📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིནཡཔིཊཀེ

ཝིམཏིཝིནོདནཱི-ཊཱིཀཱ (དུཏིཡོ བྷཱགོ)

༥. པཱཙིཏྟིཡཀཎྜཾ

༡. མུསཱཝཱདཝགྒོ

༡. མུསཱཝཱདསིཀྑཱཔདཝཎྞནཱ

༡. མུསཱཝཱདཝགྒསྶ ¶ ¶ པཋམསིཀྑཱཔདེ ཁུདྡཀཱནནྟི ཨེཏྠ ‘‘ཁུདྡཀ-སདྡོ བཧུ-སདྡཔརིཡཱཡོ’’ཏི ཝདནྟི. ཏཏྠཱཏི ཏེསུ ཝགྒེསུ, ཁུདྡཀེསུ ཝཱ. ‘‘ཛཱནིཏབྦཏོ’’ཏི ཧེཏུནོ ཝིཔཀྑེཔི ནིབྦཱནེ ཝཏྟནཏོ ཨནེཀནྟིཀཏྟེ པརེཧི ཝུཏྟེ ‘‘ན མཡཱ ཨཡཾ ཧེཏུ ཝུཏྟོ’’ཏི ¶ ཏཾ ཀཱརཎཾ པཊིཙྪཱདེཏུཾ པུན ‘‘ཛཱཏིདྷམྨཏོཏི མཡཱ ཝུཏྟ’’ནྟིཨཱདཱིནི ཝདཏི. ‘‘སམྤཛཱན’’ནྟི ཝཏྟབྦེ ཨནུནཱསིཀལོཔེན ནིདྡེསོཏི ཨཱཧ ‘‘ཛཱནནྟོ’’ཏི.

༢. སམྤཛཱནམུསཱཝཱདེཏི ཨཏྟནཱ ཝུཙྩམཱནསྶ ཨཏྠསྶ ཝིཏཐབྷཱཝཾ པུབྦེཔི ཛཱནིཏྭཱ, ཝཙནཀྑཎེ ཙ ཛཱནནྟསྶ མུསཱཝཱདབྷཎནེ. ཏེནཱཧ ‘‘ཛཱནིཏྭཱ’’ཏིཨཱདི. མུསཱཝཱདེཏི ཙ ནིམིཏྟཏྠེ བྷུམྨཾ, ཏསྨཱ མུསཱབྷཎནནིམིཏྟཾ པཱཙིཏྟིཡནྟི ཨེཝམེཏྠ, ཨིཏོ པརེསུཔི ཨཱིདིསེསུ ཨཏྠོ ཝེདིཏབྦོ.

༣. ཝདནྟི ¶ ཨེཏཱཡཱཏི ཝཱཙཱཏི ཨཱཧ ‘‘མིཙྪཱ’’ཏིཨཱདི. ‘‘དྷནུནཱ ཝིཛ྄ཛྷཏཱི’’ཏིཨཱདཱིསུ ཝིཡ ‘‘ཙཀྑུནཱ དིཊྛ’’ནྟི པཱཀཊཝསེན ཝུཏྟནྟི ཨཱཧ ‘‘ཨོལཱ༹རིཀེནཱ’’ཏི.

༡༡. གཏོ བྷཝིསྶཏཱིཏི ཨེཏྠཱཔི སནྣིཊྛཱནཏོ ཝུཏྟཏྟཱ མུསཱཝཱདོ ཛཱཏོ. ཨཱཔཏྟིནྟི པཱཙིཏྟིཡཱཔཏྟིཾ, ན དུབྦྷཱསིཏཾ. ཛཱཏིཨཱདཱིཧི དསཧི ཨཀྐོསཝཏྠཱུཧི པརཾ དཝཱ ཝདནྟསྶ ཧི ཏཾ ཧོཏི. ཙཱརེསུནྟི ཨུཔནེསུཾ. ཝཏྠུཝིཔརཱིཏཏཱ, ཝིསཾཝཱདནཔུརེཀྑཱརཏཱ, ཡམཏྠཾ ཝཏྠུཀཱམོ, ཏསྶ པུགྒལསྶ ཝིཉྙཱཔནཔཡོགོ ཙཱཏི ཨིམཱནེཏྠ ཏཱིཎི ཨངྒཱནི. ཝཏྠུཝིཔརཱིཏཏཱཡ ཧི ཨསཏི ཝིསཾཝཱདནཔུརེཀྑཱརཏཱཡ ཝིཉྙཱཔིཏེཔི མུསཱཝཱདོ ན ཧོཏི, དུཀྐཊམཏྟམེཝ ཧོཏི. ཏསྨཱ སཱཔི ཨངྒམེཝཱཏི གཧེཏབྦཾ. ཨུཏྟརིམནུསྶདྷམྨཱརོཙནཏྠཾ མུསཱ བྷཎནྟསྶ པཱརཱཛིཀཾ, པརིཡཱཡེན ཐུལླཙྩཡཾ, ཨམཱུལཀེན པཱརཱཛིཀེན ཨནུདྡྷཾསནཏྠཾ སངྒྷཱདིསེསོ, སངྒྷཱདིསེསེནཱནུདྡྷཾསནཨོམསཝཱདཱདཱིསུ པཱཙིཏྟིཡཾ, ཨནུཔསམྤནྣེསུ དུཀྐཊཾ, ཨུཀྐཊྛཧཱིནཛཱཏིཨཱདཱིཧི དཝཱ ཨཀྐོསནྟསྶ དུབྦྷཱསིཏཾ, ཀེཝལཾ མུསཱ བྷཎནྟསྶ ཨིདྷ པཱཙིཏྟིཡཾ ཝུཏྟཾ.

མུསཱཝཱདསིཀྑཱཔདཝཎྞནཱ ནིཊྛིཏཱ.

༢. ཨོམསཝཱདསིཀྑཱཔདཝཎྞནཱ

༡༣. དུཏིཡེ པུབྦེ པཏིཊྛིཏཱརཔྤདེསཾ པུན ཨརེ པཏྟེཏི པཋམཾ བྷཱུམིཡཾ པཏིཊྛིཏནེམིཔྤདེསེ པརིཝཏྟེཏྭཱ པུན བྷཱུམིཡཾ པཏིཊྛིཏེཏི ཨཏྠོ.

༡༥. པུབྦེཏི ཨཊྛུཔྤཏྟིཡཾ. པུཔྥཚཌྜཀཱ ནཱམ གབྦྷམལཱདིཧཱརཀཱ. ཏཙྪཀཀམྨནྟི པཱསཱཎཀོཊྚནཱདིཝཌྜྷཀཱིཀམྨཾ ¶ . ཧཏྠམུདྡཱགཎནཱཏི ཨངྒུལིསངྐོཙནེནེཝ གཎནཱ. ཨཙྪིདྡཀགཎནཱ ནཱམ ཨེཀཊྛཱནདསཊྛཱནཱདཱིསུ སཱརིཡོ ཋཔེཏྭཱ ཨནུཀྐམེན གཎནཱ. ཨཱདི-སདྡེན སངྐལནཔཊཨུཔྤཱདནཝོཀླནབྷཱགཧཱརཱདིཝསེན པཝཏྟཱ པིཎྜགཎནཱ གཧིཏཱ. ཡསྶ སཱ པགུཎཱ, སོ རུཀྑམྤི དིསྭཱ ‘‘ཨེཏྟཀཱནི ཨེཏྠ པཎྞཱནཱི’’ཏི ¶ ཛཱནཱཏི. ཡབྷ-མེཐུནེཏི ཝཙནཏོ ཨཱཧ ‘‘ཡ-ཀཱར-བྷ-ཀཱརེ’’ཏིཨཱདི.

༡༦. ན པུརིམེནཱཏི མུསཱཝཱདསིཀྑཱཔདེན. སོཔི ཨཱཔཏྟིཡཱཏི ཨུཔསགྒཱདིཝིསིཊྛེཧིཔི ཝདནྟོ པཱཙིཏྟིཡཱཔཏྟིཡཱཝ ཀཱརེཏབྦོ.

༢༦. དུབྦྷཱསིཏནྟི སཱམཉྙཏོ ཝུཏྟཏྟཱ པཱལི༹ཡཾ ཨནཱགཏེཧིཔི པརམྨུཁཱ ཝདནྟསྶཔི དུབྦྷཱསིཏམེཝཱཏི ཨཱཙརིཡཱ ཝདནྟི ཏཏོ ལཱམཀཱཔཏྟིཡཱ ཨབྷཱཝཱ, ཨནཱཔཏྟིཡཱཔེཏྠ བྷཝིཏུཾ ཨཡུཏྟཏྟཱ. སབྦསཏྟཱཏི ཨེཏྠ ཝཙནཏྠཝིདཱུཧི ཏིརཙྪཱནཱདཡོཔི གཧིཏཱ.

༣༥. ཨནུསཱསནཱིཔུརེཀྑཱརཏཱཡ ཝཱ པཱཔགརཧིཏཱཡ ཝཱ ཝདནྟཱནཾ ཙིཏྟསྶ ལཧུཔརིཝཏྟིབྷཱཝཏོ ཨནྟརནྟརཱ ཀོཔེ ཨུཔྤནྣེཔི ཨནཱཔཏྟི. ཀཱཡཝིཀཱརམཏྟེནཔི ཨོམསནསམྦྷཝཏོ ‘‘ཏིསམུཊྛཱནཾ, ཀཱཡཀམྨ’’ནྟི ཙ ཝུཏྟཾ. པརིཝཱརེ པན ‘‘ཙཏུཏྠེན ཨཱཔཏྟིསམུཊྛཱནེན…པེ… དུབྦྷཱསིཏཾ ཨཱཔཛྫེཡྻཱཏི. ན ཧཱིཏི ཝཏྟབྦ’’ནྟིཨཱདིནཱ (པརི. ༢༧༦) ཨིཏརཱནི སམུཊྛཱནཱནི པཊིཀྑིཔིཏྭཱ པཉྩམསྶེཝ ཝུཏྟཏྟཱ ཨཱཧ ‘‘དུབྦྷཱསིཏཱཔཏྟི པནེཏྠ ཝཱཙཱཙིཏྟཏོ སམུཊྛཱཏཱི’’ཏི. དཝཀམྱཏཱཡ ཧི ཀཱཡཝཱཙཱཙིཏྟེཧི ཨོམསནྟསྶཔི ཝཱཙཱཙིཏྟམེཝ ཨཱཔཏྟིཡཱ ཨངྒཾ ཧོཏི, ན པན ཀཱཡོ ཝིཛྫམཱནོཔི དྷམྨདེསནཱཔཏྟི ཝིཡ ཀེཝལཾ ཀཱཡཝིཀཱརེནེཝ. ཨོམསནྟསྶ པན ཀིཉྩཱཔི ཨིདྷ དུབྦྷཱསིཏཱཔཏྟིཡཱ ཨནཱཔཏྟི, ཨཐ ཁོ ཀཱཡཀཱིལཱ༹པཊིཀྑེཔསིཀྑཱཔདེན དུཀྐཊམེཝཱཏི དཊྛབྦཾ. ཨུཔསམྤནྣཾ ཛཱཏིཨཱདཱིཧི ཨནཉྙཱཔདེསེན ཨཀྐོསནཾ, ཏསྶ ཛཱནནཾ, ཨཏྠཔུརེཀྑཱརཏཱདཱིནཾ ཨབྷཱཝོཏི ཨིམཱནེཏྠ ཏཱིཎི ཨངྒཱནི.

ཨོམསཝཱདསིཀྑཱཔདཝཎྞནཱ ནིཊྛིཏཱ.

༣. པེསུཉྙསིཀྑཱཔདཝཎྞནཱ

༣༦. ཏཏིཡེ བྷཎྜནཾ ཛཱཏཾ ཨེཏེསནྟི བྷཎྜནཛཱཏཱ. པིསཏཱིཏི པིསུཎཱ, ཝཱཙཱ, སམགྒེ བྷིནྣེ ¶ ཀརོཏཱིཏི ཨཏྠོ. ཏཱཡ ཝཱཙཱཡ སམནྣཱགཏོ པིསུཎོ, ཏསྶ ཀམྨཾ པེསུཉྙནྟི ཨེཝམེཏྠ ཨཏྠོ ཝེདིཏབྦོ.

ཨིདྷཱཔི ¶ ཛཱཏིཨཱདཱིཧི དསཧི ཝཏྠཱུཧི པེསུཉྙཾ ཨུཔསཾཧརནྟསྶེཝ པཱཙིཏྟིཡཾ, ཨིཏརེཧི ཨཀྐོསཝཏྠཱུཧི དུཀྐཊཾ. ཨནཀྐོསཝཏྠཱུཧི པན ཨུཔསཾཧརནྟསྶ དུཀྐཊམེཝཱཏི ཝདནྟི. ཛཱཏིཨཱདཱིཧི ཨནཉྙཱཔདེསེན ཨཀྐོསནྟསྶ བྷིཀྑུནོ སུཏྭཱ བྷིཀྑུསྶ ཨུཔསཾཧརཎཾ, པིཡཀམྱཏཱབྷེདཱདྷིཔྤཱཡེསུ ཨཉྙཏརཏཱ, ཏསྶ ཝིཛཱནནཱཏི ཨིམཱནེཏྠ ཏཱིཎི ཨངྒཱནི.

པེསུཉྙསིཀྑཱཔདཝཎྞནཱ ནིཊྛིཏཱ.

༤. པདསོདྷམྨསིཀྑཱཔདཝཎྞནཱ

༤༥. ཙཏུཏྠེ པུརིམབྱཉྫནེན སདིསནྟི ‘‘རཱུཔཾ ཨནིཙྩ’’ནྟི ཨེཏྠ ཨནིཙྩ-སདྡེན སདིསཾ ‘‘ཝེདནཱ ཨནིཙྩཱ’’ཏི ཨེཏྠ ཨནིཙྩ-སདྡཾ ཝདཏི. ཨཀྑརསམཱུཧོཏི ཨཝིབྷཏྟིཀོ ཝུཏྟོ. པདནྟི ཝིབྷཏྟིཨནྟཾ ཝུཏྟཾ.

ཨེཀཾ པདནྟི གཱཐཱཔདམེཝ སནྡྷཱཡ ཝདཏི. པདགཎནཱཡཱཏི གཱཐཱཔདགཎནཱཡ. ཨཔཱཔུཎིཏྭཱཏི སདྡྷིཾ ཨཀཐེཏྭཱ. ཨེཏེན གཱཐཱཡ པཙྪིམཔཱདེ ཝུཙྩམཱནེ སཱམཎེརོ པཋམཔཱདཱདིཾ ཝདཏི, ཨཱཔཏྟིཡེཝ, ཏསྨིཾ ནིསྶདྡེ ཨེཝ ཨིཏརེན ཝཏྟབྦནྟི དསྶེཏི.

ཨཊྛཀཐཱནིསྶིཏོཏི སངྒཱིཏིཏྟཡཱརུལ༹ྷཾ པོརཱཎཊྛཀཐཾ སནྡྷཱཡ ཝདཏི. ཨིདཱནིཔི ‘‘ཡཐཱཔི དཱིཔིཀོ ནཱམ, ནིལཱིཡིཏྭཱ གཎྷཏེ མིགེ’’ཏི (མི. པ. ༦.༡.༥; ཝིསུདྡྷི. ༡.༢༡༧; དཱི. ནི. ཨཊྛ. ༢.༣༧༤; མ. ནི. ཨཊྛ. ༡.༡༠༧; པཱརཱ. ཨཊྛ. ༢.༡༦༥; པཊི. མ. ཨཊྛ. ༢.༡.༡༦༣) ཨེཝམཱདིཀཾ ཨཊྛཀཐཱཝཙནཾ ཨཏྠེཝ, བུདྡྷགྷོསཱཙརིཡཱདཱིཧི པོརཱཎཊྛཀཐཱནཡེན ཝུཏྟམྤི ཨིདྷ སངྒཧེཏབྦནྟི ཝདནྟི. པཱལི༹ནིསྶིཏོཏི ཨུདཱནཝགྒསངྒཧཱདིཀོ. ཝིཝཊྚཱུཔནིསྶིཏནྟི ནིབྦཱནནིསྶིཏཾ. ཐེརསྶཱཏི ནཱགསེནཏྠེརསྶ. མགྒཀཐཱདཱིནི པཀརཎཱནི.

༤༦. པཱལི༹ཡཾ ཨཀྑརཱཡཱཏིཨཱདི ལིངྒཝིཔལླཱསེན ཝུཏྟཾ, ཨཀྑརེནཱཏིཨཱདིནཱ ཨཏྠོ གཧེཏབྦོ.

༤༨. ཨུཔཙཱརཾ ¶ མུཉྩིཏྭཱཏི པརིསཱཡ དྭཱདསཧཏྠཾ མུཉྩིཏྭཱ ཨེཀཏོ ཋིཏསྶ ཝཱ ནིསིནྣསྶ ཝཱ ཨནུཔསམྤནྣསྶ ཨཀཐེཏྭཱ ཨཉྙེ ཨུདྡིསྶ བྷཎནྟསྶཱཔི ¶ ཨནཱཔཏྟི. སཙེ པན དཱུརེ ནིསིནྣམྤི ཨུདྡིསྶ བྷཎཏི, ཨཱཔཏྟི ཨེཝ. ཨོཔཱཏེཏཱིཏི སདྡྷིཾ ཀཐེཏི. ཨནུཔསམྤནྣཏཱ, ཝུཏྟལཀྑཎདྷམྨཾ པདསོ ཝཱཙནཏཱ, ཨེཀཏོ བྷཎནཉྩཱཏི ཨིམཱནེཏྠ ཏཱིཎི ཨངྒཱནི.

པདསོདྷམྨསིཀྑཱཔདཝཎྞནཱ ནིཊྛིཏཱ.

༥. སཧསེཡྻསིཀྑཱཔདཝཎྞནཱ

༥༠-༥༡. པཉྩམེ ཏཏྲིདཾ ནིདསྶནནྟི སེསོ. དིརཏྟཏིརཏྟནྟི ཨེཏྠ དིརཏྟགྒཧཎཾ ཝཙནཱལངྐཱརཏྠཾ, ནིརནྟརཾ ཏིསྶོཝ རཏྟིཡོ ཝསིཏྭཱ ཙཏུཏྠདིཝསཱདཱིསུ སཡནྟསྶེཝ ཨཱཔཏྟི, ན ཨེཀནྟརིཀཱདིཝསེན སཡནྟསྶཱཏི དསྶནཏྠམྤཱིཏི དཊྛབྦཾ. དིརཏྟཝིསིཊྛཉྷི ཏིརཏྟཾ ཝུཙྩམཱནཾ, ཏེན ཨནནྟརིཀམེཝ ཏིརཏྟཾ དཱིཔེཏཱིཏི. པཉྩཧི ཚདནེཧཱིཏི ཨིཊྛཀསིལཱསུདྷཱཏིཎཔཎྞེཧི. ཝཱཙུགྒཏཝསེནཱཏི པགུཎཝསེན. དིཡཌྜྷཧཏྠུབྦེདྷོ ཝཌྜྷཀཱིཧཏྠེན གཧེཏབྦོ. ཨེཀཱུཔཙཱརོ ཨེཀེན མགྒེན པཝིསིཏྭཱ ཨབྦྷོཀཱསཾ ཨནུཀྐམིཏྭཱ སབྦཏྠ ཨནུཔརིགམནཡོགྒོ, ཨེཏཾ བཧུདྭཱརམྤི ཨེཀཱུཔཙཱརོཝ. ཏཏྠ པན ཀུཊྚཱདཱིཧི རུནྡྷིཏྭཱ ཝིསུཾ དྭཱརཾ ཡོཛེནྟི, ནཱནཱུཔཙཱརོ ཧོཏི. སཙེ པན རུནྡྷཏི ཨེཝ, ཝིསུཾ དྭཱརཾ ན ཡོཛེནྟི, ‘‘ཨེཏམྤི ཨེཀཱུཔཙཱརམེཝ མཏྟིཀཱདཱིཧི པིཧིཏདྭཱརོ ཝིཡ གབྦྷོ’’ཏི གཧེཏབྦཾ. ཨཉྙཐཱ གབྦྷེ པཝིསིཏྭཱ པམུཁཱདཱིསུ ནིཔནྣཱནུཔསམྤནྣེཧི སཧསེཡྻཱཔརིམུཏྟིཡཱ གབྦྷདྭཱརཾ མཏྟིཀཱདཱིཧི པིདཧཱཔེཏྭཱ ཨུཊྛིཏེ ཨརུཎེ ཝིཝརཱཔེནྟསྶཔི ཨནཱཔཏྟི བྷཝེཡྻཱཏི.

ཏེསཾ པཡོགེ པཡོགེ བྷིཀྑུསྶ ཨཱཔཏྟཱིཏི ཨེཏྠ ཀེཙི ‘‘ཨནུཊྛཧནེན ཨཀིརིཡསམུཊྛཱནཱ ཨཱཔཏྟི ཝུཏྟཱ ཏསྨིཾ ཁཎེ སཡནྟསྶ ཀིརིཡཱབྷཱཝཱ. ཨིདཉྷི སིཀྑཱཔདཾ སིཡཱ ཀིརིཡཱཡ སམུཊྛཱཏི, སིཡཱ ཨཀིརིཡཱཡ སམུཊྛཱཏི. ཀིརིཡཱསམུཊྛཱནཏཱ ཙསྶ ཏབྦཧུལཝསེན ཝུཏྟཱཏི ཝདཏི. ཡཐཱ ཙེཏཾ, ཨེཝཾ དིཝཱསཡནམྤི. ཨནུཊྛཧནེན, ཧི དྭཱརཱསཾཝརཎེན ཙེཏཾ ཨཀིརིཡསམཨུཊྛཱནམྤི ཧོཏཱི’’ཏི ཝདནྟི. ཨིདཉྩ ཡུཏྟཾ ཝིཡ དིསྶཏི, ཝཱིམཾསིཏྭཱ གཧེཏབྦཾ.

‘‘ཨུཔརིམཏལེན ¶ སདྡྷིཾ ཨསམྦདྡྷབྷིཏྟིཀསྶཱ’’ཏི ཨིདཾ སམྦདྡྷབྷིཏྟིཀེ ཝཏྟབྦམེཝ ནཏྠཱིཏི དསྶནཏྠཾ ཝུཏྟཾ. ཨུཔརིམཏལེ སཡིཏསྶ སངྐཱ ཨེཝ ནཏྠཱིཏི ‘‘ཧེཊྛཱཔཱསཱདེ’’ཏིཨཱདི ཝུཏྟཾ. ནཱནཱུཔཙཱརེཏི བཧི ནིསྶེཎིཡཱ ཨཱརོཧཎཱིཡེ.

སབྷཱསངྑེཔེནཱཏི ¶ སབྷཱཀཱརེན. ‘‘ཨཌྜྷཀུཊྚཀེ’’ཏི ཨིམིནཱ སཎྛཱནཾ དསྶེཏི. ཡཏྠ ཏཱིསུ དྭཱིསུ ཝཱ པསྶེསུ བྷིཏྟིཡོ བདྡྷཱ, ཚདནཾ ཝཱ ཨསམྤཏྟཱ ཨཌྜྷབྷིཏྟི, ཨིདཾ ཨཌྜྷཀུཊྚཀཾ ནཱམ. ཝཱལ༹སངྒྷཱཊོ ནཱམ པརིཀྑེཔསྶ ཨནྟོ ཐམྦྷཱདཱིནཾ ཨུཔརི ཝཱལ༹རཱུཔེཧི ཀཏསངྒྷཱཊོ. པརིཀྑེཔསྶ བཧིགཏེཏི ཨེཏྠ ཡསྨིཾ པསྶེ པརིཀྑེཔོ ནཏྠི, ཏཏྠ སཙེ བྷཱུམིཏོ ཝཏྠུ ཨུཙྩཾ ཧོཏི, ཨུབྷཏོ ཨུཙྩཝཏྠུཏོ ཧེཊྛཱ བྷཱུམིཡཾ ནིབྦཀོསབྦྷནྟརེཔི ཨནཱཔཏྟི ཨེཝ ཏཏྠ སེནཱསནཝོཧཱརཱབྷཱཝཏོ. ཨཐ ཝཏྠུ ནཱིཙཾ བྷཱུམིསམམེཝ སེནཱསནསྶ ཧེཊྛིམཏལེ ཏིཊྛཏི, ཏཏྠ པརིཀྑེཔརཧིཏདིསཱཡ ནིབྦཀོསབྦྷནྟརེ སབྦཏྠ ཨཱཔཏྟི ཧོཏི, པརིཙྪེདཱབྷཱཝཏོ པརིཀྑེཔསྶ བཧི ཨེཝ ཨནཱཔཏྟཱིཏི དཊྛབྦཾ. པརིམཎྜལཾ ཝཱཏིཨཱདི མཛ྄ཛྷེ ཨུདཀཔཏནཏྠཱཡ ཨཱཀཱསངྒཎཝནྟཾ སེནཱསནཾ སནྡྷཱཡ ཝུཏྟཾ. ཏཏྠ ཨཔརིཙྪིནྣགབྦྷཱུཔཙཱརེཏི ཨེཀེཀགབྦྷསྶ དྭཱིསུ པསྶེསུ པམུཁེན གམནཾ པརིཙྪིནྡིཏྭཱ དིཡཌྜྷཧཏྠུབྦེདྷཏོ ཨནཱུནཾ ཀུཊྚཾ ཀཏྭཱ ཨཱཀཱསངྒཎེན པཝེསཾ ཀརོནྟི, ཨེཝཾ ཨཀཏོཏི ཨཏྠོ. གབྦྷཔརིཀྑེཔོཏི ཙཏུརསྶཔཱསཱདཱདཱིསུ སམནྟཱ ཋིཏགབྦྷབྷིཏྟིཡོ སནྡྷཱཡ ཝུཏྟཾ.

པཱཊེཀྐསནྣིཝེསཱཏི ཨེཀེཀདིསཱཡ གབྦྷཔཱལི༹ཡོ ཨིཏརདིསཱསུ གབྦྷཔཱལཱི༹ནཾ ཨབྷཱཝེན, བྷཱཝེཔི ཝཱ ཨཉྙམཉྙབྷིཏྟིཙྪདནེཧི ཨསམྦནྡྷཏཱཡ པཱཊེཀྐསནྣིཝེསཱ ནཱམ ཝུཙྩཏི. ཏཾ…པེ… སནྡྷཱཡ ཝུཏྟནྟི ཏཏྠ པཱཙིཏྟིཡེན ཨནཱཔཏྟཱིཏི ཝུཏྟཾ, ན དུཀྐཊེན. ཏཱདིསཱཡ ཧི གབྦྷཔཱལི༹ཡཱ པམུཁཾ ཏཱིསུ དིསཱསུ བྷིཏྟཱིནཾ ཨབྷཱཝེན ཨེཀདིསཱཡ གབྦྷབྷིཏྟིམཏྟེན སབྦཙྪནྣཾ ཙཱུལ༹པརིཙྪནྣཾ ནཱམ ཧོཏི. ཏསྨཱ དུཀྐཊམེཝ. ཡདི པན ཏསྶ པམུཁསྶ ཨིཏརདིསཱསུཔི ཨེཀིསྶཾ, སབྦཱསུ ཝཱ བྷིཏྟིཾ ཀརོནྟི, ཏདཱ སབྦཙྪནྣཨུཔཌྜྷཔརིཙྪནྣཱདིབྷཱཝཏོ པཱཙིཏྟིཡམེཝ ཧོཏཱིཏི དཊྛབྦཾ. བྷཱུམིཡཾ ཝིནཱ ཛགཏིཡཱ པམུཁཾ སནྡྷཱཡཱཏི ཨེཏྠ ཨུཙྩཝཏྠུཾ ཨཀཏྭཱ བྷཱུམིཡཾ ཀཏགེཧསྶ པམུཁཾ སནྡྷཱཡ ཨཔརིཀྑིཏྟེ པཱཙིཏྟིཡེན ཨནཱཔཏྟཱིཏི ཨིདཾ ཀཐིཏཾ ¶ . ཨུཙྩཝཏྠུཀཾ ཙེ པམུཁཾ ཧོཏི, ཏེན ཝཏྠུནཱ པརིཀྑིཏྟསངྑྱམེཝ པམུཁཾ གཙྪཏཱིཏི ཨདྷིཔྤཱཡོ. ཏཏྠཱཏི ཨནྡྷཀཊྛཀཐཱཡཾ. ཛགཏིཡཱ པམཱཎཾ ཝཏྭཱཏི པཀཏིབྷཱུམིཡཱ ནིཔནྣོ ཡཐཱ ཛགཏིཡཱ ཨུཔརི སཡིཏཾ ན པསྶཏི, ཨེཝཾ ཨུཙྩཱཏིཨུཙྩཝཏྠུསྶ ཨུབྦེདྷཔྤམཱཎཾ ཝཏྭཱ. ཨེཀདིསཱཡ ཨུཛུཀམེཝ དཱིགྷཾ ཀཏྭཱ སནྣིཝེསིཏོ པཱསཱདོ ཨེཀསཱལསནྣིཝེསོ. དྭཱིསུ, ཏཱིསུ ཝཱ ཙཏཱུསུཔི ཝཱ དིསཱསུ སིངྒྷཱཊཀསཎྛཱནཱདིཝསེན ཀཏཱ དྭིསཱལཱདིསནྣིཝེསཱ ཝེདིཏབྦཱ. སཱལཔྤབྷེདདཱིཔནམེཝ ཙེཏྠ པུརིམཏོ ཝིསེསོཏི. པརིཀྑེཔོ ཝིདྡྷསྟོཏི པམུཁསྶ པརིཀྑེཔཾ སནྡྷཱཡ ཝདཏི.

༥༣. ཨུཔཌྜྷཙྪནྣཨུཔཌྜྷཔརིཙྪནྣཾ སེནཱསནཾ དུཀྐཊསྶ ཨཱདིཾ ཝཏྭཱ པཱལི༹ཡཾ དསྶིཏཏྟཱ ཏཏོ ¶ ཨདྷིཀཾ སབྦཙྪནྣཨུཔཌྜྷཔརིཙྪནྣཱདིཀམྤི སབྦཾ པཱལི༹ཡཾ ཨཝུཏྟམྤི པཱཙིཏྟིཡསྶེཝ ཝཏྠུབྷཱཝེན དསྶིཏཾ སིཀྑཱཔདསྶ པཎྞཏྟིཝཛྫཏྟཱ, གརུཀེ ཋཱཏབྦཏོ ཙཱཏི ཝེདིཏབྦཾ. སཏྟ པཱཙིཏྟིཡཱནཱིཏི པཱལི༹ཡཾ ཝུཏྟཔཱཙིཏྟིཡདྭཡཾ སཱམཉྙཏོ ཨེཀཏྟེན གཧེཏྭཱ ཝུཏྟཾ.

༥༤. པཱལི༹ཡཾ ‘‘ཏཏིཡཱཡ རཏྟིཡཱ པུརཱརུཎཱ ནིཀྑམིཏྭཱ པུན ཝསཏཱི’’ཏི ཨིདཾ ཨུཀྐཊྛཝསེན ཝུཏྟཾ, ཨནིཀྑམིཏྭཱ པན པུརཱརུཎཱ ཨུཊྛཧིཏྭཱ ཨནྟོཚདནེ ནིསིནྣསྶཱཔི པུནདིཝསེ སཧསེཡྻེན ཨནཱཔཏྟི ཨེཝ. སེནམྦམཎྜཔཝཎྞཾ ཧོཏཱིཏི སཱིཧལ༹དཱིཔེ ཀིར ཨུཙྩཝཏྠུཀོ སབྦཙྪནྣོ སབྦཨཔརིཙྪནྣོ ཨེཝཾནཱམཀོ སནྣིཔཱཏམཎྜཔོ ཨཏྠི, ཏཾ སནྡྷཱཡེཏཾ ཝུཏྟཾ. ཨེཏྠ ཙཏུཏྠབྷཱགོ ཙཱུལ༹ཀཾ, དྭེ བྷཱགཱ ཨུཔཌྜྷཾ, ཏཱིསུ བྷཱགེསུ དྭེ བྷཱགཱ ཡེབྷུཡྻནྟི ཨིམིནཱ ནཡེན ཙཱུལ༹ཀཙྪནྣཔརིཙྪནྣཏཱདཱིནི ཝེདིཏབྦཱནི. པཱཙིཏྟིཡཝཏྠུཀསེནཱསནཾ, ཏཏྠ ཨནུཔསམྤནྣེན སཧ ནིཔཛྫནཾ, ཙཏུཏྠདིཝསེ སཱུརིཡཏྠངྒམནནྟི ཨིམཱནེཏྠ ཏཱིཎི ཨངྒཱནི.

སཧསེཡྻསིཀྑཱཔདཝཎྞནཱ ནིཊྛིཏཱ.

༦. དུཏིཡསཧསེཡྻསིཀྑཱཔདཝཎྞནཱ

༥༥. ཚཊྛེ མཱཏུགཱམེན སདྡྷིཾ ཙཏུཏྠདིཝསེ སཡནྟསྶཱཔི ཨིམིནཱ སིཀྑཱཔདེན ཨེཀཱཝ ཨཱཔཏྟི. ཀེཙི པན པུརིམསིཀྑཱཔདེནཱཔཱིཏི དྭེ ཨཱཔཏྟིཡོ ཝདནྟི, ཏཾ ན ཡུཏྟཾ ‘‘ཨནུཔསམྤནྣེནཱ’’ཏི ཨནིཏྠིལིངྒེན ཝུཏྟཏྟཱ ནཔུཾསཀེན ¶ པན ཙཏུཏྠདིཝསེ སཡནྟསྶ སདུཀྐཊཔཱཙིཏྟིཡཾ ཝཏྟུཾ ཡུཏྟཾ. ཀིཉྩཱཔེཏྠ པཱལི༹ཡཾ པཎྜཀཝསེནེཝ དུཀྐཊཾ ཝུཏྟཾ, ཏདནུལོམིཀཱ པན པུརིསཨུབྷཏོབྱཉྫནཀེན སཧ སཡནྟསྶ ཨིམིནཱ དུཀྐཊཾ, པུརིམེན ཙཏུཏྠདིཝསེ སདུཀྐཊཔཱཙིཏྟིཡཾ. ཨིཏྠིཨུབྷཏོབྱཉྫནཀོ ཨིཏྠིགཏིཀོཝཱཏི ཨཡཾ ཨམྷཱཀཾ ཁནྟི. མཏིཏྠིཡཱ ཨནཱཔཏྟཱིཏི ཝདནྟི. པཱཙིཏྟིཡཝཏྠུཀསེནཱསནཾ, ཏཏྠ མཱཏུགཱམེན སདྡྷིཾ ནིཔཛྫནཾ, སཱུརིཡཏྠངྒམནནྟི ཨིམཱནེཏྠ ཏཱིཎི ཨངྒཱནི.

དུཏིཡསཧསེཡྻསིཀྑཱཔདཝཎྞནཱ ནིཊྛིཏཱ.

༧. དྷམྨདེསནཱསིཀྑཱཔདཝཎྞནཱ

༦༠. སཏྟམེ ན ཡཀྑེནཱཏིཨཱདཱིནཾ ‘‘ཨཉྙཏྲ ཝིཉྙུནཱ’’ཏི ཨིམིནཱ སམྦནྡྷོ. ཨཉྙཏྲ ཝིཉྙུནཱ ¶ པུརིསཝིགྒཧེན, ན ཡཀྑཱདིནཱཔཱིཏི ཨེཝམཏྠོ གཧེཏབྦོཏི ཨདྷིཔྤཱཡོ. ཏཱདིསེནཔི ཧི སཧ ཋིཏཱཡ དེསེཏུཾ ན ཝཊྚཏི. ཏཾཏཾདེསབྷཱསཱཡ ཨཏྠཾ ཡཐཱརུཙི ཝཊྚཏི ཨེཝ.

ཨིརིཡཱཔཐཱཔརིཝཏྟནཾ, པུརིསཾ ཝཱ དྭཱདསཧཏྠཱུཔཙཱརེ ཨཔཀྐོསཱཔནཾ ཨེཏྠ ཨཀིརིཡཱ. ཝུཏྟལཀྑཎསྶ དྷམྨསྶ ཚནྣཾ ཝཱཙཱནཾ ཨུཔརི དེསནཱ, ཝུཏྟལཀྑཎོ མཱཏུགཱམོ, ཨིརིཡཱཔཐཔཨཝཏྟནཱབྷཱཝོ, ཝིཉྙཱུཔུརིསཱབྷཱཝོ, ཨཔཉྷཝིསྶཛྫནཱཏི ཨིམཱནེཏྠ པཉྩ ཨངྒཱནི.

དྷམྨདེསནཱསིཀྑཱཔདཝཎྞནཱ ནིཊྛིཏཱ.

༨. བྷཱུཏཱརོཙནསིཀྑཱཔདཝཎྞནཱ

༧༧. ཨཊྛམེ ཨནྟརཱཏི པརིནིབྦཱནཀཱལཏོ པུབྦེཔི. ཨཏིཀཌྜྷིཡམཱནེནཱཏི ‘‘ཝདཐ, བྷནྟེ, ཀིཾ ཏུམྷེཧི ཨདྷིགཏ’’ནྟི ཨེཝཾ ནིཔྤཱིལི༹ཡམཱནེན ཨཏིབདྡྷིཡམཱནེན. ཏཐཱརཱུཔེ པཙྩཡེ སཏི ཝཏྟབྦམེཝ. སུཏཔརིཡཏྟིསཱིལགུཎནྟི ཨེཏྠ ཨཏྠཀུསལཏཱ སུཏགུཎོ, པཱལི༹པཱཋཀུསལཏཱ པརིཡཏྟིགུཎོཏི དཊྛབྦཾ. ‘‘ཙིཏྟཀྑེཔསྶ ཝཱ ཨབྷཱཝཱ’’ཏི ཨིམིནཱ ཁིཏྟཙིཏྟཝེདནཱཊྚཏཱཔི ཨརིཡཱནཾ ནཏྠཱིཏི དསྶེཏི.

པུབྦེ ¶ ཨཝུཏྟེཧཱིཏི ཙཏུཏྠཔཱརཱཛིཀེ ཨཝུཏྟེཧི. ཨིདཉྩ སིཀྑཱཔདཾ པཎྞཏྟིཨཛཨཱནནཝསེན ཨེཀནྟཏོ ཨཙིཏྟཀསམུཊྛཱནམེཝ ཧོཏི ཨརིཡཱནཾ པཎྞཏྟིཝཱིཏིཀྐམཱབྷཱཝཱ. ཛྷཱནལཱབྷཱིནཉྩ སཏྠུ ཨཱཎཱཝཱིཏིཀྐམཔཊིགྷཙིཏྟསྶ ཛྷཱནཔརིཧཱནཏོ བྷཱུཏཱརོཙནཾ ན སམྦྷཝཏི. ཨུཏྟརིམནུསྶདྷམྨསྶ བྷཱུཏཏཱ, ཨནུཔསམྤནྣསྶ ཨཱརོཙནཾ, ཏངྑཎཝིཛཱནནཱ, ཨནཉྙཱཔདེསོཏི ཨིམཱནེཏྠ ཙཏྟཱརི ཨངྒཱནི.

བྷཱུཏཱརོཙནསིཀྑཱཔདཝཎྞནཱ ནིཊྛིཏཱ.

༩. དུཊྛུལླཱརོཙནསིཀྑཱཔདཝཎྞནཱ

༧༨. ནཝམེ ཏཏྠ བྷཝེཡྻཱཏི ཏཏྠ ཀསྶཙི མཏི ཨེཝཾ བྷཝེཡྻ. ཨཊྛཀཐཱཝཙནམེཝ ཨུཔཔཏྟིཏོ དལ༹ྷཾ ཀཏྭཱ པཏིཊྛཔེནྟོ ‘‘ཨིམིནཱཔི ཙེཏ’’ནྟིཨཱདིམཱཧ.

༨༢. ཨཱདིཏོ པཉྩ སིཀྑཱཔདཱནཱིཏི པཱཎཱཏིཔཱཏཱདཱིནི པཉྩ. སེསཱནཱིཏི ཝིཀཱལབྷོཛནཱདཱིནི ¶ . སུཀྐཝིསྶཊྛིཨཱདི ཨཛ྄ཛྷཱཙཱརོཝ. ཨནྟིམཝཏྠུཾ ཨནཛ྄ཛྷཱཔནྣསྶ བྷིཀྑུནོ སཝཏྠུཀོ སངྒྷཱདིསེསོ, ཨནུཔསམྤནྣསྶ ཨཱརོཙནཾ, བྷིཀྑུསམྨུཏིཡཱ ཨབྷཱཝོཏི ཨིམཱནེཏྠ ཏཱིཎི ཨངྒཱནི.

དུཊྛུལླཱརོཙནསིཀྑཱཔདཝཎྞནཱ ནིཊྛིཏཱ.

༡༠. པཐཝཱིཁཎནསིཀྑཱཔདཝཎྞནཱ

༨༦. དསམེ ཨཔྤཔཾསུམཏྟིཀཱཡ པཐཝིཡཱ ཨནཱཔཏྟིཝཏྠུབྷཱཝེན ཝུཏྟཏྟཱ ཨུཔཌྜྷཔཾསུམཏྟིཀཱཡཔི པཱཙིཏྟིཡམེཝཱཏི གཧེཏབྦཾ. ན ཧེཏཾ དུཀྐཊཝཏྠཱུཏི སཀྐཱ ཝཏྟུཾ ཛཱཏཱཛཱཏཝིནིམུཏྟཱཡ ཏཏིཡཔཐཝིཡཱ ཨབྷཱཝཏོ.

ཝཊྚཏཱིཏི ཨིམསྨིཾ ཋཱནེ པོཀྑརཎིཾ ཁཎཱཏི ཨོཀཱསསྶ ཨནིཡམིཏཏྟཱ ཝཊྚཏི. ཨིམཾ ཝལླིཾ ཁཎཱཏི པཐཝཱིཁཎནཾ སནྡྷཱཡ ཝུཏྟཏྟཱ ཨིམིནཱཝ སིཀྑཱཔདེན ཨཱཔཏྟི, ན བྷཱུཏགཱམསིཀྑཱཔདེན. ཨུབྷཡམྤི ¶ སནྡྷཱཡ ཝུཏྟེ པན དྭེཔི པཱཙིཏྟིཡཱ ཧོནྟི. ཨུདཀཔཔྤཊཀོཏི ཨུདཀེ ཨནྟོབྷཱུམིཡཾ པཝིཊྛེ ཏསྶ ཨུཔརིབྷཱགཾ ཚཱདེཏྭཱ ཏནུཀཔཾསུ ཝཱ མཏྟིཀཱ ཝཱ པཊལཾ ཧུཏྭཱ པཏམཱནཱ ཏིཊྛཏི, ཏསྨིཾ ཨུདཀེ སུཀྑེཔི ཏཾ པཊལཾ ཝཱཏེན ཙལམཱནཱ ཏིཊྛཏི, ཏཾ ཨུདཀཔཔྤཊཀོ ནཱམ.

ཨཀཏཔབྦྷཱརེཏི ཨཝལ༹ཉྫནཊྛཱནདསྶནཏྠཾ ཝུཏྟཾ. ཏཱདིསེ ཨེཝ ཧི ཝམྨིཀསྶ སམྦྷཝོཏི. མཱུསིཀུཀྐརཾ ནཱམ མཱུསིཀཱཧི ཁནིཏྭཱ བཧི ཀཏཔཾསུརཱསི. ཨཙྪདནནྟིཨཱདིཝུཏྟཏྟཱ ཨུཛུཀཾ ཨཱཀཱསཏོ པཏིཏཝསྶོདཀེན ཨོཝཊྛམེཝ ཛཱཏཔཐཝཱི ཧོཏི, ན ཚདནཱདཱིསུ པཏིཏྭཱ ཏཏོ པཝཏྟཨུདཀེན ཏིནྟནྟི ཝེདིཏབྦཾ. མཎྜཔཏྠམྦྷནྟི སཱཁཱམཎྜཔཏྠམྦྷཾ. ཨུཙྩཱལེཏྭཱཏི ཨུཀྑིཔིཏྭཱ. ཏཏོཏི པུརཱཎསེནཱསནཏོ.

༨༨. མཧཱམཏྟིཀནྟི བྷིཏྟིལེཔནཾ. ཛཱཏཔཐཝིཏཱ, ཏཐཱསཉྙིཏཱ, ཁཎནཁཎཱཔནཱནཾ ཨཉྙཏརནྟི ཨིམཱནེཏྠ ཏཱིཎི ཨངྒཱནི.

པཐཝཱིཁཎནསིཀྑཱཔདཝཎྞནཱ ནིཊྛིཏཱ.

ནིཊྛིཏོ མུསཱཝཱདཝགྒོ པཋམོ.

༢. བྷཱུཏགཱམཝགྒོ

༡. བྷཱུཏགཱམསིཀྑཱཔདཝཎྞནཱ

༨༩. དུཏིཡཝགྒསྶ ¶ པཋམེ ནིགྒཧེཏུཾ ཨསཀྐོནྟོཏི སཱཁཊྛཀཝིམཱནེ སཱཁཱཡ ཚིཛྫམཱནཱཡ ཚིཛྫནྟེ ཏཏྠ ཨཚེདནཏྠཱཡ དེཝཏཱཡ ཨུཔནཱིཏཾ པུཏྟཾ དིསྭཱཔི ཀུཋཱརིནིཀྑེཔཝེགཾ ནིཝཏྟེཏུཾ ཨསཀྐོནྟོཏི ཨཏྠོ. རུཀྑདྷམྨེཏི རུཀྑསྶ པཝཏྟིཡཾ. རུཀྑཱནཾ ཝིཡ ཚེདནཱདཱིསུ ཨཀུཔྤནཉྷི རུཀྑདྷམྨོ ནཱམ.

ཨུཔྤཏིཏནྟི ཨུཔྤནྣཾ. བྷནྟནྟི དྷཱཝནྟཾ. ཝཱརཡེཏི ནིགྒཎྷེཡྻ. ཨིཏརོཏི ཨུཔྤནྣཾ ཀོདྷཾ ཨནིགྒཎྷནྟོ རཱཛཨུཔརཱཛཱདཱིནཾ རསྨིམཏྟགྒཱཧཀཛནོ ཝིཡ ན ཨུཏྟམསཱརཐཱིཏི ཨཏྠོ. ཝིསཊཾ སཔྤཝིསནྟི སརཱིརེ དཱཋཱཝཎཱནུསཱརེན ཝིཏྠིཎྞཾ བྱཱཔེཏྭཱ ཋིཏཾ ཀཎྷསཔྤཝིསཾ ཝིཡ. ཛཧཱཏི ཨོརཔཱརནྟི པཉྩོརམྦྷཱགིཡསཉྙོཛནཱནི ཏཏིཡམགྒེན ཛཧཱཏི. ‘‘ཨོརཔཱར’’ནྟི ཧི ཨོརིམཏཱིརཾ ཝུཙྩཏི ¶ . ཨཐ ཝཱ སོཏི ཏཏིཡམགྒེན ཀོདྷཾ ཝིནེཏྭཱ ཋིཏོ བྷིཀྑུ ཨརཧཏྟམགྒེན ཨོརཔཱརཾ ཛཧཱཏཱིཏི ཨཏྠོ. ཏཏྠ ཨོརཾ ནཱམ སཀཏྟབྷཱཝོ, ཨཛ྄ཛྷཏྟིཀཱནི ཝཱ ཨཱཡཏནཱནི. པཱརཾ ནཱམ པརཨཏྟབྷཱཝོ, བཱཧིརཱནི ཝཱ ཨཱཡཏནཱནི. ཏདུབྷཡེ པན ཚནྡརཱགཾ ཛཧནྟོ ‘‘ཛཧཱཏི ཨོརིམཔཱར’’ནྟི ཝུཙྩཏི.

༩༠. བྷཝནྟཱིཏི ཝཌྜྷནྟི. ཨཧུཝུནྟཱིཏི བབྷཱུཝུ. ཏེནཱཧ ‘‘ཛཱཏཱ ཝཌྜྷིཏཱ’’ཏི. བྷཱུཏཱནཾ གཱམོཏི མཧཱབྷཱུཏཱནཾ ཧརིཏཏིཎཱདིབྷཱཝེན སམགྒཱནཾ སམཱུཧོ. ཏབྦིནིམུཏྟསྶ གཱམསྶ ཨབྷཱཝཾ དསྶེཏུཾ ‘‘བྷཱུཏཱ ཨེཝ ཝཱ གཱམོ’’ཏི ཝུཏྟཾ. པཱཏབྱ-སདྡསྶ པཱ པཱནེཏི དྷཱཏྭཏྠཾ སནྡྷཱཡཱཧ ‘‘པརིབྷུཉྫིཏབྦཏཱ’’ཏི. སཱ ཙ པཱཏབྱཏཱ ཚེདནཱདི ཨེཝ ཧོཏཱིཏི ཨཱཧ ‘‘ཏསྶཱ…པེ… བྷཱུཏགཱམསྶ ཛཱཏཱ ཚེདནཱདིཔཙྩཡཱ’’ཏི.

༩༡. ཛཱཏ-སདྡོ ཨེཏྠ ཝིཛཱཏཔརིཡཱཡོཏི ‘‘པུཏྟཾ ཝིཛཱཏཱ ཨིཏྠཱི’’ཏིཨཱདཱིསུ ཝིཡ པསཱུཏཝཙནོཏི ཨཱཧ ‘‘པསཱུཏཱནཱི’’ཏི, ནིབྦཏྟཔཎྞམཱུལཱནཱིཏི ཨཏྠོ.

ཏཱནི ¶ དསྶེནྟོཏི ཏཱནི བཱིཛཱནི དསྶེནྟོ. ཀཱརིཡདསྶནམུཁེནེཝ ཀཱརཎཉྩ གཧིཏནྟི ཨཱཧ ‘‘བཱིཛཏོ ནིབྦཏྟེན བཱིཛཾ དསྶིཏ’’ནྟི.

༩༢. ‘‘བཱིཛཏོ སམྦྷཱུཏོ བྷཱུཏགཱམོ བཱིཛ’’ནྟི ཨིམིནཱ ཨུཏྟརཔདལོཔེན ‘‘པདུམགཙྪཏོ ནིབྦཏྟཾ པུཔྥཾ པདུམ’’ནྟིཨཱདཱིསུ ཝིཡཱཡཾ ཝོཧཱརོཏི དསྶེཏི. ཡཾ བཱིཛཾ བྷཱུཏགཱམོ ནཱམ ཧོཏཱིཏི ནིབྦཏྟཔཎྞམཱུལཾ སནྡྷཱཡ ཝདཏི. ཡཐཱརུཏནྟི ཡཐཱཔཱཋཾ.

‘‘སཉྩིཙྩཱ’’ཏི ཝུཏྟཏྟཱ སརཱིརེ ལགྒབྷཱཝཾ ཉཏྭཱཔི ཨུཊྛཧཏི, ‘‘ཏཾ ཨུདྡྷརིསྶཱམཱི’’ཏིསཉྙཱཡ ཨབྷཱཝཏོ ཝཊྚཏི. ཨནནྟཀ-གྒཧཎེན སཱསཔམཏྟིཀཱ གཧིཏཱ, ནཱམཉྷེཏཾ ཏསྶཱ སེཝཱལཛཱཏིཡཱ. མཱུལཔཎྞཱནཾ ཨབྷཱཝེན ‘‘ཨསམྤུཎྞབྷཱུཏགཱམོ ནཱམཱ’’ཏི ཝུཏྟཾ. སོ བཱིཛགཱམེན སངྒཧིཏོཏི. ཨཝཌྜྷམཱནེཔི བྷཱུཏགཱམམཱུལཀཏྟཱ ཝུཏྟཾ ‘‘ཨམཱུལཀབྷཱུཏགཱམེ སངྒཧཾ གཙྪཏཱི’’ཏི. ནཱལི༹ཀེརསྶ ཨཱཝེཎིཀཾ ཀཏྭཱ ཝདཏི.

སེལེཡྻཀཾ ¶ ནཱམ སིལཱཡ སམྦྷཱུཏཱ ཨེཀཱ གནྡྷཛཱཏི. པུཔྥིཏཀཱལཏོ པཊྛཱཡཱཏི ཝིཀསིཏཀཱལཏོ པབྷུཏི. ཚཏྟཀཾ གཎྷནྟོཏི ཝིཀསིཏཾ གཎྷནྟོ. མཀུལ༹ཾ པན རུཀྑཏྟཙཾ ཨཀོཔེནྟེནཔི གཧེཏུཾ ན ཝཊྚཏི, ཕུལླཾ ཝཊྚཏི. ཧཏྠཀུཀྐུཙྩེནཱཏི ཧཏྠཙཱཔལླེན.

‘‘པཱནཱིཡཾ ན ཝཱསེཏབྦ’’ནྟི ཨིདཾ ཨཏྟནོ པིཝནཔཱནཱིཡཾ སནྡྷཱཡ ཝུཏྟཾ, ཨཉྙེསཾ པན ཝཊྚཏི ཨནུགྒཧིཏཏྟཱ. ཏེནཱཧ ‘‘ཨཏྟནཱ ཁཱདིཏུཀཱམེནཱ’’ཏི. ཡེསཾ རུཀྑཱནཾ སཱཁཱ རུཧཏཱིཏི མཱུལཾ ཨནོཏཱརེཏྭཱ པཎྞམཏྟནིགྒམནམཏྟེནཔི ཝཌྜྷཏི. ཏཏྠ ཀཔྤིཡམྤི ཨཀརོནྟོ ཚིནྣནཱལི༹ཀེརཝེལུ༹དཎྜཱདཡོ ཀོཔེཏུཾ ཝཊྚཏི.

‘‘ཙངྐམིཏཊྛཱནཾ དསྶེསྶཱམཱི’’ཏི ཝུཏྟཏྟཱ ཀེཝལཾ ཙངྐམནཱདྷིཔྤཱཡེན ཝཱ མགྒགམནཱདྷིཔྤཱཡེན ཝཱ ཨཀྐམནྟསྶ, ཏིཎཱནཾ ཨུཔརི ནིསཱིདནཱདྷིཔྤཱཡེན ནིསཱིདནྟསྶ ཙ དོསོ ནཏྠི.

སམཎཀཔྤེཧཱིཏི སམཎཱནཾ ཀཔྤིཡཝོཧཱརེཧི, ཨབཱིཛནིབྦཊྚབཱིཛཱནིཔི ཀཔྤིཡབྷཱཝཏོ ‘‘སམཎཀཔྤཱནཱི’’ཏི ཝུཏྟཱནི. ཨབཱིཛཾ ནཱམ ཏརུཎཨམྦཕལཱདཱིནི. ནིབྦཊྚེཏབྦཾ ཝིཡོཛེཏབྦཾ བཱིཛཾ ཡསྨིཾ, ཏཾ པནསཱདི ནིབྦཊྚབཱིཛཾ ནཱམ. ཀཔྤིཡནྟི ཝཏྭཱཝཱཏི པུབྦཀཱལཀིརིཡཱཝསེན ཝུཏྟེཔི ཝཙནཀྑཎེཝ ཨགྒིསཏྠཱདིནཱ བཱིཛགཱམེ ཝཎཾ ཀཱཏབྦནྟི ཝཙནཏོ པན པུབྦེ ཀཱཏུཾ ན ཝཊྚཏི, ཏཉྩ དྭིདྷཱ ཨཀཏྭཱ ཚེདནབྷེདནམེཝ དསྶེཏབྦཾ. ཀརོནྟེན ཙ བྷིཀྑུནཱ ‘‘ཀཔྤིཡཾ ཀརོཧཱི’’ཏི ¶ ཡཱཡ ཀཱཡཙི བྷཱསཱཡ ཝུཏྟེཡེཝ ཀཱཏབྦཾ. བཱིཛགཱམཔརིམོཙནཏྠཾ པུན ཀཔྤིཡཾ ཀཱརེཏབྦནྟི ཀཱརཱཔནསྶ པཋམམེཝ ཨདྷིཀཏཏྟཱ. ‘‘ཀཊཱཧེཔི ཀཱཏུཾ ཝཊྚཏཱི’’ཏི ཝུཏྟཏྟཱ ཀཊཱཧཏོ ནཱིཧཏཱཡ མིཉྫཱཡ ཝཱ བཱིཛེ ཝཱ ཡཏྠ ཀཏྠཙི ཝིཛ྄ཛྷིཏུཾ ཝཊྚཏི ཨེཝ. བྷཱུཏགཱམོ, བྷཱུཏགཱམསཉྙིཏཱ, ཝིཀོཔནཾ ཝཱ ཝིཀོཔཱཔནཾ ཝཱཏི ཨིམཱནེཏྠ ཏཱིཎི ཨངྒཱནི.

བྷཱུཏགཱམསིཀྑཱཔདཝཎྞནཱ ནིཊྛིཏཱ.

༢. ཨཉྙཝཱདཀསིཀྑཱཔདཝཎྞནཱ

༩༤. དུཏིཡེ ཨཉྙཾ ཝཙནནྟི ཡཾ དོསཝིབྷཱཝནཏྠཾ པརེཧི ཝུཏྟཝཙནཾ ཏཾ ཏསྶ ཨནནུཙྪཝིཀེན ཨཉྙེན ཝཙནེན པཊིཙརཏི.

༩༨. ཡདེཏཾ ¶ ཨཉྙེནཉྙཾ པཊིཙརཎཝསེན པཝཏྟཝཙནཾ, ཏདེཝ པུཙྪིཏམཏྠཾ ཋཔེཏྭཱ ཨཉྙཾ ཝདཏི པཀཱསེཏཱིཏི ཨཉྙཝཱདཀནྟི ཨཱཧ ‘‘ཨཉྙེནཉྙཾ པཊིཙརཎསྶེཏཾ ནཱམ’’ནྟི. ཏུཎྷཱིབྷཱུཏསྶེཏཾ ནཱམནྟི ཏུཎྷཱིབྷཱཝསྶེཏཾ ནཱམཾ, ཨཡམེཝ ཝཱ པཱཋོ. ཨཉྙཝཱདཀཾ ཨཱརོཔེཏུནྟི ཨཉྙཝཱདེ ཨཱརོཔེཏུཾ. ཝིཧེསཀནྟི ཝིཧེསཀཏྟཾ.

༩༩. པཱལི༹ཡཾ ན ཨུགྒྷཱཊེཏུཀཱམོཏི པཊིཙྪཱདེཏུཀཱམོ.

༡༠༠. ཨནཱརོཔིཏེ ཨཉྙཝཱདཀེཏི ཝུཏྟདུཀྐཊཾ པཱལི༹ཡཾ ཨཱགཏཨཉྙེནཉྙཔཊིཙརཎཝསེན ཡུཛྫཏི, ཨཊྛཀཐཱཡཾ ཨཱགཏནཡེན པན མུསཱཝཱདེན ཨཉྙེནཉྙཾ པཊིཙརནྟསྶ པཱཙིཏྟིཡེན སདྡྷིཾ དུཀྐཊཾ, ཨཱརོཔིཏེ ཨིམིནཱཝ པཱཙིཏྟིཡཾ. ཀེཙི པན ‘‘མུསཱཝཱདཔཱཙིཏྟིཡེན སདྡྷིཾ པཱཙིཏྟིཡདྭཡ’’ནྟི ཝདནྟི, ཝཱིམཾསིཏབྦཾ. ཨཱདིཀམྨིཀསྶཔི མུསཱཝཱདེ ཨིམིནཱཝ ཨནཱཔཏྟཱིཏི དཊྛབྦཾ. དྷམྨཀམྨེན ཨཱརོཔིཏཏཱ, ཨཱཔཏྟིཡཱ ཝཱ ཝཏྠུནཱ ཝཱ ཨནུཡུཉྫིཡམཱནཏཱ, ཚཱདེཏུཀཱམཏཱཡ ཨཉྙེནཉྙཾ པཊིཙརཎཾ, ཏུཎྷཱིབྷཱཝོ ཙཱཏི ཨིམཱནེཏྠ ཏཱིཎི ཨངྒཱནི.

ཨཉྙཝཱདཀསིཀྑཱཔདཝཎྞནཱ ནིཊྛིཏཱ.

༣. ཨུཛ྄ཛྷཱཔནཀསིཀྑཱཔདཝཎྞནཱ

༡༠༣. ཏཏིཡེ ¶ ཙིནྟཱཡནཏྠསྶ ཛྷེ-དྷཱཏུསྶ ཨནེཀཏྠཏཱཡ ཨོལོཀནཏྠསམྦྷཝཏོ ཝུཏྟཾ ‘‘ཨོལོཀཱཔེནྟཱི’’ཏི. ཚནྡཱཡཱཏི ལིངྒཝིཔལླཱསོཏི ཨཱཧ ‘‘ཚནྡེནཱ’’ཏི.

༡༠༥. བྷིཀྑུཾ ལཱམཀཏོ ཙིནྟཱཔནཏྠཾ ཨཉྙེསཾ ཏཾ ཨཝཎྞཀཐནཾ ཨུཛ྄ཛྷཱཔནཾ ནཱམ. ཨཉྙེསཾ པན ཨཝཏྭཱ ཨཉྙམཉྙཾ སམུལླཔནཝསེན བྷིཀྑུནོ དོསཔྤཀཱསནཾ ཁིཡྻནཾ ནཱམཱཏི ཨཡམེཏེསཾ བྷེདོ.

༡༠༦. ཨཉྙཾ ཨནུཔསམྤནྣཾ ཨུཛ྄ཛྷཱཔེཏཱིཏི ཨཉྙེན ཨནུཔསམྤནྣེན ཨུཛ྄ཛྷཱཔེཏི. ཏསྶ ཝཱ ཏཾ སནྟིཀེཏི ཏསྶ ཨནུཔསམྤནྣསྶ སནྟིཀེ ཏཾ སངྒྷེན སམྨཏཾ ཨུཔསམྤནྣཾ ཁིཡྻཏི. ཨིདྷཱཔི མུསཱཝཱདེན ཨུཛ྄ཛྷཱཔནཱདཱིནཾ སམྦྷཝཏོ དུཀྐཊཊྛཱནཱནི ཙ ཨཱདིཀམྨིཀསྶ ཨནཱཔཏྟི ཙ ཨིམིནཱ ཨེཝ སིཀྑཱཔདེན ཝུཏྟཱཏི ¶ ཝེདིཏབྦཾ སབྦཏྠ མུསཱཝཱདཔཱཙིཏྟིཡསྶ ཨནིཝཏྟིཏོ. དྷམྨཀམྨེན སམྨཏཏཱ, ཨུཔསམྤནྣཏཱ, ཨགཏིགམནཱབྷཱཝོ, ཏསྶ ཨཝཎྞཀཱམཏཱ, ཡསྶ སནྟིཀེ ཝདཏི. ཏསྶ ཨུཔསམྤནྣཏཱ, ཨུཛ྄ཛྷཱཔནཾ ཝཱ ཁིཡྻནཾ ཝཱཏི ཨིམཱནེཏྠ ཚ ཨངྒཱནི.

ཨུཛ྄ཛྷཱཔནཀསིཀྑཱཔདཝཎྞནཱ ནིཊྛིཏཱ.

༤. པཋམསེནཱསནསིཀྑཱཔདཝཎྞནཱ

༡༡༠. ཙཏུཏྠེ ཨཔཉྙཱཏེཏི ཨཔྤསིདྡྷེ. ཨིམཾ པན ཨཊྛ མཱསེ མཎྜཔཱདཱིསུ ཋཔནསངྑཱཏཾ ཨཏྠཝིསེསཾ གཧེཏྭཱ བྷགཝཏཱ པཋམམེཝ སིཀྑཱཔདཾ པཉྙཏྟནྟི ཨདྷིཔྤཱཡཾ ‘‘ཨནུཛཱནཱམི, བྷིཀྑཝེ, ཨཊྛམཱསེ’’ཏིཨཱདིཝཙནེན ཨནུཔཉྙཏྟིསདིསེན པཀཱསེཏྭཱ ཝིསུཾ ཨནུཔཉྙཏྟི ན ཝུཏྟཱ. པརིཝཱརེ པནེཏཾ ཨནུཛཱནནཝཙནཾ ཨནུཔཉྙཏྟིཊྛཱནནྟི ‘‘ཨེཀཱ ཨནུཔཉྙཏྟཱི’’ཏི (པརི. ༦༥-༦༧) ཝུཏྟཾ.

ནཝཝཱཡིམོཏི ཨདྷུནཱ སུཏྟེན ཝཱིཏཀཙྪེན པལིཝེཋིཏམཉྩོ. ཨོནདྡྷོཏི ཀཔྤིཡཙམྨེན ཨོནདྡྷོ. ཏེ ཧི ཝསྶེན སཱིགྷཾ ན ནསྶནྟི. ‘‘ཨུཀྐཊྛཨབྦྷོཀཱསིཀོ’’ཏི ཨིདཾ ཏསྶ སུཁཔཊིཔཏྟིདསྶནམཏྟཾ, ཨུཀྐཊྛསྶཱཔི པན ཙཱིཝརཀུཊི ཝཊྚཏེཝ. ཀཱཡཱནུགཏིཀཏྟཱཏི བྷིཀྑུནོ ཏཏྠེཝ ནིསཱིདནབྷཱཝཾ དཱིཔེཏི, ཏེན ཙ ཝསྶབྷཡེན སཡཾ ཨཉྙཏྠ གཙྪནྟསྶ ཨཱཔཏྟཱིཏི དསྶེཏི ¶ . ཨབྦྷོཀཱསིཀཱནཾ ཏེམནཏྠཱཡ ནིཡམེཏྭཱ དཱཡཀེཧི དིནྣམྤི ཨཏྟཱནཾ རཀྑནྟེན རཀྑིཏབྦམེཝ.

‘‘ཝལཱཧཀཱནཾ ཨནུཊྛིཏབྷཱཝཾ སལླཀྑེཏྭཱ’’ཏི ཨིམིནཱ གིམྷཱནེཔི མེགྷེ ཨུཊྛིཏེ ཨབྦྷོཀཱསེ ནིཀྑིཔིཏུཾ ན ཝཊྚཏཱིཏི དཱིཔེཏི. ཏཏྲ ཏཏྲཱཏི ཙེཏིཡངྒཎཱདིཀེ ཏསྨིཾ ཏསྨིཾ ཨབྦྷོཀཱསེ ནིཡམེཏྭཱ ནིཀྑིཏྟཱ. མཛ྄ཛྷཏོ པཊྛཱཡ པཱདཊྛཱནཱབྷིམུཁཱཏི ཡཏྠ སམནྟཏོ སམྨཛྫིཏྭཱ ཨངྒཎམཛ྄ཛྷེ སབྦདཱ ཀཙཝརསྶ སངྐཌྜྷནེན མཛ྄ཛྷེ ཝཱལིཀཱ སཉྩིཏཱ ཧོཏི. ཏཏྠ ཀཏྟབྦཝིདྷིདསྶནཏྠཾ ཝུཏྟཾ. ཨུཙྩཝཏྠུཔཱདཊྛཱནཱབྷིམུཁཾ ཝཱ ཝཱལིཀཱ ཧརིཏབྦཱ. ཡཏྠ ཝཱ པན ཀོཎེསུ ཝཱལིཀཱ སཉྩིཏཱ, ཏཏྠ ཏཏོ པཊྛཱཡ ཨཔརདིསཱབྷིམུཁཱ ཧརིཏབྦཱཏི ཀེཙི ཨཏྠཾ ཝདནྟི. ཀེཙི པན ‘‘སམྨཊྛཊྛཱནསྶ ¶ པདཝལ༹ཉྫེན ཨཝིཀོཔནཏྠཱཡ སཡཾ ཨསམྨཊྛཊྛཱནེ ཋཏྭཱ ཨཏྟནོ པཱདཱབྷིམུཁཾ ཝཱལིཀཱ ཧརིཏབྦཱཏི ཝུཏྟ’’ནྟི ཝདནྟི, ཏཏྠ ‘‘མཛ྄ཛྷཏོ པཊྛཱཡཱ’’ཏི ཝཙནསྶ པཡོཛནཾ ན དིསྶཏི.

༡༡༡. ཝངྐཔཱདཏཱམཏྟེན ཀུལཱི༹རཔཱདཀསྶ སེསེཧི ཝིསེསོ, ན ཨཊནཱིསུ པཱདཔྤཝེསནཝིསེསེནཱཏི དསྶེཏུཾ ‘‘ཡོ ཝཱ པན ཀོཙཱི’’ཏིཨཱདི ཝུཏྟཾ. ཏསྶཱཏི ཨུཔསམྤནྣསྶེཝ.

ནིསཱིདིཏྭཱ…པེ… པཱཙིཏྟིཡནྟི ཨེཏྠ མེགྷུཊྛཱནཱབྷཱཝཾ ཉཏྭཱ ‘‘པཙྪཱ ཨཱགནྟྭཱ ཨུདྡྷརིསྶཱམཱི’’ཏི ཨཱབྷོགེན གཙྪནྟསྶ ཨནཱཔཏྟི, ཏེན པུནཱགནྟབྦམེཝ. ཀཔྤཾ ལབྷིཏྭཱཏི ‘‘གཙྪ, མཱ ཨིདྷ ཏིཊྛཱ’’ཏི ཝུཏྟཝཙནཾ ལབྷིཏྭཱ.

ཨཱཝཱསིཀཱནཾཡེཝ པལིབོདྷོཏི ཨཱགནྟུཀེསུ ཀིཉྩི ཨཝཏྭཱ ནིསཱིདིཏྭཱ ‘‘ཨཱཝཱསིཀཱ ཨེཝ ཨུདྡྷརིསྶནྟཱི’’ཏི གཏེསུཔི ཨཱཝཱསིཀཱནམེཝ པལིབོདྷོ. མཧཱཔཙྩརིཝཱདེ པན ‘‘ཨིདཾ ཨམྷཱཀ’’ནྟི ཨཝཏྭཱཔི ནིསིནྣཱནམེཝཱཏི ཨདྷིཔྤཱཡོ. ‘‘སནྠརིཏྭཱ ཝཱ སནྠརཱཔེཏྭཱ ཝཱ’’ཏི ཝུཏྟཏྟཱ ཨནཱཎཏྟིཡཱ པཉྙཱཔིཏཏྟཱཔི དུཀྐཊེ ཀཱརཎཾ ཝུཏྟཾ. ཨུསྶཱརཀོཏི སརབྷཱཎཀོ. སོ ཧི ཨུདྡྷཾ ཨུདྡྷཾ པཱལི༹པཱཋཾ སཱརེཏི པཝཏྟེཏཱིཏི ཨུསྶཱརཀོཏི ཝུཙྩཏི.

༡༡༢. ཝཎྞཱནུརཀྑཎཏྠཾ ཀཏཱཏི པཊཁཎྜཱདཱིཧི སིབྦིཏྭཱ ཀཏཱ. བྷཱུམིཡཾ ཨཏྠརིཏབྦཱཏི ཙིམིལིཀཱཡ སཏི ཏསྶཱ ཨུཔརི, ཨསཏི སུདྡྷབྷཱུམིཡཾ ཨཏྠརིཏབྦཱ. ‘‘སཱིཧཙམྨཱདཱིནཾ པརིཧརཎེཡེཝ པཊིཀྑེཔོ’’ཏི ཨིམིནཱ མཉྩཔཱིཋཱདཱིསུ ཨཏྠརིཏྭཱ པུན སཾཧརིཏྭཱ ཋཔནཱདིཝསེན ¶ ཨཏྟནོ ཨཏྠཱཡ པརིཧརཎམེཝ ན ཝཊྚཏི, བྷཱུམཏྠརཎཱདིཝསེན པརིབྷོགོ པན ཨཏྟནོ པརིཧརཎཾ ན ཧོཏཱིཏི དསྶེཏི. ཁནྡྷཀེ ཧི ‘‘ཨནྟོཔི མཉྩེ པཉྙཏྟཱནི ཧོནྟི, བཧིཔི མཉྩེ པཉྙཏྟཱནི ཧོནྟཱི’’ཏི ཨེཝཾ ཨཏྟནོ ཨཏྟནོ ཨཏྠཱཡ མཉྩཱདཱིསུ པཉྙཔེཏྭཱ པརིཧརཎཝཏྠུསྨིཾ –

‘‘ན, བྷིཀྑཝེ, མཧཱཙམྨཱནི དྷཱརེཏབྦཱནི སཱིཧཙམྨཾ བྱགྒྷཙམྨཾ དཱིཔིཙམྨཾ. ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༢༥༥) –

པཊིཀྑེཔོ ¶ ཀཏོ. ཏསྨཱ ཝུཏྟནཡེནེཝེཏྠ ཨདྷིཔྤཱཡོ དཊྛབྦོ. དཱརུམཡཔཱིཋནྟི ཕལཀམཡཔཱིཋམེཝ. པཱདཀཐལིཀནྟི ཨདྷོཏཔཱདཾ ཡསྨིཾ གྷཾསནྟཱ དྷོཝནྟི, ཏཾ དཱརུཕལཀཱདི.

༡༡༣. ‘‘ཨཱགནྟྭཱ ཨུདྡྷརིསྶཱམཱིཏི གཙྪཏཱི’’ཏི ཝུཏྟཏྟཱ ཨཉྙེནཔི ཀཱརཎེན ཨནོཏཱཔེནྟསྶཔི ཨཱགམནེ སཱཔེཀྑསྶ ཨནཱཔཏྟི. ཏེནེཝ མཱཏིཀཱཊྛཀཐཱཡཾ ‘‘མཉྩཱདཱིནཾ སངྒྷིཀཏཱ, ཝུཏྟལཀྑཎེ དེསེ སནྠརཎཾ ཝཱ སནྠརཱཔནཾ ཝཱ, ཨཔལིབུདྡྷཏཱ, ཨཱཔདཱཡ ཨབྷཱཝོ, ནིརཔེཀྑཏཱ, ལེཌྜུཔཱཏཱཏིཀྐམོ’’ཏི (ཀངྑཱ. ཨཊྛ. པཋམསེནཱསནསིཀྑཱཔདཝཎྞནཱ) ཨེཝམེཏྠ ནིརཔེཀྑཏཱཡ སདྡྷིཾ ཚ ཨངྒཱནི ཝུཏྟཱནི.

པཋམསེནཱསནསིཀྑཱཔདཝཎྞནཱ ནིཊྛིཏཱ.

༥. དུཏིཡསེནཱསནསིཀྑཱཔདཝཎྞནཱ

༡༡༦. པཉྩམེ པཱཝཱརོ ཀོཛཝོཏི པཙྩཏྠརཎཏྠཱཡེཝ ཋཔིཏཱ ཨུགྒཏལོམཱ ཨཏྠརཎཝིསེསཱ. ཨེཏྟཀམེཝ ཝུཏྟནྟི ཨཊྛཀཐཱསུ ཝུཏྟཾ. སེནཱསནཏོཏི སབྦཔཙྪིམསེནཱསནཏོ.

༡༡༧. ཀུརུནྡཊྛཀཐཱཡཾ ཝུཏྟམེཝཏྠཾ སཝིསེསཾ ཀཏྭཱ དསྶེཏུཾ ‘‘ཀིཉྩཱཔི ཝུཏྟོ’’ཏིཨཱདི ཨཱརདྡྷཾ. ཝཏྟབྦཾ ནཏྠཱིཏི རུཀྑམཱུལསྶ པཱཀཊཏྟཱ ཝུཏྟཾ. པལུཛྫཏཱིཏི ཝིནསྶཏི.

༡༡༨. ཡེན མཉྩཾ ཝཱ པཱིཋཾ ཝཱ ཝཱིནནྟི, ཏཾ མཉྩཔཱིཋཀཝཱནཾ. སིལུཙྩཡལེཎནྟི པབྦཏགུཧཱ. ‘‘ཨཱཔུཙྪནཾ པན ཝཏྟ’’ནྟི ཨིམིནཱ ཨཱཔཏྟི ནཏྠཱིཏི དསྶེཏི. ཝུཏྟལཀྑཎསེཡྻཱ, ཏསྶཱ ¶ སངྒྷིཀཏཱ, ཝུཏྟལཀྑཎེ ཝིཧཱརེ སནྠརཎཾ ཝཱ སནྠརཱཔནཾ ཝཱ, ཨཔལིབུདྡྷཏཱ, ཨཱཔདཱཡ ཨབྷཱཝོ, ཨནཔེཀྑསྶ དིསཱཔཀྐམནཾ, ཨུཔཙཱརསཱིམཱཏིཀྐམོཏི ཨིམཱནེཏྠ སཏྟ ཨངྒཱནི.

དུཏིཡསེནཱསནསིཀྑཱཔདཝཎྞནཱ ནིཊྛིཏཱ.

༦. ཨནུཔཁཛྫསིཀྑཱཔདཝཎྞནཱ

༡༡༩. ཚཊྛེ ¶ ཨནུཔཝིསིཏྭཱཏི སམཱིཔཾ པཝིསིཏྭཱ.

༡༢༢. ཨུཔཙཱརཾ ཋཔེཏྭཱཏི དིཡཌྜྷཧཏྠཱུཔཙཱརཾ ཋཔེཏྭཱ. སངྒྷིཀཝིཧཱརཏཱ, ཨནུཊྛཱཔནཱིཡབྷཱཝཛཱནནཾ, སམྦཱདྷེཏུཀཱམཏཱ, ཨུཔཙཱརེ ནིསཱིདནཾ ཝཱ ནིཔཛྫནཾ ཝཱཏི ཨིམཱནེཏྠ ཙཏྟཱརི ཨངྒཱནི.

ཨནུཔཁཛྫསིཀྑཱཔདཝཎྞནཱ ནིཊྛིཏཱ.

༧. ནིཀྐཌྜྷནསིཀྑཱཔདཝཎྞནཱ

༡༢༦. སཏྟམེ ཀོཊྛཀཱནཱིཏི དྭཱརཀོཊྛཀཱནི.

༡༢༨. ‘‘སཀལསངྒྷཱརཱམཏོ ནིཀྐཌྜྷིཏུཾ ན ཝཊྚཏཱི’’ཏི ཨིདཾ ཨནནུརཱུཔཏོ ཝུཏྟཾ. པཱཔགརཧིཏཱཡ ཧི ཨཀུཔིཏཙིཏྟེན ནིཀྐཌྜྷཱཔེནྟསྶ ཨིམིནཱ སིཀྑཱཔདེན ཨཱཔཏྟི ནཏྠི ‘‘ཀུཔིཏོ ཨནཏྟམནོ’’ཏི ཝུཏྟཏྟཱ. ཨཉྙཱཔེཀྑཱ ཨཱཔཏྟི ན དིསྶཏི. པཱལི༹ཡཾ ‘‘ཨལཛྫིཾ ནིཀྐཌྜྷཏཱི’’ཏིཨཱདཱིསུ ཙིཏྟསྶ ལཧུཔརིཝཏྟིཏཱཡ ཨནྟརནྟརཱ ཀོཔེ ཨུཔྤནྣེཔི ཨནཱཔཏྟི ཨལཛྫིཏཱདིཔཙྩཡེནེཝ ནིཀྐཌྜྷནསྶ ཨཱརདྡྷཏྟཱ. སངྒྷིཀཝིཧཱརོ, ཨུཔསམྤནྣསྶ བྷཎྜནཀཱརཀབྷཱཝཱདིཝིནིམུཏྟཏཱ, ཀོཔེན ནིཀྐཌྜྷནཾ ཝཱ ནིཀྐཌྜྷཱཔནཾ ཝཱཏི ཨིམཱནེཏྠ ཏཱིཎི ཨངྒཱནི.

ནིཀྐཌྜྷནསིཀྑཱཔདཝཎྞནཱ ནིཊྛིཏཱ.

༨. ཝེཧཱསཀུཊིསིཀྑཱཔདཝཎྞནཱ

༡༢༩. ཨཊྛམཾ ¶ ཨུཏྟཱནམེཝ. སངྒྷིཀོ ཝིཧཱརོ, ཨསཱིསགྷཊྚཝེཧཱསཀུཊི, ཧེཊྛཱཔརིབྷོགཏཱ, ཨཔཊཱཎིདིནྣེ ཨཱཧཙྩཔཱདཀེ ནིསཱིདནཾ ཝཱ ནིཔཛྫནཾ ཝཱཏི ཨིམཱནེཏྠ ཙཏྟཱརི ཨངྒཱནི.

ཝེཧཱསཀུཊིསིཀྑཱཔདཝཎྞནཱ ནིཊྛིཏཱ.

༩. མཧལླཀཝིཧཱརསིཀྑཱཔདཝཎྞནཱ

༡༣༥. ནཝམེ ¶ ‘‘མཧལླཀོ ནཱམ ཝིཧཱརོ སསྶཱམིཀོ’’ཏི ཝུཏྟཏྟཱ སཉྙཱཙིཀཱཡ ཀུཊིཡཱ ཨནཱཔཏྟཱིཏི ཝདནྟི. ཡསྶཱཏི ཝིཧཱརསྶ. སཱ ཨཔརིཔཱུརཱུཔཙཱརཱཔི ཧོཏཱིཏི ཝིཝརིཡམཱནཾ ཀཝཱཊཾ ཡཾ བྷིཏྟིཾ ཨཱཧནཏི, སཱ སཱམནྟཱ ཀཝཱཊཝིཏྠཱརཔྤམཱཎཱ ཨུཔཙཱརརཧིཏཱཔི ཧོཏཱིཏི ཨཏྠོ. ཨཱལོཀཾ ཝཱཏཔཱནཾ སནྡྷེཏི གྷཊཡཏཱིཏི ཨཱལོཀསནྡྷཱིཏི ཀཝཱཊཾ ཝུཙྩཏི. དྭཱརཝཱཏཔཱནཱུཔཙཱརཏོ ཨཉྙཏྠ པུནཔྤུནཾ ལིམྤནཱདིཾ ཀརོནྟསྶ པིཎྜགཎནཱཡ པཱཙིཏྟིཡཾ.

ཀེཙི པན ‘‘པཱལི༹ཡཾ པཱཙིཏྟིཡསྶ ཨཝུཏྟཏྟཱ དུཀྐཊ’’ནྟི ཝདནྟི. ཨདྷིཊྛཱཏབྦནྟི སཾཝིདྷཱཏབྦཾ. ཧརིཏེ ཋིཏོ ཨདྷིཊྛཱཏི. ཨཱཔཏྟི དུཀྐཊསྶཱཏི ཧརིཏཡུཏྟེ ཁེཏྟེ ཋཏྭཱ ཚཱདེནྟསྶ དུཀྐཊནྟི ཨཏྠོ. ཀེཙི པན ‘‘ཏཱདིསེ ཁེཏྟེ ཝིཧཱརཾ ཀརོནྟསྶ དུཀྐཊ’’ནྟི ཝདནྟི, ཏཾ པཱལི༹ཡཱ ན སམེཏི.

༡༣༦. ཨུཛུཀམེཝ ཚཱདནནྟི ཚཱདནམུཁཝཊྚིཏོ པཊྛཱཡ ཡཱཝ པིཊྛིཝཾསཀཱུཊཱགཱརཀཎྞིཀཱདི, ཏཱཝ ཨིཊྛཀཱདཱིཧི ཨུཛུཀཾ ཚཱདནཾ. ཨིམིནཱ པན ཡེན སབྦསྨིཾ ཝིཧཱརེ ཨེཀཝཱརཾ ཚཱདིཏེ ཏཾ ཚཱདནཾ ཨེཀམགྒནྟི གཧེཏྭཱ པཱལི༹ཡཾ ‘‘དྭེ མགྒེ’’ཏིཨཱདི ཝུཏྟཾ. པརིཡཱཡེན ཚཱདནམྤི ཨིམིནཱཝ ནཡེན ཡོཛེཏབྦནྟི ཝདནྟི, ཏཾ ‘‘པུནཔྤུནཾ ཚཱདཱཔེསཱི’’ཏི ཨིམཱཡ པཱལི༹ཡཱ ཙ ‘‘སབྦམྤི ཙེཏཾ ཚདནཾ ཚདནཱུཔརི ཝེདིཏབྦ’’ནྟི ཨིམིནཱ ཨཊྛཀཐཱཝཙནེན ཙ སམེཏི.

པཱལི༹ཡཾ ‘‘མགྒེན ཚཱདེནྟསྶ པརིཡཱཡེན ཚཱདེནྟསྶཱ’’ཏི ཨིདཉྩ ཨིཊྛཀཱདཱིཧི, ཏིཎཔཎྞེཧི ཙ ཚཱདནཔྤཀཱརབྷེདདསྶནཏྠཾ ཝུཏྟཾ. ཀེཙི པན ‘‘པནྟིཡཱ ཚཱདིཏསྶ ཚདནསྶ ཨུཔརི ཚདནམུཁཝཊྚིཏོ པཊྛཱཡ ཨུདྡྷཾ ཨུཛུཀམེཝ ཨེཀཝཱརཾ ཚཱདནཾ ཨེཀམགྒནྟི གཧེཏྭཱ ‘དྭེ མགྒེ’ཏིཨཱདི ¶ ཝུཏྟཾ, ན པན སཀལཝིཧཱརཚཱདནཾ. ཨེས ནཡོ པརིཡཱཡེན ཚཱདནེཔཱི’’ཏི ཝདནྟི, ཏཾ པཱལི༹ཨཊྛཀཐཱཧི ན སམེཏི.

ཏཏིཡཱཡ མགྒནྟི ཨེཏྠ ཏཏིཡཱཡཱཏི ཨུཔཡོགཏྠེ སམྤདཱནཝཙནཾ, ཏཏིཡཾ མགྒནྟི ཨཏྠོ. ཨཡམེཝ ཝཱ པཱཋོ. ཏིཎཔཎྞེཧི ལབྦྷཏཱིཏི ཏིཎཔཎྞེཧི ཚཱདེཏྭཱ ཨུཔརི ཨུལླིཏྟཱཝལིཏྟཀརཎཾ སནྡྷཱཡ ཝུཏྟཾ. ཀེཝལཾ ¶ ཏིཎཀུཊིཡཱ ཧི ཨནཱཔཏྟི ཝུཏྟཱ. ཏིཎྞཾ མགྒཱནནྟི མགྒཝསེན ཚཱདིཏཱནཾ ཏིཎྞཾ ཚདནཱནཾ. ཏིཎྞཾ པརིཡཱཡཱནནྟི ཨེཏྠཱཔི ཨེསེཝ ནཡོ. མཧལླཀཝིཧཱརཏཱ, ཨཏྟནོ ཝཱསཱགཱརཏཱ, ཨུཏྟརི ཨདྷིཊྛཱནནྟི ཨིམཱནེཏྠ ཏཱིཎི ཨངྒཱནི.

མཧལླཀཝིཧཱརསིཀྑཱཔདཝཎྞནཱ ནིཊྛིཏཱ.

༡༠. སཔྤཱཎཀསིཀྑཱཔདཝཎྞནཱ

༡༤༠. དསམེ མཱཏིཀཱཡཾ སཔྤཱཎཀཨུདཀཾ ཏིཎེན ཝཱ མཏྟིཀཱཡ ཝཱ སིཉྩེཡྻ, ཚཌྜེཡྻཱཏི ཨཏྠོ. ཨཐ ཝཱ ཨུདཀཾ གཧེཏྭཱ བཧི སིཉྩེཡྻ, ཏསྨིཉྩ ཨུདཀེ ཏིཎཾ ཝཱ མཏྟིཀཾ ཝཱ ཨཱཧརིཏྭཱ པཀྑིཔེཡྻཱཏི ཨཛ྄ཛྷཱཧརིཏྭཱ ཨཏྠོ ཝེདིཏབྦོ. ཏེནཱཧ ‘‘སཀཊབྷཱརམཏྟཉྩེཔཱི’’ཏིཨཱདི. ཨིདནྟི ཏིཎམཏྟིཀཔཀྑིཔནཝིདྷཱནཾ. ཝུཏྟནྟི མཱཏིཀཱཡཾ ‘‘ཏིཎཾ ཝཱ མཏྟིཀཾ ཝཱ’’ཏི ཨེཝཾ ཝུཏྟཾ, ཨཊྛཀཐཱསུ ཝཱ ཝུཏྟཾ.

ཨིདཉྩ སིཀྑཱཔདཾ བཱཧིརཔརིབྷོགཾ སནྡྷཱཡ ཝཏྠུཝསེན ཝུཏྟཾ ཨབྦྷནྟརཔརིབྷོགསྶ ཝིསུཾ ཝཀྑམཱནཏྟཱ. ཏདུབྷཡམྤི ‘‘སཔྤཱཎཀ’’ནྟི ཀཏྭཱ ཝདྷཀཙིཏྟཾ ཝིནཱཝ སིཉྩནེ པཉྙཏྟཏྟཱ ‘‘པཎྞཏྟིཝཛྫ’’ནྟི ཝུཏྟཾ. ཝདྷཀཙིཏྟེ པན སཏི སིཀྑཱཔདནྟརེནེཝ པཱཙིཏྟིཡཾ, ན ཨིམིནཱཏི དཊྛབྦཾ. ཨུདཀསྶ སཔྤཱཎཀཏཱ, ‘‘སིཉྩནེན པཱཎཀཱ མརིསྶནྟཱི’’ཏི ཛཱནནཾ, ཏཱདིསམེཝ ཙ ཨུདཀཾ ཝིནཱ ཝདྷཀཙེཏནཱཡ ཀེནཙིདེཝ ཀརཎཱིཡེན ཏིཎཱདཱིནཾ སིཉྩནནྟི ཨིམཱནེཏྠ ཙཏྟཱརི ཨངྒཱནི.

སཔྤཱཎཀསིཀྑཱཔདཝཎྞནཱ ནིཊྛིཏཱ.

ནིཊྛིཏོ སེནཱསནཝགྒོ དུཏིཡོ.

‘‘བྷཱུཏགཱམཝགྒོ’’ཏིཔི ཨེཏསྶེཝ ནཱམཾ.

༣. ཨོཝཱདཝགྒོ

༡. ཨོཝཱདསིཀྑཱཔདཝཎྞནཱ

༡༤༤. ཏཏིཡཝགྒསྶ ¶ ¶ པཋམེ ཏིརཙྪཱནབྷཱུཏནྟི ཏིརོཀརཎབྷཱུཏཾ, བཱཧིརབྷཱུཏནྟི ཨཏྠོ. སམིདྡྷོཏི པརིཔུཎྞོ. སཧིཏཏྠོ ཨཏྠཡུཏྟོ. ཨཏྠགམྦྷཱིརཏཱདིནཱ གམྦྷཱིརོ.

༡༤༥-༡༤༧. པརཏོཏི ཨུཏྟརི. ཀརོནྟོཝཱཏི པརིབཱཧིརེ ཀརོནྟོ. ཝིབྷངྒེཏི ཛྷཱནཝིབྷངྒེ. ཙརཎནྟི ནིབྦཱནགམནཱཡ པཱདཾ.

ཡདསྶཱཏི ཡཾ ཨསྶ. དྷཱརེཏཱིཏི ཨཝིནསྶམཱནཾ དྷཱརེཏི. པརིཀཐནཏྠནྟི པཀིཎྞཀཀཐཱཝསེན པརིཙྪིནྣདྷམྨཀཐནཏྠཾ. ཏིསྶོ ཨནུམོདནཱཏི སངྒྷབྷཏྟཱདཱིསུ དཱནཱནིསཾསཔྤཊིསཾཡུཏྟཱ ནིདྷིཀུཎྜསུཏྟཱདི (ཁུ. པཱ. ༨.༡ ཨཱདཡོ) -ཨནུམོདནཱ, གེཧཔྤཝེསམངྒལཱདཱིསུ མངྒལསུཏྟཱདི (ཁུ. པཱ. ༥.༡ ཨཱདཡོ; སུ. ནི. མངྒལསུཏྟ) -ཨནུམོདནཱ, མཏཀབྷཏྟཱདིཨམངྒལེསུ ཏིརོཀུཊྚཱདི (ཁུ. པཱ. ༧.༡ ཨཱདཡོ; པེ. ཝ. ༡༤ ཨཱདཡོ) -ཨནུམོདནཱཏི ཨིམཱ ཏིསྶོ ཨནུམོདནཱ. ཀམྨཱཀམྨཝིནིཙྪཡོཏི པརིཝཱརཱཝསཱནེ ཀམྨཝགྒེ (པརི. ༤༨༢ ཨཱདཡོ) ཝུཏྟཝིནིཙྪཡོ. སམཱདྷིཝསེནཱཏི སམཐཔུབྦཀཝསེན. ཝིཔསྶནཱཝསེན ཝཱཏི དིཊྛིཝིསུདྡྷིཨཱདིཀཱཡ སུཀྑཝིཔསྶནཱཡ ཝསེན. ཨཏྟནོ སཱིལརཀྑཎཏྠཾ ཨཔརཱནཔེཀྑཏཱཡ ཡེན ཀཱམཾ གནྟུཾ ཙཏསྶོ དིསཱ ཨརཧཏི, ཨསྶ ཝཱ སནྟི, ཏཱསུ ཝཱ སཱདྷཱུཏི ཙཱཏུདྡིསོ.

ཨབྷིཝིནཡེཏི པཱཏིམོཀྑསཾཝརསངྑཱཏེ སཾཝརཝིནཡེ, ཏཔྤཀཱསཀེ ཝཱ ཝིནཡཔིཊཀེ. ཝིནེཏུནྟི སིཀྑཱཔེཏུཾ པཀཱསེཏུཾ. པགུཎཱ ཝཱཙུགྒཏཱཏི པཱཋཏོ ཙ ཨཏྠཏོ ཙ པགུཎཱ མུཁེ སནྣིདྷཱཔནཝསེན ཝཱཙུགྒཏཱ ཀཱཏབྦཱ. ཨཏྠམཏྟཝསེནཔེཏྠ ཡོཛནཾ ཀརོནྟི. ཨབྷིདྷམྨེཏི ལཀྑཎརསཱདིཝསེན པརིཙྪིནྣེ ནཱམརཱུཔདྷམྨེ. པུབྦེ ཀིར མཧཱཐེརཱ པརིཡཏྟིཨནནྟརདྷཱནཱཡ ཨེཀེཀསྶ གཎསྶ དཱིགྷནིཀཱཡཱདིཨེཀེཀདྷམྨཀོཊྛཱསཾ ནིཡྻཱཏེནྟཱ ‘‘ཏུམྷེ ཨེཏཾ པཱལི༹ཏོ ཙ ཨཊྛཀཐཱཏོ ཙ པརིཧརཐ, སཀྐོནྟཱ ཨུཏྟརིཔི ཨུགྒཎྷཐཱ’’ཏི ཨེཝཾ སཀལདྷམྨཾ གནྠཝསེན ནིཡྻཱཏེནྟི, ཏཏྠ ཏེ ཙ བྷིཀྑཱུ གནྠནཱམེན དཱིགྷབྷཱཎཀཱ མཛ྄ཛྷིམབྷཱཎཀཱཏི ཝོཧརཱིཡནྟི, ཏེ ཙ ¶ ཨཏྟནོ བྷཱརབྷཱུཏཾ ཀོཊྛཱསཾ པརིཙྩཛིཏྭཱ ཨཉྙཾ ¶ ཨུགྒཧེཏུཾ ན ལབྷནྟི. ཏཾ སནྡྷཱཡཱཧ ‘‘སཙེ མཛ྄ཛྷིམབྷཱཎཀོ ཧོཏཱི’’ཏིཨཱདི.

ཏཏྠ ཧེཊྛིམཱ ཝཱ ཏཡོ ཝགྒཱཏི མཧཱཝགྒཏོ ཧེཊྛིམཱ སགཱཐཀཝགྒོ (སཾ. ནི. ༡.༡ ཨཱདཡོ), ནིདཱནཝགྒོ (སཾ. ནི. ༢.༡ ཨཱདཡོ), ཁནྡྷཝགྒོཏི (སཾ. ནི. ༣.༡ ཨཱདིཡོ) ཨིམེ ཏཡོ ཝགྒཱ. ཏིཀནིཔཱཏཏོ པཊྛཱཡ ཧེཊྛཱཏི ཨེཀཀནིཔཱཏདུཀནིཔཱཏེ སནྡྷཱཡ ཝུཏྟཾ. དྷམྨཔདམྤི སཧ ཝཏྠུནཱ ཛཱཏཀབྷཱཎཀེན ཨཏྟནོ ཛཱཏཀེན སདྡྷིཾ ཨུགྒཧེཏབྦཾ. ཏཏོ ཨོརཾ ན ཝཊྚཏཱིཏི མཧཱཔཙྩརིཝཱདསྶ ཨདྷིཔྤཱཡོ. ཏཏོ ཏཏོཏི དཱིགྷནིཀཱཡཱདིཏོ. ཨུཙྩིནིཏྭཱ ཨུགྒཧིཏཾ སདྡྷམྨསྶ ཋིཏིཡཱ, བྷིཀྑུནོཔི པུབྦཱཔརཱནུསནྡྷིཨཱདིཀུསལཏཱཡ ཙ ན ཧོཏཱིཏི ‘‘ཏཾ ན ཝཊྚཏཱི’’ཏི པཊིཀྑིཏྟཾ. ཨབྷིདྷམྨེ ཀིཉྩི ཨུགྒཧེཏབྦནྟི ན ཝུཏྟནྟི ཨེཏྠ ཡསྨཱ ཝིནཡེ ཀུསལཏྟིཀཱདིཝིབྷཱགོ, སུཏྟནྟེསུ སམཐཝིཔསྶནཱམགྒོ ཙ ཨབྷིདྷམྨཔཱཋཾ ཝིནཱ ན ཝིཉྙཱཡཏི, ཨནྡྷཀཱརེ པཝིཊྛཀཱལོ ཝིཡ ཧོཏི, ཏསྨཱ སུཏྟཝིནཡཱནཾ གཧཎཝསེན ཨབྷིདྷམྨགྒཧཎཾ ཝུཏྟམེཝཱཏི ཝིསུཾ ན ཝུཏྟནྟི ཝེདིཏབྦཾ. ཡཐཱ ‘‘བྷོཛནཾ བྷུཉྫིཏབྦ’’ནྟི ཝུཏྟེ ‘‘བྱཉྫནཾ ཁཱདིཏབྦ’’ནྟི ཨཝུཏྟམྤི ཝུཏྟམེཝ ཧོཏི ཏདཝིནཱབྷཱཝཏོ, ཨེཝཾསམྤདམིདཾ དཊྛབྦཾ.

པརིམཎྜལཔདབྱཉྫནཱཡཱཏི པརིམཎྜལཱནི པརིཔུཎྞཱནི པདེསུ སིཐིལདྷནིཏཱདིབྱཉྫནཱནི ཡསྶཾ, ཏཱཡ. པུརསྶ ཨེསཱཏི པོརཱི, ནགརཝཱསཱིནཾ ཀཐཱཏི ཨཏྠོ. ཨནེལགལཱ༹ཡཱཏི ཨེཏྠ ཨེལཱཏི ཁེལ༹ཾ ཏགྒལ༹ནཝིརཧིཏཱཡ. ཀལྱཱཎཝཱཀྐརཎོཏི ཨེཏྠ ཝཱཙཱ ཨེཝ ཝཱཀྐརཎཾ, ཨུདཱཧརཎགྷོསོ. ཀལྱཱཎཾ མདྷུརཾ ཝཱཀྐརཎམསྶཱཏི ཀལྱཱཎཝཱཀྐརཎོ. ཨུཔསམྤནྣཱཡ མེཐུནེནེཝ ཨབྷབྦོ ཧོཏི, ན སིཀྑམཱནཱསཱམཎེརཱིསཱུཏི ཨཱཧ ‘‘བྷིཀྑུནིཡཱ ཀཱཡསཾསགྒཾ ཝཱ’’ཏིཨཱདི.

༡༤༨. གརུཀེཧཱིཏི གརུཀབྷཎྜེཧི. ཨེཀཏོཨུཔསམྤནྣཱཡཱཏི ཨུཔཡོགཏྠེ བྷུམྨཝཙནཾ. བྷིཀྑཱུནཾ སནྟིཀེ ཨུཔསམྤནྣཱ ནཱམ པརིཝཏྟལིངྒཱ ཝཱ པཉྩསཏསཱཀིཡཱནིཡོ ཝཱ. ཨེཏཱ པན ཨེཀཏོཨུཔསམྤནྣཱ ཨོཝདནྟསྶ པཱཙིཏྟིཡམེཝ.

༡༤༩. ན ནིམནྟིཏཱ ཧུཏྭཱ གནྟུཀཱམཱཏི ནིམནྟིཏཱ ཧུཏྭཱ བྷོཛནཔརིཡོསཱནེ གནྟུཀཱམཱ ན ཧོནྟི, ཏཏྠེཝ ཝསིཏུཀཱམཱ ཧོནྟཱིཏི ¶ ཨཏྠོ. ཡཏོཏི བྷིཀྑུནུཔསྶཡཏོ. ཡཱཙིཏྭཱཏི ‘‘ཏུམྷེཧི ཨཱནཱིཏཨོཝཱདེནེཝ མཡམྤི ཝསིསྶཱམཱ’’ཏི ཡཱཙིཏྭཱ. ཏཏྠཱཏི ཏསྨིཾ བྷིཀྑུནུཔསྶཡེ. ཨབྷིཀྑུཀཱཝཱསེ ཝསྶཾ ཝསནྟིཡཱ པཱཙིཏྟིཡཾ, ཨཔགཙྪནྟིཡཱ དུཀྐཊཾ.

ཨིམཱསུ ¶ ཀཏརཱཔཏྟི པརིཧརིཏབྦཱཏི ཙོདནཾ པརིཧརནྟོ ཨཱཧ ‘‘སཱ རཀྑིཏབྦཱ’’ཏི. སཱ ཝསྶཱནུགམནམཱུལིཀཱ ཨཱཔཏྟི རཀྑིཏབྦཱ, ཨིཏརཱཡ ཨནཱཔཏྟིཀཱརཎཾ ཨཏྠཱིཏི ཨདྷིཔྤཱཡོ. ཏེནཱཧ ‘‘ཨཱཔདཱསུ ཧཱི’’ཏིཨཱདི.

ཨོཝཱདཏྠཱཡཱཏི ཨོཝཱདེ ཡཱཙནཏྠཱཡ. དྭེ ཏིསྶོཏི དྭཱིཧི ཏཱིཧི, ཀརཎཏྠེ ཙེཏཾ པཙྩཏྟཝཙནཾ. པཱསཱདིཀེནཱཏི པསཱདཛནཀེན ཀཱཡཀམྨཱདིནཱ. སམྤཱདེཏཱུཏི ཏིཝིདྷཾ སིཀྑཾ སམྤཱདེཏུ. ཨསམྨཏཏཱ, བྷིཀྑུནིཡཱ པརིཔུཎྞཱུཔསམྤནྣཏཱ, ཨོཝཱདཝསེན ཨཊྛགརུདྷམྨདཱནནྟི ཨིམཱནེཏྠ ཏཱིཎི ཨངྒཱནི.

ཨོཝཱདསིཀྑཱཔདཝཎྞནཱ ནིཊྛིཏཱ.

༢. ཨཏྠངྒཏསིཀྑཱཔདཝཎྞནཱ

༡༥༣. དུཏིཡེ ཀོཀནདནྟི པདུམཝིསེསཾ, ཏཾ ཀིར བཧུཔཏྟཾ ཝཎྞསམྤནྣཾ. ཨཡཉྷེཏྠ ཨཏྠོ – ཡཐཱ ཀོཀནདསངྑཱཏཾ པདུམཾ, ཨེཝཾ ཕུལླམུཁཔདུམཾ ཨཝཱིཏགུཎགནྡྷཾ ནིམྨལེ ཨནྟལིཀྑེ ཨཱདིཙྩཾ ཝིཡ ཙ ཨཏྟནོ ཏེཛསཱ ཏཔནྟཾ ཏཏོ ཨེཝ ཝིརོཙམཱནཾ ཨངྒེཧི ནིཙྪརཎཀཛུཏིཡཱ ཨངྒཱིརསཾ སམྨཱསམྦུདྡྷཾ པསྶཱཏི. རཛོཧརཎནྟི སརཱིརེ རཛཾ པུཉྪཏཱིཏི རཛོཧརཎནྟི པུཉྪནཙོལ༹སྶ ནཱམཾ. ཨོབྷཱསཝིསྶཛྫནཔུབྦཀཱ བྷཱསིཏགཱཐཱ ཨོབྷཱསགཱཐཱ ནཱམ. ཝིསུདྡྷིམགྒཱདཱིསུ (ཝིསུདྡྷི. ༢.༣༨༦) པན ‘‘རཱགོ རཛོ ན ཙ པན རེཎུ ཝུཙྩཏཱི’’ཏིཨཱདི ཨོབྷཱསགཱཐཱ ཝུཏྟཱ, ན པནེསཱ ‘‘ཨདྷིཙེཏསོ’’ཏི གཱཐཱ. ཨཡཉྩ ཙཱུལ༹པནྠཀཏྠེརསྶ ཨུདཱནགཱཐཱཏི ཨུདཱནཔཱལི༹ཡཾ ནཏྠི, ཨེཀུདཱནིཡཏྠེརསྶ (ཐེརགཱ. ༡.༦༧ ཨེཀུདཱནིཡཏྠེརགཱཐཱཝཎྞནཱ) ནཱཡཾ ཨུདཱནགཱཐཱཏི ཏཏྠ ཝུཏྟཾ. ཨིདྷ པན པཱལི༹ཡཱ ཨེཝ ཝུཏྟཏྟཱ ཐེརསྶཱཔི ཨུདཱནགཱཐཱཏི གཧེཏབྦཾ. ཨིདྷ ཙ ཨགརུདྷམྨེནཱཔི ཨོཝདཏོ ¶ པཱཙིཏྟིཡམེཝ. ཨཏྠངྒཏསཱུརིཡཏཱ, པརིཔུཎྞཱུཔསམྤནྣཏཱ, ཨོཝདནནྟི ཨིམཱནེཏྠ ཏཱིཎི ཨངྒཱནི.

ཨཏྠངྒཏསིཀྑཱཔདཝཎྞནཱ ནིཊྛིཏཱ.

༣. བྷིཀྑུནུཔསྶཡསིཀྑཱཔདཝཎྞནཱ

༡༦༢. ཏཏིཡཾ ¶ ཨུཏྟཱནམེཝ. ཨུཔསྶཡཱུཔགམནཾ, པརིཔུཎྞཱུཔསམྤནྣཏཱ, སམཡཱབྷཱཝོ, གརུདྷམྨེཧི ཨོཝདནནྟི ཨིམཱནེཏྠ ཙཏྟཱརི ཨངྒཱནི.

བྷིཀྑུནུཔསྶཡསིཀྑཱཔདཝཎྞནཱ ནིཊྛིཏཱ.

༤. ཨཱམིསསིཀྑཱཔདཝཎྞནཱ

༡༦༤. ཙཏུཏྠེ ཨཱམིསནིརཔེཀྑམྤི ཨཱམིསཧེཏུ ཨོཝདཏཱིཏིསཉྙཱཡ བྷཎནྟསྶཔི ཨནཱཔཏྟི སཙིཏྟཀཏྟཱ སིཀྑཱཔདསྶ. སེསམེཏྠ ཨུཏྟཱནམེཝ. ཨུཔསམྤནྣཏཱ, དྷམྨེན ལདྡྷསམྨུཏིཏཱ, ཨནཱམིསནྟརཏཱ, ཨཝཎྞཀཱམཏཱཡ ཨེཝཾ བྷཎནནྟི ཨིམཱནེཏྠ ཙཏྟཱརི ཨངྒཱནི.

ཨཱམིསསིཀྑཱཔདཝཎྞནཱ ནིཊྛིཏཱ.

༡༦༩. པཉྩམཾ ཙཱིཝརདཱནསིཀྑཱཔདཾ ཨུཏྟཱནམེཝ.

༦. ཙཱིཝརསིབྦནསིཀྑཱཔདཝཎྞནཱ

༡༧༦. ཚཊྛེ ཀཐིནཝཏྟནྟི ཀཐིནམཱསེ ཙཱིཝརཾ ཀརོནྟཱནཾ སབྲཧྨཙཱརཱིནཾ སཧཱཡབྷཱཝཱུཔགམནཾ སནྡྷཱཡ ཝུཏྟཾ. ཝཉྩེཏྭཱཏི ‘‘ཏཝ ཉཱཏིཀཱཡཱ’’ཏི ཨཝཏྭཱ ‘‘ཨེཀིསྶཱ བྷིཀྑུནིཡཱ’’ཏི ཨེཏྟཀམེཝ ཝཏྭཱ ‘‘ཨེཀིསྶཱ བྷིཀྑུནིཡཱ’’ཏི སུཏྭཱ ཏེ ཨཉྙཱཏིཀསཉྙིནོ ཨཧེསུནྟི ཨཱཧ ‘‘ཨཀཔྤིཡེ ནིཡོཛིཏཏྟཱ’’ཏི. ཨཉྙཱཏིཀཱཡ བྷིཀྑུནིཡཱ སནྟཀཏཱ, ནིཝཱསནཔཱརུཔནཱུཔགཏཱ, ཝུཏྟནཡེན སིབྦནཾ ཝཱ སིབྦཱཔནཾ ཝཱཏི ཨིམཱནེཏྠ ཏཱིཎི ཨངྒཱནི.

ཙཱིཝརསིབྦནསིཀྑཱཔདཝཎྞནཱ ནིཊྛིཏཱ.

༧. སཾཝིདྷཱནསིཀྑཱཔདཝཎྞནཱ

༡༨༣. སཏྟམེ ¶ པཱལི༹ཡཾ གཙྪཱམ བྷགིནི གཙྪཱམཱཡྻཱཏི བྷིཀྑུཔུབྦཀཾ སཾཝིདྷཱནཾ, ཨིཏརཾ བྷིཀྑུནིཔུབྦཀཾ ¶ . ཨེཀདྡྷཱནམགྒནྟི ཨེཀཏོ ཨདྡྷཱནསངྑཱཏཾ མགྒཾ. ཧིཡྻོཏི སུཝེ. པརེཏི ཏཏིཡེ དིཝསེ.

དྭིདྷཱ ཝུཏྟཔྤཀཱརོཏི པཱདགམནེ པཀྑགམནེཏི དྭིདྷཱ ཝུཏྟཔྤཀཱརོ. ཨུཔཙཱརོ ན ལབྦྷཏཱིཏི ཡོ པརིཀྑིཏྟཱདིགཱམསྶ ཨེཀལེཌྜུཔཱཏཱདིཨུཔཙཱརོ ཝུཏྟོ, སོ ཨིདྷ ན ལབྦྷཏི ཨཱསནྣཏྟཱ. ཨེཏེན ཙ ཨནྟརགྷརེཡེཝེཏྠ གཱམོཏི ཨདྷིཔྤེཏོ, ན སཀལཾ གཱམཁེཏྟཾ. ཏཏྠཱཔི ཡཏྠ ཨུཔཙཱརོ ལབྦྷཏི, ཏཏྠ ཨུཔཙཱརོཀྐམནེ ཨེཝ ཨཱཔཏྟཱིཏི དསྶེཏི. ཏེནཱཧ ‘‘རཏནམཏྟནྟརོ’’ཏིཨཱདི. ཨུཔཙཱརོཀྐམནཉྩེཏྠ ཨུཔཙཱརབྦྷནྟརེ པཝིསནམེཝ ཧོཏི. ཏཏྠ ཨཔྤཝིསིཏྭཱཔི ཨུཔཙཱརཏོ བཧི ཨདྡྷཡོཛནབྦྷནྟརགཏེན མགྒེན གཙྪནྟོཔི མགྒསྶ དྭཱིསུ པསྶེསུ ཨདྡྷཡོཛནབྦྷནྟརགཏཾ གཱམཱུཔཙཱརཾ སབྦཾ ཨོཀྐམིཏྭཱ གཙྪཏིཙྩེཝ ཝུཙྩཏི. ཨདྡྷཡོཛནཏོ བཧི གཏེན མགྒེན གཙྪནྟོ ན གཱམཱུཔཙཱརགཎནཱཡ ཀཱརེཏབྦོ, ཨདྡྷཡོཛནགཎནཱཡེཝ ཀཱརེཏབྦོ. ཨེཝཉྩ སཏི ཨནནྟརསིཀྑཱཔདེ ནཱཝཱཡེཝ གཱམཏཱིརཔསྶེན གཙྪནྟསྶ གཱམཱུཔཙཱརགཎནཱཡ ཨཱཔཏྟི སམཏྠིཏཱ ཧོཏི. ན ཧི སཀྐཱ ནཱཝཱཡ གཱམཱུཔཙཱརབྦྷནྟརེ པཝིསིཏུཾ. ཏིཎྞཾ མགྒཱནཾ སམྦནྡྷཊྛཱནཾ སིངྒྷཱཊཀཾ. ཨེཏྠནྟརེ སཾཝིདཧིཏེཏི ཨེཏྠ ན ཀེཝལཾ ཡཐཱཝུཏྟརཐིཀཱདཱིསུ ཨེཝ སཾཝིདཧནེ དུཀྐཊཾ, ཨནྟརཱམགྒེཔཱིཏི ཨདྷིཔྤཱཡོ.

ཨདྡྷཡོཛནཾ ཨཏིཀྐམནྟསྶཱཏི ཨསཏི གཱམེ ཨདྡྷཡོཛནཾ ཨཏིཀྐམནྟསྶ. ཡསྨིཉྷི གཱམཁེཏྟབྷཱུཏེཔི ཨརཉྙེ ཨདྡྷཡོཛནབྦྷནྟརེ གཱམོ ན ཧོཏི, ཏམྤི ཨིདྷ ཨགཱམཀཾ ཨརཉྙནྟི ཨདྷིཔྤེཏཾ, ན ཝིཉྫྷཱཊཝཱདཡོ.

༡༨༥. རཊྛབྷེདེཏི རཊྛཝིལོཔེ. ཙཀྐསམཱརུལ༹ྷཱཏི ཨིརིཡཱཔཐཙཀྐཾ, སཀཊཙཀྐཾ ཝཱ སམཱརུལ༹ྷཱ. དྭིནྣམྤི སཾཝིདཧིཏྭཱ མགྒཔྤཊིཔཏྟི, ཨཝིསངྐེཏཾ, སམཡཱབྷཱཝོ, ཨནཱཔདཱ, གཱམནྟརོཀྐམནཾ ཝཱ ཨདྡྷཡོཛནཱཏིཀྐམོ ཝཱཏི ཨིམཱནེཏྠ པཉྩ ཨངྒཱནི. ཨེཀཏོཨུཔསམྤནྣཱདཱིཧི སདྡྷིཾ སཾཝིདྷཱཡ གཙྪནྟསྶ པན མཱཏུགཱམསིཀྑཱཔདེན ཨཱཔཏྟི.

སཾཝིདྷཱནསིཀྑཱཔདཝཎྞནཱ ནིཊྛིཏཱ.

༨. ནཱཝཱབྷིརུཧནསིཀྑཱཔདཝཎྞནཱ

༡༨༩. ཨཊྛམེ ¶ ཨེཀཾ ཏཱིརཾ…པེ… ནིརནྟརནྟི ནདིཏོ ཨདྡྷཡོཛནབྦྷནྟརེ པདེསེ ནིཝིཊྛགཱམེཧི ¶ ནིརནྟརཏཱ ཝུཏྟཱ. ཨེཀཾ ཨགཱམཀཾ ཨརཉྙནྟི ཏཐཱ ནིཝིཊྛགཱམཱབྷཱཝེན ཝུཏྟཾ. ཨགཱམཀཏཱིརཔསྶེནཱཏིཨཱདི པན ཨཏིརེཀཨདྡྷཡོཛནཝིཏྠཏཾ ནདིཾ སནྡྷཱཡ ཝུཏྟཾ. ཏཏོ ཨཱུནཝིཏྠཱརཱཡ ཧི ནདིཡཱ མཛ྄ཛྷེནཱཔི གམནེ ཏཱིརདྭཡསྶཱཔི ཨདྡྷཡོཛནབྦྷནྟརེ གཏཏྟཱ གཱམནྟརགཎནཱཡ, ཨདྡྷཡོཛནགཎནཱཡ ཙ ཨཱཔཏྟིཡོ པརིཙྪིནྡིཏབྦཱ. ཏེནེཝ ‘‘ཡོཛནཝིཏྠཏཱ…པེ… ཨདྡྷཡོཛནགཎནཱཡ པཱཙིཏྟིཡཱནཱི’’ཏི ཝུཏྟཾ. ཏེནེཝ ཧི ཡོཛནཏོ ཨཱུནཱཡ ནདིཡཱ ཨདྡྷཡོཛནབྦྷནྟརགཏཏཱིརཝསེནེཝ ཨཱཔཏྟིགཎནཾ ཝུཏྟམེཝ ཧོཏི. ‘‘སབྦཨཊྛཀཐཱསཱུ’’ཏིཨཱདིནཱ ཝུཏྟམེཝཏྠཾ སམཏྠེཏི. ཏཏྠ ཀིཉྩཱཔི སམུདྡཏལཱ༹ཀཱདཱིསུ པཱཙིཏྟིཡཾ ན ཝུཏྟཾ, ཏཐཱཔི ཀཱིལཱ༹པུརེཀྑཱརསྶ ཏཏྠ དུཀྐཊམེཝཱཏི གཧེཏབྦཾ, པཋམཾ ཀཱིལཱ༹པུརེཀྑཱརསྶཱཔི པཙྪཱ ནཱཝཱཡ ནིདྡུཔགཏསྶ, ཡོནིསོ ཝཱ མནསི ཀརོནྟསྶ གཱམནྟརོཀྐམནཱདཱིསུཔི ཨཱཔཏྟིསམྦྷཝཏོ པཎྞཏྟིཝཛྫཏཱ, ཏིཙིཏྟཏཱ ཙསྶ སིཀྑཱཔདསྶ ཝུཏྟཱཏི ཝེདིཏབྦཾ. སེསཾ སུཝིཉྙེཡྻམེཝ.

ནཱཝཱབྷིརུཧནསིཀྑཱཔདཝཎྞནཱ ནིཊྛིཏཱ.

༩. པརིཔཱཙིཏསིཀྑཱཔདཝཎྞནཱ

༡༩༧. ནཝམེ པཱལི༹ཡཾ ‘‘སིཀྑམཱནཱ…པེ… པཉྩ བྷོཛནཱནི ཋཔེཏྭཱ སབྦཏྠ ཨནཱཔཏྟཱི’’ཏི ཨིདཾ ཨིམིནཱ སིཀྑཱཔདེན ཨནཱཔཏྟིཾ སནྡྷཱཡ ཝུཏྟཾ. པཉྩཧི སཧདྷམྨིཀེཧི ཀཏཝིཉྙཏྟིཔརིཀཐཱདཱིཧི ཨུཔྤནྣཾ པརིབྷུཉྫནྟསྶ དུཀྐཊམེཝ. བྷིཀྑུནིཡཱ པརིཔཱཙིཏཏཱ, ཏཐཱ ཛཱནནཾ, གིཧིསམཱརམྦྷཱབྷཱཝོ, བྷོཛནཏཱ, ཏསྶ ཨཛ྄ཛྷོཧརཎནྟི ཨིམཱནེཏྠ པཉྩ ཨངྒཱནི.

པརིཔཱཙིཏསིཀྑཱཔདཝཎྞནཱ ནིཊྛིཏཱ.

༡༠. རཧོནིསཛྫསིཀྑཱཔདཝཎྞནཱ

༡༩༨. དསམེ ¶ ཨུཔནནྡསྶ ཙཏུཏྠསིཀྑཱཔདེནཱཏི མཱཏུགཱམེན རཧོནིསཛྫསིཀྑཱཔདཾ སནྡྷཱཡ ཝུཏྟཾ, ཏཾ པན ཨཙེལཀཝགྒེ པཉྩམམྤི ཨུཔནནྡཾ ཨཱརབྦྷ པཉྙཏྟེསུ ཙཏུཏྠཏྟཱ ཨེཝཾ ཝུཏྟནྟི དཊྛབྦཾ.

རཧོནིསཛྫསིཀྑཱཔདཝཎྞནཱ ནིཊྛིཏཱ.

ནིཊྛིཏོ ཨོཝཱདཝགྒོ ཏཏིཡོ.

༤. བྷོཛནཝགྒོ

༡. ཨཱཝསཐཔིཎྜསིཀྑཱཔདཝཎྞནཱ

༢༠༦. ཙཏུཏྠཝགྒསྶ ¶ པཋམེ ཨིམེསཾཡེཝཱཏི ཨིམེསཾ པཱསཎྜཱནཾཡེཝ. ཨེཏྟཀཱནནྟི ཨིམསྨིཾ པཱསཎྜེ ཨེཏྟཀཱནཾ.

༢༠༨. ‘‘གཙྪནྟོ ཝཱ ཨཱགཙྪནྟོ ཝཱ’’ཏི ཨིདཾ ཨདྡྷཡོཛནཝསེན གཧེཏབྦཾ. ཨཉྙེ ཨུདྡིསྶ པཉྙཏྟཉྩ བྷིཀྑཱུསུ ཨཔྤསནྣེཧི ཏིཏྠིཡེཧི སཱམཉྙཏོཔི པཉྙཏྟམྤི བྷིཀྑཱུནཾ ན ཝཊྚཏི ཨེཝ. ཨཱཝསཐཔིཎྜཏཱ, ཨགིལཱནཏཱ, ཨནུཝསིཏྭཱ བྷོཛནནྟི ཨིམཱནེཏྠ ཏཱིཎི ཨངྒཱནི.

ཨཱཝསཐཔིཎྜསིཀྑཱཔདཝཎྞནཱ ནིཊྛིཏཱ.

༢. གཎབྷོཛནསིཀྑཱཔདཝཎྞནཱ

༢༠༩. དུཏིཡེ ཨབྷིམཱརེཏི ཨབྷིབྷཝིཏྭཱ བྷགཝནྟཾ མཱརཎཏྠཱཡ པཡོཛིཏེ དྷནུདྷརེ. ནནུ ‘‘རཱཛཱནམྤི མཱརཱཔེསཱི’’ཏི ཝཙནཏོ ཨིདཾ སིཀྑཱཔདཾ ཨཛཱཏསཏྟུནོ ཀཱལེ པཉྙཏྟནྟི སིདྡྷཾ, ཨེཝཉྩ སཏི པཱལི༹ཡཾ ‘‘ཏེན ཁོ པན སམཡེན རཉྙོ མཱགདྷསྶ…པེ… ཉཱཏིསཱལོཧིཏོ ཨཱཛཱིཝཀེསུ པབྦཛིཏོ ཧོཏི…པེ… བིམྦིསཱརཾ ཨེཏདཝོཙཱ’’ཏིཨཱདི ཝིརུཛ྄ཛྷཏཱིཏི? ན ཝིརུཛ྄ཛྷཏི. སོ ཀིར ཨཱཛཱིཝཀོ བིམྦིསཱརཀཱལཏོ པབྷུཏི ཨནྟརནྟརཱ བྷིཀྑཱུ ནིམནྟེཏྭཱ དཱནཾ དེནྟོ ཨཛཱཏསཏྟུཀཱལེཔི སིཀྑཱཔདེ པཉྙཏྟེཔི བྷིཀྑཱུནཾ སནྟིཀེ དཱུཏཾ པཱཧེསི, བྷིཀྑཱུ ཙ ཀུཀྐུཙྩཱཡནྟཱ ནིཝཱརེསུཾ. ཏསྨཱ ཨཱདིཏོ པཊྛཱཡ ཏཾ ཝཏྠུ དསྶིཏནྟི ཝེདིཏབྦཾ.

༢༡༥. ཨཉྙམཉྙཾ ¶ ཝིསདིསཾ རཛྫཾ ཝིརཛྫཾ, ཝིརཛྫཏོ ཨཱགཏཱ ཝེརཛྫཀཱ. ཏེ ཙ ཡསྨཱ ཛཱཏིགོཏྟཱདིཏོ ནཱནཱཝིདྷཱ, ཏསྨཱ ནཱནཱཝེརཛྫཀེཏིཔི ཨཏྠོ.

༢༡༧-༨. ཨིམསྶ སིཀྑཱཔདསྶ ཝཏྠུཝསེནེཝ ཝིཉྙཏྟིཏོ གཎབྷོཛནཏྠཏཱ སིདྡྷཱཏི ཏཾ ཨཝཏྭཱ པདབྷཱཛནེ ཨསིདྡྷམེཝ ནིམནྟནཏོ གཎབྷོཛནཾ དསྶིཏནྟི ཝེདིཏབྦཾ. ཏེནཱཧ ‘‘དྭཱིཧཱཀཱརེཧཱི’’ཏིཨཱདི. ¶ ‘‘ཡེན ཀེནཙི ཝེཝཙནེནཱ’’ཏི ཝུཏྟཏྟཱ ‘‘བྷོཛནཾ གཎྷཐཱ’’ཏིཨཱདིསཱམཉྙནཱམེནཱཔི གཎབྷོཛནཾ ཧོཏི. ཡཾ པན པཱལི༹ཡཾ ཨདྡྷཱནགམནཱདིཝཏྠཱུསུ ‘‘ཨིདྷེཝ བྷུཉྫཐཱ’’ཏི ཝུཏྟཝཙནསྶ ཀུཀྐུཙྩཱཡནཾ, ཏམྤི ཨོདནཱདིནཱམཾ གཧེཏྭཱ ཝུཏྟཏྟཱ ཨེཝ ཀཏནྟི ཝེདིཏབྦཾ. ཨེཀཏོ གཎྷནྟཱིཏི ཨཉྙམཉྙསྶ དྭཱདསཧཏྠཾ ཨམུཉྩིཏྭཱ ཨེཀཏོ ཋཏྭཱ གཎྷནྟི.

‘‘ཨམྷཱཀཾ ཙཏུནྣམྤི བྷཏྟཾ དེཧཱི’’ཏི ཝུཏྟཏྟཱ པཱལི༹ (ཝཎྞནཱ) ཡཾ ‘‘ཏྭཾ ཨེཀསྶ བྷིཀྑུནོ བྷཏྟཾ དེཧཱི’’ཏིཨཱདིནོ ཝུཏྟཏྟཱ ཙ བྷོཛནནཱམེན ཝིཉྙཏྟམེཝ གཎབྷོཛནཾ ཧོཏི, ཏཉྩ ཨཉྙེན ཝིཉྙཏྟམྤི ཨེཀཏོ གཎྷནྟཱནཾ སབྦེསམྤི ཧོཏཱིཏི དཊྛབྦཾ. ཝིསུཾ གཧིཏཾ པན ཝིཉྙཏྟཾ བྷུཉྫཏོ པཎཱིཏབྷོཛནཱདིསིཀྑཱཔདེཧི ཨཱཔཏྟི ཨེཝ.

ཨཱགནྟུཀཔཊྚནྟི ཨཙྪིནྡིཏྭཱ ཨནྭཱདྷིཾ ཨཱརོཔེཏྭཱ ཀརཎཙཱིཝརཾ སནྡྷཱཡ ཝུཏྟཾ. ཋཔེཏཱིཏི ཨེཀཾ ཨནྟཾ ཙཱིཝརེ བནྡྷནཝསེན ཋཔེཏི. པཙྩཱགཏཾ སིབྦཏཱིཏི ཏསྶེཝ དུཏིཡཨནྟཾ པརིཝཏྟིཏྭཱ ཨཱཧཏཾ སིབྦཏི. ཨཱགནྟུཀཔཊྚཾ བནྡྷཏཱིཏི ཙཱིཝརེན ལགྒཾ ཀརོནྟོ པུནཔྤུནཾ ཏཏྠ ཏཏྠ སུཏྟེན བནྡྷཏི. གྷཊྚེཏཱིཏི པམཱཎེན གཧེཏྭཱ དཎྜཱདཱིཧི གྷཊྚེཏི. སུཏྟཾ ཀརོཏཱིཏི གུཎཱདིབྷཱཝེན ཝཊྚེཏི. ཝལེཏཱིཏི ཨནེཀགུཎསུཏྟཾ ཧཏྠེན ཝཱ ཙཀྐདཎྜེན ཝཱ ཝཊྚེཏི ཨེཀཏྟཾ ཀརོཏི. པརིཝཏྟནཾ ཀརོཏཱིཏི པརིཝཏྟནདཎྜཡནྟཀཾ ཀརོཏི, ཡསྨིཾ སུཏྟགུལ༹ཾ པཝེསེཏྭཱ ཝེལུ༹ནཱལི༹ཀཱདཱིསུ ཋཔེཏྭཱ པརིབྦྷམཱཔེཏྭཱ སུཏྟཀོཊིཏོ པཊྛཱཡ ཨཱཀཌྜྷནྟི.

༢༢༠. ཨནིམནྟིཏཙཏུཏྠནྟི ཨནིམནྟིཏོ ཙཏུཏྠོ ཡསྶ བྷིཀྑུཙཏུཀྐསྶ, ཏཾ ཨནིམནྟིཏཙཏུཏྠཾ. ཨེཝཾ སེསེསུཔི. ཏེནཱཧ ‘‘པཉྩནྣཾ ཙཏུཀྐཱན’’ནྟི. སམྤཝེསེཏྭཱཏི ཏེཧི ཡོཛེཏྭཱ. གཎོ བྷིཛྫཏཱིཏི ནིམནྟིཏསངྒྷོ ན ཧོཏཱིཏི ཨཏྠོ.

ཨདྷིཝཱསེཏྭཱ ¶ གཏེསཱུཏི ཨེཏྠ ཨཀཔྤིཡནིམནྟནཱདྷིཝཱསནཀྑཎེ པུབྦཔཡོགེ དུཀྐཊམྤི ནཏྠི, ཝིཉྙཏྟིཏོ པསཝནེ པན ཝིཉྙཏྟིཀྑཎེ ཨིཏརསིཀྑཱཔདེཧི དུཀྐཊཾ ཧོཏཱིཏི གཧེཏབྦཾ. ནིམནྟནཾ སཱདིཡཐཱཏི ནིམནྟནབྷཏྟཾ པཊིགྒཎྷཐ. ཏཱནི ཙཱཏི ཀུམྨཱསཱདཱིནི ཙ ཏེཧི བྷིཀྑཱུཧི ཨེཀེན པཙྪཱ གཧིཏཏྟཱ ཨེཀཏོ ན གཧིཏཱནི.

‘‘བྷཏྟུདྡེསཀེན པཎྜིཏེན བྷཝིཏབྦཾ…པེ… མོཙེཏབྦཱ’’ཏི ཨེཏེན བྷཏྟུདྡེསཀེན ཨཀཔྤིཡནིམནྟནེ སཱདིཏེ སབྦེསམྤི སཱདིཏཾ ཧོཏི. ཨེཀཏོ གཎྷནྟཱནཾ གཎབྷོཛནཱཔཏྟི ཙ ཧོཏཱིཏི ¶ དསྶེཏི. དཱུཏསྶ དྭཱརེ ཨཱགནྟྭཱ པུན ‘‘བྷཏྟཾ གཎྷཐཱ’’ཏི ཝཙནབྷཡེན ‘‘གཱམདྭཱརེ ཨཊྛཏྭཱ’’ཏི ཝུཏྟཾ. གཎབྷོཛནཏཱ, སམཡཱབྷཱཝོ, ཨཛ྄ཛྷོཧརཎནྟི ཨིམཱནེཏྠ ཏཱིཎི ཨངྒཱནི.

གཎབྷོཛནསིཀྑཱཔདཝཎྞནཱ ནིཊྛིཏཱ.

༣. པརམྤརབྷོཛནསིཀྑཱཔདཝཎྞནཱ

༢༢༡. ཏཏིཡེ པཱལི༹ཡཾ བྷཏྟཔཊིཔཱཊི ཨཊྛིཏཱཏི ཀུལཔཊིཔཱཊིཡཱ དཱཏབྦཱ བྷཏྟཔཊིཔཱཊི ཨཊྛིཏཱ ན ཋིཏཱ, ཨབྦོཙྪིནྣཱ ནིརནྟརཔྤཝཏྟཱཏི ཨཏྠོ. བདརཕལཱནི པཀྑིཔིཏྭཱ པཀྐཡཱགུཨཱདིཀཾ ‘‘བདརསཱལ༹ཝ’’ནྟི ཝུཙྩཏི.

པཱལི༹ཡཾ པརམྤརབྷོཛནེཏི ཡེན པཋམཾ ནིམནྟིཏོ, ཏསྶ བྷོཛནཏོ པརསྶ བྷོཛནསྶ བྷུཉྫནེ. ཝིཀཔྤནཱཝ ཨིདྷ ཨནུཔཉྙཏྟིཝསེན མཱཏིཀཱཡཾ ཨནཱརོཔིཏཱཔི པརིཝཱརེ ‘‘ཙཏསྶོ ཨནུཔཉྙཏྟིཡོ’’ཏི (པརི. ༨༦) ཨནུཔཉྙཏྟིཡཾ གཎིཏཱ. ཏཏྠ ཀིཉྩཱཔི ཨཊྛཀཐཱཡཾ མཧཱཔཙྩརིཝཱདསྶ པཙྪཱ ཀཐནེན པརམྨུཁཱཝིཀཔྤནཱ པཏིཊྛཔིཏཱ, ཏཐཱཔི སམྨུཁཱཝིཀཔྤནཱཔི གཧེཏབྦཱཝ. ཏེནེཝ མཱཏིཀཱཊྛཀཐཱཡམྤི ‘‘ཡོ བྷིཀྑུ པཉྩསུ སཧདྷམྨིཀེསུ ཨཉྙཏརསྶ ‘མཡ྄ཧཾ བྷཏྟཔཙྩཱསཾ ཏུཡ྄ཧཾ དམྨཱི’ཏི ཝཱ ‘ཝིཀཔྤེམཱི’ཏི ཝཱ ཨེཝཾ སམྨུཁཱ’’ཏིཨཱདི (ཀངྑཱ. ཨཊྛ. པརམྤརབྷོཛནསིཀྑཱཔདཝཎྞནཱ) ཝུཏྟཾ.

༢༢༩. ཁཱིརཾ ཝཱ རསཾ ཝཱཏི པཉྩབྷོཛནཱམིསཾ བྷཏྟཏོ ཨུཔརི ཋིཏཾ སནྡྷཱཡ ཝུཏྟཾ. ཏཉྷི ཨབྷོཛནཏྟཱ ཨུཔྤཊིཔཱཊིཡཱ པིཝཏོཔི ཨནཱཔཏྟི. ཏེནཱཧ ‘‘བྷུཉྫནྟེནཱ’’ཏིཨཱདི.

ཝིཀཔྤནཱཡ ¶ ཨཀརཎཏོ ཨཀིརིཡཱཝསེན ཨིདཾ ཝཱཙཱཡཔི སམུཊྛིཏནྟི ཨཱཧ ‘‘ཝཙཱིཀམྨ’’ནྟི. པརམྤརབྷོཛནཏཱ, སམཡཱབྷཱཝོ, ཨཛ྄ཛྷོཧརཎནྟི ཨིམཱནེཏྠ ཏཱིཎི ཨངྒཱནི.

པརམྤརབྷོཛནསིཀྑཱཔདཝཎྞནཱ ནིཊྛིཏཱ.

༤. ཀཱཎམཱཏཱསིཀྑཱཔདཝཎྞནཱ

༢༣༡. ཙཏུཏྠེ པཱལི༹ཡཾ པཊིཡཱལོཀནྟི པཙྪིམདིསཾ, པཙྪཱདིསནྟི ཨཏྠོ. ཨཔཱཐེཡྻཱདིཨཏྠཱཡ ¶ པཊིཡཱདིཏནྟིསཉྙཱཡ གཎྷནྟསྶཱཔི ཨཱཔཏྟི ཨེཝ ཨཙིཏྟཀཏྟཱ སིཀྑཱཔདསྶ. ཨཏྟནོ ཨཏྠཱཡ ‘‘ཨིམསྶ ཧཏྠེ དེཧཱི’’ཏི ཝཙནེནཱཔི ཨཱཔཛྫནཏོ ‘‘ཝཙཱིཀམྨ’’ནྟི ཝུཏྟཾ. ཝུཏྟལཀྑཎཔཱུཝམནྠཏཱ, ཨསེསཀཏཱ, ཨཔྤཊིཔྤསྶདྡྷགམནཏཱ, ཨཉྙཱཏཀཱདིཏཱ, ཨཏིརེཀཔཊིགྒཧཎནྟི ཨིམཱནེཏྠ པཉྩ ཨངྒཱནི.

ཀཱཎམཱཏཱསིཀྑཱཔདཝཎྞནཱ ནིཊྛིཏཱ.

༥. པཋམཔཝཱརཎཱསིཀྑཱཔདཝཎྞནཱ

༢༣༧. པཉྩམེ ‘‘ཏི-ཀཱརཾ ཨཝཏྭཱ’’ཏི ཨིམིནཱ ཀཱཏབྦསདྡསཱམཏྠིཡཱ ལདྡྷཾ ཨིཏི-པདཾ ཀཏཀཱལེ ན ཝཏྟབྦནྟི དསྶེཏི. ཨིདྷ པན ཨཛཱནནྟེཧི ཨིཏི-སདྡེ པཡུཏྟེཔི ཨཏིརིཏྟཾ ཀཏམེཝ ཧོཏཱིཏི དཊྛབྦཾ.

༢༣༨-༩. ‘‘པཝཱརིཏོ’’ཏི ཨིདཉྩ ཀཏྟུཨཏྠེ ནིཔྥནྣནྟི དསྶེཏུཾ ‘‘ཀཏཔཝཱརཎོ’’ཏིཨཱདི ཝུཏྟཾ. བྷུཏྟཱཝཱི-པདསྶ ནིརཏྠཀབྷཱཝམེཝ སཱདྷེཏུཾ ‘‘ཝུཏྟམྤི ཙེཏ’’ནྟིཨཱདི ཝུཏྟཾ. ཏཱཧཱིཏི པུཐུཀཱཧི. སཏྟུམོདཀོཏི སཏྟུཾ ཏེམེཏྭཱ ཀཏོ ཨཔཀྐོ. སཏྟུཾ པན པིསིཏྭཱ པིཊྛཾ ཀཏྭཱ ཏེམེཏྭཱ པཱུཝཾ ཀཏྭཱ པཙནྟི, ཏཾ ན པཝཱརེཏི. ‘‘པཊིཀྑིཔིཏབྦཊྛཱནེ ཋིཏམེཝ པཊིཀྑིཔཏི ནཱམཱ’’ཏི ཝུཏྟཏྟཱ ཡཾ ཡཾ ཨལཛྫིསནྟཀཾ ཝཱ ཨཏྟནོ ཨཔཱཔུཎཀསངྒྷིཀཱདིཾ ཝཱ པཊིཀྑེཔཏོ པཝཱརཎཱ ན ཧོཏཱིཏི དཊྛབྦཾ.

ཨཱསནྣཏརཾ ཨངྒནྟི ཧཏྠཔཱསཏོ བཧི ཋཏྭཱ ཨོནམིཏྭཱ དེནྟསྶ སཱིསཾ ཨཱསནྣཏརཾ ཧོཏི, ཏསྶ ཨོརིམནྟེན པརིཙྪིནྡིཏབྦཾ.

ཨཔནཱམེཏྭཱཏི ¶ ཨབྷིམུཁཾ ཧརིཏྭཱ. ‘‘ཨིམཾ བྷཏྟཾ གཎྷཱ’’ཏི ཝདཏཱིཏི ཀིཉྩི ཨནཱམེཏྭཱ ཝདཏི. ཀེཝལཾ ཝཱཙཱབྷིཧཱརསྶ ཨནདྷིཔྤེཏཏྟཱ གཎྷཐཱཏི གཧེཏུཾ ཨཱརདྡྷཾ ཀཊཙྪུནཱ ཨནུཀྑིཏྟམྤི པུབྦེཔི ཨེཝཾ ཨབྷིཧཊཏྟཱ པཝཱརཎཱ ཧོཏཱིཏི ‘‘ཨབྷིཧཊཱཝ ཧོཏཱི’’ཏི ཝུཏྟཾ. ཨུདྡྷཊམཏྟེཏི བྷཱཛནཏོ ཝིཡོཛིཏམཏྟེ. དྭིནྣཾ སམབྷཱརེཔཱིཏི པརིཝེསཀསྶ ཙ ཨཉྙསྶ ཙ བྷཏྟཔཙྪིབྷཱཛནཝཧནེ སམཀེཔཱིཏི ཨཏྠོ.

རསཾ གཎྷཐཱཏི ཨེཏྠ ཀེཝལཾ མཾསརསསྶ ཨཔཝཱརཎཱཛནཀསྶ ནཱམེན ཝུཏྟཏྟཱ པཊིཀྑིཔཏོ ¶ པཝཱརཎཱ ན ཧོཏི. མཙྪརསནྟིཨཱདཱིསུ མཙྪོ ཙ རསཉྩཱཏི ཨཏྠསྶ སམྦྷཝཏོ ཝཏྠུནོཔི ཏཱདིསཏྟཱ པཝཱརཎཱ ཧོཏི, ‘‘ཨིདཾ གཎྷཐཱ’’ཏིཔི ཨཝཏྭཱ ཏུཎྷཱིབྷཱཝེན ཨབྷིཧཊཾ པཊིཀྑིཔཏོཔི ཧོཏི ཨེཝ. ཀརམྦཀོཏི མིསྶཀཱདྷིཝཙནམེཏཾ. ཡཉྷི བཧཱུཧི མིསྶེཏྭཱ ཀརོནྟི, སོ ‘‘ཀརམྦཀོ’’ཏི ཝུཙྩཏི.

‘‘ཨུདྡིསྶ ཀཏ’’ནྟི མཉྙམཱནོཏི ཨེཏྠ ཝཏྠུནོ ཀཔྤིཡཏྟཱ ‘‘པཝཱརིཏོཝ ཧོཏཱི’’ཏི ཝུཏྟཾ. ཏཉྩེ ཨུདྡིསྶ ཀཏམེཝ ཧོཏི, པཊིཀྑེཔོ ནཏྠི. ཨཡམེཏྠ ཨདྷིཔྤཱཡོཏི ‘‘ཡེནཱཔུཙྪིཏོ’’ཏིཨཱདིནཱ ཝུཏྟམེཝཏྠཾ སནྡྷཱཡ ཝདཏི. ཀཱརཎཾ པནེཏྠ དུདྡསནྟི བྷཏྟསྶ བཧུཏརབྷཱཝེན པཝཱརཎཱསམྦྷཝཀཱརཎཾ དུདྡསཾ, ཨཉྙཐཱ ཀརམྦཀེཔི མཙྪཱདིབཧུབྷཱཝེ པཝཱརཎཱ བྷཝེཡྻཱཏི ཨདྷིཔྤཱཡོ. ཡཐཱ ཙེཏྠ ཀཱརཎཾ དུདྡསཾ, ཨེཝཾ པརཏོ ‘‘མིསྶཀཾ གཎྷཐཱ’’ཏི ཨེཏྠཱཔི ཀཱརཎཾ དུདྡསམེཝཱཏི དཊྛབྦཾ. ཡཉྩ ‘‘ཨིདཾ པན བྷཏྟམིསྶཀམེཝཱ’’ཏིཨཱདི ཀཱརཎཾ ཝུཏྟཾ, ཏམྤི ‘‘ཨཔྤཏརཾ ན པཝཱརེཏཱི’’ཏི ཝཙནེན ན སམེཏི. ཝིསུཾ ཀཏྭཱ དེཏཱིཏི ‘‘རསཾ གཎྷཐཱ’’ཏིཨཱདིནཱ ཝཱཙཱཡ ཝིསུཾ ཀཏྭཱ དེཏཱིཏི ཨཏྠོ གཧེཏབྦོ. ན པན ཀཱཡེན རསཱདིཾ ཝིཡོཛེཏྭཱཏི. ཏཐཱ ཨཝིཡོཛིཏེཔི པཊིཀྑིཔཏོ པཝཱརཎཱཡ ཨསམྦྷཝཏོ ཨཔྤཝཱརཎཱཔཧོཎཀསྶ ནཱམེན ཝུཏྟཏྟཱ བྷཏྟམིསྶཀཡཱགུཾ ཨཱཧརིཏྭཱ ‘‘ཡཱགུཾ གཎྷཐཱ’’ཏི ཝུཏྟཊྛཱནཱདཱིསུ ཝིཡ, ཨཉྙཐཱ ཝཱ ཨེཏྠ ཡཐཱ པུབྦཱཔརཾ ན ཝིརུཛ྄ཛྷཏི, ཏཐཱ ཨདྷིཔྤཱཡོ གཧེཏབྦོ.

ནཱཝཱ ཝཱ སེཏུ ཝཱཏིཨཱདིམྷི ནཱཝཱདིཨབྷིརུཧནཱདིཀྑཎེ ཀིཉྩི ཋཏྭཱཔི ཨབྷིརུཧནཱདིཀཱཏབྦཏྟེཔི གམནཏཔྤརཏཱཡ ཋཱནཾ ནཱམ ན ཧོཏི, ཛནསམྨདྡེན པན ཨནོཀཱསཱདིབྷཱཝེན ཀཱཏུཾ ན ཝཊྚཏི. ཨཙཱལེཏྭཱཏི ཝུཏྟཊྛཱནཏོ ¶ ཨཉྙསྨིམྤི པདེསེ ཝཱ ཨུདྡྷཾ ཝཱ ཨཔེསེཏྭཱ ཏསྨིཾ ཨེཝ པན ཋཱནེ པརིཝཏྟེཏུཾ ལབྷཏི. ཏེནཱཧ ‘‘ཡེན པསྶེནཱ’’ཏིཨཱདི.

ཨཀཔྤིཡབྷོཛནཾ ཝཱཏི ཀུལདཱུསནཱདིནཱ ཨུཔྤནྣཾ, ཏཾ ‘‘ཨཀཔྤིཡ’’ནྟི ཨིམིནཱ ཏེན མིསྶཾ ཨོདནཱདི ཨཏིརིཏྟཾ ཧོཏི ཨེཝཱཏི དསྶེཏི. ཏསྨཱ ཡཾ ཏཏྠ ཨཀཔྤཀཏཾ ཀནྡཕལཱདི, ཏཾ ཨཔནེཏྭཱ སེསཾ བྷུཉྫིཏབྦམེཝ.

སོ པུན ཀཱཏུཾ ན ལབྷཏཱིཏི ཏསྨིཉྙེཝ བྷཱཛནེ ཀརིཡམཱནཾ པཋམཀཏེན སདྡྷིཾ ཀཏཾ ཧོཏཱིཏི པུན སོ ཨེཝ ཀཱཏུཾ ན ལབྷཏི, ཨཉྙོ ལབྷཏི. ཨཉྙེན ཧི ཀཏཏོ ཨཉྙོ པུན ཀཱཏུཾ ¶ ལབྷཏི. ཨཉྙསྨིཾ པན བྷཱཛནེ ཏེན ཝཱ ཨཉྙེན ཝཱ ཀཱཏུཾ ཝཊྚཏི. ཏེནཱཧ ‘‘ཡེན ཨཀཏཾ, ཏེན ཀཱཏབྦཾ, ཡཉྩ ཨཀཏཾ, ཏཾ ཀཱཏབྦ’’ནྟི. ཨེཝཾ ཀཏནྟི ཨཉྙསྨིཾ བྷཱཛནེ ཀཏཾ. སཙེ པན ཨཱམིསསཾསཊྛཱནཱིཏི ཨེཏྠ མུཁཱདཱིསུ ལགྒམྤི ཨཱམིསཾ སོདྷེཏྭཱཝ ཨཏིརིཏྟཾ བྷུཉྫིཏབྦནྟི ཝེདིཏབྦཾ.

༢༤༡. ཝཱཙཱཡ ཨཱཎཱཔེཏྭཱ ཨཏིརིཏྟཾ ཨཀཱརཱཔནཏོ ཨཀིརིཡསམུཊྛཱནནྟི དཊྛབྦཾ. པཝཱརིཏབྷཱཝོ, ཨཱམིསསྶ ཨནཏིརིཏྟཏཱ, ཀཱལེ ཨཛ྄ཛྷོཧརཎནྟི ཨིམཱནེཏྠ ཏཱིཎི ཨངྒཱནི.

པཋམཔཝཱརཎཱསིཀྑཱཔདཝཎྞནཱ ནིཊྛིཏཱ.

༦. དུཏིཡཔཝཱརཎཱསིཀྑཱཔདཝཎྞནཱ

༢༤༣. ཚཊྛེ ‘‘བྷུཏྟསྨི’’ནྟི མཱཏིཀཱཡཾ ཝུཏྟཏྟཱ བྷོཛནཔརིཡོསཱནེ པཱཙིཏྟིཡཾ. པཝཱརིཏཏཱ, ཏཐཱསཉྙིཏཱ, ཨཱསཱདནཱཔེཀྑཏཱ, ཨནཏིརིཏྟེན ཨབྷིཧཊཔཝཱརཎཱ, བྷོཛནཔཨཡོསཱནནྟི ཨིམཱནེཏྠ པཉྩ ཨངྒཱནི.

དུཏིཡཔཝཱརཎཱསིཀྑཱཔདཝཎྞནཱ ནིཊྛིཏཱ.

༧. ཝིཀཱལབྷོཛནསིཀྑཱཔདཝཎྞནཱ

༢༤༧. སཏྟམེ ནཊཱནཾ ནཱཊཀཱཏི ནཊནཱཊཀཱ, སཱིཏཱཧརཎཱདཱིནི.

༢༤༨-༩. ཁཱདནཱིཡེ ཁཱདནཱིཡཏྠནྟི པཱུཝཱདིཁཱདནཱིཡེ ཝིཛྫམཱནཁཱདནཱིཡཀིཙྩཾ ཁཱདནཱིཡེཧི ཀཱཏབྦཾ ཛིགྷཙྪཱཧརཎསངྑཱཏཾ ཨཏྠཾ པཡོཛནཾ ནེཝ ཕརནྟི ¶ ན ནིཔྥཱདེནྟི. ཨེཀསྨིཾ དེསེ ཨཱཧཱརཀིཙྩཾ སཱདྷེནྟཾ ཝཱ ཨཉྙསྨིཾ དེསེ ཨུཊྛིཏབྷཱུམིརསཱདིབྷེདེན ཨཱཧཱརཀིཙྩཾ ཨསཱདྷེནྟམྤི ཝཱ སམྦྷཝེཡྻཱཏི ཨཱཧ ‘‘ཏེསུ ཏེསུ ཛནཔདེསཱུ’’ཏིཨཱདི. ཀེཙི པན ‘‘ཨེཀསྨིཾ ཛནཔདེ ཨཱཧཱརཀིཙྩཾ སཱདྷེནྟཾ སེསཛནཔདེསུཔི ཝིཀཱལེ ན ཀཔྤཏི ཨེཝཱཏི དསྶནཏྠཾ ཨིདཾ ཝུཏྟ’’ནྟིཔི (སཱརཏྠ. ཊཱི. པཱཙིཏྟིཡཀཎྜ ༣.༢༤༨-༢༤༩) ཝདནྟི. པཀཏིཨཱཧཱརཝསེནཱཏི ཨཉྙེཧི ཡཱཝཀཱལིཀེཧི ཨཡོཛིཏཾ ཨཏྟནོ པཀཏིཡཱཝ ཨཱཧཱརཀིཙྩཀརཎཝསེན. སམྨོཧོཡེཝ ཧོཏཱིཏི ¶ ཨནེཀཏྠཱནཾ ནཱམཱནཾ, ཨཔྤསིདྡྷཱནཉྩ སམྦྷཝཏོ སམྨོཧོ ཨེཝ སིཡཱ. ཏེནེཝེཏྠ མཡམྤི མཱུལཀམཱུལཱདཱིནཾ པརིཡཱཡནྟརདསྶནེན ཨདསྶནཾ ཀརིམྷ ཨུཔདེསཏོཝ གཧེཏབྦཏོ.

ཡནྟི ཝཊྚཀནྡཾ. མུལཱ༹ལནྟི ཐཱུལཏརུཎམཱུལམེཝ, རུཀྑཝལླིཨཱདཱིནཾ མཏྠཀོཏི ཧེཊྛཱ ཝུཏྟམེཝ སམྤིཎྜེཏྭཱ ཝུཏྟཾ. ཨཙྪིཝཱདཱིནཾ ཨཔརིཔཀྐཱནེཝ ཕལཱནི ཡཱཝཛཱིཝིཀཱནཱིཏི དསྶེཏུཾ ‘‘ཨཔརིཔཀྐཱནཱི’’ཏི ཝུཏྟཾ. ཧརཱིཏཀཱདཱིནཾ ཨཊྛཱིནཱིཏི ཨེཏྠ མིཉྫཾ ཡཱཝཀཱལིཀནྟི ཀེཙི ཝདནྟི, ཏཾ ན ཡུཏྟཾ ཨཊྛཀཐཱཡཾ ཨཝུཏྟཏྟཱ.

ཧིངྒུརུཀྑཏོ པགྒྷརིཏནིཡྻཱསོ ཧིངྒུ ནཱམ. ཧིངྒུཛཏུཨཱདཡོ ཙ ཧིངྒུཝིཀཏིཡོཝ. ཏཏྠ ཧིངྒུཛཏུ ནཱམ ཧིངྒུརུཀྑསྶ དཎྜཔཏྟཱནི པཙིཏྭཱ ཀཏནིཡྻཱསོ. ཧིངྒུསིཔཱཊིཀཱ ནཱམ ཧིངྒུཔཏྟཱནི པཙིཏྭཱ ཀཏནིཡྻཱསོ. ཨཉྙེན མིསྶེཏྭཱ ཀཏོཏིཔི ཝདནྟི. ཏཀནྟི ཨགྒཀོཊིཡཱ ནིཀྑནྟསིལེསོ. ཏཀཔཏྟིནྟི པཏྟཏོ ནིཀྑནྟསིལེསོ. ཏཀཔཎྞིནྟི པལཱསེ བྷཛྫིཏྭཱ ཀཏསིལེསོ. དཎྜཏོ ནིཀྑནྟསིལེསོཏིཔི ཝདནྟི. ཝིཀཱལཏཱ, ཡཱཝཀཱལིཀཏཱ, ཨཛ྄ཛྷོཧརཎནྟི ཨིམཱནེཏྠ ཏཱིཎི ཨངྒཱནི.

ཝིཀཱལབྷོཛནསིཀྑཱཔདཝཎྞནཱ ནིཊྛིཏཱ.

༨. སནྣིདྷིཀཱརཀསིཀྑཱཔདཝཎྞནཱ

༢༥༢-༣. ཨཊྛམེ ཏཱདིསནྟི ཨསཱུཔབྱཉྫནཾ. ཡཱཝཀཱལིཀཾ ཝཱ ཡཱམཀཱལིཀཾ ཝཱ…པེ… པཱཙིཏྟིཡནྟི ཨེཏྠ ཀིཉྩཱཔི པཱལི༹ཡཾ ཁཱདནཱིཡབྷོཛནཱིཡཔདེཧི ཡཱཝཀཱལིཀམེཝ སངྒཧིཏཾ, ན ཡཱམཀཱལིཀཾ. ཏཐཱཔི ‘‘ཨནཱཔཏྟི ཡཱམཀཱལིཀཾ ཡཱམེ ནིདཧིཏྭཱ བྷུཉྫཏཱི’’ཏི ཨིདྷ ཙེཝ –

‘‘ཡཱམཀཱལིཀེན ¶ , བྷིཀྑཝེ, སཏྟཱཧཀཱལིཀཾ…པེ… ཡཱཝཛཱིཝིཀཾ ཏདཧུཔཊིགྒཧིཏཾ ཡཱམེ ཀཔྤཏི, ཡཱམཱཏིཀྐནྟེ ན ཀཔྤཏཱི’’ཏི (མཧཱཝ. ༣༠༥) –

ཨཉྙཏྠ ཙ ཝུཏྟཏྟཱ, ‘‘ཡཱམཀཱལིཀ’’ནྟི ཝཙནསཱམཏྠིཡཏོ ཙ བྷགཝཏོ ཨདྷིཔྤཱཡཉྙཱུཧི ཨཊྛཀཐཱཙརིཡེཧི ཡཱམཀཱལིཀཾ སནྣིདྷིཀཱརཀཀཏཾ པཱཙིཏྟིཡཝཏྠུམེཝ ཝུཏྟནྟི དཊྛབྦཾ. ཡནྟི པཏྟཾ, གྷཾསནཀིརིཡཱཔེཀྑཱཡ ཙེཏཾ ཨུཔཡོགཝཙནཾ. ཨངྒུལིལེཁཱ པཉྙཱཡཏཱིཏི སིནེཧཱབྷཱཝེཔི པཏྟསྶ སུཙྪཝིཏཱཡ པཉྙཱཡཏི. ཡནྟི ཡཱཝཀཱལིཀཾ, ཡཱམཀཱལིཀཉྩ. ཨཔརིཙྩཏྟམེཝཱཏི ནིརཔེཀྑཏཱཡ ¶ ཨནུཔསམྤནྣསྶ ཨདིནྣཾ, ཨཔརིཙྩཏྟཉྩ ཡཱཝཀཱལིཀཱདིཝཏྠུམེཝ སནྡྷཱཡ ཝདཏི, ན པན ཏགྒཏཔཊིགྒཧཎཾ. ན ཧི ཝཏྠུཾ ཨཔརིཙྩཛིཏྭཱ ཏཏྠགཏཔཊིགྒཧཎཾ པརིཙྩཛིཏུཾ སཀྐཱ, ན ཙ ཏཱདིསཾ ཝཙནམཏྠི. ཡདི བྷཝེཡྻ, ‘‘སཙེ པཏྟོ དུདྡྷོཏོ ཧོཏི…པེ… བྷུཉྫནྟསྶ པཱཙིཏྟིཡ’’ནྟི ཝཙནཾ ཝིརུཛ྄ཛྷེཡྻ. ན ཧི དྷོཝནེན ཨཱམིསཾ ཨཔནེཏུཾ ཝཱཡམནྟསྶ པཊིགྒཧཎེ ཨཔེཀྑཱ ཝཏྟཏི. ཡེན པུནདིཝསེ བྷུཉྫཏོ པཱཙིཏྟིཡཾ ཛནེཡྻ, པཏྟེ པན ཝཏྟམཱནཱ ཨཔེཀྑཱ ཏགྒཏིཀེ ཨཱམིསེཔི ཝཏྟཏི ཨེཝནཱམཱཏི ཨཱམིསེ ཨནཔེཀྑཏཱ ཨེཏྠ ན ལབྦྷཏི, ཏཏོ ཨཱམིསེ ཨཝིཛཧིཏཔཊིགྒཧཎཾ པུནདིཝསེ པཱཙིཏྟིཡཾ ཛནེཏཱིཏི ཨིདཾ ཝུཏྟཾ. ཨཐ མཏཾ ‘‘ཡདགྒེནེཏྠ ཨཱམིསཱནཔེཀྑཏཱ ན ལབྦྷཏི. ཏདགྒེན པཊིགྒཧཎཱནཔེཀྑཱཔི ན ལབྦྷཏཱི’’ཏི. ཏཐཱ སཏི ཡཏྠ ཨཱམིསཱཔེཀྑཱ ཨཏྠི, ཏཏྠ པཊིགྒཧཎཱཔེཀྑཱཔི ན ཝིགཙྪཏཱིཏི ཨཱཔནྣཾ, ཨེཝཉྩ པཊིགྒཧཎེ ཨནཔེཀྑཝིསྶཛྫནཾ ཝིསུཾ ན ཝཏྟབྦཾ སིཡཱ. ཨཊྛཀཐཱཡཉྩེཏམྤི པཊིགྒཧཎཝིཛཧནཀཱརཎཏྟེན ཨབྷིམཏཾ སིཡཱ, ཨིདཾ སུཊྛུཏརཾ ཀཏྭཱ ཝིསུཾ ཝཏྟབྦཾ ཙཱིཝརཱཔེཀྑཱཡ ཝཏྟམཱནཱཡཔི པཙྩུདྡྷཱརེན ཨདྷིཊྛཱནཝིཛཧནཾ ཝིཡ. ཨེཏསྨིཉྩ ཨུཔཱཡེ སཏི གཎྛིཀཱཧཏཔཏྟེསུ ཨཝཊྚནཏཱ ནཱམ ན སིཡཱཏི ཝུཏྟོཝཱཡམཏྠོ. ཏསྨཱ ཡཾ ཝུཏྟཾ སཱརཏྠདཱིཔནིཡཾ ‘‘ཡཾ པརསྶ པརིཙྩཛིཏྭཱ ཨདིནྣམྤི སཙེ པཊིགྒཧཎེ ནིརཔེཀྑནིསྶཛྫནེན ཝིཛཧིཏཔཊིགྒཧཎཾ ཧོཏི, ཏམྤི དུཏིཡདིཝསེ ཝཊྚཏཱི’’ཏིཨཱདི (སཱརཏྠ. ཊཱི. པཱཙིཏྟིཡཀཎྜ ༣.༢༥༢-༢༥༣), ཏཾ ན སཱརཏོ པཙྩེཏབྦཾ.

པཀཏིཨཱམིསེཏི ཨོདནཱདིཀཔྤིཡཡཱཝཀཱལིཀེ. དྭེཏི པུརེབྷཏྟཾ པཊིགྒཧིཏཾ ཡཱམཀཱལིཀཾ པུརེབྷཏྟཾ སཱམིསེན མུཁེན བྷུཉྫཏོ སནྣིདྷིཔཙྩཡཱ ཨེཀཾ, ཡཱམཀཱལིཀསཾསཊྛཏཱཡ ཡཱཝཀཱལིཀཏྟབྷཛནེན ཨནཏིརིཏྟཔཙྩཡཱ ¶ ཨེཀནྟི དྭེ པཱཙིཏྟིཡཱནི. ཝིཀཔྤདྭཡེཏི སཱམིསནིརཱམིསཔཀྑདྭཡེ. ཐུལླཙྩཡཉྩ དུཀྐཊཉྩཱཏི མནུསྶམཾསེ ཐུལླཙྩཡཾ, སེསེསུ དུཀྐཊཾ. ཡཱཝཀཱལིཀཡཱམཀཱལིཀཏཱ, སནྣིདྷིབྷཱཝོ, ཏསྶ ཨཛ྄ཛྷོཧརཎནྟི ཨིམཱནེཏྠ ཏཱིཎི ཨངྒཱནི.

སནྣིདྷིཀཱརཀསིཀྑཱཔདཝཎྞནཱ ནིཊྛིཏཱ.

༩. པཎཱིཏབྷོཛནསིཀྑཱཔདཝཎྞནཱ

༢༥༩. ནཝམེ པཎཱིཏསཾསཊྛཱནི བྷོཛནཱནི པཎཱིཏབྷོཛནཱནཱིཏི པཱལི༹ཡཾ པན བྷོཛནཱནི པུབྦེ ཝུཏྟཏྟཱ པཱཀཊཱནཱིཏི ཨདསྶིཏཱནི, ཏཱདིསེཧི པཎཱིཏེཧི མིསྶཏྟཱ པཎཱིཏབྷོཛནཱནི ནཱམ ཧོནྟི. ཏེསཾ པབྷེདདསྶནཏྠཾ ‘‘སེཡྻཐིདཾ སཔྤི ནཝནཱིཏ’’ནྟིཨཱདི ཝུཏྟཾ. སཔྤིབྷཏྟནྟི ཨེཏྠ ཀིཉྩཱཔི ¶ སཔྤིནཱ སཾསཊྛཾ བྷཏྟཾ, སཔྤི ཙ བྷཏྟཉྩཱཏིཔི ཨཏྠོ ཝིཉྙཱཡཏི, ཨཊྛཀཐཱཡཾ པན ‘‘སཱལིབྷཏྟཾ ཝིཡ སཔྤིབྷཏྟཾ ནཱམ ནཏྠཱི’’ཏིཨཱདིནཱ ཝུཏྟཏྟཱ ན སཀྐཱ ཨཉྙཾ ཝཏྠུཾ. ཨཊྛཀཐཱཙརིཡཱ ཨེཝ ཧི ཨཱིདིསེསུ ཋཱནེསུ པམཱཎཾ.

མཱུལནྟི ཀཔྤིཡབྷཎྜཾ ཝུཏྟཾ. ཏསྨཱ ཨནཱཔཏྟཱིཏི ཨེཏྠ ཝིསངྐེཏེན པཱཙིཏྟིཡཱབྷཱཝེཔི སཱུཔོདནདུཀྐཊཱ ན མུཙྩཏཱིཏི ཝདནྟི. ‘‘ཀཔྤིཡསཔྤིནཱ, ཨཀཔྤིཡསཔྤིནཱ’’ཏི ཙ ཨིདཾ ཀཔྤིཡཱཀཔྤིཡམཾསསཏྟཱནཾ ཝསེན ཝུཏྟཾ.

༢༦༡. མཧཱནཱམསིཀྑཱཔདཾ ནཱམ ཨུཔརི ཙཱཏུམཱསཔཙྩཡཔཝཱརཎཱསིཀྑཱཔདཾ (པཱཙི. ༣༠༣ ཨཱདཡོ). ཨགིལཱནོ ཧི ཨཔྤཝཱརིཏཊྛཱནེ ཝིཉྙཱཔེནྟོཔི ཀཱལཔརིཙྪེདཾ, བྷེསཛྫཔརིཙྪེདཾ ཝཱ ཀཏྭཱ སངྒྷཝསེན པཝཱརིཏཊྛཱནཏོ ཏདུཏྟརི ཝིཉྙཱཔེནྟེན, པརིཙྪེདབྦྷནྟརེཔི ན བྷེསཛྫཀརཎཱིཡེན རོགེན བྷེསཛྫཾ ཝིཉྙཱཔེནྟེན ཙ སམོ ཧོཏཱིཏི ‘‘མཧཱནཱམསིཀྑཱཔདེན ཀཱརེཏབྦོ’’ཏི ཝུཏྟཾ. པཎཱིཏབྷོཛནཏཱ, ཨགིལཱནཏཱ, ཨཀཏཝིཉྙཏྟིཡཱ པཊིལཱབྷོ, ཨཛ྄ཛྷོཧརཎནྟི ཨིམཱནེཏྠ ཙཏྟཱརི ཨངྒཱནི.

པཎཱིཏབྷོཛནསིཀྑཱཔདཝཎྞནཱ ནིཊྛིཏཱ.

༡༠. དནྟཔོནསིཀྑཱཔདཝཎྞནཱ

༢༦༣. དསམེ ¶ གྷནབདྡྷོཏི གྷནམཾསེན སམྦདྡྷོ, ཀཐིནསཾཧཏསརཱིརོཏི ཨཏྠོ.

༢༦༤. མུཁདྭཱརནྟི མུཁཏོ ཧེཊྛཱ དྭཱརཾ མུཁདྭཱརཾ, གལནཱལི༹ཀནྟི ཨཏྠོ. ཨེཝཉྩ ནཱསིཀཱཡ པཝིཊྛམྤི མུཁདྭཱརཾ པཝིཊྛམེཝ ཧོཏི, མུཁེ པཀྑིཏྟམཏྟཉྩ ཨཔྤཝིཊྛཾ. ཨཱཧཱརནྟི ཨཛ྄ཛྷོཧརིཏབྦཾ ཀཱལིཀཾ ཨདྷིཔྤེཏཾ, ན ཨུདཀཾ. ཏཉྷི བྷེསཛྫསངྒཧིཏམྤི ཨཀཱལིཀམེཝ པཊིགྒཧིཏསྶེཝ ཀཱལིཀཏྟཱ. ཨུདཀེ ཧི པཊིགྒཧཎཾ ན རུཧཏི. ཏེནེཝ བྷིཀྑུནཱ ཏཱཔིཏེན ཨུདཀེན ཙིརཔཊིགྒཧིཏེན ཙ ཨཀཔྤིཡཀུཊིཡཾ ཝུཏྠེན ཙ སཧ ཨཱམིསཾ བྷུཉྫནྟསྶཱཔི སཱམཔཱཀཱདིདོསོ ན ཧོཏི. ཝཀྑཏི ཧི ‘‘བྷིཀྑུ ཡཱགུཨཏྠཱཡ…པེ… ཨུདཀཾ ཏཱཔེཏི, ཝཊྚཏཱི’’ཏིཨཱདི (པཱཙི. ཨཊྛ. ༢༦༥). བྷིཀྑཱུ པན ཨེཏཾ ཨདྷིཔྤཱཡཾ ཏདཱ ན ཛཱནིཾསུ. ཏེནཱཧ ‘‘སམྨཱ ཨཏྠཾ ཨསལླཀྑེཏྭཱ’’ཏིཨཱདི.

༢༦༥. རཐརེཎུམྤཱིཏི ¶ རཐེ གཙྪནྟེ ཨུཊྛཧནརེཎུསདིསརེཎུཾ. ཏེན ཏཏོ སུཁུམཾ ཨཱཀཱསེ པརིབྦྷམནཀཾ དིསྶམཱནམྤི ཨབྦོཧཱརིཀནྟི དསྶེཏི. ཨཀལླཀོཏི གིལཱནོ.

‘‘གཧེཏུཾ ཝཱ…པེ… ཏསྶ ཨོརིམནྟེནཱ’’ཏི ཨིམིནཱ ཨཱཀཱསེ ཨུཛུཾ ཋཏྭཱ པརེན ཨུཀྑིཏྟཾ གཎྷནྟསྶཱཔི ཨཱསནྣངྒབྷཱུཏཔཱདཏལཏོ པཊྛཱཡ ཧཏྠཔཱསོ པརིཙྪིནྡིཏབྦོ, ན པན སཱིསནྟཏོ པཊྛཱཡཱཏི དསྶེཏི. ཏཏྠ ‘‘ཨོརིམནྟེནཱ’’ཏི ཨིམསྶ ཧེཊྛིམནྟེནཱཏི ཨཏྠོ གཧེཏབྦོ.

ཨེཏྠ ཙ པཝཱརཎཱསིཀྑཱཔདཊྛཀཐཱཡཾ ‘‘སཙེ བྷིཀྑུ ནིསིནྣོ ཧོཏི, ཨཱསནསྶ པཙྪིམནྟཏོ པཊྛཱཡཱ’’ཏིཨཱདིནཱ (པཱཙི. ཨཊྛ. ༢༣༨-༢༣༩) པཊིགྒཱཧཀཱནཾ ཨཱསནྣངྒསྶ པཱརིམནྟཏོ པཊྛཱཡ པརིཙྪེདསྶ དསྶིཏཏྟཱ ཨིདྷཱཔི ཨཱཀཱསེ ཋིཏསྶ པཊིགྒཱཧཀསྶ ཨཱསནྣངྒབྷཱུཏཔཱདངྒུལསྶ པཱརིམནྟབྷཱུཏཏོ པཎྷིཔརིཡནྟསྶ ཧེཊྛིམཏལཏོ པཊྛཱཡ, དཱཡཀསྶ པན ཨོརིམནྟབྷཱུཏཏོ པཱདངྒུལསྶ ཧེཊྛིམཏལཏོ པཊྛཱཡ ཧཏྠཔཱསོ པརིཙྪིནྡིཏབྦོཏི དཊྛབྦཾ. ཨིམིནཱཝ ནཡེན བྷཱུམིཡཾ ནིཔཛྫིཏྭཱ ཨུསྶཱིསེ ནིསིནྣསྶ ཧཏྠཏོ པཊིགྒཎྷནྟསྶཔི ཨཱསནྣསཱིསངྒསྶ པཱརིམནྟབྷཱུཏཏོ གཱིཝནྟཏོ པཊྛཱཡེཝ ¶ ཧཏྠཔཱསོ མིནིཏབྦོ, ན པཱདཏལཏོ པཊྛཱཡ. ཨེཝཾ ནིཔཛྫིཏྭཱ དཱནེཔི ཡཐཱནུརཱུཔཾ ཝེདིཏབྦཾ. ‘‘ཡཾ ཨཱསནྣཏརཾ ཨངྒ’’ནྟི ཧི ཝུཏྟཾ.

པཊིགྒཧཎསཉྙཱཡཱཏི ‘‘མཉྩཱདིནཱ པཊིགྒཧེསྶཱམཱི’’ཏི ཨུཔྤཱདིཏསཉྙཱཡ. ཨིམིནཱ ‘‘པཊིགྒཎྷཱམཱི’’ཏི ཝཱཙཱཡ ཝཏྟབྦཀིཙྩཾ ནཏྠཱིཏི དསྶེཏི. ཀཏྠཙི ཨཊྛཀཐཱསུ, པདེསེསུ ཝཱ. ཨསཾཧཱརིམེ ཕལཀེཏི ཐཱམམཛ྄ཛྷིམེན པུརིསེན ཨསཾཧཱརིཡེ. པུཉྪིཏྭཱ པཊིགྒཧེཏྭཱཏི པུཉྪིཏེཔི རཛནཙུཎྞསངྐཱཡ སཏི པཊིགྒཧཎཏྠཱཡ ཝུཏྟཾ, ནཱསཏི. ཏཾ པནཱཏི པཏིཏརཛཾ ཨཔྤཊིགྒཧེཏྭཱ ཨུཔརི གཧིཏཔིཎྜཔཱཏཾ. ཨནཱཔཏྟཱིཏི དུརུཔཙིཎྞཱདིདོསོ ནཏྠི. ‘‘ཨནུཔསམྤནྣསྶ དསྶཱམཱི’’ཏིཨཱདིཔི ཝིནཡདུཀྐཊཔརིཧཱརཱཡ ཝུཏྟཾ. ཏཐཱ ཨཀཏྭཱ གཧིཏེཔི པཊིགྒཧེཏྭཱ པརིབྷུཉྫཏོ ཨནཱཔཏྟི ཨེཝ. ‘‘ཨནུཔསམྤནྣསྶ དཏྭཱ’’ཏི ཨིདམྤི པུརིམཱབྷོགཱནུགུཎཏཱཡ ཝུཏྟཾ.

ཙརུཀེནཱཏི ཁུདྡཀབྷཱཛནེན. ཨབྷིཧཊཏྟཱཏི དིཡྻམཱནཀྑཎཾ སནྡྷཱཡ ཝུཏྟཾ. དཏྭཱ ཨཔནཡནཀཱལེ པན ཚཱརིཀཱ ཝཱ བིནྡཱུནི ཝཱ པཏནྟི, པུན པཊིགྒཧེཏབྦཾ ཨབྷིཧཱརསྶ ཝིགཏཏྟཱཏི ཝདནྟི. ཏཾ ཡཐཱ ན པཏཏི, ཏཐཱ ཨཔནེསྶཱམཱིཏི པརིཧརནྟེ ཡུཛྫཏི. པཀཏིསཉྙཱཡ ཨཔནེནྟེ ཨབྷིཧཱརོ ན ཚིཛྫཏི, ཏཾ པཊིགྒཧིཏམེཝ ཧོཏི. མུཁཝཊྚིཡཱཔི གཧེཏུཾ ¶ ཝཊྚཏཱིཏི ཨབྷིཧརིཡམཱནསྶ པཏྟསྶ མུཁཝཊྚིཡཱ ཨུཔརིབྷཱགེ ཧཏྠཾ པསཱརེཏྭཱ ཕུསིཏུཾ ཝཊྚཏི.

པཱདེན པེལླེཏྭཱཏི ‘‘པཱདེན པཊིགྒཧེསྶཱམཱི’’ཏིསཉྙཱཡ ཨཀྐམིཏྭཱ. ཀེཙཱིཏི ཨབྷཡགིརིཝཱསིནོ. ཝཙནམཏྟམེཝཱཏི པཊིབདྡྷཔྤཊིབདྡྷནྟི སདྡམཏྟམེཝ ནཱནཾ, ཀཱཡཔཊིབདྡྷམེཝ ཧོཏི. ཏསྨཱ ཏེསཾ ཝཙནཾ ན གཧེཏབྦནྟི ཨདྷིཔྤཱཡོ.

ཏེན ཨཱཧརཱཔེཏུནྟི ཡསྶ བྷིཀྑུནོ སནྟིཀཾ གཏཾ, ཏཾ ཨིདྷ ཨཱནེཧཱིཏི ཨཱཎཱཔེཏྭཱ ཏེན ཨཱཧརཱཔེཏུཾ ཨིཏརསྶ ཝཊྚཏཱིཏི ཨཏྠོ. ན ཏཏོ པརནྟི ཏདཧེཝ སཱམཾ ཨཔྤཊིགྒཧིཏཾ སནྡྷཱཡ ཝུཏྟཾ. ཏདཧེཝ པཊིགྒཧིཏཾ པན པུནདིཝསཱདཱིསུ ཨཔྤཊིགྒཧེཏྭཱཔི པརིབྷུཉྫིཏུཾ ཝཊྚཏཱིཏི ཝདནྟི.

ཁིཡྻནྟཱིཏི ཁཡཾ གཙྪནྟི, ཏེསཾ ཙུཎྞེཧི ཐུལླཙྩཡཨཔྤཊིགྒཧཎཱཔཏྟིཡོ ན ཧོནྟཱིཏི ཨདྷིཔྤཱཡོ. ‘‘ནཝསམུཊྛིཏ’’ནྟི ཨེཏེནེཝ ཨུཙྪུཨཱདཱིསུ ¶ ཨབྷིནཝལགྒཏྟཱ ཨབྦོཧཱརིཀཾ ན ཧོཏཱིཏི དསྶེཏི. ཨེསེཝ ནཡོཏི སནྣིདྷིདོསཱདིཾ སནྡྷཱཡ ཝདཏི. ཏེནཱཧ ‘‘ན ཧཱི’’ཏིཨཱདི. ཏེན ཙ པཊིགྒཧཎངྒེསུ པཉྩསུཔི སམིདྡྷེསུ ཨཛ྄ཛྷོཧརིཏུཀཱམཏཱཡ གཧིཏམེཝ པཊིགྒཧིཏཾ ནཱམ ཧོཏི ཨཛ྄ཛྷོཧརིཏབྦེསུ ཨེཝ པཊིགྒཧཎསྶ ཨནུཉྙཱཏཏྟཱཏི དསྶེཏི. ཏཐཱ བཱཧིརཔརིབྷོགཏྠཱཡ གཧེཏྭཱ ཋཔིཏཏེལཱདིཾ ཨཛ྄ཛྷོཧརིཏུཀཱམཏཱཡ སཏི པཊིགྒཧེཏྭཱ པརིབྷུཉྫིཏུཾ ཝཊྚཏི.

ཀེསཉྩཱིཏིཨཱདཱིསུ ཨནུཔསམྤནྣཱནཾ ཨཏྠཱཡ ཀཏྠཙི ཋཔིཡམཱནམྤི ཧཏྠཏོ མུཏྟམཏྟེ ཨེཝ པཊིགྒཧཎཾ ན ཝིཛཧཏི, ཨཐ ཁོ བྷཱཛནེ པཏིཏམེཝ པཊིགྒཧཎཾ ཝིཛཧཏི. བྷཱཛནཉྩ བྷིཀྑུནཱ པུནདིཝསཏྠཱཡ ཨཔེཀྑིཏམེཝཱཏི ཏགྒཏམྤི ཨཱམིསཾ དུདྡྷོཏཔཏྟགཏཾ ཝིཡ པཊིགྒཧཎཾ ན ཝིཛཧཏཱིཏི ཨཱསངྐཱཡ ‘‘སཱམཎེརསྶ ཧཏྠེ པཀྑིཔིཏབྦ’’ནྟི ཝུཏྟནྟི ཝེདིཏབྦཾ. ཨཱིདིསེསུ ཧི ཡུཏྟི ན གཝེསིཏབྦཱ, ཝུཏྟནཡེནེཝ པཊིཔཛྫིཏབྦཾ. ‘‘པཏྟགཏཱ ཡཱགཱུ’’ཏི ཨིམིནཱ པཏྟམུཁཝཊྚིཡཱ ཕུཊྛེཔི ཀཱུཊེ ཡཱགུ པཊིགྒཧིཏཱ, ཨུགྒཧིཏཱ ཝཱ ན ཧོཏི བྷིཀྑུནོ ཨནིཙྪཱཡ ཕུཊྛཏྟཱཏི དསྶེཏི. ཨཱརོཔེཏཱིཏི ཧཏྠཾ ཕུསཱཔེཏི. པཊིགྒཧཎཱུཔགཾ བྷཱརཾ ནཱམ མཛ྄ཛྷིམསྶ པུརིསསྶ ཨུཀྑེཔཱརཧཾ. ན པིདཧིཏབྦནྟི ཧཏྠཏོ མུཏྟཾ སནྡྷཱཡ ཝུཏྟཾ, ཧཏྠགཏཾ པན ཨིཏརེན ཧཏྠེན པིདཧཏོ, ཧཏྠཏོ མུཏྟམྤི ཝཱ ཨཕུསིཏྭཱ ཨུཔརིཔིདྷཱནཾ པཱཏེནྟསྶ ན དོསོ.

པཊིགྒཎྷཱཏཱིཏི ¶ ཚཱཡཏྠཱཡ ཨུཔརི དྷཱརཡམཱནཱ མཧཱསཱཁཱ ཡེན ཀེནཙི ཚིཛྫེཡྻ, ཏཏྠ ལགྒརཛཾ མུཁེ པཱཏེཡྻ ཙཱཏི ཀཔྤིཡཾ ཀཱརཱཔེཏྭཱ པཊིགྒཎྷཱཏི. ཀུཎྜཀེཏི མཧཱགྷཊེ. ཏསྨིམྤཱིཏི ཙཱཊིགྷཊེཔི. གཱཧཱཔེཏྭཱཏི ཨཔྤཊིགྒཧིཏཾ ཀཱལིཀཾ གཱཧཱཔེཏྭཱ.

དུཏིཡཏྠེརསྶཱཏི ‘‘ཐེརསྶ པཏྟཾ མཡ྄ཧཾ དེཐཱ’’ཏི ཏེན ཨཏྟནོ པརིཙྩཛཱཔེཏྭཱ དུཏིཡཏྠེརསྶ དེཏི. ཨེཏྠ པནཱཏི པཏྟཔརིཝཏྟནེ. ཀཱརཎནྟི ཨེཏྠ ཡཐཱ ‘‘སཱམཎེརཱ ཨིཏོ ཨམྷཱཀམྤི དེནྟཱི’’ཏི ཝིཏཀྐོ ཨུཔྤཛྫཏི, ན ཏཐཱཏི ཀཱརཎཾ ཝདནྟི, ཏཉྩ ཡུཏྟཾ. ཡསྶ པན ཏཱདིསོ ཝིཏཀྐོ ནཏྠི, ཏེན ཨཔརིཝཏྟེཏྭཱཔི བྷུཉྫིཏུཾ ཝཊྚཏི.

ནིཙྩཱལེཏུནྟི ¶ ཙཱལེཏྭཱ པཱསཱཎསཀྑརཱདིཨཔནཡཾ ཀཱཏུཾ. ཨུདྡྷནཾ ཨཱརོཔེཏབྦནྟི ཨནགྒིཀཾ ཨུདྡྷནཾ སནྡྷཱཡ ཝུཏྟཾ. ཨུདྡྷནེ པཙྩམཱནསྶ ཨཱལུལ༹ནེ ཨུཔརི ཨཔཀྐཏཎྜུལཱ ཧེཊྛཱ པཝིསིཏྭཱ པཙྩཏཱིཏི ཨཱཧ ‘‘སཱམཾཔཱཀཉྩེཝ ཧོཏཱི’’ཏི.

ཨཱདྷཱརཀེ པཏྟོ ཋཔིཏོཏི ཨཔྤཊིགྒཧིཏཱམིསོ པཏྟོ པུན པཊིགྒཧཎཏྠཱཡ ཋཔིཏོ. ཨེཀགྒཧཎེནེཝཱཏི སཱམཎེརཱནཾ གཧིཏསྶ པུན ཨཙྪཌྜནཝསེན གཧཎེན. བྷུཉྫིཏུཾ ཝཊྚཏཱིཏི དྷཱུམཝཊྚིཡཱ ཏདཧུཔཊིགྒཧིཏཏྟཱ ཝུཏྟཾ. བྷཏྟུགྒཱརོཏིཨཱདི ཨབྦོཧཱརིཀཔྤསངྒེན ཝིཀཱལབྷོཛནཝིནིཙྪཡདསྶནཾ. སམུདྡོདཀེནཱཏི ཨཔྤཊིགྒཧིཏེན. ཧིམཀརཀཱ ནཱམ ཀདཱཙི ཝསྶོདཀེན སཧ པཏནཀཱ པཱསཱཎལེཁཱ ཝིཡ གྷནཱིབྷཱུཏཨུདཀཝིསེསཱ, ཏེསུ པཊིགྒཧཎཀིཙྩཾ ནཏྠི. ཏེནཱཧ ‘‘ཨུདཀགཏིཀཱ ཨེཝཱ’’ཏི. པུརེབྷཏྟམེཝ ཝཊྚཏཱིཏི ཨཔྤཊིགྒཧིཏཱཔཏྟཱིཧི ཨབྦོཧཱརིཀམྤི ཝིཀཱལབྷོཛནཱཔཏྟཱིཧི སབྦོཧཱརིཀནྟི དསྶེཏི.

ལགྒཏཱིཏི མུཁེ ཙ ཧཏྠེ ཙ མཏྟིཀཱཝཎྞཾ དསྶེཏི. བཧལནྟི ཧཏྠམུཁེསུ ཨལགྒནཀམྤི པཊིགྒཧེཏབྦཾ. ཝཱསམཏྟནྟི རེཎུཁཱིརཱབྷཱཝཾ དསྶེཏི. ཨཱཀིརཏི པཊིགྒཧེཏབྦནྟི པུཔྥརསསྶ པཉྙཱཡནཏོ ཝུཏྟཾ.

མཧཱབྷཱུཏེསཱུཏི པཱཎསརཱིརསནྣིསྶིཏེསུ པཐཝཱིཨཱདིམཧཱབྷཱུཏེསུ. སབྦཾ ཝཊྚཏཱིཏི ཨཏྟནོ, པརེསཉྩ སརཱིརནིསྶིཏཾ སབྦཾ ཝཊྚཏི. ཨཀཔྤིཡམཾསཱནུལོམཏཱཡ ཐུལླཙྩཡཱདིཾ ན ཛནེཏཱིཏི ཨདྷིཔྤཱཡོ. པཏཏཱིཏི ཨཏྟནོ སརཱིརཏོ ཝིཙྪིནྡིཏྭཱ པཏཏི. ‘‘རུཀྑཏོ ཚིནྡིཏྭཱ’’ཏི ཝུཏྟཏྟཱ མཏྟིཀཏྠཱཡ པཐཝིཾ ཁཎིཏུཾ, ཨཉྙམྤི ཡཾཀིཉྩི མཱུལཔཎྞཱདིཝིསབྷེསཛྫཾ ཚིནྡིཏྭཱ ཚཱརིཀཾ ¶ ཨཀཏྭཱཔི ཨཔྤཊིགྒཧིཏམྤི པརིབྷུཉྫིཏུཾ ཝཊྚཏཱིཏི དཊྛབྦཾ. ཨཔྤཊིགྒཧིཏཏཱ, ཨནནུཉྙཱཏཏཱ, དྷཱུམཱདིཨབྦོཧཱརིཀཏཱབྷཱཝོ, ཨཛ྄ཛྷོཧརཎནྟི ཨིམཱནེཏྠ ཙཏྟཱརི ཨངྒཱནི.

དནྟཔོནསིཀྑཱཔདཝཎྞནཱ ནིཊྛིཏཱ.

ནིཊྛིཏོ བྷོཛནཝགྒོ ཙཏུཏྠོ.

༥. ཨཙེལཀཝགྒོ

༡. ཨཙེལཀསིཀྑཱཔདཝཎྞནཱ

༢༧༣. པཉྩམཝགྒསྶ ¶ པཋམེ མཡ྄ཧཾ ནཱམཱཏི བྷིཀྑུནཱ བྷཱུམིཡཾ ཋཔེཏྭཱ དིནྣམྤི སནྡྷཱཡ ཝདཏི. ཨཉྙཏིཏྠིཡཏཱ, ཨནནུཉྙཱཏཏཱ, ཨཛ྄ཛྷོཧརཎཱིཡཏཱ, ཨཛ྄ཛྷོཧརཎཏྠཱཡ སཧཏྠཱ ཨནིཀྑིཏྟབྷཱཛནེ དཱནནྟི ཨིམཱནེཏྠ ཙཏྟཱརི ཨངྒཱནི.

ཨཙེལཀསིཀྑཱཔདཝཎྞནཱ ནིཊྛིཏཱ.

༢. ཨུཡྻོཛནསིཀྑཱཔདཝཎྞནཱ

༢༧༤. དུཏིཡེ ཨནཱཙཱརཾ ཨཱཙརིཏུཀཱམཏཱ, ཏདཏྠམེཝ ཨུཔསམྤནྣསྶ ཨུཡྻོཛནཱ, ཏསྶ ཨུཔཙཱརཱཏིཀྐམོཏི ཨིམཱནེཏྠ ཏཱིཎི ཨངྒཱནི.

ཨུཡྻོཛནསིཀྑཱཔདཝཎྞནཱ ནིཊྛིཏཱ.

༣. སབྷོཛནསིཀྑཱཔདཝཎྞནཱ

༢༨༡. ཏཏིཡེ པཱལི༹ཡཾ ཁུདྡཀེ གྷརེཏི ཨེཏྠ ཁུདྡཀཾ གྷརཾ ནཱམ པཉྩཧཏྠཏོ ཨཱུནཀཝིཏྠཱརཾ ཨདྷིཔྤེཏཾ. ཏཏྠ ཙ པིཊྛསངྒྷཱཊཏོ ཧཏྠཔཱསེ ཨཝིཛཧིཏེཔི པིཊྛིཝཾསཱཏིཀྐམོ ཧོཏཱིཏི ཨཱཧ ‘‘པིཊྛིཝཾསཾ ཨཏིཀྐམིཏྭཱ’’ཏི. ཡཐཱ ཏཐཱ ཝཱ ཀཏསྶཱཏི པིཊྛིཝཾསཾ ཨཱརོཔེཏྭཱ ཝཱ ཨནཱརོཔེཏྭཱ ཝཱ ཀཏསྶ.

༢༨༣. པཱལི༹ཡཾ ¶ ཝཱིཏརཱགཱཏི ཨཔརིཡུཊྛིཏརཱགཱནཾ, ཨནཱགཱམཱིནཉྩ སངྒཧོ. སཙིཏྟཀནྟི ཨནུཔཝིསིཏྭཱ ནིསཱིདནཙིཏྟེན སཙིཏྟཀཾ. པརིཡུཊྛིཏརཱགཛཱཡམྤཏིཀཱནཾ སནྣིཧིཏཏཱ, སཡནིགྷརཏཱ, དུཏིཡསྶ བྷིཀྑུནོ ཨབྷཱཝོ, ཨནུཔཁཛྫ ནིསཱིདནནྟི ཨིམཱནེཏྠ ཙཏྟཱརི ཨངྒཱནི.

སབྷོཛནསིཀྑཱཔདཝཎྞནཱ ནིཊྛིཏཱ.

༢༨༤-༢༨༩. ཙཏུཏྠཔཉྩམཱནི ཝུཏྟཏྠཱནི.

༦. ཙཱརིཏྟསིཀྑཱཔདཝཎྞནཱ

༢༩༨. ཚཊྛེ ¶ ‘‘པརིཡེསིཏྭཱ ཨཱརོཙནཀིཙྩཾ ནཱམ ནཏྠཱི’’ཏི ཝུཏྟཏྟཱ ཡོ ཨཔརིཡེསིཏབྦོ ཨུཔསངྐམིཏུཾ ཡུཏྟཊྛཱནེ དིསྶཏི, སོ སཙེཔི པཀཏིཝཙནསྶ སཝནཱུཔཙཱརཾ ཨཏིཀྐམྨ ཋིཏོ ཨུཔགནྟྭཱ ཨཱཔུཙྪིཏབྦོ. ཏེནཱཧ ‘‘ཨཔི ཙ…པེ… ཡཾ པསྶཏི, སོ ཨཱཔུཙྪིཏབྦོ’’ཏིཨཱདི.

༣༠༢. ཨནཱཔཏྟིཝཱརེ ཙེཏྠ ཨནྟརཱརཱམཱདཱིནཉྙེཝ ཝུཏྟཏྟཱ ཝིཧཱརཏོ གཱམཝཱིཐིཾ ཨནུཉྙཱཏཀཱརཎཾ ཝིནཱ ཨཏིཀྐམནྟསྶཱཔི ཨཱཔཏྟི ཧོཏི, ན པན གྷརཱུཔཙཱརཾ ཨཏིཀྐམནྟསྶེཝ.

ཡཾ པན པཱལི༹ཡཾ ‘‘ཨཉྙསྶ གྷརཱུཔཙཱརཾ ཨོཀྐམནྟསྶ…པེ… པཋམཾ པཱདཾ ཨུམྨཱརཾ ཨཏིཀྐཱམེཏཱི’’ཏིཨཱདི ཝུཏྟཾ. ཏཾ གཱམེ པཝིཊྛཾ སནྡྷཱཡ ཝུཏྟཾ, ཏཐཱཔི ཨཉྙསྶ གྷརཱུཔཙཱརཾ ཨནོཀྐམིཏྭཱ ཝཱིཐིམཛ྄ཛྷེནེཝ གནྟྭཱ ཨིཙྪིཏིཙྪིཏགྷརདྭཱརཱབྷིམུཁེ ཋཏྭཱ མནུསྶེ ཨོལོཀེཏྭཱ གཙྪནྟསྶཱཔི པཱཙིཏྟིཡམེཝ. ཏཏྠ ཀེཙི ‘‘ཝཱིཐིཡཾ ཨཏིཀྐམནྟསྶ གྷརཱུཔཙཱརགཎནཱཡ ཨཱཔཏྟིཡོ’’ཏི ཝདནྟི. ཨཉྙེ པན ‘‘ཡཱནི ཀུལཱནི ཨུདྡིསྶ གཏོ, ཏེསཾ གཎནཱཡཱ’’ཏི. པཉྩནྣཾ བྷོཛནཱནཾ ཨཉྙཏརེན ནིམནྟནསཱདིཡནཾ, སནྟཾ བྷིཀྑུཾ ཨནཱཔུཙྪནཱ, བྷཏྟིཡགྷརཏོ ཨཉྙགྷརཱུཔསངྐམནཾ, མཛ྄ཛྷནྷིཀཱནཏིཀྐམོ, སམཡཱཔདཱནཾ ཨབྷཱཝོཏི ཨིམཱནེཏྠ པཉྩ ཨངྒཱནི.

ཙཱརིཏྟསིཀྑཱཔདཝཎྞནཱ ནིཊྛིཏཱ.

༧. མཧཱནཱམསིཀྑཱཔདཝཎྞནཱ

༣༠༣. སཏྟམེ ¶ མཧཱནཱམོཏི སུཀྐོདནསྶ པུཏྟོ ཨནུརུདྡྷཏྠེརསྶ, སཏྠུ ཙ ཛེཊྛབྷཱཏཱ. ཨཱནནྡཏྠེརོ ཨམིཏོདནསྶ པུཏྟོ, ནནྡཏྠེརོ པན སུདྡྷོདནསྶེཝ.

༣༠༥. པཱལི༹ཡཾ ཀཱལཾ ཨཱཧརིསྶཐཱཏི ཨཛྫཏནཾ ཀཱལཾ ཝཱིཏིནཱམེསྶཐ, སྭེ བྷེསཛྫཾ ཧརིསྶཐཱཏི ཝཱ ཨཏྠོ. ‘‘ཨཏྠི པཝཱརཎཱ བྷེསཛྫཔརིཡནྟཱ ཙ རཏྟིཔརིཡནྟཱ ཙཱ’’ཏི ཏཏིཡཀོཊྛཱསེ ནིཡམིཏམེཝ བྷེསཛྫཾ ནིཡམིཏཀཱལནྟརེཡེཝ གཧེཏབྦཾ, ན ཏཏོ བཧི. ཨིཏརཐཱ ¶ ཝིསུཾ པཡོཛནཾ ནཏྠཱིཏི དཊྛབྦཾ. སཔརིཡནྟཱ སངྒྷཔཝཱརཎཱ, ཏདུཏྟརི བྷེསཛྫཝིཉྙཏྟི, ཨགིལཱནཏཱཏི ཨིམཱནེཏྠ ཏཱིཎི ཨངྒཱནི.

མཧཱནཱམསིཀྑཱཔདཝཎྞནཱ ནིཊྛིཏཱ.

༨. ཨུཡྻུཏྟསེནཱསིཀྑཱཔདཝཎྞནཱ

༣༡༥. ཨཊྛམེ ཨེཀམེཀནྟི ཨེཏྠ དུཝངྒིནཱིཔི ཏིཝངྒིནཱིཔི སེནཱ སངྒཡ྄ཧཏི. ཨུཡྻུཏྟཙཏུརངྒསེནཱདསྶནཱཡ ཏཐཱརཱུཔཔཙྩཡཱདིཾ ཝིནཱ གམནཾ, ཨནནུཉྙཱཏོཀཱསེ དསྶནནྟི ཨིམཱནེཏྠ དྭེ ཨངྒཱནི.

ཨུཡྻུཏྟསེནཱསིཀྑཱཔདཝཎྞནཱ ནིཊྛིཏཱ.

༩. སེནཱཝཱསསིཀྑཱཔདཝཎྞནཱ

༣༡༩. ནཝམེ སེནཱཡ ཙཏུཏྠོ སཱུརིཡཏྠངྒམོ, ཨགིལཱནཏཱཏི ཨིམཱནེཏྠ དྭེ ཨངྒཱནི.

སེནཱཝཱསསིཀྑཱཔདཝཎྞནཱ ནིཊྛིཏཱ.

༡༠. ཨུཡྻོདྷིཀསིཀྑཱཔདཝཎྞནཱ

༣༢༢. དསམེ པཱལི༹ཡཾ ཀཏི ཏེ ལཀྑཱནི ལདྡྷཱནཱིཏི ཀིཏྟཀཱ ཏཡཱ ལདྡྷཱཏི ཨཏྠོ. ཨུཡྻོདྷིཀཱདིདསྶནཱཡ ¶ ཏཐཱརཱུཔཔཙྩཡཾ ཝིནཱ གམནཾ, ཨནནུཉྙཱཏོཀཱསེ དསྶནནྟི ཨིམཱནེཏྠ དྭེ ཨངྒཱནི.

ཨུཡྻོདྷིཀསིཀྑཱཔདཝཎྞནཱ ནིཊྛིཏཱ.

ནིཊྛིཏོ ཨཙེལཀཝགྒོ པཉྩམོ.

༦. སུརཱཔཱནཝགྒོ

༡. སུརཱཔཱནསིཀྑཱཔདཝཎྞནཱ

༣༢༨. ཚཊྛཝགྒསྶ ¶ པཋམེ པཱལི༹ཡཾ ཀིཎྞཔཀྑིཏྟཱཏི པིཊྛཔཱུཝཱདིཾ ཨཔཀྑིཔིཏྭཱ ཀིཎྞསངྑཱཏཾ དྷཉྙངྐུརཱདིསུརཱབཱིཛཾ པཀྑིཔིཏྭཱ ཀཏཱ. སམྦྷཱརསཾཡུཏྟཱཏི སཱསཔཱདིཨནེཀསམྦྷཱརེཧི སཉྙུཏྟཱ.

མདྷུཀཏཱལནཱལི༹ཀེརཱདིཔུཔྥཱདིརསོ ཙིརཔརིཝཱསིཏོ པུཔྥཱསཝོ ནཱམ. ཏཐཱ པནསཱདི ཕལཱསཝོ. མུདྡིཀརསོ མདྷྭཱསཝོ. ཨུཙྪུརསོ གུལཱ༹སཝོ. ཏིཕལཏིཀཊུཀཱདིནཱནཱསམྦྷཱརཱནཾ རསོ ཙིརཔརིཝཱསིཏོ སམྦྷཱརསཾཡུཏྟོ. བཱིཛཏོ པཊྛཱཡཱཏི ཡཐཱཝུཏྟཱནཾ པིཊྛཱདཱིནཾ མཛྫཏྠཱཡ བྷཱཛནེ པཀྑིཏྟཀཱལཏོ པཊྛཱཡ.

༣༢༩. ལོཎསོཝཱིརཀཾ སུཏྟཉྩ ཨནེཀེཧི དབྦསམྦྷཱརེཧི ཨབྷིསངྑཏོ བྷེསཛྫཝིསེསོ. ཨུཡྻུཏྟསིཀྑཱཔདཱནཾ ཨཙིཏྟཀལོཀཝཛྫེསུ ལོཀཝཛྫཏཱ པུབྦེ ཝུཏྟནཡཱཝཱཏི ཏཏྠ ཀིཉྩིཔི ཨཝཏྭཱ ཨིདྷ ཏེཧི ཨསཱདྷཱརཎཝཏྠུཝིསེསསིདྡྷཱཡ ཨཙིཏྟཀཔཀྑེཔི ཨཀུསལཙིཏྟཏཱཡ ཏཾ ལོཀཝཛྫཏཱདིཝིསེསཾ དསྶེཏུམེཝ ‘‘ཝཏྠུཨཛཱནནཏཱཡ ཙེཏྠཱ’’ཏིཨཱདིནཱ ཝུཏྟནྟི ཝེདིཏབྦཾ. ཡཾ པནེཏྠ ཝཏྟབྦཾ, ཏཾ པཋམཔཱརཱཛིཀཝཎྞནཱཡཾ ཝིཏྠཱརཏོ སཱརཏྠདཱིཔནིཡཾ ཝིརདྡྷཊྛཱནཝིསོདྷནཝསེན ཝུཏྟནྟི ཏཏྠེཝ གཧེཏབྦཾ. མཛྫབྷཱཝོ, ཏསྶ པཱནཉྩཱཏི ཨིམཱནེཏྠ དྭེ ཨངྒཱནི.

སུརཱཔཱནསིཀྑཱཔདཝཎྞནཱ ནིཊྛིཏཱ.

༢. ཨངྒུལིཔཏོདཀསིཀྑཱཔདཝཎྞནཱ

༣༣༠. དུཏིཡེ ¶ ཧསཱདྷིཔྤཱཡཏཱ, ཨུཔསམྤནྣསྶ ཀཱཡེན ཀཱཡཱམསནནྟི ཨིམཱནེཏྠ དྭེ ཨངྒཱནི.

ཨངྒུལིཔཏོདཀསིཀྑཱཔདཝཎྞནཱ ནིཊྛིཏཱ.

༣. ཧསདྷམྨསིཀྑཱཔདཝཎྞནཱ

༣༣༨. ཏཏིཡེ ¶ པཱལི༹ཡཾ ཧསདྷམྨེ ཧསདྷམྨསཉྙཱིཏིཨཱདཱིསུ ཨུཔླཝཱདིམཏྟཾ ཀིཾ ཧསདྷམྨོ ཧོཏཱིཏི གཧཎཝསེན སཏི ཀརཎཱིཡེ ཀརིཡམཱནཾ ཧསདྷམྨཾ ཧསདྷམྨོཏི གཧཎཝསེན ཨཏྠོ ཝེདིཏབྦོ. ཨུསྶཱརེནྟོཏི ཨུདཀེ ཋིཏཾ ནཱཝཾ ཏཱིརེ ཨཱརོཔེནྟོ.

པཏནུཔྤཏནཝཱརེསཱུཏི ཨུདཀསྶ ཨུཔརིཏལེ མཎྜཱུཀགཏིཡཱ པཏནུཔྤཏནཝསེན གམནཏྠཾ ཁིཏྟཱཡ ཨེཀིསྶཱ ཀཐལཱཡ ཝསེན ཝུཏྟཾ. ཨུདཀསྶ ཨུཔརིགོཔྥཀཏཱ, ཧསཱདྷིཔྤཱཡེན ཀཱིལ༹ནནྟི དྭེ ཨངྒཱནི.

ཧསདྷམྨསིཀྑཱཔདཝཎྞནཱ ནིཊྛིཏཱ.

༤. ཨནཱདརིཡསིཀྑཱཔདཝཎྞནཱ

༣༤༤. ཙཏུཏྠེ སུཏྟཱནུལོམནྟི མཧཱཔདེསཱ. ཨཊྛཀཐཱཏིཔི ཝདནྟི. ཨུཔསམྤནྣསྶ པཉྙཏྟེན ཝཙནཾ, ཨནཱདརིཡཀརཎནྟི དྭེ ཨངྒཱནི.

ཨནཱདརིཡསིཀྑཱཔདཝཎྞནཱ ནིཊྛིཏཱ.

༥. བྷིཾསཱཔནསིཀྑཱཔདཝཎྞནཱ

༣༤༥. པཉྩམེ ཨུཔསམྤནྣཏཱ, ཏསྶ དསྶནསཝནཝིསཡེ བྷིཾསཱཔེཏུཀཱམཏཱཡ ཝཱཡམནནྟི དྭེ ཨངྒཱནི.

བྷིཾསཱཔནསིཀྑཱཔདཝཎྞནཱ ནིཊྛིཏཱ.

༦. ཛོཏིསིཀྑཱཔདཝཎྞནཱ

༣༥༤. ཚཊྛེ ¶ ཨལཱཏཾ པཏིཏནྟི ཨགྒིཀཔཱལཏོ བཧི པཏིཏཾ. ཝིཛ྄ཛྷཱཏནྟི ཝིཛ྄ཛྷཱཏཾ ཨལཱཏཾ ཀཔཱལགྒིམྷི པཀྑིཔིཏྭཱ ཛཱལེནྟསྶ པཱཙིཏྟིཡཾ, ཏཐཱ ཀེཝལཾ ཨིནྡྷནཾ པཱཏེནྟསྶཔི ཝིཛ྄ཛྷཱཏཾ ཀཔཱལགྒིཾ མུཁཝཱཏཱདིནཱ ཨུཛྫཱལེནྟསྶཔི. གིལཱནཏཱདིཀཱརཎཱབྷཱཝོ, ཝིསིབྦེཏུཀཱམཏཱ, སམཱདཧནནྟི ཏཱིཎི ཨངྒཱནི.

ཛོཏིསིཀྑཱཔདཝཎྞནཱ ནིཊྛིཏཱ.

༧. ནཧཱནསིཀྑཱཔདཝཎྞནཱ

༣༥༧. སཏྟམེ ¶ པཱལི༹ཡཾ ནགརེ ཐཀིཏེཏི ཨེཏྠ རཉྙཱ ཙིརཾ ནཧཱཡིཏུཀཱམེན ‘‘ཨཧཾ བཧི ཨུཡྻཱནེ ཀཏཱརཀྑོ ཝསིསྶཱམི, ནགརཾ ཐཀེཏྭཱ གོཔེཐཱ’’ཏི ཨནུཉྙཱཏཱ, ཏེ ཐཀིཾསཱུཏི དཊྛབྦཾ. ཨསམྦྷིནྣེནཱཏི ཨནཊྛེན, ཏཾ དིཝསཾ པུན ཨགྒཧིཏཱལངྐཱརེན པབུདྡྷམཏྟེནཱཏི ཨདྷིཔྤཱཡོ. མཛ྄ཛྷིམདེསེ ཨཱུནཀདྡྷམཱསནཧཱནཾ, སམཡཱདཱིནཾ ཨབྷཱཝོཏི དྭེ ཨངྒཱནི.

ནཧཱནསིཀྑཱཔདཝཎྞནཱ ནིཊྛིཏཱ.

༨. དུབྦཎྞཀརཎསིཀྑཱཔདཝཎྞནཱ

༣༦༨. ཨཊྛམེ པཊིལདྡྷནཝཙཱིཝརེནཱཏི ཨེཏྠ པུབྦེ ཨཀཏཀཔྤཾ ཀཏིཔཱཧཾ ནིཝཱསནཏྠཱཡ ཏཱཝཀཱལིཀཝསེན ལདྡྷམྤི སངྒཡ྄ཧཏཱིཏི ཝདནྟི.

༣༦༩. ‘‘ནཝཾ ནཱམ ཨཀཏཀཔྤ’’ནྟི སཱམཉྙཏོ ཝུཏྟཏྟཱ ཨཉྙེན བྷིཀྑུནཱ ཀཔྤབིནྡུཾ དཏྭཱ པརིབྷུཏྟཾ ཙཱིཝརཾ, ཏེན ཝཱ, ཏཏོ ལབྷིཏྭཱ ཨཉྙེན ཝཱ ཀེནཙི དིནྣམྤི ཀཏཀཔྤམེཝ ནཝཾ ནཱམ ན ཧོཏཱིཏི དཊྛབྦཾ. ‘‘ནིཝཱསེཏུཾ ཝཱ པཱརུཔིཏུཾ ཝཱ’’ཏི ཝུཏྟཏྟཱ ཨཾསབདྡྷཀཱསཱཝམྤི པཱརུཔིཏབྦཏོ ཀཔྤཾ ཀཱཏབྦནྟི ཝདནྟི. ཙམྨཀཱརནཱིལཾ ནཱམ ཙམྨཾ ནཱིལཝཎྞཾ ཀཱཏུཾ ཡོཛིཡམཱནཾ ནཱིལཾ. པཀཏིནཱིལམེཝཱཏི ཀེཙི. ཡཐཱཝུཏྟཙཱིཝརསྶ ཨཀཏཀཔྤཏཱ, ཨནཊྛཙཱིཝརཱདིཏཱ, ནིཝཱསནཱདིཏཱཏི ཏཱིཎི ཨངྒཱནི.

དུབྦཎྞཀརཎསིཀྑཱཔདཝཎྞནཱ ནིཊྛིཏཱ.

༩. ཝིཀཔྤནསིཀྑཱཔདཝཎྞནཱ

༣༧༤. ནཝམེ ¶ ཡེནཱཏི ཡེན སདྡྷིཾ, ཡསྶ སནྟིཀེཏི ཨཏྠོ. སཱམཾ ཝིཀཔྤིཏསྶ ཨཔཙྩུདྡྷཱརོ, ཝིཀཔྤནུཔགཙཱིཝརཏཱ, ཨཝིསྶཱསེན པརིབྷོགོཏི ཏཱིཎི ཨངྒཱནི.

ཝིཀཔྤནསིཀྑཱཔདཝཎྞནཱ ནིཊྛིཏཱ.

༡༠. ཙཱིཝརཨཔནིདྷཱནསིཀྑཱཔདཝཎྞནཱ

༣༧༨. དསམེ ¶ པཱལི༹ཡཾ ཨནྟམསོ ཧསཱཔེཀྑོཔཱིཏི ཨཔི-སདྡེན ཨཐེཡྻཙིཏྟཾ ཀོདྷེན དུཀྑཱཔེཏུཀཱམཾ, ཨཝཎྞཾ པཀཱསེཏུཀཱམཉྩ སངྒཡ྄ཧཏི. ཏེནེཝ ‘‘ཏིཝེདན’’ནྟི ཝུཏྟཾ. ཨུཔསམྤནྣསྶ པཏྟཱདཱིནཾ ཨཔནིདྷཱནཾ, ཝིཧེསེཏུཀཱམཏཱདཱིཏི དྭེ ཨངྒཱནི.

ཙཱིཝརཨཔནིདྷཱནསིཀྑཱཔདཝཎྞནཱ ནིཊྛིཏཱ.

ནིཊྛིཏོ སུརཱཔཱནཝགྒོ ཚཊྛོ.

༧. སཔྤཱཎཀཝགྒོ

༡. སཉྩིཙྩཔཱཎསིཀྑཱཔདཝཎྞནཱ

༣༨༢. སཏྟམསྶ པཋམེ ཨུསུཾ སརཾ ཨསཏི ཁིཔཏཱིཏི ཨིསྶཱསོ. ན ཧེཏྠ ཀིཉྩི ཛཱིཝིཏཾ ནཱམ ཝིསུཾ ཏིཊྛཏཱིཏི སམྦནྡྷོ. ཏཏྠ པཱཎེཏི སཏྟེ. ཨཔྤམཏྟེན ཝཏྟཾ ཀཱཏབྦནྟི ཡཐཱ པཱཎཀཱནཾ ཝིཧེསཱཔི ན ཧོཏི, ཨེཝཾ སལླཀྑེཏྭཱ ཨོཏཱཔནསམྨཛྫནཱདིཝཏྟཾ ཀཱཏབྦཾ. སེསཾ ཝུཏྟནཡམེཝ.

སཉྩིཙྩཔཱཎསིཀྑཱཔདཝཎྞནཱ ནིཊྛིཏཱ.

༢. སཔྤཱཎཀསིཀྑཱཔདཝཎྞནཱ

༣༨༧. དུཏིཡེ ¶ ཨུདཀསཎྛཱནཀཔྤདེསེཏི ཀདྡམཔཱསཱཎཱདིབྷཱུམིཡཾ. ཏཏྠཱཏི ཨཱསིཏྟེ ཀཔྤིཡཨུདཀེ. སེསཾ ཝུཏྟནཡམེཝ.

སཔྤཱཎཀསིཀྑཱཔདཝཎྞནཱ ནིཊྛིཏཱ.

༣. ཨུཀྐོཊནསིཀྑཱཔདཝཎྞནཱ

༣༩༢. ཏཏིཡེ ‘‘ཏསྶ བྷིཀྑུནོ སནྟིཀཾ གནྟྭཱ’’ཏི ཝུཏྟཏྟཱ ཡསྶ ཨདྷིཀརཎཾ སངྒྷཀམྨེན ནིཧཏཾ, ཏསྶ སམྨུཁེ ཨེཝ ཨུཀྐོཊེནྟསྶ པཱཙིཏྟིཡཾ. པརམྨུཁེ པན དུཀྐཊམེཝ.

༣༩༥. ‘‘དྷམྨཀམྨེ ¶ ཨདྷམྨཀམྨསཉྙཱི ཨུཀྐོཊེཏི, ཨནཱཔཏྟཱི’’ཏི ཝུཏྟཏྟཱ ཨནཱདརིཡཏཱདི ཝིཡ ཨུཀྐོཊནཾ སཡཾ ཨཀུསལཾ ན ཧོཏི, དྷམྨཀམྨསཉྙཱཡ, པན ཝིམཏིཡཱ ཙ ཨུཀྐོཊནེནེཝ ཨཀུསལཾ ཧོཏི. ཡཐཱདྷམྨཾ ནིཧཏཏཱ, ཛཱནནཱ, ཨུཀྐོཊནཱཏི ཏཱིཎི ཨངྒཱནི.

ཨུཀྐོཊནསིཀྑཱཔདཝཎྞནཱ ནིཊྛིཏཱ.

༤. དུཊྛུལླསིཀྑཱཔདཝཎྞནཱ

༣༩༩. ཙཏུཏྠེ ཨཱཔཏྟིཾ ཨཱཔཛྫཏིཡེཝཱཏི དྷུརནིཀྑེཔཔཀྑེ ཝུཏྟཾ. ཝཏྠུཔུགྒལོཏི ཨཱཔནྣཔུགྒལོ. ཚཱདེཏུཀཱམཏཱཡ ཧི སཏི ཨེཝ ཨཝསྶཾ ཨཉྙསྶ ཨཱརོཙནཾ ཝུཏྟཾ, ཝཏྠུཔུགྒལསྶ ཙ ཨཱརོཙནཱ ནཱམ ན ཧོཏཱིཏི པཊིཙྪཱདནམེཝཱཏི ཨདྷིཔྤཱཡོ. ཀོཊི ཚིནྣཱ ཧོཏཱིཏི ཚཱདེསྶཱམཱིཏི དྷུརནིཀྑེཔེ སཏིཔི པུགྒལཔརམྤརཱཡ གཙྪནྟཱི ཨཱཔཏྟིཀོཊི ཚིཛྫཏི.

༤༠༠. ‘‘ཨནུཔསམྤནྣསྶ སུཀྐཝིསྶཊྛི ཙ ཀཱཡསཾསགྒོ ཙཱཏི ཨཡཾ དུཊྛུལླཨཛ྄ཛྷཱཙཱརོ ནཱམཱ’’ཏི ཨིདཾ དུཊྛུལླཱརོཙནསིཀྑཱཔདཊྛཀཐཱཡཾ ‘‘ཨནུཔསམྤནྣསྶ…པེ… ཨཱདིཏོ པཉྩ སིཀྑཱཔདཱནི དུཊྛུལློ ནཱམ ཨཛ྄ཛྷཱཙཱརོ, སེསཱནི ཨདུཊྛུལློ. སུཀྐཝིསྶཊྛིཀཱཡསཾསགྒདུཊྛུལླཨཏྟཀཱམཱ པནསྶ ཨཛ྄ཛྷཱཙཱརོ ནཱམཱ’’ཏི (པཱཙི. ཨཊྛ. ༨༢) ཨིམིནཱ ཝཙནེན ཝིརུཛ྄ཛྷཏཱིཏི ཝཱིམཾསིཏབྦཾ. པུགྒལཔེམེན ཚཱདཡཏོ ཙེཏྠ ‘‘ཨཉྙེ གརཧིསྶནྟཱི’’ཏི བྷཡཝསེན ཚཱདནཀྑཎེ ¶ པཊིགྷོཝ ཨུཔྤཛྫཏཱིཏི ‘‘དུཀྑཝེདན’’ནྟི ཝུཏྟནྟི དཊྛབྦཾ. ཨུཔསམྤནྣསྶ དུཊྛུལླཱཔཏྟིཛཱནནཾ, པཊིཙྪཱདེཏུཀཱམཏཱཡ དྷུརནིཀྑེཔོཏི དྭེ ཨངྒཱནི.

དུཊྛུལླསིཀྑཱཔདཝཎྞནཱ ནིཊྛིཏཱ.

༥. ཨཱུནཝཱིསཏིཝསྶསིཀྑཱཔདཝཎྞནཱ

༤༠༢. པཉྩམེ རཱུཔསིཔྤནྟི ཧེརཉྙིཀསིཔྤཾ. གབྦྷེ སཡིཏཀཱལེན སདྡྷིཾ ཝཱིསཏིམཾ ཝསྶཾ པརིཔུཎྞམསྶཱཏི གབྦྷཝཱིསོ.

༤༠༤. ནིཀྑམནཱིཡཔུཎྞམཱསཱིཏི ¶ སཱཝཎམཱསསྶ པུཎྞམིཡཱ ཨཱསཱལ༹ྷཱིཔུཎྞམིཡཱ ཨནནྟརཔུཎྞམཱི. པཱཊིཔདདིཝསེཏི པཙྪིམིཀཱཡ ཝསྶཱུཔནཱཡིཀཱཡ. དྭཱདས མཱསེ མཱཏུ ཀུཙྪིསྨིཾ ཝསིཏྭཱ མཧཱཔཝཱརཎཱཡ ཛཱཏཾ ཨུཔསམྤཱདེནྟཱིཏི ཨཏྠོ. ‘‘ཏིཾས རཏྟིནྡིཝོ མཱསོ, དྭཱདསམཱསིཀོ སཾཝཙྪརོ’’ཏི (ཨ. ནི. ༣.༧༡; ༨.༤༣; ཝིབྷ. ༡༠༢༣) ཝཙནཏོ ‘‘ཙཏྟཱརོ མཱསཱ པརིཧཱཡནྟཱི’’ཏི ཝུཏྟཾ. ཝསྶཾ ཨུཀྐཌྜྷནྟཱིཏི ཝསྶཾ ཨུདྡྷཾ ཀཌྜྷནྟི, ‘‘ཨེཀམཱསཾ ཨདྷིཀམཱསོ’’ཏི ཚཌྜེཏྭཱ ཝསྶཾ ཨུཔགཙྪནྟཱིཏི ཨཏྠོ. ཏསྨཱ ཏཏིཡོ ཏཏིཡོ སཾཝཙྪརོ ཏེརསམཱསིཀོ ཧོཏི. ཏེ དྭེ མཱསེ གཧེཏྭཱཏི ནིཀྑམནཱིཡཔུཎྞམཱསཏོ ཡཱཝ ཛཱཏདིཝསབྷཱུཏཱ མཧཱཔཝཱརཎཱ. ཏཱཝ ཡེ དྭེ མཱསཱ ཨནཱགཏཱ, ཏེསཾ ཨཏྠཱཡ ཨདྷིཀམཱསཏོ ལདྡྷེ དྭེ མཱསེ གཧེཏྭཱ. ཏེནཱཧ ‘‘ཡོ པཝཱརེཏྭཱ ཝཱིསཏིཝསྶོ བྷཝིསྶཏཱི’’ཏིཨཱདི. ‘‘ནིཀྐངྑཱ ཧུཏྭཱ’’ཏི ཨིདཾ ཨཊྛཱརསནྣཾ ཝསྶཱནཾ ཨེཀཨདྷིཀམཱསེ གཧེཏྭཱ ཏཏོ ཝཱིསཏིཡཱ ཝསྶེསུཔི ཙཱཏུདྡསཱིཨཏྠཱཡ ཙཏུནྣཾ མཱསཱནཾ པརིཧཱཔནེན སབྦདཱ པརིཔུཎྞཝཱིསཏིཝསྶཏཾ སནྡྷཱཡ ཝུཏྟཾ. པཝཱརེཏྭཱ ཝཱིསཏིཝསྶོ བྷཝིསྶཏཱིཏི མཧཱཔཝཱརཎཱདིཝསེ ཨཏིཀྐནྟེ གབྦྷཝསྶེན སཧ ཝཱིསཏིཝསྶོ བྷཝིསྶཏཱིཏི ཨཏྠོ. ཏསྨཱཏི ཡསྨཱ གབྦྷམཱསཱཔི གཎནཱུཔགཱ ཧོནྟི, ཏསྨཱ. ཨེཀཝཱིསཏིཝསྶོཏི ཛཱཏིཡཱ ཝཱིསཏིཝསྶཾ སནྡྷཱཡ ཝུཏྟཾ.

༤༠༦. ཨཉྙཾ ཨུཔསམྤཱདེཏཱིཏི ཨུཔཛ྄ཛྷཱཡོ, ཨཱཙརིཡོ ཝཱ ཧུཏྭཱ ཨུཔསམྤཱདེཏི. སོཔཱིཏི ཨུཔསམྤཱདེནྟོཔི ཨནུཔསམྤནྣོ. ཨཱུནཝཱིསཏིཝསྶཏཱ, ཏཾ ཉཏྭཱ ཨུཔཛ྄ཛྷཱཡེན ཧུཏྭཱ ཨུཔསམྤཱདནནྟི དྭེ ཨངྒཱནི.

ཨཱུནཝཱིསཏིཝསྶསིཀྑཱཔདཝཎྞནཱ ནིཊྛིཏཱ.

༦. ཐེཡྻསཏྠསིཀྑཱཔདཝཎྞནཱ

༤༠༩. ཚཊྛེ ¶ ཐེཡྻསཏྠབྷཱཝོ, ཉཏྭཱ སཾཝིདྷཱནཾ, ཨཝིསངྐེཏེན གམནནྟི ཏཱིཎི ཨངྒཱནི.

ཐེཡྻསཏྠསིཀྑཱཔདཝཎྞནཱ ནིཊྛིཏཱ.

༤༡༢. སཏྟམཾ ཝུཏྟནཡམེཝ.

༨. ཨརིཊྛསིཀྑཱཔདཝཎྞནཱ

༤༡༧. ཨཊྛམེ ¶ ཨནྟརཱཡནྟི ཨནྟརཱ ཝེམཛ྄ཛྷེ ཨེཏི ཨཱགཙྪཏཱིཏི ཨནྟརཱཡོ, དིཊྛདྷམྨིཀཱདིཨནཏྠོ. ཨཱནནྟརིཡདྷམྨཱཏི ཨནནྟརེ བྷཝེ ཕལནིབྦཏྟནེ ནིཡུཏྟཱ ཙེཏནཱདིདྷམྨཱཏི ཨཏྠོ. ‘‘ན སགྒསྶཱ’’ཏི ཨིདཾ བྷིཀྑུནིདཱུསནཀམྨསྶ ཨཱནནྟརིཡཏྟཱབྷཱཝཏོ ཝུཏྟཾ. ཨརིཡསཱཝིཀཱསུ, པན ཀལྱཱཎཔུཐུཛྫནབྷཱུཏཱཡ ཙ བལཀྐཱརེན དཱུསེནྟསྶ ཨཱནནྟརིཡསཨསམེཝ. མོཀྑནྟརཱཡིཀཏཱ པན ལོལཱཡཔི པཀཏཏྟབྷིཀྑུནིཡཱ དཱུསཀསྶ ཏསྨིཾ ཨཏྟབྷཱཝེ མགྒུཔྤཏྟིཡཱ ཨབྷཱཝཏོ ཝུཏྟཱ.

ཏསྨིཾ ཨཏྟབྷཱཝེ ཨནིཝཏྟནཀཱ ཨཧེཏུཀཨཀིརིཡནཏྠིཀདིཊྛིཡོཝ ནིཡཏམིཙྪཱདིཊྛིདྷམྨཱ. པཎྜཀཱདཱིནཾ གཧཎཾ ནིདསྶནམཏྟཾ. སབྦཱཔི དུཧེཏུཀཱཧེཏུཀཔཊིསནྡྷིཡོ ཝིཔཱཀནྟརཱཡིཀཱཝ དུཧེཏུཀཱནམྤི མགྒཱནུཔྤཏྟིཏོ.

ཨཡནྟི ཨརིཊྛོ. རསེན རསནྟི ཨནཝཛྫེན པཙྩཡཔརིབྷུཉྫནརསེན པཉྩཀཱམགུཎཔཨབྷོགརསཾ སམཱནེཏྭཱ. ཨུཔནེནྟོ ཝིཡཱཏི གྷཊེནྟོ ཝིཡ, སོ ཨེཝ ཝཱ པཱཋོ.

ཨཊྛིཀངྐལཱུཔམཱཏི ཨེཏྠ ཨཊྛི ཨེཝ ནིམྨཾསཏཱཡ ཀངྐལནྟི ཙ ཝུཙྩཏི. པལིབྷཉྫནཊྛེནཱཏི ཨཝསྶཾ པཏནཊྛེན. ཨདྷིཀུཊྚནཊྛེནཱཏི ཨཏི ཝིཡ ཀུཊྚནཊྛེན. པཱལི༹ཡཾ ‘‘ཏཐཱཧཾ བྷགཝཏཱ…པེ… ནཱལཾ ཨནྟརཱཡཱཡཱ’’ཏི ཨིདཾ ཝཏྠུཨནུརཱུཔཏོ ཝུཏྟཾ. ཨེཝཾ པན ཨགྒཧེཏྭཱ ཨཉྙེནཔི ཨཱཀཱརེན ཡཾ ཀིཉྩི བྷགཝཏཱ ཝུཏྟཾ ཝིཔརཱིཏཏོ གཧེཏྭཱ པརེཧི ཝུཏྟེཔི ཨམུཉྩིཏྭཱ ཝོཧརནྟསྶཱཔི ཝུཏྟནཡཱནུསཱརེན ཏདནུགུཎཾ སམནུབྷཱསནཀམྨཝཱཙཾ ཡོཛེཏྭཱ ཨཱཔཏྟིཡཱ ཨཱརོཔེཏུཾ, ཨཱཔཏྟིཡཱ ཨདསྶནཱདཱིསུ ཏཱིསུ ཡཾ ཀིཉྩི ཨབྷིརུཙིཏཾ ནིམིཏྟཾ ཀཏྭཱ ཨུཀྑེཔནཱིཡཀམྨཾ ¶ ཀཱཏུཉྩ ལབྦྷཏི. སམནུབྷཱསནཾ ཨཀཏྭཱཔི ‘‘མཱཡསྨཱ ཨེཝཾ ཨཝཙཱ’’ཏི བྷིཀྑཱུཧི ཝུཏྟམཏྟེ ལདྡྷིཡཱ ཨཔྤཊིནིསྶཛྫནཔཙྩཡཱཡ དུཀྐཊཱཔཏྟིཡཱཔི ཨུཀྑེཔནཱིཡཀམྨཾ ཀཱཏུམྤི ཝཊྚཏེཝཱཏི དཊྛབྦཾ. དྷམྨཀམྨཏཱ, སམནུབྷཱསནཱཡ ཨཔྤཊིནིསྶཛྫནནྟི དྭེ ཨངྒཱནི.

ཨརིཊྛསིཀྑཱཔདཝཎྞནཱ ནིཊྛིཏཱ.

༩. ཨུཀྑིཏྟསམྦྷོགསིཀྑཱཔདཝཎྞནཱ

༤༢༤. ནཝམེ ¶ ‘‘ཨུཀྑིཏྟོ ཨནོསཱརིཏོ’’ཏི ཝུཏྟཏྟཱ ཨརིཊྛསྶ ཨུཀྑེཔནཱིཡཀམྨཾ ཀཏནྟི དཊྛབྦཾ.

༤༢༥. པཱལི༹ཡཾ ‘‘ཨེཀཙྪནྣེ’’ཏི སཱམཉྙཏོ ཝུཏྟཏྟཱ ནཱནཱུཔཙཱརེཔི ཨེཀཙྪནྣེ ནིཔཛྫནེ པཎྞཏྟིཾ ཨཛཱནནྟསྶ ཨརཧཏོཔི ཨུཀྑིཏྟཱནུཝཏྟཀཱནམྤི པཱཙིཏྟིཡམེཝ. ཨཀཏཱནུདྷམྨཏཱ, ཉཏྭཱ སམྦྷོགཱདིཀརཎནྟི དྭེ ཨངྒཱནི.

ཨུཀྑིཏྟསམྦྷོགསིཀྑཱཔདཝཎྞནཱ ནིཊྛིཏཱ.

༡༠. ཀཎྚཀསིཀྑཱཔདཝཎྞནཱ

༤༢༨. དསམེ པིརེཏི སམྦོདྷནཏྠེ ནིཔཱཏཔདཾ. སེསཾ ཨནནྟརསིཀྑཱཔདདྭཡེ ཝུཏྟནཡམེཝ.

ཀཎྚཀསིཀྑཱཔདཝཎྞནཱ ནིཊྛིཏཱ.

ནིཊྛིཏོ སཔྤཱཎཀཝགྒོ སཏྟམོ.

༨. སཧདྷམྨིཀཝགྒོ

༡. སཧདྷམྨིཀསིཀྑཱཔདཝཎྞནཱ

༤༣༤. ཨཊྛམཝགྒསྶ ¶ པཋམེ ཨུཔསམྤནྣསྶ པཉྙཏྟེན ཝཙནཾ, ཨསིཀྑིཏུཀཱམསྶ ལེསེན ཨེཝཾ ཝཙནནྟི དྭེ ཨངྒཱནི.

སཧདྷམྨིཀསིཀྑཱཔདཝཎྞནཱ ནིཊྛིཏཱ.

༢. ཝིལེཁནསིཀྑཱཔདཝཎྞནཱ

༤༣༨. དུཏིཡེ ཨལཛྫིཏཱཏི ཨལཛྫིཏཱཡ. ཨེཝཾ སེསེསུཔི. སཉྩིཙྩ ཨཱཔཏྟིཾ ཨཱཔཛྫཏཱིཏིཨཱདི བྷིཀྑུབྷིཀྑུནཱིནཉྙེཝ ཝུཏྟཾ ཨལཛྫིལཀྑཎཾ, སཱམཎེརཱདཱིནཾ, པན གཧཊྛཱནཉྩ སཱདྷཱརཎཝསེན ཡཐཱསཀཾ སིཀྑཱཔདཝཱིཏིཀྐམནཔཊིགཱུཧནཱདིཏོ ཝེདིཏབྦཾ. ལཛྫིལཀྑཎེཔི ཨེསེཝ ནཡོ. ཀིཉྩཱཔི ¶ ཀུཀྐུཙྩེ ཨུཔྤནྣེཔི མདྡིཏྭཱ ཀརོནྟོ, ཀཔྤིཡེ ཨཀཔྤིཡསཉྙིཏཱཡ ཀརོནྟོཔི ཏངྑཎིཀཱཡ ཨལཛྫིཏཱཡ ཨེཝཾ ཀརོནྟི. ཏཐཱཔི ཀུཀྐུཙྩཱདིབྷེདེ ཝིསུཾ གཧིཏཱཏི དཊྛབྦཾ.

ཝཛྫིཔུཏྟཀཱ དསཝཏྠུདཱིཔཀཱ. པརཱུཔཧཱརཨཉྙཱཎཀངྑཱཔརཝིཏཱརཎཱདིཝཱདཱཏི ཨེཏྠ ཨརཧཏྟཾ པཊིཛཱནནྟཱནཾ ཀུཧཀཱནཾ སུཀྐཝིསྶཊྛིཾ དིསྭཱ ‘‘མཱརཀཱཡིཀཱ དེཝཏཱ ཨསུཙིཾ ཨུཔསཾཧརནྟཱི’’ཏིགཱཧིནོ པརཱུཔཧཱརཝཱདཱ ནཱམ. ཨརཧཏོ སབྦེསཾ ཨིཏྠིཔུརིསཱདཱིནཾ ནཱམཱདིཨཛཱནནེ ཨཉྙཱཎཾ, ཏཏྠ སནྣིཊྛཱནབྷཱཝེན ཀངྑཱ, པརཏོ སུཏྭཱ ནཱམཱདིཛཱནནེན པརཝིཏཱརཎོ ཨཏྠཱིཏིཝཱདིནོ ཨཉྙཱཎཝཱདཱ, ཀངྑཱཝཱདཱ, པརཝིཏཱརཎཝཱདཱ ཙ ཏེསཾ, མཧཱསངྒྷིཀཱདཱིནཉྩ ཝིབྷཱགོ ཀཐཱཝཏྠུཔྤཀརཎེ ཝུཏྟོ.

ཙཏྟཱརོ མགྒཱ ཙ ཕལཱནི ཙཱཏི ཨེཏྠ ཙ-ཀཱརེན ཨབྷིཉྙཱཔཊིསམྦྷིདཱཔི སངྒཧིཏཱཏི དཊྛབྦཾ. ཀེཙཱིཏི པརིཡཏྟིདྷརཱ དྷམྨཀཐིཀཱ. པུན ཀེཙཱིཏི པཊིཔཏྟིདྷརཱ པཾསུཀཱུལིཀཏྠེརཱ. ཨིཏརེ པནཱཏིཨཱདཱིསུ ཨཡཾ ཨདྷིཔྤཱཡོ – དྷམྨཀཐིཀཏྠེརཱ པན པཾསུཀཱུལིཀཏྠེརེཧི ཨཱབྷཏཾ སུཏྟཾ སུཏྭཱ –

‘‘ཡཱཝ ¶ ཏིཊྛནྟི སུཏྟནྟཱ, ཝིནཡོ ཡཱཝ དིཔྤཏི;

ཏཱཝ དཀྑནྟི ཨཱལོཀཾ, སཱུརིཡེ ཨབྦྷུཊྛིཏེ ཡཐཱ.

‘‘སུཏྟནྟེསུ ཨསནྟེསུ, པམུཊྛེ ཝིནཡམྷི ཙ;

ཏམོ བྷཝིསྶཏི ལོཀེ, སཱུརིཡེ ཨཏྠངྒཏེ ཡཐཱ.

‘‘སུཏྟནྟེ རཀྑིཏེ སནྟེ, པཊིཔཏྟི ཧོཏི རཀྑིཏཱ;

པཊིཔཏྟིཡཾ ཋིཏོ དྷཱིརོ, ཡོགཀྑེམཱ ན དྷཾསཏཱི’’ཏི. (ཨ. ནི. ཨཊྛ. ༡.༡.༡༣༠) –

ཨིདཾ སུཏྟཾ ཨཱཧརིཏྭཱ ཨཏྟནོཝ ཝཱདཾ པཏིཊྛཔེནྟཱ པཱརཱཛིཀཱནཱཔཛྫནཝསེན ཋིཏཱ པཊིཔཏྟིསངྒཧིཏཱ པརིཡཏྟིཡེཝ མཱུལནྟི ཨཱཧཾསཱུཏི. ཏེནཱཧ ‘‘སཙེ པཉྩ བྷིཀྑཱུ ཙཏྟཱརི པཱརཱཛིཀཱནི རཀྑཎཀཱ…པེ… སཱསནཾ ཝུཌྜྷིཾ ཝིརུལ༹ྷིཾ གམཡིསྶནྟཱི’’ཏི. ཨེཏེན ཙ པརིཀྑཱིཎེ ཀཱལེ ལཛྫིགཎཾ ཨལབྷནྟེན ཝིནཡདྷརེན ཨལཛྫིནོཔི པཀཏཏྟེ སངྒཧེཏྭཱ ཏེཧི སཧ དྷམྨཱམིསསམྦྷོགཾ སཾཝཱསཾ ཀརོནྟེན བཧཱུ ཀུལཔུཏྟེ ཨུཔསམྤཱདེཏྭཱ སཱསནཾ ¶ པགྒཧེཏུཾ ཝཊྚཏཱིཏི ཨིདཾ སིཛ྄ཛྷཏཱིཏི དཊྛབྦཾ. གརཧིཏུཀཱམཏཱ, ཨུཔསམྤནྣསྶ སནྟིཀེ སིཀྑཱཔདཝིཝཎྞནནྟི དྭེ ཨངྒཱནི.

ཝིལེཁནསིཀྑཱཔདཝཎྞནཱ ནིཊྛིཏཱ.

༣. མོཧནསིཀྑཱཔདཝཎྞནཱ

༤༤༤. ཏཏིཡེ པཱལི༹ཡཾ ཀོ པན ཝཱདོ བྷིཡྻོཏི ཏེཧི ཨཉྙེཧི བྷིཀྑཱུཧི དིཊྛདྭཏྟིཝཱརཏོ བྷིཡྻོ པན ཝིཏྠཱརེན ཨུདྡིསིཡམཱནེ པཱཏིམོཀྑེ ནིསིནྣཔུབྦཏཱ ཨཏྠི ཙེ, ཏཏྠ ཀིམེཝ ཝཏྟབྦཾ, ཨཱཔཏྟིམོཀྑོ ནཏྠི ཨེཝཱཏི ཨདྷིཔྤཱཡོ. ཏཉྩ ཡཐཱདྷམྨོ ཀཱརེཏབྦོཏི ཏནྟི ཀཱརཎཏྠེ ཨུཔཡོགཝཙནཾ, ཏཱཡཱཏི ཨཏྠོ. ཡཐཱ དྷམྨོ ཙ ཝིནཡོ ཙ ཋིཏོ, ཏཐཱ ཏཱཡ ཨཱཔཏྟིཡཱ ཀཱརེཏབྦོཏི ཝུཏྟཾ ཧོཏི. མོཧཱརོཔནཾ, ཏིཀྑཏྟུཾ སུཏབྷཱཝོ, མོཧེཏུཀཱམསྶ མོཧནནྟི ཏཱིཎི ཨངྒཱནི.

མོཧནསིཀྑཱཔདཝཎྞནཱ ནིཊྛིཏཱ.

༤. པཧཱརསིཀྑཱཔདཝཎྞནཱ

༤༥༡. ཙཏུཏྠེ ¶ པཱལི༹ཡཾ ཀཱཡཔཊིབདྡྷེན ཝཱཏི ཨེཏྠ པཱསཱཎཱདིནིསྶགྒིཡཔཧཱརོཔི སངྒཧིཏོ.

༤༥༢. རཏྟཙིཏྟོཏི ཀཱཡསཾསགྒརཱགེན ཝུཏྟཾ. མེཐུནརཱགེན པན པཧཱརཏོ པུརིསཱདཱིསུ དུཀྐཊམེཝ. མོཀྑཱདྷིཔྤཱཡེན དཎྜཀོཊིཡཱ སཔྤཱདིཾ གྷཊྚེཏྭཱ མཎྜཱུཀཱདིཾ མོཙེནྟསྶཔི ཨནཱཔཏྟི ཨེཝ. ཀུཔིཏཏཱ, ཨུཔསམྤནྣསྶ ན མོཀྑཱདྷིཔྤཱཡེན པཧཱརོཏི དྭེ ཨངྒཱནི.

པཧཱརསིཀྑཱཔདཝཎྞནཱ ནིཊྛིཏཱ.

༥. ཏལསཏྟིཀསིཀྑཱཔདཝཎྞནཱ

༤༥༧. པཉྩམེ ¶ ན པཧརིཏུཀཱམཏཱཡ དིནྣཏྟཱ དུཀྐཊནྟི ཨེཏྠ ཀིམིདཾ དུཀྐཊཾ, པཧཱརཔཙྩཡཱ, ཨུདཱཧུ ཨུགྒིརཎཔཙྩཡཱཏི? ཨུགྒིརཎཔཙྩཡཱཝ, ན པཧཱརཔཙྩཡཱ. ན ཧི པཧརིཏུཀཱམཏཱཡ ཨསཏི ཏཔྤཙྩཡཱ ཀཱཙི ཨཱཔཏྟི ཡུཏྟཱ, ཨུགྒིརཎསྶ པན ཨཏྟནོ སབྷཱཝེན ཨསཎྛིཏཏྟཱ ཏཔྤཙྩཡཱ པཱཙིཏྟིཡཾ ན ཛཱཏཾ, ཨསུདྡྷཙིཏྟེན ཀཏཔཡོགཏྟཱ ཙ ཨེཏྠ ཨནཱཔཏྟི ན ཡུཏྟཱཏི དུཀྐཊཾ ཝུཏྟནྟི གཧེཏབྦཾ.

༤༥༨. པུབྦེཏི ཨནནྟརསིཀྑཱཔདེ. སེསཾ ཨནནྟརསདིསམེཝ.

ཏལསཏྟིཀསིཀྑཱཔདཝཎྞནཱ ནིཊྛིཏཱ.

༦. ཨམཱུལཀསིཀྑཱཔདཝཎྞནཱ

༤༥༩. ཚཊྛེ ‘‘ཨཏྟཔརིཏྟཱཎཾ ཀརོནྟཱ’’ཏི ཨིདཾ ན ཙ ཝེརམཱུལིཀཱ ཨནུདྡྷཾསནཱཏི དསྶནཏྠཾ ཝུཏྟཾ. ཨནུདྡྷཾསནཀྑཎེ པན ཀོཔཙིཏྟམེཝ ཨུཔྤཛྫཏི. ཏེནེཝ ‘‘དུཀྑཝེདན’’ནྟི ཝུཏྟཾ. སེསཾ ཝུཏྟནཡམེཝ.

ཨམཱུལཀསིཀྑཱཔདཝཎྞནཱ ནིཊྛིཏཱ.

༧. ཀུཀྐུཙྩུཔྤཱདནསིཀྑཱཔདཝཎྞནཱ

༤༦༤. སཏྟམེ ¶ ཨུཔསམྤནྣསྶ ཨཕཱསུཀཱམཏཱ, ཀུཀྐུཙྩུཔྤཱདནནྟི དྭེ ཨངྒཱནི.

ཀུཀྐུཙྩུཔྤཱདནསིཀྑཱཔདཝཎྞནཱ ནིཊྛིཏཱ.

༨. ཨུཔསྶུཏིསིཀྑཱཔདཝཎྞནཱ

༤༧༡. ཨཊྛམེ སུཡྻཏཱིཏི སུཏི, ཝཙནཾ. ཏསྶཱ སམཱིཔཾ ཨུཔསྶུཏི. སུཡྻཏི ཨེཏྠཱཏི སུཏཱིཏི ཨེཝཉྷི ཨཏྠེ གཡ྄ཧམཱནེ སཝནཊྛཱནསམཱིཔེ ཨཉྙསྨིཾ ཨསྶཝནཊྛཱནེ ཏིཊྛཏཱིཏི ཨཱཔཛྫཏི. ཨཊྛཀཐཱཡཉྩ ཨུཔསྶུཏི-སདྡསྶེཝ ཨཏྠཾ དསྶེཏུཾ ‘‘ཡཏྠ ཋཏྭཱ’’ཏིཨཱདི ཝུཏྟཾ, ན སུཏི-སདྡམཏྟསྶ.

༤༧༣. ཨེཀཔརིཙྪེདཱནཱིཏི ¶ ཀདཱཙི ཨཀིརིཡཏོ, ཀདཱཙི ཀིརིཡཏོ སམུཊྛཱནསཱམཉྙེན ཝུཏྟཾ. ཨུཔསམྤནྣེན ཙོདནཱདྷིཔྤཱཡོ, སཝནནྟི དྭེ ཨངྒཱནི.

ཨུཔསྶུཏིསིཀྑཱཔདཝཎྞནཱ ནིཊྛིཏཱ.

༩. ཁིཡྻནསིཀྑཱཔདཝཎྞནཱ

༤༧༤. ནཝམེ དྷམྨཀམྨཏཱ, ཛཱནནཾ, ཚནྡཾ དཏྭཱ ཁིཡྻནནྟི ཏཱིཎི ཨངྒཱནི.

ཁིཡྻནསིཀྑཱཔདཝཎྞནཱ ནིཊྛིཏཱ.

༡༠. པཀྐམནསིཀྑཱཔདཝཎྞནཱ

༤༨༡. དསམེ ཝིནིཙྪཡཀཐཱཡ དྷམྨིཀཏཱ, ཏཾ ཉཏྭཱ ཀམྨཏོ པཊྛཱཡ ཨེཀསཱིམཊྛསྶ སམཱནསཾཝཱསིཀསྶ ཧཏྠཔཱསཝིཛཧནནྟི དྭེ ཨངྒཱནི.

པཀྐམནསིཀྑཱཔདཝཎྞནཱ ནིཊྛིཏཱ.

༡༡. དུབྦལསིཀྑཱཔདཝཎྞནཱ

༤༨༤. ཨེཀཱདསམེ ¶ ཨུཔསམྤནྣསྶ དྷམྨེན ལདྡྷསམྨུཏིཏཱ, སངྒྷེན སདྡྷིཾ ཙཱིཝརཾ དཏྭཱ ཁིཡྻིཏུཀཱམཏཱཡ ཁིཡྻནནྟི དྭེ ཨངྒཱནི.

དུབྦལསིཀྑཱཔདཝཎྞནཱ ནིཊྛིཏཱ.

༤༨༩. དྭཱདསམཾ ཝུཏྟནཡམེཝ.

ནིཊྛིཏོ སཧདྷམྨིཀཝགྒོ ཨཊྛམོ.

༩. རཱཛཝགྒོ

༡. ཨནྟེཔུརསིཀྑཱཔདཝཎྞནཱ

༤༩༩. ནཝམཝགྒསྶ ¶ པཋམེ པཱལི༹ཡཾ སཾསུདྡྷགཧཎིཀོཏི ཨེཏྠ གཧཎཱིཏི གབྦྷཱསཡསཉྙིཏོ མཱཏུ ཀུཙྪིཔྤདེསོ, པུརིསནྟརསུཀྐཱསམྥུཊྛཏཱཡ སཾསུདྡྷགཧཎིཀོ. ཨབྷིསིཏྟཁཏྟིཡཏཱ, ཨུབྷིནྣམྤི སཡནིགྷརཏོ ཨནིཀྑནྟཏཱ, ཨཔྤཊིསཾཝིདིཏསྶ ཨིནྡཁཱིལཱཏིཀྐམོཏི ཏཱིཎི ཨངྒཱནི.

ཨནྟེཔུརསིཀྑཱཔདཝཎྞནཱ ནིཊྛིཏཱ.

༢. རཏནསིཀྑཱཔདཝཎྞནཱ

༥༠༦. དུཏིཡེ ཨཱཝསཐསྶཱཏི ཨེཏྠ ཨནྟོཨཱརཱམེ ཝཱ ཧོཏུ ཨཉྙཏྠ ཝཱ, ཡཏྠ ཀཏྠཙི ཨཏྟནོ ཝསནཊྛཱནཾ ཨཱཝསཐོ ནཱམ. ཚནྡེནཔི བྷཡེནཔཱིཏི ཝཌྜྷཀིཨཱདཱིསུ ཚནྡེན, རཱཛཝལླབྷེསུ བྷཡེན. ཨཱཀིཎྞམནུསྶེཔི ཛཱཏེ…པེ… ཨཱསངྐནྟཱིཏི ཏསྨིཾ ནིམྨནུསྶཊྛཱནེ པཙྪཱ ཨཱཀིཎྞམནུསྶེ ཛཱཏེཔི ཝིསརིཏྭཱ གམནཀཱལེ ཨཉྙསྶ ཨདིཊྛཏྟཱ ཏམེཝ བྷིཀྑུཾ ཨཱསངྐནྟི. པཏིརཱུཔཾ ནཱམ ཀཔྤིཡབྷཎྜེ སཡཾ པཾསུཀཱུལཾ གཧེཏྭཱ ཨཀཔྤིཡབྷཎྜེ པཏིརཱུཔཱནཾ ཨུཔཱསཀཱདཱིནཾ ¶ དསྶེཏྭཱ ཙེཏིཡཱདིཔུཉྙེ ནིཡོཛནཾ ཝཱ དཱཔེཏྭཱ ནིརཔེཀྑགམནཾ ཝཱ. སམཱདཔེཏྭཱཏི ཡཱཙིཏྭཱ. པརསནྟཀཏཱ, ཝིསྶཱསགྒཱཧཔཾསུཀཱུལསཉྙཱནཾ ཨབྷཱཝོ, ཨནནུཉྙཱཏཀཱརཎཱ ཨུགྒཧཎཱདི ཙཱཏི ཏཱིཎི ཨངྒཱནི.

རཏནསིཀྑཱཔདཝཎྞནཱ ནིཊྛིཏཱ.

༣. ཝིཀཱལགཱམཔྤཝིསནསིཀྑཱཔདཝཎྞནཱ

༥༠༨. ཏཏིཡེ པཱལི༹ཡཾ བྷཡཀཐནྟི རཱཛཙོརཱདིབྷཡཾ ཝཱ རོགཱམནུསྶདུབྦྷིཀྑཀནྟཱརཱདིབྷཡཾ ཝཱ ཨཱརབྦྷ པཝཏྟཾ. ཝིསིཁཱཀཐནྟི སུནིཝིཊྛཱདིཝཱིཐིཀཐཾ. ཀུམྦྷཊྛཱནཀཐནྟི ཨུདཀཏིཏྠཀཐཾ, ཀུམྦྷདཱསཱིཀཐཾ ཝཱ. པུབྦཔེཏཀཐནྟི ཨཏཱིཏཉཱཏིཀཐཾ. ནཱནཏྟཀཐནྟི ཝུཏྟཱཧི, ཝཀྑམཱནཱཧི ཙ ཝིམུཏྟཾ ནཱནཱསབྷཱཝཾ ¶ ནིརཏྠཀཀཐཾ. ལོཀཀྑཱཡིཀནྟི ‘‘ཨཡཾ ལོཀོ ཀེན ནིམྨིཏོ’’ཏིཨཱདིནཱ ལོཀསབྷཱཝཀྑཱནཝསེན པཝཏྟནཀཐཱ. ཨེཝཾ སམུདྡཀྑཱཡིཀཱ ཝེདིཏབྦཱ. ཨིཏི བྷཝོ ཨིཏི ཨབྷཝོཏི ཡཾ ཝཱ ཏཾ ཝཱ ནིརཏྠཀཀཱརཎཾ ཝཏྭཱ པཝཏྟིཏཀཐཱ ཨིཏིབྷཝཱབྷཝཀཐཱ. ཨེཏྠ ཙ བྷཝོ སསྶཏཾ, ཝུཌྜྷི, ཀཱམསུཁཉྩཱཏི ཏིཝིདྷོ, ཨབྷཝོ ཏབྦིཔརཱིཏཝསེན. ཨིཏི ཨིམཱཡ ཚབྦིདྷཱཡ ཨིཏིབྷཝཱབྷཝཀཐཱཡ སདྡྷིཾ དྭཏྟིཾསཏིརཙྪཱནཀཐཱ ནཱམ ཧོནྟི. ཨཐ ཝཱ པཱལི༹ཡཾ སརཱུཔཏོ ཨནཱགཏཱཔི ཨརཉྙཔབྦཏནདཱིདཱིཔཀཐཱ ཨིཏི-སདྡེན སངྒཧེཏྭཱ དྭཏྟིཾསཏིརཙྪཱནཀཐཱཏི ཝུཙྩནྟི. ཨིཏི ཝཱཏི ཨེཏྠ ཨིཏི-སདྡོ པཀཱརཏྠེ. ཝཱ-སདྡོ ཝིཀཔྤཏྠེ. ཏསྨཱ ཨེཝཾ པཀཱརཾ ཨིཏོ ཨཉྙཾ ཝཱ ཏཱདིསཾ ནིརཏྠཀཀཐཾ ཀཐེཏཱིཏི ཨཏྠོ གཧེཏབྦོ.

༥༡༢. ཨུསྶཱཧཾ པཊིཔྤསྶམྦྷེཏྭཱ ཝིཧཱརཾ གཙྪནྟཱཏི ཨེཏྠ གཱམཱུཔཙཱརཏོ བཧི ནིཀྑནྟེ ཨནྟརཱརཱམཱདཱིནམུཔཙཱརཾ པཝིཊྛེ སནྡྷཱཡ ཝུཏྟཾ. གཱམཱུཔཙཱརབྦྷནྟརེ པན པཊིཔསྶདྡྷུསྶཱཧཱནམྤི པུན ཏམེཝ ཝཱ ཨཉྙཾ ཝཱ གཱམཾ པཝིསིཏུཀཱམཏཱཡ སཏི ཨཱཔུཙྪནཀིཙྩཾ ནཏྠི. ‘‘ཀུལགྷརེ ཝཱ…པེ… གནྟབྦ’’ནྟི ཨིདཾ པན པུརེབྷཏྟཾ པཝིཊྛཱནཾ ཝིཀཱལེ སཉྫཱཏེ ཝིཀཱལེ གཱམཔྤཝེསསྶ ཨཱཔུཙྪིཏབྦཏཱཡ ཝུཏྟཾ. ཨདིནྣཱདཱནེ ཝུཏྟནཡེནཱཏི དུཏིཡལེཌྜུཔཱཏཾ སནྡྷཱཡ ཝུཏྟཾ.

༥༡༥. ཨནྟརཱརཱམནྟིཨཱདཱིསཱུཏི ཨེཏྠ ཨུསྶཝདིཝསཱདཱིསུ མནུསྶེཧི གཱམེ པདཀྑིཎཾ ཀཱརེནྟཾ ཛིནབིམྦཱདིཾ པཱུཛེཏུཀཱམེཧི ཝཱ རོགཝཱུཔསམཱདིཡཏྠཾ མནུསྶེཧི ཡཱཙིཏེཧི ཝཱ བྷིཀྑཱུཧི སུཔྤཊིཙྪནྣཱདིཝིདྷིཾ ཨཀཏྭཱཔི ཝཱིཐིམཛ྄ཛྷེནེཝ གཱམཾ པདཀྑིཎཾ ཀཱཏུཾ ཝཊྚཏཱིཏི ཝདནྟི, ཏཾ ན ¶ གཧེཏབྦཾ ཨནཱཔཏྟིཝཱརེ ཨཝུཏྟཏྟཱ, ‘‘མགྒཱ ཨནོཀྐམིཏྭཱ…པེ… པཱཙིཏྟིཡ’’ནྟི (ཀངྑཱ. ཨཊྛ. ཝིཀཱལགཱམཔྤཝེསནསིཀྑཱཔདཝཎྞནཱ) པཊིཀྑིཏྟཏྟཱ ཙ. ཝེསཱལིཾ ཨནུཔརིཡཱཡིཏྭཱ པརིཏྟཾ ཀརོནྟེནཱཔི ཨཱནནྡཏྠེརེན སུཔྤཊིཙྪནྣཏཱདིཾ ཨཀོཔེནྟེནེཝ, ཨཔཉྙཏྟེ ཝཱ སིཀྑཱཔདེ ཀཏནྟི དཊྛབྦཾ. ཀེཙི པན ‘‘ཨནྟརཱརཱམཱདིགཱམནྟརེ ཋིཏེཧི གརུཊྛཱནཱིཡཱནཾ པཙྩུགྒམནཱནུགྒམནཱདིཝསེན གཱམཝཱིཐིཾ ཨོཏརིཏུཾ ཝཊྚཏཱི’’ཏི ཝདནྟི, ཏམྤི ཨནྟརགྷརཾ པཝིསནྟཾ པཏི ཀཱཏུཾ ན ཝཊྚཏི ཨེཝ. ཨནྟརཱརཱམཱདིཀཔྤིཡབྷཱུམིཾ པན ཨུདྡིསྶ གཙྪནྟཾ པཏི ཀཱཏུཾ ཝཊྚཏཱིཏི ཁཱཡཏི, ཝཱིམཾསིཏབྦཾ. སནྟཾ བྷིཀྑུཾ ཨནཱཔུཙྪནཱ ¶ , ཨནནུཉྙཱཏཀཱརཎཱ ཝིཀཱལེ གཱམཔྤཝེསོཏི དྭེ ཨངྒཱནི.

ཝིཀཱལགཱམཔྤཝིསནསིཀྑཱཔདཝཎྞནཱ ནིཊྛིཏཱ.

༤. སཱུཙིགྷརསིཀྑཱཔདཝཎྞནཱ

༥༢༠. ཙཏུཏྠེ པཱལི༹ཡཾ ཝཱསིཛཊེཏི ཝཱསིདཎྜཀེ. ཨཊྛིམཡཱདིསཱུཙིགྷརཏཱ, ཀརཎཀཱརཱཔནཱདིཝསེན ཨཏྟནོ པཊིལཱབྷོཏི དྭེ ཨངྒཱནི.

སཱུཙིགྷརསིཀྑཱཔདཝཎྞནཱ ནིཊྛིཏཱ.

༥. མཉྩཔཱིཋསིཀྑཱཔདཝཎྞནཱ

༥༢༡. པཉྩམེ པཱལི༹ཡཾ ཨཱསཡཏོ, བྷིཀྑཝེ, མོགྷཔུརིསོ ཝེདིཏབྦོཏི ཧཱིནཛ྄ཛྷཱསཡཝསེན ཨཡཾ ཏུཙྪཔུརིསོཏི ཉཱཏབྦོ, ཧཱིནཱཡ པཙྩཡེ ལོལཏཱཡ པུགྒལསྶ ཏུཙྪཏཱ ཉཱཏབྦཱཏི ཨདྷིཔྤཱཡོ. ཨིམསྨིཾ སིཀྑཱཔདེ, ཨིཏོ པརེསུ ཙ པཉྩསུ ཨཏྟནཱ ཀཱརཱཔིཏསྶ པཊིལཱབྷེ ཨེཝ པཱཙིཏྟིཡཾ. པརིབྷོགེ པནསྶ, ཨཉྙེསཉྩ དུཀྐཊམེཝ. པམཱཎཱཏིཀྐནྟམཉྩཔཱིཋཏཱ, ཨཏྟནོ ཀརཎཀཱརཱཔནཝསེན པཊིལཱབྷོཏི དྭེ ཨངྒཱནི.

མཉྩཔཱིཋསིཀྑཱཔདཝཎྞནཱ ནིཊྛིཏཱ.

༦. ཏཱུལོནདྡྷསིཀྑཱཔདཝཎྞནཱ

༥༢༦. ཚཊྛེ ¶ པོཊཀིཏཱུལནྟི ཏིཎགཙྪཛཱཏིཀཱནཾ ཏཱུལཾ. སེསཾ ཝུཏྟནཡམེཝ.

ཏཱུལོནདྡྷསིཀྑཱཔདཝཎྞནཱ ནིཊྛིཏཱ.

༧. ནིསཱིདནསིཀྑཱཔདཝཎྞནཱ

༥༣༡-༥༣༦. སཏྟམེ ¶ ནིསཱིདནསྶ པམཱཎཱཏིཀྐནྟཏཱ, ཨཏྟནོ ཀརཎཱདིནཱ པཊིལཱབྷོཏི དྭེ ཨངྒཱནི.

ནིསཱིདནསིཀྑཱཔདཝཎྞནཱ ནིཊྛིཏཱ.

༥༣༧-༥༤༧. ཨིམིནཱ ནཡེན ཨཊྛམནཝམདསམེསུཔི ཨངྒཱནི ཝེདིཏབྦཱནི. སེསཾ སབྦཏྠ སུཝིཉྙེཡྻམེཝཱཏི.

ནིཊྛིཏོ རཱཛཝགྒོ ནཝམོ.

ཁུདྡཀཝཎྞནཱནཡོ ནིཊྛིཏོ.

༦. པཱཊིདེསནཱིཡཀཎྜཾ

༡. པཋམཔཱཊིདེསནཱིཡསིཀྑཱཔདཝཎྞནཱ

༥༥༣. པཱཊིདེསནཱིཡེསུ ¶ ¶ པཋམེ པཊིདེསེཏབྦཱཀཱརདསྶནནྟི ཨེཝཾ ཨཱཔཏྟིཾ ནཝཀསྶ སནྟིཀེ དེསེཏབྦཱཀཱརདསྶནཾ. ཨིམིནཱ ལཀྑཎེན སམྦཧུལཱནཾ ཨཱཔཏྟཱིནམྤི ཝུཌྜྷསྶ སནྟིཀེ ཙ དེསེཏབྦཱཀཱརོ སཀྐཱ ཝིཉྙཱཏུནྟི. ཏཏྲཱཡཾ ནཡོ – ‘‘གཱརཡ྄ཧེ, ཨཱཝུསོ, དྷམྨེ ཨཱཔཛྫིཾ ཨསཔྤཱཡེ པཱཊིདེསནཱིཡེ’’ཏི ཨེཝཾ སམྦཧུལཱསུ. ཝུཌྜྷསྶ པན སནྟིཀེ ‘‘གཱརཡ྄ཧཾ, བྷནྟེ, དྷམྨཾ…པེ… གཱརཡ྄ཧེ, བྷནྟེ, དྷམྨེ’’ཏི ཡོཛནཱ ཝེདིཏབྦཱ. ཏཏྠ ཨསཔྤཱཡནྟི སགྒམོཀྑནྟརཱཡཀརནྟི ཨཏྠོ. ཨཉྙཱཏིཀཱཡ བྷིཀྑུནིཡཱ ཨནྟརགྷརེ ཋིཏཱཡ ཧཏྠཏོ སཧཏྠཱ ཡཱཝཀཱལིཀགྒཧཎཾ, ཨཛ྄ཛྷོཧརཎནྟི དྭེ ཨངྒཱནི.

པཋམཔཱཊིདེསནཱིཡསིཀྑཱཔདཝཎྞནཱ ནིཊྛིཏཱ.

༥༥༨. དུཏིཡེ པརིཔུཎྞཱུཔསམྤནྣཱཡ ཨནནུཉྙཱཏཱཀཱརེན ཝོསཱསནཱ, ཨནིཝཱརེཏྭཱ བྷོཛནཛ྄ཛྷོཧཱརོཏི དྭེ ཨངྒཱནི.

༥༦༣. ཏཏིཡེ སེཀྑསམྨཏཏཱ, གྷརཱུཔཙཱརེ ཨནིམནྟིཏཏཱ, གིལཱནསྶ ཨནིཙྩབྷཏྟཱདིཾ གཧེཏྭཱ བྷུཉྫནནྟི ཏཱིཎི ཨངྒཱནི.

༥༧༠. ཙཏུཏྠེ སཱསངྐཱརཉྙསེནཱསནཏཱ, ཨནནུཉྙཱཏཾ ཡཱཝཀཱལིཀཾ ཨཔྤཊིསཾཝིདིཏཾ ཨཛ྄ཛྷཱརཱམེ པཊིགྒཧེཏྭཱ ཨགིལཱནསྶ ཨཛ྄ཛྷོཧརཎནྟི དྭེ ཨངྒཱནི. སེསཾ ཨུཏྟཱནམེཝ.

པཱཊིདེསནཱིཡཝཎྞནཱནཡོ ནིཊྛིཏོ.

༧. སེཁིཡཀཎྜཾ

༡. པརིམཎྜལཝགྒཝཎྞནཱ

༥༧༦. སེཁིཡེསུ ¶ ¶ ཡསྨཱ ཝཏྟཀྑནྡྷཀེ (ཙཱུལ༹ཝ. ༣༥༦ ཨཱདཡོ) ཝུཏྟཝཏྟཱནིཔི སིཀྑིཏབྦཏྟཱ སེཁིཡཱནེཝ, ཏསྨཱ པཱརཱཛིཀཱདཱིསུ ཝིཡེཏྠ པཱལི༹ཡཾ པརིཙྪེདོ ན ཀཏོ. ཙཱརིཏྟནཡདསྶནཏྠཉྩ ‘‘ཡོ པན བྷིཀྑུ ཨོལམྦེནྟོ ནིཝཱསེཡྻ, དུཀྐཊ’’ནྟི ཨཝཏྭཱ ‘‘སིཀྑཱ ཀརཎཱིཡཱ’’ཏི སབྦཏྠ པཱལི༹ ཨཱརོཔིཏཱ. པདབྷཱཛནེ པན ‘‘ཨཱཔཏྟི དུཀྐཊསྶཱ’’ཏི ཝུཏྟཏྟཱ སབྦཏྠ ཨནཱདརིཡཀརཎེ དུཀྐཊཾ ཝེདིཏབྦཾ.

ཨཊྛངྒུལམཏྟནྟི མཏྟ-སདྡེན ཏཏོ ཀིཉྩི ཨདྷིཀཾ, ཨཱུནམྤི སངྒཎྷཱཏི. ཏེནེཝ ནིསིནྣསྶ ཙཏུརངྒུལམཏྟམྤི ཝུཏྟཾ. ན ཧི ནིསིནྣསྶ ཙཏུརངྒུལཔྤམཱཎཾ, ཋིཏསྶ ཨཊྛངྒུལམེཝཱཏི སཀྐཱ ནིཡམེཏུཾ ཨཱུནཱདྷིཀཏྟསམྦྷཝཏོ. ཏསྨཱ ཡཐཱ སཱརུཔྤཾ ཧོཏི ཨེཝཾ ཨཊྛངྒུལཱནུསཱརེན ནིཝཱསནཉྙེཝ ཨདྷིཔྤེཏནྟི གཧེཏབྦཾ. ཏེནེཝ ཝཀྑཏི ‘‘ཡོ པན བྷིཀྑུ སུཀྑཛངྒྷོ ཝཱ’’ཏིཨཱདི. ཀུརུནྡིཡཾ ‘‘ཨཛཱནནྟསྶ ཨནཱཔཏྟཱི’’ཏི ཨཱདརཾ ཀཏྭཱ ཨུགྒཎྷནྟསྶཱཔི ཨཛཱནནཾ སནྡྷཱཡ ཝུཏྟཾ. ཏེནཱཔི ནིརནྟརཾ ནིཝཱསནཔཱརུཔནཝཏྟཾ སིཀྑིཏབྦཾ, ཨསིཀྑིཏོ ཨནཱདརིཡམེཝ. པརིམཎྜལགྒཧཎེན ཨུཀྑིཔིཏྭཱ ནིཝཱསནམྤི པཊིཀྑིཏྟནྟི ཨཱཧ ‘‘ཨུཀྑིཔིཏྭཱ ཝཱ ཨོཏཱརེཏྭཱ ཝཱ’’ཏི.

སཙིཏྟཀནྟི ཝཏྠུཝིཛཱནནཙིཏྟེན སཙིཏྟཀཾ. སཱརཏྠདཱིཔནིཡཾ པན ཨུཔཏིསྶཏྠེརཝཱདནཡེན ལོཀཝཛྫཏྟཾ གཧེཏྭཱ ‘‘ཝཏྠུཝིཛཱནནཙིཏྟེན, པཎྞཏྟིཝིཛཱནནཙིཏྟེན ཙ སཙིཏྟཀ’’ནྟི (སཱརཏྠ. ཊཱི. སེཁིཡཀཎྜ ༣.༥༧༦) ཝུཏྟཾ. ཏཏྠ ཙ ཝཏྠུཝིཛཱནནཾ ཝིསུཾ ན ཝཏྟབྦཾ. པཎྞཏྟིཝིཛཱནནེན ཏསྶཱཔི ཨནྟོགདྷབྷཱཝཏོ ཨིདཾ ཝཏྠུཾ ཨེཝཾ ཝཱིཏིཀྐམནྟསྶ ཨཱཔཏྟཱིཏི ཝིཛཱནནྟོ ཧི པཎྞཏྟིཾ ཝིཛཱནཱཏཱིཏི ཝུཙྩཏི. ཨུཔཏིསྶཏྠེརཝཱདེ ཙེཏྠ པཎྞཏྟིཾ ཨཛཱནིཏྭཱ ཨཔརིམཎྜལནིཝཱསནཱདིཝཏྠུམེཝ ¶ ཛཱནནྟསྶ པཎྞཏྟིཝཱིཏིཀྐམཱནཱདརིཡཱབྷཱཝཱ སབྦསེཁིཡེསུ ཨནཱཔཏྟི ཨེཝ ཨབྷིམཏཱ, ཏཉྩ ན ཡུཏྟཾ ཀོསམྦཀྑནྡྷཀེ (མཧཱཝ. ༤༥༡ ཨཱདཡོ) ཝཙྩཀུཊིཡཾ ཨུདཀཱཝསེསཾ ཋཔེནྟསྶ པཎྞཏྟིཝིཛཱནནཱབྷཱཝེཔི ཨཱཔཏྟིཡཱ ཝུཏྟཏྟཱ. ཝུཏྟཉྷི ཏཏྠ ‘‘ཏེན ཁོ པན སམཡེན ཨཉྙཏརོ བྷིཀྑུ ཨཱཔཏྟིཾ ཨཱཔནྣོ ཧོཏི ¶ …པེ… སོ ཨཔརེན སམཡེན ཏསྶཱ ཨཱཔཏྟིཡཱ ཨནཱཔཏྟིདིཊྛི ཧོཏཱི’’ཏིཨཱདི (མཧཱཝ. ༤༥༡). ཨཊྛཀཐཱཡཉྩསྶ ‘‘ཏྭཾ ཨེཏྠ ཨཱཔཏྟིབྷཱཝཾ ན ཛཱནཱསཱིཏི, ཨཱམ ན ཛཱནཱམཱིཏི. ཧོཏུ ཨཱཝུསོ, ཨེཏྠ ཨཱཔཏྟཱིཏི, སཙེ ཧོཏི, དེསེསྶཱམཱིཏི. སཙེ པན ཏེ, ཨཱཝུསོ, ཨསཉྩིཙྩ ཨསཏིཡཱ ཀཏཾ, ནཏྠི ཨཱཔཏྟཱིཏི. སོ ཏསྶཱ ཨཱཔཏྟིཡཱ ཨནཱཔཏྟིདིཊྛི ཨཧོསཱི’’ཏི (མཧཱཝ. ཨཊྛ. ༤༥༡) ཝུཏྟཾ, ཏཐཱ ‘‘ཨདྷམྨཝཱདཱིཏི ཨུཀྑིཏྟཱནུཝཏྟཀེསུ ཨཉྙཏརོ’’ཏི (མཧཱཝ. ཨཊྛ. ༤༥༧-༤༥༨) ཙ ཝུཏྟཾ. ཁནྡྷཀཝཏྟཱནཉྷི སེཁིཡཏྟཱ ཏཏྠ ཝུཏྟོ ནཡོ ཨིམེསཾ, ཨིདྷ ཝུཏྟོ ཙ ཏེསཾ སཱདྷཱརཎོཝ ཧོཏཱིཏི. ཏེནེཝ ‘‘ཨསཉྩིཙྩ ཨསཏིཡཱ ཀཏཾ, ནཏྠི ཨཱཔཏྟཱི’’ཏི ཨེཝཾ ཨིདྷ ཝུཏྟོ ཨཱཔཏྟིནཡོ ཏཏྠཱཔི དསྶིཏོ. ཏསྨཱ ཕུསྶདེཝཏྠེརཝཱདེ ཨེཝ ཋཏྭཱ ཝཏྠུཝིཛཱནནཙིཏྟེནེཝ སབྦསེཁིཡཱནི སཙིཏྟཀཱནི, ན པཎྞཏྟིཝིཛཱནནཙིཏྟེན. བྷིཡྻོཀམྱཏཱཡསཱུཔབྱཉྫནཔཊིཙྪཱདནཨུཛ྄ཛྷཱནསཉྙཱིཏི དྭེ སིཀྑཱཔདཱནི ལོཀཝཛྫཱནི ཨཀུསལཙིཏྟཱནི, སེསཱནི པཎྞཏྟིཝཛྫཱནི, ཏིཙིཏྟཱནི, ཏིཝེདནཱནི ཙཱཏི གཧཎམེཝ ཡུཏྟཏརཾ དིསྶཏི. ཏེནེཝེཏྠ ‘‘ཨསཉྩིཙྩཱཏི པུརཏོ ཝཱ པཙྪཏོ ཝཱ ཨོལམྦེཏྭཱ ནིཝཱསེསྶཱམཱིཏི ཨེཝཾ ཨསཉྩིཙྩཱ’’ཏིཨཱདིནཱ ཝཏྠུཨཛཱནནཝསེནེཝ ཨནཱཔཏྟིཝཎྞནཱ ཀཏཱ, ན པཎྞཏྟིཝིཛཱནནཙིཏྟཝསེན.

ཨཔིཙ ‘‘ཡསྶ སཙིཏྟཀཔཀྑེ ཙིཏྟཾ ཨཀུསལམེཝ ཧོཏི, ཏཾ ལོཀཝཛྫ’’ནྟི (ཀངྑཱ. ཨཊྛ. པཋམཔཱརཱཛིཀཝཎྞནཱ) ཨིམིནཱ ལཀྑཎཝཙནེནཱཔི ཙེཏཾ སིཛ྄ཛྷཏི. ཝཏྠུཝིཛཱནནཙིཏྟཝསེནེཝ ཧེཏྠ ‘‘སཙིཏྟཀཔཀྑེ’’ཏི ཝུཏྟཾ. ཨིཏརཐཱ པཎྞཏྟིཝིཛཱནནཙིཏྟཝསེན སབྦསིཀྑཱཔདཱནམྤི སཙིཏྟཀཔཀྑེ ཙིཏྟསྶ ཨཀུསལཏྟནིཡམེན ལོཀཝཛྫཏྟཔྤསངྒཏོ པཎྞཏྟིཝཛྫམེཝ ན སིཡཱ, ཨིདཉྩ ཝཙནཾ ནིརཏྠཀཾ སིཡཱ ཨིམིནཱ ཝཙནེན ནིཝཏྟེཏབྦསྶ སིཀྑཱཔདསྶ ཨབྷཱཝཱ. ན ཙ སེཁིཡེསུ ཝཏྠུཝིཛཱནནཙིཏྟེན སཙིཏྟཀཔཀྑེ ཙིཏྟཾ པཱཎཱཏིཔཱཏཱདཱིསུ ཝིཡ ཨཀུསལམེཝཱཏི ནིཡམོ ཨཏྠི, ཡེནེཏྠ ལོཀཝཛྫཏཱ པསཛྫེཡྻ, ‘‘ཨནཱདརིཡཾ པཊིཙྩཱ’’ཏི ཙེཏཾ པཱལི༹ཝཙནཾ ཝཏྠུཾ ཛཱནིཏྭཱ ཏཱིཧི ཙིཏྟེཧི ཝཱིཏིཀྐམམེཝ ཨནཱདརིཡཾ ཀཏྭཱ ཝུཏྟཾ, ན པཎྞཏྟིཾ ཛཱནིཏྭཱ ཨཀུསལཙིཏྟེནེཝ ཝཱིཏིཀྐམནྟི གཧེཏབྦཾ. ཨཉྙཐཱ ཁནྡྷཀཔཱལི༹ཡཱ, ཨཊྛཀཐཱཡཉྩ པུབྦཱཔརཉྩ ཝིརུཛ྄ཛྷནཏོཏི ཨམྷཱཀཾ ཁནྟི. ཡཐཱ ཝཱ ན ཝིརུཛ྄ཛྷཏི, ཏཐཱ ཨེཏྠ ཨདྷིཔྤཱཡོ གཝེསིཏབྦོ. ཨནཱདརིཡཾ, ཨནཱཔཏྟིཀཱརཎཱབྷཱཝོ ¶ , ཨཔརིམཎྜལནིཝཱསནནྟི ¶ ཨིམཱནེཏྠ ཏཱིཎི ཨངྒཱནི. ཡཐཱ ཙེཏྠ, ཨེཝཾ སབྦཏྠ. ཀེཝལཾ ཏཏྠ ཏཏྠ ཝུཏྟཔཊིཔཀྑཀརཎཝསེན ཏཏིཡངྒཡོཛནམེཝ ཝིསེསོ.

༥༧༧. དུཏིཡཱདཱིསུ གིཧིཔཱརུཏནྟི སེཏཔཊཔཱརུཏཱདི. ཝིཧཱརེཔཱིཏི སངྒྷསནྣིཔཱཏབུདྡྷུཔཊྛཱནཱདིཀཱལཾ སནྡྷཱཡ ཝུཏྟཾ.

༥༧༨. གཎྛིཀཾ པཊིམུཉྩིཏྭཱཏིཨཱདི པཊིཙྪཱདནཝིདྷིདསྶནཾ. གཱིཝཾ པཊིཙྪཱདེཏྭཱཏིཨཱདིནཱ ཝུཏྟཏྟཱ སཉྩིཙྩ གཱིཝཾ, མཎིབནྡྷནཉྩ ཨཔྤཊིཙྪཱདེནྟསྶ ཨཱཔཏྟི. ཨེཏྠཱཔི པརིམཎྜལསིཀྑཱཔདསྶ སཱདྷཱརཎཏྟཱ ཛཱཎུམཎྜལཏོ ཧེཊྛཱ ཙཏུརངྒུལམཏྟཾ ཨོཏཱརེཏྭཱ ཨནོལམྦེཏྭཱ པརིམཎྜལམེཝ པཱརུཔིཏབྦཾ.

༥༧༩. ཝིཝརིཏྭཱ ནིསཱིདཏོཏི ཝིཧཱརེ ཝིཡ ཨེཀཾསཔཱརུཔནཾ སནྡྷཱཡ ཝུཏྟཾ. ‘‘ཝཱསཏྠཱཡ ཨུཔགཏསྶཱ’’ཏི ཝུཏྟཏྟཱ ཝཱསཱདྷིཔྤཱཡཾ ཝིནཱ དྷམྨདེསནཔརིཏྟབྷཎནཱདིཨཏྠཱཡ སུཙིརམྤི ནིསཱིདནྟེན སབྦཾ ཨནྟརགྷརཝཏྟཾ པཱུརེནྟེནེཝ ནིསཱིདིཏབྦཾ. ནིསཱིདནཔཊིསཾཡུཏྟེསུ ཨེཝ ཙ སིཀྑཱཔདེསུ ‘‘ཝཱསཱུཔགཏསྶཱ’’ཏི ཨནཱཔཏྟིཡཱ ཝུཏྟཏྟཱ ཝཱསཏྠཱཡ ཨནྟརགྷརཾ ཨུཔགཙྪནྟེནཱཔི སུཔྤཊིཙྪནྣཏཱདིསབྦཾ ཨཀོཔེནྟེནེཝ གནྟབྦཾ. ‘‘ཝཱསཱུཔགཏསྶཱ’’ཏི ཧི ཝུཏྟཾ, ན པན ཨུཔགཙྪམཱནསྶཱཏི. ཀེཙི པན ‘‘ཨེཀེཀསྨིཾ པཋམཾ གནྟྭཱ ཝཱསཔརིགྒཧེ ཀཏེ ཏཏོ ཨཉྙེཧི ཡཐཱསུཁཾ གནྟུཾ ཝཊྚཏཱི’’ཏི ཝདནྟི. ཨཔརེ པན ‘‘གེཧསྶཱམིཀེཧི ‘ཡཱཝ ཏུམྷེ ནིཝསིསྶཐ, ཏཱཝ ཏུམྷཱཀཾ ཨིམཾ གེཧཾ དེམཱི’ཏི དིནྣེ ཨཉྙེཧི ཨཝཱསཱདྷིཔྤཱཡེཧི ཨནྟརཱརཱམེ ཝིཡ ཡཐཱསུཁཾ གནྟུཾ, ནིསཱིདིཏུཉྩ ཝཊྚཏཱི’’ཏི ཝདནྟི, ཏཾ སབྦཾ ན གཧེཏབྦཾ ཏཐཱཝཙནཱབྷཱཝཱ, དཱནལཀྑཎཱབྷཱཝཱ, ཏཱཝཏྟཀེན ཝིཧཱརསངྑྱཱནུཔགམནཏོ ཙ. ‘‘ཡཱཝ ནིསཱིདིསྶཐ, ཏཱཝ ཏུམྷཱཀཾ ཨིམཾ གེཧཾ དེམཱི’’ཏི དེནྟོཔི ཧི ཏཱཝཀཱལིཀམེཝ དེཏི ཝཏྠུཔརིཙྩཱགལཀྑཎཏྟཱ དཱནསྶ.

༥༨༢. ཙཏུཧཏྠཔྤམཱཎནྟི ཝཌྜྷཀཱིཧཏྠཾ སནྡྷཱཡ ཝུཏྟནྟི ཝདནྟི.

༥༨༤. ཨུཀྑིཏྟཙཱིཝརོ ¶ ཧུཏྭཱཏི ཀཊིཏོ ཨུདྡྷཾ ཀཱཡབནྡྷནཱདིདསྶནཝསེནེཝུཀྑིཔནཾ སནྡྷཱཡ ཝུཏྟཾ པིཎྜཱཡ ཙརཏོ པཏྟགྒཧཎཱདིམཏྟསྶ ཨནུཉྙཱཏཏྟཱ. ཏེནེཝ ‘‘ནིསིནྣཀཱལེ པན དྷམཀརཎ’’ནྟིཨཱདི ཝུཏྟཾ. ནིསིནྣཀཱལེ ཧི ཁནྡྷེ ལགྒཔཏྟཏྠཝིཀཱདིཏོ དྷམཀརཎཾ ནཱིཧརནྟསྶ ཀཊིཏོ ཨུདྡྷམྤི དིསྶཏི, ཏཐཱ ཨདསྶེཏྭཱ ནཱིཧརིཏབྦནྟི ཨདྷིཔྤཱཡོ. ཨཱསནེ ནིསཱིདནྟསྶཱཔི ¶ ཙ པཱརུཔིཏཙཱིཝརཾ ཀིཉྩི ཨུཀྑིཔིཏྭཱ སངྒྷཱཊིཾ ཛངྒྷཔིཎྜེཧི ཨནུཀྑིཔིཏྭཱཝ ནིསཱིདིཏབྦཾ. ཨིམསྨིཉྙེཝ པན སིཀྑཱཔདེ ‘‘ཝཱསཱུཔགཏསྶཱ’’ཏི ཝུཏྟཏྟཱ ནིསཱིདནཔཊིསཾཡུཏྟེསུ ཚཊྛཨཊྛམེསུ ཨཝུཏྟཏྟཱ ཝཱསཱུཔགཏེནཱཔི སུསཾཝུཏེན ཨོཀྑིཏྟཙཀྑུནཱཝ ནིསཱིདིཏབྦཾ. ཏེནེཝ མཱཏིཀཱཊྛཀཐཱཡམྤི ཏེསཾ ཝིསེསཾ ཨཝཏྭཱ ཨིདྷེཝ ‘‘ཝཱསཱུཔགཏསྶ པན ཨནཱཔཏྟཱི’’ཏི (ཀངྑཱ. ཨཊྛ. ཨུཀྑིཏྟཀསིཀྑཱཔདཝཎྞནཱ) ཝུཏྟཱ.

པརིམཎྜལཝགྒཝཎྞནཱ ནིཊྛིཏཱ.

༢. ཨུཛྫགྒྷིཀཝགྒཝཎྞནཱ

༥༨༦. དུཏིཡཝགྒཱདིཨུཛྫགྒྷིཀཨཔྤསདྡེསུ ནིསཱིདནཔཊིསཾཡུཏྟེསུཔི ཝཱསཱུཔགཏསྶ ཨནཱཔཏྟི ན ཝུཏྟཱ, ཀཱཡཔྤཙཱལཀཱདཱིསུ ཨེཝ པན ཝུཏྟཱ. པཱལི༹པོཏྠཀེསུ པནེཏཾ ཀེསུཙི པེཡྻཱལེན བྱཱམོཧིཏཏྟཱ ན སུཊྛུ ཝིཉྙཱཡཏི. ཡཏྠ ཙ ཨནྟརགྷརེ དྷམྨཾ ཝཱ དེསེནྟསྶ, པཱཏིམོཀྑཾ ཝཱ ཨུདྡིསནྟསྶ མཧཱསདྡེན ཡཱཝཔརིསསཱཝནེཔི ཨནཱཔཏྟི ཨེཝཱཏི དཊྛབྦཾ ཏཐཱ ཨཱནནྡཏྠེརམཧིནྡཏྠེརཱདཱིཧི ཨཱཙརིཏཏྟཱ.

ཨུཛྫགྒྷིཀཝགྒཝཎྞནཱ ནིཊྛིཏཱ.

༣. ཁམྦྷཀཏཝགྒཝཎྞནཱ

༦༠༣. པཏྟེ གཧཎསཉྙཱ ཨསྶ ཨཏྠཱིཏི པཏྟསཉྙཱིཏི ཨིམམཏྠཾ དསྶེཏུཾ ‘‘པཏྟེ སཉྙཾ ཀཏྭཱ’’ཏི ཝུཏྟཾ.

༦༠༤. ཨོལོཎཱིཏི ཨེཀཱ བྱཉྫནཝིཀཏི. ཀཉྫིཀཏཀྐཱདིརསོཏི ཀེཙི. མཾསརསཱདཱིནཱིཏི ཨཱདི-སདྡེན ཨཝསེསཱ སབྦཱཔི བྱཉྫནཝིཀཏི སངྒཧིཏཱ.

༦༠༥. སམབྷརིཏནྟི ¶ རཙིཏཾ. ཧེཊྛཱ ཨོརོཧཏཱིཏི སམནྟཱ ཨོཀཱསསམྦྷཝཏོ ཧཏྠེན སམཾ ཀརིཡམཱནཾ ཧེཊྛཱ བྷསྶཏི. པཏྟམཏྠཀེ ཋཔིཏཱནི པཱུཝཱནི ཨེཝ ཝཊཾསཀཱཀཱརེན ཋཔིཏཏྟཱ ‘‘པཱུཝཝཊཾསཀ’’ནྟི ཝུཏྟཱནི. ཀེཙི པན ‘‘པཏྟཾ གཧེཏྭཱ ཐཱུཔཱིཀཏཾ པིཎྜཔཱཏཾ རཙིཏྭཱ དིཡྻམཱནམེཝ གཎྷཏོ ཨཱཔཏྟི, ཧཏྠགཏེ ཨེཝ པན པཏྟེ དིཡྻམཱནེ ཐཱུཔཱིཀཏམྤི གཧེཏུཾ ཝཊྚཏཱི’’ཏི ¶ ཝདནྟི, ཏཾ ན གཧེཏབྦམེཝ ‘‘སམཏིཏྟིཀ’’ནྟི བྷཱཝནཔུཾསཀཝསེན སཱམཉྙཏོ ཝུཏྟཏྟཱ.

ཁམྦྷཀཏཝགྒཝཎྞནཱ ནིཊྛིཏཱ.

༤. སཀྐཙྩཝགྒཝཎྞནཱ

༦༠༨. ཙཏུཏྠཝགྒཱདཱིསུ སཔདཱནནྟི ཨེཏྠ དཱནཾ ཝུཙྩཏི ཨཝཁཎྜནཾ, ཨཔེཏཾ དཱནཏོ ཨཔདཱནཾ, སཧ ཨཔདཱནེན སཔདཱནཾ, ཨཝཁཎྜནཝིརཧིཏཾ ཨནུཔཊིཔཱཊིཡཱཏི ཝུཏྟཾ ཧོཏི. ཏེནཱཧ ‘‘ཏཏྠ ཏཏྠ ཨོདྷིཾ ཨཀཏྭཱ’’ཏིཨཱདི.

༦༡༡. ཝིཉྙཏྟིཡནྟི སཱུཔོདནཝིཉྙཏྟིསིཀྑཱཔདཾ སནྡྷཱཡ ཝདཏི. ‘‘ཝཏྟབྦཾ ནཏྠཱི’’ཏི ཨིམིནཱ པཱལི༹ཡཱཝ སབྦཾ ཝིཉྙཱཡཏཱིཏི དསྶེཏི. ཏཏྠ པཱལི༹ཡཾ ཨསཉྩིཙྩཱཏིཨཱདཱིསུ ཝཏྠུམཏྟཾ ཉཏྭཱ བྷུཉྫནེན ཨཱཔཏྟིཾ ཨཱཔཛྫནྟསྶེཝ པུན པཎྞཏྟིཾ ཉཏྭཱ མུཁགཏཾ ཚཌྜེཏུཀཱམསྶ ཡཾ ཨརུཙིཡཱ པཝིཊྛཾ, ཏཾ ཨསཉྩིཙྩ པཝིཊྛཾ ནཱམ, ཏཏྠ ཨནཱཔཏྟི. ཏདེཝ པུན ཨཉྙཝིཧིཏཏཱཡ ཝཱ ཨཝིཉྙཏྟམིདནྟིསཉྙཱཡ ཝཱ བྷུཉྫནེ ‘‘ཨསཏིཡཱ’’ཏི ཝུཙྩཏི.

༦༡༣. ‘‘ཨཉྙསྶཏྠཱཡཱ’’ཏི ཨིདམསྶ སིཀྑཱཔདསྶ ཨཏྟནོ ཨཏྠཱཡ ཝིཉྙཱཔེཏྭཱ སཡཾ བྷུཉྫནེ ཨེཝ པཉྙཏྟཏྟཱ ཨིམིནཱ སིཀྑཱཔདེན ཨནཱཔཏྟིཾ སནྡྷཱཡ ཝུཏྟཾ. པཉྩསཧདྷམྨིཀཱནཾ པན ཨཏྠཱཡ ཨཉྙཱཏཀཨཔྤཝཱརིཏཊྛཱནེ ཝིཉྙཱཔེནྟོ ཝིཉྙཏྟིཀྑཎེ ཨཊྛཀཐཱསུ སུཏྟཱནུལོམཏོ ཝུཏྟཨཀཏཝིཉྙཏྟིདུཀྐཊཏོ ན མུཙྩཏི. སཉྩིཙྩ བྷུཉྫནཀྑཎེ སཡཉྩ ཨཉྙེ ཙ མིཙྪཱཛཱིཝཏོ ན མུཙྩནྟཱིཏི གཧེཏབྦཾ.

༦༡༥. ‘‘ཀུཀྐུཊཎྜཾ ཨཏིཁུདྡཀ’’ནྟི ཨིདཾ ཨསཱརུཔྤཝསེན ཝུཏྟཾ, ཨཏིམཧནྟེ ཨེཝ ཨཱཔཏྟཱིཏི དཊྛབྦཾ. བྷུཉྫནྟེན པན ཙོརཱདིབྷཡཾ པཊིཙྩ མཧནྟམྤི ཨཔརིམཎྜལམྤི ¶ ཀཏྭཱ སཱིགྷཾ བྷུཉྫནཝསེནེཏྠ ཨཱཔདཱ. ཨེཝམཉྙེསུཔི ཡཐཱནུརཱུཔཾ དཊྛབྦཾ.

སཀྐཙྩཝགྒཝཎྞནཱ ནིཊྛིཏཱ.

༥. ཀབལ༹ཝགྒཝཎྞནཱ

༦༡༧. ཨནཱཧཊེ ¶ ཀབལེ༹ མུཁདྭཱརཝིཝརཎེ པན པཡོཛནཱབྷཱཝཱ ‘‘ཨཱཔདཱསཱུ’’ཏི ན ཝུཏྟཾ. ཨེཝམཉྙེསུཔི ཨཱིདིསེསུ.

༦༡༨. སབྦཾ ཧཏྠནྟི ཧཏྠེཀདེསཱ ཨངྒུལིཡོ ཝུཏྟཱ ‘‘ཧཏྠམུདྡཱ’’ཏིཨཱདཱིསུ ཝིཡ, ཏསྨཱ ཨེཀངྒུལིམྤི མུཁེ པཀྑིཔིཏུཾ ན ཝཊྚཏི.

ཀབལ༹ཝགྒཝཎྞནཱ ནིཊྛིཏཱ.

༦. སུརུསུརུཝགྒཝཎྞནཱ

༦༢༧. པཱལི༹ཡཾ སཱིཏཱིཀཏོཏི སཱིཏཔཱིལི༹ཏོ. སིལཀབུདྡྷོཏི པརིཧཱསཝཙནམེཏཾ. སིལཀཉྷི ཀིཉྩི དིསྭཱ ‘‘བུདྡྷོ ཨཡ’’ནྟི ཝོཧརནྟི.

༦༢༨. ‘‘ཨངྒུལིཡོ མུཁེ པཝེསེཏྭཱ བྷུཉྫིཏུཾ ཝཊྚཏཱི’’ཏི ཨིམིནཱ སབྦཾ ཧཏྠཾ ཨནྟོམུཁེ པཀྑིཔནསིཀྑཱཔདསྶཔི པཝིཊྛངྒུལིནིལླེཧནེན ཨིམསྶཔི སིཀྑཱཔདསྶ ཨནཱཔཏྟིཾ དསྶེཏི. ཨེསེཝ ནཡོཏི གྷནཡཱགུཨཱདཱིསུ པཏྟཾ ཧཏྠེན, ཨོཊྛཉྩ ཛིཝ྄ཧཱཡ ནིལླེཧིཏུཾ ཝཊྚཏཱིཏི ཨཏིདིསཏི. ཏསྨཱཏི ཡསྨཱ གྷནཡཱགུཨཱདིཝིརཧིཏཾ ནིལླེཧིཏུཾ ན ཝཊྚཏི.

༦༣༤. ཝིལཱིཝཙྪཏྟནྟི ཝེཎུཔེསིཀཱཧི ཀཏཾ. མཎྜལབདྡྷཱནཱིཏི དཱིགྷསལཱཀཱསུ ཏིརིཡཾ ཝལཡཱཀཱརེན སལཱཀཾ ཋཔེཏྭཱ སུཏྟེཧི བདྡྷཱནི དཱིགྷཉྩ ཏིརིཡཉྩ ཨུཛུཀམེཝ སལཱཀཱཡོ ཋཔེཏྭཱ དལ༹ྷབདྡྷཱནི ཙེཝ ཏིརིཡཾ ཋཔེཏྭཱ དཱིགྷདཎྜཀེཧེཝ སངྐོཙཱརཧཾ ཀཏྭཱ སུཏྟེཧེཝ ཏིརིཡཾ བདྡྷཱནི. ཏཏྠཛཱཏཀདཎྜཀེན ཀཏནྟི སཧ དཎྜཀེན ཚིནྣཏཱལཔཎྞཱདཱིཧི ཀཏཾ. ཚཏྟཔཱདུཀཱཡཱཏི ཡསྨིཾ ཚཏྟདཎྜཀོཊིཾ པཝེསེཏྭཱ ཚཏྟཾ ཨུཛུཀཾ ཋཔེཏྭཱ ཧེཊྛཱ ཚཱཡཱཡ ནིསཱིདནྟི, ཏིཊྛནྟི ཝཱ, ཏཱདིསེ ཚཏྟཱདྷཱརེ.

༦༣༧. ཙཱཔོཏི ¶ མཛ྄ཛྷེ ཝངྐཀཱཛདཎྜསདིསཱ དྷནུཝིཀཏི. ཀོདཎྜོཏི ཝིདྡྷདཎྜཱ དྷནུཝིཀཏི.

སུརུསུརུཝགྒཝཎྞནཱ ནིཊྛིཏཱ.

༧. པཱདུཀཝགྒཝཎྞནཱ

༦༤༧. སཏྟམཝགྒེ ¶ རུཀྑཏོ པཏིཏོཏི ཨེཀཾ ཨོལམྦནསཱཁཾ གཧེཏྭཱ པཏིཏོ. པཱལི༹ཡཱཏི ཨཏྟནོ ཨཱཙཱརཔྤཀཱསཀགནྠསྶ. དྷཱིརཏྠཱུཏི དྷཱི ཨཏྠུ, ནིནྡཱ ཧོཏཱུཏི ཨཏྠོ. ཝིནིཔཱཏནཧེཏུནཱཏི ཝིནིཔཱཏནསྶ ཧེཏུབྷཱཝེན. ཏྭནྟི ཨུཔཡོགཏྠེ པཙྩཏྟཝཙནཾ, ཏཾ ཨིཙྩེཝ ཝཱ པཱཋོ. ཨསྨཱཏི པཱསཱཎོ.

༦༤༩. ན ཀཐེཏབྦནྟི ཐེརེན ཨཏྟནོ ཀངྑཱཊྛཱནསྶ པུཙྪིཏཏྟཱ ཝུཏྟཾ. དཧརསྶ ཨཏྠཀོསལླཾ ཉཱཏུཾ པུཙྪིཏེན ཨུཙྩཱསནེ ནིསིནྣསྶ ཨཱཙརིཡསྶ ཨནུཡོགདཱནནཡེན ཝཏྟུཾ ཝཊྚཏི.

༦༥༢. ཁེལེ༹ན ཙེཏྠ སིངྒྷཱཎིཀཱཔི སངྒཧིཏཱཏི ཨེཏྠ ཨུདཀགཎྜུསཀཾ ཀཏྭཱ ཨུཙྪུཀཙཝརཱདིཉྩ མུཁེནེཝ ཧརིཏུཾ ཨུདཀེསུ ཚཌྜེཏུཾ ཝཊྚཏཱིཏི དཊྛབྦཾ. སེསཾ སབྦཏྠ ཨུཏྟཱནམེཝ.

པཱདུཀཝགྒཝཎྞནཱ ནིཊྛིཏཱ.

སེཁིཡཝཎྞནཱནཡོ ནིཊྛིཏོ.

༦༥༥. ཨདྷིཀརཎསམཐེསུ ཙ ཨིདྷ ཝཏྟབྦཾ ནཏྠི.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

བྷིཀྑུཝིབྷངྒཝཎྞནཱནཡོ ནིཊྛིཏོ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

བྷིཀྑུནཱིཝིབྷངྒཝཎྞནཱ

༡. པཱརཱཛིཀཀཎྜཾ

༡. ཨུབྦྷཛཱཎུམཎྜལིཀསིཀྑཱཔདཝཎྞནཱ

༦༥༦. བྷིཀྑུནཱིཝིབྷངྒེ ¶ ¶ མིགཱརམཱཏུཡཱཏི མིགཱརམཱཏུ, ཝིསཱཁཱཡཱཏི ཨཏྠོ. པཱལི༹ཡཾ ‘‘ཨེཧི བྷིཀྑུནཱིཏི བྷིཀྑུནཱི, ཏཱིཧི སརཎགམནེཧི ཨུཔསམྤནྣཱཏི བྷིཀྑུནཱི’’ཏི ཨིདཾ བྷིཀྑུཝིབྷངྒཔཱལི༹ཡཱ སམདསྶནཏྠཾ ཨཊྛགརུདྷམྨཔྤཊིགྒཧཎེན ལདྡྷཱུཔསམྤདཾ མཧཱཔཛཱཔཏིགོཏམིཉྩེཝ ཏཱཡ སཧ ནིཀྑནྟཱ བྷགཝཏོ ཨཱཎཱཡ བྷིཀྑཱུནཉྙེཝ སནྟིཀེ ཨེཀཏོཨུཔསམྤནྣཱ པཉྩསཏསཱཀིཡཱནིཡོ ཙ སནྡྷཱཡ ཝུཏྟཾ. ཏཱ ཧི བྷགཝཏཱ ཨཱནནྡཏྠེརསྶ ཡཱཙནཱཡ པབྦཛྫཾ ཨནུཛཱནནྟེན ‘‘ཨེཐ བྷིཀྑུནིཡོ, མམ སཱསནེ ཏུམྷེཔི པཝིསཐཱ’’ཏི ཝུཏྟཱ ཝིཡ ཛཱཏཱ. སཱཀིཡཱནིཡོ ཨེཝ སརཎསཱིལཱནི དཏྭཱ ཀམྨཝཱཙཱཡ ཨུཔསམྤཱདིཏཏྟཱ ‘‘ཏཱིཧི སརཎགམནེཧི ཨུཔསམྤནྣཱ’’ཏི ཝུཏྟཱ. ན ཧི ཨེཏཱཧི ཨཉྙཱ ཨེཧིབྷིཀྑུནིབྷཱཝཱདིནཱ ཨུཔསམྤནྣཱ ནཱམ སནྟི. ཡཾ པན ཐེརཱིགཱཐཱསུ བྷདྡཱཡ ཀུཎྜལཀེསིཡཱ –

‘‘ནིཧཙྩ ¶ ཛཱཎུཾ ཝནྡིཏྭཱ, སམྨུཁཱ ཨཉྫལིཾ ཨཀཾ;

‘ཨེཧི བྷདྡེ’ཏི མཾ ཨཝོཙ, སཱ མེ ཨཱསཱུཔསམྤདཱ’’ཏི. (ཐེརཱིགཱ. ༡༠༩) –

ཝུཏྟཾ. ཡཉྩ ཨཔདཱནེཔི –

‘‘ཨཱཡཱཙིཏོ ཏདཱ ཨཱཧ, ‘ཨེཧི བྷདྡེ’ཏི ནཱཡཀོ;

ཏདཱཧཾ ཨུཔསམྤནྣཱ, པརིཏྟཾ ཏོཡམདྡས’’ནྟི. (ཨཔ. ཐེརཱི ༢.༣.༤༤) –

ཝུཏྟཾ. ཏམྤི ‘‘ཨེཧི ཏྭཾ བྷིཀྑུནཱིནཾ སནྟིཀེ པབྦཛྫཾ, ཨུཔསམྤདཉྩ གཎྷཱཧཱི’’ཏི བྷགཝཏོ ཨཱཎཱ ཨུཔསམྤདཱཡ ཀཱརཎཏྟཱ ཨུཔསམྤདཱ ཨཧོསཱིཏི ཨིམམཏྠཾ སནྡྷཱཡ ཝུཏྟཾ. ཏཐཱ ཧི ཝུཏྟཾ ཐེརཱིགཱཐཱཊྛཀཐཱཡཾ ‘‘ཨེཧི བྷདྡེ, བྷིཀྑུནུཔསྶཡཾ ¶ གནྟྭཱ བྷིཀྑུནཱིནཾ སནྟིཀེ པབྦཛྫ ཨུཔསམྤཛྫསྶཱུཏི མཾ ཨཝཙ ཨཱཎཱཔེསི, སཱ སཏྠུ ཨཱཎཱ མཡ྄ཧཾ ཨུཔསམྤདཱཡ ཀཱརཎཏྟཱ ཨུཔསམྤདཱ ཨཱསི ཨཧོསཱི’’ཏི (ཐེརཱིགཱ. ཨཊྛ. ༡༡༡).

༦༥༧. སཱདྷཱརཎཔཱརཱཛིཀེཧཱིཏི མེཐུནཱདཱིཧི ཙཏཱུཧི. ཏཱནི, པན ཨཉྙཱནི ཙ སཱདྷཱརཎསིཀྑཱཔདཱནི ཡསྨཱ བྷིཀྑུཝིབྷངྒེ ཝུཏྟནིདཱནཝཏྠཱདཱིསུ ཨེཝ སཱདྷཱརཎཝསེན པཉྙཏྟཱནི, པཙྪཱ པན ཏཱནི བྷིཀྑུནཱིནཾ པཱཏིམོཀྑུདྡེསཾ ཨནུཛཱནནྟེན བྷགཝཏཱ ཏཱསཾ སིཀྑཱཔཙྩཀྑཱནཱབྷཱཝེན ‘‘ཡཱ པན བྷིཀྑུནཱི ཚནྡསོ མེཐུནཾ དྷམྨཾ པཊིསེཝེཡྻཱ’’ཏིཨཱདིནཱ ཏདནུརཱུཔཝསེན པརིཝཏྟེཏྭཱ ཨསཱདྷཱརཎསིཀྑཱཔདེཧི སདྡྷིཾ སཾསནྡེཏྭཱ བྷིཀྑུནིཔཱཏིམོཀྑུདྡེསཝསེན ཨེཀཏོ སངྒཧིཏཱནི. ཡསྨཱ ཙ ནེསཾ བྷིཀྑུཝིབྷངྒེ (པཱརཱ. ༤༤ ཨཱདཡོ) ཝུཏྟནཡེནེཝ སབྦོཔི ཝིནིཙྪཡོ སཀྐཱ ཉཱཏུཾ, ཏསྨཱ ཏཱནི ཝཛྫེཏྭཱ ཨསཱདྷཱརཎཱནཾ ཨེཝ ཨིདྷ ཝིབྷངྒོ ཝུཏྟོཏི ཝེདིཏབྦཾ.

༦༥༩. བྷིཀྑཱུནཾ ‘‘ཀཱཡསཾསགྒཾ སཱདིཡེཡྻཱ’’ཏི ཨཝཏྭཱ ‘‘སམཱཔཛྫེཡྻཱ’’ཏི ཝུཏྟཏྟཱ ‘‘བྷིཀྑུ ཨཱཔཏྟིཡཱ ན ཀཱརེཏབྦོ’’ཏི ཝུཏྟཾ. ཏབྦཧུལནཡེནཱཏི ཀིརིཡཱསམུཊྛཱནསྶེཝ བཧུལབྷཱཝཏོ, ཨེཏེན ཨཀིརིཡཱསམུཊྛཱནཱཔི ཨཡཾ ཨཱཔཏྟི ཧོཏཱིཏི དསྶེཏི. ཀིཉྩཱཔི དསྶེཏི, མཡཾ པནེཏྠ ཨེཝཾ ཏཀྐཡཱམ ‘‘ཀཱཡསཾསགྒཀྑཎེ སཱདིཡནྟིཡཱ ཀིརིཡཱཡ ཨབྷཱཝེཔི ཏཏོ པུབྦེ པཝཏྟིཏཱནཾ པཊིཙྪནྣཊྛཱནགམནཨིངྒིཏཱཀཱརདསྶནཱདིཀིརིཡཱནཾ ཝསེནེཝ ཀིརིཡཱསམཨུཊྛཱནམེཝ, པརེཧི མགྒེ ཀརིཡམཱནུཔཀྐམེན ནིཙྩལསྶ སཱདིཡཏོ སུཀྐཝིསྶཊྛི ཝིཡ པུབྦཔཡོགཱབྷཱཝེཔི ¶ ཝཱ ཏསྨིཉྙེཝ ཁཎེ པརཱུཔཀྐམེན ཛནིཡམཱནཱཡ ཨཏྟནོ ཀཱཡཙལནཱདིསངྑཱཏཱཡ ཀིརིཡཱཡ, སཱ ཧི སཱདིཡམཱནེན ཏསྶཱ ཙིཏྟེནཱཔི སམུཊྛིཏཱ ཀིརིཡཱ ནཱམ ཧོཏི ཨཝཱཡམིཏྭཱ པརཱུཔཀྐམེན མེཐུནསཱདིཡནེ ཝིཡ, བྷིཀྑཱུནཾ པན པརཱུཔཀྐམཛནིཏཾ ཀིརིཡཾ ཨབྦོཧཱརིཀཾ ཀཏྭཱ ཨཏྟནཱ ཀརིཡམཱནཔཡོགཝསེནེཝ ‘ཀཱཡསཾསགྒཾ སམཱཔཛྫེཡྻཱ’ཏི ཨེཝཾ ཝིསེསེཏྭཱཝ སིཀྑཱཔདསྶ པཉྙཏྟཏྟཱ སཱདིཡམཱནེཔི ན དོསོ. ཨིཏརཐཱ ཧི ཏབྦཧུལནཡེནེཏྠ ཀིརིཡཏྟེ གཡ྄ཧམཱནེ ཨཉྙེསམྤི ཀིརིཡཱཀིརིཡསིཀྑཱཔདཱནཾ ཀིརིཡཏྟགྒཧཎཔྤསངྒོ སིཡཱ’’ཏི. ཏསྨཱ ¶ ཝཱིམཾསིཏྭཱ གཧེཏབྦཾ. སཱཏི ཀིརིཡཱསམུཊྛཱནཏཱ. ཏཐེཝཱཏི ཀཱཡསཾསགྒརཱགཱི ཨེཝ.

ཨུབྦྷཛཱཎུམཎྜལིཀསིཀྑཱཔདཝཎྞནཱ ནིཊྛིཏཱ.

༢. ཝཛྫཔཊིཙྪཱདིཀསིཀྑཱཔདཝཎྞནཱ

༦༦༦. དུཏིཡེ པུརིམེནཱཏིཨཱདི སུནྡརཱིནནྡཱཡ ཝཛྫཔཊིཙྪཱདནེ པཉྙཏྟཏཾ སནྡྷཱཡ ཝུཏྟཾ. ‘‘ཨཊྛནྣ’’ནྟི ཝུཏྟཏྟཱ ཝཛྫཔཊིཙྪཱདནསྶཱཔི པཊིཙྪཱདནེ པཱརཱཛིཀམེཝཱཏི དཊྛབྦཾ. ‘‘དྷུརཾ ནིཀྑིཏྟམཏྟེ’’ཏི ཝུཏྟཏྟཱ པཎྞཏྟིཾ ཨཛཱནནྟིཡཱཔི ‘‘ཨིདཾ ཝཛྫཾ ན པཀཱསེསྶཱམཱི’’ཏི ཚནྡེན དྷུརཾ ནིཀྑེཔཀྑཎེ པཱརཱཛིཀནྟི དཊྛབྦཾ. ཏཾ པན པཊིཙྪཱདནཾ ཡསྨཱ ‘‘པེསལཱ ཉཏྭཱ གརཧིསྶནྟཱི’’ཏི བྷཡེནེཝ ཧོཏི, བྷཡཉྩ ཀོདྷཙིཏྟསམྤཡུཏྟཾ, ཏསྨཱ ཨིདཾ ‘‘དུཀྑཝེདན’’ནྟི ཝུཏྟཾ. ཡཾ པན སཱརཏྠདཱིཔནིཡཾ (སཱརཏྠ. ཊཱི. པཱརཱཛིཀཀཎྜ ༣.༦༦༦) ‘‘ཀིཉྩཱཔི ཝཛྫཔཊིཙྪཱདནཾ པེམཝསེན ཧོཏི, ཏཐཱཔི སིཀྑཱཔདཝཱིཏིཀྐམཙིཏྟཾ དོམནསྶིཏམེཝ ཧོཏཱི’’ཏི ཨེཝཾ པཎྞཏྟིཝཱིཏིཀྐམཙིཏྟེནེཝ ཚཱདནཾ དོམནསྶཏྟེ ཀཱརཎཾ ཝུཏྟཾ, ཏཾ ཨཀཱརཎཾ པཎྞཏྟིཝིཛཱནནཾ ཝིནཱཔི ཨཱཔཛྫིཏབྦཏོཝ.

ཝཛྫཔཊིཙྪཱདིཀསིཀྑཱཔདཝཎྞནཱ ནིཊྛིཏཱ.

༦༦༩. ཏཏིཡཾ ཨུཏྟཱནམེཝ.

༤. ཨཊྛཝཏྠུཀསིཀྑཱཔདཝཎྞནཱ

༦༧༥. ཙཏུཏྠེ ¶ ལོཀསྶཱདསངྑཱཏཾ མིཏྟེཧི ཨཉྙམཉྙཾ ཀཱཏབྦཾ སནྠཝཾ. ཝུཏྟམེཝཏྠཾ པརིཡཱཡནྟརེན དསྶེཏུཾ ‘‘ཀཱཡསཾསགྒརཱགེནཱ’’ཏི ཝུཏྟཾ.

ཏིསྶིཏྠིཡོ མེཐུནཾ ཏཾ ན སེཝེཏི ཡཱ ཏིསྶོ ཨིཏྠིཡོ, ཏཱསུ ཝུཏྟཾ ཏཾ མེཐུནཾ ན སེཝེཡྻ. ཨནརིཡཔཎྜཀེཏི ཏཡོ ཨནརིཡེ, ཏཡོ པཎྜཀེ ཙ ཨུཔསངྐམིཏྭཱ མེཐུནཾ ན སེཝེཏི ཨཏྠོ. ཨནརིཡཱཏི ¶ ཙེཏྠ ཨུབྷཏོབྱཉྫནཀཱ ཨདྷིཔྤེཏཱ. བྱཉྫནསྨིནྟི ཨཏྟནོ ཝཙྩམུཁམགྒེཔི. ཚེདོ ཨེཝ ཚེཛྫཾ, པཱརཱཛིཀཾ.

ཝཎྞཱཝཎྞོཏི དྭཱིཧི སུཀྐཝིསྶཊྛི ཝུཏྟཱ. གམནུཔྤཱདནནྟི སཉྩརིཏྟཾ. ‘‘མེཐུནདྷམྨསྶ པུབྦབྷཱགཏྟཱ པཙྩཡོ ཧོཏཱི’’ཏི ཨིམིནཱ ཀཱརིཡོཔཙཱརེན ཀཱཡསཾསགྒོ མེཐུནདྷམྨོཏི ཝུཏྟོཏི དསྶེཏི. སབྦཔདེསཱུཏི སངྒྷཱཊིཀཎྞགྒཧཎཱདིཔདེསུ. ཀཱཡསཾསགྒརཱགོ, སཨུསྶཱཧཏཱ, ཨཊྛམཝཏྠུསྶ པཱུརཎནྟི ཏཱིཎེཏྠ ཨངྒཱནི.

ཨཊྛཝཏྠུཀསིཀྑཱཔདཝཎྞནཱ ནིཊྛིཏཱ.

པཱརཱཛིཀཝཎྞནཱནཡོ ནིཊྛིཏོ.

༢. སངྒྷཱདིསེསཀཎྜཾ

༡. པཋམསངྒྷཱདིསེསསིཀྑཱཔདཝཎྞནཱ

༦༧༩. སངྒྷཱདིསེསཀཎྜེ ¶ ¶ ‘‘དུཏིཡསྶ ཨཱརོཙེཏཱི’’ཏི ཨེཏྠཱཔི དྭཱིསུཔི ཨཌྜཀཱརཀེསུ ཡསྶ ཀསྶཙི དུཏིཡསྶ ཀཐཾ ཡོ ཀོཙི ཨཱརོཙེཏཱིཏི ཨེཝམཏྠོ གཧེཏབྦོཏི ཨཱཧ ‘‘ཨེསེཝ ནཡོ’’ཏི.

གཏིགཏནྟི ཙིརཀཱལཔྤཝཏྟཾ. ཨཱཔཏྟཱིཏི ཨཱཔཛྫནཾ. ‘‘ནིསྶཱརཎཱིཡ’’ནྟི ཨིདཾ ཀཏྟུཨཏྠེ སིདྡྷནྟི ཨཱཧ ‘‘ནིསྶཱརེཏཱི’’ཏི. ཨཱཔནྣཾ བྷིཀྑུནིཾ སངྒྷཏོ ཝིཡོཛེཏི, ཝིཡོཛནཧེཏུ ཧོཏཱིཏི ཨཏྠོ.

གཱིཝཱཡེཝཱཏི ཨཱཎཏྟིཡཱ ཨབྷཱཝཏོ. ཏེསཾ ཨནཏྠཀཱམཏཱཡཱཏི ‘‘ཙོརོ’’ཏི ཝུཏྟཾ མམ ཝཙནཾ སུཏྭཱ ཀེཙི དཎྜིསྶནྟི ཛཱིཝིཏཱ ཝོརོཔེསྶནྟཱིཏི ཨེཝཾ སཉྙཱཡ. ཨེཏེན ཀེཝལཾ བྷཡེན ཝཱ པརིཀྑཱརགྒཧཎཏྠཾ ཝཱ སཧསཱ ‘‘ཙོརོ’’ཏི ཝུཏྟེ དཎྜིཏེཔི ན དོསོཏི དསྶེཏི. རཱཛཔུརིསཱནཉྷི ‘‘ཙོརོ ཨཡ’’ནྟི ཨུདྡིསྶ ཀཐནེ ཨེཝ གཱིཝཱ, བྷིཀྑཱུནཾ, པན ཨཱརཱམིཀཱདཱིནཾ ཝཱ སམྨུཁཱ ‘‘ཨསུཀོ ཙོརོ ཨེཝམཀཱསཱི’’ཏི ཀེནཙི ཝུཏྟཝཙནཾ ནིསྶཱཡ ཨཱརཱམིཀཱདཱིསུ རཱཛཔུརིསཱནཾ ཝཏྭཱ དཎྜཱཔེནྟེསུཔི བྷིཀྑུསྶ ན གཱིཝཱ རཱཛཔུརིསཱནཾ ཨཝུཏྟཏྟཱ. ཡེསཉྩ ཝུཏྟཾ, ཏེཧི སཡཾ ཙོརསྶ ཨདཎྜིཏཏྟཱཏི གཧེཏབྦཾ. ‘‘ཏྭཾ ཨེཏསྶ སནྟཀཾ ཨཙྪིནྡཱ’’ཏི ཨཱཎཏྟོཔི ཧི སཙེ ཨཉྙེན ཨཙྪིནྡཱཔེཏི, ཨཱཎཱཔཀསྶ ཨནཱཔཏྟི ཝིསངྐེཏཏྟཱ. ‘‘ཨཏྟནོ ཝཙནཀར’’ནྟི ཨིདཾ སཱམཱིཙིཝསེན ཝུཏྟཾ. ཝཙནཾ ཨཀརོནྟཱནཾ རཱཛཔུརིསཱནམྤི ‘‘ཨིམིནཱ གཧིཏཔརིཀྑཱརཾ ཨཱཧརཱཔེཧི, མཱ ཙསྶ དཎྜཾ ཀརོཧཱི’’ཏི ཨུདྡིསྶ ཝདནྟསྶཱཔི དཎྜེ གཧིཏེཔི ན གཱིཝཱ ཨེཝ དཎྜགྒཧཎསྶ པཊིཀྑིཏྟཏྟཱ, ‘‘ཨསུཀབྷཎྜཾ ཨཝཧརཱ’’ཏི ཨཱཎཱཔེཏྭཱ ཝིཔྤཊིསཱརེ ཨུཔྤནྣེ པུན པཊིཀྑིཔནེ (པཱརཱ. ༡༢༡) ཝིཡ.

དཱསཱདཱིནཾ ¶ སམྤཊིཙྪནེ ཝིཡ ཏདཏྠཱཡ ཨཌྜཀརཎེ བྷིཀྑཱུནམྤི དུཀྐཊནྟི ཨཱཧ ‘‘ཨཀཔྤིཡཨཌྜོ ནཱམ ན ཝཊྚཏཱི’’ཏི. ཀེནཙི པན བྷིཀྑུནཱ ཁེཏྟཱདིཨཏྠཱཡ ཝོཧཱརིཀཱནཾ སནྟིཀཾ གནྟྭཱ ཨཌྜེ ཀཏེཔི ཏཾ ཁེཏྟཱདིསམྤཊིཙྪནེ ཝིཡ སབྦེསཾ ཨཀཔྤིཡཾ ན ཧོཏི པུབྦེ ཨེཝ སངྒྷསྶ སནྟཀཏྟཱ ¶ , བྷིཀྑུསྶེཝ པན པཡོགཝསེན ཨཱཔཏྟིཡོ ཧོནྟི. དཱསཱདཱིནམྤི པན ཨཏྠཱཡ རཀྑཾ ཡཱཙིཏུཾ ཝོཧཱརིཀེན པུཊྛེན སངྒྷསྶ ཨུཔྤནྣཾ ཀཔྤིཡཀྐམཾ ཝཏྟུཾ, ཨཱརཱམིཀཱདཱིཧི ཙ ཨཌྜཾ ཀཱརཱཔེཏུཉྩ ཝཊྚཏི ཨེཝ. ཝིཧཱརཝཏྠཱདིཀཔྤིཡཨཌྜཾ པན བྷིཀྑུནོ སཡམྤི ཀཱཏུཾ ཝཊྚཏི.

བྷིཀྑུནཱིནཾ ཝུཏྟོཏི རཀྑཾ ཡཱཙནྟཱིནཾ བྷིཀྑུནཱིནཾ ཝུཏྟོ ཨུདྡིསྶཨནུདྡིསྶཝསེན རཀྑཱཡཱཙནཝིནིཙྪཡོ, ན སབྦོ སིཀྑཱཔདཝིནིཙྪཡོ ཨསཱདྷཱརཎཏྟཱ སིཀྑཱཔདསྶ. ཏེནཱཧ ‘‘བྷིཀྑུནོཔཱི’’ཏིཨཱདི. ཨནཱཀཌྜྷིཏཱཡ ཨཌྜཀརཎཾ, ཨཌྜཔརིཡོསཱནནྟི དྭེ ཨངྒཱནི.

པཋམསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༢. དུཏིཡསངྒྷཱདིསེསསིཀྑཱཔདཝཎྞནཱ

༦༨༣. པཱལི༹ཡཾ དུཏིཡེ མལླགཎབྷཊིཔུཏྟགཎཱདིཀནྟིཨཱདཱིསུ མལླརཱཛཱུནཾ གཎོ མལླགཎོ. བྷཊིཔུཏྟཱ ནཱམ ཀེཙི གཎརཱཛཱནོ, ཏེསཾ གཎོ. ཀེཙི པན ‘‘ནཱརཱཡནབྷཏྟིཀོ པུཉྙཀཱརགཎོ མལླགཎོ. ཏཐཱ ཀུམཱརབྷཏྟིཀོ ཙ གཎོ བྷཊིཔུཏྟགཎོ’’ཏིཔི (སཱརཏྠ. ཊཱི. སཾགྷཱདིསེསཀཎྜ ༣.༦༨༣) ཝདནྟི. དྷམྨགཎོཏི སཱསནེ, ལོཀེ ཝཱ ཨནེཀཔྤཀཱརཔུཉྙཀཱརཀོ གཎོ. གནྡྷཝིཀཏིཀཱརཀོ གཎོ གནྡྷིཀསེཎཱི. པེསཀཱརཱདིགཎོ དུསྶིཀསེཎཱི. ཀཔྤགཏིཀནྟི ཀཔྤིཡབྷཱཝགཏཾ, པབྦཛིཏཔུབྦནྟི ཨཏྠོ.

༦༨༥. པཱལི༹ཡཾ ཝུཊྛཱཔེཏཱིཏི ཨུཔསམྤཱདེཏི. ཨཀཔྤགཏམྤི པབྦཱཛེནྟིཡཱ དུཀྐཊནྟི ཝདནྟི. ཁཱིཎཱསཝཱཡཔི ཨཱཔཛྫིཏབྦཏོ ‘‘ཏིཙིཏྟ’’ནྟི ཝུཏྟཾ. ཙོརིཏཱ, ཏཾ ཉཏྭཱ ཨནནུཉྙཱཏཀཱརཎཱ ཝུཊྛཱཔནནྟི དྭེ ཨངྒཱནི.

དུཏིཡསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༣. ཏཏིཡསངྒྷཱདིསེསསིཀྑཱཔདཝཎྞནཱ

༦༩༢. ཏཏིཡེ ¶ ¶ པརིཀྑེཔཾ ཨཏིཀྐཱམེནྟིཡཱཏི གཱམནྟརསྶ པརིཀྑེཔཾ ཨཏིཀྐཱམེནྟིཡཱ. ‘‘གཱམནྟརཾ གཙྪེཡྻཱ’’ཏི ཧི ཝུཏྟཾ. ཝིཀཱལགཱམཔྤཝེསནསིཀྑཱཔདེ ཝིཡ ‘‘ཨཔརིཀྑིཏྟསྶ ཨུཔཙཱརཾ ཨོཀྐམནྟིཡཱ’’ཏི ཨཝཏྭཱ ‘‘ཨཏིཀྐཱམེནྟིཡཱ’’ཏི པཱལི༹ཡཾ ཝུཏྟཏྟཱ གཱམཾ པཝིསནྟིཡཱ གྷརཱུཔཙཱརེ ཋིཏསྶ དུཏིཡལེཌྜུཔཱཏསངྑཱཏསྶ ཨུཔཙཱརསྶ ཨཏིཀྐམོ ནཱམ པཋམལེཌྜུཔཱཏཊྛཱནསངྑཱཏསྶ པརིཀྑེཔཱརཧཊྛཱནསྶ ཨཏིཀྐམོ ཨེཝཱཏི ཨཱཧ ‘‘པརིཀྑེཔཱརཧཊྛཱནཾ ཨེཀེན པཱདེན ཨཏིཀྐམཏཱི’’ཏི.

མཛ྄ཛྷེཏི གཱམམཛ྄ཛྷེ. པཙྪཱཏི ཨཔརཀཱལེ. ‘‘ཙཏུགཱམསཱདྷཱརཎཏྟཱ’’ཏི ཨིམིནཱ ཝིཧཱརཏོ ཙཏཱུསུ གཱམེསུ ཡཏྠ ཀཏྠཙི པཝིསིཏུཾ ཝཊྚཏཱིཏི ཨེཏྠ ཀཱརཎམཱཧ.

པརཏཱིརམེཝ ཨཀྐམནྟིཡཱཏི ནདིཾ ཨནོཏརིཏྭཱ ཨོརིམཏཱིརཏོ ལངྒྷིཏྭཱ ཝཱ ཨཱཀཱསཱདིནཱ ཝཱ པརཏཱིརམེཝ ཨཏིཀྐཱམེནྟིཡཱ. ཨོརིམཏཱིརམེཝ ཨཱགཙྪཏི, ཨཱཔཏྟཱིཏི པཱརགམནཱཡ ཨོཏིཎྞཏྟཱ ཝུཏྟཾ.

ཏཱདིསེ ཨརཉྙེཏི ཨིནྡཁཱིལཏོ བཧིབྷཱཝལཀྑཎེ ཨརཉྙེ. ‘‘ཏེནེཝཱ’’ཏིཨཱདིནཱ དསྶནཱུཔཙཱརེ ཝིརཧིཏེ སཝནཱུཔཙཱརསྶ ཝིཛྫམཱནཏྟེཔི ཨཱཔཏྟི ཧོཏཱིཏི དསྶེཏི. ཨཉྙཾ མགྒཾ གཎྷཱཏཱིཏི མགྒམཱུལ༹ྷཏྟཱ གཎྷཱཏི, ན དུཏིཡིཀཾ ཨོཧིཡིཏུཾ. ཏསྨཱ ཨནཱཔཏྟི. ཨནནྟརཱཡེན ཨེཀབྷཱཝོ, ཨནཱཔདཱཡ གཱམནྟརགམནཱདཱིསུ ཨེཀནྟི དྭེ ཨངྒཱནི.

ཏཏིཡསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༤. ཙཏུཏྠསངྒྷཱདིསེསསིཀྑཱཔདཝཎྞནཱ

༦༩༤. ཙཏུཏྠེ ཀཱརཀགཎསྶཱཏི ཨིམསྶ ཀམྨཾ ཀཱཏབྦནྟི ཡེཧི སནྣིཊྛཱནཾ ཀཏཾ, ཏེ སནྡྷཱཡ ཝུཏྟཾ. ཀམྨཝཱཙཀྑཎེ སཧཋིཏེཏི ཀེཙི. ནེཏྠཱརཝཏྟེཏི ནིཏྠརཎཧེཏུམྷི ཝཏྟེ.

༦༩༨. པཱལི༹ཡཾ ¶ ཨསནྟེ ཀཱརཀསངྒྷེཏི ཨེཏྠ ཝིཛྫམཱནཾ སུདཱུརམྤི གནྟྭཱ ཨཱཔུཙྪིཏབྦཾ ¶ . ཨནྟརཱཡེ པན སཏི སམྨཱ ཝཏྟནྟཾ ཨོསཱརེཏུཾ ཝཊྚཏཱིཏི. དྷམྨཀམྨེན ཨུཀྑིཏྟཏཱ, ཨནནུཉྙཱཏཀཱརཎཱ ཨོསཱརཎནྟི དྭེ ཨངྒཱནི.

ཙཏུཏྠསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༥. པཉྩམསངྒྷཱདིསེསསིཀྑཱཔདཝཎྞནཱ

༧༠༡. པཉྩམེ ཏནྟི མཧཱཨཊྛཀཐཱཡཾ ཨཝཙནཾ ‘‘ཨནཝསྶུཏོཏི ཛཱནནྟཱི པཊིགྒཎྷཱཏཱི’’ཏིཨཱདི པཱལི༹ཡཱ སམེཏི. ཨུབྷཏོ ཨཝསྶུཏབྷཱཝོ, ཨུདཀདནྟཔོནཏོ ཨཉྙཾ སཧཏྠཱ གཧེཏྭཱ ཨཛ྄ཛྷོཧརཎནྟི དྭེ ཨངྒཱནི.

པཉྩམསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༦. ཚཊྛསངྒྷཱདིསེསསིཀྑཱཔདཝཎྞནཱ

༧༠༥. ཚཊྛེ པཊིགྒཧོ ཏེན ན ཝིཛྫཏཱིཏི ཏེནེཝ ‘‘ན དེཏཱི’’ཏི ཝུཏྟཀཱརཎེན ཨུཡྻོཛིཏཱཡ ཧཏྠཏོ ཨིཏརཱཡ པཊིགྒཧོཔི ནཏྠི. པརིབྷོགཔཙྩཡཱཏི ཨུཡྻོཛིཏཱཡ བྷོཛནཔརིཡོསཱནཔཙྩཡཱཏི ཨཏྠོ. མནུསྶཔུརིསསྶ ཨཝསྶུཏཏཱ, ཏཾ ཉཏྭཱ ཨནནུཉྙཱཏཀཱརཎཱ ཨུཡྻོཛནཱ, ཏེན ཨིཏརིསྶཱ གཧེཏྭཱ བྷོཛནཔརིཡོསཱནནྟི ཏཱིཎི ཨངྒཱནི.

ཚཊྛསངྒྷཱདིསེསསིཀྑཱཔདཝཎྞནཱ ནིཊྛིཏཱ.

༧༠༩-༧༢༧. སཏྟམཏོ ཡཱཝདསམཔརིཡོསཱནཱནི ཨུཏྟཱནཱནེཝ.

སངྒྷཱདིསེསཝཎྞནཱནཡོ ནིཊྛིཏོ.

༣. ནིསྶགྒིཡཀཎྜཾ

༢. དུཏིཡནིསྶགྒིཡཱདིཔཱཙིཏྟིཡསིཀྑཱཔདཝཎྞནཱ

༧༣༣. ནིསྶགྒིཡེསུཔི ¶ ¶ པཋམཾ ཨུཏྟཱནམེཝ.

༧༤༠. དུཏིཡེ ཨཡྻཱཡ དམྨཱིཏི ཨེཝཾ པཊིལདྡྷནྟི ནིསྶཊྛཔཊིལདྡྷཾ, ནིསྶཊྛཾ པཊིལབྷིཏྭཱཔི ཡཾ ཨུདྡིསྶ དཱཡཀེཧི དིནྣཾ, ཏཏྠེཝ དཱཏབྦཾ. ཏེནཱཧ ‘‘ཡཐཱདཱནེཡེཝ ཨུཔནེཏབྦ’’ནྟི. ཨཀཱལཙཱིཝརཏཱ, ཏཾ ཉཏྭཱ ཀཱལཙཱིཝརནྟི ལེསེན བྷཱཛཱཔནཾ, པཊིལཱབྷོཏི ཏཱིཎི ཨངྒཱནི.

༧༤༣. ཏཏིཡེ མེཏནྟི མམེཝེཏཾ ཙཱིཝརཾ. ཨུཔསམྤནྣཏཱ, པརིཝཏྟིཏཝིཀཔྤནུཔགཙཱིཝརསྶ སཀསཉྙཱཡ ཨཙྪིནྡནཱདཱིཏི དྭེ ཨངྒཱནི.

༧༤༨-༧༥༢. ཙཏུཏྠེ ཨཱཧཊསཔྤིཾ དཏྭཱཏི ཨཏྟནོ དཏྭཱ. ཡམཀཾ པཙིཏབྦནྟི སཔྤིཉྩ ཏེལཉྩ ཨེཀཏོ པཙིཏབྦཾ. ལེསེན གཧེཏུཀཱམཏཱ, ཨཉྙསྶ ཝིཉྙཏྟི, པཊིལཱབྷོཏི ཏཱིཎི ཨངྒཱནི.

༧༥༣. པཉྩམེ སཱཏི ཐུལླནནྡཱ. ཨཡནྟི སིཀྑམཱནཱ. ཙེཏཱཔེཏྭཱཏི ཛཱནཱཔེཏྭཱཏི ཨིདྷ ཝུཏྟཾ, མཱཏིཀཱཊྛཀཐཱཡཾ པན ‘‘ཨཏྟནོ ཀཔྤིཡབྷཎྜེན ‘ཨིདཾ ནཱམ ཨཱཧརཱ’ཏི ཨཉྙཾ པརིཝཏྟཱཔེཏྭཱ’’ཏི (ཀངྑཱ. ཨཊྛ. ཨཉྙཙེཏཱཔནསིཀྑཱཔདཝཎྞནཱ) ཝུཏྟཾ.

༧༥༨. ཚཊྛེ པཱཝཱརིཀསྶཱཏི དུསྶཝཱཎིཛཀསྶ.

༧༦༤. སཏྟམེ ¶ སཉྙཱཙིཏཀེནཱཏི སཡཾ ཡཱཙིཏཀེནཔཱིཏི ཨཏྠོ.

༧༦༩-༧༨༩. ཨཊྛམཏོ ཡཱཝདྭཱདསམཱ ཨུཏྟཱནམེཝ.

ནིསྶགྒིཡཝཎྞནཱནཡོ ནིཊྛིཏོ.

༤. པཱཙིཏྟིཡཀཎྜཾ

༡. ལསུཎཝགྒོ

༡. པཋམལསུཎཱདིསིཀྑཱཔདཝཎྞནཱ

༧༩༧. པཱཙིཏྟིཡེསུ ¶ ¶ ལསུཎཝགྒསྶ པཋམེ བདརསཱལ༹ཝཾ ནཱམ བདརཕལཱནི སུཀྑཱཔེཏྭཱ ཏེཧི ཀཏྟབྦབྱཉྫནཝིཀཏི. ཨཱམཀམཱགདྷལསུཎཉྩེཝ, ཨཛ྄ཛྷོཧརཎཉྩཱཏི དྭེ ཨངྒཱནི.

༧༩༩-༨༡༢. དུཏིཡཱདཱིནི ཨུཏྟཱནཏྠཱནི.

༨༡༥. ཚཊྛེ པཱལི༹ཡཾ ཨཱསུམྦྷིཏྭཱཏི པཱཏེཏྭཱ.

༨༡༧. དདྷིམཏྠཱུཏི དདྷིམྷི པསནྣོདཀཾ. རསཁཱིརཱདཱིནནྟི མཾསརསཁཱིརཱདཱིནཾ. བྷུཉྫནྟསྶ བྷིཀྑུནོ ཧཏྠཔཱསེ ཋཱནཾ, པཱནཱིཡསྶ ཝཱ ཝིདྷཱུཔནསྶ ཝཱ གཧཎནྟི དྭེ ཨངྒཱནི.

༨༢༢. སཏྟམེ ཨཝིཉྙཏྟིཡཱ ལདྡྷནྟི ཨཏྟནོ ཝིཉྙཏྟིཾ ཝིནཱ ལདྡྷཾ. པུབྦཱཔརཝིརུདྡྷནྟི སཡཾ ཀརཎེ པཱཙིཏྟིཡནྟི ཨིདཾ ཀཱརཱཔནེ དུཀྐཊཝཙནེན ཝིརུཛ྄ཛྷནཾ སནྡྷཱཡ ཝུཏྟཾ. ཏེནཱཧ ‘‘ན ཧཱི’’ཏིཨཱདི, ‘‘ཨཝིཉྙཏྟིཡཱ ལདྡྷ’’ནྟིཨཱདིཝཙནེན ཝཱ ཝིརུཛ྄ཛྷནཾ སནྡྷཱཡ ཝུཏྟཾ. ཨཉྙཱཡ ཝིཉྙཏྟིཔི ཧི ཨིམིསྶཱ ཨཝིཉྙཏྟིཡཱ ལདྡྷམེཝཱཏི. ཨཱམཀདྷཉྙཝིཉྙཱཔནཱདི, ཏཾ བྷཛྫནཱདིནཱ ཨཛ྄ཛྷོཧརཎནྟི དྭེ ཨངྒཱནི.

༨༢༤. ཨཊྛམེ ནིབྦིཊྛོཏི ལདྡྷོ. ཀེཎཱིཏི རཉྙོ དཱཏབྦོ ཨཱཡོ, ཨཱཡུཔྤཏྟིཊྛཱནནྟི ཨཏྠོ ¶ . ཏེནཱཧ ‘‘ཨེཀཾ ཋཱནནྟར’’ནྟིཨཱདི. ཋཱནནྟརནྟི ཙ གཱམཛནཔདཱཎཱཡཏྟཾ. ཝལ༹ཉྫིཡམཱནཏིརོཀུཊྚཱདིཏཱ, ཨནཔལོཀེཏྭཱ ཨུཙྩཱརཱདཱིནཾ ཚཌྜནཱདཱིཏི དྭེ ཨངྒཱནི.

༨༣༠. ནཝམེ ‘‘མཏྠཀཙྪིནྣནཱལི༹ཀེརམྤཱི’’ཏི ཝུཏྟཏྟཱ ཧརིཏཱུཔརི ཚཌྜནམེཝ པཊིཀྑིཏྟཾ. ཏེནཱཧ ‘‘ཨནིཀྑིཏྟབཱིཛེསཱུ’’ཏིཨཱདི. ཡཏྠ ཙ ཚཌྜེཏུཾ ཝཊྚཏི, ཏཏྠ ཧརིཏེ ཝཙྩཱདིཾ ཀཱཏུམྤི ཝཊྚཏི ཨེཝ. སབྦེསནྟི བྷིཀྑུབྷིཀྑུནཱིནཾ.

༨༣༦-༧. དསམེ ¶ ཏེསཾཡེཝཱཏི ཡེསཾ ནིཙྩཾ པསྶཏི. ཨཱརཱམེ ཋཏྭཱཏི ཋིཏནིསནྣཊྛཱནེ ཨེཝ ཋཏྭཱ སམནྟཏོ གཱིཝཾ པརིཝཏྟེཏྭཱཔི པསྶཏི, ཨནཱཔཏྟི. ཋིཏཊྛཱནཏོ གནྟྭཱ པསྶིཏུཾ ན ཝཊྚཏི. ཀེཙི པན ‘‘ཝཊྚཏཱི’’ཏི ཝདནྟི. ཏཾ པན ‘‘དསྶནཱཡ གཙྪེཡྻ, པཱཙིཏྟིཡ’’ནྟི སཱམཉྙཏོ གམནསྶ པཊིཀྑིཏྟཏྟཱ, ཨནཱཔཏྟིཡམྤི གམནཱཡ ཨཝུཏྟཏྟཱ ཙ ན གཧེཏབྦཾ. ནཙྩཱདིཏཱ, ཨནནུཉྙཱཏཀཱརཎཱ གམནཾ, དསྶནཱདི ཙཱཏི ཏཱིཎི ཨངྒཱནི.

ནིཊྛིཏོ ལསུཎཝགྒོ པཋམོ.

༢. ཨནྡྷཀཱརཝགྒོ

༡. པཋམཱདིསིཀྑཱཔདཝཎྞནཱ

༨༤༡. དུཏིཡཝགྒསྶ པཋམེ དཱནེ ཝཱཏི དཱནནིམིཏྟཾ. རཏྟནྡྷཀཱརེ པུརིསསྶ ཧཏྠཔཱསེ ཋཱནཱདི, རཧོཔེཀྑཱ, སཧཱཡཱབྷཱཝོཏི ཏཱིཎི ཨངྒཱནི.

༨༤༢-༨༥༠. དུཏིཡཱདཱིནི ཨུཏྟཱནཱནི.

༨༥༤. པཉྩམེ པལླངྐསྶ ཨནོཀཱསེཏི ཨཱུརུབདྡྷཱསནསྶ ཨཔྤཧོནཀེ. པུརེབྷཏྟཾ ཨནྟརགྷརེ པལླངྐཔྤཧོནཀཱསནེ ནིསཛྫཱ, ཨནནུཉྙཱཏཀཱརཎཱ ཨནཱཔུཙྪཱ ཝུཏྟཔརིཙྪེདཱཏིཀྐམོཏི དྭེ ཨངྒཱནི.

༨༦༠-༨༧༩. ཚཊྛཱདཱིནི ¶ ཨུཏྟཱནཱནི.

ནིཊྛིཏོ ཨནྡྷཀཱརཝགྒོ དུཏིཡོ.

༣. ནགྒཝགྒོ

༡. པཋམཱདིསིཀྑཱཔདཝཎྞནཱ

༨༨༣-༨༨༧. ཏཏིཡཝགྒསྶ པཋམདུཏིཡཱནི ཨུཏྟཱནཱནི.

༨༩༣. ཏཏིཡེ ཝིསིབྦེཏྭཱཏི ཝིཛཊེཏྭཱ. དྷུརཾ ནིཀྑིཏྟམཏྟེཏི ཝིསིབྦནདིཝསཏོ པཉྩ དིཝསེ ཨཏིཀྐཱམེཏྭཱ དྷུརཾ ནིཀྑིཏྟམཏྟེ. ཨནྟོཔཉྩཱཧེ པན དྷུརནིཀྑེཔེཔི ཨནཱཔཏྟི ཨེཝ ‘‘ཨཉྙཏྲ ཙཏཱུཧཔཉྩཱཧཱ’’ཏི ཝུཏྟཏྟཱ ¶ . ཨུཔསམྤནྣཱཡ ཙཱིཝརཾ སིབྦནཏྠཱཡ ཝིསིབྦེཏྭཱ པཉྩཧཱཏིཀྐམོ, ཨནནུཉྙཱཏཀཱརཎཱ དྷུརནིཀྑེཔོཏི དྭེ ཨངྒཱནི.

༩༠༠. ཙཏུཏྠེ པཉྩནྣཾ ཙཱིཝརཱནཾ ཨཔརིཝཏྟནཾ, ཨནནུཉྙཱཏཀཱརཎཱ པཉྩཱཧཱཏིཀྐམོཏི དྭེ ཨངྒཱནི.

༩༠༣. པཉྩམཾ ཨུཏྟཱནམེཝ.

༩༠༩. ཚཊྛེ ཝིཀཔྤནུཔགསྶ སངྒྷེ པརིཎཏཏཱ, ཝིནཱ ཨཱནིསཾསདསྶནེན ཨནྟརཱཡཀརཎནྟི དྭེ ཨངྒཱནི.

༩༡༡. སཏྟམཾ ཨུཏྟཱནམེཝ.

༩༡༦. ཨཊྛམེ ཀུམྦྷཐཱུཎཾ ནཱམ ཀུམྦྷསདྡོ, ཏེན ཀཱིལ༹ནྟཱིཏི ཀུམྦྷཐཱུཎིཀཱ. ཏེནཱཧ ‘‘གྷཊཀེན ཀཱིལ༹ནཀཱ’’ཏི. དཱིགྷནིཀཱཡཊྛཀཐཱཡཾ པན ‘‘ཙཏུརསྶཨམྦཎཀཏཱལ༹’’ནྟི ཝུཏྟཾ. ཏཉྷི རུཀྑསཱརཱདིམཡཾ ཨནྟོཚིདྡཾ ཙཏཱུསུ པསྶེསུ ཙམྨོནདྡྷཾ ཝཱདིཏབྷཎྜཾ, ཡཾ ‘‘བིམྦིསཀ’’ནྟིཔི ཝུཙྩཏི, ཏཾ ཝཱདེནྟཱཔི ཀུམྦྷཐཱུཎིཀཱ. ཏེནཱཧ ‘‘བིམྦིསཀཝཱདིཏཀཱཏིཔི ཝདནྟཱི’’ཏི.

༩༡༨. པཱལི༹ཡཾ ¶ ཀཔྤཀཏནྟི ཀཔྤཀཏཾ ནིཝཱསནཔཱརུཔནཱུཔགཾ. སམཎཙཱིཝརཏཱ, ཨནནུཉྙཱཏཱནཾ དཱནནྟི དྭེ ཨངྒཱནི.

༩༢༡-༩༣༡. ནཝམདསམཱནི ཨུཏྟཱནཱནེཝ.

ནིཊྛིཏོ ནགྒཝགྒོ ཏཏིཡོ.

༤. ཏུཝཊྚཝགྒོ

༡༠. དསམསིཀྑཱཔདཝཎྞནཱ

༩༧༦. ཏུཝཊྚཝགྒསྶ དསམེ ཙཱརིཀཱཡ ཨཔཀྐམནཾ པཎྞཏྟིཝཛྫམེཝ. པཎྞཏྟིཝིཛཱནནཙིཏྟེན སཙིཏྟཀཏཾ སནྡྷཱཡ པནེཏྠ ‘‘ལོཀཝཛྫ’’ནྟི དཊྛབྦཾ. སེསཾ སབྦཏྠ ཨུཏྟཱནམེཝ.

ནིཊྛིཏོ ཏུཝཊྚཝགྒོ ཙཏུཏྠོ.

༥. ཙིཏྟཱགཱརཝགྒོ

༡. པཋམཱདིསིཀྑཱཔདཝཎྞནཱ

༩༧༨. ཙིཏྟཱགཱརཝགྒསྶ ¶ པཋམེ པཱཊེཀྐཱ ཨཱཔཏྟིཡོཏི གཱིཝཱཡ པརིཝཏྟནཔྤཡོགགཎནཱཡ.

༡༠༡༥. ནཝམེ ཧཏྠིཨཱདཱིསུ སིཔྤ-སདྡོ པཙྩེཀཾ ཡོཛེཏབྦོ, ཏཐཱ ཨཱཐབྦཎཱདཱིསུ མནྟ-སདྡོ. ཏཏྠ ཨཱཐབྦཎམནྟོ ནཱམ ཨཱཐབྦཎཝེདཝིཧིཏོ པརཱུཔགྷཱཏཀརོ མནྟོ. ཁཱིལནམནྟོ ནཱམ ཝེརིམཱརཎཏྠཱཡ སཱརདཱརུམཡཾ ཁཱིལཾ མནྟེཏྭཱ པཐཝིཡཾ ཨཱཀོཊནམནྟོ. ཨགདཔྤཡོགོ ཝིསཔྤཡོཛནཾ. ནཱགམཎྜལནྟི སཔྤཱནཾ པཝེསནིཝཱརཎཏྠཾ མཎྜལབནྡྷམནྟོ. སེསཾ སབྦཏྠ ཨུཏྟཱནམེཝ.

ནིཊྛིཏོ ཙིཏྟཱགཱརཝགྒོ པཉྩམོ.

༡༠༢༥-༡༡༡༦. ཨཱརཱམཝགྒེ ¶ , གབྦྷིནིཝགྒེ ཙ སབྦཾ ཨུཏྟཱནམེཝ.

༨. ཀུམཱརིབྷཱུཏཝགྒོ

༡. པཋམཱདིསིཀྑཱཔདཝཎྞནཱ

༡༡༡༩. ཨཊྛམཝགྒསྶ པཋམེ སབྦཔཋམཱ དྭེ མཧཱསིཀྑམཱནཱཏི གབྦྷིནིཝགྒེ (པཱཙི. ༡༠༦༧ ཨཱདཡོ) སབྦཔཋམཾ ཝུཏྟཱ དྭེ. སིཀྑམཱནཱ ཨིཙྩེཝ ཝཏྟབྦཱཏི སམྨུཏིཀམྨཱདཱིསུ ཨཉྙཐཱ ཝུཏྟེ ཀམྨཾ ཀུཔྤཏཱིཏི ཨདྷིཔྤཱཡོ.

༡༡༦༧. ཨེཀཱདསམེ པཱརིཝཱསིཡེན ཚནྡདཱནེནཱཏི པརིཝུཏྠེན ནཝིཀཔྤཝུཏྠེན ཝིགཏེན ཚནྡདཱནེནཱཏི ཨཏྠོ, ཚནྡཝིསྶཛྫནམཏྟེན ཝཱ.

༡༡༦༨. ‘‘ཝུཊྛིཏཱཡཱ’’ཏི ཨེཏེན ‘‘ཨིདཱནི ཀམྨཾ ན ཀརིསྶཱམཱ’’ཏི དྷུརཾ ནིཀྑིཔིཏྭཱ ཀཱཡེན ཨཝུཊྛཧིཏྭཱ ནིསིནྣཱཡཔི པརིསཱཡ ཀམྨཾ ཀཱཏུཾ ན ཝཊྚཏཱིཏི དསྶེཏི. ཏེནཱཧ ‘‘ཚནྡཾ ཨཝིསྶཛྫེཏྭཱ ཨཝུཊྛིཏཱཡཱ’’ཏི. པཱལི༹ཡཾ པན ‘‘ཨནཱཔཏྟི ཨཝུཊྛིཏཱཡ པརིསཱཡཱ’’ཏི སཱམཉྙཏོ ཝུཏྟཏྟཱ ¶ , ཨུཔོསཐཀྑནྡྷཀེ ཙ ‘‘ན, བྷིཀྑཝེ, པཱརིཝཱསིཀཔཱརིསུདྡྷིདཱནེན ཨུཔོསཐོ ཀཱཏབྦོ ཨཉྙཏྲ ཨཝུཊྛིཏཱཡ པརིསཱཡཱ’’ཏི (མཧཱཝ. ༡༨༣) ཝུཏྟཏྟཱ, ཏདཊྛཀཐཱཡམྤི ‘‘པཱརིཝཱསིཡཔཱརིསུདྡྷིདཱནཾ ནཱམ པརིསཱཡ ཝུཊྛིཏཀཱལཏོ པཊྛཱཡ ན ཝཊྚཏི, ཨཝུཊྛིཏཱཡ པན ཝཊྚཏཱི’’ཏི (མཧཱཝ. ཨཊྛ. ༡༨༣) ཝུཏྟཏྟཱ ཙ ‘‘ཀམྨཾ ན ཀརིསྶཱམཱི’’ཏི དྷུརཾ ནིཀྑིཔིཏྭཱ ནིསིནྣཱཡཔི ཀམྨཾ ཀཱཏུཾ ཝཊྚཏཱིཏི གཧེཏབྦཾ. སེསཾ ཨུཏྟཱནམེཝ.

ནིཊྛིཏོ ཀུམཱརིབྷཱུཏཝགྒོ ཨཊྛམོ.

༡༡༨༡. ཚཏྟཝགྒོ ཨུཏྟཱནོ ཨེཝ.

ཁུདྡཀཝཎྞནཱནཡོ ནིཊྛིཏོ.

༥. པཱཊིདེསནཱིཡཀཎྜཾ

པཱཊིདེསནཱིཡསིཀྑཱཔདཝཎྞནཱ

༡༢༢༨. པཱཊིདེསནཱིཡཱདཱིསུ ¶ ¶ པཱལི༹ཝིནིམུཏྟཀེསཱུཏི པཱལི༹ཡཾ ཨནཱགཏེསུ སཔྤིཨཱདཱིསུ.

སཏྟཱདྷིཀརཎཝ྄ཧཡཱཏི སཏྟཱདྷིཀརཎསམཐནཱམཀཱ. ཏཾ ཨཏྠཝིནིཙྪཡཾ ཏཱདིསཾཡེཝ ཡསྨཱ ཝིདཱུ ཝདནྟཱིཏི ཨཏྠོ. ཡཐཱ ནིཊྛིཏཱཏི སམྦནྡྷོ. སབྦཱསཝཔཧནྟི སབྦཱསཝཝིགྷཱཏཀཾ ཨརཧཏྟམགྒཾ. པསྶནྟུ ནིབྦུཏིནྟི མགྒཉཱཎེན ནིབྦཱནཾ སཙྪིཀརོནྟུ, པཔྤོནྟཱུཏི ཝཱ པཱཋོ. ཏཏྠ ནིབྦུཏིནྟི ཁནྡྷཔརིནིབྦཱནཾ གཧེཏབྦཾ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

བྷིཀྑུནཱིཝིབྷངྒཝཎྞནཱནཡོ ནིཊྛིཏོ.

ཨུབྷཏོཝིབྷངྒཊྛཀཐཱཝཎྞནཱ ནིཊྛིཏཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

མཧཱཝགྒཝཎྞནཱ

༡. མཧཱཁནྡྷཀོ

བོདྷིཀཐཱཝཎྞནཱ

མཧཱཝགྒེ ¶ ¶ ཨུབྷིནྣཾ པཱཏིམོཀྑཱནནྟི ཨུབྷིནྣཾ པཱཏིམོཀྑཝིབྷངྒཱནཾ. ཡཾ ཁནྡྷཀཾ སངྒཱཡིཾསཱུཏི སམྦནྡྷོ. ཁནྡྷཱནཾ སམཱུཧོ, ཁནྡྷཱནཾ ཝཱ པཀཱསནཏོ ཁནྡྷཀོ. ཁནྡྷཱཏི ཙེཏྠ པབྦཛྫཱདིཙཱརིཏྟཝཱརིཏྟསིཀྑཱཔདཔཉྙཏྟིསམཱུཧོ ཨདྷིཔྤེཏོ. པདབྷཱཛནཱིཡེ ཡེསཾ པདཱནཾ ཨཏྠཱ ཡེཧི ཨཊྛཀཐཱནཡེཧི པཀཱསིཏཱཏི ཡོཛནཱ. ཨཐ ཝཱ ཡེ ཨཏྠཱཏི ཡོཛེཏབྦཾ. ཧི-སདྡོ ཙེཏྠ པདཔཱུརཎེ དཊྛབྦོ.

༡. ཝིསེསཀཱརཎནྟི ‘‘ཡེན སམཡེན ཨཱཡསྨཏོ སཱརིཔུཏྟཏྠེརསྶ སིཀྑཱཔདཔཉྙཏྟིཡཱཙནཧེཏུབྷཱུཏོ ¶ པརིཝིཏཀྐོ ཨུདཔཱདི, ཏེན སམཡེནཱ’’ཏིཨཱདིནཱ ཝུཏྟཀཱརཎཾ ཝིཡ ཝིསེསཀཱརཎཾ བྷུམྨཝཙནནིཝཏྟནཀཀཱརཎནྟི ཨཏྠོ. ཨེཏསྶཱཏི ཨབྷིསམྦོདྷིཏོ པཊྛཱཡ སཏྠུ ཙརིཡཱཝིབྷཱཝནསྶ ཝིནཡཔཉྙཏྟིཡཾ ཀིཾ པཡོཛནཾ? ཡདི ཝིསེསཀཱརཎཾ ནཏྠཱིཏི ཨདྷིཔྤཱཡོ. ནིདཱནདསྶནཾ པཡོཛནནྟི ཡོཛནཱ. ནིདཱནནྟིཙེཏྠ སིཀྑཱཔདཔཉྙཏྟིཧེཏུབྷཱུཏཾ ཝཏྠུཔུགྒལཱདིཀཱརཎཾ ཨདྷིཔྤེཏཾ, ན པཉྙཏྟིཊྛཱནམེཝ. ཏེནཱཧ ‘‘ཡཱ ཧཱི’’ཏིཨཱདི.

ཨུརུཝེལཱཡནྟི ཨེཏྠ ཨུརུ-སདྡོ མཧནྟཝཱཙཱི. ཝེལཱ-སདྡོ ཏཱིརཔརིཡཱཡོ. ཨུནྣཏཏྟཱདིནཱ ཝེལཱ ཝིཡ ཝེལཱ. ཨུརུ མཧནྟཱི ཝེལཱ ཨུརུཝེལཱ, ཏསྶཾ. ཏེནཱཧ ‘‘མཧཱཝེལཱཡ’’ནྟིཨཱདི. མརིཡཱདཱཏི སཱིལཱདིགུཎསཱིམཱ. པཏྟཔུཊེནཱཏི ཏཱལཱདཱིནཾ པཎྞཔུཊེན.

‘‘པཋམཱབྷིསམྦུདྡྷོ’’ཏི ཨནུནཱསིཀལོཔེནཱཡཾ ནིདྡེསོཏི ཨཱཧ ‘‘པཋམཾ ཨབྷིསམྦུདྡྷོ’’ཏི. པཋམནྟི ཙ བྷཱཝནཔུཾསཀནིདྡེསོ. ཏསྨཱ ཨབྷིསམྦུདྡྷོ ¶ ཧུཏྭཱ སབྦཔཋམཾ བོདྷིརུཀྑམཱུལེ ཝིཧརཏཱིཏི ཡོཛནཱ དཊྛབྦཱ.

པཱལི༹ཡཾ ཨཐ ཁོཏི ཨེཏྠ ཨཐཱཏི ཨེཏསྨིཾ སམཡེཏི ཨཏྠོ ཨནེཀཏྠཏྟཱ ནིཔཱཏཱནཾ. སཏྟཱཧནྟི ཨཙྩནྟསཾཡོགེ ཨེཏཾ ཨུཔཡོགཝཙནཾ. ཨཐ ཁོཏི ཨདྷིཀཱརནྟརདསྶནེ ནིཔཱཏོ. ཏེན ཝིམུཏྟིསུཁཔཊིསཾཝེདནཾ པཧཱཡ པཊིཙྩསམུཔྤཱདམནསིཀཱརེ ཨདྷིཀཏབྷཱཝཾ དསྶེཏི. པཊིཙྩཱཏི པཊིམུཁཾ གནྟྭཱ, ཨཉྙམཉྙཾ ཨཔེཀྑིཏྭཱཏི ཨཏྠོ. ཨེཏེན ཀཱརཎབཧུཏཱ དསྶིཏཱ. སཧིཏེཏི ཀཱརིཡབཧུཏཱ. ཨནུལོམནྟི བྷཱཝནཔུཾསཀནིདྡེསོ. སྭེཝཱཏི སོ ཨེཝ པཙྩཡཱཀཱརོ. པུརིམནཡེན ཝཱ ཝུཏྟོཏི ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིནཱ ནཡེན ཝུཏྟོ པཙྩཡཱཀཱརོ. པཝཏྟིཡཱཏི སཾསཱརཔྤཝཏྟིཡཱ.

པཱལི༹ཡཾ ‘‘ཨཝིཛྫཱཔཙྩཡཱ’’ཏིཨཱདཱིསུ དུཀྑཱདཱིསུ ཨཉྙཱཎཾ ཨཝིཛྫཱ. ལོཀིཡཀུསལཱཀུསལཙེཏནཱ སངྑཱརཱ. ལོཀིཡཝིཔཱཀམེཝ ཝིཉྙཱཎཾ. ལོཀིཡཝེདནཱདིཀྑནྡྷཏྟཡཾ ནཱམཾ, བྷཱུཏུཔཱདཱཡབྷེདཾ རཱུཔཾ. པསཱདཝིཉྙཱཎབྷེདཾ སལཱ༹ཡཏནཾ. ཝིཔཱཀབྷཱུཏོ སབྦོ ཕསྶོ, ཝེདནཱ ཙ. རཱགོ ཏཎྷཱ. བལཝརཱགོ, ཏིཝིདྷཱ ཙ དིཊྛི ཨུཔཱདཱནཾ. བྷཝོ པན དུཝིདྷོ ཀམྨབྷཝོ, ཨུཔཔཏྟིབྷཝོ ཙ. ཏཏྠ ཀམྨབྷཝོ སཱསཝཀུསལཱཀུསལཙེཏནཱཝ, ཨུཔཔཏྟིབྷཝོ ཨུཔཱདིནྣཀཀྑནྡྷཱ. ཏེསཾ ཨུཔཔཏྟི ཛཱཏི. པཱཀོ ཛརཱ. བྷེདོ མརཎཾ. ཏེ ཨེཝ ནིསྶཱཡ སོཙནཾ སོཀོ. ཀནྡནཾ པརིདེཝོ. དུཀྑཾ ཀཱཡིཀཾ. དོམནསྶཾ ཙེཏསིཀཾ. ཨཏིཝིཡ སོཀོ ཨུཔཱཡཱསོ.

པཙྩེཀཉྩ ¶ སམྦྷཝཏི-སདྡོ ཡོཛེཏབྦོ. ཏེནཱཧ ‘‘ཨིམིནཱ ནཡེནཱ’’ཏིཨཱདི. ‘‘དུཀྑརཱསིསྶཱ’’ཏི ཨིམིནཱ ན སཏྟསྶ. ནཱཔི སུབྷསུཁཱདཱིནནྟི དསྶེཏི.

ཧཝེཏི བྱཏྟནྟི ཨིམསྨིཾ ཨཏྠེ ནིཔཱཏོ. ‘‘ཨནུལོམཔཙྩཡཱཀཱརཔཊིཝེདྷསཱདྷཀཱ བོདྷིཔཀྑིཡདྷམྨཱ’’ཏི ཨིདཾ པཋམཝཱརེ ཀིཉྩཱཔི ‘‘ཨཝིཛྫཱཡཏྭེཝ ཨསེསཝིརཱགནིརོདྷཱ’’ཏིཨཱདིནཱ པཊིལོམཔཙྩཡཱཀཱརོཔི ཨཱགཏོ, ཏཐཱཔི ‘‘ཡཏོ པཛཱནཱཏི སཧེཏུདྷམྨ’’ནྟི ཨནུལོམཔཙྩཡཱཀཱརཔཊིཝེདྷསྶེཝ ཀཱརཎཏྟེན ཝུཏྟནྟི. ཡཐཱ ཙེཏྠ, ཨེཝཾ དུཏིཡཝཱརེཔི ‘‘ཡཏོ ཁཡཾ པཙྩཡཱནཾ ཨཝེདཱི’’ཏི གཱཐཱཡ ཝུཏྟཏྟཱ ‘‘པཙྩཡཱནཾ ཁཡསངྑཱཏ’’ནྟིཨཱདི ¶ ཝུཏྟནྟི ཝེདིཏབྦཾ. ནོ ཀལློ པཉྷོཏི ཨཡུཏྟོ ན བྱཱཀཱཏབྦོ, ཨཝིཛྫམཱནཾ ཨཏྟཱནཾ སིདྡྷཾ ཀཏྭཱ ‘‘ཀོ ཕུསཏཱི’’ཏི ཏསྶ ཀིརིཡཱཡ པུཊྛཏྟཱ ‘‘ཀོ ཝཉྫྷཱཔུཏྟོ ཕུསཏཱི’’ཏིཨཱདི ཝིཡཱཏི ཨདྷིཔྤཱཡོ. སོལ༹ས ཀངྑཱཏི ‘‘ཨཧོསིཾ ནུ ཁོ ཨཧམཏཱིཏམདྡྷཱནཾ, ནནུ ཁོ ཨཧོསིཾ, ཀིཾ ནུ ཁོ ཨཧོསིཾ, ཀཐཾ ནུ ཁོ ཨཧོསིཾ, ཀིཾ ཧུཏྭཱ ཀིཾ ཨཧོསིཾ ནུ ཁོ ཨཧམཏཱིཏམདྡྷཱནཾ, བྷཝིསྶཱམི ནུ ཁོ ཨཧཾ ཨནཱགཏམདྡྷཱནཾ, ནནུ ཁོ བྷཝིསྶཱམི, ཀིཾ ནུ ཁོ བྷཝིསྶཱམི, ཀཐཾ ནུ ཁོ བྷཝིསྶཱམི, ཀིཾ ཧུཏྭཱ ཀིཾ བྷཝིསྶཱམི ནུ ཁོ ཨཧཾ ཨནཱགཏམདྡྷཱནཾ, ཨཧཾ ནུ ཁོསྨི, ནོ ནུ ཁོསྨི, ཀིཾ ནུ ཁོསྨི, ཀཐཾ ནུ ཁོསྨི, ཨཡཾ ནུ ཁོ སཏྟོ ཀུཏོ ཨཱགཏོ, སོ ཀུཧིཾ གཱམཱི བྷཝིསྶཏཱི’’ཏི (མ. ནི. ༡.༡༨; སཾ. ནི. ༢.༢༠) ཨེཝཾ ཨཱགཏཱ ཨཏཱིཏེ པཉྩ, ཨནཱགཏེ པཉྩ, པཙྩུཔྤནྣེ ཚཱཏི སོལ༹སཝིདྷཱ ཀངྑཱ.

ཏཏྠ ཀིཾ ནུ ཁོཏི མནུསྶདེཝཱདཱིསུ, ཁཏྟིཡཱདཱིསུ ཝཱ ཨཉྙཏརཾ ནིསྶཱཡ ཀངྑཏི. ཀཐཾ ནུ ཁོཏི པན སཎྛཱནཱཀཱརཱདཱིསུ ཨིསྶརཱདིཛནཀཾ, ཀཱརཎཾ ཝཱ ནིསྶཱཡ. ཀིཾ ཧུཏྭཱ ཀིཾ ཨཧོསིནྟི ཙ མནུསྶཱདཱིསུ པཋམཾ ཀིཾ ཧུཏྭཱ པཙྪཱ ཀིཾ ཨཧོསིནྟི ཀངྑཏི. ཨཧཾ ནུ ཁོསྨཱིཏིཨཱདི ཨིདཱནི ཨཏྟནོ ཝིཛྫམཱནཱཝིཛྫམཱནཏཾ, སརཱུཔཔཀཱརཱདིཀཉྩ ཀངྑཏི. ཝཔཡནྟཱིཏི ཝིཨཔཡནྟི བྱཔགཙྪནྟི. ཏེནཱཧ ‘‘ཨཔགཙྪནྟི ནིརུཛ྄ཛྷནྟཱི’’ཏི.

༣. ཏསྶ ཝསེནཱཏི ཏསྶ པཙྩཡཱཀཱརཔཛཱནནསྶ, པཙྩཡཀྑཡཱདྷིགམསྶ ཙ ཝསེན. ཨེཀེཀམེཝ ཀོཊྛཱསནྟི ཨནུལོམཔཊིལོམཏོ ཨེཀེཀམེཝ ཀོཊྛཱསཾ. པཱཊིཔདརཏྟིཡཱ ཨེཝཾ མནསཱཀཱསཱིཏི རཏྟིཡཱ ཏཱིསུཔི ཡཱམེསུ ཨེཝཾ ཨིདྷ ཁནྡྷཀཔཱལི༹ཡཱ ཨཱགཏནཡེན ཨནུལོམཔཊིལོམཾཡེཝ མནསཱཀཱསི.

ཨཛཔཱལཀཐཱཝཎྞནཱ

༤. ཏསྶ ¶ སཏྟཱཧསྶ ཨཙྩཡེནཱཏི པལླངྐསཏྟཱཧསྶ ཨཔགམནེན. ཏམྷཱ སམཱདྷིམྷཱཏི ཨརཧཏྟཕལསམཱཔཏྟིསམཱདྷིམྷཱ. ཨནྟརནྟརཱ ཨེཝ ཧི པཙྩཡཱཀཱརམནསིཀཱརོ. ཨཝསེསཀཱལཾ པན སབྦཾ བྷགཝཱ ཕལསམཱཔཏྟིཡཱཔི ཝཱིཏིནཱམེསི. ཏཾ སནྡྷཱཡ ‘‘ཏམྷཱ སམཱདྷིམྷཱ’’ཏི ཝུཏྟཾ. རཏནཙངྐམེཏི ¶ བྷགཝཏོ ཙིརཾ ཋིཏསྶ ཙངྐམནཱདྷིཔྤཱཡཾ ཉཏྭཱ དེཝཏཱཧི མཱཔིཏེ རཏནཙངྐམེ. རཏནགྷརནྟི བྷགཝཏོ ནིསཱིདནཱདྷིཔྤཱཡཾ ཉཏྭཱ དེཝཏཱཧི མཱཔིཏཾ རཏནམཡཾ གེཧཾ.

ཏཏྲཱཔཱིཏི ན ཀེཝལཾ རཏནགྷརེཡེཝ. ཏཏྲཱཔི ཨཛཔཱལནིགྲོདྷམཱུལེཔི ཨབྷིདྷམྨཾ ཝིཙིནནྟོ ཨེཝ ཨནྟརནྟརཱ ཝིམུཏྟིསུཁཾ པཊིསཾཝེདེནྟོཏི ཨཏྠོ. ཏཏྠཱཔི ཧི ཨནནྟནཡསམནྟཔཊྛཱནཾ སམྨསཏོ སམྨཱསམྦུདྡྷསྶ པཱིཏིསམུཊྛིཏཱ ཚབྦཎྞཱ བུདྡྷརསྨིཡོ རཏནགྷརེ ཝིཡ ནིཙྪརིཾསུ ཨེཝ. ‘‘ཧུཾཧུ’’ནྟི ཀརོནྟོཏི ‘‘སབྦེ ཧཱིནཛཱཏིཀཱ མཾ མཱ ཨུཔགཙྪནྟཱུ’’ཏི མཱནཝསེན, སམཱིཔཾ ཨུཔགཏེསུ ཀོདྷཝསེན ཙ ‘‘ཨཔེཐཱ’’ཏི ཨདྷིཔྤཱཡནིཙྪཱརིཏཾ ཧུཾཧུཾཀཱརཾ ཀརོནྟོ.

བྲཧྨཉྙནྟི བྲཱཧྨཎཏྟཾ. ཨནྟནྟི ནིབྦཱནཾ. དེཝཱནཾ ཝཱ ཨནྟནྟི མགྒཉཱཎཱནཾ ཝཱ ཨནྟབྷཱུཏཾ ཨརཧཏྟཕལཾ.

མུཙལིནྡཀཐཱཝཎྞནཱ

༥. མུཙལིནྡམཱུལེཏི ཨེཏྠ ཙ མུཙལིནྡོ ཝུཙྩཏི ནཱིཔརུཀྑོ, ཡོ ‘‘ནིཙུལོ’’ཏིཔི ཝུཙྩཏི. ཨུཔྤནྣམེགྷོཏི སཀལཙཀྐཝཱལ༹གབྦྷཾ པཱུརེཏྭཱ ཨུཔྤནྣོ མཧཱམེགྷོ. ཝདྡལིཀཱཏི ཝུཊྛིཡཱ ཨེཝ ཨིཏྠིལིངྒཝསེན ནཱམཾ. ཡཱ ཙ སཏྟཱཧཾ པཝཏྟཏྟཱ སཏྟཱཧཝདྡལིཀཱཏི ཝུཏྟཱཏི ཨཱཧ ‘‘སཏྟཱཧཾ ཨཝིཙྪིནྣཝུཊྛིཀཱ ཨཧོསཱི’’ཏི. སཱིཏཝཱཏེན དཱུསིཏཾ དིནམེཏིསྶཱ ཝདྡལིཀཱཡཱཏི སཱིཏཝཱཏདུདྡིནཱིཏི ཨཱཧ ‘‘ཨུདཀཕུསིཏསམྨིསྶེནཱ’’ཏིཨཱདི. ཨུབྦིདྡྷཏཱ ནཱམ དཱུརབྷཱཝེན ཨུཔཊྛཱནནྟི ཨཱཧ ‘‘མེགྷཝིགམེན དཱུརཱིབྷཱུཏ’’ནྟི. ཨིནྡནཱིལམཎི ཝིཡ དིབྦཏི ཛོཏེཏཱིཏི དེཝོ, ཨཱཀཱསོ.

ཨེཏམཏྠཾ ཝིདིཏྭཱཏི ཝིཝེཀསྶ སུཁབྷཱཝཾ ཝིདིཏྭཱ. སབྦསོ ཨསནྟུཊྛིསམུཙྪེདཀཏྟཱ མགྒཉཱཎཱནཾ ‘‘ཙཏུམགྒཉཱཎསནྟོསེནཱ’’ཏི ཝུཏྟཾ. ཨཀུཔྤནབྷཱཝོཏི ཨཀུཛ྄ཛྷནསབྷཱཝོ.

རཱཛཱཡཏནཀཐཱཝཎྞནཱ

༦. པཙྩགྒྷེཏི ¶ ཨབྷིནཝེ. ཨཡམེཝ ཨཏྠོ པསཏྠོ, ན པུརིམོ. ན ཧི བུདྡྷཱ མཧགྒྷཾ པཏྟཾ པརིབྷུཉྫནྟི.

བྲཧྨཡཱཙནཀཐཱཝཎྞནཱ

༧. ཨཱལཱིཡནྟི ¶ སེཝཱིཡནྟཱིཏི ཨཱལཡཱ. པཉྩ ཀཱམགུཎཱཏི ཨཱཧ ‘‘སཏྟཱ…པེ… ཝུཙྩནྟཱི’’ཏི. སུཊྛུ མུདིཏཱཏི ཨཏིཝིཡ པམུདིཏཱ. ཋཱནཾ སནྡྷཱཡཱཏི ཋཱན-སདྡཾ ཨཔེཀྑིཏྭཱ. ཨིམེསནྟི སངྑཱརཱདཱིནཾ ཕལཱནཾ. པཱལི༹ཡཾ སབྦསངྑཱརསམཐོཏིཨཱདཱིནི ནིབྦཱནཝེཝཙནཱནི. ཨཔིསྶཱུཏི སམྤིཎྜནཏྠེ ནིཔཱཏོ. ན ཀེཝལཾ ཨེཏདཧོསི, ཨིམཱཔི གཱཐཱ པཊིབྷཾསཱུཏི ཨཏྠོ.

ཀིཙྪེན མེ ཨདྷིགཏནྟི པཱརམིཔཱུརཎཾ སནྡྷཱཡ ཝུཏྟཾ, ན དུཀྑཱཔཊིཔདཾ. བུདྡྷཱནཉྷི ཙཏྟཱརོ མགྒཱ སུཁཱཔཊིཔདཱཝ ཧོནྟི. ཧ-ཨིཏི བྱཏྟཾ, ཨེཀཾསནྟི དྭཱིསུ ཨཏྠེསུ ནིཔཱཏོ, བྱཏྟཾ, ཨེཀཾསེན ཝཱ ཨལནྟི ཝིཡོཛེནྟི. ཧལནྟི ཝཱ ཨེཀོ ནིཔཱཏོ.

༨. པཱལི༹ཡཾ སཧམྤཏིསྶཱཏི སོ ཀིར ཀསྶཔསྶ བྷགཝཏོ སཱསནེ སཧཀོ ནཱམ ཐེརོ པཋམཛ྄ཛྷཱནབྷཱུམིཡཾ བྲཧྨཔཏི ཧུཏྭཱ ནིབྦཏྟོ, ཏེན ནཾ ‘‘སཧམྤཏཱི’’ཏི སཉྫཱནིཾསུ. ཨསྶཝནཏཱཏི ཨསྶཝནཏཱཡ, ཨསྶཝནེནཱཏི ཨཏྠོ. སཝནམེཝ ཧི སཝནཏཱ ཡཐཱ དེཝཏཱཏི.

དྷམྨོ ཨསུདྡྷོཏི མིཙྪཱདིཊྛིདྷམྨོ. སམལེཧཱིཏི པཱུརཎཀསྶཔཱདཱིཧི ཚཧི སཏྠཱརེཧི. ཨཔཱཔུརཱཏི དེསནཱཧཏྠེན ཝིཝར. དྭཱརནྟི ཨརིཡམགྒཾ སནྡྷཱཡ ཝདཏི.

སེལེཏི གྷནསིལཱམཡེ. ཏཐཱུཔམནྟི ཨེཏྠ ཏཐཱ-སདྡོ ཏཾ-སདྡཏྠེ དཊྛབྦོ. ཏེན སོ སེལཔབྦཏོ ཨུཔམཱ ཡསྶ. ཏཾ ཏཐཱུཔམནྟི ཨཏྠོ. ཏེན ཝཱ པབྦཏཱདིནཱ པཀཱརེན ཨུཔམཱ ཨསྶཱཏིཔི ཨཏྠོ. དྷམྨམཡནྟི ལོཀུཏྟརདྷམྨབྷཱུཏཾ. ཨུཊྛཱཧཱིཏི དྷམྨདེསནཏྠཱཡ ཙཱརིཀཙརཎཏྠཾ ཨིམམྷཱ ཨཱསནཱ ཀཱཡེན, ཨཔྤོསྶུཀྐབྷཱཝཏོ ཝཱ ཙིཏྟེན ཨུཊྛེཧི, ཨཡམེཝ ཝཱ པཱཋོ. ཏེནེཝ ‘‘ཝིཙར, དེསསྶཱུ’’ཏི དུཝིདྷེཔི ཀཱཡཙིཏྟཔཡོགེ ནིཡོཛེསི. ཝཱིརཱཏིཨཱདི ཙཏྟཱརི ཐུཏིཝསེན སམྦོདྷནཱནི.

༩. བུདྡྷཙཀྑུནཱཏི ¶ ཨིནྡྲིཡཔརོཔརིཡཏྟཉཱཎེན, ཨཱསཡཱནུསཡཉཱཎེན ཙ. ཨིམེསཉྷི དྭིནྣཾ ‘‘བུདྡྷཙཀྑཱུ’’ཏི ནཱམཾ. སྭཱཀཱརཱཏི སདྡྷིནྡྲིཡཱདཡོཝ ཨཱཀཱརཱ ¶ སུནྡརཱ ཡེསཾ, ཏེ སྭཱཀཱརཱ, སུཝིཉྙཱཔཡཱ, པརལོཀཉྩ ཝཛྫཉྩ བྷཡཏོ དསྶནསཱིལཱ ཙཱཏི དཊྛབྦཾ. ཨུཔྤལཱནི ཨེཏྠ སནྟཱིཏི ཨུཔྤལིནཱིཏི གཙྪལཏཱཔི པོཀྑརཎཱིཔི ཝུཙྩཏི. ཨིདྷ པན པོཀྑརཎཱི. ཨེཝམིཏརེསུཔི. ཨུདཀཱནུགྒཏཱནཱིཏི ཨུདཀཏོ ཨནུགྒཏཱནི. ཨནྟོ ནིམུགྒཱནེཝ ཧུཏྭཱ པུསནྟི ཝཌྜྷནྟི, ཏཱནི ཨནྟོནིམུགྒཔོསཱིནི. ཨཙྩུགྒམྨཱཏི ཨུདཀཾ ཨཏིཀྐམནཝསེན ཨུགྒནྟྭཱ.

ཨཔཱརུཏཱཏི ཝིཝཊཱ. ཏེསནྟི སཨུཔནིསྶཡཱནཾ སཏྟཱནཾ. དྭཱརཱཏི ཨརིཡམགྒདྭཱརཱནི. ཨིདཉྩ ཨཏྟནོ སཡམྦྷུཉཱཎེན སཨུཔནིསྶཡཱནཾ ཏེསཾ མགྒུཔྤཏྟིདིཊྛཏཾ སནྡྷཱཡ ཝདཏི. ཝིཧིཾསསཉྙཱིཏིཨཱདཱིསུ ཨེཝམཏྠོ དཊྛབྦོ – ‘‘ཨཧཉྷི ཨཏྟནོ པགུཎཾ སུཔྤཝཏྟིཏམྤི ཨིམཾ པཎཱིཏཾ དྷམྨཾ ཨཛཱནནྟེསུ མནུཛེསུ དེསནཱཡ ཝིཧིཾསཱ ཀཱཡཝཱཙཱཀིལམཐོ ཧོཏཱི’’ཏི ཨེཝཾ ཝིཧིཾསསཉྙཱི ཧུཏྭཱ ན བྷཱསིཾ བྷཱསིཏུཾ ན ཨིཙྪིཾ. ཨིདཱནི པན ཧེཏུསམྤནྣཱ ཨཏྟནོ སདྡྷཱབྷཱཛནཾ ཝིཝརནྟུ, པཱུརེསྶཱམི ནེསཾ སངྐཔྤནྟི.

པཉྩཝགྒིཡཀཐཱཝཎྞནཱ

༡༠. ཨཱལཱ༹རོཏི ནཱམཾ. ཀཱལཱམོཏི གོཏྟཾ. བྷགཝཏོཔི ཁོ ཉཱཎཾ ཨུདཔཱདཱིཏི ཀིཾ ཨིདཱནེཝ ཨུདཔཱདི, ནནུ བོདྷིམཱུལེ ཏེཀཱལིཀཱ, ཀཱལཝིནིམུཏྟཱ ཙ སབྦེ དྷམྨཱ སབྦཱཀཱརཏོ དིཊྛཱཏི? སཙྩཾ དིཊྛཱ, ཏཐཱཔི ནཱམཱདིཝསེན ཨཝིཀཔྤིཏཱ ཨེཀཙིཏྟཀྑཎིཀཏྟཱ སབྦཉྙུཏཉྙཱཎསྶ. ན ཧི ཨེཀེན ཙིཏྟེན སབྦདྷམྨཱནཾ ནཱམཛཱཏིཨཱདིཀཾ པཙྩེཀཾ ཨནནྟཾ ཝིབྷཱགཾ ཝིཀཔྤེཏུཾ སཀྐཱ ཝིཀཔྤཱནཾ ཝིརུདྡྷཱནཾ སཧཱནུཔྤཏྟིཏོ, སབྦཝིཀཔྤཱརཧདྷམྨདསྶནམེཝ པནཱནེན སཀྐཱ ཀཱཏུཾ. ཡཐཱ དིཊྛེསུ པན ཡཐིཙྪིཏཱཀཱརཾ ཨཱརབྦྷ ཝིཀཔྤོ ཨུཔྤཛྫཏི ཙཀྑུཝིཉྙཱཎེན དིཊྛེ ཙིཏྟཔཊེ ཝིཡ. ཨིདྷཱཔི ཨཱལཱ༹རཾ ནིསྶཱཡ ཨཱཝཛྫནཱནནྟརམེཝ སབྦཱཀཱརཉཱཎཾ ཨུདཔཱདི. ན ཀེཝལཉྩ ཏཾ, ཨཐ ཁོ པཉྩཝགྒིཡཱ ཨེཝ པཋམཾ དྷམྨཾ ཛཱནིསྶནྟི, ཏཔྤམུཁཱ ཙ དེཝཏཱ, ཨཱལཱ༹རོ ཀཱལཾ ཀཏྭཱ ཨཱཀིཉྩཉྙཱཡཏནེ, ཨུདཀོ ཙ ནེཝསཉྙཱནཱསཉྙཱཡཏནེ ནིབྦཏྟོཏི ཨེཝམཱདིཀཾ སབྦམྤི ནིསྶཱཡ ཉཱཎཾ ཨུཔྤཛྫཏི ཨེཝ. ཏཾ པན ཁཎསམྤཏྟིཡཱ དུལླབྷབྷཱཝཾ དསྶེཏུཾ ཀམེན ཨོལོཀེཏྭཱ དེཝཏཱཡ ཝུཏྟེ ཉཱཎཾ ཝིཡ ཀཏྭཱ ¶ ཝུཏྟཾ. སདྡགཏིཡཱ ཧི བནྡྷཏྟཱ ཨེཀེན ཉཱཎེན ཉཱཏམྤི ཝུཙྩམཱནཾ ཀམེན ཉཱཏཾ ཝིཡ པཊིབྷཱཏི, དེཝཏཱཔི ཙ བྷགཝཏཱ ཉཱཏམེཝཏྠཾ ཨཱརོཙེསི. ཏེནེཝ ‘‘བྷགཝཏོཔི ཁོ ཉཱཎཾ ཨུདཔཱདཱི’’ཏི ཝུཏྟནྟི དཊྛབྦཾ. ཨེཝམཉྙཏྠཱཔི ཨཱིདིསེསུ ‘‘ལོཀཾ ཝོལོཀེནྟོ ཨསུཀཾ ཨདྡས, ཏཏྠ ¶ མཡི གཏེ ཀིཾ བྷཝིསྶཏཱི’’ཏི ཨེཝམཱདིནཱ སཏྠུ ཧིཏེསིཏཱསནྡསྶནཝསཔྤཝཏྟེསུ. སབྦཏྠ ཝཙནགཏིཡཾ ཀམཝུཏྟིཏེ པཉྙཱཡམཱནེཔི ཨེཀེནེཝ ཉཱཎེན སཀལཱཝབོདྷོ ཝེདིཏབྦོ. བཧུཀཱརཱ ཁོ མེ པཉྩཝགྒིཡཱཏི ཨུཔཀཱརསྶཱཔི ཝིཛྫམཱནཏཾ སནྡྷཱཡ ཝུཏྟཾ, ན པན དྷམྨདེསནཱཡ ཀཱརཎཏྟེན ཨནུཔཀཱརཱནམྤི དེསནཏོ.

༡༡. ཨནྟརཱ ཙ གཡཾ ཨནྟརཱ ཙ བོདྷིནྟི གཡཱཡ, བོདྷིསྶ ཙ ཨནྟརེ ཏིགཱཝུཏེ ཋཱནེ.

སབྦཱབྷིབྷཱུཏི སབྦཾ ཏེབྷཱུམཀདྷམྨཾ ཨབྷིབྷཝིཏྭཱ ཋིཏོ. ཨནཱུཔལིཏྟོཏི ཀིལེསལེཔེན ཨལིཏྟོ. ཏཏོ ཨེཝ སབྦཉྫཧོ. ཏཎྷཀྑཡེ ཝིམུཏྟོཏི ཏཎྷཀྑཡེ ནིབྦཱནེ ཨཱརམྨཎཀརཎཝསཨེན ཝིམུཏྟོ. ཨེཝཾ སཡཾ སབྦདྷམྨེ ཨཏྟནཱཝ ཛཱནིཏྭཱ. ཀམུདྡིསེཡྻནྟི ཀཾ ཨཉྙཾ ‘‘ཨཡཾ མེ ཨཱཙརིཡོ’’ཏི ཨུདྡིསེཡྻཾ.

ཀཱསིནཾ པུརནྟི བཱརཱཎསིཾ. ཨཱཧཉྪནྟི ཨཱཧནིསྶཱམི. ཨམཏཱདྷིགམཱཡ ཨུགྒྷོསནཏོ ཨམཏདུནྡུབྷིནྟི སཏྠུ དྷམྨདེསནཱ ཝུཏྟཱ, ‘‘ཨམཏབྷེརིཾ པཧརིསྶཱམཱི’’ཏི གཙྪཱམཱིཏི ཨཏྠོ.

ཨརཧསི ཨནནྟཛིནོཏི ཨནནྟཛིནོཔི བྷཝིཏུཾ ཡུཏྟོཏི ཨཏྠོ. ཨནནྟཉཱཎཏཱཡ ཨནནྟོ ཛིནོ ཙ, ཨནནྟེན ཝཱ ཉཱཎེན, ཨནནྟཾ ཝཱ དོསཾ ཛིཏཝཱ, ཨུཔྤཱདཝཡནྟརཧིཏཏཱཡ ཝཱ ཨནནྟཾ ནིབྦཱནཾ ཨཛིནི ཀིལེསཱརཡོ མདྡིཏྭཱ གཎྷཱིཏིཔི ཨནནྟཛིནོ.

ཧུཔེཡྻཱཔཱིཏི ཨེཝམྤི བྷཝེཡྻ, ཨེཝཾཝིདྷེ རཱུཔཀཱཡརཏནེ ཨཱིདིསེན ཉཱཎེན བྷཝིཏབྦནྟི ཨདྷིཔྤཱཡོ. ཨེཝཾ ནཱམ ཀཐནཉྷིསྶ ཨུཔནིསྶཡསམྤནྣསྶ ཨཔརཀཱལེ དུཀྑཔྤཏྟསྶ བྷགཝནྟཾ ཨུཔགམྨ པབྦཛིཏྭཱ མགྒཕལཔཊིཝེདྷཱཡ པཙྩཡོ ཛཱཏོ. ཏཐཱཧེས བྷགཝཱ ཏེན སམཱགམཏྠཾ པདསཱཝ མགྒཾ པཊིཔཛྫི.

༡༢. བཱཧུལླིཀོཏི ¶ པཙྩཡབཱཧུལླིཀོ. པདྷཱནཝིབྦྷནྟོཏི པདྷཱནཏོ དུཀྐརཙརཎཏོ པརིཧཱིནོ. ནཏྠི ཨེཏྠ ཨགཱརིཡཾ, ཨགཱརསྶ ཧིཏཾ ཀསིགོརཀྑཱདིཀམྨནྟི ཨནགཱརིཡཱ, པབྦཛྫཱ, ཏཾ ཨནགཱརིཡཾ. པབྦཛནྟཱིཏི ཨུཔགཙྪནྟི. ཏདནུཏྟརནྟི ཏཾ ཨནུཏྟརཾ. བྲཧྨཙརིཡཔརིཡོསཱནནྟི མགྒབྲཧྨཙརིཡསྶ པརིཡོསཱནཾ, ཨརཧཏྟཕལནྟི ཨཏྠོ. ཏསྶ ཧི ཨཏྠཱཡ ཀུལཔུཏྟཱ པབྦཛནྟི. དིཊྛེཝ དྷམྨེཏི ཨིམསྨིཾ པཙྩཀྑེ ཨཏྟབྷཱཝེ. སཡནྟི ཨཔརཔྤཙྩཡཱ ¶ . ཨབྷིཉྙཱ སཙྪིཀཏྭཱཏི ཨཏྟནོཝ ཉཱཎེན པཙྩཀྑཾ ཀཏྭཱ. ཨུཔསམྤཛྫཱཏི པཱཔུཎིཏྭཱ.

ཨིརིཡཱཡཱཏི དུཀྐརཨིརིཡཱཡ. ཨུཏྟརིམནུསྶདྷམྨཱཏིཨཱདཱིསུ མནུསྶདྷམྨཏོ ལོཀིཡཉཱཎཏོ ཨུཔརི ཨརིཡཾ ཀཱཏུཾ ཨལཾ སམཏྠོ ཨལམརིཡོ. ཉཱཎདསྶནཝིསེསོཏི སབྦཉྙུཏཉྙཱཎསྶ པུབྦབྷཱགཾ ཨདྷིཔྤེཏཾ. ནོཏི ནུ. བྷཱསིཏམེཏནྟི ཨེཝརཱུཔམེཏཾ ཝཱཀྱབྷེདནྟི ཨཏྠོ. ཏེ ཙ ‘‘ཡདི ཨེས པདྷཱནཀཱལེ ‘ཨཧཾ ཨརཧཱ’ཏི ཝདེཡྻ, མཡཉྩ སདྡཧཱམ, ན ཙཱནེན ཏདཱ ཝུཏྟཾ. ཨིདཱནི པན ཝིཛྫམཱནམེཝ གུཎཾ ཝདཏཱི’’ཏི ཨེཀཔདེན སཏིཾ ལབྷིཏྭཱ ‘‘བུདྡྷོ ཛཱཏོ’’ཏི ཨུཔྤནྣགཱརཝཱ ཨཱཝུསོཝཱདཾ པཧཱཡ ‘‘ནོ ཧེཏཾ, བྷནྟེ’’ཏི ཨཱཧཾསུ. ཨཉྙཱ ཙིཏྟནྟི ཨཉྙཱཡ ཨརཧཏྟཔྤཏྟིཡཱ ཙིཏྟཾ.

༡༣. ཨནྟཱཏི ཀོཊྛཱསཱ དྭེ བྷཱགཱ. ཀཱམེསུ ཀཱམསུཁལླིཀཱནུཡོགོཏི ཝཏྠུཀཱམེསུ ཀིལེསཀཱམསུཁསྶ ཨནུབྷཝོ. ཀིལེསཀཱམཱ ཨེཝ ཝཱ ཨཱམིསསུཁེན ཨལླཱིཡནཏོ ཀཱམསུཁལླིཀཱཏི ཝུཏྟཱཏི དཊྛབྦཱ. གམྨོཏི གཱམཝཱསཱིནཾ སནྟཀོ. ཨཏྟཀིལམཐཱནུཡོགོཏི ཨཏྟནོ ཀིལམཐསྶ ཀཎྚཀསེཡྻཱདིདུཀྑསྶ ཨནུཡོགོ. ཨུབྷོ ཨནྟེཏི ཡཐཱཝུཏྟེ ལོབྷོ ཝཱ སསྶཏོ ཝཱ ཨེཀོ ཨནྟོ, དོསོ ཝཱ ཨུཙྪེདོ ཝཱ ཨེཀོཏི ཝེདིཏབྦོ.

ཙཀྑུཀརཎཱིཏིཨཱདཱིསུ ཨཏྟནཱ སམྤཡུཏྟཉཱཎཙཀྑུཾ ཀརོཏཱིཏི ཙཀྑུཀརཎཱི. དུཏིཡཾ ཏསྶེཝ ཝེཝཙནཾ. ཨུཔསམོཏི ཀིལེསུཔསམོ. ཨབྷིཉྙཱ, སམྦོདྷོ ཙ ཙཏུསཙྩཔཊིཝེདྷོཝ. ནིབྦཱནཾ ཨསངྑཏདྷཱཏུ. ཨེཏེསམྤི ཨཏྠཱཡ སཾཝཏྟཏཱིཏི པཊིཔདཾ ཐོམེཏི. སམྨཱདིཊྛཱིཏི ཉཱཎཾ. སམྨཱསངྐཔྤོཏི ཝིཏཀྐོ. སེསཾ དྷམྨཏོ སུཝིཉྙེཡྻམེཝ.

༡༤. ཨེཝཾ ¶ ཙཏྟཱརོཔི མགྒེ ཨེཀཏོ དསྶེཏྭཱ ཨིདཱནི ཏེཧི མགྒེཧི པཊིཝིཛ྄ཛྷིཏབྦཱནི ཙཏྟཱརི ཨརིཡསཙྩཱནི དསྶེཏུཾ ‘‘ཨིདཾ ཁོ པན, བྷིཀྑཝེ’’ཏིཨཱདིམཱཧ. ཛཱཏིཔི དུཀྑཱཏིཨཱདཱིསུ ཏཏྠ ཏཏྠ བྷཝེ ནིབྦཏྟམཱནཱནཾ སཏྟཱནཾ སབྦཔཋམཾ རཱུཔཱརཱུཔདྷམྨཔྤཝཏྟི ཨིདྷ ཛཱཏི ནཱམ, སཱ ཙ ཏཏྠ ཏཏྠ བྷཝེསུ ཨུཔལབྦྷམཱནཱནཾ དུཀྑཱདཱིནཾ ཝཏྠུབྷཱཝཏོ དུཀྑཱ, ཨེཝཾ ཛརཱདཱིསུ དུཀྑཝཏྠུཀཏཱཡ དུཀྑཏཱ ཝེདིཏབྦཱ. པཉྩུཔཱདཱནཀྑནྡྷཱ པན དུཀྑདུཀྑཝིཔརིཎཱམདུཀྑསངྑཱརདུཀྑཝསེན དུཀྑཱ ཨེཝ. པོནོབྷཝིཀཱཏི པུནབྦྷཝཀརཎཾ པུནབྦྷཝོ ཨུཏྟརཔདལོཔེན, པུནབྦྷཝོ སཱིལམེཏིསྶཱཏི པོནོབྷཝིཀཱ. ནནྡིརཱགསཧགཏཱཏི ཨེཏྠ རཱུཔཱདཱིསུ ནནྡཏི པིཡཱཡཏཱིཏི ནནྡཱི, སཱ ཨེཝ རཱགོཏི ནནྡིརཱགོཏི བྷཱཝཔྤདྷཱནོཡཾ ནིདྡེསོ, ནནྡིརཱགཏྟནྟི ¶ ཨཏྠོ. ཏེན སཧགཏཱནི ནནྡིརཱགསཧགཏཱ. ཏཏྲ ཏཏྲཱཏི ཏསྨིཾ ཏསྨིཾ བྷཝེ. རཱུཔཱདཱིསུ ཚསུ ཨཱརམྨཎེསུ ཀཱམསྶཱདནཝསེན པཝཏྟཱ ཀཱམཏཎྷཱ ནཱམ. སསྶཏདིཊྛིཡཱ སཧ པཝཏྟཱ བྷཝཏཎྷཱ. ཨུཙྪེདདིཊྛིཡཱ སཧ པཝཏྟཱ ཝིབྷཝཏཎྷཱ. ཨསེསཝིརཱགནིརོདྷོཏིཨཱདིནཱ ནིབྦཱནམེཝ ཝུཙྩཏི. ཏཏྠ ཝིརཛྫནཾ ཝིགམནཾ ཝིརཱགོ. ནིརུཛ྄ཛྷནཾ ནིརོདྷོ. ཨུབྷཡེནཱཔི སུཊྛུ ཝིགམོཝ ཝུཙྩཏི. ཨསེསཱཡཔི ཏཎྷཱཡ ཝིརཱགོ, ནིརོདྷོ ཙ ཡེན ཧོཏི, སོ ཨསེསཝིརཱགནིརོདྷོ, ནིབྦཱནམེཝ. ཡསྨཱ ཙ ཏཾ ཨཱགམྨ ཏཎྷཾ, ཝཊྚཉྩ ཙཛནྟི པཊིནིསྶཛྫནྟི ཝིམུཙྩནྟི ན ཨལླཱིཡནྟི, ཏསྨཱ ཙཱགོ པཊིནིསྶགྒོ མུཏྟི ཨནཱལཡོཏི ཝུཙྩཏི.

༡༥. ཙཀྑུནྟིཨཱདཱིནི ཉཱཎཝེཝཙནཱནེཝ.

༡༦. ཡཱཝཀཱིཝཉྩཱཏི ཡཏྟཀཾ ཀཱལཾ. ཏིཔརིཝཊྚནྟི སཙྩཉཱཎ, ཀིཙྩཉཱཎ, ཀཏཉཱཎསངྑཱཏཱནཾ ཏིཎྞཾ པརིཝཊྚཱནཾ ཝསེན ཏིཔརིཝཊྚཾ ཉཱཎདསྶནཾ. ཨེཏྠ ཙ ‘‘ཨིདཾ དུཀྑཾ ཨརིཡསཙྩཾ, ཨིདཾ དུཀྑསམུདཡ’’ནྟི ཨེཝཾ ཙཏཱུསུ སཙྩེསུ ཡཐཱབྷཱུཏཉཱཎཾ སཙྩཉཱཎཾ ནཱམ. ཏེསུ ཨེཝ ‘‘པརིཉྙེཡྻཾ པཧཱཏབྦཾ སཙྪིཀཱཏབྦཾ བྷཱཝེཏབྦ’’ནྟི ཨེཝཾ ཀཏྟབྦཀིཙྩཛཱནནཉཱཎཾ ཀིཙྩཉཱཎཾ ནཱམ. ‘‘པརིཉྙཱཏཾ པཧཱིནཾ སཙྪིཀཏཾ བྷཱཝིཏ’’ནྟི ཏསྶ ཀིཙྩསྶ ཀཏབྷཱཝཛཱནནཉཱཎཾ ཀཏཉཱཎཾ ནཱམ. དྭཱདསཱཀཱརནྟི ཏེསམེཝ ཨེཀེཀསྨིཾ སཙྩེ ཏིཎྞཾ ཏིཎྞཾ ཨཱཀཱརཱནཾ ཝསེན དྭཱདསཱཀཱརཾ.

ཨབྷིསམྦུདྡྷོཏི པཙྩཉྙཱསིནྟི ཨབྷིསམྦུདྡྷོ ཨརཧཏྟཾ པཏྟོཏི ཨེཝཾ ན པཊིཛཱནིཾ. ཡཏོ ཙ ཁོཏི ཡཏོ བོདྷིམཱུལེ ནིསིནྣཀཱལཏོ པཊྛཱཡ ¶ . ཨཐཱཧནྟི ཏཏོ པརཾ ཨཧཾ. ཉཱཎཉྩ པན མེཏི པཙྩཝེཀྑཎཉཱཎཾ སནྡྷཱཡ ཝདཏི. ཨཀུཔྤཱ མེཏིཨཱདི ཏསྶ པཝཏྟིཨཱཀཱརདསྶནཾ. ཏཏྠ ཨཀུཔྤཱ མེ ཝིམུཏྟཱིཏི ཨརཧཏྟཕལཾ ཏསྶ མགྒསངྑཱཏཀཱརཎཏོ ཙ ཨཱརམྨཎཏོ ཙ ཨཀུཔྤཏཱ ཝེདིཏབྦཱ.

ཨིམསྨིཾ པན ཝེཡྻཱཀརཎསྨིནྟི ནིགྒཱཐསུཏྟེ. བྷཉྙམཱནེཏི བྷཎིཡམཱནེ. དྷམྨཙཀྑུནྟི ཨིདྷ ཙཏུསཙྩདྷམྨེསུ ཙཀྑུཀིཙྩཀརཎཏོ སོཏཱཔཏྟིམགྒོ ཨདྷིཔྤེཏོ. ཡཾ ཀིཉྩཱིཏིཨཱདི ནིབྦཱནཱརམྨཎཏྟེཔི ཀིཙྩཝསེན ཨསམྨོཧཏོ པཝཏྟིདསྶནཏྠཾ ཝུཏྟཾ.

༡༧. དྷམྨཙཀྐནྟི པཊིཝེདྷཉཱཎདྷམྨཉྩེཝ དེསནཱཉཱཎདྷམྨཉྩ པཝཏྟནཊྛེན ཙཀྐནྟི དྷམྨཙཀྐཾ ¶ . ཨོབྷཱསོཏི སབྦཉྙུཏཉྙཱཎཱནུབྷཱཝེན པཝཏྟོ ཙིཏྟཔཙྩཡཨུཏུསམུཊྛཱནོ དསསཧསྶིལོཀདྷཱཏུཾ ཕརིཏྭཱ ཋིཏོ ཨོབྷཱསོ.

༡༨. དིཊྛོ ཨརིཡསཙྩདྷམྨོ ཨེཏེནཱཏི དིཊྛདྷམྨོ. ཨེས ནཡོ སེསེསུཔི. ཨཏྟནོ པཙྩཀྑཏོ ཨདྷིགཏཏྟཱ ན པརཾ པཙྩེཏི, པརསྶ སདྡྷཱཡ ཨེཏྠ ན པཝཏྟཏཱིཏི ཨཔརཔྤཙྩཡོ. ཨེཧི བྷིཀྑཱུཏི ཨེཏྟཀེ ཝུཏྟམཏྟེ པབྦཛྫཱ, ཨུཔསམྤདཱ ཙ སིཛ྄ཛྷཏི, ཏེནེཝ ཏཏྠ ཨིཏི-སདྡེན པརིཙྪེདོ དསྶིཏོཏི ཝདནྟི. ཀེཙི པན ‘‘སམྨཱ དུཀྑསྶ ཨནྟཀིརིཡཱཡཱཏི ཝཙནཔརིཡོསཱནེ ཨེཝ ཨུཔསམྤདཱ སིཛ྄ཛྷཏི, ཨཊྛཀཐཱཡཾ པན ‘ཨེཧི བྷིཀྑཱུཏི བྷགཝཏོ ཝཙནེནཱ’ཏི ཨིདཾ ཨེཧིབྷིཀྑུསདྡོཔལཀྑིཏཝཙནཾ ཨེཧིབྷིཀྑུཝཙནནྟིཨཱདིཔདཝསེན ཝུཏྟཾ མུསཱཝཱདཝགྒོཏིཨཱདཱིསུ ཝིཡཱ’’ཏི ཝདནྟི, ཏདེཏཾ པཋམཔཱརཱཛིཀཊྛཀཐཱཡཾ ‘‘བྷགཝཱ ཧི…པེ… ཨེཧི བྷིཀྑུ, ཙར བྲཧྨཙརིཡཾ སམྨཱ དུཀྑསྶ ཨནྟཀིརིཡཱཡཱ’’ཏི (པཱརཱ. ཨཊྛ. ༡.༤༥ བྷིཀྑཱུཔདབྷཱཛནཱིཡཝཎྞནཱ) ཨིམིནཱ ཝཙནེན སམེཏི. ཡཏྟཀཉྷི བྷགཝཏཱ ནིཡམེན ཝུཙྩཏི, ཏཏྟཀཾ སབྦམྤི ཨངྒམེཝ. སེཀྑཔུཐུཛྫནཱནཉྷི ཨེཏཾ པརིཔུཎྞཾ ཝུཙྩཏི, ཨསེཀྑཱནཾ པན ‘‘ཙར བྲཧྨཙརིཡ’’ནྟི པརིཡོསཱནནྟི དཊྛབྦཾ སིཀྑཏྟཡསམིདྡྷིཏོ. ལོཀིཡསམྤདཱཧི ཨུཔརིབྷཱུཏཱ སེཊྛབྷཱུཏཱ སམྤདཱཏི ཨུཔསམྤདཱ.

༡༩-༢༡. ནཱིཧཱརབྷཏྟོཏི བྷིཀྑཱུཧི གཱམཏོ ནཱིཧརིཏྭཱ དིནྣབྷཏྟོ. ཀལླཾ ནཱུཏི ཡུཏྟཾ ནུ. ཨེཏཾ མམཱཏིཨཱདི ཡཐཱཀྐམཾ ཏཎྷཱམཱནདིཊྛིགཱཧཱནཾ དསྶནཾ.

༢༢-༢༣. ཏསྨཱ ¶ ཏིཧཱཏི ཨེཏྠ ཏིཧཱཏི ནིཔཱཏམཏྟཾ, ཏསྨཱཏི ཨཏྠོ. ནིབྦིནྡཏཱིཏི ཝུཊྛཱནགཱམིནིཝིཔསྶནཱཝསེན ཨུཀྐཎྛཏི. ཝིརཛྫཏཱིཏི ཙཏུནྣཾ མགྒཱནཾ ཝསེན ན རཛྫཏི. ཝིམུཙྩཏཱིཏི ཕལཝསེན ཝིམུཙྩཏི. ཝིམུཏྟསྨིནྟིཨཱདི པཙྩཝེཀྑཎཉཱཎདསྶནཾ. བྲཧྨཙརིཡནྟི མགྒབྲཧྨཙརིཡཾ. ཀརཎཱིཡཾ ཙཏཱུསུ སཙྩེསུ ཙཏཱུཧི མགྒེཧི པཙྩེཀཾ ཀཏྟབྦཾ པརིཉྙཱདིཝསེན སོལ༹སཝིདྷཾ ཀིཙྩཾ. ནཱཔརཾ ཨིཏྠཏྟཱཡཱཏི ཨིཏྠབྷཱཝཱཡ སོལ༹སཀིཙྩབྷཱཝཱཡ, ཀིལེསཀྑཡཱཡ ཝཱ ཨཔརཾ པུན མགྒབྷཱཝནཱཀིཙྩཾ མེ ནཏྠཱིཏི པཛཱནཱཏི. ཨཐ ཝཱ ཨིཏྠཏྟཱཡཱཏི ཨིཏྠབྷཱཝཏོ ཝཏྟམཱནཀྑནྡྷསནྟཱནཏོ ཨཔརཾ ཁནྡྷསནྟཱནཾ མཡ྄ཧཾ ན བྷཝིསྶཏཱིཏི ཨཏྠོ.

པབྦཛྫཱཀཐཱཝཎྞནཱ

༡༥. ཨཱལ༹མྦརནྟི པཎཝཾ. ཝིཀེསིཀནྟི ཝིཔྤཀིཎྞཀེསཾ. ཝིཀྑེལི༹ཀནྟི ཝིསྶནྡམཱནལཱལཾ ¶ . སུསཱནཾ མཉྙེཏི སུསཱནཾ ཝིཡ ཨདྡས སཀཾ པརིཛནནྟི སམྦནྡྷོ. ཨུདཱནཾ ཨུདཱནེསཱིཏི སཾཝེགཝསཔྤཝཏྟཾ ཝཙནཾ ནིཙྪཱརེསི. ཨུཔསྶཊྛནྟི དུཀྑེན སམྨིསྶཾ, དུཀྑོཏིཎྞཾ སབྦསཏྟཀཱཡཛཱཏནྟི ཨཏྠོ.

༢༦. ཨིདཾ ཁོ ཡསཱཏི བྷགཝཱ ནིབྦཱནཾ སནྡྷཱཡཱཧ. ཨནུཔུབྦིཾ ཀཐནྟི ཨནུཔཊིཔཱཊིཀཐཾ. ཨཱདཱིནཝནྟི དོསཾ. ཨོཀཱརནྟི ནིཧཱིནཏཱ ནིཧཱིནཛནསེཝིཏཏྟཱ. སཾཀིལེསནྟི ཏེཧི སཏྟཱནཾ སཾཀིལེསནཾ, སཾཀིལེསཝིསཡནྟི ཝཱ ཨཏྠོ. ཀལླཙིཏྟནྟི ཨརོགཙིཏྟཾ. སཱམཾ ཨཏྟནཱཝ ཨུཀྐཾསོ ཨུཀྑིཔནཾ ཨེཏིསྶནྟི སཱམུཀྐཾསིཀཱ, སཙྩདེསནཱ. ཏསྶཱ སརཱུཔདསྶནཾ ‘‘དུཀྑ’’ནྟིཨཱདི.

༢༧. ཨསྶདཱུཏེཏི ཨསྶཨཱརུལ༹ྷེ དཱུཏེ. ཨིདྡྷཱབྷིསངྑཱརནྟི ཨིདྡྷིཀིརིཡཾ. ཨབྷིསངྑརེསི ཨཀཱསི.

༢༨. ཡཐཱདིཊྛནྟི པཋམམགྒེན དིཊྛཾ ཙཏུསྶཙྩབྷཱུམིཾ སེསམགྒཏྟཡེན པཙྩཝེཀྑནྟསྶ, པསྶནྟསྶཱཏི ཨཏྠོ. མཱཏུ ནོ ཛཱིཝིཏནྟི ཨེཏྠ ནོཏི ནིཔཱཏམཏྟཾ, མཱཏུ ཛཱིཝིཏནྟི ཨཏྠོ. ཡསསྶ ཁཱིཎཱསཝཏྟཱ ‘‘ཨེཧི བྷིཀྑུ, སྭཱཀྑཱཏོ དྷམྨོ, ཙར བྲཧྨཙརིཡ’’ནྟི ཨེཏྟཀེནེཝ བྷགཝཱ ཨུཔསམྤདཾ ཨདཱསི. ཁཱིཎཱསཝཱནཉྷི ཨེཏྟཀེནེཝ ཨུཔསམྤདཱ ཨནུཉྙཱཏཱ པུབྦེཝ དུཀྑསྶ པརིཀྑཱིཎཏྟཱ. ཙར བྲཧྨཙརིཡནྟི སཱསནབྲཧྨཙརིཡསངྑཱཏཾ སིཀྑཱཔདཔཱུརཎཾ སནྡྷཱཡ ཝུཏྟཾ, ན མགྒབྲཧྨཙརིཡཾ.

༣༠. སེཊྛཱནུསེཊྛཱིནནྟི ¶ སེཊྛིནོ ཙ ཨནུསེཊྛིནོ ཙ པཝེཎཱིཝསེན ཨཱགཏཱ ཡེསཾ ཀུལཱནཾ སནྟི, ཏེསཾ སེཊྛཱནུསེཊྛཱིནཾ ཀུལཱནཾ. ཨོརཀོཏི ལཱམཀོ.

༣༢-༣༣. མཱ ཨེཀེན དྭེཏི ཨེཀེན མགྒེན དྭེ བྷིཀྑཱུ མཱ ཨགམིཏྠ. ཝིསུདྡྷེ སཏྟེ, གུཎེ ཝཱ མཱརེཏཱིཏི མཱརོ. པཱཔེ ནིཡུཏྟོ པཱཔིམཱ.

སབྦཔཱསེཧཱིཏི སབྦཀིལེསཔཱསེཧི. ཡེ དིབྦཱ ཡེ ཙ མཱནུསཱཏི ཡེ དིབྦཀཱམགུཎནིསྶིཏཱ, མཱནུསཀཀཱམགུཎནིསྶིཏཱ ཙ ཀིལེསཔཱསཱ ནཱམ ཨཏྠི, སབྦེཧི ཏེཧི. ‘‘ཏྭཾ བུདྡྷོ’’ཏི དེཝམནུསྶེཧི ཀརིཡམཱནསཀྐཱརསམྤཊིཙྪནཾ སནྡྷཱཡ ཝདཏི.

ཨནྟལིཀྑེ ¶ ཙརནྟེ པཉྩཱབྷིཉྙེཔི བནྡྷཏཱིཏི ཨནྟལིཀྑཙརོ, རཱགཔཱསོ. མཱརོ པན པཱསམྤི ཨནྟལིཀྑཙརཾ མཉྙཏི. མཱནསོཏི མནོསམྤཡུཏྟོ.

ཛཱནཱཏི མནྟི སོ ཀིར ‘‘མཧཱནུབྷཱཝོ ཨཉྙོ དེཝཔུཏྟོ ནིཝཱརེཏཱིཏི བྷཱིཏོ ནིཝཏྟིསྶཏི ནུ ཁོ’’ཏིསཉྙཱཡ ཝཏྭཱ ‘‘ནིཧཏོ ཏྭམསི ཨནྟཀཱ’’ཏི ཝུཏྟེ ‘‘ཛཱནཱཏི མ’’ནྟི དུམྨནོ པལཱཡི.

༣༤. པརིཝིཏཀྐོ ཨུདཔཱདཱིཏི ཡསྨཱ ཨེཧིབྷིཀྑུབྷཱཝཱཡ ཨུཔནིསྶཡརཧིཏཱནམྤི པབྦཛིཏུཀཱམཏཱ ཨུཔྤཛྫིསྶཏི, བུདྡྷཱ ཙ ཏེ ན པབྦཱཛེནྟི, ཏསྨཱ ཏེསམྤི པབྦཛྫཱཝིདྷིཾ དསྶེནྟོ ཨེཝཾ པརིཝིཏཀྐེསཱིཏི དཊྛབྦཾ. ཨུཔནིསྶཡསམྤནྣཱ པན བྷགཝནྟཾ ཨུཔསངྐམིཏྭཱ ཨེཧིབྷིཀྑུབྷཱཝེནེཝ པབྦཛནྟི. ཡེ པཊིཀྑིཏྟཔུགྒལཱཏི སམྦནྡྷོ. སཡཾ པབྦཱཛེཏབྦོཏི ཨེཏྠ ‘‘ཀེསམསྶུཾ ཨོཧཱརེཏྭཱ’’ཏིཨཱདིཝཙནཏོ ཀེསཙྪེདནཀཱསཱཡཙྪཱདནསརཎདཱནཱནི པབྦཛྫཱ ནཱམ, ཏེསུ པཙྪིམདྭཡཾ བྷིཀྑཱུཧི ཨེཝ ཀཱཏབྦཾ, ཀཱརེཏབྦཾ ཝཱ. ‘‘པབྦཱཛེཧཱི’’ཏི ཨིདཾ ཏིཝིདྷམྤི སནྡྷཱཡ ཝུཏྟཾ. ཁཎྜསཱིམཾ ནེཏྭཱཏི བྷཎྜུཀམྨཱརོཙནཔརིཧརཎཏྠཾ. བྷིཀྑཱུནཉྷི ཨནཱརོཙེཏྭཱ ཨེཀསཱིམཱཡ ‘‘ཨེཏསྶ ཀེསེ ཚིནྡཱ’’ཏི ཨཉྙཾ ཨཱཎཱཔེཏུམྤི ན ཝཊྚཏི. པབྦཱཛེཏྭཱཏི ཀེསཱདིཙྪེདནམེཝ སནྡྷཱཡ ཝུཏྟཾ ‘‘ཀཱསཱཡཱནི ཨཙྪཱདེཏྭཱ’’ཏི ཝིསུཾ ཝུཏྟཏྟཱ. པབྦཱཛེཏུཾ ན ལབྷཏཱིཏི སརཎདཱནཾ སནྡྷཱཡ ཝུཏྟཾ, ཨནུཔསམྤནྣེན བྷིཀྑུཨཱཎཏྟིཡཱ དིནྣམྤི སརཎཾ ན རུཧཏི.

ཡསསྶཱིཏི པརིཝཱརསམྤནྣོ. ནིཛྫཱིཝནིསྶཏྟབྷཱཝནྟི ‘‘ཀེསཱ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ¶ ནིསྶཏྟོ ཐདྡྷོ པཐཝཱིདྷཱཏཱུ’’ཏིཨཱདིནཡཾ སངྒཎྷཱཏི, སབྦཾ ཝིསུདྡྷིམགྒེ (ཝིསུདྡྷི. ༡.༣༡༡) ཨཱགཏནཡེན གཧེཏབྦཾ. པུབྦེཏི པུབྦབུདྡྷུཔྤཱདེསུ. མདྡིཏསངྑཱརོཏི ཝིཔསྶནཱཝསེན ཝུཏྟཾ. བྷཱཝིཏབྷཱཝནོཏི སམཐཝསེནཱཔི.

ཀཱསཱཡཱནི ཏིཀྑཏྟུཾ ཝཱ…པེ… པཊིགྒཱཧཱཔེཏབྦོཏི ཨེཏྠ ‘‘སབྦདུཀྑནིསྶརཎཏྠཱཡ ཨིམཾ ཀཱསཱཝཾ གཧེཏྭཱ’’ཏི ཝཱ ‘‘ཏཾ ཀཱསཱཝཾ དཏྭཱ’’ཏི ཝཱ ཝཏྭཱ ‘‘པབྦཱཛེཐ མཾ, བྷནྟེ, ཨནུཀམྤཾ ཨུཔཱདཱཡཱ’’ཏི ཨེཝཾ ཡཱཙནཔུབྦཀཾ ཙཱིཝརཾ པཊིཙྪཱཔེཏི. ཨཐཱཔཱིཏིཨཱདི ཏིཀྑཏྟུཾ པཊིགྒཱཧཱཔནཏོ པརཾ ཀཏྟབྦཝིདྷིདསྶནཾ. ཨཐཱཔཱིཏི ཏཏོ པརམྤཱིཏི ཨཏྠོ. ཀེཙི པན ‘‘ཙཱིཝརཾ ཨཔྤཊིགྒཱཧཱཔེཏྭཱ པབྦཛནཔྤཀཱརབྷེདདསྶནཏྠཾ ‘‘ཨཐཱཔཱི’’ཏི ཝུཏྟཾ, ཨཐཱཔཱིཏི ཙ ཨཐ ཝཱཏི ཨཏྠོ’’ཏི ཝདནྟི. ‘‘ཨདིནྣཾ ན ཝཊྚཏཱི’’ཏི ཨིམིནཱ པབྦཛྫཱ ན རུཧཏཱིཏི དསྶེཏི.

པཱདེ ¶ ཝནྡཱཔེཏྭཱཏི པཱདཱབྷིམུཁཾ ནམཱཔེཏྭཱ. དཱུརེ ཝནྡནྟོཔི ཧི པཱདེ ཝནྡཏཱིཏི ཝུཙྩཏི. ཨུཔཛ྄ཛྷཱཡེན ཝཱཏི ཨེཏྠ ཡསྶ སནྟིཀེ ཨུཔཛ྄ཛྷཾ གཎྷཱཏི, ཨཡཾ ཨུཔཛ྄ཛྷཱཡོ. ཨཱབྷིསམཱཙཱརིཀེསུ ཝིནཡནཏྠཾ ཡཾ ཨཱཙརིཡཾ ཀཏྭཱ ནིཡྻཱཏེནྟི, ཨཡཾ ཨཱཙརིཡོ. སཙེ པན ཨུཔཛ྄ཛྷཱཡོ སཡམེཝ སབྦཾ སིཀྑཱཔེཏི, ཨཉྙསྨིཾ ན ནིཡྻཱཏེཏི, ཨུཔཛ྄ཛྷཱཡོཝསྶ ཨཱཙརིཡོཔི ཧོཏི, ཡཐཱ ཨུཔསམྤདཱཀཱལེ སཡམེཝ ཀམྨཝཱཙཾ ཝཱཙེནྟོ ཨུཔཛ྄ཛྷཱཡོཝ ཀམྨཝཱཙཱཙརིཡོཔི ཧོཏི.

ཨནུནཱསིཀནྟཾ ཀཏྭཱ དཱནཀཱལེ ཨནྟརཱ ཝིཙྪེདོ ན ཀཱཏབྦོཏི ཨཱཧ ‘‘ཨེཀསམྦནྡྷཱནཱི’’ཏི.

‘‘ཨཱབྷིསམཱཙཱརིཀེསུ ཝིནེཏབྦོ’’ཏི ཨིམིནཱ སེཁིཡཝཏྟཁནྡྷཀཝཏྟེསུ, ཨཉྙེསུ

ཙ སུཀྐཝིསྶཊྛིཨཱདིལོཀཝཛྫསིཀྑཱཔདེསུ སཱམཎེརེཧི ཝཏྟིཏབྦཾ, ཏཏྠ ཨཝཏྟམཱནོ ཨལཛྫཱི, དཎྜཀམྨཱརཧོ ཙ ཧོཏཱིཏི དསྶེཏི.

པབྦཛྫཱཀཐཱཝཎྞནཱ ནིཊྛིཏཱ.

དུཏིཡམཱརཀཐཱཝཎྞནཱ

༣༥. པཱལི༹ཡཾ ¶ ཨནུཏྟརཾ ཝིམུཏྟིཾ ཨནུཔཱཔུཎཱཐཱཏི ‘‘ཁཱིཎཱསཝཱ མཡཾ, ཀིཾ ཨམྷཱཀཾ པདྷཱནེནཱ’’ཏི ཝཱསནཱདོསེན ཝོསཱནཾ ཨནཱཔཛྫིཏྭཱ པནྟེསུ སེནཱསནེསུ ཕལསམཱཔཏྟིཡཱཝ ཝཱིཏིནཱམནཏྠཾ, ཏཾ དིསྭཱ ཨཉྙེསམྤི དིཊྛཱནུགཏིསམཱཔཛྫནཏྠཉྩ ཨོཝདཏཱིཏི ཝེདིཏབྦཾ.

དུཏིཡམཱརཀཐཱཝཎྞནཱ ནིཊྛིཏཱ.

བྷདྡཝགྒིཡཀཐཱཝཎྞནཱ

༣༦. ཨིདཾ ནེསཾ པུབྦཀམྨནྟི ཏེསཾ ཏིཾསཛནཱནཾ ཨེཀཏོ ཨབྷིསམཡསྶ པུབྦཀམྨཾ. ཨཉྙམྤི ཏེསཾ པཙྩེཀཾ པུབྦབུདྡྷུཔྤཱདེསུ སདྡྷམྨསྶཝནསརཎགམནདཱནསཱིལསམཱདྷིཝིཔསྶནཱསམཱཡོགཝསེན བཧུཾ ཝིཝཊྚཱུཔནིསྶཡཾ ཀུསལཾ ཨཏྠེཝཱཏི གཧེཏབྦཾ. ཨིཏརཐཱ ཧི ཏདཧེཝ པཊིཝེདྷོ, ཨེཧིབྷིཀྑུབྷཱཝཱདིཝིསེསོ ཙ ན སམྤཛྫེཡྻ.

བྷདྡཝགྒིཡཀཐཱཝཎྞནཱ ནིཊྛིཏཱ.

ཨུརུཝེལཔཱཊིཧཱརིཡཀཐཱཝཎྞནཱ

༣༧-༣༨. པཱལི༹ཡཾ ¶ ཨགརཱུཏི བྷཱརིཡཾ ན སིཡཱཏི ཨཏྠོ. ཨུབྷིནྣཾ སཛོཏིབྷཱུཏཱནནྟི ཨུབྷོསུ སཛོཏིབྷཱུཏེསུ. པཏྟེ པཀྑིཔཱིཏི ཏཾ ནཱགཾ ནིཧཏཏེཛཾ དྷམྨདེསནཱཡ སནྟཔྤེཏྭཱ སརཎསཱིལཱནི དཏྭཱ སཀལརཏྟིཾ བྷགཝནྟཾ པཡིརུཔཱསིཏྭཱ ཋིཏཾ ཛཊིལཱནཾ དསྶནཏྠཾ པཏྟེ པཀྑིཔི, ན ཨཧིཏུཎྜིཀོ ཝིཡ བལཀྐཱརེནཱཏི ཝེདིཏབྦཾ. ཡཏྲ ཧི ནཱམཱཏི ཡོ ནཱམ.

༣༩. ཨཛྫཎྷོཏི ཨཛྫ ཨེཀདིཝསཾ. ཨགྒིསཱལམྷཱིཏི ཨགྱཱགཱརེ. སུམནཱནཾ བུདྡྷཱནཾ མནསཱ སདིསོ མནོ ཨསྶཱཏི སུམནམནསོ. ཨདྷིཙིཏྟོཏི མཧཱཀརུཎཱདཱིཧི ཨདྷིཙིཏྟོ. ཨུདིཙྪརེཏི ཨུལློཀེསུཾ, པརིཝཱརེསུནྟི ཨཏྠོ. ཨནེཀཝཎྞཱ ཨཙྩིཡོཏི ཚབྦཎྞརཾསིཡོ ཝུཏྟཱ. ཨཧཾ ཏེ དྷུཝབྷཏྟེན པཊིམཱནནཾ ཀརིསྶཱམཱིཏི སེསོ.

༤༠. ཨབྷིཀྐནྟཱཡ ¶ རཏྟིཡཱཏི པརིཀྑཱིཎཱཡ རཏྟིཡཱ, མཛ྄ཛྷརཏྟིསམཡེཏི ཨཏྠོ. ཨབྷིཀྐནྟཝཎྞཱཏི ཨབྷིརཱུཔཙྪཝིཝཎྞཱ. ཀེཝལཀཔྤནྟི ཨེཏྠ ཀེཝལ-སདྡསྶ ཨནཝསེསཏྠོ, ཀཔྤ-སདྡསྶ སམནྟབྷཱཝོ, ཏསྨཱ ཨནཝསེསཾ སམནྟཏོ ཝནསཎྜནྟི ཨཏྠོ. ཙཏུདྡིསཱཏི ཙཏཱུསུ དིསཱསུ. ཡཏྲ ཧི ནཱམཱཏི ཡཾ ནཱམ.

༤༣. ཨངྒམགདྷཱཏི ཨངྒམགདྷརཊྛཝཱསིནོ. ཨིདྡྷིཔཱཊིཧཱརིཡནྟི ཨབྷིཉྙིདྡྷིཡེཝ པཊིཔཀྑཱནཾ ཏིཏྠིཡཱནཾ, ཝེནེཡྻསཏྟགཏདོསཱནཉྩ ཧརཎཏོ ཨཔནཡནཏོ པཱཊིཧཱརིཡཾ, ཏཾ ཏཾ ཝཱ སཏྟཧིཏཾ པཊིཙྩ ཧརིཏབྦཾ པཝཏྟེཏབྦནྟི པཊིཧཱརིཡཾ, ཏདེཝ པཱཊིཧཱརིཡཾ. ཨིདྡྷི ཨེཝ པཱཊིཧཱརིཡཾ ཨིདྡྷིཔཱཊིཧཱརིཡཾ.

༤༤. པཾསུཀཱུལཾ ཨུཔྤནྣཾ ཧོཏཱིཏི པུཎྞཱཡ དཱསིཡཱ སརཱིརཾ པརིཀྑིཔིཏྭཱ ཚཌྜིཏཾ སཱཎམཡཾ ཀིམིཀུལཱཀུལཾ པརིཡེསནཝསེན ཨུཔྤནྣཾ ཧོཏི, ཡཾ བྷགཝཱ བྷཱུམིཾ ཀམྤེནྟོ པཱརུཔིཏྭཱ པཙྪཱ མཧཱཀསྶཔཏྠེརསྶ ཨདཱསི, ཏཾ སནྡྷཱཡེཏཾ ཝུཏྟནྟི ཝདནྟི. ཀཏྠ ནུ ཁོཏིཨཱདིཔརིཝིཏཀྐོ ཛཊིལཱནཾ ཝིཝིདྷཔཱཊིཧཱརིཡདསྶནཏྠཾ ཀཏོ. པཱཎིནཱ ཁཎནྟོ ཝིཡ ཨིདྡྷིཡཱ མཏྟིཀཾ ཨཔནེཏྭཱ དིནྣཏྟཱ ཝུཏྟཾ ‘‘པཱཎིནཱ པོཀྑརཎིཾ ཁཎིཏྭཱ’’ཏི.

༤༦. ཕཱལིཡནྟུ, ཀསྶཔ, ཀཊྛཱནཱིཏི ཨུརུཝེལཀསྶཔེན ནིཝེདིཏེ ཨེཝམཝོཙཱཏི དཊྛབྦཾ. ཨེཝཾ སེསེསུཔི.

༤༩. ཨནྟརཊྛཀཱསུ ¶ ཧིམཔཱཏསམཡེཏི ཨེཏྠ མཱགྷམཱསསྶ ཨཝསཱནེ ཙཏསྶོ, ཕགྒུཎམཱསསྶ ཨཱདིམྷི ཙཏསྶོཏི ཨེཝཾ ཨུབྷིནྣཾ མཱསཱནཾ ཨནྟརེ ཨཊྛརཏྟིཡོ ཨནྟརཊྛཀཱ ནཱམ. ཏཱསུ ཨནྟརཊྛཀཱསུ རཏྟཱིསུ ཧིམཔཱཏཀཱལེ. ཨུམྨུཛྫནནིམུཛྫནམྤི སཧསཱ ཏདུབྷཡཀརཎཝསེན ཝུཏྟཾ.

༥༠. ཨུདཀཝཱཧཀོཏི ཨུདཀོགྷོ. རེཎུཧཏཱཡཱཏི རཛོཀིཎྞཱཡ, ཨཏིནྟཱཡཱཏི ཨཏྠོ. ནཱཝཱཡཱཏི ཀུལླེན. ཨིདཾ ནུ ཏྭཾ མཧཱསམཎཱཏི ཨིདྷ ནུ ཏྭཾ. དྷ-ཀཱརསྶ ད-ཀཱརཾ, ཨནུསཱརཉྩ ཀཏྭཱ ‘‘ཨིདཾ ནཱུ’’ཏི ཝུཏྟཾ ‘‘ཨེཀམིདཱཧ’’ནྟིཨཱདཱིསུ (དཱི. ནི. ༡.༡༦༥, ༢༦༥) ཝིཡ. ‘‘ཨིམསྨིཾ པདེསེ ཏྭཾ ནུ ཁོ ཋིཏོསཱི’’ཏི པུཙྪི. ཨཡམཧམསྨཱིཏི ཨཡམཧཾ ཨིདྷ ཋིཏོསྨཱིཏི ཨཏྠོ.

༥༡. ཙིརཔཊིཀཱཏི ¶ ཙིརཀཱལཏོ པཊྛཱཡ. ཀེསམིསྶཾ སབྦཾ པརིཀྑཱརཾ ཨུདཀེ པཝཱཧེཏྭཱཏིཔི ཡོཛེཏབྦཾ. ཨརཎིཀམཎྜལུཨཱདིཀཱ ཏཱཔསཔརིཀྑཱརཱ ཁཱརཱི ནཱམ, ཏཾཧརཎཀཀཱཛཾ ཁཱརིཀཱཛཾ ནཱམ. ཨགྒིཧུཏམིསྶནྟི ཨགྒིཔཱུཛོཔཀརཎསཧིཏཾ.

༥༢-༣. ཨུཔསགྒོཏི ཨུཔདྡཝོ. ‘‘ཨཌྜྷུཌྜྷཱནི པཱཊིཧཱརིཡསཧསྶཱནཱི’’ཏི ཨིདཾ ནཱགདམནཱདཱིནི པནྣརས པཱཊིཧཱརིཡཱནི ཝཛྫེཏྭཱ ཝུཏྟཾ ཨཔྤཀམདྷིཀཾ གཎནཱུཔགཾ ན ཧོཏཱིཏི.

༥༤. གཡཱཡནྟི གཡཱནཱམིཀཱཡ ནདིཡཱ ཨདཱུརབྷཝཏྟཱ གཱམོ ཨིཏྠིལིངྒཝསེན གཡཱ ནཱམ ཛཱཏོ, ཏསྶཾ. གཡཱསཱིསེཏི ཨེཝཾནཱམཀེ པིཊྛིཔཱསཱཎེ.

‘‘ཡམིདཾ ཙཀྑུསམྥསྶཔཙྩཡཱ…པེ… སུཁཾ ཝཱ’’ཏིཨཱདིནཱ ཙཀྑུཝིཉྙཱཎཝཱིཐིཙིཏྟེསུ སོམནསྶདོམནསྶཨུཔེཀྑཱཝེདནཱམུཁེན སེསཱརཱུཔཀྑནྡྷཱནམྤི ཨཱདིཏྟཏཾ དསྶེཏི. ཨེས ནཡོ སེསེསུཔི. མནོཏི བྷཝངྒཙིཏྟཾ མནོདྭཱརསྶ ཨདྷིཔྤེཏཏྟཱ. མནོཝིཉྙཱཎནྟི མནོདྭཱརཝཱིཐིཔཨཡཱཔནྣམེཝ གཧིཏཾ.

ཨུརུཝེལཔཱཊིཧཱརིཡཀཐཱཝཎྞནཱ ནིཊྛིཏཱ.

བིམྦིསཱརསམཱགམཀཐཱཝཎྞནཱ

༥༥. ཡཉྙཱ ¶ ཨབྷིཝདནྟཱིཏི ཡཱགཧེཏུ ཨིཛ྄ཛྷནྟཱིཏི ཝདནྟི. ཨུཔདྷཱིསཱུཏི ཨེཏྠ དུཀྑསུཁཱདཱིནཾ ཨདྷིཊྛཱནཊྛེན ཙཏྟཱརོ ཨུཔདྷཱི ཀཱམཁནྡྷཀིལེསཨབྷིསངྑཱརཱུཔདྷཱིནཾ ཝསེན. ཏེསུ ཁནྡྷཱུཔདྷི ཨིདྷཱདྷིཔྤེཏོཏི ཨཱཧ ‘‘ཁནྡྷཱུཔདྷཱིསུ མལནྟི ཉཏྭཱ’’ཏི. ཡཉྙཱཏི ཡཉྙཧེཏུ. ཡིཊྛེཏི མཧཱཡཱགེ. ཧུཏེཏི དིཝསེ དིཝསེ ཀཏྟབྦེ ཨགྒིཔརིཙརཎེ. ཀིཾ ཝཀྑཱམཱིཏི ཀཐཾ ཝཀྑཱམི.

༥༧-༨. ཨཱསཱིསནཱཏི མནོརཐཱ. སིངྒཱིསུཝཎྞནིཀྑེནཱཏི སིངྒཱིསུཝཎྞསྶ རཱསིནཱ. སུཝཎྞེསུ ཧི ཡུཏྟིཀཏཾ ཧཱིནཾ. ཏཏོ རསཝིདྡྷཾ སེཊྛཾ, ཏཏོ ཨཱཀརུཔྤནྣཾ སེཊྛཾ, ཏཏོ ཡཾཀིཉྩི དིབྦསུཝཎྞཾ སེཊྛཾ ¶ , ཏཏྲཱཔི ཙཱམཱིཀརཾ, ཏཏོ སཱཏཀུམྦྷཾ, ཏཏོ ཛམྦུནདཾ, ཏཏོཔི སིངྒཱིསུཝཎྞཾ སེཊྛཾ. ཏསྶ ནིཀྑཾ ནཱམ པཉྩསུཝཎྞཔརིམཱཎཾ. ཨཊྛསུཝཎྞཱདིབྷེདཾ ཨནེཀཝིདྷམྤི ཝདནྟི. དསསུ ཨརིཡཝཱསེསཱུཏི –

‘‘ཨིདྷ, བྷིཀྑཝེ, བྷིཀྑུ པཉྩངྒཝིཔྤཧཱིནོ ཧོཏི ཚལ༹ངྒསམནྣཱགཏོ ཨེཀཱརཀྑོ ཙཏུརཱཔསྶེནོ པཎུནྣཔཙྩེཀསཙྩོ སམཝཡསཊྛེསནོ ཨནཱཝིལསངྐཔྤོ པསྶདྡྷཀཱཡསངྑཱརོ སུཝིམུཏྟཙིཏྟོ སུཝིམུཏྟཔཉྙོ’’ཏི (དཱི. ནི. ༣.༣༤༨, ༣༦༠; ཨ. ནི. ༡༠.༡༩) –

ཨེཝམཱགཏེསུ དསསུ ཨརིཡཝཱསེསུ. ཏཏྠ པཉྩངྒཝིཔྤཧཱིནོཏི པཉྩནཱིཝརཎེཧི ཝིཔྤཡུཏྟཏཱ ཝུཏྟཱ. ཚལ༹ངྒསམནྣཱགཏོཏི ཨིཊྛཱདཱིསུ ཚསུ ཨཱརམྨཎེསུ སོམནསྶིཏཱདིཔཊིཔཀྑཱ ཚལ༹ངྒུཔེཀྑཱ ཝུཏྟཱ. ཨེཀཱརཀྑོཏི ཨུཔཊྛིཏསཏིཏཱ. སངྑཱཡསེཝནཱ ཨདྷིཝཱསནཱ པརིཝཛྫནཱ ཝིནོདནཱསངྑཱཏཱནི ཙཏྟཱརི ཨཔསྶེནཱ ནིསྶཡཱ ཨེཏསྶཱཏི ཙཏུརཱཔསྶེནོ, ཨེཏེན ཙ ཏེ ནིསྶཡཱ དསྶིཏཱ. པཎུནྣཱནི ཨཔནཱིཏཱནི དིཊྛིགཏིཀེཧི པཙྩེཀཾ གཧིཏཱནི དིཊྛིསཙྩཱནི ཡསྶ, སོ པཎུནྣཔཙྩེཀསཙྩོ, ཏེན ལོཀིཡཉཱཎེན དིཊྛིཔྤཧཱནཾ ཝུཏྟཾ. ཀཱམེསནཱ བྷཝེསནཱབྲཧྨཙརིཡེསནཱསངྑཱཏཱ ཨེསནཱ སམྨདེཝ ཨཝཡཱ ཨནཱུནཱ སཊྛཱ ནིསཊྛཱ ཨནེནཱཏི སམཝཡསཊྛེསནོ. ཨེཏེན ཏིཎྞཾ ཨེསནཱནཾ ཨབྷཱཝོ ཝུཏྟོ. ‘‘ཨནཱཝིལསངྐཔྤོ’’ཏི ཨིམིནཱ ཀཱམཝིཏཀྐཱདཱིཧི ཨནཱཝིལཙིཏྟཏཱ. ‘‘པསྶདྡྷཀཱཡསངྑཱརོ’’ཏི ཨིམིནཱ ཙཏུཏྠཛ྄ཛྷཱནསམཱཡོགེན ཝིགཏདརཐཏཱ ཝུཏྟཱ. ‘‘སུཝིམུཏྟཙིཏྟོ’’ཏི ཨིམིནཱ མགྒོ. ‘‘སུཝིམུཏྟཔཉྙོ’’ཏི ཨིམིནཱ པཙྩཝེཀྑཎཉཱཎམུཁེན ཕལཉཱཎཾ ཝུཏྟཾ. ཨེཏེ ཧི ཨརིཡཱ ཝསནྟི ཨེཏྠཱཏི ཨརིཡཝཱསཱཏི ཝུཙྩནྟི ¶ . ཏེ པན ཝཱསཱ ཝུཏྠཱ ཝསིཏཱ སམྤཱདིཏཱ ཡེན, སོ ཝུཏྠཝཱསོ, བྷགཝཱ. དསབལོཏི དསཧི ཀཱཡབལེཧི, ཉཱཎབལེཧི ཙ ཨུཔེཏོ. ཡཱནི ཧེཏཱནི –

‘‘ཀཱལཱ༹ཝཀཉྩ གངྒེཡྻཾ, པཎྜརཾ ཏམྦཔིངྒལཾ;

གནྡྷམངྒལཧེམཉྩ, ཨུཔོསཐཚདྡནྟིམེ དསཱ’’ཏི. (མ. ནི. ཨཊྛ. ༡.༡༤༨; སཾ. ནི. ཨཊྛ. ༢.༢.༢༢; ཨ. ནི. ཨཊྛ. ༣.༡༠.༢༡; ཝིབྷ. ཨཊྛ. ༧༦༠; ཨུདཱ. ཨཊྛ. ༧༥; བུ. ཝ. ཨཊྛ. ༡.༣༩; ཙཱུལ༹ནི. ཨཊྛ. ༨༡; པཊི. མ. ཨཊྛ. ༢.༢.༤༤) –

ཨེཝཾ ¶ ཝུཏྟཱནི དསཧཏྠིཀུལཱནི པུརིམཔུརིམཏོ དསབལགུཎོཔེཏཱནི, ཏེསུ སབྦཛེཊྛཱནཾ དསནྣཾ ཚདྡནྟཱནཾ བལཱནི བྷགཝཏོ ཀཱཡསྶ དསབལཱནི ནཱམ. ཏཉྩ ཀཱལཱ༹ཝཀསངྑཱཏཱནཾ པཀཏིཧཏྠཱིནཾ ཀོཊིསཧསྶསྶ, མཛ྄ཛྷིམཔུརིསཱནཾ པན དསནྣཾ ཀོཊིསཧསྶཱནཉྩ བལཾ ཧོཏི, ཏཾ ‘‘ནཱརཱཡནསངྒྷཱཏབལ’’ནྟིཔི ཝུཙྩཏི.

ཡཱནི པནེཏཱནི པཱལི༹ཡཾ ‘‘ཨིདྷ, སཱརིཔུཏྟ, ཏཐཱགཏོ ཋཱནཉྩ ཋཱནཏོ ཨཊྛཱནཉྩ ཨཊྛཱནཏོ ཡཐཱབྷཱུཏཾ པཛཱནཱཏཱི’’ཏིཨཱདིནཱ (མ. ནི. ༡.༡༤༨; ཨ. ནི. ༡༠.༢༡; ཝིབྷ. ༧༦༠; པཊི. མ. ༢.༤༤) ཝུཏྟཱནི ཋཱནཱཋཱནཉཱཎབལཾ, ཀམྨཝིཔཱཀཉཱཎབལཾ, སབྦཏྠགཱམིནིཔཊིཔདཱཉཱཎབལཾ, ཨནེཀདྷཱཏུནཱནཱདྷཱཏུལོཀཉཱཎབལཾ, སཏྟཱནཾ ནཱནཱདྷིམུཏྟིཀཏཱཉཱཎབལཾ, ཨིནྡྲིཡཔརོཔརིཡཏྟཉཱཎབལཾ, ཛྷཱནཝིམོཀྑསམཱདྷིསམཱཔཏྟཱིནཾ སཾཀིལེསཝོདཱནཝུཊྛཱནཉཱཎབལཾ, པུབྦེནིཝཱསཉཱཎབལཾ, དིབྦཙཀྑུཉཱཎབལཾ, ཨཱསཝཀྑཡཉཱཎབལནྟི དསབལཉཱཎཱནི, ཨིམཱནི བྷགཝཏོ དསབལཱནི ནཱམ. དསཧི ཨསེཀྑེཧི ཨངྒེཧཱིཏི ཨརཧཏྟཕལསམྤཡུཏྟེཧི པཱལི༹ཡཾ ‘‘ཨསེཀྑཱ སམྨཱདིཊྛི…པེ… ཨསེཀྑོ སམྨཱསམཱདྷི, ཨསེཀྑཾ སམྨཱཉཱཎཾ, ཨསེཀྑཱ སམྨཱཝིམུཏྟཱི’’ཏི (དཱི. ནི. ༣.༣༤༨, ༣༦༠) ཨེཝཾ ཝུཏྟེཧི དསཧི ཨསེཀྑདྷམྨེཧི སམནྣཱགཏོ. ཨེཏྠ ཙ དསྶནཊྛེན ཝུཏྟཱ སམྨཱདིཊྛི ཨེཝ ཛཱནནཊྛེན སམྨཱཉཱཎནྟིཔི ཝུཏྟཱ, ཝུཏྟཱཝསེསཱ པན ཕལཙིཏྟསམྤཡུཏྟཱ སབྦེ ཕསྶཱདིདྷམྨཱ སམྨཱཝིམུཏྟཱིཏི ཝུཏྟཱཏི དཊྛབྦཾ.

བིམྦིསཱརསམཱགམཀཐཱཝཎྞནཱ ནིཊྛིཏཱ.

སཱརིཔུཏྟམོགྒལླཱནཔབྦཛྫཱཀཐཱཝཎྞནཱ

༦༠. སཱརཱིབྲཱཧྨཎིཡཱ ¶ པུཏྟོ སཱརིཔུཏྟོ. མོགྒལཱིབྲཱཧྨཎིཡཱ པུཏྟོ མོགྒལླཱནོ. ཚནྣཔརིབྦཱཛཀསྶཱཏི སེཏཝཏྠེན ཧིརིཀོཔཱིནཾ ཚཱདེཏྭཱ ཝིཙརཎཀཔརིབྦཱཛཀསྶ, ཏེན ‘‘ནཱཡཾ ནགྒཔརིབྦཱཛཀོ’’ཏི དསྶེཏི. ‘‘ཨུཔཉྙཱཏ’’ནྟི ཨིམསྶ ཝིཝརཎཾ ཉཱཏོ ཙེཝཱཏི. ‘‘མགྒ’’ནྟི ཨིམསྶ ཝིཝརཎཾ ཨུཔགཏོ ཙ མགྒོཏི. ཏེན ཙ ཨུཔཉྙཱཏནྟི ཨེཏྠ ཉཱཏ-སདྡོ ཉཱཎཔརིཡཱཡོ. མགྒནྟི ལིངྒཝིཔལླཱསེན མགྒོཝ ཝུཏྟོ. ཨུཔསདྡོ ཙ ཨུཔགམནཏྠོ མགྒསདྡེནཔི སམྦནྡྷིཏབྦོཏི དསྶེཏི. ཨིདཾ ཝུཏྟཾ ཧོཏི – ཡསྨཱ ¶ པིཊྛིཏོ པིཊྛིཏོ ཨནུབནྡྷནཾ ནཱམ ཨཏྠིཀེཧི ཨུཔཉྙཱཏཾ ཨུཔགཏཉཱཎཉྩེཝ ཧོཏི, ཏེཧི ཨུཔགཏོ པཊིཔནྣོ མགྒོ ཙ, ཏསྨཱ ཡཾནཱུནཱཧཾ ཨནུབནྡྷེཡྻནྟི. ཨུཔཉྙཱཏཾ ནིབྦཱནནྟི ཨུཔཔཏྟིཡཱ ཨནུམཱནེན ཉཱཏཾ ནིབྦཱནཾ. ‘‘མགྒ’’ནྟི ཨིམསྶ ཝིཝརཎཾ མགྒནྟོཏི, ཨནུམཱནེན ཉཱཏཾ པཙྩཀྑཏོ དསྶནཏྠཱཡ གཝེསནྟོཏི ཨཏྠོ.

ནིརོདྷོ ཙ ནིརོདྷཱུཔཱཡོ ཙ ཨེཀསེསེན ནིརོདྷོཏི ཝུཏྟོཏི དསྶེནྟོ ‘‘ཨཐ ཝཱ’’ཏིཨཱདིམཱཧ. པཊིཔཱདེནྟོཏི ནིགམེནྟོ.

ཨིཏོ ཨུཏྟརཱིཏི ཨིཏོ མཡཱ ལདྡྷསོཏཱཔཏྟིཏོ ཨུཏྟརི ཨིཏརམགྒཏྟཡཾ ཡདིཔི ནཏྠི, ཏཐཱཔི ཨེསོ ཨེཝ མཡཱ གཝེསིཏོ ནིབྦཱནདྷམྨོཏི ཨཏྠོ.

༦༢-༣. ཏདཱརམྨཎཱཡཱཏི ནིབྦཱནཱརམྨཎཱཡ སོཏཱཔཏྟིཕལཝིམུཏྟིཡཱ. ཏེསཾ ཨཱཡསྨནྟཱནནྟི སཔརིསཱནཾ ཏེསཾ དྭིནྣཾ པརིསཱནཾ ཏསྨིཾཡེཝ ཁཎེ བྷགཝཏོ དྷམྨཾ སུཏྭཱ ཨརཧཏྟཾ པཱཔུཎི, ཨགྒསཱཝཀཱ པན ཨཏྟནོ ཉཱཎཀིཙྩསྶ མཧནྟཏཱཡ ཀཏིཔཱཧཙྩཡེན. ཏེནཱཧ ‘‘ཨེཝ’’ནྟིཨཱདི. ཨུསཱུཡནཀིརིཡཱཡ ཀམྨབྷཱཝཾ སནྡྷཱཡ ‘‘ཨུཔཡོགཏྠེཝཱ’’ཏི ཝུཏྟཾ.

སཱརིཔུཏྟམོགྒལླཱནཔབྦཛྫཱཀཐཱཝཎྞནཱ ནིཊྛིཏཱ.

ཨུཔཛ྄ཛྷཱཡཝཏྟཀཐཱཝཎྞནཱ

༦༤. ཝཛྫཱཝཛྫནྟི ཁུདྡཀཾ, མཧནྟཉྩ ཝཛྫཾ. ཨུཏྟིཊྛཔཏྟནྟི ཨེཏྠ ཨུཏྟིཊྛཾ ནཱམ པིཎྜཱཡ ཙརཎཾ ཝུཙྩཏི ‘‘ཨུཏྟིཊྛེ ནཔྤམཛྫེཡྻཱ’’ཏིཨཱདཱིསུ (དྷ. པ. ༡༦༨) ཝིཡ. ཨུཏྟིཊྛཏྠཱཡ ¶ གཧིཏཾ པཏྟཾ ཨུཏྟིཊྛཔཏྟཾ, ཏེནཱཧ ‘‘པིཎྜཱཡ ཙརཎཀཔཏྟ’’ནྟི. ཏསྶ ཨུཔནཱམེ ཀོ དོསོཏི ཨཱཧ ‘‘ཏསྨིཾ ཧཱི’’ཏིཨཱདི. ཏསྨཱཏི ཡསྨཱ མནུསྶཱ ཨེཏསྨིཾཡེཝ ཨེཏེ བྷུཉྫནྟཱིཏི ཨུཏྟིཊྛཔཏྟེ ཨུཙྪིཊྛསཉྙིནོ, ཏསྨཱ ཨུཏྟིཊྛཔཏྟནྟི ཝུཏྟཾ ཨུཏྟིཊྛ-སདྡེནེཝ མནུསྶཱནཾ སཉྙཱཡ ཨུཙྪིཊྛཏཱཔི གམྨཏཱིཏི. ཀེཙི པན ‘‘ཨུཙྪིཊྛསདྡེན སམཱནཏྠོ ཨུཏྟིཊྛསདྡོ’’ཏི ཝདནྟི. ‘‘ཨུཏྟིཊྛཱ’’ཏི ཏྭཱཔཙྩཡནྟོཔི ཧོཏཱིཏི ཨཱཧ ‘‘ཨུཊྛཧིཏྭཱ’’ཏི. ཨུཔཛ྄ཛྷཱཡཾ གཧེཏུནྟི ཨུཔཛ྄ཛྷཱཡཏྟཾ ¶ མནསཱ གཧེཏུཾ, ཡཱཙནཝཙནེན ཏསྶ ཨནུམཏིཾ གཧེཏུནྟི ཝཱ ཨཏྠོ.

༦༥. པཏིསྶཡནཾ པཏིསྶོ, གརུཾ ནིསྶཱཡ ཝཏྟནབྷཱཝོ, ཡཾཀིཉྩི གཱརཝནྟི ཨཏྠོ. སཧ པཏིསྶེན སཔྤཏིསྶོ, པརཾ ཛེཊྛཾ ཀཏྭཱ ཏསྶོཝཱདེ ཝཏྟནཏཱཏི ཨཏྠོ. ཏེནཱཧ ‘‘ཛེཊྛཀབྷཱཝཉྩ ཨུཔཊྛཔེཏྭཱ’’ཏི. སཱཧཱུཏི སཱདྷུ སུནྡརཾ. ལཧཱུཏི ཨགརུ, སུབྷརཏཱཏི ཨཏྠོ. ཨོཔཱཡིཀནྟི ཨུཔཱཡཔཊིསཾཡུཏྟཾ, ཨེཝཾ པཊིཔཛྫནཾ ནིཏྠརཎཱུཔཱཡོཏི ཨཏྠོ. པཏིརཱུཔནྟི སཱམཱིཙིཀམྨམིདནྟི ཨཏྠོ. པཱསཱདིཀེནཱཏི པསཱདཱཝཧེན ཀཱཡཝཙཱིཔཡོགེན སམྤཱདེཧཱིཏི ཨཏྠོ. ཀཱཡེནཱཏི ཨེཏདཏྠཝིཉྙཱཔཀཾ ཧཏྠམུདྡཱདིཾ དསྶེནྟོ ཀཱཡེན ཝིཉྙཱཔེཏི. སཱདྷཱུཏི སམྤཊིཙྪནཾ སནྡྷཱཡཱཏི ཨུཔཛ྄ཛྷཱཡེན ‘‘སཱཧཱུ’’ཏིཨཱདཱིསུ ཝུཏྟེསུ སདྡྷིཝིཧཱརིཀསྶ ‘‘སཱདྷཱུ’’ཏི སམྤཊིཙྪནཾ ཝཙནཾ སནྡྷཱཡ ‘‘ཀཱཡེན ཝིཉྙཱཔེཏཱི’’ཏིཨཱདི ཝུཏྟནྟི ཨདྷིཔྤཱཡོ. ཨཱཡཱཙནདཱནམཏྟེནཱཏི སདྡྷིཝིཧཱརིཀསྶ པཋམཾ ཨཱཡཱཙནམཏྟེན, ཏཏོ ཨུཔཛ྄ཛྷཱཡསྶ ཙ ‘‘སཱཧཱུ’’ཏིཨཱདིནཱ ཝཙནམཏྟེནཱཏི ཨཏྠོ.

༦༦. ཨསྶཱཏི སདྡྷིཝིཧཱརིཀསྶ. དྭེ ཙཱིཝརཱནཱིཏི ཨུཏྟརཱསངྒཾ, སངྒྷཱཊིཉྩ སནྡྷཱཡ ཝདཏི. ཨིཏོ པཊྛཱཡཱཏི ‘‘ན ཨུཔཛ྄ཛྷཱཡསྶ བྷཎམཱནསྶཱ’’ཏི ཨེཏྠ ན-ཀཱརཏོ པཊྛཱཡ, ཏེན ‘‘ནཱཏིདཱུརེ’’ཏིཨཱདཱིསུ ན-ཀཱརཔཊིསིདྡྷེསུ ཨཱཔཏྟི ནཏྠཱིཏི དསྶེཏི. སབྦཏྠ དུཀྐཊཱཔཏྟཱིཏི ཨཱཔདཱཨུམྨཏྟཁིཏྟཙིཏྟཝེདནཊྚཏཱདཱིཧི ཝིནཱ པཎྞཏྟིཾ ཨཛཱནིཏྭཱཔི ཝདནྟསྶ གིལཱནསྶཔི དུཀྐཊམེཝ. ཨཱཔདཱསུ ཧི ཨནྟརནྟརཱ ཀཐཱ ཝཏྟུཾ ཝཊྚཏི. ཨེཝམཉྙེསུཔི ན-ཀཱརཔཊིསིདྡྷེསུ ཨཱིདིསེསུ, ཨིཏརེསུ པན གིལཱནོཔི ན མུཙྩཏི. པཱལི༹ཡཾ ‘‘ཧེཊྛཱཔཱིཋཾ ཝཱ པརཱམསིཏྭཱ’’ཏི ཨིདཾ པུབྦེ ཏཏྠ ཋཔིཏཔཏྟཱདིནཱ ཨསངྒྷཊྚནཏྠཱཡ ཝུཏྟཾ, ཙཀྑུནཱ ཨོལོཀེཏྭཱཔི ཨཉྙེསཾ ཨབྷཱཝཾ ཉཏྭཱཔི ཋཔེཏུཾ ཝཊྚཏི ཨེཝ. ཨཱཔཏྟིཡཱ ཨཱསནྣནྟི ཨཱཔཏྟིཀརཎམེཝ.

གཱམེཏི ཨནྟོགཱམེ ཏཱདིསེ མཎྜཔཱདིམྷི. ཨནྟརགྷརེཏི ཨནྟོགེཧེ. པཊིཀྐམནེཏི ཨཱསནསཱལཱཡཾ. དྷོཏཝཱལིཀཱཡཱཏི ཨུདཀེན གཏཊྛཱནེ ནིརཛཱཡ པརིསུདྡྷཝཱལིཀཱཡ. ནིདྡྷཱུམེཏི ཛནྟཱགྷརེ ཛལིཡམཱནཨགྒིདྷཱུམརཧིཏེ. ཛནྟཱགྷརཉྷི ནཱམ ཧིམཔཱཏབཧུལེསུ དེསེསུ ཏཔྤཙྩཡརོགཔཱིལཱ༹དིནིཝཱརཎཏྠཾ ¶ ¶ སརཱིརསེདཱཔནཊྛཱནཾ. ཏཏྠ ཀིར ཨནྡྷཀཱརཔཊིཙྪནྣཏཱཡ བཧཱུཔི ཨེཀཏོ པཝིསིཏྭཱ ཙཱིཝརཾ ནིཀྑིཔིཏྭཱ ཨགྒིཏཱཔཔརིཧཱརཱཡ མཏྟིཀཱཡ མུཁཾ ལིམྤིཏྭཱ སརཱིརཾ ཡཱཝདཏྠཾ སེདེཏྭཱ ཙུཎྞཱདཱིཧི ཨུབྦཊྚེཏྭཱ ནཧཱཡནྟི. ཏེནེཝ པཱལི༹ཡཾ ‘‘ཙུཎྞཾ སནྣེཏབྦ’’ནྟིཨཱདི ཝུཏྟཾ. ཨུལློཀནྟི ཨུདྡྷཾ ཨོལོཀནཊྛཱནཾ. ཨུཔརིབྷཱགནྟི ཨཏྠོ.

ཨཉྙཏྠ ནེཏབྦོཏི ཡཏྠ ཝིཧརཏོ སཱསནེ ཨནབྷིརཏི ཨུཔྤནྣཱ, ཏཏོ ཨཉྙཏྠ ཀལྱཱཎམིཏྟཱདིསམྤཏྟིཡུཏྟཊྛཱནེ ནེཏབྦོ. ཝིསབྷཱགཔུགྒལཱནནྟི ལཛྫིནོ ཝཱ ཨལཛྫིནོ ཝཱ ཨུཔཛ྄ཛྷཱཡསྶ ཨཝཌྜྷིཀཱམེ སནྡྷཱཡ ཝུཏྟཾ. སཙེ པན ཨུཔཛ྄ཛྷཱཡོ ཨལཛྫཱི ཨོཝཱདམྤི ན གཎྷཱཏི, ལཛྫིནོ ཙ ཨེཏསྶ ཝིསབྷཱགཱ ཧོནྟི, ཏཏྠ ཨུཔཛ྄ཛྷཱཡཾ ཝིཧཱཡ ལཛྫཱིཧེཝ སདྡྷིཾ ཨཱམིསཱདིཔརིབྷོགོ ཀཱཏབྦོ. ཨུཔཛ྄ཛྷཱཡཱདིབྷཱཝོ ཧེཏྠ ན པམཱཎནྟི དཊྛབྦཾ. པརིཝེཎཾ གནྟྭཱཏི ཨུཔཛ྄ཛྷཱཡསྶ པརིཝེཎཾ གནྟྭཱ. ‘‘ན སུསཱན’’ནྟི ཨིདཾ ཨུཔལཀྑཎཾ, ཨུཔཙཱརསཱིམཏོ བཧི གནྟུཀཱམེན ཨནཱཔུཙྪཱ གནྟུཾ ན ཝཊྚཏི.

ཨུཔཛ྄ཛྷཱཡཝཏྟཀཐཱཝཎྞནཱ ནིཊྛིཏཱ.

སདྡྷིཝིཧཱརིཀཝཏྟཀཐཱཝཎྞནཱ

༦༧. སདྡྷིཝིཧཱརིཀཝཏྟཀཐཱཡཾ སངྒཧེཏབྦོ ཨནུགྒཧེཏབྦོཏིཨཱདཱིསུ ཨནཱདརིཡཾ པཊིཙྩ དྷམྨཱམིསེཧི ཨསངྒཎྷནྟཱནཾ ཨཱཙརིཡུཔཛ྄ཛྷཱཡཱནཾ དུཀྐཊཾ ཝཏྟབྷེདཏྟཱ. ཏེནེཝ པརིཝཱརེཔི ‘‘ནདེནྟོ ཨཱཔཛྫཏཱི’’ཏི (པརི. ༣༢༢) ཝུཏྟཾ. སེསཾ སུཝིཉྙེཡྻམེཝ.

སདྡྷིཝིཧཱརིཀཝཏྟཀཐཱཝཎྞནཱ ནིཊྛིཏཱ.

ནསམྨཱཝཏྟནཱདིཀཐཱཝཎྞནཱ

༦༨. ནསམྨཱཝཏྟནཱདིཀཐཱཡཾ ཝཏྟཾ ན པཱུརེཡྻཱཏི ‘‘ཝཏྟཀརཎཀཱལོ’’ཏི ཝཏྠུཝིཛཱནནཝསེན ཉཏྭཱ མཱནཀོསཛྫཱདིཝསེན ཝཱ ཨུཔཛ྄ཛྷཱཡཱདཱིསུ ¶ ཨནཱདརེན ཝཱ ‘‘ཨཀཱཏུཾ ན ཝཊྚཏཱི’’ཏི ཨཛཱནནཏཱཡ ཝཱ ན ཀརེཡྻ, དུཀྐཊམེཝ. ཨསཉྩིཙྩ ཨསཏིཡཱཏིཨཱདཱིཧི ཙ ཨཀརོནྟསྶ པན ཨནཱཔཏྟི. སབྦཱནི ཧི ཝཏྟཱནི སེཁིཡཱནེཝ, ཏསྨཱ སེཁིཡེསུ ཝུཏྟནཡེནེཝེཏྠ སབྦོཔི ཝིནིཙྪཡོ ཝེདིཏབྦོ. གེཧསྶིཏཔེམནྟི མེཏྟཱཔེམཾ.

སཱདིཡནཾ ¶ ཝཱ ཨསཱདིཡནཾ ཝཱ ན ཛཱནཱཏཱིཏི ‘‘མཡི སཱདིཡནྟེ ཨཀརོནྟཱནཾ ཨཱཔཏྟི ཧོཏི, པཊིཀྑིཔིཏྭཱ ཨསཱདིཡནྟེ ཨཱཔཏྟི ན ཧོཏཱི’’ཏི ཨེཝཾ ན ཛཱནཱཏཱིཏི ཨཏྠོ. ‘‘ཏེསུ ཨེཀོ ཝཏྟསམྤནྣོ བྷིཀྑུ…པེ… ཏེསཾ ཨནཱཔཏྟཱི’’ཏི ཝཙནཏོ སཙེ ཀོཙི ‘‘ཏུམྷཱཀཾ སདྡྷིཝིཧཱརིཀེ, ཨནྟེཝཱསིཀེ ཝཱ གིལཱནེ ཨུཔཊྛཧིསྶཱམི, ཨོཝཱདཱནུསཱསནིཨཱདིཀཾ སབྦཾ ཀཏྟབྦཾ ཀརིསྶཱམཱི’’ཏི ཝདཏི, ཏེ ཝཱ སདྡྷིཝིཧཱརིཀཱདཡོ ‘‘ཨཔྤོསྶུཀྐཱ ཧོཐཱ’’ཏི ཝདནྟི, ཝཏྟཾ ཝཱ ན སཱདིཡནྟི, ཨཱཙརིཡུཔཛ྄ཛྷཱཡཱནམྤི ཨནཱཔཏྟི.

ནསམྨཱཝཏྟནཱདིཀཐཱཝཎྞནཱ ནིཊྛིཏཱ.

རཱདྷབྲཱཧྨཎཝཏྠུཀཐཱཝཎྞནཱ

༦༩. རཱདྷབྲཱཧྨཎཝཏྠུསྨིཾ པཱལི༹ཡཾ ཨུཔྤཎྜུཔྤཎྜུཀཛཱཏོཏི སཀལསརཱིརེ སཉྫཱཏཔཎྜུཝཎྞོ. པཎྜུཝཎྞསྶ སཀལསརཱིརེ བྱཱཔིཏབྷཱཝདསྶནཏྠཉྷི ཝིཙྪཱཝཙནཾ ཀཏཾ. ཨདྷིཀཱརནྟི ཨུཔཀཱརཾ. ཀཏཝེདིནོཏི ཨཏྟནོ ཀཏཾ ཨུཔཀཱརཾ པཊིཀིརིཡཱཡ ཉཱཔཀཱ. ཨུཔསམྤདཱཀམྨཝཱཙཱཡ ཡཾ ཝཏྟབྦཾ, ཏཾ པརིཡོསཱནེ ཝཀྑཱམ. པརིམཎྜལེཧཱིཏི པརིཔུཎྞེཧི.

༧༡-༧༣. པཎྞཏྟིཝཱིཏིཀྐམནྟི སིཀྑཱཔདཝཱིཏིཀྐམཾ. པཱལི༹ཡཾ པིཎྜིཡཱལོཔབྷོཛནནྟི ཛངྒྷཔིཎྜིམཾསབལེན ཙརིཏྭཱ ཨཱལོཔཱལོཔཝསེན པརིཡིཊྛབྷོཛནཾ. ཨཏིརེཀལཱབྷོཏི བྷིཀྑཱཧཱརཏོ ཨདྷིཀལཱབྷོ. སངྒྷབྷཏྟཱདཱིནཾ ཝིབྷཱགོ སེནཱསནཀྑནྡྷཀེ ཨཱཝི བྷཝིསྶཏི. ཝིཧཱརོཏི ཏིཎཀུཊིཀཱདིསཧིཏོ པཱཀཱརཔརིཙྪིནྣོ སཀལོ སངྒྷཱརཱམོ. ཨཌྜྷཡོགོཏི ཨེཀསཱལོ དཱིགྷཔཱསཱདོ. ཧཏྠིཔིཊྛིགརུལ༹སཎྛཱནོ དཱིགྷཔཱསཱདོཏིཔི ཝདནྟི. པཱསཱདོཏི ཙཏུརསྶོ ཨུཙྩོ ¶ ཨནེཀབྷཱུམཀཔཱསཱདོ. ཧམྨིཡནྟི མུཎྜཙྪདནོ ཙནྡིཀངྒཎཡུཏྟོ ནཱཏིཨུཙྩོ པཱསཱདོ. གུཧཱཏི པབྦཏགུཧཱ. པཱུཏིམུཏྟནྟི གོམུཏྟཾ.

རཱདྷབྲཱཧྨཎཝཏྠུཀཐཱཝཎྞནཱ ནིཊྛིཏཱ.

ཨཱཙརིཡཝཏྟཀཐཱཝཎྞནཱ

༧༦. སཧདྷམྨིཀཾ ཝུཙྩམཱནོཏི ‘‘ཨེཝཾ ནིཝཱསེཏབྦ’’ནྟིཨཱདིནཱ སིཀྑཱཔདེན ཨོཝདིཡམཱནོ. ཝཱདཾ ཨཱརོཔེཏྭཱཏི ‘‘ཨོལམྦིཏྭཱ ནིཝཱསནཱདཱིསུ ཀོ དོསོ? ཡདི དོསོ བྷཝེཡྻ ¶ , པརིམཎྜལནིཝཱསནཱདཱིསུཔི དོསོ སིཡཱ’’ཏིཨཱདིནཱ ནིགྒཧཾ ཨཱརོཔེཏྭཱ. ཏཾཡེཝ ཏིཏྠཱཡཏནནྟི དིཊྛིསངྑཱཏཏིཏྠམེཝ ཨཱཡཏནཾ དུཀྑུཔྤཏྟིཊྛཱནནྟི ཏིཏྠཱཡཏནཾ. ཨཱཡསྨཏོ ནིསྶཱཡ ཝཙྪཱམཱིཏི ཨཱཡསྨནྟཾ ནིསྶཱཡ ཝསིསྶཱམཱིཏི ཨཏྠོ.

ཨཱཙརིཡཝཏྟཀཐཱཝཎྞནཱ ནིཊྛིཏཱ.

པཎཱམནཱཁམཱཔནཱཀཐཱཝཎྞནཱ

༨༠. ཡཾ པུབྦེ ལཀྑཎཾ ཝུཏྟཾ, ཏེནེཝ ལཀྑཎེན ནིསྶཡནྟེཝཱསིཀསྶ ཨཱཔཏྟི ན ཝེདིཏབྦཱཏི སམྦནྡྷཡོཛནཱ དཊྛབྦཱ. པོཏྠཀེསུ པན ‘‘ན ཏེནེཝ ལཀྑཎེནཱ’’ཏི ཨེཏྠ ན-ཀཱརཾ ཚཌྜེཏྭཱ ‘‘ཏེནེཝ ལཀྑཎེན ནིསྶཡནྟེཝཱསིཀསྶ ཨཱཔཏྟི ཝེདིཏབྦཱ’’ཏི ལིཁནྟི, ཏཾ པམཱདལིཁིཏཾ. ཏཐཱ ཧི ཏེནེཝ ལཀྑཎེན ཨཱཔཏྟིབྷཱཝེ གཡ྄ཧམཱནེ ནིསྶཡམུཏྟཀསྶཱཔི ཨམུཏྟཀསྶཱཔི ཨཱཔཏྟི ཨེཝཱཏི ཝུཏྟལཀྑཎེན ཨཱཔཏྟིཾ ཨཱཔཛྫེཡྻ. ཏཐཱ ཙ ‘‘ནིསྶཡནྟེཝཱསིཀེན ཧི ཡཱཝ ཨཱཙརིཡཾ ནིསྶཱཡ ཝསཏི, ཏཱཝ སབྦཾ ཨཱཙརིཡཝཏྟཾ ཀཱཏབྦ’’ནྟི ཨིམིནཱ ཨནནྟརཝཙནེན ཝིརོདྷོ སིཡཱ. ཝིསུདྡྷིམགྒེཔི ཙ –

‘‘ནིསྶཡཱཙརིཡ, ཨུདྡེསཱཙརིཡ, ནིསྶཡནྟེཝཱསིཀ, ཨུདྡེསནྟེཝཱསིཀ, སམཱནཱཙརིཡཀཱ པན ཡཱཝ ནིསྶཡཨུདྡེསཱ ཨནུཔཙྪིནྣཱ. ཏཱཝ པཊིཛགྒིཏབྦཱ’’ཏི (ཝིསུདྡྷི. ༡.༤༡) –

ཝུཏྟཾ ¶ . ཏསྨཱ ཝུཏྟནཡེན ཨིདྷ པརིགལི༹ཏཾ ན-ཀཱརཾ ཨཱནེཏྭཱ ཏེནེཝ སདྡྷིཝིཧཱརིཀསྶ ཝུཏྟེནེཝ ལཀྑཎེན ནིསྶཡནྟེཝཱསིཀསྶ ཨཱཔཏྟི ན ཝེདིཏབྦཱཏི ཨེཝམཏྠོ གཧེཏབྦོ.

པཎཱམནཱཁམཱཔནཱཀཐཱཝཎྞནཱ ནིཊྛིཏཱ.

ནིསྶཡཔཊིཔྤསྶདྡྷིཀཐཱཝཎྞནཱ

༨༣. ནིསྶཡཔཊིཔྤསྶདྡྷིཀཐཱཡཾ ‘‘ཡོ ཝཱ ཨེཀསམྦྷོགཔརིབྷོགོ, ཏསྶ སནྟིཀེ ནིསྶཡོ གཧེཏབྦོ’’ཏི ཨིམིནཱ ལཛྫཱིསུ ཨེཝ ནིསྶཡགྒཧཎཾ ནིཡོཛེཏི ཨལཛྫཱིསུ པཊིཀྑིཏྟཏྟཱ. ཨེཏྠ ཙ པརིབྷོགསདྡེན ཨེཀཀམྨཱདིཀོ སཾཝཱསོ གཧིཏོ པཙྩཡཔརིབྷོགསྶ སམྦྷོག-སདྡེན གཧིཏཏྟཱ, ཨེཏེན ¶ ཙ སམྦྷོགསཾཝཱསཱནཾ ཨལཛྫཱིཧི སདྡྷིཾ ན ཀཏྟབྦཏཾ དསྶེཏི. པརིཧཱརོ ནཏྠཱིཏི ཨཱཔཏྟིཔརིཧཱརོ ནཏྠི. ཏཱདིསོཏི ཡཏྠ ནིསྶཡོ གཧིཏཔུབྦོ, ཡོ ཙ ཨེཀསམྦྷོགཔརིབྷོགོ, ཏཱདིསོ. ཏཐཱ ཝུཏྟནྟི ‘‘ལཧུཾ ཨཱགམིསྶཱམཱི’’ཏི ཝུཏྟཉྩེཏི ཨཏྠོ. ‘‘ཙཏྟཱརི པཉྩ དིཝསཱནཱི’’ཏི ཨིདཾ ཨུཔལཀྑཎམཏྟཾ. ཡདི ཨེཀཱཧདྭཱིཧེན སབྷཱགཏཱ པཉྙཱཡཏི, ཉཱཏདིཝསེན གཧེཏབྦོཝ. ཨཐཱཔི ཙཏུཔཉྩཱཧེནཱཔི ན པཉྙཱཡཏི, ཡཏྟཀེཧི དིཝསེཧི པཉྙཱཡཏི, ཏཏྟཀཱནི ཨཏིཀྐམེཏབྦཱནི. སབྷཱགཏཾ ཨོལོཀེམཱིཏི པན ལེསོ ན ཀཱཏབྦོ.

དཧརཱ སུཎནྟཱིཏི ཨེཏྠ ཨསུཏྭཱཔི ཨཱགམིསྶཏི, ཀེནཙི ཨནྟརཱཡེན ཙིརཱཡཏཱིཏི སཉྙཱཡ སཏི ལབྦྷཏེཝ པརིཧཱརོ. ཏེནཱཧ ‘‘ཨིདྷེཝཱཧཾ ཝསིསྶཱམཱིཏི པཧིཎཏི, པརིཧཱརོ ནཏྠཱི’’ཏི.

ཨེཀདིཝསམྤི པརིཧཱརོ ནཏྠཱིཏི གམནེ ནིརུསྶཱཧཾ སནྡྷཱཡ ཝུཏྟཾ. སཨུསྶཱཧསྶ པན སེནཱསནཔཊིསཱམནཱདིཝསེན ཀཏིཔཱཧེ གཏེཔི ན དོསོ.

ཏཏྲེཝ ཝསིཏབྦནྟི ཏཏྲ སབྷཱགཊྛཱནེ ཨེཝ ནིསྶཡཾ གཧེཏྭཱ ཝསིཏབྦཾ. ‘‘ཏཾཡེཝ ཝིཧཱརཾ…པེ… ཝསིཏུཾ ཝཊྚཏཱི’’ཏི ཨིམིནཱ ཨུཔཛ྄ཛྷཱཡེ སངྒཎྷནྟེཡེཝ ཏཾསམོདྷཱནེ ནིསྶཡཔཊིཔྤསྶདྡྷི ཝུཏྟཱ, ཏསྨིཾ པན ཀོདྷེན ¶ ཝཱ གཎནིརཔེཀྑཏཱཡ ཝཱ ཨསངྒཎྷནྟེ ཨཉྙེསུ གཧིཏོ ནིསྶཡོ ན པཊིཔྤསྶམྦྷཏཱིཏི དསྶེཏི.

ཨཱཙརིཡམྷཱ ནིསྶཡཔཊིཔྤསྶདྡྷིཡཾ ཝུཏྟོ ‘‘ཀོཙི ཨཱཙརིཡོ’’ཏིཨཱདིཀོ ནཡོ ཨུཔཛ྄ཛྷཱཡཔཀྐམནཱདཱིསུཔི ནེཏྭཱ ཏཏྠ ཙ ཝུཏྟོ ཨིདྷཱཔི ནེཏྭཱ ཡཐཱརཧཾ ཡོཛེཏབྦོ.

དྭེ ལེཌྜུཔཱཏེ ཨཏིཀྐམྨ ཨཉྙསྨིཾ ཝིཧཱརེ ཝསནྟཱིཏི ཨུཔཙཱརསཱིམཏོ བཧི ཨཉྙསྨིཾ ཝིཧཱརེ ཨནྟེཝཱསིཀཱནཾ ཝསནཊྛཱནཏོ དྭེ ལེཌྜུཔཱཏེ ཨཏིཀྐམྨ ཝསནྟི. ཏེན བཧིཨུཔཙཱརེཔི ཨནྟེཝཱསིཀཱདཱིནཾ ཝསནཊྛཱནཏོ དྭིནྣཾ ལེཌྜུཔཱཏཱནཾ ཨནྟརེ ཨཱསནྣཔདེསེ ཝསཏི, ནིསྶཡོ ན པཊིཔྤསྶམྦྷཏཱིཏི དསྶེཏི. ཨནྟོཨུཔཙཱརསཱིམཱཡཾ པན དྭེ ལེཌྜུཔཱཏེ ཨཏིཀྐམིཏྭཱ ཝསཏོ ནིསྶཡོ ན པཊིཔྤསྶམྦྷཏེཝ.

ནིསྶཡཔཊིཔྤསྶདྡྷིཀཐཱཝཎྞནཱ ནིཊྛིཏཱ.

ཨུཔསམྤཱདེཏབྦཔཉྩཀཀཐཱཝཎྞནཱ

༨༤. ཨུཔཛ྄ཛྷཱཙརིཡལཀྑཎཀཐཱཡཾ ¶ ན སཱམཎེརོ ཨུཔཊྛཱཔེཏབྦོཏི ཨུཔཛ྄ཛྷཱཡེན ཧུཏྭཱ ན པབྦཱཛེཏབྦོ. ཨསེཀྑསྶ ཨཡནྟི ཨསེཀྑོ, ལོཀིཡལོཀུཏྟརོ སཱིལཀྑནྡྷོ.

ཨནྟགྒཱཧིཀཱཡཱཏི སསྶཏུཙྪེདཀོཊྛཱསགྒཱཧིཀཱཡ. པཙྪིམཱནི དྭེཏི ཨཔྤསྶུཏོ ཧོཏི, དུཔྤཉྙོ ཧོཏཱིཏི ཨིམཱནི དྭེ ཨངྒཱནི. པཙྪིམཱནི ཏཱིཎཱིཏི ན པཊིབལོ ཨུཔྤནྣཾ ཀུཀྐུཙྩཾ དྷམྨཏོ ཝིནོདེཏུཾ, ཨཱཔཏྟིཾ ན ཛཱནཱཏི, ཨཱཔཏྟིཡཱ ཝུཊྛཱནཾ ན ཛཱནཱཏཱིཏི ཨིམཱནི ཏཱིཎི. ཀུཀྐུཙྩསྶ ཧི པཱལི༹ཨཊྛཀཐཱནཡསངྑཱཏདྷམྨཏོ ཝིནོདེཏུཾ ཨཔཊིབལཏཱ ནཱམ ཨབྱཏྟཏཱ ཨེཝ ཧོཏཱིཏི སཱཔི ཨཱཔཏྟིཨངྒམེཝ ཝུཏྟཱ.

ཨབྷིཝིསིཊྛོ ཨུཏྟམོ སམཱཙཱརོ ཨཱབྷིསམཱཙཱརོ, ཝཏྟཔཊིཝཏྟསཱིལཾ. ཏཾ ཨཱརབྦྷ པཉྙཏྟཱ ཁནྡྷཀསིཀྑཱཔདསངྑཱཏཱ སིཀྑཱ ཨཱབྷིསམཱཙཱརིཀཱ. སིཀྑཱཔདམྤི ཧི ཏཾ ཏཏྠ པཊིཔཱུརཎཏྠིཀེཧི ཨུགྒཧཎཱདིཝསེན སིཀྑིཏབྦཏོ ‘‘སིཀྑཱ’’ཏི ཝུཙྩཏི. མགྒབྲཧྨཙརིཡསྶ ཨཱདིབྷཱུཏཱ ཀཱརཎབྷཱུཏཱཏི ཨཱདིབྲཧྨཙརིཡཀཱ སིཀྑཱ, ཨུབྷཏོཝིབྷངྒཔརིཡཱཔནྣསིཀྑཱཔདཾ. ཏེནེཝ ¶ ཝིསུདྡྷིམགྒེཔི ‘‘ཨུབྷཏོཝིབྷངྒཔརིཡཱཔནྣསིཀྑཱཔདཾ ཨཱདིབྲཧྨཙརིཡཀཾ, ཁནྡྷཀཝཏྟཔཨཡཱཔནྣཾ ཨཱབྷིསམཱཙཱརིཀ’’ནྟི (ཝིསུདྡྷི. ༡.༡༡) ཝུཏྟཾ. ཏསྨཱ སེཀྑཔཎྞཏྟིཡ’’ནྟི ཨེཏྠ སིཀྑིཏབྦཏོ སེཀྑཱ, བྷགཝཏཱ པཉྙཏྟཏྟཱ པཎྞཏྟི. སབྦཱཔི ཨུབྷཏོཝིབྷངྒཔརིཡཱཔནྣཱ སིཀྑཱཔདཔཎྞཏྟི ‘‘སེཀྑཔཎྞཏྟཱི’’ཏི ཝུཏྟཱཏི གཧེཏབྦཱ. ནཱམརཱུཔཔརིཙྪེདེཏི ཨེཏྠ ཀུསལཏྟིཀཱདཱིཧི ཝུཏྟཾ ཛཱཏིབྷཱུམིཔུགྒལསམྤཡོགཝཏྠཱརམྨཎཀམྨདྭཱརལཀྑཎརསཱདིབྷེདེཧི ཝེདནཱཀྑནྡྷཱདིཙཏུབྦིདྷཾ སནིབྦཱནཾ ནཱམཾ, བྷཱུཏུཔཱདཱཡབྷེདཾ རཱུཔཉྩ པརིཙྪིནྡིཏྭཱ ཛཱནནཔཉྙཱ, ཏཔྤཀཱསཀོ ཙ གནྠོ ནཱམརཱུཔཔརིཙྪེདོ ནཱམ. ཨིམིནཱ ཨབྷིདྷམྨཏྠཀུསལེན བྷཝིཏབྦནྟི དསྶེཏི. སིཀྑཱཔེཏུནྟི ཨུགྒཎྷཱཔེཏུཾ.

ཨུཔསམྤཱདེཏབྦཔཉྩཀཀཐཱཝཎྞནཱ ནིཊྛིཏཱ.

ཨཉྙཏིཏྠིཡཔུབྦཝཏྠུཀཐཱཝཎྞནཱ

༨༦. ཏིཏྠིཡཔརིཝཱསཀཐཱཡཾ ཨཱཛཱིཝཀསྶ ཝཱཏིཨཱདཱིསུ ཨཀིརིཡཝཱདཱི ཨཱཛཱིཝཀོ ནཱམ, ཀིརིཡཝཱདིནོ པན ནིགཎྛཱཔི ཨཉྙེཔི ནགྒཏིཏྠིཀཱ ཨཙེལཀཔདེ སངྒཧིཏཱ. སབྦཐཱ ནགྒསྶེཝ ¶ ཏིཏྠིཡཔརིཝཱསོ ཝིཧིཏོ. སོ ཙ ཏེནེཝ ནགྒཝེསེན བྷིཀྑཱུནཾ སནྟིཀཾ ཨཱགཏསྶ, ན པཊིཙྪཱདེཏྭཱ ཨཱགཏསྶཱཏི དསྶེཏུཾ ‘‘སཙེ སོཔཱི’’ཏིཨཱདི ཝུཏྟཾ. ཏཏྠ སོཔཱིཏི ཨཱཛཱིཝཀོ.

ཨཱམིསཀིཉྩིཀྑསམྤདཱནཾ ནཱམ ཨཔྤམཏྟཀསྶ དེཡྻདྷམྨསྶ ཨནུཔྤདཱནཾ. རཱུཔཱུཔཛཱིཝིཀཱཏི ཨཏྟནོ རཱུཔམེཝ ནིསྶཱཡ ཛཱིཝནྟིཡོ. ཝེསིཡཱ གོཙརོ བཧུལཾ པཝཏྟིཊྛཱནཾ ཨསྶཱཏི ཝེསིཡཱགོཙརོ. ཨེས ནཡོ སབྦཏྠ. ཡོབྦནྣཱཏཱིཏཱཏི ཨནིཝིདྡྷཱ ཨེཝ མཧལླིཀབྷཱཝཾ པཏྟཱ ཐུལླཀུམཱརཱི ཨེཝཱཏི ཝུཏྟཾ. ཨཱདཱཡསྶཱཏི ཨཱདཱནསྶ གཧཎསྶ.

ཨཉྙཏིཏྠིཡཔུབྦཝཏྠུཀཐཱཝཎྞནཱ ནིཊྛིཏཱ.

པཉྩཱབཱདྷཝཏྠུཀཐཱཝཎྞནཱ

༨༨-༩. པཉྩཱབཱདྷཱདིཝཏྠཱུསུ ¶ པཱལི༹ཡཾ སོམྷི ཨརོགོ, ཝིབྦྷམིསྶཱམཱིཏི སོ ཨཧཾ ཨརོགོ, ཝིབྦྷམིསྶཱམཱིཏི ཨཏྠོ. ནཁཔིཊྛིཔྤམཱཎནྟི ཀནིཊྛངྒུལིནཁཔིཊྛི ཨདྷིཔྤེཏཱ. ‘‘པཊིཙྪནྣེ ཋཱནེ ནཁཔིཊྛིཔྤམཱཎཾ ཨཝཌྜྷནཀཔཀྑེ ཋིཏཾ ཧོཏི, ཝཊྚཏཱི’’ཏི ཝུཏྟཏྟཱ ཨཔྤཊིཙྪནྣཊྛཱནེ ཏཱདིསམྤི ན ཝཊྚཏི, པཊིཙྪནྣཊྛཱནེཔི ཙ ཝཌྜྷནཀཔཀྑེ ཋིཏོཔི ན ཝཊྚཏཱིཏི སིདྡྷམེཝ ཧོཏི. པཱཀཊཊྛཱནེཔི པན ནཁཔིཊྛིཔྤམཱཎཏོ ཨཱུནཏརཾ ཨཝཌྜྷནཀཾ ཝཊྚཏཱིཏི ཡེ གཎྷེཡྻུཾ, ཏེསཾ ཏཾ གཧཎཾ པཊིསེདྷེཏུཾ ‘‘མུཁེ པནཱ’’ཏིཨཱདི ཝུཏྟཾ.

ཀོལཊྛིམཏྟཀོཔཱིཏི བདརཊྛིཔྤམཱཎོཔི. ཨཝཌྜྷནཀཔཀྑེ ཋིཏོཔི ན ཝཊྚཏཱིཏི ཨེཏྠ པི-སདྡེན ཀོལཊྛིམཏྟཏོ ཁུདྡཀཏརོཔི གཎྜོ ན ཝཊྚཏཱིཏི དསྶེཏི. ཏེནཱཧ ‘‘སཙྪཝིཾ ཀཱརེཏྭཱ’’ཏི, ཝིཛྫམཱནཙྪཝིཾ ཀཏྭཱཏི ཨཏྠོ. ‘‘སཉྪཝི’’ནྟི ཝཱ པཱཋོ, སཉྫཱཏཙྪཝིནྟི ཨཏྠོ. གཎྜཱདཱིསུ ཝཱུཔསནྟེསུཔི གཎྜཱནཾ ཝིཝཎྞམྤི ཧོཏི, ཏཾ ཝཊྚཏི.

པདུམཔུཎྜརཱིཀཔཏྟཝཎྞནྟི རཏྟཔདུམསེཏཔདུམཔུཔྥདལཝཎྞཾ. ཀུཊྛེ ཝུཏྟནཡེནེཝཱཏི པཊིཙྪནྣཊྛཱནེ ཨཝཌྜྷནཀཾ ཝཊྚཏི, ཨཉྙཏྠ ན ཀིཉྩིཔི ཝཊྚཏཱིཏི ཝུཏྟནཡཾ དསྶེཏི. སོསབྱཱདྷཱིཏི ཁཡརོགོ. ཡཀྑུམྨཱརོཏི ཀདཱཙི ཀདཱཙི ཨཱགནྟྭཱ བྷཱུམིཡཾ པཱཏེཏྭཱ ཧཏྠམུཁཱདིཀཾ ཨཝཡཝཾ བྷཱུམིཡཾ གྷཾསནཀོ ཡཀྑོཝ རོགོ.

པཉྩཱབཱདྷཝཏྠུཀཐཱཝཎྞནཱ ནིཊྛིཏཱ.

རཱཛབྷཊཝཏྠུཀཐཱཝཎྞནཱ

༩༠. ན ¶ དཱནཱཧཾ དེཝསྶ བྷཊོཏི ཨཱཔུཙྪཏཱིཏི རཉྙཱ ཨེཝ དིནྣཊྛཱནནྟརཾ སནྡྷཱཡ ཝུཏྟཾ. ཡོ པན རཱཛཀམྨིཀེཧི ཨམཙྩཱདཱིཧི ཋཔིཏོ, ཨམཙྩཱདཱིནཾ ཨེཝ ཝཱ བྷཊོ ཧོཏི, ཏེན ཏཾ ཏཾ ཨམཙྩཱདིམྤི ཨཱཔུཙྪིཏུཾ ཝཊྚཏི.

རཱཛབྷཊཝཏྠུཀཐཱཝཎྞནཱ ནིཊྛིཏཱ.

ཙོརཝཏྠུཀཐཱཝཎྞནཱ

༩༡. ཏསྨཱཏི ¶ བྷགཝཱ སཡཾ ཡསྨཱ དྷམྨསྶཱམཱི, ཏསྨཱ ཨངྒུལིམཱལཾ ཨེཧིབྷིཀྑུབྷཱཝེན པབྦཱཛེསི, བྷིཀྑཱུནཾ པན སིཀྑཱཔདཾ པཉྙཔེནྟོ ཨེཝམཱཧཱཏི ཨདྷིཔྤཱཡོ. ཨེཝཾ ཛཱནནྟཱིཏི སཱིལཝཱ ཛཱཏོཏི ཛཱནནྟི.

༩༢. ཨུཔརམནྟི ཝིརམནྟི. བྷིནྡིཏྭཱཏི ཨནྡུབནྡྷནཾ བྷིནྡིཏྭཱ. ཚིནྡིཏྭཱཏི སངྑལིཀཾ ཚིནྡིཏྭཱ. མུཉྩིཏྭཱཏི རཛྫུབནྡྷནཾ མུཉྩིཏྭཱ. ཝིཝརིཏྭཱཏི གཱམབནྡྷནཱདཱིསུ གཱམདྭཱརཱདཱིནཾ ཝིཝརིཏྭཱ. ཨཔསྶམཱནཱནནྟི པུརིསགུཏྟིཡཾ གོཔཀཱནཾ ཨཔསྶནྟཱནཾ.

༩༥. པུརིམནཡེནེཝཱཏི ‘‘ཀསཱཧཏོ ཀཏདཎྜཀམྨོ’’ཏི ཨེཏྠ ཝུཏྟནཡེནེཝ.

ཙོརཝཏྠུཀཐཱཝཎྞནཱ ནིཊྛིཏཱ.

ཨིཎཱཡིཀཝཏྠུཀཐཱཝཎྞནཱ

༩༦. པལཱཏོཔཱིཏི ཨིཎསཱམིཀཱནཾ ཨཱགམནཾ ཉཏྭཱ བྷཡེན པལཱཏོ. གཱིཝཱ ཧོཏཱིཏི ཨིཎཱཡིཀབྷཱཝཾ ཉཏྭཱ ཨནཱདརེན ཨིཎམུཏྟཀེ བྷིཀྑུབྷཱཝེ པཝེསིཏཏྟཱ. ཨུཔཌྜྷུཔཌྜྷནྟི ཐོཀཐོཀཾ. དཱཏབྦམེཝཱཏི ཨིཎཱཡིཀེན དྷནཾ སམྤཊིཙྪཏུ ཝཱ མཱ ཝཱ, དཱནེ སཨུསྶཱཧེནེཝ བྷཝིཏབྦཾ. ཨཉྙེཧི ཙ བྷིཀྑཱུཧི ‘‘མཱ དྷུརཾ ནིཀྑིཔཱཧཱི’’ཏི ཝཏྭཱ སཧཱཡཀེཧི བྷཝིཏབྦནྟི དསྶེཏི. དྷུརནིཀྑེཔེན ཧིསྶ བྷཎྜགྒྷེན ཀཱརེཏབྦཏཱ སིཡཱཏི.

ཨིཎཱཡིཀཝཏྠུཀཐཱཝཎྞནཱ ནིཊྛིཏཱ.

དཱསཝཏྠུཀཐཱཝཎྞནཱ

༩༧. ‘‘དཱསཙཱརིཏྟཾ ¶ ཨཱརོཔེཏྭཱ ཀཱིཏོ’’ཏི ཨིམིནཱ དཱསབྷཱཝཔརིམོཙནཏྠཱཡ ཀཱིཏཀཾ ནིཝཏྟེཏི. ཏཱདིསོ ཧི དྷནཀྐཱིཏོཔི ཨདཱསོ ཨེཝ. ཏཏྠ ཏཏྠ ཙཱརིཏྟཝསེནཱཏི ཏསྨིཾ ཏསྨིཾ ཛནཔདེ དཱསཔཎྞཛ྄ཛྷཱཔནཱདིནཱ ¶ ཨདཱསཀརཎནིཡཱམེན. ཨབྷིསེཀཱདཱིསུ སབྦབནྡྷནཱནི མོཙཱཔེནྟི, ཏཾ སནྡྷཱཡ ‘‘སབྦསཱདྷཱརཎེནཱ’’ཏི ཝུཏྟཾ.

སཡམེཝ པཎྞཾ ཨཱརོཔེནྟི, ན ཝཊྚཏཱིཏི ཏཱ བྷུཛིསྶིཏྠིཡོ ‘‘མཡམྤི ཝཎྞདཱསིཡོ ཧོམཱ’’ཏི ཨཏྟནོ རཀྑཎཏྠཱཡ སཡམེཝ རཱཛཱུནཾ དཱསིཔཎྞེ ཨཏྟནོ ནཱམཾ ལིཁཱཔེནྟི, ཏཱསཾ པུཏྟཱཔི རཱཛདཱསཱཝ ཧོནྟི, ཏསྨཱ ཏེ པབྦཱཛེཏུཾ ན ཝཊྚཏི. ཏེཧི ཨདིནྣཱ ན པབྦཱཛེཏབྦཱཏི ཡཏྟཀཱ ཏེསཾ སཱམིནོ, ཏེསུ ཨེཀེན ཨདིནྣེཔི ན པབྦཱཛེཏབྦཱ.

བྷུཛིསྶེ པན ཀཏྭཱ པབྦཱཛེཏུཾ ཝཊྚཏཱིཏི ཡསྶ ཝིཧཱརསྶ ཏེ ཨཱརཱམིཀཱ དིནྣཱ, ཏསྨིཾ ཝིཧཱརེ སངྒྷཾ ཉཱཔེཏྭཱ ཕཱཏིཀམྨེན དྷནཱནི དཏྭཱ བྷུཛིསྶེ ཀཏྭཱ པབྦཱཛེཏུཾ ཝཊྚཏི. ཏཀྐཾ སཱིསེ ཨཱསིཏྟཀསདིསཱཝ ཧོནྟཱིཏི ཀེསུཙི ཛནཔདེསུ ཨདཱསེ ཀརོནྟཱ ཏཀྐཾ སཱིསེ ཨཱསིཉྩནྟི, ཏེན ཀིར ཏེ ཨདཱསཱ ཧོནྟི, ཨེཝམིདམྤི ཨཱརཱམིཀཝཙནེན དཱནམྤཱིཏི ཨདྷིཔྤཱཡོ. ཏཐཱ དིནྣེཔི སངྒྷསྶ ཨཱརཱམིཀདཱསོ ཨེཝཱཏི ‘‘ནེཝ པབྦཱཛེཏབྦོ’’ཏི ཝུཏྟཾ. ‘‘ཏཱཝཀཱལིཀོ ནཱམཱ’’ཏི ཝུཏྟཏྟཱ ཀཱལཔརིཙྪེདཾ ཀཏྭཱ ཝཱ པཙྪཱཔི གཧེཏུཀཱམཏཱཡ ཝཱ དིནྣཾ སབྦཾ ཏཱཝཀཱལིཀམེཝཱཏི གཧེཏབྦཾ. ནིསྶཱམིཀདཱསོ ནཱམ ཡསྶ སཱམིཀུལཾ ཨཉྙཱཏིཀཾ མརཎེན པརིཀྑཱིཎཾ, ན ཀོཙི ཏསྶ དཱཡཱདོ, སོ པན སམཱནཛཱཏིཀེཧི ཝཱ ནིཝཱསགཱམཝཱསཱིཧི ཝཱ ཨིསྶརེཧི ཝཱ བྷུཛིསྶོ ཀཏོཝ པབྦཱཛེཏབྦོ. དེཝདཱསཱཔི དཱསཱ ཨེཝ. ཏེ ཧི ཀཏྠཙི དེསེ རཱཛདཱསཱ ཧོནྟི, ཀཏྠཙི ཝིཧཱརདཱསཱ, ཏསྨཱ པབྦཱཛེཏུཾ ན ཝཊྚཏི. དཱསམྤི པབྦཱཛེཏྭཱ སཱམིཀེ དིསྭཱ པཊིཙྪཱདནཏྠཾ ཨཔནེནྟོ པདཝཱརེན ཨདིནྣཱདཱནཱཔཏྟིཡཱ ཀཱརེཏབྦོ, དཱསསྶ པན པལཱཡཏོ ཨནཱཔཏྟི.

དཱསཝཏྠུཀཐཱཝཎྞནཱ ནིཊྛིཏཱ.

ཀམྨཱརབྷཎྜུཝཏྠཱདིཀཐཱཝཎྞནཱ

༩༨. བྷཎྜུཀམྨཱཔུཙྪཱནཱདིཀཐཱཡཾ ཀམྨཱརབྷཎྜཱུཏི དཧརཏཱཡ ཨམོལི༹བནྡྷོ མུཎྜིཀསཱིསོ ཀམྨཱརདཱརཀོ ¶ ཨེཝ ཝུཏྟོ. ཏུལཱདྷཱརམུཎྜཀོཏི ཨེཏྠ ཏུལཱདྷཱརཱཏི ཏམྦསུཝཎྞཱདཱིནཾ ཏུལཾ ཧཏྠེན དྷཱརེཏཱིཏི ¶ ཀམྨཱརཱ ‘‘ཏུལཱདྷཱརཱ’’ཏི ཝུཏྟཱ, ཏེསུ ཨེཀོ མུཎྜིཀསཱིསོ དཧརོཏི ཨཏྠོ. ཏེནཱཧ ‘‘པཉྩསིཁོ ཏརུཎདཱརཀོ’’ཏི. ཨེཀཱཝ སིཁཱ པཉྩ ཝེཎིཡོ ཀཏྭཱ བནྡྷནེན པཉྩསིཁཱཏི ཝུཙྩཏི, སཱ ཨེཏསྶ ཨཏྠཱིཏི པཉྩསིཁོ, ཏསྶ སིཁཾ ཚིནྡནྟཱ ཀཉྩི བྷིཀྑུཾ ཨཛཱནཱཔེཏྭཱཝ པབྦཱཛེསུཾ. ཏེན བྷཎྜུཀམྨཱཔལོཀནཾ ཨནུཉྙཱཏཾ. སཱིམཱཔརིཡཱཔནྣེཏི བདྡྷསཱིམཱཡ སཏི ཏདནྟོགདྷེ, ཨསཏི ཨུཔཙཱརསཱིམནྟོགདྷེཏི ཨཏྠོ. ཨེཏྠ ཙ ཀིཉྩཱཔི ‘‘ཨནུཛཱནཱམི, བྷིཀྑཝེ, སངྒྷཾ ཨཔལོཀེཏུཾ བྷཎྜུཀམྨཱཡཱ’’ཏི ཨེཏྟཀམེཝ ཝུཏྟཾ, ན པན ཨནཔལོཀེནྟསྶ ཨཱཔཏྟི ཝུཏྟཱ, ཏཐཱཔི ཨཊྛཀཐཱཡཾ ‘‘སབྦེ ཨཱཔུཙྪིཏཱ ཨམྷེཧཱིཏིསཉྙིནོ…པེ… པབྦཱཛེནྟསྶཔི ཨནཱཔཏྟཱི’’ཏི ཝུཏྟཏྟཱ སཉྩིཙྩ ཨནཱཔུཙྪཱ ཀེསེ ཨོཧཱརེནྟསྶ དུཀྐཊམེཝཱཏི དཊྛབྦཾ. ཀེསོརོཔནམྤི སམཎཔབྦཛནཝོཧཱརཾ ལབྷཏཱིཏི ཨཱཧ ‘‘ཨིམསྶ སམཎཀརཎ’’ནྟིཨཱདི. ཨེཀསིཁཱམཏྟདྷརོཏི ཨེཏྠ ཨེཀེན ཀེསེན སིཁཱ ཨེཀསིཁཱཏི ཝདནྟི, ཨཔྤཀེསཱཝ སིཁཱ ཨེཝཾ ཝུཏྟཱཏི གཧེཏབྦཱ. ཨེཀཀེསམྤི པན ཨནཱཔུཙྪཱ ཚིནྡིཏུཾ ན ཝཊྚཏིཡེཝ.

༡༠༠. ཝཱམཧཏྠེནཱཏི དཀྑིཎཧཏྠེན བྷུཉྫནཏོ ཝུཏྟཾ.

༡༠༣-༤. ནིསྶཡམུཙྩནཀསྶ ཝཏྟེསུ པཉྩཀཚཀྐེསུ པན ‘‘ཨུབྷཡཱནི ཁོ པནསྶ པཱཏིམོཀྑཱནི…པེ… ཨནུབྱཉྫནསོ’’ཏི ཨེཏྠ སབྦོཔི ཙཱཡཾ པབྷེདོ མཱཏིཀཱཊྛཀཐཱཡཾ ཉཱཏཱཡཾ ཉཱཏོ ཧོཏི. ‘‘ཨཱཔཏྟིཾ ཛཱནཱཏི, ཨནཱཔཏྟིཾ ཛཱནཱཏཱི’’ཏི ཨིདཉྩ ཨཏྟནཱ ཉཱཏཊྛཱནེསུ ཨཱཔཏྟཱདིཾ སནྡྷཱཡ ཝུཏྟནྟི ན གཧེཏབྦཾ.

ཀམྨཱརབྷཎྜུཝཏྠཱདིཀཐཱཝཎྞནཱ ནིཊྛིཏཱ.

རཱཧུལཝཏྠུཀཐཱཝཎྞནཱ

༡༠༥. པོཀྑརཝསྶནྟི པོཀྑརེ པདུམགཙྪེ ཝིཡ ཨཏེམིཏུཀཱམཱནཾ སརཱིརཏོ པཝཊྚནཀཝསྶཾ. ཏསྨིཾ ཀིར ཝསྶནྟེ ཏེམིཏུཀཱམཱཝ ཏེམེནྟི, ན ཨིཏརེ. ‘‘བྷིཀྑཾ གཎྷཐཱ’’ཏི ཝཏྭཱ གཏོ ནཱམ ནཏྠཱིཏི ཨཏྟནོ སནྟཀེ རཛྫེ སབྦམྤི སཱཔཏེཡྻཾ སཡམེཝ པརིབྷུཉྫིསྶཏཱིཏི གཱརཝེན ¶ སུདྡྷོདནམཧཱརཱཛཱཔི ན ནིམནྟེསི, གནྟྭཱ པན གེཧེ སཀལརཏྟིཾ མཧཱདཱནཉྩེཝ བུདྡྷཔྤམུཁསྶ སངྒྷསྶ ཨཱསནཔཉྙཏྟིཊྛཱནཱལངྐཱརཉྩ སཾཝིདཧནྟོཝ ཝཱིཏིནཱམེསི.

ན ¶ ཀོཙི…པེ… པཏྟཾ ཝཱ ཨགྒཧེསཱིཏི བྷགཝཱ ཨཏྟནོ པིཏུ ནིཝེསནམེཝ གམིསྶཏཱིཏིསཉྙཱཡ ནགྒཧེསི. ཀུལནགརེཏི ཉཱཏིཀུལནྟཀེ ནགརེ. པིཎྜཙཱརིཡཝཏྟནྟི ཨཏྟནོ ཉཱཏིགཱམེསུཔི སཔདཱནཙཱརིཀཝཏྟཾ. བྷིཀྑཱཡ ཙཱརོ ཙརཎཾ ཨེཏསྶཱཏི བྷིཀྑཱཙཱརོ, ཁཏྟིཡོ.

ཨུཏྟིཊྛེཏི ཨུཏྟིཊྛིཏྭཱ པརེསཾ གྷརདྭཱརེ ཨུདྡིསྶ ཋཏྭཱ གཧེཏབྦཔིཎྜེ. ནཔྤམཛྫེཡྻཱཏི ནིམནྟནཱདིཝསེན ལབྦྷམཱནཔཎཱིཏབྷོཛནཾ པཊིཀྑིཔིཏྭཱ པིཎྜཱཡ ཙརཎཝསེན ཏཏྠ ནཔྤམཛྫེཡྻ. དྷམྨནྟི ཨནེསནཾ པཧཱཡ སཔདཱནཾ ཙརནྟོ ཏམེཝ བྷིཀྑཱཙརིཡདྷམྨཾ སུཙརིཏཾ ཙརེཡྻ. སུཁཾ སེཏཱིཏི ཙཏཱུཧི ཨིརིཡཱཔཐེཧི སུཁཾ ཝིཧརཏཱིཏི ཨཏྠོ.

དུཏིཡགཱཐཱཡཾ ན ནཾ དུཙྩརིཏནྟི ཝེསིཡཱདིབྷེདེ ཨགོཙརེ ཙརཎཝསེན ཏཾ ཡཐཱཝུཏྟཾ དྷམྨཾ དུཙྩརིཏཾ ན ཙ ཙརེ. སེསཾ ཝུཏྟནཡམེཝ. ཨིམཾ པན གཱཐཾ སུཏྭཱཏི ནིཝེསནེ ནིསིནྣེན བྷགཝཏཱ ཉཱཏིསམཱགམེ ཨཏྟནོ པིཎྜཱཡ ཙརཎཾ ནིསྶཱཡ པཝཏྟཱཡ གཱཐཱཡ ཝུཏྟཾ ཨིམཾ དུཏིཡགཱཐཾ སུཏྭཱ.

དྷམྨཔཱལཛཱཏཀནྟིཨཱདཱིསུ པན ཏཏོ པརཀཱལེསུཔི རཉྙོ པཝཏྟི པརིནིབྦཱནཾ པཱཔེཏྭཱ ཡཐཱཔསངྒཝསེན དསྶེཏུཾ ཝུཏྟཱ. ཏེནཱཧ ‘‘སོཏཱཔཏྟིཕལཾ སཙྪིཀཏྭཱ’’ཏིཨཱདི. སིརིགབྦྷཾ གནྟྭཱཏི ཨེཏྠ ཡདི ཧི བྷགཝཱ ཏདཧེཝ གནྟྭཱ ན པསྶེཡྻ, སཱ ཧདཡེན ཕལིཏེན མརེཡྻཱཏི ཨགམཱསཱིཏི དཊྛབྦཾ.

ཏཾ དིཝསམེཝཱཏི ཏསྨིཾ རཱཧུལམཱཏུདསྶནདིཝསེཡེཝ. དྷམྨཔདཊྛཀཐཱཡཾ པན ‘‘སཏྠཱ ཀཔིལཔུརཾ གནྟྭཱ ཏཏིཡདིཝསེ ནནྡཾ པབྦཱཛེསཱི’’ཏི (དྷ. པ. ཨཊྛ. ༡.༡༢ ནནྡཏྠེརཝཏྠུ) ཝུཏྟཾ. ཀེསཝིསྶཛྫནནྟི རཱཛམོལི༹བནྡྷནཏྠཾ ཀུམཱརཀཱལེ བནྡྷིཏསིཁཱཝེཎིམོཙནཾ, ཏཾ ཀིར ཀརོནྟཱ མངྒལཾ ཀརོནྟི. སཱརཏྠདཱིཔནིཡཾ པན ‘‘ཀེསཝིསྶཛྫནནྟི ཀུལམརིཡཱདཝསེན ཀེསོརོཔན’’ནྟི (སཱརཏྠ. ཊཱི. མཧཱཝགྒ ༣.༡༠༥) ཝུཏྟཾ. པཊྚབནྡྷོཏི ‘‘ཨསུཀརཱཛཱ’’ཏི ནལཱ༹ཊེ སུཝཎྞཔཊྚབནྡྷནཾ. ཨབྷིནཝཔཱསཱདཔྤཝེསམངྒལཾ གྷརམངྒལཾ. ཚཏྟུསྶཱཔནེ མངྒལཾ ཚཏྟམངྒལཾ. ཛནཔདཀལྱཱཎཱིཏི ¶ ཛནཔདམྷི ཀལྱཱཎཱི པརེཧི ཨསཱདྷཱརཎེཧི པཉྩཀལྱཱཎཱདཱིཧི སཧིཏཏྟཱ སཱ ཨེཝཾ ཝུཏྟཱ. ཏུཝཊནྟི སཱིགྷཾ. ཨནིཙྪམཱནནྟི མནསཱ ཨརོཙེནྟཾ, ཝཱཙཱཡ པན བྷགཝཏཱ ‘‘པབྦཛིསྶསི ནནྡཱ’’ཏི ཝུཏྟེ གཱརཝེན པཊིཀྑིཔིཏུཾ ཨཝིསཧནྟོ ‘‘ཨཱམཱ’’ཏི ཨཝོཙ. བྷགཝཱ ཙ ཨེཏེན ལེསེན པབྦཱཛེསི.

བྲཧྨརཱུཔཝཎྞནྟི ¶ བྲཧྨརཱུཔསམཱནརཱུཔཾ. ཏྱསྶཱཏི ཏེ ཨསྶ. ནིཝཏྟེཏུཾ ན ཝིསཧཱིཏི ‘‘མཱ ནཾ ནིཝཏྟཡིཏྠཱ’’ཏི བྷགཝཏཱ ཝུཏྟཏྟཱ ནཱསཀྑི. སཏྟཝིདྷཾ ཨརིཡདྷནནྟི –

‘‘སདྡྷཱདྷནཾ སཱིལདྷནཾ, ཧིརིཨོཏྟཔྤིཡཾ དྷནཾ;

སུཏདྷནཉྩ ཙཱགོ ཙ, པཉྙཱ ཝེ སཏྟམཾ དྷན’’ནྟི. (ཨ. ནི. ༧.༥, ༦) –

ཨེཝཾ ཝུཏྟཾ སཏྟཝིདྷཾ ཨརིཡདྷནཾ. ཨདྷིམཏྟཾ རཱཧུལེཏི རཱཧུལེ པབྦཛིཏེ ནནྡཔབྦཛྫཱཡ ཨུཔྤནྣདུཀྑཏོཔི ཨདྷིཀཏརཾ དུཀྑཾ ཨཧོསཱིཏི ཨཏྠོ. ཨིཏོ པཙྪཱཏི ཨིཏོ ཝུཏྟསོཀུཔྤཏྟིཏོ ཨཔརདིཝསེསུ ཨནཱགཱམཱིནཾ ཉཱཏིསིནེཧཔཊིགྷཙིཏྟུཔྤཱདཱབྷཱཝཱ. པཱལི༹ཡཾ པུཏྟཔེམནྟིཨཱདི རཉྙཱ པུཏྟསིནེཧསྶ ཏིབྦབྷཱཝཾ དསྶེཏུཾ ཝུཏྟཾ. པུཏྟསིནེཧོ ཧི ཨཏྟནཱ སཧཛཱཏཔཱིཏིཝེགསམུཊྛིཏཱནཾ རཱུཔདྷམྨཱནཾ སཀལསརཱིརཾ ཁོབྷེཏྭཱ པཝཏྟནཝསེན ‘‘ཚཝིཾ…པེ… ཨཊྛིམིཉྫཾ ཨཱཧཙྩ ཏིཊྛཏཱི’’ཏི ཝུཏྟོ. ཨཏྟནོ པིཡཏརཱཏི བྷགཝནྟཾ སནྡྷཱཡ ཝདཏི. པུཏྟེཏི རཱཧུལཾ. སདྡཧནྟེནཱཏི ཏསྶ ཝཙནེན ཨཝེམཏིཀེནཱཏི ཨཏྠོ. ཝིམཏིཡཱ སཏི ཨཱཔཏྟི ཨེཝ.

རཱཧུལཝཏྠུཀཐཱཝཎྞནཱ ནིཊྛིཏཱ.

སིཀྑཱཔདདཎྜཀམྨཝཏྠུཀཐཱཝཎྞནཱ

༡༠༦. སཱམཎེརསིཀྑཱཔདཱདཱིསུ པཱལི༹ཡཾ སིཀྑཱཔདཱནཱིཏི སིཀྑཱཀོཊྛཱསཱ. ཨདྷིསཱིལསིཀྑཱནཾ ཝཱ ཨདྷིགམཱུཔཱཡཱ. པཱཎོཏི པརམཏྠཏོ ཛཱིཝིཏིནྡྲིཡཾ. ཏསྶ ཨཏིཔཱཏནཾ པབནྡྷཝསེན པཝཏྟིཏུཾ ཨདཏྭཱ སཏྠཱདཱིཧི ཨཏིཀྐམྨ ཨབྷིབྷཝིཏྭཱ པཱཏནཾ པཱཎཱཏིཔཱཏོ. པཱཎཝདྷོཏི ཨཏྠོ. སོ ¶ པན ཨཏྠཏོ པཱཎེ པཱཎསཉྙིནོ ཛཱིཝིཏིནྡྲིཡུཔཙྪེདཀཨུཔཀྐམསམུཊྛཱཔིཀཱ ཝདྷཀཙེཏནཱཝ. ཏསྨཱ པཱཎཱཏིཔཱཏཱ ཝེརམཎི, ཝེརཧེཏུཏཱཡ ཝེརསངྑཱཏཾ པཱཎཱཏིཔཱཏཱདིཔཱཔདྷམྨཾ མཎཏི ནཱིཧརཏཱིཏི ཝིརཏི ‘‘ཝེརམཎཱི’’ཏི ཝུཙྩཏི, ཝིརམཏི ཨེཏཱཡཱཏི ཝཱ ‘‘ཝིརམཎཱི’’ཏི ཝཏྟབྦེ ནིརུཏྟིནཡེན ‘‘ཝེརམཎཱི’’ཏི སམཱདཱནཝིརཏི ཝུཏྟཱ. ཨེས ནཡོ སེསེསུཔི.

ཨདིནྣསྶ ཨཱདཱནཾ ཨདིནྣཱདཱནཾ, ཐེཡྻཙེཏནཱཝ. ཨབྲཧྨཙརིཡནྟི ཨསེཊྛཙརིཡཾ, མགྒེན མགྒཔཊིཔཏྟིསམུཊྛཱཔིཀཱ མེཐུནཙེཏནཱ. མུསཱཏི ཨབྷཱུཏཝཏྠུ, ཏསྶ ཝཱདོ ཨབྷཱུཏཏཾ ཉཏྭཱཝ བྷཱུཏཏོ ¶ ཝིཉྙཱཔནཙེཏནཱ མུསཱཝཱདོ. པིཊྛཔཱུཝཱདིནིབྦཏྟསུརཱ ཙེཝ པུཔྥཱསཝཱདིབྷེདཾ མེརཡཉྩ སུརཱམེརཡཾ. ཏདེཝ མདནཱིཡཊྛེན མཛྫཉྩེཝ པམཱདཀཱརཎཊྛེན པམཱདཊྛཱནཉྩ, ཏཾ ཡཱཡ ཙེཏནཱཡ པིཝཏི, ཏསྶ ཨེཏཾ ཨདྷིཝཙནཾ.

ཨརུཎུགྒམནཏོ པཊྛཱཡ ཡཱཝ མཛ྄ཛྷནྷིཀཱ ཨཡཾ ཨརིཡཱནཾ བྷོཛནསྶ ཀཱལོ ནཱམ, ཏདཉྙོ ཝིཀཱལོ. བྷུཉྫིཏབྦཊྛེན བྷོཛནནྟི ཨིདྷ སབྦཾ ཡཱཝཀཱལིཀཾ ཝུཙྩཏི, ཏསྶ ཨཛ྄ཛྷོཧརཎཾ ཨིདྷ ཨུཏྟརཔདལོཔེན ‘‘བྷོཛན’’ནྟི ཨདྷིཔྤེཏཾ. ཝིཀཱལེ བྷོཛནཾ ཨཛ྄ཛྷོཧརཎཾ ཝིཀཱལབྷོཛནཾ, ཝིཀཱལེ ཝཱ ཡཱཝཀཱལིཀསྶ བྷོཛནཾ ཨཛ྄ཛྷོཧརཎཾ ཝིཀཱལབྷོཛནནྟིཔི ཨཏྠོ གཧེཏབྦོ, ཨཏྠཏོ ཝིཀཱལེ ཡཱཝཀཱལིཀཨཛ྄ཛྷོཧརཎཙེཏནཱཝ.

སཱསནསྶ ཨནནུལོམཏྟཱ ཝིསཱུཀཾ པཊཱཎཱིབྷཱུཏཾ དསྶནཾ ཝིསཱུཀདསྶནཾ, ནཙྩགཱིཏཱདིདསྶནསཝནཱནཉྩེཝ ཝཊྚཀཡུདྡྷཛཱུཏཀཱིལཱ༹དིསབྦཀཱིལཱ༹ནཉྩ ནཱམཾ. དསྶནནྟི ཙེཏྠ པཉྩནྣམྤི ཝིཉྙཱཎཱནཾ ཡཐཱསཀཾ ཝིསཡསྶ ཨཱལོཙནསབྷཱཝཏཱཡ དསྶན-སདྡེན སངྒཧེཏབྦཏྟཱ སཝནམྤི སངྒཧིཏཾ. ནཙྩགཱིཏཝཱདིཏ-སདྡེཧི ཙེཏྠ ཨཏྟནོ ནཙྩནགཱཡནཱདཱིནིཔི སངྒཧིཏཱནཱིཏི དཊྛབྦཾ.

མཱལཱཏི བདྡྷམབདྡྷཾ ཝཱ ཨནྟམསོ སུཏྟཱདིམཡམྤི ཨལངྐཱརཏྠཱཡ པིལ༹ནྡྷིཡམཱནཾ ‘‘མཱལཱ’’ཏྭེཝ ཝུཙྩཏི. གནྡྷནྟི ཝཱསཙུཎྞཱདིཝིལེཔནཏོ ཨཉྙཾ ཡཾ ཀིཉྩི གནྡྷཛཱཏཾ. ཝིལེཔནནྟི པིསིཏྭཱ གཧིཏཾ ཚཝིརཱགཀརཎཉྩེཝ གནྡྷཛཱཏཉྩ. དྷཱརཎཾ ནཱམ པིལ༹ནྡྷནཾ. མཎྜནཾ ནཱམ ཨཱུནཊྛཱནཔཱུརཎཾ. གནྡྷཝསེན, ཚཝིརཱགཝསེན ཙ སཱདིཡནཾ ཝིབྷཱུསནཾ ནཱམ. མཱལཱདཱིསུ ཝཱ དྷཱརཎཱདཱིནི ཡཐཱཀྐམཾ ¶ ཡོཛེཏབྦཱནི. ཏེསཾ དྷཱརཎཱདཱིནཾ ཋཱནཾ ཀཱརཎཾ ཝཱིཏིཀྐམཙེཏནཱ.

ཨུཙྩཱཏི ཨུཙྩ-སདྡེན སམཱནཏྠོ ནིཔཱཏོ, ཨུཙྩཱསཡནཾ ཝུཙྩཏི པམཱཎཱཏིཀྐནྟཾ ཨཱསནྡཱདི. མཧཱསཡནཾ ཨཀཔྤིཡཏྠརཎེཧི ཨཏྠཏཾ, སལོཧིཏཝིཏཱནཉྩ. ཨེཏེསུ ཧི ཨཱསནཾ, སཡནཉྩ ཨུཙྩཱསཡནམཧཱསཡན-སདྡེཧི གཧིཏཱནི ཨུཏྟརཔདལོཔེན. ཛཱཏརཱུཔརཛཏཔཊིགྒཧཎཱཏི ཨེཏྠ རཛཏ-སདྡེན དཱརུམཱསཀཱདི སབྦཾ རཱུཔིཡཾ སངྒཧིཏཾ, མུཏྟཱམཎིཨཱདཡོཔེཏྠ དྷཉྙཁེཏྟཝཏྠཱདཡོ ཙ སངྒཧིཏཱཏི དཊྛབྦཱ. པཊིགྒཧཎ-སདྡེན པཊིགྒཱཧཱཔནསཱདིཡནཱནི སངྒཧིཏཱནི. ནཱསནཝཏྠཱུཏི པཱརཱཛིཀཊྛཱནཏཱཡ ལིངྒནཱསནཱཡ ཀཱརཎཾ.

༡༠༧. པཱལི༹ཡཾ སབྦཾ སངྒྷཱརཱམཾ ཨཱཝརཎཾ ཀརོནྟཱིཏི སབྦསངྒྷཱརཱམེ པཝེསནིཝཱརཎཾ ཀརོནྟི. སངྒྷཱརཱམོ ཨཱཝརཎཾ ཀཱཏབྦོཏི སངྒྷཱརཱམོ ཨཱཝརཎོ ཀཱཏབྦོ, སངྒྷཱརཱམེ ཝཱ ཨཱཝརཎཾ ¶ ཀཱཏབྦནྟི ཨཏྠོ. ཏེནེཝ ‘‘ཏཏྠ ཨཱཝརཎཾ ཀཱཏུ’’ནྟི བྷུམྨཝསེན ཝུཏྟཾ. ཨཱཧཱརཾ ཨཱཝརཎནྟིཨཱདཱིསུཔི ཨེསེཝ ནཡོ. ‘‘ཡཏྠ ཝཱ ཝསཏཱི’’ཏི ཨིམིནཱ སཱམཎེརསྶ ཝསྶགྒེན ལདྡྷཾ ཝཱ སཀསནྟཀམེཝ ཝཱ ནིབདྡྷཝསནཀསེནཱསནཾ ཝུཏྟཾ. ཡཏྠ ཝཱ པཊིཀྐམཏཱིཏི ཨཱཙརིཡུཔཛ྄ཛྷཱཡཱནཾ ཝསནཊྛཱནཾ ཝུཏྟཾ. ཏེནཱཧ ‘‘ཨཏྟནོ’’ཏིཨཱདི. ཨཏྟནོཏི ཧི སཡཾ, ཨཱཙརིཡསྶ, ཨུཔཛ྄ཛྷཱཡསྶ ཝཱཏི ཨཏྠོ. དཎྜེནྟི ཝིནེནྟི ཨེཏེནཱཏི དཎྜོ, སོ ཨེཝ ཀཏྟབྦཏྟཱ ཀམྨནྟི དཎྜཀམྨཾ, ཨཱཝརཎཱདི. ཨུདཀཾ ཝཱ པཝེསེཏུནྟི པོཀྑརཎཱིཨཱདིཨུདཀེ པཝེསེཏུཾ.

སིཀྑཱཔདདཎྜཀམྨཝཏྠུཀཐཱཝཎྞནཱ ནིཊྛིཏཱ.

ཨནཱཔུཙྪཱཝརཎཝཏྠུཨཱདིཀཐཱཝཎྞནཱ

༡༠༨. སདྡྷིཝིཧཱརིཀཨནྟེཝཱསིཀཱནམྤཱིཏི ཨུཔསམྤནྣེ སནྡྷཱཡ ཝུཏྟཾ. ཏེསུཔི ཧི ཨཱཙརིཡུཔཛ྄ཛྷཱཡེསུ ཡཐཱ ཨོརམནྟི, ཏཐཱ ཏེསཾ ནིགྒཧཾ ཨཀརོནྟེསུ ཨཉྙེཧི ཨཱཝརཎཱདིནིགྒཧཀམྨཾ ཀཱཏབྦམེཝ. སངྒཎྷནྟཱིཏི ‘‘པརཔརིསཏོ བྷིནྡིཏྭཱ གཎྷིསྶཱམཱི’’ཏི དཱནཱདིཙཏཱུཧི སངྒཧཝཏྠཱུཧི (དཱི. ནི. ༣.༢༡༠; ཨ. ནི. ༤.༣༢, ༢༥༦) ཨུཔལཱལ༹ནཝསེན ¶ སངྒཎྷནྟི. སོ བྷིཛྫཏུ ཝཱ མཱ ཝཱ, སངྒཎྷནྟསྶ པཡོགེ ཨཱཔཏྟི ཨེཝ. བྷིནྡིཏྭཱ གཎྷིཏུཾ ན ཝཊྚཏཱིཏི བྷིནྡིཏུམྤི ན ཝཊྚཏི, གཎྷིཏུམྤི ན ཝཊྚཏཱིཏི ཨཏྠོ. ཨཱདཱིནཝཾ པན ཝཏྟུཾ ཝཊྚཏཱིཏི སཱསནགཱརཝེན ཝཱ པརཱནུདྡཡཏཱཡ ཝཱ ཝཏྟུཾ ཝཊྚཏི, ན པརིསལོལཏཱཡ.

‘‘སེནཱསནགྒཱཧོ ཙ པཊིཔྤསྶམྦྷཏཱི’’ཏི ཨིམིནཱ ཝསྶཙྪེདཾ དསྶེཏི. ཨུཔསམྤནྣཱནམྤི པཱརཱཛིཀསམཱཔཏྟིཡཱ སརཎགམནཱདིསཱམཎེརབྷཱཝསྶཱཔི ཝིནསྶནཏོ སེནཱསནགྒཱཧོ ཙ པཊིཔྤསྶམྦྷཏི, སངྒྷལཱབྷམྤི ཏེ ན ལབྷནྟཱིཏི ཝེདིཏབྦཾ. པུརིམིཀཱཡ པུན སརཎཱནི གཧིཏཱནཱིཏི སརཎགྒཧཎེན སཧ ཏདཧེཝསྶ ཝསྶཱུཔགམནམྤི དསྶེཏི. པཙྪིམིཀཱཡ ཝསྶཱཝཱསིཀནྟི ཝསྶཱཝཱསིཀལཱབྷགྒཧཎདསྶནམཏྟམེཝེཏཾ, ཏཏོ པུརེཔི, པཙྪཱཔི ཝཱ ཝསྶཱཝཱསིཀཉྩ ཙཱིཝརམཱསེསུ སངྒྷེ ཨུཔྤནྣཾ ཀཱལཙཱིཝརཉྩ པུརིམིཀཱཡ ཨུཔགནྟྭཱ ཨཝིཔནྣསཱིལོ སཱམཎེརོ ལབྷཏི ཨེཝ. སཙེ པཙྪིམིཀཱཡ གཧིཏཱནཱིཏི པཙྪིམིཀཱཡ ཝསྶཱུཔགམནཉྩ ཚིནྣཝསྶཏཉྩ དསྶེཏི. ཏསྶ ཧི ཀཱལཙཱིཝརེ བྷཱགོ ན པཱཔུཎཱཏི. ཏསྨཱ ‘‘ཨཔལོཀེཏྭཱ ལཱབྷོ དཱཏབྦོ’’ཏི ཝུཏྟཾ.

ཝསྶཱཝཱསིཀལཱབྷོ ¶ པན ཡདི སེནཱསནསཱམིཀཱ དཱཡཀཱ སེནཱསནགུཏྟཏྠཱཡ པཙྪིམིཀཱཡ ཨུཔགནྟྭཱ ཝཏྟཾ ཀཏྭཱ ཨཏྟནོ སེནཱསནེ ཝསནྟསྶཔི ཝསྶཱཝཱསིཀཾ དཱཏབྦནྟི ཝདནྟི, ཨནཔལོཀེཏྭཱཔི དཱཏབྦོཝ. ཡཾ པན སཱརཏྠདཱིཔནིཡཾ ‘‘པཙྪིམིཀཱཡ ཝསྶཱཝཱསིཀཾ ལཙྪཏཱིཏི པཙྪིམིཀཱཡ པུན ཝསྶཾ ཨུཔགཏཏྟཱ ལཙྪཏཱི’’ཏི (སཱརཏྠ. ཊཱི. མཧཱཝགྒ ༣.༡༠༨) ཝུཏྟཾ, ཏམྤི ཝསྶཱཝཱསིཀེ དཱཡཀཱནཾ ཨིམཾ ཨདྷིཔྤཱཡཾ ནིསྶཱཡ ཝུཏྟཉྩེ, སུནྡརཾ. སངྒྷིཀཾ, ཀཱལཙཱིཝརམྤི སནྡྷཱཡ ཝུཏྟཉྩེ, ན ཡུཛྫཏཱིཏི ཝེདིཏབྦཾ.

ན ཨཛཱནིཏྭཱཏི ‘‘སུརཱ’’ཏི ཨཛཱནིཏྭཱ པིཝཏོ པཱཎཱཏིཔཱཏཝེརམཎིཨཱདིསབྦསཱིལབྷེདཾ, སརཎབྷེདཉྩ ན ཨཱཔཛྫཏི, ཨཀུསལཾ པན སུརཱཔཱནཝེརམཎིསཱིལབྷེདོ ཙ ཧོཏི མཱལཱདིདྷཱརཎཱདཱིསུ ཝིཡཱཏི དཊྛབྦཾ. ཨིཏརཱནཱིཏི ཝིཀཱལབྷོཛནཝེརམཎིཨཱདཱིནི. ཏཱནིཔི ཧི སཉྩིཙྩ ཝཱིཏིཀྐམནྟསྶ ཏཾ ཏཾ བྷིཛྫཏི ཨེཝ, ཨིཏརཱིཏརེསཾ པན ཨབྷིཛྫམཱནེན ནཱསནངྒཱནི ན ཧོནྟི. ཏེནེཝ ‘‘ཏེསུ བྷིནྣེསཱུ’’ཏི བྷེདཝཙནཾ ཝུཏྟཾ.

ཨཙྩཡཾ ¶ དེསཱཔེཏབྦོཏི ‘‘ཨཙྩཡོ མཾ, བྷནྟེ, ཨཙྩགམཱ’’ཏིཨཱདིནཱ སངྒྷམཛ྄ཛྷེ དེསཱཔེཏྭཱ སརཎསཱིལཾ དཱཏབྦནྟི ཨདྷིཔྤཱཡོ པཱརཱཛིཀཏྟཱ ཏེསཾ. ཏེནཱཧ ‘‘ལིངྒནཱསནཱཡ ནཱསེཏབྦོ’’ཏི. ཨཡམེཝ ཧི ནཱསནཱ ཨིདྷ ཨདྷིཔྤེཏཱཏི ལིངྒནཱསནཱཀཱརཎེཧི པཱཎཱཏིཔཱཏཱདཱིཧི ཨཝཎྞབྷཱསནཱདཱིནཾ སཧ པཏིཏཏྟཱ ཝུཏྟཾ.

ནནུ ཙ ཀཎྚཀསཱམཎེརོཔི མིཙྪཱདིཊྛིཀོ ཨེཝ, ཏསྶ ཙ ཧེཊྛཱ དཎྜཀམྨནཱསནཱཝ ཝུཏྟཱ. ཨིདྷ པན མིཙྪཱདིཊྛིཀསྶ ལིངྒནཱསནཱ ཝུཙྩཏི, ཀོ ཨིམེསཾ བྷེདོཏི ཙོདནཾ མནསི ནིདྷཱཡཱཧ ‘‘སསྶཏུཙྪེདཱནཉྷི ཨཉྙཏརདིཊྛིཀོ’’ཏི. ཨེཏྠ ཙཱཡམདྷིཔྤཱཡོ – ཡོ ཧི ‘‘ཨཏྟཱ ཨིསྶརོ ཝཱ ནིཙྩོ དྷུཝོ’’ཏིཨཱདིནཱ ཝཱ ‘‘ཨཏྟཱ ཨུཙྪིཛྫིསྶཏི ཝིནསྶིསྶཏཱི’’ཏིཨཱདིནཱ ཝཱ ཏིཏྠིཡཔརིཀཔྤིཏཾ ཡཾ ཀིཉྩི སསྶཏུཙྪེདདིཊྛིཾ དལ༹ྷཾ གཧེཏྭཱ ཝོཧརཏི, ཏསྶ སཱ པཱརཱཛིཀཊྛཱནཾ ཧོཏི. སོ ཙ ལིངྒནཱསནཱཡ ནཱསེཏབྦོ. ཡོ པན ཨཱིདིསཾ དིཊྛིཾ ཨགྒཧེཏྭཱ སཱསནིཀོཝ ཧུཏྭཱ ཀེཝལཾ བུདྡྷཝཙནཱདྷིཔྤཱཡཾ ཝིཔརཱིཏཏོ གཧེཏྭཱ བྷིཀྑཱུཧི ཨོཝདིཡམཱནོཔི ཨཔྤཊིནིསྶཛྫིཏྭཱ ཝོཧརཏི, ཏསྶ སཱ དིཊྛི པཱརཱཛིཀཾ ན ཧོཏི, སོ པན ཀཎྚཀནཱསནཱཡ ཨེཝ ནཱསེཏབྦོཏི.

ཨནཱཔུཙྪཱཝརཎཝཏྠུཨཱདིཀཐཱཝཎྞནཱ ནིཊྛིཏཱ.

པཎྜཀཝཏྠུཀཐཱཝཎྞནཱ

༡༠༩. པཎྜཀཝཏྠུསྨིཾ ¶ ཨཱསིཏྟཨུསཱུཡཔཀྑཔཎྜཀཱ ཏཡོཔི པུརིསབྷཱཝལིངྒཱདིཡུཏྟཱ ཨཧེཏུཀཔཊིསནྡྷིཀཱ, ཏེ ཙ ཀིལེསཔརིཡུཊྛཱནསྶ བལཝཏཱཡ ནཔུཾསཀཔཎྜཀསདིསཏྟཱ ‘‘པཎྜཀཱ’’ཏི ཝུཏྟཱ. ཏེསུ ཨཱསིཏྟཨུསཱུཡཔཎྜཀཱནཾ དྭིནྣཾ ཀིལེསཔརིཡུཊྛཱནཾ ཡོནིསོམནསིཀཱརཱདཱིཧི ཝཱིཏིཀྐམཏོ ནིཝཱརེཏུམྤི སཀྐཱ, ཏེན ཏེ པབྦཱཛེཏབྦཱ ཝུཏྟཱ. པཀྑཔཎྜཀསྶ པན ཀཱལ༹པཀྑེསུ ཨུམྨཱདོ ཝིཡ ཀིལེསཔརིལཱ༹ཧོ ཨཝཏྠརནྟོ ཨཱགཙྪཏི, ཝཱིཏིཀྐམཾ པཏྭཱ ཨེཝ ཙ ནིཝཏྟཏི. ཏསྨཱ སོ ཏསྨིཾ པཀྑེ ན པབྦཱཛེཏབྦོཏི ཝུཏྟོ. ཏདེཏཾ ཝིབྷཱགཾ དསྶེཏུཾ ‘‘ཡསྶ པརེས’’ནྟིཨཱདི ཝུཏྟཾ. ཏཏྠ ཨཱསིཏྟསྶཱཏི མུཁེ ཨཱསིཏྟསྶ ཨཏྟནོཔི ཨསུཙིམུཙྩནེན ¶ པརིལཱ༹ཧོ ཝཱུཔསམྨཏི. ཨུསཱུཡཱཡ ཨུཔྤནྣཱཡཱཏི ཨུསཱུཡཱཡ ཝསེན ཨཏྟནོ སེཝེཏུཀཱམཏཱརཱགེ ཨུཔྤནྣེ ཨསུཙིམུཏྟིཡཱ པརིལཱ༹ཧོ ཝཱུཔསམྨཏི.

‘‘བཱིཛཱནི ཨཔནཱིཏཱནཱི’’ཏི ཝུཏྟཏྟཱ བཱིཛེསུ ཋིཏེསུ ནིམིཏྟམཏྟེ ཨཔནཱིཏེ པཎྜཀོ ན ཧོཏི. བྷིཀྑུནོཔི ཨནཱབཱདྷཔཙྩཡཱ ཏདཔནཡནེ ཐུལླཙྩཡམེཝ, ན པན པཎྜཀཏྟཾ, བཱིཛེསུ པན ཨཔནཱིཏེསུ ཨངྒཛཱཏམྤི རཱགེན ཀམྨནིཡཾ ན ཧོཏི, པུམབྷཱཝོ ཝིགཙྪཏི, མསྶུཨཱདིཔུརིསལིངྒམྤི ཨུཔསམྤདཱཔི ཝིགཙྪཏི, ཀིལེསཔརིལཱ༹ཧོཔི དུནྣིཝཱརཝཱིཏིཀྐམོ ཧོཏི ནཔུཾསཀཔཎྜཀསྶ ཝིཡ. ཏསྨཱ ཨཱིདིསོ ཨུཔསམྤནྣོཔི ནཱསེཏབྦོཏི ཝདནྟི. ཡདི ཨེཝཾ ཀསྨཱ བཱིཛུདྡྷརཎེ པཱརཱཛིཀཾ ན པཉྙཏྟནྟི? ཨེཏྠ ཏཱཝ ཀེཙི ཝདནྟི ‘‘པཉྙཏྟམེཝེཏཾ བྷགཝཏཱ ‘པཎྜཀོ, བྷིཀྑཝེ, ཨནུཔསམྤནྣོ ན ཨུཔསམྤཱདེཏབྦོ, ཨུཔསམྤནྣོ ནཱསེཏབྦོ’ཏི ཝུཏྟཏྟཱ’’ཏི. ཀེཙི པན ‘‘ཡསྨཱ བཱིཛུདྡྷརཎཀྑཎེ པཎྜཀོ ན ཧོཏི, ཏསྨཱ ཏསྨིཾ ཁཎེ པཱརཱཛིཀཾ ན པཉྙཏྟཾ. ཡསྨཱ པན སོ ཨུདྡྷཊབཱིཛོ བྷིཀྑུ ཨཔརེན སམཡེན ཝུཏྟནཡེན པཎྜཀཏྟཾ ཨཱཔཛྫཏི, ཨབྷཱཝཀོ ཧོཏི, ཨུཔསམྤདཱཡ ཨཝཏྠུ, ཏཏོ ཨེཝ ཙསྶ ཨུཔསམྤདཱ ཝིགཙྪཏི, ཏསྨཱ ཨེས པཎྜཀཏྟུཔགམནཀཱལཏོ པཊྛཱཡ ཛཱཏིཡཱ ནཔུཾསཀཔཎྜཀེན སདྡྷིཾ ཡོཛེཏྭཱ ‘ཨུཔསམྤནྣོ ནཱསེཏབྦོ’ཏི ཨབྷབྦོཏི ཝུཏྟོ, ན ཏཏོ པུབྦེ. ཨཡཉྩ ཀིཉྩཱཔི སཧེཏུཀོ, བྷཱཝཀྑཡེན པནསྶ ཨཧེཏུཀསདིསཏཱཡ མགྒོཔི ན ཨུཔྤཛྫཏཱི’’ཏི ཝདནྟི. ཨཔརེ པན ‘‘པབྦཛྫཏོ པུབྦེ ཨུཔཀྐམེན པཎྜཀབྷཱཝམཱཔནྣཾ སནྡྷཱཡ ‘ཨུཔསམྤནྣོ ནཱསེཏབྦོ’ཏི ཝུཏྟཾ, ཨུཔསམྤནྣསྶ པན པཙྪཱ ཨུཔཀྐམེན ཨུཔསམྤདཱཔི ན ཝིགཙྪཏཱི’’ཏི, ཏཾ ན ཡུཏྟཾ. ཡདགྒེན ཧི པབྦཛྫཏོ པུབྦེ ཨུཔཀྐམེན ཨབྷབྦོ ཧོཏི, ཏདགྒེན པཙྪཱཔི ཧོཏཱིཏི ཝཱིམཾསིཏྭཱ གཧེཏབྦཾ.

ཨིཏྠཏྟཱདི ¶ བྷཱཝོ ནཏྠི ཨེཏསྶཱཏི ཨབྷཱཝཀོ. པབྦཛྫཱ ན ཝཱརིཏཱཏི ཨེཏྠ པབྦཛྫཱགཧཎེནེཝ ཨུཔསམྤདཱཔི གཧིཏཱ. ཏེནཱཧ ‘‘ཡསྶ ཙེཏྠ པབྦཛྫཱ ཝཱརིཏཱ’’ཏིཨཱདི. ཏསྨིཾཡེཝསྶ པཀྑེ པབྦཛྫཱ ཝཱརིཏཱཏི ཨེཏྠ པན ཨཔཎྜཀཔཀྑེཔི པབྦཛྫཱམཏྟམེཝ ལབྷཏི, ཨུཔསམྤདཱ པན ཏདཱཔི ན ཝཊྚཏི, པཎྜཀཔཀྑེ པན ཨཱགཏེ ལིངྒནཱསནཱཡ ནཱསེཏབྦོཏི ཝེདིཏབྦཾ.

པཎྜཀཝཏྠུཀཐཱཝཎྞནཱ ནིཊྛིཏཱ.

ཐེཡྻསཾཝཱསཀཝཏྠུཀཐཱཝཎྞནཱ

༡༡༠. ཐེཡྻསཾཝཱསཀཝཏྠུམྷི ¶ ཀོལཉྙཱཏི ཀུལེ ཛཱཏཱ, ཏཏྠ ཝཱ ཝིདིཏཱ ཉཱཏཱ པསིདྡྷཱ, ཏཾ ཝཱ ཛཱནནྟི ཀོལཉྙཱཏི ཉཱཏཀཱནཾ ནཱམཾ. ཐེཡྻཱཡ ལིངྒགྒཧཎམཏྟམྤི ཨིདྷ སཾཝཱསོ ཨེཝཱཏི ཨཱཧ ‘‘ཏཡོ ཐེཡྻསཾཝཱསཀཱ’’ཏི. ན ཡཐཱཝུཌྜྷཾ ཝནྡནནྟི བྷིཀྑཱུནཾ, སཱམཎེརཱནཾ ཝཱ ཝནྡནཾ ན སཱདིཡཏི.

ཡཐཱཝུཌྜྷཾ ཝནྡནནྟི ཨཏྟནཱ མུསཱཝཱདེན དསྶིཏཝསྶཀྐམེན བྷིཀྑཱུནཾ ཝནྡནཾ སཱདིཡཏི, དཧརསཱམཎེརོ པན ཝུཌྜྷསཱམཎེརཱནཾ, དཧརབྷིཀྑུ ཙ ཝུཌྜྷཱནཾ ཝནྡནཾ སཱདིཡནྟོཔི ཐེཡྻསཾཝཱསཀོ ན ཧོཏི. ཨིམསྨིཾ ཨཏྠེཏི སཾཝཱསཏྠེནཀཏྠེ.

‘‘བྷིཀྑུཝསྶཱནཱི’’ཏི ཨིདཾ སཾཝཱསཏྠེནཀེ ཝུཏྟཔཱཋཝསེན ཝུཏྟཾ, སཡམེཝ པན པབྦཛིཏྭཱ སཱམཎེརཝསྶཱནི གཎེནྟོཔི ཨུབྷཡཏྠེནཀོ ཨེཝ. ན ཀེཝལཉྩ པུརིསོཝ, ཨིཏྠཱིཔི བྷིཀྑུནཱིསུ ཨེཝཾ པཊིཔཛྫཏི, ཐེཡྻསཾཝཱསིཀཱཝ. ཨཱདིཀམྨིཀཱཔི ཙེཏྠ ན མུཙྩནྟི, ཨུཔསམྤནྣེསུ ཨེཝ པཉྙཏྟཱཔཏྟིཾ པཊིཙྩ ཨཱདིཀམྨིཀཱ ཝུཏྟཱ, ཏེནེཝེཏྠ ཨཱདིཀམྨིཀོཔི ན མུཏྟོ.

རཱཛ…པེ… བྷཡེནཱཏི ཨེཏྠ བྷཡ-སདྡོ པཙྩེཀཾ ཡོཛེཏབྦོ. ཡཱཝ སོ སུདྡྷམཱནསོཏི ‘‘ཨིམིནཱ ལིངྒེན བྷིཀྑཱུ ཝཉྩེཏྭཱ ཏེཧི སཾཝསིསྶཱམཱི’’ཏི ཨསུདྡྷཙིཏྟཱབྷཱཝེན སུདྡྷཙིཏྟོ. ཏེན ཧི ཨསུདྡྷཙིཏྟེན ལིངྒེ གཧིཏམཏྟེ པཙྪཱ བྷིཀྑཱུཧི སཧ སཾཝསཏུ ཝཱ མཱ ཝཱ, ལིངྒཏྠེནཀོ ཧོཏི. པཙྪཱ སཾཝསནྟོཔི ཨབྷབྦོ ཧུཏྭཱ སཾཝསཏི. ཏསྨཱ ཨུབྷཡཏྠེནཀོཔི ལིངྒཏྠེནཀེ ཨེཝ པཝིསཏཱིཏི ཝེདིཏབྦཾ. ཡོ པན རཱཛཱདིབྷཡེན སུདྡྷཙིཏྟོཝ ལིངྒཾ གཧེཏྭཱ ཝིཙརནྟོ པཙྪཱ ‘‘བྷིཀྑུཝསྶཱནི གཎེཏྭཱ ཛཱིཝིསྶཱམཱི’’ཏི ཨསུདྡྷཙིཏྟཾ ཨུཔྤཱདེཏི, སོ ཙིཏྟུཔྤཱདམཏྟེན ཐེཡྻསཾཝཱསཀོཔི ན ཧོཏི སུདྡྷཙིཏྟེན གཧིཏལིངྒཏྟཱ. སཙེ པན སོ བྷིཀྑཱུནཾ སནྟིཀཾ ¶ གནྟྭཱ སཱམཎེརཝསྶགཎནཱདིཾ ཀརོཏི, ཏདཱ སཾཝཱསཏྠེནཀོ, ཨུབྷཡཏྠེནཀོ ཝཱ ཧོཏཱིཏི དཊྛབྦཾ. ཡཾ པན པརཏོ སཧ དྷུརནིཀྑེཔེན ‘‘ཨཡམྤི ཐེཡྻསཾཝཱསཀོ, ཝཱ’’ཏི ཝུཏྟཾ, ཏཾ བྷིཀྑཱུཧི སངྒམྨ སཾཝཱསཱདྷིཝཱསནཝསེན དྷུརནིཀྑེཔཾ སནྡྷཱཡ ཝུཏྟཾ. ཏེན ཝུཏྟཾ ‘‘སཾཝཱསཾ ནཱདྷིཝཱསེཏི ཡཱཝཱ’’ཏི. ཏསྶ ཏཱཝ ཐེཡྻསཾཝཱསཀོ ནཱམ ན ཝུཙྩཏཱིཏི སམྦནྡྷོ དཊྛབྦོ. ཨེཏྠ ཙ ཙོརཱདིབྷཡཾ ¶ ཝིནཱཔི ཀཱིལཱ༹དྷིཔྤཱཡེན ལིངྒཾ གཧེཏྭཱ བྷིཀྑཱུནཾ སནྟིཀེ པབྦཛིཏཱལཡཾ དསྶེཏྭཱ ཝནྡནཱདིཾ ཨསཱདིཡནྟོཔི ‘‘སོབྷཏི ནུ ཁོ མེ པབྦཛིཏལིངྒ’’ནྟིཨཱདིནཱ སུདྡྷཙིཏྟེན གཎྷནྟོཔི ཐེཡྻསཾཝཱསཀོ ན ཧོཏཱིཏི དཊྛབྦཾ.

སབྦཔཱསཎྜིཡབྷཏྟཱནཱིཏི སབྦསཱམཡིཀཱནཾ སཱདྷཱརཎཾ ཀཏྭཱ པཉྙཏྟབྷཏྟཱནི, ཨིདཉྩ བྷིཀྑཱུནཉྙེཝ ནིཡམིཏབྷཏྟགཧཎེ སཾཝཱསོཔི སམྦྷཝེཡྻཱཏི སབྦསཱདྷཱརཎབྷཏྟཾ ཝུཏྟཾ. སཾཝཱསཾ པན ཨསཱདིཡིཏྭཱ ཨབྷིཀྑུཀཝིཧཱརཱདཱིསུ ཝིཧཱརབྷཏྟཱདཱིནི བྷུཉྫནྟོཔི ཐེཡྻསཾཝཱསཀོ ན ཧོཏི ཨེཝ. ཀམྨནྟཱནུཊྛཱནེནཱཏི ཀསིཨཱདིཀམྨཀརཎེན. པཏྟཙཱིཝརཾ ཨཱདཱཡཱཏི བྷིཀྑུལིངྒཝེསེན སརཱིརེན དྷཱརེཏྭཱ.

‘‘ཡོ ཨེཝཾ པབྦཛཏི, སོ ཐེཡྻསཾཝཱསཀོ ནཱམ ཧོཏཱི’’ཏི ཨིདཾ ནིདསྶནམཏྟཾ, ‘‘ཐེཡྻསཾཝཱསཀོ’’ཏི པན ནཱམཾ ཨཛཱནནྟོཔི ‘‘ཨེཝཾ ཀཱཏུཾ ན ཝཊྚཏཱི’’ཏི ཝཱ ‘‘ཨེཝཾ ཀརོནྟོ སམཎོ ནཱམ ན ཧོཏཱི’’ཏི ཝཱ ‘‘ཡདི ཨཱརོཙེསྶཱམི, ཚཌྜེསྶནྟི མ’’ནྟི ཝཱ ‘‘ཡེན ཀེནཙི པབྦཛྫཱ མེ ན རུཧཏཱི’’ཏི ཛཱནཱཏི, ཐེཡྻསཾཝཱསཀོ ཧོཏི. ཡོ པན པཋམཾ ‘‘པབྦཛྫཱ ཨེཝཾ མེ གཧིཏཱ’’ཏིསཉྙཱི ཀེཝལཾ ཨནྟརཱ ཨཏྟནོ སེཏཝཏྠནིཝཱསནཱདིཝིཔྤཀཱརཾ པཀཱསེཏུཾ ལཛྫནྟོ ན ཀཐེཏི, སོ ཐེཡྻསཾཝཱསཀོ ན ཧོཏི. ཨནུཔསམྤནྣཀཱལེཡེཝཱཏི ཨེཏྠ ཨཝདྷཱརཎེན ཨུཔསམྤནྣཀཱལེ ཐེཡྻསཾཝཱསཀལཀྑཎཾ ཉཏྭཱ ཝཉྩནཱཡཔི ནཱརོཙེཏི, ཐེཡྻསཾཝཱསཀོ ན ཧོཏཱིཏི དཱིཔེཏི. སོ པརིསུདྡྷཙིཏྟེན གཧིཏལིངྒཏྟཱ ལིངྒཏྠེནཀོ ན ཧོཏི, ལདྡྷཱུཔསམྤདཏྟཱ ཏདནུགུཎསྶེཝ སཾཝཱསསྶ སཱདིཏཏྟཱ སཾཝཱསཏྠེནཀོཔི ན ཧོཏི. ཨནུཔསམྤནྣོ པན ལིངྒཏྠེནཀོ ཧོཏི, སཾཝཱསཱརཧསྶ ལིངྒསྶ གཧིཏཏྟཱ སཾཝཱསསཱདིཡནམཏྟེན སཾཝཱསཏྠེནཀོ ཧོཏི.

སལིངྒེ ཋིཏོཏི སལིངྒབྷཱཝེ ཋིཏོ. ཐེཡྻསཾཝཱསཀོ ན ཧོཏཱིཏི བྷིཀྑཱུཧི དིནྣལིངྒསྶ ཨཔརིཙྩཏྟཏྟཱ ལིངྒཏྠེནཀོ ན ཧོཏི, བྷིཀྑུཔཊིཉྙཱཡ ཨཔརིཙྩཏྟཏྟཱ སཾཝཱསཏྠེནཀོ ན ཧོཏཱིཏི. ཡཾ པན མཱཏིཀཱཊྛཀཐཱཡཾ ‘‘ལིངྒཱནུརཱུཔསྶ སཾཝཱསསྶ སཱདིཏཏྟཱ ན སཾཝཱསཏྠེནཀོ’’ཏི (ཀངྑཱ. ཨཊྛ. པཋམཔཱརཱཛིཀཝཎྞནཱ) ཀཱརཎཾ ཝུཏྟཾ, ཏམྤི ཨིདམེཝ ཀཱརཎཾ སནྡྷཱཡ ཝུཏྟཾ. ཨིཏརཐཱ ¶ ¶ སཱམཎེརསྶཔི བྷིཀྑུཝསྶགཎནཱདཱིསུ ལིངྒཱནུརཱུཔསཾཝཱསོ ཨེཝ སཱདིཏོཏི སཾཝཱསཏྠེནཀཏཱ ན སིཡཱ བྷིཀྑཱུཧི དིནྣལིངྒསྶ ཨུབྷིནྣམྤི སཱདྷཱརཎཏྟཱ. ཡཐཱ ཙེཏྠ བྷིཀྑུ, ཨེཝཾ སཱམཎེརོཔི པཱརཱཛིཀཾ སམཱཔནྣོ སཱམཎེརཔཊིཉྙཱཡ ཨཔརིཙྩཏྟཏྟཱ སཾཝཱསཏྠེནཀོ ན ཧོཏཱིཏི ཝེདིཏབྦོ. སོབྷཏཱིཏི སམྤཊིཙྪིཏྭཱཏི ཀཱསཱཝདྷཱརཎེ དྷུརཾ ནིཀྑིཔིཏྭཱ གིཧིབྷཱཝཾ སམྤཊིཙྪིཏྭཱ.

ཡོ ཀོཙི ཝུཌྜྷཔབྦཛིཏོཏི སཱམཎེརཾ སནྡྷཱཡ ཝུཏྟཾ. མཧཱཔེལཱ༹དཱིསཱུཏི ཝིལཱིཝཱདིམཡེསུ གྷརདྭཱརེསུ ཋཔིཏབྷཏྟབྷཱཛནཝིསེསེསུ, ཨེཏེན ཝིཧཱརེ བྷིཀྑཱུཧི སདྡྷིཾ ཝསྶགཎནཱདཱིནཾ ཨཀརཎཾ དསྶེཏི.

ཐེཡྻསཾཝཱསཀཝཏྠུཀཐཱཝཎྞནཱ ནིཊྛིཏཱ.

ཏིཏྠིཡཔཀྐནྟཀཀཐཱཝཎྞནཱ

ཏིཏྠིཡཔཀྐནྟཀཱདིཀཐཱསུ ཏེསཾ ལིངྒེ ཨཱདིནྣམཏྟེཏི ཝཱིམཾསཱདིཨདྷིཔྤཱཡཾ ཝིནཱ ‘‘ཏིཏྠིཡོ བྷཝིསྶཱམཱི’’ཏི སནྣིཊྛཱནཝསེན ལིངྒེ ཀཱཡེན དྷཱརིཏམཏྟེ. སཡམེཝཱཏི ཏིཏྠིཡཱནཾ སནྟིཀཾ ཨགནྟྭཱ སཡམེཝ སངྒྷཱརཱམེཔི ཀུསཙཱིརཱདཱིནི ནིཝཱསེཏི. ཨཱཛཱིཝཀོ བྷཝིསྶཱམི…པེ… གཙྪཏཱིཏི ཨཱཛཱིཝཀཱནཾ སནྟིཀེ ཏེསཾ པབྦཛནཝིདྷིནཱ ‘‘ཨཱཛཱིཝཀོ བྷཝིསྶཱམཱི’’ཏི གཙྪཏི. ཏསྶ ཧི ཏིཏྠིཡབྷཱཝཱུཔགམནཾ པཏི སནྣིཊྛཱནེ ཝིཛྫམཱནེཔི ‘‘གནྟྭཱ བྷཝིསྶཱམཱི’’ཏི པརིཀཔྤིཏཏྟཱ པདཝཱརེ དུཀྐཊམེཝ ཝུཏྟཾ. དུཀྐཊནྟི པཱལི༹ཡཱ ཨཝུཏྟེཔི མེཐུནཱདཱིསུ ཝུཏྟཔུབྦཔཡོགདུཀྐཊཱནུལོམཏོ ཝུཏྟཾ. ཨེཏེན ཙ སནྣིཊྛཱནཝསེན ལིངྒེ སམྤཊིཙྪིཏེ པཱརཱཛིཀཾ, ཏཏོ པུརིམཔཡོགེ ཐུལླཙྩཡཉྩ ཝཏྟབྦམེཝ, ཐུལླཙྩཡཀྑཎེ ནིཝཏྟནྟོཔི ཨཱཔཏྟིཾ དེསཱཔེཏྭཱ མུཙྩཏི ཨེཝཱཏི དཊྛབྦཾ. ཡཐཱ ཙེཏྠ, ཨེཝཾ སངྒྷབྷེདེཔི ལོཧིཏུཔྤཱདེཔི བྷིཀྑཱུནཾ པུབྦཔཡོགཱདཱིསུ དུཀྐཊཐུལླཙྩཡཔཱརཱཛིཀཱཧི མུཙྩནསཱིམཱ ཙ ཝེདིཏབྦཱ. སཱསནཝིརུདྡྷཏཱཡེཏྠ ཨཱདིཀམྨིཀཱནམྤི ཨནཱཔཏྟི ན ཝུཏྟཱ. པབྦཛྫཱཡཔི ཨབྷབྦཏཱདསྶནཏྠཾ པནེཏེ, ཨཉྙེ ཙ པཱརཱཛིཀཀཎྜེ ཝིསུཾ སིཀྑཱཔདེན པཱརཱཛིཀཱདིཾ ཨདསྶེཏྭཱ ཨིདྷ ཨབྷབྦེསུ ཨེཝ ཝུཏྟཱཏི ཝེདིཏབྦཾ.

ཏཾ ¶ ལདྡྷིནྟི ཏིཏྠིཡཝེསེ སེཊྛབྷཱཝགྒཧཎམེཝ སནྡྷཱཡ ཝུཏྟཾ. ཏེསཉྷི ཏིཏྠིཡཱནཾ སསྶཏཱདིགྒཱཧཾ གཎྷནྟོཔི ལིངྒེ ཨསམྤཊིཙྪིཏེ ཏིཏྠིཡཔཀྐནྟཀོ ན ཧོཏི, ཏཾ ལདྡྷིཾ ཨགྒཧེཏྭཱཔི ‘‘ཨེཏེསཾ ཝཏཙརིཡཱ སུནྡརཱ’’ཏི ལིངྒཾ སམྤཊིཙྪནྟོ ཏིཏྠིཡཔཀྐནྟཀོ ཧོཏི ཨེཝ ¶ . ལདྡྷིཡཱ ཨབྷཱཝེནཱཏི བྷིཀྑུབྷཱཝེ སཱལཡཏཱཡ ཏིཏྠིཡབྷཱཝཱུཔགམནལདྡྷིཡཱ ཨབྷཱཝེན, ཨེཏེན ཙ ཨཱཔདཱསུ ཀུསཙཱིརཱདིཾ པཱརུཔནྟསྶཱཔི ནགྒསྶ ཝིཡ ཨནཱཔཏྟིཾ དསྶེཏི.

ཨུཔསམྤནྣབྷིཀྑུནཱ ཀཐིཏོཏི ཨེཏྠ སངྒྷབྷེདཀོཔི ཨུཔསམྤནྣབྷིཀྑུནཱཝ ཀཐིཏོ, མཱཏུགྷཱཏཀཱདཡོ པན ཨནུཔསམྤནྣེནཱཔཱིཏི དཊྛབྦཾ.

ཏིཏྠིཡཔཀྐནྟཀཀཐཱཝཎྞནཱ ནིཊྛིཏཱ.

ཏིརཙྪཱནཝཏྠུཀཐཱཝཎྞནཱ

༡༡༡. ཨུདཀསཉྩཱརིཀཾ མཎྜཱུཀབྷཀྑཾ ནཱགསརཱིརནྟི སམྦནྡྷིཏབྦཾ. ཝིསྶརབྷཡེནཱཏི ནཱགསྶ སརཱིརཾ དིསྭཱ བྷིཀྑུནོ ཝིརཝནབྷཡེན. ཀཔིམིདྡྷཱདཱིསུ ནཱགསརཱིརཾ ནུཔྤཛྫཏཱིཏི ཏདུཔྤཏྟིསཱིམཾ དསྶེནྟོ ཨཱཧ ‘‘ཝིསྶཊྛོ’’ཏིཨཱདི.

ཏིརཙྪཱནཝཏྠུཀཐཱཝཎྞནཱ ནིཊྛིཏཱ.

མཱཏུགྷཱཏཀཱདིཀཐཱཝཎྞནཱ

༡༡༢. ཨཔཝཱཧནནྟི སོདྷནཾ. ཏིརཙྪཱནཱདིཨམནུསྶཛཱཏིཏོ མནུསྶཛཱཏིཀཱནཉྙེཝ པུཏྟེསུ མེཏྟཱདཡོཔི ཏིཀྑཝིསདཱ ཧོནྟི ལོཀུཏྟརགུཎཱ ཝིཡཱཏི ཨཱཧ ‘‘མནུསྶིཏྠིབྷཱུཏཱ ཛནིཀཱ མཱཏཱ’’ཏི. ཡཐཱ མནུསྶཱནཉྙེཝ ཀུསལཔྤཝཏྟི ཏིཀྑཝིསདཱ, ཨེཝཾ ཨཀུསལཔྤཝཏྟིཔཱིཏི ཨཱཧ ‘‘སཡམྤི མནུསྶཛཱཏིཀེནེཝཱ’’ཏིཨཱདི. ཨཱནནྟརིཡེནཱཏི ཨེཏྠ ཙུཏིཨནནྟརཾ ནིརཡེ པཊིསནྡྷིཕལཾ ཨནནྟརཾ ནཱམ, ཏསྨིཾ ཨནནྟརེ ཛནཀཏྟེན ནིཡུཏྟཾ ཨཱནནྟརིཡཾ, ཏེན. ཝེསིཡཱ པུཏྟོཏི ཨུཔལཀྑཎམཏྟཾ, ཀུལིཏྠིཡཱ ཨཏིཙཱརིནིཡཱ པུཏྟོཔི ཨཏྟནོ པིཏརཾ ཨཛཱནིཏྭཱ གྷཱཏེནྟོ པིཏུགྷཱཏཀོཝ ཧོཏི.

༡༡༤. ཨཝསེསནྟི ¶ ཨནཱགཱམིཨཱདིཀཾ. ཡཾ པནེཏྠ ཝཏྟབྦཾ, ཏཾ མནུསྶཝིགྒཧཔཱརཱཛིཀེ ཝུཏྟམེཝ.

༡༡༥. ཨཡཾ སངྒྷབྷེདཀོཏི པཀཏཏྟཾ བྷིཀྑུཾ སནྡྷཱཡ ཝུཏྟཾ. པུབྦེ ཨེཝ པཱརཱཛིཀཾ སམཱཔནྣོ ¶ ཝཱ ཝཏྠཱདིདོསེན ཝིཔནྣོཔསམྤདོ ཝཱ སངྒྷཾ བྷིནྡནྟོཔི ཨནནྟརིཡཾ ན ཕུསཏི, སངྒྷོ པན བྷིནྣོཝ ཧོཏི, པབྦཛྫཱ ཙསྶ ན ཝཱརིཏཱཏི དཊྛབྦཾ.

‘‘དུཊྛཙིཏྟེནཱ’’ཏི ཝུཏྟམེཝཏྠཾ ཝིབྷཱཝེཏི ‘‘ཝདྷཀཙིཏྟེནཱ’’ཏི. ལོཧིཏཾ ཨུཔྤཱདེཏཱིཏི ཏཐཱགཏསྶ ཝེརཱིཧི ཨབྷེཛྫཀཱཡཏཱཡ ཀེནཙི བལཀྐཱརེན ཙམྨཱདིཚེདཾ ཀཏྭཱ བཧི ལོཧིཏཾ པགྒྷརཱཔེཏུཾ ན སཀྐཱ, ཨཱཝུདྷཱདིཔཧཱརེན པན ལོཧིཏཾ ཋཱནཏོ ཙལིཏྭཱ ཀུཔྤམཱནཾ ཨེཀཏྠ སཉྩིཏཾ ཧོཏི, ཨེཏྟཀེན པན པཧཱརདཱཡཀོ ལོཧིཏུཔྤཱདཀོ ནཱམ ཧོཏི དེཝདཏྟོ ཝིཡ. ཙེཏིཡཾ པན བོདྷིཾ ཝཱ པཊིམཱདིཾ ཝཱ བྷིནྡཏོ ཨཱནནྟརིཡཾ ན ཧོཏི, ཨཱནནྟརིཡསདིསཾ མཧཱསཱཝཛྫཾ ཧོཏི. བོདྷིརུཀྑསྶ པན ཨོཛོཧརཎསཱཁཱ ཙེཝ སདྷཱཏུཀཾ ཙེཏིཡཾ བཱདྷཡམཱནཱ ཙ ཚིནྡིཏབྦཱ, པུཉྙམེཝེཏྠ ཧོཏི.

མཱཏུགྷཱཏཀཱདིཀཐཱཝཎྞནཱ ནིཊྛིཏཱ.

ཨུབྷཏོབྱཉྫནཀཝཏྠུཀཐཱཝཎྞནཱ

༡༡༦. ཨིཏྠིཨུབྷཏོབྱཉྫནཀོཏི ཨིཏྠིནྡྲིཡཡུཏྟོ, ཨིཏརོ པན པུརིསིནྡྲིཡཡུཏྟོ. ཨེཀསྶ ཧི བྷཱཝདྭཡཾ སཧ ནུཔྤཛྫཏི ཡམཀེ (ཡམ. ༣.ཨིནྡྲིཡཡམཀ.༡༨༨) པཊིཀྑིཏྟཏྟཱ. དུཏིཡབྱཉྫནཾ པན ཀམྨསཧཱཡེན ཨཀུསལཙིཏྟེནེཝ བྷཱཝཝིརཧིཏཾ ཨུཔྤཛྫཏི. པཀཏིཏྠིཔུརིསཱནམྤི ཀམྨམེཝ བྱཉྫནལིངྒཱནཾ ཀཱརཎཾ, ན བྷཱཝོ ཏསྶ ཀེནཙི པཙྩཡེན པཙྩཡཏྟསྶ པཊྛཱནེ ཨཝུཏྟཏྟཱ. ཀེཝལཾ བྷཱཝསཧིཏཱནཾཡེཝ བྱཉྫནལིངྒཱནཾ པཝཏྟིདསྶནཏྠཾ ཨཊྛཀཐཱསུ ‘‘ཨིཏྠིནྡྲིཡཾ པཊིཙྩ ཨིཏྠིལིངྒཱདཱིནཱི’’ཏིཨཱདིནཱ (དྷ. ས. ཨཊྛ. ༦༣༢) ཨིནྡྲིཡཾ བྱཉྫནཀཨཱརཎཏྟེན ཝུཏྟཾ, ཨིདྷ པན ཨཀུསལབལེན ཨིནྡྲིཡཾ ཝིནཱཔི བྱཉྫནཾ ཨུཔྤཛྫཏཱིཏི ཝུཏྟཾ. ཨུབྷིནྣམྤི ཙེསཾ ཨུབྷཏོབྱཉྫནཀཱནཾ ཡདཱ ཨིཏྠིཡཱ རཱགོ ཨུཔྤཛྫཏི, ཏདཱ པུརིསབྱཉྫནཾ པཱཀཊཾ ཧོཏི, ཨིཏརཾ པཊིཙྪནྣཾ. ཡདཱ པུརིསེ རཱགོ ཨུཔྤཛྫཏི, ཏདཱ ཨིཏྠིབྱཉྫནཾ ¶ པཱཀཊཾ ཧོཏི, ཨིཏརཾ པཊིཙྪནྣཾ. ཏཏྠ ཝིཙཱརཎཀྐམོཏི པཊིསནྡྷིཀྑཎེ ཨེཝ ཨིཏྠིཔུརིསལིངྒཱནམྤི པཱཏུབྷཱཝཔྤཀཱསཀེ ཀུརུནྡིཝཙནེ ཨཡུཏྟཏཱཔཀཱསནཏྠཾ ཨཏྠཝིཙཱརཎཀྐམོ. ཨཊྛསཱལིནིཡཉྷི ‘‘ཨིཏྠིལིངྒཱདཱིནི པན ཨིཏྠིནྡྲིཡཾ པཊིཙྩ པཝཏྟེ སམུཊྛིཏཱནཱི’’ཏིཨཱདི (དྷ. ས. ཨཊྛ. ༦༣༢) ཝུཏྟཾ. ནེཝསྶ པབྦཛྫཱ ཨཏྠཱིཏི ཡོཛནཱ. ཡོ ཙ པཊིཀྑིཏྟེ ཨབྷབྦེ, བྷབྦེ ཙ པུགྒལེ ཉཏྭཱ པབྦཱཛེཏི, ཨུཔསམྤཱདེཏི ཝཱ, དུཀྐཊཾ. ཨཛཱནནྟསྶ སབྦཏྠ ཨནཱཔཏྟཱིཏི ཝེདིཏབྦཾ.

ཨུབྷཏོབྱཉྫནཀཝཏྠུཀཐཱཝཎྞནཱ ནིཊྛིཏཱ.

ཨནུཔཛ྄ཛྷཱཡཀཱདིཝཏྠུཀཐཱཝཎྞནཱ

༡༡༧. ཨནུཔཛ྄ཛྷཱཡཱདིཝཏྠཱུསུ ¶ སིཀྑཱཔདཾ ཨཔཉྙཏྟནྟི ‘‘ན, བྷིཀྑཝེ, ཨནུཔཛ྄ཛྷཱཡཀོ ཨུཔསམྤཱདེཏབྦོ’’ཏི ཨིདྷེཝ པཉྙཱཔིཡམཱནསིཀྑཱཔདཾ སནྡྷཱཡ ཝུཏྟཾ. ‘‘ཀམྨཾ པན ན ཀུཔྤཏཱི’’ཏི ཨིདཾ ཨུཔཛ྄ཛྷཱཡཱབྷཱཝེཔི ‘‘ཨིཏྠནྣཱམསྶ ཨུཔསམྤདཱཔེཀྑོ, ཨིཏྠནྣཱམེན ཨུཔཛ྄ཛྷཱཡེནཱ’’ཏི མཏསྶ ཝཱ ཝིབྦྷམནྟསྶ ཝཱ པུརཱཎཨུཔཛ྄ཛྷཱཡསྶ, ཨཉྙསྶ ཝཱ ཡསྶ ཀསྶཙི ཨཝིཛྫམཱནསྶཱཔི ནཱམེན སབྦཏྠ ཨུཔཛ྄ཛྷཱཡཀིཏྟནསྶ ཀཏཏྟཱ ཝུཏྟཾ. ཡདི ཧི ཨུཔཛ྄ཛྷཱཡཀིཏྟནཾ ན ཀརེཡྻ, ‘‘པུགྒལཾ ན པརཱམསཏཱི’’ཏི ཝུཏྟཀམྨཝིཔཏྟི ཨེཝ སིཡཱ. ཏེནེཝ པཱལི༹ཡཾ ‘‘ཨནུཔཛ྄ཛྷཱཡཀ’’ནྟི ཝུཏྟཾ. ཨཊྛཀཐཱཡམྤིསྶ ‘‘ཨུཔཛ྄ཛྷཱཡཾ ཨཀིཏྟེཏྭཱ’’ཏི ཨཝཏྭཱ ‘‘ཨུཔཛ྄ཛྷཱཡཾ ཨགཱཧཱཔེཏྭཱ སབྦེན སབྦཾ ཨུཔཛ྄ཛྷཱཡཝིརཧིཏཾ’’ཨིཙྩེཝ ཨཏྠོཏི ཝུཏྟོ. པཱལི༹ཡཾ སངྒྷེན ཨུཔཛ྄ཛྷཱཡེནཱཏི ‘‘ཨཡཾ ཨིཏྠནྣཱམོ སངྒྷསྶ ཨུཔསམྤདཱཔེཀྑོ, ཨིཏྠནྣཱམོ སངྒྷཾ ཨུཔསམྤདཾ ཡཱཙཏི སངྒྷེན ཨུཔཛ྄ཛྷཱཡེནཱ’’ཏི ཨེཝཾ ཀམྨཝཱཙཱཡ སངྒྷམེཝ ཨུཔཛ྄ཛྷཱཡཾ ཀིཏྟེཏྭཱཏི ཨཏྠོ. ཨེཝཾ གཎེན ཨུཔཛ྄ཛྷཱཡེནཱཏི ཨེཏྠཱཔི ‘‘ཨཡཾ ཨིཏྠནྣཱམོ གཎསྶ ཨུཔསམྤདཱཔེཀྑོ’’ཏིཨཱདིནཱ ཡོཛནཱ ཝེདིཏབྦཱ, ཨེཝཾ ཝུཏྟེཔི ཀམྨཾ ན ཀུཔྤཏི ཨེཝ དུཀྐཊསྶེཝ ཝུཏྟཏྟཱ. ཨཉྙཐཱ ‘‘སོ ཙ པུགྒལོ ཨནུཔསམྤནྣོ’’ཏི ཝདེཡྻ. ཏེནཱཧ ‘‘སངྒྷེནཱ’’ཏིཨཱདི. ཏཏྠ པཎྜཀཱདཱིཧི ཨུཔཛ྄ཛྷཱཡེཧི ཀརིཡམཱནེསུ ཀམྨེསུ པཎྜཀཱདིཀེ ཝིནཱཝ ཡདི པཉྩཝགྒཱདིགཎོ པཱུརཏི, ཀམྨཾ ན ཀུཔྤཏི, ཨིཏརཐཱ ཀུཔྤཏཱིཏི ཝེདིཏབྦཾ.

ཨནུཔཛ྄ཛྷཱཡཀཱདིཝཏྠུཀཐཱཝཎྞནཱ ནིཊྛིཏཱ.

ཨཔཏྟཀཱདིཝཏྠུཀཐཱཝཎྞནཱ

༡༡༨. ཨཔཏྟཙཱིཝརཝཏྠཱུསུཔི ¶ པཏྟཙཱིཝརཱནཾ ཨབྷཱཝེཔི ‘‘པརིཔུཎྞསྶ པཏྟཙཱིཝར’’ནྟི ཀམྨཝཱཙཱཡ སཱཝིཏཏྟཱ ཀམྨཀོཔཾ ཨཝཏྭཱ དུཀྐཊམེཝ ཝུཏྟཾ. ཨིཏརཐཱ སཱཝནཱཡ ཧཱཔནཏོ ཀམྨཀོཔོ ཨེཝ སིཡཱ. ཀེཙི པན ‘‘པཋམཾ ཨནུཉྙཱཏཀམྨཝཱཙཱཡ ཨུཔསམྤནྣཱ ཝིཡ ཨིདཱནིཔི ‘པརིཔུཎྞསྶ པཏྟཙཱིཝར’ནྟི ཨཝཏྭཱ ཀམྨཝཱཙཱཡ ཨུཔསམྤནྣཱཔི སཱུཔསམྤནྣཱཨེཝཱ’’ཏི ཝདནྟི, ཏཾ ན ཡུཏྟཾ. ཨནུཉྙཱཏཀཱལཏོ པཊྛཱཡ ཧི ཨཔརཱམསནཾ སཱཝནཱཡ ཧཱཔནཝིཔཏྟི ཨེཝ ཧོཏི ‘‘ཨིཏྠནྣཱམོ སངྒྷཾ ཨུཔསམྤདཾ ཡཱཙཏཱི’’ཏི པདསྶ ཧཱཔནེ ཝིཡ. ཏམྤི ཧི པཙྪཱ ཨནུཉྙཱཏཾ, ‘‘སངྒྷཾ, བྷནྟེ, ཨུཔསམྤདཾ ཡཱཙཱམཱི’’ཏིཨཱདིཝཱཀྱེན ཨཡཱཙེཏྭཱ ཏམྤི ཨུཔསམྤཱདེནྟོ ‘‘ཨཡཾ ཨིཏྠནྣཱམོ སངྒྷཾ ཨུཔསམྤདཾ ཡཱཙཏཱི’’ཏི ཝཏྭཱཝ ཡདི ཀམྨཝཱཙཾ ཀརོཏི, ཀམྨཾ སུཀཏམེཝ ཧོཏི ¶ , ནོ ཙེ ཝིཔནྣཾ. སབྦཔཙྪཱ ཧི ཨནུཉྙཱཏཀམྨཝཱཙཏོ ཀིཉྩིཔི པརིཧཱཔེཏུཾ ན ཝཊྚཏི, སཱཝནཱཡ ཧཱཔནམེཝ ཧོཏི. ཨཉྙེ ཝཱ བྷིཀྑཱུ དཱཏུཀཱམཱ ཧོནྟཱིཏི སམྦནྡྷོ.

ཨནཱམཊྛཔིཎྜཔཱཏནྟི བྷིཀྑཱུཧི ལདྡྷབྷིཀྑཏོ ཨགྒཧིཏགྒཾ པིཎྜཔཱཏཾ. སཱམཎེརབྷཱགསམཀོཏི ཨེཏྠ ཀིཉྩཱཔི སཱམཎེརཱནམྤི ཨཱམིསབྷཱགསྶ སམཀམེཝ དིཡྻམཱནཏྟཱ ཝིསུཾ སཱམཎེརབྷཱགོ ནཱམ ནཏྠི, པཏྟཙཱིཝརཔརིཀམྨམཏྟཔཊིབདྡྷཔབྦཛྫཏཱཡ པན སཱམཎེརསདིསཱ ཨེཏེ པཎྜུཔལཱསཱཏི དསྶནཏྠཾ ཨེཝཾ ཝུཏྟནྟི དཊྛབྦཾ. ནིཡཏཱསནྣཔབྦཛྫསྶེཝ ཙཱཡཾ བྷཱགོ དཱིཡཏི. ཏེནེཝ ‘‘ཡཱཝ པཏྟོ པཙྩཏཱི’’ཏིཨཱདི ཝུཏྟཾ. ཨཱམིསབྷཱགོཏི ཝིཧཱརེ དིནྣཾ སངྒྷབྷཏྟཾ, ཏཏྲུཔྤཱདཉྩ སནྡྷཱཡ ཝུཏྟཾ, ན དཱཡཀཱནཾ གེཧེསུ ཏེཧི དིཡྻམཱནཾ. ཏེནེཝ སལཱཀབྷཏྟཱདི པཊིཀྑིཏྟཾ, དཱཡཀཱ ཝིཔྤཊིསཱརིནོ ཧོནྟཱིཏི. བྷེསཛྫནྟིཨཱདིནཱ པན གིཧཱིནཾ བྷེསཛྫཀརཎཱདིདོསོ ཨེཏྠ ན ཧོཏཱིཏི དསྶེཏི.

ཨཔཏྟཀཱདིཝཏྠུཀཐཱཝཎྞནཱ ནིཊྛིཏཱ.

ཧཏྠཙྪིནྣཱདིཝཏྠུཀཐཱཝཎྞནཱ

༡༡༩. ཧཏྠཙྪིནྣཱདིཝཏྠཱུསུ ¶ ཀཎྞམཱུལེཏི སཀལསྶ ཀཎྞསྶ ཚེདཾ སནྡྷཱཡ ཝུཏྟཾ. ཀཎྞསཀྑལིཀཱཡཱཏི ཀཎྞཙཱུལི༹ཀཱཡ. ཡསྶ པན ཀཎྞཱཝིདྡྷེཏི ཧེཊྛཱ ཀུཎྜལཱདིཋཔནཙྪིདྡཾ སནྡྷཱཡ ཝུཏྟཾ. ཏཉྷི སངྒྷཊནཀྑམཾ. ཨཛཔདཀེཏི ཨཛཔདནཱསིཀཊྛིཀོཊིཡཾ. ཏཏོ ཧི ཨུདྡྷཾ ན ཝིཙྪིནྡཏི. སཀྐཱ ཧོཏི སནྡྷེཏུནྟི ཨཝིརཱུཔསཎྛཱནཾ སནྡྷཱཡ ཝུཏྟཾ, ཝིརཱུཔཾ པན པརིསདཱུསཀཏཾ ཨཱཔཱདེཏི.

ཁུཛྫསརཱིརོཏི ཝངྐསརཱིརོ. བྲཧྨུནོ ཝིཡ ཨུཛུཀཾ གཏྟཾ སརཱིརཾ ཡསྶ, སོ བྲཧྨུཛྫུགཏྟོ, བྷགཝཱ.

པརིཝཊུམོཏི སམནྟཏོ ཝཊྚཀཱཡོ, ཨེཏེན ཨེཝརཱུཔཱ ཨེཝ ཝཱམནཀཱ ན ཝཊྚནྟཱིཏི དསྶེཏི.

ཀཱུཊཀཱུཊསཱིསོཏི ཨནེཀེསུ ཋཱནེསུ པིཎྜིཀམཾསཏཾ དསྶེཏུཾ ཨཱམེཌིཏཾ ཀཏཾ. ཏེནཱཧ ‘‘ཏཱལཕལཔིཎྜིསདིསེནཱ’’ཏི, ཏཱལཕལཱནཾ མཉྫརཱི པིཎྜི ནཱམ. ཨནུཔུབྦཏནུཀེན སཱིསེནཱཏི ཙེཏིཡཐཱུཔིཀཱ ¶ ཝིཡ ཀམེན ཀིསེན སཱིསེན, ཐཱུལཝེལུ༹པབྦཾ ཝིཡ ཨཱདིཏོ པཊྛཱཡ ཡཱཝཔརིཡོསཱནཾ སམཐཱུལེན ཨུཙྩེན སཱིསེན སམནྣཱགཏོ ནཱལི༹སཱིསོ ནཱམ. ཀཔྤསཱིསོཏི གཛམཏྠཀཾ ཝིཡ དྭིདྷཱ བྷིནྣསཱིསོ. ‘‘ཀཎྞིཀཀེསོ ཝཱ’’ཏི ཨིམསྶ ཝིཝརཎཾ ‘‘པཱཎཀེཧཱི’’ཏིཨཱདི. མཀྐཊསྶེཝ ནལཱ༹ཊེཔི ཀེསཱནཾ ཨུཊྛིཏབྷཱཝཾ སནྡྷཱཡཱཧ ‘‘སཱིསལོམེཧཱི’’ཏིཨཱདི.

མཀྐཊབྷམུཀོཏི ནལཱ༹ཊལོམེཧི ཨཝིབྷཏྟལོམབྷམུཀོ. ཨཀྑིཙཀྐལེཧཱིཏི ཀཎྷམཎྜལེཧི. ཀེཀརོཏི ཏིརིཡཾ པསྶནཀོ. ཨུདཀཏཱརཀཱཏི ཨོལོཀེནྟཱནཾ ཨུདཀེ པཊིབིམྦིཀཙྪཱཡཱ, ཨུདཀཔུབྦུལ༹ནྟི ཀེཙི. ཨཀྑིཏཱརཀཱཏི ཨབྷིམུཁེ ཋིཏཱནཾ ཚཱཡཱ, ཨཀྑིགཎྜཀཱཏིཔི ཝདནྟི. ཨཏིཔིངྒལཀྑཱིཏི མཛྫཱརཀྑི. མདྷུཔིངྒལནྟི མདྷུཝཎྞཔིངྒལཾ. ནིཔྤཁུམཀྑཱིཏི ཨེཏྠ པཁུམ-སདྡོ ཨཀྑིདལལོམེསུ ནིརཱུལ༹ྷོ, ཏདབྷཱཝཱ ནིཔྤཁུམཀྑི. ཨཀྑིཔཱཀེནཱཏི ཨཀྑིདལ པརིཡནྟེསུ པཱུཏིབྷཱཝཱཔཛྫནརོགེན.

ཙིཔིཊནཱསིཀོཏི ¶ ཨནུནྣཏནཱསིཀོ. པཊངྒམཎྜཱུཀོ ནཱམ མཧཱམུཁམཎྜཱུཀོ. བྷིནྣམུཁོཏི ཨུཔཀྐམུཁཔརིཡོསཱནོ, སབྦདཱ ཝིཝཊམུཁོ ཝཱ. ཝངྐམུཁོཏི ཨེཀཔསྶེ ཨཔཀྐམྨ ཋིཏཧེཊྛིམཧནུཀཊྛིཀོ. ཨོཊྛཙྪིནྣཀོཏི ཨུབྷོསུ ཨོཊྛེསུ ཡཏྠ ཀཏྠཙི ཛཱཏིཡཱ ཝཱ པཙྪཱ ཝཱ སཏྠཱདིནཱ ཨཔནཱིཏམཾསེན ཨོཊྛེན སམནྣཱགཏོ. ཨེལ༹མུཁོཏི ནིཙྩཔགྒྷརིཏལཱལཱམུཁོ.

བྷིནྣགལོཏི ཨཝནཏགཏོ. བྷིནྣཨུརོཏི ཨཏིནིནྣཨུརམཛ྄ཛྷོ. ཨེཝཾ བྷིནྣཔིཊྛིཔི. སབྦཉྩེཏནྟི ‘‘ཀཙྪུགཏྟོ’’ཏིཨཱདིཾ སནྡྷཱཡ ཝུཏྟཾ. ཨེཏྠ ཙ ཝིནིཙྪཡོ ཀུཊྛཱདཱིསུ ཝུཏྟོ ཨེཝཱཏི ཨཱཧ ‘‘ཝིནིཙྪཡོ’’ཏིཨཱདི.

ཝཱཏཎྜིཀོཏི ཨཎྜཝཱཏརོགེན ཨུདྡྷུཏབཱིཛཎྜཀོསེན སམནྣཱགཏོ, ཡསྶ ནིཝཱསནེན པཊིཙྪནྣམྤི ཨུནྣཏཾ པཀཱསཏི, སོཝ ན པབྦཱཛེཏབྦོ. ཝིཀཊོཏི ཏིརིཡཾགམནཔཱདོ, ཡསྶ ཙངྐམཏོ ཛཱཎུཀཱ བཧི ནིགཙྪནྟི. པཎྷོཏི པཙྪཏོ པརིཝཏྟནཀཔཱདོ, ཡསྶ ཙངྐམཏོ ཛཱཎུཀཱ ཨནྟོ པཝིསནྟི. མཧཱཛངྒྷོཏི ཐཱུལཛངྒྷོ. མཧཱཔཱདོཏི མཧནྟེན པཱདཏལེན ཡུཏྟོ. པཱདཝེམཛ྄ཛྷེཏི པིཊྛིཔཱདཝེམཛ྄ཛྷེ, ཨེཏེན ཨགྒཔཱདོ ཙ པཎྷི ཙ སདིསོཏི དསྶེཏི.

མཛ྄ཛྷེ སངྐུཊིཏཔཱདཏྟཱཏི ཀུཎྜཔཱདཏཱཡ ཀཱརཎཝིབྷཱཝནཾ. ཨགྒེ སངྐུཊིཏཔཱདཏྟཱཏི ཀུཎྜཔཱདཏཱཡ སཀུཎཔཱདསྶེཝ གམནཝིབྷཱཝནཾ. པིཊྛིཔཱདགྒེན ཙངྐམནྟོཏི ‘‘པཱདསྶ བཱཧིརནྟེནཱཏི ¶ ཙ ཨབྦྷནྟརནྟེནཱ’’ཏི ཙ ཨིདཾ པཱདཏལསྶ ཨུབྷོཧི པརིཡནྟེཧི ཙངྐམནཾ སནྡྷཱཡ ཝུཏྟཾ.

མམྨནནྟི ཋཱནཀརཎཝིསུདྡྷིཡཱ ཨབྷཱཝེན ཨཡུཏྟཀྑརཝཙནཾ. ཝཙནཱནུཀརཎེན ཧི སོ མམྨནོ ཝུཏྟོ. ཡོ ཙ ཀརཎསམྤནྣོཔི ཨེཀམེཝཀྑརཾ ཧིཀྐཱརབཧུསོ ཝདཏི, སོཔི ཨིདྷེཝ སངྒཡ྄ཧཏི. ཡོ ཝཱ པན ཧིཀྐཾ ནིགྒཧེཏྭཱཔི ཨནཱམེཌིཏཀྑརམེཝ སིལིཊྛཝཙནཾ ཝཏྟུཾ སམཏྠོ, སོ པབྦཱཛེཏབྦོ.

ཨཱཔཏྟིཏོ ན མུཙྩཏཱིཏི ཉཏྭཱ ཀརོནྟོཝ ན མུཙྩཏི. ཛཱིཝིཏནྟརཱཡཱདིཨཱཔདཱསུ ཨརུཙིཡཱ ཀཱཡསཱམགྒིཾ དེནྟསྶ ཨནཱཔཏྟི. ཨཔྤཏྟོ ཨོསཱརཎནྟི ཨོསཱརཎཱཡ ཨནརཧོཏི ཨཏྠོ.

ཧཏྠཙྪིནྣཱདིཝཏྠུཀཐཱཝཎྞནཱ ནིཊྛིཏཱ.

ཨལཛྫིནིསྶཡཝཏྠུཀཐཱཝཎྞནཱ

༡༢༠. ནིསྶཡཔཊིསཾཡུཏྟཝཏྠཱུསུ ¶ བྷིཀྑཱུཧི སམཱནོ བྷཱགོ དིཊྛིསཱིལཱདིགུཎཀོཊྛཱསོ ཨསྶཱཏི བྷིཀྑུསབྷཱགོ, ཏསྶ བྷཱཝོ བྷིཀྑུསབྷཱགཏཱ.

ཨལཛྫིནིསྶཡཝཏྠུཀཐཱཝཎྞནཱ ནིཊྛིཏཱ.

གམིཀཱདིནིསྶཡཝཏྠུཀཐཱཝཎྞནཱ

༡༢༡. ནིསྶཡཀརཎཱིཡོཏི ཨེཏྠ ནིསྶཡགྒཧཎཾ ནིསྶཡོ, སོ ཀརཎཱིཡོ ཡསྶཱཏི ཝིསེསནསྶ པརནིཔཱཏོ དཊྛབྦོ. ཝིསྶམེནྟོ ཝཱ…པེ… ཨནཱཔཏྟཱིཏི གམནསཨུསྶཱཧཏཱཡ ཏཐཱ ཝསནྟོཔི ཨདྡྷིཀོ ཨེཝ, ཏཏྠ ནིསྶཡདཱཡཀེ ཨསཏི ཨནཱཔཏྟཱིཏི ཨདྷིཔྤཱཡོ. ཨེཏེན ཙ པརིསྶམཱདིཨབྷཱཝེ སེནཱསནཱདིསམྤདཾ པཊིཙྩ ཝསཏོ ཨཱཔཏྟཱིཏི དསྶེཏི. ཏཉྩ ཨགམནཔཙྩཡཱ དིཝསེ དིཝསེ ཨཱཔཛྫཏཱིཏི ཝདནྟི. ཙཱིཝརརཛནཱདིཀིཙྩཏྠཱཡ གརཱུཧི པེསིཏསྶཱཔི ཀིཙྩཔརིཡོསཱནམེཝ ཝསིཏབྦཾ, ན ཏཏོ པརཾ. གརཱུཧིཔི ཏཱཝཀཱལིཀཀིཙྩཏྠམེཝ པེསལདཧརཱ པེསིཏབྦཱ, ན ནིཙྩཀཱལཀིཙྩཏྠནྟི དཊྛབྦཾ. ‘‘ནཱཝཱཡ གཙྪནྟསྶ…པེ… ཨནཱཔཏྟཱི’’ཏི ¶ ཝུཏྟཏྟཱ ཨེཝརཱུཔཾ ཨཝིདྷེཡྻཏཾ ཝིནཱ ནིསྶཡདཱཡཀརཧིཏཊྛཱནེ ཝསྶཾ ཨུཔགནྟུཾ ན ཝཊྚཏཱིཏི དཊྛབྦཾ.

ཏསྶ ནིསྶཱཡཱཏི ཏཾ ནིསྶཱཡ. ཨཱསཱལ༹ྷཱིམཱསེ…པེ… ཏཏྠ གནྟབྦནྟི ཨེཏྠ པན སཙེཔི ‘‘ཨསུཀོ ཐེརོ ཨེཏྠ ཨཱགམིསྶཏི ཨཱགམིསྶཏཱི’’ཏི ཨཱགམེནྟསྶེཝ ཝསྶཱུཔནཱཡིཀདིཝསོ ཧོཏི. ཧོཏུ, ཝསིཏཊྛཱནེ ཝསྶཾ ཨནུཔགམྨ ཡཏྠ ནིསྶཡོ ལབྦྷཏི, དཱུརེཔི ཏཏྠ གནྟྭཱ པཙྪིམིཀཱཡ ཨུཔགནྟབྦཾ.

༡༢༢. གོཏྟེནཔཱིཏི ‘‘ཨཱཡསྨཏོ པིཔྤལིསྶ ཨུཔསམྤདཱཔེཀྑོ’’ཏི ཨེཝཾ ནཱམཾ ཨཝཏྭཱ གོཏྟནཱམེནཔཱིཏི ཨཏྠོ, ཏེན ‘‘ཀོནཱམོ ཏེ ཨུཔཛ྄ཛྷཱཡོ’’ཏི པུཊྛེན གོཏྟནཱམེན ‘‘ཨཱཡསྨཱ ཀསྶཔོ’’ཏི ཝཏྟབྦནྟི སིདྡྷཾ ཧོཏི. ཏསྨཱ ཨཉྙམྤི ཀིཉྩི ཏསྶ ནཱམཾ པསིདྡྷཾ, ཏསྨིཾ ཝཱ ཁཎེ སུཁགྒཧཎཏྠཾ ནཱམཾ པཉྙཱཔིཏཾ, ཏཾ སབྦཾ གཧེཏྭཱཔི ཨནུསྶཱཝནཱ ཀཱཏབྦཱ. ཡཐཱ ¶ ཨུཔཛ྄ཛྷཱཡསྶ, ཨེཝཾ ཨུཔསམྤདཱཔེཀྑསྶཔི གོཏྟཱདིནཱམེན, ཏངྑཎིཀནཱམེན ཙ ཨནུསྶཱཝནཾ ཀཱཏུཾ ཝཊྚཏི. ཏསྨིམྤི ཁཎེ ‘‘ཨཡཾ ཏིསྶོ’’ཏི ཝཱ ‘‘ནཱགོ’’ཏི ཝཱ ནཱམཾ ཀརོནྟེཧི ཨནུསཱསཀསམྨུཏིཏོ པཋམམེཝ ཀཱཏབྦཾ, ཨེཝཾ ཀཏྭཱཔི ཨནྟརཱཡིཀདྷམྨཱནུསཱསནཔུཙྪནཀཱལེསུ ‘‘ཀིནྣཱམོསི, ཨཧཾ བྷནྟེ ནཱགོ ནཱམ, ཀོནཱམོ ཏེ ཨུཔཛ྄ཛྷཱཡོ, ཨུཔཛ྄ཛྷཱཡོ མེ བྷནྟེ ཏིསྶོ ནཱམཱ’’ཏིཨཱདིནཱ ཝིཉྙཱཔེནྟེན ཨུབྷིནྣམྤི ཙིཏྟེ ‘‘མམེདཾ ནཱམ’’ནྟི ཡཐཱ སཉྙཱ ཨུཔྤཛྫཏི, ཨེཝཾ ཝིཉྙཱཔེཏབྦཾ. སཙེ པན ཏསྨིཾ ཁཎེ པཀཏིནཱམེན ཝཏྭཱ པཙྪཱ ཏིསྶ-ནཱམཱདིཨཔུབྦནཱམེན ཨནུསྶཱཝེཏི, ན ཝཊྚཏི.

ཏཏྠ ཙ ཀིཉྩཱཔི ཨུཔཛ྄ཛྷཱཡསྶེཝ ནཱམཾ ཨགྒཧེཏྭཱ ཡེན ཀེནཙི ནཱམེན ‘‘ཏིསྶསྶ ཨུཔསམྤདཱཔེཀྑོ’’ཏིཨཱདིནཱཔི པུགྒལེ པརཱམཊྛེ ཀམྨཾ སུཀཏམེཝ ཧོཏི ཨནུཔཛ྄ཛྷཱཡཀཱདཱིནཾ ཨུཔསམྤདཱཀམྨཾ ཝིཡ ཨུཔཛ྄ཛྷཱཡསྶ ཨབྷཱཝེཔི ཨབྷབྦཏྟེཔི ཀམྨཝཱཙཱཡ པུགྒལེ པརཱམཊྛེ ཀམྨསྶ སིཛ྄ཛྷནཏོ. ཨུཔསམྤདཱཔེཀྑསྶ པན ཡཐཱསཀཾ ནཱམཾ ཝིནཱ ཨཉྙེན ནཱམེན ཨནུསྶཱཝིཏེ ཀམྨཾ ཀུཔྤཏི, སོ ཨནུཔསམྤནྣོཝ ཧོཏི. ཏཏྠ ཋིཏོ ཨཉྙོ ཨནུཔསམྤནྣོ ཝིཡ གཧིཏནཱམསྶ ཝཏྠུཔུགྒལསྶ ཏཏྠ ཨབྷཱཝཱ, ཨེཏསྶ ཙ ནཱམསྶ ཨནུསྶཱཝནཱཡ ཨཝུཏྟཏྟཱ. ཏསྨཱ ཨུཔསམྤདཱཔེཀྑསྶ པཀཏིནཱམཾ པརིཝཏྟེཏྭཱ ཨནུཔུབྦེན ནཱགཱདིནཱམེན ཨནུསྶཱཝེཏུཀཱམེན པཊིཀཙྩེཝ ‘‘ཏྭཾ ནཱགོ’’ཏིཨཱདིནཱ ཝིཉྙཱཔེཏྭཱ ཨནུསཱསནཨནྟརཱཡིཀདྷམྨཔུཙྪནཀྑཎེསུཔི ཏསྶ ཙ སངྒྷསྶ ཙ ཡཐཱ པཱཀཊཾ ཧོཏི, ཏཐཱ པཀཱསེཏྭཱཝ ནཱགཱདིནཱམེན ཨནུསྶཱཝེཏབྦཾ. ཨེཀསྶ བཧཱུནི ནཱམཱནི ཧོནྟི, ཏེསུ ཨེཀཾ གཧེཏུཾ ཝཊྚཏི.

ཡཾ ¶ པན ཨུཔསམྤདཱཔེཀྑཨུཔཛ྄ཛྷཱཡཱནཾ ཨེཀཏྠ གཧིཏཾ ནཱམཾ, ཏདེཝ ཉཏྟིཡཱ, སབྦཏྠ ཨནུསྶཱཝནཱསུ ཙ གཧེཏབྦཾ. གཧིཏཏོ ཧི ཨཉྙསྨིཾ གཧིཏེ བྱཉྫནཾ བྷིནྣཾ ནཱམ ཧོཏི, ཀམྨཾ ཝིཔཛྫཏི. ཨཏྠཏོ, ཧི བྱཉྫནཏོ ཙ ཨབྷིནྣཱ ཨེཝ ཉཏྟི, ཨནུསྶཱཝནཱ ཙ ཝཊྚནྟི, ཨུཔཛ྄ཛྷཱཡནཱམསྶ པན པུརཏོ ‘‘ཨཱཡསྨཏོ ཏིསྶསྶཱ’’ཏིཨཱདིནཱ ཨཱཡསྨནྟ-པདཾ སབྦཏྠ ཡོཛེཏྭཱཔི ཨནུསྶཱཝེཏི, ཏཐཱ ཨཡོཛིཏེཔི དོསོ ནཏྠི.

པཱལི༹ཡཾ པན ཀིཉྩཱཔི ‘‘ཨིཏྠནྣཱམསྶ ཨཱཡསྨཏོ’’ཏི པཙྪཏོ ‘‘ཨཱཡསྨཏོ’’ཏི པདཾ ཝུཏྟཾ, ཏཐཱཔི ‘‘ཨཱཡསྨཱ སཱརིཔུཏྟོ ཨཏྠཀུསལོ’’ཏིཨཱདིནཱ ¶ ནཱམསྶ པུརཏོ ཨཱཡསྨནྟ-པདཡོགསྶ དསྶནཏོ པུརཏོཝ པཡོགོ ཡུཏྟཏརོ. ཏཉྩ ཨེཀཏྠ ཡོཛེཏྭཱ ཨཉྙཏྠ ཨཡོཛིཏེཔི ཨེཀཏྠ པུརཏོ ཡོཛེཏྭཱ ཨཉྙཏྠ པཙྪཏོ ཡོཛནེཔི སཱཝནཱཡ ཧཱཔནཾ ནཱམ ན ཧོཏི ནཱམསྶ ཨཧཱཔིཏཏྟཱ. ཏེནེཝ པཱལི༹ཡམྤི ‘‘ཨིཏྠནྣཱམསྶ ཨཱཡསྨཏོ’’ཏི ཨེཀཏྠ ཡོཛེཏྭཱ ‘‘ཨིཏྠནྣཱམེན ཨུཔཛ྄ཛྷཱཡེནཱ’’ཏིཨཱདཱིསུ ‘‘ཨཱཡསྨཏོ’’ཏི ན ཡོཛིཏནྟི ཝདནྟི. ཏཉྩ ཀིཉྩཱཔི ཨེཝཾ, ཏཐཱཔི སབྦཊྛཱནེཔི ཨེཀེནེཝ པཀཱརེན ཡོཛེཏྭཱ ཨེཝ ཝཱ ཨཡོཛེཏྭཱ ཝཱ ཨནུསྶཱཝནཾ པསཏྠཏརནྟི གཧེཏབྦཾ.

གམིཀཱདིནིསྶཡཝཏྠུཀཐཱཝཎྞནཱ ནིཊྛིཏཱ.

དྭེཨུཔསམྤདཱཔེཀྑཱདིཝཏྠུཀཐཱཝཎྞནཱ

༡༢༣. ཨེཀཏོ སཧེཝ ཨེཀསྨིཾ ཁཎེ ཨནུསྶཱཝནཾ ཨེཏེསནྟི ཨེཀཱནུསྶཱཝནཱ, ཨུཔསམྤདཱཔེཀྑཱ, ཨེཏེ ཨེཀཱནུསྶཱཝནེ ཀཱཏུཾ. ཏེནཱཧ ‘‘ཨེཀཱནུསྶཱཝནེ ཀཱཏུ’’ནྟི, ཨིདཉྩ ཨེཀཾ པདཾ ཝིབྷཏྟིཨལོཔེན དཊྛབྦཾ. ཨེཀེན ཝཱཏི དྭིནྣམྤི ཨེཀསྨིཾ ཁཎེ ཨེཀཱཡ ཨེཝ ཀམྨཝཱཙཱཡ ཨནུསྶཱཝནེ ཨེཀེནཱཙརིཡེནཱཏི ཨཏྠོ. ‘‘ཨཡཾ བུདྡྷརཀྑིཏོ ཙ ཨཡཾ དྷམྨརཀྑིཏོ ཙ ཨཱཡསྨཏོ སངྒྷརཀྑིཏསྶ ཨུཔསམྤདཱཔེཀྑོ’’ཏིཨཱདིནཱ ནཡེན ཨེཀེན ཨཱཙརིཡེན དྭིནྣཾ ཨེཀསྨིཾ ཁཎེ ཨནུསྶཱཝནནཡོ དཊྛབྦོ. ཨིམིནཱཝ ནཡེན ཏིཎྞམྤི ཨེཀེན ཨཱཙརིཡེན ཨེཀཀྑཎེ ཨནུསྶཱཝནཾ དཊྛབྦཾ.

པུརིམནཡེནེཝ ཨེཀཏོ ཨནུསྶཱཝནེ ཀཱཏུནྟི ‘‘ཨེཀེན ཨེཀསྶ, ཨཉྙེན ཨིཏརསྶཱ’’ཏིཨཱདིནཱ པུབྦེ ཝུཏྟནཡེན དྭིནྣཾ དྭཱིཧི ཝཱ, ཏིཎྞཾ ཏཱིཧི ཝཱ ཨཱཙརིཡེཧི, ཨེཀཀེན ཝཱ ཨཱཙརིཡེན ཏཡོཔི ཨེཀཏོ ཨནུསྶཱཝནེ ཀཱཏུནྟི ཨཏྠོ, ཏཉྩ ཁོ ཨེཀེན ཨུཔཛ྄ཛྷཱཡེན. ‘‘ན ཏྭེཝ ནཱནུཔཛ྄ཛྷཱཡེནཱ’’ཏི ཨིདཾ ཨེཀེན ཨཱཙརིཡེན དྭཱིཧི ཝཱ ཏཱིཧི ཝཱ ཨུཔཛ྄ཛྷཱཡེཧི ¶ དྭེ ཝཱ ཏཡོ ཝཱ ཨུཔསམྤདཱཔེཀྑེ ཨེཀཀྑཎེ ཨེཀཱཡ ཨནུསྶཱཝནཱཡ ཨེཀཱནུསྶཱཝནེ ཀཱཏུཾ ན ཝཊྚཏཱིཏི པཊིཀྑེཔཔདཾ. ན པན ནཱནཱཙརིཡེཧི ནཱནུཔཛ྄ཛྷཱཡེཧི ཏཡོ ཨེཀཱནུསྶཱཝནེ ཀཱཏུཾ ན ཝཊྚཏཱིཏི ཨཱཧ ‘‘སཙེ པན ནཱནཱཙརིཡཱ ནཱནུཔཛ྄ཛྷཱཡཱ…པེ… ཝཊྚཏཱི’’ཏི. ཡཉྩེཏྠ ¶ ‘‘ཏིསྶཏྠེརོ སུམནཏྠེརསྶ སདྡྷིཝིཧཱརིཀཾ, སུམནཏྠེརོ ཏིསྶཏྠེརསྶ སདྡྷིཝིཧཱརིཀ’’ནྟི ཨེཝཾ ཨུཔཛ྄ཛྷཱཡེཧི ཨཉྙམཉྙཾ སདྡྷིཝིཧཱརིཀཱནཾ ཨནུསྶཱཝནཀརཎཾ ཝུཏྟཾ, ཏཾ ཨུཔལཀྑཎམཏྟཾ. ཏསྨཱ སཙེ ཏིསྶཏྠེརོ སུམནཏྠེརསྶ སདྡྷིཝིཧཱརིཀཾ, སུམནཏྠེརོ ནནྡཏྠེརསྶ སདྡྷིཝིཧཱརིཀཾ ཨནུསྶཱཝེཏི, ཨཉྙམཉྙཉྩ གཎཔཱུརཀཱ ཧོནྟི, ཝཊྚཏི ཨེཝ. སཙེ པན ཨུཔཛ྄ཛྷཱཡོ སཡམེཝ ཨཏྟནོ སདྡྷིཝིཧཱརིཀཾ ཨནུསྶཱཝེཏཱིཏི ཨེཏྠ ཝཏྟབྦམེཝ ནཏྠི, ཀམྨཾ སུཀཏམེཝ ཧོཏི. ཨནུཔཛ྄ཛྷཱཡཀསྶཔི ཡེན ཀེནཙི ཨནུསྶཱཝིཏེ ཨུཔསམྤདཱ ཧོཏི, ཀིམངྒཾ པན སཨུཔཛ྄ཛྷཱཡཀསྶ ཨུཔཛ྄ཛྷཱཡེནེཝ ཨནུསྶཱཝནེཏི དཊྛབྦཾ. ཏེནེཝ ནཝཊྚནཔཀྑཾ དསྶེཏུཾ ‘‘སཙེ པནཱ’’ཏིཨཱདིམཱཧ.

དྭེཨུཔསམྤདཱཔེཀྑཱདིཝཏྠུཀཐཱཝཎྞནཱ ནིཊྛིཏཱ.

ཨུཔསམྤདཱཝིདྷིཀཐཱཝཎྞནཱ

༡༢༦. ཨུཔཛ྄ཛྷཱཏི ཨུཔཛ྄ཛྷཱཡ-སདྡསམཱནཏྠོ ཨཱཀཱརནྟོ ཨུཔཛ྄ཛྷཱསདྡོཏི དསྶེཏི. ཨུཔཛ྄ཛྷཱཡ-སདྡོ ཨེཝ ཝཱ ཨུཔཛ྄ཛྷཱ ཨུཔཡོགཔཙྩཏྟཝཙནེསུ ཡ-ཀཱརལོཔཾ ཀཏྭཱ ཨེཝཾ ཝུཏྟོ ཀརཎཝཙནཱདཱིསུ ཨུཔཛ྄ཛྷཱ-སདྡསྶ པཡོགཱབྷཱཝཱཏི དཊྛབྦཾ. པཱལི༹ཡཾ ཨཏྟནཱཝ ཨཏྟཱནཾ སམྨནྣིཏབྦནྟི ཨཏྟནཱཝ ཀཏྟུབྷཱུཏེན ཀརཎབྷཱུཏེན ཨཏྟཱནམེཝ ཀམྨབྷཱུཏཾ པཏི སམྨནནཀིཙྩཾ ཀཱཏབྦཾ. ཨཏྟཱནནྟི ཝཱ པཙྩཏྟེ ཨུཔཡོགཝཙནཾ, ཨཏྟནཱཝ ཨཏྟཱ སམྨནྣིཏབྦོཏི ཨཏྠོ. ན ཀེཝལཉྩ ཨེཏྠེཝ, ཨཉྙཏྲཱཔི ཏེརསསམྨུཏིཨཱདཱིསུ ཨིམིནཱཝ ལཀྑཎེན ཨཏྟནཱཝ ཨཏྟཱ སམྨནྣིཏབྦོཝ. ཨཔིཙ སཡཾ ཀམྨཱརཧཏྟཱ ཨཏྟཱནཾ མུཉྩིཏྭཱ ཙཏུཝགྒཱདིཀོ གཎོ སབྦཏྠ ཨིཙྪིཏབྦོ.

སཙྩཀཱལོཏི ‘‘ནིགཱུཧིསྶཱམཱི’’ཏི ཝཉྩནཾ པཧཱཡ སཙྩསྶེཝ ཏེ ཨིཙྪིཏབྦཀཱལོ. བྷཱུཏཀཱལོཏི ཝཉྩནཱཡ ཨབྷཱཝེཔི མནུསྶཏྟཱདིཝཏྠུནོ བྷཱུཏཏཱཡ ཨཝསྶཾ ཨིཙྪིཏབྦཀཱལོ, ཨིཏརཐཱ ཀམྨཀོཔཱདིཨནྟརཱཡོ ཧོཏཱིཏི ཨདྷིཔྤཱཡོ. མངྐཱུཏི ཨདྷོམུཁོ. ཨུདྡྷརཏཱུཏི ཨནུཔསམྤནྣབྷཱཝཏོ ཨུཔསམྤཏྟིཡཾ པཏིཊྛཔེཏཱུཏི ཨཏྠོ.

སབྦཀམྨཝཱཙཱསུ ¶ ཨཏྠཀོསལླཏྠཾ པནེཏྠ ཨུཔསམྤདཱཀམྨཝཱཙཱཡ ཨེཝམཏྠོ དཊྛབྦོ – སུཎཱཏཱུཏི སཝནཱཎཏྟིཡཾ པཋམཔུརིསེཀཝཙནཾ. ཏཉྩ ¶ ཀིཉྩཱཔི ཡོ སངྒྷོ སཝནཀིརིཡཱཡ ནིཡོཛཱིཡཏི, ཏསྶ སམྨུཁཏྟཱ ‘‘སུཎཱཧཱི’’ཏི མཛ྄ཛྷིམཔུརིསེཀཝཙནེན ཝཏྟབྦཾ, ཏཐཱཔི ཡསྨཱ སངྒྷ-སདྡསནྣིདྷཱནེ པཋམཔུརིསཔཡོགོཝ སདྡཝིདྷཱུཧི སམཱཙིཎྞོ བྷགཝནྟཨཱཡསྨནྟཱདིསདྡསནྣིདྷཱནེསུ ཝིཡ ‘‘ཨདྷིཝཱསེཏུ མེ བྷཝཾ གོཏམོ (པཱརཱ. ༢༢). ཨེཏསྶ སུགཏ ཀཱལོ, ཡཾ བྷགཝཱ སཱཝཀཱནཾ སིཀྑཱཔདཾ པཉྙཔེཡྻ (པཱརཱ. ༢༡). པཀྐམཏཱཡསྨཱ (པཱརཱ. ༤༣༦). སུཎནྟུ མེ ཨཱཡསྨནྟོ’’ཏིཨཱདཱིསུ ཝིཡ. ཏསྨཱ ཨིདྷ པཋམཔུརིསཔཡོགོ ཀཏོ. ཨཐ ཝཱ གཱརཝཝསེནེཝེཏཾ ཝུཏྟཾ. གརུཊྛཱནཱིཡེསུ ཧི གཱརཝཝསེན མཛ྄ཛྷིམཔུརིསཔཡོགུཔྤཏྟིཡམྤི པཋམཔུརིསཔཡོགཾ པཡུཛྫནྟི ‘‘དེསེཏུ སུགཏོ དྷམྨ’’ནྟིཨཱདཱིསུ (དཱི. ནི. ༢.༦༦; མ. ནི. ༢.༣༣༨; སཾ. ནི. ༡.༡༧༢; མཧཱཝ. ༨) ཝིཡཱཏི དཊྛབྦཾ. ཀེཙི པན ‘‘བྷནྟེ, ཨཱཝུསོཏི སདྡེ ཨཔེཀྑིཏྭཱ ཨིདྷ པཋམཔུརིསཔཡོགོ’’ཏི ཝདནྟི, ཏཾ ན ཡུཏྟཾ ‘‘ཨཱཙརིཡོ མེ བྷནྟེ ཧོཧི, (མཧཱཝ. ༧༧) ཨིངྒྷཱཝུསོ ཨུཔཱལི, ཨིམཾ པབྦཛིཏཾ ཨནུཡུཉྫཱཧཱི’’ཏིཨཱདཱིསུ (པཱརཱ. ༥༡༧) ཏཔྤཡོགེཔི མཛ྄ཛྷིམཔུརིསཔཡོགསྶེཝ དསྶནཏོ.

མེཏི ཡོ སཱཝེཏི, ཏསྶ ཨཏྟནིདྡེསེ སཱམིཝཙནཾ. བྷནྟེཏི ཨཱལཔནཏྠེ ཝུཌྜྷེསུ སགཱརཝཝཙནཾ. ‘‘ཨཱཝུསོ’’ཏི པདཾ པན ནཝཀེསུ. ཏདུབྷཡམྤི ནིཔཱཏོ ‘‘ཏུམྷེ བྷནྟེ, ཏུམྷེ ཨཱཝུསོ’’ཏི བཧཱུསུཔི སམཱནརཱུཔཏྟཱ. སངྒྷོཏི ཨཝིསེསཏོ ཙཏུཝགྒཱདིཀེ པཀཏཏྟཔུགྒལསམཱུཧེ ཝཏྟཏི. ཨིདྷ པན པཙྩནྟིམེསུ ཛནཔདེསུ པཉྩཝགྒཏོ པཊྛཱཡ, མཛ྄ཛྷིམེསུ ཛནཔདེསུ དསཝགྒཏོ པཊྛཱཡ སངྒྷོཏི གཧེཏབྦོ. ཏཏྲཱཡཾ པིཎྜཏྠོ – བྷནྟེ, སངྒྷོ མམ ཝཙནཾ སུཎཱཏཱུཏི. ཨིདཉྩ ནཝཀཏརེན ཝཏྟབྦཝཙནཾ. སཙེ པན ཨནུསྶཱཝཀོ སབྦེཧི བྷིཀྑཱུཧི ཝུཌྜྷཏརོ ཧོཏི, ‘‘སུཎཱཏུ མེ, ཨཱཝུསོ, སངྒྷོ’’ཏི ཝཏྟབྦཾ. སོཔི ཙེ ‘‘བྷནྟེ’’ཏི ཝདེཡྻ, ནཝཀཏརོ ཝཱ ‘‘ཨཱཝུསོ’’ཏི, ཀམྨཀོཔོ ནཏྠི. ཀེཙི པན ‘‘ཨེཀཏྠ ‘ཨཱཝུསོ’ཏི ཝཏྭཱ ཨཉྙཏྠ ‘བྷནྟེ’ཏི ཝུཏྟེཔི ནཏྠི དོསོ ཨུབྷཡེནཱཔི ཨཱལཔནསྶ སིཛ྄ཛྷནཏོ’’ཏི ཝདནྟི.

ཨིདཱནི ཡམཏྠཾ ཉཱཔེཏུཀཱམོ ‘‘སུཎཱཏཱུ’’ཏི སངྒྷཾ སཝནེ ནིཡོཛེཏི, ཏཾ ཉཱཔེནྟོ ‘‘ཨཡཾ ཨིཏྠནྣཱམོ’’ཏིཨཱདིམཱཧ. ཏཏྠ ཨཡནྟི ¶ ཨུཔསམྤདཱཔེཀྑསྶ ཧཏྠཔཱསེ སནྣིཧིཏབྷཱཝདསྶནཾ. ཏེན ཙ ཧཏྠཔཱསེ ཋིཏསྶེཝ ཨུཔསམྤདཱ རུཧཏཱིཏི སིཛ྄ཛྷཏི ཧཏྠཔཱསཏོ བཧི ཋིཏསྶ ‘‘ཨཡ’’ནྟི ན ཝཏྟབྦཏོ. ཏེནེཝ ཨནུསཱསཀསམྨུཏིཡཾ སོ ཧཏྠཔཱསཏོ བཧི ཋིཏཏྟཱ ‘‘ཨཡ’’ནྟི ན ཝུཏྟོ. ཏསྨཱ ཨུཔསམྤདཱཔེཀྑོ ཨནུཔསམྤནྣོ ཧཏྠཔཱསེ ཋཔེཏབྦོ. ཨཡཾ ཨིཏྠནྣཱམོཏི ཨཡཾ-སདྡོ ཙ ཨཝསྶཾ པཡུཛྫིཏབྦོ. སོ ཙ ཨིམསྨིཾ པཋམནཱམཔཡོགེ ཨེཝཱཏི གཧེཏབྦཾ ¶ . ‘‘ཨིཏྠནྣཱམོ’’ཏི ཨིདཾ ཨནིཡམཏོ ཏསྶ ནཱམདསྶནཾ. ཨུབྷཡེནཔི ཨཡཾ བུདྡྷརཀྑིཏོཏིཨཱདིནཱམཾ དསྶེཏི. ‘‘ཨུཔསམྤདཱཔེཀྑོ’’ཏི བྷིནྣཱདྷིཀརཎཝིསཡེ བཧུབྦཱིཧིསམཨཱསོ, ཨུཔསམྤདཾ མེ སངྒྷོ ཨཔེཀྑམཱནོཏི ཨཏྠོ. ཏསྶ ཙ ཨུཔཛ྄ཛྷཱཡཏཾ སམངྒིབྷཱཝེན དསྶེཏུཾ ‘‘ཨིཏྠནྣམསྶ ཨཱཡསྨཏོ’’ཏི ཝུཏྟཾ. ཨེཏེན ‘‘ཨཡཾ བུདྡྷརཀྑིཏོ ཨཱཡསྨཏོ དྷམྨརཀྑིཏསྶ སདྡྷིཝིཧཱརིཀབྷཱུཏོ ཨུཔསམྤདཱཔེཀྑོ’’ཏི ཨེཝམཱདིནཱ ནཡེན ནཱམཡོཛནཱཡ སཧ ཨཏྠོ དསྶིཏོཏི. ཨེཏྠ ཙ ‘‘ཨཱཡསྨཏོ’’ཏི པདཾ ཨཝཏྭཱཔི ‘‘ཨཡཾ བུདྡྷརཀྑིཏོ དྷམྨརཀྑིཏསྶ ཨུཔསམྤདཱཔེཀྑོ’’ཏི ཝཏྟུཾ ཝཊྚཏི. ཏེནེཝ པཱལི༹ཡཾ ‘‘ཨིཏྠནྣཱམེན ཨུཔཛ྄ཛྷཱཡེནཱ’’ཏི ཨེཏྠ ‘‘ཨཱཡསྨཏོ’’ཏི པདཾ ན ཝུཏྟཾ. ཡཉྩེཏྠ ཝཏྟབྦཾ, ཏཾ ཧེཊྛཱ ཝུཏྟམེཝ.

ནནུ ཙེཏྠ ཨུཔཛ྄ཛྷཱཡོཔི ཨུཔསམྤདཱཔེཀྑོ ཝིཡ ཧཏྠཔཱསེ ཋིཏོ ཨེཝ ཨིཙྪིཏབྦོ, ཨཐ ཀསྨཱ ‘‘ཨཡཾ ཨིཏྠནྣཱམོ ཨིམསྶ ཨིཏྠནྣཱམསྶ ཨུཔསམྤདཱཔེཀྑོ’’ཏི ཨེཝཾ ཨུཔཛ྄ཛྷཱཡཔརཱམསནེཔི ཨིམ-སདྡསྶ པཡོགོ ན ཀཏོཏི? ནཱཡཾ ཝིརོདྷོ ཨུཔཛ྄ཛྷཱཡསྶ ཨབྷཱཝེཔི ཀམྨཀོཔཱབྷཱཝཏོ. ཀེཝལཉྷི ཀམྨནིཔྥཏྟིཡཱ སནྟཔདཝསེན ཨཝིཛྫམཱནསྶཔི ཨུཔཛ྄ཛྷཱཡསྶ ནཱམཀིཏྟནཾ ཨནུཔཛ྄ཛྷཱཡསྶ ཨུཔསམྤདཱདཱིསུཔི ཀརཱིཡཏི. ཏསྨཱ ཨུཔཛ྄ཛྷཱཡསྶ ཨསནྣིཧིཏཏཱཡཔི ཏཔྤརཱམསནམཏྟེནེཝ ཀམྨསིདྡྷིཏོ ‘‘ཨིམསྶཱ’’ཏི ནིདྡིསིཏུཾ ན ཝཊྚཏི.

པརིསུདྡྷོ ཨནྟརཱཡིཀེཧི དྷམྨེཧཱིཏི ཨབྷབྦཏཱདིཀེཧི ཨུཔསམྤདཱཡ ཨཝཏྠུཀརེཧི ཙེཝ པཉྩཱབཱདྷཧཏྠཙྪིནྣཱདཱིཧི ཙ ཨཱཔཏྟིམཏྟཀརེཧི ཨནྟརཱཡིཀེཧི སབྷཱཝེཧི པརིམུཏྟོ. ཨེཝཾ ཝུཏྟོ ཨེཝ ཙ ཨཱཔཏྟིམཏྟཀརེཧི པཉྩཱབཱདྷཱདཱིཧི ཨཔརིམུཏྟསྶཔི ཨུཔསམྤདཱ རུཧཏི, ནཱཉྙཐཱ. པརིཔུཎྞསྶ པཏྟཙཱིཝརནྟི པརིཔུཎྞམསྶ ཨུཔསམྤདཱཔེཀྑསྶ པཏྟཙཱིཝརཾ. ཨེཝཾ ཝུཏྟེ ཨེཝ ཨཔཏྟཙཱིཝརསྶཱཔི ཨུཔསམྤདཱ རུཧཏི, ནཱཉྙཐཱ. ཨུཔསམྤདཾ ཡཱཙཏཱིཏི ¶ ‘‘སངྒྷཾ, བྷནྟེ, ཨུཔསམྤདཾ ཡཱཙཱམཱི’’ཏིཨཱདིནཱ (མཧཱཝ. ༧༡, ༡༢༦) ཡཱཙིཏབྷཱཝཾ སནྡྷཱཡ ཝུཏྟཾ. ཨེཝཾ ཏེན སངྒྷེ ཨཡཱཙིཏེཔི ‘‘ཨིཏྠནྣཱམོ སངྒྷཾ ཨུཔསམྤདཾ ཡཱཙཏཱི’’ཏི ཝུཏྟེ ཨེཝ ཀམྨཾ ཨཝིཔནྣཾ ཧོཏི, ནཱཉྙཐཱ. ཨུཔཛ྄ཛྷཱཡེནཱཏི ཨུཔཛ྄ཛྷཱཡེན ཀརཎབྷཱུཏེན ཨིཏྠནྣཱམཾ ཨུཔཛ྄ཛྷཱཡཾ ཀཏྭཱ ཀམྨབྷཱུཏཾ ཨུཔསམྤདཾ དཱཏུཾ ནིཔྥཱདེཏུཾ ཀཏྟུབྷཱུཏཾ སངྒྷཾ ཡཱཙཏཱིཏི ཨཏྠོ. ཡཱཙདྷཱཏུནོ པན དྭིཀམྨཀཏྟཱ ‘‘སངྒྷཾ, ཨུཔསམྤད’’ནྟི དྭེ ཀམྨཔདཱནི ཝུཏྟཱནི.

ཡདི སངྒྷསྶ པཏྟཀལླནྟི ཨེཏྠ པཏྟོ ཀཱལོ ཨིམསྶཱཏི པཏྟཀཱལཾ, ཨཔལོཀནཱདིཙཏུབྦིདྷསངྒྷཀམྨཾ, ཏདེཝ སཀཏྠེ ཡ-པཙྩཡེན ‘‘པཏྟཀལླ’’ནྟི ཝུཙྩཏི. ཨིདྷ པན ཉཏྟིཙཏུཏྠཨུཔསམྤདཱཀམྨཾ ཨདྷིཔྤེཏཾ, ཏཾ ཀཱཏུཾ སངྒྷསྶ པཏྟཀལླཾ ཛཱཏཾ. ཡདཱིཏི ཨནུམཏིགཧཎཝསེན ཀམྨསྶ ¶ པཏྟཀལླཏཾ ཉཱཔེཏི. ཡོ ཧི ཀོཙི ཏཏྠ ཨཔཏྟཀལླཏཾ མཉྙིསྶཏི, སོ ཝཀྑཏི. ཨིམམེཝ ཧི ཨཏྠཾ སནྡྷཱཡ ཨནུསྶཱཝནཱསུ ‘‘ཡསྶཱཡསྨཏོ ཁམཏི…པེ… སོ བྷཱསེཡྻཱ’’ཏི (མཧཱཝ. ༡༢༧) ཝུཏྟཾ. ཏཾ པནེཏཾ པཏྟཀལླཾ ཝཏྠུསམྤདཱ, ཨནྟརཱཡིཀེཧི དྷམྨེཧི ཙསྶ པརིསུདྡྷཏཱ, སཱིམཱསམྤདཱ, པརིསསམྤདཱ, པུབྦཀིཙྩནིཊྛཱཔནནྟི ཨིམེཧི པཉྩཧི ཨངྒེཧི སངྒཧིཏཾ.

ཏཏྠ ཝཏྠུསམྤདཱ ནཱམ ཡཐཱཝུཏྟེཧི ཨེཀཱདསཧི ཨབྷབྦཔུགྒལེཧི ཙེཝ ཨནྟིམཝཏྠུཨཛ྄ཛྷཱཔནྣེཧི ཙ ཨཉྙོ པརིཔུཎྞཝཱིསཏིཝསྶོ ཨནུཔསམྤནྣབྷཱུཏོ མནུསྶཔུརིསོ, ཨེཏསྨིཾ པུགྒལེ སཏི ཨེཝ ཨིདཾ སངྒྷསྶ ཨུཔསམྤདཱཀམྨཾ པཏྟཀལླཾ ནཱམ ཧོཏི, ནཱསཏི. ཀཏཉྩ ཀུཔྤམེཝ ཧོཏི.

ཨནྟརཱཡིཀེཧི དྷམྨེཧི ཙསྶ པརིསུདྡྷཏཱ ནཱམ ཡཐཱཝུཏྟསྶེཝ ཨུཔསམྤདཱཝཏྠུབྷཱུཏསྶ པུགྒལསྶ ཡེ ཨིམེ བྷགཝཏཱ པཊིཀྑིཏྟཱ པཉྩཱབཱདྷཕུཊྛཏཱདཡོ མཱཏཱཔིཏཱུཧི ཨནནུཉྙཱཏཏཱཔརིཡོསཱནཱ ཙེཝ ཧཏྠཙྪིནྣཏཱདཡོ ཙ དོསདྷམྨཱ ཀཱརཀསངྒྷསྶ ཨཱཔཏྟཱདིཨནྟརཱཡཧེཏུཏཱཡ ‘‘ཨནྟརཱཡིཀཱ’’ཏི ཝུཙྩནྟི ཏེཧི ཨནྟརཱཡིཀེཧི དོསདྷམྨེཧི པརིམུཏྟཏྟཱ, ཨིམིསྶཱ ཙ སཏི ཨེཝ ཨིདཾ ཀམྨཾ པཏྟཀལླཾ ནཱམ ཧོཏི, ནཱསཏི. ཀཏཾ པན ཀམྨཾ སུཀཏམེཝ ཧོཏི ཋཔེཏྭཱ ཨཱུནཝཱིསཏིཝསྶཔུགྒལཾ.

སཱིམཱསམྤདཱ ¶ པན ཨུཔོསཐཀྑནྡྷཀེ (མཧཱཝ. ༡༤༧-༡༤༨) ཝཀྑམཱནནཡེན སབྦདོསཝིརཧིཏཱཡ བདྡྷཱབདྡྷཝསེན དུཝིདྷཱཡ སཱིམཱཡ ཝསེནེཝ ཝེདིཏབྦཱ. ཏཱདིསཱཡ ཧི སཱིམཱཡ སཏི ཨེཝ ཨིདཾ ཀམྨཾ པཏྟཀལླཾ ནཱམ ཧོཏི, ནཱསཏི. ཀཏཉྩ ཀམྨཾ ཝིཔཛྫཏི.

པརིསསམྤདཱ པན ཡེ ཨིམེ ཨུཔསམྤདཱཀམྨསྶ སབྦནྟིམེན པརིཙྪེདེན ཀམྨཔྤཏྟཱ དསཧི ཝཱ པཉྩཧི ཝཱ ཨནཱུནཱ པཱརཱཛིཀཾ ཨནཱཔནྣཱ, ཨནུཀྑིཏྟཱ ཙ སམཱནསཾཝཱསཀཱ བྷིཀྑཱུ, ཏེསཾ ཨེཀསཱིམཱཡཾ ཧཏྠཔཱསཾ ཨཝིཛཧིཏྭཱ ཋཱནཾ, ཚནྡཱརཧཱནཉྩ ཚནྡསྶ ཨཱནཡནཾ, སམྨུཁཱིབྷཱུཏཱནཉྩ ཨཔྤཊིཀྐོསནཾ, ཨུཔསམྤདཱཔེཀྑརཧིཏཱནཾ ཨུཔོསཐཀྑནྡྷཀེ པཊིཀྑིཏྟཱནཾ གཧཊྛཱདིཨནཨུཔསམྤནྣཱནཉྩེཝ པཱརཱཛིཀུཀྑིཏྟཀནཱནཱསཾཝཱསཀབྷིཀྑུནཱིནཉྩ ཝཛྫནཱིཡཔུགྒལཱནཾ སངྒྷསྶ ཧཏྠཔཱསེ ཨབྷཱཝོ ཙཱཏི ཨིམེཧི ཙཏཱུཧི ཨངྒེཧི སངྒཧིཏཱ. ཨེཝརཱུཔཱཡ ཙ པརིསསམྤདཱཡ སཏི ཨེཝ ཨིདཾ པཏྟཀལླཾ ནཱམ ཧོཏི, ནཱསཏི. ཏཏྠ པུརིམཱནཾ ཏིཎྞཾ ཨངྒཱནཾ ཨཉྙཏརསྶཔི ཨབྷཱཝེ ཀཏཾ ཀམྨཾ ཝིཔཛྫཏི, ན པཙྪིམསྶ.

པུབྦཀིཙྩནིཊྛཱཔནཾ ¶ ནཱམ ཡཱནིམཱནི ‘‘པཋམཾ ཨུཔཛ྄ཛྷཾ གཱཧཱཔེཏབྦོ’’ཏིཨཱདིནཱ པཱལི༹ཡཾ ཝུཏྟཱནི ‘‘ཨུཔཛ྄ཛྷཾ གཱཧཱཔནཾ, པཏྟཙཱིཝརཱཙིཀྑནཾ, ཏཏོ ཏཾ ཧཏྠཔཱསཏོ བཧི ཋཔེཏྭཱ ཨནུསཱསཀསམྨུཏིཀམྨཀརཎཾ, སམྨཏེན ཙ གནྟྭཱ ཨནུསཱསནཾ, ཏེན ཙ པཋམཏརཾ ཨཱགནྟྭཱ སངྒྷསྶ ཉཱཔེཏྭཱ ཨུཔསམྤདཱཔེཀྑཾ ‘ཨཱགཙྪཱཧཱི’ཏི ཧཏྠཔཱསེ ཨེཝ ཨབྦྷཱནཾ, ཏེན ཙ བྷིཀྑཱུནཾ པཱདེ ཝནྡཱཔེཏྭཱ ཨུཔསམྤདཱཡཱཙཱཔནཾ, ཏཏོ ཨནྟརཱཡིཀདྷམྨཔུཙྪཀསམྨུཏིཀརཎཾ, སམྨཏེན ཙ པུཙྪན’’ནྟི ཨིམཱནི ཨཊྛ པུབྦཀིཙྩཱནི, ཏེསཾ སབྦེསཾ ཡཱཐཱཝཏོ ཀརཎེན ནིཊྛཱཔནཾ. ཨེཏསྨིཉྩ པུབྦཀམྨནིཊྛཱཔནེ སཏི ཨེཝ ཨིདཾ སངྒྷསྶ ཨུཔསམྤདཱཀམྨཾ པཏྟཀལླཾ ནཱམ ཧོཏི, ནཱསཏི. ཨེཏེསུ པན པུབྦཀམྨེསུ ཨཀཏེསུཔི ཀཏཾ ཀམྨཾ ཡཐཱཝུཏྟཝཏྠུསམྤཏྟིཨཱདཱིསུ ཝིཛྫམཱནེསུ ཨཀུཔྤམེཝ ཧོཏི. ཏདེཝམེཏྠ པཏྟཀལླཾ ཨིམེཧི པཉྩཧི ཨངྒེཧི སངྒཧིཏནྟི ཝེདིཏབྦཾ. ཨིམིནཱཝ ནཡེན ཧེཊྛཱ ཝུཏྟེསུ, ཝཀྑམཱནེསུ ཙ སབྦེསུ ཀམྨེསུ པཏྟཀལླཏཱ ཡཐཱརཧཾ ཡོཛེཏྭཱ ཉཱཏབྦཱ.

ཨིཏྠནྣཱམཾ ¶ ཨུཔསམྤཱདེཡྻཱཏི ཨུཔསམྤདཱནིཔྥཱདནེན ཏཾསམངྒིཾ ཀརེཡྻ ཀརོཏཱུཏི པཏྠནཱཡཾ, ཝིདྷིམྷི ཝཱ ཨིདཾ དཊྛབྦཾ. ཡཐཱ ཧི ‘‘དེཝདཏྟཾ སུཁཱཔེཡྻཱ’’ཏི ཝུཏྟེ སུཁམསྶ ནིཔྥཱདེཏྭཱ ཏཾ སུཁསམངྒིནཾ ཀརེཡྻཱཏི ཨཏྠོ ཧོཏི, ཨེཝམིདྷཱཔི ཨུཔསམྤདམསྶ ནིཔྥཱདེཏྭཱ ཏཾ ཨུཔསམྤདཱསམངྒིནཾ ཀརེཡྻཱཏི ཨཏྠོ. པཡོཛཀབྱཱཔཱརེ ཙེཏཾ ཡཐཱ སུཁཡནྟཾ ཀཉྩི སུདྡྷཀཏྟཱརཾ ཀོཙི ཧེཏུཀཏྟཱ སུཁཧེཏུནིཔྥཱདནེན སུཁཱཔེཡྻཱཏི ཝུཙྩཏི, ཨེཝམིདྷཱཔི ཨུཔསམྤཛྫནྟཾ སུདྡྷཀཏྟཱརཾ པུགྒལཾ ཧེཏུཀཏྟུབྷཱུཏོ སངྒྷོ ཨུཔསམྤདཱཧེཏུནིཔྥཱདནེན ཨུཔསམྤཱདེཡྻཱཏི ཝུཏྟོ. ཨེཏེན ཙ སུཁཾ ཝིཡ སུཁདཱཡཀེན སངྒྷེན པུགྒལསྶ དིཡྻམཱནཱ ཏཐཱཔཝཏྟཔརམཏྠདྷམྨེ ཨུཔཱདཱཡ ཨརིཡཛནཔཉྙཏྟཱ ཨུཔསམྤདཱ ནཱམ སམྨུཏིསཙྩཏཱ ཨཏྠཱིཏི སམཏྠིཏཾ ཧོཏི. ཨེཏྠ ཙ ‘‘ཨིཏྠནྣཱམོ སངྒྷཾ ཨུཔསམྤདཾ ཡཱཙཏཱི’’ཏི ཝུཏྟཏྟཱ པརིཝཱསཱདཱིསུ ཝིཡ ཡཱཙནཱནུགུཎཾ ‘‘ཨིཏྠནྣཱམསྶ ཨུཔསམྤདཾ དདེཡྻཱ’’ཏི ཨཝཏྭཱ ‘‘ཨིཏྠནྣཱམཾ ཨུཔསམྤཱདེཡྻཱ’’ཏི ཝུཏྟཏྟཱ ཨིདཾ ཨུཔསམྤདཱཀམྨཾ དཱནེ ཨསངྒཧེཏྭཱ ཀམྨལཀྑཎེ ཨེཝ སངྒཧིཏནྟི དཊྛབྦཾ. ཨིམིནཱ ནཡེན ‘‘ཨིཏྠནྣཱམཾ ཨུཔསམྤཱདེཏི, ཨུཔསམྤནྣོ སངྒྷེནཱ’’ཏི ཨེཏྠཱཔི ཨཏྠོ ཝེདིཏབྦོ. ཀེཝལཉྷི ཏཏྠ ཝཏྟམཱནཀཱལཨཏཱིཏཀཱལཝསེན, ཨིདྷ པན ཨནཱམཊྛཀཱལཝསེནཱཏི ཨེཏྟཀམེཝ ཝིསེསོ.

ཨེསཱ ཉཏྟཱིཏི ‘‘སངྒྷོ ཉཱཔེཏབྦོ’’ཏི ཝུཏྟཉཱཔནཱ ཨེསཱ. ཨིདཉྩ ཨནུསྶཱཝནཱནམྤི སབྦྷཱཝསཱུཙནཏྠཾ ཝུཙྩཏི. ཨཝསྶཉྩེཏཾ ཝཏྟབྦམེཝ, ཉཏྟིཀམྨེ ཨེཝ ཏཾ ན ཝཏྟབྦཾ. ཏཏྠ པན ཡྻ-ཀཱརེ ཝུཏྟམཏྟེ ཨེཝ ཉཏྟིཀམྨཾ ནིཊྛིཏཾ ཧོཏཱིཏི དཊྛབྦཾ. ཁམཏཱིཏི རུཙྩཏི. ཨུཔསམྤདཱཏི སངྒྷེན དིཡྻམཱནཱ ནིཔྥཱདིཡམཱནཱ ཨུཔསམྤདཱ ཡསྶ ཁམཏི. སོ ཏུཎྷསྶཱཏི ཡོཛནཱ. ཏུཎྷཱིཏི ¶ ཙ ཨཀཐནཏྠེ ནིཔཱཏོ, ཨཀཐནཀོ ཨསྶ བྷཝེཡྻཱཏི ཨཏྠོ. ཁམཏི སངྒྷསྶ ཨིཏྠནྣཱམསྶ ཨུཔསམྤདཱཏི པཀཏེན སམྦནྡྷོ. ཏཏྠ ཀཱརཎམཱཧ ‘‘ཏསྨཱ ཏུཎྷཱི’’ཏི. ཏཏྠ ‘‘ཨཱསཱི’’ཏི སེསོ. ཡསྨཱ ‘‘ཡསྶ ནཀྑམཏི, སོ བྷཱསེཡྻཱ’’ཏི ཏིཀྑཏྟུཾ ཝུཙྩམཱནོཔི སངྒྷོ ཏུཎྷཱི ནིརཝོ ཨཧོསི, ཏསྨཱ ཁམཏི སངྒྷསྶཱཏི ཨཏྠོ. ཨེཝནྟི ཨིམིནཱ པཀཱརེན. ཏུཎྷཱིབྷཱཝེནེཝེཏཾ སངྒྷསྶ རུཙྩནབྷཱཝཾ དྷཱརཡཱམི བུཛ྄ཛྷཱམི པཛཱནཱམཱིཏི ཨཏྠོ. ཨིཏི-སདྡོ པརིསམཱཔནཏྠེ ཀཏོ, སོ ཙ ཀམྨཝཱཙཱཡ ཨནངྒཾ. ཏསྨཱ ཨནུསྶཱཝཀེན ‘‘དྷཱརཡཱམཱི’’ཏི ཨེཏྠ མི-ཀཱརཔརིཡོསཱནམེཝ ¶ ཝཏྭཱ ནིཊྛཱཔེཏབྦཾ, ཨིཏི-སདྡོ ན པཡུཛྫིཏབྦོཏི དཊྛབྦཾ. ཨིམིནཱ ནཡེན སབྦཏྠ ཀམྨཝཱཙཱནམཏྠོ ཝེདིཏབྦོ.

ཨུཔསམྤདཱཝིདྷིཀཐཱཝཎྞནཱ ནིཊྛིཏཱ.

ཙཏྟཱརོནིསྶཡཱདིཀཐཱཝཎྞནཱ

༡༢༨. ཨེཀཔོརིསཱ ཝཱཏིཨཱདི སཏྟཱནཾ སརཱིརཙྪཱཡཾ པཱདེཧི མིནིཏྭཱ ཛཱནནཔྤཀཱརདསྶནཾ. ཚསཏྟཔདཔརམཏཱ ཧི ཚཱཡཱ ‘‘པོརིསཱ’’ཏི ཝུཙྩཏི. ཨིདཉྩ ཨུཏུཔྤམཱཎཱཙིཀྑནཱདི ཙ ཨཱགནྟུཀེཧི སདྡྷིཾ ཝཱིམཾསིཏྭཱ ཝུཌྜྷནཝབྷཱཝཾ ཉཏྭཱ ཝནྡནཝནྡཱཔནཱདིཀརཎཏྠཾ ཝུཏྟཾ. ཨེཏི ཨཱགཙྪཏི, གཙྪཏི ཙཱཏི ཨུཏུ, སོཝ པམིཡཏེ ཨནེན སཾཝཙྪརནྟི པམཱཎནྟི ཨཱཧ ‘‘ཨུཏུཡེཝ ཨུཏུཔྤམཱཎ’’ནྟི. ཨཔརིཔུཎྞཱཏི ཨུཔསམྤདཱདིཝསེན ཨཔརིཔུཎྞཱ. ཡདི ཨུཏུཝེམཛ྄ཛྷེ ཨུཔསམྤཱདིཏོ, ཏདཱ ཏསྨིཾ ཨུཏུམྷི ཨཝསིཊྛདིཝསཱཙིཀྑནཾ ‘‘དིཝསབྷཱགཱཙིཀྑན’’ནྟི དསྶེཏི. ཏེནཱཧ ‘‘ཡཏྟཀེཧི དིཝསེཧི ཡསྶ ཡོ ཨུཏུ ཨཔརིཔུཎྞོ, ཏེ དིཝསེ’’ཏི. ཏཏྠ ཡསྶ ཏཾ ཁཎཾ ལདྡྷཱུཔསམྤདསྶ པུགྒལསྶ སམྦནྡྷཱི ཡོ ཨུཏུ ཡཏྟཀེཧི དིཝསེཧི ཨཔརིཔུཎྞོ, ཏེ དིཝསེཏི ཡོཛནཱ.

ཚཱཡཱདིཀམེཝ སབྦཾ སངྒཧེཏྭཱ གཱཡིཏབྦཏོ ཀཐེཏབྦཏོ སངྒཱིཏཱིཏི ཨཱཧ ‘‘ཨིདམེཝཱ’’ཏིཨཱདི. ཏཏྠ ཨེཀཏོ ཀཏྭཱ ཨཱཙིཀྑིཏབྦཾ. ཏྭཾ ཀིཾ ལབྷསཱིཏི ཏྭཾ ཨུཔསམྤཱདནཀཱལེ ཀཏརཝསྶཾ, ཀཏརཨུཏུཉྩ ལབྷསི, ཀཏརསྨིཾ ཏེ ཨུཔསམྤདཱ ལདྡྷཱཏི ཨཏྠོ. ཝསྶནྟི ཝསྶཱནཨུཏུ. ཨིདཉྩ སཾཝཙྪརཱཙིཀྑནཾ ཝིནཱ ཝུཏྟམྤི ན ཉཱཡཏཱིཏི ཨིམིནཱ ཨུཏུཨཱཙིཀྑནེནེཝ སཱསནཝསྶེསུ ཝཱ ཀལིཡུགཝསྶཱདཱིསུ ཝཱ སཧསྶིམེ ཝཱ སཏིམེ ཝཱ ཨསུཀཾ ཨུཏུཾ ལབྷཱམཱིཏི དསྶིཏནྟི དཊྛབྦཾ. ‘‘ཚཱཡཱ’’ཏི ཨིདཾ པཱལི༹ཡཾ ཨཱགཏཔཊིཔཱཊིཾ སནྡྷཱཡ ཝུཏྟཾ. ཝཏྟབྦཀམཏོ པན ཀལིཡུགཝསྶཱདཱིསུ སབྦདེསཔསིདྡྷེསུ ཨསུཀཝསྶེ ཨསུཀཨུཏུམྷི ཨསུཀམཱསེ ¶ ཨསུཀེ ཀཎྷེ ཝཱ སུཀྐེ ཝཱ པཀྑེ ཨསུཀཏིཐིཝཱརཝིསེསཡུཏྟེ ནཀྑཏྟེ པུབྦཎྷཱདིདིཝསབྷཱགེ ཨེཏྟཀེ ཚཱཡཱཔམཱཎེ, ནཱཌིཀཱཔམཱཎེ ཝཱ མཡཱ ཨུཔསམྤདཱ ལདྡྷཱཏི ཝདེཡྻཱསཱིཏི ཨེཝཾ ཨཱཙིཀྑིཏབྦཾ. ‘‘ཨིདཾ སུཊྛུ ཨུགྒཧེཏྭཱ ཨཱགནྟུཀེཧི ¶ ཝུཌྜྷཔཊིཔཱཊིཾ ཉཏྭཱ པཊིཔཛྫཱཧཱི’’ཏི ཝཏྟབྦཾ. པཱལི༹ཡཾ ཀིསྶ ཏྭནྟི ཀིཾ ཏྭཾ ཨེཏྟཀཾ ཀཱལཾ ཨཀཱསཱིཏི ཨཏྠོ.

༡༣༠. ཨུཔསམྤདཾ ཡཱཙཱིཏི པབྦཛྫཉྩ ཨུཔསམྤདཉྩ ཡཱཙཱིཏི ཨཏྠོ. པསྶིསྶཱམཱིཏི ཨེཏྠ ཝདཏཱིཏི སེསོ, ཨེཝཾ ཨུཔརིཔི. ‘‘ཨོསཱརེཏབྦོ’’ཏི ཨིམིནཱ པུརིམོ ཨུཀྑིཏྟབྷཱཝོ ཝིབྦྷམིཏྭཱ པུན ལདྡྷཱུཔསམྤདམྤི ན མུཉྩཏི. ཏེན ཙ སམྦྷུཉྫནཱདཱིསུཔི བྷིཀྑཱུནཾ པཱཙིཏྟིཡམེཝཱཏི དསྶེཏི. ཨནཱཔཏྟི སམྦྷོགེ སཾཝཱསེཏི ཨེཏྠ སཧསེཡྻཱཔི སངྒཧིཏཱཏི དཊྛབྦཾ. ཨེཏྠ ཙཱཡམདྷིཔྤཱཡོ – ཡསྨཱ ཨཡཾ ཨོསཱརིཏཏྟཱ པཀཏཏྟོ, ཏསྨཱ ཨུཀྑིཏྟསམྦྷོགཱདིཔཙྩཡེན པཱཙིཏྟིཡེནེཏྠ ཨནཱཔཏྟཱིཏི. ཡོ པན ཨཱཔཏྟིཊྛཱནེ ཨནཱཔཏྟིདིཊྛིཏཱཡ ཨཱཔཏྟིཾ ན པསྶཏི, ཏེནེཝ པཊིཀམྨམྤི ན ཀརོཏི, སོ ཡསྨཱ ཨེཏྟཱཝཏཱ ཨལཛྫཱི ནཱམ ན ཧོཏི. པཎྞཏྟིཾ ཉཏྭཱ ཝཱིཏིཀྐམཾ ཀརོནྟོ ཨེཝ ཧི ཨལཛྫཱི ནཱམ ཧོཏི. ‘‘སཉྩིཙྩ ཨཱཔཏྟིཾ ཨཱཔཛྫཏཱི’’ཏིཨཱདི (པརི. ༣༥༩) ཧི ཝུཏྟཾ. ཏསྨཱ ཨེཏྠ ཨལཛྫིསམྦྷོགཱདིཔཙྩཡཱ དུཀྐཊཱཔཏྟིནིཡམོ ནཏྠི. ཏེན སཱཔེཏྠ ཨཱཔཏྟི ན ཝུཏྟཱཏི དཊྛབྦཾ. ཡོ པནེཏྠ ཨིམཾ ཨདྷིཔྤཱཡཾ ཨསལླཀྑེནྟེན ཀེནཙི ‘‘ཨནཱཔཏྟི སམྦྷོགེ སཾཝཱསེ’’ཏི ཨིམིནཱ པཱཙིཏྟིཡེན ཨནཱཔཏྟི ཝུཏྟཱ, ཨལཛྫིསམྦྷོགཔཙྩཡཱ དུཀྐཊཾ པན ཨཱཔཛྫཏི ཨེཝཱཏི ཨཱཔཏྟིནིཡམོ ཝུཏྟོ, སོ ཨལཛྫིཏྟེ སཏི ཨེཝ ཝུཏྟོ, ནཱསཏཱིཏི དཊྛབྦཾ.

༡༣༡. ཝིནཡམྷཱིཏིཨཱདིགཱཐཱསུ ནིགྒཧཱནནྟི ནིགྒཧཀརཎེསུ. པཱཔིཙྪེཏི པཱཔཔུགྒལཱནཾ ནིགྒཧཀརཎེསུ, ལཛྫཱིནཾ པགྒཧེསུ ཙ པེསལཱནཾ སུཁཱཝཧེ མཧནྟེ ཝིནཡམྷི ཡཐཱ ཨཏྠཀཱརཱི ཨཏྠཱནུགུཎཾ ཀརོནྟོཝ ཡསྨཱ ཡོནིསོ པཊིཔཛྫཏི ནཱམ ཧོཏི, ཏསྨཱ ཨུདྡཱནཾ པཝཀྑཱམཱིཏི སམྦནྡྷཡོཛནཱ དཊྛབྦཱ. སེསཾ སབྦཏྠ སུཝིཉྙེཡྻམེཝ.

ཙཏྟཱརོནིསྶཡཱདིཀཐཱཝཎྞནཱ ནིཊྛིཏཱ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

མཧཱཁནྡྷཀཝཎྞནཱནཡོ ནིཊྛིཏོ.

༢. ཨུཔོསཐཀྑནྡྷཀོ

སནྣིཔཱཏཱནུཛཱནནཱདིཀཐཱཝཎྞནཱ

༡༣༢. ཨུཔོསཐཀྑནྡྷཀེ ¶ ¶ ཏརནྟི ཨོཏརནྟི ཨེཏྠཱཏི ཏིཏྠཾ, ལདྡྷི. ཨིཏོཏི སཱསནལདྡྷིཏོ.

༡༣༥. ཨཱཔཛྫིཏྭཱ ཝཱ ཝུཊྛིཏོཏི ཨེཏྠ དེསནཱརོཙནཱནམྤི སངྒཧོ. ཏེནེཝ མཱཏིཀཱཊྛཀཐཱཡཾ ‘‘ཝུཊྛིཏཱ ཝཱ དེསིཏཱ ཝཱ ཨཱརོཙིཏཱ ཝཱ ཨཱཔཏྟི…པེ… ཨསནྟཱི ནཱམ ཧོཏཱི’’ཏི (ཀངྑཱ. ཨཊྛ. ནིདཱནཝཎྞནཱ) ཝུཏྟཾ.

མནུཛེནཱཏི ཨཱསནྣེན སཧ. པརེཏི དཱུརཊྛེཔི པརཔུགྒལེ སནྡྷཱཡ གིརཾ ནོ ཙ བྷཎེཡྻཱཏི ཡོཛནཱ.

‘‘ཨཱཝིཀཏཱ ཧིསྶ ཕཱསུ ཧོཏཱི’’ཏི (མཧཱཝ. ༡༣༤) ཝུཏྟཏྟཱ གརུཀཱཔཏྟིཔི ཨཱཝིཀརཎམཏྟེན ཝུཊྛཱཏཱིཏི ཀེཙི ཝདནྟི, ཏཾ ཏེསཾ མཏིམཏྟཾ པརིཝཱསཱདིཝིདྷཱནསུཏྟེཧི ཝིརུཛ྄ཛྷནཏོ. ཨཡཾ པནེཏྠ ཨདྷིཔྤཱཡོ – ཡཐཱབྷཱུཏཉྷི ཨཏྟཱནམཱཝིཀརོནྟཾ པེསལཱ བྷིཀྑཱུ ‘‘ཨཀཱམཱ པརིཝཏྠབྦ’’ནྟིཨཱདིཝཙནཾ ནིསྶཱཡ ཨནིཙྪམཱནམྤི ནཾ ཨུཔཱཡེན པརིཝཱསཱདཱིནི དཏྭཱ ཨཝསྶཾ སུདྡྷནྟེ པཏིཊྛཱཔེསྶནྟི, ཏཏོ ཏསྶ ཨཝིཔྤཊིསཱརཱདཱིནཾ ཝསེན ཕཱསུ ཧོཏི. པཋམཾ པཱཏིམོཀྑུདྡེསནྟི ནིདཱནུདྡེསཾ དསྶེཏི. པུབྦེ ཨཝིཛྫམཱནཾ པཉྙཱཔེསཱིཏི. ན ཀེཝལཉྩ ཨེཏཾ, པུབྦེ པཉྙཏྟམྤི པན པཱརཱཛིཀཱདིསིཀྑཱཔདཾ སབྦཾ བྷགཝཱ ‘‘ཏཏྲིམེ ཙཏྟཱརོ པཱརཱཛིཀཱ དྷམྨཱ ཨུདྡེསཾ ཨཱགཙྪནྟཱི’’ཏིཨཱདིནཱ པཱརཱཛིཀུདྡེསཱདིཝསེན ཝིནཡམཱཏིཀཾ ཀཏྭཱ ནིདཱནུདྡེསེན སཧ སཡམེཝ སངྒཧེཏྭཱ ‘‘པཱཏིམོཀྑ’’ནྟི པཉྙཱཔེསཱིཏི དཊྛབྦཾ. ཏདེཏཾ སབྦམྤི སནྡྷཱཡ ‘‘ཨནུཛཱནཱམི, བྷིཀྑཝེ, པཱཏིམོཀྑཾ ཨུདྡིསིཏུ’’ནྟི (མཧཱཝ. ༡༣༣) ཝུཏྟཾ.

༡༣༦. ཨེཏཾ ༣༤ ཝེདིཏབྦནྟི ཡསྨིཾ ཏསྨིཾ ཙཱཏུདྡསེ ཝཱ པནྣརསེ ཝཱཏི ཨེཝཾ ཨཏྠཛཱཏཾ.

སནྣིཔཱཏཱནུཛཱནནཱདིཀཐཱཝཎྞནཱ ནིཊྛིཏཱ.

སཱིམཱནུཛཱནནཀཐཱཝཎྞནཱ

༡༣༨. ‘‘པུརཏྠིམཱཡ ¶ དིསཱཡཱ’’ཏི ཨིདཾ ནིདསྶནམཏྟཾ. ཏསྶཾ པན དིསཱཡཾ ནིམིཏྟེ ཨསཏི ཡཏྠ ཨཏྠི, ཏཏོ པཊྛཱཡ པཋམཾ ‘‘པུརཏྠིམཱཡ ཨནུདིསཱཡ, དཀྑིཎཱཡ དིསཱཡཱ’’ཏིཨཱདིནཱ སམནྟཱ ཝིཛྫམཱནཊྛཱནེསུ ནིམིཏྟཱནི ཀིཏྟེཏྭཱ པུན ‘‘པུརཏྠིམཱཡ ཨནུདིསཱཡཱ’’ཏི པཋམཀིཏྟིཏཾ ཀིཏྟེཏུཾ ཝཊྚཏི, ཏཱིཧི ནིམིཏྟེཧི སིངྒྷཱཊཀསཎྛཱནཱཡཔི སཱིམཱཡ སམྨནྣིཏབྦཏོ. ཏིཀྑཏྟུཾ སཱིམཱམཎྜལཾ སམྦནྡྷནྟེནཱཏི ཝིནཡདྷརེན སཡཾ ཨེཀསྨིཾཡེཝ ཋཱནེ ཋཏྭཱ ཀེཝལཾ ནིམིཏྟཀིཏྟནཝཙནེནེཝ སཱིམཱམཎྜལཾ སམནྟཱ ནིམིཏྟེན ནིམིཏྟཾ བནྡྷནྟེནཱཏི ཨཏྠོ. ཏཾ ཏཾ ནིམིཏྟཊྛཱནཾ ཨགནྟྭཱཔི ཧི ཀིཏྟེཏུཾ ཝཊྚཏི. ཏིཡོཛནཔརམཱཡ སཱིམཱཡ སམནྟཏོ ཏིཀྑཏྟུཾ ཨནུཔརིགམནསྶ ཨེཀདིཝསེན དུཀྐརཏྟཱ ཝིནཡདྷརེན སཡཾ ཨདིཊྛམྤི པུབྦེ བྷིཀྑཱུཧི ཡཐཱཝཝཏྠིཏཾ ནིམིཏྟཾ ‘‘པཱསཱཎོ བྷནྟེ’’ཏིཨཱདིནཱ ཀེནཙི ཝུཏྟཱནུསཱརེན སལླཀྑེཏྭཱ ‘‘ཨེསོ པཱསཱཎོ ནིམིཏྟ’’ནྟིཨཱདིནཱ ཀིཏྟེཏུམྤི ཝཊྚཏི ཨེཝ.

སུདྡྷཔཾསུཔབྦཏོཏི ན ཀེནཙི ཀཏོ སཡཾཛཱཏོཝ ཝུཏྟོ. ཏཐཱ སེསཱཔི. ཨིཏརོཔཱིཏི སུདྡྷཔཾསུཔབྦཏཱདིཀོཔི པབྦཏོ. ཧཏྠིཔྤམཱཎཏོཏི ཨེཏྠ བྷཱུམིཏོ ཨུགྒཏཔྤདེསེན ཧཏྠིཔྤམཱཎཾ གཧེཏབྦཾ. ཙཏཱུཧི ཝཱ ཏཱིཧི ཝཱཏི སཱིམཱབྷཱུམིཡཾ ཙཏཱུསུ, ཏཱིསུ ཝཱ དིསཱསུ ཋིཏེཧི. ཨེཀིསྶཱ ཨེཝ པན དིསཱཡ ཋིཏེཧི ཏཏོ བཧཱུཧིཔི སམྨནྣིཏུཾ ན ཝཊྚཏི. དྭཱིཧི པན དྭཱིསུ དིསཱསུ ཋིཏེཧིཔི ན ཝཊྚཏི. ཏསྨཱཏི ཡསྨཱ ཨེཀེན ན ཝཊྚཏི, ཏསྨཱ. ཏཾ བཧིདྡྷཱ ཀཏྭཱཏི ཀིཏྟིཏནིམིཏྟསྶ ཨསཱིམཏྟཱ ཨནྟོསཱིམཱཡ ཀརཎཾ ཨཡུཏྟནྟི ཝུཏྟཾ. ཏེནཱཧ ‘‘སཙེ’’ཏིཨཱདི.

དྭཏྟིཾསཔལགུལ༹པིཎྜཔྤམཱཎཏཱ སཎྛཱནཏོ གཧེཏབྦཱ, ན ཏུལགཎནཱཝསེན, བྷཱརཏོ པལཔརིམཱཎཉྩ མགདྷཏུལཱཡ གཧེཏབྦཾ. སཱ ཙ ལོཀིཡཏུལཱཡ དྭིགུཎཱཏི ཝདནྟི. ཨཏིམཧནྟོཔཱིཏི བྷཱུམིཏོ ཧཏྠིཔྤམཱཎཾ ཨནུགྒནྟྭཱ ཧེཊྛཱབྷཱུམིཡཾ ཨོཏིཎྞགྷནཏོ ཨནེཀཡོཛནཔྤམཱཎོཔི. སཙེ ཧི ཏཏོ ཧཏྠིཔྤམཱཎཾ ཀཱུཊཾ ཨུགྒཙྪཏི, པབྦཏསངྑྱམེཝ གཙྪཏི.

ཨནྟོསཱརཱནནྟི ¶ ཏསྨིཾ ཁཎེ ཏརུཎཏཱཡ སཱརེ ཨཝིཛྫམཱནེཔི པརིཎཱམེན བྷཝིསྶམཱནསཱརེཔི སནྡྷཱཡ ཝུཏྟཾ. ཏཱདིསཱནཉྷི སཱུཙིདཎྜཀཔྤམཱཎཔརིཎཱཧཱནཾ ཙཏུཔཉྩམཏྟམྤི ཝནཾ ཝཊྚཏི. ཨནྟོསཱརམིསྶཀཱནནྟི ཨནྟོསཱརེཧི ¶ རུཀྑེཧི སམྨིསྶཱནཾ. ཨེཏེན ཙ སཱརརུཀྑམིསྶམྤི ཝནཾ ཝཊྚཏཱིཏི དསྶེཏི. ཙཏུཔཉྩརུཀྑམཏྟམྤཱིཏི སཱརརུཀྑེ སནྡྷཱཡ ཝུཏྟཾ. ཝནམཛ྄ཛྷེ ཝིཧཱརཾ ཀརོནྟཱིཏི རུཀྑགྷཊཱཡ ཨནྟརེ རུཀྑེ ཨཙྪིནྡིཏྭཱ ཝཏིཨཱདཱིཧི ཝིཧཱརཔརིཙྪེདཾ ཀཏྭཱཝ ཨནྟོརུཀྑནྟརེསུ ཨེཝ པརིཝེཎཔཎྞསཱལཱདཱིནཾ ཀརཎཝསེན ཡཐཱ ཨནྟོཝིཧཱརམྤི ཝནམེཝ ཧོཏི, ཨེཝཾ ཝིཧཱརཾ ཀརོནྟཱིཏི ཨཏྠོ. ཡདི ཧི སབྦཾ རུཀྑཾ ཚིནྡིཏྭཱ ཝིཧཱརཾ ཀརེཡྻུཾ, ཝིཧཱརསྶ ཨཝནཏྟཱ ཏཾ པརིཀྑིཔིཏྭཱ ཋིཏཾ ཝནཾ ཨེཀཏྠ ཀིཏྟེཏབྦཾ སིཡཱ. ཨིདྷ པན ཨནྟོཔི ཝནཏྟཱ ‘‘ཝནཾ ན ཀིཏྟེཏབྦ’’ནྟི ཝུཏྟཾ. སཙེ ཧི ཏཾ ཀིཏྟེནྟི, ‘‘ནིམིཏྟསྶ ཨུཔརི ཝིཧཱརོ ཧོཏཱི’’ཏིཨཱདིནཱ ཨནནྟརེ ཝུཏྟདོསཾ ཨཱཔཛྫཏི. ཨེཀདེསནྟི ཝནེཀདེསཾ, རུཀྑཝིརཧིཏཊྛཱནེ ཀཏཝིཧཱརསྶ ཨེཀཔསྶེ ཋིཏཝནསྶ ཨེཀདེསནྟི ཨཏྠོ.

སཱུཙིདཎྜཀཔྤམཱཎོཏི ཝཾསདཎྜཔྤམཱཎོ. ལེཁནིདཎྜཔྤམཱཎོཏི ཀེཙི. མཱཏིཀཱཊྛཀཐཱཡཾ པན ཨཝེབྷངྒིཡཝིནིཙྪཡེ ‘‘ཡོ ཀོཙི ཨཊྛངྒུལསཱུཙིདཎྜཀམཏྟོཔི ཝེལུ༹…པེ… གརུབྷཎྜ’’ནྟི (ཀངྑཱ. ཨཊྛ. དུབྦཏྟསིཀྑཱཔདཝཎྞནཱ) ཝུཏྟཏྟཱ ཏནུཏརོ ཝེལུ༹དཎྜོཏི ཙ སཱུཙིདཎྜོཏི ཙ གཧེཏབྦཾ. ཝཾསནལ༹ཀསརཱཝཱདཱིསཱུཏི ཝེལུ༹པབྦེ ཝཱ ནལ༹པབྦེ ཝཱ ཀཔལླཀཱདིམཏྟིཀབྷཱཛནེསུ ཝཱཏི ཨཏྠོ. ཏངྑཎམྤཱིཏི ཏརུཎཔོཏཀེ ཨམིལཱཡིཏྭཱ ཝིརུཧནཛཱཏིཀེ སནྡྷཱཡ ཝུཏྟཾ. ཡེ པན པརིཎཏཱ སམཱུལཾ ཨུདྡྷརིཏྭཱ རོཔིཏཱཔི ཚིནྣསཱཁཱ ཝིཡ མིལཱཡིཏྭཱ ཙིརེན ནཝམཱུལངྐུརུཔྤཏྟིཡཱ ཛཱིཝནྟི, མཱིཡནྟིཡེཝ ཝཱ, ཏཱདིསེ ཀིཏྟེཏུཾ ན ཝཊྚཏི. ཨེཏནྟི ནཝམཱུལསཱཁཱནིགྒམནཾ.

མཛ྄ཛྷེཏི སཱིམཱཡ མཧཱདིསཱནཾ ཨནྟོ. ཀོཎནྟི སཱིམཱཡ ཙཏཱུསུ ཀོཎེསུ དྭིནྣཾ དྭིནྣཾ མགྒཱནཾ སམྦནྡྷཊྛཱནཾ. པརབྷཱགེ ཀིཏྟེཏུཾ ཝཊྚཏཱིཏི ཏེསཾ ཙཏུནྣཾ ཀོཎཱནཾ བཧི ནིཀྑམིཏྭཱ ཋིཏེསུ མགྒེསུ ཨེཀིསྶཱ དིསཱཡ ཨེཀཾ, ཨཉྙིསྶཱ དིསཱཡ ཙཱཔརནྟི ཨེཝཾ ཙཏྟཱརོཔི མགྒཱ ཙཏཱུསུ དིསཱསུ ཀིཏྟེཏུཾ ཝཊྚཏཱིཏི ཨདྷིཔྤཱཡོ. ཨེཝཾ པན ཀིཏྟིཏམཏྟེན ཀཐཾ ཨེཀཱབདྡྷཏཱ ཝིགཙྪཏཱིཏི ཝིཉྙཱཡཏཱིཏི. པརཏོ གཏཊྛཱནེཔི ཨེཏེ ཨེཝ ཏེ ཙཏྟཱརོ མགྒཱ. ‘‘ཙཏཱུསུ དིསཱསུ གཙྪནྟཱི’’ཏི ཧི ཝུཏྟཾ. ཏསྨཱ ཨེཏྠ ཀཱརཎཾ ཝིཙིནིཏབྦཾ.

‘‘ཨུཏྟརནྟིཡཱ བྷིཀྑུནིཡཱ’’ཏི ཨིདཉྩ པཱལི༹ཡཾ (པཱཙི. ༦༩༢) བྷིཀྑུནཱིནཾ ནདཱིཔཱརགམནེ ནདིལཀྑཎསྶ ཨཱགཏཏྟཱ ཝུཏྟཾ. བྷིཀྑཱུནཾ ཨནྟརཝཱསཀཏེམནམཏྟམྤི ཝཊྚཏི ཨེཝ ¶ . ‘‘ནདིཙཏུཀྐེཔི ཨེསེཝ ནཡོ’’ཏི ཨིམིནཱ ཨེཀཏྠ ཀིཏྟེཏྭཱ ཨཉྙཏྠ པརཏོ གཏཊྛཱནེཔི ཀིཏྟེཏུཾ ¶ ན ཝཊྚཏཱིཏི དསྶེཏི. ཏེནེཝ ཙ ‘‘ཨསྶམྨིསྶནདིཡོ ཙཏསྶོཔི ཀིཏྟེཏུཾ ཝཊྚཏཱི’’ཏི ཨསམྨིསྶ-གྒཧཎཾ ཀཏཾ. མཱུལེཏི ཨཱདིཀཱལེ. ནདིཾ བྷིནྡིཏྭཱཏི ཡཐཱ ཨུདཀཾ ཨནིཙྪནྟེཧི ཀསྶཀེཧི མཧོགྷེ ནིཝཏྟེཏུཾ ན སཀྐཱ, ཨེཝཾ ནདིཀཱུལཾ བྷིནྡིཏྭཱ.

ཨུཀྑེཔིམནྟི དཱིགྷརཛྫུནཱ ཀུཊེན ཨུསྶིཉྩནཱིཡཾ.

ཨསམྨིསྶེཧཱིཏི སབྦདིསཱསུ ཋིཏཔབྦཏེཧི ཨེཝ, པཱསཱཎཱདཱིསུ ཨཉྙཏརེཧི ཝཱ ནིམིཏྟནྟརཱབྱཝཧིཏེཧི. སམྨིསྶེཧཱིཏི ཨེཀཏྠ པབྦཏོ, ཨཉྙཏྠ པཱསཱཎོཏི ཨེཝཾ ཋིཏེཧི ཨཊྛཧིཔི. ‘‘ནིམིཏྟཱནཾ སཏེནཱཔཱི’’ཏི ཨིམིནཱ ཨེཀིསྶཱཡ ཨེཝ དིསཱཡ བཧུནིམིཏྟཱནི ‘‘པུརཏྠིམཱཡ དིསཱཡ ཀིཾ ནིམིཏྟཾ? པབྦཏོ བྷནྟེ. པུན པུརཏྠིམཱཡ དིསཱཡ ཀིཾ ནིམིཏྟཾ? པཱསཱཎོ བྷནྟེ’’ཏིཨཱདིནཱ ཀིཏྟེཏུཾ ཝཊྚཏཱིཏི དསྶེཏི. སིངྒྷཱཊཀསཎྛཱནཱཏི ཏིཀོཎཱ. ཙཏུརསྶཱཏི སམཙཏུརསྶཱ, མུདིངྒསཎྛཱནཱ པན ཨཱཡཏཙཏུརསྶཱ. ཨེཀཀོཊིཡཾ སངྐོཙིཏཱ, ཏདཉྙཱཡ ཝིཏྠིཎྞཱ ཝཱ ཧོཏཱིཏི. སཱིམཱཡ ཨུཔཙཱརཾ ཋཔེཏྭཱཏི ཨཱཡཏིཾ བནྡྷིཏབྦཱཡ སཱིམཱཡ ནེསཾ ཝིཧཱརཱནཾ པརིཙྪེདཏོ བཧི སཱིམནྟརིཀཔྤཧོནཀཾ ཨུཔཙཱརཾ ཋཔེཏྭཱ. བདྡྷཱ སཱིམཱ ཡེསུ ཝིཧཱརེསུ, ཏེ བདྡྷསཱིམཱ. པཱཊེཀྐནྟི པཙྩེཀཾ. བདྡྷསཱིམཱསདིསཱནཱིཏི ཡཐཱ བདྡྷསཱིམཱསུ ཋིཏཱ ཨཉྙམཉྙཾ ཚནྡཱདིཾ ཨནཔེཀྑིཏྭཱ པཙྩེཀཾ ཀམྨཾ ཀཱཏུཾ ལབྷནྟི, ཨེཝཾ གཱམསཱིམཱསུ ཋིཏཱཔཱིཏི དསྶེཏི. ཨཱགནྟབྦནྟི སཱམཱིཙིམཏྟཝསེན ཝུཏྟཾ. ཏེནཱཧ ‘‘ཨཱགམནམྤཱི’’ཏིཨཱདི.

པབྦཛྫཱུཔསམྤདཱདཱིནནྟི ཨེཏྠ བྷཎྜུཀམྨཱཔུཙྪནཾ སནྡྷཱཡ པབྦཛྫཱགཧཎཾ. ཨེཀཝཱིསཏི བྷིཀྑཱུཏི ནིསིནྣེ སནྡྷཱཡ ཝུཏྟཾ. ཨིདཉྩ ཀམྨཱརཧེན སཧ ཨབྦྷཱནཀཱརཀཱནམྤི པཧོནཀཏྠཾ ཝུཏྟཾ. ‘‘ནིམིཏྟུཔགཱ པཱསཱཎཱ ཋཔེཏབྦཱ’’ཏི ཨིདཾ ཡཐཱརུཙིཏཊྛཱནེ རུཀྑནིམིཏྟཱདཱིནཾ དུལླབྷཏཱཡ ཝཌྜྷིཏྭཱ ཨུབྷིནྣཾ བདྡྷསཱིམཱནཾ སངྐརཀརཎཏོ ཙ པཱསཱཎནིམིཏྟསྶ ཙ ཏདབྷཱཝཏོ ཡཏྠ ཀཏྠཙི ཨཱནེཏྭཱ ཋཔེཏུཾ སུཀརཏཱཡ ཙ ཝུཏྟཾ. ཏཐཱ སཱིམནྟརིཀཔཱསཱཎཱ ཋཔེཏབྦཱཏི ཨེཏྠཱཔི. ཙཏུརངྒུལཔྤམཱཎཱཔཱིཏི ཡཐཱ ཁནྡྷསཱིམཱཔརིཙྪེདཏོ བཧི ནིམིཏྟཔཱསཱཎཱནཾ ཙཏུརངྒུལམཏྟཊྛཱནཾ སམནྟཱ ནིགཙྪཏི, ཨཝསེསཾ ཋཱནཾ ཨནྟོཁནྡྷསཱིམཱཡ ཧོཏིཡེཝ, ཨེཝཾ ཏེསུཔི ཋཔིཏེསུ ཙཏུརངྒུལམཏྟཱ སཱིམནྟརིཀཱ ཧོཏཱིཏི དཊྛབྦཾ.

སཱིམནྟརིཀཔཱསཱཎཱཏི ¶ སཱིམནྟརིཀཱཡ ཋཔིཏནིམིཏྟཔཱསཱཎཱ. ཏེ པན ཀིཏྟེནྟེན པདཀྑིཎཏོ ཨནུཔརིཡཱཡནྟེནེཝ ཀིཏྟེཏབྦཱ. ཀཐཾ? ཁཎྜསཱིམཏོ ཧི པཙྪིམཱཡ དིསཱཡ པུརཏྠཱབྷིམུཁེན ཋཏྭཱ ‘‘པུརཏྠིམཱཡ དིསཱཡ ཀིཾ ནིམིཏྟ’’ནྟི ཏཏྠ སབྦཱནི ནིམིཏྟཱནི ཨནུཀྐམེན ¶ ཀིཏྟེཏྭཱ ཏཐཱ ཨུཏྟརཱཡ དིསཱཡ དཀྑིཎཱབྷིམུཁེན ཋཏྭཱ ‘‘དཀྑིཎཱཡ དིསཱཡ ཀིཾ ནིམིཏྟ’’ནྟི ཨནུཀྐམེན ཀིཏྟེཏྭཱ ཏཐཱ པུརཏྠིམཱཡ དིསཱཡ པཙྪིམཱབྷིམུཁེན ཋཏྭཱ ‘‘པཙྪིམཱཡ དིསཱཡ ཀིཾ ནིམིཏྟ’’ནྟི ཨནུཀྐམེན ཀིཏྟེཏྭཱ ཏཐཱ དཀྑིཎཱཡ དིསཱཡ ཨུཏྟརཱབྷིམུཁེན ཋཏྭཱ ‘‘ཨུཏྟརཱཡ དིསཱཡ ཀིཾ ནིམིཏྟ’’ནྟི ཏཏྠ སབྦཱནི ནིམིཏྟཱནི ཨནུཀྐམེན ཀིཏྟེཏྭཱ པུན པཙྪིམཱཡ དིསཱཡ པུརཏྠཱབྷིམུཁེན ཋཏྭཱ པུརིམཀིཏྟིཏཾ ཝུཏྟནཡེན པུན ཀིཏྟེཏབྦཾ. ཨེཝཾ བཧཱུནམྤི ཁཎྜསཱིམཱནཾ སཱིམནྟརིཀཔཱསཱཎཱ པཙྩེཀཾ ཀིཏྟེཏབྦཱ. ཏཏོཏི པཙྪཱ. ཨཝསེསནིམིཏྟཱནཱིཏི མཧཱསཱིམཱཡ བཱཧིརནྟརེསུ ཨཝསེསནིམིཏྟཱནི. ཨུབྷིནྣམྤི ན ཀོཔེནྟཱིཏི ཨུབྷིནྣམྤི ཀམྨཾ ན ཀོཔེནྟི.

ཀུཊིགེཧེཏི བྷཱུམིཡཾ ཀཏཏིཎཀུཊིཡཾ. ཨུདུཀྑལནྟི ཨུདུཀྑལཱཝཱཊསདིསཁུདྡཀཱཝཱཊཾ. ནིམིཏྟཾ ན ཀཱཏབྦནྟི ཏཾ རཱཛིཾ ཝཱ ཨུདུཀྑལཾ ཝཱ ནིམིཏྟཾ ན ཀཱཏབྦཾ. ཨིདཉྩ ཡཐཱཝུཏྟེསུ ནིམིཏྟེསུ ཨནཱགཏཏྟེན ན ཝཊྚཏཱིཏི སིདྡྷམྤི ཨཝིནསྶཀསཉྙཱཡ ཀོཙི མོཧེན ནིམིཏྟཾ ཀརེཡྻཱཏི དཱུརཏོཔི ཝིཔཏྟིཔརིཧཱརཏྠཾ ཝུཏྟཾ. ཨེཝཾ ཨུཔརི ‘‘བྷིཏྟིཾ ཨཀིཏྟེཏྭཱ’’ཏིཨཱདཱིསུཔི སིདྡྷམེཝཏྠཾ པུནཔྤུནཾ ཀཐནེ ཀཱརཎཾ ཝེདིཏབྦཾ. སཱིམཱཝིཔཏྟི ཧི ཨུཔསམྤདཱདིསབྦཀམྨཝིཔཏྟིམཱུལནྟི ཏསྶཱ སབྦཾ དྭཱརཾ སབྦཐཱ པིདཧནཝསེན ཝཏྟབྦཾ. སབྦཾ ཝཏྭཱཝ ཨིདྷ ཨཱཙརིཡཱ ཝིནིཙྪཡཾ ཋཔེསུནྟི དཊྛབྦཾ.

བྷིཏྟིནྟི ཨིཊྛཀདཱརུམཏྟིཀཱམཡཾ. སིལཱམཡཱཡ པན བྷིཏྟིཡཱ ནིམིཏྟུཔགཾ ཨེཀཾ པཱསཱཎཾ ཏཾཏཾདིསཱཡ ཀིཏྟེཏུཾ ཝཊྚཏི. ཨནེཀསིལཱཧི ཙིནིཏཾ སཀལབྷིཏྟིཾ ཀིཏྟེཏུཾ ན ཝཊྚཏི ‘‘ཨེསོ པཱསཱཎོ ནིམིཏྟ’’ནྟི ཨེཀཝཙནེན ཝཏྟབྦཏོ. ཨནྟོཀུཊྚམེཝཱཏི ཨེཏྠ ཨནྟོཀུཊྚེཔི ནིམིཏྟཱནཾ ཋིཏོཀཱསཏོ ཨནྟོ ཨེཝ སཱིམཱཏི གཧེཏབྦཾ. པམུཁེ ནིམིཏྟཔཱསཱཎེ ཋཔེཏྭཱཏི གབྦྷཱབྷིམུཁེཔི བཧིཔམུཁེ གབྦྷཝིཏྠཱརཔྤམཱཎེ ཋཱནེ པཱསཱཎེ ཋཔེཏྭཱ སམྨནྣིཏབྦཱ. ཨེཝཉྷི གབྦྷཔམུཁཱནཾ ཨནྟརེ ཋིཏཀུཊྚམྤི ཨུཔཱདཱཡ ཨནྟོ ཙ བཧི ཙ ཙཏུརསྶསཎྛཱནཱཝ སཱིམཱ ཧོཏི. བཧཱིཏི སཀལསྶ ཀུཊིགེཧསྶ སམནྟཏོ བཧི.

ཨནྟོ ¶ ཙ བཧི ཙ སཱིམཱ ཧོཏཱིཏི མཛ྄ཛྷེ ཋིཏབྷིཏྟིཡཱ སཧ ཙཏུརསྶསཱིམཱ ཧོཏི.

‘‘ཨུཔརིཔཱསཱདེཡེཝ ཧོཏཱི’’ཏི ཨིམིནཱ གབྦྷསྶ ཙ པམུཁསྶ ཙ ཨནྟརཱ ཋིཏབྷིཏྟིཡཱ ཨེཀཏྟཱ ཏཏྠ ཙ ཨེཀཝཱིསཏིཡཱ བྷིཀྑཱུནཾ ཨོཀཱསཱབྷཱཝེན ཧེཊྛཱ ན ཨོཏརཏི, ཨུཔརིབྷིཏྟི པན སཱིམཊྛཱཝ ཧོཏཱིཏི དསྶེཏི. ཧེཊྛིམཏལེ ཀུཊྚོཏི ཧེཊྛིམཏལེ ཙཏཱུསུ དིསཱསུ ཋིཏཀུཊྚོ. སཙེ ཧི ¶ དྭཱིསུ, ཏཱིསུ ཝཱ དིསཱསུ ཨེཝ ཀུཊྚོ ཏིཊྛེཡྻ, ཧེཊྛཱ ན ཨོཏརཏི. ཧེཊྛཱཔི ཨོཏརཏཱིཏི ཙཏུནྣམྤི བྷིཏྟཱིནཾ ཨནྟོ བྷིཏྟཱིཧི སཧ ཨེཀཝཱིསཏིཡཱ བྷིཀྑཱུནཾ པཧོནཀཏྟཱ ཝུཏྟཾ. ཨོཏརམཱནཱ ཙ ཨུཔརིསཱིམཔྤམཱཎེན ཨོཏརཏི, ཙཏུནྣཾ པན བྷིཏྟཱིནཾ བཱཧིརནྟརཔརིཙྪེདེ ཧེཊྛཱབྷཱུམིབྷཱགེ ཨུདཀཔརིཡནྟཾ ཀཏྭཱ ཨོཏརཏི. ན པན བྷིཏྟཱིནཾ བཧི ཀེསགྒམཏྟམྤི ཋཱནཾ. པཱསཱདབྷིཏྟིཏོཏི ཨུཔརིཏལེ བྷིཏྟིཏོ. ཨོཏརཎཱནོཏརཎཾ ཝུཏྟནཡེནེཝ ཝེདིཏབྦནྟི ཨུཔརིསཱིམཔྤམཱཎསྶ ཨནྟོགདྷཱནཾ ཧེཊྛིམཏལེ ཙཏཱུསུ དིསཱསུ ཀུཊྚཱནཾ ཏུལཱརུཀྑེཧི ཨེཀསམྦནྡྷཏཾ ཏདནྟོ པཙྪིམསཱིམཔྤམཱཎཏཱདིཉྩ སནྡྷཱཡ ཝུཏྟཾ. ཀིཉྩཱཔེཏྠ ནིཡྻཱུཧཀཱདཡོ ནིམིཏྟཱནཾ ཋིཏོཀཱསཏཱཡ བཛ྄ཛྷམཱནཀྑཎེ སཱིམཱ ན ཧོནྟི, བདྡྷཱཡ པན སཱིམཱཡ སཱིམཊྛཱཝ ཧོནྟཱིཏི དཊྛབྦཱ. པརིཡནྟཐམྦྷཱནནྟི ནིམིཏྟགཏཔཱསཱཎཏྠམྦྷེ སནྡྷཱཡ ཝུཏྟཾ. ‘‘ཨུཔརིམཏལེན སམྦདྡྷོ ཧོཏཱི’’ཏི ཨིདཾ ཀུཊྚཱནཾ ཨནྟརཱ སཱིམཊྛཱནཾ ཐམྦྷཱནཾ ཨབྷཱཝཏོ ཝུཏྟཾ. ཡདི ཧི བྷཝེཡྻུཾ, ཀུཊྚེ ཨུཔརིམཏལེན ཨསམྦནྡྷེཔི སཱིམཊྛཏྠམྦྷཱནཾ ཨུཔརི ཋིཏོ པཱསཱདོ སཱིམཊྛོཝ ཧོཏི.

སཙེ པན བཧཱུནཾ ཐམྦྷཔནྟཱིནཾ ཨུཔརི ཀཏཔཱསཱདསྶ ཧེཊྛཱ པཐཝིཡཾ སབྦབཱཧིརཱཡ ཐམྦྷཔནྟིཡཱ ཨནྟོ ནིམིཏྟཔཱསཱཎེ ཋཔེཏྭཱ སཱིམཱ བདྡྷཱ ཧོཏི, ཨེཏྠ ཀཐནྟི? ཨེཏྠཱཔི ཡཾ ཏཱཝ སཱིམཊྛཏྠམྦྷེཧེཝ དྷཱརིཡམཱནཱནཾ ཏུལཱནཾ ཨུཔརིམཏལཾ, སབྦཾ ཏཾ སཱིམཊྛམེཝ, ཨེཏྠ ཝིཝཱདོ ནཏྠི. ཡཾ པན སཱིམཊྛཏྠམྦྷཔནྟིཡཱ, ཨསཱིམཊྛཱཡ བཱཧིརཏྠམྦྷཔནྟིཡཱ ཙ སམདྷུརཾ དྷཱརིཡམཱནཱནཾ ཏུལཱནཾ ཨུཔརིམཏལཾ, ཏཏྠ ཨུཔཌྜྷཾ སཱིམཱཏི ཀེཙི ཝདནྟི. སཀལམྤི གཱམསཱིམཱཏི ཨཔརེ. བདྡྷསཱིམཱ ཨེཝཱཏི ཨཉྙེ. ཏསྨཱ ཀམྨཾ ཀརོནྟེཧི གརུཀེ ནིརཱསངྐཊྛཱནེ ཋཏྭཱ སབྦཾ ཏཾ ཨཱསངྐཊྛཱནཾ སོདྷེཏྭཱཝ ཀམྨཾ ཀཱཏབྦཾ, སནྣིཊྛཱནཀཱརཎཾ ཝཱ གཝེསིཏྭཱ ཏདནུགུཎཾ ཀཱཏབྦཾ.

ཏཱལམཱུལཀཔབྦཏེཏི ¶ ཏཱལཀྑནྡྷམཱུལསདིསེ ཧེཊྛཱ ཐཱུལོ ཧུཏྭཱ ཀམེན ཀིསོ ཧུཏྭཱ ཨུགྒཏོ ཧི ཏཱལསདིསོ ནཱམ ཧོཏི. ཝིཏཱནསཎྛཱནོཏི ཨཧིཙྪཏྟཀསཎྛཱནོ. པཎཝསཎྛཱནོཏི མཛ྄ཛྷེ ཏནུཀོ ཧེཊྛཱ ཙ ཨུཔརི ཙ ཝིཏྠིཎྞོ. ཧེཊྛཱ ཝཱ མཛ྄ཛྷེ ཝཱཏི མུདིངྒསཎྛཱནསྶ ཧེཊྛཱ, པཎཝསཎྛཱནསྶ མཛ྄ཛྷེ.

སཔྤཕཎསདིསོ པབྦཏོཏི སཔྤཕཎོ ཝིཡ ཁུཛྫོ, མཱུལཊྛཱནཏོ ཨཉྙཏྠ ཨཝནཏསཱིསོཏི ཨཏྠོ. ཨཱཀཱསཔབྦྷཱརནྟི བྷིཏྟིཡཱ ཨཔརིཀྑིཏྟཔབྦྷཱརཾ. སཱིམཔྤམཱཎོཏི ཨནྟོཨཱཀཱསེན སདྡྷིཾ པཙྪིམསཱིམཔྤམཱཎོ. ‘‘སོ ཙ པཱསཱཎོ སཱིམཊྛོ’’ཏི ཨིམིནཱ ཨཱིདིསེཧི སུསིརཔཱསཱཎལེཎཀུཊྚཱདཱིཧི པརིཙྪིནྣེ བྷཱུམིབྷཱགེ ཨེཝ སཱིམཱ པཏིཊྛཱཏི, ན ཨཔརིཙྪིནྣེ. ཏེ པན སཱིམཊྛཏྟཱ སཱིམཱ ཧོནྟི, ན སརཱུཔེན སཱིམཊྛམཉྩཱདི ཝིཡཱཏི དསྶེཏི. སཙེ པན སོ སུསིརཔཱསཱཎོ ¶ བྷཱུམིཾ ཨནཱཧཙྩ ཨཱཀཱསགཏོཝ ཨོལམྦཏི, སཱིམཱ ན ཨོཏརཏི. སུསིརཔཱསཱཎཱ པན སཡཾ སཱིམཱཔཊིབདྡྷཏྟཱ སཱིམཱ ཧོནྟི. ཀཐཾ པན པཙྪིམཔྤམཱཎརཧིཏེཧི ཨེཏེཧི སུསིརཔཱསཱཎཱདཱིཧི སཱིམཱ ན ཨོཏརཏཱིཏི ཨིདཾ སདྡྷཱཏབྦནྟི? ཨཊྛཀཐཱཔམཱཎཏོ.

ཨཔིཙེཏྠ སུསིརཔཱསཱཎབྷིཏྟིཨནུསཱརེན མཱུསིཀཱདཱིནཾ ཝིཡ སཱིམཱཡ ཧེཊྛིམཏལེ ཨོཏརཎཀིཙྩཾ ནཏྠི. ཧེཊྛཱ པན པཙྪིམསཱིམཔྤམཱཎེ ཨཱཀཱསེ དྭངྒུལམཏྟབཧལེཧི པཱསཱཎབྷིཏྟིཨཱདཱིཧིཔི ཨུཔརིམཏལཾ ཨཱཧཙྩ ཋིཏེཧི སབྦསོ, ཡེབྷུཡྻེན ཝཱ པརིཙྪིནྣེ སཏི ཨུཔརི བཛ྄ཛྷམཱནཱ སཱིམཱ ཏེཧི པཱསཱཎཱདཱིཧི ཨནྟརིཏཱཡ ཏཔྤརིཙྪིནྣཱཡ ཧེཊྛཱབྷཱུམིཡཱཔི ཨུཔརིམཏལེན སདྡྷིཾ ཨེཀཀྑཎེ པཏིཊྛཱཏི ནདིཔཱརསཱིམཱ ཝིཡ ནདིཨནྟརིཏེསུ ཨུབྷོསུ ཏཱིརེསུ, ལེཎཱདཱིསུ ཨཔནཱིཏེསུཔི ཧེཊྛཱ ཨོཏིཎྞཱ སཱིམཱ ཡཱཝ སཱསནནྟརདྷཱནཱ ན ཝིགཙྪཏི. པཋམཾ པན ཨུཔརི སཱིམཱཡ བདྡྷཱཡ པཙྪཱ ལེཎཱདཱིསུ ཀཏེསུཔི ཧེཊྛཱབྷཱུམིཡཾ སཱིམཱ ཨོཏརཏི ཨེཝ. ཀེཙི ཏཾ ན ཨིཙྪནྟི. ཨེཝཾ ཨུབྷཡཏྠ པཏིཊྛིཏཱ ཙ སཱ སཱིམཱ ཨེཀཱཝ ཧོཏི གོཏྟཱདིཛཱཏི ཝིཡ བྱཏྟིབྷེདེསཱུཏི གཧེཏབྦཾ. སབྦཱ ཨེཝ ཧི བདྡྷསཱིམཱ, ཨབདྡྷསཱིམཱ ཙ ཨཏྟནོ ཨཏྟནོ པཀཏིནིསྶཡབྷཱུཏེ གཱམཱརཉྙནདིཨཱདིཀེ ཁེཏྟེ ཡཐཱཔརིཙྪེདཾ སབྦཏྠ སཱཀལྱེན ཨེཀསྨིཾ ཁཎེ བྱཱཔིནཱི པརམཏྠཏོ ཨཝིཛྫམཱནཱཔི ཏེ ཏེ ནིསྶཡབྷཱུཏེ པརམཏྠདྷམྨེ, ཏཾ ཏཾ ཀིརིཡཱཝིསེསམྤི ཝཱ ཨུཔཱདཱཡ ལོཀིཡེཧི, སཱསནིཀེཧི ¶ ཙ ཡཐཱརཧཾ ཨེཀཏྟེན པཉྙཏྟཏཱཡ ནིསྶཡེཀརཱུཔཱ ཨེཝ. ཏཐཱ ཧི ཨེཀོ གཱམོ ཨརཉྙཾ ནདཱི ཛཱཏསྶརོ སམུདྡོཏི ཨེཝཾ ལོཀེ,

‘‘སམྨཏཱ སཱ སཱིམཱ སངྒྷེན (མཧཱཝ. ༡༤༣). ཨགཱམཀེ ཙེ, བྷིཀྑཝེ, ཨརཉྙེ སམནྟཱ སཏྟབྦྷནྟརཱ, ཨཡཾ ཏཏྠ སམཱནསཾཝཱསཱ ཨེཀཱུཔོསཐཱ. སམནྟཱ ཨུདཀུཀྑེཔཱ, ཨཡཾ ཏཏྠ སམཱནསཾཝཱསཱ ཨེཀཱུཔོསཐཱ’’ཏི (མཧཱཝ. ༡༤༧) –

ཨཱདིནཱ སཱསནེ ཙ ཨེཀཝོཧཱརོ དིསྶཏི. ན ཧི པརམཏྠཏོ ཨེཀསྶ ཨནེཀདྷམྨེསུ བྱཱཔནམཏྠི. ཀསིཎེཀདེསཱདིཝིཀཔྤཱསམཱནཏཱཡ ཨེཀཏྟཧཱནིཏོཏི ཨཡཾ ནོ མཏི.

ཨསྶ ཧེཊྛཱཏི སཔྤཕཎཔབྦཏསྶ ཧེཊྛཱ ཨཱཀཱསཔབྦྷཱརེ. ལེཎསྶཱཏི ལེཎཉྩེ ཀཏཾ, ཏསྶ ལེཎསྶཱཏི ཨཏྠོ. ཏམེཝ པུན ལེཎཾ པཉྩཧི པཀཱརེཧི ཝིཀཔྤེཏྭཱ ཨོཏརཎཱནོཏརཎཝིནིཙྪཡཾ དསྶེཏུཾ ཨཱཧ ‘‘སཙེ པན ཧེཊྛཱ’’ཏིཨཱདི. ཏཏྠ ‘‘ཧེཊྛཱ’’ཏི ཨིམསྶ ‘‘ལེཎཾ ཧོཏཱི’’ཏི ཨིམིནཱ སམྦནྡྷོ. ཧེཊྛཱ ལེཎཉྩ ཨེཀསྨིཾ པདེསེཏི ཨཱཧ ‘‘ཨནྟོ’’ཏི, པབྦཏསྶ ཨནྟོ, པབྦཏམཱུལེཏི ཨཏྠོ. ཏམེཝ ཨནྟོ-སདྡཾ སཱིམཱཔརིཙྪེདེན ཝིསེསེཏུཾ ‘‘ཨུཔརིམསྶ སཱིམཱཔརིཙྪེདསྶ པཱརཏོ’’ཏི ཝུཏྟཾ ¶ . པབྦཏཔཱདཾ པན ཨཔེཀྑིཏྭཱ ‘‘ཨོརཏོ’’ཏི ཝཏྟབྦེཔི སཱིམཱནིསྶཡཾ པབྦཏགྒཾ སནྡྷཱཡ ‘‘པཱརཏོ’’ཏི ཝུཏྟནྟི དཊྛབྦཾ. ཏེནེཝ ‘‘བཧིལེཎ’’ནྟི ཨེཏྠ བཧི-སདྡཾ ཝིསེསེནྟོ ‘‘ཨུཔརིམསྶ སཱིམཱཔརིཙྪེདསྶ ཨོརཏོ’’ཏི ཨཱཧ. བཧི སཱིམཱ ན ཨོཏརཏཱིཏི ཨེཏྠ བཧཱིཏི པབྦཏཔཱདེ ལེཎཾ སནྡྷཱཡ ཝུཏྟཾ, ལེཎསྶ བཧིབྷཱུཏེ ཨུཔརིསཱིམཱཔརིཙྪེདསྶ ཧེཊྛཱབྷཱགེ སཱིམཱ ན ཨོཏརཏཱིཏི ཨཏྠོ. ཨནྟོ སཱིམཱཏི ལེཎསྶ ཙ པབྦཏཔཱདསྶ ཙ ཨནྟོ ཨཏྟནོ ཨོཏརཎཱརཧཊྛཱནེ ན ཨོཏརཏཱིཏི ཨཏྠོ. ‘‘བཧི སཱིམཱ ན ཨོཏརཏི, ཨནྟོ སཱིམཱ ན ཨོཏརཏཱི’’ཏི ཙེཏྠ ཨཏྟནོ ཨོཏརཎཱརཧཊྛཱནེ ལེཎཱབྷཱཝེན སཱིམཱཡ སབྦཐཱ ཨནོཏརཎམེཝ དསྶིཏནྟི གཧེཏབྦཾ. ཏཏྠཱཔི ཨནོཏརནྟཱི ཨུཔརི ཨེཝ ཧོཏཱིཏི. ‘‘བཧི པཏིཏཾ ཨསཱིམཱ’’ཏིཨཱདིནཱ ཨུཔརིཔཱསཱདཱདཱིསུ ཨཐིརནིསྶཡེསུ ཋིཏཱ སཱིམཱཔི ཏེསཾ ཝིནཱསེན ཝིནསྶཏཱིཏི དསྶིཏནྟི དཊྛབྦཾ.

པོཀྑརཎིཾ ¶ ཁཎནྟི, སཱིམཱཡེཝཱཏི ཨེཏྠ སཙེ ཧེཊྛཱ ཨུམངྒནདིསཱིམཔྤམཱཎཏོ ཨནཱུནཱ པཋམམེཝ ཙ པཝཏྟཱ ཧོཏི. སཱིམཱ ཙ པཙྪཱ བདྡྷཱ ནདིཏོ ཨུཔརི ཨེཝ ཧོཏི, ནདིཾ ཨཱཧཙྩ པོཀྑརཎིཡཱ ཙ ཁཏཱཡ སཱིམཱ ཝིནསྶཏཱིཏི དཊྛབྦཾ. ཧེཊྛཱཔཐཝིཏལེཏི ཨནྟརཱ བྷཱུམིཝིཝརེ.

སཱིམཱམཱལ༹ཀེཏི ཁཎྜསཱིམངྒཎེ. ‘‘ཝཊརུཀྑོ’’ཏི ཨིདཾ པཱརོཧོཔཏྠམྦྷེན ཨཏིདཱུརམྤི གནྟུཾ སམཏྠསཱཁཱསམངྒིཏཱཡ ཝུཏྟཾ. སབྦརུཀྑལཏཱདཱིནམྤི སམྦནྡྷོ ན ཝཊྚཏི ཨེཝ. ཏེནེཝ ནཱཝཱརཛྫུསེཏུསམྦནྡྷོཔི པཊིཀྑིཏྟོ. ཏཏོཏི སཱཁཏོ. མཧཱསཱིམཱཡ པཐཝིཏལནྟི ཨེཏྠ ཨཱསནྣཏརམྤི གཱམསཱིམཾ ཨགྒཧེཏྭཱ བདྡྷསཱིམཱཡ ཨེཝ གཧིཏཏྟཱ གཱམསཱིམཱབདྡྷསཱིམཱནཾ ཨཉྙམཉྙཾ རུཀྑཱདིསམྦནྡྷེཔི སམྦྷེདདོསོ ནཏྠི, ཨཉྙམཉྙཾ ནིསྶཡནིསྶིཏབྷཱཝེན པཝཏྟིཏོཏི གཧེཏབྦཾ. ཡདི ཧི ཏཱསམྤི སམྦནྡྷདོསོ བྷཝེཡྻ, ཀཐཾ གཱམསཱིམཱཡ བདྡྷསཱིམཱ སམྨནྣིཏབྦཱ སིཡཱ? ཡསྶཱ ཧི སཱིམཱཡ སདྡྷིཾ སམྦནྡྷེ དོསོ བྷཝེཡྻ, སཱ ཏཏྠ བནྡྷིཏུམེཝ ན ཝཊྚཏི, བདྡྷསཱིམཱཨུདཀུཀྑེཔསཱིམཱསུ བདྡྷསཱིམཱ ཝིཡ, ཨཏྟནོ ནིསྶཡབྷཱུཏགཱམསཱིམཱདཱིསུ ཨུདཀུཀྑེཔསཱིམཱ ཝིཡ ཙ. ཏེནེཝ ‘‘སཙེ པན རུཀྑསྶ སཱཁཱ ཝཱ ཏཏོ ནིཀྑནྟཔཱརོཧོ ཝཱ བཧིནདིཏཱིརེ ཝིཧཱརསཱིམཱཡ ཝཱ གཱམསཱིམཱཡ ཝཱ པཏིཊྛིཏོ’’ཏིཨཱདིནཱ (མཧཱཝ. ཨཊྛ. ༡༤༧) ཨུདཀུཀྑེཔསཱིམཱཡ ཨཏྟནོ ཨནིསྶཡབྷཱུཏགཱམསཱིམཱདཱིཧི ཨེཝ སམྦནྡྷདོསོ དསྶིཏོ, ན ནདིསཱིམཱཡཾ. ཨེཝམིདྷཱཔཱིཏི དཊྛབྦཾ. ཨཡཉྩཏྠོ ཨུཔརི པཱཀཊོ བྷཝིསྶཏི. ཨཱཧཙྩཱཏི ཕུསིཏྭཱ.

མཧཱསཱིམཾ ཝཱ སོདྷེཏྭཱཏི མཧཱསཱིམཱགཏཱནཾ སབྦེསཾ བྷིཀྑཱུནཾ ཧཏྠཔཱསཱནཡནབཧིཀརཎཱདིཝསེན ¶ སཀལཾ མཧཱསཱིམཾ སོདྷེཏྭཱ. ཨེཏེན སབྦཝིཔཏྟིཡོ མོཙེཏྭཱ པུབྦེ སུཊྛུ བདྡྷཱནམྤི དྭིནྣཾ བདྡྷསཱིམཱནཾ པཙྪཱ རུཀྑཱདིསམྦནྡྷེན ཨུཔྤཛྫནཀོ ཨཱིདིསོ པཱལི༹མུཏྟཀོ སམྦྷེདདོསོ ཨཏྠཱིཏི དསྶེཏི. སོ ཙ ‘‘ན, བྷིཀྑཝེ, སཱིམཱཡ སཱིམཱ སམྦྷིནྡིཏབྦཱ’’ཏིཨཱདིནཱ བདྡྷསཱིམཱནཾ ཨཉྙམཉྙཾ སམྦྷེདཛ྄ཛྷོཏྠརཎཾ པཊིཀྑིཔིཏྭཱ ‘‘ཨནུཛཱནཱམི, བྷིཀྑཝེ, སཱིམཾ སམྨནྣནྟེན སཱིམནྟརིཀཾ ཋཔེཏྭཱ སཱིམཾ སམྨནྣིཏུ’’ནྟི ཨུབྷིནྣཾ (མཧཱཝ. ༡༤༨) བདྡྷསཱིམཱནམནྟརཱ སཱིམནྟརིཀཾ ཋཔེཏྭཱཝ བནྡྷིཏུཾ ཨནུཛཱནནྟེན སམྦྷེདཛ྄ཛྷོཏྠརཎཾ ཝིཡ ཏཱསཾ ཨཉྙམཉྙཾ ཕུསིཏྭཱ ཏིཊྛནཝསེན བནྡྷནམྤི ན ཝཊྚཏཱིཏི སིདྡྷཏྟཱ བདྡྷཱནམྤི ཏཱསཾ པཙྪཱ ཨཉྙམཉྙཾ ཨེཀརུཀྑཱདཱིཧི ¶ ཕུསིཏྭཱ ཋཱནམྤི ན ཝཊྚཏཱིཏི བྷགཝཏོ ཨདྷིཔྤཱཡཉྙཱུཧི སངྒཱིཏིཀཱརཀེཧི ནིདྡྷཱརིཏོ. བནྡྷནཀཱལེ པཊིཀྑིཏྟསྶ སམྦནྡྷདོསསྶ ཨནུལོམེན ཨཀཔྤིཡཱནུལོམཏྟཱ.

ཨཡཾ པན སམྦནྡྷདོསོ – པུབྦེ སུཊྛུ བདྡྷཱནཾ པཙྪཱ སཉྫཱཏཏྟཱ བཛ྄ཛྷམཱནཀྑཎེ ཝིཡ ཨསཱིམཏྟཾ ཀཱཏུཾ ན སཀྐོཏི. ཏསྨཱ རུཀྑཱདིསམྦནྡྷེ ཨཔནཱིཏམཏྟེ ཏཱ སཱིམཱ པཱཀཏིཀཱ ཧོནྟི. ཡཐཱ ཙཱཡཾ པཙྪཱ ན ཝཊྚཏི, ཨེཝཾ བཛ྄ཛྷམཱནཀྑཎེཔི ཏཱསཾ རུཀྑཱདིསམྦནྡྷེ སཏི ཏཱ བནྡྷིཏུཾ ན ཝཊྚཏཱིཏི དཊྛབྦཾ.

ཀེཙི པན ‘‘མཧཱསཱིམཾ ཝཱ སོདྷེཏྭཱཏི ཨེཏྠ མཧཱསཱིམཱགཏཱ བྷིཀྑཱུ ཡཐཱ ཏཾ སཱཁཾ ཝཱ པཱརོཧཾ ཝཱ ཀཱཡཔཊིབདྡྷེཧི ན ཕུསནྟི, ཨེཝཾ སོདྷནམེཝ ཨིདྷཱདྷིཔྤེཏཾ, ན སཀལསཱིམཱསོདྷན’’ནྟི ཝདནྟི, ཏཾ ན ཡུཏྟཾ ཨཊྛཀཐཱཡ ཝིརུཛ྄ཛྷནཏོ. ཏཐཱ ཧི ‘‘མཧཱསཱིམཱཡ པཐཝིཏལཾ ཝཱ ཏཏྠཛཱཏརུཀྑཱདཱིནི ཝཱ ཨཱཧཙྩ ཏིཊྛཏཱི’’ཏི ཨེཝཾ སཱཁཱཔཱརོཧཱནཾ མཧཱསཱིམཾ ཕུསིཏྭཱ ཋཱནམེཝ སམྦནྡྷདོསེ ཀཱརཎཏྟེན ཝུཏྟཾ, ན པན ཏཏྠ ཋིཏབྷིཀྑཱུཧི སཱཁཱདཱིནཾ ཕུསནཾ. ཡདི ཧི བྷིཀྑཱུནཾ སཱཁཱདི ཕུསིཏྭཱ ཋཱནམེཝ ཀཱརཎཾ སིཡཱ, ཏསྶ སཱཁཾ ཝཱ ཏཏོ ནིགྒཏཔཱརོཧཾ ཝཱ མཧཱསཱིམཱཡ པཝིཊྛཾ ཏཏྲཊྛོ ཀོཙི བྷིཀྑུ ཕུསིཏྭཱ ཏིཊྛཏཱིཏི བྷིཀྑུཕུསནམེཝ ཝཏྟབྦཾ སིཡཱ. ཡཉྷི ཏཏྠ མཧཱསཱིམཱསོདྷནེ ཀཱརཎཾ, ཏདེཝ ཏསྨིཾ ཝཱཀྱེ པདྷཱནཏོ དསྶེཏབྦཾ. ན ཧི ཨཱཧཙྩ ཋིཏམེཝ སཱཁཱདིཾ ཕུསིཏྭཱ ཋིཏོ བྷིཀྑུ སོདྷེཏབྦོ ཨཱཀཱསཊྛསཱཁཱདིཾ ཕུསིཏྭཱ ཋིཏསྶཱཔི སོདྷེཏབྦཏོ, ཀིཾ ནིརཏྠཀེན ཨཱཧཙྩཊྛཱནཝཙནེན. ཨཱཀཱསཊྛསཱཁཱསུ ཙ བྷིཀྑུནོ ཕུསནམེཝ ཀཱརཎཏྟེན ཝུཏྟཾ, སོདྷནཉྩ ཏསྶེཝ བྷིཀྑུསྶ ཧཏྠཔཱསཱནཡནཱདིཝསེན སོདྷནཾ ཝུཏྟཾ. ཨིདྷ པན ‘‘མཧཱསཱིམཾ སོདྷེཏྭཱ’’ཏི སཀལསཱིམཱསཱདྷཱརཎཝཙནེན སོདྷནཾ ཝུཏྟཾ.

ཨཔིཙ སཱཁཱདིཾ ཕུསིཏྭཱ ཋིཏབྷིཀྑུམཏྟསོདྷནེ ཨབྷིམཏེ ‘‘མཧཱསཱིམཱཡ པཐཝིཏལ’’ནྟི ཝིསེསསཱིམོཔཱདཱནཾ ¶ ནིརཏྠཀཾ སིཡཱ ཡཏྠ ཀཏྠཙི ཨནྟམསོ ཨཱཀཱསེཔི ཋཏྭཱ སཱཁཱདིཾ ཕུསིཏྭཱ ཋིཏསྶ ཝིསོདྷེཏབྦཏོ. ཚིནྡིཏྭཱ ¶ བཧིཊྛཀཱ ཀཱཏབྦཱཏི ཏཏྠ པཏིཊྛིཏབྷཱཝཝིཡོཛནཝཙནཏོ ཙ ཝིསབྷཱགསཱིམཱནཾ ཕུསནེནེཝ སཀལསཱིམཱསོདྷནཧེཏུཀོ ཨཊྛཀཐཱསིདྡྷོཡཾ ཨེཀོ སམྦནྡྷདོསོ ཨཏྠེཝཱཏི གཧེཏབྦོ. ཏེནེཝ ཨུདཀུཀྑེཔསཱིམཱཀཐཱཡམྤི (མཧཱཝ. ཨཊྛ. ༡༤༧) ‘‘ཝིཧཱརསཱིམཱཡ ཝཱ གཱམསཱིམཱཡ ཝཱ པཏིཊྛིཏོ’’ཏི ཙ ‘‘ནདིཏཱིརེ པན ཁཱཎུཀཾ ཀོཊྚེཏྭཱ ཏཏྠ བདྡྷནཱཝཱཡ ན ཝཊྚཏཱི’’ཏི ཙ ‘‘སཙེ པན སེཏུ ཝཱ སེཏུཔཱདཱ ཝཱ བཧིཏཱིརེ པཏིཊྛིཏཱ, ཀམྨཾ ཀཱཏུཾ ན ཝཊྚཏཱི’’ཏི ཙ ཨེཝཾ ཝིསབྷཱགཱསུ གཱམསཱིམཱསུ སཱཁཱདཱིནཾ ཕུསནམེཝ སངྐརདོསཀཱརཎཏྟེན ཝུཏྟཾ, ན བྷིཀྑུཕུསནཾ. ཏཐཱ ཧི ‘‘ཨནྟོནདིཡཾ ཛཱཏརུཀྑེ བནྡྷིཏྭཱ ཀམྨཾ ཀཱཏབྦ’’ནྟི ནདིཡཾ ནཱཝཱབནྡྷནཾ ཨནུཉྙཱཏཾ ཨུདཀུཀྑེཔནིསྶཡཏྟེན ནདིསཱིམཱཡ སབྷཱགཏྟཱ. ཡདི ཧི བྷིཀྑཱུནཾ ཕུསནམེཝ པཊིཙྩ སབྦཏྠ སམྦནྡྷདོསོ ཝུཏྟོ སིཡཱ, ནདིཡམྤི བནྡྷནཾ པཊིཀྑིཔིཏབྦཾ བྷཝེཡྻ. ཏཏྠཱཔི ཧི བྷིཀྑུཕུསནཾ ཀམྨཀོཔཀཱརཎཾ ཧོཏི, ཏསྨཱ སབྷཱགསཱིམཱསུ པཝིསིཏྭཱ བྷཱུམིཨཱདིཾ ཕུསིཏྭཱ ཝཱ ཨཕུསིཏྭཱ ཝཱ སཱཁཱདིམྷི ཋིཏེ ཏཾ སཱཁཱདིཾ ཕུསནྟོཝ བྷིཀྑུ སོདྷེཏབྦོ. ཝིསབྷཱགསཱིམཱསུ པན སཱཁཱདིམྷི ཕུསིཏྭཱ ཋིཏེ ཏཾ སཱཁཱདིཾ ཨཕུསནྟཱཔི སབྦེ བྷིཀྑཱུ སོདྷེཏབྦཱ. ཨཕུསིཏྭཱ ཋིཏེ པན ཏཾ སཱཁཱདིཾ ཕུསནྟོཝ བྷིཀྑུ སོདྷེཏབྦོཏི ནིཊྛམེཏྠ གནྟབྦཾ.

ཡཾ པནེཏྠ ཀེཙི ‘‘བདྡྷསཱིམཱནཾ དྭིནྣཾ ཨཉྙམཉྙཾ ཝིཡ བདྡྷསཱིམཱགཱམསཱིམཱནམྤི ཏདཉྙཱསམྤི སབྦཱསཾ སམཱནསཾཝཱསཀསཱིམཱནཾ ཨཉྙམཉྙཾ རུཀྑཱདིསམྦནྡྷེ སཏི ཏདུབྷཡམྤི ཨེཀསཱིམཾ ཝིཡ སོདྷེཏྭཱ ཨེཀཏྠེཝ ཀམྨཾ ཀཱཏབྦཾ, ཨཉྙཏྠ ཀཏཾ ཀམྨཾ ཝིཔཛྫཏི, ནཏྠེཏྠ སབྷཱགཝིསབྷཱགབྷེདོ’’ཏི ཝདནྟི, ཏཾ ཏེསཾ མཏིམཏྟཾ, སབྷཱགསཱིམཱནཾ ཨཉྙམཉྙཾ སམྦྷེདདོསཱབྷཱཝསྶ ཝིསབྷཱགསཱིམཱནམེཝ ཏབྦྷཱཝསྶ སུཏྟསུཏྟཱནུལོམཱདིཝིནཡནཡེཧི སིདྡྷཏྟཱ. ཏཐཱ ཧི ‘‘ཨནུཛཱནཱམི, བྷིཀྑཝེ, སཱིམཾ སམྨནྣིཏུ’’ནྟི གཱམསཱིམཱཡམེཝ བདྡྷསཱིམཾ སམྨནྣིཏུཾ ཨནུཉྙཱཏཾ. ཏཱསཾ ནིསྶཡནིསྶིཏབྷཱཝེན སབྷཱགཏཱ, སམྦྷེདཛ྄ཛྷོཏྠརཎཱདིདོསཱབྷཱཝོ ཙ སུཏྟཏོཝ སིདྡྷོ. བནྡྷནཀཱལེ པན ཨནུཉྙཱཏསྶ སམྦནྡྷསྶ ཨནུལོམཏོ པཙྪཱ སཉྫཱཏརུཀྑཱདིསམྦནྡྷོཔི ཏཱསཾ ཝཊྚཏི ཨེཝ. ‘‘ཡཾ, བྷིཀྑཝེ…པེ… ཀཔྤིཡཾ ཨནུལོམེཏི ཨཀཔྤིཡཾ པཊིབཱཧཏི. ཏཾ ཝོ ཀཔྤཏཱི’’ཏི (མཧཱཝ. ༣༠༥) ཝུཏྟཏྟཱ. ཨེཝཾ ཏཱཝ བདྡྷསཱིམཱགཱམསཱིམཱནཾ ཨཉྙམཉྙཾ སབྷཱགཏཱ, སམྦྷེདཱདིདོསཱབྷཱཝོ ཙ ¶ སུཏྟསུཏྟཱནུལོམཏོ སིདྡྷོ. ཨིམིནཱ ཨེཝ ནཡེན ཨརཉྙསཱིམཱསཏྟབྦྷནྟརསཱིམཱནཾ, ནདིཨཱདིཨུདཀུཀྑེཔསཱིམཱནཉྩ སུཏྟསུཏྟཱནུལོམཏོ ཨཉྙམཉྙཾ སབྷཱགཏཱ, སམྦྷེདཱདིདོསཱབྷཱཝོ ཙ སིདྡྷོཏི ཝེདིཏབྦོ.

བདྡྷསཱིམཱཡ ¶ པན ཨཉྙཱཡ བདྡྷསཱིམཱཡ, ནདིཨཱདིསཱིམཱསུ ཙ བནྡྷིཏུཾ པཊིཀྑེཔསིདྡྷིཏོ ཙེཝ ཨུདཀུཀྑེཔསཏྟབྦྷནྟརསཱིམཱནཾ ནདིཨཱདཱིསུ ཨེཝ ཀཱཏུཾ ནིཡམནསུཏྟསཱམཏྠིཡེན བདྡྷསཱིམཱགཱམསཱིམཱདཱིསུ ཀརཎཔཊིཀྑེཔསིདྡྷིཏོ ཙ ཏཱསཾ ཨཉྙམཉྙཾ ཝིསབྷཱགཏཱ, ཨུཔྤཏྟིཀྑཎེ, པཙྪཱ ཙ རུཀྑཱདཱིཧི སམྦྷེདཱདིདོསསམྦྷཝོ ཙ ཝུཏྟནཡེན སུཏྟསུཏྟཱནུལོམཏོ ཙ སིཛ྄ཛྷནྟི. ཏེནེཝ ཨཊྛཀཐཱཡཾ (མཧཱཝ. ཨཊྛ. ༡༤༨) ཝིསབྷཱགསཱིམཱནམེཝ ཝཊརུཀྑཱདིཝཙནེཧི སམྦནྡྷདོསཾ དསྶེཏྭཱ སབྷཱགཱནཾ བདྡྷསཱིམཱགཱམསཱིམཱདཱིནཾ སམྦནྡྷདོསོ ན དསྶིཏོ, ན ཀེཝལཉྩ ན དསྶིཏོ, ཨཐ ཁོ ཏཱསཾ སབྷཱགསཱིམཱནཾ རུཀྑཱདིསམྦནྡྷེཔི དོསཱབྷཱཝོ པཱལི༹ཨཊྛཀཐཱསུ ཉཱཔིཏོ ཨེཝ. ཏཐཱ ཧི པཱལི༹ཡཾ ‘‘པབྦཏནིམིཏྟཾ པཱསཱཎནིམིཏྟཾ ཝནནིམིཏྟཾ རུཀྑནིམིཏྟ’’ནྟིཨཱདིནཱ ཝཌྜྷནཀནིམིཏྟཱནི ཨནུཉྙཱཏཱནི. ཏེན ནེསཾ རུཀྑཱདཱིནཾ ནིམིཏྟཱནཾ ཝཌྜྷནེཔི བདྡྷསཱིམཱགཱམསཱིམཱནཾ སངྐརདོསཱབྷཱཝོ ཉཱཔིཏོཝ ཧོཏི. དྭིནྣཾ པན བདྡྷསཱིམཱནཾ ཨཱིདིསོ སམྦནྡྷོ ན ཝཊྚཏི. ཝུཏྟཉྷི ‘‘ཨེཀརུཀྑོཔི ཙ དྭིནྣཾ སཱིམཱནཾ ནིམིཏྟཾ ཧོཏི, སོ པན ཝཌྜྷནྟོ སཱིམཱསངྐརཾ ཀརོཏི, ཏསྨཱ ན ཀཱཏབྦོ’’ཏི ‘‘ཨནུཛཱནཱམི, བྷིཀྑཝེ, ཏིཡོཛནཔརམཾ སཱིམཾ སམྨནྣིཏུ’’ནྟི ཝཙནཏོཔི ཙཱཡཾ ཉཱཔིཏོ. ཏིཡོཛནཔརམཱཡ ཧི སཱིམཱཡ སམནྟཱ པརིཡནྟེསུ རུཀྑལཏཱགུམྦཱདཱིཧི བདྡྷསཱིམཱགཱམསཱིམཱནཾ ནིཡམེན ཨཉྙམཉྙཾ སམྦནྡྷསྶ སམྦྷཝཏོ ‘‘ཨཱིདིསཾ སམྦནྡྷནཾ ཝིནཱསེཏྭཱཝ སཱིམཱ སམྨནྣིཏབྦཱ’’ཏི ཨཊྛཀཐཱཡམྤི ན ཝུཏྟཾ.

ཡདི ཙེཏྠ རུཀྑཱདིསམྦནྡྷེན ཀམྨཝིཔཏྟི བྷཝེཡྻ, ཨཝསྶམེཝ ཝཏྟབྦཾ སིཡཱ. ཝིཔཏྟིཔརིཧཱརཏྠཉྷི ཨཱཙརིཡཱ ནིརཱསངྐཊྛཱནེསུཔི ‘‘བྷིཏྟིཾ ཨཀིཏྟེཏྭཱ’’ཏིཨཱདིནཱ སིདྡྷམེཝཏྠཾ པུནཔྤུནཾ ཨཝོཙུཾ. ཨིདྷ པན ‘‘ཝནམཛ྄ཛྷེ ཝིཧཱརཾ ཀརོནྟི, ཝནཾ ན ཀིཏྟེཏབྦ’’ནྟིཨཱདིརུཀྑལཏཱདཱིཧི ནིརནྟརེ ཝནམཛ྄ཛྷེཔི སཱིམཱབནྡྷནམེཝ ཨཝོཙུཾ. ཏཐཱ ཐམྦྷཱནཾ ཨུཔརི ཀཏཔཱསཱདཱདཱིསུ ཧེཊྛཱ ཐམྦྷཱདཱིཧི ཨེཀཱབདྡྷེསུ ཨུཔརིམཏལཱདཱིསུ སཱིམཱབནྡྷནཾ བཧུདྷཱ ཝུཏྟཾ. ཏསྨཱ བདྡྷསཱིམཱགཱམསཱིམཱནཾ རུཀྑཱདིསམྦནྡྷོ ཏེཧི མུཁཏོཝ ཝིཧིཏོ. ཨཔིཙ གཱམསཱིམཱནམྤི པཱཊེཀྐཾ བདྡྷསཱིམཱསདིསཏཱཡ ཨེཀིསྶཱ གཱམསཱིམཱཡ ཀམྨཾ ¶ ཀརོནྟེཧི དབྦཏིཎམཏྟེནཱཔི སམྦནྡྷཱ གཱམནྟརཔརམྤརཱ ཨརཉྙནདིསམུདྡཱ ཙ སོདྷེཏབྦཱཏི སཀལདཱིཔཾ སོདྷེཏྭཱཝ ཀཱཏབྦཾ སིཡཱ. ཨེཝཾ པན ཨསོདྷེཏྭཱ པཋམམཧཱསངྒཱིཏིཀཱལཏོ པབྷུཏི ཀཏཱནཾ ཨུཔསམྤདཱདིཀམྨཱནཾ, སཱིམཱསམྨུཏཱིནཉྩ ཝིཔཛྫནཏོ སབྦེསམྤི བྷིཀྑཱུནཾ ཨནུཔསམྤནྣསངྐཱཔསངྒོ ཙ དུནྣིཝཱརོ ཧོཏི. ན ཙེཏཾ ཡུཏྟཾ. ཏསྨཱ ཝུཏྟནཡེནེཝ ཝིསབྷཱགསཱིམཱནམེཝ རུཀྑཱདཱིཧི སམྦནྡྷདོསོ, ན བདྡྷསཱིམཱགཱམསཱིམཱདཱིནཾ སབྷཱགསཱིམཱནནྟི གཧེཏབྦཾ.

མཧཱསཱིམཱསོདྷནསྶ དུཀྐརཏཱཡ ཁཎྜསཱིམཱཡམེཝ ཡེབྷུཡྻེན སངྒྷཀམྨཀརཎནྟི ཨཱཧ ‘‘སཱིམཱམཱལ༹ཀེ’’ཏིཨཱདི ¶ . མཧཱསངྒྷསནྣིཔཱཏེ པན ཁཎྜསཱིམཱཡ ཨཔྤཧོནཀཏཱཡ མཧཱསཱིམཱཡ ཀམྨེ ཀརིཡམཱནེཔི ཨཡཾ ནཡོ གཧེཏབྦོཝ.

‘‘ཨུཀྑིཔཱཔེཏྭཱ’’ཏི ཨིམིནཱ ཀཱཡཔཊིབདྡྷེནཔི སཱིམཾ ཕུསནྟོ སཱིམཊྛོཝ ཧོཏཱིཏི དསྶེཏི. པུརིམནཡེཔཱིཏི ཁཎྜསཱིམཏོ མཧཱསཱིམཾ པཝིཊྛསཱཁཱནཡེཔི. སཱིམཊྛརུཀྑསཱཁཱཡ ནིསིནྣོ སཱིམཊྛོཝ ཧོཏཱིཏི ཨཱཧ ‘‘ཧཏྠཔཱསམེཝ ཨཱནེཏབྦོ’’ཏི. ཨེཏྠ ཙ རུཀྑསཱཁཱདཱིཧི ཨཉྙམཉྙཾ སམྦནྡྷཱསུ ཨེཏཱསུ ཁནྡྷསཱིམཱཡཾ ཏཡོ བྷིཀྑཱུ, མཧཱསཱིམཱཡཾ དྭེཏི ཨེཝཾ དྭཱིསུ སཱིམཱསུ སཱིམནྟརིཀཾ ཨཕུསིཏྭཱ, ཧཏྠཔཱསཉྩ ཨཝིཛཧིཏྭཱ ཋིཏེཧི པཉྩཧི བྷིཀྑཱུཧི ཨུཔསམྤདཱདིཀམྨཾ ཀཱཏུཾ ཝཊྚཏཱིཏི ཀེཙི ཝདནྟི. ཏཾ ན ཡུཏྟཾ ‘‘ནཱནཱསཱིམཱཡ ཋིཏཙཏུཏྠོ ཀམྨཾ ཀརེཡྻ, ཨཀམྨཾ, ན ཙ ཀརཎཱིཡ’’ནྟིཨཱདི (མཧཱཝ. ༣༨༩) ཝཙནཏོ. ཏེནེཝེཏྠཱཔི མཧཱསཱིམཾ སོདྷེཏྭཱ མཱལ༹ཀསཱིམཱཡམེཝ ཀམྨཀརཎཾ ཝིཧིཏཾ. ཨཉྙཐཱ བྷིནྣསཱིམཊྛཏཱཡ ཏཏྲཊྛསྶ གཎཔཱུརཀཏྟཱབྷཱཝཱ ཀམྨཀོཔོཝ ཧོཏཱིཏི.

ཡདི ཨེཝཾ ཀཐཾ ཚནྡཔཱརིསུདྡྷིཨཱཧརཎཝསེན མཧཱསཱིམཱསོདྷནནྟི? ཏམྤི ཝིནཡཉྙཱུ ན ཨིཙྪནྟི, ཧཏྠཔཱསཱནཡནབཧིསཱིམཱཀརཎཝསེནེཝ པནེཏྠ སོདྷནཾ ཨིཙྪནྟི, དིནྣསྶཱཔི ཚནྡསྶ ཨནཱགམནེན མཧཱསཱིམཊྛོ ཀམྨཾ ཀོཔེཏཱིཏི. ཡདི ཙསྶ ཚནྡཱདི ནཱགཙྪཏི, ཀཐཾ སོ ཀམྨཾ ཀོཔེསྶཏཱིཏི? དྭིནྣཾ ཝིསབྷཱགསཱིམཱནཾ སམྦནྡྷདོསཏོ. སོ ཙ སམྦནྡྷདོསོ ཨཊྛཀཐཱཝཙནཔྤམཱཎཏོ. ན ཧི ཝིནཡེ སབྦཏྠ ཡུཏྟི སཀྐཱ ཉཱཏུཾ བུདྡྷགོཙརཏྟཱཏི ཝེདིཏབྦཾ. ཀེཙི པན ‘‘སཙེ དྭེཔི སཱིམཱཡོ པཱུརེཏྭཱ ནིརནྟརཾ ¶ ཋིཏེསུ བྷིཀྑཱུསུ ཀམྨཾ ཀརོནྟེསུ ཨེཀིསྶཱ ཨེཝ སཱིམཱཡ གཎོ ཙ ཨུཔསམྤདཱཔེཀྑོ ཙ ཨནུསྶཱཝཀོ ཙ ཨེཀཏོ ཏིཊྛཏི, ཀམྨཾ སུཀཏམེཝ ཧོཏི. སཙེ པན ཀམྨཱརཧོ ཝཱ ཨནུསྶཱཝཀོ ཝཱ སཱིམནྟརཊྛོ ཧོཏི, ཀམྨཾ ཝིཔཛྫཏཱི’’ཏི ཝདནྟི, ཏཉྩ བདྡྷསཱིམཱགཱམསཱིམཱདིསབྷཱགསཱིམཱསུ ཨེཝ ཡུཛྫཏི, ཡཱསུ ཨཉྙམཉྙཾ རུཀྑཱདིསམྦནྡྷེསུཔི དོསོ ནཏྠི. ཡཱསུ པན ཨཏྠི, ན ཏཱསུ ཝིསབྷཱགསཱིམཱསུ རུཀྑཱདིསམྦནྡྷེ སཏི ཨེཀཏྠ ཋིཏོ ཨིཏརཊྛཱནཾ ཀམྨཾ ཀོཔེཏི ཨེཝ ཨཊྛཀཐཱཡཾ སཱམཉྙཏོ སོདྷནསྶ ཝུཏྟཏྟཱཏི ཨམྷཱཀཾ ཁནྟི. ཝཱིམཾསིཏྭཱ གཧེཏབྦཾ.

ན ཨོཏརཏཱིཏི པཎཝསཎྛཱནཔབྦཏཱདཱིསུ ཧེཊྛཱ པམཱཎརཧིཏཊྛཱནཾ ན ཨོཏརཏི. ཀིཉྩཱཔི པནེཏྠ བཛ྄ཛྷམཱནཀྑཎེ ཨུདྡྷམྤི པམཱཎརཧིཏཾ པབྦཏཱདཱིནི ནཱརོཧཏི, ཏཐཱཔི ཏཾ པཙྪཱ སཱིམཊྛཏཱཡ སཱིམཱ ཧོཏི. ཧེཊྛཱ པཎཝསཎྛཱནཱདི པན ཨུཔརི བདྡྷཱཡཔི སཱིམཱཡ སཱིམཱསངྑྱཾ ན གཙྪཏི, ཏསྶ ཝསེན ན ཨོཏརཏཱིཏི ཝུཏྟཾ, ཨིཏརཐཱ ཨོརོཧཎཱརོཧཎཱནཾ སཱདྷཱརཎཝསེན ‘‘ན ཨོཏརཏཱི’’ཏིཨཱདིནཱ ¶ ཝཏྟབྦཏོ. ཡཾ ཀིཉྩཱིཏི ནིཊྛིཏསཱིམཱཡ ཨུཔརི ཛཱཏཾ ཝིཛྫམཱནཾ པུབྦེ ཋིཏཾ, པཙྪཱ སཉྫཱཏཾ, པཝིཊྛཉྩ ཡཾཀིཉྩི སཝིཉྙཱཎཀཱཝིཉྙཱཎཀཾ སབྦམྤཱིཏི ཨཏྠོ. ཨནྟོསཱིམཱཡ ཧི ཧཏྠིཀྑནྡྷཱདིསཝིཉྙཱཎཀེསུ ནིསིནྣོཔི བྷིཀྑུ སཱིམཊྛོཝ ཧོཏི. ‘‘བདྡྷསཱིམཱཡཱ’’ཏི ཨིདཉྩ པཀརཎཝསེན ཨུཔལཀྑཎཏོ ཝུཏྟཾ. ཨབདྡྷསཱིམཱསུཔི སབྦཱསུ ཋིཏཾ ཏཾ སཱིམཱསངྑྱམེཝ གཙྪཏི.

ཨེཀསམྦདྡྷེན གཏནྟི རུཀྑལཏཱདིཏཏྲཛཱཏམེཝ སནྡྷཱཡ ཝུཏྟཾ. ཏཱདིསམྤི ‘‘ཨིཏོ གཏ’’ནྟི ཝཏྟབྦཏཾ ཨརཧཏི. ཡཾ པན ‘‘ཨིཏོ གཏ’’ནྟི ཝཱ ‘‘ཏཏོ ཨཱགཏ’’ནྟི ཝཱ ཝཏྟུཾ ཨསཀྐུཎེཡྻཾ ཨུབྷོསུ བདྡྷསཱིམཱགཱམསཱིམཱསུ, ཨུདཀུཀྑེཔནདིཨཱདཱིསུ ཙ ཏིརིཡཾ པཏིཏརཛྫུདཎྜཱདི, ཏཏྠ ཀིཾ ཀཱཏབྦནྟི? ཨེཏྠ པན བདྡྷསཱིམཱཡ པཏིཊྛིཏབྷཱགོ བདྡྷསཱིམཱ, ཨབདྡྷགཱམསཱིམཱཡ པཏིཊྛིཏབྷཱགོ གཱམསཱིམཱ ཏདུབྷཡསཱིམཊྛཔབྦཏཱདི ཝིཡ. བདྡྷསཱིམཏོ ཨུཊྛིཏཝཊརུཀྑསྶ པཱརོཧེ, གཱམསཱིམཱཡ གཱམསཱིམཏོ ཨུཊྛིཏཝཊརུཀྑསྶ པཱརོཧེ ཙ བདྡྷསཱིམཱཡ པཏིཊྛིཏེཔི ཨེསེཝ ནཡོ. མཱུལཔཏིཊྛིཏཀཱལཏོ ཧི པཊྛཱཡ ‘‘ཨིཏོ གཏཾ, ཏཏོ ཨཱགཏ’’ནྟི ཝཏྟུཾ ཨསཀྐུཎེཡྻཏོ སོ བྷཱགོ ཡཐཱཔཝིཊྛསཱིམཱསངྑྱམེཝ གཙྪཏི, ཏེསཾ རུཀྑཔཱརོཧཱནཾ ཨནྟརཱ པན ཨཱཀཱསཊྛསཱཁཱ བྷཱུམིཡཾ སཱིམཱཔརིཙྪེདཔྤམཱཎེན ¶ ཏདུབྷཡསཱིམཱ ཧོཏཱིཏི ཀེཙི ཝདནྟི. ཡསྨཱ པནསྶ སཱཁཱཡ པཱརོཧོ པཝིཊྛསཱིམཱཡ པཐཝིཡཾ མཱུལེཧི པཏིཊྛཧིཏྭཱཔི ཡཱཝ སཱཁཾ ཝིནཱ ཋཱཏུཾ ན སཀྐོཏི, ཏཱཝ མཱུལསཱིམཊྛཏཾ ན ཝིཛཧཏི. ཡདཱ པན ཝིནཱ ཋཱཏུཾ སཀྐོཏི, ཏདཱཔི པཱརོཧམཏྟམེཝ པཝིཊྛསཱིམཊྛཏཾ སམུཔེཏི. ཏསྨཱ སབྦོཔི ཨཱཀཱསཊྛསཱཁཱབྷཱགོ པུརིམསཱིམཊྛཏཾ ན ཝིཛཧཏི, ཏཏོ ཨཱགཏབྷཱགསྶ ཨཝིཛཧིཏཏྟཱཏི ཨམྷཱཀཾ ཁནྟི. ཨུདཀུཀྑེཔནདིཨཱདཱིསུཔི ཨེསེཝ ནཡོ. ཏཏྠ ཙ ཝིསབྷཱགསཱིམཱཡ ཨེཝཾ པཝིཊྛེ སཀལསཱིམཱསོདྷནཾ, སབྷཱགཱཡ པཝིཊྛེ ཕུསིཏྭཱ ཋིཏམཏྟབྷིཀྑུསོདྷནཉྩ སབྦཾ པུབྦེ ཝུཏྟནཡམེཝ.

༡༤༠. པཱརཡཏཱིཏི ཨཛ྄ཛྷོཏྠརཏི, ནདིཡཱ ཨུབྷོསུ ཏཱིརེསུ པཏིཊྛམཱནཱ སཱིམཱ ནདིཨཛ྄ཛྷོཏྠརཱ ནཱམ ཧོཏཱིཏི ཨཱཧ ‘‘ནདིཾཨཛ྄ཛྷོཏྠརམཱན’’ནྟི. ཨནྟོནདིཡཉྷི སཱིམཱ ན ཨོཏརཏི. ནདིལཀྑཎེ པན ཨསཏི ཨོཏརཏི, སཱ ཙ ཏདཱ ནདིཔཱརསཱིམཱ ན ཧོཏཱིཏི ཨཱཧ ‘‘ནདིཡཱ ལཀྑཎཾ ནདིནིམིཏྟེ ཝུཏྟནཡམེཝཱ’’ཏི. ཨསྶཱཏི བྷཝེཡྻ. ཨཝསྶཾ ལབྦྷནེཡྻཱ པན དྷུཝནཱཝཱཝ ཧོཏཱིཏི སམྦནྡྷོ. ‘‘ན ནཱཝཱཡཱ’’ཏི ཨིམིནཱ ནཱཝཾ ཝིནཱཔི སཱིམཱ བདྡྷཱ སུབདྡྷཱ ཨེཝ ཧོཏི, ཨཱཔཏྟིཔརིཧཱརཏྠཱ ནཱཝཱཏི དསྶེཏི.

རུཀྑསངྒྷཱཊམཡོཏི ¶ ཨནེཀརུཀྑེ ཨེཀཏོ གྷཊེཏྭཱ ཀཏསེཏུ. རུཀྑཾ ཚིནྡིཏྭཱ ཀཏོཏི པཱཋསེསོ. ‘‘སབྦནིམིཏྟཱནཾ ཨནྟོ ཋིཏེ བྷིཀྑཱུ ཧཏྠཔཱསགཏེ ཀཏྭཱ’’ཏི ཨིདཾ ཨུབྷིནྣཾ ཏཱིརཱནཾ ཨེཀགཱམཁེཏྟབྷཱཝཾ སནྡྷཱཡ ཝུཏྟཾ. པབྦཏསཎྛཱནཱཏི ཨེཀཏོ ཨུགྒཏདཱིཔསིཁརཏྟཱ ཝུཏྟཾ.

སཱིམཱནུཛཱནནཀཐཱཝཎྞནཱ ནིཊྛིཏཱ.

ཨུཔོསཐཱགཱརཱདིཀཐཱཝཎྞནཱ

༡༤༡. སམཱུཧནིཏྭཱཏི ཝིནཱསེཏྭཱ, ཨུདྡྷརིཏྭཱཏི ཨཏྠོ. ཨིདཉྩ ཨཱཔཏྟིཔརིཧཱརཏྠཾ ཝུཏྟཾ.

༡༤༢. ཡཱནི ཀཱནིཙཱིཏི ཨིདྷ ནིམིཏྟཱནཾ སཱིམཱཡ པཱལི༹ཡཾ སརཱུཔཏོ ཨཝུཏྟཏྟཱ ཝུཏྟཾ.

ཨུཔོསཐཱགཱརཱདིཀཐཱཝཎྞནཱ ནིཊྛིཏཱ.

ཨཝིཔྤཝཱསསཱིམཱནུཛཱནནཀཐཱཝཎྞནཱ

༡༤༣. ཨཊྛཱརསཱཏི ¶ ཨནྡྷཀཝིནྡཝིཧཱརམྤི ཨུཔཱདཱཡ ཝུཙྩཏི. ནེསཾ སཱིམཱཏི ཏེསུ མཧཱཝིཧཱརེསུ. ‘‘མན’’ནྟི ཨིམསྶ ཝིཝརཎཾ ཨཱིསཀནྟི, ཨཱིསཀཾ ཝུལ༹ྷོཏི ཨཏྠོ. ཨིམམེཝཏྠཾ དསྶེཏུཾ ‘‘ཨཔྤཏྟཝུལ༹ྷབྷཱཝོ ཨཧོསཱི’’ཏི ཝུཏྟཾ. ཨམནསིཀརོནྟོཏི ཨིདྡྷིཡཱ ཨནཏིཀྐམསྶ ཀཱརཎཾ ཝུཏྟཾ.

༡༤༤. སོཏི བྷིཀྑུནིསངྒྷོ. དྭེཔཱིཏི དྭེ སམཱནསཾཝཱསཨཝིཔྤཝཱསཱཡོ. ཨཝིཔྤཝཱསསཱིམཱཏི མཧཱསཱིམཾ སནྡྷཱཡ ཝདཏི. ཏཏྠེཝ ཡེབྷུཡྻེན ཨཝིཔྤཝཱསཱཏི.

‘‘ཨཝིཔྤཝཱསཾ ཨཛཱནནྟཱཔཱི’’ཏི ཨིདཾ མཧཱསཱིམཱཡ ཝིཛྫམཱནཱཝིཛྫམཱནཏྟཾ, ཏསྶཱ བཱཧིརཔརིཙྪེདཉྩ ཨཛཱནནྟཱནཾ ཝསེན ཝུཏྟཾ. ཨེཝཾ ཨཛཱནནྟེཧིཔི ཨནྟོསཱིམཱཡ ཋཏྭཱ ཀམྨཝཱཙཱཡ ཀཏཱཡ སཱ སཱིམཱ སམཱུཧཏཱཝ ཧོཏཱིཏི ཨཱཧ ‘‘སམཱུཧནིཏུཉྩེཝ བནྡྷིཏུཉྩ སཀྑིསྶནྟཱི’’ཏི. ནིརཱསངྐཊྛཱནེཏི ཁཎྜསཱིམཱརཧིཏཊྛཱནེ. ཨིདཉྩ མཧཱསཱིམཱཡ ཝིཛྫམཱནཱཡཔི ཀམྨཀརཎསུཁཏྠཾ ཁཎྜསཱིམཱ ཨིཙྪིཏཱཏི ཏཾ ཙེཏིཡངྒཎཱདིབཧུསནྣིཔཱཏཊྛཱནེ ན བནྡྷཏཱིཏི ཝུཏྟཾ. ཏཏྠཱཔི ¶ སཱ བདྡྷཱ སུབདྡྷཱ ཨེཝ མཧཱསཱིམཱ ཝིཡ. ‘‘པཊིབནྡྷིཏུཾ པན ན སཀྑིསྶནྟེཝཱ’’ཏི ཨིདཾ ཁཎྜསཱིམཱཡ ཨསམཱུཧཏཏྟཱ, ཏསྶཱ ཨཝིཛྫམཱནཏྟསྶ ཨཛཱནནཏོ ཙ མཧཱསཱིམཱབནྡྷནཾ སནྡྷཱཡ ཝུཏྟཾ. ཁཎྜསཱིམཾ པན ནིརཱསངྐཊྛཱནེ བནྡྷིཏུཾ སཀྑིསྶནྟེཝ. སཱིམཱསམྦྷེདཾ ཀཏྭཱཏི ཁཎྜསཱིམཱཡ ཝིཛྫམཱནཔཀྑེ སཱིམཱཡ སཱིམཾ ཨཛ྄ཛྷོཏྠརཎསམྦྷེདཾ ཀཏྭཱ ཨཝིཛྫམཱནཔཀྑེཔི སམྦྷེདསངྐཱཡ ཨནིཝཏྟནེན སམྦྷེདསངྐཾ ཀཏྭཱ. ཨཝིཧཱརཾ ཀརེཡྻུནྟི སངྒྷཀམྨཱནཱརཧཾ ཀརེཡྻུཾ. པུབྦེ ཧི ཙེཏིཡངྒཎཱདིནིརཱསངྐཊྛཱནེ ཀམྨཾ ཀཱཏུཾ སཀྐཱ, ཨིདཱནི ཏམྤི ཝིནཱསིཏནྟི ཨདྷིཔྤཱཡོ. ན སམཱུཧནིཏབྦཱཏི ཁཎྜསཱིམཾ ཨཛཱནནྟེཧི ན སམཱུཧནིཏབྦཱ. ཨུབྷོཔི ན ཛཱནནྟཱིཏི ཨུབྷིནྣཾ པདེསནིཡམཾ ཝཱ ཏཱསཾ དྭིནྣམྤི ཝཱ ཨཉྙཏརཱཡ ཝཱ ཝིཛྫམཱནཏཾ ཝཱ ཨཝིཛྫམཱནཏཾ ཝཱ ན ཛཱནནྟི, སབྦཏྠ སངྐཱ ཨེཝ ཧོཏི. ‘‘ནེཝ སམཱུཧནིཏུཾ, ན བནྡྷིཏུཾ སཀྑིསྶནྟཱི’’ཏི ཨིདཾ ནིརཱསངྐཊྛཱནེ ཋཏྭཱ སམཱུཧནིཏུཾ སཀྐོནྟོཔི མཧཱསཱིམཾ པཊིབནྡྷིཏུཾ ན སཀྐོནྟཱིཏི ཨིམམཏྠཾ སནྡྷཱཡ ཝུཏྟཾ. ‘‘ན ཙ སཀྐཱ…པེ… ཀམྨཝཱཙཾ ཀཱཏུ’’ནྟི ཨིདཾ སཱིམཱབནྡྷནཀམྨཝཱཙཾ སནྡྷཱཡ ཝུཏྟཾ. ཏསྨཱཏི ཡསྨཱ བནྡྷིཏུཾ ན སཀྐཱ, ཏསྨཱ ན སམཱུཧནིཏབྦཱཏི ཨཏྠོ.

ཀེཙི ¶ པན ‘‘ཨཱིདིསེསུ ཝིཧཱརེསུ ཚཔཉྩམཏྟེ བྷིཀྑཱུ གཧེཏྭཱ ཝིཧཱརཀོཊིཏོ པཊྛཱཡ ཝིཧཱརཔརིཀྑེཔསྶ ཨནྟོ ཙ བཧི ཙ སམནྟཱ ལེཌྜུཔཱཏེ སབྦཏྠ མཉྩཔྤམཱཎེ ཨོཀཱསེ ནིརནྟརཾ ཋཏྭཱ པཋམཾ ཨཝིཔྤཝཱསསཱིམཾ, ཏཏོ སམཱནསཾཝཱསཀསཱིམཉྩ སམཱུཧནནཝསེན སཱིམཱཡ སམུགྒྷཱཏེ ཀཏེ ཏསྨིཾ ཝིཧཱརེ ཁཎྜསཱིམཱཡ, མཧཱསཱིམཱཡཔི ཝཱ ཝིཛྫམཱནཏྟེ སཏི ཨཝསྶཾ ཨེཀསྨིཾ མཉྩཊྛཱནེ ཏཱསཾ མཛ྄ཛྷགཏཱ ཏེ བྷིཀྑཱུ ཏཱ སམཱུཧནེཡྻུཾ, ཏཏོ གཱམསཱིམཱ ཨེཝ ཨཝསིསྶེཡྻ. ན ཧེཏྠ སཱིམཱཡ, ཏཔྤརིཙྪེདསྶ ཝཱ ཛཱནནཾ ཨངྒཾ. སཱིམཱཡ པན ཨནྟོཋཱནཾ, ‘‘སམཱུཧནིསྶཱམཱ’’ཏི ཀམྨཝཱཙཱཡ ཀརཎཉྩེཏྠ ཨངྒཾ. ཨཊྛཀཐཱཡཾ ‘ཁཎྜསཱིམཾ པན ཛཱནནྟཱ ཨཝིཔྤཝཱསཾ ཨཛཱནནྟཱཔི སམཱུཧནིཏུཉྩེཝ བནྡྷིཏུཉྩ སཀྑིསྶནྟཱི’ཏི ཨེཝཾ མཧཱསཱིམཱཡ པརིཙྪེདསྶ ཨཛཱནནེཔི སམཱུཧནསྶ ཝུཏྟཏྟཱ. གཱམསཱིམཱཡ ཨེཝ ཙ ཨཝསིཊྛཱཡ ཏཏྠ ཡཐཱརུཙི དུཝིདྷམྤི སཱིམཾ བནྡྷིཏུཉྩེཝ ཨུཔསམྤདཱདིཀམྨཾ ཀཱཏུཉྩ ཝཊྚཏཱི’’ཏི ཝདནྟི, ཏཾ ཡུཏྟཾ ཝིཡ དིསྶཏི. ཝཱིམཾསིཏྭཱ གཧེཏབྦཾ.

ཨཝིཔྤཝཱསསཱིམཱནུཛཱནནཀཐཱཝཎྞནཱ ནིཊྛིཏཱ.

གཱམསཱིམཱདིཀཐཱཝཎྞནཱ

༡༤༧. པཱལི༹ཡཾ ¶ ‘‘ཨསམྨཏཱཡ, བྷིཀྑཝེ, སཱིམཱཡཱ’’ཏིཨཱདིནཱ གཱམསཱིམཱ ཨེཝ བདྡྷསཱིམཱཡ ཁེཏྟཾ, ཨརཉྙནདིཨཱདཡོ ཝིཡ སཏྟབྦྷནྟརཨུདཀུཀྑེཔཱདཱིནཾ. སཱ ཙ གཱམསཱིམཱ བདྡྷསཱིམཱཝིརཧིཏཊྛཱནེ སཡམེཝ སམཱནསཾཝཱསཱ ཧོཏཱིཏི དསྶེཏི. ཡཱ ཏསྶ ཝཱ གཱམསྶ གཱམསཱིམཱཏི ཨེཏྠ གཱམསཱིམཱཔརིཙྪེདསྶ ཨནྟོ ཙ བཧི ཙ ཁེཏྟཝཏྠུཨརཉྙཔབྦཏཱདིཀཾ སབྦཾ གཱམཁེཏྟཾ སནྡྷཱཡ ‘‘གཱམསྶཱ’’ཏི ཝུཏྟཾ, ན ཨནྟརགྷརམེཝ. ཏསྨཱ ཏསྶ སཀལསྶ གཱམཁེཏྟསྶ སམྦནྡྷནཱིཡཱ གཱམསཱིམཱཏི ཨེཝམཏྠོ ཝེདིཏབྦོ. ཡོ ཧི སོ ཨནྟརགྷརཁེཏྟཱདཱིསུ ཨནེཀེསུ བྷཱུམིབྷཱགེསུ ‘‘གཱམོ’’ཏི ཨེཀཏྟེན ལོཀཛནེཧི པཉྙཏྟོ གཱམཝོཧཱརོ, སོཝ ཨིདྷ ‘‘གཱམསཱིམཱ’’ཏིཔི ཝུཙྩཏཱིཏི ཨདྷིཔྤཱཡོ, གཱམོ ཨེཝ ཧི གཱམསཱིམཱ. ཨིམིནཱཝ ནཡེན ཨུཔརི ཨརཉྙཾ ནདཱི སམུདྡོ ཛཱཏསྶརོཏི ཨེཝཾ ཏེསུ བྷཱུམིཔྤདེསེསུ ཨེཀཏྟེན ལོཀཛནཔཉྙཏྟཱནམེཝ ཨརཉྙཱདཱིནཾ ཨརཉྙསཱིམཱདིབྷཱཝོ ཝེདིཏབྦོ. ལོཀེ པན གཱམསཱིམཱདིཝོཧཱརོ གཱམཱདཱིནཾ ¶ མརིཡཱདཱཡམེཝ ཝཏྟུཾ ཝཊྚཏི, ན གཱམཁེཏྟཱདཱིསུ སབྦཏྠ. སཱསནེ པན ཏེ གཱམཱདཡོ ཨིཏརནིཝཏྟིཨཏྠེན སཡམེཝ ཨཏྟནོ མརིཡཱདཱཏི ཀཏྭཱ གཱམོ ཨེཝ གཱམསཱིམཱ, ཨརཉྙམེཝ ཨརཉྙསཱིམཱ…པེ… སམུདྡོ ཨེཝ སམུདྡསཱིམཱཏི སཱིམཱཝོཧཱརེན ཝུཏྟཱཏི ཝེདིཏབྦཱ.

‘‘ནིགམསྶ ཝཱ’’ཏི ཨིདཾ གཱམསཱིམཔྤབྷེདཾ སབྦཾ ཨུཔལཀྑཎཝསེན དསྶེཏུཾ ཝུཏྟཾ. ཏེནཱཧ ‘‘ནགརམྤི གཧིཏམེཝཱ’’ཏི. ‘‘བལིཾ ལབྷནྟཱི’’ཏི ཨིདཾ ཡེབྷུཡྻཝསེན ཝུཏྟཾ, ‘‘ཨཡཾ གཱམོ ཨེཏྟཀོ ཀརཱིསབྷཱགོ’’ཏིཨཱདིནཱ པན རཱཛཔཎྞེསུ ཨཱརོཔིཏེསུ བྷཱུམིབྷཱགེསུ ཡསྨིཾ ཡསྨིཾ ཏལཱ༹ཀམཱཏིཀཱསུསཱནཔབྦཏཱདིཀེ པདེསེ བལིཾ ན གཎྷནྟི, སོཔི གཱམསཱིམཱ ཨེཝ. རཱཛཱདཱིཧི པརིཙྪིནྣབྷཱུམིབྷཱགོ ཧི སབྦོཝ ཋཔེཏྭཱ ནདིལོཎིཛཱཏསྶརེ གཱམསཱིམཱཏི ཝེདིཏབྦོ. ཏེནཱཧ ‘‘པརིཙྪིནྡིཏྭཱ རཱཛཱ ཀསྶཙི དེཏཱི’’ཏི. སཙེ པན ཏཏྠ རཱཛཱ ཀཉྩི པདེསཾ གཱམནྟརེན ཡོཛེཏི, སོ པཝིཊྛགཱམསཱིམཏཾ ཨེཝ བྷཛཏི, ནདིཛཱཏསྶརེསུ ཝིནཱསེཏྭཱ ཏལཱ༹ཀཱདིབྷཱཝཾ ཝཱ པཱུརེཏྭཱ ཁེཏྟཱདིབྷཱཝཾ ཝཱ པཱཔིཏེསུཔི ཨེསེཝ ནཡོ.

ཡེ པན གཱམཱ རཱཛཙོརཱདིབྷཡཔཱིལི༹ཏེཧི མནུསྶེཧི ཚཌྜིཏཱ ཙིརམྤི ནིམྨནུསྶཱ ཏིཊྛནྟི, སམནྟཱ པན གཱམཱ སནྟི, ཏེཔི པཱཊེཀྐཾ གཱམསཱིམཱཝ. ཏེསུ ཧི རཱཛཱནོ སམནྟགཱམཝཱསཱིཧི ཀསཱཔེཏྭཱ ཝཱ ཡེཧི ཀེཧིཙི ཀསིཏཊྛཱནཾ ལིཁིཏྭཱ ཝཱ བལིཾ གཎྷནྟི, ཨཉྙེན ཝཱ གཱམེན ཨེཀཱིབྷཱཝཾ ཝཱ ཨུཔནེནྟི. ཡེ པན གཱམཱ རཱཛཱུཧིཔི པརིཙྩཏྟཱ གཱམཁེཏྟཱནནྟརིཀཱ མཧཱརཉྙེན ཨེཀཱིབྷཱུཏཱ, ཏེ ཨགཱམཀཱརཉྙསཱིམཏཾ པཱཔུཎནྟི, པུརིམཱ གཱམསཱིམཱ ¶ ཝིནསྶཏི. རཱཛཱནོ པན ཨེཀསྨིཾ ཨརཉྙཱདིཔྤདེསེ མཧནྟཾ གཱམཾ ཀཏྭཱ ཨནེཀསཧསྶཱནི ཀུལཱནི ཝཱསཱཔེཏྭཱ ཏཏྠ ཝཱསཱིནཾ བྷོགགཱམཱཏི སམནྟཱ བྷཱུཏགཱམེ པརིཙྪིནྡིཏྭཱ དེནྟི. པུརཱཎནཱམཾ, པན པརིཙྪེདཉྩ ན ཝིནཱསེནྟི, ཏེཔི པཙྩེཀཾ གཱམསཱིམཱ ཨེཝ. ཨེཏྟཱཝཏཱ པུརིམགཱམསཱིམཏྟཾ ན ཝིཛཧནྟི. སཱ ཙ ཨིཏརཱ ཙཱཏིཨཱདི ‘‘སམཱནསཾཝཱསཱ ཨེཀཱུཔོསཐཱ’’ཏི པཱལི༹པདསྶ ཨདྷིཔྤཱཡཝིཝརཎཾ. ཏཏྠ ཧི སཱ ཙ རཱཛིཙྪཱཝསེན པརིཝཏྟིཏྭཱ སམུཔྤནྣཱ ཨབྷིནཝཱ, ཨིཏརཱ ཙ ཨཔརིཝཏྟཱ པཀཏིགཱམསཱིམཱ, ཡཐཱ བདྡྷསཱིམཱཡ སབྦཾ སངྒྷཀམྨཾ ཀཱཏུཾ ཝཊྚཏི, ཨེཝམེཏཱཔི སབྦཀམྨཱརཧཏཱསདིསེན བདྡྷསཱིམཱསདིསཱ, སཱ སམཱནསཾཝཱསཱ ཨེཀཱུཔོསཐཱཏི ¶ ཨདྷིཔྤཱཡོ. སཱམཉྙཏོ ‘‘བདྡྷསཱིམཱསདིསཱ’’ཏི ཝུཏྟེ ཏིཙཱིཝརཱཝིཔྤཝཱསསཱིམཾ བདྡྷསཱིམཾ ཨེཝ མཉྙནྟཱིཏི ཏཾསདིསཏཱནིཝཏྟནམུཁེན ཨུཔརི སཏྟབྦྷནྟརསཱིམཱཡ ཏཾསདིསཏཱཔི ཨཏྠཱིཏི དསྶནནཡསྶ ཨིདྷེཝ པསངྒཾ དསྶེཏུཾ ‘‘ཀེཝལ’’ནྟིཨཱདི ཝུཏྟཾ.

ཝིཉྫྷཱཊཝིསདིསེ ཨརཉྙེཏི ཡཏྠ ‘‘ཨསུཀགཱམསྶ ཨིདཾ ཁེཏྟ’’ནྟི གཱམཝོཧཱརོ ནཏྠི, ཡཏྠ ཙ ན ཀསནྟི ན ཝཔནྟི, ཏཱདིསེ ཨརཉྙེ. མཙྪབནྡྷཱནཾ ཨགམནཔཐཱ ནིམྨནུསྶཱཝཱསཱ སམུདྡནྟརདཱིཔཀཱཔི ཨེཏྠེཝ སངྒཡ྄ཧནྟི. ཡཾ ཡཉྷི ཨགཱམཁེཏྟབྷཱུཏཾ ནདིསམུདྡཛཱཏསྶརཝིརཧིཏཾ པདེསཾ, ཏཾ སབྦཾ ཨརཉྙསཱིམཱཏི ཝེདིཏབྦཾ. སཱ ཙ སཏྟབྦྷནྟརསཱིམཾ ཝིནཱཝ སཡམེཝ སམཱནསཾཝཱསཱ བདྡྷསཱིམཱསདིསཱ. ནདིཨཱདིསཱིམཱསུ ཝིཡ སབྦམེཏྠ སངྒྷཀམྨཾ ཀཱཏུཾ ཝཊྚཏི. ནདིསམུདྡཛཱཏསྶརཱནཾ ཏཱཝ ཨཊྛཀཐཱཡཾ ‘‘ཨཏྟནོ སབྷཱཝེནེཝ བདྡྷསཱིམཱསདིསཱ’’ཏིཨཱདིནཱ ཝུཏྟཏྟཱ སཱིམཏཱ སིདྡྷཱ. ཨརཉྙསྶ པན སཱིམཏཱ ཀཐནྟི? སཏྟབྦྷནྟརསཱིམཱནུཛཱནནསུཏྟཱདིསཱམཏྠིཡཏོ. ཡཐཱ ཧི གཱམསཱིམཱཡ ཝགྒཀམྨཔརིཧཱརཏྠཾ བཧཱུ བདྡྷསཱིམཱཡོ ཨནུཉྙཱཏཱ, ཏཱསཉྩ དྭིནྣམནྟརཱ ཨཉྙམཉྙཾ ཨསམྦྷེདཏྠཾ སཱིམནྟརིཀཱ ཨནུཉྙཱཏཱ, ཨེཝམིདྷཱརཉྙེཔི སཏྟབྦྷནྟརསཱིམཱ. ཏཱསཉྩ དྭིནྣཾ ཨནྟརཱ སཱིམནྟརིཀཱཡ པཱལི༹ཨཊྛཀཐཱསུཔི ཝིདྷཱནསཱམཏྠིཡཏོ ཨརཉྙསྶཔི སབྷཱཝེནེཝ ནདིཨཱདཱིནཾ ཝིཡ སཱིམཱབྷཱཝོ ཏཏྠ ཝགྒཀམྨཔརིཧཱརཏྠམེཝ སཏྟབྦྷནྟརསཱིམཱཡ ཨནུཉྙཱཏཏྟཱཝ སིདྡྷོཏི ཝེདིཏབྦོ. ཏཏྠ སཱིམཱཡམེཝ ཧི ཋིཏཱ སཱིམཊྛཱནཾ ཝགྒཀམྨཾ ཀརོནྟི, ན ཨསཱིམཱཡཾ ཨཱཀཱསེ ཋིཏཱ ཝིཡ ཨཱཀཱསཊྛཱནཾ. ཨེཝམེཝ ཧི སཱམཏྠིཡཾ གཧེཏྭཱ ‘‘སབྦཱ, བྷིཀྑཝེ, ནདཱི ཨསཱིམཱ’’ཏིཨཱདིནཱ པཊིཀྑིཏྟབདྡྷསཱིམཱནམྤི ནདིསམུདྡཛཱཏསྶརཱནཾ ཨཏྟནོ སབྷཱཝེནེཝ སཱིམཱབྷཱཝོ ཨཊྛཀཐཱཡཾ ཝུཏྟོཏི གཧེཏབྦོ.

ཨཐསྶ ཋིཏོཀཱསཏོཏི ཨསྶ བྷིཀྑུསྶ ཋིཏོཀཱསཏོ. སཙེཔི ཧི བྷིཀྑུསཧསྶཾ ཏིཊྛཏི, ཏསྶ ཋིཏོཀཱསསྶ བཱཧིརནྟཏོ པཊྛཱཡ བྷིཀྑཱུནཾ ཝགྒཀམྨཔརིཧཱརཏྠཾ སཱིམཱཔེཀྑཱཡ ཨུཔྤནྣཱཡ ¶ ཏཱཡ སཧ སཡམེཝ སཉྫཱཏཱ སཏྟབྦྷནྟརསཱིམཱ སམཱནསཾཝཱསཱཏི ཨདྷིཔྤཱཡོ. ཡཏྠ པན ཁུདྡཀེ ཨརཉྙེ མཧནྟེཧི བྷིཀྑཱུཧི པརིཔུཎྞཏཱཡ ཝགྒཀམྨསངྐཱབྷཱཝེན སཏྟབྦྷནྟརསཱིམཱཔེཀྑཱ ནཏྠི, ཏཏྠ སཏྟབྦྷནྟརསཱིམཱ ན ཨུཔྤཛྫཏི, ཀེཝལཱརཉྙསཱིམཱཡམེཝ, ཏཏྠ སངྒྷེན ཀམྨཾ ཀཱཏབྦཾ. ནདིཨཱདཱིསུཔི ཨེསེཝ ནཡོ. ཝཀྑཏི ཧི ‘‘སཙེ ནདཱི ནཱཏིདཱིགྷཱ ཧོཏི, པབྷཝཏོ ¶ པཊྛཱཡ ཡཱཝ མུཁདྭཱརཱ སབྦཏྠ སངྒྷོ ནིསཱིདཏི, ཨུདཀུཀྑེཔསཱིམཱཀམྨཾ ནཏྠཱི’’ཏིཨཱདི (མཧཱཝ. ཨཊྛ. ༡༤༧). ཨིམིནཱ ཨེཝ ཙ ཝཙནེན ཝགྒཀམྨཔརིཧཱརཏྠཾ སཱིམཱཔེཀྑཱཡ སཏི ཨེཝ ཨུདཀུཀྑེཔསཏྟབྦྷནྟརསཱིམཱ ཨུཔྤཛྫནྟི, ནཱསཏཱིཏི དཊྛབྦཾ.

ཀེཙི པན ‘‘སམནྟཱ ཨབྦྷནྟརཾ མིནིཏྭཱ པརིཙྪེདཀརཎེནེཝ སཱིམཱ སཉྫཱཡཏི, ན སཡམེཝཱ’’ཏི ཝདནྟི, ཏཾ ན གཧེཏབྦཾ. ཡདི ཧི ཨབྦྷནྟརཔརིཙྪེདཀརཎཔྤཀཱརེན སཱིམཱ ཨུཔྤཛྫེཡྻ, ཨབདྡྷསཱིམཱ ཙ ན སིཡཱ བྷིཀྑཱུནཾ ཀིརིཡཱཔཀཱརསིདྡྷིཏོ. ཨཔིཙ ཝཌྜྷཀཱིཧཏྠཱནཾ, པཀཏིཧཏྠཱནཉྩ ལོཀེ ཨནེཀཝིདྷཏྟཱ, ཝིནཡེ ཨཱིདིསཾ ཧཏྠཔྤམཱཎནྟི ཨཝུཏྟཏྟཱ ཙ ཡེན ཀེནཙི མིནིཏེ ཙ བྷགཝཏཱ ཨནུཉྙཱཏེན ནུ ཁོ ཧཏྠེན མིནིཏཾ, ན ནུ ཁོཏི སཱིམཱཡ ཝིཔཏྟིསངྐཱ བྷཝེཡྻ. མིནནྟེཧི ཙ ཨཎུམཏྟམྤི ཨཱུནམདྷིཀཾ ཨཀཏྭཱ མིནིཏུཾ ཨསཀྐུཎེཡྻཏཱཡ ཝིཔཏྟི ཨེཝ སིཡཱ. པརིསཝསེན ཙཱཡཾ ཝཌྜྷམཱནཱ ཏེསཾ མིནནེན ཝཌྜྷཏི ཝཱ ཧཱཡཏི ཝཱ. སངྒྷེ ཙ ཀམྨཾ ཀཏྭཱ གཏེ ཨཡཾ བྷིཀྑཱུནཾ པཡོགེན སམུཔྤནྣསཱིམཱ ཏེསཾ པཡོགེན ཝིགཙྪཏི ན ཝིགཙྪཏི ཙ. ཀཐཾ བདྡྷསཱིམཱ ཝིཡ ཡཱཝ སཱསནནྟརདྷཱནཱ ན ཏིཊྛེཡྻ, ཋིཏིཡཱ ཙ པུརཱཎཝིཧཱརེསུ ཝིཡ སཀལེཔི ཨརཉྙེ ཀཐཾ སཱིམཱསམྦྷེདསངྐཱ ན བྷཝེཡྻ. ཏསྨཱ སཱིམཱཔེཀྑཱཡ ཨེཝ སམུཔྤཛྫཏི, ཏབྦིགམེན ཝིགཙྪཏཱིཏི གཧེཏབྦཾ. ཡཐཱ ཙེཏྠ, ཨེཝཾ ཨུདཀུཀྑེཔསཱིམཱཡམྤི ནདིཨཱདཱིསུཔི.

ཏཏྠཱཔི ཧི མཛ྄ཛྷིམཔུརིསོ ན ཉཱཡཏི. ཏཐཱ སབྦཐཱམེན ཁིཔནཾ ཨུབྷཡཏྠཱཔི ཙ ཡསྶཾ དིསཱཡཾ སཏྟབྦྷནྟརསྶ, ཨུདཀུཀྑེཔསྶ ཝཱ ཨོཀཱསོ ན པཧོཏི, ཏཏྠ ཀཐཾ མིནནཾ, ཁིཔནཾ ཝཱ བྷཝེཡྻ? གཱམཁེཏྟཱདཱིསུ པཝིསནཏོ ཨཁེཏྟེ སཱིམཱ པཝིཊྛཱ ནཱམཱཏི སཱིམཱ ཝིཔཛྫེཡྻ. ཨཔེཀྑཱཡ སཱིམུཔྤཏྟིཡཾ པན ཡཏོ པཧོཏི, ཏཏྠ སཏྟབྦྷནྟརཨུདཀུཀྑེཔསཱིམཱ སཡམེཝ པརིཔུཎྞཱ ཛཱཡནྟི. ཡཏོ པན ན པཧོཏི, ཏཏྠ ཨཏྟནོ ཁེཏྟཔྤམཱཎེནེཝ ཛཱཡནྟི, ན བཧི. ཡཾ པནེཏྠ ཨབྦྷནྟརམིནནཔམཱཎསྶ, ཝཱལུཀཱདིཁིཔནཀམྨསྶ ཙ དསྶནཾ, ཏཾ སཉྫཱཏསཱིམཱནཾ ཋིཏཊྛཱནསྶ པརིཙྪེདནཏྠཾ ཀཏཾ གཱམཱུཔཙཱརགྷརཱུཔཙཱརཛཱནནཏྠཾ ལེཌྜུསུཔྤཱདིཁིཔནཝིདྷཱནདསྶནཾ ཝིཡ. ཏེནེཝ མཱཏིཀཱཊྛཀཐཱཡཾ ‘‘སཱིམཾ ཝཱ སམྨནྣཏི ཨུདཀུཀྑེཔཾ ཝཱ པརིཙྪིནྡཏཱི’’ཏི ཝུཏྟཾ (ཀངྑཱ. ཨཊྛ. ཨཱུནཝཱིསཏིཝསྶསིཀྑཱཔདཝཎྞནཱ). ཨེཝཾ ཀཏེཔི ཏསྶ ¶ པརིཙྪེདསྶ ཡཱཐཱཝཏོ ཉཱཏུཾ ¶ ཨསཀྐུཎེཡྻཏྟེན པུཐུལཏོ ཉཏྭཱ ཨནྟོ ཏིཊྛནྟེཧི ནིརཱསངྐཊྛཱནེ ཋཱཏབྦཾ, ཨཉྙཾ བཧི ཀརོནྟེཧི ཨཏིདཱུརེ ནིརཱསངྐཊྛཱནེ པེསེཏབྦཾ.

ཨཔརེ པན ‘‘སཱིམཱཔེཀྑཱཡ ཀིཙྩཾ ནཏྠི, མགྒགམནནཧཱནཱདིཨཏྠེཧི ཨེཀབྷིཀྑུསྨིམྤི ཨརཉྙེ ཝཱ ནདིཨཱདཱིསུ ཝཱ པཝིཊྛེ ཏཾ པརིཀྑིཔིཏྭཱ སཏྟབྦྷནྟརཨུདཀུཀྑེཔསཱིམཱ སཡམེཝ པབྷཱ ཝིཡ པདཱིཔསྶ སམུཔྤཛྫཏི, གཱམཁེཏྟཱདཱིསུ ཏསྨིཾ ཨོཏིཎྞམཏྟེ ཝིགཙྪཏི. ཏེནེཝ ཙེཏྠ དྭིནྣཾ སངྒྷཱནཾ ཝིསུཾ ཀམྨཾ ཀརོནྟཱནཾ སཱིམཱདྭཡསྶ ཨནྟརཱ སཱིམནྟརིཀཱ ཨཉྙཾ སཏྟབྦྷནྟརཾ, ཨུདཀུཀྑེཔཉྩ ཋཔེཏུཾ ཨནུཉྙཱཏཾ, སཱིམཱཔརིཡནྟེ ཧི ཀེནཙི ཀམྨེན པེསིཏསྶ བྷིཀྑུནོ སམནྟཱ སཉྫཱཏསཱིམཱ ཨིཏརེསཾ སཱིམཱཡ ཕུསིཏྭཱ སཱིམཱསམྦྷེདཾ ཀརེཡྻ, སོ མཱ ཧོཏཱུཏི, ཨིཏརཐཱ ཧཏྠཙཏུརངྒུལམཏྟཱཡཔེཏྠ སཱིམནྟརིཀཱཡ ཨནུཛཱནིཏབྦཏོ. ཨཔིཙ སཱིམནྟརིཀཱཡ ཋིཏསྶཱཔི ཨུབྷཡཏྠ ཀམྨཀོཔཝཙནཏོཔི ཙེཏཾ སིཛ྄ཛྷཏི. ཏམྤི པརིཀྑིཔིཏྭཱ སཡམེཝ སཉྫཱཏཱཡ སཱིམཱཡ ཨུབྷིནྣམྤི སཱིམཱནཾ, ཨེཀཱཡ ཨེཝ ཝཱ སངྐརཏོ. ཨིཏརཐཱ ཏསྶ ཀམྨཀོཔཝཙནཾ ན ཡུཛྫེཡྻ. ཝུཏྟཉྷི མཱཏིཀཱཊྛཀཐཱཡཾ ‘པརིཙྪེདབྦྷནྟརེ ཧཏྠཔཱསཾ ཝིཛཧིཏྭཱ ཋིཏོཔི པརིཙྪེདཏོ བཧི ཨཉྙཾ ཏཏྟཀཾཡེཝ པརིཙྪེདཾ ཨནཏིཀྐམིཏྭཱ ཋིཏོཔི ཀམྨཾ ཀོཔེཏཱི’ཏི (ཀངྑཱ. ཨཊྛ. ནིདཱནཝཎྞནཱ). ཀིཉྩ ཨགཱམཀཱརཉྙེ ཋིཏསྶ ཀམྨཀརཎིཙྪཱཝིརཧིཏསྶཱཔི བྷིཀྑུནོ སཏྟབྦྷནྟརཔརིཙྪིནྣེ ཨཛ྄ཛྷོཀཱསེ ཙཱིཝརཝིཔྤཝཱསོ བྷགཝཏཱ ཨནུཉྙཱཏོ, སོ ཙ པརིཙྪེདོ སཱིམཱ. ཨེཝཾ ཨཔེཀྑཾ ཝིནཱ སམུཔྤནྣཱ. ཏེནེཝེཏྠ ‘ཨཡཾ སཱིམཱ ཏིཙཱིཝརཝིཔྤཝཱསཔརིཧཱརམྤི ལབྷཏཱི’ཏི (མཧཱཝ. ཨཊྛ. ༡༤༧) ཝུཏྟཾ. ཏསྨཱ ཀམྨཀརཎིཙྪཾ ཝིནཱཔི ཝུཏྟནཡེན སམུཔྤཏྟི གཧེཏབྦཱ’’ཏི ཝདནྟི, ཏཾ ན ཡུཏྟཾ པདཱིཔསྶ པབྷཱ ཝིཡ སབྦཔུགྒལཱནམྤི པཙྩེཀཾ སཱིམཱསམྦྷཝེན སངྒྷེ, གཎེ ཝཱ ཀམྨཾ ཀརོནྟེ ཏཏྲཊྛཱནཾ བྷིཀྑཱུནཾ སམནྟཱ པཙྩེཀཾ སམུཔྤནྣཱནཾ ཨནེཀསཱིམཱནཾ ཨཉྙམཉྙཾ སངྐརདོསཔྤསངྒཏོ. པརིསཝསེན ཙསྶཱ ཝཌྜྷི, ཧཱནི ཙ སམྦྷཝཏི. པཙྪཱ ཨཱགཏཱནཾ ཨབྷིནཝསཱིམནྟརུཔྤཏྟི ཨེཝ, གཏཱནཾ སམནྟཱ ཋིཏསཱིམཱཔི ཝིནཱསོ ཙ བྷཝེཡྻ.

པཱལི༹ཡཾ པན ‘‘སམནྟཱ སཏྟབྦྷནྟརཱ, ཨཡཾ ཏཏྠ སམཱནསཾཝཱསཱ’’ཏིཨཱདིནཱ (མཧཱཝ. ༡༤༧) ཨེཀཱ ཨེཝ སཏྟབྦྷནྟརཱ, ཨུདཀུཀྑེཔཱ ཙ ཨནུཉྙཱཏཱ, ན ཙེསཱ སཱིམཱ སབྷཱཝེན, ཀཱརཎསཱམཏྠིཡེན ཝཱ པབྷཱ ཝིཡ པདཱིཔསྶ ཨུཔྤཛྫཏི. ཀིནྟུ ¶ བྷགཝཏོ ཨནུཛཱནནེནེཝ, བྷགཝཱ ཙ ཨིམཱཡོ ཨནུཛཱནནྟོ བྷིཀྑཱུནཾ ཝགྒཀམྨཔརིཧཱརེན ཀམྨཀརཎསུཁཏྠམེཝ ཨནུཉྙཱསཱིཏི ཀཐཾ ནཧཱནཱདིཀིཙྩེན པཝིཊྛཱནམྤི སམནྟཱ ཏཱསཾ སཱིམཱནཾ སམུཔྤཏྟི པཡོཛནཱབྷཱཝཱ? པཡོཛནེ ཙ ཨེཀཾ ཨེཝ པཡོཛནནྟི ཀཐཾ པཙྩེཀཾ བྷིཀྑུགཎནཱཡ ཨནེཀསཱིམཱསམུཔྤཏྟི ¶ ? ‘‘ཨེཀསཱིམཱཡཾ ཧཏྠཔཱསཾ ཨཝིཛཧིཏྭཱ ཋིཏཱ’’ཏི (ཀངྑཱ. ཨཊྛ. ནིདཱནཝཎྞནཱ) ཝུཏྟཾ. ཡཾ པན དྭིནྣཾ སཱིམཱནཾ ཨནྟརཱ ཏཏྟཀཔརིཙྪེདེནེཝ སཱིམནྟརིཀཊྛཔནཝཙནཾ, ཏཏྠ ཋིཏཱནཾ ཀམྨཀོཔཝཙནཉྩ, ཏམྤི ཨིམཱསཾ སཱིམཱནཾ པརིཙྪེདསྶ དུབྦོདྷཏཱཡ སཱིམཱཡ སམྦྷེདསངྐཾ, ཀམྨཀོཔསངྐཉྩ དཱུརཏོ པརིཧརིཏུཾ ཝུཏྟཾ.

ཡོ ཙ ཙཱིཝརཱཝིཔྤཝཱསཏྠཾ བྷགཝཏཱ ཨབྦྷོཀཱསེ དསྶིཏོ སཏྟབྦྷནྟརཔརིཙྪེདོ, སོ སཱིམཱ ཨེཝ ན ཧོཏི, ཁེཏྟཏལཱ༹ཀཱདིཔརིཙྪེདོ ཝིཡ ཨཡམེཏྠ ཨེཀོ པརིཙྪེདོཝ. ཏཏྠ ཙ བཧཱུསུ བྷིཀྑཱུསུ ཨེཀཏོ ཋིཏེསུ ཏེསཾ ཝིསུཾ ཝིསུཾ ཨཏྟནོ ཋིཏཊྛཱནཏོ པཊྛཱཡ སམནྟཱ སཏྟབྦྷནྟརཔརིཙྪེདབྦྷནྟརེ ཨེཝ ཙཱིཝརཾ ཋཔེཏབྦཾ. ན པརིསཔརིཡནྟཏོ པཊྛཱཡ. པརིསཔརིཡནྟཏོ པཊྛཱཡ ཧི ཨབྦྷནྟརེ གཡ྄ཧམཱནེ ཨབྦྷནྟརཔརིཡོསཱནེ ཋཔིཏཙཱིཝརཾ མཛ྄ཛྷེ ཋིཏསྶ ཨབྦྷནྟརཏོ བཧི ཧོཏཱིཏི ཏཾ ཨརུཎུགྒམནེ ནིསྶགྒིཡཾ སིཡཱ. སཱིམཱ པན པརིསཔརིཡནྟཏོཝ གཧེཏབྦཱ. ཙཱིཝརཝིཔྤཝཱསཔརིཧཱརོཔེཏྠ ཨབྦྷོཀཱསཔརིཙྪེདསྶ ཝིཛྫམཱནཏྟཱ ཝུཏྟོ, ན པན ཡཱཝ སཱིམཱཔརིཙྪེདཾ ལབྦྷམཱནཏྟཱ མཧཱསཱིམཱཡ ཨཝིཔྤཝཱསསཱིམཱཝོཧཱརོ ཝིཡ. མཧཱསཱིམཱཡམྤི ཧི གཱམགཱམཱུཔཙཱརེསུ ཙཱིཝརཾ ནིསྶགྒིཡཾ ཧོཏི. ཨིདྷཱཔི མཛ྄ཛྷེ ཋིཏསྶ སཱིམཱཔརིཡནྟེ ནིསྶགྒིཡཾ ཧོཏི. ཏསྨཱ ཡཐཱཝུཏྟསཱིམཱཔེཀྑཝསེནེཝེཏཱསཾ སཏྟབྦྷནྟརཨུདཀུཀྑེཔསཱིམཱནཾ ཨུཔྤཏྟི, ཏབྦིགམེན ཝིནཱསོ ཙ གཧེཏབྦཱཏི ཨམྷཱཀཾ ཁནྟི. ཝཱིམཾསིཏྭཱ གཧེཏབྦཾ. ཨཉྙོ ཝཱ པཀཱརོ ཨིཏོ ཡུཏྟཏརོ གཝེསིཏབྦོ.

ཨིདྷ པན ‘‘ཨརཉྙེ སམནྟཱ སཏྟབྦྷནྟརཱ’’ཏི ཨེཝཾ པཱལི༹ཡཾ ཝིཉྫྷཱཊཝིསདིསེ ཨརཉྙེ སམནྟཱ སཏྟབྦྷནྟརཱཏི ཨཊྛཀཐཱཡཉྩ རུཀྑཱདིནིརནྟརེཔི ཨརཉྙེ སཏྟབྦྷནྟརསཱིམཱཡ ཝིཧིཏཏྟཱ ཨཏྟནོ ནིསྶཡབྷཱུཏཱཡ ཨརཉྙསཱིམཱཡ སཧ ཨེཏསྶཱ རུཀྑཱདིསམྦནྡྷེ དོསཱབྷཱཝོ པགེཝ ཨགཱམཀེ རུཀྑེཏི ནིསྶིཏེཔི པདེསེ ཙཱིཝརཝིཔྤཝཱསསྶ རུཀྑཔརིཧཱརཾ ཝིནཱཝ ཨབྦྷོཀཱསཔརིཧཱརོཝ ཨནུམཏོཏི སིདྡྷོཏི ཝེདིཏབྦོ.

ཨུཔཙཱརཏྠཱཡཱཏི ¶ སཱིམནྟརིཀཏྠཱཡ སཏྟབྦྷནྟརཏོ ཨདྷིཀཾ ཝཊྚཏི. ཨཱུནཀཾ པན ན ཝཊྚཏི ཨེཝ སཏྟབྦྷནྟརཔརིཙྪེདསྶ དུབྦིཛཱནཏྟཱ. ཏསྨཱ སངྒྷཾ ཝིནཱ ཨེཀེནཱཔི བྷིཀྑུནཱ བཧི ཏིཊྛནྟེན ཨཉྙཾ སཏྟབྦྷནྟརཾ ཨཏིཀྐམིཏྭཱ ཨཏིདཱུརེ ཨེཝ ཋཱཏབྦཾ, ཨིཏརཐཱ ཀམྨཀོཔསངྐཏོ. ཨུདཀུཀྑེཔེཔི ཨེསེཝ ནཡོ. ཏེནེཝ ཝཀྑཏི ‘‘ཨཱུནཀཾ པན ན ཝཊྚཏཱི’’ཏི (མཧཱཝ. ཨཊྛ. ༡༤༧). ཨིདཉྩེཏྠ སཱིམནྟརིཀཝིདྷཱནཾ དྭིནྣཾ བདྡྷསཱིམཱནཾ སཱིམནྟརིཀཱནུཛཱནནསུཏྟཱནུལོམཏོ སིདྡྷནྟི དཊྛབྦཾ. ཀིཉྩཱཔི ཧི བྷགཝཏཱ ནིདཱནཝསེན ཨེཀགཱམསཱིམཱནིསྶིཏཱནཾ ¶ , ཨེཀསབྷཱགཱནཉྩ དྭིནྣཾ བདྡྷསཱིམཱནམེཝ ཨཉྙམཉྙཾ སམྦྷེདཛ྄ཛྷོཏྠརཎདོསཔརིཧཱརཱཡ སཱིམནྟརིཀཱ ཨནུཉྙཱཏཱ, ཏཐཱཔི ཏདནུལོམཏོ ཨེཀཨརཉྙསཱིམཱནདིཨཱདིསཱིམཉྩ ནིསྶིཏཱནཾ ཨེཀསབྷཱགཱནཾ དྭིནྣཾ སཏྟབྦྷནྟརསཱིམཱནམྤི ཨུདཀུཀྑེཔསཱིམཱནམྤི ཨཉྙམཉྙཾ སམྦྷེདཛ྄ཛྷོཏྠརཎཾ, སཱིམནྟརིཀཾ ཝིནཱ ཨབྱཝདྷཱནེན ཋཱནཉྩ བྷགཝཏཱ ཨནབྷིམཏམེཝཱཏི ཉཏྭཱ ཨཊྛཀཐཱཙརིཡཱ ཨིདྷཱཔི སཱིམནྟརིཀཝིདྷཱནམཀཾསུ. ཝིསབྷཱགསཱིམཱནམྤི ཧི ཨེཀསཱིམཱནིསྶིཏཏྟཾ, ཨེཀསབྷཱགཏྟཉྩཱཏི དྭཱིཧངྒེཧི སམནྣཱགཏེ སཏི ཨེཀཾ སཱིམནྟརིཀཾ ཝིནཱ ཋཱནཾ སམྦྷེདཱཡ ཧོཏི, ནཱསཏཱིཏི དཊྛབྦཾ. སཱིམནྟརིཀཝིདྷཱནསཱམཏྠིཡེནེཝ ཙེཏཱསཾ རུཀྑཱདིསམྦནྡྷོཔི བདྡྷསཱིམཱནཾ ཝིཡ ཨཉྙམཉྙཾ ན ཝཊྚཏཱིཏི ཨཡམྤི ནཡཏོ དསྶིཏོ ཨེཝཱཏི གཧེཏབྦཾ.

‘‘སབྷཱཝེནེཝཱ’’ཏི ཨིམིནཱ གཱམསཱིམཱ ཝིཡ ཨབདྡྷསཱིམཱཏི དསྶེཏི. སབྦམེཏྠ སངྒྷཀམྨཾ ཀཱཏུཾ ཝཊྚཏཱིཏི སམཱནསཾཝཱསཱ ཨེཀཱུཔོསཐཱཏི དསྶེཏི. ཡེན ཀེནཙཱིཏི ཨནྟམསོ སཱུཀརཱདིནཱ སཏྟེན. མཧོགྷེན པན ཨུནྣཏཊྛཱནཏོ ནིནྣཊྛཱནེ པཏནྟེན ཁཏོ ཁུདྡཀོ ཝཱ མཧནྟོ ཝཱ ལཀྑཎཡུཏྟོ ཛཱཏསྶརོཝ. ཨེཏྠཱཔི ཁུདྡཀེ ཨུདཀུཀྑེཔཀིཙྩཾ ནཏྠི, སམུདྡེ པན སབྦཐཱ ཨུདཀུཀྑེཔསཱིམཱཡམེཝ ཀམྨཾ ཀཱཏབྦཾ སོདྷེཏུཾ དུཀྐརཏྟཱ.

པུན ཏཏྠཱཏི ལོཀཝོཧཱརསིདྡྷཱསུ ཨེཏཱསུ ནདིཨཱདཱིསུ ཏཱིསུ ཨབདྡྷསཱིམཱསུ པུན ཝགྒཀམྨཔརིཧཱརཏྠཾ སཱསནཝོཧཱརསིདྡྷཱཡ ཨབདྡྷསཱིམཱཡ པརིཙྪེདཾ དསྶེནྟོཏི ཨདྷིཔྤཱཡོ. པཱལི༹ཡཾ ཡཾ མཛ྄ཛྷིམསྶ པུརིསསྶཱཏིཨཱདཱིསུ ཨུདཀཾ ཨུཀྑིཔིཏྭཱ ཁིཔཱིཡཏི ཨེཏྠཱཏི ཨུདཀུཀྑེཔོ, ཨུདཀསྶ པཏནོཀཱསོ, ཏསྨཱ ཨུདཀུཀྑེཔཱ. ཨཡཉྷེཏྠ པདསམྦནྡྷཝསེན ཨཏྠོ – པརིསཔརིཡནྟཏོ པཊྛཱཡ སམནྟཱ ཡཱཝ མཛ྄ཛྷིམསྶ པུརིསསྶ ¶ ཨུདཀུཀྑེཔོ ཨུདཀཔཏནཊྛཱནཾ, ཏཱཝ ཡཾ ཏཾ པརིཙྪིནྣཊྛཱནཾ, ཨཡཾ ཏཏྠ ནདིཨཱདཱིསུ ཨཔརཱ སམཱནསཾཝཱསཱ ཨུདཀུཀྑེཔསཱིམཱཏི.

ཏསྶ ཨནྟོཏི ཏསྶ ཨུདཀུཀྑེཔཔརིཙྪིནྣསྶ ཋཱནསྶ ཨནྟོ. ན ཀེཝལཉྩ ཏསྶེཝ ཨནྟོ, ཏཏོ བཧིཔི, ཨེཀསྶ ཨུདཀུཀྑེཔསྶ ཨནྟོ ཋཱཏུཾ ན ཝཊྚཏཱིཏི ཝཙནཾ ཨུདཀུཀྑེཔཔརིཙྪེདསྶ དུབྦིཛཱནཏོ ཀམྨཀོཔསངྐཱ ཧོཏཱིཏི. ཏེནེཝ མཱཏིཀཱཊྛཀཐཱཡཾ ‘‘པརིཙྪེདབྦྷནྟརེ ཧཏྠཔཱསཾ ཝིཛཧིཏྭཱ ཋིཏོཔི པརིཙྪེདཏོ བཧི ཨཉྙཾ ཏཏྟཀཾཡེཝ པརིཙྪེདཾ ཨནཏིཀྐམིཏྭཱ ཋིཏོཔི ཀམྨཾ ཀོཔེཏི ཨིདཾ སབྦཨཊྛཀཐཱསུ སནྣིཊྛཱན’’ནྟི (ཀངྑཱ. ཨཊྛ. ནིདཱནཝཎྞནཱ) ཝུཏྟཾ. ཡཾ པནེཏྠ སཱརཏྠདཱིཔནིཡཾ ‘‘ཏསྶ ཨནྟོ ཧཏྠཔཱསཾ ཝིཛཧིཏྭཱ ཋིཏོ ཀམྨཾ ¶ ཀོཔེཏཱིཏི ཨིམིནཱ བཧིཔརིཙྪེདཏོ ཡཏྠ ཀཏྠཙི ཋིཏོ ཀམྨཾ ན ཀོཔེཏཱི’’ཏི (སཱརཏྠ. ཊཱི. མཧཱཝགྒ ༣.༡༤༧) ཝཏྭཱ མཱཏིཀཱཊྛཀཐཱཝཙནམྤི པཊིཀྑིཔིཏྭཱ ‘‘ནེཝ པཱལི༹ཡཾ ན ཨཊྛཀཐཱཡཾ ཨུཔལབྦྷཏཱི’’ཏིཨཱདི བཧུ པཔཉྩིཏཾ, ཏཾ ན སུནྡརཾ ཨིདྷ ཨཊྛཀཐཱཝཙནེན མཱཏིཀཱཊྛཀཐཱཝཙནསྶ ནཡཏོ སཾསནྡནཏོ སངྒྷཊནཏོ. ཏཐཱ ཧི དྭིནྣཾ ཨུདཀུཀྑེཔཔརིཙྪེདཱནམནྟརཱ ཝིདཏྠིཙཏུརངྒུལམཏྟམྤི སཱིམནྟརིཀཾ ཨཊྛཔེཏྭཱ ‘‘ཨཉྙོ ཨུདཀུཀྑེཔོ སཱིམནྟརིཀཱཡ ཋཔེཏབྦོ, ཏཏོ ཨདྷིཀཾ ཝཊྚཏི ཨེཝ, ཨཱུནཀཾ པན ན ཝཊྚཏཱི’’ཏི ཨེཝཾ ཨིདྷེཝ ཝུཏྟེན ཨིམིནཱ ཨཊྛཀཐཱཝཙནེན སཱིམནྟརིཀོཔཙཱརེན ཨུདཀུཀྑེཔཏོ ཨཱུནཀེ ཋཔིཏེ སཱིམཱཡ སཱིམཱསམྦྷེདཏོ ཀམྨཀོཔོཔི ཝུཏྟོ ཨེཝ. ཡདགྒེན ཙ ཨེཝཾ ཝུཏྟོ, ཏདགྒེན ཏཏྠ ཨེཀབྷིཀྑུནོ པཝེསེཔི སཏི ཏསྶ སཱིམཊྛབྷཱཝཏོ ཀམྨཀོཔོ ཝུཏྟོ ཨེཝ ཧོཏི. ཨཊྛཀཐཱཡཾ ‘‘ཨཱུནཀཾ པན ན ཝཊྚཏཱི’’ཏི ཀཐནཉྩེཏཾ ཨུདཀུཀྑེཔཔརིཙྪེདསྶ དུབྦིཛཱནནྟེནཔི སཱིམཱསམྦྷེདསངྐཨཱཔརིཧཱརཏྠཾ ཝུཏྟཾ. སཏྟབྦྷནྟརསཱིམཱནམནྟརཱ ཏཏྟཀཔརིཙྪེདེནེཝ སཱིམནྟརིཀཝིདྷཱནཝཙནཏོཔི ཨེཏཱསཾ དུབྦིཛཱནཔརིཙྪེདཏཱ, ཏཏྠ ཙ ཋིཏཱནཾ ཀམྨཀོཔསངྐཱ སིཛ྄ཛྷཏི. ཀམྨཀོཔསངྐཊྛཱནམྤི ཨཱཙརིཡཱ དཱུརཏོ པརིཧཱརཏྠཾ ཀམྨཀོཔཊྛཱནནྟི ཝཏྭཱཝ ཋཔེསུནྟི གཧེཏབྦཾ.

ཏནྟི སཱིམཾ. ‘‘སཱིགྷམེཝ ཨཏིཀྐཱམེཏཱི’’ཏི ཨིམིནཱ ཏཾ ཨནཏིཀྐམིཏྭཱ ཨནྟོ ཨེཝ པརིཝཏྟམཱནཱཡ ཀཱཏུཾ ཝཊྚཏཱིཏི དསྶེཏི. ཨེཏདཏྠམེཝ ཧི ཝཱལུཀཱདཱིཧི སཱིམཱཔརིཙྪིནྡནཾ, ཨིཏརཐཱ བཧི པརིཝཏྟཱ ནུ ཁོ, ནོ ཝཱཏི ཀམྨཀོཔསངྐཱ བྷཝེཡྻཱཏི. ཨཉྙིསྶཱ ཨནུསྶཱཝནཱཏི ཀེཝལཱཡ ནདིསཱིམཱཡ ཨནུསྶཱཝནཱ ¶ . ཨནྟོནདིཡཾ ཛཱཏརུཀྑེ ཝཱཏི ཨུདཀུཀྑེཔཔརིཙྪེདསྶ བཧི ཋིཏེ རུཀྑེཔི ཝཱ. བཧིནདིཏཱིརམེཝ ཧི ཝིསབྷཱགསཱིམཏྟཱ ཨབནྡྷིཏབྦཊྛཱནཾ, ན ཨནྟོནདཱི ནིསྶཡཏྟེན སབྷཱགཏྟཱ. ཏེནེཝ ‘‘བཧིནདིཏཱིརེ ཝིཧཱརསཱིམཱཡ ཝཱ’’ཏིཨཱདིནཱ ཏཱིརམེཝ ཨབནྡྷིཏབྦཊྛཱནཏྟེན དསྶིཏཾ, ན པན ནདཱི. ‘‘རུཀྑེཔི ཋིཏེཧཱི’’ཏི ཨིདཾ ཨནྟོཨུདཀུཀྑེཔཊྛཾ སནྡྷཱཡ ཝུཏྟཾ. ན ཧི བཧིཨུདཀུཀྑེཔེ བྷིཀྑཱུནཾ ཋཱཏུཾ ཝཊྚཏི.

རུཀྑསྶཱཏི ཏསྶེཝ ཨནྟོཨུདཀུཀྑེཔཊྛསྶ རུཀྑསྶ. སཱིམཾ ཝཱ སོདྷེཏྭཱཏི ཡཐཱཝུཏྟཾ ཝིཧཱརེ བདྡྷསཱིམཾ, གཱམསཱིམཉྩ ཏཏྠ ཋིཏབྷིཀྑཱུནཾ ཧཏྠཔཱསཱནཡནབཧིསཱིམཱཀརཎཝསེནེཝ སོདྷེཏྭཱ. ཡཐཱ ཙ ཨུདཀུཀྑེཔསཱིམཱཡཾ ཀམྨཾ ཀརོནྟེཧི, ཨེཝཾ བདྡྷསཱིམཱཡཾ, གཱམསཱིམཱཡཾ ཝཱ ཀམྨཾ ཀརོནྟེཧིཔི ཨུདཀུཀྑེཔསཱིམཊྛེ སོདྷེཏྭཱཝ ཀཱཏབྦཾ. ཨེཏེནེཝ སཏྟབྦྷནྟརཨརཉྙསཱིམཱཧིཔི ཨུདཀུཀྑེཔསཱིམཱཡ, ཨིམཱཡ ཙ སདྡྷིཾ ཏཱསཾ རུཀྑཱདིསམྦནྡྷདོསོཔི ནཡཏོ དསྶིཏོཝ ཧོཏི. ཨིམིནཱཝ ནཡེན སཏྟབྦྷནྟརསཱིམཱཡ བདྡྷསཱིམཱགཱམསཱིམཱཧིཔི སདྡྷིཾ, ཨེཏཱསཉྩ སཏྟབྦྷནྟརསཱིམཱཡ ¶ སདྡྷིཾ སམྦནྡྷདོསོ ཉཱཏབྦོ. ཨཊྛཀཐཱཡཾ པནེཏཾ སབྦཾ ཝུཏྟནཡཏོ སཀྐཱ ཉཱཏུནྟི ཨཉྙམཉྙསམཱསནྣཱནམེཝེཏྠ དསྶིཏཾ.

ཏཏྲིདཾ སུཏྟཱནུལོམཏོ ནཡགྒཧཎམུཁཾ – ཡཐཱ ཧི བདྡྷསཱིམཱཡཾ སམྨཏཱ ཝིཔཏྟིསཱིམཱ ཧོཏཱིཏི ཏཱསཾ ཨཉྙམཉྙཾ རུཀྑཱདིསམྦནྡྷོ ན ཝཊྚཏི, ཨེཝཾ ནདིཨཱདཱིསུ སམྨཏཱཔི བདྡྷསཱིམཱ ཝིཔཏྟིསཱིམཱཝ ཧོཏཱིཏི ཏཱཧིཔི སདྡྷིཾ ཏསྶཱ རུཀྑཱདིསམྦནྡྷོ ན ཝཊྚཏཱིཏི སིཛ྄ཛྷཏི. ཨིམིནཱ ནཡེན སཏྟབྦྷནྟརསཱིམཱཡ གཱམནདིཨཱདཱིཧི སདྡྷིཾ, ཨུདཀུཀྑེཔསཱིམཱཡ ཙ ཨརཉྙཱདཱིཧི སདྡྷིཾ རུཀྑཱདིསམྦནྡྷསྶ ན ཝཊྚནཀབྷཱཝོ ཉཱཏབྦོ, ཨེཝམེཏཱ བྷགཝཏཱ ཨནུཉྙཱཏཱ བདྡྷསཱིམཱ སཏྟབྦྷནྟརཨུདཀུཀྑེཔསཱིམཱ ཨཉྙམཉྙཉྩེཝ ཨཏྟནོ ནིསྶཡཝིརཧིཏཱཧི ཨིཏརཱིཏརཱསཾ ནིསྶཡསཱིམཱཧི ཙ རུཀྑཱདིསམྦནྡྷེ སཏི སམྦྷེདདོསམཱཔཛྫཏཱིཏི སུཏྟཱནུལོམནཡོ ཉཱཏབྦོཝ.

ཨཏྟནོ ཨཏྟནོ པན ནིསྶཡབྷཱུཏགཱམཱདཱིཧི སདྡྷིཾ བདྡྷསཱིམཱདཱིནཾ ཏིསྶནྣཾ ཨུཔྤཏྟིཀཱལེ བྷགཝཏཱ ཨནུཉྙཱཏསྶ སམྦྷེདཛ྄ཛྷོཏྠརཎསྶ ཨནུལོམཏོ རུཀྑཱདིསམྦནྡྷོཔི ཨནུཉྙཱཏོཝ ཧོཏཱིཏི དཊྛབྦཾ. ཡདི ཨེཝཾ ཨུདཀུཀྑེཔབདྡྷསཱིམཱདཱིནཾ ཨནྟརཱ ཀསྨཱ སཱིམནྟརིཀཱ ན ཝིཧིཏཱཏི? ནིསྶཡབྷེདསབྷཱཝབྷེདེཧི ¶ སཡམེཝ བྷིནྣཏྟཱ. ཨེཀནིསྶཡཨེཀསབྷཱཝཱནམེཝ ཧི སཱིམནྟརིཀཱཡ ཝིནཱསཾ ཀརོཏཱིཏི ཝུཏྟོཝཱཡམཏྠོ. ཨེཏེནེཝ ནདིནིམིཏྟཾ ཀཏྭཱ བདྡྷཱཡ སཱིམཱཡ སངྒྷེ ཀམྨཾ ཀརོནྟེ ནདིཡམྤི ཡཱཝ གཱམཁེཏྟཾ ཨཱཧཙྩ ཋིཏཱཡ ཨུདཀུཀྑེཔསཱིམཱཡ ཨཉྙེསཾ ཀམྨཾ ཀཱཏུཾ ཝཊྚཏཱིཏི སིདྡྷཾ ཧོཏི. ཡཱ པནེཏཱ ལོཀཝོཧཱརསིདྡྷཱ གཱམཱརཉྙནདིསམུདྡཛཱཏསྶརསཱིམཱ པཉྩ, ཏཱ ཨཉྙམཉྙརུཀྑཱདིསམྦནྡྷེཔི སམྦྷེདདོསཾ ནཱཔཛྫཏི, ཏཐཱ ལོཀཝོཧཱརཱབྷཱཝཏོ. ན ཧི གཱམཱདཡོ གཱམནྟརཱདཱིཧི, ནདིཨཱདཱིཧི ཙ རུཀྑཱདིསམྦནྡྷམཏྟེན སམྦྷིནྣཱཏི ལོཀེ ཝོཧརནྟི. ལོཀཝོཧཱརསིདྡྷཱནཉྩ ལོཀཝོཧཱརཏོཝ སམྦྷེདོ ཝཱ ཨསམྦྷེདོ ཝཱ གཧེཏབྦོ, ནཱཉྙཏོ. ཏེནེཝ ཨཊྛཀཐཱཡཾ ཏཱསཾ ཨཉྙམཉྙཾ ཀཏྠཙིཔི སམྦྷེདནཡོ ན དསྶིཏོ, སཱསནཝོཧཱརསིདྡྷོཡེཝ དསྶིཏོཏི.

ཨེཏྠ པན བདྡྷསཱིམཱཡ ཏཱཝ ‘‘ཧེཊྛཱ པཐཝཱིསནྡྷཱརཀཾ ཨུདཀཔརིཡནྟཾ ཀཏྭཱ སཱིམཱགཏཱ ཧོཏཱི’’ཏིཨཱདིནཱ (མཧཱཝ. ཨཊྛ. ༡༣༨) ཨདྷོབྷཱགཔརིཙྪེདོ ཨཊྛཀཐཱཡཾ སབྦཐཱ དསྶིཏོ. གཱམསཱིམཱདཱིནཾ པན ན དསྶིཏོ. ཀཐམཡཾ ཛཱནིཏབྦོཏི? ཀེཙི ཏཱཝེཏྠ ‘‘གཱམསཱིམཱདཡོཔི བདྡྷསཱིམཱ ཝིཡ པཐཝཱིསནྡྷཱརཀཾ ཨུདཀཾ ཨཱཧཙྩ ཏིཊྛཏཱི’’ཏི ཝདནྟི.

ཀེཙི ¶ པན ཏཾ པཊིཀྑིཔིཏྭཱ ‘‘ནདིསམུདྡཛཱཏསྶརསཱིམཱ, ཏཱཝ ཏནྣིསྶིཏཨུདཀུཀྑེཔསཱིམཱ ཙ པཐཝིཡཱ ཨུཔརིཏལེ, ཧེཊྛཱ ཙ ཨུདཀཛ྄ཛྷོཏྠརཎཔྤདེསེ ཨེཝ ཏིཊྛནྟི, ན ཏཏོ ཧེཊྛཱ ཨུདཀསྶ ཨཛ྄ཛྷོཏྠརཎཱབྷཱཝཱ. སཙེ པན ཨུདཀོགྷཱདིནཱ ཡོཛནཔྤམཱཎམྤི ནིནྣཊྛཱནཾ ཧོཏི, ནདིསཱིམཱདཡོཝ ཧོནྟི, ན ཏཏོ ཧེཊྛཱ. ཏསྨཱ ནདིཨཱདཱིནཾ ཧེཊྛཱ བཧིཏཱིརམུཁེན ཨུམངྒེན, ཨིདྡྷིཡཱ ཝཱ པཝིཊྛོ བྷིཀྑུ ནདིཡཾ ཋིཏཱནཾ ཀམྨཾ ན ཀོཔེཏི. སོ པན ཨཱསནྣགཱམེ བྷིཀྑཱུནཾ ཀམྨཾ ཀོཔེཏི. སཙེ པན སོ ཨུབྷིནྣཾ ཏཱིརགཱམཱནཾ མཛ྄ཛྷེ ནིསིནྣོ ཧོཏི, ཨུབྷཡགཱམཊྛཱནཾ ཀམྨཾ ཀོཔེཏི. སཙེ པན ཏཱིརཾ གཱམཁེཏྟཾ ན ཧོཏི, ཨགཱམཀཱརཉྙམེཝ. ཏཏྠ པན ཏཱིརདྭཡེཔི སཏྟབྦྷནྟརསཱིམཾ ཝིནཱ ཀེཝལཱཡ ཁུདྡཀཱརཉྙསཱིམཱཡ ཀམྨཾ ཀརོནྟཱནཾ ཀམྨཾ ཀོཔེཏི. སཙེ སཏྟབྦྷནྟརསཱིམཱཡཾ ཀརོནྟི, ཏདཱ ཡདི ཏེསཾ སཏྟབྦྷནྟརསཱིམཱཡ པརིཙྪེདོ ཨེཏསྶ ནིསིནྣོཀཱསསྶ པརཏོ ཨེཀཾ སཏྟབྦྷནྟརཾ ཨཏིཀྐམིཏྭཱ ཋིཏོ ན ཀམྨཀོཔོ ¶ . ནོ ཙེ, ཀམྨཀོཔོ. གཱམསཱིམཱཡཾ པན ཨནྟོཨུམངྒེ ཝཱ བིལེ ཝཱ ཡཏྠ པཝིསིཏུཾ སཀྐཱ, ཡཏྠ ཝཱ སུཝཎྞམཎིཨཱདིཾ ཁཎིཏྭཱ གཎྷནྟི, གཧེཏུཾ སཀྐཱཏི ཝཱ སམྦྷཱཝནཱ ཧོཏི, ཏཏྟཀཾ ཧེཊྛཱཔི གཱམསཱིམཱ, ཏཏྠ ཨིདྡྷིཡཱ ཨནྟོ ནིསིནྣོཔི ཀམྨཾ ཀོཔེཏི. ཡཏྠ པན པཀཏིམནུསྶཱནཾ པཝེསསམྦྷཱཝནཱཔི ནཏྠི, ཏཾ སབྦཾ ཡཱཝ པཐཝིསནྡྷཱརཀཨུདཀཱ ཨརཉྙསཱིམཱཝ, ན གཱམསཱིམཱ. ཨརཉྙསཱིམཱཡམྤི ཨེསེཝ ནཡོ. ཏཏྠཔི ཧི ཡཏྟཀེ པདེསེ པཝེསསམྦྷཱཝནཱ, ཏཏྟཀམེཝ ཨུཔརིཏལེ ཨརཉྙསཱིམཱ པཝཏྟཏི. ཏཏོ པན ཧེཊྛཱ ན ཨརཉྙསཱིམཱ, ཏཏྠ ཨུཔརིཏལེན སཧ ཨེཀཱརཉྙཝོཧཱརཱབྷཱཝཏོ. ན ཧི ཏཏྠ པཝིཊྛཾ ཨརཉྙཾ པཝིཊྛོ ཏི ཝོཧརནྟི. ཏསྨཱ ཏཏྲཊྛོ ཨུཔརི ཨརཉྙཊྛཱནཾ ཀམྨཾ ན ཀོཔེཏི ཨུམངྒནདིཡཾ ཋིཏོ ཝིཡ ཨུཔརིནདིཡཾ ཋིཏཱནཾ. ཨེཀསྨིཉྷི ཙཀྐཝཱལེ༹ གཱམནདིསམུདྡཛཱཏསྶརེ མུཉྩིཏྭཱ ཏདཝསེསཾ ཨམནུསྶཱཝཱསཾ དེཝབྲཧྨལོཀཾ ཨུཔཱདཱཡ སབྦཾ ཨརཉྙམེཝ. ‘གཱམཱ ཝཱ ཨརཉྙཱ ཝཱ’ཏི ཝུཏྟཏྟཱ ཧི ནདིསམུདྡཛཱཏསྶརཱདིཔི ཨརཉྙམེཝ. ཨིདྷ པན ནདིཨཱདཱིནཾ ཝིསུཾ སཱིམཱབྷཱཝེན གཧིཏཏྟཱ ཏདཝསེསམེཝ ཨརཉྙཾ གཧེཏབྦཾ. ཏཏྠ ཙ ཡཏྟཀེ པདེསེ ཨེཀཾ ‘ཨརཉྙ’ནྟི ཝོཧརནྟི, ཨཡམེཀཱརཉྙསཱིམཱ. ཨིནྡཔུརཉྷི སབྦཾ ཨེཀཱརཉྙསཱིམཱ. ཏཐཱ ཨསུརཡཀྑཔུརཱདི. ཨཱཀཱསཊྛདེཝབྲཧྨཝིམཱནཱནི པན སམནྟཱ ཨཱཀཱསཔརིཙྪིནྣཱནི པཙྩེཀཾ ཨརཉྙསཱིམཱ སམུདྡམཛ྄ཛྷེ པབྦཏདཱིཔཀཱ ཝིཡ. ཏཏྠ སབྦཏྠ སཏྟབྦྷནྟརསཱིམཱཡཾ, ཨརཉྙསཱིམཱཡམེཝ ཝཱཏི ཀམྨཾ ཀཱཏབྦཾ. ཏསྨཱ ཨིདྷཱཔི ཨུཔརིཨརཉྙཏལེན སདྡྷིཾ ཧེཊྛཱཔཐཝིཡཱ ཨརཉྙཝོཧཱརཱབྷཱཝཱ ཝིསུཾ ཨརཉྙསཱིམཱཏི གཧེཏབྦཾ. ཏེནེཝེཏྠ གཱམནདིཨཱདིསཱིམཱཀཐཱཡ ཨཊྛཀཐཱཡཾ ‘ཨིདྡྷིམཱ བྷིཀྑུ ཧེཊྛཱཔཐཝིཏལེ ཋིཏོ ཀམྨཾ ཀོཔེཏཱི’ཏི (མཧཱཝ. ཨཊྛ. ༡༣༨) བདྡྷསཱིམཱཡཾ དསྶིཏནཡོ ན དསྶིཏོ’’ཏི ཝདནྟི.

ཨིདཉྩེཏཱསཾ ¶ གཱམསཱིམཱདཱིནཾ ཧེཊྛཱཔམཱཎདསྶནཾ སུཏྟཱདིཝིརོདྷཱབྷཱཝཱ ཡུཏྟཾ ཝིཡ དིསྶཏི. ཝཱིམཾསིཏྭཱ གཧེཏབྦཾ. ཨེཝཾ གཧཎེ ཙ གཱམསཱིམཱཡཾ སམྨཏཱ བདྡྷསཱིམཱ ཨུཔརི གཱམསཱིམཾ, ཧེཊྛཱ ཨུདཀཔརིཡནྟཾ ཨརཉྙསཱིམཉྩ ཨཝཏྠརཏཱིཏི ཏསྶཱ ཨརཉྙསཱིམཱཔི ཁེཏྟནྟི སིཛ྄ཛྷཏི. བྷགཝཏཱ ཙ ‘‘སབྦཱ, བྷིཀྑཝེ, ནདཱི ཨསཱིམཱ’’ཏིཨཱདིནཱ (མཧཱཝ. ཨཊྛ. ༡༤༧) ནདིསམུདྡཛཱཏསྶརཱ བདྡྷསཱིམཱཡ ཨཁེཏྟབྷཱཝེན ཝུཏྟཱ, ན པན ཨརཉྙཾ. ཏསྨཱ ཨརཉྙམྤི ¶ བདྡྷསཱིམཱཡ ཁེཏྟམེཝཱཏི གཧེཏབྦཾ. ཡདི ཨེཝཾ ཀསྨཱ ཏཏྠ སཱ ན བཛ྄ཛྷཏཱིཏི? པཡོཛནཱབྷཱཝཱ. སཱིམཱཔེཀྑཱནནྟརམེཝ སཏྟབྦྷནྟརསཱིམཱཡ སམྦྷཝཏོ. ཏསྶཱ ཙ ཨུཔརི སམྨཏཱཡ བདྡྷསཱིམཱཡ སམྦྷེདཛ྄ཛྷོཏྠརཎཱནུལོམཏོ ཝིཔཏྟིསཱིམཱ ཨེཝ སིཡཱ. གཱམཁེཏྟེ པན ཋཏྭཱ ཨགཱམཀཱརཉྙེཀདེསམྤི ཨནྟོཀརིཏྭཱ སམྨཏཱ ཀིཉྩཱཔི སུསམྨཏཱ, ཨགཱམཀཱརཉྙེ བྷགཝཏཱ ཝིཧིཏཱཡ སཏྟབྦྷནྟརསཱིམཱཡཔི ཨནིཝཏྟིཏོ. ཏཏྠ པན ཀམྨཾ ཀཱཏུཾ པཝིཊྛཱནམྤི ཏཏོ བཧི ཀེཝལཱརཉྙེ ཀརོནྟཱནམྤི ཨནྟརཱ ཏཱིཎི སཏྟབྦྷནྟརཱནི ཋཔེཏབྦཱནི, ཨཉྙཐཱ ཝིཔཏྟི ཨེཝ སིཡཱཏི སབྦཐཱ ནིརཏྠཀམེཝ ཨགཱམཀཱརཉྙེ བདྡྷསཱིམཱཀརཎནྟི ཝེདིཏབྦཾ.

ཨནྟོནདིཡཾ པཝིཊྛསཱཁཱཡཱཏི ནདིཡཱ པཐཝིཏལཾ ཨཱཧཙྩ ཋིཏཱཡ སཱཁཱཡཔི, པགེཝ ཨནཱཧཙྩ ཋིཏཱཡ. པཱརོཧེཔི ཨེསེཝ ནཡོ. ཨེཏེན སབྷཱགཾ ནདིསཱིམཾ ཕུསིཏྭཱ ཋིཏེནཔི ཝིསབྷཱགསཱིམཱསམྦནྡྷསཱཁཱདིནཱ ཨུདཀུཀྑེཔསཱིམཱཡ སམྦནྡྷོ ན ཝཊྚཏཱིཏི དསྶེཏི. ཨེཏེནེཝ མཧཱསཱིམཾ, གཱམསཱིམཉྩ ཕུསིཏྭཱ ཋིཏེན སཱཁཱདིནཱ མཱལ༹ཀསཱིམཱཡ སམྦནྡྷོ ན ཝཊྚཏཱིཏི ཉཱཔིཏོཏི དཊྛབྦོ.

ཨནྟོནདིཡཾཡེཝཱཏི སེཏུཔཱདཱནཾ ཏཱིརཊྛཏཾ ནིཝཏྟེཏི. ཏེན ཨུདཀུཀྑེཔཔརིཙྪེདཏོ བཧི ནདིཡཾ པཏིཊྛིཏཏྟེཔི སམྦྷེདཱབྷཱཝཾ དསྶེཏི. ཏེནཱཧ ‘‘བཧིཏཱིརེ པཏིཊྛིཏཱ’’ཏིཨཱདི. ཡདི ཧི ཨུདཀུཀྑེཔཏོ བཧི ཨནྟོནདིཡམྤི པཏིཊྛིཏཏྟེ སམྦྷེདོ བྷཝེཡྻ, ཏམྤི པཊིཀྑིཔིཏབྦཾ བྷཝེཡྻ ཀམྨཀོཔསྶ སམཱནཏྟཱ, ན ཙ པཊིཀྑིཏྟཾ. ཏསྨཱ སབྦཏྠ ཨཏྟནོ ནིསྶཡསཱིམཱཡ སམྦྷེདདོསོ ནཏྠེཝཱཏི གཧེཏབྦཾ.

ཨཱཝརཎེན ཝཱཏི དཱརུཨཱདིཾ ནིཁཎིཏྭཱ ཨུདཀནིཝཱརཎེན. ཀོཊྚཀབནྡྷནེན ཝཱཏི མཏྟིཀཱདཱིཧི པཱུརེཏྭཱ ཀཏསེཏུབནྡྷེན. ཨུབྷཡེནཱཔི ཨཱཝརཎམེཝ དསྶེཏི. ‘‘ནདིཾ ཝིནཱསེཏྭཱ’’ཏི ཝུཏྟམེཝཏྠཾ ཝིབྷཱཝེཏི ‘‘ཧེཊྛཱ པཱལི༹ བདྡྷཱ’’ཏི, ཧེཊྛཱ ནདིཾ ཨཱཝརིཏྭཱ པཱལི༹ བདྡྷཱཏི ཨཏྠོ. ཚཌྜིཏམོདཀནྟི ཨཏིརིཏྟོདཀཾ. ‘‘ནདིཾ ཨོཏྠརིཏྭཱ སནྡནཊྛཱནཏོ’’ཏི ཨིམིནཱ ཏལཱ༹ཀནདཱིནཾ ཨནྟརཱ ¶ པཝཏྟནཊྛཱནེ ན ཝཊྚཏཱིཏི དསྶེཏི. ཨུཔྤཏིཏྭཱཏི ཏཱིརཱདིབྷིནྡནཝསེན ཝིཔུལཱ ཧུཏྭཱ. ཝིཧཱརསཱིམནྟི བདྡྷསཱིམཾ.

ཨགམནཔཐེཏི ¶ ཏདཧེཝ གནྟྭཱ ནིཝཏྟིཏུཾ ཨསཀྐུཎེཡྻེ. ཨརཉྙསཱིམཱསངྑྱམེཝ གཙྪཏཱིཏི ལོཀཝོཧཱརསིདྡྷཾ ཨགཱམཀཱརཉྙསཱིམཾ སནྡྷཱཡ ཝདཏི. ཏཏྠཱཏི པཀཏིཡཱ མཙྪབནྡྷཱནཾ གམནཔཐེསུ དཱིཔཀེསུ.

ཏཾ ཋཱནནྟི ཨཱཝཱཊཱདཱིནཾ ཀཏཊྛཱནམེཝ, ན ཨཀཏནྟི ཨཏྠོ. ལོཎཱིཏི སམུདྡོདཀསྶ ཨུཔྤཏྟིཝེགནིནྣོ མཱཏིཀཱཀཱརེན པཝཏྟནཀོ.

༡༤༨. སམྦྷིནྡནྟཱིཏི ཡཏྠ ཙཏཱུཧི བྷིཀྑཱུཧི ནིསཱིདིཏུཾ ན སཀྐཱ, ཏཏྟཀཏོ པཊྛཱཡ ཡཱཝ ཀེསགྒམཏྟམྤི ཨནྟོསཱིམཱཡ ཀརོནྟོ སམྦྷིནྡཏི. ཙཏུནྣཾ བྷིཀྑཱུནཾ པཧོནཀཏོ པཊྛཱཡ ཡཱཝ སཀལམྤི ཨནྟོ ཀརོནྟོ ཨཛ྄ཛྷོཏྠརནྟཱིཏི ཝེདིཏབྦཾ. སཾསཊྛཝིཊཔཱཏི ཨཉྙམཉྙཾ སིབྦིཏྭཱ ཋིཏམཧཱསཱཁམཱུལཱ, ཨེཏེན ཨཉྙམཉྙསྶ ཨཙྩཱསནྣཏཾ དཱིཔེཏི. སཱཁཱཡ སཱཁཾ ཕུསནྟཱ ཧི དཱུརཊྛཱཔི སིཡྻུཾ, ཏཏོ ཨེཀཾསཏོ སམྦྷེདལཀྑཎཾ དསྶིཏཾ ན སིཡཱཏི ཏཾ དསྶེཏུཾ ཝིཊཔགྒཧཎཾ ཀཏཾ. ཨེཝཉྷི བྷིཀྑཱུནཾ ནིསཱིདིཏུཾ ཨཔྤཧོནཀཊྛཱནཾ ཨཏྟནོ སཱིམཱཡ ཨནྟོསཱིམཊྛཾ ཀརིཏྭཱ པུརཱཎཝིཧཱརཾ ཀརོནྟོ སཱིམཱཡ སཱིམཾ སམྦྷིནྡཏི ནཱམ, ན ཏཏོ པརནྟི དསྶིཏམེཝ ཧོཏི. བདྡྷཱ ཧོཏཱིཏི པོརཱཎཀཝིཧཱརསཱིམཾ སནྡྷཱཡ ཝུཏྟཾ. ཨམྦནྟི ཨཔརེན སམཡེན པུརཱཎཝིཧཱརཔརིཀྑེཔཱདཱིནཾ ཝིནཊྛཏྟཱ ཨཛཱནནྟཱནཾ ཏཾ པུརཱཎསཱིམཱཡ ནིམིཏྟབྷཱུཏཾ ཨམྦཾ. ཨཏྟནོ སཱིམཱཡ ཨནྟོསཱིམཊྛཾ ཀརིཏྭཱ པུརཱཎཝིཧཱརསཱིམཊྛཾ ཛམྦུཾ ཀིཏྟེཏྭཱ ཨམྦཛམྦཱུནཾ ཨནྟརེ ཡཾ ཋཱནཾ, ཏཾ ཨཏྟནོ སཱིམཱཡ པཝེསེཏྭཱ བནྡྷནྟཱིཏི ཨཏྠོ. ཨེཏྠ ཙ པུརཱཎསཱིམཱཡ ནིམིཏྟབྷཱུཏསྶ གཱམཊྛསྶ ཨམྦརུཀྑསྶ ཨནྟོསཱིམཊྛཱཡ ཛམྦུཡཱ སཧ སཾསཊྛཝིཊཔཏྟེཔི སཱིམཱཡ བནྡྷནཀཱལེ ཝིཔཏྟི ཝཱ པཙྪཱ གཱམསཱིམཱཡ སཧ སམྦྷེདོ ཝཱ ཀམྨཝིཔཏྟི ཝཱ ན ཧོཏཱིཏི མུཁཏོཝ ཝུཏྟནྟི ཝེདིཏབྦཾ.

པདེསནྟི སངྒྷསྶ ནིསཱིདནཔྤཧོནཀཔྤདེསཾ. ‘‘སཱིམནྟརིཀཾ ཋཔེཏྭཱ’’ཏིཨཱདིནཱ སམྦྷེདཛ྄ཛྷོཏྠརཎཾ ཨཀཏྭཱ བདྡྷསཱིམཱཧི ཨཉྙམཉྙཾ ཕུསཱཔེཏྭཱ ཨབྱཝདྷཱནེན བདྡྷཱཔི སཱིམཱ ཨསཱིམཱ ཨེཝཱཏི དསྶེཏི. ཏསྨཱ ཨེཀདྭངྒུལམཏྟཱཔི སཱིམནྟརིཀཱ ཝཊྚཏི ཨེཝ. སཱ པན དུབྦོདྷཱཏི ཨཊྛཀཐཱསུ ཙཏུརངྒུལཱདིཀཱ ཝུཏྟཱཏི དཊྛབྦཾ. དྭིནྣཾ སཱིམཱནནྟི དྭིནྣཾ བདྡྷསཱིམཱནཾ. ནིམིཏྟཾ ཧོཏཱིཏི ནིམིཏྟསྶ སཱིམཏོ བཱཧིརཏྟཱ བནྡྷནཀཱལེ ཏཱཝ སམྦྷེདདོསོ ནཏྠཱིཏི ཨདྷིཔྤཱཡོ ¶ . ན ཀེཝལཉྩ ནིམིཏྟཀཏྟཱ ཨེཝ སངྐརཾ ཀརོཏི ¶ , ཨཐ ཁོ སཱིམནྟརིཀཱཡ ཋིཏོ ཨཉྙོཔི རུཀྑོ ཀརོཏི ཨེཝ. ཏསྨཱ ཨཔྤམཏྟིཀཱཡ སཱིམནྟརིཀཱཡ ཝཌྜྷནཀཱ རུཀྑཱདཡོ ན ཝཊྚནྟི ཨེཝ. ཨེཏྠ ཙ ཨུཔརི དིསྶམཱནཁནྡྷསཱཁཱདིཔཝེསེ ཨེཝ སངྐརདོསསྶ སབྦཏྠ དསྶིཏཏྟཱ ཨདིསྶམཱནཱནཾ མཱུལཱནཾ པཝེསེཔི བྷཱུམིགཏིཀཏྟཱ དོསོ ནཏྠཱིཏི སིཛ྄ཛྷཏི. སཙེ པན མཱུལཱནིཔི དིསྶམཱནཱནེཝ པཝིསནྟི, སངྐརོཝ. པབྦཏཔཱསཱཎཱ པན དིསྶམཱནཱཔི བྷཱུམིགཏིཀཱ ཨེཝ. ཡདི པན བནྡྷནཀཱལེ ཨེཝ ཨེཀོ ཐཱུལརུཀྑོ ཨུབྷཡམྤི སཱིམཾ ཨཱཧཙྩ ཏིཊྛཏི, པཙྪཱ བདྡྷཱ ཨསཱིམཱ ཧོཏཱིཏི དཊྛབྦཾ.

སཱིམཱསངྐརནྟི སཱིམཱསམྦྷེདཾ. ཡཾ པན སཱརཏྠདཱིཔནིཡཾ ཝུཏྟཾ ‘‘སཱིམཱསངྐརཾ ཀརོཏཱིཏི ཝཌྜྷིཏྭཱ སཱིམཔྤདེསཾ པཝིཊྛེ དྭིནྣཾ སཱིམཱནཾ གཏཊྛཱནསྶ དུཝིཉྙེཡྻཏྟཱ ཝུཏྟ’’ནྟི (སཱརཏྠ. ཊཱི. མཧཱཝགྒ ༣.༡༤༨), ཏཾ ན ཡུཏྟཾ གཱམསཱིམཱཡཔི སཧ སངྐརཾ ཀརོཏཱིཏི ཝཏྟབྦཏོ. ཏཏྠཱཔི ཧི ནིམིཏྟེ ཝཌྜྷིཏེ གཱམསཱིམཱབདྡྷསཱིམཱནཾ གཏཊྛཱནཾ དུབྦིཉྙེཡྻམེཝ ཧོཏི, ཏཏྠ པན ཨཝཏྭཱ དྭིནྣཾ བདྡྷསཱིམཱནམེཝ སངྐརསྶ ཝུཏྟཏྟཱ ཡཐཱཝུཏྟསམྦདྡྷདོསོཝ སངྐར-སདྡེན ཝུཏྟོཏི གཧེཏབྦཾ. པཱལི༹ཡཾ པན ནིདཱནཝསེན ‘‘ཡེསཾ, བྷིཀྑཝེ, སཱིམཱ པཙྪཱ སམྨཏཱ, ཏེསཾ ཏཾ ཀམྨཾ ཨདྷམྨིཀ’’ནྟིཨཱདིནཱ (མཧཱཝ. ༡༤༨) པཙྪཱ སམྨཏཱཡ ཨསཱིམཏྟེ ཝུཏྟེཔི དྭཱིསུ གཱམསཱིམཱསུ ཋཏྭཱ དྭཱིཧི སངྒྷེཧི སམྦྷེདཾ ཝཱ ཨཛ྄ཛྷོཏྠརཎཾ ཝཱ ཀཏྭཱ སཱིམནྟརིཀཾ ཨཊྛཔེཏྭཱ ཝཱ རུཀྑཔཱརོཧཱདིསམྦནྡྷཾ ཨཝིཡོཛེཏྭཱ ཝཱ ཨེཀསྨིཾ ཁཎེ ཀམྨཝཱཙཱནིཊྛཱཔནཝསེན ཨེཀཏོ སམྨཏཱནཾ དྭིནྣཾ སཱིམཱནམྤི ཨསཱིམཏཱ པཀཱསིཏཱཏི ཝེདིཏབྦཾ.

གཱམསཱིམཱདིཀཐཱཝཎྞནཱ ནིཊྛིཏཱ.

ཨུཔོསཐབྷེདཱདིཀཐཱཝཎྞནཱ

༡༤༩. ཨདྷམྨེན ཝགྒནྟི ཨེཏྠ ཨེཀསཱིམཱཡ ཙཏཱུསུ བྷིཀྑཱུསུ ཝིཛྫམཱནེསུ པཱཏིམོཀྑུདྡེསོཝ ཨནུཉྙཱཏོ, ཏཱིསུ, དྭཱིསུ ཙ པཱརིསུདྡྷིཨུཔོསཐོཝ. ཨིདྷ པན ཏཐཱ ཨཀཏཏྟཱ ‘‘ཨདྷམྨེནཱ’’ཏི ཝུཏྟཾ. ཡསྨཱ པན ཚནྡཔཱརིསུདྡྷི སངྒྷེ ཨེཝ ཨཱགཙྪཏི, ན གཎེ, ན པུགྒལེ, ཏསྨཱ ‘‘ཝགྒ’’ནྟི ཝུཏྟནྟི.

སཙེ ¶ པན དྭེ སངྒྷཱ ཨེཀསཱིམཱཡ ཨཉྙམཉྙཾ ཚནྡཾ ཨཱཧརིཏྭཱ ཨེཀསྨིཾ ཁཎེ ཝིསུཾ སངྒྷཀམྨཾ ཀརོནྟི, ཨེཏྠ ཀཐནྟི? ཀེཙི པནེཏཾ ཝཊྚཏཱིཏི ཝདནྟི, ཏཾ ན གཧེཏབྦཾ ཝགྒཀམྨཏྟཱ ¶ . ཀམྨཾ ཀརོནྟཱནཉྷི ཚནྡཔཱརིསུདྡྷི ཨཉྙཏྠ ན གཙྪཏི ཏཐཱ ཝཙནཱབྷཱཝཱ, ཝིསུཾ ཝིསུཾ ཀམྨཀརཎཏྠམེཝ སཱིམཱཡ ཨནུཉྙཱཏཏྟཱ ཙཱཏི གཧེཏབྦཾ. ཝིཧཱརསཱིམཱཡཾ པན སངྒྷེ ཝིཛྫམཱནེཔི ཀེནཙི པཙྩཡེན ཁནྡྷསཱིམཱཡཾ ཏཱིསུ, དྭཱིསུ ཝཱ པཱརིསུདྡྷིཨུཔོསཐཾ ཀརོནྟེསུ ཀམྨཾ དྷམྨེན སམགྒམེཝ བྷིནྣསཱིམཊྛཏྟཱཏི དཊྛབྦཾ.

ཨུཔོསཐབྷེདཱདིཀཐཱཝཎྞནཱ ནིཊྛིཏཱ.

པཱཏིམོཀྑུདྡེསཀཐཱཝཎྞནཱ

༡༥༠. ཨེཝམེཏཾ དྷཱརཡཱམཱིཏི. སུཏཱ ཁོ པནཱཡསྨནྟེཧཱིཏི ཨེཏྠ ‘‘ཨེཝམེཏཾ དྷཱརཡཱམཱི’’ཏི ཝཏྭཱ ‘‘ཨུདྡིཊྛཾ ཁོ ཨཱཡསྨནྟོ ནིདཱནཾ, སུཏཱ ཁོ པནཱཡསྨནྟེཧི ཙཏྟཱརོ པཱརཱཛིཀཱ དྷམྨཱ’’ཏིཨཱདིནཱ ཝཏྟབྦཾ. མཱཏིཀཱཊྛཀཐཱཡམྤི (ཀངྑཱ. ཨཊྛ. ནིདཱནཝཎྞནཱ) ཨེཝམེཝ ཝུཏྟཾ. སུཏེནཱཏི སུཏཔདེན.

སཝརབྷཡནྟི ཝནཙརཀབྷཡཾ. ཏེནཱཧ ‘‘ཨཊཝིམནུསྶབྷཡ’’ནྟི. ནིདཱནུདྡེསེ ཨནིཊྛིཏེ པཱཏིམོཀྑཾ ནིདྡིཊྛཾ ནཱམ ན ཧོཏཱིཏི ཨཱཧ ‘‘དུཏིཡཱདཱིསུ ཨུདྡེསེསཱུ’’ཏིཨཱདི. ཏཱིཧིཔི ཝིདྷཱིཧཱིཏི ཨོསཱརཎཀཐནསརབྷཉྙེཧི. ཨེཏྠ ཙ ཨཏྠཾ བྷཎིཏུཀཱམཏཱཡ ཝཱ བྷཎཱཔེཏུཀཱམཏཱཡ ཝཱ སུཏྟསྶ ཨོསཱརཎཾ ཨོསཱརཎཾ ནཱམ. ཏསྶེཝ ཨཏྠཔྤཀཱསནཱ ཀཐནཾ ནཱམ. ཀེཝལཾ པཱཋསྶེཝ སརེན བྷཎནཾ སརབྷཉྙཾ ནཱམ. སཛ྄ཛྷཱཡཾ ཨདྷིཊྛཧིཏྭཱཏི ‘‘སཛ྄ཛྷཱཡཾ ཀརོམཱི’’ཏི ཙིཏྟཾ ཨུཔྤཱདེཏྭཱ. ཨོསཱརེཏྭཱ པན ཀཐེནྟེནཱཏི སཡམེཝ པཱཋཾ ཝཏྭཱ པཙྪཱ ཨཏྠཾ ཀཐེནྟེན.

པཱཏིམོཀྑུདྡེསཀཐཱཝཎྞནཱ ནིཊྛིཏཱ.

ཨདྷམྨཀམྨཔཊིཀྐོསནཱདིཀཐཱཝཎྞནཱ

༡༥༥. ནཝཝིདྷནྟི སངྒྷགཎཔུགྒལེསུ ཏཡོ, སུཏྟུདྡེསཔཱརིསུདྡྷིཨདྷིཊྛཱནཝསེན ཏཡོ, ཙཱཏུདྡསཱིཔནྣརསཱིསཱམགྒཱིཝསེན ཏཡོཏི ནཝཝིདྷཾ. ཙཏུབྦིདྷནྟི ¶ ཨདྷམྨེནཝགྒཱདི ཙཏུབྦིདྷཾ. དུཝིདྷནྟི བྷིཀྑུབྷིཀྑུནིཔཱཏིམོཀྑཝསེན དུཝིདྷཾ པཱཏིམོཀྑཾ. ནཝཝིདྷནྟི བྷིཀྑཱུནཾ པཉྩ, བྷིཀྑུནཱིནཾ ཙཏྟཱརོཏི ནཝཝིདྷཾ པཱཏིམོཀྑུདྡེསཾ.

ཨདྷམྨཀམྨཔཊིཀྐོསནཱདིཀཐཱཝཎྞནཱ ནིཊྛིཏཱ.

པཀྑགཎནཱདིཨུགྒཧཎཱནུཛཱནནཀཐཱདིཝཎྞནཱ

༡༥༦. ཀཏིམཱིཏི ¶ ཏིཐི-སདྡཱཔེཀྑཾ ཨིཏྠིལིངྒཾ དཊྛབྦཾ.

༡༦༣. ཨུཏུཝསྶེཡེཝཱཏི ཧེམནྟགིམྷེསུཡེཝ.

༡༦༤. ཝིཉྙཱཔེཏཱིཏི ཨེཏྠ མནསཱ ཙིནྟེཏྭཱ ཀཱཡཝིཀཱརཀརཎམེཝ ཝིཉྙཱཔནནྟི དཊྛབྦཾ. པཱལི༹ཡཾ ཨཉྙསྶ དཱཏབྦཱ པཱརིསུདྡྷཱིཏི པཱརིསུདྡྷིདཱཡཀེན པུན ཨཉྙསྶ བྷིཀྑུནོ སནྟིཀེ དཱཏབྦཱ. ‘‘བྷཱུཏཾཡེཝ ཝཱ སཱམཎེརབྷཱཝཾ ཨཱརོཙེཏཱི’’ཏི ཝུཏྟཏྟཱ ཨཱུནཝཱིསཏིཝསྶཀཱལེ ཨུཔསམྤནྣསྶ, ཨནྟིམཝཏྠུཨཛ྄ཛྷཱཔནྣསིཀྑཱཔཙྩཀྑཱཏཱདཱིནཾ ཝཱ ཡཱཝ བྷིཀྑུཔཊིཉྙཱ ཝཏྟཏི, ཏཱཝ ཏེཧི ཨཱཧཊཱཔི ཚནྡཔཱརིསུདྡྷི ཨཱགཙྪཏི. ཡདཱ པན ཏེ ཨཏྟནོ སཱམཎེརཱདིབྷཱཝཾ པཊིཛཱནནྟི, ཏཏོ པཊྛཱཡེཝ ནཱགཙྪཏཱིཏི དསྶིཏནྟི དཊྛབྦཾ. པཱལི༹ཡམྤི ཧི ‘‘དིནྣཱཡ པཱརིསུདྡྷིཡཱ སངྒྷཔྤཏྟོ ཝིབྦྷམཏི…པེ… པཎྜཀོ པཊིཛཱནཱཏི. ཏིརཙྪཱནགཏོ པཊིཛཱནཱཏི. ཨུབྷཏོབྱཉྫནཀོ པཊིཛཱནཱཏི, ཨཱཧཊཱ ཧོཏི པཱརིསུདྡྷཱི’’ཏི ཝུཏྟཏྟཱ པཎྜཀཱདཱིནམྤི བྷིཀྑུཔཊིཉྙཱཡ ཝཏྟམཱནཀཱལེསུ ཚནྡཔཱརིསུདྡྷིཡཱ ཨཱགམནཾ སིདྡྷམེཝ. ཏེནཱཧ ‘‘ཨེས ནཡོ སབྦཏྠཱ’’ཏི. ཨུམྨཏྟཀཁིཏྟཙིཏྟཝེདནཱཊྚཱནཾ པན པཀཏཏྟཱ ཨནྟརཱམགྒེ ཨུམྨཏྟཀཱདིབྷཱཝེ པཊིཉྙཱཏེཔི ཏེསཾ སངྒྷཔྤཏྟམཏྟེནེཝ ཚནྡཱདི ཨཱགཙྪཏཱིཏི དཊྛབྦཾ.

‘‘བྷིཀྑཱུནཾ ཧཏྠཔཱས’’ནྟི ཨིམིནཱ གཎཔུགྒལེསུ ཚནྡཔཱརིསུདྡྷིཡཱ ཨནཱགམནཾ དསྶེཏི. ‘‘སངྒྷཔྤཏྟོ’’ཏི ཧི པཱལི༹ཡཾ ཝུཏྟཾ. བིལཱ༹ལསངྑལིཀཔཱརིསུདྡྷཱིཏི བིལཱ༹ལགཱིཝཱཡ བནྡྷནསངྑལིཀསདིསཱ པཱརིསུདྡྷི ནཱམ, ཡཐཱ སངྑལིཀཱ བིལཱ༹ལེ ཨཱགཙྪནྟེ ཨེཝ ཨཱགཙྪཏི, ན ཨནཱགཙྪནྟེ ཏཔྤཊིབདྡྷཏྟཱ, ཨེཝམཡཾ པཱརིསུདྡྷིཔཱིཏི ཨཏྠོ. ཨཐ ཝཱ ཡཐཱ སངྑལིཀཱཡ པཋམཝལཡཾ དུཏིཡཝལཡཾ ¶ པཱཔུཎཱཏི, ན ཏཏིཡཝལཡཾ, ཨེཝམཡམྤཱིཏི ཨདྷིཔྤཱཡོ. ཨུཔལཀྑཎམཏྟཉྩེཏྠ བིལཱ༹ལ-གྒཧཎཾ དཊྛབྦཾ.

པཀྑགཎནཱདིཨུགྒཧཎཱནུཛཱནནཀཐཱདིཝཎྞནཱ ནིཊྛིཏཱ.

ཚནྡདཱནཀཐཱདིཝཎྞནཱ

༡༦༥. པཱལི༹ཡཾ ¶ ‘‘སནྟི སངྒྷསྶ ཀརཎཱིཡཱནཱི’’ཏི ཝཏྟབྦེ ཝཙནཝིཔལླཱསེན ‘‘ཀརཎཱིཡ’’ནྟི ཝུཏྟཾ.

༡༦༧. ‘‘ཏསྶ སམྨུཏིདཱནཀིཙྩཾ ནཏྠཱི’’ཏི ཨིདཾ པཱལི༹ཡཾ ཨེཀདཱ སརནྟསྶེཝ སམྨུཏིདཱནསྶ ཝུཏྟཏྟཱ ཨེཀདཱ ཨསརནྟསྶ སམྨུཏིཨབྷཱཝེཔི ཏསྶ ཨནཱགམནཾ ཝགྒཀམྨཱཡ ན ཧོཏཱིཏི ཝུཏྟཾ. ཀེཙི པན ‘‘སོཔི ཧཏྠཔཱསེཝ ཨཱནེཏབྦོ’’ཏི ཝདནྟི, ཏཾ ན གཧེཏབྦཾ.

༡༦༨. སངྒྷསནྣིཔཱཏཏོ པཋམཾ ཀཱཏབྦཾ པུབྦཀརཎཾ. སངྒྷསནྣིཔཱཏེ ཀཱཏབྦཾ པུབྦཀིཙྩནྟི དཊྛབྦཾ. པཱལི༹ཡཾ ནོ ཙེ ཨདྷིཊྛཧེཡྻ, ཨཱཔཏྟི དུཀྐཊསྶཱཏི ཨེཏྠ ཨསཉྩིཙྩ ཨསཏིཡཱ ཨནཱཔཏྟི. ཡཐཱ ཙེཏྠ, ཨེཝཾ ཨུཔརིཔི. ཡཏྠ པན ཨཙིཏྟཀཱཔཏྟི ཨཏྠི, ཏཏྠ ཝཀྑཱམ.

༡༦༩. ‘‘པཉྙཏྟཾ ཧོཏཱི’’ཏི ཨིམིནཱ ‘‘ན སཱཔཏྟིཀེན ཨུཔོསཐོ ཀཱཏབྦོ’’ཏི ཝིསུཾ པཊིཀྑེཔཱབྷཱཝེཔི ཡཐཱཝུཏྟསུཏྟསཱམཏྠིཡཏོ པཉྙཏྟམེཝཱཏི དསྶེཏི. ཨིམིནཱ ཨེཝ ནཡེན –

‘‘ཨཊྛཱནམེཏཾ, བྷིཀྑཝེ, ཨནཝཀཱསོ ཡཾ ཏཐཱགཏོ ཨཔརིསུདྡྷཱཡ པརིསཱཡ ཨུཔོསཐཾ ཀརེཡྻ, པཱཏིམོཀྑཾ ཨུདྡིསེཡྻཱ’’ཏི (ཙཱུལ༹ཝ. ༣༨༦; ཨ. ནི. ༨.༢༠; ཨུདཱ. ༤༥) –

ཨཱདིསུཏྟནཡཏོ ཙ ཨལཛྫཱིཧིཔི སདྡྷིཾ ཨུཔོསཐཀརཎམྤི པཊིཀྑིཏྟམེཝ ཨལཛྫིནིགྒཧཏྠཏྟཱ སབྦསིཀྑཱཔདཱནནྟི དཊྛབྦཾ. ‘‘པཱརིསུདྡྷིདཱནཔཉྙཱཔནེནཱ’’ཏི ཨིམིནཱ སཱཔཏྟིཀེན པཱརིསུདྡྷིཔི ན དཱཏབྦཱཏི དཱིཔིཏཾ ཧོཏི. ཨུབྷོཔི དུཀྐཊནྟི ཨེཏྠ སབྷཱགཱཔཏྟིབྷཱཝཾ ཨཛཱནིཏྭཱ ཀེཝལཾ ཨཱཔཏྟིནཱམེནེཝ དེསེནྟསྶ པཊིགྒཎྷནྟསྶ ཨཙིཏྟཀམེཝ དུཀྐཊཾ ཧོཏཱིཏི ཝདནྟི ¶ . ཡཐཱ སངྒྷོ སབྷཱགཱཔཏྟིཾ ཨཱཔནྣོ ཉཏྟིཾ ཋཔེཏྭཱ ཨུཔོསཐཾ ཀཱཏུཾ ལབྷཏི, ཨེཝཾ ཏཡོཔི ‘‘སུཎནྟུ མེ, ཨཱཡསྨནྟཱ, ཨིམེ བྷིཀྑཱུ སབྷཱགཾ ཨཱཔཏྟིཾ ཨཱཔནྣཱ’’ཏིཨཱདིནཱ ཝུཏྟནཡཱནུསཱརེནེཝ གཎཉཏྟིཾ ཋཔེཏྭཱ དྭཱིཧི ཨཉྙམཉྙཾ ཨཱརོཙེཏྭཱ ཨུཔོསཐཾ ཀཱཏུཾ ཝཊྚཏི. ཨེཀེན པན སཱཔཏྟིཀེན དཱུརཾ གནྟྭཱཔི པཊིཀཱཏུམེཝ ཝཊྚཏི, ཨསམྤཱཔུཎནྟེན ‘‘བྷིཀྑུཾ ལབྷིཏྭཱ པཊིཀརིསྶཱམཱི’’ཏི ཨུཔོསཐོ ཀཱཏབྦོ, པཊིཀརིཏྭཱ ཙ པུན ཨུཔོསཐོ ཀཏྟབྦོ.

ཚནྡདཱནཀཐཱདིཝཎྞནཱ ནིཊྛིཏཱ.

ཨནཱཔཏྟིཔནྣརསཀཱདིཀཐཱཝཎྞནཱ

༡༧༢. ཀེནཙི ༦༣ ཀརཎཱིཡེན གནྟྭཱཏི སཱིམཱཔརིཙྪེདཏོ བཧིབྷཱུཏཾ གཱམཾ ཝཱ ཨརཉྙཾ ཝཱ གནྟྭཱཏི ཨཏྠོ. ཨེཏེནེཝ ཨུཔོསཐཉཏྟིཡཱ ཋཔནཀཱལེ སམགྒཱ ཨེཝ ཏེ ཉཏྟིཾ ཋཔེསུནྟི སིདྡྷཾ. ཏེནེཝ པཱལི༹ཡཾ ‘‘ཨུདྡིཊྛཾ སུཨུདྡིཊྛ’’ནྟི སབྦཔནྣརསཀེསུཔི ཝུཏྟཾ. ཝགྒཱ སམགྒསཉྙིནོཏིཨཱདི པན ཉཏྟིཡཱ ནིཊྛིཏཱཡ ‘‘ཀིཾ སངྒྷསྶ པུབྦཀིཙྩ’’ནྟིཨཱདཱིནཾ (མཧཱཝ. ༡༣༤) ཝཙནཀྑཎེ བཧིགཏཱནཾ བྷིཀྑཱུནཾ སཱིམཱཡ པཝིཊྛཏྟཱ བྷིཀྑཱུ ཏསྨིཾ ཁཎེ ཝགྒཱ ཧོནྟཱིཏི ཝུཏྟཾ. ཏེནཱཧ ‘‘ཏེསཾ སཱིམཾ ཨོཀྐནྟཏྟཱ ཝགྒཱ’’ཏིཨཱདི, ཨེཏེན པཱརཱཛིཀུདྡེསཱདིཀྑཎེཔི ཝགྒསཉྙཱིནཾ ཨུདྡིསནྟཱནཾ ཨཱཔཏྟི ཨེཝ, ཉཏྟིཡཱ པན པུབྦེ ནིཊྛིཏཏྟཱ ཀམྨཀོཔོ ནཏྠཱིཏི དསྶིཏམེཝ ཧོཏི. ཨེཝཾ ཨུཔརིཔི སབྦཝཱརེསུ ཨདྷིཔྤཱཡོ ཝེདིཏབྦོ.

ཨེཏྠ ཙ པཱལི༹ཡཾ ‘‘སབྦཱཡ ཝུཊྛིཏཱཡ…པེ… ཏེསཾ སནྟིཀེ པཱརིསུདྡྷི ཨཱརོཙེཏབྦཱ’’ཏི (མཧཱཝ. ༡༧༤) ཝུཏྟཏྟཱ བཧིསཱིམཱགཏཱཡ པརིསཱཡ ཏེསུ ཡསྶ ཀསྶཙི སནྟིཀེ ཨནདྷིཊྛིཏེཧི པཱརིསུདྡྷིཾ ཨཱརོཙེཏུཾ ཝཊྚཏཱིཏི ཝདནྟི.

ཨནཱཔཏྟིཔནྣརསཀཱདིཀཐཱཝཎྞནཱ ནིཊྛིཏཱ.

ལིངྒཱདིདསྶནཀཐཱདིཝཎྞནཱ

༡༧༩. ཨཉྙཱཏཀཾ ¶ ནཱམ ཨདིཊྛཔུབྦནྟི ཨཱཧ ‘‘ཨཉྙེསཾ སནྟཀ’’ནྟི. ཨཉྙེསནྟི ཨཏྟནཱ ཨདིཊྛཔུབྦཱནཾ. ནཱནཱསཾཝཱསཀབྷཱཝནྟི ལདྡྷིནཱནཱསཾཝཱསཀབྷཱཝཾ.

༡༨༠. པཱལི༹ཡཾ ཨབྷིཝིཏརནྟི སམཱནསཾཝཱསཀཱབྷཱཝཾ ནིཙྪིནནྟི.

༡༨༡. ཨུཔོསཐཀཱརཀཱཏི སངྒྷུཔོསཐཀཱརཀཱ. ཏེནེཝ ‘‘ཨཉྙཏྲ སངྒྷེནཱ’’ཏི ཝུཏྟཾ. སངྒྷུཔོསཐཊྛཱནཏོ ཧི གཙྪནྟེན ཨཏྟཙཏུཏྠེནེཝ གནྟབྦཾ, ཏིཎྞཾ བྷིཀྑཱུནཾ ནིསིནྣཊྛཱནཏོ པན གཙྪནྟེན ཨེཀེན བྷིཀྑུནཱཔི སཧ གནྟུམྤི ཝཊྚཏི. པཱལི༹ཡཾ ‘‘ཨབྷིཀྑུཀོ ཨཱཝཱསོ’’ཏི ཨིདཾ ནིདསྶནམཏྟཾ, སངྒྷུཔོསཐཊྛཱནཏོ གཎཔུགྒལེཧི སབྷིཀྑུཀོཔི ཨཱཝཱསོ ན གནྟབྦོ ‘‘ཨཉྙཏྲ སངྒྷེནཱ’’ཏི ཝུཏྟཏྟཱཏི ཝདནྟི. ཨུཔོསཐཾ ཀརོནྟཱིཏི སངྒྷུཔོསཐཾ ཝཱ གཎུཔོསཐཾ ཝཱ. ‘‘ཏསྶ སནྟིཀ’’ནྟི ཨིདཾ གཎུཔོསཐཊྛཱནཏོ གཙྪནྟཾ སནྡྷཱཡ ཝུཏྟཾ, ཨཉྙཐཱ ‘‘སབྦནྟིམེན པརིཙྪེདེན ཨཏྟཙཏུཏྠེན ¶ ཝཱ’’ཏི ཝཙནེན ཝིརུཛ྄ཛྷནཏོ. ཨཱརཉྙཀེནཱཏི ཨེཀཙཱརིནཱ. ཨུཔོསཐནྟརཱཡོཏི ཨཏྟནོ ཨུཔོསཐནྟརཱཡོ.

༡༨༣. པཱལི༹ཡཾ བྷིཀྑུནིཡཱ ནིསིནྣཔརིསཱཡཱཏིཨཱདཱིསུ བྷིཀྑུནིཡཱཏིཨཱདི ཀརཎཏྠེ སཱམིཝཙནཾ.

ལིངྒཱདིདསྶནཀཐཱདིཝཎྞནཱ ནིཊྛིཏཱ.

ཨུཔོསཐཀྑནྡྷཀཝཎྞནཱནཡོ ནིཊྛིཏོ.

༣. ཝསྶཱུཔནཱཡིཀཀྑནྡྷཀོ

ཝསྶཱུཔནཱཡིཀཨནུཛཱནནཀཐཱདིཝཎྞནཱ

༡༨༤. ཝསྶཱུཔནཱཡིཀཀྑནྡྷཀེ ¶ ¶ ཨཔརསྨིཾ དིཝསེཏི དུཏིཡེ པཱཊིཔདདིཝསེ.

༡༨༥. ཨཉྙཏྠ ཨརུཎཾ ཨུཊྛཱཔནེན ཝཱཏི སཱཔེཀྑསྶ ཨཀརཎཱིཡེན གནྟྭཱ ཨཉྙཏྠ ཨརུཎཾ ཨུཊྛཱཔནེན ཝཱ. པརིཧཱནཱིཏི གུཎཔརིཧཱནི.

༡༨༧. པཱལི༹ཡཾ སཏྟཱཧཾ སནྣིཝཏྟོ ཀཱཏབྦོཏི སཀལཾ སཏྟཱཧཾ བཧི ཨེཝ ཨཝཱིཏིནཱམེཏྭཱ སཏྟཱཧཔརིཡོསཱནབྷཱུཏཾ ཨརུཎུཊྛཱནཀཱལཾ པུན ཝིཧཱརེཝ སམྦནྡྷཝསེན སཏྟཱཧཾ ཝིཧཱརེ སནྣིཝཏྟཾ ཀཱཏབྦཾ. སཏྟཱཧཔརིཡོསཱནཀཱལོ ཧི ཨིདྷ སཏྟཱཧ-སདྡེན ཝུཏྟོ, ཏདཔེཀྑཱཡ ཙ ‘‘སནྣིཝཏྟོ’’ཏི པུལླིངྒེན ཝུཏྟཾ. ཏཱིཎི པརིཧཱིནཱནཱིཏི བྷིཀྑུནཱིནཾ ཝཙྩཀུཊིཨཱདཱིནཾ པཊིཀྑིཏྟཏྟཱ པརིཧཱིནཱནི.

༡༨༩. ན པལུཛྫཏཱིཏི ཨཉྙེསཾ ཨཔྤགུཎཏྟཱ, མམ ཙ མརཎེན ན ཝིནསྶཏི.

ཝསྶཱུཔནཱཡིཀཨནུཛཱནནཀཐཱདིཝཎྞནཱ ནིཊྛིཏཱ.

པཧིཏེཡེཝཨནུཛཱནནཀཐཱཝཎྞནཱ

༡༩༩. བྷིཀྑཱུཧི སདྡྷིཾ ཝསནཀཔུརིསོཏི ཨནཉྙགཏིཀོཏི དསྶེཏི. གནྟབྦནྟི སངྒྷཀརཎཱིཡེན ཨཔྤཧིཏེཔི གནྟབྦཾ. ཨེཏྠ ཙ ཨནུཔཱསཀེཧིཔི སཱསནབྷཱཝཾ ཉཱཏུཀཱམེཧི པཧིཏེ ཏེསཾ པསཱདཝཌྜྷིཾ སམྤསྶནྟེཧིཔི སཏྟཱཧཀརཎཱིཡེན གནྟུཾ ཝཊྚཏཱིཏི གཧེཏབྦཾ.

རཏྟིཙྪེདཝིནིཙྪཡོཏི ¶ སཏྟཱཧཀརཎཱིཡེན གནྟྭཱ བཧིདྡྷཱ ཨརུཎུཊྛཱཔནསངྑཱཏསྶ རཏྟིཙྪེདསྶ ཝིནིཙྪཡོ. གནྟུཾ ཝཊྚཏཱིཏི ཨནྟོཨུཔཙཱརསཱིམཱཡཾ ཋིཏེནེཝ སཏྟཱཧཀརཎཱིཡནིམིཏྟཾ སལླཀྑེཏྭཱ ཨིམིནཱ ནིམིཏྟེན གནྟྭཱ ‘‘ཨནྟོསཏྟཱཧེ ཨཱགཙྪིསྶཱམཱི’’ཏི ཨཱབྷོགཾ ཀཏྭཱ གནྟུཾ ཝཊྚཏི. པུརིམཀྑཎེ ཨཱབྷོགཾ ཀཏྭཱ གམནཀྑཎེ ཝིསྶརིཏྭཱ གཏེཔི དོསོ ¶ ནཏྠི ‘‘སཀརཎཱིཡོ པཀྐམཏཱི’’ཏི (མཧཱཝ. ༢༠༧) ཝུཏྟཏྟཱ. སབྦཐཱ པན ཨཱབྷོགཾ ཨཀཏྭཱ གཏསྶ ཝསྶཙྪེདོཏི ཝདནྟི. ཡོ པན སཏྟཱཧཀརཎཱིཡནིམིཏྟཱབྷཱཝེཔི ‘‘སཏྟཱཧབྦྷནྟརེ ཨཱགམིསྶཱམཱི’’ཏི ཨཱབྷོགཾ ཀཏྭཱ གནྟྭཱ སཏྟཱཧབྦྷནྟརེ ཨཱགཙྪཏི, ཏསྶ ཨཱཔཏྟིཡེཝ, ཝསྶཙྪེདོ ནཏྠི སཏྟཱཧསྶ སནྣིཝཏྟཏྟཱཏི ཝདནྟི. ཝཱིམཾསིཏྭཱ གཧེཏབྦཾ. བྷཎྜཀནྟི ཙཱིཝརབྷཎྜཾ. སམྤཱཔུཎིཏུཾ ན སཀྐོཏི, ཝཊྚཏཱིཏི ཏདཧེཝ ཨཱགམནེ སཨུསྶཱཧཏྟཱ ཝསྶཙྪེདོ ཝཱ ཨཱཔཏྟི ཝཱ ན ཧོཏཱིཏི ཨདྷིཔྤཱཡོ. ཨཱཙརིཡནྟི ཨགིལཱནམྤི ནིསྶཡཱཙརིཡཉྩ དྷམྨཱཙརིཡཉྩ, པགེཝ ཨུཔསམྤདཱཙརིཡཨུཔཛ྄ཛྷཱཡེསུ. ཝདཏི, ཝཊྚཏཱིཏི སཏྟཱཧཱཏིཀྐམེ ཨཱཔཏྟིཨབྷཱཝཾ སནྡྷཱཡ ཝུཏྟཾ, ཝསྶཙྪེདོ པན ཧོཏི ཨེཝ.

པཧིཏེཡེཝཨནུཛཱནནཀཐཱཝཎྞནཱ ནིཊྛིཏཱ.

ཨནྟརཱཡེཨནཱཔཏྟིཝསྶཙྪེདཀཐཱཝཎྞནཱ

༢༠༠. པཱལི༹ཡཾ གཎྷིཾསཱུཏི གཧེཏྭཱ ཁཱདིཾསུ. པརིཔཱཏིཾསཱུཏི པལཱཔེསུཾ, ཨནུབནྡྷིཾསཱུཏི ཨཏྠོ.

༢༠༡. སཏྟཱཧཝཱརེན ཨརུཎོ ཨུཊྛཱཔེཏབྦོཏི ཨེཏྠ ཚདིཝསཱནི བཧིདྡྷཱ ཝཱིཏིནཱམེཏྭཱ སཏྟམེ དིཝསེ པུརཱརུཎཱ ཨེཝ ཨནྟོཨུཔཙཱརསཱིམཱཡ པཝིསིཏྭཱ ཨརུཎཾ ཨུཊྛཱཔེཏྭཱ པུནདིཝསེ སཏྟཱཧཾ ཨདྷིཊྛཱཡ གནྟབྦནྟི ཨདྷིཔྤཱཡོ. ཀེཙི པན ‘‘སཏྟམེ དིཝསེ ཨཱགནྟྭཱ ཨརུཎཾ ཨནུཊྛཱཔེཏྭཱ ཏདཧེཝ དིཝསབྷཱགེཔི གནྟུཾ ཝཊྚཏཱི’’ཏི ཝདནྟི, ཏཾ ན གཧེཏབྦཾ ‘‘ཨརུཎོ ཨུཊྛཱཔེཏབྦོ’’ཏི ཝུཏྟཏྟཱ. སཏྟམེ དིཝསེ ཏཏྠ ཨརུཎུཊྛཱཔནམེཝ ཧི སནྡྷཱཡ པཱལི༹ཡམྤི ‘‘སཏྟཱཧཾ སནྣིཝཏྟོ ཀཱཏབྦོ’’ཏི ཝུཏྟཾ. ཨརུཎཾ ཨནུཊྛཱཔེཏྭཱ གཙྪནྟོ ཨནྟོ ཨཔྤཝིསིཏྭཱ བཧིདྡྷཱཝ སཏྟཱཧཾ ཝཱིཏིནཱམེནྟེན སམུཙྪིནྣཝསྶོ ཨེཝ བྷཝིསྶཏི ཨརུཎསྶ བཧི ཨེཝ ཨུཊྛཱཔིཏཏྟཱ. ཨིཏརཐཱ ‘‘ཨརུཎོ ཨུཊྛཱཔེཏབྦོ’’ཏི ཝཙནཾ ནིརཏྠཀཾ སིཡཱ ‘‘སཏྟཱཧཝཱརེན ཨནྟོཝིཧཱརེ པཝིསིཏྭཱ ཨརུཎཾ ཨནུཊྛཱཔེཏྭཱཔི གནྟབྦ’’ནྟི ཝཏྟབྦཏོ. ཨཉྙེསུ ཙ ཋཱནེསུ ཨརུཎུཊྛཱཔནམེཝ ¶ ཝུཙྩཏི. ཝཀྑཏི ཧི ཙཱིཝརཀྑནྡྷཀེ ‘‘ཨེཀསྨིཾ ཝིཧཱརེ ཝསནྟོ ཨིཏརསྨིཾ སཏྟཱཧཝཱརེན ཨརུཎམེཝ ཨུཊྛཱཔེཏཱི’’ཏི (མཧཱཝ. ཨཊྛ. ༣༦༤).

ཨཐཱཔི ¶ ཡཾ ཏེ ཝདེཡྻུཾ ‘‘སཏྟམེ དིཝསེ ཡདཱ ཀདཱཙི པཝིཊྛེན ཏཾདིཝསནིསྶིཏོ ཨཏཱིཏཨརུཎོ ཨུཊྛཱཔིཏོ ནཱམ ཧོཏཱིཏི ཨིམམཏྠཾ སནྡྷཱཡ ཨཊྛཀཐཱཡཾ ཝུཏྟ’’ནྟི, ཏཾ སདྡགཏིཡཱཔི ན སམེཏི. ན ཧི ཨུཊྛིཏེ ཨརུཎེ པཙྪཱ པཝིཊྛོ ཏསྶ པཡོཛཀོ ཨུཊྛཱཔཀོ བྷཝིཏུམརཧཏི. ཡདི བྷཝེཡྻ, ཝསྶཾ ཨུཔགནྟྭཱ པནསྶ ཨརུཎཾ ཨནུཊྛཱཔེཏྭཱ ཏདཧེཝ སཏྟཱཧཀརཎཱིཡེན པཀྐནྟསྶཱཔཱིཏི ཨེཏྠ ‘‘ཨརུཎཾ ཨནུཊྛཱཔེཏྭཱ’’ཏི ཝཙནཾ ཝིརུཛ྄ཛྷེཡྻ, ཏེནཔི ཏཾདིཝསསནྣིསྶིཏསྶ ཨརུཎསྶ ཨུཊྛཱཔིཏཏྟཱ. ཨཱརཉྙཀསྶཱཔི ཧི བྷིཀྑུནོ སཱཡནྷསམཡེ ཨངྒཡུཏྟཾ ཨརཉྙཊྛཱནཾ གནྟྭཱ ཏདཱ ཨེཝ ནིཝཏྟནྟསྶ ཨརུཎོ ཨུཊྛཱཔིཏོ དྷུཏངྒཉྩ ཝིསོདྷིཏཾ སིཡཱ, ན ཙེཏཾ ཡུཏྟཾ ཨརུཎུགྒམནཀཱལེ ཨེཝ ཨརུཎུཊྛཱཔནསྶ ཝུཏྟཏྟཱ. ཝུཏྟཉྷི ‘‘ཀཱལསྶེཝ པན ནིཀྑམིཏྭཱ ཨངྒཡུཏྟེ ཋཱནེ ཨརུཎཾ ཨུཊྛཱཔེཏབྦཾ. སཙེ ཨརུཎུཊྛཱནཝེལཱཡཾ ཏེསཾ ཨཱབཱདྷོ ཝཌྜྷཏི, ཏེསཾ ཨེཝ ཀིཙྩཾ ཀཱཏབྦཾ, ན དྷུཏངྒཝིསུདྡྷིཀེན བྷཝིཏབྦ’’ནྟི (ཝིསུདྡྷི. ༡.༣༡). ཏཐཱ པཱརིཝཱསིཀཱདཱིནམྤི ཨརུཎཾ ཨནུཊྛཱཔེཏྭཱ ཝཏྟཾ ནིཀྑིཔནྟཱནཾ རཏྟིཙྪེདོ ཝུཏྟོ. ‘‘ཨུགྒཏེ ཨརུཎེ ནིཀྑིཔིཏབྦ’’ནྟི (ཙཱུལ༹ཝ. ༩༧) ཧི ཝུཏྟཾ. སཧསེཡྻསིཀྑཱཔདེཔི ཨནུཔསམྤནྣེཧི སཧ ནིཝུཏྠབྷཱཝཔརིམོཙནཏྠཾ ‘‘པུརཱརུཎཱ ནིཀྑམིཏྭཱ’’ཏིཨཱདི ཝུཏྟཾ. ཨེཝཾ ཙཱིཝརཝིཔྤཝཱསཱདཱིསུ ཙ སབྦཏྠ རཏྟིཔརིཡོསཱནེ ཨཱགཱམིཨརུཎཝསེནེཝ ཨརུཎུཊྛཱཔནཾ དསྶིཏཾ, ན ཨཏཱིཏཱརུཎཝསེན. ཏསྨཱ ཝུཏྟནཡེནེཝེཏྠ ཨརུཎུཊྛཱཔནཾ ཝེདིཏབྦཾ ཨཉྙཐཱ ཝསྶཙྪེདཏྟཱ.

ཡཾ པན ཝསྶཾ ཨུཔགཏསྶ ཏདཧེཝ ཨརུཎཾ ཨནུཊྛཱཔེཏྭཱ སཀརཎཱིཡསྶ པཀྐམནཝཙནཾ, ཏཾ ཝསྶཾ ཨུཔགཏཀཱལཏོ པཊྛཱཡ ཡདཱ ཀདཱཙི ནིམིཏྟེ སཏི གམནསྶ ཨནུཉྙཱཏཏྟཱ ཡུཏྟཾ, ན པན སཏྟཱཧཝཱརེན གཏསྶ ཨརུཎཾ ཨནུཊྛཱཔེཏྭཱ ཏདཧེཝ གམནཾ ‘‘ཨརུཎོ ཨུཊྛཱཔེཏབྦོ’’ཏི ཝུཏྟཏྟཱ ཨེཝ. ཡཐཱ ཝཱ ‘‘སཏྟཱཧཾ ཨནཱགཏཱཡ པཝཱརཎཱཡ སཀརཎཱིཡོ པཀྐམཏི, ཨཱགཙྪེཡྻ ཝཱ སོ, བྷིཀྑཝེ, བྷིཀྑུ ཏཾ ཨཱཝཱསཾ, ན ཝཱ ཨཱགཙྪེཡྻཱ’’ཏིཨཱདིནཱ (མཧཱཝ. ༢༠༧) པཙྪིམསཏྟཱཧེ ཨནཱགམནེ ཨནུཉྙཱཏེཔི ཨཉྙསཏྟཱཧེསུ ན ཝཊྚཏི. ཨེཝཾ པཋམསཏྟཱཧེ ཨརུཎཾ ཨནུཊྛཱཔེཏྭཱ གམནེ ཨནུཉྙཱཏེཔི ཏཏོ པརེསུ སཏྟཱཧེསུ ཨཱགཏསྶ ཨརུཎཾ ཨནུཊྛཱཔེཏྭཱ ¶ གམནཾ ན ཝཊྚཏཱིཏི ནིཊྛམེཏྠ གནྟབྦཾ. ཨིདྷ ཨཱཧཊནྟི ཝིཧཱརཏོ བཧི ཨཱགཏཊྛཱནེ ཨཱནཱིཏཾ.

ཨནྟརཱཡེཨནཱཔཏྟིཝསྶཙྪེདཀཐཱཝཎྞནཱ ནིཊྛིཏཱ.

ཝཛཱདཱིསུ ཝསྶཱུཔགམནཀཐཱཝཎྞནཱ

༢༠༣. ཨུཔགནྟུཾ ༦༨ ན ཝཊྚཏཱིཏི ཀུཊིཀཱདཱིནཾ ཨབྷཱཝེན ‘‘ཨིདྷ ཝསྶཾ ཨུཔེམཱི’’ཏི ཨེཝཾ ཝཙཱིབྷེདཾ ཀཏྭཱ ཨུཔགནྟུཾ ན ཝཊྚཏི.

༢༠༤. པཱལི༹ཡཾ པིསཱཙིལླིཀཱཏི པིསཱཙདཱརཀཱ. པཝིསནདྭཱརཾ ཡོཛེཏྭཱཏི སཀཝཱཊདྭཱརཾ ཀཏྭཱ. རུཀྑཾ ཚིནྡིཏྭཱཏི སུསིརཊྛཱནསྶ ཨུཔརིབྷཱགཾ ཚིནྡིཏྭཱ. ཁཱཎུམཏྠཀེཏི སུསིརཁཱཎུམཏྠཀེ. ཊངྐིཏམཉྩོ ནཱམ དཱིགྷེ མཉྩཔཱདེ ཝིཛ྄ཛྷིཏྭཱ ཨཊནིཡོ པཝེསེཏྭཱ ཀཏོ, སོ ཧེཊྛུཔརིཡཝསེན པཉྙཏྟོཔི པུརིམསདིསོཝ ཧོཏི, ཏཾ སུསཱནེ, དེཝཏཱཋཱནེ ཙ ཋཔེནྟི. ཙཏུནྣཾ པཱསཱཎཱནཾ ཨུཔརི པཱསཱཎཕལཀེ ཨཏྠརིཏྭཱ ཀཏགེཧམྤི ‘‘ཊངྐིཏམཉྩོ’’ཏི ཝུཙྩཏི.

ཝཛཱདཱིསུཝསྶཱུཔགམནཀཐཱཝཎྞནཱ ནིཊྛིཏཱ.

ཨདྷམྨིཀཀཏིཀཱདིཀཐཱཝཎྞནཱ

༢༠༥. མཧཱཝིབྷངྒེཏི ཙཏུཏྠཔཱརཱཛིཀཝཎྞནཱཡཾ. པརཏོ སེནཱསནཀྑནྡྷཀེཔི ཨདྷམྨིཀཾ ཀཏིཀཝཏྟཾ ཨཱཝི བྷཝིསྶཏི ཨེཝ.

༢༠༧. ཡསྨཱ ནཱནཱསཱིམཱཡཾ དྭཱིསུ ཨཱཝཱསེསུ ཝསྶཾ ཨུཔགཙྪནྟསྶ ‘‘དུཏིཡེ ཝསིསྶཱམཱི’’ཏི ཨུཔཙཱརཏོ ནིཀྑནྟམཏྟེ པཋམོ སེནཱསནགྒཱཧོ པཊིཔྤསྶམྦྷཏི. ཏསྨཱ པཱལི༹ཡཾ ‘‘ཏསྶ, བྷིཀྑཝེ, བྷིཀྑུནོ པུརིམིཀཱ ཙ ན པཉྙཱཡཏཱི’’ཏི པཋམཾ སེནཱསནགྒཱཧཾ སནྡྷཱཡ ཝུཏྟཾ. དུཏིཡེ སེནཱསནགྒཱཧེ པན པུརིམིཀཱ པཉྙཱཡཏེཝ, ཏཏྠེཝ ཏེམཱསཾ ཝསནྟོ པུརིམཝསྶཾཝུཏྠོ ¶ ཨེཝ ཧོཏི, ཏཏོ ཝཱ པན དུཏིཡདིཝསཱདཱིསུ ‘‘པཋམསེནཱསནེ ཝསིསྶཱམཱི’’ཏི ཨུཔཙཱརཱཏིཀྐམེ པུརིམིཀཱཔི ན པཉྙཱཡཏཱིཏི དཊྛབྦཾ.

༢༠༨. པཱལི༹ཡཾ ‘‘སོ སཏྟཱཧཾ ཨནཱགཏཱཡ པཝཱརཎཱཡ སཀརཎཱིཡོ པཀྐམཏཱི’’ཏི ཝུཏྟཏྟཱ པཝཱརཎཱདིཝསེཔི སཏྟཱཧཀརཎཱིཡཾ ཝིནཱ གནྟུཾ ན ཝཊྚཏཱིཏི ཝེདིཏབྦཾ. ཀོམུདིཡཱ ཙཱཏུམཱསིནིཡཱཏི ¶ པཙྪིམ-ཀཏྟིཀཔུཎྞམཱཡ. སཱ ཧི ཏསྨིཾ ཀཱལེ ཀུམུདཱནཾ ཨཏྠིཏཱཡ ཀོམུདཱི, ཙཏུནྣཾ ཝསྶིཀམཱསཱནཾ པརིཡོསཱནཏྟཱ ཙཱཏུམཱསིནཱིཏི ཙ ཝུཙྩཏི.

ཨདྷམྨིཀཀཏིཀཱདིཀཐཱཝཎྞནཱ ནིཊྛིཏཱ.

ཝསྶཱུཔནཱཡིཀཀྑནྡྷཀཝཎྞནཱནཡོ ནིཊྛིཏོ.

༤. པཝཱརཎཱཀྑནྡྷཀོ

ཨཕཱསུཝིཧཱརཀཐཱདིཝཎྞནཱ

༢༠༩. པཝཱརཎཱཀྑནྡྷཀེ ¶ ¶ པཱལི༹ཡཾ པིཎྜཱཡ པཊིཀྐམེཡྻཱཏི པིཎྜཱཡ ཙརིཏྭཱ པཊིཀྐམེཡྻ. ཨཝཀྐཱརཔཱཏིནྟི ཨཏིརེཀཔིཎྜཔཱཏཋཔནཀཾ ཨེཀཾ བྷཱཛནཾ. ཨཝིསཡ྄ཧནྟི ཨུཀྑིཔིཏུཾ ཨསཀྐུཎེཡྻཾ. ཝིལངྒྷནཾ ཨུཀྑིཔནཾ ཝིལངྒྷོ, སོ ཨེཝ ཝིལངྒྷཀོ, ཧཏྠེཧི ཝིལངྒྷཀོ ཧཏྠཝིལངྒྷཀོཏི ཨཱཧ ‘‘ཧཏྠུཀྑེཔཀེནཱ’’ཏི. ཨཐ ཝཱ ཝིལངྒྷཀེན ཨུཀྑེཔཀེན ཧཏྠེནཱཏིཔི ཨཏྠོ, ཨཉྙམཉྙཾ སཾསིབྦིཏཧཏྠེཧཱིཏི ཝུཏྟཾ ཧོཏི.

༢༡༣. སཙེ པན ཝུཌྜྷཏརོ ཧོཏཱིཏི པཝཱརཎཱདཱཡཀོ བྷིཀྑུ ཝུཌྜྷཏརོ ཧོཏི. ཨེཝཉྷི ཏེན ཏསྶཏྠཱཡ པཝཱརིཏཾ ཧོཏཱིཏི ཨེཏྠ ཨེཝཾ ཏེན ཨཔྤཝཱརིཏོཔི ཏསྶ སངྒྷཔྤཏྟིམཏྟེན སངྒྷཔཝཱརཎཱཀམྨཾ སམགྒཀམྨམེཝ ཧོཏཱིཏི དཊྛབྦཾ. ཏེན ཙ བྷིཀྑུནཱཏི པཝཱརཎཱདཱཡཀེན བྷིཀྑུནཱ.

༢༣༤. བཧཱུཔི སམཱནཝསྶཱ ཨེཀཏོ པཝཱརེཏུཾ ལབྷནྟཱིཏི ཨེཀསྨིཾ སཾཝཙྪརེ ལདྡྷཱུཔསམྤདཏཱཡ སམཱནུཔསམྤནྣཝསྶཱ སབྦེ ཨེཀཏོ པཝཱརེཏུཾ ལབྷནྟཱིཏི ཨཏྠོ.

༢༣༧. པཱལི༹ཡཾ མིཙྪཱདིཊྛཱིཏི ‘‘ནཏྠི དིནྣ’’ནྟིཨཱདི (དཱི. ནི. ༡.༡༧༡; མ. ནི. ༡.༤༤༥; ༢.༩༤, ༩༥, ༢༢༥; ༣.༩༡, ༡༡༦, ༡༣༦; སཾ. ནི. ༣.༢༡༠; དྷ. ས. ༡༢༢༡) ནཡཔྤཝཏྟཱ. ཨནྟགྒཱཧིཀཱཏི སསྶཏུཙྪེདསངྑཱཏསྶ ཨནྟསྶ གཱཧིཀཱ. ཡཾ ཁོ ཏྭནྟིཨཱདཱིསུ ཡཾ པཝཱརཎཾ ཋཔེསི, ཏཾ དིཊྛེན ཋཔེསཱིཏི ཏཾ-སདྡཾ ཨཛ྄ཛྷཱཧརིཏྭཱ ཡོཛེཏབྦཾ.

༢༣༩. ཝཏྠུཾ པཀཱསེནྟོཏི པུགྒལེ པརིསངྐུཔྤཏྟིཡཱ ནིམིཏྟབྷཱུཏཾ ཝཏྠུམཏྟཾཡེཝ སནྡྷཱཡ ཝུཏྟཾ ¶ . ཡཾ པན ཝཏྠུཾ སནྡྷཱཡ ‘‘པུགྒལོ པཉྙཱཡཏི, ན ཝཏྠཱུ’’ཏི ཨཱཧ, ན ཏཾ སནྡྷཱཡེཏཾ ཝུཏྟཾ. ཡདི པན ཏསྶ བྷིཀྑུནོ ཝསནཊྛཱནེ པོཀྑརཎིཏོ མཙྪགྒཧཎཱདི དིསྶེཡྻ, ཏདཱ ‘‘ཝཏྠུ ཙ པུགྒལོ ཙ པཉྙཱཡཏཱི’’ཏི ཝཏྟབྦཾ བྷཝེཡྻ. ཏེནཱཧ ‘‘པུརིམནཡེནེཝ ཙོརེཧཱི’’ཏིཨཱདི. བྷིཀྑུནོ སརཱིརེ མཱལཱགནྡྷཉྩ ཨརིཊྛགནྡྷཉྩ དིསྭཱ ཨེཝཾ ‘‘ཝཏྠུ ཙ པུགྒལོ ཙ པཉྙཱཡཏཱི’’ཏི ཝུཏྟནྟི ཝེདིཏབྦཾ.

ཨཕཱསུཝིཧཱརཀཐཱདིཝཎྞནཱ ནིཊྛིཏཱ.

བྷཎྜནཀཱརཀཝཏྠུཀཐཱཝཎྞནཱ

༢༤༠. དྭེ ¶ ཙཱཏུདྡསིཀཱ ཧོནྟཱིཏི ཏཏིཡཔཀྑེ ཙཱཏུདྡསིཡཱ སདྡྷིཾ དྭེ ཙཱཏུདྡསིཀཱ ཧོནྟི. ‘‘བྷཎྜནཀཱརཀཱནཾ ཏེརསེ ཝཱ ཙཱཏུདྡསེ ཝཱ ཨིམེ པནྣརསཱིཔཝཱརཎཾ པཝཱརེསྶནྟཱི’’ཏི ཨིམིནཱ ཡཐཱསཀཾ ཨུཔོསཐཀརཎདིཝསཏོ པཊྛཱཡ བྷིཀྑཱུནཾ ཙཱཏུདྡསཱིཔནྣརསཱིཝོཧཱརོ, ན ཙནྡགཏིསིདྡྷིཡཱ ཏིཐིཡཱ ཝསེནཱཏི དསྶེཏི. ཀིཉྩཱཔི ཨེཝཾ ‘‘ཨནུཛཱནཱམི, བྷིཀྑཝེ, རཱཛཱུནཾ ཨནུཝཏྟིཏུ’’ནྟི (མཧཱཝ. ༡༨༦) ཝཙནཏོ པནེཏྠ ལོཀིཡཱནཾ ཏིཐིཾ ཨནུཝཏྟནྟེཧིཔི ཨཏྟནོ ཨུཔོསཐཀྐམེན ཙཱཏུདྡསིཾ པནྣརསིཾ ཝཱ, པནྣརསིཾ ཙཱཏུདྡསིཾ ཝཱ ཀརོནྟེཧེཝ ཨནུཝཏྟིཏབྦཾ, ན པན སོལ༹སམདིཝསཾ ཝཱ ཏེརསམདིཝསཾ ཝཱ ཨུཔོསཐདིཝསཾ ཀརོནྟེཧི. ཏེནེཝ པཱལི༹ཡམྤི ‘‘དྭེ ཏཡོ ཨུཔོསཐེ ཙཱཏུདྡསིཀེ ཀཱཏུ’’ནྟི ཝུཏྟཾ. ཨཉྙཐཱ དྭཱདསིཡཾ, ཏེརསིཡཾ ཝཱ ཨུཔོསཐོ ཀཱཏབྦོཏི ཝཏྟབྦཏོ. ‘‘སཀིཾ པཀྑསྶ ཙཱཏུདྡསེ, པནྣརསེ ཝཱ’’ཏིཨཱདིཝཙནམྤི ཨུཔཝུཏྠཀྐམེནེཝ ཝུཏྟཾ, ན ཏིཐིཀྐམེནཱཏི གཧེཏབྦཾ.

བྷཎྜནཀཱརཀཝཏྠུཀཐཱཝཎྞནཱ ནིཊྛིཏཱ.

པཝཱརཎཱསངྒཧཀཐཱཝཎྞནཱ

༢༤༡. ‘‘པཝཱརེཏྭཱ པན ཨནྟརཱཔི ཙཱརིཀཾ པཀྐམིཏུཾ ལབྷནྟཱི’’ཏི ཨིམིནཱ པཝཱརཎཱསངྒཧེ ཀཏེ ཨནྟརཱ པཀྐམིཏུཀཱམཱ སངྒྷཾ སནྣིཔཱཏཱཔེཏྭཱ པཝཱརེཏུཾ ལབྷནྟཱིཏི དསྶེཏི.

པཝཱརཎཱསངྒཧཀཐཱཝཎྞནཱ ནིཊྛིཏཱ.

པཝཱརཎཱཀྑནྡྷཀཝཎྞནཱནཡོ ནིཊྛིཏོ.

༥. ཙམྨཀྑནྡྷཀོ

སོཎཀོལི༹ཝིསཀཐཱདིཝཎྞནཱ

༢༤༢. ཙམྨཀྑནྡྷཀེ ¶ ¶ ཨུཎྞཔཱཝཱརཎནྟི ཨུབྷཏོ ལོམཱནི ཨུཊྛཱཔེཏྭཱ ཀཏཾ ཨུཎྞམཡཾ པཱཝཱརཎཾ, ཨུབྷཏོ ཀཔྤཱསཔིཙུཾ ཨུཊྛཱཔེཏྭཱ ཝཱིཏཔཱཝཱརོཔི ཨཏྠི, ཏཏོ ནིཝཏྟནཏྠཾ ‘‘ཨུཎྞཔཱཝཱརཎ’’ནྟི ཝུཏྟཾ.

ཨཌྜྷཙནྡཔཱསཱཎེཏི སོཔཱནམཱུལེ ཨུཔཌྜྷཾ ཨནྟོ པཝེསེཏྭཱ ཋཔིཏེ ཨཌྜྷཔཱསཱཎེ. པཱལི༹ཡཾ ཝིཧཱརཔཙྪཱཡཱཡནྟི ཝིཧཱརཔཙྩནྟེ ཚཱཡཱཡ, ཝིཧཱརསྶ ཝཌྜྷམཱནཙྪཱཡཱཡནྟིཔི ཝདནྟི.

༢༤༣. བྷོགཱཏི ཨུཔཡོགཏྠེ པཙྩཏྟཝཙནཾ. ཨཙྩཱཡཏཱཏི ཨཏིཨཱཡཏཱ ཁརམུཙྪནཱ. སརཝཏཱིཏི མདྷུརསརསཾཡུཏྟཱ. ཨཏིསིཐིལཱ མནྡམུཙྪནཱ. ཝཱིརིཡསམཐནྟི ཝཱིརིཡསམྤཡུཏྟསམཐཾ. ཏཏྠ ཙ ནིམིཏྟཾ གཎྷཱཧཱིཏི ཏསྨིཉྩ སམབྷཱཝེ སཏི ཡཾ ཨཱདཱསེ མུཁནིམིཏྟཾ ཝིཡ ནིམིཏྟཾ ཨུཔྤཛྫཏི, ཏཾ སམཐནིམིཏྟཾ, ཝིཔསྶནཱནིམིཏྟཾ, མགྒནིམིཏྟཾ, ཕལནིམིཏྟཉྩ གཎྷཱཧི ནིབྦཏྟེཧཱིཏི, ཨེཝམསྶ ཨརཧཏྟཔརིཡོསཱནཾ ཀམྨཊྛཱནཾ ཀཐིཏཾ.

༢༤༤. ཚཋཱནཱནཱིཏི ཚ ཀཱརཎཱནི. ཨདྷིམུཏྟོཏི པཊིཝིཛ྄ཛྷིཏྭཱ ཋིཏོ. ནེཀྑམྨཱདྷིམུཏྟོཏིཨཱདི སབྦཾ ཨརཧཏྟཝསེན ཝུཏྟཾ. ཨརཧཏྟཉྷི སབྦཀིལེསེཧི ནིཀྑནྟཏྟཱ ནེཀྑམྨཾ, ཏེཧེཝ ཙ པཝིཝིཏྟཏྟཱ པཝིཝེཀོ, བྱཱཔཛྫཱབྷཱཝཏོ ཨབྱཱཔཛྫཾ, ཨུཔཱདཱནསྶ ཁཡནྟེ ཨུཔྤནྣཏྟཱ ཨུཔཱདཱནཀྑཡོ, ཏཎྷཀྑཡནྟེ ཨུཔྤནྣཏྟཱ ཏཎྷཀྑཡོ, སམྨོཧཱབྷཱཝཏོ ཨསམྨོཧོཏི ཙ ཝུཙྩཏི.

ཀེཝལཾ སདྡྷཱམཏྟཀནྟི ཀེཝལཾ པཊིཝེདྷཔཉྙཱཡ ཨསམྨིསྶཾ སདྡྷཱམཏྟཀཾ. པཊིཙཡནྟི པུནཔྤུནཾ ¶ ཀརཎེན ཝཌྜྷིཾ. ཝཱིཏརཱགཏྟཱཏི མགྒཔཊིཝེདྷེན རཱགསྶ ཝིགཏཏྟཱ ཨེཝ ནེཀྑམྨསངྑཱཏཾ ཨརཧཏྟཾ པཊིཝིཛ྄ཛྷིཏྭཱ སཙྪིཀཏྭཱ ཋིཏོ ཧོཏི. སེསཔདེསུཔི ཨེསེཝ ནཡོ. པཝིཝེཀཱདྷིམུཏྟོཏི ‘‘པཝིཝེཀེ ཨདྷིམུཏྟོ ཨཧ’’ནྟི ཨེཝཾ ཨརཧཏྟཾ བྱཱཀརོཏཱིཏི ཨཏྠོ.

སཱིལབྦཏཔརཱམཱསནྟི སཱིལཉྩ ཝཏཉྩ པརཱམསིཏྭཱ གཧིཏགྒཧཎམཏྟཾ. སཱརཏོ པཙྩཱགཙྪནྟོཏི སཱརབྷཱཝེན ཛཱནནྟོ. ཨབྱཱཔཛྫཱདྷིམུཏྟོཏི ཨབྱཱཔཛྫཾ ཨརཧཏྟཾ བྱཱཀརོཏི.

ཨམིསྶཱིཀཏནྟི ¶ ཨམིསྶཀཏཾ. ཀིལེསཱ ཧི ཨཱརམྨཎེན སདྡྷིཾ ཙིཏྟཾ མིསྶཾ ཀརོནྟི, ཏེསཾ ཨབྷཱཝཱ ཨམིསྶཱིཀཏཾ. བྷུསཱ ཝཱཏཝུཊྛཱིཏི བལཝཝཱཏཀྑནྡྷོ.

ཨུཔཱདཱནཀྑཡསྶ ཙཱཏི ཨུཔཡོགཏྠེ སཱམིཝཙནཾ. དིསྭཱ ཨཱཡཏནུཔྤཱདནྟི ཙཀྑཱདིཨཱཡཏནཱནཾ ཨུཔྤཱདཉྩ ཝཡཉྩ དིསྭཱ. ཙིཏྟཾ ཝིམུཙྩཏཱིཏི ཨིམཱཡ ཝིཔསྶནཱཔཊིཔཏྟིཡཱ ཕལསམཱཔཏྟིཝསེན ཙིཏྟཾ ཝིམུཙྩཏི.

སོཎཀོལི༹ཝིསཀཐཱདིཝཎྞནཱ ནིཊྛིཏཱ.

དིགུཎཱདིཨུཔཱཧནཔཊིཀྑེཔཀཐཱཝཎྞནཱ

༢༤༥. སཀཊཝཱཧེཏི དྭཱིཧི སཀཊེཧི པརིཙྪིནྣེ ཝཱཧེ. ‘‘ཝཱཧེ’’ཏི བཧུཝཙནསྶ ཧིརཉྙཝིསེསནཏྟེཔི སཱམཉྙཱཔེཀྑཱཡ ‘‘ཧིརཉྙ’’ནྟི ཨེཀཝཙནཾ ཀཏཾ.

༢༤༦. ཨདྡཱརིཊྛཀཝཎྞཱཏི ཨལླཱརིཊྛཕལཝཎྞཱ, ཏིནྟཀཱཀཔཀྑཝཎྞཱཏིཔི ཝདནྟི. རཛནནྟི ཨུཔལིཏྟཾ ནཱིལཱདིཝཎྞཾ སནྡྷཱཡ ཝུཏྟཾ. ཏེནཱཧ ‘‘ཙོལ༹ཀེན པུཉྪིཏྭཱ’’ཏི. ཏཉྷི ཏཐཱ པུཉྪིཏེ ཝིགཙྪཏི. ཡཾ པན ཙམྨསྶ དུགྒནྡྷཱཔནཡནཏྠཾ ཀཱལ༹རཏྟཱདིརཛནེཧི རཉྫིཏཏྟཱ ཀཱལ༹རཏྟཱདིཝཎྞཾ ཧོཏི, ཏཾ ཙོལཱ༹དཱིཧི ཨཔནེཏུཾ ན སཀྐཱ ཙམྨགཏིཀམེཝ, ཏསྨཱ ཏཾ ཝཊྚཏཱིཏི དཊྛབྦཾ.

ཁལླཀནྟི སབྦཔཎྷིཔིདྷཱནཙམྨཾ, ཨཔརིགལ༹ནཏྠཾ པཎྷིཨུཔརིབྷཱགེ ཨཔིདྷཱཡ ཨཱརོཔནབནྡྷནམཏྟཾ ཝཊྚཏི. ཝིཙིཏྲཱཏི སཎྛཱནཏོ ཝིཙིཏྲཔཊཱ ཨདྷིཔྤེཏཱ, ན ཝཎྞཏོ སབྦསོ ཨཔནེཏབྦེསུ ¶ ཁལླཀཱདཱིསུ པཝིཊྛཏྟཱ. བིལཱ༹ལསདིསམུཁཏྟཱ མཧཱཨུལཱུཀཱ ‘‘པཀྑིབིལཱ༹ལཱ’’ཏི ཝུཙྩཏི, ཏེསཾ ཙམྨཾ ནཱམ པཀྑལོམམེཝ.

དིགུཎཱདིཨུཔཱཧནཔཊིཀྑེཔཀཐཱཝཎྞནཱ ནིཊྛིཏཱ.

ཨཛ྄ཛྷཱརཱམེཨུཔཱཧནཔཊིཀྑེཔཀཐཱདིཝཎྞནཱ

༢༥༡. ཨུཎྞཱཧི ¶ ཀཏཔཱདུཀཱཏི ཨེཏྠ ཨུཎྞཱམཡཀམྦལེཧི ཀཏཱ པཱདུཀཱ སངྒཡ྄ཧནྟི.

༢༥༣. གངྒཱམཧཀཱིལི༹ཀཱཡཱཏི གངྒཱམཧེ ཀཱིལི༹ཀཱཡ. ཏཏྠ ཧི ཨིཏྠིཔུརིསཱ ཡཱནེཧི ཨུདཀཀཱིལ༹ཾ གཙྪནྟི. པཱིཋཀསིཝིཀནྟི ཕལཀཱདིནཱ ཀཏཾ པཱིཋཀཡཱནཾ. པཊཔོཏལིཀཾ ཨནྡོལིཀཱ. སབྦམྤི ཡཱནཾ ཨུཔཱཧནེནཔི གནྟུཾ ཨསམཏྠསྶ གིལཱནསྶ ཨནུཉྙཱཏཾ.

༢༥༤. ཝཱལ༹རཱུཔཱནཱིཏི ཨཱཧརིམཱནི ཝཱལ༹རཱུཔཱནི. ཙཏུརངྒུལཱདྷིཀཱནཱིཏི ཨུདྡལོམཱིཨེཀནྟལོམཱིཧི ཝིསེསདསྶནཾ. ཙཏུརངྒུལཏོ ཧི ཨཱུནཱནི ཀིར ཨུདྡལོམཱིཨཱདཱིསུ པཝིསནྟི. ཝཱནཙིཏྲོ ཨུཎྞཱམཡཏྠརཎོཏི ནཱནཱཝཎྞེཧི ཨུཎྞཱམཡསུཏྟེཧི བྷིཏྟིཙྪེདཱདིཝསེན ཝཱཡིཏྭཱ ཀཏཙིཏྟཏྠརཎོ. གྷནཔུཔྥཀོཏི བཧལརཱགོ. པཀཏིཏཱུལིཀཱཏི ཏཱུལཔུཎྞཱ བྷིསི. ཝིཀཏིཀཱཏི སཱིཧརཱུཔཱདིཝསེན ཝཱནཙིཏྲཱཝ གཡ྄ཧཏི. ཨུདྡལོམཱིཏི ‘‘ཨུབྷཏོདསཾ ཨུཎྞཱམཡཏྠརཎ’’ནྟི དཱིགྷནིཀཱཡཊྛཀཐཱཡཾ ཝུཏྟཾ. ཀོསེཡྻཀཊྚིསྶམཡནྟི ཀོསིཡསུཏྟཱནཾ ཨནྟརཱ སུཝཎྞམཡསུཏྟཱནི པཝེསེཏྭཱ ཝཱིཏཾ. སུཝཎྞསུཏྟཾ ཀིར ‘‘ཀཊྚིསྶཾ, ཀསཊ’’ནྟི ཙ ཝུཙྩཏི. ཏེནེཝ ‘‘ཀོསེཡྻཀསཊམཡ’’ནྟི ཨཱཙརིཡ-དྷམྨཔཱལཏྠེརེན ཝུཏྟནྟི ཝདནྟི. རཏནཔརིསིབྦིཏནྟི སུཝཎྞལིཏྟཾ. སུདྡྷཀོསེཡྻནྟི རཏནཔརིསིབྦནརཧིཏཾ.

ཨཛིནམིགཙམྨཱནཾ ཨཏིསུཁུམཏྟཱ དུཔཊྚཏིཔཊྚཱནི ཀཏྭཱ སིབྦནྟཱིཏི ཝུཏྟཾ ‘‘ཨཛིནཔྤཝེཎཱི’’ཏི. རཏྟཝིཏཱནེནཱཏི སབྦརཏྟེན ཝིཏཱནེན. ཡཾ པན ནཱནཱཝཎྞཾ ཝཱནཙིཏྟཾ ཝཱ ལེཔཙིཏྟཾ ཝཱ, ཏཾ ཝཊྚཏི. ཨུབྷཏོལོཧིཏཀཱུཔདྷཱནེཔི ཨེསེཝ ནཡོ. ‘‘ཙིཏྲཾ ཝཱ’’ཏི ཨིདཾ པན སབྦཐཱ ཀཔྤིཡཏྟཱ ཝུཏྟཾ, ན པན ཨུབྷཏོཨུཔདྷཱནེསུ ཨཀཔྤིཡཏྟཱ. ན ཧི ལོཧིཏཀ-སདྡོ ཙིཏྟེ ཝཏྟཏི, པཊལིགྒཧཎེནེཝ ཙིཏྟཀསྶཔི ཨཏྠརཎསྶ སངྒཧེཏབྦཔྤསངྒཏོ, ཀཱསཱཝཾ པན ལོཧིཏཀཝོཧཱརཾ ན གཙྪཏི. ཏསྨཱ ཝིཏཱནེཔི ཨུབྷཏོཨུཔདྷཱནེཔི ཝཊྚཏི. སཙེ པམཱཎཡུཏྟནྟིཨཱདི ཨཉྙཔྤམཱཎཱཏིཀྐནྟསྶ བིབྦོཧནསྶ པཊིཀྑིཏྟབྷཱཝདསྶནཏྠཾ ཝུཏྟཾ, ན པན ¶ ཨུཙྩཱསཡནམཧཱསཡནབྷཱཝདསྶནཏྠཾ ཏཐཱ ཨཝུཏྟཏྟཱ. ཏཾ པན ཨུཔདྷཱནཾ ཨུཔོསཐིཀཱནཾ ¶ གཧཊྛཱནཾ ཝཊྚཏི. ཨུཙྩཱསཡནམཧཱསཡནམེཝ ཧི ཏདཱ ཏེསཾ ན ཝཊྚཏི. དཱིགྷནིཀཱཡཊྛཀཐཱདཱིསུ ཀིཉྩཱཔི ‘‘ཋཔེཏྭཱ ཏཱུལིཀཾ སབྦཱནེཝ གོནཀཱདཱིནི རཏནཔརིསིབྦིཏཱནི ཝཊྚནྟཱི’’ཏིཨཱདི ཝུཏྟཾ, ཝིནཡཊྛཀཐཱཡེཝ ཀཔྤིཡཱཀཔྤིཡབྷཱཝེ པམཱཎནྟི གཧེཏབྦཾ.

ཨཛ྄ཛྷཱརཱམེཨུཔཱཧནཔཊིཀྑེཔཀཐཱདིཝཎྞནཱ ནིཊྛིཏཱ.

གིཧིཝིཀཏཱནུཉྙཱཏཱདིཀཐཱཝཎྞནཱ

༢༥༦. ཨབྷིནིསྶཱཡཱཏི ཨཔསྶཱཡ. ཝིསུཀཱཡིཀཝིཔྥནྡིཏཱནནྟི པཊིཔཀྑབྷཱུཏཱནཾ དིཊྛིཙིཏྟཝིཔྥནྡིཏཱནནྟི ཨཏྠོ.

༢༥༧. ཡཏིནྡྲིཡནྟི མནིནྡྲིཡཝསེན སཉྙཏིནྡྲིཡཾ.

༢༥༨. པཱལི༹ཡཾ ཨཊྛཀཝགྒིཀཱནཱིཏི སུཏྟནིཔཱཏེ (སུ. ནི. ༧༧༢ ཨཱདཡོ) ཨཊྛཀཝགྒབྷཱུཏཱནི སོལ༹ས སུཏྟཱནི. ཨེཝཾ ཙིརཾ ཨཀཱསཱིཏི ཨེཝཾ ཙིརཀཱལཾ པབྦཛྫཾ ཨནུཔགནྟྭཱ ཨགཱརམཛ྄ཛྷེ ཀེན ཀཱརཎེན ཝཱསམཀཱསཱིཏི ཨཏྠོ. སོ ཀིར མཛ྄ཛྷིམཝཡེ པབྦཛིཏོ, ཏེན བྷགཝཱ ཨེཝམཱཧ. ཨེཏམཏྠཾ ཝིདིཏྭཱཏི ཀཱམེསུ དིཊྛཱདཱིནཝཱ ཙིརཱཡིཏྭཱཔི གྷརཱཝཱསེན པཀྑནྡནྟཱིཏི ཨེཏམཏྠཾ སབྦཱཀཱརཏོ ཝིདིཏྭཱ.

ཨཱདཱིནཝཾ ལོཀེཏི སངྑཱརལོཀེ ཨནིཙྩཏཱདིཨཱདཱིནཝཾ. ནིརུཔདྷིནྟི ནིབྦཱནཾ. ‘‘ཨརིཡོ ན རམཏཱི པཱཔེ’’ཏི ཨིམསྶ ཧེཏུམཱཧ ‘‘པཱཔེ ན རམཏཱི སུཙཱི’’ཏི. ཏཏྠ སུཙཱིཏི ཝིསུདྡྷཔུགྒལོ.

༢༥༩. ཀཱལ༹སཱིཧོཏི ཀཱལ༹མུཁཝཱནརཛཱཏི. ཙམྨཾ ན ཝཊྚཏཱིཏི ནིསཱིདནཏྠརཎཾ ཀཱཏུཾ ན ཝཊྚཏི, བྷཱུམཏྠརཎཱདིཝསེན སེནཱསནཔརིབྷོགོ ཝཊྚཏེཝ.

གིཧིཝིཀཏཱནུཉྙཱཏཱདིཀཐཱཝཎྞནཱ ནིཊྛིཏཱ.

ཙམྨཀྑནྡྷཀཝཎྞནཱནཡོ ནིཊྛིཏོ.

༦. བྷེསཛྫཀྑནྡྷཀོ

པཉྩབྷེསཛྫཱདིཀཐཱཝཎྞནཱ

༢༦༠. བྷེསཛྫཀྑནྡྷཀེ ¶ ¶ པིཏྟཾ ཀོཊྛབྦྷནྟརགཏཾ ཧོཏཱིཏི བཧིསརཱིརེ བྱཱཔེཏྭཱ ཋིཏཾ ཨབདྡྷཔིཏྟཾ ཀོཊྛབྦྷནྟརགཏཾ ཧོཏི, ཏེན པིཏྟཾ ཀུཔིཏཾ ཧོཏཱིཏི ཨདྷིཔྤཱཡོ.

༢༦༡-༢. པཱལི༹ཡཾ ནཙྪཱདེནྟཱིཏི རུཙིཾ ན ཨུཔྤཱདེནྟི. སུསུཀཱཏི སམུདྡེ ཨེཀཱ མཙྪཛཱཏི, ཀུམྦྷིལཱཏིཔི ཝདནྟི. སཾསཊྛནྟི པརིསྶཱཝིཏཾ.

༢༦༣. པིཊྛེཧཱིཏི པིསིཏེཧི. ཀསཱཝེཧཱིཏི ཏཙཱདཱིནི ཨུདཀེ ཏཱཔེཏྭཱ གཧིཏཨཱུསརེཧི. ཨུབྦྷིདནྟི ཨཱུསརཔཾསུམཡཾ. ལོཎབིལནྟི ལོཎཝིསེསོ.

༢༦༤-༥. ཚཀཎནྟི གོམཡཾ. པཱཀཏིཀཙུཎྞནྟི ཨཔཀྐཀསཱཝཙུཎྞཾ, གནྡྷཙུཎྞཾ པན ན ཝཊྚཏི. པཱལི༹ཡཾ ཙུཎྞཙཱལིནིནྟི ཨུདུཀྑལེ ཀོཊྚིཏཙུཎྞཔརིསྶཱཝནིཾ. སུཝཎྞགེརུཀོཏི སུཝཎྞཏུཏྠཱདི. པཱལི༹ཡཾ ཨཉྫནཱུཔཔིསནནྟི ཨཉྫནེ ཨུཔནེཏུཾ པིསིཏབྦབྷེསཛྫཾ.

༢༦༧-༩. ཀབལི༹ཀཱཏི ཨུཔནཱཧབྷེསཛྫཾ. གྷརདིནྣཀཱབཱདྷོ ནཱམ གྷརཎིཡཱ དིནྣཝསཱིཀརཎབྷེསཛྫསམུཊྛིཏཨཱབཱདྷོ. ཏཱཡ ཚཱརིཀཱཡ པགྒྷརིཏཾ ཁཱརོདཀནྟི པརིསྶཱཝནེ ཏཙྪཱརིཀཾ པཀྑིཔིཏྭཱ ཨུདཀེ ཨབྷིསིཉྩིཏེ ཏཏོ ཚཱརིཀཏོ ཧེཊྛཱ པགྒྷརིཏཾ ཁཱརོདཀཾ. པཱལི༹ཡཾ ཨཀཊཡཱུསེནཱཏི ཨནབྷིསངྑཏེན མུགྒཡཱུསེན. ཀཊཱཀཊེནཱཏི མུགྒེ པཙིཏྭཱ ཨཙཱལེཏྭཱ པརིསྶཱཝིཏེན མུགྒཡཱུསེནཱཏི ཝདནྟི.

པཉྩབྷེསཛྫཱདིཀཐཱཝཎྞནཱ ནིཊྛིཏཱ.

གུལཱ༹དིཨནུཛཱནནཀཐཱཝཎྞནཱ

༢༧༢-༤. གུལ༹ཀརཎནྟི ¶ ¶ ཨུཙྪུསཱལཾ. ཨཝིསྶཏྠཱཏི སཱསངྐཱ.

༢༧༦. ཨཔྤམཏྟཀེཔི ཝཱརེནྟཱིཏི ཨཔྤམཏྟཀེ དིནྣེ དཱཡཀཱནཾ པཱིལཱ༹ཏི པཊིཀྑིཔནྟི. པཊིསངྑཱཔཱིཏི ཨེཏྟཀེནཔི ཡཱཔེཏུཾ སཀྐཱ, ‘‘ཨཝསེསཾ ཨཉྙེསཾ ཧོཏཱུ’’ཏི སལླཀྑེཏྭཱཔི པཊིཀྑིཔནྟི.

༢༧༩. ཝཏྠིཔཱིལ༹ནནྟི ཡཐཱ ཝཏྠིགཏཏེལཱདི ཨནྟོསརཱིརེ ཨཱརོཧནྟི, ཨེཝཾ ཧཏྠེན ཝཏྠིམདྡནཾ. སམྦཱདྷེ སཏྠཀམྨཝཏྠིཀམྨཱནམེཝ པཊིཀྑིཏྟཏྟཱ དཧནཀམྨཾ ཝཊྚཏི ཨེཝ.

གུལཱ༹དིཨནུཛཱནནཀཐཱཝཎྞནཱ ནིཊྛིཏཱ.

ཡཱགུམདྷུགོལ༹ཀཱདིཀཐཱཝཎྞནཱ

༢༨༢-༣. པཱལི༹ཡཾ དསསྶ ཋཱནཱནཱིཏི ཨསྶ པཊིགྒཱཧཀསྶ དས ཋཱནཱནི ཀཱརཎཱནི དྷམྨེནཱཏི ཨཏྠོ. ཨནུཔྤཝེཙྪཏཱིཏི དེཏི. ཝཱཏཉྩ བྱཔནེཏཱིཏི སམྦནྡྷོ, ཝཱཏཉྩ ཨནུལོམེཏཱིཏི ཨཏྠོ. སགྒཱ ཏེ ཨཱརདྡྷཱཏི ཏཡཱ དེཝལོཀཱ ཨཱརཱདྷིཏཱ.

ཡཱགུམདྷུགོལ༹ཀཱདིཀཐཱཝཎྞནཱ ནིཊྛིཏཱ.

པཱཊལིགཱམཝཏྠུཀཐཱཝཎྞནཱ

༢༨༦. པཱཊལིགཱམེ ནགརཾ མཱཔེནྟཱིཏི པཱཊལིགཱམསྶ སམཱིཔེ ཏསྶེཝ གཱམཁེཏྟབྷཱུཏེ མཧནྟེ ཨརཉྙཔྤདེསེ པཱཊལིཔུཏྟཾ ནཱམ ནགརཾ མཱཔེནྟི. ཡཱཝཏཱ ཨརིཡཾ ཨཱཡཏནནྟི ཡཏྟཀཾ ཨརིཡམནུསྶཱནཾ ཨོསརཎཊྛཱནཾ. ཡཱཝཏཱ ཝཎིཔྤཐོཏི ཡཏྟཀཾ ཝཱཎིཛཱནཾ བྷཎྜཝིཀྐཱིཎནཊྛཱནཾ, ཝསནཊྛཱནཾ ཝཱ, ཨིདཾ ཏེསཾ སབྦེསཾ ཨགྒནགརཾ བྷཝིསྶཏཱིཏི ཨཏྠོ. པུཊབྷེདནནྟི སཀཊཱདཱིཧི ནཱནཱདེསཏོ ཨཱཧཊཱནཾ བྷཎྜཔུཊཱནཾ ཝིཀྐཱིཎནཏྠཱཡ མོཙནཊྛཱནཾ. སརནྟི ཏལཱ༹ཀཱདཱིསུཔི ཝཏྟཏི ¶ , ཏནྣིཝཏྟནཏྠཾ ¶ ‘‘སརནྟི ཨིདྷ ནདཱི ཨདྷིཔྤེཏཱ’’ཏི ཝུཏྟཾ སརཏི སནྡཏཱིཏི ཀཏྭཱ. ཝིནཱ ཨེཝ ཀུལླེན ཏིཎྞཱཏི ཨིདཾ ཨཔྤམཏྟཀཨུདཀམྤི ཨཕུསིཏྭཱ ཝིནཱ ཀུལླེན པཱརཔྤཏྟཱ.

པཱཊལིགཱམཝཏྠུཀཐཱཝཎྞནཱ ནིཊྛིཏཱ.

ཀོཊིགཱམེསཙྩཀཐཱཝཎྞནཱ

༢༨༧. པཱལི༹ཡཾ སནྡྷཱཝིཏནྟི བྷཝཏོ བྷཝཾ པཊིསནྡྷིགྒཧཎཝསེན སནྡྷཱཝནཾ ཀཏཾ. སཾསརིཏནྟི ཏསྶེཝ ཝེཝཙནཾ. མམཉྩེཝ ཏུམྷཱཀཉྩཱཏི མཡཱ ཙ ཏུམྷེཧི ཙ, སཱམིཝསེནེཝ ཝཱ མམ ཙ ཏུམྷཱཀཉྩ སནྡྷཱཝནཾ ཨཧོསཱིཏི ཨཏྠོ གཧེཏབྦོ. སཾསརིཏནྟི སཾསརི. བྷཝཏཎྷཱ ཨེཝ བྷཝཏོ བྷཝཾ ནེཏཱིཏི བྷཝནེཏྟཱིཏི ཝུཏྟཱ.

༢༨༩. ‘‘ནཱིལཱ ཧོནྟཱི’’ཏི ཝུཏྟམེཝཏྠཾ ཝིཝརིཏུཾ ‘‘ནཱིལཝཎྞཱ’’ཏིཨཱདི ཝུཏྟཾ. ནཱིལཝཎྞཱཏི ནཱིལཝིལེཔནཱ. ཨེས ནཡོ སབྦཏྠ. པཊིཝཊྚེསཱིཏི པཧརི. ཨམྦཀཱཡཱཏི ཨམྦཱཡ. ཨུཔཙཱརཝཙནཉྷེཏཾ, མཱཏུགཱམེནཱཏི ཨཏྠོ. ཨུཔསཾཧརཐཱཏི ཨུཔནེཐ, ‘‘ཨཱིདིསཱ ཏཱཝཏིཾསཱ’’ཏི པརིཀཔྤེཐཱཏི ཨཏྠོ. ཨིདཉྩ བྷིཀྑཱུནཾ སཾཝེགཛནནཏྠཾ ཝུཏྟཾ, ན ནིམིཏྟགྒཱཧཏྠཾ. ལིཙྪཝིརཱཛཱནོ ཧི སབྦེ ན ཙིརསྶེཝ ཨཛཱཏསཏྟུནཱ ཝིནཱསཾ པཱཔུཎིསྶནྟི.

ཀོཊིགཱམེསཙྩཀཐཱཝཎྞནཱ ནིཊྛིཏཱ.

སཱིཧསེནཱཔཏིཝཏྠུཨཱདིཀཐཱཝཎྞནཱ

༢༩༠. སནྡྷཱགཱརེཏི རཱཛཀིཙྩསྶ སནྡྷཱརཎཏྠཱཡ ནིཙྪིདྡཾ ཀཏྭཱ ཝིཙཱརཎཏྠཱཡ ཀཏམཧཱསབྷཱཡ. གམིཀཱབྷིསངྑཱརོཏི གམནེ ཝཱཡཱམོ. དྷམྨསྶ ཙ ཨནུདྷམྨནྟི ཏུམྷེཧི ཝུཏྟསྶ ཀཱརཎསྶ ཨནུཀཱརཎཾ, ཏུམྷེཧི ཝུཏྟསྶ ཨཏྠསྶ ཨནུརཱུཔམེཝཱཏི ཨདྷིཔྤཱཡོ. སཧདྷམྨིཀོ ཝཱདཱནུཝཱདོཏི པརེཧི ཝུཏྟཀཱརཎེན སཀཱརཎོ ཧུཏྭཱ ཏུམྷཱཀཾ ཝཱདོ ཝཱ ¶ ཨིཏོ པརཾ ཏསྶ ཨནུཝཱདོ ཝཱ. ཀོཙི ཨཔྤམཏྟཀོཔི གཱརཡ྄ཧཾ ཋཱནཾ ན ཨཱགཙྪཏཱིཏི ཀིཾ ཏཝ ཝཱདེ གཱརཡ྄ཧཀཱརཎཾ ནཏྠཱིཏི ཝུཏྟཾ ཧོཏི.

༢༩༣. ཨནུཝིཙྩཀཱརནྟི ཨནུཝིདིཏཱཀཱརཾ. རཏནཏྟཡསྶ སརཎགམནཱདིཀིརིཡཾ ཀརོཏི. སཧསཱ ¶ ཀཏྭཱ མཱ པཙྪཱ ཝིཔྤཊིསཱརཱི ཨཧོསཱིཏི ཨཏྠོ. པཊཱཀཾ པརིཧརེཡྻུནྟི དྷཛཔཊཱཀཾ ཨུཀྑིཔིཏྭཱ ‘‘ཨཱིདིསོ ཨམྷཱཀཾ སརཎཾ གཏོ སཱཝཀོ ཛཱཏོ’’ཏི ནགརེ གྷོསེནྟཱ ཨཱཧིཎྜནྟི.

༢༩༤. ནིམིཏྟཀམྨསྶཱཏི མཾསཁཱདནནིམིཏྟེན ཨུཔྤནྣཔཱཎཱཏིཔཱཏཀམྨསྶ.

སཱིཧསེནཱཔཏིཝཏྠུཨཱདིཀཐཱཝཎྞནཱ ནིཊྛིཏཱ.

ཀཔྤིཡབྷཱུམིཨནུཛཱནནཀཐཱཝཎྞནཱ

༢༩༥. ཨནུཔྤགེ ཨེཝཱཏི པཱཏོཝ. ཨོརཝསདྡནྟི མཧཱསདྡཾ. ཏཾ པན ཨཝཏྭཱཔཱིཏི པི-སདྡེན ཏཐཱཝཙནམྤི ཨནུཛཱནཱཏི. ཨཊྛཀཐཱསཱུཏི ཨནྡྷཀཊྛཀཐཱཝིརཧིཏཱསུ སེསཊྛཀཐཱསུ. སཱདྷཱརཎལཀྑཎནྟི ཨནྡྷཀཊྛཀཐཱཡ སཧ སབྦཊྛཀཐཱནཾ སམཱནཾ.

ཙཡནྟི ཨདྷིཊྛཱནཨུཙྩཝཏྠུཾ. ཡཏོ པཊྛཱཡཱཏི ཡཏོ ཨིཊྛཀཱདིཏོ པཊྛཱཡ, ཡཾ ཨཱདིཾ ཀཏྭཱ བྷིཏྟིཾ ཨུཊྛཱཔེཏུཀཱམཱཏི ཨཏྠོ. ‘‘ཐམྦྷཱ པན ཨུཔརི ཨུགྒཙྪནྟི, ཏསྨཱ ཝཊྚནྟཱི’’ཏི ཨེཏེན ཨིཊྛཀཔཱསཱཎཱ ཧེཊྛཱ པཏིཊྛཱཔིཏཱཔི ཡདི ཙཡཏོ, བྷཱུམིཏོ ཝཱ ཨེཀངྒུལམཏྟམྤི ཨུགྒཏཱ ཏིཊྛནྟི, ཝཊྚནྟཱིཏི སིདྡྷཾ ཧོཏི.

ཨཱརཱམོཏི ཨུཔཙཱརསཱིམཱཔརིཙྪིནྣོ སཀལོ ཝིཧཱརོ. སེནཱསནཱནཱིཏི ཝིཧཱརསྶ ཨནྟོ ཏིཎཀུཊིཨཱདིཀཱནི སངྒྷསྶ ནིཝཱསགེཧཱནི. ཝིཧཱརགོནིསཱདིཀཱ ནཱམཱཏི སེནཱསནགོནིསཱདིཀཱ. སེནཱསནཱནི ཧི སཡཾ པརིཀྑིཏྟཱནིཔི ཨཱརཱམཔརིཀྑེཔཱབྷཱཝེན ‘‘གོནིསཱདིཀཱནཱི’’ཏི ཝུཏྟཱནི. ‘‘ཨུཔཌྜྷཔརིཀྑིཏྟོཔཱི’’ཏི ཨིམིནཱ ཏཏོ ཨཱུནཔརིཀྑིཏྟོ ཡེབྷུཡྻེན ཨཔརིཀྑིཏྟོ ནཱམ, ཏསྨཱ ཨཔརིཀྑིཏྟསངྑྱམེཝ གཙྪཏཱིཏི དསྶེཏི. ཨེཏྠཱཏི ཨུཔཌྜྷཱདིཔརིཀྑིཏྟེ. ཀཔྤིཡཀུཊིཾ ལདྡྷུཾ ཝཊྚཏཱིཏི གོནིསཱདིཡཱ ¶ ཨབྷཱཝེན སེསཀཔྤིཡཀུཊཱིསུ ཏཱིསུ ཡཱ ཀཱཙི ཀཔྤིཡཀུཊི ཀཱཏབྦཱཏི ཨཏྠོ.

ཏེསཾ གེཧཱནཱིཏི ཨེཏྠ བྷིཀྑཱུནཾ ཝཱསཏྠཱཡ ཀཏམྤི ཡཱཝ ན དེནྟི, ཏཱཝ ཏེསཾ སནྟཀཾཡེཝ བྷཝིསྶཏཱིཏི དཊྛབྦཾ. ཝིཧཱརཾ ཋཔེཏྭཱཏི ཨུཔསམྤནྣཱནཾ ཝཱསཏྠཱཡ ཀཏགེཧཾ ཋཔེཏྭཱཏི ཨཏྠོ. གེཧནྟི ནིཝཱསགེཧཾ, ཏདཉྙཾ པན ཨུཔོསཐཱགཱརཱདི སབྦཾ ཨནིཝཱསགེཧཾ ཙཏུཀཔྤིཡབྷཱུམིཝིམུཏྟཱ པཉྩམཱི ཀཔྤིཡབྷཱུམི. སངྒྷསནྟཀེཔི ཧི ཨེཏཱདིསེ གེཧེ སུཊྛུ པརིཀྑིཏྟཱརཱམཏྟེཔི ¶ ཨབྦྷོཀཱསེ ཝིཡ ཨནྟོཝུཏྠཱདིདོསོ ནཏྠི. ཡེན ཀེནཙི ཚནྣེ, པརིཙྪནྣེ ཙ སཧསེཡྻཔྤཧོནཀེ བྷིཀྑུསངྒྷསྶ ནིཝཱསགེཧེ ཨནྟོཝུཏྠཱདིདོསོ, ན ཨཉྙཏྠ. ཏེནཱཧ ‘‘ཡཾ པནཱ’’ཏིཨཱདི. ཏཏྠ ‘‘སངྒྷིཀཾ ཝཱ པུགྒལིཀཾ ཝཱ’’ཏི ཨིདཾ ཀིཉྩཱཔི བྷིཀྑུནཱིནཾ སཱམཉྙཏོ ཝུཏྟཾ, བྷིཀྑཱུནཾ པན སངྒྷིཀཾ པུགྒལིཀཉྩ བྷིཀྑུནཱིནཾ, ཏཱསཾ སངྒྷིཀཾ པུགྒལིཀཉྩ བྷིཀྑཱུནཾ གིཧིསནྟཀཊྛཱནེ ཏིཊྛཏཱིཏི ཝེདིཏབྦཾ.

མུཁསནྣིདྷཱིཏི ཨནྟོསནྣིཧིཏདོསོ ཧི མུཁཔྤཝེསནནིམིཏྟཾ ཨཱཔཏྟིཾ ཀརོཏི, ནཱཉྙཐཱ. ཏསྨཱ ‘‘མུཁསནྣིདྷཱི’’ཏི ཝུཏྟོ.

ཏཏྠ ཏཏྠ ཁཎྜཱ ཧོནྟཱིཏི ཨུཔཌྜྷཏོ ཨདྷིཀཾ ཁཎྜཱ ཧོནྟི. སབྦསྨིཾ ཚདནེ ཝིནཊྛེཏི ཏིཎཔཎྞཱདིཝསྶཔརིཏྟཱཡཀེ ཚདནེ ཝིནཊྛེ. གོཔཱནསཱིནཾ པན ཨུཔརི ཝལླཱིཧི བདྡྷདཎྜེསུ ཋིཏེསུཔི ཛཧིཏཝཏྠུཀཱ ཧོནྟི ཨེཝ. པཀྑཔཱསཀམཎྜལནྟི ཨེཀསྨིཾ པསྶེ ཏིཎྞཾ གོཔཱནསཱིནཾ ཨུཔརི ཋིཏཏིཎཔཎྞཱདིཙྪདནཾ ཝུཙྩཏི.

ཨནུཔསམྤནྣསྶ དཱཏབྦོ ཨསྶཱཏིཨཱདིནཱ ཨཀཔྤིཡཀུཊིཡཾ ཝུཏྠམྤི ཨནུཔསམྤནྣསྶ དིནྣེ ཀཔྤིཡཾ ཧོཏི, སཱཔེཀྑདཱནཉྩེཏྠ ཝཊྚཏི, པཊིགྒཧཎཾ ཝིཡ ན ཧོཏཱིཏི དསྶེཏི.

༢༩༩. པཱལི༹ཡཾ ཀནྟཱརེ སམྦྷཱཝེསཱིཏི ཨཔྤབྷཀྑཀནྟཱརེ སམྤཱཔུཎི.

ཀཔྤིཡབྷཱུམིཨནུཛཱནནཀཐཱཝཎྞནཱ ནིཊྛིཏཱ.

ཀེཎིཡཛཊིལཝཏྠུཀཐཱཝཎྞནཱ

༣༠༠. ཛཊིལོཏི ¶ ཨཱཧརིམཛཊཱདྷརོ ཏཱཔསཝེསདྷཱརཀོ ཡཉྙཡུཏྟོ ལོཀཔཱུཛིཏོ བྲཱཧྨཎོ. པཝཏྟཱརོ པཱཝཙནཝསེན ཝཏྟཱརོ. ཡེསཾ སནྟཀམིདཾ, ཡེཧི ཝཱ ཨིདཾ གཱིཏནྟི ཨཏྠོ. གཱིཏཾ པཝུཏྟཾ སམིཧིཏནྟི ཨཉྙམཉྙསྶ པརིཡཱཡཝཙནཾ ཝུཏྟནྟི ཨཏྠོ. ཏདནུགཱཡནྟཱིཏི ཏཾ ཏེཧི པུབྦེ གཱིཏཾ ཨནུགཱཡནྟི. ཨེཝཾ སེསེསུ ཙ.

ཡཱཝཀཱལིཀཔཀྐཱནནྟི པཀྐེ སནྡྷཱཡ ཝུཏྟཾ, ཨཱམཱནི པན ཨནུཔསམྤནྣེཧི སཱིཏུདཀེ མདྡིཏྭཱ པརིསྶཱཝེཏྭཱ དིནྣཔཱནཾ པཙྪཱབྷཏྟམྤི ཀཔྤཏི ཨེཝ. ཨཡཉྩ ཨཏྠོ མཧཱཨཊྛཀཐཱཡཾ སརཱུཔཏོ ¶ ཨཝུཏྟོཏི ཨཱཧ ‘‘ཀུརུནྡིཡཾ པནཱ’’ཏིཨཱདི. ‘‘ཨུཙྪུརསོ ནིཀསཊོ’’ཏི ཨིདཾ པཱཏབྦསཱམཉྙེན ཡཱམཀཱལིཀཀཐཱཡཾ ཝུཏྟཾ, ཏཾ པན སཏྟཱཧཀཱལིཀམེཝཱཏི གཧེཏབྦཾ. ཨིམེ ཙཏྟཱརོ རསཱཏི ཕལཔཏྟཔུཔྥཨུཙྪུརསཱ ཙཏྟཱརོ.

པཱལི༹ཡཾ ཨགྒིཧུཏྟམུཁཱཏི ཨགྒིཛུཧནཔུབྦཀཱ. ཚནྡསོཏི ཝེདསྶ. སཱཝིཏྟཱི མུཁཾ པཋམཾ སཛ྄ཛྷཱཡིཏབྦཱཏི ཨཏྠོ. ཏཔཏནྟི ཝིཛོཏནྟཱནཾ.

ཀེཎིཡཛཊིལཝཏྠུཀཐཱཝཎྞནཱ ནིཊྛིཏཱ.

རོཛམལླཱདིཝཏྠུཀཐཱཝཎྞནཱ

༣༠༡. བཧུཀཏོ བུདྡྷེ ཝཱཏི བུདྡྷེ ཀཏབཧུམཱནོཏི ཨཏྠོ. སོ ཁོ ཨཧཾ, བྷནྟེ ཨཱནནྡ, ཉཱཏཱིནཾ དཎྜབྷཡཏཛྫིཏོ ཨཧོསིནྟི སེསོ. ཨེཝཉྷི སཏི ‘‘ཨེཝཱཧ’’ནྟི པུན ཨཧཾ-གཧཎཾ ཡུཛྫཏི. ཝིཝརཱིཏི ‘‘ཝིཝརཏཱུ’’ཏི ཙིནྟཱམཏྟེན ཝིཝརི, ན ཨུཊྛཱཡ ཧཏྠེན.

༣༠༣. ཨཉྙཏརོཏི སུབྷདྡོ ཝུཌྜྷཔབྦཛིཏོ. དྭེ དཱརཀཱཏི སཱམཎེརབྷཱུམིཡཾ ཋིཏཱ དྭེ པུཏྟཱ. ནཱལི༹ཡཱཝཱཔཀེནཱཏི ནཱལི༹ཡཱ ཙེཝ ཐཝིཀཱཡ ཙ. སཾཧརཐ ཨིམེཧི བྷཱཛནེཧི ཏཎྜུལཱདཱིནི སངྐཌྜྷཐཱཏི ཨཏྠོ. བྷུསཱགཱརེཏི པལཱལམཡེ ཨགཱརེ, པལཱལཔུཉྫཾ ཨབྦྷནྟརཏོ པལཱལཾ སངྐཌྜྷིཏྭཱ ཨགཱརཾ ཀཏཾ ཧོཏི, ཏཏྠཱཏི ཨཏྠོ.

རོཛམལླཱདིཝཏྠུཀཐཱཝཎྞནཱ ནིཊྛིཏཱ.

ཙཏུམཧཱཔདེསཀཐཱཝཎྞནཱ

༣༠༥. པརིམདྡནྟཱཏི ¶ ཨུཔཔརིཀྑནྟཱ. དྭེ པཊཱ དེསནཱམེནེཝ ཝུཏྟཱཏི ཏེསཾ སརཱུཔདསྶནཔདམེཏཾ. ནཱཉྙནིཝཏྟནཔདཾ པཏྟུཎྞཔཊསྶཱཔི དེསནཱམེན ཝུཏྟཏྟཱ.

ཏུམྦཱཏི བྷཱཛནཱནི. ཕལཏུམྦོ ནཱམ ལཱབུཨཱདི. ཨུདཀཏུམྦོ ཨུདཀགྷཊོ. ཀིལཉྫཙྪཏྟནྟི ཝེལུ༹ཝིལཱིཝེཧི ཝཱཡིཏྭཱ ཀཏཚཏྟཾ. སམྦྷིནྣརསནྟི མིསྶཱིབྷཱུཏརསཾ.

ཙཏུམཧཱཔདེསཀཐཱཝཎྞནཱ ནིཊྛིཏཱ.

བྷེསཛྫཀྑནྡྷཀཝཎྞནཱནཡོ ནིཊྛིཏོ.

༧. ཀཐིནཀྑནྡྷཀོ

ཀཐིནཱནུཛཱནནཀཐཱཝཎྞནཱ

༣༠༦. ཀཐིནཀྑནྡྷཀེ ¶ ¶ སཱིསཝསེནཱཏི པདྷཱནཝསེན. ཀཐིནནྟི པཉྩཱནིསཾསེ ཨནྟོཀརཎསམཏྠཏཱཡ ཐིརནྟི ཨཏྠོ. སོ ནེསཾ བྷཝིསྶཏཱིཏི ཡུཛྫཏཱིཏི ‘‘སོ ཏུམྷཱཀ’’ནྟི ཨཝཏྭཱ ‘‘ནེས’’ནྟི ཝཙནཾ ཡུཛྫཏི. ཡེ ཨཏྠཏཀཐིནཱཏི ན ཀེཝལཾ ཏུམྷཱཀམེཝ, ཡེ ཨཉྙེཔི ཨཏྠཏཀཐིནཱ, ཏེསཾ བྷཝིསྶཏཱིཏི ཨཏྠོ. ཨཐ ཝཱ ཝོཏི ཏདཱ སམྨུཁཱིབྷཱུཏེཧི སདྡྷིཾ ཨསམྨུཁཱིབྷཱུཏེ ཙ ཨནཱགཏེ ཙ བྷིཀྑཱུ སབྦེ ཨེཀཏོ སམྤིཎྜེཏྭཱ ཝུཏྟཾ, ཏུམྷཱཀནྟི ཨཏྠོ. སོ ནེསནྟི ཨེཏྠ སོ ཏེསནྟི ཡོཛེཏབྦཾ. ཏེནཱཧ ‘‘ཨཏྠཏཀཐིནཱནཾ ཝོ, བྷིཀྑཝེ, ཨིམཱནི པཉྩ ཀཔྤིསྶནྟཱི’’ཏི. མཏཀཙཱིཝརནྟི མཏསྶ ཙཱིཝརཾ. ‘‘ཝུཏྠཝསྶཝསེནཱ’’ཏི ཨིདཾ པཙྪིམཝསྶཾཝུཏྠཱནམྤི སཱདྷཱརཎནྟི ཨཱཧ ‘‘པུརིམིཀཱཡ ཝསྶཾ ཨུཔགནྟྭཱ པཋམཔཝཱརཎཱཡ པཝཱརིཏཱ ལབྷནྟཱི’’ཏི. ཨུཔགཏཱ ཝཱ ན ལབྷནྟཱིཏི པཙྪིམིཀཱཡ ཝུཏྠཝསྶེཔི སནྡྷཱཡ ཝུཏྟཾ.

ཁལིམཀྑིཏསཱཊཀོཏི ཨཧཏཝཏྠཾ སནྡྷཱཡ ཝུཏྟཾ. ‘‘ཨཀཱཏུཾ ན ལབྦྷཏཱི’’ཏི ཨིམིནཱ ཨནཱདརིཡེ སཏི དུཀྐཊནྟི དཱིཔེཏི.

‘‘ཨཔལོཀེཏྭཱ’’ཏི ཨིདཾ ཨཉྙེསཾ ཝསྶཾཝུཏྠབྷིཀྑཱུནཾ ཨདཏྭཱ དཱཏུཀཱམེཧི ཀཏྟབྦཝིདྷིདསྶནཾ. ཡདི ཨེཝཾ ཀམྨཝཱཙཱཡ ཨེཝ དཱནཾ ཨཝུཏྟནྟི ཨཱཧ ‘‘ཀམྨཝཱཙཱ པནཱ’’ཏིཨཱདི. ཀཐིནཙཱིཝརཾ ཝིཡ ཀམྨཝཱཙཱཡ དཱཏུཾ ན ཝཊྚཏཱིཏི ཨཔལོཀེཏྭཱཝ དཱཏབྦནྟི ཨདྷིཔྤཱཡོ.

༣༠༨. མཧཱབྷཱུམིཀནྟི མཧཱཝིསཡཾ, ཙཏུཝཱིསཏིཨཱཀཱརཝནྟཏཱཡ མཧཱཝིཏྠཱརིཀནྟི ཝུཏྟཾ ཧོཏི. པཉྩཀནྟི པཉྩཁཎྜཾ. ཨེསེཝ ནཡོ སེསེསུཔི. པཋམཙིམིལིཀཱཏི ཀཐིནཝཏྠཏོ ཨཉྙཱ ¶ ཨཏྟནོ པཀཏིཙིམིལིཀཱ. ཀུཙྪིཙིམིལིཀཾ ཀཏྭཱ སིབྦིཏམཏྟེནཱཏི ཐིརཛིཎྞཱནཾ ཙིམིལིཀཱནཾ ཨེཀཏོ ཀཏྭཱ སིབྦནསྶེཏཾ ཨདྷིཝཙནནྟི ཝདནྟི. མཧཱཔཙྩརིཡཾ, ཀུརུནྡིཡཉྩ ཝུཏྟཝཙནནྟི དསྶནཾ, བྱཉྫནཏོ ཨེཝ བྷེདོ, ན ཨཏྠཏོཏི དསྶནཏྠཾ ཀཏནྟིཔི ཝདནྟི. པིཊྛིཨནུཝཱཏཱརོཔནམཏྟེནཱཏི དཱིགྷཏོ ཨནུཝཱཏསྶ ཨཱརོཔནམཏྟེན. ཀུཙྪིཨནུཝཱཏཱརོཔནམཏྟེནཱཏི པུཐུལཏོ ཨནུཝཱཏསྶ ཨཱརོཔནམཏྟེན. རཏྟིནིསྶགྒིཡེནཱཏི རཏྟིཨཏིཀྐནྟེན.

༣༠༩. ཧཏཝཏྠཀསཱཊཀེནཱཏི ¶ ཨཏིཛིཎྞསཱཊཀོ. ན ཧི ཏེནཱཏིཨཱདཱིསུ ཏེན པརིཝཱརཱགཏཔཱཋེན ཨིདྷ ཨཱནེཏྭཱ ཨཝུཙྩམཱནེན ཀཐིནཏྠཱརཀསྶ ཛཱནིཏབྦེསུ ན ཀིཉྩི པརིཧཱཡཏི, ཏསྶ སབྦསྶ ཨིདྷེཝ ཝུཏྟཏྟཱཏི ཨདྷིཔྤཱཡོ.

༣༡༠. མཱཏཱ ཝིཡཱཏི མཱཏིཀཱ, ཨིཝཏྠེ ཀ-པཙྩཡོ དཊྛབྦོ. ཏེན སིདྡྷམཏྠཾ དསྶེནྟོ ཨཱཧ ‘‘མཱཏིཀཱཏི མཱཏརོ’’ཏིཨཱདི. ཨསྶཱཏི ཨེཏིསྶཱ མཱཏིཀཱཡ. པཀྐམནནྟིཀོ ཀཐིནུབྦྷཱརོ ཨེཝ ཧི སཡཾ ཨཏྟནོ ཨུཔྤཛྫཏཱིཏི ཨེཝམབྷེདཱུཔཙཱརེན ‘‘མཱཏིཀཱ’’ཏི ཝུཏྟོ ཨུབྦྷཱརསྶེཝ པཀྐམནནྟེ སམུཔྤཏྟིཏོ, ཏབྦིནིམུཏྟཱཡ ཙ མཱཏིཀཱཡ ཨབྷཱཝཱ, ཏཔྤཀཱསིཀཱཔི ཙེཏྠ པཱལི༹ ‘‘མཱཏིཀཱ’’ཏི ཝཏྟུཾ ཡུཛྫཏི. སཱཔི ཧི པཀྐམནནྟིཀུབྦྷཱརཔྤཀཱསནེན ‘‘པཀྐམནནྟིཀཱ’’ཏི ཝུཏྟཱ. ཨེསེཝ ནཡོ སེསུབྦྷཱརེསུཔི. པཀྐམནནྟི ཙེཏྠ ཨུཔཙཱརསཱིམཱཏིཀྐམནཾ དཊྛབྦཾ.

ཀཐིནཱནུཛཱནནཀཐཱཝཎྞནཱ ནིཊྛིཏཱ.

ཨཱདཱཡསཏྟཀཀཐཱཝཎྞནཱ

༣༡༡. ‘‘ན པུན ཨཱགམིསྶ’’ནྟི ཨིདཾ ཨཱཝཱསཔལིབོདྷུཔཙྪེདཀཱརཎདསྶནཾ. པཉྩསུ ཧི ཙཱིཝརམཱསེསུ ཡདཱ ཀདཱཙི ན པཙྩེསྶནྟི ཙིཏྟེན ཨུཔཙཱརསཱིམཱཏིཀྐམེན ཨཱཝཱསཔལིབོདྷོ ཚིཛྫཏི. པཙྩེསྶནྟི བཧིཨུཔཙཱརགཏསྶ པན ཡཏྠ ཀཏྠཙི ན པཙྩེསྶནྟི ཙིཏྟེ ཨུཔྤནྣམཏྟེ ཚིཛྫཏི. པཋམཾ ཙཱིཝརཔལིབོདྷོ ཚིཛྫཏཱིཏི ན པཙྩེསྶནྟི པཀྐམནཏོ པུརེཏརམེཝ ཙཱིཝརསྶ ནིཊྛིཏཏྟཱ ཝུཏྟཾ. ‘‘ཀཏཙཱིཝརམཱདཱཡཱ’’ཏི ཧི ཝུཏྟཾ. ཨཏྠཏཀཐིནསྶ ཧི བྷིཀྑུནོ ཡཱཝ ‘‘སངྒྷཏོ ཝཱ དཱཡཀཀུལཱདིཏོ ཝཱ ཙཱིཝརཾ ལབྷིསྶཱམཱི’’ཏི ཙཱིཝརཱསཱ ཝཱ ལདྡྷཝཏྠཱནཾ སཧཱཡསམྤདཱདིཡོགཾ ལབྷིཏྭཱ སངྒྷཱཊིཨཱདིབྷཱཝེན ‘‘ཚིནྡིཏྭཱ ཀརིསྶཱམཱི’’ཏི ཀརཎིཙྪཱ ཝཱ པཝཏྟཏི, ཏཱཝ ཙཱིཝརཔལིབོདྷོ ཨནུཔཙྪིནྣོ ཨེཝ. ཡདཱ པན ཡཐཱཔཏྠིཏཊྛཱནཏོ ཙཱིཝརཱདཱིནཾ སབྦཐཱ ¶ ཨལཱབྷེན ཝཱ ཙཱིཝརཱསཱ ཙེཝ ལདྡྷཱནཾ ཀཏྭཱ ནིཊྛཱནེན ཝཱ ནཊྛཝིནཊྛཱདིབྷཱཝེན ཝཱ ཙཱིཝརེ ནིརཔེཀྑཏཱཡ ཝཱ ཀརཎིཙྪཱ ཙ ཝིགཙྪཏི, ཏདཱ ཙཱིཝརཔལིབོདྷོ ཨུཔཙྪིནྣོ ཧོཏི.

སོ ¶ ཙ ཨིདྷ ‘‘ཀཏཙཱིཝརཾ ཨཱདཱཡཱ’’ཏི ཝཙནེན པཀཱསིཏོ. ཨེཝཾ ཨུཔརི སབྦཏྠ པཱལི༹ཝཙནཀྐམཾ ནིསྶཱཡ ནེསཾ པཋམཾ, པཙྪཱ ཙ ཨུཔཙྪིཛྫནཾ ཝུཏྟནྟི དཊྛབྦཾ. སབྦཐཱཔི ཙ ཨིམེསཾ ཨུབྷིནྣཾ པལིབོདྷཱནཾ ཨུཔཙྪེདེནེཝ ཀཐིནུབྦྷཱརོ, ན ཨེཀསྶ. ཏེསཉྩ པུབྦཱཔརིཡེན, ཨེཀཀྑཎེ ཙ ཨུཔཙྪིཛྫནཾ དསྶེཏུཾ ཨིམཱ ཨཊྛ མཱཏིཀཱ ཋཔིཏཱཏི ཝེདིཏབྦཱ. ཨནྟོསཱིམཱཡནྟི ཙཱིཝརནིཊྛཱནཀྑཎེཡེཝ ཚིནྣཏྟཱ ཝུཏྟཾ. ནེཝིམཾ ཙཱིཝརཾ ཀཱརེསྶནྟི ཙཱིཝརེ ཨཔེཀྑཱཡ ཝིགཏཏྟཱ ཀརཎཔལིབོདྷསྶཱཔི ཨུཔཙྪིནྣཏཾ དསྶེཏི. ཡོ པན ཨཔྤིཙྪཏཱཡ ཝཱ ཨནཏྠིཀཏཱཡ ཝཱ སབྦཐཱ ཙཱིཝརཾ ན སམྤཊིཙྪཏི, ཏསྶ བཧིསཱིམཱགཏསྶ སབྦཐཱཔི ཙཱིཝརཔལིབོདྷཱབྷཱཝེན ན པཙྩེསྶནྟི སནྣིཊྛཱནམཏྟེན སནྣིཊྛཱནནྟིཀོ ཀཐིནུབྦྷཱརོ ཝེདིཏབྦོ. སོ པནཱཏི པལིབོདྷུཔཙྪེདོ. ཨཡཾ པནཱཏི ཨཱསཱཝཙྪེདཀོ ཀཐིནུབྦྷཱརོ ཝིསུཾ ཝིཏྠཱརེཏྭཱ ཝུཏྟོ, ཨིདྷ ན ཝུཏྟོཏི སམྦནྡྷོ.

ཨནཱསཱཡ ལབྷཏཱིཏི ‘‘ཡསྨིཾ ཀུལེ ཙཱིཝརཾ ལབྷིསྶཱམཱ’’ཏི ཨཱསཱ ཨནུཔྤནྣཔུབྦཱ, ཏཏྠ ཙཱིཝརཱསཱཡ ཨནུཔྤནྣཊྛཱནེ ཡཏྠ ཀཏྠཙི ལབྷཏཱིཏི ཨཏྠོ. ཨཱསཱཡ ན ལབྷཏཱིཏི ཨཱསཱིསིཏཊྛཱནེ ན ལབྷཏཱིཏི ཨཏྠོ. ཨིདྷ ན ཝུཏྟོཏི ཨིདྷ སཝནནྟིཀཱནནྟརེ ན ཝུཏྟོ. ཏཏྠཱཏི ཏསྨིཾ སཱིམཱཏིཀྐནྟིཀེ. སཱིམཱཏིཀྐནྟིཀོ ནཱམ ཙཱིཝརམཱསཱནཾ པརིཡནྟདིཝསསངྑཱཏཱཡ སཱིམཱཡ ཨཏིཀྐམནཏོ སཉྫཱཏོ. ཀེཙི ‘‘བཧིསཱིམཱཡ ཀཱལཱཏིཀྐམོ སཱིམཱཏིཀྐམོ’’ཏི མཉྙནྟི, ཏེསཾ ཨནྟོཨུཔཙཱརེ ཙཱིཝརཀཱལཱཏིཀྐམེཔི ཀཐིནུབྦྷཱརོ ཨསམྨཏོ ནཱམ སིཡཱཏི ན ཙེཏཾ ཡུཏྟཾ. ཏསྨཱ ཡཏྠ ཀཏྠཙི ཀཱལཱཏིཀྐམོ སཱིམཱཏིཀྐམོཏི ཝེདིཏབྦོ. ཨེཏྠ ཙ པཱལི༹ཡཾ ‘‘ཀཏཙཱིཝརོ’’ཏི ཨིདཾ ཨུཔལཀྑཎམཏྟཾ, ཨཀཏཙཱིཝརསྶཔི ཀཱལཱཏིཀྐམེན སཱིམཱཏིཀྐནྟིཀོ ཧོཏི, དྭེ ཙ པལིབོདྷཱ ཨེཀཏོ ཚིཛྫནྟི. ཨེཝཾ ཨཉྙཏྠཱཔི ཡཐཱསམྦྷཝཾ ཏཾཏཾ ཝིསེསནཱབྷཱཝེཔི ཀཐིནུབྦྷཱརཏཱ, པལིབོདྷུཔཙྪེདཔྤཀཱརོ ཙ ཝེདིཏབྦོ. ‘‘སཧུབྦྷཱརེ དྭེཔི པལིབོདྷཱ ཨཔུབྦཾ ཨཙརིམཾ ཚིཛྫནྟཱི’’ཏི ཨིདཾ ཨཀཏཙཱིཝརསྶ པཙྩེསྶནྟི ཨདྷིཊྛཱནསམྦྷཝཔཀྑཾ སནྡྷཱཡ ཝུཏྟཾ, ཏེསུ ཨཉྙཏརཱབྷཱཝེཔི སཧུབྦྷཱརོཝ ཧོཏི.

༣༡༢-༣༢༥. སམཱདཱཡཝཱརོ ཨཱདཱཡཝཱརསདིསོཝ. ཨུཔསགྒམེཝེཏྠ ཝིསེསོ. ཏེནཱཧ ‘‘པུན སམཱདཱཡཝཱརེཔི…པེ… ཏེཡེཝ དསྶིཏཱ’’ཏི ¶ . ཝིཔྤཀཏཙཱིཝརེ པཀྐམནནྟིཀསྶ ཨབྷཱཝཏོ ‘‘ཡཐཱསམྦྷཝ’’ནྟི ཝུཏྟཾ. ཏེནེཝ ཝིཔྤཀཏཙཱིཝརཝཱརེ ཚལེ༹ཝ ཨུབྦྷཱརཱ ཝུཏྟཱ, ཙཱིཝརེ ཧཏྠགཏེ ¶ ཙ ཨཱསཱཝཙྪེདིཀསྶ ཨསམྦྷཝཱ, སོ ཨེཏེསུ ཝཱརེསུ ཡཏྠ ཀཏྠཙི ན ཝུཏྟོ, ཝིསུཉྙེཝ ཝུཏྟོ. ཝིཔྤཀཏཝཱརེ ཙེཏྠ ཨཱདཱཡཝཱརསམཱདཱཡཝཱརཝསེན དྭེ ཚཀྐཝཱརཱ ཝུཏྟཱ.

ཏཏོ པརཾ ནིཊྛཱནསནྣིཊྛཱནནཱསནནྟིཀཱནཾ ཝསེན ཏཱིཎི ཏིཀཱནི དསྶིཏཱནི. ཏཏྠ ཏཏིཡཏྟིཀེ ཨནདྷིཊྛིཏེནཱཏི ‘‘པཙྩེསྶཾ, ན པཙྩེསྶ’’ནྟི ཨེཝཾ ཨནདྷིཊྛིཏེན, ན ཨེཝཾ མནསིཀཏྭཱཏི ཨཏྠོ. ཏཏིཡཏྟིཀཏོ པན པརཾ ཨེཀཾ ཚཀྐཾ དསྶིཏཾ. ཨེཝཾ ཏཱིཎི ཏིཀཱནི, ཨེཀཾ ཚཀྐཉྩཱཏི པཋམཾ པནྣརསཀཾ ཝུཏྟཾ, ཨིམིནཱ ནཡེན དུཏིཡཔནྣརསཀཱདཱིནི ཝེདིཏབྦཱནི.

པཱལི༹ཡཾ ཨཱསཱདྭཱདསཀེ བཧིསཱིམཱགཏསྶ ཀཐིནུདྡྷཱརེསུ ཏེསམྤི ཙཱིཝརཱསཱདིཝསེན ཙཱིཝརཔལིབོདྷོ ཡཱཝ ཙཱིཝརནིཊྛཱནཱ ཏིཊྛཏཱིཏི ཨཱཧ ‘‘སོ བཧིསཱིམཱགཏོ སུཎཱཏི ‘ཨུབྦྷཏཾ ཀིར ཏསྨིཾ ཨཱཝཱསེ ཀཐིནནྟི…པེ… སཝནནྟིཀོ ཀཐིནུདྡྷཱརོ’’’ཏི. ཨེཏྠ ཙ སཝནཀྑཎེ ཨཱཝཱསཔལིབོདྷོ པཋམཾ ཚིཛྫཏི, ནིཊྛིཏེ ཙཱིཝརཔལིབོདྷོཏི ཝེདིཏབྦོ.

དིསཾགམིཀནཝཀེ དིསཾགམིཀོ པཀྐམཏཱིཏི ན པཙྩེསྶནྟི པཀྐམཏི, ཨིམིནཱ ཨཱཝཱསཔལིབོདྷཱབྷཱཝོ དསྶིཏོ ཧོཏི. ཏེནེཝ ཝསྶཾཝུཏྠཱཝཱསེ པུན གནྟྭཱ ཙཱིཝརནིཊྛཱཔིཏམཏྟེ ནིཊྛཱནནྟིཀོ ཀཐིནུདྡྷཱརོ ཝུཏྟོ. ‘‘ཙཱིཝརཔཊིཝིསཾ ཨཔཝིལཱཡམཱནོ’’ཏི ཨིམིནཱ ཙཱིཝརཔལིབོདྷསམངྒིཀཏྟམསྶ དསྶེཏི, ཨཔཝིལཱཡམཱནོཏི ཨཱཀངྑམཱནོ. སེསཾ སུཝིཉྙེཡྻམེཝ.

ཨཱདཱཡསཏྟཀཀཐཱཝཎྞནཱ ནིཊྛིཏཱ.

ཀཐིནཀྑནྡྷཀཝཎྞནཱནཡོ ནིཊྛིཏོ.

༨. ཙཱིཝརཀྑནྡྷཀོ

ཛཱིཝཀཝཏྠུཀཐཱདིཝཎྞནཱ

༣༢༩. ཙཱིཝརཀྑནྡྷཀེ ¶ ¶ ཀམྨཝིཔཱཀནྟི ཀམྨཔཙྩཡཨུཏུཙིཏྟཱཧཱརསམུཊྛིཏཾ ཨཔྤཊིབཱཧིཡརོགཾ སནྡྷཱཡ ཝུཏྟཾ ཀམྨཛསྶ རོགསྶ ཨབྷཱཝཱ.

༣༣༠. པཱལི༹ཡཾ སཾཡམསྶཱཏི སངྒཧཎསྶ. ཨཝིསཛྫནསྶཱཏི ཨཏྠོ ‘‘ཡོ སཾཡམོ སོ ཝིནཱསོ’’ཏིཨཱདཱིསུ (པེ. ཝ. ༢༣༧) ཝིཡ. ཨེཏསྶ སཾཡམསྶ ཕལཾ ཨུཔཛཱནཱམཱཏི ཡོཛནཱ. ཏམེཝ ཕལཾ དསྶེནྟཱི ཨཱཧ ‘‘ཝརམེཏཾ…པེ… ཨཱསིཏྟ’’ནྟི. ཀེཙི པན ‘‘སཾཡམསྶཱཏི ཨཱནིསཾསསྶ, ཨུཔཡོགཏྠེ ཙེཏཾ སཱམིཝཙན’’ནྟི (སཱརཏྠ. ཊཱི. མཧཱཝགྒ ༣.༣༢༩-༣༣༠) ཨཏྠཾ ཝདནྟི.

༣༣༦. ཨུསྶནྣདོསོཏི སཉྫཱཏཔིཏྟཱདིདོསོ. སབྦཏྠཱཏི སཀལསརཱིརེ.

༣༣༧. མཧཱཔིཊྛིཡཀོཛཝནྟི ཧཏྠིཔིཊྛིཡཾ ཨཏྠརིཏབྦཏཱཡ ‘‘མཧཱཔིཊྛིཡ’’ནྟི ལདྡྷསམཉྙཾ ཨུཎྞཱམཡཏྠརཎཾ.

༣༣༨-༩. ཨུཔཌྜྷཀཱསིནཾ ཁམམཱནནྟི ཨཌྜྷཀཱསིཨགྒྷནཀཾ. པཱལི༹ཡཾ ཀིཾ ནུ ཁོཏི ཀཏམཾ ནུ ཁོ.

༣༤༠-༣༤༢. ཨུཔཙཱརེཏི སུསཱནསྶ ཨཱསནྣེ པདེསེ. ཚཌྜེཏྭཱ གཏཱཏི ཀིཉྩི ཨཝཏྭཱ ཨེཝ ཚཌྜེཏྭཱ གཏཱ, ཨེཏེན ‘‘བྷིཀྑཱུ གཎྷནྟཱུ’’ཏི ཚཌྜིཏེ ཨེཝ ཨཀཱམཱ བྷཱགདཱནཾ ཝིཧིཏཾ, ཀེཝལཾ ཚཌྜིཏེ པན ཀཏིཀཱཡ ཨསཏི ཨེཀཏོ བཧཱུསུ པཝིཊྛེསུ ཡེན གཧིཏཾ, ཏེན ཨཀཱམབྷཱགོ ན ¶ དཱཏབྦོཏི དསྶེཏི. སམཱནཱ དིསཱ པུརཏྠིམཱདིབྷེདཱ ཨེཏེསནྟི སདིསཱཏི ཨཱཧ ‘‘ཨེཀདིསཱཡ ཝཱ ཨོཀྐམིཾསཱུ’’ཏི. དྷུརཝིཧཱརཊྛཱནེཏི ཝིཧཱརསྶ སམྨུཁཊྛཱནེ.

ཛཱིཝཀཝཏྠུཀཐཱདིཝཎྞནཱ ནིཊྛིཏཱ.

བྷཎྜཱགཱརསམྨུཏིཨཱདིཀཐཱཝཎྞནཱ

༣༤༣. ཝིཧཱརམཛ྄ཛྷེཏི ¶ སབྦེསཾ ཛཱནནཏྠཱཡ ཝུཏྟཾ. ཝཎྞཱཝཎྞཾ ཀཏྭཱཏི པཊིཝཱིསཔྤཧོནཀཏཱཛཱནནཏྠཾ ཧལིདྡིཡཱདཱིཧི ཁུདྡཀམཧནྟཝཎྞེཧི ཡུཏྟེ སམེ ཀོཊྛཱསེ ཀཏྭཱ. ཏེནཱཧ ‘‘སམེ པཊིཝཱིསེ ཋཔེཏྭཱ’’ཏི. ཨིདནྟི སཱམཎེརཱནཾ ཨུཔཌྜྷཔཊིཝཱིསདཱནཾ. ཕཱཏིཀམྨནྟི པཧོནཀཀམྨཾ. ཡཏྟཀེན ཝིནཡཱགཏེན སམྨུཉྫནཱིབནྡྷནཱདིཧཏྠཀམྨེན ཝིཧཱརསྶ ཨཱུནཀཏཱ ན ཧོཏི, ཏཏྟཀཾ ཀཏྭཱཏི ཨཏྠོ. སབྦེསནྟི ཏཏྲུཔྤཱདཝསྶཱཝཱསིཀཾ གཎྷནྟཱནཾ སབྦེསཾ བྷིཀྑཱུནཾ, སཱམཎེརཱནཉྩ. བྷཎྜཱགཱརིཀཙཱིཝརེཔཱིཏི ཨཀཱལཙཱིཝརཾ སནྡྷཱཡ ཝུཏྟཾ. ཨེཏནྟི ཨུཀྐུཊྛིཡཱ ཀཏཱཡ སམབྷཱགདཱནཾ. ཝིརཛ྄ཛྷིཏྭཱ ཀརོནྟཱིཏི ཀཏྟབྦཀཱལེསུ ཨཀཏྭཱ ཡཐཱརུཙིཏཀྑཎེ ཀརོནྟི.

ཨེཏྟཀེན མམ ཙཱིཝརཾ པཧོཏཱིཏི དྭཱདསགྒྷནཀེནེཝ མམ ཙཱིཝརཾ པརིཔུཎྞཾ ཧོཏི, ན ཏཏོ ཨཱུནེནཱཏི སབྦཾ གཧེཏུཀཱམོཏི ཨཏྠོ.

བྷཎྜཱགཱརསམྨུཏིཨཱདིཀཐཱཝཎྞནཱ ནིཊྛིཏཱ.

ཙཱིཝརརཛནཀཐཱདིཝཎྞནཱ

༣༤༤. ཨེཝཉྷི ཀཏེཏི ཝཊྚཱདྷཱརསྶ ཨནྟོ རཛནོདཀཾ, བཧི ཚལླིཀཉྩ ཀཏྭཱ ཝིཡོཛནེ ཀཏེ. ན ཨུཏྟརཏཱིཏི ཀེཝལཾ ཨུདཀཏོ ཕེཎུཊྛཱནཱབྷཱཝཱ ན ཨུཏྟརཏི. རཛནཀུཎྜནྟི པཀྐརཛནཊྛཔནཀཾ མཧཱགྷཊཾ.

༣༤༥. ཨནུཝཱཏཱདཱིནཾ དཱིགྷཔཏྟཱནནྟི ཨཱཡཱམཏོ, ཝིཏྠཱརཏོ ཙ ཨནུཝཱཏཾ. ཨཱདི-སདྡེན དྭིནྣཾ ཁནྡྷཱནཾ ཨནྟརཱ མཱཏིཀཱཀཱརེན ཋཔིཏཔཏྟཉྩ ‘‘དཱིགྷཔཏྟ’’ནྟི དཊྛབྦཾ. ཨཱགནྟུཀཔཏྟནྟི དིགུཎཙཱིཝརསྶ ཨུཔརི ཨཉྙཾ པཊྚཾ ཨཔྤེནྟི, ཏཾ སནྡྷཱཡ ཝུཏྟཾ. ཏཾ ཀིར ཨིདཱནི ན ཀརོནྟི.

༣༤༦. པཱལི༹ཡཾ ¶ ནནྡིམུཁིཡཱཏི ཏུཊྛིམུཁིཡཱ, པསནྣདིསཱམུཁཱཡཱཏི ཨཏྠོ.

༣༤༨. ཨཙྪུཔེཡྻནྟི པཏིཊྛཔེཡྻཾ. ཧཏཝཏྠཀཱནནྟི པུརཱཎཝཏྠཱནཾ. ཨནུདྡྷརིཏྭཱཝཱཏི ཨགྒལེ༹ ཝིཡ དུབྦལཊྛཱནཾ ཨནཔནེཏྭཱཝ.

༣༤༩-༣༥༡. ཝིསཱཁཝཏྠུམྷི ¶ ཀལླཀཱཡཱཏི ཨཀིལནྟཀཱཡཱ. གཏཱིཏི ཉཱཎགཏི ཨདྷིགམོ. ཨབྷིསམྤརཱཡོཏི ‘‘སཀིདེཝ ཨིམཾ ལོཀཾ ཨཱགནྟྭཱ དུཀྑསྶནྟཾ ཀརོཏཱི’’ཏིཨཱདིནཱ (སཾ. ནི. ༥.༡༠༤༨) ཝུཏྟོ ཉཱཎཱབྷིསམྤརཱཡོ, མགྒཉཱཎཡུཏྟེཧི གནྟབྦགཏིཝིསེསོཏི ཨཏྠོ. ཏཾ བྷགཝཱ བྱཱཀརིསྶཏི. ‘‘དདཱཏི དཱན’’ནྟི ཨིདཾ ཨནྣཔཱནཝིརཧིཏཱནཾ སེསཔཙྩཡཱནཾ དཱནཝསེན ཝུཏྟཾ. སོཝགྒིཀནྟི སགྒསཾཝཏྟནིཀཾ.

༣༥༩. ཨཊྛཔདཀཙྪནྣེནཱཏི ཨཊྛཔདཀསངྑཱཏཛཱུཏཕལཀལེཁཱསཎྛཱནེན.

༣༦༢. པཱལི༹ཡཾ ནདཱིཔཱརཾ གནྟུནྟི བྷིཀྑུནོ ནདཱིཔཱརགམནཾ ཧོཏཱིཏི ཨཏྠོ. ཨགྒལ༹གུཏྟིཡེཝ པམཱཎནྟི ཨིམེཧི ཙཏཱུཧི ནིཀྑེཔཀཱརཎེཧི ཋཔེནྟེནཔི ཨགྒལ༹གུཏྟིཝིཧཱརེ ཨེཝ ཋཔེཏུཾ ཝཊྚཏཱིཏི ཨདྷིཔྤཱཡོ. ནིསྶཱིམཱགཏནྟི ཝསྶཱནསངྑཱཏཾ ཀཱལསཱིམཾ ཨཏིཀྐནྟཾ, ཏཾ ཝསྶིཀསཱཊིཀཙཱིཝརཾ ན ཧོཏཱིཏི ཨཏྠོ.

ཙཱིཝརརཛནཀཐཱདིཝཎྞནཱ ནིཊྛིཏཱ.

སངྒྷིཀཙཱིཝརུཔྤཱདཀཐཱཝཎྞནཱ

༣༦༣. པཉྩ མཱསེཏི ཨཙྩནྟསཾཡོགེ ཨུཔཡོགཝཙནཾ. ཝཌྜྷིཾ པཡོཛེཏྭཱ ཋཔིཏཨུཔནིཀྑེཔཏོཏི ཝསྶཱཝཱསིཀསྶཏྠཱཡ དཱཡཀེཧི ཝཌྜྷིཾ པཡོཛེཏྭཱ ཋཔིཏཨུཔནིཀྑེཔཏོ. ‘‘ཨིདྷ ཝསྶཾཝུཏྠསངྒྷསྶཱ’’ཏི ཨིདཾ ཨབྷིལཱཔམཏྟཾ. ཨིདྷ-སདྡཾ པན ཝིནཱ ‘‘ཝསྶཾཝུཏྠསངྒྷསྶ དེམཱ’’ཏི ཝུཏྟེཔི སོ ཨེཝ ནཡོ. ཨནཏྠཏཀཐིནསྶཱཔི པཉྩ མཱསེ པཱཔུཎཱཏཱིཏི ཝསྶཱཝཱསིཀལཱབྷཝསེན ཨུཔྤནྣཏྟཱ ཨནཏྠཏཀཐིནསྶཱཔི ཝུཏྠཝསྶསྶ པཉྩ མཱསེ པཱཔུཎཱཏི. ཝཀྑཏི ཧི ‘‘ཙཱིཝརམཱསཏོ པཊྛཱཡ ཡཱཝ ཧེམནྟསྶ པཙྪིམོ དིཝསོ, ཏཱཝ ཝསྶཱཝཱསིཀཾ དེམཱཏི ཝུཏྟེ ཀཐིནཾ ཨཏྠཏཾ ཝཱ ཧོཏུ ཨནཏྠཏཾ ཝཱ, ཨཏཱིཏཝསྶཾཝུཏྠཱནམེཝ པཱཔུཎཱཏཱི’’ཏི (མཧཱཝ. ཨཊྛ. ༣༧༩). ཏཏོ པརནྟི པཉྩམཱསཏོ པརཾ, གིམྷཱནསྶ པཋམདིཝསཏོ པཊྛཱཡཱཏི ¶ ཨཏྠོ. ‘‘ཀསྨཱ? པིཊྛིསམཡེ ཨུཔྤནྣཏྟཱ’’ཏི ཨིདཾ ‘‘ཨུདཱཧུ ཨནཱགཏཝསྶེ’’ཏི ¶ ཨིམསྶཱནནྟརཾ དཊྛབྦཾ. པོཏྠཀེསུ པན ‘‘ཨནཏྠཏཀཐིནསྶཱཔི པཉྩ མཱསེ པཱཔུཎཱཏཱི’’ཏི ཨིམསྶཱནནྟརཾ ‘‘ཀསྨཱ པིཊྛིསམཡེ ཨུཔྤནྣཏྟཱ’’ཏི ཨིདཾ ལིཁནྟི, ཏཾ པམཱདལིཁིཏཾ པིཊྛིསམཡེ ཨུཔྤནྣཾ སནྡྷཱཡ ‘‘ཨནཏྠཏཀཐིནསྶཱཔཱི’’ཏི ཝཏྟབྦཏོ. ཝུཏྠཝསྶེ ཧི སནྡྷཱཡ ‘‘ཨནཏྠཏཀཐིནསྶཱཔཱི’’ཏི ཝུཏྟཾ, ན ཙ པིཊྛིསམཡེ ཨུཔྤནྣཾ ཝུཏྠཝསྶསྶེཝ པཱཔུཎཱཏཱིཏི སམྨུཁཱིབྷཱུཏཱནཾ སབྦེསམྤི པཱཔུཎནཏོ. ཏེནེཝ ཝཀྑཏི ‘‘སཙེ པན གིམྷཱནཾ པཋམདིཝསཏོ པཊྛཱཡ ཨེཝཾ ཝདཏི, ཏཏྲ སམྨུཁཱིབྷཱུཏཱནཾ སབྦེསཾ པཱཔུཎཱཏི. ཀསྨཱ? པིཊྛིསམཡེ ཨུཔྤནྣཏྟཱ’’ཏི (མཧཱཝ. ཨཊྛ. ༡༧༩).

དུགྒཧིཏཱནཱིཏི ཨགྒཧིཏཱནི. སངྒྷིཀཱནེཝཱཏི ཨཏྠོ. ཨིཏོཝཱཏི ཐེརཱནཾ དཱཏབྦཏོཝ, ཨིདཱནེཝཱཏི ཝཱ ཨཏྠོ.

སངྒྷིཀཙཱིཝརུཔྤཱདཀཐཱཝཎྞནཱ ནིཊྛིཏཱ.

ཨུཔནནྡསཀྱཔུཏྟཝཏྠུཀཐཱཝཎྞནཱ

༣༦༤. ‘‘སཏྟཱཧཝཱརེན ཨརུཎམེཝ ཨུཊྛཱཔེཏཱི’’ཏི ཨིདཾ ནཱནཱསཱིམཱཝིཧཱརེསུ ཀཏྟབྦནཡེན ཨེཀསྨིམྤི ཝིཧཱརེ དྭཱིསུ སེནཱསནེསུ ནིཝུཏྠབྷཱཝདསྶནཏྠཾ ཝུཏྟཾ, ཨརུཎུཊྛཱཔནེནེཝ ཏཏྠ ཝུཏྠོ ཧོཏི, ན པན ཝསྶཙྪེདཔརིཧཱརཱཡ. ཨནྟོཨུཔཙཱརསཱིམཱཡཔི ཡཏྠ ཀཏྠཙི ཨརུཎཾ ཨུཊྛཱཔེནྟོ ཨཏྟནཱ གཧིཏསེནཱསནཾ ཨཔྤཝིཊྛོཔི ཝུཏྠཝསྶོ ཨེཝ ཧོཏི, གཧིཏསེནཱསནེ པན ནིཝུཏྠོ ནཱམ ན ཧོཏི, ཏཏྠ ཙ ཨརུཎུཊྛཱཔནེ པན སཏི ཧོཏི. ཏེནཱཧ ‘‘པུརིམསྨིཾ བཧུཏརཾ ནིཝསཏི ནཱམཱ’’ཏི, ཨེཏེན ཙ ཨིཏརསྨིཾ སཏྟཱཧཝཱརེནཱཔི ཨརུཎུཊྛཱཔནེ སཏི ཨེཝ ཨཔྤཀཏརཾ ནིཝསཏི ནཱམ ཧོཏི, ནཱསཏཱིཏི དཱིཔིཏཾ ཧོཏི. ནཱནཱལཱབྷེཧཱིཏི ཝིསུཾ ཝིསུཾ ནིབདྡྷཝསྶཱཝཱསིཀལཱབྷེཧི. ནཱནཱུཔཙཱརེཧཱིཏི ནཱནཱཔརིཀྑེཔནཱནཱདྭཱརེཧི. ཨེཀསཱིམཱཝིཧཱརེཧཱིཏི དྭིནྣཾ ཝིཧཱརཱནཾ ཨེཀེན པཱཀཱརེན པརིཀྑིཏྟཏྟཱ ཨེཀཱཡ ཨུཔཙཱརསཱིམཱཡ ཨནྟོགཏེཧི དྭཱིཧི ཝིཧཱརེཧི. སེནཱསནགྒཱཧོ པཊིཔྤསྶམྦྷཏཱིཏི པཋམཾ གཧིཏོ པཊིཔྤསྶམྦྷཏི. ཏཏྠཱཏི ཡཏྠ སེནཱསནགྒཱཧོ པཊིཔྤསྶདྡྷོ, ཏཏྠ.

ཨུཔནནྡསཀྱཔུཏྟཝཏྠུཀཐཱཝཎྞནཱ ནིཊྛིཏཱ.

གིལཱནཝཏྠུཀཐཱཝཎྞནཱ

༣༦༥-༦. བྷཱུམིཡཾ ¶ ¶ པརིབྷཎྜཾ ཨཀཱསཱིཏི གིལཱནེན ནིཔནྣབྷཱུམིཡཾ ཀིལིཊྛཊྛཱནཾ དྷོཝིཏྭཱ ཧརིཏཱུཔལིཏྟཾ ཀཱརེསཱིཏི ཨཏྠོ. བྷེསཛྫཾ ཡོཛེཏུཾ ཨསམཏྠོཏི པརེཧི ཝུཏྟཝིདྷིམྤི ཀཱཏུཾ ཨསམཏྠོ. པཱལི༹ཡཾ གིལཱནུཔཊྛཱཀཱནཾ ཙཱིཝརདཱནེ སཱམཎེརཱནཾ ཏིཙཱིཝརཱདྷིཊྛཱནཱབྷཱཝཱ ‘‘ཙཱིཝརཉྩ པཏྟཉྩཱ’’ཏིཨཱདི སབྦཏྠ ཝུཏྟཾ. སཙེཔི སཧསྶཾ ཨགྒྷཏི, གིལཱནུཔཊྛཱཀཱནཉྙེཝ དཱཏབྦནྟི སམྦནྡྷོ.

གིལཱནཝཏྠུཀཐཱཝཎྞནཱ ནིཊྛིཏཱ.

མཏསནྟཀཀཐཱདིཝཎྞནཱ

༣༦༩. ཨཉྙནྟི ཙཱིཝརཔཏྟཏོ ཨཉྙཾ. ཨཔྤགྒྷནྟི ཨཏིཛིཎྞཱདིབྷཱཝེན ནིཧཱིནཾ. ཏཏོཏི ཨཝསེསཔརིཀྑཱརཏོ. སབྦནྟི པཏྟཾ, ཏིཙཱིཝརཉྩ.

ཏཏྠ ཏཏྠ སངྒྷསྶེཝཱཏི ཏསྨིཾ ཏསྨིཾ ཝིཧཱརེ སངྒྷསྶེཝ. པཱལི༹ཡཾ ཨཝིསྶཛྫིཀཾ ཨཝེབྷངྒིཀནྟི ཨཱགཏཱནཱགཏསྶ ཙཱཏུདྡིསསྶ སངྒྷསྶེཝ སནྟཀཾ ཧུཏྭཱ ཀསྶཙི ཨཝིསྶཛྫིཀཾ ཨཝེབྷངྒིཀཾ བྷཝིཏུཾ ཨནུཛཱནཱམཱིཏི ཨཏྠོ.

༣༧༡-༢. ཨཀྐནཱལ༹མཡནྟི ཨཀྐདཎྜམཡཾ. ཨཀྐདུསྶཱནཱིཏི ཨཀྐཝཱཀེན ཀཏདུསྶཱནི, པོཏྠཀགཏིཀཱནི དུཀྐཊཝཏྠུཀཱནཱིཏི ཨཏྠོ. དུཔཊྚཙཱིཝརསྶ ཝཱ མཛ྄ཛྷེཏི ཡཾ ནིཊྛིཏེ ཏིཔཊྚཙཱིཝརཾ ཧོཏི, ཏསྶ མཛ྄ཛྷེ པཊལཾ ཀཏྭཱ དཱཏབྦཱནཱིཏི ཨཏྠོ.

༣༧༤. ‘‘སནྟེ པཏིརཱུཔེ གཱཧཀེ’’ཏི ཝུཏྟཏྟཱ གཱཧཀེ ཨསཏི ཨདཏྭཱ བྷཱཛིཏེཔི སུབྷཱཛིཏམེཝཱཏི དཊྛབྦཾ.

༣༧༦. དཀྑིཎོདཀཾ པམཱཎནྟི ‘‘ཨེཏྟཀཱནི ཙཱིཝརཱནི དསྶཱམཱི’’ཏི པཋམཾ ཨུདཀཾ པཱཏེཏྭཱ པཙྪཱ དེནྟི. ཏཾ ཡེཧི གཧིཏཾ, ཏེ བྷཱགིནོཝ ཧོནྟཱིཏི ¶ ཨདྷིཔྤཱཡོ. པརསམུདྡེཏི ཛམྦུདཱིཔེ. ཏམྦཔཎྞིདཱིཔཉྷི ཨུཔཱདཱཡེས ཨེཝཾ ཝུཏྟོ.

མཏསནྟཀཀཐཱདིཝཎྞནཱ ནིཊྛིཏཱ.

ཨཊྛཙཱིཝརམཱཏིཀཱཀཐཱཝཎྞནཱ

༣༧༩. པུགྒལཱདྷིཊྛཱནནཡེན ¶ ཝུཏྟནྟི ‘‘སཱིམཱཡ དཱན’’ནྟིཨཱདིནཱ ཝཏྟབྦེ ‘‘སཱིམཱཡ དེཏཱི’’ཏིཨཱདི པུགྒལཱདྷིཊྛཱནེན ཝུཏྟཾ. ‘‘ཨཔིཙཱ’’ཏིཨཱདིནཱ པཋམལེཌྜུཔཱཏབྷཱུཏཔརིཀྑེཔཱརཧཊྛཱནཏོ བཧི དུཏིཡལེཌྜུཔཱཏོཔི ཨུཔཙཱརསཱིམཱ ཨེཝཱཏི དསྶེཏི. དྷུཝསནྣིཔཱཏཊྛཱནཱདིཀམྤི པརིཡནྟེ ཋིཏམེཝ གཧེཏབྦཾ. ལོཀེ གཱམསཱིམཱདཡོ ཝིཡ ལཱབྷསཱིམཱ ནཱམ ཝིསུཾ པསིདྡྷཱ ནཱམ ནཏྠི, ཀེནཱཡཾ ཨནུཉྙཱཏཱཏི ཨཱཧ ‘‘ནེཝ སམྨཱསམྦུདྡྷེནཱ’’ཏིཨཱདི. ཨེཏེན ནཱཡཾ སཱསནཝོཧཱརསིདྡྷཱ, ལོཀཝོཧཱརསིདྡྷཱ ཨེཝཱཏི དསྶེཏི. ‘‘ཛནཔདཔརིཙྪེདོ’’ཏི ཨིདཾ ལོཀཔསིདྡྷསཱིམཱསདྡཏྠཝསེན ཝུཏྟཾ. པརིཙྪེདབྦྷནྟརཾ པན སབྦཾ ཛནཔདསཱིམཱཏི གཧེཏབྦཾ, ཛནཔདོ ཨེཝ ཛནཔདསཱིམཱ. ཨེཝཾ རཊྛསཱིམཱདཱིསུཔི. ཏེནཱཧ ‘‘ཨཱཎཱཔཝཏྟིཊྛཱན’’ནྟིཨཱདི.

པཐཝཱིཝེམཛ྄ཛྷེ གཏསྶཱཏི ཡཱཝ ཨུདཀཔརིཡནྟཱ ཁཎྜསཱིམཏྟཱ ཝུཏྟཾ, ཨུཔཙཱརསཱིམཱདཱིསུ པན ཨབདྡྷསཱིམཱསུ ཧེཊྛཱཔཐཝིཡཾ སབྦཏྠ ཋིཏཱནཾ ན པཱཔུཎཱཏི, ཀཱུཔཱདིཔཝེསཱརཧཊྛཱནེ ཋིཏཱནཉྙེཝ པཱཔུཎཱཏཱིཏི ཧེཊྛཱ སཱིམཱཀཐཱཡཾ ཝུཏྟནཡེན ཏཾཏཾསཱིམཊྛབྷཱཝོ ཝེདིཏབྦོ. ཙཀྐཝཱལ༹སཱིམཱཡ པན དིནྣཾ པཐཝཱིསནྡྷཱརཀཨུདཀཊྛཱནེཔི ཋིཏཱནཾ པཱཔུཎཱཏི སབྦཏྠ ཙཀྐཝཱལ༹ཝོཧཱརཏྟཱ.

བུདྡྷཱདྷིཝུཏྠོཏི བུདྡྷེན བྷགཝཏཱ ནིཝུཏྠོ. པཱཀཝཊྚནྟི ནིབདྡྷདཱནཾ. ཝཏྟཏཱིཏི པཝཏྟཏི. ཏེཧཱིཏི ཡེསཾ སམྨུཁེ ཨེས དེཏི, ཏེཧི བྷིཀྑཱུཧི. དུཏིཡབྷཱགེ པན ཐེརཱསནཾ ཨཱརུལ༹ྷེཏི ཡཱཝ སངྒྷནཝཀཱ ཨེཀཝཱརཾ སབྦེསཾ བྷཱགཾ དཏྭཱ ཙཱིཝརེ ཨཔརིཀྑཱིཎེ པུན སབྦེསཾ དཱཏུཾ དུཏིཡབྷཱགེ ཐེརསྶ དིནྣེཏི ཨཏྠོ. པཾསུཀཱུལིཀཱནམྤི ཝཊྚཏཱིཏི ཨེཏྠ ‘‘ཏུཡ྄ཧཾ དེམཱ’’ཏི ཨཝུཏྟཏྟཱཏི ཀཱརཎཾ ཝདནྟི. ཡདི ཨེཝཾ ‘‘སངྒྷསྶ དེམཱ’’ཏི ཝུཏྟེཔི ¶ ཝཊྚེཡྻ, ‘‘བྷིཀྑཱུནཾ དེམ, ཐེརཱནཾ དེམ, སངྒྷསྶ དེམཱ’’ཏི (མཧཱཝ. ཨཊྛ. ༣༧༩) ཝཙནཏོ བྷེདོ ན དིསྶཏི. ཝཱིམཾསིཏབྦམེཏྠ ཀཱརཎཾ.

པཱརུཔིཏུཾ ཝཊྚཏཱིཏི པཾསུཀཱུལིཀཱནཾ ཝཊྚཏི. བྷིཀྑུསངྒྷསྶ ཙ བྷིཀྑུནཱིནཉྩ དམྨཱིཏི ཝུཏྟེ པན ན མཛ྄ཛྷེ བྷིནྡིཏྭཱ དཱཏབྦནྟི ཨེཏྠ ཡསྨཱ བྷིཀྑུནིཔཀྑེ སངྒྷསྶ པཙྩེཀཾ ཨཔརཱམཊྛཏྟཱ བྷིཀྑུནཱིནཾ གཎནཱཡ བྷཱགོ དཱཏབྦོཏི དཱཡཀསྶ ཨདྷིཔྤཱཡོཏི སིཛ྄ཛྷཏི, ཏཐཱ དཱནཉྩ བྷིཀྑཱུཔི གཎེཏྭཱ དིནྣེ ཨེཝ ཡུཛྫཏི. ཨིཏརཐཱ ཧི ཀིཏྟཀཾ བྷིཀྑཱུནཾ དཱཏབྦཾ, ཀིཏྟཀཾ བྷིཀྑུནཱིནནྟི ན ཝིཉྙཱཡཏི, ཏསྨཱ ‘‘བྷིཀྑུསངྒྷསྶཱ’’ཏི ཝུཏྟཝཙནམྤི ‘‘བྷིཀྑཱུན’’ནྟི ཝུཏྟཝཙནསདིསམེཝཱཏི ཨཱཧ ‘‘བྷིཀྑཱུ ཙ བྷིཀྑུནིཡོ ཙ གཎེཏྭཱ དཱཏབྦ’’ནྟི. ཏེནཱཧ ‘‘པུགྒལོ ¶ …པེ… བྷིཀྑུསངྒྷགྒཧཎེན ཨགྒཧིཏཏྟཱ’’ཏི. བྷིཀྑུསངྒྷ-སདྡེན བྷིཀྑཱུནཉྙེཝ གཧིཏཏྟཱ, པུགྒལསྶ པན ‘‘ཏུཡ྄ཧཉྩཱ’’ཏི ཝིསུཾ གཧིཏཏྟཱ ཙ ཏཏྠསྶ ཨགྒཧིཏཏཱ དཊྛབྦཱ, ‘‘བྷིཀྑཱུནཉྩ བྷིཀྑུནཱིནཉྩ ཏུཡ྄ཧཉྩཱ’’ཏི ཝུཏྟཊྛཱནསདིསཏྟཱཏི ཨདྷིཔྤཱཡོ. པུགྒལཔྤདྷཱནོ ཧེཏྠ སངྒྷ-སདྡོ དཊྛབྦོ. ཀེཙི པན ‘‘བྷིཀྑུསངྒྷགྒཧཎེན གཧིཏཏྟཱ’’ཏི (སཱརཏྠ. ཊཱི. མཧཱཝགྒ ༣.༣༧༩) པཱཋཾ ལིཁནྟི, ཏཾ ན སུནྡརཾ ཏསྶ ཝིསུཾ ལཱབྷགྒཧཎེ ཀཱརཎཝཙནཏྟཱ. ཏཐཱ ཧི ཝིསུཾ སངྒྷགྒཧཎེན གཧིཏཏྟཱཏི ཝིསུཾ པུགྒལསྶཔི བྷཱགགྒཧཎེ ཀཱརཎཾ ཝུཏྟཾ. ཡཐཱ ཙེཏྠ པུགྒལསྶ ཨགྒཧཎཾ, ཨེཝཾ ཨུཔརི ‘‘བྷིཀྑུསངྒྷསྶ ཙ ཏུཡ྄ཧཉྩཱ’’ཏིཨཱདཱིསུཔི སངྒྷཱདི-སདྡེཧི པུགྒལསྶ ཨགྒཧཎཾ དཊྛབྦཾ. ཡདི ཧི གཧཎཾ སིཡཱ, སངྒྷཏོཔི, ཝིསུམྤཱིཏི བྷཱགདྭཡཾ ལབྷེཡྻ ཨུབྷཡཏྠ གཧིཏཏྟཱ.

པཱུཛེཏབྦནྟིཨཱདི གིཧིཀམྨཾ ན ཧོཏཱིཏི དསྶནཏྠཾ ཝུཏྟཾ. ‘‘བྷིཀྑུསངྒྷསྶ ཧརཱ’’ཏི ཨིདཾ པིཎྜཔཱཏཧརཎཾ སནྡྷཱཡ ཝུཏྟཾ. ཏེནཱཧ ‘‘བྷུཉྫིཏུཾ ཝཊྚཏཱི’’ཏི. ‘‘ཨནྟོཧེམནྟེ’’ཏི ཨིམིནཱ ཨནཏྠཏེ ཀཐིནེ ཝསྶཱནཾ པཙྪིམེ མཱསེ དིནྣཾ པུརིམཝསྶཾཝུཏྠཱནཉྙེཝ པཱཔུཎཱཏི, ཏཏོ པརཾ ཧེམནྟེ དིནྣཾ པཙྪིམཝསྶཾཝུཏྠཱནམྤི ཝུཏྠཝསྶཏྟཱ པཱཔུཎཱཏི. ཧེམནྟཏོ པན པརཾ པིཊྛིསམཡེ ‘‘ཝསྶཾཝུཏྠསངྒྷསྶཱ’’ཏི ཨེཝཾ ཝཏྭཱ དིནྣཾ ཨནནྟརེ ཝསྶེ ཝཱ ཏཏོ པརེསུ ཝཱ ཡཏྠ ཀཏྠཙི ཏསྨིཾ ཝུཏྠཝསྶཱནཾ སབྦེསཾ པཱཔུཎཱཏི. ཡེ པན སབྦཐཱ ཨཝུཏྠཝསྶཱ, ཏེསཾ ན པཱཔུཎཱཏཱིཏི དསྶེཏི. སབྦེསམྤཱིཏི ཧི ཏསྨིཾ བྷིཀྑུབྷཱཝེ ཝུཏྠཝསྶཱནཾ སབྦེསམྤཱིཏི ཨཏྠོ ¶ དཊྛབྦོ. ‘‘ཝསྶཾཝུཏྠསངྒྷསྶཱ’’ཏི ཝུཏྟཏྟཱ སམྨུཁཱིབྷཱུཏཱནཾ སབྦེསནྟི ཨེཏྠཱཔི ཨེསེཝ ནཡོ. ཨཏཱིཏཝསྶནྟི ཨནནྟརཱཏཱིཏཝསྶཾ.

ཨུདྡེསཾ གཧེཏུཾ ཨཱགཏོཏི ཨུདྡེསེ ཨགྒཧིཏེཔི ཨནྟེཝཱསིཀོཝཱཏི ཝུཏྟཾ. གཧེཏྭཱ གཙྪནྟོཏི པརིནིཊྛིཏཨུདྡེསོ ཧུཏྭཱ གཙྪནྟོ. ‘‘ཝཏྟཾ ཀཏྭཱ ཨུདྡེསཔརིཔུཙྪཱདཱིནི གཧེཏྭཱ ཝིཙརནྟཱན’’ནྟི ཨིདཾ ‘‘ཨུདྡེསནྟེཝཱསིཀཱན’’ནྟི ཨིམསྶེཝ ཝིསེསནཾ, ཏེན ཨུདྡེསཀཱལེ ཨཱགནྟྭཱ ཨུདྡེསཾ གཧེཏྭཱ གནྟྭཱ ཨཉྙཏྠ ནིཝསནྟེ ཨནིབདྡྷཙཱརིཀེ ནིཝཏྟེཏི.

ཨཊྛཙཱིཝརམཱཏིཀཱཀཐཱཝཎྞནཱ ནིཊྛིཏཱ.

ཙཱིཝརཀྑནྡྷཀཝཎྞནཱནཡོ ནིཊྛིཏོ.

༩. ཙམྤེཡྻཀྑནྡྷཀོ

ཀསྶཔགོཏྟབྷིཀྑུཝཏྠུཀཐཱདིཝཎྞནཱ

༣༨༠. ཙམྤེཡྻཀྑནྡྷཀེ ¶ ¶ ཏནྟིབདྡྷོཏི ཏནྟི ཝུཙྩཏི བྱཱཔཱརོ, ཏཏྠ བདྡྷོ, ཨུསྶུཀྐཾ ཨཱཔནྣོཏི ཨཏྠོ. ཏེནཱཧ ‘‘ཏསྨིཾ ཨཱཝཱསེ’’ཏིཨཱདི.

༣༨༧-༨. ཧཱཔནཾ ཝཱ ཨཉྙཐཱ ཀརཎཾ ཝཱ ནཏྠཱིཏི ཉཏྟིཀམྨསྶ ཉཏྟིཡཱ ཨེཀཏྟཱ ཧཱཔནཾ ན སམྦྷཝཏི, ཏསྶཱ ཨེཀཏྟཱ ཨེཝ པཙྪཱ ཉཏྟིཋཔནཝསེན, དྭིཀྑཏྟུཾ ཋཔནཝསེན ཙ ཨཉྙཐཱ ཀརཎཾ ནཏྠི. པརཏོཏི པརིཝཱརེ. ཏནྟི པབྦཱཛནཱིཡཀམྨཾ, ཏསྶཱཏི ཨཏྠོ.

ཀསྶཔགོཏྟབྷིཀྑུཝཏྠུཀཐཱདིཝཎྞནཱ ནིཊྛིཏཱ.

དྭེནིསྶརཎཱདིཀཐཱཝཎྞནཱ

༣༩༥. ཨེསཱཏི ‘‘བཱལོ’’ཏིཨཱདིནཱ ནིདྡིཊྛཔུགྒལོ, ཨཔྤཏྟོཏི སམྦནྡྷོ. ཏཏྠ ཀཱརཎམཱཧ ‘‘ཡསྨཱ’’ཏིཨཱདི. ཏཏྠ ཨཱཝེཎིཀེན ལཀྑཎེནཱཏི པབྦཱཛནཱིཡཀམྨསྶ ནིམིཏྟབྷཱཝེན པཱལི༹ཡཾ ཝུཏྟཏྟཱ ཨསཱདྷཱརཎབྷཱུཏེན ཀུལདཱུསཀབྷཱཝེན. ཡདི ཧེས ཏཾ ཀམྨཾ ཨཔྤཏྟོ, ཀཐཾ པན སུནིསྶཱརིཏོཏི ཨཱཧ ‘‘ཡསྨཱ པནསྶ ཨཱཀངྑམཱནོ སངྒྷོ པབྦཱཛནཱིཡཀམྨཾ ཀརེཡྻཱཏི ཝུཏྟཾ, ཏསྨཱ སུནིསྶཱརིཏོ’’ཏི. ཏཏྠ ཝུཏྟནྟི ཀམྨཀྑནྡྷཀེ (ཙཱུལ༹ཝ. ༢༧) ཝུཏྟཾ.

ཨེཏྠ པན ཀུལདཱུསཀཀམྨཾ ཀཏྭཱ པབྦཱཛནཱིཡཀམྨཀཏསྶ ཏེརསཀཀཎྜཀཊྛཀཐཱཡཾ ‘‘ཡསྨིཾ ཝིཧཱརེ ཝསནྟེན ཡསྨིཾ གཱམེ ཀུལདཱུསཀཀམྨཾ ཀཏཾ ཧོཏི, ཏསྨིཾ ཝིཧཱརེ ཝཱ ཏསྨིཾ གཱམེ ཝཱ ན ཝསིཏབྦ’’ནྟིཨཱདིནཱ (པཱརཱ. ཨཊྛ. ༢.༤༣༣) ཡཱ སམྨཱཝཏྟནཱ ཝུཏྟཱ, སཱ ཨིཏརེནཱཔི ¶ པཱུརེཏབྦཱ. ཡཾ པན པཊིཔྤསྶདྡྷཀམྨསྶ ཀུལདཱུསཀསྶ ཏཏྠེཝ ཨཊྛཀཐཱཡཾ ‘‘ཡེསུ ཀུལེསུ ཀུལདཱུསཀཀམྨཾ ཀཏཾ, ཏཏོ པཙྩཡཱ ན གཧེཏབྦཱ’’ཏིཨཱདི ཝུཏྟཾ, ཏཾ ན པཱུརེཏབྦཾ ཀུལསངྒཧསྶ ཨཀཏཏྟཱ. ཨེཝཾ སེསཀམྨེསུཔི. ཡདི ཨེཝཾ ‘‘ཏཛྫནཱིཡཀམྨཱརཧསྶ ¶ ནིཡསཀམྨཾ ཀརོཏི…པེ… ཨེཝཾ ཁོ, ཨུཔཱལི, ཨདྷམྨཀམྨཾ ཧོཏཱི’’ཏིཨཱདིཝཙནཾ (མཧཱཝ. ༤༠༢) ཝིརུཛ྄ཛྷཏཱིཏི? ན ཝིརུཛ྄ཛྷཏི སངྒྷསནྣིཊྛཱནཝསེན ཏཛྫནཱིཡཱདིཀམྨཱརཧཏྟསྶ སིཛ྄ཛྷནཏོ. ཡསྶ ཧི སངྒྷོ ‘‘ཏཛྫནཱིཡཀམྨཾ ཀརོམཱ’’ཏི སནྣིཊྛཱནཾ ཀཏྭཱ ཀམྨཝཱཙཾ སཱཝེནྟོ པབྦཱཛནཱིཡཀམྨཝཱཙཾ སཱཝེཏི, ཏསྶ ཀམྨཾ ཨདྷམྨཀམྨཾ ཧོཏི. སཙེ པན ‘‘ཏསྶེཝ པབྦཱཛནཱིཡཀམྨམེཝ ཀརོམཱ’’ཏི སནྣིཊྛཱནཾ ཀཏྭཱ ཏདེཝ ཀརོཏི, ཏསྶ ཏཾ ཀམྨཾ དྷམྨཀམྨནྟི ཝེདིཏབྦཾ.

ཨེཝམིདྷ ‘‘ནིསྶཱརཎ’’ནྟི ཨདྷིཔྤེཏསྶ པབྦཱཛནཱིཡཀམྨསྶ ཝསེན ཨཏྠཾ དསྶེཏྭཱ ཨིདཱནི ཏདཉྙེསཾ ཏཛྫནཱིཡཱདཱིནཾ ཝསེན ནིསྶཱརཎེ ཨདྷིཔྤེཏེ ‘‘ཨཔྤཏྟོ ནིསྶཱརཎ’’ནྟི ཨིམསྶ པཊིཔཀྑཝསེན སམྤཏྟོ ནིསྶཱརཎཾ, ‘‘ཏཉྩེ སངྒྷོ ནིསྶཱརེཏི. སུནིསྶཱརིཏོ’’ཏི ཨཏྠསམྦྷཝཾ དསྶེཏུཾ པུན ‘‘ཏཉྩེ སངྒྷོ ནིསྶཱརེཏཱིཏི སཙེ སངྒྷོ’’ཏིཨཱདི ཝུཏྟཾ. ཏཏྠ ཏཏྠཱཏི ཏཛྫནཱིཡཱདིཀམྨཝིསཡེ, ཨེཀེནཱཔི ཨངྒེན ནིསྶཱརཎཱ ཨནུཉྙཱཏཱཏི ཡོཛནཱ. པཱལི༹ཡཾ ཨཔྤཏྟོ ནིསྶཱརཎནྟི ཨེཏྠ ཨཱཔནྣོ ཨཱཝེཎིཀཝསེན ཏཛྫནཱིཡཱདིསངྑཱཏཾ ནིསྶཱརཎཾ པཏྟོཏི ཨཏྠོ གཧེཏབྦོ.

དྭེནིསྶརཎཱདིཀཐཱཝཎྞནཱ ནིཊྛིཏཱ.

ཙམྤེཡྻཀྑནྡྷཀཝཎྞནཱནཡོ ནིཊྛིཏོ.

༡༠. ཀོསམྦཀཀྑནྡྷཀོ

ཀོསམྦཀཝིཝཱདཀཐཱཝཎྞནཱ

༤༥༡. ཀོསམྦཀཀྑནྡྷཀེ ¶ ¶ སཙེ ཧོཏི, དེསེསྶཱམཱིཏི ཝིནཡདྷརསྶ ཝཙནེན ཨཱཔཏྟིདིཊྛིཾ པཊིལབྷིཏྭཱ ཨེཝམཱཧ. ཏེནེཝ པཱལི༹ཡཾ ‘‘སོ ཏསྶཱ ཨཱཔཏྟིཡཱ ཨནཱཔཏྟིདིཊྛི ཧོཏཱི’’ཏི ཝུཏྟཾ. ནཏྠི ཨཱཔཏྟཱིཏི ཨུདཀསྶ ཋཔནབྷཱཝཾ ཨཛཱནིཏྭཱ ཝཱ ཋཔིཏཾ ཚཌྜེཏྭཱ ཝིསྶརིཏྭཱ ཝཱ གམནེ ཨསཉྩིཙྩ ཨསཏིཡཱ ཨནཱཔཏྟིཔཀྑོཔི སམྦྷཝཏཱིཏི ཝིནཡདྷརོ ཏཏྠ ཨནཱཔཏྟིདིཊྛིཾ པཊིལབྷིཏྭཱ ཨེཝམཱཧ. ཏེནེཝ པཱལི༹ཡཾ ‘‘ཨཉྙེ བྷིཀྑཱུ ཏསྶ ཨཱཔཏྟིཡཱ ཨནཱཔཏྟིདིཊྛིནོ ཧོནྟཱི’’ཏི ཝུཏྟཾ. པརིསཱཡཔིསྶ ཨནཱཔཏྟིདིཊྛིཡཱ ཨུཔྤནྣཏྟཱ ‘‘ཨཉྙེ’’ཏི བཧུཝཙནཾ ཀཏཾ. ཨནཱཔཏྟིདིཊྛི ཨཧོསཱིཏི སུཏྟནྟིཀཏྠེརསྶ ཝིནཡེ ཨཔཀཏཉྙུཏཱཡ ཝིནཡདྷརསྶ ཝཙནམཏྟེན སོ ཨེཝམཧོསི, སཱ པནསྶ ཨཱཔཏྟི ཨེཝ ཨུདཀཱཝསེསསྶ ཋཔནབྷཱཝཾ ཉཏྭཱ ཋཔིཏཏྟཱ. ཝཏྠུམཏྟཛཱནནེ ཨེཝ ཧི སེཁིཡཱ སཙིཏྟཀཱ, ན པཎྞཏྟིཝིཛཱནནེ. ཏེནེཝ པཱལི༹ཡཾ ‘‘ཏསྶཱ ཨཱཔཏྟིཡཱ ཨནཱཔཏྟིདིཊྛི ཧོཏཱི’’ཏི སབྦཏྠ ཨཱཔཏྟི ཨིཙྩེཝ ཝུཏྟཾ. ‘‘ཨཱཔཏྟིཾ ཨཱཔཛྫམཱནོ’’ཏི ཨིདཾ ཝིནཡདྷརཏྠེརོ ‘‘ཏཡཱ ཨིདཾ ཨུདཀཾ ཋཔིཏ’’ནྟི ཨཏྟནཱ པུཊྛེན སུཏྟནྟིཀཏྠེརེན ‘‘ཨཱམཱཝུསོ’’ཏི ཝུཏྟཝཙནཾ སརིཏྭཱ པཎྞཏྟིཨཀོཝིདཏཱཡ སཉྩིཙྩེཝ ཨཀཱསཱིཏི ཨཱཔཏྟིདིཊྛི ཧུཏྭཱཝ ཨཝོཙ. ཏེནེཝ པཱལི༹ཡཾ ‘‘ཨཉྙེ བྷིཀྑཱུ ཏསྶཱ ཨཱཔཏྟིཡཱ ཨཱཔཏྟིདིཊྛིནོ ཧོནྟཱི’’ཏི ཝུཏྟཾ.

༤༥༣. ‘‘ན ཏཱཝ བྷིནྣོ’’ཏི ཨིདཾ ཨུཀྑིཔནཏདནུཝཏྟནམཏྟེན སངྒྷོ བྷིནྣོ ནཱམ ན ཧོཏི, ཏཾ ནིསྶཱཡ པན ཨུབྷཡཔཀྑིཀཱནཾ པཀྑཾ པརིཡེསིཏྭཱ ཨཉྙམཉྙཾ ཀོདྷཝསེན ཀཱཡཝཙཱིཀལཧཝཌྜྷནེནེཝ ཧོཏཱིཏི ཨིམམཏྠཾ སནྡྷཱཡ ཝུཏྟཾ. ཏེནཱཧ ‘‘སོ ཙ ཁོ ཀལཧཝསེནཱ’’ཏི. སམྦྷམཨཏྠཝསེནཱཏི ཏུརིཏཏྠཝསེན.

༤༥༤. ཨཀཱརཎེཏིཨཱདི ¶ ཨནུཀྑིཔིཏྭཱཝ ཨུཔཱཡེན སཉྙཱཔེཏྭཱ ཧིཏེསིཏཱཡ ཨཱཔཏྟིཏོ མོཙེཏུཾ ཡུཏྟཊྛཱནེ ཀོདྷཙིཏྟཝསེན ཝིཧེཋནཏྠཱཡ ཀཏབྷཱཝཾ སནྡྷཱཡ ཝུཏྟཾ, ན པན ཀམྨངྒསྶ ཨབྷཱཝཾ སནྡྷཱཡ. ཏེནེཝ ¶ པཱལི༹ཡཾ ‘‘ཨཱཔཏྟི ཨེསཱ, བྷིཀྑཝེ, ནེསཱ ཨནཱཔཏྟི…པེ… ཨུཀྑིཏྟོ ཨེསོ བྷིཀྑཱུ’’ཏིཨཱདི ཝུཏྟཾ.

༤༥༥. ‘‘ཨདྷམྨཝཱདཱིནཾ པཀྑེ ནིསིནྣོ’’ཏི ཨིདཾ ཨུཔལཀྑཎམཏྟཾ, དྷམྨཝཱདཱིནཾ པཀྑེ ནིསཱིདིཏྭཱ ཨདྷམྨཝཱདཱིནཾ ལདྡྷིཾ གཎྷནྟོཔི དྷམྨཝཱདཱིནཾ ནཱནཱསཾཝཱསཀོ ཧོཏི ཨེཝ. ཀམྨཾ ཀོཔེཏཱིཏི ཏཾ ཝིནཱ གཎསྶ ཨཔཱུརཎཔཀྑཾ སནྡྷཱཡ ཝུཏྟཾ. ཡཏྠ ཝཱ ཏཏྠ ཝཱཏི དྷམྨཝཱདཱིནཾ པཀྑེ ཝཱ ཨདྷམྨཝཱདཱིནཾ པཀྑེ ཝཱཏི ཨཏྠོ. ཨིམེ དྷམྨཝཱདིནོཏི གཎྷཱཏཱིཏི ཏཾཏཾཔཀྑགཏེ བྷིཀྑཱུ ཡཱཐཱཝཏོ ཝཱ ཨཡཱཐཱཝཏོ ཝཱ ‘‘ཨིམེ དྷམྨཝཱདིནོ’’ཏི གཎྷཱཏི, ཨཡཾ ཏཾཏཾཔཀྑགཏཱནཾ ཨཏྟཱནཾ སམཱནསཾཝཱསཀཾ ཀརོཏི.

༤༥༦. ཨུཔདཾསེནྟཱིཏི པཝཏྟེནྟི. པཱལི༹ཡཾ ཨེཏྟཱཝཏཱཏི ‘‘ཨེཏྟཀཔདེསཾ མུཉྩིཏྭཱ ནིསིནྣཱ མཡཾ ཀོདྷཙིཏྟེ ཨུཔྤནྣེཔི ཨཉྙམཉྙཾ ཨནནུལོམིཀཾ ཀཱཡཀམྨཱདིཾ པཝཏྟེཏུཾ ན སཀྑིསྶཱམཱ’’ཏི སལླེཀྑེཏྭཱ དཱུརེ ནིསཱིདིཏབྦནྟི ཨདྷིཔྤཱཡོ. ཏེནཱཧ ‘‘ཨུཔཙཱརཾ མུཉྩིཏྭཱ’’ཏི.

༤༥༧. པཱལི༹ཡཾ བྷཎྜནཛཱཏཱཏིཨཱདཱིསུ ཀལཧསྶ པུབྦབྷཱགོ བྷཎྜནཾ ནཱམ. ཧཏྠཔརཱམཱསཱདི ཀལཧོ ནཱམ. ཝིརུདྡྷཝཱདོ ཝིཝཱདོ ནཱམ.

༤༥༨. པརིཔུཎྞཀོསཀོཊྛཱགཱརོཏི ཨེཏྠ ཀོསོ ནཱམ སུཝཎྞམཎིཨཱདིབྷཎྜཱགཱརསཱརགབྦྷོ. ཀོཊྛཾ ཝུཙྩཏི དྷཉྙསྶ ཨཱཝསནཊྛཱནཾ, ཀོཊྛབྷཱུཏཾ ཨགཱརཾ ཀོཊྛཱགཱརཾ, དྷཉྙསངྒཧཊྛཱནཾ. ཨབྦྷུཡྻཱསཱིཏི ཡུདྡྷཱཡ ཨབྷིམུཁོ ནིཀྑམཱིཏི ཨཏྠོ. ཨེཀསངྒྷཱཏམྤཱིཏི ཨེཀཡུདྡྷམྤི. དྷོཝནནྟི དྷོཝནུདཀཾ.

༤༦༣. པརིཡཱདིནྣརཱུཔཱཏི ཀོདྷཙིཏྟེན པརིགྒཧིཏསབྷཱཝཱ.

༤༦༤. ཏཾ ན ཛཱནནྟཱིཏི ཏཾ ཀལཧཾ ན ཛཱནནྟི. ཡེ ཨུཔནཡ྄ཧནྟཱིཏི ཡཐཱཝུཏྟཾ ཀོདྷཱཀཱརཾ ཙིཏྟེ བནྡྷནྟི. པཱཀཊཔརིསྶཡེཏི སཱིཧཱདིཀེ. པཊིཙྪནྣཔརིསྶཡེཏི རཱགཱདིཀེ. པཱལི༹ཡཾ ནཏྠི བཱལེ ༩༧ སཧཱཡཏཱཏི བཱལཾ ནིསྶཱཡ སཱིལཱདིགུཎསངྑཱཏཱ སཧཱཡཏཱ ནཏྠི, ན སཀྐཱ ལདྡྷུནྟི ཨཏྠོ.

༤༦༦. ཨཏྟཀཱམརཱུཔཱཏི ¶ ཨཏྟནོ ཧིཏཀཱམཡམཱནསབྷཱཝཱ. ཨནུརུདྡྷཱཏི ཨེཀསེསནཡེན ཏིཎྞམྤི ཀུལཔུཏྟཱནཾ ཨཱལཔནཾ, ཏེནེཝ བཧུཝཙནནིདྡེསོ ཀཏོ. ཁམནཱིཡཾ སརཱིརཾ ཡཱཔནཱིཡཾ ཛཱིཝིཏཾ ‘‘ཀཙྩི ཝོ སརཱིརཉྩ དྷཱརེཏུཾ, ཛཱིཝིཏཉྩ ཡཱཔེཏུཾ སཀྐཱ’’ཏི པུཙྪཏི. ཏགྒྷཱཏི ཨེཀཾསཏྠེ ནིཔཱཏོ, ཨེཀཾསེན མཡཾ བྷནྟེཏི ཨཏྠོ. ཡཐཱ ཀཐནྟི ཨེཏྠ ཡཐཱཏི ནིཔཱཏམཏྟཾ, ཡཐཱཀཐནྟི ཝཱ ཨེཀོ ནིཔཱཏོ ཀཱརཎཔུཙྪནཏྠོ, ཀེན པཀཱརེནཱཏི ཨཏྠོ. ཨེཀཉྩ པན མཉྙེ ཙིཏྟནྟི ཨེཀསྶ ཙིཏྟཝསེན ཨིཏརེསམྤི པཝཏྟནཏོ སབྦེསཾ ནོ ཨེཀཾ ཝིཡ ཙིཏྟནྟི ཨཏྠོ. ཀཙྩི པན ཝོ ཨནུརུདྡྷཱཏི ཨེཏྠ ཝོཏི ནིཔཱཏམཏྟཾ, པཙྩཏྟཝཙནཾ ཝཱ, ཀཙྩི ཏུམྷེཏི ཨཏྠོ. ཨམྷཱཀནྟི ནིདྡྷཱརཎེ སཱམིཝཙནཾ, ཨམྷེསུ ཏཱིསུ ཡོ པཋམཾ པཊིཀྐམཏཱིཏི ཨཏྠོ.

ཀོསམྦཀཝིཝཱདཀཐཱཝཎྞནཱ ནིཊྛིཏཱ.

པཱལིལེཡྻཀགམནཀཐཱཝཎྞནཱ

༤༦༧. ཡེན པཱལིལེཡྻཀནྟི པཙྩཏྟེ ཨུཔཡོགཝཙནཾ, ཡཏྠ པཱལིལེཡྻཀོ གཱམོ, ཏཏྠ ཨཝསརཱིཏི ཨཏྠོ. དཧརཔོཏཀེཧཱིཏི བྷིངྐཙྪཱཔེཧི. ‘‘ཨོགཱཧི’’ནྟིཔི པཱཋོ, ནཧཱནཔོཀྑརཎིནྟི ཨཏྠོ.

ཨུདཱནགཱཐཱཡཾ པན – རཐཨཱིསསདིསདནྟསྶ ནཱགསྶ ཧཏྠིནོ ཨེཏཾ ཝིཝེཀནིནྣཾ ཙིཏྟཾ ནཱགེན བུདྡྷནཱགསྶ ཝིཝེཀནིནྣཙིཏྟེན སམེཏི. ཀསྨཱ? ཡཾ ཡསྨཱ ཨེཀོཝ རམཏི ཝནེ, ཏསྨཱ ཨེཝཾ ཡོཛནཱ དཊྛབྦཱ.

པཱལིལེཡྻཀགམནཀཐཱཝཎྞནཱ ནིཊྛིཏཱ.

ཨཊྛཱརསཝཏྠུཀཐཱཝཎྞནཱ

༤༦༨. ཡཐཱ དྷམྨོ ཏཐཱ ཏིཊྛཱཧཱིཏི ཡཐཱ དྷམྨོ ཙ ཝིནཡོ ཙ ཋིཏོ, ཏཐཱ ཏིཊྛ, དྷམྨཝཱདཱིཔཀྑེ ཏིཊྛཱཏི ཨཏྠོ.

༤༧༣. ‘‘ཡོ ¶ པཊིབཱཧེཡྻ, ཨཱཔཏྟི དུཀྐཊསྶཱ’’ཏི ཨིདཾ སཱམགྒཱིབྷེདསྶ ཨཀཱརཀེ སནྡྷཱཡ ཝུཏྟཾ. ཡེ པན བྷེདཀཱརཀཱ ཝིརུདྡྷཱ ཨལཛྫིནོ ¶ , ཏེསཾ པཊིབཱཧིཏུཾ ཝཊྚཏི ཏེསཾ སནྟཀསྶཔི སེནཱསནསྶ ཝིནཱསནཝཙནཏོ. ‘‘ཝིཝིཏྟཾ ཀཏྭཱཔི དཱཏབྦ’’ནྟི ཝུཏྟཏྟཱ པན ཡཐཱཝུཌྜྷཾ ཝརསེནཱསནཾ ཨདཏྭཱ ཝུཌྜྷཱནམྤི ཨསཉྙཏཱནཾ སཉྙཏེཧི ཝིཝིཏྟཾ ཀཏྭཱ དཱཏབྦནྟི དཊྛབྦཾ.

༤༧༥. ཀམྨཝཱཙཱཡ ཨོསཱརེཏྭཱཏི ཨེཏྠ ཨུཀྑིཏྟསྶ བྷིཀྑུནོ ཨཱཔཏྟིཡཱཔནྣབྷཱཝཾ པཊིཛཱནིཏྭཱ སམྨཱཝཏྟནེན ཨུཀྑེཔཀཱནཾ སམུཔྤནྣཨོསཱརཎཙྪནྡསྶ པགེཝ ཉཱཏཏྟཱ པཊིཔྤསྶམྦྷནཀམྨཝཱཙཱཡ ཨུཀྑིཏྟཱནུཝཏྟཀཱ སཡམེཝ ནཾ ཨོསཱརེསུནྟི དཊྛབྦཾ.

༤༧༦. ཨཏྠཏོ ཨཔགཏཱཏི སཱམགྒཱིཨཏྠཝིརཧིཏཱ, ཏུཙྪབྱཉྫནཱཏི ཨཏྠོ.

༤༧༧. ཨཔྤཊིཙྪནྣཱཙཱརོཏི ཨཔྤཊིཙྪཱདེཏབྦསུནྡརཱཙཱརོ. ཨནཔགཏནྟི ཀཱརཎཏོ ཨནཔེཏཾ. ཨཱདཱཏབྦཏོ གཧེཏབྦཏོ ཨཱདཱཡནྟི ཨཱཙརིཡཝཱདོ ཝུཏྟོཏི ཨཱཧ ‘‘ཨཱདཱཡཾ ཨཏྟནོ ཨཱཙརིཡཝཱད’’ནྟི.

ཨཊྛཧི དཱུཏངྒེཧཱིཏི ‘‘སོཏཱ ཙ ཧོཏི སཱཝེཏཱ ཙ ཨུགྒཧེཏཱ ཙ དྷཱརེཏཱ ཙ ཝིཉྙཱཏཱ ཙ ཝིཉྙཱཔེཏཱ ཙ ཀུསལོ ཙ སཧིཏཱསཧིཏསྶ ནོ ཙ ཀལཧཀཱརཀོ’’ཏི (ཨ. ནི. ༨.༡༦) ཨེཝཾ ཝུཏྟེཧི ཨཊྛཧི དཱུཏངྒེཧི. སེསམེཏྠ, ཧེཊྛཱ ཙ སབྦཏྠ སུཝིཉྙེཡྻམེཝཱཏི.

ཨཊྛཱརསཝཏྠུཀཐཱཝཎྞནཱ ནིཊྛིཏཱ.

ཀོསམྦཀཀྑནྡྷཀཝཎྞནཱནཡོ ནིཊྛིཏོ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

མཧཱཝགྒཝཎྞནཱནཡོ ནིཊྛིཏོ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཙཱུལ༹ཝགྒཝཎྞནཱ

༡. ཀམྨཀྑནྡྷཀོ

ཏཛྫནཱིཡཀམྨཀཐཱཝཎྞནཱ

༡. ཙཱུལ༹ཝགྒསྶ ¶ ¶ པཋམེ ཀམྨཀྑནྡྷཀེ ཏཱཝ ‘‘བལཝཱབལཝ’’ནྟི ཨིདཾ ཨེཀཔདཾ. ‘‘བལཝབལཝ’’ནྟི ཝཏྟབྦེ ཨཱཀཱརཾ ཀཏྭཱ ‘‘བལཝཱབལཝ’’ནྟི ཝུཏྟཾ. ཏཉྩ ‘‘དུཀྑདུཀྑ’’ནྟིཨཱདཱིསུ ཝིཡ ཨཏིསཡཏྠེ ཝཏྟཏཱིཏི ཨཱཧ ‘‘སུཊྛུ བལཝཾ པཊིཝདཐཱ’’ཏི, ཨཏི ཝིཡ བལཝཾ ཀཏྭཱ པཊིཝཙནཾ དེཐཱཏི ཨཏྠོ.

༢. པཱལི༹ཡཾ ཨཱཔཏྟི ཨཱརོཔེཏབྦཱཏི ཨེཏྠ ཀིཉྩཱཔི ‘‘མཱ ཁོ ཏུམྷེ ཨཱཡསྨནྟོ ཨེསོ ཨཛེསཱི’’ཏིཨཱདིཀེ བྷཎྜནཱདིཛནཀེ ཝཙནེ པཉྙཏྟཱ ཀཱཙི ཨཱཔཏྟི ནཱམ ནཏྠི མུསཱཔེསུཉྙཱདཱིསུ ཨེཏསྶ ཨཔྤཝིཊྛཏྟཱ, ཏཐཱཔི བྷིཀྑཱུཧི ཝིསུཾ, སངྒྷམཛ྄ཛྷེ ཙ ‘‘མཱ, ཨཱཝུསོ, བྷིཀྑཱུ ¶ ཨཉྙམཉྙཾ པཡོཛེཏྭཱ བྷཎྜནཱདིཾ ཨཀཱསི, ནེདཾ ཨཔྤིཙྪཏཱདཱིནཾ ཨཏྠཱཡ ཝཏྟཏཱི’’ཏི ཨེཝཾ ཨཔཉྙཏྟེན ཝུཙྩམཱནསྶ བྷིཀྑུནོ ཨནཱདརིཡེན ཨནོརམནཔཙྩཡཱ ཝཱ ཨཉྙཝཱདཝིཧེསཱདིཀརཎཔཙྩཡཱ ཝཱ ཡཱ ཨཱཔཏྟི ཧོཏི, སཱ ཨཱཔཏྟི ཨཱརོཔེཏབྦཱ དིཊྛིཝིཔནྣསྶ ཝིཡཱཏི ཨེཝམཏྠོ དཊྛབྦོ.

ཡསྶ པན ཨིདཾ ཝཙནཾ ཝིནཱཝ ཀཱཡཝཱཙཱཧི ཨཱཔནྣཱ ལཧུཀཱཔཏྟི ཨཏྠི, ཏསྶཔི ཨཱརོཔེཏབྦཱཝ. ཡཾ པན ཀམྨཝཱཙཱཡ ‘‘ཨཏྟནཱ བྷཎྜནཀཱརཀཱ’’ཏི ཨཏྟནཱ-སདྡགྒཧཎཾ, ‘‘ཡེཔི ཙཉྙེ བྷིཀྑཱུ བྷཎྜནཀཱརཀཱ…པེ… ཏེ ཨུཔསངྐམིཏྭཱ’’ཏིཨཱདིཝཙནཉྩ, ཏཾ ཝཏྠུཝསེན གཧིཏཾ. ཡོ པན སཡམེཝ བྷཎྜནཀཱརཀོ ཧོཏི, ཨཉྙེ པན བྷཎྜནཀཱརཀེ ཨུཔསངྐམིཏྭཱ ‘‘མཱ ཁོ ཏུམྷེ’’ཏིཨཱདིཝཙནཾ ན ཝདཏི, ཏསྶཱཔེཏཾ ཀམྨཾ ཀཱཏབྦམེཝ. ཀརོནྟེཧི ཙ ‘‘སུཎཱཏུ མེ, བྷནྟེ, སངྒྷོ, ཨཡཾ ཨིཏྠནྣཱམོ ¶ བྷིཀྑུ བྷཎྜནཀཱརཀོ…པེ… སངྒྷེ ཨདྷིཀརཎཀཱརཀོ. ཡདི སངྒྷསྶ པཏྟཀལླ’’ནྟིཨཱདིནཱཝ ཀམྨཝཱཙཱ ཀཱཏབྦཱ. ཡོ ཙ ཨཉྙེཔི བྷིཀྑཱུ ཀལཧཱཡ སམཱདཔེཏི, ཏསྶཱཔི ཨེཝམེཝ ཀམྨཝཱཙཾ ཀཱཏུཾ ཝཊྚཏི ཨཉྙེསཾ སམཱདཱཔནསྶཔི བྷཎྜནཀཱརཀཏྟེ ཨེཝ པཝིསནཏོ. ཨཉྙེསཾ སམཱདཱཔནཱཀཱརམྤི ཝཏྭཱཝ, ཀམྨཝཱཙཾ ཀཱཏུཀཱམེནཔི ཙ ཏེཧི ཝུཏྟཝཙནཏྠམེཝ གཧེཏྭཱ ཏདནུགུཎཾ ཡོཛེཏྭཱཝ ཀཱཏབྦཾ, ན ཨིདྷཱགཏཝསེནེཝ སབྦེསམྤི ཨིདྷཱགཏཝསེནེཝ ཝཙནཱསམྦྷཝཱ. བྷཱུཏེན ཝཏྠུནཱ ཀཏམེཝ ཧི ཨཝིཔནྣཾ ཧོཏི, ནཱཉྙནྟི གཧེཏབྦཾ. ཨེས ནཡོ ནིཡསྶཀམྨཱདཱིསུཔི.

ཏཛྫནཱིཡཀམྨཀཐཱཝཎྞནཱ ནིཊྛིཏཱ.

ཨདྷམྨཀམྨདྭཱདསཀཀཐཱདིཝཎྞནཱ

༤. ཨཔྤཊིཉྙཱཡ ཀཏནྟི ཝཏྠུཾ ཝཱ ཨཱཔཏྟིཾ ཝཱ ཨསམྤཊིཙྪཱཔེཏྭཱ ཀཏཾ. ཡོ པན སབྦེསཾ པསྶནྟཱནཾ ཨེཝ ཝཏྠུཝཱིཏིཀྐམཾ ཀཏྭཱ པཙྪཱ ཀམྨཀརཎབྷཡེན ‘‘ན ཀརོམཱི’’ཏི མུསཱ ཝདཏི, ཏསྶ བྷིཀྑཱུནཾ སམྨུཁེ ཝཱིཏིཀྐམཀརཎམེཝ པཊིཉྙཱ. ཏཐཏོ ཛཱནནཏྠམེཝ པཊིཉྙཱཡ ཀརཎཾ ཨནུཉྙཱཏཾ. ཡཏྠ པན སནྡེཧོ ཧོཏི, ཏཏྠ སམྤཊིཙྪཱཔེཏྭཱཝ ཀཏྟབྦནྟི གཧེཏབྦཾ.

‘‘པཱརཱཛིཀཱཔཏྟིཡཱ ཝཱ’’ཏི ཨིདཾ ལིངྒནཱསནནིམིཏྟཏཱཡ པཱརཱཛིཀསྶ ཀམྨེན ཨཏིཀིཙྪནཱིཡཏོ ཝུཏྟཾ. ‘‘སངྒྷཱདིསེསཱཔཏྟིཡཱ ཝཱ’’ཏི ཨིདཾ པན པརིཝཱསཱདིནིསྶཱརཎཀམྨསྶ ཨཱཝེཎིཀསྶ ¶ ཝིཛྫམཱནཏྟཱ ཝུཏྟཾ. ཡཾ པན པརཏོ ‘‘ཨདྷིསཱིལེ སཱིལཝིཔནྣོ ཧོཏི…པེ… ཏཛྫནཱིཡཀམྨཾ ཀརེཡྻཱ’’ཏི (ཙཱུལ༹ཝ. ༦) ཝུཏྟཾ, ཏཾ ‘‘ཨཱཡཏིཾ སཾཝརེ ཋཏྭཱ ཝུཊྛཱནཾ ཀརོཧཱི’’ཏི ཨོཝདིཡམཱནསྶ ཨནཱདརིཡཱདིཔཙྩཡལཧུཀཱཔཏྟིཾ སནྡྷཱཡ ཝུཏྟཾ. སཱིལཝིཔཏྟིམཱུལཀཉྷི ལཧུཀཱཔཏྟིཾ ཨཱཔནྣོ ཨིདྷ ཨབྷེདཱུཔཙཱརེན ‘‘ཨདྷིསཱིལེ སཱིལཝིཔནྣོ’’ཏི ཝུཏྟོ ‘‘ཨཏིདིཊྛིཡཱ དིཊྛིཝིཔནྣོ’’ཏི ཨེཏྠ ཝིཡ.

ཡཐཱ ཙ དིཊྛིཾ གཧེཏྭཱ ཝོཧརནྟསྶ ‘‘ཨིཏོ དིཊྛིཏོ ཨོརམཱཧཱི’’ཏི ཨཝཏྭཱ ཀཏཀམྨཾ ཀེཝལཱཡ དིཊྛིཝིཔཏྟིཡཱ ཀཏཏྟཱ ཨནཱཔཏྟིཡཱ ཀཏཾ ནཱམ ཨདྷམྨཀམྨཾ ཧོཏི, ཨེཝཾ སཱིལཝིཔཏྟིཾ ཨཱཔཛྫིཏྭཱ ལཛྫིདྷམྨེ ¶ ཨོཀྐནྟེ ཡཐཱདྷམྨཾ ཝུཊྛཱཡ སཾཝརེ ཋཱཏུཀཱམསྶ ཀཏཾ ཏཛྫནཱིཡཱདིཀམྨཾ ཀེཝལཱཡ སཱིལཝིཔཏྟིཡཱ ཀཏཏྟཱ ཨདེསནཱགཱམིནིཡཱ ཀཏཾ ནཱམ ཨདྷམྨཀམྨཾ ཧོཏི. ཏེནེཝ ནིཡསྶཀམྨེཔི ‘‘ཨཔིསྶུ བྷིཀྑཱུ པཀཏཱ པརིཝཱསཾ དེནྟཱ’’ཏིཨཱདིནཱ སཾཝརེ ཨཊྛཱནམེཝ ཀམྨནིམིཏྟབྷཱཝེན ཝུཏྟཾ. ཨདནྟཾ དམནཏྠམེཝ ཧི ཏཛྫནཱིཡཱདིཀམྨཱནི ཨནུཉྙཱཏཱནཱིཏི. ཀེཙི པན ‘‘ཨདེསནཱགཱམིནིཡཱཏི ཨིདཾ པཱརཱཛིཀཱཔཏྟིཾཡེཝ སནྡྷཱཡ ཝུཏྟཾ, ན སངྒྷཱདིསེས’’ནྟི (སཱརཏྠ. ཊཱི. ཙཱུལ༹ཝགྒ ༣.༤) ཝདནྟི, ཏཾ སུཀྐཔཀྑེ ‘‘དེསནཱགཱམིནིཡཱ ཨཱཔཏྟིཡཱ ཀཏཾ ཧོཏཱི’’ཏི ཨིམིནཱ ཝཙནེན ཝིརུཛ྄ཛྷཏི. སངྒྷཱདིསེསསྶཱཔི ཙ པརིཡཱཡཏོ དེསནཱགཱམིནིཝོཧཱརེ གཡ྄ཧམཱནེ ‘‘ཨཱཔཏྟིཡཱ ཀཏཾ ཧོཏཱི’’ཏི ཝུཏྟཝཱརཏོ ཨིམསྶ ཝཱརསྶ ཝིསེསོ ན སིཡཱ, ཨཊྛཀཐཱཡམྤེཏྠ ཝིསེསབྷཱཝོ ན དསྶིཏོ. ཏསྨཱ ཝུཏྟནཡེནེཝེཏྠ ཨདྷིཔྤཱཡོ གཧེཏབྦོ.

༦. སབྦཱནིཔཱིཏི ཏཛྫནཱིཡནིཡསྶཔབྦཱཛནཱིཡཀམྨཱནི ཏཱིཎིཔི. ཨཉྙཀམྨསྶ ཝཏྠུནཱཏི ཏཛྫནཱིཡཏོ ཨཉྙསྶ ཀམྨསྶ ཝཏྠུནཱ ཨཉྙཀམྨཀརཎཾ ནཱམ ཀོཙི དོསོཔི ན ཧོཏཱིཏི ཨདྷིཔྤཱཡོ. ཀཱརཎམཱཧ ‘‘ཀསྨཱ’’ཏིཨཱདིནཱ.

༨. པནྣལོམཱཏི པཏིཏམཱནལོམཱ.

ཨདྷམྨཀམྨདྭཱདསཀཀཐཱདིཝཎྞནཱ ནིཊྛིཏཱ.

ནིཡསྶཀམྨཀཐཱདིཝཎྞནཱ

༡༡. ནིཡསྶཀམྨེ པཱལི༹ཡཾ ཨཔིསྶཱུཏི ཨཔིཙཱཏི ཨིམསྨིཾ ཨཏྠེ ནིཔཱཏསམུདཱཡོ. ནིསྶཱཡ ¶ ཏེ ཝཏྠབྦནྟི ཨེཏྠ ཀེཙི ཀལྱཱཎམིཏྟཱཡཏྟཝུཏྟིཏཾ སནྡྷཱཡ ཝུཏྟནྟི ཝདནྟི, ཨཉྙེ པན ནིསྶཡགྒཧཎམེཝཱཏི, ཨུབྷཡེནཔིསྶ སེརིཝིཧཱརོ ན ཝཊྚཏཱིཏི དཱིཔིཏནྟི དཊྛབྦཾ.

༢༡. པབྦཱཛནཱིཡཀམྨེ ‘‘པབྦཱཛནཱིཡཀམྨཾ པཊིཔྤསྶམྦྷེཏཱུ’’ཏི ཨིདཾ པཀྐམནཱདིཾ ཨཀཏྭཱ སམྨཱཝཏྟནྟཱནཾ ཝསེན ཝུཏྟཾ.

༣༣. པཊིསཱརཎཱིཡཀམྨེ ¶ ནེཝ བྷིཀྑུཝཙནཾ, ན གིཧིཝཙནནྟི ཨེཏྠ པརིཡཱཡཏོཔི བྷིཀྑཱུ པརཁུཾསནཾ ན ཝདནྟི, གཧཊྛཱ པན སརཱུཔེནེཝ ཨཀྐོསིཏུཾ སམཏྠཱཔི ཨུཔཀཱརཱིསུ ཨཀཱརཎཾ ཨེཝརཱུཔཾ ན ཝདནྟི, ཏྭཾ གིཧིགུཎཏོཔི པརིཧཱིནོཏི ཨདྷིཔྤཱཡོ.

༣༩. ‘‘ཨངྒསམནྣཱགམོ པུརིམེཧི ཨསདིསོ’’ཏི ཨིམིནཱ ཏཛྫནཱིཡཱདཱིནཾ ཝུཏྟཀཱརཎམཏྟེན ཨིདཾ ཀཱཏུཾ ན ཝཊྚཏཱིཏི དཱིཔེཏི. ཨིདྷ ཝུཏྟེན པན གིཧཱིནཾ ཨལཱབྷཱཡ པརིསཀྐནཱདིནཱ ཨངྒེན ཏཱནིཔི ཀཱཏུཾ ཝཊྚཏཱིཏི གཧེཏབྦཾ. ཨེཏྠ ཙ ‘‘སདྡྷཾ པསནྣཾ དཱཡཀཾ ཀཱརཀཾ སངྒྷུཔཊྛཱཀཾ ཧཱིནེན ཁུཾསེཏཱི’’ཏི ཝུཏྟཏྟཱ ཏཱདིསེསུ གིཧཱིསུ ཁུཾསནཱདཱིཧི གིཧིཔཊིསཾཡུཏྟེཧི ཨེཝ ཨངྒེཧི ཀམྨཱརཧཏཱ, ན ཨཱརཱམིཀཙེཊཀཱདཱིསུ ཁུཾསནཱདཱིཧི. ཏཏྠཱཔི དཱཡཀཱདཱིསུ ཁམཱཔིཏེསུ ཀམྨཱརཧཏཱ ནཏྠི, ཨཱཔཏྟི ཙ ཡཏྠ ཀཏྠཙི དེསེཏུཾ ཝཊྚཏི. ཡོ ཙེ ཏིཀྑཏྟུཾ ཁམཱཔིཡམཱནོཔི ན ཁམཏི, ཨཀཏཀམྨེནཔི དསྶནཱུཔཙཱརེ ཨཱཔཏྟི དེསེཏབྦཱ. སོ ཙེ ཀཱལཀཏོ ཧོཏི, དེསནྟརཾ ཝཱ གཏོ, གཏདིསཱ ན ཉཱཡཏི, ཨནྟརཱམགྒེ ཝཱ ཛཱིཝིཏནྟརཱཡོ ཧོཏི, ཀཏཀམྨེནཔི ཨཀཏཀམྨེནཔི སངྒྷམཛ྄ཛྷེ ཡཐཱབྷཱུཏཾ ཝིཉྙཱཔེཏྭཱ ཁམཱཔེཏྭཱ ཨཱཔཏྟི དེསེཏབྦཱཏི ཝདནྟི. དྷམྨིཀཔཊིསྶཝསྶ ཨསཙྩཱཔནེ པན ཏེསཾ སནྟིཀཾ གནྟྭཱ ‘‘མཡཱ ཨསམཝེཀྑིཏྭཱ པཊིསྶཝཾ ཀཏྭཱ སོ ན སཙྩཱཔིཏོ, ཏཾ མེ ཁམཐཱ’’ཏིཨཱདིནཱ ཁམཱཔནེ ཝཙནཀྐམོ ཉཱཔེཏབྦོ.

༤༡. པཱལི༹ཡཾ མངྐུབྷཱུཏོ ནཱསཀྑི ཙིཏྟཾ གཧཔཏིཾ ཁམཱཔེཏུནྟི ཏིཾསཡོཛནམགྒཾ པུན གནྟྭཱཔི མཱནཐདྡྷཏཱཡ ཡཐཱབྷཱུཏཾ དོསཾ ཨཱཝིཀཏྭཱ ཨཁམཱཔནེན ‘‘ནཱཧཾ ཁམཱམཱི’’ཏི ཏེན པཊིཀྑིཏྟོ མངྐུབྷཱུཏོ ཁམཱཔེཏུཾ ན སཀྑི, སོ པུནདེཝ སཱཝཏྠིཾ པཙྩཱགནྟྭཱཔི མཱནནིགྒཧཏྠཱཡེཝ པུནཔི སཏྠཱརཱ པེསིཏོ པུརིམནཡེནེཝ ཁམཱཔེཏུཾ ཨསཀྐོནྟོ པུནཱགཙྪི. ཨཐསྶ བྷགཝཱ ‘‘ཨསནྟཾ བྷཱཝནམིཙྪེཡྻཱ’’ཏིཨཱདིནཱཝ (དྷ. པ. ༧༣) དྷམྨཾ དེསེཏྭཱ མཱནནིམྨཐནཾ ཀཏྭཱ ཨནུདཱུཏདཱནཾ ཨནུཉྙཱསཱིཏི དཊྛབྦཾ.

༤༢. ‘‘ནོ ¶ ཙེ ཁམཏི…པེ… ཨཱཔཏྟིཾ དེསཱཔེཏབྦོ’’ཏི ཝུཏྟཏྟཱ པགེཝ གཧཊྛོ ཁམཏི ཙེ, དསྶནཱུཔཙཱརེ ཨཱཔཏྟིདེསནཱཀིཙྩཾ ནཏྠཱིཏི གཧེཏབྦཾ.

༤༦. ཨུཀྑེཔནཱིཡཀམྨེསུ ¶ ཏཱིསུ ཨརིཊྛཝཏྠུསྨིཾ ཨཱཔཏྟིཾ ཨཱརོཔེཏྭཱཏི ཝིསུཾ སངྒྷམཛ྄ཛྷེཝ པཱཔིཀཱཡ དིཊྛིཡཱ ཨཔྤཊིནིསྶཛྫནཔཙྩཡཱ དུཀྐཊཾ, སམནུབྷཱསནཔརིཡོསཱནེ པཱཙིཏྟིཡཾ ཝཱ ཨཱཔཏྟིཾ ཨཱརོཔེཏྭཱ. ཨེཏྠཱཔི ཀམྨཝཱཙཱཡ ‘‘ཏཐཱཧཾ བྷགཝཏཱ’’ཏིཨཱདི ཝཏྠུཝསེན ཝུཏྟཾ. ཡེན ཡེན པཀཱརེན དིཊྛིགཏིཀཱ ཝོཧརིཾསུ, ཏེན ཏེན པཀཱརེན ཡོཛེཏྭཱ ཀམྨཝཱཙཱ ཀཱཏབྦཱ. གཧཎཱཀཱརཾ པན ཝིནཱཔི ‘‘སུཎཱཏུ མེ, བྷནྟེ, སངྒྷོ, ཨིཏྠནྣཱམསྶ བྷིཀྑུནོ པཱཔིཀཾ དིཊྛིགཏཾ ཨུཔྤནྣཾ, སོ ཏཾ དིཊྛིཾ ཨཔྤཊིནིསྶཛྫཏི, ཡདི སངྒྷསྶ པཏྟཀལླ’’ནྟི ཨེཝཾ སཱམཉྙཏོཔི ཀམྨཝཱཙཾ ཀཱཏུཾ ཝཊྚཏི.

༦༥. ‘‘ཡཾ དིཊྛིཾ ནིསྶཱཡ བྷཎྜནཱདཱིནི ཀརོཏཱི’’ཏི ཨིམིནཱ དིཊྛིཾ ནིསྶཱཡ ཨུཔྤནྣཱནི ཨེཝ བྷཎྜནཱདཱིནི ཨིདྷ ཨདྷིཔྤེཏཱནི, ན ཀེཝལཱནཱིཏི དསྶེཏི. ཡོ པན ‘‘བྷཎྜནཱདཱིནཾ ཀརཎེ དོསོ ནཏྠཱི’’ཏི དིཊྛིཀོ ཧུཏྭཱ བྷཎྜནཱདིཾ ཀརོཏི, སཱཔིསྶ དིཊྛི ཨེཝ ཧོཏི, ཏསྶཔི ཨཔྤཊིནིསྶགྒེ ཀམྨཾ ཀཱཏུཾ ཝཊྚཏི.

ནིཡསྶཀམྨཀཐཱདིཝཎྞནཱ ནིཊྛིཏཱ.

ཀམྨཀྑནྡྷཀཝཎྞནཱནཡོ ནིཊྛིཏོ.

༢. པཱརིཝཱསིཀཀྑནྡྷཀོ

པཱརིཝཱསིཀཝཏྟཀཐཱཝཎྞནཱ

༧༥. པཱརིཝཱསིཀཀྑནྡྷཀེ ¶ ¶ ཨནྟམསོ མཱུལཱཡཔཊིཀསྶནཱརཧཱདཱིནམྤཱིཏི ཨཱདི-སདྡེན མཱནཏྟཱརཧམཱནཏྟཙཱརིཀཨབྦྷཱནཱརཧེ སངྒཎྷཱཏི. ཏེ ཧི པཱརིཝཱསིཀཱནཾ, པཱརིཝཱསིཀཱ ཙ ཏེསཾ པཀཏཏྟཊྛཱནེ ཨེཝ ཏིཊྛནྟི. ཨདྷོཏཔཱདཊྛཔནཀནྟི ཡཏྠ ཋཏྭཱ པཱདེ དྷོཝནྟི, ཏཱདིསཾ དཱརུཕལཀཁཎྜཱདིཾ. པཱདགྷཾསནནྟི སཀྑརཀཐལཱདིཾ. ‘‘ཝཏྟཾ ཀརོནྟཱི’’ཏི ཨེཏྟཀམཏྟསྶེཝ ཝུཏྟཏྟཱ སདྡྷིཝིཧཱརིཀཱདཱིཧིཔི ཨབྷིཝཱདནཱདིཾ ཀཱཏུཾ ན ཝཊྚཏི.

‘‘པཱརིསུདྡྷིཨུཔོསཐེ ཀརིཡམཱནེ’’ཏི ཨིདཾ པཝཱརཎཱདིཝསེསུ སངྒྷེ པཝཱརེནྟེ ཨནུཔགཏཚིནྣཝསྶཱདཱིཧི ཀརིཡམཱནཔཱརིསུདྡྷིཨུཔོསཐམྤི སནྡྷཱཡ ཝུཏྟཾ. ཨཏྟནོ པཱལི༹ཡཱཏི ནཝཀཱནཾ པུརཏོ.

‘‘པཱརིཝཱསིཀསྶེཝཱ’’ཏི ཨིདཾ ཨབྦྷཱནཱརཧཔརིཡོསཱནེ སབྦེ གརུཀཊྛེ སནྡྷཱཡ ཝུཏྟཾ. ཏེསམྤི པཙྩེཀཾ ཨོཎོཛནསྶ ཨནུཉྙཱཏཏྟཱ ཏདཝསེསཱ པཀཏཏྟཱ ཨེཝ ཏཾ ན ལབྷནྟི.

ཙཏུསྶཱལབྷཏྟནྟི བྷོཛནསཱལཱཡ པཊིཔཱཊིཡཱ དིཡྻམཱནབྷཏྟཾ. ཧཏྠཔཱསེ ཋིཏེནཱཏི དཱཡཀསྶ ཧཏྠཔཱསེ པཊིགྒཧཎརུཧནཊྛཱནེཏི ཨདྷིཔྤཱཡོ. མཧཱཔེལ༹བྷཏྟེཔཱིཏི མཧནྟེསུ བྷཏྟཔཙྪིཨཱདིབྷཱཛནེསུ ཋཔེཏྭཱ དིཡྻམཱནབྷཏྟེསུཔི.

༧༦. པཱཔིཊྛཏརཱཏི པཱརཱཛིཀཱཔཏྟཱིཏི ཨུཀྐཾསཝསེན ཝུཏྟཾ. སཉྩརིཏྟཱདིཔཎྞཏྟིཝཛྫཏོ པན སུཀྐཝིསྶཊྛཱདིཀཱ ལོཀཝཛྫཱཝ, ཏཏྠཱཔི སངྒྷབྷེདཱདིཀཱ པཱཔིཊྛཏརཱ ཨེཝ.

‘‘ཀམྨནྟི ¶ པཱརིཝཱསིཀཀམྨཝཱཙཱ’’ཏི ཨེཏེན ཀམྨབྷཱུཏཱ ཝཱཙཱཏི ཀམྨཝཱཙཱ-སདྡསྶ ཨཏྠོཔི སིདྡྷོཏི ཝེདིཏབྦོ. སཝཙནཱིཡནྟི ཨེཏྠ ‘‘སདོས’’ནྟི (སཱརཏྠ. ཊཱི. ཙཱུལ༹ཝགྒ. ༣.༧༦) ཨཏྠཾ ཝདཏི. ཨཏྟནོ ཝཙནེ པཝཏྟནཀམྨནྟི ཨེཝམེཏྠ ཨཏྠོ དཊྛབྦོ, ‘‘མཱ པཀྐམཱཧཱི’’ཏི ཝཱ ‘‘ཨེཧི ཝིནཡདྷརཱནཾ སམྨུཁཱིབྷཱཝ’’ནྟི ཝཱ ¶ ཨེཝཾ ཨཏྟནོ ཨཱཎཱཡ པཝཏྟནཀཀམྨཾ ན ཀཱཏབྦནྟི ཨདྷིཔྤཱཡོ. ཨེཝཉྷི ཀེནཙི སཝཙནཱིཡེ ཀཏེ ཨནཱདརེན ཨཏིཀྐམིཏུཾ ན ཝཊྚཏི, བུདྡྷསྶ སངྒྷསྶ ཨཱཎཱ ཨཏིཀྐནྟཱ ནཱམ ཧོཏི.

རཛོཧཏབྷཱུམཱིཏི པཎྞསཱལཱཝིསེསནཾ. པཙྩཡནྟི ཝསྶཱཝཱསིཀཙཱིཝརཾ. སེནཱསནཾ ན ལབྷཏཱིཏི ཝསྶགྒེན ན ལབྷཏི.

ཨཔཎྞཀཔཊིཔདཱཏི ཨཝིརདྡྷཔཊིཔདཱ. སཙེ ཝཱཡམནྟོཔཱིཏི ཨེཏྠ ཨཝིསཡབྷཱཝཾ ཉཏྭཱ ཨཝཱཡམནྟོཔི སངྒཡ྄ཧཏི.

༨༡. ཨཝིསེསེནཱཏི པཱརིཝཱསིཀུཀྑིཏྟཀཱནཾ སཱམཉྙེན. པཉྩཝཎྞཙྪདནབདྡྷཊྛཱནེསཱུཏི པཉྩཔྤཀཱརཙྪདནེཧི ཚནྣཊྛཱནེསུ.

ཨོབདྡྷནྟི ཨུཊྛཱནཱདིབྱཱཔཱརཔཊིབདྡྷཾ. པཱིལི༹ཏནྟི ཨཏྠོ. མཉྩེ ཝཱ པཱིཋེ ཝཱཏི ཨེཏྠ ཝཱ-སདྡོ སམུཙྩཡཏྠོ, ཏེན ཏཊྚིཀཱཙམྨཁཎྜཱདཱིསུ དཱིགྷཱསནེསུཔི ནིསཱིདིཏུཾ ན ཝཊྚཏཱིཏི དཱིཔིཏཾ ཧོཏི.

ན ཝཏྟབྷེདདུཀྐཊནྟི ཝུཌྜྷཏརསྶ ཛཱནནྟསྶཱཔི ཝཏྟབྷེདེ དུཀྐཊཾ ནཏྠཱིཏི དསྶེཏི. ‘‘ཝཏྟཾ ནིཀྑིཔཱཔེཏྭཱ’’ཏི ཨིདཾ པཱརིཝཱསཱདིམེཝ སནྡྷཱཡ ཝུཏྟཾ.

པཱརིཝཱསིཀཝཏྟཀཐཱཝཎྞནཱ ནིཊྛིཏཱ.

པཱརིཝཱསིཀཀྑནྡྷཀཝཎྞནཱནཡོ ནིཊྛིཏོ.

༣. སམུཙྩཡཀྑནྡྷཀོ

སུཀྐཝིསྶཊྛིཀཐཱཝཎྞནཱ

༩༧. སམུཙྩཡཀྑནྡྷཀེ ¶ ¶ ཝེདཡཱམཧནྟི ཛཱནཱཔེམི ཨཧཾ, ཨཱརོཙེམཱིཏིཨཏྠོ. ཨནུབྷཝཱམཱིཏིཔིསྶ ཨཏྠཾ ཝདནྟི. པུརིམཾ པན པསཾསནྟི ཨཱརོཔནཝཙནཏྟཱ. ཨཱརོཙེཏྭཱ ནིཀྑིཔིཏབྦནྟི དུཀྐཊཔརིམོཙནཏྠཾ ཝུཏྟཾ. ཀེཙི པན ‘‘ཏདཧེཝ པུན ཝཏྟཾ སམཱདིཡིཏྭཱ ཨརུཎཾ ཨུཊྛཱཔེཏུཀཱམསྶ རཏྟིཙྪེདཔརིཧཱརཏྠམྤཱི’’ཏི ཝདནྟི.

‘‘སབྷཱགཱ བྷིཀྑཱུ ཝསནྟཱི’’ཏི ཝུཏྟཏྟཱ ཝིསབྷཱགཱནཾ ཝསནཊྛཱནེ ཝཏྟཾ ཨསམཱདིཡིཏྭཱ བཧི ཨེཝ ཀཱཏུམྤི ཝཊྚཏཱིཏི དཊྛབྦཾ. ‘‘དྭེ ལེཌྜུཔཱཏེ ཨཏིཀྐམིཏྭཱ’’ཏི ཨིདཾ ཝིཧཱརེ བྷིཀྑཱུནཾ སཛ྄ཛྷཱཡཱདིསདྡསཝནཱུཔཙཱརཝིཛཧནཏྠཾ ཝུཏྟཾ. ‘‘མཧཱམགྒཏོ ཨོཀྐམྨཱ’’ཏི ཨིདཾ མགྒཔཊིཔནྣཱནཾ བྷིཀྑཱུནཾ ཨུཔཙཱརཱཏིཀྐམནཏྠཾ ཝུཏྟཾ. གུམྦེན ཝཱཏིཨཱདི དསྶནཱུཔཙཱརཝིཛཧནཏྠཾ.

‘‘སོཔི ཀེནཙི ཀམྨེན པུརེ ཨརུཎེ ཨེཝ གཙྪཏཱི’’ཏི ཨིམིནཱ ཨཱརོཙནཱཡ ཀཏཱཡ སབྦེསུཔི བྷིཀྑཱུསུ ཝིཧཱརགཏེསུ ཨཱུནེ གཎེ ཙརཎདོསོ ཝཱ ཝིཔྤཝཱསདོསོ ཝཱ ན ཧོཏི ཨཱརོཙིཏཏྟཱ སཧཝཱསསྶཱཏི དསྶེཏི. ཏེནཱཧ ‘‘ཨཡཉྩཱ’’ ཏིཨཱདི. ཨབྦྷཱནཾ ཀཱཏུཾ ན ཝཊྚཏཱིཏི ཀཏམྤི ཨཀཏམེཝ ཧོཏཱིཏི ཨཏྠོ.

སུཀྐཝིསྶཊྛིཀཐཱཝཎྞནཱ ནིཊྛིཏཱ.

པཊིཙྪནྣཔརིཝཱསཀཐཱཝཎྞནཱ

༡༠༢. སུདྡྷསྶཱཏི སབྷཱགསངྒྷཱདིསེསཾ ཨནཱཔནྣསྶ, ཏཏོ ཝུཊྛིཏསྶ ཝཱ. ཨཉྙསྨིནྟི སུདྡྷནྟཔརིཝཱསཝསེན ¶ ཨཱཔཏྟིཝུཊྛཱནཏོ ཨཉྙསྨིཾ ཨཱཔཏྟིཝུཊྛཱནེ. པཱལི༹ཡཾ ‘‘པཊིཀསྶིཏོ སངྒྷེན ཨུདཱཡི བྷིཀྑུ ཨནྟརཱ ཨེཀིསྶཱ ཨཱཔཏྟིཡཱ…པེ… མཱུལཱཡཔཊིཀསྶནཱ’’ཏི ཨིདཾ ཀརཎཝསེན ཝིཔརིཎཱམེཏྭཱ མཱུལཱཡཔཊིཀསྶནཱཡ པཊིཀསྶིཏོཏི ཡོཛེཏབྦཾ. ཨཐ ཝཱ ‘‘མཱུལཱཡ པཊིཀསྶནཱ ཁམཏི སངྒྷསྶཱ’’ཏི ཨུཏྟརཔདེན སཧ པཙྩཏྟཝསེནེཝ ཡོཛེཏུམྤི ཝཊྚཏི.

‘‘ཨུདཱཡིཾ ¶ བྷིཀྑུཾ ཨནྟརཱ ཨེཀིསྶཱ ཨཱཔཏྟིཡཱ…པེ… མཱུལཱཡ པཊིཀསྶིཏྭཱ’’ཏི ཨེཏྠ ཨནྟརཱ ཨེཀིསྶཱ ཨཱཔཏྟིཡཱ ཧེཏུབྷཱུཏཱཡ ཨུདཱཡིཾ བྷིཀྑུཾ མཱུལཱཡ པཊིཀསྶིཏྭཱ མཱུལདིཝསེ ཨཱཀཌྜྷིཏྭཱ ཏསྶཱ ཨནྟརཱཔཏྟིཡཱ སམོདྷཱནཔརིཝཱསཾ དེཏཱུཏི ཡོཛནཱ. ཨཱཝིཀཱརཱཔེཏྭཱ ཝིསྶཛྫེཏབྦོཏི ཏསྶ ཨཏེཀིཙྪབྷཱཝཾ ཏེནེཝ སངྒྷསྶ པཱཀཊཾ ཀཱརེཏྭཱ ལཛྫིགཎཏོ ཝིཡོཛནཝསེན ཝིསྶཛྫེཏབྦོ.

སཏཾ ཨཱཔཏྟིཡོཏི ཀཱཡསཾསགྒཱདིཝསེན ཨེཀདིཝསེ ཨཱཔནྣཱ སཏཾ ཨཱཔཏྟིཡོ. དསསཏནྟི སཧསྶཱ ཨཱཔཏྟིཡོ. རཏྟིསཏཾ ཚཱདཡིཏྭཱནཱཏི ཡོཛེཏབྦོ. སབྦཔརིཝཱསཀམྨཝཱཙཱཝསཱནེཏི ཧེཊྛཱ དསྶིཏཱནཾ དྭིནྣཾ སུདྡྷནྟཔརིཝཱསཱནཾ, ཏིཎྞཾ སམོདྷཱནཔརིཝཱསཱནཉྩཱཏི ཨིམེསཾ སབྦེསཾ པརིཝཱསཱནཾ ཀམྨཝཱཙཱཔརིཡོསཱནེ. པུརིམནཡེནེཝཱཏི པཊིཙྪནྣཔརིཝཱསེ ཝུཏྟནཡེན.

ཝིཧཱརཱུཔཙཱརཏོཔཱིཏི བཧིགཱམེ བྷིཀྑཱུནཾ ཝིཧཱརཱུཔཙཱརཏོཔི. ‘‘དྭེ ལེཌྜུཔཱཏཱ ཨཏིཀྐམིཏབྦཱ’’ཏི ཨིདཾ བྷིཀྑཱུནཾ སཝནཱུཔཙཱརཱཏིཀྐམནཾ ཝུཏྟཾ. གཱམསྶཱཏི ན ཝུཏྟནྟི གཱམསྶ ཨུཔཙཱརཾ མུཉྩིཏུཾ ཝཊྚཏཱིཏི ན ཝུཏྟཾ. ཏེན གཱམཱུཔཙཱརེ ཋིཏཱཔི ཏཏྠ དསྶནསཝནཱུཔཙཱརེ ཨཏིཀྐམིཏྭཱ ཋིཏཱ བྷིཀྑཱུ ཙ བྷིཀྑུནིཡོ ཙ ཏསྶཱ རཏྟིཙྪེདཾ ན ཀརོནྟཱིཏི དཱིཔེཏི.

ཨནིཀྑིཏྟཝཏྟབྷིཀྑཱུནཾ ཝུཏྟནཡེནེཝཱཏི ཨུཔཙཱརསཱིམཱཡ པཝིཊྛཱནཾ ཝསེན རཏྟིཙྪེདཾ སནྡྷཱཡ ཝུཏྟཾ. ཏསྨིཾ གཱམེཏི བྷིཀྑུནཱིནཾ ནིཝཱསནགཱམེ. ཨཏྟཱནཾ དསྶེཏྭཱཏི ཡཐཱ ཨཱརོཙེཏུཾ སཀྐཱ, ཏཐཱ དསྶེཏྭཱ. ‘‘སམྨནྣིཏྭཱ དཱཏབྦཱ’’ཏི ཨིམིནཱ སམྨཏཱཡ སཧཝཱསེཔི རཏྟིཙྪེདོ ན ཧོཏཱིཏི དསྶེཏི.

མཱུལཱཡཔཊིཀསྶིཏསྶཱཏི མཱུལཱཡཔཊིཀསྶིཏསྶ པུན པརིཝུཏྠཔརིཝཱསསྶཱཏི ཨཏྠོ. ཏིསྶནྣནྟི མཱུལཱཔཏྟིཡཱ སཧ དྭིནྣཾ ཨནྟརཱཔཏྟཱིནཉྩ.

༡༠༨. སཙེ ¶ པཊིཙྪནྣཱཏི ནིཀྑིཏྟཝཏྟེནཱཔནྣཱཔཏྟིཾ སནྡྷཱཡ ཝུཏྟཾ. པཱལི༹ཡཾ པཉྩཱཧཔྤཊིཙྪནྣཝཱརེ ཨནྟརཱཔཏྟིཀཐཱཡཾ ‘‘ཨེཝཉྩ པན, བྷིཀྑཝེ, ཚཱརཏྟཾ མཱནཏྟཾ དཱཏབྦ’’ནྟི ཨིདཾ མཱུལཱཡཔཊིཀསྶནཱཀམྨཝཱཙཱནནྟརམེཝ དཱཏུཾ ཝུཏྟཾ ན ཧོཏི. མཱུལཱཡཔཊིཀསྶིཏསྶ པན པཉྩདིཝསཱནི པརིཝསིཏྭཱ ཡཱཙིཏསྶ ¶ མཱནཏྟཙརཎཀཱལེ ཨཱཔནྣཱཡ ཏཏིཡཱཡ ཨནྟརཱཔཏྟིཡཱ ཨཔྤཊིཙྪནྣཱཡ མཱནཏྟདཱནཾ སནྡྷཱཡ ཝུཏྟཾ. ཨེཝཉྩ དིནྣམཱནཏྟསྶ ཨེཀེན ཚཱརཏྟེན པུབྦེ དིནྣམཱནཏྟཱཧི ཏཱིཧི ཨཱཔཏྟཱིཧི སཧ ཙཏསྶནྣམྤི ཨཱཔཏྟཱིནཾ མཱནཏྟཾ ཙིཎྞམེཝ ཧོཏི. ཨིམིནཱ པན ནཡེན ཨབྦྷཱནཱརཧཀཱལེ ཨཱཔནྣཱཡ ཨནྟརཱཔཏྟིཡཱ, པཀྑཔྤཊིཙྪནྣཝཱརེ ཨནྟརཱཔཏྟཱིསུ ཙ པཊིཔཛྫནཾ ཝེདིཏབྦཾ. ‘‘ཨེཀཱཧཔྤཊིཙྪནྣཱདིཝསེན པཉྩཱ’’ཏི ཨིདཾ ཨེཀཱཧཔྤཊིཙྪནྣཱདཱིནཾ ཙཏུནྣཾ པཙྩེཀཔརིཝཱསདཱནམཱནཏྟདཱནཨབྦྷཱནཱནི ཨེཀེཀཾ ཀཏྭཱ ཝུཏྟཾ. ‘‘ཨནྟརཱཔཏྟིཝསེན ཙཏསྶོ’’ཏི ཨིདམྤི མཱནཏྟདཱནཨབྦྷཱནཱནི ཏསྨིཾ ཏསྨིཾ མཱུལཱཡཔཊིཀསྶནེ ཨེཀཏྟཾ ཨཱརོཔེཏྭཱ ཝུཏྟཾ.

པཊིཙྪནྣཔརིཝཱསཀཐཱཝཎྞནཱ ནིཊྛིཏཱ.

སམོདྷཱནཔརིཝཱསཀཐཱཝཎྞནཱ

༡༢༥. ‘‘ཡསྨཱ པཊིཙྪནྣཱ ཨནྟརཱཔཏྟཱི’’ཏི ཨིདཾ སམོདྷཱནཔརིཝཱསདཱནསྶ ཀཱརཎཝཙནཾ, ན པན ཙིཎྞཔརིཝུཏྠདིཝསཱནཾ མཀྑིཏབྷཱཝསྶ, ཨཔྤཊིཙྪནྣཱཡ ཨནྟརཱཔཏྟིཡཱ མཱུལཱཡཔཊིཀསྶནེ ཀཏེཔི ཏེསཾ མཀྑིཏབྷཱཝསམྦྷཝཏོ. ཏསྨཱ ‘‘མཱནཏྟཙིཎྞདིཝསཱཔི པརིཝུཏྠདིཝསཱཔི སབྦེ མཀྑིཏཱཝ ཧོནྟཱི’’ཏི ཨིམསྶཱནནྟརཾ ‘‘སམོདྷཱནཔརིཝཱསོ ཙསྶ དཱཏབྦོ’’ཏི ཨེཝམེཏྠ ཡོཛནཱ ཀཱཏབྦཱ. ཏེནཱཧ ‘‘ཏེནེཝཱ’’ཏིཨཱདི.

སམོདྷཱནཔརིཝཱསཀཐཱཝཎྞནཱ ནིཊྛིཏཱ.

ཨགྒྷསམོདྷཱནཔརིཝཱསཀཐཱཝཎྞནཱ

༡༣༤. ‘‘ཨེཀཱཔཏྟིམཱུལཀཉྩཱ’’ཏི ཨིམིནཱ ‘‘ཨེཀཱ ཨཱཔཏྟི ཨེཀཱཧཔྤཊིཙྪནྣཱ, ཨེཀཱ ཨཱཔཏྟི དྭཱིཧཔྤཊིཙྪནྣཱ’’ཏིཨཱདིནཡཾ དསྶེཏི. ཨཔྤཊིཙྪནྣབྷཱཝཾ དསྶེཏུནྟི ཨཛཱནནཱདིནཱ པཊིཙྪནྣཱཡཔི ཨཱཔཏྟིཡཱ མཱནཏྟཱརཧཏཱཝཙནེན ཨཔྤཊིཙྪནྣབྷཱཝཾ དསྶེཏུཾ. ‘‘ཨེཀསྶ, ཨཱཝུསོ, མཱསསྶ བྷིཀྑུ མཱནཏྟཱརཧོ’’ཏི ¶ (ཙཱུལ༹ཝ. ༡༥༣) ཧི ཝུཏྟཾ. ཨེཏྠ ཨེཀསྶ ཨཛཱནནཔཊིཙྪནྣམཱསསྶ ¶ པརིཝཱསཱརཧོ ན ཧོཏི, ཀེཝལཾ ཨཱཔཏྟིཡཱ ཨཔྤཊིཙྪནྣཏྟཱ མཱནཏྟཱརཧོ ཧོཏཱིཏི ཨདྷིཔྤཱཡོ. པཱལི༹ཡཾ མཀྑདྷམྨོཏི མདྡིཏུཀཱམཏཱ. སངྒྷཱདིསེསཱནཾ པརིཝཱསདཱནཱདིསབྦཝིནིཙྪཡསྶ སམུཙྩཡཏྟཱ པནེས སམུཙྩཡཀྑནྡྷཀོཏི ཝུཏྟོཏི ཝེདིཏབྦོ.

ཨགྒྷསམོདྷཱནཔརིཝཱསཀཐཱཝཎྞནཱ ནིཊྛིཏཱ.

སམུཙྩཡཀྑནྡྷཀཝཎྞནཱནཡོ ནིཊྛིཏོ.

༤. སམཐཀྑནྡྷཀོ

སཏིཝིནཡཀཐཱདིཝཎྞནཱ

༡༩༥. སམཐཀྑནྡྷཀེ ¶ ¶ ཁཱིཎཱསཝསྶ ཝིཔུལསཏིཾ ནིསྶཱཡ དཱཏབྦོ ཝིནཡོ ཙོདནཱདིཨསཱརུཔྤཱནཾ ཝིནཡནུཔཱཡོ སཏིཝིནཡོ.

༡༩༦. ཙིཏྟཝིཔརིཡཱསཀཏོཏི ཀཏཙིཏྟཝིཔརིཡཱསོ. གགྒཾ བྷིཀྑུཾ…པེ… ཙོདེནྟཱིཏི ཨེཏྠ པན ཨུམྨཏྟཀསྶ ཨིདཾ ཨུམྨཏྟཀཾ, ཨཛ྄ཛྷཱཙིཎྞཾ. ཏདེཝ ཙིཏྟཝིཔརིཡཱསེན ཀཏནྟི ཙིཏྟཝིཔརིཡཱསཀཏཾ. ཏེན ཨུམྨཏྟཀེན ཙིཏྟཝིཔརིཡཱསཀཏེན ཨཛ྄ཛྷཱཙིཎྞེན ཨནཱཙཱརེན ཨཱཔནྣཱཡ ཨཱཔཏྟིཡཱ གགྒཾ བྷིཀྑུཾ ཙོདེནྟཱིཏི ཨེཝམཏྠོ དཊྛབྦོ. པཋམཾ མཱུལ༹ྷོ ཧུཏྭཱ པཙྪཱ ཨམཱུལ༹ྷབྷཱཝཾ ཨུཔགཏསྶ དཱཏབྦོ ཝིནཡོ ཨམཱུལ༹ྷཝིནཡོ.

༢༠༢. དྷམྨཝཱདཱིནཾ ཡེབྷུཡྻབྷཱཝསམྤཱདིཀཱ ཀིརིཡཱ ཡེབྷུཡྻསིཀཱཏི ཨིམསྨིཾ ཨཏྠེ ས-ཀཱརཱགམསཧིཏོ ཨིཀ-པཙྩཡནྟོཡཾ སདྡོཏི དསྶེཏུཾ ཨཱཧ ‘‘ཡསྶཱ’’ཏིཨཱདི. ཏཏྠ ཡསྶཱ ཀིརིཡཱཡཱཏི གཱུལ༹ྷཀཝིཝཊྚཀཱདིནཱ སལཱཀགྒཱཧཱཔཀཀིརིཡཱཡ. ཡེབྷུཡྻབྷཱཝཾ ནིསྶིཏསམཐཀིརིཡཱ ཡེབྷུཡྻསིཀཱཏི ཨེཝཾ ཡེབྷུཡྻསིཀཱསདྡསྶ ཨཏྠོ གཧེཏབྦོ. ཨེཝཉྷི ཨཡཾ ཨདྷིཀརཎསམཐོ ནཱམ ཧོཏི. ཡཐཱཝུཏྟསལཱཀགྒཱཧེན ཧི དྷམྨཝཱདཱིནཾ ཡེབྷུཡྻབྷཱཝེ སིདྡྷེ པཙྪཱ ཏཾ ཡེབྷུཡྻབྷཱཝཾ ནིསྶཱཡེཝ ཨདྷིཀརཎཝཱུཔསམོ ཧོཏི, ན དྷམྨཝཱདཱིནཾ བཧུཏརབྷཱཝསཱདྷཀཀིརིཡཱམཏྟེན.

༢༠༧. ‘‘སེསམེཏྠ ཏཛྫནཱིཡཱདཱིསུ ཝུཏྟནཡམེཝཱ’’ཏི ཨེཏེན ཏཛྫནཱིཡཱདིསཏྟཀམྨཱནི ཝིཡ ཨིདམྤི ཏསྶཔཱཔིཡསིཀཱཀམྨཾ ཨསུཙིབྷཱཝཱདིདོསཡུཏྟསྶ, སངྒྷསྶ ཙ ཝིནིཙྪཡེ ཨཏིཊྛམཱནསྶ ཀཏྟབྦཾ ཝིསུཾ ཨེཀཾ ནིགྒཧཀམྨནྟི དསྶེཏི. ཨེཏསྨིཉྷི ནིགྒཧཀམྨེ ཀཏེ སོ པུགྒལོ ‘‘ཨཧཾ ¶ སུདྡྷོ’’ཏི ཨཏྟནོ སུདྡྷིཡཱ སཱདྷནཏྠཾ སངྒྷམཛ྄ཛྷཾ ཨོཏརིཏུཾ, སངྒྷོ ཙསྶ ཝིནིཙྪཡཾ དཱཏུཾ ན ལབྷཏི, ཏཾ ཀམྨཀརཎམཏྟེནེཝ ཙ ཏཾ ཨདྷིཀརཎཾ ཝཱུཔསནྟཾ ཧོཏི.

ཀཐཾ པནེཏཾ ཀམྨཾ པཊིཔྤསྶམྦྷཏཱིཏི? ཀེཙི པནེཏྠ ‘‘སོ ཏཐཱ ནིགྒཧིཏོ ནིགྒཧིཏོཝ ཧོཏི, ཨོསཱརཎཾ ན ལབྷཏི. ཏེནེཝ པཱལི༹ཡཾ ¶ ཨོསཱརཎཱ ན ཝུཏྟཱ’’ཏི ཝདནྟི. ཨཉྙེ པན ‘‘པཱལི༹ཡཾ ན ཨུཔསམྤཱདེཏབྦནྟིཨཱདིནཱ སམྨཱཝཏྟནསྶ ཝུཏྟཏྟཱ སམྨཱཝཏྟིཏྭཱ ལཛྫིདྷམྨེ ཨོཀྐནྟསྶ ཨོསཱརཎཱ ཨཝུཏྟཱཔི ཏཛྫནཱིཡཱདཱིསུ ཝིཡ ནཡཏོ ཀམྨཝཱཙཾ ཡོཛེཏྭཱ ཨོསཱརཎཱ ཀཱཏབྦཱ ཨེཝཱ’’ཏི ཝདནྟི, ཨིདཾ ཡུཏྟཾ. ཏེནེཝ ཨཊྛཀཐཱཡཾ ཝཀྑཏི ‘‘སཙེ སཱིལཝཱ བྷཝིསྶཏི, ཝཏྟཾ པརིཔཱུརེཏྭཱ པཊིཔྤསྶདྡྷིཾ ལབྷིསྶཏི. ནོ ཙེ, ཏཐཱནཱསིཏཀོཝ བྷཝིསྶཏཱི’’ཏི (ཙཱུལ༹ཝ. ཨཊྛ. ༢༣༨). ཏསྶཔཱཔིཡསིཀཱཀམྨནྟི ཙ ཨལུཏྟསམཱསོཡེཝ. ཏེནཱཧ ‘‘ཨིདཾ ཧཱི’’ཏི ཨཱདི.

སཏིཝིནཡཀཐཱདིཝཎྞནཱ ནིཊྛིཏཱ.

ཨདྷིཀརཎཀཐཱཝཎྞནཱ

༢༡༥. ཝིརཱུཔཏོ ཝིཔརིཎཱམཊྛེན ཙིཏྟཾ དུཀྑཾ ཝིཔཙྩཏཱིཏི ཨཱཧ ‘‘ཙིཏྟདུཀྑཏྠཾ ཝོཧཱརོ’’ཏིཨཱདི. ཨུཔཝདནཱཏི ཙོདནཱ. ཏཏྠེཝཱཏི ཨནུཝདནེ.

ཨཱདིཏོ པཊྛཱཡ ཙ ཏསྶ ཏསྶ ཀམྨསྶ ཝིཉྙཱཏཏྟཱཏི ཝིཏྠཱརཏོ ཨཱགཏཀམྨཝགྒསྶ ཨཱདིཏོ པཊྛཱཡ ཝཎྞནཱམུཁེན ཝིཉྙཱཏཏྟཱ ཝིནིཙྪཡོ བྷཝིསྶཏཱིཏི ཡོཛནཱ.

༢༡༦. པཱལི༹ཡཾ ཨཛ྄ཛྷཏྟཾ ཝཱཏི ཨཏྟནི ཝཱ ཨཏྟནོ པརིསཱཡ ཝཱ. བཧིདྡྷཱ ཝཱཏི པརསྨིཾ ཝཱ པརསྶ པརིསཱཡ ཝཱ. ཨནཝསྶཝཱཡཱཏི ཨནུཔྤཱདཱཡ.

༢༢༠. ‘‘ཝིཝཱདཱདྷིཀརཎཾ ཀུསལཾ ཨཀུསལཾ ཨབྱཱཀཏ’’ནྟི ཨིདཾ པུཙྪཱཝཙནཾ. ཝིཝཱདཱདྷིཀརཎཾ སིཡཱ ཀུསལནྟིཨཱདི ཝིསཛྫནཾ. ཨེས ནཡོ སེསེསུཔི.

༢༢༢. སམྨུཏིསབྷཱཝཱཡཔི ཨཱཔཏྟིཡཱ ཀཱརཎཱུཔཙཱརེན ཨཀུསལཱབྱཱཀཏབྷཱཝེན ཝུཙྩམཱནེ ཀུསལསྶཱཔི ཨཱཔཏྟིཀཱརཎཏྟཱ ཏདུཔཙཱརེན ‘‘ཨཱཔཏྟཱདྷིཀརཎཾ སིཡཱ ཀུསལ’’ནྟི ཝཏྟབྦཾ བྷཝེཡྻ ¶ , ཏཐཱ ¶ ཨཝཏྭཱ ‘‘ནཏྠི ཨཱཔཏྟཱདྷིཀརཎཾ ཀུསལ’’ནྟི ཨེཝཾཝཙནསྶ ཀཱརཎཾ དསྶེཏུཾ ‘‘ཨེཏྠ སནྡྷཱཡབྷཱསིཏཝསེན ཨཏྠོ ཝེདིཏབྦོ’’ཏི ཝུཏྟཾ. ཨེཏྠ ཙཱཡམདྷིཔྤཱཡོ – ཡདི ཧི ཨཱཔཏྟི ནཱམ པརམཏྠདྷམྨསབྷཱཝཱ བྷཝེཡྻ, ཏདཱ ‘‘ཨཱཔཏྟཱདྷིཀརཎཾ སིཡཱ ཨཀུསལ’’ནྟིཨཱདིཝཙནཾ ཡུཛྫེཡྻ. ཡསྨཱ དུཊྛདོསསིཀྑཱཔདཊྛཀཐཱདཱིསུ དསྶིཏདོསཔྤསངྒཏོ པརམཏྠསབྷཨཱཝཏཱ ན ཡུཏྟཱ, ཨེཀནྟསམྨུཏིསབྷཱཝཱ ཨེཝ སཱ ཧོཏི, ཏསྨཱ ‘‘སིཡཱ ཨཀུསལཾ སིཡཱ ཨབྱཱཀཏ’’ནྟིཔི ནིཔྤརིཡཱཡཏོ ན ཝཏྟབྦཱ. ཡདི པན ཨཀུསལཨབྱཱཀཏདྷམྨསམུཊྛིཏཏྟམེཝ ཨུཔཱདཱཡ པརིཡཱཡཏོ ‘‘སིཡཱ ཨཀུསལཾ སིཡཱ ཨབྱཱཀཏ’’ནྟི ཝུཏྟཾ. ཏདཱ ཀུསལདྷམྨསམཨུཊྛིཏཏྟམྤི ཨུཔཱདཱཡ པརིཡཱཡཏོ ‘‘ཨཱཔཏྟཱདྷིཀརཎཾ སིཡཱ ཀུསལ’’ནྟིཔི ཝཏྟབྦཾ བྷཝེཡྻ. ཡཏོ ཙེཏཾ ཝཙནཾ ཨཱཔཏྟིཡཱ ཨཀུསལཱབྱཱཀཏཱུཔཙཱརཱརཧཏྟསྶ ཀུསལཱུཔཙཱརཱནཱརཧཏྟསྶ ཝིསུཾ ཀཱརཎསབྦྷཱཝཾ སནྡྷཱཡ བྷཱསིཏཾ, ཏསྨཱ ཡཾ ཏཾ ཀཱརཎཝིསེསཾ སནྡྷཱཡ ཨིདཾ བྷཱསིཏཾ, ཏསྶ ཝསེནེཝེཏྠ ཨཏྠོ ཝེདིཏབྦོ.

ཨིདཱནི པན ཡོ ཨངྒཔྤཧོནཀཙིཏྟམེཝ སནྡྷཱཡ ཨཱཔཏྟིཡཱ ཨཀུསལཱདིབྷཱཝོ ཝུཏྟོ, ནཱཉྙཾ ཝིསེསཀཱརཎཾ སནྡྷཱཡཱཏི གཎྷེཡྻ, ཏསྶ གཱཧེ དོསཾ དསྶེནྟོ ‘‘ཡསྨིཾ ཧཱི’’ཏིཨཱདིམཱཧ. ཏཏྠ པཐཝཱིཁཎནཱདིཀེཏི པཐཝཱིཁཎནཱདིནིམིཏྟེ པཎྞཏྟིཝཛྫེ. ཨཱཔཏྟཱདྷིཀརཎེ ཀུསལཙིཏྟཾ ཨངྒནྟི པཎྞཏྟིཾ ཨཛཱནིཏྭཱ ཀུསལཙིཏྟེན ཙེཏིཡངྒཎཱདཱིསུ བྷཱུམིསོདྷནཱདིཝསེན པཐཝཱིབྷཱུཏགཱམཝིཀོཔནཱདིཀཱལེ ཀུསལཙིཏྟཾ ཀཱརཎཾ ཧོཏི. ཏསྨིཾ སཏཱིཏི ཏསྨིཾ ཨཱཔཏྟཱདྷིཀརཎེ ཝིཛྫམཱནེ ཀུསལཙིཏྟསམུཊྛིཏཏྟེན ཀུསལཝོཧཱརཱརཧཱཡ ཨཱཔཏྟིཡཱ ཝིཛྫམཱནཱཡཱཏི ཨདྷིཔྤཱཡོ. སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༢༢༢) པན ‘‘ཏསྨིཾ སཏཱི’’ཏི ཨིམསྶ ‘‘ཏསྨིཾ ཀུསལཙིཏྟེ ཨཱཔཏྟིབྷཱཝེན གཧིཏེ’’ཏི ཨཏྠོ ཝུཏྟོ, ཏཾ ན ཡུཛྫཏི ‘‘ཡསྨི’’ནྟི ཡ-སདྡེན པརཱམཊྛསྶེཝ ཨཱཔཏྟཱདྷིཀརཎསྶ ‘‘ཏསྨི’’ནྟི པརཱམསིཏབྦཏོ.

ན སཀྐཱ ཝཏྟུནྟི ཡདི སམྨུཏིསབྷཱཝཱཡཔི ཨཱཔཏྟིཡཱ ཨཀུསལཱདིསམུཊྛིཏཏྟེན ཨཀུསལཱདིཝོཧཱརོ ཀརཱིཡཏི, ཏདཱ ཀུསལཝོཧཱརོཔི ཀཏྟབྦོཏི ‘‘ནཏྠི ཨཱཔཏྟཱདྷིཀརཎཾ ཀུསལ’’ནྟི ན སཀྐཱ ཝཏྟུཾ, ཨཉྙཐཱ ཨཀུསལཱདིབྷཱཝོཔིསྶ པཊིཀྑིཔིཏབྦོཏི ཨདྷིཔྤཱཡོ. ཏསྨཱཏི ¶ ཡསྨཱ ཀུསལཱདཱིནཾ ཏིཎྞཾ སམཱནེཔི ཨཱཔཏྟིཡཱ ཨངྒཔྤཧོནཀཏྟེ ཀུསལཝོཧཱརོཝ ཨཱཔཏྟིཡཱ པཊིཀྑིཏྟོ, ན ཨཀུསལཱདིཝོཧཱརོ, ཏསྨཱ ནཡིདཾ ཨངྒཔྤཧོནཀཾ ཙིཏྟཾ སནྡྷཱཡ ཝུཏྟནྟི ‘‘ཨཱཔཏྟཱདྷིཀརཎཾ སིཡཱ ཨཀུསལཾ སིཡཱ ཨབྱཱཀཏཾ, ནཏྠི ཨཱཔཏྟཱདྷིཀརཎཾ ཀུསལ’’ནྟི ཨིདཾ ཨཱཔཏྟིཡཱ སམུཊྛཱཔཀཏྟེན ཨངྒཔྤཧོནཀཾ ཀཱརཎབྷཱུཏཾ ཙིཏྟམཏྟཾ སནྡྷཱཡ ན ཝུཏྟཾ ¶ , ཨཉྙཐཱ ‘‘ཨཱཔཏྟཱདྷིཀརཎཾ སིཡཱ ཀུསལ’’ནྟིཔི ཝཏྟབྦཏོཏི ཨདྷིཔྤཱཡོ. ཨེཏེན ཨཱཔཏྟིཡཱ ཨཀུསལཱདིབྷཱཝོཔི ཀེནཙི ནིམིཏྟེན པརིཡཱཡཏོཝ ཝུཏྟོ, ན པརམཏྠཏོཏི དསྶེཏི. ཡཐཱཧ ‘‘ཡཾ ཀུསལཙིཏྟེན ཨཱཔཛྫཏི, ཏཾ ཀུསལཾ, ཨིཏརེཧི ཨིཏར’’ནྟི.

ཨིདཾ པནཱཏིཨཱདཱིསུ ཨཡཾ ཨདྷིཔྤཱཡོ – ‘‘ཨཱཔཏྟཱདྷིཀརཎཾ སིཡཱ ཨཀུསལཾ སིཡཱ ཨབྱཱཀཏ’’ནྟི ཨིདཉྷི ཡཾ ཀིཉྩི ཀདཱཙི ཀཏྠཙི ཀཱརཎཾ བྷཝནྟཾ ཨནིཡཏཀཱརཎཾ སནྡྷཱཡ ཝུཏྟཾ ན ཧོཏི. ཡཾ པན སབྦསིཀྑཱཔདེསུ ཨཱཔཏྟིཡཱ ཀཱརཎཾ བྷཝིཏུམརཧཏི, ཨིདམེཝ ཀཱརཎཾ སནྡྷཱཡ ཝུཏྟཾ. ཨཀུསལཉྷི པཎྞཏྟིཾ ཉཏྭཱ ཝཱིཏིཀྐམནྟསྶ སབྦཱཔཏྟིཡཱ ཀཱརཎཾ ཧོཏི, ལོཀཝཛྫཱཔཏྟིཡཱ པན པཎྞཏྟིཾ ཨཛཱནནྟསྶཔི ཀཱརཎཾ ཧོཏི. ཀེཝལཾ པཎྞཏྟིཝཛྫཱཔཏྟཱིསུ ཀུསལཱབྱཱཀཏཙིཏྟཔཝཏྟིཀྑཎེ ཨེཝ ཨཀུསལཾ ན ཝཏྟཏི, ཏདཉྙཏྠ སཡམེཝ པཝཏྟཏི. ཨབྱཱཀཏཾ པན ཀཱཡཝཙཱིབྷཱུཏཾ ཀུསལཱཀུསལཱདཱིནཾ པཝཏྟིཀྑཎེ ནིརོདྷསམཱཔནྣསྶ སཧསེཡྻཱཔཏྟིཡནྟི སབྦཱཔཏྟིཡཱ ཨངྒམེཝ ཧོཏི ཚནྣཾ ཨཱཔཏྟིསམུཊྛཱནཱནཾ ཀཱཡཝཱཙངྒཝིརཧིཏཏྟཱབྷཱཝཱ. ཏསྨཱ ཨིམེསཾ ཨཀུསལཱབྱཱཀཏཱནཾ སབྦཱཔཏྟིམཱུལཀཏྟམེཝ སནྡྷཱཡ ཨིདཾ ཨཱཔཏྟིཡཱ ཨཀུསལཏྟཾ, ཨབྱཱཀཏཏྟཉྩ ཝུཏྟཾ. ཡཏྠ པན པཐཝཱིཁཎནཱདཱིསུ ཀུསལམྤི ཨཱཔཏྟིཡཱ ཀཱརཎཾ ཧོཏི, ཏཏྠཱཔི ཨཱཔཏྟིཡཱ ཏདུཔཙཱརེན ཀུསལཏྟཝོཧཱརོ ཨཡུཏྟོ སཱཝཛྫཱནཝཛྫཱནཾ ཨེཀཏྟཝོཧཱརསྶ ཝིརུདྡྷཏྟཱ. ཡདགྒེན ཨཉྙམཉྙཾ ཝིརུདྡྷཱ, ཏདགྒེན ཀཱརཎཀཱརིཡཝོཧཱརོཔི ནེསཾ ཨཡུཏྟོ. ཏསྨཱ ཏཏྠ ཝིཛྫམཱནམྤི ཀུསལཾ ཨབྦོཧཱརིཀཾ, ཀཱཡཝཙཱིདྭཱརམེཝ ཨཱཝེཎིཀཾ ཀཱརཎནྟི.

ཏཏྠ ཨེཀནྟཏོ ཨཀུསལམེཝཱཏི ཨཀུསལཙིཏྟེན སམུཊྛཧནཏོ ཀཱརཎཱུཔཙཱརཏོ ཨེཝཾ ཝུཏྟཾ. ཏཏྠཱཏི ལོཀཝཛྫེ. ཝིཀཔྤོ ནཏྠཱིཏི སིཡཱ-སདྡསྶ ཝིཀཔྤནཏྠཏཾ དསྶེཏི. ཨཀུསལཾ ཧོཏཱིཏི ཨཀུསལསམུཊྛིཏཱཡ ཀཱརཎཱུཔཙཱརེན ཨཀུསལཾ ཧོཏི. སཧསེཡྻཱདིཝསེན ཨཱཔཛྫནཏོ ¶ ཨབྱཱཀཏཾ ཧོཏཱིཏི ཨིཏྠིཡཱདཱིཧི སཧ པིཊྛིཔསཱརཎཝསཔྤཝཏྟཀཱཡདྭཱརསངྑཱཏརཱུཔཱབྱཱཀཏཝསེནེཝ ཨཱཔཛྫིཏབྦཏོ ཀཱརཎཱུཔཙཱརེནེཝ ཨཱཔཏྟི ཨབྱཱཀཏཾ ཧོཏི. ཏཏྠཱཏི ཏསྨིཾ པཎྞཏྟིཝཛྫཱཔཏྟཱདྷིཀརཎེ. སཉྩིཙྩཱསཉྩིཙྩཝསེནཱཏི པཎྞཏྟིཾ ཉཏྭཱ, ཨཉྙཏྭཱ ཙ ཨཱཔཛྫནཝསེན ཨིམཾ ཝིཀཔྤབྷཱཝཾ སནྡྷཱཡ ཨཀུསལཏྟཨབྱཱཀཏཏྟསངྑཱཏཾ ཡཐཱཝུཏྟཾ ཨིམཾ ཝིཀཔྤསབྷཱཝཾ སནྡྷཱཡ ཨིདཾ ཝཙནཾ ཝུཏྟཾ.

ཡདི ཨེཝཾ ཨསཉྩིཙྩཱཔཛྫནཔཀྑེ ཀུསལེནཱཔི ཨཱཔཛྫནཏོ ཏམྤི ཝིཀཔྤཾ སནྡྷཱཡ ‘‘ཨཱཔཏྟཱདྷིཀརཎཾ སིཡཱ ཀུསལ’’ནྟིཔི ཀསྨཱ ན ཝུཏྟནྟི ཨཱཧ ‘‘སཙེ པནཱ’’ཏིཨཱདི. ‘‘ཨཙིཏྟཀཱན’’ནྟི ¶ ཝུཏྟམེཝཏྠཾ སམུཊྛཱནཝསེན ཝིབྷཱཝེཏུཾ ‘‘ཨེལ༹ཀལོམཔདསོདྷམྨཱདིསམུཊྛཱནཱནམྤཱི’’ཏི ཝུཏྟཾ. ཨཙིཏྟཀསམུཊྛཱནཱནཾ ‘‘ཀུསལཙིཏྟཾ ཨཱཔཛྫེཡྻཱ’’ཏི ཨེཏེན སཱཝཛྫབྷཱུཏཱཡ ཨཱཔཏྟིཡཱ ཀཱརཎཱུཔཙཱརེནཱཔི ཨནཝཛྫབྷཱུཏཀུསལཝོཧཱརོ ཨཡུཏྟོཏི དསྶེཏི. ‘‘ན ཙ ཏཏྠཱ’’ཏིཨཱདིནཱ ཀུསལསྶ ཨཱཔཏྟིཡཱ ཀཱརཎཏྟཾ ཝིཛྫམཱནམྤི ཏཐཱ ཝོཧརིཏུཾ ཨཡུཏྟནྟི པཊིཀྑིཔིཏྭཱ ཀཱཡཝཱཙཱསངྑཱཏཾ ཨབྱཱཀཏསྶེཝ ཀཱརཎཏྟཾ དསྶེཏི. ཏཏྠ ཙལིཏཔྤཝཏྟཱནནྟི ཙལིཏཱནཾ, པཝཏྟཱནཉྩ. ཙལིཏོ ཧི ཀཱཡོ, པཝཏྟཱ ཝཱཙཱ. ཨེཏྠ ཙ ཀཱཡཝཱཙཱནམཉྙཏརམེཝ ཨངྒཾ. ཏཉྩ…པེ… ཨབྱཱཀཏནྟི ཨེཝཾ ཨབྱཱཀཏསྶ ཨཱཔཏྟིཀཱརཎབྷཱཝེནེཝ ཝུཏྟཏྟཱ. ‘‘ཨཱཔཏྟཱདྷིཀརཎཾ སིཡཱ ཨཀུསལཾ སིཡཱ ཨབྱཱཀཏ’’ནྟི ཨིདཾ ཀཱརཎཱུཔཙཱརེན པརིཡཱཡཏོ ཝུཏྟཾ, ན ནིཔྤརིཡཱཡཏོཏི སིཛ྄ཛྷཏི.

ཡཾ པན སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝ. ༣.༢༢༢) ཨཱཔཏྟིཡཱ ནིཔྤརིཡཱཡཏོཝ ཨཀུསལཱདིསབྷཱཝཏཾ སམཏྠེཏུཾ བཧུཾ པཔཉྩིཏཾ, ཏཾ ན སཱརཏོ པཙྩེཏབྦཾ དུཊྛདོསསིཀྑཱཔདཊྛཀཐཱཡམེཝ པཊིཀྑིཏྟཏྟཱ. ཏེནེཝེཏྠཱཔི ‘‘ཡཾ ཙིཏྟཾ ཨཱཔཏྟིཡཱ ཨངྒཾ ཧོཏཱི’’ཏིཨཱདིནཱ ཨཀུསལཙིཏྟསྶཱཔི ཨཱཔཏྟིཡཱ ཀཱརཎཏྟེན བྷིནྣཏཱཝ དསྶིཏཱ. ཡཾ པནེཏྠ ཝཏྟབྦཾ, ཏཾ ཧེཊྛཱ དསྶིཏམེཝཱཏི ཨིདྷ ན ཝིཏྠཱརཡིམྷ. ཨེཝཾ ཝཱིཏིཀྐམཏོ ཡོ ཝཱིཏིཀྐམོཏི ཨེཏྠ ཨཀུསལཙིཏྟེན ཉཏྭཱ ཝཱིཏིཀྐམནྟསྶ ཀཱཡཝཙཱིཝཱིཏིཀྐམསམུཊྛིཏཱ ཨཱཔཏྟིཝཱིཏིཀྐམོཏི ཝུཏྟོ. ཨེས ནཡོ ཨབྱཱཀཏཝཱརེཔི.

ཨདྷིཀརཎཀཐཱཝཎྞནཱ ནིཊྛིཏཱ.

ཨདྷིཀརཎཝཱུཔསམནསམཐཀཐཱདིཝཎྞནཱ

༢༢༨. པཱལི༹ཡཾ ¶ ཝིཝཱདཱདྷིཀརཎཾ ཨེཀཾ སམཐཾ ཨནཱགམྨཱཏིཨཱདི པུཙྪཱ. སིཡཱཏིཨཱདི ཝིསྶཛྫནཾ. སིཡཱཏིསྶ ཝཙནཱིཡནྟི ཨེཏེནེཝ ཝཱུཔསམཾ སིཡཱཏི ཝཏྟབྦཾ བྷཝེཡྻཱཏི ཨཏྠོ. སམྨུཁཱཝིནཡསྨིནྟི སམྨུཁཱཝིནཡཏྟསྨིནྟི བྷཱཝཔྤདྷཱནོ ནིདྡེསོ དཊྛབྦོ. ཨེཝཾ སབྦཝཱརེསུ. ‘‘ཀཱརཀོ ཨུཀྐོཊེཏཱི’’ཏི ཨིདཾ ཨུཔལཀྑཎམཏྟཾ, ཡསྶ ཀསྶཙི ཨུཀྐོཊེནྟསྶ པཱཙིཏྟིཡམེཝ. ཨུབྦཱཧིཀཱཡ ཁཱིཡནཀེ པཱཙིཏྟིཡཾ ན ཝུཏྟཾ ཏཏྠ ཚནྡདཱནསྶ ནཏྠིཏཱཡ.

༢༣༥. ཝཎྞཱཝཎྞཱཡོ ཀཏྭཱཏི ཁུདྡཀམཧནྟེཧི སཉྙཱཎེཧི ཡུཏྟཱཡོ ཀཏྭཱ. ཏེནཱཧ ‘‘ནིམིཏྟསཉྙཾ ཨཱརོཔེཏྭཱ’’ཏི.

༢༤༢. ཀིཙྩཱདྷིཀརཎཾ ¶ …པེ… སམྨཏཱིཏི ཨེཏྠ སམྨུཁཱཝིནཡེན ཨཔལོཀནཱདིཀམྨཾ སམྤཛྫཏཱིཏི ཨཏྠོ དཊྛབྦོ.

ཨདྷིཀརཎཝཱུཔསམནསམཐཀཐཱདིཝཎྞནཱ ནིཊྛིཏཱ.

སམཐཀྑནྡྷཀཝཎྞནཱནཡོ ནིཊྛིཏོ.

༥. ཁུདྡཀཝཏྠུཀྑནྡྷཀོ

ཁུདྡཀཝཏྠུཀཐཱཝཎྞནཱ

༢༤༣. ཁུདྡཀཝཏྠུཀྑནྡྷཀེ ¶ ¶ ཨཊྛཔདཱཀཱརེནཱཏི ཛཱུཏཕལཀེ ཨཊྛགབྦྷརཱཛིཨཱཀཱརེན. མལླཀམཱུལསཎྛཱནེནཱཏི ཁེལ༹མལླཀམཱུལསཎྛཱནེན. ཨིདཉྩ ཝཊྚཱདྷཱརཀཾ སནྡྷཱཡ ཝུཏྟཾ, ཀཎྚཀེ ཨུཊྛཱཔེཏྭཱ ཀཏཝཊྚཀཔཱལསྶེཏཾ ཨདྷིཝཙནཾ.

༢༤༤. པུཐུཔཱཎིཀནྟི མུཊྛིཾ ཨཀཏྭཱ ཝིཀསིཏཧཏྠཏལེཧི པིཊྛིཔརིཀམྨཾ ཝུཙྩཏི. ཨེཏམེཝ སནྡྷཱཡ ‘‘ཧཏྠཔརིཀམྨ’’ནྟི ཝུཏྟཾ.

༢༤༥. མུཏྟོལམྦཀཱདཱིནནྟི ཨཱདི-སདྡེན ཀུཎྜལཱདིཾ སངྒཎྷཱཏི. པལམྦཀསུཏྟནྟི བྲཱཧྨཎཱནཾ ཡཉྙོཔཙིཏསུཏྟཱདིཨཱཀཱརཾ ཝུཙྩཏི. ཝལཡནྟི ཧཏྠཔཱདཝལཡཾ.

༢༤༦. དྭངྒུལེཏི ཨུཔཡོགབཧུཝཙནཾ, དྭངྒུལཔྤམཱཎཾ ཨཏིཀྐཱམེཏུཾ ན ཝཊྚཏཱིཏི ཨཏྠོ. ཨེཏྠ ཙ དུམཱསསྶ ཝཱ དྭངྒུལསྶ ཝཱ ཨཏིཀྐནྟབྷཱཝཾ ཨཛཱནནྟསྶཱཔི ཀེསམསྶུགཎནཱཡ ཨཙིཏྟཀཱཔཏྟིཡོ ཧོནྟཱིཏི ཝདནྟི.

ཀོཙྪེནཱཏི ཨུསཱིརཏིཎཱདཱིནི བནྡྷིཏྭཱ སམཾ ཚིནྡིཏྭཱ གཧིཏཀོཙྪེན. ཙིཀྐལེནཱཏི སིལེསཡུཏྟཏེལེན. ཨུཎྷཱབྷིཏཏྟརཛསིརཱནམྤཱིཏི ཨུཎྷཱབྷིཏཏྟཱནཾ རཛོཀིཎྞསིརཱནཾ. ཨདྡཧཏྠེནཱཏི ཨལླཧཏྠེན.

༢༤༨-༩. སཱདྷུགཱིཏནྟི ཨནིཙྩཏཱདིཔཊིསཉྙུཏྟཾ གཱིཏཾ. ཙཏུརསྶེན ཝཏྟེནཱཏི པརིཔུཎྞེན ཨུཙྩཱརཎཝཏྟེན. ཏརངྒཝཏྟཱདཱིནཾ སབྦེསམྤི སཱམཉྙལཀྑཎཾ དསྶེཏུཾ ‘‘སབྦེསཾ…པེ… ལཀྑཎ’’ནྟི ¶ ཝུཏྟཾ. ཡཏྟཀཱཧི མཏྟཱཧི ཨཀྑརཾ པརིཔུཎྞཾ ཧོཏི, ཏཏོཔི ཨདྷིཀམཏྟཱཡུཏྟཾ ཀཏྭཱ ཀཐནཾ ཝིཀཱརཀཐནཾ ནཱམ, ཏཐཱ ཨཀཏྭཱ ཀཐནམེཝ ལཀྑཎནྟི ཨཏྠོ. བཱཧིརལོམིནྟི བྷཱཝནཔུཾསཀནིདྡེསོ, ཡཐཱ བཧིདྡྷཱ ལོམཱནི དིསྶནྟི, ཨེཝཾ དྷཱརེནྟསྶ དུཀྐཊནྟི ཨཏྠོ.

༢༥༠. པཱལི༹ཡཾ ¶ ཏརུཎཉྙེཝ ཨམྦནྟི ཏརུཎཾ ཨསཉྫཱཏབཱིཛཾ ཨེཝ ཨམྦཕལཾ. པཱཏཱཔེཏྭཱཏི ཚིནྡཱཔེཏྭཱཝ. ‘‘མཏྟཱཝཎྞིཏཱ’’ཏི ཨིདཾ ‘‘པརེ ནིནྡནྟཱི’’ཏི སཱསནཧིཏེསིཏཱཡ ཝུཏྟཾ. ན པརིཡཱཔུཎིཾསཱུཏི ནཱསིཀྑིཾསུ.

༢༥༡. ཙཏྟཱརི ཨཧིརཱཛཀུལཱནཱིཏི སབྦེསཾ ཨཧིབྷེདཱནཾ ཙཏཱུསུ ཨེཝ སངྒཧཏོ ཝུཏྟཾ. ཨཏྟཔརིཏྟཾ ཀཱཏུནྟི ཨཏྟནོ པརིཏྟཱཎཾ ཀཱཏུཾ.

ཝིརཱུཔཀྑེཧི མེ མེཏྟནྟི ཝིརཱུཔཀྑཛཱཏིཀེཧི ནཱགེཧི སཧ མཡ྄ཧཾ མིཏྟབྷཱཝོ ཧོཏུ, མེཏྟཱ ཧོཏཱུཏི ཨཏྠོ, ཏེ སུཁིཏཱ ནིདྡུཀྑཱ ཨཝེརཱ ཧོནྟཱུཏི ཨདྷིཔྤཱཡོ. ཨེཝཉྷི མེཏྟཱཕརཎཾ ཧོཏི. སེསེསུཔི ཨེསེཝ ནཡོ. ཨཔཱདཀེཧཱིཏི ཨཧིཀུལེཧི སཧ སབྦསཏྟེསུ ཨོདྷིསོ མེཏྟཱཕརཎདསྶནཾ. མཱ མཾ ཨཔཱདཀོ ཧིཾསཱིཏི ཏཱཡ མེཏྟཱཡ ཨཏྟརཀྑཱཝིདྷཱནདསྶནཾ.

སབྦེ སཏྟཱཏིཨཱདི ཨཏྟཱནཾ ཨུཔམཾ ཀཏྭཱ སབྦསཏྟེསུ ཨནོདྷིསོ མེཏྟཱཕརཎདསྶནཾ. ཏཏྠ མཱ ཀཉྩི པཱཔམཱགམཱཏི ཀཉྩི སཏྟཾ ལཱམཀཾ དུཀྑཧེཏུ, དུཀྑཉྩ མཱ ཨཱགཙྪཏུ.

ཨེཝཾ མེཏྟཱཡ ཨཏྟགུཏྟིཾ དསྶེཏྭཱ ཨིདཱནི རཏནཏྟཡཱནུསྶརཎེན དསྶེཏུཾ ‘‘ཨཔྤམཱཎོ’’ཏིཨཱདི ཝུཏྟཾ. ཏཏྠ པམཱཎཀརདྷམྨཱ ཨཀུསལཱ, ཏབྦིཔཱཀཱ ཙ པམཱཎཱ, ཏཔྤཊིཔཀྑཱ སཱིལཱདཡོ གུཎཱ, ཏབྦིཔཱཀཱ ཙ ལོཀིཡལོཀུཏྟརཕལཱནི ཨཔྤམཱཎཱ, ཏེ ཨསྶ ཨཏྠཱིཏི ཨཔྤམཱཎོ, ཨཔྤམཱཎཱ ཝཱ ཨཔརིམེཡྻགུཎཱ ཨསྶཱཏིཔི ཨཔྤམཱཎོ. པམཱཎཝནྟཱནཱིཏི ཡཐཱཝུཏྟཔམཱཎཀརདྷམྨཡུཏྟཱནི. ཨཧིཝིཙྪིཀཱཏི སརཱིསཔཱནཉྙེཝ པབྷེདདསྶནཾ. ཨུཎྞནཱབྷཱིཏི ལོམསནཱབྷིཀོ མཀྐཊོ. སརབཱུཏི གྷརགོལི༹ཀཱ.

པཊིཀྐམནྟཱུཏི ཨཔགཙྪནྟུ, མཱ མཾ ཝིཧེསཡིཾསཱུཏི ཨཏྠོ. སོཧཾ ནམོཏི ཨེཏྠ ‘‘ཀརོམཱི’’ཏི པཱཋསེསོ. ཡསྨཱ མཡཱ མེཏྟཱདཱིཧི ཏུམྷཱཀཉྩ མཡ྄ཧཉྩ རཀྑཱ ཀཏཱ, ཡསྨཱ ཙ སོཧཾ བྷགཝཏོ ནམོ ཀརོམི, ཝིཔསྶཱིཨཱདཱིནཾ སཏྟནྣམྤི ནམོ ཀརོམི, ཏསྨཱ པཊིཀྐམནྟུ བྷཱུཏཱནཱིཏི ཡོཛནཱ.

ཨཉྙམྷཱིཏི ¶ ཀཱམརཱགེ ཨསུབྷམནསིཀཱརཱདིནཱ ཚེཏབྦེཏི ཨཏྠོ. ཨངྒཛཱཏནྟི བཱིཛཝིརཧིཏཾ པུརིསནིམིཏྟཾ. བཱིཛེ ཧི ཚིནྣེ ཨོཔཀྐམིཀཔཎྜཀོ ནཱམ ཨབྷབྦོ ཧོཏཱིཏི ཝདནྟི. ཨེཀེ པན ‘‘བཱིཛསྶཱཔི ཚེདནཀྑཎེ ¶ དུཀྐཊཱཔཏྟི ཨེཝ ཀམེན པུརིསིནྡྲིཡཱདིཀེ ཨནྟརཧིཏེ པཎྜཀོ ནཱམ ཨབྷབྦོ ཧོཏི, ཏདཱ ལིངྒནཱསནཱཡ ནཱསེཏབྦོ’’ཏི ཝདནྟི. ཏཱདིསཾ ཝཱ དུཀྑཾ ཨུཔྤཱདེནྟསྶཱཏི མུཊྛིཔྤཧཱརཱདཱིཧི ཨཏྟནོ དུཀྑཾ ཨུཔྤཱདེནྟསྶ.

༢༥༢. པཱལི༹ཡཾ ཏུཡ྄ཧེསོ པཏྟོཏི ‘‘ཡོ ཙ ཨརཧཱ ཙེཝ ཨིདྡྷིམཱ ཙ, ཏསྶ དིནྣམེཝཱ’’ཏི སེཊྛིནཱ ཝུཏྟཾ, ཏཾ སནྡྷཱཡ ཝདཏི. ཏཾ པཏྟཾ གཧེཏྭཱ ཏིཀྑཏྟུཾ རཱཛགཧཾ ཨནུཔརིཡཱཡཱིཏི ཨེཏྠ ཝེལུ༹པརམྤརཱཡ བདྡྷཔཏྟསྶ ཨུཔརིབྷཱགེ ཨཱཀཱསེ ནགརཾ ཏིཀྑཏྟུཾ ཨནུཔརིཡཱཡིཏྭཱ ཋིཏབྷཱཝཾ སནྡྷཱཡ ‘‘པཏྟཾ གཧེཏྭཱ’’ཏི ཝུཏྟཾ, ན པན ཐེརོ ཧཏྠེན པཏྟཾ སཡམེཝ ཨགྒཧེསི. ཀེཙི པན ཝདནྟི ‘‘ཨིདྡྷིབལེན ཏཾ པཏྟཾ ཝེལུ༹པརམྤརཏོ མུཉྩིཏྭཱ ཐེརཾ ཨནུབནྡྷམཱནོ ཨཊྛཱསི, སོ ཙ ཨནེན ཧཏྠེན གཧིཏོ ཝིཡ ཨཧོསཱི’’ཏི. ཏཐཱ ཋིཏམེཝ པན སནྡྷཱཡ ‘‘བྷཱརདྭཱཛསྶ ཧཏྠཏོ པཏྟཾ གཧེཏྭཱ’’ཏི ཝུཏྟཾ. ཏེ ཙ མནུསྶཱ…པེ… ཨནུབནྡྷིཾསཱུཏི ཡེ ཙ མནུསྶཱ པཋམཾ པཱཊིཧཱརིཡཾ ནཱདྡསཾསུ, ཏེ ཨམྷཱཀམྤི པཱཊིཧཱརིཡཾ དསྶེཧཱིཏི ཐེརམནུབནྡྷིཾསུ. ཐེརོ ཙ སཱིཧབྱགྒྷཱདིརཱུཔཾ གཧེཏྭཱ ཝིཀུབྦནིདྡྷིཾ དསྶེཏི, ཏེ ཙ ཨཙྪརིཡབྦྷུཏཛཱཏཱ ཨུཙྩཱསདྡཱ མཧཱསདྡཱ ཨཧེསུཾ. ཏེནཱཧ ‘‘ཀིཾ ནུ ཁོ སོ, ཨཱནནྡ, ཨུཙྩཱསདྡོ མཧཱསདྡོ’’ཏི. ཨིདྡྷིཔཱཊིཧཱརིཡཾ ན དསྶེཏབྦནྟི ཨེཏྠ ‘‘ཡོ པཀཏིཝཎྞཾ ཝིཛཧིཏྭཱ ཀུམཱརཝཎྞཾ ཝཱ དསྶེཏི, ནཱགཝཎྞཾ ཝཱ…པེ… ཝིཝིདྷམྤི སེནཱབྱཱུཧཾ དསྶེཏཱི’’ཏི (པཊི. མ. ༣.༡༣) ཨེཝམཱགཏཱ ཨཏྟནོ སརཱིརསྶ ཝིཀཱརཱཔཱདནཝསཔྤཝཏྟཱ ཝིཀུབྦནིདྡྷི ཨདྷིཔྤེཏཱཏི ཨཱཧ ‘‘ཨདྷིཊྛཱནིདྡྷི པན ཨཔྤཊིཀྑིཏྟཱ’’ཏི. པཀཏིཡཱ ཨེཀོ བཧུཀཾ ཨཱཝཛྫཏི, སཏཾ ཝཱ སཧསྶཾ ཝཱ སཏསཧསྶཾ ཝཱ ཨཱཝཛྫེཏྭཱ ཉཱཎེན ཨདྷིཊྛཱཏི ‘‘བཧུཀོ ཧོམཱི’’ཏི (པཊི. མ. ༣.༡༠) ཨེཝཾ དསྶིཏཱ ཨདྷིཊྛཱནཝསེན ནིཔྥནྣཱ ཨདྷིཊྛཱནིདྡྷི ནཱམ. གིཧིཝིཀཊཱནཱིཏི གིཧིསནྟཀཱནི.

༢༥༣. པཱལི༹ཡཾ ན ཨཙྪུཔིཡནྟཱིཏི ན ཕུསིཏཱནི ཧོནྟི. རཱུཔཀཱཀིཎྞཱནཱིཏི ཨིཏྠིརཱུཔཱདཱིཧི ཨཱཀིཎྞཱནི.

༢༥༤. བྷཱུམིཨཱདྷཱརཀེཏི དནྟཱདཱིཧི ཀཏེ ཝལཡཱདྷཱརཀེ. ཨེཏསྶ ཝལཡཱདྷཱརཀསྶ ཨནུཙྩཏཱཡ ཋཔིཏཱ པཏྟཱ ན པརིཔཏནྟཱིཏི ‘‘ཏཡོ པཏྟེ ¶ ཋཔེཏུཾ ཝཊྚཏཱི’’ཏི ཝུཏྟཾ. ཨནུཙྩཏཉྷི སནྡྷཱཡ ཨཡཾ ‘‘བྷཱུམིཨཱདྷཱརཀོ’’ཏི ཝུཏྟོ. དཱརུཨཱདྷཱརཀདཎྜཱདྷཱརཀེསཱུཏི ཨེཀདཱརུནཱ ¶ ཀཏཨཱདྷཱརཀེ, བཧཱུཧི དཎྜེཧི ཀཏཨཱདྷཱརཀེ ཙ. ཨེཏེ ཙ ཨུཙྩཏརཱ ཧོནྟི པཏྟེཧི སཧ པཏནསབྷཱཝཱ. ཏེན ‘‘སུསཛྫིཏེསཱུ’’ཏི ཝུཏྟཾ. བྷམཀོཊིསདིསོཏི ཡཏྠ དྷམཀརཎཱདིཾ པཝེསེཏྭཱ ལིཁནྟི, ཏསྶ བྷམཀསྶ ཀོཊིཡཱ སདིསོ. ཏཱདིསསྶ དཱརུཨཱདྷཱརཀསྶ ཨཝིཏྠིཎྞཏཱཡ ཋཔིཏོཔི པཏྟོ པཏཏཱིཏི ‘‘ཨནོཀཱསོ’’ཏི ཝུཏྟོ.

ཨཱལིནྡཀམིཌྜྷིཀཱདཱིནནྟི པམུཁམིཌྜྷིཀཱདཱིནཾ, ཨུཙྩཝཏྠུཀཱནནྟི ཨཏྠོ. བཱཧིརཔསྶེཏི པཱསཱདཱདཱིནཾ བཧིཀུཊྚེ. ཏནུཀམིཌྜྷིཀཱཡཱཏི ཝེདིཀཱཡ. སབྦཏྠ པན ཧཏྠཔྤམཱཎཏོ ཨབྦྷནྟརེ ཋཔེཏུཾ ཝཊྚཏི. ཨཱདྷཱརེ པན ཏཏོ བཧིཔི ཝཊྚཏི.

པཱལི༹ཡཾ ཨོཊྛོཏི མུཁཝཊྚི. པཏྟམཱལ༹ཀནྟི ཨུཔཙིཀཱནཾ ཨནུཊྛཧནཏྠཱཡ བྷཱུམིཏོ ཨུཙྩཏརཾ ཀཏཾ ཝེདིཀཱཀཱརམཱལ༹ཀཾ. མཧཱམུཁཀུཎྜསཎྛཱནཱཏི མཧཱམུཁཙཱཊིསཎྛཱནཱ. ལགྒེནྟསྶ དུཀྐཊནྟི ཀེཝལཾ པཏྟཾ ལགྒེནྟསྶ, ན ཐཝིཀཱཡ ལགྒེནྟསྶཱཏི ཝདནྟི. ཝཱིམཾསིཏབྦཾ. ཨཉྙེན པན བྷཎྜཀེནཱཏི ཨཉྙེན བྷཱརབནྡྷནེན བྷཎྜཀེན. ‘‘བནྡྷིཏྭཱ ཨོལམྦེཏུ’’ནྟི ཝུཏྟཏྟཱ པཏྟཏྠཝིཀཱཡ ཨཾསབདྡྷཀོ ཡཐཱ ལགྒིཏཊྛཱནཏོ ན པརིགལ༹ཏི, ཏཐཱ སབྦཐཱཔི བནྡྷིཏྭཱ ཋཔེཏུཾ ཝཊྚཏི. བནྡྷིཏྭཱཔི ཨུཔརི ཋཔེཏུཾ ན ཝཊྚཏཱིཏི ཨུཔརི ནིསཱིདནྟཱ ཨོཏྠརིཏྭཱ བྷིནྡནྟཱིཏི ཝུཏྟཾ. ཏཏྠ ཋཔེཏུཾ ཝཊྚཏཱིཏི ནིསཱིདནསངྐཱབྷཱཝཏོ ཝུཏྟཾ. བནྡྷིཏྭཱ ཝཱཏི བནྡྷིཏྭཱ ཋཔིཏཚཏྟེ ཝཱ. ཡོ ཀོཙཱིཏི བྷཏྟཔཱུརོཔི ཏུཙྪཔཏྟོཔི.

༢༥༥. པརིཧརིཏུནྟི དིཝསེ དིཝསེ པིཎྜཱཡ ཙརཎཏྠཱཡ ཋཔེཏུཾ. པཏྟཾ ཨལབྷནྟེན པན ཨེཀདིཝསཾ པིཎྜཱཡ ཙརིཏྭཱ བྷུཉྫིཏྭཱ ཚཌྜེཏུཾ ཝཊྚཏི. ཏེནཱཧ ‘‘ཏཱཝཀཱལིཀཾ པརིབྷུཉྫིཏུཾ ཝཊྚཏཱི’’ཏི. པཎྞཔུཊཱདཱིསུཔི ཨེསེཝ ནཡོ. ཨབྷུཾ མེཏི ཨབྷཱུཏི མཡ྄ཧཾ, ཝིནཱསོ མཡ྄ཧནྟི ཨཏྠོ. པཱལི༹ཡཾ པིསཱཙོ ཝཏམནྟི པིསཱཙོ ཝཏཱཡཾ, ཨཡམེཝ ཝཱ པཱཋོ. པིསཱཙིལླིཀཱཏི པིསཱཙདཱརཀཱ. ཚཝསཱིསསྶ པཏྟོཏི ཚཝསཱིསམཡོ པཏྟོ. པཀཏིཝིཀཱརསམྦནྡྷེ ཙེཏཾ སཱམིཝཙནཾ.

ཙབྦེཏྭཱཏི ¶ ནིཊྛུབྷིཏྭཱ. ‘‘པཊིགྒཧཾ ཀཏྭཱ’’ཏི ཝུཏྟཏྟཱ ཨུཙྪིཊྛཧཏྠེན ཨུདཀཾ གཧེཏྭཱ པཏྟཾ པརིཔྥོསིཏྭཱ དྷོཝནགྷཾསནཝསེན ཧཏྠཾ དྷོཝིཏུཾ ཝཊྚཏི, ཨེཏྟཀེན པཏྟཾ པཊིགྒཧཾ ཀཏྭཱ ཧཏྠོ དྷོཝིཏོ ནཱམ ན ཧོཏི. ཨེཀཾ ཨུདཀགཎྜུསཾ གཧེཏྭཱཏི པཏྟཾ ཨཕུསིཏྭཱ ཏཏྠ ཨུདཀམེཝ ཨུཙྪིཊྛཧཏྠེན ཨུཀྑིཔིཏྭཱ གཎྜུསཾ ཀཏྭཱ, ཝཱམཧཏྠེནེཝ ཝཱ པཏྟཾ ཨུཀྑིཔིཏྭཱ མུཁེན གཎྜུསཾ གཧེཏུམྤི ཝཊྚཏི. བཧི ཨུདཀེན ཝིཀྑཱལེཏྭཱཏི དྭཱིསུ ཨངྒུལཱིསུ ཨཱམིསམཏྟཾ ཝིཀྑཱལེཏྭཱ བཧི གཧེཏུམྤི ཝཊྚཏི. པཊིཁཱདིཏུཀཱམོཏི ཨེཏྠ ན སཡཾ ཁཱདིཏུཀཱམོཔི ཨཉྙེསཾ ཁཱདནཱརཧཾ ཋཔེཏུཾ ལབྷཏི ¶ . ཏཏྠེཝ ཀཏྭཱཏི པཏྟེཡེཝ ཡཐཱཋཔིཏཊྛཱནཏོ ཨནུདྡྷརིཏྭཱ. ལུཉྩིཏྭཱཏི ཏཏོ མཾསམེཝ ནིརཝསེསཾ ཨུཔྤཊྚེཏྭཱ.

༢༥༦. ཀིཎྞཙུཎྞེནཱཏི སུརཱཀིཎྞཙུཎྞེན. མཀྑེཏུནྟི སཱུཙིཾ མཀྑེཏུཾ. ནིསྶེཎིམྤཱིཏི ཙཏཱུཧི དཎྜེཧི ཙཱིཝརཔྤམཱཎེན ཨཱཡཏཙཏུརསྶཾ ཀཏྭཱ བདྡྷཔཊལམྤི. ཨེཏྠ ཧི ཙཱིཝརཀོཊིཡོ སམཀཾ བནྡྷིཏྭཱ ཙཱིཝརཾ ཡཐཱསུཁཾ སིབྦནྟི. ཏཏྠ ཨཏྠརིཏབྦནྟི ཏསྶཱ ནིསྶེཎིཡཱ ཨུཔརི ཙཱིཝརསྶ ཨུཔཏྠམྦྷནཏྠཱཡ ཨཏྠརིཏབྦཾ. ཀཐིནསངྑཱཏཱཡ ནིསྶེཎིཡཱ ཙཱིཝརསྶ བནྡྷནཀརཛྫུ ཀཐིནརཛྫཱུཏི མཛ྄ཛྷིམཔདལོཔཱིསམཱསོཏི ཨཱཧ ‘‘ཡཱཡཱ’’ཏིཨཱདི. ཏཏྠ ཡསྨཱ དྭིནྣཾ པཊལཱནཾ ཨེཀསྨིཾ ཨདྷིཀེ ཛཱཏེ ཏཏྠ ཝལིཡོ ཧོནྟི, ཏསྨཱ དུཔཊྚཙཱིཝརསྶ པཊལདྭཡམྤི སམཀཾ ཀཏྭཱ བནྡྷནཀརཛྫུ ཀཐིནརཛྫཱུཏི ཝེདིཏབྦཾ.

པཱལི༹ཡཾ ཀཐིནསྶ ཨནྟོ ཛཱིརཏཱིཏི ཀཐིནེ བདྡྷསྶ ཙཱིཝརསྶ པརིཡནྟོ ཛཱིརཏི. ཀཐིནནིསྶིཏཉྷི ཙཱིཝརཾ ཨིདྷ ནིསྶཡཝོཧཱརེན ‘‘ཀཐིན’’ནྟི ཝུཏྟཾ ‘‘མཉྩཱ གྷོསནྟཱི’’ཏིཨཱདཱིསུ ཝིཡ. ཨནུཝཱཏཾ པརིབྷཎྜནྟི ཀཐིནེ བནྡྷནརཛྫཱུཧི ཙཱིཝརསྶ སམནྟཱ པརིཡནྟསྶ ཨཛཱིརཎཏྠཾ ཡེཧི ཀེཧིཙི ཙོལ༹ཀེཧི དཱིགྷཏོ ཨནུཝཱཏཾ, ཏིརིཡཏོ པརིབྷཎྜཉྩ སིབྦིཏྭཱ ཀཱཏུཾ ཡཏྠ རཛྫུཀེ པཝེསེཏྭཱ དཎྜེསུ པལིཝེཋེཏྭཱ ཙཱིཝརསམཀཾ ཨཱཀཌྜྷིཏུཾ སཀྐཱ, ཏཱདིསནྟི ཨཏྠོ. ཀེཙི པན ‘‘ཀཐིནསངྑཱཏེསུ ཀིལཉྫཱདཱིསུ ཨེཝ ཨཛཱིརཎཏྠཱཡ ཨནུཝཱཏཔརིབྷཎྜཀརཎཾ ཨནུཉྙཱཏ’’ནྟི ཝདནྟི. ཏསྶ མཛ྄ཛྷེཏི པུརཱཎཀཐིནསྶེཝ ཨནྟོ. བྷིཀྑུནོ པམཱཎེནཱཏི བྷིཀྑུནོ ཙཱིཝརསྶ པམཱཎེན. ཨཉྙཾ ནིསྶེཎིནྟི དཱིགྷཏོ ཙ ཏིརིཡཏོ ཙ ཨཉྙཾ དཎྜཾ ཋཔེཏྭཱ བནྡྷིཏུཾ.

བིདལཀནྟི ¶ དིགུཎཀརཎསངྑཱཏཀིརིཡཱཝིསེསསྶ ཨདྷིཝཙནཾ. ཏེནཱཧ ‘‘དུགུཎཀརཎ’’ནྟི. པཝེསནསལཱཀནྟི ཝལཱིནཾ ཨགྒཧཎཏྠཱཡ པཝེསནཀཝེལུ༹སལཱཀཱདི. པཱལི༹ཡཾ པཊིགྒཧནྟི ཨངྒུལིཀཉྩུཀཾ.

༢༥༧. པཱཏི ནཱམ བྷཎྜཊྛཔནཀོ བྷཱཛནཝིསེསོ. པཱལི༹ཡཾ པཊིགྒཧཐཝིཀནྟི པཱཏིཨཱདིབྷཱཛནཏྠཝིཀཾ. ཙིནིཏུནྟི ཨུཙྩཝཏྠུཔརིཡནྟསྶ ཨཔཏནཏྠཱཡ ཨིཊྛཀཱདཱིཧི ཙིནིཏུཾ. ཨཱལམྦནབཱཧནྟི ཨཱལམྦནརཛྫུདཎྜཱདི. པརིབྷིཛྫཏཱིཏི ཀཊསཱརཱདིཀཾ ཀཐིནམཛ྄ཛྷེ བྷངྒཾ ཧོཏི. ཨུསྶཱཔེཏྭཱཏི དཎྜཀཐིནཾ སནྡྷཱཡ ཝུཏྟཾ.

༢༥༨-༩. ཨུདཀཾ ¶ ཨཀཔྤིཡནྟི སཔྤཱཎཀཾ. ཨུཔནནྡྷཱིཏི ཝེརཾ བནྡྷི. ཨདྡྷཱནམགྒོ པཊིཔཛྫིཏབྦོཏི ཨེཏྠ ཨདྡྷཡོཛནཾ ཨདྡྷཱནམགྒོ ནཱམ, ཏཾ པཊིཔཛྫིཏུཀཱམསྶ སཉྩིཙྩ ཝིཧཱརཱུཔཙཱརཱཏིཀྐམནེ ཨཱཔཏྟི. ཨསཉྩིཙྩ གཏསྶ པན ཡཏྠ སརཏི, ཏཏྠ ཋཏྭཱ སངྒྷཱཊིཀཎྞཱདིཾ ཨནདྷིཊྛཧིཏྭཱ གམནེ པདཝཱརེན ཨཱཔཏྟཱིཏི ཝེདིཏབྦཾ. ན སམྨཏཱིཏི ན པཧོཏི.

༢༦༠. ཨབྷིསནྣཀཱཡཱཏི སེམྷཱདིདོསསནྣིཙིཏཀཱཡཱ. ཏཏྠ མཛ྄ཛྷེཏི ཨགྒལ༹པཱསཀསྶ མཛ྄ཛྷེ. ཨུཔརཱིཏི ཨགྒལ༹པཱསཀསྶ ཨུཔརིབྷཱགེ. ཨུདཀཊྛཔནཊྛཱནནྟི ཨུདཀཊྛཔནཏྠཱཡ པརིཙྪིནྡིཏྭཱ ཀཏཊྛཱནཾ.

༢༦༡. པཱལི༹ཡཾ ཨུདཔཱནནྟི ཀཱུཔཾ. ནཱིཙཝཏྠུཀོཏི ཀཱུཔསྶ སམནྟཱ ཀཱུལཊྛཱནཾ, བྷཱུམིསམཾ ཏིཊྛཏཱིཏི ཨཏྠོ. ཨུདཀེན ཨོཏྠརིཡྻཏཱིཏི སམནྟཱ ཝསྶོདཀཾ ཨཱགནྟྭཱ ཀཱུཔེ པཏཏཱིཏི ཨཏྠོ.

༢༦༢. ཝཱཧེནྟཱིཏི ཨུསྶིཉྩནྟི. ཨརཧཊགྷཊིཡནྟཾ ནཱམ ཙཀྐསཎྛཱནཾ ཨནེཀཱརཾ ཨརེ ཨརེ གྷཊིཀཱནི བནྡྷིཏྭཱ ཨེཀེན, དྭཱིཧི ཝཱ པརིབྦྷམིཡམཱནཡནྟཾ.

༢༦༣. ཨཱཝིདྡྷཔཀྑཔཱསཀནྟི ཀཎྞིཀམཎྜལསྶ སམནྟཱ ཋཔིཏཔཀྑཔཱསཀཾ. མཎྜལེཏི ཀཎྞིཀམཎྜལེ. པཀྑཔཱསཀེ ཋཔེཏྭཱཏི སམནྟཱ ཙཏུརསྶཱཀཱརེན ཕལཀཱདཱིནི ཋཔེཏྭཱ.

༢༦༤. ནམཏཀཾ ¶ ནཱམ སནྠཏསདིསནྟི ཀེཙི ཝདནྟི. ཀེཙི པན ‘‘རུཀྑཏཙམཡ’’ནྟི. ཙམྨཁཎྜཔརིཧཱརེནཱཏི ཨནདྷིཊྛཧིཏྭཱ སཡནཱསནཝིདྷིནཱཏི ཨཏྠོ. པེལཱ༹ཡཱཏི ཨཊྛཾསསོལ༹སཾསཱདིཨཱཀཱརེན ཀཏཱཡ བྷཱཛནཱཀཱརཱཡ པེལཱ༹ཡ. ཡཏྠ ཨུཎྷཔཱཡཱསཱདིཾ པཀྑིཔིཏྭཱ ཨུཔརི བྷོཛནཔཱཏིཾ ཋཔེནྟི བྷཏྟསྶ ཨུཎྷབྷཱཝཱཝིགམནཏྠཾ, ཏཱདིསསྶ བྷཱཛནཱཀཱརསྶ ཨཱདྷཱརསྶེཏཾ ཨདྷིཝཙནཾ. ཏེནེཝ པཱལི༹ཡཾ ‘‘ཨཱསིཏྟཀཱུཔདྷཱན’’ནྟི ཝུཏྟཾ. ཏསྶ ཙ པཱཡཱསཱདཱིཧི ཨཱསིཏྟཀཱདྷཱརོཏི ཨཏྠོ. ཨིདཉྩ ཨཱསིཏྟཀཱུཔདྷཱནཾ པཙྩནྟེསུ ན ཛཱནནྟི ཀཱཏུཾ, མཛ྄ཛྷིམདེསེཡེཝ ཀརོནྟི. ཀེཙི པན ‘‘གིཧིཔརིབྷོགོ ཨཡོམཡཱདི སབྦོཔི ཨཱདྷཱརོ ཨཱསིཏྟཀཱུཔདྷཱནམེཝ ཨནུལོམེཏཱི’’ཏི ཝདནྟི, ཨེཀེ པན ‘‘ཀཔྤིཡལོཧམཡོ ཨཱདྷཱརོ མལོ༹རིཀམེཝ ཨནུལོམེཏཱི’’ཏི. ཝཱིམཾསིཏྭཱ གཧེཏབྦཾ. པུབྦེ པཏྟགུཏྟིཡཱ ཨཱདྷཱརོ ཨནུཉྙཱཏོ. ཨིདཱནི བྷུཉྫིཏུཾ མལོ༹རིཀཱ ཨནུཉྙཱཏཱ. ཚིདྡནྟི ཚིདྡཡུཏྟཾ. ཝིདྡྷནྟི ཨནྟོཝིནིཝིདྡྷཚིདྡཾ. ཨཱཝིདྡྷནྟི སམནྟཏོ ཚིདྡཾ.

༢༦༥. པཏྟཾ ནིཀྐུཛྫིཏུནྟི ཨེཏྠ ཀམྨཝཱཙཱཡ ཨསམྦྷོགཀརཎཝསེནེཝ ནིཀྐུཛྫནཾ, ན པཏྟཱནཾ ¶ ཨདྷོམུཁཊྛཔནེན. ཏེནཱཧ ‘‘ཨསམྦྷོགཾ སངྒྷེན ཀརོཏཱུ’’ཏིཨཱདི, ཏཾ ཝཌྜྷཾ ཀམྨཝཱཙཱཡ སངྒྷེན སདྡྷིཾ ཨསམྦྷོགཾ སངྒྷོ ཀརོཏཱུཏི ཨཏྠོ.

པཏྟཾ ནིཀྐུཛྫེཡྻཱཏི ཝཌྜྷསྶ པཏྟནིཀྐུཛྫནདཎྜཀམྨཾ ཀརེཡྻ. ཨསམྦྷོགཾ སངྒྷེན ཀརཎནྟི སངྒྷེན ཝཌྜྷསྶ ཨསམྦྷོགཀརཎཾ. ཡཐཱ ཨསམྦྷོགོ ཧོཏི, ཏཐཱ ཀརཎནྟི ཨཏྠོ. ནིཀྐུཛྫིཏོ…པེ… ཨསམྦྷོགཾ སངྒྷེནཱཏི ཨེཏྠ སངྒྷེན ཨསམྦྷོགོ ཧོཏཱིཏི ཨཏྠོ དཊྛབྦོ. ཨེཝཾ བྷགཝཏཱ ཨསམྦྷོགཀརཎསྶ ཨཱཎཏྟཏྟཱ, ཀམྨཝཱཙཱཡ ཙ སཱཝིཏཏྟཱ, ཨཊྛཀཐཱཡཉྩ ‘‘ཀོཙི དེཡྻདྷམྨོ ན གཧེཏབྦོ’’ཏི ཝུཏྟཏྟཱ པཏྟེ ནིཀྐུཛྫིཏེ ཏསྶ སནྟཀཾ ཉཏྭཱ གཎྷནྟསྶ དུཀྐཊམེཝཱཏི གཧེཏབྦཾ.

ཨཙྩཡོཏི ཉཱཡཔྤཊིཔཏྟིཾ ཨཏིཀྐམིཏྭཱ པཝཏྟི, ཨཔརཱདྷོཏི ཨཏྠོ. མཾ ཨཙྩགམཱཏི མཾ ཨཏིཀྐམྨ པཝཏྟོ. ཏཾ ཏེ མཡཾ པཊིགྒཎྷཱམཱཏི ཏཾ ཏེ ཨཔརཱདྷཾ མཡཾ ཁམཱམ. བྷིཀྑཱུནཾ ཨལཱབྷཱཡ པརིསཀྐཏཱིཏིཨཱདཱིསུ ཨལཱབྷཱཡ ¶ པརིསཀྐནཱདིཏོ ཝིརཏོཏི ཨེཝམཏྠོ གཧེཏབྦོ. ཨསམྦྷོགཾ བྷིཀྑུསངྒྷེནཱཏི ཨེཏྠ ‘‘ཀཏོ’’ཏི པཱཋསེསོ.

༢༦༨. ཡཱཝ པཙྪིམཱ སོཔཱནཀལེ༹ཝརཱཏི པཋམསོཔཱནཕལཀཾ སནྡྷཱཡ ཝུཏྟཾ. ཏཉྷི པཙྪཱ དུསྶེན སནྠཏཏྟཱ ཨེཝ ཝུཏྟཾ. ‘‘པཙྪིམཾ ཛནཏཾ ཏཐཱགཏོ ཨནུཀམྤཏཱི’’ཏི ཨིདཾ ཐེརོ ཨནཱགཏེ བྷིཀྑཱུནཾ ཙེལཔཊིཀསྶ ཨཀྐམནཔཙྩཡཱ ཨཔཝཱདཾ སིཀྑཱཔདཔཉྙཏྟིཡཱ ནིཝཱརཎེན བྷགཝཏོ ཨནུཀམྤཾ སནྡྷཱཡཱཧ. ཨཔགཏགབྦྷཱཏི ཝིཛཱཏཔུཏྟཱ. ཏེནཱཧ ‘‘མངྒལཏྠཱཡཱ’’ཏི.

༢༦༩-༢༧༠. བཱིཛནིནྟི ཙཏུརསྶབཱིཛནིཾ. ཨེཀཔཎྞཙྪཏྟནྟི ཏཱལཔཎྞཱདིནཱ ཨེཀེན པཏྟེན ཀཏཚཏྟཾ.

༢༧༤-༥. ཨནུརཀྑཎཏྠནྟི པརིགྒཧེཏྭཱ གོཔནཏྠཾ. དཱིགྷཾ ཀཱརེནྟཱིཏི ཀེསེཧི སདྡྷིཾ ཨཙྪིནྡིཏྭཱ ཋཔཱཔེནྟི. ཙཏུཀོཎནྟི ཡཐཱ ཨུཔརི ནལཱཊནྟེསུ དྭེ, ཧེཊྛཱ ཧནུཀཔསྶེ དྭེཏི ཙཏྟཱརོ ཀོཎཱ པཉྙཱཡནྟི, ཨེཝཾ ཙཏུརསྶཾ ཀཏྭཱ ཀཔྤཱཔནཾ. པཱལི༹ཡཾ དཱཋིཀཾ ཋཔཱཔེནྟཱིཏི ཨུཏྟརོཊྛེ མསྶུཾ ཨཙྪིནྡིཏྭཱ ཋཔཱཔེནྟི. རུདྷཱིཏི ཁུདྡཀཝཎཾ.

༢༧༧. པཱལི༹ཡཾ ལོཧབྷཎྜཀཾསབྷཎྜསནྣིཙཡོཏི ལོཧབྷཎྜསྶ, ཀཾསབྷཎྜསྶ ཙ སནྣིཙཡོཏི ¶ ཨཏྠོ. བནྡྷནམཏྟནྟི ཝཱསིདཎྜཱདཱིནཾ ཀོཊཱིསུ ཨཔཱཏནཏྠཾ ལོཧེཧི བནྡྷནཾ. ཏནྟཀནྟི ཨཱཡོགཝཱཡནཏྠཾ ཏདཱཀཱརེན པསཱརིཏཏནྟཾ.

༢༧༨. ‘‘ཡཏྠ སརཏི, ཏཏྠ བནྡྷིཏབྦ’’ནྟི ཨེཏེན ཨསཉྩིཙྩ ཀཱཡབནྡྷནཾ ཨབནྡྷིཏྭཱ པཝིཊྛསྶ ཨནཱཔཏྟཱིཏི དསྶེཏི. མུརཛཝཊྚིསཎྛཱནཾ ཝེཋེཏྭཱ ཀཏནྟི ཨེཝཾ བཧུརཛྫུཀེ ཨེཀཏོ ཀཏྭཱ ནཱནཱཝཎྞེཧི སུཏྟེཧི ཀཏནྟི ཀེཙི ཝདནྟི. ཨེཀཝཎྞསུཏྟེནཱཔི ཝལཡགྷཊཀཱདིཝིཀཱརཾ དསྶེཏྭཱ ཝེཋིཏམྤི མུརཛམེཝ. ཝིཀཱརཾ པན ཨདསྶེཏྭཱ མཊྛཾ ཀཏྭཱ ནིརནྟརཾ ཝེཋིཏཾ ཝཊྚཏི. ཏེནེཝ དུཏིཡཔཱརཱཛིཀསཾཝཎྞནཱཡཾ ཝུཏྟཾ ‘‘བཧུརཛྫུཀེ ཨེཀཏོ ཀཏྭཱ ཨེཀེན ནིརནྟརཾ ཝེཋེཏྭཱ ཀཏཾ ‘བཧུརཛྫུཀ’ནྟི ན ཝཏྟབྦཾ, ཝཊྚཏཱི’’ཏི. མུདྡིཀཀཱཡབནྡྷནཾ ནཱམ ཙཏུརསྶཾ ཨཀཏྭཱ ¶ སཛྫིཏཾ. པཱམངྒདསཱ ཙཏུརསྶཱ. མུདིངྒསཎྛཱནེནཱཏི ཝརཀསཱིསཱཀཱརེན. པཱསནྟོཏི དསཱཔརིཡོསཱནཾ.

༢༧༩. པཱལི༹ཡཾ གཎྛིཀཕལཀཾ པཱསཀཕལཀནྟི ཨེཏྠ དཱརུདནྟཱདིམཡེསུ ཕལཀེསུ གཎྛིཀཔཱསཀཱནི ཨཔྤེཏྭཱ ཙཱིཝརེ ཋཔེཏུཾ ཨནུཉྙཱཏཾ. ཀོཊྚོ ཝིཝརིཡཏཱིཏི ཨནུཝཱཏོ ཝིཝརིཡཏི.

༢༨༠-༡. པཱལི༹ཀཱརཀོཏི བྷིཀྑཱུནཾ ཡཐཱཝུཌྜྷཾ པཱལི༹ཡཱ པཏིཊྛཱཔཀོ. ཏསྶཱཔི ཏཐཱ པཱརུཔིཏུཾ ན ཝཊྚཏི. པཱལི༹ཡཾ མུཎྜཝཊྚཱིཏི མལླཱདཡོ.

༢༨༢. པམཱཎངྒུལེནཱཏི ཝཌྜྷཀཱིཨངྒུལེན. ཀེཙི པན ‘‘པཀཏིཨངྒུལེནཱ’’ཏི ཝདནྟི, ཏཾ ཙཏུརངྒུལཔཙྪིམཀཝཙནེན ན སམེཏི. ན ཧི པཀཏངྒུལེན ཙཏུརངྒུལཔྤམཱཎཾ དནྟཀཊྛཾ ཀཎྛེ ཨཝིལགྒཾ ཁཱདིཏུཾ སཀཱཏི.

༢༨༥. པཱལི༹ཡཾ སཀཱཡ ནིརུཏྟིཡཱ བུདྡྷཝཙནཾ དཱུསེནྟཱིཏི མཱགདྷབྷཱསཱཡ སབྦེསཾ ཝཏྟུཾ སུཀརཏཱཡ ཧཱིནཛཙྩཱཔི ཨུགྒཎྷནྟཱ དཱུསེནྟཱིཏི ཨཏྠོ.

༢༨༩. མཱ བྷིཀྑཱུ བྱཱབཱདྷཡིཾསཱུཏི ལསུཎགནྡྷེན བྷིཀྑཱུ མཱ བཱདྷཡིཾསུ.

༢༩༡. ཨཝལེཁནཔཱིཋརོཏི ¶ ཨཝལེཁནཀཊྛཱནཾ ཋཔནབྷཱཛནཝིསེསོ. ཨཔིདྷཱནནྟི པིདྷཱནཕལཀཱདི.

ཁུདྡཀཝཏྠུཀཐཱཝཎྞནཱ ནིཊྛིཏཱ.

ཁུདྡཀཝཏྠུཀྑནྡྷཀཝཎྞནཱནཡོ ནིཊྛིཏོ.

༦. སེནཱསནཀྑནྡྷཀོ

ཝིཧཱརཱནུཛཱནནཀཐཱཝཎྞནཱ

༢༩༥. སེནཱསནཀྑནྡྷཀེ ¶ ¶ སིསིརེཏི སིསིརཀཱལེ ཧིམཔཱཏཝསེན སཏྟཱཧཝདྡལིཀཱདིཝསྶཔཱཏཝསྶེན ཙ ཨུཔྤནྣོ ཁརོ སཱིཏསམྥསྶོ ཨདྷིཔྤེཏོཏི ཨཱཧ ‘‘སམྥུསིཏཀོ’’ཏི. ‘‘ཏཏོ’’ཏི ཨིདཾ ཀཏྟུཨཏྠེ ནིསྶཀྐཝཙནཾ, ཏེན ཙ ཝིཧཱརེན ཝཱཏཱཏཔོ པཊིཧཉྙཏཱིཏི ཨཏྠོཏི ཨཱཧ ‘‘ཝིཧཱརེན པཊིཧཉྙཏཱི’’ཏི.

༢༩༦. ཨཱཝིཉྪནཚིདྡནྟི ཡཏྠ ཨངྒུལིཾ ཝཱ རཛྫུསངྑལིཀཱདིཾ ཝཱ པཝེསེཏྭཱ ཀཝཱཊཾ ཨཱཀཌྜྷནྟཱ དྭཱརབཱཧཾ ཕུསཱཔེནྟི, ཏསྶེཏཾ ཨདྷིཝཙནཾ. སེནཱསནཔརིབྷོགེ ཨཀཔྤིཡཾ ནཱམ ནཏྠཱིཏི དསྶནཏྠཾ ‘‘སཙེཔི དཱིཔིནངྒུཊྛེནཱ’’ཏིཨཱདི ཝུཏྟཾ. ཙེཏིཡེ ཝེདིཀཱསདིསནྟི ཝཱཏཔཱནདཱརུཾ ཝཱ ཛཱལཾ ཝཱ ཨཊྛཔེཏྭཱ དཱརུཊྛཱནེ ཙེཏིཡེ ཝེདིཀཱཡ པཊྚཱདཱིནི ཝིཡ ཨིཊྛཀཱདཱིཧི ཨུདྡྷཾ, ཏིརིཡཉྩ པཊྚིཀཱདཡོ དསྶེཏྭཱ ཙཏུཚིདྡཡུཏྟཾ ཀཏཾ. ཐམྦྷཀཝཱཏཔཱནཾ ནཱམ ཏིརིཡཾ དཱརཱུནི ཨདཏྭཱ ཨུདྡྷཾ ཋཔིཏདཱརཱུཧི ཨེཝ ཀཏཾ. ཙོལ༹ཀཔཱདཔུཉྪནཾ བནྡྷིཏུནྟི ཝཱཏཔཱནཔྤམཱཎེན པཱདཔུཉྪནསདིསཾ ཙོལ༹ཀཱདིནཱ བནྡྷིཏྭཱ ཝགྒུལིཨཱདིཔྤཝེསནནིཝཱརཎཏྠཾ, ཀཐེཏུནྟི ཨཏྠོ. མིཌྜྷཀནྟི མཉྩཱཀཱརེན ཀཊྛམཏྟིཀཱདཱིཧི ཀཏཝེདིཀཱཀཱརཾ.

༢༩༧. ཙཏུརསྶཔཱིཋནྟི སམཙཏུརསྶཾ. ཨཊྛངྒུལཔཱདཀཾ ཝཊྚཏཱིཏི ཨཊྛངྒུལཔཱདཀམེཝ ཝཊྚཏི. པམཱཎཱཏིཀྐནྟོཔི ཝཊྚཏཱིཏི སམཙཏུརསྶམེཝ སནྡྷཱཡ ཝུཏྟཾ. ཨཱཡཏཙཏུརསྶཱ པན སཏྟངྒཔཉྩངྒཱཔི ཨུཙྩཔཱདཱ ན ཝཊྚནྟི. ཝེཏྟེཧེཝ ཙཏུརསྶཱདིཨཱཀཱརེན ཀཏཾ བྷདྡཔཱིཋནྟི ཨཱཧ ‘‘ཝེཏྟམཡཾ པཱིཋ’’ནྟི. དཱརུཔཊྚིཀཱཡ ཨུཔརཱིཏི ཨཊནིཨཱཀཱརེན ཋིཏདཱརུཔཊལསྶ ཧེཊྛཱ ཨུདྡྷཾ པཱདཾ ཀཏྭཱ. པཝེསནཀཱལཉྷི སནྡྷཱཡ ‘‘ཨུཔརཱི’’ཏི ཝུཏྟཾ. ཨེལ༹ཀསྶ པཙྪིམཔཱདདྭཡཾ ཝིཡ ཝངྐཱཀཱརེན ཋིཏཏྟཱ པནེཏཾ ‘‘ཨེལ༹ཀཔཱདཔཱིཋ’’ནྟི ཝུཏྟཾ. པལོཋེནྟཱིཏི སཧ མཉྩེཧི པཝཊྚེནྟི. རུཀྑེ ¶ , ལཏཱ ཙ མུཉྩིཏྭཱ ཨཝསེསཾ གཙྪཱདིཀཾ སབྦམྤི ཏིཎཛཱཏི ཨེཝཱཏི ཨཱཧ ‘‘ཡེསཾ ཀེསཉྩི ཏིཎཛཱཏིཀཱན’’ནྟིཨཱདི.

ཨུཔདཧནྟཱིཏི ¶ ཋཔེནྟི. སཱིསཔྤམཱཎཾ ནཱམ ཡཏྠ གཱིཝཱཡ སཧ སཀལཾ སཱིསཾ ཋཔེཏུཾ སཀྐཱ, ཏསྶ ཙ མུཊྛིརཏནཾ ཝིཏྠཱརཔྤམཱཎནྟི དསྶེནྟོ ‘‘ཝིཏྠཱརཏོ’’ཏིཨཱདིམཱཧ. ཨིདཉྩ བིམྦོཧནསྶ ཨུབྷོསུ ཨནྟེསུ ཋཔེཏབྦཙོལ༹པྤམཱཎདསྶནཾ. ཏསྶ ཝསེན བིམྦོཧནསྶ ཝིཏྠཱརཔྤམཱཎཾ པརིཙྪིཛྫཏི, ཏཾ ཝཊྚཾ ཝཱ ཙཏུརསྶཾ ཝཱ ཀཏྭཱ སིབྦིཏཾ ཡཐཱ ཀོཊིཏོ ཀོཊི ཝིཏྠཱརཏོ པུཐུལཊྛཱནཾ མུཊྛིརཏནཔྤམཱཎཾ ཧོཏི, ཨེཝཾ སིབྦིཏབྦཾ. ཨིཏོ ཨདྷིཀཾ ན ཝཊྚཏི, ཏཾ པན ཨནྟེསུ ཋཔིཏཙོལ༹ཾ ཀོཊིཡཱ ཀོཊིཾ ཨཱཧཙྩ དིགུཎཾ ཀཏཾ ཏིཀཎྞཾ ཧོཏི. ཏེསུ ཏཱིསུ ཀཎྞེསུ དྭིནྣཾ ཀཎྞཱནམནྟརཾ ཝིདཏྠིཙཏུརངྒུལཾ ཧོཏི, མཛ྄ཛྷཊྛཱནཾ ཀོཊིཏོ ཀོཊིཾ ཨཱཧཙྩ མུཊྛིརཏནཾ ཧོཏི, ཨིདམསྶ ཨུཀྐཊྛཔྤམཱཎཾ. ཏེནཱཧ ‘‘ཏཱིསུ ཀཎྞེསཱུ’’ཏིཨཱདི.

‘‘ཀམྦལམེཝ…པེ… ཨུཎྞབྷིསིསངྑྱམེཝ གཙྪཏཱི’’ཏི སཱམཉྙཏོ ཝུཏྟཏྟཱ གོནཀཱདིཨཀཔྤིཡམྤི ཨུཎྞམཡཏྠརཎཾ བྷིསིཡཾ པཀྑིཔིཏྭཱ སཡིཏུཾ ཝཊྚཏཱིཏི དཊྛབྦཾ.

མསཱུརཀེཏི ཙམྨམཡབྷིསིཡཾ. ཙམྨམཡཾ པན བིམྦོཧནཾ ཏཱུལཔུཎྞམྤི ན ཝཊྚཏི. པཱལི༹ཡཾ སེནཱསནཔརིཀྑཱརདུསྶནྟི སེནཱསནཔརིཀྑཱརཀརཎཏྠཱཡ དུསྶཾ. བྷིསིཾ ཨོནནྡྷིཏུནྟི བྷིསིཏྠཝིཀཱཡ པཀྑིཔིཏྭཱ བནྡྷིཏུཾ. པརིབྷིཛྫཏཱིཏི མཉྩཱདིཏོ སཱརིཡམཱནཱ པཱིཋཀོཊིཨཱདཱིསུ ནིསཱིདནྟེཧི གྷཾསིཡམཱནཱ བྷིསི པརིབྷིཛྫཏི. ཨོནདྡྷམཉྩནྟི བྷིསིཾ ཨེཀཱབདྡྷཾ ཀཏྭཱ བདྡྷམཉྩཾ. པཱལི༹ཡཾ ཚཝིཾ ཨུཔྤཱཊེཏྭཱ ཧརནྟཱིཏི བྷིསིཙྪཝིཾ ཙོརཱ ཧརནྟི. ཕོསིཏུནྟི ཙོརེཧི ཧརིཏསྶ པཙྪཱ ཧརིཏསཉྙཱཎཕུསིཏབིནྡཱུནི དཱཏུཾ. བྷིཏྟིཀམྨནྟི ནཱནཱཝཎྞེཧི ཝིབྷིཏྟིརཱཛིཀརཎཾ. ཧཏྠཀམྨནྟི ཧཏྠེན ཡཾ ཀིཉྩི སཉྙཱཀརཎཾ.

༢༩༨. པཱལི༹ཡཾ ན ནིཔཏཏཱིཏི ན ཨལླཱིཡཏི. པཊིབཱཧེཏྭཱཏི གྷཾསིཏྭཱ. ན ནིབནྡྷཏཱིཏི ཨནིབནྡྷནཱིཡོ, ན ལགྒནཀོཏི ཨཏྠོ.

༢༩༩. ‘‘ཀརོཧཱི’’ཏི ཝཏྟུམྤི ན ལབྦྷཏཱིཏི ཨཱཎཏྟིཡཱ ཨེཝ པཊིཀྑིཏྟཏྟཱ དྭཱརཔཱལཾ ‘‘ཀིཾ ན ཀརོསཱི’’ཏིཨཱདིནཱ པརིཡཱཡེན ཝཏྟུཾ ཝཊྚཏི. ཛཱཏཀཔཀརཎནྟི ཛཱཏཀཔཊིསཾཡུཏྟཾ ཨིཏྠིཔུརིསཱདི ཡཾ ཀིཉྩི རཱུཔཾ ཨདྷིཔྤེཏཾ. ‘‘པརེཧི ཀཱརཱཔེཏུ’’ནྟི ཝུཏྟཏྟཱ བུདྡྷརཱུཔམྤི སཡཾ ཀཱཏུཾ ན ལབྷཏི. པཱལི༹ཡཾ པཉྩཔཊིཀནྟི ཛཱཏིཨཱདིཔཉྩཔྤཀཱརཝཎྞམཊྛཾ.

༣༠༠. ཨུཔཙཱརོ ¶ ¶ ན ཧོཏཱིཏི གབྦྷསྶ བཧི སམནྟཱ ཨནུཔརིགམནསྶ ཨོཀཱསོ ནཔྤཧོཏི. རུཀྑཾ ཝིཛ྄ཛྷིཏྭཱཏི ཏཙྪིཏསཱརདཱརུཾ ཨགྒསམཱིཔེ ཝིཛ྄ཛྷིཏྭཱ. ཀཏྭཱཏི ཚིདྡེ ཀཏྭཱ. ཀཔྤཀཏཾ ཝིཡ སཱརཁཱཎུཀེ ཨཱཀོཊེཏྭཱ ཨེཝཾ ཀཏམེཝ ‘‘ཨཱཧརིམཾ བྷིཏྟིཔཱད’’ནྟི ཝུཏྟཾ. ཨུཔཏྠམྦྷནཏྠཾ བྷཱུམིཡཾ པཏིཊྛཱཔེཏུནྟི ཛིཎྞབྷིཏྟིཔཱདེན བཧི སམཱནབྷཱརཾ ཁཱཎུཀཔྤསཱིསེན ཨུསྶཱཔེཏྭཱ མཱུལེན བྷཱུམིཡཾ པཏིཊྛཱཔེཏུཾ. པརིཏྟཱཎཏྠནྟི ཨུལླིཏྟཱཝལིཏྟཀུཊིཡཱ ཨོཝསྶནཊྛཱནསྶ པརིཏྟཱཎཏྠཾ. ཀིཊིཀནྟི ཏཱལཔཎྞཱདཱིཧི ཀཏཔདལཾ. མདྡིཏམཏྟིཀནྟི ཨོཝསྶནཚིདྡསྶ པིདཧནཏྠཾ ཝུཏྟཾ.

ཨུབྷཏོཀུཊྚཾ ནཱིཧརིཏྭཱ ཀཏཔདེསསྶཱཏི ཡཐཱ བཧི ཋིཏཱ ཨུཛུཀཾ ཨནྟོ ནིསིནྣེ ན པསྶནྟི, ཨེཝཾ དྭཱརཱབྷིམུཁཾ པིདཧནཝསེན བྷིཏྟིཉྩ ཨཉྙཏོ དྭཱརཉྩ ཡོཛེཏྭཱ ཀཏཊྛཱནཾ ཝདཏི. སམནྟཱ པརིཡཱགཱརོཏི སམནྟཏོ ཨཱཝིདྡྷཔམུཁཾ. ཝཾསཾ དཏྭཱཏི པུརིསཔྤམཱཎེ པཱདེ ནིཁཎིཏྭཱ ཏེསཾ ཨུཔརི པིཊྛིཝཾསསདིསཾ པསྶཝཾསཾ ཋཔེཏྭཱ ཨོསཱརེཏྭཱ. ཨེཀཾ དཎྜཀོཊིཾ ཨཏིཨུཙྩཱཡ ཝིཧཱརབྷིཏྟིཀོཊིཡཱ ཨེཀཾ ཀོཊིཾ ནཱིཙེ ཝཾསཔིཊྛིཡཾ ཋཔནཝསེན དཎྜཀེ པསཱརེཏྭཱ. ཙཀྐལཡུཏྟོ ཀིཊིཀོཏི ཀཝཱཊཾ ཝིཡ ཝིཝརཎཐཀནསུཁཏྠཾ ཙཀྐལབནྡྷཀིཊིཀཾ. པཱལི༹ཡཾ ཨུགྒྷཱཊནཀིཊིཀནྟི ཨཱཔཎཱདཱིསུ ཨནཏྠིཀཀཱལེ ཨུཀྑིཔིཏྭཱ, ཨུཔརི ཙ བནྡྷིཏྭཱ པཙྪཱ ཨོཏརཎཀིཊིཀཾ, ཀཔྤསཱིསེཧི ཝཱ ཨུཔཏྠམྦྷནཱིཧི ཨུཀྑིཔིཏྭཱ པཙྪཱ ཨོཏརཎཀིཊིཀམྤི.

༣༠༡. པཱནཱིཡཾ ཨོཏཔྤཏཱིཏི པཱནཱིཡབྷཱཛནེསུ ཋཔིཏཔཱནཱིཡཾ ཨཱཏཔེན སནྟཔྤཏི.

༣༠༣. ཏཡོ ཝཱཊེཏི ཏཡོ པརིཀྑེཔེ. ཝེལུ༹ཝཱཊནྟི སབྦཾ དཱརུཔརིཀྑེཔཾ སངྒཎྷཱཏི. ཀཎྚཀཝཱཊནྟི སབྦསཱཁཱཔརིཀྑེཔཾ.

༣༠༥. ཨཱལོཀོ ཨནྟརདྷཱཡཱིཏི ཡོ བུདྡྷཱརམྨཎཱཡ པཱིཏིཡཱ ཨཱནུབྷཱཝེན མཧནྟོ ཨོབྷཱསོ ཨཧོསི, ཡེན ཙསྶ པདཱིཔསཧསྶེན ཝིཡ ཝིགཏནྡྷཀཱརོ མགྒོ ཨཧོསི, སོ བཧིནགརེ ཚཝསརཱིརསམཱཀུལཾ དུགྒནྡྷཾ བཱིབྷཙྪཾ ཨཱམཀསུསཱནཾ པཏྟསྶ བྷཡེན པཱིཏིཝེགེ མནྡཱིབྷཱུཏེ ཨནྟརདྷཱཡི.

སཏཾ ¶ ཧཏྠཱིཏི གཱཐཱཡ ཧཏྠིནོ སཏསཧསྶཱནཱིཏི ཨེཝཾ པཙྩེཀཾ སཧསྶ-སདྡེན ཡོཛེཏྭཱ ཨཏྠོ ཉཱཏབྦོ. པདཝཱིཏིཧཱརསྶཱཏི ‘‘བུདྡྷཾ ཝནྡིསྶཱམཱི’’ཏི རཏནཏྟཡཾ ཨུདྡིསྶ གཙྪཏོ ཨེཀཔདཝཱིཏིཧཱརསྶ ¶ , ཏཔྤཙྩཡཀུསལཕལསྶཱཏི ཨཏྠོ. ཏསྶ སོལ༹སམོ བྷཱགོ ཀལཾ ནཱམ, ཏཾ སོལ༹སིཾ ཀལཾ ཡཐཱཝུཏྟཱ ཧཏྠིཨཱདཡོ སབྦེ ནཱགྒྷནྟི ནཱརཧནྟི, ནིདསྶནམཏྟཉྩེཏཾ. ཨནེཀསཏསཧསྶབྷཱགམྤི ནཱགྒྷནྟི.

ཨནྡྷཀཱརོ ཨནྟརདྷཱཡཱིཏི པུན བལཝཔཱིཏིཡཱ ཨཱལོཀེ སམུཔྤནྣེ ཨནྟརདྷཱཡི. ཨཱསཏྟིཡོཏི ཏཎྷཱཡོ. ཝཡཀརཎནྟི དེཡྻདྷམྨམཱུལཾ ནཝཀམྨཾ.

༣༠༩. དདེཡྻཱཏི ནཝཀམྨཾ ཨདྷིཊྛཱཏུཾ ཝིཧཱརེ ཨིསྶརིཡཾ དདེཡྻཱཏི ཨཏྠོ. དིནྣོཏི ནཝཀམྨཾ ཀཱཏུཾ ཝིཧཱརོ དིནྣོ, ཝིཧཱརེ ནཝཀམྨཾ དིནྣནྟི ཝཱ ཨཏྠོ.

༣༡༣-༤. སནྠཱགཱརེཏི སནྣིཔཱཏམཎྜཔེ. ཨོཀཱསེཏི ནིཝཱསོཀཱསེ. ཨུདྡིསྶ ཀཏནྟི སངྒྷཾ ཨུདྡིསྶ ཀཏཾ. གིཧིཝིཀཊནྟི གིཧཱིཧི ཀཏཾ པཉྙཏྟཾ, གིཧིསནྟཀནྟི ཨཏྠོ.

ཝིཧཱརཱནུཛཱནནཀཐཱཝཎྞནཱ ནིཊྛིཏཱ.

སེནཱསནགྒཱཧཀཐཱཝཎྞནཱ

༣༡༨. ‘‘ཚམཱསཙྩཡེན ཚམཱསཙྩཡེནཱ’’ཏི ཨིདཾ དྭིཀྑཏྟུཾ པཙྩཡདཱནཀཱལཔརིཙྪེདདསྶནཾ, ཨེཝཾ ཨུཔརིཔི. ‘‘ཏཾ ན གཱཧེཏབྦ’’ནྟི ཝཙནསྶ ཀཱརཎམཱཧ ‘‘པཙྩཡེནེཝ ཧི ཏ’’ནྟིཨཱདིནཱ, པཙྩཡཉྙེཝ ནིསྶཱཡ ཏཏྠ ཝསིཏྭཱ པཊིཛགྒནཱ བྷཝིསྶནྟཱིཏི ཨདྷིཔྤཱཡོ.

ཨུབྦྷཎྜིཀཱཏི ཨུཀྑིཏྟབྷཎྜཱ བྷཝིསྶནྟི. དཱིགྷསཱལཱཏི ཙངྐམནསཱལཱ. མཎྜལམཱལོ༹ཏི ཨུཔཊྛཱནསཱལཱ. ཨནུདཧཏཱིཏི པཱིལེ༹ཏི. ‘‘ཨདཱཏུཾ ན ལབྦྷཏཱི’’ཏི ཨིམིནཱ སཉྩིཙྩ ཨདདནྟསྶ པཊིབཱཧནེ པཝིསནཏོ དུཀྐཊནྟི དཱིཔེཏི.

‘‘ན ¶ གོཙརགཱམོ གྷཊྚེཏབྦོ’’ཏི ཝུཏྟམེཝཏྠཾ ཝིབྷཱཝེཏུཾ ‘‘ན ཏཏྠ མནུསྶཱ ཝཏྟབྦཱ’’ཏིཨཱདི ཝུཏྟཾ. ཝིཏཀྐཾ ཚིནྡིཏྭཱཏི ‘‘ཨིམིནཱ ནཱིཧཱརེན གཙྪནྟཾ དིསྭཱ ནིཝཱརེཏྭཱ པཙྩཡེ དསྶནྟཱི’’ཏི ཨེཝརཱུཔཾ ཝིཏཀྐཾ ཨནུཔྤཱདེཏྭཱ. བྷཎྜཔྤཊིཙྪཱདནནྟི པཊིཙྪཱདནབྷཎྜཾ. སརཱིརཔྤཊིཙྪཱདནཙཱིཝརནྟི ཨཏྠོ. ‘‘སུདྡྷཙིཏྟཏྟཱཝ ཨནཝཛྫ’’ནྟི ཨིདཾ པུཙྪིཏཀྑཎེ ཀཱརཎཱཙིཀྑནཾ ¶ སནྡྷཱཡ ཝུཏྟཾ ན ཧོཏི ཨསུདྡྷཙིཏྟསྶཔི པུཙྪིཏཔཉྷཝིསཛྫནེ དོསཱབྷཱཝཱ. ཨེཝཾ པན གཏེ མཾ པུཙྪིསྶནྟཱིཏིསཉྙཱཡ ཨགམནཾ སནྡྷཱཡ ཝུཏྟནྟི དཊྛབྦཾ.

པཊིཛགྒིཏབྦཱནཱིཏི ཁཎྜཕུལླཔཊིསངྑརཎསམྨཛྫནཱདཱིཧི པཊིཛགྒིཏབྦཱནི. མུདྡཝེདིཀཱཡཱཏི ཙེཏིཡསྶ ཧམྨིཡཝེདིཀཱཡ གྷཊཱཀཱརསྶ ཨུཔརི ཙཏུརསྶཝེདིཀཱཡ. ཀསྨཱ པུཙྪིཏབྦནྟིཨཱདི ཡཏོ པཀཏིཡཱ ལབྷཏི. ཏཏྠཱཔི པུཙྪནསྶ ཀཱརཎསནྡསྶནཏྠཾ ཝུཏྟཾ.

པཊིཀྐམྨཱཏི ཝིཧཱརཏོ ཨཔསཀྐིཏྭཱ. ཏམཏྠཾ དསྶེནྟོ ‘‘ཡོཛནདྭིཡོཛནནྟརེ ཧོཏཱི’’ཏི ཨཱཧ. ཨུཔནིཀྑེཔཾ ཋཔེཏྭཱཏི ཝཌྜྷིཡཱ ཀཧཱཔཎཱདིཾ ཋཔེཏྭཱ, ཁེཏྟཱདཱིནི ཝཱ ནིཡམེཏྭཱ. ཨིཏི སདྡྷཱདེཡྻེཏི ཨེཝཾ ཧེཊྛཱ ཝུཏྟནཡེན སདྡྷཱཡ དཱཏབྦེ ཝསྶཱཝཱསིཀལཱབྷཝིསཡེཏི ཨཏྠོ.

ཝཏྠུ པནཱཏི ཏཏྲུཔྤཱདེ ཨུཔྤནྣརཱུཔིཡཾ, ཏཉྩ ‘‘ཏཏོ ཙཏུཔཙྩཡཾ པརིབྷུཉྫཐཱ’’ཏི དིནྣཁེཏྟཱདིཏོ ཨུཔྤནྣཏྟཱ ཀཔྤིཡཀཱརཀཱནཾ ཧཏྠེ ‘‘ཀཔྤིཡབྷཎྜཾ པརིབྷུཉྫཐཱ’’ཏི དཱཡཀེཧི དིནྣཝཏྠུསདིསཾ ཧོཏཱིཏི ཨཱཧ ‘‘ཀཔྤིཡཀཱརཀཱནཾ ཧཱི’’ཏིཨཱདི.

སངྒྷསུཊྛུཏཱཡཱཏི སངྒྷསྶ ཧིཏཱཡ. པུགྒལཝསེནཱཏི ‘‘བྷིཀྑཱུ ཙཱིཝརེན ཀིལམནྟཱི’’ཏི ཨེཝཾ པུགྒལཔརཱམཱསཝསེན, ན ‘‘སངྒྷོ ཀིལམཏཱི’’ཏི ཨེཝཾ སངྒྷཔརཱམཱསཝསེན.

‘‘ཀཔྤིཡབྷཎྜཝསེནཱ’’ཏི སཱམཉྙཏོ ཝུཏྟམེཝཏྠཾ ཝིབྷཱཝེཏུཾ ‘‘ཙཱིཝརཏཎྜུལཱདིཝསེནེཝ ཙཱ’’ཏི ཝུཏྟཾ. ཙ-ཀཱརོ ཙེཏྠ པན-སདྡཏྠེ ཝཏྟཏི, ན སམུཙྩཡཏྠེཏི དཊྛབྦཾ. པུགྒལཝསེནེཝ, ཀཔྤིཡབྷཎྜཝསེན ཙ ཨཔལོཀནཔྤཀཱརཾ དསྶེཏུཾ ‘‘ཏཾ པན ཨེཝཾ ཀཏྟབྦ’’ནྟིཨཱདི ཝུཏྟཾ.

ཙཱིཝརཔཙྩཡཾ སལླཀྑེཏྭཱཏི སདྡྷཱདེཡྻཏཏྲུཔྤཱདཱདིཝསེན ཏསྨིཾ ཝསྶཱཝཱསེ ལབྦྷམཱནཾ ཙཱིཝརསངྑཱཏཾ པཙྩཡཾ ‘‘ཨེཏྟཀ’’ནྟི པརིཙྪིནྡིཏྭཱ. སེནཱསནསྶཱཏི སེནཱསནགྒཱཧཱཔནསྶ. ‘‘ནཝཀོ ཝུཌྜྷཏརསྶ, ཝུཌྜྷོ ཙ ¶ ནཝཀསྶཱ’’ཏི ཨིདཾ སེནཱསནགྒཱཧསྶ ཨཏྟནཱཝ ཨཏྟནོ གཧཎཾ ཨསཱརུཔྤནྟི ཝུཏྟཾ, དྭེ ཨཉྙམཉྙཾ གཱཧེསྶནྟཱིཏི ཨདྷིཔྤཱཡོ. ཨཊྛཔི སོལ༹སཔི ཛནེ སམྨནྣིཏུཾ ཝཊྚཏཱིཏི ཨེཀཀམྨཝཱཙཱཡ སབྦེཔི ཨེཀཏོ སམྨནྣིཏུཾ ཝཊྚཏི. ནིགྒཧཀམྨམེཝ ཧི སངྒྷོ སངྒྷསྶ ན ཀརོཏི. ཏེནེཝ སཏྟསཏིཀཀྑནྡྷཀེ ‘‘ཨུབྦཱཧིཀཀམྨསམྨུཏིཡཾ ཨཊྛཔི ཛནཱ ཨེཀཏོཝ སམྨཏཱཏི.

ཨཱསནགྷརནྟི ¶ པཊིམཱགྷརཾ. མགྒོཏི ཨུཔཙཱརསཱིམབྦྷནྟརགཏེ གཱམཱབྷིམུཁམགྒེ ཀཏསཱལཱ ཝུཙྩཏི. ཨེཝཾ པོཀྑརཎཱིརུཀྑམཱུལཱདཱིསུཔི.

ལབྷནྟཱིཏི ཏཏྲཝཱསིནོ བྷིཀྑཱུ ལབྷནྟི. ཝིཛཊེཏྭཱཏི ‘‘ཨེཀེཀསྶ པཧོནཀཔྤམཱཎེན ཝིཡོཛེཏྭཱ. ཨཱཝཱསེསུ པཀྑིཔིཏྭཱཏི ‘‘ཨིཏོ ཨུཔྤནྣཾ ཨསུཀསྨིཾ ཨསུཀསྨིཉྩ ཨཱཝཱསེ ཝསནྟཱ པཱཔེཏྭཱ གཎྷནྟཱུ’’ཏི ཝཱཙཱཡ ཨུཔསཾཧརིཏྭཱ. པཝིསིཏབྦནྟི མཧཱལཱབྷེ པརིཝེཎེ ཝསིཏྭཱཝ ལཱབྷོ གཧེཏབྦོཏི ཨདྷིཔྤཱཡོ.

ཨཡམྤཱིཏི ཨེཏྠ ཡོ པཾསུཀཱུལིཀོ པཙྩཡཾ ཝིསྶཛྫེཏི. ཏེནེཝ ཝིསྶཊྛོ ཨཡཾ ཙཱིཝརཔཙྩཡོཔཱིཏི ཡོཛནཱ. པཱདམཱུལེ ཋཔེཏྭཱ སཱཊཀཾ དེནྟཱིཏི པཙྩཡདཱཡཀཱ དེནྟི. ཨེཏེན གཧཊྛེཧི པཱདམཱུལེ ཋཔེཏྭཱ དིནྣམྤི པཾསུཀཱུལིཀཱནམྤི ཝཊྚཏཱིཏི དསྶེཏི. ཨཐ ཝསྶཱཝཱསིཀཾ དེམཱཏི ཝདནྟཱིཏི ཨེཏྠ པཾསུཀཱུལིཀཱནཾ ན ཝཊྚཏཱིཏི ཨཛ྄ཛྷཱཧརིཏྭཱ ཡོཛེཏབྦཾ. ཝསྶཾཝུཏྠབྷིཀྑཱུནནྟི པཾསུཀཱུལིཀཏོ ཨཉྙེསཾ བྷིཀྑཱུནཾ.

ཨུཔནིབནྡྷིཏྭཱ གཱཧཱཔེཏབྦནྟི ཨིདྷ རུཀྑཱདཱིསུ ཝསིཏྭཱ ཙཱིཝརཾ གཎྷཐཱཏི པཊིབནྡྷཾ ཀཏྭཱ གཱཧེཏབྦཾ.

པཱཊིཔདཨརུཎཏོཏིཨཱདི ཝསྶཱུཔནཱཡིཀདིཝསཾ སནྡྷཱཡ ཝུཏྟཾ. ཨནྟརཱམུཏྟཀཾ པན པཱཊིཔདཾ ཨཏིཀྐམིཏྭཱཔི གཱཧེཏུཾ ཝཊྚཏི. ནིབདྡྷཝཏྟཾ ཋཔེཏྭཱཏི སཛ྄ཛྷཱཡམནསིཀཱརཱདཱིསུ ནིརནྟརཀརཎཱིཡེསུ ཀཏྟབྦཾ ཀཏིཀཝཏྟཾ ཀཏྭཱ. ཀསཱཝཔརིབྷཎྜནྟི ཀསཱཝརསེཧི བྷཱུམིཔརིཀམྨཾ.

ཏིཝིདྷམྤཱིཏི པརིཡཏྟིཔཊིཔཏྟིཔཊིཝེདྷཝསེན ཏིཝིདྷམྤི. སོདྷེཏྭཱཏི ཨཱཙཱརཱདཱིསུ ཨུཔཔརིཀྑིཏྭཱ. ཨེཀཙཱརིཀཝཏྟནྟི བྷཱཝནཱཀམྨཾ. ཏཉྷི གཎསངྒཎིཀཾ པཧཱཡ ཨེཀཙཱརིཀེནེཝ ཝཏྟིཏབྦཏྟཱ ཨེཝཾ ཝུཏྟཾ. དསཝཏྠུཀཀཐཱ ¶ ནཱམ ཨཔྤིཙྪཀཐཱ, སནྟུཊྛི, པཝིཝེཀ, ཨསཾསགྒ, ཝཱིརིཡཱརམྦྷ, སཱིལ, སམཱདྷི, པཉྙཱ, ཝིམུཏྟི, ཝིམུཏྟིཉཱཎདསྶནཀཐཱཏི ཨིམཱ དས.

དནྟཀཊྛཁཱདནཝཏྟནྟི དནྟཀཊྛམཱལ༹ཀེ ནིཀྑིཏྟེསུ དནྟཀཊྛེསུ ‘‘དིཝསེ དིཝསེ ཨེཀམེཝ དནྟཀཊྛཾ གཧེཏབྦ’’ནྟིཨཱདིནཱ (པཱརཱ. ཨཊྛ. ༡.༡༠༩) ཨདིནྣཱདཱནེ དནྟཔོནཀཐཱཡཾ ཝུཏྟཾ ཝཏྟཾ. པཏྟཾ ཝཱ…པེ… ན ཀཐེཏབྦནྟི པཏྟགུཏྟཏྠཱཡ ཝུཏྟཾ. ཝིསབྷཱགཀཐཱཏི ཏིརཙྪཱནཀཐཱ. ཁནྡྷཀཝཏྟནྟི ¶ ཝཏྟཀྑནྡྷཀེ (ཙཱུལ༹ཝ. ༣༦༥) ཨཱགཏཾ པིཎྜཙཱརིཀཝཏྟཏོ ཨཝསིཊྛཝཏྟཾ ཏསྶ ‘‘བྷིཀྑཱཙཱརཝཏྟ’’ནྟི ཝིསུཾ གཧིཏཏྟཱ.

ཨིདཱནི ཡཾ དཱཡཀཱ པཙྪིམཝསྶཾཝུཏྠཱནཾ ཝསྶཱཝཱསིཀཾ དེནྟི, ཏཏྠ པཊིཔཛྫནཝིདྷིཾ དསྶེཏུཾ ‘‘པཙྪིམཝསྶཱུཔནཱཡིཀདིཝསེ པནཱ’’ཏི ཨཱརདྡྷཾ. ཨཱགནྟུཀོ སཙེ བྷིཀྑཱུཏི ཙཱིཝརེ གཱཧིཏེ པཙྪཱ ཨཱགཏོ ཨཱགནྟུཀོ བྷིཀྑུ. པཏྟཊྛཱནེཏི ཝསྶགྒེན པཏྟཊྛཱནེ. པཋམཝསྶཱུཔགཏཱཏི ཨཱགནྟུཀསྶ ཨཱགམནཏོ པུརེཏརམེཝ པཙྪིམིཀཱཡ ཝསྶཱུཔནཱཡིཀཱཡ ཝསྶཱུཔགཏཱ. ལདྡྷཾ ལདྡྷནྟི པུནཔྤུནཾ དཱཡཀཱནཾ སནྟིཀཱ ཨཱགཏཱགཏསཱཊཀཾ.

ནེཝ ཝསྶཱཝཱསིཀསྶ སཱམིནོཏི ཚིནྣཝསྶཏྟཱ ཝུཏྟཾ. པཋམམེཝ ཀཏིཀཱཡ ཀཏཏྟཱ ‘‘ནེཝ ཨདཱཏུཾ ལབྷནྟཱི’’ཏི ཝུཏྟཾ, དཱཏབྦཾ ཝཱརེནྟཱནཾ གཱིཝཱ ཧོཏཱིཏི ཨདྷིཔྤཱཡོ. ཏེསམེཝ དཱཏབྦནྟི ཝསྶཱུཔགཏེསུ ཨལདྡྷཝསྶཱཝཱསིཀཱནཾ ཨེཀཙྩཱནམེཝ དཱཏབྦཾ.

བྷཏིནིཝིཊྛནྟི པཱནཱིཡུཔཊྛཱནཱདིབྷཏིཾ ཀཏྭཱ ལདྡྷཾ. སངྒྷིཀཾ པནཱཏིཨཱདི ཀེསཉྩི ཝཱདདསྶནཾ. ཏཏྠ ཨཔལོཀནཀམྨཾ ཀཏྭཱ གཱཧིཏནྟི ‘‘ཚིནྣཝསྶཱནཾ ཝསྶཱཝཱསིཀཉྩ ཨིདཱནི ཨུཔྤཛྫནཀཝསྶཱཝཱསིཀཉྩ ཨིམེསཾ དཱཏུཾ རུཙྩཏཱི’’ཏི ཨནནྟརེ ཝུཏྟནཡེན ཨཔལོཀནཾ ཀཏྭཱ གཱཧིཏཾ སངྒྷེན དིནྣཏྟཱ ཝིབྦྷནྟོཔི ལབྷཏི. པགེཝ ཚིནྣཝསྶོ. པཙྩཡཝསེན གཱཧིཏཾ པན ཏེམཱསཾ ཝསིཏྭཱ གཧེཏུཾ ཨཏྟནཱ, དཱཡཀེཧི ཙ ཨནུམཏཏྟཱ བྷཏིནིཝིཊྛམྤི ཚིནྣཝསྶོཔི ཝིབྦྷནྟོཔི ན ལབྷཏཱིཏི ཀེཙི ཨཱཙརིཡཱ ཝདནྟི. ཨིདཉྩ པཙྪཱ ཝུཏྟཏྟཱ པམཱཎཾ. ཏེནེཝ ཝསྶཱུཔནཱཡིཀདིཝསེ ཨེཝ དཱཡཀེཧི དིནྣཝསྶཱཝཱསིཀཾ གཧིཏབྷིཀྑུནོ ཝསྶཙྪེདཾ ཨཀཏྭཱ ཝཱསོཝ ཧེཊྛཱ ཝིཧིཏོ, ན པཱནཱིཡུཔཊྛཱནཱདིབྷཏིཀརཎཝཏྟཾ. ཡདི ཧི ཏཾ ¶ ནིཝིཊྛམེཝ སིཡཱ, བྷཏིཀརཎམེཝ ཝིདྷཱཏབྦཾ. ཏསྨཱ ཝསྶགྒེན གཱཧིཏཾ ཚིནྣཝསྶཱདཡོ ན ལབྷནྟཱིཏི ཝེདིཏབྦཾ.

‘‘སངྒྷིཀཾ ཧོཏཱི’’ཏི ཨེཏེན ཝུཏྠཝསྶཱནམྤི ཝསྶཱཝཱསིཀབྷཱགོ སངྒྷིཀཏོ ཨམོཙིཏོ ཏེསཾ ཝིབྦྷམེན སངྒྷིཀོ ཧོཏཱིཏི དསྶེཏི. ལབྷཏཱིཏི ‘‘མམ པཏྟབྷཱགཾ ཨེཏསྶ དེཐཱ’’ཏི དཱཡཀེ སམྤཊིཙྪཱཔེནྟེནེཝ སངྒྷིཀཏོ ཝིཡོཛིཏཾ ཧོཏཱིཏི ཝུཏྟཾ.

ཝརབྷཱགཾ སཱམཎེརསྶཱཏི ཏསྶ པཋམགཱཧཏྟཱ, ཐེརེན པུབྦེ པཋམབྷཱགསྶ གཧིཏཏྟཱ, ཨིདཱནི གཡ྄ཧམཱནསྶ དུཏིཡབྷཱགཏྟཱ ཙ ཝུཏྟཾ.

སེནཱསནགྒཱཧཀཐཱཝཎྞནཱ ནིཊྛིཏཱ.

ཨུཔནནྡཝཏྠུཀཐཱཝཎྞནཱ

༣༡༩. པཱལི༹ཡཾ ¶ ཨུབྷཡཏྠ པརིབཱཧིརོཏི ཀམེན ཨུབྷཡསྶཔི མུཏྟཏྟཱ ཝུཏྟཾ, ན སབྦཐཱ ཨུབྷཡཏོ པརིབཱཧིརཏྟཱ. ཏེནཱཧ ‘‘པཙྪིམེ…པེ… ཏིཊྛཏཱི’’ཏི.

༣༢༠. ཡཾ ཏིཎྞཾ པཧོཏཱིཏི མཉྩཔཱིཋཝིནིམུཏྟཾ ཡཾ ཨཱསནཾ ཏིཎྞཾ སུཁཾ ནིསཱིདིཏུཾ པཧོཏི, ཨིདཾ པཙྪིམདཱིགྷཱསནཾ. ཨེཏྠ མཉྩཔཱིཋརཧིཏེསུ ཨསམཱནཱསནིཀཱཔི ཏཡོ ནིསཱིདིཏུཾ ལབྷནྟི. མཉྩཔཱིཋེསུ པན དྭེ. ཨདཱིགྷཱསནེསུ མཉྩཔཱིཋེསུ སམཱནཱསནིཀཱ ཨེཝ དྭེ ནིསཱིདིཏུཾ ལབྷནྟི དུཝགྒསྶེཝ ཨནུཉྙཱཏཏྟཱ.

ཧཏྠིནཁོ ཧེཊྛཱབྷཱགེ ཨེཏསྶ ཨཏྠཱིཏི ཧཏྠིནཁོ, པཱསཱདོ. པཱསཱདསྶ ནཁོ ནཱམ ཧེཊྛིམབྷཱགོ པཱདནཁསདིསཏྟཱ, སོ སབྦདིསཱསུ ཨནེཀེཧི ཧཏྠིརཱུཔེཧི སམལངྐཏོ ཋིཏོ. ཏསྶཱུཔརི ཀཏོ པཱསཱདོ ཧཏྠིཀུམྦྷེ པཏིཊྛིཏོ ཝིཡ ཧོཏཱིཏི ཨཱཧ ‘‘ཧཏྠིཀུམྦྷེ པཏིཊྛིཏ’’ནྟི. སུཝཎྞརཛཏཱདིཝིཙིཏྲཱནཱིཏི སངྒྷིཀསེནཱསནཾ སནྡྷཱཡ ཝུཏྟཾ. པུགྒལིཀཾ པན སུཝཎྞཱདིཝིཙིཏྲཾ བྷིཀྑུསྶ སམྤཊིཙྪིཏུམེཝ ན ཝཊྚཏི ‘‘ན ཀེནཙི པརིཡཱཡེན ཛཱཏརཱུཔརཛཏཾ སཱདིཏབྦ’’ནྟི (མཧཱཝ. ༢༩༩) ཝུཏྟཏྟཱ. ཏེནེཝེཏྠ ཨཊྛཀཐཱཡཾ ‘‘སངྒྷིཀཝིཧཱརེ ཝཱ པུགྒལིཀཝིཧཱརེ ཝཱ’’ཏི ན ¶ ཝུཏྟཾ, གོནཀཱདིཨཀཔྤིཡབྷཎྜཝིསཡེ ཨེཝ ཝུཏྟཾ ཨེཀབྷིཀྑུསྶཱཔི ཏེསཾ གཧཎེ དོསཱབྷཱཝཱ. གིཧིཝིཀཊནཱིཧཱརེནཱཏི གིཧཱིཧི ཀཏནཱིཧཱརེན, གིཧཱིཧི ཨཏྟནོ སནྟཀཾ ཨཏྠརིཏྭཱ དིནྣནིཡཱམེནཱཏི ཨཏྠོ. ལབྦྷནྟཱིཏི ནིསཱིདིཏུཾ ལབྦྷནྟི.

ཨུཔནནྡཝཏྠུཀཐཱཝཎྞནཱ ནིཊྛིཏཱ.

ཨཝིསྶཛྫིཡཝཏྠུཀཐཱཝཎྞནཱ

༣༢༡. ཨརཉྫརོཏི བཧུཨུདཀགཎྷནིཀཱ མཧཱཙཱཊི, ཛལཾ གཎྷིཏུམལནྟི ཨརཉྫརོ.

ཐཱཝརེན ཙ ཐཱཝརནྟིཨཱདཱིསུ པཉྩསུ ཀོཊྛཱསེསུ པུརིམདྭཡཾ ཐཱཝརཾ, པཙྪིམཏྟཡཾ གརུབྷཎྜནྟི ཝེདིཏབྦཾ. སམཀམེཝ དེཏཱིཏི ཨེཏྠ ཨཱུནཀཾ དེནྟམྤི ཝིཧཱརཝཏྠུསཱམནྟཾ གཧེཏྭཱ དཱུརཏརཾ དུཀྑགོཔཾ ཝིསྶཛྫེཏུཾ ཝཊྚཏཱིཏི དཊྛབྦཾ. ཝཀྑཏི ཧི ‘‘བྷིཀྑཱུནཾ ཙེ མཧགྒྷཏརཾ…པེ… སམྤཊིཙྪིཏུཾ ཝཊྚཏཱི’’ཏི (ཙཱུལ༹ཝ. ཨཊྛ. ༣༢༡). ཛཱནཱཔེཏྭཱཏི བྷིཀྑུསངྒྷསྶ ¶ ཛཱནཱཔེཏྭཱ, ཨཔལོཀེཏྭཱཏི ཨཏྠོ. ‘‘ནནུ ཏུམྷཱཀཾ བཧུཏརཱ རུཀྑཱཏི ཝཏྟབྦ’’ནྟི ཨིདཾ སཱམིཀེསུ ཨཏྟནོ བྷཎྜསྶ མཧགྒྷཏཾ ཨཛཱནིཏྭཱ དེནྟེསུ ཏཾ ཉཏྭཱ ཐེཡྻཙིཏྟེན གཎྷཏོ ཨཝཧཱརོ ཧོཏཱིཏི ཝུཏྟཾ.

ཝིཧཱརེན ཝིཧཱརོ པརིཝཏྟེཏབྦོཏི སཝཏྠུཀེན ཨཉྙེསཾ བྷཱུམིཡཾ ཀཏཔཱསཱདཱདིནཱ, ཨཝཏྠུཀེན ཝཱ སཝཏྠུཀཾ པརིཝཏྟེཏབྦཾ. ཨཝཏྠུཀཾ པན ཨཝཏྠུཀེནེཝ པརིཝཏྟེཏབྦཾ. ཀེཝལཾ པཱསཱདསྶ བྷཱུམིཏོ ཨཐཱཝརཏྟཱ. ཨེཝཾ ཐཱཝརེསུཔི ཐཱཝརཝིབྷཱགཾ ཉཏྭཱཝ པརིཝཏྟེཏབྦཾ.

‘‘ཀཔྤིཡམཉྩཱ སམྤཊིཙྪིཏབྦཱ’’ཏི ཨིམིནཱ སུཝཎྞཱདིཝིཙིཏྟཾ ཨཀཔྤིཡམཉྩཾ ‘‘སངྒྷསྶཱ’’ཏི ཝུཏྟེཔི སམྤཊིཙྪིཏུཾ ན ཝཊྚཏཱིཏི དསྶེཏི. ‘‘ཝིཧཱརསྶ དེམཱ’’ཏི ཝུཏྟེ སངྒྷསྶ ཝཊྚཏི, ན པུགྒལསྶ ཁེཏྟཱདི ཝིཡཱཏི དཊྛབྦཾ. ཨེཏེསཱུཏི མཉྩཱདཱིསུ. ཀཔྤིཡཱཀཔྤིཡཾ ཝུཏྟནཡམེཝཱཏི ཨཱསནྡཱིཏཱུལིཀཱདིཝིནིཙྪཡེསུ ཝུཏྟནཡམེཝ. ཨཀཔྤིཡཾ ཝཱཏི ཨཱསནྡཱིཨཱདི, པམཱཎཱཏིཀྐནྟཾ ¶ བིམྦོཧནཱདི ཙ. མཧགྒྷཾ ཀཔྤིཡཾ ཝཱཏི སུཝཎྞཱདིཝིཙིཏྟཾ ཀཔྤིཡཝོཧཱརེན དིནྣཾ.

‘‘ཀཱལ༹ལོཧ…པེ… བྷཱཛེཏབྦོ’’ཏི ཝུཏྟཏྟཱ ཝཊྚཀཾསལོཧམཡམྤི བྷཱཛནཾ པུགྒལིཀམྤི སམྤཊིཙྪིཏུམྤི པརིཧརིཏུམྤི ཝཊྚཏི པུགྒལཔརིཧརིཏབྦསྶེཝ བྷཱཛེཏབྦཏྟཱཏི ཝདནྟི. ཏཾ ཨུཔརི ‘‘ཀཾསལོཧཝཊྚལོཧབྷཱཛནཝིཀཏི སངྒྷིཀཔརིབྷོགེན ཝཱ གིཧིཝིཀཊཱ ཝཱ ཝཊྚཏཱི’’ཏིཨཱདིཀེན མཧཱཔཙྩརིཝཙནེན ཝིརུཛ྄ཛྷཏི. ཨིམསྶ ཧི ‘‘ཝཊྚལོཧཀཾསལོཧཱནཾ ཡེན ཀེནཙི ཀཏོ སཱིཧལ༹དཱིཔེ པཱདགྒཎྷནཀོ བྷཱཛེཏབྦོ’’ཏི ཝུཏྟསྶ མཧཱཨཊྛཀཐཱཝཙནསྶ པཊིཀྑེཔཱཡ ཏཾ མཧཱཔཙྩརིཝཙནཾ པཙྪཱ དསྶིཏཾ. ཏསྨཱ ཝཊྚལོཧཀཾསལོཧམཡཾ ཡཾ ཀིཉྩི པཱདགྒཎྷནཀཝཱརཀམྤི ཨུཔཱདཱཡ ཨབྷཱཛནཱིཡམེཝ. གིཧཱིཧི དིཡྻམཱནམྤི པུགྒལསྶ སམྤཊིཙྪིཏུམྤི ན ཝཊྚཏི. པཱརིཧཱརིཡཾ ན ཝཊྚཏཱིཏི པཏྟཱདིཔརིཀྑཱརཾ ཝིཡ སཡམེཝ པཊིསཱམེཏྭཱ པརིབྷུཉྫིཏུཾ ན ཝཊྚཏི. གིཧིསནྟཀཾ ཝིཡ ཨཱརཱམིཀཱདཡོ ཙེ སཡམེཝ གོཔེཏྭཱ ཝིནིཡོགཀཱལེ ཨཱནེཏྭཱ པཊིནེནྟི, པརིབྷུཉྫིཏུཾ ཝཊྚཏི. ‘‘པཊིསཱམེཏྭཱ བྷིཀྑཱུནཾ དེཐཱ’’ཏི ཝཏྟུམྤི ཝཊྚཏི.

པཎྞསཱུཙི ནཱམ ལེཁནཱིཏི ཝདནྟི. ‘‘ཨཏྟནཱ ལདྡྷཱནིཔཱི’’ཏིཨཱདིནཱ པཊིགྒཧཎེ དོསོ ནཏྠི, པརིཧརིཏྭཱ པརིབྷོགོཝ ཨཱཔཏྟིཀརོཏི དསྶེཏི. ཡཐཱ ཙེཏྠ, ཨེཝཾ ཨུཔརི ཨབྷཱཛནཱིཡཝཱསིཨཱདཱིསུ ཨཏྟནོ སནྟཀེསུཔི.

ཨནཱམཱསམྤཱིཏི ¶ སུཝཎྞཱདིམཡམྤི སབྦཾ ཏཾ ཨཱམསིཏྭཱཔི པརིབྷུཉྫིཏུཾ ཝཊྚཏི. ཨུཔཀྑརེཏི ཨུཔཀརཎེ. ཨཌྜྷབཱཧུཔྤམཱཎཱ ནཱམ ཨཌྜྷབཱཧུམཏྟཱ. ཨཌྜྷབྱཱམམཏྟཱཏིཔི ཝདནྟི. ཡོཏྟཱནཱིཏི ཙམྨརཛྫུཀཱ.

ཨཊྛངྒུལསཱུཙིདཎྜམཏྟོཔཱིཏི ཏསརདཎྜཱདིསཱུཙིཨཱཀཱརཏནུདཎྜཀམཏྟོཔི. རིཏྟཔོཏྠཀོཔཱིཏི ཨལིཁིཏཔོཏྠཀོ. ཨིདཉྩ པཎྞཔྤསངྒེན ཝུཏྟཾ.

‘‘གྷཊྚནཕལཀཾ གྷཊྚནམུགྒརོ’’ཏི ཨིདཾ རཛིཏཙཱིཝརཾ ཨེཀསྨིཾ མཊྛེ དཎྜམུགྒརེ ཝེཋེཏྭཱ ཨེཀསྶ མཊྛཕལཀསྶ ཨུཔརི ཋཔེཏྭཱ ཨུཔརི ཨཔརེན མཊྛཕལཀེན ནིཀུཛྫིཏྭཱ ཨེཀོ ཨུཔརི ཨཀྐམིཏྭཱ ཏིཊྛཏི. དྭེ ཛནཱ ཨུཔརི ཕལཀཾ དྭཱིསུ ཀོཊཱིསུ གཧེཏྭཱ ཨཔརཱཔརཾ ཨཱཀཌྜྷནཝིཀཌྜྷནཾ ཀརོནྟི, ཨེཏཾ སནྡྷཱཡ ཝུཏྟཾ. ཧཏྠེ ཋཔཱཔེཏྭཱ ཧཏྠེན པཧརཎཾ པན ¶ ནིཊྛིཏརཛནསྶ ཙཱིཝརསྶ ཨལླཀཱལེ ཀཱཏབྦཾ. ཨིདཾ པན ཕལཀམུགྒརེཧི གྷཊྚནཾ སུཀྑཀཱལེ ཐདྡྷབྷཱཝཝིམོཙནཏྠནྟི དཊྛབྦཾ. ཨམྦཎནྟི ཨེཀདོཎིཀནཱཝཱཕལཀེཧི པོཀྑརཎཱིསདིསཾ ཀཏཾ. པཱནཱིཡབྷཱཛནནྟིཔི ཝདནྟི. རཛནདོཎཱིཏི ཨེཀདཱརུནཱཝ ཀཏཾ རཛནབྷཱཛནཾ. ཨུདཀདོཎཱིཔི ཨེཀདཱརུནཱཝ ཀཏཾ ཨུདཀབྷཱཛནཾ.

བྷཱུམཏྠརཎཾ ཀཱཏུཾ ཝཊྚཏཱིཏི ཨཀཔྤིཡཙམྨཾ སནྡྷཱཡ ཝུཏྟཾ. ཏཏྠ བྷཱུམཏྠརཎསངྑེཔེན སཡིཏུམྤི ཝཊྚཏིཡེཝ. ‘‘པཙྩཏྠརཎགཏིཀ’’ནྟི ཨིམིནཱ མཉྩཱདཱིསུ ཨཏྠརིཏབྦཾ མཧཱཙམྨཾ ཨེལ༹ཀཙམྨཾ ནཱམཱཏི དསྶེཏི.

ཚཏྟམུཊྛིཔཎྞནྟི ཏཱལཔཎྞཾ སནྡྷཱཡ ཝུཏྟཾ. པཏྟཀཊཱཧནྟི པཏྟཔཙནཀཊཱཧཾ.

ཨཝིསྶཛྫིཡཝཏྠུཀཐཱཝཎྞནཱ ནིཊྛིཏཱ.

ནཝཀམྨདཱནཀཐཱཝཎྞནཱ

༣༢༣. པཱལི༹ཡཾ པིཎྜནིཀྑེཔནམཏྟེནཱཏིཨཱདཱིསུ ཁཎྜཕུལླཊྛཱནེ མཏྟིཀཱཔིཎྜཊྛཔནཾ པིཎྜནིཀྑེཔནཾ ནཱམ. ནཝཀམྨནྟི ནཝཀམྨསམྨུཏི. ཨགྒལ༹ཝཊྚི ནཱམ ཀཝཱཊབནྡྷོ. ཚཱདནཾ ནཱམ ཏིཎཱདཱིཧི གེཧཙྪཱདནཾ. བནྡྷནཾ ནཱམ དཎྜཝལླིཨཱདཱིཧི ཚདནབནྡྷནམེཝ. ཙཏུཧཏྠཝིཧཱརེཏི ཝིཏྠཱརཔྤམཱཎཏོ ཝུཏྟཾ. ཨུབྦེདྷཏོ པན ཨནེཀབྷཱུམཀཏྟཱ ཝཌྜྷཀཱིཧཏྠེན ཝཱིསཏིཧཏྠོཔི ¶ ནཱནཱསཎྛཱནཝིཙིཏྟོཔི ཧོཏི. ཏེནསྶ ཙཏུཝསྶིཀཾ ནཝཀམྨཾ ཝུཏྟཾ. ཨེཝཾ སེསེསུཔི.

པཱལི༹ཡཾ སབྦེ ཝིཧཱརེཏི བྷུམྨཏྠེ ཨུཔཡོགབཧུཝཙནཾ. ཨེཀསྶ སབྦེསུ ཝིཧཱརེསུ ནཝཀམྨཾ དེཏཱིཏི ཨཏྠོ. སབྦཀཱལཾ པཊིབཱཧནྟཱིཏི ནཝཀམྨིཀཱ ཨཏྟནོ གཱཧིཏཾ ཝརསེཡྻཾ སམྤཏྟཱནཾ ཡཐཱཝུཌྜྷཾ ཨཀཏྭཱ ཨུཏུཀཱལེཔི པཊིབཱཧནྟི.

‘‘སཙེ སོ ཨཱཝཱསོ ཛཱིརཏཱི’’ཏིཨཱདི པཱལི༹མུཏྟཀཝིནིཙྪཡོ. མཉྩཊྛཱནཾ དཏྭཱཏི མཉྩཊྛཱནཾ པུགྒལིཀཾ དཏྭཱ. ཏིབྷཱགནྟི ཏཏིཡབྷཱགཾ. ཨེཝཾ ཝིསྶཛྫནམྤི ཐཱཝརེན ཐཱཝརཔརིཝཏྟནཊྛཱནེ ཨེཝ པཝིསཏི, ན ཨིཏརཐཱ སབྦསེནཱསནཱནཾ ¶ ཝིནསྶནཏོ. སཙེ སདྡྷིཝིཧཱརིཀཱནཾ དཱཏུཀཱམོ ཧོཏཱིཏི སཙེ སོ སངྒྷསྶ བྷཎྜཀཊྛཔནཊྛཱནཾ ཝཱ ཨཉྙེསཾ བྷིཀྑཱུནཾ ཝསནཊྛཱནཾ ཝཱ དཱཏུཾ ན ཨིཙྪཏི, ཨཏྟནོ སདྡྷིཝིཧཱརིཀཱནཉྙེཝ དཱཏུཀཱམོ ཧོཏི, ཏཱདིསསྶ ཏུཡ྄ཧཾ པུགྒལིཀམེཝ ཀཏྭཱ ཛགྒཱཏི ན སབྦཾ ཏསྶ དཱཏབྦནྟི ཨདྷིཔྤཱཡོ. ཏཏྠ པན ཀཏྟབྦཝིདྷིཾ དསྶེནྟོ ཨཱཧ ‘‘ཀམྨ’’ནྟིཨཱདི. ཨེཝཉྷཱིཏིཨཱདིམྷི ཝཡཱནུརཱུཔཾ ཏཏིཡབྷཱགེ ཝཱ ཨུཔཌྜྷབྷཱགེ ཝཱ གཧིཏེ ཏཾ བྷཱགཾ དཱཏུཾ ལབྷཏཱིཏི ཨཏྠོ.

ཡེནཱཏི ཏེསུ དྭཱིསུ བྷིཀྑཱུསུ ཡེན. སོ སཱམཱིཏི ཏསྶཱ བྷཱུམིཡཱ ཝིཧཱརཀརཎེ སོཝ སཱམཱི, ཏཾ པཊིབཱཧིཏྭཱ ཨིཏརེན ན ཀཱཏབྦནྟི ཨདྷིཔྤཱཡོ. སོ ཧི པཋམཾ གཧིཏོ. ཨཀཏཊྛཱནེཏི ཙཡཱདཱིནཾ ཨཀཏཔུབྦཊྛཱནེ. ཙཡཾ ཝཱ པམུཁཾ ཝཱཏི སངྒྷིཀསེནཱསནཾ ནིསྶཱཡ ཏཏོ བཧི ཙཡཾ བནྡྷིཏྭཱ, ཨེཀཾ སེནཱསནཾ ཝཱ. བཧིཀུཊྚེཏི ཀུཊྚཏོ བཧི, ཨཏྟནོ ཀཏཊྛཱནེཏི ཨཏྠོ.

ནཝཀམྨདཱནཀཐཱཝཎྞནཱ ནིཊྛིཏཱ.

ཨཉྙཏྲཔརིབྷོགཔཊིཀྑེཔཱདིཀཐཱཝཎྞནཱ

༣༢༤. ཝཌྜྷིཀམྨཏྠཱཡཱཏི ཡཐཱ ཏམྨཱུལགྒྷཏོ ན པརིཧཱཡཏི, ཨེཝཾ ཀཏྟབྦསྶ ཨེཝཾ ནིཔྥཱདེཏབྦསྶ མཉྩཔཱིཋཱདིནོ ཨཏྠཱཡ.

ཙཀྐལིཀནྟི པཱདཔུཉྪནཏྠཾ ཙཀྐཱཀཱརེན ཀཏཾ. པརིབྷཎྜཀཏབྷཱུམི ཝཱཏི ཀཱལ༹ཝཎྞཱདིཀཏསཎྷབྷཱུམི ཝཱ. སེནཱསནཾ ཝཱཏི མཉྩཔཱིཋཱདི ཝཱ.

‘‘ཏཐེཝ ¶ ཝལ༹ཉྫེཏུཾ ཝཊྚཏཱི’’ཏི ཨིམིནཱ ནེཝཱསིཀེཧི དྷོཏཔཱདཱདཱིཧི ཝལ༹ཉྫནཊྛཱནེ སཉྩིཙྩ ཨདྷོཏཔཱདཱདཱིཧི ཝལ༹ཉྫནྟསྶེཝ ཨཱཔཏྟི པཉྙཏྟཱཏི དསྶེཏི.

‘‘དྭཱརམྤཱི’’ཏིཨཱདིནཱ སཱམཉྙཏོ ཝུཏྟཏྟཱ དྭཱརཝཱཏཔཱནཱདཡོ ཨཔརིཀམྨཀཏཱཔི ན ཨཔསྶཡིཏབྦཱ. ཨཛཱནིཏྭཱ ཨཔསྶཡནྟསྶཔི ཨིདྷ ལོམགཎནཱཡ ཨཱཔཏྟི.

ཨཉྙཏྲཔརིབྷོགཔཊིཀྑེཔཱདིཀཐཱཝཎྞནཱ ནིཊྛིཏཱ.

སངྒྷབྷཏྟཱདིཨནུཛཱནནཀཐཱཝཎྞནཱ

༣༢༥. ཨུདྡེསབྷཏྟཾ ¶ ནིམནྟནནྟི ཨིམཾ ཝོཧཱརཾ པཏྟཱནཱིཏི ཨེཏྠ ཨིཏི-སདྡོ ཨཱདིཨཏྠོ, ཨུདྡེསབྷཏྟཾ ནིམནྟནནྟིཨཱདིཝོཧཱརཾ པཏྟཱནཱིཏི ཨཏྠོ. ཏམྤཱིཏི སངྒྷབྷཏྟམྤི.

སངྒྷབྷཏྟཱདིཨནུཛཱནནཀཐཱཝཎྞནཱ ནིཊྛིཏཱ.

ཨུདྡེསབྷཏྟཀཐཱཝཎྞནཱ

བྷོཛནསཱལཱཡཱཏི བྷཏྟུདྡེསཊྛཱནཾ སནྡྷཱཡ ཝུཏྟཾ. ཨེཀཝལ༹ཉྫནྟི ཨེཀདྭཱརེན ཝལ༹ཉྫིཏབྦཾ. ནཱནཱནིཝེསནེསཱུཏི ནཱནཱཀུལསྶ ནཱནཱུཔཙཱརེསུ ནིཝེསནེསུ.

ནིསིནྣསྶཔི ནིདྡཱཡནྟསྶཔཱིཏི ཨནཱདརེ སཱམིཝཙནཾ, ཝུཌྜྷཏརེ ནིདྡཱཡནྟེ ནཝཀསྶ གཱཧིཏཾ སུགྒཧིཏནྟི ཨཏྠོ.

ཝིསྶཊྛདཱུཏོཏི ཡཐཱརུཙི ཝཏྟུཾ ལབྷནཏོ ནིརཱསངྐདཱུཏོ. པུཙྪཱསབྷཱགེནཱཏི པུཙྪཱཝཙནཔཊིབྷཱགེན. ‘‘ཨེཀཱ ཀཱུཊཊྛིཏིཀཱ ནཱམཱ’’ཏི ཝུཏྟམེཝཏྠཾ ཝིབྷཱཝེཏུཾ ‘‘རཉྙོ ཝཱ ཧཱི’’ཏིཨཱདི ཝུཏྟཾ.

སབྦཾ པཏྟསྶཱམིཀསྶ ཧོཏཱིཏི ཙཱིཝརཱདིཀམྤི སབྦཾ པཏྟསྶཱམིཀསྶེཝ ཧོཏི, མཡཱ བྷཏྟམེཝ སནྡྷཱཡ ཝུཏྟཾ, ན ཙཱིཝརཱདིནྟི ཝཏྭཱ གཧེཏུཾ ན ཝཊྚཏཱིཏི ཨཏྠོ.

ཨཀཏབྷཱགོནཱམཱཏི ¶ ཨཱགནྟུཀབྷཱགོ ནཱམ, ཨདིནྣཔུབྦབྷཱགོཏི ཨཏྠོ.

ཀིཾ ཨཱཧརཱིཡཏཱིཏི ཨཝཏྭཱཏི ‘‘ཀཏརབྷཏྟཾ ཝཱ ཏཡཱ ཨཱཧརཱིཡཏཱི’’ཏི དཱཡཀཾ ཨཔུཙྪིཏྭཱ. པཀཏིཊྛིཏིཀཱཡཱཏི ཨུདྡེསབྷཏྟཊྛིཏིཀཱཡ.

ཨུདྡེསབྷཏྟཀཐཱཝཎྞནཱ ནིཊྛིཏཱ.

ནིམནྟནབྷཏྟཀཐཱཝཎྞནཱ

ཝིཙྪིནྡིཏྭཱཏི ¶ ‘‘བྷཏྟཾ གཎྷཐཱ’’ཏི པདཾ ཨཝཏྭཱ. ཏེནེཝཱཧ ‘‘བྷཏྟནྟི ཨཝདནྟེནཱ’’ཏི.

ཨཱལོཔསངྑེཔེནཱཏི ཨེཀེཀཔིཎྜཝསེན, ཨེཝཉྩ བྷཱཛནཾ ཨུདྡེསབྷཏྟེ ན ཝཊྚཏི. ཏཏྠ ཧི ཨེཀསྶ པཧོནཀཔྤམཱཎེནེཝ བྷཱཛེཏབྦཾ.

ཨཱརུལ༹ྷཱཡེཝ མཱཏིཀཾ, སངྒྷཏོ ཨཊྛ བྷིཀྑཱུཏི ཨེཏྠ ཡེ མཱཏིཀཾ ཨཱརུལ༹ྷཱ, ཏེ ཨཊྛ བྷིཀྑཱུཏི ཡོཛེཏབྦཾ. ཨུདྡེསབྷཏྟནིམནྟནབྷཏྟཱདིསངྒྷིཀབྷཏྟམཱཏིཀཱསུ ནིམནྟནབྷཏྟམཱཏིཀཱཡ ཋིཏིཝསེན ཨཱརུལ༹ྷེ བྷཏྟུདྡེསཀེན ཝཱ སཡཾ ཝཱ སངྒྷཏོ ཨུདྡིསཱཔེཏྭཱ གཧེཏྭཱ གནྟབྦཾ, ན ཨཏྟནོ རུཙིཏེ གཧེཏྭཱཏི ཨདྷིཔྤཱཡོ. མཱཏིཀཾ ཨཱརོཔེཏྭཱཏི ‘‘སངྒྷཏོ གཎྷཱམཱི’’ཏིཨཱདིནཱ ཝུཏྟམཱཏིཀཱབྷེདཾ དཱཡཀསྶ ཝིཉྙཱཔེཏྭཱཏི ཨཏྠོ.

པཊིབདྡྷཀཱལཏོ པན པཊྛཱཡཱཏི ཏཏྠེཝ ཝཱསསྶ ནིབདྡྷཀཱལཏོ པཊྛཱཡ.

ནིམནྟནབྷཏྟཀཐཱཝཎྞནཱ ནིཊྛིཏཱ.

སལཱཀབྷཏྟཀཐཱཝཎྞནཱ

ཨུཔནིབནྡྷིཏྭཱཏི ལིཁིཏྭཱ. གཱམཝསེནཔཱིཏི ཡེབྷུཡྻེན སམལཱབྷགཱམཝསེནཔི. བཧཱུནི སལཱཀབྷཏྟཱནཱིཏི ཏིཾསཾ ཝཱ ཙཏྟཱརཱིསཾ ཝཱ བྷཏྟཱནི. ‘‘སཙེ ཧོནྟཱི’’ཏི ཨཛ྄ཛྷཱཧརིཏྭཱ ཡོཛེཏབྦཾ.

སལླཀྑེཏྭཱཏི ¶ ཏཱནི བྷཏྟཱནི པམཱཎཝསེན སལླཀྑེཏྭཱ. ནིགྒཧེན དཏྭཱཏི དཱུརཾ གནྟུཾ ཨནིཙྪནྟསྶ ནིགྒཧེན སམྤཊིཙྪཱཔེཏྭཱ དཏྭཱ. པུན ཝིཧཱརཾ ཨཱགནྟྭཱཏི ཨེཏྠ ཝིཧཱརཾ ཨནཱགནྟྭཱ བྷཏྟཾ གཧེཏྭཱ པཙྪཱ ཝིཧཱརེ ཨཏྟནོ པཱཔེཏྭཱ བྷུཉྫིཏུམྤི ཝཊྚཏི.

ཨེཀགེཧཝསེནཱཏི ཝཱིཐིཡམྤི ཨེཀཔསྶེ གྷརཔཱལི༹ཡཱ ཝསེན. ཨུདྡིསིཏྭཱཔཱིཏི ཨསུཀཀུལེ སལཱཀབྷཏྟཱནི ཏུཡ྄ཧཾ པཱཔུཎནྟཱིཏི ཝཏྭཱ.

ཝཱརགཱམེཏི ¶ ཨཏིདཱུརཏྟཱ ཝཱརེན གནྟབྦགཱམེ. སཊྛིཏོ ཝཱ པཎྞཱསཏོ ཝཱཏི དཎྜཀམྨཏྠཱཡ ཨུདཀགྷཊཾ སནྡྷཱཡ ཝུཏྟཾ. ཝིཧཱརཝཱརོཏི སབྦབྷིཀྑཱུསུ བྷིཀྑཏྠཱཡ གཏེསུ ཝིཧཱརརཀྑཎཝཱརོ.

ཏེསནྟི ཝིཧཱརཝཱརིཀཱནཾ. ཕཱཏིཀམྨམེཝཱཏི ཝིཧཱརརཀྑཎཀིཙྩསྶ པཧོནཀཔཊིཔཱདནམེཝ. ཨེཀསྶེཝ པཱཔུཎནྟཱིཏི དིཝསེ དིཝསེ ཨེཀེཀསྶེཝ པཱཔིཏཱནཱིཏི ཨཏྠོ.

རསསལཱཀནྟི ཨུཙྪུརསསལཱཀཾ. ‘‘སལཱཀཝསེན གཱཧིཏཏྟཱ པན ན སཱདིཏབྦཱ’’ཏི ཨིདཾ ཨསཱརུཔྤཝསེན ཝུཏྟཾ, ན དྷུཏངྒབྷེདཝསེན. ‘‘སངྒྷཏོ ནིརཱམིསསལཱཀཱ…པེ… ཝཊྚཏིཡེཝཱ’’ཏི (ཝིསུདྡྷི. ༡.༢༦) ཧི ཝིསུདྡྷིམགྒེ ཝུཏྟཾ. ཨགྒབྷིཀྑཱམཏྟནྟི ཨེཀཀཊཙྪུབྷིཀྑཱམཏྟཾ. ལདྡྷཱ ཝཱ ཨལདྡྷཱ ཝཱ སྭེཔི གཎྷེཡྻཱསཱིཏི ལདྡྷེཔི ཨཔྤམཏྟཏཱཡ ཝུཏྟཾ. ཏེནཱཧ ‘‘ཡཱཝདཏྠཾ ལབྷཏི…པེ… ཨལབྷིཏྭཱ ‘སྭེ གཎྷེཡྻཱསཱི’ཏི ཝཏྟབྦོ’’ཏི.

ཏཏྠཱཏི ཏསྨིཾ དིསཱབྷཱགེ. ཏཾ གཧེཏྭཱཏི ཏཾ ཝཱརགཱམེ སལཱཀཾ ཨཏྟནོ གཧེཏྭཱ. ཏེནཱཏི དིསཾགམིཀཏོ ཨཉྙེན ཏསྨིཾ དིསཾགམིཀེ. དེཝསིཀཾ པཱཔེཏབྦཱཏི ཨུཔཙཱརསཱིམཱཡ ཋིཏསྶ ཡསྶ ཀསྶཙི ཝསྶགྒེན པཱཔེཏབྦཱ. ཨེཝཾ ཨེཏེསུ ཨགཏེསུ ཨཱསནྣཝིཧཱརེ བྷིཀྑཱུནཾ བྷུཉྫིཏུཾ ཝཊྚཏི ཨིཏརཐཱ སངྒྷིཀཏོ.

ཨམྷཱཀཾ གོཙརགཱམེཝཱཏི སལཱཀབྷཏྟདཱཡཀཱནཾ གཱམཾ སནྡྷཱཡ ཝུཏྟཾ. ཝིཧཱརེ ཐེརསྶ པཏྟསལཱཀབྷཏྟནྟི ཝིཧཱརེ ཨེཀེཀསྶེཝ ཨོཧཱིནཏྠེརསྶ སབྦསལཱཀཱནཾ ཨཏྟནོ པཱཔནཝསེན པཏྟསལཱཀབྷཏྟཾ.

སལཱཀབྷཏྟཀཐཱཝཎྞནཱ ནིཊྛིཏཱ.

པཀྑིཀབྷཏྟཱདིཀཐཱཝཎྞནཱ

‘‘སྭེ ¶ པཀྑོ’’ཏི ཨཛྫ པཀྑིཀཾ ན གཱཧེཏབྦནྟི ཨཊྛམིཡཱ བྷུཉྫིཏབྦཾ སཏྟམིཡཱ བྷུཉྫནཏྠཱཡ ན གཱཧེཏབྦཾ, དཱཡཀེཧི ནིཡམིཏདིཝསེནེཝ གཱཧེཏབྦནྟི ཨཏྠོ. ཏེནཱཧ ‘‘སཙེ པནཱ’’ཏིཨཱདི. སྭེ ལཱུཁནྟི ཨཛྫ ཨཱཝཱཧམངྒལཱདིཀརཎཏོ ཨཏིཔཎཱིཏབྷོཛནཾ ཀརཱིཡཏི, སྭེ ཏཐཱ ན བྷཝིསྶཏི, ཨཛྫེཝ བྷིཀྑཱུ བྷོཛེསྶཱམཱིཏི ཨདྷིཔྤཱཡོ.

པཀྑིཀབྷཏྟཏོ ¶ ཨུཔོསཐིཀསྶ བྷེདཾ དསྶེནྟོ ཨཱཧ ‘‘ཨུཔོསཐངྒཱནི སམཱདིཡིཏྭཱ’’ཏིཨཱདི. ནིབནྡྷཱཔིཏནྟི ‘‘ཨསུཀཝིཧཱརེ ཨཱགནྟུཀཱ བྷུཉྫནྟཱུ’’ཏི ནིཡམིཏཾ.

གམིཀོ ཨཱགནྟུཀབྷཏྟམྤཱིཏི གཱམནྟརཏོ ཨཱགནྟྭཱ ཨཝཱུཔསནྟེན གམིཀཙིཏྟེན ཝསིཏྭཱ པུན ཨཉྙཏྠ གཙྪནྟཾ སནྡྷཱཡ ཝུཏྟཾ. ཨཱཝཱསིཀསྶ པན གནྟུཀཱམསྶ གམིཀབྷཏྟམེཝ ལབྦྷཏི. ‘‘ལེསཾ ཨོཌྜེཏྭཱ’’ཏི ཝུཏྟཏྟཱ ལེསཱབྷཱཝེ ཡཱཝ གམནཔརིབནྡྷོ ཝིགཙྪཏི, ཏཱཝ བྷུཉྫིཏུཾ ཝཊྚཏཱིཏི ཉཱཔིཏནྟི དཊྛབྦཾ.

ཏཎྜུལཱདཱིནི པེསེནྟི…པེ… ཝཊྚཏཱིཏི ཨབྷིཧཊབྷིཀྑཏྟཱ ཝཊྚཏི. ཏཐཱ པཊིགྒཧིཏཏྟཱཏི བྷིཀྑཱནཱམེན པཊིགྒཧིཏཏྟཱ.

ཨཝིབྷཏྟཾ སངྒྷིཀཾ བྷཎྜནྟི ཀུཀྐུཙྩུཔྤཏྟིཨཱཀཱརདསྶནཾ. ཨེཝཾ ཀུཀྐུཙྩཾ ཀཏྭཱ པུཙྪིཏབྦཀིཙྩཾ ནཏྠི, ཨཔུཙྪིཏྭཱ དཱཏབྦནྟི ཨདྷིཔྤཱཡོ.

པཀྑིཀབྷཏྟཱདིཀཐཱཝཎྞནཱ ནིཊྛིཏཱ.

སེནཱསནཀྑནྡྷཀཝཎྞནཱནཡོ ནིཊྛིཏོ.

༧. སངྒྷབྷེདཀཀྑནྡྷཀོ

ཚསཀྱཔབྦཛྫཱཀཐཱདིཝཎྞནཱ

༣༣༠. སངྒྷབྷེདཀཀྑནྡྷཀེ ¶ ¶ པཱལི༹ཡཾ ཨནུཔིཡཾ ནཱམཱཏི ཨནུཔིཡཱ ནཱམ. ཧེཊྛཱ པཱསཱདཱཏི པཱསཱདཏོ ཧེཊྛཱ ཧེཊྛིམཏལཾ, ‘‘ཧེཊྛཱཔཱསཱད’’ནྟིཔི པཱཋོ. ཨབྷིནེཏབྦནྟི ཝཔིཏཁེཏྟེསུ པཝེསེཏབྦཾ. ནིནྣེཏབྦནྟི ཏཏོ ནཱིཧརིཏབྦཾ. ནིདྡྷཱཔེཏབྦནྟི སསྶདཱུསཀཏིཎཱདཱིནི ཨུདྡྷརིཏབྦཾ. ཨུཛུཾ ཀཱརཱཔེཏབྦནྟི པུཉྫཾ ཀཱརཱཔེཏབྦཾ, ཨཡམེཝ ཝཱ པཱཋོ.

༣༣༢. པརདཏྟོཏི པརེཧི དིནྣཔཙྩཡེཧི པཝཏྟམཱནོ. མིགབྷཱུཏེན ཙེཏསཱཏི ཀཏྠཙི ཨལགྒཏཱཡ མིགསྶ ཝིཡ ཛཱཏེན ཙིཏྟེན.

༣༣༣. མནོམཡཾ ཀཱཡནྟི ཛྷཱནམནེན ནིབྦཏྟཾ བྲཧྨཀཱཡཾ, ‘‘ཀིཾ ནུ ཁོ ཨཧཾ པསཱདེཡྻཾ, ཡསྨིཾ མེ པསནྣེ བཧུལཱབྷསཀྐཱརོ ཨུཔྤཛྫེཡྻཱ’’ཏི པཋམཾ ཨུཔྤནྣཔརིཝིཏཀྐསྶ མནྡཔརིཡུཊྛཱནཏཱཡ དེཝདཏྟསྶ ཏསྨིཾ ཁཎེ ཛྷཱནཔརིཧཱནི ནཱཧོསི, པཙྪཱ ཨེཝ ཨཧོསཱིཏི དཊྛབྦཾ. ཏེནཱཧ ‘‘སཧ ཙིཏྟུཔྤཱདཱ’’ཏིཨཱདི. དྭེ ཝཱ ཏཱིཎི ཝཱ མཱགདྷཀཱནི གཱམཁེཏྟཱནཱིཏི ཨེཏྠ མགདྷརཊྛེ ཁུདྡཀཾ གཱམཁེཏྟཾ གཱཝུཏམཏྟཾ, མཛ྄ཛྷིམཾ པན དིཡཌྜྷགཱཝུཏམཏྟཾ, མཧནྟཾ ཨནེཀཡོཛནམྤི ཧོཏི. ཏེསུ མཛ྄ཛྷིམེན གཱམཁེཏྟེན དྭེ ཝཱ ཁུདྡཀེན ཏཱིཎི ཝཱ གཱམཁེཏྟཱནི, ཏསྶ སརཱིརཾ ཏིགཱཝུཏཔྤམཱཎོ ཨཏྟབྷཱཝོཏི ཝུཏྟཾ ཧོཏི.

༣༣༤. སཏྠཱརོཏི གཎསཏྠཱརོ. ནཱསྶསྶཱཏི ན ཨེཏསྶ བྷཝེཡྻ. ཏནྟི སཏྠཱརཾ. ཏེནཱཏི ཨམནཱཔེན. སམྨནྣཏཱིཏི ཙཱིཝརཱདིནཱ ཨམྷཱཀཾ སམྨཱནཾ ཀརོཏི, པརེཧི ཝཱ ཨཡཾ སཏྠཱ སམྨཱནཱིཡཏཱིཏི ཨཏྠོ.

༣༣༥. ནཱསཱཡ ¶ པིཏྟཾ བྷིནྡེཡྻུནྟི ཨཙྪཔིཏྟཾ ཝཱ མཙྪཔིཏྟཾ ཝཱ ནཱསཱཔུཊེ པཀྑིཔེཡྻུཾ. ཨསྶཏརཱིཏི ཝལ༹ཝཱཡ ཀུཙྪིསྨིཾ གདྲབྷསྶ ཛཱཏཱ. ཏསྶཱ ཧི གཧིཏགབྦྷཱཡ ཝིཛཱཡིཏུམསཀྐོནྟིཡཱ ཨུདརཾ ཕཱལེཏྭཱ པོཏཀཾ ནཱིཧརནྟི. ཏེནཱཧ ‘‘ཨཏྟཝདྷཱཡ གབྦྷཾ གཎྷཱཏཱི’’ཏི.

༣༣༩. པོཏྠནིཀནྟི ཚུརིཀཾ, ‘‘ཁར’’ནྟིཔི ཝུཙྩཏི.

༣༤༢. མཱ ¶ ཀུཉྫར ནཱགམཱསདོཏི ཧེ ཀུཉྫར བུདྡྷནཱགཾ ཝདྷཀཙིཏྟེན མཱ ཨུཔགཙྪ. དུཀྑནྟི དུཀྑཀཱརཎཏྟཱ དུཀྑཾ. ཨིཏོཏི ཨིཏོ ཛཱཏིཏོ. ཡཏོཏི ཡསྨཱ, ཡནྟསྶ ཝཱ, གཙྪནྟསྶཱཏི ཨཏྠོ. མཱ ཙ མདོཏི མདོ ཏཡཱ ན ཀཱཏབྦོཏི ཨཏྠོ.

༣༤༣. ཏིཀབྷོཛནནྟི ཏཱིཧི བྷུཉྫིཏབྦཾ བྷོཛནཾ, ཏཏོ ཨདྷིཀེཧི ཨེཀཏོ པཊིགྒཧེཏྭཱ བྷུཉྫིཏུཾ ན ཝཊྚནཀཾ གཎབྷོཛནཔཊིཔཀྑཾ བྷོཛནནྟི ཨཏྠོ. ཀོཀཱལིཀོཏིཨཱདཱིནི དེཝདཏྟཔརིསཱཡ གཎཔཱམོཀྑཱནཾ ནཱམཱནི. ཀཔྤནྟི མཧཱནིརཡེ ཨཱཡུཀཔྤཾ, ཏཾ ཨནྟརཀཔྤནྟི ཀེཙི. ཀེཙི པན ‘‘ཨསངྑྱེཡྻཀཔྤ’’ནྟི.

ཚསཀྱཔབྦཛྫཱཀཐཱདིཝཎྞནཱ ནིཊྛིཏཱ.

སངྒྷབྷེདཀཀཐཱཝཎྞནཱ

༣༤༥. པརསྶ ཙིཏྟཾ ཉཏྭཱ ཀཐནཾ ཨཱདེསནཱཔཱཊིཧཱརིཡཾ. ཀེཝལཾ དྷམྨདེསནཱ ཨནུསཱསནཱིཔཱཊིཧཱརིཡཾ. ཏདུབྷཡམྤི དྷམྨཱི ཀཐཱ ནཱམ. ཏཱཡ ཐེརོ ཨོཝདི. ཨིདྡྷིཝིདྷཾ ཨིདྡྷིཔཱཊིཧཱརིཡཾ ནཱམ. ཏེན སཧིཏཱ ཨནུསཱསནཱི ཨེཝ དྷམྨཱི ཀཐཱ. ཏཱཡ ཐེརོ ཨོཝདི.

‘‘ཐུལླཙྩཡཾ དེསཱཔེཧཱི’’ཏི ཨིདཾ བྷེདཔུརེཀྑཱརསྶ ཨུཔོསཐཱདིཀརཎེ ཐུལླཙྩཡསྶ ཨུཔོསཐཀྑནྡྷཀཱདཱིསུ པཋམམེཝ པཉྙཏྟཏྟཱ ཝུཏྟཾ, ཨིཏརཐཱ ཨེཏེསཾ ཨཱདིཀམྨིཀཏྟཱ ཨནཱཔཏྟིཡེཝ སིཡཱ.

༣༤༦. སརསཱིཏི སརོ. མཧིཾ ཝིཀྲུབྦཏོཏི མཧིཾ དནྟེཧི ཝིལིཁནྟསྶ. ཨིདཉྩ ཧཏྠཱིནཾ སབྷཱཝདསྶནཾ. ནདཱིསཱུཏི སརེསུ. བྷིསཾ གྷསམཱནསྶཱཏི ཡོཛནཱ. ཛགྒཏོཏི ཡཱུཐཾ པཱལེནྟསྶ.

༣༤༧. དཱུཏེཡྻཾ ¶ གནྟུནྟི དཱུཏཀམྨཾ པཏྟུཾ, དཱུཏཀམྨཾ ཀཱཏུནྟི ཨཏྠོ. སཧིཏཱསཧིཏསྶཱཏི ཡུཏྟཱཡུཏྟསྶ, ཡཾ ཝཏྟུཾ, ཀཱཏུཉྩ ཡུཏྟཾ, ཏཏྠ ཀུསལོ. ཨཐ ཝཱ ཨདྷིཔྤེཏཱནཱདྷིཔྤེཏསྶ ཝཙནསྶ ཀུསལོ, བྱཉྫནམཏྟེ ན ཏིཊྛཏི, ཨདྷིཔྤེཏཏྠམེཝ ཨཱརོཙེཏཱིཏི ཨཏྠོ.

༣༥༠. གཱཐཱསུ ¶ ཛཱཏཱུཏི ཨེཀཾསེན. མཱ ཨུདཔཛྫཐ མཱ ཧོཏཱུཏི ཨཏྠོ. པཱཔིཙྪཱནཾ ཡཐཱགཏཱིཏི པཱཔིཙྪཱནཾ པུགྒལཱནཾ ཡཱདིསཱི གཏི ཨབྷིསམྤརཱཡོ. ཏཾ ཨཏྠཛཱཏཾ. ཨིམིནཱཔི ཀཱརཎེན ཛཱནཱཐཱཏི དེཝདཏྟསྶ ‘‘པཎྜིཏོ’’ཏིཨཱདིནཱ ཨུཔརི ཝཀྑམཱནཱཀཱརཾ དསྶེཏི.

པམཱདཾ ཨནུཙིཎྞོཏི པམཱདཾ ཨཱཔནྣོ. ཨཱསཱིསཱཡནྟི ཨཝསྶཾབྷཱཝཱིཨཏྠསིདྡྷིཡཾ. སཱ ཧི ཨིདྷ ཨཱསཱིསཱཏི ཨདྷིཔྤེཏཱ, ན པཏྠནཱ. ཨཱིདིསེ ཨནཱགཏཏྠེ ཨཏཱིཏཝཙནཾ སདྡཝིདཱུ ཨིཙྪནྟི.

དུབྦྷེཏི དུབྦྷེཡྻ. ཝིསཀུམྦྷེནཱཏི ཨེཀེན ཝིསཔུཎྞཀུམྦྷེན. སོཏི སོ པུགྒལོ. ན པདཱུསེཡྻ ཝིསམིསྶཾ ཀཱཏུཾ ན སཀྐོཏཱིཏི ཨཏྠོ. བྷཡཱནཀོཏི ཝིཔུལགམྦྷཱིརབྷཱཝེན བྷཡཱནཀོ. ཏེནཱཔི དཱུསེཏུཾ ན སཀྐུཎེཡྻཏཾ དསྶེཏི. ཝཱདེནཱཏི དོསཀཐནེན. ཨུཔཧིཾསཏཱིཏི བཱདྷཏི.

སངྒྷབྷེདཀཀཐཱཝཎྞནཱ ནིཊྛིཏཱ.

ཨུཔཱལིཔཉྷཱཀཐཱཝཎྞནཱ

༣༥༡. ན པན ཨེཏྟཱཝཏཱ སངྒྷོ བྷིནྣོ ཧོཏཱིཏི སལཱཀགྒཱཧཱཔནམཏྟེན སངྒྷབྷེདཱནིབྦཏྟིཏོ ཝུཏྟཾ. ཨུཔོསཐཱདིསངྒྷཀམྨེ ཀཏེ ཨེཝ ཧི སངྒྷོ བྷིནྣོ ཧོཏི. ཏཏྠ ཙ ཨུཔོསཐཔཝཱརཎཱསུ ཉཏྟིནིཊྛཱནེན, སེསཀམྨེསུ ཨཔལོཀནཱདིཀམྨཔརིཡོསཱནེན སངྒྷབྷེདོ སམཏྠོཏི དཊྛབྦོ.

‘‘ཨབྷབྦཏཱ ན ཝུཏྟཱ’’ཏི ཨིདཾ ‘‘བྷིཀྑཝེ, དེཝདཏྟེན པཋམཾ ཨཱནནྟརིཡཀམྨཾ ཨུཔཙིཏ’’ནྟིཨཱདིནཱ ཨཱནནྟརིཡཏྟཾ ཝདཏཱ བྷགཝཏཱ ཏསྶ ཨབྷབྦཏཱསངྑཱཏཱ པཱརཱཛིཀཏཱ ན པཉྙཏྟཱ. ཨེཏེན ཨཱཔཏྟི ཝིཡ ཨབྷབྦཏཱཔི པཉྙཏྟིཨནནྟརམེཝ ཧོཏི, ན ཏཏོ པུརེཏི དསྶེཏི. ཨིདྷ པན ཨཱདིཀམྨིཀསྶཔི ཨནཱཔཏྟིཡཱ ཨཝུཏྟཏྟཱ དེཝདཏྟཱདཡོཔི ན མུཏྟཱཏི དཊྛབྦཾ.

ཏཡོ སཏིཔཊྛཱནཱཏིཨཱདཱིསུ ཏཡོ ཨེཝ སཏིཔཊྛཱནཱ, ན ཏཏོ པརནྟི ཨེཀསྶ སཏིཔཊྛཱནསྶ ¶ པཊིཀྑེཔོཝ ཨིདྷ ཨདྷམྨོ, ན པན ཏིཎྞཾ སཏིཔཊྛཱནཏྟཝིདྷཱནཾ ¶ ཏསྶ དྷམྨཏྟཱ. ཨེཝཾ སེསེསུཔི ཧཱཔནཀོཊྛཱསེསུ. ཝཌྜྷནེསུ པན ཚ ཨིནྡྲིཡཱནཱིཏི ཨནིནྡྲིཡསྶཔི ཨེཀསྶ ཨིནྡྲིཡཏྟཝིདྷཱནམེཝ ཨདྷམྨོ. ཨེཝཾ སེསེསུཔི. ན ཀེཝལཉྩ ཨེཏེཝ, ‘‘ཙཏྟཱརོ ཁནྡྷཱ, ཏེརསཱཡཏནཱནཱི’’ཏིཨཱདིནཱ ཡཏྠ ཀཏྠཙི ཝིཔརཱིཏཏོ པཀཱསནཾ སབྦཾ ཨདྷམྨོ. ཡཱཐཱཝཏོ པཀཱསནཉྩ སབྦཾ དྷམྨོཏི དཊྛབྦཾ. པཀཱསནནྟི ཙེཏྠ ཏཐཱ ཏཐཱ ཀཱཡཝཙཱིཔཡོགསམུཊྛཱཔིཀཱ ཨརཱུཔཀྑནྡྷཱཝ ཨདྷིཔྤེཏཱ, ཨེཝམེཏྠ དསཀུསལཀམྨཔཐཱདཱིསུ ཨནཝཛྫཊྛེན སརཱུཔཏོ དྷམྨེསུ, ཨཀུསལཀམྨཔཐཱདཱིསུ སཱཝཛྫཊྛེན སརཱུཔཏོ ཨདྷམྨེསུ ཙ ཏདཉྙེསུ ཙ ཨབྱཱཀཏེསུ ཡསྶ ཀསྶཙི ཀོཊྛཱསསྶ བྷགཝཏཱ པཉྙཏྟཀྐམེནེཝ པཀཱསནཾ ‘‘དྷམྨོ’’ཏི ཙ ཝིཔརཱིཏཏོ པཀཱསནཾ ‘‘ཨདྷམྨོ’’ཏི ཙ དསྶིཏནྟི དཊྛབྦཾ. ཀཱམཉྩེཏྠ ཝིནཡཱདཡོཔི ཡཐཱབྷཱུཏཏོ, ཨཡཐཱབྷཱུཏཏོ ཙ པཀཱསནཝསེན དྷམྨཱདྷམྨེསུ ཨེཝ པཝིསནྟི, ཝིནཡཱདིནཱམེན པན ཝིསེསེཏྭཱ ཝིསུཾ གཧིཏཏྟཱ ཏདཝསེསམེཝ དྷམྨཱདྷམྨཀོཊྛཱསེ པཝིསཏཱིཏི དཊྛབྦཾ.

ཨིམཾ ཨདྷམྨཾ དྷམྨོཏི ཀརིསྶཱམཱཏིཨཱདི དྷམྨཉྩ ཨདྷམྨཉྩ ཡཱཐཱཝཏོ ཉཏྭཱཝ པཱཔིཙྪཾ ནིསྶཱཡ ཝིཔརཱིཏཏོ པཀཱསེནྟསྶེཝ སངྒྷབྷེདོ ཧོཏི, ན པན ཏཐཱསཉྙཱཡ པཀཱསེནྟསྶཱཏི དསྶནཏྠཾ ཝུཏྟཾ. ཨེས ནཡོ ‘‘ཨཝིནཡཾ ཝིནཡོཏི དཱིཔེནྟཱི’’ཏིཨཱདཱིསུཔི. ཏཏྠ ནིཡྻཱནིཀནྟི ཨུཀྐཊྛནྟི ཨཏྠོ. ‘‘ཏཐེཝཱ’’ཏི ཨིམིནཱ ‘‘ཨེཝཾ ཨམྷཱཀཾ ཨཱཙརིཡཀུལ’’ནྟིཨཱདིནཱ ཝུཏྟམཏྠཾ ཨཱཀཌྜྷཏི.

སཾཝརོ པཧཱནཾ པཊིསངྑཱཏི སཾཝརཝིནཡོ, པཧཱནཝིནཡོ, པཊིསངྑཱཝིནཡོ ཙ ཝུཏྟོ. ཏེནཱཧ ‘‘ཨཡཾ ཝིནཡོ’’ཏི. ‘‘པཉྙཏྟཾ ཨཔཉྙཏྟ’’ནྟི དུཀཾ ‘‘བྷཱསིཏཾ ཨབྷཱསིཏ’’ནྟི དུཀེན ཨཏྠཏོ སམཱནམེཝ, ཏཐཱ དུཊྛུལླདུཀཾ གརུཀདུཀེན. ཏེནེཝ ཏེསཾ ‘‘ཙཏྟཱརོ སཏིཔཊྛཱནཱ…པེ… ཨིདཾ ཨཔཉྙཏྟཾ ནཱམཱ’’ཏིཨཱདིནཱ སདིསནིདྡེསོ ཀཏོ. སཱཝསེསཱཔཏྟིནྟི ཨཝསེསསཱིལེཧི སཧིཏཱཔཏྟིཾ. ནཏྠི ཨེཏིསྶཾ ཨཱཔནྣཱཡཾ སཱིལཱཝསེསཱཏི ཨནཝསེསཱཔཏྟི.

༣༥༤. པཱལི༹ཡཾ སམགྒཱནཉྩ ཨནུགྒཧོཏི ཡཐཱ སམགྒཱནཾ སཱམགྒཱི ན བྷིཛྫཏི, ཨེཝཾ ཨནུགྒཧཎཾ ཨནུབལཔྤདཱནཾ.

༣༥༥. སིཡཱ ¶ ནུ ཁོཏི སམྦྷཝེཡྻ ནུ ཁོ. ཏསྨིཾ ཨདྷམྨདིཊྛཱིཏི ཨཏྟནོ ‘‘ཨདྷམྨཾ དྷམྨོ’’ཏི ཨེཏསྨིཾ དཱིཔནེ ཨཡུཏྟདིཊྛི. བྷེདེ ཨདྷམྨདིཊྛཱིཏི ‘‘ཨདྷམྨཾ དྷམྨོ’’ཏི དཱིཔེཏྭཱ ཨནུསྶཱཝནསལཱཀགྒཱཧཱཔནཱདིནཱ ཨཏྟཱནཾ མུཉྩིཏྭཱ ཙཏུཝགྒཱདིཀཾ སངྒྷཾ ཨེཀསཱིམཱཡམེཝ ཋིཏཏོ ¶ ཙཏུཝགྒཱདིསངྒྷཏོ ཝིཡོཛེཏྭཱ ཨེཀཀམྨཱདིནིཔྥཱདནཝསེན སངྒྷབྷེདཀརཎེ ཨདྷམྨདིཊྛིཀོ ཧུཏྭཱཏི ཨཏྠོ. ཝིནིདྷཱཡ དིཊྛིནྟི ཡཱ ཏསྨིཾ ‘‘ཨདྷམྨཾ དྷམྨོ’’ཏི དཱིཔནེ ཨཏྟནོ ཨདྷམྨདིཊྛི ཨུཔྤཛྫཏི, ཏཾ ཝིནིདྷཱཡ པཊིཙྪཱདེཏྭཱ ‘‘དྷམྨོ ཨེཝཱཡ’’ནྟི ཝིཔརཱིཏཏོ པཀཱསེཏྭཱཏི ཨཏྠོ. ཨེཝཾ སབྦཏྠ ཨཏྠོ ཝེདིཏབྦོ.

བྷེདེ དྷམྨདིཊྛཱིཏི ཡཐཱཝུཏྟནཡེན སངྒྷབྷེདནེ དོསོ ནཏྠཱིཏི ལདྡྷིཀོ. ཨཡཾ པན ‘‘ཨདྷམྨཾ དྷམྨོ’’ཏི དཱིཔནེ ཨདྷམྨདིཊྛིཀོ ཧུཏྭཱཔི ཏཾ དིཊྛིཾ ཝིནིདྷཱཡ ཀརཎེན སངྒྷབྷེདཀོ ཨཏེཀིཙྪོ ཛཱཏོ. ཨེཝཾ བྷེདེ ཝེམཏིཀོཏི ཨིམསྶ པན བྷེདེ ཝེམཏིཀདིཊྛིཡཱ ཝིནིདྷཱནམྤི ཨཏྠི. སེསཾ སམམེཝ. ཏསྨིཾ དྷམྨདིཊྛིབྷེདེ ཨདྷམྨདིཊྛཱིཏི ཨཡཾ པན བྷེདེ ཨདྷམྨདིཊྛིཾ ཝིནིདྷཱཡ ཀཏཏྟཱ སངྒྷབྷེདཀོ ཨཏེཀིཙྪོ ཛཱཏོ. སུཀྐཔཀྑེ པན སབྦཏྠ ‘‘ཨདྷམྨཾ དྷམྨོ’’ཏིཨཱདིདཱིཔནེ ཝཱ བྷེདེ ཝཱ དྷམྨདིཊྛིཏཱཡ དིཊྛིཾ ཨཝིནིདྷཱཡེཝ ཀཏཏྟཱ སངྒྷབྷེདཀོཔི སཏེཀིཙྪོ ཛཱཏོ. ཏསྨཱ ‘‘ཨདྷམྨཾ དྷམྨོ’’ཏིཨཱདིདཱིཔནེ ཝཱ སངྒྷབྷེདེ ཝཱ ཨུབྷོསུཔི ཝཱ ཨདྷམྨདིཊྛི ཝཱ ཝེམཏིཀོ ཝཱ ཧུཏྭཱ ཏཾ དིཊྛིཾ, ཝིམཏིཉྩ ཝིནིདྷཱཡ ‘‘དྷམྨོ’’ཏི པཀཱསེཏྭཱ ཝུཏྟནཡེན སངྒྷབྷེདཾ ཀརོནྟསྶེཝ ཨཱནནྟརིཡཾ ཧོཏཱིཏི ཝེདིཏབྦཾ.

ཨུཔཱལིཔཉྷཱཀཐཱཝཎྞནཱ ནིཊྛིཏཱ.

སངྒྷབྷེདཀཀྑནྡྷཀཝཎྞནཱནཡོ ནིཊྛིཏོ.

༨. ཝཏྟཀྑནྡྷཀོ

ཨཱགནྟུཀཝཏྟཀཐཱཝཎྞནཱ

༣༥༧. ཝཏྟཀྑནྡྷཀེ ¶ ¶ པཏྠརིཏབྦནྟི ཨཱཏཔེ པཏྠརིཏབྦཾ. པཱལི༹ཡཾ ཨབྷིཝཱདཱཔེཏབྦོཏི ཝནྡནཏྠཱཡ ཝསྶཾ པུཙྪནེན ནཝཀོ སཡམེཝ ཝནྡཏཱིཏི ཝུཏྟཾ. ནིལློཀེཏབྦོཏི ཨོལོཀེཏབྦོ.

ཨཱགནྟུཀཝཏྟཀཐཱཝཎྞནཱ ནིཊྛིཏཱ.

ཨཱཝཱསིཀཝཏྟཀཐཱཝཎྞནཱ

༣༥༩. ‘‘ཡཐཱབྷཱག’’ནྟི ཋཔིཏཊྛཱནཾ ཨནཏིཀྐམིཏྭཱ མཉྩཔཱིཋཱདིཾ པཔྥོཊེཏྭཱ པཏྠརིཏྭཱ ཨུཔརི པཙྩཏྠརཎཾ དཏྭཱ དཱནམྤི སེནཱསནཔཉྙཱཔནམེཝཱཏི དསྶེནྟོ ཨཱཧ ‘‘པཔྥོཊེཏྭཱ ཧི པཏྠརིཏུཾ པན ཝཊྚཏིཡེཝཱ’’ཏི.

ཨཱཝཱསིཀཝཏྟཀཐཱཝཎྞནཱ ནིཊྛིཏཱ.

ཨནུམོདནཝཏྟཀཐཱཝཎྞནཱ

༣༦༢. པཉྩམེ ནིསིནྣེཏི ཨནུམོདནཏྠཱཡ ནིསིནྣེ. ན མཧཱཐེརསྶ བྷཱརོ ཧོཏཱིཏི ཨནུམོདཀཾ ཨཱགམེཏུཾ ན བྷཱརོ. ཨཛ྄ཛྷིཊྛོཝ ཨཱགམེཏབྦོཏི ཨཏྟནཱ ཨཛ྄ཛྷིཊྛེཧི བྷིཀྑཱུཧི ཨནུམོདནྟེཡེཝ ནིསཱིདིཏབྦནྟི ཨཏྠོ.

ཨནུམོདནཝཏྟཀཐཱཝཎྞནཱ ནིཊྛིཏཱ.

བྷཏྟགྒཝཏྟཀཐཱཝཎྞནཱ

༣༦༤. མནུསྶཱནཾ ¶ པརིཝིསནཊྛཱནནྟི ཡཏྠ ཨནྟོཝིཧཱརེཔི མནུསྶཱ སཔུཏྟདཱརཱ ཨཱཝསིཏྭཱ བྷིཀྑཱུ ནེཏྭཱ བྷོཛེནྟི. ཨཱསནེསུ སཏཱིཏི ནིསཱིདནཊྛཱནེསུ ¶ སནྟེསུ. ཨིདཾ, བྷནྟེ, ཨཱསནཾ ཨུཙྩནྟི ཨཱསནྣེ སམབྷཱུམིབྷཱགེ པཉྙཏྟཾ ཐེརཱསནེན སམཀཾ ཨཱསནཾ སནྡྷཱཡ ཝུཏྟཾ, ཐེརཱསནཏོ པན ཨུཙྩཏརེ ཨཱཔུཙྪིཏྭཱཔི ནིསཱིདིཏུཾ ན ཝཊྚཏི. ཡདི ཏཾ ཨཱསནྣམྤི ནཱིཙཏརཾ ཧོཏི, ཨནཱཔུཙྪཱཔི ནིསཱིདིཏུཾ ཝཊྚཏི. མཧཱཐེརསྶེཝ ཨཱཔཏྟཱིཏི ཨཱསནེན པཊིབཱཧནཱཔཏྟིཡཱ ཨཱཔཏྟི. ཨཝཏྠརིཏྭཱཏི པཱརུཏསངྒྷཱཊིཾ ཨཝཏྠརིཏྭཱ, ཨནུཀྑིཔིཏྭཱཏི ཨཏྠོ.

པཱལི༹ཡཾ ‘‘ཨུབྷོཧི ཧཏྠེཧི…པེ… ཨོདནོ པཊིགྒཧེཏབྦོ’’ཏི ཨིདཾ ཧཏྠཏལེ ཝཱ པཙྪིཔིཊྛིཨཱདིདུསྶཎྛིཏཱདྷཱརེ ཝཱ པཏྟཾ ཋཔེཏྭཱ ཨོདནསྶ གཧཎཀཱལེ པཏྟསྶ ཨཔཏནཏྠཱཡ ཝུཏྟཾ, སུསཛྫིཏེ པན ཨཱདྷཱརེ པཏྟཾ ཋཔེཏྭཱ ཨེཀེན ཧཏྠེན ཏཾ པརཱམསིཏྭཱཔི ཨོདནཾ པཊིགྒཧེཏུཾ ཝཊྚཏི ཨེཝ. ཨུབྷོཧི ཧཏྠེཧི…པེ… ཨུདཀཾ པཊིགྒཧེཏབྦནྟི ཨེཏྠཱཔི ཨེསེཝ ནཡོ.

ཧཏྠདྷོཝནཨུདཀནྟི བྷོཛནཱཝསཱནེ ཨུདཀཾ. ཏེནཱཧ ‘‘པཱནཱིཡཾ པིཝིཏྭཱ ཧཏྠཱ དྷོཝིཏབྦཱ’’ཏི. ཏེན པརིཡོསཱནེ དྷོཝནམེཝ པཊིཀྑིཏྟཾ, བྷོཛནནྟརེ པན པཱནཱིཡཔིཝནཱདིནཱ ནཡེན ཧཏྠཾ དྷོཝིཏྭཱ པུན བྷུཉྫིཏུཾ ཝཊྚཏཱིཏི དསྶེཏི. པོཏྠཀེསུ པན ‘‘པཱནཱིཡཾ པིཝིཏྭཱ ཧཏྠཱ ན དྷོཝིཏབྦཱ’’ཏི ལིཁནྟི, ཏཾ པུརིམཝཙནེན ན སམེཏི པརིཡོསཱནེ ཨུདཀསྶེཝ ‘‘ཧཏྠདྷོཝནཨུདཀ’’ནྟི ཝུཏྟཏྟཱ. སཙེ མནུསྶཱ དྷོཝཐ, བྷནྟེཏིཨཱདི ནིཊྛིཏབྷཏྟཾ ནིསིནྣཾ ཐེརཾ སནྡྷཱཡ ཝུཏྟཾ. དྷུརེ དྭཱརསམཱིཔེ.

བྷཏྟགྒཝཏྟཀཐཱཝཎྞནཱ ནིཊྛིཏཱ.

པིཎྜཙཱརིཀཝཏྟཀཐཱདིཝཎྞནཱ

༣༦༦. པཱལི༹ཡཾ ཋཱཔེཏི ཝཱཏི ཏིཊྛ བྷནྟེཏི ཝདནྟི.

༣༦༧. ཨཏྠི, བྷནྟེ, ནཀྑཏྟཔདཱནཱིཏི ནཀྑཏྟཔདཝིསཡཱནི ཉཱཏཱནི ཨཏྠི, ཨསྶཡུཛཱདིནཀྑཏྟཾ ཛཱནཱཐཱཏི ཨདྷིཔྤཱཡོ. ཏེནཱཧ ‘‘ན ཛཱནཱམ, ཨཱཝུསོ’’ཏི. ཨཏྠི, བྷནྟེ ¶ , དིསཱབྷཱགནྟི ཨེཏྠཱཔི ཨེསེཝ ནཡོ. ཀེནཛྫ, བྷནྟེ, ཡུཏྟནྟི ཀེན ནཀྑཏྟེན ཙནྡོ ཡུཏྟོཏི ཨཏྠོ.

༣༦༩. ཨངྒཎེཏི ¶ ཨབྦྷོཀཱསེ. ཨེཝམེཝ པཊིཔཛྫིཏབྦནྟི ཨུདྡེསདཱནཱདི ཨཱཔུཙྪིཏབྦནྟི དསྶེཏི.

༣༧༤. ནིབདྡྷགམནཏྠཱཡཱཏི ཨཏྟནོཝ ནིརནྟརགམནཏྠཱཡ. ཨཱུཧདིཏཱཏི ཨེཏྠ ཧད-དྷཱཏུསྶ ཝཙྩཝིསྶཛྫནཏྠཏཱཡཱཧ ‘‘བཧི ཝཙྩམཀྑིཏཱ’’ཏི.

པིཎྜཙཱརིཀཝཏྟཀཐཱདིཝཎྞནཱ ནིཊྛིཏཱ.

ཝཏྟཀྑནྡྷཀཝཎྞནཱནཡོ ནིཊྛིཏོ.

༩. པཱཏིམོཀྑཊྛཔནཀྑནྡྷཀོ

པཱཏིམོཀྑུདྡེསཡཱཙནཀཐཱཝཎྞནཱ

༣༨༣. པཱཏིམོཀྑཊྛཔནཀྑནྡྷཀེ ¶ ¶ པཱལི༹ཡཾ ནནྡིམུཁིཡཱཏི ཨོདཱཏདིསཱམུཁཏཱཡ ཏུཊྛམུཁིཡཱ. ‘‘ཨུདྡྷསྟཾ ཨརུཎ’’ནྟི ཝཏྭཱཔི ‘‘ཨུདྡིསཏུ, བྷནྟེ, བྷགཝཱ’’ཏི པཱཏིམོཀྑུདྡེསཡཱཙནཾ ཨནུཔོསཐེ ཨུཔོསཐཀརཎཔཊིཀྑེཔསྶ སིཀྑཱཔདསྶ ཨཔཉྙཏྟཏྟཱ ཐེརེན ཀཏནྟི དཊྛབྦཾ. ཀསྨཱ པན བྷགཝཱ ཨེཝཾ ཏུཎྷཱིབྷཱུཏོཝ ཏིཡཱམརཏྟིཾ ཝཱིཏིནཱམེསཱིཏི? ཨཔརིསུདྡྷཱཡ པརིསཱཡ ཨུཔོསཐཱདིསཾཝཱསཀརཎསྶ སཱཝཛྫཏཾ བྷིཀྑུསངྒྷེ པཱཀཊཾ ཀཱཏུཾ, ཏཉྩ ཨཱཡཏིཾ བྷིཀྑཱུནཾ ཏཐཱཔཊིཔཛྫནཏྠཾ སིཀྑཱཔདཾ ཉཱཔེཏུཾ. ཀེཙི པནེཏྠ ‘‘ཨཔརིསུདྡྷམྤི པུགྒལཾ ཏསྶ སམྨུཁཱ ‘ཨཔརིསུདྡྷོ’ཏི ཝཏྟུཾ མཧཱཀརུཎཱཡ ཨཝིསཧནྟོ བྷགཝཱ ཏཐཱ ནིསཱིདཱི’’ཏི ཀཱརཎཾ ཝདནྟི. ཏཾ ཨཀཱརཎཾ པཙྪཱཔི ཨཝཏྟབྦཏོ, མཧཱམོགྒལླཱནཏྠེརེནཱཔི ཏཾ བཱཧཱཡཾ གཧེཏྭཱ བཧི ནཱིཧརཎསྶ ཨཀཏྟབྦཏཱཔསངྒཏོ. ཏསྨཱ ཡཐཱཝུཏྟམེཝེཏྠ ཀཱརཎནྟི. ཏེནེཝ ‘‘ཨཊྛཱནམེཏཾ, བྷིཀྑཝེ, ཨནཝཀཱསོ, ཡཾ ཏཐཱགཏོ ཨཔརིསུདྡྷཱཡ པརིསཱཡ ཨུཔོསཐཾ ཀརེཡྻ, པཱཏིམོཀྑཾ ཨུདྡིསེཡྻཱ’’ཏི (ཨ. ནི. ༨.༢༠; ཙཱུལ༹ཝ. ༣༨༦; ཨུདཱ. ༤༥) ཝཏྭཱ ‘‘ན ཙ, བྷིཀྑཝེ, སཱཔཏྟིཀེན པཱཏིམོཀྑཾ སོཏབྦ’’ནྟིཨཱདིནཱ (ཙཱུལ༹ཝ. ༣༨༦) སཱཔཏྟིཀཔརིསཱཡ ཀཏྟབྦཝིདྷི དསྶིཏོ.

སངྐསྶརསམཱཙཱརནྟི ཀིཉྩིདེཝ ཨསཱརུཔྤཾ དིསྭཱ ‘‘ཨིདཾ ཨིམིནཱ ཀཏཾ བྷཝིསྶཏཱི’’ཏི པརེཧི སངྐཱཡ སརིཏབྦསམཱཙཱརཾ, ཨཏྟནཱ ཝཱ ‘‘མམ ཨནཱཙཱརཾ ཨེཏེ ཛཱནནྟཱི’’ཏི སངྐཱཡ སརིཏབྦསམཱཙཱརཾ. སམཎཝེསདྷཱརཎེན, སངྒྷིཀཔཙྩཡབྷཱགགཧཎཱདིནཱ ཙ ཛཱིཝིཀཾ ཀཔྤེནྟོ ‘‘ཨཧཾ སམཎོ’’ཏི པཊིཉྙཾ ཨདེནྟོཔི ཨཏྠཏོ དེནྟོ ཝིཡ ཧོཏཱིཏི ‘‘སམཎཔཊིཉྙཾ བྲཧྨཙཱརིཔཊིཉྙ’’ནྟི ཝུཏྟཾ. ཨཝསྶུཏནྟི ཀིལེསཱཝསྶནེན ཏིནྟཾ. སཉྫཱཏདུསྶིལྱཀཙཝརཏྟཱ ཀསམྦུཛཱཏཾ ¶ , ཨསཱརཏཱཡ ཝཱ ཀསམྦུ ཝིཡ ཛཱཏཾ. བཧིདྭཱརཀོཊྛཀཱ ནིཀྑཱམེཏྭཱཏི དྭཱརསཱལཏོ བཧི ནིཀྑམཱཔེཏྭཱ.

༣༨༤. མཧཱསམུདྡེ ¶ ཨབྷིརམནྟཱིཏི བཧུསོ དསྶནཔཝིསནཱདིནཱ མཧཱསམུདྡེ ཨབྷིརཏིཾ ཝིནྡནྟི. ན ཨཱཡཏཀེནེཝ པཔཱཏོཏི ཚིནྣཏཊམཧཱསོབྦྷོ ཝིཡ ན ཨཱདིཏོཝ ནིནྣོཏི ཨཏྠོ. ཋིཏདྷམྨོཏི ཨཝཊྛིཏསབྷཱཝོ. པཱུརཏྟནྟི པུཎྞཏྟཾ. ནཱགཱཏི སཔྤཛཱཏིཀཱ.

པཱཏིམོཀྑུདྡེསཡཱཙནཀཐཱཝཎྞནཱ ནིཊྛིཏཱ.

པཱཏིམོཀྑསཝནཱརཧཀཐཱདིཝཎྞནཱ

༣༨༦. ཨུདཱཧརིཏབྦནྟི པཱལི༹ཡཱ ཨཝཏྭཱ ཏམཏྠཾ ཡཱཡ ཀཱཡཙི བྷཱསཱཡ ཨུདཱཧཊམྤི ཨུདཱཧཊམེཝཱཏི དཊྛབྦཾ.

པུརེ ཝཱ པཙྪཱ ཝཱཏི ཉཏྟིཨཱརམྦྷཏོ པུབྦེ ཝཱ ཉཏྟིནིཊྛཱནཏོ པཙྪཱ ཝཱ.

༣༨༧. ཀཏཉྩ ཨཀཏཉྩ ཨུབྷཡཾ གཧེཏྭཱཏི ཡསྶ ཀཏཱཔི ཨཏྠི ཨཀཏཱཔི. ཏསྶ ཏདུབྷཡཾ གཧེཏྭཱ. དྷམྨིཀཾ སཱམགྒིནྟི དྷམྨིཀཾ སམགྒཀམྨཾ. པཙྩཱདིཡཏཱིཏི ཨུཀྐོཊནཱདྷིཔྤཱཡེན པུན ཀཱཏུཾ ཨཱདིཡཏི.

༣༨༨. ཨཱཀཱརཱདིསཉྙཱ ཝེདིཏབྦཱཏི ཨཱཀཱརལིངྒནིམིཏྟནཱམཱནི ཝུཏྟཱནཱིཏི ཝེདིཏབྦཱནི.

པཱཏིམོཀྑསཝནཱརཧཀཐཱདིཝཎྞནཱ ནིཊྛིཏཱ.

ཨཏྟཱདཱནཨངྒཀཐཱདིཝཎྞནཱ

༣༩༨. པུན ཙོདེཏུཾ ཨཏྟནཱ ཨཱདཱཏབྦཾ གཧེཏབྦཾ ཨདྷིཀརཎཾ ཨཏྟཱདཱནནྟི ཨཱཧ ‘‘སཱསནཾ སོདྷེཏུཀཱམོ’’ཏིཨཱདི. ཝསྶཱརཏྟོཏི ཝསྶཀཱལོ. སོཔི ཧི དུབྦྷིཀྑཱདིཀཱལོ ཝིཡ ཨདྷིཀརཎཝཱུཔསམཏྠཾ ལཛྫིཔརིསཱཡ དཱུརཏོ ཨཱནཡནསྶ, ཨཱགཏཱནཉྩ པིཎྜཱཡ ཙརཎཱདིསམཱཙཱརསྶ དུཀྐརཏྟཱ ཨཀཱལོ ཨེཝ.

སམནུསྶརཎཀརཎནྟི ¶ ཨནུསྶརིཏཱནུསྶརིཏཀྑཎེ པཱིཏིཔཱམོཛྫཛནནཏོ ཨནུསྶརཎུཔྤཱདཀཾ. ཝིགཏཱུཔཀྐིལེས…པེ… སཾཝཏྟཏཱིཏི ཨེཏྠ ཡཐཱ ¶ ཨབྦྷཧིམཱདིཨུཔཀྐིལེསཝིརཧིཏཱནཾ ཙནྡིམསཱུརིཡཱནཾ སསྶིརཱིཀཏཱ ཧོཏི, ཨེཝམསྶཱཔི ཙོདཀསྶ པཱཔཔུགྒལཱུཔཀྐིལེསཝིགམེན སསྶིརཱིཀཏཱ ཧོཏཱིཏི ཨདྷིཔྤཱཡོ.

༣༩༩. ཨདྷིགཏཾ མེཏྟཙིཏྟནྟི ཨཔྤནཱཔྤཏྟཾ མེཏྟཛྷཱནཾ.

༤༠༠-༡. ‘‘དོསནྟརོ’’ཏི ཨེཏྠ ཨནྟར-སདྡོ ཙིཏྟཔརིཡཱཡོཏི ཨཱཧ ‘‘ན དུཊྛཙིཏྟོ ཧུཏྭཱ’’ཏི.

ཀཱརུཉྙཾ ནཱམ ཀརུཎཱ ཨེཝཱཏི ཨཱཧ ‘‘ཀཱརུཉྙཏཱཏི ཀརུཎཱབྷཱཝོ’’ཏི. ཀརུཎནྟི ཨཔྤནཱཔྤཏྟཾ ཝདཏི. ཏཐཱ མེཏྟནྟི.

ཨཏྟཱདཱནཨངྒཀཐཱདིཝཎྞནཱ ནིཊྛིཏཱ.

པཱཏིམོཀྑཊྛཔནཀྑནྡྷཀཝཎྞནཱནཡོ ནིཊྛིཏོ.

༡༠. བྷིཀྑུནིཀྑནྡྷཀོ

མཧཱཔཛཱཔཏིགོཏམཱིཝཏྠུཀཐཱཝཎྞནཱ

༤༠༣. བྷིཀྑུནིཀྑནྡྷཀེ ¶ ¶ ‘‘མཱཏུགཱམསྶ པབྦཛིཏཏྟཱ’’ཏི ཨིདཾ པཉྩཝསྶསཏཏོ ཨུདྡྷཾ སདྡྷམྨསྶ ཨཔྤཝཏྟནཀཱརཎདསྶནཾ. སུཀྑཝིཔསྶཀཁཱིཎཱསཝཝསེན ཝསྶསཧསྶནྟིཨཱདི ཁནྡྷཀབྷཱཎཀཱནཾ མཏཾ གཧེཏྭཱ ཝུཏྟཾ. དཱིགྷནིཀཱཡཊྛཀཐཱཡཾ པན ‘‘པཊིསམྦྷིདཱཔྤཏྟེཧི ཝསྶསཧསྶཾ ཨཊྛཱསི, ཚལ༹བྷིཉྙེཧི ཝསྶསཧསྶཾ, ཏེཝིཛྫེཧི ཝསྶསཧསྶཾ, སུཀྑཝིཔསྶཀེཧི ཝསྶསཧསྶཾ, པཱཏིམོཀྑེཧི ཝསྶསཧསྶཾ ཨཊྛཱསཱི’’ཏི (དཱི. ནི. ཨཊྛ. ༣.༡༦༡) ཝུཏྟཾ. ཨངྒུཏྟར (ཨ. ནི. ཨཊྛ. ༣.༨.༥༡) -སཾཡུཏྟཊྛཀཐཱསུཔི (སཾ. ནི. ཨཊྛ. ༢.༢.༡༥༦) ཨཉྙཐཱཝ ཝུཏྟཾ, ཏཾ སབྦཾ ཨཉྙམཉྙཝིརུདྡྷམྤི ཏཾཏཾབྷཱཎཀཱནཾ མཏེན ལིཁིཏསཱིཧལ༹ཊྛཀཐཱསུ ཨཱགཏནཡམེཝ གཧེཏྭཱ ཨཱཙརིཡེན ལིཁིཏཾ ཨཱིདིསེ ཀཐཱཝིརོདྷེ སཱསནཔརིཧཱནིཡཱ ཨབྷཱཝཏོ, སོདྷནུཔཱཡཱབྷཱཝཱ ཙ. པརམཏྠཝིརོདྷོ ཨེཝ ཧི སུཏྟཱདིནཡེན སོདྷནཱིཡོ, ན ཀཐཱམགྒཝིརོདྷོཏི.

མཧཱཔཛཱཔཏིགོཏམཱིཝཏྠུཀཐཱཝཎྞནཱ ནིཊྛིཏཱ.

བྷིཀྑུནཱིཨུཔསམྤདཱནུཛཱནནཀཐཱཝཎྞནཱ

༤༠༤-༨. པཱལི༹ཡཾ ཡདགྒེནཱཏི ཡསྨིཾ དིཝསེ. ཏདཱཏི ཏསྨིཾཡེཝ དིཝསེ. ཝིམཱནེཏྭཱཏི ཨཝམཱནཾ ཀཏྭཱ.

༤༡༠-༡. ཨཱཔཏྟིགཱམིནིཡོཏི ཨཱཔཏྟིཾ ཨཱཔནྣཱཡོ. ཀམྨཝིབྷངྒེཏི པརིཝཱརེ ཀམྨཝིབྷངྒེ (པརི. ༤༨༢ ཨཱདཡོ).

༤༡༣-༥. པཱལི༹ཡཾ ¶ དྭེ ཏིསྶོ བྷིཀྑུནིཡོཏི དྭཱིཧི ཏཱིཧི བྷིཀྑུནཱིཧི. ན ཨཱརོཙེནྟཱིཏི པཱཏིམོཀྑུདྡེསཀསྶ ན ཨཱརོཙེནྟི.

༤༡༦. དུསྶཝེཎིཡཱཏི ཨནེཀདུསྶཔཊྚེ ཨེཀཏོ ཀཏྭཱ ཀཏཝེཎིཡཱ.

༤༡༧. ཝིསེསཀནྟི ¶ པཏྟལེཁཱདིཝཎྞཝིསེསཾ. པཀིཎནྟཱིཏི ཝིཀྐིཎནྟི. ནམནཀནྟི པཱསུཀཊྛིནམནཀབནྡྷནཾ.

༤༢༢-༥. སཾཝེལླིཡནྟི ཀཙྪཾ བནྡྷིཏྭཱ ནིཝཱསནཾ. ཏཡོ ནིསྶཡེཏི རུཀྑམཱུལསེནཱསནསྶ ཏཱསཾ ཨལབྦྷནཏོ ཝུཏྟཾ.

༤༢༦-༨. ཨཊྛེཝ བྷིཀྑུནིཡོ ཡཐཱཝུཌྜྷཾ པཊིབཱཧནྟཱིཏི ཨཊྛ བྷིཀྑུནིཡོ ཝུཌྜྷཔཊིཔཱཊིཡཱཝ གཎྷནྟིཡོ ཨཱགཏཔཊིཔཱཊིཾ པཊིབཱཧནྟི, ནཱཉྙཱཏི ཨཏྠོ. ཨནུཝཱདཾ པཊྛཔེནྟཱིཏི ཨིསྶརིཡཾ པཝཏྟེནྟཱིཏི ཨཏྠཾ ཝདནྟི.

༤༣༠. བྷིཀྑུདཱུཏེནཱཏི བྷིཀྑུནཱ དཱུཏབྷཱུཏེན. སིཀྑམཱནདཱུཏེནཱཏི སིཀྑམཱནཱཡ དཱུཏཱཡ.

༤༣༡. ན སམྨཏཱིཏི ནཔྤཧོཏི. ནཝཀམྨནྟི ‘‘ནཝཀམྨཾ ཀཏྭཱ ཝསཏཱུ’’ཏི ཨཔལོཀེཏྭཱ སངྒྷིཀབྷཱུམིཡཱ ཨོཀཱསདཱནཾ.

༤༣༢-༦. སནྣིསིནྣགབྦྷཱཏི དུཝིཉྙེཡྻགབྦྷཱ. མཧིལཱཏིཏྠེཏི ཨིཏྠཱིནཾ སཱདྷཱརཎཏིཏྠེ.

བྷིཀྑུནཱིཨུཔསམྤདཱནུཛཱནནཀཐཱཝཎྞནཱ ནིཊྛིཏཱ.

བྷིཀྑུནིཀྑནྡྷཀཝཎྞནཱནཡོ ནིཊྛིཏོ.

༡༡. པཉྩསཏིཀཀྑནྡྷཀོ

ཁུདྡཱནུཁུདྡཀསིཀྑཱཔདཀཐཱཝཎྞནཱ

༤༣༧. པཉྩསཏིཀཀྑནྡྷཀེ ¶ ¶ པཱལི༹ཡཾ ‘‘ཨཔཱཝུསོ, ཨམྷཱཀཾ སཏྠཱརཾ ཛཱནཱསཱི’’ཏི ཨིདཾ ཐེརོ སཡཾ བྷགཝཏོ པརིནིབྦུཏབྷཱཝཾ ཛཱནནྟོཔི ཨཏྟནཱ སཧགཏབྷིཀྑུཔརིསཱཡ ཉཱཔནཏྠམེཝ, སུབྷདྡསྶ ཝུཌྜྷཔབྦཛིཏསྶ སཱསནསྶ པཊིཔཀྑཝཙནཾ བྷིཀྑཱུནཾ ཝིཉྙཱཔནཏྠཉྩ ཨེཝཾ པུཙྪི. སུབྷདྡོ ཧི ཀུསིནཱརཱཡཾ བྷགཝཏི ཨབྷིཔྤསནྣཱཡ ཁཏྟིཡཱདིགཧཊྛཔརིསཱཡ མཛ྄ཛྷེ བྷགཝཏོ པརིནིབྦཱནཾ སུཏྭཱ ཧཊྛཔཧཊྛོཔི བྷཡེན པཧཊྛཱཀཱརཾ ཝཱཙཱཡ པཀཱསེཏུཾ ན སཀྑིསྶཏི, ཨིདྷེཝ པན ཝིཛནཔདེསེ སུཏྭཱ ཡཐཱཛ྄ཛྷཱསཡཾ ཨཏྟནོ པཱཔལདྡྷིཾ པཀཱསེསྶཏི, ཏཏོ ཏམེཝ པཙྩཡཾ དསྶེཏྭཱ བྷིཀྑཱུ སམུསྶཱཧེཏྭཱ དྷམྨཝིནཡསངྒཧཾ ཀཱརེཏྭཱ ཨེཏསྶ པཱཔབྷིཀྑུསྶ, ཨཉྙེསཉྩ ཨཱིདིསཱནཾ མནོརཐཝིགྷཱཏཾ, སཱསནཊྛིཏིཉྩ ཀརིསྶཱམཱིཏི ཛཱནནྟོཝ ཏཾ པུཙྪཱིཏི ཝེདིཏབྦཾ. ཏེནེཝ ཐེརོ ‘‘ཨེཀམིདཱཧཾ, ཨཱཝུསོ, སམཡ’’ནྟིཨཱདིནཱ སུབྷདྡཝཙནམེཝ དསྶེཏྭཱ དྷམྨཝིནཡཾ སངྒཱཡཱཔེསི. ནཱནཱབྷཱཝོཏི སརཱིརེན ནཱནཱདེསབྷཱཝོ, ཝིཔྤཝཱསོཏི ཨཏྠོ. ཝིནཱབྷཱཝོཏི མརཎེན ཝིཡུཛྫནཾ. ཨཉྙཐཱབྷཱཝོཏི བྷཝནྟརཱུཔགམནེན ཨཉྙཱཀཱརཔྤཏྟི.

༤༤༡. ‘‘ཨཱཀངྑམཱནོ…པེ… སམཱུཧནེཡྻཱ’’ཏི ཨིདཾ བྷགཝཱ མཡཱ ‘‘ཨཱཀངྑམཱནོ’’ཏི ཝུཏྟཏྟཱ ཨེཀསིཀྑཱཔདམྤི སམཱུཧནིཏབྦཾ ཨཔསྶནྟཱ, སམཱུཧནེ ཙ དོསཾ དིསྭཱ དྷམྨསངྒཧཀཱ བྷིཀྑཱུ ‘‘ཨཔཉྙཏྟཾ ན པཉྙཱཔེསྶཱམ, པཉྙཏྟཾ ན སམུཙྪིནྡིསྶཱམཱ’’ཏིཨཱདིནཱ པུན ‘‘པཉྙཏྟིསདིསཱཡ ཨཀུཔྤཱཡ ཀམྨཝཱཙཱཡ སཱཝེཏྭཱ སམཱདཱཡ ཝཏྟིསྶནྟི, ཏཏོ ཡཱཝ སཱསནནྟརདྷཱནཱ ཨཔྤཊིབཱཧིཡཱནི སིཀྑཱཔདཱནི བྷཝིསྶནྟཱི’’ཏི ཨིམིནཱ ཨདྷིཔྤཱཡེན ཨཝོཙཱཏི དཊྛབྦཾ. ཏེནེཝ མཧཱཐེརཱཔི ཏཐེཝ པཊིཔཛྫིཾསུ.

གིཧིགཏཱནཱིཏི ¶ གིཧཱིསུ གཏཱནི. ཁཏྟིཡམཧཱསཱརཱདིགིཧཱིཧི ཉཱཏཱནཱིཏི ཨཏྠོ. ཙིཏཀདྷཱུམཀཱལོ ཨཏྟནོ པཝཏྟིཔརིཡོསཱནབྷཱུཏོ ཨེཏསྶཱཏི དྷཱུམཀཱལིཀཾ.

༤༤༣. ཨོལཱ༹རིཀེ ¶ ནིམིཏྟེ ཀརིཡམཱནེཔཱིཏི ‘‘ཨཱཀངྑམཱནོ, ཨཱནནྡ, ཏཐཱགཏོ ཀཔྤཾ ཝཱ ཏིཊྛེཡྻ ཀཔྤཱཝསེསཾ ཝཱ’’ཏི ཨེཝཾ ཐཱུལཏརེ ‘‘ཏིཊྛཏུ, བྷགཝཱ, ཀཔྤ’’ནྟི ཡཱཙནཧེཏུབྷཱུཏེ ཨོཀཱསནིམིཏྟེ ཀམྨེ ཀརིཡམཱནེ. མཱརེན པརིཡུཊྛིཏཙིཏྟོཏི མཱརེན ཨཱཝིཊྛཙིཏྟོ.

༤༤༥. ཨུཛྫཝནིཀཱཡཱཏི པཊིསོཏགཱམིནིཡཱ. ཀུཙྪིཏོ ལཝོ ཚེདོ ཝིནཱསོ ཀུལཝོ, ནིརཏྠཀཝིནིཡོགོ. ཏཾ ན གཙྪནྟཱིཏི ན ཀུལཝཾ གམེནྟི.

ཁུདྡཱནུཁུདྡཀསིཀྑཱཔདཀཐཱཝཎྞནཱ ནིཊྛིཏཱ.

པཉྩསཏིཀཀྑནྡྷཀཝཎྞནཱནཡོ ནིཊྛིཏོ.

༡༢. སཏྟསཏིཀཀྑནྡྷཀོ

དསཝཏྠུཀཐཱཝཎྞནཱ

༤༤༦. སཏྟསཏིཀཀྑནྡྷཀེ ¶ ¶ བྷིཀྑགྒེནཱཏི བྷིཀྑུགཎནཱཡ. མཧཱིཏི ཧིམཾ.

༤༤༧. ཨཝིཛྫཱནིཝུཏཱཏི ཨཝིཛྫཱནཱིཝརཎེན ནིཝུཏཱ པཊིཙྪནྣཱ. ཨཝིདྡསཱུཏི ཨཉྙཱཎིནོ. ཨུཔཀྐིལེསཱ ཝུཏྟཱཏི ཏེསཾ སམཎབྲཱཧྨཎཱནཾ ཨེཏེ སུརཱཔཱནཱདཡོ ཨུཔཀྐིལེསཱཏི ཝུཏྟཱ. ནེཏྟིཡཱ ཏཎྷཱཡ སཧིཏཱ སནེཏྟིཀཱ.

༤༥༠-༡. ཨཧོགངྒོཏི ཏསྶ པབྦཏསྶ ནཱམཾ. པཊིཀཙྩེཝ གཙྪེཡྻནྟི ཡཏྠ ནཾ ཨདྷིཀརཎཾ ཝཱུཔསམིཏུཾ བྷིཀྑཱུ སནྣིཔཏིསྶནྟི, ཏཏྠཱཧཾ པཋམམེཝ གཙྪེཡྻཾ. སམྦྷཱཝེསུནྟི སམྤཱཔུཎིཾསུ.

༤༥༢. ཨལོཎིཀནྟི ལོཎརཧིཏཾ བྷཏྟཾ, བྱཉྫནཾ ཝཱ. ཨཱསུཏཱཏི སབྦསམྦྷཱརསཛྫིཏཱ, ‘‘ཨསུཏྟཱ’’ཏི ཝཱ པཱཋོ.

༤༥༣. ཨུཛྫཝིཾསཱུཏི ནཱཝཱཡ པཊིསོཏཾ གཙྪིཾསུ. པཱཙཱིནཀཱཏི པུརཏྠིམདིསཱཡ ཛཱཏཏྟཱ ཝཛྫིཔུཏྟཀེ སནྡྷཱཡ ཝུཏྟཾ. པཱཝེཡྻཀཱཏི པཱཝེཡྻདེསཝཱསིནོ.

༤༥༤. ནནུ ཏྭཾ, ཨཱཝུསོ, ཝུཌྜྷོཏི ནནུ ཏྭཾ ཐེརོ ནིསྶཡམུཏྟོ, ཀསྨཱ ཏཾ ཐེརོ པཎཱམེསཱིཏི བྷེདཝཙནཾ ཝདནྟི. གརུནིསྶཡཾ གཎྷཱམཱཏི ནིསྶཡམུཏྟཱཔི མཡཾ ཨེཀཾ སམྦྷཱཝནཱིཡགརུཾ ནིསྶཡབྷཱུཏཾ གཧེཏྭཱཝ ཝསིསྶཱམཱཏི ཨདྷིཔྤཱཡོ.

༤༥༥. མཱུལཱདཱཡཀཱཏི པཋམཾ དསཝཏྠཱུནཾ དཱཡཀཱ, ཨཱཝཱསིཀཱཏི ཨཏྠོ. པཐབྱཱ སངྒྷཏྠེརོཏི ¶ ལོཀེ སབྦབྷིཀྑཱུནཾ ཏདཱ ཨུཔསམྤདཱཡ ཝུཌྜྷོ. སུཉྙཏཱཝིཧཱརེནཱཏི སུཉྙཏཱམུཁེན ཨདྷིགཏཕལསམཱཔཏྟིཾ སནྡྷཱཡ ཝདཏི.

༤༥༧. སུཏྟཝིབྷངྒེཏི པདབྷཱཛནཱིཡེ. ཨིདཉྩ ‘‘ཡོ པན བྷིཀྑུ སནྣིདྷིཀཱརཀཾ ཁཱདནཱིཡཾ ཝཱ བྷོཛནཱིཡཾ ཝཱ’’ཏི (པཱཙི. ༢༥༣) སུཏྟེ ཡཱཝཀཱལིཀསྶེཝ པརཱམཊྛཏྟཱ ¶ སིངྒཱིལོཎསྶ ཡཱཝཛཱིཝིཀསྶ སནྣིདྷིཀཏསྶ ཨཱམིསེན སདྡྷིཾ པརིབྷོགེ པཱཙིཏྟིཡཾ ཝིབྷངྒནཡེནེཝ སིཛ྄ཛྷཏཱིཏི ཝུཏྟཾ, ཏཾ པན པཱཙིཏྟིཡཾ ཝིབྷངྒེ ཨཱགཏབྷཱཝཾ སཱདྷེཏུཾ ‘‘ཀཐཾ སུཏྟཝིབྷངྒེ’’ཏིཨཱདི ཝུཏྟཾ. ཏཏྠ ཧི ལོཎམེཏྠ སནྣིདྷིཀཏཾ, ན ཁཱདནཱིཡཾ བྷོཛནཱིཡནྟི ལོཎམིསྶབྷོཛནེ ཝཛྫིཔུཏྟཀཱ ཨནཝཛྫསཉྙིནོ ཨཧེསུཾ. ཏཐཱསཉྙཱིནམྤི ནེསཾ ཨཱཔཏྟིདསྶནཏྠཾ ‘‘སནྣིདྷིཀཱརེ ཨསནྣིདྷིཀཱརསཉྙཱི’’ཏི ཨིདཾ སུཏྟཝིབྷངྒཾ ཨུདྡྷཊནྟི ཝེདིཏབྦཾ.

ཏེན སདྡྷིནྟི པུརེཔཊིགྒཧིཏལོཎེན སདྡྷིཾ. དུཀྐཊེནེཏྠ བྷཝིཏབྦནྟི ‘‘ཡཱཝཀཱལིཀེན, བྷིཀྑཝེ, ཡཱཝཛཱིཝིཀཾ པཊིགྒཧིཏ’’ནྟི ཨཝཏྭཱ ‘‘ཏདཧུཔཊིགྒཧིཏ’’ནྟི ཝཙནསཱམཏྠིཡཏོ པུརེཔཊིགྒཧིཏཾ ཡཱཝཛཱིཝིཀཾ ཡཱཝཀཱལིཀེན སདྡྷིཾ སམྦྷིནྣརསཾ ཀཱལེཔི ན ཀཔྤཏཱིཏི སིཛ྄ཛྷཏི, ཏཏྠ དུཀྐཊེན བྷཝིཏབྦནྟི ཨདྷིཔྤཱཡོ. དུཀྐཊེནཔི ན བྷཝིཏབྦནྟི ཡདི ཧི སནྣིདྷིཀཱརཔཙྩཡཱ དུཀྐཊཾ མཉྙཐ, ཡཱཝཛཱིཝིཀསྶ ལོཎསྶ སནྣིདྷིདོསཱབྷཱཝཱ དུཀྐཊེན ན བྷཝིཏབྦཾ, ཨཐ ཨཱམིསེན སམྦྷིནྣརསསྶ ཏསྶ ཨཱམིསགཏིཀཏྟཱ དུཀྐཊཾ མཱ མཉྙཐ. ཏདཱ ཙ ཧི པཱཙིཏྟིཡེནེཝ བྷཝིཏབྦཾ ཨཱམིསཏྟུཔགམནཏོཏི ཨདྷིཔྤཱཡོ. ན ཧི ཨེཏྠ ཡཱཝཛཱིཝིཀནྟིཨཱདིནཱཔི དུཀྐཊཱབྷཱཝཾ སམཏྠེཏི.

པཱལི༹ཡཾ རཱཛགཧེ སུཏྟཝིབྷངྒེཏིཨཱདཱིསུ སབྦཏྠ སུཏྟེ ཙ ཝིབྷངྒེ ཙཱཏི ཨཏྠོ གཧེཏབྦོ. ཏསྶ ཏསྶ ཝིཀཱལབྷོཛནཱདིནོ སུཏྟེཔི པཊིཀྑིཏྟཏྟཱ ཝིནཡསྶ ཨཏིསརཎཾ ཨཏིཀྐམོ ཝིནཡཱཏིསཱརོ. ‘‘ནིསཱིདནཾ ནཱམ སདསཾ ཝུཙྩཏཱིཏི ཨཱགཏ’’ནྟི ཨིདཾ ཝིབྷངྒེ ཙ ཨཱགཏདསྶནཏྠཾ ཝུཏྟཾ. ཏཾ པམཱཎཾ ཀརོནྟསྶཱཏི སུགཏཝིདཏྠིཡཱ ཝིདཏྠིཏྟཡཔྤམཱཎཾ ཀརོནྟསྶ, དསཱཡ པན ཝིདཏྠིདྭཡཔྤམཱཎཾ ཀཏཾ. ཨདསཀམྤི ནིསཱིདནཾ ཝཊྚཏི ཨེཝཱཏི ཨདྷིཔྤཱཡོ. སེསམིདྷ ཧེཊྛཱ སབྦཏྠ སུཝིཉྙེཡྻམེཝ.

དསཝཏྠུཀཐཱཝཎྞནཱ ནིཊྛིཏཱ.

སཏྟསཏིཀཀྑནྡྷཀཝཎྞནཱནཡོ ནིཊྛིཏོ.

ཨིཏི སམནྟཔཱསཱདིཀཱཡ ཝིནཡཊྛཀཐཱཡ ཝིམཏིཝིནོདནིཡཾ

ཙཱུལ༹ཝགྒཝཎྞནཱནཡོ ནིཊྛིཏོ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

པརིཝཱརཝཎྞནཱ

མཧཱཝགྒོ

པཉྙཏྟིཝཱརཝཎྞནཱ

༡. ཝིསུདྡྷཔརིཝཱརསྶ ¶ ¶ སཱིལཀྑནྡྷཱདིདྷམྨཀྑནྡྷསརཱིརསྶ བྷགཝཏོ ཝིནཡཔརིཡཏྟིསཱསནེ ཁནྡྷཀཱནཾ ཨནནྟརཾ པརིཝཱརོཏི ཡོ ཝིནཡོ སངྒཧཾ སམཱརུལ༹ྷོ, ཏསྶ དཱནི ཨནུཏྟཱནཏྠཝཎྞནཾ ཀརིསྶཱམཱིཏི ཡོཛནཱ.

སམནྟཙཀྑུནཱཏི སབྦཉྙུཏཉྙཱཎེན. ཨཏིཝིསུདྡྷེན མཾསཙཀྑུནཱཏི རཏྟིནྡིཝཾ སམནྟཱ ཡོཛནཔྤམཱཎེ ཨཏིསུཁུམཱནིཔི རཱུཔཱནི པསྶནཏོ ཨཏིཝིཡ པརིསུདྡྷེན པསཱདཙཀྑུནཱ. ‘‘ཨཏྠི ཏཏྠ པཉྙཏྟཱི’’ཏིཨཱདཱིསུ ཨཏྠི ནུ ཁོ ཏཏྠ པཉྙཏྟཱིཏིཨཱདིནཱ ཨཏྠོ གཧེཏབྦོཏི ཨཱཧ ‘‘ཏཏྠ པཉྙཏྟི…པེ… ཀེནཱབྷཏནྟི པུཙྪཱ’’ཏི.

༢. པུཙྪཱཝིསྶཛྫནེཏི ¶ པུཙྪཱཡ ཝིསྶཛྫནེ. ཝིནཱིཏཀཐཱཏི ཝིནཱིཏཝཏྠུཀཐཱ, ཨཡམེཝ ཝཱ པཱཋོ.

དྭངྒིཀེན ཨེཀེན སམུཊྛཱནེནཱཏི ཨངྒདྭཡསམུདཱཡབྷཱུཏེན ཨེཀེན. ཨངྒདྭཡཝིམུཏྟསྶ སམུཊྛཱནསྶ ཨབྷཱཝེཔི ཏེསུ ཨེཀེནངྒེན ཝིནཱ ཨཡཾ ཨཱཔཏྟི ན ཧོཏཱིཏི དསྶནཏྠམེཝ ‘‘ཨེཀེན སམུཊྛཱནེནཱ’’ཏི ཝུཏྟཾ. ཨིདཱནི ཏེསུ དྭཱིསུ ཨངྒེསུ པདྷཱནངྒཾ དསྶེཏུམཱཧ ‘‘ཨེཏྠ ཧི ཙིཏྟཾ ཨངྒཾ ཧོཏཱི’’ཏིཨཱདི. ཡསྨཱ པན མགྒེནམགྒཔྤཊིཔཏྟིསངྑཱཏཱཡ ཀཱཡཝིཉྙཏྟིཡཱ སེཝནཙིཏྟེནེཝ སམྦྷཝེ སཏི ཨཡཾ ཏཾ ཨངྒདྭཡཾ ཨུཔཱདཱཡ བྷགཝཏཱ པཉྙཏྟཱ ཨཱཔཏྟིསམྨུཏི ཧོཏི, ནཱསཏི. ཏསྨཱ ཏཾ ཙིཏྟཾ ཀཱཡཝིཉྙཏྟིསངྑཱཏསྶ ཀཱཡསྶ ཨངྒཾ ཀཱརཎཾ ཧོཏི, ན ཨཱཔཏྟིཡཱ. ཏསྶ པན ཏཾསམུཊྛིཏཀཱཡོ ཨེཝ ཨངྒཾ ཨབྱཝཧིཏཀཱརཎཾ, ཙིཏྟཾ པན ཀཱརཎཀཱརཎནྟི ཨདྷིཔྤཱཡོ. ཨེཝཾ ཨུཔརིཔི སབྦཏྠ ཙིཏྟངྒཡུཏྟསམུཊྛཱནེསུ ཨདྷིཔྤཱཡོ ¶ ཝེདིཏབྦོ. ‘‘ཨེཀེན སམུཊྛཱནེན སམུཊྛཱཏཱི’’ཏིཨཱདིཔརིཝཱརཝཙནེནེཝ ཨཱཔཏྟིཡཱ ཨཀུསལཱདིཔརམཏྠསབྷཱཝཏཱ པཱལི༹ཨཊྛཀཐཱསུ པརིཡཱཡཏོཝ ཝུཏྟཱ, སམྨུཏིསབྷཱཝཱ ཨེཝ ཨཱཔཏྟཱིཏི སིཛ྄ཛྷཏི སམུཊྛཱནསམུཊྛིཏཱནཾ བྷེདསིདྡྷིཏོཏི གཧེཏབྦཾ. ཨིམམཏྠཾ སནྡྷཱཡཱཏི ཨཱཔནྣཱཡ པཱརཱཛིཀཱཔཏྟིཡཱ ཀེཧིཙིཔི སམཐེཧི ཨནཱཔཏྟིབྷཱཝཱཔཱདནསྶ ཨསཀྐུཎེཡྻཏྟསངྑཱཏམཏྠཾ སནྡྷཱཡ.

༣. པོརཱཎཀེཧི མཧཱཐེརེཧཱིཏི སངྒཱིཏིཏྟཡཏོ པཙྪཱ པོཏྠཀསངྒཱིཏིཀཱརཀེཧི ཚལ༹བྷིཉྙཱཔཨསམྦྷིདཱདིགུཎསམུཛྫལེཧི མཧཱཐེརེཧི. ཙཏུཏྠསངྒཱིཏིསདིསཱ ཧི པོཏྠཀཱརོཧསངྒཱིཏི.

༡༨༨. མཧཱཝིབྷངྒེཏི བྷིཀྑུཝིབྷངྒེ. སོལ༹ས ཝཱརཱ དསྶིཏཱཏི ཡེཧི ཝཱརེཧི ཨཱདིབྷཱུཏེཧི ཨུཔལཀྑིཏཏྟཱ ཨཡཾ སཀལོཔི པརིཝཱརོ སོལ༹སཔརིཝཱརོཏི ཝོཧརཱིཡཏི, ཏེ སནྡྷཱཡ ཝདཏི.

པཉྙཏྟིཝཱརཝཎྞནཱ ནིཊྛིཏཱ.

སམུཊྛཱནསཱིསཝཎྞནཱ

༢༥༧. པཱལི༹ཡཾ ནིབྦཱནཉྩེཝ པཉྙཏྟཱིཏི ཨེཏྠ ཡསྨཱ སངྑཏདྷམྨེ ཨུཔཱདཱཡ པཉྙཏྟཱ སམྨུཏིསཙྩབྷཱུཏཱ པུགྒལཱདིཔཉྙཏྟི པརམཏྠཏོ ཨཝིཛྫམཱནཏྟཱ ཨུཔྤཏྟིཝིནཱསཡུཏྟཝཏྠུདྷམྨནིཡཏེན ཨནིཙྩདུཀྑལཀྑཎདྭཡེན ཡུཏྟཱཏི ཝཏྟུཾ ཨཡུཏྟཱ, ཀཱརཀཝེདཀཱདིརཱུཔེན པན པརིཀཔྤིཏེན ཨཏྟསབྷཱཝེན ཝིརཧིཏཏྟཱ ‘‘ཨནཏྟཱ’’ཏི ཝཏྟུཾ ཡུཏྟཱ. ཏསྨཱ ཨཡཾ པཉྙཏྟིཔི ཨསངྑཏཏྟསཱམཉྙཏོ ¶ ཝཏྠུབྷཱུཏེན ནིབྦཱནེན སཧ ‘‘ཨནཏྟཱ ཨིཏི ནིཙྪཡཱ’’ཏི ཝུཏྟཱ. ཨཝིཛྫམཱནཱཔི ཧི སམྨུཏི ཀེནཙི པཙྩཡེན ཨཀཏཏྟཱ ཨསངྑཏཱ ཨེཝཱཏི.

ཀརུཎཱསཱིཏལཏྟཾ, པཉྙཱཔབྷཱསིཏཏྟཉྩ བྷགཝཏོ དསྶེཏུཾ ‘‘བུདྡྷཙནྡེ, བུདྡྷཱདིཙྩེ’’ཏི ཨེཏཾ ཨུབྷཡཾ ཝུཏྟཾ. ཧཱཡཏི ཨེཏེནཱཏི ཧཱནི, དུཀྑསྶ ཧཱནི དུཀྑཧཱནི, སབྦདུཀྑཱཔནཱུདནཀཱརཎནྟི ཨཏྠོ. པིཊཀེ ཏཱིཎི དེསཡཱིཏི ཡསྨཱ ཨཉྙེཔི མཧཱཝཱིརཱ སམྨཱསམྦུདྡྷཱ སདྡྷམྨཾ དེསཡནྟི, ཏསྨཱ ¶ ཨངྒཱིརསོ པིཊཀཱནི ཏཱིཎི དེསཡཱིཏི ཡོཛནཱ. མཧཱགུཎནྟི མཧཱནིསཾསཾ. ཨེཝཾ ནཱིཡཏི སདྡྷམྨོཏི ཡདི ཝིནཡཔརིཡཏྟི ཨཔརིཧཱིནཱ ཏིཊྛཏི, ཨེཝཾ སཏི པཊིཔཏྟིཔཊིཝེདྷསདྡྷམྨོཔི ནཱིཡཏི པཝཏྟཱིཡཏི, ན པརིཧཱཡཏཱིཏི ཨཏྠོ.

ཝིནཡཔརིཡཏྟི པན ཀཐཾ ཏིཊྛཏཱིཏི ཨཱཧ ‘‘ཨུབྷཏོ ཙཱ’’ཏིཨཱདི. པརིཝཱརེན གནྠིཏཱ ཏིཊྛཏཱིཏི ཡོཛེཏབྦཾ. ཏསྶེཝ པརིཝཱརསྶཱཏི ཏསྨིཾ ཨེཝ པརིཝཱརེ. སམུཊྛཱནཾ ནིཡཏོ ཀཏནྟི ཨེཀཙྩཾ སམུཊྛཱནེན ནིཡཏཾ ཀཏཾ. ཏསྨིཾ པརིཝཱརེ ཀིཉྩི སིཀྑཱཔདཾ ནིཡཏསམུཊྛཱནཾ ཨཉྙེཧི ཨསཱདྷཱརཎཾ, ཏཾ པཀཱསིཏནྟི ཨཏྠོ.

སམྦྷེདཾ ནིདཱནཉྩཉྙནྟི སམྦྷེདོ སིཀྑཱཔདཱནཾ ཨཉྙམཉྙསམུཊྛཱནེན སཾཀིཎྞཏཱ, ནིདཱནཉྩ པཉྙཏྟིཊྛཱནཾ, ཨཉྙཾ པུགྒལཱདིཝཏྠཱདི ཙ. སུཏྟེ དིསྶནྟི ཨུཔརཱིཏི ཧེཊྛཱ ཝུཏྟེ, ཨུཔརི ཝཀྑམཱནེ ཙ པརིཝཱརསུཏྟེ ཨེཝ དིསྶནྟི. ཡསྨཱ ཙ ཨེཝཾ, ཏསྨཱ སཀལསཱསནཱདྷཱརསྶ ཝིནཡསྶ ཋིཏིཧེཏུབྷཱུཏཾ པརིཝཱརཾ སིཀྑེཏི, ཨེཝམེཏྠ ཡོཛནཱ དཊྛབྦཱ.

སམྦྷིནྣསམུཊྛཱནཱནཱིཏི ཨཉྙེཧི སཱདྷཱརཎསམུཊྛཱནཱནི. ཨཱདིམྷི ཏཱཝ པུརིམནཡེཏི སབྦཔཋམེ པཉྙཏྟིཝཱརེ ཨཱགཏནཡཾ སནྡྷཱཡ ཝདཏི, ཏཏྠ པན པཉྙཏྟིཝཱརེ ‘‘པཋམཾ པཱརཱཛིཀཾ ཀཏྠ པཉྙཏྟནྟི, ཝེསཱལིཡཾ པཉྙཏྟ’’ནྟིཨཱདིནཱ (པརི. ༡) ནིདཱནམྤི དིསྶཏི ཨེཝ. པརཏོཏི ཨཱགཏབྷཱཝཾ པན སནྡྷཱཡ པརཏོ ཨཱགཏེ སུཏྟེ དིསྶཏཱིཏི ཝེདིཏབྦནྟི ཝུཏྟཾ. ཏསྶཱཏི ཨུབྷཏོཝིབྷངྒཔརིཡཱཔནྣསྶ སིཀྑཱཔདསྶ.

༢༥༨. ཨནིཡཏཱ པཋམིཀཱཏི ཨཱཔཏྟིཾ ཨཔེཀྑིཏྭཱཝ ཨིཏྠིལིངྒཾ ཀཏཾ, པཋམཱནིཡཏཾ སིཀྑཱཔདནྟི ཨཏྠོ. པཱལི༹ཡཾ ནཱནུབནྡྷེ པཝཏྟིནིནྟི ཝུཊྛཱཔིཏཾ པཝཏྟིནིཾ ཨནནུབནྡྷནསིཀྑཱཔདཾ.

༢༦༠. ཨེལ༹ཀལོམསིཀྑཱཔདཝཏྠུསྨིཾ ¶ ‘‘བྷིཀྑུནིཡོ ཨེལ༹ཀལོམཱནི དྷོཝནྟིཡོ རཛནྟིཡོ ཝིཛཊེནྟིཡོ རིཉྩནྟི ཨུདྡེསཾ པརིཔུཙྪ’’ནྟི (པཱརཱ. ༥༧༦) ཨཱགཏཏྟཱ ཨིམཾ རིཉྩནྟི-པདཾ གཧེཏྭཱ སིཀྑཱཔདཾ ཨུཔལཀྑིཏནྟི དསྶེནྟོ ‘‘ཝིབྷངྒེ ‘རིཉྩནྟི ཨུདྡེས’ནྟི ཨཱགཏཾ ཨེལ༹ཀལོམདྷོཝཱཔནསིཀྑཱཔད’’ནྟི ཨཱཧ.

ཝསྶིཀསཱཊིཀསིཀྑཱཔདནྟི ¶ ཨསམཡེ ཝསྶིཀསཱཊིཀཔརིཡེསནསིཀྑཱཔདཾ (པཱརཱ. ༦༢༦ ཨཱདཡོ). རཏནསིཀྑཱཔདནྟི རཏནཾ ཝཱ རཏནསམྨཏཾ ཝཱ པཊིསཱམནསིཀྑཱཔདཾ (པཱཙི. ༥༠༢ ཨཱདཡོ).

༢༦༥. པཱལི༹ཡཾ བུདྡྷཉཱཎེནཱཏི པཊིཝིདྡྷསབྦཉྙུཏཉྙཱཎེན.

༢༦༧. ‘‘ན དེསེནྟི ཏཐཱགཏཱ’’ཏི ཨེཏེན ཚཏྟཔཱཎིསྶ དྷམྨདེསནཱཔཊིཀྑེཔཾ དསྶེཏི.

༢༦༩. ཨཀཏནྟི ཨཉྙེཧི ཨམིསྶཱིཀཏཾ, ནིཡཏསམུཊྛཱནནྟི ཨཏྠོ. ཨཀཏནྟི ཝཱ པུབྦེ ཨནཱགཏཾ, ཨབྷིནཝནྟི ཨཏྠོ.

༢༧༠. སམུཊྛཱནཉྷི སངྑེཔནྟི ཨེཏྠ སངྑིཔནྟི སངྒཡ྄ཧནྟི སདིསསམུཊྛཱནཱནི ཨེཏྠཱཏི སངྑེཔོ, སམུཊྛཱནསཱིསཾ. ནེཏི ཝིནེཏི ཀཱཡཝཙཱིདུཙྩརིཏནྟི ནེཏྟི, ཝིནཡཔཱལི༹, སཱ ཨེཝ དྷམྨོཏི ནེཏྟིདྷམྨོཏི ཨཱཧ ‘‘ཝིནཡཔཱལི༹དྷམྨསྶཱ’’ཏི.

སམུཊྛཱནསཱིསཝཎྞནཱ ནིཊྛིཏཱ.

ཨནྟརཔེཡྻཱལཾ

ཀཏིཔུཙྪཱཝཱརཝཎྞནཱ

༢༧༡. ཀཏི ¶ ཨཱཔཏྟིཡོཏི པཱརཱཛིཀཱདཱིསུ པཉྩསུ ཨཱཔཏྟཱིསུ མེཐུནཱདིནྣཱདཱནཱདིཨནྟོགདྷབྷེདཾ ཨཔེཀྑིཏྭཱ ཛཱཏིཝསེན ཨེཀཏྟཾ ཨཱརོཔེཏྭཱ པུཙྪཱ ཀཏཱ. ཀཏི ཨཱཔཏྟིཀྑནྡྷཱཏི ཨནྟོགདྷབྷེདཾ ཨཔེཀྑིཏྭཱ པཙྩེཀཾ རཱསཊྛེནཱཏི ཨེཏྟཀམེཝེཏྠ བྷེདོ. ཝིནཱིཏཱནིཡེཝ ¶ ཝིནཱིཏཝཏྠཱུནཱིཏི ཨཱཔཏྟིཏོ ཝིརམཎཱནི ཨེཝ ཨཝིཔྤཊིསཱརཔཱམོཛྫཱདིདྷམྨཱནཾ ཀཱརཎཏྟཱ ཝཏྠཱུནཱིཏི ཝིནཱིཏཝཏྠཱུནི, ཏཱནི ཨེཏྠ ཨཏྠཏོ ཝིརཏིཨཱདིཨནཝཛྫདྷམྨཱ ཨེཝ. ཝེརཾ མཎཏཱིཏི ཝེརཧེཏུཏྟཱ ‘‘ཝེར’’ནྟི ལདྡྷནཱམཾ རཱགཱདིཨཀུསལཔཀྑཾ ཝིནཱསེཏི.

དྷམྨསྶཝནགྒཾ བྷིནྡིཏྭཱ གཙྪཏཱིཏི བཧཱུསུ ཨེཀཏོ ནིསཱིདིཏྭཱ དྷམྨཾ སུཎནྟེསུ ཏཾ དྷམྨསྶཝནསམཱགམཾ ཀོཔེཏྭཱ ཨུཊྛཱཡ གཙྪཏི. ཨནཱདརོཝཱཏི ཏུསྶིཏབྦཊྛཱནེ ཏུཊྛིཾ, སཾཝིཛིཏབྦཊྛཱནེ སཾཝེགཉྩ ཨཔཝེདེནྟོ ཨེཝ. ཀཱཡཔཱགབྦྷིཡནྟི ཨུནྣཏིཝསེན པཝཏྟནཀཱཡཱནཱཙཱརཾ.

༢༧༤. མེཏྟཱཡ སམྦྷཱུཏཾ མེཏྟཾ, ཀཱཡཀམྨཾ. ཨུབྷཡེཧིཔཱིཏི ནཝཀེཧི, ཐེརེཧི ཙ. པིཡཾ ཀརོཏཱིཏི ཏཾ པུགྒལཾ པེམཊྛཱནཾ ཀརོཏི, ཀེསནྟི ཨཱཧ ‘‘སབྲཧྨཙཱརཱིན’’ནྟི.

པུགྒལཾ པཊིཝིབྷཛིཏྭཱ བྷུཉྫཏཱིཏི པཀཏེན སམྦནྡྷོ. ཏམེཝ པུགྒལཔཊིཝིབྷཱགཾ དསྶེཏུཾ ‘‘ཨསུཀསྶཱ’’ཏིཨཱདི ཝུཏྟཾ.

བྷུཛིསྶབྷཱཝཀརཎཏོཏི ཏཎྷཱདཱསབྱཏོ མོཙེཏྭཱ སམཐཝིཔསྶནཱསུ སེརིཝིཧཱརིཏཱཀརཎཏོཏི ཨཏྠོ. ནིཡྻཱཏཱིཏི པཝཏྟཏི. སམྨཱདུཀྑཀྑཡཱཡ སཾཝཏྟཏཱིཏི ཨཏྠོ.

ཀཏིཔུཙྪཱཝཱརཝཎྞནཱ ནིཊྛིཏཱ.

ཚཨཱཔཏྟིསམུཊྛཱནཝཱརཝཎྞནཱ

༢༧༦. པཋམེན ཨཱཔཏྟིསམུཊྛཱནེནཱཏི ཀེཝལཾ ཀཱཡེན. པཱརཱཛིཀཱཔཏྟིཡཱ ཨེཀནྟསཙིཏྟཀསམུཊྛཱནཏྟཱ ‘‘ན ཧཱིཏི ཝཏྟབྦ’’ནྟི ཝུཏྟཾ. སངྒྷཱདིསེསཱདཱིནཾ ¶ དུཀྐཊཔརིཡོསཱནཱནཾ པཉྩནྣཾ ཨཙིཏྟཀཱནམྤི སམྦྷཝཏོ ‘‘སིཡཱ’’ཏི ཝུཏྟཾ, ཨཱཔཛྫནཾ སིཡཱ བྷཝེཡྻཱཏི ཨཏྠོ. ཧཱིནུཀྐཊྛེཧི ཛཱཏིཨཱདཱིཧི ཨོམསནེ ཨེཝ དུབྦྷཱསིཏསྶ པཉྙཏྟཏྟཱ སཱ ཨེཀནྟཝཱཙཱཙིཏྟསམུཊྛཱནཱ ཨེཝཱཏི.

དུཏིཡསམུཊྛཱནནཡེ ཝཱཙཱཡ ཨེཝ སམཱཔཛྫིཏབྦཔཱཊིདེསནཱིཡསྶ ཨབྷཱཝཱ ‘‘ན ཧཱི’’ཏི ཝུཏྟཾ.

ཏཏིཡེ ¶ པན ཝོསཱསམཱནརཱུཔཾ བྷིཀྑུནིཾ ཀཱཡཝཱཙཱཧི ཨནཔསཱདནཔཙྩཡཱ པཱཊིདེསནཱིཡསམྦྷཝཏོ ‘‘སིཡཱ’’ཏི ཝུཏྟཾ.

ཨོམསནེ པཱཙིཏྟིཡསྶ ཨདིནྣཱདཱནསམུཊྛཱནཏྟེཔི ཏཔྤཙྩཡཱ པཉྙཏྟསྶ དུབྦྷཱསིཏསྶ པཉྩམེནེཝ སམུཔྤཏྟཱིཏི དསྶེཏུཾ ཙཏུཏྠཝཱརེ ‘‘དུབྦྷཱསིཏཾ ཨཱཔཛྫེཡྻཱཏི ན ཧཱིཏི ཝཏྟབྦ’’ནྟི ཝཏྭཱ པཉྩམཝཱརེ ‘‘སིཡཱཏི ཝཏྟབྦ’’ནྟི ཝུཏྟཾ. ཀཱཡཝིཀཱརེནེཝ ཨོམསནྟསྶ པནེཏྠ དུབྦྷཱསིཏབྷཱཝེཔི ཀཱཡཀཱིལཱ༹བྷཱཝཱབྷཱཝཏོ དུཀྐཊམེཝཱཏི དཊྛབྦཾ.

ཚཊྛཝཱརེ པན ཝིཛྫམཱནོཔི ཀཱཡོ དུབྦྷཱསིཏསྶ ཨངྒཾ ན ཧོཏི, པཉྩམསམུཊྛཱནེ ཨེཝ ཚཊྛམྤི པཝིསཏཱིཏི དསྶེཏུཾ ‘‘ན ཧཱི’’ཏི པཊིཀྑིཏྟཾ, ན པན ཏཏྠ སབྦཐཱ དུབྦྷཱསིཏེན ཨནཱཔཏྟཱིཏི དསྶེཏུཾ. ན ཧི དཝཀམྱཏཱཡ ཀཱཡཝཱཙཱཧི ཨོམསནྟསྶ དུབྦྷཱསིཏཱཔཏྟི ན སམྦྷཝཏི. ཡཉྷི པཉྩམེནེཝ སམཱཔཛྫཏི, ཏཾ ཚཊྛེནཔི སམཱཔཛྫཏི ཨེཝ དྷམྨདེསནཱཔཏྟི ཝིཡཱཏི གཧེཏབྦཾ. སེསཾ སམུཊྛཱནཝཱརེ སུཝིཉྙེཡྻམེཝ.

ཚཨཱཔཏྟིསམུཊྛཱནཝཱརཝཎྞནཱ ནིཊྛིཏཱ.

ཀཏཱཔཏྟིཝཱརཝཎྞནཱ

༢༧༧. དུཏིཡེ པན ཀཏིཝཱརེ པཋམསམུཊྛཱནེན ཨཱཔཛྫིཏབྦཱནཾ ཨཱཔཏྟཱིནཾ ལཧུདསྶནསུཁཏྠཾ ཀུཊིཀཱརཱདཱིནི ཨེཝ སམུདྡྷཊཱནི, ན ཨཉྙེསཾ ཨབྷཱཝཱ, སཉྩརིཏྟཱདཱིནམྤི ཝིཛྫམཱནཏྟཱ. ཨེཝཾ དུཏིཡསམུཊྛཱནཱདཱིསུཔི. ‘‘ཀཔྤིཡསཉྙཱི’’ཏི ཨིམིནཱ ཨཙིཏྟཀཏྟཾ དསྶེཏི. ‘‘ཀུཊིཾ ཀརོཏཱི’’ཏི ཨིམིནཱ ཝཙཱིཔཡོགཱབྷཱཝཾ. ཨུབྷཡེནཱཔི ཀེཝལཾ ཀཱཡེནེཝ དུཀྐཊཱདཱིནཾ སམྦྷཝཾ དསྶེཏི. ཨེཝཾ ཨུཔརིཔི ཡཐཱནུརཱུཔཾ ཀཱཏབྦཾ.

‘‘ཨེཀེན ¶ སམུཊྛཱནེན སམུཊྛཧནྟཱི’’ཏི ཨིདཾ ཨིདྷ ཝིསེསེཏྭཱ དསྶིཏཱནཾ ཀཱཡཏོཝ སམུཊྛིཏཱནཾ ཝསེན ཝུཏྟཾ, ཨཝིསེསཏོ པན ཏཱ ཨཱཔཏྟིཡོ ཨིཏརསམུཊྛཱནེཧིཔི ཡཐཱརཧཾ སམུཊྛཧནྟི ཨེཝ. ཨེཝཾ ཨུཔརིཔི.

‘‘ཏིཎཝཏྠཱརཀེན ཙཱ’’ཏི ཨིདཾ སངྒྷཱདིསེསཝཛྫིཏཱནཾ ཙཏུནྣཾ ཨཱཔཏྟཱིནཾ ཝསེན ཝུཏྟཾ.

༢༧༩. སཾཝིདཧིཏྭཱ ¶ ཀུཊིཾ ཀརོཏཱིཏི ཝཱཙཱཡ སཾཝིདཧཏི, སཡཉྩ ཀཱཡེན ཀརོཏཱིཏི ཨཏྠོ.

ཀཏཱཔཏྟིཝཱརཝཎྞནཱ ནིཊྛིཏཱ.

ཨཱཔཏྟིསམུཊྛཱནགཱཐཱཝཎྞནཱ

༢༨༣. ཏཏིཡོ པན གཱཐཱཝཱརོ དུཏིཡཝཱརེན ཝུཏྟམེཝཏྠཾ སངྒཧེཏྭཱ དསྶེཏུཾ ཝུཏྟོ. ཏཏྠ ཀཱཡོཝ ཀཱཡིཀོཏི ཝཏྟབྦེ ཝཙནཝིཔལླཱསེན ‘‘ཀཱཡིཀཱ’’ཏི ཝུཏྟཾ. ཏེནཱཧ ‘‘ཏེན སམུཊྛིཏཱ’’ཏི, ཀཱཡོ སམུཊྛཱནཾ ཨཀྑཱཏོཏི ཨཏྠོ.

ཝིཝེཀདསྶིནཱཏི སབྦསངྑཏཝིཝིཏྟཏྟཱ, ཏཏོ ཝིཝིཏྟཧེཏུཏྟཱ ཙ ནཱིཝརཎཝིཝེཀཉྩ ནིབྦཱནཉྩ དསྶནསཱིལེན. ཝིབྷངྒཀོཝིདཱཏི ཨུབྷཏོཝིབྷངྒཀུསལཱཏི ཨཱལཔནཾ. ཨིདྷ པནེཝཾ ཨཉྙོ པུཙྪནྟོ ནཱམ ནཏྠི, ཨུཔཱལིཏྠེརོ སཡམེཝ ཨཏྠཾ པཱཀཊཾ ཀཱཏུཾ པུཙྪཱཝིསཛྫནཉྩ ཨཀཱསཱིཏི ཨིམིནཱ ནཡེན སབྦཏྠ ཨཏྠོ ཝེདིཏབྦོ.

ཨཱཔཏྟིསམུཊྛཱནགཱཐཱཝཎྞནཱ ནིཊྛིཏཱ.

ཝིཔཏྟིཔཙྩཡཝཱརཝཎྞནཱ

༢༨༤. ཙཏུཏྠེ པན ཝིཔཏྟིཔཙྩཡཝཱརེ སཱིལཝིཔཏྟིཔཙྩཡཱཏི སཱིལཝིཔཏྟིཔཨཙྪཱདནཔཙྩཡཱ.

༢༨༦. དིཊྛིཝིཔཏྟིཔཙྩཡཱཏི དིཊྛིཝིཔཏྟིཡཱ ཨཔྤཊིནིསྶཛྫནཔཙྩཡཱ.

༢༨༧. ཨཱཛཱིཝཝིཔཏྟིཔཙྩཡཱཏི ¶ ཨེཏྠ ཨཱགམྨ ཛཱིཝནྟི ཨེཏེནཱཏི ཨཱཛཱིཝོ, ཙཏུཔཙྩཡོ, སོཝ མིཙྪཱཔཏྟིཡཱ ཝིཔནྣཏྟཱ ཝིཔཏྟཱིཏི ཨཱཛཱིཝཝིཔཏྟི, ཏསྶཱ ཨཱཛཱིཝཝིཔཏྟིཡཱ ཧེཏུ, ཏདུཔྤཱདནཏཔརིབྷོགནིམིཏྟནྟི ཨཏྠོ.

ཝིཔཏྟིཔཙྩཡཝཱརཝཎྞནཱ ནིཊྛིཏཱ.

ཨདྷིཀརཎཔཙྩཡཝཱརཝཎྞནཱ

༢༩༡. པཉྩམེ ¶ ཨདྷིཀརཎཔཙྩཡཝཱརེ ཀིཙྩཱདྷིཀརཎཔཙྩཡཱཏི ཨཔལོཀནཝཙནཉཏྟིཀམྨཝཱཙཱསངྑཏཀམྨཝཱཙཱཔཙྩཡཱ. པཉྩཱཏི ཨེཏྠ ཨདྷམྨིཀཀཏིཀཱདིཾ ཨཔལོཀེཏྭཱ ཀརོནྟཱནཾ ཨནིམིཏྟནྟི ཨཏྠོ. པཉྩམེ ཨདྷིཀརཎཔཙྩཡཝཱརེ ཀིཙྩཱདྷིཀརཎཔཙྩཡཱ ཨཔལོཀནཱཝསཱནེ དུཀྐཊཾ, ཨདྷིཔྤཱཡཱདིནཱ ཉཏྟིཀམྨཱདིཾ ཀརོནྟཱནཾ ཐུལླཙྩཡཱདི ཙ སངྒཡ྄ཧཏཱིཏི དཊྛབྦཾ. ཨཝསེསཱ ཨཱཔཏྟིཡོཏི སོཏཱཔཏྟིཕལསམཱཔཏྟིཨཱདཡོ. ‘‘ནཏྠཉྙཱ ཨཱཔཏྟིཡོ’’ཏི ཨིདཾ ཝིཔཏྟིཨཱདིབྷཱགིནིཡོ སཱཝཛྫཱཔཏྟིཡོ སནྡྷཱཡ ཝུཏྟཾ.

ཨདྷིཀརཎཔཙྩཡཝཱརཝཎྞནཱ ནིཊྛིཏཱ.

སམཐབྷེདཾ

ཨདྷིཀརཎཔརིཡཱཡཝཱརཝཎྞནཱ

༢༩༣. ཚཊྛེ ¶ པརིཡཱཡཝཱརེ ཨལོབྷོ པུབྦངྒམོཏིཨཱདི སཱསནཊྛིཏིཡཱ ཨཝིཔརཱིཏཏོ དྷམྨཝཱདིསྶ ཝིཝཱདཾ སནྡྷཱཡ ཝུཏྟཾ. ཨཊྛཱརས བྷེདཀརཝཏྠཱུནི ཋཱནཱནཱིཏི དྷམྨཱདཱིསུ ཨདྷམྨོཏིཨཱདིནཱ གཧེཏྭཱ དཱིཔནཱནི ཨིདྷེཝ བྷེདཀརཝཏྠཱུནི, ཏཱནི ཨེཝ ཀཱཡཀལཧཱདིཝིཝཱདསྶ ཀཱརཎཏྟཱ ཋཱནཱནི, ཨོཀཱསཏྟཱ ཝཏྠཱུནི, ཨཱདྷཱརཏྟཱ བྷཱུམིཡོཏི ཙ ཝུཏྟཱནི. ཨབྱཱཀཏཧེཏཱུཏི ཨསེཀྑཱནཾ ཝིཝཱདཾ སནྡྷཱཡ ཝུཏྟཾ. དྭཱདས མཱུལཱནཱིཏི ཀོདྷོ ཨུཔནཱཧོ, མཀྑོ པལཱསོ, ཨིསྶཱ མཙྪརིཡཾ, མཱཡཱ སཱཋེཡྻཾ, པཱཔིཙྪཏཱ མཧིཙྪཏཱ, སནྡིཊྛིཔརཱམཱསིཏཱ ཨཱདྷཱནགྒཱཧཱིདུཔྤཊིནིསྶཛྫིཏཱནཱིཏི ཨིམེསཾ ཚནྣཾ ཡུགལཱ༹ནཾ ཝསེན ཚ དྷམྨཱ ཙེཝ ལོབྷཱདཡོ ཚ ཧེཏཱུ ཙཱཏི དྭཱདས དྷམྨཱ ཝིཝཱདཱདྷིཀརཎསྶ མཱུལཱནི.

༢༩༤. ཙུདྡས མཱུལཱནཱིཏི ཏཱནེཝ དྭཱདས ཀཱཡཝཱཙཱཧི སདྡྷིཾ ཙུདྡས ཨནུཝཱདཱདྷིཀརཎསྶ མཱུལཱནི.

༢༩༥. པཐཝཱིཁཎནཱདཱིསུ པཎྞཏྟིཝཛྫེསུ ཀུསལཱབྱཱཀཏཙིཏྟམཱུལིཀཱ ཨཱཔཏྟི ཧོཏཱིཏི དསྶེཏུཾ ‘‘ཨལོབྷོ པུབྦངྒམོ’’ཏིཨཱདི ཝུཏྟཾ. སཏྟ ཨཱཔཏྟིཀྑནྡྷཱ ཋཱནཱནཱིཏིཨཱདི སཏྟནྣཾ ཨཱཔཏྟིཀྑནྡྷཱནཾ ¶ པཊིཙྪཱདནཔཙྩཡཱ ཨཱཔཏྟིསམྦྷཝཏོ ཝུཏྟཾ. ‘‘ཨཱཔཏྟཱདྷིཀརཎཔཙྩཡཱ ཙཏསྶོ ཨཱཔཏྟིཡོ ཨཱཔཛྫཏཱི’’ཏི (པརི. ༢༩༠) ཧི ཝུཏྟཾ. ‘‘ཚ ཧེཏཱུ’’ཏི ཨིདཾ ཀུསལཱནཾ ཨཱཔཏྟིཧེཏུཝོཧཱརསྶ ཨཡུཏྟཏཱཡ ཝུཏྟཾ, ན པན ཀུསལཧེཏཱུནཾ ཨབྷཱཝཏོ. ‘‘ཨལོབྷོ པུབྦངྒམོ’’ཏི ཧི ཨཱདི ཝུཏྟཾ. ཨཱཔཏྟིཧེཏཝོ ཨེཝ ཧི པུབྦངྒམནཱམེན ཝུཏྟཱ.

༢༩༦. ཙཏྟཱརི ཀམྨཱནི ཋཱནཱནཱིཏིཨཱདཱིསུ ཨཔལོཀནཝཱཙཱ, ཉཏྟིཨཱདིཝཱཙཱཡོ ཙ ཀམྨཱནཱིཏི ཝུཏྟཾ. ཏཱ ཨེཝ ཧི ཨེཀསཱིམཱཡཾ སཱམགྒིམུཔགཏཱནཾ ཀམྨཔྤཏྟཱནཾ ཨནུམཏིཡཱ སཱཝནཀིརིཡཱནིཔྥཏྟིསངྑཱཏསྶ སངྒྷགཎཀིཙྩསབྷཱཝསྶ ཀིཙྩཱདྷིཀརཎསྶ ཨདྷིཊྛཱནཱབྷཱཝེན ‘‘ཋཱནཝཏྠུབྷཱུམིཡོ’’ཏི ཝུཙྩནྟི. ཨེཀཾ མཱུལཾ སངྒྷོཏི ཡེབྷུཡྻཝསེན ཝུཏྟཾ. གཎཉཏྟིཨཔལོཀནཱནཉྷི ¶ གཎོཔི མཱུལནྟི. ཉཏྟིཏོ ཝཱཏི ཉཏྟིཉཏྟིདུཏིཡཉཏྟིཙཏུཏྠཀམྨཝཱཙཱནཾ ཉཏྟིརཱུཔཏྟཱ, ཉཏྟིཔུབྦཀཏྟཱ ཙ ཝུཏྟཾ. ཀམྨཉཏྟིཀམྨཝཱཙཱཉཏྟིཝསེན ཧི དུཝིདྷཱསུ ཉཏྟཱིསུ ཨནུསྶཱཝནཱཔི ཀམྨམཱུལཀནྟྭེཝ སངྒཡ྄ཧནྟི. ཉཏྟིཝིབྷཱགོ ཙཱཡཾ ཨུཔརི ཨཱཝི བྷཝིསྶཏི.

‘‘ཨིམེ སཏྟ སམཐཱ…པེ… པརིཡཱཡེནཱ’’ཏི ཨིདཾ པུཙྪཱཝཙནཾ. ‘‘སིཡཱ’’ཏི ཨིདཾ ཝིསཛྫནཾ. ‘‘ཀཐཉྩ སིཡཱ’’ཏི ཨིདཾ པུན པུཙྪཱ. ཝིཝཱདཱདྷིཀརཎསྶ དྭེ སམཐཱཏིཨཱདི པུན ཝིསཛྫནཾ. ཏཏྠ ‘‘ཝཏྠུཝསེནཱ’’ཏི ཨིདཾ ‘‘སཏྟ སམཐཱ དས སམཐཱ ཧོནྟཱི’’ཏི ཨིམསྶ ཀཱརཎཝཙནཾ. ‘‘པརིཡཱཡེནཱ’’ཏི ཨིདཾ ‘‘དས སམཐཱ སཏྟ སམཐཱ ཧོནྟཱི’’ཏི ཨིམསྶ ཀཱརཎཝཙནཾ. ཙཏུབྦིདྷཱདྷིཀརཎསངྑཱཏཝཏྠུཝསེན ཙ དེསནཱཀྐམསངྑཱཏཔརིཡཱཡཝསེན ཙཱཏི ཨཏྠོ.

ཨདྷིཀརཎཔརིཡཱཡཝཱརཝཎྞནཱ ནིཊྛིཏཱ.

སཱདྷཱརཎཝཱརཱདིཝཎྞནཱ

༢༩༧. སཏྟམེ སཱདྷཱརཎཝཱརེ སཱདྷཱརཎཱཏི ཝིཝཱདཱདྷིཀརཎསྶ ཝཱུཔསམནཀིཙྩསཱདྷཱརཎཱ. ཨེཝཾ སབྦཏྠ.

༢༩༨. ཨཊྛམེ ཏབྦྷཱགིཡཝཱརེ ཏབྦྷཱགིཡཱཏི ཝིཝཱདཱདྷིཀརཎསྶ ཝཱུཔསམནཏོ ཏཔྤཀྑིཀཱ.

སཱདྷཱརཎཝཱརཱདིཝཎྞནཱ ནིཊྛིཏཱ.

སམཐཱསམཐསྶསཱདྷཱརཎཝཱརཝཎྞནཱ

༢༩༩. ནཝམེ ¶ སམཐཱསམཐསཱདྷཱརཎཝཱརེ ‘‘སབྦེ སམཐཱ ཨེཀཏོཝ ཨདྷིཀརཎཾ སམེནྟི ཨུདཱཧུ ནཱནཱ’’ཏི པུཙྪནྟེན ‘‘སམཐཱ སམཐསྶ སཱདྷཱརཎཱ, སམཐཱ སམཐསྶ ཨསཱདྷཱརཎཱ’’ཏི ཝུཏྟཾ. ཝིཝཱདཱདིཨདྷིཀརཎཀྐམེན ཏབྦཱུཔསམཧེཏུབྷཱུཏེ སམཐེ ཨུདྡྷརནྟོ ‘‘ཡེབྷུཡྻསིཀཱ’’ཏིཨཱདིམཱཧ. སམྨུཁཱཝིནཡཾ ཝིནཱ ཀསྶཙི སམཐསྶ ཨསམྦྷཝཱ སེསཱ ཚཔི སམཐཱ སམྨུཁཱཝིནཡསྶ སཱདྷཱརཎཱ ཝུཏྟཱ, ཏེསཾ ¶ པན ཚནྣཾ ཨཉྙམཉྙཱཔེཀྑཱབྷཱཝཏོ ཏེ ཨཉྙམཉྙཾ ཨསཱདྷཱརཎཱ ཝུཏྟཱ. ཏབྦྷཱགིཡཝཱརེཔི ཨེསེཝ ནཡོ.

སམཐཱསམཐསྶསཱདྷཱརཎཝཱརཝཎྞནཱ ནིཊྛིཏཱ.

སམཐསམྨུཁཱཝིནཡཝཱརཱདིཝཎྞནཱ

༣༠༡-༣. ཨེཀཱདསམཝཱརེཔི སམྨུཁཱཝིནཡོཏིཨཱདི པུཙྪཱ. ཡེབྷུཡྻསིཀཱ སཏིཝིནཡོཏིཨཱདི ཝིསཛྫནཾ. ཨེཝཾ ཝིནཡཝཱརེ ཀུསལ-ཝཱརེ ཏཏོ པརེསུཔི པུཙྪཱཝིསཛྫནཔརིཙྪེདོ ཝེདིཏབྦོ.

ཏཏྠ སམྨུཁཱཝིནཡོ སིཡཱ ཀུསལོཏིཨཱདཱིསུ ཏསྨིཾ ཏསྨིཾ ཝིནཡཀམྨེ, ཝིཝཱདཱདིམྷི ཙ ནིཡུཏྟཔུགྒལཱནཾ སམུཔྤཛྫནཀཀུསལཱདཱིནཾ ཝསེན སམྨུཁཱཝིནཡཱདཱིནཾ, ཝིཝཱདཱདཱིནཉྩ ཀུསལཱདིབྷཱཝོ ཏེན ཏེན ཨུཔཙཱརེན ཝུཏྟོ. ཡསྨཱ པནེཏསྶ སམྨུཁཱཝིནཡོ ནཱམ སངྒྷསམྨུཁཏཱདཡོ ཧོནྟི, ཏེསཉྩ ཨནཝཛྫསབྷཱཝཏྟཱ ཨཀུསལེ ཝིཛྫམཱནེཔི ཨཀུསལཏྟཱུཔཙཱརོ ན ཡུཏྟོ ཨཱཔཏྟཱདྷིཀརཎསྶ ཨཀུསལཏྟཱུཔཙཱརོ ཝིཡ, ཏསྨཱ ནཏྠི སམྨུཁཱཝིནཡོ ཨཀུསལོཏི ཨཏྠོ.

༣༠༤. ཏཏོ པརེསུ ཡཏྠ ཡེབྷུཡྻསིཀཱ ལབྦྷཏི, ཏཏྠ སམྨུཁཱཝིནཡོ ལབྦྷཏཱིཏིཨཱདི སམྨུཁཱཝིནཡསྶ ཨིཏརེཧི སམཐེཧི ནིཡམེན སཾསཊྛཏཾ, ཨིཏརེསཾ པན ཚནྣཾ ཨཉྙམཉྙཾ སཾསགྒཱབྷཱཝཉྩ དསྶེཏུཾ ཝུཏྟཾ.

སམཐསམྨུཁཱཝིནཡཝཱརཱདིཝཎྞནཱ ནིཊྛིཏཱ.

སཾསཊྛཝཱརཱདིཝཎྞནཱ

༣༠༦. ཨདྷིཀརཎནྟི ¶ ཝཱ སམཐཱཏི ཝཱ ཨིམེ དྷམྨཱ སཾསཊྛཱཏིཨཱདི སམཐཱནཾ ཨདྷིཀརཎེསུ ཨེཝ ཡཐཱརཧཾ པཝཏྟིཾ, ཨདྷིཀརཎཱནི ཝིནཱ ཏེསཾ ཝིསུཾ ཨཊྛཱནཉྩ དསྶེཏུཾ ཝུཏྟཾ. ཝིནིབྦྷུཛིཏྭཱ ནཱནཱཀརཎཾ པཉྙཱཔེཏུནྟི ཨདྷིཀརཎཏོ སམཐེཧི ཝིཡོཛེཏྭཱ ཨསཾསཊྛེ ཀཏྭཱ ནཱནཱཀརཎཾ ཨཉྙམཉྙཾ ཨསཾསཊྛཏཱཡ ཋིཏབྷཱཝསངྑཱཏཾ ནཱནཏྟཾ པཉྙཱཔེཏུཾ ཨདྷིཀརཎཝཱུཔསམཀྑཎེ ཨེཝ ཏེསཾ ཨསཾསགྒཾ པཉྙཱཔེཏུཾ ཀིཾ སཀྐཱཏི པུཙྪཏི.

ཨདྷིཀརཎནྟིཨཱདི ¶ གཱརཡ྄ཧཝཱདདསྶནཾ. སོ མཱ ཧེཝནྟི ཡོ ཨེཝཾ ཝདཏི, སོ ‘‘མཱ ཨེཝཾ ཝདཱ’’ཏི ཝཙནཱིཡོ ཨསྶ, ན ཙ ལབྦྷཏི སམཐཱནཾ ཨཉྙཏྲ ཨདྷིཀརཎཱ ཝཱུཔསམལཀྑཎནྟི པཧཱནཱཝཏྠཱནསངྑཱཏཾ ནཱནཱཀརཎཾ པཊིཀྑིཔཏི. ལཀྑཎཏོ པན ཨདྷིཀརཎེཧི སམཐཱནཾ ནཱནཱཀརཎཾ ཨཏྠེཝཱཏི དཊྛབྦཾ. སམཐཱ ཨདྷིཀརཎེཧི སམྨནྟཱིཏི ཨཔལོཀནཱདཱིཧི ཙཏཱུཧི ཀིཙྩཱདྷིཀརཎེཧི སབྦེཔི སམཐཱ ནིཊྛཱནཾ གཙྪནྟི, ནཱཉྙེཧཱིཏི ཨིམམཏྠཾ སནྡྷཱཡ ཝུཏྟཾ. ཏེནེཝ ཝཀྑཏི ‘‘སམྨུཁཱཝིནཡོ ཝིཝཱདཱདྷིཀརཎེན ན སམྨཏི. ཨནུཝཱད…པེ… ཨཱཔཏྟཱདྷིཀརཎེན ན སམྨཏི, ཀིཙྩཱདྷིཀརཎེན སམྨཏཱི’’ཏིཨཱདི (པརི. ༣༡༡).

༣༠༧-༣༡༣. ཝིཝཱདཱདྷིཀརཎཾ ཀཏིཧི སམཐེཧི སམྨཏཱིཏིཨཱདིཀོ སམྨཏིཝཱརོ. ཏདནནྟརོ སམྨཏིནསམྨཏིཝཱརོ ཙ ཨདྷིཀརཎེཧི སམཐཱནཾ སཾསཊྛཏཾ, ཝིསཾསཊྛཏཉྩ དསྶེཏུཾ ཝུཏྟོ. སམཐཱ སམཐེཧི སམྨནྟཱིཏིཨཱདིཀོ སམཐཱདྷིཀརཎཝཱརོ སམཐཱནཾ ཨཉྙམཉྙཾ, ཨདྷིཀརཎེཧི ཙ ཨདྷིཀརཎཱནཉྩ ཨཉྙམཉྙཾ, སམཐེཧི ཙ ཝཱུཔསམཱཝཱུཔསམཾ དསྶེཏུཾ ཝུཏྟོ.

༣༡༤. སམུཊྛཱཔེཏིཝཱརོ པན ཨདྷིཀརཎེཧི ཨདྷིཀརཎཱནཾ ཨུཔྤཏྟིཔྤཀཱརདསྶནཏྠཾ ཝུཏྟོ. ན ཀཏམཾ ཨདྷིཀརཎནྟི ཨཏྟནོ སམྦྷཝམཏྟེན ཨེཀམྤི ཨདྷིཀརཎཾ ན སམུཊྛཱཔེཏཱིཏི ཨཏྠོ. ཀཐཉྩརཧི སམུཊྛཱཔེཏཱིཏི ཨཱཧ ‘‘ཨཔི ཙཱ’’ཏིཨཱདི. ཏཏྠ ཛཱཡནྟཱིཏི ཨནནྟརམེཝ ཨནུཔྤཛྫིཏྭཱ པརམྤརཔཙྩཡཱ ཛཱཡནྟཱིཏི ཨདྷིཔྤཱཡོ. ‘‘དྷམྨོ ཨདྷམྨོ’’ཏིཨཱདིནཱ ཨུབྷིནྣཾ པུགྒལཱནཾ ཝིཝཱདཔཙྩཡཱ ཨཉྙམཉྙཁེམབྷངྒཱ ཧོནྟི, ཏཔྤཙྩཡཱ ཏེསཾ པཀྑཾ པརིཡེསནེན ཀལཧཾ ཝཌྜྷནྟཱནཾ ཝིཝཱདོ ཀཉྩི མཧཱཔརིསཾ སངྒྷཔརིཎཱཡཀཾ ལཛྫིཾ ཨཱགམྨ ཝཱུཔསམཾ གཙྪཏི. ཏཐཱ ཨཝཱུཔསམནྟེ པན ཝིཝཱདོ ཀམེན ཝཌྜྷིཏྭཱ སཀལེཔི སངྒྷེ ཝིཝཱདཾ སམུཊྛཱཔེཏི, ཏཏོ ཨནུཝཱདཱདཱིནཱིཏི ཨེཝཾ པརམྤརཀྐམེན ཝཱུཔསམཀཱརཎཱབྷཱཝེ ཙཏྟཱརི ཨདྷིཀརཎཱནི ཛཱཡནྟི. ཏཾ སནྡྷཱཡཱཧ ¶ ‘‘སངྒྷོ ཝིཝདཏི ཝིཝཱདཱདྷིཀརཎ’’ནྟི. སངྒྷསྶ ཝིཝདཏོ ཡོ ཝིཝཱདོ, ཏཾ ཝིཝཱདཱདྷིཀརཎཾ ཧོཏཱིཏི ཨཏྠོ. ཨེས ནཡོ སེསེསུཔི.

སཾསཊྛཝཱརཱདིཝཎྞནཱ ནིཊྛིཏཱ.

བྷཛཏིཝཱརཝཎྞནཱ

༣༡༨. ཏདནནྟརཝཱརེ ¶ པན ཝིཝཱདཱདྷིཀརཎཾ ཙཏུནྣཾ ཨདྷིཀརཎཱནནྟིཨཱདི ཨདྷིཀརཎཱནཾ ཝུཏྟནཡེན ཨཉྙམཉྙཔཙྩཡཏྟེཔི སཾསགྒབྷཱཝདསྶནཏྠཾ ཝུཏྟཾ. ཝིཝཱདཱདྷིཀརཎཾ ཙཏུནྣཾ ཨདྷིཀརཎཱནཾ ཝིཝཱདཱདྷིཀརཎཾ བྷཛཏཱིཏིཨཱདཱིསུ ཝིཝཱདཱདྷིཀརཎཾ ཙཏཱུསུ ཨདྷིཀརཎེསུ ཝིཝཱདཱདྷིཀརཎབྷཱཝམེཝ བྷཛཏི, ནཱཉྙཱདྷིཀརཎབྷཱཝཾ, ཙཏཱུསུ ཨདྷིཀརཎེསུ ཝིཝཱདཱདྷིཀརཎཏྟམེཝ ནིསྶིཏཾ ཝིཝཱདཱདྷིཀརཎམེཝ པརིཡཱཔནྣཾ ཝིཝཱདཱདྷིཀརཎབྷཱཝེནེཝ སངྒཧིཏནྟི ཨེཝམཏྠོ གཧེཏབྦོ.

༣༡༩. ཝིཝཱདཱདྷིཀརཎཾ སཏྟནྣཾ སམཐཱནཾ ཀཏི སམཐེ བྷཛཏཱིཏིཨཱདི པན ཙཏུནྣཾ ཨདྷིཀརཎཱནཾ ཝཱུཔསམནེ སཏི ནིཡཏསམཐེ དསྶེཏུཾ ཝུཏྟཾ. ཏཏྠ ཀཏི སམཐེ བྷཛཏཱིཏི ཨཏྟནོ ཨུཔསམཏྠཱཡ ཀིཏྟཀེ སམཐེ ཨུཔགཙྪཏི, ཀིཏྟཀེ སམཐེ ཨཱགམྨ ཝཱུཔསམཾ གཙྪཏཱིཏི ཨཏྠོ. ཀཏི སམཐཔརིཡཱཔནྣནྟི ཨཏྟཱནཾ ཝཱུཔསམེཏུཾ ཀཏིསུ སམཐེསུ ཏེཧི སམཱནཝསེན པཝིཊྛཾ. ཀཏིཧི སམཐེཧི སངྒཧིཏནྟི ཝཱུཔསམཾ ཀརོནྟེཧི ཀཏིཧི སམཐེཧི ཝཱུཔསམཀརཎཏྠཾ སངྒཧིཏཾ.

བྷཛཏིཝཱརཝཎྞནཱ ནིཊྛིཏཱ.

ཁནྡྷཀཔུཙྪཱཝཱརོ

པུཙྪཱཝིསྶཛྫནཱཝཎྞནཱ

༣༢༠. ཨུཔསམྤདཀྑནྡྷཀནྟི ¶ པབྦཛྫཱཁནྡྷཀཾ (མཧཱཝ. ༨༤). སཧ ནིདྡེསེནཱཏི སནིདྡེསཾ. ‘‘སནྣིདྡེས’’ནྟི ཝཱ པཱཋོ, སོ ཨེཝཏྠོ. ནིདཱནེན ཙ ནིདྡེསེན ཙ སདྡྷིནྟི ཨེཏྠ པཉྙཏྟིཊྛཱནཔུགྒལཱདིཔྤཀཱསཀཾ ནིདཱནཝཙནཾ ནིདཱནཾ ནཱམ, ཏནྣིདཱནཾ པཊིཙྩ ནིདྡིཊྛསིཀྑཱཔདཱནི ¶ ནིདྡེསོ ནཱམ, ཏེཧི ཨཝཡཝབྷཱུཏེཧི སཧིཏཾ ཏཾསམུདཱཡབྷཱུཏཾ ཁནྡྷཀཾ པུཙྪཱམཱིཏི ཨཏྠོ. ཨུཏྟམཱནི པདཱནཱིཏི ཨཱཔཏྟིཔཉྙཱཔཀཱནི ཝཙནཱནི ཨདྷིཔྤེཏཱནི. ཏེསཾ…པེ… ཀཏི ཨཱཔཏྟིཡོ ཧོནྟཱིཏི ཏེཧི ཝཙནེཧི པཉྙཏྟཱ ཀཏི ཨཱཔཏྟིཀྑནྡྷཱ ཧོནྟཱིཏི ཨཏྠོ. ནནུ ཨཱཔཏྟིཡོ ནཱམ པུགྒལཱནཉྙེཝ ཧོནྟི, ན པདཱནཾ, ཀསྨཱ པན ‘‘སམུཀྐཊྛཔདཱནཾ ཀཏི ཨཱཔཏྟིཡོ’’ཏི སཱམིཝསེན ནིདྡེསོ ཀཏོཏི ཨཱཧ ‘‘ཡེན ཡེན ཧི པདེནཱ’’ཏིཨཱདི. པཱལི༹ཡཾ ཨུཔོསཐནྟིཨཱདི ཨུཔོསཐཀྑནྡྷཀཱདཱིནཉྙེཝ (མཧཱཝ. ༡༣༢ ཨཱདཡོ) གཧཎཾ.