾ ཧོཏི, ན ཨཏྟནོཏི གཧེཏབྦཾ. སཙེ པན སཡཾ ཏཏྠེཝ ནིསཱིདིཏྭཱ ཨཏྟནོ ནིསིནྣཊྛཱནམེཝ ནིཡམེཏྭཱ ‘‘མཱརེཧཱི’’ཏི ཝུཏྟེཔི ཨཉྙོ ཏཏྠ ནིསིནྣོ མཱརིཡཏི, ཏསྶཱཔི ཨཏྟནོཔི ཛཱིཝིཏཾ ཨཱརབྦྷ ཝདྷཀཙེཏནཱ པཝཏྟཏི, པརསྨིཾ ཏཏྠ མཱརིཏེ ཨཱཎཱཔཀསྶ ཀམྨབདྡྷོཏི གཧེཏབྦཾ. ཨེཝརཱུཔེ ཋཱནེ ཙིཏྟཔྤཝཏྟིནིཡམོ བུདྡྷཝིསཡོ, ན ཨཉྙེསཾ ཝིསཡོཏི ཨཱཧ ‘‘ཏསྨཱ ཨེཏྠ ན ཨནཱདརིཡཾ ཀཱཏབྦ’’ནྟི.

ཨེཝཾ ¶ ཨཱཎཱཔེནྟསྶ ཨཱཙརིཡསྶ ཏཱཝ དུཀྐཊནྟི སཙེ ཨཱཎཏྟིཀོ ཡཐཱདྷིཔྤཱཡཾ ན གཙྪཏི, ཨཱཙརིཡསྶ ཨཱཎཏྟིཀྑཎེ དུཀྐཊཾ. སཙེ པན སོ ཡཐཱདྷིཔྤཱཡཾ གཙྪཏི, ཡཾ པརཏོ ཐུལླཙྩཡཾ ཝུཏྟཾ, ཨཱཎཏྟིཀྑཎེ ཏདེཝ ཧོཏི. ཨཐ སོ ཨཝསྶཾ གྷཱཏེཏི, ཡཾ པརཏོ ‘‘ཨཱཔཏྟི སབྦེསཾ པཱརཱཛིཀསྶཱ’’ཏི (པཱརཱ. ༡༧༤) ཝུཏྟཾ, ཏཏོ ཨིམསྶ ཨཱཎཏྟིཀྑཎེཡེཝ པཱརཱཛིཀཾ ཧོཏི, ན དུཀྐཊཐུལླཙྩཡཱནཱིཏི གཧེཏབྦཾ. ཏེསམྤི དུཀྐཊནྟི བུདྡྷརཀྑིཏཱདཱིནམྤི ཨཱརོཙནཔཙྩཡཱ དུཀྐཊཾ, ཨིདཉྩ ཡཐཱཎཏྟིཝསེན སངྒྷརཀྑིཏསྶ ཛཱིཝིཏཱ ཝོརོཔནེ ཨསཏི ཡུཛྫཏི, ཝོརོཔནེ སཏི ཏེསམྤི ཨཱརོཙནཀྑཎེཡེཝ པཱརཱཛིཀཾ. པཊིགྒཧིཏམཏྟེཏི ཨིདཾ ཨཝསྶཾ པཊིགྒཧཎསབྷཱཝདཱིཔནཏྠཾ ཝུཏྟཾ, ན པཊིགྒཧིཏཀྑཎེཡེཝ ཐུལླཙྩཡནྟི ¶ དསྶནཏྠཾ. སཙེ ཧི སོ ཨཝསྶཾ པཊིགྒཧེསྶཏི, ཀམྨཾ པན ན ནིཔྥཱདེསྶཏི, ཏདཱ ཨཱཙརིཡསྶ ཨཱཎཏྟིཀྑཎེཡེཝ ཐུལླཙྩཡཾ ཧོཏཱིཏི དཊྛབྦཾ.

མཱུལཊྛསྶེཝ དུཀྐཊནྟི ཨིདཾ མཧཱཨཊྛཀཐཱཡཾ ཨཱགཏནཡདསྶནམཏྟཾ, ན པནེཏཾ ཨཏྟནཱ ཨདྷིཔྤེཏཾ, ཏེནཱཧ ཨེཝཾ སནྟེཏིཨཱདི, ཨེཝཾ མཧཱཨཊྛཀཐཱཡཾ ཝུཏྟནཡེན ཨཏྠེ སཏཱིཏི ཨཏྠོ. པཊིགྒཧཎེ ཨཱཔཏྟིཡེཝ ན སིཡཱཏི ཝདྷཀསྶ ‘‘སཱདྷུ སུཊྛཱུ’’ཏི མརཎཔཊིགྒཧཎེ དུཀྐཊཱཔཏྟི ནེཝ སིཡཱ, ཨེཝཾ ཨནོལཱ༹རིཀཝིསཡེཔི ཏཱཝ དུཀྐཊཾ, ཀིམངྒཾ པན མརཎཔཊིགྒཧཎེཏི དསྶནཏྠཾ སཉྩརིཏྟཔཊིགྒཧཎཱདི ནིདསྶིཏཾ. ‘‘ཨཧོ ཝཏ ཨིཏྠནྣཱམོ ཧཏོ ཨསྶཱ’’ཏི ཨེཝཾ མརཎཱབྷིནནྡནདསྶནཏྠཾ སཉྩརིཏྟཔཊིགྒཧཎཱདིབྷིནནྡནེ དུཀྐཊེ སཏི པགེཝ ‘‘ཨཧཾ ཏཾ མཱརེསྶཱམཱི’’ཏི མརཎཔཊིགྒཧཎེཏི ཨདྷིཔྤཱཡོ. པཊིགྒཎྷནྟསྶེཝེཏཾ དུཀྐཊནྟི ཨཝདྷཱརཎེན སངྒྷརཀྑིཏསྶ པཊིགྒཧཎཔཙྩཡཱ མཱུལཊྛསྶ ནཏྠེཝ ཨཱཔཏྟཱིཏི དསྶེཏི, ཝིསངྐེཏཏྟཱ པཋམཾ ཨཱཎཏྟདུཀྐཊམེཝསྶ ཧོཏི. ཀེཙི པན ‘‘མཱུལཊྛསྶཱཔི དུཀྐཊམེཝཱ’’ཏི ཝདནྟི, ཏཾ ན ཡུཏྟཾ ཨེཀེན པཡོགེན དྭིནྣཾ དུཀྐཊཱནཾ ཨསམྦྷཝཱ. པུརིམནཡེཏི སམནནྟརཱཏཱིཏེ ཨཝིསཀྐིཡདཱུཏནིདྡེསེ. ཨེཏནྟི དུཀྐཊཾ. ཨོཀཱསཱབྷཱཝེནཱཏི མཱུལཊྛསྶ ཐུལླཙྩཡསྶ ཝུཙྩམཱནཏྟཱ པཊིགྒཎྷནྟསྶ དུཀྐཊཾ ན ཝུཏྟཾ ཨོཀཱསཱབྷཱཝེན, ན པན ཨཱཔཏྟིཨབྷཱཝཏོཏི ཨདྷིཔྤཱཡོ.

༡༧༥. སཡཾ སངྒྷཏྠེརཏྟཱ ‘‘ཨུཔཊྛཱནཀཱལེ’’ཏི ཝུཏྟཾ. ཝཱཙཱཡ ཝཱཙཱཡ དུཀྐཊནྟི ‘‘ཡོ ཀོཙི མམ ཝཙནཾ སུཏྭཱ ཨིམཾ མཱརེཏཱུ’’ཏི ཨིམིནཱ ཨདྷིཔྤཱཡེན ཨཝཏྭཱ ཀེཝལཾ མརཎཱབྷིནནྡནཝསེནེཝ ཝུཏྟཏྟཱ ཙོརཱཔི ནཱམ ཏཾ ན ཧནནྟཱིཏིཨཱདིཝཱཙཱཡཔི དུཀྐཊམེཝ ཝུཏྟཾ. དྭིནྣཾ ཨུདྡིསྶཱཏི དྭེ ཨུདྡིསྶ, དྭིནྣཾ ཝཱ མརཎཾ ཨུདྡིསྶ. ཨུབྷོ ཨུདྡིསྶ མརཎཾ སཾཝཎྞེནྟསྶ པཡོགསམུཊྛཱཔིཀཱཡ ཙེཏནཱཡ ཨེཀཏྟེཔི ‘‘དྭེ པཱཎཱཏིཔཱཏཱ’’ཏི ཝཏྟབྦཏཱསངྑཱཏཾ བལཝབྷཱཝཾ ཨཱཔཛྫིཏྭཱ པཊིསནྡྷིཔཝཏྟཱིསུ མཧཱཝིཔཱཀཏྟཱ ‘‘ཨཀུསལརཱསཱི’’ཏི ཝུཏྟཾ, བཧཱུ ཨུདྡིསྶ མརཎསཾཝཎྞནེཔི ¶ ཨེསེཝ ནཡོ. ཏཏྟཀཱ པཱཎཱཏིཔཱཏཱཏི ཡཏྟཀཱ སཾཝཎྞནཾ སུཏྭཱ མརིསྶནྟི, ཏཏྟཀཱནམྤི ཝཏྟམཱནཾ ཨནཱགཏཉྩ ཛཱིཝིཏིནྡྲིཡཾ སབྦཾ ཨཱལམྦིཏྭཱཝ ཙེཏནཱཡ པཝཏྟནཏོ ¶ ཏཏྟཀཱ པཱཎཱཏིཔཱཏཱ ཧོནྟི, ཏཏྟཀཱཧི ཙེཏནཱཧི དཱཏབྦཾ པཝཏྟིཝིཔཱཀཾ ཨེཀཱཝ སཱ ཙེཏནཱ དཱཏུཾ སཀྐོཏཱིཏི ཨཏྠོ, པཊིསནྡྷིཝིཔཱཀཾ པན སཡཉྩ པུབྦཱཔརཙེཏནཱ ཙ ཨེཀེཀམེཝ དཱཏུཾ སཀྐོཏཱིཏི གཧེཏབྦཾ.

༡༧༦. ཡེསཾ ཧཏྠཏོཏི ཡེསཾ ཉཱཏཀཔཝཱརིཏཱདཱིནཾ ཧཏྠཏོ, ཨིདཉྩ བྷིཀྑུནོ རཱུཔིཡམཱུལསྶ ཨབྷཱཝཾ སནྡྷཱཡ ཝུཏྟཾ, ཨཏྟནོཝ དྷནཉྩེ, སཡམེཝ མཱུལཾ གཧེཏྭཱ མུཉྩཏི, མཱུལཾ པན ཨགྒཧེཏྭཱཔི པོཏྠཀསྶ པོཏྠཀསཱམིནོ སནྟཀཏྟཱཔཱདནམེཝེཏྠ པམཱཎནྟི གཧེཏབྦཾ. ལེཁཱདསྶནཀོཏཱུཧལཀཱཏི སུནྡརཀྑརཾ དིསྭཱ ཝཱ ‘‘ཀཱིདིསཾ ནུ ཁོ པོཏྠཀ’’ནྟི ཝཱ ཨོལོཀེཏུཀཱམཱ.

པཱཎཱཏིཔཱཏསྶ པཡོགཏྟཱཏི སརཱིརཏོ པཱཎཝིཡོཛནསྶ ནིཊྛཱཔཀཔཡོགཏྟཱ. ཨོཔཱཏཁཎནཏྠཾ པན ཀུདཱལཱདིཨཏྠཱཡ ཨཡོབཱིཛསམུཊྛཱཔནཏྠཾ ཨཀཔྤིཡཔཐཝིཾ ཝཱ ཀུདཱལདཎྜཱདཱིནཾ ཨཏྠཱཡ བྷཱུཏགཱམཾ ཝིཀོཔེནྟསྶ པཱཙིཏྟིཡམེཝ. པཱཎཱཏིཔཱཏཔཡོགཏྟཱབྷཱཝཱ ཨདིནྣཱདཱནཔུབྦཔཡཨོགེ ཝིཡ དུཏིཡཔརིཡེསནཱདཱིསུཔི ཨེཏྠ དུཀྐཊཊྛཱནེ དུཀྐཊཾ, མུསཱཝཱདཱདིཔཱཙིཏྟིཡཊྛཱནེ པཱཙིཏྟིཡམེཝཱཏི གཧེཏབྦཾ. པམཱཎེཏི ཨཏྟནཱ སལླཀྑིཏེ པམཱཎེ. ཏཙྪེཏྭཱཏི ཨུནྣཏཔྤདེསཾ ཏཙྪེཏྭཱ. པཾསུཔཙྪིནྟི སབྦནྟིམཾ པཾསུཔཙྪིཾ. ཨེཏྟཀཾ ཨལནྟི ནིཊྛཱཔེཏུཀཱམཏཱཡ སབྦནྟིམཔཡཨོགསཱདྷིཀཱ ཙེཏནཱ སནྣིཊྛཱཔཀཙེཏནཱ, མཧཱཨཊྛཀཐཱཡཾ ‘‘ཨེཀསྨིཾ དིཝསེ ཨཝཱུཔསནྟེནེཝ པཡོགེན ཁཎིཏྭཱ ནིཊྛཱཔེནྟཾ སནྡྷཱཡ སབྦནྟིམཱ སནྣིཊྛཱཔཀཙེཏནཱ ཝུཏྟཱ, ཨིཏརཱསུ པན ཨཊྛཀཐཱསུ ‘‘ཨིམསྨིཾ པཏིཏྭཱ མརནྟཱུ’’ཏི ཨདྷིཔྤཱཡེན ཨེཀསྨིཾ དིཝསེ ཀིཉྩི ཁཎིཏྭཱ ཨཔརསྨིམྤི དིཝསེ ཏཏོ ཀིཉྩི ཀིཉྩི ཁཎིཏྭཱ ནིཊྛཱཔེནྟཾ སནྡྷཱཡ ཝུཏྟནྟི ཨེཝཾ ཨཊྛཀཐཱནཾ ཨཉྙམཉྙཝིརོདྷོ ཉཱཏབྦོ. ཨཏྟནོ དྷམྨཏཱཡཱཏི ཨཛཱནིཏྭཱ, པཀྑལིཏྭཱ ཝཱ. ཨརཧནྟཱཔི སངྒཧཾ གཙྪནྟཱིཏི ཨཉྙེཧི པཱཏིཡམཱནཱནཾ ཨམརིཏུཀཱམཱནམྤི ཨརཧནྟཱནཾ མརཎཾ སམྦྷཝཏཱིཏི ཝུཏྟཾ. པུརིམནཡེཏི ‘‘མརིཏུཀཱམཱ ཨིདྷ མརིསྶནྟཱི’’ཏི ཝུཏྟནཡེ. ཝིསངྐེཏོཏི མརིཏུཀཱམཱནཾ མཱརེཏུཀཱམཱནཉྩ ཨུདྡིསྶ ཁཏཏྟཱ ཨམརིཏུཀཱམཱནཾ མརཎེ ཀམྨབདྡྷོ ནཏྠཱིཏི ཨཏྠོ.

ཏཏྠ ¶ པཏིཏཾ བཧི ནཱིཧརིཏྭཱཏི ཨིདཾ ཏཏྠ པཏནཔཙྩཡཱ མརཎསྶ པཝཏྟཏྟཱ ཝུཏྟཾ. ཨཱཝཱཊེ པཏིཏྭཱ ཐོཀཾ ཙིརཱཡིཏྭཱ གཙྪནྟཾ གཧེཏྭཱ མཱརིཏེ ཏཏྠ པཏིཏརོགེན པཱིལི༹ཏསྶ གཙྪཏོ ¶ པཀྑལིཏྭཱ པཱསཱཎཱདཱིསུ པཏནེནཱཔི མརཎེཔི ཨོཔཱཏཁཎཀོ ན མུཙྩཏཱིཏི ཝེདིཏབྦཾ. ཨམརིཏུཀཱམཱ ཝཱཏི ཨདྷིཔྤཱཡསྶ སམྦྷཝཏོ ཨོཔཔཱཏིཀེ ཨུཏྟརིཏུཾ ཨསཀྐུཎིཏྭཱ མཏེཔི པཱརཱཛིཀཾ ཝུཏྟཾ. ‘‘ནིབྦཏྟིཏྭཱ’’ཏི ཝུཏྟཏྟཱ པཏནཾ ན དིསྶཏཱིཏི ཙེ? ཏཏྠསྶ ནིབྦཏྟིཡེཝ པཏནནྟི ནཏྠི ཝིརོདྷོ. ཡསྨཱ མཱཏུཡཱ པཏིཏྭཱ པརིཝཏྟིཏལིངྒཱཡ མཏཱཡ སོ མཱཏུགྷཱཏཀོ ཧོཏི, ན ཀེཝལཾ མནུསྶཔུརིསགྷཱཏཀོ, ཏསྨཱ པཏིཏསྶེཝ ཝསེན ཨཱཔཏྟཱིཏི ཨདྷིཔྤཱཡེན ‘‘པཏནརཱུཔཾ པམཱཎ’’ནྟི ཝུཏྟཾ, ཨིདཾ པན ཨཀཱརཎཾ ‘‘ལིངྒེ པརིཝཏྟེཔི ཨེཀསནྟཱནཏྟསྶ ཨཝིགཏཏྟཱ. མནུསྶབྷཱུཏཾ མཱཏརཾ ཝཱ པིཏརཾ ཝཱ ཨཔི པརིཝཏྟལིངྒཾ ཛཱིཝིཏཱ ཝོརོཔེནྟསྶ ཀམྨཾ ཨཱནནྟརིཡ’’ནྟི ཧི ཨཊྛཀཐཱཡཾ ཝུཏྟཾ. ཡེན པན སབྷཱཝེན སཏྟཱ ཛཱཡནྟི, ཏེནེཝ མརནྟི, སོཝ ཏེསཾ རཱུཔནྟརགྒཧཎེཔི སབྷཱཝོཏི ‘‘མརཎརཱུཔམེཝ པམཱཎཾ, ཏསྨཱ པཱཙིཏྟིཡ’’ནྟི ཝུཏྟོ. པཙྪིམོ ཝཱདོ པམཱཎཾ, ཨེཝཾ སནྟེ པཱལི༹ཡཾ ‘‘ཡཀྑོ ཝཱ པེཏོ ཝཱ ཏིརཙྪཱནགཏམནུསྶཝིགྒཧོ ཝཱ ཏསྨིཾ པཏཏི, ཨཱཔཏྟི དུཀྐཊསྶ. པཏིཏེ དུཀྑཱ ཝེདནཱ ཨུཔྤཛྫཏི, ཨཱཔཏྟི དུཀྐཊསྶ. མརཏི, ཨཱཔཏྟི ཐུལླཙྩཡསྶཱ’’ཏི ཀསྨཱ ཝུཏྟནྟི ཙེ? ནཱཡཾ དོསོ. ‘‘ཡཀྑོ ཝཱ པེཏོ ཝཱ’’ཏི ཧི པཋམཾ སཀརཱུཔཾ དསྶེཏྭཱ རཱུཔནྟརཾ གཧེཏྭཱཔི ཋིཏེཡེཝ ཡཀྑཔེཏེ དསྶེཏུཾ ‘‘ཏིརཙྪཱནགཏམནུསྶཝིགྒཧོ ཝཱ’’ཏི ཝུཏྟཾ. ཏསྨཱ ཏིརཙྪཱནགཏཝིགྒཧོ མནུསྶཝིགྒཧོ ཝཱ ཡཀྑོ ཝཱ པེཏོ ཝཱཏི ཨེཝམེཏྠ ཡོཛནཱ ཀཱཏབྦཱ. ཀེཙི པན ‘‘མནུསྶཝིགྒཧེན ཋིཏཏིརཙྪཱནགཏཱནཾ ཨཱཝེཎིཀཾ ཀཏྭཱ ཐུལླཙྩཡཾ ཝུཏྟཾ ཝིཡ དིསྶཏཱི’’ཏི ཝདནྟི, ཏཾ ན ཡུཏྟཾ ཏིརཙྪཱནོ ཝཱ མནུསྶཝིགྒཧོཏི ཝཏྟབྦཏོ, ཨཊྛཀཐཱསུ ཙ ཨིམསྶ ཝིསེསསྶ ཨཝུཏྟཏྟཱ. ཡཀྑཔེཏརཱུཔེན མཏེཔི ཨེསེཝ ནཡོཏི ཨིམིནཱ མརཎརཱུཔསྶེཝ པམཱཎཏྟཱ ཐུལླཙྩཡཾ ཨཏིདིསཏི.

མུདྷཱཏི ཨམཱུལེན. སོ ནིདྡོསོཏི ཏེན ཏཏྠ ཀཏཔཡོགསྶ ཨབྷཱཝཏོ, ཡདི པན སོཔི ཏཏྠ ཀིཉྩི ཀརོཏི, ན མུཙྩཏི ཨེཝཱཏི དསྶེནྟོ ཨེཝཾ པཏིཏཱཏིཨཱདིམཱཧ. ཏཏྠ ཨེཝནྟི ཨེཝཾ མཡཱ ཀཏེཏི ཨཏྠོ ¶ . ན ནསྶིསྶནྟཱིཏི ཨདསྶནཾ ན གམིསྶནྟི, ན པལཱཡིསྶནྟཱིཏི ཨདྷིཔྤཱཡོ. སུཨུདྡྷརཱ ཝཱ བྷཝིསྶནྟཱིཏི ཨིདཾ གམྦྷཱིརསྶ ཨོཔཱཏསྶ པཱུརཎེ པཡོཛནདསྶནཾ. ཨུཏྟཱནེ ཀཏེ ཨོཔཱཏེ སཱིགྷཾ ཨམྷེཧི གཧེཏྭཱ མཱརེཏུཾ སུཨུདྡྷརཱ བྷཝིསྶནྟཱིཏི ཨདྷིཔྤཱཡོ. ཝིཔྤཊིསཱརེ ཨུཔྤནྣེཏི མཱུལཊྛཾ སནྡྷཱཡ ཝུཏྟཾ. ཡདི པན པཙྪིམོཔི ལབྷིཏྭཱ ཏཏྠ ཝུཏྟཔྤཀཱརཾ ཀིཉྩི ཀཏྭཱ པུན ཝིཔྤཊིསཱརེ ཨུཔྤནྣེ ཨེཝཾ ཀརོཏི, ཏསྶཱཔི ཨེསེཝ ནཡོ. ཛཱཏཔཐཝཱི ཛཱཏཱཏི ཨཱིདིསེ པུན ཨཉྙེན ཨོཔཱཏེ ཁཏེ ཏདཱ མུཙྩཏཱིཏི དསྶནཏྠཾ ཝུཏྟཾ, ཛཱཏཔཐཝཱིསདིསཾ ཀཏྭཱ པུན སུཊྛུ ཀོཊྚེཏྭཱ དལ༹ྷཏརཾ པཱུརིཏེཔི མུཙྩཏིཡེཝཱཏི གཧེཏབྦཾ.

ཐདྡྷཏརནྟི ¶ ཐིརཀརཎཏྠཾ ཨཔརཱཔརཱཡ པཱསཡཊྛིཡཱ སདྡྷིཾ བནྡྷིཏྭཱ ཝཱ ཏམེཝ ཝཱ སིཐིལབྷཱུཏཔཱསཾ ཐདྡྷཏརཾ བནྡྷིཏྭཱ ཋཔེཏི. ཁཱཎུཀནྟི པཱསཡཊྛིབནྡྷནཁཱཎུཀཾ. ཏཏྠཛཱཏཀཡཊྛིཾ ཚིནྡིཏྭཱ མུཙྩཏཱིཏི ཨིདཾ ཨརཉྙེ ཡཐཱཋིཏམེཝ དཎྜཾ མཱུལེ ཨཙྪིནྡིཏྭཱ པཱསབནྡྷནཡོགྒཾ ཀཏྭཱ ཋཔིཏཏྟཱ ཏཏྠ ཨཉྙོཔི ཀོཙི པཱསཾ བནྡྷེཡྻ, མཱུལཊྛོ ན མུཙྩཏི, ཏཾ པན མཱུལེཔི ཚིནྡིཏྭཱ ཁཎྜཱཁཎྜཾ ཀཏྭཱ མུཙྩཏཱིཏི དསྶནཏྠཾ ཝུཏྟཾ. རཛྫུཀེཏི ཝཱཀེཧི ཨེཀཝཱརཾ ཝཊྚིཏརཛྫུཀེ. སཡཾ ཝཊྚིཏནྟི ཏནུཀཝཊྚིཏཾ དིགུཎཏིགུཎཏཱཔཱདནེན ཨཏྟནཱ ཝཊྚིཏཾ. ཨུབྦཊྚེཏྭཱཏི པཱཀཏིཀཾ ཀཏྭཱ. གོཔེནྟོཔཱིཏི ཧཱིརཾ ཧཱིརཾ ཀཏྭཱ གོཔེནྟོཔི.

༡༧༧. ཨཱལམྦནརུཀྑོ ཝཱཏི ཏཏྠཛཱཏཀཾ སནྡྷཱཡ ཝུཏྟཾ. ཏདཏྠམེཝ ཀཏྭཱཏི མཱརཎཏྠམེཝ ཨཡོབཱིཛསམུཊྛཱཔནཱདིནཱ ཝཱསིཨཱདིཾ སཏྠཾ ཀཱརེཏྭཱ. པཱཀཏིཀནྟི ཨཉྙེཧི ཀཏཾ པཀཏིསཏྠམེཝ ལབྷིཏྭཱ མཱུལཊྛེན ཋཔིཏཾ ཧོཏཱིཏི ཨཏྠོ. མུཙྩཏཱིཏི མཱུལཊྛོ མུཙྩཏི. ཝིསམཎྜལནྟི མཉྩཔཱིཋཱདཱིསུ ཨཱལིཏྟཾ ཝིསམཎྜལཾ.

ཝཏྭཱ ཨསིཾ ཨུཔནིཀྑིཔཏཱིཏི ཨེཏྠ མུཁེན ཨཝཏྭཱ མནསཱཝ ཙིནྟེཏྭཱ ཨུཔནིཀྑིཔནེཔི ཨེསེཝ ནཡོ. པུརིམནཡེནཱཏི ཡེསཾ ཧཏྠཏོ མཱུལཾ གཧིཏནྟིཨཱདིནཱ. ཝིསབྷཱགརོགོ ནཱམ ཀུཊྛཱདིཝིརཱུཔབྷཱཝཏོ, གཎྜཔཱིལ༹ཀཱདི ཝཱ ཛཱིཝིཏཔྤཝཏྟིཡཱ པཙྩནཱིཀཏྟཱ.

༡༧༨. མནཱཔིཡེཔི ཨེསེཝ ནཡོཏི ཨེཏེན མནཱཔིཡཾ རཱུཔཾ ཨུཔསཾཧརཏཱིཏི ཨེཏྠ ཡཾ ཝཱ མནཱཔརཱུཔཾ, ཏསྶ སམཱིཔེ ཋཔེཏི, ཨཏྟནཱ ཝཱ མནཱཔིཡེན རཱུཔེན ¶ སམནྣཱགཏོ ཏིཊྛཏཱིཏིཨཱདི ཡོཛེཏབྦནྟི དསྶེཏི. ཨལངྐརིཏྭཱ ཨུཔསཾཧརཏཱིཏི ‘‘ཨལཱབྷཀེན སུསྶིཏྭཱ མརཏཱུ’’ཏི ཨིམིནཱ ཨདྷིཔྤཱཡེན ཨུཔསཾཧརཏི, ཏེནེཝ ‘‘སཙེ ཨུཏྟསིཏྭཱ མརཏི, ཝིསངྐེཏོ’’ཏི ཝུཏྟཾ. ཨལཱབྷཀེན སུསྶིཏྭཱ མརཏཱིཏི ཨེཏྠ པཱརཱཛིཀོཏི པཱཋསེསོ དཊྛབྦོ. མཧཱཀཙྪུ ནཱམ ཝལླིཕལཝིསེསོ, ཡསྶ མཛྫཱརཔཱདསྶེཝ སཎྛཱནཾ དུཀྑསམྥསྶཱནི སུཁུམལོམཱནི ཙ ཧོནྟི. ཧཾསཔུཔྥནྟི ཧཾསཱདཱིནཾ པཀྑལོམཾ སནྡྷཱཡ ཝདནྟི. ཨཏྟནོ དྷམྨཏཱཡ མརཏི, ཨནཱཔཏྟཱིཏི པཱརཱཛིཀཾ སནྡྷཱཡ ཝུཏྟཾ དུཀྐཊཱ ན མུཙྩནཏོ.

༡༧༩. ཨསཉྩིཙྩཱཏི ཨིདཾ མརཎསཾཝཏྟནིཀཨུཔཀྐམསྶ ཨསལླཀྑཎཾ སནྡྷཱཡ ཝུཏྟནྟི ཨཱཧ ཨིམིནཱ ཨུཔཀྐམེནཱཏིཨཱདི. ཨཛཱནནྟསྶཱཏི ཨིདཾ པན མརཎསཾཝཏྟནིཀཝིསཱདིཨུཔཀྐམཀརཎསྶ ཨཛཱནནཾ སནྡྷཱཡ ཝུཏྟནྟི ཨཱཧ ཨིམིནཱ ཨཡཾ མརིསྶཏཱིཏིཨཱདི. ན མརཎཱདྷིཔྤཱཡསྶཱཏི ཨིདཾ དུཀྑུཔྤཱདཀཾ ཨུཔཀྐམནྟི ཛཱནནྟསྶཱཔི མརཎཱདྷིཔྤཱཡསྶ ཨབྷཱཝཾ སནྡྷཱཡ ¶ ཝུཏྟནྟི ཨཱཧ མརཎཾ ཨནིཙྪནྟསྶཱཏིཨཱདི. ཨནུཔྤབནྡྷཱབྷཱཝཱཏི དོམནསྶཝཱིཐཱིནཾ ནིརནྟརཔྤཝཏྟིཨབྷཱཝཱ.

པདབྷཱཛནཱིཡཝཎྞནཱནཡོ ནིཊྛིཏོ.

ཝིནཱིཏཝཏྠུཝཎྞནཱ

༡༨༠. ཝོཧཱརཝསེནཱཏི པུབྦབྷཱགཝོཧཱརཝསེན, མརཎཱདྷིཔྤཱཡསྶ སནྣིཊྛཱཔཀཙེཏནཱཀྑཎེ ཀརུཎཱཡ ཨབྷཱཝཏོ ཀཱརུཉྙེན པཱསེ བདྡྷསཱུཀརམོཙནཾ (པཱརཱ. ༡༥༣) ཝིཡ ན ཧོཏཱིཏི ཨདྷིཔྤཱཡོ. ‘‘ཡཐཱཡུནཱ’’ཏི ཝུཏྟམེཝཏྠཾ ‘‘ཡཐཱནུསནྡྷིནཱ’’ཏི པརིཡཱཡནྟརེན ཝུཏྟཾ. ཧེཊྛཱ ཀིསྨིཉྩི ཝིཛྫམཱནེ སཱཊཀཾ ཝལིཾ གཎྷཱཏཱིཏི ཨཱཧ ‘‘ཡསྨིཾ ཝལི ན པཉྙཱཡཏཱི’’ཏི. པཊིཝེཀྑཎཉྩེཏཾ གིཧཱིནཾ སནྟཀེ ཨེཝཱཏི དཊྛབྦཾ. པཱལི༹ཡཾ མུསལེ ཨུསྶིཏེཏི ཨཉྙམཉྙཾ ཨུཔཏྠམྦྷེཏྭཱ དྭཱིསུ མུསལེསུ བྷིཏྟིཾ ཨཔསྶཱཡ ཋཔིཏེསཱུཏི ཨཏྠོ. ཨུདུཀྑལབྷཎྜིཀནྟི ཨུདུཀྑལཏྠཱཡ ཨཱནཱིཏཾ དཱརུབྷཎྜཾ. པརིབནྡྷནྟི བྷོཛནཔརིབནྡྷཾ, བྷོཛནནྟརཱཡནྟི ཝུཏྟཾ ཧོཏི.

༡༨༡. ཨགྒཀཱརིཀནྟི ¶ ཨེཏྠ ཀཱརིཀ-སདྡསྶ བྷཱཝཝཙནཏྟཱ ‘‘ཨགྒཀིརིཡ’’ནྟི ཨཏྠཾ ཝཏྭཱཔི ཡསྨཱ ཀིརིཡཾ དཱཏུཾ ན སཀྐཱ, ཏསྨཱ དཱནསངྑཱཏཱཡ ཨགྒཀིརིཡཱཡ ཡུཏྟཔིཎྜཔཱཏམེཝ ཨིདྷ ཨུཔཙཱརཡུཏྟིཡཱ ཨགྒཀིརིཡཱཏི གཧེཏབྦནྟི ཨཱཧ པཋམཾ ལདྡྷཔིཎྜཔཱཏནྟིཨཱདི.

༡༨༢-༣. དཎྜམུགྒརནིཁཱདནཝེམཱདཱིནཾ ཝསེནཱཏི ཨེཏྠ དཎྜོ ནཱམ དཱིགྷདཎྜོ. མུགྒརོ ནཱམ རསྶོ. ཝེམཾ ནཱམ ཏནྟཝཱཡཱནཾ ཝཏྠཝཱཡནཨུཔཀརཎཾ, ཡེན ཝཱིཏཾ ཏནྟཾ གྷཊྚེནྟི. ཝིབྷཏྟིབྱཏྟཡེནཱཏི ཝིབྷཏྟིཝིཔརིཎཱམེན. ཝིསེསཱདྷིགམོཏི སམཱདྷི ཝིཔསྶནཱ ཙ. ཝིསེསཱདྷིགམནྟི ལོཀུཏྟརདྷམྨཔཊིལཱབྷཾ. བྱཱཀརིཏྭཱཏི ཨཱརོཙེཏྭཱ, ཨིདཉྩ ཝིསེསསྶ ཨདྷིགཏབྷཱཝདསྶནཏྠཾ ཝུཏྟཾ. ཨདྷིགཏཝིསེསཱ ཧི དིཊྛཱནུགཏིཨཱཔཛྫནཏྠཾ ལཛྫཱིབྷིཀྑཱུནཾ ཨཝསྶཾ ཨདྷིགམཾ བྱཱཀརོནྟི, ཨདྷིགཏཝིསེསེན པན ཨབྱཱཀརིཏྭཱཔི ཨཱཧཱརཾ ཨུཔཙྪིནྡིཏུཾ ན ཝཊྚཏི, ཨདྷིགམནྟརཱཡཝིནོདནཏྠམེཝ ཨཱཧཱརཱུཔཙྪེདསྶ ཨནུཉྙཱཏཏྟཱ ཏདདྷིགམེ སོ ན ཀཱཏབྦོཝ. ཀིཾ པནཱདྷིགམཾ ཨཱརོཙེཏུཾ ཝཊྚཏཱིཏི ཨཱཧ སབྷཱགཱནནྟིཨཱདི. བྷཎྜཀཾ ཝཱ དྷོཝནྟཱཏི ཙཱིཝརཾ ཝཱ དྷོཝནྟཱ. དྷོཝནདཎྜཀནྟི ཙཱིཝརདྷོཝནདཎྜཾ.

༡༨༥. མདྡཱཔེཏྭཱ པཱཏེཏི, ཝིསངྐེཏོཏི ཡཐཱཎཏྟིཡཱ ཨཀཏཏྟཱ ཝུཏྟཾ, ཡདི པན ཨཱཎཱཔཀོ ¶ མདྡནམྤི མདྡཱཔནམྤི སནྡྷཱཡ ཝོཧཱརཝསེན ‘‘མདྡིཏྭཱ པཱཏེཧཱི’’ཏི ཝདཏི, ཝིསངྐེཏོ ནཏྠཱིཏི ཝེདིཏབྦཾ. ‘‘མརཎཝཎྞཾ ཝཱ སཾཝཎྞེཡྻཱ’’ཏི (པཱརཱ. ༡༧༡) ཝུཏྟཏྟཱ ཨཱཧ ‘‘པརིཡཱཡོ ནཱམ ནཏྠཱི’’ཏི, པརིཡཱཡེན ཨཱཔཏྟིམོཀྑོ ན ཧོཏཱིཏི ཨདྷིཔྤཱཡོ. ཨཝིཛཱཡནཏྠཱཡ གབྦྷགྒཧཎཏོ པུརེཏརམེཝ བྷེསཛྫཾ དེནྟསྶ ཀུཙྪིཡཾ ཨུཔྤཛྫིཏྭཱ གབྦྷོ ཝིནསྶཏཱིཏི ཨིམིནཱ ཨདྷིཔྤཱཡེན དིནྣེ ཏཐཱམརནྟཱནཾ ཝསེན ཀམྨབདྡྷོ, ཀུཙྪིཡཾ ན ཨུཔྤཛྫིསྶཏཱིཏི ཨིམིནཱ ཨདྷིཔྤཱཡེན དིནྣེ ཨུཔྤཛྫིཏྭཱ མརཏུ ཝཱ མཱ ཝཱ, ནེཝཏྠི ཀམྨབདྡྷོ.

སཧདྷམྨིཀཱནནྟི ཨེཀསྶ སཏྠུ སཱསནེ སཧསིཀྑམཱནདྷམྨཱནཾ, སཧདྷམྨེ ཝཱ སིཀྑཱཔདེ སིཀྑནབྷཱཝེན ནིཡུཏྟཱནཾ. སམསཱིལསདྡྷཱནནྟིཨཱདིནཱ དུསྶཱིལཱནཾ བྷིནྣལདྡྷིཀཱནཉྩ ཨཀཱཏུམྤི ལབྦྷཏཱིཏི དསྶེཏི. ཉཱཏཀཔཝཱརིཏཊྛཱནཏོཏི ¶ ཨཏྟནོ ཏེསཾ ཝཱ ཉཱཏཀཔཝཱརིཏཊྛཱནཏོ. ཨརིཡེཧི ཨཀཏཱ ཨཡུཏྟཝསེན ཨཀཏཔུབྦཱ ཝིཉྙཏྟི ཨཀཏཝིཉྙཏྟི.

པཊིཡཱདིཡཏཱིཏི སམྤཱདིཡཏི. ཨཀཱཏུཾ ན ཝཊྚཏཱིཏི ཨེཏྠ དུཀྐཊཾ ཝདནྟི, ཨཡུཏྟཏཱཝསེནེཝ པནེཏྠ ཨཀརཎཔཊིཀྑེཔོ ཡུཏྟོ, ན ཨཱཔཏྟིཝསེནཱཏི གཧེཏབྦཾ. ཡཱཝ ཉཱཏཀཱ པསྶནྟཱིཏི ཡཱཝ ཏསྶ ཉཱཏཀཱ པསྶནྟི.

པིཏུབྷགིནཱི པིཏུཙྪཱ. མཱཏུབྷཱཏཱ མཱཏུལོ. ནཔྤཧོནྟཱིཏི ཀཱཏུཾ ན སཀྐོནྟི. ན ཡཱཙནྟཱིཏི ལཛྫཱཡ ན ཡཱཙནྟི. ‘‘ཨཱབྷོགཾ ཀཏྭཱ’’ཏི ཝུཏྟཏྟཱ ཨཉྙཐཱ དེནྟསྶ ཨཱཔཏྟིཡེཝ. ཀེཙི པན ‘‘ཨཱབྷོགཾ ཨཀཏྭཱཔི དཱཏུཾ ཝཊྚཏཱི’’ཏི ཝདནྟི, ཏཾ ན ཡུཏྟཾ བྷེསཛྫཀརཎསྶ པཱལི༹ཡཾ ‘‘ཨནཱཔཏྟི བྷིཀྑུ པཱརཱཛིཀསྶ, ཨཱཔཏྟི དུཀྐཊསྶཱ’’ཏི (པཱརཱ. ༡༨༧) ཨེཝཾ ཨནྟརཱཔཏྟིདསྶནཝསེན སཱམཉྙཏོ པཊིཀྑིཏྟཏྟཱ, ཨཊྛཀཐཱཡཾ ཨཝུཏྟཔྤཀཱརེན ཀརོནྟསྶ སུཏྟེནེཝ ཨཱཔཏྟི སིདྡྷཱཏི དཊྛབྦཱ, ཏེནེཝ ཨཊྛཀཐཱཡམྤི ‘‘ཏེསཉྙེཝ སནྟཀ’’ནྟིཨཱདི ཝུཏྟཾ. ཨཉྙེསནྟི ཨསཱལོཧིཏཱནཾ, ཏེནཱཧ ཨེཏེསཾ པུཏྟཔརམྤརཱཡཱཏིཨཱདི. ཀུལཔརིཝཊྚོཏི ཀུལསྨིཾ ཉཱཏིཔརམྤརཱ. བྷེསཛྫཾ ཀརོནྟསྶཱཏི ཡཐཱཝུཏྟཝིདྷིནཱ ཀརོནྟསྶ, ‘‘ཏཱཝཀཱལིཀཾ དསྶཱམཱི’’ཏི ཨཱབྷོགཾ ཨཀཏྭཱ དེནྟསྶཱཔི པན ཨནྟརཱཔཏྟི དུཀྐཊཾ ཝིནཱ མིཙྪཱཛཱིཝཾ ཝཱ ཀུལདཱུསནཾ ཝཱ ན ཧོཏིཡེཝ, ཏེནཱཧ – ‘‘ཝེཛྫཀམྨཾ ཝཱ ཀུལདཱུསཀཱཔཏྟི ཝཱ ན ཧོཏཱི’’ཏི. ཉཱཏཀཱནཉྷི སནྟཀཾ ཡཱཙིཏྭཱཔི གཧེཏུཾ ཝཊྚཏི, ཏསྨཱ ཏཏྠ ཀུལདཱུསནཱདི ན སིཡཱ. སབྦཔདེསཱུཏི ‘‘ཙཱུལ༹མཱཏུཡཱ’’ཏིཨཱདཱིསུ སབྦཔདེསུ.

ཨུཔཛ྄ཛྷཱཡསྶ ¶ ཨཱཧརཱམཱཏི ཨིདཾ ཨུཔཛ྄ཛྷཱཡེན ‘‘མམ ཉཱཏཀཱནཾ བྷེསཛྫཾ ཨཱཧརཐཱ’’ཏི ཨཱཎཏྟེཧི ཀཏྟབྦཝིདྷིདསྶནཏྠཾ ཝུཏྟཾ, ཨིམིནཱ ཙ སཱམཎེརཱདཱིནཾ ཨཔཙྩཱསཱཡཔི པརཛནསྶ བྷེསཛྫཀརཎཾ ན ཝཊྚཏཱིཏི དསྶེཏི. ཝུཏྟནཡེན པརིཡེསིཏྭཱཏི ཨིམིནཱ ‘‘བྷིཀྑཱཙཱརཝཏྟེན ཝཱ’’ཏི ཨིམིནཱ, ‘‘ཉཱཏིསཱམཎེརེཧཱི’’ཏི ཨིམིནཱ ཙ ཝུཏྟམཏྠཾ ཨཏིདིསཏི. ཨཔཙྩཱསཱིསནྟེནཱཏི ཨཱགནྟུཀཙོརཱདཱིནཾ ཀརོནྟེནཱཔི ‘‘མནུསྶཱ ནཱམ ཨུཔཀཱརཀཱ ཧོནྟཱི’’ཏི ཨཏྟནོ ཏེཧི ལཱབྷཾ ཨཔཏྠཡནྟེན. པཙྩཱསཱཡ ཀརོནྟསྶ པན ཝེཛྫཀམྨཀུལདཱུསནཱདིདོསོ ཧོཏཱིཏི ཨདྷིཔྤཱཡོ. ‘‘ཨེཝཾ ཨུཔཀཱརེ ཀཏེ སཱསནགུཎཾ ¶ ཉཏྭཱ པསཱིདནྟི, སངྒྷསྶ ཝཱ ཨུཔཀཱརཀཱ ཧོནྟཱི’’ཏི ཀརཎེ པན དོསོ ནཏྠི. ཀེཙི པན ‘‘ཨཔཙྩཱསཱིསནྟེན ཨཱགནྟུཀཱདཱིནཾ པཊིཀྑིཏྟཔུགྒལཱདཱིནམྤི དཱཏུཾ ཝཊྚཏཱི’’ཏི ཝདནྟི, ཏཾ ན ཡུཏྟཾ ཀཏྟབྦཱཀཏྟབྦཊྛཱནཝིབྷཱགསྶནིརཏྠཀཏྟཔྤསངྒཏོ ‘‘ཨཔཙྩཱསཱིསནྟེན སབྦེསཾ དཱཏུཾ ཀཱཏུཉྩ ཝཊྚཏཱི’’ཏི ཨེཏྟཀམཏྟསྶེཝ ཝཏྟབྦཏོ. ཨཔཙྩཱསཱིསནཉྩ མིཙྪཱཛཱིཝཀུལདཱུསནཱདིདོསནིསེདྷནཏྠམེཝ ཝུཏྟཾ བྷེསཛྫཀརཎསངྑཏཱཡ ཨིམིསྶཱ ཨནྟརཱཔཏྟིཡཱ མུཙྩནཏྠཾ ཨཱགནྟུཀཙོརཱདཱིནཾ ཨནུཉྙཱཏཱནཾ དཱནེནེཝ ཏཱཡ ཨཱཔཏྟིཡཱ མུཙྩནཏོཏི གཧེཏབྦཾ. ཏེནེཝ ཨཔཙྩཱསཱིསནྟེནཱཔི ཨཀཱཏབྦཊྛཱནཾ དསྶེཏུཾ སདྡྷཾ ཀུལནྟིཨཱདི ཝུཏྟཾ. པུཙྪནྟཱིཏི ཨིམིནཱ དིཊྛདིཊྛརོགཱིནཾ པརིཡཱཡེནཱཔི ཝཏྭཱ ཝིཙརཎཾ ཨཡུཏྟནྟི དསྶེཏི. པུཙྪིཏསྶཱཔི པན པཙྩཱསཱིསནྟསྶ པརིཡཱཡཀཐཱཔི ན ཝཊྚཏཱིཏི ཝདནྟི.

སམུལླཔེསཱིཏི ཨཔཙྩཱསཱིསནྟོ ཨེཝཾ ཨཉྙམཉྙཾ ཀཐཾ སམུཊྛཱཔེསི. ཨཱཙརིཡབྷཱགོཏི ཝིནཡཱཙཱརཾ ཨཀོཔེཏྭཱ བྷེསཛྫཱཙིཀྑཎེན ཝེཛྫཱཙརིཡབྷཱགོཏི ཨཏྠོ. པུཔྥཔཱུཛནཏྠཱཡ སམྤཊིཙྪིཡམཱནཾ རཱུཔིཡཾ ཨཏྟནོ སནྟཀཏྟབྷཛནེན ནིསྶགྒིཡམེཝཱཏི ཨཱཧ ‘‘ཀཔྤིཡཝསེན གཱཧཱཔེཏྭཱ’’ཏི, ‘‘ཨམྷཱཀཾ རཱུཔིཡཾ ན ཝཊྚཏི, པུཔྥཔཱུཛནཏྠཾ པུཔྥཾ ཝཊྚཏཱི’’ཏིཨཱདིནཱ པཊིཀྑིཔིཏྭཱ ཀཔྤིཡེན ཀམྨེན གཱཧཱཔེཏྭཱཏི ཨཏྠོ.

ཡདི ‘‘པརིཏྟཾ ཀརོཐཱ’’ཏི ཝུཏྟེ ཀརོནྟི, བྷེསཛྫཀརཎཾ ཝིཡ གིཧིཀམྨཾ ཝིཡ ཧོཏཱིཏི ‘‘ན ཀཱཏབྦ’’ནྟི ཝུཏྟཾ. ‘‘པརིཏྟཾ བྷཎཐཱ’’ཏི ཝུཏྟེ པན དྷམྨཛ྄ཛྷེསནཏྟཱ ཨནཛ྄ཛྷིཊྛེནཔི བྷཎིཏབྦོ དྷམྨོ, པགེཝ ཨཛ྄ཛྷིཊྛེནཱཔཱིཏི ‘‘ཀཱཏབྦ’’ནྟི ཝུཏྟཾ. ཙཱལེཏྭཱ སུཏྟཾ པརིམཛྫིཏྭཱཏི ཨིདཾ ‘‘པརིཏྟཱཎཾ ཨེཏྠ པཝེསེམཱི’’ཏི ཙིཏྟེན ཨེཝཾ ཀཏེ པརིཏྟཱཎཱ ཏཏྠ པཝེསིཏཱ ནཱམ ཧོཏཱིཏི ཝུཏྟཾ. ཝིཧཱརཏོ…པེ… དུཀྐཊནྟི ཨིདཾ ཨཉྙཱཏཀགཧཊྛེ སནྡྷཱཡ ཝུཏྟནྟི ཝདནྟི. པཱདེསུ ཨུདཀཾ ཨཱཀིརིཏྭཱཏི ཨིདཾ ཏསྨིཾ དེསེ ཙཱརིཏྟཝསེན ཝུཏྟཾ. ཝུཏྟཉྷི ‘‘ཏཏྠ པཱལི༹ཡཱ ནིསིནྣཱནཾ བྷིཀྑཱུནཾ པཱདེསུ རོགཝཱུཔསམནཱདིཨཏྠཱཡ ཨུདཀཾ སིཉྩིཏྭཱ པརིཏྟཾ ཀཱཏུཾ སུཏྟཉྩ ཋཔེཏྭཱ ‘པརིཏྟཾ ¶ བྷཎཐཱ’ཏི ཝཏྭཱ གཙྪནྟི. ཨེཝཉྷི ཀརིཡམཱནེ ཡདི པཱདེ ཨཔནེནྟི, མནུསྶཱ ཏཾ ཨཝམངྒལནྟི མཉྙནྟི, རོགོ ཝཱ ན ཝཱུཔསམིསྶཏཱི’’ཏི. ཏེནཱཧ ‘‘ན པཱདཱ ཨཔནེཏབྦཱ’’ཏི. མཏསརཱིརདསྶནེ ཝིཡ ཀེཝལཾ སུསཱནདསྶནེཔི ‘‘ཨིདཾ ཛཱཏཱནཾ སཏྟཱནཾ ཁཡགམནཊྛཱན’’ནྟི མརཎསཉྙཱ ཨུཔྤཛྫཏཱིཏི ¶ ཨཱཧ ‘‘སཱིཝཐིཀདསྶནེ…པེ… ‘མརཎསྶཏིཾ པཊིལབྷིསྶཱམཱ’ཏི ཀམྨཊྛཱནསཱིསེན གནྟུཾ ཝཊྚཏཱི’’ཏི. ལེསཀཔྤཾ ཨཀཏྭཱ སམུཔྤནྣསུདྡྷཙིཏྟེན ‘‘པརིཝཱརཏྠཱཡ ཨཱགཙྪནྟཱུ’’ཏི ཝུཏྟེཔི གནྟུཾ ཝཊྚཏི.

ཨནཱམཊྛཔིཎྜཔཱཏོཏི ཨགྒཧིཏཨགྒོ, ཨཔརིབྷུཏྟོཏི ཨཏྠོ. ཀཧཱཔཎགྒྷནཀོ ཧོཏཱིཏི ཨིམིནཱ དཱཡཀེཧི བཧུབྱཉྫནེན སམྤཱདེཏྭཱ སཀྐཙྩཾ དིནྣབྷཱཝཾ དཱིཔེཏི. ཐཱལཀེཏི སངྒྷིཀེ ཀཾསཱདིམཡེ ཐཱལཀེ, པཏྟོཔི ཨེཏྠ སངྒཡ྄ཧཏི. ན ཝཊྚཏཱིཏི ཨིམིནཱ དུཀྐཊནྟི དསྶེཏི. དཱམརིཀཙོརསྶཱཏི རཛྫཾ པཏྠེནྟསྶ པཱཀཊཙོརསྶ. ཨདཱིཡམཱནེཔི ‘‘ན དེནྟཱི’’ཏི ཀུཛ྄ཛྷནྟཱིཏི སམྦནྡྷོ. ཨཱམིསསྶ དྷམྨསྶ ཙ ཨལཱབྷེན ཨཏྟནོ པརསྶ ཙ ཨནྟརེ སམྦྷཝནྟསྶ ཚིདྡསྶ ཙ ཝིཝརསྶ པཊིསནྠརཎཾ པིདཧནཾ པཊིསནྠཱརོ, སོ པན དྷམྨཱམིསཝསེན དུཝིདྷོ. ཏཏྠ ཨཱམིསཔཊིསནྠཱརཾ སནྡྷཱཡ ‘‘ཀསྶ ཀཱཏབྦོ, ཀསྶ ན ཀཱཏབྦོ’’ཏི ཝུཏྟཾ. ‘‘ཨཱགནྟུཀསྶ ཝཱ…པེ… ཀཏྟབྦོ ཡེཝཱ’’ཏི སངྑེཔཏོ ཝུཏྟམཏྠཾ པཱཀཊཾ ཀཱཏུཾ ཨཱགནྟུཀཾ ཏཱཝཱཏིཨཱདིམཱཧ. ཁཱིཎཔརིབྦཡནྟི ཨིམིནཱ ཨགཏིབྷཱཝཾ ཀཱརུཉྙབྷཱཛནཏཉྩ དསྶེཏི, ཏེན ཙ ཏབྦིདྷུརཱནཾ སམིདྡྷཱནཾ དཱཡཀཱདཱིནཾ ཨཱགནྟུཀཏྟེཔི དཱཏུཾ ན ཝཊྚཏཱིཏི སིདྡྷཾ ཧོཏི. ཏཎྜུལཱདིམྷི དཱཏབྦེ སཏི ‘‘ཨཝེལཱཡཾ…པེ… ན ཝཏྟབྦོ’’ཏི ཝུཏྟཾ. ‘‘ཨཔཙྩཱསཱིསནྟེནཱ’’ཏི ཝཏྭཱ པཙྩཱསཱིསནཔྤཀཱརཾ དསྶེཏུཾ མནུསྶཱ ནཱམཱཏིཨཱདི ཝུཏྟཾ. ཨནནུཉྙཱཏཱནཾ པན ཨཔཙྩཱསཱིསནྟེནཱཔི དཱཏུཾ ན ཝཊྚཏི སདྡྷཱདེཡྻཝིནིཔཱཏཏྟཱ, པཙྩཱསཱིསཱཡ པན སཏི ཀུལདཱུསནམྤི ཧོཏི.

ཨུབྦཱསེཏྭཱཏི སམནྟཏོ ཏིཡོཛནཾ ཝིལུམྤནྟེ མནུསྶེ པལཱཔེཏྭཱ. ཝརཔོཏྠཀཙིཏྟཏྠརཎནྟི ཨནེཀཔྤཀཱརཨིཏྠིཔུརིསཱདིཨུཏྟམརཱུཔཝིཙིཏྟཾ ཨཏྠརཎཾ.

༡༨༧. སཏྟརསཝགྒིཡེསུ པུབྦེ ཨེཀསྶ ཨངྒུལིཔཏོདཀེན མཱརིཏཏྟཱ སེསེསུ སོལ༹སཛནེསུ ཨུདརཾ ཨཱརུཧིཏྭཱ ནིསིནྣམེཀཾ ཋཔེཏྭཱ ‘‘སེསཱཔི པནྣརས ཛནཱ’’ཏི ཝུཏྟཾ. ཨདཱུཧལཔཱསཱཎཱ ཝིཡཱཏི ཨདཱུཧལེ ཨཱརོཔིཏཔཱསཱཎཱ ཝིཡ. ཀམྨཱདྷིཔྤཱཡཱཏི ཏཛྫནཱིཡཱདིཀམྨཀརཎཱདྷིཔྤཱཡཱ.

ཨཱཝཱཧེཏྭཱཏི ¶ ¶ ཨཱཝིསཱཔེཏྭཱ. རཱུཔཾ ཀཏྭཱ ཧཏྠཔཱདཱདཱིནི ཚིནྡནྟཱིཏི ཏསྨིཾ པིཊྛཱདིམཡེ རཱུཔེ ཨམནུསྶཾ ཨཱཝཱཧེཏྭཱ ཏསྶ ཧཏྠཔཱདཱདཱིནི ཚིནྡནྟི. སཀྐཾ དེཝརཱཛཱནཾ མཱརེཡྻཱཏི ཨིདཾ སམྦྷཱཝནཝསེན ཝུཏྟཾ. ན ཧི ཏཱདིསཱ མཧཱནུབྷཱཝཱ ཡཀྑཱ སཏྠགྷཱཏཱརཧཱ ཧོནྟི དེཝཱསུརཡུདྡྷེཔི ཏེསཾ སཏྠཔྤཧཱརེན མརཎཱབྷཱཝཱ.

༡༨༨. པཧཱརོ ན དཱཏབྦོཏི སམྦནྡྷོ. ཨམནུསྶཾ ཀོདྷཙིཏྟེན པཧརནྟསྶ དུཀྐཊམེཝ. ཙིཀིཙྪཱདྷིཔྤཱཡེན པཧརནྟསྶ ཨནཱཙཱརོཏི གཧེཏབྦོ. ཏཱལཔཎྞཾ…པེ… བནྡྷིཏབྦནྟི ཨམནུསྶཱ ཏཱལཔཎྞབནྡྷནེན པལཱཡནྟཱིཏི ཀཏྭཱ ཝུཏྟཾ, ཨིདཉྩ གིཧཱིནཾ ཝེཛྫཀམྨཝསེན ཀཱཏུཾ ན ཝཊྚཏི.

༡༨༩. ཡོ རུཀྑེན ཨོཏྠཏོཔི ན མརཏཱིཏིཨཱདཱིསུ ཡཾ ཝཏྟབྦཾ, ཏཾ བྷཱུཏགཱམསིཀྑཱཔདཊྛཀཐཱཡཾ སཡམེཝ ཝཀྑཏི, ཏཾ ཏཏྠེཝ གཧེཏབྦཾ.

༡༩༠. དབྦཱུཔཀརཎཱནཱིཏི ཀེཧིཙི ཚིནྡིཏྭཱ ཋཔིཏཱནི སཔརིགྒཧིཏཱནི སནྡྷཱཡ ཝུཏྟཾ. ཏཏྠ ཧི ཋཱནཱཙཱཝནཱབྷཱཝེན ཝིནཱསཱདྷིཔྤཱཡསྶ དུཀྐཊཾ ཝུཏྟཾ. ཁིཌྜཱདྷིཔྤཱཡེནཱཔི དུཀྐཊནྟི སུཀྑཏིཎཱདཱིསུ ཨགྒིཀརཎཾ སནྡྷཱཡ ཝུཏྟཾ, ཨལླེསུ པན ཀཱིལཱ༹དྷིཔྤཱཡེནཔི ཀརོནྟསྶ པཱཙིཏྟིཡམེཝ. པཊིཔཀྑབྷཱུཏོ, པཊིམུཁཾ གཙྪནྟོ ཝཱ ཨགྒི པཊགྒི, ཏསྶ ཨལླཏིཎཱདཱིསུཔི དཱནཾ ཨནུཉྙཱཏཾ, ཏཾ དེནྟེན དཱུརཏོ ཨཱགཙྪནྟཾ དཱཝགྒིཾ དིསྭཱ ཝིཧཱརསྶ སམནྟཏོ ཨེཀཀྑཎེ ཨདཏྭཱ ཨེཀདེསཏོ པཊྛཱཡ ཝིཧཱརསྶ སམནྟཏོ སཎིཀཾ ཛྷཱཔེཏྭཱ ཡཐཱ མཧནྟོཔི ཨགྒི ཝིཧཱརཾ པཱཔུཎིཏུཾ ན སཀྐོཏི, ཨེཝཾ ཝིཧཱརསྶ སམནྟཱ ཨབྦྷོཀཱསཾ ཀཏྭཱ པཊགྒི དཱཏབྦོ, སོ དཱཝགྒིནོ པཊིཔཐཾ གནྟྭཱ ཨེཀཏོ ཧུཏྭཱ ཏེན སཧ ནིབྦཱཏི. པརིཏྟཀརཎནྟི སམནྟཱ རུཀྑཏིཎཱདིཙྪེདནཔརིཁཱཁཎནཱདིཨཱརཀྑཀརཎཾ, ཏེནཱཧ ཏིཎཀུཊིཀཱནཾ སམནྟཱ བྷཱུམིཏཙྪནནྟིཨཱདི.

༡༩༡. ཁེཏྟམེཝ ཨོཏིཎྞཏྟཱ པཱརཱཛིཀནྟི དྭཱིསུ ཨེཀསྶཱཔི ཨནྟོགདྷཏྟཱ ‘‘དྭཱིཧཱི’’ཏི ཝུཏྟཁེཏྟེ ཨེཀསྶཱཔི ཨོཏིཎྞཏྟཱ པཱརཱཛིཀཾ, ‘‘དྭཱིཧི ཨེཝ མཱརེཧི ན ཨེཀེནཱ’’ཏི ནིཡམིཏེ པན ཨེཀེནེཝ མཱརིཏེ ནཏྠི པཱརཱཛིཀནྟི ཝདནྟི, ཨེཝཾ དྭེ ཨེཝ པུརིསཱཏིཨཱདཱིསུཔི. པུབྦེ ཀཏསཱིསཙྪེདཔཡོགཏོ ཨཉྙོ པཡོགོ ཛཱིཝིཏིནྡྲིཡུཔཙྪེདཀོ ན ཨུཔལབྦྷཏི, པཋམེན པཡོགེནསྶ ¶ ཛཱིཝིཏིནྡྲིཡཾ ཨུཔཙྪིཛྫཏཱིཏི ‘‘སཱིསཙྪེདཀསྶཱ’’ཏི ཝུཏྟཾ, ཡཾ པན སཱརཏྠདཱིཔནིཡཾ ‘‘ཛཱིཝིཏིནྡྲིཡསྶ ཨཝིཛྫམཱནཏྟཱ’’ཏི ཀཱརཎཾ ཝུཏྟཾ, ཏཾ ཨཀཱརཎཾ ཛཱིཝིཏིནྡྲིཡསནྣིསྶིཏཙིཏྟསནྟཏིཾ ¶ ཝིནཱ ཨུཀྑིཔནསནྣིརུཛ྄ཛྷནཱདིཝསཔྤཝཏྟསྶ གམནསྶ ཨསམྦྷཝཏོ. ན ཧི ཝཱཡུཝེགེན པཎྞཔཊཱདཡོ ཝིཡ ཀཱཡོ གཙྪཏི, ན ཙ ཨུཀྑིཔནེ པཝཏྟཱཝ ཙིཏྟཛཝིཉྙཏྟིཨཱདཡོཝ ནིཀྑིཔནཱདིནོཔི ཧེཏུབྷཱུཏཱཏི སཀྐཱ ཝཏྟུཾ ཝིཙྪིནྡིཏྭཱ པཝཏྟནཏོ. པུབྦེ ཨནཱཧིཏཝེགཱཔི ཧི ཀཱཙི སརཱིསཔཛཱཏི དྭིདྷཱ ཚིནྣཱ ཚེདནམཏྟཱ དྭཱིཧི ཝིབྷཱགེཧི ཀཏིཔཡཀྑཎཾ དྭཱིསུ དིསཱསུ གཙྪཏི, ཏཏྠ ཙ ཡསྨིཾ བྷཱགེ ཧདཡཝཏྠུ ཏིཊྛཏི, ཏཏྲཊྛཾ པཉྩདྭཱརཱཝཛྫནཙིཏྟཾ དྭཱིསུཔི བྷཱགེསུ ཀཱཡཔྤསཱདེ གྷཊྚིཏཾ ཕོཊྛབྦཾ ཨཱལམྦིཏྭཱ ཨུཔྤཛྫཏི, ཏཏོ ཏདཱརམྨཎམེཝ ཡཐཱརཧམེཀསྨིཾ བྷཱགེ ཨེཀདཱ ཨཉྙསྨིཾ ཨཉྙདཱཏི ཨེཝཾ པརིཡཱཡེན ཀཱཡཝིཉྙཱཎཾ ཨུཔྤཛྫཏི, ཏཏོ ཧདཡཝཏྠུསྨིཾཡེཝ སམྤཊིཙྪནཱདིཝཱིཐིཙིཏྟཱནི བྷཝངྒནྟརིཏཱནི མནོདྭཱརཝཱིཐིཝིཉྙཱཎཱནི ཙ ཝིཉྙཏྟིཛནཀཱནི ཨུཔྤཛྫནྟི, ཡེ ཧི ཨུབྷཡབྷཱགཱ གཙྪནྟི ཝཱ ཙལནྟི ཝཱ ཕནྡནྟི ཝཱ. ཙིཏྟསྶ པན ལཧུཔརིཝཏྟིཡཱ ཨེཀཀྑཎེ ཨུབྷཡབྷཱགཱཔི ཙལནྟཱ ཝིཡ ཨུཔཊྛཧནྟི, སེཡྻཐཱཔི ནཱམ ཀུཀྐུལཱ༹དིནརཀེསུ ནིམུགྒསཀལསརཱིརསྶ སཏྟསྶ ཨེཀསྨིཾ ཁཎེ སཀལསརཱིརེཔི ཀཱཡཝིཉྙཱཎདུཀྑཾ ཨུཔྤཛྫམཱནཾ ཝིཡ ཨུཔཊྛཱཏི, ཨེཝཾསམྤདམིདཾ དཊྛབྦཾ, ཏཏོ པན ཡསྨིཾ བྷཱགེ ཛཱིཝིཏིནྡྲིཡཾ སསེསཀམྨཛརཱུཔཾ ནིརུཛ྄ཛྷཏི, ཏཏྠ ཀཱཡཝིཉྙཱཎཾ ནཔྤཝཏྟཏི, ཧདཡཝཏྠུསཧིཏབྷཱགེཡེཝ ཡཱཝ ཛཱིཝིཏིནྡྲིཡནིརོདྷཱ པཝཏྟཏི.

ནནུ ནརཀཱདཱིསུ ཨེཀཱབདྡྷེ སརཱིརེ སབྦཏྠ པརིཡཱཡེན ཀཱཡཝིཉྙཱཎསམུཔྤཏྟི ཡུཏྟཱ ཧོཏུ, དྭིདྷཱ ཧུཏྭཱ ཝིཙྪིནྣེ པན བྷཱགདྭཡེ ཀཐནྟི? ནཱཡཾ དོསོ. སརཱིརེ ཧི ཨེཀཱབདྡྷཏཱ ནཱམ པརམཏྠདྷམྨབྱཏིརིཏྟཱ ཀཱཙི ནཏྠི པརཝཱདཱིནཾ ཨཝཡཝཱིཨཱདི ཝིཡ, ཀམྨཱདིཨེཀཀཱརཎཔུཉྫཱཡཏྟཏཱཡ བཧཱུནཾ སཧུཔྤཏྟིཡེཝ ཨེཀཱབདྡྷཏཱ. ཏཏྠ ཙ སཏྠཔྤཧཱརཱདིཝིརུདྡྷཔཙྩཡོཔནིཔཱཏེན ཝིབྷིནྣཱནམྤི ཀམྨཱདིཨེཀཀཱརཎཱནཾ པུཉྫཱཡཏྟཏཱ ན ཝིགཙྪཏི, ཡཱཝ སཱ ན ཝིགཙྪཏི, ཏཱཝ ཨཝིཙྪིནྣཱཝ ཏཏྠ ཝིཉྙཱཎཔྤཝཏྟི. ཝིབྷིནྣཱནཾ པན ཀམྨཛརཱུཔཱནཾ ཨཉྙེསཉྩ སེསཏིསནྟཏིརཱུཔཱནཉྩ ཨུཔཏྠམྦྷནབྷཱཝེན ཙིརཾ པཝཏྟིཏུཾ ན སཀྐོནྟི, ཡཱཝ ཙ དྷརནྟི, ཏཱཝ ཝིཉྙཱཎཔཙྩཡཱ ཧོནྟི, ཝིཉྙཱཎེན ཙ ཏེསཾ ¶ ཙལནགམནཱདིདེསནྟརུཔྤཏྟི. ཏསྨཱ ཀབནྡྷསྶཔི དྷཱཝཀྑཎེ སཝིཉྙཱཎཛཱིཝིཏིནྡྲིཡཾ ཨཏྠེཝ, ཏཉྩ སཱིསཙྪེདཀཔྤཡོགེནེཝ སཱིགྷཾ པཏཏི, ཏཏོ ཨཉྙཔྤཡོགསྶ སརཱིརེ ཝིསེསུཔྤཱདནཏོ པུརེཏརམེཝ པཋམེནེཝ ཀིཙྩནིཔྥཏྟིཏོ སཱིསཙྪེདཀསྶེཝ ཀམྨབདྡྷོཏི གཧེཏབྦོ. ཨེཝརཱུཔཱནཱིཏི ཀབནྡྷཝཏྠུསདིསཱནི. ཨིམསྶ ཝཏྠུསྶཱཏི ཨཱགྷཱཏནཝཏྠུསྶ. ཨཏྠདཱིཔནེཏི ཨེཀེན པུརིསེན པཡོགེན ཝཱ མཱརིཏཏཱསངྑཱཏསྶ ཨཏྠསྶ དཱིཔནེ.

༡༩༢. པཱནཔརིབྷོགེན ¶ ཝཊྚཏཱིཏི སམྦནྡྷོ. ཨེཝཾ པན ཝུཏྟཏྟཱ ‘‘ལོཎསོཝཱིརཀཾ ཡཱམཀཱལིཀ’’ནྟི ཀེཙི ཝདནྟི, ཀེཙི པན ‘‘གིལཱནཱནཾ པཱཀཏིཀམེཝ, ཨགིལཱནཱནཾ པན ཨུདཀསམྦྷིནྣ’’ནྟི ཝུཏྟཏྟཱ ‘‘གུལ༹ཾ ཝིཡ སཏྟཱཧཀཱལིཀ’’ནྟི.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

ཏཏིཡཔཱརཱཛིཀཝཎྞནཱནཡོ ནིཊྛིཏོ.

༤. ཙཏུཏྠཔཱརཱཛིཀཾ

ཝགྒུམུདཱཏཱིརིཡབྷིཀྑུཝཏྠུཝཎྞནཱ

༡༩༣. ཨདྷིཊྛེམཱཏི ¶ སཾཝིདཧཱམ. ཨིརིཡཱཔཐཾ སཎྛཔེཏྭཱཏི པདྷཱནཱནུརཱུཔཾ ཀཏྭཱ. ཨནཱགཏསམྦནྡྷེ པན ཨསཏཱིཏི བྷཱསིཏོ བྷཝིསྶཏཱིཏི པཱཋསེསཾ ཀཏྭཱ ཨནཱགཏསམྦནྡྷེ ཨསཏི. བྷཱསིཏོཏི ཨཏཱིཏཝཙནཾ ཀཐཾ ཨནཱགཏཝཙནེན སམྦནྡྷམུཔགཙྪཏཱིཏི ཨཱཧ ལཀྑཎཾ པནཱཏིཨཱདི. ཨཱིདིསེ ཧི ཋཱནེ དྷཱཏུསམྦནྡྷེ པཙྩཡཱཏི ཨིམིནཱ ལཀྑཎེན དྷཱཏྭཏྠསམྦནྡྷེ སཏི ཨཡཐཱཀཱལཝིཧིཏཱཔི པཙྩཡཱ སཱདྷཝོ བྷཝནྟཱིཏི སདྡསཏྠཝིདཱུ ཝདནྟི.

༡༩༤. ཝཎྞཝཱཏི ཨིམིནཱ ཨབྷིནཝུཔྤནྣཝཎྞཏཱ ཝུཏྟཱ. པསནྣམུཁཝཎྞཱཏི ཨིམིནཱ མུཁཝཎྞསྶ ཨཏིཔཎཱིཏཏཱ ཝུཏྟཱ. ཝིཔྤསནྣཙྪཝིཝཎྞཱཏི ཨིམིནཱ པཀཏིསརཱིརཝཎྞསྶེཝ ཡཐཱཝུཏྟནཡེན ཝིཔྤསནྣཏཱ ཝུཏྟཱ. ཡསྨཱ ཨིནྡྲིཡཱནཾ ཨུཔཱདཱརཱུཔཏྟཱ ནིསྶཡཝསེནེཝ པཱིཎནནྟི ཨཱཧ ‘‘ཨབྷིནིཝིཊྛོཀཱསསྶ པརིཔུཎྞཏྟཱ’’ཏི. པཉྩཔྤསཱདཱནཾ ཝིཡ ཧདཡརཱུཔསྶཱཔི པརིཔུཎྞཏཱ ཝུཏྟཱཡེཝཱཏི ¶ ཨཱཧ ‘‘མནཙྪཊྛཱནཾ ཨིནྡྲིཡཱན’’ནྟི. ཨུདྡེསཾ པརིཔུཙྪཾ ཨནུཡུཉྫནྟཱ ཨིམཾ སརཱིརསོབྷཾ ནེཝ པཱཔུཎིཾསཱུཏི སམྦནྡྷོ. ཡཐཱ ཏནྟི ཨེཏྠ ཏནྟི ནིཔཱཏམཏྟཾ. ཙཏུཙཀྐནྟི ཨེཏྠ པཝཏྟནཊྛེན ཨིརིཡཱཔཐོཝ ཙཀྐནྟི ཝུཏྟོ.

༡༩༥. ཨུཔལབྦྷནྟཱིཏི དིསྶནྟི, ཉཱཡནྟཱིཏི ཨཏྠོ. པཙནྟོཏི པཱིལེ༹ནྟོ, གེཧཱདཱིནི ཝཱ སཡཾ ཌཧནྟོ, ཨཉྙེཧི ཝཱ པཱཙེནྟོ. ཨུདྡྷཏེཏི ཨུདྡྷཙྩཔཀཏིཀེ. ཨུནྣལེ༹ཏི ཨུགྒཏནལ༹སདིསེན ཨུགྒཏཏུཙྪམཱནེན སཧིཏེ. ཙཔལེཏི པཏྟཙཱིཝརམཎྜནཱདིནཱ ཙཱཔལླེན ཡུཏྟེ. མུཁརེཏི ཁརཝཙནེ. པཱཀཏིནྡྲིཡེཏི ཨསཾཝུཏཏྟཱ གིཧིཀཱལེ ཝིཡ པཀཏིཡཾ ཋིཏིནྡྲིཡེ. ཨིརིཡཱཔཐསཎྛཔནཱདཱིནཱིཏི ཨཱདི-སདྡེན པཙྩཡཔཊིསེཝནསཱམནྟཛཔྤཱནཾ གཧཎཾ ཝེདིཏབྦཾ. པརམསལླེཁཝུཏྟཱིཧི མཧཱཨརིཡཝཾསེཧི བྷིཀྑཱུཧི ནིཝུཏྠསེནཱསནཱནི ལོཀསམྨཏསེནཱསནཱནི ནཱམ. པརིཔཱཙེཏུནྟི ཝིམྷཱཔནཝསེན པརིཎཱམེཏུཾ. བྷིཀྑཱཙཱརེ ཨསམྤཛྫམཱནེཏི ཨིདཾ ཛནཔདཙཱརིཀཾ ¶ ཙརནྟཱིཏི ཨིམིནཱ སམྦནྡྷིཏབྦཾ, ན པན པཱལི༹ཾ ཝཱཙེནྟོཏིཨཱདཱིཧི, ཏཱནི པན པདཱནི ཨཏྟནོ ནིརནྟརཝཱསཊྛཱནེཔི ཛནཔདེསུཔི ཀཏྟབྦཀིཙྩདསྶནཝསེན ཝུཏྟཱནི, ཏཱནི ཙ ཏེ ཝཏྟསཱིསེན ཀརོནྟི, ན ལཱབྷནིམིཏྟཾ, ཏེནཱཧ ཏནྟཱིཏིཨཱདི. ཀིཙྪེནཱཏི ཨིམསྶེཝ ཝེཝཙནཾ ཀསིརེནཱཏི. ཏདུབྷཡམྤི པཱརམཱིཔཱུརཎཝཱཡཱམཾ སནྡྷཱཡ ཝུཏྟཾ. སཱདྷཱརཎཔརིཀྑཱརབྷཱཝེནཱཏི སངྒྷིཀཔརིཀྑཱརབྷཱཝེན. ཏཐཱབྷཱཝཏོ ཐེནེཏྭཱཏི ཨཝིསྶཛྫིཡཨཝེབྷངྒིཡབྷཱཝཏོ ཐེནེཏྭཱ, ན ཋཱནཱཙཱཝནཝསེནཱཏི ཨདྷིཔྤཱཡོ, ཏེནཱཧ ‘‘ཀུལདཱུསཀདུཀྐཊཾ ཨཱཔཛྫཏཱི’’ཏི. ཨསནྟནྟི ཨིམསྶ ཨབྷཱུཏནྟི ཨིདཾ ཀཱརཎཝཙནཾ, ཨནུཔྤནྣཏྟཱ ཨཝིཛྫམཱནནྟི ཨཏྠོ. ཀིཏཝསྶེཝཱཏི ཀིཏཝསྶ སཀུཎགཧཎམིཝ. ཀེརཱཊིཀསྶཱཏི སཋསྶ. སམཎོཏི གོཏྟམཏྟཾ ཨནུབྷོནྟི དྷཱརེནྟཱིཏི གོཏྲབྷུནོ, ནཱམམཏྟསམཎཱཏི ཨཏྠོ. དུཛྫཱནཔརིཙྪེདནྟི ཨནནྟདུཀྑཏྟཱ ‘‘ཨེཏྟཀཾ དུཀྑ’’ནྟི སངྑྱཱཝསེན པརིཙྪིནྡིཏྭཱ ཉཱཏུཾ སབྦཉྙུཏཉྙཱཎེནཱཔི དུཀྐརཾ, ན པན སརཱུཔཝསེན ཉཱཏུཾ བུདྡྷཉཱཎསྶ ཨཝིསཡབྷཱཝཱ.

ཨདྷིམཱནཝཏྠུཝཎྞནཱ

༡༩༦. ཨརཧཏྟེཏི ཨགྒཕལེ. ཉཱཎཙཀྑུནཱཏི པཙྩཝེཀྑཎཉཱཎསངྑཱཏེན ཙཀྑུནཱ, ཨཐ ཝཱ ཕལཙིཏྟསམྤཡུཏྟེནེཝ ཉཱཎཙཀྑུནཱ. ཨཏྟནཱ སམྤཡུཏྟེནཱཔི ¶ ཧི ཉཱཎེན ཨསམྨོཧཏོ སཡཾ དིཊྛཾ ནཱམ ཧོཏི, ཏཐཱ ཏསྨིཾ ཨདིཊྛེཏི ཨཏྠོ. སབྦེསཾ ཀིལེསཱནཾ པཧཱཡཀཝསེན ཨཱཛཱནཱཏི, སམནྟཏོ སབྦེན ཝཱ པཀཱརེན ཛཱནཱཏཱིཏི ‘‘ཨཉྙཱ’’ཏི ཨགྒམགྒོ ཝུཙྩཏི, ཏདུཔཙཱརེན པན ཏཔྥལམྤཱིཏི ཨཱཧ ‘‘ཨཉྙཾ བྱཱཀརིཾསཱུཏི ཨརཧཏྟཾ བྱཱཀརིཾསཱུ’’ཏི. ཨནྟརཱ ཋཔེཏཱིཏི སེཁབྷཱུམིཡཾ ཨདྷིམཱནོ ཋཔེཏི. ཀིལེསསམུདཱཙཱརཾ ཨཔསྶནྟོཏི པུརིམམགྒཏྟཡཝཛ྄ཛྷཱནཾཡེཝ ཀིལེསཱནཾ ཝསེན ཝུཏྟཾ, ན བྷཝརཱགཱདཱིནཾ.

སཝིབྷངྒསིཀྑཱཔདཝཎྞནཱ

༡༩༧. པཀཏིམནུསྶེཧི ཨུཏྟརིཏརཱནཾ བུདྡྷཱདིཨུཏྟམཔུརིསཱནཾ ཨདྷིགམདྷམྨོ ཨུཏྟརིམནུསྶདྷམྨོཏི ཨཱཧ ཨུཏྟརིམནུསྶཱནནྟིཨཱདི. པཱལི༹ཡཾ (པཱརཱ. ༡༩༨) ‘‘ཨཏྠི ཙ མེ ཨེཏེ དྷམྨཱ མཡཱི’’ཏི ཨེཏྠ མེཏི ཨིདཾ པདཔཱུརཎམཏྟཾ. ཨདྷིགནྟབྦཏོ ཨདྷིགམསངྑཱཏསྶ ཛྷཱནཱདིནོ པུཙྪཱ ཨདྷིགམཔུཙྪཱ, སཱ ཙ ཛྷཱནཱདཱིསུ སཱམཉྙཏོ པཝཏྟཱཏི ཨིདཱནི ཏཏྠ པཋམཛ྄ཛྷཱནཾ ཝཱ དུཏིཡཱདཱིསུ ཨཉྙཏརཾ ཝཱ ཏཏྠཱཔི ཀསིཎཱདིཨཱརམྨཎེསུ ཀཏརམཱརམྨཎཾ ཛྷཱནཾ ཝཱ ལོཀུཏྟརེསུ ཙ སོཏཱཔཏྟིམགྒཾ ཝཱ སཀདཱགཱམིམགྒཱདཱིསུ ཨཉྙཏརཾ ཝཱ ཏཏྠཱཔི སུཉྙཏཝིམོཀྑཾ ¶ ཝཱ ཨཔྤཎིཧིཏཝིམོཀྑཱདཱིསུ ཨཉྙཏརཾ ཝཱཏི ཨེཝཾ པཙྩེཀཾ བྷེདནིདྡྷཱརཎཝསེན པུཙྪནཱཀཱརཾ དསྶེཏུཾ པཱལི༹ཡཾ (པཱརཱ. ༡༩༨) ‘‘པུན ཀཏམེསཾ ཏྭཾ དྷམྨཱནཾ ལཱབྷཱི’’ཏི ཨཡཾ པུཙྪཱ དསྶིཏཱཏི དཊྛབྦཱ, ཏེནཱཧ པཋམམགྒཱདཱིསཱུཏིཨཱདི. ཡཱཡ ཨནུཀྐམཔཊིཔཏྟིཡཱ ལོཀུཏྟརོ ཨདྷིགམོ ཨཱགཙྪཏི, སཱ པུབྦབྷཱགཔཊིཔཏྟི ཨཱགམནཔཊིཔདཱ. ན སུཛ྄ཛྷཏཱིཏི པུཙྪིཡམཱནོ པཊིཔཏྟིཀྐམཾ ཨུལླངྒྷིཏྭཱ ཀཐེཏི. ཨཔནེཏབྦོཏི ཏཡཱ ཝུཏྟཀྐམེནཱཡཾ ན སཀྐཱ ཨདྷིགནྟུནྟི ཨདྷིགཏམཱནཏོ ཨཔནེཏབྦོ. སནྣིཧིཏེསུ ཀཔྤིཡེསུཔི ཙཏཱུསུ པཙྩཡེསུ ཨལགྒཏྟཱ ‘‘ཨཱཀཱསེ པཱཎིསམེན ཙེཏསཱ’’ཏི ཝུཏྟཾ. ཝུཏྟསདིསཾ བྱཱཀརཎཾ ཧོཏཱིཏི ཡོཛནཱ. ཁཱིཎཱསཝཔཊིཔཏྟིསདིསཱ པཊིཔདཱ ཧོཏི སུཝིཀྑམྦྷིཏཀིལེསཏྟཱ. ཨིདཉྩ ཨརཧཏྟཾ པཊིཛཱནནྟསྶ ཝསེན ཝུཏྟཾ, ཏེནཱཧ ཁཱིཎཱསཝསྶ ནཱམཱཏིཨཱདི. ཨེཝཾ སུཝིཀྑམྦྷིཏཀིལེསསྶ ཝཏྟནསེཀྑདྷམྨཔཊིཛཱནནཾ ཨིམིནཱ བྷཡུཔྤཱདནེན, ཨམྦིལཱདིདསྶནེ ཁེལུ༹པྤཱདཱདིནཱ ཙ ན སཀྐཱ ཝཱིམཾསིཏུཾ, ཏསྨཱ ཏསྶ ཝཙནེནེཝ ཏཾ སདྡྷཱཏབྦཾ. ཨཡཾ བྷིཀྑུ སམྤནྣབྱཱཀརཎོཏི ¶ ཨིདཾ ན ཀེཝལཾ ཨབྷཱཡནཀམེཝ སནྡྷཱཡ ཝུཏྟཾ ཨེཀཙྩསྶ སཱུརཛཱཏིཀསྶ པུཐུཛྫནསྶཱཔི ཨབྷཱཡནཏོ, རཛྫནཱིཡཱརམྨཎཱནཾ བདརསཱལ༹ཝཱདིཨམྦིལམདྡནཱདཱིནཾ ཨུཔནཡནེཔི ཁེལུ༹པྤཱདཱདིཏཎྷཱཔཝཏྟརཧིཏཾ སབྦཐཱ སུསོདྷིཏམེཝ སནྡྷཱཡ ཝུཏྟནྟི གཧེཏབྦཾ.

ཨསནྟགུཎསམྦྷཱཝནལཀྑཎཱ པཱཔིཙྪཱཏི ཨཱཧ ཡཱ སཱ ཨིདྷེཀཙྩོཏིཨཱདི. ཨཱདི-སདྡེན ཨསྶདྡྷོཏིཨཱདིཔཱཋཾ སངྒཎྷཱཏི. སཱམཉྙཾ དུཔྤརཱམཊྛནྟི སམཎདྷམྨསངྑཱཏཾ སཱམཉྙཾ ཁཎྜསཱིལཱདིཏཱཡ དུཔྤརཱམཊྛཾ དུཊྛུ གཧིཏཾ ནིརཡཱཡ ནིརཡདུཀྑཱཡ ཏཾ པུགྒལཾ ཏཏྠ ནིརཡེ ཨུཔཀཌྜྷཏི ནིབྦཏྟཱཔེཏཱིཏི ཨཏྠོ. སིཐིལོཏི ཨོལཱིཡིཏྭཱ ཀརཎེན སིཐིལགཱཧེན ཀཏོ, སཐེན ཝཱ སཱཋེཡྻེན ཨཱདིཎྞོ སིཐིལོ. པརིབྦཛོཏི སམཎབྷཱཝོ. བྷིཡྻོཏི པུབྦེ ཝིཛྫམཱནཱནཾ རཱགརཛཱདཱིནཾ ཨུཔརི ཨཔརམྤི རཛཾ ཨཱཀིརཏཱིཏི ཨཏྠོ. བྷིཀྑུབྷཱཝོཏི ཨདྷམྨིཀཔཊིཉྙཱམཏྟསིདྡྷོ བྷིཀྑུབྷཱཝོ. ཨཛཱནམེཝཱཏི ཨེཏྠ ཨེཝ-སདྡོ ཨཝདྷཱརཎེ ཨཛཱནནྟོ ཨེཝཱཏི, ‘‘ཨཛཱནམེཝ’’ནྟིཔི པཱཋོ, ཏཏྠ པན ཨེཝཾ ཛཱནཱམི ཨེཝཾ པསྶཱམཱིཏི ཡོཛེཏབྦཾ.

པདབྷཱཛནཱིཡཝཎྞནཱ

༡༩༩. ཨེཝནྟི ཙ པཋམཛ྄ཛྷཱནཱདིཔརཱམསནཾ པཋམཛ྄ཛྷཱནཾ ཛཱནཱམི དུཏིཡཱདིཛྷཱནནྟི. ཨསུབྷཛ྄ཛྷཱནཱདཱིནཱིཏི ཨཱདི-སདྡེན ཀཱཡགཏཱསཏིཛ྄ཛྷཱནཾ ཀསིཎཛ྄ཛྷཱནཾ ཀསིཎམཱུལཀཱནི ཨཱརུཔྤཛ྄ཛྷཱནཱནི ཙ སངྒཎྷཱཏི. ཝིམོཀྑོཏི ཙཏུབྦིདྷོ མགྒོ, ཏསྶ སགུཎཏོ སུཉྙཏཱདིནཱམཾ དསྶེནྟོ ཨཱཧ སོ པནཱཡནྟིཨཱདི. མགྒོ ཧི ནཱམ པཉྩཧི ཀཱརཎེཧི ནཱམཾ ལབྷཏི ¶ སརསེན ཝཱ པཙྩནཱིཀེན ཝཱ སགུཎེན ཝཱ ཨཱརམྨཎེན ཝཱ ཨཱགམནེན ཝཱ. སཙེ ཧི སངྑཱརུཔེཀྑཱ ཨནིཙྩཏོ སངྑཱརེ སམྨསིཏྭཱ ཝུཊྛཱཏི, མགྒོ ཨནིམིཏྟཝིམོཀྑེན ཝིམུཙྩཏི. སཙེ དུཀྑཏོ སམྨསིཏྭཱ ཝུཊྛཱཏི, ཨཔྤཎིཧིཏཝིམོཀྑེན ཝིམུཙྩཏི. སཙེ ཨནཏྟཏོ སམྨསིཏྭཱ ཝུཊྛཱཏི, སུཉྙཏཝིམོཀྑེན ཝིམུཙྩཏི, ཨིདཾ སརསཏོ ནཱམཾ ནཱམ. ཡསྨཱ པནེས སངྑཱརེསུ ཨནིཙྩཱནུཔསྶནཱཡ ནིཙྩནིམིཏྟཾ པཛཧནྟོ ཨཱགཏོ, ཏསྨཱ ཨནིམིཏྟོ. དུཀྑཱནུཔསྶནཱཡ སུཁསཉྙཾ པཎིདྷིཾ པཏྠནཾ པཧཱཡ ཨཱགཏཏྟཱ ཨཔྤཎིཧིཏོ. ཨནཏྟཱནུཔསྶནཱཡ ཨཏྟསཉྙཾ པཧཱཡ ཨཏྟསུཉྙཏཱདསྶནཝསེན སུཉྙཏཱ ཧོཏི, ཨིདཾ པཙྩནཱིཀཏོ ནཱམཾ ནཱམ. རཱགཱདཱིཧི ¶ པནེས སུཉྙཏཏྟཱ སུཉྙཏོ, རཱུཔནིམིཏྟཱདཱིནཾ, རཱགནིམིཏྟཱདཱིནཾ ཨེཝ ཝཱ ཨབྷཱཝེན ཨནིམིཏྟོ, རཱགཔཎིདྷིཨཱདཱིནཾ ཨབྷཱཝཏོ ཨཔྤཎིཧིཏོཏི ཝུཙྩཏི, ཨིདཾ ཨསྶ སགུཎཏོ ནཱམཾ. རཱགཱདིསུཉྙཾ ཨནིམིཏྟཾ ཨཔྤཎིཧིཏཉྩ ནིབྦཱནཾ ཨཱརམྨཎཾ ཀརོཏཱིཏི སུཉྙཏོ ཨནིམིཏྟོ ཨཔྤཎིཧིཏོཏི ཝུཙྩཏི, ཨིདམསྶ ཨཱརམྨཎཏོ ནཱམཾ. ཨཱགམནཾ པན དུཝིདྷཾ ཝིཔསྶནཱགམནཾ མགྒཱགམནཉྩ. ཏཏྠ མགྒེ ཝིཔསྶནཱགམནམེཝ, ཕལེ པན མགྒཱནནྟརེ མགྒཱགམནཾ, ཕལསམཱཔཏྟིཡཾ ཝིཔསྶནཱགམནམྤི. ཨནཏྟཱནུཔསྶནཱཝསེན མགྒོ སུཉྙཏོ ཨནིཙྩདུཀྑཱནུཔསྶནཱཧི ཨནིམིཏྟོ ཨཔྤཎིཧིཏོཏི ཨེཝཾ ཝིཔསྶནཱ ཨཏྟནོ ནཱམཾ མགྒསྶ དེཏི, མགྒོ ཕལསྶཱཏི ཨིདཾ ཨཱགམནཏོ ནཱམཾ.

སུཉྙཏྟཱཏི ཝིཝིཏྟཏྟཱ. རཱགཱདཡོཝ པཏིཊྛཱནཊྛེན པཎིདྷཱིཏི ཨཱཧ ‘‘རཱགདོསམོཧཔཎིདྷཱིན’’ནྟི. ཨིམིསྶཱ ཝིཛྫཱཡཱཏི དིབྦཙཀྑུཝིཛྫཱཡཱཏིཨཱདིནཱ ཨེཀེཀཝིཛྫཾ སནྡྷཱཡ ཝདནྟི. ཨེཝཾ ཨེཀིསྶཱཔི ནཱམཾ ཨགྒཧེཏྭཱཔི ཏཱ ཨེཝ སནྡྷཱཡ ‘‘ཝིཛྫཱནཾ ལཱབྷིམྷཱི’’ཏི བྷཎནྟོཔི པཱརཱཛིཀོ ཧོཏཱིཏི སངྑེཔཊྛཀཐཱཡཾ ཨདྷིཔྤཱཡོ. ཝཏྠུཝིཛྫཱདཱིནི པན སནྡྷཱཡ ཝདནྟོ ན ཧོཏི. ཨེཀེཀཀོཊྛཱསཝསེནཱཏི མཧཱཨཊྛཀཐཱཡཾ ཝུཏྟནཡེན ལོཀུཏྟརཝིསེསཾ ཨཀཏྭཱ ཀེཝལཾ ‘‘སཏིཔཊྛཱནཱནཾ ལཱབྷཱི’’ཏི ཨེཀེཀཀོཊྛཱསཝསེནཱཏི ཨདྷིཔྤཱཡོ. ཏཏྠཱཏི ཏེསུ ཀོཊྛཱསེསུ. ཀིལེསཱནཾ པཧཱནཾ ནཱམ ཨབྷཱཝམཏྟམྤི ལོཀུཏྟརཀིཙྩཏྟཱ ལོཀུཏྟརནྟི སམཏྠེཏུཾ ཏཾ པནཱཏིཨཱདི ཝུཏྟཾ. རཱགཱ ཙིཏྟཾ ཝིནཱིཝརཎཏཱཏི རཱགཏོ ཙིཏྟསྶ ཝིནཱིཝརཎཏཱ, ཏཏོ རཱགཏོ ཝིམུཏྟཏྟཱ ཨེཝ ཝཱིཏརཱགནཱིཝརཎཏཱཏི ཨཏྠོ, ཡཱ ཙ པཉྩ ཝིཛྫཱཏི ཡོཛེཏབྦཾ. ན ཨཱགཏཱཏི ཨིདྷ པདབྷཱཛནེ ‘‘ཉཱཎནྟི ཏིསྶོ ཝིཛྫཱ’’ཏི (པཱརཱ. ༡༩༩) ཝུཏྟཏྟཱ སེསཱ པཉྩ ཝིཛྫཱ ན ཨཱགཏཱཏི ཨཏྠོ. ནིབྦཏྟིཏལོཀུཏྟརཏྟཱཏི ལོཀིཡདྷམྨསཱདྷཱརཎསངྑཏསྶཱཔི ཨབྷཱཝཱ ལོཀིཡེཧི སབྦཐཱ ཨསམྨིསྶལོཀུཏྟརཏྟཱ. ཨཉྙནྟི སངྑེཔཊྛཀཐཱདིཾ ཝདནྟི, ཏམྤི ཏཏྠེཝ པཊིཀྑིཏྟནྟི སམྦནྡྷོ.

༢༠༠. པུན ¶ ཨཱནེཏྭཱ པཋམཛ྄ཛྷཱནཱདཱིཧི ན ཡོཛིཏནྟི ཨེཏྠ ‘‘པཋམཛ྄ཛྷཱནེནཱཏི པཱཋོ’’ཏི ཀེཙི ཝདནྟི, ཏཾ ཡུཏྟམེཝ ཨཱདི-སདྡེན གཧེཏབྦསྶ ¶ ཛྷཱནསྶ ཨབྷཱཝཱ. པཋམཛ྄ཛྷཱནམཱུལཀཉྷི ཨེཀམེཝ ཁཎྜཙཀྐཾ. ཀཏྟུསཱདྷནོཔི བྷཎིཏ-སདྡོ ཧོཏཱིཏི ཨཱཧ ཨཐ ཝཱཏིཨཱདི. ཡེན ཙིཏྟེན མུསཱ བྷཎཏི, ཏེནེཝ ཙིཏྟེན ན སཀྐཱ ‘‘མུསཱ བྷཎཱམཱི’’ཏི ཛཱནིཏུཾ, ཨནྟརནྟརཱ པན ཨཉྙཱཧི མནོདྭཱརཝཱིཐཱིཧི ‘‘མུསཱ བྷཎཱམཱི’’ཏི ཛཱནཱཏཱིཏི ཝུཏྟཾ ‘‘བྷཎནྟསྶ ཧོཏི མུསཱ བྷཎཱམཱི’’ཏི. ཨཡམེཏྠ ཨཏྠོ དསྶིཏོཏི ཏཱིཧི ཨངྒེཧི སམནྣཱགཏོ མུསཱཝཱདོཏི ཨཡམཏྠོ དསྶིཏོ. དཝཱཏི སཧསཱ. རཝཱཏི ཨཉྙཾ ཝཏྟུཀཱམསྶ ཁལིཏྭཱ ཨཉྙབྷཎནཾ. ཏཾ ཛཱནཱཏཱིཏི ཏཾཉཱཎཾ, ཏསྶ བྷཱཝོ ཏཾཉཱཎཏཱ, ཉཱཎསྶ ཝིསཡཝིསཡཱིབྷཱཝེན ཨཏྟསཾཝེདནནྟི ཨཏྠོ. ཉཱཎསམོདྷཱནནྟི བཧཱུནཾ ཉཱཎཱནཾ ཨེཀསྨིཾ ཁཎེ སམོདྷཱནཾ, སཧུཔྤཏྟཱིཏི ཨཏྠོ. ཡེན ཙིཏྟེན ‘‘མུསཱ བྷཎིསྶ’’ནྟི ཛཱནཱཏཱིཏི ཨིདཾ པུབྦབྷཱགཙེཏནཉྩ སནྣིཊྛཱནཙེཏནཉྩ ཨེཀཏོ ཀཏྭཱ ཝུཏྟཾ. ཡེན ཙིཏྟེན པུབྦབྷཱགཙེཏནཱབྷཱུཏེན སནྣིཊྛཱནཙེཏནཱབྷཱུཏེན ཙ ཝིསཾཝཱདིཏབྦསཏྟསངྑཱརེ ཛཱནཱཏི, ཡེན ཙིཏྟེན མུསཱ བྷཎིསྶནྟི ཨཏྠོ. ཏེནེཝ…པེ… པརིཙྩཛིཏབྦཱཏི ཏེནེཝ ཙིཏྟེན ‘‘ཨེཝཾ ཨཧཾ མུསཱ བྷཎཱམཱི’’ཏི ཝཱ ‘‘བྷཎིཏ’’ནྟི ཝཱ ཏདེཝ མུསཱཝཱདཙིཏྟམཱརམྨཎཾ ཀཏྭཱ བྷིཀྑུ ཛཱནཱཏཱིཏི ཨེཝཾ པུབྦཱཔརསནྣིཊྛཱནཙེཏནཱཀྑཎེསུ ཏཱིསུ ཨེཀེནེཝ ཙིཏྟེན ཉཱཎཝིསཡཉྩ ཉཱཎཉྩཱཏི ཨུབྷཡམྤི ཨེཀཀྑཎེ པུགྒལོ ཛཱནཱཏཱིཏི ཨཡཾ ཏཾཉཱཎཏཱ པརིཙྩཛིཏབྦཱ ཝིསཡསྶེཝ ཏདཱ པཀཱསནཏོཏི ཨདྷིཔྤཱཡོ, ཏེནཱཧ ན ཧཱིཏིཨཱདི. ཡདི ཉཱཎསྶ ཨཏྟནོ སརཱུཔཾ ན ཉཱཡཏི, ཀཐཾ པཙྪིམཾ ཙིཏྟཾ ཛཱནཱཏཱིཏི ཨཱཧ པུརིམཾ པུརིམནྟིཨཱདི. ཏཏྠ བྷཎིསྶཱམཱིཏིཨཱདིནཱ ཏཱིསུ ཀཱལེསུ ཨུཔྤནྣཾ པུརིམཔུརིམཙིཏྟཾ ཨཏྟཱནཾ ཝིསཡཾ ཀཏྭཱ ཨུཔྤཛྫམཱནསྶ པཙྪིམསྶ པཙྪིམསྶ ཙིཏྟསྶ ཏཐཱ ཨུཔྤཏྟིཡཱ པཙྩཡོ ཧོཏཱིཏི ཨཏྠོ. ཏེནཱཏི ཡེན ཀཱརཎེན ཏཱིསུ ཁཎེསུ ཙིཏྟཱནི ཏདཉྙེཧེཝ ཙིཏྟེཧི ཛཱནིཏབྦཱནི, ཏཱནི ཙ པུརིམཔུརིམཙིཏྟེནེཝ ཨཝསྶཾ ཨུཔྤཛྫནྟི, ཏེན ཀཱརཎེནཱཏི ཨཏྠོ. ཏསྨིཾ སཏཱིཏི བྷཎིསྶཱམཱིཏི པུབྦབྷཱགེ སཏི. སེསདྭཡནྟི བྷཎཱམི, བྷཎིཏནྟི ཨིདཾ དྭཡཾ ན ཧེསྶཏཱིཏི ཨེཏཾ ནཏྠཱིཏི ཡོཛནཱ ཧོཏིཡེཝཱཏི ཨཏྠོ. ཨེཀཾ ཝིཡ པཀཱསཏཱིཏི བྷིནྣཀྑཎཱནམྤི ནིརནྟརུཔྤཏྟིཡཱ ‘‘ཏདེཝེད’’ནྟི གཧེཏབྦཏཾ སནྡྷཱཡ ཝདཏི.

བལཝདྷམྨཝིནིདྷཱནཝསེནཱཏི ¶ བལཝགཱཧསྶ ཝིནིདྷཱནཝསེན. དུབྦལདུབྦལཱནནྟི དུབྦལདུབྦལཱནཾ གཱཧཱནཾ. སཀབྷཱཝཔརིཙྩཛནཝསེནཱཏི ཨཏྟནོ སནྟཀབྷཱཝསྶ པརིཙྩཛནཝསེན.

༢༠༧. ཨུཏྟཱསིཏཏྟཱཏི བྷཡཾ ཛནེཏྭཱ ཝིཡ པལཱཔིཏཏྟཱ. ཨེཝཾ པལཱཔིཏོ ན པུན ཏཾ ཋཱནཾ ཨཱགཙྪཏཱིཏི ཨཱཧ ‘‘པུན ཨནལླཱིཡནབྷཱཝདསྶནཝསེནཱ’’ཏི. ཁེཊ-སདྡཾ སདྡཏྠཝིདཱུ ཨུཏྟཱསཏྠེ ¶ པཋནྟཱིཏི ཨཱཧ སྭཱཡམཏྠོཏིཨཱདི. ཨཎུ ཨེཝ ཨཎུསཧགཏཾ, ཨཎུཏྟེན ཝཱ ཡུཏྟནྟི ཨཏྠོ.

ཝཏྟུཀཱམཝཱརཀཐཱཝཎྞནཱ

༢༡༥. ཀེཝལཉྷིཡནྟི ཀེཝལཉྷི ཨཡཾ ཝཱརོཏི ཨཛ྄ཛྷཱཧརིཏབྦཾ. ཏངྑཎཉྙེཝ ཛཱནཱཏཱིཏི པཀཏིཡཱ ཝཙནཱནནྟརཾ ཝིཛཱནནཾ སནྡྷཱཡ ཝུཏྟཾ. ཨེཝཾ པན ཝཙཱིབྷེདཾ ཨཀཏྭཱ ‘‘ཡོ ཨིམམྷཱ ཨཱཝཱསཱ པཋམཾ པཀྐམིསྶཏི, ནཾ མཡཾ ‘ཨརཧཱ’ཏི ཛཱནིསྶཱམཱ’’ཏི ཨེཝཾ ཀཏསངྐེཏཱ ཝིཧཱརཱ པཋམཾ པཀྐམནེན ཏསྨིཾ ཁཎེ ཨཝཱིཏིཝཏྟེཔི ནིཀྑནྟམཏྟེཔི པཱརཱཛིཀཾ ཨཉྙཏརོ བྷིཀྑུ ‘‘མཾ ‘ཨརཧཱ’ཏི ཛཱནནྟཱུ’’ཏི ཏམྷཱ ཨཱཝཱསཱ པཋམཾ པཀྐཱམཱིཏི ཨཱགཏཝཏྠུམྷི (པཱརཱ. ༢༢༧) ཝིཡ. ཝིཉྙཏྟིཔཐེཏི ཀཱཡཝཙཱིཝིཉྙཏྟཱིནཾ གཧཎཡོགྒེ པདེསེ, ཏེན ཝིཉྙཏྟིཔཐཾ ཨཏིཀྐམིཏྭཱ ཋིཏོ ཀོཙི དིབྦེན ཙཀྑུནཱ ཀཱཡཝིཀཱརཾ དིསྭཱ དིབྦཱཡ སོཏདྷཱཏུཡཱ ཝཙཱིབྷེདཉྩ སུཏྭཱ ཛཱནཱཏི, ན པཱརཱཛིཀནྟི དཱིཔེཏི. པཱལི༹ཡཾ ‘‘པཊིཝིཛཱནནྟསྶ ཨཱཔཏྟི པཱརཱཛིཀསྶཱ’’ཏི (པཱརཱ. ༢༡༥) ཨིམསྨིཾ པཊིཝིཛཱནནཝཱརེ ཡསྨིཾ ཨཀྑརེ ཝཱ ཨུཙྩཱརིཏེ ཀཱཡཔྤཡོགེ ཝཱ ཀཏེཡེཝ ཨཡཾ པཋམཛ྄ཛྷཱནཾ སམཱཔནྣོཏིཨཱདིཨཏྠཾ པརོ ཝིཛཱནཱཏི, ཏཏོ པུརིམེསུ ཨཀྑརུཙྩཱརཎཱདིཔྤཡོགེསུ ཐུལླཙྩཡཾ ཨཱཔཛྫིཏྭཱ པཙྪིམེཝ པཊིཝིཛཱནནཔཡོགཀྑཎེ པཱརཱཛིཀཾ ཨཱཔཛྫཏཱིཏི ཝེདིཏབྦཾ ཐུལླཙྩཡསྶེཝེཏྠ སཱམནྟཏྟཱ, ཏེནེཝ བུདྡྷདཏྟཱཙརིཡེན –

‘‘དུཀྐཊཾ པཋམསྶེཝ, སཱམནྟམིཏི ཝཎྞིཏཾ;

སེསཱནཾ པན ཏིཎྞམྤི, ཐུལླཙྩཡམུདཱིརིཏ’’ནྟི –

ཝུཏྟཾ ¶ , ཨཡཉྩཏྠོ ‘‘ན པཊིཝིཛཱནནྟསྶ ཨཱཔཏྟི ཐུལླཙྩཡསྶཱ’’ཏི ཨིམིནཱ སུཏྟེན སངྒཧིཏོཏི དཊྛབྦོ. ཨུགྒཧཔརིཔུཙྪཱདིཝསེནཱཏིཨཱདིནཱ ཛྷཱནསམཱདྷིཨཱདིསདྡཱནམཏྠེསུ པུབྦེ ཨཀཏཔརིཙཡཏྟཱ སུཏྭཱ ‘‘ཨཏྠཾ ཨཱིདིས’’ནྟི ཨཛཱནིཏྭཱ ཀེཝལཾ ‘‘ཝིསིཊྛོ ཀོཙི སམཎགུཎོ ཨནེན ལདྡྷོ’’ཏི པརེན ཉཱཏེཔི པཱརཱཛིཀམེཝཱཏི དསྶེཏི.

ཨནཱཔཏྟིབྷེདཀཐཱཝཎྞནཱ

༢༢༠. ཨནུལླཔནཱདྷིཔྤཱཡསྶཱཏི ‘‘ཨེཝཾ ཝུཏྟེ ཨུཏྟརིམནུསྶདྷམྨོ མཡཱ པཀཱསིཏོ ཧོཏཱི’’ཏི ¶ ཨམནསིཀཏྭཱ ‘‘ནཱཧཾ, ཨཱཝུསོ, མཙྩུནོ བྷཱཡཱམཱི’’ཏིཨཱདིཀཾ ཀཐེནྟསྶ. ཨེཝཾ ཀཐེནྟོ ཙ ཝོཧཱརཏོ ཨཉྙཾ བྱཱཀརོནྟོ ནཱམ ཧོཏཱིཏི ཝུཏྟཾ ‘‘ཨཉྙཾ བྱཱཀརོནྟསྶཱ’’ཏི. བྷཱཡནྟོཏི ‘‘ཉཏྭཱ གརཧནྟི ནུ ཁོ’’ཏི བྷཱཡནྟོ.

པདབྷཱཛནཱིཡཝཎྞནཱནཡོ ནིཊྛིཏོ.

ཝིནཱིཏཝཏྠུཝཎྞནཱ

༢༢༣. སེཀྑབྷཱུམིཡནྟི ཨིམིནཱ ཛྷཱནབྷཱུམིམྤི སངྒཎྷཱཏི. ཏིཎྞཾ ཝིཝེཀཱནནྟི ཀཱཡཙིཏྟཨུཔདྷིཝིཝེཀཱནཾ. པིཎྜཱཡ ཙརཎསྶ བྷོཛནཔརིཡོསཱནཏཱཡ ཝུཏྟཾ ‘‘ཡཱཝ བྷོཛནཔཨཡོསཱན’’ནྟི. ཨནྟརགྷརེ བྷུཏྭཱ ཨཱགཙྪནྟསྶཱཔི ཝུཏྟནཡེནེཝ སམྦྷཱཝནིཙྪཱཡ ཙཱིཝརསཎྛཱཔནཱདཱིནི ཀརོནྟསྶ དུཀྐཊམེཝ, པཱལི༹ཡཾ པན དུཀྐརཱདིཝཏྠཱུསུ ‘‘ཨནཱཔཏྟི ཨནུལླཔནཱདྷིཔྤཱཡསྶཱ’’ཏི ཨིདཾ ཐུལླཙྩཡེནཱཔི ཨནཱཔཏྟིདསྶནཏྠཾ ཝུཏྟཾ. ཨུལླཔནཱདྷིཔྤཱཡསྶཱཔི ཧི ‘‘ནཱཝུསོ, དུཀྐརཾ ཨཉྙཾ བྱཱཀཱཏུ’’ནྟི ཝུཏྟེ ཐུལླཙྩཡམེཝ ཨཏྟུཔནཱཡིཀཏྟཱབྷཱཝཏོཏི དཊྛབྦཾ.

༢༢༧. ན དཱནཱཧཾ ཏཏྠ གམིསྶཱམཱིཏི པུན ཏཏྠ ཝསིཏཊྛཱནེ ན གམིསྶཱམི, ཨེཝཾ སཏི པཋམཾ གཏོ ཨཡཾ པུན ཙ ནཱགཏོ, ཏསྨཱ ཨརཧཱཏི མཉྙིསྶནྟཱིཏི ཨདྷིཔྤཱཡོ. ཏཾ ཋཱནནྟི ཨཱཝཱསཾ ཝཱཏིཨཱདིནཱ པུབྦེ པརིཙྪིནྣཊྛཱནཾ. པདསཱ གམནཾ སནྡྷཱཡ ཀཏིཀཱཡ ཀཏཏྟཱ ཡཱནེནཱཏིཨཱདི ཝུཏྟཾ. ཝིཛྫཱམཡིདྡྷིཾ སནྡྷཱཡ ‘‘ཨིདྡྷིཡཱ’’ཏི ཝུཏྟཾ ཨུལླཔནཱདྷིཔྤཱཡསྶ ཨབྷིཉྙིདྡྷིཡཱ ཨསམྦྷཝཏོ. ཨཉྙམཉྙཾ རཀྑནྟཱིཏི ཨུལླཔནཱདྷིཔྤཱཡེ ¶ སཏིཔི ཨེཀསྶཱཔི པཋམགམནཱབྷཱཝཱ རཀྑནྟི. སཙེ པན ཀཏིཀཾ ཀཏྭཱ ནིསིནྣེསུ ཨེཀཾ དྭེ ཋཔེཏྭཱ ཨཝསེསཱ ཨུལླཔནཱདྷིཔྤཱཡེན ཨེཀཏོ གཙྪནྟི, གཏཱནཾ སབྦེསཾ པཱརཱཛིཀམེཝ. ཏེསུ ཡསྶ ཨུལླཔནཱདྷིཔྤཱཡོ ནཏྠི, ཏསྶ ཨནཱཔཏྟི. ཨེཏནྟི ཧེཊྛཱ ཝུཏྟཾ སབྦཾ ཀཏིཀཝཏྟཾ. ནཱནཱཝེརཛྫཀཱཏི ནཱནཱཛནཔདཝཱསིནོ. སངྒྷལཱབྷོཏི ཡཐཱཝུཌྜྷཾ པཱཔུཎནཀཀོཊྛཱསོ. ཨཡཉྩ པཊིཀྑེཔོ ཨཝིསེསེཏྭཱ ཀརཎཾ སནྡྷཱཡ ཀཏོ, ཝིསེསེཏྭཱ པན ‘‘ཨེཏྟཀོ ཨསུཀསྶཱ’’ཏི པརིཙྪིནྡིཏྭཱ ཨཔལོཀེཏྭཱ དཱཏུཾ ཝཊྚཏི.

༢༢༨. དྷམྨདྷཱཏཱུཏི སབྦཉྙུཏཉྙཱཎཾ, དྷམྨཱནཾ སབྷཱཝོ ཝཱ. ཨུཔཔཏྟཱིཏི ཨཏྟབྷཱཝཾ སནྡྷཱཡ ཝདཏི. དུསྶདྡྷཱཔཡཱ ཧོནྟཱིཏི པུཐུཛྫནེ སནྡྷཱཡ ཝུཏྟཾ, ན ལཀྑཎཏྠེརཱདིཀེ ཨརིཡཔུགྒལེ ¶ . ཝིཏུཌེནྟཱིཏི ཝིནིཝིཛ྄ཛྷིཏྭཱ ཌེནྟི གཙྪནྟི, ཕཱསུལ༹ནྟརིཀཱཡོ ཚིདྡཱཝཚིདྡཾ ཀཏྭཱ ཏཱཧི གཙྪནྟཱིཏི ནིསྶཀྐཝསེན ཨཏྠོ. ཝིཏུདེནྟཱིཏི པཱཋེ ཕཱསུལ༹ནྟརིཀཱཧཱིཏི ཨཱདྷཱརཏྠེ ནིསྶཀྐཝཙནཾ. ལོཧཏུཎྜེཧཱིཏི ཀཱལ༹ལོཧམཡེཧི ཏུཎྜེཧི. ཨཙྪརིཡཾ ཝཏཱཏི གརཧིཏབྦཏཱཡ ཨཙྪརཾ པཧརིཏུཾ ཡུཏྟརཱུཔཾ. ཙཀྑུབྷཱུཏཱཏི ལོཀསྶ ཙཀྑུ ཝིཡ བྷཱུཏཱ སཉྫཱཏཱ, ཙཀྑུསདིསཱཏིཔི ཨཏྠོ. ཏསྶེཝ ཀམྨསྶཱཏི ཡེན གོགྷཱཏཀཀམྨེནེཝ ནིརཡེ ནིབྦཏྟོ, ཏསྶེཝཱཏི ཨཏྠེ གཡ྄ཧམཱནེ ཨེཀཱཡ ཙེཏནཱཡ བཧུཔཊིསནྡྷིཡོ ཧོནྟཱིཏི ཨཱཔཛྫཏི, ན ཙེཏཾ ཡུཏྟཾ ཨེཀསྶ ཨམྦཱདིབཱིཛསྶ ཨནེཀངྐུརུཔྤཏྟི ཝིཡཱཏི ཏཾ པརིཧརནྟོ ཨཱཧ ཏསྶ ནཱནཱཙེཏནཱཧི ཨཱཡཱུཧིཏསྶཱཏིཨཱདི, ཏེན གོགྷཱཏཀཀམྨཀྑཎེ པུབྦཙེཏནཱ ཨཔརཙེཏནཱ སནྣིཊྛཱཔཀཙེཏནཱཏི ཨེཀསྨིམྤི པཱཎཱཏིཔཱཏེ བཧཱུ ཙེཏནཱ ཧོནྟི, ནཱནཱཔཱཎཱཏིཔཱཏེསུ ཝཏྟབྦམེཝ ནཏྠི. ཏཏྠ ཨེཀཱཡ ཙེཏནཱཡ ནརཀེ པཙིཏྭཱ ཏདཉྙཙེཏནཱསུ ཨེཀཱཡ ཨཔརཱཔརིཡཙེཏནཱཡ ཨིམསྨིཾ པེཏཏྟབྷཱཝེ ནིབྦཏྟོཏི དསྶེཏི, ཏེནཱཧ ‘‘ཨཝསེསཀམྨཾ ཝཱ ཀམྨནིམིཏྟཾ ཝཱ’’ཏི. ཨེཏྠ ཙ ཀམྨསརིཀྑཝིཔཱཀུཔྤཏྟིཾ སནྡྷཱཡ ཀམྨཀམྨནིམིཏྟཱནམེཝ གཧཎཾ ཀཏཾ, ན གཏིནིམིཏྟསྶ, ཏེནཱཧ ‘‘ཨཊྛིརཱསིཡེཝ ནིམིཏྟཾ ཨཧོསཱི’’ཏི. པཱལི༹ཡཾ ཝིཏཙྪེནྟཱིཏི ཏུཎྜེཧི ཏཙྪེནྟོ ཝིཡ ལུཉྩནྟི. ཝིརཱཛེནྟཱིཏི ཝིལིཁནྟི.

༢༢༩. ཝལླཱུརཝིཀྐཡེནཱཏི ¶ སུཀྑཱཔིཏམཾསཝིཀྐཡེན. ནིཔྤཀྑཙམྨེཏི ཝིགཏཔཀྑལོམཙམྨེ. ཨེཀཾ མིགནྟི དཱིཔཀམིགཾ. ཀཱརཎཱཧཱིཏི གྷཱཏནཱཧི. ཉཏྭཱཏི ཀམྨཊྛཱནཾ ཉཏྭཱ.

༢༣༠. མངྒནཝསེན ཨུལཏཱིཏི མངྒུལི, ཝིརཱུཔབཱིབྷཙྪབྷཱཝེན པཝཏྟཏཱིཏི ཨཏྠོ. ཙིཏྟཀེལི༹ནྟི ཙིཏྟརུཙིཡཾ ཨནཱཙཱརཀཱིལ༹ཾ.

༢༣༡. ནིསྶེཝཱལཔཎཀཀདྡམོཏི ཏིལབཱིཛཀཱདིསེཝཱལེན ནཱིལམཎྜཱུཀཔིཊྛིཝཎྞེན ཨུདཀཔིཊྛེ ཨུདཀཾ ནཱིལཝཎྞཾ ཀུརུམཱནེན པཎཀེན ཀདྡམེན ཙ ཝིརཧིཏོ. ཨུཎྷབྷཱཝེན ཏཔནཏོ ཏཔཾ ཨུདཀཾ ཨསྶཱཏི ཏཔོདཀཱཏི ཝཏྟབྦེ ཀ-ཀཱརལོཔཾ ཀཏྭཱ ‘‘ཏཔོདཱ’’ཏི ཝུཙྩཏི. པེཏལོཀོཏི པཀཊྛེན ཨཀུསལཀམྨེན སུགཏིཏོ དུགྒཏིཾ ཨིཏཱནཾ གཏཱནཾ ལོཀོ སམཱུཧོ, ནིཝཱསཊྛཱནཾ ཝཱ. ཀཏཧཏྠཱཏི དྷནུསིཔྤེ སུཊྛུ སིཀྑིཏཧཏྠཱ, ཨཝིརཛ྄ཛྷནལཀྑཝེདྷཱཏི ཨཏྠོ. སིཔྤདསྶནཝསེན རཱཛཀུལཱདཱིསུ རཱཛསམཱུཧཾ ཨུཔེཙྩ ཀཏཾ ཨསནཾ སརཀྑེཔོ ཨེཏེསནྟི ཀཏུཔཱསནཱ, སབྦཏྠ དསྶིཏསིཔྤཱཏི ཨཏྠོ. པབྷགྒོཏི པབྷཉྫིཏོ, པརཱཛིཏོཏི ཨཏྠོ.

༢༣༢. ཨཱནེཉྫསམཱདྷིནྟི ¶ ཨརཱུཔསམཱཔཏྟིཡཾ ནིརུདྡྷེ སཏིཔི སདྡཀཎྚཀེན ཨུཊྛཱནཱརཧོ རཱུཔཱཝཙརསམཱདྷིཡེཝ ཨིདྷ ཝཏྟབྦོཏི ཨཱཧ ཨནེཛཾ ཨཙལནྟིཨཱདི. སམཱདྷིཔརིཔནྠཀེཏི ཝིཏཀྐཱདིཀེ སནྡྷཱཡ ཝདཏི, ཨིདཾ པན པཋམབོདྷིཡཾ ཨུཔྤནྣམྤི ཝཏྠུཾ ཨནཱཙཱརམཏྟཝསེན བྷིཀྑཱུཧི ཙོདིཏེཔི བྷགཝཏཱ ‘‘ཨནཱཔཏྟི, བྷིཀྑཝེ, མོགྒལླཱནསྶཱ’’ཏི (པཱརཱ. ༢༢༨) ཨེཝཾ ཨཱཡཏིཾ ཨཏྟནཱ པཉྙཔིཡམཱནཔཱརཱཛིཀཱནུགུཎཾ ཏདཱ ཨེཝ ཝིནཱིཏནྟི དྷམྨསངྒཱཧཀཏྠེརེཧི པཙྪཱ པཉྙཏྟསྶ ཨིམསྶ སིཀྑཱཔདསྶ ཝིནཱིཏཝཏྠུབྷཱཝེན སངྒཧམཱརོཔིཏནྟི དཊྛབྦཾ. སཱཝཀཱནཾ ཨུཔྤཊིཔཱཊིཡཱ ཨནུསྶརཎཱབྷཱཝཾ དསྶེཏུཾ ‘‘ན ཨུཔྤཊིཔཱཊིཡཱ’’ཏི ཝུཏྟཾ. དུཀྐརཾ ཀཏནྟི ཨནནྟརེ པཉྩཀཔྤསཏིཀེ ཀཱལེ ཝིཉྙཱཎསནྟཏིཾ ཨདིསྭཱཔི ཨསམྨུཡ྄ཧིཏྭཱ པརཏོ ཏཏིཡཏྟབྷཱཝེ དིཊྛཙུཏིཙིཏྟེན སདྡྷིཾ ཝཏྟམཱནབྷཝཔཊིསནྡྷིཡཱ ཨནུམཱནེནཱཔི ཀཱརིཡཀཱརཎཱབྷཱཝགཧཎཾ ནཱམ སཱཝཀཱནཾ དུཀྐརཏྟཱ ཝུཏྟཾ. པཊིཝིདྡྷཱཏི ¶ པཊིཝིདྡྷསདིསཱ. ཡཐཱ ནཱམ སཏྟདྷཱ ཕཱལིཏསྶ ཙཱམརཝཱལལོམསྶ ཨེཀཱཡ ཨགྒཀོཊིཡཱ ཨཔརསྶ ཝཱལལོམཾསུནོ ཀོཊིཾ དཱུརེ ཋཏྭཱ ཝིཛ྄ཛྷེཡྻ ཨཱཝུནནྟོ ཝིཡ པཊིཔཱདེཡྻ, ཨེཝམེཝ ཨིམིནཱཔི དུཀྐརཾ ཀཏནྟི ཝུཏྟཾ ཧོཏི. ཨེཏདགྒནྟི ཨེསོ ཨགྒོ. ཡདིདནྟི ཡོ ཨཡཾ.

ནིགམནཝཎྞནཱ

༢༣༣. ཨིདྷཱཏི བྷིཀྑུཝིབྷངྒེ. ཨུདྡིཊྛཔཱརཱཛིཀཔརིདཱིཔནནྟི སིཀྑཱཔདེསུ པཱཏིམོཀྑུདྡེསཝསེན ཨུདྡིཊྛཔཱརཱཛིཀཔརིདཱིཔནཾ, ན པན སབྦསྨིཾ པཱརཱཛིཀཝིབྷངྒེ ཨཱགཏཨཱཔཏྟིཔརིདཱིཔནཾ ཏཏྠ ཐུལླཙྩཡཱདཱིནམྤི ཨཱགཏཏྟཱ ཏེནེཝ ཨུདྡིཊྛ-སདྡེན ཝུཏྟཝིབྷངྒསྶ ནིདྡེསཏྟཱ. བྷིཀྑུནཱིནཾ ཨསཱདྷཱརཎཱནི ཙཏྟཱརཱིཏི ཨུབྦྷཛཱཎུམཎྜལིཀཱ (པཱཙི. ༦༥༨) ཝཛྫཔྤཊིཙྪཱདིཀཱ (པཱཙི. ༦༦༥) ཨུཀྑིཏྟཱནུཝཏྟིཀཱ (པཱཙི. ༦༦༩) ཨཊྛཝཏྠུཀཱཏི (པཱཙི. ༦༧༥) ཨིམཱནི བྷིཀྑཱུཧི ཨསཱདྷཱརཎཱནི བྷིཀྑུནཱིནཾ ཨེཝ པཉྙཏྟཱནི པཱརཱཛིཀཱནཱིཏི ཨཏྠོ. ཝཏྠུཝིཔནྣཱཏི པབྦཛྫུཔསམྤདཱནཾ ཝཏྠུབྷཱཝོ ཝཏྠུ ནཱམ, ཏེན ཝཏྠུམཏྟེན ཝིཔནྣཱ, ཝིཔནྣཝཏྠུཀཱཏི ཨཏྠོ. ཨཧེཏུཀཔཊིསནྡྷིཀཱཏི མགྒཱནུཔྤཏྟིཀཱརཎམཱཧ. ཀིཉྩཱཔི དུཧེཏུཀཱནམྤི མགྒོ ནུཔྤཛྫཏི, ཏེ པན པབྦཛྫུཔསམྤདཱསུ ཋཏྭཱ ཨཱཡཏིཾ མགྒཧེཏུཾ སམྤཱདེཏུཾ སཀྐོནྟི, ཨཧེཏུཀཱ པན པརིསུདྡྷེ ཙཏུཔཱརིསུདྡྷིསཱིལེ ཋཏྭཱ སམྤཱདེཏུཾ ན སཀྐོནྟི, ཏསྨཱ ཏེ ཏམྤི པཊིཙྩ ཝཏྠུཝིཔནྣཱཝཱཏི ཝེདིཏབྦཱ. པཱརཱཛིཀཱཏི ཀམྨཝིཔཏྟིཡཱ པཊིསནྡྷིཀྑཎེཡེཝ པརཱཛཡཾ ཨཱཔནྣཱ. ཐེཡྻསཾཝཱསཀཱདཱིནཾ གིཧིབྷཱཝེ ཋཏྭཱ ཝིཔསྶནཱཡ ཝཱཡམནྟཱནམྤི ཏསྨིཾ ཨཏྟབྷཱཝེ མགྒུཔྤཏྟིཨབྷཱཝཏོ ‘‘མགྒོ པན ཝཱརིཏོ’’ཏི ཝུཏྟཾ. དཱིགྷཏཱཡ ལམྦམཱནཾ ཨངྒཛཱཏཾ ལམྦཾ ནཱམ, ཏཾ ཡསྶ ཨཏྠི སོ ལམྦཱི. སོ ཨེཏྟཱཝཏཱ ན པཱརཱཛིཀོ, ཏཾ པན དཱིགྷཾ ཨངྒཛཱཏཾ ¶ ཨཏྟནོ མུཁེ ཝཱ ཝཙྩམགྒེ ཝཱ སེཝནཱདྷིཔྤཱཡེན པཝེསེནྟོཝ པཱརཱཛིཀོ, ཨིདྷ པན ཝཙྩམགྒེ པཝེསེནྟོཝ ཨདྷིཔྤེཏོ མུདུཔིཊྛིཀེནེཝ མུཁེ པཝེསནསྶ ཝུཏྟཏྟཱ. སོཔི ཧི ཀཏཔརིཀམྨཏཱཡ མུདུབྷཱུཏཱཡ པིཊྛིཡཱ ཨོནམིཏྭཱ ཨཏྟནོ ཨངྒཛཱཏཾ མུཁེན གཎྷནྟོཝ པཱརཱཛིཀོ ཧོཏི, ན ཀེཝལོ. ཡོ པན མུཁེན ཨཏྟནོ ཝཙྩམགྒཾ ཝཱ པརེསཾ ཝཙྩམགྒམུཁཾ ཝཱ ཨིཏྠཱིནཾ པསྶཱཝམགྒཾ ཝཱ གཎྷཱཏི, ཏསྶ ཙ པུརིསནིམིཏྟེན པུརིསནིམིཏྟཾ ཚུཔནྟསྶ ཙ མགྒེན མགྒཔཊིཔཱདནེཔི པཱརཱཛིཀཾ ན ཧོཏི པུརིསནིམིཏྟེན ཏདིཏརམགྒསམྤཊིཔཱདནེནེཝ མེཐུནདྷམྨཝོཧཱརཏོ ¶ . པརསྶ ཨངྒཛཱཏེ ཨབྷིནིསཱིདཏཱིཏི པརསྶ ཨུཏྟཱནཾ སཡནྟསྶ ཀམྨནིཡེ ཨངྒཛཱཏེ ཨཏྟནོ ཝཙྩམགྒཾ པཝེསེནྟོ ཏསྶཱུཔརི ནིསཱིདཏི, ཨིདཉྩ ཨུཔལཀྑཎམཏྟཾ པརེསཾ ཨངྒཛཱཏཾ ཝཙྩམགྒེ པཝེསེནྟོ སཱདིཡནྟོཔི པཱརཱཛིཀོཝ, བལཀྐཱརེན པན ཝཙྩམགྒེ ཝཱ མུཁེ ཝཱ པརེན པཝེསིཡམཱནོ ཡདི ན སཱདིཡཏི, ཨནཱཔཏྟིཀོཝ. ཨེཏྠ ཨསཱདིཡནཾ ནཱམ དུཀྐརཾ ཝིརཛྫིཏབྦཏོ. ཨེཏྠ ཙ ཨནུཔསམྤནྣབྷཱཝེ ཋཏྭཱ མཱཏུཔིཏུཨརཧནྟེསུ ཨཉྙཏརཾ གྷཱཏེནྟོ བྷིཀྑུནིཾ དཱུསེནྟོ ཙ སཱམཎེརཔབྦཛྫམྤི ན ལབྷཏཱིཏི དསྶནཏྠཾ ཝིསུཾ གཧིཏཏྟཱ མཱཏུགྷཱཏཀཱདཱིནཾ ཙཏུནྣཾ ཏཏིཡཔཋམཔཱརཱཛིཀེསུ ཨནྟོགདྷཏཱ ཝེདིཏབྦཱ. ཡཐཱ ཨེཏྠ, ཨེཝཾ གིཧིབྷཱཝེ ཋཏྭཱ ལོཧིཏུཔྤཱདཾ ཀརོནྟོ ལོཧིཏུཔྤཱདཀོཝཱཏི གཧེཏབྦཾ. ཨེཏེན པརིཡཱཡེནཱཏི ཨུབྷིནྣཾ རཱགཔརིཡུཊྛཱནསངྑཱཏེན པརིཡཱཡེན. དུཏིཡཝིཀཔྤེ ཀཙྩི ཨཏྠཱཏི པདཙྪེདོ ཝེདིཏབྦོ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

ཙཏུཏྠཔཱརཱཛིཀཝཎྞནཱནཡོ ནིཊྛིཏོ.

ནིཊྛིཏོ ཙ པཱརཱཛིཀཀཎྜཝཎྞནཱནཡོ.

༢. སངྒྷཱདིསེསཀཎྜོ

༡. སུཀྐཝིསྶཊྛིསིཀྑཱཔདཝཎྞནཱ

༢༣༤. ཏེརསཀསྶཱཏི ¶ ¶ ཏེརས སིཀྑཱཔདཱནི པརིམཱཎཱནི ཨསྶཱཏི ཏེརསཀོ, ཀཎྜོ, ཏསྶ. སམཐེ ཝིཔསྶནཱཡ ཝཱ ཨབྷིརཏིརཧིཏོ ཨིདྷ ཨནབྷིརཏོ, ན པབྦཛྫཱཡཱཏི ཨཱཧ ‘‘ཝིཀྑིཏྟཙིཏྟོ’’ཏི. ཝིཀྑིཏྟཏཱཡ ཀཱརཎམཱཧ ཀཱམརཱགཱཨིཙྩཱདི.

༢༣༥. ཨབྦོཧཱརིཀཱཏི སཱིལཝིཔཏྟིཝོཧཱརཾ ནཱརཧཏཱིཏི ཀཏྭཱ ཝུཏྟཾ. ཨཀུསལབྷཱཝེ པནསྶཱ ཨབྦོཧཱརཏཱ ནཏྠི.

༢༣༦-༧. ཙེཏནཱ-སདྡཏོ ཝིསུཾ སཾ-སདྡསྶ ཨཏྠཱབྷཱཝཾ ཨིཀ-པཙྩཡསྶ ཙ ཨཏྠཝནྟཏཾ དསྶེཏུཾ སཉྩེཏནཱ ཝཱཏིཨཱདི དུཏིཡཝིཀཔྤོ ཝུཏྟོ. སིཁཱཔྤཏྟོ ཨཏྠོཏི ཨདྷིཔྤེཏཏྠཾ སནྡྷཱཡ ཝུཏྟཾ. ཨཱསཡབྷེདཏོཏི པིཏྟསེམྷཔུབྦལོཧིཏཱནཾ ཙཏུནྣཾ ཨཱསཡཱནཾ བྷེདེན. དྷཱཏུནཱནཏྟཏོཏི རསརུཧིརཱདཱིནཾ སཏྟནྣཾ, པཐཝཱདཱིནཾ ཝཱ ཙཏུནྣཾ དྷཱཏཱུནཾ ནཱནཏྟེན. ཝཏྠིསཱིསནྟི མུཏྟཝཏྠིཏོ མཏྠཀཔསྶཾ. ཧཏྠིམདཙལནཾ ནཱམཉྩ སམྦྷཝོཏི ཨཱཧ ‘‘སམྦྷཝོ ནིཀྑམཏཱི’’ཏི. སམྦྷཝཝེགནྟི སམྦྷཝསྶ ཋཱནཏོ ཙཝིཏྭཱ དཀསོཏཱབྷིམུཁཾ ཨོཏརཎེན སཉྫཱཏསརཱིརཀྑོབྷཝེགཾ. བཱཧུསཱིསནྟི ཁནྡྷཔྤདེསཾ. དསྶེསཱིཏི ཨེཏྠ ཨིཏི-སདྡོ ཧེཏུཏྠོ, ཏེན ཡསྨཱ ཀཎྞཙཱུལི༹ཀཱཧི སམྦྷཝོ ནིཀྑམཏི…པེ… སམྦྷཝཉྩ དསྶེསི, ཏསྨཱ ཏཏིཡསྶ བྷཱསིཏཾ སུབྷཱསིཏནྟི ཨེཝཾ ཡོཛནཱ ཝེདིཏབྦཱ. དཀསོཏནྟི མུཏྟསྶ ཝཏྠིཏོ ནིཀྑམནམགྒཾ, ཨངྒཛཱཏཔྤདེསནྟི ཝུཏྟཾ ཧོཏི. སུཀྐཉྩ ནཱམེཏཾ རསརུཧིརཱདིསཏྟདེཧདྷཱཏཱུསུ མཛ྄ཛྷིམདྷཱཏུཙཏུཛཾ ཨཊྛིམིཉྫཱདི ཝིཡ པཐཝཱིདྷཱཏུསངྒཧིཏཾ ཨཱཧཱརཱུཔཛཱིཝཱིནཾ སཀལཀཱཡགཏཾ ཨཏིདཧརདཱརཀཱནམྤི ཨཏྠེཝ, ཏཾ པན པནྣརསསོལ༹སཝསྶུདྡེསཏོ པཊྛཱཡ སཏྟཱནཾ སམུཔྤཛྫནཀཀཱམརཱགེཧེཝ ཋཱནཏོ ཙལཏི, ཙལིཏཉྩ ཨཱཔོདྷཱཏུབྷཱཝེན ཙིཏྟཛམེཝ ཧུཏྭཱ དཀསོཏཾ ཨོཏརཏི, དཀསོཏཏོ པན པཊྛཱཡ ¶ ཙིཏྟཔཙྩཡཨུཏུཛཾ ཧོཏི མཏྠལུངྒཏོ ཙལིཏསིངྒྷཱཎིཀཱ ཝིཡ. ཡེསཾ པན སམུཙྪེདནཝིཀྑམྦྷནཱདཱིཧི རཱགཔརིཡུཊྛཱནཾ ནཏྠི ¶ , ཏེསཾ སུཀྐཝིསྶཊྛི ན སིཡཱ. ཨིཏི ཡཐཱཋཱནཏོ སུཀྐསྶ ཝིསྶཊྛིཡེཝ རཱགཙིཏྟསམུཊྛཱནཱ, ན པཀཏིརཱུཔཾ, ཏེནེཝ ཀཐཱཝཏྠུཨཊྛཀཐཱཡཾ (ཀཐཱ. ཨཊྛ. ༣༠༧) ‘‘སུཀྐཝིསྶཊྛི ནཱམ རཱགསམུཊྛཱནཱ ཧོཏཱི’’ཏི སུཀྐསྶ ཝིསྶཊྛི ཨེཝ རཱགསམུཊྛཱནཱ ཝུཏྟཱ, ན པཀཏིརཱུཔཾ. ཚནྣཾ པན ཀཱམཱཝཙརདེཝཱནཾ ཝིཛྫམཱནཱཔི སུཀྐདྷཱཏུ དྭཡཾདྭཡསམཱཔཏྟིཝསེན པརིཡུཊྛིཏརཱགེནཱཔི ཋཱནཏོ ན གལ༹ཏི, ཡཐཱཋཱནེ ཨེཝ ཋཏྭཱ ཀིཉྩི ཝིཀཱརཾ ཨཱཔཛྫམཱནཱ ཏངྑཎིཀཔརིལཱ༹ཧཝཱུཔསམཱཝཧཱ མེཐུནཀིཙྩནིཊྛཱཔིཏཱ ཧོཏཱིཏི ཝེདིཏབྦཾ. ཀེཙི པན ‘‘ཀཱཡསམྥསྶསུཁམེཝ ཏེསཾ ཀཱམཀིཙྩ’’ནྟི ཝདནྟི. ཁཱིཎཱསཝཱནཾ པན ཨནཱགཱམཱིནཉྩ སབྦསོ ཀཱམརཱགཱབྷཱཝེན སུཀྐདྷཱཏུཝིཀཱརམྤི ནཱཔཛྫཏཱིཏི ཝེདིཏབྦཾ. རཱུཔཱིབྲཧྨཱནཾ པན ཝིཀྑམྦྷིཏཀཱམརཱགེན ཛནིཏཏྟཱ ཨནཱཧཱརཱུཔཛཱིཝིཏཏྟཱ ཙ སབྦཐཱ སུཀྐདྷཱཏུཔི ནཏྠེཝ. ཏཐེཝཱཏི མོཙནསྶཱདེན ནིམིཏྟེ ཨུཔཀྐམཏོཏིཨཱདིཾ ཨཏིདིསཏི. ‘‘ཝིསྶཊྛཱིཏི ཋཱནཱཙཱཝནཱ ཝུཙྩཏཱི’’ཏི པདབྷཱཛནེ (པཱརཱ. ༢༣༧) ཝུཏྟཏྟཱ ‘‘དཀསོཏཾ ཨོཏིཎྞམཏྟེ’’ཏི ཀསྨཱ ཝུཏྟནྟི ཨཱཧ དཀསོཏོརོཧཎཉྩེཏྠཱཏིཨཱདི. ཨེཏྠཱཏི ཏཱིསུཔི ཝཱདེསུ. ཨདྷིཝཱསེཏྭཱཏི ནིམིཏྟེ ཨུཔཀྐམིཏྭཱ པུན ཝིཔྤཊིསཱརེ ཨུཔྤནྣེ མོཙནསྶཱདཾ ཝིནོདེཏྭཱ. ཨནྟརཱ ནིཝཱརེཏུནྟི ཨཏྟནོ ནིམིཏྟེ ཀཏཱུཔཀྐམེན ཋཱནཱ ཙུཏཾ དཀསོཏཾ ཨོཏརིཏུཾ ཨདཏྭཱ ཨནྟརཱ ནིཝཱརེཏུཾ. མོཙནསྶཱདེན ཧཏྠཔརིཀམྨཱདིཾ ཀརོནྟསྶ མུཏྟེཔི དུཀྐཊམེཝ, ནིམིཏྟེ ཨུཔཀྐམཱབྷཱཝཏོ པན སངྒྷཱདིསེསོ ན ཧོཏཱིཏི ཨཱཧ ‘‘ཧཏྠ…པེ… ཨནཱཔཏྟཱི’’ཏི. དཀསོཏོརོཧཎཉྩེཏྠཱཏིཨཱདིནཱ ཝུཏྟཝིནིཙྪཡཾ སནྡྷཱཡ ‘‘ཨཡཾ སབྦཱཙརིཡསཱདྷཱརཎཝིནིཙྪཡོ’’ཏི ཝུཏྟཾ.

ཁོབྷཀརཎཔཙྩཡོ ནཱམ ཝིསབྷཱགབྷེསཛྫསེནཱསནཱཧཱརཱདིཔཙྩཡོ. ནཱནཱཝིདྷཾ སུཔིནནྟི ཁུབྷིཏཝཱཏཱདིདྷཱཏཱུནཾ ཨནུགུཎཾ. ཨནུབྷཱུཏཔུབྦནྟི པུབྦེ བྷཱུཏཔུབྦཾ མནསཱ པརིཀཔྤིཏཔུབྦཉྩ. སགྒནརཀདེསནྟརཱདཱིནམྤི ཧི སངྒཧེཏྭཱ ཝུཏྟཾ. ཨཏྠཀཱམཏཱཡ ཝཱ ཨནཏྠཀཱམཏཱཡ ཝཱཏི ཨིདཾ དེཝཏཱནཾ ཧིཏཱཧིཏཱདྷིཔྤཱཡཏཾ དསྶེཏུཾ ཝུཏྟཾ. ཨཏྠཱཡ ཝཱ ཨནཏྠཱཡ ཝཱཏི སབྷཱཝཏོ བྷཝིཏབྦཾ ཧིཏཱཧིཏཾ སནྡྷཱཡ ཝུཏྟཾ. ནནུ དེཝཏཱཧི ཨུཔསཾཧརིཡམཱནཱནི ཨཱརམྨཎཱནི པརམཏྠཏོ ནཏྠི, ཀཐཾ ཏཱནི པུརིསོ པསྶཏི, དེཝཏཱ ཝཱ ཏཱནི ཨཝིཛྫམཱནཱནི ཨུཔསཾཧརནྟཱིཏི ཙོདནཾ མནསི ཀཏྭཱ ¶ ཨཱཧ སོ ཏཱསནྟིཨཱདི. ཏེན ‘‘ཨེཝམེསོ པརིཀཔྤཏཱུ’’ཏི དེཝཏཱཧི ཙིནྟིཏམཏྟེན སུཔནྟསྶ ཙིཏྟཾ བྷཝངྒསནྟཏིཏོ ནིཔཏིཏྭཱ དེཝཏཱཧི ཙིནྟིཏནིཡཱམེནེཝ པརིཀཔྤམཱནཾ པཝཏྟཏི, ཨེཝཾ ཏེན པརིཀཔྤམཱནཱནི ཨཱརམྨཎཱནི དེཝཏཱཧི ཨུཔསཾཧཊཱནི ནཱམ ཧོནྟི, ཏཱནི ཙ སོ དེཝཏཱནུབྷཱཝེན པསྶཏི ནཱམཱཏི དསྶེཏི. བོདྷིསཏྟམཱཏཱ ཝིཡ པུཏྟཔཊིལཱབྷནིམིཏྟནྟིཨཱདཱིསུ ¶ བོདྷིསཏྟསྶ གབྦྷོཀྐནྟིདིཝསེ མཧཱམཱཡཱདེཝིཡཱ ཨཏྟནོ དཀྑིཎཔསྶེན ཨེཀསྶ སེཏཝརཝཱརཎསྶ ཨནྟོཀུཙྪིཔཝིཊྛབྷཱཝདསྶནཾ པུཏྟཔཊིལཱབྷནིམིཏྟཾ སུཔིནཾ ནཱམ. ཨམྷཱཀཾ པན བོདྷིསཏྟསྶ ‘‘སྭེ བུདྡྷོ བྷཝིསྶཏཱི’’ཏི ཙཱཏུདྡསིཡཾ པཀྑསྶ རཏྟིཝིབྷཱཡནཀཱལེ ཧིམཝནྟཾ བིབྦོཧནཾ ཀཏྭཱ པུརཏྠིམཔཙྪིམསམུདྡེསུ ཝཱམདཀྑིཎཧཏྠེ དཀྑིཎསམུདྡེ པཱདེ ཙ ཨོདཧིཏྭཱ མཧཱཔཐཝིཡཱ སཡནཾ ཨེཀོ, དབྦཏིཎསངྑཱཏཱཡ ཏིརིཡཱ ནཱམ ཏིཎཛཱཏིཡཱ ནངྒལམཏྟརཏྟདཎྜཱཡ ནཱབྷིཏོ ཨུགྒཏཱཡ ཁཎེན ཨནེཀཡོཛནསཧསྶཾ ནབྷཾ ཨཱཧཙྩ ཋཱནཾ ཨེཀོ, སེཏཱནཾ ཀཎྷསཱིསཱནཾ ཀིམཱིནཾ པཱདེཧི ཨུསྶཀྐིཏྭཱ ཡཱཝ ཛཱཎུམཎྜལཾ ཨཱཧཙྩ ཋཱནཾ ཨེཀོ, ནཱནཱཝཎྞཱནཾ ཙཏུནྣཾ སཀུཎཱནཾ ཙཏཱུཧི དིསཱཧི ཨཱགནྟྭཱ པཱདམཱུལེ སེཏཝཎྞཏཱཔཛྫནཾ ཨེཀོ, བོདྷིསཏྟསྶ མཧཏོ མཱིལ༹ྷཔབྦཏསྶ ཨུཔརི ཨལིམྤམཱནསྶ ཙངྐམནཾ ཨེཀོཏི ཨིམེ པཉྩ མཧཱསུཔིནཱ ནཱམ, ཨིམེ ཙ ཡཐཱཀྐམཾ སམྦོདྷིཡཱ, དེཝམནུསྶེསུ ཨརིཡམགྒཔྤཀཱསནསྶ, གིཧཱིནཉྩ སརཎཱུཔགམནསྶ, ཁཏྟིཡཱདིཙཏུཝཎྞཱནཾ པབྦཛིཏྭཱ ཨརཧཏྟཔཊིལཱབྷསྶ, ཙཏུནྣཾ པཙྩཡཱནཾ ལཱབྷེ ཨལིཏྟབྷཱཝསྶ ཙ པུབྦནིམིཏྟཱནཱིཏི ཝེདིཏབྦཾ. སོལ༹ས སུཔིནཱ པཱཀཊཱ ཨེཝ. ཨེཀནྟསཙྩམེཝཱཏི ཕལནིཡམུཔྤཏྟིཏོ ཝུཏྟཾ. དསྶནཾ པན སབྦཏྠ ཝིཔལླཏྠམེཝ. དྷཱཏུཀྑོབྷཱདཱིསུ ཙཏཱུསུ མཱུལཀཱརཎེསུ དྭཱིཧི ཏཱིཧིཔི ཀཱརཎེཧི ཀདཱཙི སུཔིནཾ པསྶནྟཱིཏི ཨཱཧ ‘‘སཾསགྒབྷེདཏོ’’ཏི. སུཔིནབྷེདོཏི སཙྩཱསཙྩཏྠཏཱབྷེདོ.

རཱུཔནིམིཏྟཱདིཨཱརམྨཎནྟི ཨེཏྠ ཀམྨནིམིཏྟགཏིནིམིཏྟཏོ ཨཉྙརཱུཔམེཝ ཝིཉྙཱཎསྶ ནིམིཏྟནྟི རཱུཔནིམིཏྟཾ, ཏཾ ཨཱདི ཡེསཾ སཏྟནིམིཏྟཱདཱིནཾ ཏཱནི རཱུཔནིམིཏྟཱདཱིནི ཨཱརམྨཎཱནི ཡསྶ བྷཝངྒཙིཏྟསྶ ཏཾ རཱུཔནིམིཏྟཱདིཨཱརམྨཎཾ. ཨཱིདིསཱནཱིཏི རཱུཔནིམིཏྟཱདིཨཱརམྨཎཱནི རཱགཱདིསམྤཡུཏྟཱནི ཙ. སབྦོཧཱརིཀཙིཏྟེནཱཏི པཊིབུདྡྷསྶ པཀཏིཝཱིཐིཙིཏྟེན. ཀོ ནཱམ པསྶཏཱིཏི སུཏྟཔཊིབུདྡྷབྷཱཝཝིཡུཏྟཱཡ ¶ ཙིཏྟཔྤཝཏྟིཡཱ ཨབྷཱཝཏོ སུཔིནཾ པསྶནྟོ ནཱམ ན སིཡཱཏི ཨདྷིཔྤཱཡོ, ཏེནཱཧ ‘‘སུཔིནསྶ ཨབྷཱཝོཝ ཨཱཔཛྫཏཱི’’ཏི. ཀཔིམིདྡྷཔརེཏོཏི ཨིམིནཱ ནིདྡཱཝསེན པཝཏྟམཱནབྷཝངྒསནྟཏིབྱཝཧིཏཱཡ ཀུསལཱཀུསལཱཡ མནོདྭཱརཝཱིཐིཡཱ ཙ པསྶཏཱིཏི དསྶེཏི, ཏེནཱཧ ཡཱ ནིདྡཱཏིཨཱདི. དྭཱིཧི ཨནྟེཧི མུཏྟོཏི ཀུསལཱཀུསལསངྑཱཏེཧི དྭཱིཧི ཨནྟེཧི མུཏྟོ. ཨཱཝཛྫནཏདཱརམྨཎཀྑཎེཏི སུཔིནེ པཉྩདྭཱརཝཱིཐིཡཱ ཨབྷཱཝཏོ མནོདྭཱརེ ཨུཔྤཛྫནཱརཧཾ གཧེཏྭཱ ཝུཏྟཾ.

ཨེཏྠ ཙ སུཔིནནྟེཔི ཏདཱརམྨཎཝཙནཏོ ཨནུབྷཱུཏེསུ སུཏཔུབྦེསུ ཝཱ རཱུཔཱདཱིསུ པུརཱཔཏྟིབྷཱཝེན པརིཀཔྤེཏྭཱ ཝིཔལླཱསཏོ པཝཏྟམཱནཱཔི ཀཱམཱཝཙརཝིཔཱཀདྷམྨཱ པརིཏྟདྷམྨེ ནིསྶཱཡ པརིཀཔྤེཏྭཱ པཝཏྟཏྟཱ པརིཏྟཱརམྨཎཱ ཝུཏྟཱ, ན པན སརཱུཔཏོ པརིཏྟདྷམྨེ གཧེཏྭཱ པཝཏྟཏྟཱ ¶ ཨེཝཱཏི གཧེཏབྦཾ. ཨེཝཉྩ ཨིཏྠིཔུརིསཱདིཨཱཀཱརཾ ཨཱརོཔེཏྭཱ པཝཏྟམཱནཱནཾ རཱགཱདིསཝིཔཱཀདྷམྨཱནམྤི ཏེསཾ ཨཱརམྨཎཾ གཧེཏྭཱ ཨུཔྤནྣཱནཾ པཊིསནྡྷཱདིཝིཔཱཀཱནམྤི པརིཏྟཱརམྨཎཏཱ ཀམྨནིམིཏྟཱརམྨཎཏཱ ཙ ཨུཔཔནྣཱ ཨེཝ ཧོཏི. ཝཏྠུདྷམྨཝིནིམུཏྟཾ པན སམྨུཏིབྷཱུཏཾ ཀསིཎཱདིཔཊིབྷཱགཱརམྨཎཾ གཧེཏྭཱ ཨུཔྤནྣཱ ཨུཔཙཱརཔྤནཱདིཝསཔྤཝཏྟཱ ཙིཏྟཙེཏསིཀདྷམྨཱ ཨེཝ པརིཏྟཏྟིཀེ (དྷ. ས. ཏིཀམཱཏིཀཱ ༡༢) ན ཝཏྟབྦཱརམྨཎཱཏི གཧེཏབྦཱ.

སྭཱཡནྟི སུཔིནོ. ཝིཔལླཱསེན པརིཀཔྤིཏཔརིཏྟཱརམྨཎཏྟཱ ‘‘དུབྦལཝཏྠུཀཏྟཱ’’ཏི ཝུཏྟཾ, ཨཝིཛྫམཱནཱརམྨཎེ ཨཝསཝཏྟིཏོཏི ཨདྷིཔྤཱཡོ, ཏེནཱཧ ཨཝིསཡེ ཨུཔྤནྣཏྟཱཏིཨཱདི.

ཨཱཔཏྟིནིཀཱཡསྶཱཏི ཨིདཾ སངྒྷཱདིསེསོཏི པུལླིངྒ-སདྡསྶ ཨནུརཱུཔཝསེན ཝུཏྟཾ. ཨསྶཱཏི ཨསྶ ཨཱཔཏྟིནིཀཱཡསྶ, ཝུཊྛཱཔེཏུཾ ཨིཙྪིཏསྶཱཏི ཨཏྠོ, ཏེནཱཧ ཀིཾ ཝུཏྟནྟིཨཱདི. རུལ༹ྷིསདྡེནཱཏི ཨེཏྠ སམུདཱཡེ ནིཔྥནྣསྶཱཔི སདྡསྶ ཏདེཀདེསེཔི པསིདྡྷི ཨིདྷ རུལ༹ྷཱི ནཱམ, ཏཱཡ རུལ༹ྷིཡཱ ཡུཏྟོ སདྡོ རུལ༹ྷཱིསདྡོ, ཏེན. རུལ༹ྷིཡཱ ཀཱརཎམཱཧ ཨཝཡཝེཨིཙྩཱདིནཱ.

ཀཱལཉྩཱཏི ‘‘རཱགཱུཔཏྠམྦྷེ’’ཏིཨཱདིནཱ དསྶིཏཀཱལཉྩ, ‘‘རཱགཱུཔཏྠམྦྷེ’’ཏི ཝུཏྟེ རཱགཱུཔཏྠམྦྷེ ཛཱཏེ ཏསྨིཾ ཀཱལེ མོཙེཏཱིཏི ཨཏྠཏོ ¶ ཀཱལོ གམྨཏི. ནཝམསྶ ཨདྷིཔྤཱཡསྶཱཏི ཝཱིམཾསཱདྷིཔྤཱཡསྶ. ཝཏྠཱུཏི ཝིསཡཾ.

༢༣༨. ལོམཱ ཨེཏེསཾ སནྟཱིཏི ལོམསཱ, བཧུལོམཔཱཎཀཱ.

༢༣༩. མོཙནེནཱཏི མོཙནཔྤཡོགེན. མོཙནསྶཱདསམྤཡུཏྟཱཡཱཏི ཨེཏྠ མོཙནིཙྪཱཝ མོཙནསྶཱདོ, ཏེན སམྤཡུཏྟཱ ཙེཏནཱ མོཙནསྶཱདཙེཏནཱཏི ཨཏྠོ, ན པན མོཙནེ ཨསྶཱདཾ སུཁཾ པཏྠེནྟིཡཱ ཙེཏནཱཡཱཏི ཨེཝཾ ཨཏྠོ གཧེཏབྦོ, ཨིཏརཐཱ སུཁཏྠཱཡ མོཙེནྟསྶེཝ ཨཱཔཏྟི, ན ཨཱརོགྱཱདིཨཏྠཱཡཱཏི ཨཱཔཛྫཏི. ཏསྨཱ ཨཱརོགྱཱདཱིསུ ཡེན ཀེནཙི ཨདྷིཔྤཱཡེན མོཙནིཙྪཱཡ ཙེཏནཱཡཱཏི ཨཏྠོཝ གཧེཏབྦོ.

༢༤༠. ཝཱཡམཏོཏི ཨངྒཛཱཏེ ཀཱཡེན ཨུཔཀྐམཏོ. དྭེ ཨཱཔཏྟིསཧསྶཱནཱིཏི ཁཎྜཙཀྐཱདཱིནི ཨནཱམསིཏྭཱཝ ཝུཏྟཾ, ཨིཙྪནྟེན པན ཁཎྜཙཀྐཱདིབྷེདེནཱཔི གཎནཱ ཀཱཏབྦཱ. ཨེཀེན པདེནཱཏི གེཧསིཏཔེམཔདེན. ཏཐེཝཱཏི མོཙནསྶཱདཙེཏནཱཡ ཨེཝ གཱལ༹ྷཾ པཱིལ༹ནཱདིཔྤཡོགཾ ¶ ཨཝིཛཧིཏྭཱ སུཔནེན སངྒྷཱདིསེསོཏི ཝུཏྟཾ. སུདྡྷཙིཏྟོཏི མོཙནསྶཱདསྶ ནིམིཏྟེ ཨཱུརུཨཱདཱིཧི ཀཏཨུཔཀྐམསྶ ཝིཛཧནཾ སནྡྷཱཡ ཝུཏྟཾ. ཏེན ཨསུབྷམནསིཀཱརཱབྷཱཝེཔི པཡོགཱབྷཱཝེནེཝ མོཙནེཔི ཨནཱཔཏྟི དཱིཔིཏཱཏི ཝེདིཏབྦཱ.

ཏེན ཨུཔཀྐམེན མུཏྟེཏི མུཙྩམཱནཾ ཝིནཱ ཨཉྙསྨིམྤི སུཀྐེ ཋཱནཏོ མུཏྟེ. ཡདི པན ཨུཔཀྐམེ ཀཏེཔི མུཙྩམཱནམེཝ དཀསོཏཾ ཨོཏརཏི, ཐུལླཙྩཡམེཝ པཡོགེན མུཏྟསྶ ཨབྷཱཝཱ. ཛགྒནཏྠཱཡཱཏི ཙཱིཝརཱདཱིསུ ལིམྤནཔརིཧཱརཱཡ ཧཏྠེན ཨངྒཛཱཏགྒཧཎཾ ཝཊྚཏི, ཏཔྤཡོགོ ན ཧོཏཱིཏི ཨདྷིཔྤཱཡོ. ཨནོཀཱསནྟི ཨངྒཛཱཏཔྤདེསཾ.

༢༦༢. སུཔིནནྟེན ཀཱརཎེནཱཏི སུཔིནནྟེ པཝཏྟཨུཔཀྐམཧེཏུནཱ. ཨཱཔཏྟིཊྛཱནེཡེཝ ཧི ཨཡཾ ཨནཱཔཏྟི ཨཝིསཡཏྟཱ ཝུཏྟཱ. ཏེནཱཧ ‘‘སཙསྶ ཝིསཡོ ཧོཏི ནིཙྩལེན བྷཝིཏབྦ’’ནྟིཨཱདི.

༢༦༣. ཝིནཱིཏཝཏྠུཔཱལི༹ཡཾ ¶ ཨཎྜཀཎྜུཝནཝཏྠུསྨིཾ མོཙནཱདྷིཔྤཱཡེན ཨཎྜཙལནེན ཨངྒཛཱཏསྶཱཔི ཙལནཏོ ནིམིཏྟེ ཨུཔཀྐམོ ཧོཏཱིཏི སངྒྷཱདིསེསོ ཝུཏྟོ. ཡཐཱ པན ཨངྒཛཱཏཾ ན ཙལཏི, ཨེཝཾ ཨཎྜམེཝ ཀཎྜུཝནེན ཕུསནྟསྶ མུཏྟེཔི ཨནཱཔཏྟི ཨཎྜསྶ ཨནངྒཛཱཏཏྟཱ.

༢༦༤. ཝཏྠིནྟི ཨངྒཛཱཏསཱིསཙྪཱདཀཙམྨཾ. ཨུདརཾ ཏཱཔེནྟསྶ…པེ… ཨནཱཔཏྟིཡེཝཱཏི ཨུདརཏཱཔནེན ཨངྒཛཱཏེཔི ཏཏྟེ ཏཱཝཏྟཀེན ནིམིཏྟེ ཨུཔཀྐམོ ཀཏོ ནཱམ ན ཧོཏཱིཏི ཝུཏྟཾ.

༢༦༥. ཨེཧི མེ ཏྭཾ, ཨཱཝུསོ, སཱམཎེརཱཏི ཝཏྠུསྨིཾ ཨཉྙཾ ཨཱཎཱཔེཏུ, ཏེན ཀརིཡམཱནསྶ ཨངྒཛཱཏཙལནསྶ མོཙནསྶཱདེན སཱདིཡནཏོ ཏཾ ཙལནཾ བྷིཀྑུསྶ སཱདིཡནཙིཏྟསམུཊྛིཏམྤི ཧོཏཱིཏི སུཀྐཝིསྶཊྛིཔཙྩཡསྶ ཨངྒཛཱཏཙལནསྶ ཧེཏུབྷཱུཏཱ ཨསྶཱདཙེཏནཱཝ ཨཱཔཏྟིཡཱ ཨངྒཾ ཧོཏི, ན ཨཱཎཱཔནཝཱཙཱ ཏསྶཱ པཝཏྟིཀྑཎེ སངྒྷཱདིསེསསྶ ཨསིཛ྄ཛྷནཏོ. ཨེཝཾ ཨཱཎཱཔེཏྭཱཔི ཡོནིསོམནསིཀཱརེན མོཙནསྶཱདཾ པཊིཝིནོདེནྟསྶ ཨཱཔཏྟིཨསམྦྷཝཏོ ཨིདཾ སིཀྑཱཔདཾ ཨནཱཎཏྟིཀཾ, ཀཱཡཀམྨཾ, ཀིརིཡསམུཊྛཱནཉྩ ཛཱཏནྟི གཧེཏབྦཾ, ཨཱཎཱཔནཝཱཙཱཡ པན དུཀྐཊཾ ཨཱཔཛྫཏི. ཡོ པན པརེན ཨནཱཎཏྟེན བལཀྐཱརེནཱཔི ཀརིཡམཱནཔྤཡོགཾ མོཙནསྶཱདེན སཱདིཡཏི, ཏསྶཱཔི མུཏྟེ པཋམཔཱརཱཛིཀེ ཝིཡ སངྒྷཱདིསེསོཝ, ཨམུཏྟེ ཐུལླཙྩཡཾ. མོཙནསྶཱདེ ཙེཏནཱཡ པན ཨསཏི ཀཱཡསཾསགྒརཱགེན ¶ སཱདིཡནྟསྶཱཔི མུཏྟེཔི སངྒྷཱདིསེསེན ཨནཱཔཏྟཱིཏི ཨཱཙརིཡཱ ཝདནྟི, ཏཉྩ ཡུཏྟམེཝ.

༢༦༦. ཀཱཡཏྠམྦྷནཝཏྠུསྨིཾ ཙལནཝསེན ཡཐཱ ཨངྒཛཱཏེ ཨུཔཀྐམོ སམྦྷཝཏི, ཏཐཱ ཝིཛམྦྷིཏཏྟཱ ཨཱཔཏྟི ཝུཏྟཱ.

ཨུཔནིཛ྄ཛྷཱཡནཝཏྠུསྨིཾ ཨངྒཛཱཏནྟི ཛཱིཝམཱནཨིཏྠཱིནཾ པསྶཱཝམགྒོཝ ཨདྷིཔྤེཏོ, ནེཏརོ.

༢༦༧. པུཔྥཱཝལཱིཏི ཀཱིལཱ༹ཝིསེསོ. ཏཾ ཀིར ཀཱིལ༹ནྟཱ ནདཱིཨཱདཱིསུ ཚིནྣཏཊཾ ཨུདཀེན ཙིཀྑལླཾ ཀཏྭཱ ཏཏྠ ཨུབྷོ པཱདེ པསཱརེཏྭཱ ནིསིནྣཱ པཏནྟི ¶ , ‘‘པུཔྥཱཝལིཡ’’ནྟིཔི པཱཋོ. པཝེསེནྟསྶཱཏི པཡོཛཀཏྟེན དྭིཀམྨིཀཏྟཱ ‘‘ཝཱལིཀཾ ཨངྒཛཱཏ’’ནྟི ཨུབྷཡཏྠཱཔི ཨུཔཡོགཝཙནཾ ཀཏཾ. ཙེཏནཱ, ཨུཔཀྐམོ, མུཙྩནནྟི ཨིམཱནེཏྠ ཏཱིཎི ཨངྒཱནི ཝེདིཏབྦཱནི.

སུཀྐཝིསྶཊྛིསིཀྑཱཔདཝཎྞནཱ ནིཊྛིཏཱ.

༢. ཀཱཡསཾསགྒསིཀྑཱཔདཝཎྞནཱ

༢༦༩. དུཏིཡེ ཀེསུཙི ཝཱཏཔཱནེསུ ཝིཝཊེསུ བཧིཔི ཨནྡྷཀཱརཏྟཱ ཨཱལོཀོ ན པཝིསཏི, ཝིཝཊཀཝཱཊེན ཨཉྙཏོ ཨཱགཙྪནྟསྶ ཨཱལོཀསྶ ནིཝཱརཎཏོ ཀཝཱཊསྶ པིཊྛིཔསྶེ གྷནནྡྷཀཱརོཝ ཧོཏི, ཏཱདིསཱནི སནྡྷཱཡ ‘‘ཡེསུ ཝིཝཊེསུ ཨནྡྷཀཱརོ ཧོཏཱི’’ཏིཨཱདི ཝུཏྟཾ.

བྲཱཧྨཎཱི ཨཏྟནོ ཨངྒམངྒཱནཾ པརཱམསནཀྑཎེ ཨནཱཙཱརཱནུཀཱུལཱ ཧུཏྭཱ ན ཀིཉྩི ཝཏྭཱ བྷིཀྑུནོ ཝཎྞབྷཎནཀྑཎེ ཝུཏྟཏྟཱ ཨཱཧ ‘‘པབྦཛིཏུཀཱམོ མཉྙེཏི སལླཀྑེཏྭཱ’’ཏི, པབྦཛིཏུཀཱམོ ཝིཡཱཏི སལླཀྑེཏྭཱཏི ཨཏྠོ. ཀུལིཏྠཱིནཾ ཨེཝཾ པརེཧི ཨབྷིབྷཝནཾ ནཱམ ཨཙྩནྟཱཝམཱནོཏི ཨཱཧ ‘‘ཨཏྟནོ ཝིཔྤཀཱར’’ནྟི.

༢༧༠. ཨོཏིཎྞསདྡསྶ ཀམྨསཱདྷནཔཀྑཾ སནྡྷཱཡ ‘‘ཡཀྑཱདཱིཧཱི’’ཏིཨཱདི ཝུཏྟཾ, ཀཏྟུསཱདྷནཔཀྑཾ སནྡྷཱཡ ‘‘ཀཱུཔཱདཱིནཱི’’ཏིཨཱདི ཝུཏྟཾ. ཏསྨིཾ ཝཏྠུསྨིནྟི ཨིཏྠིསརཱིརསངྑཱཏེ ཝཏྠུསྨིཾ.

༢༧༡. ཨསྶཱཏི ཧཏྠགྒཱཧཱདིཀསྶ སབྦསྶ.

༢༧༣. ཨེཏེསཾ ¶ པདཱནནྟི ཨཱམསནཱདིཔདཱནཾ. ཨིཏྠིསཉྙཱིཏི མནུསྶིཏྠིསཉྙཱི. ནཾ-སདྡསྶ ཀཱཡཝིསེསནབྷཱཝེན ཨེཏཾ ཀཱཡནྟི ཨཏྠཾ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. ཨོམསནྟོ…པེ… ཨེཀཱཝ ཨཱཔཏྟཱིཏི ཨནིཝཏྠཾ སནྡྷཱཡ ཝུཏྟཾ, ན ནིཝཏྠཾ. སནིཝཏྠཱཡ པན མཏྠཀཏོ པཊྛཱཡ ཧཏྠཾ ཨོཏཱརེནྟསྶ ནིཝཏྠསཱཊཀོཔརི ཧཏྠེ ཨཱརུལ༹ྷེ ཐུལླཙྩཡཾ. སཱཊཀཏོ ཧཏྠཾ ཨོཏཱརཱཔེཏྭཱ ཛངྒྷཏོ པཊྛཱཡ ཨོམསནྟསྶ པུན སངྒྷཱདིསེསོ.

ཡཐཱནིདྡིཊྛནིདྡེསེཏི ¶ ཡཐཱཝུཏྟཀཱཡསཾསགྒནིདྡེསེ. ཏེནཱཏི ཡེན ཀཱརཎེན ཝཏྠུསཉྙཱདཡོ ཧོནྟི, ཏེན ཀཱརཎེན. ཡཐཱཝུཏྟསིཀྑཱཔདནིདྡེསེ ཝུཏྟཾ གརུཀཾ བྷིཀྑུནོ ཀརེཡྻ པཀཱསེཡྻཱཏི ཡོཛནཱ.

སཉྙཱཡ ཝིརཱགིཏམྷཱིཏི སཉྙཱཡ ཝིརདྡྷཱཡ. ཨིདཾ ནཱམ ཝཏྠུནྟི ཨིམསྨིཾ སིཀྑཱཔདེ ཨཱགཏཾ, ཨནཱགཏཉྩ ཡཾ ཀིཉྩི སཝིཉྙཱཎཀཱཝིཉྙཱཎཀཾ ཕུསནྟསྶ ཨནཱཔཏྟིཨབྷཱཝཾ སནྡྷཱཡ ཝུཏྟཾ.

སཱརཏྟནྟི ཀཱཡསཾསགྒརཱགེནེཝ སཱརཏྟཾ. ཝིརཏྟནྟི ཀཱཡསཾསགྒརཱགརཧིཏཾ མཱཏུཨཱདིཾ སནྡྷཱཡ ཝདཏི. དུཀྐཊནྟི མཱཏུཔེམཱདིཝསེན གཎྷནྟསྶ ཝསེན ཝུཏྟཾ, ཝིརཏྟམྤི ཨིཏྠིཾ ཀཱཡསཾསགྒརཱགེན གཎྷནྟསྶ པན སངྒྷཱདིསེསོ ཨེཝ. ཨིམཱཡ པཱལི༹ཡཱ སམེཏཱིཏི སམྦནྡྷོ. ཀཐཾ སམེཏཱིཏི ཙེ? ཡདི ཧི ‘‘ཨིཏྠིཡཱ ཀཱཡཔྤཊིབདྡྷཾ གཎྷིསྶཱམཱི’’ཏི ཙིཏྟེ ཨུཔྤནྣེ ཨིཏྠིསཉྙཱ ཝིརཱགིཏཱ བྷཝེཡྻ. ཀཱཡཔྤཊིབདྡྷགྒཧཎེཔི ཐུལླཙྩཡེནཱཔི ན བྷཝིཏབྦཾ ཨིཏྠིསཉྙཱཡ ཨེཝ པཱལི༹ཡཾ (པཱརཱ. ༢༧༦) ཐུལླཙྩཡསྶ ཝུཏྟཏྟཱ, ཏསྨཱ ‘‘ཨིཏྠིཡཱ ཀཱཡཔྤཊིབདྡྷཾ གཎྷིསྶཱམཱིཏི ཀཱཡཾ གཎྷནྟསྶ ཨིཏྠིསཉྙཱ ཝིརཱགིཏཱ ནཱམ ན ཧོཏཱིཏི ཀཱཡཔྤཊིབདྡྷཾ གཎྷིསྶཱམཱིཏི ཀཱཡཾ གཎྷཏོ ཨིཏྠིསཉྙཱཡ ཙེཝ ཀཱཡསཾསགྒརཱགསྶ ཙ ཀཱཡགྒཧཎསྶ ཙ སམྦྷཝཱ ཡཐཱཝཏྠུཀཾ སངྒྷཱདིསེསམེཝ ཨཱཔཛྫཏཱི’’ཏི མཧཱསུམཏྠེརེན ཝུཏྟཝཱདོཝ ཨིམཱཡ པཱལི༹ཡཱ སམེཏི. ཨཊྛཀཐཱཡཉྷི ‘‘སམྦཧུལཱ ཨིཏྠིཡོ བཱཧཱཧི པརིཀྑིཔིཏྭཱ གཎྷཱམཱི’’ཏི སཉྙཱཡ པརིཀྑིཔཏོ མཛ྄ཛྷགཏཱནཾ ཝསེན ཐུལླཙྩཡཾ ཝུཏྟཾ. ན ཧི ཏསྶ ‘‘མཛ྄ཛྷགཏཱ ཨིཏྠིཡོ ཀཱཡཔྤཊིབདྡྷེན གཎྷཱམཱི’’ཏི སཉྙཱ ཨཏྠི, ཏསྨཱ ཨཊྛཀཐཱཡཔི སམེཏཱིཏི གཧེཏབྦཾ. ནཱིལེན དུཝིཉྙེཡྻབྷཱཝཏོ ཀཱལི༹ཏྠཱི ཝུཏྟཱ.

༢༧༩. སེཝནཱདྷིཔྤཱཡོཏི ¶ ཕསྶསུཁསེཝནཱདྷིཔྤཱཡོ. ཀཱཡཔྤཊིབདྡྷཱམསནཝཱརེ ཀཱཡཔྤཊིབདྡྷཝསེན ཕསྶཔཊིཝིཛཱནནཾ ཝེདིཏབྦཾ. ཙིཏྟུཔྤཱདམཏྟེ ཨཱཔཏྟིཡཱབྷཱཝཏོ ཨནཱཔཏྟཱིཏི ཨིདཾ ཀཱཡསཾསགྒརཱགམཏྟེན ཀཱཡཙལནསྶ ཨནུཔྤཏྟིཏོ ཨིཏྠིཡཱ ཀརིཡམཱནཀཱཡཙལནཾ སཱདིཡཏོཔི པཡོགཱབྷཱཝཾ སནྡྷཱཡ ཝུཏྟཾ. པཋམཔཱརཱཛིཀེ པན པརེཧི ཨུཔཀྐམིཡམཱནསྶ ཨབྷཱཝཏོ སེཝནཱདྷིཔྤཱཡེ ཨུཔྤནྣེ ཏེན ཨདྷིཔྤཱཡེན ཨངྒཛཱཏཀྑོབྷོ ¶ སཡམེཝ ཨཝསྶཾ སཉྫཱཡཏི, སོ ཙ ཏེན ཀཏོ ནཱམ ཧོཏཱིཏི པཱརཱཛིཀཾ ཝུཏྟཾ, ཏེནེཝ ནཡེན པཋམསངྒྷཱདིསེསེཔི པརེན ཀརིཡམཱནཔཡོགསཱདིཡམཱནེཔི ཨངྒཛཱཏཀྑོབྷསམྦྷཝེན ཨཱཔཏྟི ཧོཏཱིཏི ཝེདིཏབྦཾ. ཙཏུཏྠེཏི ‘‘ན ཙ ཀཱཡེན ཝཱཡམཏི, ན ཙ ཕསྶཾ པཊིཝིཛཱནཱཏཱི’’ཏི ཨིམསྨིཾ ཝཱརེ. ཕསྶཔཊིཝིཛཱནནམྤཱིཏི ཨཔི-སདྡེན ཏཏིཡཝཱརེ ཝིཡ ཝཱཡཱམོཔི ནཏྠཱིཏི དསྶེཏི. ནིསྶགྒིཡེན ནིསྶགྒིཡཱམསནེ ཝིཡཱཏི ཨིདཾ པན ཕསྶཔཊིཝིཛཱནནཱབྷཱཝམཏྟསྶེཝ ནིདསྶནཾ, ན པཡོགཱབྷཱཝསྶཱཏི དཊྛབྦཾ. མོཀྑཱདྷིཔྤཱཡོཏི ཨེཏྠ ཙིཏྟསྶ ལཧུཔརིཝཏྟིཏཱཡ ཨནྟརནྟརཱ ཀཱཡསཾསགྒརཱགེ སམུཔྤནྣེཔི མོཀྑཱདྷིཔྤཱཡསྶ ཨཝིཙྪིནྣཏཱཡ ཨནཱཔཏྟིཡེཝ, ཝིཙྪིནྣེ པན ཏསྨིཾ ཨཱཔཏྟི ཨེཝ.

པདབྷཱཛནཱིཡཝཎྞནཱནཡོ.

༢༨༡. ཨེཏྠ གཎྷཱཧཱིཏི ན ཝཏྟབྦཱཏི གེཧསིཏཔེམེན ཀཱཡཔྤཊིབདྡྷེན ཕུསནེ དུཀྐཊཾ སནྡྷཱཡ ཝུཏྟཾ, ཀཱརུཉྙེན པན ཝཏྠཱདིཾ གཧེཏུཾ ཨསཀྐོནྟིཾ ‘‘གཎྷཱ’’ཏི ཝདནྟསྶཱཔི ཨཝསསབྷཱཝཔྤཏྟཾ ཨུདཀེ ནིམུཛྫནྟིཾ ཀཱརུཉྙེན སཧསཱ ཨནཱམཱསནྟི ཨཙིནྟེཏྭཱ ཀེསཱདཱིསུ གཧེཏྭཱ མོཀྑཱདྷིཔྤཱཡེན ཨཱཀཌྜྷཏོཔི ཨནཱཔཏྟིཡེཝ. ན ཧི མཱིཡམཱནཾ མཱཏརཾ ཨུཀྑིཔིཏུཾ ན ཝཊྚཏི. ཨཉྙཱཏིཀཱཡ ཨིཏྠིཡཱཔི ཨེསེཝ ནཡོ. ཨུཀྐཊྛཱཡ མཱཏུཡཱཔི ཨཱམཱསོ ན ཝཊྚཏཱིཏི དསྶནཏྠཾ ‘‘མཱཏར’’ནྟི ཝུཏྟཾ. ཏསྶཱ ཀཱཏབྦཾ པན ཨཉྙཱསམྤི ཨིཏྠཱིནཾ ཀརོནྟསྶཱཔི ཨནཱཔཏྟིཡེཝ ཨནཱམཱསཏྟེ ཝིསེསཱབྷཱཝཱ.

ཏིཎཎྜུཔཀནྟི ཧིརིཝེརཱདིམཱུལེཧི ཀེསཱལངྐཱརཏྠཱཡ ཀཏཙུམྦཊཀཾ. པརིཝཏྟེཏྭཱཏི ཨཏྟནོ ནིཝཱསནཱདིབྷཱཝཏོ ཨཔནེཏྭཱ. པཱུཛཱདིཨཏྠཾ པན ཏཱཝཀཱལིཀམྤི ཨཱམསིཏུཾ ཝཊྚཏི. སཱིསཔསཱདྷནཀདནྟསཱུཙིཨཱདཱིཏི ཨིདཾ སཱིསཱལངྐཱརཏྠཱཡ པཊཔིལོཏིཀཱདཱིཧི ཀཏཾ སཱིསཔསཱདྷནཀཉྩེཝ དནྟསཱུཙིཨཱདི ཙཱཏི དྭིདྷཱ ཡོཛེཏྭཱ སཱིསཔསཱདྷནཾ སིཔཱཊིཀོཔཀརཎཏྠཱཡ ཙེཝ དནྟསཱུཙིཨུཔཀརཎཏྠཱཡ ཙ གཧེཏབྦནྟི ཡཐཱཀྐམཾ ཨཏྠཾ དསྶེཏི. ཀེསཀལཱཔཾ བནྡྷིཏྭཱ ཏཏྠ ཏིརིཡཾ པཝེསནཏྠཱཡ ཀཏཱ དནྟསཱུཙི ཨེཝ སཱིསཔསཱདྷནཀདནྟསཱུཙཱིཏི ཨེཀམེཝ ཀཏྭཱ སིཔཱཊིཀཱཡ ¶ པཀྑིཔིཏྭཱ པརིཧརིཏབྦསཱུཙིཡེཝ ཏསྶ ཏསྶ ཀིཙྩསྶ ཨུཔཀརཎནྟི སིཔཱཊིཀཱསཱུཙིཨུཔཀརཎནྟི ཨེཝཾ ཝཱ ཡོཛནཱ ཀཱཏབྦཱ ¶ . པོཏྠཀརཱུཔནྟི སུདྷཱདཱིཧི ཀཏཾ, པཱརཱཛིཀཝཏྠུབྷཱུཏཱནཾ ཏིརཙྪཱནགཏིཏྠཱིནཾ སཎྛཱནེན ཀཏམྤི ཨནཱམཱསམེཝ. ཨིཏྠིརཱུཔཱདཱིནི དསྶེཏྭཱ ཀཏཾ, ཝཏྠབྷིཏྟིཨཱདིཉྩ ཨིཏྠིརཱུཔཾ ཨནཱམསིཏྭཱ ཝལ༹ཉྫེཏུཾ ཝཊྚཏི. ཨེཝརཱུཔེཧི ཨནཱམཱསེ ཀཱཡསཾསགྒརཱགེ ཨསཏི ཀཱཡཔྤཊིབདྡྷེན ཨཱམསཏོ དོསོ ནཏྠི. བྷིནྡིཏྭཱཏི ཨེཏྠ ཨནཱམཱསམྤི དཎྜཔཱསཱཎཱདཱིཧི བྷེདནསྶ ཨཊྛཀཐཱཡཾ ཝུཏྟཏྟཱ, པཱལི༹ཡམྤི ཨཱཔདཱསུ མོཀྑཱདྷིཔྤཱཡསྶ ཨཱམསནེཔི ཨནཱཔཏྟིཡཱ ཝུཏྟཏྟཱ ཙ. སཔྤིནཱིཨཱདཱིཧི ཝཱལ༹མིགཱིཧི ཙ གཧིཏཔཱཎཀཱནཾ མོཙནཏྠཱཡ ཏཾ སཔྤིནཱིཨཱདིཾ ཝཏྠདཎྜཱདཱིཧི པརིཀྑིཔིཏྭཱ གཧེཏུཾ, མཱཏུཨཱདིཾ ཨུདཀེ མཱིཡམཱནཾ ཝཏྠཱདཱིཧི གཧེཏུཾ, ཨསཀྐོནྟིཾ ཀེསཱདཱིསུ གཧེཏྭཱ ཀཱརུཉྙེན ཨུཀྑིཔིཏུཾ ཝཊྚཏཱིཏི ཨཡམཏྠོ གཧེཏབྦོཝ. ཨཊྛཀཐཱཡཾ ‘‘ན ཏྭེཝ ཨཱམསིཏབྦཱ’’ཏི ཨིདཾ པན ཝཙནཾ ཨམཱིཡམཱནཝཏྠུཾ སནྡྷཱཡ ཝུཏྟནྟི ཨཡཾ ཨམྷཱཀཾ ཁནྟི.

མགྒཾ ཨདྷིཊྛཱཡཱཏི ‘‘མགྒོ ཨཡ’’ནྟི མགྒསཉྙཾ ཨུཔྤཱདེཏྭཱཏི ཨཏྠོ. པཉྙཔེཏྭཱ དེནྟཱིཏི ཨིདཾ སཱམཱིཙིཝསེན ཝུཏྟཾ, ཏེཧི པན ཨཱསནཾ ཨཔཉྙཔེཏྭཱཝ ནིསཱིདཐཱཏི ཝུཏྟེ སཡམེཝ པཉྙཔེཏྭཱ ནིསཱིདིཏུམྤི ཝཊྚཏི. ཏཏྠཛཱཏཀཱནཱིཏི ཨཙྪིནྡིཏྭཱ བྷཱུཏགཱམབྷཱཝེནེཝ ཋིཏཱནི. ཀཱིལ༹ནྟེནཱཏི ཝུཏྟཏྟཱ སཏི པཙྩཡེ ཨཱམསནྟསྶ ཨནཱཔཏྟི. བྷིཀྑུསནྟཀཾ པན པརིབྷོགཱརཧཾ སབྦཐཱ ཨཱམསིཏུཾ ན ཝཊྚཏི དུརུཔཙིཎྞཏྟཱ. ཨནུཔསམྤནྣཱནཾ དསྶཱམཱིཏི ཨིདཾ ཨཔྤཊིགྒཧེཏྭཱ གཧཎཾ སནྡྷཱཡ ཝུཏྟཾ. ཨཏྟནོཔི ཨཏྠཱཡ པཊིགྒཧེཏྭཱ གཧཎེ དོསོ ནཏྠི ཨནཱམཱསཏྟཱབྷཱཝཱ.

མཎཱིཏི ཝེལུ༹རིཡཱདིཏོ ཨཉྙོ ཛོཏིརསཱདིབྷེདོ སབྦོཔི མཎི. ཝེལུ༹རིཡོཏི ཨལླཝེལུ༹ཝཎྞོམཎི, ‘‘མཛྫཱརཀྑི མཎྜལཝཎྞོ’’ཏིཔི ཝདནྟི. སིལཱཏི མུགྒམཱསཝཎྞཱ ཨཏིསིནིདྡྷཱ ཀཱལ༹སིལཱ, མཎིཝོཧཱརཾ ཨཱགཏཱ རཏྟསེཏཱདིཝཎྞཱ སུམཊྛཱཔི སིལཱ ཨནཱམཱསཱ ཨེཝཱཏི ཝདནྟི. རཛཏནྟི ཀཧཱཔཎམཱསཱདིབྷེདཾ ཛཏུམཱསཱདིཾ ཨུཔཱདཱཡ སབྦཾ ཝུཏྟཱཝསེསཾ རཱུཔིཡཾ གཧིཏཾ. ལོཧིཏངྐོཏི རཏྟམཎི. མསཱརགལླནྟི ཀབརཝཎྞོ མཎི, ‘‘མརཀཏ’’ནྟིཔི ཝདནྟི. བྷེསཛྫཏྠཱཡ པིསིཏྭཱ ཡོཛིཏཱནཾ མུཏྟཱནཾ རཏནབྷཱཝཝིརཧཏོ གཧཎཀྑཎེཔི རཏནཱཀཱརེན ཨཔེཀྑིཏཱབྷཱཝཱ ‘‘བྷེསཛྫཏྠཱཡ པན ཝཊྚཏཱི’’ཏི ཝུཏྟཾ. ཡཱཝ པན ¶ ཏཱ མུཏྟཱ རཏནརཱུཔེན ཏིཊྛནྟི, ཏཱཝ ཨཱམསིཏུཾ ན ཝཊྚཏི ཨེཝ. ཨེཝཾ ཨཉྙམྤི རཏནཔཱསཱཎཾ པིསིཏྭཱ བྷེསཛྫེ ཡོཛནཏྠཱཡ གཧེཏུཾ ཝཊྚཏི ཨེཝ, ཛཱཏརཱུཔརཛཏཾ པན པིསིཏྭཱ ཡོཛནབྷེསཛྫཏྠཱཡཔི སམྤཊིཙྪིཏུཾ ན ཝཊྚཏི, གཧཊྛེཧི ཡོཛེཏྭཱ དིནྣམྤི ཡདི བྷེསཛྫེ སུཝཎྞཱདིརཱུཔེན ཏིཊྛཏི, ཝིཡོཛེཏུཉྩ སཀྐཱ, ཏཱདིསཾ བྷེསཛྫམྤི ན ཝཊྚཏི. ཏཾ ཨབྦོཧཱརིཀཏྟཾ གཏཾ ཙེ, ཝཊྚཏི. ‘‘ཛཱཏིཕལིཀཾ ¶ ཨུཔཱདཱཡཱ’’ཏི ཝུཏྟཏྟཱ, སཱུརིཡཀནྟཙནྡཀནྟཱདིཀཾ ཛཱཏིཔཱསཱཎཾ མཎིམྷི ཨེཝ སངྒཧིཏནྟི དཊྛབྦཾ. དྷམནསངྑོ ཙ དྷོཏཝིདྡྷོ ཙ རཏནམིསྶོ ཙཱཏི ཡོཛེཏབྦཾ. ཝིདྡྷོཏི མཎིཨཱདིབྷཱཝེན ཀཏཚིདྡོ.

རཏནམིསྶོཏི ཀཉྩནལཏཱདིཝིཙིཏྟོ, མུཏྟཱདིརཏནཁཙིཏོ ཙ, ཨེཏེན དྷམནསངྑཏོ ཨཉྙོ རཏནམིསྶོཝ ཨནཱམཱསོཏི དསྶེཏི. སིལཱཡམྤི ཨེསེཝ ནཡོ. པཱནཱིཡསངྑོཏི ཨིམིནཱཝ ཐཱལཀཱདིཨཱཀཱརེན ཀཏསངྑམཡབྷཱཛནཱནི བྷིཀྑཱུནཾ སམྤཊིཙྪིཏུཾ ཝཊྚཏཱིཏི སིདྡྷཾ. སེསཱཏི རཏནསཾཡུཏྟཾ ཋཔེཏྭཱ ཨཝསེསཱ.

བཱིཛཏོ པཊྛཱཡཱཏི དྷཱཏུཔཱསཱཎཏོ པཊྛཱཡ. པཊིཀྑིཔཱིཏི སུཝཎྞམཡདྷཱཏུཀརཎྜཀསྶ, བུདྡྷརཱུཔཱདིསྶ ཙ ཨཏྟནོ སནྟཀཀརཎེ ནིསྶགྒིཡཏྟཱ ཝུཏྟཾ. ‘‘རཱུཔིཡཚཌྜཀཊྛཱནེ’’ཏི ཝུཏྟཏྟཱ རཱུཔིཡཚཌྜཀསྶ ཛཱཏརཱུཔརཛཏཾ ཨཱམསིཏྭཱ ཚཌྜེཏུཾ ཝཊྚཏཱིཏི སིདྡྷཾ. ཀེལཱ༹པཡིཏུནྟི ཨཱམསིཏྭཱ ཨིཏོ ཙིཏོ ཙ སཉྩཱརེཏུཾ. ཝུཏྟནྟི མཧཱཨཊྛཀཐཱཡཾ ཝུཏྟཾ. ཀཙཝརམེཝ ཧརིཏུཾ ཝཊྚཏཱིཏི གོཔཀཱ ཝཱ ཧོནྟུ ཨཉྙེ ཝཱ, ཧཏྠེན པུཉྪིཏྭཱ ཀཙཝརཾ ཨཔནེཏུཾ ཝཊྚཏི, མལམྤི པམཛྫིཏུཾ ཝཊྚཏི ཨེཝཱཏི ཝདནྟི, ཏཾ ཨཊྛཀཐཱཡ ན སམེཏི ཀེལཱ༹ཡནསདིསཏྟཱ. ཨཱརཀཱུཊལོཧནྟི སུཝཎྞཝཎྞོ ཀིཏྟིམལོཧཝིསེསོ. ཏིཝིདྷཉྷི ཀིཏྟིམལོཧཾ ཀཾསལོཧཾ ཝཊྚལོཧཾ ཧཱརཀཱུཊལོཧནྟི. ཏཏྠ ཏིཔུཏམྦེ མིསྶེཏྭཱ ཀཏཾ ཀཾསལོཧཾ ནཱམ. སཱིསཏམྦེ མིསྶེཏྭཱ ཀཏཾ ཝཊྚལོཧཾ. རསཏམྦེ མིསྶེཏྭཱ ཀཏཾ ཧཱརཀཱུཊལོཧཾ ནཱམ. ཏཾ པན ‘‘ཛཱཏརཱུཔགཏིཀ’’ནྟི ཝུཏྟཏྟཱ ཨུགྒཎྷཏོ ནིསྶགྒིཡམྤི ཧོཏཱིཏི ཀེཙི ཝདནྟི. རཱུཔིཡེསུ པན ཨགཎིཏཏྟཱ ནིསྶགྒིཡཾ ན ཧོཏི, ཨཱམསནེ, སམྤཊིཙྪནེ ཙ དུཀྐཊམེཝཱཏི ཝེདིཏབྦཾ. སབྦཀཔྤིཡོཏི ཡཐཱཝུཏྟསུཝཎྞཱདིམཡཱནཾ ¶ སེནཱསནཔརིཀྑཱརཱནཾ ཨཱམསནགོཔནཱདིཝསེན པརིབྷོགོ སབྦཐཱ ཀཔྤིཡོཏི ཨདྷིཔྤཱཡོ. ཏེནཱཧ ‘‘ཏསྨཱ’’ཏིཨཱདི. ‘‘བྷིཀྑཱུནཾ དྷམྨཝིནཡཝཎྞནཊྛཱནེ’’ཏི ཝུཏྟཏྟཱ སངྒྷིཀམེཝ སུཝཎྞཱདིམཡཾ སེནཱསནཾ, སེནཱསནཔརིཀྑཱརཱ ཙ ཝཊྚནྟི, ན པུགྒལིཀཱནཱིཏི གཧེཏབྦཾ.

བྷིནྡིཏྭཱཏི པཋམམེཝ ཨནཱམསིཏྭཱ པཱསཱཎཱདིནཱ ཀིཉྩིམཏྟཾ བྷེདཾ ཀཏྭཱ པཙྪཱ ཀཔྤིཡབྷཎྜཏྠཱཡ ཨདྷིཊྛཧིཏྭཱ ཧཏྠེན གཧེཏུཾ ཝཊྚཏི. ཏེནཱཧ ‘‘ཀཔྤིཡབྷཎྜཾ ཀརིསྶཱམཱིཏི སབྦམྤི སམྤཊིཙྪིཏུཾ ཝཊྚཏཱི’’ཏི. ཨེཏྠཱཔི ཀིཉྩི བྷིནྡིཏྭཱ, ཝིཡོཛེཏྭཱ ཝཱ ཨཱམསིཏབྦ.

ཕལཀཛཱལིཀཱདཱིནཱིཏི ཨེཏྠ སརཔརིཏྟཱཎཱཡ ཧཏྠེན གཧེཏབྦཾ ཀིཊིཀཱཕལཀཾ ཨཀྑིརཀྑཎཏྠཱཡ ཨཡལོཧཱདཱིཧི ཛཱལཱཀཱརེན ཀཏྭཱ སཱིསཱདཱིསུ པཊིམུཉྩིཏབྦཾ ཛཱལིཀཾ ནཱམ ¶ . ཨཱདི-སདྡེན ཀཝཙཱདིཾ སངྒཎྷཱཏི. ཨནཱམཱསཱནཱིཏི མཙྪཛཱལཱདིཔརཱུཔརོདྷཀཾ སནྡྷཱཡ ཝུཏྟཾ, ན སརཔརིཏྟཱཎཾ ཏསྶ ཨཱཝུདྷབྷཎྜཏྟཱབྷཱཝཱ. ཏེནེཝ ཝཀྑཏི ‘‘པརཱུཔརོདྷནིཝཱརཎཾ ཧཱི’’ཏིཨཱདི. ཨཱསནསྶཱཏི ཙེཏིཡསྶ སམནྟཱ ཀཏཔརིབྷཎྜསྶ. བནྡྷིསྶཱམཱིཏི ཀཱཀཱདཱིཧི ཨདཱུསནཏྠཱཡ བནྡྷིསྶཱམི.

‘‘བྷེརིསངྒྷཱཊོཏི སངྒྷཊིཏཙམྨབྷེརཱི. ཝཱིཎཱསངྒྷཱཊོཏི སངྒྷཊིཏཙམྨཝཱིཎཱ’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༢༨༡) ཝུཏྟཾ. ‘‘ཙམྨཝིནདྡྷཱནི ཝཱིཎཱབྷེརིཨཱདཱིནཱི’’ཏི མཧཱཨཊྛཀཐཱཡཾ ཝུཏྟཝཙནཏོ ཝིསེསཱབྷཱཝཱ, ‘‘ཀུརུནྡིཡཾ པནཱ’’ཏིཨཱདིནཱ ཏཏོ ཝིསེསསྶ ཝཏྟུམཱརདྡྷཏྟཱ ཙ བྷེརིཨཱདཱིནཾ ཝིནདྡྷནོཔཀརཎསམཱུཧོ བྷེརིཝཱིཎཱསངྒྷཱཊོཏི ཝེདིཏབྦཾ སངྒྷཊིཏབྦོཏི སངྒྷཱཊོཏི ཀཏྭཱ. ཏུཙྪཔོཀྑརནྟི ཨཝིནདྡྷཙམྨབྷེརིཝཱིཎཱནཾ པོཀྑརཾ. ཨཱརོཔིཏཙམྨནྟི པུབྦེ ཨཱརོཔིཏཾ ཧུཏྭཱ པཙྪཱ ཏཏོ ཨཔནེཏྭཱ ཝིསུཾ ཋཔིཏམུཁཙམྨམཏྟཾ, ན སེསོཔཀརཎསཧིཏཾ. སཧིཏཾ པན སངྒྷཱཊོཏི ཨཡཾ ཝིསེསོ. ཨོནཧིཏུནྟི བྷེརིཔོཀྑརཱདཱིནི ཙམྨཾ ཨཱརོཔེཏྭཱ ཙམྨཝཊྚིཨཱདཱིཧི སབྦེཧི ཨུཔཀརཎེཧི ཝིནནྡྷིཏུཾ.

པཱལི༹ཡཾ པཎྜཀསྶཱཏི པཎྜཀེན. པཱརཱཛིཀཔྤཧོནཀཀཱལེཏི ཨཀུཐིཏཀཱལེ. ཀཱཡསཾསགྒརཱགཱདིབྷཱཝེ སབྦཱཝཏྠཱཡཔི ཨིཏྠིཡཱ སཎྛཱནེ ¶ པཉྙཱཡམཱནེ ཨནཱམཱསདུཀྐཊཾ ན ཝིགཙྪཏཱིཏི དཊྛབྦཾ. སངྐམཱདཱིནཾ ཋཱནཱཙཱཝནཝསེན ཨཙཱལེཏབྦཏཱཡ ན ཀཱཡཔྤཊིབདྡྷཝོཧཱརོཏི དུཀྐཊཾ ཝུཏྟཾ.

༢༨༢. ཨེཀཔདིཀསངྐམོཏི ཏནུཀསེཏུ. ‘‘ཨཱཝིཉྪནྟོ’’ཏི ཝུཏྟཏྟཱ ཙཱལེཏུཾ ཡུཏྟཱཡ ཨེཝ རཛྫུཡཱ ཐུལླཙྩཡཾ, ན ཨིཏརཱཡ བྷིཏྟིཐམྦྷཱདིགཏིཀཏྟཱཏི ཨཱཧ ‘‘ཡཱ མཧཱརཛྫུ ཧོཏཱི’’ཏིཨཱདི. ཏེན ཙཱལེཏུཾ ཡུཏྟེ ཏནུཀརཛྫུདཎྜཀེ ཨཙཱལེཏྭཱ ཕུསནྟསྶཱཔི ཐུལླཙྩཡམེཝཱཏི དཱིཔིཏནྟི ཝེདིཏབྦཾ. པཊིཙྪཱདེཏབྦཱཏི ཚཱདནཱདིཝསེན གཱུཧིཏབྦཱ. མནུསྶིཏྠཱི, མནུསྶིཏྠིསཉྙིཏཱ, ཀཱཡསཾསགྒརཱགོ, ཝཱཡཱམོ, ཏེན ཧཏྠཱདཱིསུ ཕུསནནྟི ཨིམཱནེཏྠ པཉྩ ཨངྒཱནི.

ཀཱཡསཾསགྒསིཀྑཱཔདཝཎྞནཱ ནིཊྛིཏཱ.

༣. དུཊྛུལླཝཱཙཱསིཀྑཱཔདཝཎྞནཱ

༢༨༥. ཏཏིཡེ ཨསདྡྷམྨཔཊིསཉྙུཏྟནྟི མེཐུནདྷམྨཔཊིསཾཡུཏྟཾ. བཱལཱཏི སུབྷཱསིཏདུབྦྷཱསིཏཾ ཨཛཱནནྟཱི ¶ , སུརཱམདམཏྟཏཱཡ ཨུམྨཏྟཀཱདིབྷཱཝེན ཙ ཨཛཱནནྟཱིཔི ཨེཏྠེཝ སངྒཡ྄ཧཏི. ན ཏཱཝ སཱིསཾ ཨེཏཱིཏི སངྒྷཱདིསེསཔཙྩཡཏྟསངྑཱཏཾ མཏྠཀཾ པཱརིཔཱུརི ན ཧོཏི, མགྒམེཐུནེཧི ཨགྷཊིཏཏྟཱ དུཀྐཊཾ པན ཧོཏི ཨེཝ.

ཨཔསཱདེཏཱིཏི ཨཔསཱདཀརཝཙནཾ ཀརོཏི. དོསཾ དེཏཱིཏི དོསཾ པཏིཊྛཱཔེཏི. ཏཱིཧཱིཏི ཨནིམིཏྟཱསཱིཏིཨཱདཱིནཾ པདཱནཾ ཨདུཊྛུལླབྷཱཝེནཱཔི ཨཏྠཡོཛནཱརཧཏྟཱ པསྶཱཝམགྒཱདིཔཊིསཉྙུཏྟཏཱནིཡམོ ནཏྠཱིཏི ཝུཏྟཾ, ཏེཧི པན ཨཊྛཧི པདེཧི པརིབྦཱཛིཀཱཝཏྠུསྨིཾ (པཱརཱ. ༢༨༩) ཝིཡ ཐུལླཙྩཡནྟི ཝེདིཏབྦཾ.

ཀུཉྩིཀཔནཱལི༹མཏྟནྟི ཀུཉྩིཀཱཚིདྡམཏྟཾ. སུཀྑསོཏཱཏི དཀསོཏསྶ སུཀྑཏཱཡ ལོཧིཏཝཎྞཝིགམོ ཧོཏཱིཏི ཝུཏྟཾ.

སུདྡྷཱནཱིཏི མེཐུནཱདིཔདེཧི ཨཡོཛིཏཱནིཔི. མེཐུནདྷམྨེན གྷཊིཏཱནེཝཱཏི ཨིདཾ ཨུཔལཀྑཎམཏྟཾ, ཝཙྩམགྒཔསྶཱཝམགྒེཧིཔི ཨནིམིཏྟེ ‘‘ཏཝ ¶ ཝཙྩམགྒོ, པསྶཱཝམགྒོ ཝཱ ཨཱིདིསོ’’ཏིཨཱདིནཱ གྷཊིཏེཔི ཨཱཔཏྟིཀརཱནེཝ.

༢༨༦. གརུཀཱཔཏྟིནྟི བྷིཀྑུནིཡཱ ཨུབྦྷཛཱཎུམཎྜལིཀཱཡ པཱརཱཛིཀཱཔཏྟིཾ སནྡྷཱཡ ཝདཏི.

༢༨༧. ཧསནྟོ ཧསནྟོཏི ཨུཔལཀྑཎམཏྟཾ, ཨཧསནྟོཔི ཡེན ཀེནཙི ཨཱཀཱརེན ཨཏྟནོ ཝིཔརིཎཏཙིཏྟཏཾ ཨིཏྠིཡཱ པཀཱསེནྟོ ཝདཏི, ཨཱཔཏྟིཡེཝ.

ཀཱཡཙིཏྟཏོཏི ཧཏྠམུདྡཱཡ ཨོབྷཱསེནྟསྶ ཀཱཡཙིཏྟཏོ སམུཊྛཱཏི.

༢༨༨. ཏསྨཱ དུཀྐཊནྟི ཨཔྤཊིཝིཛཱནནཏོ དུཀྐཊཾ, པཊིཝིཛཱནནེ པན སཏི ཐུལླཙྩཡམེཝ པརིབྦཱཛིཀཱཝཏྠུསྨིཾ (པཱརཱ. ༢༨༩) ཝིཡ ཨཁེཏྟཔདཏྟཱ. ཁེཏྟཔདེ ཧི པཊིཝིཛཱནནྟིཡཱ སངྒྷཱདིསེསོཝ སིཡཱ མེཐུནདྷམྨཡཱཙནཝཏྠུདྭཡེ (པཱརཱ. ༢༨༩) ཝིཡ, ཏཾ པན ཝཏྠུདྭཡཾ མེཐུནཡཱཙནཏོ ཙཏུཏྠསངྒྷཱདིསེསེ ཝཏྟབྦམྤི དུཊྛུལླཝཱཙསྶཱདམཏྟེན པཝཏྟཏྟཱ ཨིདྷ ཝུཏྟནྟི ཝེདིཏབྦཾ. ཨེཝཾ ཁེཏྟཔདེན ཝདནྟསྶ ཨིཏྠིཡཱ ཨཔྤཊིཝིཛཱནནྟིཡཱ ཀིཾ ཧོཏཱིཏི? ཀིཉྩཱཔི ཨཡཾ ནཱམ ཨཱཔཏྟཱིཏི པཱལི༹ཨཊྛཀཐཱསུ ན ཝུཏྟཾ, ཨཐ ཁོ ཐུལླཙྩཡེནེཝེཏྠ བྷཝིཏབྦཾ ¶ . ཏཐཱ ཧི ཨཁེཏྟཔདེ ཨཔྤཊིཝིཛཱནནྟིཡཱ དུཀྐཊཾ, པཊིཝིཛཱནནྟིཡཱ ཐུལླཙྩཡཾ ཝུཏྟཾ. ཁེཏྟཔདེ པན པཊིཝིཛཱནནེ སངྒྷཱདིསེསོཝ ཝུཏྟོ, ཨཔྤཊིཝིཛཱནནེ ཐུལླཙྩཡམེཝ བྷཝིཏུཾ ཡུཏྟཾ, ན དུཀྐཊཾ, ཨཁེཏྟཔདཏོ ཝིསེསཱབྷཱཝཔྤསངྒོཏི གཧེཏབྦཾ. ཡཐཱ ཙེཏྠ, ཨེཝཾ ཙཏུཏྠསིཀྑཱཔདེཔི ཨཁེཏྟཔདེ པཊིཝིཛཱནནྟིཡཱ ཐུལླཙྩཡཾ, ཨཔྤཊིཝིཛཱནནྟིཡཱ དུཀྐཊཾ, ཁེཏྟཔདེ པན ཨཔྤཊིཝིཛཱནནྟིཡཱ ཐུལླཙྩཡནྟི ཝེདིཏབྦཾ. པཱལི༹ཡཾ ནཝཱཝུཏནྟི ནཝཝཱིཏཾ.

༢༨༨. ཨསདྡྷམྨཾ སནྡྷཱཡཱཏི མེཐུནཾ སནྡྷཱཡ ཝུཏྟཾ. ཏཉྷི པུཏྟསམུཔྤཏྟིཡཱ བཱིཛནིཀྑེཔཏོ ཝཔྤཔརིཡཱཡཾ ལབྷཏཱིཏི.

སཾསཱིདཏཱིཏི ཝཧཏི, སཾསརཱིཡཏཱིཏི ཝཱ ཨཏྠོ. མནུསྶིཏྠཱི, ཏཐཱསཉྙིཏཱ, དུཊྛུལླཝཱཙསྶཱདརཱགོ, ཏེན ཨོབྷཱསནཾ, ཏངྑཎཝིཛཱནནནྟི ཨིམཱནེཏྠ པཉྩ ཨངྒཱནི.

དུཊྛུལླཝཱཙཱསིཀྑཱཔདཝཎྞནཱ ནིཊྛིཏཱ.

༤. ཨཏྟཀཱམཔཱརིཙརིཡསིཀྑཱཔདཝཎྞནཱ

༢༩༠. ཙཏུཏྠེ ¶ པརེཧི པཏྟེ པཱཏིཡམཱནཱནཾ བྷིཀྑཱཔིཎྜཱནཾ པཱཏོ སནྣིཔཱཏོཏི པིཎྜཔཱཏོཏི བྷིཀྑཱཧཱརོ ཝུཙྩཏི, ཏཾསདིསཏཱཡ ཨཉྙོཔི ཡོ ཀོཙི བྷིཀྑཱཙརིཡཾ ཝིནཱ བྷིཀྑཱུཧི ལདྡྷོ པིཎྜཔཱཏོཏྭེཝ ཝུཙྩཏི. པཏི ཨེཏི ཨེཏསྨཱཏི པཙྩཡོཏི ཨཱཧ ‘‘པཏིཀརཎཊྛེན པཙྩཡོ’’ཏི. རོགདུཀྑཱནཾ ཝཱ པཊིཔཀྑབྷཱཝེན ཨཡཏི པཝཏྟཏཱིཏི པཙྩཡོ. སཔྤཱཡསྶཱཏི ཧིཏསྶ. ནགརཔརིཀྑཱརེཧཱིཏི ནགརཾ པརིཝཱརེཏྭཱ རཀྑཎཀེཧི. རཱཛཱུནཾ གེཧཔརིཀྑེཔོ པརིཁཱ ཨུདྡཱཔོ པཱཀཱརོ ཨེསིཀཱ པལིགྷོ ཨཊྚོཏི ཨིམེ སཏྟ ནགརཔརིཀྑཱརཱཏི ཝདནྟི. སེཏཔརིཀྑཱརོཏི ཝིསུདྡྷིསཱིལཱལངྐཱརོ. ཨརིཡམགྒོ ཧི ཨིདྷ ‘‘རཐོ’’ཏི ཨདྷིཔྤེཏོ, ཏསྶ ཙ སམྨཱཝཱཙཱདཡོ ཨལངྐཱརཊྛེན ‘‘པརིཀྑཱརཱ’’ཏི ཝུཏྟཱ. ཙཀྐཝཱིརིཡོཏི ཝཱིརིཡཙཀྐོ. ཛཱིཝིཏཔརིཀྑཱརཱཏི ཛཱིཝིཏསྶ པཝཏྟིཀཱརཎཱནི. སམུདཱནེཏབྦཱཏི སམྨཱ ཨུདྡྷཾ ཨཱནེཏབྦཱ པརིཡེསིཏབྦཱ.

༢༩༡. ཨུཔཙཱརེཏི ཡཏྠ ཋིཏོ ཝིཉྙཱཔེཏུཾ སཀྐོཏི, ཏཱདིསེ ཋཱནེ. ཀཱམོ ཙེཝ ཧེཏུ ཙ པཱརིཙརིཡཱ ཙ ཨཏྠོཏི པཱལི༹ཡཾ ‘‘ཨཏྟནོ ཀཱམཾ, ཨཏྟནོ ཧེཏུཾ, ཨཏྟནོ ཨདྷིཔྤཱཡཾ, ཨཏྟནོ པཱརིཙརིཡ’’ནྟི (པཱརཱ. ༢༩༢) ཝུཏྟེསུ ཨིམེསུ ཙཏཱུསུ པདེསུ ཀཱམོ, ཧེཏུ, པཱརིཙརིཡཱ ¶ ཙ ཨཊྛཀཐཱཡཾ ཝུཏྟེ པཋམེ ཨཏྠཝིཀཔྤེ ཝིགྒཧཝཱཀྱཱདྷིཔྤཱཡསཱུཙནཏོ ཨཏྠོ. སེསནྟི ཨདྷིཔྤཱཡཔདམེཀཾ. བྱཉྫནནྟི བྱཉྫནམཏྟཾ, པཋམཝིཀཔྤཱནུཔཡོགིཏཱཡ ཝཙནམཏྟནྟི ཨཏྠོ. དུཏིཡེ ཨཏྠཝིཀཔྤེཔི ཨེསེཝ ནཡོ.

ཡཐཱཝུཏྟམེཝ ཨཏྠཾ པདབྷཱཛནེན སཾསནྡིཏྭཱ དསྶེཏུཾ ‘‘ཨཏྟནོ ཀཱམཾ ཨཏྟནོ ཧེཏུཾ ཨཏྟནོ པཱརིཙརིཡནྟི ཧི ཝུཏྟེ ཛཱནིསྶནྟི པཎྜིཏཱ’’ཏིཨཱདི ཨཱརདྡྷཾ. ཨིདཾ ཝུཏྟཾ ཧོཏི – ‘‘ཨཏྟནོ ཧེཏུ’’ནྟི ཝུཏྟེ ཨཏྟནོ ཨཏྠཱཡཱཏི ཨཡམཏྠོ ཝིཉྙཱཡཏི, ‘‘ཨཏྟནོ ཀཱམཾ ཨཏྟནོ པཱརིཙརིཡ’’ནྟི ཝུཏྟེ ཀཱམེན པཱརིཙརིཡཱཏི ཨཡམཏྠོ ཝིཉྙཱཡཏི. ཏསྨཱ ཨིམེཧི ཏཱིཧི པདེཧི ཨཏྟནོ ཨཏྠཱཡ ཀཱམེན པཱརིཙརིཡཱ ཨཏྟཀཱམཔཱརིཙརིཡཱཏི ཨིམཾ ཨཏྠཝིཀཔྤཾ ཝིཉྙཱུ ཛཱནིསྶནྟི. ‘‘ཨཏྟནོ ¶ ཨདྷིཔྤཱཡ’’ནྟི ཝུཏྟེ པན ཨདྷིཔྤཱཡ-སདྡསྶ ཀཱམིཏ-སདྡེན སམཱནཏྠབྷཱཝཏོ ཨཏྟནཱ ཨདྷིཔྤེཏཀཱམིཏཊྛེན ཨཏྟཀཱམཔཱརིཙརིཡཱཏི ཨིམམཏྠཾ ཝིཀཔྤཾ ཝིཉྙཱུ ཛཱནིསྶནྟི.

ཨེཏདགྒནྟི ཨེསཱ ཨགྒཱ. དུཊྛུལླཝཱཙཱསིཀྑཱཔདེཔི (པཱརཱ. ༢༨༥) ཀཱམཾ ‘‘ཡཱཙཏིཔི ཨཱཡཱཙཏིཔཱི’’ཏི ཨེཝཾ མེཐུནཡཱཙནཾ ཨཱགཏཾ, ཏཾ པན དུཊྛུལླཝཱཙསྶཱདརཱགཝསེན ཝུཏྟཾ, ཨིདྷ པན ཨཏྟནོ མེཐུནསྶཱདརཱགཝསེནཱཏི ཨཡཾ ཝིསེསོ.

ཝིནཱིཏཝཏྠཱུསུ ‘‘ཨགྒདཱནཾ དེཧཱི’’ཏི ཨིདཾ ཨཏྟནོ ཨཏྠཱཡ ཝུཏྟཾ, དུཊྛུལླཝཱཙཱསིཀྑཱཔདེ པན པརཏྠཱཡཔི ཝུཏྟེ སཱིསཾ ཨེཏཱིཏི ཝེདིཏབྦཾ. སུབྷགཱཏི ཨིསྶརིཡཱདཱིཧི སུནྡརེཧི བྷགེཧི སམནྣཱགཏཱ. མནུསྶིཏྠཱི, ཏཐཱསཉྙིཏཱ, ཨཏྟཀཱམཔཱརིཙརིཡཱཡ རཱགོ, ཏེན ཀཱམཔཱརིཙརིཡཡཱཙནཾ, ཏངྑཎཝིཛཱནནནྟི ཨིམཱནེཏྠ པཉྩ ཨངྒཱནི.

ཨཏྟཀཱམཔཱརིཙརིཡསིཀྑཱཔདཝཎྞནཱ ནིཊྛིཏཱ.

༥. སཉྩརིཏྟསིཀྑཱཔདཝཎྞནཱ

༢༩༦. པཉྩམེ པཎྜིཙྩེནཱཏི སབྷཱཝཉཱཎེན. གཏིམནྟཱཏི སབྷཱཝཉཱཎགཏིཡུཏྟཱ. ཝེཡྻཏྟིཡེནཱཏི ཨིཏྠིཀཏྟབྦེསུ སིཀྑིཏཉཱཎེན. མེདྷཱཡཱཏི ཨསིཀྑིཏེསུཔི ཏཾཨིཏྠིཀཏྟབྦེསུ ཋཱནུཔྤཏྟིཡཱ པཉྙཱཡ. ཚེཀཱཏི ཀཱཡེན པཙནཱདིཀུསལཱ.

ཨཱཝཧནཾ ¶ ཨཱཝཱཧོ, དཱརིཀཱཡ གཧཎཾ. ཝིདྷིནཱ པརཀུལེ ཝཧནཾ པེསནཾ ཝིཝཱཧོ, དཱརིཀཱཡ དཱནཾ.

༢༩༧. རནྡྷཱཔནཾ བྷཏྟཔཙཱཔནཾ. བྱཉྫནཱདིསམྤཱདནཾ པཙཱཔནཾ. ན ཨུཔཱཧཊནྟི ན དིནྣཾ. ཀཡོ ནཱམ གཧཎཾ. ཝིཀྐཡོ ནཱམ དཱནཾ. ཏདུབྷཡཾ སངྒཧེཏྭཱ ‘‘ཝོཧཱརོ’’ཏི ཝུཏྟཾ.

༣༠༠. ‘‘ཨབྦྷུཏཾ ཀཱཏུཾ ན ཝཊྚཏཱི’’ཏི ཨིམིནཱ དུཀྐཊཾ ཧོཏཱིཏི དཱིཔེཏི. ‘‘པརཱཛིཏེན དཱཏབྦ’’ནྟི ཝུཏྟཏྟཱ ཨདེནྟོ དྷུརནིཀྑེཔེན ཀཱརེཏབྦོ. ཨཙིརཀཱལེ ¶ ཨདྷིཀཱརོ ཨེཏསྶ ཨཏྠཱིཏི ཨཙིརཀཱལཱདྷིཀཱརིཀཾ, སཉྩརིཏྟཾ. ‘‘ཨཙིརཀཱལཱཙཱརིཀ’’ནྟི ཝཱ པཱཋོ. ཨཙིརཀཱལེ ཨཱཙཱརོ ཨཛ྄ཛྷཱཙཱརོ ཨེཏསྶཱཏི ཡོཛནཱ.

༣༠༡. ཀིཉྩཱཔི ཨེཧིབྷིཀྑུཨཱདིཀཱཔི སཉྩརིཏྟཱདིཔཎྞཏྟིཝཛྫཾ ཨཱཔཏྟིཾ ཨཱཔཛྫནྟི, ཏེསཾ པན ཨསབྦཀཱལིཀཏྟཱ, ཨཔྤཀཏྟཱ ཙ ཨིདྷཱཔི ཉཏྟིཙཏུཏྠེནེཝ ཀམྨེན ཨུཔསམྤནྣཾ སནྡྷཱཡ ‘‘ཡྭཱཡ’’ནྟིཨཱདིཔདབྷཱཛནམཱཧ. སཉྩརཎཾ སཉྩརོ, སོ ཨེཏསྶ ཨཏྠཱིཏི སཉྩརཱི, ཏསྶ བྷཱཝོ སཉྩརིཏྟཾ. ཏེནཱཧ ‘‘སཉྩརཎབྷཱཝ’’ནྟི. སཉྩརཏཱིཏི སཉྩརཎོ, པུགྒལོ, ཏསྶ བྷཱཝོ སཉྩརཎབྷཱཝོ, ཏཾ ཨིཏྠིཔུརིསཱནཾ ཨནྟརེ སཉྩརཎབྷཱཝནྟི ཨཏྠོ.

ཛཱཡཱབྷཱཝེཏི བྷརིཡབྷཱཝཱཡ. ཛཱརབྷཱཝེཏི སཱམིབྷཱཝཱཡ, ཏཾནིམིཏྟནྟི ཨཏྠོ. ནིམིཏྟཏྠེ ཧི ཨེཏཾ བྷུམྨཝཙནཾ. ཀིཉྩཱཔི ‘‘ཛཱརཏྟནེ’’ཏི པདསྶ པདབྷཱཛནེ ‘‘ཛཱརཱི བྷཝིསྶསཱི’’ཏི (པཱརཱ. ༣༠༢) ཨིཏྠིལིངྒཝསེན པདབྷཱཛནཾ ཝུཏྟཾ, ‘‘སཉྩརིཏྟཾ སམཱཔཛྫེཡྻཱ’’ཏི པདསྶ པན ནིདྡེསེ ‘‘ཨིཏྠིཡཱ ཝཱ པཧིཏོ པུརིསསྶ སནྟིཀེ གཙྪཏི, པུརིསེན ཝཱ པཧིཏོ ཨིཏྠིཡཱ སནྟིཀེ གཙྪཏཱི’’ཏི ཝུཏྟཏྟཱ པུརིསསྶཱཔི སནྟིཀེ ཝཏྟབྦཱཀཱརཾ དསྶེཏུཾ ‘‘ཛཱརཏྟནེ’’ཏི ནིདྡེསསྶ ཨིཏྠིཔུརིསསཱདྷཱརཎཏྟཱ ‘‘ཨིཏྠིཡཱ མཏིཾ པུརིསསྶ ཨཱརོཙེནྟོ ཛཱརཏྟནེ ཨཱརོཙེཏཱི’’ཏི ཝུཏྟཾ. པཱལི༹ཡཾ པན པུརིསསྶ མཏིཾ ཨིཏྠིཡཱ ཨཱརོཙནཝསེནེཝ པདདྭཡེཔི ཡོཛནཱ ཀཏཱ, ཏདནུསཱརེན ཨིཏྠིཡཱ མཏིཾ པུརིསསྶ ཨཱརོཙནཱཀཱརོཔི སཀྐཱ ཝིཉྙཱཏུནྟི.

ཨིདཱནི པཱལི༹ཡཾ ཝུཏྟནཡེནཱཔི ཨཏྠཾ དསྶེནྟོ ‘‘ཨཔིཙཱ’’ཏིཨཱདིམཱཧ. ‘‘པཏི བྷཝིསྶསཱི’’ཏི ཨིདཾ ཛཱཡཱསདྡསྶ ཨིཏྠིལིངྒནིཡམཏོ པུརིསཔརིཡཱཡེན ཝུཏྟཾ, ནིབདྡྷསཱམིཀོ བྷཝིསྶསཱིཏི ཨཏྠོ. ཛཱརོ བྷཝིསྶསཱིཏི མིཙྪཱཙཱརབྷཱཝེན ཨུཔགཙྪནཀོ བྷཝིསྶསཱིཏི ཨདྷིཔྤཱཡོ.

༣༠༣. སེརིཝིཧཱརནྟི ¶ སཙྪནྡཙཱརཾ. ཨཏྟནོ ཝསནྟི ཨཏྟནོ ཨཱཎཾ. གོཏྟཝནྟེསུ གོཏྟ-སདྡོ, དྷམྨཙཱརཱིསུ ཙ དྷམྨ-སདྡོ ཝཏྟཏཱིཏི ཨཱཧ ‘‘སགོཏྟེཧཱི’’ཏིཨཱདི. ཏཏྠ སགོཏྟེཧཱིཏི སམཱནགོཏྟེཧི. སཧདྷམྨིཀེཧཱིཏི ཨེཀསྶ སཏྠུ སཱསནེ སཧཙརིཏབྦདྷམྨེཧི, སམཱནཀུལདྷམྨེཧི ¶ ཝཱ. ཏེནེཝཱཧ ‘‘ཨེཀཾ སཏྠཱར’’ནྟིཨཱདི. ཨེཀགཎཔརིཡཱཔནྣེཧཱིཏི མཱལཱཀཱརཱདིཨེཀགཎཔརིཡཱཔནྣེཧི.

སསྶཱམིཀཱ སཱརཀྑཱ. ཡསྶཱ གམནེ རཉྙཱ དཎྜོ ཋཔིཏོ, སཱ སཔརིདཎྜཱ. པཙྪིམཱནཾ དྭིནྣནྟི སཱརཀྑསཔརིདཎྜཱནཾ. མིཙྪཱཙཱརོ ཧོཏཱིཏི ཏཱསུ གཏཔུརིསཱནཾ ཝིཡ ཏཱསམྤི མིཙྪཱཙཱརོ ཧོཏི སསྶཱམིཀབྷཱཝཏོ. ན ཨིཏརཱསནྟི མཱཏུརཀྑིཏཱདཱིནཾ ཨཊྛནྣཾ མིཙྪཱཙཱརོ ནཏྠི ཨསྶཱམིཀཏྟཱ, ཏཱསུ གཏཱནཾ པུརིསཱནམེཝ མིཙྪཱཙཱརོ ཧོཏི མཱཏཱདཱིཧི རཀྑིཏཏྟཱ. པུརིསཱ ཧི པརེཧི ཡེཧི ཀེཧིཙི གོཔིཏཾ ཨིཏྠིཾ གནྟུཾ ན ལབྷནྟི, ཨིཏྠིཡོ པན ཀེནཙི པུརིསེན བྷརིཡཱབྷཱཝེན གཧིཏཱཝ པུརིསནྟརཾ གནྟུཾ ན ལབྷནྟི, ན ཨིཏརཱ ཨཏྟནོ ཕསྶསྶ སཡཾ སཱམིཀཏྟཱ. ན ཧི མཱཏཱདཡོ སཡཾ ཏཱསཾ ཕསྶཱནུབྷཝནཏྠཾ ཏཱ རཀྑནྟི, ཀེཝལཾ པུརིསགམནམེཝ ཏཱསཾ ཝཱརེནྟི. ཏསྨཱ ཀེནཙི ཨཔརིགྒཧིཏཕསྶཏྟཱ, ཨཏྟནོ ཕསྶཏྟཱ ཙ ཨིཏྠཱིནཾ ན མིཙྪཱཙཱརོ, པུརིསཱནཾ པན པརེཧི ཝཱརིཏེ ཨཏྟནོ ཨསནྟཀཊྛཱནེ པཝིཊྛཏྟཱ མིཙྪཱཙཱརོཏི ཝེདིཏབྦོ.

བྷོགེནཱཏི བྷོགཧེཏུ. ཨུདཔཏྟཾ ཨཱམསིཏྭཱ གཧིཏཱ ཨོདཔཏྟཀིནཱི. དྷཛ-སདྡེན སེནཱ ཨེཝ ཨུཔལཀྑིཏཱཏི ཨཱཧ ‘‘ཨུསྶིཏདྡྷཛཱཡཱ’’ཏིཨཱདི.

༣༠༥. བཧིདྡྷཱ ཝིམཊྛནྟི ཨཉྙཏྠ ཨཱརོཙིཏཾ. ཏཾ ཀིརིཡཾ སམྤཱདེསྶཏཱིཏི ཏསྶཱ ཨཱརོཙེཏྭཱ ཏཾ ཀིཙྩཾ སམྤཱདེཏུ ཝཱ མཱ ཝཱ, ཏཾ ཀིརིཡཾ སམྤཱདནེ སཱམཏྠིཡཾ སནྡྷཱཡ ཝུཏྟཾ. དཱརཀཾ, དཱརིཀཉྩ ཨཛཱནཱཔེཏྭཱ མཱཏཱཔིཏུཨཱདཱིཧི མཱཏཱཔིཏུཨཱདཱིནཉྙེཝ སནྟིཀཾ སཱསནེ པེསིཏེཔི པཊིགྒཎྷནཝཱིམཾསནཔཙྩཱཧརཎསངྑཱཏཱཡ ཏིཝངྒསམྤཏྟིཡཱ སངྒྷཱདིསེསོ ཧོཏི ཨེཝཱཏི དཊྛབྦཾ.

ཡཾ ཨུདྡིསྶ སཱསནཾ པེསིཏཾ, ཏཾ ཨེཝ སནྡྷཱཡ ཏསྶཱ མཱཏུཨཱདཱིནཾ ཨཱརོཙིཏེཔི ཁེཏྟམེཝ ཨོཏིཎྞབྷཱཝཾ དསྶེཏུཾ ‘‘བུདྡྷཾ པཙྩཀྑཱམཱི’’ཏིཨཱདི ཨུདཱཧཊཾ, ཨིདཉྩ ཝཙནབྱཏྟཡཧེཏུབྱཏྟཡཱནཾ བྷེདེཔི བྱཏྟཡསཱམཉྙཏོ ཨུདཱཧཊནྟི དཊྛབྦཾ. ཏམྤི ཨུདཱཧརཎདོསཾ པརིཧརིཏྭཱ སུཏྟཱནུལོམཏཾ དསྶེཏུཾ ‘‘ཏཾ པནཱ’’ཏིཨཱདི ཝུཏྟཾ. ཨིམིནཱ སམེཏཱིཏི ཨེཏྠཱཡམདྷིཔྤཱཡོ ¶ – ཡཐཱ སཡཾ ཨནཱརོཙེཏྭཱ ¶ ཨཉྙེསཾ ཨནྟེཝཱསིཀཱདཱིནཾ ཝཏྭཱ ཝཱིམཾསཱཔེཏྭཱ པཙྩཱཧརནྟསྶ ནཏྠི ཝིསངྐེཏོ, ཨེཝཾ ཏསྶཱ སཡཾ ཨནཱརོཙེཏྭཱ ཨཱརོཙནཏྠཾ མཱཏུཨཱདཱིནཾ ཝདནྟསྶཱཔི མཱཏུཨཱདཡོ ཏཾ ཀིརིཡཾ སམྤཱདེནྟུ ཝཱ མཱ ཝཱ. ཡདི ཧི ཏེསཾ མཱཏུཨཱདཱིནཾ ཏུཎྷཱིབྷཱུཏབྷཱཝམྤི པཙྩཱཧརཏི, ཝིསངྐེཏོ ནཏྠཱིཏི.

གྷརཀིཙྩཾ ནེཏཱིཏི གྷརཎཱི. ཨཉྙཏརཾ ཝདནྟསྶ ཝིསངྐེཏཾ ཨདིནྣཱདཱནཱདཱིསུ ཨཱཎཏྟིཡཾ ཝཏྠུསངྐེཏོ ཝིཡཱཏི ཨདྷིཔྤཱཡོ. མཱུལཊྛཱནཉྩ ཝསེནཱཏི ཨེཏྠ པུརིསསྶ མཱཏུཨཱདཡོ སཱསནཔེསནེ མཱུལབྷཱུཏཏྟཱ ‘‘མཱུལཊྛཱ’’ཏི ཝུཏྟཱ.

༣༢༢. པཱལི༹ཡཾ མཱཏུརཀྑིཏཱཡ མཱཏཱ བྷིཀྑུཾ པཧིཎཏཱིཏི ཨེཏྠ ཨཏྟནོ ཝཱ དྷཱིཏུ སནྟིཀཾ ‘‘ཨིཏྠནྣཱམསྶ བྷརིཡཱ ཧོཏཱུ’’ཏི བྷིཀྑུཾ པཧིཎཏི, པུརིསསྶ ཝཱ ཏསྶ ཉཱཏཀཱནཾ ཝཱ སནྟིཀཾ ‘‘མམ དྷཱིཏཱ ཨིཏྠནྣཱམསྶ བྷརིཡཱ ཧོཏཱུ’’ཏི པཧིཎཏཱིཏི གཧེཏབྦཾ. ཨེསེཝ ནཡོ སེསེསུཔི. པུབྦེ ཝུཏྟནཡཏྟཱཏི པཋམསངྒྷཱདིསེསེ ཝུཏྟནཡཏྟཱ.

༣༣༨. ཨནྟེ ཨེཀེནཱཏི ཨེཀེན པདེན. ཨེཏྟོཝ པཀྐམཏཱིཏི ཨཔཙྩཱཧརིཏྭཱ ཏཏོཝ པཀྐམཏི. ‘‘ཨནབྷིནནྡིཏྭཱ’’ཏི ཨིདཾ ཏཐཱ པཊིཔཛྫམཱནཾ སནྡྷཱཡ ཝུཏྟཾ. སཏིཔི ཨབྷིནནྡནེ སཱསནཾ ཨནཱརོཙེནྟོ པན ན ཝཱིམཾསཏི ནཱམ. ཏཏིཡཔདེ ཝུཏྟནཡེནཱཏི ‘‘སོ ཏསྶཱ ཝཙནཾ ཨནབྷིནནྡིཏྭཱ’’ཏིཨཱདིནཱ ཝུཏྟནཡེན. པཱལི༹ཡཾ ཨནྟེཝཱསིཾ ཝཱིམཾསཱཔེཏྭཱཏི ‘‘ཨཡཾ ཏེསཾ ཝཏྟུཾ སམཏྠོ’’ཏི ཨནྟེཝཱསིནཱ ཝཱིམཾསཱཔེཏྭཱ. སཙེ པན སོ ཨནྟེཝཱསིཀོ ཏཾ ཝཙནཾ ཨཱདིཡིཏྭཱ ཏུཎྷཱི ཧོཏི, ཏསྶཱཔི ཏཾ པཝཏྟིཾ པཙྩཱཧརནྟསྶ ཨཱཙརིཡསྶ སངྒྷཱདིསེསོཝ མཱཏུཨཱདཱིསུ ཏུཎྷཱིབྷཱུཏེསུ ཏེསཾ ཏུཎྷིབྷཱཝཾ པཙྩཱཧརནྟསྶ ཝིཡཱཏི དཊྛབྦཾ.

པཱལི༹ཡཾ ཙཏུཏྠཝཱརེ ཨསཏིཔི གཙྪནྟོ སམྤཱདེཏི, ཨཱགཙྪནྟོ ཝིསཾཝཱདེཏི ཨནཱཔཏྟཱིཏི ཨཏྠཏོ ཨཱཔནྣམེཝཱཏིཀཏྭཱ ཝུཏྟཾ ‘‘ཙཏུཏྠེ ཨནཱཔཏྟཱི’’ཏི.

༣༤༠. ཀཱརུཀཱནནྟི ¶ ཝཌྜྷཀཱིཨཱདཱིནཾ ཏཙྪཀཨཡོཀཱརཏནྟཝཱཡརཛཀནྷཱཔིཏཀཱ པཉྩ ཀཱརཝོ ‘‘ཀཱརུཀཱ’’ཏི ཝུཙྩནྟི. ཨེཝརཱུཔེན…པེ… ཨནཱཔཏྟཱིཏི ཏཱདིསཾ གིཧིཝེཡྻཱཝཙྩམྤི ན ཧོཏཱིཏི ཀཏྭཱ ཝུཏྟཾ.

ཀཱཡཏོ སམུཊྛཱཏཱིཏི པཎྞཏྟིཾ ཝཱ ཨལཾཝཙནཱིཡབྷཱཝཾ ཝཱ ཏདུབྷཡཾ ཝཱ ཨཛཱནནྟསྶ ཀཱཡཏོ ¶ སམུཊྛཱཏི. ཨེས ནཡོ ཨིཏརདྭཡེཔི. ཨལཾཝཙནཱིཡཱ ཧོནྟཱིཏི ཨིཏྠཱི ཝཱ པུརིསོ ཝཱ ཨུབྷོཔི ཝཱ ཛཱཡཱབྷཱཝེ, སཱམིཀབྷཱཝེ ཙ ནིཀྑིཏྟཚནྡཏཱཡ ཨཙྩནྟཝིཡུཏྟཏྟཱ པུན ཨཉྙམཉྙཾ སམཱགམཏྠཾ ‘‘མཱ ཨེཝཾ ཨཀརིཏྠཱ’’ཏིཨཱདིནཱ ཝཙནཱིཡཏཱཡ ཝཏྟབྦཏཱཡ ཨལཾ ཨརཧཱཏི ཨལཾཝཙནཱིཡཱ, ཨལཾ ཝཱ ཀཏྟུཾ ཨརཧཾ སནྡྷཱནཝཙནམེཏེསུ ཨིཏྠིཔུརིསེསཱུཏི ཨལཾཝཙནཱིཡཱ, སནྡྷཱནཀཱརསྶ ཝཙནཾ ཝིནཱ ཨསངྒཙྪནཀཱ པརིཙྩཏྟཱཡེཝཱཏི ཨདྷིཔྤཱཡོ.

པཎྞཏྟིཾ པན ཛཱནིཏྭཱཏི ཨེཏྠ ཨལཾཝཙནཱིཡབྷཱཝཾ ཝཱཏི ཝཏྟབྦཾ. ཏེནེཝ མཱཏིཀཱཊྛཀཐཱཡཉྩ ‘‘ཏདུབྷཡཾ པན ཛཱནིཏྭཱ’’ཏིཨཱདི ཝུཏྟཾ. བྷིཀྑུཾ ཨཛཱནཱཔེཏྭཱ ཨཏྟནོ ཨདྷིཔྤཱཡཾ པཎྞེ ལིཁིཏྭཱ ‘‘ཨིམཾ པཎྞཾ ཨསུཀསྶ དེཧཱི’’ཏི དིནྣཾ ཧརནྟསྶ སཉྩརིཏྟཾ ན ཧོཏི. པཎྞཏྟིཨལཾཝཙནཱིཡབྷཱཝཨཛཱནནཝསེནེཝ ཧི ཨིམཾ སིཀྑཱཔདཾ ཨཙིཏྟཀཾ, ན སབྦེན སབྦཾ སཉྩརཎབྷཱཝམྤི ཨཛཱནནཝསེན, པཱལི༹ཡཉྩ ཨཊྛཀཐཱཡཉྩ ཨཱརོཙནམེཝ དསྶིཏཾ. ཏསྨཱ སནྡསྶནཏྠཾ ཉཏྭཱ པཎྞསནྡསྶནཝསེནཱཔི ཀཱཡེན ཝཱ ཝཱཙཱཡ ཝཱ ཨཱརོཙེནྟསྶེཝ ཨཱཔཏྟི ཧོཏཱིཏི གཧེཏབྦཾ.

༣༤༡. ཡཐཱ ཡཐཱ ཡེསུ ཡེསུ ཛནཔདེསཱུཏི པརིཙྩཏྟབྷཱཝཔྤཀཱསནཏྠཾ ཀཏྟབྦཾ པཎྞདཱནཉཱཏིཛནིསྶརཱདིཛཱནཱཔནཱདིཏཾཏཾདེསནིཡཏཾ པཀཱརཾ དསྶེཏི, ཨིདཉྩ ནིབདྡྷབྷརིཡཱབྷཱཝེན གཧིཏཾ སནྡྷཱཡ ཝུཏྟཾ. ཨཏྟནོ རུཙིཡཱ སངྒཏཱནཾ པན ཨིཏྠཱིནཾ, མུཧུཏྟིཀཱཡ ཙ པུརིསེ ཙིཏྟསྶ ཝིརཛྫནམེཝ ཨལཾཝཙནཱིཡབྷཱཝེ ཀཱརཎནྟི དཊྛབྦཾ. དུཊྛུལླཱདཱིསུཔཱིཏི ཨཱདི-སདྡེན ཨཏྟཀཱམསཉྩརིཏྟཱནི སངྒཎྷཱཏི, ཨེཏྠ པན པཱལི༹ཡཾ ཀིཉྩཱཔི ‘‘ཨིཏྠཱི ནཱམ མནུསྶིཏྠཱི ན ཡཀྑཱི’’ཏིཨཱདིནཱ མནུསྶིཏྠིཔུརིསཱ ན དསྶིཏཱ, ཏཐཱཔི ‘‘དས ཨིཏྠིཡོ མཱཏུརཀྑིཏཱ’’ཏིཨཱདིནཱ མནུསྶིཏྠཱིནཉྙེཝ དསྶིཏཏྟཱ པུརིསཱནམྤི ཏདནུགུཎཱནམེཝ གཧེཏབྦཏོ མནུསྶཛཱཏིཀཱཝ ¶ ཨིཏྠིཔུརིསཱ ཨིདྷཱདྷིཔྤེཏཱ. ཏསྨཱ ཡེསུ སཉྩརིཏྟཾ སམཱཔཛྫཏི, ཏེསཾ མནུསྶཛཱཏིཀཏཱ, ན ནཱལཾཝཙནཱིཡཏཱ, པཊིགྒཎྷན, ཝཱིམཾསན, པཙྩཱཧརཎཱནཱིཏི ཨིམཱནེཏྠ པཉྩ ཨངྒཱནི.

སཉྩརིཏྟསིཀྑཱཔདཝཎྞནཱ ནིཊྛིཏཱ.

༦. ཀུཊིཀཱརསིཀྑཱཔདཝཎྞནཱ

༣༤༢. ཚཊྛེ ཨེཏྟཀེནཱཏི ཨེཏྟཀེན དཱརུཨཱདིནཱ. ཨཔརིཙྪིནྣཔྤམཱཎཱཡོཏི ཨཔརིཙྪིནྣདཱརུཨཱདིཔམཱཎཱཡོ. མཱུལཙྪེཛྫཱཡཱཏི པརསནྟཀབྷཱཝཏོ མོཙེཏྭཱ ཨཏྟནོ ཨེཝ སནྟཀཀརཎཝསེནཱཏི ¶ ཨཏྠོ. ཨེཝཾ ཡཱཙཏོ ཨཉྙཱཏཀཝིཉྙཏྟིདུཀྐཊཉྩེཝ དཱསཔཊིགྒཧཎདུཀྐཊཉྩ ཧོཏི ‘‘དཱསིདཱསཔཊིགྒཧཎཱ པཊིཝིརཏོ ཧོཏཱི’’ཏི (དཱི. ནི. ༡.༡༠, ༡༩༤) ཝཙནཾ ནིསྶཱཡ ཨཊྛཀཐཱསུ པཊིཀྑིཏྟཏྟཱ. སཀཀམྨནྟི པཱཎཝདྷཀམྨཾ. ཨིདཉྩ པཱཎཱཏིཔཱཏདོསཔརིཧཱརཱཡ དུཀྐཊཾ ཝུཏྟཾ, ན ཝིཉྙཏྟིཔརིཧཱརཱཡ. ཨནིཡམེཏྭཱཔི ན ཡཱཙིཏབྦཱཏི སཱམཱིཙིདསྶནཏྠཾ ཝུཏྟཾ, སུདྡྷཙིཏྟེན པན ཧཏྠཀམྨཾ ཡཱཙནྟསྶ ཨཱཔཏྟི ནཱམ ནཏྠི. ཡདིཙྪཀཾ ཀཱརཱཔེཏུཾ ཝཊྚཏཱིཏི ‘‘ཧཏྠཀམྨཾ ཡཱཙཱམི, དེཐཱ’’ཏིཨཱདིནཱ ཨཡཱཙིཏྭཱཔི ཝཊྚཏི. སཀིཙྩཔསུཏམྤི ཨེཝཾ ཀཱརཱཔེནྟསྶ ཝིཉྙཏྟི ནཏྠི ཨེཝ, སཱམཱིཙིདསྶནཏྠཾ པན ཝིབྷཛིཏྭཱ ཝུཏྟཾ.

སབྦཀཔྤིཡབྷཱཝདཱིཔནཏྠནྟི སབྦསོ ཀཔྤིཡབྷཱཝདཱིཔནཏྠཾ. མཱུལཾ དེཐཱཏི ཝཏྟུཾ ཝཊྚཏཱིཏི ‘‘མཱུལཾ དསྶཱམཱ’’ཏི པཋམཾ ཝུཏྟཏྟཱ ཝིཉྙཏྟི ཝཱ མཱུལནྟི ཝཙནསྶ ཀཔྤིཡཱཀཔྤིཡཝཏྠུསཱམཉྙཝཙནཏྟེཔི ནིཊྛིཏབྷཏིཀིཙྩཱནཾ དཱཔནཏོ ཨཀཔྤིཡཝཏྠུསཱདིཡནཾ ཝཱ ན ཧོཏཱིཏི ཀཏྭཱ ཝུཏྟཾ. ཨནཛ྄ཛྷཱཝུཏྠཀནྟི ཨཔརིགྒཧིཏཾ.

མཉྩ…པེ… ཙཱིཝརཱདཱིནི ཀཱརཱཔེཏུཀཱམེནཱཔཱིཏིཨཱདཱིསུ ཙཱིཝརཾ ཀཱརཱཔེཏུཀཱམསྶ ཨཉྙཱཏཀཨཔྤཝཱརིཏཏནྟཝཱཡེཧི ཧཏྠཀམྨཡཱཙནཝསེན ཝཱཡཱཔནེ ཝིཉྙཏྟིཔཙྩཡཱ དུཀྐཊཱབྷཱཝེཔི ཙཱིཝརཝཱཡཱཔནསིཀྑཱཔདེན ཡཐཱརཧཾ པཱཙིཏྟིཡདུཀྐཊཱནི ཧོནྟཱིཏི ཝེདིཏབྦཾ. ཨཀཔྤིཡཀཧཱཔཎཱདི ན དཱཏབྦནྟི ཀཔྤིཡམུཁེན ལདྡྷམྤི ཧཏྠཀམྨཀརཎཏྠཱཡ ཨིམསྶ ¶ ཀཧཱཔཎཾ དེཧཱིཏི ཝཏྭཱ དཱནཾ ན ཝཊྚཏཱིཏི ཝུཏྟཾ. པུབྦེ ཀཏཀམྨསྶ དཱཔནེ ཀིཉྩཱཔི དོསོ ན དིསྶཏི, ཏཐཱཔི ཨསཱརུཔྤམེཝཱཏི ཝདནྟི. ཀཏཀམྨཏྠཱཡཔི ཀཱཏབྦཀམྨཏྠཱཡཔི ཀཔྤིཡཝོཧཱརེན པརིཡཱཡཏོ བྷཏིཾ དཱཔེནྟསྶ ནཏྠི དོསོ. ཝཏྟནྟི ཙཱརིཏྟཾ, ཨཱཔཏྟི ན ཧོཏཱིཏི ཨདྷིཔྤཱཡོ.

ཀཔྤིཡཾ ཀཱརཱཔེཏྭཱ པཊིགྒཧེཏབྦཱནཱིཏི སཱཁཱཡ མཀྑིཀབཱིཛནེན པཎྞཱདིཙྪེདེ བཱིཛགཱམཀོཔནསྶ ཙེཝ ཏཏྠ ལགྒརཛཱདིཨཔྤཊིགྒཧིཏསྶ ཙ པརིཧཱརཏྠཱཡ ཝུཏྟཾ. ཏདུབྷཡཱསངྐཱཡ ཨསཏི ཏཐཱ ཨཀརཎེ དོསོ ནཏྠི. ནདཱིཡཱདཱིསུ ཨུདཀསྶ ཨཔརིགྒཧིཏཏཱཡ ‘‘ཨཱཧརཱཏི ཝཏྟུཾ ཝཊྚཏཱི’’ཏི ཝུཏྟཾ. ‘‘ན ཨཱཧཊཾ པརིབྷུཉྫིཏུ’’ནྟི ཝཙནཏོ ཝིཉྙཏྟིཡཱ ཨཱཔནྣཾ དུཀྐཊཾ དེསེཏྭཱཔི ཏཾ ཝཏྠུཾ པརིབྷུཉྫནྟསྶ པུན པརིབྷོགེ དུཀྐཊམེཝ, པཉྩནྣམྤི སཧདྷམྨིཀཱནཾ ན ཝཊྚཏི. ‘‘ཨལཛྫཱིཧི པན བྷིཀྑཱུཧི ཝཱ སཱམཎེརེཧི ཝཱ ཧཏྠཀམྨཾ ན ཀཱརེཏབྦ’’ནྟི སཱམཉྙཏོ ཝུཏྟཏྟཱ ཨཏྟནོ ཨཏྠཱཡ ཡཾཀིཉྩི ཧཏྠཀམྨཾ ཀཱརེཏུཾ ན ཝཊྚཏི. ཡཾ པན ¶ ཨལཛྫཱི ནིཝཱརིཡམཱནོཔི བཱིཛནཱདིཾ ཀརོཏི, ཏཏྠ དོསོ ནཏྠི. ཙེཏིཡཀམྨཱདཱིནི པན ཏེཧི ཀཱརཱཔེཏུཾ ཝཊྚཏི. ཨེཏྠ ཙ ‘‘ཨལཛྫཱིཧི སཱམཎེརེཧཱི’’ཏི ཝུཏྟཏྟཱ ‘‘སཉྩིཙྩ ཨཱཔཏྟིཾ ཨཱཔཛྫཏཱི’’ཏིཨཱདི (པརི. ༣༥༩) ཨལཛྫཱིལཀྑཎཾ ཨུཀྐཊྛཝསེན ཨུཔསམྤནྣེ པཊིཙྩ ཨུཔལཀྑཎཏོ ཝུཏྟནྟི ཏཾལཀྑཎཝིརཧིཏཱནཾ སཱམཎེརཱདཱིནཾ ལིངྒཏྠེནཀགོཏྲབྷུཔརིཡོསཱནཱནཾ བྷིཀྑུཔཊིཉྙཱནཾ དུསྶཱིལཱནམྤི སཱདྷཱརཎཝསེན ཨལཛྫིཏཱལཀྑཎཾ ཡཐཱཝིཧིཏཔཊིཔཏྟིཡཾ སཉྩིཙྩ ཨཏིཊྛནམེཝཱཏི གཧེཏབྦཾ.

ཨཱཧརཱཔེནྟསྶ དུཀྐཊནྟི ཝིཉྙཏྟིཀྑཎེ ཝིཉྙཏྟིཔཙྩཡཱ, པཊིལཱབྷཀྑཎེ གོཎཱནཾ སཱདིཡནཔཙྩཡཱ ཙ དུཀྐཊཾ. གོཎཉྷི ཨཏྟནོ ཨཏྠཱཡ ཨཝིཉྙཏྟིཡཱ ལདྡྷམྤི སཱདིཏུཾ ན ཝཊྚཏི ‘‘ཧཏྠིགཝསྶཝལ༹ཝཔཊིགྒཧཎཱ པཊིཝིརཏོ ཧོཏཱི’’ཏི (དཱི. ནི. ༡.༡༠, ༡༩༤) ཝུཏྟཏྟཱ. ཏེནེཝཱཧ ‘‘ཉཱཏིཔཝཱརིཏཊྛཱནཏོཔི མཱུལཙྪེཛྫཱཡ ཡཱཙིཏུཾ ན ཝཊྚཏཱི’’ཏི. ཨེཏྠ ཙ ཝིཉྙཏྟིདུཀྐཊཱབྷཱཝེཔི ཨཀཔྤིཡཝཏྠུཡཱཙནེཔི པཊིགྒཧཎེཔི དུཀྐཊམེཝ. རཀྑིཏྭཱཏི ཙོརཱདིཨུཔདྡཝཏོ རཀྑིཏྭཱ. ཛགྒིཏྭཱཏི ཏིཎདཱནཱདཱིཧི པོསེཏྭཱ.

ཉཱཏིཔཝཱརིཏཊྛཱནེ པན ཝཊྚཏཱིཏི སཀཊསྶ སམྤཊིཙྪིཏབྦཏྟཱ མཱུལཙྪེཛྫཝསེན ཡཱཙིཏུཾ ཝཊྚཏི. ཏཱཝཀཱལིཀཾ ཝཊྚཏཱིཏི ཨུབྷཡཏྠཱཔི ཝཊྚཏཱིཏི ཨཏྠོ ¶ . ཝཱསིཨཱདཱིནི པུགྒལིཀཱནིཔི ཝཊྚནྟཱིཏི ཨཱཧ ‘‘ཨེས ནཡོ ཝཱསཱི’’ཏིཨཱདི. ཝལླིཨཱདཱིསུ ཙ པརཔརིགྒཧིཏེསུ ཙ ཨེསེཝ ནཡོཏི ཡོཛེཏབྦཾ. ‘‘གརུབྷཎྜཔྤཧོནཀེསུཡེཝཱ’’ཏི ཨིདཾ ཝིཉྙཏྟིཾ སནྡྷཱཡ ཝུཏྟཾ. ཨདིནྣཱདཱནེ པན ཏིཎསལཱཀཾ ཨུཔཱདཱཡ པརཔརིགྒཧིཏཾ ཐེཡྻཙིཏྟེན གཎྷཏོ ཨཝཧཱརོ ཨེཝ, བྷཎྜགྒྷེན ཀཱརེཏབྦོ. ཝལླིཨཱདཱིསཱུཏི ཨེཏྠ ཨཱདི-སདྡེན པཱལི༹ཨཱགཏཱནཾ (པཱརཱ. ༣༤༩) ཝེལུ༹ཨཱདཱིནཾ སངྒཧོ. ཏཏྠ ཡསྨིཾ པདེསེ ཧརིཏཱལཛཱཏིཧིངྒུལཱདི ཨཔྤཀམྤི མཧགྒྷཾ ཧོཏི, ཏཏྠ ཏཾ ཏཱལཔཀྐཔམཱཎཏོ ཨཱུནམྤི གརུབྷཎྜམེཝ, ཝིཉྙཱཔེཏུཉྩ ན ཝཊྚཏི.

སཱཏི ཝིཉྙཏྟི. པརིཀཐཱདཱིསུ ‘‘སེནཱསནཾ སམྦཱདྷ’’ནྟིཨཱདིནཱ (ཝིསུདྡྷི. ༡.༡༩) པརིཡཱཡེན ཀཐནཾ པརིཀཐཱ ནཱམ. ཨུཛུཀམེཝ ཨཀཐེཏྭཱ ‘‘བྷིཀྑཱུནཾ ཀིཾ པཱསཱདོ ན ཝཊྚཏཱི’’ཏིཨཱདིནཱ (ཝིསུདྡྷི. ༡.༡༩) ཨདྷིཔྤཱཡོ ཡཐཱཝིབྷཱུཏོ ཧོཏི, ཨེཝཾ བྷཱསནཾ ཨོབྷཱསོ ནཱམ. སེནཱསནཱདིཨཏྠཾ བྷཱུམིཔརིཀམྨཱདིཀརཎཝསེན པཙྩཡུཔྤཱདཱཡ ནིམིཏྟཀརཎཾ ནིམིཏྟཀམྨཾ ནཱམ. ཨུཀྐམནྟཱིཏི ཨཔགཙྪནྟི.

༣༤༤. མཎི ཀཎྛེ ཨསྶཱཏི མཎིཀཎྛོ. དེཝཝཎྞནྟི དེཝཏྟབྷཱཝཾ.

༣༤༥. པཱལི༹ཡཾ ¶ པཏྟེན མེ ཨཏྠོཏི (པཱརཱ. ༣༤༥) ཨནཏྠིཀམྤི པཏྟེན བྷིཀྑུཾ ཨེཝཾ ཝདཱཔེནྟོ བྷགཝཱ སོཏྠིཡཱ མནྟཔདཝསེན ཝདཱཔེསི. སོཔི བྷིཀྑུ བྷགཝཏཱ ཨཱཎཏྟཝཙནཾ ཝདེམཱིཏི ཨཝོཙ, ཏེནསྶ མུསཱ ན ཧོཏི. ཨཐ ཝཱ ‘‘པཏྟེན མེ ཨཏྠོ’’ཏི ཨིདཾ ‘‘པཏྟཾ དདནྟཱུ’’ཏི ཨིམིནཱ སམཱནཏྠནྟི དཊྛབྦཾ. ཨེས ནཡོ མཎིནཱ མེ ཨཏྠོཏི ཨེཏྠཱཔི. ཏསྨཱ ཨཉྙེསམྤི ཨེཝརཱུཔཾ ཀཐེནྟསྶ, ཀཐཱཔེནྟསྶ ཙ ཝཙནདོསོ ནཏྠཱིཏི གཧེཏབྦཾ.

༣༤༩. ཨུདྡྷཾམུཁཾ ལིཏྟཱ ཨུལླིཏྟཱ, ཚདནསྶ ཨནྟོ ལིམྤནྟཱ ཧི ཡེབྷུཡྻེན ཨུདྡྷཾམུཁཱ ལིམྤནྟི. ཏེནཱཧ ‘‘ཨནྟོལིཏྟཱ’’ཏི. ཨདྷོམུཁཾ ལིཏྟཱ ཨཝལིཏྟཱ. བཧི ལིམྤནྟཱ ཧི ཡེབྷུཡྻེན ཨདྷོམུཁཱ ལིམྤནྟི. ཏེནཱཧ ‘‘བཧིལིཏྟཱ’’ཏི.

བྱཉྫནཾ ཝིལོམིཏཾ བྷཝེཡྻཱཏི ཡསྨཱ ‘‘ཀཱརཡམཱནེནཱ’’ཏི ཨིམསྶ ཧེཏུཀཏྟུཝཙནསྶ ‘‘ཀརོནྟེནཱ’’ཏི ཨིདཾ སུདྡྷཀཏྟུཝཙནཾ པརིཡཱཡཝཙནཾ ན ¶ ཧོཏི, ཏསྨཱ ‘‘ཀརོནྟེན ཝཱ ཀཱརཱཔེནྟེན ཝཱ’’ཏི ཀཱརཡམཱནེནཱཏི བཧུཨུདྡེསཔདཱནུགུཎཾ ཀརཎཝཙནེནེཝ པདཏྠཾ ཀཏྭཱ ནིདྡེསེ ཀཏེ བྱཉྫནཾ ཝིརུདྡྷཾ བྷཝེཡྻ, ཏཐཱ པན པདཏྠཝསེན ཨདསྶེཏྭཱ སཱམཏྠིཡཏོ སིདྡྷམེཝཏྠཾ དསྶེཏུཾ པཙྩཏྟཝསེན ‘‘ཀརོནྟོ ཝཱ ཀཱརཱཔེནྟོ ཝཱ’’ཏི པདབྷཱཛནཾ ཝུཏྟནྟི ཨདྷིཔྤཱཡོ. ཏེནཱཧ ‘‘ཨཏྠམཏྟམེཝཱ’’ཏིཨཱདི. པདཏྠཏོ, སཱམཏྠིཡཏོ ཙ ལབྦྷམཱནཾ ཨཏྠམཏྟམེཝཱཏི ཨཏྠོ. ཡཉྷི ཀཱརཡམཱནེན པཊིཔཛྫིཏབྦཾ, ཏཾ ཀརོནྟེནཱཔི པཊིཔཛྫིཏབྦམེཝཱཏི ཨིདམེཏྠ སཱམཏྠིཡཾ དཊྛབྦཾ.

ཨུདྡེསོཏི སཱམིབྷཱཝེན ཨུདྡིསིཏབྦོ. སེཏཀམྨནྟི སེཏཝཎྞཀརཎཏྠཾ སེཏཝཎྞམཏྟིཀཱཡ ཝཱ སུདྷཱཡ ཝཱ ཀཏཏནུཀལེཔོ, ཏེན པན སཧ མིནིཡམཱནེ པམཱཎཱཏིཀྐནྟཾ ཧོཏཱིཏི སངྐཱནིཝཱརཎཏྠཾ ཨཱཧ ‘‘ཨབྦོཧཱརིཀ’’ནྟི. ཏེན པམཱཎཱཏིཀྐནྟཝོཧཱརཾ ན གཙྪཏི ཀུཊིཡཱ ཨནངྒཏྟཱཏི ཨདྷིཔྤཱཡོ.

ཡཐཱཝུཏྟསྶ ཨཏྠསྶ ཝུཏྟནཡཾ དསྶེནྟེན ‘‘ཝུཏྟཉྷེཏ’’ནྟིཨཱདི ཝུཏྟཾ. ཏཏྠ ‘‘ཨཱཡཱམཏོ ཙ ཝིཏྠཱརཏོ ཙཱ’’ཏི ཨཝཏྭཱ ‘‘ཨཱཡཱམཏོ ཝཱ ཝིཏྠཱརཏོ ཝཱ’’ཏི ཝིཀཔྤཏྠསྶ ཝཱ-སདྡསྶ ཝུཏྟཏྟཱ ཨེཀཏོབྷཱགེ ཝཌྜྷིཏེཔི ཨཱཔཏྟཱིཏི པཀཱསིཏནྟི ཨདྷིཔྤཱཡོ. ཏིཧཏྠཱཏི པཀཏིཧཏྠེན ཏིཧཏྠཱ, ‘‘ཝཌྜྷཀཱིཧཏྠེནཱ’’ཏིཔི (སཱརཏྠ. ཊཱི. ༢.༣༤༨-༣༤༩) ཝདནྟི, ཏཾ ‘‘ཡཏྠ…པེ… ཨཡཾ ཀུཊཱིཏི སངྑྱཾ ན གཙྪཏཱི’’ཏི ཨིམིནཱ ཝིརུཛ྄ཛྷཏི ཝཌྜྷཀཱིཧཏྠེན ཏིཧཏྠཱཡཔི ཀུཊིཡཱ པམཱཎཡུཏྟསྶ མཉྩསྶ སུཁེན པརིཝཏྟནཏོ. ‘‘ཨཱུནཀཙཏུཧཏྠཱ ཝཱ’’ཏི ཨིདཉྩ པཙྪིམཔྤམཱཎཡུཏྟསྶ ¶ མཉྩསྶ ཨཔརིཝཏྟནཱརཧཾ སནྡྷཱཡ ཝུཏྟཾ. ཡདི ཧི པཀཏིཧཏྠེན ཙཏུཧཏྠཱཡཔི ཀུཊིཡཱ པམཱཎཡུཏྟོ མཉྩོ ན པརིཝཏྟཏི, སཱ ཨཀུཊཱིཡེཝ, ཏསྨཱ མཉྩཔརིཝཏྟནམཏྟེནེཝ པམཱཎནྟི གཧེཏབྦཾ. པམཱཎཡུཏྟོ མཉྩོཏི སབྦཔཙྪིམཔྤམཱཎཡུཏྟོ མཉྩོ. སོ ཧི པཀཏིཝིདཏྠིཡཱ ནཝཝིདཏྠིཀོ, ཨཊྛཝིདཏྠིཀོ ཝཱ ཧོཏི, ཏཏོ ཁུདྡཀོ མཉྩོ སཱིསཱུཔདྷཱནཾ ཋཔེཏྭཱ པཱདཾ པསཱརེཏྭཱ ནིཔཛྫིཏུཾ ན པཧོཏི. པམཱཎཏོ ཨཱུནཏརམྤཱིཏི ཨུཀྐཊྛཔྤམཱཎཏོ ཨཱུནཏརམྤི, ཨིདཉྩ ཧེཊྛིམཔྤམཱཎཡུཏྟཱཡཔི ཝཏྠུདེསནཱ ཀཱཏབྦཱ, ན ཝཱཏི སནྡེཧནིཝཏྟནཏྠཾ ཝུཏྟཾ.

ཀལལལེཔོཏི ¶ ཀེནཙི སིལེསེན ཀཏལེཔོ, སེཏརཏྟཱདིཝཎྞཀརཎཏྠཾ ཀཏཏམྦམཏྟིཀཱདིཀལལལེཔོ ཝཱ. ཏེནཱཧ ‘‘ཨལེཔོ ཨེཝཱ’’ཏི. ཏེན ཏལཱ༹ཀཱདཱིསུ གྷནེན ཀལལེན ཀཏབཧལལེཔོ མཏྟིཀཱལེཔནེ ཨེཝ པཝིསཏི ལེཔཝོཧཱརགམནཏོཏི དསྶེཏི. པིཊྛསངྒྷཱཊོ ནཱམ དྭཱརབཱཧསངྑཱཏོ ཙཏུརསྶདཱརུསངྒྷཱཊོ, ཡཏྠ སཨུཏྟརཔཱསཾ ཀཝཱཊཾ ཨཔསྶཱཡ དྭཱརཾ པིདཧནྟི.

ཨོལོཀེཏྭཱཔཱིཏི ཨཔལོཀེཏྭཱཔི, ཨཔལོཀནཀམྨཝསེནཱཔཱིཏི ཨཏྠོ, ཨཔསདྡསྶཱཔི ཨོཨཱདེསོ ཀཏོཏི དཊྛབྦོ.

༣༥༣. ནིབདྡྷགོཙརཊྛཱནམྤཱིཏི ཨེཏྠ གོཙརཱཡ པཀྐམནྟཱནཾ ཧཏྠཱིནཾ ནིབདྡྷགམནམགྒོཔི སངྒཡ྄ཧཏི. ཨེཏེསནྟི སཱིཧཱདཱིནཾ. གོཙརབྷཱུམཱིཏི ཨཱམིསགྒཧཎཊྛཱནཾ. ན གཧིཏཱཏི པཊིཀྑིཔིཏབྦབྷཱཝེན ན གཧིཏཱ, ན ཝཱརིཏཱཏི ཨཏྠོ. སཱིཧཱདཱིནཉྷི གོཙརགྒཧཎཊྛཱནཾ ཧཏྠཱིནཾ ཝིཡ ནིབདྡྷཾ ན ཧོཏི, ཡཏྠ པན གོམཧིཾསཱདིཔཱཎཀཱ སནྟི, དཱུརམྤི ཏཾ ཋཱནཾ སཱིགྷཾ གནྟྭཱ གོཙརཾ གཎྷནྟི. ཏསྨཱ ཏེསཾ ཏཾ ན ཝཱརིཏཾ, ནིབདྡྷགམནམགྒོཝ ཝཱརིཏོ ཨཱསཡཏོ གམནམགྒསྶ ནིབདྡྷཏྟཱ. ཨཉྙེསམྤི ཝཱལཱ༹ནནྟི ཨརཉྙམཧིཾསཱདཱིནཾ. ཨཱརོགྱཏྠཱཡཱཏི ནིརུཔདྡཝཱཡ. སེསཱནཱིཏི པུབྦཎྞནིསྶིཏཱདཱིནི སོལ༹ས. ཏཱནི ཙ ཛནསམྨདྡམཧཱསམྨདྡཀུཊིཝིལོཔསརཱིརཔཱིལཱ༹དིཨུཔདྡཝེཧི སཨུཔདྡཝཱནཱིཏི ཝེདིཏབྦཱནི. ཨབྷིཧནནྟི ཨེཏྠཱཏི ཨབྦྷཱགྷཱཏཾ. ‘‘ཝེརིགྷར’’ནྟི ཝུཏྟམེཝཏྠཾ ཝིབྷཱཝེཏུཾ ‘‘ཙོརཱནཾ མཱརཎཏྠཱཡ ཀཏ’’ནྟི ཝུཏྟཾ.

དྷམྨགནྡྷིཀཱཏི དྷམྨེན དཎྜནཱིཏིཡཱ ཧཏྠཔཱདཱདིཙྪིནྡནགནྡྷིཀཱ. གནྡྷིཀཱཏི ཙ ཡསྶ ཨུཔརི ཧཏྠཱདིཾ ཋཔེཏྭཱ ཚིནྡནྟི, ཏཱདིསཾ དཱརུཁཎྜཕལཀཱཏི ཝུཙྩཏི, ཏེན ཙ ཨུཔལཀྑིཏཾ ཋཱནཾ. པཱལི༹ཡཾ རཙྪཱནིསྶིཏནྟི རཐིཀཱནིསྶིཏཾ. ཙཙྩརནིསྶིཏནྟི ཙཏུནྣཾ རཐིཀཱནཾ སནྡྷིནིསྶིཏཾ. སཀཊེནཱཏི ཨིཊྛཀསུདྷཱདིབྷཎྜཱཧརཎསཀཊེན.

པཱཙིནནྟི ¶ སེནཱསནསྶ བྷཱུམིཏོ པཊྛཱཡ ཡཱཝ ཏལཱཝསཱནཾ ཙིནིཏབྦཝཏྠུཀཾ ཨདྷིཊྛཱནཾ, ཡསྶ ཨུཔརི བྷིཏྟིཐམྦྷཱདཱིནི ཙ པཏིཊྛཔེནྟི. ཏེནཱཧ ‘‘ཏཏོ པཊྛཱཡཱ’’ཏིཨཱདི. ཀིཉྩཱཔི ཨིདྷ པུབྦཔཡོགསཧཔཡོགཱནཾ ཨདིནྣཱདཱནེ ཝིཡ ཝིསེསོ ནཏྠི, ཏཐཱཔི ཏེསཾ ཝིབྷཱགེན དསྶནཾ ¶ བྷིནྡིཏྭཱ ཝཱ པུན ཀཱཏབྦཱཏི ཨེཏྠ ཀུཊིཡཱ བྷེདེན པརིཙྪེདདསྶནཏྠཾ ཀཏཾ. ཏདཏྠཱཡཱཏི ཏཙྪནཏྠཱཡ. ཨེཝཾ ཀཏནྟི ཨདེསིཏཝཏྠུཀཾ པམཱཎཱཏིཀྐནྟཾ ཝཱ ཀཏཾ. པཎྞསཱལནྟི པཎྞཀུཊིཡཱ ཏིཎཔཎྞཙུཎྞསྶ ཨཔརིཔཏནཏྠཱཡ ཨནྟོ ཙ བཧི ཙ ལིམྤནྟི, ཏཾ སནྡྷཱཡེཏཾ ཝུཏྟཾ. ཏེནེཝ ཝཀྑཏི ‘‘པཎྞསཱལཾ ལིམྤཏཱི’’ཏི.

ཨནྟོལེཔེནེཝ ནིཊྛཱཔེཏུཀཱམཾ སནྡྷཱཡ ‘‘ཨནྟོལེཔེ ཝཱ’’ཏིཨཱདི ཝུཏྟཾ. བཧིལེཔེ ཝཱཏི ཨེཏྠཱཔི ཨེསེཝ ནཡོ. ཏསྨིནྟི དྭཱརབནྡྷེ ཝཱ ཝཱཏཔཱནེ ཝཱ ཋཔིཏེཏི ཡོཛེཏབྦཾ. ཏསྶོཀཱསནྟི ཏསྶ དྭཱརབནྡྷཱདིསྶ ཨོཀཱསབྷཱུཏཾ ཚིདྡཾ. པུན ཝཌྜྷེཏྭཱཏི པུབྦེ ཋཔིཏོཀཱསཾ ཁུདྡཀཾ ཙེ, ཏཾ དྭཱརཝཱཏཔཱནཙྪིདྡབྷེདནེན པུན ཝཌྜྷེཏྭཱ. ཋཔིཏེཏི དྭཱརབནྡྷེ ཝཱ གཝཀྑསངྒྷཱཊེ ཝཱ ཨཱནེཏྭཱ ཏསྨིཾ ཝཌྜྷིཏེ ཝཱ ཨཝཌྜྷིཏེ ཝཱ ཚིདྡེ པཏིཊྛཱཔིཏེ. ལེཔོ ན གྷཊཱིཡཏཱིཏི སམནྟཏོ དིནྣོ ལེཔོ ཏཐཱ ཋཔིཏེན དྭཱརབནྡྷནེན ཝཱ ཝཱཏཔཱནེན ཝཱ སདྡྷིཾ ན གྷཊཱིཡཏི, ཨེཀཱབདྡྷཾ ན ཧོཏཱིཏི ཝུཏྟཾ ཧོཏི. ཏནྟི དྭཱརབནྡྷཾ ཝཱ ཝཱཏཔཱནཾ ཝཱ. པཋམམེཝ སངྒྷཱདིསེསོཏི ཏེསཾ སམནྟཏོ པུབྦེཝ ལེཔསྶ གྷཊེཏྭཱ ནིཊྛཱཔིཏཏྟཱ དྭཱརབནྡྷཝཱཏཔཱནཱནཾ ཋཔནཏོ པུབྦེ ཨེཝ སངྒྷཱདིསེསོ.

ལེཔགྷཊནེནེཝཱཏི ཨིཊྛཀཱཧི ཀཏཝཱཏཔཱནཱདཱིནི ཝིནཱ སམནྟཱ ལེཔགྷཊནེནེཝ ཨཱཔཏྟི ཝཱཏཔཱནཱདཱིནཾ ཨལེཔོཀཱསཏྟཱ, ཨིཊྛཀཱཧི ཀཏཏྟཱ ཝཱ, ཝཱཏཔཱནཱདཱིསུཔི ལེཔསྶ བྷིཏྟིལེཔེན སདྡྷིཾ གྷཊནེནེཝཱཏིཔི ཨཏྠཾ ཝདནྟི. ཏཏྠཱཏི པཎྞསཱལཱཡཾ. ཨཱལོཀཏྠཱཡ ཨཊྛངྒུལམཏྟཾ ཋཔེཏྭཱ ལིམྤཏཱིཏི དཱརུཀུཊྚསྶ དཱརཱུནམནྟརཱ ཨཊྛངྒུལམཏྟཾ ཝིཝརཾ ཡཱཝ ལིམྤཏི, ཏཱཝ ཨཱལོཀཏྠཱཡ ཋཔེཏྭཱ ཨཝསེསཾ སཀུཊྚཙྪདནཾ ལིམྤཏི, པཙྪཱ ཨེཏཾ ཝིཝརཾ ལིམྤིསྶཱམཱིཏི ཨེཝཾ ཋཔནེ ཨནཱཔཏྟཱིཏི ཨདྷིཔྤཱཡོ. སཙེ པན ཨེཝཾ ཨཀཏྭཱ སབྦདཱཔི ཨཱལོཀཏྠཱཡ ཝཱཏཔཱནཝསེན ཋཔེཏི, ཝཱཏཔཱནདྭཱརསངྒྷཱཊེ གྷཊིཏེ ལེཔོ ཙ གྷཊཱིཡཏི, པཋམམེཝ སངྒྷཱདིསེསོཏི དསྶེནྟོ ཨཱཧ ‘‘སཙེ’’ཏིཨཱདི. མཏྟིཀཱཀུཊྚམེཝ མཏྟིཀཱལེཔསངྑྱཾ གཙྪཏཱིཏི ཨཱཧ ‘‘སཙེ མཏྟིཀཱཡ ཀུཊྚཾ ཀརོཏི, ཚདནལེཔེན སདྡྷིཾ གྷཊནེ ཨཱཔཏྟཱི’’ཏི. ཨུབྷིནྣཾ ཨནཱཔཏྟཱིཏི པུརིམསྶ ལེཔསྶ ཨགྷཊིཏཏྟཱ དུཏིཡསྶ ཨཏྟུདྡེསིཀཏཱཡ ཨསམྦྷཝཏོ.

༣༥༤. ཨཱཔཏྟིབྷེདདསྶནཏྠནྟི ¶ ཏཏྠ ‘‘སཱརམྦྷེ ཙ ཨཔརིཀྐམནེ ཙ དུཀྐཊཾ ཨདེསིཏཝཏྠུཀཏཱཡ ¶ , པམཱཎཱཏིཀྐནྟཏཱཡ ཙ སངྒྷཱདིསེསོ’’ཏི ཨེཝཾ ཨཱཔཏྟིཡེཝ ཝིབྷཱགདསྶནཏྠཾ.

༣༦༡. ཨནིཊྛིཏེ ཀུཊིཀམྨེཏི ལེཔཔརིཡོསཱནེ ཀུཊིཀམྨེ ཨེཀཔིཎྜམཏྟེནཔི ཨནིཊྛིཏེ. ‘‘ཨཉྙསྶ པུགྒལསྶ ཝཱ’’ཏི ཨིདཾ མཱུལཊྛསྶ ཨནཱཔཏྟིདསྶནཏྠཾ ཝུཏྟཾ. ཡེན པན ལདྡྷཾ, ཏསྶཱཔི ཏཾ ནིཊྛཱཔེནྟསྶ ‘‘པརེཧི ཝིཔྤཀཏཾ ཨཏྟནཱ པརིཡོསཱཔེཏི, ཨཱཔཏྟི སངྒྷཱདིསེསསྶཱ’’ཏིཨཱདིཝཙནཏོ (པཱརཱ. ༣༦༣) ཨཱཔཏྟིཡེཝ. པུབྦེ ཀཏཀམྨམྤི ལདྡྷཀཱལཏོ པཊྛཱཡ ཨཏྟནོ ཨཏྠཱཡེཝ ཀཏཾ ནཱམ ཧོཏི, ཏསྨཱ ཏེནཱཔི སངྒྷསྶ ཝཱ སཱམཎེརཱདཱིནཾ ཝཱ དཏྭཱ ནིཊྛཱཔེཏབྦཾ. ‘‘ཨཉྙསྶ ཝཱ’’ཏི ཨིདཾ ཨནུཔསམྤནྣཾཡེཝ སནྡྷཱཡ ཝུཏྟནྟི གཧེཏབྦཾ, ཀེཙི པན ‘‘པརཏོ ལདྡྷཱཡ ཀུཊིཡཱ ནིཊྛཱཔནེ ཨནཱཔཏྟིཨཱདིཏོ པཊྛཱཡ ཨཏྟནོ ཨཏྠཱཡ ཨཀཏཏྟཱ’’ཏི ཝདནྟི. ཨཔཙིནིཏབྦཱཏི ཡཱཝ པཱཙིནཱ ཝིདྡྷཾསེཏབྦཱ. བྷཱུམིསམཾ ཀཏྭཱཏི པཱཙིནཏལཱཝསཱནཾ ཀཏྭཱ.

༣༦༤. ལེཎནྟི པབྦཏལེཎཾ. ན ཧེཏྠ ལེཔོ གྷཊཱིཡཏཱིཏི ཚདནལེཔསྶ ཨབྷཱཝཏོ ཝུཏྟཾ, ཝིསུཾ ཨེཝ ཝཱ ཨནུཉྙཱཏཏྟཱ. སཙེ ལེཎསྶ ཨནྟོ ཨུཔརིབྷཱགེ ཙིཏྟཀམྨཱདིཀརཎཏྠཾ ལེཔཾ དེནྟི, ཨུལླིཏྟཀུཊིསངྑྱཾ ན གཙྪཏི, ཝཊྚཏི ཨེཝ. ཨིཊྛཀཱདཱིཧི ཀཏཾ ཙཏུརསྶཀཱུཊཱགཱརསཎྛཱནཾ ཨེཀཀཎྞིཀཱབདྡྷཾ ནཱཏིཨུཙྩཾ པཊིསྶཡཝིསེསཾ ‘‘གུཧཱ’’ཏི ཝདནྟི, ཏཱདིསཾ མཧནྟམྤི ཨུལླིཏྟཱཝལིཏྟཾ ཀརོནྟསྶ ཨནཱཔཏྟི. བྷཱུམིགུཧནྟི ཨུམངྒགུཧཾ.

ཨཊྛཀཐཱསཱུཏི ཀུཀྐུཊཙྪིཀགེཧནྟིཨཱདཱིསུ ཨཊྛཀཐཱསུ ཏིཎཀུཊིཀཱ ཀུཀྐུཊཙྪིཀགེཧནྟི ཝཏྭཱ པུན ཏཾ ཝིཝརནྟེཧི ཨཊྛཀཐཱཙརིཡེཧི ཚདནཾ དཎྜཀེཧི…པེ… ཝུཏྟཱཏི ཡོཛནཱ དཊྛབྦཱ. ཏཏྠ དཎྜཀེཧི ཛཱལབདྡྷཾ ཀཏྭཱཏི དཱིགྷཏོ, ཏིརིཡཏོ ཙ ཋཔེཏྭཱ ཝལླིཡཱདཱིཧི བདྡྷདཎྜཀེཧི ཛཱལཾ ཝིཡ ཀཏྭཱ. སོ ཙཱཏི ཨུལླིཏྟཱདིབྷཱཝོ. ཚདནམེཝ སནྡྷཱཡ ཝུཏྟོཏི ཚདནསྶ ཨནྟོ ཙ བཧི ཙ ལིམྤནམེཝ སནྡྷཱཡ ཝུཏྟོ. མཏྟིཀཱཀུཊྚེ བྷིཏྟིལེཔཾ ཝིནཱཔི བྷིཏྟིཡཱ སདྡྷིཾ ¶ ཚདནལེཔསྶ གྷཊནམཏྟེནཱཔི ཨཱཔཏྟིསམྦྷཝཏོ ཚདནལེཔོཝ པདྷཱནནྟི ཝེདིཏབྦཾ. ཀིཉྩཱཔི ཨེཝཾ, ཨཐ ཁོ ‘‘ཨུཔཙིཀཱམོཙནཏྠམེཝ ཧེཊྛཱ པཱསཱཎཀུཊྚཾ ཀཏྭཱ ཏཾ ཨལིམྤིཏྭཱ ཨུཔརི ལིམྤཏི, ལེཔོ ན གྷཊཱིཡཏི ནཱམ, ཨནཱཔཏྟིཡེཝཱ’’ཏིཨཱདིཝཙནཏོ པན ཚདནལེཔགྷཊནཏྠཾ སཀལཱཡཔི བྷིཏྟིཡཱ ལེཔོ ཨཝསྶཾ ཨིཙྪིཏབྦོཝ ཏསྶཱ ཨེཀདེསསྶ ཨལེཔེཔི ཚདནལེཔསྶ ཨགྷཊནཏོ. ཏེནཱཧ ‘‘ལེཔོ ན གྷཊཱིཡཏཱི’’ཏི. ཨེཏྠཱཏི ཏིཎཀུཊིཀཱཡཾ. ན ཀེཝལཉྩ ཏིཎཀུཊིཀཱཡཾ ཨེཝ, ལེཎགུཧཱདཱིསུཔི སཱརམྦྷཱཔརིཀྐམནཔཙྩཡཱཔི ཨནཱཔཏྟི ཨེཝ, ཨིམིནཱ ¶ པན ནཡེན ཨཉྙསྶཏྠཱཡ ཀུཊིཾ ཀརོནྟསྶཱཔི སཱརམྦྷཱདིཔཙྩཡཱཔི ཨནཱཔཏྟིབྷཱཝོ ཨཏྠཏོ དསྶིཏོ ཨེཝ ཧོཏཱིཏི.

ཏཏྠ པཱལི༹ཝིརོདྷཾ པརིཧརིཏུཾ ‘‘ཡཾ པནཱ’’ཏིཨཱདི ཝུཏྟཾ. ཨཡཉྷེཏྠ ཨདྷིཔྤཱཡོ – ཨཉྙསྶ ཨུཔཛ྄ཛྷཱཡཱདིནོ ཨཏྠཱཡ ཀརོནྟསྶ སཱརམྦྷཱདིཔཙྩཡཱཔི ཨནཱཔཏྟི ཨེཝ, ཡཾ པན པཱལི༹ཡཾ ‘‘ཨཱཔཏྟིཀཱརུཀཱནཾ ཏིཎྞཾ དུཀྐཊཱན’’ནྟིཨཱདིཝཙནཾ, ཏཾ ཨཉྙསྶཏྠཱཡ ཀརོནྟསྶ, ན སཱརམྦྷཱདིཔཙྩཡཱ ཨཱཔཏྟིདསྶནཏྠཾ ཝུཏྟཾ, ཀིཉྩརཧི ཡཐཱསམཱདིཊྛཱཡ ཀུཊིཡཱ ཨཀརཎཔཙྩཡཱ ཨཱཔཏྟིདསྶནཏྠནྟི. ཏཏྠ ཡཐཱསམཱདིཊྛཱཡཱཏི ‘‘བྷིཀྑུ སམཱདིསིཏྭཱ པཀྐམཏི, ‘ཀུཊིཾ མེ ཀརོཐཱ’ཏི སམཱདིསཏི ཙ, དེསིཏཝཏྠུཀཱ ཙ ཧོཏུ ཨནཱརམྦྷཱ ཙ སཔརིཀྐམནཱ ཙཱ’’ཏི ཨེཝཾ ཀཱརཱཔཀེན ཨཱཎཏྟིཀྐམཾ མུཉྩིཏྭཱ ཀརཎཔཙྩཡཱཏི ཨདྷིཔྤཱཡོ. ཀཏྠཙི པན པོཏྠཀེ ‘‘ཀུཊིལཀྑཎཔྤཏྟམྤི ཀུཊིཾ ཨཉྙསྶ…པེ… ཀརོནྟསྶ ཨནཱཔཏྟཱི’’ཏི ཨིམསྶ པཱཋསྶ ཨནནྟརཾ ‘‘ཡཾ པན ཨཱཔཏྟི ཀཱརུཀཱན’’ནྟིཨཱདིཔཱཋོ དིསྶཏི, སོཝ ཡུཏྟཏརོ. ཨེཝཉྷི སཏི ཏཏྠ ཨདྷིཔྤཱཡོ པཱཀཊོ ཧོཏི.

ཨནཱཔཏྟཱིཏི ཝཏྭཱཏི ཝཱསཱགཱརཏྠཱཡ ཨེཝ ཨནིཡམིཏཏྟཱ ཨནཱཔཏྟཱིཏི ཝཏྭཱ. ཨདེསཱཔེཏྭཱ ཀརོཏོཏི པམཱཎཡུཏྟམྤི ཀརོཏོ. ཨཙིཏྟཀནྟི པཎྞཏྟིཨཛཱནནཙིཏྟེན ཨཙིཏྟཀཾ. ཨུལླིཏྟཱདཱིནཾ ཨཉྙཏརཏཱ, ཧེཊྛིམཔྤམཱཎསམྦྷཝོ, ཨདེསིཏཝཏྠུཀཏཱ, པམཱཎཱཏིཀྐནྟཏཱ, ཨཏྟུདྡེསིཀཏཱ, ཝཱསཱགཱརཏཱ, ལེཔགྷཊནཱཏི སཏྟ ཝཱ པམཱཎཡུཏྟངྒཱདཱིསུ ཚ ཝཱ ཨངྒཱནི.

ཀུཊིཀཱརསིཀྑཱཔདཝཎྞནཱ ནིཊྛིཏཱ.

༧. ཝིཧཱརཀཱརསིཀྑཱཔདཝཎྞནཱ

༣༦༥. སཏྟམེ ¶ པཱུཛཱཝཙནཔྤཡོགེ ཀཏྟརི སཱམིཝཙནསྶཔི ཨིཙྪིཏཏྟཱ ‘‘གཱམསྶ ཝཱ པཱུཛིཏ’’ནྟི ཝུཏྟཾ. རཱུཔིནྡྲིཡེསུ ཝིཛྫམཱནཾ སནྡྷཱཡ ཨེཀིནྡྲིཡཏཱ ཝུཙྩཏཱིཏི ཨཱཧ ‘‘ཀཱཡིནྡྲིཡཾ སནྡྷཱཡཱ’’ཏི. ཏེ ཧི མནིནྡྲིཡམྤི བྷཱུཏགཱམཱནཾ ཨིཙྪནྟི.

༣༦༦. ཀིརིཡཏོ སམུཊྛཱནཱབྷཱཝོཏི ཝཏྠུནོ ཨདེསནཱསངྑཱཏཾ ཨཀིརིཡཾ ཝིནཱ ན ཀེཝལཾ ཀིརིཡཱཡ སམུཊྛཱནབྷཱཝོ. ཀིརིཡཱཀིརིཡཏོ ཧི ཨིདཾ སམུཊྛཱཏི. ཨིམསྨིཾ སིཀྑཱཔདེ བྷིཀྑཱུ ཝཱ ¶ ཨནབྷིནེཡྻཱཏི ཨེཏྠ ཝཱ-སདྡོ སམུཙྩཡཏྠོ, ཏེན ‘‘མཧལླཀཉྩ ཝིཧཱརཾ ཀརེཡྻ, བྷིཀྑཱུ ཙ ཨནབྷིནེཡྻཱ’’ཏི ཀིརིཡཉྩ ཨཀིརིཡཉྩ སམུཙྩིནོཏི.

ཝིཧཱརཀཱརསིཀྑཱཔདཝཎྞནཱ ནིཊྛིཏཱ.

༨. པཋམདུཊྛདོསསིཀྑཱཔདཝཎྞནཱ

༣༨༠. ཨཊྛམེ པཱཀཱརེན ཙ པརིཀྑིཏྟནྟི སམྦནྡྷོ. གོཔུརཊྚཱལཀཡུཏྟནྟི ཨེཏྠ པཱཀཱརེསུ ཡུདྡྷཏྠཱཡ ཀཏོ ཝངྐསཎྛཱནོ སརཀྑེཔཚིདྡསཧིཏོ པཏིསྶཡཝིསེསོ ཨཊྚཱལཀོ ནཱམ.

སོལ༹སཝིདྷསྶཱཏི ཙཏཱུཧི མགྒེཧི པཙྩེཀཾ ཙཏཱུསུ སཙྩེསུ ཀཏྟབྦསྶ པརིཉྙཱཔཧཱནསཙྪིཀིརིཡཱབྷཱཝནཱསངྑཱཏསྶ སོལ༹སཝིདྷསྶ. ཏེ གཱརཝེནཱཏི ཏེ ཀིལནྟརཱུཔཱ བྷིཀྑཱུ བྷཏྟུདྡེསཀཊྛཱནེ སནྣིཔཏིཏཱནཾ བྷིཀྑཱུནཾ པུརཏོ ཨཏྟནོ ཀིལནྟསརཱིརཾ དསྶེཏྭཱ ཨུདྡིསཱཔནེ གཱརཝེན, ལཛྫཱཡཱཏི ཨཏྠོ. ཏེརསཔཱིཏི བྷཏྟུདྡེསཀསེནཱསནགཱཧཱཔཀབྷཎྜཱགཱརིཀཙཱིཝརཔཊིགྒཱཧཀཙཱིཝརབྷཱཛཀཡཱགུབྷཱཛཀཕལབྷཱཛཀཁཛྫབྷཱཛཀཨཔྤམཏྟཀཝིསྶཛྫཀསཱཊིཡགཱཧཱཔཀཔཏྟགཱཧཱཔཀཨཱརཱམིཀཔེསཀསཱམཎེརཔེསཀསམྨུཏཱིནཾ ཝསེན ཏེརསཔི.

པཱལི༹ཡཾ ‘‘ཨཔིསཱུ’’ཏི ཨིདཾ ‘‘ཨཔིཙཱ’’ཏི ཨིམིནཱ སམཱནཏྠོ ནིཔཱཏོ. ཨེཝཾ སབྦཔདེསཱུཏི པཱིཋཱདཱིསུ སེནཱསནསཱདྷཱརཎེསུ, ཀཏིཀསཎྛཱནཔཝེསནིཀྑམནཀཱལཱདཱིསུ པན ཝིསུཾ ཝིསུཾ ཨདྷིཊྛཧིཏྭཱ ཀཐཱཔེཏཱིཏི ཝེདིཏབྦཾ ¶ . ཨཡཉྷི ནིམྨིཏཱནཾ དྷམྨཏཱཏི ཨནིཡམེཏྭཱ ནིམྨིཏཱནཾ ཝསེན ཝུཏྟཾ, ནིཡམེཏྭཱ པན ‘‘ཨེཏྟཀཱ ཨིདཉྩིདཉྩ ཀཐེནྟུ, ཨེཏྟཀཱ ཏུཎྷཱི བྷཝནྟུ, ནཱནཱཔྤཀཱརཾ ཨིརིཡཱཔཐཾ, ཀིརིཡཉྩ ཀཔྤེནྟུ, ནཱནཱཝཎྞསཎྛཱནཝཡོནིཡམཱ ཙ ཧོནྟཱུ’’ཏི པརིཀམྨཾ ཀཏྭཱ སམཱཔཛྫིཏྭཱ ཝུཊྛཱཡ ཨདྷིཊྛིཏེ ཨིཙྪིཏིཙྪིཏཔྤཀཱརཱ ཨཉྙམཉྙམྤི ཝིསདིསཱཝ ཧོནྟི. ཨཝཏྠུཀཝཙནནྟི ནིརཏྠཀཝཙནཾ.

༣༨༣. ཨེཀཙཱརིཀབྷཏྟནྟི ཨཏིམནཱཔཏྟཱ སབྦེསམྤི པཊིལཱབྷཏྠཱཡ ཝིསུཾ ཋིཏིཀཱཡ པཱཔེཏབྦབྷཏྟཾ. ཏདྡྷིཏཝོཧཱརེནཱཏི ཙཏྟཱརི པམཱཎམསྶ ཙཏུཀྐནྟི ཨེཝཾ ཏདྡྷིཏཝོཧཱརེན. བྷཝོཏི བྷཝིཏབྦོ. ཨཏཱིཏཾ དིཝསབྷཱགནྟི ཏསྨིཉྙེཝ དིཝསེ སལཱཀདཱནཀྑཎཾ སནྡྷཱཡ ཝུཏྟཾ. ཧིཡྻོཏི ཨིམསྶ ཨཛྫ ཨིཙྩེཝ ཨཏྠོ. ཏེནེཝཱཧཾསུ ‘‘སྭེ ཨམྷེ’’ཏིཨཱདི. པདྷཱུཔཱཡནྟཱཏི པུནཔྤུནཾ ¶ ཨུཔྤཛྫནཀོདྷཝསེན པདྷཱུཔཱཡནྟཱ. པཱལི༹ཡཾ ཀིསྶ མནྟི ཀེན ཀཱརཎེན མཡཱཏི ཨཏྠོ.

༣༨༤. ‘‘སརསི ཏྭ’’ནྟི ཨིདཾ ཨེཀཾ ཝཱཀྱཾ ཀཏྭཱ, ‘‘ཀཏྟཱ’’ཏི ཨིདཉྩ ཀཏྟརི རིཏུཔཙྩཡནྟཾ ཀཏྭཱ, ‘‘ཨསཱི’’ཏི ཨཛ྄ཛྷཱཧཱརཔདེན སཧ ཨེཀཝཱཀྱཾ ཀཏྭཱ, ‘‘ཨེཝརཱུཔ’’ནྟི ཨིདཾ, ‘‘ཡཐཱཡཾ བྷིཀྑུནཱི ཨཱཧཱ’’ཏི ཨིདཉྩ དྭཱིསུ ཝཱཀྱེསུ པཙྩེཀཾ ཡོཛེཏབྦནྟི དསྶེཏུཾ ‘‘ཨཐ ཝཱ’’ཏིཨཱདིམཱཧ. ཨུཛུཀམེཝཱཏི ཏྭཱ-པཙྩཡནྟཝསེན པཋམཾ ཨཏྠགྒཧཎཾ ཨུཛུཀནྟི ཨདྷིཔྤཱཡོ.

དུཏིཡོ དབྦ-སདྡོ པཎྜིཏཱདིཝཙནོཏི ཨཱཧ ‘‘ན ཁོ དབྦ དབྦཱ པཎྜིཏཱ’’ཏི. ནིབྦེཋེནྟཱིཏི དོསཏོ མོཙེནྟི. ཝིནཡལཀྑཎེ ཏནྟིནྟི ཝིནཡཝིནིཙྪཡལཀྑཎཝིསཡེ ཨཱགམཾ ཋཔེནྟོ. པཱལི༹ཡཾ ཡཏོ ཨཧནྟིཨཱདཱིསུ ཡསྨིཾ ཀཱལེ ཨཧཾ ཛཱཏོ, ཏཏོ པབྷུཏི སུཔིནནྟེནཔི མེཐུནཾ དྷམྨཾ ནཱབྷིཛཱནཱམི, ན ཙ ཏསྶ མེཐུནདྷམྨསྶ པཊིསེཝིཏཱ ཨཧོསིནྟི ཨཏྠོ དཊྛབྦོ. ཏེནཱཧ ‘‘སུཔིནནྟེནཔཱི’’ཏིཨཱདི. ཨིདཱནི ཨེཀཝཱཀྱཝསེན ཡོཛནཾ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. ན གྷཊཏཱིཏི ཡསྨཱ ཁཱིཎཱསཝསྶ ཝཙནེན ཨེཏིསྶཱ ཝཙནཾ ན སམེཏི, ཏཉྩ ན གྷཊནཾ ཡསྨཱ པུབྦེ བྷིཀྑཱུསུ པསིདྡྷཱཡ ཨེཝ ཨཙྩནྟདུསྶཱིལཏཱཡ ཨེཝ ཨཧོསི, ཏསྨཱ མེཏྟིཡཾ བྷིཀྑུནིཾ ནཱསེཐཱཏི ཨདྷིཔྤཱཡོ.

ཙར པིརེཏི ཙར གཙྪ པིརེ པར ཨམཱམཀ ཏྭཾ. ཝིནསྶཱཏི ཨདསྶནཾ གཙྪ. ཨཀཱརིཀཱཏི ཨམཱུལཀེན ཙོདནཱཡ ན ཀཱརིཀཱ. ཀཱརཀོ ཧོཏཱིཏི ¶ ‘‘ཨཡྻེནམྷི དཱུསིཏཱ’’ཏི ཨིམཱཡ པཊིཉྙཱཡ ཡདི ནཱསིཏཱ, ཏདཱ ཐེརོ བྷིཀྑུནཱིདཱུསཀཏྟསིདྡྷིཏོ ཏསྶ དོསསྶ ཀཱརཀོ ཧོཏི. ཨཀཱརཀོ ཧོཏཱིཏི ཏཱཡ ཀཏཔཊིཉྙཾ ཨནཔེཀྑིཏྭཱ སཱམཉྙཏོ ‘‘མེཏྟིཡཾ བྷིཀྑུནིཾ ནཱསེཐཱ’’ཏི བྷགཝཏཱ ཝུཏྟཏྟཱ ཨཀཱརཀོ ཧོཏི. ཡདི ཧི ཐེརོ ཀཱརཀོ བྷཝེཡྻ, ཨཝསྶཾ ཏམེཝ དོསཾ ཨཔདིསིཏྭཱ ཨིམིནཱ ནཱམ ཀཱརཎེན ‘‘མེཏྟིཡཾ བྷིཀྑུནིཾ ནཱསེཐཱ’’ཏི ཝཏྟབྦཾ སིཡཱ, ཏཐཱ ཨཝུཏྟཏྟཱ, ‘‘དབྦཉྩ ཨནུཡུཉྫཐཱ’’ཏི ཨཝཏྭཱ ‘‘ཨིམེ ཙ བྷིཀྑཱུ ཨནུཡུཉྫཐཱ’’ཏི ཝུཏྟཏྟཱ ཙ སཱམཏྠིཡཏོ མེཏྟིཡཱཡ བྷིཀྑུནིཡཱ ཨཉྙེན དོསེན ནཱསནཱརཧཏཱ, ཝཏྠུསྶ ཙ ཨམཱུལཀབྷཱཝོ, ཐེརསྶ ཨཀཱརཀབྷཱཝོ ཙ སིདྡྷོ ཧོཏཱིཏི ཨདྷིཔྤཱཡོ.

ཨཏྟནོ སུཏྟནྟི ‘‘སཀཱཡ པཊིཉྙཱཡཱ’’ཏི ཨིམིནཱ པཀྑེཔཝཙནེན སཧིཏཾ ཀཱུཊསུཏྟཾ. ཐེརོ ¶ ཀཱརཀོ ཧོཏཱིཏི ཨེཏྠ ཨཡམདྷིཔྤཱཡོ – ‘‘སཀཱཡ པཊིཉྙཱཡཱ’’ཏི ཨཝཏྭཱ སཱམཉྙཏོ ‘‘མེཏྟིཡཾ བྷིཀྑུནིཾ ནཱསེཐཱ’’ཏི ཨོཏིཎྞཝཏྠུསྨིཾཡེཝ ཏསྶཱ ནཱསནཱ ཝིཧིཏཱཏི ཏུམྷཱཀཾ ཝཱདེ ཐེརོ ཀཱརཀོ ཧོཏི, ‘‘སཀཱཡ པཊིཉྙཱཡཱ’’ཏི པན ཝུཏྟེ པུབྦེཡེཝ སིདྡྷསྶ པཱརཱཛིཀསྶ སུཙིཀཱཡ ཨསྶཱ སཀཱཡ པཊིཉྙཱཡ ནཱསེཐཱཏི སིཛ྄ཛྷནཏོ ཨམྷཱཀཾ ཝཱདེ ཐེརོ ཨཀཱརཀོ ཧོཏཱིཏི. མཧཱཝིཧཱརཝཱསཱིནམྤི པན ‘‘སཀཱཡ པཊིཉྙཱཡཱ’’ཏི ཝུཏྟེ ཨོཏིཎྞཝཏྠུསྨིཾཡེཝ ཏསྶཱ ནཱསནཱ ཝིཧིཏཱ ཧོཏི, ན སཱམཉྙཏོཏི ཨདྷིཔྤཱཡོ. ཨེཏྠཱཏི ཨིམེསུ དྭཱིསུ ཝཱདེསུ, སུཏྟེསུ ཝཱ. ཡཾ པཙྪཱ ཝུཏྟནྟི མཧཱཝིཧཱརཝཱསཱིཧི ཡཾ ཝུཏྟཾ, ཏཾ ཡུཏྟནྟི ཨཏྠོ. ཝིཙཱརིཏཾ ཧེཏནྟི ཨེཏཾ པཙྪིམསྶ ཡུཏྟཏྟཾ ཝིཙཱརིཏཾ, ‘‘ཏཏྲ སངྒྷཱདིསེསོ ཝུཊྛཱནགཱམིནཱི…པེ… ཨསུདྡྷཏཱཡེཝ ནཱསེསཱི’’ཏི ཝཀྑམཱནནཡེན ཝིནིཙྪིཏནྟི ཨཏྠོ. ‘‘བྷིཀྑུནིཾ ཨནུདྡྷཾསེཏི དུཀྐཊ’’ནྟི ཨིམིནཱ མཧཱཨཊྛཀཐཱཝཱདོ དསྶིཏོ.

ཏཏྲཱཏི ཏེསུ དུཀྐཊཔཱཙིཏྟིཡེསུ. དུཀྐཊནྟི ཝུཏྟམཧཱཨཊྛཀཐཱཝཱདསྶ ཨདྷིཔྤཱཡཾ དསྶེཏྭཱ ‘‘པཱཙིཏྟིཡ’’ནྟི པཝཏྟསྶ ཀུརུནྡིཝཱདསྶ ཨདྷིཔྤཱཡཾ དསྶེཏུཾ ‘‘པཙྪིམནཡེཔཱི’’ཏིཨཱདི ཝུཏྟཾ. ཝཙནཔྤམཱཎཏོཏི ཝིསཾཝཱདནཱདྷིཔྤཱཡེ སམཱནེཔི ཨནུདྡྷཾསནཱདིཝིསེསེ སངྒྷཱདིསེསཱདིནོ ཝིདྷཱཡཀཝཙནབལེནཱཏི ཨཏྠོ. བྷིཀྑུསྶ པན བྷིཀྑུནིཡཱ དུཀྐཊནྟི བྷིཀྑུནིཾ ཨནུདྡྷཾསེནྟསྶ བྷིཀྑུསྶ དུཀྐཊཾ.

ཨེཝཾ ¶ དྭཱིསུཔི ཨཊྛཀཐཱཝཙནེསུ ཨདྷིཔྤཱཡཾ ཝིབྷཱཝེཏྭཱ ཨིདཱནི པཙྪིམེ པཱཙིཏྟིཡཝཱདེ དོསཾ དསྶེཏྭཱ པུརིམདུཀྐཊཝཱདམེཝ པཏིཊྛཱཔེཏུཾ ‘‘ཏཏྲ པནཱ’’ཏིཨཱདི ཝུཏྟཾ. ཏཏྠ ཝིསུནྟི སམྤཛཱནམུསཱཝཱདེ པཱཙིཏྟིཡཏོ (པཱཙི. ༡) ཝིསུཾ པཱཙིཏྟིཡཾ ཝུཏྟཾ, ཏཏྠ ཨནནྟོགདྷབྷཱཝཱཏི ཨདྷིཔྤཱཡོ. ཏསྨཱཏི ཡསྨཱ ཨམཱུལཀཱནུདྡྷཾསནེ ཝིསུཉྙེཝ པཱཙིཏྟིཡཾ པཉྙཏྟཾ, ཏསྨཱ པུརིམནཡོཏི དུཀྐཊཝཱདོ. ཨེཝཾ ཨནྟརཱ པཝིཊྛཾ དུཀྐཊཔཱཙིཏྟིཡཝཱདཾ དསྶེཏྭཱ ཨིདཱནི པཱཀཊམེཝ ཨཏྠཾ ཝིབྷཱཝེཏུཾ ‘‘ཏཐཱ བྷིཀྑུནཱི’’ཏིཨཱདི ཨཱརདྡྷཾ. ཏཏྠ ཏཐཱཏི ཡཐཱ བྷིཀྑུསྶ བྷིཀྑུཾ, བྷིཀྑུནིཉྩ ཨནུདྡྷཾསེནྟསྶ སངྒྷཱདིསེསདུཀྐཊཱནི ཝུཏྟཱནི, ཏཐཱཏི ཨཏྠོ. ཨེཏེཧི ནཱསནཱ ནཏྠཱིཏི སཱམཉྙཏོ ཝུཏྟཾ, དུཀྐཊེན ཨིམིསྶཱ པན ནཱསནཱ ནཏྠཱིཏི ཨདྷིཔྤཱཡོ. དུསྶཱིལཱཏི པཱརཱཛིཀཱ.

༣༨༦. ཨཱཀཱརནཱནཏྟེནཱཏི དཱུསིཏཱཀཱརསྶ, དཱུསཀཱཀཱརསྶ ཙ ནཱནཏྟེན. ཨནབྷིརདྡྷོཏི ཨཏུཊྛོ. ཏེནཱཧ ‘‘ན སུཁིཏོ’’ཏི. ན པསཱདིཏོཏི ཨནུཔྤཱདིཏཔྤསཱདོ. ཁཱིལ-སདྡོ ཐདྡྷབྷཱཝཝཙནོ ¶ , ཀཙཝརཔརིཡཱཡོ ཙ ཧོཏཱིཏི ཨཱཧ ‘‘ཙིཏྟ…པེ… ཁཱིལ’’ནྟི. ནཔྤཏཱིཏོཏི པཱིཏིསུཁཱདཱིཧི ན ཨབྷིགཏོ ན ཨུཔགཏོ. ཏེནཱཧ ‘‘ན ཨབྷིསཊོ’’ཏི.

ཡེན དུཊྛོཏི ཙ ཀུཔིཏོཏི ཙ ཝུཏྟོཏི ཨེཏྠ ཡེན དུཊྛོཏི ཙ ཝུཏྟོ ཡེན ཀུཔིཏོཏི ཙ ཝུཏྟོ, ཏཾ མཱཏིཀཱཡཉྩ པདབྷཱཛནེ (པཱརཱ. ༣༨༦) ཙ ཝུཏྟཾ ཨུབྷཡམྤེཏནྟི ཡོཛེཏབྦཾ. དྭཱིཧཱིཏི ‘‘ཏེན ཙ ཀོཔེན, ཏེན ཙ དོསེནཱ’’ཏི ཝུཏྟཀོཔདོསཔདེཧི དྭཱིཧི, ཨཏྠཏོ པན དྭཱིཧིཔི དོསོཝ དསྶིཏོཏི ཨཱཧ ‘‘སངྑཱརཀྑནྡྷམེཝ དསྶེཏཱི’’ཏི. ཡཱཡཱཏི ཨནཏྟམནཏཱཡ.

ན ཙུདིཏཀཝསེནཱཏི ཡདི ཙུདིཏཀཝསེནཱཔི ཨམཱུལཀཾ ཨདྷིཔྤེཏཾ སིཡཱ, ཨམཱུལཀཾ ནཱམ ཨནཛ྄ཛྷཱཔནྣནྟི པདབྷཱཛནཾ ཝདེཡྻཱཏི ཨདྷིཔྤཱཡོ. ཡཾ པཱརཱཛིཀནྟི བྷིཀྑུནོ ཨནུརཱུཔེསུ ཨེཀཱུནཝཱིསཏིཡཱ པཱརཱཛིཀེསུ ཨཉྙཏརཾ. པདབྷཱཛནེ (པཱརཱ. ༣༨༦) པན བྷིཀྑུཝིབྷངྒེ ཨཱགཏཱནེཝ གཧེཏྭཱ ‘‘ཙཏུནྣཾ ཨཉྙཏརེནཱ’’ཏི ཝུཏྟཾ. ཨེཏཾ ཨིདྷ ཨཔྤམཱཎནྟི ཨེཏཾ ཨཱཔནྣཱནཱཔནྣཏཾ ཨིདྷཱནུདྡྷཾསནེ ¶ ཨཱཔཏྟིཡཱ ཨནངྒཾ, ཨཱཔཏྟིཾ པན ཨཱཔནྣེ ཝཱ ཨནཱཔནྣེ ཝཱ པུགྒལེ ‘‘ཨནཱཔནྣོ ཨེསོ སུདྡྷོ’’ཏི སུདྡྷསཉྙཱཡ ཝཱ ཝིམཏིཡཱ ཝཱ ཙཱཝནཱདྷིཔྤཱཡོཝ ཨིདྷ ཨངྒནྟི ཨདྷིཔྤཱཡོ.

ཏཐེཝཱཏི པསཱདསོཏེན, དིབྦསོཏེན ཝཱཏི ཨིམམཏྠཾ ཨཏིདིསཏི. དིཊྛཱནུསཱརེནེཝ སམུཔྤནྣཱ པརིསངྐཱཝ དིཊྛཔརིསངྐིཏཾ ནཱམ. ཨེཝཾ སེསེསུཔི. ‘‘ཨདིསྭཱ ཝཱ’’ཏི ཨིདཾ ཨུཀྐཊྛཝསེན ཝུཏྟཾ, དིསྭཱ པཀྐནྟེསུཔི དོསོ ནཏྠིཡེཝ. ཨིམེསནྟི ཨིམེཧི. ཀརིསྶནྟཱིཏི ཏསྨིཾ ཁཎེ ཨུཔྤཛྫནཱཀཱརདསྶནཾ, པཙྪཱ པན ཨེཏྟཀེན ཀཱལེན ཀཏཾ ཝཱཏི སངྐཱཡ ཙོདེཏི. ན ཧི ཀརིསྶནྟཱིཏི ཙོདནཱ ཨཏྠི. ‘‘ཨརིཊྛཾ པཱིཏ’’ནྟི ཨིདཾ མུཁེ སུརཱགནྡྷཝཱཡནནིམིཏྟདསྶནཾ. ཨརིཊྛཉྷི སུརཱསདིསཝཎྞགནྡྷཾ ཀཔྤིཡབྷེསཛྫཾ.

དིཊྛཾ ཨཏྠི སམཱུལཀནྟིཨཱདཱིསུ ཨཛ྄ཛྷཱཙཱརསྶ སམྦྷཝཱསམྦྷཝཱནཾ མཱུལཱམཱུལབྷཱཝདསྶནཾ. ཨཏྠི སཉྙཱསམཱུལཀནྟིཨཱདི པན དིཊྛསཉྙཱཡ སམྦྷཝཱསམྦྷཝཱནཾ མཱུལཱམཱུལབྷཱཝདསྶནཾ. དིསྭཱཝ དིཊྛསཉྙཱི ཧུཏྭཱ ཙོདེཏཱིཏི ཨེཏྠ ཡཾ ཙོདེཏི, ཏཏོ ཨཉྙཾ པུགྒལཾ ཝཱིཏིཀྐམནྟཾ, པཊིཙྪནྣོཀཱསཏོ ནིཀྑམནྟཾ ཝཱ དིསྭཱ ‘‘ཨཡཾ སོ’’ཏི སཉྙཱཡ ཙོདེནྟོཔི སངྒཡ྄ཧཏི. ཨེས ནཡོ སུཏཱདཱིསུཔི. སམཱུལཀེན ཝཱ སཉྙཱསམཱུལཀེན ཝཱཏི ཨེཏྠ པཱརཱཛིཀམཱཔནྣཾ དིཊྛཱདིམཱུལཀེན ཙ ‘‘ཨཡཾ ཨཱཔནྣོ’’ཏི ཨསུདྡྷསཉྙཱཡ ཙོདེནྟོ སམཱུལཀེན ཙོདེཏི ནཱམ. སཉྙཱསམཱུལཀཏྟེ ཨེཝ ཨནཱཔཏྟིསམྦྷཝཏོ ཨཱཔནྣེ ཝཱ ཨནཱཔནྣེ ཝཱ པུགྒལེ ཨཱཔནྣསཉྙཱི དིཊྛཱདཱིསུ ¶ , ཨདིཊྛཱདཱིསུ ཝཱ མཱུལེསུ དིཊྛསུཏཱདིསཉྙཱི ཏེན དིཊྛཱདིམཱུལཀེན ཏཾ པུགྒལཾ ཙོདེནྟོ སཉྙཱསམཱུལཀེན ཙོདེཏི ནཱམ. ཨིམེསཾ ཨནཱཔཏྟི, ཝུཏྟཝིཔརིཡཱཡེན ཨཱཔཏྟིཝཱརེ ཨཏྠོ ཝེདིཏབྦོ.

སམཱིཔེ ཋཏྭཱཏི ཧཏྠཝིཀཱརཝཙཱིགྷོསཱནཾ ཙོདནཱཝསེན པཝཏྟིཡམཱནཱནཾ དསྶནསཝནཱུཔཙཱརེ ཋཏྭཱཏི ཨཏྠོ. ཀེཙི པན ‘‘དྭཱདསཧཏྠབྦྷནྟརེ ཋཏྭཱ’’ཏི (སཱརཏྠ. ཊཱི. ༢.༣༨༥-༣༨༦) ཝདནྟི, ཏཾ ན ཡུཏྟཾ. པརཏོ བྱཏིརེཀཏོ ཨནཱཔཏྟིཾ དསྶེནྟེན ‘‘དཱུཏཾ ཝཱ པཎྞཾ ཝཱ སཱསནཾ ཝཱ པེསེཏྭཱ’’ཏི ཨེཏྟཀམེཝ ཝུཏྟཾ, ན པན ‘‘དྭཱདསཧཏྠཾ མུཉྩིཏྭཱ ཙོདེནྟསྶ སཱིསཾ ན ཨེཏཱི’’ཏི ཝུཏྟཾ. ཝཱཙཱཡ ཝཱཙཱཡཱཏི སཀིཾ ཨཱཎཏྟསྶ སཀལམྤི དིཝསཾ ཝདཏོ ཝཱཙཱཡ ¶ ཝཱཙཱཡ ཙོདཱཔཀསྶེཝ ཨཱཔཏྟི. སོཔཱིཏི ཨཱཎཏྟོཔི. ཏསྶ ཙ ‘‘མཡཱཔི དིཊྛ’’ནྟིཨཱདིཾ ཨཝཏྭཱཔི ‘‘ཨམཱུལཀ’’ནྟི སཉྙཱཡ ཙཱཝནཱདྷིཔྤཱཡེན ‘‘ཏྭཾ པཱརཱཛིཀཾ དྷམྨཾ ཨཛ྄ཛྷཱཔནྣོསཱི’’ཏི ཨིདམེཝ ཝཱཙཾ པརསྶ ཝཙནཾ ཝིཡ ཨཀཏྭཱ སཱམཉྙཏོ ཝདནྟསྶཱཔི སངྒྷཱདིསེསོ ཨེཝ. སཏིཔི པན ཨནུདྡྷཾསནཱདྷིཔྤཱཡེ ‘‘ཨསུཀེན ཨེཝཾ ཝུཏྟ’’ནྟི པརེན ཝུཏྟམེཝ ཝདནྟསྶ ནཏྠི སངྒྷཱདིསེསོ. སཙེ པན པརེན ཨཝུཏྟམྤི ཝུཏྟནྟི ཝདཏི, ཨཱཔཏྟི ཨེཝ.

སམྦཧུལཱ སམྦཧུལེ སམྦཧུལེཧི ཝཏྠཱུཧཱིཏི ཨེཏྠ སམྦཧུལེཏི ཙུདིཏཀབཧུཏྟནིདྡེསེན པུརིམེསུ ཏཱིསུ ཝཱརེསུ ཙུདིཏཀབཧུཏྟེནཱཔི ཝཱརབྷེདསབྦྷཱཝཾ ཉཱཔེཏི. ཨེཀསྨིཉྷི ཙུདིཏཀཝཏྠུཙོདཀབྷེདེན ཨིདཾ ཙཏུཀྐཾ ཝུཏྟཾ, ཙུདིཏཀབཧུཏྟེནཱཔི ཙཏུཀྐནྟརཾ ལབྦྷཏཱིཏི ཨཊྛཀཾ ཧོཏི ཨེཝ.

ཨམཱུལཀཙོདནཱཔསངྒེན སམཱུལཀཙོདནཱལཀྑཎཱདིཾ དསྶེཏུཾ ‘‘ཙོདེཏུཾ པན ཀོ ལབྷཏཱི’’ཏིཨཱདི ཨཱརདྡྷཾ. བྷིཀྑུསྶ སུཏྭཱ ཙོདེཏཱིཏིཨཱདི སུཏྟཾ ཡསྨཱ ཡེ ཙོདཀསྶ ཨཉྙེསཾ ཝིཔཏྟིཾ པཀཱསེནྟི, ཏེཔི ཏསྨིཾ ཁཎེ ཙོདཀབྷཱཝེ ཋཏྭཱཝ པཀཱསེནྟི, ཏེསཉྩ ཝཙནཾ གཧེཏྭཱ ཨིཏརོཔི ཡསྨཱ ཙོདེཏུཉྩ ཨསམྤཊིཙྪནྟཾ ཏེཧི ཏིཏྠིཡསཱཝཀཔརིཡོསཱནེཧི པཋམཙོདཀེཧི སམྤཊིཙྪཱཔེཏུཉྩ ལབྷཏི, ཏསྨཱ ཨིདྷ སཱཝཀབྷཱཝེན ཨུདྡྷཊནྟི ཝེདིཏབྦཾ.

དཱུཏཾ ཝཱཏིཨཱདཱིསུ ‘‘ཏྭཾ ཨེཝཾ གནྟྭཱ ཙོདེཧཱི’’ཏི དཱུཏཾ ཝཱ པེསེཏྭཱ ཡོ ཙོདེཏུཾ སཀྐོཏི, ཏསྶ པཎྞཾ, མཱུལསཱསནཾ ཝཱ པེསེཏྭཱ. སམཡེནཱཏི པཀཏིཡཱ ཛཱནནཀྑཎེ.

གརུཀཱནཾ དྭིནྣནྟི པཱརཱཛིཀསངྒྷཱདིསེསཱནཾ. མིཙྪཱདིཊྛི ནཱམ ‘‘ནཏྠི དིནྣ’’ནྟིཨཱདིནཡཔྤཝཏྟཱ (མ. ནི. ༡.༤༤༥; ༢.༩༤, ༩༥, ༢༢༥; ༣.༩༡, ༡༡༦, ༡༣༦; སཾ. ནི. ༣.༢༡༠) དསཝཏྠུཀཱ ¶ དིཊྛི, སསྶཏུཙྪེདསངྑཱཏཾ ཨནྟཾ གཎྷཱཔཀདིཊྛི ཨནྟགྒཱཧིཀཱ ནཱམ. ཨཱཛཱིཝཧེཏུ པཉྙཏྟཱནཾ ཚནྣནྟི ཨཱཛཱིཝཧེཏུཔི ཨཱཔཛྫིཏབྦཱནཾ ཨུཏྟརིམནུསྶདྷམྨཔཱརཱཛིཀཾ (པཱརཱ. ༡༩༥), སཉྩརིཏྟེ (པཱརཱ. ༣༠༡, ༣༠༢) སངྒྷཱདིསེསོ, ‘‘ཡོ ཏེ ཝིཧཱརེ ཝསཏི, སོ ཨརཧཱ’’ཏི (པཱརཱ. ༢༢༠) པརིཡཱཡེན ཐུལླཙྩཡཾ, བྷིཀྑུསྶ པཎཱིཏབྷོཛནཝིཉྙཏྟིཡཱ པཱཙིཏྟིཡཾ (པཱཙི. ༢༥༧), བྷིཀྑུནིཡཱཔཎཱིཏབྷོཛནཝིཉྙཏྟིཡཱ ¶ པཱཊིདེསནཱིཡཾ (པཱཙི. ༡༢༣༦), སཱུཔོདནཝིཉྙཏྟིཡཱ (པཱཙི. ༦༡༢-༦༡༣) དུཀྐཊནྟི ཨིམེསཾ པརིཝཱརེ (པརི. ༢༨༧) ཝུཏྟཱནཾ ཚནྣཾ. ན ཧེཏཱ ཨཱཔཏྟིཡོ ཨཱཛཱིཝཧེཏུ ཨེཝ པཉྙཏྟཱ སཉྩརིཏྟཱདཱིནཾ ཨཉྙཐཱཔི ཨཱཔཛྫིཏབྦཏོ. ཨཱཛཱིཝཧེཏུཔི ཨེཏཱསཾ ཨཱཔཛྫནཾ སནྡྷཱཡ ཨེཝཾ ཝུཏྟཾ, ཨཱཛཱིཝཧེཏུཔི པཉྙཏྟཱནནྟི ཨཏྠོ. ན ཀེཝལཉྩ ཨེཏཱ ཨེཝ, ཨཉྙཱཔི ཨདིནྣཱདཱནཀུལདཱུསནཔཱཎཝདྷཝེཛྫཀམྨཱདིཝསེན ཨཱཛཱིཝཧེཏུ ཨཱཔཛྫིཏབྦཱཔི སནྟི, ཏཱ པན ཨཱཔཏྟིསབྷཨཱགཏཱཡ པཱརཱཛིཀཱདཱིསུ ཚསུ ཨེཝ སངྒཡ྄ཧནྟཱིཏི ཝིསུཾ ན ཝུཏྟཱཏི ཝེདིཏབྦཱ.

ཨེཏྟཱཝཏཱ པན སཱིསཾ ན ཨེཏཱིཏི སངྒྷཱདིསེསཾ སནྡྷཱཡ ཝུཏྟཾ, ཙོདནཱ པན ཀཏཱ ཨེཝ ཧོཏི. ཏིཾསཱནཱིཏི ཏིཾསཾ ཨེཏེསམཏྠཱིཏི ཏིཾསཱནི, ཏིཾསཱདྷིཀཱནཱིཏི ཝུཏྟཾ ཧོཏི. ནཝུཏཱནཱིཏི ཨེཏྠཱཔི ཨེསེཝ ནཡོ.

ཨཏྟཱདཱནཾ ཨཱདཱཏུཀཱམེནཱཏི ཨེཏྠ ཨཏྟནཱ ཨཱདཱཏབྦཏོ དིཊྛཱདིམཱུལཀེཧི གཧེཏབྦཏོ པརསྶ ཝིཔྥནྡིཏུཾ ཨདཏྭཱ པགྒཎྷནཏོ ཨཏྟཱདཱནནྟི ཙོདནཱ ཝུཙྩཏི, ཏཾ ཨཱདཱཏུཀཱམེན, ཙོདནཾ ཀཏྟུཀཱམེནཱཏི ཨཏྠོ.

ཨུབྦཱཧིཀཱཡཱཏི ཨུབྦཧནྟི ཝིཡོཛེནྟི ཨེཏཱཡ ཨལཛྫཱིནཾ ཏཛྫནིཾ ཝཱ ཀལཧཾ ཝཱཏི ཨུབྦཱཧིཀཱ, སངྒྷསམྨུཏི, ཏཱཡ. ཝིནིཙྪིནནཾ ནཱམ ཏཱཡ སམྨཏབྷིཀྑཱུཧི ཝིནིཙྪནནམེཝ. ཨལཛྫུསྶནྣཱཡ ཧི པརིསཱཡ སམཐཀྑནྡྷཀེ (ཙཱུལ༹ཝ. ༢༢༧) ཨཱགཏེཧི དསངྒེཧི སམནྣཱགཏཱ དྭེ ཏཡོ བྷིཀྑཱུ ཏཏྠེཝ ཝུཏྟཱཡ ཉཏྟིདུཏིཡཀམྨཝཱཙཱཡ སམྨནྣིཏབྦཱ, ཏེཧི ཙ སམྨཏེཧི ཝིསུཾ ཝཱ ནིསཱིདིཏྭཱ, ཏསྶཱ ཨེཝ ཝཱ པརིསཱཡ ‘‘ཨཉྙེཧི ན ཀིཉྩི ཀཐེཏབྦ’’ནྟི སཱཝེཏྭཱ ཏཾ ཨདྷིཀརཎཾ ཝིནིཙྪིཏབྦཾ.

ཀིམྷཱིཏི ཀིསྨིཾ ཝཏྠུསྨིཾ, ཀཏརཝིཔཏྟིཡནྟི ཨཏྠོ. ‘‘ཀིམྷི ནཾ ནཱམཱ’’ཏི ཨིདཾ ‘‘ཀཏརཱཡ ཝིཔཏྟིཡཱ ཨེཏཾ ཙོདེསཱི’’ཏི ཡཱཡ ཀཱཡཙི ཝིཉྙཱཡམཱནཱཡ བྷཱསཱཡ ཝུཏྟེཔི ཙོདཀསྶ ཝིནཡེ ཨཔཀཏཉྙུཏཱཡ ‘‘སཱིལཱཙཱརདིཊྛིཨཱཛཱིཝཝིཔཏྟཱིསུ ཀཏརཱཡཱཏི མཾ པུཙྪཏཱི’’ཏི ¶ ཉཱཏུཾ ཨསཀྐོནྟསྶ པུཙྪཱ, ན པན ཀིམྷཱིཏིཨཱདིཔདཏྠམཏྟཾ ཨཛཱནནྟསྶ. ན ཧི ཨནུཝིཛྫཀོ ཙོདཀཾ བཱལཾ ཨཔརིཙིཏབྷཱསཱཡ ‘‘ཀིམྷི ན’’ནྟི པུཙྪཏི. ‘‘ཀིམྷི ནམྤི ན ཛཱནཱསཱི’’ཏི ཨིདམྤི ཝཙནམཏྟཾ སནྡྷཱཡ ཝུཏྟཾ ན ཧོཏི, ‘‘ཀཏརཝིཔཏྟིཡཱ’’ཏི ¶ ཝུཏྟེ ‘‘ཨསུཀཱཡ ཝིཔཏྟིཡཱ’’ཏི ཝཏྟུམྤི ན ཛཱནཱསཱིཏི ཝཙནསྶ ཨདྷིཔྤཱཡམེཝ སནྡྷཱཡ ཝུཏྟནྟི གཧེཏབྦཾ. ཏེནེཝ ཝཀྑཏི ‘‘བཱལསྶ ལཛྫིསྶ ནཡོ དཱཏབྦོ’’ཏི ཝཏྭཱ ཙ ‘‘ཀིམྷི ནཾ ཙོདེསཱིཏི སཱིལཝིཔཏྟིཡཱ’’ཏིཨཱདི ཨདྷིཔྤཱཡཔྤཀཱསནམེཝ ནཡདཱནཾ ཝུཏྟཾ, ན པན ཀིམྷི-ནཾ-པདཱནཾ པརིཡཱཡམཏྟདསྶནཾ. ན ཧི བཱལོ ‘‘ཀཏརཝིཔཏྟིཡཾ ནཾ ཙོདེསཱི’’ཏི ཨིམསྶ ཝཙནསྶ ཨཏྠེ ཉཱཏེཔི ཝིཔཏྟིཔྤབྷེདནཾ, ཨཏྟནཱ ཙོདིཡམཱནཾ ཝིཔཏྟིསརཱུཔཉྩ ཛཱནིཏུཾ སཀྐོཏི, ཏསྨཱ ཏེནེཝ ཨཛཱནནེན ཨལཛྫཱི ཨཔསཱདེཏབྦོ. ‘‘ཀིམྷི ན’’ནྟི ཨིདམྤི ཨུཔལཀྑཎམཏྟཾ, ཨཉྙེན ཝཱ ཡེན ཀེནཙི ཨཱཀཱརེན ཨཝིཉྙུཏཾ པཀཱསེཏྭཱ ཝིསྶཛྫེཏབྦོཝ.

‘‘དུམྨངྐཱུནཾ པུགྒལཱནཾ ནིགྒཧཱཡཱ’’ཏིཨཱདིཝཙནཏོ (པཱརཱ. ༣༩; པརི. ༢) ‘‘ཨལཛྫཱིནིགྒཧཏྠཱཡ…པེ… པཉྙཏྟ’’ནྟི ཝུཏྟཾ. ཨེཧིཏཱིཏི ཧི-ཀཱརོ ཨེཏྠ ཨཱགམོ དཊྛབྦོ, ཨཱགམིསྶཏཱིཏི ཨཏྠོ. དིཊྛསནྟཱནེནཱཏི དིཊྛནིཡཱམེན. ཨལཛྫིསྶ པཊིཉྙཱཡ ཨེཝ ཀཱཏབྦནྟི ཝཙནཔཊིཝཙནཀྐམེནེཝ དོསེ ཨཱཝིབྷཱུཏེཔི ཨལཛྫིསྶ ‘‘ཨསུདྡྷོཧ’’ནྟི དོསསམྤཊིཙྪནཔཨཉྙཱཡ ཨེཝ ཨཱཔཏྟིཡཱ ཀཱཏབྦནྟི ཨཏྠོ. ཀེཙི པན ‘‘ཨལཛྫིསྶ ཨེཏཾ ནཏྠཱིཏི སུདྡྷཔཊིཉྙཱཡ ཨེཝ ཨནཱཔཏྟིཡཱ ཀཱཏབྦནྟི ཨཡམེཏྠ ཨཏྠོ སངྒཧིཏོ’’ཏི ཝདནྟི, ཏཾ ན ཡུཏྟཾ ཨནུཝིཛྫཀསྶེཝ ནིརཏྠཀཏྟཱཔཏྟིཏོ ཙོདཀེནེཝ ཨལཛྫིཔཊིཉྙཱཡ ཋཱཏབྦཏོ. དོསཱཔགམཔཊིཉྙཱ ཨེཝ ཧི ཨིདྷ པཊིཉྙཱཏི ཨདྷིཔྤེཏཱ. ཏེནེཝ ཝཀྑཏི ‘‘ཨེཏམྤི ནཏྠཱིཏི པཊིཉྙཾ ན དེཏཱི’’ཏིཨཱདི (པཱརཱ. ཨཊྛ. ༢.༣༨༥-༣༨༦).

ཏདཏྠདཱིཔནཏྠནྟི ཨལཛྫིསྶ དོསེ ཨཱཝིབྷཱུཏེཔི ཏསྶ དོསཱཔགམཔཊིཉྙཱཡ ཨེཝ ཀཱཏབྦཏཱདཱིཔནཏྠཾ. ཝིཝཱདཝཏྠུསངྑཱཏེ ཨཏྠེ པཙྩཏྠིཀཱ ཨཏྠཔཙྩཏྠིཀཱ. སཉྙཾ དཏྭཱཏི ནེསཾ ཀཐཱཔཙྪེདཏྠཾ, ཨབྷིམུཁཀརཎཏྠཉྩ སདྡཾ ཀཏྭཱ. ཝིནིཙྪིནིཏུཾ ཨནནུཙྪཝིཀོཏི ‘‘ཨསུདྡྷོ’’ཏི སཉྙཱཡ ཙོདཀཔཀྑེ པཝིཊྛཏྟཱ ཨནུཝིཛྫཀབྷཱཝཏོ བཧིབྷཱུཏཏྟཱ ཨནུཝིཛྫིཏུཾ ཨསཀྐུཎེཡྻཏཾ སནྡྷཱཡ ཝུཏྟཾ. སནྡེཧེ ཨེཝ ཧི སཏི ཨནུཝིཛྫིཏུཾ སཀྐཱ, ཨསུདྡྷདིཊྛིཡཱ པན སཏི ཙུདིཏཀེན ཝུཏྟཾ སབྦཾ ཨསཙྩཏོཔི པཊིབྷཱཏི, ཀཐཾ ཏཏྠ ཨནུཝིཛྫནཱ སིཡཱཏི.

‘‘ཏཐཱ ¶ ནཱསིཏཀོཝ བྷཝིསྶཏཱི’’ཏི ཨིམིནཱ ཝིནིཙྪཡཾ ཨདཏྭཱ སངྒྷཏོ ཝིཡོཛནཾ ནཱམ ལིངྒནཱསནཱ ཝིཡ ཨཡམྤི ཨེཀོ ནཱསནཔྤཀཱརོཏི དསྶེཏི. ཝིརདྡྷཾ ཧོཏཱིཏི སཉྩིཙྩ ཨཱཔཏྟིཾ ¶ སཧསཱ ཨཱཔནྣོ ཧོཏི. ‘‘ཨཱདིཏོ པཊྛཱཡ ཨལཛྫཱི ནཱམ ནཏྠཱི’’ཏི ཨིདཾ ‘‘པཀྑཱནུརཀྑཎཏྠཱཡ པཊིཉྙཾ ན དེཏཱི’’ཏི ཨིམསྶ ཨལཛྫིལཀྑཎསམྦྷཝསྶ ཀཱརཎཝཙནཾ. པཊིཙྪཱདིཏཀཱལཏོ པཊྛཱཡ ཨལཛྫཱི ནཱམ ཨེཝ, པུརིམོ ལཛྫིབྷཱཝོ ན རཀྑཏཱིཏི ཨཏྠོ. པཊིཉྙཾ ན དེཏཱིཏི སཙེ མཡཱ ཀཏདོསཾ ཝཀྑཱམི, མཡ྄ཧཾ ཨནུཝཏྟཀཱ བྷིཛྫིསྶནྟཱིཏི པཊིཉྙཾ ན དེཏི. ཋཱནེ ན ཏིཊྛཏཱིཏི ལཛྫིཊྛཱནེ ན ཏིཊྛཏི, ཀཱཡཝཱཙཱསུ ཝཱིཏིཀྐམོ ཧོཏི ཨེཝཱཏི ཨདྷིཔྤཱཡོ. ཏེནཱཧ ‘‘ཝིནིཙྪཡོ ན དཱཏབྦོ’’ཏི, པུབྦེ པཀྑིཀཱནཾ པཊིཉྙཱཡ ཝཱུཔསམིཏསྶཱཔི ཨདྷིཀརཎསྶ དུཝཱུཔསནྟཏཱཡ ཨཡམྤི ཏཐཱ ནཱསིཏཀོཝ བྷཝིསྶཏཱིཏི ཨདྷིཔྤཱཡོ.

ཙུདིཏཀཙོདཀེསུ པཊིཔཏྟིཾ ཉཏྭཱཏི ‘‘ཏུམྷེ ཨམྷཱཀཾ ཝིནིཙྪཡེན ཏུཊྛཱ བྷཝིསྶཐཱ’’ཏིཨཱདིནཱ ཝུཏྟཾ ཙུདིཏཀཙོདཀེསུ ཨནུཝིཛྫཀེན པཊིཔཛྫིཏབྦཀམྨཾ ཉཏྭཱ. ཝིནིཙྪཡོ མཛ྄ཛྷེཏི ཨཱཔཏྟཱིཏི ཝཱ ཨནཱཔཏྟཱིཏི ཝཱ ཝིནིཙྪཡཔརིཡོསཱནཨནུཝིཛྫནཱནཾ མཛ྄ཛྷཾ ནཱམཱཏི ཨཏྠོ.

ཨམཱུལཀམྤི སམཱུལཀཾ ཀཏྭཱ ཝདནྟཱིཏི ཨཱཧ ‘‘དྭེ མཱུལཱནཱི’’ཏི. ཀཱལེན ཝཀྑཱམཱིཏིཨཱདཱིསུ ཨོཀཱསཾ ཀཱརཱཔེཏྭཱ ཝདནྟོ ཀཱལེན ཝདཏི ནཱམ. སལཱཀགྒཡཱགུཨགྒབྷིཀྑཱཙཱརཊྛཱནཱདཱིསུ ཙོདེནྟོ ཨཀཱལེན ཝདཏི ནཱམ. དོསཏོ ཝུཊྛཱཔེཏུཀཱམཏཱཡ ཝདནྟོ ཨཏྠསཾཧིཏེན ཝདཏི ནཱམ. དོསནྟརོཏི དོསཙིཏྟོ. པནྣརསསུ དྷམྨེསཱུཏི ‘‘པརིསུདྡྷཀཱཡསམཨཱཙཱརཏཱ, ཏཐཱ ཝཙཱིསམཱཙཱརཏཱ, སབྲཧྨཙཱརཱིསུ མེཏྟཙིཏྟཏཱ, བཧུསྶུཏཏཱ, ཨུབྷིནྣཾ པཱཏིམོཀྑཱནཾ སྭཱགཏཱདིཏཱ, ཀཱལེན ཝཀྑཱམཱི’’ཏིཨཱདིནཱ (པརི. ༣༦༢) ཝུཏྟཔཉྩདྷམྨཱ ཙ ཀཱརུཉྙཏཱ, ཧིཏེསིཏཱ, ཨནུཀམྤཏཱ, ཨཱཔཏྟིཝུཊྛཱནཏཱ, ཝིནཡཔུརེཀྑཱརཏཱཏི (ཙཱུལ༹ཝ. ༤༠༡) ཨིམེསུ པནྣརསསུ. ཏཏྠ ‘‘ཀཱརུཉྙཏཱ’’ཏི ཨིམིནཱ ཀརུཎཱ དསྶིཏཱ. ཧིཏེསིཏཱཏི ཧིཏགཝེསནཏཱ. ཨནུཀམྤཏཱཏི ཏེན ཧིཏེན སཾཡོཛནཏཱ, ཨིམེཧི དྭཱིཧིཔི མེཏྟཱ དསྶིཏཱ. ཨཱཔཏྟིཝུཊྛཱནཏཱཏི སུདྡྷནྟེ པཏིཊྛཱཔནཏཱ. ཝཏྠུཾ ཙོདེཏྭཱ སཱརེཏྭཱ པཊིཉྙཾ ཨཱརོཔེཏྭཱ ཡཐཱཔཊིཉྙཱཡ ཀམྨཀརཎཾ ཝིནཡཔུརེཀྑཱརཏཱ ནཱམ.

ཨདྷིཀརཎཊྛེནཱཏི ¶ ཨདྷིཀཱཏབྦཊྛེན, སམཐེཧི ཝཱུཔསམེཏབྦཊྛེནཱཏི ཨཏྠོ. ཏཾ ནཱནཏྟཾ དསྶེཏུནྟི ཨིདྷ ཨནདྷིཔྤེཏམྤི ཨཏྠུདྡྷཱརཝསེན ཏཾ ནཱནཏྟཾ དསྶེཏུནྟི ཨདྷིཔྤཱཡོ. ཏེནེཝ ཝཀྑཏི ‘‘སེསཱནི ཨཏྠུདྡྷཱརཝསེན ཝུཏྟཱནཱི’’ཏི (པཱརཱ. ཨཊྛ. ༢.༣༨༥-༣༨༦). ཡཾ ཨདྷིཀིཙྩཱཏིཨཱདིནཱ ཨདྷིཀརཎསདྡསྶ ཀམྨསཱདྷནཏཱ ཝུཏྟཱ.

གཱཧནྟི ¶ ‘‘ཨསུཀཾ ཙོདེསྶཱམཱི’’ཏི མནསཱ ཙོདནཱཀཱརསྶ གཧཎཾ. ཙེཏནནྟི ‘‘ཙོདེསྶཱམཱི’’ཏི ཨུཔྤནྣཙིཏྟབྱཱཔཱརསངྑཱཏཾ ཙིཏྟཀམྨཾ. ཨཀྑནྟིནྟི ཙུདིཏཀསྶ ཝིཔཏྟིཾ དིསྭཱ ཨུཔྤནྣཾ ཀོདྷཾ ཨསཧནཾ, ཏཐཱ པཝཏྟཾ ཝཱ ཡཾ ཀིཉྩི ཙིཏྟཙེཏསིཀརཱསིཾ. ཝོཧཱརནྟི ཙོདནཱཝསཔྤཝཏྟཝཙནཾ. པཎྞཏྟིནྟི ཙོདནཱཝསཔྤཝཏྟཾ མནསཱ པརིཀཔྤིཏཾ ནཱམཔཎྞཏྟིཾ. ཨཏྟཱདཱནཾ གཧེཏྭཱཏི ཙོདནཾ མནསཱ གཧེཏྭཱ. ཏཾ ཨདྷིཀརཎནྟི ཏཾ གཱཧལཀྑཎཾ ཨདྷིཀརཎཾ. ནིརུཛ྄ཛྷཏི ཙེཏནཱཡ ཁཎིཀཏྟཱ, སཱ ཙ སམཐཔྤཏྟཱ ཧོཏཱིཏི ཨེཝམེཏྠ ཨནིཊྛཔྤསངྒོ ཝེདིཏབྦོ. ཨེཝཾ ཨུཔརིཔི ‘‘ཏུཎྷཱི ཧོཏཱི’’ཏི ཨིམིནཱ ཝོཧཱརཝཙནསྶ ནིརོདྷཾ དསྶེཏི. ཏེནཱཧ ‘‘ཏཾ ཨདྷིཀརཎཾ སམཐཔྤཏྟཾ བྷཝིསྶཏཱི’’ཏི. ‘‘ཏསྨཱ པཎྞཏྟི ཨདྷིཀརཎ’’ནྟི ཨཊྛཀཐཱསུ ཀཏསནྣིཊྛཱནཾ དསྶེཏྭཱ ཨིདཱནི ཏསྶཱཔི ཨེཀཙྩེཧི པཊིཀྑིཏྟབྷཱཝཾ དསྶེཏྭཱ པུན ཏམྤི པཊིསེདྷེཏྭཱ ཨཊྛཀཐཱསུ ཝུཏྟཔཎྞཏྟིཡཱ ཨེཝ ཨདྷིཀརཎཏཾ སམཏྠེཏུཾ ‘‘ཏཾ པནེཏ’’ནྟིཨཱདིམཱཧ. ཏཏྠ ཏཾ པནེཏནྟི པཎྞཏྟི ཨདྷིཀརཎནྟི ཨེཏཾ གཧཎཾ ཝིརུཛ྄ཛྷཏཱིཏི སམྦནྡྷོ. པཱརཱཛིཀཱདིཨཱཔཏྟི ཨེཀནྟཨཀུསལསབྷཱཝཱ ཝཱ ཨབྱཱཀཏསབྷཱཝཱ ཝཱ ཧོཏཱིཏི སཉྙཱཡ ‘‘མེཐུནདྷམྨཔཱརཱཛིཀཱཔཏྟཱི’’ཏིཨཱདིཀཾ སུཏྟཾ པཎྞཏྟིཨདྷིཀརཎཝཱདེན ཝིརུཛ྄ཛྷཏཱིཏི དསྶེཏུཾ ཨུདྡྷཊཾ. ཏེནཱཧ ‘‘ན ཧི ཏེ…པེ… ཨཙྩནྟཨཀུསལཏྟཱ’’ཏིཨཱདི. ཏེཏི ཨཊྛཀཐཱཙརིཡཱ.

ཨམཱུལཀཉྩེཝ ཏཾ ཨདྷིཀརཎནྟི ཨེཏྠ ཨམཱུལཀཔཱརཱཛིཀམེཝ ཨདྷིཀརཎ-སདྡེན ཨདྷིཔྤེཏནྟི དསྶེཏུཾ ‘‘ཡཉྩེཏ’’ནྟིཨཱདི ཝུཏྟཾ. ཡསྨཱ པནཱཏིཨཱདི པན ཨིདྷཱདྷིཔྤེཏཱཡ ཨམཱུལཀཔཱརཱཛིཀཱཔཏྟིཡཱ ཨེཝ པཎྞཏྟིབྷཱཝོ ཡུཛྫཏཱིཏི དསྶེཏུཾ ཨཱརདྡྷཾ. ཏཏྠ ཡཱཡ པཎྞཏྟིཡཱཏི སབྷཱཝཏོ པརིསུདྡྷེཔི པུགྒལེ ‘‘པཱརཱཛིཀོ’’ཏིཨཱདིནཱ ཙོདཀེན པཝཏྟིཏཾ ནཱམཔཎྞཏྟིཾ སནྡྷཱཡ ཝདཏི. པཉྙཏྟོཏི ཀཐིཏོ. ཨདྷིཀརཎེ པཝཏྟཏྟཱཏི ཨཝིཛྫམཱནེཔི ¶ མནསཱ ཨཱརོཔིཏམཏྟེ ཨཱཔཏྟཱདྷིཀརཎེ ཝཱཙཀབྷཱཝེན པཝཏྟཏྟཱ.

ཨེཝཾ ནཱམཔཎྞཏྟིཝསེན ཨིམསྨིཾ སིཀྑཱཔདེ ཨཱཔཏྟཱདྷིཀརཎསྶ པཉྙཏྟིབྷཱཝཾ དསྶེཏྭཱ ཨིདཱནི ཨཏྠཔཎྞཏྟིཝསེནཱཔི དསྶེཏུཾ ‘‘ཡསྨཱ ཝཱཡ’’ནྟིཨཱདི ཝུཏྟཾ. པཉྙཏྟིམཏྟམེཝཱཏི ཨཝིཛྫམཱནསྶ ཝིཛྫམཱནཱཀཱརེན མནསཱ ཨཱརོཔིཏཨཏྠཔཎྞཏྟིམཏྟམེཝཱཏི ཨཏྠོ. ཏཉྩ ཁོ ཨིདྷེཝཱཏི ཏཉྩ ཡཐཱཝུཏྟཔརིཡཱཡེན པཎྞཏྟིཡཱ ཨདྷིཀརཎཏྟཾ ཨིདྷེཝ ཨིམསྨིཾ ཨེཝ སིཀྑཱཔདེ. ཨེཀེཏི ཀེཙི. ཏཾ ན ཡུཏྟནྟི ཡཾ ཨེཀཙྩེཧི ཨཊྛཀཐཱསུ ཝུཏྟཾ, ཨདྷིཀརཎསྶ པཎྞཏྟིབྷཱཝཾ ནིསེདྷེཏྭཱ ཀུསལཱདིཔརམཏྠབྷཱཝཾ སཱདྷེཏུཾ ‘‘ཏཾ པནེཏཾ མེཐུནདྷམྨཔཱརཱཛིཀཱཔཏྟཱི’’ཏིཨཱདིནཱ པཔཉྩཏོ དསྶིཏོ, ཏཾ ན ཡུཏྟནྟི ཨཏྠོ. ཏཏྠ ཀཱརཎམཱཧ ‘‘ཨཱདིཀམྨིཀསྶཱ’’ཏིཨཱདིནཱ, ཏེན ཙ ཏསྨིཾ ཝཱདེ ཡདི ཨཱཔཏྟི ནཱམ ཨཀུསལཱ ཝཱ ཨབྱཱཀཏཱ ཝཱ བྷཝེཡྻ, ཀཐཾ ཨཱདིཀམྨིཀསྶ ¶ ཨནཱཔཏྟི བྷཝེཡྻ? ཏསྶཱཔི ཨཀུསལཱདཱིནཾ ཨུཔྤནྣཏྟཱ བྷགཝཏོ སིཀྑཱཔདཔཉྙཏྟིཏོ པཊྛཱཡ ཡཱཝ ཨཱཔཏྟཱིཏིཔི ན སཀྐཱ ཝཏྟུཾ, མེཐུནཱདཱིསུ ཨཀུསལཱདཱིནཾ སིཀྑཱཔདཔཉྙཏྟིཏོ པུབྦེཔི སམུཔྤཏྟིཏོ. ཏཏོ ཨེཝ ཨནུཔསམྤནྣཱནམྤི ཨཱཔཏྟིཔྤསངྒོ, གིལཱནཱདཱིནཾ ཨུཔྤནྣཏྟཱ ཨནུཔཉྙཏྟིཡཱཔི ཨནཱཔཏྟིཨབྷཱཝཔྤསངྒོ ཙ སིཡཱ. ཨཐ མཏཾ ‘‘ན ཀེཝལཾ ཨཀུསལཱདི ཨེཝ, ཨཐ ཁོ བྷགཝཏཱ པཊིཀྑིཏྟབྷཱཝཾ ཛཱནནྟསྶ སམུཔྤཛྫམཱནཱ ཨེཝ ཨཀུསལཱདཡོ ཨཱཔཏྟཱི’’ཏི, ཏམྤི ཨསཱརཾ, སིཀྑཱཔདཔཉྙཏྟིཾ ཨཛཱནིཏྭཱ ཝཱིཏིཀྐམནྟསྶ མེཐུནཱདཱིསུ ཨནཱཔཏྟིཔྤསངྒཏོ, ཨཀུསལཱདིསབྷཱཝཱཡ ཙ ཨཱཔཏྟིཡཱ ཨེཀཔཡོགཱདཱིསུ ཨེཀཏྟཱདིཔི ན སིཡཱ. ན ཧི སཀལམྤི དིཝསཾ ཨིཏྠིཾ ཀཱཡཏོ ཨམོཙེཏྭཱ ཕུསནྟསྶ ཨེཀམེཝཱཀུསལཾ ཨུཔྤཛྫཏི, བཧཱུ ཝཱ ཨིཏྠིཡོ ཕུསིཏྭཱ ཨཔགཙྪནྟསྶ བཧཱུནི, ཡེནཱཔཏྟིཡཱ ཨེཀཏྟཾ, བཧུཏྟཾ ཝཱ སིཡཱཏི ཨེཝམཱདིཀཾ ཨཡུཏྟིཾ སངྒཧེཏྭཱ དསྶིཏནྟི ཝེདིཏབྦཾ.

ཏཏྠ ཝཏྠུཉྩཱཏི ཝཱིཏིཀྐམོ. ཏཉྷི ཨཱཔཏྟིསམྨུཏིཔཉྙཱཔནསྶ ཨོཀཱསཊྛེན ‘‘ཝཏྠཱུ’’ཏི ཝུཙྩཏི. གོཏྟནྟི ཨདིནྣཱདཱནཱདིཏོ བུདྡྷིསདྡནིཝཏྟནཊྛེན པརིཀཔྤིཏསཱམཉྙཱཀཱརོ གོཏྟཾ. ནཱམནྟི ཨཝིཛྫམཱནནཱམཔཉྙཏྟི. ཏསྶ པན པཱརཱཛིཀནྟི ནཱམསྶ ཨཏྠབྷཱུཏཱ ཨཱཔཏྟི ཨཏྠཔཉྙཏྟི ཨེཝཱཏི དཊྛབྦཾ ¶ . ཡཾ པན ‘‘ཝིཝཱདཱདྷིཀརཎཾ སིཡཱ ཀུསལ’’ནྟིཨཱདི (ཙཱུལ༹ཝ. ༢༢༠; པརི. ༣༠༣), ‘‘ཨཱཔཏྟཱདྷིཀརཎཾ སིཡཱ ཨཀུསལ’’ནྟིཨཱདི (ཙཱུལ༹ཝ. ༢༢༢) ཙ སུཏྟཾ ཏེཧི སམུདྡྷཊཾ, ཏམྤི ན ཝིཝཱདཱདཱིནཾ ཀུསལཱདིབྷཱཝསྶ པརིཡཱཡདེསིཏཏྟཱཏི ཡཾ ཨེཏྠ ཝཏྟབྦཾ, ཏཾ ཧེཊྛཱ པཋམཔཱརཱཛིཀསམུཊྛཱནཱདིཝཎྞནཱཡ སཱརཏྠདཱིཔནིཡཾ ཝིརདྡྷཊྛཱནསོདྷནཏྠཾ ཝིཏྠཱརཏོ ཝུཏྟནྟི ཏཏྠེཝ ཏཾ གཧེཏབྦཾ, སཱརཏྠདཱིཔནཱིཀཱརཀསྶ ཨཀུསལཱདིརཱུཔཱཝ ཨཱཔཏྟཱིཏི ལདྡྷི, ཏེནེཝ སོ ཨིདྷཱཔི ‘‘ཏསྨཱ པཎྞཏྟིཨདྷིཀརཎནྟི ཨཊྛཀཐཱསུ ཀཏསནྣིཊྛཱནཾ དསྶེཏྭཱ ཨིདཱནི ཏམྤི ན ཡུཏྟནྟི དསྶེཏུཾ ‘ཏཾ པནེཏ’ནྟིཨཱདིམཱཧཱ’’ཏི (སཱརཏྠ. ཊཱི. ༢.༣༨༥-༣༨༦) ཨེཝཾ ཨཏྟནོ ལདྡྷིཾ ཨཊྛཀཐཱཙརིཡསྶཔི ལདྡྷིཾ ཀཏྭཱ གནྠཝིརོདྷམྤི ཨནོལོཀེཏྭཱ དསྶེསི. ན ཧེཏྠ བུདྡྷགྷོསཱཙརིཡོ ཨཊྛཀཐཱཝཱདཾ ཨཡུཏྟནྟི དསྶེཏུཾ ‘‘ཏཾ པནེཏ’’ནྟིཨཱདིམཱརབྷི ‘‘པཎྞཏྟིམཏྟམེཝ ཨཱཔཏྟཱདྷིཀརཎནྟི ཝེདིཏབྦ’’ནྟི སཡམེཝ ཨུཔརི ཀཐནཏོ, ཨཐ ཁོ དུལླདྡྷིཀཱནཾ ཨེཀཙྩཱནཾ ཏཏྠ ཝིཔྤཊིཔཏྟིཾ དསྶེཏྭཱ པུན ཏཾ པཊིསེདྷེཏུཀཱམོ ཨཱརབྷི, ཏེནེཝ ཨནྟེ ‘‘ཨེཀེ’’ཏི ཝུཏྟནྟི ཝེདིཏབྦཾ. ཝིཝཱདཱདཱིནཾ ཀུསལཱདིཀཏྟེ ཏཾསམཐཱནམྤི ཏབྦྷཱཝོ ཨཱཔཛྫཏི པརམཏྠེསུ པཎྞཏྟིཡཱ སམཐཱཡོགཱཏི ཨཱཧ ‘‘ཀུསལཱདིསམཐེཧཱི’’ཏི. པཉྙཏྟིསབྷཱཝཱནམེཝ ཙཏུནྣཾ ཨདྷིཀརཎཱནཾ སམཐེཧི ཨདྷིཀརཎཱིཡཏཱ, ན པན ཀུསལཱདིཔརམཏྠརཱུཔཱནཾ ཏེསཾ ཏེསཾ ཁཎིཀཏཱཡ སཡམེཝ སམཐཔྤཏྟིཏོཏི ཧེཊྛཱ སམཏྠིཏམཏྠཾ ནིགམནཝསེན དསྶེནྟེན ‘‘ཨིཏི ཨིམིནཱ ཨདྷིཀརཎཊྛེནཱ’’ཏི ཝུཏྟཾ, ཏསྶ ཡཐཱཝུཏྟནཡེན ¶ སམཐེཧི ཨདྷིཀརཎཱིཡཏཱཡཱཏི ཨཏྠོ. ‘‘ཨིདྷེཀཙྩོ’’ཏི ཨིམིནཱ ཨིདྷཱདྷིཔྤེཏཾ ཝིཝཱདཾ ནིཝཏྟེཏི.

ཨནུཝཱདོཏི ཝིཔཏྟཱིཧི ཨུཔཝདནཱ ཙེཝ ཙོདནཱ ཙ. ཏཏྠ ཨུཔཝདནཱ ནཱམ གརཧཱ, ཨཀྐོསོ ཙ. པཉྩཔཱིཏི མཱཏིཀཱཔརིཡཱཔནྣཱཔཏྟིཡོ སནྡྷཱཡ ཝུཏྟཾ. ཀིཙྩཡཏཱཏི ཀཏྟབྦཏཱ. སཔདཱནུཀྐམནིདྡེསསྶཱཏི ཨེཏྠ པདཱནུཀྐམནིདྡེསོཏི པདབྷཱཛནཾ ཝུཙྩཏི, ཏེན སཧིཏསྶ སིཀྑཱཔདསྶཱཏི ཨཏྠོ.

༣༨༧. ཨསྶཱཏི ཀཏྟུཨཏྠེ སཱམིཝཙནནྟི ཨཱཧ ‘‘ཨེཏེན ཙོདཀེནཱ’’ཏིཨཱདི. དིཊྛམཱུལཀེ པནཱཏི ‘‘དིཊྛསྶ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ’’ཏིཨཱདི ¶ (པཱརཱ. ༣༨༧) པཱལི༹ཝཱརཾ སནྡྷཱཡ ཝུཏྟཾ. ཏཏྠ ཨིཏྠིཡཱ སདྡྷིཾ རཧོནིསཛྫཱདིདསྶནམཏྟཝསེན པཱརཱཛིཀཾ དྷམྨཾ ཨཛ྄ཛྷཱཔཛྫནྟོ པུགྒལོ ཏེན དིཊྛོ, ན པན མགྒེན མགྒཔྤཊིཔཱདནཱདིདསྶནཝསེན. ཡདི ཧི ཏེན སོ ཏཐཱ དིཊྛོ བྷཝེཡྻ, ཨསུདྡྷསཉྙཱི ཨེཝཱཡཾ ཏསྨིཾ པུགྒལེ སིཡཱ, ཨསུདྡྷསཉྙཱཡ ཙ སུདྡྷཾ ཝཱ ཨསུདྡྷཾ ཝཱ ཙོདེནྟསྶ སངྒྷཱདིསེསོ ན སིཡཱ ‘‘ཨནཱཔཏྟི སུདྡྷེ ཨསུདྡྷདིཊྛིསྶ, ཨསུདྡྷེ ཨསུདྡྷདིཊྛིསྶཱ’’ཏིཨཱདིཝཙནཏོ (པཱརཱ. ༣༩༠). ཏསྨཱ ཨིཏྠིཡཱ སདྡྷིཾ རཧོནིསཛྫཱདིམཏྟམེཝ དིསྭཱཔི ‘‘སདྡྷོ ཀུལཔུཏྟོ, ནཱཡཾ པཱརཱཛིཀཾ ཨཱཔཛྫཏཱི’’ཏི ཏསྨིཾ སུདྡྷསཉྙིསྶ ཝཱ ཝེམཏིཀསྶ ཝཱ ‘‘སུཏོ མཡཱ པཱརཱཛིཀཾ དྷམྨཾ ཨཛ྄ཛྷཱཔཛྫནྟོ’’ཏིཨཱདིནཱ ནིཡམེཏྭཱ ཙོདེནྟསྶེཝ སངྒྷཱདིསེསོ, ན ཨསུདྡྷསཉྙིསྶ, ཏསྶ པན དིཊྛཾ སུཏནྟི མུསཱཝཱདཱདིཔཙྩཡཱ ལཧུཀཱཔཏྟི ཨེཝཱཏི ཝེདིཏབྦཾ. ཡདི པན སོ ཏསྨིཾ སུདྡྷདིཊྛིཙཱཝནཱདྷིཔྤཱཡོཔི དིཊྛཾ རཧོནིསཛྫཱདིམཏྟམེཝ ཝདཏི, ཨདིཊྛཾ པན མགྒེནམགྒཔྤཊིཔཱདནཱདིཔཱརཱཛིཀཝཏྠུཾ ཝཱ ‘‘ཨསྶམཎོསཱི’’ཏིཨཱདིཀཾ ཝཱ ན ཝདཏི, ཏསྶ ཨནཱཔཏྟི. ཨདྷིཀཾ ཝདནྟསྶ པན ཨཱཔཏྟིཡེཝ ‘‘ཨདིཊྛཾ དིཊྛ’’ནྟི (པཱརཱ. ༣༨༦-༣༨༧) ཝུཏྟཏྟཱ. ཡོ པན དིཊྛེན རཧོནིསཛྫཱདིནཱ པཋམཔཱརཱཛིཀེན ཨསུདྡྷསཉྙཱི ཧུཏྭཱ ཙཱཝནཱདྷིཔྤཱཡོ ཨདིནྣཱདཱནཾ ཨཛ྄ཛྷཱཔཛྫནྟོ ‘‘དིཊྛོ’’ཏི ཝཱ ‘‘སུཏོ’’ཏི ཝཱ ཨཱདིཾ ཝདཏི, ཏསྶཱཔི ན སངྒྷཱདིསེསོ ཨསུདྡྷེ ཨསུདྡྷདིཊྛིཏཱཡཱཏི ཀེཙི ཝདནྟི. ཨཉྙེ པན ‘‘ཡེན པཱརཱཛིཀེན ཙོདེཏི, ཏེན སུདྡྷསཉྙཱབྷཱཝཱ ཨཱཔཏྟིཡེཝཱ’’ཏི ཝདནྟི, ཨིདཾ ཡུཏྟཾ. ཏཐཱ ཧི ཝུཏྟཾ མཱཏིཀཱཊྛཀཐཱཡཾ (ཀངྑཱ. ཨཊྛ. དུཊྛདོསསིཀྑཱཔདཝཎྞནཱ) ‘‘ཡེན པཱརཱཛིཀེན ཙོདེཏི, ཏཾ ‘ཨཡཾ ཨནཛ྄ཛྷཱཔནྣོ’ཏི ཉཏྭཱ ཙཱཝནཱདྷིཔྤཱཡེན…པེ… སངྒྷཱདིསེསོ’’ཏི. ཨིམིནཱ ནཡེན སུཏཱདིམཱུལཀེསུཔི ཝིནིཙྪཡོ ཝེདིཏབྦོ. ཨཉྙཏྲ ཨཱགཏེསཱུཏི ཨོམསཝཱདཱདཱིསུ ཨཱགཏེསུ. ཨཝསྶུཏོཏི ¶ ཏཱིཧིཔི དྭཱརེཧི པཱརཱཛིཀཝཏྠུབྷཱུཏདུཙྩརིཏཱནུཝསྶནེན ཏིནྟོ. ཀསམྦུཛཱཏོཏི ཀཙཝརབྷཱུཏོ, ནིསྶཱརོཏི ཨཏྠོ.

ཀོཎྛོཏི ཙོརོ, དུསྶཱིལོཏི ཨཏྠོ. ཛེཊྛབྦཏིཀོཏི ཀཱལ༹ཀཎྞིདེཝཱིཝཏེ ནིཡུཏྟོ ཏིཏྠིཡོཏི ཝདཏི, སཱ ཀིར ཀཱལ༹ཀཎྞིསིརིདེཝིཡཱ ཛེཊྛཱཏི ཝུཏྟཱ. ཡདགྒེནཱཏི ཡེན ཀཱརཎེན, ཡཏྟཀེནཱཏི ཨཏྠོ ¶ . ཏདགྒེནཱཏི ཨེཏྠཱཔི ཨེསེཝ ནཡོ. ནོ ཀཔྤེཏཱིཏིཨཱདི ཝེམཏིཀབྷཱཝདཱིཔནཏྠམེཝ ཝུཏྟནྟི མཧཱཔདུམཏྠེརསྶ ཨདྷིཔྤཱཡོ.

༣༨༩. ཨེཏྠཱཏི ཙོདནཱཡཾ. ཏཛྫནཱིཡཱདིཀམྨཾ ཀརིསྶཱམཱིཏིཨཱཔཏྟིཡཱ ཙོདེནྟསྶ ཨདྷིཔྤཱཡོ ཀམྨཱདྷིཔྤཱཡོ ནཱམ. པརིཝཱསདཱནཱདིཀྐམེན ཨཱཔཏྟིཏོ ཝུཊྛཱཔེཏུཾ ཨཱཔཏྟིཡཱ ཙོདེནྟསྶ ཨདྷིཔྤཱཡོ ཝུཊྛཱནཱདྷིཔྤཱཡོ. ཨུཔོསཐཾ, པཝཱརཎཾ ཝཱ སངྒྷེ ཀཱཏུཾ ཨདཱནཏྠཱཡ ཨཱཔཏྟིཡཱ ཙོདཡཏོ ཨདྷིཔྤཱཡོ ཨུཔོསཐཔཝཱརཎཊྛཔནཱདྷིཔྤཱཡོ. ཨསམྨུཁཱ…པེ… དུཀྐཊནྟི ཨནུདྡྷཾསེནྟསྶཔི ཨཀྐོསནྟསྶཔི དུཀྐཊཾ.

སབྦཏྠེཝཱཏི སབྦཱསུ ཨཊྛཀཐཱསུ. ཨུཔོསཐཔཝཱརཎཱནཾ ཉཏྟིཀམྨབྷཱཝཏོ ཉཏྟིཡཱ ཝཏྟམཱནཱཡ ཨེཝ ཨུཔོསཐཔཝཱརཎཊྛཔནཾ ཧོཏི, ན ནིཊྛིཏཱཡ, སཱ ཙ ཡྻ-ཀཱརེ པཏྟེ ནིཊྛིཏཱ ནཱམ ཧོཏཱིཏི ཨཱཧ ‘‘ཡྻ-ཀཱརེ པཏྟེ ན ལབྦྷཏཱི’’ཏི.

ཨནུཔཱསཀོཏི ཨུཔཱསཀོཔི སོ བྷིཀྑུ ན ཧོཏི སརཎགམནསྶཱཔི པཊིཔྤསྶདྡྷཏྟཱཏི ཝདནྟི. ‘‘ཨནོདིསྶ དྷམྨཾ ཀཐེནྟསྶཱ’’ཏི ཨིམིནཱ ཨོདིསྶ ཀཐེནྟེན ཨོཀཱསཾ ཀཱརེཏབྦནྟི དསྶེཏི. ཨཱཔཏྟིཾ དེསེཏྭཱཏི ཨོཀཱསཱཀཱརཱཔནཱཔཏྟིཾ དེསེཏྭཱ. ཡཾ ཙོདེཏི, ཏསྶ ཨུཔསམྤནྣོཏི སངྑྱུཔགམནཾ, ཏསྨིཾ སུདྡྷསཉྙིཏཱ ཝེམཏིཀཏཱ ཝཱ, ཡེན པཱརཱཛིཀེན ཙོདེཏི, ཏསྶ དིཊྛཱདིཝསེན ཨམཱུལཀཏཱ, ཙཱཝནཱདྷིཔྤཱཡེན ‘‘ཏྭཾ པཱརཱཛིཀོ’’ཏིཨཱདིནཱ ནིཡམེཏྭཱ སམྨུཁཱ ཙོདནཱ ཙོདཱཔནཱ, ཏསྶ ཏངྑཎཝིཛཱནནནྟི ཨིམཱནེཏྠ པཉྩ ཨངྒཱནི.

པཋམདུཊྛདོསསིཀྑཱཔདཝཎྞནཱ ནིཊྛིཏཱ.

༩. དུཏིཡདུཊྛདོསསིཀྑཱཔདཝཎྞནཱ

༣༩༡. ནཝམེ མེཏྟིཡཾ བྷིཀྑུནིནྟི ལིངྒནཱསནཱཡ ནཱསིཏཱཡཔི ཏསྶཱ བྷཱུཏཔུབྦཝོཧཱརཾ གཧེཏྭཱ ¶ ཝུཏྟཾ. ཨཉྙབྷཱགསྶཱཏི ཐེརསྶ མནུསྶཛཱཏིབྷིཀྑུབྷཱཝཏོ ཨཉྙསྶ ཏིརཙྪཱནཛཱཏིཚགལཀབྷཱཝསངྑཱཏསྶ ཀོཊྛཱསསྶ. ཨིདནྟི སཱམཉྙཏོ ནཔུཾསཀལིངྒེན ཝུཏྟཾ, ཨཡཾ ¶ ཚགལཀོཏི ཨཏྠོ. ཨཉྙབྷཱགོཏི ཡཐཱཝུཏྟཏིརཙྪཱནཛཱཏིཚགལཀབྷཱཝསངྑཱཏོ ཨཉྙོ ཀོཊྛཱསོ, ཨཉྙབྷཱགསྶ ཨིདནྟི ཨཉྙབྷཱགིཡནྟི པཋམཝིགྒཧསྶ ཨཏྠོ, ཨཉྙབྷཱགམཏྠཱིཏི དུཏིཡཝིགྒཧསྶ, དྭཱིཧིཔི ཚགལཀོཝ ཝུཏྟོ. ཨིདཱནི དྭཱིཧིཔི ཝིགྒཧེཧི ཝུཏྟམེཝཏྠཾ ཝིཏྠཱརཏོ དསྶེནྟོ ‘‘ཡོ ཧི སོ’’ཏིཨཱདིམཱཧ. ཏཏྠ ཡོ ཧི སོ ཚགལཀོ ཝུཏྟོ, སོ ཨཉྙསྶ བྷཱགསྶ ཧོཏཱིཏི ཙ ཨཉྙབྷཱགིཡསངྑྱཾ ལབྷཏཱིཏི ཙ ཡོཛནཱ. དུཏིཡཝིགྒཧསྶ ཨཏྠཾ དསྶེཏུཾ ‘‘སོ ཝཱ’’ཏིཨཱདི ཝུཏྟཾ. ཨདྷིཀརཎནྟི ཝེདིཏབྦོཏི ཨེཏྠཱཔི ཡོ ཧི སོ ‘‘དབྦོ མལླཔུཏྟོ ནཱམཱ’’ཏི ཚགལཀོ ཝུཏྟོ, སོཏི ཨཱནེཏྭཱ སམྦནྡྷིཏབྦཾ. ཏཉྷི སནྡྷཱཡཱཏི ‘‘དབྦོ’’ཏི ནཱམཀརཎསྶ ཨདྷིཊྛཱནབྷཱུཏཾ ཚགལཀཾ སནྡྷཱཡ. ཏེ བྷིཀྑཱུཏི ཏེ ཨནུཡུཉྫནྟཱ བྷིཀྑཱུ. ཨཱཔཏྟིཡཱཔི པུགྒལཱདྷིཊྛཱནཏྟཱ ‘‘པུགྒལཱནཾཡེཝ ལེསཱ’’ཏི ཝུཏྟཾ.

༣༩༣. ཡཱ ཙ སཱ ཨཝསཱནེ…པེ… ཙོདནཱ ཝུཏྟཱཏི ‘‘བྷིཀྑུ སངྒྷཱདིསེསཾ ཨཛ྄ཛྷཱཔཛྫནྟོ དིཊྛོ ཧོཏི སངྒྷཱདིསེསེ སངྒྷཱདིསེསདིཊྛི ཧོཏི, ཏཉྩེ པཱརཱཛིཀེན ཙོདེཏཱི’’ཏིཨཱདིཾ (པཱརཱ. ༤༠༧) ཙོདནཱབྷེདཾ སནྡྷཱཡ ཝདཏི. སཏྟནྣམྤི ཨཱཔཏྟཱིནཾ པཙྩེཀཾ པཱརཱཛིཀཏྟཱདིསཱམཉྙེཔི མེཐུནཱདིནྣཱདཱནཱདིཝཏྠུཏོ, རཱགདོསཏྟཱདིསབྷཱཝཏོ ཙ ཝིསབྷཱགཏཱཔི ཨཏྠཱིཏི ཨཱཧ ‘‘ཡསྨཱ པན…པེ… ན ཧོཏཱི’’ཏི.

ཝུཏྟནཡེནེཝཱཏི ‘‘སབྷཱགཝིསབྷཱགཝཏྠུཏོ’’ཏིཨཱདིནཱ (པཱརཱ. ཨཊྛ. ༢.༣༩༣) ཝུཏྟནཡེན. ཀམྨལཀྑཎཾ, ཏཾམནསིཀཱརོ ཙ ཨཝིཔནྣཀམྨསྶ ནིམིཏྟཏོ ཕལཱུཔཙཱརེན ཀམྨནྟི ཝུཙྩཏཱིཏི ཨཱཧ ‘‘ཏཾ ནིསྶཱཡ ཨུཔྤཛྫནཏོ’’ཏི. པརིཝཱསཱདིཾ ནིསྶཱཡ མཱནཏྟཱདཱིནཾ ཨུཔྤཛྫནཏོ ‘‘པུརིམཾ པུརིམ’’ནྟིཨཱདི ཝུཏྟཾ.

༣༩༥. སཝཏྠུཀཾ ཀཏྭཱཏི པུགྒལཱདྷིཊྛཱནཾ ཀཏྭཱ. དཱིགྷཱདིནོཏི དཱིགྷརསྶཱདིལིངྒསྶ. དིཊྛཱདིནོཏི དིཊྛཔུབྦཱདིནོ.

༤༠༨. ཨེཝཾ ཏཐཱསཉྙཱིཏི ཨཉྙསྶ མེཐུནཱདིཀིརིཡཾ དིསྭཱ ‘‘ཨཡཾ སོ’’ཏི ཨེཝཾ ཏཐཱསཉྙཱི. ཨངྒཱནི པཋམདུཊྛདོསེ ཝུཏྟསདིསཱནི, ཨིདྷ པན ཀིཉྩིདེསཾ ལེསམཏྟཾ ཨུཔཱདིཡནཱ ཨདྷིཀཱ.

དུཏིཡདུཊྛདོསསིཀྑཱཔདཝཎྞནཱ ནིཊྛིཏཱ.

༡༠. པཋམསངྒྷབྷེདསིཀྑཱཔདཝཎྞནཱ

༤༡༠. དསམེ ¶ ¶ བཧཱུནནྟི དུབྦལཏཱཡ ཨརཉྙཱདིསེཝཱཡ ཙིཏྟཾ སམཱཧིཏཾ ཀཱཏུཾ ཨསཀྐོནྟཱནཾ. དུཀྑསྶནྟཀིརིཡཱཡ ཏསྨིཾ ཨཏྟབྷཱཝེ བུདྡྷཝཙནགྒཧཎདྷཱརཎཱདིསངྑཱཏཾ བྱཉྫནཔདམེཝ པརམཾ ཨསྶ, ན མགྒལཱབྷོཏི པདཔརམོ. ཨབྷིསམྦྷུཎིཏྭཱཏི ནིཔྥཱདེཏྭཱ. དྷམྨཏོ ཨཔེཏཾ ཨུདྡྷམྨཾ. པཊིཀྑིཏྟམེཝཱཏི ‘‘ན, བྷིཀྑཝེ, ཨསེནཱསནིཀེན ཝསྶཾ ཨུཔགནྟབྦ’’ནྟི (མཧཱཝ. ༢༠༤) ཝཙནཏོ ཝུཏྟཾ, ཨིདམེཝ ཝཙནཾ སནྡྷཱཡ པཱལི༹ཡམྤི ‘‘ཨཊྛ མཱསེ’’ཏིཨཱདི (པཱརཱ. ༤༠༩) ཝུཏྟཾ.

ཏཱིཧི ཀོཊཱིཧཱིཏི ཨསུདྡྷམཱུལེཧི. ཨེཏྠ ཙ བྷིཀྑཱུནཾ ཙཏཱུསུ ཀུལེསུ པཀྐཔིཎྜིཡཱལོཔབྷོཛནནིསྶིཏཏཱཡ, མཙྪམཾསབྷོཛནཝིརཧིཏསྶ ཙ ཀུལསྶ དུལླབྷཏཱཡ ཏཏྠ ལདྡྷེསུ བྷཏྟབྱཉྫནེསུ མཙྪམཾསསཾསགྒསངྐཱཡ, དུནྣིཝཱརཎཏཱཡ ཙ བྷིཀྑཱུནཾ སརཱིརཡཱཔནམྤི ན སིཡཱཏི བྷགཝཏཱ མཙྪམཾསཾ སབྦཐཱ ཨཔྤཊིཀྑིཔིཏྭཱ ཏཱིཧི ཀོཊཱིཧི ཨཔརིསུདྡྷམེཝ པཊིཀྑིཏྟཾ. ཡདི ཧི ཏཾ བྷགཝཱ སབྦཐཱ པཊིཀྑིཔེཡྻ, བྷིཀྑཱུ མརམཱནཱཔི མཙྪཱདིསཾསགྒསངྐིཏཾ བྷཏྟཾ ན བྷུཉྫེཡྻུཾ, ཏཏོ ཏཎྜུལདྷཉྙཱདིཾ པཊིགྒཧེཏྭཱ ནིདཧིཏྭཱ སཡཾ པཙིཏྭཱ བྷུཉྫིཏུཾ ཏདུཔཀརཎབྷཱུཏཾ དཱསིདཱསཾ, ཨུདུཀྑལམུསལཱདིཀཉྩ བྷིཀྑཱུནཾ པཏྟཱདི ཝིཡ ཨཝསྶཾ གཧེཏུཾ ཨནུཛཱནིཏབྦཾ སིཡཱཏི ཏིཏྠིཡཱནཾ ཝིཡ གཧཊྛཱཝཱསོ ཨེཝ སིཡཱ, ན བྷིཀྑུཨཱཝཱསོཏི ཝེདིཏབྦཾ. ཛཱལཾ མཙྪབནྡྷནཾ. ཝཱགུརཱ མིགབནྡྷནཱི. ཀཔྤཏཱིཏི ཡདི ཏེསཾ ཝཙནེན སངྐཱ ན ཝཏྟཏི, ཝཊྚཏི, ན ཏཾ ཝཙནཾ ལེསཀཔྤཾ ཀཱཏུཾ ཝཊྚཏི. ཏེནེཝ ཝཀྑཏི ‘‘ཡཏྠ ཙ ནིབྦེམཏིཀོ ཧོཏི, ཏཾ སབྦཾ ཀཔྤཏཱི’’ཏི.

པཝཏྟམཾསནྟི ཨཱཔཎཱདཱིསུ པཝཏྟཾ ཝིཀྐཱཡིཀཾ མཏམཾསཾ. བྷིཀྑཱུནཾཡེཝ ཨཏྠཱཡ ཨཀཏནྟི ཨེཏྠ ཨཊྛཱནཔྤཡུཏྟོ ཨེཝ-སདྡོ, བྷིཀྑཱུནཾ ཨཏྠཱཡ ཨཀཏམེཝཱཏི སམྦནྡྷིཏབྦཾ, ཏསྨཱ བྷིཀྑཱུནཉྩ མངྒལཱདཱིནཉྩཱཏི མིསྶེཏྭཱ ཀཏམྤི ན ཝཊྚཏཱིཏི ཝེདིཏབྦཾ. ཀེཙི པན ཡཐཱཋིཏཝསེན ཨཝདྷཱརཎཾ གཧེཏྭཱ ‘‘ཝཊྚཏཱི’’ཏི ཝདནྟི, ཏཾ ན སུནྡརཾ. ‘‘ཝཏྟ’’ནྟི ཨིམིནཱ ཨཱཔཏྟི ནཏྠཱིཏི དསྶེཏི.

ཀཔྤནྟི ཨསངྑེཡྻཀཔྤཾ, ‘‘ཨཱཡུཀཔྤ’’ནྟིཔི (སཱརཏྠ. ཊཱི. ༢.༤༡༠) ཀེཙི. མཧཱཀཔྤསྶ ཧི ཙཏུཏྠབྷཱགོ ཨསངྑེཡྻཀཔྤོ, ཏཏོ ཝཱིསཏིམོ བྷཱགོ སངྒྷབྷེདཀསྶ ¶ ཨཱཡུཀཔྤནྟི ཝདནྟི, ཏཾ ཨཊྛཀཐཱསུ ཀཔྤཊྛཀཐཱཡ ན སམེཏི ‘‘ཀཔྤཝིནཱསེ ཨེཝ མུཙྩཏཱི’’ཏིཨཱདི (ཝིབྷ. ཨཊྛ. ༨༠༩) ¶ ཝཙནཏོ. བྲཧྨཾ པུཉྙནྟི སེཊྛཾ པུཉྙཾ. ཀཔྤཾ སགྒམྷཱིཏི ཨེཏྠ པཊིསནྡྷིཔརམྤརཱཡ ཀཔྤཊྛཏཱ ཝེདིཏབྦཱ.

༤༡༡. ལདྡྷིནཱནཱསཾཝཱསཀེནཱཏི ཨུཀྑིཏྟཱནུཝཏྟཀབྷཱཝེན བྷཱཝཔྤདྷཱནཏྟཱ ནིདྡེསསྶ. ཀམྨནཱནཱསཾཝཱསཀེནཱཏི ཨུཀྑིཏྟབྷཱཝེན. ‘‘བྷེདཱཡ པརཀྐམེཡྻཱ’’ཏི ཝིསུཾ ཝུཏྟཏྟཱ བྷེདནསཾཝཏྟནིཀསྶ ཨདྷིཀརཎསྶ སམཱདཱཡ པགྒཎྷནཏོ པུབྦེཔི པཀྑཔརིཡེསནཱདིཝསེན སངྒྷབྷེདཱཡ པརཀྐམནྟསྶ སམནུབྷཱསནཀམྨཾ ཀཱཏུཾ ཝཊྚཏཱིཏི ཝེདིཏབྦཾ. ཡོཔི ཙཱཡཾ སངྒྷབྷེདོ ཧོཏཱིཏི སམྦནྡྷོ.

ཀམྨེནཱཏི ཨཔལོཀནཱདིནཱ. ཨུདྡེསེནཱཏི པཱཏིམོཀྑུདྡེསེན. ཝོཧཱརེནཱཏི ཏཱཧི ཏཱཧི ཨུཔཔཏྟཱིཧི ‘‘ཨདྷམྨཾ དྷམྨོ’’ཏིཨཱདིནཱ (ཨ. ནི. ༣.༡༠-༣༩, ༤༢; ཙཱུལ༹ཝ. ༣༥༢) ཝོཧཱརེན, པརེསཾ པཉྙཱཔནེནཱཏི ཨཏྠོ. ཨནུསཱཝནཱཡཱཏི ཨཏྟནོ ལདྡྷིཡཱ གཧཎཏྠམེཝ ཨནུ པུནཔྤུནཾ ཀཎྞམཱུལེ མནྟསཱཝནཱཡ, ཀཐནེནཱཏི ཨཏྠོ. སལཱཀགྒཱཧེནཱཏི ཨེཝཾ ཨནུསཱཝནཱཡ ཏེསཾ ཙིཏྟཾ ཨུཔཏྠམྦྷེཏྭཱ ཨཏྟནོ པཀྑེ པཝིཊྛབྷཱཝསྶ སཉྙཱཎཏྠཾ ‘‘གཎྷཐ ཨིམཾ སལཱཀ’’ནྟི སལཱཀགྒཱཧེན. ཨེཏྠ ཙ ཀམྨམེཝ, ཨུདྡེསོ ཝཱ སངྒྷབྷེདེ པདྷཱནཾ ཀཱརཎཾ, ཝོཧཱརཱདཡོ པན སངྒྷབྷེདསྶ པུབྦབྷཱགཱཏི ཝེདིཏབྦཱ. ཨབྦྷུསྶིཏནྟི ཨབྦྷུགྒཏཾ. ཨཙྪེཡྻཱཏི ཝིཧརེཡྻ.

‘‘ལཛྫཱི རཀྑིསྶཏཱི’’ཏི (ཝིསུདྡྷི. ༡.༤༢; པཱརཱ. ཨཊྛ. ༡.༤༥) ཝཙནཏོ ཨཱཔཏྟིབྷཡེན ཨཱརོཙནཾ ལཛྫཱིནཾ ཨེཝ བྷཱརོཏི ཨཱཧ ‘‘ལཛྫཱིཧི བྷིཀྑཱུཧཱི’’ཏི, ཨལཛྫིསྶཔི ཨནཱརོཙེནྟསྶ ཨཱཔཏྟིཡེཝ. ཨཔྤཊིནིསྶཛྫཏོ དུཀྐཊནྟི ཝིསུཾ ཝིསུཾ ཝདནྟཱནཾ གཎནཱཡ དུཀྐཊཾ. པཧོནྟེནཱཏི གནྟུཾ སམཏྠེན, ཨིཙྪནྟེནཱཏི ཨཏྠོ. ཨཱཔཏྟི པན ཨཌྜྷཡོཛནབྦྷནྟརེནེཝ ཨགིལཱནསྶ ཝསེན ཝེདིཏབྦཱ.

༤༡༦. ཉཏྟིཡཱདཱིཧི དུཀྐཊཱདིསབྦྷཱཝཾ སནྡྷཱཡ ‘‘སངྒྷཱདིསེསེན ཨནཱཔཏྟཱི’’ཏི ཝུཏྟཾ. ཨསྶཱཏི དེཝདཏྟསྶ. ཨཔཉྙཏྟེ སིཀྑཱཔདེ སམནུབྷཱསནཀམྨསྶེཝ ཨབྷཱཝཏོ ‘‘ན ཧི པཉྙཏྟཾ སིཀྑཱཔདཾ ཝཱིཏིཀྐམནྟསྶཱ’’ཏི ཝུཏྟཾ. སིཀྑཱཔདཾ པཉྙཔེནྟེནེཝ ཧི སམནུབྷཱསནཀམྨཾ ཨནུཉྙཱཏཾ. ཨུདྡིསྶ ཨནུཉྙཱཏཏོཏི ‘‘ཨནུཛཱནཱམི, བྷིཀྑཝེ, རོམནྠཀསྶ རོམནྠན’’ནྟིཨཱདིཾ ¶ (ཙཱུལ༹ཝ. ༢༧༣) ཨུདྡིསྶཱནུཉྙཱཏཾ སནྡྷཱཡ ཝདཏི. ཨནཱཔཏྟིཡནྟི ཨནཱཔཏྟིཝཱརེ. ཨཱཔཏྟིཾ རོཔེཏབྦོཏི སམནུབྷཱསནཱཡ པཱཙིཏྟིཡཨཱཔཏྟིཾ རོཔེཏབྦོ. ཨཱཔཏྟིཡེཝ ན ཛཱཏཱཏི སངྒྷཱདིསེསཱཔཏྟི ན ཛཱཏཱ ཨེཝ.

‘‘ན ¶ པཊིནིསྶཛྫཱམཱི’’ཏི སཉྙཱཡ ཨབྷཱཝེན མུཙྩནཏོ སཉྙཱཝིམོཀྑཾ. སཙིཏྟཀནྟི ‘‘ན པཊིནིསྶཛྫཱམཱི’’ཏི ཛཱནནཙིཏྟེན སཙིཏྟཀཾ. ཡོ ཝིསཉྙཱི ཝཱ བྷཱིཏོ ཝཱ ཝིཀྑིཏྟོ ཝཱ ‘‘པཊིནིསྶཛྫིཏབྦ’’ནྟིཔི, ‘‘ཀམྨཾ ཀརིསྶཏཱི’’ཏི ཝཱ ན ཛཱནཱཏི, ཏསྶ ཨནཱཔཏྟི. བྷེདཱཡ པརཀྐམནཾ, དྷམྨཀམྨེན སམནུབྷཱསནཾ, ཀམྨཝཱཙཱཔརིཡོསཱནཾ, ན པཊིནིསྶཛྫཱམཱིཏི ཙིཏྟེན ཨཔྤཊིནིསྶཛྫནནྟི ཨིམཱནེཏྠ ཙཏྟཱརི ཨངྒཱནི.

པཋམསངྒྷབྷེདསིཀྑཱཔདཝཎྞནཱ ནིཊྛིཏཱ.

༡༡. དུཏིཡསངྒྷབྷེདསིཀྑཱཔདཝཎྞནཱ

༤༡༨. ཨེཀཱདསམེ ཡསྨཱ ཨུབྦཱཧིཀཱདིསམྨུཏིཀམྨཾ བཧཱུནམྤི ཀཱཏུཾ ཝཊྚཏི, ཏསྨཱ ‘‘ན ཧི སངྒྷོ སངྒྷསྶ ཀམྨཾ ཀརོཏཱི’’ཏི ཨིདཾ ནིགྒཧཝསེན ཀཏྟབྦཀམྨཾ སནྡྷཱཡ ཝུཏྟནྟི ཝེདིཏབྦཾ. ཨངྒཱནི པནེཏྠ བྷེདཱཡ པརཀྐམནཾ པཧཱཡ ཨནུཝཏྟནཾ པཀྑིཔིཏྭཱ ཧེཊྛཱ ཝུཏྟསདིསཱནེཝ གཧེཏབྦཱནི.

དུཏིཡསངྒྷབྷེདསིཀྑཱཔདཝཎྞནཱ ནིཊྛིཏཱ.

༡༢. དུབྦཙསིཀྑཱཔདཝཎྞནཱ

༤༢༤. དྭཱདསམེ ཝམྦྷནཝཙནནྟི གརཧཝཙནཾ. སཊ-སདྡོ པཏིཏསདྡེན སམཱནཏྠོ, ཏསྶ ཙ ཝིསེསནསྶ པརནིཔཱཏོཏི ཨཱཧ ‘‘ཏཏྠ ཏཏྠ པཏིཏཾ ཏིཎཀཊྛཔཎྞ’’ནྟི. ཀེནཱཔཱིཏི ཝཱཏཱདིསདིསེན ཨུཔཛ྄ཛྷཱཡཱདིནཱ.

༤༢༦. ཙིཏྟཔརིཡོནཱཧོ དལ༹ྷཀོདྷོཝ ཨུཔནཱཧོ. ཏཏོཔི བལཝཏརོ དུམྨོཙནཱིཡོ ཀོདྷཱབྷིསངྒོ. ཙོདཀཾ པཊིཔྥརཎཏཱཏི ཙོདཀསྶ ¶ པཊིཝིརུདྡྷོ ཧུཏྭཱ ཨཝཊྛཱནཾ. ཙོདཀཾ ཨཔསཱདནཱཏི ཝཱཙཱཡ གྷཊྚནཱ. པཙྩཱརོཔནཱཏི ‘‘ཏྭམྤི སཱཔཏྟིཀོ’’ཏི ཙོདཀསྶ ཨཱཔཏྟིཨཱརོཔནཱ. པཊིཙརཎཏཱཏི པཊིཙྪཱདནཏཱ. ཨཔདཱནེནཱཏི ཨཏྟནོ ཙརིཡཱཡ. ན སམྤཱཡནཏཱཏི ‘‘ཡཾ ཏྭཾ ཙོདཀོ ཝདེསི ‘མཡཱ ཨེས ཨཱཔཏྟིཾ ཨཱཔནྣོ དིཊྛོ’ཏི, ཏྭཾ ཏསྨིཾ སམཡེ ཀིཾ ཀརོསི, ཨཡཾ ཀིཾ ཀརོཏི, ཀཏྠ ཙ ཏྭཾ ཨཧོསི, ཀཏྠ ཨཡ’’ནྟིཨཱདིནཱ ནཡེན ཙརིཡཾ པུཊྛེན སམྤཱདེཏྭཱ ཨཀཐནཾ.

‘‘ཡསྶ ¶ སིཡཱ ཨཱཔཏྟཱི’’ཏི (མཧཱཝ. ༡༣༤) ཨིམིནཱ ནིདཱནཝཙནེན སབྦཱཔི ཨཱཔཏྟིཡོ སངྒཧིཏཱཏི ཨཱཧ ‘‘ཡསྶ སིཡཱ’’ཏིཨཱདི. ཨངྒཱནི ཙེཏྠ པཋམསངྒྷབྷེདསདིསཱནི, ཨཡཾ པན ཝིསེསོ ཡཐཱ ཏཏྠ བྷེདཱཡ པརཀྐམནཾ, ཨིདྷ ཨཝཙནཱིཡཀརཎཏཱ དཊྛབྦཱ.

དུབྦཙསིཀྑཱཔདཝཎྞནཱ ནིཊྛིཏཱ.

༡༣. ཀུལདཱུསཀསིཀྑཱཔདཝཎྞནཱ

༤༣༡. ཏེརསམེ ཀཱིཊཱགིརཱིཏི ཏསྶ ནིགམསྶ ནཱམཾ. ཏཉྷི སནྡྷཱཡ པརཏོ ‘‘ན ཨསྶཛིཔུནབྦསུཀེཧི བྷིཀྑཱུཧི ཀཱིཊཱགིརིསྨིཾ ཝཏྠབྦ’’ནྟི ཝུཏྟཾ, གཱམནིགམཏོ ཙ པབྦཱཛནཾ, ན ཛནཔདཏོ. ཏེན པན ཡོགཏོ ཛནཔདོཔི ‘‘ཀཱིཊཱགིརི’’ཨིཙྩེཝ སངྑྱཾ གཏོཏི ཨཱཧ ‘‘ཨེཝཾནཱམཀེ ཛནཔདེ’’ཏི.

ཏཏྲཱཏི སཱཝཏྠིཡཾ. དྷུརཊྛཱནེཏི ཨབྷིམུཁཊྛཱནེ, ཛེཏཝནདྭཱརསམཱིཔེཏི ཨཏྠོ. དྭཱིཧི མེགྷེཧཱིཏི ཝསྶིཀེན, ཧེམནྟིཀེན ཙཱཏི དྭཱིཧི མེགྷེཧི. གཎཱཙརིཡེཧི ཚཧི ཨདྷིཀཏཱཡ ‘‘སམདྷིཀ’’ནྟི ཝུཏྟཾ.

ཨུདཀསྶཱཏི ཨཀཔྤིཡཨུདཀསྶ ‘‘ཀཔྤིཡཨུདཀསིཉྩན’’ནྟི ཝིསུཾ ཝཀྑམཱནཏྟཱ, ཏཉྩ ‘‘ཨཱརཱམཱདིཨཏྠཱཡ རུཀྑརོཔནེ ཨཀཔྤིཡཝོཧཱརེསུཔི ཀཔྤིཡཨུདཀསིཉྩནཱདི ཝཊྚཏཱི’’ཏི ཝཀྑམཱནཏྟཱ ཨིདྷཱཔི ཝིབྷཱགཾ ཀཏྭཱ ཀཔྤིཡཨུདཀསིཉྩནཱདི ¶ ཝིསུཾ དསྶིཏཾ. ཡཐཱ ཀོཊྚནཁཎནཱདིཀཱཡིཀཀིརིཡཱཔི ཨཀཔྤིཡཝོཧཱརེ སངྒཧིཏཱ, ཨེཝཾ མཱཏིཀཱཨུཛུཀརཎཱདིཀཔྤིཡཝོཧཱརེཔཱིཏི ཨཱཧ ‘‘སུཀྑམཱཏིཀཱཡ ཨུཛུཀརཎ’’ནྟི. ཨེཏྠ པུརཱཎཔཎྞཱདིཧརཎམྤི སངྒཡ྄ཧཏི. མཧཱཔཙྩརིཡཝཱདོཝ པམཱཎཏྟཱ པཙྪཱ ཝུཏྟོ. ཨཀཔྤིཡཝོཧཱརེཔི ཨེཀཙྩཾ ཝཊྚཏཱིཏི དསྶེཏུཾ ‘‘ན ཀེཝལཉྩ སེས’’ནྟིཨཱདིམཱཧ. ཡཾཀིཉྩི མཱཏིཀནྟི སུཀྑཾ ཝཱ ཨསུཀྑཾ ཝཱ. ཏཏྠཱཏི ཨཱརཱམཱདིཨཏྠཱཡ རུཀྑརོཔནེ. ཏཐཱཏི ཀཔྤིཡཝོཧཱརཔརིཡཱཡཱདཱིཧི གནྠཱཔནཾ སནྡྷཱཡ ཝུཏྟཾ. ཨིམིནཱ ཙ ཀུལསངྒཧཏྠཱཡ གནྠཱཔནཱདིཔི ན ཝཊྚཏཱིཏི དསྶེཏི.

ཝཏྠུཔཱུཛནཏྠཱཡ སཡཾ གནྠནཾ ཀསྨཱ ན ཝཊྚཏཱིཏི ཙོདེནྟོ ‘‘ནནུ ཙཱ’’ཏིཨཱདིམཱཧ. ཡཐཱ ཨཱརཱམཱདིཨཏྠཾ ཀཔྤིཡཔཐཝིཡཾ སཡཾ རོཔེཏུམྤི ཝཊྚཏི, ཏཐཱ ཝཏྠུཔཱུཛནཏྠཱཡ སཡཾ གནྠནམྤི ཀསྨཱ ན ཝཊྚཏཱིཏི ཙོདཀསྶ ཨདྷིཔྤཱཡོ. ཝུཏྟནྟིཨཱདི པརིཧཱརོ. ཨཐ ‘‘ན པན མཧཱཨཊྛཀཐཱཡ’’ནྟི ¶ ཀསྨཱ ཝདཏི? མཧཱཔཙྩརིཨཱདཱིསུ ཝུཏྟམྤི ཧི པམཱཎམེཝཱཏི ནཱཡཾ ཝིརོདྷོ, མཧཱཨཊྛཀཐཱཡཾ ཨཝུཏྟསྶ སཡཾ རོཔནསྶ ཏཏྠེཝ ཝུཏྟེན ཨུདཀསིཉྩནེན སཧ སཾསནྡནནཡདསྶནམུཁེན པམཱཎམེཝཱཏི པཏིཊྛཱཔེཏུཾ ཝུཏྟཏྟཱ. ‘‘མཉྙེཡྻཱསཱི’’ཏི པདཾ ‘‘ཏཾ ཀཐ’’ནྟི ཨིམིནཱ སམྦནྡྷིཏབྦཾ. ཏཏྠཱཡཾ ཨདྷིཔྤཱཡོ – ཀིཉྩཱཔི མཧཱཨཊྛཀཐཱཡཾ སཡཾ རོཔནཾ ན ཝུཏྟཾ, ཀཔྤིཡཨུདཀསྶ སཡཾ ཨཱསིཉྩནཾ ཝུཏྟམེཝ, ཏསྨཱ ཡཐཱ ཨཱརཱམཱདིཨཏྠཱཡ ཀཔྤིཡཨུདཀཾ སཡཾ སིཉྩིཏུམྤི ཝཊྚཏི, ཏཐཱ ཝཏྠུཔཱུཛནཏྠཱཡ གནྠནམྤི ཀསྨཱ ན ཝཊྚཏཱིཏི. ཏམྤི ན ཝིརུཛ྄ཛྷཏཱིཏི ཡདེཏཾ ཝཏྠུཔཱུཛནཏྠཱཡཔི གནྠནཱདིཾ པཊིཀྑིཔིཏྭཱ ཨཱརཱམཱདིཨཏྠཱཡ སཡཾ རོཔནསིཉྩནཾ ཝུཏྟཾ, ཏམྤི པཱལི༹ཡཱ སཾསནྡནཏོ པུབྦཱཔརཾ ན ཝིརུཛ྄ཛྷཏི.

ཏཾ ཀཐཾ ན ཝིརུཛ྄ཛྷཏཱིཏི ཨཱཧ ‘‘ཏཏྲ ཧཱི’’ཏིཨཱདི. ཏཏྲཱཏི རོཔནསིཉྩནཝིསཡེ. པུཔྥཱདཱིཧི ཀུལསངྒཧཔྤསངྒེ ‘‘མཱལཱཝཙྪ’’ནྟི ཝིསེསིཏཏྟཱ ཀུལསངྒཧཏྠམེཝ རོཔནཾ ཨདྷིཔྤེཏནྟི ཝིཉྙཱཡཏཱིཏི ཨཱཧ ‘‘མཱལཱཝཙྪནྟི ཝདནྟོ’’ཏིཨཱདི. ཨེཏཾ ཝུཏྟནྟི ‘‘མཱལཱཝཙྪཾ རོཔེནྟིཔི རོཔཱཔེནྟིཔི, སིཉྩནྟིཔི སིཉྩཱཔེནྟིཔཱི’’ཏི ཨེཏཾ ཝུཏྟཾ. ཨཉྙཏྲ པནཱཏི ཨཱརཱམཱདིཨཏྠཱཡ མཱལཱཝཙྪཱདཱིནཾ རོཔནེ པན. པརིཡཱཡོཏི སཡཾཀརཎཀཱརཱཔནསངྑཱཏོ པརིཡཱཡོ ཝོཧཱརོ ཨཏྠཝིསེསོཏི ཨཏྠོ ཨཏྠི ཨུཔལབྦྷཏི ¶ , ཀུལསངྒཧཏྠཏྟཱབྷཱཝཱཏི ཨདྷིཔྤཱཡོ. ཨེཝམེཏྠ པརིཡཱཡསདྡསྶ ཀརཎཀཱརཱཔནཝསེན ཨཏྠེ གཡ྄ཧམཱནེ ‘‘གནྠེནྟིཔི གནྠཱཔེནྟིཔཱི’’ཏི པཱལི༹ཡཾ པཊིཀྑིཏྟགནྠནགནྠཱཔནཾ ཋཔེཏྭཱ ཡཾ པརཏོ ‘‘ཨེཝཾ ཛཱན, ཨེཝཾ ཀཏེ སོབྷེཡྻཱ’’ཏིཨཱདིཀཔྤིཡཝཙནེཧི གནྠཱཔནཾ ཝུཏྟཾ, ཏཏྠ དོསཱབྷཱཝོ སམཏྠིཏོ ཧོཏི, ‘‘གནྠེཧཱི’’ཏི ཨཱཎཏྟིཡཱ ཀཱརཱཔནསྶེཝ གནྠཱཔནནྟི ཨདྷིཔྤེཏཏྟཱ. ཏཏྠ པརིཡཱཡཾ ཨིདྷ ཙ པརིཡཱཡཱབྷཱཝཾ ཉཏྭཱཏི ཏཏྠ ‘‘མཱལཱཝཙྪཾ རོཔེནྟཱི’’ཏིཨཱདཱིསུ ‘‘མཱལཱཝཙྪ’’ནྟི ཀུལསངྒཧཏྠཏཱསཱུཙནཀསྶ ཝིསེསནསྶ སབྦྷཱཝཏོ ཀརཎཀཱརཱཔནསངྑཱཏཔརིཡཱཡསབྦྷཱཝཾ. ཨིདྷ ‘‘གནྠེནྟཱི’’ཏིཨཱདཱིསུ ཏཐཱཝིདྷཝིསེསཝཙནཱབྷཱཝཏོ ཏསྶ པརིཡཱཡསྶ ཨབྷཱཝཉྩ ཉཏྭཱ. ཏཾ སུཝུཏྟམེཝཱཏི ཝེདིཏབྦནྟི ཡོཛནཱ.

སབྦཾ ཝུཏྟནཡེནེཝ ཝེདིཏབྦནྟི ཨཊྛཀཐཱསུ ཨཱགཏནཡེནེཝ རོཔནཱདི, གནྠཱཔནཱདི ཙ སབྦཾ ཝེདིཏབྦཾ. ན ཧེཏྠ སནྡེཧོ ཀཱཏབྦོཏི ནིགམེཏི.

ཧརཎཱདཱིསཱུཏི ཝཏྠུཔཱུཛནཏྠཱཡ ཧརཎཱདཱིསུ. ཀུལིཏྠིཨཱདཱིནཾ ཨཏྠཱཡ ཧརཎཏོཏི ཀུལིཏྠིཨཱདཱིནཾ ཧརཎསྶེཝ ཝིསེསེཏྭཱ པཊིཀྑིཏྟཏྟཱཏི ཨདྷིཔྤཱཡོ. ཏེནཱཧ ‘‘ཧརཎཱདྷིཀཱརེ ཧཱི’’ཏིཨཱདི. མཉྫརཱིཏི པུཔྥགོཙྪཾ. ཝཊཾསཀོཏི ཀཎྞསྶ ཨུཔརི པིལ༹ནྡྷནཏྠཾ ཀཏཔུཔྥཝིཀཏི ¶ , སོ ཙ ‘‘ཝཊཾསོ’’ཏི ཝུཙྩཏི. ཀཎྞིཀཱཏི བཧཱུནཾ པུཔྥཱནཾ ཝཱ མཱལཱནཾ ཝཱ ཨེཀཏོ བནྡྷིཏསྶ ནཱམཾ, ‘‘ཀཎྞཱབྷརཎ’’ནྟིཔི ཝདནྟི. ཧཱརསདིསནྟི མུཏྟཱཧཱརསདིསཾ.

ཀཔྤིཡེནཱཏི ཀཔྤིཡཨུདཀེན. ཏེསཾཡེཝ དྭིནྣནྟི ཀུལདཱུསནཔརིབྷོགཱནཾ དྭིནྣཾ. དུཀྐཊནྟི ཀུལསངྒཧཏྠཱཡ སཡཾ སིཉྩནེ, ཀཔྤིཡཝོཧཱརེན ཝཱ ཨཀཔྤིཡཝོཧཱརེན ཝཱ སིཉྩཱཔནེ ཙ དུཀྐཊཾ, པརིབྷོགཏྠཱཡ པན སཡཾ སིཉྩནེ, ཨཀཔྤིཡཝོཧཱརེན སིཉྩཱཔནེ ཙ དུཀྐཊཾ. པཡོགབཧུལཏཱཡཱཏི སཡཾ ཀརཎེ, ཀཱཡཔཡོགསྶ ཀཱརཱཔནེ ཙ ཝཙཱིཔཡོགསྶ ཙ བཧུཏྟེན.

གནྠེན ནིབྦཏྟཾ དཱམཾ གནྠིམཾ. ཨེསེཝ ནཡོ སེསེསུཔི. ན ཝཊྚཏཱིཏི ཝཏྠུཔཱུཛནཏྠཱཡཔི ན ཝཊྚཏི, དུཀྐཊནྟི ཨཏྠོ. ཝཊྚཏཱིཏི ཝཏྠུཔཱུཛནཏྠཱཡ ཝཊྚཏི, ཀུལསངྒཧཏྠཱཡ པན ཀཔྤིཡཝོཧཱརེན ཀཱརཱཔེནྟསྶཱཔི དུཀྐཊམེཝ.

ནཱིཔཔུཔྥཾ ¶ ནཱམ ཀདམྦཔུཔྥཾ. པུརིམནཡེནེཝཱཏི ‘‘བྷིཀྑུསྶ ཝཱ’’ཏིཨཱདིནཱ ཝུཏྟནཡེན.

ཀདལིཀྑནྡྷམྷཱིཏིཨཱདིནཱ ཝུཏྟཾ སབྦམེཝ སནྡྷཱཡ ‘‘ཏཾ ཨཏིཨོལཱ༹རིཀམེཝཱ’’ཏི ཝུཏྟཾ, སབྦཏྠ ཀརཎེ, ཨཀཔྤིཡཝཙནེན ཀཱརཱཔནེ ཙ དུཀྐཊམེཝཱཏི ཨཏྠོ. ‘‘པུཔྥཝིཛ྄ཛྷནཏྠཾ ཀཎྚཀཾ བནྡྷིཏུམྤི ན ཝཊྚཏཱི’’ཏི ཨིམསྶ ཨུཔལཀྑཎཏྟཱ པུཔྥདཱམོལམྦནཱདིཨཏྠཱཡ རཛྫུབནྡྷནཱདིཔི ན ཝཊྚཏཱིཏི ཀེཙི ཝདནྟི, ཨཉྙེ པན ‘‘པུཔྥཝིཛ྄ཛྷནཏྠཾ ཀཎྚཀནྟི ཝིསེསིཏཏྟཱ ཏདཏྠཾ ཀཎྚཀམེཝ བནྡྷིཏུཾ ན ཝཊྚཏི, ཏཉྩ ཨཊྛཀཐཱཔམཱཎེནཱ’’ཏི ཝདནྟི, ཝཱིམཾསིཏྭཱ གཧེཏབྦཾ. པུཔྥཔཊིཙྪཀཾ ནཱམ དཎྜཱདཱིཧི ཀཏཾ པུཔྥཱདྷཱནཾ, ཨེཏམྤི ནཱགདནྟཀམྤི སཚིདྡཀམེཝ གཧེཏབྦཾ. ཨསོཀཔིཎྜིཡཱཏི ཨསོཀསཱཁཱནཾ, པུཔྥཱནཾ ཝཱ སམཱུཧེ. དྷམྨརཛྫུ ནཱམ ཙེཏིཡཱདཱིནི པརིཀྑིཔིཏྭཱ ཏེསཉྩ རཛྫུཡཱ ཙ ཨནྟརཱ པུཔྥཔྤཝེསནཏྠཱཡ བནྡྷརཛྫུ. ‘‘སིཐིལཝཊྚིཏཱ ཝཱ རཛྫུཝཊྚིཨནྟརེ པུཔྥཔྤཝེསནཏྠཱཡ ཨེཝཾ བནྡྷཱ’’ཏིཔི ཝདནྟི.

མཏྠཀདཱམནྟི དྷམྨཱསནཱདིམཏྠཀལམྦཀདཱམཾ. ཏེསཾཡེཝཱཏི ཨུཔྤལཱདཱིནཾ ཨེཝ. ཝཱཀེན ཝཱ དཎྜཀེན ཝཱཏི པུཔྥནཱལ༹ཾ ཕཱལེཏྭཱ པུཔྥེན ཨེཀཱབདྡྷཾ ཋིཏཝཱཀེན, དཎྜཀེན ཙ ཨེཀབནྡྷནེནེཝ, ཨེཏེན པུཔྥཾ བཱིཛགཱམེ སངྒཧཾ ན གཙྪཏི པཉྩསུ བཱིཛེསུ ཨཔྤཝིཊྛཏྟཱ པཎྞཾ ཝིཡ, ཏསྨཱ ཀཔྤིཡཾ ཨཀཱརཱཔེཏྭཱཔི ཀོཔནེ དོསོ ནཏྠི. ཡཉྩ ཚིནྣསྶཱཔི མཀུལ༹སྶ ཝིཀསནཾ, ཏམྤི ཨཏིཏརུཎསྶ ཨབྷཱཝཱ ཝུཌྜྷིལཀྑཎཾ ན ཧོཏི, པརིཎཏསྶ པན མཀུལ༹སྶ པཏྟཱནཾ སིནེཧེ པརིཡཱདཱནཾ གཏེ ཝིསུཾབྷཱཝོ ཨེཝ ཝིཀཱསོ, ཏེནེཝ ཚིནྣམཀུལ༹ཝིཀཱསོ ཨཙྪིནྣམཀུལ༹ཝིཀཱསཏོ པརིཧཱིནོ ¶ , མིལཱཏཡུཏྟོ ཝཱ དིསྶཏི. ཡཉྩ མིལཱཏསྶ ཨུདཀསཉྙོགེ ཨམིལཱནཏཱཔཛྫནཾ, ཏམྤི ཏམྦུལཔཎྞཱདཱིསུ སམཱནནྟི ཝུཌྜྷིལཀྑཎཾ ན ཧོཏི, པཱལི༹ཨཊྛཀཐཱདཱིསུ ཙ ན ཀཏྠཙི པུཔྥཱནཾ ཀཔྤིཡཀརཎཾ ཨཱགཏཾ, ཏསྨཱ པུཔྥཾ སབྦཐཱ ཨབཱིཛམེཝཱཏི ཝིཉྙཱཡཏི, ཝཱིམཾསིཏྭཱ གཧེཏབྦཾ. ‘‘པསིབྦཀེ ཝིཡཱ’’ཏི ཝུཏྟཏྟཱ པུཔྥཔསིབྦཀེ ཝཱ པསིབྦཀསདིསབནྡྷེ ཝཱ ཡཏྠ ཀཏྠཙི ཙཱིཝརེ ཝཱ པཀྑིཔིཏུཾ ཝཊྚཏཱིཏི སིདྡྷཾ. བནྡྷིཏུཾ ན ཝཊྚཏཱིཏི རཛྫུཨཱདཱིཧི བནྡྷནཾ སནྡྷཱཡ ཝུཏྟཾ, པུཔྥསྶེཝ པན ཨཙྪིནྣདཎྜཝཱཀེཧི བནྡྷིཏུཾ ཝཊྚཏི ཨེཝ.

པུཔྥཔཊེ ¶ ཙ དཊྛབྦནྟི པུཔྥཔཊཾ ཀརོནྟསྶ དཱིགྷཏོ པུཔྥདཱམསྶ ཧརཎཔཙྩཱཧརཎཝསེན པཱུརཎཾ སནྡྷཱཡ ཝུཏྟཾ, ཏིརིཡཏོ ཧརཎཾ པན ཝཱཡིམཾ ནཱམ ཧོཏི, ན པཱུརིམཾ. ‘‘པུརིམཊྛཱནཾ ཨཏིཀྐཱམེཏཱི’’ཏི སཱམཉྙཏོ ཝུཏྟཏྟཱ པུརིམཾ པུཔྥཀོཊིཾ ཕུསཱཔེཏྭཱ ཝཱ ཨཕུསཱཔེཏྭཱ ཝཱ པརིཀྑིཔནཝསེན པན ཨཏིཀྐམནྟསྶ ཨཱཔཏྟིཡེཝ. བནྡྷིཏུཾ ཝཊྚཏཱིཏི པུཔྥརཧིཏཱཡ སུཏྟཝཱཀཀོཊིཡཱ བནྡྷིཏུཾ ཝཊྚཏི. ‘‘ཨེཀཝཱརཾ ཧརིཏྭཱ ཝཱ པརིཀྑིཔིཏྭཱ ཝཱ’’ཏི ཨིདཾ པུབྦེ ཝུཏྟཙེཏིཡཱདིཔརིཀྑེཔཾ, པུཔྥཔཊཀརཎཉྩ སནྡྷཱཡ ཝུཏྟཾ.

པརེཧི པཱུརིཏནྟི དཱིགྷཏོ པསཱརིཏཾ. ཝཱཡིཏུནྟི ཏིརིཡཏོ ཧརིཏུཾ, ཏཾ པན ཨེཀཝཱརམྤི ན ལབྦྷཏི. པུཔྥཱནི ཋཔེནྟེནཱཏི ཨགནྠིཏཔུཔྥཱནི ཨཉྙམཉྙཾ ཕུསཱཔེཏྭཱཔི ཋཔེནྟེན. གྷཊིཀདཱམཨོལམྦཀོཏི ཧེཊྛཱབྷཱགེ གྷཊིཀཱཀཱརཡུཏྟོ, དཱརུགྷཊིཀཱཀཱརོ ཝཱ ཨོལམྦཀོ. སུཏྟམཡཾ གེཎྜུཀཾ ནཱམ. སབྦཏྠཱཏི གནྠིམཱདཱིསུ སབྦཏྠ.

རེཙཀནྟི ཨབྷིནཡཾ, ‘‘ཨེཝཾ ནཙྩཱཧཱི’’ཏི ནཊནཱཀཱརདསྶནནྟི ཨཏྠོ, ‘‘ཙཀྐཾ ཝིཡ ཨཏྟཱནཾ བྷམཱཔན’’ནྟིཔི ཀེཙི. ཨཱཀཱསེཡེཝ ཀཱིལ༹ནྟཱིཏི ‘‘ཨཡཾ སཱརཱི ཨསུཀཔདཾ མཡཱ ནཱིཏཱ’’ཏི ཨེཝཾ མུཁེནེཝ ཨུབྷོཔི ཝདནྟཱ ཀཱིལ༹ནྟི. ཛཱུཏཕལཀེཏི ཛཱུཏམཎྜལེ. པཱསཀཀཱིལཱ༹ཡཱཏི དྭིནྣཾ ཏིཝངྒུལཔྤམཱཎཱནཾ དཱརུདནྟཱདིམཡཱནཾ པཱསཀཱནཾ ཙཏཱུསུ པསྶེསུ ཨེཀཀཱདིཝསེན བིནྡཱུནི ཀཏྭཱ ཕལཀེ ཁིཔིཏྭཱ ཨུཔརིབྷཱགེ དིཊྛབིནྡཱུནཾ ཝསེན སཱརིཡོ ཨཔནེཏྭཱ ཀཱིལ༹ནཀཛཱུཏཀཱིལཱ༹ཡ.

མཉྫཊྛི ནཱམ མཉྫཊྛརུཀྑསཱརཀསཱཝཾ. སལཱཀཧཏྠནྟི ནཱལི༹ཀེརཧཱིརཱདཱིནཾ ཀལཱཔསྶེཏཾ ནཱམཾ. པཱལི༹ཡཾ ཐརུསྨིནྟི ཁགྒེ. ཨུསྶེལེ༹ནྟཱིཏི མུཁེན ཨུསྶེལ༹ནསདྡཾ པམུཉྩནྟི, མཧནྟཾ ཨབྱཏྟསདྡཾ པཝཏྟེནྟཱིཏི ཨཏྠོ. ཨཔྥོཊེནྟཱིཏི དྭིགུཎིཏཝཱམཧཏྠེ དཀྑིཎཧཏྠེན ཏཱལེ༹ཏྭཱ སདྡཾ ཀརོནྟི. མུཁཌིཎྜིམནྟི མུཁབྷེརཱི.

༤༣༢. ཏེསནྟི ¶ སམཱསེ གུཎཱིབྷཱུཏཱནི པབྦཱནིཔི པརཱམསཏི. བོནྡོཏི ལོལོ, མནྡདྷཱཏུཀོཏི ཨཏྠོ. བྷཀུཊིཾ ཀཏྭཱཏི བྷམུཀབྷེདཾ ཀཏྭཱ. ནེལཱཏི ནིདྡོསཱ.

༤༣༣. པཱལི༹ཡཾ ¶ ‘‘སཱརིཔུཏྟཱ’’ཏི ཨིདཾ ཨེཀསེསནཡེན སཱརིཔུཏྟམོགྒལླཱནཱནཾ ཨུབྷིནྣཾ ཨཱལཔནཾ, ཏེནེཝ བཧུཝཙནནིདྡེསོ ཀཏོ.

༤༣༥. ཨཊྛཱརས ཝཏྟཱནཱིཏི ‘‘ན ཨུཔསམྤཱདེཏབྦ’’ནྟིཨཱདཱིནི ‘‘ན བྷིཀྑཱུཧི སམྤཡོཛེཏབྦ’’ནྟི པརིཡོསཱནཱནི ཀམྨཀྑནྡྷཀེ (ཙཱུལ༹ཝ. ༧) ཨཱགཏཱནི ཨཊྛཱརས ཝཏྟཱནི. ན པནྣལོམཱཏི ན པཏིཏམཱནལོམཱ, ཨནནུཀཱུལཝཏྟིནོཏི ཨཏྠོ.

༤༣༧. པརསནྟཀཾ དེཏི དུཀྐཊམེཝཱཏི ཝིསྶཱསགཱཧེན དཱནཾ སནྡྷཱཡ ཝུཏྟཾ. ཐུལླཙྩཡནྟི ཨེཏྠ བྷཎྜདེཡྻམྤི ཧོཏི ཨེཝ.

ཏཉྩ ཁོ ཝཏྠུཔཱུཛནཏྠཱཡཱཏི མཱཏཱཔིཏཱུནམྤི པུཔྥཾ དེནྟེན ཝཏྠུཔཱུཛནཏྠཱཡེཝ དཱཏབྦནྟི དསྶེཏི. མཎྜནཏྠཱཡ པན སིཝལིངྒཱདིཔཱུཛནཏྠཱཡཱཏི ཨེཏྟཀམེཝ ཝུཏྟཏྟཱ ‘‘ཨིམཾ ཝིཀྐིཎིཏྭཱ ཛཱིཝིསྶནྟཱི’’ཏི མཱཏཱཔིཏཱུནཾ དཱཏུཾ ཝཊྚཏི, སེསཉཱཏཱིནཾ པན ཏཱཝཀཱལིཀམེཝ དཱཏུཾ ཝཊྚཏི. ཉཱཏིསཱམཎེརེཧེཝཱཏི ཏེསཾ གིཧིཀམྨཔརིམོཙནཏྠཾ ཝུཏྟཾ. ཨིཏརེཏི ཨཉྙཱཏཀཱ, ཏེཧིཔི སཱམཎེརེཧི ཨཱཙརིཡུཔཛ྄ཛྷཱཡཱནཾ ཝཏྟསཱིསེན ཧརིཏབྦཾ. ཙཱུལ༹ཀནྟི ཨུཔཌྜྷབྷཱགཏོཔི ཨུཔཌྜྷཾ.

སཱམཎེརཱ…པེ… ཋཔེནྟཱིཏི ཨརཀྑིཏཱགོཔིཏཾ སནྡྷཱཡ ཝུཏྟཾ. ཏཏྠ ཏཏྠཱཏི མགྒེ ཝཱ ཙེཏིཡངྒཎེ ཝཱ. ‘‘སཱམཎེརེཧི དཱཔེཏུཾ ན ལབྷནྟཱི’’ཏི ཨིདཾ སཱམཎེརེཧི གིཧཱིནཾ ཀམྨཾ ཀཱརིཏཾ ཝིཡ ཧོཏཱིཏི ཝུཏྟཾ, ན པན པུཔྥདཱནཾ ཧོཏཱིཏི སཱམཎེརཱནམྤི ན ཝཊྚནཏོ. ཝུཏྟཉྩ ‘‘སཡམེཝཱ’’ཏིཨཱདི. ‘‘ཨཝིསེསེན ཝུཏྟ’’ནྟི ཨིམིནཱ སབྦེསམྤི ན ཝཊྚཏཱིཏི དསྶེཏི.

ཁཱིཎཔརིབྦཡཱནནྟི ཨཱགནྟུཀེ སནྡྷཱཡ ཝུཏྟཾ. པརིཙྪིནྣེསུཔི རུཀྑེསུ ‘‘ཨིདྷ ཕལཱནི སུནྡརཱནཱི’’ཏིཨཱདིཾ ཝདནྟེན ཀུལསངྒཧོ ཀཏོ ནཱམ ཧོཏཱིཏི ཨཱཧ ‘‘ཨེཝཾ པན ན ཝཏྟབྦ’’ནྟི.

རུཀྑཙྪལླཱིཏི རུཀྑཏྟཙོ. ཨབྷཱཛནཱིཡཏྟཱ གརུབྷཎྜཾ ཝུཏྟཾ. ཝུཏྟནཡེནཱཏི པཎྞདཱནམྤི པུཔྥཕལཱདཱིསུ ཝུཏྟནཡེན ཀུལསངྒཧོ ཧོཏཱིཏི དསྶེཏི.

པུབྦེ ¶ ཝུཏྟཔྤཀཱརནྟི མམ ཝཙནེན བྷགཝཏོ པཱདེ ཝནྡཐཱཏིཨཱདིནཱ ཝུཏྟཔྤཀཱརསིཀྑཱཔདེ པཋམཾ ཝུཏྟཾ. ‘‘པཀྐམཏཱཡསྨཱ’’ཏི ཨིདཾ པབྦཱཛནཱིཡཀམྨཝསེན ¶ ཝུཏྟཾ. པུན ‘‘པཀྐམཏཱཡསྨཱ’’ཏི ཨིདམྤི པབྦཱཛནཱིཡཀམྨཀཏསྶ ཝཏྟཝསེན ཝུཏྟཾ. ཨེཏྠ ཙ ཨསྶཛིཔུནབྦསུཀེཧི ཨཱཙརིཡེསུ ཨནེཀཝིདྷེསུ ཨནཱཙཱརེསུ པཉྙཔེཏབྦཱ ཨཱཔཏྟིཡོ སིཀྑཱཔདནྟརེསུ པཉྙཏྟཱ ཨེཝཱཏི ཏཱ ཨིདྷ ཨཔཉྙཔེཏྭཱ ཀུལདཱུསཀཱནཾ པབྦཱཛནཱིཡཀམྨཝསེན ནིགྒཧཾ ཀཱཏུཾ ཏཏྠེཝ སམྨཱ ཨཝཏྟིཏྭཱ ཀཱརཀསངྒྷཾ ཚནྡགཱམིཏཱདཱིཧི པཱཔེནྟཱནཾ སམནུབྷཱསནཱཡ སངྒྷཱདིསེསཾ ཨཱརོཔིཏཉྩ ཨིདཾ སིཀྑཱཔདཾ པཉྙཏྟནྟི ཝེདིཏབྦཾ. པཋམསངྒྷབྷེདསདིསཱནེཝཱཏི ཨེཏྠ ཨངྒེསུཔི ཡཐཱ ཏཏྠ པརཀྐམནཾ, ཨེཝམིདྷ ཚནྡཱདཱིཧི པཱཔནཾ དཊྛབྦཾ. སེསཾ ཏཱདིསམེཝཱཏི.

ཀུལདཱུསཀསིཀྑཱཔདཝཎྞནཱ ནིཊྛིཏཱ.

ནིགམནཝཎྞནཱ

༤༤༢. ཨིཏརེ པན ཡཱཝཏཏིཡཀཱཏི ཝེདིཏབྦཱཏི སམྦནྡྷོ. ཡོ ཧི ཛརོ ཨེཀསྨིཾ དིཝསེ ཨཱགནྟྭཱཔི གཏོ ཨནནྟརེསུ དྭཱིསུ དིཝསེསུ ཨནུཔྤཛྫིཏྭཱ ཏཏིཡེ དིཝསེ ཨུཔྤཛྫཏི, སོ ཏཏིཡཀོ. ཡོ པན ཏཏིཡེཔི ཨནུཔྤཛྫིཏྭཱ ཙཏུཏྠེ ཨེཝ དིཝསེ ཨུཔྤཛྫཏི, སོ ཙཏུཏྠཀོ ཙཱཏི ཝུཙྩཏི. ཏཾ སནྡྷཱཡཱཧ ‘‘ཡཐཱ ཏཏིཡེ’’ཏིཨཱདི. ‘‘ཨཀཱམེན ཨཝསེནཱ’’ཏི ཨིམིནཱ ཨཔྤཊིཀམྨཀརཎཾ ནཱམ ཡསྨཱ ཨལཛྫིལཀྑཎཾ, སགྒམོཀྑཱཝརཎཉྩ, ཏསྨཱ ཨཱཔནྣོ པུགྒལོ ‘‘པཙྪཱ པརིཝསིསྶཱམཱི’’ཏི ཝིཀྑིཔིཏུཾ ན ལབྷཏི, སངྒྷེན ཙ ཨནིཙྪནྟསྶེཝ པརིཝཱསོ དཱཏབྦོཏི དསྶེཏི. པཱལི༹ཡཾ ཙིཎྞམཱནཏྟོ བྷིཀྑུ…པེ… ཨབྦྷེཏབྦོཏི ཨེཏྠ ཡོ བྷིཀྑུ ཙིཎྞམཱནཏྟོ, སོ བྷིཀྑུ ཨབྦྷེཏབྦོཏི ཨེཝཾ བྷིཀྑུསདྡདྭཡསྶ ཡོཛནཱ ཝེདིཏབྦཱ. ཏེ ཙ བྷིཀྑཱུ གཱརཡ྄ཧཱཏི ཨཱུནབྷཱཝཾ ཉཏྭཱ ཨབྦྷེནྟི, དུཀྐཊཱཔཛྫནེན གརཧིཏབྦཱ. སཱམཱིཙཱིཏི ཝཏྟཾ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

ཏེརསཀཝཎྞནཱནཡོ ནིཊྛིཏོ.

༣. ཨནིཡཏཀཎྜོ

༡. པཋམཨནིཡཏསིཀྑཱཔདཝཎྞནཱ

༤༤༣. པུཏྟསདྡེན ¶ ¶ སཱམཉྙནིདྡེསཏོ, ཨེཀསེསནཡེན ཝཱ པུཏྟཱིཔི གཧིཏཱཏི ཨཱཧ ‘‘བཧཱུ དྷཱིཏརོ ཙཱ’’ཏི. ཏདནནྟརནྟི བྷིཀྑཱུནཾ བྷོཛནཱནནྟརཾ.

༤༤༤-༥. ཏཾ ཀམྨནྟི ཏཾ མེཐུནཱདིཨཛ྄ཛྷཱཙཱརཀམྨཾ. པཱལི༹ཡཾ ‘‘སོཏསྶ རཧོ’’ཏི ཨིདཾ ཨཏྠུདྡྷཱརཝསེན ཝུཏྟཾ, ཨུཔརི སིཀྑཱཔདེ ‘‘ན ཧེཝ ཁོ པན པཊིཙྪནྣ’’ནྟིཨཱདིནཱ (པཱརཱ. ༤༥༤) ཨེཏསྶ སིཀྑཱཔདསྶ ཝིསཡཾ པཊིཀྑིཔིཏྭཱ ‘‘ཨལཉྩ ཁོ ཧོཏི མཱཏུགཱམཾ དུཊྛུལླཱཧི ཝཱཙཱཧི ཨོབྷཱསིཏུ’’ནྟི ཝིསཡནྟརབྷཱུཏསོཏརཧསྶ ཝིསུཾ ཝཀྑམཱནཏྟཱ, ཨིདྷ པན ཙཀྑུརཧོཝ ཨདྷིཔྤེཏོ ‘‘པཊིཙྪནྣེ ཨཱསནེ’’ཏིཨཱདིཝཙནཏོ, ‘‘སཀྐཱ ཧོཏི མེཐུནཾ དྷམྨཾ པཊིསེཝིཏུ’’ནྟི ཝུཏྟཏྟཱ ཙ. ཏེནཱཧ ‘‘ཀིཉྩཱཔཱི’’ཏིཨཱདི. པརིཙྪེདོཏི རཧོནིསཛྫཱཔཏྟིཡཱ ཝཝཏྠཱནཾ.

ཨིདཱནི ཙཀྑུརཧེནེཝ ཨཱཔཏྟིཾ པརིཙྪིནྡིཏྭཱ དསྶེནྟོ ‘‘སཙེཔི ཧཱི’’ཏིཨཱདིམཱཧ. ‘‘པིཧིཏཀཝཱཊསྶཱ’’ཏི ཨིམིནཱ པཊིཙྪནྣབྷཱཝཏོ ཙཀྑུསྶ རཧོཝ ཨདྷིཔྤེཏོ, ན སོཏསྶ རཧོཏི དསྶེཏི. ཏེནཱཧ ‘‘ཨཔིཧིཏཀཝཱཊསྶ…པེ… ཨནཱཔཏྟི’’ནྟི. ན ཧི ཀཝཱཊཔིདཧནེན སོཏསྶ རཧོ ཝིགཙྪཏི, ཙཀྑུསྶ རཧོ ཨེཝ པན ཝིགཙྪཏི. ‘‘ཨནྟོདྭཱདསཧཏྠེཔཱི’’ཏི ཨིདཾ དུཏིཡསིཀྑཱཔདེ ཨཱགཏསོཏསྶ རཧེན ཨཱཔཛྫིཏབྦདུཊྛུལླཝཱཙཱཔཏྟིཡཱ སབྦཐཱ ཨནཱཔཏྟིབྷཱཝཾ དསྶེཏུཾ ཝུཏྟཾ. དྭཱདསཧཏྠཏོ བཧི ནིསིནྣོ ཧི ཏཏྠ སོཏསྶ རཧསབྦྷཱཝཏོ དུཊྛུལླཝཱཙཱཔཏྟིཡཱ ཨནཱཔཏྟིཾ ན ཀརོཏི, ཏཐཱ ཙ ‘‘ཨནཱཔཏྟིཾ ན ཀརོཏཱི’’ཏི སཱམཉྙཏོ ན ཝཏྟབྦཾ སིཡཱ, ‘‘མེཐུནཀཱཡསཾསགྒཱཔཏྟཱིཧི ཨནཱཔཏྟིཾ ཀརོཏཱི’’ཏི ཝིསེསེཏྭཱ ཝཏྟབྦཾ བྷཝེཡྻ. ཏསྨཱ ཏཐཱ ཏཾ ཨཝཏྭཱ སབྦཐཱ ཨནཱཔཏྟིཾ དསྶེཏུམེཝ ‘‘དྭཱདསཧཏྠེ’’ཏི ཝུཏྟནྟི གཧེཏབྦཾ. ཡདི ཧི ཙཀྑུསྶེཝ ¶ རཧབྷཱཝཾ སནྡྷཱཡ ཝདེཡྻ, ‘‘ཨནྟོདྭཱདསཧཏྠེ’’ཏི ན ཝདེཡྻ ཨཔྤཊིཙྪནྣེ ཏཏོ དཱུརེ ནིསིནྣེཔི ཙཀྑུསྶ རཧཱསམྦྷཝཏོ ¶ . ཡསྨཱ ནིསཱིདིཏྭཱ ནིདྡཱཡནྟོ ཀཔིམིདྡྷཔརེཏོ ཀིཉྩི ཀཱལཾ ཙཀྑཱུནི ཨུམྨཱིལེཏི, ཀིཉྩི ཀཱལཾ ནིམྨཱིལེཏི. ཏསྨཱ ‘‘ནིདྡཱཡནྟོཔི ཨནཱཔཏྟིཾ ཀརོཏཱི’’ཏི ཝུཏྟཾ.

པཊིལདྡྷསོཏཱཔཏྟིཕལཱཏི ཨནྟིམཔརིཙྪེདཏོ ཝུཏྟཾ. ནིསཛྫཾ པཊིཛཱནམཱནོཏི མེཐུནཀཱཡསཾསགྒཱདིཝསེན རཧོ ནིསཛྫཾ པཊིཛཱནམཱནོཏི ཨཏྠོ. ཏེནཱཧ ‘‘པཱརཱཛིཀེན ཝཱ’’ཏིཨཱདི. ན ཨཔྤཊིཛཱནམཱནོཏི ཨལཛྫཱིཔི ཨཔྤཊིཛཱནམཱནོ ཨཱཔཏྟིཡཱ ན ཀཱརེཏབྦོཝ. སོ ཧི ཡཱཝ དོསཾ ན པཊིཛཱནཱཏི, ཏཱཝ ‘‘ནེཝ སུདྡྷོ, ནཱསུདྡྷོ’’ཏི ཝཱ ཝཏྟབྦོ, ཝཏྟཱནུསནྡྷིནཱ པན ཀཱརེཏབྦོ. ཝུཏྟཉྷེཏཾ –

‘‘པཊིཉྙཱ ལཛྫཱིསུ ཀཏཱ, ཨལཛྫཱིསུ ཨེཝཾ ན ཝིཛྫཏི;

བཧུམྤི ཨལཛྫཱི བྷཱསེཡྻ, ཝཏྟཱནུསནྡྷིཏེན ཀཱརཡེ’’ཏི. (པརི. ༣༥༩);

ནིསཛྫཱདཱིསུ…པེ… པཊིཛཱནམཱནོཝ ཏེན སོ བྷིཀྑུ ཀཱརེཏབྦོཏི ཨེཏྠ པཊིཛཱནམཱནོཏི པཱལི༹ཡཾ ཨནཱགཏམྤི ཨདྷིཀཱརཏོ ཨཱགཏམེཝཱཏི ཀཏྭཱ ཝུཏྟཾ.

ཝདཱཔེཐཱཏི ཏསྶ ཨིདྡྷིཡཱ ཝིགཏཱསངྐོཔི ཏཾ ཨོཝདནྟོ ཨཱཧ, ཨནུཔཔརིཀྑིཏྭཱ ཨདེསེ ནིསིནྣཱ ‘‘མཱཏུགཱམེན སདྡྷིཾ ཨེཀཱསནེ ཐེརོ རཧོ ནིསིནྣོ’’ཏི ཨེཝཾ མཱདིསེཧིཔི ཏུམྷེ ཏུམྷཱཀཾ ཨཝཎྞཾ ཝདཱཔེཐ ཀཐཱཔཡིཏྠ, མཱ པུན ཨེཝཾ ཀརིཏྠཱཏི ཨདྷིཔྤཱཡོ. ཨེཝམཀཱསིནྟི ནིགཱུཧིཏབྦམྤི ཨིམཾ ཝིསེསཱདྷིགམཾ པཀཱསེནྟོ ཏཾ སདྡྷཱཔེཏུམེཝ ཨེཝམཀཱསིནྟི ཨཏྠོ. རཀྑེཡྻཱསིམནྟི ཨིམཾ ཨུཏྟརིམནུསྶདྷམྨཾ ཨཉྙེསཾ མཱ པཀཱསཡི.

༤༥༡. ནིསཛྫཱཡ པཱཙིཏྟིཡནྟི རཧོནིསཛྫསྶཱདེ ཝཏྟམཱནེ པཱཙིཏྟིཡཾ. སཙེ པན སོ རཧོནིསཛྫསྶཱདཾ པཊིཝིནོདེཏྭཱ ཀམྨཊྛཱནམནསིཀཱརཱདིནཱ ཨཉྙཝིཧིཏོ, ནིདྡཱུཔགཏོ ཝཱ ཨནཱཔཏྟི ཨེཝ. ཏེནཱཧ ‘‘ཨསྶཱདེ ཨུཔྤནྣེ’’ཏི. ‘‘ནིསིནྣཱཡ ཨིཏྠིཡཱ’’ཏི ཨིམིནཱ ནིསཱིདནཀྑཎེ ཨསྶཱདཱབྷཱཝཾ དསྶེཏི. ཡདི ཧི ནིསཱིདནཀྑཎེ ཨསྶཱདོ ཨུཔྤཛྫེཡྻ, ཏེན ཨུཊྛཱཏབྦཾ. ཨིཏརཐཱ ཨཱཔཏྟི ཨེཝ ཨིཏྠིཡཱ ཨུཊྛཱཡུཊྛཱཡ པུནཔྤུནཾ ནིསཱིདནེ ཝིཡ, ཏཏྠཱཔི བྷིཀྑུསྶ ¶ ཨུཊྛཧཏོ ཨནཱཔཏྟི, ཏེན རཧོནིསཛྫཱཔཏྟི ཨཀིརིཡསམུཊྛཱནཱཔི ཧོཏཱིཏི ཝདནྟི. ཨིདཾ པན ཨནིཡཏསིཀྑཱཔདཾ, ཨནནྟརཉྩཱཏི དྭེཔི ཝིསུཾ ཨཱཔཏྟིཔཉྙཱཔནཝསེན པཉྙཏྟཱནི ན ¶ ཧོནྟི རཧོནིསཛྫཱདཱིསུ ཨཱཔཏྟིཡཱ སིཀྑཱཔདནྟརེསུ པཉྙཏྟཏྟཱ. པཱརཱཛིཀཱདིཨཱཔཏྟཱིཧི པན ཀེནཙི ཙོདིཏསྶ ཨནུཝིཛྫཀེཧི ཝིནིཙྪཡཀཱརཎནཡདསྶནཏྠཾ ཨེཝཾ ཝཏྠུཝསེན དྭིདྷཱ ཝིབྷཛིཏྭཱ པཉྙཏྟཱནི, ཨིམཱནེཝ ཙ ཡསྨཱ བྷིཀྑུནཱིནམྤི ཝིནིཙྪཡནཡགྒཧཎཱཡ ཨལཾ, ཏསྨཱ ཏཱསཾ ཝིསུཾ ན ཝུཏྟཱནཱིཏི ཝེདིཏབྦཾ. ཡཾ པན ཨཱཔཏྟིཾ པཊིཛཱནཱཏི, ཏསྶ ཝསེནེཏྠ ཨངྒབྷེདོ ཝེདིཏབྦོ. ཏེནེཝ ‘‘ཨཡཾ དྷམྨོ ཨནིཡཏོ’’ཏི ཝུཏྟཾ.

ཨིདྷ ཨནིཡཏཝསེན ཝུཏྟཱནཾ པཱརཱཛིཀསངྒྷཱདིསེསཔཱཙིཏྟིཡཱནཾ ཏིཎྞམྤི ཨཉྙམཉྙཾ སདིསསམུཊྛཱནཱདིཏཱཡ ཝུཏྟཾ ‘‘སམུཊྛཱནཱདཱིནི པཋམཔཱརཱཛིཀསདིསཱནེཝཱ’’ཏི.

པཋམཨནིཡཏསིཀྑཱཔདཝཎྞནཱ ནིཊྛིཏཱ.

༢. དུཏིཡཨནིཡཏསིཀྑཱཔདཝཎྞནཱ

༤༥༢. ‘‘ན ལབྷཏི མཱཏུགཱམེན སདྡྷིཾ ཨེཀོ ཨེཀཱཡ…པེ… ནིསཛྫཾ ཀཔྤེཏུ’’ནྟི ཨཝཏྭཱ ‘‘པཊིཀྑིཏྟཾ མཱཏུགཱམེནཱ’’ཏིཨཱདིནཱ ཝུཏྟཏྟཱ ‘‘ཨེཀོ’’ཏི པཙྩཏྟཔདཾ པཊིཀྑིཏྟཔདེན ན སམེཏི, ‘‘ཨེཀསྶཱ’’ཏི ཝཏྟབྦོཏི སཱདྷེནྟོ ཨཱཧ ‘‘ཨིཏརཐཱ ཧཱི’’ཏིཨཱདི.

༤༥༣. པརིཝེཎངྒཎཱདཱིཏི པརིཝེཎསྶ མཱལ༹ཀཾ. ཨཱདི-སདྡེན པཱཀཱརཱདིཔརིཀྑིཏྟཾ ཙེཏིཡམཱལ༹ཀཱདིཾ སངྒཎྷཱཏི. ཨནྟོགདྷནྟི ཨཔྤཊིཙྪནྣཊྛཱནེ ཨེཝ པརིཡཱཔནྣཾ. ཨིདྷ ཨིཏྠཱིཔི ཨནཱཔཏྟིཾ ཀརོཏཱིཏི སམྦནྡྷོ. ཀསྨཱ པན ཨིཏྠཱི ཨིདྷེཝ ཨནཱཔཏྟིཾ ཀརོཏི, ན པུརིམསིཀྑཱཔདེཏི? ཨིམསྶ སིཀྑཱཔདསྶ མེཐུནཾ ཝིནཱ དུཊྛུལླཝཱཙཱཡ ཝསེན ཨཱགཏཏྟཱ. མེཐུནམེཝ ཧི ཨིཏྠིཡོ ཨཉྙམཉྙཾ པཊིཙྪཱདེནྟི མཧཱཝནེ དྭཱརཾ ཝིཝརིཏྭཱ ནིདྡཱུཔགཏམྷི བྷིཀྑུམྷི ཝིཡ. དུཊྛུལླཾ པན ན པཊིཙྪཱདེནྟི, ཏེནེཝ དུཊྛུལླཝཱཙཱསིཀྑཱཔདེ ‘‘ཡཱ ཏཱ ཨིཏྠིཡོ ཧིརིམནཱ, ཏཱ ནིཀྑམིཏྭཱ བྷིཀྑཱུ ཨུཛ྄ཛྷཱཔེསུ’’ནྟི (པཱརཱ. ༢༨༣) ཝུཏྟཾ, ཏསྨཱ ¶ ‘‘ཨིཏྠཱིཔི ཨནཱཔཏྟིཾ ཀརོཏཱི’’ཏི ཝུཏྟཾ, ‘‘ཨཔྤཊིཙྪནྣཊྛཱནཏྟཱ’’ཏིཔི ཀཱརཎཾ ཝདནྟི.

ཀཱཡེནཱཔི དུཊྛུལློབྷཱསསམྦྷཝཏོ ཨིམསྨིཾ སིཀྑཱཔདེ ཙཀྑུསྶ རཧོ, སོཏསྶ རཧོ ཙ ཨདྷིཔྤེཏོཏི ཨཱཧ ‘‘ཨནནྡྷོ ཨབདྷིརོ’’ཏིཨཱདི. ཀེཙི པན ཝིབྷངྒེ ‘‘ནཱལཾ ཀམྨནིཡནྟི ན སཀྐཱ ཧོཏི མེཐུནཾ དྷམྨཾ པཊིསེཝིཏུ’ནྟི (པཱརཱ. ༤༥༤) ཨེཏྟཀམེཝ ཝཏྭཱ ‘ན སཀྐཱ ཧོཏི ཀཱཡསཾསགྒཾ སམཱཔཛྫིཏུ’ནྟི ཨཝུཏྟཏྟཱ ཨཔྤཊིཙྪནྣེཔི ཋཱནེ རཧོ ཨཉྙེསཾ ཨབྷཱཝཾ དིསྭཱ ཨེཀཱཡ ¶ ཨིཏྠིཡཱ ཀཱཡསཾསགྒོཔི སཀྐཱ ཨཱཔཛྫིཏུནྟི ཨནྟོདྭཱདསཧཏྠེ སཝནཱུཔཙཱརེ ཋིཏོ ཨབདྷིརོཔི ཨནྡྷོ ཀཱཡསཾསགྒསྶཱཔི སབྦྷཱཝཱབྷཱཝཾ ན ཛཱནཱཏཱིཏི ཀཱཡེན དུཊྛུལློབྷཱསནསབྦྷཱཝཾ ཨམནསིཀཏྭཱཔི ཀཱཡསཾསགྒཱཔཏྟིཡཱཔི པརིཧཱརཱཡ ཨནནྡྷོ ཨབདྷིརོཏིཨཱདི ཝུཏྟ’’ནྟི ཝདནྟི. ཡཾ པན སཱརཏྠདཱིཔནིཡཾ ‘‘ཀཱཡསཾསགྒཝསེན ཨནནྡྷོ ཝུཏྟོ’’ཏི (སཱརཏྠ. ཊཱི. ༢.༤༥༣) ཝུཏྟཾ, ཏཾ པན ཀཱཡེན དུཊྛུལློབྷཱསནསམྦྷཝཾ ཨམནསིཀཏྭཱ ཝུཏྟཾ, ཀཱཡསཾསགྒཝསེནཱཔཱིཏི གཧེཏབྦཾ. ཏེནེཝ ‘‘ཨིམསྨིཾ སིཀྑཱཔདེ སོཏསྶ རཧོ ཨེཝ ཨདྷིཔྤེཏོ…པེ… ཀེནཙི པན ‘དྭེཔི རཧཱ ཨིདྷ ཨདྷིཔྤེཏཱ’ཏི ཝུཏྟཾ, ཏཾ ན གཧེཏབྦ’’ནྟི ཝུཏྟཾ. ཡཾ པན ཙཀྑུསྶ རཧཱབྷཱཝསཱདྷནཏྠཾ ‘‘ན ཧི ཨཔྤཊིཙྪནྣེ ཨོཀཱསེ ཙཀྑུསྶ རཧོ སམྦྷཝཏཱི’’ཏིཨཱདི ཝུཏྟཾ, ཏཾ ན ཡུཏྟཾ ཨཏིདཱུརཏརེ ཋིཏསྶ ཀཱཡེན ཨོབྷཱསནམྤི ཧཏྠགྒཱཧཱདཱིནིཔི སལླཀྑེཏུཾ ཨསཀྐུཎེཡྻཏྟཱ. ཏེནེཝ པཱལི༹ཡཾ ‘‘ཙཀྑུསྶ རཧོ’’ཏི ཝུཏྟཾ, ཨཊྛཀཐཱཡཾ ཨཔྤཊིཀྑིཏྟཾ. ན ཀེཝལཉྩ ཨཔྤཊིཀྑིཏྟཾ, ཨཐ ཁོ ‘‘ཨནནྡྷོ བདྷིརོཏི ཙ ཨནྡྷོ ཝཱ ཨབདྷིརོཔི ན ཀརོཏཱི’’ཏི ཙ ཝུཏྟཾ, ཏསྨཱ དྭེཔི རཧཱ ཨིདྷ གཧེཏབྦཱ. ‘‘ཨནྟོདྭཱདསཧཏྠེ’’ཏིཨིམིནཱ སོཏསྶ རཧོ དྭཱདསཧཏྠེན པརིཙྪིནྣོཏི ཨིདཾ དསྶེཏི. ཙཀྑུསྶ རཧོ པན ཡཏྠ ཋིཏསྶ ཀཱཡཝིཀཱརཱདཡོ ན པཉྙཱཡནྟི, ཏེན པརིཙྪིནྡིཏབྦོཏི དཊྛབྦཾ. བདྷིརོ པན ཙཀྑུམཱཔཱིཏི དུཊྛུལླཝཱཙཱསངྒྷཱདིསེསཾ སནྡྷཱཡ ཝུཏྟཾ. དུཊྛུལླཱཔཏྟི ཝུཏྟཱཏི པུརིམསིཀྑཱཔདེ ཝུཏྟེཧི ཨདྷིཀཝསེན དུཊྛུལླཱཔཏྟི ཙ ཝུཏྟཱཏི ཨེཝམཏྠོ གཧེཏབྦོ, ན པན དུཊྛུལླཱཔཏྟི ཨེཝཱཏི ཀཱཡསཾསགྒསྶཱཔི ཨིདྷ གཧེཏབྦཏོ. ཏེནེཝ ‘‘པཱརཱཛིཀཱཔཏྟིཉྩ པརིཧཱཔེཏྭཱ’’ཏི ¶ ཨེཏྟཀམེཝ ཝུཏྟཾ, ཨིཏརཐཱ ‘‘ཀཱཡསཾསགྒཉྩཱ’’ཏི ཝཏྟབྦཾ བྷཝེཡྻ.

ཏིསམུཊྛཱནནྟིཨཱདི པན པུརིམསིཀྑཱཔདེ ཨཱགཏེཧི ཨདྷིཀསྶ དུཊྛུལླཝཱཙཱསངྒྷཱདིསེསསྶ ཝསེན ཝུཏྟཾ ཀཱཡསཾསགྒཱདཱིནམྤི པུརིམསིཀྑཱཔདེ ཨེཝ ཝུཏྟཏྟཱ, ཨིདྷ པན ན ཝུཏྟནྟིཔི ཝདནྟི, ཝཱིམཾསིཏྭཱ གཧེཏབྦཾ.

དུཏིཡཨནིཡཏསིཀྑཱཔདཝཎྞནཱ ནིཊྛིཏཱ.

ནིཊྛིཏོ ཨནིཡཏཝཎྞནཱནཡོ.

༤. ནིསྶགྒིཡཀཎྜོ

༡. ཙཱིཝརཝགྒོ

༡. པཋམཀཐིནསིཀྑཱཔདཝཎྞནཱ

༤༥༩. སམིཏཱཝིནཱཏི ¶ ¶ སམིཏཔཱཔེན. གོཏམཀཙེཏིཡཾ ནཱམ གོཏམཡཀྑསྶ ཙེཏིཡཊྛཱནེ ཀཏཝིཧཱརོ ཝུཙྩཏི.

༤༦༡. ནཝམཾ ཝཱ དསམཾ ཝཱཏི བྷུམྨཏྠེ ཨུཔཡོགཝཙནཾ. སཙེ བྷཝེཡྻཱཏི སཙེ ཀསྶཙི ཀངྑཱ བྷཝེཡྻ. ཝུཏྟསདིསནྟི དསམཾ ཝཱཏི ཝུཏྟསདིསཾ པརིཙྪེདསདིསཾ, ‘‘ཝུཏྟསདིསམེཝཱ’’ཏིཔི ལིཁནྟི. དྷཱརེཏུནྟི ཨེཏྠ ཨཱཧཱཏི པཱཋསེསོ དཊྛབྦོ.

༤༦༣. སཱུཙིཡཱ པཊིསཱམནནྟི སཱུཙིགྷརེ སཾགོཔནཾ, ཨིདཉྩ སཱུཙིཀམྨསྶ སབྦསྶ པརིནིཊྛིཏབྷཱཝདསྶནཏྠཾ ཝུཏྟཾ. ཨེཏནྟི ནཊྛཙཱིཝརཾ. ཨེཏེསམྤཱིཏི ནཊྛཙཱིཝརཱདཱིནི པརཱམསཏི, ཏེན ཙཱིཝརཔལིབོདྷཱབྷཱཝཾ དསྶེཏི. དུཏིཡསྶ པལིབོདྷསྶཱཏི ཨཱཝཱསཔལིབོདྷསྶ. ཨེཏྠ ཙ ནིཊྛིཏཙཱིཝརསྨིཾ, ཨུབྦྷཏསྨིཾ ཀཐིནེཏི དྭཱིཧི པདེཧི དྭིནྣཾ པལིབོདྷཱནཾ ཨབྷཱཝདསྶནེན ཨཏྠཏཀཐིནསྶ པཉྩམཱསབྦྷནྟརེ ཡཱཝ ཙཱིཝརཔལིབོདྷཨཱཝཱསཔལིབོདྷེསུ ཨཉྙཏརཾ ན ཨུཔཙྪིཛྫཏི, ཏཱཝ ཨཏིརེཀཙཱིཝརཾ དྷཱརེཏུཾ ཝཊྚཏཱིཏི དཱིཔེཏི. པཀྐམནཾ ཨནྟོ ཨསྶཱཏི པཀྐམནནྟིཀཱ, ཨེཝཾ སེསཱཔི ཝེདིཏབྦཱ. ཝིཏྠཱརོ པནེཏྠ ཨཱགཏཊྛཱནེ ཨཱཝི བྷཝིསྶཏི.

དསཱཧཔརམཾ ཀཱལནྟི ཨཙྩནྟསཾཡོགཝཙནཾ. ཨིདཉྷི ཝུཏྟཾ ཧོཏི…པེ… དསཱཧཔརམབྷཱཝོཏི ཨིདཾ དསཱཧཔརམཏཱཔདསྶ ཨཏྠམཏྟདསྶནཾ, དསཱཧཔརམབྷཱཝོཏི ཨིདཉྷི ཝུཏྟཾ ཧོཏཱིཏི ཨེཝམེཏྠ ཡོཛནཱ ཝེདིཏབྦཱ. ཨཡམཏྠོཏིཨཱདི དསཱཧཔརམཔདསྶེཝ ཨདྷིཔྤེཏཏྠདསྶནཝསེན ¶ ཝུཏྟཾ. ཏཏྠ ཨེཏྟཀོ ཀཱལོཏི ‘‘དསཱཧཔརམཏཱ’’ཏི ཝུཏྟོ ཡོ ཀཱལོ, སོ ཨེཏྟཀོ ཀཱལོཏི ཨཏྠོ.

ཁོམནྟི ཁོམསུཏྟེཧི ཝཱཡིཏཾ ཁོམཔཊཙཱིཝརཾ, ཏཾ ཝཱཀམཡནྟི ཝདནྟི. ཀཔྤཱསསུཏྟེཧི ཝཱཡིཏཾ ཀཔྤཱསིཀཾ, ཨེཝཾ སེསཱནིཔི. ཀམྦལནྟི ཨེལ༹ཀཱདཱིནཾ ལོམམཡསུཏྟེན ཝཱཡིཏཔཊཾ. བྷངྒནྟི ཁོམསུཏྟཱདཱིནི སབྦཱནི, ཨེཀཙྩཱནི ཝཱ མིསྶེཏྭཱ ཝཱཡིཏཾ ཙཱིཝརཾ. བྷངྒམྤི ཝཱཀམཡམེཝཱཏི ཀེཙི. དུཀཱུལཾ པཏྟུཎྞཾ སོམཱརཔཊཾ ཙཱིནཔཊཾ ཨིདྡྷིཛཾ དེཝདིནྣནྟི ཨིམཱནི པན ཚ ཙཱིཝརཱནི ཨེཏེསཉྙེཝ ¶ ཨནུལོམཱནཱིཏི ཝིསུཾ ན ཝུཏྟཱནི. དུཀཱུལཉྷི སཱཎསྶ ཨནུལོམཾ ཝཱཀམཡཏྟཱ. ‘‘པཏྟུཎྞཾ ཀོསེཡྻཝིསེསོ’’ཏི ཨབྷིདྷཱནཀོསེ ཝུཏྟཾ. སོམཱརདེསེ, ཙཱིནདེསེ ཙ ཛཱཏཝཏྠཱནི སོམཱརཙཱིནཔཊཱནི. པཏྟུཎྞཱདཱིནི ཏཱིཎི ཀོསེཡྻསྶ ཨནུལོམཱནི པཱཎཀེཧི ཀཏསུཏྟམཡཏྟཱ. ཨིདྡྷིཛནྟི ཨེཧིབྷིཀྑཱུནཾ པུཉྙིདྡྷིཡཱ ནིབྦཏྟཙཱིཝརཾ. ཀཔྤརུཀྑེ ནིབྦཏྟཾ, དེཝདིནྣཉྩ ཁོམཱདཱིནཾ ཨཉྙཏརཾ ཧོཏཱིཏི ཏེསཾ སབྦེསཾ ཨནུལོམཱནི. མནུསྶཱནཾ པཀཏིཝིདཏྠིཾ སནྡྷཱཡ ‘‘དྭེ ཝིདཏྠིཡོ’’ཏིཨཱདི ཝུཏྟཾ. ཨིམིནཱ དཱིགྷཏོ ཝཌྜྷཀཱིཧཏྠཔྤམཱཎཾ ཝིཏྠཱརཏོ ཏཏོ ཨུཔཌྜྷཔྤམཱཎཾ ཝིཀཔྤནུཔགནྟི དསྶེཏི. ཏཐཱ ཧི ‘‘སུགཏཝིདཏྠི ནཱམ ཨིདཱནི མཛ྄ཛྷིམསྶ པུརིསསྶ ཏིསྶོ ཝིདཏྠིཡོ, ཝཌྜྷཀཱིཧཏྠེན དིཡཌྜྷོ ཧཏྠོ ཧོཏཱི’’ཏི (པཱརཱ. ཨཊྛ. ༢.༣༤༨-༣༤༩) ཀུཊིཀཱརསིཀྑཱཔདཊྛཀཐཱཡཾ ཝུཏྟཾ, ཏསྨཱ སུགཏངྒུལེན དྭཱདསངྒུལཱ སུགཏཝིདཏྠི ཝཌྜྷཀཱིཧཏྠེན དིཡཌྜྷོ ཧཏྠོཏི སིདྡྷཾ. ཨེཝཉྩ ཀཏྭཱ ‘‘སུགཏངྒུལེན ཨཊྛངྒུལཾ ཝཌྜྷཀཱིཧཏྠཔྤམཱཎ’’ནྟི ཨཱགཏཊྛཱནེཧི ཙ སམེཏི.

ཏཾ ཨཏིཀྐཱམཡཏོཏི ཨེཏྠ ཏནྟི ཙཱིཝརཾ, ཀཱལཾ ཝཱ པརཱམསཏི. ཏསྶ ཡོ ཨརུཎོཏི ཙཱིཝརུཔྤཱདདིཝསསྶ ཡོ ཨཏིཀྐནྟོ ཨརུཎོ. ཙཱིཝརུཔྤཱདདིཝསེན སདྡྷིནྟི ཙཱིཝརུཔྤཱདདིཝསསྶ ཨཱདིབྷཱུཏེན ཨཏིཀྐནྟཨརུཎེན སདྡྷིནྟི ཨཏྠོ, ཨིདཉྩ བྷགཝཏཱ ‘‘དསཱཧཔརམ’’ནྟི ཝཏྭཱ པུན ‘‘ཨེཀཱདསེ ཨརུཎུགྒམནེ’’ཏི ཝུཏྟཏྟཱ པུབྦཱཔརསཾསནྡནཏྠཾ སདྡཏོ གམྨམཱནམྤི ‘‘ཙཱིཝརུཔྤཱདདིཝསེན སདྡྷི’’ནྟི ཨེཝཾ ཝུཏྟཾ. ‘‘དསམེ ཨརུཎེ’’ཏི ཝུཏྟེ ཨེཝ ཧི དསཱཧཔརམེན སདྡྷིཾ སམེཏི. དིཝསཔརིཡོསཱནསྶ ཨཝདྷིབྷཱུཏཨནཱགཏཱརུཎཝསེན ཧི དིཝསཾ ཨཏིཀྐནྟཾ ནཱམ ཧོཏི, ན པན དིཝསསྶ ཨཱདིབྷཱུཏཱརུཎཝསེན པརིཝཱསཱདཱིསུ ཏཐཱ ཨགྒཧཎཏོ, ཨིདྷ པན བྷགཝཏཱ དིཝསསྶ ཨཱདིཨནྟཔརིཙྪེདདསྶནཝསེན ‘‘ཨེཀཱདསེ ཨརུཎུགྒམནེ’’ཏི ཝུཏྟཾ, ཏསྨཱ ཨཊྛཀཐཱཡཾ དིཝསསྶ ཨཱདིབྷཱུཏཾ ཏཾདིཝསནིསྶིཏམྤི ཨརུཎཾ གཧེཏྭཱ ‘‘ཨེཀཱདསེ ཨརུཎུགྒམནེ ནིསྶགྒིཡཾ ཧོཏཱི’’ཏི ཝུཏྟཾ. ཨརུཎོཏི ཙེཏྠ སཱུརིཡུགྒམནསྶ པུརེཙརོ ཝཌྜྷནགྷནརཏྟོ པབྷཱཝིསེསོཏི དཊྛབྦོ.

ཝཙནཱིཡོཏི ¶ སངྒྷཱཔེཀྑོ. ཝཙནབྷེདོཏི ‘‘ཉཏྟིཡཾ དྭེ ཨཱཔཏྟིཡོ སརཏཱི’’ཏིཨཱདིནཱ ཝཏྟབྦནྟི ཨདྷིཔྤཱཡོ.

༤༦༨. ‘‘ན ¶ ཨིདྷ སཉྙཱ རཀྑཏཱི’’ཏི ཨིདཾ ཝེམཏིཀཉྩ ཨནཏིཀྐནྟསཉྙཉྩ སནྡྷཱཡ ཝུཏྟཾ. ཡོཔི ཨེཝཾསཉྙཱི ཏསྶཔཱིཏི ཡོ ཨནཏིཀྐནྟསཉྙཱི, ཝེམཏིཀོ ཝཱ, ཏསྶཔཱིཏི ཨཏྠོ. ཨནཊྛཏོ ཨཝིལུཏྟསྶ ཝིསེསམཱཧ ‘‘པསཡ྄ཧཱཝཧཱརཝསེནཱ’’ཏི. ཐེཡྻཱཝཧཱརཝསེན གཧིཏམྤི ཨིདྷ ནཊྛཾ.

ཨནཱཔཏྟི ཨཉྙེན ཀཏཾ པཊིལབྷིཏྭཱཏིཨཱདི ནིསཱིདནསནྠཏཾ སནྡྷཱཡ ཝུཏྟཾ. ཡེན ཧི པུརཱཎསནྠཏསྶ སཱམནྟཱ སུགཏཝིདཏྠིཾ ཨནཱདིཡིཏྭཱ ནཝཾ ནིསཱིདནསནྠཏཾ ཀཏཾ, ཏསྶ ཏཾ ནིསྶགྒིཡམྤི ཏཏོ ཨཉྙསྶ པཊིལབྷིཏྭཱ པརིབྷུཉྫནྟསྶ ཨནཱཔཏྟིཀརནྟི སིཛ྄ཛྷནཏོ ཨཡམཏྠོ སབྦནིསྶགྒིཡེསུཔི སིཛ྄ཛྷཏི.

༤༦༩. ཏིཙཱིཝརཾ ཨདྷིཊྛཱཏུནྟི སངྒྷཱཊིཨཱདིནཱམེན ཨདྷིཊྛཱཏུཾ. ‘‘ན ཝིཀཔྤེཏུ’’ནྟི ཨིམིནཱ ནཱམེན ན ཝིཀཔྤེཏུཾ, ཨེཏེན ཝིཀཔྤིཏཏིཙཱིཝརོ ཏེཙཱིཝརིཀོ ན ཧོཏི. ཏསྶ ཏསྨིཾ ཨདྷིཊྛིཏཏིཙཱིཝརེ ཝིཡ ཨཝིཔྤཝཱསཱདིནཱ ཀཏྟབྦཝིདྷི ན ཀཱཏབྦོཏི དསྶེཏི, ན པན ཝིཀཔྤནེ དོསོཏི. ཏཏོ པརནྟི ཙཏུམཱསཏོ པརཾ ཝིཀཔྤེཏྭཱ པརིབྷུཉྫིཏུཾ ཨནུཉྙཱཏནྟི ཀེཙི ཝདནྟི, ཨཉྙེ པན ‘‘ཝིཀཔྤེཏྭཱ ཡཱཝ ཨཱགཱམིཝསྶཱནཾ, ཏཱཝ ཋཔེཏུམེཝ ཝཊྚཏཱི’’ཏི ཝདནྟི, ཨཔརེ པན ‘‘ཝིཀཔྤནེ ན དོསོ, ཏཐཱ ཝིཀཔྤིཏཾ པརིཀྑཱརཱདིནཱམེན ཨདྷིཊྛཧིཏྭཱ པརིབྷུཉྫིཏབྦ’’ནྟི ཝདནྟི.

མུཊྛིཔཉྩཀནྟི མུཊྛིཡཱ ཨུཔལཀྑིཏཾ པཉྩཀཾ, ཙཏུཧཏྠེ མིནིཏྭཱ པཉྩམཾ ཧཏྠཾ མུཊྛིཾ ཀཏྭཱ མིནིཏབྦནྟི ཨདྷིཔྤཱཡོ. ཀེཙི པན ‘‘མུཊྛིཧཏྠཱནཾ པཉྩཀཾ མུཊྛིཔཉྩཀཾ, ཏསྨཱ པཉྩཔི ཧཏྠེ མུཊྛིཾ ཀཏྭཱཝ མིནིཏབྦཱ’’ཏི ཝདནྟི. མུཊྛིཏྟིཀནྟི ཨེཏྠཱཔི ཨེསེཝ ནཡོ. དྭིཧཏྠེན ཨནྟརཝཱསཀེན ཏིམཎྜལཾ པཊིཙྪཱདེཏུཾ སཀྐཱཏི ཨཱཧ ‘‘པཱརུཔནེནཱ’’ཏིཨཱདི. ཨཏིརེཀནྟི སུགཏཙཱིཝརཔྤམཱཎཏོ ཨདྷིཀཾ. ཨཱུནཀནྟི མུཊྛིཔཉྩཀཱདིཏོ ཨཱུནཀཾ, ཏེན ཙ ཏེསུ ཏིཙཱིཝརཱདྷིཊྛཱནཾ ན རུཧཏཱིཏི དསྶེཏི.

ཨིམཾ སངྒྷཱཊིཾ པཙྩུདྡྷརཱམཱིཏི ཨིམཾ སངྒྷཱཊིཨདྷིཊྛཱནཾ ཨུཀྑིཔཱམི པརིཙྩཛཱམཱིཏི ཨཏྠོ. ཀཱཡཝིཀཱརཾ ཀརོནྟེནཱཏི ཧཏྠེན ཙཱིཝརཾ པརཱམསནྟེན, ཙཱལེནྟེན ཝཱ. ཝཱཙཱཡ ཨདྷིཊྛཱཏབྦཱཏི ཨེཏྠ ¶ ཀཱཡེནཔི ཙཱལེཏྭཱ ཝཱཙམྤི བྷིནྡིཏྭཱ ཀཱཡཝཱཙཱཧི ཨདྷིཊྛཱནམྤི སངྒཧིཏནྟི ཝེདིཏབྦཾ ‘‘ཀཱཡེན ཨཕུསིཏྭཱ’’ཏི ཝུཏྟཏྟཱ. དུཝིདྷནྟི ཨཧཏྠཔཱསཧཏྠཔཱསཝསེན དུཝིདྷཾ. ཏཏྠ ཧཏྠཔཱསོ ནཱམ ཨཌྜྷཏེཡྻཧཏྠོ ཝུཙྩཏི. དྭཱདསཧཏྠནྟི ཀེཙི ཝདནྟི ¶ , ཏཾ ཨིདྷ ན སམེཏི. ‘‘སཱམནྟཝིཧཱརེ’’ཏི ཨིདཾ ཋཔིཏཊྛཱནསལླཀྑཎཡོགྒེ ཋིཏཾ སནྡྷཱཡ ཝུཏྟཾ. ཏཏོ དཱུརེ ཋིཏམྤི ཋཔིཏཊྛཱནཾ སལླཀྑེནྟེན ཨདྷིཊྛཱཏབྦམེཝ. ཏཏྠཔི ཙཱིཝརསྶ ཋཔིཏབྷཱཝསལླཀྑཎམེཝ པམཱཎཾ. ན ཧི སཀྐཱ སབྦཐཱ ཋཱནཾ སལླཀྑེཏུཾ. ཨེཀསྨིཾ ཝིཧཱརེ ཋཔེཏྭཱ ཏཏོ ཨཉྙསྨིཾ ཋཔིཏནྟི ཨདྷིཊྛཱཏུཾ ན ཝཊྚཏི. ཀེཙི པན ‘‘ཏཐཱཔི ཨདྷིཊྛིཏེ ན དོསོ’’ཏི ཝདནྟི, ཏཾ ཨཊྛཀཐཱཡ ན སམེཏི, ཝཱིམཾསིཏབྦཾ. ཨདྷིཊྛཧིཏྭཱ ཋཔིཏཝཏྠེཧཱིཏི པརིཀྑཱརཙོལ༹ནཱམེན ཨདྷིཊྛཧིཏྭཱ ཋཔིཏཝཏྠེཧི, ཏེནེཝ ‘‘ཨིམཾ པཙྩུདྡྷརཱམཱི’’ཏི པརིཀྑཱརཙོལ༹སྶ པཙྩུདྡྷཱརཾ དསྶེཏི. ཨེཏེན ཙ ཏེཙཱིཝརདྷུཏངྒཾ པརིཧརནྟེན པཾསུཀཱུལཱདིཝསེན ལདྡྷཾ ཝཏྠཾ དསཱཧབྦྷནྟརེ ཀཏྭཱ རཛིཏྭཱ པཱརུཔིཏུཾ ཨསཀྐོནྟེན པརིཀྑཱརཙོལ༹ཝསེན ཨདྷིཊྛཧིཏྭཱཝ དསཱཧཾ ཨཏིཀྐམེཏབྦཾ, ཨིཏརཐཱ ནིསྶགྒིཡཾ ཧོཏཱིཏི དསྶེཏི. ཏེནེཝ ‘‘རཛིཏཀཱལཏོ པན པཊྛཱཡ ནིཀྑིཔིཏུཾ ན ཝཊྚཏི, དྷུཏངྒཙོརོ ནཱམ ཧོཏཱི’’ཏི (ཝིསུདྡྷི. ༡.༢༥) ཝིསུདྡྷིམགྒེ ཝུཏྟཾ. ‘‘པུན ཨདྷིཊྛཱཏབྦཱནཱི’’ཏི ཨིདཉྩ སངྒྷཱཊིཨཱདིཏིཙཱིཝརནཱམེན ཨདྷིཊྛཧིཏྭཱ པརིབྷུཉྫིཏུཀཱམསྶ ཝསེན ཝུཏྟཾ, ཨིཏརསྶ པན པུརིམཱདྷིཊྛཱནམེཝ ཨལནྟི ཝེདིཏབྦཾ. ‘‘པུན ཨདྷིཊྛཱཏབྦ’’ནྟི ཨིམིནཱ ཀཔྤབིནྡུཔི དཱཏབྦནྟི དསྶེཏི.

བདྡྷསཱིམཱཡཾ ཨཝིཔྤཝཱསསཱིམཱསམྨུཏིསམྦྷཝཏོ ན ཏཏྠ དུཔྤརིཧཱརཏཱཏི ཨཱཧ ‘‘ཨབདྡྷསཱིམཱཡཾ དུཔྤརིཧཱར’’ནྟི.

ཨཏིརིཏྟཔྤམཱཎཱཡ ཚེདནཀཾ པཱཙིཏྟིཡནྟི ཨཱཧ ‘‘ཨནཏིརིཏྟཔྤམཱཎཱ’’ཏི. ཏཏོ པརཾ པཙྩུདྡྷརིཏྭཱ ཝིཀཔྤེཏབྦཱཏི ཝསྶིཀམཱསཏོ པརཾ ཨདྷིཊྛཱནཾ པཙྩུདྡྷརིཏྭཱ ཝིཀཔྤེཏབྦཱ, ཨིམིནཱ ཙཏུནྣཾ ཝསྶིཀམཱསཱནཾ ཨུཔརི ཨདྷིཊྛཱནཾ ཏིཊྛཏཱིཏི ཝིཉྙཱཡཏི ཏཏོ པཙྩུདྡྷརཱཡོགཱ. ཡཉྩ མཱཏིཀཱཊྛཀཐཱཡཾ ‘‘ཝསྶིཀསཱཊིཀཱ ཝསྶཱནམཱསཱཏིཀྐམེནཱཔི, ཀཎྜུཔཊིཙྪཱདི ཨཱབཱདྷཝཱུཔསམེནཱཔི ཨདྷིཊྛཱནཾ ཝིཛཧཏཱི’’ཏི (ཀངྑཱ. ཨཊྛ. ཀཐིནསིཀྑཱཔདཝཎྞནཱ) ཝུཏྟཾ, ཏཾ སམནྟཔཱསཱདིཀཱཡཾ ནཏྠི. པརིཝཱརཊྛཀཐཱཡཉྩ ‘‘ཨཏྠཱཔཏྟི ཧེམནྟེ ཨཱཔཛྫཏི, ནོ གིམྷེ’’ཏི ཨེཏྠ ཨིདཾ ཝུཏྟཾ ‘‘ཀཏྟིཀཔུཎྞམཱསིཡཱ པཙྪིམེ པཱཊིཔདདིཝསེ ཝིཀཔྤེཏྭཱ ཋཔིཏཾ ཝསྶིཀསཱཊིཀཾ ནིཝཱསེནྟོ ཧེམནྟེ ཨཱཔཛྫཏི, ཀུརུནྡིཡཾ པན ‘ཀཏྟིཀཔུཎྞམདིཝསེ ཨཔཙྩུདྡྷརིཏྭཱ ཧེམནྟེ ཨཱཔཛྫཏཱི’ཏི ཝུཏྟཾ, ཏམྤི སུཝུཏྟཾ, ‘ཙཏུམཱསཾ ཨདྷིཊྛཱཏུཾ ཏཏོ པརཾ ཝིཀཔྤེཏུ’ནྟི ¶ ཧི ཝུཏྟ’’ནྟི (པརི. ཨཊྛ. ༣༢༣). ཏཏྠ མཧཱཨཊྛཀཐཱཡཾ ནིཝཱསནཔཙྩཡཱ དུཀྐཊཾ ¶ ཝུཏྟཾ, ཀུརུནྡཊྛཀཐཱཡཾ པན ཨཔཙྩུདྡྷཱརཔཙྩཡཱ, ཏསྨཱ ཀུརུནྡིཡཾ ཝུཏྟནཡེནཱཔི ཝསྶིཀསཱཊིཀཱ ཝསྶཱནམཱསཱཏིཀྐམེཔི ཨདྷིཊྛཱནཾ ན ཝིཛཧཏཱིཏི པཉྙཱཡཏི. ཨདྷིཊྛཱནཝིཛཧནེསུ ཙ ཝསྶཱནམཱསཨཱབཱདྷཱནཾ ཝིགམེན ཝིཛཧནཾ མཱཏིཀཱཊྛཀཐཱཡམྤི ན ཨུདྡྷཊཾ, ཏསྨཱ སམནྟཔཱསཱདིཀཱཡཾ ཨཱགཏནཡེན ཡཱཝ པཙྩུདྡྷཱརཱ ཨདྷིཊྛཱནཾ ཏིཊྛཏཱིཏི གཧེཏབྦཾ. ནཧཱནཏྠཱཡ ཨནུཉྙཱཏཏྟཱ ‘‘ཝཎྞབྷེདམཏྟརཏྟཱཔི ཙེསཱ ཝཊྚཏཱི’’ཏི ཝུཏྟཾ. ‘‘དྭེ པན ན ཝཊྚནྟཱི’’ཏི ཨིམིནཱ སངྒྷཱཊིཨཱདཱིསུ ཝིཡ དུཏིཡེ ཨདྷིཊྛཱནཾ ན རུཧཏི, ཨཏིརེཀཙཱིཝརཾ ཧོཏཱིཏི དསྶེཏི. མཧཱཔཙྩརིཡཾ ཙཱིཝརཝསེན པརིབྷོགཀིཙྩསྶ ཨབྷཱཝཾ སནྡྷཱཡ ཨནཱཔཏྟི ཝུཏྟཱ སེནཱསནཔརིཀྑཱརཏྠཱཡ དིནྣཔཙྩཏྠརཎེ ཝིཡ. ཡཾ པན ‘‘པཙྩཏྠརཎམྤི ཨདྷིཊྛཱཏབྦ’’ནྟི ཝུཏྟཾ, ཏཾ སེནཱསནཏྠཱཡེཝཱཏི ནིཡམིཏཾ ན ཧོཏི ནཝསུ ཙཱིཝརེསུ གཧིཏཏྟཱ, ཏསྨཱ ཨཏྟནོ ནཱམེན ཨདྷིཊྛཧིཏྭཱ ནིདཧིཏྭཱ པརིཀྑཱརཙོལ༹ཾ ཝིཡ ཡཐཱ ཏཐཱ ཝིནིཡུཛྫིཏབྦམེཝཱཏི གཧེཏབྦཾ. པཱཝཱརོ ཀོཛཝོཏི ཨིམེསམྤི པཙྩཏྠརཎཱདཱིནཾ ལོཀེཔི ཝོཧརཎཏོ སེནཱསནཔརིཀྑཱརཏྠཱཡ དིནྣཔཙྩཏྠརཎཏོ ཝིསུཾ གཧཎཾ ཀཏཾ.

‘‘ཧཱིནཱཡཱཝཏྟནེནཱ’’ཏི ཨིདཾ ཨནྟིམཝཏྠུཾ ཨཛ྄ཛྷཱཔཛྫིཏྭཱ བྷིཀྑུཔཊིཉྙཱཡ ཋིཏསྶ ཙེཝ ཏིཏྠིཡཔཀྐནྟསྶ ཙ བྷིཀྑུནིཡཱ ཙ བྷིཀྑུནིབྷཱཝེ ནིརཔེཀྑཏཱཡ གིཧིལིངྒཏིཏྠིཡལིངྒགྒཧཎཾ སནྡྷཱཡ ཝུཏྟཾ. སིཀྑཾ ཨཔཙྩཀྑཱཡ གིཧིབྷཱཝཱུཔགམནཾ སནྡྷཱཡ ཝུཏྟནྟི ཀེཙི ཝདནྟི, ཏཾ ན ཡུཏྟཾ ཏདཱཔིསྶ ཨུཔསམྤནྣཏྟཱ, ཙཱིཝརསྶ ཙ ཏསྶ སནྟཀཏྟཱཝིཛཧནཏོ. པམཱཎཙཱིཝརསྶཱཏི པཙྪིམཔྤམཱཎཾ སནྡྷཱཡ ཝུཏྟཾ. དྭེ ཙཱིཝརཱནི པཱརུཔནྟསྶཱཏི གཱམཔྤཝེསེ དིགུཎཾ ཀཏྭཱ སངྒྷཱཊིཡོ པཱརུཔནཾ སནྡྷཱཡ ཝུཏྟཾ. ‘‘ཨེས ནཡོ’’ཏི ཨིམིནཱ པམཱཎཡུཏྟེསུ ཡཏྠ ཀཏྠཙི ཚིདྡཾ ཨདྷིཊྛཱནཾ ཝིཛཧཏཱིཏིཨཱདིཨཏྠཾ སངྒཎྷཱཏི.

ཨཉྙཾ པཙྪིམཔྤམཱཎཾ ནཱམ ནཏྠཱིཏི སུཏྟེ ཨཱགཏཾ ནཏྠཱིཏི ཨདྷིཔྤཱཡོ. ཨིདཱནི ཏམེཝ ཝིབྷཱཝེཏུཾ ‘‘ཡཉྷཱི’’ཏིཨཱདི ཝུཏྟཾ, ཏཾ ན སམེཏི, སངྒྷཱཊིཨཱདཱིནཾ མུཊྛིཔཉྩཀཱདིཧེཊྛིམཔྤམཱཎསྶ སུཏྟེ ཨནཱགཏཏྟཱཏི ཨདྷིཔྤཱཡོ.

མཧནྟཾ ཝཱ ཁུདྡཀཾ ཀརོཏཱིཏི ཨེཏྠ ཨཏིམཧནྟཾ ཙཱིཝརཾ མུཊྛིཔཉྩཀཱདིཔཙྪིམཔྤམཱཎཡུཏྟཾ ཀཏྭཱ སམནྟཏོ ཚིནྡནེནཱཔི ཝིཙྪིནྡནཀཱལེ ཚིཛྫམཱནཊྛཱནཾ ཚིདྡསངྑྱཾ ¶ ན གཙྪཏི ཨདྷིཊྛཱནཾ ན ཝིཛཧཏི ཨེཝཱཏི སིཛ྄ཛྷཏི, ‘‘གྷཊེཏྭཱ ཚིནྡཏི, ན བྷིཛྫཏཱི’’ཏི ཝཙནེན ཙ སམེཏི. པརིཀྑཱརཙོལ༹ཾ པན ཝིཀཔྤནུཔགཔཙྪིམཔྤམཱཎཏོ ཨཱུནཾ ཀཏྭཱ ཚིནྣཾ ཨདྷིཊྛཱནཾ ཝིཛཧཏི ཨདྷིཊྛཱནསྶ ཨནིསྶཡཏྟཱ. ཏཱནི པུན བདྡྷཱནི གྷཊིཏཱནི ཨདྷིཊྛཱཏབྦམེཝཱཏི ཝེདིཏབྦཾ ¶ . ཀེཙི པན ‘‘ཝསྶིཀསཱཊིཀཙཱིཝརེ དྭིདྷཱ ཚིནྣེ ཡདིཔི ཨེཀེཀཾ ཁཎྜཾ པཙྪིམཔཙྪིམཔྤམཱཎཾ པཧོཏི, ཨེཀསྨིཾཡེཝ ཁཎྜེ ཨདྷིཊྛཱནཾ ཏིཊྛཏི, ན ཨིཏརེ, ‘‘དྭེ པན ན ཝཊྚནྟཱི’’ཏི ཝུཏྟཏྟཱ. ནིསཱིདནཀཎྜུཔྤཊིཙྪཱདཱིསུཔི ཨེསེཝ ནཡོཏི ཝདནྟི.

སམྨུཁེ པཝཏྟཱ སམྨུཁཱཏི པཙྩཏྟཝཙནཾ, ཏཉྩ ཝིཀཔྤནཝིསེསནཾ, ཏསྨཱ ‘‘སམྨུཁེ’’ཏི བྷུམྨཏྠེ ནིསྶཀྐཝཙནཾ ཀཏྭཱཔི ཨཏྠཾ ཝདནྟི, ཨབྷིམུཁེཏི ཨཏྠོ. ཨཐ ཝཱ སམྨུཁེན ཨཏྟནོ ཝཱཙཱཡ ཨེཝ ཝིཀཔྤནཱ སམྨུཁཱཝིཀཔྤནཱ. པརམྨུཁེན ཝིཀཔྤནཱ པརམྨུཁཱཝིཀཔྤནཱཏི ཀརཎཏྠེནཱཔི ཨཏྠོ དཊྛབྦོ, ཨཡམེཝ པཱལི༹ཡཱ སམེཏི. སནྣིཧིཏཱསནྣིཧིཏབྷཱཝནྟི ཨཱསནྣདཱུརབྷཱཝཾ. ཨེཏྟཱཝཏཱ ནིདྷེཏུཾ ཝཊྚཏཱིཏི ཨེཏྟཀེནེཝ ཝིཀཔྤནཱཀིཙྩསྶ ནིཊྛིཏཏྟཱ, ཨཏིརེཀཙཱིཝརཾ ན ཧོཏཱིཏི དསཱཧཱཏིཀྐམེ ན ནིསྶགྒིཡཾ ཛནེཏཱིཏི ཨདྷིཔྤཱཡོ. པརིབྷུཉྫིཏུཾ…པེ… ན ཝཊྚཏཱིཏི སཡཾ ཨཔཙྩུདྡྷརཎཾ པརིབྷུཉྫནེ པཱཙིཏྟིཡཾ, ཨདྷིཊྛཱནེ པརེསཾ ཝིསྶཛྫནེ དུཀྐཊཉྩ སནྡྷཱཡ ཝུཏྟཾ.

པརིབྷོགཱདཡོཔི ཝཊྚནྟཱིཏི པརིབྷོགཝིསྶཛྫནཨདྷིཊྛཱནཱནིཔི. ཨཔི-སདྡེན ནིདྷེཏུམྤི ཝཊྚཏཱིཏི ཨཏྠོ, ཨེཏེན ཙ པཙྩུདྡྷཱརེཔི ཀཏེ ཙཱིཝརམྤི ཝིཀཔྤིཏཙཱིཝརམེཝ ཧོཏི, ན ཨཏིརེཀཙཱིཝརཾ. ཏཾ པན ཏིཙཱིཝརཱདིནཱམེན ཨདྷིཊྛཱཏུཀཱམེན ཨདྷིཊྛཧིཏབྦཾ, ཨིཏརེན ཝིཀཔྤིཏཙཱིཝརམེཝ ཀཏྭཱ པརིབྷུཉྫིཏབྦནྟི དསྶེཏི. ཀེཙི པན ‘‘ཡཾ ཝིཀཔྤིཏཙཱིཝརཾ, ཏཾ ཡཱཝ ཨཔརིབྷོགཀཱལཱ ཨཔཙྩུདྡྷརཱཔེཏྭཱཝ ནིདཧིཏབྦཾ, པརིབྷོགཀཱལེ པན སམྤཏྟེ པཙྩུདྡྷརཱཔེཏྭཱ ཨདྷིཊྛཧིཏྭཱ པརིབྷུཉྫིཏབྦཾ. ཡདི ཧི ཏཏོ པུརེཔི པཙྩུདྡྷརཱཔེཡྻ, པཙྩུདྡྷཱརེནེཝ ཝིཀཔྤནཱཡ ཝིགཏཏྟཱ ཨཏིརེཀཙཱིཝརཾ ནཱམ ཧོཏི, དསཱཧཱཏིཀྐམེ ཙ ནིསྶགྒིཡཾ པཱཙིཏྟིཡཾ. ཏསྨཱ ཡཾ ཨཔརིབྷུཉྫིཏྭཱཝ ཋཔེཏབྦཾ, ཏདེཝ ཝིཀཔྤེཏབྦཾ, པཙྩུདྡྷཱརེ ཙ ཀཏེ ཨནྟོདསཱཧེཡེཝ ཨདྷིཊྛཱཏབྦཾ. ཡཉྩ ཨཊྛཀཐཱཡཾ ‘ཏཏོ པབྷུཏི པརིབྷོགཱདཡོཔི ཝཊྚནྟཱི’ཏིཨཱདི ཝུཏྟཾ, ཏཾ པཱལི༹ཡཱ ཝིརུཛ྄ཛྷཏཱི’’ཏི ཝདནྟི, ཏཾ ཏེསཾ མཏིམཏྟམེཝ. པཱལི༹ཡཉྷི ¶ ‘‘ཨནྟོདསཱཧཾ ཨདྷིཊྛེཏི, ཝིཀཔྤེཏཱི’’ཏི (པཱརཱ. ༤༦༩) ཙ ‘‘སཱམཾ ཙཱིཝརཾ ཝིཀཔྤེཏྭཱ ཨཔཙྩུདྡྷཱརཎཾ པརིབྷུཉྫེཡྻ པཱཙིཏྟིཡ’’ནྟི (པཱཙི. ༣༧༣) ཙ ‘‘ཨནཱཔཏྟི སོ ཝཱ དེཏི, ཏསྶ ཝཱ ཝིསྶཱསནྟོ པརིབྷུཉྫཏཱི’’ཏི (པཱཙི. ༣༧༤) ཙ སཱམཉྙཏོ ཝུཏྟཏྟཱ, ཨཊྛཀཐཱཡཉྩ ‘‘ཨིམཾ ཙཱིཝརཾ ཝཱ ཝིཀཔྤནཾ ཝཱ པཙྩུདྡྷརཱམཱི’’ཏིཨཱདིནཱ པཙྩུདྡྷཱརཾ ཨདསྶེཏྭཱ ‘‘མཡ྄ཧཾ སནྟཀཾ པརིབྷུཉྫ ཝཱ ཝིསྶཛྫེཧི ཝཱ’’ཏི ཨེཝཾ ཨཏྟནོ སནྟཀཏྟཾ ཨམོཙེཏྭཱཝ པརིབྷོགཱདིཝསེནེཝ པཙྩུདྡྷཱརསྶ ཝུཏྟཏྟཱ, ‘‘ཏཏོ པབྷུཏི པརིབྷོགཱདཡོཔི ཝཊྚནྟཱི’’ཏི ཨདྷིཊྛཱནཾ ཝིནཱཔི ཝིསུཾ པརིབྷོགསྶ, ནིདཧནསྶ ཙ ཝུཏྟཏྟཱ ཝིཀཔྤནཱནནྟརམེཝ པཙྩུདྡྷརཱཔེཏྭཱ ཨནདྷིཊྛཧིཏྭཱ ཨེཝ ཏིཙཱིཝརཝིརཧིཏཾ ¶ ཝིཀཔྤནཱརཧཾ ཙཱིཝརཾ པརིབྷུཉྫིཏུཾ, ནིདཧིཏུཉྩ ཨིདཾ པཱཊེཀྐཾ ཝིནཡཀམྨནྟི ཁཱཡཏི. ཨཔིཙ བཧཱུནཾ པཏྟཱནཾ ཝིཀཔྤེཏུཾ, པཙྩུདྡྷཱརེཏུཉྩ ཝུཏྟཏྟཱ པཙྩུདྡྷཱརེན ཏེསཾ ཨཏིརེཀཔཏྟཏཱ དསྶིཏཱཏི སིཛ྄ཛྷཏི ཏེསུ ཨེཀསྶེཝ ཨདྷིཊྛཱཏབྦཏོ. ཏསྨཱ ཨཊྛཀཐཱཡཾ ཨཱགཏནཡེནེཝ གཧེཏབྦཾ.

པཉྙཏྟིཀོཝིདོ ན ཧོཏཱིཏི ཨེཝཾ ཝིཀཔྤིཏེ ‘‘ཨནནྟརམེཝ ཨེཝཾ པཙྩུདྡྷརིཏབྦ’’ནྟི ཝིནཡཀམྨཾ ན ཛཱནཱཏི. ཏེནཱཧ ‘‘ན ཛཱནཱཏི པཙྩུདྡྷརིཏུ’’ནྟི, ཨིམིནཱཔི ཙེཏཾ ཝེདིཏབྦཾ ‘‘ཝིཀཔྤནཱནནྟརམེཝ པཙྩུདྡྷཱརོ ཀཱཏབྦོ’’ཏི.

ཨཝིསེསེན ཝུཏྟཝཙནནྟི ཏིཙཱིཝརཱདཱིནཾ སཱདྷཱརཎཝཙནེན ཝུཏྟཝཙནཾ. ཡཾ པནེཏྠ ‘‘ཝིརུདྡྷཾ ཝིཡ དིསྶཏཱི’’ཏི ཝཏྭཱ ཏཾ ཝིརོདྷཱསངྐཾ ནིཝཏྟེཏུཾ ‘‘ཏིཙཱིཝརསངྑེཔེན…པེ… ཝིཀཔྤནཱཡ ཨོཀཱསོ དིནྣོ ཧོཏཱི’’ཏི ཝུཏྟཾ, ཏཾ ‘‘ཨདྷིཊྛེཏི ཝིཀཔྤེཏཱི’’ཏི སཱམཉྙཏོ ཝུཏྟེཔི ཏིཙཱིཝརམྤི ཝིཀཔྤེཏཱིཏི ཨཡམཏྠོ ན སིཛ྄ཛྷཏི, ‘‘ཏིཙཱིཝརཾ ཨདྷིཊྛཱཏུཾ ན ཝིཀཔྤེཏུ’’ནྟི (མཧཱཝ. ༣༥༨) ཝིསེསེཏྭཱ ཝུཏྟཏྟཱ. ཡཾ པན ཨདྷིཊྛཱཏབྦཾ, ཏཾ ཨདྷིཊྛཱཏི. ཡཾ ཏིཙཱིཝརཝིརཧིཏཾ, ཏཾ ཝིཀཔྤེཏབྦཾ, ཏཾ ཝིཀཔྤེཏཱིཏི ཨེཝམཏྠོ སིཛ྄ཛྷཏཱིཏི. ཏསྨཱ ཨེཏྠ པུབྦཱཔརཝིརོདྷོ ན དིསྶཏི སཱམཉྙཝཙནསྶ ཝུཏྟཱཝསེསེཡེཝ ཨཝཏིཊྛནཏོ. ཡཾ པནེཏྠ ཏིཙཱིཝརསྶཱཔི ཝིཀཔྤནཝིདྷིཾ དསྶེཏུཾ ‘‘ཏིཙཱིཝརཾ ཏིཙཱིཝརསངྑེཔེནཱ’’ཏིཨཱདི ཝུཏྟཾ. ཏཏྠ ཏིཙཱིཝརསངྑེཔེན པརིཧརིཡམཱནེསུ ཨེཀམྤི པཙྩུདྡྷརིཏྭཱ ཝིཀཔྤེཏུཾ ན ཝཊྚཏི, ཏིཙཱིཝརཏོ པན ཨེཀཾ ཝཱ སཀལམེཝ ཝཱ ཨཔནེཏྭཱ ཨཔརཾ ཏིཙཱིཝརཾ ཏིཙཱིཝརསངྑེཔེན པརིཧརིཏུཀཱམསྶ ཝཱ ཏིཙཱིཝརཱདྷིཊྛཱནཾ མུཉྩིཏྭཱ པརིཀྑཱརཙོལ༹ཝསེནེཝ སབྦཙཱིཝརཾ པརིབྷུཉྫིཏུཀཱམསྶ ¶ ཝཱ པུརིམཾ ཨདྷིཊྛིཏཙཱིཝརཾ པཙྩུདྡྷརིཏྭཱ ཝིཀཔྤེཏུཾ ཝཊྚཏཱིཏི ཨེཝམདྷིཔྤཱཡེན ‘‘ཏིཙཱིཝརེ ཨེཀེན ཙཱིཝརེན ཝིཔྤཝསིཏུཀཱམོ ཧོཏཱི’’ཏིཨཱདི ཝུཏྟཾ སིཡཱ, ཨིཙྩེཏཾ པཱལི༹ཡཱ སདྡྷིཾ སམེཏི. ཨཐ པུནཔི ཏདེཝ ཏིཙཱིཝརཱདྷིཊྛཱནེན ཨདྷིཊྛཱཏུཀཱམོ ཧུཏྭཱ ཝིཔྤཝཱསསུཁཏྠཾ པཙྩུདྡྷརིཏྭཱ ཝིཀཔྤེཏཱིཏི ཨིམིནཱ ཨདྷིཔྤཱཡེན ཝུཏྟཾ སིཡཱ, ཏཾ ‘‘ཏིཙཱིཝརཾ ཨདྷིཊྛཱཏུཾ ན ཝིཀཔྤེཏུ’’ནྟི (མཧཱཝ. ༣༥༨) ཨིམིནཱ ཝཙནེན ན སམེཏི. ཡདི ཧི སེསཙཱིཝརཱནི ཝིཡ ཏིཙཱིཝརམྤི པཙྩུདྡྷརིཏྭཱ ཝིཀཔྤེཏབྦཾ སིཡཱ, ‘‘ཏིཙཱིཝརཾ ཨདྷིཊྛཱཏུཾ ན ཝིཀཔྤེཏུ’’ནྟི ཨིདཾ ཝཙནམེཝ ནིརཏྠཀཾ སིཡཱ སེསཙཱིཝརེཧི ཏིཙཱིཝརསྶ ཝིསེསཱབྷཱཝཱ. ཏསྨཱ ‘‘ཝིཀཔྤེཏཱི’’ཏི ཨིདཾ ཏིཙཱིཝརཝིརཧིཏམེཝ སནྡྷཱཡ ཝུཏྟཾ. ཏིཙཱིཝརཾ པན ཝིཀཔྤེཏུཾ ན ཝཊྚཏཱིཏི ཝིཉྙཱཡཏི, ཏེནེཝ དུཏིཡཀཐིནསིཀྑཱཔདསྶ ཨནཱཔཏྟིཝཱརེ ‘‘ཝིཀཔྤེཏཱི’’ཏི ཨིདཾ ན ཝུཏྟཾ, ཝཱིམཾསིཏྭཱ ཡཐཱ པཱལི༹ཡཱ སདྡྷིཾ ན ཝིརུཛ྄ཛྷཏི, ཏཐཱ ཨེཏྠ ཨདྷིཔྤཱཡོ གཧེཏབྦོ.

ཏུཡ྄ཧཾ ¶ དེམཱིཏིཨཱདཱིསུ པརིཙྩཏྟཏྟཱ མནསཱ ཨསམྤཊིཙྪནྟེཔི སམྤདཱནབྷཱུཏསྶེཝ སནྟཀཾ ཧོཏི, སོ ཨིཙྪིཏཀྑཎེ གཧེཏུཾ ལབྷཏི. ཨིཏྠནྣཱམསྶཱཏི པརམྨུཁེ ཋིཏཾ སནྡྷཱཡ ཝདཏི. ཡསྶ པན རུཙྩཏཱིཏིཨཱདི ཨུབྷོཧིཔི པརིཙྩཏྟཏཱཡ ཨསྶཱམིཀཏཾ སནྡྷཱཡ ཝུཏྟཾ.

‘‘ཏཾ ན ཡུཛྫཏཱི’’ཏི ཨིདཾ ཨནྟོདསཱཧེ ཨེཝ ཝིསྶཱསགྒཧཎཾ སནྡྷཱཡ ཨནཱཔཏྟིཝཱརསྶ ཨཱགཏཏྟཱ, ཨིདྷ ནིསྶགྒིཡཙཱིཝརསྶ ཀཔྤིཡབྷཱཝཀརཎཏྠཾ ལེསེན གཧིཏཏྟཱ ཙ ཝུཏྟཾ, ཀེཙི པན ‘‘པརེཧི སབྷཱགེན ཨཙྪིནྣེ, ཝིསྶཱསགྒཧིཏེ ཙ པུན ལདྡྷེ དོསོ ན དིསྶཏཱི’’ཏི ཝདནྟི. ཨནདྷིཊྛཱནེནཱཏི ཀཱཡཝཱཙཱཧི ཀཏྟབྦསྶ ཨཀརཎེནཱཏི ཨདྷིཔྤཱཡོ. ཙཱིཝརསྶ ཨཏྟནོ སནྟཀཏཱ, ཛཱཏིཔམཱཎཡུཏྟཏཱ, ཚིནྣཔལིབོདྷབྷཱཝོ, ཨཏིརེཀཙཱིཝརཏཱ, དསཱཧཱཏིཀྐམོཏི ཨིམཱནེཏྠ པཉྩ ཨངྒཱནི.

པཋམཀཐིནསིཀྑཱཔདཝཎྞནཱ ནིཊྛིཏཱ.

༢. ཨུདོསིཏསིཀྑཱཔདཝཎྞནཱ

༤༧༣. དུཏིཡེ ཨཝིཔྤཝཱསེཏི ཨཝིཔྤཝཱསེ ནིཔྥཱདེཏབྦེ, ཝིཔྤཝཱསདོསཱབྷཱཝེ སཱདྷེཏབྦེ ཀཏྟབྦཱ སམྨུཏཱིཏི ཨཏྠོ.

༤༧༥. པཊིསིདྡྷཔརིཡཱཔནྣེནཱཏི ¶ ཝིཔྤཝསིཏུཾ པཊིསིདྡྷེསུ ཏཱིསུ ཙཱིཝརེསུ ཨནྟོགདྷེན, ཨེཀེན ཙ ཨཝཡཝེ སམུདཱཡོཔཙཱརཾ དསྶེཏི.

༤༧༨-༩. ཨེཏྟཱཝཏཱཏི ‘‘པརིཀྑིཏྟོ’’ཏི ཨིམིནཱ. ‘‘སབྷཱཡེཏི ལིངྒབྱཏྟཡེན སབྷཱ ཝུཏྟཱ’’ཏི ཝཏྭཱ པུན སཡམྤི ‘‘སབྷཱཡེ’’ཏི ཨིམིནཱ ཝོཧརནྟོ སབྷཱ-སདྡསྶ པརིཡཱཡོ སབྷཱཡ-སདྡོ ནཔུཾསཀལིངྒཡུཏྟོ ཨཏྠཱིཏི དསྶེཏི. ‘‘སབྷཱཡནྟི ལིངྒབྱཏྟཡེན སབྷཱ ཝུཏྟཱ’’ཏི ཝཱ པཱཋོ. ལིངྒབྱཏྟཡེན སབྷཱཏི ཙ ལིངྒནྟརཡུཏྟོ སབྷཱསདྡཔརིཡཱཡོ སབྷཱཡསདྡོཏི ཨཏྠོ.

སབྷཱཡཾ གཙྪཏཱིཏི སབྷཾ གཙྪཏི. ཝསིཏབྦཾ ནཏྠཱིཏི ཙཱིཝརཧཏྠཔཱསེཡེཝ ཝསིཏབྦཾ ནཏྠཱིཏི ཨཏྠོ. ཏསྶཱཏི ཝཱིཐིཡཱ. སབྷཱཡསྶ ཙ དྭཱརསྶ ཙ ཧཏྠཔཱསཱ ན ཝིཛཧིཏབྦནྟི ཨེཏྠ སབྷཱཡདྭཱརཱནམནྟརེ ཝཱིཐི གེཧཱཔི གཧིཏཱ ཨེཝ ཧོནྟི ཨཱདིཔརིཡོསཱནཱནཾ གཧིཏཏྟཱ. ཨེཏྠ ཙ དྭཱརཝཱིཐིགྷརེསུ ཝསནྟེན གཱམཔྤཝེསནསཧསེཡྻཱདིདོསཾ པརིཧརིཏྭཱ སུཔཊིཙྪནྣཏཱདིཡུཏྟེནེཝ བྷཝིཏབྦཾ ¶ , སབྷཱ པན ཡདི སབྦེསཾ ཝསནཏྠཱཡ སཱལཱསདིསཱ ཀཏཱ, ཨནྟརཱརཱམེ ཝིཡ ཡཐཱསུཁཾ ཝསིཏུཾ ཝཊྚཏཱིཏི ཝེདིཏབྦཾ. པརིཀྑིཏྟཏཱཡ ཙ ཨེཀཱུཔཙཱརཏཾ, ཨཔརིཀྑིཏྟཏཱཡ ནཱནཱུཔཙཱརཏཉྩ ནིཝེསནཱདཱིསུཔི ཨཏིདིསནྟོ ཨཱཧ ‘‘ཨེཏེནེཝཱུཔཱཡེནཱ’’ཏིཨཱདི. ནིཝེསནཱདཱིནི བཧིགཱམཏོ སནྣིཝིཊྛཱནི གཧིཏཱནི ཨནྟོགཱམེ ཋིཏཱནཾ གཱམགྒཧཎེནེཝ གཧིཏཏྟཱ. སབྦཏྠཱཏི གཱམནིགམནིཝེསནཱདཱིསུ པནྣརསསུ. པརིཀྑེཔཱདཱིཏི ཨཱདི-སདྡེན ཨཔརིཀྑེཔསྶེཝ གཧཎཾ, ན ཨེཀཀུལཱདཱིནམྤི ཏེསཾ ཨེཀཱུཔཙཱརཏཱནཱནཱུཔཙཱརཏཱནིམིཏྟཏཱབྷཱཝཱ. ཨེཏྠ ཙ སཏྠསྶ ཀཏིཔཱཧཾ ཀཏྠཙི ནིཝིཊྛསྶེཝ པརིཀྑེཔོ ཧོཏི, ན གཙྪནྟསྶ.

༤༨༢-༧. གཱམཏོ བཧི ཨིསྶརཱནཾ སམུདྡཏཱིརཱདཱིསུ ཀཏབྷཎྜསཱལཱ ཨུདོསིཏོཏི ཨཱཧ ‘‘ཡཱནཱདཱིན’’ནྟིཨཱདི. མུཎྜཙྪདནཔཱསཱདོཏི ནཱཏིཨུཙྩོ ཙནྡིཀངྒཎཡུཏྟོ སིཁརཀཱུཊམཱལཱདིཝིརཧིཏོ པཱསཱདོ.

༤༨༩. པརིཡཱདིཡིཏྭཱཏི ཨཛ྄ཛྷོཏྠརིཏྭཱ. ནདཱིཔརིཧཱརོཏི ཝིསུཾགཱམཱདཱིནཾ ཝིཡ ནདཱིཔརིཧཱརསྶ ཨཝུཏྟཏྟཱ ཙཱིཝརཧཏྠཔཱསོ ཨེཝཱཏི ཝདནྟི, ཨཉྙེ པན ‘‘ཨིམིནཱ ཨཊྛཀཐཱཝཙནེན ནདཱིཔརིཧཱརོཔི ཝིསུཾ སིདྡྷོ, ནདིཡཱ ¶ ཧཏྠཔཱསོ ན ཝིཛཧིཏབྦོ’’ཏི ཝདནྟི. ཝིཧཱརསཱིམནྟི ཨཝིཔྤཝཱསསཱིམཾ སནྡྷཱཡཱཧ. ཨེཏྠ ཙ ཝིཧཱརསྶ ནཱནཱཀུལསནྟཀབྷཱཝེཔི ཨཝིཔྤཝཱསསཱིམཱཔརིཙྪེདབྦྷནྟརེ སབྦཏྠ ཙཱིཝརཨཝིཔྤཝཱསསམྦྷཝཏོ ཏསྶཱ པདྷཱནཏྟཱ ཏཏྠ སཏྠཔརིཧཱརོ ན ལབྦྷཏཱིཏི ‘‘ཝིཧཱརཾ གནྟྭཱ ཝསིཏབྦ’’ནྟི ཝུཏྟཾ. ‘‘སཏྠསམཱིཔེ’’ཏི ཨིདཾ ཡཐཱཝུཏྟཾ ཨབྦྷནྟརཔརིཙྪེདཝསེན ཝུཏྟཾ. པཱལི༹ཡཾ ནཱནཱཀུལསྶ སཏྠོ ཧོཏི, སཏྠེ ཙཱིཝརཾ ནིཀྑིཔིཏྭཱ ཧཏྠཔཱསཱ ན ཝིཛཧིཏབྦནྟི ཨེཏྠ སཏྠཧཏྠཔཱསོ གཧིཏོ.

༤༩༠. ཨེཀཀུལསྶ ཁེཏྟེཏི ཨཔརིཀྑིཏྟཾ སནྡྷཱཡ ཝདཏི.

༤༩༡-༤. ཝིཧཱརོ ནཱམ ཨུཔཙཱརསཱིམཱ. ཏཏྠ ཡསྨིཾ ཝིཧཱརེཏི ཏསྶ ཨནྟོཔརིཝེཎཱདིཾ སནྡྷཱཡ ཝུཏྟཾ, ཨེཀཀུལཱདིསནྟཀཏཱ ཙེཏྠ ཀཱརཱཔཀཱནཾ ཝསེན. ཚཱཡཱཡ ཕུཊྛོཀཱསསྶཱཏི ཨུཛུཀཾ ཨཝཀྑིཏྟལེཌྜུཔཱཏབྦྷནྟརཾ སནྡྷཱཡ ཝདཏི.

ཨགམནཔཐེཏི ཏདཧེཝ གནྟྭཱ ནིཝཏྟེཏུཾ ན སཀྐུཎེཡྻཀེ སམུདྡམཛ྄ཛྷེ ཡེ དཱིཔཀཱ, ཏེསཱུཏི ཡོཛནཱ. ཨིཏརསྨིནྟི པུརཏྠིམདིསཱཡ ཙཱིཝརེ. ‘‘ཨུཔོསཐཀཱལེ…པེ… ཝཌྜྷཏཱི’’ཏི ཨིམིནཱ ཙཱིཝརཝིཔྤཝཱསསཏྟབྦྷནྟརཏོ སམཱནསཾཝཱསཱཡ སཏྟབྦྷནྟརསཱིམཱཡ ཨཙྩནྟཝིསདིསཏཾ དསྶེཏི ¶ . ཏཐཱ ཧི བཧཱུསུ བྷིཀྑཱུསུ ཨེཀཏོ ནིསཱིདིཏྭཱ སམནྟཱ སཏྟབྦྷནྟརཔརིཙྪེདེསུ ཡཐཱསཀཾ ཙཱིཝརཾ ཋཔེཏྭཱ པརིཧརནྟེསུ ཨེཀེཀསྶ བྷིཀྑུནོ ནིསིནྣོཀཱསཏོ པཊྛཱཡ པཙྩེཀཾ སཏྟབྦྷནྟརསྶ པརིཙྪེདོ ཨཉྙམཉྙཝིསདིསོ ཨནེཀཝིདྷོ ཧོཏི, ན ཨེཀོ པརིསཔརིཡནྟཏོ པཊྛཱཡ ཨནིམིཏབྦཏྟཱ. ཏེནེཝ ཏཏྠ པརིསཝསེན ཝུཌྜྷི, ཧཱནི ཝཱ ན ཧོཏི, ན ཨེཝཾ སཏྟབྦྷནྟརསཱིམཱཡ. སཱ ཧི ཡོཛནིཀཱཡཔི པརིསཔརིཡནྟཏོཝ པཊྛཱཡ སམནྟཱ སཏྟབྦྷནྟརཔཨཙྪིནྣཱ ཨེཀཱཝ ཧོཏི. ཏེནེཝ སཱ པརིསཝསེན ཝཌྜྷཏི, ཧཱཡཏི ཙ, ཏསྨཱ ཨཉྙཱཝ སཏྟབྦྷནྟརསཱིམཱ ཨཉྙོ སཏྟབྦྷནྟརཏོ པརིཙྪིནྣོ ཙཱིཝརཝིཔྤཝཱསཔརིཧཱརོ ཨབྦྷོཀཱསོཏི ཝེདིཏབྦཾ. ཡཉྩེཏྠ ཝཏྟབྦཾ, ཏཾ ཁནྡྷཀེ སཱིམཱཀཐཱཡམེཝ (མཧཱཝ. ༡༤༣) ཝཀྑཱམ.

༤༩༥. ནདིཾ ¶ ཨོཏརཏཱིཏི ཧཏྠཔཱསཾ མུཉྩིཏྭཱ ཨོཏརཏི. བཧིགཱམེ ཋཔེཏྭཱཏི ཨཔཱརུཔིཏབྦཏཱཡ ཝུཏྟཾ. ཝིནཡཀམྨཾ ཀཱཏབྦནྟི ཨུཏྟརཱསངྒེ ཙ བཧིགཱམེ ཋཔིཏསངྒྷཱཊིཡཉྩ པཋམཾ ཝིནཡཀམྨཾ ཀཏྭཱ པཙྪཱ ཨུཏྟརཱསངྒཾ ནིཝཱསེཏྭཱ ཨནྟརཝཱསཀེ ཀཱཏབྦཾ. ཨེཏྠ ཙ བཧིགཱམེ ཋཔིཏསྶཱཔི ཝིནཡཀམྨཝཙནཏོ པརམྨུཁཱཔི ཋིཏཾ ཝིསྶཛྫིཏུཾ, ནིསྶཊྛཾ དཱཏུཉྩ ཝཊྚཏཱིཏི ཝེདིཏབྦཾ. དཧརཱནཾ གམནེ སཨུསྶཱཧཏྟཱ ‘‘ནིསྶཡོ པན ན པཊིཔྤསྶམྦྷཏཱི’’ཏི ཝུཏྟཾ. མུཧུཏྟཾ…པེ… པཊིཔྤསྶམྦྷཏཱིཏི སཨུསྶཱཧཏྟེ གམནསྶ ཨུཔཙྪིནྣཏྟཱ ཝུཏྟཾ. ཏེསཾ པན པུརཱརུཎཱཝ ཨུཊྛཧིཏྭཱ སཨུསྶཱཧེན གཙྪནྟཱནཾ ཨརུཎེ ཨནྟརཱ ཨུཊྛིཏེཔི ན པཊིཔྤསྶམྦྷཏི ‘‘ཡཱཝ ཨརུཎུགྒམནཱ སཡནྟཱི’’ཏི ཝུཏྟཏྟཱ. ཏེནེཝ ‘‘གཱམཾ པཝིསིཏྭཱ…པེ… ན པཊིཔྤསྶམྦྷཏཱི’’ཏི ཝུཏྟཾ. ཨཉྙམཉྙསྶ ཝཙནཾ ཨགྒཧེཏྭཱཏིཨཱདིམྷི སཨུསྶཱཧཏྟཱ གམནཀྑཎེ པཊིཔྤསྶདྡྷི ན ཝུཏྟཱ. དྷེནུབྷཡེནཱཏི ཏརུཎཝཙྪགཱཝཱིནཾ ཨབྷིདྷཱཝིཏྭཱ སིངྒེན པཧརཎབྷཡེན. ནིསྶཡོ ཙ པཊིཔྤསྶམྦྷཏཱིཏི ཨེཏྠ དྷེནུབྷཡཱདཱིཧི ཋིཏཱནཾ ཡཱཝ བྷཡཝཱུཔསམཱ ཋཱཏབྦཏོ ‘‘ཨནྟོཨརུཎེཡེཝ གམིསྶཱམཱི’’ཏི ནིཡམེཏུཾ ཨསཀྐུཎེཡྻཏྟཱ ཝུཏྟཾ. ཡཏྠ པན ཨེཝཾ ནིཡམེཏུཾ སཀྐཱ, ཏཏྠ ཨནྟརཱརུཎེ ཨུགྒཏེཔི ནིསྶཡོ ན པཊིཔྤསྶམྦྷཏི བྷེསཛྫཏྠཱཡ གཱམཔྤཝིཊྛདཧརཱནཾ ཝིཡ. ཨནྟོསཱིམཱཡཾ གཱམནྟི ཨཝིཔྤཝཱསསཱིམཱསམྨུཏིཏོ པཙྪཱ པཏིཊྛཱཔིཏགཱམཾ སནྡྷཱཡ ཝདཏི གཱམཉྩ གཱམཱུཔཙཱརཉྩ ཋཔེཏྭཱ སམྨནྣིཏབྦཏོ. པཝིཊྛཱནནྟི ཨཱཙརིཡནྟེཝཱསིཀཱནཾ ཝིསུཾ ཝིསུཾ གཏཱནཾ ཨཝིཔྤཝཱསསཱིམཏྟཱ ནེཝ ཙཱིཝརཱནི ནིསྶགྒིཡཱནི ཧོནྟི, སཨུསྶཱཧཏཱཡ ནིསྶཡོ ན པཊིཔྤསྶམྦྷཏི. ཨནྟརཱམགྒེཏི དྷམྨཾ སུཏྭཱ ཨཱགཙྪནྟཱནཾ ཨནྟརཱམགྒེ.

‘‘ཨིདྷ ཨཔཙྩུདྡྷརཎ’’ནྟི ཨིམིནཱ ཨདྷིཊྛཱནཝིཀཔྤནཱནི ཝིཡ པཙྩུདྡྷརཎམྤི ཀཱཡེན ཝཱ ཝཱཙཱཡ ཝཱ ཀཏྟབྦནྟི དསྶེཏི. ཀཱཡཝཱཙཱཧི ཀཏྟབྦསྶ ཨཀརཎཏོཏི ཨིདཾ ཀཱཡཝཱཙཱསམུཊྛཱནཾ ¶ ཝུཏྟཾ. ཨདྷིཊྛིཏཏིཙཱིཝརཏཱ, ཨནཏྠཏཀཐིནཏཱ, ཨལདྡྷསམྨུཏིཏཱ, རཏྟིཝིཔྤཝཱསོཏི ཨིམཱནེཏྠ ཙཏྟཱརི ཨངྒཱནི.

ཨུདོསིཏསིཀྑཱཔདཝཎྞནཱ ནིཊྛིཏཱ.

༣. ཏཏིཡཀཐིནསིཀྑཱཔདཝཎྞནཱ

༤༩༧. ཏཏིཡེ ¶ པཱལི༹ཡཾ ཙཱིཝརཔཙྩཱསཱ ནིཀྑིཔིཏུནྟི ཙཱིཝརཔཙྩཱསཱཡ སཏིཡཱ ནིཀྑིཔིཏུནྟི ཨཏྠོ. ནིཊྛིཏཙཱིཝརསྨིཾ བྷིཀྑུནཱཏི ཨེཏྠ དུཏིཡཀཐིནེ ཝིཡ སཱམིཝསེནེཝ ཀརཎཝཙནསྶ ཨཏྠོ ཝེདིཏབྦོ.

༤༩༩-༥༠༠. ཏུཡ྄ཧཾ དམྨཱིཏི དིནྣནྟི ‘‘ཏུཡ྄ཧཾ, བྷནྟེ, ཨཀཱལཙཱིཝརཾ དམྨཱི’’ཏི ཨེཝཾ དིནྣཾ, ཨེཏམྤི ཀཱལེ ཨཱདིསྶ དིནྣཾ ནཱམ ཧོཏཱིཏི ཨདྷིཔྤཱཡོ. ཨིདཾ པན ཨཊྛཀཐཱཝཙནཾ, པཱལི༹ཡཾ ‘‘ཀཱལེཔི ཨཱདིསྶ དིནྣ’’ནྟི ཨིདཉྩ ‘‘ཨཀཱལཙཱིཝར’’ནྟི ཝཙནསཱམཉྙཏོ ལབྦྷམཱནཾ སབྦམྤི དསྶེཏུཾ ཨཏྠུདྡྷཱརཝསེན ཝུཏྟཾ པཋམཨནིཡཏེ སོཏསྶ རཧོ ཝིཡ. སངྒྷསྶ ཧི ཀཱལེཔི ཨཱདིསྶ དིནྣཾ ཨཀཱལེ ཨུཔྤནྣཙཱིཝརཾ ཝིཡ སམྨུཁཱིབྷཱུཏེཧི ཝུཏྠཝསྶེཧི, ཨཝུཏྠཝསྶེཧི ཙ སབྦེཧིཔི བྷཱཛེཏབྦཏཱསཱམཉྙེན ཨཀཱལཙཱིཝརཾ ནཱམ ཧོཏཱིཏི དསྶནཏྠཾ ཨཏྠུདྡྷཱརཝསེན པཱལི༹ཡཾ ‘‘ཀཱལེཔི ཨཱདིསྶ དིནྣ’’ནྟི ཝུཏྟཾ, ན པན ‘‘ཏཏོ བྷཱཛེཏྭཱ ལདྡྷཙཱིཝརམྤི ཨཀཱལེ ལདྡྷཙཱིཝརམྤི ཝུཏྠཝསྶཱནཾ ཨེཀམཱསཔརིཧཱརཾ, པཉྩམཱསཔརིཧཱརཾ ཝཱ ན ལབྷཏི, པཙྩཱསཱཙཱིཝརེ ཨསཏི དསཱཧཔརིཧཱརམེཝ ལབྷཏཱི’’ཏི དསྶནཏྠཾ ཝུཏྟཾ, ཨཊྛཀཐཱཡམྤི ‘‘ཨཱདིསྶ དིནྣ’’ནྟི ཝཙནསཱམཉྙཏོ ལབྦྷམཱནཾ སབྦཾ ཨཏྠུདྡྷཱརཝསེན དསྶེཏུཾ ‘‘ཨེཀཔུགྒལསྶ ཝཱ ཨིདཾ ཏུཡ྄ཧཾ དམྨཱིཏི དིནྣ’’ནྟི ཝུཏྟཾ, ན པན ཏཐཱལདྡྷཾ ཝཱ ཨཀཱལེ ལདྡྷཾ ཝཱ ཨནཏྠཏཀཐིནཱནཾ དསཱཧབྦྷནྟརེ ཨདྷིཊྛཱཏབྦནྟི དསྶེཏུནྟི ཝེདིཏབྦཾ ཨིཏརཐཱ པཱལི༹ཨཊྛཀཐཱཧི ཝིརུཛ྄ཛྷནཏོ. ཏཐཱ ཧི ཨཙྩེཀཙཱིཝརསིཀྑཱཔདེ ཨཀཱལེ ཨུཔྤནྣམྤི ཨཙྩེཀཙཱིཝརཾ ‘‘ཡཱཝཙཱིཝརཀཱལསམཡཾ ནིཀྑིཔིཏབྦ’’ནྟི (པཱརཱ. ༦༤༨) ཝུཏྟཾ, ཏསྶ ཨཊྛཀཐཱཡཉྩ ‘‘པཝཱརཎམཱསསྶ ཛུཎྷཔཀྑཔཉྩམིཡཾ ཨུཔྤནྣསྶ ཨཙྩེཀཙཱིཝརསྶ ཨནཏྠཏེ ཀཐིནེ ཨེཀཱདསདིཝསཱདྷིཀོ མཱསོ, ཨཏྠཏེ ཀཐིནེ ཨེཀཱདསདིཝསཱདྷིཀཱ པཉྩ མཱསཱ ཙ པརིཧཱརོ ཝུཏྟོ, ཏམེཝ པརིཧཱརཾ སནྡྷཱཡ ‘ཚཊྛིཏོ པཊྛཱཡ པན ཨུཔྤནྣཾ ཨནཙྩེཀཙཱིཝརམྤི པཙྩུདྡྷརིཏྭཱ ཋཔིཏཙཱིཝརམྤི ཨེཏཾ པརིཧཱརཾ ལབྷཏིཡེཝཱ’ཏི (པཱརཱ. ཨཊྛ. ༢.༦༤༦-༦༤༩) ཝུཏྟཾ. ཏསྨཱ ཀཱལེཔི ཨཀཱལེཔི ཙ ཡཐཱཏཐཱ ལདྡྷཾ ¶ ཨཏིརེཀཙཱིཝརཾ ཝུཏྠཝསྶཱནཾ ཨེཀམཱསཾ, པཉྩམཱསཾ ཝཱ ཡཐཱརཧཾ པརིཧཱརཾ ལབྷཏི ཨེཝཱཏི གཧེཏབྦཾ.

ཨེཝཾ པན ཨཝཏྭཱ པདབྷཱཛནཾ ཝུཏྟནྟི སམྦནྡྷོ. ཏཏྠ ཨེཝནྟི ཡཾ ཨཊྛཀཐཱཡཾ ‘‘ཏཏོ ཙེ ཨུཏྟརཱི’’ཏི ཨིམསྶ མཱསཔརམཏོ ཨུཏྟརཱིཏི ¶ ཨཏྠོ ཝུཏྟོ, ཏཾ པརཱམསཏི. པདབྷཱཛནིཡཾ ཨེཝམཏྠཾ ཨཝཏྭཱ ཨཉྙཐཱ ཨཏྠོ ཝུཏྟོཏི ཨདྷིཔྤཱཡོ. ཏཱཝ ཨུཔྤནྣཾ པཙྩཱསཱཙཱིཝརནྟི པཙྩཏྟཝཙནཾ. ‘‘མཱུལཙཱིཝར’’ནྟི ཨིདཾ ཨུཔཡོགཝཙནཾ. ཨཏྟནོ གཏིཀཾ ཀརོཏཱིཏི ཨནནྟརཱ དུཏིཡདིཝསཱདཱིསུ ཨུཔྤནྣཾ པཙྩཱསཱཙཱིཝརཾ མཱསཔརམཾ མཱུལཙཱིཝརཾ ཋཔེཏུཾ ཨདཏྭཱ ཨཏྟནོ དསཱཧཔརམཏཱཡ ཨེཝ པཏིཊྛཱཔེཏཱིཏི ཨཏྟནོ གཏིཀཾ ཀརོཏཱིཏི. ཏཏོ ཨུདྡྷཾ མཱུལཙཱིཝརནྟི ཨེཏྠ པན མཱུལཙཱིཝརནྟི པཙྩཏྟཝཙནཾ. ཏཉྷི ཝཱིསཏིམདིཝསཏོ ཨུདྡྷཾ དྭཱཝཱིསཏིམདིཝསཱདཱིསུ ཨུཔྤནྣཾ པཙྩཱསཱཙཱིཝརཾ ཨཏྟནཱ སདྡྷིཾ ཨེཀཏོ སིབྦེཏྭཱ གྷཊིཏཾ དསཱཧཔརམཾ གནྟུཾ ཨདཏྭཱ ནཝཱཧཔརམཏཱདིཝསེན ཨཏྟནོ གཏིཀཾ ཀརོཏི, ཨེཀཏོ ཨསིབྦེཏྭཱ ཝིསུཾ ཋཔིཏཾ པན པཙྩཱསཱཙཱིཝརཾ དསཱཧཔརམམེཝ.

པཱལི༹ཡཾ དསཱཧཱཏི དསཱཧེན. ཨེཀཱདསེ ཨུཔྤནྣེཏིཨཱདཱིསུ ཨེཀཱདསཱཧེ ཨུཔྤནྣེཏིཨཱདིནཱ ཨཏྠོ, ཨཡམེཝ ཝཱ པཱཋོ གཧེཏབྦོ. ཨེཀཝཱིསེ ཨུཔྤནྣེ…པེ… ནཝཱཧཱ ཀཱརེཏབྦནྟིཨཱདི པཙྩཱསཱཙཱིཝརསྶ ཨུཔྤནྣདིཝསཾ ཋཔེཏྭཱ ཝུཏྟཾ. ཏེནེཝ ‘‘ཏིཾསེ…པེ… ཏདཧེཝ ཨདྷིཊྛཱཏབྦ’’ནྟི ཝུཏྟཾ. ‘‘ཨཉྙཾ པཙྩཱསཱཙཱིཝརཾ…པེ… ཀཱརེཏབྦ’’ནྟི ཨིདཾ སཏིཡཱ ཨེཝ པཙྩཱསཱཡ ཝུཏྟཾ. སཙེ པན ‘‘ཨིཏོ པཊྛཱཡ ཙཱིཝརཾ ན ལབྷིསྶཱམཱི’’ཏི ཨིཙྪིཏཊྛཱནཏོ པཙྩཱསཱཡ ཨུཔཙྪིནྣཱཡ ཨཉྙཏྠཱཔི ཡེན ཀེནཙི ཨུཔཱཡེན པཙྩཱསཾ ཨུཔྤཱདེཏི, མཱུལཙཱིཝརཾ ན ཨདྷིཊྛཱཏབྦཾ, སབྦཐཱ པཙྩཱསཱཡ ཨུཔཙྪིནྣཱཡ དསཱཧཱཏིཀྐནྟཾ མཱུལཙཱིཝརཾ ཏདཧེཝ ཨདྷིཊྛཱཏབྦཾ. པཙྩཱསཱཙཱིཝརམྤི པརིཀྑཱརཙོལ༹ཾ ཨདྷིཊྛཱཏབྦནྟི པཋམཏརཾ ཨུཔྤནྣཾ ཝིསབྷཱགཾ སནྡྷཱཡ ཝདཏི. ཨཉྙམཉྙནྟི ཨཉྙཾ ཨཉྙཾ, ཨཡམེཝ ཝཱ པཱཋོ. ཨངྒཾ པནེཏྠ པཋམཀཐིནེ ཝུཏྟསདིསམེཝ. ཀེཝལཉྷི ཏཏྠ དསཱཧཱཏིཀྐམོ, ཨིདྷ མཱསཱཏིཀྐམོཏི ཨཡཾ ཝིསེསོ.

ཏཏིཡཀཐིནསིཀྑཱཔདཝཎྞནཱ ནིཊྛིཏཱ.

༤. པུརཱཎཙཱིཝརསིཀྑཱཔདཝཎྞནཱ

༥༠༣-༥. ཙཏུཏྠེ པཱལི༹ཡཾ བྷཏྟཝིསྶགྒནྟི བྷཏྟསྶ ཨུདརེ ཝིསྶཛྫནཾ, པཝེསནཾ ཨཛ྄ཛྷོཧརཎཾ ¶ བྷཏྟཀིཙྩནྟི ཨཏྠོ, བྷོཛནཔརིཡོསཱནེན བྷཏྟསྶ ཝིསྶཛྫནནྟིཔི ¶ ཝདནྟི. ཏཏྠ ནཱམ ཏྭནྟི སོ ནཱམ ཏྭཾ, ཏཱཡ ནཱམ ཏྭནྟི ཝཱ ཨཏྠོ. པིཏཱ ཙ མཱཏཱ ཙ པིཏརོ, པིཏཱུནཾ པིཏཱ ཙ མཱཏཱ ཙ པིཏཱམཧཱ, ཏེ ཨེཝ ཡུགལ༹ཊྛེན ཡུགོ, ཏསྨཱ ཡཱཝ སཏྟམཱ པིཏཱམཧཡུགཱ པིཏཱམཧཱཝཊྚཱཏི ཨེཝམེཏྠ ཨཏྠོ དཊྛབྦོ. ཨེཝཉྷི པིཏཱམཧགྒཧཎེན མཱཏཱམཧོ ཙ པིཏཱམཧཱི མཱཏཱམཧཱི ཙ གཧིཏཱཝ ཧོནྟི. སཏྟམཡུགཏོ པརཾ ‘‘ཨཉྙཱཏཀཱ’’ཏི ཝེདིཏབྦཾ. ཡཱཏི བྷིཀྑུནཱི. པིཏུ མཱཏཱ པིཏཱམཧཱི, མཱཏུ པིཏཱ མཱཏཱམཧོ.

པཡོགེ པཡོགེ བྷིཀྑུསྶ དུཀྐཊནྟི ‘‘དྷོཝཱ’’ཏི ཨཱཎཱཔནཝཱཙཱཡ ཨེཀཱཡ ཨེཝ ཏདནུགུཎསྶ སབྦསྶཱཔི པཡོགསྶ ཨཱཎཏྟཏྟཱ ཝུཏྟཾ.

༥༠༦. ཏདཝིནཱབྷཱཝཏོ དྷོཝནསྶ ‘‘ཀཱཡཝིཀཱརཾ ཀཏྭཱ’’ཏི ཙ ‘‘ཨནྟོདྭཱདསཧཏྠེ’’ཏི ཙ ཝུཏྟཏྟཱ ཀཱཡེན དྷོཝཱཔེཏུཀཱམཏཾ ཨཔྤཀཱསེཏྭཱ དཱནཁིཔནཔེསནཱདིཾ ཀརོནྟསྶ ཙ དྭཱདསཧཏྠཾ ཨུཔཙཱརཾ མུཉྩིཏྭཱ བཧི ཋཏྭཱ ཀཱཡཝཱཙཱཧི ཨཱཎཱཔེཏྭཱ ཁིཔནཔེསནཱདིཾ ཀརོནྟསྶ ཙ ཨནཱཔཏྟི ཨེཝ.

ཨེཀེན ཝཏྠུནཱཏི པཋམཀཏེན. པཉྩསཏཱནི པམཱཎཾ ཨེཏཱསནྟི པཉྩསཏཱ. བྷིཀྑུབྷཱཝཏོ པརིཝཏྟལིངྒཱཔི བྷིཀྑུནཱི བྷིཀྑཱུནཾ སནྟིཀེ ཨེཀཏོཨུཔསམྤནྣཱ ཨེཝ.

༥༠༧. ཏཱཝཀཱལིཀཾ གཧེཏྭཱཏི ཨཏྟནཱ ཀཏིཔཱཧཾ པཱརུཔནཱདིཨཏྠཱཡ ཏཱཝཀཱལིཀཾ ཡཱཙིཏྭཱ. པུརཱཎཙཱིཝརཏཱ, ཨུཔཙཱརེ ཋཏྭཱ ཨཉྙཱཏིཀཱཡ བྷིཀྑུནིཡཱ ཨཱཎཱཔནཾ, ཏསྶཱ དྷོཝཱཔནཱདཱིནི ཙཱཏི ཨིམཱནེཏྠ ཏཱིཎི ཨངྒཱནི.

པུརཱཎཙཱིཝརསིཀྑཱཔདཝཎྞནཱ ནིཊྛིཏཱ.

༥. ཙཱིཝརཔཊིགྒཧཎསིཀྑཱཔདཝཎྞནཱ

༥༠༨. པཉྩམེ ¶ ཨཔཉྙཏྟེ སིཀྑཱཔདེཏི གཎམྷཱ ཨོཧཱིཡནསིཀྑཱཔདེ (པཱཙི. ༦༩༡-༦༩༢) ཨཔཉྙཏྟེ. ཀོཊྛཱསསམྤཏྟཱིཏི ཀེསཱདིཔཉྩཀོཊྛཱསཱནཾ ཀལྱཱཎཏཱ. ཧཏྠཏལེཡེཝ དསྶེཏྭཱཏི ཧཏྠཏལཏོ སེསཀཱཡསྶ ཨདསྶནཾ དཱིཔེཏི.

༥༡༠. ཝིཧཏྠཏཱཡཱཏི ¶ ཝིཧཏཏཱཡ, ཨམིསྶིཏཏཱཡ ཨཔཊིསརཎཏཱཡཱཏི ཨཏྠོ. ཏེནཱཧ ‘‘སམབྷིཏུནྣཏྟཱ’’ཏི, བྱདྷིཏཏྟཱཏི ཨཏྠོ. པརིཝཏྟེཏབྦཾ པརིཝཏྟཾ, ཏདེཝ པཱརིཝཏྟཀཾ, པརིཝཏྟེཏྭཱ དིཡྻམཱནནྟི ཨཏྠོ.

པུརིམསིཀྑཱཔདེ ཝིཡ ཨིདྷ དྭཱདསཧཏྠོ ཨུཔཙཱརནིཡམོ ནཏྠཱིཏི ཨཱཧ ‘‘ཨུཔཙཱརཾ མུཉྩིཏྭཱ’’ཏི. ཨཉྙཏྲ པཱརིཝཏྟཀཱཏི ཡཾ ཨནྟམསོ ཧརཱིཊཀཁཎྜམྤི དཏྭཱ ཝཱ ‘‘དསྶཱམཱི’’ཏི ཨཱབྷོགཾ ཀཏྭཱ ཝཱ པརིཝཏྟཀཾ གཎྷཱཏི, ཏཾ ཋཔེཏྭཱ. ‘‘ཏཾ ཨཙིཏྟཀབྷཱཝེན ན སམེཏཱི’’ཏི ཨིམིནཱ ཉཱཏིབྷཱཝཱཛཱནནཱདཱིསུ ཝིཡ བྷིཀྑུནཱིབྷཱཝཱཛཱནནཱདིཝསེནཱཔི ཨཙིཏྟཀཏཾ པཀཱསེཏི.

༥༡༣-༤. ཏིཀཉྩ ཏཾ པཱཙིཏྟིཡཉྩཱཏི ཏིཀཔཱཙིཏྟིཡཾ, པཱཙིཏྟིཡཏིཀནྟི ཨཏྠོ. པཏྟཏྠཝིཀཱདཱིཏི ཨནདྷིཊྛཱནུཔགཾ སནྡྷཱཡ ཝདཏི. ཀོ པན ཝཱདོ པཏྟཏྠཝིཀཱདཱིསཱུཏི མཧཏིཡཱཔི ཏཱཝ བྷིསིཙྪཝིཡཱ ཨནདྷིཊྛཱནུཔགཏྟཱ ཨནཱཔཏྟི, ཝིཀཔྤནུཔགཔཙྪིམཔྤམཱཎཝིརཧིཏཏཱཡ ཨནདྷིཊྛཱཏབྦེསུ ཀིམེཝ ཝཏྟབྦནྟི དསྶེཏི. པཏྟཏྠཝིཀཱདཱིནི པན ཝིཀཔྤནུཔགཔཙྪིམཱནི གཎྷིཏུཾ ན ཝཊྚཏི ཨེཝ. པཊིགྒཧཎཾ ཀིརིཡཱ, ཨཔརིཝཏྟནཾ ཨཀིརིཡཱ. ཝིཀཔྤནུཔགཙཱིཝརཏཱ, པཱརིཝཏྟཀཱབྷཱཝོ, ཨཉྙཱཏིཀཱཡ ཧཏྠཏོ གཧཎནྟི ཨིམཱནེཏྠ ཏཱིཎི ཨངྒཱནི.

ཙཱིཝརཔཊིགྒཧཎསིཀྑཱཔདཝཎྞནཱ ནིཊྛིཏཱ.

༦. ཨཉྙཱཏཀཝིཉྙཏྟིསིཀྑཱཔདཝཎྞནཱ

༥༡༥. ཚཊྛེ ¶ པཊུ ཨེཝ པཊྚོ. པཱལི༹ཡཾ དྷམྨནིམནྟནཱཏི སམཎེསུ ཝཏྟབྦཱཙཱརདྷམྨམཏྟཝསེན ནིམནྟནཱ, དཱཏུཀཱམཏཱཡ ཀཏནིམནྟནཱ ན ཧོཏཱིཏི ཨཏྠོ. ཏེནེཝ ‘‘ཝིཉྙཱཔེསྶཏཱི’’ཏི ཝུཏྟཾ. ཨཉྙཱཏཀཨཔྤཝཱརིཏཏོ ཧི ཝིཉྙཏྟི ནཱམ ཧོཏི.

༥༡༧. ‘‘ཏིཎེན ཝཱ པཎྞེན ཝཱ པཊིཙྪཱདེཏྭཱ ཨཱགནྟབྦ’’ནྟི ཨིམིནཱ བྷཱུཏགཱམཝིཀོཔནཾ ཨནུཉྙཱཏནྟི ཨཱཧ ‘‘ནེཝ བྷཱུཏགཱམཔཱཏབྱཏཱཡཱ’’ཏིཨཱདི. པཋམཾ སུདྡྷཙིཏྟེན ལིངྒཾ གཧེཏྭཱ པཙྪཱ ལདྡྷིཾ གཎྷནྟོཔི ཏིཏྠིཡཔཀྐནྟཀོ ཨེཝཱཏི ཨཱཧ ‘‘ནིཝཱསེཏྭཱཔི ལདྡྷི ན གཧེཏབྦཱ’’ཏི.

ཡཾ ཨཱཝཱསཾ པཋམཾ ཨུཔགཙྪཏཱིཏི ཨེཏྠཱཔི ཝིཧཱརཙཱིཝརཱདིཨཏྠཱཡ པཝིསནྟེནཔི ཏིཎཱདཱིཧི པཊིཙྪཱདེཏྭཱཝ ¶ གནྟབྦཾ, ན ཏྭེཝ ནགྒེན ཨཱགནྟབྦནྟི སཱམཉྙཏོ དུཀྐཊསྶ ཝུཏྟཏྟཱ. ཙིམིལིཀཱཧཱིཏི པཊཔིལོཏིཀཱཧི. པརིབྷོགེནེཝཱཏི ཨཉྙཾ ཙཱིཝརཾ ཨལབྷིཏྭཱ པརིབྷུཉྫནེན. པརིབྷོགཛིཎྞནྟི ཡཐཱ ཏཾ ཙཱིཝརཾ པརིབྷུཉྫིཡམཱནཾ ཨོབྷགྒཝིབྷགྒཏཱཡ ཨསཱརུཔྤཾ ཧོཏི, ཨེཝཾ ཛིཎྞཾ.

༥༢༡. ཨཉྙསྶཏྠཱཡཱཏི ཨེཏྠཱཔི ‘‘ཉཱཏཀཱནཾ པཝཱརིཏཱན’’ནྟི ཨིདཾ ཨནུཝཏྟཏི ཨེཝཱཏི ཨཱཧ ‘‘ཨཏྟནོ ཉཱཏཀཔཝཱརིཏེ’’ཏིཨཱདི. ཨིདྷ པན ཨཉྙསྶ ཨཙྪིནྣནཊྛཙཱིཝརསྶ ཨཏྠཱཡ ཨཉྙཱཏཀཨཔྤཝཱརིཏེ ཝིཉྙཱཔེནྟསྶ ནིསྶགྒིཡེན ཨནཱཔཏྟཱིཏི ཨཏྠོ གཧེཏབྦོ, ཨིཏརཐཱ ‘‘ཉཱཏཀཱནཾ པཝཱརིཏཱན’’ནྟི ཨིམིནཱ ཝིསེསོ ན བྷཝེཡྻ. ཏེནེཝ ཨནནྟརསིཀྑཱཔདེ ཝཀྑཏི ‘‘ཨཊྛཀཐཱསུ པན ཉཱཏཀཔརིཝཱཏཊྛཱནེ…པེ… པམཱཎམེཝ ཝཊྚཏཱིཏི ཝུཏྟཾ, ཏཾ པཱལི༹ཡཱ ན སམེཏཱི’’ཏི (པཱརཱ. ཨཊྛ. ༢.༥༢༦) ཙ ‘‘ཡསྨཱ པནིདཾ སིཀྑཱཔདཾ ཨཉྙསྶཏྠཱཡ ཝིཉྙཱཔནཝཏྠུསྨིཾཡེཝ པཉྙཏྟཾ, ཏསྨཱ ཨིདྷ ‘ཨཉྙསྶཏྠཱཡཱ’ཏི ན ཝུཏྟ’’ནྟི (པཱརཱ. ཨཊྛ. ༢.༥༢༦) ཙ. ཝིཀཔྤནུཔགཙཱིཝརཏཱ, སམཡཱབྷཱཝོ, ཨཉྙཱཏཀཝིཉྙཏྟི, ཏཱཡ པཊིལཱབྷོཏི ཨིམཱནེཏྠ ཙཏྟཱརི ཨངྒཱནི.

ཨཉྙཱཏཀཝིཉྙཏྟིསིཀྑཱཔདཝཎྞནཱ ནིཊྛིཏཱ.

༧. ཏཏུཏྟརིསིཀྑཱཔདཝཎྞནཱ

༥༢༢-༥༢༤. སཏྟམེ ¶ པཱལི༹ཡཾ པགྒཱཧིཀསཱལནྟི དུསྶཱཔཎཾ. ཏཉྷི ཝཱཎིཛཀེཧི དུསྶཱནི པགྒཧེཏྭཱ དསྶནཊྛཱནཏཱཡ ‘‘པགྒཱཧིཀསཱལཱ’’ཏི ཝུཙྩཏི. ཨསྶ ཙཱིཝརསྶཱཏི སཱདིཏབྦཙཱིཝརསྶ. ‘‘ཏིཙཱིཝརིཀེནཱ’’ཏི ཨིམིནཱ ཨཙྪིནྣཏིཙཱིཝརཏོ ཨཉྙསྶ ཝིཧཱརཱདཱིསུ ནིཧིཏསྶ ཙཱིཝརསྶ ཨབྷཱཝཾ དསྶེཏི. ཡདི བྷཝེཡྻ, ཝིཉྙཱཔེཏུཾ ན ཝཊྚེཡྻ. ཏཱཝཀཱལིཀཾ ནིཝཱསེཏྭཱ ཨཏྟནོ ཙཱིཝརཾ གཱཧེཏབྦཾ, ཏཱཝཀཱལིཀམྤི ཨལབྷནྟསྶ བྷཱུཏགཱམཝིཀོཔནཾ ཀཏྭཱ ཏིཎཔཎྞེཧི ཚདནཾ ཝིཡ ཝིཉྙཱཔནམྤི ཝཊྚཏི ཨེཝ. ཨཉྙེནཱཏི ཨཙྪིནྣཨསབྦཙཱིཝརེན. དྭེ ནཊྛཱནཱིཏི ཨདྷིཀཱརཏོ ཝུཏྟཾ ‘‘དྭེ སཱདིཏབྦཱནཱི’’ཏི.

༥༢༦. པཱལི༹ཡཱ ན སམེཏཱིཏི ‘‘ཨནཱཔཏྟི ཉཱཏཀཱནཾ པཝཱརིཏཱན’’ནྟི ཨིམཱཡ པཱལི༹ཡཱ ན སམེཏི ཏཏུཏྟརིཝིཉྙཱཔནཨཱཔཏྟིཔྤསངྒེ ཨེཝ ཝུཏྟཏྟཱ. ‘‘ཨཉྙསྶཏྠཱཡཱཏི ན ཝུཏྟ’’ནྟི ཨིདཾ ཨཉྙསྶཏྠཱཡ ཏཏུཏྟརི ཝིཉྙཱཔནེ ནིསྶགྒིཡཾ པཱཙིཏྟིཡཾ ཧོཏཱིཏི ཨིམམཏྠཾ དཱིཔེཏི, ཏཉྩ པཱཙིཏྟིཡཾ ཡེསཾ ཨཏྠཱཡ ཝིཉྙཱཔེཏི, ཏེསཾ ཝཱ སིཡཱ, ཝིཉྙཱཔཀསྶེཝ ཝཱ, ན ཏཱཝ ཏེསཾ ཏེཧི ¶ ཨཝིཉྙཱཔིཏཏྟཱ, ནཱཔི ཝིཉྙཱཔཀསྶ ཨཏྟཱནཾ ཨུདྡིསྶ ཨཝིཉྙཱཔིཏཏྟཱ. ཏསྨཱ ཨཉྙསྶཏྠཱཡ ཝིཉྙཱཔེནྟསྶཱཔི ནིསྶགྒིཡཾ པཱཙིཏྟིཡཾ ན དིསྶཏི. པཱལི༹ཡཾ པན ཨིམསྶ སིཀྑཱཔདསྶ ཨཏྟནོ སཱདིཡནཔཊིབདྡྷཏཱཝསེན པཝཏྟཏྟཱ ‘‘ཨཉྙསྶཏྠཱཡཱ’’ཏི ཨནཱཔཏྟིཝཱརེ ན ཝུཏྟནྟི ཝདནྟི, ཏཉྩ ཡུཏྟཾ ཝིཡ དིསྶཏི, ཝཱིམཾསིཏྭཱ གཧེཏབྦཾ. ཏཏུཏྟརིཙཱིཝརཏཱ, ཨཙྪིནྣཱདིཀཱརཎཏཱ, ཨཉྙཱཏཀཝིཉྙཏྟི, ཏཱཡ ཙ པཊིལཱབྷོཏི ཨིམཱནེཏྠ ཙཏྟཱརི ཨངྒཱནི.

ཏཏུཏྟརིསིཀྑཱཔདཝཎྞནཱ ནིཊྛིཏཱ.

༨. པཋམཨུཔཀྑཊསིཀྑཱཔདཝཎྞནཱ

༥༢༨-༥༣༡. ཨཊྛམེ ཡོ ཀཏྟཱཏི དཱཡཀཾ སནྡྷཱཡ ཝུཏྟཾ. པཊོ ཨེཝ པཊཀོ. ‘‘ཨཔྤགྒྷཾ ཙེཏཱཔེཏཱི’’ཏི ཨིདཾ ནིསྶགྒིཡཔཱཙིཏྟིཡཱ ཨནཱཔཏྟིཾ སནྡྷཱཡ ཝུཏྟཾ, ཝིཉྙཏྟིཔཙྩཡཱ པན དུཀྐཊམེཝ. ‘‘པུབྦེ ཨཔྤཝཱརིཏོ’’ཏི ཧི སུཏྟེ ¶ ཝིཉྙཏྟིཀཱརཎཾ ཝུཏྟཾ. མཱཏིཀཱཊྛཀཐཱཡམྤི ‘‘ཙཱིཝརེ བྷིཡྻོཀམྱཏཱ, ཨཉྙཱཏཀཝིཉྙཏྟི, ཏཱཡ ཙ པཊིལཱབྷོཏི ཨིམཱནེཏྠ ཏཱིཎི ཨངྒཱནཱི’’ཏི (ཀངྑཱ. ཨཊྛ. ཨུཔཀྑཊསིཀྑཱཔད) ཨཉྙཱཏཀཝིཉྙཏྟིཏཱ པཀཱསིཏཱ, ཀེཙི པན ‘‘དཱཡཀེན དཱཏུཀཱམོམྷཱིཏི ཨཏྟནོ སནྟིཀེ ཨཝུཏྟེཔི ཡདགྒྷནཀཾ སོ དཱཏུཀཱམོ, ཏདགྒྷནཀཾ ཨཱཧརཱཔེཏུཾ ཝཊྚཏི ཨེཝཱ’’ཏི ཝདནྟི, ཏཾ རཱཛསིཀྑཱཔདཊྛཀཐཱཡཔི ན སམེཏི, དཱུཏེན ཝཱ དཱཡཀེན ཝཱ ‘‘ཨཱཡསྨནྟཾ ཨུདྡིསྶ ཙཱིཝརཙེཏཱཔནྣཾ ཨཱབྷཏ’’ནྟི ཨཱརོཙིཏེཔི མུཁཝེཝཊིཡཀཔྤིཡཀཱརཀཱདཱིནཾ སནྟིཀཱ ཨཱཧརཱཔནསྶ ཏཏྠ པཊིཀྑིཏྟཏྟཱ. ཝུཏྟཉྷི ཏཏྠ ‘‘ཨིམེ དྭེ ཨནིདྡིཊྛཀཔྤིཡཀཱརཀཱ ནཱམ, ཨེཏེསུ ཨཉྙཱཏཀཨཔྤཝཱརིཏེསུ ཝིཡ པཊིཔཛྫིཏབྦཾ…པེ… ན ཀིཉྩི ཝཏྟབྦཱ. དེསནཱམཏྟམེཝ ཙེཏཾ ‘དཱུཏེན ཙཱིཝརཙེཏཱཔནྣཾ པཧིཎེཡྻཱ’ཏི སཡཾ ཨཱཧརིཏྭཱཔི པིཎྜཔཱཏཱདཱིནཾ ཨཏྠཱཡ དདནྟེསུཔི ཨེསེཝ ནཡོ’’ཏི. མུཁཝེཝཊིཡཀཔྤིཡཀཱརཀཱདཡོ ཧི དཱཡཀེན པརིཙྩཏྟེཔི ཝཏྠུམྷི ‘‘ཨསུཀསྶ སནྟིཀེ ཙཱིཝརཔིཎྜཔཱཏཱདིཾ གཎྷཐཱ’’ཏི ཨནིདྡིཊྛཏྟཱ ཨེཝ ‘‘ན ཀིཉྩི ཝཏྟབྦཱ’’ཏི ཝུཏྟཾ, ན པན ཏསྶ ཝཏྠུནོ མུཁཝེཝཊིཡཱདཱིནཾ སནྟཀཏྟཱ, ཏསྨཱ ཨིདྷཱཔི དཱཡཀེན ཝཱ དཱུཏེན ཝཱ ‘‘ཡཾ ཨིཙྪཐ, ཏཾ ཝདཐཱ’’ཏི ཨཔྤཝཱརིཏསྶ ཝདཏོ དུཀྐཊམེཝ. ཨགྒྷཝཌྜྷནཀནྟི ཙཱིཝརེ ཨགྒྷཝཌྜྷནཀཾ ནིསྶཱཡ པཝཏྟཾ ཨིདཾ སིཀྑཱཔདཾ, ན པིཎྜཔཱཏཱདཱིསུ ཏེསུ ཨགྒྷཝཌྜྷནསྶ དུཀྐཊམཏྟཏྟཱ, པཎཱིཏཔིཎྜཔཱཏེ སུདྡྷིཀཔཱཙིཏྟིཡཏྟཱ ཙཱཏི གཧེཏབྦཾ. ཏེནེཝ ‘‘ཙཱིཝརེ བྷིཡྻོཀམྱཏཱ’’ཏི ཨངྒཾ ཝུཏྟཾ.

པཋམཨུཔཀྑཊསིཀྑཱཔདཝཎྞནཱ ནིཊྛིཏཱ.

༩. དུཏིཡཨུཔཀྑཊསིཀྑཱཔདཝཎྞནཱ

༥༣༣. ནཝམེ ¶ པཱལི༹ཡཾ པཙྩེཀཙཱིཝརཙེཏཱཔནྣཱཏི པཙྩེཀཾ ནིཡམེཏྭཱ ཙཱིཝརཙེཏཱཔནྣཱ, ཨེཀེཀེན ཝིསུཾ ཝིསུཾ ནིཡམིཏཱ ཙཱིཝརཙེཏཱཔནྣཱཏི ཨཏྠོ. ཨུབྷོཝ སནྟཱ ཨེཀེནཱཏི ཨུབྷོ ཨེཀཏོཝ སནྟཱ, ཨུབྷོ ཨེཀཏོ ཧུཏྭཱཏི ཨཏྠོ.

དུཏིཡཨུཔཀྑཊསིཀྑཱཔདཝཎྞནཱ ནིཊྛིཏཱ.

༡༠. རཱཛསིཀྑཱཔདཝཎྞནཱ

༥༣༧. དསམེ ¶ ‘‘ཨཛྫཎྷོ’’ཏི ‘‘ཨཛྫ ནོ’’ཏི ཝཏྟབྦེ ཧ-ཀཱརཱགམཾ, ན-ཀཱརསྶ ཙ ཎ-ཀཱརཾ ཀཏྭཱ ཝུཏྟོཏི ཨཱཧ ‘‘ཨཛྫ ཨེཀདིཝསཾ ཨམྷཱཀ’’ནྟི.

༥༣༨-༩. ཡཾ ཝུཏྟཾ མཱཏིཀཱཊྛཀཐཱཡཾ (ཀངྑཱ. ཨཊྛ. རཱཛསིཀྑཱཔདཝཎྞནཱ) ‘‘ཨིམིནཱ ཙཱིཝརཙེཏཱཔནྣེན ཙཱིཝརཾ ཙེཏཱཔེཏྭཱ ཨིཏྠནྣཱམཾ བྷིཀྑུཾ ཙཱིཝརེན ཨཙྪཱདེཧཱིཏི ཨིདཾ ཨཱགམནསུདྡྷིཾ དསྶེཏུཾ ཝུཏྟཾ, སཙེ ཧི ‘ཨིདཾ ཨིཏྠནྣཱམསྶ བྷིཀྑུནོ དེཧཱི’ཏི པེསེཡྻ, ཨཱགམནསྶ ཨསུདྡྷཏྟཱ ཨཀཔྤིཡཝཏྠུཾ ཨཱརབྦྷ བྷིཀྑུནཱ ཀཔྤིཡཀཱརཀོཔི ནིདྡིསིཏབྦོ ན བྷཝེཡྻཱ’’ཏི, ཏཾ ནིསྶགྒིཡཝཏྠུདུཀྐཊཝཏྠུབྷཱུཏཾ ཨཀཔྤིཡཙཱིཝརཙེཏཱཔནྣཾ ‘‘ཨསུཀསྶ བྷིཀྑུནོ དེཧཱི’’ཏི ཨེཝཾ ཨཱགམནསུདྡྷིཡཱ ཨསཏི, སིཀྑཱཔདེ ཨཱགཏནཡེན དཱུཏཝཙནེ ཙ ཨསུདྡྷེ སབྦཐཱ པཊིཀྑེཔོ ཨེཝ ཀཱཏུཾ ཝཊྚཏི, ན པན ‘‘ཙཱིཝརཉྩ ཁོ མཡཾ པཊིགྒཎྷཱམཱ’’ཏི ཝཏྟུཾ, ཏདནུསཱརེན ན ཝེཡྻཱཝཙྩཀརཉྩ ནིདྡིསིཏུཾ ཨཱགམནདཱུཏཝཙནཱནཾ ཨུབྷིནྣཾ ཨསུདྡྷཏྟཱ. པཱལི༹ཡཾ ཨཱགཏནཡེན པན ཨཱགམནསུདྡྷིཡཱ སཏི དཱུཏཝཙནེ ཨསུདྡྷེཔི སིཀྑཱཔདེ ཨཱགཏནཡེན སབྦཾ ཀཱཏུཾ ཝཊྚཏཱིཏི དསྶནཏྠཾ ཝུཏྟཾ. ཏེན ཙ ཡཐཱ དཱུཏཝཙནཱསུདྡྷིཡམྤི ཨཱགམནེ སུདྡྷེ ཝེཡྻཱཝཙྩཀརམྤི ནིདྡིསིཏུཾ ཝཊྚཏི, ཨེཝཾ ཨཱགམནཱསུདྡྷིཡམྤི དཱུཏཝཙནེ སུདྡྷེ ཝཊྚཏི ཨེཝཱཏི ཨཡམཏྠོ ཨཏྠཏོ སིདྡྷོཝ ཧོཏི, ཨུབྷཡསུདྡྷིཡཾ ཝཏྟབྦམེཝ ནཏྠཱིཏི ཨུབྷཡཱསུདྡྷིཔཀྑམེཝ སནྡྷཱཡ མཱཏིཀཱཊྛཀཐཱཡཾ (ཀངྑཱ. ཨཊྛ. རཱཛསིཀྑཱཔདཝཎྞནཱ) ‘‘ཀཔྤིཡཀཱརཀོཔི ནིདྡིསིཏབྦོ ན བྷཝེཡྻཱ’’ཏི ཝུཏྟནྟི ཝེདིཏབྦཾ.

ཡཾ པནེཏྠ སཱརཏྠདཱིཔནིཡཾ (སཱརཏྠ. ཊཱི. ༢.༥༣༧-༥༣༩) ‘‘ཨཱགམནསྶ སུདྡྷིཡཱ ཝཱ ཨསུདྡྷིཡཱ ཝཱ ཝིསེསཔྤཡོཛནཾ ན དིསྶཏཱི’’ཏིཨཱདི ཝུཏྟཾ, ཏཾ མཱཏིཀཱཊྛཀཐཱཝཙནསྶ ཨདྷིཔྤཱཡཾ ¶ ཨསལླཀྑེཏྭཱ ཝུཏྟཾ ཡཐཱཝུཏྟནཡེན ཨཱགམནསུདྡྷིཨཱདིནཱ སཔྤཡོཛནཏྟཱ. ཡོ པནེཏྠ ‘‘མཱུལསཱམིཀེན ཀཔྤིཡཝོཧཱརཝསེན, པེསིཏསྶ དཱུཏསྶ ཨཀཔྤིཡཝོཧཱརཝསེན ཙ ཝདཏོཔི ཀཔྤིཡཀཱརཀོ ནིདྡིསིཏབྦོ བྷཝེཡྻཱ’’ཏི ཨནིཊྛཔྤསངྒོ ཝུཏྟོ, སོ ཨནིཊྛཔྤསངྒོ ཨེཝ ན ཧོཏི ཨབྷིམཏཏྟཱ. ཏཐཱ ཧི སིཀྑཱཔདེ ཨེཝ ‘‘པཊིགྒཎྷཱཏུ ཨཱཡསྨཱ ཙཱིཝརཙེཏཱཔནྣ’’ནྟི ཨཀཔྤིཡཝོཧཱརེན ཝདཏོ དཱུཏསྶ ཀཔྤིཡེན ¶ ཀམྨེན ཝེཡྻཱཝཙྩཀརོ ནིདྡིསིཏབྦོ ཝུཏྟོ ཨཱགམནསྶ སུདྡྷཏྟཱ, ཨཱགམནསྶཱཔི ཨསུདྡྷིཡཾ པན ཀཔྤིཡེནཱཔི ཀམྨེན ཝེཡྻཱཝཙྩཀརོ ན ནིདྡིསིཏབྦོཏི ཨཏྠེཝ ཨཱགམནསྶ སུདྡྷིཨསུདྡྷཱིསུ པཡོཛནཾ. ཀཐཾ པན དཱུཏཝཙནེན ཨཱགམནསུདྡྷི ཝིཉྙཱཡཏཱིཏི? ནཱཡཾ བྷཱརོ. དཱུཏེན ཧི ཨཀཔྤིཡཝོཧཱརེནེཝ ཝུཏྟེ ཨེཝ ཨཱགམནསུདྡྷི གཝེསིཏབྦཱ, ན ཨིཏརཐཱ, ཏཏྠ ཙ ཏསྶ ཝཙནཀྐམེན པུཙྪིཏྭཱ ཙ ཡུཏྟིཨཱདཱིཧི ཙ སཀྐཱ ཝིཉྙཱཏུཾ. ཨིདྷཱཔི ཧི སིཀྑཱཔདེ ‘‘ཙཱིཝརཙེཏཱཔནྣཾ ཨཱབྷཏ’’ནྟི དཱུཏཝཙནེནེཝ ཙཱིཝརཾ ཀིཎིཏྭཱ དཱཏུཾ པེསིཏབྷཱཝོ ཝིཉྙཱཡཏི. ཡདི ཧི སབྦཐཱ ཨཱགམནསུདྡྷི ན ཝིཉྙཱཡཏི, པཊིཀྑེཔོ ཨེཝ ཀཏྟབྦོཏི.

པཱལི༹ཡཉྩ ‘‘ཙཱིཝརཉྩ ཁོ མཡཾ པཊིགྒཎྷཱམཱ’’ཏིཨཱདི དཱུཏཝཙནསྶ ཨཀཔྤིཡཏྟེཔི ཨཱགམནསུདྡྷིཡཱ སཏི པཊིཔཛྫནཝིདྷིདསྶནཏྠཾ ཝུཏྟཾ. ‘‘ཨེསོ ཁོ…པེ… ན ཝཏྟབྦོ ‘ཏསྶ དེཧཱི’’’ཏིཨཱདི ཨཀཔྤིཡཝཏྠུསཱདིཡནཔརིམོཙནཏྠཾ ཝུཏྟཾ. ‘‘སཉྙཏྟོ’’ཏིཨཱདི ‘‘ཨེཝཾ དཱུཏེན པུན ཝུཏྟེ ཨེཝ ཙོདེཏུཾ ཝཊྚཏི, ན ཨིཏརཐཱ’’ཏི དསྶནཏྠཾ ཝུཏྟཾ. ‘‘ན ཝཏྟབྦོ ‘དེཧི མེ ཙཱིཝརཾ…པེ… ཙེཏཱཔེཧི མེ ཙཱིཝར’’’ནྟི ཨིདཾ དཱུཏེནཱབྷཏརཱུཔིཡཾ པཊིགྒཧེཏུཾ ཨཏྟནཱ ནིདྡིཊྛཀཔྤིཡཀཱརཀཏྟཱཝ ‘‘དེཧི མེ ཙཱིཝརཾ…པེ… ཙེཏཱཔེཧི མེ ཙཱིཝར’’ནྟི ཝདནྟོ རཱུཔིཡསྶ པཀཏཏྟཱ ཏེན རཱུཔིཡེན པརིཝཏྟེཏྭཱ ‘‘དེཧི ཙེཏཱཔེཧཱི’’ཏི རཱུཔིཡསཾཝོཧཱརཾ སམཱཔཛྫནྟོ ནཱམ ཧོཏཱིཏི ཏཾ དོསཾ དཱུརཏོ པརིཝཛྫེཏུཾ ཝུཏྟཾ རཱུཔིཡཔཊིགྒཧཎེན སངྒྷམཛ྄ཛྷེ ནིསྶཊྛརཱུཔིཡེ ཝིཡ. ཝུཏྟཉྷི ཏཏྠ ‘‘ན ཝཏྟབྦོ ཨིམཾ ཝཱ ཨིམཾ ཝཱ ཨཱཧརཱ’’ཏི. ཏསྨཱ ན ཨིདཾ ཝིཉྙཏྟིདོསཾ པརིཝཛྫེཏུཾ ཝུཏྟནྟི ཝེདིཏབྦཾ, ‘‘ཨཏྠོ མེ, ཨཱཝུསོ, ཙཱིཝརེནཱ’’ཏིཔི ཨཝཏྟབྦཏཱཔསངྒཏོ, ཏེནེཝ དཱུཏནིདྡིཊྛེསུ རཱུཔིཡསཾཝོཧཱརསངྐཱབྷཱཝཏོ ཨཉྙཾ ཀཔྤིཡཀཱརཀཾ ཋཔེཏྭཱཔི ཨཱཧརཱཔེཏབྦནྟི ཝུཏྟཾ. ཏཏྠཱཔི ‘‘དཱུཏེན ཋཔིཏརཱུཔིཡེན ཙེཏཱཔེཏྭཱ ཙཱིཝརཾ ཨཱཧརཱཔེཧཱི’’ཏི ཨཝཏྭཱ ཀེཝལཾ ‘‘ཙཱིཝརཾ ཨཱཧརཱཔེཧཱི’’ཏི ཨེཝཾ ཨཱཧརཱཔེཏབྦནྟི ཨདྷིཔྤཱཡོ གཧེཏབྦོ. ཋཱནཾ བྷཉྫཏཱིཏི ཨེཏྠ ཋཱནནྟི ཋིཏིཡཱ ཙ ཀཱརཎསྶ ཙ ནཱམཾ, ཏསྨཱ ཨཱསནེ ནིསཱིདནེན ཋཱནམྤི ཀུཔྤཏི, ཨཱགཏཀཱརཎམྤི ཏེསཾ ན ཝིཉྙཱཡཏི. ཋིཏཾ པན ཨཀོཔེཏྭཱ ཨཱམིསཔཊིགྒཧཎཱདཱིསུ ཨཱགཏཀཱརཎམེཝ བྷཉྫཏི, ན ཋཱནཾ. ཏེནཱཧ ‘‘ཨཱགཏཀཱརཎཾ བྷཉྫཏཱི’’ཏི ¶ . ཀེཙི པན ‘‘ཨཱམིསཔཊིགྒཧཎཱདིནཱ ཋཱནམྤི བྷཉྫཏཱི’’ཏི ཝདནྟི, ཏཾ ཨཊྛཀཐཱཡ ན སམེཏི.

ཡཏསྶ ¶ ཙཱིཝརཙེཏཱཔནྣནྟིཨཱདི ཡེན ཨཏྟནཱ ཝེཡྻཱཝཙྩཀརོ ནིདྡིཊྛོ, ཙཱིཝརཉྩ ཨནིཔྥཱདིཏཾ, ཏསྶ ཀཏྟབྦཝིདྷིདསྶནཾ. ཨེཝཾ བྷིཀྑུནཱ ཝཏྠུསཱམིཀཱནཾ ཝུཏྟེ ཏེ ཙོདེཏྭཱ དེནྟི, ཝཊྚཏི ‘‘སཱམིཀཱ ཙོདེཏྭཱ དེནྟཱི’’ཏི ཨནཱཔཏྟིཡཾ ཝུཏྟཏྟཱ. ཏེན ཙ ཡོ སཡཾ ཨཙོདེཏྭཱ ཨུཔཱསཀཱདཱིཧི པརིཡཱཡེན ཝཏྭཱ ཙོདཱཔེཏི, ཏེསུ སཏྟཀྑཏྟུམྤི ཙོདེཏྭཱ ཙཱིཝརཾ དཱཔེནྟེསུ ཏསྶ ཨནཱཔཏྟི སིདྡྷཱ ཧོཏི སིཀྑཱཔདསྶ ཨནཱཎཏྟིཀཏྟཱ.

ཀེནཙི ཨནིདྡིཊྛོ ཨཏྟནོ མུཁེནེཝ བྱཱཝཊབྷཱཝཾ ཝེཡྻཱཝཙྩཀརཏྟཾ པཏྟོ མུཁཝེཝཊིཀོ. ‘‘ཨཝིཙཱརེཏུཀཱམཏཱཡཱ’’ཏི ཨིམིནཱ ཝིཛྫམཱནམྤི དཱཏུཾ ཨནིཙྪནྟཱ ཨརིཡཱཔི ཝཉྩནཱདྷིཔྤཱཡཾ ཝིནཱ ཝོཧཱརཏོ ནཏྠཱིཏི ཝདནྟཱིཏི དསྶེཏི. བྷེསཛྫཀྑནྡྷཀེ མེཎྜཀསེཊྛིཝཏྠུམྷི (མཧཱཝ. ༢༩༩) ཝུཏྟཾ ‘‘སནྟི, བྷིཀྑཝེ’’ཏིཨཱདིཝཙནམེཝ (མཧཱཝ. ༢༩༩) མེཎྜཀསིཀྑཱཔདཾ ནཱམ. ཀཔྤིཡཀཱརཀཱནཾ ཧཏྠེཏི དཱུཏེན ནིདྡིཊྛཀཔྤིཡཀཱརཀེ སནྡྷཱཡ ཝུཏྟཾ, ན པན བྷིཀྑུནཱ ནིདྡིཊྛེ, ཨནིདྡིཊྛེ ཝཱཏི. ཏེནཱཧ ‘‘ཨེཏྠ ཙ ཙོདནཱཡ པམཱཎཾ ནཏྠཱི’’ཏིཨཱདི.

སཡཾ ཨཱཧརིཏྭཱ དདནྟེསཱུཏི སམྦནྡྷོ. ‘‘པིཎྜཔཱཏཱདཱིནཾ ཨཏྠཱཡཱ’’ཏི ཨིམིནཱ ཙཱིཝརཏྠཱཡེཝ ན ཧོཏཱིཏི དསྶེཏི. ‘‘ཨེསེཝ ནཡོ’’ཏི ཨིམིནཱ ཝཏྠུསཱམིནཱ ནིདྡིཊྛཀཔྤིཡཀཱརཀབྷེདེསུཔི པིཎྜཔཱཏཱདཱིནམྤི ཨཏྠཱཡ དིནྣེ ཙ ཋཱནཙོདནཱདི སབྦཾ ཧེཊྛཱ ཝུཏྟནཡེནེཝ ཀཱཏབྦནྟི དསྶེཏི.

‘‘སངྒྷཾ ཝཱ…པེ… ཨནཱམསིཏྭཱ’’ཏི ཝུཏྟཏྟཱ ‘‘སངྒྷསྶ ཝིཧཱརཏྠཱཡ དེམཱ’’ཏིཨཱདིནཱ ཨཱམསིཏྭཱ ཝདནྟེསུ པཊིཀྑིཔིཏབྦམེཝ. ‘‘སངྒྷོ སམྤཊིཙྪཏཱི’’ཏི ཨིདཾ ཨུཀྐཊྛཝསེན ཝུཏྟཾ, གཎཱདཱིསུཔི སངྒྷསྶཏྠཱཡ སམྤཊིཙྪནྟེསུཔི པཊིགྒཧཎེཔི པརིབྷོགེཔི དུཀྐཊམེཝ. སཱརཏྠདཱིཔནིཡཾ ‘‘པཊིགྒཧཎེ པཱཙིཏྟིཡ’’ནྟི (སཱརཏྠ. ཊཱི. ༢.༥༣༧-༥༣༩) ཝུཏྟཾ, ཏཾ ན ཡུཏྟཾ སངྒྷཙེཏིཡཱདཱིནཾ ཨཏྠཱཡ དུཀྐཊསྶ ཝུཏྟཏྟཱ. ཙོདེཏཱིཏི ཏསྶ དོསཱབྷཱཝཾ ཉཏྭཱཔི ཀོདྷེན ཝཱ ལོབྷེན ཝཱ བྷཎྜདེཡྻནྟི ཙོདེཏི. སོ ཨེཝ ཧི མུསཱཝཱདཱདིཔཙྩཡཱ པཱཙིཏྟིཡདུཀྐཊཱདིཨཱཔཏྟཱིཧི སཱཔཏྟིཀོ ཧོཏི, གཱིཝཱཏིསཉྙཱཡ པན ཝཏྭཱ ནིདྡོསབྷཱཝཾ ཉཏྭཱ ཝིརམནྟསྶ ནཏྠི ཨཱཔཏྟི.

ཏལཱ༹ཀཾ ¶ ¶ ཁེཏྟེ པཝིཊྛཏྟཱ ‘‘ན སམྤཊིཙྪིཏབྦ’’ནྟི ཝུཏྟཾ. ཙཏྟཱརོ པཙྩཡེ སངྒྷོ པརིབྷུཉྫཏཱུཏི དེཏི, ཝཊྚཏཱིཏི ཨེཏྠ ‘‘བྷིཀྑུསངྒྷསྶ ཙཏུཔཙྩཡཔརིབྷོགཏྠཱཡ ཏལཱ༹ཀཾ དམྨཱི’’ཏི ཝཱ ‘‘བྷིཀྑུསངྒྷོ ཙཏྟཱརོ པཙྩཡེ པརིབྷུཉྫིཏུཾ ཏལཱ༹ཀཾ དམྨཱི’’ཏི ཝཱ ‘‘ཨིཏོ ཏལཱ༹ཀཏོ ཨུཔྤནྣེ ཙཏྟཱརོ པཙྩཡེ དམྨཱི’’ཏི ཝཱ ཝཏྟུམྤི ཝཊྚཏི, ཨིདཉྩ སངྒྷསྶ པརིབྷོགཏྠཱཡ དིཡྻམཱནཉྙེཝ སནྡྷཱཡ ཝུཏྟཾ, པུགྒལསྶ པན ཨེཝམྤི དིནྣཾ ཏལཱ༹ཀཁེཏྟཱདི ན ཝཊྚཏི. སུདྡྷཙིཏྟསྶ པན ཨུདཀཔརིབྷོགཏྠཾ ཀཱུཔཔོཀྑརཎཱིཨཱདཡོ ཝཊྚནྟི. ‘‘སངྒྷསྶ ཏལཱ༹ཀཾ ཨཏྠི, ཏཾ ཀཐ’’ནྟི ཧི ཨཱདིནཱ སབྦཏྠ སངྒྷཝསེནེཝ ཝུཏྟཾ. ཧཏྠེཏི ཝསེ.

‘‘ཋཔེཐཱཏི ཝུཏྟེ’’ཏི ཨིདཾ སཱམཱིཙིཝསེན ཝུཏྟཾ, ཨཝུཏྟེཔི ཋཔེནྟསྶ དོསོ ནཏྠི. ཏེནཱཧ ‘‘ཨུདཀཾ ཝཱརེཏུཾ ལབྦྷཏཱི’’ཏི. སསྶཀཱལེཔི ཏཱསེཏྭཱ མུཉྩིཏུཾ ཝཊྚཏི, ཨམུཉྩཏོ པན བྷཎྜདེཡྻཾ. པུན དེཏཱིཏི ཨཙྪིནྡིཏྭཱ པུན དེཏི, ཨེཝམྤི ཝཊྚཏཱིཏི སམྦནྡྷོ. ཨིམིནཱ ‘‘ཡེན ཀེནཙི ཨིསྶརེན ‘པརིཙྩཏྟམིདཾ བྷིཀྑཱུཧི, ཨསྶཱམིཀ’ནྟིསཉྙཱཡ ཨཏྟནཱ གཧེཏྭཱ དིནྣཾ ཝཊྚཏཱི’’ཏི དསྶེཏི. ཀཔྤིཡཝོཧཱརེཔི ཝིནིཙྪཡཾ ཝཀྑཱམཱཏི པཱཋསེསོ.

ཨུདཀཝསེནཱཏི ཨུདཀཔརིབྷོགཏྠཾ. ‘‘སུདྡྷཙིཏྟཱན’’ནྟི ཨིདཾ སཧཏྠེན ཙ ཨཀཔྤིཡཝོཧཱརེན ཙ ཀརོནྟེ སནྡྷཱཡ ཝུཏྟཾ. སསྶསམྤཱདནཏྠནྟི ཨེཝཾ ཨསུདྡྷཙིཏྟཱནམྤི པན སཡཾ ཨཀཏྭཱ ཀཔྤིཡཝོཧཱརེན ཨཱཎཱཔེཏུཾ ཝཊྚཏི ཨེཝ. ‘‘ཀཔྤིཡཀཱརཀཾ ཋཔེཏུཾ ན ཝཊྚཏཱི’’ཏི ཨིདཾ སཧཏྠཱདིནཱ ཀཏཏལཱ༹ཀཏྟཱ ‘‘ཨསཱརུཔྤ’’ནྟི ཝུཏྟཾ, ཋཔེནྟསྶ, པན ཏཾ པཙྩཡཾ པརིབྷུཉྫནྟསྶཔི ཝཱ སངྒྷསྶ ཨཱཔཏྟི ན ཝིཉྙཱཡཏི, ཨཊྛཀཐཱཔམཱཎེན ཝཱ ཨེཏྠ ཨཱཔཏྟི གཧེཏབྦཱ. ལཛྫིབྷིཀྑུནཱཏི ལཛྫིནཱཔི, པགེཝ ཨལཛྫིནཱ མཏྟིཀུདྡྷརཎཱདཱིསུ ཀཱརཱཔིཏེསཱུཏི ཨདྷིཔྤཱཡོ. ནཝསསྶེཏི ཨཀཏཔུབྦེ ཀེདཱརེ. ‘‘ཀཧཱཔཎེ’’ཏི ཨིམིནཱ དྷཉྙུཊྛཱཔནེ ཏསྶེཝ ཨཀཔྤིཡནྟི དསྶེཏི, དྷཉྙུཊྛཱཔནེ ཙསྶ པཡོགེཔི དུཀྐཊམེཝ, ན ཀཧཱཔཎུཊྛཱཔནེ ཝིཡ.

‘‘ཀསཐ ཝཔཐཱ’’ཏི ཝཙནེ སབྦེསམྤི ཨཀཔྤིཡཾ སིཡཱཏི ཨཱཧ ‘‘ཨཝཏྭཱ’’ཏི. ཨེཏྟཀོ ནཱམ བྷཱགོཏི ཨེཏྠ ཨེཏྟཀོ ཀཧཱཔཎོཏི ཨིདམྤི སནྡྷཱཡ ཝདཏི. ཏཐཱ ཝུཏྟེཔི ཧི ཏདཱ ཀཧཱཔཎཱནཾ ཨཝིཛྫམཱནཏྟཱ ¶ ཨཱཡཏིཾ ཨུཔྤནྣཾ ཨཉྙེསཾ ཝཊྚཏི ཨེཝ. ཏེནཱཧ ‘‘ཏསྶེཝ ཏཾ ཨཀཔྤིཡ’’ནྟི. ཏསྶ པན སབྦཔཡོགེསུ, པརིབྷོགེསུཔི དུཀྐཊཾ. ཀེཙི པན ‘‘དྷཉྙཔརིབྷོགེ ཨེཝ ཨཱཔཏྟི, ན པུབྦཔཡོགེ’’ཏི ཝདནྟི, ཏཾ ན ཡུཏྟཾ, ཡེན མིནནརཀྑཎཱདིཔཡོགེན པཙྪཱ དྷཉྙཔརིབྷོགེ ཨཱཔཏྟི ཧོཏི, ཏསྶ པཡོགསྶ ཀརཎེ ཨནཱཔཏྟིཡཱ ཨཡུཏྟཏྟཱ. པརིཡཱཡཀཐཱཡ པན སབྦཏྠ ཨནཱཔཏྟི. ཏེནེཝ ‘‘ཨེཏྟཀེཧི ཝཱིཧཱིཧི ཨིདཉྩིདཉྩ ཨཱཧརཐཱ’’ཏི ནིཡམཝཙནེ ཨཀཔྤིཡཾ ¶ ཝུཏྟཾ, ཀཧཱཔཎཝིཙཱརཎེཔི ཨེསེཝ ནཡོ. ཝཏྠུ ཙ ཨེཝརཱུཔཾ ནཱམ སཾཝིཛྫཏི, ཀཔྤིཡཀཱརཀོ ནཏྠཱིཏི ཝཏྟབྦནྟིཨཱདིཝཙནཉྩེཏྠ སཱདྷཀཾ.

ཝནཾ དམྨི…པེ… ཝཊྚཏཱིཏི ཨེཏྠ ནིཝཱསཊྛཱནཏྟཱ པུགྒལསྶཱཔི སུདྡྷཙིཏྟེན གཧེཏུཾ ཝཊྚཏི. སཱིམཾ དེམཱཏི ཝིཧཱརསཱིམཱདིསཱདྷཱརཎཝཙནེན ཝུཏྟཏྟཱ ‘‘ཝཊྚཏཱི’’ཏི ཝུཏྟཾ.

‘‘ཝེཡྻཱཝཙྩཀར’’ནྟིཨཱདིནཱ ཝུཏྟེཔི པུགྒལསྶཔི དཱསཾ གཧེཏུཾ ཝཊྚཏི ‘‘ཨནུཛཱནཱམི, བྷིཀྑཝེ, ཨཱརཱམིཀ’’ནྟི (པཱརཱ. ༦༡༩; མཧཱཝ. ༢༧༠) ཝིསེསེཏྭཱ ཨནུཉྙཱཏཏྟཱ, ཏཉྩ ཁོ པིལིནྡཝཙྪེན གཧིཏཔརིབྷུཏྟཀྐམེན, ན གཧཊྛཱནཾ དཱསཔརིབྷོགཀྐམེན. ཁེཏྟཱདཡོ པན སབྦེ སངྒྷསྶེཝ ཝཊྚནྟི པཱལི༹ཡཾ པུགྒལིཀཝསེན གཧེཏུཾ ཨནནུཉྙཱཏཏྟཱཏི དཊྛབྦཾ. ཝིཧཱརསྶ དེམཱཏི སངྒྷིཀཝིཧཱརཾ སནྡྷཱཡ ཝུཏྟཾ, ‘‘ཁེཏྟཝཏྠུཔཊིགྒཧཎཱ པཊིཝིརཏོ ཧོཏཱི’’ཏིཨཱདིནཱ (དཱི. ནི. ༡.༡༠, ༡༩༤) སུཏྟནྟེསུ ཨཱགཏཔཊིཀྑེཔོ བྷགཝཏཱ ཨཱཔཏྟིཡཱཔི ཧེཏུབྷཱཝེན ཀཏོཏི བྷགཝཏོ ཨདྷིཔྤཱཡཾ ཛཱནནྟེཧི སངྒཱིཏིམཧཱཐེརེཧི ཁེཏྟཔཊིགྒཧཎཱདིནིསྶིཏོ ཨཡཾ སབྦོཔི པཱལི༹མུཏྟཝིནིཙྪཡོ ཝུཏྟོཏི གཧེཏབྦོ. ཀཔྤིཡཀཱརཀསྶ ནིདྡིཊྛབྷཱཝོ, དཱུཏེན ཨཔྤིཏཏཱ, ཏཏུཏྟརི ཝཱཡཱམོ, ཏེན པཊིལཱབྷོཏི ཨིམཱནེཏྠ ཙཏྟཱརི ཨངྒཱནི.

རཱཛསིཀྑཱཔདཝཎྞནཱ ནིཊྛིཏཱ.

ནིཊྛིཏོ ཙཱིཝརཝགྒོ པཋམོ.

༢. ཀོསིཡཝགྒོ

༡. ཀོསིཡསིཀྑཱཔདཝཎྞནཱ

༥༤༢. དུཏིཡསྶ ¶ ¶ པཋམེ པཱལི༹ཡཾ ཀོསིཡཀཱརཀེཏི ཀོསཀཱརཀཔཱཎཱནཾ ཀོསཏོ ནིབྦཏྟཏྟཱ ཀོསིཡེན སུཏྟེན ཝཏྠཱདིཾ ཀརོནྟེ. སངྒྷཱཏནྟི ཝིནཱསཾ.

༥༤༤. ‘‘ཨཝཱཡིམ’’ནྟི ཝུཏྟཏྟཱ ཝཱཡིཏྭཱ ཀརཎེ ཨནཱཔཏྟི. མིསྶེཏྭཱཏི ཨེལ༹ཀལོམེཧི མིསྶེཏྭཱ. པཊིལཱབྷེནཱཏི པརིནིཊྛཱནེན ‘‘པརིཡོསཱཔེཏི, ནིསྶགྒིཡ’’ནྟི (པཱརཱ. ༥༤༥) ཝུཏྟཏྟཱ, ཀོསིཡམིསྶཀཏཱ, ཨཏྟནོ ཨཏྠཱཡ སནྠཏསྶ ཀརཎཀཱརཱཔནཾ, པཊིལཱབྷོ ཙཱཏི ཨིམཱནེཏྠ ཏཱིཎི ཨངྒཱནི.

ཀོསིཡསིཀྑཱཔདཝཎྞནཱ ནིཊྛིཏཱ.

༥༤༧-༥༥༢. དུཏིཡཉྩ ཏཏིཡཉྩ ཨུཏྟཱནམེཝ. ཏཏྠ པན ཨོདཱཏཱདིམིསྶཀསཉྙཱཡ སུདྡྷཀཱལ༹ཀཱནཉྙེཝ སནྠཏསྶ ཀརཎཝསེན ཙེཏྠ དྭེབྷཱགཏོ ཨདྷིཀེསུ སུདྡྷཀཱལ༹ཀེསུ ཨནདྷིཀསཉྙཱཡ སནྠཏསྶ ཀརཎཝསེན ཙ ཨཙིཏྟཀཏཱ ཝེདིཏབྦཱ.

༤. ཚབྦསྶསིཀྑཱཔདཝཎྞནཱ

༥༥༧. ཙཏུཏྠེ ཧད ཀརཱིསུསྶགྒེ, མིཧ སེཙནེཏི དྷཱཏུཨཏྠཾ སནྡྷཱཡཱཧ ‘‘ཝཙྩམྤི པསྶཱཝམྤི ཀརོནྟཱི’’ཏི. ཨཱུནཀཚབྦསྶེསུ ཨཏིརེཀཚབྦསྶསངྐིཏཱདིཝསེནེཏྠ ཨཙིཏྟཀཏཱ ཝེདིཏབྦཱ.

ཚབྦསྶསིཀྑཱཔདཝཎྞནཱ ནིཊྛིཏཱ.

༥. ནིསཱིདནསནྠཏསིཀྑཱཔདཝཎྞནཱ

༥༦༥. པཉྩམེ ¶ ¶ ཏཏྠ སནྡིསྶིསྶཏཱིཏི སཀཱཡ ཀཏིཀཱཡ ཨཡུཏྟཀཱརིཏཱཝསེན ཝིཉྙཱུཧི སནྡིསྶིསྶཏཱིཏི ཨཏྠོ. ཨརཉྙཀངྒཱདཱིནི ཏཱིཎི པཱལི༹ཡཾ སེནཱསནཱདིཔཙྩཡཏྟཡསྶ ཨཱདིཨངྒཝསེན ཝུཏྟཱནི, སེསཱནིཔི ཏེ སམཱདིཡིཾསུ ཨེཝཱཏི ཝེདིཏབྦཾ.

༥༦༦. པིཧཡནྟཱཏི པཏྠཡནྟཱ. སནྠཏསྶ ཨཝཱཡིམཏྟཱ, སེནཱསནཔརིཀྑཱརཏྟཱ ཙ ཙཱིཝརཏཱ, ཨདྷིཊྛཱཏབྦཏཱ ཙ ནཏྠཱིཏི ཨཱཧ ‘‘ཙཏུཏྠཙཱིཝརསཉྙིཏཱཡཱ’’ཏི, ཝིཔལླཱསསཉྙཱཡཱཏི ཨཏྠོ. ཀེཙི པན ‘‘ཨིདཾ ནིསཱིདནསནྠཏཾ ནཱམ ནཝསུ ཙཱིཝརེསུ ནིསཱིདནཙཱིཝརམེཝ, ནཱཉྙཾ. ནིསཱིདནསིཀྑཱཔདེཔི (པཱཙི. ༥༣༡ ཨཱདཡོ) ཨིམསྨིཾ སིཀྑཱཔདེ ཝིཡ ‘ནིསཱིདནཾ ནཱམ སདསཾ ཝུཙྩཏཱི’ཏི ཙ ཨཊྛཀཐཱཡཉྩསྶ ‘སནྠཏསདིསཾ སནྠརིཏྭཱ ཨེཀསྨིཾ ཨནྟེ སུགཏཝིདཏྠིཡཱ ཝིདཏྠིམཏྟེ པདེསེ དྭཱིསུ ཋཱནེསུ ཕཱལེཏྭཱ ཏིསྶོ དསཱ ཀརཱིཡནྟི, ཏཱཧི དསཱཧི སདསཾ ནཱམ ཝུཙྩཏཱི’ཏི (པཱཙི. ཨཊྛ. ༥༣༡) ཙ ཝུཏྟཏྟཱ’’ཏི ཝདནྟི, ཏཾ ན ཡུཏྟཾ ཨིདྷ པམཱཎནིཡམསྶ ཨཝུཏྟཏྟཱ, སནྠཏསྶ ཙ ཨཝཱཡིམཙཱིཝརཏྟཱ, ཨདྷིཊྛཱནུཔགཏྟཱབྷཱཝཱ ཨཊྛཀཐཱཡཾ ཨཝུཏྟཏྟཱ ཙ. ནིསཱིདནཙཱིཝརཾ པན ཚནྣཾ ཙཱིཝརཱནཾ ཁཎྜཔིལོཏིཀཱནི པམཱཎཡུཏྟམེཝ སནྠརིཏྭཱ སནྠཏཾ ཝིཡ ཀརོནྟི. ཏེནེཝ ‘‘སནྠཏསདིས’’ནྟི སདིསགྒཧཎཾ ཀཏཾ, ཏསྨཱ ཏདེཝ ཙཱིཝརཾ ཨདྷིཊྛཱནུཔགཉྩ, ན ཨིདནྟི གཧེཏབྦཾ.

༥༦༧. སུགཏཝིདཏྠིཀཾ ཨནཱདཱཡ ཨཱདིཡནྟིསཉྙཱཡ, སུགཏཝིདཏྠིཨཱུནེ ཨནཱུནནྟིསཉྙཱཡ ཙ ཝསེནེཏྠ ཨཙིཏྟཀཏཱ ཝེདིཏབྦཱ. ཝིཏཱནཱདཱིནཉྙེཝ ཨཏྠཱཡ ཀརཎེ ཨནཱཔཏྟིཝཙནཏོ ནིཔཛྫནཏྠཱཡ ཀརོཏོཔི ཨཱཔཏྟི ཨེཝ. པརིབྷུཉྫིཏུཾ ན ཝཊྚཏཱིཏི ཀོསིཡེསུ སུདྡྷཀཱལ༹ཀཱནཉྩ ཝཏྠཱུནཾ ཨཀཔྤིཡཏྟཱ ཝུཏྟཾ. ཏེནེཝ པཱལི༹ཡཾ ‘‘ཨཉྙེན ཀཏཾ པཊིལབྷིཏྭཱ པརིབྷུཉྫཏི, ཨཱཔཏྟི དུཀྐཊསྶཱ’’ཏི (པཱརཱ. ༥༤༥, ༥༥༠) ཏཏྠ ཏཏྠ ཝུཏྟཾ, ཨིཏརེསུ པན དྭཱིསུ ‘‘ཨནཱཔཏྟཱི’’ཏི ཝུཏྟཾ. ཏཏྠ ཙཏུཏྠེ ཨཉྙསྶཏྠཱཡ ཀརཎེཔི ཨནཱཔཏྟི, པཉྩམེ ཏཏྠ དུཀྐཊནྟི དཊྛབྦཾ. ནིསྶཊྛདཱནཝཙནཏོ པན གཧཎེ དོསོ ནཏྠི, པརིབྷུཉྫནེ ཙ ཝིཛཊེཏྭཱ ཀཔྤིཡཝསེན ཀཏེ ན དོསོ.

ནིསཱིདནསནྠཏསིཀྑཱཔདཝཎྞནཱ ནིཊྛིཏཱ.

༦. ཨེལ༹ཀལོམསིཀྑཱཔདཝཎྞནཱ

༥༧༢. ཚཊྛེ ¶ ¶ པཱལི༹ཡཾ ‘‘ཨདྡྷཱནམགྒཔྤཊིཔནྣསྶཱ’’ཏི ཨིདཾ ཝཏྠུཝསེན ཝུཏྟཾ. ནིཝཱསཊྛཱནེ ལདྡྷཱནིཔི ཏིཡོཛནཏོ པརཾ ཧརིཏུཾ ན ཝཊྚཏི ཨེཝ. ཨསནྟེ ཧཱརཀེཏི ཨནུརཱུཔཏོ ཝུཏྟཾ. སནྟེཔི ཧཱརཀེ ཧརཏོ ནཏྠི དོསོ. ཨཱཔཏྟིཡེཝཱཏི ཨནཱཎཏྟེན ཧཊཏྟཱ. པཀྑདྭཡསྶཔི ཀཱརཎམཱཧ ‘‘སཨུསྶཱཧཏྟཱ’’ཏི, ཨནུཔརཏགམནིཙྪཏྟཱཏི ཨཏྠོ. སུདྡྷཙིཏྟཔཀྑསྶེཝ ཀཱརཎམཱཧ ‘‘ཨཙིཏྟཀཏྟཱ’’ཏི. ན སམེཏཱིཏི ‘‘ཨནཱཔཏྟི, ཨཉྙཾ ཧརཱཔེཏཱི’’ཏི ཨེཏྟཀསྶེཝ པརིཧརཎེ ཝུཏྟཏྟཱ. ཨགཙྪནྟེཏི ཋིཏེ. ཧེཊྛཱཏི བྷཱུམིཡཱ.

༥༧༥. ཏཾ ཧརནྟསྶཱཏི པཋམཾ པཊིལཱབྷཊྛཱནཏོ པཊྛཱཡ ཏིཡོཛནཏོ ཨུདྡྷཾ ཧརནྟསྶཱཏི ཨཏྠོ. ཏཐཱ ཧརནྟསྶ ཧི ཙོརེཧི ཨཙྪིནྡིཏྭཱ པུན དིནྣཊྛཱནཏོ ཏིཡོཛནཾ ཧརིཏུཾ ཝཊྚཏི. ཀེཙི པན ‘‘མཱཏིཀཱཊྛཀཐཱཡཾ ཨངྒེསུ ‘པཋམཔྤཊིལཱབྷོ’ཏི ཝུཏྟཏྟཱ དུཏིཡཔཊིལཱབྷཊྛཱནཏོ ཏིཡོཛནཱཏིཀྐམེཔི ཨནཱཔཏྟཱི’’ཏི ཝདནྟི, ཏཾ ན ཡུཏྟཾ, དུཏིཡཔཊིལཱབྷསྶཱཔི པཊིལཱབྷཊྛཱནེ པཝིསནཏོ ཝཱསཏྠཱཡ གམནཊྛཱནཏོ པུན གམནེ ཝིཡ. ཀཱཡབནྡྷནཱདཱིནནྟི དྭིཔཊལཀཱཡབནྡྷནཱདཱིནཾ ཨནྟརེ པཀྑིཏྟཾ པསིབྦཀེ པཀྑིཏྟསདིསཾ, ན ཀཏབྷཎྜནྟི ཝུཏྟཾ, ཏཐཱ ནིདྷཱནམུཁནྟི. ཨཀཏབྷཎྜཏཱ, པཋམཔྤཊིལཱབྷོ, ཏིཡོཛནཱཏིཀྐམནཾ, ཨཱཧརཎཔཙྩཱཧརཎཾ, ཨཝཱསཱདྷིཔྤཱཡཏཱཏི ཨིམཱནེཏྠ པཉྩ ཨངྒཱནི.

ཨེལ༹ཀལོམསིཀྑཱཔདཝཎྞནཱ ནིཊྛིཏཱ.

༧. ཨེལ༹ཀལོམདྷོཝཱཔནསིཀྑཱཔདཝཎྞནཱ

༥༨༡. སཏྟམེ པཱལི༹ཡཾ ཨནཱཔཏྟིཝཱརེ ཨཔརིབྷུཏྟཾ ཀཏབྷཎྜཾ དྷོཝཱཔེཏཱིཏི ཨེཏྠ པརིབྷུཏྟསྶ ཀམྦལཱདིཀཏབྷཎྜསྶ དྷོཝཱཔནཾ པུརཱཎཙཱིཝརདྷོཝཱཔནསིཀྑཱཔདེན ཨཱཔཏྟིཀརནྟི ཏནྣིཝཏྟནཏྠཾ ‘‘ཨཔརིབྷུཏྟཾ ཀཏབྷཎྜ’’ནྟི ཝུཏྟཾ. སེསམེཏྠ ཨུཏྟཱནཏྠམེཝ.

ཨེལ༹ཀལོམདྷོཝཱཔནསིཀྑཱཔདཝཎྞནཱ ནིཊྛིཏཱ.

༨. རཱུཔིཡསིཀྑཱཔདཝཎྞནཱ

༥༨༣-༤. ཨཊྛམེ ¶ ¶ སུཝཎྞམཡཀཧཱཔཎེན ཀཧཱཔཎོཔི རཛཏེ ཨེཝ སངྒཡ྄ཧཏཱིཏི ཨཱཧ ‘‘སོཝཎྞམཡོ ཝཱ’’ཏི. རཱུཔིཡམཡོ ཝཱཏི རཛཏེན རཱུཔཾ སམུཊྛཔེཏྭཱ ཀཏཀཧཱཔཎོ. པཱཀཏིཀོ ནཱམ ཨེཏརཧི པཀཏིཀཧཱཔཎོ.

ཨིཙྩེཏཾ སབྦམྤཱིཏི སིཀྑཱཔདེན, ཝིབྷངྒེན ཙ ཝུཏྟཾ སབྦམྤི ནིདསྶེཏི. ཏསྶ ཙཏུབྦིདྷཾ ནིསྶགྒིཡཝཏྠཱུཏི ཨིམིནཱཝ སམྦནྡྷོ, ན པན ཨནནྟརེན ‘‘རཛཏ’’ནྟི པདེན. ཨིདཱནི ཏཾ ཙཏུབྦིདྷཾ ནིསྶགྒིཡཝཏྠུཾ སརཱུཔཏོ དསྶེནྟོ ‘‘རཛཏ’’ནྟིཨཱདིམཱཧ. ཏཏྠ ཀིཉྩཱཔི ཧེཊྛཱ རཛཏམཱསཀོཝ ཝུཏྟོ, ན ཀེཝལཾ རཛཏཾ, ཏཐཱཔི སིཀྑཱཔདེ ‘‘ཛཱཏརཱུཔརཛཏ’’ནྟི པདེནེཝ ཝུཏྟནྟི ཏམྤི དསྶེཏུཾ ‘‘རཛཏ’’ནྟི ཨིདཾ ཝིསུཾ ཝུཏྟཾ. པདབྷཱཛནེ པན མཱཏིཀཱཔདེནེཝ སིདྡྷཏྟཱ ཏཾ ཨཝཏྭཱ ཏེན སཧ སངྒཡ྄ཧམཱནམེཝ དསྶེཏུཾ ‘‘རཛཏཾ ནཱམ ཀཧཱཔཎོ’’ཏིཨཱདི ཝུཏྟནྟི ཝེདིཏབྦཾ. ཛཱཏརཱུཔམཱསཀོཏི སུཝཎྞམཡཀཧཱཔཎོ. ཝུཏྟཔྤབྷེདོཏི ‘‘རཱུཔིཡམཡོ ཝཱ པཱཀཏིཀོ ཝཱ’’ཏིཨཱདིནཱ ཝུཏྟཔྤབྷེདོ. པཊོཝ པཊཀོ, ཝཏྠཾ. དུཀྐཊམེཝཱཏི པཊིགྒཱཧཀསྶེཝ པཊིགྒཧཎཔཙྩཡཱ དུཀྐཊཾ, པརིབྷོགེ པན པཉྩསཧདྷམྨིཀེཧི པཊིགྒཧིཏཱནཾ དྷཉྙཝིརཧིཏམུཏྟཱདཱིནཾ ཀཱརཎཱ ཨུཔྤནྣཔཙྩཡཾ པརིབྷུཉྫནྟཱནཾ སབྦེསམྤི དུཀྐཊམེཝ. ཀེཙི པན ‘‘དྷཉྙམྤི པཉྩསཧདྷམྨིཀེཧི པཊིགྒཧིཏཾ མུཏྟཱདིཁེཏྟཱདི ཝིཡ སབྦེསམྤི པརིབྷུཉྫིཏུཾ ན ཝཊྚཏི, ཀེཝལཾ སངྒྷིཀབྷཱུམིཡཾ ཀཔྤིཡཝོཧཱརེན ཙ ཨུཔྤནྣསྶ དྷཉྙསྶ ཝིཙཱརཎམེཝ སནྡྷཱཡ ‘ཏསྶེཝེཏཾ ཨཀཔྤིཡ’ནྟི ཝུཏྟ’’ནྟི ཝདནྟི.

ཨེཀོ སཏཾ ཝཱ སཧསྶཾ ཝཱཏིཨཱདི རཱུཔིཡེ ཧེཊྛིམཀོཊིཡཱ པཝཏྟནཱཀཱརཾ དསྶེཏུཾ ཝུཏྟཾ, ན པན ‘‘ཨེཝཾ པཊིཔཛྫིཏབྦམེཝཱ’’ཏི དསྶེཏུཾ. ‘‘ཨིདྷ ནིཀྑིཔཱཧཱི’’ཏི ཝུཏྟེ ཨུགྒཎྷཱཔནཾ ཧོཏཱིཏི ཨཱཧ ‘‘ཨིདྷ ནིཀྑིཔཱཧཱིཏི ན ཝཏྟབྦ’’ནྟི. ཀཔྤིཡཉྩ…པེ… ཧོཏཱིཏི ཡསྨཱ ཨསཱདིཏཏྟཱ ཏཏོ ཨུཔྤནྣཔཙྩཡཱ ཝཊྚནྟི, ཏསྨཱ ཀཔྤིཡཾ ནིསྶཱཡ ཋིཏཾ. ཡསྨཱ པན དུབྦིཙཱརཎཱཡ སཏི ཏཏོ ཨུཔྤནྣམྤི ན ཀཔྤཏི, ཏསྨཱ ཨཀཔྤིཡཾ ནིསྶཱཡ ཋིཏནྟི ཝེདིཏབྦཾ.

‘‘ན ཏེན ཀིཉྩི ཀཔྤིཡབྷཎྜཾ ཙེཏཱཔིཏ’’ནྟི ཨིམིནཱ ཙེཏཱཔིཏཾ ཙེ, ནཏྠི པརིབྷོགཱུཔཱཡོ ཨུགྒཧེཏྭཱ ཨནིསྶཊྛརཱུཔིཡེན ཙེཏཱཔིཏཏྟཱ. ཨཱིདིསཉྷི སངྒྷམཛ྄ཛྷེ ནིསྶཛྫནཾ ཀཏྭཱཝ ཚཌྜེཏྭཱ པཱཙིཏྟིཡཾ དེསེཏབྦནྟི དསྶེཏི. ཀེཙི ¶ པན ‘‘ཡསྨཱ ནིསྶགྒིཡཝཏྠུཾ པཊིགྒཧེཏྭཱཔི ཙེཏཱཔིཏཾ ¶ ཀཔྤིཡབྷཎྜཾ སངྒྷེ ནིསྶཊྛཾ ཀཔྤིཡཀཱརཀེཧི ནིསྶཊྛརཱུཔིཡཾ པརིཝཏྟེཏྭཱ ཨཱནཱིཏཀཔྤིཡབྷཎྜསདིསཾ ཧོཏི, ཏསྨཱ ཝིནཱཝ ཨུཔཱཡཾ བྷཱཛེཏྭཱ པརིབྷུཉྫིཏུཾ ཝཊྚཏཱི’’ཏི ཝདནྟི, ཏཾ པཏྟཙཏུཀྐཱདིཀཐཱཡ (པཱརཱ. ཨཊྛ. ༢.༥༨༩) ན སམེཏི. ཏཏྠ རཱུཔིཡེན པརིཝཏྟིཏཔཏྟསྶ ཨཔརིབྷོགོཝ དསྶིཏོ, ན ནིསྶཛྫནཝིདྷཱནནྟི. ཨུཔནིཀྑེཔཾ ཋཔེཏྭཱཏི ཀཔྤིཡཀཱརཀེཧི ཝཌྜྷིཡཱ པཡོཛནཾ སནྡྷཱཡ ཝུཏྟཾ. ཨཀཔྤིཡནྟི ཏེན ཝཏྠུནཱ གཧིཏཏྟཱ ཝུཏྟཾ.

༥༨༥. ‘‘པཏིཏོཀཱསཾ ཨསམནྣཱཧརནྟེནཱ’’ཏི ཨིདཾ ནིརཔེཀྑབྷཱཝདསྶནཔརནྟི ཝེདིཏབྦཾ. ཨསནྟསམྦྷཱཝནཱཡཱཏི པརིཡཱཡཱདིནཱ ཨབྷཱུཏཱརོཙནཾ སནྡྷཱཡ ཝུཏྟཾ. ཐེཡྻཔརིབྷོགོཏི པཙྩཡསཱམིནཱ བྷགཝཏཱ ཨནནུཉྙཱཏཏྟཱ ཝུཏྟཾ. ཨིཎཔརིབྷོགོཏི བྷགཝཏཱ ཨནུཉྙཱཏམྤི ཀཏྟབྦཾ ཨཀཏྭཱ པརིབྷུཉྫནཏོ ཝུཏྟཾ, ཏེན ཙ པཙྩཡསནྣིསྶིཏསཱིལཾ ཝིཔཛྫཏཱིཏི དསྶེཏི. པརིབྷོགེ པརིབྷོགེཏི ཀཱཡཏོ མོཙེཏྭཱ མོཙེཏྭཱ པརིབྷོགེ. པཙྪིམཡཱམེསུ པཙྩཝེཀྑིཏབྦནྟི ཡོཛནཱ. ཨིཎཔརིབྷོགཊྛཱནེ ཏིཊྛཏཱིཏི ཨེཏྠ ‘‘ཧིཡྻོ ཡཾ མཡཱ ཙཱིཝརཾ པརིབྷུཏྟ’’ནྟིཨཱདིནཱཔི ཨཏཱིཏཔཙྩཝེཀྑཎཱ ཝཊྚཏཱིཏི ཝདནྟི. པརིབྷོགེ པརིབྷོགེཏི ཨུདཀཔཏནཊྛཱནཏོ ཨནྟོཔཝེསནེསུ, ནིསཱིདནསཡནེསུ ཙ. སཏིཔཙྩཡཏཱ ཝཊྚཏཱིཏི པཙྩཝེཀྑཎསཏིཡཱ པཙྩཡཏྟཾ ལདྡྷུཾ ཝཊྚཏི. པཊིགྒཧཎེ ཙ པརིབྷོགེ ཙ པཙྩཝེཀྑཎཱསཏི ཨཝསྶཾ ལདྡྷབྦཱཏི དསྶེཏི. ཏེནཱཧ ‘‘སཏིཾ ཀཏྭཱ’’ཏིཨཱདི. ཀེཙི པན ‘‘སཏིཔཙྩཡཏཱ པཙྩཡེ སཏི བྷེསཛྫཔརིབྷོགསྶ ཀཱརཎེ སཏཱི’’ཏི ཨེཝམྤི ཨཏྠཾ ཝདནྟི, ཏེསམྤི པཙྩཡེ སཏཱིཏི པཙྩཡསབྦྷཱཝསལླཀྑཎེ སཏཱིཏི ཨེཝམཏྠོ གཧེཏབྦོ པཙྩཡསབྦྷཱཝམཏྟེན སཱིལསྶ ཨསུཛ྄ཛྷནཏོ. ‘‘པརིབྷོགེ ཨཀརོནྟསྶེཝ ཨཱཔཏྟཱི’’ཏི ཨིམིནཱ པཱཏིམོཀྑསཾཝརསཱིལསྶ བྷེདོ དསྶིཏོ, ན པཙྩཡསནྣིསྶྶིསཱིལསྶ, ཏསྶ ཨཏཱིཏཔཙྩཝེཀྑཎཱཡ ཝིསུཛ྄ཛྷནཏོ. ཨེཏསྨིཾ, པན སེསཔཙྩཡེསུ ཙ ཨིཎཔརིབྷོགཱདིཝཙནེན པཙྩཡསནྣིསྶིཏསཱིལསྶེཝ བྷེདོཏི ཨེཝམིམེསཾ ནཱནཱཀརཎཾ ཝེདིཏབྦཾ.

ཨེཝཾ པཙྩཡསནྣིསྶིཏསཱིལསྶ ཝིསུདྡྷིཾ དསྶེཏྭཱ ཏེནེཝ པསངྒེན སབྦཱཔི ཝིསུདྡྷིཡོ དསྶེཏུཾ ‘‘ཙཏུབྦིདྷཱ ཧི སུདྡྷཱི’’ཏིཨཱདིམཱཧ. ཏཏྠ སུཛ྄ཛྷཏི ¶ དེསནཱདཱིཧི, སོདྷཱིཡཏཱིཏི ཝཱ སུདྡྷི, ཙཏུབྦིདྷསཱིལཾ. ཏེནཱཧ ‘‘དེསནཱཡ སུཛ྄ཛྷནཏོ’’ཏིཨཱདི. ཨེཏྠ དེསནཱགྒཧཎེན ཝུཊྛཱནམྤི ཚིནྣམཱུལཱནཾ ཨབྷིཀྑུཏཱཔཊིཉྙཱཔི སངྒཧིཏཱ. ཚིནྣམཱུལཱནམྤི ཧི པཱརཱཛིཀཱཔཏྟིཝུཊྛཱནེན ཧེཊྛཱ པརིརཀྑིཏཾ བྷིཀྑུསཱིལཾ ཝིསུདྡྷཾ ནཱམ ཧོཏི, ཏེན ཏེསཾ མགྒཔཊིལཱབྷོཔི སམྤཛྫཏི.

དཱཏབྦཊྛེན དཱཡཾ, ཏཾ ཨཱདིཡནྟཱིཏི དཱཡཱདཱ. སཏྟནྣཾ སེཀྑཱནནྟི ཨེཏྠ ཀལྱཱཎཔུཐུཛྫནཱཔི སངྒཧིཏཱ ཏེསཾ ཨཱཎཎྱཔརིབྷོགསྶ དཱཡཛྫཔརིབྷོགེ སངྒཧིཏཏྟཱཏི ཝེདིཏབྦཾ ¶ . དྷམྨདཱཡཱདསུཏྟནྟི ‘‘དྷམྨདཱཡཱདཱ མེ, བྷིཀྑཝེ, བྷཝཐ, མཱ ཨཱམིསདཱཡཱདཱ’’ཏིཨཱདིནཱ (མ. ནི. ༡.༢༩) པཝཏྟཾ སུཏྟཾ. ཏཏྠ མཱ མེ ཨཱམིསདཱཡཱདཱཏི ཨེཝཾ མེ-སདྡཾ ཨཱནེཏྭཱ ཨཏྠོ གཧེཏབྦོ. ཨེཝཉྷི ཏཐཱ ཝུཏྟཏྠསཱདྷཀཾ ཧོཏི.

ལཛྫིནཱ སདྡྷིཾ པརིབྷོགོཏི དྷམྨཱམིསཝསེན མིསྶབྷཱཝོ. ཨལཛྫིནཱ སདྡྷིནྟི ཨེཏྠཱཔི ཨེསེཝ ནཡོ. ‘‘ཨཱདིཏོ པཊྛཱཡ ཧི ཨལཛྫཱི ནཱམ ནཏྠཱི’’ཏི ཨིམིནཱ དིཊྛདིཊྛེསུ ཨཱསངྐཱ ནཱམ ན ཀཱཏབྦཱ, དིཊྛསུཏཱདིཀཱརཎེ སཏི ཨེཝ ཀཱཏབྦཱཏི དསྶེཏི. ཨཏྟནོ བྷཱརབྷཱུཏཱ སདྡྷིཝིཧཱརིཀཱདཡོ. སཙེ ན ཨོརམཏཱིཏི ཨགཏིགམནེན དྷམྨཱམིསཔརིབྷོགཏོ ན ཨོརམཏི. ‘‘ཨཱཔཏྟི ནཱམ ནཏྠཱི’’ཏི ཨིདཾ ཨལཛྫཱིནཾ དྷམྨེན ཨུཔྤནྣཔཙྩཡཾ, དྷམྨཀམྨཉྩ སནྡྷཱཡ ཝུཏྟཾ. ཏེསམྤི ཧི ཀུལདཱུསནཱདིསམུཔྤནྣཔཙྩཡཾ པརིབྷུཉྫནྟཱནཾ, ཝགྒཀམྨཱདིཾ ཀརོནྟཱནཉྩ ཨཱཔཏྟི ཨེཝ.

‘‘དྷམྨིཡཱདྷམྨིཡཔརིབྷོགོ པཙྩཡཝསེན ཝེདིཏབྦོ’’ཏི ཝུཏྟཏྟཱ ཧེཊྛཱ ལཛྫིཔརིབྷོགོ པཙྩཡཝསེན ཙ ཨེཀཀམྨཱདིཝསེན ཙ ཝུཏྟོ ཨེཝཱཏི ཝེདིཏབྦཾ. ཏེནེཝ དུཊྛདོསསིཀྑཱཔདཊྛཀཐཱཡཾ ཙོདཀཙུདིཏཀབྷཱཝེ ཋིཏཱ དྭེ ཨལཛྫིནོ དྷམྨཔརིབྷོགམྤི སནྡྷཱཡ ‘‘ཨེཀསམྦྷོགཔརིབྷོགཱ ཧུཏྭཱ ཛཱིཝཐཱ’’ཏི (པཱརཱ. ཨཊྛ. ༢.༣༨༥-༣༨༦) ཝུཏྟཱ ཏེསཾ ཨཉྙམཉྙཾ དྷམྨཱམིསཔརིབྷོགེ ཝིརོདྷཱབྷཱཝཱ. ལཛྫཱིནམེཝ ཧི ཨལཛྫིནཱ སཧ ཏདུབྷཡཔརིབྷོགཱ ན ཝཊྚནྟཱིཏི.

དྷམྨཔརིབྷོགོཏི ‘‘ཨེཀཀམྨཾ ཨེཀུདྡེསོ’’ཏིཨཱདིནཱ (པཱརཱ. ༥༥, ༩༢, ༡༧༢) ཝུཏྟསཾཝཱསོ ཙེཝ ནིསྶཡགྒཧཎདཱནཱདིཀོ སབྦོ ནིརཱམིསཔརིབྷོགོ ཙ ཝེདིཏབྦོ ¶ . ‘‘ན སོ ཨཱཔཏྟིཡཱ ཀཱརེཏབྦོ’’ཏི ཝུཏྟཏྟཱ ལཛྫིནོ ཨལཛྫིཔགྒཧེ ཨཱཔཏྟཱིཏི ཝེདིཏབྦཾ. ཨིཏརོཔཱིཏི ལཛྫཱིཔི. ཏསྶཱཔི ཨཏྟཱནཾ པགྒཎྷནྟསྶ ཨལཛྫིནོ, ཨིམིནཱ ཙ ལཛྫིནོ ཝཎྞབྷཎནཱདིལཱབྷཾ པཊིཙྩ ཨཱམིསགརུཀཏཱཡ ཝཱ གེཧསིཏཔེམེན ཝཱ ཏཾ ཨལཛྫིཾ པགྒཎྷནྟོ ལཛྫཱི སཱསནཾ ཨནྟརདྷཱཔེཏི ནཱམཱཏི དསྶེཏི. ཨེཝཾ གཧཊྛཱདཱིསུ ཨུཔཏྠམྦྷིཏོ ཨལཛྫཱི བལཾ ལབྷིཏྭཱ པེསལེ ཨབྷིབྷཝིཏྭཱ ནཙིརསྶེཝ སཱསནཾ ཨུདྡྷམྨཾ ཨུབྦིནཡཾ ཀརོཏཱིཏི.

‘‘དྷམྨཔརིབྷོགོཔི ཏཏྠ ཝཊྚཏཱི’’ཏི ཨིམིནཱ ཨཱམིསཔརིབྷོགཏོ དྷམྨཔརིབྷོགོཝ གརུཀོ, ཏསྨཱ ཨཏིཝིཡ ཨལཛྫིཝིཝེཀེན ཀཱཏབྦོཏི དསྶེཏི. ‘‘དྷམྨཱནུགྒཧེན ཨུགྒཎྷིཏུཾ ཝཊྚཏཱི’’ཏི ཝུཏྟཏྟཱ ཨལཛྫུསྶནྣཏཱཡ སཱསནེ ཨོསཀྐནྟེ, ལཛྫཱིསུ ཙ ཨཔྤཧོནྟེསུ ཨལཛྫིམྤི པཀཏཏྟཾ གཎཔཱུརཀཾ ¶ གཧེཏྭཱ ཨུཔསམྤདཱདིཀརཎེན ཙེཝ ཀེཙི ཨལཛྫིནོ དྷམྨཱམིསཔརིབྷོགེན སངྒཧེཏྭཱ སེསཱལཛྫིགཎསྶ ནིགྒཧེན ཙ སཱསནཾ པགྒཎྷིཏུཾ ཝཊྚཏི ཨེཝ.

ཀེཙི པན ‘‘ཀོཊིཡཾ ཋིཏོ གནྠོཏི ཝུཏྟཏྟཱ གནྠཔརིཡཱཔུཎནམེཝ དྷམྨཔརིབྷོགོ, ན ཨེཀཀམྨཱདི. ཏསྨཱ ཨལཛྫཱིཧིཔི སདྡྷིཾ ཨུཔོསཐཱདིཀཾ ཀམྨཾ ཀཱཏུཾ ཝཊྚཏི, ཨཱཔཏྟི ནཏྠཱི’’ཏི ཝདནྟི, ཏཾ ན ཡུཏྟཾ, ཨེཀཀམྨཱདཱིསུ བཧཱུསུ དྷམྨཔརིབྷོགེསུ ཨལཛྫིནཱཔི སདྡྷིཾ ཀཏྟབྦཱཝཏྠཱཡུཏྟཾ དྷམྨཔརིབྷོགཾ དསྶེཏུཾ ཨིདྷ ནིདསྶནཝསེན གནྠསྶེཝ སམུདྡྷཊཏྟཱ. ན ཧི ཨེཀཀམྨཱདིཀོ ཝིདྷི དྷམྨཔརིབྷོགོ ན ཧོཏཱིཏི སཀྐཱ ཝཏྟུཾ ཨནཱམིསཏྟཱ དྷམྨཱམིསེསུ ཨཔརིཡཱཔནྣསྶ ཀསྶཙི ཨབྷཱཝཱ. ཏེནེཝ ཨཊྛསཱལིནིཡཾ དྷམྨཔཊིསནྡྷཱརཀཐཱཡཾ (དྷ. ས. ཨཊྛ. ༡༣༥༡)‘‘ཀམྨཊྛཱནཾ ཀཐེཏབྦཾ, དྷམྨོ ཝཱཙེཏབྦོ…པེ… ཨབྦྷཱནཝུཊྛཱནམཱནཏྟཔརིཝཱསཱ དཱཏབྦཱ, པབྦཛྫཱརཧོ པབྦཱཛེཏབྦོ, ཨུཔསམྤདཱརཧོ ཨུཔསམྤཱདེཏབྦོ…པེ… ཨཡཾ དྷམྨཔཊིསནྡྷཱརོ ནཱམཱ’’ཏི ཨེཝཾ སངྒྷཀམྨཱདིཔི དྷམྨཀོཊྛཱསེ དསྶིཏཾ. ཏེསུ པན དྷམྨཀོཊྛཱསེསུ ཡཾ གཎཔཱུརཎཱདིཝསེན ཨལཛྫིནོ ཨཔེཀྑིཏྭཱ ཨུཔོསཐཱདི ཝཱ ཏེསཾ སནྟིཀཱ དྷམྨུགྒཧཎནིསྶཡགྒཧཎཱདི ཝཱ ཀརཱིཡཏི, ཏཾ དྷམྨོ ཙེཝ པརིབྷོགོ ཙཱཏི དྷམྨཔརིབྷོགོཏི ཝུཙྩཏི, ཨེཏཾ ཏཐཱརཱུཔཔཙྩཡཾ ཝིནཱ ཀཱཏུཾ ན ཝཊྚཏི, ཀརོནྟསྶ ཨལཛྫིཔརིབྷོགོ ཙ ཧོཏི དུཀྐཊཉྩ. ཡཾ པན ཨལཛྫིསཏཾ ཨནཔེཀྑིཏྭཱ ཏཛྫནཱིཡཱདིནིགྒཧཀམྨཾ ¶ ཝཱ པརིཝཱསཱདིཨུཔཀཱརཀམྨཾ ཝཱ ཨུགྒཧཔརིཔུཙྪཱདཱནཱདི ཝཱ ཀརཱིཡཏི, ཏཾ དྷམྨོ ཨེཝ, ནོ པརིབྷོགོ. ཨེཏཾ ཨནུརཱུཔཱནཾ ཀཱཏུཾ ཝཊྚཏི, ཨཱམིསདཱནཾ ཝིཡ ཨཱཔཏྟི ནཏྠི. ནིསྶཡདཱནམྤི ཏེརསསམྨུཏིདཱནཱདི ཙ ཝཏྟཔཊིཝཏྟསཱདིཡནཱདིཔརིབྷོགསྶཱཔི ཧེཏུཏྟཱ ན ཝཊྚཏི.

ཡོ པན མཧཱཨལཛྫཱི ཨུདྡྷམྨཾ ཨུབྦིནཡཾ སཏྠུ སཱསནཾ ཀརོཏི, ཏསྶ སདྡྷིཝིཧཱརིཀཱདཱིནཾ ཨུཔསམྤདཱདིཨུཔཀཱརཀམྨམྤི ཨུགྒཧཔརིཔུཙྪཱདཱནཱདི ཙ ཀཱཏུཾ ན ཝཊྚཏི, ཨཱཔཏྟི ཨེཝ ཧོཏི, ནིགྒཧཀམྨམེཝ ཀཱཏབྦཾ. ཏེནེཝ ཨལཛྫིཔགྒཧོཔི པཊིཀྑིཏྟོ. དྷམྨཱམིསཔརིབྷོགཝིཝཛྫནེནཱཔི ཧི དུམྨངྐཱུནཾ པུགྒལཱནཾ ནིགྒཧོ ཨདྷིཔྤེཏོ, སོ ཙ པེསལཱནཾ ཕཱསུཝིཧཱརསདྡྷམྨཊྛིཏིཝིནཡཱནུགྒཧཱདིཨཏྠཱཡ ཨེཏདཏྠཏྟཱ སིཀྑཱཔདཔཉྙཏྟིཡཱ. ཏསྨཱ ཡཾ ཡཾ དུམྨངྐཱུནཾ ཨུཔཏྠམྦྷཱཡ པེསལཱནཾ ཨཕཱསུཝིཧཱརཱཡ སདྡྷམྨཔརིཧཱནཱདིཨཏྠཱཡ ཧོཏི, ཏཾ སབྦམྤི པརིབྷོགོ ཝཱ ཧོཏུ ཨཔརིབྷོགོ ཝཱ ཀཱཏུཾ ན ཝཊྚཏི, ཨེཝཾ ཀརོནྟཱ སཱསནཾ ཨནྟརདྷཱཔེནྟི, ཨཱཔཏྟིཉྩ ཨཱཔཛྫནྟི. དྷམྨཱམིསཔརིབྷོགེསུ ཙེཏྠ ཨལཛྫཱིཧི ཨེཀཀམྨཱདིདྷམྨཔརིབྷོགོ ཨེཝ པེསལཱནཾ ཨཕཱསུཝིཧཱརསདྡྷམྨཔརིཧཱནཱདིཨཏྠཱཡ ཧོཏི, ན ཏཐཱ ཨཱམིསཔརིབྷོགོ. ན ཧི ཨལཛྫཱིནཾ པཙྩཡཔརིབྷོགམཏྟེན པེསལཱནཾ ཨཕཱསུཝིཧཱརཱདི ཧོཏི, ཡཐཱཝུཏྟདྷམྨཔརིབྷོགེན པན ཧོཏི ¶ , ཏཔྤརིཝཛྫནེན ཙ ཕཱསུཝིཧཱརཱདཡོ. ཏཐཱ ཧི ཀཏསིཀྑཱཔདཝཱིཏིཀྐམཱ ཨལཛྫིཔུགྒལཱ ཨུཔོསཐཱདཱིསུ པཝིཊྛཱ ‘‘ཏུམྷེ ཀཱཡདྭཱརེ, ཝཙཱིདྭཱརེ ཙ ཝཱིཏིཀྐམཾ ཀརོཐཱ’’ཏིཨཱདིནཱ བྷིཀྑཱུཧི ཝཏྟབྦཱ ཧོནྟི, ཡཐཱ ཝིནཡཉྩ ཨཏིཊྛནྟཱ སངྒྷཏོ བཧིཀརཎཱདིཝསེན སུཊྛུ ནིགྒཧེཏབྦཱ, ཏཐཱ ཨཀཏྭཱ ཏེཧི སཧ སཾཝསནྟཱཔི ཨལཛྫིནོཝ ཧོནྟི ‘‘ཨེཀོཔི ཨལཛྫཱི ཨལཛྫིསཏམྤི ཀརོཏཱི’’ཏིཨཱདིཝཙནཏོ (པཱརཱ. ཨཊྛ. ༢.༥༨༥). ཡདི ཧི ཏེ ཨེཝཾ ན ནིགྒཧིཏཱ སིཡུཾ, སངྒྷེ ཀལཧཱདིཾ ཝཌྜྷེཏྭཱ ཨུཔོསཐཱདིསཱམགྒཱིཀམྨཔཊིབཱཧནཱདིནཱ པེསལཱནཾ ཨཕཱསུཾ ཀཏྭཱ ཀམེན ཏེ དེཝདཏྟཝཛྫིཔུཏྟཀཱདཡོ ཝིཡ པརིསཾ ཝཌྜྷེཏྭཱ ཨཏྟནོ ཝིཔྤཊིཔཏྟིཾ དྷམྨཏོ ཝིནཡཏོ དཱིཔེནྟཱ སངྒྷབྷེདཱདིམྤི ཀཏྭཱ ནཙིརསྶེཝ སཱསནཾ ཨནྟརདྷཱཔེཡྻུཾ, ཏེསུ པན སངྒྷཏོ བཧིཀརཎཱདིཝསེན ནིགྒཧིཏེསུ སབྦོཔཱཡཾ ཨུཔདྡཝོ ན ཧོཏི. ཝུཏྟཉྷི –

‘‘དུསྶཱིལཔུགྒལེ ¶ ནིསྶཱཡ ཨུཔོསཐོ ན ཏིཊྛཏི, པཝཱརཎཱ ན ཏིཊྛཏི, སངྒྷཀམྨཱནི ནཔྤཝཏྟནྟི, སཱམགྒཱི ན ཧོཏི…པེ… དུསྶཱིལེསུ པན ནིགྒཧིཏེསུ སབྦོཔི ཨཡཾ ཨུཔདྡཝོ ན ཧོཏི, ཏཏོ པེསལཱ བྷིཀྑཱུ ཕཱསུ ཝིཧརནྟཱི’’ཏི (པཱརཱ. ཨཊྛ. ༡.༣༩).

ཏསྨཱ ཨེཀཀམྨཱདིདྷམྨཔརིབྷོགོཝ ཨཱམིསཔརིབྷོགཏོཔི ཨཏིཝིཡ ཨལཛྫིཝིཝེཀེན ཀཱཏབྦོ, ཨཱཔཏྟིཀརོ ཙ སདྡྷམྨཔརིཧཱནིཧེཏུཏྟཱཏི ཝེདིཏབྦཾ.

ཨཔིཙ ཨུཔོསཐོ ན ཏིཊྛཏི, པཝཱརཎཱ ན ཏིཊྛཏི, སངྒྷཀམྨཱནི ནཔྤཝཏྟནྟཱིཏི ཨེཝཾ ཨལཛྫཱིཧི སདྡྷིཾ སངྒྷཀམྨཱཀརཎསྶ ཨཊྛཀཐཱཡཾ པཀཱསིཏཏྟཱཔི ཙེཏཾ སིཛ྄ཛྷཏི, ཏཐཱ པརིཝཏྟལིངྒསྶ བྷིཀྑུནོ བྷིཀྑུནུཔསྶཡཾ གཙྪནྟསྶ པཊིཔཏྟིཀཐཱཡཾ ‘‘ཨཱརཱདྷིཀཱ ཙ ཧོནྟི སངྒཱཧིཀཱ ལཛྫིནིཡོ, ཏཱ ཀོཔེཏྭཱ ཨཉྙཏྠ ན གནྟབྦཾ. གཙྪཏི ཙེ, གཱམནྟརནདཱིཔཱརརཏྟིཝིཔྤཝཱསགཎཨོཧཱིཡནཱཔཏྟཱིཧི ན མུཙྩཏི…པེ… ཨལཛྫིནིཡོ ཧོནྟི, སངྒཧཾ པན ཀརོནྟི, ཏཱཔི པརིཙྩཛིཏྭཱ ཨཉྙཏྠ གནྟུཾ ལབྦྷཏཱི’’ཏི ཨེཝཾ ཨལཛྫིནཱིསུ དུཏིཡིཀཱགཧཎཱདཱིསུ སཾཝཱསཱཔཏྟིཔརིཧཱརཱཡ ནདཱིཔཱརགམནཱདིགརུཀཱཔཏྟིཊྛཱནཱནཾ ཨནུཉྙཱཏཏྟཱ ཏཏོཔི ཨལཛྫིསཾཝཱསཱཔཏྟི ཨེཝ སདྡྷམྨཔརིཧཱནིཧེཏུཏོ གརུཀཏརཱཏི ཝིཉྙཱཡཏི. ན ཧི ལཧུཀཱཔཏྟིཊྛཱནཾ, ཨནཱཔཏྟིཊྛཱནཾ ཝཱ པརིཧརིཏུཾ གརུཀཱཔཏྟིཊྛཱནཝཱིཏིཀྐམཾ ཨཱཙརིཡཱ ཨནུཛཱནནྟི, ཏཐཱ ཨསཾཝཱསཔདསྶ ཨཊྛཀཐཱཡཾ ‘‘སབྦེཧིཔི ལཛྫིཔུགྒལེཧི སམཾ སིཀྑིཏབྦབྷཱཝཏོ སམསིཀྑཱཏཱ ནཱམ. ཨེཏྠ ཡསྨཱ སབྦེཔི ལཛྫིནོ ཨེཏེསུ ཀམྨཱདཱིསུ སཧ ¶ ཝསནྟི, ན ཨེཀོཔི ཏཏོ བཧིདྡྷཱ སནྡིསྶཏི, ཏསྨཱ ཏཱནི སབྦཱནིཔི གཧེཏྭཱ ཨེསོ སཾཝཱསོ ནཱམཱ’’ཏི ཨེཝཾ ལཛྫཱིཧེཝ ཨེཀཀམྨཱདིསཾཝཱསོ ཝཊྚཏཱིཏི པཀཱསིཏོ.

ཡདི ཨེཝཾ, ཀསྨཱ ཨསཾཝཱསིཀེསུ ཨལཛྫཱི ན གཎིཏོཏི? ནཱཡཾ ཝིརོདྷོ, ཡེ གཎཔཱུརཀེ ཀཏྭཱ ཀཏཾ ཀམྨཾ ཀུཔྤཏི, ཏེསཾ པཱརཱཛིཀཱདིཨཔཀཏཏྟཱནཉྙེཝ ཨསཾཝཱསིཀཏྟེ གཧིཏཏྟཱ. ཨལཛྫིནོ པན པཀཏཏྟབྷཱུཏཱཔི སནྟི, ཏེ ཙེ གཎཔཱུརཎཱ ཧུཏྭཱ ཀམྨཾ སཱདྷེནྟི, ཀེཝལཾ ཀཏྭཱ ཨགཏིགམནེན ཀརོནྟཱནཾ ཨཱཔཏྟིཀརཱ ཧོནྟི སབྷཱགཱཔཏྟིཨཱཔནྣཱ ¶ ཝིཡ ཨཉྙམཉྙཾ. ཡསྨཱ ཨལཛྫིཏཉྩ ལཛྫིཏཉྩ པུཐུཛྫནཱནཾ ཙིཏྟཀྑཎཔཊིབདྡྷཾ, ན སབྦཀཱལིཀཾ. སཉྩིཙྩ ཧི ཝཱིཏིཀྐམཙིཏྟེ ཨུཔྤནྣེ ཨལཛྫིནོ ‘‘ན པུན ཨཱིདིསཾ ཀརིསྶཱམཱི’’ཏི ཙིཏྟེན ལཛྫིནོ ཙ ཧོནྟི, ཏེསུ ཙ ཡེ པེསལེཧི ཨོཝདིཡམཱནཱཔི ན ཨོརམནྟི, པུནཔྤུནཾ ཝཱིཏིཀྐམནྟི, ཏེ ཨེཝ ཨསཾཝསིཏབྦཱ, ན ཨིཏརེ ལཛྫིདྷམྨེ ཨོཀྐནྟཏྟཱ. ཏསྨཱཔི ཨལཛྫིནོ ཨསཾཝཱསིཀེསུ ཨགཎེཏྭཱ ཏཔྤརིཝཛྫནཏྠཾ སོདྷེཏྭཱཝ ཨུཔོསཐཱདིཀརཎཾ ཨནུཉྙཱཏཾ. ཏཐཱ ཧི ‘‘པཱརིསུདྡྷིཾ ཨཱཡསྨནྟོ ཨཱརོཙེཐ, པཱཏིམོཀྑཾ ཨུདྡིསིསྶཱམཱི’’ཏིཨཱདིནཱ (མཧཱཝ. ༡༣༤) ཨཔརིསུདྡྷཱཡ པརིསཱཡ ཨུཔོསཐཀརཎསྶ ཨཡུཏྟཏཱ པཀཱསིཏཱ, ‘‘ཡསྶ སིཡཱ ཨཱཔཏྟི སོ ཨཱཝིཀརེཡྻ…པེ… ཕཱསུ ཧོཏཱི’’ཏི (མཧཱཝ. ༡༣༤) ཨེཝཾ ཨལཛྫིམྤི ལཛྫིདྷམྨེ པཏིཊྛཱཔེཏྭཱ ཨུཔོསཐཀརཎཔྤཀཱརོ ཙ ཝུཏྟོ, ‘‘ཀཙྩིཏྠ པརིསུདྡྷཱ…པེ… པརིསུདྡྷེཏྠཱཡསྨནྟོ’’ཏི (པཱརཱ. ༤༤༢, ༤༥༨, ༦༦༢; པཱཙི. ༥༥༡, ༥༧༥, ༦༥༥) ཙ པཱརིསུདྡྷིཨུཔོསཐེ ‘‘པརིསུདྡྷོ ཨཧཾ བྷནྟེ, པརིསུདྡྷོཏི མཾ དྷཱརེཐཱ’’ཏི (མཧཱཝ. ༡༦༨) ཙ ཨེཝཾ ཨུཔོསཐཾ ཀརོནྟཱནཾ པརིསུདྡྷཏཱ ཙ པཀཱསིཏཱ, ཝཙནམཏྟེན ཨནོརམནྟཱནཉྩ ཨུཔོསཐཔཝཨཱརཎཊྛཔནཝིདྷི ཙ ཝུཏྟཱ, སབྦཐཱ ལཛྫིདྷམྨཾ ཨནོཀྐམནྟེཧི སཾཝཱསསྶ ཨཡུཏྟཏཱཡ ནིསྶཡདཱནགྒཧཎཔཊིཀྑེཔོ, ཏཛྫནཱིཡཱདིནིགྒཧཀམྨཀརཎཉྩ ཨུཀྑེཔནཱིཡཀམྨཀརཎེན སཱནུཝཏྟཀཔརིསསྶ ཨལཛྫིསྶ ཨསཾཝཱསིཀཏྟཔཱཔནཝིདྷི ཙ ཝུཏྟཱ. ཏསྨཱ ཡཐཱཝུཏྟེཧི སུཏྟནཡེཧི, ཨཊྛཀཐཱཝཙནེཧི ཙ པཀཏཏྟེཧིཔི ཨཔཀཏཏྟེཧིཔི སབྦེཧི ཨལཛྫཱིཧི ཨེཀཀམྨཱདིསཾཝཱསོ ན ཝཊྚཏི, ཀརོནྟཱནཾ ཨཱཔཏྟི ཨེཝ དུམྨངྐཱུནཾ པུགྒལཱནཾ ནིགྒཧཏྠཱཡེཝ སབྦསིཀྑཱཔདཱནཾ པཉྙཏྟཏྟཱཏི ནིཊྛམེཏྠ གནྟབྦཾ. ཏེནེཝ དུཏིཡསངྒཱིཏིཡཾ པཀཏཏྟཱཔི ཨལཛྫིནོ ཝཛྫིཔུཏྟཀཱ ཡསཏྠེརཱདཱིཧི མཧནྟེན ཝཱཡཱམེན སངྒྷཏོ ཝིཡོཛིཏཱ. ན ཧི ཏེསུ པཱརཱཛིཀཱདིཨསཾཝཱསིཀཱ ཨཏྠི ཏེཧི དཱིཔིཏཱནཾ དསནྣཾ ཝཏྠཱུནཾ (ཙཱུལ༹ཝ. ༤༥༢) ལཧུཀཱཔཏྟིཝིསཡཏྟཱ.

ཏསྶ པན སནྟིཀེཏི མཧཱརཀྑིཏཏྠེརསྶ སནྟིཀེ. ཁརཔཏྟནྟི ཁརསངྑཱཏཾ སུཝཎྞཔཏིརཱུཔཀཾ ¶ ཝཏྠུ. དཱཡཀེཧི ཨསཏིཡཱ དིནྣཾ རཱུཔིཡཾ ཏེཧི པུན སཀསཉྙཱཡ གཎྷནྟེ ཨདཱཏུཾ, ནིསྶགྒིཡཝཏྠུཾ གཎྷཱཧཱིཏི དཱཏུཉྩ ¶ ན ཝཊྚཏཱིཏི ཨཱཧ ‘‘ཏཝ ཙོལ༹ཀཾ པསྶཱཧཱི’’ཏི. ཨེཝཾ ཝཏྭཱཔི པན ནཊྛཝཏྠུསྨིཾ ཝིཡ ནིསྶཛྫིཏབྦཱབྷཱཝེཔི ཨཱཔཏྟི དེསེཏབྦཱཝ. ཨསཏིཡཱཔི ཧི ཏཾ ཝཏྠུཾ ཝཏྠཱདིནཱ སཧཏྠེན གཧེཏྭཱ ‘‘ཨིདཾ དེམཱི’’ཏི དིནྣཾ, ཏདཱ པརིཙྩཱགསབྦྷཱཝཏོ དཱནམེཝ ཧོཏི ‘‘ཨཔྤགྒྷཾ དསྶཱམཱི’’ཏི མཧགྒྷསྶ དཱནེ ཝིཡ. པཊིགྒཎྷནྟསྶ ཙ ཨསཏིཡཱ དིཡྻམཱནཏྟེ ཉཱཏེཔི ཨདིནྣཱདཱནཾ ན ཧོཏི དཱཡཀེཧི དིནྣཏྟཱ, ཏསྨཱ རཱུཔིཡཾ ནིསྶགྒིཡམེཝ ཧོཏི. ཀེཙི པན ‘‘ཨཱིདིསཾ ནཱམ ན ཧོཏི, ཏེནེཝ ཙེཏྠ ‘ཏཝ ཙོལ༹ཀཾ པསྶཱ’ཏི ཝུཏྟ’’ནྟི ཝདནྟི, ཏཾ ནོ ནཀྑམཏི, ཝཱིམཾསིཏབྦཾ.

༥༨༦. ཨེཀཔརིཙྪེདཱནཱིཏི སིཡཱ ཀིརིཡཏྟཾ, སིཡཱ ཨཀིརིཡཏྟཉྩ སནྡྷཱཡ ཝུཏྟཾ. ཛཱཏརཱུཔརཛཏབྷཱཝོ, ཨཏྟུདྡེསིཀཏཱ, གཧཎཱདཱིསུ ཨཉྙཏརབྷཱཝོཏི ཨིམཱནེཏྠ ཏཱིཎི ཨངྒཱནི.

རཱུཔིཡསིཀྑཱཔདཝཎྞནཱ ནིཊྛིཏཱ.

༩. རཱུཔིཡསཾཝོཧཱརསིཀྑཱཔདཝཎྞནཱ

༥༨༧. ནཝམེ ཛཱཏརཱུཔཱདིཙཏུབྦིདྷནིསྶགྒིཡཝཏྠུ ཨིདྷ རཱུཔིཡགྒཧཎེནེཝ གཧིཏནྟི ཨཱཧ ‘‘ཛཱཏརཱུཔརཛཏཔརིཝཏྟན’’ནྟི. པཊིགྒཧིཏཔརིཝཏྟནེཏི ཀཔྤིཡཝོཧཱརེན, ཨཀཔྤིཡཝོཧཱརེན ཝཱ པཊིགྒཧིཏསྶ རཱུཔིཡསྶ པརིཝཏྟནེ.

༥༨༩. པཱལི༹ཡཾ གྷནཀཏནྟི ཨིཊྛཀཱདི. རཱུཔིཡཾ ནཱམ སཏྠུཝཎྞོཏིཨཱདཱིསུ ཀིཉྩཱཔི ཀེཝལཾ རཛཏཾ ན གཧིཏཾ, ཏཐཱཔི རཱུཔིཡཔདེནེཝ ཏཾ གཧིཏནྟི དཊྛབྦཾ. སུདྡྷོ རཱུཔིཡསཾཝོཧཱརོ ཨེཝ ཝུཏྟོཏི ཨཛ྄ཛྷཱཧརིཏབྦཾ. རཱུཔིཡེ རཱུཔིཡསཉྙཱིཏིཨཱདིམྷི ཝིནིཙྪཡཾ ཝཀྑཱམཱཏི པཱཋསེསོ.

༥༩༡. པཱལི༹ཡཾ རཱུཔིཡེ རཱུཔིཡསཉྙཱིཏི ཨཏྟནཱ དིཡྻམཱནཾ སཀསནྟཀཾ སནྡྷཱཡ ཝུཏྟཾ. རཱུཔིཡཾ ཙེཏཱཔེཏཱིཏི པརསནྟཀཾ. ཨེས ནཡོ སེསེསུཔི. ཏཏྠ ཨརཱུཔིཡ-སདྡེན དུཀྐཊཝཏྠུམྤི སངྒཎྷཱཏི. པཙྪིམེ པན ཏིཀེ ‘‘ཨརཱུཔིཡེ རཱུཔིཡསཉྙཱི ཨརཱུཔིཡཾ ཙེཏཱཔེཏི, ཨཱཔཏྟི དུཀྐཊསྶཱ’’ཏི ཨིམིནཱ ནཡེན སབྦཏྠ ཡོཛནཱ ཝེདིཏབྦཱ. ཨིམསྨིཉྩ ཏིཀེ ཨརཱུཔིཡ-སདྡེན ཀཔྤིཡཝཏྠུཡེཝ གཧིཏཾ, ན མུཏྟཱདིདུཀྐཊཝཏྠུ ཨནྟེ ‘‘པཉྩནྣཾ སཧ ཨནཱཔཏྟཱི’’ཏི ¶ ཝུཏྟཏྟཱ. ཀིཉྩཱཔི ¶ དུཀྐཊཝཏྠུ ན གཧིཏཾ, ཏཐཱཔི དུཀྐཊཝཏྠུནཱ དུཀྐཊཝཏྠུཾ, ཀཔྤིཡཝཏྠུནཱ དུཀྐཊཝཏྠུཉྩ པརིཝཏྟཡཏོ དུཀྐཊཾ, ནཡཏོ སིདྡྷམེཝ ཧོཏི. ཏཉྩ དུཀྐཊཝཏྠུམྷི ཏཐསཉྙཱཡ ཝཱ ཨཏཐསཉྙཱཡ ཝཱ ཝིམཏིཡཱ ཝཱ པརིཝཏྟེནྟསྶཔི ཧོཏིཡེཝ ཨཙིཏྟཀཏྟཱ ཨིམསྶ སིཀྑཱཔདསྶ. པཉྩནྣཾ སཧཱཏི པཉྩཧི སཧདྷམྨིཀེཧི སཧ.

ཨིདཱནི ‘‘ནིསྶགྒིཡཝཏྠུནཱ དུཀྐཊཝཏྠུཾ ཝཱ’’ཏིཨཱདིནཱ ཝུཏྟསྶ ཨཏྠསྶ པཱལི༹ཡཾ སརཱུཔེན ཨནཱགཏཏྟེཔི ནཡཏོ ལབྦྷམཱནཏཾ དསྶེཏུཾ ‘‘ཡོ ཧི ཨཡ’’ནྟིཨཱདི ཝུཏྟཾ. ཨེཏྠ ཙ ཡསྨཱ རཱུཔིཡེན པརིཝཏྟིཏཾ ཨརཱུཔིཡཾ ནིསྶཊྛམྤི སབྦེསམྤི ཨཀཔྤིཡཏྟཱ ནིསྶགྒིཡམེཝ ན ཧོཏི ནིསྶཛྫིཏྭཱ པརིབྷུཉྫིཏབྦསྶེཝ ནིསྶཛྫིཏབྦཏོ, ཀེཝལཾ པན ཨིདཾ ཚཌྜེཏྭཱ པཱཙིཏྟིཡམེཝ པརིཝཏྟཀེན དེསེཏབྦཾ, ཏསྨཱ ‘‘རཱུཔིཡེ རཱུཔིཡསཉྙཱི ཨརཱུཔིཡཾ ཙེཏཱཔེཏི, ནིསྶགྒིཡཾ པཱཙིཏྟིཡ’’ནྟིཨཱདི ཏིཀོ བྷགཝཏཱ ན ཝུཏྟོ, ཏཱིསུཔི པདེསུ པརིཝཏྟིཡམཱནསྶ ཨརཱུཔིཡཏྟེན ནིསྶགྒིཡཝཙནཱཡོགཱ རཱུཔིཡསྶེཝ ནིསྶཛྫིཏབྦཏོ. རཱུཔིཡསྶེཝ ཧི ནིསྶཊྛསྶ ཨཱརཱམིཀཱདཱིཧི པཊིཔཛྫནཝིདྷི པཱལི༹ཡཾ དསྶིཏོ, ན ཨརཱུཔིཡསྶ. ཏསྨཱ པཱཙིཏྟིཡམཏྟསམྦྷཝདསྶནཏྠམེཝ པནེཏྠ ཨཊྛཀཐཱཡཾ ‘‘ཨཝུཏྟོཔི ཨཡཾ…པེ… ཏིཀོ ཝེདིཏབྦོ’’ཏི ཝུཏྟཾ, ན པན ཏསྶ ཝཏྠུནོ ནིསྶགྒིཡཏཱདསྶནཏྠཾ. ཏེནེཝ པཏྟཙཏུཀྐེ ‘‘ན སཀྐཱ ཀེནཙི ཨུཔཱཡེན ཀཔྤིཡཾ ཀཱཏུ’’ནྟིཨཱདི ཝུཏྟཾ. ཨཡཾ ཨམྷཱཀཾ ཁནྟི. ཨཏྟནོ ཝཱ ཧཱིཏིཨཱདི དུཏིཡཏིཀཱནུལོམེནེཝ ཏཏིཡཏྟིཀསྶ སིཛ྄ཛྷནཔྤཀཱརཾ སམཏྠེཏུཾ ཝུཏྟཾ. ཏཏྲཱཡཾ ཨདྷིཔྤཱཡོ – ཡསྨཱ ཧི ཡཐཱ ཨཏྟནོ ཨརཱུཔིཡེན པརསྶ རཱུཔིཡཾ ཙེཏཱཔེནྟསྶ ཨེཀསྨིཾ ཨནྟེ རཱུཔིཡསམྦྷཝཏོ ‘‘རཱུཔིཡསཾཝོཧཱརོ ཀཏོ ཨེཝ ཧོཏཱི’’ཏི དུཏིཡཏྟིཀོ ཝུཏྟོ, ཨེཝཾ ཨཏྟནོ རཱུཔིཡེན པརསྶ ཨརཱུཔིཡཾ ཙེཏཱཔེནྟསྶཱཔི ཧོཏཱིཏི ཏཏིཡོ ཏིཀོ ཝཏྟབྦོ བྷཝེཡྻ, སོ པན དུཏིཡཏྟིཀེནེཝ ཨེཀཏོ རཱུཔིཡཔཀྑསཱམཉྙེན སིཛ྄ཛྷཏཱིཏི པཱལི༹ཡཾ ན ཝུཏྟོཏི. ཏཏྠ ཨེཀནྟེན རཱུཔིཡཔཀྑེཏི ཨེཀེན ཨནྟེན རཱུཔིཡཔཀྑེ, ‘‘ཨེཀཏོ རཱུཔིཡཔཀྑེ’’ཏི ཝཱ པཱཋོ.

ཨིདཱནི དུཏིཡཏྟིཀེ ཨརཱུཔིཡཔདསྶ ཨཏྠབྷཱུཏེསུ དུཀྐཊཝཏྠུཀཔྤིཡཝཏྠཱུསུ དུཀྐཊཝཏྠུནཱ རཱུཔིཡཱདིཔརིཝཏྟནེ ཨཱཔཏྟིབྷེདཾ དསྶེཏུཾ ‘‘དུཀྐཊཝཏྠུནཱ’’ཏིཨཱདི ¶ ཨཱརདྡྷཾ. དུཀྐཊཝཏྠུནཱ དུཀྐཊཝཏྠུནྟིཨཱདི པན དུཀྐཊཝཏྠུནཱ པརིཝཏྟནཔྤསངྒེ པཱལི༹ཡཾ ཨཝུཏྟསྶཱཔི ཨཏྠསྶ ནཡཏོ ལབྦྷམཱནཏཾ དསྶེཏུཾ ཝུཏྟཾ. ཏཏྠ ཨིམིནཱཏི རཱུཔིཡསཾཝོཧཱརསིཀྑཱཔདེན, ཏེན ཙ དུཀྐཊསྶ ཨཙིཏྟཀཏམྤི དསྶེཏི. ཨཉྙཏྲ སཧདྷམྨིཀེཧཱིཏི ‘‘པཉྩནྣཾ སཧ ཨནཱཔཏྟཱི’’ཏི ཝཙནཏོ ཝུཏྟཾ, ཏེནཱཔི ཀཡཝིཀྐཡསིཀྑཱཔདསྶ ཀཔྤིཡཝཏྠུནིསྶིཏཏཾ ཨེཝ སཱདྷེཏི. ཨིམཾ…པེ… རཱུཔིཡཙེཏཱཔནཉྩ ¶ སནྡྷཱཡ ཝུཏྟནྟི པཀཏེན སམྦནྡྷོ. ཨིདྷཱཏི ཨིམསྨིཾ སིཀྑཱཔདེ. ཏཏྠཱཏི ཀཡཝིཀྐཡསིཀྑཱཔདེ (པཱརཱ. ༥༩༣).

ཨེཝཾ དུཀྐཊཝཏྠུནཱ རཱུཔིཡཱདིཔརིཝཏྟནེ ཨཱཔཏྟིབྷེདཾ དསྶེཏྭཱ ཨིདཱནི ཀཔྤིཡཝཏྠུནཱཔི དསྶེཏུཾ ‘‘ཀཔྤིཡཝཏྠུནཱ པནཱ’’ཏིཨཱདི ཨཱརདྡྷཾ. ཏཏྠ ཏེནེཝཱཏི ཀཔྤིཡཝཏྠུནཱ ཨེཝ. ‘‘རཱུཔིཡཾ ཨུགྒཎྷིཏྭཱ’’ཏི ཨིདཾ ཨུཀྐཊྛཝསེན ཝུཏྟཾ. མུཏྟཱདིདུཀྐཊཝཏྠུམྤི ཨུགྒཧེཏྭཱ ཀཱརིཏམྤི པཉྩནྣམྤི ན ཝཊྚཏི ཨེཝ. སམུཊྛཱཔེཏཱིཏི སཡཾ གནྟྭཱ, ‘‘ཨིམཾ ཀཧཱཔཎཱདིཾ ཀམྨཀཱརཱནཾ དཏྭཱ བཱིཛཾ སམུཊྛཱཔེཧཱི’’ཏི ཨེཝཾ ཨཉྙཾ ཨཱཎཱཔེཏྭཱ ཝཱ སམུཊྛཱཔེཏི. མཧཱཨཀཔྤིཡོཏི ཨཏྟནཱཝ བཱིཛཏོ པཊྛཱཡ དཱུསིཏཏྟཱ ཨཉྙསྶ མཱུལསཱམིཀསྶ ཨབྷཱཝཏོ ཝུཏྟཾ. སོ ཧི ཙོརེཧི ཨཙྪིནྣོཔི པུན ལདྡྷོ ཛཱནནྟསྶ ཀསྶཙིཔི ན ཝཊྚཏི. ཡདི ཧི ཝཊྚེཡྻ, ཏལཱ༹ཀཱདཱིསུ ཝིཡ ཨཙྪིནྣོ ཝཊྚཏཱིཏི ཨཱཙརིཡཱ ཝདེཡྻུཾ. ན སཀྐཱ ཀེནཙི ཨུཔཱཡེནཱཏི སངྒྷེ ནིསྶཛྫནེན, ཙོརཱདིཨཙྪིནྡནཱདིནཱ ཙ ཀཔྤིཡཾ ཀཱཏུཾ ན སཀྐཱ, ཨིདཉྩ ཏེན རཱུཔེན ཋིཏཾ, ཏམྨཱུལིཀེན ཝཏྠུམུཏྟཱདིརཱུཔེན ཋིཏཉྩ སནྡྷཱཡ ཝུཏྟཾ. དུཀྐཊཝཏྠུམྤི ཧི ཏམྨཱུལིཀཀཔྤིཡཝཏྠུཉྩ ན སཀྐཱ ཀེནཙི ཨུཔཱཡེན ཏེན རཱུཔེན ཀཔྤིཡཾ ཀཱཏུཾ. ཡདི པན སོ བྷིཀྑུ ཏེན ཀཔྤིཡཝཏྠུདུཀྐཊཝཏྠུནཱ པུན རཱུཔིཡཾ ཙེཏཱཔེཡྻ, ཏཾ རཱུཔིཡཾ ནིསྶཛྫཱཔེཏྭཱ ཨཉྙེསཾ ཀཔྤིཡཾ ཀཱཏུམྤི སཀྐཱ བྷཝེཡྻཱཏི དཊྛབྦཾ.

པཏྟཾ ཀིཎཱཏཱིཏི ཨེཏྠ ‘‘ཨིམིནཱ ཀཧཱཔཎཱདིནཱ ཀམྨཱརཀུལཏོ པཏྟཾ ཀིཎིཏྭཱ ཨེཧཱི’’ཏི ཨཱརཱམིཀཱདཱིཧི ཀིཎཱཔནམྤི སངྒཧིཏནྟི ཝེདིཏབྦཾ. ཏེནེཝ རཱཛསིཀྑཱཔདཊྛཀཐཱཡཾ ‘‘ཨེཏྟཀེཧི ཀཧཱཔཎེཧི སཱཊཀེ ཨཱཧར, ཨེཏྟཀེཧི ཡཱགུཨཱདཱིནི སམྤཱདེཧཱིཏི ཝདཏི, ཡཾ ཏེ ཨཱཧརནྟི, སབྦེསཾ ཨཀཔྤིཡཾ. ཀསྨཱ? ཀཧཱཔཎཱནཾ ཝིཙཱརིཏཏྟཱ’’ཏི (པཱརཱ. ཨཊྛ. ༢.༥༣༨-༥༣༩) ཝུཏྟཾ ¶ . ཨིམིནཱ པན ཝཙནེན ཡཾ མཱཏིཀཱཊྛཀཐཱཡཾ རཱུཔིཡསཾཝོཧཱརསིཀྑཱཔདཾ ‘‘ཨནཱཎཏྟིཀ’’ནྟི ཝུཏྟཾ, ཏཾ ན སམེཏི. ན ཀེཝལཉྩ ཨིམིནཱ, པཱལི༹ཡཱཔི ཏཾ ན སམེཏི. པཱལི༹ཡཉྷི ནིསྶཊྛརཱུཔིཡེན ཨཱརཱམིཀཱདཱིཧི སཔྤིཡཱདིཾ པརིཝཏྟཱཔེཏུཾ ‘‘སོ ཝཏྟབྦོ ‘ཨཱཝུསོ, ཨིམཾ ཛཱནཱཧཱི’ཏི. སཙེ སོ བྷཎཏི ‘ཨིམིནཱ ཀིཾ ཨཱཧརཱིཡཏཱུ’ཏི, ན ཝཏྟབྦོ ‘ཨིམཾ ཝཱ ཨིམཾ ཝཱ ཨཱཧརཱ’ཏི. ཀཔྤིཡཾ ཨཱཙིཀྑིཏབྦཾ ‘སཔྤི ཝཱ’’’ཏིཨཱདིནཱ རཱུཔིཡསཾཝོཧཱརཾ པརིམོཙེཏྭཱཝ ཝུཏྟཾ. ‘‘ཨིམིནཱ རཱུཔིཡེན ཀིཾ ཨཱཧརཱིཡཏཱུ’’ཏི པུཙྪནྟོ ‘‘ཨིམཾ ཨཱཧརཱ’’ཏི ཝུཏྟེཔི ཨདྷིཀཱརཏོ ‘‘ཨིམིནཱ རཱུཔིཡེན ཨིམཾ ཨཱཧརཱ’’ཏི བྷིཀྑཱུཧི ཨཱཎཏྟོ ཨེཝ ཧོཏཱིཏི ཏཾ རཱུཔིཡསཾཝོཧཱརཾ པརིཝཛྫེཏུཾ ‘‘ན ཝཏྟབྦོ ‘ཨིམཾ ཝཱ ཨིམཾ ཝཱ ཨཱཧརཱ’’’ཏི པཊིཀྑེཔོ ཀཏོ, ཨནཱཔཏྟིཝཱརེཔི ‘‘ཀཔྤིཡཀཱརཀསྶ ¶ ཨཱཙིཀྑཏཱི’’ཏི ན ཝུཏྟཾ. ཀཡཝིཀྐཡསིཀྑཱཔདེ (པཱརཱ. ༥༩༥) པན ཏཐཱ ཝུཏྟཾ, ཏསྨཱ ཨིདཾ སཱཎཏྟིཀཾ ཀཡཝིཀྐཡམེཝ ཨནཱཎཏྟིཀནྟི གཧེཏབྦཾ.

མཱུལསྶ ཨནིསྶཊྛཏྟཱཏི ཡེན ཨུགྒཧིཏམཱུལེན པཏྟོ ཀཱིཏོ, ཏསྶ མཱུལསྶ སངྒྷམཛ྄ཛྷེ ཨནིསྶཊྛཏྟཱ, ཨེཏེན རཱུཔིཡམེཝ ནིསྶཛྫིཏབྦཾ, ན ཏམྨཱུལིཀཾ ཨརཱུཔིཡནྟི དསྶེཏི. ཡདི ཧི ཏེན རཱུཔིཡེན ཨཉྙཾ རཱུཔིཡཾ ཙེཏཱཔེཡྻ, ཏཾ རཱུཔིཡསཾཝོཧཱརསིཀྑཱཔདེ ཨཱགཏནཡེནེཝ ནིསྶཛྫཱཔེཏྭཱ སེསེཧི པརིབྷུཉྫིཏབྦཾ བྷཝེཡྻཱཏི. ‘‘མཱུལསྶ ཨསམྤཊིཙྪིཏཏྟཱ’’ཏི ཨིམིནཱ མཱུལསྶ གིཧིསནྟཀཏྟཾ, ཏེནེཝ པཏྟསྶ རཱུཔིཡསཾཝོཧཱརཱནུཔྤནྣཏཉྩ དསྶེཏི. པཉྩསཧདྷམྨིཀསནྟཀེནེཝ ཧི རཱུཔིཡསཾཝོཧཱརདོསོ. ཏཏྠ ཙ ཨཏྟནོ སནྟཀེ པཱཙིཏྟིཡཾ, ཨིཏརཏྠ དུཀྐཊཾ.

ནིསྶཛྫཱིཏི དཱནཝསེན ཝུཏྟཾ, ན ཝིནཡཀམྨཝསེན. ཏེནེཝ ‘‘སཔྤིསྶ པཱུརེཏྭཱ’’ཏི ཝུཏྟཾ. ཡཾ ཨཏྟནོ དྷནེན པརིཝཏྟེཏི, ཏསྶ ཝཱ དྷནསྶ རཱུཔིཡབྷཱཝོ, པརིཝཏྟནཔརིཝཏྟཱཔནེསུ ཨཉྙཏརབྷཱཝོ ཙཱཏི ཨིམཱནེཏྠ དྭེ ཨངྒཱནི.

རཱུཔིཡསཾཝོཧཱརསིཀྑཱཔདཝཎྞནཱ ནིཊྛིཏཱ.

༡༠. ཀཡཝིཀྐཡསིཀྑཱཔདཝཎྞནཱ

༥༩༣-༥. དསམེ ¶ པཱལི༹ཡཾ ཛཱནཱཧཱིཏི ཨིདཱནེཝ ཨུཔདྷཱརེཧི, ཨིདཾ པཙྪཱ ཚཌྜེཏུཾ ན སཀྐཱཏི ཨདྷིཔྤཱཡོ. ཨིམིནཱཏི བྷིཀྑུནཱ དིཡྻམཱནཾ ཝུཏྟཾ. ཨིམནྟི པརེན པཊིདིཡྻམཱནཾ. སེསཉཱཏཀེསུ སདྡྷཱདེཡྻཝིནིཔཱཏསམྦྷཝཏོ ཏདབྷཱཝཊྛཱནམྤི དསྶེཏུཾ ‘‘མཱཏརཾ པན པིཏརཾ ཝཱ’’ཏི ཝུཏྟཾ. ན སཀྐཱ ཏཾ པཊིཀྑིཔིཏུནྟི ཨེཏྠ ཡཐཱ རཱུཔིཡཾ བྷཏཀཱནཾ དཏྭཱ ཨསྶཱམིཀབྷཱུམིཡཾ ཨཡོབཱིཛསམུཊྛཱཔནེ བྷཏིཡཱ ཁཎནྟཱནཾ སནྟིཀཱ གཧིཏབྷཎྜཀབྷཱཝེཔི པཱཙིཏྟིཡཾ ཧོཏི, ཨེཝམིདྷཱཔཱིཏི ཀེཙི ཝདནྟི, ཏཾ ན ཡུཏྟཾ. ཡཉྷི ཨསྶཱམིཀབྷཱུམིཾ ཁཎིཏྭཱ སམུཊྛཱཔིཏཾ ཨཡོབཱིཛཾ, ཏཾ བྷཏཀཱནཾ སནྟཀཾ ནཱམ ཧོཏི, ཏདཏྠཉྩ ཏེསཾ རཱུཔིཡཾ དེནྟསྶ རཱུཔིཡསཾཝོཧཱརོཝ ཧོཏི ཨཀཔྤིཡཝོཧཱརེན རཛནཙྪལླིཨཱདཱིནཾ ཨཱཧརཱཔནེ ཀཡཝིཀྐཡོ ཝིཡ, ཏཱདིསམྤི པརབྷཎྜཾ ཨིདྷ ཝཏྠདྷོཝནཱདཱིསུ ནཏྠི, ཏསྨཱ ཨཊྛཀཐཱཔམཱཎེནེཝེཏྠ པཱཙིཏྟིཡཾ གཧེཏབྦཾ.

༥༩༧. པུཉྙཾ ¶ བྷཝིསྶཏཱིཏི དེཏཱིཏི ཨེཏྠ སཙེ བྷིཀྑུ ཨཏྟནོ བྷཎྜསྶ ཨཔྤགྒྷཏཾ ཉཏྭཱཔི ཨཀཐེཏྭཱ ‘‘ཨིདཱནེཝ ཨུཔཔརིཀྑིཏྭཱ གཎྷ, མཱ པཙྪཱ ཝིཔྤཊིསཱརཱི ཧོཧཱི’’ཏི ཝདཏི, ཨིཏརོ ཙ ཨཏྟནོ དིཡྻམཱནསྶ མཧགྒྷཏཾ ཨཛཱནནྟོ ‘‘ཨཱུནཾ ཝཱ ཨདྷིཀཾ ཝཱ ཏུམྷཱཀམེཝཱ’’ཏི དཏྭཱ གཙྪཏི, བྷིཀྑུསྶ ཨནཱཔཏྟི ཨུཔནནྡསྶ ཝིཡ པརིབྦཱཛཀཝཏྠུགྒཧཎེ. ཝིཔྤཊིསཱརིསྶ པུན སཀསཉྙཱཡ ཨཱགཏསྶ ཡཾ ཨདྷིཀཾ གཧིཏཾ, ཏཾ དཱཏབྦཾ. ཡེན ཡཾ པརིཝཏྟེཏི, ཏེསཾ ཨུབྷིནྣཾ ཀཔྤིཡཝཏྠུཏཱ, ཨསཧདྷམྨིཀཏཱ, ཀཡཝིཀྐཡཱཔཛྫནཉྩཱཏི ཨིམཱནེཏྠ ཏཱིཎི ཨངྒཱནི.

ཀཡཝིཀྐཡསིཀྑཱཔདཝཎྞནཱ ནིཊྛིཏཱ.

ནིཊྛིཏོ ཀོསིཡཝགྒོ དུཏིཡོ.

༣. པཏྟཝགྒོ

༡. པཏྟསིཀྑཱཔདཝཎྞནཱ

༦༠༢. ཏཏིཡཝགྒསྶ ¶ པཋམེ ཨཌྜྷཏེརསཔལཱཏི མཱགདྷིཀཱཡ མཱནཏུལཱཡ ཨཌྜྷཏེརསཔལཔརིམིཏཾ ཨུདཀཾ གཎྷནྟཾ སནྡྷཱཡ ཝུཏྟཾ, ཏཐཱ ¶ པརིམིཏཾ ཡཝམཱསཱདིཾ གཎྷནྟིཾ སནྡྷཱཡཱཏི ཀེཙི. ཨཱཙརིཡདྷམྨཔཱལཏྠེརེན པན ‘‘པཀཏིཙཏུམུཊྛིཀཾ ཀུཌུཝཾ, ཙཏུཀུཌུཝཾ ནཱལི༹, ཏཱཡ ནཱལི༹ཡཱ སོལ༹ས ནཱལི༹ཡོ དོཎཾ, ཏཾ པན མགདྷནཱལི༹ཡཱ དྭཱདས ནཱལི༹ཡོ ཧོནྟཱིཏི ཝདནྟཱི’’ཏི ཝུཏྟཾ. དམིལ༹ནཱལཱི༹ཏི པུརཱཎནཱལི༹ཾ སནྡྷཱཡ ཝུཏྟཾ. སཱ ཙ ཙཏུམུཊྛིཀེཧི ཀུཌུཝེཧི ཨཊྛ ཀུཌུཝཱ, ཏཱཡ ནཱལི༹ཡཱ དྭེ ནཱལི༹ཡོ མགདྷནཱལི༹ཾ གཎྷཱཏི. པུརཱཎཱ པན ‘‘སཱིཧལ༹ནཱལི༹ ཏིསྶོ ནཱལི༹ཡོ གཎྷཱཏཱི’’ཏི ཝདནྟི, ཏེསཾ མཏེན མགདྷནཱལི༹ ཨིདཱནི པཝཏྟམཱནཱཡ ཙཏུཀུཌུཝཱཡ དམིལ༹ནཱལི༹ཡཱ ཙཏུནཱལི༹ཀཱ ཧོཏི, ཏཏོ མགདྷནཱལི༹ཏོ ཨུཔཌྜྷཉྩ པུརཱཎདམིལ༹ནཱལི༹སངྑཱཏཾ པཏྠཾ ནཱམ ཧོཏི, ཨེཏེན ཙ ‘‘ཨོམཀོ ནཱམ པཏྟོ པཏྠོདནཾ གཎྷཱཏཱི’’ཏི པཱལི༹ཝཙནཉྩ སམེཏི, ལོཀིཡེཧིཔི –

‘‘ལོཀིཡཾ མགདྷཉྩེཏི, པཏྠདྭཡམུདཱཧཊཾ;

ལོཀིཡཾ སོལ༹སཔལཾ, མཱགདྷཾ དིགུཎཾ མཏ’’ནྟི. –

ཨེཝཾ ལོཀེ ནཱལི༹ཡཱ མགདྷནཱལི༹ དིགུཎཱཏི དསྶིཏཱ, ཨེཝཉྩ གཡ྄ཧམཱནེ ཨོམཀཔཏྟསྶ ཙ ཡཱཔནམཏྟོདནགཱཧིཀཱ ཙ སིདྡྷཱ ཧོཏི. ན ཧི སཀྐཱ ཨཊྛཀུཌུཝཏོ ཨཱུནོདནགཱཧིནཱ པཏྟེན ཨཐཱུཔཱིཀཏཾ པིཎྜཔཱཏཾ པརིཡེསིཏྭཱ ཡཱཔེཏུཾ. ཏེནེཝ ཝེརཉྫཀཎྜཊྛཀཐཱཡཾ ‘‘པཏྠོ ནཱམ ནཱལི༹མཏྟཾ ཧོཏི ཨེཀསྶ པུརིསསྶ ཨལཾ ཡཱཔནཱཡ. ཝུཏྟམྤི ཧེཏཾ ‘པཏྠོདནོ ནཱལམཡཾ དུཝིནྣ’’’ནྟི (ཛཱ. ༢.༢༡.༡༩༢) ཝུཏྟཾ, ‘‘ཨེཀེཀསྶ དྭིནྣཾ ཏིཎྞཾ པཧོཏཱི’’ཏི ཙ ཨཱགཧཾ, ཏསྨཱ ཨིདྷ ཝུཏྟནཡཱནུསཱརེནེཝ གཧེཏབྦཾ.

ཨཱལོཔསྶ ¶ ཨནུརཱུཔནྟི ཨེཏྠ ‘‘བྱཉྫནསྶ མཏྟཱ ནཱམ ཨོདནཏོ ཙཏུཏྠབྷཱགོ’’ཏི (མ. ནི. ཨཊྛ. ༢.༣༨༧) བྲཧྨཱཡུསུཏྟཊྛཀཐཱཡཾ ཝུཏྟཏྟཱ ཨཱལོཔསྶ ཙཏུཏྠབྷཱགམེཝ བྱཉྫནཾ ཨནུརཱུཔནྟི དཊྛབྦཾ. ཨོདནགཏིཀཱནེཝཱཏི ཨོདནསྶ ཨནྟོ ཨེཝ པཝིསནསཱིལཱནི སིཡུཾ, ཨཏྟནོ ཨོཀཱསཾ ན གཝེསནྟཱིཏི ཨཏྠོ. ནཱམམཏྟེཏི ‘‘མཛ྄ཛྷིམོ པཏྟོ མཛ྄ཛྷིམོམཀོ’’ཏིཨཱདིནཱམམཏྟེ.

༦༠༧-༨. ཨེཝཾ པཡོགེ པཡོགེཏི པརིཡོསཱནཱལོཔཛ྄ཛྷོཧརཎཔཡོགེ པཡོགེ, ཨཱལོཔེ ཨཱལོཔེཏི ཨཏྠོ. ཀཏྭཱཏི པཱཀཔརིཡོསཱནཾ ཀཏྭཱ. པཙིཏྭཱ ཋཔེསྶཱམཱིཏི ཀཱལ༹ཝཎྞཔཱཀཾ སནྡྷཱཡ ¶ ཝུཏྟཾ. ཚིདྡནྟི མུཁཝཊྚིཏོ དྭངྒུལསྶ ཧེཊྛཱཚིདྡཾ ཝུཏྟཾ. སེསཾ པཋམཀཐིནེ ཝུཏྟནཡམེཝ.

པཏྟསིཀྑཱཔདཝཎྞནཱ ནིཊྛིཏཱ.

༢. ཨཱུནཔཉྩབནྡྷནསིཀྑཱཔདཝཎྞནཱ

༦༠༩-༦༡༣. དུཏིཡེ པཱལི༹ཡཾ ཨཧཾ པཏྟེན ཏེ བྷིཀྑཱུ སནྟཔེསྶཱམཱིཏི སེསོ. ‘‘ཨཔཏྟོ’’ཏི ཨིམིནཱ ཨདྷིཊྛཱནཝིཛཧནམྤི དསྶེཏི. པཉྩབནྡྷནེཔི པཏྟེ ཨཔརིཔུཎྞཔཱཀེ པཏྟེ ཝིཡ ཨདྷིཊྛཱནཾ ན རུཧཏི. ‘‘ཏིཔུཔཊྚཀེན ཝཱ’’ཏི ཝུཏྟཏྟཱ ཏམྦལོཧཱདཱིཧི ཀཔྤིཡལོཧེཧི ཨཡོཔཏྟསྶ ཚིདྡཾ ཚཱདེཏུཾ ཝཊྚཏི. ཏེནེཝ ‘‘ལོཧམཎྜལཀེནཱ’’ཏི ཝུཏྟཾ. ཨིམསྨིཾ སིཀྑཱཔདེ ཨཀཱལ༹ཝཎྞམྤི ཀཔྤིཡཔཏྟཾ ཝིཉྙཱཔེནྟསྶ ཨཱཔཏྟི ཨེཝཱཏི དཊྛབྦཾ. ཨདྷིཊྛཱནུཔགཔཏྟསྶ ཨཱུནཔཉྩབནྡྷནཏཱ, ཨཏྟུདྡེསིཀཏཱ, ཨཀཏཝིཉྙཏྟི, ཏཱཡ ཙ པཊིལཱབྷོཏི ཨིམཱནེཏྠ ཙཏྟཱརི ཨངྒཱནི.

ཨཱུནཔཉྩབནྡྷནསིཀྑཱཔདཝཎྞནཱ ནིཊྛིཏཱ.

༣. བྷེསཛྫསིཀྑཱཔདཝཎྞནཱ

༦༡༨-༦༢༡. ཏཏིཡེ པཱལི༹ཡཾ པིལིནྡཝཙྪཏྠེརེན ‘‘ན ཁོ, མཧཱརཱཛ, བྷགཝཏཱ ཨཱརཱམིཀོ ཨནུཉྙཱཏོ’’ཏི པཋམཾ པཊིཀྑིཔིཏྭཱ ‘‘ཨནུཛཱནཱམི, བྷིཀྑཝེ, ཨཱརཱམིཀ’’ནྟི པུགྒལཱནམྤི ཨཱརཱམིཀནཱམེན དཱསགྒཧཎེ ཨནུཉྙཱཏེ ཨེཝ ཨཱརཱམིཀཱནཾ གཧིཏཏྟཱ ཁེཏྟཝཏྠཱདཱིནི ཀཔྤིཡཝོཧཱརེནཔི པུགྒལཱནཾ གཧེཏུཾ ན ཝཊྚཏི, ཏཐཱ ཨནནུཉྙཱཏཏྟཱཏི ཝིཉྙཱཡཏི. ‘‘ཁེཏྟཝཏྠུཔཊིགྒཧཎཱ པཊིཝིརཏོ ཧོཏཱི’’ཏིཨཱདིནཱ (དཱི. ནི. ༡.༡༠, ༡༩༤) ཧི ¶ པཊིཀྑིཏྟེསུ ཨེཀསྶེཝ པུགྒལིཀཝསེན གཧཎེ ཨནུཉྙཱཏེ ཨིཏརཱིཏརཱནཾ ཏཐཱ ན གཧེཏབྦཏཱ སིདྡྷཱཝ ཧོཏི. ཡཉྩ པིལིནྡཝཙྪཏྠེརེན དཱཡཀཀུལསྶ དཱརིཀཱཡ སུཝཎྞམཱལཱཝསེན ཏིཎཎྜུཔཀསྶ ནིམྨཱནཾ, ཏཾ ‘‘ཨནཱཔཏྟི, བྷིཀྑཝེ, ཨིདྡྷིམསྶ ཨིདྡྷིཝིསཡེ’’ཏི (པཱརཱ. ༡༥༩) ཝཙནཏོ ཀུལསངྒཧཱདི ན ཧོཏཱིཏི ཀཏནྟི དཊྛབྦཾ, ཀེཙི པན ‘‘ཁཱིཎཱསཝཱནཾ ལཱབྷིཙྪཱཡ ཨབྷཱཝཏོ ཀུལསངྒཧེཔི ¶ ཨཱཛཱིཝཀོཔོ ནཏྠཱི’’ཏི ཝདནྟི, ཏཾ ན ཡུཏྟཾ ཁཱིཎཱསཝཱནམྤི ཨཱཛཱིཝཝིཔཏྟིཧེཏཱུནཾ པིཎྜཔཱཏཱདཱིནཾ པརིཝཛྫེཏབྦཏོ. ཝུཏྟཉྷི དྷམྨསེནཱཔཏིནཱ ‘‘ནེཝ བྷིནྡེཡྻམཱཛཱིཝཾ, ཙཛམཱནོཔི ཛཱིཝིཏ’’ནྟི (མི. པ. ༦.༡.༥). བྷགཝཏཱ ཙ ‘‘གཱཐཱབྷིགཱིཏཾ མེ ཨབྷོཛནཱིཡ’’ནྟིཨཱདི ཝུཏྟཾ (སུ. ནི. ༨༡, ༤༨༤; མི. པ. ༤.༥.༩; སཾ. ནི. ༡.༡༩༧).

༦༢༢. ཨུགྒཧིཏཀནྟི པརིབྷོགཏྠཱཡ སཡཾ གཧིཏཾ. སཡཾ ཀརོཏཱིཏི པཙིཏྭཱ ཀརོཏི. པུརེབྷཏྟནྟི ཏདཧུཔུརེབྷཏྟམེཝ ཝཊྚཏི སཝཏྠུཀཔཊིགྒཧིཏཏྟཱ. སཡཾཀཏནྟི ཁཱིརནཝནཱིཏཾ པཙིཏྭཱ ཀཏཾ. ནིརཱམིསམེཝཱཏི ཏདཧུཔུརེབྷཏྟཾ སནྡྷཱཡ ཝུཏྟཾ. ཨཛྫ སཡཾཀཏཾ ནིརཱམིསམེཝ བྷུཉྫནྟསྶ ཀསྨཱ སཱམཔཱཀོ ན ཧོཏཱིཏི ཨཱཧ ‘‘ནཝནཱིཏཾ ཏཱཔེནྟསྶཱ’’ཏིཨཱདི. པཊིགྒཧིཏེཧཱིཏི ཁཱིརདདྷཱིནི སནྡྷཱཡ ཝུཏྟཾ. ཨུགྒཧིཏཀེཧི ཀཏཾ ཨབྦྷཉྫནཱདཱིསུ ཨུཔནེཏབྦནྟི ཡོཛནཱ. ཨེསེཝ ནཡོཏི ནིསྶགྒིཡཱཔཏྟིཾ སནྡྷཱཡ ཝུཏྟཾ. ཨཀཔྤིཡམཾསསཔྤིམྷཱིཏི ཧཏྠིཨཱདཱིནཾ སཔྤིམྷི.

ཨེཏྠ པནཱཏི ནཝནཱིཏེ ཝིསེསོ ཨཏྠཱིཏི ཨཏྠོ. དྷོཏཾ ཝཊྚཏཱིཏི དྷོཏམེཝ པཊིགྒཧིཏུམྤི ན ཝཊྚཏི, ཨིཏརཐཱ སཝཏྠུཀཔཊིགྒཧིཏཾ ཧོཏཱིཏི ཐེརཱནཾ ཨདྷིཔྤཱཡོ.

མཧཱསིཝཏྠེརསྶ པན ཝཏྠུནོ ཝིཡོཛིཏཏྟཱ དདྷིགུལི༹ཀཱདཱིཧི ཡུཏྟཏཱམཏྟེན སཝཏྠུཀཔཊིགྒཧིཏཾ ནཱམ ན ཧོཏི, ཏསྨཱ ཏཀྐཏོ ཨུདྡྷཊམཏྟམེཝ པཊིགྒཧེཏྭཱ དྷོཝིཏྭཱ, པཙིཏྭཱ ཝཱ ནིརཱམིསམེཝ ཀཏྭཱ པརིབྷུཉྫིཾསཱུཏི ཨདྷིཔྤཱཡོ, ན པན དདྷིགུལི༹ཀཱདཱིཧི སཧ ཝིཀཱལེ བྷུཉྫིཾསུ. ཏེནཱཧ ‘‘ཏསྨཱ ནཝནཱིཏཾ པརིབྷུཉྫནྟེན…པེ… སཝཏྠུཀཔཊིགྒཧིཏཾ ནཱམ ན ཧོཏཱི’’ཏི. ཏཏྠ ཨདྷོཏཾ པཊིགྒཧེཏྭཱཔི ཏཾ ནཝནཱིཏཾ པརིབྷུཉྫནྟེན དདྷིཨཱདཱིནི ཨཔནེཏྭཱ པརིབྷུཉྫིཏབྦནྟི ཨཏྠོ. ཁཡཾ གམིསྶཏཱིཏི ནིརཱམིསཾ ཧོཏི, ཏསྨཱ ཝིཀཱལེཔི ཝཊྚཏཱིཏི ཨཏྠོ. ཨེཏྟཱཝཏཱཏི ནཝནཱིཏེ ལགྒམཏྟེན ཝིསུཾ དདྷིཨཱདིཝོཧཱརཾ ཨལདྡྷེན ཨཔྤམཏྟེན དདྷིཨཱདིནཱཏི ཨཏྠོ, ཨེཏེན ཝིསུཾ པཊིགྒཧིཏདདྷིཨཱདཱིཧི སཧ པཀྐཾ སཝཏྠུཀཔཊིགྒཧིཏསངྑྱམེཝ གཙྪཏཱིཏི དསྶེཏི. ཏསྨིམྤཱིཏི ནིརཱམིསབྷཱུཏེཔི. ཀུཀྐུཙྩཀཱནཾ པན ཨཡཾ ཨདྷིཔྤཱཡོ – པཊིགྒཧཎེ ཏཱཝ དདྷིཨཱདཱིཧི ཨསམྦྷིནྣརསཏྟཱ བྷཏྟེན སཧིཏེན གུལ༹པིཎྜཱདི ¶ ཝིཡ སཝཏྠུཀཔཊིགྒཧིཏཾ ནཱམ ན ཧོཏི, ཏཾ ¶ པན པཙནྟེན དྷོཝིཏྭཱཝ པཙིཏབྦཾ, ཨིཏརཐཱ པཙནཀྑཎེ པཙྩམཱནདདྷིགུལི༹ཀཱདཱིཧི སམྦྷིནྣརསཏཱཡ སཱམཾཔཀྐཾ ཛཱཏཾ, ཏེསུ ཁཱིཎེསུ སཱམཾཔཀྐམེཝ ཧོཏི, ཏསྨཱ ནིརཱམིསམེཝ པཙིཏབྦནྟི. ཏེནེཝ ‘‘ཨཱམིསེན སཧ པཀྐཏྟཱ’’ཏི ཀཱརཎཾ ཝུཏྟཾ.

ཨེཏྠ ཙཱཡཾ ཝིཙཱརཎཱ – སཝཏྠུཀཔཊིགྒཧིཏཏྟཱབྷཱཝེ ཨཱམིསེན སཧ བྷིཀྑུནཱ པཀྐསྶ སཡཾཔཱཀདོསོ ཝཱ པརིསངྐཱིཡཏི ཡཱཝཀཱལིཀཏཱ ཝཱ, ཏཏྠ ན ཏཱཝ སཡཾཔཱཀདོསོ ཨེཏྠ སམྦྷཝཏི སཏྟཱཧཀཱལིཀཏྟཱ. ཡཉྷི ཏཏྠ དདྷིཨཱདི ཨཱམིསགཏཾ, ཏཾ པརིཀྑཱིཎནྟི. ཨཐ པཊིགྒཧིཏདདྷིགུལི༹ཀཱདིནཱ སཧ ཨཏྟནཱ པཀྐཏྟཱ སཝཏྠུཀཔཀྐཾ ཝིཡ བྷཝེཡྻཱཏི པརིསངྐཱིཡཏི, ཏདཱ ཨཱམིསེན སཧ པཊིགྒཧིཏཏྟཱཏི ཀཱརཎཾ ཝཏྟབྦཾ, ན པན པཀྐཏྟཱཏི. ཏཐཱ ཙ ཨུཔཌྜྷཏྠེརཱནཾ མཏམེཝ ཨངྒཱི ཀཏཾ སིཡཱ. ཏཏྠ ཙ སཱམཎེརཱདཱིཧི པཀྐམྤི ཡཱཝཀཱལིཀམེཝ སིཡཱ པཊིགྒཧིཏཁཱིརཱདིཾ པཙིཏྭཱ ཨནུཔསམྤནྣེཧི ཀཏསཔྤིཨཱདི ཝིཡ ཙ, ན ཙ ཏཾ ཡུཏྟཾ, བྷིཀྑཱཙཱརེན ལདྡྷནཝནཱིཏཱདཱིནཾ ཏཀྐཱདིཨཱམིསསཾསགྒསམྦྷཝེན ཨཔརིབྷུཉྫིཏབྦཏཱཔསངྒཏོ. ན ཧི གཧཊྛཱ དྷོཝིཏྭཱ, སོདྷེཏྭཱ ཝཱ པཏྟེ ཨཱཀིརནྟཱིཏི ནིཡམོ ཨཏྠི, ཨཊྛཀཐཱཡཉྩ ‘‘ཡཐཱ ཏཏྠ པཏིཏཏཎྜུལཀཎཱདཡོ ན པཙྩནྟི, ཨེཝཾ…པེ… པུན པཙིཏྭཱ དེཏི, པུརིམནཡེནེཝ སཏྟཱཧཾ ཝཊྚཏཱི’’ཏི ཨིམིནཱ ཝཙནེནཔེཏཾ ཝིརུཛ྄ཛྷཏི, ཏསྨཱ ཨིདྷ ཀུཀྐུཙྩཀཱནཾ ཀུཀྐུཙྩུཔྤཏྟིཡཱ ནིམིཏྟམེཝ ན དིསྶཏི. ཡཐཱ ཙེཏྠ, ཨེཝཾ ‘‘ལཛྫཱི སཱམཎེརོ ཡཐཱ ཏཏྠ པཏིཏཏཎྜུལཀཎཱདཡོ ན པཙྩནྟི, ཨེཝཾ སཱམིསཔཱཀཾ མོཙེནྟོ ཨགྒིམྷི ཝིལཱིཡཱཔེཏྭཱ…པེ… ཝཊྚཏཱི’’ཏི ཝཙནསྶཱཔི ནིམིཏྟཾ ན དིསྶཏི. ཡདི ཧི ཨེཏཾ ཡཱཝཀཱལིཀསཾསགྒཔརིཧཱརཱཡ ཝུཏྟཾ སིཡཱ, ཨཏྟནཱཔི ཏཐཱ ཀཱཏབྦཾ བྷཝེཡྻ. གཧཊྛེཧི དིནྣསཔྤིཨཱདཱིསུ ཙ ཨཱམིསསཾསགྒསངྐཱ ན ཝིགཙྪེཡྻ. ན ཧི གཧཊྛཱ ཨེཝཾ ཝིལཱིཡཱཔེཏྭཱ པན ཏཎྜུལཱདིཾ ཨཔནེཏྭཱ པུན པཙནྟི, ཨཔིཙ བྷེསཛྫེཧི སདྡྷིཾ ཁཱིརཱདིཾ པཀྑིཔིཏྭཱ ཡཐཱ ཁཱིརཱདི ཁཡཾ གཙྪཏི, ཨེཝཾ པརེཧི པཀྐབྷེསཛྫཏེལཱདིཔི ཡཱཝཀཱལིཀམེཝ སིཡཱ, ན ཙ ཏམྤི ཡུཏྟཾ དདྷིཨཱདིཁཡཀརཎཏྠཾ ‘‘པུན པཙིཏྭཱ དེཏཱི’’ཏི ཝུཏྟཏྟཱ. ཏསྨཱ མཧཱསིཝཏྠེརཝཱདེ ཀུཀྐུཙྩཾ ཨཀཏྭཱ ཨདྷོཏམྤི ནཝནཱིཏཾ ཏདཧུཔི པུནདིཝསཱདཱིསུཔི པཙིཏུཾ, ཏཎྜུལཱདིམིསྶཾ སཔྤིཨཱདིཾ ཨཏྟནཱཔི ཨགྒིམྷི ཝིལཱིཡཱཔེཏྭཱ པརིསྶཱཝེཏྭཱ པུན ཏཀྐཱདིཁཡཏྠཾ པཙིཏུཉྩ ཝཊྚཏི.

ཏཏྠ ¶ ཝིཛྫམཱནསྶཔི པཙྩམཱནཀྑཎེ སམྦྷིནྣརསསྶ ཡཱཝཀཱལིཀསྶ ཨབྦོཧཱརིཀཏྟེན སཝཏྠུཀཔཊིགྒཧིཏཔུརེཔཊིགྒཧིཏཱནམྤི ཨབྦོཧཱརིཀཏོཏི ནིཊྛམེཏྠ གནྟབྦནྟི. ཏེནེཝ ‘‘ཨེཏྟཱཝཏཱ ¶ སཝཏྠུཀཔཊིགྒཧིཏཾ ནཱམ ན ཧོཏཱི’’ཏི ཝུཏྟཾ. ཝིསུཾ པཊིགྒཧིཏེན པན ཁཱིརཱདིཨཱམིསེན ནཝནཱིཏཱདིཾ མིསྶེཏྭཱ བྷིཀྑུནཱ ཝཱ ཨཉྙེཧི ཝཱ པཀྐཏེལཱདིབྷེསཛྫཾ སཝཏྠུཀཔཊིགྒཧིཏསངྑྱམེཝ གཙྪཏི, ཏཏྠ པཝིཊྛཡཱཝཀཱལིཀསྶ ཨབྦོཧཱརིཀཏྟཱབྷཱཝཱ. ཡཾ པན པུརེཔརིགྒཧིཏབྷེསཛྫེཧི ཨཔྤཊིགྒཧིཏཾ ཁཱིརཱདིཾ པཀྑིཔིཏྭཱ པཀྐཏེལཱདིཀཾ ཨནུཔསམྤནྣེཧེཝ པཀྐམྤི སཝཏྠུཀཔཊིགྒཧིཏམྤི སནྣིདྷིཔི ན ཧོཏི, ཏཏྠ པཀྑིཏྟཁཱིརཱདིཀསྶཔི ཏསྨིཾ ཁཎེ སམྦྷིནྣརསཏཱཡ པུརེཔཊིགྒཧིཏཏྟཱཔཏྟིཏོ. སཙེ པན ཨཔྤཊིགྒཧིཏེཧེཝ, ཨཉྙེཧི ཝཱ པཀྐཏེལཱདཱིསུཔི སཙེ ཨཱམིསརསོ པཉྙཱཡཏི, ཏཾ ཡཱཝཀཱལིཀམེཝ ཧོཏཱིཏི ཝེདིཏབྦཾ. ཨུགྒཧེཏྭཱཏི སཡམེཝ གཧེཏྭཱ.

པརིསྶཱཝེཏྭཱ གཧིཏནྟི ཏཎྜུལཱདིཝིགམཏྠཾ པརིསྶཱཝེཏྭཱ, ཏཀྐཱདིཝིགམཏྠཾ པུན པཙིཏྭཱ གཧིཏནྟི ཨཏྠོ. པཊིགྒཧེཏྭཱ ཋཔིཏབྷེསཛྫེཧཱིཏི ཨཏིརེཀསཏྟཱཧཔཊིགྒཧིཏེཧི, ཨེཏེན ཏེཧི ཡུཏྟམྤི སཔྤིཨཱདི ཨཏིརེཀསཏྟཱཧཔཊིགྒཧིཏཾ ན ཧོཏཱིཏི དསྶེཏི. ཝདྡལིསམཡེཏི ཝསྶཀཱལསམཡེ, ཨནཱཏཔཀཱལེཏི ཨཏྠོ.

ནིབྦཊྚིཏཏྟཱཏི ཡཱཝཀཱལིཀཝཏྠུཏོ ཝིཝེཙིཏཏྟཱ, ཨེཏེན ཏེལེ སབྷཱཝཏོ ཡཱཝཀཱལིཀཏྟཱབྷཱཝཾ, བྷིཀྑུནོ སཝཏྠུཀཔཊིགྒཧཎེན ཡཱཝཀཱལིཀཏྟུཔགམནཉྩ དསྶེཏི. ཨུབྷཡམྤཱིཏི ཨཏྟནཱ, ཨཉྙེཧི ཙ ཀཏཾ.

༦༢༣. ཨཙྪཝསནྟི དུཀྐཊཝཏྠཱུནཉྙེཝ ཨུཔལཀྑཎནྟི ཨཱཧ ‘‘ཋཔེཏྭཱ མནུསྶཝས’’ནྟི. སཾསཊྛནྟི པརིསྶཱཝིཏཾ. ཏིཎྞཾ དུཀྐཊཱནནྟི ཨཛ྄ཛྷོཧཱརེ ཨཛ྄ཛྷོཧཱརེ ཏཱིཎི དུཀྐཊཱནི སནྡྷཱཡ ཝུཏྟཾ. ཀིཉྩཱཔི པརིབྷོགཏྠཱཡ ཝིཀཱལེ པཊིགྒཧཎཔཙནཔརིསྶཱཝནཱདཱིསུ པུབྦཔཡོགེསུ པཱལི༹ཡཾ, ཨཊྛཀཐཱཡཉྩ ཨཱཔཏྟི ན ཝུཏྟཱ, ཏཐཱཔི ཨེཏྠ ཨཱཔཏྟིཡཱ ཨེཝ བྷཝིཏབྦཾ པཊིཀྑིཏྟསྶ ཀརཎཏོ ཨཱཧཱརཏྠཱཡ ཝིཀཱལེ ཡཱམཀཱལིཀཱདཱིནཾ པཊིགྒཧཎེ ཝིཡ. ཡསྨཱ ཁཱིརཱདིཾ པཀྑིཔིཏྭཱ པཀྐབྷེསཛྫཏེལེ ཀསཊཾ ཨཱམིསགཏིཀཾ, ཏེན སཧ ཏེལཾ པཊིགྒཧེཏུཾ, པཙིཏུཾ ཝཱ བྷིཀྑུནོ ན ཝཊྚཏི. ཏསྨཱ ཝུཏྟཾ ‘‘པཀྐཏེལཀསཊེ ཝིཡ ཀུཀྐུཙྩཱཡཏཱི’’ཏི. སཙེ ཝསཱཡ སཧ པཀྐཏྟཱ ན ཝཊྚཏི, ཨིདཾ ཀསྨཱ ན ཝཊྚཏཱིཏི པུཙྪནྟཱ ‘‘བྷནྟེ ¶ …པེ… ཝཊྚཏཱི’’ཏི ཨཱཧཾསུ. ཐེརོ ཨཏིཀུཀྐུཙྩཏཱཡ ཙ ‘‘ཨེཏམྤི, ཨཱཝུསོ, ན ཝཊྚཏཱི’’ཏི ཨཱཧ. རོགནིགྒཧཏྠཱཡ ཨེཝ ཝསཱཡ ཨནུཉྙཱཏཏྟཾ སལླཀྑེཏྭཱ པཙྪཱ ‘‘སཱདྷཱུ’’ཏི སམྤཊིཙྪི.

‘‘མདྷུཀརཱིཧི ནཱམ མདྷུམཀྑིཀཱཧཱི’’ཏི ཨིདཾ ཁུདྡཀབྷམརཱནཾ དྭིནྣཾ ཨེཝ ཝིསེསནནྟི ཀེཙི ཝདནྟི ¶ , ཨཉྙེ པན ‘‘དཎྜཀེསུ མདྷུཀཱརིཀཱ མདྷུཀརཱིམཀྑིཀཱ ནཱམ, ཏཱཧི སཧ ཏིསྶོ མདྷུམཀྑིཀཱཛཱཏིཡོ’’ཏི ཝདནྟི. བྷམརམཀྑིཀཱཏི མཧཱཔཊལཀཱརིཀཱ. སིལེསསདིསནྟི སུཀྑཏཱཡ ཝཱ པཀྐཏཱཡ ཝཱ གྷནཱིབྷཱུཏཾ. ཨིཏརནྟི ཏནུཀམདྷུ.

ཨུཙྪུརསཾ ཨུཔཱདཱཡཱཏི ནིཀྐསཊརསསྶཔི སཏྟཱཧཀཱལིཀཏཾ དསྶེཏི ‘‘ཨུཙྪུམྷཱ ནིབྦཏྟ’’ནྟི པཱལི༹ཡཾ སཱམཉྙཏོ ཝུཏྟཏྟཱ. ཡཾ པན སུཏྟནྟཊྛཀཐཱཡཾ ‘‘ཨུཙྪུ ཙེ, ཡཱཝཀཱལིཀོ. ཨུཙྪུརསོ ཙེ, ཡཱམཀཱལིཀོ. ཕཱཎིཏཾ ཙེ, སཏྟཱཧཀཱལིཀཾ. ཏཙོ ཙེ, ཡཱཝཛཱིཝཀོ’’ཏི ཝུཏྟཾ, ཏཾ ཨམྦཕལརསཱདིམིསྶཏཱཡ ཡཱམཀཱལིཀཏྟཾ སནྡྷཱཡ ཝུཏྟནྟི གཧེཏབྦཾ, ཨཝིནཡཝཙནཏྟཱ ཏཾ ཨཔྤམཱཎནྟི. ཏེནེཝ ‘‘པུརེབྷཏྟཾ པཊིགྒཧིཏེན ཨཔརིསྶཱཝིཏཨུཙྪུརསེནཱ’’ཏིཨཱདི ཝུཏྟཾ. ནིརཱམིསམེཝ ཝཊྚཏི ཏཏྠ པཝིཊྛཡཱཝཀཱལིཀསྶ ཨབྦོཧཱརིཀཏྟཱཏི ཨིདཾ གུལེ༹ ཀཏེ ཏཏྠ ཝིཛྫམཱནམྤི ཀསཊཾ པཱཀེན སུཀྑཏཱཡ ཡཱཝཛཱིཝིཀཏྟཾ བྷཛཏཱིཏི ཝུཏྟཾ. ཏསྶ ཡཱཝཀཱལིཀཏྟེ ཧི སཱམཾཔཱཀེན པུརེབྷཏྟེཔི ཨནཛ྄ཛྷོཧརཎཱིཡཾ སིཡཱཏི. ‘‘སཝཏྠུཀཔཊིགྒཧིཏཏྟཱ’’ཏི ཨིདཾ ཨུཙྪུརསེ ཙུཎྞཝིཙུཎྞཾ ཧུཏྭཱ ཋིཏཀསཊཾ སནྡྷཱཡ ཝུཏྟཾ, ཏེན ཙ ཨཔརིསྶཱཝིཏེན ཨཔྤཊིགྒཧིཏེན ཨནུཔསམྤནྣེཧི ཀཏཾ སཏྟཱཧཾ ཝཊྚཏཱིཏི དསྶེཏི. ཛྷཱམཨུཙྪུཕཱཎིཏནྟི ཨགྒིམྷི ཨུཙྪུཾ ཏཱཔེཏྭཱ ཀཏཾ. ཀོཊྚིཏཨུཙྪུཕཱཎིཏནྟི ཁུདྡཱནུཁུདྡཀཾ ཚིནྡིཏྭཱ ཀོཊྚེཏྭཱ ནིཔྤཱིལེ༹ཏྭཱ པཀྐཾ.

ཏཾ ཏཏྠ ཝིཛྫམཱནམྤི ཀསཊཾ པཀྐཀཱལེ ཡཱཝཀཱལིཀཏྟཾ ཝིཛཧཏཱིཏི ཨཱཧ ‘‘ཏཾ ཡུཏྟ’’ནྟི. སཱིཏོདཀེན ཀཏནྟི མདྷུཀཔུཔྥཱནི སཱིཏོདཀེན མདྡིཏྭཱ པརིསྶཱཝེཏྭཱ པཙིཏྭཱ ཀཏཾ, ཨམདྡིཏྭཱ ཀཏནྟི ཀེཙི, ཏཏྠ ཀཱརཎཾ ན དིསྶཏི. ཁཱིརཛལླིཀནྟི ཁཱིརཕེཎཾ. མདྷུཀཔུཔྥཾ པནཱཏིཨཱདི ཡཱཝཀཱལིཀརཱུཔེན ཋིཏསྶཔི ཨཝཊྚནཀམེརཡབཱིཛཝཏྠུཾ དསྶེཏུཾ ཨཱརདྡྷཾ.

སབྦཱནིཔཱིཏི ¶ སཔྤིཨཱདཱིནི པཉྩཔི. ཨཱཧཱརཀིཙྩཾ ཀརོནྟཱནི ཨེཏཱནི ཀསྨཱ ཨེཝཾ པརིབྷུཉྫིཏབྦཱནཱིཏི ཙོདནཱཔརིཧཱརཱཡ བྷེསཛྫོདིསྶཾ དསྶེནྟེན ཏཔྤསངྒེན སབྦཱནིཔི ཨོདིསྶཀཱནི ཨེཀཏོ དསྶེཏུཾ ‘‘སཏྟཝིདྷཾ ཧཱི’’ཏིཨཱདི ཝུཏྟཾ. ཨཔཀཏིབྷེསཛྫཏྟཱ ཝིཀཊཱནི ཝིརཱུཔཱནི ཝིསཧརཎཏོ མཧཱཝིསཡཏྟཱ མཧནྟཱནི ཙཱཏི མཧཱཝིཀཊཱནི. ཨུཔསམྤདཱདཱིནཱིཏི ཨཱདི-སདྡེན གཎངྒཎཱུཔཱཧནཱདིཾ སངྒཎྷཱཏི.

ཨདྷིཊྛེཏཱིཏི བཱཧིརཔརིབྷོགཏྠམེཏནྟི ཙིཏྟཾ ཨུཔྤཱདེཏི, ཨེཝཾ པརིབྷོགེ ཨནཔེཀྑཏཱཡ པཊིགྒཧཎཾ ཝིཛཧཏཱིཏི ཨདྷིཔྤཱཡོ. ཨེཝཾ ཨཉྙེསུཔི ཀཱལིཀེསུ ཨནཛ྄ཛྷོཧརིཏུཀཱམཏཱཡ སུདྡྷཙིཏྟེན ¶ བཱཧིརཔརིབྷོགཏྠཱཡ ནིཡམེཔི པཊིགྒཧཎཾ ཝིཛཧཏཱིཏི ཨིདམྤི ཝིསུཾ ཨེཀཾ པཊིགྒཧཎཝིཛཧནཀཱརཎནྟི དཊྛབྦཾ.

༦༢༥. སཙེ དྭིནྣཾ…པེ… ན ཝཊྚཏཱིཏི ཨེཏྠ པཱཋོ གལི༹ཏོ, ཨེཝཾ པནེཏྠ པཱཋོ ཝེདིཏབྦོ ‘‘སཙེ དྭིནྣཾ སནྟཀཾ ཨེཀེན པཊིགྒཧིཏཾ ཨཝིབྷཏྟཾ ཧོཏི, སཏྟཱཧཱཏིཀྐམེ དྭིནྣམྤི ཨནཱཔཏྟི, པརིབྷུཉྫིཏུཾ པན ན ཝཊྚཏཱི’’ཏི. ཨཉྙཐཱ ཧི སདྡཔྤཡོགོཔི ན སངྒཧཾ གཙྪཏི. ‘‘གཎྛིཔདེཔི ཙ ཨཡམེཝ པཱཋོ དསྶིཏོ’’ཏི (སཱརཏྠ. ཊཱི. ༢.༦༢༥) སཱརཏྠདཱིཔནིཡཾ ཝུཏྟཾ. དྭིནྣམྤི ཨནཱཔཏྟཱིཏི ཨཝིབྷཏྟཏྟཱ ཝུཏྟཾ. ‘‘པརིབྷུཉྫིཏུཾ པན ན ཝཊྚཏཱི’’ཏི ཨིདཾ ‘‘སཏྟཱཧཔརམཾ སནྣིདྷིཀཱརཀཾ པརིབྷུཉྫིཏབྦ’’ནྟི ཝཙནཏོ ཝུཏྟཾ. ‘‘ཡེན པཊིགྒཧིཏཾ, ཏེན ཝིསྶཛྫིཏཏྟཱ’’ཏི ཨིམིནཱ ཨུཔསམྤནྣསྶ དཱནམྤི སནྡྷཱཡ ‘‘ཝིསྶཛྫེཏཱི’’ཏི ཨིདཾ ཝུཏྟནྟི དསྶེཏི. ཨུཔསམྤནྣསྶ ནིརཔེཀྑདིནྣཝཏྠུམྷི པཊིགྒཧཎསྶ ཨཝིགཏཏྟེཔི སཀསནྟཀཏཱ ཝིགཏཱཝ ཧོཏི, ཏེན ནིསྶགྒིཡཾ ན ཧོཏི. ཨཏྟནཱཝ པཊིགྒཧིཏཏྟཾ, སཀསནྟཀཏྟཉྩཱཏི ཨིམེཧི དྭཱིཧི ཀཱརཎེཧི ནིསྶགྒིཡཾ ཧོཏི, ན ཨེཀེན. ཨནུཔསམྤནྣསྶ ནིརཔེཀྑདཱནེ པན ཏདུབྷཡམྤི ཝིཛཧཏི, པརིབྷོགོཔེཏྠ ཝཊྚཏི, ན སཱཔེཀྑདཱནེ དཱནལཀྑཎཱབྷཱཝཏོ. ‘‘ཝིསྶཛྫེཏཱི’’ཏི ཨེཏསྨིཉྩ པཱལི༹པདེ ཀསྶཙི ཨདཏྭཱ ཨནཔེཀྑཏཱཡ ཚཌྜནམྤི སངྒཧིཏནྟི ཝེདིཏབྦཾ. ‘‘ཨནཔེཀྑོ དཏྭཱ’’ཏི ཨིདཉྩ པཊིགྒཧཎཝིཛཧནཝིདྷིདསྶནཏྠམེཝ ཝུཏྟཾ. པཊིགྒཧཎེ ཧི ཝིཛཧིཏེ པུན པཊིགྒཧེཏྭཱ པརིབྷོགོ སཡམེཝ ཝཊྚིསྶཏི, ཏབྦིཛཧནཉྩ ཝཏྠུནོ སཀསནྟཀཏཱཔརིཙྩཱགེན ཧོཏཱིཏི, ཨེཏེན ཙ ཝཏྠུམྷི ཨཛ྄ཛྷོཧརཎཱཔེཀྑཱཡ སཏི པཊིགྒཧཎཝིསྶཛྫནཾ ནཱམ ཝིསུཾ ན ལབྦྷཏཱིཏི སིཛ྄ཛྷཏི. ཨིཏརཐཱ ཧི ‘‘པཊིགྒཧཎེ ཨནཔེཀྑོཝ ¶ པཊིགྒཧཎཾ ཝིསྶཛྫེཏྭཱ པུན པཊིགྒཧེཏྭཱ བྷུཉྫཏཱི’’ཏི ཝཏྟབྦཾ སིཡཱ. ‘‘ཨཔྤཊིགྒཧིཏཏྟཱ’’ཏི ཨིམིནཱ ཨེཀསྶ སནྟཀཾ ཨཉྙེན པཊིགྒཧིཏམྤི ནིསྶགྒིཡཾ ཧོཏཱིཏི དསྶེཏི.

ཨེཝནྟི ‘‘པུན གཧེསྶཱམཱི’’ཏི ཨཔེཀྑཾ ཨཀཏྭཱ སུདྡྷཙིཏྟེན པརིཙྩཏྟཏཾ པརཱམསཏི. པརིབྷུཉྫནྟསྶ ཨནཱཔཏྟིདསྶནཏྠནྟི ནིསྶགྒིཡམཱུལིཀཱཧི པཱཙིཏྟིཡཱདིཨཱཔཏྟཱིཧི ཨནཱཔཏྟིདསྶནཏྠནྟི ཨདྷིཔྤཱཡོ. པརིབྷོགེ ཨནཱཔཏྟིདསྶནཏྠནྟི ཨེཏྠ པན ནིསྶཊྛཔཊིལདྡྷསྶ ཀཱཡིཀཔརིབྷོགཱདཱིསུ ཡཱ དུཀྐཊཱཔཏྟི ཝུཏྟཱ, ཏཱཡ ཨནཱཔཏྟིདསྶནཏྠནྟི ཨདྷིཔྤཱཡོ. སཔྤིཨཱདཱིནཾ པཊིགྒཧིཏབྷཱཝོ, ཨཏྟནོ སནྟཀཏཱ, སཏྟཱཧཱཏིཀྐམོཏི ཨིམཱནེཏྠ ཏཱིཎི ཨངྒཱནི.

བྷེསཛྫསིཀྑཱཔདཝཎྞནཱ ནིཊྛིཏཱ.

༤. ཝསྶིཀསཱཊིཀསིཀྑཱཔདཝཎྞནཱ

༦༢༨. ཙཏུཏྠེ ¶ ཛེཊྛམཱུལཔུཎྞམཱསིཡཱ…པེ… ཀརཎཀྑེཏྟཉྩཱཏི པཋམདྡྷམཱསམྤི ཀརཎཀྑེཏྟཾ ཝུཏྟཾ. ཏཾ ‘‘ཀཏྭཱ ནིཝཱསེཏབྦ’’ནྟི ཨིམསྶ པུརིམདྡྷམཱསེ ཝཱ པཙྪིམདྡྷམཱསེ ཝཱ ཀཏྭཱ པཙྪིམམཱསེཝ ནིཝཱསེཏབྦནྟི ཨེཝམཏྠཾ གཧེཏྭཱ ཝུཏྟཾ ནིཝཱསནེཡེཝ ཨཱཔཏྟིཡཱ ཝུཏྟཏྟཱཏི. ཡཾ པན མཱཏིཀཱཊྛཀཐཱཡཾ ‘‘གིམྷཱནཾ པཙྪིམོ མཱསོ པརིཡེསནཀྑེཏྟཾ, པཙྪིམོ ཨདྡྷམཱསོ ཀརཎནིཝཱསནཀྑེཏྟམྤཱི’’ཏི (ཀངྑཱ. ཨཊྛ. ཝསྶིཀསཱཊིཀསིཀྑཱཔདཝཎྞནཱ) ཝུཏྟཾ, ཏཾ ཏསྨིཾཡེཝ ཨདྡྷམཱསེ ཀཏྭཱ ནིཝཱསེཏབྦནྟི ཨེཝམཏྠཾ གཧེཏྭཱ ཝུཏྟཾ. ཨིདྷ ཝུཏྟནཡེནེཝ ཨཏྠེ གཧིཏེ ཝིརོདྷོ ནཏྠི.

‘‘ཝཏྟབྷེདེ དུཀྐཊ’’ནྟི ཨིདཾ ཝསྶིཀསཱཊིཀཨདིནྣཔུབྦེ སནྡྷཱཡ ཝུཏྟཾ. ཏེནཱཧ ‘‘ཡེ མནུསྶཱ’’ཏིཨཱདི. པཀཏིཡཱ ཝསྶིཀསཱཊིཀདཱཡཀཱ ནཱམ སངྒྷཾ ཝཱ ཨཏྟཱནཾ ཝཱ ཨཔྤཝཱརེཏྭཱཝ ཨནུསཾཝཙྪརཾ དཱཡཀཱ.

༦༣༠. ‘‘ཚ མཱསེ པརིཧཱརཾ ལབྷཏཱི’’ཏི ཨེཏེན ཨནྟོཝསྶེཔི ཡཱཝ ཝསྶཱནསྶ པཙྪིམདིཝསཱ ཨཀཏཱ པརིཧཱརཾ ལབྷཏཱིཏི དཱིཔིཏཾ ཧོཏི. ཨེཀམཱསནྟི ཧེམནྟསྶ པཙྪིམུཔོསཐེན སཧ གཎེཏྭཱ ཝུཏྟཾ. ཏསྨིཾ ཨུཔོསཐདིཝསེ ¶ ཨེཝ ཧི ཏཾ མཱུལཙཱིཝརཾ ཀཱཏབྦཾ, ཨིཏརཐཱ ཧི ནིསྶགྒིཡཏོ. ཨེཀཱཧདྭཱིཧཱདིཝསེན…པེ… ལདྡྷཱ ཙེཝ ནིཊྛིཏཱ ཙཱཏི ཨེཏྠ ཨེཀཱཧཱནཱགཏཱཡ ཝསྶཱུཔནཱཡིཀཱཡ ལདྡྷཱ ཙེཝ ནིཊྛིཏཱ ཙ དྭཱིཧཱནཱགཏཱཡ…པེ… དསཱཧཱནཱགཏཱཡ ཝསྶཱུཔནཱཡིཀཱཡ ལདྡྷཱ ཙེཝ ནིཊྛིཏཱ ཙ, ཨནྟོཝསྶེ ཝཱ ལདྡྷཱ ཙེཝ ནིཊྛིཏཱ ཙཱཏི ཨེཝམཏྠོ དཊྛབྦོ. ཏཏྠ ཨཱསལ༹ྷཱིམཱསསྶ ཛུཎྷཔཀྑཔུཎྞམིཡཾ ལདྡྷཱ, ཏདཧེཝ རཛནཀཔྤཔརིཡོསཱནེཧི ནིཊྛིཏཱ ཙ ཝསྶིཀསཱཊིཀཱ ‘‘ཨེཀཱཧཱནཱགཏཱཡ ཝསྶཱུཔནཱཡིཀཱཡ ལདྡྷཱ ཙེཝ ནིཊྛིཏཱ ཙཱ’’ཏི ཝུཙྩཏི. ཨེཏེནེཝ ནཡེན ཛུཎྷཔཀྑསྶ ཚཊྛིཡཾ ལདྡྷཱ, ནིཊྛིཏཱ ཙ ‘‘དསཱཧཱནཱགཏཱཡ ཝསྶཱུཔནཱཡིཀཱཡ ལདྡྷཱ ཙེཝ ནིཊྛིཏཱ ཙཱ’’ཏི ཝུཙྩཏི. ཡཱཝ པཋམཀཏྟིཀཏེམཱསིཔུཎྞམཱ, ཏཱཝ ལདྡྷཱ, ནིཊྛིཏཱ ཙ ‘‘ཨནྟོཝསྶེ ལདྡྷཱ ཙེཝ ནིཊྛིཏཱ ཙཱ’’ཏི ཝུཙྩཏི. པཋམཀཏྟིཀཏེམཱསིཔུཎྞམིཏོ པརཾ ལདྡྷཱ ཙེཝ ནིཊྛིཏཱ ཙ ཡཱཝ ཙཱིཝརཀཱལོ ནཱཏིཀྐམཏི, ཏཱཝ ཨནདྷིཊྛཧིཏྭཱཔི ཋཔེཏུཾ ཝཊྚཏཱིཏི ཨདྷིཔྤཱཡོ.

ཨེཏྠ ཙ ‘‘ཏསྨིཾཡེཝ ཨནྟོདསཱཧེ ཨདྷིཊྛཱཏབྦཱ’’ཏི ཨཝིསེསེན ཝུཏྟེཔི ཝསྶཱནཏོ པུབྦེ ཨེཀཱཧདྭཱིཧཱདིཝསེན ཨནཱགཏཱཡ ཝསྶཱུཔནཱཡིཀཱཡ ལདྡྷཱ ཏེཧི དིཝསེཧི དསཱཧཾ ཨནཏིཀྐམནྟེན ¶ ཝསྶཱུཔནཱཡིཀདིཝསཏོ པཊྛཱཡ ཨདྷིཊྛཱནཀྑེཏྟཾ སམྤཏྟཱ ཨེཝ ཨདྷིཊྛཱཏབྦཱ, ཏཏོ པན པུབྦེ དསཱཧཱཏིཀྐམེན ནིཊྛིཏཱཔི ན ཨདྷིཊྛཱཏབྦཱ ཨདྷིཊྛཱནསྶ ཨཁེཏྟཏྟཱ. ཏཱདིསཱ པན ཝསྶཱུཔནཱཡིཀདིཝསེ ཨེཝ ཨདྷིཊྛཱཏབྦཱ, ཨནདྷིཊྛཧཏོ ཨརུཎུགྒམནེན ནིསྶགྒིཡཾ ཧོཏི. ཡདི ཨེཝཾ ‘‘དསཱཧཱནཱགཏཱཡཱ’’ཏི ཨིམིནཱ ཀིཾ པཡོཛནནྟི ཙེ? ཝསྶཱནཏོ པུབྦེ ཨེཝ དསཱཧེ ཨཏིཀྐནྟེ ནིཊྛིཏཱ ཝསྶཱུཔནཱཡིཀདིཝསེ ཨེཝ ཨདྷིཊྛཱཏབྦཱཏི དསྶནཏྠཾ ཝུཏྟཾ. ཏེནེཝཱཧ ‘‘དསཱཧཱཏིཀྐམེ ནིཊྛིཏཱ ཏདཧེཝ ཨདྷིཊྛཱཏབྦཱ’’ཏི.

དསཱཧེ ཨཔྤཧོནྟེ ཙཱིཝརཀཱལཾ ནཱཏིཀྐམེཏབྦཱཏི ཏེམཱསབྦྷནྟརེ དསཱཧེ ཨཔྤཧོནྟེ ནཝཱཧཱནཱགཏཱཡ ཀཏྟིཀཏེམཱསིཔུཎྞམཱཡ སཏྟམིཏོ པཊྛཱཡ ལདྡྷཱ, ནིཊྛིཏཱ ཙ ཙཱིཝརཀཱལཾ ནཱཏིཀྐམེཏབྦཱཏི ཨཏྠོ. ཏཐཱ ཧི ‘‘མཱསོ སེསོ གིམྷཱནནྟི བྷིཀྑུནཱ ཝསྶིཀསཱཊིཀཙཱིཝརཾ པརིཡེསིཏབྦ’’ནྟི པརིཡེསནཀྑེཏྟཾ ཝཏྭཱ ‘‘ཝསྶིཀསཱཊིཀཾ ཝསྶཱནཾ ཙཱཏུམཱསཾ ཨདྷིཊྛཱཏུ’’ནྟི (མཧཱཝ. ༣༥༨) ཝུཏྟཏྟཱ ཀཏཱཡཔི ཨཀཏཱཡཔི ¶ མཱསམཏྟཾ ཨནདྷིཊྛཱཏབྦཏཱ སིདྡྷཱ. ཡསྨཱ ཙ ཨཀཏཱ ཝསྶིཀསཱཊིཀསངྑྱཾ ན གཙྪཏི, ཨཀརཎཉྩ ཀེནཙི ཝེཀལླེན, ན ཨནཱདརེན, ཏསྨཱ ཙཱཏུམཱསཾ ཨཀཏཏྟཱ ཨེཝ པརིཧཱརཾ ལབྷཏི, ཀཏཱ པན ཨདྷིཊྛཱནཀྑེཏྟེ, ཨཀཏཱ ཙ ཙཱིཝརཀཱལེ དསཱཧཔརམསིཀྑཱཔདེནེཝ པརིཧཱརཾ ལབྷཏཱིཏི ཨཡམཏྠོ ལབྦྷཏི. ཀསྨཱཏི ཨཏྟནོ མཏིཡཱ ཀཱརཎཔུཙྪཱ. ཏསྨཱཏི ཝསྶཱནེཡེཝ ཝསྶིཀསཱཊིཀཱཡ ཨདྷིཊྛཱཏབྦཏཱཝཙནཏོ. ‘‘ཏིཙཱིཝརཾ ཨདྷིཊྛཱཏུ’’ནྟི སུཏྟཾ པནེཏྠ སེསཙཱིཝརཱནཾ ཨེཝཾ ཀཱལནིཡམཱབྷཱཝཾ སཱདྷེཏུཾ ཨུདྡྷཊཾ. ན ཧི ཏེནེཏྠ ཨཉྙཾ པཡོཛནཾ ཨཏྠི.

ཀདཱ ཨདྷིཊྛཱཏབྦཱཏིཨཱདིཀུརུནྡིཝཙནེནཱཔི ‘‘ཡདཱ ཝཱ ཏདཱ ཝཱ ཨདྷིཊྛཱཏུཾ ཝཊྚཏཱི’’ཏི ཨིདཾ པཊིཀྑིཔིཏྭཱ དསཱཧབྦྷནྟརེ ཨེཝ ཀཏཱཡ ཨདྷིཊྛཱཏབྦཏཾ དསྶེཏི.

པཱལི༹ཡཾ ཨཙྪིནྣཙཱིཝརསྶཱཏིཨཱདཱིསུ ཨཙྪིནྣསེསཙཱིཝརསྶ ནཊྛསེསཙཱིཝརསྶ. ཨེཏེསཉྷི ཨསམཡེ པརིཡེསནནིཝཱསནཱཔཏྟིཡཱ ཨེཝ ཨནཱཔཏྟི ཝུཏྟཱ. ཏེནེཝ མཱཏིཀཱཊྛཀཐཱཡཾ ‘‘ཨཙྪིནྣཙཱིཝརསྶ ཝཱ ནཊྛཙཱིཝརསྶ ཝཱ ཨནིཝཏྠཾ ཙོརཱ ཧརནྟཱིཏི ཨེཝཾ ཨཱཔདཱསུ ཝཱ ནིཝཱསཡཏོ ཨུམྨཏྟཀཱདཱིནཉྩ ཨནཱཔཏྟཱི’’ཏི (ཀངྑཱ. ཨཊྛ. ཝསྶིཀསཱཊིཀསིཀྑཱཔདཝཎྞནཱ) ཝུཏྟཾ, ཨིདྷ པན སམནྟཔཱསཱདིཀཱཡཾ ཨཡཾ ནིསྶགྒིཡཱ ཨནཱཔཏྟི པཱལི༹ཏོ སཡམེཝ སིཛ྄ཛྷཏཱིཏི ཨིམཾ ཨདསྶེཏྭཱ ཨསིཛ྄ཛྷམཱནཾ ནགྒསྶ ནྷཱཡཏོ དུཀྐཊཱཔཏྟིཡཱ ཨེཝ ཨནཱཔཏྟིཾ དསྶེཏུཾ ‘‘ཨཙྪིནྣཙཱིཝརསྶཱ’’ཏིཨཱདི ཝུཏྟནྟི གཧེཏབྦཾ. ན ཧི ཨེསཱ ཨནཱཔཏྟི ཨཝུཏྟེ སིཛ྄ཛྷཏཱིཏི. ཝསྶིཀསཱཊིཀཱཡ ཨཏྟུདྡེསིཀཏཱ, ཨསམཡེ པརིཡེསནཏཱ, ཏཱཡ ཙ པཊིལཱབྷོཏི ཨིམཱནི ¶ ཏཱཝ པརིཡེསནཱཔཏྟིཡཱ ཏཱིཎི ཨངྒཱནི. ནིཝཱསནཱཔཏྟིཡཱ པན སཙཱིཝརཏཱ, ཨཱཔདཱབྷཱཝོ, ཝསྶིཀསཱཊིཀཱཡ སཀབྷཱཝོ, ཨསམཡེ ནིཝཱསནནྟི ཙཏྟཱརི ཨངྒཱནི.

ཝསྶིཀསཱཊིཀསིཀྑཱཔདཝཎྞནཱ ནིཊྛིཏཱ.

༥. ཙཱིཝརཨཙྪིནྡནསིཀྑཱཔདཝཎྞནཱ

༦༣༡. པཉྩམེ ¶ ཡམྤི…པེ… ཨཙྪིནྡཱིཏི ཨེཏྠ ཡཾ ཏེ ཨཧཾ ཙཱིཝརཾ ཨདཱསིཾ, ཏཾ ‘‘མཡཱ སདྡྷིཾ པཀྐམིསྶཏཱི’’ཏི སཉྙཱཡ ཨདཱསིཾ, ན ཨཉྙཐཱཏི ཀུཔིཏོ ཨཙྪིནྡཱིཏི ཨེཝཾ ཨཛ྄ཛྷཱཧརིཏྭཱ ཡོཛེཏབྦཾ.

༦༣༣. ཨེཀཾ དུཀྐཊནྟི ཡདི ཨཱཎཏྟོ ཨཝསྶཾ ཨཙྪིནྡཏི, ཨཱཎཏྟིཀྑཎེ པཱཙིཏྟིཡམེཝ. ཡདི ན ཨཙྪིནྡཏི, ཏདཱ ཨེཝ དུཀྐཊནྟི དཊྛབྦཾ. ཨེཀཝཱཙཱཡ སམྦཧུལཱ ཨཱཔཏྟིཡོཏི ཡདི ཨཱཎཏྟོ ཨནནྟརཱཡེན ཨཙྪིནྡཏི, ཨཱཎཏྟིཀྑཎེཡེཝ ཝཏྠུགཎནཱཡ པཱཙིཏྟིཡཨཱཔཏྟིཡོ པཡོགཀརཎཀྑཎེཡེཝ ཨཱཔཏྟིཡཱ ཨཱཔཛྫིཏབྦཏོ, ཙཱིཝརཾ པན ཨཙྪིནྣེཡེཝ ནིསྶགྒིཡཾ ཧོཏི. ཡདི སོ ན ཨཙྪིནྡཏི, ཨཱཎཏྟིཀྑཎེ ཨེཀམེཝ དུཀྐཊནྟི དཊྛབྦཾ. ཨེཝཾ ཨཉྙཏྠཱཔི ཨཱིདིསེསུ ནཡོ ཉཱཏབྦོ.

༦༣༥. ཨུཔཛ྄ཛྷཾ གཎྷིསྶཏཱིཏི སཱམཎེརསྶ དཱནཾ དཱིཔེཏི, ཏེན ཙ སཱམཎེརཀཱལེ དཏྭཱ ཨུཔསམྤནྣཀཱལེ ཨཙྪིནྡཏོཔི པཱཙིཏྟིཡཾ དཱིཔེཏི. ‘‘བྷིཀྑུསྶ སཱམཾ ཙཱིཝརཾ དཏྭཱ’’ཏི ཨིདཾ ཨུཀྐཊྛཝསེན ཝུཏྟཾ. ཨཱཧརཱཔེཏུཾ པན ཝཊྚཏཱིཏི ཀམྨེ ཨཀཏེ བྷཏིསདིསཏྟཱ ཝུཏྟཾ. ཝིཀཔྤནུཔགཔཙྪིམཙཱིཝརཏཱ, སཱམཾ དིནྣཏཱ, སཀསཉྙིཏཱ, ཨུཔསམྤནྣཏཱ, ཀོདྷཝསེན ཨཙྪིནྡནཾ ཝཱ ཨཙྪིནྡཱཔནཾ ཝཱཏི ཨིམཱནེཏྠ པཉྩ ཨངྒཱནི.

ཙཱིཝརཨཙྪིནྡནསིཀྑཱཔདཝཎྞནཱ ནིཊྛིཏཱ.

༦. སུཏྟཝིཉྙཏྟིསིཀྑཱཔདཝཎྞནཱ

༦༣༦. ཚཊྛེ ཝཱིཏཝཱིཏཊྛཱནཾ ཡསྨིཾ ཙཏུརསྶདཱརུམྷི པལིཝེཋེནྟི, ཏསྶ ཏུརཱིཏི ནཱམཾ. ཝཱཡནྟཱ ¶ ཏིརིཡཾ སུཏྟཾ པཝེསེཏྭཱ ཡེན ཨཱཀོཊེནྟཱ ཝཏྠེ གྷནབྷཱཝཾ ཨཱཔཱདེནྟི, ཏཾ ‘‘ཝེམ’’ནྟི ཝུཙྩཏི.

‘‘ཨིཏརསྨིཾ ཏཐེཝ དུཀྐཊ’’ནྟི ཨིམིནཱ ཝཱཡིཏུཾ ཨཱརདྡྷཀཱལཏོ པཊྛཱཡ ཡཐཱཝུཏྟཔརིཙྪེདནིཊྛིཏེཡེཝ དུཀྐཊམྤི ཧོཏི, ན ཏཏོ པུབྦེ ཝཱཡནཔཡོགེསཱུཏི དསྶེཏི.

ཏནྟེ ¶ ཋིཏཾཡེཝ ཨདྷིཊྛཱཏབྦནྟི ཨེཏྠ ཨེཀཝཱརཾ ཨདྷིཊྛིཏེ པཙྪཱ ཝཱིཏཾ ཨདྷིཊྛིཏགཏིཀམེཝ ཧོཏི, པུན ཨདྷིཊྛཱནཀིཙྩཾ ནཏྠི. སཙེ པན ཨནྟརནྟརཱ དསཱ ཋཔེཏྭཱ ཝིསུཾ ཝིསུཾ སཔརིཙྪེདཾ ཝཱིཏཾ ཧོཏི, པཙྩེཀཾ ཨདྷིཊྛཱཏབྦམེཝཱཏི དཊྛབྦཾ. ཨེཏྠ ཙ ཀཔྤིཡསུཏྟཾ གཧེཏྭཱ ཨཉྙཱཏཀཨཔྤཝཱརིཏེནཱཔི ཨཀཔྤིཡཏནྟཝཱཡེན ‘‘སུཏྟམཏྠི, ཝཱཡནྟོ ནཏྠཱི’’ཏིཨཱདིཔརིཡཱཡམུཁེན ཝཱཡཱཔེནྟསྶ ཨནཱཔཏྟི. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. སུཏྟཝིཉྙཏྟིསིཀྑཱཔདཝཎྞནཱ) ‘‘ཝཱཡཱཔེཡྻཱ’’ཏི པདསྶ ‘‘ཙཱིཝརཾ མེ, ཨཱཝུསོ, ཝཱཡཐཱཏི ཨཀཔྤིཡཝིཉྙཏྟིཡཱ ཝཱཡཱཔེཡྻཱ’’ཏི ཨཏྠོ ཝུཏྟོ, ཨེཝཾ ཝདནྟོ ཨཀཔྤིཡཏནྟཝཱཡེན ཝཱཡཱཔེཏི ནཱམ, ནཱཉྙཐཱ.

༦༤༠. ཨནཱཔཏྟི ཙཱིཝརཾ སིབྦེཏུནྟིཨཱདཱིསུ ཨིམིནཱ སིཀྑཱཔདེནེཝ ཨནཱཔཏྟི, ཨཀཏཝིཉྙཏྟིཔཙྩཡཱ པན དུཀྐཊམེཝཱཏི ཝདནྟི. ཨཀཔྤིཡསུཏྟཏཱ, ཨཏྟུདྡེསིཀཏཱ, ཨཀཔྤིཡཏནྟཝཱཡེན ཨཀཔྤིཡཝིཉྙཏྟིཡཱ ཝཱཡཱཔནནྟི ཨིམཱནེཏྠ ཏཱིཎི ཨངྒཱནི.

སུཏྟཝིཉྙཏྟིསིཀྑཱཔདཝཎྞནཱ ནིཊྛིཏཱ.

༧. མཧཱཔེསཀཱརསིཀྑཱཔདཝཎྞནཱ

༦༤༢. སཏྟམེ ‘‘ཀིཉྩིམཏྟཾ ཨནུཔདཛྫེཡྻཱ’’ཏི ཨིདཾ པཡོགབྷེདདསྶནཾ, དཱནཾ པནེཏྠ ཨངྒཾ ན ཧོཏི. ཏེནེཝ ཏསྶ ཝིབྷངྒེ ‘‘ཨནྟམསོ དྷམྨམྤི བྷཎཏཱི’’ཏི ཝུཏྟཾ. སེསམེཏྠ ཨུཏྟཱནམེཝ. ཨཉྙཱཏཀཨཔྤཝཱརིཏཱནཾ ཏནྟཝཱཡེ ཨུཔསངྐམིཏྭཱ ཝིཀཔྤམཱཔཛྫནཏཱ, ཙཱིཝརསྶ ཨཏྟུདྡེསིཀཏཱ, ཏསྶ ཝཙནེན སུཏྟཝཌྜྷནཾ, ཙཱིཝརཔཊིལཱབྷོཏི ཨིམཱནེཏྠ ཙཏྟཱརི ཨངྒཱནི.

མཧཱཔེསཀཱརསིཀྑཱཔདཝཎྞནཱ ནིཊྛིཏཱ.

༨. ཨཙྩེཀཙཱིཝརསིཀྑཱཔདཝཎྞནཱ

༦༤༦. ཨཊྛམེ ¶ ¶ ཚཊྛིཡཾ ཨུཔྤནྣཙཱིཝརསྶ ཨེཀཱདསམཱརུཎོ ཙཱིཝརཀཱལེ ཨུཊྛཱཏཱིཏི ཨཱཧ ‘‘ཚཊྛིཏོ པཊྛཱཡཱ’’ཏིཨཱདི, ཏེན ཙ ‘‘དསཱཧཱནཱགཏ’’ནྟི ཝུཏྟཏྟཱ པཉྩམིཏོ པཊྛཱཡ པུཎྞམིཏོ པུབྦེ དསསུ ཨརུཎེསུ ཨུཊྛིཏེསུཔི ཙཱིཝརཾ ནིསྶགྒིཡཾ ན ཧོཏི. པུཎྞམིཡཱ སཧ ཨེཀཱདས དིཝསཱ ལབྦྷནྟཱིཏི ཨེཏྟཀམེཝ ཨིམིནཱ སིཀྑཱཔདེན ལདྡྷཾ, ཚཊྛིཏོ པཊྛཱཡ ཨུཔྤནྣཾ སབྦཙཱིཝརཾ པཋམཀཐིནསིཀྑཱཔདཝསེནེཝ ཡཱཝ ཙཱིཝརཀཱལཾ ནིསྶགྒིཡཾ ན ཧོཏཱིཏི དསྶེཏི.

༦༥༠. ཨིདཱནི པཋམཀཐིནཱདིསིཀྑཱཔདེཧི ཏསྶ ཏསྶ ཙཱིཝརསྶ ལབྦྷམཱནཾ པརིཧཱརཾ ཨིདྷེཝ ཨེཀཏོ སམྤིཎྜེཏྭཱ དསྶེནྟོ ‘‘ཨཏིརེཀཙཱིཝརསྶཱ’’ཏིཨཱདིམཱཧ. ‘‘ཨནཏྠཏེ ཀཐིནེ ཨེཀཱདསདིཝསཱདྷིཀོ མཱསོ, ཨཏྠཏེ ཀཐིནེ ཨེཀཱདསདིཝསཱདྷིཀཱ པཉྩ མཱསཱ’’ཏི ཨཡམེཝ པཱཋོ པཱལི༹ཡཱ སམེཏི. ཀེཙི པན ‘‘དསདིཝསཱདྷིཀོ མཱསོ, དསདིཝསཱདྷིཀཱ པཉྩ མཱསཱཏི པཱཋེན བྷཝིཏབྦ’’ནྟི ཝདནྟི, ཏཾ ན ཡུཏྟཾ, ཨཉྙཐཱ ‘‘ནཝཱཧཱནཱགཏ’’ནྟི ཝཏྟབྦཏོ. ཡཾ པནེཏྠ མཱཏིཀཱཊྛཀཐཱཡཉྩ ‘‘ཀཱམཉྩེས ‘དསཱཧཔརམཾ ཨཏིརེཀཙཱིཝརཾ དྷཱརེཏབྦ’ནྟི ཨིམིནཱཝ སིདྡྷོ, ཨཊྛུཔྤཏྟིཝསེན པན ཨཔུབྦཾ ཝིཡ ཨཏྠཾ དསྶེཏྭཱ སིཀྑཱཔདཾ ཋཔིཏ’’ནྟི (ཀངྑཱ. ཨཊྛ. ཨཙྩེཀཙཱིཝརསིཀྑཱཔདཝཎྞནཱ) ལིཁནྟི, ཏཾ པམཱདལིཁིཏཾ ‘‘པཝཱརཎམཱསསྶ ཛུཎྷཔཀྑཔཉྩམིཏོ པཊྛཱཡ ཨུཔྤནྣསྶ ཙཱིཝརསྶ ནིདྷཱནཀཱལོ དསྶིཏོ ཧོཏཱི’’ཏི (ཀངྑཱ. ཨཊྛ. ཨཙྩེཀཙཱིཝརསིཀྑཱཔདཝཎྞནཱ) ཝུཏྟཏྟཱ. ཨིམམེཝ ཙ པམཱདལིཁིཏཾ གཧེཏྭཱ བྷདནྟབུདྡྷདཏྟཱཙརིཡེན ཙ ‘‘པརིཧཱརེཀམཱསོཝ, དསཱཧཔརམོ མཏོ’’ཏིཨཱདི ཝུཏྟནྟི གཧེཏབྦཾ.

ཨཙྩེཀཙཱིཝརསདིསེ ཨཉྙསྨིནྟི པུབྦེ ཨདྷིཊྛིཏེ ཨུཔྤནྣཀཱལཱཀཱརཱདི སཱདིསེན ཨཙྩེཀཙཱིཝརསདིསེ ཨཉྙསྨིཾ ཙཱིཝརེ ཨཙྩེཀཙཱིཝརསཉྙཱཡ ཙཱིཝརཀཱལཾ ཨཏིཀྐམེཏཱིཏི ཨཏྠོ. ཏེནེཝེཏྠ དུཀྐཊཾ, ཨནཱཔཏྟི ཙ ཝུཏྟཱ, ཨིཏརཐཱ ཏཱིསུཔི པདེསུ པཱཙིཏྟིཡསྶེཝ ཝཏྟབྦཏོ. ཨནཙྩེཀཙཱིཝརམྤི ཧི ཙཱིཝརཀཱལཾ ཨཏིཀྐམཡཏོ པཱཙིཏྟིཡམེཝ ཨཙྩེཀཙཱིཝརཏྟིཀེ ཝིཡཱཏི དཊྛབྦཾ. ཝིཀཔྤནུཔགཔཙྪིམཔྤམཱཎསྶ ཨཙྩེཀཙཱིཝརསྶ ཨཏྟནོ སནྟཀཏཱ ¶ , དསཱཧཱནཱགཏཱཡ ཀཏྟིཀཏེམཱསིཔུཎྞམཱཡ ཨུཔྤནྣབྷཱཝོ, ཨནདྷིཊྛིཏཨཝིཀཔྤིཏཏཱ, ཙཱིཝརཀཱལཱཏིཀྐམོཏི ཨིམཱནེཏྠ ཙཏྟཱརི ཨངྒཱནི.

ཨཙྩེཀཙཱིཝརསིཀྑཱཔདཝཎྞནཱ ནིཊྛིཏཱ.

༩. སཱསངྐསིཀྑཱཔདཝཎྞནཱ

༦༥༢-༣. ནཝམེ ¶ ཨནྟརནྟརཱ གྷརམེཏྠཱཏི ཨནྟརགྷརནྟི གཱམོ ཝུཏྟོཏི ཨཱཧ ‘‘ཨནྟོགཱམེ’’ཏི. ‘‘པཋམཾ ཛྷཱནཾ ཨུཔསམྤཛྫ ཝིཧརཏཱི’’ཏི (ཝིབྷ. ༦༢༤) ཨིམསྶ ཝིབྷངྒེ ‘‘ཨུཔསམྤཛྫ’’ནྟི སཱནུསཱརཾ ཨུདྡྷཊཾ. ཏཾ སནྡྷཱཡཱཧ ‘‘ཨུཔསམྤཛྫནྟིཨཱདཱིསུ ཝིཡཱ’’ཏི. ཏསྶཱཔཱིཏི ‘‘ཝུཏྠཝསྶཱན’’ནྟི ཝིབྷངྒཔདསྶཔི. ཝུཏྠཝསྶཱནནྟི ཙ ནིདྡྷཱརཎེ སཱམིཝཙནཾ, ཨེཏེན ཙ པུརིམསིཀྑཱཔདེ ཨནཏྠཏཀཐིནཱནཾ ཀཐིནམཱསེཔི ཨསམཱདཱནཙཱརོ ན ལབྦྷཏཱིཏི སིདྡྷཾ ཧོཏི, ཨིཏརཐཱ སིཀྑཱཔདསྶེཝ ནིརཏྠཀཏྟཱཏི དཊྛབྦཾ.

པརིཀྑེཔཱརཧཊྛཱནཏོཏི ཨེཏྠ གཱམཔརིཡནྟེ ཋིཏགྷརཱུཔཙཱརཏོ པཊྛཱཡ ཨེཀོ ལེཌྜུཔཱཏོ པརིཀྑེཔཱརཧཊྛཱནཾ ནཱམ. ཝིསུདྡྷིམགྒེཔི ‘‘ཨཔརིཀྑིཏྟསྶ པཋམལེཌྜུཔཱཏཏོ པཊྛཱཡཱ’’ཏི (ཝིསུདྡྷི. ༡.༣༡) ཝུཏྟཾ. ཏནྟི ཏཾ པཋམསེནཱསནཱདིཾ. མཛ྄ཛྷིམནིཀཱཡཊྛཀཐཱཡཾ པན ཝིཧཱརསྶཔི གཱམསྶེཝ ཨུཔཙཱརཾ ནཱིཧརིཏྭཱ ཨུབྷིནྣཾ ལེཌྜུཔཱཏཱནཾ ཨནྟརཱ མིནིཏབྦནྟི ཝུཏྟཾ.

‘‘ཀོསམྦིཡཾ ཨཉྙཏརོ བྷིཀྑུ གིལཱནོ ཧོཏཱི’’ཏི ཨཱགཏཏྟཱ ‘‘ཀོསམྦཀསམྨུཏི ཨནུཉྙཱཏཱ’’ཏི ཝུཏྟཾ. ‘‘ཨཡཉྩ པཙྪིམདིསཾ གཏོ ཧོཏཱི’’ཏི ཨིམིནཱ ཨནྟརགྷརེ ཙཱིཝརཾ ནིཀྑིཔིཏྭཱ ཏསྨིཾ ཝིཧཱརེ ཝསནྟསྶ སཀལམྤི ཙཱིཝརམཱསཾ ཝིཔྤཝསིཏུཾ ཝཊྚཏི, ཏཏོ ཨཉྙཏྠ གམནཀིཙྩེ སཏི ཝིཧཱརཏོ བཧི ཚཱརཏྟཾ ཝིཔྤཝཱསོ ཨནུཉྙཱཏོཏི དཱིཔེཏི. ཏེནཱཧ ‘‘སེནཱསནཾ ཨཱགནྟྭཱ སཏྟམཾ ཨརུཎཾ ཨུཊྛཱཔེཏུ’’ནྟིཨཱདི. ཝསིཏྭཱཏི ཨརུཎཾ ཨུཊྛཱཔེཏྭཱ. ཏཏྠེཝཱཏི ཏསྨིཉྙེཝ གཏཊྛཱནེ. ཨངྒཱནི པནེཏྠ ཨཊྛཀཐཱཡམེཝ ཝུཏྟཱནི.

སཱསངྐསིཀྑཱཔདཝཎྞནཱ ནིཊྛིཏཱ.

༡༠. པརིཎཏསིཀྑཱཔདཝཎྞནཱ

༦༦༠. དསམེ ¶ རོཔིཏམཱལཝཙྪཏོཏི ཀེནཙི ནིཡམེཏྭཱ རོཔིཏཾ སནྡྷཱཡ ཝུཏྟཾ. ཨནོཙིཏཾ མིལཱཡམཱནཾ ཨོཙིནིཏྭཱ ཡཏྠ ཀཏྠཙི པཱུཛེཏུཾ ཝཊྚཏི. ཋིཏཾ དིསྭཱཏི སེསཀཾ གཧེཏྭཱ ཋིཏཾ དིསྭཱ. ཡཏྠ ཨིཙྪཐ, ཏཏྠ དེཐཱཏི ཨེཏྠ ནིཡམེཏྭཱ ‘‘ཨསུཀསྶ དེཧཱི’’ཏི ཝུཏྟེཔི ¶ དོསོ ནཏྠི ‘‘ཏུམྷཱཀཾ རུཙིཡཱ’’ཏི ཝུཏྟཏྟཱ. སངྒྷེ པརིཎཏབྷཱཝོ, ཏཾ ཉཏྭཱ ཨཏྟནོ པརིཎཱམནཾ, པཊིལཱབྷོཏི ཨིམཱནེཏྠ ཏཱིཎི ཨངྒཱནི.

པརིཎཏསིཀྑཱཔདཝཎྞནཱ ནིཊྛིཏཱ.

ནིཊྛིཏོ པཏྟཝགྒོ ཏཏིཡོ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

ཏིཾསཀཝཎྞནཱནཡོ ནིཊྛིཏོ.

པཋམོ བྷཱགོ ནིཊྛིཏོ.