📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིནཡཔིཊཀེ

ཝིནཡཱལངྐཱར-ཊཱིཀཱ (པཋམོ བྷཱགོ)

གནྠཱརམྦྷཀཐཱ

མུཏྟཧཱརཱདིནཡགཱཐཱ

ཡོ ¶ ¶ ལོཀེ ལོཀལོཀོ ཝརཏརཔརདོ རཱཛརཱཛགྒཛཉྙོ;

ཨཱཀཱསཱཀཱརཀཱརོ པརམརཏིརཏོ དེཝདེཝནྟཝཛྫོ.

སཾསཱརཱསཱརསཱརོ སུནརནམནཏོ མཱརཧཱརནྟརཊྛོ;

ལོཀཱལངྐཱརཀཱརོ ཨཏིསཏིགཏིམཱ དྷཱིརཝཱིརཏྟརམྨོ.

སཱིཧནིཝཏྟནནཡགཱཐཱ

སཾསཱརཙཀྐཝིདྡྷཾསཾ, ¶ སམྦུདྡྷཾ ཏཾ སུམཱནསཾ;

སཾནམཱམི སུགུཎེསཾ, སཾདེསིཏསུདུདྡསཾ.

ཨནོཏཏྟོདཀཱཝཏྟནཡགཱཐཱ

ཡེན ¶ ཝིདྡྷཾསིཏཱ པཱཔཱ, ཡེན ནིབྦཱཔིཏཱ དརཱ;

ཡེན ལོཀཱ ནིསྶརིསུཾ, ཡེན ཙཱཧཾ ནམཱམི ཏཾ.

ཙཏུདཱིཔཙཀྐཝཏྟནནཡགཱཐཱ

སངྒྷཾ སསངྒྷཾ ནམཱམི, ཝནྟནྟཝརདྷམྨཛཾ;

མགྒགྒམནཕལཊྛཾ, སུསཾསཾ སུབྷམཱནསཾ.

ཨབྱཔེཏཙཏུཔཱདཨཱདིཡམཀགཱཐཱ

ཝིནཡཾ ཝིནཡཾ སཱརཾ, སངྒཧཾ སངྒཧཾ ཀརཾ;

ཙརིཡཾ ཙརིཡཾ ཝནྡེ, པརམཾ པརམཾ སུཏཾ.

བྱཔེཏཙཏུཔཱདཨཱདིཨནྟཡམཀགཱཐཱ

པཀཱརེ བཧུཔཀཱརེ, སཱགརེ གུཎསཱགརེ;

གརཝོ མམ གརཝོ, ཝནྡཱམི ཨབྷིཝནྡཱམི.

ཝཏྠུཏྟཡེ གནྠཀཱརེ, གརཱུསུ སཱདརཾ མཡཱ;

ཀཏེན ནམཀྐཱརེན, ཧིཏྭཱ སབྦེ ཨུཔདྡཝེ.

སིཀྑཱཀཱམེཧི ¶ དྷཱིརེཧི, ཛིནསཱསནཀཱརིབྷི;

བྷིཀྑཱུཧི ཝིནཡཉྙཱུཧི, སཱདརཾ ཨབྷིཡཱཙིཏོ.

ཝཎྞཡིསྶཱམི ཝིནཡ-སངྒཧཾ པཱིཏིཝཌྜྷནཾ;

བྷིཀྑཱུནཾ ཝེནཡིཀཱནཾ, ཡཐཱསཏྟིབལཾ ཨཧཾ.

པོརཱཎེཧི ཀཏཱ ཊཱིཀཱ, ཀིཉྩཱཔི ཨཏྠི སཱ པན;

ཨཏིསངྑེཔབྷཱཝེན, ན སཱདྷེཏི ཡཐིཙྪིཏཾ.

ཏསྨཱ ཧི ནཱནཱསཏྠེཧི, སཱརམཱདཱཡ སཱདྷུཀཾ;

ནཱཏིསངྑེཔཝིཏྠཱརཾ, ཀརིསྶཾ ཨཏྠཝཎྞནཾ.

ཝིནཡཱལངྐཱརཾ ནཱམ, པེསལཱནཾ པམོདནཾ;

ཨིམཾ པཀརཎཾ སབྦེ, སམྨཱ དྷཱརེནྟུ སཱདྷཝོཏི.

གནྠཱརམྦྷཀཐཱཝཎྞནཱ

ཝིཝིདྷཝིསེསནཡསམནྣཱགཏཾ ¶ ཀཱཡཝཱཙཱཝིནཡནཀརཎསམཏྠཾ ལཛྫིཔེསལབྷིཀྑཱུནཾ སཾསཡཝིནོདནཀཱརཀཾ ཡོགཱཝཙརཔུགྒལཱནཾ སཱིལཝིསུདྡྷིསམྤཱཔཀཾ ཛིནསཱསནཝུཌྜྷིཧེཏུབྷཱུཏཾ པཀརཎམིདམཱརབྷིཏུཀཱམོ ཨཡམཱཙརིཡཱསབྷོ པཋམཾ ཏཱཝ རཏནཏྟཡཔཎཱམཔཎཱམཱརཧབྷཱཝཨབྷིདྷེཡྻཀརཎཧེཏུ ཀརཎཔྤཀཱརཔཀརཎཱབྷིདྷཱནནིམིཏྟཔཡོཛནཱནི དསྶེཏུཾ ‘‘ཝཏྠུཏྟཡཾ ནམསྶིཏྭཱ’’ཏིཨཱདིམཱཧ. ཨེཏྠ ཧི ཝཏྠུཏྟཡཾ ནམསྶིཏྭཱཏི ཨིམིནཱ རཏནཏྟཡཔཎཱམོ ཝུཏྟོ པཎཱམེཏབྦཔཎཱམཨཏྠདསྶནཏོ. སརཎཾ སབྦཔཱཎིནནྟི ཨིམིནཱ པཎཱམཱརཧབྷཱཝོ པཎཱམཧེཏུདསྶནཏོ. པཱལི༹མུཏྟཝིནིཙྪཡནྟི ཨབྷིདྷེཡྻོ ཨིམསྶ པཀརཎསྶ ཨཏྠབྷཱཝཏོ. ཝིཔྤཀིཎྞམནེཀཏྠཱཏི ཀརཎཧེཏུ ཏེནེཝཀཱརཎེན པཀརཎསྶ ཀཏཏྟཱ. སམཱཧརིཏྭཱ ཨེཀཏྠ, དསྶཡིསྶམནཱཀུལནྟི ཀརཎཔྤཀཱརོ ཏེནཱཀཱརེན པཀརཎསྶ ཀརཎཏོ. པཀརཎཱབྷིདྷཱནཾ པན སམཱཧརིཏསདྡསྶ སཱམཏྠིཡཏོ དསྶིཏཾ སམཱཧརིཏྭཱ དསྶནེནེཝ ཨིམསྶ པཀརཎསྶ ཝིནཡསངྒཧཨིཏི ནཱམསྶ ལབྷནཏོ.

ནིམིཏྟཾ ¶ པན ཨཛ྄ཛྷཏྟིཀབཱཧིརཝསེན དུཝིདྷཾ. ཏཏྠ ཨཛ྄ཛྷཏྟིཀཾ ནཱམ ཀརུཎཱ, ཏཾ དསྶནཀིརིཡཱཡ སཱམཏྠིཡཏོ དསྶིཏཾ ཏསྨིཾ ཨསཏི དསྶནཀིརིཡཱཡ ཨབྷཱཝཏོ. བཱཧིརཾ ནཱམ སོཏུཛནསམཱུཧོ, ཏཾ ཡོགཱཝཙརབྷིཀྑཱུནནྟི ཏསྶ ཀརུཎཱརམྨཎབྷཱཝཏོ. པཡོཛནཾ པན དུཝིདྷཾ པཎཱམཔཡོཛནཔཀརཎཔཡོཛནཝསེན. ཏཏྠ པཎཱམཔཡོཛནཾ ནཱམ ཨནྟརཱཡཝིསོསནཔསཱདཛནནཱདིཀཾ, ཏཾ སརཎཾ སབྦཔཱཎིནནྟི ཨིམསྶ སཱམཏྠིཡཏོ དསྶིཏཾ ཧེཏུམྷི སཏི ཕལསྶ ཨཝིནཱབྷཱཝཏོ. ཝུཏྟཉྷི ཨབྷིདྷམྨཊཱིཀཱཙརིཡེན ‘‘གུཎཝིསེསཝཱ ཧི པཎཱམཱརཧོ ¶ ཧོཏི, པཎཱམཱརཧེ ཙ ཀཏོ པཎཱམོ ཝུཏྟཔྤཡོཛནསིདྡྷིཀརོཝ ཧོཏཱི’’ཏི (དྷ. ས. མཱུལཊཱི. ༡). པཀརཎཔཡོཛནམྤི དུཝིདྷཾ མུཁྱཱནུསངྒིཀཝསེན. ཏེསུ མུཁྱཔཡོཛནཾ ནཱམ བྱཉྫནཱནུརཱུཔཾ ཨཏྠསྶ པཊིཝིཛ྄ཛྷནཾ པཀཱསནཉྩ ཨཏྠཱནུརཱུཔཾ བྱཉྫནསྶ ཨུདྡིསནཾ ཨུདྡེསཱཔནཉྩ, ཏཾ ཝིནཡེ པཱཊཝཏྠཱཡཱཏི ཨིམིནཱ ཝུཏྟཾ. ཨནུསངྒིཀཔཡོཛནཾ ནཱམ སཱིལཱདིཨནུཔཱདཱཔརིནིབྦཱནནྟོ ཨཏྠོ, ཏཾ སམཱཧརིཏྭཱ ཨེཀཏྠ དསྶཡིསྶནྟི ཨིམསྶ སཱམཏྠིཡེན དསྶིཏཾ ཨེཀཏྠ སམཱཧརིཏྭཱ དསྶནེ སཏི ཏདུགྒཧཔརིཔུཙྪཱདིནཱ ཀཏཔཡོགསྶ ཨནནྟརཱཡེན ཏདཏྠསིཛ྄ཛྷནཏོཏི.

ཀིམཏྠཾ པནེཏྠ རཏནཏྟཡཔཎཱམཱདཡོ ཨཱཙརིཡེན ཀཏཱ, ནནུ ཨདྷིཔྤེཏགནྠཱརམྦྷོཝ ཀཱཏབྦོཏི? ཝུཙྩཏེ – ཨེཏྠ རཏནཏྟཡཔཎཱམཀརཎཾ ཏབྦིཧཏནྟརཱཡོ ཧུཏྭཱ ཨནཱཡཱསེན གནྠཔརིསམཱཔནཏྠཾ. པཎཱམཱརཧབྷཱཝཝཙནཾ ཨཏྟནོ ཡུཏྟཔཏྟཀཱརིཏཱདསྶནཏྠཾ, ཏཾ ཝིཉྙཱུནཾ ཏོསཱཔནཏྠཾ, ཏཾ པཀརཎསྶ ཨུགྒཧཎཏྠཾ, ཏཾ སབྦསམྤཏྟིནིཔྥཱདནཏྠཾ. ཨབྷིདྷེཡྻཀཐནཾ ཝིདིཏཱབྷིདྷེཡྻསྶ གནྠསྶ ཝིཉྙཱུནཾ ཨུགྒཧདྷཱརཎཱདིཝསེན པཊིཔཛྫནཏྠཾ. ཀརཎཧེཏུཀཐནཾ ཨཀཱརཎེ ཀཏསྶ ཝཱཡཱམསྶ ནིཔྥལབྷཱཝཏོ ཏཔྤཊིཀྑེཔནཏྠཾ. ཀརཎཔྤཀཱརཀཐནཾ ཝིདིཏཔྤཀཱརསྶ གནྠསྶ སོཏཱུནཾ ཨུགྒཧཎཱདཱིསུ རུཙིཛནནཏྠཾ. ཨབྷིདྷཱནདསྶནཾ ཝོཧཱརསུཁཏྠཾ. ནིམིཏྟཀཐནཾ ཨཱསནྣཀཱརཎདསྶནཏྠཾ. པཡོཛནདསྶནཾ དུཝིདྷཔཡོཛནཀཱམཱིནཾ སོཏཱུནཾ སམུསྶཱཧཛནནཏྠནྟི.

རཏནཏྟཡཔཎཱམཔཡོཛནཾ པན བཧཱུཧི པཀཱརེཧི ཝིཏྠཱརཡནྟི ཨཱཙརིཡཱ, ཏཾ ཏཏྠ ཏཏྠ ཝུཏྟནཡེནེཝ གཧེཏབྦཾ. ཨིདྷ པན གནྠགརུབྷཱཝམོཙནཏྠཾ ཨཊྛཀཐཱཙརིཡེཧི ཨདྷིཔྤེཏཔཡོཛནམེཝ ཀཐཡིམྷ. ཝུཏྟཉྷི ཨཊྛཀཐཱཙརིཡེན –

‘‘ནིཔཙྩཀཱརསྶེཏསྶ ¶ ¶ ;

ཀཏསྶ རཏནཏྟཡེ;

ཨཱནུབྷཱཝེན སོསེཏྭཱ;

ཨནྟརཱཡེ ཨསེསཏོ’’ཏི. (དྷ. ས. ཨཊྛ. གནྠཱརམྦྷཀཐཱ ༧);

ཨཡམེཏྠ སམུདཱཡཏྠོ, ཨཡཾ པན ཨཝཡཝཏྠོ – ཨཧཾ སབྦཔཱཎཱིནཾ སརཎཾ སརཎཱིབྷཱུཏཾ ཝཏྠུཏྟཡཾ ནམསྶཱམི, ནམསྶིཏྭཱ ཡོགཱཝཙརབྷིཀྑཱུནཾ ཝིནཡེ པཱཊཝཏྠཱཡ ཨནེཀཏྠཝིཔྤཀིཎྞཾ པཱལི༹མུཏྟཝིནིཙྪཡཾ ཨེཀཏྠ སམཱཧརིཏྭཱ ཨནཱཀུལཾ ཀཏྭཱ དསྶཡིསྶཾ དསྶཡིསྶཱམཱིཏི ཡོཛནཱ.

ཏཏྠ ཝསནྟི ཨེཏྠཱཏི ཝཏྠུ. ཀིཾ ཏཾ? བུདྡྷཱདིརཏནཾ. ཏཉྷི ཡསྨཱ སརཎགཏཱ སཔྤུརིསཱ སརཎགམནསམངྒིནོ ཧུཏྭཱ བུདྡྷཱདིརཏནཾ ཨཱརམྨཎཾ ཀཏྭཱ ཏསྨིཾ ཨཱརམྨཎེ ཝསནྟི ཨཱཝསནྟི ནིཝསནྟི, ཏསྨཱ ‘‘ཝཏྠཱུ’’ཏི ཝུཙྩཏི. ཨཱརམྨཎཉྷི ཨཱདྷཱརོ, ཨཱརམྨཎིཀཾ ཨཱདྷེཡྻོཏི. ཨིཏོ པརཱནིཔི ཝཏྠུསདྡསྶ ཝཙནཏྠཱདཱིནི ཨཱཙརིཡེཧི ཝུཏྟཱནི, ཏཱནིཔི ཏཏྠ ཏཏྠ ཝུཏྟནཡེནེཝ ཝེདིཏབྦཱནི. ཨིདྷ པན གནྠཝིཏྠཱརཔརིཧརཎཏྠཾ ཨེཏྟཀམེཝ ཝུཏྟནྟི ཝེདིཏབྦནྟི. ཏིཎྞཾ སམཱུཧོཏི ཏཡཾ, ཏཡོ ཨཾསཱ ཨཝཡཝཱ ཨསྶཱཏི ཝཱ ཏཡཾ. ཀིཾ ཏཾ? སམུདཱཡོ. ཝཏྠཱུནཾ ཏཡནྟི ཝཏྠུཏྟཡཾ. ཀིཾ ཏཾ? བུདྡྷཱདིརཏནཏྟཡཾ. ནམསྶཱམཱིཏི ནམསྶིཏྭཱ, ཨནམིནྟི ནམསྶིཏྭཱ. བུདྡྷཱདིརཏནཉྷི ཨཱརམྨཎཾ ཀཏྭཱ ཙིཏྟསྶ ཨུཔྤཛྫནཀཱལེ ཏྭཱ-པཙྩཡོ པཙྩུཔྤནྣཀཱལིཀོ ཧོཏི, ཏསྨཱ པཋམོ ཝིགྒཧོ ཀཏོ, པཱལི༹མུཏྟཝིནིཙྪཡཾ ཨེཀཏྠ དསྶནཀཱལེ ཨཏཱིཏཀཱལིཀོ, ཏསྨཱ དུཏིཡོ ཝིགྒཧོ. ཏེནེཝ ཙ ཀཱརཎེན ཨཏྠཡོཛནཱཡཔི པཙྩུཔྤནྣཀཱལཨཏཱིཏཀཱལཝསེན ཡོཛནཱ ཀཏཱ.

སརཏི ཧིཾསཏཱིཏི སརཎཾ. ཀིཾ ཏཾ? བུདྡྷཱདིརཏནཏྟཡཾ. ཏཉྷི སརཎགཏཱནཾ སཔྤུརིསཱནཾ བྷཡཾ སནྟཱསཾ དུཀྑཾ དུགྒཏིཝིནིཔཱཏཾ ¶ སཾཀིལེསཾ སརཏི ཧིཾསཏི ཝིནཱསེཏི, ཏསྨཱ ‘‘སརཎ’’ནྟི ཝུཙྩཏི. ཝུཏྟཉྷི བྷགཝཏཱ –

‘‘ཡསྨིཾ, མཧཱནཱམ, སམཡེ ཨརིཡསཱཝཀོ ཏཐཱགཏཾ ཨནུསྶརཏི, ནེཝསྶ ཏསྨིཾ སམཡེ རཱགཔརིཡུཊྛིཏཾ ཙིཏྟཾ ཧོཏཱི’’ཏིཨཱདི (ཨ. ནི. ༦.༡༠; ༡༡.༡༡),

‘‘ཨེཝཾ ¶ བུདྡྷཾ སརནྟཱནཾ;

དྷམྨཾ སངྒྷཉྩ བྷིཀྑཝོ;

བྷཡཾ ཝཱ ཚམྦྷིཏཏྟཾ ཝཱ;

ལོམཧཾསོ ན ཧེསྶཏཱི’’ཏི ཙ. (སཾ. ནི. ༡.༢༤༩);

ཡསྨཱ པན ‘‘སརཎ’’ནྟི ཨིདཾ པདཾ ‘‘ནཱཐ’’ནྟི པདསྶ ཝེཝཙནབྷཱུཏཾ ཀིཏསུདྡྷནཱམཔདཾ ཧོཏི, ན ཀིཏམཏྟཔདཾ, ཏསྨཱ དྷཱཏྭཏྠོ ཨནྟོནཱིཏོ. ‘‘སར ཧིཾསཱཡ’’ནྟི ཧི ཝུཏྟཾ ཧིཾསཏྠཾ གཧེཏྭཱ སབྦཔཱཎཱིནཾ སརཎཾ ཧིཾསཀཾ ཝཏྠུཏྟཡཾ ནམསྶིཏྭཱ ཝིཉྙཱཡམཱནེ ཨནིཊྛཔྤསངྒཏོ སབྦཔཱཎཱིནཾ སརཎཾ སརཎཱིབྷཱུཏཾ ནཱཐབྷཱུཏཾ ཝཏྠུཏྟཡཾ ནམསྶིཏྭཱཏི ཝིཉྙཱཡམཱནེཡེཝ ཡུཛྫཏི, ཏེནེཝ ཙ ཀཱརཎེན ཨཏྠཡོཛནཱཡམྤི ཏཐཱ ཡོཛནཱ ཀཏཱ. སབྦ-སདྡོ ནིརཝསེསཏྠཝཱཙཀཾ སབྦནཱམཔདཾ. སཧ ཨཝེན ཡོ ཝཏྟཏཱིཏི སབྦོཏི ཀཏེ པན སཀལ-སདྡོ ཝིཡ སམུདཱཡཝཱཙཀཾ སམཱསནཱམཔདཾ ཧོཏི. པཱཎོ ཨེཏེསཾ ཨཏྠཱིཏི པཱཎིནོ, པཱཎོཏི ཙེཏྠ ཛཱིཝིཏིནྡྲིཡཾ ཨདྷིཔྤེཏཾ. སབྦེ པཱཎིནོ སབྦཔཱཎིནོ, ཏེསཾ སབྦཔཱཎཱིནཾ. ཨེཏྟཱཝཏཱ ཝཏྠུཏྟཡསྶ སབྦལོཀསརཎབྷཱཝཾ, ཏཏོཡེཝ ཙ ནམསྶནཱརཧབྷཱཝཾ, ནམསྶནཱརཧེ ཙ ཀཏཱཡནམསྶནཀིརིཡཱཡ ཡཐཱདྷིཔྤེཏཏྠསིདྡྷིཀརབྷཱཝཾ, ཨཏྟནོ ཀིརིཡཱཡ ཙ ཁེཏྟངྒཏབྷཱཝཾ དསྶེཏི.

ཨེཝཾ སཧེཏུཀཾ རཏནཏྟཡཔཎཱམཾ དསྶེཏྭཱ ཨིདཱནི པཀརཎཱརམྦྷསྶ སནིམིཏྟཾ མུཁྱཔཡོཛནཾ དསྶེཏུམཱཧ ‘‘ཝིནཡེ ¶ པཱཊཝཏྠཱཡ, ཡོགཱཝཙརབྷིཀྑཱུན’’ནྟི. ཨེཏྠ ཙ ཝིནཡེ པཱཊཝཏྠཱཡཱཏི མུཁྱཔཡོཛནདསྶནཾ, ཏཾདསྶནེན ཙ ཨནུསངྒིཀཔཡོཛནམྤི ཝིབྷཱཝིཏམེཝ ཧོཏི ཀཱརཎེ སིདྡྷེ ཀཱརིཡསྶ སིཛ྄ཛྷནཏོ. ཡོགཱཝཙརབྷིཀྑཱུནནྟི བཱཧིརནིམིཏྟདསྶནཾ, ཏསྨིཾ དསྶིཏེ ཨཛ྄ཛྷཏྟིཀནིམིཏྟམྤི དཱིཔིཏམེཝ ཧོཏི ཨཱརམྨཎེ ཉཱཏེ ཨཱརམྨཎིཀསྶ ཉཱཏབྦཏོ. ཏཏྠ ཝིཝིདྷཱ ནཡཱ ཨེཏྠཱཏི ཝིནཡོ, དུཝིདྷཔཱཏིམོཀྑདུཝིདྷཝིབྷངྒཔཉྩཝིདྷཔཱཏིམོཀྑུདྡེསཔཉྩཨཱཔཏྟིཀྑནྡྷསཏྟཨཱཔཏྟིཀྑནྡྷཱདཡོ ཝིཝིདྷཱ ཨནེཀཔྤཀཱརཱ ནཡཱ ཨེཏྠ སནྟཱིཏི ཨཏྠོ. ཨཐ ཝཱ ཝིསེསཱ ནཡཱ ཨེཏྠཱཏི ཝིནཡོ, དལ༹ྷཱིཀམྨསིཐིལཀརཎཔཡོཛནཱ ཨནུཔཉྙཏྟིནཡཱདཡོ ཝིསེསཱ ནཡཱ ཨེཏྠ སནྟཱིཏི ཨཏྠོ. ཨཐ ཝཱ ཝིནེཏཱིཏི ཝིནཡོ. ཀཱཡོ ཝིནེཏི ཀཱཡཝཱཙཱཡོ, ཨིཏི ཀཱཡཝཱཙཱནཾ ཝིནཡནཏོ ཝིནཡོ. ཝུཏྟཉྷི ཨཊྛཀཐཱཡཾ –

‘‘ཝིཝིདྷཝིསེསནཡཏྟཱ ¶ ;

ཝིནཡནཏོ ཙེཝ ཀཱཡཝཱཙཱནཾ;

ཝིནཡཏྠཝིདཱུཧི ཨཡཾ;

ཝིནཡོ ‘ཝིནཡོ’ཏི ཨཀྑཱཏོ’’ཏི. (པཱརཱ. ཨཊྛ. ༡.པཋམམཧཱསངྒཱིཏིཀཐཱ; དྷ. ས. ཨཊྛ. ནིདཱནཀཐཱ; དཱི. ནི. ཨཊྛ. ༡.པཋམམཧཱསངྒཱིཏིཀཐཱ);

ཀོ སོ? ཝིནཡཔིཊཀཾ. ཏསྨིཾ ཝིནཡེ. པཊཏི ཝིཡཏྟབྷཱཝཾ གཙྪཏཱིཏི པཊུ. ཀོ སོ? པཎྜིཏོ. པཊུནོ བྷཱཝོ པཱཊཝཾ. ཀིཾ ཏཾ? ཉཱཎཾ. ཨསཏི ཀཱརཎཱནུརཱུཔཾ བྷཝཏཱིཏི ཨཏྠོ. ཀོ སོ? པཡོཛནཾ. པཱཊཝམེཝ ཨཏྠོ པཱཊཝཏྠོ, ཏསྶ པཱཊཝཏྠཱཡ, ཝིནཡཔིཊཀེ ཀོསལླཉཱཎཔཡོཛནཱཡཱཏི ཝུཏྟཾ ཧོཏི. ཡུཉྫནཾ ཡོགོ, ཀམྨཊྛཱནམནསིཀཱརོ. ཨཝཙརནྟཱིཏི ཨཝཙརཱ, ཡོགེ ཨཝཙརཱ ཡོགཱཝཙརཱ, ཀམྨཊྛཱནིཀཱ བྷིཀྑཱུ. སཾསཱརེ བྷཡཾ ཨིཀྑནྟཱིཏི བྷིཀྑཱུ, ཡོགཱཝཙརཱ ཙ ཏེ བྷིཀྑཱུ ཙཱཏི ཡོགཱཝཙརབྷིཀྑཱུ, ཏེསཾ ཡོགཱཝཙརབྷིཀྑཱུནཾ. ཨེཏེན ¶ ཝིནཡེ པཊུབྷཱཝོ ནཱམ བྷིཀྑཱུནཾཡེཝ ཨཏྠོ ཧོཏི, ན གཧཊྛཏཱཔསཔརིབྦཱཛཀཱདཱིནཾ. བྷིཀྑཱུསུ ཙ ཀམྨཊྛཱནེ ནིཡུཏྟཱནཾ ལཛྫིཔེསལབྷིཀྑཱུནཾཡེཝ, ན ཝིསྶཊྛཀམྨཊྛཱནཱནཾ ཨལཛྫིབྷིཀྑཱུནནྟི ཨིམམཏྠཾ དསྶེཏི.

ཨེཝཾ པཀརཎཱརམྦྷསྶ སནིམིཏྟཾ པཡོཛནཾ དསྶེཏྭཱ ཨིདཱནི སཧེཏུཀཾ ཨབྷིདྷེཡྻཾ དསྶེཏུཾ ‘‘ཝིཔྤཀིཎྞམནེཀཏྠ, པཱལི༹མུཏྟཝིནིཙྪཡ’’ནྟི ཨཱཧ. ཏཏྠ ཝིཔྤཀིཎྞཾ ཨནེཀཏྠཱཏི ཨིམིནཱ པཀརཎཱརམྦྷསྶ ཧེཏུཾ དསྶེཏི ཧེཏུམནྟཝིསེསནཏྟཱ, ཨིམསྶ ཨནེཀཏྠཝིཔྤཀིཎྞཏྟཱཡེཝ ཨཱཙརིཡསྶ ཨཱརམྦྷོ ཧོཏི, ན ཨཝིཔྤཀིཎྞེ སཏི. ཝཀྑཏི ཧི ‘‘སམཱཧརིཏྭཱ ཨེཀཏྠ དསྶཡིསྶ’’ནྟི (ཝི. སངྒ. ཨཊྛ. གནྠཱརམྦྷཀཐཱ). པཱལི༹མུཏྟཝིནིཙྪཡནྟི ཨིམིནཱ པཀརཎཱབྷིདྷེཡྻཾ. ཏཏྠ ཀིརཏི ཝིཀྑིཔཏཱིཏི ཀིཎྞོ, པཀཱརེན ཀིཎྞོ པཀིཎྞོ, ཝིཝིདྷེན པཀིཎྞོ ཝིཔྤཀིཎྞོ. ཀོ སོ? པཱལི༹མུཏྟཝིནིཙྪཡོ, ཏཾ ཝིཔྤཀིཎྞཾ.

ཨནེཀཏྠཱཏི ཨེཏྠ སངྑྱཱཝཱཙཀོ སབྦནཱམིཀོ ཨེཀ-སདྡོ, ན ཨེཀོ ཨནེཀེ. བཧྭཏྠཝཱཙཀོ ཨནེཀསདྡོ. ཨེཀནྟཨེཀཝཙནནྟོཔི ཨེཀ-སདྡོ ན-ཨིཏིནིཔཱཏེན ཡུཏྟཏྟཱ བཧུཝཙནནྟོ ཛཱཏོཏི. ཏཏྠ ཨནེཀཏྠ བཧཱུསཱུཏི ཨཏྠོ, པཱརཱཛིཀཀཎྜཊྛཀཐཱདཱིསུ ཨནེཀེསུ པཀརཎེསཱུཏི ¶ ཝུཏྟཾ ཧོཏི. པོརཱཎཊཱིཀཱཡཾ པན ཨནེཀཏྠཱཏི ཨནེཀེསུ སིཀྑཱཔདཔདེསེསཱུཏི ཨཏྠོ དསྶིཏོ, ཨེཝཉྩ སཏི ཨུཔརི ‘‘སམཱཧརིཏྭཱ ཨེཀཏྠཱ’’ཏི ཝཀྑམཱནཏྟཱ ‘‘ཨནེཀཏྠཝིཔྤཀིཎྞཾ ཨེཀཏྠ སམཱཧརིཏྭཱ’’ཏི ཨིམེསཾ པདཱནཾ སཧཡོགཱིབྷཱུཏཏྟཱ ཨནེཀེསུ སིཀྑཱཔདཔདེསེསུ ཝིཔྤཀིཎྞཾ ཨེཀསྨིཾ སིཀྑཱཔདཔདེསེ སམཱཧརིཏྭཱཏི ཨཏྠོ བྷཝེཡྻ, སོ ཙ ཨཏྠོ ཨཡུཏྟོ. ཀསྨཱ? ཨནེཀེསུ པཀརཎེསུ ཝིཔྤཀིཎྞཾ ཨེཀསྨིཾ པཀརཎེ སམཱཧརིཏྭཱཏི ¶ ཨཏྠོ ཨམྷེཧི ཝུཏྟོ. ཨཐ པན ‘‘ཨེཀཏྠཱ’’ཏི ཨིམསྶ ‘‘ཨེཀཏོ’’ཏི ཨཏྠཾ ཝིཀཔྤེཏྭཱ ཨནེཀེསུ སིཀྑཱཔདཔདེསེསུ ཝིཔྤཀིཎྞཾ ཨེཀཏོ སམཱཧརིཏྭཱཏི ཨཏྠཾ གཎྷེཡྻ, སོ ཨཏྠོ ཡུཏྟོ བྷཝེཡྻ.

པཀཊྛཱནཾ ཨཱལཱི༹ཏི པཱལི༹, ཨུཏྟམཱནཾ ཝཙནཱནཾ ཨནུཀྐམོཏི ཨཏྠོ. ཨཐ ཝཱ ཨཏྟཏྠཔརཏྠཱདིབྷེདཾ ཨཏྠཾ པཱལེཏི རཀྑཏཱིཏི པཱལི༹, ལལཱ༹ནམཝིསེསོ. ཀཱ སཱ? ཝིནཡཏནྟི. མུཙྩཏཱིཏི མུཏྟོ, པཱལི༹ཏོ མུཏྟོ པཱལི༹མུཏྟོ. ཚིནྡིཡཏེ ཨནེནཱཏི ཚཡོ, ནཱིཧརིཏྭཱ ཚཡོ ནིཙྪཡོ, ཝིསེསེན ནིཙྪཡོ ཝིནིཙྪཡོ, ཁིལམདྡནཱཀཱརེན པཝཏྟོ སདྡནཡོ ཨཏྠནཡོ ཙ. པཱལི༹མུཏྟོ ཙ སོ ཝིནིཙྪཡོ ཙཱཏི པཱལི༹མུཏྟཝིནིཙྪཡོ, ཏཾ པཱལི༹མུཏྟཝིནིཙྪཡཾ. ཨིདཉྩ ‘‘ཨཱནགརཱ ཁདིརཝན’’ནྟིཨཱདཱིསུ ཝིཡ ཡེབྷུཡྻནཡཝསེན ཝུཏྟཾ ཀཏྠཙི པཱལི༹ཝིནིཙྪཡསྶཔི དིསྶནཏོ. པོརཱཎཊཱིཀཱཡཾ པན པཱལི༹ཝིནིཙྪཡོ ཙ པཱལི༹མུཏྟཝིནིཙྪཡོ ཙ པཱལི༹མུཏྟཝིནིཙྪཡོཏི ཨེཝཾ ཨེཀདེསསརཱུཔེཀསེསཝསེན ཝཱ ཨེཏཾ ཝུཏྟནྟི དཊྛབྦནྟི དུཏིཡནཡོཔི ཝུཏྟོ, ཨེཝཉྩ སཏི པཱལི༹ཝིནིཙྪཡཔཱལི༹མུཏྟཝིནིཙྪཡེཧི ཨཉྙསྶ ཝིནིཙྪཡསྶ ཨབྷཱཝཱ ཀིམེཏེན གནྠགརུཀརེན པཱལི༹མུཏྟགྒཧཎེན. ཝིསེསནཉྷི སམྦྷཝབྱབྷིཙཱརེ ཙ སཏི སཱཏྠཀཾ སིཡཱཏི པཋམནཡོཝ ཨཱརཱདྷནཱིཡོ ཧོཏི.

ཨེཝཾ སཧེཏུཀཾ ཨབྷིདྷེཡྻཾ དསྶེཏྭཱ ཨིདཱནི ཀརཎཔྤཀཱརཾ དསྶེཏི ‘‘སམཱཧརིཏྭཱ’’ཏིཨཱདིནཱ. དུཝིདྷོ ཧེཏྠ ཀརཎཔྤཀཱརོ ཨེཀཏྠསམཱཧརཎཨནཱཀུལཀརཎཝསེན. སོ དུཝིདྷོཔི ཏེན པཀཱརེན པཀརཎསྶ ཀཏཏྟཱ ‘‘ཀརཎཔྤཀཱརོ’’ཏི ཝུཙྩཏི. ཏཏྠ སམཱཧརིསྶཱམཱིཏི སམཱཧརིཏྭཱ, སཾ-སདྡོ སངྑེཔཏྠོ, ཏསྨཱ སངྑིཔིཡ ཨཱཧརིསྶཱམཱིཏི ཨཏྠོ. ཨནཱགཏཀཱལིཀཝསེན པཙྩམཱནེན ‘‘དསྶཡིསྶ’’ནྟི ¶ པདེན སམཱནཀཱལཏྟཱ ཨནཱགཏཀཱལིཀོ ཨིདྷ ཏྭཱ-པཙྩཡོ ཝུཏྟོ. ཨེཀཏྠཱཏི ཨེཀསྨིཾ ཨིདྷ ཝིནཡསངྒཧཔྤཀརཎེ. ཨེཀཏྠཱཏི ཝཱ ཨེཀཏོ. དསྶཡིསྶནྟི དསྶཡིསྶཱམི, ཉཱཔཡིསྶཱམཱིཏི ཨཏྠོ. ཨཱཀུལཏི བྱཱཀུལཏཱིཏི ཨཱཀུལོ, ན ཨཱཀུལོ ¶ ཨནཱཀུལོ, པུབྦཱཔརབྱཱཀིཎྞཝིརཧིཏོ པཱལི༹མུཏྟཝིནིཙྪཡོ. ཨནཱཀུལནྟི པན བྷཱཝནཔུཾསཀཾ, ཏསྨཱ ཀརདྷཱཏུམཡེན ཀཏྭཱསདྡེན ཡོཛེཏྭཱ དསྶནཀིརིཡཱཡ སམྦནྡྷིཏབྦཾ.

ཨེཝཾ རཏནཏྟཡཔཎཱམཱདིཀཾ པུབྦཀརཎཾ དསྶེཏྭཱ ཨིདཱནི ཡེ པཱལི༹མུཏྟཝིནིཙྪཡེ དསྶེཏུཀཱམོ, ཏེསཾ ཨནུཀྐམཀརཎཏྠཾ མཱཏིཀཾ ཋཔེནྟོ ‘‘ཏཏྲཱཡཾ མཱཏིཀཱ’’ཏིཨཱདིམཱཧ. མཱཏིཀཱཡ ཧི ཨསཏི དསྶིཏཝིནིཙྪཡཱ ཝིཀིརནྟི ཝིདྷཾསེནྟི ཡཐཱ ཏཾ སུཏྟེན ཨསངྒཧིཏཱནི པུཔྥཱནི. སནྟིཡཱ པན མཱཏིཀཱཡ དསྶིཏཝིནིཙྪཡཱ ན ཝིཀིརནྟི ན ཝིདྷཾསེནྟི ཡཐཱ ཏཾ སུཏྟེན སངྒཧིཏཱནི པུཔྥཱནི. ཏཾ ཏཾ ཨཏྠཾ ཛཱནིཏུཀཱམེཧི མཱཏིཀཱནུསཱརེན གནྟྭཱ ཨིཙྪིཏིཙྪིཏཝིནིཙྪཡཾ པཏྭཱ སོ སོ ཨཏྠོ ཛཱནིཏབྦོ ཧོཏི, ཏསྨཱ སུཁགྒཧཎཏྠཾ མཱཏིཀཱ ཋཔིཏཱ. ཏཏྠ ཏཏྲཱཏི ཏསྨིཾ པཱལི༹མུཏྟཝིནིཙྪཡེ. ཨཡནྟི ཨཡཾ མཡཱ ཝཀྑམཱནཱ. མཱཏཱ ཝིཡཱཏི མཱཏིཀཱ. ཡཐཱ ཧི པུཏྟཱ མཱཏིཏོ པབྷཝནྟི, ཨེཝཾ ནིདྡེསཔདཱནི ཨུདྡེསཏོ པབྷཝནྟི, ཏསྨཱ ཨུདྡེསོ མཱཏིཀཱ ཝིཡཱཏི ‘‘མཱཏིཀཱ’’ཏི ཝུཙྩཏི.

དིཝཱསེཡྻཱཏིཨཱདཱིསུ དིཝཱསེཡྻཱ དིཝཱསེཡྻཝིནིཙྪཡཀཐཱ. པརིཀྑཱརོ པརིཀྑཱརཝིནིཙྪཡཀཐཱ…པེ… པཀིཎྞཀཾ པཀིཎྞཀཝིནིཙྪཡཀཐཱཏི ཡོཛནཱ. ཏེནེཝ ཝཀྑཏི ‘‘དིཝཱསཡནཝིནིཙྪཡཀཐཱ སམཏྟཱ’’ཏིཨཱདི. ཨིཏི-སདྡོ ཨིདམཏྠོ ཝཱ ནིདསྶནཏྠོ ཝཱ པརིསམཱཔནཏྠོ ཝཱ. ཏེསུ ཨིདམཏྠེ ཀཱ སཱ? དིཝཱསེཡྻཱ…པེ… པཀིཎྞཀཾ ཨིཏི ཨཡནྟི. ནིདསྶནཏྠེ ¶ ཀཐཾ སཱ? དིཝཱསེཡྻཱ…པེ… པཀིཎྞཀཾ ཨིཏི དཊྛབྦཱཏི. པརིསམཱཔནཏྠེ སཱ ཀིཏྟཀེན པརིསམཏྟཱ? དིཝཱསེཡྻཱ…པེ… པཀིཎྞཀཾ ཨིཏི ཨེཏྟཀེན པརིསམཏྟཱཏི ཨཏྠོ. ཨིམེསཾ པན དིཝཱསེཡྻཱདིཔདཱནཾ ཝཱཀྱཝིགྒཧཾ ཀཏྭཱ ཨཏྠེ ཨིདྷ ཝུཙྩམཱནེ ཨཏིཔཔཉྩོ བྷཝིསྶཏི, སོཏཱུནཉྩ དུསྶལླཀྑཎཱིཡོ, ཏསྨཱ ཏསྶ ཏསྶ ནིདྡེསསྶ ཨཱདིམྷིཡེཝ ཡཐཱནུརཱུཔཾ ཝཀྑཱམ.

གནྠཱརམྦྷཀཐཱཝཎྞནཱ ནིཊྛིཏཱ.

༡. དིཝཱསེཡྻཝིནིཙྪཡཀཐཱ

༡. ཨེཝཾ ¶ པཱལི༹མུཏྟཝིནིཙྪཡཀཐཱནཾ མཱཏིཀཾ ཋཔེཏྭཱ ཨིདཱནི ཡཐཱཋཔིཏམཱཏིཀཱནུཀྐམེན ནིདྡིསནྟོ ‘‘ཏཏྠ དིཝཱསེཡྻཱཏི དིཝཱནིཔཛྫན’’ནྟིཨཱདིམཱཧ. ཏཏྠ ཏཏྠཱཏི ཏེསུ མཱཏིཀཱཔདེསུ སམབྷིནིཝིཊྛསྶ ‘‘དིཝཱསེཡྻཱ’’ཏི པདསྶ ‘‘དིཝཱནིཔཛྫན’’ནྟི ཨཏྠོ དཊྛབྦོཏི ཡོཛནཱ. ཏཏྠ དིཝཱ-སདྡོ ཨཧཝཱཙཀོ ཨཱཀཱརནྟོ ནིཔཱཏོ. ཝུཏྟཉྷི ཨབྷིདྷཱནཔྤདཱིཔིཀཱཡཾ ‘‘ཨཱནུཀཱུལྱེཏུ སདྡྷཉྩ, ནཏྟཾ དོསོ དིཝཱ ཏྭཧེ’’ཏི. སཡནཾ སེཡྻཱ, ཀརཛཀཱཡགཏརཱུཔཱནཾ ཨུདྡྷཾ ཨནུགྒནྟྭཱ དཱིགྷཝསེན ཝིཏྠཱརཏོ པཝཏྟནསངྑཱཏོ ཨིརིཡཱཔཐཝིསེསོ. དིཝཱཀཱལསྨིཾ སེཡྻཱ དིཝཱསེཡྻཱ. ཨརུཎུགྒམནཏོ པཊྛཱཡ ཡཱཝ སཱུརིཡཏྠངྒམནཱ, ཨེཏསྨིཾ ཀཱལེ སཡནཨིརིཡཱཔཐཀརཎནྟི. ཏེནཱཧ ‘‘དིཝཱནིཔཛྫནནྟི ཨཏྠོ’’ཏི.

ཏཏྲཱཏི ཏསྨིཾ དིཝཱསཡནེ ཨཡཾ ཝཀྑམཱནོ ཝིནིཙྪཡོ ཝེདིཏབྦོཏི ཡོཛནཱ. ‘‘ཨནུཛཱནཱམི…པེ… ཝཙནཏོ’’ཏི (པཱརཱ. ༧༧) ཨཡཾ པཋམཔཱརཱཛིཀསིཀྑཱཔདསྶ ཝིནཱིཏཝཏྠཱུསུ ཨཱགཏོ བྷགཝཏཱ ¶ ཨཱཧཙྩབྷཱསིཏོ ཉཱཔཀཔཱཋོ. ཏཏྠ དིཝཱ པཊིསལླཱིཡནྟེནཱཏི དིཝཱ ནིཔཛྫནྟེན. དྭཱརཾ སཾཝརིཏྭཱ པཊིསལླཱིཡིཏུནྟི དྭཱརཾ པིདཧིཏྭཱ ནིཔཛྫིཏུཾ. ‘‘དིཝཱ…པེ… ནིཔཛྫིཏབྦནྟི ཉཱཔྱཾ. ནནུ པཱལི༹ཡཾ ‘‘ཨཡཾ ནཱམ ཨཱཔཏྟཱི’’ཏི ན ཝུཏྟཱ, ཨཐ ཀཐམེཏྠ ཨཱཔཏྟི ཝིཉྙཱཡཏཱིཏི ཙོདནཾ སནྡྷཱཡཱཧ ‘‘ཨེཏྠ ཙ ཀིཉྩཱཔཱི’’ཏིཨཱདི. ཏཏྠ ཨེཏྠཱཏི ཨེཏསྨིཾ དིཝཱནིཔཛྫནེ. ཙ-སདྡོ ཝཱཀྱཱརམྦྷཛོཏཀོ, ཀིཉྩཱཔི-སདྡོ ནིཔཱཏསམུདཱཡོ, ཡདིཔཱིཏྱཏྠོ. པཱལི༹ཡཾ ཨཡཾ ནཱམ ཨཱཔཏྟཱིཏི ཀིཉྩཱཔི ན ཝུཏྟཱ, པན ཏཐཱཔི ཨསཾཝརིཏྭཱ ནིཔཛྫནྟསྶ ཨཊྛཀཐཱཡཾ (པཱརཱ. ཨཊྛ. ༡.༧༧) དུཀྐཊཾ ཡསྨཱ ཝུཏྟཾ, ཏསྨཱ ཨེཏྠ ཨཱཔཏྟི ཝིཉྙཱཡཏཱིཏི ཡོཛནཱ. ཨེཝཾ སནྟེཔི ཨསཏི བྷགཝཏོ ཝཙནེ ཀཐཾ ཨཊྛཀཐཱཡཾ ཝུཏྟཾ སིཡཱཏི ཨཱཧ ‘‘ཝིཝརིཏྭཱ…པེ… ཨནུཉྙཱཏཏྟཱ’’ཏི. ཨེཏེན བྷགཝཏོ ཨནུཛཱནནམྤི ཏཾ ཨཀརོནྟསྶ ཨཱཔཏྟིཀཱརཎཾ ཧོཏཱིཏི དསྶེཏི.

ཏཏྠ ‘‘ཨུཔྤནྣེ ཝཏྠུམྷཱིཏི ཨིཏྠིཡཱ ཀཏཨཛ྄ཛྷཱཙཱརཝཏྠུསྨི’’ནྟི ཝིམཏིཝིནོདནིཡཾ (ཝི. ཝི. ཊཱི. ༡.༧༧) ཝུཏྟཾ, སཱརཏྠདཱིཔནིཡཾ (སཱརཏྠ. ཊཱི. ༢.༧༧) པན ‘‘མེཐུནཝཏྠུསྨིཾ ཨུཔྤནྣེ’’ཏི ཝུཏྟཾ, པོརཱཎཊཱིཀཱཡམྤི ཏམེཝ གཧེཏྭཱ ‘‘ཨུཔྤནྣེ མེཐུནཝཏྠུསྨི’’ནྟི ཝུཏྟཾ, ཏདེཏཾ ཝིཙཱརེཏབྦཾ མེཐུནལཀྑཎསྶ ཨབྷཱཝཱ. ནནུ སིཀྑཱཔདཔཉྙཱཔནཾ ནཱམ བུདྡྷཝིསཡོ, ཨཐ ཀསྨཱ ¶ ཨཊྛཀཐཱཡཾ དུཀྐཊཾ ཝུཏྟནྟི ཨཱཧ ‘‘བྷགཝཏོ’’ཏིཨཱདི. ན ཀེཝལཾ ཨུཔཱལིཏྠེརཱདཱིཧི ཨེཝ ཨཊྛཀཐཱ ཋཔིཏཱ, ཨཐ ཁོ པཱལི༹ཏོ ཙ ཨཏྠཏོ ཙ བུདྡྷེན བྷགཝཏཱ ཝུཏྟོ. ན ཧི བྷགཝཏཱ ཨབྱཱཀཏཾ ཏནྟིཔདཾ ནཱམ ཨཏྠི, སབྦེསཾཡེཝ ཨཏྠོ ཀཐིཏོ, ཏསྨཱ སམྦུདྡྷེནེཝ ཏིཎྞཾ པིཊཀཱནཾ ཨཏྠཝཎྞནཀྐམོཔི བྷཱསིཏོཏི དཊྛབྦཾ. ཏཏྠ ཏཏྠ ཧི བྷགཝཏཱ པཝཏྟིཏཱ པཀིཎྞཀདེསནཱཡེཝ ཨཊྛཀཐཱཏི.

ཀིཾ ¶ པནེཏྠ ཨེཏཾ དིཝཱ དྭཱརཾ ཨསཾཝརིཏྭཱ ནིཔཛྫནྟསྶ དུཀྐཊཱཔཏྟིཨཱཔཛྫནཾ ཨཊྛཀཐཱཡཾ ཝུཏྟཏྟཱ ཨེཝ སིདྡྷཾ, ཨུདཱཧུ ཨཉྙེནཔཱིཏི ཨཱཧ ‘‘ཨཏྠཱཔཏྟཱི’’ཏིཨཱདི. ཨེཏཾ དུཀྐཊཱཔཏྟིཨཱཔཛྫནཾ ན ཀེཝལཾ ཨཊྛཀཐཱཡཾ ཝུཏྟཏྟཱ ཨེཝ སིདྡྷཾ, ཨཐ ཁོ ‘‘ཨཏྠཱཔཏྟི དིཝཱ ཨཱཔཛྫཏི, ནོ རཏྟི’’ནྟི (པརི. ༣༢༣) ཨིམིནཱ པརིཝཱརཔཱཋེནཔི སིདྡྷཾ ཧོཏཱིཏི ཡོཛནཱ. ཀཏརསྨིཾ པན ཝཏྠུསྨིཾ ཨིདཾ སིཀྑཱཔདཾ ཝུཏྟནྟི? ‘‘ཏེན ཁོ པན སམཡེན ཨཉྙཏརོ བྷིཀྑུ ཝེསཱལིཡཾ མཧཱཝནེ ཀཱུཊཱགཱརསཱལཱཡཾ དིཝཱ ཝིཧཱརགཏོ དྭཱརཾ ཝིཝརིཏྭཱ ནིཔནྣོ ཨཧོསི. ཏསྶ ཨངྒམངྒཱནི ཝཱཏུཔཏྠདྡྷཱནི ཨཧེསུཾ. ཏེན ཁོ པན སམཡེན སམྦཧུལཱ ཨིཏྠིཡོ གནྡྷཉྩ མཱལཉྩ ཨཱདཱཡ ཝིཧཱརཾ ཨཱགམིཾསུ ཝིཧཱརཔེཀྑིཀཱཡོ. ཨཐ ཁོ ཏཱ ཨིཏྠིཡོ ཏཾ བྷིཀྑུཾ པསྶིཏྭཱ ཨངྒཛཱཏེ ཨབྷིནིསཱིདིཏྭཱ ཡཱཝདཏྠཾ ཀཏྭཱ ‘པུརིསུསབྷོ ཝཏཱཡ’ནྟི ཝཏྭཱ གནྡྷཉྩ མཱལཉྩ ཨཱརོཔེཏྭཱ པཀྐམིཾསུ. བྷིཀྑཱུ ཀིལིནྣཾ པསྶིཏྭཱ བྷགཝཏོ ཨེཏམཏྠཾ ཨཱརོཙེསུཾ. པཉྩཧི, བྷིཀྑཝེ, ཨཱཀཱརེཧི ཨངྒཛཱཏཾ ཀམྨནིཡཾ ཧོཏི རཱགེན, ཝཙྩེན, པསྶཱཝེན, ཝཱཏེན, ཨུཙྩཱལིངྒཔཱཎཀདཊྛེན. ཨིམེཧི ཁོ, བྷིཀྑཝེ, པཉྩཧཱཀཱརེཧི ཨངྒཛཱཏཾ ཀམྨནིཡཾ ཧོཏི. ཨཊྛཱནམེཏཾ, བྷིཀྑཝེ, ཨནཝཀཱསོ, ཡཾ ཏསྶ བྷིཀྑུནོ རཱགེན ཨངྒཛཱཏཾ ཀམྨནིཡཾ ཨསྶ, ཨརཧཾ སོ, བྷིཀྑཝེ, བྷིཀྑུ, ཨནཱཔཏྟི བྷིཀྑཝེ ཏསྶ བྷིཀྑུནོ. ཨནུཛཱནཱམི བྷིཀྑཝེ དིཝཱ པཊིསལླཱིཡནྟེན དྭཱརཾ སཾཝརིཏྭཱ པཊིསལླཱིཡིཏུ’’ནྟི (པཱརཱ. ༧༧) ཨེཏསྨིཾ ཝཏྠུསྨིཾ ཨིདཾ ཝུཏྟནྟི དཊྛབྦཾ.

༢. ཨིདཱནི དྭཱརཝིསེསཾ དསྶེཏུཾ ‘‘ཀཱིདིས’’ནྟིཨཱདིམཱཧ. ཏཏྠ པརིཝཏྟཀདྭཱརམེཝཱཏི སཾཝརཎཝིཝརཎཝསེན ཨིཏོ ཙིཏོ ཙ པརིཝཏྟནཡོགྒདྭཱརམེཝ. རུཀྑསཱུཙིཀཎྚཀདྭཱརནྟི རུཀྑསཱུཙིདྭཱརཾ ཀཎྚཀདྭཱརཉྩ. ‘‘རུཀྑསཱུཙིདྭཱརཀཎྚཀདྭཱར’’མིཙྩེཝ ཝཱ ¶ པཱཋོ. ཡཾ ཨུབྷོསུ པསྶེསུ རུཀྑཏྠམྦྷེ ནིཁནིཏྭཱ ཏཏྠ ཝིཛ྄ཛྷིཏྭཱ མཛ྄ཛྷེ དྭེ ཏིསྶོ རུཀྑསཱུཙིཡོ པཝེསེཏྭཱ ཀརོནྟི, ཏཾ རུཀྑསཱུཙིདྭཱརཾ ནཱམ. པཝེསནནིཀྑམནཀཱལེ ཨཔནེཏྭཱ ཐཀནཡོགྒཾ ཨེཀཱཡ, བཧཱུཧི ¶ ཝཱ ཀཎྚཀསཱཁཱཧི ཀཏཾ ཀཎྚཀདྭཱརཾ ནཱམ. གཱམདྭཱརསྶ པིདྷཱནཏྠཾ པདརེན ཝཱ ཀཎྚཀསཱཁཱདཱིཧི ཝཱ ཀཏསྶ ཀཝཱཊསྶ ཨུདུཀྑལཔཱསཀརཧིཏཏཱཡ ཨེཀེན སཾཝརིཏུཾ ཝིཝརིཏུཉྩ ཨསཀྐུཎེཡྻསྶ ཧེཊྛཱ ཨེཀཾ ཙཀྐཾ ཡོཛེནྟི, ཡེན པརིཝཏྟམཱནཀཀཝཱཊཾ སུཁཐཀནཀཾ ཧོཏི, ཏཾ སནྡྷཱཡ ཝུཏྟཾ ‘‘ཙཀྐལཀཡུཏྟདྭཱར’’ནྟི. ཙཀྐམེཝ ཧི ལཱཏབྦཏྠེན སཾཝརཎཝིཝརཎཏྠཱཡ གཧེཏབྦཏྠེན ཙཀྐལཀཾ, ཏེན ཡུཏྟཀཝཱཊམྤི ཙཀྐལཀཾ ནཱམ, ཏེན ཡུཏྟདྭཱརཾ ཙཀྐལཀཡུཏྟདྭཱརཾ.

མཧཱདྭཱརེསུ པན དྭེ ཏཱིཎི ཙཀྐལཀཱནི ཡོཛེཏཱིཏི ཨཱཧ ‘‘ཕལཀེསཱུ’’ཏིཨཱདི. ཀིཊིཀཱསཱུཏི ཝེལུ༹པེསིཀཱདཱིཧི ཀཎྚཀསཱཁཱདཱིཧི ཙ ཀཏཐཀནཀེསུ. སཾསརཎཀིཊིཀདྭཱརནྟི ཙཀྐལཀཡནྟེན སཾསརཎཀིཊིཀཱཡུཏྟམཧཱདྭཱརཾ. གོཔྥེཏྭཱཏི ཨཱཝུཎིཏྭཱ, རཛྫཱུཧི གནྠེཏྭཱ ཝཱ. ཨེཀཾ དུསྶསཱཎིདྭཱརམེཝཱཏི ཨེཏྠ ཀིལཉྫསཱཎིདྭཱརམྤི སངྒཧཾ གཙྪཏི. ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༧༦-༧༧) པན ‘‘དུསྶདྭཱརཾ སཱཎིདྭཱརཉྩ དུསྶསཱཎིདྭཱརཾ. དུསྶསཱཎི ཀིལཉྫསཱཎཱིཏིཨཱདིནཱ ཝུཏྟཾ སབྦམྤི དུསྶསཱཎིཡམེཝ སངྒཧེཏྭཱ ཝུཏྟཾ, ཨེཀསདིསཏྟཱ ཨེཀནྟི ཝུཏྟ’’ནྟི ཝུཏྟཾ.

༣. ཨེཝཾ དྭཱརཝིསེསཾ དསྶེཏྭཱ ཨིདཱནི ཡཏྟཀེན དྭཱརཾ སཾཝུཏཾ ཧོཏི, ཏཾ པམཱཎཾ དསྶེཏུཾ ‘‘ཀིཏྟཀེན’’ཏྱཱདིམཱཧ. ཏཏྠ སཱུཙཱིཏི མཛ྄ཛྷེ ཚིདྡཾ ཀཏྭཱ པཝེསིཏཱ. གྷཊིཀཱཏི ཨུཔརི ཡོཛིཏཱ. ཨིདཱནི ཡཏྠ དྭཱརཾ སཾཝརིཏྭཱ ནིཔཛྫིཏུཾ ¶ ན སཀྐཱ ཧོཏི, ཏཏྠ ཀཱཏབྦཝིདྷིཾ དསྶེཏུཾ ‘‘སཙེ བཧཱུནཾ ཝལ༹ཉྫནཊྛཱནཾ ཧོཏཱི’’ཏིཨཱདི ཝུཏྟཾ. བཧཱུནཾ ཨཝལ༹ཉྫནཊྛཱནེཔི ཨེཀཾ ཨཱཔུཙྪིཏྭཱ ནིཔཛྫིཏུཾ ཝཊྚཏིཡེཝ. ཨཐ བྷིཀྑཱུ…པེ… ནིསིནྣཱ ཧོནྟཱིཏི ཨིདཾ ཏཏྠ བྷིཀྑཱུནཾ སནྣིཧིཏབྷཱཝདསྶནཏྠཾ ཝུཏྟཾ, ན སེསཨིརིཡཱཔཐསམངྒིཏཱནིཝཏྟནཏྠཾ, ཏསྨཱ ནིཔནྣེཔི ཨཱབྷོགཾ ཀཱཏུཾ ཝཊྚཏི. ནིཔཛྫིཏྭཱ ནིདྡཱཡནྟེ པན ཨཱབྷོགཾ ཀཱཏུཾ ན ཝཊྚཏི. ཨསནྟཔཀྑེ ཋིཏཏྟཱ རཧོ ནིསཛྫཱཡ ཝིཡ དྭཱརསཾཝརཎཾ ནཱམ མཱཏུགཱམཱནཾ པཝེསནིཝཱརཎཏྠཾ ཨནུཉྙཱཏནྟི ཨཱཧ ‘‘ཀེཝལཾ བྷིཀྑུནིཾ ཝཱ’’ཏིཨཱདི.

ཨེཏྠ ཙ ཏཾ ཡུཏྟཾ, ཨེཝཾ སབྦཏྠཔི ཡོ ཡོ ཐེརཝཱདོ ཝཱ ཨཊྛཀཐཱཝཱདོ ཝཱ པཙྪཱ ཝུཙྩཏི, སོ སོཝ པམཱཎནྟི གཧེཏབྦནྟི ཨིདཾ ཨཊྛཀཐཱཝཙནཏོ ཨཏིརེཀཾ ཨཱཙརིཡསྶ ཝཙནཾ. ཨིཏོ པུབྦཱཔརཝཙནཾ ཨཊྛཀཐཱཝཙནམེཝ. ཏཏྠ ཏཾ ཡུཏྟནྟི ‘‘ཀུརུནྡཊྛཀཐཱཡཾ པན…པེ… ན ཝཏྟཏཱི’’ཏི ¶ ཡཾ ཝཙནཾ ཨཊྛཀཐཱཙརིཡེཧི ཝུཏྟཾ, ཏཾ ཝཙནཾ ཡུཏྟནྟི ཨཏྠོ. ཨེཝཾ…པེ… གཧེཏབྦནྟི ཡཐཱ ཙེཏྠ ཀུརུནྡིཡཾ ཝུཏྟཝཙནཾ ཡུཏྟཾ, ཨེཝཾ སབྦཏྠཔི ཝིནིཙྪཡེ ཡོ ཡོ ཐེརཝཱདོ ཝཱ ཨཊྛཀཐཱཝཱདོ ཝཱ པཙྪཱ ཝུཙྩཏི, སོ སོཝ པམཱཎནྟི གཧེཏབྦཾ, པུརེ ཝུཏྟོ ཐེརཝཱདོ ཝཱ ཨཊྛཀཐཱཝཱདོ ཝཱ པམཱཎནྟི ན གཧེཏབྦནྟི ཨདྷིཔྤཱཡོ. ཨིདཾ ཝཙནཾ ཨཊྛཱནེ ཝུཏྟཾ ཝིཡ དིསྶཏི. ཀཐཾ? ཡཾ ཏཱཝ ཝུཏྟཾ, ཏཾ ཡུཏྟནྟི. ཏཾ ཨིམསྨིཾ ཨཱཔུཙྪནཨཱབྷོགཀརཎཝིནིཙྪཡེ ཨཉྙསྶ ཨཡུཏྟསྶ ཨཊྛཀཐཱཝཱདསྶ ཝཱ ཐེརཝཱདསྶ ཝཱ ཨབྷཱཝཱ ཝཏྟུཾ ན སཀྐཱ. ན ཧི པུབྦཝཱཀྱེ ‘‘བྷིཀྑཱུ ཨེཝཱ’’ཏི ཨཝདྷཱརཎཾ ཀཏཾ, ཨཐ ཁོ ཨཱསནྣཝསེན ཝཱ པཊྛཱནཝསེན ཝཱ ‘‘བྷིཀྑཱུ ཙཱིཝརཀམྨཾ’’ཨིཙྩཱདིཀཾཡེཝ ཝུཏྟཾ. ཡམྤི ཝུཏྟཾ ‘‘ཨེཝཾ སབྦཏྠཔཱི’’ཏྱཱདི, ཏམྤི ཨནོཀཱསཾ. ཨིམསྨིཾ ཝིནིཙྪཡེ ¶ ཨཉྙསྶ ཨཊྛཀཐཱཝཱདསྶ ཝཱ ཨཱཙརིཡཝཱདསྶ ཝཱ ཨཝཙནཏོ པུརེ པཙྪཱབྷཱཝོ ཙ ན དིསྶཏི, ཨཡཾ ‘‘པམཱཎ’’ནྟི གཧེཏབྦོ, ཨཡཾ ‘‘ན གཧེཏབྦོ’’ཏི ཝཏྟབྦབྷཱཝོ ཙ.

ཨུཔརི པན ‘‘ཀོ མུཙྩཏི, ཀོ ན མུཙྩཏཱི’’ཏི ཨིམསྶ པཉྷསྶ ཝིསྶཛྫནེ མཧཱཔཙྩརིཝཱདོ ཙ ཀུརུནྡིཝཱདོ ཙ མཧཱཨཊྛཀཐཱཝཱདོ ཙཱཏི ཏཡོ ཨཊྛཀཐཱཝཱདཱ ཨཱགཏཱ, ཨེཀོ མཧཱཔདུམཏྠེརཝཱདོ, ཏསྨཱ ཏཏྠེཝ ཡུཏྟཱཡུཏྟབྷཱཝོ ཙ པམཱཎཱཔམཱཎབྷཱཝོ ཙ གཧེཏབྦཱགཧེཏབྦབྷཱཝོ ཙ དིསྶཏི, ཏསྨཱ ཏསྨིཾཡེཝ ཋཱནེ ཝཏྟབྦཾ སིཡཱ, སུཝིམལཝིཔུལཔཉྙཱཝེཡྻཏྟིཡསམནྣཱགཏེན པན ཨཱཙརིཡཱསབྷེན ཨཝཏྟབྦཊྛཱནེ ཝུཏྟཾ ན སིཡཱ, ཏསྨཱ ཨུཔརི ཨཊྛཀཐཱཝཱདསཾསནྡནཱཝསཱནེ མཧཱཔདུམཏྠེརེན ཝུཏྟནྟི ཨིམསྶ ཝཙནསྶ པཙྪཏོ ཝུཏྟཾ སིཡཱ, ཏཾ པཙྪཱ ལེཁཀེཧི པརིཝཏྟེཏྭཱ ལིཁིཏཾ བྷཝེཡྻ, པཱརཱཛིཀཀཎྜཊྛཀཐཱཡཉྩ ཨིདཾ ཝཙནཾ ཝུཏྟཾ. ཊཱིཀཱཡཉྩ ཨིམསྨིཾ ཋཱནེ ན ཝུཏྟཾ, ཨུཔརིཡེཝ ཝུཏྟཾ, ‘‘ཡོ ཙ ཡཀྑགཧིཏཀོ, ཡོ ཙ བནྡྷིཏྭཱ ནིཔཛྫཱཔིཏོ’’ཏི ཨིམསྶ ཨཊྛཀཐཱཝཱདསྶ པཙྪིམཏྟཱ སོཡེཝ པམཱཎཏོ གཧེཏབྦོ. ཏཐཱ ཙ ཝཀྑཏི ‘‘སབྦཏྠ ཡོ ཡོ ཨཊྛཀཐཱཝཱདོ ཝཱ ཐེརཝཱདོ ཝཱ པཙྪཱ ཝུཙྩཏི, སོ སོཡེཝ པམཱཎཏོ དཊྛབྦོ’’ཏི, ཏསྨཱ ཨིདམེཏྠ ཝིཙཱརེཏྭཱ གཧེཏབྦཾ.

༤. ཨིདཱནི དྭཱརཾ སཾཝརཎསྶ ཨནྟརཱཡེ སཏི ཨསཾཝརིཏྭཱཔི ནིཔཛྫིཏུཾ ཝཊྚཏཱིཏི དསྶེཏུཾ ‘‘ཨཐ དྭཱརསྶ’’ཏྱཱདིམཱཧ. ནིསྶེཎིཾ ཨཱརོཔེཏྭཱཏི ཨུཔརིམཏལཾ ཨཱརོཔེཏྭཱ ཝིསངྑརིཏྭཱ བྷཱུམིཡཾ པཱཏེཏྭཱ, ཚཌྜེཏྭཱ ཝཱ ནིཔཛྫིཏུཾ ཝཊྚཏི. ཨིདཾ ཨེཀཱབདྡྷཏཱཡ ཝུཏྟཾ. དྭེཔི དྭཱརཱནི ཛགྒིཏབྦཱནཱིཏི ཨེཏྠ སཙེ ཨེཀསྨིཾ དྭཱརེ ཀཝཱཊཾ ཝཱ ནཏྠི, ཧེཊྛཱ ཝུཏྟནཡེན སཾཝརིཏུཾ ཝཱ ན སཀྐཱ ¶ , ཨིཏརཾ དྭཱརཾ ཨསཾཝརིཏྭཱ ¶ ནིཔཛྫིཏུཾ ཝཊྚཏི. དྭཱརཔཱལསྶཱཏི དྭཱརཀོཊྛཀེ མཧཱདྭཱརེ, ནིསྶེཎིམཱུལེ ཝཱ ཋཏྭཱ དྭཱརཛགྒནཀསྶ. པཙྪིམཱནཾ བྷཱརོཏི ཨེཀཱབདྡྷཝསེན ཨཱགཙྪནྟེ སནྡྷཱཡ ཝུཏྟཾ. ཨསཾཝུཏདྭཱརེ ཨནྟོགབྦྷེ ཝཱཏི ཡོཛེཏབྦཾ. བཧི ཝཱཏི གབྦྷཏོ བཧི. ནིཔཛྫནཀཱལེཔི…པེ… ཝཊྚཏིཡེཝཱཏི ཨེཏྠ དྭཱརཛགྒནཀསྶ ཏདདྷཱིནཏྟཱ ཏདཱ ཏསྶ ཏཏྠ སནྣིཧིཏཱསནྣིཧིཏབྷཱཝཾ ཨནུཔདྷཱརེཏྭཱཔི ཨཱབྷོགཾ ཀཱཏུཾ ཝཊྚཏིཡེཝཱཏི ཝདནྟི.

ཡེན ཀེནཙི པརིཀྑིཏྟེཏི ཨེཏྠ པརིཀྑེཔསྶ ཨུབྦེདྷཏོ པམཱཎཾ སཧསེཡྻཔྤཧོནཀེ ཝུཏྟསདིསམེཝ. ཝུཏྟཉྷི སམནྟཔཱསཱདིཀཱཡཾ (པཱཙི. ཨཊྛ. ༥༡) ‘‘ཡཉྷི སེནཱསནཾ ཨུཔརི པཉྩཧི ཚདནེཧི ཨཉྙེན ཝཱ ཀེནཙི སབྦམེཝ པཊིཙྪནྣཾ, ཨཡཾ སབྦཙྪནྣཱ ནཱམ སེཡྻཱ…པེ… ཡཾ པན སེནཱསནཾ བྷཱུམིཏོ པཊྛཱཡ ཡཱཝ ཚདནཾ ཨཱཧཙྩ པཱཀཱརེན ཝཱ ཨཉྙེན ཝཱ ཀེནཙི ཨནྟམསོ ཝཏྠེནཔི པརིཀྑིཏྟཾ, ཨཡཾ སབྦཔརིཙྪནྣཱ ནཱམ སེཡྻཱ. ཚདནཾ ཨནཱཧཙྩ སབྦནྟིམེན པརིཡཱཡེན དིཡཌྜྷཧཏྠུབྦེདྷེན པཱཀཱརཱདིནཱ པརིཀྑིཏྟཱཔི སབྦཔརིཙྪནྣཱཡེཝཱཏི ཀུརུནྡཊྛཀཐཱཡཾ ཝུཏྟ’’ནྟི. ‘‘དིཡཌྜྷཧཏྠུབྦེདྷོ ཝཌྜྷཀིཧཏྠེན གཧེཏབྦོ’’ཏི སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༥༡) ཝིམཏིཝིནོདནིཡཉྩ (ཝི. ཝི. ཊཱི. པཱཙིཏྟིཡ ༢.༥༠-༥༡) ཝུཏྟཾ. མཧཱཔརིཝེཎནྟི མཧནྟཾ ཨངྒཎཾ. ཏེན བཧུཛནསཉྩརཎཊྛཱནཾ དསྶེཏི. ཏེནཱཧ ‘‘མཧཱབོདྷཱི’’ཏིཨཱདི.

ཨརུཎེ ཨུགྒཏེ ཝུཊྛཱཏི, ཨནཱཔཏྟི ཨནཱཔཏྟིཁེཏྟབྷཱུཏཱཡ རཏྟིཡཱ སུདྡྷཙིཏྟེན ནིཔནྣཏྟཱ. པབུཛ྄ཛྷིཏྭཱ པུན སུཔཏི, ཨཱཔཏྟཱིཏི ཨརུཎེ ཨུགྒཏེ པབུཛ྄ཛྷིཏྭཱ ཨརུཎུགྒམནཾ ཉཏྭཱ ཝཱ ཨཉཏྭཱ ཝཱ ཨནུཊྛཧིཏྭཱ སཡིཏསནྟཱནེན སུཔཏི, ཨུཊྛཧིཏྭཱ ¶ ཀཏྟབྦསྶ དྭཱརསཾཝརཎཱདིནོ ཨཀཏཏྟཱ ཨཀིརིཡསམུཊྛཱནཱ ཨཱཔཏྟི ཧོཏི ཨནཱཔཏྟིཁེཏྟེ ཀཏནིཔཛྫནཀིརིཡཱཡ ཨནངྒཏྟཱ. ཨཡཉྷི ཨཱཔཏྟི ཨཱིདིསེ ཋཱནེ ཨཀིརིཡཱ, དིཝཱ དྭཱརཾ ཨསཾཝརིཏྭཱ ནིཔཛྫནཀྑཎེ ཀིརིཡཱཀིརིཡཱ ཙ ཨཙིཏྟཀཱ ཙཱཏི ཝེདིཏབྦཱ. པུརཱརུཎཱ པབུཛ྄ཛྷིཏྭཱཔི ཡཱཝ ཨརུཎུགྒམནཱ སཡནྟསྶཔི པུརིམནཡེན ཨཱཔཏྟིཡེཝ.

ཨརུཎེ ཨུགྒཏེ ཝུཊྛཧིསྶཱམཱིཏི…པེ… ཨཱཔཏྟིཡེཝཱཏི ཨེཏྠ ཀདཱ ཨསྶ ཨཱཔཏྟཱིཏི? ཝུཙྩཏེ – ན ཏཱཝ རཏྟིཡཾ, ‘‘དིཝཱ ཨཱཔཛྫཏི, ནོ རཏྟི’’ནྟི (པརི. ༣༢༣) ཝུཏྟཏྟཱ ཨནཱདརིཡདུཀྐཊཱ ན མུཙྩཏཱིཏི ཝུཏྟདུཀྐཊཾ པན དིཝཱསཡནདུཀྐཊམེཝ ན ཧོཏི ཨནཱདརིཡདུཀྐཊཏྟཱ ¶ ཨེཝ. ‘‘ཨརུཎུགྒམནེ པན ཨཙིཏྟཀཾ ཨཀིརིཡསམུཊྛཱནཾ ཨཱཔཏྟིཾ ཨཱཔཛྫཏཱིཏི ཝེདིཏབྦ’’ནྟི ཝིམཏིཝིནོདནིཡཾ (ཝི. ཝི. ཊཱི. ༡.༧༧) ཝུཏྟཾ, སཱརཏྠདཱིཔནིཡམྤི (སཱརཏྠ. ཊཱི. པཱརཱཛིཀ ༢.༧༧) ‘‘ཡཐཱཔརིཙྪེདམེཝ ཝུཊྛཱཏཱིཏི ཨརུཎེ ཨུགྒཏེཡེཝ ཨུཊྛཧཏི. ཏསྶ ཨཱཔཏྟཱིཏི ཨསུདྡྷཙིཏྟེནེཝ ནིཔནྣཏྟཱ ནིདྡཱཡནྟསྶཔི ཨརུཎེ ཨུགྒཏེ དིཝཱཔཊིསལླཱནམཱུལིཀཱ ཨཱཔཏྟི. ‘ཨེཝཾ ནིཔཛྫནྟོ ཨནཱདརིཡདུཀྐཊཱཔི ན མུཙྩཏཱི’ཏི ཝུཏྟཏྟཱ ཨསུདྡྷཙིཏྟེན ནིཔཛྫནྟོ ཨརུཎུགྒམནཏོ པུརེཏརཾ ཨུཊྛཧནྟོཔི ཨནུཊྛཧནྟོཔི ནིཔཛྫནཀཱལེཡེཝ ཨནཱདརིཡདུཀྐཊཾ ཨཱཔཛྫཏི, དིཝཱཔཊིསལླཱནམཱུལིཀཾ པན དུཀྐཊཾ ཨརུཎེཡེཝ ཨཱཔཛྫཏཱི’’ཏི ཝུཏྟཾ, ཏསྨཱ ཨེཝཾ ནིཔཛྫནྟསྶ དྭེ དུཀྐཊཱནི ཨཱཔཛྫནྟཱིཏི ཝེདིཏབྦཾ.

སཙེ དྭཱརཾ སཾཝརིཏྭཱ ཨརུཎེ ཨུགྒཏེ ཨུཊྛཧིསྶཱམཱིཏི ནིཔཛྫཏི, དྭཱརེ ཙ ཨཉྙེཧི ཨརུཎུགྒམནཀཱལེ ཝིཝཊེཔི ཏསྶ ཨནཱཔཏྟིཡེཝ དྭཱརཔིདཧནསྶ རཏྟིདིཝཱབྷཱགེསུ ཝིསེསཱབྷཱཝཱ. ཨཱཔཏྟིཨཱཔཛྫནསྶེཝ ཀཱལཝིསེསོ ཨིཙྪིཏབྦོ, ན ཏཔྤརིཧཱརསྶཱཏི གཧེཏབྦཾ. ‘‘དྭཱརཾ སཾཝརིཏྭཱ རཏྟིཾ ¶ ནིཔཛྫཏཱི’’ཏི (པཱརཱ. ཨཊྛ. ༡.༧༧) ཧི ཝུཏྟཾ. དིཝཱ སཾཝརིཏྭཱ ནིཔནྣསྶ ཀེནཙི ཝིཝཊེཔི དྭཱརེ ཨནཱཔཏྟིཡེཝ, ཨཏྟནཱཔི ཨནུཊྛཧིཏྭཱཝ སཏི པཙྩཡེ ཝིཝཊེཔི ཨནཱཔཏྟཱིཏི ཝདནྟི, ཨིདམྤི ཝིམཏིཝིནོདནིཡམེཝ (ཝི. ཝི. ཊཱི. ༡.༧༧) ཝུཏྟཾ.

ཡཐཱཔརིཙྪེདམེཝ ཝུཊྛཱཏཱིཏི ཨརུཎེ ཨུགྒཏེཡེཝ ཝུཊྛཱཏི, ཨཱཔཏྟིཡེཝཱཏི མཱུལཱཔཏྟིཾ སནྡྷཱཡ ཝུཏྟཾ. ཨནཱདརིཡཨཱཔཏྟི པན པུརཱརུཎཱ ཨུཊྛིཏསྶཔི ཏསྶ ཧོཏེཝ ‘‘དུཀྐཊཱ ན མུཙྩཏཱི’’ཏི ཝུཏྟཏྟཱ. དུཀྐཊཱ ན མུཙྩཏཱིཏི ཙ པུརཱརུཎཱ ཨུཊྛཧིཏྭཱ མཱུལཱཔཏྟིཡཱ མུཏྟོཔི ཨནཱདརིཡདུཀྐཊཱ ན མུཙྩཏཱིཏི ཨདྷིཔྤཱཡོ.

༥. ནིདྡཱཝསེན ནིཔཛྫཏཱིཏི ནིདྡཱབྷིབྷཱུཏཏཱཡ ཨེཀཔསྶེན ནིཔཛྫཏི. ‘‘ནིདྡཱཝསེན ནིཔཛྫཏཱི’’ཏི ཝོཧཱརཝསེན ཝུཏྟཾ, པཱདཱནཾ པན བྷཱུམིཏོ ཨམོཙིཏཏྟཱ ཨཡཾ ནིཔནྣོ ནཱམ ཧོཏཱིཏི ཏེནེཝ ཨནཱཔཏྟི ཝུཏྟཱ. ཨཔསྶཱཡ སུཔནྟསྶཱཏི ཀཊིཊྛིཏོ ཨུདྡྷཾ པིཊྛིཀཎྚཀེ ཨཔྤམཏྟཀཾ པདེསཾ བྷཱུམིཾ ཨཕུསཱཔེཏྭཱ སུཔནྟསྶ. ཀཊིཊྛིཾ པན བྷཱུམིཾ ཕུསཱཔེནྟསྶ སཡནཾ ནཱམ ན ཧོཏི. པིཊྛིཔསཱརཎལཀྑཎཱ ཧི སེཡྻཱ དཱིགྷཱ, ཝནྡནཱདཱིསུཔི ཏིརིཡཾ པིཊྛིཀཎྚཀཱནཾ ¶ པསཱརིཏཏྟཱ ནིཔཛྫནམེཝཱཏི ཨཱཔཏྟི པརིཧརིཏབྦཱཝ. ཝནྡནཱཔི ཧི པཱདམཱུལེ ནིཔཛྫཏཱིཏིཨཱདཱིསུ ནིཔཛྫནམེཝ ཝུཏྟཱ. སཧསཱ ཝུཊྛཱཏཱིཏི པཀྑལིཏཱ པཏིཏོ ཝིཡ སཧསཱ ཝུཊྛཱཏི, ཏསྶཔི ཨནཱཔཏྟི པཏནཀྑཎེ ཨཝིསཡཏྟཱ, ཝིསཡེ ཛཱཏེ སཧསཱ ཝུཊྛིཏཏྟཱ ཙ. ཡསྶ པན ཝིསཉྙིཏཱཡ པཙྪཱཔི ཨཝིསཡོ ཨེཝ, ཏསྶ ཨནཱཔཏྟིཡེཝ པཏནཀྑཎེ ཝིཡ. ཏཏྠེཝ སཡཏི, ན ཝུཊྛཱཏཱིཏི ཨིམིནཱ ཝིསཡེཔི ཨཀརཎཾ དསྶེཏི, ཏེནེཝ ཏསྶ ཨཱཔཏྟཱིཏི ཝུཏྟཾ.

ཨིདཱནི ¶ ཨཊྛཀཐཱཝཱདསཾསནྡནཾ ཀཱཏུཾ ‘‘ཀོ མུཙྩཏི, ཀོ ན མུཙྩཏཱི’’ཏིཨཱདིམཱཧ. ཏཏྠ མཧཱཔཙྩརིཡནྟིཨཱདཱིསུ པཙྩརཱིཏི ཨུལུ༹མྤཾ ཝུཙྩཏི, ཏསྨིཾ ནིསཱིདིཏྭཱ ཀཏཏྟཱ ཏམེཝ ནཱམཾ ཛཱཏཾ. ཀུརུནྡིཝལླིཝིཧཱརོ ནཱམ ཨཏྠི, ཏཏྠ ཀཏཏྟཱ ཀུརུནྡཱིཏི ནཱམཾ ཛཱཏཾ. མཧཱཨཊྛཀཐཱ ནཱམ སངྒཱིཏིཏྟཡམཱརུལ༹ྷཱ ཏེཔིཊཀསྶ བུདྡྷཝཙནསྶ ཨཊྛཀཐཱ. ཡཱ མཧཱམཧིནྡཏྠེརེན ཏམྦཔཎྞིདཱིཔཾ ཨཱབྷཏཱ, ཏམྦཔཎྞིཡེཧི ཐེརེཧི པཙྪཱ སཱིཧལ༹བྷཱསཱཡ ཨབྷིསངྑཏཱ ཙ ཧོཏི. ཨེཀབྷངྒེནཱཏི ཨེཀཔསྶབྷཉྫནེན པཱདེ བྷཱུམིཏོ ཨམོཙེཏྭཱ ཨེཀཔསྶེན སརཱིརཾ བྷཉྫིཏྭཱ ནིཔནྣོཏི ཝུཏྟཾ ཧོཏི. མཧཱཨཊྛཀཐཱཡཾ པན མཧཱཔདུམཏྠེརེན ཝུཏྟནྟི སམྦནྡྷོ. ཏེན མཧཱཨཊྛཀཐཱཡ ལིཁིཏམཧཱཔདུམཏྠེརཝཱདེ ‘‘ཨཡ’’ནྟི དསྶེཏི. ‘‘མུཙྪིཏྭཱ པཏིཏཏྟཱ ཨཝིསཡཏྟཱ ཨཱཔཏྟི ན དིསྶཏཱི’’ཏི ཐེརེན ཝུཏྟཾ. ཨཱཙརིཡཱ པན ཡཐཱ ཡཀྑགཧིཏཀོ བནྡྷིཏྭཱ ནིཔཛྫཱཔིཏོ ཙ པརཝསོ ཧོཏི, ཨེཝཾ ཨཔརཝསཏྟཱ མུཙྪིཏྭཱ པཏིཏོ ཀཉྩིཀཱལཾ ཛཱནིཏྭཱ ནིཔཛྫཏཱིཏི ཨནཱཔཏྟིཾ ན ཝདནྟི, ཝིསཉྙིཏེ པན སཏི ཨནཱཔཏྟིཡེཝ.

དྭེ ཛནཱཏིཨཱདི མཧཱཨཊྛཀཐཱཡམེཝ ཝཙནཾ, ཏདེཝ པཙྪཱ ཝུཏྟཏྟཱ པམཱཎཾ. ཡཀྑགཧིཏགྒཧཎེནེཝ ཙེཏྠ ཝིསཉྙིབྷཱུཏོཔི སངྒཧིཏོ, ཨེཀབྷངྒེན ནིཔནྣོ པན ཨནིཔནྣཏྟཱ ཨཱཔཏྟིཏོ མུཙྩཏིཡེཝཱཏི གཧེཏབྦཾ. སཱརཏྠདཱིཔནིཡཉྩ (སཱརཏྠ. ཊཱི. ༢.༧༧) ‘‘ཡོ ཙ ཡཀྑགཧིཏཀོ, ཡོ ཙ བནྡྷིཏྭཱ ནིཔཛྫཱཔིཏོ’’ཏི ཨིམསྶ ཨཊྛཀཐཱཝཱདསྶ པཙྪིམཏྟཱ སོཡེཝ པམཱཎཏོ གཧེཏབྦོ, ཏཐཱ ཙ ཝཀྑཏི ‘‘སབྦཏྠ ཡོ ཡོ ཨཊྛཀཐཱཝཱདོ ཝཱ པཙྪཱ ཝུཙྩཏི, སོ སོཡེཝ པམཱཎཏོ གཧེཏབྦོ’’ཏི. ཨིམསྨིཾ ཋཱནེ ཨིམསྶ ཨཊྛཀཐཱཔཱཋསྶ ཨཱནཱིཏཏྟཱ ཨིམསྨིཾ ཝིནཡསངྒཧཔྤཀརཎེཔི ¶ ཨིམསྨིཾཡེཝ ཋཱནེ སོ པཱཋོ ཝཏྟབྦོཏི ནོ ཁནྟི. ཨེཏྠ ཙ ‘‘རཏྟིཾ དྭཱརཾ ཝིཝརིཏྭཱ ནིཔནྣོ ཨརུཎེ ཨུགྒཏེ ཨུཊྛཱཏི, ཨནཱཔཏྟཱི’’ཏིཨཱདིཝཙནཏོ ཨརུཎུགྒམནེ སཾསཡཝིནོདནཏྠཾ ཨརུཎཀཐཱ ཝཏྟབྦཱ. ཏཏྲིདཾ ཝུཙྩཏི –

‘‘ཀོ ¶ ཨེས ཨརུཎོ ནཱམ;

ཀེན སོ ཨརུཎོ བྷཝེ;

ཀཱིདིསོ ཏསྶ ཝཎྞཱ ཏུ;

སཎྛཱནཾ ཀཱིདིསཾ བྷཝེ.

‘‘ཀིསྨིཾ ཀཱལེ ཙ དེསེ ཙ, ཨརུཎོ སམུགཙྪཏི;

ཀིཾ པཙྩཀྑསིདྡྷོ ཨེསོ, ཨུདཱཧུ ཨནུམཱནཏོ’’ཏི.

ཏཏྠ ཀོ ཨེས ཨརུཎོ ནཱམཱཏི ཨེཏྠ ཨེས ཨརུཎོ ནཱམ སཱུརིཡསྶ པབྷཱཝིསེསོ. ཝུཏྟཉྷེཏཾ ཨབྷིདྷཱནཔྤདཱིཔིཀཱཡཾ –

‘‘སཱུརསྶོདཡཏོ པུབྦུཊྛིཏརཾསི སིཡཱརུཎོ’’ཏི;

ཏཊྚཱིཀཱཡཉྩ ‘‘སཱུརསྶ ཨུདཡཏོ པུབྦེ ཨུཊྛིཏརཾསི ཨརུཎོ ནཱམ སིཡཱ’’ཏི. ཝིམཏིཝིནོདནཱིནཱམིཀཱཡཾ ཝིནཡཊཱིཀཱཡཉྩ (ཝི. ཝི. ཊཱི. ༡.༤༦༣) ‘‘ཨརུཎོཏི ཙེཏྠ སཱུརིཡུགྒམནསྶ པུརེཙརོ ཝཌྜྷནགྷནརཏྟོ པབྷཱཝིསེསོཏི དཊྛབྦོ’’ཏི ཝུཏྟཾ, ཏསྨཱ སཱུརིཡཔྤབྷཱཡེཝ ཨརུཎོ ནཱམ, ན ཨཉྙོཏི དཊྛབྦཾ. ཀེན སོ ཨརུཎོ བྷཝེཏི ཨེཏྠ ཨརུཎོ ཝཎྞོ ཨསྶཱཏི ཨརུཎོ, ཀིཉྩིརཏྟཝཎྞསམནྣཱགཏོཏི ཨཏྠོ. ཨཐ ཝཱ ཨརཏི གཙྪཏི རཏྟཝཎྞབྷཱཝེན པཝཏྟཏཱིཏི ཨརུཎོ. ཝུཏྟཉྷེཏཾ ཨབྷིདྷཱནཔྤདཱིཔིཀཱཊཱིཀཱཡཾ ‘‘ཨརུཎཝཎྞཏཱཡ ཨརཏི གཙྪཏཱིཏི ཨརུཎོ’’ཏི. ཀཱིདིསོ ཏསྶ ཝཎྞོཏི ཨེཏྠ ཨབྱཏྟརཏྟཝཎྞོ ཏསྶ ཝཎྞོ བྷཝེ. ཝུཏྟཉྷི ཨབྷིདྷཱནཔྤདཱིཔིཀཱཡཾ ‘‘ཨརུཎོ ཀིཉྩིརཏྟོཐཱ’’ཏི. ཏཊྚཱིཀཱཡཉྩ ¶ ‘‘ཀིཉྩིརཏྟོ ཨབྱཏྟརཏྟཝཎྞོ ཨརུཎོ ནཱམ ཡཐཱ མཙྪསྶ ཨཀྑཱི’’ཏི. ཝིམཏིཝིནོདནིཡཉྩ (ཝི. ཝི. ཊཱི. ༡.༤༦༣) ‘‘ཝཌྜྷནགྷནརཏྟོ པབྷཱཝིསེསོ’’ཏི, ཏསྨཱ སཱུརིཡསྶ རཏྟཔྤབྷཱཡེཝ ཨརུཎོ ནཱམ, ན སེཏཔྤབྷཱདཡོཏི དཊྛབྦཾ. ཡདི ཨེཝཾ པཱཏིམོཀྑཊྛཔནཀྑནྡྷཀཝཎྞནཱཡ ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༣༨༣) ‘‘པཱལི༹ཡཾ པན ནནྡིམུཁིཡཱཏི ཨོདཱཏདིསཱམུཁཏཱཡ ཏུཊྛམུཁིཡཱ’’ཏི ཝུཏྟཾ, ཏཾ ཀཐཾ ཡུཛྫེཡྻཱཏི, ནོ ན ཡུཛྫེཡྻ. ཏཏྠ ཧི ཨརུཎུགྒཏཀཱལེ ཨརུཎོབྷཱསེན ཨོདཱཏདིསཱམུཁབྷཱཝོ ཝུཏྟོ, ན ཨརུཎོབྷཱསསྶ ཨོདཱཏབྷཱཝོ. ཝུཏྟཉྷེཏཾ ཨུདཱནཊྛཀཐཱཡཾ (ཨུདཱ. ཨཊྛ. ༢༣) ‘‘ནནྡིམུཁིཡཱཏི ཨརུཎསྶ ཨུགྒཏཏྟཱ ¶ ཨེཝ ཨརུཎོབྷཱཡ སཱུརིཡཱལོཀཱུཔཛཱིཝིནོ སཏྟེ ནནྡཱཔནམུཁིཡཱ རཏྟིཡཱ ཛཱཏཱཡ ཝིབྷཱཡམཱནཱཡཱཏི ཨཏྠོ’’ཏི.

ཛཱཏཀཊྛཀཐཱཡཉྩ –

‘‘ཛིགྷཉྙརཏྟིཾ ཨརུཎསྨིམུཧཏེ;

ཡཱ དིསྶཏི ཨུཏྟམརཱུཔཝཎྞིནཱི;

ཏཐཱུཔམཱ མཾ པཊིབྷཱསི དེཝཏེ;

ཨཱཙིཀྑ མེ ཏཾ ཀཏམཱསི ཨཙྪརཱ’’ཏི. (ཛཱ. ཨཊྛ. ༥.༢༡.༢༥༤);

ཨིམསྶ གཱཐཱཡ ཨཏྠཝཎྞནཱཡཾ ‘‘ཏཏྠ ཛིགྷཉྙརཏྟིནྟི པཙྪིམརཏྟིཾ, རཏྟིཔརིཡོསཱནེཏི ཨཏྠོ. ཨུཧཏེཏི ཨརུཎེ ཨུགྒཏེ. ཡཱཏི ཡཱ པུརཏྠིམཱ དིསཱ རཏྟཝཎྞཏཱཡ ཨུཏྟམརཱུཔདྷརཱ ཧུཏྭཱ དིསྶཏཱི’’ཏི. ཨེཝཾ ཨརུཎུགྒཏསམཡེ པུརཏྠིམདིསཱཡ རཏྟཝཎྞཏཱ ཝུཏྟཱ, ཏསྨཱ ཏསྨིཾ སམཡེ ཨརུཎསྶ ཨུཊྛིཏཏྟཱ པུརཏྠིམཱཡ དིསཱཡ རཏྟབྷཱགོ སཱུརིཡཱལོཀསྶ པཏྠཊཏྟཱ སེསདིསཱནཾ ཨོདཱཏབྷཱཝོ ཝིཉྙཱཡཏི.

སཎྛཱནཾ ¶ ཀཱིདིསཾ བྷཝེཏི ཨེཏྠ ཨརུཎསྶ པཱཊེཀྐཾ སཎྛཱནཾ ནཱམ ནཏྠི རསྨིམཏྟཏྟཱ. ཡཏྟཀཾ པདེསཾ ཕརཏི, ཏཏྟཀཾ ཏསྶ སཎྛཱནནྟི དཊྛབྦཾ. ཨཐ ཝཱ པུརཏྠིམདིསཱསཎྛཱནཾ. ཝུཏྟཉྷི ཛཱཏཀཊྛཀཐཱཡཾ (ཛཱ. ཨཊྛ. ༥.༢༡.༢༥༥) ‘‘པུརཏྠིམདིསཱ རཏྟཝཎྞཏཱཡ ཨུཏྟམརཱུཔདྷརཱ ཧུཏྭཱ དིསྶཏཱི’’ཏི.

ཀིསྨིཾ ཀཱལེ ཙ དེསེ ཙ, ཨརུཎོ སམུགཙྪཏཱིཏི ཨེཏྠ ཨེས ཨརུཎོ སཱུརིཡུགྒམནསྶ པུརེ ཀཱལེ པུརཏྠིམདིསཱཡཾ ཨུགྒཙྪཏི. ཝུཏྟཉྷེཏཾ ཨུདཱནཊྛཀཐཱཡཾ (ཨུདཱ. ཨཊྛ. ༢༣) ‘‘ཨུདྡྷསྟེ ཨརུཎེཏི ཨུགྒཏེ ཨརུཎེ, ཨརུཎོ ནཱམ པུརཏྠིམདིསཱཡཾ སཱུརིཡོདཡཏོ པུརེཏརམེཝ ཨུཊྛིཏོབྷཱསོ’’ཏི. ཨབྷིདྷཱནཔྤདཱིཔིཀཱཡཉྩ ‘‘སཱུརསྶོདཡཏོ པུབྦུཊྛིཏརཾསཱི’’ཏི.

ཀིཾ པཙྩཀྑསིདྡྷོ ཨེསོ, ཨུདཱཧུ ཨནུམཱནཏོཏི ཨེཏྠ ཨཡཾ ཨརུཎོ ནཱམ པཙྩཀྑསིདྡྷོ ཨེཝ ¶ , ན ཨནུམཱནསིདྡྷོ. ཀསྨཱ ཝིཉྙཱཡཏཱིཏི ཙེ? ཙཀྑུཝིཉྙཱཎགོཙརཝཎྞཱཡཏནབྷཱཝཏོ. ཨཀྑསྶ པཏཱིཏི པཙྩཀྑཾ, ཙཀྑུརཱུཔཱནཾ ཨབྷིམུཁབྷཱཝེན ཨཱཔཱཐགཏཏྟཱ ཙཀྑུཝིཉྙཱཎཾ ཧོཏི. ཝུཏྟཉྷེཏཾ བྷགཝཏཱ ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎ’’ནྟི (མ. ནི. ༡.༢༠༤, ༤༠༠; ༣.༤༢༡, ༤༢༥, ༤༢༦; སཾ. ནི. ༢.༤༣, ༤༤, ༤༥, སཾ. ནི. ༤.༦༠; ཀཐཱ. ༤༦༥, ༤༦༧), ཏསྨཱ ཨཡཾ ཨརུཎཝཎྞོ ཙཀྑུནཱ དིསྭཱ ཛཱནིཏབྦཏོ པཙྩཀྑསིདྡྷོཡེཝ ཧོཏི, ན ཨེཝཾ སཏི ཨེཝཾ བྷཝེཡྻཱཏི ཨནུམཱནེན པུནཔྤུནཾ ཙིནྟནེན སིདྡྷོཏི. ཨིམཾ པཉྷཝིསྶཛྫནཾ སཱདྷུཀཾ མནསི ཀརིཏྭཱ པཎྜིཏེཧི རཏྟོབྷཱསོཡེཝ ཨརུཎོཏི པཙྩེཏབྦོ སལླཀྑེཏབྦོཏི.

ཀསྨཱ པན ཨིམསྨིཾ ཋཱནེ ཨརུཎཀཐཱ ཝུཏྟཱཏི? ཨིམིསྶཱ ཨརུཎཀཐཱཡ མཧཱཝིསཡབྷཱཝཏོ. ཀཐཾ? ཨུཔོསཐིཀཱ ཨུཔཱསཀཱ ཙ ཨུཔཱསིཀཱཡོ ཙ ཨརུཎུགྒམནཾ ཏཐཏོ ¶ ཨཛཱནནྟཱ ཨནུགྒཏེཡེཝ ཨརུཎེ ཨུགྒཏསཉྙཱཡ ཁཱདནཱིཡཾ ཝཱ ཁཱདནྟི, བྷོཛནཱིཡཾ ཝཱ བྷུཉྫནྟི, མཱལཱགནྡྷཱདཱིནི ཝཱ དྷཱརེནྟི, ཏཏོ ཏེསཾ སཱིལཾ བྷིཛྫཏི. སཱམཎེརཱ ཏཐེཝ ཝིཀཱལབྷོཛནཾ བྷུཉྫིཏྭཱ སཱིལཝིནཱསཾ པཱཔུཎནྟི. ནིསྶཡཔཊིཔནྣཀཱ བྷིཀྑཱུ ཨཱཙརིཡུཔཛ྄ཛྷཱཡེཧི ཝིནཱ བཧིསཱིམེ ཙརནྟཱ ནིསྶཡཔྤསྶམྦྷནཾ པཱཔུཎནྟི, ཨནྟོཝསྶེ བྷིཀྑཱུ ཨུཔཙཱརསཱིམཏོ བཧིགཙྪནྟཱ ཝསྶཙྪེདཾ, ཏེཙཱིཝརིཀཱ བྷིཀྑཱུ ཨབདྡྷསཱིམཱཡཾ ཙཱིཝརེན ཝིཔྤཝསནྟཱ ནིསྶགྒིཡཔཱཙིཏྟིཡཾ, ཏཐཱ སཏྟབྦྷནྟརསཱིམཱཡཾ, སཧསེཡྻཔྤཧོནཀཊྛཱནེ ཨནུཔསམྤནྣམཱཏུགཱམེཧི སཧ སཡནྟཱ པཱཙིཏྟིཡཾ, ཏཐཱ ཡཱཝཀཱལིཀཾ བྷུཉྫནྟཱ བྷིཀྑཱུ, པཱརིཝཱསིཀཱདཡོ ཝཏྟཾ ནིཀྑིཔནྟཱ རཏྟིཙྪེདཾ. ཨེཝམཱདིཨནེཀཱདཱིནཝསམྦྷཝཏོ ལཛྫིཔེསལཱནཾ བྷིཀྑཱུནཾ ཏཐཏོ ཨརུཎུགྒམནསྶ ཛཱནནཏྠཾ ཝུཏྟཱཏི དཊྛབྦཱ.

ཀེཙི པན བྷིཀྑཱུ ཨཌྜྷརཏྟིསམཡེ གྷཊིསུཉྙཏྟཱ ཨཌྜྷརཏྟིཀཱལཾ ཨཏིཀྐམྨ ཨཉྙདིཝསོ ཧོཏི, ཏསྨཱ ཏསྨིཾ ཀཱལེ ཨརུཎཾ ཨུཊྛིཏཾ ནཱམ ཧོཏཱིཏི མཉྙམཱནཱ ཨཌྜྷརཏྟིཾ ཨཏིཀྐམྨ ཁཱདནཱིཡབྷོཛནཱིཡཱདཱིནི བྷུཉྫནྟི, ཏེ པན བུདྡྷསམཡཾ ཨཛཱནནྟཱ ཝེདསམཡམེཝ མནསི ཀརོནྟཱ ཨེཝཾ ཀརོནྟི, ཏསྨཱ ཏེསཾ ཏཾཀརཎཾ པམཱཎཾ ན ཧོཏི. བཧཝོ པན བྷིཀྑཱུ ཨརུཎསྶ པཙྩཀྑབྷཱཝཾ ཨཛཱནནྟཱ ཨནུམཱནཝསེན ཙིནྟིཏུཉྩ ཨསཀྐོནྟཱ ཨནུསྶཝཝསེནེཝ པརཝཙནཾ སདྡཧནྟཱ ཨམྷཱཀཾ ཨཱཙརིཡཱ ཨརུཎུགྒམནཝེལཱཡཾ ཨུཊྛཱཡ གཙྪནྟཱ སཱུརིཡུགྒམནཝེལཱཡཾ དྭིསཧསྶདཎྜཔྤམཱཎཾ ཋཱནཾ པཱཔུཎནྟི, ཏིསཧསྶདཎྜཔྤམཱཎཾ ཋཱནཾ པཱཔུཎནྟཱིཏི ¶ ཙ ཝདནྟི. ཨིམམྷཱ ཝིཧཱརཱ ཨསུཀཾ ནཱམ ཝིཧཱརཾ ཨསུཀཾ ནཱམ ཙེཏིཡཾ ཨསུཀཾ ནཱམ གཱམཾ པཱཔུཎནྟཱིཏིཨཱདཱིནི ཙ ཝདནྟཱིཏི ཨེཝཾ ཨནུསྶཝཝཙནཾ ཝདནྟི, ཏམྤི ཨཔྤམཱཎཾ. ཀསྨཱ? ཨདྡྷཱནཾ ནཱམ བལཝནྟསྶ ཛཝསམྤནྣསྶ ཙ རསྶཾ ཧོཏི, དུབྦལསྶ སནྟསྶ ཙ དཱིགྷཾ ཧོཏི. ཝུཏྟཉྷི བྷགཝཏཱ –

‘‘དཱིགྷཱ ¶ ཛཱགརཏོ རཏྟི, དཱིགྷཾ སནྟསྶ ཡོཛནཾ;

དཱིགྷོ བཱལཱན སཾསཱརོ, སདྡྷམྨཾ ཨཝིཛཱནཏ’’ནྟི. (དྷ. པ. ༦༠);

ཏསྨཱ ཨདྡྷཱནཾ ནཱམ སབྦེསཾ ཨེཀསདིསཾ ན ཧོཏཱིཏི ཨརུཎུགྒམནསྶ ལཀྑཎཾ བྷཝིཏུཾ ན སཀྐཱ, ན ཙ ཏེ ཨཱཡསྨནྟོ པིཊཀཏྟཡཏོ ཀིཉྩི སཱདྷཀབྷཱུཏཾ ཝཙནཾ ཨཱཧརནྟི, ཨསཀྑིཀཾ ཨཌྜཾ ཀརོནྟི ཝིཡ ཡཐཱཛ྄ཛྷཱསཡམེཝ ཝདནྟཱིཏི པམཱཎཾ ན ཧོཏི.

ཨཉྙེ པན –

‘‘ཨཏཱིཏརཏྟིཡཱ ཡཱམོ;

པཙྪིམོཌྜྷམམུསྶ ཝཱ;

བྷཱཝིནིཡཱདིཔྤཧཱརོ;

ཏདཌྜྷཾ ཝཱཛྫཏེཧྱ ཧོཏི –

ཀཙྩཱཡནསཱརཔྤཀརཎཱགཏཾ གཱཐཾ ཝཏྭཱ ཨཏཱིཏརཏྟིཡཱ པཙྪིམོ ཡཱམོ ཨཛྫ པརིཡཱཔནྣོ, ཏསྨཱ པཙྪིམཡཱམསྶ ཨཱདིཏོ པཊྛཱཡ ཨརུཎཾ ཨུགྒཙྪཏཱི’’ཏི ཝདནྟི. ཨཡཾ ཝཱདོ སཀཱརཎསཉྙཱཔཀཏྟཱ པུརིམེཧི བལཝཱ ཧོཏི, ཨེཝཾ སནྟེཔི ཨཡུཏྟོཡེཝ. ཀསྨཱ? ཨཡཉྷི གཱཐཱ བཱཧིརསདྡསཏྠེ ཛངྒདཱསཔྤཀརཎེ ཝུཏྟནཡེན ཨཛྫ བྷཝཱ ཨཛྫཏནཱིཏི ཝུཏྟཨཛྫཝོཧཱརསྶ པཝཏྟནཀཱལཾ དསྶེཏུཾ ཝུཏྟཱ, ན པིཊཀཏྟཡེ ཝུཏྟསྶ ཨརུཎུགྒམནསྶ ཀཱལཾ དསྶེཏུཾ, ཏསྨཱ ཨཉྙསཱདྷྱསྶ ཨཉྙསཱདྷཀེན སཱདྷིཏཏྟཱ ཨཡུཏྟོཡེཝ.

ཨཔརེ པན ‘‘པཧཱརོ ཡཱམསཉྙིཏོ’’ཏི ཨབྷིདྷཱནཔྤདཱིཔིཀཱཡཾ ཝུཏྟཏྟཱ པཧཱརཡཱམསདྡཱནཾ ཨེཀཏྠཏྟཱ ཏཏྠེཝ ‘‘ཏིཡཱམཱ སཾཝརཱི བྷཝེ’’ཏི ཝུཏྟཏྟཱ རཏྟིཡཱ ཙ ཏིཡཱམབྷཱཝཏོ པཱལི༹ཡཉྩ (ཨུདཱ. ༤༥; ཙཱུལ༹ཝ. ༣༨༣) ‘‘ཨབྷིཀྐནྟཱ ¶ , བྷནྟེ, རཏྟི, ནིཀྑནྟོ པཙྪིམོ ཡཱམོ, ཨུདྡྷསྟོ ཨརུཎོ’’ཏི ཨཱགཏཏྟཱ ཨིདཱནི ¶ རཏྟིཡཱ ཙཏཱུསུ པཧཱརེསུ ཏཏིཡཔྤཧཱརསྶ ཨཝསཱནེ ཨརུཎོ ཨུགྒཏོ, ཏསྨཱ ཨཝསེསཨེཀཔྤཧཱརམཏྟོ ཀཱལོ དིཝསབྷཱགཾ བྷཛཏཱིཏི ཝདེཡྻུཾ, ཨཡཾ ཝཱདོ ཏཏིཡཝཱདཏོཔི བལཝཏརོ. ཀསྨཱ? ཉཱཔཀཉཱཔྱཱནཾ ཨནུརཱུཔབྷཱཝཏོ. ཏཐཱ ཧི ‘‘པཧཱརོ ཡཱམསཉྙིཏོ’’ཏི ཨཡཾ ཉཱཔཀོ པཧཱརཡཱམཱནཾ ཨེཀཏྠབྷཱཝསྶ ཨནུརཱུཔོ, ‘‘ཏིཡཱམཱ སཾཝརཱིབྷཝེ’’ཏི ཨཡཾ རཏྟིཡཱ ཏིཡཱམབྷཱཝསྶ, ‘‘པཱལི༹ཡཉྩཱ’’ཏིཨཱདི ཏཏིཡཔྤཧཱརསྶ ཨཝསཱནེ ཨརུཎུགྒམནསྶ, ཏཐཱཔི ཨཡུཏྟོཡེཝ ཧོཏི. ཀསྨཱ? ‘‘ཨཝསེསཨེཀཔྤཧཱརམཏྟོ ཀཱལོ དིཝསབྷཱགཾ བྷཛཏཱི’’ཏི ཝཙནསྶ ཝིརུདྡྷཏྟཱ. མཛ྄ཛྷིམདེསེ ཧི དསགྷཊིཀཱཔམཱཎསྶ ཀཱལསྶ ཨེཀཔྤཧཱརཏྟཱ སབྦཱ རཏྟི ཏིཡཱམཱཝ ཧོཏི, ན ཙཏུཡཱམཱ, ཨིདཱནི པན པཙྩནྟཝིསཡེསུ སཏྟཊྛགྷཊིཀཱམཏྟསྶ ཀཱལསྶ ཨེཀཔྤཧཱརཀཏཏྟཱ ཙཏུཔྤཧཱརཱ བྷཝཏི, ཏསྨཱ མཛ྄ཛྷིམདེསཝོཧཱརཾ གཧེཏྭཱ ཨབྷིདྷཱནཔྤདཱིཔིཀཱཡཉྩ ‘‘ཏིཡཱམཱ སཾཝརཱི བྷཝེ’’ཏི ཝུཏྟཾ, པཱལི༹ཡཉྩ (ཨུདཱ. ༤༥; ཙཱུལ༹ཝ. ༣༨༣) ‘‘ནིཀྑནྟོ པཙྪིམོ ཡཱམོ, ཨུདྡྷསྟོ ཨརུཎོ’’ཏི, ཏསྨཱ རཏྟིཔརིཡོསཱནེཡེཝ ཨརུཎོ ཨུགྒཏོཏི དཊྛབྦོ. ཏཐཱ ཧི ཝུཏྟཾ ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༢༠༡) ‘‘ཏཐཱ པཱརིཝཱསིཀཱདཱིནམྤི ཨརུཎཾ ཨནུཊྛཱཔེཏྭཱ ཝཏྟཾ ནིཀྑིཔནྟཱནཾ རཏྟིཙྪེདོ ཝུཏྟོ, ཨུགྒཏེ ཨརུཎེ ནིཀྑིཔིཏབྦནྟི ཧི ཝུཏྟ’’ནྟི.

སཧསེཡྻསིཀྑཱཔདེཔི (པཱཙི. ༥༢-༥༤) ‘‘ཨནུཔསམྤནྣེཧི སཧ ནིཝུཏྠབྷཱཝཔརིམོཙནཏྠཾ པུརཱརུཎཱ ནིཀྑམིཏྭཱ’’ཏིཨཱདི ཝུཏྟཾ. ཨེཝཾ ཙཱིཝརཝིཔྤཝཱསཱདཱིསུ ཙ སབྦཏྠ རཏྟིཔརིཡོསཱནེ ཨཱགམནཝསེན ཨརུཎུགྒམནཾ དསྶིཏཾ, ན ཨཏཱིཏཱརུཎཝསེནཱཏི. ཛཱཏཀཊྛཀཐཱཡམྤི (ཛཱ. ཨཊྛ. ༥.༢༡.༢༥༥) ‘‘རཏྟིཔརིཡོསཱནེཏི ཨཏྠོ’’ཏི. ན ཀེཝལཾ མཛ྄ཛྷིམདེསེསུ རཏྟིཡཱཡེཝ ཏིཔྤཧཱརབྷཱཝོ ཧོཏི ¶ , ཨཐ ཁོ དིཝསསྶཔི. ཏཐཱ ཧི ཝུཏྟཾ ཨཊྛསཱལིནིཡཾ (དྷ. ས. ཨཊྛ. ནིདཱནཀཐཱ) ‘‘སམྨཱསམྦུདྡྷསྶ ཨབྷིདྷམྨདེསནཱཔརིཡོསཱནཉྩ ཏེསཾ བྷིཀྑཱུནཾ སཏྟཔྤཀརཎཨུགྒཧཎཉྩ ཨེཀཔྤཧཱརེནེཝ ཧོཏཱི’’ཏི, མཱུལཊཱིཀཱཡཉྩ (དྷ. ས. མཱུལཊཱི. ནིདཱནཀཐཱཝཎྞནཱ) ‘‘ཨེཀཔྤཧཱརེནཱཏི ཨེཏྠ པཧཱརོཏི དིཝསསྶ ཏཏིཡབྷཱགོ ཝུཙྩཏཱི’’ཏི, ཏསྨཱ ཨེཀོ རཏྟིདིཝོ ཚཔྤཧཱརོ ཧོཏཱིཏི ཝིཉྙཱཡཏི. ཨེཝཾ མཛ྄ཛྷིམདེསཝོཧཱརེན ཏིཡཱམསངྑཱཏསྶ ཏིཔྤཧཱརསྶ ཨཝསཱནེ སབྦརཏྟིཔརིཡོསཱནེ ཨུཊྛིཏཾ ཨརུཎཾ པཙྩནྟདེསཝོཧཱརེན ཏིཔྤཧཱརསྶ ཨཝསཱནེཏི གཧེཏྭཱ ཨེཀཔྤཧཱརཱཝསེསཀཱལེ ཨརུཎོ ཨུགྒཏོཏི ཝུཏྟཏྟཱ ཨཡམྤི ཝཱདོ ཨཡུཏྟོཡེཝ ཧོཏཱིཏི དཊྛབྦོ.

བཧཝོ ¶ པན པཎྜིཏཱ ‘‘ཁུདྡསིཀྑཱནིསྶཡེ ཝུཏྟཾ –

‘སེཏརུཎཉྩ པཋམཾ, དུཏིཡཾ ནནྡིཡཱཝཊྚཾ;

ཏཏིཡཾ ཏམྦཝཎྞཉྩ, ཙཏུཏྠཾ གདྲབྷཾ མུཁ’ནྟི. –

ཨིམཾ གཱཐཾ ནིསྶཱཡ ཨེཀརཏྟིཡཾ ཨརུཎོ ཙཏུཀྑཏྟུཾ ཨུཊྛཧཏི, ཏཏྠ པཋམཾ སེཏཝཎྞཾ ཧོཏི, དུཏིཡཾ ནནྡིཡཱཝཊྚཔུཔྥཝཎྞཾ ཧོཏི, ཏཏིཡཾ ཏམྦཝཎྞཾ ཧོཏི, ཙཏུཏྠཾ གདྲབྷམུཁཝཎྞཾ ཧོཏཱི’’ཏི ཝཏྭཱ རཏྟོབྷཱསཏོ པུརེཏརཾ ཨཏཱིཏརཏྟིཀཱལེཡེཝ ཝཏྟནིཀྑིཔནཱདིཀམྨཾ ཀརོནྟི. ཏེསཾ ཏཾ ཀརཎཾ ཨནིསམྨཀཱརིཏཾ ཨཱཔཛྫཏི. ཨཡཉྷི གཱཐཱ ནེཝ པཱལི༹ཡཾ དིསྶཏི, ན ཨཊྛཀཐཱཡཾ, ན ཊཱིཀཱསུ, ཀེཝལཾ ནིསྶཡེ ཨེཝ, ནིསྶཡེསུ ཙ ཨེཀསྨིཾཡེཝ ཁུདྡསིཀྑཱནིསྶཡེ དིསྶཏི, ན ཨཉྙནིསྶཡེསུ, ཏཏྠཱཔི ནེཝ པུབྦཱཔརསམྦནྡྷོ དིསྶཏི, ན ཧེཏུཕལཱདིབྷཱཝོ, ན ཙ ལིངྒནིཡམོཏི ན ནིསྶཡཀཱརཱཙརིཡེན ཋཔིཏཱ བྷཝེཡྻ, ཨཐ ཁོ པཙྪཱ ཨཉྙེཧི ལེཁཀེཧི ཝཱ ཨཏྟནོ ཨིཙྪཱནུརཱུཔཾ ལིཁིཏཱ བྷཝེཡྻ, ཏསྨཱ ཨཡཾ གཱཐཱ ཀུཏོ ཨཱབྷཏཱ པཱལི༹ཏོ ཝཱ ཨཊྛཀཐཱཏོ ¶ ཝཱ ཊཱིཀཱཏོ ཝཱ ཝིནཡཏོ ཝཱ སུཏྟནྟཏོ ཝཱ ཨབྷིདྷམྨཏོ ཝཱཏི པབྷཝཾ ཨཔརིཡེསིཏྭཱ ནིསྶཡེ དིཊྛམཏྟམེཝ སཱརཏོ གཧེཏྭཱ པཱལི༹ཡཊྛཀཐཱཊཱིཀཱསུ ཝུཏྟཝཙནཾ ཨནིསཱམེཏྭཱ ཀཏཏྟཱ ཨནིསམྨཀཱརིཏཾ ཨཱཔཛྫཏི.

ཏཏྲཱཡཾ པཱལི༹ ‘‘ཏེན ཁོ པན སམཡེན བུདྡྷོ བྷགཝཱ སཱིཏཱསུ ཧེམནྟིཀཱསུ རཏྟཱིསུ ཨནྟརཊྛཀཱསུ ཧིམཔཱཏསམཡེ རཏྟིཾ ཨཛ྄ཛྷོཀཱསེ ཨེཀཙཱིཝརོ ནིསཱིདི, ན བྷགཝནྟཾ སཱིཏཾ ཨཧོསི. ནིཀྑནྟེ པཋམེ ཡཱམེ སཱིཏཾ བྷགཝནྟཾ ཨཧོསི, དུཏིཡཾ བྷགཝཱ ཙཱིཝརཾ པཱརུཔི, ན བྷགཝནྟཾ སཱིཏཾ ཨཧོསི. ནིཀྑནྟེ མཛ྄ཛྷིམེ ཡཱམེ སཱིཏཾ བྷགཝནྟཾ ཨཧོསི, ཏཏིཡཾ བྷགཝཱ ཙཱིཝརཾ པཱརུཔི, ན བྷགཝནྟཾ སཱིཏཾ ཨཧོསི. ནིཀྑནྟེ པཙྪིམེ ཡཱམེ ཨུདྡྷསྟེ ཨརུཎེ ནནྡིམུཁིཡཱ རཏྟིཡཱ སཱིཏཾ བྷགཝནྟཾ ཨཧོསི, ཙཏུཏྠཾ བྷགཝཱ ཙཱིཝརཾ པཱརུཔི, ན བྷགཝནྟཾ སཱིཏཾ ཨཧོསཱི’’ཏི. ཨཡཾ མཧཱཝགྒེ (མཧཱཝ. ༣༤༦) ཙཱིཝརཀྑནྡྷཀཱགཏཱ ཝིནཡཔཱལི༹. པཱལི༹ཡཾ ནནྡིམུཁིཡཱཏི ཏུཊྛིམུཁིཡཱ, པསནྣདིསཱམུཁཱཡཱཏི ཨཏྠོ. ཨཡཾ ཏཾསཾཝཎྞནཱཡ ཝིམཏིཝིནོདནཱིཔཱཋོ (ཝི. ཝི. ཊཱི. མཧཱཝགྒ ༢.༣༤༦).

‘‘ཏེན ཁོ པན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི པུབྦཱརཱམེ མིགཱརམཱཏུཔཱསཱདེ ¶ . ཏེན ཁོ པན སམཡེན བྷགཝཱ ཏདཧུཔོསཐེ བྷིཀྑུསངྒྷཔརིཝུཏོ ནིསིནྣོ ཧོཏི. ཨཐ ཁོ ཨཱཡསྨཱ ཨཱནནྡོ ཨབྷིཀྐནྟཱཡ རཏྟིཡཱ ནིཀྑནྟེ པཋམེ ཡཱམེ ཨུཊྛཱཡཱསནཱ ཨེཀཾསཾ ཨུཏྟརཱསངྒཾ ཀརིཏྭཱ ཡེན བྷགཝཱ ཏེནཉྫལིཾ པཎཱམེཏྭཱ བྷགཝནྟཾ ཨེཏདཝོཙ – ཨབྷིཀྐནྟཱ, བྷནྟེ རཏྟི, ནིཀྑནྟོ པཋམོ ཡཱམོ, ཙིརནིསིནྣོ བྷིཀྑུསངྒྷོ, ཨུདྡིསཏུ, བྷནྟེ, བྷགཝཱ བྷིཀྑཱུནཾ པཱཏིམོཀྑནྟི. ཨེཝཾ ཝུཏྟེ བྷགཝཱ ཏུཎྷཱི ཨཧོསི. དུཏིཡམྤི ཁོ ཨཱཡསྨཱ ¶ ཨཱནནྡོ ཨབྷིཀྐནྟཱཡ རཏྟིཡཱ ནིཀྑནྟེ མཛ྄ཛྷིམེ ཡཱམེ ཨུཊྛཱཡཱསནཱ ཨེཀཾསཾ ཨུཏྟརཱསངྒཾ ཀརིཏྭཱ ཡེན བྷགཝཱ ཏེནཉྫལིཾ པཎཱམེཏྭཱ བྷགཝནྟཾ ཨེཏདཝོཙ – ཨབྷིཀྐནྟཱ, བྷནྟེ, རཏྟི, ནིཀྑནྟོ མཛ྄ཛྷིམོ ཡཱམོ, ཙིརནིསིནྣོ བྷིཀྑུསངྒྷོ, ཨུདྡིསཏུ, བྷནྟེ, བྷགཝཱ བྷིཀྑཱུནཾ པཱཏིམོཀྑནྟི. དུཏིཡམྤི བྷགཝཱ ཏུཎྷཱི ཨཧོསི. ཏཏིཡམྤི ཁོ ཨཱཡསྨཱ ཨཱནནྡོ ཨབྷིཀྐནྟཱཡ རཏྟིཡཱ ནིཀྑནྟེ པཙྪིམེ ཡཱམེ ཨུདྡྷསྟེ ཨརུཎེ ནནྡིམུཁིཡཱ རཏྟིཡཱ ཨུཊྛཱཡཱསནཱ ཨེཀཾསཾ ཨུཏྟརཱསངྒཾ ཀརིཏྭཱ ཡེན བྷགཝཱ ཏེནཉྫལིཾ པཎཱམེཏྭཱ བྷགཝནྟཾ ཨེཏདཝོཙ – ཨབྷིཀྐནྟཱ, བྷནྟེ, རཏྟི, ནིཀྑནྟོ པཙྪིམོ ཡཱམོ, ཨུདྡྷསྟཾ ཨརུཎཾ, ནནྡིམུཁཱི རཏྟི, ཙིརནིསིནྣོ བྷིཀྑུསངྒྷོ, ཨུདྡིསཏུ བྷནྟེ བྷགཝཱ བྷིཀྑཱུནཾ པཱཏིམོཀྑནྟི. ཨཔརིསུདྡྷཱ, ཨཱནནྡ, པརིསཱ’’ཏི (ཙཱུལ༹ཝ. ༣༨༣). ཨཡཾ ཙཱུལ༹ཝགྒེ པཱཏིམོཀྑཊྛཔནཀྑནྡྷཀཱགཏཱ ཨཔརཱཔི ཝིནཡཔཱལི༹.

ནནྡིམུཁིཡཱ རཏྟིཡཱཏི ཨརུཎུཊྛིཏཀཱལེ པཱིཏིམུཁཱ ཝིཡ རཏྟི ཁཱཡཏི. ཏེནཱཧ ‘‘ནནྡིམུཁིཡཱ’’ཏི (ཙཱུལ༹ཝ. ཨཊྛ. ༣༨༣) ཨཡཾ ཏཾསཾཝཎྞནཱབྷཱུཏསམནྟཔཱསཱདིཀཊྛཀཐཱཔཱཋོ. ཨབྷིཀྐནྟཱཏི པརིཀྑཱིཎཱ. ཨུདྡྷསྟེ ཨརུཎེཏི ཨུགྒཏེ ཨརུཎསཱིསེ. ནནྡིམུཁིཡཱཏི ཏུཊྛིམུཁིཡཱ. ཨཡཾ ཏཾསཾཝཎྞནཱབྷཱུཏསཱརཏྠདཱིཔནཱིཔཱཋོ (སཱརཏྠ. ཊཱི. ཙཱུལ༹ཝགྒ ༣.༣༨༣). པཱལི༹ཡཾ ནནྡིམུཁིཡཱཏི ཨོདཱཏདིསཱམུཁིཏཱཡ ཏུཊྛམུཁིཡཱ. ཨཡཾ ཏཾསཾཝཎྞནཱཡ (ཝི. ཝི. ཊཱི. ཙཱུལ༹ཝགྒ ༢.༢༨༣) ཝིམཏིཝིནོདནཱིཔཱཋོ.

‘‘ཏཏིཡམྤི ཁོ ཨཱཡསྨཱ ཨཱནནྡོ ཨབྷིཀྐནྟཱཡརཏྟིཡཱ ནིཀྑནྟེ པཙྪིམེ ཡཱམེ ཨུདྡྷསྟེ ཨརུཎེ ནནྡིམུཁིཡཱ རཏྟིཡཱ ཨུཊྛཱཡཱསནཱ ཨེཀཾསཾ ཙཱིཝརཾ ཀཏྭཱ ཡེན བྷགཝཱ ཏེནཉྫལིཾ པཎཱམེཏྭཱ བྷགཝནྟཾ ཨེཏདཝོཙ – ཨབྷིཀྐནྟཱ, བྷནྟེ, རཏྟི, ནིཀྑནྟོ པཙྪིམོ ཡཱམོ, ཨུདྡྷསྟོ ཨརུཎོ, ནནྡིམུཁཱི རཏྟི, ཙིརནིསིནྣཱ ཨཱགནྟུཀཱ བྷིཀྑཱུ, པཊིསམྨོདཏུ, བྷནྟེ, བྷགཝཱ ¶ ཨཱགནྟུཀེ བྷིཀྑཱུ’’ཏི. ཨཡཾ ཨུདཱནཱགཏཱ སུཏྟནྟཔཱལི༹ (ཨུདཱ. ༤༥). ཨུདྡྷསྟེ ¶ ཨརུཎེཏི ཨུགྒཏེ ཨརུཎེ. ཨརུཎོ ནཱམ པུརཏྠིམདིསཱཡཾ སཱུརིཡོདཡཏོ པུརེཏརམེཝ ཨུཊྛིཏོབྷཱསོ. ནནྡིམུཁིཡཱ རཏྟིཡཱཏི ཨརུཎསྶ ཨུགྒཏཏྟཱ ཨེཝ ཨརུཎོབྷཱཡ སཱུརིཡཱལོཀཱུཔཛཱིཝིནོ སཏྟེ ནནྡཱཔནམུཁིཡཱ རཏྟིཡཱ ཛཱཏཱཡ, ཝིབྷཱཡམཱནཱཡཱཏི ཨཏྠོ. ཨཡཾ ཏཾསཾཝཎྞནཱབྷཱུཏཱ ཨུདཱནཊྛཀཐཱ (ཨུདཱ. ཨཊྛ. ༢༣).

ཨིཏི ཨེཏྟཀཱསུ ཝིནཡསུཏྟནྟཱགཏཱསུ པཱལི༹ཡཊྛཀཐཱཊཱིཀཱསུ ཨེཀསྨིམྤིཋཱནེ ཨརུཎོ ཙཏུཀྑཏྟུཾ ཨུགྒཏོཏི ནཏྠི, ཨེཀཝཱརམེཝ ཝུཏྟོ. ཙཏུབྦིདྷཝཎྞསམནྣཱགཏོཏིཔི ནཏྠི, ཨེཀཝཎྞོ ཨེཝ ཝུཏྟོ. ཛཱཏཀཊྛཀཐཱཡམྤི (ཛཱ. ཨཊྛ. ༥.༢༡.༢༥༥) རཏྟཝཎྞོ ཨེཝ ཝུཏྟོ, ན སེཏཝཎྞཱདིཀོ. ནནྡིམུཁཱིཏི ཙ སཏྟེ ནནྡཱཔནདིསཱམུཁཱི རཏྟི ཨེཝ ཝུཏྟཱ, ན ཨརུཎསྶ ནནྡིཡཱཝཊྚཔུཔྥསདིསཝཎྞཏཱ. ཏེནཱཧ ‘‘སཏྟེ ནནྡཱཔནམུཁིཡཱ རཏྟིཡཱ’’ཏི. ཨེཝཾ ཨབྷིདྷཱནཔྤདཱིཔིཀཱཔཀརཎཝཙནེན ཝིརུདྡྷཏྟཱ པཱལི༹ཡཊྛཀཐཱདཱིཧི ཨསཾསནྡནཏོ དུབྦལསཱདྷཀཏྟཱ ཙ ཨཡམྤི ཝཱདོ ཨཡུཏྟོཡེཝཱཏི དཊྛབྦོ, ཏསྨཱ སམྨཱསམྦུདྡྷསྶ ཨཱཎཾ ཨནཏིཀྐནྟེན ལཛྫིབྷིཀྑུནཱ ཡདི ཀེནཙི ཨཔྤཊིཙྪནྣེ ཝིཝཊོཀཱསེ ཧོཏི, མཙྪཀྑིསམཱནཨབྱཏྟརཏྟོབྷཱསསྶ པཉྙཱཡམཱནཀཱལཏོ པཊྛཱཡ ཝཏྟནིཀྑིཔནཱདིཀམྨཾ ཀཱཏབྦཾ.

ཡདི པན པབྦཏཱདིནཱ པཊིཙྪནྣཊྛཱནཾ ཧོཏི, ཡཏྟཀེན ཀཱལེན ཝིཝཊཊྛཱནེ རཏྟོབྷཱསོ པཉྙཱཡཏི, སཱུརིཡམཎྜལསྶ དིསྶནཀཱལཏོ ཨེཀགྷཊིཀཱམཏྟེན ཝཱ དྭིགྷཊིཀཱམཏྟེན ཝཱ ཏཏྟཀཾ ཀཱལཾ སལླཀྑེཏྭཱ ཨིམསྨིཾ ཀཱལེ ཨརུཎོ ཨུགྒཏོ བྷཝེཡྻཱཏི ཏཀྐེཏྭཱ ཀཱཏབྦཾ, སཾསཡཾ ཨནིཙྪནྟེན ཏཏོཔི ཀཉྩིཀཱལཾ ཨདྷིཝཱསེཏྭཱ ནིསྶཾསཡཀཱལེ ཀཏྟབྦཾ, ཨཡཾ ཏཏྠ ¶ སཱམཱིཙི. ཨཡཾ པན ཝཱདོ ཡཐཱཝུཏྟཔྤཀརཎཝཙནེཧི སུཊྛུ སཾསནྡཏི ཡཐཱ གངྒོདཀེན ཡམུནོདཀཾ, ཏསྨཱ པཎྜིཏེཧི པུནཔྤུནཾ པུབྦཱཔརཾ ཨཱལོལེ༹ནྟེན མནསི ཀཱཏབྦོ. ཨེཝཾ མནསི ཀརིཏྭཱ ཨརུཎཔཊིསཾཡུཏྟེསུ ཋཱནེསུ སཾསཡོ ཚིནྡིཏབྦོ, སཾསཡཾ ཚིནྡིཏྭཱ ཝིསཱརདེན ཧུཏྭཱ ཏཾ ཏཾ ཀམྨཾ ཀཱཏབྦནྟི.

ཝིསུདྡྷཏྠཱཡ སཱིལསྶ, བྷིཀྑཱུནཾ པིཡསཱིལིནཾ;

ཀཏཱརུཎཀཐཱ ཨེསཱ, ན སཱརམྦྷཱདིཀཱརཎཱ.

ཏསྨཱ ¶ སུཊྛཱུཔདྷཱརེཏྭཱ, ཡུཏྟཾ གཎྷནྟུ སཱདྷཝོ;

ཨཡུཏྟཉྩེ ཚཌྜཡནྟུ, མཱ ཧོནྟུ དུམྨནཱདཡོཏི.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

དིཝཱསེཡྻཝིནིཙྪཡཀཐཱལངྐཱརོ ནཱམ

པཋམོ པརིཙྪེདོ.

༢. པརིཀྑཱརཝིནིཙྪཡཀཐཱ

༦. ཨེཝཾ དིཝཱསེཡྻཝིནིཙྪཡཾ ཀཐེཏྭཱ ཨིདཱནི པརིཀྑཱརཝིནིཙྪཡཾ ཀཐེཏུཾ ‘‘པརིཀྑཱརོཏི སམཎཔརིཀྑཱརོ’’ཏིཨཱདིམཱཧ. ཏཏྠ དིཝཱསེཡྻཝིནིཙྪཡཀཐཱཡ ཨཱདིམྷི ཝུཏྟཾ ‘‘ཏཏྠཱ’’ཏི པདཾ ཨཱནེཏྭཱ ཏཏྠ ཏེསུ མཱཏིཀཱཔདེསུ སམབྷིནིཝིཊྛསྶ ‘‘པརིཀྑཱརོ’’ཏི པདསྶ ‘‘སམཎཔརིཀྑཱརོ’’ཏི ཨཏྠོ དཊྛབྦོཏི ཡོཛནཱ, ཨེས ནཡོ ཨིཏོ པརེཔི. སམཎཔརིཀྑཱརོ ཝུཏྟོ, ན གིཧིཔརིཀྑཱརོཏི ཨདྷིཔྤཱཡོ. པརིསམནྟཏོ ཀརིཡཏེཏི པརིཀྑཱརོ, ཚཏྟཱདིཀོ. ཏཏྲཱཏི སམཎཔརིཀྑཱརེ. ཀཔྤཏཱིཏི ཀཔྤིཡོ, ན ཀཔྤིཡོ ཨཀཔྤིཡོ, ཀཔྤིཡོ ཙ ཨཀཔྤིཡོ ཙ ཀཔྤིཡཱཀཔྤིཡོ, སམཱཧཱརདྭནྡེཔི པུལླིངྒམིཙྪནྟི པཎྜིཏཱ. ཀཔྤིཡཱཀཔྤིཡོ ¶ ཙ སོ པརིཀྑཱརོ ཙེཏི ཏཐཱ, ཏསྶ ཝིནིཙྪཡོ ཀཔྤིཡཱཀཔྤིཡཔརིཀྑཱརཝིནིཙྪཡོ.

ཀེཙི ཏཱལཔཎྞཙྪཏྟནྟི ཨིདཾ ཨུཔལཀྑཎམཏྟཾ. སབྦམྤི ཧི ཚཏྟཾ ཏཐཱཀརིཡམཱནཾ ན ཝཊྚཏི. ཏེནེཝཱཧ ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༨༥) ‘‘སབྦཔརིཀྑཱརེསུ ཝཎྞམཊྛཝིཀཱརཾ ཀརོནྟསྶ དུཀྐཊནྟི དཱིཔེནྟེན ན ཝཊྚཏཱིཏི ཝུཏྟནྟི ཝེདིཏབྦ’’ནྟི. ན ཝཎྞམཊྛཏྠཱཡཱཏི ཨིམིནཱ ཐིརཀརཎཏྠཾ ཨེཀཝཎྞསུཏྟེན ཝིནནྡྷིཡམཱནཾ ཡདི ཝཎྞམཊྛཾ ཧོཏི, ཏཏྠ ན དོསོཏི དསྶེཏི. ཨཱརགྒེནཱཏི ནིཁཱདནམུཁེན. ཡདི ན ཝཊྚཏི, ཏཱདིསཾ ཚཏྟདཎྜཾ ལབྷིཏྭཱ ཀིཾ ཀཱཏབྦནྟི ཨཱཧ ‘‘གྷཊཀཾ ཝཱ’’ཏིཨཱདི. སུཏྟཀེན ཝཱ དཎྜོ ཝེཋེཏབྦོཏི ཡཐཱ ལེཁཱ ན པཉྙཱཡཏི, ཏཐཱ ཝེཋེཏབྦོ. དཎྜབུནྡེཏི དཎྜམཱུལེ, ཚཏྟདཎྜསྶ ཧེཊྛིམཀོཊིཡནྟི ཨཏྠོ. ཚཏྟམཎྜལིཀནྟི ཚཏྟསྶ ཨནྟོ ཁུདྡཀམཎྜལཾ, ཚཏྟཔཉྫརེ མཎྜལཱཀཱརེན བདྡྷདཎྜཝལཡཾ ¶ ཝཱ. ཨུཀྐིརིཏྭཱཏི ནིནྣཾ, ཨུནྣཏཾ ཝཱ ཀཏྭཱ ཨུཊྛཱཔེཏྭཱ. སཱ ཝཊྚཏཱིཏི སཱ ལེཁཱ རཛྫུཀེཧི བནྡྷནྟུ ཝཱ མཱ ཝཱ, བནྡྷིཏུཾ ཡུཏྟཊྛཱནཏྟཱ ཝཊྚཏི. ཏེན ཝུཏྟཾ ཨཱཙརིཡབུདྡྷདཏྟམཧཱཐེརེན –

‘‘ཚཏྟཾ པཎྞམཡཾ ཀིཉྩི, བཧི ཨནྟོ ཙ སབྦསོ;

པཉྩཝཎྞེན སུཏྟེན, སིབྦིཏུཾ ན ཙ ཝཊྚཏི.

‘‘ཚིནྡིཏུཾ ཨཌྜྷཙནྡཾ ཝཱ, པཎྞེ མཀརདནྟཀཾ;

གྷཊཀཾ ཝཱལ༹རཱུཔཾ ཝཱ, ལེཁཱ དཎྜེ ན ཝཊྚཏི.

‘‘སིབྦིཏུཾ ཨེཀཝཎྞེན, ཚཏྟཾ སུཏྟེན ཝཊྚཏི;

ཐིརཏྠཾ པཉྩཝཎྞེན, པཉྫརཾ ཝཱ ཝིནནྡྷིཏུཾ.

‘‘གྷཊཀཾ ཝཱལ༹རཱུཔཾ ཝཱ, ལེཁཱ ཝཱ པན ཀེཝལཱ;

ཚིནྡིཏྭཱ ཝཱཔི གྷཾསིཏྭཱ, དྷཱརེཏུཾ པན ཝཊྚཏི.

‘‘ཨཧིཙྪཏྟཀསཎྛཱནཾ ¶ , དཎྜབུནྡམྷི ཝཊྚཏི;

ཨུཀྐིརིཏྭཱ ཀཏཱ ལེཁཱ, བནྡྷནཏྠཱཡ ཝཊྚཏཱི’’ཏི.

ཏསྶ ཝཎྞནཱཡམྤི ཚཏྟཾ པཎྞམཡཾ ཀིཉྩཱིཏི ཏཱལཔཎྞཱདིཔཎྞཙྪདནཾ ཡཾ ཀིཉྩི ཚཏྟཾ. བཧཱིཏི ཨུཔརི. ཨནྟོཏི ཧེཊྛཱ. སིབྦིཏུནྟི རཱུཔཾ དསྶེཏྭཱ སཱུཙིཀམྨཾ ཀཱཏུཾ. པཎྞེཏི ཚདནཔཎྞེ. ཨཌྜྷཙནྡནྟི ཨཌྜྷཙནྡཱཀཱརཾ. མཀརདནྟཀནྟི མཀརདནྟཱཀཱརཾ, ཡཾ ‘‘གིརིཀཱུཊ’’ནྟི ཝུཙྩཏི. ཚིནྡིཏུཾ ན ཝཊྚཏཱིཏི སམྦནྡྷོ. མུཁཝཊྚིཡཱ ནཱམེཏྭཱ བདྡྷཔཎྞཀོཊིཡཱ ཝཱ མཏྠཀམཎྜལཀོཊིཡཱ ཝཱ གིརིཀཱུཊཱདིཾ ཀརོནྟི, ཨིམིནཱ ཏཾ པཊིཀྑིཏྟཾ. དཎྜེཏི ཚཏྟདཎྜེ. གྷཊཀནྟི གྷཊཱཀཱརོ. ཝཱལ༹རཱུཔཾ ཝཱཏི བྱགྒྷཱདིཝཱལཱ༹ནཾ རཱུཔཀཾ ཝཱ. ལེཁཱཏི ཨུཀྐིརིཏྭཱ ཝཱ ཚིནྡིཏྭཱ ཝཱ ཙིཏྟཀམྨཝསེན ཝཱ ཀཏརཱཛི. པཉྩཝཎྞཱནཾ སུཏྟཱནཾ ཨནྟརེ ནཱིལཱདིཨེཀཝཎྞེན སུཏྟེན ཐིརཏྠཾ ཚཏྟཾ ཨནྟོ ཙ བཧི ཙ སིབྦིཏུཾ ཝཱ ཚཏྟདཎྜགྒཱཧཀསལཱཀཔཉྫརཾ ཐིརཏྠཾ ཝིནནྡྷིཏུཾ ཝཱ ཝཊྚཏཱིཏི ཡོཛནཱ. པཉྩཝཎྞཱནཾ ཨེཀཝཎྞེན ཐིརཏྠནྟི ཨིམིནཱ ཨནེཀཝཎྞེཧི སུཏྟེཧི ¶ ཝཎྞམཊྛཏྠཱཡ སིབྦིཏུཉྩ ཝིནནྡྷིཏུཉྩ ན ཝཊྚཏཱིཏི དཱིཔེཏི. པོཏྠཀེསུ པན ‘‘པཉྩཝཎྞེནཱ’’ཏི པཱཋོ དིསྶཏི, ཏསྶ ཨེཀཝཎྞེན པཉྩཝཎྞེན ཝཱ སུཏྟེན ཐིརཏྠཾ སིབྦིཏུཾ ཝིནནྡྷིཏུཾ ཝཱ ཝཊྚཏཱིཏི ཡོཛནཱ ཀཱཏབྦཱ ཧོཏི.

ཨེཏྠ ཙ ཧེཊྛཱ ཝུཏྟེན ‘‘པཉྩཝཎྞེན སུཏྟེན སིབྦིཏུཾ ན ཙ ཝཊྚཏཱི’’ཏི པཱཋེན ཙ ‘‘ཀེཙི ཏཱལཔཎྞཙྪཏྟཾ ཨནྟོ ཝཱ བཧི ཝཱ པཉྩཝཎྞེན སུཏྟེན སིབྦེཏྭཱ ཝཎྞམཊྛཾ ཀརོནྟི, ཏཾ ན ཝཊྚཏི, ཨེཀཝཎྞེ པན ནཱིལེན ཝཱ པཱིཏཀེན ཝཱ ཡེན ཀེནཙི སུཏྟེན ཨནྟོ ཝཱ བཧི ཝཱ སིབྦིཏུཾ, ཚཏྟདཎྜགྒཱཧཀཾ སལཱཀཔཉྫརཾ ཝཱ ཝིནནྡྷིཏུཾ ཝཊྚཏི, ཏཉྩ ཁོ ཐིརཀརཎཏྠཾ, ན ཝཎྞམཊྛཏྠཱཡཱ’’ཏི ཨཊྛཀཐཱཔཱཋེན ཙ ཝིརུཛ྄ཛྷཏི, ཏསྨཱ སོ ན གཧེཏབྦོ.

ལེཁཱ ¶ ཝཱ པན ཀེཝལཱཏི ཡཐཱཝུཏྟཔྤཀཱརཱ སཀལཱ ལེཁཱ ཝཱ. ཚིནྡིཏྭཱཏི ཨུཀྐིརིཏྭཱ ཀཏཾ ཚིནྡིཏྭཱ. གྷཾསིཏྭཱཏི ཙིཏྟཀམྨཱདིཝསེན ཀཏཾ གྷཾསིཏྭཱ. དཎྜབུནྡམྷཱིཏི ཚཏྟདཎྜསྶ པཉྫརེ གཱཧཎཏྠཱཡ ཕཱལིཏབུནྡམྷི, མཱུལེཏི ཨཏྠོ. ཨཡམེཏྠ ནིསྶནྡེཧེ ཝུཏྟནཡོ. ཁུདྡསིཀྑཱགཎྛིཔདེ པན ‘‘ཚཏྟཔིཎྜིཡཱ མཱུལེ’’ཏི ཝུཏྟཾ. ཨཧིཙྪཏྟཀསཎྛཱནནྟི ཕུལླཨཧིཙྪཏྟཀཱཀཱརཾ. རཛྫུཀེཧི གཱཧཱཔེཏྭཱ དཎྜེ བནྡྷནྟི, ཏསྨིཾ བནྡྷནཊྛཱནེ ཝལཡམིཝ ཨུཀྐིརིཏྭཱཏི ཝལཡཾ ཝིཡ ཨུཔཊྛཱཔེཏྭཱ. བནྡྷནཏྠཱཡཱཏི ཝཱཏེན ཡཐཱ ན ཙལཏི, ཨེཝཾ རཛྫཱུཧི དཎྜེ པཉྫརསྶ བནྡྷནཏྠཱཡ. ཨུཀྐིརིཏྭཱ ཀཏཱ ལེཁཱ ཝཊྚཏཱིཏི ཡོཛནཱ. ཡཐཱ ཝཱཏཔྤཧཱརེན ཨཙལནཏྠཾ ཚཏྟམཎྜལིཀཾ རཛྫུཀེཧི གཱཧཱཔེཏྭཱ དཎྜེ བནྡྷནྟི, ཏསྨིཾ བནྡྷནཊྛཱནེ ཝལཡམིཝ ཨུཀྐིརིཏྭཱ ལེཁཾ ཋཔེནྟི, སཱ ཝཊྚཏཱིཏི. སཙེཔི ན བནྡྷཏི, བནྡྷནཱརཧཊྛཱནཏྟཱ ཝལཡཾ ཨུཀྐིརིཏྭཱ ཝཊྚཏཱིཏི གཎྛིཔདེ ཝཏྟནྟཱིཏི ཨཱགཏཾ, ཏསྨཱ པཀྑརཎེསུ ཨཱགཏནཡེནེཝ ཚཏྟེ པཊིཔཛྫིཏབྦནྟི.

༧. ཙཱིཝརེ པན ནཱནཱསུཏྟཀེཧཱིཏི (སཱརཏྠ. ཊཱི. ༢.༨༥; ཝི. ཝི. ཊཱི. ༡.༨༥) ནཱནཱཝཎྞེཧི སུཏྟེཧི. ཨིདཉྩ ཏཐཱ ཀརོནྟཱནཾ ཝསེན ཝུཏྟཾ, ཨེཀཝཎྞསུཏྟཀེནཔི ན ཝཊྚཏིཡེཝ. ‘‘པཀཏིསཱུཙིཀམྨམེཝ ཝཊྚཏཱི’’ཏི ཧི ཝུཏྟཾ. པཊྚམུཁེཏི དྭིནྣཾ པཊྚཱནཾ སངྒྷཊིཏཊྛཱནཾ སནྡྷཱཡེཏཾ ཝུཏྟཾ. པརིཡནྟེཏི ཙཱིཝརཔརིཡནྟེ. ཨནུཝཱཏཾ སནྡྷཱཡེཏཾ ཝུཏྟཾ. ཝེཎཱིཏི ཝརཀསཱིསཱཀཱརེན སིབྦནཾ. སངྑལིཀནྟི དྭིགུཎསངྑལིཀཱཀཱརེན སིབྦནཾ, བིལཱ༹ལསངྑལིཀཱཀཱརེན སིབྦནཾ ཝཱ. ཝེཎིཾ ཝཱ སངྑལིཀཾ ཝཱ ཀརོནྟཱིཏི ཀརཎཀིརིཡཱཡ སམྦནྡྷོ. ཨགྒྷིཡཾ ནཱམ ཙེཏིཡསཎྛཱནཾ ¶ , ཡཾ ‘‘ཨགྒྷིཡཏྠམྦྷོ’’ཏི ཝདནྟི. གཡཱ ནཱམ མཱུལེ ཏནུཀཾ ཨགྒེ མཧནྟཾ ཀཏྭཱ གདཱཀཱརེན སིབྦནཾ. མུགྒརོ ནཱམ མཱུལེ ཙ ཨགྒེ ཙ ཨེཀསདིསཾ ཀཏྭཱ མུགྒརཱཀཱརེན སིབྦནཾ. ཀཀྐཊཀྑཱིནི ཨུཀྐིརནྟཱིཏི ¶ གཎྛིཀཔཊྚཔཱསཀཔཊྚཱནཾ ཨནྟེ པཱལི༹བདྡྷཾ ཀཏྭཱ ཀཀྐཊཀཱནཾ ཨཀྑིསཎྛཱནཾ པཊྛཔེནྟི, ཀརོནྟཱིཏི ཨཏྠོ. ‘‘ཀོཎསུཏྟཔིལ༹ཀཱཏི གཎྛིཀཔཱསཀཔཊྚཱནཾ ཀོཎེཧི ནཱིཧཊསུཏྟཱནཾ ཀོཊིཡོ’’ཏི ཏཱིསུཔི གཎྛིཔདེསུ ཝུཏྟཾ. ཀཐཾ པན ཏཱ པིལ༹ཀཱ དུཝིཉྙེཡྻརཱུཔཱ ཀཱཏབྦཱཏི? ཀོཎེཧི ནཱིཧཊསུཏྟཱནཾ ཨནྟེསུ ཨེཀཝཱརཾ གཎྛིཀཀརཎེན ཝཱ པུན ནིཝཏྟེཏྭཱ སིབྦནེན ཝཱ དུཝིཉྙེཡྻསབྷཱཝཾ ཀཏྭཱ སུཏྟཀོཊིཡོ རསྶཾ ཀཏྭཱ ཚིནྡིཏབྦཱ. དྷམྨསིརིཏྠེརེན པན ‘‘ཀོཎསུཏྟཱ ཙ པིལ༹ཀཱ, དུཝིཉྙེཡྻཱཝ ཀཔྤརེ’’ཏི ཝུཏྟཾ, ཏཐཱ ཨཱཙརིཡབུདྡྷདཏྟཏྠེརེནཔི ‘‘སུཏྟཱ ཙ པིལ༹ཀཱ ཏཏྠ, དུཝིཉྙེཡྻཱཝ དཱིཔིཏཱ’’ཏི ཝུཏྟཾ, ཏསྨཱ ཏེསཾ མཏེན ཀོཎསུཏྟཱ ཙ པིལ༹ཀཱ ཙ ཀོཎསུཏྟཔིལ༹ཀཱཏི ཨེཝམེཏྠ ཨཏྠོ དཊྛབྦོ.

ཝིམཏིཝིནོདནིཡམྤི (ཝི. ཝི. ཊཱི. ༡.༨༥) ཀོཎསུཏྟཔིལ༹ཀཱཏི གཎྛིཀཔཱསཀཔཊྚཱནཾ ཀོཎེཧི བཧི ནིགྒཏསུཏྟཱནཾ པིལ༹ཀཱཀཱརེན ཋཔིཏཀོཊིཡོཏི ཀེཙི ཝདནྟི, ཏེ པིལ༹ཀེ ཚིནྡིཏྭཱ དུཝིཉྙེཡྻཱ ཀཱཏབྦཱཏི ཏེསཾ ཨདྷིཔྤཱཡོ. ཀེཙི པན ‘‘ཀོཎསུཏྟཱ ཙ པིལ༹ཀཱ ཙཱཏི དྭེཡེཝཱ’’ཏི ཝདནྟི, ཏེསཾ མཏེན གཎྛིཀཔཱསཀཔཊྚཱནཾ ཀོཎཏོ ཀོཎཾ ནཱིཧཊསུཏྟཱ ཀོཎསུཏྟཱ ནཱམ. སམནྟཏོ པན པརིཡནྟེན གཏཱ ཙཏུརསྶསུཏྟཱ པིལ༹ཀཱ ནཱམ. ཏཾ དུཝིདྷམྤི ཀེཙི ཙཱིཝརཏོ ཝིསུཾ པཉྙཱནཏྠཱཡ ཝིཀཱརཡུཏྟཾ ཀརོནྟི, ཏཾ ནིསེདྷཱཡ ‘‘དུཝིཉྙེཡྻརཱུཔཱ ཝཊྚཏཱི’’ཏི ཝུཏྟཾ, ན པན སབྦཐཱ ཨཙཀྑུགོཙརབྷཱཝེན སིབྦནཏྠཱཡ ཏཐཱསིབྦནསྶ ཨསཀྐུཎེཡྻཏྟཱ, ཡཐཱ པཀཏིཙཱིཝརཏོ ཝིཀཱརོ ན པཉྙཱཡཏི, ཨེཝཾ སིབྦིཏབྦནྟི ཨདྷིཔྤཱཡོ. རཛནཀམྨཏོ པུབྦེ པཉྙཱཡམཱནོཔི ཝིསེསོ ཙཱིཝརེ རཏྟེ ཨེཀཝཎྞཏོ ན པཉྙཱཡཏཱིཏི ཨཱཧ ‘‘ཙཱིཝརེ རཏྟེ’’ཏི.

༨. མཎིནཱཏི ¶ ནཱིལམཎིཨཱདིཔཱསཱཎེན, ཨཾསབདྡྷཀཀཱཡབནྡྷནཱདིཀཾ ཨཙཱིཝརཏྟཱ སངྑཱདཱིཧི གྷཾསིཏུཾ ཝཊྚཏཱིཏི ཝདནྟི. ཀཎྞསུཏྟཀནྟི ཙཱིཝརསྶ དཱིགྷཏོ ཏིརིཡཉྩ སིབྦིཏཱནཾ ཙཏཱུསུ ཀཎྞེསུ ཀོཎེསུ ཙ ནིཀྑནྟཱནཾ སུཏྟསཱིསཱནམེཏཾ ནཱམཾ, ཏཾ ཚིནྡིཏྭཱཝ པཱརུཔིཏབྦཾ. ཏེནཱཧ ‘‘རཛིཏཀཱལེ ཚིནྡིཏབྦ’’ནྟི. བྷགཝཏཱ ཨནུཉྙཱཏཾ ཨེཀཾ ཀཎྞསུཏྟམྤི ཨཏྠི, ཏཾ པན ནཱམེན སདིསམྤི ཨིཏོ ཨཉྙམེཝཱཏི དསྶེཏུཾ ‘‘ཡཾ པནཱ’’ཏིཨཱདི ཝུཏྟཾ. ལགྒནཏྠཱཡཱཏི ཙཱིཝརརཛྫུཡཾ ¶ ཙཱིཝརབནྡྷནཏྠཱཡ. ཝིམཏིཝིནོདནིཡཾ (ཝི. ཝི. ཊཱི. ༡.༨༥) ཨེཏྟཀམེཝ ཝུཏྟཾ.

སཱརཏྠདཱིཔནིཡཾ (སཱརཏྠ. ཊཱི. ༢.༨༥) པན ‘‘པཱསཀཾ ཀཏྭཱ བནྡྷིཏབྦནྟི རཛནཀཱལེ བནྡྷིཏབྦཾ, སེསཀཱལེ མོཙེཏྭཱ ཋཔེཏབྦ’’ནྟི ཝུཏྟཾ. ཝིནཡསངྒཧཔྤཀརཎསྶ པོརཱཎཊཱིཀཱཡམྤི ཨིདམེཝ གཧེཏྭཱ ཝུཏྟཾ, ཏཾ པན ཙཱིཝརཀྑནྡྷཀེ (མཧཱཝ. ༣༤༤) ‘‘མཛ྄ཛྷེན ལགྒེནྟི, ཨུབྷཏོ གལཏི, བྷགཝཏོ ཨེཏམཏྠཾ ཨཱརོཙེསུཾ. ཨནུཛཱནཱམི, བྷིཀྑཝེ, ཀཎྞེ བནྡྷིཏུནྟི. ཀཎྞོ ཛཱིརཏི. བྷགཝཏོ ཨེཏམཏྠཾ ཨཱརོཙེསུཾ. ཨནུཛཱནཱམི, བྷིཀྑཝེ, ཀཎྞསུཏྟཀ’’ནྟི ཨེཝཾ ཨནུཉྙཱཏཙཱིཝརརཛྫུཡཾ རཛིཏྭཱ པསཱརིཏཙཱིཝརསྶ ཨོལམྦཀསུཏྟཾ སནྡྷཱཡ ཝུཏྟནྟི དཊྛབྦཾ.

གཎྛིཀེཏི ཙཱིཝརཔཱརུཔནཀཱལེ པཱསཀེ ལགྒཱཔནཏྠཾ ཀཏེ དནྟཱདིམཡེ གཎྛིཀེ. པིལ༹ཀཱཏི བིནྡུཾ བིནྡུཾ ཀཏྭཱ ཨུཊྛཱཔེཏབྦཔིལ༹ཀཱ. ཝུཏྟཉྷེཏཾ ཝིནཡཝིནིཙྪཡཔྤཀརཎེ –

‘‘ནཱནཱཝཎྞེཧི སུཏྟེཧི, མཎྜནཏྠཱཡ ཙཱིཝརཾ;

སམཾ སཏཔདཱདཱིནཾ, སིབྦིཏུཾ ན ཙ ཝཊྚཏི.

‘‘པཏྟསྶ པརིཡནྟེ ཝཱ, ཏཐཱ པཏྟམུཁེཔི ཙ;

ཝེཎིཾ སངྑལིཀཾ ཝཱཔི, ཀརོཏོ ཧོཏི དུཀྐཊཾ.

‘‘པཊྚམྤི ¶ གཎྛིཔཱསཱནཾ, ཨཊྛཀོཎཱདིཀཾ ཝིདྷིཾ;

ཏཏྠགྒྷིཡགདཱརཱུཔཾ, མུགྒརཱདིཾ ཀརོནྟི ཙ.

‘‘ཏཏྠ ཀཀྐཊཀཀྑཱིནི, ཨུཊྛཱཔེནྟི ན ཝཊྚཏི;

སུཏྟཱ ཙ པིལ༹ཀཱ ཏཏྠ, དུཝིཉྙེཡྻཱཝ དཱིཔིཏཱ.

‘‘ཙཏུཀོཎཱཝ ཝཊྚནྟི, གཎྛིཔཱསཀཔཊྚཀཱ;

ཀཎྞཀོཎེསུ སུཏྟཱནི, རཏྟེ ཚིནྡེཡྻ ཙཱིཝརེ.

‘‘སཱུཙིཀམྨཝིཀཱརཾ ¶ ཝཱ, ཨཉྙཾ ཝཱ པན ཀིཉྩིཔི;

ཙཱིཝརེ བྷིཀྑུནཱ ཀཱཏུཾ, ཀཱརཱཔེཏུཾ ན ཝཊྚཏི.

‘‘ཡོ ཙ པཀྑིཔཏི བྷིཀྑུ ཙཱིཝརཾ,

ཀཉྫིཔིཊྛཁལིཨལླིཀཱདིསུ;

ཝཎྞམཊྛམབྷིཔཏྠཡཾ པརཾ;

ཏསྶ ནཏྠི པན མུཏྟི དུཀྐཊཱ.

‘‘སཱུཙིཧཏྠམལཱདཱིནཾ, ཀརཎེ ཙཱིཝརསྶ ཙ;

ཏཐཱ ཀིལིཊྛཀཱལེ ཙ, དྷོཝནཏྠཾ ཏུ ཝཊྚཏི.

‘‘རཛནེ པན གནྡྷཾ ཝཱ, ཏེལཾ ཝཱ ལཱཁམེཝ ཝཱ;

ཀིཉྩི པཀྑིཔིཏུཾ ཏཏྠ, བྷིཀྑུནོ ན ཙ ཝཊྚཏི.

‘‘སངྑེན མཎིནཱ ཝཱཔི, ཨཉྙེནཔི ཙ ཀེནཙི;

ཙཱིཝརཾ ན ཙ གྷཊྚེཡྻ, གྷཾསིཏབྦཾ ན དོཎིཡཱ.

‘‘ཙཱིཝརཾ དོཎིཡཾ ཀཏྭཱ, ནཱཏིགྷཊྚེཡྻ མུཊྛིནཱ;

རཏྟཾ པཧརིཏུཾ ཀིཉྩི, ཧཏྠེཧེཝ ཙ ཝཊྚཏི.

‘‘གཎྛིཀེ པན ལེཁཱ ཝཱ, པིལ༹ཀཱ ཝཱ ན ཝཊྚཏི;

ཀཔྤབིནྡུཝིཀཱརོ ཝཱ, པཱལི༹ཀཎྞིཀབྷེདཏོ’’ཏི.

ཝིནཡསཱརཏྠསནྡཱིཔནིཡམྤི སམཾ སཏཔདཱདཱིནནྟི སཏཔདཱདཱིཧི སདིསཾ. ཏུལྱཏྠེ ཀརཎཝཙནཔྤསངྒེ སཱམིཝཙནཾ. པཊྚསྶ པརིཡནྟེ ཝཱཏི ཨནུཝཱཏསྶ ཨུབྷཡཔརིཡནྟེ ཝཱ. པཊྚམུཁེཔི ཝཱཏི དྭིནྣཾ ཨཱཡཱམཝིཏྠཱརཔཊྚཱནཾ སངྒྷཊིཏཊྛཱནེ, ཀཎྞེཔི ཝཱ ཨེཀསྶེཝ ཝཱ པཊྚསྶ ཨཱུནཔཱུརཎཏྠཾ གྷཊིཏཊྛཱནེཔི ཝཱ ¶ . ཝེཎཱིཏི ཀུདྲཱུསསཱིསཱཀཱརེན སིབྦནཾ. ཀེཙི ‘‘ཝརཀསཱིསཱཀཱརེནཱ’’ཏི ¶ ཝདནྟི. སངྑལིཀནྟི བིལཱ༹ལདཱམསདིསསིབྦནཾ. ཀེཙི ‘‘སཏཔདིསདིས’’ནྟི ཝདནྟི.

པཊྚམྤཱིཏི པཏྟམྤི. ཨཊྛཀོཎཱདིཀོ ཝིདྷི པཀཱརོ ཨེཏསྶཱཏི ཨཊྛཀོཎཱདིཀཝིདྷི, ཏཾ. ཨཊྛཀོཎཱདིཀནྟི ཝཱ གཱཐཱབནྡྷཝསེན ནིགྒཧིཏཱགམོ. ‘‘ཨཊྛཀོཎཱདིཀཾ ཝིདྷི’’ནྟི ཨེཏཾ ‘‘པཊྚ’’ནྟི ཨེཏསྶ སམཱནཱདྷིཀརཎཝིསེསནཾ, ཀིརིཡཱཝིསེསནཾ ཝཱ. ‘‘ཀརོནྟཱི’’ཏི ཨིམིནཱ སམྦནྡྷོ. ཨཐ ཝཱ པཊྚནྟི ཨེཏྠ བྷུམྨཏྠེ ཨུཔཡོགཝཙནཾ, པཊྚེཏི ཨཏྠོ. ཨིམསྨིཾ པཀྑེ ཨཊྛཀོཎཱདིཀནྟི ཨུཔཡོགཝཙནཾ. ཝིདྷིནྟི ཨེཏསྶ ཝིསེསནཾ. ཨིདྷ ཝཀྑམཱནཙཏུཀོཎསཎྛཱནཏོ ཨཉྙཾ ཨཊྛཀོཎཱདིཀཾ ནཱམ. ཏཏྠཱཏི ཏསྨིཾ པཊྚདྭཡེ. ཨགྒྷིཡགདཱརཱུཔནྟི ཨགྒྷིཡསཎྛཱནཉྩེཝ གདཱསཎྛཱནཉྩ སིབྦནཾ. མུགྒརནྟི ལགུལ༹སཎྛཱནསིབྦནཾ. ཨཱདི-སདྡེན ཙེཏིཡཱདིསཎྛཱནཱནཾ གཧཎཾ.

ཏཏྠཱཏི པཊྚདྭཡེ ཏསྨིཾ ཋཱནེ. ཀཀྐཊཀཀྑཱིནཱིཏི ཀུལཱི༹རཀཙྪིསདིསཱནི སིབྦནཝིཀཱརཱནི. ཨུཊྛཱཔེནྟཱིཏི ཀརོནྟི. ཏཏྠཱཏི ཏསྨིཾ གཎྛིཀཔཱསཀཔཊྚཀེ. སུཏྟཱཏི ཀོཎཏོ ཀོཎཾ སིབྦིཏསུཏྟཱ ཙེཝ ཙཏུརསྶེ སིབྦིཏསུཏྟཱ ཙ. པིལ༹ཀཱཏི ཏེསམེཝ སུཏྟཱནཾ ནིཝཏྟེཏྭཱ སིབྦིཏཀོཊིཡོ ཙ. དུཝིཉྙེཡྻཱཝཱཏི རཛནཀཱལེ དུཝིཉྙེཡྻརཱུཔཱ ཨནོལཱ༹རིཀཱ དཱིཔིཏཱ ཝཊྚནྟཱིཏི. ཡཐཱཧ ‘‘ཀོཎསུཏྟཔིལ༹ཀཱ ཙ ཙཱིཝརེ རཏྟེ དུཝིཉྙེཡྻརཱུཔཱ ཝཊྚནྟཱི’’ཏི (པཱརཱ. ཨཊྛ. ༡.༨༥).

གཎྛིཀཔཊྚིཀཱ པཱསཔཊྚིཀཱཏི ཡོཛནཱ. ཀཎྞཀོཎེསུ སུཏྟཱནཱིཏི ཙཱིཝརཀཎྞེ སུཏྟཱ ཙེཝ པཱསཀཔཊྚཱནཾ ཀོཎེསུ སུཏྟཱནི ཙ ཨཙྪིནྡཏི. ཨེཏྠ ཙ ཙཱིཝརེ ཨཱཡཱམཏོ ཝིཏྠཱརཏོ ཙ སིབྦིཏྭཱ ཨནུཝཱཏཏོ བཧི ནིཀྑམིཏསུཏྟཾ ཙཱིཝརཾ རཛིཏྭཱ སུཀྑཱཔནཀཱལེ རཛྫུཡཱ ཝཱ ཙཱིཝརཝཾསེ ཝཱ ¶ བནྡྷིཏྭཱ ཨོལམྦིཏུཾ ཨནུཝཱཏེ བནྡྷསུཏྟཱནི ཙ ཀཎྞསུཏྟཱནི ནཱམ. ཡཐཱཧ ‘‘ཙཱིཝརསྶ ཀཎྞསུཏྟཀཾ ན ཙ ཝཊྚཏི, རཛིཏཀཱལེ ཚིནྡིཏབྦཾ, ཡཾ པན ‘ཨནུཛཱནཱམི བྷིཀྑཝེ ཀཎྞསུཏྟཀ’ནྟི ཨེཝཾ ཨནུཉྙཱཏཾ, ཏཾ ཨནུཝཱཏེ པཱསཀཾ ཀཏྭཱ བནྡྷིཏབྦཾ རཛནཀཱལེ ལགྒནཏྠཱཡཱ’’ཏི (པཱརཱ. ཨཊྛ. ༡.༨༥).

སཱུཙིཀམྨཝིཀཱརཾ ཝཱཏི ཙཱིཝརམཎྜནཏྠཱཡ ནཱནཱསུཏྟཀེཧི སཏཔདིསདིསཾ སིབྦནྟཱ ཨཱགནྟུཀཔཊྚཾ ¶ ཋཔེནྟི, ཨེཝརཱུཔཾ སཱུཙིཀམྨཝིཀཱརཾ ཝཱ. ཨཉྙཾ ཝཱ པན ཀིཉྩིཔཱིཏི ཨཉྙམྤི ཡཾ ཀིཉྩི མཱལཱཀམྨམིགཔཀྑིཔདཱདིཀཾ སིབྦནཝིཀཱརཾ. ཀཱཏུནྟི སཡཾ ཀཱཏུཾ. ཀཱརཱཔེཏུནྟི ཨཉྙེན ཝཱ ཀཱརཱཔེཏུཾ.

ཡོ བྷིཀྑུ པརཾ ཨུཏྟམཾ ཝཎྞམཊྛམབྷིཔཏྠཡནྟོ ཀཉྫིཀཔིཊྛཁལིཨལླིཀཱདཱིསུ ཙཱིཝརཾ པཀྑིཔཏི, ཏསྶ པན བྷིཀྑུནོ དུཀྐཊཱ མོཀྑོ ན ཝིཛྫཏཱིཏི ཡོཛནཱ. ཀཉྫིཀནྟི ཝཱཡནཏནྟམཀྑནཾ ཀཉྫིཀསདིསཱ སུལཱཀཉྫིཀཾ. པིཊྛནྟི ཏཎྜུལཔིཊྛཾ. ཏཎྜུལཔིཊྛེཧི པཀྐཱ ཁལི. ཨལླིཀཱཏི ནིཡྻཱསོ. ཨཱདི-སདྡེན ལཱཁཱདཱིནཾ གཧཎཾ. ཙཱིཝརསྶ ཀརཎེ ཀརཎཀཱལེ སམུཊྛིཏཱནཾ སཱུཙིཧཏྠམལཱདཱིནཾ ཀིལིཊྛཀཱལེ དྷོཝནཏྠཉྩ ཀཉྫིཀཔིཊྛཁལིཨལླིཀཱདཱིསུ པཀྑིཔཏི, ཝཊྚཏཱིཏི ཡོཛནཱ.

ཏཏྠཱཏི ཡེན ཀསཱཝེན ཙཱིཝརཾ རཛཏི, ཏསྨིཾ རཛནེ ཙཱིཝརསྶ སུགནྡྷབྷཱཝཏྠཱཡ གནྡྷཾ ཝཱ ཨུཛྫལབྷཱཝཏྠཱཡ ཏེལཾ ཝཱ ཝཎྞཏྠཱཡ ལཱཁཾ ཝཱ. ཀིཉྩཱིཏི ཨེཝརཱུཔཾ ཡཾ ཀིཉྩི. མཎིནཱཏི པཱསཱཎེན. ཨཉྙེནཔི ཙ ཀེནཙཱིཏི ཡེན ཨུཛྫལཾ ཧོཏི, ཨེཝརཱུཔེན མུགྒརཱདིནཱ ཨཉྙེནཔི ཀེནཙི ཝཏྠུནཱ. དོཎིཡཱཏི རཛནམྦཎེ ན གྷཾསིཏབྦཾ ཧཏྠེན གཱཧཱཔེཏྭཱ ན གཧེཏབྦཾ. རཏྟཾ ཙཱིཝརཾ ཧཏྠེཧི ཀིཉྩི ཐོཀཾ པཧརིཏུཾ ཝཊྚཏཱིཏི ¶ ཡོཛནཱ. ཡཏྠ པཀྐརཛནཾ པཀྑིཔནྟི, སཱ རཛནདོཎཱི. ཏཏྠ ཨཾསབདྡྷཀཀཱཡབནྡྷནཱདིཾ གྷཊྚེཏུཾ ཝཊྚཏཱིཏི གཎྛིཔདེ ཝུཏྟཾ.

གཎྛིཀེཏི ཝེལུ༹དནྟཝིསཱཎཱདིམཡགཎྛིཀེ. ལེཁཱ ཝཱཏི ཝཊྚཱདིབྷེདཱ ལེཁཱ ཝཱ. པིལ༹ཀཱཏི སཱསཔབཱིཛསདིསཱ ཁུདྡཀབུབྦུལཱ༹. པཱལི༹ཀཎྞིཀབྷེདཏོཏི མཎིཀཱཝལི༹རཱུཔཔུཔྥཀཎྞིཀརཱུཔབྷེདཏོ. ‘‘ཀཔྤབིནྡུཝིཀཱརོ ཝཱ ན ཝཊྚཏཱིཏི ཡོཛནཱ’’ཏི ཝུཏྟཾ, ཏསྨཱ ཏཐེཝ ཙཱིཝརེ པཊིཔཛྫིཏབྦཾ.

༩. པཏྟེ ཝཱ ཐཱལཀེ ཝཱཏིཨཱདཱིསུ ཐཱལཀེཏི ཏམྦཱདིམཡེ པུགྒལིཀེ ཏིཝིདྷེཔི ཀཔྤིཡཐཱལཀེ. ན ཝཊྚཏཱིཏི མཎིཝཎྞཀརཎཔཡོགོ ན ཝཊྚཏི, ཏེལཝཎྞཔཡོགོ པན ཝཊྚཏི. ཏེལཝཎྞོཏི སམཎསཱརུཔྤཝཎྞཾ སནྡྷཱཡ ཝུཏྟཾ, མཎིཝཎྞཾ པན པཏྟཾ ཨཉྙེན ཀཏཾ ལབྷིཏྭཱ པརིབྷུཉྫིཏུཾ ཝཊྚཏཱིཏི ཝདནྟི. པཏྟམཎྜལེཏི ཏིཔུསཱིསཱདིམཡེ པཏྟཊྛཔནཀམཎྜལེ. ‘‘ན བྷིཀྑཝེ ཝིཙིཏྲཱནི པཏྟམཎྜལཱནི དྷཱརེཏབྦཱནི རཱུཔཀཱཀིཎྞཱནི བྷིཏྟིཀམྨཀཏཱནཱི’’ཏི (ཙཱུལ༹ཝ. ༢༥༣) ཝུཏྟཏྟཱ ¶ ‘‘བྷིཏྟིཀམྨཾ ན ཝཊྚཏཱི’’ཏི ཝུཏྟཾ. ‘‘ཨནུཛཱནཱམི, བྷིཀྑཝེ, མཀརདནྟཀཾ ཚིནྡིཏུ’’ནྟི (ཙཱུལ༹ཝ. ༢༥༣) ཝུཏྟཏྟཱ ‘‘མཀརདནྟཀཾ པན ཝཊྚཏཱི’’ཏི ཝུཏྟཾ. ཏེནཱཧུ པོརཱཎཱ –

‘‘ཐཱལཀསྶ ཙ པཏྟསྶ, བཧི ཨནྟོཔི ཝཱ པན;

ཨཱརགྒེན ཀཏཱ ལེཁཱ, ན ཙ ཝཊྚཏི ཀཱཙིཔི.

‘‘ཨཱརོཔེཏྭཱ བྷམཾ པཏྟཾ, མཛྫིཏྭཱ ཙེ པཙནྟི ཙ;

‘མཎིཝཎྞཾ ཀརིསྶཱམ’, ཨིཏི ཀཱཏུཾ ན ཝཊྚཏི.

‘‘པཏྟམཎྜལཀེ ཀིཉྩི;

བྷིཏྟིཀམྨཾ ན ཝཊྚཏི;

ན དོསོ ཀོཙི ཏཏྠསྶ;

ཀཱཏུཾ མཀརདནྟཀ’’ནྟི.

ཝིནཡསཱརཏྠསནྡཱིཔནིཡམྤི ¶ ཨཱརགྒེནཱཏི ཨཱརཀཎྚཀགྒེན, སཱུཙིམུཁེན ཝཱ. ཀཱཙིཔི ལེཁཱཏི ཝཊྚཀགོམུཏྟཱདིསཎྛཱནཱ ཡཱ ཀཱཙིཔི རཱཛི. བྷམཾ ཨཱརོཔེཏྭཱཏི བྷམེ ཨལླཱིཡཱཔེཏྭཱ. པཏྟམཎྜལཀེཏི པཏྟེ ཚཝིརཀྑཎཏྠཱཡ ཏིཔུསཱིསཱདཱིཧི ཀཏེ པཏྟསྶ ཧེཊྛཱ ཨཱདྷཱརཱདཱིནཾ ཨུཔརི ཀཱཏབྦེ པཏྟམཎྜལཀེ. བྷིཏྟིཀམྨནྟི ནཱནཱཀཱརརཱུཔཀཀམྨཝིཙིཏྟཾ. ཡཐཱཧ ‘‘ན, བྷིཀྑཝེ, ཝིཙིཏྲཱནི པཏྟམཎྜལཱནི དྷཱརེཏབྦཱནི རཱུཔཀཱཀིཎྞཱནི བྷིཏྟིཀམྨཀཏཱནཱི’’ཏི. ཏཏྠཱཏི ཏསྨིཾ པཏྟམཎྜལེ. ཨསྶཱཏི བྷིཀྑུསྶ. མཀརདནྟཀནྟི གིརིཀཱུཊནྟི ཝུཏྟཾ, ཏསྨཱ ཨེཝཾ པཏྟཐཱལཀཱདཱིསུ པཊིཔཛྫིཏབྦཾ.

དྷམཀརཎ…པེ… ལེཁཱ ན ཝཊྚཏཱིཏི ཨཱརགྒེན དིནྣལེཁཱ ན ཝཊྚཏི, ཛཱཏིཧིངྒུལིཀཱདིཝཎྞེཧི ཀཏལེཁཱ པན ཝཊྚཏི. ཚཏྟམུཁཝཊྚིཡནྟི དྷམཀརཎསྶ ཧཏྠེན གཧཎཏྠཾ ཀཏསྶ ཚཏྟཱཀཱརསྶ མུཁཝཊྚིཡཾ. ‘‘པརིསྶཱཝནབནྡྷཊྛཱནེ’’ཏི ཀེཙི. ཝིནཡཝིནིཙྪཡེཔི –

‘‘ན ¶ དྷམྨཀརཎཙྪཏྟེ, ལེཁཱ ཀཱཙིཔི ཝཊྚཏི;

ཀུཙྪིཡཾ ཝཱ ཋཔེཏྭཱ ཏཾ, ལེཁཾ ཏུ མུཁཝཊྚིཡ’’ནྟི. –

ཝུཏྟཾ. ཏཊྚཱིཀཱཡཾ པན ‘‘མུཁཝཊྚིཡཱ ཡཱ ལེཁཱ པརིསྶཱཝནབནྡྷནཏྠཱཡ ཨནུཉྙཱཏཱ, ཏཾ ལེཁཾ ཋཔེཏྭཱ དྷམཀརཎཙྪཏྟེ ཝཱ ཀུཙྪིཡཾ ཝཱ ཀཱཙི ལེཁཱ ན ཝཊྚཏཱིཏི ཡོཛནཱ’’ཏི ཝུཏྟཾ, ཏསྨཱ ཏཏྠ ཝུཏྟནཡེནེཝ དྷམཀརཎེ པཊིཔཛྫིཏབྦཾ.

༡༠. ཀཱཡབནྡྷནེ པན ཀཀྐཊཀྑཱིནཱིཏི ཀཀྐཊཀསྶ ཨཀྑིསདིསཱནི. མཀརམུཁནྟི མཀརམུཁསཎྛཱནཾ. དེཌྜུབྷསཱིསནྟི ཨུདཀསཔྤསཱིསསདིསསཎྛཱནཱནི. ཨཙྪཱིནཱིཏི ཀུཉྫརཙྪིསཎྛཱནཱནི. ཨེཀམེཝ ཝཊྚཏཱིཏི ཨེཏྠ ཨེཀརཛྫུཀཾ དྭིགུཎཏིགུཎཾ ཀཏྭཱ བནྡྷིཏུཾ ན ཝཊྚཏི, ཨེཀམེཝ པན སཏཝཱརམྤི སརཱིརཾ པརིཀྑིཔིཏྭཱ བནྡྷིཏུཾ ཝཊྚཏི. ‘‘བཧུརཛྫུཀེ ཨེཀཏོ ཀཏྭཱ ཨེཀེན ¶ ནིརནྟརཾ ཝེཋེཏྭཱ ཀཏཾ བཧུརཛྫུཀནྟི ན ཝཏྟབྦཾ, ཏཾ ཝཊྚཏཱི’’ཏི ཝུཏྟཏྟཱ ཏཾ མུརཛསངྑཾ ན གཙྪཏཱིཏི ཝེདིཏབྦཾ. མུརཛཉྷི ནཱནཱཝཎྞེཧི སུཏྟེཧི མུརཛཝཊྚིསཎྛཱནཾ ཝེཋེཏྭཱ ཀརོནྟི. ཨིདཾ པན མུརཛཾ མདྡཝཱིཎསངྑཱཏཾ པཱམངྒསཎྛཱནཉྩ དསཱསུ ཝཊྚཏི ‘‘ཀཱཡབནྡྷནསྶ དསཱ ཛཱིརནྟི. ཨནུཛཱནཱམི, བྷིཀྑཝེ, མུརཛཾ མདྡཝཱིཎ’’ནྟི (ཙཱུལ༹ཝ. ༢༧༨) ཝུཏྟཏྟཱ.

ཝིདྷེཏི དསཱཔརིཡོསཱནེ ཐིརབྷཱཝཱཡ དནྟཝིསཱཎསུཏྟཱདཱིཧི ཀཏེ ཝིདྷེ. སཱརཏྠདཱིཔནིཡཾ (སཱརཏྠ. ཊཱི. ༢.༨༥) པན ‘‘ཀཱཡབནྡྷནསྶ པཱསནྟེ དསཱམཱུལེ ཏསྶ ཐིརབྷཱཝཏྠཾ ཀཏྟབྦེ དནྟཝིསཱཎཱདིམཡེ ཝིདྷེ’’ཏི ཝུཏྟཾ. ཨཊྛམངྒལཱནི ནཱམ སངྑོ, ཙཀྐཾ, པུཎྞཀུམྦྷོ, གཡཱ, སིརཱིཝཙྪོ, ཨངྐུསོ, དྷཛཾ, སོཝཏྠིཀནྟི. མཙྪཡུགལ༹ཚཏྟནནྡིཡཱཝཊྚཱདིཝསེནཔི ཝདནྟི. པརིཙྪེདལེཁཱམཏྟནྟི དནྟཱདཱིཧི ཀཏསྶ ཝིདྷསྶ ཨུབྷོསུ ཀོཊཱིསུ ཀཱཏབྦཔརིཙྪེདརཱཛིམཏྟཾ. ཝིནཡཝིནིཙྪཡཔྤཀརཎེཔི –

‘‘སུཏྟཾ ཝཱ དིགུཎཾ ཀཏྭཱ, ཀོཊྚེནྟི ཙ ཏཧིཾ ཏཧིཾ;

ཀཱཡབནྡྷནསོབྷཏྠཾ, ཏཾ ན ཝཊྚཏི བྷིཀྑུནོ.

‘‘དསཱམུཁེ དལ༹ྷཏྠཱཡ, དྭཱིསུ ཨནྟེསུ ཝཊྚཏི;

མཱལཱཀམྨལཏཱཀམྨ-ཙིཏྟིཀམྤི ན ཝཊྚཏི.

‘‘ཨཀྑཱིནི ¶ ཏཏྠ དསྶེཏྭཱ;

ཀོཊྚིཏེ པན ཀཱ ཀཐཱ.

ཀཀྐཊཀྑཱིནི ཝཱ ཏཏྠ;

ཨུཊྛཱཔེཏུཾ ན ཝཊྚཏི.

‘‘གྷཊཾ དེཌྜུབྷསཱིསཾ ཝཱ, མཀརསྶ མུཁམྤི ཝཱ;

ཝིཀཱརརཱུཔཾ ཡཾ ཀིཉྩི, ན ཝཊྚཏི དསཱམུཁེ.

‘‘ཨུཛུཀཾ ¶ མཙྪཀཎྚཾ ཝཱ, མཊྛཾ ཝཱ པན པཊྚིཀཾ;

ཁཛྫཱུརིཔཏྟཀཱཀཱརཾ, ཀཏྭཱ ཝཊྚཏི ཀོཊྚིཏཾ.

‘‘པཊྚིཀཱ སཱུཀརནྟནྟི, དུཝིདྷཾ ཀཱཡབནྡྷནཾ;

རཛྫུཀཱ དུསྶཔཊྚཱདི, སབྦཾ ཏསྶཱནུལོམིཀཾ.

‘‘མུརཛཾ མདྡཝཱིཎཉྩ, དེཌྜུབྷཉྩ ཀལཱབུཀཾ;

རཛྫུཡོ ཙ ན ཝཊྚནྟི, པུརིམཱ དྭེདསཱ སིཡུཾ.

‘‘དསཱ པཱམངྒསཎྛཱནཱ, ནིདྡིཊྛཱ ཀཱཡབནྡྷནེ;

ཨེཀཱ དྭིཏིཙཏསྶོ ཝཱ, ཝཊྚནྟི ན ཏཏོ པརཾ.

‘‘ཨེཀརཛྫུམཡཾ ཝུཏྟཾ, མུནིནཱ ཀཱཡབནྡྷནཾ;

ཏཉྩ པཱམངྒསཎྛཱནཾ, ཨེཀམྤི ཙ ན ཝཊྚཏི.

‘‘རཛྫུཀེ ཨེཀཏོ ཀཏྭཱ, བཧཱུ ཨེཀཱཡ རཛྫུཡཱ;

ནིརནྟརཉྷི ཝེཋེཏྭཱ, ཀཏཾ ཝཊྚཏི བནྡྷིཏུཾ.

‘‘དནྟཀཊྛཝིསཱཎཊྛི-ལོཧཝེལུ༹ནལ༹བྦྷཝཱ;

ཛཏུསངྑམཡཱ སུཏྟ-ཕལཛཱ ཝིདྷཀཱ མཏཱ.

‘‘ཀཱཡབནྡྷནཝིདྷེཔི ¶ , ཝིཀཱརོ ན ཙ ཝཊྚཏི;

ཏཏྠ ཏཏྠ པརིཙྪེད-ལེཁཱམཏྟཾ ཏུ ཝཊྚཏཱི’’ཏི. –

ཝུཏྟཾ.

ཝིནཡསཱརཏྠསནྡཱིཔནིཡམྤི ཏཧིཾ ཏཧིནྟི པཊྚིཀཱཡ ཏཏྠ ཏཏྠ. ཏནྟི ཏཐཱཀོཊྚིཏདིགུཎསུཏྟཀཱཡབནྡྷནཾ. ཨནྟེསུ དལ༹ྷཏྠཱཡ དསཱམུཁེ དིགུཎཾ ཀཏྭཱ ཀོཊྚེནྟི, ཝཊྚཏཱིཏི ཡོཛནཱ. ཙིཏྟཀམྤཱིཏི མཱལཱཀམྨལཏཱཀམྨཙིཏྟཡུཏྟམྤི ཀཱཡབནྡྷནཾ. ཨཀྑཱིནཱིཏི ཀུཉྫརཀྑཱིནི. ཏཏྠཱཏི ཀཱཡབནྡྷནེ ན ཝཊྚཏཱིཏི ཀཱ ཀཐཱ. ཨུཊྛཱཔེཏུནྟི ཨུཀྐིརིཏུཾ.

གྷཊནྟི གྷཊསཎྛཱནཾ. དེཌྜུབྷསཱིསཾ ཝཱཏི ཨུདཀསཔྤསཱིསཾ མུཁསཎྛཱནཾ ཝཱ. ཡཾ ཀིཉྩི ཝིཀཱརརཱུཔཾ དསཱམུཁེ ན ཝཊྚཏཱིཏི ཡོཛནཱ. ཨེཏྠ ཙ ཨུབྷཡཔསྶེསུ མཙྪཀཎྚཀཡུཏྟཾ མཙྪསྶ པིཊྛིཀཎྚཀཾ ཝིཡ ཡསྶཱ པཊྚིཀཱཡ ཝཱཡནཾ ཧོཏི, ཨིདཾ ཀཱཡབནྡྷནཾ ¶ མཙྪཀཎྚཀཾ ནཱམ. ཡསྶ ཁཛྫཱུརིཔཏྟསཎྛཱནམིཝ ཝཱཡནཾ ཧོཏི, ཏཾ ཁཛྫཱུརིཔཏྟཀཱཀཱརཾ ནཱམ.

པཀཏིཝིཀཱརཱ པཊྚིཀཱ སཱུཀརནྟཾ ནཱམ ཀུཉྩིཀཱཀོསསཎྛཱནཾ. ཏསྶ དུཝིདྷསྶ ཀཱཡབནྡྷནསྶ. ཏཏྠ རཛྫུཀཱ སཱུཀརནྟཱནུལོམིཀཱ, དུསྶཔཊྚཾ པཊྚིཀཱནུལོམིཀཾ. ཨཱདི-སདྡེན མུདྡིཀཀཱཡབནྡྷནཾ གཧིཏཾ, ཏཉྩ སཱུཀརནྟཱནུལོམིཀཾ. ཡཐཱཧ ‘‘ཨེཀརཛྫུཀཾ པན མུདྡིཀཀཱཡབནྡྷནཉྩ སཱུཀརནྟཾ ཨནུལོམེཏཱི’’ཏི (ཙཱུལ༹ཝ. ཨཊྛ. ༢༧༨). ཏཏྠ རཛྫུཀཱ ནཱམ ཨེཀཱཝཊྚཱ, བཧུརཛྫུཀསྶ ཨཀཔྤིཡབྷཱཝཾ ཝཀྑཏི. མུདྡིཀཀཱཡབནྡྷནཾ ནཱམ ཙཏུརསྶཾ ཨཀཏྭཱ སཛྫིཏནྟི གཎྛིཔདེ ཝུཏྟཾ.

མུརཛཾ ནཱམ མུརཛཝཊྚིསཎྛཱནཾ ཝེཋེཏྭཱ ཀཏཾ. ཝེཋེཏྭཱཏི ནཱནཱསུཏྟེཧི ཝེཋེཏྭཱ. སིཀྑཱབྷཱཛནཝིནིཙྪཡེ པན ‘‘བཧུཀཱ རཛྫུཡོ ཨེཀཏོ ཀཏྭཱ ཨེཀཱཡ རཛྫུཡཱ ཝེཋིཏ’’ནྟི ཝུཏྟཾ. མདྡཝཱིཎཾ ནཱམ པཱམངྒསཎྛཱནཾ. དེཌྜུབྷཀཾ ནཱམ ཨུདཀསཔྤསདིསཾ. ཀལཱབུཀཾ ནཱམ བཧུརཛྫུཀཾ. རཛྫུཡོཏི ཨུབྷཡཀོཊིཡཾ ཨེཀཏོ ཨབནྡྷཱ བཧུརཛྫུཡོ, ཏཐཱབནྡྷཱ ཀལཱབུཀཾ ནཱམ ཧོཏི. ན ཝཊྚནྟཱིཏི མུརཛཱདཱིནི ཨིམཱནི སབྦཱནི ཀཱཡབནྡྷནཱནི ན ཝཊྚནྟི. པུརིམཱ དྭེཏི མུརཛཾ ¶ མདྡཝཱིཎནཱམཉྩཱཏི དྭེ. ‘‘དསཱསུ སིཡུ’’ནྟི ཝཏྟབྦེ གཱཐཱབནྡྷཝསེན ཝཎྞལོཔེན ‘‘དསཱ སིཡུ’’ནྟི ཝུཏྟཾ. ཡཐཱཧ ‘‘མུརཛཾ མདྡཝཱིཎནྟི ཨིདཾ དསཱསུཡེཝ ཨནུཉྙཱཏ’’ནྟི.

པཱམངྒསཎྛཱནཱཏི པཱམངྒདཱམཾ ཝིཡ ཙཏུརསྶསཎྛཱནཱ. ཨེཀརཛྫུམཡནྟི ནཱནཱཝཊྚེ ཨེཀཏོ ཝཊྚེཏྭཱ ཀཏཾ རཛྫུམཡཾ ཀཱཡབནྡྷནཾ ཝཏྟུཾ ཝཊྚཏཱིཏི ‘‘རཛྫུཀཱ དུསྶཔཊྚཱདཱི’’ཏི ཨེཏྠ ཨེཀཝཊྚརཛྫུཀཱ གཧིཏཱ. ཨིདྷ པན ནཱནཱཝཊྚེ ཨེཀཏོ ཝཊྚེཏྭཱ ཀཏཱ ཨེཀཱཝ རཛྫུ གཧིཏཱ. ཏཉྩཱཏི ཏཾ ཝཱ ནཡམྤི ཨེཀརཛྫུཀཀཱཡབནྡྷནཾ པཱམངྒསཎྛཱནེན གནྠིཏཾ. ཨེཀམྤི ཙ ན ཝཊྚཏཱིཏི ཀེཝལམྤི ན ཝཊྚཏི.

བཧཱུ ¶ རཛྫུཀེ ཨེཀཏོ ཀཏྭཱཏི ཡོཛནཱ. ཝཊྚཏི བནྡྷིཏུནྟི མུརཛཾ ཀལཱབུཀཉྩ ན ཧོཏི, རཛྫུཀཀཱཡབནྡྷནམེཝ ཧོཏཱིཏི ཨདྷིཔྤཱཡོ. ཨཡཾ པན ཝིནིཙྪཡོ ‘‘བཧུརཛྫུཀེ ཨེཀཏོ ཀཏྭཱ ཨེཀེན ནིརནྟརཾ ཝེཋེཏྭཱ ཀཏཾ བཧུརཛྫུཀནྟི ན ཝཏྟབྦཾ, ཏཾ ཝཊྚཏཱི’’ཏི ཨཊྛཀཐཱགཏོ ཨིདྷ ཝུཏྟོ. སིཀྑཱབྷཱཛནཝིནིཙྪཡེ ‘‘བཧུརཛྫུཡོ ཨེཀཏོ ཀཏྭཱ ཨེཀཱཡ ཝེཋིཏཾ མུརཛཾ ནཱམཱ’’ཏི ཡཾ ཝུཏྟཾ, ཏཾ ཨིམིནཱ ཝིརུཛ྄ཛྷནཏོ ན གཧེཏབྦཾ.

དནྟ-སདྡེན ཧཏྠིདནྟཱ ཝུཏྟཱ. ཛཏཱུཏི ལཱཁཱ. སངྑམཡནྟི སངྑནཱབྷིམཡཾ. ཝིདྷཀཱ མཏཱཏི ཨེཏྠ ཝེདྷིཀཱཏིཔི པཱཋོ, ཝིདྷཔརིཡཱཡོ. ཀཱཡབནྡྷནཝིདྷེཏི ཀཱཡབནྡྷནསྶ དསཱཡ ཐིརབྷཱཝཏྠཾ ཀཊྛདནྟཱདཱིཧི ཀཏེ ཝིདྷེ. ཝིཀཱརོ ཨཊྛམངྒལཱདིཀོ. ཏཏྠ ཏཏྠཱཏི ཏསྨིཾ ཏསྨིཾ ཋཱནེ. ཏུ-སདྡེན གྷཊཱཀཱརོཔི ཝཊྚཏཱིཏི དཱིཔེཏཱིཏི ཨཏྠོ པཀཱསིཏོ, ཏསྨཱ ཏེན ནཡེན ཀཱཡབནྡྷནཝིཙཱརོ ཀཱཏབྦོཏི.

༡༡. ཨཉྫནིཡཾ ‘‘ཨུཛུཀམེཝཱ’’ཏི ཝུཏྟཏྟཱ ཙཏུརསྶཱདིསཎྛཱནཱཔི ཝངྐགཏིཀཱ ན ཝཊྚཏི. སིཔཱཊིཀཱཡཱཏི ཝཱསིཨཱདིབྷཎྜཔཀྑིཔནེ. ཝིནཡཝིནིཙྪཡཔྤཀརཎེ པན –

‘‘མཱལཱཀམྨལཏཱཀམྨ-ནཱནཱརཱུཔཝིཙིཏྟིཏཱ;

ན ཙ ཝཊྚཏི བྷིཀྑཱུནཾ, ཨཉྫནཱི ཛནརཉྫནཱི.

‘‘ཏཱདིསཾ ¶ པན གྷཾསིཏྭཱ, ཝེཋེཏྭཱ སུཏྟཀེན ཝཱ;

ཝལ༹ཉྫནྟསྶ བྷིཀྑུསྶ, ན དོསོ ཀོཙི ཝིཛྫཏི.

‘‘ཝཊྚཱ ཝཱ ཙཏུརསྶཱ ཝཱ, ཨཊྛཾསཱ ཝཱཔི ཨཉྫནཱི;

ཝཊྚཏེཝཱཏི ནིདྡིཊྛཱ, ཝཎྞམཊྛཱ ན ཝཊྚཏི.

‘‘ཏཐཱཉྫནིསལཱཀཱཔི, ཨཉྫནིཐཝིཀཱཡ ཙ;

ནཱནཱཝཎྞེཧི སུཏྟེཧི, ཙིཏྟཀམྨཾ ན ཝཊྚཏི.

‘‘ཨེཀཝཎྞེན ¶ སུཏྟེན, སིཔཱཊིཾ ཡེན ཀེནཙི;

ཡཾ ཀིཉྩི པན སིབྦེཏྭཱ, ཝལ༹ཉྫནྟསྶ ཝཊྚཏཱི’’ཏི. –

ཨཱགཏཾ.

ཏཊྚཱིཀཱཡམྤི མཱལཱ…པེ… ཙིཏྟིཏཱཏི མཱལཱཀམྨལཏཱཀམྨེཧི ཙ མིགཔཀྑིརཱུཔཱདིནཱནཱརཱུཔེཧི ཙ ཝིཙིཏྟིཏཱ. ཛནརཉྫནཱིཏི བཱལཛནཔལོབྷིནཱི. ཨཊྛཾསཱ ཝཱཔཱིཏི ཨེཏྠ ཨཔི-སདྡེན སོལ༹སཾསཱདཱིནཾ གཧཎཾ. ཝཎྞམཊྛཱཏི མཱལཱཀམྨཱདིཝཎྞམཊྛཱ. ཨཉྫནཱིསལཱཀཱཔི ཏཐཱ ཝཎྞམཊྛཱ ན ཝཊྚཏཱིཏི ཡོཛནཱ. ཨཉྫནཱིཐཝིཀཱཡ ཙ ནཱནཱཝཎྞེཧི སུཏྟེཧི ཙིཏྟཀམྨཾ ན ཝཊྚཏཱིཏི པཱཋོ ཡུཛྫཏི, ‘‘ཐཝིཀཱཔི ཝཱ’’ཏི པཱཋོ དིསྶཏི, སོ ན གཧེཏབྦོ. ‘‘པཱིཏཱདིནཱ ཡེན ཀེནཙི ཨེཀཝཎྞེན སུཏྟེན པིལོཏིཀཱདིམཡཾ ཀིཉྩིཔི སིཔཱཊིཀཾ སིབྦེཏྭཱ ཝལ༹ཉྫནྟསྶ ཝཊྚཏཱིཏི ཡོཛནཱ’’ཏི ཨཱགཏཾ.

༡༢. ཨཱརཀཎྚཀཱདཱིསུ ཨཱརཀཎྚཀེཏི པོཏྠཀཱདིཨབྷིསངྑརཎཏྠཾ ཀཏེ དཱིགྷམུཁསཏྠཀེ. བྷམཀཱརཱནཾ དཱརུཨཱདིལིཁནསཏྠཀནྟི ཀེཙི. ཝཊྚམཎིཀནྟི ཝཊྚཾ ཀཏྭཱ ཨུཊྛཱཔེཏབྦབུབྦུལ༹ཀཾ. ཨཉྙནྟི ཨིམིནཱ པིལ༹ཀཱདིཾ སངྒཎྷཱཏི. པིཔྥལིཀེཏི ཡཾ ཀིཉྩི ཚེདནཀེ ཁུདྡཀསཏྠེ. མཎིཀནྟི ཨེཀཝཊྚམཎི. པིལ༹ཀནྟི སཱསཔམཏྟིཀཱམུཏྟརཱཛིསདིསཱ བཧུཝཊྚལེཁཱ. ཨིམསྨིཾ ཨདྷིཀཱརེ ཨཝུཏྟཏྟཱ ལེཁནིཡཾ ཡཾ ཀིཉྩི ཝཎྞམཊྛཾ ཝཊྚཏཱིཏི ཝདནྟི. ཝཛིརབུདྡྷིཊཱིཀཱཡཾ པན ‘‘ཀུཉྩིཀཱཡ སེནཱསནཔརིཀྑཱརཏྟཱ སུཝཎྞརཱུཔིཡམཡཱཔི ཝཊྚཏཱིཏི ཚཱཡཱ དིསྶཏི. ‘ཀུཉྩིཀཱཡ ¶ ཝཎྞམཊྛཀམྨཾ ན ཝཊྚཏཱི’ཏི (པཱརཱ. ཨཊྛ. ༡.༨༥) ཝཙནཏོ ཨཉྙེ ཀཔྤིཡལོཧཱདིམཡཱཝ ཀུཉྩིཀཱ ཀཔྤནྟི པརིཧརཎཱིཡཔརིཀྑཱརཏྟཱ’’ཏི ཝུཏྟཾ. ཨཱརཀཎྚཀོ པོཏྠཀཱདིཀརཎསཏྠཀཛཱཏི, ཨཱམཎྜསཱརཀོ ཨཱམལཀཕལམཡོཏི ཝདནྟི.

ཝལིཏཀནྟི ¶ ནཁཙྪེདནཀཱལེ དལ༹ྷགྒཧཎཏྠཾ ཝལིཡུཏྟམེཝ ཀརོནྟི. ཏསྨཱ ཏཾ ཝཊྚཏཱིཏི ཨིམིནཱ ཨཉྙམྤི ཝིཀཱརཾ དལ༹ྷཱིཀམྨཱདིཨཏྠཱཡ ཀརོནྟི, ན ཝཎྞམཊྛཏྠཱཡ, ཏཾ ཝཊྚཏཱིཏི དཱིཔིཏཾ, ཏེན ཙ ཀཏྟརདཎྜཀོཊིཡཾ ཨཉྙམཉྙཾ སངྒྷཊྚནེན སདྡནིཙྪརཎཏྠཱཡ ཀཏཝལཡཱདིཀཾ ཨཝུཏྟམྤི ཡཏོ ཨུཔཔནྣཾ ཧོཏི. ཨེཏྠ ཙ དལ༹ྷཱིཀམྨཱདཱིཏི ཨཱདི-སདྡེན པརིསྶཡཝིནོདནཱདིཾ སངྒཎྷཱཏི, ཏེན ཀཏྟརཡཊྛིཀོཊིཡཾ ཀཏཝལཡཱནཾ ཨཉྙམཉྙསངྒྷཊྚནེན སདྡནིཙྪརཎཾ དཱིགྷཛཱཏིཀཱདིཔརིསྶཡཝིནོདནཏྠཾ ཧོཏི, ཏསྨཱ ཝཊྚཏཱིཏི དཱིཔེཏི. ཏེནཱཧ ཨཱཙརིཡཝརོ –

‘‘མཎིཀཾ པིལ༹ཀཾ ཝཱཔི, པིཔྥལེ ཨཱརཀཎྚཀེ;

ཋཔེཏུཾ པན ཡཾ ཀིཉྩི, ན ཙ ཝཊྚཏི བྷིཀྑུནོ.

‘‘དཎྜཀེཔི པརིཙྪེད-ལེཁཱམཏྟཾ ཏུ ཝཊྚཏི;

ཝལིཏྭཱ ཙ ནཁཙྪེདཾ, ཀརོནྟཱིཏི ཧི ཝཊྚཏཱི’’ཏི.

ཏསྶ ཝཎྞནཱཡམྤི མཎིཀནྟི ཐཱུལབུབྦུལ༹ཾ. པཱིལ༹ཀནྟི སུཁུམབུབྦུལ༹ཾ. པིཔྥལེཏི ཝཏྠཙྪེདནསཏྠེ. ཨཱརཀཎྚཀེཏི པཏྟདྷཱརཝལཡཱནཾ ཝིཛ྄ཛྷནཀཎྚཀེ. ཋཔེཏུནྟི ཨུཊྛཱཔེཏུཾ. ཡཾ ཀིཉྩཱིཏི སེསཝཎྞམཊྛམྤི ཙ. དཎྜཀེཏི པིཔྥལིདཎྜཀེ. ཡཐཱཧ ‘‘པིཔྥལིཀེཔི མཎིཀཾ ཝཱ པིལ༹ཀཾ ཝཱ ཡཾ ཀིཉྩི ཋཔེཏུཾ ན ཝཊྚཏི, དཎྜཀེ པན པརིཙྪེདལེཁཱ ཝཊྚཏཱི’’ཏི. པརིཙྪེདལེཁཱམཏྟནྟི ཨཱཎིབནྡྷནཊྛཱནཾ པཏྭཱ པརིཙྪིནྡནཏྠཾ ཨེཀཱཝ ལེཁཱ ཝཊྚཏཱིཏི. ཝལིཏྭཱཏི ཨུབྷཡཀོཊིམུཁཾ ཀཏྭཱ མཛ྄ཛྷེ ཝལིཡོ གཱཧེཏྭཱ ནཁཙྪེདཾ ཡསྨཱ ཀརོནྟི, ཏསྨཱ ཝཊྚཏཱིཏི ཡོཛནཱཏི ཨཱགཏཱ.

ཨུཏྟརཱརཎིཡཾ མཎྜལནྟི ཨུཏྟརཱརཎིཡཱ པཝེསནཏྠཾ ཨཱཝཱཊམཎྜལཾ ཧོཏི. དནྟཀཊྛཙྪེདནཝཱསིཡཾ ཨུཛུཀམེཝ བནྡྷིཏུནྟི སམྦནྡྷོ. ཨེཏྠ ཙ ཨུཛུཀམེཝཱཏི ཨིམིནཱ ཝངྐཾ ཀཏྭཱ བནྡྷིཏུཾ ན ¶ ཝཊྚཏཱིཏི དསྶེཏི, ཏེནེཝ ཨཉྫནིཡམྤི ཏཐཱ དསྶིཏཾ. ཨུབྷོསུ པསྶེསུ ཨེཀཔསྶེ ¶ ཝཱཏི ཝཙནསེསོ, ཝཱསིདཎྜསྶ ཨུབྷོསུ པསྶེསུ དཎྜཀོཊཱིནཾ ཨཙལནཏྠཾ བནྡྷིཏུནྟི ཨཏྠོ. ཀཔྤིཡལོཧེན ཙཏུརསྶཾ ཝཱ ཨཊྛཾསཾ ཝཱ ཀཱཏུཾ ཝཊྚཏཱིཏི ཡོཛནཱ.

༡༣. ཨཱམཎྜསཱརཀེཏི ཨཱམལཀཕལཱནི པིསིཏྭཱ ཏེན ཀཀྐེན ཀཏཏེལབྷཱཛནེ. ཏཏྠ ཀིར པཀྑིཏྟཾ ཏེལཾ སཱིཏཾ ཧོཏི. ཏཐཱ ཧི ཝུཏྟཾ ཨཱཙརིཡེན –

‘‘ཨུཏྟརཱརཎིཡཾ ཝཱཔི, དྷནུཀེ པེལླདཎྜཀེ;

མཱལཱཀམྨཱདི ཡཾ ཀིཉྩི, ཝཎྞམཊྛཾ ན ཝཊྚཏི.

‘‘སཎྜཱསེ དནྟཀཊྛཱནཾ, ཏཐཱ ཚེདནཝཱསིཡཱ;

དྭཱིསུ པསྶེསུ ལོཧེན, བནྡྷིཏུཾ པན ཝཊྚཏི.

‘‘ཏཐཱ ཀཏྟརདཎྜེཔི, ཙིཏྟཀམྨཾ ན ཝཊྚཏི;

ཝཊྚལེཁཱཝ ཝཊྚནྟི, ཨེཀཱ ཝཱ དྭེཔི ཧེཊྛཏོ.

‘‘ཝིསཱཎེ ནཱལི༹ཡཾ ཝཱཔི, ཏཐེཝཱམཎྜསཱརཀེ;

ཏེལབྷཱཛནཀེ སབྦཾ, ཝཎྞམཊྛཾ ཏུ ཝཊྚཏཱི’’ཏི.

ཊཱིཀཱཡམྤི ཨརཎིསཧིཏེ བྷནྟཀིཙྩཀརོ དཎྜོ ཨུཏྟརཱརཎཱི ནཱམ. ཝཱཔཱིཏི པི-སདྡེན ཨདྷརཱརཎིཾ སངྒཎྷཱཏི. ཨུདུཀྑལདཎྜསྶེཏཾ ཨདྷིཝཙནཾ. ཨཉྪནཀཡནྟདྷནུ དྷནུཀཾ ནཱམ. མུསལམཏྠཀཔཱིལ༹ནདཎྜཀོ པེལླདཎྜཀོ ནཱམ. སཎྜཱསེཏི ཨགྒིསཎྜཱསེ. དནྟཀཊྛཱནཾ ཚེདནཝཱསིཡཱ ཏཐཱ ཡཾ ཀིཉྩི ཝཎྞམཊྛཾ ན ཝཊྚཏཱིཏི སམྦནྡྷོ. དྭཱིསུ པསྶེསཱུཏི ཝཱསིཡཱ ཨུབྷོསུ པསྶེསུ. ལོཧེནཱཏི ཀཔྤིཡལོཧེན. བནྡྷིཏུཾ ཝཊྚཏཱིཏི ཨུཛུཀམེཝ ཝཱ ཙཏུརསྶཾ ཝཱ ཨཊྛཾསཾ ཝཱ བནྡྷིཏུཾ ཝཊྚཏི. སཎྜཱསེཏི ཨགྒིསཎྜཱསེཏི ནིསྶནྡེཧེ ཝུཏྟཾ. ཨཊྛཀཐཱཡཾ པནེཏྠ སཱུཙིསཎྜཱསོ དསྶིཏོ ¶ . ཧེཊྛཱཏི ཧེཊྛཱ ཨཡོཔཊྚཝལཡེ. ‘‘ཨུཔརི ཨཧིཙྪཏྟཀམཀུལ༹མཏྟ’’ནྟི ཨཊྛཀཐཱཡཾ ཝུཏྟཾ. ཝིསཱཎེཏི ཏེལཱསིཉྩནཀགཝཡམཧིཾསཱདིསིངྒེ. ནཱལི༹ཡཾ ཝཱཔཱིཏི ཝེལུ༹ནཱལི༹ཀཱདིནཱལི༹ཡཾ. ཨཔི-སདྡེན ཨལཱབུཾ སངྒཎྷཱཏི. ཨཱམཎྜསཱརཀེཏི ཨཱམལཀཙུཎྞམཡཏེལགྷཊེ ¶ . ཏེལབྷཱཛནཀེཏི ཝུཏྟཔྤཀཱརེཡེཝ ཏེལབྷཱཛནེ. སབྦཾ ཝཎྞམཊྛཾ ཝཊྚཏཱིཏི པུམིཏྠིརཱུཔརཧིཏཾ མཱལཱཀམྨཱདི སབྦཾ ཝཎྞམཊྛཾ ཝཊྚཏཱིཏི ཨཱགཏཾ.

བྷཱུམཏྠརཎེཏི ཀཊསཱརཱདིམཡེ པརིཀམྨཀཏཱཡ བྷཱུམིཡཱ ཨཏྠརིཏབྦཨཏྠརཎེ. པཱནཱིཡགྷཊེཏི ཨིམིནཱ སབྦབྷཱཛནེ སངྒཎྷཱཏི. སབྦཾ…པེ… ཝཊྚཏཱིཏི ཡཐཱཝུཏྟེསུ མཉྩཱདཱིསུ ཨིཏྠིཔུརིསརཱུཔམྤི ཝཊྚཏི. ཏེལབྷཱཛནེསུཡེཝ ཨིཏྠིཔུརིསརཱུཔཱནཾ པཊིཀྑིཔིཏཏྟཱ ཏེལབྷཱཛནེན སཧ ཨགཎེཏྭཱ ཝིསུཾ མཉྩཱདཱིནཾ གཧིཏཏྟཱ ཙཱཏི ཝདནྟི. ཀིཉྩཱཔི ཝདནྟི, ཨེཏེསཾ པན མཉྩཱདཱིནཾ ཧཏྠེན ཨཱམསིཏབྦབྷཎྜཏྟཱ ཨིཏྠིརཱུཔམེཏྠ ན ཝཊྚཏཱིཏི གཧེཏབྦཾ. ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༨༥) པན ‘‘ཏཱལཝཎྚབཱིཛནིཨཱདཱིསུ ཝཎྞམཊྛཀམྨཾ ཝཊྚཏཱི’’ཏི ཝུཏྟཾ. ཀིཉྩཱཔི ཏཱནི ཀུཉྩིཀཱ ཝིཡ པརིཧརཎཱིཡཱནི, ཨཐ ཁོ ཨུཙྩཱཝཙཱནི ན དྷཱརེཏབྦཱནཱིཏི པཊིཀྑེཔཱབྷཱཝཏོ ཝུཏྟཾ. ཀེཝལཉྷི ཏཱནི ‘‘ཨནུཛཱནཱམི བྷིཀྑཝེ ཝིདྷཱུཔནཉྩ ཏཱལཝཎྚཉྩཱ’’ཏིཨཱདིནཱ ཝུཏྟཱནི. གཎྛིཔདེ པན ‘‘ཏེལབྷཱཛནེསུ ཝཎྞམཊྛཀམྨཾ ཝཊྚཏི, སེནཱསནཔརིཀྑཱརཏྟཱ ཝུཏྟ’’ནྟི ཝུཏྟཾ. ཨཱཙརིཡབུདྡྷདཏྟཏྠེརེནཔི ཝུཏྟམེཝ –

‘‘པཱནཱིཡསྶ ཨུལུ༹ངྐེཔི, དོཎིཡཾ རཛནསྶཔི;

གྷཊེ ཕལཀཔཱིཋེཔི, ཝལཡཱདྷཱརཀཱདིཀེ.

‘‘ཏཐཱ པཏྟཔིདྷཱནེ ཙ, ཏཱལཝཎྚེ ཙ བཱིཛནེ;

པཱདཔུཉྪནིཡཾ ཝཱཔི, སམྨུཉྫནིཡམེཝ ཙ.

‘‘མཉྩེ ¶ བྷཱུམཏྠརེ པཱིཋེ, བྷིསིབིམྦོཧནེསུ ཙ;

མཱལཱཀམྨཱདིཀཾ ཙིཏྟཾ, སབྦམེཝ ཙ ཝཊྚཏཱི’’ཏི.

༡༤. ཨེཝཾ སམཎཔརིཀྑཱརེསུ ཀཔྤིཡཱཀཔྤིཡཾ ཀཐེཏྭཱ ཨིདཱནི སེནཱསནེ ཀཐེཏུཾ ‘‘སེནཱསནེ པནཱ’’ཏྱཱདིམཱཧ. ཨེཏྠ པན-སདྡོ ཝིསེསཛོཏཀོ. ཏེན སབྦརཏནམཡམྤི ཝཎྞམཊྛཀམྨཾ ཝཊྚཏི, ཀིམངྒཾ པན ཨཉྙཝཎྞམཊྛཀམྨནྟི ཨཏྠཾ ཛོཏེཏི. ཡདི ཨེཝཾ ཀིསྨིཉྩི པཊིསེདྷེཏབྦེ སནྟེཔི ཏཐཱ ཝཏྟབྦཾ སིཡཱཏི ཨཱཧ ‘‘སེནཱསནེ ཀིཉྩི པཊིསེདྷེཏབྦཾ ནཏྠཱི’’ཏི. ཝུཏྟམྤི ཙེཏཾ ཨཱཙརིཡབུདྡྷདཏྟཏྠེརེན –

‘‘ནཱནཱམཎིམཡཏྠམྦྷ-ཀཝཱཊདྭཱརབྷིཏྟིཀཾ ¶ ;

སེནཱསནམནུཉྙཱཏཾ, ཀཱ ཀཐཱ ཝཎྞམཊྛཀེ.

‘‘སོཝཎྞིཡཾ དྭཱརཀཝཱཊབདྡྷཾ;

སུཝཎྞནཱནཱམཎིབྷིཏྟིབྷཱུམིཾ;

ན ཀིཉྩི ཨེཀམྤི ནིསེདྷནཱིཡཾ;

སེནཱསནཾ ཝཊྚཏི སབྦམེཝཱ’’ཏི.

སམནྟཔཱསཱདིཀཱཡམྤི པཋམསངྒྷཱདིསེསཝཎྞནཱཡཾ (པཱརཱ. ཨཊྛ. ༢.༢༨༡) ‘‘སེནཱསནཔརིབྷོགོ པན སབྦཀཔྤིཡོ, ཏསྨཱ ཛཱཏརཱུཔརཛཏམཡཱ སབྦེཔི སེནཱསནཔརིཀྑཱརཱ ཨཱམཱསཱ. བྷིཀྑཱུནཾ དྷམྨཝིནཡཝཎྞནཊྛཱནེ རཏནམཎྜཔེ ཀརོནྟི ཕལིཀཏྠམྦྷེ རཏནདཱམཔཊིམཎྜིཏེ. ཏཏྠ སབྦུཔཀརཎཱནི བྷིཀྑཱུནཾ པཊིཛགྒིཏུཾ ཝཊྚནྟཱི’’ཏི ཨཱགཏཾ. ཏསྶཱ ཝཎྞནཱཡཾ པན ཝིམཏིཝིནོདནིཡཾ (ཝི. ཝི. ཊཱི. ༡.༢༨༡) ‘‘སབྦཀཔྤིཡོཏི ཡཐཱཝུཏྟསུཝཎྞཱདིམཡཱནཾ སེནཱསནཔརིཀྑཱརཱནཾ ཨཱམསནགོཔནཱདིཝསེན པརིབྷོགོ སབྦཐཱ ཀཔྤིཡོཏི ཨདྷིཔྤཱཡོ. ཏེནཱཧ ‘ཏསྨཱ’ཏིཨཱདི. ‘བྷིཀྑཱུནཾ དྷམྨཝིནཡཝཎྞནཊྛཱནེ’ཏི ཝུཏྟཏྟཱ སངྒྷིཀམེཝ ¶ སུཝཎྞམཡཾ སེནཱསནཾ སེནཱསནཔརིཀྑཱརཱ ཙ ཝཊྚནྟི, ན པུགྒལིཀཱནཱིཏི ཝེདིཏབྦ’’ནྟི ཝཎྞིཏཾ.

སེནཱསནཀྑནྡྷཀཝཎྞནཱཡམྤི སམནྟཔཱསཱདིཀཱཡཾ (ཙཱུལ༹ཝ. ཨཊྛ. ༣༢༠) ‘སབྦཾ པཱསཱདཔརིབྷོགནྟི སུཝཎྞརཛཏཱདིཝིཙིཏྲཱནི ཀཝཱཊཱནི མཉྩཔཱིཋཱནི ཏཱལཝཎྚཱནི སུཝཎྞརཛཏམཡཔཱནཱིཡགྷཊཔཱནཱིཡསརཱཝཱནི ཡཾ ཀིཉྩི ཙིཏྟཀམྨཀཏཾ, སབྦཾ ཝཊྚཏི. པཱསཱདསྶ དཱསིདཱསཾ ཁེཏྟཾ ཝཏྠུཾ གོམཧིཾསཾ དེམཱཏི ཝདནྟི, པཱཊེཀྐཾ གཧཎཀིཙྩཾ ནཏྠི, པཱསཱདེ པཊིགྒཧིཏེ པཊིགྒཧིཏམེཝ ཧོཏི. གོནཀཱདཱིནི སངྒྷིཀཝིཧཱརེ ཝཱ པུགྒལིཀཝིཧཱརེ ཝཱ མཉྩཔཱིཋེསུ ཨཏྠརིཏྭཱ པརིབྷུཉྫིཏུཾ ན ཝཊྚནྟི, དྷམྨཱསནེ པན གིཧིཝིཀཏནཱིཧཱརེན ལབྦྷནྟི, ཏཏྲཱཔི ནིཔཛྫིཏུཾ ན ཝཊྚཏཱི’’ཏི ཨཱགཏཾ. ཏསྶཱ ཝཎྞནཱཡཾ པན ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༣༢༠) ‘‘སུཝཎྞརཛཏཱདིཝིཙིཏྲཱནཱིཏི སངྒྷིཀསེནཱསནཾ སནྡྷཱཡ ཝུཏྟཾ, པུགྒལིཀཾ པན སུཝཎྞཱདིཝིཙིཏྲཾ བྷིཀྑུསྶ སམྤཊིཙྪིཏུམེཝ ན ཝཊྚཏི ‘ན ཏྭེཝཱཧཾ བྷིཀྑཝེ ཀེནཙི པརིཡཱཡེན ཛཱཏརཱུཔརཛཏཾ སཱདིཏབྦ’ནྟི (མཧཱཝ. ༢༩༩) ཝུཏྟཏྟཱ, ཏེནེཝེཏྠ ཨཊྛཀཐཱཡཾ ¶ ‘སངྒྷིཀཝིཧཱརེ ཝཱ པུགྒལིཀཝིཧཱརེ ཝཱ’ཏི ན ཝུཏྟཾ, གོནཀཱདིཨཀཔྤིཡབྷཎྜཝིསཡེཝ ཨེཝཾ ཝུཏྟཾ, ཨེཀབྷིཀྑུསྶཔི ཏེསཾ གཧཎེ དོསཱབྷཱཝཱ’’ཏི ཝཎྞིཏཾ.

ཏསྨིཾཡེཝ ཁནྡྷཀེ ཨཊྛཀཐཱཡཾ (ཙཱུལ༹ཝ. ཨཊྛ. ༣༢༡) ‘‘སཙེཔི རཱཛརཱཛམཧཱམཏྟཱདཡོ ཨེཀཔྤཧཱརེནེཝ མཉྩསཏཾ ཝཱ མཉྩསཧསྶཾ ཝཱ དེནྟི, སབྦེ ཀཔྤིཡམཉྩཱ སམྤཊིཙྪིཏབྦཱ, སམྤཊིཙྪིཏྭཱ ཝུཌྜྷཔཊིཔཱཊིཡཱ སངྒྷིཀཔརིབྷོགེན པརིབྷུཉྫཐཱཏི དཱཏབྦཱ, པུགྒལིཀཝསེན ན དཱཏབྦཱ’’ཏི ཨཱགཏཾ. ཏསྶཱ ཝཎྞནཱཡཾཡེཝ ཝིམཏིཝིནོདནིཡཾ ‘‘ཀཔྤིཡམཉྩཱ སམྤཊིཙྪིཏབྦཱཏི ཨིམིནཱ སུཝཎྞཱདིཝིཙིཏྟཾ ཨཀཔྤིཡམཉྩཾ ‘སངྒྷསྶཱ’ཏི ཝུཏྟེཔི སམྤཊིཙྪིཏུཾ ན ཝཊྚཏཱིཏི དསྶེཏི, ‘ཝིཧཱརསྶ དེམཱ’ཏི ཝུཏྟེ སངྒྷསྶེཝ ¶ ཝཊྚཏི, ན པུགྒལསྶ ཁེཏྟཱདི ཝིཡཱཏི དཊྛབྦ’’ནྟི ཝཎྞིཏཾ, ཏསྨཱ བྷགཝཏོ ཨཱཎཾ སམྤཊིཙྪནྟེཧི ལཛྫིཔེསལབཧུསྶུཏསིཀྑཱཀཱམབྷཱུཏེཧི བྷིཀྑཱུཧི སུཊྛུ མནསིཀཱཏབྦམིདཾ ཋཱནཾ.

ནནུ ཙ སེནཱསནེ ཝིརུདྡྷསེནཱསནཾ ནཱམ པཊིསེདྷེཏབྦཾ ཨཏྠི, ཨཐ ཀསྨཱ ‘‘སེནཱསནེ ཀིཉྩི པཊིསེདྷེཏབྦཾ ནཏྠཱི’’ཏི ཝུཏྟནྟི ཙོདནཾ སནྡྷཱཡཱཧ ‘‘ཨཉྙཏྲ ཝིརུདྡྷསེནཱསནཱ’’ཏི. ཏསྶཏྠོ – ཝིརུདྡྷསེནཱསནཱ ཝིརུདྡྷསེནཱསནཾ ཨཉྙཏྲ ཋཔེཏྭཱ ཨཉྙཾ ཝཎྞམཊྛཀམྨཱདིཀམྨཾ སནྡྷཱཡ སེནཱསནེ ཀིཉྩི པཊིསེདྷེཏབྦཾ ནཏྠཱིཏི ཝུཏྟཾ, ན ཏདབྷཱཝོཏི. ཡདི ཨེཝཾ ཏཾ ཝིརུདྡྷསེནཱསནཾ ཨཱཙརིཡེན ཝཏྟབྦཾ, ཀཏམཾ ཝིརུདྡྷསེནཱསནཾ ནཱམཱཏི པུཙྪཱཡམཱཧ ‘‘ཝིརུདྡྷ…པེ… ཝུཙྩཏཱི’’ཏི. ཏཏྠ ཨཉྙེསནྟི སཱིམསྶཱམིཀཱནཾ. རཱཛཝལླབྷེཧཱིཏི ལཛྫིཔེསལཱནཾ ཨུཔོསཐཱདིཨནྟརཱཡཀརཱ ཨལཛྫིནོ བྷིནྣལདྡྷིཀཱ ཙ བྷིཀྑཱུ ཨདྷིཔྤེཏཱ ཏེཧི སཧ ཨུཔོསཐཱདིཀརཎཱཡོགཏོ. ཏེན ཙ ‘‘སཱིམཱཡཱ’’ཏི ཝུཏྟཾ. ཏེསཾ ལཛྫིཔརིསཱཏི ཏེསཾ སཱིམསྶཱམིཀཱནཾ ཨནུབལཾ དཱཏུཾ སམཏྠཱ ལཛྫིཔརིསཱ. བྷིཀྑཱུཧི ཀཏནྟི ཡཾ ཨལཛྫཱིནཾ སེནཱསནབྷེདནཱདིཀཾ ལཛྫིབྷིཀྑཱུཧི ཀཏཾ, ཏཾ སབྦཾ སུཀཏམེཝ ཨལཛྫིནིགྒཧཏྠཱཡ པཝཏྟེཏབྦཏོ.

ཨེཏྠ ཙ སིཡཱ – ‘‘ཨཉྙེསཾ སཱིམཱཡཱ’’ཏི ཨཊྛཀཐཱཡཾ ཝུཏྟཾ, སཱིམཱ ནཱམ བཧུཝིདྷཱ, ཀཏརསཱིམཾ སནྡྷཱཡཱཏི? བདྡྷསཱིམཾ སནྡྷཱཡཱཏི དཊྛབྦཾ. ཀཐཾ ཝིཉྙཱཡཏཱིཏི ཙེ? ‘‘མཱ ཨམྷཱཀཾ ཨུཔོསཐཔཝཱརཎཱནཾ ཨནྟརཱཡམཀཏྠཱ’’ཏི ཨཊྛཀཐཱཡམེཝ ཝུཏྟཏྟཱ, སཱརཏྠདཱིཔནིཡམྤི (སཱརཏྠ.ཊཱི. ༢.༨༥) ‘‘ཨུཔོསཐཔཝཱརཎཱནཾ ཨནྟརཱཡཀརཱ ཨལཛྫིནོ རཱཛཀུལཱུཔཀཱ ཝུཙྩནྟཱི’’ཏི ¶ ཝུཏྟཏྟཱ, ཨུཔོསཐཱདིཝིནཡཀམྨཁེཏྟབྷཱུཏཱཡ ཨེཝ སཱིམཱཡ ཨིདྷ ཨདྷིཔྤེཏཏྟཱ ¶ . ཡདི ཨེཝཾ གཱམསཱིམསཏྟབྦྷནྟརསཱིམཨུདཀུཀྑེཔསཱིམཱཡོཔི ཏཾཁེཏྟབྷཱུཏཱ ཨེཝ, ཏསྨཱ ཏཱཔི སནྡྷཱཡཱཏི ཝཏྟབྦནྟི? ན ཝཏྟབྦཾ ཏཱསཾ ཨབདྡྷསཱིམཏྟཱ, ན ཏེ ཏཱསཾ སཱམིཀཱ, བདྡྷསཱིམཱཡེཝ བྷིཀྑཱུནཾ ཀིརིཡཱཡ སིདྡྷཏྟཱ ཏཱསཾཡེཝ ཏེ སཱམིཀཱ. ཏེན ཝུཏྟཾ ‘‘ཡཾ པན སཱིམསྶཱམིཀེཧི བྷིཀྑཱུཧཱི’’ཏི. ཡཾ པན ཝདནྟི ‘‘ཨུཔཙཱརསཱིམཱཔི ཏཾཁེཏྟབྷཱུཏཱ’’ཏི, ཏཾ ན གཧེཏབྦཾ, ཏསྶཱ ཏདཀྑེཏྟབྷཱཝཾ ཨུཔརི སཱིམཱཝིནིཙྪཡཀཐཱདཱིསུ (ཝི. སངྒ. ཨཊྛ. ༡༥༦ ཨཱདཡོ) ཀཐཡིསྶཱམ. ཨཔིཙ གཱམསཱིམཱཡ ཨཉྙེསཾ སེནཱསནཀརཎསྶ པཊིསེདྷིཏུམཡུཏྟཏྟཱ སཏྟབྦྷནྟརཨུདཀུཀྑེཔསཱིམཱནཉྩ སབྦདཱ ཨཏིཊྛནཏོ བདྡྷསཱིམཱཡེཝ ཨདྷིཔྤེཏཱཏི ཝིཉྙཱཡཏཱིཏི.

ཚིནྡཱཔེཡྻ ཝཱ བྷིནྡཱཔེཡྻ ཝཱ, ཨནུཔཝཛྫོཏི ཨིདཾ སབྦམཏྟིཀཱམཡཀུཊཱི ཝིཡ སབྦཐཱ ཨནུཔཡོགཱརཧཾ སནྡྷཱཡ ཝུཏྟཾ. ཡཾ པན པཉྩཝཎྞསུཏྟེཧི ཝིནདྡྷཚཏྟཱདིཀཾ, ཏཏྠ ཨཀཔྤིཡབྷཱགོཝ ཚིནྡིཏབྦོ, ན ཏདཝསེསོ, ཏསྶ ཀཔྤིཡཏྟཱཏི ཚིནྡནྟོ ཨུཔཝཛྫོཝ ཧོཏི. ཏེནེཝ ཝུཏྟཾ ‘‘གྷཊཀམྤི ཝཱལ༹རཱུཔམྤི ཚིནྡིཏྭཱ དྷཱརེཏབྦ’’ནྟིཨཱདི.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

པརིཀྑཱརཝིནིཙྪཡཀཐཱལངྐཱརོ ནཱམ

དུཏིཡོ པརིཙྪེདོ.

༣. བྷེསཛྫཱདིཀརཎཝིནིཙྪཡཀཐཱ

༡༥. ཨེཝཾ པརིཀྑཱརཝིནིཙྪཡཾ ཀཐེཏྭཱ ཨིདཱནི བྷེསཛྫཀརཎཔརིཏྟཔཊིསནྠཱརཱནཾ ཝིནིཙྪཡཾ ཀཐེཏུཾ ‘‘བྷེསཛྫཱ’’ཏིཨཱདིམཱཧ. ཏཏྠ བྷིསཀྐསྶ ཨིདཾ ཀམྨཾ བྷེསཛྫཾ. ཀིཾ ཏཾ? ཏིཀིཙྪནཾ ¶ . ཀརིཡཏེ ཀརཎཾ, བྷེསཛྫསྶ ཀརཎཾ བྷེསཛྫཀརཎཾ, ཝེཛྫཀམྨཀརཎནྟི ཝུཏྟཾ ཧོཏི. པརིསམནྟཏོ ཏཱཡཏི རཀྑཏཱིཏི པརིཏྟཾ, ཨཱརཀྑཱཏི ཨཏྠོ. པཊིསནྠརཎཾ པཊིསནྠཱརོ, ཨཏྟནཱ སདྡྷིཾ ཨཉྙེསཾ སམྦནྡྷཀརཎནྟི ཨཏྠོ. ཏཏྠ ཡོ ཝིནིཙྪཡོ མཱཏིཀཱཡཾ ‘‘བྷེསཛྫཀརཎམྤི ཙ པརིཏྟཾ, པཊིསནྠཱརོ’’ཏི (ཝི. སངྒ. ཨཊྛ. གནྠཱརམྦྷཀཐཱ) མཡཱ ཝུཏྟོ ¶ , ཏསྨིཾ སམབྷིནིཝིཊྛེ བྷེསཛྫཀརཎཝིནིཙྪཡེ. སཧདྷམྨོ ཨེཏེསནྟི སཧདྷམྨིཀཱ, ཏེསཾ, ཨེཀསྶ སཏྠུནོ སཱསནེ སཧསིཀྑམཱནདྷམྨཱནནྟི ཨཏྠོ. ཨཐ ཝཱ སཧདྷམྨེ ནིཡུཏྟཱ སཧདྷམྨིཀཱ, ཏེསཾ, སཧདྷམྨསངྑཱཏེ སིཀྑཱཔདེ སིཀྑམཱནབྷཱཝེན ནིཡུཏྟཱནནྟི ཨཏྠོ. ཝིཝཊྚནིསྶིཏསཱིལཱདིཡུཏྟབྷཱཝེན སམཏྟཱ སམསཱིལསདྡྷཱཔཉྙཱནཾ. ཨེཏེན དུསྶཱིལཱནཾ བྷིནྣལདྡྷིཀཱནཉྩ ཨཀཱཏུམྤི ལབྦྷཏཱིཏི དསྶེཏི.

ཉཱཏཀཔཝཱརིཏཊྛཱནཏོ ཝཱཏི ཨཏྟནོ ཝཱ ཏེསཾ ཝཱ ཉཱཏཀཔཝཱརིཏཊྛཱནཏོ. ན ཀརིཡིཏྠཱཏི ཨཀཏཱ, ཨཡུཏྟཝསེན ཨཀཏཔུབྦཱ ཝིཉྙཏྟི ཨཀཏཝིཉྙཏྟི. ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༡༨༦) པན ‘‘ཨཀཏཝིཉྙཏྟིཡཱཏི ན ཝིཉྙཏྟིཡཱ. སཱ ཧི ཨནནུཉྙཱཏཏྟཱ ཀཏཱཔི ཨཀཏཱ ཝིཡཱཏི ཨཀཏཝིཉྙཏྟི, ‘ཝདེཡྻཱཐ བྷནྟེ ཡེནཏྠོ’ཏི ཨེཝཾ ཨཀཏཊྛཱནེ ཝིཉྙཏྟི ཨཀཏཝིཉྙཏྟཱིཏི ལིཁིཏ’’ནྟི ཝུཏྟཾ. སཱརཏྠདཱིཔནིཡཾ (སཱརཏྠ. ཊཱི. ༢.༡༨༥) ‘‘གིལཱནསྶ ཨཏྠཱཡ ཨཔྤཝཱརིཏཊྛཱནཏོ ཝིཉྙཏྟིཡཱ ཨནུཉྙཱཏཏྟཱ ཀཏཱཔི ཨཀཏཱ ཝིཡཱཏི ཨཀཏཝིཉྙཏྟི, ‘ཝད བྷནྟེ པཙྩཡེནཱ’ཏི ཨེཝཾ ཨཀཏཔཝཱརཎཊྛཱནེ ཙ ཝིཉྙཏྟི ཨཀཏཝིཉྙཏྟཱི’’ཏི.

༡༦. པཊིཡཱདིཡཏཱིཏི སམྤཱདེཏི. ཨཀཱཏུཾ ན ཝཊྚཏཱིཏི ཨེཏྠ དུཀྐཊནྟི ཝདནྟི, ཨཡུཏྟཏཱཝསེན པནེཏྠ ཨཀརཎཔྤཊིཀྑེཔོ ཝུཏྟོ, ན ཨཱཔཏྟིཝསེནཱཏི གཧེཏབྦཾ. སབྦཾ ¶ པརིཀམྨཾ ཨནཱམསནྟེནཱཏི མཱཏུགཱམསརཱིརཱདཱིནཾ ཨནཱམཱསཏྟཱ ཝུཏྟཾ. ཡཱཝ ཉཱཏཀཱ ན པསྶནྟཱིཏི ཡཱཝ ཏསྶ ཉཱཏཀཱ ན པསྶནྟི. ‘‘ཏིཏྠིཡབྷཱུཏཱནཾ མཱཏཱཔིཏཱུནཾ སཧཏྠཱ དཱཏུཾ ན ཝཊྚཏཱི’’ཏི ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༡༨༦) ཝུཏྟཾ.

༡༧. པིཏུ བྷགིནཱི པིཏུཙྪཱ. མཱཏུ བྷཱཏཱ མཱཏུལོ. ནཔྤཧོནྟཱིཏི ཀཱཏུཾ ན སཀྐོནྟཱིཏི ཊཱིཀཱསུ ཝུཏྟཾ. ‘‘ཏེསཾཡེཝ སནྟཀཾ བྷེསཛྫཾ གཧེཏྭཱ ཀེཝལཾ ཡོཛེཏྭཱ དཱཏབྦ’’ནྟི ཝཏྭཱ ‘‘སཙེ པན ནཔྤཧོནྟི ཡཱཙནྟི ཙ, དེཐ ནོ བྷནྟེ, ཏུམྷཱཀཾ པཊིདསྶཱམཱ’’ཏི ཝུཏྟཏྟཱ པན ཏེསཾ བྷེསཛྫསྶ ཨཔྤཧོནཀཏྟཱ བྷེསཛྫམེཝ ཡཱཙནྟཱིཏི ཨཊྛཀཐཱདྷིཔྤཱཡོ དིསྶཏི, ཝཱིམཾསིཏབྦོ. ན ཡཱཙནྟཱིཏི ལཛྫཱཡ ན ཡཱཙནྟི, གཱརཝེན ཝཱ. ‘‘ཨཱབྷོགཾ ཀཏྭཱ’’ཏི ཝུཏྟཏྟཱ ཨཉྙཐཱ དེནྟསྶ ཨཱཔཏྟིཡེཝ. སཱརཏྠདཱིཔནིཡཾ (སཱརཏྠ. ཊཱི. ༢.༡༨) པན ‘‘ཨཱབྷོགཾ ཀཏྭཱཏི ཨིདཾ ཀཏྟབྦཀརཎདསྶནཝསེན ཝུཏྟཾ, ཨཱབྷོགཾ པན ཨཀཏྭཱཔི དཱཏུཾ ཝཊྚཏཱིཏི ¶ ཏཱིསུ གཎྛིཔདེསུ ལིཁིཏ’’ནྟི ཝུཏྟཾ. པོརཱཎཊཱིཀཱཡམྤི ཏདེཝ གཧེཏྭཱ ལིཁིཏཾ. ཝིམཏིཝིནོདནིཡཾ (ཝི. ཝི. ཊཱི. ༡.༡༨༥) པན ཏཾ ཝཙནཾ པཊིཀྑིཏྟཾ. ཝུཏྟཉྷི ཏཏྠ ཀེཙི པན ‘‘ཨཱབྷོགཾ ཨཀཏྭཱཔི དཱཏུཾ ཝཊྚཏཱིཏི ཝདནྟི, ཏཾ ན ཡུཏྟཾ བྷེསཛྫཀརཎསྶ, པཱལི༹ཡཾ ‘ཨནཱཔཏྟི བྷིཀྑུ པཱརཱཛིཀསྶ, ཨཱཔཏྟི དུཀྐཊསྶཱ’ཏི ཨེཝཾ ཨནྟརཱཔཏྟིདསྶནཝསེན སཱམཉྙཏོ པཊིཀྑིཏྟཏྟཱ, ཨཊྛཀཐཱཡཾ ཨཝུཏྟཔྤཀཱརེན ཀརོནྟསྶ སུཏྟེནེཝ ཨཱཔཏྟིསིདྡྷཱཏི དཊྛབྦཱ. ཏེནེཝ ཨཊྛཀཐཱཡམྤི ‘ཏེསཉྙེཝ སནྟཀ’ནྟིཨཱདི ཝུཏྟ’’ནྟི.

ཨེཏེ དས ཉཱཏཀེ ཋཔེཏྭཱཏི ཏེསཾ པུཏྟནཏྟཱདཡོཔི ཏཔྤཊིབདྡྷཏྟཱ ཉཱཏཀཱ ཨེཝཱཏི ཏེཔི ཨེཏྠེཝ སངྒཧིཏཱ. ཏེན ཨཉྙེསནྟི ཨིམིནཱ ཨཉྙཱཏཀཱནཾ གཧཎཾ ཝེདིཏབྦཾ ¶ . ཏེནེཝཱཧ ‘‘ཨེཏེསཾ པུཏྟཔརམྤརཱཡཱ’’ཏིཨཱདི. ཀུལཔརིཝཊྚཱཏི ཀུལཱནཾ པཊིཔཱཊི, ཀུལཔརམྤརཱཏི ཝུཏྟཾ ཧོཏི. བྷེསཛྫཾ ཀརོནྟསྶཱཏི ཡཐཱཝུཏྟཝིདྷིནཱ ཀརོནྟསྶ, ‘‘ཏཱཝཀཱལིཀཾ དསྶཱམཱི’’ཏི ཨཱབྷོགཾ ཨཀཏྭཱ དེནྟསྶཔི པན ཨནྟརཱཔཏྟིདུཀྐཊཾ ཝིནཱ མིཙྪཱཛཱིཝནཾ ཝཱ ཀུལདཱུསནཾ ཝཱ ན ཧོཏིཡེཝ. ཏེནཱཧ ‘‘ཝེཛྫཀམྨཾ ཝཱ ཀུལདཱུསཀཱཔཏྟི ཝཱ ན ཧོཏཱི’’ཏི. ཉཱཏཀཱནཉྷི སནྟཀཾ ཡཱཙིཏྭཱཔི གཧེཏུཾ ཝཊྚཏི, ཏསྨཱ ཏཏྠ ཀུལདཱུསནཱདི ན སིཡཱ. སཱརཏྠདཱིཔནིཡམྤི (སཱརཏྠ. ཊཱི. ༢.༡༨༥) ‘‘མཡ྄ཧཾ དསྶནྟི ཀརིསྶནྟཱིཏི པཙྩཱསཱཡ ཀརོནྟསྶཔི ཡཱཙིཏྭཱ གཧེཏབྦཊྛཱནཏཱཡ ཉཱཏཀེསུ ཝེཛྫཀམྨཾ ཝཱ ཀུལདཱུསཀཱཔཏྟི ཝཱ ན ཧོཏཱིཏི ཝདནྟཱི’’ཏི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༡༨༦) པན ‘‘ཝེཛྫཀམྨཾ ཝཱ ཀུལདཱུསཀཱཔཏྟི ཝཱ ན ཧོཏཱིཏི ཝཙནཏོ ཡཱཝ སཏྟམོ ཀུལཔརིཝཊྚོ, ཏཱཝ བྷེསཛྫཾ ཀཱཏུཾ ཝཊྚཏཱིཏི ཝདནྟཱི’’ཏི ཨེཏྟཀམེཝ ཝུཏྟཾ. སབྦཔདེསུ ཝིནིཙྪཡོ ཝེདིཏབྦོཏི ‘‘ཙཱུལ༹མཱཏུཡཱ’’ཏིཨཱདཱིསུ སབྦཔདེསུ ཙཱུལ༹མཱཏུཡཱ སཱམིཀོཏིཨཱདིནཱ ཡོཛེཏྭཱ ཧེཊྛཱ ཝུཏྟནཡེནེཝ ཝིནིཙྪཡོ ཝེདིཏབྦོ.

ཨུཔཛ྄ཛྷཱཡསྶ ཨཱཧརཱམཱཏི ཨིདཾ ཨུཔཛ྄ཛྷཱཡེན མམ ཉཱཏཀཱནཾ བྷེསཛྫཾ ཨཱཧརཐཱཏི ཨཱཎཏྟེཧི ཀཏྟབྦཝིདྷིདསྶནཏྠཾ ཝུཏྟཾ. ཨིམིནཱ ཙ སཱམཎེརཱདཱིནཾ ཨཔཙྩཱསཱཡཔི པརཛནསྶ བྷེསཛྫཀརཎཾ ན ཝཊྚཏཱིཏི དསྶེཏི. ཝུཏྟནཡེནེཝ པརིཡེསིཏྭཱཏི ཨིམིནཱ ‘‘བྷིཀྑཱཙཱརཝཏྟེན ཝཱ’’ཏིཨཱདིནཱ, ‘‘ཉཱཏིསཱམཎེརེཧི ཝཱ’’ཏིཨཱདིནཱ ཙ ཝུཏྟམཏྠཾ ཨཏིདིསཏི. ཨཔཙྩཱསཱིསནྟེནཱཏི (ཝི. ཝི. ཊཱི. ༡.༡༨༥) ཨཱགནྟུཀཙོརཱདཱིནཾ ཀརོནྟེནཔི མནུསྶཱ ནཱམ ཨུཔཀཱརཀཱ ཧོནྟཱིཏི ཨཏྟནོ ཏེཧི ལཱབྷཾ ཨཔཏྠཡནྟེན, པཙྩཱསཱཡ ཀརོནྟསྶ ¶ པན ཝེཛྫཀམྨཀུལདཱུསནཱདིནཱ ¶ དོསོ ཧོཏཱིཏི ཨདྷིཔྤཱཡོ. ཨེཝཉྷི ཨུཔཀཱརེ ཀཏེ སཱསནསྶ གུཎཾ ཉཏྭཱ པསཱིདནྟི, སངྒྷསྶ ཝཱ ཨུཔཀཱརཀཱ ཧོནྟཱིཏི ཀརཎེ པན དོསོ ནཏྠི. ཀེཙི པན ‘‘ཨཔཙྩཱསཱིསནྟེན ཨཱགནྟུཀཱདཱིནཾ པཊིཀྑིཏྟཔུགྒལཱནམྤི དཱཏུཾ ཝཊྚཏཱི’’ཏི ཝདནྟི, ཏཾ ན ཡུཏྟཾ ཀཏྟབྦཱཀཏྟབྦཊྛཱནཝིབྷཱགསྶ ནིརཏྠཀཏྟཔྤསངྒཏོ ཨཔཙྩཱསཱིསནྟེན ‘‘སབྦེསམྤི དཱཏུཾ ཀཱཏུཉྩ ཝཊྚཏཱི’’ཏི ཨེཏྟཀམཏྟསྶེཝ ཝཏྟབྦཏོ. ཨཔཙྩཱསཱིསནཉྩ མིཙྪཱཛཱིཝཀུལདཱུསནཱདིདོསནིསེདྷནཏྠམེཝ ཝུཏྟཾ ན བྷེསཛྫཀརཎསངྑཱཏཱཡ ཨིམིསྶཱ ཨནྟརཱཔཏྟིཡཱ མུཙྩནཏྠཾ ཨཱགནྟུཀཙོརཱདཱིནཾ ཨནུཉྙཱཏཱནཾ དཱནེནེཝ ཏཱཡ ཨཱཔཏྟིཡཱ མུཙྩནཏོཏི གཧེཏབྦཾ.

༡༨. ཏེནེཝ ཨཔཙྩཱསཱིསནྟེནཔི ཨཀཱཏབྦཊྛཱནཾ དསྶེཏུཾ ‘‘སདྡྷཾ ཀུལ’’ནྟིཨཱདི ཝུཏྟཾ. ‘‘བྷེསཛྫཾ ཨཱཙིཀྑཐཱ’’ཏི ཝུཏྟེཔི ‘‘ཨཉྙམཉྙཾ པན ཀཐཱ ཀཱཏབྦཱ’’ཏི ཨིདཾ པརིཡཱཡཏྟཱ ཝཊྚཏི. ཨེཝཾ ཧེཊྛཱ ཝུཏྟནཡེན ཨིདཉྩིདཉྩ གཧེཏྭཱ ཀརོནྟཱིཏི ཨིམིནཱ པརིཡཱཡེན ཀཐེནྟསྶཔི ནེཝཏྠི དོསོཏི ཨཱཙརིཡཱ. པུཙྪནྟཱིཏི ཨིམིནཱ དིཊྛདིཊྛརོགཱིནཾ པརིཡཱཡེནཔི ཝཏྭཱ ཝིཙརཎཾ ཨཡུཏྟནྟི དསྶེཏི. པུཙྪིཏསྶཔི པན པཙྩཱསཱིསནྟསྶ པརིཡཱཡཀཐཱཔི ན ཝཊྚཏཱིཏི ཝདནྟི. སམུལླཔེསཱིཏི ཨཔཙྩཱསཱིསནྟོ ཨེཝ ཨཉྙམཉྙཾ ཀཐཾ སམུཊྛཱཔེསི. ཨཱཙརིཡབྷཱགོཏི ཝིནཡཱཙཱརཾ ཨཀོཔེཏྭཱ བྷེསཛྫཱཙིཀྑཎེན ཝེཛྫཱཙརིཡབྷཱགོ ཨཡནྟི ཨཏྠོཏི ཝིམཏིཝིནོདནིཡཾ (ཝི. ཝི. ཊཱི. ༡.༡༨༥) ཝུཏྟཾ.

སཱརཏྠདཱིཔནིཡཾ (སཱརཏྠ. ཊཱི. ༢.༡༨༥) པན ‘‘ཝིནཡལཀྑཎཾ ཨཛཱནནྟསྶ ཨནཱཙརིཡསྶ ཏདནུརཱུཔཝོཧཱརཱསམྦྷཝཏོ ཨཱིདིསསྶ ལཱབྷསྶ ཨུཔྤཏྟི ནཱམ ནཏྠཱིཏི ‘ཨཱཙརིཡབྷཱགོ ནཱམ ཨཡ’ནྟི ཝུཏྟཾ. ཝིནཡེ ¶ པཀཏཉྙུནཱ ཨཱཙརིཡེན ལབྷིཏབྦབྷཱགོ ཨཡནྟི ཝུཏྟཾ ཧོཏཱི’’ཏི ཝུཏྟཾ. ‘‘པུཔྥཔཱུཛནཏྠཱཡ དིནྣེཔི ཨཀཔྤིཡཝོཧཱརེན ཝིདྷཱནསྶ ཨཡུཏྟཏྟཱ ‘ཀཔྤིཡཝསེནཱ’ཏི ཝུཏྟཾ, ‘པུཔྥཾ ཨཱཧརཐཱ’ཏིཨཱདིནཱ ཀཔྤིཡཝོཧཱརཝསེནཱཏི ཨཏྠོ’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༡༨༥) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ༡.༡༨༥) པན ‘‘པུཔྥཔཱུཛནཏྠཱཡཔི སམྤཊིཙྪིཡམཱནཾ རཱུཔིཡཾ ཨཏྟནོ སནྟཀཏྟབྷཛནེན ནིསྶགྒིཡམེཝཱཏི ཨཱཧ ‘ཀཔྤིཡཝསེན གཱཧཱཔེཏྭཱ’ཏི. ‘ཨམྷཱཀཾ རཱུཔིཡཾ ན ཝཊྚཏི, པུཔྥཔཱུཛནཏྠཾ པུཔྥཾ ཝཊྚཏཱི’ཏིཨཱདིནཱ པཊིཀྑིཔིཏྭཱ ཀཔྤིཡེན ཀམྨེན གཱཧཱཔེཏྭཱཏི ཨཏྠོ’’ཏི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༡༨༦) པན ‘‘ཀཔྤིཡཝསེནཱཏི ཨམྷཱཀཾ པུཔྥཾ ¶ ཨཱནེཐཱཏིཨཱདིནཱ. ‘པཱུཛཾ ཨཀཱསཱི’ཏི ཝུཏྟཏྟཱ སཡཾ གཧེཏུཾ ན ཝཊྚཏཱིཏི ཝདནྟཱི’’ཏི ཨེཏྟཀམེཝ ཝུཏྟཾ. ཨཡམེཏྠ བྷེསཛྫཀརཎཝིནིཙྪཡཀཐཱལངྐཱརོ.

༡༩. ཨེཝཾ བྷེསཛྫཀརཎཝིནིཙྪཡཾ ཀཐེཏྭཱ ཨིདཱནི པརིཏྟཀརཎཝིནིཙྪཡཾ ཀཐེཏུམཱཧ ‘‘པརིཏྟེ པནཱ’’ཏིཨཱདི. ཏཏྠ ཡདི ‘‘པརིཏྟཾ ཀརོཐཱ’’ཏི ཝུཏྟེ ཀརོནྟི, བྷེསཛྫཀརཎཾ ཝིཡ གིཧིཀམྨཾ ཝིཡ ཙ ཧོཏཱིཏི ‘‘ན ཀཱཏབྦ’’ནྟི ཝུཏྟཾ. ‘‘པརིཏྟཾ བྷཎཐཱ’’ཏི ཝུཏྟེ པན དྷམྨཛ྄ཛྷེསནཏྟཱ ཨནཛ྄ཛྷིཊྛེནཔི བྷཎིཏབྦོ དྷམྨོ, པགེཝ ཨཛ྄ཛྷིཊྛེནཱཏི ‘‘ཀཱཏབྦ’’ནྟི ཝུཏྟཾ, ཙཱལེཏྭཱ སུཏྟཾ པརིམཛྫིཏྭཱཏི པརིཏྟཾ ཀརོནྟེན ཀཱཏབྦཝིདྷིཾ དསྶེཏི. ཙཱལེཏྭཱ སུཏྟཾ པརིམཛྫིཏྭཱཏི ཨིདཾ ཝཱ ‘‘པརིཏྟཱཎཾ ཨེཏྠ པཝེསེམཱི’’ཏི ཙིཏྟེན ཨེཝཾ ཀཏེ པརིཏྟཱཎཱ ཨེཏྠ པཝེསིཏཱ ནཱམ ཧོཏཱིཏི ཝུཏྟཾ. ཝིཧཱརཏོ…པེ… དུཀྐཊནྟི ཨིདཾ ཨཉྙཱཏཀེ གཧཊྛེ སནྡྷཱཡ ཝུཏྟནྟི ཝདནྟི. པཱདེསུ ཨུདཀཾ ཨཱཀིརིཏྭཱཏི ཨིདཾ ཏསྨིཾ དེསེ ཙཱརིཏྟཝསེན ཝུཏྟཾ. ཏཏྠ ཧི པཱལི༹ཡཱ ནིསིནྣཱནཾ བྷིཀྑཱུནཾ པཱདེསུ རོགཝཱུཔསམནཱདིཨཏྠཱཡ ཨུདཀཾ སིཉྩིཏྭཱ པརིཏྟཾ ཀཱཏུཾ སུཏྟཉྩ ཋཔེཏྭཱ ‘‘པརིཏྟཾ བྷཎཐཱ’’ཏི ཝཏྭཱ གཙྪནྟི. ཨེཝཉྷི ཀརིཡམཱནེ ཡདི པཱདེ ¶ ཨཔནེནྟི, མནུསྶཱ ཏཾ ‘‘ཨཝམངྒལ’’ནྟི མཉྙནྟི ‘‘རོགོ ན ཝཱུཔསམེསྶཏཱི’’ཏི. ཏེནཱཧ ‘‘ན པཱདཱ ཨཔནེཏབྦཱ’’ཏི.

མཏསརཱིརདསྶནེ ཝིཡ ཀེཝལེ སུསཱནདསྶནེཔི ཨིདཾ ཛཱཏཱནཾ སཏྟཱནཾ ཝཡགམནཊྛཱནནྟི མརཎསཉྙཱ ཨུཔྤཛྫཏཱིཏི ཨཱཧ ‘‘སཱིཝཐིཀདསྶནེ…པེ… མརཎསྶཏིཾ པཊིལབྷིསྶཱམཱཏི གནྟུཾ ཝཊྚཏཱི’’ཏི. ལེསཀཔྤཾ ཨཀཏྭཱ སམུཔྤནྣསུདྡྷཙིཏྟེན ‘‘པརིཝཱརཏྠཱཡ ཨཱགཙྪནྟཱུ’’ཏི ཝུཏྟེཔི གནྟུཾ ཝཊྚཏཱིཏི ཝིམཏིཝིནོདནིཡཾ (ཝི. ཝི. ཊཱི. ༡.༡༨༥) ཝུཏྟཾ. ཨེཏེན ཨསུབྷདསྶནནྟི ཝཙནམཏྟེན ལེསཀཔྤཾ ཀཏྭཱ ཨེཝཾ གཏེ མཏསྶ ཉཱཏཀཱ པསཱིདིསྶནྟི, དཱནཾ དསྶནྟི, མཡཾ ལཱབྷཾ ལབྷིསྶཱམ, ཨུཔཊྛཱཀཾ ལབྷིསྶཱམཱཏི ཨསུདྡྷཙིཏྟེན གནྟུཾ ན ཝཊྚཏཱིཏི དསྶེཏི. ཀམྨཊྛཱནསཱིསེན པན ‘‘མརཎསྶཏིཾ ལབྷིསྶཱམཱ’’ཏིཨཱདིནཱ སུདྡྷཙིཏྟེན པཀྐོསིཏེཔི ཨཔཀྐོསིཏེཔི གནྟུཾ ཝཊྚཏཱིཏི དཱིཔེཏི. ཏཱལཔཎྞསྶ པརིཏྟལེཁནཊྛཱནཏྟཱ པརིཏྟསུཏྟསྶ པརིཏྟཀརཎསཉྙཱཎཏྟཱ ཏཱནི དིསྭཱ ཨམནུསྶཱ པརིཏྟསཉྙཱཡ ཨཔཀྐམནྟཱིཏི ཨཱཧ ‘‘ཏཱལཔཎྞཾ པན པརིཏྟསུཏྟཾ ཝཱ ཧཏྠེ ཝཱ པཱདེ ཝཱ བནྡྷིཏབྦ’’ནྟི.

ཨེཏྠ ཙ ཨཱདིཏོ པཊྛཱཡ ཡཱཝ ‘‘ཨཱཊཱནཱཊིཡཔརིཏྟཾ (དཱི. ནི. ༣.༢༧༥ ཨཱདཡོ) ཝཱ ¶ བྷཎིཏབྦ’’ནྟི ཨེཏྟཀོཡེཝ ཝིནཡཊྛཀཐཱབྷཏོ པཱལི༹མུཏྟཔརིཏྟཀརཎཝིནིཙྪཡོ, ན པན ཏཏོ པརཾ ཝུཏྟོ, ཏསྨཱ ‘‘ཨིདྷ པནཱ’’ཏིཨཱདིཀོ ཀཐཱམགྒོ སམནྟཔཱསཱདིཀཱཡཾ ནཏྠི, ཏཱིསུ ཊཱིཀཱསུཔི ཏཾསཾཝཎྞནཱནཡོ ནཏྠི, ཏཐཱཔི སོ སུཏྟཊྛཀཐཱཡཾ ཨཱགཏོཝཱཏི ཏཾ དསྶེཏུཾ ‘‘ཨིདྷ པན ཨཱཊཱནཱཊིཡསུཏྟསྶ པརིཀམྨཾ ཝེདིཏབྦ’’ནྟིཨཱདིམཱཧ. ཏཏྠ ཨིདྷཱཏི ‘‘ཨཱཊཱནཱཊིཡཔརིཏྟཾ ཝཱ བྷཎིཏབྦ’’ནྟི ཝཙནེ. པནཱཏི ཝིསེསཏྠེ ནིཔཱཏོ. དཱིགྷནིཀཱཡེ པཱཐིཀཝགྒེ ཨཱགཏསྶ ཨཱཊཱནཱཊིཡཔརིཏྟསྶ པརིཀམྨཾ ཨེཝཾ ཝེདིཏབྦནྟི ཡོཛནཱ. ཡདི པཋམམེཝ ན ཝཏྟབྦཾ, ཨཐ ཀིཾ ཀཱཏབྦནྟི ¶ ཨཱཧ ‘‘མེཏྟསུཏྟ’’ནྟིཨཱདི. ཨེཝཉྷི ལདྡྷཱསེཝནཾ ཧུཏྭཱ ཨཏིཨོཛཝནྟཾ ཧོཏི.

པིཊྛཾ ཝཱ མཾསཾ ཝཱཏི ཝཱ-སདྡོ ཨནིཡམཏྠོ, ཏེན མཙྪཁཎྜཔཱུཝཁཛྫཀཱདཡོ སངྒཎྷཱཏི. ཨོཏཱརཾ ལབྷནྟཱིཏི ཨཏྟནཱ པིཡཱཡིཏཁཱདནཱིཡནིབདྡྷཝསནཊྛཱནལཱབྷཏཱཡ ཨཝཏཱརཎཾ ལབྷནྟི. ཧརིཏཱུཔལིཏྟནྟི ཨལླགོམཡལིཏྟཾ. ཨིདཉྷི པོརཱཎཀཙཱརིཏྟཾ བྷཱུམིཝིསུདྡྷཀརཎཾ. པརིསུདྡྷཾ…པེ… ནིསཱིདིཏབྦནྟི ཨིམིནཱ པརིཏྟཀཱརཀསྶ བྷིཀྑུནོ མེཏྟཱཀརུཎཱཝསེན ཙིཏྟཝིསུདྡྷིཔི ཨིཙྪིཏབྦཱཏི དསྶེཏི. ཨེཝཉྷི སཏི ཨུཔརི ཝཀྑམཱནཨུབྷཡཏོ རཀྑཱསཾཝིདྷཱནེན སམེཏི. ཊཱིཀཱཡཾ (དཱི. ནི. ཊཱི. ༣.༢༨༢) པན ‘‘སརཱིརསུདྡྷིཔི ཨིཙྪིཏབྦཱཏི དསྶེཏཱི’’ཏི ཝུཏྟཾ. ཏདེཏཾ ཝིཙཱརེཏབྦཾ. ན ཧི ‘‘ཀཱཡསུདྡྷིམཏྟེན ཨམནུསྶཱནཾ པིཡོ ཧོཏཱི’’ཏི ཝུཏྟཾ, མེཏྟཱཝསེནེཝ པན ཝུཏྟཾ. ཝུཏྟཉྷེཏཾ བྷགཝཏཱ ‘‘མེཏྟཱཡ, བྷིཀྑཝེ, ཙེཏོཝིམུཏྟིཡཱ…པེ… ཨེཀཱདསཱནིསཾསཱ པཱཊིཀངྑཱ. ཀཏམེ ཨེཀཱདས? སུཁཾ སུཔཏི, སུཁཾ པཊིབུཛ྄ཛྷཏི, ན པཱཔཀཾ སུཔིནཾ པསྶཏི, མནུསྶཱནཾ པིཡོ ཧོཏི, ཨམནུསྶཱནཾ པིཡོ ཧོཏཱི’’ཏིཨཱདི (ཨ. ནི. ༡༡.༡༥; པརི. ༣༣༡; མི. པ. ༤.༤.༦).

པརིཏྟཀཱརཀོ…པེ… སམྤརིཝཱརིཏེནཱཏི ཨིདཾ པརིཏྟཀརཎོ བཱཧིརཏོ ཨཱརཀྑཱསཾཝིདྷཱནཾ, ‘‘མེཏྟ…པེ… ཝཏྟབྦ’’ནྟི ཨབྦྷནྟརཏོ ཨཱརཀྑཱསཾཝིདྷཱནཾ, ཨེཝཾ ཨུབྷཡཏོ རཀྑཱསཾཝིདྷཱནཾ ཧོཏི. ཨེཝཉྷི ཨམནུསྶཱ པརིཏྟཀཱརཀསྶ ཨནྟརཱཡཾ ཀཱཏུཾ ན ཝིསཧནྟི. མངྒལཀཐཱ ཝཏྟབྦཱཏི ཨམནུསྶཱནཾ ཏོསནཏྠཱཡ པཎྞཱཀཱརཾ ཀཏྭཱ མཧཱམངྒལཀཐཱ ཀཐེཏབྦཱ. ཨེཝཾ ཨུཔརི ཝཀྑམཱནེན ‘‘ཏུཡ྄ཧཾ པཎྞཱཀཱརཏྠཱཡ མཧཱམངྒལཀཐཱ ཝུཏྟཱ’’ཏི ཝཙནེན སམེཏི. ཊཱིཀཱཡཾ པན ‘‘པུབྦུཔཙཱརཝསེན ཝཏྟབྦཱ’’ཏི ཝུཏྟཾ. སབྦསནྣིཔཱཏོཏི ཏསྨིཾ ཝིཧཱརེ ཏསྨིཾ གཱམཀྑེཏྟེ སབྦེསཾ བྷིཀྑཱུནཾ ¶ སནྣིཔཱཏོ གྷོསེཏབྦོ ‘‘ཙེཏིཡངྒཎེ སབྦེཧི སནྣིཔཏིཏབྦ’’ནྟི. ཨནཱགནྟུཾནཱམ ¶ ན ལབྷཏཱིཏི ཨམནུསྶོ བུདྡྷཱཎཱབྷཡེན རཱཛཱཎཱབྷཡེན ཨནཱགནྟུཾ ན ལབྷཏི ཙཏུནྣཾ མཧཱརཱཛཱུནཾ ཨཱཎཱཊྛཱནིཡཏྟཱ. གཧིཏཀཱཔདེསེན ཨམནུསྶོཝ པུཙྪིཏོ ཧོཏཱིཏི ‘‘ཨམནུསྶགཧིཏཀོ ‘ཏྭཾ ཀོ ནཱམོ’ཏི པུཙྪིཏབྦོ’’ཏི ཝུཏྟཾ. མཱལཱགནྡྷཱདཱིསཱུཏི མཱལཱགནྡྷཱདིཔཱུཛཱསུ. ཨཱསནཔཱུཛཱཡཱཏི ཙེཏིཡེ བུདྡྷཱསནཔཱུཛཱཡ. པིཎྜཔཱཏེཏི བྷིཀྑུསངྒྷསྶ པིཎྜཔཱཏདཱནེ. ཨེཝཾ ཝཏྠུཔྤདེསེན ཙེཏནཱ ཝུཏྟཱ, ཏསྨཱ པཏྟིདཱནཾ སམྦྷཝཏི.

དེཝཏཱནནྟི ཡཀྑསེནཱཔཏཱིནཾ. ཝུཏྟཉྷི ཨཱཊཱནཱཊིཡསུཏྟེ (དཱི. ནི. ༣.༢༨༣, ༢༩༣) ‘‘ཨིམེསཾ ཡཀྑཱནཾ མཧཱཡཀྑཱནཾ སེནཱཔཏཱིནཾ མཧཱསེནཱཔཏཱིནཾ ཨུཛ྄ཛྷཱཔེཏབྦ’’ནྟིཨཱདི. ཨཱཊཱཏི དབྦིམུཁསཀུཎཱ. ཏེ ཨཱཊཱ ནདནྟི ཨེཏྠཱཏི ཨཱཊཱནཱདཾ, དེཝནགརཾ, ཨཱཊཱནཱདེ ཀཏཾ ཨཱཊཱནཱདིཡཾ, སུཏྟཾ. ཊཱིཀཱཡཾ (དཱི. ནི. ཊཱི. ༣.༢༨༢) ‘‘པརིཏྟཾ བྷཎིཏབྦནྟི ཨེཏྠཱཔི ‘མེཏྟཙིཏྟཾ པུརེཙཱརིཀཾ ཀཏྭཱ’ཏི ཙ ‘མངྒལཀཐཱ ཝཏྟབྦཱ’ཏི ཙ ‘ཝིཧཱརསྶ ཨུཔཝནེ’ཏི ཙ ཨེཝམཱདི སབྦཾ གིཧཱིནཾ པརིཏྟཀརཎེ ཝུཏྟཾ པརིཀམྨཾ ཀཱཏབྦམེཝཱ’’ཏི ཝུཏྟཾ, ཨེཝཾ སཏི ཨཊྛཀཐཱཡཾ (དཱི. ནི. ཨཊྛ. ༣.༢༨༢) ‘‘ཨེཏཾ ཏཱཝ གིཧཱིནཾ པརིཀམྨ’’ནྟི ཝཏྭཱ ‘‘སཙེ པན བྷིཀྑཱུ’’ཏིཨཱདིནཱ ཝིསེསཏྠཛོཏཀེན པན-སདྡེན སཧ ཝུཙྩམཱནཾ ‘‘ཨིདཾ བྷིཀྑཱུནཾ པརིཀམྨ’’ནྟི ཝཙནཾ ནིརཏྠཀཾ ཝིཡ ཧོཏི. ཨཝིསེསེ ཧི སཏི བྷེདོ ཀཱཏབྦོ ན སིཡཱ. བྷིཀྑཱུནཉྩ ཡཐཱཝུཏྟཱཝ བཱཧིརཱརཀྑཱ དུཀྐརཱ ཧོཏི, ཏསྨཱ གིཧཱིནཾ པརིཏྟཀརཎེ ཝུཏྟཔརིཀམྨེ ཨསམྤཛྫམཱནེཔི ཨཊྛཀཐཱཡཾ ཝུཏྟནཡེནེཝ ཀཱཏུཾ ཝཊྚཏཱིཏི ནོ མཏི.

ཨིདཾ པན ཨིདྷ ཨཱགཏཾ ཨཱཊཱནཱཊིཡསུཏྟཔརིཀམྨཾ སུཏྭཱ ‘‘ཨིདཾ སུཏྟཾ ཨམནུསྶཱནཾ ཨམནཱཔཾ, སཛ྄ཛྷཱཡནྟསྶ པརིཏྟཾ ཀརོནྟསྶ ¶ ཨམནུསྶཱ ཨནྟརཱཡཾ ཀརེཡྻུ’’ནྟི མཉྙམཱནཱ པོརཱཎཱ ཙཏཱུཧི མཧཱརཱཛེཧི ཨཱརོཙིཏཾ སབྦཉྙུབུདྡྷེན དེསིཏཾ མཱུལབྷཱུཏཾ དཱིགྷནིཀཱཡེ ཨཱགཏཾ ཨཱཊཱནཱཊིཡསུཏྟཾ (དཱི. ནི. ༣.༢༧༥ ཨཱདཡོ) པཧཱཡ མཱུལསུཏྟཏོ གཱཐཱཚཀྐམེཝ གཧེཏྭཱ ཨཝསེསཾ སབྦཾ སུཏྟཾ ཋཔེཏྭཱ ཨཉྙགཱཐཱཡོ པཀྑིཔིཏྭཱ ‘‘ཨཱཊཱནཱཊིཡཔརིཏྟ’’ནྟི ཋཔེསུཾ, ཏམྤི པརིཏྟཾ ཨམཱུལབྷཱུཏཏྟཱ ཨེཀེནཱཀཱརེན དྷཱརེཏུཾ ཨསཀྐོནྟཱ ཀེཙི སཾཁིཏྟེན དྷཱརེནྟི, ཀེཙི ཝིཏྠཱརེན, ཀེཙི ཨེཀཙྩཱ གཱཐཱཡོ པཀྑིཔནྟི, ཀེཙི ནིཀྑིཔནྟི, ཀེཙི བྷིཀྑཱུ ཏཾམིསྶཀཔརིཏྟམྤི མངྒལཀརཎཀཱལཱདཱིསུ ཝཏྟུམཝིསཧནྟཱ ཏཾ ཋཔེཏྭཱ ཨཉྙསུཏྟཱནིཡེཝ བྷཎནྟི, སབྦམེཏཾ ཨཡུཏྟཾ ཝིཡ དིསྶཏི. ཀསྨཱ? ཙཏྟཱརོཔི མཧཱརཱཛཱནོ ཨིམཾ ཨཱཊཱནཱཊིཡཾ རཀྑཾ སཾཝིདཧམཱནཱ བུདྡྷསཱསནེ ཨམནུསྶཱནཾ པསཱདཱཡ, ཙཏསྶནྣཾ པརིསཱནཾ ཨཝིཧེཋནཱཡ ཨེཝ སཾཝིདཧིཾསུ ¶ , ན ཨཉྙེན ཀཱརཎེན. ཝུཏྟཉྷི ཏཏྠ ‘‘ཏཏྠ སནྟི ཨུལཱ༹རཱ ཡཀྑཱནིཝཱསིནོ, ཡེ ཨིམསྨིཾ བྷགཝཏོ པཱཝཙནེ ཨཔྤསནྣཱ, ཏེསཾ པསཱདཱཡ ཨུགྒཎྷཱཏུ བྷནྟེ བྷགཝཱ ཨཱཊཱནཱཊིཡཾ རཀྑཾ བྷིཀྑཱུནཾ བྷིཀྑུནཱིནཾ ཨུཔཱསཀཱནཾ ཨུཔཱསིཀཱནཾ གུཏྟིཡཱ རཀྑཱཡ ཨཝིཧིཾསཱཡ ཕཱསུཝིཧཱརཱཡཱ’’ཏི (དཱི. ནི. ༣.༢༧༦).

སམྨཱསམྦུདྡྷེནཔི ཨིམསྶ སུཏྟསྶ ནིགམནེ ‘‘ཨུགྒཎྷཱཐ བྷིཀྑཝེ ཨཱཊཱནཱཊིཡཾ རཀྑཾ, པརིཡཱཔུཎཱཐ བྷིཀྑཝེ ཨཱཊཱནཱཊིཡཾ རཀྑཾ, དྷཱརེཐ བྷིཀྑཝེ ཨཱཊཱནཱཊིཡཾ རཀྑཾ, ཨཏྠསཾཧིཏཱ བྷིཀྑཝེ ཨཱཊཱནཱཊིཡཱ རཀྑཱ བྷིཀྑཱུནཾ བྷིཀྑུནཱིནཾ ཨུཔཱསཀཱནཾ ཨུཔཱསིཀཱནཾ གུཏྟིཡཱ རཀྑཱཡ ཨཝིཧིཾསཱཡ ཕཱསུཝིཧཱརཱཡཱ’’ཏི (དཱི. ནི. ༣.༢༩༥) བྷིཀྑཱུནཾ དྷཱརཎཾ ཨུཡྻོཛིཏཾ ཨཱནིསཾསཉྩ པཀཱསིཏཾ. ཨཊྛཀཐཱཙརིཡེཧི ཙ ‘‘བུདྡྷབྷཱསིཏེ ཨེཀཀྑརམྤི ཨེཀཔདམྤི ཨཔནེཏབྦཾ ནཱམ ནཏྠཱི’’ཏི ཝུཏྟཾ ¶ , ཏསྨཱ ཙཏཱུཧི མཧཱརཱཛེཧི སཾཝིདཧིཏཾ སམྨཱསམྦུདྡྷེན ཨཱཧཙྩབྷཱསིཏཾ ཏིསྶོ སངྒཱིཏིཡོ ཨཱརུལ༹ྷཾ པཀཏིཨཱཊཱནཱཊིཡསུཏྟམེཝ དྷཱརེཏུཾ སཛ྄ཛྷཱཡིཏུཉྩ ཡུཏྟཾ, ན བྷགཝཏཱ ཨབྷཱསིཏཾ ཏིསྶོ སངྒཱིཏིཡོ ཨནཱརུལ༹ྷཾ མིསྶཀསུཏྟནྟི. དཱིགྷནིཀཱཡཊྛཀཐཱཡཾ (དཱི. ནི. ཨཊྛ. ༣.༢༨༢) ཨཱགཏཾ ཨིདཾ ཨཱཊཱནཱཊིཡཔརིཏྟཔརིཀམྨཾ པན པཀཏིསཛ྄ཛྷཱཡནཝཱཙནཱདིཾ སནྡྷཱཡ ཨཊྛཀཐཱཙརིཡེཧི ན ཝུཏྟཾ, ཨཐ ཁོ གཧཊྛཾ ཝཱ པབྦཛིཏཾ ཝཱ ཨམནུསྶེཧི གཧིཏཀཱལེ མོཙཱཔནཏྠཱཡ ལོཀིཡེཧི མནྟཾ ཝིཡ བྷཎནཾ སནྡྷཱཡ ཝུཏྟཾ. ཝུཏྟཉྷི ཏཏྠ ‘‘ཨམནུསྶགཧིཏཀོ ཏྭཾ ཀོ ནཱམོསཱིཏི པུཙྪིཏབྦོ’’ཏིཨཱདི (དཱི. ནི. ཨཊྛ. ༣.༢༨༢).

ཨཱཊཱནཱཊིཡཱ རཀྑཱ ཙ ནཱམ ན སཀལསུཏྟཾ, ཨཐ ཁོ ‘‘ཝིཔསྶིསྶ ཙ ནམཏྠཱུ’’ཏི པདཾ ཨཱདིཾ ཀཏྭཱ ཙཏུནྣཾ མཧཱརཱཛཱུནཾ ཝསེན ཙཏུཀྑཏྟུཾ ཨཱགཏཾ ‘‘ཛིནཾ ཝནྡཱམ གོཏམ’’ནྟི པདཾ པརིཡོསཱནཾ ཀཏྭཱ ཝུཏྟསུཏྟེཀདེསོཡེཝ. ཀཐཾ ཝིཉྙཱཡཏཱིཏི ཙེ? ‘‘ཨཐ ཁོ ཝེསྶཝཎོ མཧཱརཱཛཱ བྷགཝཏོ ཨདྷིཝཱསནཾ ཝིདིཏྭཱ ཨིམཾ ཨཱཊཱནཱཊིཡཾ རཀྑཾ ཨབྷཱསཱི’’ཏི ཨཱརབྷིཏྭཱ ཡཐཱཝུཏྟསུཏྟེཀདེསསྶ ཨཝསཱནེ ‘‘ཨཡཾ ཁོ མཱརིསཱ ཨཱཊཱནཱཊིཡཱ རཀྑཱ’’ཏི ནིཡྻཱཏིཏཏྟཱ. ཏསྨཱ ཡཐཱ ནཱམ བྱགྒྷཱདཡོ ཨཏྟནོ བྷཀྑཾ ཝིལུམྤནྟཱནཾ བལཝདུཊྛཙིཏྟཱ བྷཝནྟི, ཨེཝཾ ཨཏྟནཱ གཧིཏམནུསྶཾ མོཙཱཔེནྟཱནཾ ཨམནུསྶཱ པདུཊྛཙིཏྟཱ ཧོནྟི. ཨིཏི ཏཐཱ མོཙཱཔེཏུཾ ཨཱརདྡྷཀཱལེ བྷིཀྑཱུནཾ པརིསྶཡཝིནོདནཏྠཾ ཨིམཾ ཨཱཊཱནཱཊིཡཔརིཏྟཔརིཀམྨཾ ཨཊྛཀཐཱཙརིཡེཧི ཝུཏྟནྟི དཊྛབྦཾ. ཨཡཾ པརིཏྟཀརཎཝིནིཙྪཡཀཐཱལངྐཱརོ.

༢༠. ཨནཱམཊྛཔིཎྜཔཱཏོཏི (ཝི. ཝི. ཊཱི. ༡.༡༨༥) ¶ ཨེཏྠ ཨམསིཡིཏྠཱཏི ཨཱམཊྛོ, ན ཨཱམཊྛོ ཨནཱམཊྛོ. པིཎྜཾ པིཎྜཾ ཧུཏྭཱ པཏཏཱིཏི ¶ པིཎྜཔཱཏོ. ཨནཱམཊྛོ ཙ སོ པིཎྜཔཱཏོ ཙཱཏི ཏཐཱ, ཨགྒཧིཏཨགྒོ, ཨཔརིབྷུཏྟོ པིཎྜཔཱཏོཏི ཨཏྠོ. སཙེཔི ཀཧཱཔཎགྒྷནཀོ ཧོཏཱིཏི ཨིམིནཱ དཱཡཀེཧི བཧུབྱཉྫནེན སམྤཱདེཏྭཱ སཀྐཙྩཾ དིནྣབྷཱཝཾ དཱིཔེཏི. ཏེན ཝུཏྟཾ ‘‘སདྡྷཱདེཡྻཝིནིཔཱཏནཾ ནཏྠཱི’’ཏི, ཨེཝཾ སཀྐཙྩཾ སདྡྷཱཡ དིནྣཾ མཧགྒྷབྷོཛནམྤི མཱཏཱཔིཏཱུནཾ དཏྭཱ སདྡྷཱདེཡྻཝིནིཔཱཏནཾ ནཱམ ན ཧོཏི, པགེཝ ཨཔྤགྒྷབྷོཛནེཏི ཨདྷིཔྤཱཡོ. མཱཏཱདིཔཉྩཀཾཡེཝ ཝཏྭཱ བྷེསཛྫཀརཎེ ཝིཡ ཨཔརེསམྤི དསནྣཾ དཱཏུཾ ཝཊྚཏཱིཏི ཨཝུཏྟཏྟཱ ཨཉྙེསཾ ཉཱཏཀཱནམྤི པེསེཏྭཱ དཱཏུཾ ན ཝཊྚཏཱིཏི སིདྡྷཾ, ‘‘ཝིཧཱརཾ སམྤཏྟསྶ པན ཡསྶ ཀསྶཙི ཨཱགནྟུཀསྶ ཝཱ’’ཨིཙྩཱདིཝཀྑམཱནཏྟཱ ཝིཧཱརཾ སམྤཏྟཱནཾ ཉཱཏཀཱནམྤི ཨཱགནྟུཀསཱམཉྙེན དཱཏུཾ ཝཊྚཏཱིཏི ཙ. ཐཱལཀེཏི སངྒྷིཀེ ཀཾསཱདིམཡེ ཐཱལཀེ. པཏྟོཔི ཨེཏྠ སངྒཡ྄ཧཏི. ན ཝཊྚཏཱིཏི ཨིམིནཱ དུཀྐཊནྟི དསྶེཏི. དཱམརིཀཙོརསྶཱཏི རཛྫཾ པཏྠེནྟསྶ པཱཀཊཙོརསྶ. ཨདཱིཡམཱནེཔི ‘‘ན དེནྟཱི’’ཏི ཀུཛ྄ཛྷནྟཱིཏི སམྦནྡྷོ.

ཨཱམིསསྶ དྷམྨསྶ ཙ ཨལཱབྷེན ཨཏྟནོ པརསྶ ཙ ཨནྟརེ སམྦྷཝནྟསྶ ཚིདྡསྶ ཝིཝརསྶ པཊིསནྠརཎཾ པིདཧནཾ པཊིསནྠཱརོ. སོ པན དྷམྨཱམིསཝསེན དུཝིདྷོ. ཏཏྠ ཨཱམིསཔཊིསནྠཱརཾ སནྡྷཱཡ ‘‘ཀསྶ ཀཱཏབྦོ, ཀསྶ ན ཀཱཏབྦོ’’ཏི ཝུཏྟཾ. ཨཱགནྟུཀསྶ ཝཱ…པེ… ཀཱཏབྦོཡེཝཱཏི ཝུཏྟམཏྠཾ པཱཀཊཾ ཀཱཏུཾ ‘‘ཨཱགནྟུཀཾ ཏཱཝཱ’’ཏིཨཱདིམཱཧ. ཁཱིཎཔརིབྦཡནྟི ཨིམིནཱ ཨགཏིབྷཱཝཾ ཀརུཎཱཊྛཱནཏཉྩ དསྶེཏི. ཏེན ཙ ཏབྦིདྷུརཱནཾ སམིདྡྷཱནཾ ཨཱགནྟུཀཏྟེཔི དཱཏུཾ ན ཝཊྚཏཱིཏི སིདྡྷཾ ཧོཏི. ‘‘ཨཔཙྩཱསཱིསནྟེནཱ’’ཏི ཝཏྭཱ པཙྩཱསཱིསནཔྤཀཱརཾ དསྶེཏུཾ ‘‘མནུསྶཱ ནཱམཱ’’ཏིཨཱདི ཝུཏྟཾ. ཨནནུཉྙཱཏཱནཾ པན ཨཔཙྩཱསཱིསནྟེནཔི དཱཏུཾ ན ཝཊྚཏི སདྡྷཱདེཡྻཝིནིཔཱཏཏྟཱ, པཙྩཱསཱཡ ¶ པན སཏི ཀུལདཱུསནམྤི ཧོཏི. ཨུབྦཱསེཏྭཱཏི སམནྟཏོ ཏིཡོཛནཾ ཝིལུམྤནྟེ མནུསྶེ པལཱཔེཏྭཱ. ཝརཔོཏྠཀཙིཏྟཏྠརཎནྟི ཨནེཀཔྤཀཱརཾ ཨིཏྠིཔུརིསཱདིཨུཏྟམརཱུཔཝིཙིཏྟཾ ཨཏྠརཎཾ. ཨཡཾ པཊིསནྠཱརཝིནིཙྪཡཀཐཱལངྐཱརོ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

བྷེསཛྫཱདིཝིནིཙྪཡཀཐཱལངྐཱརོ ནཱམ

ཏཏིཡོ པརིཙྪེདོ.

༤. ཝིཉྙཏྟིཝིནིཙྪཡཀཐཱ

༢༡. ཨེཝཾ ¶ བྷེསཛྫཱདིཝིནིཙྪཡཾ ཀཐེཏྭཱ ཨིདཱནི ཝིཉྙཏྟིཝིནིཙྪཡཾ ཀཐེཏུཾ ‘‘ཝིཉྙཏྟཱིཏི ཡཱཙནཱ’’ཏིཨཱདིམཱཧ. ཏཏྠ ཝིཉྙཱཔནཱ ཝིཉྙཏྟི, ‘‘ཨིམིནཱ ནོ ཨཏྠོ’’ཏི ཝིཉྙཱཔནཱ, ཡཱཙནཱཏི ཝུཏྟཾ ཧོཏི. ཏེནཱཧ ‘‘ཝིཉྙཏྟཱིཏི ཡཱཙནཱ’’ཏི. ཏཏྲ ཝིཉྙཏྟིཡཾ ཨཡཾ མཡཱ ཝཀྑམཱནོ ཝིནིཙྪཡོ ཝེདིཏབྦོཏི ཡོཛནཱ. མཱུལཙྪེཛྫཱཡཱཏི (ཝི. ཝི. ཊཱི. ༡.༣༤༢) པརསནྟཀབྷཱཝཏོ མོཙེཏྭཱ ཨཏྟནོ ཨེཝ སནྟཀཀརཎཝསེན. ཨེཝཾ ཡཱཙཏོ ཨཉྙཱཏཀཝིཉྙཏྟིདུཀྐཊཉྩེཝ དཱསཔཊིགྒཧདུཀྐཊཉྩ ཧོཏི ‘‘དཱསིདཱསཔཊིགྒཧཎཱ པཊིཝིརཏོ (དཱི. ནི. ༡.༡༠, ༡༩༤) ཧོཏཱི’’ཏི ཝཙནཾ ནིསྶཱཡ ཨཊྛཀཐཱཡཾ པཊིཀྑིཏྟཏྟཱ. ཉཱཏཀཔཝཱརིཏཊྛཱནཏོ པན དཱསཾ མཱུལཙྪེཛྫཱཡ ཡཱཙནྟསྶ སཱདིཡནཝསེནེཝ དུཀྐཊཾ. སཀཀམྨནྟི པཱཎཝདྷཀམྨཾ. ཨིདཉྩ པཱཎཱཏིཔཱཏདོསཔརིཧཱརཱཡ ཝུཏྟཾ, ན ཝིཉྙཏྟིཔརིཧཱརཱཡ. ཨནིཡམེཏྭཱཔི ན ཡཱཙིཏབྦཱཏི སཱམཱིཙིདསྶནཏྠཾ ཝུཏྟཾ, སུདྡྷཙིཏྟེན པན ཧཏྠཀམྨཾ ཡཱཙནྟསྶ ཨཱཔཏྟི ནཱམ ནཏྠི. ཡདིཙྪཀཾ ཀཱརཱཔེཏུཾ ཝཊྚཏཱིཏི ‘‘ཧཏྠཀམྨཾ ཡཱཙཱམི, དེཐཱ’’ཏིཨཱདིནཱ ཨཡཱཙིཏྭཱཔི ¶ ཝཊྚཏི, སཀིཙྩཔསུཏམྤི ཨེཝཾ ཀཱརཱཔེནྟསྶ ཝིཉྙཏྟི ནཏྠི ཨེཝ, སཱམཱིཙིདསྶནཏྠཾ པན ཝིབྷཛིཏྭཱ ཝུཏྟཾ.

སབྦཀཔྤིཡབྷཱཝདཱིཔནཏྠནྟི སབྦསོ ཀཔྤིཡབྷཱཝདསྶནཏྠཾ. མཱུལཾ དེཐཱཏི ཝཏྟུཾ ཝཊྚཏཱིཏི ‘‘མཱུལཾ དསྶཱམཱ’’ཏི པཋམཾ ཝུཏྟཏྟཱ ཝིཉྙཏྟི ཝཱ ‘‘མཱུལ’’ནྟི ཝཙནསྶ ཀཔྤིཡཱཀཔྤིཡཝཏྠུསཱམཉྙཝཙནཏྟཱ ཨཀཔྤིཡཝཙནཾ ཝཱ ནིཊྛིཏབྷཏིཀིཙྩཱནཾ དཱཔནཏོ ཨཀཔྤིཡཝཏྠུསཱདིཡནཾ ཝཱ ན ཧོཏཱིཏི ཀཏྭཱ ཝུཏྟཾ. མཱུལཙྪེཛྫཱཡ ཝཱཏི ཨིདཾ ཨིདྷ ཐམྦྷཱདཱིནཾ དཱསིདཱསཱདིབྷཱཝཱབྷཱཝཏོ ཝུཏྟཾ. ཨནཛ྄ཛྷཱཝུཏྠཀནྟི ཨཔརིགྒཧིཏཾ, ཨསྶཱམིཀནྟི ཨཏྠོ.

༢༢. ན ཀེཝལཉྩ…པེ… ཙཱིཝརཱདཱིནི ཀཱརཱཔེཏུཀཱམེནཱཏིཨཱདཱིསུ ཙཱིཝརཾ ཀཱརཱཔེཏུཀཱམསྶ ཨཉྙཱཏཀཨཔྤཝཱརིཏཏནྟཝཱཡེཧི ཧཏྠཀམྨཡཱཙནཝསེན ཝཱཡཱཔནེ ཝིཉྙཏྟིཔཙྩཡཱ དུཀྐཊཱབྷཱཝེཔི ཙཱིཝརཝཱཡཱཔནསིཀྑཱཔདེན ཡཐཱརཧཾ པཱཙིཏྟིཡདུཀྐཊཱནི ཧོནྟཱིཏི ཝེདིཏབྦཾ. ཨཀཔྤིཡཀཧཱཔཎཱདི ན དཱཏབྦནྟི ཀཔྤིཡམུཁེན ལདྡྷམྤི ཏཏྠ ཀམྨཀརཎཏྠཱཡ ཨིམསྶ ཀཧཱཔཎཾ དེཧཱིཏི ཝཏྭཱ ‘‘དཱཏུཾ ཝཊྚཏཱི’’ཏི ཝུཏྟཾ. པུབྦེ ཀཏཀམྨསྶ དཱཔནེ ཀིཉྩཱཔི དོསོ ན དིསྶཏི, ཏཐཱཔི ཨསཱརུཔྤམེཝཱཏི ཝདནྟི. ཀཏཀམྨཏྠཱཡཔི ཀཔྤིཡཝོཧཱརེན ¶ པརིཡཱཡཏོ བྷཏིཾ དཱཔེནྟསྶ ནཏྠི དོསོ, སཱརཏྠདཱིཔནིཡཾ (སཱརཏྠ. ཊཱི. ༡.༣༤༢) པན ‘‘ཨཀཔྤིཡཀཧཱཔཎཱདི ན དཱཏབྦནྟི ཀིཉྩཱཔི ཨཀཔྤིཡཀཧཱཔཎཱདིཾ ཨསཱདིཡནྟེན ཀཔྤིཡཝོཧཱརཏོ དཱཏུཾ ཝཊྚཏི, ཏཐཱཔི སཱརུཔྤཾ ན ཧོཏི, མནུསྶཱ ཙ ཨེཏསྶ སནྟཀཾ ཀིཉྩི ཨཏྠཱིཏི ཝིཧེཋེཏབྦཾ མཉྙནྟཱིཏི ཨཀཔྤིཡཀཧཱཔཎཱདིདཱནཾ པཊིཀྑིཏྟ’’ནྟི ཝུཏྟཾ. ཏཐེཝ པཱཙེཏྭཱཏི ཧཏྠཀམྨཝསེནེཝ པཱཙེཏྭཱ. ‘‘ཀིཾ བྷནྟེ’’ཏི ཨེཏྟཀེཔི པུཙྪིཏེ ཡདཏྠཱཡ པཝིཊྛོ, ཏཾ ཀཐེཏུཾ ལབྷཏི པུཙྪིཏཔཉྷཏྟཱ.

༢༣. ཝཏྟནྟི ¶ ཙཱརིཏྟཾ, ཨཱཔཏྟི པན ན ཧོཏཱིཏི ཨདྷིཔྤཱཡོ. ཀཔྤིཡཾ ཀཱརཱཔེཏྭཱ པཊིགྒཧེཏབྦཱནཱིཏི སཱཁཱཡ མཀྑིཀབཱིཛནེན པཎྞཱདིཚེདེ བཱིཛགཱམཀོཔནསྶ ཙེཝ ཏཏྠ ལགྒརཛཱདིཨཔྤཊིགྒཧིཏཀསྶ ཙ པརིཧཱརཏྠཱཡ ཝུཏྟཾ, ཏདུབྷཡཱསངྐཱཡ ཨསཏི ཏཐཱ ཨཀརཎེ དོསོ ནཏྠི. སཱརཏྠདཱིཔནིཡཾ (སཱརཏྠ. ཊཱི. ༡.༣༤༢) པན ‘‘ཀཔྤིཡཾ ཀཱརཱཔེཏྭཱ པཊིགྒཧེཏབྦཱནཱིཏི སཱཁཱཡ ལགྒརཛསྨིཾ པཏྟེ པཏིཏེཔི སཱཁཾ ཚིནྡིཏྭཱ ཁཱདིཏུཀཱམཏཱཡཔི སཏི སུཁཔརིབྷོགཏྠཾ ཝུཏྟ’’ནྟི ཝུཏྟཾ. ནདིཡཱདཱིསུ ཨུདཀསྶ ཨཔརིགྒཧིཏཏྟཱ ‘‘ཨཱཧརཱཏི ཝཏྟུཾ ཝཊྚཏཱི’’ཏི ཝུཏྟཾ. གེཧཏོ…པེ… ནེཝ ཝཊྚཏཱིཏི པརིགྒཧིཏུདཀཏྟཱ ཝིཉྙཏྟིཡཱ དུཀྐཊཾ ཧོཏཱིཏི ཨདྷིཔྤཱཡོ. ‘‘ན ཨཱཧཊཾ པརིབྷུཉྫིཏུ’’ནྟི ཝཙནཏོ ཝིཉྙཏྟིཡཱ ཨཱཔནྣཾ དུཀྐཊཾ དེསེཏྭཱཔི ཏཾ ཝཏྠུཾ པརིབྷུཉྫནྟསྶ པརིབྷོགེ པརིབྷོགེ དུཀྐཊམེཝ, པཉྩནྣམྤི སཧདྷམྨིཀཱནཾ ན ཝཊྚཏི.

‘‘ཨལཛྫཱིཧི པན བྷིཀྑཱུཧི ཝཱ སཱམཎེརེཧི ཝཱ ཧཏྠཀམྨཾ ན ཀཱརེཏབྦ’’ནྟི སཱམཉྙཏོ ཝུཏྟཏྟཱ ཨཏྟནོ ཨཏྠཱཡ ཡཾ ཀིཉྩི ཧཏྠཀམྨཾ ཀཱརེཏུཾ ན ཝཊྚཏི. ཡཾ པན ཨལཛྫཱི ནིཝཱརིཡམཱནོཔི བཱིཛནཱདིཾ ཀརོཏི, ཏཏྠ དོསོ ནཏྠི, ཙེཏིཡཀམྨཱདཱིནི པན ཏེཧི ཀཱརཱཔེཏུཾ ཝཊྚཏཱིཏི ཝིམཏིཝིནོདནིཡཾ (ཝི. ཝི. ཊཱི. ༡.༣༤༢) ཝུཏྟཾ. སཱརཏྠདཱིཔནིཡཾ (སཱརཏྠ. ཊཱི. ༢.༣༤༢) པན ‘‘ཨལཛྫཱིཧི…པེ… ན ཀཱརེཏབྦནྟི ཨིདཾ ཨུཏྟརིབྷངྒཱདྷིཀཱརཏྟཱ ཨཛ྄ཛྷོཧརཎཱིཡཾ སནྡྷཱཡ ཝུཏྟཾ, བཱཧིརཔརིབྷོགེསུ པན ཨལཛྫཱིཧིཔི ཧཏྠཀམྨཾ ཀཱརེཏུཾ ཝཊྚཏཱི’’ཏི ཝུཏྟཾ. ཨེཏྠ ཙ ‘‘ཨལཛྫཱིཧི སཱམཎེརེཧཱི’’ཏི ཝུཏྟཏྟཱ ‘‘སཉྩིཙྩ ཨཱཔཏྟིཾ ཨཱཔཛྫཏཱི’’ཏི (པརི. ༣༥༩) ཨལཛྫིལཀྑཎཾ ཨུཀྐཊྛཝསེན ཨུཔསམྤནྣེ པཊིཙྩ ཨུཔལཀྑཎཏོ ཝུཏྟནྟི ཏཾལཀྑཎཝིརཧིཏཱནཾ སཱམཎེརཱདཱིནཾ ལིངྒཏྠེནགོཏྲབྷུཔརིཡོསཱནཱནཾ ¶ བྷིཀྑུཔཊིཉྙཱནཾ དུསྶཱིལཱནམྤི སཱདྷཱརཎཝསེན ཨལཛྫིལཀྑཎཾ ཡཐཱཋཔིཏཔཊིཔཏྟིཡཱ ཨཏིཊྛནམེཝཱཏི གཧེཏབྦཾ.

༢༤. གོཎཾ ¶ པན…པེ… ཨཱཧརཱཔེནྟསྶ དུཀྐཊནྟི ཝིཉྙཏྟིཀྑཎེ ཝིཉྙཏྟིཔཙྩཡཱ, པཊིལཱབྷཀྑཎེ གོཎཱནཾ སཱདིཡནཔཙྩཡཱ ཙ དུཀྐཊཾ. གོཎཉྷི ཨཏྟནོ ཨཏྠཱཡ ཨཝིཉྙཏྟིཡཱ ལདྡྷམྤི སཱདིཏུཾ ན ཝཊྚཏི ‘‘ཧཏྠིགཝཱསྶཝལ༹ཝཔཊིགྒཧཎཱ པཊིཝིརཏོ ཧོཏཱི’’ཏི (དཱི. ནི. ༡.༡༠, ༡༩༤) ཝུཏྟཏྟཱ. ཏེནེཝཱཧ ‘‘ཉཱཏཀཔཝཱརིཏཊྛཱནཏོཔི མཱུལཙྪེཛྫཱཡ ཡཱཙིཏུཾ ན ཝཊྚཏཱི’’ཏི. ཨེཏྠ ཙ ཝིཉྙཏྟིདུཀྐཊཱབྷཱཝེཔི ཨཀཔྤིཡཝཏྠུཡཱཙནེཔི པཊིགྒཧཎེཔི དུཀྐཊམེཝ. རཀྑིཏྭཱཏི ཙོརཱདིཨུཔདྡཝཏོ རཀྑིཏྭཱ. ཛགྒིཏྭཱཏི ཏིཎཨནྣཱདཱིཧི པོསེཏྭཱ. ན སམྤཊིཙྪིཏབྦནྟི ཨཏྟནོ ཨཏྠཱཡ གོསཱདིཡནསྶ པཊིཀྑིཏྟཏྟཱ ཝུཏྟཾ.

༢༥. ཉཱཏཀཔཝཱརིཏཊྛཱནེ པན ཝཊྚཏཱིཏི སཀཊསྶ སམྤཊིཙྪིཏབྦཏྟཱ མཱུལཙྪེཛྫཝསེན ཡཱཙིཏུཾ ཝཊྚཏི. ཏཱཝཀཱལིཀཾ ཝཊྚཏཱིཏི ཨུབྷཡཏྠཱཔི ཝཊྚཏཱིཏི ཨཏྠོཏི ཝིམཏིཝིནོདནིཡཾ (ཝི. ཝི. ཊཱི. ༡.༣༤༢) ཝུཏྟཾ. སཱརཏྠདཱིཔནིཡཾ (སཱརཏྠ. ཊཱི. ༢.༣༤༢) པན ‘‘སཀཊཾ དེཐཱཏི…པེ… ན ཝཊྚཏཱིཏི མཱུལཙྪེཛྫཝསེན སཀཊཾ དེཐཱཏི ཝཏྟུཾ ན ཝཊྚཏི. ཏཱཝཀཱལིཀཾ ཝཊྚཏཱིཏི ཏཱཝཀཱལིཀཾ ཀཏྭཱ སབྦཏྠ ཡཱཙིཏུཾ ཝཊྚཏཱི’’ཏི ཝུཏྟཾ. ཝཱསིཨཱདཱིནི པུགྒལིཀཱནིཔི ཝཊྚནྟཱིཏི ཨཱཧ ‘‘ཨེས ནཡོ ཝཱསཱི’’ཏིཨཱདི. ཝལླིཨཱདཱིསུ ཙ པརཔརིགྒཧིཏེསུ ཨེས ནཡོཏི ཡོཛེཏབྦཾ. གརུབྷཎྜཔྤཧོནཀེསུཡེཝཱཏི ཨིདཾ ཝིཉྙཏྟིཾ སནྡྷཱཡ ཝུཏྟཾ, ཨདིནྣཱདཱནེ པན ཏིཎསལཱཀཾ ཨུཔཱདཱཡ པརཔརིགྒཧིཏཾ ཐེཡྻཙིཏྟེན གཎྷཏོ ཨཝཧཱརོ ཨེཝ, བྷཎྜགྒྷེན ཀཱརེཏབྦོ. ཝལླིཨཱདཱིསཱུཏི ཨེཏྠ ཨཱདི-སདྡེན པཱལི༹ཨཱགཏཱནཾ ཝེལུ༹མུཉྫཔབྦཛཏིཎམཏྟིཀཱནཾ སངྒཧོ དཊྛབྦོ. ཏཏྠ ཙ ཡསྨིཾ པདེསེ ¶ ཧརིཏཱལཛཱཏིཧིངྒུལིཀཱདི ཨཔྤཀམྤི མཧགྒྷཾ ཧོཏི, ཏཏྠ ཏཾ ཏཱལཔཀྐཔྤམཱཎཏོ ཨཱུནམྤི གརུབྷཎྜམེཝ, ཝིཉྙཱཔེཏུཉྩ ན ཝཊྚཏི.

༢༦. སཱཏི ཝིཉྙཏྟི. པརིཀཐཱདཱིསུ ‘‘སེནཱསནཾ སམྦཱདྷ’’ནྟིཨཱདིནཱ པརིཡཱཡེན ཀཐནཾ པརིཀཐཱ ནཱམ. ཨུཛུཀམེཝ ཨཀཐེཏྭཱ ‘‘བྷིཀྑཱུནཾ ཀིཾ པཱསཱདོ ན ཝཊྚཏཱི’’ཏིཨཱདིནཱ ཨདྷིཔྤཱཡོ ཡཐཱ ཝིབྷཱུཏོ ཧོཏི, ཨེཝཾ ཀཐནཾ ཨོབྷཱསོ ནཱམ. སེནཱསནཱདིཨཏྠཾ བྷཱུམིཔརིཀམྨཱདིཀརཎཝསེན པཙྩཡུཔྤཱདཱཡ ནིམིཏྟཀརཎཾ ནིམིཏྟཀམྨཾ ནཱམ. ཏཱིསུ པཙྩཡེསུ ཝིཉྙཏྟིཨཱདཡོ དསྶིཏཱ, གིལཱནཔཙྩཡེ པན ཀཐནྟི ཨཱཧ ‘‘གིལཱནཔཙྩཡེ པནཱ’’ཏིཨཱདི. ཏཐཱ ཨུཔྤནྣཾ པན བྷེསཛྫཾ རོགེ ཝཱུཔསནྟེ བྷུཉྫིཏུཾ ཝཊྚཏི, ན ཝཊྚཏཱིཏི? ཏཏྠ ཝིནཡདྷརཱ ‘‘བྷགཝཏཱ རོགསཱིསེན པརིབྷོགསྶ དྭཱརཾ དིནྣཾ, ཏསྨཱ ཨརོགཀཱལེཔི བྷུཉྫིཏུཾ ཝཊྚཏི, ཨཱཔཏྟི ན ¶ ཧོཏཱི’’ཏི ཝདནྟི, སུཏྟནྟིཀཱ པན ‘‘ཀིཉྩཱཔི ཨཱཔཏྟི ན ཧོཏི, ཨཱཛཱིཝཾ པན ཀོཔེཏི, ཏསྨཱ སལླེཁཔཊིཔཏྟིཡཾ ཋིཏསྶ ན ཝཊྚཏི, སལླེཁཾ ཀོཔེཏཱི’’ཏི ཝདནྟཱིཏི.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཝིཉྙཏྟིཝིནིཙྪཡཀཐཱལངྐཱརོ ནཱམ

ཙཏུཏྠོ པརིཙྪེདོ.

༥. ཀུལསངྒཧཝིནིཙྪཡཀཐཱ

༢༧. ཨེཝཾ ཝིཉྙཏྟིཝིནིཙྪཡཾ ཀཐེཏྭཱ ཨིདཱནི ཀུལསངྒཧཝིནིཙྪཡཾ ཀཐེཏུཾ ‘‘ཀུལསངྒཧོ’’ཏིཨཱདིམཱཧ. ཏཏྠ སངྒཎྷནཾ སངྒཧོ, ཀུལཱནཾ སངྒཧོ ཀུལསངྒཧོ, པཙྩཡདཱཡཀཱདཱིནཾ ¶ གིཧཱིནཾ ཨནུགྒཧཀརཎཾ. ཨནུགྒཧཏྠོ ཧེཏྠ སངྒཧ-སདྡོ ཡཐཱ ‘‘པུཏྟདཱརསྶ སངྒཧོ’’ཏི (ཁུ. པཱ. ༥.༦; སུ. ནི. ༢༦༥).

༢༨. ཏཏྠ ཀོཊྚནནྟི སཡཾ ཚིནྡནཾ. ཀོཊྚཱཔནནྟི ‘‘ཨིམཾ ཚིནྡཱ’’ཏི ཨཉྙེསཾ ཚེདཱཔནཾ. ཨཱལི༹ཡཱ བནྡྷནནྟི ཡཐཱ གཙྪམཱུལེ ཨུདཀཾ སནྟིཊྛཏི, ཏཐཱ སམནྟཏོ བནྡྷནཾ. ཨུདཀསྶཱཏི ཨཀཔྤིཡཨུདཀསྶ ‘‘ཀཔྤིཡཨུདཀསིཉྩན’’ནྟི ཝིསུཾ ཝཀྑམཱནཏྟཱ, ཏཉྩ ཨཱརཱམཱདིཨཏྠཾ རོཔནེ ཨཀཔྤིཡཝོཧཱརེསུཔི ཀཔྤིཡཝོཧཱརེསུཔི ཀཔྤིཡཨུདཀསིཉྩནཱདི ཝཊྚཏཱིཏི ཝཀྑམཱནཏྟཱ ཨིདྷཱཔི ཝིབྷཱགཾ ཀཏྭཱ ཀཔྤིཡཨུདཀསིཉྩནཱདི ཝིསུཾ དསྶིཏཾ. ཨེཏྠ ཙ ཀཏམཾ ཨཀཔྤིཡཨུདཀཾ, ཀཏམཾ པན ཀཔྤིཡཨུདཀནྟི? སཔྤཱཎཀཾ ཨཀཔྤིཡཨུདཀཾ, ཨཔྤཱཎཀཾ ཀཔྤིཡཨུདཀནྟི. ཀཐཾ ཝིཉྙཱཡཏཱིཏི ཙེ, ‘‘ཡོ པན བྷིཀྑུ ཛཱནཾ སཔྤཱཎཀཾ ཨུདཀཾ ཏིཎཾ ཝཱ མཏྟིཀཾ ཝཱ སིཉྩེཡྻ ཝཱ སིཉྩཱཔེཡྻ ཝཱ པཱཙིཏྟིཡ’’ནྟི ཝཙནཏོ. ཡཐཱ ཀོཊྚནཁཎནཱདིཀཱཡིཀཀིརིཡཱཔི ཨཀཔྤིཡཝོཧཱརེ སངྒཧིཏཱ, ཨེཝཾ མཱཏིཀཱཨུཛུཀརཎཱདིཀཔྤིཡཝོཧཱརེཔཱིཏི ཨཱཧ ‘‘སུཀྑམཱཏིཀཱཡ ཨུཛུཀརཎ’’ནྟི. ཧཏྠཔཱདམུཁདྷོཝནནཧཨཱནོདཀསིཉྩནནྟི ཨིམིནཱཔི པཀཱརནྟརེན ཀཔྤིཡཨུདཀསིཉྩནམེཝ དསྶེཏི. ཨཀཔྤིཡཝོཧཱརེ ཀོཊྚནཁཎནཱདིཝསེན སཡཾ ཀརཎསྶཔི ཀཐཾ སངྒཧོཏི? ཨཀཔྤིཡནྟི ཝོཧརིཡཏཱིཏི ཨཀཔྤིཡཝོཧཱརོཏི ¶ ཨཀཔྤིཡབྷཱུཏཾ ཀརཎཀཱརཱཔནཱདི སབྦམེཝ སངྒཧིཏཾ, ན པན ཨཀཔྤིཡཝཙནམཏྟནྟི དཊྛབྦཾ. ཀཔྤིཡཝོཧཱརེཔི ཨེསེཝ ནཡོ. སུཀྑམཱཏིཀཱཡ ཨུཛུཀརཎནྟི ཨིམིནཱ པུརཱཎཔཎྞཱདཱིནཾ ཧརཎམྤི སངྒཧིཏནྟི དཊྛབྦཾ. ཀུདཱལཱདཱིནི བྷཱུམིཡཾ ཋཔེཏྭཱ ཋཱནཏོ ཧཏྠེན གཧེཏྭཱ ཋཱནམེཝ པཱཀཊཏརནྟི ‘‘ཨོབྷཱསོ’’ཏི ཝུཏྟཾ.

༢༩. མཧཱཔཙྩརིཝཱདཾ པཏིཊྛཱཔེཏུཀཱམོ པཙྪཱ ཝདཏི. ཝནཏྠཱཡཱཏི ཨིདཾ ཀེཙི ‘‘ཝཏཏྠཱཡཱ’’ཏི པཋནྟི, ཏེསཾ ཝཏིཨཏྠཱཡཱཏི ¶ ཨཏྠོ. ཝཛིརབུདྡྷིཊཱིཀཱཡམྤི ཏཐེཝ ཝུཏྟཾ, ‘‘ཨཱརཱམརོཔཱ ཝནརོཔཱ, ཡེ ནརཱ སེཏུཀཱརཀཱ’’ཏི (སཾ. ནི. ༡.༤༧) ཝཙནཏོ པན ཏཾ ཝིཙཱརེཏབྦཾ. ཨཀཔྤིཡཝོཧཱརེཔི ཨེཀཙྩཾ ཝཊྚཏཱིཏི དསྶེཏུཾ ‘‘ན ཀེཝལཉྩ སེས’’ནྟིཨཱདིམཱཧ. ཡཾ ཀིཉྩི མཱཏིཀནྟི སུཀྑམཱཏིཀཾ ཝཱ ཨསུཀྑམཱཏིཀཾ ཝཱ. ཀཔྤིཡཨུདཀཾ སིཉྩིཏུནྟི ཨིམིནཱ ‘‘ཀཔྤིཡཨུདཀཾ སིཉྩཐཱ’’ཏི ཝཏྟུམྤི ཝཊྚཏཱིཏི དསྶེཏི. སཡཾ རོཔེཏུམྤི ཝཊྚཏཱིཏི ཨིམིནཱ ‘‘རོཔེཧཱི’’ཏི ཝཏྟུམྤི ཝཊྚཏཱིཏིཔི སིདྡྷཾ.

༣༠. པཱཙིཏྟིཡཉྩེཝ དུཀྐཊཉྩཱཏི པཐཝཱིཁཎནཔཙྩཡཱ པཱཙིཏྟིཡཾ, ཀུལསངྒཧཔཙྩཡཱ དུཀྐཊཾ. ཨཀཔྤིཡཝོཧཱརེནཱཏི ‘‘ཨིདཾ ཁཎ, ཨིདཾ རོཔེཧཱི’’ཏི ཨཀཔྤིཡཝོཧཱརེན. དུཀྐཊམེཝཱཏི ཀུལསངྒཧཔཙྩཡཱ དུཀྐཊཾ. ཨུབྷཡཏྲཱཏི ཀཔྤིཡཱཀཔྤིཡཔཐཝིཡཾ.

སབྦཏྠཱཏི ཀུལསངྒཧཔརིབྷོགཨཱརཱམཱདིཨཏྠཱཡ རོཔིཏེ. དུཀྐཊམྤཱིཏི ན ཀེཝལཾ པཱཙིཏྟིཡམེཝ. ཀཔྤིཡེནཱཏི ཀཔྤིཡཨུདཀེན. ཏེསཾཡེཝ དྭིནྣནྟི ཀུལསངྒཧཔརིབྷོགཱནཾ. དུཀྐཊནྟི ཀུལསངྒཧཏྠཱཡ སཡཾ སིཉྩནེ, ཀཔྤིཡཝོཧཱརེན ཝཱ ཨཀཔྤིཡཝོཧཱརེན ཝཱ སིཉྩཱཔནེ དུཀྐཊཾ, པརིབྷོགཏྠཱཡ སཡཾ སིཉྩནེ, ཨཀཔྤིཡཝོཧཱརེན སིཉྩཱཔནེ ཙ དུཀྐཊཾ. པཡོགབཧུལཏཱཡཱཏི སཡཾ ཀརཎེ, ཀཱཡཔཡོགསྶ ཀཱརཱཔནེ ཝཙཱིཔཡོགསྶ བཧུཏྟེན. ཨཱཔཏྟིབཧུལཏཱ ཝེདིཏབྦཱཏི ཨེཏྠ སཡཾ སིཉྩནེ དྷཱརཱཔཙྪེདགཎནཱཡ ཨཱཔཏྟིགཎནཱ ཝེདིཏབྦཱ. སིཉྩཱཔནེ པན པུནཔྤུནཾ ཨཱཎཱཔེནྟསྶ ཝཱཙཱཡ ཝཱཙཱཡ ཨཱཔཏྟི, སཀིཾ ཨཱཎཏྟསྶ བཧུསིཉྩནེ ཨེཀཱཝ.

ཨོཙིནནེ དུཀྐཊཔཱཙིཏྟིཡཱནཱིཏི ཀུལསངྒཧཔཙྩཡཱ དུཀྐཊཾ, བྷཱུཏགཱམཔཱཏབྱཏཱཡ པཱཙིཏྟིཡཾ. ཨཉྙཏྠཱཏི ཝཏྠུཔཱུཛཱདིཨཏྠཱཡ ¶ ཨོཙིནནེ. སཀིཾ ཨཱཎཏྟོཏི ཨཀཔྤིཡཝོཧཱརེན ཨཱཎཏྟོ ¶ . པཱཙིཏྟིཡམེཝཱཏི ཨཀཔྤིཡཝོཧཱརེན ཨཱཎཏྟཏྟཱ བྷཱུཏགཱམསིཀྑཱཔདེན (པཱཙི. ༩༠-༩༡) པཱཙིཏྟིཡཾ. ཀཔྤིཡཝཙནེན པན ཝཏྠུཔཱུཛཱདིཨཏྠཱཡ ཨོཙིནཱཔེནྟསྶ ཨནཱཔཏྟིཡེཝ.

༣༡. གནྠནེན ནིབྦཏྟཾ དཱམཾ གནྠིམཾ. ཨེས ནཡོ སེསེསུཔི. ན ཝཊྚཏཱིཏི ཀུལསངྒཧཏྠཱཡ, ཝཏྠུཔཱུཛཱདིཨཏྠཱཡ ཝཱ ཝུཏྟནཡེན ཀརོནྟསྶ ཀཱརཱཔེནྟསྶ ཙ དུཀྐཊནྟི ཨཏྠོ. ཝཊྚཏཱིཏི ཝཏྠུཔཱུཛཱདིཨཏྠཱཡ ཝཊྚཏི, ཀུལསངྒཧཏྠཱཡ པན ཀཔྤིཡཝོཧཱརེན ཀཱརཱཔེནྟསྶཔི དུཀྐཊམེཝ. པུརིམནཡེནེཝཱཏི ‘‘བྷིཀྑུསྶ ཝཱ’’ཏིཨཱདིནཱ ཝུཏྟནཡེན. དྷམྨཱསནཝིཏཱནེ བདྡྷཀཎྚཀེསུ པུཔྥཱནི ཝིནིཝིཛ྄ཛྷིཏྭཱ ཋཔེནྟཱིཏི སམྦནྡྷོ. ཨུཔརཱུཔརི ཝིཛ྄ཛྷིཏྭཱ ཚཏྟསདིསཾ ཀཏྭཱ ཨཱཝུཎནཏོ ‘‘ཚཏྟཱདྷིཚཏྟཾ ཝིཡཱ’’ཏི ཝུཏྟཾ. ‘‘ཀདལིཀྑནྡྷམྷཱི’’ཏིཨཱདིནཱ ཝུཏྟཾ སབྦམེཝ སནྡྷཱཡ ‘‘ཏཾ ཨཏིཨོལཱ༹རིཀམེཝཱ’’ཏི ཝུཏྟཾ, སབྦཏྠ ཀརཎེ, ཨཀཔྤིཡཝོཧཱརེན ཀཱརཱཔནེ ཙ དུཀྐཊམེཝཱཏི ཨཏྠོ. པུཔྥཝིཛ྄ཛྷནཏྠཾ ཀཎྚཀམྤི བནྡྷིཏུཾ ན ཝཊྚཏཱིཏི ཨིམསྶ ཨུཔལཀྑཎཏྟཱ པུཔྥདཱམོལམྦཀཱདིཨཏྠཱཡ རཛྫུབནྡྷནཱདིཔི ན ཝཊྚཏཱིཏི ཀེཙི ཝདནྟི. ཨཉྙེ པན ‘‘པུཔྥཝིཛ྄ཛྷནཏྠཾ ཀཎྚཀནྟི ཝིསེསིཏཏྟཱ ཏདཏྠཾ ཀཎྚཀམེཝ བནྡྷིཏུཾ ན ཝཊྚཏི, ཏཉྩ ཨཊྛཀཐཱཔམཱཎེནཱ’’ཏི ཝདནྟི, ཝཱིམཾསིཏྭཱ གཧེཏབྦཾ. པུཔྥཔཊིཙྪཀཾ ནཱམ དནྟཱདཱིཧི ཀཏཾ པུཔྥཱདྷཱནཾ. ཨེཏམྤི ནཱགདནྟཀམྤི སཚིདྡམེཝ གཧེཏབྦཾ. ཨསོཀཔིཎྜིཡཱཏི ཨསོཀསཱཁཱནཾ, པུཔྥཱནཾ ཝཱ སམཱུཧེ. སཱརཏྠདཱིཔནིཡཾ (སཱརཏྠ. ཊཱི. ༢.༤༣༡) པན ‘‘ཨསོཀཔིཎྜིཡཱཏི ཨསོཀཔུཔྥམཉྫརིཀཱཡཱ’’ཏི ཝུཏྟཾ. དྷམྨརཛྫུ ནཱམ ཙེཏིཡཾ ཝཱ བོདྷིཾ ཝཱ པུཔྥཔྤཝེསནཏྠཾ ཨཱཝིཛ྄ཛྷིཏྭཱ བནྡྷརཛྫུ. ཝིམཏིཝིནོདནིཡཾ (ཝི. ཝི. ཊཱི. ༡.༤༣༡) པན ‘‘དྷམྨརཛྫུ ནཱམ ཙེཏིཡཱདཱིནི ¶ པརིཀྑིཔིཏྭཱ ཏེསཉྩ རཛྫུཡཱ ཙ ཨནྟརཱ པུཔྥཔྤཝེསནཏྠཱཡ བནྡྷརཛྫུ. སིཐིལཝཊྚིཏཱཡ ཝཱ ཝཊྚིཡཱ ཨབྦྷནྟརེ པུཔྥཔྤཝེསནཏྠཱཡ ཨེཝཾ བནྡྷཱཏིཔི ཝདནྟཱི’’ཏི ཝུཏྟཾ.

མཏྠཀདཱམནྟི དྷམྨཱསནཱདིམཏྠཀེ པལམྦཀདཱམཾ. ཏེསཾཡེཝཱཏི ཨུཔྤལཱདཱིནཾ ཨེཝ. ཝཱཀེན ཝཱཏི པུཔྥནཱལ༹ཾ ཕཱལེཏྭཱ པུཔྥེན ཨེཀཱབདྡྷཊྛིཏཝཱཀེན དཎྜེན ཙ ཨེཀཱབདྡྷེནེཝ. ཨེཏེན པུཔྥཾ བཱིཛགཱམསངྒཧཾ ན གཙྪཏི པཉྩསུ བཱིཛེསུ ཨཔཝིཊྛཏྟཱ པཎྞཾ ཝིཡ, ཏསྨཱ ཀཔྤིཡཾ ཨཀཱརཱཔེཏྭཱཔི ཝིཀོཔནེ དོསོ ནཏྠི. ཡཉྩ ཚིནྣསྶཔི མཀུལ༹སྶ ཝིཀསནཾ, ཏམྤི ཨཏིཏརུཎསྶ ཨབྷཱཝཱ ཝུཌྜྷིལཀྑཎཾ ན ཧོཏི, པརིཎཏསྶ པན མཀུལ༹སྶ པཏྟཱནཾ སིནེཧེ པརིཡཱདཱནཾ གཏེ ཝིསུཾབྷཱཝོ ཨེཝ ཝིཀཱསོ, ཏེནེཝ ཚིནྣམཀུལ༹ཝིཀཱསོ ཨཚིནྣམཀུལ༹ཝིཀཱསཏོ པརིཧཱིནོ, མིལཱཏནིཡུཏྟོ ¶ ཝཱ དིསྶཏི. ཡཉྩ མིལཱཏསྶ ཨུདཀསཉྙོགེ ཨམིལཱནཏཱཔཛྫནཾ, ཏམྤི ཏམྦུལཔཎྞཱདཱིསུ སམཱནཾ ཝུཌྜྷིལཀྑཎཾ ན ཧོཏི. པཱལི༹ཨཊྛཀཐཱསུ ཙ ན ཀཏྠཙི པུཔྥཱནཾ ཀཔྤིཡཀརཎཾ ཨཱགཏཾ, ཏསྨཱ པུཔྥཾ སབྦཐཱ ཨབཱིཛམེཝཱཏི ཝིཉྙཱཡཏི, ཝཱིམཾསིཏྭཱ གཧེཏབྦཾ.

‘‘པསིབྦཀེ ཝིཡཱ’’ཏི ཝུཏྟཏྟཱ པུཔྥཾ པསིབྦཀེ ཝཱ པསིབྦཀསདིསཾ བནྡྷེ ཡཏྠ ཀཏྠཙི ཙཱིཝརེ ཝཱ པཀྑིཔིཏུཾ ཝཊྚཏཱིཏི སིདྡྷཾ. སཱརཏྠདཱིཔནིཡཾ (སཱརཏྠ. ཊཱི. ༢.༤༣༡) པན ‘‘ཁནྡྷེ ཋཔིཏཀཱསཱཝསྶཱཏི ཁནྡྷེ ཋཔིཏསངྒྷཱཊིཾ སནྡྷཱཡ ཝུཏྟཾ. ཏཉྷི ཏཐཱབནྡྷིཏུཾ སཀྐཱ བྷཝེཡྻ. ཨིམིནཱ ཙ ཨཉྙམྤི ཏཱདིསཾ ཀཱསཱཝཾ ཝཱ ཝཏྠཾ ཝཱ ཝུཏྟནཡེན བནྡྷིཏྭཱ ཏཏྠ པུཔྥཱནི པཀྑིཔིཏུཾ ཝཊྚཏཱིཏི སིདྡྷཾ. ཨཾསབྷཎྜིཀཔསིབྦཀེ པཀྑིཏྟསདིསཏྟཱ ཝེཋིམཾ ནཱམ ན ཛཱཏཾ, ཏསྨཱ སིཐིལབནྡྷསྶ ཨནྟརནྟརཱ པཀྑིཔིཏུམྤི ཝཊྚཏཱིཏི ཝདནྟཱི’’ཏི ཝུཏྟཾ. ཧེཊྛཱ དཎྜཀཾ པན བནྡྷིཏུཾ ན ¶ ཝཊྚཏཱིཏི རཛྫུཨཱདཱིཧི བནྡྷནཾ སནྡྷཱཡ ཝུཏྟཾ, པུཔྥསྶེཝ པན ཨཙྪིནྣདཎྜཀེཧི བནྡྷིཏུཾ ཝཊྚཏི ཨེཝ.

པུཔྥཔཊེ ཙ དཊྛབྦནྟི པུཔྥཔཊཾ ཀརོནྟསྶ དཱིགྷཏོ པུཔྥདཱམསྶ ཧརཎཔཙྩཱཧརཎཝསེན པཱུརཎཾ སནྡྷཱཡ ཝུཏྟཾ, ཏིརིཡཏོ ཧརཎཾ པན ཝཱཡིམཾ ནཱམ ཧོཏི, ན པུརིམཾ. ‘‘པུརིམཊྛཱནཾ ཨཏིཀྐཱམེཏཱི’’ཏི སཱམཉྙཏོ ཝུཏྟཏྟཱ པུརིམཾ པུཔྥཀོཊིཾ ཕུསཱཔེཏྭཱ ཝཱ ཨཕུསཱཔེཏྭཱ ཝཱ པརིཀྑིཔནཝསེན ཨཏིཀྐཱམེནྟསྶ ཨཱཔཏྟིཡེཝ. བནྡྷིཏུཾ ཝཊྚཏཱིཏི པུཔྥརཧིཏཱཡ སུཏྟཝཱཀཀོཊིཡཱ བནྡྷིཏུཾ ཝཊྚཏི. ཨེཀཝཱརཾ ཧརིཏྭཱ པརིཀྑིཔིཏྭཱཏི ཨིདཾ པུབྦེ ཝུཏྟཙེཏིཡཱདིཔརིཀྑེཔཾ པུཔྥཔཊཀརཎཉྩ སནྡྷཱཡ ཝུཏྟཾ, ཏསྨཱ ཙེཏིཡཾ ཝཱ བོདྷིཾ ཝཱ པརིཀྑིཔནྟེན ཨེཀཝཱརཾ པརིཀྑིཔིཏྭཱ པུརིམཊྛཱནཾ སམྤཏྟེ ཨཉྙསྶ དཱཏབྦཾ, ཏེནཔི ཨེཀཝཱརཾ པརིཀྑིཔིཏྭཱ ཏཐེཝ ཀཱཏབྦཾ. པུཔྥཔཊཾ ཀརོནྟེན ཙ ཧརིཏྭཱ ཨཉྙསྶ དཱཏབྦཾ, ཏེནཔི ཏཐེཝ ཀཱཏབྦཾ. སཙེཔི དྭེཡེཝ བྷིཀྑཱུ ཨུབྷོསུ པསྶེསུ ཋཏྭཱ པརིཡཱཡེན ཧརནྟི, ཝཊྚཏིཡེཝཱཏི ཝདནྟི.

པརེཧི པཱུརིཏནྟི དཱིགྷཏོ པསཱརིཏཾ. ཝཱཡིཏུནྟི ཏིརིཡཏོ ཧརིཏུཾ, ཏཾ པན ཨེཀཝཱརམྤི ན ལབྷཏི. པུཔྥཱནི ཋཔེནྟེནཱཏི ཨགནྠིཏཱནི པཱཀཏིཀཔུཔྥཱནི ཨཉྙམཉྙཾ ཕུསཱཔེཏྭཱཔི ཋཔེནྟེན. པུཔྥདཱམཾ པན པཱུཛནཏྠཱཡ བྷཱུམིཡཾ ཋཔེནྟེན ཕུསཱཔེཏྭཱ ཝཱ ཨཕུསཱཔེཏྭཱ ཝཱ དིགུཎཾ ཀཏྭཱ ཋཔེཏུཾ ན ཝཊྚཏཱིཏི ཝདནྟི.

༣༢. གྷཊིཀདཱམཨོལམྦཀོཏི ¶ ཧེཊྛཱབྷཱགེ གྷཊིཀཱཀཱརཡུཏྟོ, དཱརུགྷཊིཀཱཀཱརོ ཝཱ ཨོལམྦཀོ. སཱརཏྠདཱིཔནིཡཾ (སཱརཏྠ. ཊཱི. ༢.༤༣༡) པན ‘‘གྷཊིཀདཱམཨོལམྦཀོཏི ཨནྟེ གྷཊིཀཱཀཱརཡུཏྟོ ཡམཀདཱམཨོལམྦཀོ’’ཏི ཝུཏྟཾ. ཝཛིརབུདྡྷིཊཱིཀཱཡཾ ¶ (ཝཛིར. ཊཱི. པཱརཱཛིཀ ༤༣༡) པན ‘‘གྷཊིཀདཱམཨོལམྦཀོཏི ཡམཀདཱམཨོལམྦཀོཏི ལིཁིཏ’’ནྟི ཝུཏྟཾ, ཨེཀེཀཾ པན དཱམཾ ནིཀྑནྟསུཏྟཀོཊིཡཱཝ བནྡྷིཏྭཱ ཨོལམྦིཏུཾ ཝཊྚཏི, པུཔྥདཱམདྭཡཾ སངྒྷཊིཏུཀཱམེནཔི ནིཀྑནྟསུཏྟཀོཊིཡཱཝ སུཏྟཀོཊིཾ སངྒྷཊིཏུཾ ཝཊྚཏི. ཨཌྜྷཙནྡཱཀཱརེན མཱལཱགུཎཔརིཀྑེཔོཏི ཨཌྜྷཙནྡཱཀཱརེན མཱལཱགུཎསྶ པུནཔྤུནཾ ཧརཎཔཙྩཱཧརཎཝསེན པཱུརེཏྭཱ པརིཀྑིཔནཾ, ཏེནེཝ ཏཾ པུརིམེ པཝིཊྛཾ, ཏསྨཱ ཨེཏམྤི ཨཌྜྷཙནྡཱཀཱརཾ པུནཔྤུནཾ ཧརཎཔཙྩཱཧརཎཝསེན པཱུརེཏུཾ ན ཝཊྚཏི. ཨེཀཝཱརཾ པན ཨཌྜྷཙནྡཱཀཱརཀརཎེ མཱལཱགུཎཾ ཧརིཏུཾ ཝཊྚཏཱིཏི ཝདནྟི. པུཔྥདཱམཀརཎནྟི ཨེཏྠ སུཏྟཀོཊིཡཾ གཧེཏྭཱཔི ཨེཀཏོ ཀཱཏུཾ ན ཝཊྚཏཱིཏི ཝདནྟི. སུཏྟམཡཾ གེཎྜུཀཾ ནཱམ, གེཎྜུཀཁརཔཏྟདཱམཱནཾ པཊིཀྑིཏྟཏྟཱ ཙེལཱདཱིཧི ཀཏདཱམམྤི ན ཝཊྚཏི ཨཀཔྤིཡཱནུལོམཏྟཱཏི ཝདནྟི. པརསནྟཀཾ དེཏི, དུཀྐཊམེཝཱཏི ཝིསྶཱསགྒཱཧེན པརསནྟཀཾ གཧེཏྭཱ དེནྟཾ སནྡྷཱཡ ཝུཏྟཾ. ཐུལླཙྩཡནྟི ཨེཏྠ བྷཎྜདེཡྻམྤི ཧོཏི.

༣༣. ཏཉྩ ཁོ ཝཏྠུཔཱུཛནཏྠཱཡཱཏི མཱཏཱཔིཏཱུནམྤི པུཔྥཾ དེནྟེན ཝཏྠུཔཱུཛནཏྠཱཡེཝ དཱཏབྦནྟི དསྶེཏི. ‘‘མཎྜནཏྠཱཡ པན སིཝལིངྒཱདིཔཱུཛནཏྠཱཡཱ’’ཏི ཨེཏྟཀམེཝ ཝུཏྟཏྟཱ ‘‘ཨིམཾ ཝིཀྐིཎིཏྭཱ ཛཱིཝིསྶནྟཱི’’ཏི མཱཏཱཔིཏཱུནཾ ཝཊྚཏི, སེསཉཱཏཀཱནཾ ཏཱཝཀཱལིཀམེཝ དཱཏུཾ ཝཊྚཏི. ཀསྶཙིཔཱིཏི ཉཱཏཀསྶ ཝཱ ཨཉྙཱཏཀསྶ ཝཱ ཀསྶཙིཔི. ཉཱཏིསཱམཎེརེཧེཝཱཏི ཏེསཾ གིཧིཔརིཀམྨམོཙནཏྠཾ ཝུཏྟཾ. ཨིཏརེཏི ཨཉྙཱཏཀཱ. ཏེཧིཔི སཱམཎེརེཧི ཨཱཙརིཡུཔཛ྄ཛྷཱཡཱནཾ ཝཏྟསཱིསེན ཧརིཏབྦཾ. སམྤཏྟཱནཾ སཱམཎེརཱནཾ ཨུཔཌྜྷབྷཱགཾ དཱཏུཾ ཝཊྚཏཱིཏི སངྒྷིཀསྶ ལཱབྷསྶ ཨུཔཙཱརསཱིམཊྛསཱམཎེརཱནམྤི སནྟཀཏྟཱ ཏེསམྤི ཨུཔཌྜྷབྷཱགོ ལབྦྷཏེཝཱཏི ཀཏྭཱ ཝུཏྟཾ. ཙཱུལ༹ཀནྟི ཨུཔཌྜྷབྷཱགཏོཔི ཨུཔཌྜྷཾ. ཙཏུཏྠབྷཱགསྶེཏཾ ¶ ཨདྷིཝཙནཾ. སཱམཎེརཱ…པེ… ཋཔེནྟཱིཏི ཨིདཾ ཨརཀྑིཏཨགོཔིཏཾ སནྡྷཱཡ ཝུཏྟཾ. སཱརཏྠདཱིཔནིཡཾ པན ‘‘ཝསྶགྒེན ཨབྷཱཛནཱིཡཾ སནྡྷཱཡ ཝུཏྟ’’ནྟི ཝུཏྟཾ. ཏཏྠ ཏཏྠཱཏི མགྒེ ཝཱ ཙེཏིཡངྒཎེ ཝཱ.

༣༤. སཱམཎེརེཧི དཱཔེཏུཾ ན ལབྷནྟཱིཏི ཨིདཾ སཱམཎེརེཧི གིཧིཀམྨཾ ཀཱརིཏཾ ཝིཡ ཧོཏཱིཏི ཝུཏྟཾ, ན པན པུཔྥདཱནཾ ཧོཏཱིཏི སཱམཎེརཱནམྤི ན ཝཊྚནཏོ. ཝུཏྟཉྩ ‘‘སཡམེཝཱ’’ཏིཨཱདི. ན ཧི ཏཾ པུཔྥདཱནཾ ནཱམ སིཡཱ. ཡདི ཧི ཏཐཱ ཨཱགཏཱནཾ ཏེསཾ དཱནཾ པུཔྥདཱནཾ ནཱམ བྷཝེཡྻ ¶ , སཱམཎེརེཧིཔི དཱཏུཾ ན ལབྦྷེཡྻ. སཡམེཝཱཏི སཱམཎེརཱ སཡམེཝ. ཡཱགུབྷཏྟཱདཱིནི ཨཱདཱཡཱཏི ཨིདཾ བྷིཀྑཱུནཾ ཨཏྠཱཡ ཡཱགུབྷཏྟཱདིསམྤཱདནཾ སནྡྷཱཡ ཝུཏྟཏྟཱ ‘‘ན ཝཊྚཏཱི’’ཏི ཨཝིསེསེན ཝུཏྟཾ. ཨཝིསེསེན ཝུཏྟནྟི ཨིམིནཱ སབྦེསམྤི ན ཝཊྚཏཱིཏི དསྶེཏི.

༣༥. ཝུཏྟནཡེནེཝཱཏི ‘‘མཱཏཱཔིཏཱུནཾ ཏཱཝ ཧརིཏྭཱཔི ཧརཱཔེཏྭཱཔི པཀྐོསིཏྭཱཔི པཀྐོསཱཔེཏྭཱཔི དཱཏུཾ ཝཊྚཏི, སེསཉཱཏཀཱནཾ པཀྐོསཱཔེཏྭཱཝ. མཱཏཱཔིཏཱུནཉྩ ཧརཱཔེནྟེན ཉཱཏིསཱམཎེརེཧེཝ ཧརཱཔེཏབྦཾ. ཨིཏརེ པན ཡདི སཡམེཝ ཨིཙྪནྟི, ཝཊྚཏཱི’’ཏི ཨིམཾ པུཔྥདཱནེ ཝུཏྟནཡཾ ཕལདཱནེཔི ཨཏིདིསཏི, ཏསྨཱ ཕལམྤི མཱཏཱཔིཏཱུནཾ ཧརཎཧརཱཔནཱདིནཱ དཱཏུཾ ཝཊྚཏི, སེསཉཱཏཱིནཾ པཀྐོསཱཔེཏྭཱཝ. ཨིདཱནི ‘‘ཡོ ཧརིཏྭཱ ཝཱ ཧརཱཔེཏྭཱ ཝཱ…པེ… ཨིསྶརཝཏཱཡ དདཏོ ཐུལླཙྩཡ’’ནྟི (པཱརཱ. ཨཊྛ. ༢.༤༣༦-༤༣༧) ཨིམཾ པུཔྥདཱནེ ཝུཏྟནཡཾ ཕལདཱནེ སངྑིཔིཏྭཱ དསྶེནྟོ ‘‘ཀུལསངྒཧཏྠཱཡ པནཱ’’ཏིཨཱདིམཱཧ. ཁཱིཎཔརིབྦཡཱནནྟི ཨཱགནྟུཀེ སནྡྷཱཡ ཝུཏྟཾ. ཕལཔརིཙྪེདེནཱཏི ‘‘ཨེཏྟཀཱནི ཕལཱནི དཱཏབྦཱནཱི’’ཏི ཨེཝཾ ཕལཔརིཙྪེདེན ཝཱ. རུཀྑཔརིཙྪེདེན ཝཱཏི ‘‘ཨིམེཧི རུཀྑེཧི ¶ དཱཏབྦཱནཱི’’ཏི ཨེཝཾ རུཀྑཔརིཙྪེདེན ཝཱ. པརིཙྪིནྣེསུཔི པན རུཀྑེསུ ‘‘ཨིདྷ ཕལཱནི སུནྡརཱནི, ཨིཏོ གཎྷཐཱ’’ཏི ཝདནྟེན ཀུལསངྒཧོ ཀཏོ ནཱམ ཧོཏཱིཏི ཨཱཧ ‘‘ཨེཝཾ པན ན ཝཏྟབྦ’’ནྟི. རུཀྑཙྪལླཱིཏི རུཀྑཏྟཙོ, སཱ ‘‘བྷཱཛནཱིཡབྷཎྜ’’ནྟི ཝུཏྟཱ. ཝུཏྟནཡེནཱཏི པུཔྥཕལཱདཱིསུ ཝུཏྟནཡེན ཀུལསངྒཧོ ཧོཏཱིཏི དསྶེཏི.

༣༦. ཏེསཾ ཏེསཾ གིཧཱིནཾ གཱམནྟརདེསནྟརཱདཱིསུ སཱསནཔཊིསཱསནཧརཎཾ ཛངྒྷཔེསནིཡཾ. ཏེནཱཧ ‘‘གིཧཱིནཾ དཱུཏེཡྻཾ སཱསནཧརཎཀམྨ’’ནྟི. དཱུཏསྶ ཀམྨཾ དཱུཏེཡྻཾ. པཋམཾ སཱསནཾ ཨགྒཧེཏྭཱཔི…པེ… པདེ པདེ དུཀྐཊནྟི ཨིདཾ ‘‘ཏསྶ སཱསནཾ ཨཱརོཙེསྶཱམཱི’’ཏི ཨིམིནཱ ཨདྷིཔྤཱཡེན གམནཾ སནྡྷཱཡ ཝུཏྟཾ. ཏསྶ པན སཱསནཾ པཊིཀྑིཔིཏྭཱ སཡམེཝ ཀཱརུཉྙེ ཋིཏོ གནྟྭཱ ཨཏྟནོ པཏིརཱུཔཾ སཱསནཾ ཨཱརོཙེཏི, ཨནཱཔཏྟི. གིཧཱིནཉྩ ཀཔྤིཡསཱསནཾ ཧརིཏུཾ ཝཊྚཏཱིཏི སམྦནྡྷོ. ཨིམེཧི པན ཨཊྛཧི ཀུལདཱུསཀཀམྨེཧཱིཏི པུཔྥདཱནཾ ཕལདཱནཾ ཙུཎྞདཱནཾ མཏྟིཀདཱནཾ དནྟཀཊྛདཱནཾ ཝེལུ༹དཱནཾ པཎྞདཱནཾ ཛངྒྷཔེསནིཀནྟི ཨིམེཧི ཡཐཱཝུཏྟེཧི. པབྦཱཛནཱིཡཀམྨཀཏོཏི ཀུལདཱུསནཔཙྩཡཱ ཀཏཔབྦཱཛནཱིཡཀམྨོ.

༣༧. སེཀྑབྷཱུམིཡཾ ཝཱཏི ཨིམིནཱ ཛྷཱནབྷཱུམིམྤི སངྒཎྷཱཏི. ཏིཎྞཾ ཝིཝེཀཱནནྟི ཀཱཡཙིཏྟཨུཔདྷིཝིཝེཀབྷཱུཏཱནཾ ¶ ཏིཎྞཾ ཝིཝེཀཱནཾ. པིཎྜཱཡ ཙརཎསྶ བྷོཛནཔརིཡོསཱནཏྟཱ ཝུཏྟཾ ‘‘ཡཱཝ བྷོཛནཔརིཡོསཱན’’ནྟི. བྷུཏྭཱ ཨཱགཙྪནྟསྶཔི པུན ཝུཏྟནཡེནེཝ པཎིདྷཱཡ ཙཱིཝརསཎྛཱཔནཱདཱིནི ཀརོནྟསྶ དུཀྐཊམེཝཱཏི དཊྛབྦཾ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཀུལསངྒཧཝིནིཙྪཡཀཐཱལངྐཱརོ ནཱམ

པཉྩམོ པརིཙྪེདོ.

༦. མཙྪམཾསཝིནིཙྪཡཀཐཱ

༣༨. ཨེཝཾ ¶ ཀུལསངྒཧཝིནིཙྪཡཾ ཀཐེཏྭཱ ཨིདཱནི མཙྪམཾསཝིནིཙྪཡཾ ཀཐེཏུཾ ‘‘མཙྪམཾསེསུ པནཱ’’ཏིཨཱདི ཝུཏྟཾ. ཏཏྠ ཐལེ ཋཔིཏམཏྟེ མརཏི, ཀེཝཊྚཱདཱིཧི ཝཱ མཱརིཡཏཱིཏི མཙྪོ. མཙྪསྶ ཨིདནྟི མཙྪཾ, མསིཡཏེ ཨཱམསིཡཏེཏི མཾསཾ, མཙྪཉྩ མཾསཉྩ མཙྪམཾསཱནི, ཏེསུ. མཙྪམཾསེསུ པན ཝིནིཙྪཡོ ཨེཝཾ ཝེདིཏབྦོཏི ཡོཛནཱ. མཙྪགྒཧཎེནཱཏི ཨེཏྠ ནིདྡྷཱརཎཾ ན ཀཱཏབྦཾ. པན-སདྡོ པཀྑནྟརཏྠོ, དིཝཱསེཡྻཱདཱིསུ ཝིནིཙྪཡཏོ ཨཔརོ མཙྪམཾསེསུ ཝིནིཙྪཡོ ཝེདིཏབྦོཏི ཨཏྠོ. གཡ྄ཧཏེ ཨནེནཱཏི གཧཎཾ. ཀིཾ ཏཾ? སདྡོ, མཙྪཨིཏི གཧཎཾ མཙྪགྒཧཎཾ, ཏེན མཙྪགྒཧཎེན, མཙྪསདྡེནཱཏི ཨཏྠོ. མཾསེསུ པན…པེ… ཨཀཔྤིཡཱནཱིཏི ཨེཏྠ མནུསྶམཾསཾ སམཱནཛཱཏིམཾསཏོ པཊིཀྑིཏྟཾ. ཧཏྠིཨསྶཱནཾ མཾསཱནི རཱཛངྒཏོ, སུནཁཨཧཱིནཾ ཛེགུཙྪབྷཱཝཏོ, སེསཱནཾ ཝཱལ༹མིགཏྟཱ བྷིཀྑཱུནཾ པརིབནྡྷཝིམོཙནཏྠཾ པཊིཀྑིཏྟནྟི དཊྛབྦཾ.

ཏིཀོཊིཔརིསུདྡྷནྟི དིཊྛསུཏཔརིསངྐིཏསངྑཱཏཱཧི ཏཱིཧི ཀོཊཱིཧི ཏཱིཧི ཨཱཀཱརེཧི ཏཱིཧི ཀཱརཎེཧི པརིསུདྡྷཾ, ཝིམུཏྟནྟི ཨཏྠོ. ཏཏྠ ཨདིཊྛཨསུཏཱནི ཙཀྑུཝིཉྙཱཎསོཏཝིཉྙཱཎཱནཾ ཨནཱརམྨཎབྷཱཝཏོ ཛཱནིཏབྦཱནི. ཨཔརིསངྐིཏཾ པན ཀཐཾ ཛཱནིཏབྦནྟི ཨཱཧ ‘‘ཨཔརིསངྐིཏཾ པནཱ’’ཏིཨཱདི, ཏཱིཎི པརིསངྐིཏཱནི ཉཏྭཱ ཏེསཾ པཊིཔཀྑཝསེན ཨཔརིསངྐིཏཾ ཛཱནིཏབྦནྟི ཨཏྠོ. ཨིདཱནི ཏཱནི ཏཱིཎི པརིསངྐིཏཱནི ཙ ཨེཝཾ པརིསངྐིཏེ སཏི བྷིཀྑཱུཧི ཀཏྟབྦཝིདྷིཉྩ ཏེན ཝིདྷིནཱ ཨཔརིསངྐིཏེ སཏི ཀཏྟབྦབྷཱཝཉྩ ཝིཏྠཱརཏོ དསྶེཏུཾ ‘‘ཀཐ’’ནྟིཨཱདིམཱཧ ¶ . ཏཏྠ དིསྭཱ པརིསངྐིཏཾ དིཊྛཔརིསངྐིཏཾ ནཱམ. སུཏྭཱ པརིསངྐིཏཾ སུཏཔརིསངྐིཏཾ ནཱམ. ཨདིསྭཱ ཨསུཏྭཱ ཏཀྐེན ཨནུམཱནེན པརིསངྐིཏཾ ཏདུབྷཡཝིནིམུཏྟཔརིསངྐིཏཾ ནཱམ. ཏཾ ཏིཝིདྷམྤི པརིསངྐིཏསཱམཉྙེན ཨེཀཱ ཀོཊི ¶ ཧོཏི, ཏཏོ ཝིམུཏྟཾ ཨཔརིསངྐིཏཾ ནཱམ. ཨེཝཾ ཨདིཊྛཾ ཨསུཏཾ ཨཔརིསངྐིཏཾ མཙྪམཾསཾ ཏིཀོཊིཔརིསུདྡྷཾ ཧོཏི.

ཛཱལཾ མཙྪབནྡྷནཾ. ཝཱགུརཱ མིགབནྡྷིནཱི. ཀཔྤཏཱིཏི ཡདི ཏེསཾ ཝཙནེན སངྐཱ ནིཝཏྟཏི, ཝཊྚཏི, ན ཏཾ ཝཙནཾ ལེསཀཔྤཾ ཀཱཏུཾ ཝཊྚཏི. ཏེནེཝ ཝཀྑཏི ‘‘ཡཏྠ ཙ ནིབྦེམཏིཀོ ཧོཏི, ཏཾ སབྦཾ ཀཔྤཏཱི’’ཏི. པཝཏྟམཾསནྟི ཨཱཔཎཱདཱིསུ པཝཏྟཾ ཝིཀྐཱཡིཀཾ ཝཱ མཏམཾསཾ ཝཱ. མངྒལཱདཱིནནྟི ཨཱདི-སདྡེན ཨཱཧུནཔཱཧུནཱདིཀེ སངྒཎྷཱཏི. བྷིཀྑཱུནཾཡེཝ ཨཏྠཱཡ ཨཀཏནྟི ཨེཏྠ ཨཊྛཱནཔྤཡུཏྟོ ཨེཝ-སདྡོ, བྷིཀྑཱུནཾ ཨཏྠཱཡ ཨཀཏམེཝཱཏི སམྦནྡྷིཏབྦཾ, ཏསྨཱ བྷིཀྑཱུནཉྩ མངྒལཱདཱིནཉྩཱཏི མིསྶེཏྭཱ ཀཏམྤི ན ཝཏྟཏཱིཏི ཝེདིཏབྦཾ. ཀེཙི པན ‘‘ཡཐཱཋིཏཝསེན ཨཝདྷཱརཎཾ གཧེཏྭཱ ཝཊྚཏཱི’’ཏི ཝདནྟི, ཏཾ ན སུནྡརཾ. ཡཏྠ ཙ ནིབྦེམཏིཀོ ཧོཏཱིཏི བྷིཀྑཱུནཾ ཨཏྠཱཡ ཀཏེཔི སབྦེན སབྦཾ པརིསངྐིཏཱབྷཱཝམཱཧ.

༣༩. ཏམེཝཏྠཾ ཨཱཝིཀཱཏུཾ ‘‘སཙེ པནཱ’’ཏིཨཱདི ཝུཏྟཾ. ཨིཏརེསཾ ཝཊྚཏཱིཏི ཨཛཱནནྟཱནཾ ཝཊྚཏི, ཛཱནཏོཝེཏྠ ཨཱཔཏྟི ཧོཏཱིཏི. ཏེཡེཝཱཏི ཡེ ཨུདྡིསྶ ཀཏཾ, ཏེཡེཝ. ཨུདྡིསྶ ཀཏམཾསཔརིབྷོགཏོ ཨཀཔྤིཡམཾསཔརིབྷོགེ ཝིསེསཾ དསྶེཏུཾ ‘‘ཨཀཔྤིཡམཾསཾ པནཱ’’ཏིཨཱདི ཝུཏྟཾ. པུརིམསྨིཾ སཙིཏྟཀཱཔཏྟི, ཨིཏརསྨིཾ ཨཙིཏྟཀཱ. ཏེནཱཧ ‘‘ཨཀཔྤིཡམཾསཾ ཨཛཱནིཏྭཱ བྷུཉྫནྟསྶཔི ཨཱཔཏྟིཡེཝཱ’’ཏི. ‘‘པརིབྷོགཀཱལེ པུཙྪིཏྭཱ པརིབྷུཉྫིསྶཱམཱིཏི ཝཱ གཧེཏྭཱ པུཙྪིཏྭཱཝ པརིབྷུཉྫིཏབྦ’’ནྟི (ཝི. སངྒ. ཨཊྛ. ༣༩) ཝཙནཏོ ཨཀཔྤིཡམཾསཾ ཨཛཱནིཏྭཱ པཊིགྒཎྷནྟསྶ པཊིགྒཧཎེ ཨནཱཔཏྟི སིདྡྷཱ. ཨཛཱནིཏྭཱ ¶ པརིབྷུཉྫནྟསྶེཝ ཧི ཨཱཔཏྟི ཝུཏྟཱ. ཝཏྟནྟི ཝདནྟཱིཏི ཨིམིནཱ ཨཱཔཏྟི ནཏྠཱིཏི དསྶེཏི.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

མཙྪམཾསཝིནིཙྪཡཀཐཱལངྐཱརོ ནཱམ

ཚཊྛོ པརིཙྪེདོ.

༧. ཨནཱམཱསཝིནིཙྪཡཀཐཱ

༤༠. ཨེཝཾ ¶ མཙྪམཾསཝིནིཙྪཡཾ ཀཐེཏྭཱ ཨིདཱནི ཨནཱམཱསཝིནིཙྪཡཾ ཀཐེཏུཾ ‘‘ཨནཱམཱས’’ནྟིཨཱདིམཱཧ. ཏཏྠ ཨཱམསིཡཏེཏི ཨཱམཱསཾ, ན ཨཱམཱསཾ ཨནཱམཱསཾ, ཨཔརཱམསིཏབྦནྟི ཨཏྠོ. པཱརིཔནྠིཀཱཏི ཝིཀུཔྤནིཀཱ, ཨནྟརཱཡིཀཱཏི ཝུཏྟཾ ཧོཏི. ནདཱིསོཏེན ཝུཡ྄ཧམཱནཾ མཱཏརནྟི ཨེཏཾ ཨུཀྐཊྛཔརིཙྪེདདསྶནཏྠཾ ཝུཏྟཾ. ཨཉྙཱསུ པན ཨིཏྠཱིསུ ཀཱརུཉྙཱདྷིཔྤཱཡེན མཱཏརི ཝུཏྟནཡེན པཊིཔཛྫནྟསྶ ནེཝཏྠི དོསོཏི ཝདནྟི. ‘‘མཱཏར’’ནྟི ཝུཏྟཏྟཱ ཨཉྙཱསུ ན ཝཊྚཏཱིཏི ཝདནྟཱཔི ཨཏྠི. ཨེཏྠ གཎྷཱཧཱིཏི ན ཝཏྟབྦཱཏི གེཧསྶིཏཔེམེན ཀཱཡཔྤཊིབདྡྷེན ཕུསནེ དུཀྐཊཾ སནྡྷཱཡ ཝུཏྟཾ. ཀཱརུཉྙེན པན ཝཏྠཱདིཾ གཧེཏུཾ ཨསཀྐོནྟིཾ ‘‘གཎྷཱཧཱི’’ཏི ཝདནྟསྶཔི ཨཝསབྷཱཝཔྤཏྟིཏོ ཨུདཀེ ནིམུཛྫནྟིཾ ཀཱརུཉྙེན སཧསཱ ཨནཱམཱསནྟི ཨཙིནྟེཏྭཱ ཀེསཱདཱིསུ གཧེཏྭཱ མོཀྑཱདྷིཔྤཱཡེན ཨཱཀཌྜྷཏོཔི ཨནཱཔཏྟིཡེཝ. ན ཧི མཱིཡམཱནཾ མཱཏརཾ ཨུཔེཀྑིཏུཾ ཝཊྚཏི. ཨཉྙཱཏིཀཱཡ ཨིཏྠིཡཱཔི ཨེསེཝ ནཡོ. ཨུཀྐཊྛཱཡ མཱཏུཡཱཔི ཨཱམཱསོ ན ཝཊྚཏཱིཏི དསྶནཏྠཾ ‘‘མཱཏར’’ནྟི ཝུཏྟཾ. ཏསྶ ཀཱཏབྦཾ པན ཨཉྙཱསམྤི ཨིཏྠཱིནཾ ཀརོནྟསྶཔི ཨནཱཔཏྟིཡེཝ ཨནཱམཱསཏྟེ ཝིསེསཱབྷཱཝཱ.

ཏིཎཎྜུཔཀནྟི ¶ ཧིརིཝེརཱདིམཱུལེཧི ཀེསཱལངྐཱརཏྠཱཡ ཀཏཙུམྦཊཀཾ. ཏཱལཔཎྞམུདྡིཀནྟི ཏཱལཔཎྞེཧི ཀཏཾ ཨངྒུལིམུདྡིཀཾ. ཏེན ཏཱལཔཎྞཱདིམཡཾ ཀཊིསུཏྟཀཎྞཔིལ༹ནྡྷནཱདི སབྦཾ ན ཝཊྚཏཱིཏི སིདྡྷཾ. པརིཝཏྟེཏྭཱཏི ཨཏྟནོ ནིཝཱསནཔཱརུཔནབྷཱཝཏོ ཨཔནེཏྭཱ, ཙཱིཝརཏྠཱཡ པརིཎཱམེཏྭཱཏི ཝུཏྟཾ ཧོཏི. ཙཱིཝརཏྠཱཡ པཱདམཱུལེ ཋཔེཏཱིཏི ཨིདཾ ནིདསྶནམཏྟཾ. པཙྩཏྠརཎཝིཏཱནཱདིཨཏྠམྤི ཝཊྚཏིཡེཝ, པཱུཛཱདིཨཏྠཾ ཏཱཝཀཱལིཀམྤི ཨཱམསིཏུཾ ཝཊྚཏི. སཱིསཔསཱདྷནདནྟསཱུཙཱིཏི ཨིདཾ སཱིསཱལངྐཱརཏྠཱཡ པཊཔིལོཏིཀཱཧི ཀཏསཱིསཔསཱདྷནཀཉྩེཝ དནྟསཱུཙིཨཱདི ཙཱཏི དྭེ ཏཡོ. སཱིསཔསཱདྷནཾ སིཔཱཊིཀོཔཀརཎཏྠཱཡ ཙེཝ དནྟསཱུཙིཾ སཱུཙིཨུཔཀརཎཏྠཱཡ ཙ གཧེཏབྦནྟི ཡཐཱཀྐམཾ ཨཏྠཾ དསྶེཏི. ཀེསཀལཱཔཾ བནྡྷིཏྭཱ ཏཏྠ ཏིརིཡཾ པཝེསནཏྠཱཡ ཀཏཱ སཱུཙི ཨེཝ སཱིསཔསཱདྷནཀདནྟསཱུཙཱིཏི ཨེཀམེཝ ཀཏྭཱ སིཔཱཊིཀཱཡ པཀྑིཔིཏྭཱ པརིཧརིཏབྦསཱུཙིཡེཝ ཏསྶ ཏསྶ ཀིཙྩསྶ ཨུཔཀརཎནྟི སིཔཱཊིཀསཱུཙིཨུཔཀརཎཾ, ཨེཝཾ ཝཱ ཡོཛནཱ ཀཱཏབྦཱ.

པོཏྠཀརཱུཔནྟི སུདྷཱདཱིཧི ཀཏཾ པཱརཱཛིཀཝཏྠུབྷཱུཏཱནཾ ཏིརཙྪཱནགཏིཏྠཱིནཾ སཎྛཱནེན ཀཏམྤི ཨནཱམཱསམེཝ ¶ . ཨིཏྠིརཱུཔཱནི དསྶེཏྭཱ ཀཏཾ ཝཏྠུབྷིཏྟིཨཱདིཉྩ ཨིཏྠིརཱུཔཾ ཨནཱམསིཏྭཱ ཝལ༹ཉྫེཏུཾ ཝཊྚཏི. ཨེཝརཱུཔེ ཧི ཨནཱམཱསེ ཀཱཡསཾསགྒརཱགེ ཨསཏི ཀཱཡཔྤཊིབདྡྷེན ཨཱམསཏོ དོསོ ནཏྠི. བྷིནྡིཏྭཱཏི ཨེཏྠ ཧཏྠེན ཨགྒཧེཏྭཱཝ ཀེནཙི དཎྜཱདིནཱ བྷིནྡིཏབྦཾ. ཨེཏྠ ཙ ཨནཱམཱསམྤི དཎྜཔཱསཱཎཱདཱིཧི བྷེདནསྶ ཨཊྛཀཐཱཡཾ ཝུཏྟཏྟཱ, པཱལི༹ཡམྤི ཨཱཔདཱསུ མོཀྑཱདྷིཔྤཱཡསྶ ཨཱམསནེཔི ཨནཱཔཏྟིཡཱ ཝུཏྟཏྟཱ ཙ སཔྤིནིཨཱདིཝཱལ༹མིགཱིཧི གཧིཏཔཱཎཀཱནཾ མོཙནཏྠཱཡ ཏཾ ཏཾ སཔྤིནིཨཱདིཝཏྠུཾ དཎྜཱདཱིཧི པཊིཀྑིཔིཏྭཱ གཧེཏུཾ, མཱཏུཨཱདིཾ ཨུདཀེ མཱིཡམཱནཾ ཝཏྠཱདཱིཧི གཧེཏུཾ, ཨསཀྐོནྟིཾ ¶ ཀེསཱདཱིསུ གཧེཏྭཱ ཀཱརུཉྙེན ཨུཀྑིཔིཏུཉྩ ཝཊྚཏཱིཏི ཨཡམཏྠོ གཧེཏབྦོཝ. ‘‘ཨཊྛཀཐཱཡཾ ‘ན ཏྭེཝ ཨཱམསིཏབྦཱ’ཏི ཨིདཾ པན ཝཙནཾ ཨམཱིཡམཱནཾ ཝཏྠུཾ སནྡྷཱཡ ཝུཏྟནྟི ཨཡཾ ཨམྷཱཀཾ ཁནྟཱི’’ཏི ཝིམཏིཝིནོདནིཡཾ (ཝི. ཝི. ཊཱི. ༡.༢༨༡) ཝུཏྟཾ.

༤༡. མགྒཾ ཨདྷིཊྛཱཡཱཏི ‘‘མགྒོ ཨཡ’’ནྟི མགྒསཉྙཾ ཨུཔྤཱདེཏྭཱཏི ཨཏྠོ. པཉྙཔེཏྭཱ དེནྟཱིཏི ཨིདཾ སཱམཱིཙིཝསེན ཝུཏྟཾ, ཏེཧི པན ‘‘ཨཱསནཾ པཉྙཔེཏྭཱཝ ནིསཱིདཐཱ’’ཏི ཝུཏྟེ སཡམེཝ པཉྙཔེཏྭཱ ནིསཱིདིཏུཾ ཝཊྚཏི. ཏཏྠ ཛཱཏཀཱནཱིཏི ཨཙྪིནྡིཏྭཱ བྷཱུཏགཱམབྷཱཝེནེཝ ཋིཏཱནི. ‘‘ཀཱིལ༹ནྟེནཱ’’ཏི ཝུཏྟཏྟཱ སཏི པཙྩཡེ ཨཱམསནྟསྶ ཨནཱཔཏྟི, ཨིདཉྩ གིཧིསནྟཀཾ སནྡྷཱཡ ཝུཏྟཾ, བྷིཀྑུསནྟཀཾ པན པརིབྷོགཱརཧཾ སབྦཐཱ ཨཱམསིཏུཾ ན ཝཊྚཏི དུརཱུཔཙིཎྞཏྟཱ. ཏཱལཔནསཱདཱིནཱིཏི ཙེཏྠ ཨཱདི-སདྡེན ནཱལི༹ཀེརལབུཛཏིཔུསཨལཱབུཀུམྦྷཎྜཔུསྶཕལཨེལཱ༹ལུཀཕལཱནཾ སངྒཧོ དཊྛབྦོ. ‘‘ཡཐཱཝུཏྟཕལཱནཾཡེཝ ཙེཏྠ ཀཱིལཱ༹དྷིཔྤཱཡེན ཨཱམསནཾ ན ཝཊྚཏཱི’’ཏི ཝུཏྟཏྟཱ པཱསཱཎསཀྑརཱདཱིནི ཀཱིལཱ༹དྷིཔྤཱཡེནཔི ཨཱམསིཏུཾ ཝཊྚཏི. ཨནུཔསམྤནྣཱནཾ དསྶཱམཱིཏི ཨིདཾ ཨཔཊིགྒཧེཏྭཱ གཧཎཾ སནྡྷཱཡ ཝུཏྟཾ. ཨཏྟནོཔི ཨཏྠཱཡ པཊིགྒཧེཏྭཱ གཧཎེ དོསོ ནཏྠི ཨནཱམཱསཏྟཱབྷཱཝཱ.

༤༢. མུཏྟཱཏི (མ. ནི. ཊཱི. ༡.༢ པཐཝཱིཝཱརཝཎྞནཱ; སཱརཏྠ. ཊཱི. ༢.༢༨༡) ཧཏྠིཀུམྦྷཛཱཏིཀཱ ཨཊྛཝིདྷཱ མུཏྟཱ. ཏཐཱ ཧི ཧཏྠིཀུམྦྷཾ, ཝརཱཧདཱཋཾ, བྷུཛགསཱིསཾ, ཝལཱཧཀཾ, ཝེལུ༹, མཙྪསིརོ, སངྑོ, སིཔྤཱིཏི ཨཊྛ མུཏྟཱཡོནིཡོ. ཏཏྠ ཧཏྠིཀུམྦྷཛཱ པཱིཏཝཎྞཱ པབྷཱཧཱིནཱ. ཝརཱཧདཱཋཱ ཝརཱཧདཱཋཱཝཎྞཱཝ. བྷུཛགསཱིསཛཱ ནཱིལཱདིཝཎྞཱ སུཝིསུདྡྷཱ ཝཊྚལཱ ཙ. ཝལཱཧཀཛཱ བྷཱསུརཱ དུབྦིབྷཱགཱ རཏྟིབྷཱགེ ཨནྡྷཀཱརཾ ཝིདྷམེནྟིཡོ ཏིཊྛནྟི, དེཝཱུཔབྷོགཱ ཨེཝ ཙ ཧོནྟི. ཝེལུ༹ཛཱ ཀརཀཕལསམཱནཝཎྞཱ ན བྷཱསུརཱ, ཏེ ¶ ཙ ཝེལཱུ༹ ཨམནུསྶགོཙརེཡེཝ པདེསེ ཛཱཡནྟི ¶ . མཙྪསིརཛཱ པཱཋཱིནཔིཊྛིསམཱནཝཎྞཱ ཝཊྚལཱ ལགྷཝོ ཙ ཏེཛཝནྟཱ ཧོནྟི པབྷཱཝིཧཱིནཱ ཙ, ཏེ ཙ མཙྪཱ སམུདྡམཛ྄ཛྷེཡེཝ ཛཱཡནྟི. སངྑཛཱ སངྑཨུདརཙྪཝིཝཎྞཱ ཀོལཕལཔྤམཱཎཱཔི ཧོནྟི པབྷཱཝིཧཱིནཱཝ. སིཔྤིཛཱ པབྷཱཝིསེསཡུཏྟཱ ཧོནྟི ནཱནཱསཎྛཱནཱ. ཨེཝཾ ཛཱཏིཏོ ཨཊྛཝིདྷཱསུ མུཏྟཱསུ ཡཱ མཙྪསངྑསིཔྤིཛཱ, ཏཱ སཱམུདྡིཀཱ. བྷུཛགཛཱཔི ཀཱཙི སཱམུདྡིཀཱ ཧོནྟི, ཨིཏརཱ ཨསཱམུདྡིཀཱ. ཡསྨཱ བཧུལཾ སཱམུདྡིཀཱཝ མུཏྟཱ ལོཀེ དིསྶནྟི, ཏཏྠཱཔི སིཔྤིཛཱཝ, ཨིཏརཱ ཀདཱཙི ཀཱཙི, ཏསྨཱ སམྨོཧཝིནོདནིཡཾ (ཝིབྷ. ཨཊྛ. ༡༧༣) ‘‘མུཏྟཱཏི སཱམུདྡིཀཱ མུཏྟཱ’’ཏི ཝུཏྟཾ.

མཎཱིཏི ཝེལུ༹རིཡཱདིཏོ ཨཉྙོ ཛོཏིརསཱདིབྷེདོ སབྦོ མཎི. ཝེལུ༹རིཡོཏི ཨལླཝེལུ༹ཝཎྞོ མཎི, ‘‘མཛྫཱརཀྑིམཎྜལཝཎྞོ’’ཏིཔི ཝདནྟི. སངྑོཏི སཱམུདྡིཀསངྑོ. སིལཱཏི མུགྒཝཎྞཱ ཨཏིསིནིདྡྷཱ ཀཱལ༹སིལཱ. མཎིཝོཧཱརཾ ཨགཏཱ རཏྟསེཏཱདིཝཎྞཱ སུམཊྛཱཔི སིལཱ ཨནཱམཱསཱ ཨེཝཱཏི ཝདནྟི. སཱརཏྠདཱིཔནིཡཾ (སཱརཏྠ. ཊཱི. ༢.༢༨༡) པན ‘‘སངྑོཏི སཱམུདྡིཀསངྑོ. སིལཱཏི ཀཱལ༹སིལཱཔཎྜུསིལཱསེཏསིལཱདིབྷེདཱ སབྦཱཔི སིལཱ’’ཏི ཝུཏྟཾ. པཝཱལ༹ཾ སམུདྡཏོ ཛཱཏནཱཏིརཏྟམཎི. རཛཏནྟི ཀཧཱཔཎམཱསཱདིབྷེདཾ ཛཏུམཱསཱདིཾ ཨུཔཱདཱཡ སབྦཾ ཝུཏྟཱཝསེསརཱུཔིཡཾ གཧིཏཾ. ཛཱཏརཱུཔནྟི སུཝཎྞཾ. ལོཧིཏངྐོཏི རཏྟམཎི. མསཱརགལླནྟི ཀབརཝཎྞོ མཎི. ‘‘མརཀཏ’’ནྟིཔི ཝདནྟི.

བྷཎྜམཱུལཏྠཱཡཱཏི པཏྟཙཱིཝརཱདིམཱུལཏྠཱཡ. ཀུཊྛརོགསྶཱཏི ནིདསྶནམཏྟཾ. ཏཱཡ ཝཱུཔསམེཏབྦསྶ ཡསྶ ཀསྶཙི རོགསྶ ཨཏྠཱཡ ཝཊྚཏིཡེཝ. ‘‘བྷེསཛྫཏྠཉྩ ཨཝིདྡྷཱཡེཝ མུཏྟཱ ཝཊྚཏཱི’’ཏི ཏཱིསུཔི གཎྛིཔདེསུ ཝུཏྟཱ. བྷེསཛྫཏྠཱཡ པིསིཏྭཱ ཡོཛིཏཱནཾ མུཏྟཱནཾ རཏནབྷཱཝཝིཛཧནཏོ གཧཎཀྑཎེཔི ¶ རཏནཱཀཱརེན ཨཔེཀྑཱབྷཱཝཱ ‘‘བྷེསཛྫཏྠཱཡ པན ཝཊྚཏཱི’’ཏི ཝུཏྟཾ. ཡཱཝ པན ཏཱ མུཏྟཱ རཏནརཱུཔེན ཏིཊྛནྟི, ཏཱཝ ཨཱམསིཏུཾ ན ཝཊྚནྟི. ཨེཝཾ ཨཉྙམྤི རཏནཔཱསཱཎཾ པིསིཏྭཱ བྷེསཛྫེ ཡོཛནཏྠཱཡ གཧེཏུཾ ཝཊྚཏི ཨེཝ. ཛཱཏརཱུཔརཛཏཾ པན མིསྶེཏྭཱ ཡོཛནབྷེསཛྫཏྠཱཡཔི སམྤཊིཙྪིཏུཾ ན ཝཊྚཏི. གཧཊྛེཧི ཡོཛེཏྭཱ དིནྣམྤི ཡདི བྷེསཛྫེ སུཝཎྞཱདིརཱུཔེན ཏིཊྛཏི, ཝིཡོཛེཏུཉྩ སཀྐཱ, ཏཱདིསཾ བྷེསཛྫམྤི ན ཝཊྚཏི. ཏཾ ཨབྦོཧཱརིཀཏྟགཏཉྩེ ཝཊྚཏི. ‘‘ཛཱཏིཕལིཀཾ ཨུཔཱདཱཡཱ’’ཏི ཝུཏྟཏྟཱ སཱུརིཡཀནྟཙནྡཀནྟཱདིཀཾ ཛཱཏིཔཱསཱཎཾ མཎིམྷི ཨེཝ སངྒཧིཏནྟི དཊྛབྦཾ. ཨཱཀརམུཏྟོཏི ཨཱཀརཏོ མུཏྟམཏྟོ. བྷཎྜམཱུལཏྠཾ ¶ སམྤཊིཙྪིཏུཾ ཝཊྚཏཱིཏི ཨིམིནཱཝ ཨཱམསིཏུམྤི ཝཊྚཏཱིཏི དསྶེཏི. པཙིཏྭཱ ཀཏོཏི ཀཱཙཀཱརེཧི པཙིཏྭཱ ཀཏོ.

དྷམནསངྑོ ཙ དྷོཏཝིདྡྷོ ཙ རཏནམིསྶོ ཙཱཏི ཡོཛེཏབྦཾ. ཝིདྡྷོཏིཨཱདིབྷཱཝེན ཀཏཚིདྡོ. རཏནམིསྶོཏི ཀཉྩནལཏཱདིཝིཙིཏྟོ མུཏྟཱདིརཏནཁཙིཏོ ཙ. ཨེཏེན དྷམནསངྑཏོ ཨཉྙོ རཏནསམྨིསྶོ ཨནཱམཱསོཏི དསྶེཏི. སིལཱཡམྤི ཨེསེཝ ནཡོ. པཱནཱིཡསངྑོཏི ཨིམིནཱ ཐཱལཀཱདིཨཱཀཱརེན ཀཏསངྑམཡབྷཱཛནཱནི བྷིཀྑཱུནཾ སམྤཊིཙྪིཏུཾ ཝཊྚནྟཱིཏི སིདྡྷཾ. སེསནྟི རཏནམིསྶཾ ཋཔེཏྭཱ ཨཝསེསཾ. མུགྒཝཎྞཾཡེཝ རཏནསམྨིསྶཾ ཀརོནྟི, ན ཨཉྙནྟི ཨཱཧ ‘‘མུགྒཝཎྞཱཝཱ’’ཏི, མུགྒཝཎྞཱ རཏནསམྨིསྶཱཝ ན ཝཊྚཏཱིཏི ཝུཏྟཾ ཧོཏི. སེསཱཏི རཏནསམྨིསྶཾ ཋཔེཏྭཱ ཨཝསེསཱ སིལཱ.

བཱིཛཏོ པཊྛཱཡཱཏི དྷཱཏུཔཱསཱཎཏོ པཊྛཱཡ. སུཝཎྞཙེཏིཡནྟི དྷཱཏུཀརཎྜཀཾ. པཊིཀྑིཔཱིཏི ‘‘དྷཱཏུཊྛཔནཏྠཱཡ གཎྷཐཱ’’ཏི ཨཝཏྭཱ ‘‘ཏུམྷཱཀཾ གཎྷཐཱ’’ཏི པེསིཏཏྟཱ ¶ པཊིཀྑིཔི. ཝིམཏིཝིནོདནིཡཾ (ཝི. ཝི. ཊཱི. ༡.༢༨༡) པན ‘‘པཊིཀྑིཔཱིཏི སུཝཎྞམཡསྶ དྷཱཏུཀརཎྜཀསྶ བུདྡྷཱདིརཱུཔསྶ ཙ ཨཏྟནོ སནྟཀཀརཎེ ནིསྶགྒིཡཏྟཱ ཝུཏྟ’’ནྟི ཝུཏྟཾ. སུཝཎྞབུབྦུལ༹ཀནྟི སུཝཎྞཏཱརཀཾ. ‘‘རཱུཔིཡཚཌྜཀཊྛཱནེ’’ཏི ཝུཏྟཏྟཱ རཱུཔིཡཚཌྜཀསྶ ཛཱཏརཱུཔརཛཏཾ ཨཱམསིཏྭཱ ཚཌྜེཏུཾ ཝཊྚཏཱིཏི ཝུཏྟཾ. ཀེལཱ༹པཡིཏུནྟི ཨཱམསིཏྭཱ ཨིཏོ ཙིཏོ ཙ སཉྩཱརེཏུཾ. ཝུཏྟནྟི མཧཱཨཊྛཀཐཱཡཾ ཝུཏྟཾ. ཀཙཝརམེཝ ཧརིཏུཾ ཝཊྚཏཱིཏི གོཔཀཱ ཝཱ ཧོནྟུ ཨཉྙེ ཝཱ, ཧཏྠེནཔི པུཉྪིཏྭཱ ཀཙཝརཾ ཨཔནེཏུཾ ཝཊྚཏི, ‘‘མལམྤི པམཛྫིཏུཾ ཝཊྚཏིཡེཝཱ’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༢༨༡) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ༡.༢༨༡) པན ‘‘ཀཙཝརམེཝ ཧརིཏུཾ ཝཊྚཏཱིཏི གོཔཀཱ ཝཱ ཧོནྟུ ཨཉྙེ ཝཱ, ཧཏྠེནཔི པུཉྪིཏྭཱ ཀཙཝརཾ ཨཔནེཏུཾ ཝཊྚཏི, མལམྤི མཛྫིཏུཾ ཝཊྚཏི ཨེཝཱཏི ཝདནྟི, ཏཾ ཨཊྛཀཐཱཡ ན སམེཏི ཀེལཱ༹ཡནསདིསཏྟཱ’’ཏི ཝུཏྟཾ. ཀཐཾ ན སམེཏི? མཧཱཨཊྛཀཐཱཡཾ ཙེཏིཡགྷརགོཔཀཱ རཱུཔིཡཚཌྜཀཊྛཱནེ ཋིཏཱཏི ཏེསཾཡེཝ ཀེལཱ༹ཡནཾ ཨནུཉྙཱཏཾ, ན ཨཉྙེསཾ, ཏསྨཱ ‘‘གོཔཀཱ ཝཱ ཧོནྟུ ཨཉྙེ ཝཱ’’ཏི ཝཙནཾ མཧཱཨཊྛཀཐཱཡ ན སམེཏི.

ཀུརུནྡིཡཾ པན ཏམྤི པཊིཀྑིཏྟཾ, སུཝཎྞཙེཏིཡེ ཀཙཝརམེཝ ཧརིཏུཾ ཝཊྚཏཱིཏི ཨེཏྟཀམེཝ ཨནུཉྙཱཏཾ, ཏསྨཱ སཱཝདྷཱརཎཾ ཀཏྭཱ ཝུཏྟཏྟཱ ‘‘ཧཏྠེནཔི པུཉྪིཏྭཱ’’ཏི ཙ ‘‘མལམྤི པམཛྫིཏུཾ ཝཊྚཏི ¶ ཨེཝཱ’’ཏི ཙ ཝཙནཾ ཀུརུནྡཊྛཀཐཱཡ ན སམེཏི, ཏསྨཱ ཝིཙཱརེཏབྦམེཏནྟི. ཨཱརཀཱུཊལོཧནྟི སུཝཎྞཝཎྞོ ཀིཏྟིམལོཧཝིསེསོ. ཏིཝིདྷཉྷི ཀིཏྟིམལོཧཾ – ཀཾསལོཧཾ ཝཊྚལོཧཾ ཨཱརཀཱུཊལོཧནྟི. ཏཏྠ ཏིཔུཏམྦེ མིསྶེཏྭཱ ཀཏཾ ཀཾསལོཧཾ ནཱམ, སཱིསཏམྦེ མིསྶེཏྭཱ ཀཏཾ ཝཊྚལོཧཾ, རསཏུཏྠེཧི རཉྫིཏཾ ཏམྦཾ ཨཱརཀཱུཊལོཧཾ ནཱམ. ‘‘པཀཏིརསཏམྦེ མིསྶེཏྭཱ ཀཏཾ ¶ ཨཱརཀཱུཊ’’ནྟི ཙ སཱརཏྠདཱིཔནིཡཾ (སཱརཏྠ. ཊཱི. ༢.༢༨༡) ཝུཏྟཾ. ཏཾ པན ‘‘ཛཱཏརཱུཔགཏིཀ’’ནྟི ཝུཏྟཏྟཱ ཨུགྒཎྷཏོ ནིསྶགྒིཡམྤི ཧོཏཱིཏི ཀེཙི ཝདནྟི, རཱུཔིཡེསུ པན ཨགཎིཏཏྟཱ ནིསྶགྒིཡཾ ན ཧོཏི, ཨཱམསནེ སམྤཊིཙྪནེ ཙ དུཀྐཊམེཝཱཏི ཝེདིཏབྦཾ. སབྦོཔི ཀཔྤིཡོཏི ཡཐཱཝུཏྟསུཝཎྞཱདིམཡཱནཾ སེནཱསནཔརིཀྑཱརཱནཾ ཨཱམསནགོཔནཱདིཝསེན པརིབྷོགོ སབྦཐཱ ཀཔྤིཡོཏི ཨདྷིཔྤཱཡོ. ཏེནཱཧ ‘‘ཏསྨཱ’’ཏིཨཱདི. ‘‘བྷིཀྑཱུནཾ དྷམྨཝིནཡཝཎྞནཊྛཱནེ’’ཏི ཝུཏྟཏྟཱ སངྒྷིཀམེཝ སུཝཎྞཱདིམཡཾ སེནཱསནཾ སེནཱསནཔརིཀྑཱརཱ ཙ ཝཊྚནྟི, ན པུགྒལིཀཱནཱིཏི གཧེཏབྦཾ. པཊིཛགྒིཏུཾ ཝཊྚནྟཱིཏི སེནཱསནཔཊིབནྡྷཏོ ཝུཏྟཾ.

༤༣. སཱམིཀཱནཾ པེསེཏབྦནྟི སཱམིཀཱནཾ སཱསནཾ པེསེཏབྦཾ. བྷིནྡིཏྭཱཏི པཋམམེཝ ཨནཱམསིཏྭཱ པཱསཱཎཱདིནཱ ཀིཉྩིམཏྟཾ བྷེདཾ ཀཏྭཱ པཙྪཱ ཀཔྤིཡབྷཎྜཏྠཱཡ ཨདྷིཊྛཧིཏྭཱ ཧཏྠེན གཧེཏུཾ ཝཊྚཏི. ཏེནཱཧ ‘‘ཀཔྤིཡབྷཎྜཾ ཀརིསྶཱམཱིཏི སམྤཊིཙྪིཏུཾ ཝཊྚཏཱི’’ཏི. ཨེཏྠཱཔི ཏཉྩ ཝིཡོཛེཏྭཱ ཨཱམསིཏབྦཾ. ཕལཀཛཱལིཀཱདཱིནཱིཏི ཨེཏྠ སརཔརིཏྟཱཎཱཡ ཧཏྠེན གཧེཏབྦཾ. ཀིཊིཀཱཕལཀཾ ཨཀྑིརཀྑཎཏྠཱཡ ཨཡལོཧཱདཱིཧི ཛཱལཱཀཱརེན ཀཏྭཱ སཱིསཱདཱིསུ པཊིམུཉྩིཏབྦཾ ཛཱལིཀཾ ནཱམ. ཨཱདི-སདྡེན ཀཝཙཱདིཀཾ སངྒཎྷཱཏི. ཨནཱམཱསཱནཱིཏི མཙྪཛཱལཱདིཔརཱུཔརོདྷཾ སནྡྷཱཡ ཝུཏྟཾ, ན སརཔརིཏྟཱཎཾ ཏསྶ ཨཱཝུདྷབྷཎྜཏྟཱབྷཱཝཱ. ཏེན ཝཀྑཏི ‘‘པརཱུཔརོདྷནིཝཱརཎཉྷཱི’’ཏིཨཱདི (ཝི. སངྒ. ཨཊྛ. ༤༣). ཨཱསནསྶཱཏི ཙེཏིཡསྶསམནྟཱ ཀཏཔརིབྷཎྜསྶ. བནྡྷིསྶཱམཱིཏི ཀཱཀཱདཱིནཾ ཨདཱུསནཏྠཱཡ བནྡྷིསྶཱམི.

‘‘བྷེརིསངྒྷཱཊོཏི སངྒྷཊིཏཙམྨབྷེརཱི. ཝཱིཎཱསངྒྷཱཊོཏི སངྒྷཊིཏཙམྨཝཱིཎཱ’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༢༨༡) ཝུཏྟཾ. ‘‘ཙམྨཝིནདྡྷཱ ཝཱིཎཱབྷེརིཨཱདཱིནཱི’’ཏི མཧཱཨཊྛཀཐཱཡཾ ཝུཏྟཝཙནཏོ ཝིསེསཱབྷཱཝཱ ¶ ‘‘ཀུརུནྡིཡཾ པནཱ’’ཏིཨཱདིནཱ ཏཏོ ཝིསེསསྶ ཝཏྟུམཱརདྡྷཏྟཱ ཙ བྷེརིཨཱདཱིནཾ ཝིནདྡྷོཔཀརཎསམཱུཧོ བྷེརིཝཱིཎཱསངྒྷཱཊོཏི ཝེདིཏབྦོ ‘‘སངྒྷཊིཏབྦོཏི སངྒྷཱཊོ’’ཏི ཀཏྭཱ. ཏུཙྪཔོཀྑརནྟི ཨཝིནདྡྷཙམྨབྷེརིཝཱིཎཱནཾ པོཀྑརཾ. ཨཱརོཔིཏཙམྨནྟི པུབྦེ ཨཱརོཔིཏཾ ཧུཏྭཱ པཙྪཱ ཏཏོ ཨཔནེཏྭཱ ཝིསུཾ ཋཔིཏམུཁཙམྨམཏྟཾ, ན སེསོཔཀརཎསཧིཏཾ, ཏཾ པན སངྒྷཱཏོཏི ¶ ཨཡཾ ཝིསེསོ. ཨོནཧིཏུནྟི བྷེརིཔོཀྑརཱདཱིནི ཙམྨཾ ཨཱརོཔེཏྭཱ ཙམྨཝདྡྷིཨཱདཱིཧི སབྦེཧི ཨུཔཀརཎེཧི ཝིནནྡྷིཏུཾ. ཨོནཧཱཔེཏུནྟི ཏཐེཝ ཨཉྙེཧི ཝིནནྡྷཱཔེཏུཾ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཨནཱམཱསཝིནིཙྪཡཀཐཱལངྐཱརོ ནཱམ

སཏྟམོ པརིཙྪེདོ.

༨. ཨདྷིཊྛཱནཝིཀཔྤནཝིནིཙྪཡཀཐཱ

༤༤. ཨེཝཾ ཨནཱམཱསཝིནིཙྪཡཀཐཾ ཀཐེཏྭཱ ཨིདཱནི ཨདྷིཊྛཱནཝིཀཔྤནཝིནིཙྪཡཾ ཀཐེཏུཾ ‘‘ཨདྷིཊྛཱནཝིཀཔྤནེསུ པནཱ’’ཏིཨཱདིམཱཧ. ཏཏྠ ཨདྷིཊྛིཡཏེ ཨདྷིཊྛཱནཾ, གཧཎཾ སལླཀྑཎནྟི ཨཏྠོ. ཝིཀཔྤིཡཏེ ཝིཀཔྤནཱ, སངྐཔྤནཾ ཙིནྟནནྟི ཨཏྠོ. ཏཏྠ ‘‘ཏིཙཱིཝརཾ ཨདྷིཊྛཱཏུནྟི ནཱམཾ ཝཏྭཱ ཨདྷིཊྛཱཏུཾ. ན ཝིཀཔྤེཏུནྟི ནཱམཾ ཝཏྭཱ ན ཝིཀཔྤེཏུཾ. ཨེས ནཡོ སབྦཏྠ. ཏསྨཱ ཏིཙཱིཝརཾ ཨདྷིཊྛཧནྟེན ‘ཨིམཾ སངྒྷཱཊིཾ ཨདྷིཊྛཱམཱི’ཏིཨཱདིནཱ ནཱམཾ ཝཏྭཱ ཨདྷིཊྛཱཏབྦཾ. ཝིཀཔྤེནྟེན པན ‘ཨིམཾ སངྒྷཱཊི’ནྟིཨཱདིནཱ ཏསྶ ཏསྶ ཙཱིཝརསྶ ནཱམཾ ཨགྒཧེཏྭཱཝ ‘ཨིམཾ ཙཱིཝརཾ ཏུཡ྄ཧཾ ཝིཀཔྤེམཱི’ཏི ཝིཀཔྤེཏབྦཾ. ཏིཙཱིཝརཾ ཝཱ ཧོཏུ ཨཉྙཾ ཝཱ, ཡདི ཏཾ ཏཾ ནཱམཾ གཧེཏྭཱ ཝིཀཔྤེཏི ¶ , ཨཝིཀཔྤིཏཾ ཧོཏི, ཨཏིརེཀཙཱིཝརཊྛཱནེ ཏིཊྛཏཱི’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༤༦༩) ཝུཏྟཾ.

ཝིམཏིཝིནོདནིཡཾ (ཝི. ཝི. ཊཱི. ༡.༤༦༩) པན ‘‘ཏིཙཱིཝརཾ ཨདྷིཊྛཱཏུནྟི སངྒྷཱཊིཨཱདིནཱམེན ཨདྷིཊྛཱཏུཾ. ན ཝིཀཔྤེཏུནྟི ཨིམིནཱ ནཱམེན ན ཝིཀཔྤེཏུཾ, ཨེཏེན ཝིཀཔྤིཏཏིཙཱིཝརོ ཏེཙཱིཝརིཀོ ན ཧོཏི, ཏསྶ ཏསྨིཾ ཨདྷིཊྛིཏཏིཙཱིཝརེ ཝིཡ ཨཝིཔྤཝཱསཱདིནཱ ཀཱཏབྦཝིདྷི ན ཀཱཏབྦོཏི དསྶེཏི, ན པན ཝིཀཔྤནེ དོསོ’’ཏི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༤༦༩) པན ‘‘ཏིཙཱིཝརཾ ཨདྷིཊྛཱཏུནྟི ཨེཏྠ ཏིཙཱིཝརཾ ཏིཙཱིཝརཱདྷིཊྛཱནེན ཨདྷིཊྛཱཏབྦཡུཏྟཀཾ, ཡཾ ཝཱ ཏིཙཱིཝརཱདྷིཊྛཱནེན ཨདྷིཊྛཱཏུཾ ན ཝིཀཔྤེཏུཾ ཨནུཛཱནཱམི, ཏསྶ ཨདྷིཊྛཱནཀཱལཔརིཙྪེདཱབྷཱཝཏོ སབྦཀཱལཾ ཨིཙྪནྟསྶ ཨདྷིཊྛཱཏུཾཡེཝ ¶ ཨནུཛཱནཱམི, ཏཾ ཀཱལཔརིཙྪེདཾ ཀཏྭཱ ཝིཀཔྤེཏུཾ ནཱནུཛཱནཱམི, སཏི པན པཙྩཡེ ཡདཱ ཏདཱ ཝཱ པཙྩུདྡྷརིཏྭཱ ཝིཀཔྤེཏུཾ ཝཊྚཏཱིཏི ‘ཨནཱཔཏྟི ཨནྟོདསཱཧཾ ཨདྷིཊྛེཏི ཝིཀཔྤེཏཱི’ཏི ཝཙནཏོ སིདྡྷཾ ཧོཏཱི’’ཏི ཝུཏྟཾ.

ཨིམེསུ པན ཏཱིསུ ཊཱིཀཱཝཱདེསུ ཏཏིཡཝཱདོ ཡུཏྟཏརོ ཝིཡ དིསྶཏི. ཀསྨཱ? པཱལི༹ཡཱ ཨཊྛཀཐཱཡ ཙ སཾསནྡནཏོ. ཀཐཾ? པཱལི༹ཡཉྷི ཀཏཔརིཙྪེདཱསུཡེཝ དྭཱིསུ ཝསྶིཀསཱཊིཀཀཎྜུཔཊིཙྪཱདཱིསུ ཏཏོ པརཾ ཝིཀཔྤེཏུནྟི ཝུཏྟཾ, ཏཏོ ཨཉྙེསུ ན ཝིཀཔྤེཏུཾ ཨིཙྩེཝ, ཏསྨཱ ཏེསུ ཨསཏི པཙྩཡེ ནིཙྩཾ ཨདྷིཊྛཱཏབྦམེཝ ཧོཏི, ན ཝིཀཔྤེཏབྦནྟི ཨཡཾ པཱལི༹ཡཱ ཨདྷིཔྤཱཡོ དིསྶཏི, ཨིཏརཱསུ པན དྭཱིསུ ཨནུཉྙཱཏཀཱལེཡེཝ ཨདྷིཊྛཱཏབྦཾ, ‘‘ཏཏོ པརཾ ཝིཀཔྤེཏུ’’ནྟི ཨེཝཾ པཱལི༹ཡཱ སཾསནྡཏི, ཨཊྛཀཐཱཡཾ ཏིཙཱིཝརཾ ཏིཙཱིཝརསངྑེཔེན པརིཧརཏོ ཨདྷིཊྛཱཏུམེཝ ཨནུཛཱནཱམི, ན ཝིཀཔྤེཏུཾ. ཝསྶིཀསཱཊིཀཾ པན ཙཱཏུམཱསཏོ པརཾ ཝིཀཔྤེཏུམེཝ, ན ཨདྷིཊྛཱཏུཾ, ཨེཝཉྩ ¶ སཏི ཡོ ཏིཙཱིཝརེ ཨེཀེན ཙཱིཝརེན ཝིཔྤཝསིཏུཀཱམོ ཧོཏི, ཏསྶ ཙཱིཝརཱདྷིཊྛཱནཾ པཙྩུདྡྷརིཏྭཱ ཝིཔྤཝཱསསུཁཏྠཾ ཝིཀཔྤནཱཡ ཨོཀཱསོ དིནྣོ ཧོཏཱིཏི.

པཋམཝཱདེ ‘‘ན ཝིཀཔྤེཏུ’’ནྟི ནཱམཾ ཝཏྭཱ ‘‘ན ཝིཀཔྤེཏུ’’ནྟི ཨཏྠོ ཝུཏྟོ, ཨེཝཾ སནྟེ ‘‘ཏཏོ པརཾ ཝིཀཔྤེཏུ’’ནྟི ཨེཏྠ ཏཏོ པརཾ ནཱམཾ ཝཏྭཱ ཝིཀཔྤེཏུནྟི ཨཏྠོ བྷཝེཡྻ, སོ ཙ ཨཏྠོ ཝིཀཔྤནཱདྷིཀཱརེན ཝུཏྟོ, ‘‘ནཱམཾ ཝཏྭཱ’’ཏི ཙ ཝིསེསནེ ཀཏྟབྦེ སཏི ‘‘ན ཝིཀཔྤེཏུ’’ནྟི ཙ ‘‘ཏཏོ པརཾ ཝིཀཔྤེཏུ’’ནྟི ཙ བྷེདཝཙནཾ ན སིཡཱ, སབྦེསུཔི ཙཱིཝརེསུ ནཱམཾ ཨཝཏྭཱཝ ཝིཀཔྤེཏབྦཏོ, དུཏིཡཝཱདེ ཙ ‘‘ན ཝིཀཔྤེཏུ’’ནྟི ཨིམིནཱ ནཱམེན ན ཝིཀཔྤེཏུནྟི ཝུཏྟཾ, ན ཨནུཛཱནཱམཱིཏི པཱཋསེསོ. པཋམེ ཙ ‘‘ཏིཙཱིཝརཾ ཝཱ ཧོཏུ ཨཉྙཾ ཝཱ, ཡདི ཏཾ ཏཾ ནཱམཾ གཧེཏྭཱ ཝིཀཔྤེཏི, ཨཝིཀཔྤིཏཾ ཧོཏི, ཨཏིརེཀཙཱིཝརཊྛཱནེ ཏིཊྛཏཱི’’ཏི. དུཏིཡེ ཙ ‘‘ན པན ཝིཀཔྤནེ དོསོ’’ཏི, ཏཉྩ ཨཉྙམཉྙཝིརུདྡྷཾ ཝིཡ དིསྶཏི, ཏསྨཱ ཝིཙཱརེཏབྦམེཏཾ.

ཏཏོ པརཾ ཝིཀཔྤེཏུནྟི ཙཱཏུམཱསཏོ པརཾ ཝིཀཔྤེཏྭཱ པརིབྷུཉྫིཏུནྟི ཏཱིསུ གཎྛིཔདེསུ ཝུཏྟཾ. ཀེཙི པན ‘‘ཏཏོ པརཾ ཝིཀཔྤེཏྭཱ ཡཱཝ ཨཱགཱམིསཾཝཙྪརེ ཝསྶཱནཾ ཙཱཏུམཱསཾ, ཏཱཝ ཋཔེཏུཾ ཨནུཉྙཱཏ’’ནྟིཔི ཝདནྟི. ‘‘ཏཏོ པརཾ ཝིཀཔྤེཏུཾ ཨནུཛཱནཱམཱིཏི ཨེཏྟཱཝཏཱ ཝསྶིཀསཱཊིཀཾ ¶ ཀཎྜུཔཊིཙྪཱདིཉྩ ཏཾ ཏཾ ནཱམཾ གཧེཏྭཱ ཝིཀཔྤེཏུཾ ཨནུཉྙཱཏནྟི ཨེཝམཏྠོ ན གཧེཏབྦོ. ཏཏོ པརཾ ཝསྶིཀསཱཊིཀཱདིནཱམསྶེཝ ཨབྷཱཝཏོ, ཀསྨཱ ཏཏོ པརཾ ཝིཀཔྤེནྟེནཔི ནཱམཾ གཧེཏྭཱ ན ཝིཀཔྤེཏབྦཾ. ཨུབྷིནྣམྤི ཏཏོ པརཾ ཝིཀཔྤེཏྭཱ པརིབྷོགསྶ ཨནུཉྙཱཏཏྟཱ ཏཐཱཝིཀཔྤིཏཾ ཨཉྙནཱམེན ཨདྷིཊྛཧིཏྭཱ པརིབྷུཉྫིཏབྦནྟི ཏཱིསུཔི གཎྛིཔདེསུ ཝུཏྟ’’ནྟི སཱརཏྠདཱིཔནིཡཾ (སཱརཏྠ. ཊཱི. ༢.༤༦༩) ཝུཏྟཾ. ཝིམཏིཝིནོདནིཡམྤི (ཝི. ཝི. ཊཱི. ༡.༤༦༩) ‘‘ཏཏོ པརནྟི ཙཱཏུམཱསཏོ ¶ པརཾ ཝིཀཔྤེཏྭཱ པརིབྷུཉྫིཏུཾ ཨནུཉྙཱཏནྟི ཀེཙི ཝདནྟི. ཨཉྙེ པན ‘ཝིཀཔྤེཏྭཱ ཡཱཝ ཨཱགཱམིཝསྶཱནཾ ཏཱཝ ཋཔེཏུཾ ཝཊྚཏཱི’ཏི ཝདནྟི. ཨཔརེ པན ‘ཝིཀཔྤནེ ན དོསོ, ཏཐཱ ཝིཀཔྤིཏཾ པརིཀྑཱརཱདིནཱམེན ཨདྷིཊྛཧིཏྭཱ པརིབྷུཉྫིཏབྦ’ནྟི ཝདནྟཱི’’ཏི ཝུཏྟཾ.

ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༤༦༩) པན ‘‘ཝསྶིཀསཱཊིཀཾ ཏཏོ པརཾ ཝིཀཔྤེཏུཾཡེཝ, ནཱདྷིཊྛཱཏུཾ. ཝཏྠཉྷི ཀཏཔརིཡོསིཏཾ ཨནྟོཙཱཏུམཱསེ ཝསྶཱནདིཝསཾ ཨཱདིཾ ཀཏྭཱ ཨནྟོདསཱཧེ ཨདྷིཊྛཱཏུཾ ཨནུཛཱནཱམི, ཙཱཏུམཱསཏོ ཨུདྡྷཾ ཨཏྟནོ སནྟཀཾ ཀཏྭཱ ཋཔེཏུཀཱམེན ཝིཀཔྤེཏུཾ ཨནུཛཱནཱམཱིཏི ཨཏྠོ’’ཏི ཝུཏྟཾ. ཨིདྷཱཔི པཙྪིམཝཱདོ པསཏྠཏརོཏི དིསྶཏི, ཀསྨཱ? སུཝིཉྙེཡྻཏྟཱ, པུརིམེསུ པན ཨཱཙརིཡཱནཾ ཨདྷིཔྤཱཡོཡེཝ དུཝིཉྙེཡྻོ ཧོཏི ནཱནཱཝཱདསྶེཝ ཀཐིཏཏྟཱ. མུཊྛིཔཉྩཀནྟི མུཊྛིཡཱ ཨུཔལཀྑིཏཾ པཉྩཀཾ མུཊྛིཔཉྩཀཾ, ཙཏུཧཏྠེ མིནིཏྭཱ པཉྩམཾ ཧཏྠམུཊྛིཾ ཀཏྭཱ མིནིཏབྦནྟི ཨདྷིཔྤཱཡོ. ཀེཙི པན ‘‘མུཊྛིཧཏྠཱནཾ པཉྩཀཾ མུཊྛིཔཉྩཀཾ. པཉྩཔི ཧཏྠཱ མུཊྛཱི ཀཏྭཱཝ མིནིཏབྦཱ’’ཏི ཝདནྟི. མུཊྛིཏྟིཀནྟི ཨེཏྠཱཔི ཨེསེཝ ནཡོ. དྭིཧཏྠེན ཨནྟརཝཱསཀེན ཏིམཎྜལཾ པཊིཙྪཱདེཏུཾ སཀྐཱཏི ཨཱཧ ‘‘པཱརུཔནེནཔཱི’’ཏིཨཱདི. ཨཏིརེཀནྟི སུགཏཙཱིཝརཏོ ཨཏིརེཀཾ. ཨཱུནཀནྟི མུཊྛིཔཉྩཀཱདིཏོ ཨཱུནཀཾ. ཏེན ཙ ཏེསུ ཏིཙཱིཝརཱདྷིཊྛཱནཾ ན རུཧཏཱིཏི དསྶེཏི.

ཨིམཾ སངྒྷཱཊིཾ པཙྩུདྡྷརཱམཱིཏི ཨིམཾ སངྒྷཱཊིཨདྷིཊྛཱནཾ ཨུཀྑིཔཱམི, པརིཙྩཛཱམཱིཏི ཨཏྠོ. སཱརཏྠདཱིཔནིཡཾ (སཱརཏྠ. ཊཱི. ༢.༤༦༩) པན ‘‘པཙྩུདྡྷརཱམཱིཏི ཋཔེམི, པརིཙྩཛཱམཱིཏི ཝཱ ཨཏྠོ’’ཨིཙྩེཝ ཝུཏྟཾ. ཀཱཡཝིཀཱརཾ ཀརོནྟེནཱཏི ཧཏྠེན ཙཱིཝརཾ པརཱམསནྟེན, ཙཱལེནྟེན ཝཱ. ཝཱཙཱཡ ཨདྷིཊྛཱཏབྦཱཏི ཨེཏྠ ཀཱཡེནཔི ཙཱལེཏྭཱ ¶ ཝཱཙམྤི བྷིནྡིཏྭཱ ཀཱཡཝཱཙཱཧི ཨདྷིཊྛཱནམྤི སངྒཧིཏནྟི ཝེདིཏབྦཾ, ‘‘ཀཱཡེན ཨཕུསིཏྭཱ’’ཏི ཝཏྟབྦཏྟཱ ཨཧཏྠཔཱསཧཏྠཔཱསཝསེན དུཝིདྷཾ ཨདྷིཊྛཱནཾ. ཏཏྠ ‘‘ཧཏྠཔཱསོ ནཱམ ཨཌྜྷཏེཡྻཧཏྠོ ཝུཙྩཏི. ‘དྭཱདསཧཏྠ’ནྟི ཀེཙི ཝདནྟི, ཏཾ ཨིདྷ ¶ ན སམེཏཱི’’ཏི ཝིམཏིཝིནོདནིཡཾ (ཝི. ཝི. ཊཱི. ༡.༤༦༩) ཝུཏྟཾ. ‘‘ཨིདཱནི སམྨུཁཱཔརམྨུཁཱབྷེདེན དུཝིདྷཾ ཨདྷིཊྛཱནཾ དསྶེཏུཾ ‘‘སཙེ ཧཏྠཔཱསེཏིཨཱདི ཝུཏྟཾ. སཱརཏྠདཱིཔནིཡཾ (སཱརཏྠ. ཊཱི. ༢.༤༦༩) པན ‘‘ཧཏྠཔཱསེཏི ཙ ཨིདཾ དྭཱདསཧཏྠཾ སནྡྷཱཡ ཝུཏྟཾ, ཏསྨཱ དྭཱདསཧཏྠབྦྷནྟརེ ཋིཏཾ ‘ཨིམ’ནྟི ཝཏྭཱ ཨདྷིཊྛཱཏབྦཾ, ཏཏོ པརཾ ‘ཨེཏ’ནྟི ཝཏྭཱ ཨདྷིཊྛཱཏབྦནྟི ཀེཙི ཝདནྟི, གཎྛིཔདེསུ པནེཏྠ ན ཀིཉྩི ཝུཏྟཾ, པཱལི༹ཡཾ ཨཊྛཀཐཱཡཉྩ སབྦཏྠ ‘ཧཏྠཔཱསོ’ཏི ཨཌྜྷཏེཡྻཧཏྠོ ཝུཙྩཏི, ཏསྨཱ ཨིདྷ ཝིསེསཝིཀཔྤནཱཡ ཀཱརཎཾ གཝེསིཏབྦ’’ནྟི ཝུཏྟཾ. ཨེཝཾ པཱལི༹ཡཊྛཀཐཱསུཔི ཨཌྜྷཏེཡྻཧཏྠམེཝ ཧཏྠཔཱསོ ཝུཏྟོ, ཊཱིཀཱཙརིཡེཧི ཙ ཏདེཝ སམྤཊིཙྪིཏོ, ཏསྨཱ ཨཌྜྷཏེཡྻཧཏྠབྦྷནྟརེ ཋིཏཾ ཙཱིཝརཾ ‘‘ཨིམ’’ནྟི, ཏཏོ བཧིབྷཱུཏཾ ‘‘ཨེཏ’’ནྟི ཝཏྭཱ ཨདྷིཊྛཱཏབྦཾ.

‘‘སཱམནྟཝིཧཱརེཏི ཨིདཾ ཋཔིཏཊྛཱནསལླཀྑཎཡོགྒེ ཋིཏཾ སནྡྷཱཡ ཝུཏྟཾ, ཏཏོ དཱུརེ ཋིཏམྤི ཋཔིཏཊྛཱནཾ སལླཀྑེནྟེན ཨདྷིཊྛཱཏབྦམེཝ. ཏཏྠཱཔི ཙཱིཝརསྶ ཋཔིཏབྷཱཝསལླཀྑཎམེཝ པམཱཎཾ. ན ཧི སཀྐཱ ནིཙྩསྶ ཋཱནཾ སལླཀྑེཏུཾ, ཨེཀསྨིཾ ཝིཧཱརེ ཋཔེཏྭཱ ཏཏོ ཨཉྙསྨིཾ ཋཔིཏནྟི ཨདྷིཊྛཱཏུཾ ན ཝཊྚཏི. ཀེཙི པན ‘ཏཐཱཔི ཨདྷིཊྛིཏེ ན དོསོ’ཏི ཝདནྟི, ཏཾ ཨཊྛཀཐཱཡ ན སམེཏི, ཝཱིམཾསིཏབྦ’’ནྟི ཝིམཏིཝིནོདནིཡཾ (ཝི. ཝི. ཊཱི. ༡.༤༦༩) ཝུཏྟཾ. སཱརཏྠདཱིཔནིཡཾ (སཱརཏྠ. ཊཱི. ༢.༤༦༩) པན ‘‘སཱམནྟཝིཧཱརོ ནཱམ ཡཏྠ ཏདཧེཝ གནྟྭཱ ནིཝཏྟེཏུཾ སཀྐཱ. སཱམནྟཝིཧཱརེཏི ཨིདཾ དེསནཱསཱིསམཏྟཾ, ཏསྨཱ ཋཔིཏཊྛཱནཾ སལླཀྑེཏྭཱ དཱུརེ ཋིཏམྤི ཨདྷིཊྛཱཏབྦནྟི ཝདནྟི. ཋཔིཏཊྛཱནཾ སལླཀྑེཏྭཱཏི ཙ ཨིདཾ ཋཔིཏཊྛཱནསལླཀྑཎཾ ¶ ཨནུཙྪཝིཀནྟི ཀཏྭཱ ཝུཏྟཾ, ཙཱིཝརསལླཀྑཎམེཝེཏྠ པམཱཎ’’ནྟི ཝུཏྟཾ. ཝཛིརབུདྡྷིཊཱིཀཱཡཉྩ (ཝཛིར. ཊཱི. པཱརཱཛིཀ ༤༦༩) ‘‘སངྒྷཱཊི ཨུཏྟརཱསངྒོ ཨནྟརཝཱསཀནྟི ཨདྷིཊྛིཏཱནདྷིཊྛིཏཱནཾ སམཱནམེཝ ནཱམཾ. ‘ཨཡཾ སངྒྷཱཊཱི’ཏིཨཱདཱིསུ ཨནདྷིཊྛིཏཱ ཝུཏྟཱ. ‘ཏིཙཱིཝརེན ཝིཔྤཝསེཡྻཱ’ཏི ཨེཏྠ ཨདྷིཊྛིཏཱ ཝུཏྟཱ. སཱམནྟཝིཧཱརེཏི གོཙརགཱམཏོ ཝིཧཱརེཏི དྷམྨསིརིཏྠེརོ. དཱུརཏརེཔི ལབྦྷཏེཝཱཏི ཨཱཙརིཡཱ. ཨནུགཎྛིཔདེཔི ‘སཱམནྟཝིཧཱརེཏི དེསནཱསཱིསམཏྟཾ, ཏསྨཱ ཋཔིཏཊྛཱནཾ སལླཀྑེཏྭཱ དཱུརེ ཋིཏམྤི ཨདྷིཊྛཱཏབྦ’ནྟི ཝུཏྟཾ. སཱམནྟཝིཧཱརོ ནཱམ ཡཏྠ ཏདཧེཝ གནྟྭཱ ནིཝཏྟིཏུཾ སཀྐཱ. རཏྟིཝིཔྤཝཱསཾ རཀྑནྟེན ཏཏོ དཱུརེ ཋིཏཾ ཨདྷིཊྛཱཏུཾ ན ཝཊྚཏི, ཨེཝཾ ཀིར མཧཱཨཊྛཀཐཱཡཾ ཝུཏྟནྟི. ཀེཙི ‘ཙཱིཝརཝཾསེ ཋཔིཏཾ ཨཉྙོ པརིཝཏྟེཏྭཱ ནཱགདནྟེ ཋཔེཏི, ཏཾ ཨཛཱནིཏྭཱ ཨདྷིཊྛཧནྟསྶཔི རུཧཏི ཙཱིཝརསྶ སལླཀྑིཏཏྟཱ’ཏི ཝདནྟཱི’’ཏི, ཏསྨཱ ཨཱཙརིཡཱནཾ མཏབྷེདཾ སཾསནྡིཏྭཱ གཧེཏབྦཾ.

ཨདྷིཊྛཧིཏྭཱ ¶ ཋཔིཏཝཏྠེཧཱིཏི པརིཀྑཱརཙོལ༹ནཱམེན ཨདྷིཊྛཧིཏྭཱ ཋཔིཏཝཏྠེཧི. ཏེནེཝ ‘‘ཨིམཾ པཙྩུདྡྷརཱམཱི’’ཏི པརིཀྑཱརཙོལ༹སྶ པཙྩུདྡྷཱརཾ དསྶེཏི, ཨེཏེན ཙ ཏེཙཱིཝརིཀདྷུཏངྒཾ པརིཧརནྟེན པཾསུཀཱུལཱདིཝསེན ལདྡྷཾ ཝཏྠཾ དསཱཧབྦྷནྟརེ ཀཏྭཱ རཛིཏྭཱ པཱརུཔིཏུམསཀྐོནྟེན པརིཀྑཱརཙོལ༹ཝསེན ཨདྷིཊྛཧིཏྭཱཝ དསཱཧམཏིཀྐམཱཔེཏབྦཾ, ཨིཏརཐཱ ནིསྶགྒིཡཾ ཧོཏཱིཏི དསྶེཏི, ཏེནེཝ ‘‘རཛིཏཀཱལཏོ པན པཊྛཱཡ ནིཀྑིཔིཏུཾ ན ཝཊྚཏི, དྷུཏངྒཙོརོ ནཱམ ཧོཏཱི’’ཏི ཝིསུདྡྷིམགྒེ (ཝིསུདྡྷི. ༡.༢༥) ཝུཏྟཾ. པུན ཨདྷིཊྛཱཏབྦཱནཱིཏི ཨིདཉྩ སངྒྷཱཊིཨཱདིཏིཙཱིཝརནཱམེན ཨདྷིཊྛཧིཏྭཱ པརིབྷུཉྫིཏུཀཱམསྶ ཝསེན ཝུཏྟཾ, ཨིཏརསྶ པན པུརིམཱདྷིཊྛཱནམེཝ ཨལནྟི ཝེདིཏབྦཾ. པུན ཨདྷིཊྛཱཏབྦནྟི ཨིམིནཱ ཀཔྤབིནྡུཔི དཱཏབྦནྟི དསྶེཏི. ཨདྷིཊྛཱནཀིཙྩཾ ¶ ནཏྠཱིཏི ཨིམིནཱ ཀཔྤབིནྡུདཱནཀིཙྩམྤི ནཏྠཱིཏི དསྶེཏི, མཧནྟཏརམེཝཱཏིཨཱདི སབྦཱདྷིཊྛཱནསཱདྷཱརཎལཀྑཎཾ. ཏཏྠ པུན ཨདྷིཊྛཱཏབྦནྟི ཨནདྷིཊྛིཏཙཱིཝརསྶ ཨེཀདེསབྷཱུཏཏྟཱ ཨནདྷིཊྛིཏཉྩེ, ཨདྷིཊྛིཏསྶ ཨཔྤབྷཱཝེན ཨེཀདེསབྷཱུཏཾ ཨདྷིཊྛིཏསངྑམེཝ གཙྪཏི, ཏཐཱ ཨདྷིཊྛིཏཉྩེ, ཨནདྷིཊྛིཏསྶ ཨེཀདེསབྷཱུཏཾ ཨནདྷིཊྛིཏསངྑཾ གཙྪཏཱིཏི ལཀྑཎཾ. ན ཀེཝལཉྩེཏྠ དུཏིཡཔཊྚམེཝ, ཨཐ ཁོ ཏཏིཡཔཊྚཱདིཀམྤི. ཡཐཱཧ ‘‘ཨནུཛཱནཱམི བྷིཀྑཝེ…པེ… ཨུཏུདྡྷཊཱནཾ དུསྶཱནཾ ཙཏུགྒུཎཾ སངྒྷཱཊིཾ…པེ… པཾསུཀཱུལེ ཡཱཝདཏྠ’’ནྟི (མཧཱཝ. ༣༤༨).

མུཊྛིཔཉྩཀཱདིཏིཙཱིཝརཔྤམཱཎཡུཏྟཾ སནྡྷཱཡ ‘‘ཏིཙཱིཝརཾ པནཱ’’ཏིཨཱདི ཝུཏྟཾ. པརིཀྑཱརཙོལ༹ཾ ཨདྷིཊྛཱཏུནྟི པརིཀྑཱརཙོལ༹ཾ ཀཏྭཱ ཨདྷིཊྛཱཏུཾ. ཨཝསེསཱ བྷིཀྑཱུཏི ཝཀྑམཱནཀཱལེ ནིསིནྣཱ བྷིཀྑཱུ. ཏསྨཱ ཝཊྚཏཱིཏི ཡཐཱ ‘‘ཨནུཛཱནཱམི, བྷིཀྑཝེ, ཏིཙཱིཝརཾ ཨདྷིཊྛཱཏུཾ, ན ཝིཀཔྤེཏུ’’ནྟི (མཧཱཝ. ༣༥༨) ཝུཏྟཾ, ཨེཝཾ པརིཀྑཱརཙོལ༹མྤི ཝུཏྟཾ, ན ཙསྶ ཨུཀྐཊྛཔརིཙྪེདོ ཝུཏྟོ, ན ཙ སངྑཱཔརིཙྪེདོ, ཏསྨཱ ཏཱིཎིཔི ཙཱིཝརཱནི པཙྩུདྡྷརིཏྭཱ ཨིམཱནི ཙཱིཝརཱནི པརིཀྑཱརཙོལཱ༹ནི ཨདྷིཊྛཧིཏྭཱ པརིབྷུཉྫིཏུཾ ཝཊྚཏཱིཏི ཨཏྠོ. ནིདྷཱནམུཁམེཏནྟི ཨེཏཾ པརིཀྑཱརཙོལཱ༹དྷིཊྛཱནཾ ནིདྷཱནམུཁཾ ཋཔནམུཁཾ, ཨཏིརེཀཙཱིཝརཊྛཔནཀཱརཎནྟི ཨཏྠོ. ཀཐཾ ཉཱཡཏཱིཏི ཙེ, ཏེན ཁོ པན སམཡེན བྷིཀྑཱུནཾ པརིཔུཎྞཾ ཧོཏི ཏིཙཱིཝརཾ, ཨཏྠོ ཙ ཧོཏི པརིསྶཱཝནེཧིཔི ཐཝིཀཱཧིཔི. ཨེཏསྨིཾ ཝཏྠུསྨིཾ ‘‘ཨནུཛཱནཱམི, བྷིཀྑཝེ, པརིཀྑཱརཙོལ༹ཀ’’ནྟི ཨནུཉྙཱཏཏྟཱ བྷིཀྑཱུནཉྩ ཨེཀམེཝ པརིསྶཱཝནཾ, ཐཝིཀཱ ཝཱ ཝཊྚཏི, ན དྭེ ཝཱ ཏཱིཎི ཝཱཏི པཊིཀྑེཔཱབྷཱཝཏོ ཝིཀཔྤནཱུཔགཔཙྪིམཔྤམཱཎཱནི, ཨཏིརེཀཔྤམཱཎཱནི ཝཱ པརིསྶཱཝནཱདཱིནི པརིཀྑཱརཱནི ཀཔྤནྟཱིཏི སིདྡྷཾ. པཋམཾ ཏིཙཱིཝརཱདྷིཊྛཱནེན ཨདྷིཊྛཱཏབྦཾ, པུན ¶ པརིཧརིཏུཾ ཨསཀྐོནྟེན པཙྩུདྡྷརིཏྭཱ པརིཀྑཱརཙོལ༹ཾ ཨདྷིཊྛཱཏབྦཾ ¶ , ན ཏྭེཝ ཨཱདིཏོཝ ཨིདཾ ཝུཏྟཾ. བདྡྷསཱིམཱཡ ཨཝིཔྤཝཱསསཱིམཱསམྨུཏིསམྦྷཝཏོ ཙཱིཝརཝིཔྤཝཱསེ ནེཝཏྠི དོསོཏི ན ཏཏྠ དུཔྤརིཧཱརོཏི ཨཱཧ ‘‘ཨབདྡྷསཱིམཱཡ དུཔྤརིཧཱར’’ནྟི.

༤༥. ཨཏིརིཏྟཔྤམཱཎཱཡ ཚེདནཀཾ པཱཙིཏྟིཡནྟི ཨཱཧ ‘‘ཨནཏིརིཏྟཔྤམཱཎཱ’’ཏི. ཏཏོ པརཾ པཙྩུདྡྷརིཏྭཱ ཝིཀཔྤེཏབྦཱཏི ཝསྶིཀམཱསཏོ པརཾ ཨདྷིཊྛཱནཾ པཙྩུདྡྷརིཏྭཱ ཝིཀཔྤེཏབྦཱ, ཨིམིནཱ ཙཏུནྣཾ ཝསྶིཀམཱསཱནཾ ཨུཔརི ཨདྷིཊྛཱནཾ ཏིཊྛཏཱིཏི ཝིཉྙཱཡཏི, ཨསཏོ པཙྩུདྡྷརཱཡོགཱ, ཡཉྩ མཱཏིཀཱཊྛཀཐཱཡཾ (ཀངྑཱ. ཨཊྛ. ཀཐིནསིཀྑཱཔདཝཎྞནཱ) ‘‘ཝསྶིཀསཱཊིཀཱ ཝསྶཱནམཱསཱཏིཀྐམེནཱཔི ཀཎྜུཔཊིཙྪཱདི ཨཱབཱདྷཝཱུཔསམེནཱཔི ཨདྷིཊྛཱནཾ ཝིཛཧནྟཱི’’ཏི ཝུཏྟཾ, ཏཾ སམནྟཔཱསཱདིཀཱཡཾ ནཏྠི, པརིཝཱརཊྛཀཐཱཡཉྩ ‘‘ཨཏྠཱཔཏྟི ཧེམནྟེ ཨཱཔཛྫཏི, ནོ གིམྷེ’’ཏི ཨེཏྠ ན ཏཾ ཝུཏྟཾ, ཀཏྟིཀཔུཎྞམཱསིཡཱ པཙྪིམེ པཱཊིཔདདིཝསེ ཝིཀཔྤེཏྭཱ ཋཔིཏཾ ཝསྶིཀསཱཊིཀཾ ནིཝཱསེནྟོ ཧེམནྟེ ཨཱཔཛྫཏི. ཀུརུནྡིཡཾ པན ‘‘ཀཏྟིཀཔུཎྞམདིཝསེ ཨཔཙྩུདྡྷརིཏྭཱ ཧེམནྟེ ཨཱཔཛྫཏཱི’’ཏི ཝུཏྟཾ, ཏམྤི སུཝུཏྟཾ. ‘‘ཙཱཏུམཱསཾ ཨདྷིཊྛཱཏུཾ, ཏཏོ པརཾ ཝིཀཔྤེཏུ’’ནྟི ཧི ཝུཏྟཾ. ཏཏྠ མཧཱཨཊྛཀཐཱཡཾ ནིཝཱསནཔཙྩཡཱ དུཀྐཊཾ ཝུཏྟཾ, ཀུརུནྡཊྛཀཐཱཡཾ པན ཨཔཙྩུདྡྷཱརཔཙྩཡཱ, ཏསྨཱ ཀུརུནྡིཡཾ ཝུཏྟནཡེནཔི ཝསྶིཀསཱཊིཀཱ ཝསྶཱནཱཏིཀྐམེཔི ཨདྷིཊྛཱནཾ ན ཝིཛཧཏཱིཏི པཉྙཱཡཏི. ཨདྷིཊྛཱནཝིཛཧནེསུ ཙ ཝསྶཱནམཱསཨཱབཱདྷཱནཾ ཝིགམེ ཝིཛཧནཾ མཱཏིཀཱཊྛཀཐཱཡམྤི ན ཨུདྡྷཊཾ, ཏསྨཱ སམནྟཔཱསཱདིཀཱཡཾ (པཱརཱ. ཨཊྛ. ༢.༤༦༩) ཨཱགཏནཡེན ཡཱཝ པཙྩུདྡྷཱརཱ ཨདྷིཊྛཱནཾ ཏིཊྛཏཱིཏི གཧེཏབྦཾ.

ནཧཱནཏྠཱཡ ཨནུཉྙཱཏཏྟཱ ‘‘ཝཎྞབྷེདམཏྟརཏྟཱཔི ཙེསཱ ཝཊྚཏཱི’’ཏི ཝུཏྟཾ. དྭེ པན ན ཝཊྚནྟཱིཏི ཨིམིནཱ སངྒྷཱཊིཨཱདཱིསུཔི དུཏིཡཨདྷིཊྛཱནཾ ན རུཧཏི, ཏཾ ཨཏིརེཀཙཱིཝརཾ ཧོཏཱིཏི ¶ དསྶེཏི. མཧཱཔཙྩརིཡཾ ཙཱིཝརཝསེན པརིབྷོགཀིཙྩསྶ ཨབྷཱཝཾ སནྡྷཱཡ ‘‘ཨནཱཔཏྟཱི’’ཏི ཝུཏྟཱ སེནཱསནཔརིབྷོགཏྠཱཡ དིནྣཔཙྩཏྠརཎེ ཝིཡ. ཡཾ པན ‘‘པཙྩཏྠརཎམྤི ཨདྷིཊྛཱཏབྦ’’ནྟི ཝུཏྟཾ, ཏཾ སེནཱསནཏྠཱཡེཝཱཏི ནིཡམིཏཾ ན ཧོཏི ནཝསུ ཙཱིཝརེསུ གཧིཏཏྟཱ, ཏསྨཱ ཨཏྟནོ ནཱམེན ཨདྷིཊྛཧིཏྭཱ ནིདཧིཏྭཱ པརིཀྑཱརཙོལ༹ཾ ཝིཡ ཡཐཱ ཏཐཱ ཝིནིཡུཛྫིཏམེཝཱཏི གཧེཏབྦཾ, པཱཝཱརོཀོཛཝོཏི ཨིམེསམྤི པཙྩཏྠརཎཱདིནཱ ལོཀེཔི ཝོཧརཎཏོ སེནཱསནཔརིཀྑཱརཏྠཱཡ དིནྣཔཙྩཏྠརཎཏོ ¶ ཝིསུཾ གཧཎཾ ཀཏཾ. སཙེ ཨཝསཱནེ ཨཔརཱཝསྶིཀསཱཊིཀཱ ཨུཔྤནྣཱ ཧོཏི, པུརིམཝསྶིཀསཱཊིཀཾ པཙྩུདྡྷརིཏྭཱ ཝིཀཔྤེཏྭཱ ཨདྷིཊྛཱཏབྦཱཏི ཝདནྟི.

ནིསཱིདནམྷི པམཱཎཡུཏྟནྟི ‘‘དཱིགྷཏོ སུགཏཝིདཏྠིཡཱ དྭེ ཝིདཏྠིཡོ, ཝིཏྠཱརཏོ དིཡཌྜྷཾ, དསཱ ཝིདཏྠཱི’’ཏིཨིམིནཱ པམཱཎེན ཡུཏྟཾ, ཏཾ པན མཛ྄ཛྷིམཔུརིསཧཏྠསངྑཱཏེན ཝཌྜྷཀཱིཧཏྠེན དཱིགྷཏོ ཏིཧཏྠཾ ཧོཏི, ཝིཏྠཱརཏོ ཚལ༹ངྒུལཱདྷིཀདྭིཧཏྠཾ, དསཱ ཝིདཏྠཱདྷིཀཧཏྠཾ, ཨིདཱནི མནུསྶཱནཾ པཀཏིཧཏྠེན དཱིགྷཏོ ཝིདཏྠཱདྷིཀཙཏུཧཏྠཾ ཧོཏི, ཝིཏྠཱརཏོ ནཝངྒུལཱདྷིཀཏིཧཏྠཾ, དསཱ ཚལ༹ངྒུལཱདྷིཀདྭིཧཏྠཱ, ཏཏོ ཨཱུནཾ ཝཊྚཏི, ན ཨདྷིཀཾ ‘‘ཏཾ ཨཏིཀྐཱམཡཏོ ཚེདནཀཾ པཱཙིཏྟིཡ’’ནྟི (པཱཙི. ༥༣༣) ཝུཏྟཏྟཱ. ཀཎྜུཔཊིཙྪཱདིཡཱ པམཱཎིཀཱཏི ‘‘དཱིགྷཏོ ཙཏསྶོ ཝིདཏྠིཡོ སུགཏཝིདཏྠིཡཱ, ཏིརིཡཾ དྭེ ཝིདཏྠིཡོ’’ཏི (པཱཙི. ༥༣༨) ཝུཏྟཏྟཱ ཨེཝཾ ཝུཏྟཔྤམཱཎཡུཏྟཱ, སཱ པན ཝཌྜྷཀཱིཧཏྠེན དཱིགྷཏོ ཚཧཏྠཱ ཧོཏི, ཝིཏྠཱརཏོ ཏིཧཏྠཱ, ཨིདཱནི པཀཏིཧཏྠེན པན དཱིགྷཏོ ནཝཧཏྠཱ ཧོཏི, ཏིརིཡཏོ ཝིདཏྠཱདྷིཀཙཏུཧཏྠཱཏི ཝེདིཏབྦཱ. ཝིཀཔྤནཱུཔགཔཙྪིམཙཱིཝརཔྤམཱཎཾ པརིཀྑཱརཙོལ༹ནྟི ཨེཏྠ པན ཝིཀཔྤནཱུཔགཔཙྪིམཙཱིཝརཔྤམཱཎཾ ¶ ནཱམ སུགཏངྒུལེན དཱིགྷཏོ ཨཊྛངྒུལཾ ཧོཏི, ཏིརིཡཏོ ཙཏུརངྒུལཾ, ཝཌྜྷཀཱིཧཏྠེན དཱིགྷཏོ ཨེཀཧཏྠཾ ཧོཏི, ཏིརིཡཏོ ཝིདཏྠིཔྤམཱཎཾ, ཨིདཱནི པཀཏིཧཏྠེན པན དཱིགྷཏོ ཝིདཏྠཱདྷིཀཧཏྠཾ ཧོཏི, ཏིརིཡཏོ ཚལ༹ངྒུལཱདྷིཀཝིདཏྠིཔྤམཱཎཾ. ཏེནཱཧ ‘‘ཏསྶ པམཱཎ’’ནྟིཨཱདི.

བྷེསཛྫཏྠཱཡཱཏིཨཱདཱིསུ ཨཏྟནོ སནྟཀབྷཱཝཏོ མོཙེཏྭཱ ཋཔིཏཾ སནྡྷཱཡ ‘‘ཨནདྷིཊྛིཏེཔི ནཏྠི ཨཱཔཏྟཱི’’ཏི ཝུཏྟཾ, ‘‘ཨིདཾ བྷེསཛྫཏྠཱཡ, ཨིདཾ མཱཏུཡཱ’’ཏི ཝིབྷཛིཏྭཱ སཀསནྟཀབྷཱཝཏོ མོཙེཏྭཱ ཋཔེནྟེན ཨདྷིཊྛཱནཀིཙྩཾ ནཏྠཱིཏི ཨདྷིཔྤཱཡོ. ‘‘ཨིམིནཱ བྷེསཛྫཾ ཙེཏཱཔེསྶཱམི, ཨིདཾ མཱཏུཡཱ དསྶཱམཱི’’ཏི ཋཔེནྟེན པན ཨདྷིཊྛཱཏབྦམེཝཱཏི ཝདནྟི. སེནཱསནཔརིཀྑཱརཏྠཱཡ དིནྣཔཙྩཏྠརཎེཏི ཨེཏྠ ཨནིཝཱསེཏྭཱ ཨཔཱརུཔིཏྭཱ ཀེཝལཾ མཉྩཔཱིཋེསུཡེཝ ཨཏྠརིཏྭཱ པརིབྷུཉྫིཡམཱནཾ པཙྩཏྠརཎཾ ཨཏྟནོ སནྟཀམྤི ཨནདྷིཊྛཱཏུཾ ཝཊྚཏཱིཏི ཝདནྟི, ཧེཊྛཱ པན པཙྩཏྠརཎམྤི ཨདྷིཊྛཱཏབྦམེཝཱཏི ཨཝིསེསེན ཝུཏྟཏྟཱ ཨཏྟནོ སནྟཀཾ ཨདྷིཊྛཱཏབྦམེཝཱཏི ཨམྷཱཀཾ ཁནྟི, ཝཱིམཾསིཏྭཱ གཧེཏབྦཾ. ཏནྟེ ཋིཏཾཡེཝ ཨདྷིཊྛཱཏབྦནྟི ཨེཏྠ པཙྪཱ ཝཱིཏཊྛཱནཾ ཨདྷིཊྛིཏམེཝ ཧོཏི, པུན ཨདྷིཊྛཱནཀིཙྩཾ ནཏྠི. སཙེ པན པརིཙྪེདཾ དསྶེཏྭཱ ཨནྟརནྟརཱ ཝཱིཏཾ ཧོཏི, པུན ཨདྷིཊྛཱཏབྦནྟི ཝདནྟི. ཨེསེཝ ནཡོཏི ཝིཀཔྤནཱུཔགཔྤམཱཎམཏྟེ ཝཱིཏེ ཏནྟེ ཋིཏཾཡེཝ ཨདྷིཊྛཱཏབྦནྟི ཨཏྠོ.

༤༦. ‘‘ཧཱིནཱཡཱཝཏྟནེནཱཏི ¶ ‘སིཀྑཾ ཨཔྤཙྩཀྑཱཡ གིཧིབྷཱཝཱུཔགམནེནཱ’ཏི ཏཱིསུཔི གཎྛིཔདེསུ ཝུཏྟཾ, ཏཾ ཡུཏྟཾ ཨཉྙསྶ དཱནེ ཝིཡ ཙཱིཝརེ ནིརཱལཡབྷཱཝེནེཝ པརིཙྩཏྟཏྟཱ. ཀེཙི པན ‘ཧཱིནཱཡཱཝཏྟནེནཱཏི བྷིཀྑུནིཡཱ གིཧིབྷཱཝཱུཔགམནེནེཝཱཏི ཨེཏམཏྠཾ གཧེཏྭཱ བྷིཀྑུ པན ཝིབྦྷམནྟོཔི ཡཱཝ སིཀྑཾ ན པཙྩཀྑཱཏི, ཏཱཝ བྷིཀྑུཡེཝཱཏི ཨདྷིཊྛཱནཾ ན ཝིཛཧཏཱི’ཏི ¶ ཝདནྟི, ཏཾ ན གཧེཏབྦཾ ‘བྷིཀྑུནིཡཱ ཧཱིནཱཡཱཝཏྟནེནཱ’ཏི ཝིསེསེཏྭཱ ཨཝུཏྟཏྟཱ. བྷིཀྑུནིཡཱ ཧི གིཧིབྷཱཝཱུཔགམནེན ཨདྷིཊྛཱནཝིཛཧནཾ ཝིསུཾ ཝཏྟབྦཾ ནཏྠི ཏསྶཱ ཝིབྦྷམནེནེཝ ཨསྶམཎཱིབྷཱཝཏོ. སིཀྑཱཔཙྩཀྑཱནེནཱཏི པན ཨིདཾ སཙེ བྷིཀྑུལིངྒེ ཋིཏོཝ སིཀྑཾ པཙྩཀྑཱཏི, ཏསྶ ཀཱཡལགྒམྤི ཙཱིཝརཾ ཨདྷིཊྛཱནཾ ཝིཛཧཏཱིཏི དསྶནཏྠཾ ཝུཏྟ’’ནྟི སཱརཏྠདཱིཔནིཡཾ (སཱརཏྠ. ཊཱི. ༢.༤༦༩) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ༡.༤༦༩) པན ‘‘ཧཱིནཱཡཱཝཏྟནེནཱཏི ཨིདཾ ཨནྟིམཝཏྠུཾ ཨཛ྄ཛྷཱཔཛྫིཏྭཱ བྷིཀྑུཔཊིཉྙཱཡ ཋིཏསྶ ཙེཝ ཏིཏྠིཡཔཀྐནྟསྶ ཙ བྷིཀྑུནིཡཱ ཙ བྷིཀྑུནིབྷཱཝེ ནིརཔེཀྑཏཱཡ གིཧིལིངྒཏིཏྠིཡལིངྒགྒཧཎཾ སནྡྷཱཡ ཝུཏྟཾ. སིཀྑཾ ཨཔྤཙྩཀྑཱཡ གིཧིབྷཱཝཱུཔགམནཾ སནྡྷཱཡ ཝུཏྟནྟི ཀེཙི ཝདནྟི, ཏཾ ན ཡུཏྟཾ, ཏདཱཔི ཏསྶ ཨུཔསམྤནྣཏྟཱ ཙཱིཝརསྶ ཙ ཏསྶ སནྟཀཏྟཱ ཝིཛཧནཏོ’’ཏི ཝུཏྟཾ, ཨིཏི ཨིམཱནི དྭེ ཝཙནཱནི ཨཉྙམཉྙཝིརུདྡྷཱནི ཧུཏྭཱ དིསྶནྟི.

ཨཊྛཀཐཱཡཾ པན ‘‘ཧཱིནཱཡཱཝཏྟནེན སིཀྑཱཔཙྩཀྑཱནེནཱ’’ཏི (པཱརཱ. ཨཊྛ. ༢.༤༦༩) ཝིསུཾ ཝུཏྟཏྟཱ ཧཱིནཱཡཱཝཏྟནྟེ སཏི སིཀྑཾ ཨཔྤཙྩཀྑནྟེཔི ཙཱིཝརཾ ཨདྷིཊྛཱནཾ ཝིཛཧཏི, སིཀྑཾ པཙྩཀྑནྟེ སཏི ཧཱིནཱཡ ཨནཱཝཏྟནྟེཔཱིཏི ཨདྷིཔྤཱཡོ དིསྶཏི, ཏསྨཱ སིཀྑཾ ཨཔྤཙྩཀྑཱཡ ཀེཝལཾ གིཧིབྷཱཝཾ ཨུཔགཙྪནྟསྶ ཀིཉྩཱཔི བྷིཀྑུབྷཱཝོ ཨཏྠི, ཙཱིཝརསྶ ཙ ཏསྶ སནྟཀཏྟཱ ཝིཛཧནཾ, ཏཐཱཔི ‘‘ཧཱིནཱཡཱཝཏྟནེནཱ’’ཏི ཝུཏྟཏྟཱ གིཧིབྷཱཝཱུཔགམནེནེཝ ཨདྷིཊྛཱནཝིཛཧནཾ སིཡཱ ཡཐཱ ཏཾ ལིངྒཔརིཝཏྟནེན. གིཧིབྷཱཝཾ ཨནུཔགནྟྭཱ ཙ ཀེཝལཾ སིཀྑཱཔཙྩཀྑཱནཾ ཀརོནྟསྶ ཀིཉྩཱཔི བྷིཀྑུལིངྒཾ ཨཏྠི, ཙཱིཝརསྶ ཙ ཏསྶ སནྟཀཏྟཱ ཝིཛཧནཾ, ཏཐཱཔི ‘‘སིཀྑཱཔཙྩཀྑཱནེནཱ’’ཏི ཝུཏྟཏྟཱ སིཀྑཱཔཙྩཀྑཱནེནེཝ ཨདྷིཊྛཱནཝིཛཧནཾ སིཡཱ ཡཐཱ ཏཾ པཙྩུདྡྷརཎེ, ཏསྨཱ བྷིཀྑུ ཝཱ ཧོཏུ བྷིཀྑུནཱི ཝཱ, ཧཱིནཱཡཱཝཏྟིསྶཱམཱིཏི ¶ ཙིཏྟེན གིཧིལིངྒགྒཧཎེན ཙཱིཝརཾ ཨདྷིཊྛཱནཾ ཝིཛཧཏི. སིཀྑཱཔཙྩཀྑཱནེན པན བྷིཀྑུསྶེཝ ཙཱིཝརཾ བྷིཀྑུནིཡཱ སིཀྑཱཔཙྩཀྑཱནཱབྷཱཝཱཏི ཨཡམམྷཱཀཾ ཁནྟི. ཨནྟིམཝཏྠུཨཛ྄ཛྷཱཔནྣཀཏིཏྠིཡཔཀྐནྟཀཱནཾ པན ཙཱིཝརསྶ ཨདྷིཊྛཱནཝིཛཧནཾ ཨཊྛཀཐཱཡཾ ཨནཱགཏཏྟཱ ཏེསཉྩ ཧཱིནཱཡཱཝཏྟཱནཝོཧཱརཱབྷཱཝཱ ཝིཙཱརེཏབྦཾ.

ཀནིཊྛངྒུལིནཁཝསེནཱཏི ¶ ཧེཊྛིམཔརིཙྪེདཾ དསྶེཏི. ཨོརཏོ པརཏོཏི ཨེཏྠ ཙ ‘‘ཨོརཏོ ཚིདྡཾ ཨདྷིཊྛཱནཾ བྷིནྡཏི, པརཏོ ན བྷིནྡཏཱི’’ཏི ཝུཏྟཾ. ཀཐཾ ཨོརཔརབྷཱཝོ ཝེདིཏབྦོཏི? ཡཐཱ ནདཱིཔརིཙྪིནྣེ པདེསེ མནུསྶཱནཾ ཝསནདིསཱབྷཱགེ ཏཱིརཾ ཨོརིམཾ ནཱམ ཧོཏི, ཨིཏརདིསཱབྷཱགེ ཏཱིརཾ པཱརིམཾ ནཱམ, ཏཐཱ བྷིཀྑཱུནཾ ནིཝཱསནཔཱརུཔནཊྛཱནབྷཱུཏཾ ཙཱིཝརསྶ མཛ྄ཛྷཊྛཱནཾ ཡཐཱཝུཏྟཝིདཏྠིཨཱདིཔྤམཱཎསྶ པདེསསྶ ཨོརཾ ནཱམ, ཙཱིཝརཔརིཡནྟཊྛཱནཾ པརཾ ནཱམ, ཨིཏི ལོཀཏོ ཝཱ ཡཐཱ ཙ ཨོརཏོ བྷོགཾ པརཏོ ཨནྟཾ ཀཏྭཱ ཙཱིཝརཾ ཋཔེཏབྦནྟི ཝུཏྟེ བྷིཀྑུནོ ཨབྷིམུཁཊྛཱནཾ ཨོརཾ ནཱམ, ཨིཏརཊྛཱནཾ པརཾ ནཱམ, ཨེཝཾ བྷིཀྑཱུནཾ ནིཝཱསནཔཱརུཔནཊྛཱནཾ ཨོརཾ ནཱམ, ཨིཏརཾ པརཾ ནཱམ. ཨེཝཾ སཱསནཏོ ཝཱ ཨོརཔརབྷཱཝོ ཝེདིཏབྦོ. ཏེནེཝ ཡོ པན དུབྦལཊྛཱནེ པཋམཾ ཨགྒལ༹ཾ དཏྭཱ པཙྪཱ དུབྦལཊྛཱནཾ ཚིནྡིཏྭཱ ཨཔནེཏི, ཨདྷིཊྛཱནཾ ན བྷིཛྫཏི. མཎྜལཔརིཝཏྟནེཔི ཨེསེཝ ནཡོཏི སཀལསྨིཾ ཙཱིཝརེ ཨདྷིཊྛཱནབྷིཛྫནཱབྷིཛྫནབྷཱཝོ དསྶིཏོ. ཏེན ཝུཏྟཾ ཝིམཏིཝིནོདནིཡཾ (ཝི. ཝི. ཊཱི. ༡.༤༦༩) ‘‘ཨེས ནཡོཏི ཨིམིནཱ པམཱཎཡུཏྟེསུ ཡཏྠ ཀཏྠཙི ཚིདྡེ ཨདྷིཊྛཱནཾ ཝིཛཧཏཱིཏིཨཱདིཨཏྠཾ སངྒཎྷཱཏཱི’’ཏི.

ཁུདྡཀཾ ཙཱིཝརནྟི མུཊྛིཔཉྩཀཱདིབྷེདཔྤམཱཎཏོ ཨནཱུནམེཝ ཁུདྡཀཙཱིཝརཾ. མཧནྟཾ ཝཱ ཁུདྡཀཾ ཀརོཏཱིཏི ཨེཏྠ ཏིཎྞཾ ཙཱིཝརཱནཾ ཙཏཱུསུ པསྶེསུ ཡསྨིཾ པདེསེ ཚིདྡཾ ཨདྷིཊྛཱནཾ ན ཝིཛཧཏི, ཏསྨིཾ ¶ པདེསེ སམནྟཏོ ཚིནྡིཏྭཱ ཁུདྡཀཾ ཀརོནྟསྶ ཨདྷིཊྛཱནཾ ན ཝིཛཧཏཱིཏི ཨདྷིཔྤཱཡོ. ཝིམཏིཝིནོདནིཡཾ པན ཝུཏྟཾ ‘‘མཧནྟཾ ཝཱ ཁུདྡཀཾ ཝཱ ཀརོཏཱིཏི ཨེཏྠ ཨཏིམཧནྟཾ ཙཱིཝརཾ མུཊྛིཔཉྩཀཱདིཔཙྪིམཔྤམཱཎཡུཏྟཾ ཀཏྭཱ སམནྟཏོ ཚིནྡནེནཔི ཝིཙྪིནྡནཀཱལེ ཚིཛྫམཱནཊྛཱནཾ ཚིདྡསངྑཾ ན གཙྪཏི, ཨདྷིཊྛཱནཾ ན ཝིཛཧཏི ཨེཝཱཏི སིཛ྄ཛྷཏི, ‘གྷཊེཏྭཱ ཚིནྡཏི ན བྷིཛྫཏཱི’ཏི ཝཙནེན ཙ སམེཏི. པརིཀྑཱརཙོལ༹ཾ པན ཝིཀཔྤནཱུཔགཔཙྪིམཔྤམཱཎཏོ ཨཱུནཾ ཀཏྭཱ ཚིདྡཾ ཨདྷིཊྛཱནཾ ཝིཛཧཏི ཨདྷིཊྛཱནསྶ ཨནིསྶཡཏྟཱ, ཏཱནི པུན བདྡྷཱནི གྷཊིཏཱནི པུན ཨདྷིཊྛཱཏབྦམེཝཱཏི ཝེདིཏབྦཾ. ཀེཙི པན ‘ཝསྶིཀསཱཊིཀཙཱིཝརེ དྭིདྷཱ ཚིནྣེ ཡདིཔི ཨེཀེཀཾ ཁཎྜཾ པཙྪིམཔྤམཱཎཾ ཧོཏི, ཨེཀསྨིཾཡེཝ ཁཎྜེ ཨདྷིཊྛཱནཾ ཏིཊྛཏི, ན ཨིཏརསྨིཾ, དྭེ པན ན ཝཊྚནྟཱི’ཏི ཝུཏྟཏྟཱ ནིསཱིདནཀཎྜུཔཊིཙྪཱདཱིསུཔི ཨེསེཝ ནཡོཏི ཝདནྟཱི’’ཏི.

༤༧. སམྨུཁེ པཝཏྟཱ སམྨུཁཱཏི པཙྩཏྟཝཙནཾ, ཏཉྩ ཝིཀཔྤནཱཝིསེསནཾ, ཏསྨཱ ‘‘སམྨུཁེ’’ཏི བྷུམྨཏྠེ ནིསྶཀྐཝཙནཾ ཀཏྭཱཔི ཨཏྠཾ ཝདནྟི, ཨབྷིམུཁེཏི ཨཏྠོ. ཨཐ ཝཱ སམྨུཁེན ཨཏྟནོ ཝཱཙཱཡ ཨེཝ ཝིཀཔྤནཱ སམྨུཁཱཝིཀཔྤནཱ. པརམྨུཁེན ཝིཀཔྤནཱ པརམྨུཁཱཝིཀཔྤནཱཏི ¶ ཀརཎཏྠེནཔི ཨཏྠོ དཊྛབྦོ. ཨཡམེཝ པཱལི༹ཡཱ སམེཏི. སནྣིཧིཏཱསནྣིཧིཏབྷཱཝནྟི ཨཱསནྣདཱུརབྷཱཝཾ. ཨེཏྟཱཝཏཱ ནིདྷེཏུཾ ཝཊྚཏཱིཏི ཨེཏྟཀེནེཝ ཝིཀཔྤནཱཀིཙྩསྶ ནིཊྛིཏཏྟཱ ཨཏིརེཀཙཱིཝརཾ ན ཧོཏཱིཏི དསཱཧཱཏིཀྐམེ ནིསྶགྒིཡཾ ན ཛནེཏཱིཏི ཨདྷིཔྤཱཡོ. པརིབྷུཉྫིཏུཾ…པེ… ན ཝཊྚཏཱིཏི སཡཾ ཨཔཙྩུདྡྷཱརཎཔརིབྷུཉྫནེ པཱཙིཏྟིཡཾ, ཨདྷིཊྛཧནེ པརེསཾ ཝིསྶཛྫནེ ཙ དུཀྐཊཉྩ སནྡྷཱཡ ཝུཏྟཾ. པརིབྷོགཱདཡོཔི ཝཊྚནྟཱིཏི པརིབྷོགཝིསྶཛྫནཨདྷིཊྛཱནཱནི ཝཊྚནྟི. ཨཔི-སདྡེན ནིདྷེཏུམྤི ཝཊྚཏཱིཏི ཨཏྠོ. ཨེཏེན པཙྩུདྡྷཱརེཔི ཀཏེ ཙཱིཝརཾ ཨདྷིཊྛཱཏུཀཱམེན ¶ ཝིཀཔྤིཏཙཱིཝརམེཝ ཧོཏི, ན ཨཏིརེཀཙཱིཝརཾ, ཏཾ པན ཏིཙཱིཝརཱདིནཱམེན ཨདྷིཊྛཱཏུཀཱམེན ཨདྷིཊྛཧིཏབྦཾ, ཨིཏརེན ཝིཀཔྤིཏཙཱིཝརམེཝ ཀཏྭཱ པརིབྷུཉྫིཏབྦནྟི དསྶེཏི.

ཀེཙི པན ‘‘ཡཾ ཝིཀཔྤིཏཙཱིཝརཾ, ཏཾ ཡཱཝ པརིབྷོགཀཱལཱ ཨཔཙྩུདྡྷརཱཔེཏྭཱ ནིདཧེཏབྦཾ, པརིབྷོགཀཱལེ པན སམྤཏྟེ པཙྩུདྡྷརཱཔེཏྭཱ ཨདྷིཊྛཧིཏྭཱ པརིབྷུཉྫིཏབྦཾ. ཡདི ཧི ཏཏོ པུབྦེཔི པཙྩུདྡྷརཱཔེཡྻ, པཙྩུདྡྷཱརེནེཝ ཝིཀཔྤནཱཡ ཝིགཏཏྟཱ ཨཏིརེཀཙཱིཝརཾ ནཱམ ཧོཏི, དསཱཧཱཏིཀྐམེ པཏྟེཝ ནིསྶགྒིཡཾ, ཏསྨཱ ཡཾ ཨཔརིབྷུཉྫིཏྭཱ ཋཔེཏབྦཾ, ཏདེཝ ཝིཀཔྤེཏབྦཾ. པཙྩུདྡྷཱརེ ཙ ཀཏེ ཨནྟོདསཱཧེཡེཝ ཨདྷིཊྛཱཏབྦཾ. ཡཉྩ ཨཊྛཀཐཱཡཾ (པཱརཱ. ཨཊྛ. ༢.༤༦༩) ‘ཏཏོ པརཾ པརིབྷོགཱདི ཝཊྚཏཱི’ཏིཨཱདི ཝུཏྟཾ, ཏཾ པཱལི༹ཡཱ ཝིརུཛ྄ཛྷཏཱི’’ཏི ཝདནྟི, ཏཾ ཏེསཾ མཏིམཏྟམེཝ. པཱལི༹ཡཉྷི ‘‘ཨནྟོདསཱཧཾ ཨདྷིཊྛེཏི ཝིཀཔྤེཏཱི’’ཏི (པཱརཱ. ༤༦༩) ཙ ‘‘སཱམཾ ཙཱིཝརཾ ཝིཀཔྤེཏྭཱ ཨཔཙྩུདྡྷཱརཎཾ པརིབྷུཉྫེཡྻ པཱཙིཏྟིཡ’’ནྟི (པཱཙི. ༣༧༣) ཙ ‘‘ཨནཱཔཏྟི སོ ཝཱ དེཏི, ཏསྶ ཝཱ ཝིསྶཱསནྟོ པརིབྷུཉྫཏཱི’’ཏི (པཱཙི. ༣༧༦) ཙ སཱམཉྙཏོ ཝུཏྟཏྟཱ, ཨཊྛཀཐཱཡཉྩ (པཱརཱ. ཨཊྛ. ༢.༤༦༩) ‘‘ཨིམཾ ཙཱིཝརཾ ཝཱ ཝིཀཔྤནཾ ཝཱ པཙྩུདྡྷརཱམཱི’’ཏིཨཱདིནཱ པཙྩུདྡྷཱརཾ ཨདསྶེཏྭཱ ‘‘མཡ྄ཧཾ སནྟཀཾ པརིབྷུཉྫ ཝཱ ཝིསྶཛྫེཧི ཝཱ ཡཐཱཔཙྩཡཾ ཀརོཧཱི’’ཏི ཨེཝཾ ཨཏྟནོ སནྟཀཏྟཾ ཨམོཙེཏྭཱཝ པརིབྷོགཱདིཝསེན པཙྩུདྡྷཱརསྶ ཝུཏྟཏྟཱ, ‘‘ཏཏོ པབྷུཏི པརིབྷོགཱདཡོཔི ཝཊྚནྟཱི’’ཏི ཨདྷིཊྛཱནཾ ཝིནཱཔི ཝིསུཾ པརིབྷོགསྶ ནིདྷཱནསྶ ཙ ཝུཏྟཏྟཱ ཝིཀཔྤནཱནནྟརམེཝ པཙྩུདྡྷརཱཔེཏྭཱ ཨནདྷིཊྛཧིཏྭཱ ཨེཝ ཙ ཏིཙཱིཝརརཧིཏཾ ཝིཀཔྤནཱརཧཾ ཙཱིཝརཾ པརིབྷུཉྫིཏུཉྩ ནིདཧིཏུཉྩ ཨིདཾ པཱཊེཀྐཾ ཝིནཡཀམྨནྟི ཁཱཡཏི. ཨཔིཙ བཧཱུནཾ པཏྟཱནཾ ཝིཀཔྤེཏུཾ པཙྩུདྡྷརེཏུཉྩ ཝུཏྟཏྟཱ པཙྩུདྡྷཱརེ ཏེསཾ ¶ ཨཏིརེཀཔཏྟཏཱ དསྶིཏཱཏི སིཛ྄ཛྷཏི ཏེསུ ཨེཀསྶེཝ ཨདྷིཊྛཱཏབྦཏོ, ཏསྨཱ ཨཊྛཀཐཱཡཾ ཨཱགཏནཡེནེཝ གཧེཏབྦཾ.

མིཏྟོཏི ¶ དལ༹ྷམིཏྟོ. སནྡིཊྛོཏི དིཊྛམཏྟོ, ན དལ༹ྷམིཏྟོ. པཉྙཏྟིཀོཝིདོ ན ཧོཏཱིཏི ཨེཝཾ ཝིཀཔྤིཏེ ཨནནྟརམེཝ ཨེཝཾ པཙྩུདྡྷརིཏབྦནྟི ཝིནཡཀམྨཾ ན ཛཱནཱཏི. ཏེནཱཧ ‘‘ན ཛཱནཱཏི པཙྩུདྡྷརིཏུ’’ནྟི. ཨིམིནཱཔི ཙེཏཾ ཝེདིཏབྦཾ ‘‘ཝིཀཔྤནཱསམནནྟརམེཝ པཙྩུདྡྷཱརོ ཀཱཏབྦོ’’ཏི. ཝིཀཔྤིཏཝིཀཔྤནཱ ནཱམེསཱ ཝཊྚཏཱིཏི ཨདྷིཊྛིཏཨདྷིཊྛཱནཾ ཝིཡཱཏི ཨདྷིཔྤཱཡོ.

༤༨. ཨེཝཾ ཙཱིཝརེ ཨདྷིཊྛཱནཝིཀཔྤནཱནཡཾ དསྶེཏྭཱ ཨིདཱནི པཏྟེ ཨདྷིཊྛཱནཝིཀཔྤནཱནཡཾ དསྶེནྟོ ‘‘པཏྟེ པནཱ’’ཏིཨཱདིམཱཧ. ཏཏྠ པཏཏི པིཎྜཔཱཏོ ཨེཏྠཱཏི པཏྟོ, ཛིནསཱསནབྷཱཝོ བྷིཀྑཱབྷཱཛནཝིསེསོ. ཝུཏྟཉྷི ‘‘པཏྟཾ པཀྑེ དལེ པཏྟོ, བྷཱཛནེ སོ གཏེ ཏིསཱུ’’ཏི, ཏསྨིཾ པཏྟེ. པནཱཏི པཀྑནྟརཏྠེ ནིཔཱཏོ. ནཡོཏི ཨདྷིཊྛཱནཝིཀཔྤནཱནཡོ. ཙཱིཝརེ ཝུཏྟཨདྷིཊྛཱནཝིཀཔྤནཱནཡཏོ ཨཉྙབྷཱུཏོ ཨཡཾ ཝཀྑམཱནོ པཏྟེ ཨདྷིཊྛཱནཝིཀཔྤནཱནཡོ ཝེདིཏབྦོཏི ཡོཛནཱ. པཏྟཾ ཨདྷིཊྛཧནྟེན པམཱཎཡུཏྟོཝ ཨདྷིཊྛཱཏབྦོ, ན ཨཔྤམཱཎཡུཏྟོཏི སམྦནྡྷོ. ཏེན པམཱཎཏོ ཨཱུནཱདྷིཀེ པཏྟེ ཨདྷིཊྛཱནཾ ན རུཧཏི, ཏསྨཱ ཏཱདིསཾ པཏྟཾ བྷཱཛནཔརིབྷོགེན པརིབྷུཉྫིཏབྦནྟི དསྶེཏི. ཝཀྑཏི ཧི ‘‘ཨེཏེ བྷཱཛནཔརིབྷོགེན པརིབྷུཉྫིཏབྦཱ, ན ཨདྷིཊྛཱནཱུཔགཱ ན ཝིཀཔྤནཱུཔགཱ’’ཏི.

དྭེ མགདྷནཱལི༹ཡོཏི ཨེཏྠ མགདྷནཱལི༹ ནཱམ ཡཱ མཱགདྷིཀཱཡ ཏུལཱཡ ཨཌྜྷཏེརསཔལཔརིམིཏཾ ཨུདཀཾ གཎྷཱཏི. སཱིཧལ༹དཱིཔེ པཀཏིནཱལི༹ཏོ ཁུདྡཀཱ ཧོཏི, དམིལ༹ནཱལི༹ཏོ པན ¶ མཧནྟཱ. ཝུཏྟཉྷེཏཾ སམནྟཔཱསཱདིཀཱཡཾ (པཱརཱ. ཨཊྛ. ༢.༦༠༢) ‘‘མགདྷནཱལི༹ ནཱམ ཨཌྜྷཏེརསཔལཱ ཧོཏཱིཏི ཨནྡྷཀཊྛཀཐཱཡཾ ཝུཏྟཾ. སཱིཧལ༹དཱིཔེ པཀཏིནཱལི༹ མཧནྟཱ, དམིལ༹ནཱལི༹ ཁུདྡཀཱ, མགདྷནཱལི༹པམཱཎཡུཏྟཱ, ཏཱཡ མགདྷནཱལི༹ཡཱ དིཡཌྜྷནཱལི༹ ཨེཀཱ སཱིཧལ༹ནཱལི༹ ཧོཏཱིཏི མཧཱཨཊྛཀཐཱཡཾ ཝུཏྟ’’ནྟི. ཨཐ ཝཱ མགདྷནཱལི༹ ནཱམ ཡཱ པཉྩ ཀུཌུཝཱནི ཨེཀཉྩ མུཊྛིཾ ཨེཀཱཡ ཙ མུཊྛིཡཱ ཏཏིཡབྷཱགཾ གཎྷཱཏི. ཝུཏྟཉྷེཏཾ སཱརཏྠདཱིཔནིཡཾ (སཱརཏྠ. ཊཱི. ༢.༥༩༨-༦༠༢) ‘‘མགདྷནཱལི༹ ནཱམ ཚཔསཏཱ ནཱལཱི༹ཏི ཀེཙི. ‘ཨཊྛཔསཏཱ’ཏི ཨཔརེ. ཏཏྠ པུརིམཱནཾ མཏེན ཏིཔསཏཱཡ ནཱལི༹ཡཱ དྭེ ནཱལི༹ཡོ ཨེཀཱ མགདྷནཱལི༹ ཧོཏི. པཙྪིམཱནཾ ཙཏུཔསཏཱཡ ནཱལི༹ཡཱ དྭེ ནཱལི༹ཡོ ཨེཀཱ མགདྷནཱལི༹. ཨཱཙརིཡདྷམྨཔཱལཏྠེརེན པན པཀཏིཡཱ ཙཏུམུཊྛིཀཾ ཀུཌུཝཾ, ཙཏུཀུཌུཝཾ ནཱལི༹ཀཾ, ཏཱཡ ནཱལི༹ཡཱ སོལ༹ས ནཱལི༹ཡོ དོཎཾ, ཏཾ པན མགདྷནཱལི༹ཡཱ དྭཱདས ནཱལི༹ཡོ ཧོནྟཱིཏི ཝུཏྟཾ, ཏསྨཱ ཏེན ནཡེན མགདྷནཱལི༹ ནཱམ པཉྩ ཀུཌུཝཱནི ¶ ཨེཀཉྩ མུཊྛིཾ ཨེཀཱཡ མུཊྛིཡཱ ཏཏིཡབྷཱགཉྩ གཎྷཱཏཱིཏི ཝེདིཏབྦ’’ནྟི. ཏཏྠ ཀུཌུཝོཏི པསཏོ. ཝུཏྟཉྷི ཨབྷིདྷཱནཔྤདཱིཔིཀཱཡཾ –

‘‘ཀུཌུཝོ པསཏོ ཨེཀོ;

པཏྠོ ཏེ ཙཏུརོ སིཡུཾ;

ཨཱལ༹ྷཀོ ཙཏུརོ པཏྠཱ;

དོཎཾ ཝཱ ཙཏུརཱལ༹ྷཀ’’ནྟི.

ཨཐ ཝཱ མགདྷནཱལི༹ ནཱམ ཡཱ ཙཏུཀུཌུཝཱཡ ནཱལི༹ཡཱ ཙཏསྶོ ནཱལི༹ཡོ གཎྷཱཏི. ཝུཏྟཉྷེཏཾ ཝིམཏིཝིནོདནིཡཾ (ཝི. ཝི. ཊཱི. ༡.༦༠༢) ‘‘དམིལ༹ནཱལཱི༹ཏི པུརཱཎཀནཱལི༹ཾ སནྡྷཱཡ ཝུཏྟཾ. སཱ ཙ ཙཏུམུཊྛིཀེཧི ཀུཌུཝེཧི ཨཊྛཀུཌུཝཱ, ཏཱཡ ནཱལི༹ཡཱ དྭེ ནཱལི༹ཡོ མགདྷནཱལི༹ གཎྷཱཏི, པུརཱཎཱ པན སཱིཧལ༹ནཱལི༹ ཏིསྶོ ནཱལི༹ཡོ གཎྷཱཏཱིཏི ཝདནྟི, ཏེསཾ མཏེན མགདྷནཱལི༹ ¶ ཨིདཱནི ཝཏྟམཱནཱཡ ཙཏུཀུཌུཝཱཡ དམིལ༹ནཱལི༹ཡཱ ཙཏུནཱལི༹ཀཱ ཧོཏི, ཏཏོ མགདྷནཱལི༹ཏོ ཨུཔཌྜྷཉྩ པུརཱཎདམིལ༹ནཱལི༹སངྑཱཏཾ པཏྠཾ ནཱམ ཧོཏི, ཨེཏེན ཙ ཨོམཀོ ནཱམ པཏྟོ པཏྠོདནཾ གཎྷཱཏཱིཏི པཱལི༹ཝཙནཾ སམེཏི. ལོཀིཡེཧིཔི –

‘ལོཀིཡཾ མགདྷཉྩེཏི, པཏྠདྭཡམུདཱཧཊཾ;

ལོཀིཡཾ སོལ༹སཔལཾ, མཱགདྷཾ དིགུཎཾ མཏ’ནྟི. (ཝི. ཝི. ཊཱི. ༡.༦༠༢) –

ཨེཝཾ ལོཀེ ནཱལི༹ཡཱ མགདྷནཱལི༹ དིགུཎཱཏི དསྶིཏཱ. ཨེཝཉྩ གཡ྄ཧམཱནེ ཨོམཀཔཏྟསྶ ཙ ཡཱཔནམཏྟོདནགཱཧིཀཱ ཙ སིདྡྷཱ ཧོཏི. ན ཧི སཀྐཱ ཨཊྛཀུཌུཝཏོ ཨཱུནོདནགཱཧིནཱ པཏྟེན ཨཐཱུཔཱིཀཏཾ པིཎྜཔཱཏཾ པརིཡེསིཏྭཱ ཡཱཔེཏུཾ. ཏེནེཝ ཝུཏྟཾ ཝེརཉྫཀཎྜཊྛཀཐཱཡཾ ‘པཏྠོ ནཱམ ནཱལི༹མཏྟཾ ཧོཏི, ཨེཀསྶ པུརིསསྶ ཨལཾ ཡཱཔནཱཡཱ’ཏི’’. ཝུཏྟམྤི ཧེཏཾ ཛཱཏཀཊྛཀཐཱཡཾ (ཛཱ. ཨཊྛ. ༥.༢༡.༡༩༢) ‘‘པཏྠོདནོ ནཱལམཡཾ དུཝིནྣ’’ནྟི, ‘‘ཨེཀསྶ དིནྣཾ དྭིནྣཾ ཏིཎྞཾ པཧོཏཱི’’ཏི ཙ, ཏསྨཱ ཨིདྷ ཝུཏྟནཡཱནུསཱརེན གཧེཏབྦནྟི. ཨཱལོཔསྶ ཨཱལོཔསྶ ཨནུརཱུཔནྟི ཨོདནསྶ ཙཏུབྷཱགམཏྟཾ. ཝུཏྟཉྷེཏཾ མཛ྄ཛྷིམནིཀཱཡེ བྲཧྨཱཡུསུཏྟསཾཝཎྞནཱཡཾ (མ. ནི. ཨཊྛ. ༢.༣༨༧) ‘‘བྱཉྫནསྶ མཏྟཱ ནཱམ ཨོདནཙཏུཏྠབྷཱགོ’’ཏི. ཨོདནགཏིཀཱནཱིཏི ཨོདནསྶ གཏི ¶ གཏི ཡེསཾ ཏཱནི ཨོདནགཏིཀཱནི. གཏཱིཏི ཙ ཨོཀཱསོ ཨོདནསྶ ཨནྟོཔཝིསནསཱིལཏྟཱ ཨོདནསྶ ཨོཀཱསོཡེཝ ཏེསཾ ཨོཀཱསོ ཧོཏི, ན ཨཉྙཾ ཨཏྟནོ ཨོཀཱསཾ གཝེསནྟཱིཏི ཨཏྠོ. བྷཱཛནཔརིབྷོགེནཱཏི ཨུདཀཱཧརཎཱདིནཱ བྷཱཛནཔརིབྷོགེན.

ཨེཝཾ པམཱཎཏོ ཨདྷིཊྛཱནཱུཔགཝིཀཔྤནཱུཔགཔཏྟཾ དསྶེཏྭཱ ཨིདཱནི པཱཀཏོ མཱུལཏོ ཙ ཏཾ དསྶེཏུཾ ‘‘པམཱཎཡུཏྟཱནམྤཱི’’ཏིཨཱདིམཱཧ. ཏཏྠ ཨཡོཔཏྟོ པཉྩཧི པཱཀེཧི པཏྟོཏི ¶ ཀམྨཱརཔཀྐཾཡེཝ ཨནདྷིཊྛཧིཏྭཱ སམཎསཱརུཔྤནཱིལཝཎྞཀརཎཏྠཱཡ པུནཔྤུནཾ ནཱནཱསམྦྷཱརེཧི པཙིཏབྦོ, ཨཡོཔཏྟསྶ ཨཏིཀཀྑལ༹ཏྟཱ ཀམྨཱརཔཱཀེན སདྡྷིཾ པཉྩཝཱརཔཀྐོཡེཝ སམཎསཱརུཔྤནཱིལཝཎྞོ ཧོཏི. མཏྟིཀཱཔཏྟོ དྭཱིཧི པཱཀེཧི པཀྐོཏི ཨེཏྠཱཔི ཨེསེཝ ནཡོ. ཏསྶ པན མུདུཀཏྟཱ ཀུམྦྷཀཱརཀཔཱཀེན སདྡྷིཾ དྭིཝཱརཔཀྐོཔི སམཎསཱརུཔྤནཱིལཝཎྞོ ཧོཏི. ཨེཝཾ ཀཏོཡེཝ ཧི པཏྟོ ཨདྷིཊྛཱནཱུཔགོ ཝིཀཔྤནཱུཔགོ ཙ ཧོཏི, ནཱཀཏོ. ཏེན ཝཀྑཏི ‘‘པཱཀེ ཙ མཱུལེ ཙ སུནིཊྛིཏེཡེཝ ཨདྷིཊྛཱནཱུཔགོ ཧོཏི. ཡོ ཨདྷིཊྛཱནཱུཔགོ, སྭེཝ ཝིཀཔྤནཱུཔགོ’’ཏི (ཝི. སངྒ. ཨཊྛ. ༤༨). སོ ཧཏྠཾ ཨཱགཏོཔི ཨནཱགཏོཔི ཨདྷིཊྛཱཏབྦོ ཝིཀཔྤེཏབྦོཏི ཨེཏེན དཱུརེ ཋིཏམྤི ཨདྷིཊྛཱཏུཾ ཝིཀཔྤེཏུཉྩ ལབྷཏི, ཋཔིཏཊྛཱནསལླཀྑཎམེཝ པམཱཎནྟི དསྶེཏི. ཨིདཱནི ཏམེཝཏྠཾ ཝིཏྠཱརེཏུམཱཧ ‘‘ཡདི ཧཱི’’ཏིཨཱདི. ཧི-སདྡོ ཝིཏྠཱརཛོཏཀོ. ཏཏྠ པཙིཏྭཱ ཋཔེསྶཱམཱིཏི ཀཱལ༹ཝཎྞཔཱཀཾ སནྡྷཱཡ ཝུཏྟཾ.

ཨིདཱནི པཏྟཱདྷིཊྛཱནཾ དསྶེཏུམཱཧ ‘‘ཏཏྠ དྭེ པཏྟསྶ ཨདྷིཊྛཱནཱ’’ཏིཨཱདི. ཏཏྠ སཱམནྟཝིཧཱརེཏི ཨིདཾ ཨུཔལཀྑཎཝསེན ཝུཏྟཾ, ཏཏོ དཱུརེ ཋིཏམྤི ཨདྷིཊྛཱཏབྦམེཝ. ཋཔིཏཊྛཱནཾ སལླཀྑེཏྭཱཏི ཨིདམྤི ཨུཔཙཱརམཏྟཾ, པཏྟསལླཀྑཎམེཝེཏྠ པམཱཎཾ.

ཨིདཱནི ཨདྷིཊྛཱནཝིཛཧནཾ དསྶེཏུཾ ‘‘ཨེཝཾ ཨཔྤམཏྟསྶ’’ཏྱཱདིམཱཧ. ཏཏྠ པཏྟེ ཝཱ ཚིདྡཾ ཧོཏཱིཏི མུཁཝཊྚིཏོ ཧེཊྛཱ དྭངྒུལམཏྟོཀཱསཏོ པཊྛཱཡ ཡཏྠ ཀཏྠཙི ཚིདྡཾ ཧོཏི.

སཏྟནྣཾ ¶ དྷཉྙཱནནྟི –

‘‘སཱལི ཝཱིཧི ཙ ཀུདྲཱུསོ;

གོདྷཱུམོ ཝརཀོ ཡཝོ;

ཀངྒཱུཏི ¶ སཏྟ དྷཉྙཱནི;

ནཱིཝཱརཱདཱི ཏུ ཏབྦྷིདཱ’’ཏི. –

ཝུཏྟཱནཾ སཏྟཝིདྷཱནཾ དྷཉྙཱནཾ.

༤༩. ཨེཝཾ པཏྟཱདྷིཊྛཱནཾ དསྶེཏྭཱ ཨིདཱནི པཏྟཝིཀཔྤནཾ དསྶེཏུཾ ‘‘ཝིཀཔྤནེ པནཱ’’ཏིཨཱདིམཱཧ. ཏཾ ཙཱིཝརཝིཀཔྤནེ ཝུཏྟནཡེནེཝ ཝེདིཏབྦཾ.

༥༠. ཨེཝཾ ཝིཀཔྤནཱནཡཾ དསྶེཏྭཱ ཨིདཱནི པཏྟེ བྷིནྣེ ཀཏྟབྦཝིདྷིཾ དསྶེཏུམཱཧ ‘‘ཨེཝཾ ཨདྷིཊྛཧིཏྭཱ’’ཨིཙྩཱདི. ཏཏྠ ཨཔཏྟོཏི ཨིམིནཱ ཨདྷིཊྛཱནཝིཛཧནམྤི དསྶེཏི. པཉྩབནྡྷནེཔི པཏྟེ ཨཔརིཔུཎྞཔཱཀེ པཏྟེ ཝིཡ ཨདྷིཊྛཱནཾ ན རུཧཏི. ‘‘ཏིཔུཔཊྚེན ཝཱ’’ཏི ཝུཏྟཏྟཱ ཏམྦལོཧཱདིཀཔྤིཡལོཧེཧི ཨཡོཔཏྟསྶ ཚིདྡཾ ཚཱདེཏུཾ ཝཊྚཏི. ཏེནེཝ ‘‘ལོཧམཎྜལཀེནཱ’’ཏི ཝུཏྟཾ. སུདྡྷེཧི…པེ… ན ཝཊྚཏཱིཏི ཨིདཾ ཨུཎྷབྷོཛནེ པཀྑིཏྟེ ཝིལཱིཡམཱནཏྟཱ ཝུཏྟཾ. ཕཱཎིཏཾ ཛྷཱཔེཏྭཱ པཱསཱཎཙུཎྞེན བནྡྷིཏུཾ ཝཊྚཏཱིཏི པཱསཱཎཙུཎྞེན སདྡྷིཾ ཕཱཎིཏཾ པཙིཏྭཱ ཏཐཱཔཀྐེན པཱསཱཎཙུཎྞེན བནྡྷིཏུཾ ཝཊྚཏི. ཨཔརིབྷོགེནཱཏི ཨཡུཏྟཔརིབྷོགེན. ‘‘ཨནུཛཱནཱམི བྷིཀྑཝེ ཨཱདྷཱརཀ’’ནྟི ཝུཏྟཏྟཱ མཉྩཔཱིཋཱདཱིསུ ཡཏྠ ཀཏྠཙི ཨཱདྷཱརཀཾ ཋཔེཏྭཱ ཏཏྠ པཏྟཾ ཋཔེཏུཾ ཝཊྚཏི ཨཱདྷཱརཀཊྛཔནོཀཱསསྶ ཨནིཡམིཏཏྟཱཏི ཝདནྟི.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཨདྷིཊྛཱནཝིཀཔྤནཝིནིཙྪཡཀཐཱལངྐཱརོ ནཱམ

ཨཊྛམོ པརིཙྪེདོ.

༩. ཙཱིཝརཝིཔྤཝཱསཝིནིཙྪཡཀཐཱ

༥༡. ཨེཝཾ ¶ ཨདྷིཊྛཱནཝིཀཔྤནཝིནིཙྪཡཀཐཾ དསྶེཏྭཱ ཨིདཱནི ཙཱིཝརེན ཝིནཱཝཱསཝིནིཙྪཡཀརཎཾ དསྶེཏུཾ ‘‘ཙཱིཝརེནཝིནཱཝཱསོ’’ཏྱཱདིམཱཧ. ཏཏྠ ཙཱིཡཏཱིཏི ཙཱིཝརཾ, ཙཡཾ སཉྩཡཾ ¶ ཀརཱིཡཏཱིཏི ཨཏྠོ, ཨརིཡདྡྷཛོ ཝཏྠཝིསེསོ. ཨིདྷ པན ཏིཙཱིཝརཱདྷིཊྛཱནེན ཨདྷིཊྛཧིཏྭཱ དྷཱརིཏཾ ཙཱིཝརཏྟཡམེཝ. ཝིནཱཏི ཝཛྫནཏྠེ ནིཔཱཏོ. ཝསནཾ ཝཱསོ, ཝིནཱ ཝཱསོ ཝིནཱཝཱསོ, ཙཱིཝརེན ཝིནཱཝཱསོ ཙཱིཝརཝིནཱཝཱསོ, ‘‘ཙཱིཝརཝིཔྤཝཱསོ’’ཏི ཝཏྟབྦེ ཝཏྟིཙྪཱཝསེན, གཱཐཱཔཱདཔཱུརཎཏྠཱཡ ཝཱ ཨལུཏྟསམཱསཾ ཀཏྭཱ ཨེཝཾ ཝུཏྟནྟི དཊྛབྦཾ. ཏཐཱ ཙ ཝཀྑཏི ‘‘ཏིཙཱིཝརཱདྷིཊྛཱནེན…པེ… ཝིཔྤཝཱསོ’’ཏི, ‘‘ཨིམཾ སངྒྷཱཊིཾ ཨདྷིཊྛཱམི, ཨིམཾ ཨུཏྟརཱསངྒཾ ཨདྷིཊྛཱམི, ཨིམཾ ཨནྟརཝཱསཀཾ ཨདྷིཊྛཱམཱི’’ཏི ཨེཝཾ ནཱམེན ཨདྷིཊྛིཏཱནཾ ཏིཎྞཾ ཙཱིཝརཱནཾ ཨེཀེཀེན ཝིཔྤཝཱསོཏི ཨཏྠོ, ཨེཀེནཔི ཝིནཱ ཝསིཏུཾ ན ཝཊྚཏི, ཝསནྟསྶ བྷིཀྑུནོ སཧ ཨརུཎུགྒམནཱ ཙཱིཝརཾ ནིསྶགྒིཡཾ ཧོཏི, པཱཙིཏྟིཡཉྩ ཨཱཔཛྫཏཱིཏི སམྦནྡྷོ. ཝསིཏབྦནྟི ཨེཏྠ ཝསནཀིརིཡཱ ཙཏུཨིརིཡཱཔཐསཱདྷཱརཎཱ, ཏསྨཱ ཀཱཡལགྒཾ ཝཱ ཧོཏུ ཨལགྒཾ ཝཱ, ཨཌྜྷཏེཡྻརཏནསྶ པདེསསྶ ཨནྟོ ཀཏྭཱ ཏིཊྛནྟོཔི ཙརནྟོཔི ནིསིནྣོཔི ནིཔནྣོཔི ཧཏྠཔཱསེ ཀཏྭཱ ཝསནྟོ ནཱམ ཧོཏི.

ཨེཝཾ སཱམཉྙཏོ ཨཝིཔྤཝཱསལཀྑཎཾ དསྶེཏྭཱ ཨིདཱནི གཱམཱདིཔནྣརསོཀཱསཝསེན ཝིསེསཏོ དསྶེཏུམཱཧ ‘‘གཱམི’’ཙྩཱདི. ཏཏྠ གཱམནིཝེསནཱནི པཱཀཊཱནེཝ. ཨུདོསིཏོ ནཱམ ཡཱནཱདཱིནཾ བྷཎྜཱནཾ སཱལཱ. ཨཊྚོ ནཱམ པཊིརཱཛཱདིཔཊིབཱཧནཏྠཾ ཨིཊྛཀཱཧི ཀཏོ བཧལབྷིཏྟིཀོ ཙཏུཔཉྩབྷཱུམིཀོ པཏིསྶཡཝིསེསོ. མཱལོ༹ ནཱམ ཨེཀཀཱུཊསངྒཧིཏོ ཙཏུརསྶཔཱསཱདོ. པཱསཱདོ ནཱམ དཱིགྷཔཱསཱདོ. ཧམྨིཡཾ ནཱམ མུཎྜཙྪདནཔཱསཱདོ, མུཎྜཙྪདནཔཱསཱདོཏི ¶ ཙ ཙནྡིཀངྒཎཡུཏྟོ པཱསཱདོཏི ཝུཙྩཏི. སཏྠོ ནཱམ ཛངྒྷསཏྠོ ཝཱ སཀཊསཏྠོ ཝཱ. ཁེཏྟཾ ནཱམ པུབྦཎྞཱཔརཎྞཱནཾ ཝིརུཧནཊྛཱནཾ. དྷཉྙཀརཎཾ ནཱམ ཁལམཎྜལཾ. ཨཱརཱམོ ནཱམ པུཔྥཱརཱམོ ཕལཱརཱམོ. ཝིཧཱརཱདཡོ པཱཀཊཱ ཨེཝ. ཏཏྠ ནིཝེསནཱདཱིནི གཱམཏོ བཧི སནྣིཝིཊྛཱནི གཧིཏཱནཱིཏི ཝེདིཏབྦཾ. ཨནྟོགཱམེ ཋིཏཱནཉྷི གཱམགྒཧཎེན གཧིཏཏྟཱ གཱམཔརིཧཱརོཡེཝཱཏི. གཱམགྒཧཎེན ཙ ནིགམནགརཱནིཔི གཧིཏཱནེཝ ཧོནྟི.

པརིཁཱཡ ཝཱ པརིཀྑིཏྟོཏི ཨིམིནཱ སམནྟཱ ནདཱིཏལཱ༹ཀཱདིཨུདཀེན པརིཀྑིཏྟོཔི པརིཀྑིཏྟོཡེཝཱཏི དསྶེཏི. ཏཾ པམཱཎཾ ཨཏིཀྐམིཏྭཱཏི གྷརསྶ ཨུཔརི ཨཱཀཱསེ ཨཌྜྷཏེཡྻརཏནཔྤམཱཎཾ ཨཏིཀྐམིཏྭཱ. སབྷཱཡེ ཝཱ ཝཏྠབྦནྟི ཨིམིནཱ སབྷཱསདྡསྶ པརིཡཱཡོ སབྷཱཡསདྡོ ནཔུཾསཀལིངྒོ ཨཏྠཱིཏི དསྶེཏི. སབྷཱསདྡོ ཧི ཨིཏྠིལིངྒོ, སབྷཱཡསདྡོ ནཔུཾསཀལིངྒོཏི. དྭཱརམཱུལེ ཝཱཏི ནགརསྶ དྭཱརམཱུལེ ཝཱ. ཏེསནྟི སབྷཱཡནགརདྭཱརམཱུལཱནཾ. ཏསྶཱ ཝཱིཐིཡཱ ¶ སབྷཱཡདྭཱརཱནཾ གཧཎེནེཝ ཏཏྠ སབྦཱནིཔི གེཧཱནི, སཱ ཙ ཨནྟརཝཱིཐི གཧིཏཱཡེཝ ཧོཏི. ཨེཏྠ ཙ དྭཱརཝཱིཐིགྷརེསུ ཝསནྟེན གཱམཔྤཝེསནསཧསེཡྻཱདིདོསཾ པརིཧརིཏྭཱ སུཔྤཊིཙྪནྣཏཱདིཡུཏྟེནེཝ བྷཝིཏབྦཾ. སབྷཱ པན ཡདི སབྦེསཾ ཝསནཏྠཱཡ པཔཱསདིསཱ ཀཏཱ, ཨནྟརཱརཱམེ ཝིཡ ཡཐཱསུཁཾ ཝསིཏུཾ ཝཊྚཏཱིཏི ཝེདིཏབྦཾ. ཨཏིཧརིཏྭཱ གྷརེ ནིཀྑིཔཏཱིཏི ཝཱིཐིཾ མུཉྩིཏྭཱ ཋིཏེ ཨཉྙསྨིཾ གྷརེ ནིཀྑིཔཏི. ཏེནཱཧ ‘‘ཝཱིཐིཧཏྠཔཱསོ ན རཀྑཏཱི’’ཏི. པུརཏོ ཝཱ པཙྪཏོ ཝཱ ཧཏྠཔཱསེཏི གྷརསྶ ཧཏྠཔཱསཾ སནྡྷཱཡ ཝདཏི.

ཨེཝཾ གཱམཝསེན ཝིཔྤཝཱསཱཝིཔྤཝཱསཾ དསྶེཏྭཱ ཨིདཱནི ནིཝེསནཝསེན དསྶེནྟོ ‘‘སཙེ ཨེཀཀུལསྶ སནྟཀཾ ནིཝེསནཾ ཧོཏཱི’’ཏིཨཱདིམཱཧ. ཏཏྠ ཨོཝརཀོ ནཱམ གབྦྷསྶ ¶ ཨབྦྷནྟརེ ཨཉྙོ གབྦྷོཏི ཝདནྟི, གབྦྷསྶ ཝཱ པརིཡཱཡཝཙནམེཏཾ. ཨིདཱནི ཨུདོསིཏཱདིཝསེན དསྶེནྟོ ‘‘ཨུདོསིཏི’’ཙྩཱདིམཱཧ. ཏཏྠ ཝུཏྟནཡེནེཝཱཏི ‘‘ཨེཀཀུལསྶ སནྟཀོ ཨུདོསིཏོ ཧོཏི པརིཀྑིཏྟོ ཙཱ’’ཏིཨཱདིནཱ ནིཝེསནེ ཝུཏྟནཡེན. ཨེཝ-སདྡོ ཝིསེསནིཝཏྟི ཨཏྠོ. ཏེན ཝིསེསོ ནཏྠཱིཏི དསྶེཏི.

ཨིདཱནི ཡེསུ ཝིསེསོ ཨཏྠི, ཏེ དསྶེནྟོ ‘‘སཙེ ཨེཀཀུལསྶ ནཱཝཱ’’ཏིཨཱདིམཱཧ. ཏཏྠ པརིཡཱདིཡིཏྭཱཏི ཝིནིཝིཛ྄ཛྷིཏྭཱ, ཨཛ྄ཛྷོཏྠརིཏྭཱ ཝཱ. ཝུཏྟམེཝཏྠཾ ཝིབྷཱཝེཏི ‘‘ཨནྟོཔཝིཊྛེནཱ’’ཏིཨཱདིནཱ. ཏཏྠ ཨནྟོཔཝིཊྛེནཱཏི གཱམསྶ, ནདིཡཱ ཝཱ ཨནྟོཔཝིཊྛེན. ‘‘སཏྠེནཱ’’ཏི པཱཋསེསོ. ནདཱིཔརིཧཱརོ ལབྦྷཏཱིཏི ཨེཏྠ ‘‘ཝིསུཾ ནདཱིཔརིཧཱརསྶ ཨཝུཏྟཏྟཱ གཱམཱདཱིཧི ཨཉྙཏྠ ཝིཡ ཙཱིཝརཧཏྠཔཱསོཡེཝ ནདཱིཔརིཧཱརོ’’ཏི ཏཱིསུཔི གཎྛིཔདེསུ ཝུཏྟཾ. ཨཉྙེ པན ‘‘ཨིམིནཱ ཨཊྛཀཐཱཝཙནེན ནདཱིཔརིཧཱརོཔི ཝིསུཾ སིདྡྷོཏི ནདཱིཧཏྠཔཱསོ ན ཝིཛཧིཏབྦོ’’ཏི ཝདནྟི. ཡཐཱ པན ཨཛ྄ཛྷོཀཱསེ སཏྟབྦྷནྟརཝསེན ཨརཉྙཔརིཧཱརོ ལབྦྷཏི, ཨེཝཾ ནདིཡཾ ཨུདཀུཀྑེཔཝསེན ནདཱིཔརིཧཱརོ ལབྦྷཏཱིཏི ཀཏྭཱ ཨཊྛཀཐཱཡཾ ནདཱིཔརིཧཱརོ ཝིསུཾ ཨཝུཏྟོ སིཡཱ སཏྟབྦྷནྟརཨུདཀུཀྑེཔསཱིམཱནཾ ཨརཉྙནདཱིསུ ཨབདྡྷསཱིམཱཝསེན ལབྦྷམཱནཏྟཱ. ཨེཝཉྩ སཏི སམུདྡཛཱཏསྶརེསུཔི པརིཧཱརོ ཨཝུཏྟསིདྡྷོ ཧོཏི ནདིཡཱ སམཱནལཀྑཎཏྟཱ, ནདཱིཧཏྠཔཱསོ ན ཝིཛཧིཏབྦོཏི པན ཨཏྠེ སཏི ནདིཡཱ ཨཏིཝིཏྠཱརཏྟཱ བཧུསཱདྷཱརཎཏྟཱ ཙ ཨནྟོནདིཡཾ ཙཱིཝརཾ ཋཔེཏྭཱ ནདཱིཧཏྠཔཱསེ ཋིཏེན ཙཱིཝརསྶ པཝཏྟིཾ ཛཱནིཏུཾ ན སཀྐཱ བྷཝེཡྻ. ཨེས ནཡོ སམུདྡཛཱཏསྶརེསུཔི. ཨནྟོཨུདཀུཀྑེཔེ ཝཱ ཏསྶ ཧཏྠཔཱསེ ཝཱ ཋིཏེན པན སཀྐཱཏི ཨཡཾ ཨམྷཱཀཾ ཨཏྟནོམཏི, ཝིཙཱརེཏྭཱ གཧེཏབྦཾ. ཝིཧཱརསཱིམནྟི ཨཝིཔྤཝཱསསཱིམཾ ¶ སནྡྷཱཡཱཧ. ཨེཏྠ ཙ ¶ ཝིཧཱརསྶ ནཱནཱཀུལསནྟཀབྷཱཝེཔི ཨཝིཔྤཝཱསསཱིམཱཔརིཙྪེདབྦྷནྟརེ སབྦཏྠ ཙཱིཝརཨཝིཔྤཝཱསསམྦྷཝཏོ པདྷཱནཏྟཱ ཏཏྠ སཏྠཔརིཧཱརོ ན ལབྦྷཏཱིཏི ‘‘ཝིཧཱརཾ གནྟྭཱ ཝསིཏབྦ’’ནྟི ཝུཏྟཾ. སཏྠསམཱིཔེཏི ཨིདཾ ཡཐཱཝུཏྟཨབྦྷནྟརཔརིཙྪེདཝསེན ཝུཏྟཾ.

ཡསྨཱ ‘‘ནཱནཱཀུལསྶ པརིཀྑིཏྟེ ཁེཏྟེ ཙཱིཝརཾ ནིཀྑིཔིཏྭཱ ཁེཏྟདྭཱརམཱུལེ ཝཱ ཏསྶ ཧཏྠཔཱསེ ཝཱ ཝཏྠབྦ’’ནྟི ཝུཏྟཾ, ཏསྨཱ དྭཱརམཱུལཏོ ཨཉྙཏྠ ཁེཏྟེཔི ཝསནྟེན ཙཱིཝརཾ ནིཀྑིཔིཏྭཱ ཧཏྠཔཱསེ ཀཏྭཱཡེཝ ཝསིཏབྦཾ.

ཝིཧཱརོ ནཱམ སཔརིཀྑིཏྟོ ཝཱ ཨཔརིཀྑིཏྟོ ཝཱ སཀལོ ཨཱཝཱསོཏི ཝདནྟི. ཡསྨིཾ ཝིཧཱརེཏི ཨེཏྠ པན ཨེཀགེཧམེཝ ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ༡.༤༩༡-༤༩༤) པན ‘‘ཝིཧཱརོ ནཱམ ཨུཔཙཱརསཱིམཱ. ཡསྨིཾ ཝིཧཱརེཏི ཏསྶ ཨནྟོཔརིཝེཎཱདིཾ སནྡྷཱཡ ཝུཏྟ’’ནྟི ཝུཏྟཾ. ཨེཀཀུལཱདིསནྟཀཏཱ ཙེཏྠ ཀཱརཱཔཀཱནཾ ཝསེན ཝེདིཏབྦཱ.

ཡཾ མཛ྄ཛྷནྷིཀེ ཀཱལེ སམནྟཱ ཚཱཡཱ ཕརཏཱིཏི ཡདཱ མཧཱཝཱིཐིཡཾ ཨུཛུཀམེཝ གཙྪནྟཾ སཱུརིཡམཎྜལཾ མཛ྄ཛྷནྷིཀཾ པཱཔུཎཱཏི, ཏདཱ ཡཾ ཨོཀཱསཾ ཚཱཡཱ ཕརཏི, ཏཾ སནྡྷཱཡ ཝུཏྟཾ. ཝིམཏིཝིནོདནིཡཾ པན ‘‘ཚཱཡཱཡ ཕུཊྛོཀཱསསྶཱཏི ཨུཛུཀཾ ཨཝིཀྑིཏྟལེཌྜུཔཱཏབྦྷནྟརཾ སནྡྷཱཡ ཝདཏཱི’’ཏི ཝུཏྟཾ. ཨགམནཔཐེཏི ཏདཧེཝ གནྟྭཱ ནིཝཏྟེཏུཾ ཨསཀྐུཎེཡྻཀེ སམུདྡམཛ྄ཛྷེ ཡེ དཱིཔཀཱ, ཏེསཱུཏི ཡོཛནཱ. ཨིཏརསྨིནྟི པུརཏྠིམདིསཱཡ ཙཱིཝརེ.

༥༢. ནདིཾ ཨོཏརཏཱིཏི ཧཏྠཔཱསཾ མུཉྩིཏྭཱ ཨོཏརཏི. ནཱཔཛྫཏཱིཏི པརིབྷོགཔཙྩཡཱ དུཀྐཊཾ ནཱཔཛྫཏི. ཏེནཱཧ ‘‘སོ ཧཱི’’ཏིཨཱདི. ཨཔརིབྷོགཱརཧཏྟཱཏི ཨིམིནཱ ནིསྶགྒིཡཙཱིཝརཾ ཨནིསྶཛྫིཏྭཱ པརིབྷུཉྫནྟསྶ དུཀྐཊཾ ཨཙིཏྟཀནྟི སིདྡྷཾ. ཨེཀཾ ¶ པཱརུཔིཏྭཱ ཨེཀཾ ཨཾསཀཱུཊེ ཋཔེཏྭཱ གནྟབྦནྟི ཨིདཾ བཧཱུནཾ སཉྩརཎཊྛཱནེ ཨེཝཾ ཨཀཏྭཱ གམནཾ ན སཱརུཔྤནྟི ཀཏྭཱ ཝུཏྟཾ, ན ཨཱཔཏྟིཨངྒཏྟཱ. བཧིགཱམེ ཋཔེཏྭཱཔི ཨཔཱརུཔིཏབྦཏཱཡ ཝུཏྟཾ ‘‘ཝིནཡཀམྨཾ ཀཱཏབྦ’’ནྟི. ཨཐ ཝཱ ཝིཧཱརེ སབྷཱགཾ བྷིཀྑུཾ ན པསྶཏི, ཨེཝཾ སཏི ཨཱསནསཱལཾ གནྟྭཱ ཝིནཡཀམྨཾ ཀཱཏབྦནྟི ཡོཛནཱ. ཨཱསནསཱལཾ གཙྪནྟེན ཀིཾ ཏཱིཧི ཙཱིཝརེཧི གནྟབྦནྟི ཨཱཧ ‘‘སནྟརུཏྟརེནཱ’’ཏི ནཊྛཙཱིཝརསྶ སནྟརུཏྟརསཱདིཡནཏོ. སངྒྷཱཊི པན ཀིཾ ཀཱཏབྦཱཏི ཨཱཧ ‘‘སངྒྷཱཊིཾ ¶ བཧིགཱམེ ཋཔེཏྭཱ’’ཏི. ཨུཏྟརཱསངྒེ ཙ བཧིགཱམེ ཋཔིཏསངྒྷཱཊིཡཉྩ པཋམཾ ཝིནཡཀམྨཾ ཀཏྭཱ པཙྪཱ ཨུཏྟརཱསངྒཾ ནིཝཱསེཏྭཱ ཨནྟརཝཱསཀེ ཀཱཏབྦཾ. ཨེཏྠ ཙ བཧིགཱམེ ཋཔིཏསྶཔི ཝིནཡཀམྨཝཙནཏོ པརམྨུཁཱཔི ཋིཏཾ ནིསྶཛྫིཏུཾ, ནིསྶཊྛཾ དཱཏུཉྩ ཝཊྚཏཱིཏི ཝེདིཏབྦཾ.

དཧརཱནཾ གམནེ སཨུསྶཱཧཏྟཱ ‘‘ནིསྶཡོ པན ན པཊིཔྤསྶམྦྷཏཱི’’ཏི ཝུཏྟཾ. མུཧུཏྟཾ…པེ… པཊིཔྤསྶམྦྷཏཱིཏི སཨུསྶཱཧཏྟེ གམནསྶ ཨུཔཙྪིནྣཏྟཱ ཝུཏྟཾ, ཏེསཾ པན པུརཱརུཎཱ ཨུཊྛཧིཏྭཱ སཨུསྶཱཧེན གཙྪནྟཱནཾ ཨརུཎེ ཨནྟརཱ ཨུཊྛིཏེཔི ན པཊིཔྤསྶམྦྷཏི ‘‘ཡཱཝ ཨརུཎུགྒམནཱ སཡནྟཱི’’ཏི ཝུཏྟཏྟཱ. ཏེནེཝ ‘‘གཱམཾ པཝིསིཏྭཱ…པེ… ན པཊིཔྤསྶམྦྷཏཱི’’ཏི ཝུཏྟཾ. ཨཉྙམཉྙསྶ ཝཙནཾ ཨགྒཧེཏྭཱཏིཨཱདིམྷི སཨུསྶཱཧཏྟཱ གམནཀྑཎེ པཊིཔྤསྶདྡྷི ན ཝུཏྟཱ. དྷེནུབྷཡེནཱཏི ཏརུཎཝཙྪགཱཝཱིནཾ ཨཱདྷཱཝིཏྭཱ སིངྒེན པཧརཎབྷཡེན. ནིསྶཡོ ཙ པཊིཔྤསྶམྦྷཏཱིཏི ཨེཏྠ དྷེནུབྷཡཱདཱིཧི ཋིཏཱནཾ ཡཱཝ བྷཡཝཱུཔསམཱ ཋཱཏབྦཏོ ‘‘ཨནྟོཨརུཎེཡེཝ གམིསྶཱམཱི’’ཏི ནིཡམེཏུཾ ཨསཀྐུཎེཡྻཏྟཱ ཝུཏྟཾ. ཡཏྠ པན ཨེཝཾ ནིཡམེཏུཾ སཀྐཱ, ཏཏྠ ཨནྟརཱ ཨརུཎེ ཨུགྒཏེཔི ནིསྶཡོ ན པཊིཔྤསྶམྦྷཏི བྷེསཛྫཏྠཱཡ གཱམཾ པཝིཊྛདཧརཱནཾ ཝིཡ.

ཨནྟོསཱིམཱཡཾ ¶ གཱམནྟི ཨཝིཔྤཝཱསསཱིམཱསམྨུཏིཏོ པཙྪཱ པཏིཊྛཱཔིཏགཱམཾ སནྡྷཱཡ ཝདཏི གཱམཉྩ གཱམཱུཔཙཱརཉྩ ཋཔེཏྭཱ སམྨནྣིཏབྦཏོ. པཝིཊྛཱནནྟི ཨཱཙརིཡནྟེཝཱསིཀཱནཾ ཝིསུཾ ཝིསུཾ གཏཱནཾ ཨཝིཔྤཝཱསསཱིམཏྟཱ ནེཝ ཙཱིཝརཱནི ནིསྶགྒིཡཱནི ཧོནྟི, སཨུསྶཱཧཏཱཡ ན ནིསྶཡོ པཊིཔྤསྶམྦྷཏི. ཨནྟརཱམགྒེཏི དྷམྨཾ སུཏྭཱ ཨཱགཙྪནྟཱནཾ ཨནྟརཱམགྒེ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཙཱིཝརཝིཔྤཝཱསཝིནིཙྪཡཀཐཱལངྐཱརོ ནཱམ

ནཝམོ པརིཙྪེདོ.

༡༠. བྷཎྜཔཊིསཱམནཝིནིཙྪཡཀཐཱ

༥༣. ཨེཝཾ ཙཱིཝརཝིཔྤཝཱསཝིནིཙྪཡཾ ཀཐེཏྭཱ ཨིདཱནི བྷཎྜཔཊིསཱམནཝིནིཙྪཡཾ ཀཐེཏུཾ ‘‘བྷཎྜསྶ ¶ པཊིསཱམན’’ནྟིཨཱདིམཱཧ. ཏཏྠ བྷཌིཏབྦཾ བྷཱཛེཏབྦནྟི བྷཎྜཾ, བྷཌིཏབྦཾ ཨིཙྪིཏབྦནྟི ཝཱ བྷཎྜཾ, བྷཎྜནྟི པརིབྷཎྜནྟི སཏྟཱ ཨེཏེནཱཏི ཝཱ བྷཎྜཾ, མཱུལདྷནཾ, པརིཀྑཱརོ ཝཱ. ཝུཏྟཉྷི ཨབྷིདྷཱནཔྤདཱིཔིཀཱཡཾ –

‘‘བྷཱཛནཱདིཔརིཀྑཱརེ, བྷཎྜཾ མཱུལདྷནེཔི ཙཱ’’ཏི.

ཏསྶ བྷཎྜསྶ, པཊིསཱམིཡཏེ པཊིསཱམནཾ, རཀྑཎཾ གོཔནནྟི ཨཏྠོ. ཏེནཱཧ ‘‘པརེསཾ བྷཎྜསྶ གོཔན’’ནྟི. མཱཏུ ཀཎྞཔིལ༹ནྡྷནཾ ཏཱལཔཎྞམྤཱིཏི པི-སདྡོ སམྦྷཱཝནཏྠོ. ཏེན པགེཝ ཨཉྙཱཏཀཱནཾ སནྟཀནྟི དསྶེཏི. གིཧིསནྟཀནྟི ཨིམིནཱ པཉྩནྣཾ སཧདྷམྨིཀཱནཾ སནྟཀཾ པཊིསཱམེཏུཾ ཝཊྚཏཱིཏི དཱིཔེཏི. བྷཎྜཱགཱརིཀསཱིསེནཱཏི ཨེཏེན ཝིསྶཱསགྒཱཧཱདིནཱ གཧེཏྭཱ པཊིསཱམེནྟསྶ ཨནཱཔཏྟཱིཏི དསྶེཏི. ཏེན ཝཀྑཏི ‘‘ཨཏྟནོ ཨཏྠཱཡ གཧེཏྭཱ པཊིསཱམེཏབྦ’’ནྟི. ཚནྡེནཔི བྷཡེནཔཱིཏི ཝཌྜྷཀཱིཨཱདཱིསུ ཚནྡེན ¶ , རཱཛཝལླབྷཱདཱིསུ བྷཡེན བལཀྐཱརེན པཱཏེཏྭཱ གཏེསུ ཙ པཊིསཱམེཏུཾ ཝཊྚཏཱིཏི ཡོཛེཏབྦཾ.

སངྒོཔནཏྠཱཡ ཨཏྟནོ ཧཏྠེ ནིཀྑིཏྟསྶ བྷཎྜསྶ གུཏྟཊྛཱནེ པཊིསཱམནཔཡོགཾ ཝིནཱ ‘‘ནཱཧཾ གཎྷཱམཱི’’ཏིཨཱདིནཱ ཨཉྙསྨིཾ པཡོགེ ཨཀཏེ རཛྫསངྑོབྷཱདིཀཱལེ ‘‘ན དཱནི ཏསྶ དསྶཱམི, ན མཡ྄ཧཾ དཱནི དསྶཏཱི’’ཏི ཨུབྷོཧིཔི སཀསཀཊྛཱནེ ནིསཱིདིཏྭཱ དྷུརནིཀྑེཔེ ཀཏེཔི ཨཝཧཱརོ ནཏྠི. ཀེཙི པནེཏྠ ‘‘པཱརཱཛིཀམེཝ པཊིསཱམནཔཡོགསྶ ཀཏཏྟཱ’’ཏི ཝདནྟི, ཏཾ ཏེསཾ མཏིམཏྟཾ, ན སཱརཏོ པཙྩེཏབྦཾ. པཊིསཱམནཀཱལེ ཧིསྶ ཐེཡྻཙིཏྟཾ ནཏྠི, ‘‘ན དཱནི ཏསྶ དསྶཱམཱི’’ཏི ཐེཡྻཙིཏྟུཔྤཏྟིཀྑཎེ ཙ སཱམིནོ དྷུརནིཀྑེཔཙིཏྟཔྤཝཏྟིཡཱ ཧེཏུབྷཱུཏོ ཀཱཡཝཙཱིཔཡོགོ ནཏྠི, ཡེན སོ ཨཱཔཏྟིཾ ཨཱཔཛྫེཡྻ. ན ཧི ཨཀིརིཡསམུཊྛཱནཱ ཨཡཾ ཨཱཔཏྟཱིཏི. དཱནེ སཨུསྶཱཧོ, རཀྑཏི ཏཱཝཱཏི ཨཝཧཱརཾ སནྡྷཱཡ ཨཝུཏྟཏྟཱ ‘‘ནཱཧཾ གཎྷཱམཱི’’ཏིཨཱདིནཱ མུསཱཝཱདཀརཎེ པཱཙིཏྟིཡམེཝ ཧོཏི, ན དུཀྐཊཾ ཐེཡྻཙིཏྟཱབྷཱཝེན སཧཔཡོགསྶཔི ཨབྷཱཝཏོཏི གཧེཏབྦཾ.

ཡདིཔི མུཁེན དསྶཱམཱིཏི ཝདཏི…པེ… པཱརཱཛིཀནྟི ཨེཏྠ ཀཏརཔཡོགེན ཨཱཔཏྟི, ན ཏཱཝ པཋམེན བྷཎྜཔཊིསཱམནཔཡོགེན ཏདཱ ཐེཡྻཙིཏྟབྷཱཝཱ, ནཱཔི ‘‘དསྶཱམཱི’’ཏི ཀཐནཔཡོགེན ཏདཱ ཐེཡྻཙིཏྟེ ཝིཛྫམཱནེཔི པཡོགསྶ ཀཔྤིཡཏྟཱཏི? ཝུཙྩཏེ – སཱམིནཱ ‘‘དེཧཱི’’ཏི བཧུསོ ཡཱཙིཡམཱནོཔི ¶ ཨདཏྭཱ ཡེན པཡོགེན ཨཏྟནོ ཨདཱཏུཀཱམཏཾ སཱམིཀསྶ ཉཱཔེསི, ཡེན ཙ སོ ཨདཱཏུཀཱམོ ཨཡཾ ཝིཀྑིཔཏཱིཏི ཉཏྭཱ དྷུརཾ ནིཀྑིཔཏི, ཏེནེཝ པཡོགེནསྶ ཨཱཔཏྟི. ན ཧེཏྠ ཨུཔནིཀྑིཏྟབྷཎྜེ པརིཡཱཡེན མུཏྟི ཨཏྠི. ཨདཱཏུཀཱམཏཱཡ ཧི ‘‘ཀདཱ ཏེ དིནྣཾ, ཀཏྠ ཏེ ¶ དིནྣ’’ནྟིཨཱདིཔརིཡཱཡཝཙནེནཔི སཱམིཀསྶ དྷུརེནིཀྑིཔཱཔིཏེ ཨཱཔཏྟིཡེཝ. ཏེནེཝ ཨཊྛཀཐཱཡཾ ཝུཏྟཾ ‘‘ཀིཾ ཏུམྷེ བྷཎཐ…པེ… ཨུབྷིནྣཾ དྷུརནིཀྑེཔེན བྷིཀྑུནོ པཱརཱཛིཀ’’ནྟི. པརསནྟཀསྶ པརེཧི གཎྷཱཔནེ ཨེཝ ཧི པརིཡཱཡཏོ མུཏྟི, ན སབྦཏྠཱཏི གཧེཏབྦཾ. ཨཏྟནོ ཧཏྠེ ནིཀྑིཏྟཏྟཱཏི ཨེཏྠ ཨཏྟནོ ཧཏྠེ སཱམིནཱ དིནྣཏཱཡ བྷཎྜཱགཱརིཀཊྛཱནེ ཋིཏཏྟཱ ཙ ཋཱནཱཙཱཝནེཔི ནཏྠི ཨཝཧཱརོ, ཐེཡྻཙིཏྟེན པན གཧཎེ དུཀྐཊཏོ ན མུཙྩཏཱིཏི ཝེདིཏབྦཾ. ཨེསེཝ ནཡོཏི ཨཝཧཱརོ ནཏྠི, བྷཎྜདེཡྻཾ པན ཧོཏཱིཏི ཨདྷིཔྤཱཡོ.

༥༤. པཉྩནྣཾ སཧདྷམྨིཀཱནནྟི བྷིཀྑུབྷིཀྑུནཱིསིཀྑམཱནསཱམཎེརསཱམཎེརཱིནཾ. ཨེཏེན ན ཀེཝལཾ གིཧཱིནཾ ཨེཝ, ཨཐ ཁོ ཏཱཔསཔརིབྦཱཛཀཱདཱིནམྤི སནྟཀཾ པཊིསཱམེཏུཾ ན ཝཊྚཏཱིཏི དསྶེཏི. ནཊྛེཔི གཱིཝཱ ན ཧོཏི, ཀསྨཱ? ཨསམྤཊིཙྪཱཔིཏཏྟཱཏི ཨཏྠོ. དུཏིཡེ ཨེསེཝ ནཡོཏི གཱིཝཱ ན ཧོཏི, ཀསྨཱ? ཨཛཱནིཏཏྟཱ. ཏཏིཡེ ཙ ཨེསེཝ ནཡོཏི གཱིཝཱ ན ཧོཏི, ཀསྨཱ? པཊིཀྑིཔིཏཏྟཱ. ཨེཏྠ ཙ ཀཱཡེན ཝཱ ཝཱཙཱཡ ཝཱ ཙིཏྟེན ཝཱ པཊིཀྑིཏྟོཔི པཊིཀྑིཏྟོཡེཝ ནཱམ ཧོཏི.

ཏསྶེཝ གཱིཝཱ ཧོཏི, ན སེསབྷིཀྑཱུནཾ, ཀསྨཱ? ཏསྶེཝ བྷཎྜཱགཱརིཀསྶ བྷཎྜཱགཱརེ ཨིསྶརབྷཱཝཏོ. བྷཎྜཱགཱརིཀསྶ གཱིཝཱ ན ཧོཏི ཨལསཛཱཏིཀསྶེཝ པམཱདེན ཧརིཏཏྟཱ. དུཏིཡེ བྷཎྜཱགཱརིཀསྶ གཱིཝཱ ན ཧོཏི ཏསྶ ཨནཱརོཙིཏཏྟཱ. ནཊྛེ ཏསྶ གཱིཝཱ ཏེན ཋཔིཏཏྟཱ. ཏསྶེཝ གཱིཝཱ, ན ཨཉྙེསཾ ཏེན བྷཎྜཱགཱརིཀེན སམྤཊིཙྪིཏཏྟཱ ཋཔིཏཏྟཱ ཙ. ནཏྠི གཱིཝཱ ཏེན པཊིཀྑིཔིཏཏྟཱ. ནཊྛཾ སུནཊྛམེཝ བྷཎྜཱགཱརིཀསྶ ཨསམྤཊིཙྪཱཔནཏོ. ནཊྛེ གཱིཝཱ ཏེན ཋཔིཏཏྟཱ. སབྦཾ ཏསྶ གཱིཝཱ ཏསྶ བྷཎྜཱགཱརིཀསྶ པམཱདེན ཧརཎཏོ. ཏཏྠེཝ ཨུཔཙཱརེ ཝིཛྫམཱནེཏི བྷཎྜཱགཱརིཀསྶ སམཱིཔེཡེཝ ཨུཙྩཱརཔསྶཱཝཊྛཱནེ ཝིཛྫམཱནེ.

༥༥. མཡི ¶ ཙ མཏེ སངྒྷསྶ ཙ སེནཱསནེ ཝིནཊྛེཏི ཨེཏྠ ཀེཝལཾ སངྒྷསྶ སེནཱསནཾ མཱ ཝིནསྶཱིཏི ཨིམིནཱ ཨདྷིཔྤཱཡེན ཝིཝརིཏུམྤི ཝཊྚཏིཡེཝཱཏི ཝདནྟི. ‘‘ཏཾ མཱརེསྶཱམཱི’’ཏི ཨེཏྟཀེ ཝུཏྟེཔི ཝིཝརིཏུཾ ཝཊྚཏི ‘‘གིལཱནཔཀྑེ ཋིཏཏྟཱ ཨཝིསཡོ’’ཏི ཝུཏྟཏྟཱ. མརཎཏོ ཧི པརཾ ¶ གེལཉྙཾ ཨཝིསཡཏྟཉྩ ནཏྠི. ‘‘དྭཱརཾ ཚིནྡིཏྭཱ ཧརིསྶཱམཱ’’ཏི ཨེཏྟཀེ ཝུཏྟེཔི ཝིཝརིཏུཾ ཝཊྚཏིཡེཝ. སཧཱཡེཧི བྷཝིཏབྦནྟི ཏེཧིཔི བྷིཀྑཱཙཱརཱདཱིཧི པརིཡེསིཏྭཱ ཨཏྟནོ སནྟཀམྤི ཀིཉྩི ཀིཉྩི དཱཏབྦནྟི ཝུཏྟཾ ཧོཏི. ཨཡཉྷི སཱམཱིཙཱིཏི བྷཎྜཱགཱརེ ཝསནྟཱནཾ ཨིདཾ ཝཏྟཾ. ལོལམཧཱཐེརོཏི མནྡོ མོམཱུཧོ ཨཱཀིཎྞཝིཧཱརཱི སདཱ ཀཱིལཱ༹པསུཏོ ཝཱ མཧཱཐེརོ.

༥༦. ཨིཏརེཧཱིཏི ཏསྨིཾཡེཝ གབྦྷེ ཝསནྟེཧི བྷིཀྑཱུཧི. ཝིཧཱརརཀྑཎཝཱརེ ནིཡུཏྟོ ཝིཧཱརཝཱརིཀོ, ཝུཌྜྷཔཊིཔཱཊིཡཱ ཨཏྟནོ ཝཱརེ ཝིཧཱརརཀྑཎཀོ. ནིཝཱཔནྟི བྷཏྟཝེཏནཾ. ཙོརཱནཾ པཊིཔཐཾ གཏེསཱུཏི ཙོརཱནཾ ཨཱགམནཾ ཉཏྭཱ ‘‘པཋམཏརཾཡེཝ གནྟྭཱ སདྡཾ ཀརིསྶཱམཱ’’ཏི ཙོརཱནཾ ཨབྷིམུཁཾ གཏེསུ. ‘‘ཙོརེཧི ཧཊབྷཎྜཾ ཨཱཧརིསྶཱམཱ’’ཏི ཏེསཾ ཨནུཔཐཾ གཏེསུཔི ཨེསེཝ ནཡོ. ནིབདྡྷཾ ཀཏྭཱཏི ‘‘ཨསུཀཀུལེ ཡཱགུབྷཏྟཾ ཝིཧཱརཝཱརིཀཱནཾཡེཝཱ’’ཏི ཨེཝཾ ནིཡམནཾ ཀཏྭཱ. དྭེ ཏིསྶོ ཡཱགུསལཱཀཱ ཙ ཙཏྟཱརི པཉྩ སལཱཀབྷཏྟཱནི ཙ ལབྷམཱནོཝཱཏི ཨིདཾ ནིདསྶནམཏྟཾ, ཏཏོ ཨཱུནཾ ཝཱ ཧོཏུ ཨདྷིཀཾ ཝཱ, ཨཏྟནོ ཙ ཝེཡྻཱཝཙྩཀརསྶ ཙ ཡཱཔནམཏྟཾ ལབྷནམེཝ པམཱཎནྟི གཧེཏབྦཾ. ནིསྶིཏཀེ ཛགྒཱཔེནྟཱིཏི ཨཏྟནོ ཨཏྟནོ ནིསྶིཏཀེ བྷིཀྑཱཙརིཡཱཡ པོསེནྟཱ ནིསྶིཏཀེཧི ཝིཧཱརཾ ཛགྒཱཔེནྟི. ཨསཧཱཡསྶཱཏི སཧཱཡརཧིཏསྶ. ‘‘ཨསཧཱཡསྶ ཨདུཏིཡསྶཱ’’ཏི པཱཋོ ཡུཏྟོ. པཙྪིམཾ པུརིམསྶེཝ ཝེཝཙནཾ. ཨསཧཱཡསྶ ཝཱ ཨཏྟདུཏིཡསྶ ཝཱཏི ¶ ཨིམསྨིཾ པན པཱཋེ ཨེཀེན ཨཱནཱིཏཾ དྭིནྣཾ ནཔྤཧོཏཱིཏི ཨཏྟདུཏིཡསྶཔི ཝཱརོ ནིཝཱརིཏོཏི ཝདནྟི, ཏཾ ‘‘ཡསྶ སབྷཱགོ བྷིཀྑུ བྷཏྟཾ ཨཱནེཏྭཱ དཱཏཱ ནཏྠཱི’’ཏི ཨིམིནཱ ན སམེཏི, ཝཱིམཾསིཏབྦཾ. ཝིམཏིཝིནོདནིཡཾ (ཝི. ཝི. ཊཱི. ༡.༡༡༢) པན ‘‘ཨཏྟདུཏིཡསྶཱཏི ཨཔྤིཙྪསྶ. ཨཏྟཱསརཱིརམེཝ དུཏིཡོ, ན ཨཉྙོཏི ཧི ཨཏྟདུཏིཡོ, ཏདུབྷཡསྶཔི ཨཏྠསྶ ཝིབྷཱཝནཾ ‘ཡསྶཱ’ཏིཨཱདི. ཨེཏེན སབྦེན ཨེཀེཀསྶ ཝཱརོ ན པཱཔེཏབྦོཏི དསྶེཏཱི’’ཏི ཝུཏྟཾ.

པཱཀཝཏྟཏྠཱཡཱཏི ནིཙྩཾ པཙིཏབྦཡཱགུབྷཏྟསངྑཱཏཝཏྟཏྠཱཡ. ཋཔེནྟཱིཏི དཱཡཀཱ ཋཔེནྟི. ཏཾ གཧེཏྭཱཏི ཏཾ ཨཱརཱམིཀཱདཱིཧི དཱིཡམཱནཾ བྷཱགཾ གཧེཏྭཱ. ཨུཔཛཱིཝནྟེན ཋཱཏབྦནྟི ཨབྦྷོཀཱསིཀརུཀྑམཱུལིཀེནཔི པཱཀཝཏྟཾ ཨུཔནིསྶཱཡ ཛཱིཝནྟེན ཨཏྟནོ པཏྟཙཱིཝརརཀྑཎཏྠཱཡ ཝིཧཱརཝཱརེ སམྤཏྟེ ཋཱཏབྦཾ. ན གཱཧཱཔེཏབྦོཏི ཨེཏྠ ཡསྶ ཨབྦྷོཀཱསིཀསྶཔི ཨཏྟནོ ཨདྷིཀཔརིཀྑཱརོ ཙེ ཋཔིཏོ ཨཏྠི, ཙཱིཝརཱདིསངྒྷིཀབྷཱགེཔི ཨཱལཡོ ཨཏྠི, སོཔི གཱཧཱཔེཏབྦོ ¶ . པརིཔུཙྪནྟི པུཙྪིཏཔཉྷཝིསྶཛྫནཾ, ཨཊྛཀཐཾ ཝཱ. དིགུཎནྟི ཨཉྙེཧི ལབྦྷམཱནཏོ དྭིགུཎཾ. པཀྑཝཱརེནཱཏི ཨཌྜྷམཱསཝཱརེན.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

བྷཎྜཔཊིསཱམནཝིནིཙྪཡཀཐཱལངྐཱརོ ནཱམ

དསམོ པརིཙྪེདོ.

༡༡. ཀཡཝིཀྐཡསམཱཔཏྟིཝིནིཙྪཡཀཐཱ

༥༧. ཨེཝཾ བྷཎྜཔཊིསཱམནཝིནིཙྪཡཾ ཀཐེཏྭཱ ཨིདཱནི ཀཡཝིཀྐཡཝིནིཙྪཡཾ ཀཐེནྟོ ‘‘ཀཡཝིཀྐཡསམཱཔཏྟཱི’’ཏིཨཱདིམཱཧ. ཏཏྠ ཀཡནཾ ཀཡོ, པརབྷཎྜསྶ གཧཎཾ, ཝིཀྐཡནཾ ¶ ཝིཀྐཡོ, སཀབྷཎྜསྶ དཱནཾ, ཀཡོ ཙ ཝིཀྐཡོ ཙ ཀཡཝིཀྐཡཾ. སམཱཔཛྫནཾ སམཱཔཏྟི, ཏསྶ དུཝིདྷསྶ ཀིརིཡསྶ ཀརཎཾ. ཏསྶརཱུཔཾ དསྶེཏི ‘‘ཨིམིནཱ’’ཏིཨཱདིནཱ.

སེསཉཱཏཀེསུ སདྡྷཱདེཡྻཝིནིཔཱཏསམྦྷཝཏོ ཏདབྷཱཝཊྛཱནམྤི དསྶེཏུཾ ‘‘མཱཏརཾ ཝཱ པན པིཏརཾ ཝཱ’’ཏིཨཱདི ཝུཏྟཾ. ཏེན ཝིཉྙཏྟིསདྡྷཱདེཡྻཝིནིཔཱཏནཉྩ ན ཧོཏི ‘‘ཨིམིནཱ ཨིདཾ དེཧཱི’’ཏི ཝདནྟོཏི དསྶེཏི, ཀཡཝིཀྐཡཾ པན ཨཱཔཛྫཏི ‘‘ཨིམིནཱ ཨིདཾ དེཧཱི’’ཏི ཝདནྟོཏི དསྶེཏི. ཨིམིནཱ ཙ ཨུཔརི ཨཉྙཱཏཀནྟྱཱདིནཱ ཙ སེསཉཱཏཀཾ ‘‘ཨིམཾ དེཧཱི’’ཏི ཝདཏོ ཝིཉྙཏྟི ན ཧོཏི, ‘‘ཨིམཾ གཎྷཱཧཱི’’ཏི པན དདཏོ སདྡྷཱདེཡྻཝིནིཔཱཏནཾ, ‘‘ཨིམིནཱ ཨིམཾ དེཧཱི’’ཏི ཀཡཝིཀྐཡཾ ཨཱཔཛྫཏོ ནིསྶགྒིཡནྟི ཨཡམྤི ཨཏྠོ དསྶིཏོ ཧོཏི མིགཔདཝལཉྫནནྱཱཡེན. ཏསྨཱཨིཙྩཱདིཀེཔི ‘‘མཱཏཱཔིཏཱུཧི སདྡྷིཾ ཀཡཝིཀྐཡཾ, སེསཉཱཏཀེཧི སདྡྷིཾ དྭེ ཨཱཔཏྟིཡོ, ཨཉྙཱཏཀེཧི སདྡྷིཾ ཏིསྶོ ཨཱཔཏྟིཡོ’’ཏི ཝཏྟབྦེ ཏེནེཝ ནྱཱཡེན ཉཱཏུཾ སཀྐཱཏི ཀཏྭཱ ན ཝུཏྟནྟི དཊྛབྦཾ, ཨཉྙཐཱ ཨབྱཱཔིཏདོསོ སིཡཱ.

‘‘ཨིདཾ བྷཏྟཾ བྷུཉྫིཏྭཱ ཨིདཾ ཀརོཐཱ’’ཏི ཝུཏྟེ པུབྦཱཔརསམྦནྡྷཱཡ ཀིརིཡཱཡ ཝུཏྟཏྟཱ ‘‘ཨིམིནཱ ཨིདཾ དེཧཱི’’ཏི ཝུཏྟསདིསཾ ཧོཏི. ཨིདཾ བྷཏྟཾ བྷུཉྫ, ཨིདཾ ནཱམ ཀརོཧཱི’’ཏི ཝཱ, ‘‘ཨིདཾ ¶ བྷཏྟཾ བྷུཏྟོསི, ཨིདཾ ནཱམ ཀརོཧི, ཨིདཾ བྷཏྟཾ བྷུཉྫིསྶསི, ཨིདཾ ནཱམ ཀརོཧཱི’’ཏི པན ཝུཏྟེ ཨསམྦནྡྷཱཡ ཀིརིཡཱཡ ཝུཏྟཏྟཱ ཀཡཝིཀྐཡོ ན ཧོཏི. ཝིགྷཱསཱདཱནཾ བྷཏྟདཱནེ ཙ ཨནཔེཀྑཏྟཱ སདྡྷཱདེཡྻཝིནིཔཱཏནཾ ན ཧོཏི, ཀཱརཱཔནེ ཧཏྠཀམྨམཏྟཏྟཱ ཝིཉྙཏྟི ན ཧོཏི, ཏསྨཱ ཝཊྚཏི. ‘‘ཨེཏྠ ཙཱ’’ཏིཨཱདིནཱ ཨསཏིཔི ནིསྶགྒིཡཝཏྠུམྷི པཱཙིཏྟིཡཾ དེསེཏབྦནྟི དསྶེཏི.

ཨགྒྷཾ པུཙྪིཏུཾ ཝཊྚཏི, ཨེཏྟཱཝཏཱ ཀཡཝིཀྐཡོ ན ཧོཏཱིཏི ཨཏྠོ. གཎྷིཏུཾ ཝཊྚཏཱིཏི ‘‘ཨིམིནཱ ཨིདཾ དེཧཱི’’ཏི ཨཝུཏྟཏྟཱ ¶ ཀཡཝིཀྐཡོ ན ཧོཏི, མཱུལསྶ ཨཏྠིཏཱཡ ཝིཉྙཏྟིཔི ན ཧོཏི. པཏྟོ ན གཧེཏབྦོ པརབྷཎྜསྶ མཧགྒྷཏཱཡ. ཨེཝཾ སཏི ཀཐཾ ཀཱཏབྦོཏི ཨཱཧ ‘‘མམ ཝཏྠུ ཨཔྤགྒྷནྟི ཨཱཙིཀྑིཏབྦ’’ནྟི. བྷཎྜཾ ཨགྒྷཱཔེཏྭཱ ཀཱརེཏབྦཏཾ ཨཱཔཛྫཏི ཐེཡྻཱཝཧཱརསམྦྷཝཏོ, ཨཱུནམཱསཀཾ ཙེ ཨགྒྷཏི, དུཀྐཊཾ. མཱསཀཏོ པཊྛཱཡ ཡཱཝ ཨཱུནཔཉྩམཱསཀཾ ཙེ ཨགྒྷཏི, ཐུལླཙྩཡཾ. པཉྩམཱསཀཾ ཙེ ཨགྒྷཏི, པཱརཱཛིཀནྟི ཝུཏྟཾ ཧོཏི. དེཏི, ཝཊྚཏི པུཉྙཏྠཱཡ དིནྣཏྟཱ ཨདྷིཀསྶ. ཀཔྤིཡཀཱརཀསྶ པན…པེ… ཝཊྚཏི ཨུབྷཏོ ཀཔྤིཡབྷཎྜཏྟཱ. ཨེཀཏོ ཨུབྷཏོ ཝཱ ཙེ ཨཀཔྤིཡབྷཎྜཾ ཧོཏི, ན ཝཊྚཏི. ‘‘མཱ གཎྷཱཧཱི’’ཏི ཝཏྟབྦོ, ཀསྨཱ? ཀཔྤིཡཀཱརཀསྶ ཨཚེཀཏྟཱ.

ཨཉྙེན ཨཔྤཊིགྒཧིཏེན ཨཏྠོ, ཀསྨཱ? སཏྟཱཧཀཱལིཀཏྟཱ ཏེལསྶ. པཊིགྒཧིཏཏེལཾ སཏྟཱཧཔརམཾ ཨེཝ ཋཔེཏབྦཾ, ཏསྨཱ ཏཏོ པརཾ ཋཔིཏུཀཱམསྶ ཨཔྤཊིགྒཧིཏཏེལེན ཨཏྠོ ཧོཏི. ཨཔྤཊིགྒཧིཏཾ དཱུསེཡྻ, ཨནིཡམིཏཀཱལཾ ཨཔྤཊིགྒཧིཏཏེལཾ ནཱལི༹ཡཾ ཨཝསིཊྛཔཊིགྒཧིཏཏེལཾ ཨཏྟནོ ཀཱལཾ ཝཏྟཱཔེཡྻ.

༥༨. ཨིདཾ པཏྟཙཏུཀྐཾ ཝེདིཏབྦནྟི ཨཀཔྤིཡཔཏྟཙཏུཀྐཾ ཝུཏྟཾ, པཉྩམོ པན ཀཔྤིཡོ. ཏེན ཝཀྑཏི ‘‘ཨཡཾ པཏྟོ སབྦཀཔྤིཡོ བུདྡྷཱནམྤི པརིབྷོགཱརཧོ’’ཏི. ཨཡཾ པཏྟོ མཧཱཨཀཔྤིཡོ ནཱམ, ཀསྨཱ? རཱུཔིཡཾ ཨུགྒཎྷིཏྭཱ ཨཡབཱིཛཾ སམུཊྛཱཔེཏྭཱ ཏེན ལོཧེན པཏྟསྶ ཀཱརིཏཏྟཱ, ཨེཝཾ བཱིཛཏོ པཊྛཱཡ དཱུསིཏཏྟཱ. ཡཐཱ ཙ ཏཏིཡཔཱརཱཛིཀཝིསཡེ ཐཱཝརཔཡོགེསུ པཱསསཱུལཱདཱིསུ མཱུལཏོ པཊྛཱཡ ཀཱརིཏེསུ ཀིསྨིཉྩི དཎྜམཏྟེ ཝཱ ཝཱཀམཏྟེ ཝཱ ཨཝསིཊྛེ སཏི ན མུཙྩཏི, སབྦསྨིཾ ནཊྛེཡེཝ མུཙྩཏི, ཨེཝམིདྷཱཔི བཱིཛཏོ ¶ པཊྛཱཡ ཀཏཏྟཱ ཏསྨིཾ པཏྟེ ཀིསྨིཉྩི པཏྟེ ཨཝསིཊྛེཔི ཀཔྤིཡོ བྷཝིཏུཾ ན སཀྐཱ. ཏཐཱ ཙ ཝཀྑཏི ‘‘སཙེཔི ཏཾ ཝིནཱསེཏྭཱ ¶ ཐཱལཀཾ ཀཱརེཏི, ཏམྤི ཨཀཔྤིཡ’’ནྟྱཱདི. ཨེཝཾ སནྟེཔི དུཏིཡཔཏྟེ ཝིཡ མཱུལེ ཙ མཱུལསྶཱམིཀཱནཾ, པཏྟེ ཙ པཏྟསྶཱམིཀཱནཾ དིནྣེ ཀཔྤིཡོ ཀཱཏུཾ སཀྐཱ བྷཝེཡྻ ནུ ཁོཏི ཨཱསངྐཱཡམཱཧ ‘‘ན སཀྐཱ ཀེནཙི ཨུཔཱཡེན ཀཔྤིཡོ ཀཱཏུ’’ནྟི. ཏསྶཏྠོ – དུཏིཡཔཏྟཾ རཱུཔིཡཾ པཊིགྒཎྷིཏྭཱ གིཧཱིཧི པརིནིཊྛཱཔིཏམེཝ ཀིཎཱཏི, ན བཱིཛཏོ པཊྛཱཡ དཱུསེཏི, ཏསྨཱ དུཏིཡཔཏྟོ ཀཔྤིཡོ ཀཱཏུཾ སཀྐཱ, ཨིདྷ པན བཱིཛཏོ པཊྛཱཡ དཱུསིཏཏྟཱ ཏེན བྷིཀྑུནཱ ཏཾ པཏྟཾ པུན ཨཡཔཱསཱཎབཱིཛཾ ཀཱཏུཾ ཨསཀྐུཎེཡྻཏྟཱ, པཊིགྒཧིཏརཱུཔིཡསྶ ཙ ཝལ༹ཉྫིཏཏྟཱ པུན སཱམིཀཱནཾ དཱཏུཾ ཨསཀྐུཎེཡྻཏྟཱ ན སཀྐཱ ཀེནཙི ཨུཔཱཡེན ཀཔྤིཡོ ཀཱཏུནྟི.

ཨིདཱནི ཏཾ ཨསཀྐུཎེཡྻཏྟཾ ཨཉྙེན པཀཱརེན ཝིཏྠཱརེཏུཾ ‘‘སཙེཔཱི’’ཏིཨཱདིམཱཧ. ཨིམིནཱ ཀིཉྩིཔི ཨཡཝཏྠུམྷི ཨཝསིཊྛེ སཏི ཨཀཔྤིཡོཝ ཧོཏཱིཏི དསྶེཏི. ཏེན ཝུཏྟཾ ཝིམཏིཝིནོདནིཡཾ (ཝི. ཝི. ཊཱི. ༡.༥༩༡) ‘‘རཱུཔིཡཾ ཨུགྒཎྷིཏྭཱཏི ཨིདཾ ཨུཀྐཊྛཝསེན ཝུཏྟཾ, མུཏྟཱདིདུཀྐཊཝཏྠུམྤི ཨུགྒཎྷིཏྭཱ ཀཱརིཏམྤི པཉྩནྣཾ ན ཝཊྚཏི ཨེཝ. སམུཊྛཱཔེཏཱིཏི སཡཾ གནྟྭཱ ཝཱ ‘ཨིམཾ ཀཧཱཔཎཱདིཾ ཀམྨཀཱརཱནཾ དཏྭཱ བཱིཛཾ སམུཊྛཱཔེཧཱི’ཏི ཨཉྙཾ ཨཱཎཱཔེཏྭཱ ཝཱ སམུཊྛཱཔེཏི. མཧཱཨཀཔྤིཡོཏི ཨཏྟནཱཝ བཱིཛཏོ པཊྛཱཡ དཱུསིཏཏྟཱ ཨཉྙསྶ མཱུལསྶཱམིཀསྶ ཨབྷཱཝཏོ ཝུཏྟཾ. སོ ཧི ཙོརེཧི ཨཙྪིནྣོཔི པུན ལདྡྷོ ཛཱནནྟསྶ ཀསྶཙཱིཔི ན ཝཊྚཏི. ཡདི ཧི ཝཊྚེཡྻ, ཏལཱ༹ཀཱདཱིསུ ཝིཡ ‘ཨཙྪིནྣོ ཝཊྚཏཱི’ཏི ཨཱཙརིཡཱ ཝདེཡྻུཾ. ན སཀྐཱ ཀེནཙི ཨུཔཱཡེནཱཏི སངྒྷསྶ ཝིསྶཛྫནེན ཙོརཱདིཨཙྪིནྡནེནཔི ཀཔྤིཡོ ཀཱཏུཾ ན སཀྐཱ, ཨིདཉྩ ཏེན རཱུཔེན ¶ ཋིཏཾ ཏམྨཱུལཀེན ཝཏྠམུཏྟཱདིརཱུཔེན ཋིཏཉྩ སནྡྷཱཡ ཝུཏྟཾ. དུཀྐཊཝཏྠུམྤི ཧི ཏམྨཱུལཀཀཔྤིཡཝཏྠུ ཙ ན སཀྐཱ ཀེནཙི ཏེན རཱུཔེན ཀཔྤིཡཾ ཀཱཏུཾ. ཡདི པན སོ བྷིཀྑུ ཏེན ཀཔྤིཡཝཏྠུནཱ, དུཀྐཊཝཏྠུནཱ ཝཱ པུན རཱུཔིཡཾ ཙེཏཱཔེཡྻ, ཏཾ རཱུཔིཡཾ ནིསྶཛྫཱཔེཏྭཱ ཨཉྙེསཾ ཀཔྤིཡཾ ཀཱཏུམྤི སཀྐཱ བྷཝེཡྻཱཏི དཊྛབྦ’’ནྟི. ཡཾ པན སཱརཏྠདཱིཔནིཡཾ པཔཉྩིཏཾ, ཡཉྩ ཏམེཝ གཧེཏྭཱ པོརཱཎཊཱིཀཱཡཾ པཔཉྩིཏཾ, ཏཾ ཝིཏྠཱརེཏྭཱ ཝུཙྩམཱནཾ ཨཏིཝིཏྠཱརིཏཉྩ བྷཝིསྶཏི, སོཏཱུནཉྩ དུབྦིཉྙེཡྻཾ, ཏསྨཱ ཨེཏྟཀམེཝ ཝདིམྷ, ཨཏྠིཀེཧི པན ཏེསུ ཏེསུ པཀརཎེསུ ཨོལོཀེཏྭཱ གཧེཏབྦནྟི.

དུཏིཡཔཏྟེ པཉྩནྣམྤི སཧདྷམྨིཀཱནཾ ན ཀཔྤཏཱིཏི རཱུཔིཡསྶ པཊིགྒཧིཏཏྟཱ, ཀཡཝིཀྐཡསྶ ཙ ཀཏཏྟཱ. སཀྐཱ པན ཀཔྤིཡོ ཀཱཏུནྟི གིཧཱིཧི པརིནིཊྛཱཔིཏཔཏྟསྶེཝ ཀིཎིཏཏྟཱ ¶ , བཱིཛཏོ པཊྛཱཡ ཨདཱུསིཏཏྟཱ, མཱུལམཱུལསྶཱམིཀཱནཉྩ པཏྟཔཏྟསྶཱམིཀཱནཉྩ ཝིཛྫམཱནཏྟཱ. ཡཐཱ པན སཀྐཱ ཧོཏི, ཏཾ དསྶེཏུཾ ‘‘མཱུལེ’’ཏིཨཱདིམཱཧ.

ཏཏིཡཔཏྟེ སདིསོཡེཝཱཏི ‘‘པཉྩནྣམྤི སཧདྷམྨིཀཱནཾ ན ཝཊྚཏི, སཀྐཱ པན ཀཔྤིཡོ ཀཱཏུ’’ནྟི ཨིམཾ ནཡཾ ནིདྡིསཏི. ནནུ ཏཏིཡཔཏྟོ ཀཔྤིཡཝོཧཱརེན གཧིཏོ, ཨཐ ཀསྨཱ ཨཀཔྤིཡོཏི ཙོདནཾ སནྡྷཱཡཱཧ ‘‘ཀཔྤིཡཝོཧཱརེན གཧིཏོཔི དུཏིཡཔཏྟསདིསོཡེཝ, མཱུལསྶ སམྤཊིཙྪིཏཏྟཱ ཨཀཔྤིཡོ’’ཏི. དུཏིཡཙོདནཾ པན སཡམེཝ ཝདཏི. ཨེཏྠ ཙ ‘‘དུཏིཡཔཏྟསདིསོཡེཝཱ’’ཏི ཝུཏྟཏྟཱ མཱུལེ ཙ མཱུལསྶཱམིཀཱནཾ, པཏྟེ ཙ པཏྟསྶཱམིཀཱནཾ དིནྣེ ཀཔྤིཡོ ཧོཏི, ཀཔྤིཡབྷཎྜཾ དཏྭཱ གཧེཏྭཱ པརིབྷུཉྫིཏུཾ ཝཊྚཏཱིཏི དཊྛབྦོ. མཱུལསྶ ཨནིསྶཊྛཏྟཱཏི ཡེན ཨུགྒཧིཏམཱུལེན པཏྟོ ཀཱིཏོ, ཏསྶ མཱུལསྶ སངྒྷམཛ྄ཛྷེ ཨནིསྶཊྛཏྟཱ. ཨེཏེན རཱུཔིཡམེཝ ནིསྶཛྫིཏབྦཾ, ན ཏམྨཱུལཀཾ ཨརཱུཔིཡནྟི ¶ དསྶེཏི. ཡདི ཧི ཏེན སམྤཊིཙྪིཏམཱུལཾ སངྒྷམཛ྄ཛྷེ ནིསྶཊྛཾ སིཡཱ, ཏེན ཀཔྤིཡེན ཀམྨེན ཨཱརཱམིཀཱདཱིཧི གཧེཏྭཱ དིནྣཔཏྟོ རཱུཔིཡཔཊིགྒཱཧཀཾ ཋཔེཏྭཱ སེསཱནཾ ཝཊྚེཡྻ.

ཙཏུཏྠཔཏྟེ དུབྦིཙཱརིཏཏྟཱཏི ‘‘ཨིམེ ཀཧཱཔཎེ དཏྭཱ ཨིདཾ དེཧཱི’’ཏི གཧིཏཏྟཱ གིཧིསནྟཀཱནཾ ཀཧཱཔཎཱནཾ དུཊྛུཝིཙཱརིཏཏྟཱ ཨེཏསྶ ཝིཙཱརཎཀསྶ བྷིཀྑུནོ ཨེཝ ན ཝཊྚཏཱིཏི ཨཏྠོ. མཱུལསྶ ཨསམྤཊིཙྪིཏཏྟཱཏི ཨེཏེན མཱུལསྶ གིཧིསནྟཀཏྟཾ དསྶེཏི, ཏེནེཝ པཏྟསྶ རཱུཔིཡསཾཝོཧཱརེན ཨནུཔྤནྣཏཉྩ དསྶེཏི, ཏེན ཙ ཏསྶ པཏྟསྶ ནིསྶཛྫིཡཱབྷཱཝཾ, བྷིཀྑུསྶ ཙ པཱཙིཏྟིཡཱབྷཱཝཾ དཱིཔེཏི, ཏེན ཙ དུབྦིཙཱརིཏམཏྟེན དུཀྐཊམཏྟབྷཱཝཾ པཀཱསེཏི. ནིསྶཛྫཱིཏི ཨིདཉྩ དཱནཝསེན ཝུཏྟཾ, ན ཝིནཡཀམྨཝསེན. ཏེནེཝ ཙ ‘‘སཔྤིསྶ པཱུརཱཔེཏྭཱ’’ཏི ཝུཏྟཾ.

པཉྩམཔཏྟེ སབྦཀཔྤིཡོཏི ཨཏྟནོ ཙ པཉྩནྣཾ སཧདྷམྨིཀཱནཉྩ བུདྡྷཔཙྩེཀབུདྡྷཱནཉྩ ཀཔྤིཡོ. ཏེནཱཧ ‘‘བུདྡྷཱནམྤི པརིབྷོགཱརཧོ’’ཏི.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཀཡཝིཀྐཡསམཱཔཏྟིཝིནིཙྪཡཀཐཱལངྐཱརོ ནཱམ

ཨེཀཱདསམོ པརིཙྪེདོ.

༡༢. རཱུཔིཡཱདིཔཊིགྒཧཎཝིནིཙྪཡཀཐཱ

༥༩. ཨེཝཾ ¶ ཀཡཝིཀྐཡསམཱཔཏྟིཝིནིཙྪཡཾ ཀཐེཏྭཱ ཨིདཱནི རཱུཔིཡཱདིཔཊིགྒཧཎཝིནིཙྪཡཾ ཀཐེནྟོ ‘‘རཱུཔིཡཱདིཔཊིགྒཧོ’’ཏིཨཱདིམཱཧ. ཏཏྠ སཉྙཱཎཏྠཱཡ ཀཏཾ རཱུཔཾ ཨེཏྠ ཨཏྠཱིཏི ¶ རཱུཔིཡཾ, ཡཾ ཀིཉྩི ཝོཧཱརཱུཔགཾ དྷནཾ. ཏེན ཝུཏྟཾ སམནྟཔཱསཱདིཀཱཡཾ (པཱརཱ. ཨཊྛ. ༢.༥༨༣-༥༨༤) ‘‘ཨིདྷ པན ཡཾ ཀིཉྩི ཝོཧཱརགམནཱིཡཾ ཀཧཱཔཎཱདི ཨདྷིཔྤེཏ’’ནྟི. པཋམཾ ཨཱདཱིཡཏཱིཏིཨཱདི, ཀིཾ ཏཾ? རཱུཔིཡཾ, རཱུཔིཡཾ ཨཱདི ཡེསཾ ཏེཏི རཱུཔིཡཱདཡོ, དཱསིདཱསཁེཏྟཝཏྠུཨཱདཡོ, པཊིགྒཧཎཾ པཊིགྒཧོ, སམྤཊིཙྪནནྟི ཨཏྠོ. རཱུཔིཡཱདཱིནཾ པཊིགྒཧོ རཱུཔིཡཱདིཔཊིགྒཧོ. ཛཱཏསམཡེ ཨུཔྤནྣཾ རཱུཔམེཝ རཱུཔཾ ཨསྶ བྷཝཏི, ན ཝིཀཱརམཱཔཛྫཏཱིཏི ཛཱཏརཱུཔཾ, སུཝཎྞཾ. དྷཝལསབྷཱཝཏཱཡ སཏྟེཧི རཉྫིཡཏེཏི རཛཏཾ, སཛ྄ཛྷུ. ཛཱཏརཱུཔེན ཀཏོ མཱསཀོ ཛཱཏརཱུཔམཱསཀོ. རཛཏེན ཀཏོ མཱསཀོ རཛཏམཱསཀོཏི ཨིདཾ ཙཏུབྦིདྷམེཝ ནིསྶགྒིཡཝཏྠུ ཧོཏི, ན ལོཧམཱསཀཱདཡོཏི ཨཱཧ ‘‘ཏམྦལོཧཱདཱིཧི…པེ… སངྒཧིཏོ’’ཏི. ཏམྦལོཧཱདཱིཧཱིཏི ཨཱདི-སདྡེན ཀཾསལོཧཝཊྚལོཧཏིཔུསཱིསཱདཱིཧི ཀཏོཔི ལོཧམཱསཀོཡེཝཱཏི དསྶེཏི. ཀིཾ ཨིདམེཝ ནིསྶགྒིཡཝཏྠུ ཧོཏི, ཨུདཱཧུ མུཏྟཱདཡོཔཱིཏི ཨཱཧ ‘‘མུཏྟཱ…པེ… དུཀྐཊཝཏྠཱུ’’ཏི. ཨིམེསཾ དྭིནྣཾ ཝཏྠཱུནཾ ཀོ ཝིསེསོཏི ཨཱཧ ‘‘ཏཏྠ ནིསྶགྒིཡཝཏྠུཾ…པེ… དུཀྐཊམེཝཱ’’ཏི. ཏཏྠ ནིསྶགྒིཡཝཏྠུ ཨཏྟནོ ཨཏྠཱཡ ནིསྶགྒིཡཾ པཱཙིཏྟིཡཾ, སེསཱནཾ ཨཏྠཱཡ དུཀྐཊཾ, དུཀྐཊཝཏྠུ སབྦེསཾ ཨཏྠཱཡ དུཀྐཊམེཝཱཏི ཡོཛནཱ.

ཨིདཱནི ཏེསུ ཝཏྠཱུསུ ཀཔྤིཡཱཀཔྤིཡཝིནིཙྪཡཾ ཝིཏྠཱརཏོ དསྶེཏུཾ ཨཱཧ ‘‘ཏཏྲཱཡཾ ཝིནིཙྪཡོ’’ཏི. ཏཏྠ སམྤཊིཙྪིཏུཾ ན ཝཊྚཏི, ཀསྨཱ? ‘‘ཨིདཾ སངྒྷསྶ དམྨཱི’’ཏི ཨཀཔྤིཡཝོཧཱརེན དིནྣཏྟཱ. དཏྭཱ པཀྐམཏི, ཝཊྚཏི, ཀསྨཱ? སངྒྷསྶ ཧཏྠེ ཨདཏྭཱ ཝཌྜྷཀཱིཨཱདཱིནཾ ཧཏྠེ དིནྣཏྟཱ. ཨེཝམྤི ཝཊྚཏི གིཧཱིནཾ ཧཏྠེ ཋཔིཏཏྟཱ. པཊིཀྑིཔིཏུཾ ན ཝཊྚཏི སངྒྷགཎཔུགྒལཱནཾ ཨནཱམསིཏཏྟཱ. ‘‘ན ཝཊྚཏཱི’’ཏི པཊིཀྑིཔིཏབྦཾ ‘‘ཏུམྷེ གཧེཏྭཱ ¶ ཋཔེཐཱ’’ཏི ཝུཏྟཏྟཱ. པཊིགྒཧཎེཔི པརིབྷོགེཔི ཨཱཔཏྟཱིཏི ‘‘སངྒྷསྶ དམྨཱི’’ཏི ཝུཏྟཏྟཱ པཊིགྒཧཎེ པཱཙིཏྟིཡཾ, པརིབྷོགེ དུཀྐཊཾ. སྭེཝ སཱཔཏྟིཀོཏི དུཀྐཊཱཔཏྟིཾ སནྡྷཱཡ ཝདཏི. ཝདཏི, ཝཊྚཏི ‘‘ཏུམྷེ པཙྩཡེ པརིབྷུཉྫཐཱ’’ཏི ཀཔྤིཡཝོཧཱརེན ཝུཏྟཏྟཱ. ཙཱིཝརཏྠཱཡ དིནྣཾ ཙཱིཝརེཡེཝ ཨུཔནེཏབྦཾ, ཀསྨཱ? ཡཐཱ དཱཡཀཱ ཝདནྟི, ཏཐཱ པཊིཔཛྫིཏབྦཏྟཱ. སེནཱསནཔཙྩཡསྶ ཨིཏརཔཙྩཡཏྟཡཏོ ཝིསེསཾ ¶ དསྶེནྟོ ‘‘སེནཱསནཏྠཱཡཱ’’ཏིཨཱདིམཱཧ. ཨིམིནཱ ཨཝིསྶཛྫིཡཨཝེབྷངྒིཡབྷཱཝཾ དསྶེཏི. ཨེཝཾ སནྟེཔི ཨཱཔདཱསུ ཀཏྟབྦཝིདྷིཾ དསྶེནྟོ ‘‘སཙེ པནཱ’’ཏིཨཱདིམཱཧ.

༦༠. ཨེཝཾ ནིསྶགྒིཡཝཏྠཱུསུ ཀཏྟབྦཝིདྷིཾ དསྶེཏྭཱ ཨིདཱནི དུཀྐཊཝཏྠཱུསུ ཀཏྟབྦཝིདྷིཾ དསྶེནྟོ ‘‘སཙེ ཀོཙི མཡ྄ཧ’’ནྟྱཱདིམཱཧ. ཨེཏྠ པན པཊིགྒཧཎེཔི པརིབྷོགེཔི ཨཱཔཏྟཱིཏི དུཀྐཊམེཝ སནྡྷཱཡ ཝུཏྟཾ. ཏལཱ༹ཀསྶཔི ཁེཏྟསངྒཧིཏཏྟཱ ཏསྶ པཊིགྒཧཎེཔི ཨཱཔཏྟི ཝུཏྟཱ. ‘‘ཙཏྟཱརོ པཙྩཡེ པརིབྷུཉྫཐཱཏི དེཏཱིཏི ཨེཏྠ ‘བྷིཀྑུསངྒྷསྶ ཙཏྟཱརོ པཙྩཡེ པརིབྷུཉྫིཏུཾ ཏལཱ༹ཀཾ དམྨཱི’ཏི ཝཱ ‘ཙཏུཔཙྩཡཔརིབྷོགཏྠཾ ཏལཱ༹ཀཾ དམྨཱི’ཏི ཝཱ ཝདཏི, ཝཊྚཏིཡེཝ. ‘ཨིཏོ ཏལཱ༹ཀཏོ ཨུཔྤནྣེ པཙྩཡེ དམྨཱི’ཏི ཝུཏྟེ པན ཝཏྟབྦམེཝ ནཏྠཱི’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༥༣༧-༥༣༩) ཝུཏྟཾ. ཝིམཏིཝིནོདནིཡམྤི (ཝི. ཝི. ཊཱི. ༡.༥༣༨-༥༣༩) ཏཐེཝ ཝཏྭཱ ‘‘ཨིདཉྩ སངྒྷསྶ དཱིཡམཱནཉྙེཝ སནྡྷཱཡ ཝུཏྟཾ, པུགྒལསྶ པན ཨེཝམྤི དིནྣཾ ཏལཱ༹ཀཁེཏྟཱདི ན ཝཊྚཏི. སུདྡྷཙིཏྟསྶ པན ཨུདཀཔརིབྷོགཏྠཾ ཀཱུཔཔོཀྑརཎིཨཱདཡོ ཝཊྚནྟི. ‘སངྒྷསྶ ཏལཱ༹ཀཾ ཨཏྠི, ཏཾ ཀཐ’ནྟི ཧི ཨཱདིནཱ སབྦཏྠ སངྒྷཝསེནེཝ ཝུཏྟ’’ནྟི ཝུཏྟཾ. ཧཏྠེ བྷཝིསྶཏཱིཏི ཝསེ བྷཝིསྶཏི.

ཀཔྤིཡཀཱརཀཾ ཋཔེཐཱཏི ཝུཏྟེཏི སཱམཱིཙིཝསེན ཝུཏྟཾ, ཨཝུཏྟེཔི ཋཔེནྟསྶ ན དོསོ ཨཏྠི. ཏེནཱཧ ‘‘ཨུདཀཾ ཝཱརེཏུཾ ¶ ལབྦྷཏཱི’’ཏི. ཡསྨཱ པརསནྟཀཾ བྷིཀྑཱུནཾ ནཱསེཏུཾ ན ཝཊྚཏི, ཏསྨཱ ‘‘ན སསྶཀཱལེ’’ཏི ཝུཏྟཾ. སསྶཀཱལེཔི ཏཱསེཏྭཱ མུཉྩིཏུཾ ཝཊྚཏི, ཨམུཉྩཏོ པན བྷཎྜདེཡྻཾ. ཛནཔདསྶ སཱམིཀོཏི ཨིམིནཱཝ ཡོ ཏཾ ཛནཔདཾ ཝིཙཱརེཏི, ཏེནཔི ཨཙྪིནྡིཏྭཱ དིནྣཾ ཝཊྚཏིཡེཝཱཏི ཝདནྟི. པུན དེཏཱིཏི ཨཙྪིནྡིཏྭཱ པུན དེཏི, ཨེཝམྤི ཝཊྚཏཱིཏི སམྦནྡྷོ. ཨིམིནཱ ཡེན ཀེནཙི ཨིསྶརེན ‘‘པརིཙྩཏྟམིདཾ བྷིཀྑཱུཧི ཨསྶཱམིཀ’’ནྟི སཉྙཱཡ ཨཏྟནོ གཧེཏྭཱ དིནྣཾ ཝཊྚཏཱིཏི དསྶེཏི. ཨུདཀཝཱཧཀནྟི ཨུདཀམཱཏིཀཾ. ཀཔྤིཡཝོཧཱརེཔི ཝིནིཙྪཡཾ ཝཀྑཱམཱིཏི པཱཋསེསོ. ཨུདཀཝསེནཱཏི ཨུདཀཔརིབྷོགཏྠཾ. སུདྡྷཙིཏྟཱནནྟི ཨུདཀཔརིབྷོགཏྠམེཝ. ཨིདཾ སཧཏྠེན ཙ ཨཀཔྤིཡཝོཧཱརེན ཙ ཀརོནྟེ སནྡྷཱཡ ཝུཏྟཾ. ‘‘སསྶསམྤཱདནཏྠ’’ནྟི ཨེཝཾ ཨསུདྡྷཙིཏྟཱནམྤི པན སཡཾ ཨཀཏྭཱ ཀཔྤིཡཝོཧཱརེན ཨཱཎཱཔེཏུཾ ཝཊྚཏི ཨེཝ. ཀཔྤིཡཀཱརཀཾ ཋཔེཏུཾ ན ཝཊྚཏཱིཏི ཨིདཾ སཧཏྠཱདིནཱ ཀཏཏལཱ༹ཀཏྟཱ ཨསྶཱརུཔྤནྟི ཝུཏྟཾ. ཋཔེནྟསྶ པན ཏཾ པཙྩཡཾ པརིབྷུཉྫནྟསྶ ཝཱ སངྒྷསྶ ཨཱཔཏྟི ན པཉྙཱཡཏི, ཨཊྛཀཐཱཔམཱཎེན ཝཱ ཨེཏྠ ཨཱཔཏྟི ¶ གཧེཏབྦཱ. ཨལཛྫིནཱ ཀཱརཱཔིཏེ ཝཏྟབྦམེཝ ནཏྠཱིཏི ཨཱཧ ‘‘ལཛྫིབྷིཀྑུནཱ’’ཏི, མཏྟིཀུདྡྷརཎཱདཱིསུ ཀཱརཱཔིཏེསཱུཏི ཨདྷིཔྤཱཡོ.

༦༡. ནཝསསྶེཏི ཨཀཏཔུབྦེ ཀེདཱརེ. ཀཧཱཔཎེཏི ཨིམིནཱ དྷཉྙུཊྛཱཔནེ ཏསྶེཝ ཨཀཔྤིཡནྟི དསྶེཏི. ཨཔརིཙྪིནྣབྷཱགེཏི ‘‘ཨེཏྟཀེ བྷཱུམིབྷཱགེ ཨེཏྟཀོ བྷཱགོ དཱཏབྦོ’’ཏི ཨེཝཾ ཨཔརིཙྪིནྣབྷཱགེ. དྷཉྙུཊྛཱཔནེ ཀསཏི, པཡོགེཔི དུཀྐཊམེཝ, ན ཀཧཱཔཎུཊྛཱཔནེ ཝིཡ. ‘‘ཀསཐ ཝཔཐཱ’’ཏི ཝཙནེན སབྦེསམྤི ཨཀཔྤིཡཾ སིཡཱཏི ཨཱཧ ‘‘ཨཝཏྭཱ’’ཏི. ཨེཏྟཀོ ནཱམ བྷཱགོཏི ཨེཏྠ ཨེཏྟཀོ ཀཧཱཔཎོཏི ཨིདམྤི སནྡྷཱཡ ཝདཏི. ཏཐཱཝུཏྟེཔི ཧི ཏདཱ ཀཧཱཔཎཱནཾ ཨཝིཛྫམཱནཏྟཱ ཨཱཡཏིཾ ཨུཔྤཛྫམཱནཾ ཨཉྙེསཾ ཝཊྚཏི ¶ ཨེཝ. ཏེནཱཧ ‘‘ཏསྶེཝ ཏཾ ཨཀཔྤིཡ’’ནྟི. ཏསྶ པན སབྦཔཡོགེསུ པརིབྷོགེ ཙ དུཀྐཊཾ. ཀེཙི པན དྷཉྙཔརིབྷོགེ ཨེཝ ཨཱཔཏྟི, ན པུབྦབྷཱགེཏི ཝདནྟི, ཏཾ ན ཡུཏྟཾ, ཡེན མིནནརཀྑཎཱདིནཱ པཡོགེན པཙྪཱ དྷཉྙཔརིབྷོགེ ཨཱཔཏྟི ཧོཏི ཏསྶ པཡོགསྶ ཀརཎེ ཨནཱཔཏྟིཡཱ ཨཡུཏྟཏྟཱ. པརིཡཱཡཀཐཱཡ པན སབྦཏྠ ཨནཱཔཏྟི. ཏེནེཝ ‘‘ཨེཏྟཀེཧི ཝཱིཧཱིཧི ཨིདཉྩིདཉྩ ཨཱཧརཐཱ’’ཏི ནིཡམཝཙནེ ཨཀཔྤིཡཾ ཝུཏྟཾ. ཀཧཱཔཎཝིཙཱརཎེཔི ཨེསེཝ ནཡོ. ‘‘ཝཏྠུ ཙ ཨེཝརཱུཔཾ ནཱམ སཾཝིཛྫཏི, ཀཔྤིཡཀཱརཀོ ནཏྠཱིཏི ཝཏྟབྦ’’ནྟིཨཱདིཝཙནཉྩེཏྠ སཱདྷཀཾ. རཛྫུཡཱ ཝཱ དཎྜེན ཝཱཏི ཨེཏྠ ‘‘པཱདེཧིཔི མིནིཏུཾ ན ཝཊྚཏཱི’’ཏི ཝདནྟི. ཁལེ ཝཱ ཋཏྭཱ རཀྑཏཱིཏི ཨེཏྠ པན ཐེནེཏྭཱ གཎྷནྟེ དིསྭཱ ‘‘མཱ གཎྷཐཱ’’ཏི ནིཝཱརེནྟོ རཀྑཏི ནཱམ, སཙེ པན ཨཝིཙཱརེཏྭཱ ཀེཝལཾ ཏུཎྷཱིབྷཱུཏོཝ རཀྑཎཏྠཱཡ ཨོལོཀེནྟོ ཏིཊྛཏི, ཝཊྚཏི. ‘‘སཙེཔི ཏསྨིཾ ཏུཎྷཱིབྷཱུཏེ ཙོརིཀཱཡ ཧརནྟི, ‘མཡཾ བྷིཀྑུསངྒྷསྶ ཨཱརོཙེསྶཱམཱ’ཏི ཨེཝཾ ཝཏྟུམྤི ཝཊྚཏཱི’’ཏི ཝདནྟི. ནཱིཧརཱཔེཏི པཊིསཱམེཏཱིཏི ཨེཏྠཱཔི ‘‘སཙེ པརིཡཱཡེན ཝདཏི, ཝཊྚཏཱི’’ཏི ཝདནྟི. ཨཔུབྦསྶ ཨནུཔྤཱདིཏཏྟཱ ཨཉྙེསཾ ཝཊྚཏཱིཏི ཨཱཧ ‘‘ཏསྶེཝེཏཾ ཨཀཔྤིཡ’’ནྟི.

སབྦེསཾ ཨཀཔྤིཡཾ, ཀསྨཱ? ཀཧཱཔཎཱནཾ ཝིཙཱརིཏཏྟཱཏི ཨེཏྠ སཱརཏྠདཱིཔནིཡཾ (སཱརཏྠ. ཊཱི. ༢.༥༣༧-༥༣༩) ཨེཝཾ ཝིཙཱརཎཱ ཀཏཱ – ནནུ ཙ དུབྦིཙཱརིཏམཏྟེན ཏསྶེཝེཏཾ ཨཀཔྤིཡཾ, ན སབྦེསཾ རཱུཔིཡསཾཝོཧཱརེ ཙཏུཏྠཔཏྟོ ཝིཡ. ཝུཏྟཉྷི ཏཏྠ (པཱརཱ. ཨཊྛ. ༢.༥༨༩) ‘‘ཡོ པན རཱུཔིཡཾ ཨསམྤཊིཙྪིཏྭཱ ‘ཐེརསྶ པཏྟཾ ཀིཎིཏྭཱ དེཧཱི’ཏི པཧིཏཀཔྤིཡཀཱརཀེན སདྡྷིཾ ཀམྨཱརཀུལཾ གནྟྭཱ པཏྟཾ དིསྭཱ ‘ཨིམེ ཀཧཱཔཎེ གཧེཏྭཱ ཨིམཾ དེཧཱི’ཏི ཀཧཱཔཎེ དཱཔེཏྭཱ གཧིཏོ, ཨཡཾ པཏྟོ ཨེཏསྶེཝ བྷིཀྑུནོ ན ཝཊྚཏི ¶ དུབྦིཙཱརིཏཏྟཱ ¶ , ཨཉྙེསཾ པན ཝཊྚཏི མཱུལསྶ ཨསམྤཊིཙྪིཏཏྟཱ’’ཏི, ཏསྨཱ ཡཾ ཏེ ཨཱཧརནྟི, སབྦེསཾ ཨཀཔྤིཡཾ. ཀསྨཱ? ཀཧཱཔཎཱནཾ ཝིཙཱརིཏཏྟཱཏི ཨིདཾ ཀསྨཱ ཝུཏྟནྟི? ཨེཏྠ ཀེཙི ཝདནྟི ‘‘ཀཧཱཔཎེ སཱདིཡིཏྭཱ ཝིཙཱརིཏཾ སནྡྷཱཡ ཨེཝཾ ཝུཏྟ’’ནྟི, སངྒྷིཀཏྟཱ ཙ ནིསྶཛྫིཏུཾ ན སཀྐཱ, ཏསྨཱ སབྦེསཾ ན ཀཔྤཏཱིཏི ཏེསཾ ཨདྷིཔྤཱཡོ. ཀེཙི པན ‘‘ཨསཱདིཡིཏྭཱཔི ཀཧཱཔཎཱནཾ ཝིཙཱརིཏཏྟཱ རཱུཔིཡསཾཝོཧཱརོ ཀཏོ ཧོཏི, སངྒྷིཀཏྟཱ ཙ ནིསྶཛྫིཏུཾ ན སཀྐཱ, ཏསྨཱ སབྦེསཾ ན ཀཔྤཏཱི’’ཏི ཝདནྟི. གཎྛིཔདེསུ པན ཏཱིསུཔི ཨིདཾ ཝུཏྟཾ ‘‘ཙཏུཏྠཔཏྟོ གིཧིསནྟཀཱནཾཡེཝ ཀཧཱཔཎཱནཾ ཝིཙཱརིཏཏྟཱ ཨཉྙེསཾ ཀཔྤཏི, ཨིདྷ པན སངྒྷིཀཱནཾ ཝིཙཱརིཏཏྟཱ སབྦེསཾ ན ཀཔྤཏཱི’’ཏི. སབྦེསམྤི ཝཱདོ ཏེན ཏེན པརིཡཱཡེན ཡུཏྟོཡེཝཱཏི.

༦༢. ཙཏུསཱལདྭཱརེཏི བྷོཛནསཱལཾ སནྡྷཱཡ ཝུཏྟཾ.

༦༣. ‘‘ཝནཾ དམྨི, ཨརཉྙཾ དམྨཱི’’ཏི ཝུཏྟེ པན ཝཊྚཏཱིཏི ཨེཏྠ ནིཝཱསཊྛཱནཏྟཱ པུགྒལསྶཔི སུདྡྷཙིཏྟེན གཧེཏུཾ ཝཊྚཏི. སཱིམཾ དེམཱཏི ཝིཧཱརསཱིམཱདིསཱདྷཱརཎཝཙནེན ཝུཏྟཏྟཱ ‘‘ཝཊྚཏཱི’’ཏི ཝུཏྟཾ. པརིཡཱཡེན ཀཐིཏཏྟཱཏི ‘‘གཎྷཱཧཱི’’ཏི ཨཝཏྭཱ ‘‘སཱིམཱ གཏཱ’’ཏི པརིཡཱཡེན ཀཐིཏཏྟཱ. པཀཏིབྷཱུམིཀརཎཏྠཾ ‘‘ཧེཊྛཱ གཧིཏཾ པཾསུ’’ནྟིཨཱདི ཝུཏྟཾ. དཱསཾ དམྨཱིཏི ཨེཏྠ ‘‘མནུསྶཾ དམྨཱིཏི ཝུཏྟེ ཝཊྚཏཱི’’ཏི ཝདནྟི. ཝེཡྻཱཝཙྩཀརནྟིཨཱདིནཱ ཝུཏྟེ པུགྒལསྶཔི དཱསཾ གཧེཏུཾ ཝཊྚཏི ‘‘ཨནུཛཱནཱམི བྷིཀྑཝེ ཨཱརཱམིཀ’’ནྟི ཝིསེསེཏྭཱ ཨནུཉྙཱཏཏྟཱ. ཏཉྩ ཁོ པིལིནྡཝཙྪེན གཧིཏཔརིབྷུཏྟཀྐམེན, ན གཧཊྛཱནཾ དཱསཔརིབྷོགཀྐམེན. ཁེཏྟཱདཡོ པན སབྦེ སངྒྷསྶེཝ ཝཊྚནྟི པཱལི༹ཡཾ པུགྒལིཀཝསེན གཧེཏུཾ ཨནནུཉྙཱཏཏྟཱཏི དཊྛབྦཾ. ཀུཀྐུཊསཱུཀརེ…པེ… ཝཊྚཏཱིཏི ཨེཏྠ ཀུཀྐུཊསཱུཀརེསུ དཱིཡམཱནེསུ ‘‘ཨིམེཧི ཨམྷཱཀཾ ཨཏྠོ ནཏྠི, སུཁཾ ཛཱིཝནྟུ, ཨརཉྙེ ཝིསྶཛྫེཐཱ’’ཏི ཝཏྟུཾ ཝཊྚཏི ¶ . ཝིཧཱརསྶ དེམཱཏི སངྒྷིཀཝིཧཱརཾ སནྡྷཱཡ ཝུཏྟཾ. ‘‘ཁེཏྟཝཏྠུཔཊིགྒཧཎཱ པཊིཝིརཏོ ཧོཏཱི’’ཏིཨཱདིནཱ (དཱི. ནི. ༡.༡༠, ༡༩༤) སུཏྟནྟེསུ ཨཱགཏཔཊིཀྑེཔོ བྷགཝཏཱ ཨཱཔཏྟིཡཱཔི ཧེཏུབྷཱཝེན ཀཏོཏི བྷགཝཏོ ཨདྷིཔྤཱཡཾ ཛཱནནྟེཧི སངྒཱིཏིཀཱརཀམཧཱཐེརེཧི ཁེཏྟཔཊིགྒཧཎཱདིནིསྶིཏོ ཨཡཾ སབྦོཔི པཱལི༹མུཏྟཝིནིཙྪཡོ ཝུཏྟོཏི གཧེཏབྦོ.

༦༤. ཙཱིཝརཙེཏཱཔནྣནྟི ཙཱིཝརམཱུལཾ. པཧིཎེཡྻཱཏི པེསེཡྻ. ཙེཏཱཔེཏྭཱཏི པརིཝཏྟེཏྭཱ. ཨཙྪཱདེཧཱིཏི ¶ ཝོཧཱརཝཙནམེཏཾ, ཨིཏྠནྣཱམསྶ བྷིཀྑུནོ དེཧཱིཏི ཨཡཾ པནེཏྠ ཨཏྠོ. ཨཱབྷཏནྟི ཨཱནཱིཏཾ.

ཨིམསྨིཾ ཋཱནེ སཱརཏྠདཱིཔནིཡཾ (སཱརཏྠ. ཊཱི. ༢.༥༢༨-༥༣༡) ཨེཝཾ ཝིཙཱརཎཱ ཀཏཱ – ཨེཏྠ ཙ ཡཾ ཝུཏྟཾ མཱཏིཀཱཊྛཀཐཱཡཾ (ཀངྑཱ. ཨཊྛ. རཱཛསིཀྑཱཔདཝཎྞནཱ) ‘‘ཨིམིནཱ ཙཱིཝརཙེཏཱཔནྣེན ཙཱིཝརཾ ཙེཏཱཔེཏྭཱ ཨིཏྠནྣཱམཾ བྷིཀྑུཾ ཙཱིཝརེན ཨཙྪཱདེཧཱིཏི ཨིདཾ ཨཱགམནསུདྡྷིཾ དསྶེཏུཾ ཝུཏྟཾ. སཙེ ཧི ‘ཨིདཾ ཨིཏྠནྣཱམསྶ བྷིཀྑུནོ དེཧཱི’ཏི པེསེཡྻ, ཨཱགམནསྶ ཨསུདྡྷཏྟཱ ཨཀཔྤིཡཝཏྠུཾ ཨཱརབྦྷ བྷིཀྑུནཱ ཀཔྤིཡཀཱརཀོཔི ནིདྡིསིཏབྦོ ན བྷཝེཡྻཱ’’ཏི, ཏཏྠ ཨཱགམནསྶ སུདྡྷིཡཱ ཝཱ ཨསུདྡྷིཡཱ ཝཱ ཝིསེསཔྤཡོཛནཾ ན དིསྶཏི. སཏིཔི ཧི ཨཱགམནསྶ ཨསུདྡྷབྷཱཝེ དཱུཏོ ཨཏྟནོ ཀུསལཏཱཡ ཀཔྤིཡཝོཧཱརེན ཝདཏི, ཀཔྤིཡཀཱརཀོ ན ནིདྡིསིཏབྦོཏི ཨིདཾ ནཏྠི, ན ཙ དཱུཏེན ཀཔྤིཡཝོཧཱརཝསེན ཝུཏྟེ དཱཡཀེན ‘‘ཨིདཾ ཀཐཾ པེསིཏ’’ནྟི ཨཱིདིསཱི ཝིཙཱརཎཱ ཨུཔལབྦྷཏི, ཨཝིཙཱརེཏྭཱ ཙ ཏཾ ན སཀྐཱ ཛཱནིཏུཾ. ཡདི པན ཨཱགམནསྶ ཨསུདྡྷཏྟཱ ཀཔྤིཡཀཱརཀོ ནིདྡིསིཏབྦོ ན བྷཝེཡྻ, ཙཱིཝརཱནཾ ཨཏྠཱཡ དཱུཏསྶ ཧཏྠེ ཨཀཔྤིཡཝཏྠུམྷི པེསིཏེ སབྦཏྠ དཱཡཀེན ཀཐཾ པེསིཏནྟི པུཙྪིཏྭཱཝ ཀཔྤིཡཀཱརཀོ ནིདྡིསིཏབྦོ བྷཝེཡྻ, ཏསྨཱ ཨསཏིཔི ¶ ཨཱགམནསུདྡྷིཡཾ སཙེ སོ དཱུཏོ ཨཏྟནོ ཀུསལཏཱཡ ཀཔྤིཡཝོཧཱརཝསེན ཝདཏི, དཱུཏསྶེཝ ཝཙནཾ གཧེཏབྦཾ. ཡདི ཧི ཨཱགམནསུདྡྷིཡེཝེཏྠ པམཱཎཾ, མཱུལསྶཱམིཀེན ཀཔྤིཡཝོཧཱརཝསེན པེསིཏསྶ དཱུཏསྶ ཨཀཔྤིཡཝོཧཱརཝསེན ཝདཏོཔི ཀཔྤིཡཀཱརཀོ ནིདྡིསིཏབྦོ བྷཝེཡྻ, ཏསྨཱ སབྦཏྠ དཱུཏཝཙནམེཝ པམཱཎནྟི གཧེཏབྦཾ. ཨིམིནཱ ཙཱིཝརཙེཏཱཔནྣེནཱཏིཨཱདིནཱ པན ཨིམམཏྠཾ དསྶེཏི ‘‘ཀཔྤིཡཝསེན ཨཱབྷཏམྤི ཙཱིཝརམཱུལཾ ཨཱིདིསེན དཱུཏཝཙནེན ཨཀཔྤིཡཾ ཧོཏི, ཏསྨཱ ཏཾ པཊིཀྑིཔིཏབྦ’’ནྟི. ཏེནེཝཱཧ ‘‘ཏེན བྷིཀྑུནཱ སོ དཱུཏོ ཨེཝམསྶ ཝཙནཱིཡོཏིཨཱདཱི’’ཏི.

ཝིམཏིཝིནོདནིཡཾ (ཝི. ཝི. ཊཱི. ༡.༥༣༨-༥༣༩) པན ཨེཝཾ ཝུཏྟཾ – ཡཾ ཝུཏྟཾ མཱཏིཀཱཊྛཀཐཱཡཾ (ཀངྑཱ. ཨཊྛ. རཱཛསིཀྑཱཔདཝཎྞནཱ) ‘‘ཨིམིནཱ ཙཱིཝརཙེཏཱཔནྣེན ཙཱིཝརཾ ཙེཏཱཔེཏྭཱ ཨིཏྠནྣཱམཾ བྷིཀྑུཾ ཙཱིཝརེན ཨཙྪཱདེཧཱིཏི ཨིདཾ ཨཱགམནསུདྡྷིཾ དསྶེཏུཾ ཝུཏྟཾ. སཙེ ཧི ‘ཨིདཾ ཨིཏྠནྣཱམསྶ བྷིཀྑུནོ དེཧཱི’ཏི པེསེཡྻ, ཨཱགམནསྶ ཨསུདྡྷཏྟཱ ཨཀཔྤིཡཝཏྠུཾ ཨཱརབྦྷ བྷིཀྑུནཱ ཀཔྤིཡཀཱརཀོཔི ནིདྡིསིཏབྦོ ན བྷཝེཡྻཱ’’ཏི, ཏཾ ནིསྶགྒིཡཝཏྠུདུཀྐཊཝཏྠུབྷཱུཏཾ ཨཀཔྤིཡཙཱིཝརཙེཏཱཔནྣཾ ‘‘ཨསུཀསྶ བྷིཀྑུནོ དེཧཱི’’ཏི ཨེཝཾ ཨཱགམནསུདྡྷིཡཱ ཨསཏི, སིཀྑཱཔདེ ¶ ཨཱགཏནཡེན དཱུཏཝཙནེ ཙ ཨསུདྡྷེ སབྦཐཱ པཊིཀྑེཔོཡེཝ ཀཱཏུཾ ཝཊྚཏི, ན པན ‘‘ཙཱིཝརཉྩ ཁོ མཡཾ པཊིགྒཎྷཱམཱ’’ཏི ཝཏྟུཾ, ཏདནུསཱརེན ཝེཡྻཱཝཙྩཀརཉྩ ནིདྡིསིཏུཾ ཨཱགམནདཱུཏཝཙནཱནཾ ཨུབྷིནྣཾ ཨསུདྡྷཏྟཱ, པཱལི༹ཡཾ ཨཱགཏནཡེན པན ཨཱགམནསུདྡྷིཡཱ སཏི དཱུཏཝཙནེ ཨསུདྡྷེཔི སིཀྑཱཔདེ ཨཱགཏནཡེན སབྦཾ ཀཱཏུཾ ཝཊྚཏཱིཏི དསྶནཏྠཾ ཝུཏྟཾ. ཏེན ཙ ཡཐཱ དཱུཏཝཙནཱསུདྡྷིཡམྤི ཨཱགམནེ སུདྡྷེ ཝེཡྻཱཝཙྩཀརཾ ནིདྡིསིཏུཾ ཝཊྚཏི, ཨེཝཾ ཨཱགམནཱསུདྡྷིཡམྤི དཱུཏཝཙནེ སུདྡྷེ ཝཊྚཏི ཨེཝཱཏི ཨཡམཏྠོ ཨཏྠཏོ ¶ སིདྡྷོཝ ཧོཏི. ཨུབྷཡསུདྡྷིཡཾ ཝཏྟབྦམེཝ ནཏྠཱིཏི ཨུབྷཡཱསུདྡྷིཔཀྑམེཝ སནྡྷཱཡ མཱཏིཀཱཊྛཀཐཱཡཾ (ཀངྑཱ. ཨཊྛ. རཱཛསིཀྑཱཔདཝཎྞནཱ) ‘‘ཀཔྤིཡཀཱརཀོཔི ནིདྡིསིཏབྦོ ན བྷཝེཡྻཱ’’ཏི ཝུཏྟནྟི ཝེདིཏབྦཾ.

ཡཾ པནེཏྠ སཱརཏྠདཱིཔནིཡཾ (སཱརཏྠ. ཊཱི. ༢.༢༣༧-༥༣༩) ‘‘ཨཱགམནསྶ སུདྡྷིཡཱ ཝཱ ཨསུདྡྷིཡཱ ཝཱ ཝིསེསཔྤཡོཛནཾ ན དིསྶཏཱི’’ཏིཨཱདི ཝུཏྟཾ, ཏཾ མཱཏིཀཱཊྛཀཐཱཝཙནསྶ ཨདྷིཔྤཱཡཾ ཨསལླཀྑེཏྭཱ ཝུཏྟཾ ཡཐཱཝུཏྟནཡེན ཨཱགམནསུདྡྷིཨཱདིནཱ སཔྤཡོཛནཏྟཱ. ཡོ པནེཏྠ ‘‘མཱུལསྶཱམིཀེན ཀཔྤིཡཝོཧཱརཝསེན, པེསིཏདཱུཏསྶ ཨཀཔྤིཡཝོཧཱརེན ཝདཏོཔི ཀཔྤིཡཀཱརཀོ ནིདྡིསིཏབྦོ བྷཝེཡྻཱ’’ཏི ཨནིཊྛཔྤསངྒོ ཝུཏྟོ, སོ ཨནིཊྛཔྤསངྒོ ཨེཝ ན ཧོཏི ཨབྷིམཏཏྟཱ. ཏཐཱ ཧི སིཀྑཱཔདེ ཨེཝ ‘‘པཊིགྒཎྷཏུ ཨཱཡསྨཱ ཙཱིཝརཙེཏཱཔནྣ’’ནྟི ཨཀཔྤིཡཝོཧཱརེན ཝདཏོ དཱུཏསྶ ཀཔྤིཡེན ཀམྨེན ཝེཡྻཱཝཙྩཀརོ ནིདྡིསིཏབྦོ ཝུཏྟོ ཨཱགམནསྶ སུདྡྷཏྟཱ, ཨཱགམནསྶཔི ཨསུདྡྷིཡཾ པན ཀཔྤིཡེནཔི ཀམྨེན ཝེཡྻཱཝཙྩཀརོ ན ནིདྡིསིཏབྦོཝཱཏི ཨཏྠེཝ ཨཱགམནསྶ སུདྡྷིཨསུདྡྷིཡཱ པཡོཛནཾ. ཀཐཾ པན དཱུཏཝཙནེན ཨཱགམནསུདྡྷི ཝིཉྙཱཡཏཱིཏི? ནཱཡཾ བྷཱརོ. དཱུཏེན ཧི ཨཀཔྤིཡཝོཧཱརེན ཝུཏྟེ ཨེཝ ཨཱགམནསུདྡྷི གཝེསིཏབྦཱ, ན ཨིཏརཏྠ. ཏཏྠ ཙ ཏསྶ ཝཙནཀྐམེན པུཙྪིཏྭཱ ཙ ཡུཏྟིཨཱདཱིཧི ཙ སཀྐཱ ཝིཉྙཱཏུཾ. ཨིདྷཱཔི ཧི སིཀྑཱཔདེ ‘‘ཙཱིཝརཙེཏཱཔནྣཾ ཨཱབྷཏ’’ནྟི དཱུཏཝཙནེནེཝ ཙཱིཝརཾ ཀིཎིཏྭཱ དཱཏུཾ པེསིཏབྷཱཝོ ཝིཉྙཱཡཏི. ཡདི ཧི སབྦཐཱ ཨཱགམནསུདྡྷི ན ཝིཉྙཱཡཏི, པཊིཀྑེཔོ ཨེཝ ཀཏྟབྦོཏི.

སུཝཎྞཾ རཛཏཾ ཀཧཱཔཎོ མཱསཀོཏི ཨིམཱནི ཧི ཙཏྟཱརི ནིསྶགྒིཡཝཏྠཱུནི, མུཏྟཱ མཎི ཝེལུ༹རིཡོ སངྑོ ¶ སིལཱ པཝཱལ༹ཾ ལོཧིཏངྐོ མསཱརགལླཾ སཏྟ དྷཉྙཱནི དཱསིདཱསཾ ཁེཏྟཾ ཝཏྠུ པུཔྥཱརཱམཕལཱརཱམཱདཡོཏི ཨིམཱནི དུཀྐཊཝཏྠཱུནི ཙ ཨཏྟནོ ཝཱ ཙེཏིཡསངྒྷགཎཔུགྒལཱནཾ ཝཱ ཨཏྠཱཡ སམྤཊིཙྪིཏུཾ ན ཝཊྚནྟི, ཏསྨཱ ཏཾ སཱདིཏུཾ ན ཝཊྚཏཱིཏི དསྶནཏྠཾ ‘‘ན ཁོ མཡཾ ཨཱཝུསོ ¶ ཙཱིཝརཙེཏཱཔནྣཾ པཊིགྒཎྷཱམཱ’’ཏི ཝུཏྟཾ. ཙཱིཝརཉྩ ཁོ མཡཾ པཊིགྒཎྷཱམཱ’’ཏིཨཱདི དཱུཏཝཙནསྶ ཨཀཔྤིཡཏྟེཔི ཨཱགམནསུདྡྷིཡཱ པཊིཔཛྫནཝིདྷིདསྶནཏྠཾ ཝུཏྟཾ. ཀཱལེན ཀཔྤིཡནྟི ཡུཏྟཔཏྟཀཱལེན ཡདཱ ནོ ཨཏྠོ ཧོཏི, ཏདཱ ཀཔྤིཡཾ ཙཱིཝརཾ པཊིགྒཎྷཱམཱཏི ཨཏྠོ. ཝེཡྻཱཝཙྩཀརོཏི ཀིཙྩཀརོ, ཀཔྤིཡཀཱརཀོཏི ཨཏྠོ. ‘‘ཝེཡྻཱཝཙྩཀརོ ནིདྡིསིཏབྦོ’’ཏི ཨིདཾ ‘‘ཨཏྠི པནཱཡསྨཏོ ཀོཙི ཝེཡྻཱཝཙྩཀརོ’’ཏི ཀཔྤིཡཝཙནེན ཝུཏྟཏྟཱ ཨནུཉྙཱཏཾ. སཙེ པན དཱུཏོ ‘‘ཀོ ཨིམཾ གཎྷཱཏི, ཀསྶ ཝཱ དེམཱི’’ཏི ཝདཏི, ན ནིདྡིསིཏབྦོ. ཨཱརཱམིཀོ ཝཱ ཨུཔཱསཀོ ཝཱཏི ཨིདཾ སཱརུཔྤཏཱཡ ཝུཏྟཾ, ཋཔེཏྭཱ པན པཉྩ སཧདྷམྨིཀེ ཡོ ཀོཙི ཀཔྤིཡཀཱརཀོ ཝཊྚཏི. ཨེསོ ཁོ ཨཱཝུསོ བྷིཀྑཱུནཾ ཝེཡྻཱཝཙྩཀརོཏི ཨིདཾ དཱུཏེན ‘‘ཨཏྠི པནཱཡསྨཏོ ཀོཙི ཝེཡྻཱཝཙྩཀརོ’’ཏི པུཙྪིཏཏྟཱ པུཙྪཱསབྷཱགེན བྷིཀྑུསྶ ཀཔྤིཡཝཙནདསྶནཏྠཾ ཝུཏྟཾ. ཨེཝམེཝ ཧི བྷིཀྑུནཱ ཝཏྟབྦཾ, ན ཝཏྟབྦཾ ‘‘ཏསྶ དེཧཱི’’ཏིཨཱདི. ཏེནེཝ པཱལི༹ཡཾ ‘‘ན ཝཏྟབྦོ ཏསྶ དེཧཱི’’ཏིཨཱདིམཱཧ. ཝིམཏིཝིནོདནིཡཾ (ཝི. ཝི. ཊཱི. ༡.༥༣༨-༥༣༩) པན ‘‘ཨེསོ ཁོ…པེ… ན ཝཏྟབྦོ ཏསྶ དེཧཱིཏིཨཱདི ཨཀཔྤིཡཝཏྠུསཱདིཡནཔརིམོཙནཏྠཾ ཝུཏྟ’’ནྟི ཝུཏྟཾ.

ཨཱཎཏྟོ སོ མཡཱཏི ཡཐཱ ཏུམྷཱཀཾ ཙཱིཝརེན ཨཏྠེ སཏི ཙཱིཝརཾ དསྶཏི, ཨེཝཾ ཝུཏྟོཏི ཨཏྠོ. ཝིམཏིཝིནོདནིཡཾ པན ‘‘སཉྙཏྟོཏིཨཱདི ཨེཝཾ དཱུཏེན པུན ཝུཏྟེ ¶ ཨེཝ ཙོདེཏུཾ ཝཊྚཏི, ན ཨིཏརཐཱཏི དསྶནཏྠཾ ཝུཏྟ’’ནྟི ཝུཏྟཾ. ཨེཏྠ པན པཱལི༹ཡཾ ‘‘སཉྙཏྟོ སོ མཡཱ’’ཏི ཨཱགཏཏྟཱ ཨེཝཾ ཝུཏྟོ, པུརིམཝཱཀྱེ པན ཝིནཡསངྒཧཔྤཀརཎེ (ཝི. སངྒ. ཨཊྛ. ༦༤) ‘‘ཨཱཎཏྟོ སོ མཡཱ’’ཏི པརིཡཱཡཝཙནེན པརིཝཏྟིཏྭཱ ཋཔིཏཏྟཱ ཏཐཱ ཝུཏྟོ, ཏེན ཙ ཀཔྤིཡཀཱརཀསྶ སཉྙཱཔིཏབྷཱཝེ དཱུཏེན བྷིཀྑུསྶ པུན ཨཱརོཙིཏེ ཨེཝ བྷིཀྑུནཱ ཀཔྤིཡཀཱརཀོ ཙོདེཏབྦོ ཧོཏི, ན ཨནཱརོཙིཏེཏི དསྶེཏི.

ཨཏྠོ མེ ཨཱཝུསོ ཙཱིཝརེནཱཏི ཙོདནཱལཀྑཎནིདསྶནམེཏཾ. ཨིདཾ ཝཱ ཧི ཝཙནཾ ཝཏྟབྦཾ, ཏསྶ ཝཱ ཨཏྠོ ཡཱཡ ཀཱཡཙི བྷཱསཱཡ ཝཏྟབྦོ. དེཧི མེ ཙཱིཝརནྟིཨཱདཱིནི པན ན ཝཏྟབྦཱཀཱརདསྶནཏྠཾ ཝུཏྟཱནི. ཨེཏཱནི ཧི ཝཙནཱནི, ཨེཏེསཾ ཝཱ ཨཏྠོ ཡཱཡ ཀཱཡཙི བྷཱསཱཡ ན ཝཏྟབྦོ. ‘‘ཨེཝཾ ཝདནྟོ ཙ པཊིཀྑིཏྟཏྟཱ ཝཏྟབྷེདེ དུཀྐཊཾ ཨཱཔཛྫཏི, ཙོདནཱ པན ཧོཏིཡེཝཱ’’ཏི མཧཱགཎྛིཔདེ མཛ྄ཛྷིམགཎྛིཔདེ ཙ ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ༡.༥༣༨-༥༣༩) པན ‘‘ན ཝཏྟབྦོ ‘དེཧི མེ ཙཱིཝརཾ…པེ… ཙེཏཱཔེཧི མེ ཙཱིཝར’ནྟི ཨིདཾ དཱུཏེནཱབྷཏརཱུཔིཡཾ ¶ པཊིགྒཧེཏུཾ ཨཏྟནཱ ནིདྡིཊྛཀཔྤིཡཀཱརཀཏྟཱཝ ‘དེཧི མེ ཙཱིཝརཾ…པེ… ཙེཏཱཔེཧི མེ ཙཱིཝར’ནྟི ཝདནྟོ རཱུཔིཡསྶ པཀཏཏྟཱ ཏེན རཱུཔིཡེན པརིཝཏྟེཏྭཱ ‘དེཧི ཙེཏཱཔེཧཱི’ཏི རཱུཔིཡསཾཝོཧཱརཾ སམཱཔཛྫནྟོ ནཱམ ཧོཏཱིཏི ཏཾ དོསཾ དཱུརཏོ པརིཝཛྫེཏུཾ ཝུཏྟཾ རཱུཔིཡཔཊིགྒཱཧཀེན སངྒྷམཛ྄ཛྷེ ནིསྶཊྛརཱུཔིཡེ ཝིཡ. ཝུཏྟཉྷི ཏཏྠ ‘ན ཝཏྟབྦོ ཨིམཾ ཝཱ ཨིམཾ ཝཱ ཨཱཧརཱ’ཏི (པཱརཱ. ཨཊྛ. ༢.༥༨༣-༥༨༤), ཏསྨཱ ན ཨིདཾ ཝིཉྙཏྟིདོསེ པརིཝཛྫེཏུཾ ཝུཏྟནྟི ཝེདིཏབྦཾ ‘ཨཏྠོ མེ ཨཱཝུསོ ཙཱིཝརེནཱ’ཏིཔི ཨཝཏྟབྦཏཱཔྤསངྒཏོ. ཏེནེཝ དཱུཏནིདྡིཊྛེསུ རཱུཔིཡསཾཝོཧཱརསངྐཱབྷཱཝཏོ ཨཉྙཾ ཀཔྤིཡཀཱརཀཾ ¶ ཋཔེཏྭཱཔི ཨཱཧརཱཔེཏབྦ’’ནྟི ཝུཏྟཾ. ཏཏྠཱཔི ‘‘དཱུཏེན ཋཔིཏརཱུཔིཡེན ཙེཏཱཔེཏྭཱ ཙཱིཝརཾ ཨཱཧརཱཔེཧཱི’’ཏི ཨཝཏྭཱ ཀེཝལཾ ‘‘ཙཱིཝརཾ ཨཱཧརཱཔེཧཱི’’ཏི ཨེཝཾ ཨཱཧརཱཔེཏབྦནྟི ཨདྷིཔྤཱཡོ གཧེཏབྦོཏི ཝུཏྟཾ.

ཨིཙྩེཏཾ ཀུསལནྟི ཨེཝཾ ཡཱཝཏཏིཡཾ ཙོདེནྟོ ཏཾ ཙཱིཝརཾ ཨབྷིནིཔྥཱདེཏུཾ སཀྐོཏི ཨཏྟནོ པཊིལཱབྷཝསེན, ཨིཙྩེཏཾ ཀུསལཾ སཱདྷུ སུཊྛུ སུནྡརཾ. ཙཏུཀྑཏྟུཾ པཉྩཀྑཏྟུཾ ཚཀྑཏྟུཔརམཾ ཏུཎྷཱིབྷཱུཏེན ཨུདྡིསྶ ཋཱཏབྦནྟི ཋཱནལཀྑཎནིདསྶནམེཏཾ. ཚཀྑཏྟུཔརམནྟི ཙ བྷཱཝནཔུཾསཀཝཙནམེཏཾ. ཚཀྑཏྟུཔརམནྟི ཨེཏེན ཙཱིཝརཾ ཨུདྡིསྶ ཏུཎྷཱིབྷཱུཏེནེཝ ཋཱཏབྦཾ, ན ཨཉྙཾ ཀིཉྩི ཀཱཏབྦནྟི ཨིདཾ ཋཱནལཀྑཎཾ. ཏེནེཝ ‘‘ན ཨཱསནེཏིཨཱདཱི’’ཏི ཨཊྛཀཐཱཡཾ ཝུཏྟཾ. སདྡསཏྠེ པན –

‘‘ཀིརིཡཱཝིསེསནཾ སཏྠེ, ཝུཏྟཾ དྷཱཏུཝིསེསནཾ;

བྷཱཝནཔུཾསཀནྟྱེཝ, སཱསནེ སམུདཱིརིཏ’’ནྟི. –

ཝཙནཏོ ཀིརིཡཱཝིསེསནམེཝ སཱསནཝོཧཱརེན བྷཱཝནཔུཾསཀཾ ནཱམ ཛཱཏཾ;

‘‘མུདུཾ པཙཏིཨིཙྩཏྲ, པཙནཾ བྷཝཏཱིཏི ཙ;

སུཁཾ སཡཏིཨིཙྩཏྲ, ཀརོཏི སཡནནྟི ཙཱ’’ཏི. –

ཝཙནཏོ ཀིརིཡཱཝིསེསནཔདེན ཏུལྱཱདྷིཀརཎབྷཱུཏཾ ཀིརིཡཱཝིསེསྱཔདཾ ཨཀམྨཀམྤི སཀམྨཀམྤི བྷཱུདྷཱཏུཀརདྷཱཏཱུཧི སམྦནྡྷིཏབྦཾ ཧོཏཱིཏི ཨིམིནཱ ཉཱཡེན ཚཀྑཏྟུཔརམཾ ཋཱནཾ བྷཝིཏབྦཾ, ཚཀྑཏྟུཔརམཾ ཋཱནཾ ཀཱཏབྦནྟི ཨཏྠོ. ཨེཏེན ཚཀྑཏྟུཔརམཾ ཨེཝཾ ཋཱནཾ བྷཝིཏབྦཾ, ན ཏཏོ ཨདྷིཀཾ ¶ , ཚཀྑཏྟུཔརམཾ ཨེཝ ཋཱནཾ ཀཱཏབྦཾ, ན ཏཏོ ཨུདྡྷནྟི ཨིམམཏྠཾ དསྶེཏི. ན ཨཱསནེ ནིསཱིདིཏབྦནྟི ‘‘ཨིདྷ བྷནྟེ ནིསཱིདཐཱ’’ཏི ཝུཏྟེཔི ན ནིསཱིདིཏབྦཾ. ན ཨཱམིསཾ པཊིགྒཧེཏབྦནྟི ‘‘ཡཱགུཁཛྫཀཱདིབྷེདཾ ཀིཉྩི ཨཱམིསཾ གཎྷཐ བྷནྟེ’’ཏི ཡཱཙིཡམཱནེནཔི ན གཎྷིཏབྦཾ. ན དྷམྨོ བྷཱསིཏབྦོཏི ‘‘མངྒལཾ ཝཱ ཨནུམོདནཾ ¶ ཝཱ བྷཱསཐཱ’’ཏི ཡཱཙིཡམཱནེནཔི ཀིཉྩི ན བྷཱསིཏབྦཾ, ཀེཝལཾ ‘‘ཀིཾཀཱརཎཱ ཨཱགཏོསཱི’’ཏི པུཙྪིཡམཱནེན ‘‘ཛཱནཱཧི ཨཱཝུསོ’’ཏི ཝཏྟབྦོ.

ཋཱནཾ བྷཉྫཏཱིཏི ཨཱགཏཀཱརཎཾ བྷཉྫཏི ཀོཔེཏི. ཋཱནནྟི ཋིཏིཡཱ ཙ ཀཱརཎསྶ ཙ ནཱམཾ, ཏསྨཱ ཨཱསནེ ནིསཱིདནེན ཋཱནཾ ཀུཔྤཏི, ཨཱགཏཀཱརཎམྤི, ཨཱམིསཔཊིགྒཧཎཱདཱིསུ པན ཨཱགཏཀཱརཎམེཝ བྷཉྫཏི, ན ཋཱནཾ. ཏེནཱཧ ‘‘ཨཱགཏཀཱརཎཾ བྷཉྫཏཱི’’ཏི. ཀེཙི པན ‘‘ཨཱམིསཔཊིགྒཧཎཱདིནཱ ཋཱནམྤི བྷཉྫཏཱི’’ཏི ཝདནྟི, ཏཾ ཨཊྛཀཐཱཡ ན སམེཏི, ཊཱིཀཱཡམྤི ནཱནཱཝཱདེ དསྶེཏྭཱ ཋཱནབྷཉྫནཾ ཝུཏྟཾ, ཏཾ ཨཊྛཀཐཱཝཙནེན ཨསཾསནྡནཏོ གནྠགརུབྷཡེན ན ཝདིམྷ. ཨིདཱནི ཡཱ ཏིསྶོ ཙོདནཱ, ཚ ཙ ཋཱནཱནི ཝུཏྟཱནི, ཏཏྠ ཝུདྡྷིཧཱནིཾ དསྶེནྟོ ‘‘སཙེ ཙཏུཀྑཏྟུཾ ཙོདེཏཱི’’ཏིཨཱདིམཱཧ. ཡསྨཱ ཙ ཨེཀཙོདནཱཝུདྡྷིཡཱ དྭིནྣཾ ཋཱནཱནཾ ཧཱནི ཝུཏྟཱ, ཏསྨཱ ཙོདནཱ དྭིགུཎཾ ཋཱནནྟི ལཀྑཎཾ དསྶིཏཾ ཧོཏི. ཨིཏི ཨིམིནཱ ལཀྑཎེན ཏིཀྑཏྟུཾ ཙོདེཏྭཱ ཚཀྑཏྟུཾ ཋཱཏབྦཾ, དྭིཀྑཏྟུཾ ཙོདེཏྭཱ ཨཊྛཀྑཏྟུཾ ཋཱཏབྦཾ, སཀིཾ ཙོདེཏྭཱ དསཀྑཏྟུཾ ཋཱཏབྦཾ.

ཏཏྲ ཏཏྲ ཋཱནེ ཏིཊྛཏཱིཏི ཨིདཾ ཙོདཀསྶ ཋིཏཊྛཱནཏོ ཨཔཀྐམྨ ཏཏྲ ཏཏྲ ཨུདྡིསྶ ཋཱནཾཡེཝ སནྡྷཱཡ ཝུཏྟཾ. ཀོ པན ཝཱདོ ནཱནཱདིཝསེསཱུཏི ནཱནཱདིཝསེསུ ཨེཝཾ ཀརོནྟསྶ ཀོ པན ཝཱདོ, ཝཏྟབྦམེཝ ནཏྠཱིཏི ཨདྷིཔྤཱཡོ. ‘‘སཱམཾ ཝཱ གནྟབྦཾ, དཱུཏོ ཝཱ པཱཧེཏབྦོཏི ཨིདཾ སབྷཱཝཏོ ཙོདེཏུཾ ཨནིཙྪནྟེནཔི ཀཱཏབྦམེཝཱ’’ཏི ཝདནྟི. ན ཏཾ ཏསྶ བྷིཀྑུནོ ཀིཉྩི ཨཏྠཾ ཨནུབྷོཏཱིཏི ཏཾ ཙཱིཝརཙེཏཱཔནྣཾ ཨསྶ བྷིཀྑུནོ ཀིཉྩི ཨཔྤམཏྟཀམྤི ཀམྨཾ ན ནིཔྥཱདེཏི. ཡུཉྫནྟཱཡསྨནྟོ སཀནྟི ཨཱཡསྨནྟོ ཨཏྟནོ སནྟཀཾ དྷནཾ པཱཔུཎནྟུ. ཝིམཏིཝིནོདནིཡཾ (ཝི. ཝི. ཊཱི. ༡.༥༣༨-༥༣༩) པན ‘‘ཡཏསྶ ¶ ཙཱིཝརཙེཏཱཔནྣནྟིཨཱདི ཡེན ཨཏྟནཱ ཝེཡྻཱཝཙྩཀརོ ནིདྡིཊྛོ, ཙཱིཝརཉྩ ཨནིཔྥཱདིཏཾ, ཏསྶ ཀཏྟབྦདསྶནཾ. ཨེཝཾ བྷིཀྑུནཱ ཝཏྠུསཱམིཀཱནཾ ཝུཏྟེ ཙོདེཏྭཱ དེནྟི, ཝཊྚཏི ‘སཱམིཀཱ ཙོདེཏྭཱ དེནྟཱི’ཏི (པཱརཱ. ༥༤༡) ཨནཱཔཏྟིཡཾ ཝུཏྟཏྟཱ. ཏེནེཝ སོ སཡཾ ཨཙོདེཏྭཱ ཨུཔཱསཀཱདཱིཧི པརིཡཱཡེན ཝཏྭཱ ཙོདཱཔེཏི ¶ , ཏེསུ སཏཀྑཏྟུམྤི ཙོདེཏྭཱ ཙཱིཝརཾ དཱཔེནྟེསུ ཏསྶ ཨནཱཔཏྟི སིདྡྷཱ ཧོཏི སིཀྑཱཔདསྶ ཨནཱཎཏྟིཀཏྟཱ’’ཏི ཝུཏྟཾ.

༦༥. ཀེནཙི ཨནིདྡིཊྛོ ཨཏྟནོ མུཁེནེཝ བྱཱཝཊབྷཱཝཾ ཝེཡྻཱཝཙྩཀརཏྟཾ པཏྟོ མུཁཝེཝཊིཀོ, ཨཝིཙཱརེཏུཀཱམཏཱཡཱཏི ཨིམིནཱ ཝིཛྫམཱནམྤི དཱཏུཾ ཨནིཙྪནྟཱ ཨརིཡཱཔི ཝཉྩནཱདྷིཔྤཱཡཾ ཝིནཱ ཝོཧཱརཏོ ནཏྠཱིཏི ཝདནྟཱིཏི དསྶེཏི. སཱརཏྠདཱིཔནིཡཾ (སཱརཏྠ. ཊཱི. ༢.༥༣༧-༥༣༩) པན ‘‘ཨཝིཙཱརེཏུཀཱམཏཱཡཱཏི ཨིམསྨིཾ པཀྑེ ‘ནཏྠམྷཱཀཾ ཀཔྤིཡཀཱརཀོ’ཏི ཨིདཾ ཏཱདིསཾ ཀརོནྟོ ཀཔྤིཡཀཱརཀོ ནཏྠཱིཏི ཨིམིནཱ ཨདྷིཔྤཱཡེན ཝུཏྟ’’ནྟི ཝུཏྟཾ. བྷེསཛྫཀྑནྡྷཀེ མེཎྜཀསེཊྛིཝཏྠུམྷི (མཧཱཝ. ༢༩༩) ཝུཏྟཾ ‘‘སནྟི བྷིཀྑཝེ’’ཏིཨཱདིཝཙནམེཝ མེཎྜཀསིཀྑཱཔདཾ ནཱམ. ཏཏྠ ཧི མེཎྜཀེན ནཱམ སེཊྛིནཱ ‘‘སནྟི ཧི བྷནྟེ མགྒཱ ཀནྟཱརཱ ཨཔྤོདཀཱ ཨཔྤབྷཀྑཱ ན སུཀརཱ ཨཔཱཐེཡྻེན གནྟུཾ, སཱདྷུ བྷནྟེ བྷགཝཱ བྷིཀྑཱུནཾ པཱཐེཡྻཾ ཨནུཛཱནཱཏཱུ’’ཏི ཡཱཙིཏེན བྷགཝཏཱ ‘‘ཨནུཛཱནཱམི བྷིཀྑཝེ པཱཐེཡྻཾ པརིཡེསིཏུཾ. ཏཎྜུལོ ཏཎྜུལཏྠིཀེན, མུགྒོ མུགྒཏྠིཀེན, མཱསོ མཱསཏྠིཀེན, ལོཎཾ ལོཎཏྠིཀེན, གུལོ༹ གུལ༹ཏྠིཀེན, ཏེལཾ ཏེལཏྠིཀེན, སཔྤི སཔྤིཏྠིཀེནཱ’’ཏི ཝཏྭཱ ཨིདཾ ཝུཏྟཾ ‘‘སནྟི, བྷིཀྑཝེ, མནུསྶཱ སདྡྷཱ པསནྣཱ, ཏེ ཀཔྤིཡཀཱརཀཱནཾ ཧཏྠེ ཧིརཉྙཾ ཨུཔནིཀྑིཔནྟི ‘ཨིམིནཱ ཡཾ ཨཡྻསྶ ཀཔྤིཡཾ, ཏཾ དེཐཱ’ཏི. ཨནུཛཱནཱམི, བྷིཀྑཝེ, ཡཾ ཏཏོ ཀཔྤིཡཾ, ཏཾ སཱདིཏུཾ, ན ཏྭེཝཱཧཾ, བྷིཀྑཝེ, ཀེནཙི ¶ པརིཡཱཡེན ཛཱཏརཱུཔརཛཏཾ སཱདིཏབྦཾ པརིཡེསིཏབྦནྟི ཝདཱམཱི’’ཏི. ‘‘ཀཔྤིཡཀཱརཀཱནཾ ཧཏྠེ ཧིརཉྙཾ ནིཀྑིཔནྟཱི’’ཏི ཨེཏྠཱཔི བྷིཀྑུསྶ ཨཱརོཙནཾ ཨཏྠིཡེཝ, ཨཉྙཐཱ ཨནིདྡིཊྛཀཔྤིཡཀཱརཀཔཀྑཾ བྷཛཏཱིཏི ན ཙོདེཏབྦོ སིཡཱ, ཨིདཾ པན དཱུཏེན ནིདྡིཊྛཀཔྤིཡཀཱརཀེ སནྡྷཱཡ ཝུཏྟཾ, ན པན བྷིཀྑུནཱ ནིདྡིཊྛེ ཝཱ ཨནིདྡིཊྛེ ཝཱ. ཏེནེཝཱཧ ‘‘ཨེཏྠ ཙོདནཱཡ པརིམཱཎཾ ནཏྠཱི’’ཏིཨཱདི. ཡདི མཱུལཾ སནྡྷཱཡ ཙོདེཏི, ཏཾ སཱདིཏམེཝ སིཡཱཏི ཨཱཧ ‘‘མཱུལཾ ཨསཱདིཡནྟེནཱ’’ཏི.

ཨཉྙཱཏཀཨཔྤཝཱརིཏེསུ ཝིཡ པཊིཔཛྫིཏབྦནྟི ཨིདཾ ཨཏྟནཱ ཙོདནཱཊྛཱནཉྩ ན ཀཱཏབྦནྟི དསྶནཏྠཾ ཝུཏྟཾ. པིཎྜཔཱཏཱདཱིནཾ ཨཏྠཱཡཱཏི ཨིམིནཱ ཙཱིཝརཏྠཱཡེཝ ན ཧོཏཱིཏི དསྶེཏི. ཨེསེཝ ནཡོཏི ཨིམིནཱ ཝཏྠུསཱམིནཱ ནིདྡིཊྛཀཔྤིཡཀཱརཀེསུཔི པིཎྜཔཱཏཱདཱིནམྤི ཨཏྠཱཡ དིནྣེ ཙ ཋཱནཙོདནཱདིསབྦཾ ཧེཊྛཱ ཝུཏྟནཡེནེཝ ཀཱཏབྦནྟི དསྶེཏི.

༦༦. ཨུཔནིཀྑིཏྟསཱདིཡནེ ¶ པནཱཏིཨཱདཱིསུ ‘‘ཨིདཾ ཨཡྻསྶ ཧོཏཱུ’’ཏི ཨེཝཾ སམྨུཁཱ ཝཱ ‘‘ཨམུཀསྨིཾ ནཱམ ཋཱནེ མམ ཧིརཉྙསུཝཎྞཾ ཨཏྠི, ཏཾ ཏུཡ྄ཧཾ ཧོཏཱུ’’ཏི ཨེཝཾ པརམྨུཁཱ ཝཱ ཋིཏསྶ ཀེཝལཾ ཝཱཙཱཡ ཝཱ ཧཏྠམུདྡཱཡ ཝཱ ‘‘ཏུཡ྄ཧ’’ནྟི ཝཏྭཱ པརིཙྩཏྟསྶ ཀཱཡཝཱཙཱཧི ཨཔྤཊིཀྑིཔིཏྭཱ ཙིཏྟེན སཱདིཡནཾ ཨུཔནིཀྑིཏྟསཱདིཡནཾ ནཱམ. སཱདིཡཏཱིཏི ཝུཏྟམེཝཏྠཾ ཝིབྷཱཝེཏི ‘‘གཎྷིཏུཀཱམོ ཧོཏཱི’’ཏི.

ཨིདཾ གུཏྟཊྛཱནནྟི ཨཱཙིཀྑིཏབྦནྟི པཙྩཡཔརིབྷོགཾཡེཝ སནྡྷཱཡ ཨཱཙིཀྑིཏབྦཾ. ‘‘ཨིདྷ ནིཀྑིཔཱ’’ཏི ཝུཏྟེ ‘‘ཨུགྒཎྷཱཔེཡྻ ཝཱ’’ཏི ཝུཏྟལཀྑཎེན ནིསྶགྒིཡཾ ཧོཏཱིཏི ཨཱཧ ‘‘ཨིདྷ ནིཀྑིཔཱཧཱིཏི ན ཝཏྟབྦ’’ནྟི. ཨཐ ཝཱ ‘‘ཨིདཾ གུཏྟཊྛཱན’’ནྟི ཨཱཙིཀྑནྟོ ཋཱནསྶ གུཏྟབྷཱཝམེཝ དསྶེཏི, ན ཝཏྠུཾ པརཱམསཏི, ཏསྨཱ ཨཱཙིཀྑིཏབྦཾ. ‘‘ཨིདྷ ནིཀྑིཔཱཧཱི’’ཏི པན ཝདནྟོ ¶ ནིཀྑིཔིཏབྦཾ ཝཏྠུཾ ནིཀྑིཔཱཧཱིཏི ཝཏྠུཾ པརཱམསཏི ནཱམ, ཏསྨཱ ན ཝཏྟབྦཾ. པརཏོ ཨིདཾ གཎྷཱཏི ཨེཏྠཱཔི ཨེསེཝ ནཡོ. ཀཔྤིཡཉྩ ཨཀཔྤིཡཉྩ ནིསྶཱཡ ཋིཏཾ ཧོཏཱིཏི ཡསྨཱ ཏཏོ ཨུཔྤནྣཔཙྩཡཔརིབྷོགོ ཀཔྤཏི, ཏསྨཱ ཀཔྤིཡཾ ནིསྶཱཡ ཋིཏཾ, ཡསྨཱ པན དུབྦིཙཱརཎཱཡ ཏཏོ ཨུཔྤནྣཔཙྩཡཔརིབྷོགོ ན ཀཔྤཏི, ཏསྨཱ ཨཀཔྤིཡཾ ནིསྶཱཡ ཋིཏནྟི ཝེདིཏབྦཾ. ཨཐ ཝཱ ཨིདཾ དྷནཾ ཡསྨཱ ‘‘ནཡིདཾ ཀཔྤཏཱི’’ཏི པཊིཀྑིཏྟཾ, ཏསྨཱ ཀཔྤིཡཾ ནིསྶཱཡ ཋིཏཾ, ཡསྨཱ པན སབྦསོ ཨཝིསྶཛྫིཏཾ, ཏསྨཱ ཨཀཔྤིཡཾ ནིསྶཱཡ ཋིཏཾ. ཨཐ ཝཱ ཏཾ དྷནཾ ཡསྨཱ པཙྪཱ སུཊྛུཝིཙཱརཎཱཡ སཏིཡཱ ཀཔྤིཡཾ བྷཝིསྶཏི, དུབྦིཙཱརཎཱཡ སཏིཡཱ ཨཀཔྤིཡཾ བྷཝིསྶཏི, ཏསྨཱ ཀཔྤིཡཉྩ ཨཀཔྤིཡཉྩ ནིསྶཱཡ ཋིཏཾ ཧོཏཱིཏི. ཝིམཏིཝིནོདནིཡཾ པན ‘‘ཨེཀོ སཏཾ ཝཱ སཧསྶཾ ཝཱཏིཨཱདི རཱུཔིཡེ ཧེཊྛིམཀོཊིཡཱ པཝཏྟནཱཀཱརཾ དསྶེཏུཾ ཝུཏྟ’’ནྟི ཙ ‘‘ན པན ཨེཝཾ པཊིཔཛྫིཏབྦམེཝཱཏི དསྶེཏུཾ, ‘ཨིདྷ ནིཀྑིཔཱཧཱི’ཏི ཝུཏྟེ ཨུགྒཎྷཱཔནཾ ཧོཏཱིཏི ཨཱཧ ‘ཨིདྷ ནིཀྑིཔཱཧཱི’ཏི ན ཝཏྟབྦ’’ནྟི ཙ ‘‘ཀཔྤིཡཉྩ…པེ… ཧོཏཱིཏི ཡསྨཱ ཨསཱདིཏཏྟཱ ཏཏོ ཨུཔྤནྣཔཙྩཡཱ ཝཊྚནྟི, ཏསྨཱ ཀཔྤིཡཾ ནིསྶཱཡ ཋིཏཾ, ཡསྨཱ པན དུབྦིཙཱརཎཱཡ སཏི ཏཏོ ཨུཔྤནྣཾ ན ཀཔྤཏི, ཏསྨཱ ཨཀཔྤིཡཾ ནིསྶཱཡ ཋིཏནྟི ཝེདིཏབྦ’’ནྟི ཙ ཝུཏྟཾ.

༦༧. སངྒྷམཛ྄ཛྷེ ནིསྶཛྫིཏབྦནྟི ཡསྨཱ རཱུཔིཡཾ ནཱམ ཨཀཔྤིཡཾ, ཏསྨཱ སངྒྷསྶ ཝཱ གཎསྶ ཝཱ པུགྒལསྶ ཝཱ ནིསྶཛྫིཏབྦནྟི ན ཝུཏྟཾ. ཡསྨཱ པན ཏཾ པཊིགྒཧིཏམཏྟམེཝ ཧོཏི, ན ཏེན ཀིཉྩི ཀཔྤིཡབྷཎྜཾ ཙེཏཱཔིཏཾ, ཏསྨཱ ཨུཔཱཡེན པརིབྷོགདསྶནཏྠཾ ‘‘སངྒྷམཛ྄ཛྷེ ནིསྶཛྫིཏབྦ’’ནྟི ¶ (པཱརཱ. ༥༨༤) ཝུཏྟཾ. ན ཏེན ཀིཉྩི ཀཔྤིཡབྷཎྜཾ ཙེཏཱཔིཏནྟི ཨིམིནཱ ཙེཏཱཔིཏཉྩེ, ནཏྠི པརིབྷོགཱུཔཱཡོ ཨུགྒཧེཏྭཱ ཨནིསྶཊྛརཱུཔིཡེན ཙེཏཱཔིཏཏྟཱ. ཨཱིདིསཉྷི སངྒྷམཛ྄ཛྷེ ནིསྶཛྫནཾ ཀཏྭཱཝ ¶ ཚཌྜེཏྭཱ པཱཙིཏྟིཡཾ དེསཱཔེཏབྦནྟི དསྶེཏི. ཀེཙི པན ‘‘ཡསྨཱ ནིསྶགྒིཡཝཏྠུཾ པཊིགྒཧེཏྭཱཔི ཙེཏཱཔིཏཾ ཀཔྤིཡབྷཎྜཾ སངྒྷེ ནིསྶཊྛཾ ཀཔྤིཡཀཱརཀེཧི ནིསྶཊྛརཱུཔིཡེན པརིཝཏྟེཏྭཱ ཨཱནཱིཏཀཔྤིཡབྷཎྜསདིསཾ ཧོཏི, ཏསྨཱ ཝིནཱཝ ཨུཔཱཡཾ བྷཱཛེཏྭཱ པརིབྷུཉྫིཏུཾ ཝཊྚཏཱི’’ཏི ཝདནྟི, ཏཾ པཏྟཙཏུཀྐཱདིཀཐཱཡ ན སམེཏི. ཏཏྠ ཧི རཱུཔིཡེན པརིཝཏྟིཏཔཏྟསྶ ཨཔརིབྷོགོཝ དསྶིཏོ, ན ནིསྶཛྫནཝིཙཱརོཏི. ཀཔྤིཡཾ ཨཱཙིཀྑིཏབྦནྟི པབྦཛིཏཱནཾ སཔྤི ཝཱ ཏེལཾ ཝཱ ཝཊྚཏི ཨུཔཱསཀཱཏི ཨེཝཾ ཨཱཙིཀྑིཏབྦཾ.

ཨཱརཱམིཀཱནཾ ཝཱ པཏྟབྷཱགནྟི ཨིདཾ གིཧཱིནཾ ཧཏྠགཏོཔི སོཡེཝ བྷཱགོཏི ཀཏྭཱ ཝུཏྟཾ. སཙེ པན ཏེན ཨཉྙཾ པརིཝཏྟེཏྭཱ ཨཱརཱམིཀཱ དེནྟི, པརིབྷུཉྫིཏུཾ ཝཊྚཏཱིཏི མཛ྄ཛྷིམགཎྛིཔདེ ཙཱུལ༹གཎྛིཔདེ ཙ ཝུཏྟཾ. ཏཏོ ཧརིཏྭཱཏི ཨཉྙེསཾ པཏྟབྷཱགཏོ ཧརིཏྭཱ. ཀསིཎཔརིཀམྨནྟི ཨཱལོཀཀསིཎཔརིཀམྨཾ. མཉྩཔཱིཋཱདཱིནི ཝཱཏི ཨེཏྠ ཏཏོ གཧིཏམཉྩཔཱིཋཱདཱིནི པརིཝཏྟེཏྭཱ ཨཉྙཾ ཙེ གཧིཏཾ, ཝཊྚཏཱིཏི ཝདནྟི. ཚཱཡཱཔཱིཏི བྷོཛནསཱལཱདཱིནཾ ཚཱཡཱཔི. པརིཙྪེདཱཏིཀྐནྟཱཏི གེཧཔརིཙྪེདཾ ཨཏིཀྐནྟཱ, ཚཱཡཱཡ གཏགཏཊྛཱནཾ གེཧཾ ན ཧོཏཱིཏི ཨདྷིཔྤཱཡོ. མགྒེནཔཱིཏི ཨེཏྠ སཙེ ཨཉྙོ མགྒོ ནཏྠི, མགྒཾ ཨདྷིཊྛཧིཏྭཱ གནྟུཾ ཝཊྚཏཱིཏི ཝདནྟི. ཀཱིཏཱཡཱཏི ཏེན ཝཏྠུནཱ ཀཱིཏཱཡ. ཨུཔནིཀྑེཔཾ ཋཔེཏྭཱ སངྒྷོ པཙྩཡེ པརིབྷུཉྫཏཱིཏི སཙེ ཨུཔཱསཀོ ‘‘ཨཏིབཧུ ཨེཏཾ ཧིརཉྙཾ, ཨིདཾ བྷནྟེ ཨཛྫེཝ ན ཝིནཱསེཏབྦ’’ནྟི ཝཏྭཱ སཡཾ ཨུཔནིཀྑེཔཾ ཋཔེཏི, ཨཉྙེན ཝཱ ཋཔཱཔེཏི, ཨེཝཾ ཨུཔནིཀྑེཔཾ ཋཔེཏྭཱ ཏཏོ ཨུཔྤནྣཔཙྩཡཾ པརིབྷུཉྫནྟོ སངྒྷོ པཙྩཡེ པརིབྷུཉྫཏི, ཏེན ཝཏྠུནཱ གཧིཏཏྟཱ ‘‘ཨཀཔྤིཡ’’ནྟི ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ༡.༥༨༣-༥༨༤) པན ‘‘ཨུཔནིཀྑེཔཾ ཋཔེཏྭཱཏི ཀཔྤིཡཀཱརཀེཧི ¶ ཝཌྜྷིཡཱ པཡོཛནཾ སནྡྷཱཡ ཝུཏྟཾ. ཨཀཔྤིཡནྟི ཏེན ཝཏྠུནཱ གཧིཏཏྟཱ ཝུཏྟ’’ནྟི ཝུཏྟཾ.

སཙེ སོ ཚཌྜེཏཱིཏི ཡཏྠ ཀཏྠཙི ཁིཔཏི, ཨཐཱཔི ན ཚཌྜེཏི, སཡཾ གཧེཏྭཱ གཙྪཏི, ན ཝཱརེཏབྦོ. ནོ ཙེ ཚཌྜེཏཱིཏི ཨཐ ནེཝ གཧེཏྭཱ གཙྪཏི, ན ཚཌྜེཏི, ‘‘ཀིཾ མཡ྄ཧཾ ཨིམིནཱ བྱཱཔཱརེནཱ’’ཏི ཡེནཀཱམཾ པཀྐམཏི, ཏཏོ ཡཐཱཝུཏྟལཀྑཎོ རཱུཔིཡཚཌྜཀོ སམནྣིཏབྦོ. ཡོ ན ཚནྡཱགཏིནྟིཨཱདཱིསུ ལོབྷཝསེན ཏཾ ཝཏྠུཾ ཨཏྟནོ ཝཱ ཀརོནྟོ ཨཏྟཱནཾ ཝཱ ཨུཀྐཾསེནྟོ ཚནྡཱགཏིཾ ¶ ནཱམ གཙྪཏི. དོསཝསེན ‘‘ནེཝཱཡཾ མཱཏིཀཾ ཛཱནཱཏི, ན ཝིནཡ’’ནྟི པརཾ ཨཔསཱདེནྟོ དོསཱགཏིཾ ནཱམ གཙྪཏི. མོཧཝསེན པམུཊྛོ པམུཊྛསྶཏིབྷཱཝཾ ཨཱཔཛྫནྟོ མོཧཱགཏིཾ ནཱམ གཙྪཏི. རཱུཔིཡཔཊིགྒཱཧཀསྶ བྷཡེན ཚཌྜེཏུཾ ཨཝིསཧནྟོ བྷཡཱགཏིཾ ནཱམ གཙྪཏི. ཨེཝཾ ཨཀརོནྟོ ན ཚནྡཱགཏིཾ གཙྪཏི, ན དོསཱགཏིཾ གཙྪཏི, ན མོཧཱགཏིཾ གཙྪཏི, ན བྷཡཱགཏིཾ གཙྪཏི ནཱམཱཏི ཝེདིཏབྦོ.

༦༨. པཏིཏོཀཱསཾ ཨསམནྣཱརཧནྟེན ཚཌྜེཏབྦནྟི ཨིདཾ ནིརཔེཀྑབྷཱཝདསྶནཔརནྟི ཝེདིཏབྦཾ, ཏསྨཱ པཏིཏཊྛཱནེ ཉཱཏེཔི ཏསྶ གཱུཐཾ ཚཌྜེནྟསྶ ཝིཡ ནིརཔེཀྑབྷཱཝོཡེཝེཏྠ པམཱཎནྟི ཝེདིཏབྦཾ. ཨསནྟསམྦྷཱཝནཱཡཱཏི ཨཏྟནི ཨཝིཛྫམཱནཨུཏྟརིམནུསྶདྷམྨཱརོཙནཾ སནྡྷཱཡ ཝུཏྟཾ. ཐེཡྻཔརིབྷོགོ ནཱམ ཨནརཧསྶ པརིབྷོགོ. བྷགཝཏཱ ཧི ཨཏྟནོ སཱསནེ སཱིལཝཏོ པཙྩཡཱ ཨནུཉྙཱཏཱ, ན དུསྶཱིལསྶ. དཱཡཀཱནམྤི སཱིལཝཏོ ཨེཝ པརིཙྩཱགོ, ན དུསྶཱིལསྶ ཨཏྟནོ ཀཱརཱནཾ མཧཔྥལབྷཱཝསྶ པཙྩཱསཱིསནཏོ. ཨིཏི སཏྠཱརཱ ཨནནུཉྙཱཏཏྟཱ དཱཡཀེཧི ཙ ཨཔརིཙྩཏྟཏྟཱ དུསྶཱིལསྶ པརིབྷོགོ ཐེཡྻཔརིབྷོགོ. ཨིཎཝསེན པརིབྷོགོ ཨིཎཔརིབྷོགོ, པཊིགྒཱཧཀཏོ དཀྑིཎཱཝིསུདྡྷིཡཱ ¶ ཨབྷཱཝཏོ ཨིཎཾ གཧེཏྭཱ པརིབྷོགོ ཝིཡཱཏི ཨཏྠོ. ཏསྨཱཏི ‘‘སཱིལཝཏོ’’ཏིཨཱདིནཱ ཝུཏྟམེཝཏྠཾ ཀཱརཎབྷཱཝེན པཙྩཱམསཏི. ཙཱིཝརཾ པརིབྷོགེ པརིབྷོགེཏི ཀཱཡཏོ མོཙེཏྭཱ པརིབྷོགེ པརིབྷོགེ. པུརེབྷཏྟ…པེ… པཙྪིམཡཱམེསུ པཙྩཝེཀྑིཏབྦནྟི སམྦནྡྷོ. ཏཐཱ ཨསཀྐོནྟེན ཡཐཱཝུཏྟཀཱལཝིསེསཝསེན ཨེཀསྨིཾ དིཝསེ ཙཏུཀྑཏྟུཾ ཏིཀྑཏྟུཾ དྭིཀྑཏྟུཾ སཀིཾཡེཝ ཝཱ པཙྩཝེཀྑིཏབྦཾ.

སཙསྶ ཨཔྤཙྩཝེཀྑཏོཝ ཨརུཎོ ཨུགྒཙྪཏི, ཨིཎཔརིབྷོགཊྛཱནེ ཏིཊྛཏཱིཏི ཨེཏྠ ཧིཡྻོ ཡཾ མཡཱ ཙཱིཝརཾ པརིབྷུཏྟཾ, ཏཾ ཡཱཝདེཝ སཱིཏསྶ པཊིགྷཱཏཱཡ…པེ… ཧིརིཀོཔིནཔཊིཙྪཱདནཏྠཾ. ཧིཡྻོ ཡོ མཡཱ པིཎྜཔཱཏོ པརིབྷུཏྟོ, སོ ནེཝ དཝཱཡཱཏིཨཱདིནཱ སཙེ ཨཏཱིཏཔརིབྷོགཔཙྩཝེཀྑཎཾ ན ཀརེཡྻ, ཨིཎཔརིབྷོགཊྛཱནེ ཏིཊྛཏཱིཏི ཝདནྟི, ཏཾ ཝཱིམཾསིཏབྦཾ. སེནཱསནམྤི པརིབྷོགེ པརིབྷོགེཏི པཝེསེ པཝེསེ. ཨེཝཾ པན ཨསཀྐོནྟེན པུརེབྷཏྟཱདཱིསུ པཙྩཝེཀྑིཏབྦཾ, ཏཾ ཧེཊྛཱ ཝུཏྟནཡེནེཝ སཀྐཱ ཝིཉྙཱཏུནྟི ཨིདྷ ཝིསུཾ ན ཝུཏྟཾ. སཏིཔཙྩཡཏཱཏི སཏིཡཱ པཙྩཡབྷཱཝོ. པཊིགྒཧཎསྶ པརིབྷོགསྶ ཙ པཙྩཝེཀྑཎསཏིཡཱ པཙྩཡབྷཱཝོ ཡུཛྫཏི, པཙྩཝེཀྑིཏྭཱཝ པཊིགྒཧེཏབྦཾ པརིབྷུཉྫིཏབྦཉྩཱཏི ཨཏྠོ. ཏེནེཝཱཧ ‘‘སཏིཾ ཀཏྭཱ’’ཏིཨཱདི. ཨེཝཾ སནྟེཔཱིཏི ཡདིཔི དྭཱིསུཔི ཋཱནེསུ པཙྩཝེཀྑཎཱ ཡུཏྟཱ, ཨེཝཾ སནྟེཔི ¶ . ཨཔརེ པནཱཧུ ‘‘སཏིཔཙྩཡཏཱཏི སཏི བྷེསཛྫཔརིབྷོགསྶ པཙྩཡབྷཱཝེ, པཙྩཡེཏི ཨཏྠོ. ཨེཝཾ སནྟེཔཱིཏི པཙྩཡེ སཏིཔཱི’’ཏི, ཏཾ ཏེསཾ མཏིམཏྟཾ. ཏཐཱ ཧི པཙྩཡསནྣིསྶིཏསཱིལཾ པཙྩཝེཀྑཎཱཡ ཝིསུཛ྄ཛྷཏི, ན པཙྩཡསབྦྷཱཝམཏྟེན.

ནནུ ཙ ‘‘པརིབྷོགེ ཀརོནྟསྶ ཨནཱཔཏྟཱི’’ཏི ཨིམིནཱ པཱཏིམོཀྑསཾཝརསཱིལཾ ཝུཏྟཾ, ཏསྨཱ པཙྩཡསནྣིསྶིཏསཱིལསྶ པཱཏིམོཀྑསཾཝརསཱིལསྶ ¶ ཙ ཀོ ཝིསེསོཏི? ཝུཙྩཏེ – པུརིམེསུ ཏཱཝ ཏཱིསུ པཙྩཡེསུ ཝིསེསོ པཱཀཊོཡེཝ, གིལཱནཔཙྩཡེ པན ཡཐཱ ཝཏིཾ ཀཏྭཱ རུཀྑམཱུལེ གོཔིཏེ ཏསྶ ཕལཱནིཔི རཀྑིཏཱནེཝ ཧོནྟི, ཨེཝམེཝ པཙྩཝེཀྑཎཱཡ པཙྩཡསནྣིསྶིཏསཱིལེ རཀྑིཏེ ཏཔྤཊིབདྡྷཾ པཱཏིམོཀྑསཾཝརསཱིལམྤི ནིཔྥནྣཾ ནཱམ ཧོཏི. གིལཱནཔཙྩཡཾ ཨཔྤཙྩཝེཀྑིཏྭཱ པརིབྷུཉྫནྟསྶ སཱིལཾ བྷིཛྫམཱནཾ པཱཏིམོཀྑསཾཝརསཱིལམེཝ བྷིཛྫཏི, པཙྩཡསནྣིསྶིཏསཱིལཾ པན པཙྪཱབྷཏྟཔུརིམཡཱམཱདཱིསུ ཡཱཝ ཨརུཎུགྒམནཱ ཨཔྤཙྩཝེཀྑནྟསྶེཝ བྷིཛྫཏི. པུརེབྷཏྟཉྷི ཨཔྤཙྩཝེཀྑིཏྭཱཔི གིལཱནཔཙྩཡཾ པརིབྷུཉྫནྟསྶ ཨནཱཔཏྟི, ཨིདམེཏེསཾ ནཱནཱཀརཎནྟི སཱརཏྠདཱིཔནིཡཾ (སཱརཏྠ. ཊཱི. ༢.༥༨༥) ཨཱགཏཾ.

ཝིམཏིཝིནོདནིཡཾ (ཝི. ཝི. ཊཱི. ༡.༥༨༥) པན ‘‘ཐེཡྻཔརིབྷོགོཏི པཙྩཡསྶཱམིནཱ བྷགཝཏཱ ཨནནུཉྙཱཏཏྟཱ ཝུཏྟཾ. ཨིཎཔརིབྷོགོཏི བྷགཝཏཱ ཨནུཉྙཱཏམྤི ཀཏྟབྦཾ ཨཀཏྭཱ པརིབྷུཉྫནཏོ ཝུཏྟཾ. ཏེན ཙ པཙྩཡསནྣིསྶིཏསཱིལཾ ཝིཔཛྫཏཱིཏི དསྶེཏི. པརིབྷོགེ པརིབྷོགེཏི ཀཱཡཏོ མོཙེཏྭཱ མོཙེཏྭཱ པརིབྷོགེ. པཙྪིམཡཱམེསུ པཙྩཝེཀྑིཏབྦནྟི ཡོཛནཱ. ཨིཎཔརིབྷོགཊྛཱནེ ཏིཊྛཏཱིཏི ཨེཏྠ ‘ཧིཡྻོ ཡཾ མཡཱ ཙཱིཝརཾ པརིབྷུཏྟ’ནྟིཨཱདིནཱཔི ཨཏཱིཏཔཙྩཝེཀྑཎཱ ཝཊྚཏཱིཏི ཝདནྟི. པརིབྷོགེ པརིབྷོགེཏི ཨུདཀཔཏནཊྛཱནཏོ ཨནྟོཔཝེསནེསུ ནིསཱིདནསཡནེསུ ཙ. སཏིཔཙྩཡཏཱ ཝཊྚཏཱིཏི པཙྩཝེཀྑཎསཏིཡཱ པཙྩཡཏྟཾ ལདྡྷུཾ ཝཊྚཏི. པཊིགྒཧཎེ ཙ པརིབྷོགེ ཙ པཙྩཝེཀྑཎཱསཏི ཨཝསྶཾ ལདྡྷབྦཱཏི དསྶེཏི. ཏེནཱཧ ‘སཏིཾ ཀཏྭཱ’ཏིཨཱདི. ཀེཙི པན ‘སཏིཔཙྩཡཏཱ པཙྩཡེ སཏི བྷེསཛྫཔརིབྷོགསྶ ཀཱརཎེ སཏཱི’ཏི ཨེཝམྤི ཨཏྠཾ ཝདནྟི, ཏེསམྤི པཙྩཡེ སཏཱིཏི པཙྩཡསབྦྷཱཝསལླཀྑཎེ སཏཱིཏི ཨེཝམཏྠོ གཧེཏབྦོ ¶ པཙྩཡསབྦྷཱཝམཏྟེན སཱིལསྶ ཨསུཛ྄ཛྷནཏོ. པརིབྷོགེ ཨཀརོནྟསྶེཝ ཨཱཔཏྟཱིཏི ཨིམིནཱ པཱཏིམོཀྑསཾཝརསཱིལསྶ བྷེདོ དསྶིཏོ, ན པཙྩཡསནྣིསྶིཏསཱིལསྶ ཏསྶ ཨཏཱིཏཔཙྩཝེཀྑཎཱཡ ཝིསུཛ྄ཛྷནཏོ. ཨེཏསྨིཾ པན སེསཔཙྩཡེསུ ཙ ཨིཎཔརིབྷོགཱདིཝཙནེན པཙྩཡསནྣིསྶིཏསཱིལསྶེཝ བྷེདོཏི ཨེཝམིམེསཾ ནཱནཱཀརཎཾ ཝེདིཏབྦ’’ནྟི ཨཱགཏཾ.

ཨེཏེསུ ¶ དྭཱིསུ པཀརཎེསུ ‘‘ཨིཎཔརིབྷོགཊྛཱནེ ཏིཊྛཏཱི’’ཏི ཨེཏྠ ཧིཡྻོ ཡཾ མཡཱ ཙཱིཝརཾ པརིབྷུཏྟནྟི…པེ… ཝདནྟཱིཏི ཨཱགཏཾ. ཨིམཾ པན ནཡཾ ནིསྶཱཡ ཨིདཱནི ཨེཀཙྩེ པཎྜིཏཱ ‘‘ཨཛྫཔཱཏོ པརིབྷུཏྟཾ སཱཡཾ པཙྩཝེཀྑནྟེན ཨཛྫ ཡཾ མཡཱ ཙཱིཝརཾ པརིབྷུཏྟནྟིཨཱདིནཱ ཨཏཱིཏཝསེན པཙྩཝེཀྑཎཱ ཀཱཏབྦཱ’’ཏི ཝདནྟི. ཀེཙི ‘‘ཧིཡྻོ པརིབྷུཏྟམེཝ ཨཏཱིཏཝསེན པཙྩཝེཀྑཎཱ ཀཱཏབྦཱ, ན ཨཛྫ པརིབྷུཏྟཾ, ཏཾ པན པཙྩུཔྤནྣཝསེན པཙྩཝེཀྑཎཱཡེཝཱ’’ཏི ཝདནྟི. ཏཏྠ མཱུལཝཙནེ ཨེཝཾ ཝིཙཱརཎཱ ཀཱཏབྦཱ. ཀཐཾ? ཨིདཾ ཧིཡྻོཏྱཱདིཝཙནཾ སུཏྟཾ ཝཱ སུཏྟཱནུལོམཾ ཝཱ ཨཱཙརིཡཝཱདོ ཝཱ ཨཏྟནོམཏི ཝཱཏི. ཏཏྠ ན ཏཱཝ སུཏྟཾ ཧོཏི ‘‘སུཏྟཾ ནཱམ སཀལེ ཝིནཡཔིཊཀེ པཱལཱི༹’’ཏི ཝུཏྟཏྟཱ ཨིམསྶ ཙ ཝཙནསྶ ན པཱལི༹བྷཱུཏཏྟཱ. ན ཙ སུཏྟཱནུལོམཾ ‘‘སུཏྟཱནུལོམཾ ནཱམ ཙཏྟཱརོ མཧཱཔདེསཱ’’ཏི (པཱརཱ. ཨཊྛ. ༡.༤༥) ཝུཏྟཏྟཱ ཨིམསྶ ཙ མཧཱཔདེསབྷཱཝཱབྷཱཝཏོ. ན ཙ ཨཱཙརིཡཝཱདོ ‘‘ཨཱཙརིཡཝཱདོ ནཱམ དྷམྨསངྒཱཧཀེཧི པཉྩཧི ཨརཧནྟསཏེཧི ཋཔིཏཱ པཱལི༹ཝིནིམུཏྟཱ ཨོཀྐནྟཝིནིཙྪཡཔྤཝཏྟཱ ཨཊྛཀཐཱཏནྟཱི’’ཏི ཝཙནཏོ ཨིམསྶ ཙ ཨཊྛཀཐཱཔཱཋབྷཱཝཱབྷཱཝཏོ. ན ཙ ཨཏྟནོམཏི ‘‘ཨཏྟནོམཏི ནཱམ སུཏྟསུཏྟཱནུལོམཨཱཙརིཡཝཱདེ མུཉྩིཏྭཱ ཨནུམཱནེན ཨཏྟནོ བུདྡྷིཡཱ ནཡགྒཱཧེན ཨུཔཊྛིཏཱཀཱརཀཐནཾ, ཨཔིཙ སུཏྟནྟཱབྷིདྷམྨཝིནཡཊྛཀཐཱསུ ཨཱགཏོ སབྦོཔི ¶ ཐེརཝཱདོ ཨཏྟནོམཏི ནཱམཱ’’ཏི ཝུཏྟཏྟཱ ཨིམསྶ ཙ ཨཊྛཀཐཱསུ ཨཱགཏཏྠེརཝཱདབྷཱཝཱབྷཱཝཏོ.

ཨིཏི –

‘‘ཙཏུབྦིདྷཉྷི ཝིནཡཾ, མཧཱཐེརཱ མཧིདྡྷིཀཱ;

ནཱིཧརིཏྭཱ པཀཱསེསུཾ, དྷམྨསངྒཱཧཀཱ པུརཱ’’ཏི. (པཱརཱ. ཨཊྛ. ༡.༤༥) –

ཝུཏྟེསུ ཙཏུབྦིདྷཝིནཡེསུ ཨནནྟོགདྷཏྟཱ ཨིདཾ ཝཙནཾ ཝིཙཱརེཏབྦཾ. ཏེན ཝུཏྟཾ སཱརཏྠདཱིཔནིཡཾ (སཱརཏྠ. ཊཱི. ༢.༥༨༥) ཊཱིཀཱཙརིཡེན ‘‘ཏཾ ཝཱིམཾསིཏབྦ’’ནྟི. ཨཐ ཝཱ ‘‘ནཡགྒཱཧེན ཨུཔཊྛིཏཱཀཱརཀཐན’’ནྟི ཨིམིནཱ ལཀྑཎེན ཏེསཾ ཏེསཾ ཨཱཙརིཡཱནཾ ཨུཔཊྛིཏཱཀཱརཝསེན ཀཐནཾ ཨཏྟནོམཏི སིཡཱ, ཨེཝམྤི ཝིཙཱརེཏབྦམེཝ. ‘‘ཨཏྟནོམཏི ཨཱཙརིཡཝཱདེ ཨོཏཱརེཏབྦཱ. སཙེ ཏཏྠ ཨོཏརཏི ཙེཝ སམེཏི ཙ, གཧེཏབྦཱ. སཙེ ནེཝ ཨོཏརཏི ན སམེཏི, ན གཧེཏབྦཱ. ཨཡཉྷི ཨཏྟནོམཏི ནཱམ སབྦདུབྦལཱ’’ཏི (པཱརཱ. ཨཊྛ. ༡.༤༥) ཝཙནཏོ ཨིམསྶ ཙ ཝཙནསྶ ¶ ཨཊྛཀཐཱཝཙནེ ཨནོཏརཎཏོ ཨཔྤཝིསནཏོ. ཝུཏྟཉྷི ཨཊྛཀཐཱཡཾ ‘‘སཙསྶ ཨཔྤཙྩཝེཀྑཏོཝ ཨརུཎོ ཨུགྒཙྪཏི, ཨིཎཔརིབྷོགཊྛཱནེ ཏིཊྛཏཱི’’ཏི.

ཨཔརོ ནཡོ – ཀིཾ ཨིདཾ ཝཙནཾ པཱལི༹ཝཙནཾ ཝཱ ཨཊྛཀཐཱཝཙནཾ ཝཱ ཊཱིཀཱཝཙནཾ ཝཱ གནྠནྟརཝཙནཾ ཝཱཏི. ཏཏྠ ན ཏཱཝ པཱལི༹ཝཙནཾ, ན ཨཊྛཀཐཱཝཙནཾ, ན གནྠནྟརཝཙནཾ, ཨཐ ཁོ ཊཱིཀཱཝཙནནྟི. ཧོཏུ ཊཱིཀཱཝཙནཾ, སཀཝཙནཾ ཝཱ པརཝཙནཾ ཝཱ ཨདྷིཔྤེཏཝཙནཾ ཝཱ ཨནདྷིཔྤེཏཝཙནཾ ཝཱཏི. ཏཏྠ ན སཀཝཙནཾ ཧོཏི, ཨཐ ཁོ པརཝཙནཾ. ཏེནཱཧ ‘‘ཝདནྟཱི’’ཏི. ན ཊཱིཀཱཙརིཡེན ཨདྷིཔྤེཏཝཙནཾ ཧོཏི, ཨཐ ཁོ ཨནདྷིཔྤེཏཝཙནཾ. ཏེནཱཧ ‘‘ཏཾ ཝཱིམཾསིཏབྦ’’ནྟི. ཏེཧི པན ཨཱཙརིཡེཧི ཨཏཱིཏཔརིབྷོགཔཙྩཝེཀྑཎཱཏི ཨིདཾ ¶ ཨཏཱིཏཔཨབྷོགཝསེན པཙྩཝེཀྑཎཱ ཨཏཱིཏཔརིབྷོགཔཙྩཝེཀྑཎཱཏི པརིཀཔྤེཏྭཱ ཨཏཱིཏཝཱཙཀེན སདྡེན ཡོཛེཏྭཱ ཀཏཾ བྷཝེཡྻ. ཨཏཱིཏེ པརིབྷོགོ ཨཏཱིཏཔརིབྷོགོ, ཨཏཱིཏཔརིབྷོགསྶ པཙྩཝེཀྑཎཱ ཨཏཱིཏཔརིབྷོགཔཙྩཝེཀྑཎཱཏི ཨེཝཾ པན ཀཏེ ཨཏཱིཏཔརིབྷོགསྶ པཙྩུཔྤནྣསམཱིཔཏྟཱ པཙྩུཔྤནྣཝཱཙཀེན སདྡེན ཀཐནཾ ཧོཏི ཡཐཱ ཏཾ ནགརཏོ ཨཱགནྟྭཱ ནིསིནྣཾ པུརིསཾ ‘‘ཀུཏོ ཨཱགཙྪསཱི’’ཏི ཝུཏྟེ ‘‘ནགརཏོ ཨཱགཙྪཱམཱི’’ཏི པཙྩུཔྤནྣཝཱཙཀསདྡེན ཀཐནཾ.

ཝིནཡསུཏྟནྟཝིསུདྡྷིམགྒཱདཱིསུ (མ. ནི. ༡.༢༣; ཝིསུདྡྷི. ༡.༡༨) ཙ ‘‘པཊིསངྑཱ ཡོནིསོ ཙཱིཝརཾ པཊིསེཝཏཱི’’ཏི ཝཏྟམཱནཝཙནེནེཝ པཱཋོ ཧོཏི, ན ཨཏཱིཏཝཙནེན, ཨཏཱིཏཔརིབྷོགོཏི ཙ ཨིམསྨིཾཡེཝ དིཝསེ པཙྪཱབྷཏྟཱདིཀཱལཾ ཨུཔཱདཱཡ པུརེབྷཏྟཱདཱིསུ པརིབྷོགོ ཨིཙྪིཏབྦོ, ན ཧིཡྻོ པརིབྷོགོ. ཀཐཾ ཝིཉྙཱཡཏཱིཏི ཙེ? ཨཊྛཀཐཱཔམཱཎེན. ཝུཏྟཉྷི ཨཊྛཀཐཱཡཾ (པཱརཱ. ཨཊྛ. ༢.༥༨༥) ‘‘པིཎྜཔཱཏོ ཨཱལོཔེ ཨཱལོཔེ, ཏཐཱ ཨསཀྐོནྟེན པུརེབྷཏྟཔཙྪཱབྷཏྟཔུརིམཡཱམཔཙྪིམཡཱམེསུ. སཙསྶ ཨཔྤཙྩཝེཀྑཏོཝ ཨརུཎོ ཨུགྒཙྪཏི, ཨིཎཔརིབྷོགཊྛཱནེ ཏིཊྛཏཱི’’ཏི. ཨེཏེན པིཎྜཔཱཏཾ ཨཱལོཔེ ཨཱལོཔེ པཙྩཝེཀྑནྟོ བྷོཛནཀིརིཡཱཡ ཨཔརིནིཊྛིཏཏྟཱ མུཁྱཏོ པཙྩུཔྤནྣཔཙྩཝེཀྑཎཱ ཧོཏི, པུརེབྷཏྟཱདཱིསུ ཙཏཱུསུ ཀོཊྛཱསེསུ པཙྩཝེཀྑནྟོ བྷོཛནཀིརིཡཱཡ པརིནིཊྛིཏཏྟཱ ཨཏཱིཏཔཙྩཝེཀྑཎཱ ཧོཏཱིཏི དསྶེཏི. སཱ པན པཙྩུཔྤནྣསམཱིཔཏྟཱ ཝཏྟམཱནཝཙནེན ཝིདྷཱིཡཏི. ཡདི ཧི ཧིཡྻོ པརིབྷུཏྟཱནི ཨཏཱིཏཔཙྩཝེཀྑཎེན པཙྩཝེཀྑིཏབྦཱནི སིཡུཾ, ཨཏཱིཏདུཏིཡདིཝསཏཏིཡདིཝསཱདིམཱསསཾཝཙྪརཱདིཔརིབྷུཏྟཱནིཔི པཙྩཝེཀྑིཏབྦཱནི སིཡུཾ, ཨེཝཉྩ སཏི ཡཐཱཝུཏྟཨཊྛཀཐཱཝཙནཾ ནིརཏྠཀཾ སིཡཱ, ཏསྨཱ ཨཊྛཀཐཱཝཙནམེཝ པམཱཎཾ ཀཱཏབྦཾ. ཡཐཱཧ –

‘‘བུདྡྷེན ¶ ¶ དྷམྨོ ཝིནཡོ ཙ ཝུཏྟོ;

ཡོ ཏསྶ པུཏྟེཧི ཏཐེཝ ཉཱཏོ;

སོ ཡེཧི ཏེསཾ མཏིམཙྩཛནྟཱ;

ཡསྨཱ པུརེ ཨཊྛཀཐཱ ཨཀཾསུ.

‘‘ཏསྨཱ ཧི ཡཾ ཨཊྛཀཐཱསུ ཝུཏྟཾ;

ཏཾ ཝཛྫཡིཏྭཱན པམཱདལེཁཾ;

སབྦམྤི སིཀྑཱསུ སགཱརཝཱནཾ;

ཡསྨཱ པམཱཎཾ ཨིདྷ པཎྜིཏཱན’’ནྟི. (པཱརཱ. ཨཊྛ. ༡.གནྠཱརམྦྷཀཐཱ);

ཡསྨཱ ཙ སབྦཱསཝསུཏྟཱདཱིསུ (མ. ནི. ༡.༢༣) བྷགཝཏཱ དེསིཏཀཱལེ བྷིཀྑུཀཏྟུཀཏྟཱ ནཱམཡོགཏྟཱ ཝཏྟམཱནཔཋམཔུརིསཝསེན ‘‘པཊིསངྑཱ ཡོནིསོ ཙཱིཝརཾ པཊིསེཝཏཱི’’ཏི དེསིཏཱ, ཏདནུཀརཎེན བྷིཀྑཱུནཾ པཙྩཝེཀྑཎཀཱལེ ཨཏྟཀཏྟུཀཏྟཱ ཨམྷཡོགཏྟཱ ཝཏྟམཱནཨུཏྟམཔུརིསཝསེན ‘‘པཊིསངྑཱ ཡོནིསོ ཙཱིཝརཾ པཊིསེཝཱམཱི’’ཏི པཙྩཝེཀྑིཏབྦཱ ཧོཏི, ‘‘སཱིཏསྶ པཊིགྷཱཏཱཡཱ’’ཏིཨཱདཱིནི ཏདཏྠསམྤདཱནཔདཱནི ཙ ‘‘པཊིསེཝཏི, པཊིསེཝཱམཱི’’ཏི ཝུཏྟཔཊིསེཝནཀིརིཡཱཡམེཝ སམྦནྡྷིཏབྦཱནི ཧོནྟི, ཏཱནི ཙ ཀིརིཡཱཔདཱནི པཙྩུཔྤནྣཝསེན ཝཱ པཙྩུཔྤནྣསམཱིཔཨཏཱིཏཝསེན ཝཱ ཝཏྟམཱནཝིབྷཏྟིཡུཏྟཱནི ཧོནྟི, ཏསྨཱ པཙྩུཔྤནྣཔརིབྷུཏྟཱནཾ ཝཱ ཨཏཱིཏཔརིབྷུཏྟཱནཾ ཝཱ པཙྩཡཱནཾ པཙྩཝེཀྑཎཀཱལེ ‘‘པཊིསེཝཱམཱི’’ཏི ཝཙནཾ བྷགཝཏོ ཝཙནསྶ ཨནུགཏཏྟཱ ཨུཔཔནྣམེཝཱཏི དཊྛབྦཾ.

ཨནུཝཙནེཔི ཨེཝཾ ཝིཙཱརཎཱ ཀཱཏབྦཱ – ‘‘ཨཛྫ པཱཏོ པརིབྷུཏྟཾ སཱཡཾ པཙྩཝེཀྑནྟེན ཨཛྫ ཡཾ མཡཱ ཙཱིཝརཾ པརིབྷུཏྟནྟིཨཱདིནཱ ཨཏཱིཏཝསེན པཙྩཝེཀྑཎཱ ཀཱཏབྦཱ’’ཏི ཡེ ཝདནྟི, ཏེ ཨེཝཾ པུཙྪིཏབྦཱ – ཀིཾ བྷཝནྟོ བྷགཝཏཱ ཨཏཱིཏཔརིབྷུཏྟེསུ ཨཏཱིཏཝསེན པཙྩཝེཀྑཎཱ དེསིཏཱཏི? ན དེསིཏཱ. ཀཐཾ དེསིཏཱཏི? ‘‘པཙྩཝེཀྑཏཱི’’ཏི པཙྩུཔྤནྣཝསེནེཝ ¶ དེསིཏཱཏི. ཀིཾ བྷོནྟོ བྷགཝཏོ ཀཱལེ ཨཏཱིཏཔརིབྷུཏྟེསུ པཙྩཝེཀྑཎཱ ནཏྠཱིཏི? ཨཏྠི. ཨཐ ཀསྨཱ བྷགཝཏཱ པཙྩུཔྤནྣཝསེནེཝ པཙྩཝེཀྑཎཱ དེསིཏཱཏི? པཙྩུཔྤནྣསམཱིཔཝསེན ཝཱ སཱམཉྙཝསེན ཝཱ དེསིཏཱཏི. ཨེཝཾ སནྟེ བྷགཝཏོ ཨནུཀརཎེན ཨིདཱནིཔི ¶ ཨཏཱིཏཔརིབྷུཏྟཱནཾ པཙྩཡཱནཾ པཙྩུཔྤནྣཝསེན པཙྩཝེཀྑཎཱ ཀཱཏབྦཱཏི. ཡེ པན ཨེཝཾ ཝདནྟི ‘‘ཧིཡྻོ པརིབྷུཏྟཱནམེཝ ཨཏཱིཏཔཙྩཝེཀྑཎཱ ཀཱཏབྦཱ, ན ཨཛྫ པརིབྷུཏྟཱནཾ, ཏེསཾ པན པཙྩུཔྤནྣཔཙྩཝེཀྑཎཱཡེཝཱ’’ཏི, ཏེ ཨེཝཾ ཝཏྟབྦཱ – ཀིཾ བྷོནྟོ ཡཐཱ ཏུམྷེ ཝདནྟི, ཨེཝཾ པཱལི༹ཡཾ ཨཏྠཱིཏི? ནཏྠི. ཨཊྛཀཐཱཡཾ ཨཏྠཱིཏི? ནཏྠི. ཨེཝཾ སནྟེ སཱཊྛཀཐེསུ ཏེཔིཊཀེསུ བུདྡྷཝཙནེསུ ཨསཾཝིཛྫམཱནཾ ཏུམྷཱཀཾ ཝཙནཾ ཀཐཾ པཙྩེཏབྦནྟི? ཨཱཙརིཡཔརམྤརཱཝསེན. ཧོཏུ ཏུམྷཱཀཾ ཨཱཙརིཡལདྡྷིཝསེན ཀཐནཾ, ཀཱལོ ནཱམ ཏིཝིདྷོ ཨཏཱིཏོ ཨནཱགཏོ པཙྩུཔྤནྣོཏི. ཏཏྠ པརིནིཊྛིཏཀིརིཡཱ ཨཏཱིཏོ ནཱམ, ཨབྷིམུཁཀིརིཡཱ ཨནཱགཏོ ནཱམ, ཨཱརདྡྷཨནིཊྛིཏཀིརིཡཱ པཙྩུཔྤནྣོ ནཱམ. ཏེནཱཧུ པོརཱཎཱ –

‘‘ཨཱརདྡྷཱནིཊྛིཏོ བྷཱཝོ, པཙྩུཔྤནྣོ སུནིཊྛིཏོ;

ཨཏཱིཏཱནཱགཏུཔྤཱད-མཔྤཏྟཱབྷིམུཁཱ ཀིརིཡཱ’’ཏི.

ཏཏྠ ཨཛྫ ཝཱ ཧོཏུ ཧིཡྻོ ཝཱ ཏཏོ པུབྦེ ཝཱ, པརིབྷུཏྟཔཙྩཡོ སུཔརིནིཊྛིཏབྷུཉྫནཀིརིཡཏྟཱ ཨཏཱིཏོ ནཱམ. ཏཏྠ ཧིཡྻོ ཝཱ ཏཏོ པུབྦེ ཝཱ པརིབྷུཏྟཔཙྩཡོ ཨཏིཀྐནྟཨརུཎུགྒམནཏྟཱ ན པཙྩཝེཀྑཎཱརཧོ, པཙྩཝེཀྑིཏོཔི ཨཔྤཙྩཝེཀྑིཏོཡེཝ ཧོཏི, ཨིཎཔརིབྷོགཊྛཱནེ ཏིཊྛཏི. ཝུཏྟཉྷི ཨཊྛཀཐཱཡཾ ‘‘སཙསྶ ཨཔྤཙྩཝེཀྑཏོཝ ཨརུཎོ ཨུགྒཙྪཏི, ཨིཎཔརིབྷོགཊྛཱནེ ཏིཊྛཏཱི’’ཏི. ཨཛྫེཝ པན ཙཱིཝརཉྩ སེནཱསནཉྩ པརིབྷོགེ པརིབྷོགེ, པིཎྜཔཱཏཾ ཨཱལོཔེ ཨཱལོཔེ, བྷེསཛྫཾ པཊིགྒཧཎེ པརིབྷོགེ ཙ ¶ པཙྩཝེཀྑཏོ ཨཔརིནིཊྛིཏབྷུཉྫནཀིརིཡཏྟཱ པཙྩུཔྤནྣཔརིབྷུཏྟཔཙྩཝེཀྑཎཱ ནཱམ ཧོཏི. པུརེ པརིབྷུཏྟཾ ཏཏོ པཙྪཱ ཙཏཱུསུ ཀོཊྛཱསེསུ པཙྩཝེཀྑཏོ སུཔརིནིཊྛིཏབྷུཉྫནཀིརིཡཏྟཱ ཨཏཱིཏཔརིབྷུཏྟཔཙྩཝེཀྑཎཱ ནཱམ ཧོཏི. ཨེཏྟཀཾ པཙྩཝེཀྑཎཱཡ ཁེཏྟཾ, ན ཏཏོ པུབྦེ པཙྪཱ ཝཱ. ཡཐཱཧ ཨཊྛཀཐཱཡཾ ‘‘སཱིལཝཏོ ཨཔྤཙྩཝེཀྑིཏཔརིབྷོགོ ཨིཎཔརིབྷོགོ ནཱམ. ཏསྨཱ ཙཱིཝརཾ པརིབྷོགེ པརིབྷོགེ…པེ… བྷེསཛྫསྶ པཊིགྒཧཎེཔི པརིབྷོགེཔི སཏིཔཙྩཡཏཱ ཝཊྚཏཱི’’ཏི, ཏསྨཱ ཧིཡྻོ པརིབྷུཏྟསྶ ཨིཎཔརིབྷོགཏྟཱ ཏཾ ཨནཱམསིཏྭཱ ཨཛྫ པརིབྷུཏྟེསུ ཨཏཱིཏཔཙྩུཔྤནྣེསུ བྷགཝཏོ ཝཙནསྶ ཨནུཀརཎེན ཝཏྟམཱནཝིབྷཏྟིཡུཏྟེན ‘‘པཊིསེཝཱམཱི’’ཏི ཀིརིཡཱཔདེན པཙྩཝེཀྑཎཱ སཱུཔཔནྣཱ ཧོཏཱིཏི དཊྛབྦཱ. ཨཱིདིསཔཙྩཝེཀྑཎམེཝ སནྡྷཱཡ ཝིམཏིཝིནོདནིཡཱདཱིསུ (ཝི. ཝི. ཊཱི. ༡.༥༨༥) ‘‘པཙྩཡསནྣིསྶིཏསཱིལསྶ ཨཏཱིཏཔཙྩཝེཀྑཎཱཡ ཝིསུཛ྄ཛྷནཏོ’’ཏི ཝུཏྟཾ.

ཨེཝཾ ¶ པཙྩཡསནྣིསྶིཏསཱིལསྶ སུདྡྷིཾ དསྶེཏྭཱ ཨིདཱནི ཏེནེཝ པསངྒེན སབྦཱཔི སུདྡྷིཡོ དསྶེཏུཾ ‘‘ཙཏུབྦིདྷཱ ཧི སུདྡྷཱི’’ཏིཨཱདིམཱཧ. ཏཏྠ སུཛ྄ཛྷཏི ཨེཏཱཡཱཏི སུདྡྷི, ཡཐཱདྷམྨཾ དེསནཱཝ སུདྡྷི དེསནཱསུདྡྷི. ཝུཊྛཱནསྶཔི ཙེཏྠ དེསནཱཡ ཨེཝ སངྒཧོ དཊྛབྦོ. ཚིནྣམཱུལཱཔཏྟཱིནཾ པན ཨབྷིཀྑུཏཱཔཊིཉྙཱཡེཝ དེསནཱ. ཨདྷིཊྛཱནཝིསིཊྛོ སཾཝརོཝ སུདྡྷི སཾཝརསུདྡྷི. དྷམྨེན སམེན པཙྩཡཱནཾ པརིཡེཊྛི ཨེཝ སུདྡྷི པརིཡེཊྛིསུདྡྷི. ཙཏཱུསུ པཙྩཡེསུ ཝུཏྟཝིདྷིནཱ པཙྩཝེཀྑཎཱཝ སུདྡྷི པཙྩཝེཀྑཎསུདྡྷི. ཨེས ཏཱཝ སུདྡྷཱིསུ སམཱསནཡོ. སུདྡྷིམནྟེསུ སཱིལེསུ པན དེསནཱ སུདྡྷི ཨེཏསྶཱཏི དེསནཱསུདྡྷི. སེསེསུཔི ཨེསེཝ ནཡོ. ན པུནེཝཾ ཀརིསྶཱམཱིཏི ཨེཏྠ ཨེཝནྟི སཾཝརབྷེདཾ སནྡྷཱཡཱཧ. པཧཱཡཱཏི ¶ ཝཛྫེཏྭཱ, ཨཀཏྭཱཏི ཨཏྠོ. ཝིམཏིཝིནོདནིཡཾ པན ‘‘སུཛ྄ཛྷཏི དེསནཱདཱིཧི, སོདྷཱིཡཏཱིཏི ཝཱ སུདྡྷི, ཙཏུབྦིདྷསཱིལཾ. ཏེནཱཧ ‘དེསནཱཡ སུཛ྄ཛྷནཏོ’ཏིཨཱདི. ཨེཏྠ དེསནཱགྒཧཎེན ཝུཊྛཱནམྤི ཚིནྣམཱུལཱནཾ ཨབྷིཀྑུཏཱཔཊིཉྙཱཔི སངྒཧིཏཱ. ཚིནྣམཱུལཱཔཏྟཱིནམྤི ཧི པཱརཱཛིཀཱཔཏྟིཝུཊྛཱནེན ཧེཊྛཱཔརིརཀྑིཏཾ བྷིཀྑུསཱིལཾ ཝིསུདྡྷཾ ནཱམ ཧོཏི. ཏེན ཏེསཾ མགྒཔཊིལཱབྷོཔི སམྤཛྫཏཱི’’ཏི ཝུཏྟཾ.

ཏཏྠ དེསཱིཡཏི ཨུཙྩཱརཱིཡཏཱིཏི དེསནཱ, དིསཱི ཨུཙྩཱརཎེཏི དྷཱཏུ, དེསཱིཡཏི ཉཱཔཱིཡཏི ཨེཏཱཡཱཏི ཝཱ དེསནཱ, དིས པེཀྑནེཏི དྷཱཏུ. ཨུབྷཡཐཱཔི ཝིརཏིཔདྷཱནཀུསལཙིཏྟསམུཊྛིཏོ དེསནཱཝཙཱིབྷེདསདྡོ. སཾཝརཎཾ སཾཝརོ, སཾ-པུབྦ ཝར སཾཝརཎེཏི དྷཱཏུ, སཏིཔདྷཱནོ ཙིཏྟུཔྤཱདོ. པརིཡེསནཱ པརིཡེཊྛི, པརི-པུབྦ ཨིས པརིཡེསནེཏི དྷཱཏུ, ཝཱིརིཡཔདྷཱནོ ཙིཏྟུཔྤཱདོ. པཊི པུནཔྤུནཾ ཨོགཱཧེཏྭཱ ཨིཀྑནཱ པཙྩཝེཀྑཎཱ, པཊི-པུབྦ ཨཝ-པུབྦ ཨིཀྑ དསྶནངྐེསཱུཏི དྷཱཏུ, པཉྙཱཔདྷཱནོ ཙིཏྟུཔྤཱདོ. ཏེསུ དེསནཱཡ ཝཙཱིབྷེདསདྡབྷཱཝཏོ ཝཙཱིབྷེདཾ ཀཱཏུཾ ཨསཀྐོནྟསྶ ཙ དུཏིཡཀཾ ཨལབྷནྟསྶ ཙ ན སམྤཛྫཏི, སེསཱ པན ཙིཏྟུཔྤཱདམཏྟབྷཱཝཏོ ཝཙཱིབྷེདཾ ཀཱཏུཾ ཨསཀྐོནྟསྶཔི དུཏིཡཀཾ ཨལབྷནྟསྶཔི སམྤཛྫནྟི ཨེཝ, ཏསྨཱ གིལཱནཱདིཀཱལེསུ པཙྩཝེཀྑཎཱཔཱཋཾ པཋིཏུམསཀྐོནྟེནཔི ཨཏྠཾ མནསི ཀཏྭཱ ཙིཏྟེནེཝ པཙྩཝེཀྑཎཱ ཀཱཏབྦཱཏི.

དཱཏབྦཊྛེན དཱཡཾ, ཏཾ ཨཱདིཡནྟཱིཏི དཱཡཱདཱ, ཨནནུཉྙཱཏེསུ སབྦེན སབྦཾ པརིབྷོགཱབྷཱཝཏོ ཨནུཉྙཱཏེསུཡེཝ ཙ པརིབྷོགསབྦྷཱཝབྷཱཝཏོ བྷིཀྑཱུཧི པརིབྷུཉྫིཏབྦཔཙྩཡཱ བྷགཝཏོ སནྟཀཱ. དྷམྨདཱཡཱདསུཏྟཉྩེཏྠ སཱདྷཀནྟི ‘‘དྷམྨདཱཡཱདཱ མེ, བྷིཀྑཝེ, བྷཝཐ, མཱ ཨཱམིསདཱཡཱདཱ ¶ , ཨཏྠི མེ ཏུམྷེསུ ཨནུཀམྤཱ, ཀིནྟི མེ སཱཝཀཱ དྷམྨདཱཡཱདཱ བྷཝེཡྻུཾ, ནོ ཨཱམིསདཱཡཱདཱ’’ཏི ཨེཝཾ པཝཏྟཾ དྷམྨདཱཡཱདསུཏྟཉྩ ¶ (མ. ནི. ༡.༢༩) ཨེཏྠ ཨེཏསྨིཾ ཨཏྠེ སཱདྷཀཾ. ཨཝཱིཏརཱགཱནཾ ཏཎྷཱཝསཱིཀཏཱཡ པཙྩཡཔརིབྷོགེ སཱམིབྷཱཝོ ནཏྠི, ཏདབྷཱཝེན ཝཱིཏརཱགཱནཾ ཏཏྠ སཱམིབྷཱཝོ ཡཐཱརུཙི པརིབྷོགསབྦྷཱཝཏོ. ཏཐཱ ཧི ཏེ པཊིཀཱུལམྤི ཨཔྤཊིཀཱུལཱཀཱརེན ཨཔྤཊིཀཱུལམྤི པཊིཀཱུལཱཀཱརེན ཏདུབྷཡམྤི ཝཛྫེཏྭཱ ཨཛ྄ཛྷུཔེཀྑཎཱཀཱརེན པཙྩཡེ པརིབྷུཉྫནྟི, དཱཡཀཱནཉྩ མནོརཐཾ པརིཔཱུརེནྟི. ཏེནཱཧ ‘‘ཏེ ཧི ཏཎྷཱཡ དཱསབྱཾ ཨཏཱིཏཏྟཱ སཱམིནོ ཧུཏྭཱ པརིབྷུཉྫནྟཱི’’ཏི. ཡོ པནཱཡཾ སཱིལཝཏོ པུཐུཛྫནསྶ པཙྩཝེཀྑིཏཔརིབྷོགོ, སོ ཨིཎཔརིབྷོགསྶ པཙྩནཱིཀཏྟཱ ཨཱནཎྱཔརིབྷོགོ ནཱམ ཧོཏི. ཡཐཱ པན ཨིཎཱཡིཀོ ཨཏྟནོ རུཙིཡཱ ཨིཙྪིཏཾ དེསཾ གནྟུཾ ན ལབྷཏི, ཨེཝཾ ཨིཎཔརིབྷོགཡུཏྟོ ལོཀཏོ ནིསྶརིཏུཾ ན ལབྷཏཱིཏི ཏཔྤཊིཔཀྑཏྟཱ སཱིལཝཏོ པཙྩཝེཀྑིཏཔརིབྷོགོ ཨཱནཎྱཔརིབྷོགོཏི ཝུཙྩཏི, ཏསྨཱ ནིཔྤརིཡཱཡཏོ ཙཏུཔརིབྷོགཝིནིམུཏྟོ ཝིསུཾཡེཝཱཡཾ པརིབྷོགོཏི ཝེདིཏབྦོ, སོ ཨིདྷ ཝིསུཾ ན ཝུཏྟོ, དཱཡཛྫཔརིབྷོགེཡེཝ ཝཱ སངྒཧཾ གཙྪཏཱིཏི. སཱིལཝཱཔི ཧི ཨིམཱཡ སིཀྑཱཡ སམནྣཱགཏཏྟཱ སེཀྑོཏྭེཝ ཝུཙྩཏི.

སབྦེསནྟི ཨརིཡཱནཾ པུཐུཛྫནཱནཉྩ. ཀཐཾ པུཐུཛྫནཱནཾ ཨིམེ པརིབྷོགཱ སམྦྷཝནྟཱིཏི? ཨུཔཙཱརཝསེན. ཡོ ཧི པུཐུཛྫནསྶཔི སལླེཁཔཊིཔཏྟིཡཾ ཋིཏསྶ པཙྩཡགེདྷཾ པཧཱཡ ཏཏྠ ཨནུཔལིཏྟེན ཙིཏྟེན པརིབྷོགོ, སོ སཱམིཔརིབྷོགོ ཝིཡ ཧོཏི. སཱིལཝཏོ པན པཙྩཝེཀྑིཏཔརིབྷོགོ དཱཡཛྫཔརིབྷོགོ ཝིཡ ཧོཏི དཱཡཀཱནཾ མནོརཐསྶཱཝིརཱདྷནཏོ. ཏེན ཝུཏྟཾ ‘‘དཱཡཛྫཔརིབྷོགེཡེཝ ཝཱ སངྒཧཾ གཙྪཏཱི’’ཏི. ཀལྱཱཎཔུཐུཛྫནསྶ པརིབྷོགེ ཝཏྟབྦམེཝ ནཏྠི ¶ ཏསྶ སེཀྑསངྒཧཏོ. སེཀྑསུཏྟ ཉྷེཏསྶ (ཨ. ནི. ༣.༨༦) ཨཏྠསྶ སཱདྷཀཾ.

ཝིམཏིཝིནོདནིཡཾ (ཝི. ཝི. ཊཱི. ༡.༥༨༥) པན ‘‘དཱཏབྦཊྛེན དཱཡཾ, ཏཾ ཨཱདིཡནྟཱིཏི དཱཡཱདཱ. སཏྟནྣཾ སེཀྑཱནནྟི ཨེཏྠ ཀལྱཱཎཔུཐུཛྫནཱཔི སངྒཧིཏཱ ཏེསཾ ཨཱནཎྱཔརིབྷོགསྶ དཱཡཛྫཔརིབྷོགེ སངྒཧིཏཏྟཱཏི ཝེདིཏབྦཾ. དྷམྨདཱཡཱདསུཏྟནྟི ‘‘དྷམྨདཱཡཱདཱ མེ, བྷིཀྑཝེ, བྷཝཐ, མཱ ཨཱམིསདཱཡཱདཱ’’ཏིཨཱདིནཱ པཝཏྟཾ སུཏྟཾ (མ. ནི. ༡.༢༩). ཏཏྠ ‘‘མཱ མེ ཨཱམིསདཱཡཱདཱཏི ཨེཝཾ མེ-སདྡཾ ཨཱནེཏྭཱ ཨཏྠོ ཝེདིཏབྦོ. ཨེཝཉྷི ཡཐཱཝུཏྟཏྠསཱདྷཀཾ ¶ ཧོཏཱི’’ཏི ཝུཏྟཾ. ཏཏྠ མེ མམ ཨཱམིསདཱཡཱདཱ ཙཏུཔཙྩཡབྷུཉྫཀཱཏི བྷགཝཏོ སམྦནྡྷབྷཱུཏསྶ སམྦནྡྷཱིབྷཱུཏཱ པཙྩཡཱ ཝུཏྟཱ, ཏསྨཱ དཱཡཀེཧི དིནྣཱཔི པཙྩཡཱ བྷགཝཏཱ ཨནུཉྙཱཏཏྟཱ བྷགཝཏོ པཙྩཡཱཡེཝ ཧོནྟཱིཏི ཨེཏསྶ ཨཏྠསྶ དྷམྨདཱཡཱདསུཏྟཾ སཱདྷཀཾ ཧོཏཱིཏི ཨཏྠོཏི ཝུཏྟཾ.

ལཛྫིནཱ སདྡྷིཾ པརིབྷོགོ ནཱམ ལཛྫིསྶ སནྟཀཾ གཧེཏྭཱ པརིབྷོགོ. ཨལཛྫིནཱ སདྡྷིནྟི ཨེཏྠཱཔི ཨེསེཝ ནཡོ. ཨཱདིཏོ པཊྛཱཡ ཧི ཨལཛྫཱི ནཱམ ནཏྠཱིཏི ཨིམིནཱ དིཊྛདིཊྛེསུཡེཝ ཨཱསངྐཱ ན ཀཱཏབྦཱཏི དསྶེཏི. ཨཏྟནོ བྷཱརབྷཱུཏཱ སདྡྷིཝིཧཱརིཀཱདཡོ. ཏེཔི ནིཝཱརེཏབྦཱཏི ཡོ པསྶཏི, ཏེན ནིཝཱརེཏབྦཱཏི པཱཋོ. ཨཊྛཀཐཱཡཾ པན ‘‘ཡོཔི ཨཏྟནོ བྷཱརབྷཱུཏེན ཨལཛྫིནཱ སདྡྷིཾ པརིབྷོགཾ ཀརོཏི, སོཔི ནིཝཱརེཏབྦོ’’ཏི པཱཋོ དིསྶཏི, ཏཐཱཔི ཨཏྠཏོ ཨུབྷཡཐཱཔི ཡུཛྫཏི. ཨཏྟནོ སདྡྷིཝིཧཱརིཀཱདཡོཔི ཨལཛྫིབྷཱཝཏོ ནིཝཱརེཏབྦཱ. ཨལཛྫཱིཧི སདྡྷིཝིཧཱརིཀཱདཱིཧི ཨེཀསམྦྷོགཾ ཀརོནྟཱ ཨཉྙེཔི ནིཝཱརེཏབྦཱཝ. སཙེ ན ¶ ཨོརམཏི, ཨཡམྤི ཨལཛྫཱིཡེཝ ཧོཏཱིཏི ཨེཏྠ ཨེཝཾ ནིཝཱརིཏོ སོ པུགྒལོ ཨལཛྫིནཱ སདྡྷིཾ པརིབྷོགཏོ ཨོརམཏི ཝིརམཏི, ཨིཙྩེཏཾ ཀུསལཾ. ནོ ཙེ ཨོརམཏི, ཨཡམྤི ཨལཛྫཱིཡེཝ ཧོཏི, ཏེན སདྡྷིཾ པརིབྷོགཾ ཀརོནྟོ སོཔི ཨལཛྫཱིཡེཝ ཧོཏཱིཏི ཨཏྠོ. ཏེན ཝུཏྟཾ ‘‘ཨེཝཾ ཨེཀོ ཨལཛྫཱི ཨལཛྫིསཏམྤི ཀརོཏཱི’’ཏི. ཨདྷམྨིཡོཏི ཨནེསནཱདཱིཧི ཨུཔྤནྣོ. དྷམྨིཡོཏི བྷིཀྑཱཙརིཡཱདཱིཧི ཨུཔྤནྣོ. སངྒྷསྶེཝ དེཏཱིཏི བྷཏྟཾ ཨགྒཧེཏྭཱ ཨཏྟནཱ ལདྡྷསལཱཀཾཡེཝ དེཏི.

ཝིམཏིཝིནོདནིཡཾ པན ‘‘ལཛྫིནཱ སདྡྷིཾ པརིབྷོགོཏི དྷམྨཱམིསཝསེན མིསྶཱིབྷཱཝོ. ཨལཛྫིནཱ སདྡྷིནྟི ཨེཏྠཱཔི ཨེསེཝ ནཡོ. ཨཱདིཏོ པཊྛཱཡ ཧི ཨལཛྫཱི ནཱམ ནཏྠཱིཏི ཨིམིནཱ དིཊྛདིཊྛེསུ ཨཱསངྐཱ ནཱམ ན ཀཱཏབྦཱ, དིཊྛསུཏཱདིཀཱརཎེ སཏི ཨེཝ ཀཱཏབྦཱཏི དསྶེཏི. ཨཏྟནོ བྷཱརབྷཱུཏཱ སདྡྷིཝིཧཱརིཀཱདཡོ. སཙེ ན ཨོརམཏཱིཏི ཨགཏིགམནཝསེན དྷམྨཱམིསཔརིབྷོགཏོ ན ཨོརམཏི. ཨཱཔཏྟི ནཱམ ནཏྠཱིཏི ཨིདཾ ཨལཛྫཱིནཾ དྷམྨེནུཔྤནྣཔཙྩཡཾ དྷམྨཀམྨཉྩ སནྡྷཱཡ ཝུཏྟཾ. ཏེསམྤི ཧི ཀུལདཱུསནཱདིསམུཔྤནྣཾ པཙྩཡཾ པརིབྷུཉྫནྟཱནཾ ཝགྒཀམྨཱདཱིནི ཀརོནྟཱནཉྩ ཨཱཔཏྟི ཨེཝ. ‘དྷམྨིཡཱདྷམྨིཡཔརིབྷོགོ པཙྩཡཝསེནེཝ ཝེདིཏབྦོ’ཏི ཝུཏྟཏྟཱ ཧེཊྛཱ ལཛྫིཔརིབྷོགཱལཛྫིཔརིབྷོགཱ པཙྩཡཝསེན ཨེཀཀམྨཱདིཝསེན ཙ ཝུཏྟཱ ཨེཝཱཏི ཝེདིཏབྦཾ. ཏེནེཝ དུཊྛདོསསིཀྑཱཔདཊྛཀཐཱཡཾ (པཱརཱ. ཨཊྛ. ༢.༣༨༥-༣༨༦) ཙོདཀཙུདིཏཀབྷཱཝེ ཋིཏཱ དྭེ ཨལཛྫིནོ དྷམྨཔརིབྷོགམྤི སནྡྷཱཡ ‘ཨེཀསམྦྷོགཔརིབྷོགཱ ཧུཏྭཱ ཛཱིཝཐཱ’ཏི ¶ ཝུཏྟཱ ཏེསཾ ཨཉྙམཉྙཾ དྷམྨཱམིསཱཔརིབྷོགེ ཝིརོདྷཱབྷཱཝཱ. ལཛྫཱིནམེཝ ཧི ཨལཛྫིནཱ སཧ ཏདུབྷཡཔརིབྷོགོ ན ཝཊྚཏཱི’’ཏི ཝུཏྟཾ.

སཙེ ¶ པན ལཛྫཱི ཨལཛྫིཾ པགྒཎྷཱཏི…པེ… ཨནྟརདྷཱཔེཏཱིཏི ཨེཏྠ ཀེཝལཾ པགྒཎྷིཏུཀཱམཏཱཡ ཨེཝཾ ཀཱཏུཾ ན ཝཊྚཏི, དྷམྨསྶ པན སཱསནསྶ སོཏཱུནཉྩ ཨནུགྒཧཏྠཱཡ ཝཊྚཏཱིཏི ཝེདིཏབྦཾ. པུརིམནཡེན ‘‘སོ ཨཱཔཏྟིཡཱ ཀཱརེཏབྦོ’’ཏི ཝུཏྟཏྟཱ ཨིམསྶ ཨཱཔཏྟིཡེཝཱཏི ཝདནྟི. ཨུདྡེསགྒཧཎཱདིནཱ དྷམྨསྶ པརིབྷོགོ དྷམྨཔརིབྷོགོ. དྷམྨཱནུགྒཧེན གཎྷནྟསྶ ཨཱཔཏྟིཡཱ ཨབྷཱཝེཔི ཐེརོ ཏསྶ ཨལཛྫིབྷཱཝཾཡེཝ སནྡྷཱཡ ‘‘པཱཔོ ཀིརཱཡ’’ནྟིཨཱདིམཱཧ. ཏསྶ པན སནྟིཀེཏི མཧཱརཀྑིཏཏྠེརསྶ སནྟིཀེ.

ཝིམཏིཝིནོདནིཡཾ (ཝི. ཝི. ཊཱི. ༡.༥༨༥) པན ཨིམསྨིཾ ཋཱནེ ཝིཏྠཱརཏོ ཝིནིཙྪིཏཾ. ཀཐཾ? དྷམྨཔརིབྷོགོཏི ‘‘ཨེཀཀམྨཾ ཨེཀུདྡེསོ’’ཏིཨཱདིནཱ ཝུཏྟསཾཝཱསོ ཙེཝ ནིསྶཡགྒཧཎཱདིཀོ སབྦོ ནིརཱམིསཔརིབྷོགོ ཙ ཝེདིཏབྦོ. ‘‘ན སོ ཨཱཔཏྟིཡཱ ཀཱརེཏབྦོ’’ཏི ཝུཏྟཏྟཱ ལཛྫིནོ ཨལཛྫིཔགྒཧེ ཨཱཔཏྟཱིཏི ཝེདིཏབྦཾ. ཨིཏརོཔཱིཏི ལཛྫཱིཔི. ཏསྶཱཔི ཨཏྟཱནཾ པགྒཎྷནྟསྶ ཨལཛྫིནོ, ཨིམིནཱ ཙ ལཛྫིནོ ཝཎྞབྷཎནཱདིལཱབྷཾ པཊིཙྩ ཨཱམིསགརུཀཏཱཡ ཝཱ གེཧསྶིཏཔེམེན ཝཱ ཏཾ ཨལཛྫིཾ པགྒཎྷནྟོ ལཛྫཱི སཱསནཾ ཨནྟརདྷཱཔེཏི ནཱམཱཏི དསྶེཏི. ཨེཝཾ གཧཊྛཱདཱིསུ ཨུཔཏྠམྦྷིཏོ ཨལཛྫཱི བལཾ ལབྷིཏྭཱ པེསལེ ཨབྷིབྷཝིཏྭཱ ན ཙིརསྶེཝ སཱསནཾ ཨུདྡྷམྨཾ ཨུབྦིནཡཾ ཀརོཏཱིཏི.

དྷམྨཔརིབྷོགོཔི ཏཏྠ ཝཊྚཏཱིཏི ཨིམིནཱ ཨཱམིསཔརིབྷོགཏོ དྷམྨཔརིབྷོགོཝ གརུཀོ, ཏསྨཱ ཨཏིཝིཡ ཨལཛྫཱིཝིཝེཀེན ཀཱཏབྦོཏི དསྶེཏི. ‘‘དྷམྨཱནུགྒཧེན ཨུགྒཎྷིཏུཾ ཝཊྚཏཱི’’ཏི ཝུཏྟཏྟཱ ཨལཛྫུསྶནྣཏཱཡསཱསནེ ཨོསཀྐནྟེ, ལཛྫཱིསུ ཙ ཨཔྤཧོནྟེསུ ཨལཛྫིཾ པཀཏཏྟཾ གཎཔཱུརཀཾ གཧེཏྭཱ ཨུཔསམྤདཱདིཀརཎེན ཙེཝ ཀེཙི ཨལཛྫིནོ དྷམྨཱམིསཔརིབྷོགེན ¶ སངྒཧེཏྭཱ སེསཱལཛྫིགཎསྶ ནིགྒཧེན ཙ སཱསནཾ པགྒཎྷིཏུམྤི ཝཊྚཏི ཨེཝ.

ཀེཙི པན ‘‘ཀོཊིཡཾ ཋིཏོ གནྠོཏི ཝུཏྟཏྟཱ གནྠཔརིཡཱཔུཎནམེཝ དྷམྨཔརིབྷོགོ, ན ཨེཀཀམྨཱདི, ཏསྨཱ ཨལཛྫཱིཧི སདྡྷིཾ ཨུཔོསཐཱདིཀཾ ཀམྨཾ ཀཱཏུཾ ཝཊྚཏི, ཨཱཔཏྟི ནཏྠཱི’’ཏི ཝདནྟི, ཏཾ ན ཡུཏྟཾ, ཨེཀཀམྨཱདཱིསུ བཧཱུསུ དྷམྨཔརིབྷོགེསུ ཨལཛྫིནཱཔི སདྡྷིཾ ཀཏྟབྦཱཝཏྠཱཡཏྟཾ ¶ དྷམྨཔརིབྷོགཾ དསྶེཏུཾ ཨིདྷ ནིདསྶནཝསེན གནྠསྶེཝ སམུདྡྷཊཏྟཱ. ན ཧི ཨེཀཀམྨཱདིཀོ ཝིདྷི དྷམྨཔརིབྷོགོ ན ཧོཏཱིཏི སཀྐཱ ཝཏྟུཾ ཨནཱམིསཏྟཱ དྷམྨཱམིསེསུ ཨཔརིཡཱཔནྣསྶ ཙ ཀསྶཙི ཨབྷཱཝཱ. ཏེནེཝ ཨཊྛསཱལིནིཡཾ དྷམྨཔཊིསནྠཱརཀཐཱཡཾ (དྷ. ས. ཨཊྛ. ༡༣༥༡) ‘‘ཀམྨཊྛཱནཾ ཀཐེཏབྦཾ, དྷམྨོ ཝཱཙེཏབྦོ…པེ… ཨབྦྷཱནཝུཊྛཱནམཱནཏྟཔརིཝཱསཱ དཱཏབྦཱ, པབྦཛྫཱརཧོ པབྦཱཛེཏབྦོ, ཨུཔསམྤདཱརཧོ ཨུཔསམྤཱདེཏབྦོ…པེ… ཨཡཾ དྷམྨཔཊིསནྠཱརོ ནཱམཱ’’ཏི ཨེཝཾ སངྒྷཀམྨཱདིཔི དྷམྨཀོཊྛཱསེ དསྶིཏཾ. ཏེསུ པན དྷམྨཀོཊྛཱསེསུ ཡཾ གཎཔཱུརཀཱདིཝསེན ཨལཛྫིནོ ཨཔེཀྑིཏྭཱ ཨུཔོསཐཱདི ཝཱ ཏེསཾ སནྟིཀཱ དྷམྨུགྒཧཎནིསྶཡགྒཧཎཱདི ཝཱ ཀརཱིཡཏི, ཏཾ དྷམྨོ ཙེཝ པརིབྷོགོ ཙཱཏི དྷམྨཔརིབྷོགོཏི ཝུཙྩཏི, ཨེཏཾ ཏཐཱརཱུཔཔཙྩཡཾ ཝིནཱ ཀཱཏུཾ ན ཝཊྚཏི, ཀརོནྟསྶ ཨལཛྫིཔརིབྷོགོ ཙ ཧོཏི དུཀྐཊཉྩ. ཡཾ པན ཨལཛྫིསཏཾ ཨནཔེཀྑིཏྭཱ ཏཛྫནཱིཡཱདིནིགྒཧཀམྨཾ ཝཱ པརིཝཱསཱདིཨུཔཀཱརཀམྨཾ ཝཱ ཨུགྒཧཔརིཔུཙྪཱདཱནཱདི ཝཱ ཀརཱིཡཏི, ཏཾ དྷམྨོ ཨེཝ, ནོ པརིབྷོགོ, ཨེཏཾ ཨནུརཱུཔཱནཾ ཀཱཏུཾ ཝཊྚཏི, ཨཱམིསདཱནེ ཝིཡ ཨཱཔཏྟི ནཏྠི. ནིསྶཡདཱནམྤི ཏེརསསམྨུཏིདཱནཱདི ཙ ཝཏྟཔཊིཔཏྟིསཱདིཡནཱདིཔརིབྷོགསྶཔི ཧེཏུཏྟཱ ན ཝཊྚཏི.

ཡོ པན མཧཱཨལཛྫཱི ཨུདྡྷམྨཾ ཨུབྦིནཡཾ སཏྠུསཱསནཾ ཀརོཏི, ཏསྶ སདྡྷིཝིཧཱརིཀཱདཱིནཾ ཨུཔསམྤདཱདི ཨུཔཀཱརཀམྨམྤི ཨུགྒཧཔརིཔུཙྪཱདཱནཱདི ¶ ཙ ཀཱཏུཾ ན ཝཊྚཏི, ཨཱཔཏྟི ཨེཝ ཧོཏི, ནིགྒཧཀམྨམེཝ ཀཱཏབྦཾ. ཏེནེཝ ཨལཛྫིཔགྒཧོཔི པཊིཀྑིཏྟོ. དྷམྨཱམིསཔརིབྷོགཝིཝཛྫནེནཔི ཧི དུམྨངྐཱུནཾ པུགྒལཱནཾ ནིགྒཧོཝ ཨདྷིཔྤེཏོ, སོ ཙ པེསལཱནཾ ཕཱསུཝིཧཱརསདྡྷམྨཊྛིཏིཝིནཡཱནུགྒཧཱདིཨཏྠཱཡ ཨེཏདཏྠཏྟཱ སིཀྑཱཔདཔཉྙཏྟིཡཱ, ཏསྨཱ ཡཾ ཡཾ དུམྨངྐཱུནཾ ཨུཔཏྠམྦྷཱཡ, པེསལཱནཾ ཨཕཱསུཝིཧཱརཱཡ, སདྡྷམྨཔརིཧཱནཱདིཨཏྠཱཡ ཧོཏི, ཏཾ སབྦམྤི པརིབྷོགོ ཝཱ ཧོཏུ ཨཔརིབྷོགོ ཝཱ ཀཱཏུཾ ན ཝཊྚཏི, ཨེཝཾ ཀརོནྟཱ སཱསནཾ ཨནྟརདྷཱཔེནྟི, ཨཱཔཏྟིཉྩ ཨཱཔཛྫནྟི, དྷམྨཱམིསཔརིབྷོགེསུ ཙེཏྠ ཨལཛྫཱིཧི ཨེཀཀམྨཱདིདྷམྨཔརིབྷོགོ ཨེཝ པེསལཱནཾ ཨཕཱསུཝིཧཱརཱཡ སདྡྷམྨཔརིཧཱནཱདིཨཏྠཱཡ ཧོཏི, ན ཏཐཱ ཨཱམིསཔརིབྷོགོ. ན ཧི ཨལཛྫཱིནཾ པཙྩཡཔརིབྷོགམཏྟེན པེསལཱནཾ ཨཕཱསུཝིཧཱརཱདི ཧོཏི, ཡཐཱཝུཏྟདྷམྨཔརིབྷོགེན པན ཧོཏི. ཏཔྤརིཝཛྫནེན ཙ ཕཱསུཝིཧཱརཱདཡོ. ཏཐཱ ཧི ཀཏསིཀྑཱཔདཝཱིཏིཀྐམཱ ཨལཛྫིཔུགྒལཱ ཨུཔོསཐཱདཱིསུ པཝིཊྛཱ ‘‘ཏུམྷེ ཀཱཡདྭཱརེ ཙེཝ ཝཙཱིདྭཱརེ ཙ ཝཱིཏིཀྐམཾ ཀརོཐཱ’’ཏིཨཱདིནཱ བྷིཀྑཱུཧི ཝཏྟབྦཱ ཧོནྟི. ཡཐཱ ཝིནཡཉྩ ཨཏིཊྛནྟཱ སངྒྷཏོ བཧིཀརཎཱདིཝསེན སུཊྛུ ནིགྒཧེཏབྦཱ, ཏཐཱ ཨཀཏྭཱ ཏེཧི སཧ སཾཝསནྟཱཔི ཨལཛྫིནོཝ ཧོནྟི ¶ ‘‘ཨེཀོཔི ཨལཛྫཱི ཨལཛྫིསཏམྤི ཀརོཏཱི’’ཏིཨཱདིཝཙནཏོ (པཱརཱ. ཨཊྛ. ༢.༥༨༥). ཡདི ཧི ཏེ ཨེཝཾ ཨནིགྒཧིཏཱ སིཡུཾ, སངྒྷེ ཀལཧཱདིཾ ཝཌྜྷེཏྭཱ ཨུཔོསཐཱདིསཱམགྒིཀམྨཔཊིབཱཧནཱདིནཱ པེསལཱནཾ ཨཕཱསུཾ ཀཏྭཱ ཀམེན ཏེ དེཝདཏྟཝཛྫིཔུཏྟཀཱདཡོ ཝིཡ པརིསཾ ཝཌྜྷེཏྭཱ ཨཏྟནོ ཝིཔྤཊིཔཏྟིཾ དྷམྨཏོ ཝིནཡཏོ དཱིཔེནྟཱ སངྒྷབྷེདཱདིམྤི ཀཏྭཱ ན ཙིརསྶེཝ སཱསནཾ ཨནྟརདྷཱཔེཡྻུཾ. ཏེསུ པན སངྒྷཏོ བཧིཀརཎཱདིཝསེན ནིགྒཧིཏེསུ སབྦོཔི ཨཡཾ ཨུཔདྡཝོ ¶ ན ཧོཏི. ཝུཏྟཉྷི ‘‘དུསྶཱིལཔུགྒལེ ནིསྶཱཡ ཨུཔོསཐོ ན ཏིཊྛཏི, པཝཱརཎཱ ན ཏིཊྛཏི, སངྒྷཀམྨཱནི ན པཝཏྟནྟི, སཱམགྒཱི ན ཧོཏི…པེ… དུསྶཱིལེསུ པན ནིགྒཧིཏེསུ སབྦོཔི ཨཡཾ ཨུཔདྡཝོ ན ཧོཏི, ཏཏོ པེསལཱ བྷིཀྑཱུ ཕཱསུ ཝིཧརནྟཱི’’ཏི, ཏསྨཱ ཨེཀཀམྨཱདིདྷམྨཔརིབྷོགོཝ ཨཱམིསཔརིབྷོགཏོཔི ཨཏིཝིཡ ཨལཛྫཱིཝིཝེཀེན ཀཱཏབྦོ, ཨཱཔཏྟིཀརོ ཙ སདྡྷམྨཔརིཧཱནིཧེཏུཏྟཱཏི ཝེདིཏབྦཾ.

ཨཔིཙ ‘‘ཨུཔོསཐོ ན ཏིཊྛཏི, པཝཱརཎཱ ན ཏིཊྛཏི, སངྒྷཀམྨཱནི ན པཝཏྟནྟཱི’’ཏི ཨེཝཾ ཨལཛྫཱིཧི སདྡྷིཾ སངྒྷཀམྨཱཀརཎསྶ ཨཊྛཀཐཱཡཾ པཀཱསིཏཏྟཱཔི ཙེཏཾ སིཛ྄ཛྷཏི. ཏཐཱ པརིཝཏྟལིངྒསྶ བྷིཀྑུནོ བྷིཀྑུནུཔསྶཡཾ གཙྪནྟསྶ པཊིཔཏྟིཀཐཱཡཾ ‘‘ཨཱརཱདྷིཀཱ ཙ ཧོནྟི སངྒཱཧིཀཱ ལཛྫིནིཡོ, ཏཱ ཀོཔེཏྭཱ ཨཉྙཏྠ ན གནྟབྦཾ. གཙྪཏི ཙེ, གཱམནྟརནདཱིཔཱརརཏྟིཝིཔྤཝཱསགཎམྷཱ ཨོཧཱིཡནཱཔཏྟཱིཧི ན མུཙྩཏི…པེ… ཨལཛྫིནིཡོ ཧོནྟི, སངྒཧཾ པན ཀརོནྟི, ཏཱཔི པརིཙྩཛིཏྭཱ ཨཉྙཏྠ གནྟུཾ ལབྷཏཱི’’ཏི ཨེཝཾ ཨལཛྫིནཱིསུ དུཏིཡིཀཱགཧཎཱདཱིསུ སཾཝཱསཱཔཏྟིཔརིཧཱརཱཡ ནདཱིཔཱརཱགམནཱདིགརུཀཱཔཏྟིཊྛཱནཱནཾ ཨནུཉྙཱཏཏྟཱ ཏཏོཔི ཨལཛྫིསཾཝཱསཱཔཏྟི ཨེཝ སདྡྷམྨཔརིཧཱནིཡཱ ཧེཏུབྷཱུཏོ གརུཀཏརཱཏི ཝིཉྙཱཡཏི. ན ཧི ལཧུཀཱཔཏྟིཊྛཱནཾ ཝཱ ཨནཱཔཏྟིཊྛཱནཾ ཝཱ པརིཧརིཏུཾ གརུཀཱཔཏྟིཊྛཱནཝཱིཏིཀྐམཾ ཨཱཙརིཡཱ ཨནུཛཱནནྟི. ཏཐཱ ཨསཾཝཱསཔདསྶ ཨཊྛཀཐཱཡཾ ‘‘སབྦེཧིཔི ལཛྫིཔུགྒལེཧི སམཾ སིཀྑིཏབྦབྷཱཝཏོ སམསིཀྑཱཏཱ ནཱམ. ཨེཏྠ ཡསྨཱ སབྦེཔི ལཛྫིནོ ཨེཏེསུ ཀམྨཱདཱིསུ སཧ ཝསནྟི, ན ཨེཀོཔི ཏཏོ བཧིདྡྷཱ སནྡིསྶཏི, ཏསྨཱ ཏཱནི སབྦཱནིཔི གཧེཏྭཱ ཨེསོ སཾཝཱསོ ནཱམཱ’’ཏི ཨེཝཾ ལཛྫཱིཧེཝ ཨེཀཀམྨཱདིསཾཝཱསོ ཝཊྚཏཱིཏི པཀཱསིཏོ.

ཡདི ¶ ཨེཝཾ ཀསྨཱ ཨསཾཝཱསིཀེསུ ཨལཛྫཱི ན གཧིཏོཏི? ནཱཡཾ ཝིརོདྷོ, ཡེ གཎཔཱུརཀེ ཀཏྭཱ ཀཏཾ ཀམྨཾ ཀུཔྤཏི, ཏེསཾ པཱརཱཛིཀཱདིཨཔཀཏཏྟཱནཉྙེཝ ཨསཾཝཱསིཀཏྟེན གཧིཏཏྟཱ. ཨལཛྫིནོ པན པཀཏཏྟབྷཱུཏཱཔི སནྟི, ཏེ ཙེ གཎཔཱུརཀཱ ཧུཏྭཱ ཀམྨཾ སཱདྷེནྟི, ཀེཝལཾ ¶ ཀཏྭཱ ཨགཏིགམནེན ཀརོནྟཱནཾ ཨཱཔཏྟིཀརཱ ཧོནྟི སབྷཱགཱཔཏྟིཨཱཔནྣཱ ཝིཡ ཨཉྙམཉྙཾ. ཡསྨཱ ཨལཛྫིཏཉྩ ལཛྫིཏཉྩ པུཐུཛྫནཱནཾ ཙིཏྟཀྑཎཔཊིབདྡྷཾ, ན སབྦཀཱལིཀཾ. སཉྩིཙྩ ཧི ཝཱིཏིཀྐམཙིཏྟེ ཨུཔྤནྣེ ཨལཛྫིནོ ‘‘ན པུན ཨཱིདིསཾ ཀརིསྶཱམཱི’’ཏི ཙིཏྟེན ལཛྫིནོ ཧོནྟི.

ཏེསུ ཙ ཡེ པེསལེཧི ཨོཝདིཡམཱནཱཔི ན ཨོརམནྟི, པུནཔྤུནཾ ཀརོནྟི, ཏེ ཨེཝ ཨསཾཝསིཏབྦཱ, ན ཨིཏརེ ལཛྫིདྷམྨེ ཨོཀྐནྟཏྟཱ, ཏསྨཱཔི ཨལཛྫིནོ ཨསཾཝཱསིཀེསུ ཨགཎེཏྭཱ ཏཔྤརིཝཛྫནཏྠཾ སོདྷེཏྭཱཝ ཨུཔོསཐཱདིཀརཎཾ ཨནཉྙཱཏཾ. ཏཐཱ ཧི ‘‘པཱརིསུདྡྷིཾ ཨཱཡསྨནྟོ ཨཱརོཙེཐ, པཱཏིམོཀྑཾ ཨུདྡིསིསྶཱམཱི’’ཏིཨཱདིནཱ (མཧཱཝ. ༡༣༤) ཨཔརིསུདྡྷཱཡ པརིསཱཡ ཨུཔོསཐཀརཎསྶ ཨཡུཏྟཏཱ པཀཱསིཏཱ, ‘‘ཡསྶ སིཡཱ ཨཱཔཏྟི, སོ ཨཱཝིཀརེཡྻ…པེ… ཕཱསུ ཧོཏཱི’’ཏི (མཧཱཝ. ༡༣༤) ཨེཝཾ ཨལཛྫིམྤི ལཛྫིདྷམྨེ པཏིཊྛཱཔེཏྭཱ ཨུཔོསཐཀརཎཔྤཀཱརོ ཙ ཝུཏྟོ, ‘‘ཀཙྩིཏྠ པརིསུདྡྷཱ…པེ… པརིསུདྡྷེཏྠཱཡསྨནྟོ’’ཏི (པཱརཱ. ༢༣༣) ཙ པཱརིསུདྡྷིཨུཔོསཐེ ‘‘པརིསུདྡྷོ ཨཧཾ, བྷནྟེ, པརིསུདྡྷོཏི མཾ དྷཱརེཐཱ’’ཏི (མཧཱཝ. ༡༦༨) ཙ ཨེཝཾ ཨུཔོསཐཾ ཀརོནྟཱནཾ པརིསུདྡྷཏཱ ཙ པཀཱསིཏཱ, ཝཙནམཏྟེན ཨནོརམནྟཱནཉྩ ཨུཔོསཐཔཝཱརཎཊྛཔནཝིདྷི ཙ ཝུཏྟོ, སབྦཐཱ ལཛྫིདྷམྨཾ ཨནོཀྐམནྟེཧི སཾཝཱསསྶ ཨཡུཏྟཏཱཡ ནིསྶཡདཱནགྒཧཎཔཊིཀྑེཔོ, ཏཛྫནཱིཡཱདིནིགྒཧཀམྨཀརཎཨུཀྑེཔནཱིཡཀམྨཀརཎེན སཱནུཝཏྟཀཔརིསསྶ ཨལཛྫིསྶ ཨསཾཝཱསིཀཏྟཔཱཔནཝིདྷི ¶ ཙ ཝུཏྟོ, ཏསྨཱ ཡཐཱཝུཏྟེཧི སུཏྟནྟནཡེཧི, ཨཊྛཀཐཱཝཙནེཧི ཙ པཀཏཏྟེཧིཔི ཨཔཀཏཏྟེཧིཔི སབྦེཧི ཨལཛྫཱིཧི ཨེཀཀམྨཱདིསཾཝཱསོ ན ཝཊྚཏི, ཀརོནྟཱནཾ ཨཱཔཏྟི ཨེཝ དུམྨངྐཱུནཾ པུགྒལཱནཾ ནིགྒཧཏྠཱཡེཝ སབྦསིཀྑཱཔདཱནཾ པཉྙཏྟཏྟཱཏི ནིཊྛམེཏྠ གནྟབྦཾ. ཏེནེཝ དུཏིཡསངྒཱིཏིཡཾ པཀཏཏྟཱཔི ཨལཛྫིནོ ཝཛྫིཔུཏྟཀཱ ཡསཏྠེརཱདཱིཧི མཧནྟེན ཝཱཡཱམེན སངྒྷཏོ ཝིཡོཛིཏཱ. ན ཧི ཏེསུ པཱརཱཛིཀཱདིཨསཾཝཱསིཀཱཔཏྟི ཨཏྠི, ཏེཧི དཱིཔིཏཱནཾ དསནྣཾ ཝཏྠཱུནཾ ལཧུཀཱཔཏྟིཝིསཡཏྟཱཏི ཝུཏྟཾ.

ཏསྶ སནྟིཀེཏི མཧཱརཀྑིཏཏྠེརསྶ སནྟིཀེ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

རཱུཔིཡཱདིཔཊིགྒཧཎཝིནིཙྪཡཀཐཱལངྐཱརོ ནཱམ

དྭཱདསམོ པརིཙྪེདོ.

༡༣. དཱནལཀྑཎཱདིཝིནིཙྪཡཀཐཱ

༦༩. ཨེཝཾ ¶ རཱུཔིཡཱདིཔཊིགྒཧཎཝིནིཙྪཡཾ ཀཐེཏྭཱ ཨིདཱནི དཱནཝིསྶཱསགྒཱཧལཱབྷཔརིཎཱམནཝིནིཙྪཡཾ ཀཐེཏུཾ ‘‘དཱནཝིསྶཱསགྒཱཧེཧཱི’’ཏིཨཱདིམཱཧ. ཏཏྠ དཱིཡཏེ དཱནཾ, ཙཱིཝརཱདིཝཏྠུཾ ཨཱརམྨཎཾ ཀཏྭཱ པཝཏྟོ ཨལོབྷཔྤདྷཱནོ ཀཱམཱཝཙརཀུསལཀིརིཡཙིཏྟུཔྤཱདོ. སསནཾ སཱསོ, སསུ ཧིཾསཱཡནྟི དྷཱཏུ, ཧིཾསནནྟི ཨཏྠོ, ཝིགཏོ སཱསོ ཨེཏསྨཱ གཱཧཱཏི ཝིསྶཱསོ. གཧཎཾ གཱཧོ, ཝིསྶཱསེན གཱཧོ ཝིསྶཱསགྒཱཧོ. ཝིསེསནེ ཙེཏྠ ཀརཎཝཙནཾ, ཝིསྶཱསཝསེན གཱཧོ, ན ཐེཡྻཙིཏྟཝསེནཱཏི ཨཏྠོ. ལཙྪཏེཏི ལཱབྷོ, ཙཱིཝརཱདིཝཏྠུ, ཏསྶ ལཱབྷསྶ. པརིཎམིཡཏེ པརིཎཱམནཾ, ཨཉྙེསཾ ཨཏྠཱཡ པརིཎཏསྶ ¶ ཨཏྟནོ, ཨཉྙསྶ ཝཱ པརིཎཱམནཾ, དཱཔནནྟི ཨཏྠོ. དཱནཝིསྶཱསགྒཱཧེཧི ལཱབྷསྶ པརིཎཱམནནྟི ཨེཏྠ ཨུདྡེསེ སམབྷིནིཝིཊྛསྶ ‘‘དཱན’’ནྟི པདསྶ ཨཏྠཝིནིཙྪཡོ ཏཱཝ པཋམཾ ཨེཝཾ ཝེདིཏབྦོཏི ཡོཛནཱ. ཨཏྟནོ སནྟཀསྶ ཙཱིཝརཱདིཔརིཀྑཱརསྶ དཱནནྟི སམྦནྡྷོ. ཡསྶ ཀསྶཙཱིཏི སམྤདཱནནིདྡེསོ, ཡསྶ ཀསྶཙི པཊིགྒཱཧཀསྶཱཏི ཨཏྠོ.

ཡདིདཾ ‘‘དཱན’’ནྟི ཝུཏྟཾ, ཏཏྠ ཀིཾ ལཀྑཎནྟི ཨཱཧ ‘‘ཏཏྲིདཾ དཱནལཀྑཎ’’ནྟི. ‘‘ཨིདཾ ཏུཡ྄ཧཾ དེམཱི’’ཏི ཝདཏཱིཏི ཨིདཾ ཏིཝངྒསམྤནྣཾ དཱནལཀྑཎཾ ཧོཏཱིཏི ཡོཛནཱ. ཏཏྠ ཨིདནྟི དེཡྻདྷམྨནིདསྶནཾ. ཏུཡ྄ཧནྟི པཊིགྒཱཧཀནིདསྶནཾ. དེམཱིཏི དཱཡཀནིདསྶནཾ. དདཱམཱིཏིཨཱདཱིནི པན པརིཡཱཡཝཙནཱནི. ཝུཏྟཉྷི ‘‘དེཡྻདཱཡཀཔཊིགྒཱཧཀཱ ཝིཡ དཱནསྶཱ’’ཏི, ‘‘ཏིཎྞཾ སམྨུཁཱིབྷཱཝཱ ཀུསལཾ ཧོཏཱི’’ཏི ཙ. ‘‘ཝཏྠུཔརིཙྩཱགལཀྑཎཏྟཱ དཱནསྶཱ’’ཏི ཨིདཾ པན ཨེཀདེསལཀྑཎཀཐནམེཝ, ཀིཾ ཨེཝཾ དཱིཡམཱནཾ སམྨུཁཱཡེཝ དིནྣཾ ཧོཏི, ཨུདཱཧུ པརམྨུཁཱཔཱིཏི ཨཱཧ ‘‘སམྨུཁཱཔི པརམྨུཁཱཔི དིནྣཾཡེཝ ཧོཏཱི’’ཏི. ཏུཡ྄ཧཾ གཎྷཱཧཱིཏིཨཱདཱིསུ ཨཡམཏྠོ – ‘‘གཎྷཱཧཱི’’ཏི ཝུཏྟེ ‘‘དེམཱི’’ཏི ཝུཏྟསདིསཾ ཧོཏི, ཏསྨཱ མུཁྱཏོ དིནྣཏྟཱ སུདིནྣཾ ཧོཏི, ‘‘གཎྷཱམཱི’’ཏི ཙ ཝུཏྟེ མུཁྱཏོ གཧཎཾ ཧོཏི, ཏསྨཱ སུགྒཧིཏཾ ཧོཏི. ‘‘ཏུཡ྄ཧཾ མཡ྄ཧ’’ནྟི ཨིམཱནི པན པཊིགྒཱཧཀཔཊིབནྡྷཏཱཀརཎེ ཝཙནཱནི. ཏཝ སནྟཀཾ ཀརོཧཱིཏིཨཱདཱིནི པན པརིཡཱཡཏོ དཱནགྒཧཎཱནི, ཏསྨཱ དུདིནྣཾ དུགྒཧིཏཉྩ ཧོཏི. ལོཀེ ཧི ཨཔརིཙྩཛིཏུཀཱམཱཔི པུན གཎྷིཏུཀཱམཱཔི ‘‘ཏཝ སནྟཀཾ ཧོཏཱུ’’ཏི ནིཡྻཱཏེནྟི ཡཐཱ ཏཾ ཀུསརཉྙོ མཱཏུ རཛྫནིཡྻཱཏནཾ. ཏེནཱཧ ‘‘ནེཝ དཱཏཱ དཱཏུཾ ཛཱནཱཏི, ན ཨིཏརོ གཧེཏུ’’ནྟི. སཙེ པནཱཏིཨཱདཱིསུ པན ¶ དཱཡཀེན པཉྙཏྟིཡཾ ཨཀོཝིདཏཱཡ པརིཡཱཡཝཙནེ ཝུཏྟེཔི པཊིགྒཱཧཀོ ¶ ཨཏྟནོ པཉྙཏྟིཡཾ ཀོཝིདཏཱཡ མུཁྱཝཙནེན གཎྷཱཏི, ཏསྨཱ ‘‘སུགྒཧིཏ’’ནྟི ཝུཏྟཾ.

སཙེ པན ཨེཀོཏིཨཱདཱིསུ པན དཱཡཀོ མུཁྱཝཙནེན དེཏི, པཊིགྒཱཧཀོཔི མུཁྱཝཙནེན པཊིཀྑིཔཏི, ཏསྨཱ དཱཡཀསྶ པུབྦེ ཨདྷིཊྛིཏམྤི ཙཱིཝརཾ དཱནཝསེན ཨདྷིཊྛཱནཾ ཝིཛཧཏི, པརིཙྩཏྟཏྟཱ ཨཏྟནོ ཨསནྟཀཏྟཱ ཨཏིརེཀཙཱིཝརམྤི ན ཧོཏི, ཏསྨཱ དསཱཧཱཏིཀྐམེཔི ཨཱཔཏྟི ན ཧོཏི. པཊིགྒཱཧཀསྶཔི ན པཊིཀྑིཔིཏཏྟཱ ཨཏྟནོ སནྟཀཾ ན ཧོཏི, ཏསྨཱ ཨཏིརེཀཙཱིཝརཾ ན ཧོཏཱིཏི དསཱཧཱཏིཀྐམེཔི ཨཱཔཏྟི ནཏྠི. ཡསྶ པན རུཙྩཏཱིཏི ཨེཏྠ པན ཨིམསྶ ཙཱིཝརསྶ ཨསྶཱམིཀཏྟཱ པཾསུཀཱུལཊྛཱནེ ཋིཏཏྟཱ ཡསྶ རུཙྩཏི, ཏེན པཾསུཀཱུལབྷཱཝེན གཧེཏྭཱ པརིབྷུཉྫིཏབྦཾ, པརིབྷུཉྫནྟེན པན དཱཡཀེན པུབྦཨདྷིཊྛིཏམྤི དཱནཝསེན ཨདྷིཊྛཱནསྶ ཝིཛཧིཏཏྟཱ པུན ཨདྷིཊྛཧིཏྭཱ པརིབྷུཉྫིཏབྦཾ ཨིཏརེན པུབྦེ ཨནདྷིཊྛིཏཏྟཱཏི དཊྛབྦཾ.

ཨིཏྠནྣཱམསྶ དེཧཱིཏིཨཱདཱིསུ པན ཨཱཎཏྱཏྠེ པཝཏྟཱཡ པཉྩམཱིཝིབྷཏྟིཡཱ ཝུཏྟཏྟཱ ཨཱཎཏྟེན པཊིགྒཱཧཀསྶ དིནྣཀཱལེཡེཝ པཊིགྒཱཧཀསྶ སནྟཀཾ ཧོཏི, ན ཏཏོ པུབྦེ, པུབྦེ པན ཨཱཎཱཔཀསྶེཝ, ཏསྨཱ ‘‘ཡོ པཧིཎཏི, ཏསྶེཝ སནྟཀ’’ནྟི ཝུཏྟཾ. ཨིཏྠནྣཱམསྶ དམྨཱིཏི པན པཙྩུཔྤནྣཏྠེ པཝཏྟཱཡ ཝཏྟམཱནཝིབྷཏྟིཡཱ ཝུཏྟཏྟཱ ཏཏོ པཊྛཱཡ པཊིགྒཱཧཀསྶེཝ སནྟཀཾ ཧོཏི, ཏསྨཱ ‘‘ཡསྶ པཧཱིཡཏི, ཏསྶ སནྟཀ’’ནྟི ཝུཏྟཾ. ཏསྨཱཏི ཨིམིནཱ ཨཱཡསྨཏཱ རེཝཏཏྠེརེན ཨཱཡསྨཏོ སཱརིཔུཏྟསྶ ཙཱིཝརཔེསནཝཏྠུསྨིཾ བྷགཝཏཱ དེསིཏེསུ ཨདྷིཊྛཱནེསུ ཨིདྷ ཝུཏྟལཀྑཎེན ཨསམྨོཧཏོ ཛཱནིཏབྦནྟི དསྶེཏི.

ཏཏྠ དྭཱདྷིཊྛིཏཾ, སྭཱདྷིཊྛིཏནྟི ཙ ན ཏིཙཱིཝརཱདྷིཊྛཱནཾ སནྡྷཱཡ ཝུཏྟཾ, ཨཐ ཁོ སཱམིཀེ ཛཱིཝནྟེ ཝིསྶཱསགྒཱཧཙཱིཝརབྷཱཝེན ཙ སཱམིཀེ མཏེ མཏཀཙཱིཝརབྷཱཝེན ཙ གཧཎཾ སནྡྷཱཡ ¶ ཝུཏྟཾ, ཏཏོ པན དསཱཧེ ཨནཏིཀྐནྟེཡེཝ ཏིཙཱིཝརཱདྷིཊྛཱནཾ ཝཱ པརིཀྑཱརཙོལཱ༹དྷིཊྛཱནཾ ཝཱ ཝིཀཔྤནཾ ཝཱ ཀཱཏབྦཾ. ཡོ པཧིཎཏཱིཏི དཱཡཀཾ སནྡྷཱཡཱཧ, ཡསྶ པཧཱིཡཏཱིཏི པཊིགྒཱཧཀཾ.

པརིཙྩཛིཏྭཱ…པེ… ན ལབྷཏི, ཨཱཧརཱཔེནྟོ བྷཎྜགྒྷེན ཀཱརེཏབྦོཏི ཨཏྠོ. ཨཏྟནཱ…པེ… ནིསྶགྒིཡནྟི ཨིམིནཱ པརསནྟཀབྷཱུཏཏྟཾ ཛཱནནྟོ ཐེཡྻཔསཡ྄ཧཝསེན ཨཙྪིནྡནྟོ པཱརཱཛིཀོ ཧོཏཱིཏི དསྶེཏི. པོརཱཎཊཱིཀཱཡཾ པན ‘‘སཀསཉྙཱཡ ཝིནཱ གཎྷནྟོ བྷཎྜཾ ཨགྒྷཱཔེཏྭཱ ¶ ཨཱཔཏྟིཡཱ ཀཱརེཏབྦོ’’ཏི ཝུཏྟཾ. སཀསཉྙཱཡ ཝིནཱཔི ཏཱཝཀཱལིཀཔཾསུཀཱུལསཉྙཱདིཝསེན གཎྷནྟོ ཨཱཔཏྟིཡཱ ན ཀཱརེཏབྦོ. ཨཊྛཀཐཱཡཾ པན པསཡ྄ཧཱཀཱརཾ སནྡྷཱཡ ཝདཏི. ཏེནཱཧ ‘‘ཨཙྪིནྡཏོ ནིསྶགྒིཡ’’ནྟི. སཙེ པན…པེ… ཝཊྚཏཱིཏི ཏུཊྛདཱནཾ ཨཱཧ, ཨཐ པནཱཏིཨཱདིནཱ ཀུཔིཏདཱནཾ. ཨུབྷཡཐཱཔི སཡཾ དིནྣཏྟཱ ཝཊྚཏི, གཧཎེ ཨཱཔཏྟི ནཏྠཱིཏི ཨཏྠོ.

མམ སནྟིཀེ…པེ… ཨེཝཾ པན དཱཏུཾ ན ཝཊྚཏཱིཏི ཝཏྠུཔརིཙྩཱགལཀྑཎཏྟཱ དཱནསྶ ཨེཝཾ དདནྟོ ཨཔརིཙྩཛིཏྭཱ དིནྣཏྟཱ དཱནཾ ན ཧོཏཱིཏི ན ཝཊྚཏི, ཏཏོ ཨེཝ དུཀྐཊཾ ཧོཏི. ཨཱཧརཱཔེཏུཾ པན ཝཊྚཏཱིཏི པུབྦེ ‘‘ཨཀརོནྟསྶ ན དེམཱི’’ཏི ཝུཏྟཏྟཱ ཡཐཱཝུཏྟཨུཔཛ྄ཛྷཱཡགྒཧཎཱདཱིནི ཨཀརོནྟེ ཨཱཙརིཡསྶེཝ སནྟཀཾ ཧོཏཱིཏི ཀཏྭཱ ཝུཏྟཾ. ཀརོནྟེ པན ཨནྟེཝཱསིཀསྶ སནྟཀཾ བྷཝེཡྻ སབྦསོ ཨཔརིཙྩཛིཏྭཱ དིནྣཏྟཱ. སཀསཉྙཱཡ ཝིཛྫམཱནཏྟཱ ‘‘ཨཱཧརཱཔེཏུཾ ཝཊྚཏཱི’’ཏི ཝུཏྟཾ སིཡཱ. ཊཱིཀཱཡཾ (སཱརཏྠ. ཊཱི. ༢.༦༣༥) པན ‘‘ཨེཝཾ དིནྣཾ བྷཏིསདིསཏྟཱ ཨཱཧརཱཔེཏུཾ ཝཊྚཏཱི’’ཏི ཝུཏྟཾ. བྷཏིསདིསེ སཏིཔི ཀམྨེ ཀཏེ བྷཏི ལདྡྷབྦཱ ཧོཏི, ཏསྨཱ ཨཱརོཔེཏུཾ ན ཝཊྚེཡྻ. ཝིམཏིཝིནོདནིཡཾ (ཝི. ཝི. ཊཱི. ༡.༦༣༥) པན ‘‘ཨཱཧརཱཔེཏུཾ ཝཊྚཏཱིཏི ཀམྨེ ཨཀཏེ བྷཏིསདིསཏྟཱ ¶ ཝུཏྟ’’ནྟི ཝུཏྟཾ, ཏེན ཀམྨེ ཀཏེ ཨཱཧརཱཔེཏུཾ ན ཝཊྚཏཱིཏི སིདྡྷཾ. ཨུཔཛ྄ཛྷཾ གཎྷིསྶཏཱིཏི སཱམཎེརསྶ དཱནཾ དཱིཔེཏི, ཏེན ཙ སཱམཎེརཀཱལེ དཏྭཱ ཨུཔསམྤནྣཀཱལེ ཨཙྪིནྡཏོཔི པཱཙིཏྟིཡཾ དཱིཔེཏི. ཨཡཾ ཏཱཝ དཱནེ ཝིནིཙྪཡོཏི ཨིམིནཱ དཱནཝིནིཙྪཡཱདཱིནཾ ཏིཎྞཾ ཝིནིཙྪཡཱནཾ ཨེཀཔརིཙྪེདཀཏབྷཱཝཾ དཱིཔེཏི.

ཝིསྶཱསགྒཱཧལཀྑཎཝིནིཙྪཡཀཐཱ

༧༠. ཨནུཊྛཱནསེཡྻཱ ནཱམ ཡཱཡ སེཡྻཱཡ སཡིཏོ ཡཱཝ ཛཱིཝིཏིནྡྲིཡུཔཙྪེདཾ ན པཱཔུཎཱཏི, ཏཱཝ ཝུཙྩཏི. དདམཱནེན ཙ མཏཀདྷནཾ ཏཱཝ ཡེ ཏསྶ དྷནེ ཨིསྶརཱ གཧཊྛཱ ཝཱ པབྦཛིཏཱ ཝཱ, ཏེསཾ དཱཏབྦནྟི ཨེཏྠ ཀེ གཧཊྛཱ ཀེ པབྦཛིཏཱ ཀེན ཀཱརཎེན ཏསྶ དྷནེ ཨིསྶརཱཏི? གཧཊྛཱ ཏཱཝ གིལཱནུཔཊྛཱཀབྷཱུཏཱ ཏེན ཀཱརཎེན གིལཱནུཔཊྛཱཀབྷཱགབྷཱུཏེ ཏསྶ དྷནེ ཨིསྶརཱ, ཡེསཉྩ ཝཱཎིཛཱནཾ ཧཏྠཏོ ཀཔྤིཡཀཱརཀེན པཏྟཱདིཔརིཀྑཱརོ གཱཧཱཔིཏོ, ཏེསཾ ཡཾ དཱཏབྦམཱུལཾ, ཏེ ཙ ཏསྶ དྷནེ ཨིསྶརཱ, ཡེསཉྩ མཱཏཱཔིཏཱུནཾ ཨཏྠཱཡ པརིཙྪིནྡིཏྭཱ ཝཏྠཱནི ཋཔིཏཱནི, ཏེཔི ཏསྶ དྷནསྶ ¶ ཨིསྶརཱ. ཨེཝམཱདིནཱ ཡེན ཡེན ཀཱརཎེན ཡཾ ཡཾ པརིཀྑཱརདྷནཾ ཡེཧི ཡེཧི གཧཊྛེཧི ལབྷིཏབྦཾ ཧོཏི, ཏེན ཏེན ཀཱརཎེན ཏེ ཏེ གཧཊྛཱ ཏསྶ ཏསྶ དྷནསྶ ཨིསྶརཱ.

པབྦཛིཏཱ པན བཱཧིརཀཱ ཏཐེཝ སཏི ཀཱརཎེ ཨིསྶརཱ. པཉྩསུ པན སཧདྷམྨིཀེསུ བྷིཀྑཱུ སཱམཎེརཱ ཙ མཏཱནཾ བྷིཀྑུསཱམཎེརཱནཾ དྷནཾ ཝིནཱཔི ཀཱརཎེན དཱཡཱདབྷཱཝེན ལབྷནྟི, ན ཨིཏརཱ. བྷིཀྑུནཱིསིཀྑམཱནསཱམཎེརཱིནམྤི དྷནཾ ཏཱཡེཝ ལབྷནྟི, ན ཨིཏརེ. ཏཾ པན མཏཀདྷནབྷཱཛནཾ ཙཏུཔཙྩཡབྷཱཛནཝིནིཙྪཡེ ཨཱཝི བྷཝིསྶཏི, བཧཱུ པན ཝིནཡདྷརཏྠེརཱ ‘‘ཡེ ཏསྶ དྷནསྶ ཨིསྶརཱ གཧཊྛཱ ཝཱ པབྦཛིཏཱ ཝཱ’’ཏི ¶ པཱཋཾ ནིསྶཱཡ ‘‘མཏབྷིཀྑུསྶ དྷནཾ གཧཊྛབྷཱུཏཱ ཉཱཏཀཱ ལབྷནྟཱི’’ཏི ཝིནིཙྪིནནྟི, ཏམྤི ཝིནིཙྪཡཾ ཏསྶ ཙ ཡུཏྟཱཡུཏྟབྷཱཝཾ ཏཏྠེཝ ཝཀྑཱམ.

ཨནཏྟམནསྶ སནྟཀནྟི ‘‘དུཊྛུ ཀཏཾ ཏཡཱ མཡཱ ཨདིནྣཾ མམ སནྟཀཾ གཎྷནྟེནཱ’’ཏི ཝཙཱིབྷེདེན ཝཱ ཙིཏྟུཔྤཱདམཏྟེན ཝཱ དོམནསྶཔྤཏྟསྶ སནྟཀཾ. ཡོ པན པཋམཾཡེཝ ‘‘སུཊྛུ ཀཏཾ ཏཡཱ མམ སནྟཀཾ གཎྷནྟེནཱ’’ཏི ཝཙཱིབྷེདེན ཝཱ ཙིཏྟུཔྤཱདམཏྟེན ཝཱ ཨནུམོདིཏྭཱ པཙྪཱ ཀེནཙི ཀཱརཎེན ཀུཔིཏོ, པཙྩཱཧརཱཔེཏུཾ ན ལབྷཏི. ཡོཔི ཨདཱཏུཀཱམོ, ཙིཏྟེན པན ཨདྷིཝཱསེཏི, ན ཀིཉྩི ཝདཏཱིཏི ཨེཏྠ ཏུ པོརཱཎཊཱིཀཱཡཾ (སཱརཏྠ. ཊཱི. ༢.༡༣༡) ‘‘ཙིཏྟེན པན ཨདྷིཝཱསེཏཱིཏི ཝུཏྟམེཝཏྠཾ ཝིབྷཱཝེཏུཾ ‘ན ཀིཉྩི ཝདཏཱི’ཏི ཝུཏྟ’’ནྟི ཝུཏྟཾ. ཨེཝཾ སཏི ‘‘ཙིཏྟེནཱ’’ཏི ཨིདཾ ཨདྷིཝཱསནཀིརིཡཱཡ ཀརཎཾ ཧོཏི. ཨདཱཏུཀཱམོཏི ཨེཏྠཱཔི ཏམེཝ ཀརཎཾ སིཡཱ, ཏཏོ ‘‘ཙིཏྟེན ཨདཱཏུཀཱམོ, ཙིཏྟེན ཨདྷིཝཱསེཏཱི’’ཏིཝཙནཾ ཨོཙིཏྱསམྤོསཀཾ ན བྷཝེཡྻ. ཏཾ ཋཔེཏྭཱ ‘‘ཨདཱཏུཀཱམོ’’ཏི ཨེཏྠ ཀཱཡེནཱཏི ཝཱ ཝཱཙཱཡཱཏི ཝཱ ཨཉྙཾ ཀརཎམྤི ན སམྦྷཝཏི, ཏདསམྦྷཝེ སཏི ཝིསེསཏྠཝཱཙཀོ པན-སདྡོཔི ནིརཏྠཀོ. ན ཀིཉྩི ཝདཏཱིཏི ཨེཏྠ ཏུ ཝདནཀིརིཡཱཡ ཀརཎཾ ‘‘ཝཱཙཱཡཱ’’ཏི པདཾ ཨིཙྪིཏབྦཾ, ཏཐཱ ཙ སཏི ཨཉྙཾ ཨདྷིཝཱསནཀིརིཡཱཡ ཀརཎཾ, ཨཉྙཾ ཝདནཀིརིཡཱཡ ཀརཎཾ, ཨཉྙཱ ཨདྷིཝཱསནཀིརིཡཱ, ཨཉྙཱ ཝདནཀིརིཡཱ, ཏསྨཱ ‘‘ཝུཏྟམེཝཏྠཾ ཝིབྷཱཝེཏུ’’ནྟི ཝཏྟུཾ ན ཨརཧཏི, ཏསྨཱ ཡོཔི ཙིཏྟེན ཨདཱཏུཀཱམོ ཧོཏི, པན ཏཐཱཔི ཝཱཙཱཡ ཨདྷིཝཱསེཏི, ན ཀིཉྩི ཝདཏཱིཏི ཡོཛནཾ ཀཏྭཱ པན ‘‘ཨདྷིཝཱསེཏཱིཏི ཝུཏྟམེཝཏྠཾ པཀཱསེཏུཾ ན ཀིཉྩི ཝདཏཱིཏི ཝུཏྟ’’ནྟི ཝཏྟུམརཧཏི. ཨེཏྠ ཏུ པན-སདྡོ ཨརུཙིལཀྑཎསཱུཙནཏྠོ. ‘‘ཙིཏྟེནཱ’’ཏི ཨིདཾ ཨདཱཏུཀཱམཀིརིཡཱཡ ཀརཎཾ, ‘‘ཝཱཙཱཡཱ’’ཏི ¶ ཨདྷིཝཱསནཀིརིཡཱཡ ཨཝདནཀིརིཡཱཡ ཙ ཀརཎཾ. ཨདྷིཝཱསནཀིརིཡཱ ཙ ཨཝདནཀིརིཡཱཡེཝ ¶ . ‘‘ཨདྷིཝཱསེཏཱི’’ཏི ཝུཏྟེ ཨཝདནཀིརིཡཱཡ ཨཔཱཀཊབྷཱཝཏོ ཏཾ པཀཱསེཏུཾ ‘‘ན ཀིཉྩི ཝདཏཱི’’ཏི ཝུཏྟཾ, ཨེཝཾ གཡ྄ཧམཱནེ པུབྦཱཔརཝཙནཏྠོ ཨོཙིཏྱསམྤོསཀོ སིཡཱ, ཏསྨཱ ཨེཏྟཀཝིཝརེཧི ཝིཙཱརེཏྭཱ གཧེཏབྦོཏི.

ལཱབྷཔརིཎཱམནཝིནིཙྪཡཀཐཱ

༧༡. ལཱབྷཔརིཎཱམནཝིནིཙྪཡེ ཏུམྷཱཀཾ སཔྤིཨཱདཱིནི ཨཱབྷཏཱནཱིཏི ཏུམྷཱཀཾ ཨཏྠཱཡ ཨཱབྷཏཱནི སཔྤིཨཱདཱིནི. པརིཎཏབྷཱཝཾ ཛཱནིཏྭཱཔི ཝུཏྟཝིདྷིནཱ ཝིཉྙཱཔེནྟེན ཏེསཾ སནྟཀམེཝ ཝིཉྙཱཔིཏཾ ནཱམ ཧོཏཱིཏི ཨཱཧ ‘‘མཡ྄ཧམྤི དེཐཱཏི ཝདཏི, ཝཊྚཏཱི’’ཏི.

‘‘པུཔྥམྤི ཨཱརོཔེཏུཾ ན ཝཊྚཏཱིཏི ཨིདཾ པརིཎཏཾ སནྡྷཱཡ ཝུཏྟཾ, སཙེ པན ཨེཀསྨིཾ ཙེཏིཡེ པཱུཛིཏཾ པུཔྥཾ གཧེཏྭཱ ཨཉྙསྨིཾ ཙེཏིཡེ པཱུཛེཏི, ཝཊྚཏཱི’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༦༦༠) ཝུཏྟཾ. ཨཊྛཀཐཱཡཾ (པཱརཱ. ཨཊྛ. ༢.༦༦༠) པན ནིཡམེཏྭཱ ‘‘ཨཉྙསྶ ཙེཏིཡསྶ ཨཏྠཱཡ རོཔིཏམཱལཱཝཙྪཏོ’’ཏི ཝུཏྟཏྟཱ ན ཀེཝལཾ པརིཎཏབྷཱཝོཡེཝ ཀཐིཏོ, ཨཐ ཁོ ནིཡམེཏྭཱ རོཔིཏབྷཱཝོཔི. པུཔྥམྤཱིཏི པི-སདྡེན ཀུཏོ མཱལཱཝཙྪནྟི དསྶེཏི. ཝིམཏིཝིནོདནིཡཾ (ཝི. ཝི. ཊཱི. ༡.༦༦༠) པན ‘‘རོཔིཏམཱལཱཝཙྪཏོཏི ཀེནཙི ནིཡམེཏྭཱ རོཔིཏཾ སནྡྷཱཡ ཝུཏྟཾ, ཨནོཙིཏཾ མིལཱཡམཱནཾ ཨོཙིནིཏྭཱ ཡཏྠ ཀཏྠཙི པཱུཛེཏུཾ ཝཊྚཏཱི’’ཏི ཝུཏྟཾ. ཋིཏཾ དིསྭཱཏི སེསཀཾ གཧེཏྭཱ ཋིཏཾ དིསྭཱ. ཨིམསྶ སུནཁསྶ མཱ དེཧི, ཨེཏསྶ དེཧཱིཏི ཨིདཾ པརིཎཏེཡེཝ, ཏིརཙྪཱནགཏསྶ པརིཙྩཛིཏྭཱ དིནྣེ པན ཏཾ པལཱཔེཏྭཱ ཨཉྙཾ བྷུཉྫཱཔེཏུཾ ཝཊྚཏི, ཏསྨཱ ‘‘ཀཏྠ དེམཱཏིཨཱདིནཱ ཨེཀེནཱཀཱརེན ཨནཱཔཏྟི དསྶིཏཱ. ཨེཝཾ པན ཨཔུཙྪིཏེཔི ¶ ‘ཨཔརིཎཏཾ ཨིད’ནྟི ཛཱནནྟེན ཨཏྟནོ རུཙིཡཱ ཡཏྠ ཨིཙྪཏི, ཏཏྠ དཱཔེཏུཾ ཝཊྚཏཱི’’ཏི ཏཱིསུཔི གཎྛིཔདེསུ ཝུཏྟཾ. ཡཏྠ ཨིཙྪཐ, ཏཏྠ དེཐཱཏི ཨེཏྠཱཔི ‘‘ཏུམྷཱཀཾ རུཙིཡཱ’’ཏི ཝུཏྟཏྟཱ ཡཏྠ ཨིཙྪཏི, ཏཏྠ དཱཔེཏུཾ ལབྷཏི.

པརིཝཱརེ (པརི. ཨཊྛ. ༣༢༩) པན ནཝ ཨདྷམྨིཀཱནི དཱནཱནཱིཏི སངྒྷསྶ པརིཎཏཾ ཨཉྙསངྒྷསྶ ཝཱ ཙེཏིཡསྶ ཝཱ པུགྒལསྶ ཝཱ པརིཎཱམེཏི, ཙེཏིཡསྶ པརིཎཏཾ ཨཉྙཙེཏིཡསྶ ཝཱ སངྒྷསྶ ཝཱ པུགྒལསྶ ཝཱ པརིཎཱམེཏི, པུགྒལསྶ པརིཎཏཾ ཨཉྙཔུགྒལསྶ ཝཱ སངྒྷསྶ ཝཱ ཙེཏིཡསྶ ཝཱ པརིཎཱམེཏཱིཏི ཨེཝཾ ཝུཏྟཱནི. ནཝ པཊིགྒཧཱ པརིབྷོགཱ ¶ ཙཱཏི ཨེཏེསཾཡེཝ དཱནཱནཾ པཊིགྒཧཱ ཙ པརིབྷོགཱ ཙ. ཏཱིཎི དྷམྨིཀཱནི དཱནཱནཱིཏི སངྒྷསྶ ནིནྣཾ སངྒྷསྶེཝ དེཏི, ཙེཏིཡསྶ ནིནྣཾ ཙེཏིཡསྶེཝ དེཏི, པུགྒལསྶ ནིནྣཾ པུགྒལསྶེཝ དེཏཱིཏི ཨིམཱནི ཏཱིཎི. པཊིགྒཧཔཊིབྷོགཱཔི ཏེསཾཡེཝ པཊིགྒཧཱ ཙ པརིབྷོགཱ ཙཱཏི ཨཱགཏཾ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

དཱནལཀྑཎཱདིཝིནིཙྪཡཀཐཱལངྐཱརོ ནཱམ

ཏེརསམོ པརིཙྪེདོ.

༡༤. པཐཝཱིཁཎནཝིནིཙྪཡཀཐཱ

༧༢. ཨེཝཾ དཱནཝིསྶཱསགྒཱཧལཱབྷཔརིཎཱམནཝིནིཙྪཡཾ ཀཐེཏྭཱ ཨིདཱནི པཐཝཱིཝིནིཙྪཡཾ ཀཐེཏུཾ ‘‘པཐཝཱི’’ཏྱཱདིམཱཧ. ཏཏྠ པཏྠརཏཱིཏི པཐཝཱི, པ-པུབྦ ཐར སནྠརཎེཏི དྷཱཏུ, ར-ཀཱརསྶ ཝ-ཀཱརོ, སསམྦྷཱརཔཐཝཱི. ཏཔྤབྷེདམཱཧ ‘‘དྭེ པཐཝཱི, ཛཱཏཱ ཙ པཐཝཱི ཨཛཱཏཱ ཙ པཐཝཱི’’ཏི. ཏཱསཾ ¶ ཝིསེསཾ དསྶེཏུཾ ‘‘ཏཏྠ ཛཱཏཱ ནཱམ པཐཝཱི’’ཏྱཱདིམཱཧ. ཏཏྠ སུདྡྷཔཾསུཀཱ…པེ… ཡེབྷུཡྻེནམཏྟིཀཱཔཐཝཱི ཛཱཏཱ ནཱམ པཐཝཱི ཧོཏི. ན ཀེཝལཾ སཱཡེཝ, ཨདཌྜྷཱ པཐཝཱིཔི ‘‘ཛཱཏཱ པཐཝཱི’’ཏི ཝུཙྩཏི. ན ཀེཝལཾ ཨིམཱ དྭེཡེཝ, ཡོཔི པཾསུཔུཉྫོ ཝཱ…པེ… ཙཱཏུམཱསཾ ཨོཝཊྛོ, སོཔི ‘‘ཛཱཏཱ པཐཝཱི’’ཏི ཝུཙྩཏཱིཏི ཡོཛནཱ. ཨིཏརཏྲཔི ཨེསེཝ ནཡོ.

ཏཏྠ སུདྡྷཱ པཾསུཀཱཡེཝ ཨེཏྠ པཐཝིཡཱ ཨཏྠི, ན པཱསཱཎཱདཡོཏི སུདྡྷཔཾསུཀཱ. ཏཐཱ སུདྡྷམཏྟིཀཱ. ཨཔྤཱ པཱསཱཎཱ ཨེཏྠཱཏི ཨཔྤཔཱསཱཎཱ. ཨིཏརེསུཔི ཨེསེཝ ནཡོ. ཡེབྷུཡྻེན པཾསུཀཱ ཨེཏྠཱཏི ཡེབྷུཡྻེནཔཾསུཀཱ, ཨལུཏྟསམཱསོཡཾ, ཏཐཱ ཡེབྷུཡྻེནམཏྟིཀཱ. ཏཏྠ མུཊྛིཔྤམཱཎཏོ ཨུཔརི པཱསཱཎཱ. མུཊྛིཔྤམཱཎཱ སཀྑརཱ. ཀཐལཱཏི ཀཔཱལཁཎྜཱདི. མརུམྤཱཏི ཀཊསཀྑརཱ. ཝཱལུཀཱ ཝཱལུཀཱཡེཝ. ཡེབྷུཡྻེནཔཾསུཀཱཏི ཨེཏྠ ཏཱིསུ ཀོཊྛཱསེསུ དྭེ ཀོཊྛཱསཱ པཾསུ, ཨེཀོ པཱསཱཎཱདཱིསུ ཨཉྙཏརཀོཊྛཱསོ. ཨདཌྜྷཱཔཱིཏི ཨུདྡྷནཔཏྟཔཙནཀུམྦྷཀཱརཱཏཔཱདིཝསེན ཏཐཱ ཏཐཱ ཨདཌྜྷཱ, སཱ པན ཝིསུཾ ནཏྠི, སུདྡྷཔཾསུཨཱདཱིསུ ཨཉྙཏརཱཝཱཏི ཝེདིཏབྦཱ. ཡེབྷུཡྻེནསཀྑརཱཏི བཧུཏརསཀྑརཱ. ཧཏྠིཀུཙྪིཡཾ ཀིར ཨེཀཾ པཙྪིཔཱུརཾ ཨཱཧརཱཔེཏྭཱ དོཎིཡཾ དྷོཝིཏྭཱ པཐཝིཡཱ ཡེབྷུཡྻེནསཀྑརབྷཱཝཾ ¶ ཉཏྭཱ སཡཾ བྷིཀྑཱུ པོཀྑརཎིཾ ཁཎིཾསཱུཏི. ཡཱནི པན མཛ྄ཛྷེ ‘‘ཨཔྤཔཾསུཨཔྤམཏྟིཀཱ’’ཏི དྭེ པདཱནི, ཏཱནི ཡེབྷུཡྻེནཔཱསཱཎཱདིཔཉྩཀམེཝ པཝིསནྟི. ཏེསཉྙེཝ ཧི དྭིནྣཾ པབྷེདཝཙནམེཏཾ, ཡདིདཾ སུདྡྷཔཱསཱཎཱདིཨཱདི.

ཨེཏྠ ཙ ཀིཉྩཱཔི ཡེབྷུཡྻེནཔཾསུཾ ཨཔྤཔཾསུཉྩ པཐཝིཾ ཝཏྭཱ ཨུཔཌྜྷཔཾསུཀཱཔཐཝཱི ན ཝུཏྟཱ, ཏཐཱཔི པཎྞཏྟིཝཛྫསིཀྑཱཔདེསུ སཱཝསེསཔཉྙཏྟིཡཱཔི སམྦྷཝཏོ ཨུཔཌྜྷཔཾསུཀཱཡཔི པཐཝིཡཱ ¶ པཱཙིཏྟིཡམེཝཱཏི གཧེཏབྦཾ. ཀེཙི པན ‘‘སབྦཙྪནྣཱདཱིསུ ཨུཔཌྜྷཙྪནྣེ དུཀྐཊསྶ ཝུཏྟཏྟཱ ཨིདྷཱཔི དུཀྐཊཾ ཡུཛྫཏཱི’’ཏི ཝདནྟི, ཏཾ ན ཡུཏྟཾ པཱཙིཏྟིཡཝཏྠུཀཉྩ ཨནཱཔཏྟིཝཏྠུཀཉྩ དུཝིདྷཾ པཐཝིཾ ཋཔེཏྭཱ ཨཉྙིསྶཱ དུཀྐཊཝཏྠུཀཱཡ ཏཏིཡཱཡ པཐཝིཡཱ ཨབྷཱཝཏོ. དྭེཡེཝ ཧི པཐཝིཡོ ཝུཏྟཱ ‘‘ཛཱཏཱ ཙ པཐཝཱི ཨཛཱཏཱ ཙ པཐཝཱི’’ཏི, ཏསྨཱ དྭཱིསུ ཨཉྙཏརཱཡ པཐཝིཡཱ བྷཝིཏབྦཾ. ཝིནཡཝིནིཙྪཡེ ཙ སམྤཏྟེ གརུཀལཧུཀེསུ གརུཀེཡེཝ ཋཱཏབྦཏྟཱ ན སཀྐཱ ཨེཏྠ ཨནཱཔཏྟིཡཱ བྷཝིཏུཾ. སབྦཙྪནྣཱདཱིསུ པན ཨུཔཌྜྷེ དུཀྐཊཾ ཡུཏྟཾ ཏཏྠ ཏཱདིསསྶ དུཀྐཊཝཏྠུནོ སམྦྷཝཏོ. ཝིམཏིཝིནོདནིཡམྤི (ཝི. ཝི. ཊཱི. པཱཙིཏྟིཡ ༢.༨༦) ‘‘ཨཔྤཔཾསུམཏྟིཀཱཡ པཐཝིཡཱ ཨནཱཔཏྟིཝཏྠུབྷཱཝེན ཝུཏྟཏྟཱ ཨུཔཌྜྷཔཾསུམཏྟིཀཱཡཔི པཱཙིཏྟིཡམེཝཱཏི གཧེཏབྦཾ. ན ཧེཏཾ དུཀྐཊཝཏྠཱུཏི སཀྐཱ ཝཏྟུཾ ཛཱཏཱཛཱཏཝིནིམུཏྟཱཡ ཏཏིཡཱཡ པཐཝིཡཱ ཨབྷཱཝཏོ’’ཏི ཝུཏྟཾ.

ཁཎནྟསྶ ཁཎཱཔེནྟསྶ ཝཱཏི ཨནྟམསོ པཱདངྒུཊྛཀེནཔི སམྨཛྫནིསལཱཀཱཡཔི སཡཾ ཝཱ ཁཎནྟསྶ ཨཉྙེན ཝཱ ཁཎཱཔེནྟསྶ. ‘‘པོཀྑརཎིཾ ཁཎཱ’’ཏི ཝདཏི, ཝཊྚཏཱིཏི ‘‘ཨིམསྨིཾ ཨོཀཱསེ’’ཏི ཨནིཡམེཏྭཱ ཝུཏྟཏྟཱ ཝཊྚཏི. ‘‘ཨིམཾ ཝལླིཾ ཁཎཱ’’ཏི ཝུཏྟེཔི པཐཝིཁཎནཾ སནྡྷཱཡ པཝཏྟཝོཧཱརཏྟཱ ཨིམིནཱཝ སིཀྑཱཔདེན པཱཙིཏྟིཡཾ, ན བྷཱུཏགཱམསིཀྑཱཔདེན, ཨུབྷཡམྤི སནྡྷཱཡ ཝུཏྟེ པན དྭེཔི པཱཙིཏྟིཡཱནི ཧོནྟི.

༧༣. ཀུཊེཧཱིཏི གྷཊེཧི. ཏནུཀཀདྡམོཏི ཨུདཀམིསྶཀཀདྡམོ, སོ ཙ ཨུདཀགཏིཀཏྟཱ ཝཊྚཏི. ཨུདཀཔཔྤཊཀོཏི ཨུདཀེ ཨནྟོབྷཱུམིཡཾ པཝིཊྛེ ཏསྶ ཨུཔརིབྷཱགཾ ཚཱདེཏྭཱ ཏནུཀཔཾསུ ཝཱ མཏྟིཀཱ ཝཱ པཊལཾ ཧུཏྭཱ པལཝམཱནཱ ཨུཊྛཱཏི, ཏསྨིཾ ཨུདཀེ སུཀྑེཔི ཏཾ པཊལཾ ཝཱཏེན ཙལམཱནཾ ཏིཊྛཏི, ཏཾ ཨུདཀཔཔྤཊཀོ ནཱམ. ཨོམཀཙཱཏུམཱསནྟི ¶ ཨཱུནཙཱཏུམཱསཾ. ཨོཝཊྛནྟི དེཝེན ཨོཝཊྛཾ. ཨཀཏཔབྦྷཱརེཏི ཨཝལཉྫནཊྛཱནདསྶནཏྠཾ ཝུཏྟཾ. ཏཱདིསེ ཧི ཝམྨིཀསྶ སབྦྷཱཝོཏི. མཱུསིཀུཀྐུརཾ ནཱམ མཱུསིཀཱཧི ཁཎིཏྭཱ བཧི ཀཏཔཾསུརཱསི.

ཨེསེཝ ¶ ནཡོཏི ཨོམཀཙཱཏུམཱསཾ ཨོཝཊྛོཡེཝ ཝཊྚཏཱིཏི ཨཏྠོ. ཨེཀདིཝསམྤི ན ཝཊྚཏཱིཏི ཨོཝཊྛཙཱཏུམཱསཏོ ཨེཀདིཝསཱཏིཀྐནྟོཔི ཝིཀོཔེཏུཾ ན ཝཊྚཏི. ཧེཊྛབྷཱུམིསམྦནྡྷེཔི ཙ གོཀཎྚཀེ བྷཱུམིཏོ ཚིནྡིཏྭཱ ཚིནྡིཏྭཱ ཨུགྒཏཏྟཱ ཨཙྩུགྒཏཾ མཏྠཀཏོ ཚིནྡིཏུཾ གཧེཏུཉྩ ཝཊྚཏཱིཏི ཝདནྟི. སཀཊྛཱནེ ཨཏིཊྛམཱནཾ ཀཏྭཱ པཱདེཧི མདྡིཏྭཱ ཨཱལོལི༹ཏཀདྡམམྤི གཧེཏུཾ ཝཊྚཏི.

ཨཙྪདནནྟིཨཱདིནཱ ཝུཏྟཏྟཱ ཨུཛུཀཾ ཨཱཀཱསཏོ པཏིཏཝསྶོདཀེན ཨོཝཊྛམེཝ ཛཱཏཔཐཝཱི ཧོཏི, ན ཚདནཱདཱིསུ པཏིཏྭཱ ཏཏོ པཝཏྟཨུདཀེན ཏིནྟནྟི ཝེདིཏབྦཾ. ཏཏོཏི པུརཱཎསེནཱསནཏོ. ཨིཊྛཀཾ གཎྷཱམཱིཏིཨཱདི སུདྡྷཙིཏྟཾ སནྡྷཱཡ ཝུཏྟཾ. ‘‘ཨུདཀེནཱཏི ཨུཛུཀཾ ཨཱཀཱསཏོཡེཝ པཏིཏཨུདཀེན. སཙེ པན ཨཉྙཏྠ པཧརིཏྭཱ པཏིཏེན ཨུདཀེན ཏེམིཏཾ ཧོཏི, ཝཊྚཏཱི’’ཏི ཝདནྟི. མཎྜཔཏྠམྦྷནྟི སཱཁཱམཎྜཔཏྠམྦྷཾ.

༧༤. ཨུཙྩཱལེཏྭཱཏི ཨུཀྑིཔིཏྭཱ. ཏེན ཨཔདེསེནཱཏི ཏེན ལེསེན. ཨཝིསཡཏྟཱ ཨནཱཔཏྟཱིཏི ཨེཏྠ སཙེཔི ནིབྦཱཔེཏུཾ སཀྐཱ ཧོཏི, པཋམཾ སུདྡྷཙིཏྟེན དིནྣཏྟཱ དཧཏཱུཏི སལླཀྑེཏྭཱཔི ཏིཊྛཏི, ཨནཱཔཏྟི. མཧཱམཏྟིཀནྟི བྷིཏྟིལེཔནཾ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

པཐཝཱིཁཎནཝིནིཙྪཡཀཐཱལངྐཱརོ ནཱམ

ཙུདྡསམོ པརིཙྪེདོ.

༡༥. བྷཱུཏགཱམཝིནིཙྪཡཀཐཱ

༧༥. ཨེཝཾ ¶ པཐཝིཝིནིཙྪཡཾ ཀཐེཏྭཱ ཨིདཱནི བྷཱུཏགཱམཝིནིཙྪཡཾ ཀཐེཏུཾ ‘‘བྷཱུཏགཱམོ’’ཏིཨཱདིམཱཧ. ཏཏྠ བྷཝནྟི ཨཧུཝུཉྩཱཏི བྷཱུཏཱ, ཛཱཡནྟི ཝཌྜྷནྟི ཛཱཏཱ ཝཌྜྷིཏཱ ཙཱཏི ཨཏྠོ. གཱམོཏི རཱསི, བྷཱུཏཱནཾ གཱམོཏི བྷཱུཏགཱམོ, བྷཱུཏཱ ཨེཝ ཝཱ གཱམོ བྷཱུཏགཱམོ, པཏིཊྛིཏཧརིཏཏིཎརུཀྑཱདཱིནམེཏཾ ཨདྷིཝཙནཾ. ཏཏྠ ‘‘བྷཝནྟཱི’’ཏི ཨིམསྶ ཝིཝརཎཾ ‘‘ཛཱཡནྟི ཝཌྜྷནྟཱི’’ཏི ¶ , ‘‘ཨཧུཝུ’’ནྟི ཨིམསྶ ‘‘ཛཱཏཱ ཝཌྜྷིཏཱ’’ཏི. ཨེཝཾ བྷཱུཏ-སདྡོ པཙྩུཔྤནྣཱཏཱིཏཝིསཡོ ཧོཏི. ཏེནཱཧ ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༩༠) ‘‘བྷཝནྟཱིཏི ཝཌྜྷནྟི, ཨཧུཝུནྟི བབྷུཝཱུ’’ཏི. ཨིདཱནི ཏཾ བྷཱུཏགཱམཾ དསྶེནྟོ ‘‘བྷཱུཏགཱམོཏི པཉྩཧི བཱིཛེཧི ཛཱཏཱནཾ རུཀྑལཏཱདཱིནམེཏཾ ཨདྷིཝཙན’’ནྟི ཨཱཧ. ལཏཱདཱིནནྟི ཨཱདི-སདྡེན ཨོསདྷིགཙྪཱདཡོ ཝེདིཏབྦཱ.

ཨིདཱནི ཏཱནི བཱིཛཱནི སརཱུཔཏོ དསྶེནྟོ ‘‘ཏཏྲིམཱནི པཉྩ བཱིཛཱནཱི’’ཏིཨཱདིམཱཧ. ཏཏྠ མཱུལམེཝ བཱིཛཾ མཱུལབཱིཛཾ. ཨེཝཾ སེསེསུཔི. ཨཐ ཝཱ མཱུལཾ བཱིཛཾ ཨེཏསྶཱཏི མཱུལབཱིཛཾ, མཱུལབཱིཛཏོ ཝཱ ནིབྦཏྟཾ མཱུལབཱིཛཾ. ཨེཝཾ སེསེསུཔི. ཏཏྠ པཋམེན ཝིགྒཧེན བཱིཛགཱམོ ཨེཝ ལབྦྷཏི, དུཏིཡཏཏིཡེཧི བྷཱུཏགཱམོ. ཨིདཱནི ཏེ བྷཱུཏགཱམེ སརཱུཔཏོ དསྶེནྟོ ‘‘ཏཏྠ མཱུལབཱིཛཾ ནཱམཱ’’ཏྱཱདིམཱཧ. ཏཏྠ ཏེསུ པཉྩསུ མཱུལབཱིཛཱདཱིསུ ཧལིདྡི…པེ… བྷདྡམུཏྟཀཾ མཱུལབཱིཛཾ ནཱམ. ན ཀེཝལཾ ཨིམཱནིཡེཝ མཱུལབཱིཛཱནི, ཨཐ ཁོ ཨིཏོ ཨཉྙཱནིཔི ཡཱནི ཝཱ པན བྷཱུཏགཱམཛཱཏཱནི ཨཏྠི སནྟི, མཱུལེ ཛཱཡནྟི, མཱུལེ སཉྫཱཡནྟི, ཨེཏཾ བྷཱུཏགཱམཛཱཏཾ མཱུལབཱིཛཾ ནཱམ ཧོཏཱིཏི ཡོཛནཱ. སེསེསུཔི ཨེསེཝ ནཡོ. ཝུཏྟཉྷི ཨཊྛཀཐཱཡཾ (པཱཙི. ཨཊྛ. ༩༡) ‘‘ཨིདཱནི ཏཾ བྷཱུཏགཱམཾ ཝིབྷཛིཏྭཱ དསྶེནྟོ ‘བྷཱུཏགཱམོ ནཱམ པཉྩ བཱིཛཛཱཏཱནཱི’ཏིཨཱདིམཱཧཱ’’ཏི. ཏཏྠ ¶ བྷཱུཏགཱམོ ནཱམཱཏི བྷཱུཏགཱམཾ ཨུདྡྷརིཏྭཱ ཡསྨིཾ སཏི བྷཱུཏགཱམོ ཧོཏི, ཏཾ དསྶེཏུཾ ‘‘པཉྩ བཱིཛཛཱཏཱནཱིཏི ཨཱཧཱ’’ཏི ཨཊྛཀཐཱསུ ཝུཏྟཾ. ཨེཝཾ སནྟེཔི ‘‘ཡཱནི ཝཱ པནཉྙཱནིཔི ཨཏྠི, མཱུལེ ཛཱཡནྟཱི’’ཏིཨཱདཱིནི ན སམེནྟི. ན ཧི མཱུལབཱིཛཱདཱིནི མཱུལཱདཱིསུ ཛཱཡནྟི. མཱུལཱདཱིསུ ཛཱཡམཱནཱནི པན ཏཱནི བཱིཛཛཱཏཱནི, ཏསྨཱ ཨེཝམཏྠཝཎྞནཱ ཝེདིཏབྦཱ – བྷཱུཏགཱམོ ནཱམཱཏི ཝིབྷཛིཏབྦཔདཾ. པཉྩཱཏི ཏསྶ ཝིབྷཱགཔརིཙྪེདོ. བཱིཛཛཱཏཱནཱིཏི པརིཙྪིནྣདྷམྨནིདསྶནཾ, ཡཏོ བཱིཛེཧི ཛཱཏཱནི བཱིཛཛཱཏཱནི, རུཀྑཱདཱིནཾ ཨེཏཾ ཨདྷིཝཙནནྟི ཙ. ཡཐཱ ‘‘སཱལཱིནཾ ཙེཔི ཨོདནཾ བྷུཉྫཏཱི’’ཏིཨཱདཱིསུ (མ. ནི. ༡.༧༦) སཱལིཏཎྜུལཱནཾ ཨོདནོ སཱལིཨོདནོཏི ཝུཙྩཏི, ཨེཝཾ བཱིཛཏོ སམྦྷཱུཏོ བྷཱུཏགཱམོ ‘‘བཱིཛ’’ནྟི ཝུཏྟོཏི ཝེདིཏབྦོཏི ཙ.

ཕལུ༹བཱིཛནྟི པབྦབཱིཛཾ. པཙྩཡནྟརསམཝཱཡེ སདིསཕལུཔྤཏྟིཡཱ ཝིསེསཀཱརཎབྷཱཝཏོ ཝིརུཧཎསམཏྠེ སཱརཕལེ ནིརུལ༹ྷོ བཱིཛ-སདྡོ ཏདཏྠསཾསིདྡྷིཡཱ མཱུལཱདཱིསུཔི ཀེསུཙི པཝཏྟཏཱིཏི མཱུལཱདིཏོ ནིཝཏྟནཏྠཾ ཨེཀེན བཱིཛསདྡེན ཝིསེསེཏྭཱ ཝུཏྟཾ ‘‘བཱིཛ’’ནྟི ‘‘རཱུཔརཱུཔཾ, དུཀྑདུཀྑ’’ནྟི ¶ ཙ ཡཐཱ. ནིདྡེསེ ‘‘ཡཱནི ཝཱ པནཉྙཱནིཔི ཨཏྠི, མཱུལེ ཛཱཡནྟི མཱུལེ སཉྫཱཡནྟཱི’’ཏི ཨེཏྠ བཱིཛཏོ ནིབྦཏྟེན བཱིཛཾ དསྶིཏཾ, ཏསྨཱ ཨེཝམེཏྠ ཨཏྠོ དཊྛབྦོ – ཡཱནི ཝཱ པནཉྙཱནིཔི ཨཏྠི, ཨཱལུཝཀསེརུཀམལནཱིལུཔྤལཔུཎྜརཱིཀཀུཝལཡཀུནྡཔཱཊལིམཱུལཱདིབྷེདེ མཱུལེ གཙྪཝལླིརུཀྑཱདཱིནི ཛཱཡནྟི སཉྫཱཡནྟི, ཏཱནི, ཡམྷི མཱུལེ ཛཱཡནྟི ཙེཝ སཉྫཱཡནྟི ཙ, ཏཉྩ པཱལི༹ཡཾ (པཱཙི. ༩༡) ཝུཏྟཧལིདྡཱདི ཙ, སབྦམྤི ཨེཏཾ མཱུལབཱིཛཾ ནཱམ, ཨེཏེན ཀཱརིཡོཔཙཱརེན ཀཱརཎཾ དསྶིཏནྟི དསྶེཏི. ཨེས ནཡོ ཁནྡྷབཱིཛཱདཱིསུ. ཡེཝཱཔནཀཁནྡྷབཱིཛེསུ པནེཏྠ ཨམྦཱཊཀཨིནྡསཱལནུཧིཔཱལིབྷདྡཀཀཎིཀཱརཱདཱིནི ཁནྡྷབཱིཛཱནི ¶ . ཨམྦིལཱཝལླིཙཏུརསྶཝལླིཀཎཝེརཱདཱིནི ཕལུ༹བཱིཛཱནི. མཀཙིམལླིཀཱསུམནཛཡསུམནཱདཱིནི ཨགྒབཱིཛཱནི. ཨམྦཛམྦུཔནསཊྛིཨཱདཱིནི བཱིཛབཱིཛཱནཱིཏི དཊྛབྦཱནི. བྷཱུཏགཱམེ བྷཱུཏགཱམསཉྙཱི ཚིནྡཏི ཝཱ ཚེདཱཔེཏི ཝཱཏི སཏྠཀཱནི གཧེཏྭཱ སཡཾ ཝཱ ཚིནྡཏི, ཨཉྙེན ཝཱ ཚེདཱཔེཏི. བྷིནྡཏི ཝཱ བྷེདཱཔེཏི ཝཱཏི པཱསཱཎཱདཱིནི གཧེཏྭཱ སཡཾ ཝཱ བྷིནྡཏི, ཨཉྙེན ཝཱ བྷེདཱཔེཏི. པཙཏི ཝཱ པཙཱཔེཏི ཝཱཏི ཨགྒིཾ ཨུཔསཾཧརིཏྭཱ སཡཾ ཝཱ པཙཏི, ཨཉྙེན ཝཱ པཙཱཔེཏི, པཱཙིཏྟིཡཾ ཧོཏཱིཏི སམྦནྡྷོ. ཏཏྠ ཨཱཔཏྟིབྷེདཾ དསྶེནྟོ ‘‘བྷཱུཏགཱམཉྷཱི’’ཏིཨཱདིམཱཧ. ཏཏྠ བྷཱུཏགཱམཔརིམོཙིཏནྟི བྷཱུཏགཱམཏོ ཝིཡོཛིཏཾ.

༧༦. སཉྩིཙྩ ཨུཀྑིཔིཏུཾ ན ཝཊྚཏཱིཏི ཨེཏྠ ‘‘སཉྩིཙྩཱ’’ཏི ཝུཏྟཏྟཱ སརཱིརེ ལགྒབྷཱཝཾ ཉཏྭཱཔི ཨུཊྛཧཏི, ‘‘ཏཾ ཨུདྡྷརིསྶཱམཱི’’ཏི སཉྙཱཡ ཨབྷཱཝཏོ ཝཊྚཏི. ཨནནྟཀགྒཧཎེན སཱསཔམཏྟིཀཱ གཧིཏཱ. ནཱམཉྷེཏཾ ཏསྶཱ སེཝཱལཛཱཏིཡཱ. མཱུལཔཎྞཱནཾ ཨབྷཱཝེན ‘‘ཨསམྤུཎྞབྷཱུཏགཱམོ ནཱམཱ’’ཏི ཝུཏྟཾ. ཨབྷཱུཏགཱམམཱུལཏྟཱཏི ཨེཏྠ བྷཱུཏགཱམོ མཱུལཾ ཀཱརཎཾ ཨེཏསྶཱཏི བྷཱུཏགཱམམཱུལོ, བྷཱུཏགཱམསྶ ཝཱ མཱུལཾ ཀཱརཎནྟི བྷཱུཏགཱམམཱུལཾ. བཱིཛགཱམོ ཧི ནཱམ བྷཱུཏགཱམཏོ སམྦྷཝཏི, བྷཱུཏགཱམསྶ ཙ ཀཱརཎཾ ཧོཏི. ཨཡཾ པན ཏཱདིསོ ན ཧོཏཱིཏི ‘‘ཨབྷཱུཏགཱམམཱུལཏྟཱ’’ཏི ཝུཏྟཾ.

ཀིཉྩཱཔི ཧི ཏཱལནཱལི༹ཀེརཱདཱིནཾ ཁཱཎུ ཨུདྡྷཾ ཨཝཌྜྷནཏོ བྷཱུཏགཱམསྶ ཀཱརཎཾ ན ཧོཏི, ཏཐཱཔི བྷཱུཏགཱམསངྑྱཱུཔགཏནིབྦཏྟཔཎྞམཱུལབཱིཛཏོ སམྦྷཱུཏཏྟཱ བྷཱུཏགཱམཏོ ཨུཔྤནྣོ ནཱམ ཧོཏཱིཏི བཱིཛགཱམེན སངྒཧཾ གཙྪཏི. སོ བཱིཛགཱམེན སངྒཧིཏོཏི ཨཝཌྜྷམཱནེཔི བྷཱུཏགཱམམཱུལཏྟཱ ཝུཏྟཾ.

‘‘ཨངྐུརེ ཧརིཏེ’’ཏི ཝཏྭཱ ཏམེཝཏྠཾ ཝིབྷཱཝེཏི ‘‘ནཱིལཝཎྞེ ཛཱཏེ’’ཏི, ནཱིལཔཎྞསྶ ཝཎྞསདིསེ ¶ པཎྞེ ཛཱཏེཏི ¶ ཨཏྠོ, ‘‘ནཱིལཝཎྞེ ཛཱཏེ’’ཏི ཝཱ པཱཋོ གཧེཏབྦོ. ཨམཱུལཀབྷཱུཏགཱམེ སངྒཧཾ གཙྪཏཱིཏི ཨིདཾ ནཱལི༹ཀེརསྶ ཨཱཝེཎིཀཾ ཀཏྭཱ ཝདཏི. ‘‘པཱནཱིཡགྷཊཱདཱིནཾ བཧི སེཝཱལོ ཨུདཀེ ཨཊྛིཏཏྟཱ བཱིཛགཱམཱནུལོམཏྟཱ ཙ དུཀྐཊཝཏྠཱུ’’ཏི ཝདནྟི. ཀཎྞཀམྤི ཨབྦོཧཱརིཀམེཝཱཏི ནཱིལཝཎྞམྤི ཨབྦོཧཱརིཀམེཝ.

༧༧. སེལེཡྻཀཾ ནཱམ སིལཱཡ སམྦྷཱུཏཱ ཨེཀཱ གནྡྷཛཱཏི. པུཔྥིཏཀཱལཏོ པཊྛཱཡཱཏི ཝིཀསིཏཀཱལཏོ པབྷུཏི. ཨཧིཙྪཏྟཀཾ གཎྷནྟོཏི ཝིཀསིཏཾ གཎྷནྟོ. མཀུལ༹ཾ པན རུཀྑཏྟཙཾ ཨཀོཔེནྟེནཔི གཧེཏུཾ ན ཝཊྚཏི. ‘‘རུཀྑཏྟཙཾ ཝིཀོཔེཏཱིཏི ཝུཏྟཏྟཱ རུཀྑེ ཛཱཏཾ ཡཾ ཀིཉྩི ཨཧིཙྪཏྟཀཾ རུཀྑཏྟཙཾ ཨཝིཀོཔེཏྭཱ མཏྠཀཏོ ཚིནྡིཏྭཱ གཧེཏུཾ ཝཊྚཏཱི’’ཏི ཝདནྟི, ཏདཡུཏྟཾ ‘‘ཨཧིཙྪཏྟཀཾ ཡཱཝ མཀུལ༹ཾ ཧོཏི, ཏཱཝ དུཀྐཊཝཏྠཱུ’’ཏི ཝུཏྟཏྟཱ. རུཀྑཏོ མུཙྩིཏྭཱཏི ཨེཏྠ ‘‘ཡདིཔི ཀིཉྩིམཏྟཾ རུཀྑེ ཨལླཱིནཱ ཧུཏྭཱ ཏིཊྛཏི, རུཀྑཏོ གཡ྄ཧམཱནཱ པན རུཀྑཙྪཝིཾ ན ཝིཀོཔེཏི, ཝཊྚཏཱི’’ཏི ཝདནྟི. ཨལླརུཀྑཏོ ན ཝཊྚཏཱིཏི ཨེཏྠཱཔི རུཀྑཏྟཙཾ ཨཝིཀོཔེཏྭཱ མཏྠཀཏོ ཏཙྪེཏྭཱ གཧེཏུཾ ཝཊྚཏཱིཏི ཝེདིཏབྦཾ. ཧཏྠཀུཀྐུཙྩེནཱཏི ཧཏྠཙཱཔལླེན. པཱནཱིཡཾ ན ཝཱསེཏབྦནྟི ཨིདཾ ཨཏྟནོ ཨཏྠཱཡ ནཱམིཏཾ སནྡྷཱཡ ཝུཏྟཾ. ཀེཝལཾ ཨནུཔསམྤནྣསྶ ཨཏྠཱཡ ནཱམིཏེ པན པཙྪཱ ཏཏོ ལབྷིཏྭཱ ན ཝཱསེཏབྦནྟི ནཏྠི. ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༩༢) པན ‘‘པཱནཱིཡཾ ན ཝཱསེཏབྦནྟི ཨིདཾ ཨཏྟནོ པིཝནཔཱནཱིཡཾ སནྡྷཱཡ ཝུཏྟཾ, ཨཉྙེསཾ པན ཝཊྚཏི ཨནུགྒཧིཏཏྟཱ. ཏེནཱཧ ཨཏྟནཱ ཁཱདིཏུཀཱམེནཱ’’ཏི ཝུཏྟཾ. ‘‘ཡེསཾ རུཀྑཱནཾ སཱཁཱ རུཧཏཱིཏི ཝུཏྟཏྟཱ ཡེསཾ སཱཁཱ ན རུཧཏི, ཏཏྠ ཀཔྤིཡཀརཎཀིཙྩཾ ནཏྠཱི’’ཏི ཝདནྟི. ཝིམཏིཝིནོདནིཡམྤི ‘‘ཡེསཾ རུཀྑཱནཾ སཱཁཱ ¶ རུཧཏཱིཏི མཱུལཾ ཨནོཏཱརེཏྭཱ པཎྞམཏྟནིགྒམནམཏྟེནཱཔི ཝཌྜྷཏི, ཏཏྠ ཀཔྤིཡམྤི ཨཀརོནྟོ ཚིནྣནཱལི༹ཀེརཝེལུ༹དཎྜཱདཡོ ཀོཔེཏུཾ ཝཊྚཏཱི’’ཏི ཝུཏྟཾ. ‘‘ཙངྐམིཏཊྛཱནཾ དསྶེསྶཱམཱི’’ཏི ཝུཏྟཏྟཱ ཀེཝལཾ ཙངྐམནཱདྷིཔྤཱཡེན ཝཱ མགྒགམནཱདྷིཔྤཱཡེན ཝཱ ཨཀྐམནྟསྶ, ཏིཎཱནཾ ཨུཔརི ནིསཱིདནཱདྷིཔྤཱཡེན ནིསཱིདནྟསྶ ཙ དོསོ ནཏྠི.

༧༨. སམཎཀཔྤེཧཱིཏི སམཎཱནཾ ཀཔྤིཡཝོཧཱརེཧི. ཀིཉྩཱཔི བཱིཛཱདཱིནཾ ཨགྒིནཱ ཕུཊྛམཏྟེན, ནཁཱདཱིཧི ཝིལིཁནམཏྟེན ཙ ཨཝིརུལ༹ྷིདྷམྨཏཱ ན ཧོཏི, ཏཐཱཔི ཨེཝཾ ཀཏེཡེཝ སམཎཱནཾ ཀཔྤཏཱིཏི ཨགྒིཔརིཛིཏཱདཡོ སམཎཝོཧཱརཱ ནཱམ ཛཱཏཱ, ཏསྨཱ ཏེཧི སམཎཝོཧཱརེཧི ཀརཎབྷཱུཏེཧི ཕལཾ པརིབྷུཉྫིཏུཾ ཨནུཛཱནཱམཱིཏི ཨདྷིཔྤཱཡོ. ཨབཱིཛནིབྦཊྚབཱིཛཱནིཔི ¶ སམཎཱནཾ ཀཔྤནྟཱིཏི པཉྙཏྟཔཎྞཏྟིབྷཱཝཏོ སམཎཝོཧཱརཱཨིཙྩེཝ སངྑཾ གཏཱནི. ཨཐ ཝཱ ཨགྒིཔརིཛིཏཱདཱིནཾ པཉྩནྣཾ ཀཔྤིཡབྷཱཝཏོཡེཝ པཉྩཧི སམཎཀཔྤིཡབྷཱཝསངྑཱཏེཧི ཀཱརཎེཧི ཕལཾ པརིབྷུཉྫིཏུཾ ཨནུཛཱནཱམཱིཏི ཨེཝམེཏྠ ཨདྷིཔྤཱཡོ ཝེདིཏབྦོ. ཨགྒིཔརིཛིཏནྟིཨཱདཱིསུ ‘‘པརིཙིཏ’’ནྟིཔི པཋནྟི. ཨབཱིཛཾ ནཱམ ཏརུཎཨམྦཕལཱདི. ནིབྦཊྚབཱིཛཾ ནཱམ ཨམྦཔནསཱདི, ཡཾ བཱིཛཾ ནིབྦཊྚེཏྭཱ ཝིསུཾ ཀཏྭཱ པརིབྷུཉྫིཏུཾ སཀྐཱ ཧོཏི. ནིབྦཊྚེཏབྦཾ ཝིཡོཛེཏབྦཾ བཱིཛཾ ཡསྨིཾ, ཏཾ པནསཱདི ནིབྦཊྚབཱིཛཾ ནཱམ. ‘‘ཀཔྤིཡ’’ནྟི ཝཏྭཱཝ ཀཱཏབྦནྟི ཡོ ཀཔྤིཡཾ ཀརོཏི, ཏེན ཀཏྟབྦཔཀཱརསྶེཝ ཝུཏྟཏྟཱ བྷིཀྑུནཱ ཨཝུཏྟེཔི ཀཱཏུཾ ཝཊྚཏཱིཏི ན གཧེཏབྦཾ. པུན ‘‘ཀཔྤིཡཾ ཀཱརེཏབྦ’’ནྟི ཀཱརཱཔནསྶ པཋམམེཝ ཀཐིཏཏྟཱ བྷིཀྑུནཱ ‘‘ཀཔྤིཡཾ ཀརོཧཱི’’ཏི ཝུཏྟེཡེཝ ཨནུཔསམྤནྣེན ‘‘ཀཔྤིཡ’’ནྟི ཝཏྭཱ ཨགྒིཔརིཛིཏཱདི ཀཱཏབྦནྟི གཧེཏབྦཾ. ‘‘ཀཔྤིཡནྟི ཝཙནཾ པན ཡཱཡ ཀཱཡཙི བྷཱསཱཡ ཝཏྟུཾ ཝཊྚཏཱི’’ཏི ཝདནྟི. ‘‘ཀཔྤིཡནྟི ཝཏྭཱཝ ཀཱཏབྦ’’ནྟི ཝཙནཏོ པཋམཾ ¶ ‘‘ཀཔྤིཡ’’ནྟི ཝཏྭཱ པཙྪཱ ཨགྒིཨཱདིནཱ ཕུསནཱདི ཀཱཏབྦནྟི ཝེདིཏབྦཾ. ‘‘པཋམཾ ཨགྒིམྷི ནིཀྑིཔིཏྭཱ, ནཁཱདིནཱ ཝཱ ཝིཛ྄ཛྷིཏྭཱ ཏཾ ཨནུདྡྷརིཏྭཱཝ ཀཔྤིཡནྟི ཝཏྟུཾ ཝཊྚཏཱི’’ཏིཔི ཝདནྟི.

ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༩༢) པན ‘‘ཀཔྤིཡནྟི ཝཏྭཱཝཱཏི པུབྦཀཱལཀིརིཡཱཝསེན ཝུཏྟེཔི ཝཙནཀྑཎེཝ ཨགྒིསཏྠཱདིནཱ བཱིཛགཱམེ ཝཎཾ ཀཱཏབྦནྟི ཝཙནཏོ པན པུབྦེ ཀཱཏུཾ ན ཝཊྚཏི, ཏཉྩ དྭིདྷཱ ཨཀཏྭཱ ཚེདནབྷེདནམེཝ དསྶེཏབྦཾ. ཀརོནྟེན ཙ བྷིཀྑུནཱ ‘ཀཔྤིཡཾ ཀརོཧཱི’ཏི ཡཱཡ ཀཱཡཙི བྷཱསཱཡ ཝུཏྟེཡེཝ ཀཱཏབྦཾ. བཱིཛགཱམཔརིམོཙནཏྠཾ པུན ཀཔྤིཡཾ ཀཱརེཏབྦནྟི ཀཱརཱཔནསྶ པཋམམེཝ ཨདྷིཀཏཏྟཱ’’ཏི ཝུཏྟཾ.

ཨེཀསྨིཾ བཱིཛེ ཝཱཏིཨཱདཱིསུ ‘‘ཨེཀཾཡེཝ ཀཱརེམཱིཏི ཨདྷིཔྤཱཡེ སཏིཔི ཨེཀཱབདྡྷཏྟཱ སབྦཾ ཀཏམེཝ ཧོཏཱི’’ཏི ཝདནྟི. དཱརུཾ ཝིཛ྄ཛྷཏཱིཏི ཨེཏྠ ‘‘ཛཱནིཏྭཱཔི ཝིཛ྄ཛྷཏི ཝཱ ཝིཛ྄ཛྷཱཔེཏི ཝཱ, ཝཊྚཏིཡེཝཱ’’ཏི ཝདནྟི. བྷཏྟསིཏྠེ ཝིཛ྄ཛྷཏཱིཏི ཨེཏྠཱཔི ཨེསེཝ ནཡོ. ‘‘ཏཾ ཝིཛ྄ཛྷཏི, ན ཝཊྚཏཱིཏི རཛྫུཨཱདཱིནཾ བྷཱཛནགཏིཀཏྟཱ’’ཏི ཝདནྟི. མརཱིཙཔཀྐཱདཱིཧི ཙ མིསྶེཏྭཱཏི ཨེཏྠ བྷཏྟསིཏྠསམྦནྡྷཝསེན ཨེཀཱབདྡྷཏཱ ཝེདིཏབྦཱ, ན ཕལཱནཾཡེཝ ཨཉྙམཉྙསམྦནྡྷཝསེན. ‘‘ཀཊཱཧེཔི ཀཱཏུཾ ཝཊྚཏཱི’’ཏི ཝུཏྟཏྟཱ ཀཊཱཧཏོ ནཱིཧཊཱཡ མིཉྫཱཡ ཝཱ བཱིཛེ ཝཱ ཡཏྠ ཀཏྠཙི ཝིཛ྄ཛྷིཏུཾ ¶ ཝཊྚཏི ཨེཝ. བྷིནྡཱཔེཏྭཱ ཀཔྤིཡཾ ཀཱརཱཔེཏབྦནྟི བཱིཛཏོ མུཏྟསྶ ཀཊཱཧསྶ བྷཱཛནགཏིཀཏྟཱ ཝུཏྟཾ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

བྷཱུཏགཱམཝིནིཙྪཡཀཐཱལངྐཱརོ ནཱམ

པནྣརསམོ པརིཙྪེདོ.

༡༦. སཧསེཡྻཝིནིཙྪཡཀཐཱ

༧༩. ཨེཝཾ ¶ བྷཱུཏགཱམཝིནིཙྪཡཾ ཀཐེཏྭཱ ཨིདཱནི སཧསེཡྻཝིནིཙྪཡཾ ཀཐེཏུཾ ‘‘དུཝིདྷཾ སཧསེཡྻཀ’’ནྟིཨཱདིམཱཧ. ཏཏྠ དྭེ ཝིདྷཱ པཀཱརཱ ཡསྶ སཧསེཡྻཀསྶ ཏཾ དུཝིདྷཾ, སཧ སཡནཾ, སཧ ཝཱ སཡཏི ཨེཏྠཱཏི སཧསེཡྻཱ, སཧསེཡྻཱ ཨེཝ སཧསེཡྻཀཾ སཀཏྠེ ཀ-པཙྩཡཝསེན. ཏཾ པན ཨནུཔསམྤནྣེནསཧསེཡྻཱམཱཏུགཱམེནསཧསེཡྻཱཝསེན དུཝིདྷཾ. ཏེནཱཧ ‘‘དུཝིདྷཾ སཧསེཡྻཀ’’ནྟི. དིརཏྟཏིརཏྟནྟི ཨེཏྠ ཝཙནསིལིཊྛཏཱམཏྟེན དིརཏྟགྒཧཎཾ ཀཏནྟི ཝེདིཏབྦཾ. ཏིརཏྟཉྷི སཧཝཱསེ ལབྦྷམཱནེ དིརཏྟེ ཝཏྟབྦམེཝ ནཏྠཱིཏི དིརཏྟགྒཧཎཾ ཝིསུཾ ན པཡོཛེཏི. ཏེནེཝཱཧ ‘‘ཨུཏྟརིདིརཏྟཏིརཏྟནྟི བྷགཝཱ སཱམཎེརཱནཾ སངྒཧཀརཎཏྠཱཡ ཏིརཏྟཔརིཧཱརཾ ཨདཱསཱི’’ཏི. ནིརནྟརཾ ཏིརཏྟགྒཧཎཏྠཾ ཝཱ དིརཏྟགྒཧཎཾ ཀཏཾ. ཀེཝལཉྷི ‘‘ཏིརཏྟ’’ནྟི ཝུཏྟེ ཨཉྙཏྠ ཝཱསེན ཨནྟརིཀམྤི ཏིརཏྟཾ གཎྷེཡྻ. དིརཏྟཝིསིཊྛཾ པན ཏིརཏྟཾ ཝུཙྩམཱནཾ ཏེན ཨནནྟརིཀམེཝ ཏིརཏྟཾ དཱིཔེཏི. ཝིམཏིཝིནོདནིཡམྤི (ཝི. ཝི. ཊཱི. པཱཙིཏྟིཡ ༢.༥༠-༥༡) ‘‘དིརཏྟགྒཧཎཾ ཝཙནཱལངྐཱརཏྠཾ. ནིརནྟརཾ ཏིསྶོཝ རཏྟིཡོ སཡིཏྭཱ ཙཏུཏྠདིཝསཱདཱིསུ སཡནྟསྶེཝ ཨཱཔཏྟི, ན ཨེཀནྟརིཀཱདིཝསེན སཡནྟསྶཱཏི དསྶནཏྠམྤཱིཏི དཊྛབྦ’’ནྟི ཝུཏྟཾ. སཧསེཡྻཾ ཨེཀཏོ སེཡྻཾ. སེཡྻནྟི ཙེཏྠ ཀཱཡཔྤསཱརཎསངྑཱཏཾ སཡནམྤི ཝུཙྩཏི, ཡསྨིཾ སེནཱསནེ སཡནྟི, ཏམྤི, ཏསྨཱ སེཡྻཾ ཀཔྤེཡྻཱཏི ཨེཏྠ སེནཱསནསངྑཱཏཾ སེཡྻཾ པཝིསིཏྭཱ ཀཱཡཔྤསཱརཎསངྑཱཏཾ སེཡྻཾ ཀཔྤེཡྻ སམྤཱདེཡྻཱཏི ཨཏྠོ. དིཡཌྜྷཧཏྠུབྦེདྷེནཱཏི ཨེཏྠ དིཡཌྜྷཧཏྠོ ཝཌྜྷཀིཧཏྠེན གཧེཏབྦོ. པཉྩཧི ཚདནེཧཱིཏི ཨིཊྛཀཱསིལཱསུདྷཱཏིཎཔཎྞསངྑཱཏེཧི པཉྩཧི ཚདནེཧི. ཝཱཙུགྒཏཝསེནཱཏི པགུཎཝསེན.

ཨེཀཱུཔཙཱརོཏི ¶ ¶ ཝལ༹ཉྫནདྭཱརསྶ ཨེཀཏྟཾ སནྡྷཱཡ ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༥༠-༥༡) པན ‘‘ཨེཀཱུཔཙཱརོ ཨེཀེན མགྒེན པཝིསིཏྭཱ ཨབྦྷོཀཱསཾ ཨནོཀྐམིཏྭཱ སབྦཏྠ ཨནུཔརིགམནཡོགྒོ, ཨེཏཾ བཧུདྭཱརམྤི ཨེཀཱུཔཙཱརོཝ. ཡཏྠ པན ཀུཊྚཱདཱིཧི རུནྡྷིཏྭཱ ཝིསུཾ དྭཱརཾ ཡོཛེནྟི, ནཱནཱུཔཙཱརོ ཧོཏི. སཙེ པན རུནྡྷཏི ཨེཝ, ཝིསུཾ དྭཱརཾ ན ཡོཛེནྟི, ཨེཏམྤི ཨེཀཱུཔཙཱརམེཝ མཏྟིཀཱདཱིཧི པིཧིཏདྭཱརོ ཝིཡ གབྦྷོཏི གཧེཏབྦཾ. ཨཉྙཐཱ གབྦྷེ པཝིསིཏྭཱ པམུཁཱདཱིསུ ནིཔནྣཱནུཔསམྤནྣེཧི སཧསེཡྻཱཔརིམུཏྟིཡཱ གབྦྷདྭཱརཾ མཏྟིཀཱདཱིཧི པིདཧཱཔེཏྭཱ ཨུཊྛིཏེ ཨརུཎེ ཝིཝརཱཔེནྟསྶཔི ཨནཱཔཏྟི བྷཝེཡྻཱ’’ཏི ཝུཏྟཾ. ཙཏུསཱལཾ ཨེཀཱུཔཙཱརཾ ཧོཏཱིཏི སམྦནྡྷོ. ཏེསཾ པཡོགེ པཡོགེ བྷིཀྑུསྶ ཨཱཔཏྟཱིཏི ཨེཏྠ ཀེཙི ‘‘ཨནུཊྛཧནེན ཨཀིརིཡསམུཊྛཱནཱ ཨཱཔཏྟི ཝུཏྟཱ, ཏསྨིཾ ཁཎེ ནིདྡཱཡནྟསྶ ཀིརིཡཱབྷཱཝཱ. ཨིདཉྷི སིཀྑཱཔདཾ སིཡཱ ཀིརིཡཱཡ, སིཡཱ ཨཀིརིཡཱཡ སམུཊྛཱཏི. ཀིརིཡཱཡ སམུཊྛཱནཏཱ ཙསྶ ཏབྦཧུལཝསེན ཝུཏྟཱ’’ཏི ཝདནྟི. ‘‘ཡཐཱ ཙེཏཾ, ཨེཝཾ དིཝཱསཡནམྤི. ཨནུཊྛཧནེན, ཧི དྭཱརཱསཾཝརཎེན ཙེཏཾ ཨཀིརིཡསམུཊྛཱནམྤི ཧོཏཱི’’ཏི ཝདནྟི, ཨིདཉྩ ཡུཏྟཾ ཝིཡ དིསྶཏི, ཝཱིམཾསིཏྭཱ གཧེཏབྦཾ.

༨༠. ཨུཔརིམཏལེན སདྡྷིཾ ཨསམྦདྡྷབྷིཏྟིཀསྶཱཏི ཨིདཾ སམྦདྡྷབྷིཏྟིཀེ ཝཏྟབྦམེཝ ནཏྠཱིཏི དསྶནཏྠཾ ཝུཏྟཾ. ཨུཔརིམཏལེ སཡིཏསྶ སངྐཱ ཨེཝ ནཏྠཱིཏི ‘‘ཧེཊྛཱཔཱསཱདེ’’ཏིཨཱདི ཝུཏྟཾ. ནཱནཱུཔཙཱརེཏི ཡཏྠ བཧི ནིསྶེཎིཾ ཀཏྭཱ ཨུཔརིམཏལཾ ཨཱརོཧནྟི, ཏཱདིསཾ སནྡྷཱཡ ཝུཏྟཾ ‘‘ཨུཔརིམཏལེཔཱི’’ཏི. ཨཱཀཱསངྒཎེ ནིཔཛྫནྟསྶ ཨཱཔཏྟིཨབྷཱཝཏོ ‘‘ཚདནབྦྷནྟརེ’’ཏི ཝུཏྟཾ. སབྷཱསངྑེཔེནཱཏི སབྷཱཀཱརེན. ཨཌྜྷཀུཊྚཀེ སེནཱསནེཏི ཨེཏྠ ‘‘ཨཌྜྷཀུཊྚཀཾ ནཱམ ཡཏྠ ཨུཔཌྜྷཾ མུཉྩིཏྭཱ ཏཱིསུ པསྶེསུ བྷིཏྟིཡོ བདྡྷཱ ཧོནྟི ¶ , ཡཏྠ ཝཱ ཨེཀསྨིཾ པསྶེ བྷིཏྟིཾ ཨུཊྛཱཔེཏྭཱ ཨུབྷོསུ པསྶེསུ ཨུཔཌྜྷཾ ཨུཔཌྜྷཾ ཀཏྭཱ བྷིཏྟིཡོ ཨུཊྛཱཔེནྟི, ཏཱདིསཾ སེནཱསན’’ནྟི ཏཱིསུཔི གཎྛིཔདེསུ ཝུཏྟཾ, གཎྛིཔདེ པན ‘‘ཨཌྜྷཀུཊྚཀེཏི ཚདནཾ ཨཌྜྷེན ཨསམྤཏྟཀུཊྚཀེ’’ཏི ཝུཏྟཾ, ཏམྤི ནོ ན ཡུཏྟཾ. ཝིམཏིཝིནོདནིཡཾ པན ‘‘སབྷཱསངྑེཔེནཱཏི ཝུཏྟསྶེཝ ཨཌྜྷཀུཊྚཀེཏི ཨིམིནཱ སཎྛཱནཾ དསྶེཏི. ཡཏྠ ཏཱིསུ, དྭཱིསུ ཝཱ པསྶེསུ བྷིཏྟིཡོ བདྡྷཱ, ཚདནཾ ཝཱ ཨསམྤཏྟཱ ཨཌྜྷབྷིཏྟི, ཨིདཾ ཨཌྜྷཀུཊྚཀཾ ནཱམཱ’’ཏི ཝུཏྟཾ. ཝཱལ༹སངྒྷཱཊོ ནཱམ པརིཀྑེཔསྶ ཨནྟོ ཐམྦྷཱདཱིནཾ ཨུཔརི ཝཱལ༹རཱུཔེཧི ཀཏསངྒྷཱཊོ.

པརིཀྑེཔསྶ བཧི གཏེཏི ཨེཏྠ ཡཏྠ ཡསྨིཾ པསྶེ པརིཀྑེཔོ ནཏྠི, ཏཏྠཱཔི པརིཀྑེཔཱརཧཔདེསཏོ ¶ བཧི གཏེ ཨནཱཔཏྟིཡེཝཱཏི དཊྛབྦཾ. ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༥༠-༥༡) པན ‘‘པརིཀྑེཔསྶ བཧི གཏེཏི ཨེཏྠ ཡསྨིཾ པསྶེ པརིཀྑེཔོ ནཏྠི, ཏཏྠ སཙེ བྷཱུམིཏོ ཝཏྠུ ཨུཙྩཾ ཧོཏི, ཨུབྷཏོ ཨུཙྩཝཏྠུཏོ ཧེཊྛཱ བྷཱུམིཡཾ ནིབྦཀོསབྦྷནྟརེཔི ཨནཱཔཏྟི ཨེཝ ཏཏྠ སེནཱསནཝོཧཱརཱབྷཱཝཏོ. ཨཐ ཝཏྠུ ནཱིཙཾ བྷཱུམིསམམེཝ སེནཱསནསྶ ཧེཊྛིམཏལེ ཏིཊྛཏི, ཏཏྠ པརིཀྑེཔརཧིཏདིསཱཡ ནིབྦཀོསབྦྷནྟརེ སབྦཏྠ ཨཱཔཏྟི ཧོཏི, པརིཙྪེདཱབྷཱཝཏོ པརིཀྑེཔསྶ བཧི ཨེཝ ཨནཱཔཏྟཱིཏི དཊྛབྦ’’ནྟི ཝུཏྟཾ. ཨཔརིཙྪིནྣགབྦྷཱུཔཙཱརེཏི ཨེཏྠ མཛ྄ཛྷེ ཝིཝཊངྒཎཝནྟཱསུ མཧཱཙཏུསཱལཱསུ ཡཐཱ ཨཱཀཱསངྒཎཾ ཨནོཏརིཏྭཱ པམུཁེནེཝ གནྟྭཱ སབྦགབྦྷེ པཝིསིཏུཾ ན སཀྐཱ ཧོཏི, ཨེཝཾ ཨེཀེཀགབྦྷསྶ དྭཱིསུ པསྶེསུ ཀུཊྚཾ ནཱིཧརིཏྭཱ ཀཏཾ པརིཙྪིནྣགབྦྷཱུཔཙཱརཾ ནཱམ, ཨིདཾ པན ཏཱདིསཾ ན ཧོཏཱིཏི ‘‘ཨཔརིཙྪིནྣགབྦྷཱུཔཙཱརེ’’ཏི ཝུཏྟཾ. སབྦགབྦྷེཔི པཝིསནྟཱིཏི གབྦྷཱུཔཙཱརསྶ ཨཔརིཙྪིནྣཏྟཱ ཨཱཀཱསངྒཎཾ ཨནོཏརིཏྭཱཔི ¶ པམུཁེནེཝ གནྟྭཱ ཏཾ ཏཾ གབྦྷཾ པཝིསནྟི. ཨཐ ཀུཏོ ཏསྶ པརིཀྑེཔོཡེཝ སབྦཔརིཙྪིནྣཏྟཱཏི ཝུཏྟནྟི ཨཱཧ ‘‘གབྦྷཔརིཀྑེཔོཡེཝ ཧིསྶ པརིཀྑེཔོ’’ཏི, ཨིདཉྩ སམནྟཱ གབྦྷབྷིཏྟིཡོ སནྡྷཱཡ ཝུཏྟཾ. ཙཏུསཱལཝསེན ཧི སནྣིཝིཊྛེ སེནཱསནེ གབྦྷཔམུཁཾ ཝིསུཾ ཨཔརིཀྑིཏྟམྤི སམནྟཱ ཋིཏཾ གབྦྷབྷིཏྟཱིནཾ ཝསེན པརིཀྑིཏྟཾ ནཱམ ཧོཏི.

༨༡. ཨེཀདིསཱཡ ཨུཛུཀམེཝ དཱིགྷཾ ཀཏྭཱ སནྣིཝེསིཏོ པཱསཱདོ ཨེཀསཱལསནྣིཝེསོ. དྭཱིསུ ཏཱིསུ ཙཏཱུསུ ཝཱ དིསཱསུ སིངྒྷཱཊཀསཎྛཱནཱདིཝསེན ཀཏཱ དྭིསཱལཱདིསནྣིཝེསཱ ཝེདིཏབྦཱ. སཱལཔྤབྷེདདཱིཔནམེཝ ཙེཏྠ པུརིམཏོ ཝིསེསོཏི. ཨཊྛ པཱཙིཏྟིཡཱནཱིཏི ཨུཔཌྜྷཙྪནྣཾ ཨུཔཌྜྷཔརིཙྪནྣཾ སེནཱསནཾ དུཀྐཊཝཏྠུསྶ ཨཱདིཾ ཀཏྭཱ པཱལི༹ཡཾ དསྶིཏཏྟཱ ཏཏོ ཨདྷིཀཾ སབྦཙྪནྣཨུཔཌྜྷཔརིཙྪནྣཱདིཀམྤི སབྦཾ པཱལི༹ཡཾ ཨཝུཏྟམྤི པཱཙིཏྟིཡསྶེཝ ཝཏྠུབྷཱཝེན དསྶིཏཾ སིཀྑཱཔདསྶ པཎྞཏྟིཝཛྫཏྟཱ, གརུཀེ ཋཱཏབྦཏོ ཙཱཏི ཝེདིཏབྦཾ. ‘‘སཏྟ པཱཙིཏྟིཡཱནཱི’’ཏི པཱལི༹ཡཾ ཝུཏྟཔཱཙིཏྟིཡདྭཡཾ སཱམཉྙཏོ ཨེཀཏྟེན གཧེཏྭཱ ཝུཏྟཾ. པཱལི༹ཡཾ (པཱཙི. ༥༤) ‘‘ཏཏིཡཱཡ རཏྟིཡཱ པུརཱརུཎཱ ནིཀྑམིཏྭཱ པུན སཡཏཱི’’ཏི ཨིདཾ ཨུཀྐཊྛཝསེན ཝུཏྟཾ, ཨནིཀྑམིཏྭཱ པུརཱརུཎཱ ཨུཊྛཧིཏྭཱ ཨནྟོཚདནེ ནིསིནྣསྶཱཔི པུན དིཝསེ སཧསེཡྻེན ཨནཱཔཏྟི ཨེཝ. ཨེཏྠ ཙཏུབྷཱགོ ཙཱུལ༹ཀཾ, དྭེབྷཱགཱ ཨུཔཌྜྷཾ, ཏཱིསུ བྷཱགེསུ དྭེ བྷཱགཱ ཡེབྷུཡྻནྟི ཨིམིནཱ ལཀྑཎེན ཙཱུལ༹ཀཙྪནྣཔརིཙྪནྣཱདཱིནི ཝེདིཏབྦཱནི. ཨིདཱནི དུཏིཡསིཀྑཱཔདེཔི ཡཐཱཝུཏྟནཡཾ ཨཏིདིསནྟོ ‘‘མཱཏུགཱམེན…པེ… ཨཡམེཝ ཝིནིཙྪཡོ’’ཏི ཨཱཧ. ‘‘མཏིཏྠིཡཱ པཱརཱཛིཀཝཏྠུབྷཱུཏཱཡཔི ཨནུཔཱདིནྣཔཀྑེ ཋིཏཏྟཱ སཧསེཡྻཱཔཏྟིཾ ན ཛནེཏཱི’’ཏི ¶ ཝདནྟི. ‘‘ཨཏྠངྒཏེ སཱུརིཡེ མཱཏུགཱམེ ནིཔནྣེ ནིཔཛྫཏི, ཨཱཔཏྟི ¶ པཱཙིཏྟིཡསྶཱ’’ཏི (པཱཙི. ༥༧) ཝཙནཏོ དིཝཱ ཏསྶ སཡནྟསྶ སཧསེཡྻཱཔཏྟི ན ཧོཏིཡེཝཱཏི དཊྛབྦཾ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

སཧསེཡྻཝིནིཙྪཡཀཐཱལངྐཱརོ ནཱམ

སོལ༹སམོ པརིཙྪེདོ.

༡༧. མཉྩཔཱིཋཱདིསངྒྷིཀསེནཱསནེསུཔཊིཔཛྫིཏབྦཝིནིཙྪཡཀཐཱ

༨༢. ཨེཝཾ སཧསེཡྻཝིནིཙྪཡཾ ཀཐེཏྭཱ ཨིདཱནི སངྒྷིཀེ ཝིཧཱརེ སེཡྻཱསུ ཀཏྟབྦཝིནིཙྪཡཾ ཀཐེཏུཾ ‘‘ཝིཧཱརེ སངྒྷིཀེ སེཡྻ’’ནྟྱཱདིམཱཧ. ཏཏྠ སམགྒཾ ཀམྨཾ སམུཔགཙྪཏཱིཏི སངྒྷོ, ཨཡམེཝ ཝཙནཏྠོ སབྦསངྒྷསཱདྷཱརཎོ. སངྒྷསྶ དིནྣོ སངྒྷིཀོ, ཝིཧརཏི ཨེཏྠཱཏི ཝིཧཱརོ, ཏསྨིཾ. སཡནྟི ཨེཏྠཱཏི སེཡྻཱ, ཏཾ. ཨསནྠརཱིཏི སནྠརིཏྭཱན. པཀྐམནཾ པཀྐམོ, གམནནྟི ཨཏྠོ. ‘‘ཝིཧཱརེ སངྒྷིཀེ སེཡྻཾ, སནྠརིཏྭཱན པཀྐམོ’’ཏི ཨིམསྶ ཨུདྡེསཔཱཋསྶ སངྒྷིཀེ ཝིཧཱརེ…པེ… པཀྐམནནྟི ཨཏྠོ དཊྛབྦོཏི ཡོཛནཱ. ཏཏྲཱཏི ཏསྨིཾ པཀྐམནེ ཨཡཾ ཨཱིདིསོ མཡཱ ཝུཙྩམཱནོ ཝིནིཙྪཡོ ཝེདིཏབྦོཏི ཨཏྠོ. ཀཏམོ སོ ཝིནིཙྪཡོཏི ཨཱཧ ‘‘སངྒྷིཀེ…པེ… པཱཙིཏྟིཡ’’ནྟི. ཨཔརིཀྑིཏྟསྶ ཨུཔཙཱརོ ནཱམ སེནཱསནཏོ དྭེ ལེཌྜུཔཱཏཱ. པཱཙིཏྟིཡནྟི པཋམཾ པཱདཾ ཨཏིཀྐཱམེནྟསྶ དུཀྐཊཾ, དུཏིཡཱཏིཀྐམེ པཱཙིཏྟིཡཾ. ཀཐཾ ཝིཉྙཱཡཏིཙྩཱཧ ‘‘ཡོ པན བྷིཀྑུ…པེ… ཝཙནཏོ’’ཏི.

ཏཏྠ ¶ སངྒྷིཀོ ཝིཧཱརོ པཱཀཊོ, སེཡྻཱ ཨཔཱཀཊཱ, སཱ ཀཏིཝིདྷཱཨིཙྩཱཧ ‘‘སེཡྻཱ ནཱམ…པེ… དསཝིདྷཱ’’ཏི. ཏཏྠཱཔི ཀཏམཱ བྷིསི, ཀཏམཱ ཙིམིལིཀཱདཡོཏི ཨཱཧ ‘‘ཏཏྠ བྷིསཱིཏི…པེ… ཨེས ནཡོ པཎྞསནྠཱརེ’’ཏི. ཏཏྠ མཉྩེ ཨཏྠརིཏབྦཱཏི མཉྩཀབྷིསི, ཨེཝཾ ཨིཏརཏྲ, ཝཎྞཱནུརཀྑཎཏྠཾ ཀཏཱཏི པཊཁཎྜཱདཱིཧི སིབྦིཏྭཱ ཀཏཱ. བྷཱུམིཡཾ ཨཏྠརིཏབྦཱཏི ཙིམིལིཀཱཡ སཏི ཏསྶཱ ཨུཔརི, ཨསཏི སུདྡྷབྷཱུམིཡཾ ཨཏྠརིཏབྦཱ. སཱིཧདྷམྨཱདཱིནཾ པརིཧརཎེ ཨེཝ ¶ པཊིཀྑེཔོཏི ཨིམིནཱ མཉྩཔཱིཋཱདཱིསུ ཨཏྠརིཏྭཱ པུན སཾཧརིཏྭཱ ཋཔནཱདིཝསེན ཨཏྟནོ ཨཏྠཱཡ པརིཧརཎམེཝ ན ཝཊྚཏི, བྷཱུམཏྠརཎཱདིཝསེན པརིབྷོགོ པན ཨཏྟནོ པརིཧརཎཾ ན ཧོཏཱིཏི དསྶེཏི. ཁནྡྷཀེ ཧི ‘‘ཨནྟོཔི མཉྩེ པཉྙཏྟཱནི ཧོནྟི, བཧིཔི མཉྩེ པཉྙཏྟཱནི ཧོནྟཱི’’ཏི ཨེཝཾ ཨཏྟནོ ཨཏྠཱཡ མཉྩཱདཱིསུ པཉྙཔེཏྭཱ པརིཧརཎཝཏྠུསྨིཾ ‘‘ན, བྷིཀྑཝེ, མཧཱཙམྨཱནི དྷཱརེཏབྦཱནི སཱིཧཙམྨཾ བྱགྒྷཙམྨཾ དཱིཔིཙམྨཾ, ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༢༥༥) པཊིཀྑེཔོ ཀཏོ, ཏསྨཱ ཝུཏྟནཡེནེཝེཏྠ ཨདྷིཔྤཱཡོ དཊྛབྦོ. སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༡༡༢) པན ‘‘ཡདི ཨེཝཾ ‘པརིཧརཎེཡེཝ པཊིཀྑེཔོ’ཏི ཨིདཾ ཀསྨཱ ཝུཏྟནྟི ཙོདནཾ ཀཏྭཱ ‘ཨནུཛཱནཱམི, བྷིཀྑཝེ, སབྦཾ པཱསཱདཔརིབྷོག’ནྟི (ཙཱུལ༹ཝ. ༣༢༠) ཝཙནཏོ པུགྒལིཀེཔི སེནཱསནེ སེནཱསནཔརིབྷོགཝསེན ནིཡམིཏཾ སུཝཎྞགྷཊཱདིཀཾ པརིབྷུཉྫིཏུཾ ཝཊྚམཱནམྤི ཀེཝལཾ ཨཏྟནོ སནྟཀཾ ཀཏྭཱ པརིབྷུཉྫིཏུཾ ན ཝཊྚཏི. ཨེཝམིདཾ བྷཱུམཏྠརཎཝསེན པརིབྷུཉྫིཏུཾ ཝཊྚམཱནམྤི ཨཏྟནོ སནྟཀཾ ཀཏྭཱ ཏཾ ཏཾ ཝིཧཱརཾ ཧརིཏྭཱ པརིབྷུཉྫིཏུཾ ན ཝཊྚཏཱིཏི དསྶནཏྠཾ པརིཧརཎེཡེཝ པཊིཀྑེཔོ ཝེདིཏབྦོ’’ཏི ཝུཏྟཾ.

པཱཝཱརོ ཀོཛཝོཏི པཙྩཏྠརཎཏྠཱཡེཝ ཋཔིཏཱ ཨུགྒཏལོམཱ ཨཏྠརཎཝིསེསཱ. ཨེཏྟཀམེཝ ཝུཏྟནྟི ཨཊྛཀཐཱསུ ¶ (པཱཙི. ཨཊྛ. ༡༡༦) ཝུཏྟཾ. ‘‘ཨིདཾ ཨཊྛཀཐཱསུ ཏཐཱཝུཏྟབྷཱཝདསྶནཏྠཾ ཝུཏྟཾ, ཨཉྙམྤི ཏཱདིསཾ མཉྩཔཱིཋེསུ ཨཏྠརིཏབྦཾ ཨཏྠརཎམེཝཱ’’ཏི ཏཱིསུཔི གཎྛིཔདེསུ ཝུཏྟཾ. མཱཏིཀཱཊྛཀཐཱཡཾ (ཀངྑཱ. ཨཊྛ. དུཏིཡསེནཱསནསིཀྑཱཔདཝཎྞནཱ) པན ‘‘པཙྩཏྠརཎཾ ནཱམ པཱཝཱརོ ཀོཛཝོ’’ཏི ནིཡམེཏྭཱ ཝུཏྟཾ, ཏསྨཱ གཎྛིཔདེསུ ཝུཏྟཾ ཨིམིནཱ ན སམེཏི, ‘‘ཝཱིམཾསིཏྭཱ གཧེཏབྦ’’ནྟི སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༡༡༦) ཝུཏྟཾ. ཝཱིམཾསིཏེ པན ཨེཝམདྷིཔྤཱཡོ པཉྙཱཡཏི – མཱཏིཀཱཊྛཀཐཱཔི ཨཊྛཀཐཱཡེཝ, ཏསྨཱ མཧཱཨཊྛཀཐཱདཱིསུ ཝུཏྟནཡེན ‘‘པཱཝཱརོ ཀོཛཝོ’’ཏི ནིཡམེཏྭཱ ཝུཏྟཾ, ཨེཝཾ ནིཡམནེ སཏིཔི ཡཐཱ ‘‘ལདྡྷཱཏཔཏྟོ རཱཛཀུམཱརོ’’ཏི ཨཱཏཔཏྟསྶ ལདྡྷབྷཱཝེཡེཝ ནིཡམེཏྭཱ ཝུཏྟེཔི ནིདསྶནནཡཝསེན རཱཛཀཀུདྷབྷཎྜསཱམཉྙེན སམཱནཱ ཝཱལབཱིཛནཱདཡོཔི ཝུཏྟཱཡེཝ ཧོནྟི, ཨེཝཾ ‘‘པཱཝཱརོ ཀོཛཝོ’’ཏི ནིཡམེཏྭཱ ཝུཏྟེཔི ནིདསྶནནཡཝསེན ཏེཧི མཉྩཔཱིཋེསུ ཨཏྠརིཏབྦབྷཱཝསཱམཉྙེན སམཱནཱ ཨཉྙེ ཨཏྠརཎཱཔི ཝུཏྟཱཡེཝ ཧོནྟི, ཏསྨཱ གཎྛིཔདེསུ ཝུཏྟཝཙནཾ ཨཊྛཀཐཱཝཙནསྶ པཊིལོམཾ ན ཧོཏི, ཨནུལོམམེཝཱཏི དཊྛབྦཾ.

ཨིམསྨིཾ ¶ པན ཋཱནེ ‘‘ཡེན ཝིཧཱརོ ཀཱརིཏོ, སོ ཝིཧཱརསྶཱམིཀོ’’ཏི པཱཋཾ ནིསྶཱཡ ཨེཀཙྩེ ཝིནཡདྷརཱ ‘‘སངྒྷིཀཝིཧཱརསྶ ཝཱ པུགྒལིཀཝིཧཱརསྶ ཝཱ ཝིཧཱརདཱཡཀོཡེཝ སཱམིཀོ, སོཡེཝ ཨིསྶརོ, ཏསྶ རུཙིཡཱ ཨེཝ ཝསིཏུཾ ལབྷཏི, ན སངྒྷགཎཔུགྒལཱནཾ རུཙིཡཱ’’ཏི ཝིནིཙྪཡཾ ཀརོནྟི, སོ ཝཱིམཾསིཏབྦོ, ཀཐཾ ཨཡཾ པཱཋོ ཀིམཏྠཾ སཱདྷེཏི ཨིསྶརཏྠཾ ཝཱ ཨཱཔུཙྪིཏབྦཏྠཾ ཝཱཏི? ཨེཝཾ ཝཱིམཾསིཏེ ‘‘བྷིཀྑུམྷི སཏི བྷིཀྑུ ཨཱཔུཙྪིཏབྦོ’’ཏིཨཱདིཝཙནཏོ ཨཱཔུཙྪིཏབྦཏྠམེཝ སཱདྷེཏི, ན ཨིསྶརཏྠནྟི ཝིཉྙཱཡཏི.

ཨཐ ¶ སིཡཱ ‘‘ཨཱཔུཙྪིཏབྦཏྠེ སིདྡྷེ ཨིསྶརཏྠོ སིདྡྷོཡེཝ ཧོཏི. ཨིསྶརབྷཱཝཏོཡེཝ ཧི སོ ཨཱཔུཙྪིཏབྦོ’’ཏི. ཏཏྠེཝཾ ཝཏྟབྦཾ – ‘‘ཨཱཔུཙྪནྟེན ཙ བྷིཀྑུམྷི སཏི བྷིཀྑུ ཨཱཔུཙྪིཏབྦོ, ཏསྨིཾ ཨསཏི སཱམཎེརོ, ཏསྨིཾ ཨསཏི ཨཱརཱམིཀོ’’ཏིཨཱདིཝཙནཏོ ཨཱཡསྨནྟཱནཾ མཏེན བྷིཀྑུཔི སཱམཎེརོཔི ཨཱརཱམིཀོཔི ཝིཧཱརཀཱརཀོཔི ཏསྶ ཀུལེ ཡོ ཀོཙི པུགྒལོཔི ཨིསྶརོཏི ཨཱཔཛྫེཡྻ, ཨེཝཾ ཝིཉྙཱཡམཱནེཔི བྷིཀྑུམྷི ཝཱ སཱམཎེརེ ཝཱ ཨཱརཱམིཀེ ཝཱ སཏི ཏེཡེཝ ཨིསྶརཱ, ན ཝིཧཱརཀཱརཀོ. ཏེསུ ཨེཀསྨིམྤི ཨསཏིཡེཝ ཝིཧཱརཀཱརཀོ ཨིསྶརོ སིཡཱཏི. ཨིམསྨིཾ པན ཨདྷིཀཱརེ སངྒྷིཀཾ སེནཱསནཾ རཀྑཎཏྠཱཡ ཨཱཔུཙྪིཏབྦཾཡེཝ ཝདཏི, ན ཨིསྶརབྷཱཝཏོ ཨཱཔུཙྪིཏབྦཾ. ཝུཏྟཉྷི ཨཊྛཀཐཱཡཾ (པཱཙི. ཨཊྛ. ༡༡༦) ‘‘ཨནཱཔུཙྪཾ ཝཱ གཙྪེཡྻཱཏི ཨེཏྠ བྷིཀྑུམྷི སཏི བྷིཀྑུ ཨཱཔུཙྪིཏབྦོ’’ཏིཨཱདི.

ཨཐཱཔི ཨེཝཾ ཝདེཡྻ ‘‘ན སཀལསྶ ཝཱཀྱཔཱཋསྶ ཨདྷིཔྤཱཡཏྠཾ སནྡྷཱཡ ཨམྷེཧི ཝུཏྟཾ, ཨཐ ཁོ ‘ཝིཧཱརསྶཱམིཀོ’ཏི ཨེཏསྶ པདཏྠཾཡེཝ སནྡྷཱཡ ཝུཏྟཾ. ཀཐཾ? སཾ ཨེཏསྶ ཨཏྠཱིཏི སཱམིཀོ, ཝིཧཱརསྶ སཱམིཀོ ཝིཧཱརསྶཱམིཀོ. ‘ཀོ ཝིཧཱརསྶཱམིཀོ ནཱམཱ’ཏི ཝུཏྟེ ‘ཡེན ཝིཧཱརོ ཀཱརིཏོ, སོ ཝིཧཱརསྶཱམིཀོ ནཱམཱ’ཏི ཝཏྟབྦོ, ཏསྨཱ ཝིཧཱརཀཱརཀོ དཱཡཀོ ཝིཧཱརསྶཱམིཀོ ནཱམཱཏི ཝིཉྙཱཡཏི, ཨེཝཾ ཝིཉྙཱཡམཱནེ སཏི སཱམིཀོ ནཱམ སསྶ དྷནསྶ ཨིསྶརོ, ཏསྶ རུཙིཡཱ ཨེཝ ཨཉྙེ ལབྷནྟི, ཏསྨཱ ཝིཧཱརསྶཱམིཀབྷཱུཏསྶ དཱཡཀསྶ རུཙིཡཱ ཨེཝ བྷིཀྑཱུ ཝསིཏུཾ ལབྷནྟི, ན སངྒྷགཎཔུགྒལཱནཾ རུཙིཡཱཏི ཨིམམཏྠཾ སནྡྷཱཡ ཝུཏྟ’’ནྟི. ཏེ ཨེཝཾ ཝཏྟབྦཱ – མཱ ཨཱཡསྨནྟོ ཨེཝཾ ཨཝཙུཏྠ, ཡཐཱ ¶ ནཱམ ‘‘གྷཊིཀཱརོ བྲཧྨཱ’’ཏི ཝུཏྟོ སོ བྲཧྨཱ ཨིདཱནི གྷཊཾ ན ཀརོཏི, པུརིམཏྟབྷཱཝེ པན ཀརོཏི, ཏསྨཱ ‘‘གྷཊཾ ཀརོཏཱི’’ཏི ཝཙནཏྠེན ‘‘གྷཊིཀཱརོ’’ཏི ནཱམཾ ལབྷཏི. ཨིཏི པུབྦེ ལདྡྷནཱམཏྟཱ པུབྦཝོཧཱརཝསེན བྲཧྨབྷཱུཏོཔི ¶ ‘‘གྷཊིཀཱརོ’’ཨིཙྩེཝ ཝུཙྩཏི, ཨེཝཾ སོ ཝིཧཱརཀཱརཀོ བྷིཀྑཱུནཾ པརིཙྩཏྟཀཱལཏོ པཊྛཱཡ ཝིཧཱརསྶཱམིཀོ ན ཧོཏི ཝཏྠུཔརིཙྩཱགལཀྑཎཏྟཱ དཱནསྶ, པུབྦེ པན ཨཔརིཙྩཏྟཀཱལེ ཝིཧཱརསྶ ཀཱརཀཏྟཱ ཝིཧཱརསྶཱམིཀོ ནཱམ ཧོཏི, སོ ཨེཝཾ པུབྦེ ལདྡྷནཱམཏྟཱ པུབྦཝོཧཱརཝསེན ‘‘ཝིཧཱརསྶཱམིཀོ’’ཏི ཝུཙྩཏི, ན, པརིཙྩཏྟསྶ ཝིཧཱརསྶ ཨིསྶརབྷཱཝཏོ. ཏེནེཝ སམྨཱསམྦུདྡྷེན ‘‘ཝིཧཱརདཱཡཀཱནཾ རུཙིཡཱ བྷིཀྑཱུ ཝསནྟཱུ’’ཏི ཨཝཏྭཱ སེནཱསནཔཉྙཱཔཀོ ཨནུཉྙཱཏོཏི དཊྛབྦོ. ཏཐཱ ཧི ཝུཏྟཾ ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༢༩༥) ‘‘ཏེསཾ གེཧཱནཱིཏི ཨེཏྠ བྷིཀྑཱུནཾ ཝཱསཏྠཱཡ ཀཏམྤི ཡཱཝ ན དེནྟི, ཏཱཝ ཏེསཾ སནྟཀཾཡེཝ བྷཝིསྶཏཱིཏི དཊྛབྦ’’ནྟི, ཏེན དིནྣཀཱལཏོ པཊྛཱཡ ཏེསཾ སནྟཀཱནི ན ཧོནྟཱིཏི དསྶེཏི. ཨཡཾ པན ཀཐཱ པཱཋསྶ སམྨུཁཱིབྷཱུཏཏྟཱ ཨིམསྨིཾ ཋཱནེ ཀཐིཏཱ. ཝིཧཱརཝིནིཙྪཡོ པན ཙཏུཔཙྩཡབྷཱཛནཝིནིཙྪཡེ (ཝི. སངྒ. ཨཊྛ. ༡༩༤ ཨཱདཡོ) ཨཱཝི བྷཝིསྶཏི. ཡོ ཀོཙཱིཏི ཉཱཏཀོ ཝཱ ཨཉྙཱཏཀོ ཝཱ ཡོ ཀོཙི. ཡེན མཉྩཾ པཱིཋཾ ཝཱ ཝིནནྟི, ཏཾ མཉྩཔཱིཋཀཝཱནཾ.

༨༣. སིལུཙྩཡལེཎནྟི སིལུཙྩཡེ ལེཎཾ, པབྦཏགུཧཱཏི ཨཏྠོ. ‘‘སེནཱསནཾ ཨུཔཙིཀཱཧི ཁཱཡིཏ’’ནྟི ཨིམསྨིཾ ཝཏྠུསྨིཾ པཉྙཏྟཏྟཱ ཝཏྠུཨནུརཱུཔཝསེན ཨཊྛཀཐཱཡཾ ཨུཔཙིཀཱསངྐཱཡ ཨབྷཱཝེན ཨནཱཔཏྟི ཝུཏྟཱ. ཝཏྟཀྑནྡྷཀེ (ཙཱུལ༹ཝ. ༣༦༠ ཨཱདཡོ) གམིཀཝཏྟཾ པཉྙཱཔེནྟེན ‘‘སེནཱསནཾ ཨཱཔུཙྪིཏབྦ’’ནྟི ཝུཏྟཏྟཱ ཀེཝལཾ ཨིཏིཀཏྟབྦཏཱམཏྟདསྶནཏྠཾ ‘‘ཨཱཔུཙྪནཾ པན ཝཏྟ’’ནྟི ཝུཏྟཾ ¶ , ན པན ཝཏྟབྷེདེ དུཀྐཊནྟི དསྶནཏྠཾ, ཏེནེཝ ཨནྡྷཀཊྛཀཐཱཡཾ ‘‘སེནཱསནཾ ཨཱཔུཙྪིཏབྦ’’ནྟི ཨེཏྠ ‘‘ཡཾ པཱསཱཎཔིཊྛིཡཾ ཝཱ པཱསཱཎཏྠམྦྷེསུ ཝཱ ཀཏསེནཱསནཾ ཡཏྠ ཨུཔཙིཀཱ ནཱརོཧནྟི, ཏཾ ཨནཱཔུཙྪནྟསྶཔི ཨནཱཔཏྟཱི’’ཏི ཝུཏྟཾ. ཏསྨཱ ཡཾ ཝུཏྟཾ གཎྛིཔདེ ‘‘ཏཱདིསེ སེནཱསནེ ཨནཱཔུཙྪཱ གཙྪནྟསྶ པཱཙིཏྟིཡཾ ནཏྠི, གམིཀཝཏྟེ སེནཱསནཾ ཨནཱཔུཙྪཱ གཙྪནྟོ ཝཏྟབྷེདོ ཧོཏི, ཏསྨཱ དུཀྐཊཾ ཨཱཔཛྫཏཱི’’ཏི, ཏཾ ན གཧེཏབྦཾ.

པཙྪིམསྶ ཨཱབྷོགེན མུཏྟི ནཏྠཱིཏི ཏསྶ པཙྪཏོ གཙྪནྟསྶ ཨཉྙསྶ ཨབྷཱཝཏོ ཝུཏྟཾ. ཨེཀཾ ཝཱ པེསེཏྭཱ ཨཱཔུཙྪིཏབྦནྟི ཨེཏྠ གམནཙིཏྟསྶ ཨུཔྤནྣཊྛཱནཏོ ཨནཱཔུཙྪིཏྭཱ གཙྪནྟེ དུཏིཡཔཱདུདྡྷཱརེ པཱཙིཏྟིཡཾ. མཎྜཔེ ཝཱཏི སཱཁཱམཎྜཔེ ཝཱ པདརམཎྜཔེ ཝཱ. རུཀྑམཱུལེཏི ཡསྶ ཀསྶཙི རུཀྑསྶ ཧེཊྛཱ. པལུཛྫཏཱིཏི ཝིནསྶཏི.

༨༤. མཛ྄ཛྷེ ¶ སཾཁིཏྟཾ པཎཝསཎྛཱནཾ ཀཏྭཱ བདྡྷནྟི ཨེརཀཔཏྟཱདཱིཧི ཝེཎིཾ ཀཏྭཱ ཏཱཡ ཝེཎིཡཱ ཨུབྷོསུ པསྶེསུ ཝིཏྠཏཊྛཱནེ བཧུཾ ཝེཋེཏྭཱ ཏཏོ པཊྛཱཡ ཡཱཝ མཛ྄ཛྷཊྛཱནཾ, ཏཱཝ ཨནྟོཨཱཀཌྜྷནཝསེན ཝེཋེཏྭཱ མཛ྄ཛྷེ སཾཁིཔིཏྭཱ ཏཏྠ ཏཏྠ བནྡྷིཏྭཱ ཀཏཾ. ཡཏྠ ཀཱཀཱ ཝཱ ཀུལལཱ ཝཱ ན ཨཱུཧདནྟཱིཏི ཡཏྠ དྷུཝནིཝཱསེན ཀུལཱཝཀེ ཀཏྭཱ ཝསམཱནཱ ཨེཏེ ཀཱཀཀུལལཱ, ཨཉྙེ ཝཱ སཀུཎཱ ཏཾ སེནཱསནཾ ན ཨཱུཧདནྟི, ཏཱདིསེ རུཀྑམཱུལེ ནིཀྑིཔིཏུཾ ཨནུཛཱནཱམཱིཏི ཨཏྠོ.

༨༥. ནཝཝཱཡིམོཏི ཨདྷུནཱ སུཏྟེན ཝཱིཏཀཙྪེན པལིཝེཋིཏམཉྩོ. ཨོནདྡྷོཏི ཀཔྤིཡཙམྨེན ཨོནདྡྷོ, སོཝ ཨོནདྡྷཀོ སཀཏྠེ ཀ-པཙྩཡཝསེན. ཏེན ཧི ཝསྶེན སཱིགྷཾ ན ནསྶཏི. ཨུཀྐཊྛཨབྦྷོཀཱསིཀོཏི ཨིདཾ ཏསྶ སུཁཔཊིཔཏྟིདསྶནམཏྟཾ ¶ , ཨུཀྐཊྛསྶཱཔི པན ཙཱིཝརཀུཊི ཝཊྚཏེཝ. ཀཱཡཱནུགཏིཀཏྟཱཏི བྷིཀྑུནོ ཏཏྠེཝ ནིསིནྣབྷཱཝཾ དཱིཔེཏི, ཏེན ཙ ཝསྶབྷཡེན སཡཾ ཨཉྙཏྠ གཙྪནྟསྶ ཨཱཔཏྟིཾ དསྶེཏི. ཨབྦྷོཀཱསིཀཱནཾ ཨཏེམནཏྠཱཡ ནིཡམེཏྭཱ དཱཡཀེཧི དིནྣམྤི ཨཏྟཱནཾ རཀྑནྟེན རཀྑིཏབྦམེཝ. ‘‘ཡསྨཱ པན དཱཡཀེཧི དཱནཀཱལེཡེཝ སཏསཧསྶགྒྷནཀམྤི ཀམྦལཾ ‘པཱདཔུཉྪནིཾ ཀཏྭཱ པརིབྷུཉྫཐཱ’ཏི དིནྣཾ ཏཐེཝ པརིབྷུཉྫིཏུཾ ཝཊྚཏི, ཏསྨཱ ཨིདམྤི མཉྩཔཱིཋཱདིསེནཱསནཾ ‘ཨཛ྄ཛྷོཀཱསེཔི ཡཐཱསུཁཾ པརིབྷུཉྫཐཱ’ཏི དཱཡཀེཧི དིནྣཾ ཙེ, སབྦསྨིམྤི ཀཱལེ ཨཛ྄ཛྷོཀཱསེ ནིཀྑིཔིཏུཾ ཝཊྚཏཱིཏི ཝདནྟཱི’’ཏི སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༡༠༨-༡༡༠) ཝུཏྟཾ. པེསེཏྭཱ གནྟབྦནྟི ཨེཏྠ ‘‘ཡོ བྷིཀྑུ ཨིམཾ ཋཱནཾ ཨཱགནྟྭཱ ཝསཏི, ཏསྶ དེཐཱ’’ཏི ཝཏྭཱ པེསེཏབྦཾ.

ཝལཱཧཀཱནཾ ཨནུཊྛིཏབྷཱཝཾ སལླཀྑེཏྭཱཏི ཨིམིནཱ གིམྷཱནེཔི མེགྷེ ཨུཊྛིཏེ ཨབྦྷོཀཱསེ ནིཀྑིཔིཏུཾ ན ཝཊྚཏཱིཏི དཱིཔེཏི. ཏཏྲ ཏཏྲཱཏི ཙེཏིཡངྒཎཱདིཀེ ཏསྨིཾ ཏསྨིཾ ཨབྦྷོཀཱསེ ནིཡམེཏྭཱ ནིཀྑིཏྟཱ. མཛ྄ཛྷཏོ པཊྛཱཡ པཱདཊྛཱནཱབྷིམུཁཱཏི ཡཏྠ སམནྟཏོ སམྨཛྫིཏྭཱ ཨངྒཎམཛ྄ཛྷེ སབྦདཱ ཀཙཝརསྶ སངྐཌྜྷནེན མཛ྄ཛྷེ ཝཱལིཀཱ སཉྩིཏཱ ཧོཏི, ཏཏྠ ཀཏྟབྦཝིདྷིདསྶནཏྠཾ ཝུཏྟཾ, ཨུཙྩཝཏྠུཔཱདཊྛཱནཱབྷིམུཁཾ, བྷིཏྟིཔཱདཊྛཱནཱབྷིམུཁཾ ཝཱ ཝཱལིཀཱ ཧརིཏབྦཱཏི ཨཏྠོ. ‘‘ཡཏྠ ཝཱ པན ཀོཎེསུ ཝཱལིཀཱ སཉྩིཏཱ, ཏཏྠ ཏཏོ པཊྛཱཡ ཨཔརདིསཱབྷིམུཁཱ ཧརིཏབྦཱ’’ཏི ཀེཙི ཨཏྠཾ ཝདནྟི. ཀེཙི པན ‘‘སམྨཊྛཊྛཱནསྶ པདཝལཉྫེན ཨཝིཀོཔནཏྠཱཡ སཡཾ ཨསམྨཊྛཊྛཱནེ ཋཏྭཱ ཨཏྟནོ པཱདཱབྷིམུཁཾ ཝཱལིཀཱ ཧརིཏབྦཱཏི ཝུཏྟ’’ནྟི ཝདནྟི. ཏཏྠ ‘‘མཛ྄ཛྷཏོ པཊྛཱཡཱ’’ཏི ཝཙནསྶ པཡོཛནཾ ན དིསྶཏི. སཱརཏྠདཱིཔནིཡཾ ¶ པན ‘‘པཱདཊྛཱནཱབྷིམུཁཱཏི ནིསཱིདནྟཱནཾ པཱདཊྛཱནཱབྷིམུཁནྟི ཀེཙི, སམྨཛྫནྟསྶ ¶ པཱདཊྛཱནཱབྷིམུཁནྟི ཨཔརེ, བཧིཝཱལིཀཱཡ ཨགམནནིམིཏྟཾ པཱདཊྛཱནཱབྷིམུཁཱ ཧརིཏབྦཱཏི ཝུཏྟནྟི ཨེཀེ’’ཏི ཝུཏྟཾ. ཀཙཝརཾ ཧཏྠེཧི གཧེཏྭཱ བཧི ཚཌྜེཏབྦནྟི ཨིམིནཱ ‘‘ཀཙཝརཾ ཚཌྜེསྶཱམཱི’’ཏི ཝཱལིཀཱ ན ཚཌྜེཏབྦཱཏི དཱིཔེཏི.

༨༦. ཀཔྤཾ ལབྷིཏྭཱཏི ‘‘གཙྪཱ’’ཏི ཝུཏྟཝཙནེན ཀཔྤཾ ལབྷིཏྭཱ. ཐེརསྶ ཧི ཨཱཎཏྟིཡཱ གཙྪནྟསྶ ཨནཱཔཏྟི. པུརིམནཡེནེཝཱཏི ‘‘ནིསཱིདིཏྭཱ སཡཾ གཙྪནྟོ’’ཏིཨཱདིནཱ པུབྦེ ཝུཏྟནཡེནེཝ.

ཨཉྙཏྠ གཙྪཏཱིཏི ཏཾ མགྒཾ ཨཏིཀྐམིཏྭཱ ཨཉྙཏྠ གཙྪཏི. ལེཌྜུཔཱཏུཔཙཱརཏོ བཧི ཋིཏཏྟཱ ‘‘པཱདུདྡྷཱརེན ཀཱརེཏབྦོ’’ཏི ཝུཏྟཾ, ཨཉྙཏྠ གཙྪནྟསྶ པཋམཔཱདུདྡྷཱརེ དུཀྐཊཾ, དུཏིཡཔཱདུདྡྷཱརེ པཱཙིཏྟིཡནྟི ཨཏྠོ. པཱཀཏིཀཾ ཨཀཏྭཱཏི ཨཔཊིསཱམེཏྭཱ. ཨནྟརསནྣིཔཱཏེཏི ཨནྟརནྟརཱ སནྣིཔཱཏེ.

༨༧. ཨཱཝཱསིཀཱནཾཡེཝ པལིབོདྷོཏི ཨེཏྠ ཨཱགནྟུཀེསུ ཨཱགནྟྭཱ ཀིཉྩི ཨཝཏྭཱ ཏཏྠ ནིསིནྣེསུཔི ནིསཱིདིཏྭཱ ‘‘ཨཱཝཱསིཀཱཡེཝ ཨུདྡྷརིསྶནྟཱི’’ཏི གཏེསུཔི ཨཱཝཱསིཀཱནམེཝ པལིབོདྷོ. མཧཱཔཙྩརིཝཱདེ པན ‘‘ཨིདཾ ཨམྷཱཀ’’ནྟི ཝཏྭཱཔི ཨཝཏྭཱཔི ནིསིནྣཱནམེཝཱཏི ཨདྷིཔྤཱཡོ. མཧཱཨཊྛཀཐཱཝཱདེ ‘‘ཨཱཔཏྟཱི’’ཏི པཱཙིཏྟིཡམེཝ ཝུཏྟཾ. མཧཱཔཙྩརིཡཾ པན སནྠརཱཔནེ པཱཙིཏྟིཡེན བྷཝིཏབྦནྟི ཨནཱཎཏྟིཡཱ པཉྙཏྟཏྟཱ དུཀྐཊཾ ཝུཏྟཾ. ཨུསྶཱརཀོཏི སརབྷཱཎཀོ. སོ ཧི ཨུདྡྷཾཨུདྡྷཾ པཱལི༹པཱཋཾ སཱརེཏི པཝཏྟེཏཱིཏི ‘‘ཨུསྶཱརཀོ’’ཏི ཝུཙྩཏི. ‘‘ཨིདཾ ཨུསྶཱརཀསྶ, ཨིདཾ དྷམྨཀཐིཀསྶཱ’’ཏི ཝིསུཾ པཉྙཏྟཏྟཱ ཨནཱཎཏྟིཡཱ པཉྙཏྟེཔི པཱཙིཏྟིཡེནེཝ བྷཝིཏབྦནྟི ཨདྷིཔྤཱཡེན ‘‘ཏསྨིཾ ཨཱགནྟྭཱ ནིསིནྣེ ཏསྶ པལིབོདྷོ’’ཏི ཝུཏྟཾ. ཀེཙི པན ཝདནྟི ‘‘ཨནཱཎཏྟིཡཱ པཉྙཏྟེཔི དྷམྨཀཐིཀསྶ ཨནུཊྛཱཔནཱིཡཏྟཱ པཱཙིཏྟིཡེན ¶ བྷཝིཏབྦཾ, ཨཱགནྟུཀསྶ པན པཙྪཱ ཨཱགཏེཧི ཝུཌྜྷཏརེཧི ཨུཊྛཱཔནཱིཡཏྟཱ དུཀྐཊཾ ཝུཏྟ’’ནྟི.

༨༨. པཱདཔུཉྪནཱི ནཱམ རཛྫུཀེཧི ཝཱ པིལོཏིཀཱཡ ཝཱ པཱདཔུཉྪནཏྠཾ ཀཏཱ. ཕལཀཔཱིཋཾ ནཱམ ཕལཀམཡཾ པཱིཋཾ. ཨཐ ཝཱ ཕལཀཉྩེཝ དཱརུམཡཔཱིཋཉྩ. དཱརུམཡཔཱིཋནྟི ཙ ཕལཀམཡམེཝ པཱིཋཾ ཝེདིཏབྦཾ. པཱདཀཋལིཀནྟི ཨདྷོཏཔཱདཊྛཱཔནཀཾ. ཨཛ྄ཛྷོཀཱསེ རཛནཾ པཙིཏྭཱ ¶ …པེ… པཊིསཱམེཏབྦནྟི ཨེཏྠ ཐེཝེ ཨསཏི རཛནཀམྨེ ནིཊྛིཏེ པཊིསཱམེཏབྦཾ. ‘‘བྷིཀྑུ ཝཱ སཱམཎེརོ ཝཱ ཨཱརཱམིཀོ ཝཱ ལཛྫཱི ཧོཏཱིཏི ཝུཏྟཏྟཱ ཨལཛྫིཾ ཨཱཔུཙྪིཏྭཱ གནྟུཾ ན ཝཊྚཏཱི’’ཏི ཝདནྟི. ཨོཏཱཔེནྟོ…པེ… གཙྪཏཱིཏི ཨེཏྠ ‘‘ཀིཉྩཱཔི ‘ཨེཏྟཀཾ དཱུརཾ གནྟབྦ’ནྟི པརིཙྪེདོ ནཏྠི, ཏཐཱཔི ལེཌྜུཔཱཏཾ ཨཏིཀྐམྨ ནཱཏིདཱུརཾ གནྟབྦ’’ནྟི ཝདནྟི.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

མཉྩཔཱིཋཱདིསངྒྷིཀསེནཱསནེསུཔཊིཔཛྫིཏབྦ-

ཝིནིཙྪཡཀཐཱལངྐཱརོ ནཱམ

སཏྟརསམོ པརིཙྪེདོ.

༡༨. ཀཱལིཀཝིནིཙྪཡཀཐཱ

༨༩. ཨེཝཾ སངྒྷིཀསེནཱསནེསུ ཀཏྟབྦཝིནིཙྪཡཾ ཀཐེཏྭཱ ཨིདཱནི ཙཏུཀཱལིཀཝིནིཙྪཡཾ ཀཐེཏུཾ ‘‘ཀཱལིཀཱནིཔི ཙཏྟཱརཱི’’ཏིཨཱདིམཱཧ. ཏཏྠ ཀརཎཾ ཀཱརོ, ཀིརིཡཱ. ཀཱརོ ཨེཝ ཀཱལོ ར-ཀཱརསྶ ལ-ཀཱརོ ཡཐཱ ‘‘མཧཱསཱལོ’’ཏི. ཀཱལོཏི ཙེཏྠ པཙྩུཔྤནྣཱདིཀིརིཡཱ. ཝུཏྟཉྷི –

‘‘ཨཱརདྡྷཱནིཊྛིཏོ ¶ བྷཱཝོ, པཙྩུཔྤནྣོ སུནིཊྛིཏོ;

ཨཏཱིཏཱནཱགཏུཔྤཱད-མཔྤཏྟཱབྷིམུཁཱ ཀིརིཡཱ’’ཏི.

ཨེཏྠ པན ཏསྶ ཏསྶ ཀིརིཡཱསངྑཱཏསྶ ཀཱལསྶ པབྷེདབྷཱུཏོ པུརེབྷཏྟཨེཀཨཧོརཏྟསཏྟཱཧཛཱིཝིཀཔརིཡནྟསངྑཱཏོ ཀཱལཝིསེསོ ཨདྷིཔྤེཏོ. ཀཱལེ ཏསྨིཾ ཏསྨིཾ ཀཱལཝིསེསེ པརིབྷུཉྫིཏབྦཱནཱིཏི ཀཱལིཀཱནི. པི-སདྡོ སམུཙྩཡཏྠོ, ཏེན ཀཔྤིཡཱ ཙཏུབྷཱུམིཡོཏི སམུཙྩེཏི. ཙཏྟཱརཱིཏི སངྑྱཱནིདྡེསོ, ཏེན ཀཱལིཀཱནི ནཱམ ཙཏྟཱརི ཨེཝ ཧོནྟི, ན ཏཱིཎི ན པཉྩཱཏི དསྶེཏི, ཨིདཾ མཱཏིཀཱཔདསྶ ཨཏྠཝིཝརཎཾ. ཏཏྠ ཨུདྡེསེ ཡཾ མཱཏིཀཱཡཾ (ཝི. སངྒ. ཨཊྛ. གནྠཱརམྦྷཀཐཱ) ‘‘ཀཱལིཀཱནིཔི ཙཏྟཱརཱི’’ཏི ཨེཝཾ ཝུཏྟཾ, ཨེཏྠ ཨེཏསྨིཾ མཱཏིཀཱཔདེ ཙཏྟཱརི ཀཱལིཀཱནི ཝེདིཏབྦཱནཱིཏི ཡོཛནཱ. ཀཏམཱནི ཏཱནཱིཏི ཨཱཧ ‘‘ཡཱཝཀཱལིཀ’’ནྟིཨཱདི ¶ . ཡཱཝཀཱལིཀཾ…པེ… ཡཱཝཛཱིཝིཀཾ ཨིཏི ཨིམཱནི ཝཏྠཱུནི ཙཏྟཱརི ཀཱལིཀཱནི ནཱམཱཏི ཨཏྠོ.

ཨིདཱནི ཏེསཾ ཝཏྠུཉྩ ཝིསེསནཉྩ ནཱམལཱབྷཧེཏུཉྩ དསྶེནྟོ ‘‘ཏཏྠ པུརེབྷཏྟ’’ནྟིཨཱདིམཱཧ. ཏཏྠ ཏེསུ ཙཏཱུསུ ཀཱལིཀེསུ ཡཾ ཀིཉྩི ཁཱདནཱིཡཾ བྷོཛནཱིཡཾ ཡཱཝཀཱལིཀཾ, ཨཊྛཝིདྷཔཱནཾ ཡཱམཀཱལིཀཾ, སཔྤིཨཱདིཔཉྩཝིདྷབྷེསཛྫཾ སཏྟཱཧཀཱལིཀཾ, སབྦམྤི པཊིགྒཧིཏཾ ཡཱཝཛཱིཝིཀཾ ཨིཏི ཝུཙྩཏཱིཏི སམྦནྡྷོ. ཡཾ ཀིཉྩི ཁཱདནཱིཡབྷོཛནཱིཡནྟི ཨེཏྠ ཨཏིབྱཱཔིཏཾ པརིཧརིཏུཾ ཝིསེསནམཱཧ ‘‘པུརེབྷཏྟ’’ནྟྱཱདི. པུརེབྷཏྟཾ པཊིགྒཧེཏྭཱ པརིབྷུཉྫིཏབྦམེཝ ཡཱཝཀཱལིཀཾ, ན ཨཉྙཾ ཁཱདནཱིཡཾ བྷོཛནཱིཡནྟྱཏྠོ. ཡཱཝ…པེ… པརིབྷུཉྫིཏབྦཏོཏི ནཱམལཱབྷཧེཏུཾ, ཨེཏེན ཡཱཝ ཀཱལོ ཨསྶཱཏི ཡཱཝཀཱལིཀནྟི ཝཙནཏྠཾ དསྶེཏི. ཨཊྛཝིདྷཾ པཱནནྟི ཨེཏྠ ཨབྱཱཔིཏཾ པརིཧརིཏུམཱཧ ‘‘སདྡྷིཾ ཨནུལོམཔཱནེཧཱི’’ཏི. ཡཱཝ…པེ… ཏབྦཏོཏི ནཱམལཱབྷཧེཏུཾ, ཨེཏེན ཡཱམོ ཀཱལོ ¶ ཨསྶཱཏི ཡཱམཀཱལིཀནྟི ཝཙནཏྠཾ དསྶེཏི. སཏྟཱཧཾ ནིདྷེཏབྦཏོཏི ནཱམལཱབྷཧེཏུཾ, ཨེཏེན སཏྟཱཧོ ཀཱལོ ཨསྶཱཏི སཏྟཱཧཀཱལིཀནྟི ཝཙནཏྠཾ དསྶེཏི. སབྦམྤི པཊིགྒཧིཏནྟི ཨེཏྠ ཨཏིབྱཱཔིཏཾ པརིཧརིཏུཾ ‘‘ཋཔེཏྭཱ ཨུདཀ’’ནྟྱཱཧ. ཡཱཝ…པེ… པརིབྷུཉྫིཏབྦཏོཏི ནཱམལཱབྷཧེཏུཾ, ཏེན ཡཱཝཛཱིཝཾ ཀཱལོ ཨསྶཱཏི ཡཱཝཛཱིཝིཀནྟི ཝཙནཏྠཾ དསྶེཏི.

ཨེཏྠཱཧ – ‘‘ཡོ པན བྷིཀྑུ ཨདིནྣཾ མུཁདྭཱརཾ ཨཱཧཱརཾ ཨཱཧརེཡྻ ཨཉྙཏྲ ཨུདཀདནྟཔོནཱ, པཱཙིཏྟིཡ’’ནྟི (པཱཙི. ༢༦༥) ཝཙནཏོ ནནུ ཨུདཀཾ ཨཔྤཊིགྒཧིཏབྦཾ, ཨཐ ཀསྨཱ ‘‘ཋཔེཏྭཱ ཨུདཀཾ ཨཝསེསཾ སབྦམྤི པཊིགྒཧིཏ’’ནྟི ཝུཏྟནྟི? སཙྩཾ, པརིསུདྡྷཨུདཀཾ ཨཔྤཊིགྒཧིཏབྦཾ, ཀདྡམཱདིསཧིཏཾ པན པཊིགྒཧེཏབྦཾ ཧོཏི, ཏསྨཱ པཊིགྒཧིཏེསུ ཨནྟོགདྷབྷཱཝཏོ ‘‘ཋཔེཏྭཱ ཨུདཀ’’ནྟི ཝུཏྟནྟི. ཨེཝམཔི ‘‘སབྦམྤི པཊིགྒཧིཏ’’ནྟི ཨིམིནཱཝ སིདྡྷཾ པཊིགྒཧེཏབྦསྶ ཨུདཀསྶཔི གཧཎཏོཏི? སཙྩཾ, ཏཐཱཔི ཨུདཀབྷཱཝེན སཱམཉྙཏོ ‘‘སབྦམྤི པཊིགྒཧིཏ’’ནྟི ཨེཏྟཀེ ཝུཏྟེ ཨེཀཙྩསྶ ཨུདཀསྶ པཊིགྒཧེཏབྦབྷཱཝཏོ ཨུདཀམྤི ཡཱཝཛཱིཝིཀཾ ནཱམཱཏི ཉཱཡེཡྻ, ན པན ཨུདཀཾ ཡཱཝཛཱིཝིཀཾ སུདྡྷསྶ པཊིགྒཧེཏབྦཱབྷཱཝཏོ, ཏསྨཱ ཨིདཾ ཝུཏྟཾ ཧོཏི – ཨེཀཙྩསྶ ཨུདཀསྶ པཊིགྒཧེཏབྦབྷཱཝེ སཏིཔི སུདྡྷསྶ ཨཔྤཊིགྒཧིཏབྦཏྟཱ ཏཾ ཨུདཀཾ ཋཔེཏྭཱ སབྦམྤི པཊིགྒཧིཏཾ ཡཱཝཛཱིཝིཀནྟི ཝུཙྩཏཱིཏི.

༩༠. མཱུལཀམཱུལཱདཱིནི ¶ ཨུཔདེསཏོཡེཝ ཝེདིཏབྦཱནི, ཏཱནི པརིཡཱཡཏོ ཝུཙྩམཱནཱནིཔི ན སཀྐཱ ཝིཉྙཱཏུཾ. པརིཡཱཡནྟརེན ཧི ཝུཙྩམཱནེ ཏཾ ཏཾ ནཱམཾ ཨཛཱནནྟཱནཾ སམྨོཧོཡེཝ སིཡཱ, ཏསྨཱ ཏཏྠ ན ཀིཉྩི ཝཀྑཱམ. ཁཱདནཱིཡེ ཁཱདནཱིཡཏྠནྟི པཱུཝཱདིཁཱདནཱིཡེ ཝིཛྫམཱནཾ ཁཱདནཱིཡཀིཙྩཾ ཁཱདནཱིཡེཧི ཀཱཏབྦཾ ཛིགྷཙྪཱཧརཎསངྑཱཏཾ ཨཏྠཾ པཡོཛནཾ ¶ ནེཝ ཕརནྟི ན ནིཔྥཱདེནྟི. ཨེཀསྨིཾ དེསེ ཨཱཧཱརཀིཙྩཾ སཱདྷེནྟཾ ཝཱ ཨསཱདྷེནྟཾ ཝཱ ཨཔརསྨིཾ དེསེ ཨུཊྛིཏབྷཱུམིརསཱདིབྷེདེན ཨཱཧཱརཛིགྷཙྪཱཧརཎཀིཙྩཾ ཨསཱདྷེནྟམྤི ཝཱ སམྦྷཝེཡྻཱཏི ཨཱཧ ‘‘ཏེསུ ཏེསུ ཛནཔདེསཱུ’’ཏིཨཱདི. ཀེཙི པན ‘‘ཨེཀསྨིཾ ཛནཔདེ ཨཱཧཱརཀིཙྩཾ སཱདྷེནྟཾ སེསཛནཔདེསུཔི ཝིཀཱལེ ན ཀཔྤཏི ཨེཝཱཏི དསྶནཏྠཾ ཨིདཾ ཝུཏྟ’’ནྟིཔི ཝདནྟི. པཀཏིཨཱཧཱརཝསེནཱཏི ཨཉྙེཧི ཡཱཝཀཱལིཀེཧི ཨཡོཛིཏཾ ཨཏྟནོ པཀཏིཡཱཝ ཨཱཧཱརཀིཙྩཀརཎཝསེན. སམྨོཧོཡེཝ ཧོཏཱིཏི ཨནེཀཏྠཱནཾ ནཱམཱནཾ ཨཔྤསིདྡྷཱནཉྩ སམྦྷཝཏོ སམྨོཧོ ཨེཝ སིཡཱ. ཏེནེཝེཏྠ མཡམྤི མཱུལཀམཱུལཱདཱིནཾ པརིཡཱཡནྟརདསྶནེ ཨཱདརཾ ན ཀརིམྷ ཨུཔདེསཏོཝ གཧེཏབྦཏོ.

ཡནྟི ཝཊྚཀནྡཾ.

མུལཱ༹ལནྟི ཐཱུལཏརུཎམཱུལམེཝ.

རུཀྑཝལླིཨཱདཱིནནྟི ཧེཊྛཱ ཝུཏྟམེཝ སམྤིཎྜེཏྭཱ ཝུཏྟཾ.

ཨནྟོཔཐཝཱིགཏོཏི སཱལཀལྱཱཎིཀྑནྡྷཾ སནྡྷཱཡ ཝུཏྟཾ.

སབྦཀཔྤིཡཱནཱིཏི མཱུལཏཙཔཏྟཱདཱིནཾ ཝསེན སབྦསོ ཀཔྤིཡཱནི, ཏེསམྤི ནཱམཝསེན ན སཀྐཱ པརིཡནྟཾ དསྶེཏུནྟི སམྦནྡྷོ.

ཨཙྪིཝཱདཱིནཾ ཨཔརིཔཀྐཱནེཝ ཕལཱནི ཡཱཝཛཱིཝིཀཱནཱིཏི དསྶེཏུཾ ‘‘ཨཔརིཔཀྐཱནཱི’’ཏི ཝུཏྟཾ.

ཧརཱིཏཀཱདཱིནཾ ཨཊྛཱིནཱིཏི ཨེཏྠ མིཉྫཾ པཊིཙྪཱདེཏྭཱ ཋིཏཱནི ཀཔཱལཱནི ཡཱཝཛཱིཝིཀཱནཱིཏི ཨཱཙརིཡཱ. མིཉྫམྤི ཡཱཝཛཱིཝིཀནྟི ཨེཀེ. ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༢༤༨-༢༤༩) པན ¶ ‘‘ཧརཱིཏཀཱདཱིནཾ ཨཊྛཱིནཱིཏི ཨེཏྠ ¶ ‘མིཉྫཾ ཡཱཝཀཱལིཀ’ནྟི ཀེཙི ཝདནྟི, ཏཾ ན ཡུཏྟཾ ཨཊྛཀཐཱཡཾ ཨཝུཏྟཏྟཱ’’ཏི ཝུཏྟཾ.

ཧིངྒཱུཏི ཧིངྒུརུཀྑཏོ པགྒྷརིཏནིཡྻཱསོ. ཧིངྒུཛཏུཨཱདཡོཔི ཧིངྒུཝིཀཏིཡོ ཨེཝ. ཏཏྠ ཧིངྒུཛཏུ ནཱམ ཧིངྒུརུཀྑསྶ དཎྜཔཏྟཱནི པཙིཏྭཱ ཀཏནིཡྻཱསོ. ཧིངྒུསིཔཱཊིཀཾ ནཱམ ཧིངྒུཔཏྟཱནི པཙིཏྭཱ ཀཏནིཡྻཱསོ. ‘‘ཨཉྙེན མིསྶེཏྭཱ ཀཏོ’’ཏིཔི ཝདནྟི. ཏཀནྟི ཨགྒཀོཊིཡཱ ནིཀྑནྟསིལེསོ. ཏཀཔཏྟཱིཏི པཏྟཏོ ནིཀྑནྟསིལེསོ. ཏཀཔཎྞཱིཏི པལཱསེ བྷཛྫིཏྭཱ ཀཏསིལེསོ. ‘‘དཎྜཏོ ནིཀྑནྟསིལེསོ’’ཏིཔི ཝདནྟི.

༩༡. ཡཱམཀཱལིཀེསུ པནཱཏི ཨེཏྠ ཀིཉྩཱཔི པཱལི༹ཡཾ ཁཱདནཱིཡབྷོཛནཱིཡཔདེཧི ཡཱཝཀཱལིཀམེཝ སངྒཧིཏཾ, ན ཡཱམཀཱལིཀཾ, ཏཐཱཔི ‘‘ཨནཱཔཏྟི ཡཱམཀཱལིཀཾ ཡཱམེ ནིདཧིཏྭཱ བྷུཉྫཏཱི’’ཏི ཨིདྷ ཙེཝ ‘‘ཡཱམཀཱལིཀེན བྷིཀྑཝེ སཏྟཱཧཀཱལིཀཾ…པེ… ཡཱཝཛཱིཝིཀཾ ཏདཧུཔཊིགྒཧིཏཾ ཡཱམེ ཀཔྤཏི, ཡཱམཱཏིཀྐནྟེ ན ཀཔྤཏཱི’’ཏི ཨཉྙཏྠ (མཧཱཝ. ༣༠༥) ཙ ཝུཏྟཏྟཱ ‘‘ཡཱམཀཱལིཀ’’ནྟིཝཙནསཱམཏྠིཡཏོ ཙ བྷགཝཏོ ཨདྷིཔྤཱཡཉྙཱུཧི ཨཊྛཀཐཱཙརིཡེཧི ཡཱམཀཱལིཀཾ སནྣིདྷིཀཱརཀཾ པཱཙིཏྟིཡཝཏྠུམེཝ ཝུཏྟནྟི དཊྛབྦཾ.

ཋཔེཏྭཱ དྷཉྙཕལརསནྟི ཨེཏྠ ‘‘ཏཎྜུལདྷོཝནོདཀམྤི དྷཉྙཕལརསོཡེཝཱ’’ཏི ཝདནྟི.

༩༢. སཏྟཱཧཀཱལིཀེ པཉྩ བྷེསཛྫཱནཱིཏི བྷེསཛྫཀིཙྩཾ ཀརོནྟུ ཝཱ མཱ ཝཱ, ཨེཝཾལདྡྷཝོཧཱརཱནི པཉྩ. ‘‘གོསཔྤཱི’’ཏིཨཱདིནཱ ལོཀེ པཱཀཊཾ དསྶེཏྭཱ ‘‘ཡེསཾ མཾསཾ ཀཔྤཏཱི’’ཏི ཨིམིནཱ ཨཉྙེསམྤི རོཧིཏམིགཱདཱིནཾ སཔྤིཾ གཧེཏྭཱ དསྶེཏི. ཡེསཉྷི ཁཱིརཾ ཨཏྠི, སཔྤིམྤི ཏེསཾ ཨཏྠིཡེཝ, ཏཾ པན སུལབྷཾ ཝཱ དུལླབྷཾ ཝཱ ཨསམྨོཧཏྠཾ ཝུཏྟཾ ¶ . ཨེཝཾ ནཝནཱིཏམྤི. ‘‘ཡེསཾ མཾསཾ ཀཔྤཏཱི’’ཏི ཙ ཨིདཾ ནིསྶགྒིཡཝཏྠུདསྶནཏྠཾ ཝུཏྟཾ, ན པན ཡེསཾ མཾསཾ ན ཀཔྤཏི, ཏེསཾ སཔྤིཨཱདི ན ཀཔྤཏཱིཏི དསྶནཏྠཾ. མནུསྶཁཱིརཱདཱིནིཔི ཧི ནོ ན ཀཔྤནྟི.

༩༣. ཡཱཝ ཀཱལོ ནཱཏིཀྐམཏི, ཏཱཝ པརིབྷུཉྫིཏུཾ ཝཊྚཏཱིཏི ཨེཏྠ ཀཱལོཏི བྷིཀྑཱུནཾ བྷོཛནཀཱལོ ཨདྷིཔྤེཏོ, སོ ཙ སབྦནྟིམེན པརིཙྪེདེན ཋིཏམཛ྄ཛྷནྷིཀོ. ཋིཏམཛ྄ཛྷནྷིཀོཔི ཧི ¶ ཀཱལསངྒཧཾ གཙྪཏི, ཏཏོ པཊྛཱཡ པན ཁཱདིཏུཾ ཝཱ བྷུཉྫིཏུཾ ཝཱ ན སཀྐཱ, སཧསཱ པིཝིཏུཾ སཀྐཱ བྷཝེཡྻ, ཀུཀྐུཙྩཀེན པན ན ཀཏྟབྦཾ. ཀཱལཔརིཙྪེདཛཱནནཏྠཉྩ ཀཱལཏྠམྦྷོ ཡོཛེཏབྦོ. ཀཱལནྟརེ ཝཱ བྷཏྟཀིཙྩཾ ཀཱཏབྦཾ. པཊིགྒཧཎེཏི གཧཎམེཝ སནྡྷཱཡ ཝུཏྟཾ. པཊིགྒཧིཏམེཝ ཧི ཏཾ, སནྣིཧིཏཾ ན ཀཔྤཏཱིཏི པུན པཊིགྒཧཎཀིཙྩཾ ནཏྠི, ཏེནེཝ ‘‘ཨཛ྄ཛྷོཧརིཏུཀཱམཏཱཡ གཎྷནྟསྶ པཊིགྒཧཎེ’’ཏི ཝུཏྟཾ. མཱཏིཀཱཊྛཀཐཱཡཾ (ཀངྑཱ. ཨཊྛ. སནྣིདྷིཀཱརཀསིཀྑཱཔདཝཎྞནཱ) པན ‘‘ཨཛ྄ཛྷོཧརིསྶཱམཱིཏི གཎྷནྟསྶ གཧཎེ’’ཨིཙྩེཝ ཝུཏྟཾ.

ཡནྟི ཡཾ པཏྟཾ. སནྡིསྶཏཱིཏི ཡཱགུཡཱ ཨུཔརི སནྡིསྶཏི. ཏེལཝཎྞེ པཏྟེ སཏིཔི ནིསྣེཧབྷཱཝེ ཨངྒུལིཡཱ གྷཾསནྟསྶ ཝཎྞཝསེནེཝ ལེཁཱ པཉྙཱཡཏི, ཏསྨཱ ཏཏྠ ཨནཱཔཏྟཱིཏི དསྶནཏྠཾ ‘‘སཱ ཨབྦོཧཱརིཀཱ’’ཏི ཝུཏྟཾ. སཡཾ པཊིགྒཧེཏྭཱ ཨཔརིཙྩཏྟམེཝ ཧི དུཏིཡདིཝསེ ན ཝཊྚཏཱིཏི ཨེཏྠ པཊིགྒཧཎེ ཨནཔེཀྑཝིསྶཛྫནེན, ཨནུཔསམྤནྣསྶ ནིརཔེཀྑདཱནེན ཝཱ ཝིཛཧིཏཔཊིགྒཧཎཾ པརིཙྩཏྟམེཝ ཧོཏཱིཏི ‘‘ཨཔརིཙྩཏྟ’’ནྟི ཨིམིནཱ ཨུབྷཡཐཱཔི ཨཝིཛཧིཏཔཊིགྒཧཎམེཝ ཝུཏྟཾ, ཏསྨཱ ཡཾ པརསྶ པརིཙྩཛིཏྭཱ ཨདིནྣམྤི སཙེ པཊིགྒཧཎེ ནིརཔེཀྑཝིསྶཛྫནེན ཝིཛཧིཏཔཊིགྒཧཎཾ ཧོཏི, ཏམྤི དུཏིཡདིཝསེ ཝཊྚཏཱིཏི ཝེདིཏབྦཾ. ཡདི ཨེཝཾ ‘‘པཏྟོ དུདྡྷོཏོ ཧོཏཱི’’ཏིཨཱདཱིསུ ཀསྨཱ ཨཱཔཏྟི ཝུཏྟཱཏི? ‘‘པཊིགྒཧཎཾ ཨཝིསྶཛྫེཏྭཱཝ ¶ སཡཾ ཝཱ ཨཉྙེན ཝཱ ཏུཙྪཾ ཀཏྭཱ ན སམྨཱ དྷོཝིཏྭཱ ནིཊྛཱཔིཏེ པཏྟེ ལགྒམྤི ཨཝིཛཧིཏཔཊིགྒཧཎམེཝ ཧོཏཱིཏི ཏཏྠ ཨཱཔཏྟཱི’’ཏི ཏཱིསུཔི གཎྛིཔདེསུ ཝུཏྟཾ. ཀེཙི པན ‘‘སཱམཎེརཱནཾ པརིཙྩཛནྟཱིཏི ཨིམསྨིཾ ཨདྷིཀཱརེ ཋཏྭཱ ‘ཨཔརིཙྩཏྟམེཝཱ’ཏི ཝུཏྟཏྟཱ ཨནུཔསམྤནྣསྶ པརིཙྩཏྟམེཝ ཝཊྚཏི, ཨཔརིཙྩཏྟཾ ན ཝཊྚཏཱིཏི ཨཱཔནྣཾ, ཏསྨཱ ནིརཱལཡབྷཱཝེན པཊིགྒཧཎེ ཝིཛཧིཏེཔི ཨནུཔསམྤནྣསྶ ཨཔརིཙྩཏྟཾ ན ཝཊྚཏཱི’’ཏི ཝདནྟི. ཏཾ ཡུཏྟཾ ཝིཡ ན དིསྶཏི. ཡདགྒེན ཧི པཊིགྒཧཎཾ ཝིཛཧཏི, ཏདགྒེན སནྣིདྷིམྤི ན ཀརོཏི ཝིཛཧིཏཔཊིགྒཧཎསྶ ཨཔྤཊིགྒཧིཏསདིསཏྟཱ. པཊིགྒཧེཏྭཱ ནིདཧིཏེཡེཝ ཙ སནྣིདྷིཔཙྩཡཱ ཨཱཔཏྟི ཝུཏྟཱ.

ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༢༥༢-༢༥༣) པན ‘‘ཨཔརིཙྩཏྟམེཝཱཏི ནིརཔེཀྑཏཱཡ ཨནུཔསམྤནྣསྶ ཨདིནྣཾ ཨཔརིཙྩཏྟཉྩ ཡཱཝཀཱལིཀཱདིཝཏྠུམེཝ སནྡྷཱཡ ཝདཏི, ན པན ཏགྒཏཔཊིགྒཧཎཾ. ན ཧི ཝཏྠུཾ ཨཔརིཙྩཛིཏྭཱ ཏཏྠགཏཔཊིགྒཧཎཾ པརིཙྩཛིཏུཾ སཀྐཱ, ན ཙ ཏཱདིསཾ ཝཙནཾ ཨཏྠི, ཡདི བྷཝེཡྻ ¶ , ‘སཙེ པཏྟོ དུདྡྷོཏོ ཧོཏི…པེ… བྷུཉྫནྟསྶ པཱཙིཏྟིཡ’ནྟི ཝཙནཾ ཝིརུཛ྄ཛྷེཡྻ. ན ཧི དྷོཝནེན ཨཱམིསཾ ཨཔནེཏུཾ ཝཱཡམནྟསྶ པཊིགྒཧཎེ ཨཔེཀྑཱ ཝཏྟཏི. ཡེན པུནདིཝསེ བྷུཉྫཏོ པཱཙིཏྟིཡཾ ཛནེཡྻ, པཏྟེ པན ཝཏྟམཱནཱ ཨཔེཀྑཱ ཏགྒཏིཀེ ཨཱམིསེཔི ཝཏྟཏི ཨེཝ ནཱམཱཏི ཨཱམིསེ ཨནཔེཀྑཏཱ ཨེཏྠ ན ལབྦྷཏི, ཏཏོ ཨཱམིསེ ཨཝིཛཧིཏཔཊིགྒཧཎཾ པུནདིཝསེ པཱཙིཏྟིཡཾ ཛནེཏཱིཏི ཨིདཾ ཝུཏྟཾ. ཨཐ མཏཾ ‘ཡདགྒེནེཏྠ ཨཱམིསཱནཔེཀྑཏཱ ན ལབྦྷཏི, ཏདགྒེན པཊིགྒཧཎཱནཔེཀྑཏཱཔི ན ལབྦྷཏཱི’ཏི. ཏཐཱ སཏི ཡཏྠ ཨཱམིསཱཔེཀྑཱ ཨཏྠི, ཏཏྠ པཊིགྒཧཎཱཔེཀྑཱཔི ན ཝིགཙྪཏཱིཏི ཨཱཔནྣཾ, ཨེཝཉྩ པཊིགྒཧཎེ ཨནཔེཀྑཝིསྶཛྫནཾ ཝིསུཾ ན ཝཏྟབྦཾ སིཡཱ, ཨཊྛཀཐཱཡཉྩེཏམྤི པཊིགྒཧཎཝིཛཧནཾ ཀཱརཎཏྟེན ཨབྷིམཏཾ སིཡཱ. ཨིདཾ སུཊྛུཏརཾ ཀཏྭཱ ཝིསུཾ ¶ ཝཏྟབྦཾ ཙཱིཝརཱཔེཀྑཱཡ ཝཏྟམཱནཱཡཔི པཙྩུདྡྷཱརེན ཨདྷིཊྛཱནཝིཛཧནཾ ཝིཡ. ཨེཏསྨིཉྩ ཨུཔཱཡེ སཏི གཎྛིཀཱཧཏཔཏྟེསུ ཨཝཊྚནཏཱ ནཱམ ན སིཡཱཏི ཝུཏྟོཝཱཡམཏྠོ, ཏསྨཱ ཡཾ ཝུཏྟཾ སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༢༥༢-༢༥༣) ‘ཡཾ པརསྶ པརིཙྩཛིཏྭཱ ཨདིནྣམྤི སཙེ པཊིགྒཧཎེ ནིརཔེཀྑཝིསྶཛྫནེན ཝིཛཧིཏཔཊིགྒཧཎཾ ཧོཏི, ཏམྤི དུཏིཡདིཝསེ ཝཊྚཏཱི’ཏིཨཱདི, ཏཾ ན སཱརཏོ པཙྩེཏབྦ’’ནྟི ཝུཏྟཾ.

པཱལི༹ཡཾ (པཱཙི. ༢༥༥) ‘‘སཏྟཱཧཀཱལིཀཾ ཡཱཝཛཱིཝིཀཾ ཨཱཧཱརཏྠཱཡ པཊིགྒཎྷཱཏི, ཨཱཔཏྟི དུཀྐཊསྶཱ’’ཏིཨཱདིནཱ སནྣིཧིཏེསུ སཏྟཱཧཀཱལིཀཡཱཝཛཱིཝིཀེསུ པུརེབྷཏྟམྤི ཨཱཧཱརཏྠཱཡ ཨཛ྄ཛྷོཧརཎེཔི དུཀྐཊསྶ ཝུཏྟཏྟཱ ཡཱམཀཱལིཀེཔི ཨཛ྄ཛྷོཧཱརེ ཝིསུཾ དུཀྐཊེན བྷཝིཏབྦནྟི ཨཱཧ ‘‘ཨཱཧཱརཏྠཱཡ ཨཛ྄ཛྷོཧརཏོ དུཀྐཊེན སདྡྷིཾ པཱཙིཏྟིཡ’’ནྟི. པཀཏིཨཱམིསེཏི ཨོདནཱདིཀཔྤིཡཱམིསེ. དྭེཏི པུརེབྷཏྟཾ པཊིགྒཧིཏཾ ཡཱམཀཱལིཀཾ པུརེབྷཏྟཾ སཱམིསེན མུཁེན བྷུཉྫཏོ སནྣིདྷིཔཙྩཡཱ ཨེཀཾ, ཡཱཝཀཱལིཀསཾསཊྛཏཱཡ ཡཱཝཀཱལིཀཏྟབྷཛནེན ཨནཏིརིཏྟཔཙྩཡཱ ཨེཀནྟི དྭེ པཱཙིཏྟིཡཱནི. ཝིཀཔྤདྭཡེཏི སཱམིསནིརཱམིསཔཀྑདྭཡེ. ཐུལླཙྩཡཾ དུཀྐཊཉྩ ཝཌྜྷཏཱིཏི མནུསྶམཾསེ ཐུལླཙྩཡཾ, སེསཨཀཔྤིཡམཾསེ དུཀྐཊཾ ཝཌྜྷཏི.

པཊིགྒཧཎཔཙྩཡཱ ཏཱཝ དུཀྐཊནྟི ཨེཏྠ སནྣིཧིཏཏྟཱ པུརེབྷཏྟམྤི དུཀྐཊམེཝ. སཏི པཙྩཡེ པན སནྣིཧིཏམྤི སཏྟཱཧཀཱལིཀཾ ཡཱཝཛཱིཝིཀཉྩ བྷེསཛྫཏྠཱཡ གཎྷནྟསྶ པརིབྷུཉྫནྟསྶ ཙ ཨནཱཔཏྟིཡེཝ.

༩༤. ཨུགྒཧིཏཀཾ ¶ ཀཏྭཱ ནིཀྑིཏྟནྟི ཨཔཊིགྒཧིཏཾ སཡམེཝ གཧེཏྭཱ ནིཀྑིཏྟཾ. ཝིམཏིཝིནོདནིཡཾ (ཝི. ཝི. ཊཱི. ༡.༦༢༢) ‘‘ཨུགྒཧིཏཀནྟི པརིབྷོགཏྠཱཡ སཡཾ གཧིཏ’’ནྟི ཝུཏྟཾ. སཡཾ ཀརོཏཱིཏི ¶ པཙིཏྭཱ ཀརོཏི. པུརེབྷཏྟནྟི ཏདཧུཔུརེབྷཏྟམེཝ ཝཊྚཏི སཝཏྠུཀཔཊིགྒཧིཏཏྟཱ. སཡཾཀཏནྟི ནཝནཱིཏཾ པཙིཏྭཱ ཀཏཾ. ནིརཱམིསམེཝཱཏི ཏདཧུཔུརེབྷཏྟཾ སནྡྷཱཡ ཝུཏྟཾ.

༩༥. ཨཛྫ སཡཾཀཏཾ ནིརཱམིསམེཝ བྷུཉྫནྟསྶ ཀསྨཱ སཱམཾཔཱཀོ ན ཧོཏཱིཏི ཨཱཧ ‘‘ནཝནཱིཏཾ ཏཱཔེནྟསྶཱ’’ཏིཨཱདི. པཙྪཱབྷཏྟཾ པཊིགྒཧིཏཀེཧཱིཏི ཁཱིརདདྷཱིནི སནྡྷཱཡ ཝུཏྟཾ. ཨུགྒཧིཏཀེཧི ཀཏཾ ཨབྦྷཉྫནཱདཱིསུ ཨུཔནེཏབྦནྟི ཡོཛནཱ. ཨུབྷཡེསམྤཱིཏི པཙྪཱབྷཏྟཾ པཊིགྒཧིཏཁཱིརདདྷཱིཧི ཙ པུརེབྷཏྟཾ ཨུགྒཧིཏཀེཧི ཙ ཀཏཱནཾ. ཨེས ནཡོཏི ནིསྶགྒིཡཾ ན ཧོཏཱིཏི ཨཏྠོ. ཨཀཔྤིཡམཾསསཔྤིམྷཱིཏི ཧཏྠིཨཱདཱིནཾ སཔྤིམྷི. ཀཱརཎཔཏིརཱུཔཀཾ ཝཏྭཱཏི ‘‘སཛཱཏིཀཱནཾ སཔྤིབྷཱཝཏོ’’ཏི ཀཱརཎཔཏིརཱུཔཀཾ ཝཏྭཱ. སཔྤིནཡེན ཝེདིཏབྦནྟི ནིརཱམིསམེཝ སཏྟཱཧཾ ཝཊྚཏཱིཏི ཨཏྠོ. ཨེཏྠཱཏི ནཝནཱིཏེ. དྷོཏཾ ཝཊྚཏཱིཏི ཨདྷོཏཉྩེ, སཝཏྠུཀཔཊིགྒཧིཏཾ ཧོཏི, ཏསྨཱ དྷོཏཾ པཊིགྒཧེཏྭཱ སཏྟཱཧཾ ནིཀྑིཔིཏུཾ ཝཊྚཏཱིཏི ཐེརཱནཾ ཨདྷིཔྤཱཡོ.

མཧཱསཱིཝཏྠེརསྶ པན ཝཏྠུནོ ཝིཡོཛིཏཏྟཱ དདྷིགུལི༹ཀཱདཱིཧི ཡུཏྟཏཱམཏྟེན སཝཏྠུཀཔཊིགྒཧིཏཾ ནཱམ ན ཧོཏི, ཏསྨཱ ཏཀྐཏོ ཨུདྡྷཊམཏྟམེཝ པཊིགྒཧེཏྭཱ དྷོཝིཏྭཱ, པཙིཏྭཱ ཝཱ ནིརཱམིསམེཝ ཀཏྭཱ བྷུཉྫིཾསཱུཏི ཨདྷིཔྤཱཡོ, ན པན དདྷིགུལི༹ཀཱདཱིཧི སཧ ཝིཀཱལེ བྷུཉྫིཾསཱུཏི. ཏེནཱཧ ‘‘ཏསྨཱ ནཝནཱིཏཾ པརིབྷུཉྫནྟེན…པེ… སཝཏྠུཀཔཊིགྒཧཾ ནཱམ ན ཧོཏཱི’’ཏི. ཏཏྠ ཨདྷོཏཾ པཊིགྒཧེཏྭཱཔི ཏཾ ནཝནཱིཏཾ པརིབྷུཉྫནྟེན དདྷིཨཱདཱིནི ཨཔནེཏྭཱ པརིབྷུཉྫིཏབྦནྟི ཨཏྠོ. ཀེཙི པན ‘‘ཏཀྐཏོ ཨུདྡྷཊམཏྟམེཝ ཁཱདིཾསཱུ’’ཏི ཝཙནསྶ ཨདྷིཔྤཱཡཾ ཨཛཱནནྟཱ ‘‘ཏཀྐཏོ ཨུདྡྷཊམཏྟཾ ཨདྷོཏམྤི དདྷིགུལི༹ཀཱདིསཧིཏཾ ¶ ཝིཀཱལེ པརིབྷུཉྫིཏུཾ ཝཊྚཏཱི’’ཏི ཝདནྟི, ཏཾ ན གཧེཏབྦཾ. ན ཧི དདྷིགུལི༹ཀཱདིཨཱམིསེན སཾསཊྛརསཾ ནཝནཱིཏཾ པརིབྷུཉྫིཏུཾ ཝཊྚཏཱིཏི སཀྐཱ ཝཏྟུཾ. ནཝནཱིཏཾ པརིབྷུཉྫནྟེནཱཏི ཨདྷོཝིཏྭཱ པཊིགྒཧིཏནཝནཱིཏཾ པརིབྷུཉྫནྟེན. དདྷི ཨེཝ དདྷིགཏཾ ཡཐཱ ‘‘གཱུཐགཏཾ མུཏྟགཏ’’ནྟི (མ. ནི. ༢.༡༡༩; ཨ. ནི. ༩.༡༡). ‘‘ཁཡཾ གམིསྶཏཱི’’ཏི ཝཙནཏོ ཁཱིརཾ པཀྑིཔིཏྭཱ པཀྐསཔྤིཨཱདིཔི ཝིཀཱལེ ཀཔྤཏཱིཏི ཝེདིཏབྦཾ. ཁཡཾ གམིསྶཏཱིཏི ནིརཱམིསཾ ཧོཏི, ཏསྨཱ ཝིཀཱལེཔི ཝཊྚཏཱིཏི ཨཏྠོ. ཨེཏྟཱཝཏཱཏི ནཝནཱིཏེ ལགྒམཏྟེན ཝིསུཾ དདྷིཨཱདིཝོཧཱརཾ ཨལདྡྷེན ཨཔྤམཏྟེན ¶ དདྷིཨཱདིནཱཏི ཨཏྠོ, ཨེཏེན ཝིསུཾ པཊིགྒཧིཏདདྷིཨཱདཱིཧི སཧ པཀྐཾ སཝཏྠུཀཔཊིགྒཧིཏསངྑམེཝ གཙྪཏཱིཏི དསྶེཏི. ཏསྨིམྤཱིཏི ནིརཱམིསབྷཱུཏེཔི. ཀུཀྐུཙྩཀཱནཾ པན ཨཡཾ ཨདྷིཔྤཱཡོ – པཊིགྒཧཎེ ཏཱཝ དདྷིཨཱདཱིཧི ཨསམྦྷིནྣརསཏྟཱ བྷཏྟེན སཧིཏགུལ༹པིཎྜཱདི ཝིཡ སཝཏྠུཀཔཊིགྒཧིཏཾ ནཱམ ཧོཏི. ཏཾ པན པཙནྟེན དྷོཝིཏྭཱཝ པཙིཏབྦཾ. ཨིཏརཐཱ པཙནཀྑཎེ པཙྩམཱནདདྷིགུལི༹ཀཱདཱིཧི སམྦྷིནྣརསཏཱཡ སཱམཾཔཀྐཾ ཛཱཏཾ, ཏེསུ ཁཱིཎེསུཔི སཱམཾཔཀྐམེཝ ཧོཏི, ཏསྨཱ ནིརཱམིསམེཝ པཙིཏབྦནྟི. ཏེནེཝ ‘‘ཨཱམིསེན སདྡྷིཾ པཀྐཏྟཱ’’ཏི ཀཱརཎཾ ཝུཏྟཾ.

ཨེཏྠ ཙཱཡཾ ཝིཙཱརཎཱ – སཝཏྠུཀཔཊིགྒཧིཏཏྟཱབྷཱཝེ ཨཱམིསེན སཧ བྷིཀྑུནཱ པཀྐསྶ སཡཾཔཱཀདོསོ ཝཱ པརིསངྐཱིཡཏི, ཡཱཝཀཱལིཀཏཱ ཝཱ. ཏཏྠ ན ཏཱཝ སཡཾཔཱཀདོསོ ཨེཏྠ སམྦྷཝཏི སཏྟཱཧཀཱལིཀཏྟཱ. ཡཉྷི ཏཏྠ དདྷིཨཱདི ཨཱམིསགཏཾ, ཏཾ པརིཀྑཱིཎནྟི. ཨཐ པཊིགྒཧིཏདདྷིགུལི༹ཀཱདིནཱ སཧ ཨཏྟནཱ པཀྐཏྟཱ སཝཏྠུཀཔཀྐཾ ཝིཡ བྷཝེཡྻཱཏི པརིསངྐཱིཡཏི, ཏདཱ ‘‘ཨཱམིསེན སཧ པཊིགྒཧིཏཏྟཱ’’ཏི ཀཱརཎཾ ཝཏྟབྦཾ, ན པན ‘‘པཀྐཏྟཱ’’ཏི, ཏཐཱ ཙ ཨུཔཌྜྷཏྠེརཱནཾ མཏམེཝ ཨངྒཱིཀཏཾ སིཡཱ. ཏཏྠ ཙ སཱམཎེརཱདཱིཧི ¶ པཀྐམྤི ཡཱཝཀཱལིཀམེཝ སིཡཱ པཊིགྒཧིཏཁཱིརཱདིཾ པཙིཏྭཱ ཨནུཔསམྤནྣེཧི ཀཏསཔྤིཨཱདི ཝིཡ, ན ཙ ཏཾ ཡུཏྟཾ བྷིཀྑཱཙཱརེན ལདྡྷནཝནཱིཏཱདཱིནཾ ཏཀྐཱདིཨཱམིསསཾསཊྛསམྦྷཝེན ཨཔརིབྷུཉྫིཏབྦཏྟཱཔྤསངྒཏོ. ན ཧི གཧཊྛཱ དྷོཝིཏྭཱ, སོདྷེཏྭཱ ཝཱ པཏྟེ ཨཱཀིརནྟཱིཏི ནིཡམོ ཨཏྠི.

ཨཊྛཀཐཱཡཉྩ ‘‘ཡཐཱ ཏཏྠ པཏིཏཏཎྜུལཀཎཱདཡོ ན པཙྩནྟི, ཨེཝཾ…པེ… པུན པཙིཏྭཱ དེཏི, པུརིམནཡེནེཝ སཏྟཱཧཾ ཝཊྚཏཱི’’ཏི ཨིམིནཱ ཝཙནེནཔེཏཾ ཝིརུཛ྄ཛྷཏི, ཏསྨཱ ཨིདྷ ཀུཀྐུཙྩཀཱནཾ ཀུཀྐུཙྩུཔྤཏྟིཡཱ ནིམིཏྟམེཝ ན དིསྶཏི. ཡཐཱ ཙེཏྠ, ཨེཝཾ ‘‘ལཛྫཱི སཱམཎེརོ ཡཐཱ ཏཏྠ ཏཎྜུལཀཎཱདཡོ ན པཙྩནྟི, ཨེཝཾ ཨགྒིམྷི ཝིལཱིཡཱཔེཏྭཱ…པེ… དེཏཱི’’ཏི ཝཙནསྶཱཔི ནིམིཏྟཾ ན དིསྶཏི. ཡདི ཧི ཨེཏཾ ཡཱཝཀཱལིཀསཾསགྒཔརིཧཱརཱཡ ཝུཏྟཾ སིཡཱ. ཨཏྟནཱཔི ཏཐཱ ཀཱཏབྦཾ བྷཝེཡྻ. གཧཊྛེཧི དིནྣསཔྤིཨཱདཱིསུ ཙ ཨཱམིསསཾསགྒསངྐཱ ན ཝིགཙྪེཡྻ. ན ཧི གཧཊྛཱ ཨེཝཾ ཝིལཱིཡཱཔེཏྭཱ པརིསྶཱཝེཏྭཱ ཀཎཏཎྜུལཱདིཾ ཨཔནེཏྭཱ པུན པཙནྟི. ཨཔིཙ བྷེསཛྫེཧི སདྡྷིཾ ཁཱིརཱདིཾ པཀྑིཔིཏྭཱ ཡཐཱ ཁཱིརཱདི ཁཡཾ གཙྪཏི, ཨེཝཾ པརེཧི པཀྐབྷེསཛྫཏེལཱདིཔི ཡཱཝཀཱལིཀམེཝ སིཡཱ, ན ཙ ཏམྤི ཡུཏྟཾ དདྷིཨཱདིཁཡཀརཎཏྠཾ ‘‘པུན ¶ པཙིཏྭཱ དེཏཱི’’ཏི ཝུཏྟཏྟཱ, ཏསྨཱ མཧཱསཱིཝཏྠེརཝཱདེ ཀུཀྐུཙྩཾ ཨཀཏྭཱ ཨདྷོཏམྤི ནཝནཱིཏཾ ཏདཧུཔི པུནདིཝསཱདཱིསུཔི པཙིཏུཾ, ཏཎྜུལཱདིམིསྶཾ སཔྤིཨཱདིཾ ཨཏྟནཱཔི ཨགྒིམྷི ཝིལཱིཡཱཔེཏྭཱ པུན ཏཀྐཱདིཁཡཏྠཾ པཙིཏུཉྩ ཝཊྚཏི.

ཏཏྠ ཝིཛྫམཱནསྶཱཔི པཙྩམཱནཀྑཎེ སམྦྷིནྣརསསྶ ཡཱཝཀཱལིཀསྶ ཨབྦོཧཱརིཀཏྟེན སཝཏྠུཀཔཊིགྒཧིཏཔུརེཔཊིགྒཧིཏཀཱནམྤི ཨབྦོཧཱརིཀཏོཏི ནིཊྛམེཏྠ གནྟབྦནྟི. ཏེནེཝ ‘‘ཨེཏྟཱཝཏཱ ཧི སཝཏྠུཀཔཊིགྒཧིཏཾ ནཱམ ¶ ན ཧོཏཱི’’ཏི ཝུཏྟཾ. ཝིསུཾ པཊིགྒཧིཏེན པན ཁཱིརཱདིནཱ ཨཱམིསེན ནཝནཱིཏཱདིཾ མིསྶེཏྭཱ བྷིཀྑུནཱ ཝཱ ཨཉྙེཧི ཝཱ པཀྐཏེལཱདིབྷེསཛྫཾ སཝཏྠུཀཔཊིགྒཧིཏསངྑམེཝ གཙྪཏི ཏཏྠ པཝིཊྛཡཱཝཀཱལིཀསྶ ཨབྦོཧཱརིཀཏྟཱབྷཱཝཱ. ཡཾ པན པུརེཔཊིགྒཧིཏབྷེསཛྫེཧི སདྡྷིཾ ཨཔྤཊིགྒཧིཏཾ ཁཱིརཱདིཾ པཀྑིཔིཏྭཱ པཀྐཏེལཱདིཀཾ ཨནུཔསམྤནྣེཧེཝ པཀྐམྤི སཝཏྠུཀཔཊིགྒཧིཏམྤི སནྣིདྷིཔི ན ཧོཏི ཏཏྠ པཀྑིཏྟཁཱིརཱདིམིསྶཱཔི ཏསྨིཾ ཁཎེ སམྦྷིནྣརསཏཱཡ པུརེཔཊིགྒཧིཏཏྟཱཔཏྟིཏོ, སཙེ པན ཨཔྤཊིགྒཧིཏེཧེཝ, ཨཉྙེཧི ཝཱ པཀྐཏེལཱདཱིསུཔི ཨཱམིསརསོ པཉྙཱཡཏི, ཏཾ ཡཱཝཀཱལིཀཾཝ ཧོཏཱིཏི ཝེདིཏབྦཾ. ཨཡཾ ཀཐཱམགྒོ ཝིམཏིཝིནོདནིཡཾ (ཝི. ཝི. ཊཱི. ༡.༦༢༢) ཨཱགཏོ. སཱརཏྠདཱིཔནིཡཾ (སཱརཏྠ. ཊཱི. ༢.༦༢༢) པན ‘‘ཀུཀྐུཙྩཱཡནྟི ཀུཀྐུཙྩཀཱཏི ཨིམིནཱ ཨཏྟནོཔི ཏཏྠ ཀུཀྐུཙྩསབྦྷཱཝམྤི དཱིཔེཏི. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. བྷེསཛྫསིཀྑཱཔདཝཎྞནཱ) ‘ནིབྦཊྚིཏསཔྤི ཝཱ ནཝནཱིཏཾ ཝཱ པཙིཏུཾ ཝཊྚཏཱི’ཏི ཝུཏྟ’’ནྟི ཨེཏྟཀམེཝ ཨཱགཏོ.

ཨུགྒཧེཏྭཱཏི སཡམེཝ གཧེཏྭཱ. ཏཱནི པཊིགྒཧེཏྭཱཏི ཏཱནི ཁཱིརདདྷཱིནི པཊིགྒཧེཏྭཱ. གཧིཏནྟི ཏཎྜུལཱདིཝིགམཏྠཾ པུན པཙིཏྭཱ གཧིཏནྟི ཨཏྠོ. པཊིགྒཧེཏྭཱ ཙ ཋཔིཏབྷེསཛྫེཧཱིཏི ཨཏིརེཀསཏྟཱཧཔཊིགྒཧིཏེཧི ཡཱཝཛཱིཝིཀབྷེསཛྫེཧི, ཨེཏེན ཏེཧི ཡུཏྟམྤི སཔྤིཨཱདི ཨཏིརེཀསཏྟཱཧཔཊིགྒཧིཏཾ ན ཧོཏཱིཏི དསྶེཏི. ཝདྡལིསམཡེཏི ཝསྶཀཱལསམཡེ, ཨནཱཏཔཀཱལེཏི ཨཏྠོ. ཝུཏྟནཡེན ཡཐཱ ཏཎྜུལཱདཱིནི ན པཙྩནྟི, ཏཐཱ ལཛྫཱིཡེཝ སམྤཱདེཏྭཱ དེཏཱིཏི ལཛྫིསཱམཎེརགྒཧཎཾ. ཨཔིཙ ཨལཛྫིནཱ ཨཛ྄ཛྷོཧརིཏབྦཾ ཡཾ ཀིཉྩི ཨབྷིསངྑརཱཔེཏུཾ ན ཝཊྚཏི, ཏསྨཱཔི ཨེཝམཱཧ.

༩༦. ཏིལེ ¶ པཊིགྒཧེཏྭཱ ཀཏཏེལནྟི ཨཏྟནཱ བྷཛྫཱདཱིནི ཨཀཏྭཱ ཀཏཏེལཾ. ཏེནེཝ ‘‘སཱམིསམྤི ¶ ཝཊྚཏཱི’’ཏི ཝུཏྟཾ. ནིབྦཊྚཱིཏཏྟཱཏི ཡཱཝཀཱལིཀཏོ ཝིཝེཙིཏཏྟཱ, ཨེཏེན ཨེལཱཨབྷཱཝཏོ ཡཱཝཀཱལིཀཏྟཱབྷཱཝཾ, བྷིཀྑུནོ སཝཏྠུཀཔཊིགྒཧཎེན ཡཱཝཀཱལིཀཏྟུཔགམནཉྩ དསྶེཏི. ཨུབྷཡམྤཱིཏི ཨཏྟནཱ ཨཉྙེཧི ཙ ཀཏཾ.

ཡཱཝ ཨརུཎུགྒམནཱ ཏིཊྛཏི, ནིསྶགྒིཡནྟི སཏྟམེ དིཝསེ ཀཏཏེལཾ སཙེ ཡཱཝ ཨརུཎུགྒམནཱ ཏིཊྛཏི, ནིསྶགྒིཡཾ.

ཨཙྪཝསནྟི དུཀྐཊཝཏྠུནོ ཝསཱཡ ཨནུཉྙཱཏཏྟཱ ཏཾསདིསཱནཾ དུཀྐཊཝཏྠཱུནཾཡེཝ ཨཀཔྤིཡམཾསསཏྟཱནཾ ཝསཱ ཨནུཉྙཱཏཱ, ན ཐུལླཙྩཡཝཏྠུ མནུསྶཱནཾ ཝསཱཏི ཨཱཧ ‘‘ཋཔེཏྭཱ མནུསྶཝས’’ནྟི. སཾསཊྛནྟི པརིསྶཱཝིཏཾ. ཏིཎྞཾ དུཀྐཊཱནནྟི ཨཛ྄ཛྷོཧཱརེ ཨཛ྄ཛྷོཧཱརེ ཏཱིཎི དུཀྐཊཱནི སནྡྷཱཡ ཝུཏྟཾ. ཀིཉྩཱཔི པརིབྷོགཏྠཱཡ ཝིཀཱལེ པཊིགྒཧཎཔཙནཔརིསྶཱཝནཱདཱིསུ པུབྦཔཡོགེསུ པཱལི༹ཡཾ, ཨཊྛཀཐཱཡཉྩ ཨཱཔཏྟི ན ཝུཏྟཱ, ཏཐཱཔི ཨེཏྠ ཨཱཔཏྟིཡཱ ཨེཝ བྷཝིཏབྦཾ པཊིཀྑིཏྟསྶ ཀརཎཏོ ཨཱཧཱརཏྠཱཡ ཝིཀཱལེ ཡཱམཀཱལིཀཱདཱིནཾ པཊིགྒཧཎེ ཝིཡ. ‘‘ཀཱལེ པཊིགྒཧིཏཾ ཝིཀཱལེ ཨནུཔསམྤནྣེནཱཔི ནིཔཀྐཾ སཾསཊྛཉྩ པརིབྷུཉྫནྟསྶ དྭེཔི དུཀྐཊཱནི ཧོནྟིཡེཝཱ’’ཏི ཝདནྟི.

ཡསྨཱ ཁཱིརཱདཱིནི པཀྑིཔིཏྭཱ པཀྐབྷེསཛྫཏེལེ ཀསཊཾ ཨཱམིསགཏིཀཾ, ཏེན སཧ ཏེལཾ པཊིགྒཧེཏུཾ, པཙིཏུཾ ཝཱ བྷིཀྑུནོ ན ཝཊྚཏི, ཏསྨཱ ཝུཏྟཾ ‘‘པཀྐཏེལཀསཊེ ཝིཡ ཀུཀྐུཙྩཱཡཏཱི’’ཏི. ‘‘སཙེ ཝསཱཡ སཧ པཀྐཏྟཱ ན ཝཊྚཏི, ཨིདཾ ཀསྨཱ ཝཊྚཏཱི’’ཏི པུཙྪནྟཱ ‘‘བྷནྟེ…པེ… ཝཊྚཏཱི’’ཏི ཨཱཧཾསུ, ཐེརོ ཨཏིཀུཀྐུཙྩཀཏཱཡ ‘‘ཨེཏམྤི ཨཱཝུསོ ན ཝཊྚཏཱི’’ཏི ¶ ཨཱཧ, རོགནིགྒཧཏྠཱཡ ཨེཝ ཝསཱཡ ཨནུཉྙཱཏཏྟཾ སལླཀྑེཏྭཱ པཙྪཱ ‘‘སཱདྷཱུ’’ཏི སམྤཊིཙྪི.

༩༧. ‘‘མདྷུཀརཱིཧི མདྷུམཀྑིཀཱཧཱིཏི ཨིདཾ ཁུདྡཀབྷམརཱནཾ དྭིནྣཾ ཨེཝ ཝིསེསན’’ནྟི ཀེཙི ཝདནྟི. ཨཉྙེ པན ‘‘དཎྜཀེསུ མདྷུཀཱརིཀཱ མདྷུཀརིམཀྑིཀཱ ནཱམ, ཏཱཧི སཧ ཏིསྶོ མདྷུམཀྑིཀཛཱཏིཡོ’’ཏི ཝདནྟི. བྷམརམཀྑིཀཱཏི མཧཱཔཊལཀཱརིཀཱ. སིལེསསདིསནྟི སུཀྑཏཱཡ ཝཱ པཀྐཏཱཡ ཝཱ གྷནཱིབྷཱུཏཾ. ཨིཏརནྟི ཏནུཀམདྷུ. མདྷུཔཊལནྟི མདྷུརཧིཏཾ ཀེཝལཾ མདྷུཔཊལཾ. ‘‘སཙེ མདྷུསཧིཏཾ པཊལཾ པཊིགྒཧེཏྭཱ ནིཀྑིཔནྟི. པཊལསྶ བྷཱཛནཊྛཱནིཡཏྟཱ མདྷུནོ ¶ ཝསེན སཏྟཱཧཱཏིཀྐམེ ནིསྶགྒིཡཾ ཧོཏཱི’’ཏི ཝདནྟི, ‘‘མདྷུམཀྑིཏཾ པན མདྷུགཏིཀམེཝཱ’’ཏི ཨིམིནཱ ཏཾ སམེཏི.

༩༨. ‘‘ཕཱཎིཏཾ ནཱམ ཨུཙྪུམྷཱ ནིབྦཏྟ’’ནྟི པཱལི༹ཡཾ (པཱཙི. ༢༦༠) ཨཝིསེསེན ཝུཏྟཏྟཱ, ཨཊྛཀཐཱཡཉྩ ‘‘ཨུཙྪུརསཾ ཨུཔཱདཱཡ…པེ… ཨཝཏྠུཀཱ ཨུཙྪུཝིཀཏི ‘ཕཱཎིཏ’ནྟི ཝེདིཏབྦཱ’’ཏི ཝཙནཏོ ཨུཙྪུརསོཔི ནིཀྐསཊོ སཏྟཱཧཀཱལིཀོཏི ཝེདིཏབྦཾ. ཀེནཙི པན ‘‘མདྷུམྷི ཙཏྟཱརོ ཀཱལིཀཱ ཡཐཱསམྦྷཝཾ ཡོཛེཏབྦཱ, ཨུཙྪུམྷི ཙཱ’’ཏི ཝཏྭཱ ‘‘སམཀྑིཀཎྜཾ སེལཀཾ མདྷུ ཡཱཝཀཱལིཀཾ, ཨནེལཀཾ ཨུདཀསམྦྷིནྣཾ ཡཱམཀཱལིཀཾ, ཨསམྦྷིནྣཾ སཏྟཱཧཀཱལིཀཾ, མདྷུསིཏྠཾ པརིསུདྡྷཾ ཡཱཝཛཱིཝིཀཾ, ཏཐཱ ཨུཙྪུརསོ སཀསཊོ ཡཱཝཀཱལིཀོ, ནིཀྐསཊོ ཨུདཀསམྦྷིནྣོ ཡཱམཀཱལིཀོ, ཨསམྦྷིནྣོ སཏྟཱཧཀཱལིཀོ, སུདྡྷཀསཊཾ ཡཱཝཛཱིཝིཀ’’ནྟི ཙ ཝཏྭཱ ཨུཏྟརིཔི བཧུདྷཱ པཔཉྩིཏཾ. ཏཏྠ ‘‘ཨུདཀསམྦྷིནྣཾ མདྷུ ཝཱ ཨུཙྪུརསོ ཝཱ སཀསཊོ ཡཱཝཀཱལིཀོ, ནིཀྐསཊོ ཨུདཀསམྦྷིནྣོ ཡཱམཀཱལིཀོ’’ཏི ཨིདཾ ནེཝ པཱལི༹ཡཾ, ན ཨཊྛཀཐཱཡཾ དིསྶཏི, ‘‘ཡཱཝཀཱལིཀཾ སམཱནཾ གརུཏརམྤི མུདྡིཀཱཛཱཏིརསཾ ཨཏྟནཱ ¶ སཾསཊྛཾ ལཧུཀཾ ཡཱམཀཱལིཀབྷཱཝཾ ཨུཔནེནྟཾ ཨུདཀཾ ལཧུཏརཾ སཏྟཱཧཀཱལིཀཾ ཨཏྟནཱ སཾསཊྛཾ གརུཏརཾ ཡཱམཀཱལིཀབྷཱཝཾ ཨུཔནེཏཱི’’ཏི ཨེཏྠ ཀཱརཎཾ སོཡེཝ པུཙྪིཏབྦོ. སབྦཏྠ པཱལི༹ཡཾ ཨཊྛཀཐཱཡཉྩ ཨུདཀསམྦྷིནྣེན གརུཏརསྶཱཔི ལཧུབྷཱཝོཔགམནཾཡེཝ དསྶིཏཾ. པཱལི༹ཡམྤི (མཧཱཝ. ༢༨༤) ཧི ‘‘ཨནུཛཱནཱམི, བྷིཀྑཝེ, གིལཱནསྶ གུལ༹ཾ, ཨགིལཱནསྶ གུལོ༹དཀ’’ནྟི ཝདནྟེན ཨགིལཱནེན པརིབྷུཉྫིཏུཾ ཨཡུཏྟོཔི གུལོ༹ ཨུདཀསམྦྷིནྣོ ཨགིལཱནསྶཔི ཝཊྚཏཱིཏི ཨནུཉྙཱཏོ.

ཡམྤི ཙ ‘‘ཨུཙྪུ ཙེ, ཡཱཝཀཱལིཀོ, ཨུཙྪུརསོ ཙེ, ཡཱམཀཱལིཀོ, ཕཱཎིཏཾ ཙེ, སཏྟཱཧཀཱལིཀཾ, ཏཙོ ཙེ, ཡཱཝཛཱིཝིཀོ’’ཏི ཨཊྛཀཐཱཝཙནཾ དསྶེཏྭཱ ‘‘ཨུཙྪུརསོ ཨུདཀསམྦྷིནྣོ ཡཱམཀཱལིཀོ’’ཏི ཨཉྙེན ཀེནཙི ཝུཏྟཾ, ཏམྤི ཏཐཱཝིདྷསྶ ཨཊྛཀཐཱཝཙནསྶ སམནྟཔཱསཱདིཀཱཡ ཝིནཡཊྛཀཐཱཡ ཨབྷཱཝཏོ ན སཱརཏོ པཙྩེཏབྦཾ, ཏཏོཡེཝ ཙ ‘‘ཨུཙྪུརསོ ཨུདཀསམྦྷིནྣོཔི ཨསམྦྷིནྣོཔི སཏྟཱཧཀཱལིཀོཡེཝཱ’’ཏི ཀེཙི ཨཱཙརིཡཱ ཝདནྟི. བྷེསཛྫཀྑནྡྷཀེ ཙ ‘‘ཨནུཛཱནཱམི, བྷིཀྑཝེ, ཨུཙྪུརས’’ནྟི ཨེཏྠ ཏཱིསུཔི གཎྛིཔདེསུ ཨཝིསེསེན ཝུཏྟཾ ‘‘ཨུཙྪུརསོ སཏྟཱཧཀཱལིཀོ’’ཏི. སཡཾཀཏཾ ནིརཱམིསམེཝ ཝཊྚཏཱིཏི ཨེཏྠ ཨཔརིསྶཱཝིཏཾ ¶ པཊིགྒཧིཏམྤི ཀརཎསམཡེ པརིསྶཱཝེཏྭཱ, ཀསཊཾ ཨཔནེཏྭཱ ཙ ཨཏྟནཱ ཀཏནྟི ཝེདིཏབྦཾ, ཨཡཾ སཱརཏྠདཱིཔནཱིཔཱཋོ (སཱརཏྠ. ཊཱི. ༢.༦༢༣).

ཝིམཏིཝིནོདནིཡཾ (ཝི. ཝི. ཊཱི. ༡.༦༢༣) པན ཨུཙྪུརསཾ ཨུཔཱདཱཡཱཏི ནིཀྐསཊརསསྶཱཔི སཏྟཱཧཀཱལིཀཏྟཾ དསྶེཏི ‘‘ཨུཙྪུམྷཱ ནིབྦཏྟ’’ནྟི པཱལི༹ཡཾ སཱམཉྙཏོ ཝུཏྟཏྟཱ. ཡཾ པན སུཏྟནྟཊྛཀཐཱཡཾ ‘‘ཨུཙྪུ ཙེ, ཡཱཝཀཱལིཀོ, ཨུཙྪུརསོ ཙེ, ཡཱམཀཱལིཀོ, ཕཱཎིཏཾ ཙེ, སཏྟཱཧཀཱལིཀཾ, ཏཙོ ཙེ, ཡཱཝཛཱིཝིཀོ’’ཏི ཝུཏྟཾ, ཏཾ ཨམྦཕལརསཱདིམིསྶཏཱཡ ཡཱམཀཱལིཀཏྟཾ ¶ སནྡྷཱཡ ཝུཏྟནྟི གཧེཏབྦཾ, ཨཝིནཡཝཙནཏྟཱ ཏཾ ཨཔྤམཱཎནྟི. ཏེནེཝ ‘‘པུརེབྷཏྟཾ པཊིགྒཧིཏེན ཨཔརིསྶཱཝིཏཨུཙྪུརསེནཱ’’ཏིཨཱདི ཝུཏྟཾ. ནིརཱམིསམེཝ ཝཊྚཏི ཏཏྠ པཝིཊྛཡཱཝཀཱལིཀསྶ ཨབྦོཧཱརིཀཏྟཱཏི ཨིདཾ གུལེ༹ ཀཏེ ཏཏྠ ཝིཛྫམཱནམྤི ཀསཊཾ པཱཀེན སུཀྑཏཱཡ ཡཱཝཛཱིཝིཀཏྟཾ བྷཛཏཱིཏི ཝུཏྟཾ. ཏསྶ ཡཱཝཀཱལིཀཏྟེ ཧི སཱམཾཔཱཀེན པུརེབྷཏྟེཔི ཨནཛ྄ཛྷོཧརཎཱིཡཾ སིཡཱཏི. ‘‘སཝཏྠུཀཔཊིགྒཧིཏཏྟཱ’’ཏི ཨིདཾ ཨུཙྪུརསེ ཙུཎྞཝིཙུཎྞཾ ཧུཏྭཱ ཋིཏཀསཊཾ སནྡྷཱཡ ཝུཏྟཾ, ཏེན ཙ ‘‘ཨཔརིསྶཱཝིཏེན ཨཔྤཊིགྒཧིཏེན ཨནུཔསམྤནྣེཧི ཀཏཾ སཏྟཱཧཾ ཝཊྚཏཱིཏི དསྶེཏཱི’’ཏི ཝུཏྟཾ.

ཛྷཱམཨུཙྪུཕཱཎིཏནྟི ཨགྒིམྷི ཨུཙྪུཾ ཏཱཔེཏྭཱ ཀཏཾ. ཀོཊྚིཏཨུཙྪུཕཱཎིཏནྟི ཁུདྡཱནུཁུདྡཀཾ ཚིནྡིཏྭཱ ཀོཊྚེཏྭཱ ནིཔྤཱིལེ༹ཏྭཱ པཀྐཾ. ཏཾ ཏཏྠ ཝིཛྫམཱནམྤི ཀསཊཾ པཀྐཀཱལེ ཡཱཝཀཱལིཀཏྟཾ ཝིཛཧཏཱིཏི ཨཱཧ ‘‘ཏཾ ཡུཏྟ’’ནྟི. སཱིཏོདཀེན ཀཏནྟི མདྷུཀཔུཔྥཱནི སཱིཏོདཀེན མདྡིཏྭཱ པརིསྶཱཝེཏྭཱ པཙིཏྭཱ ཀཏཾ. ‘‘ཨཔརིསྶཱཝེཏྭཱ ཀཏ’’ནྟི ཀེཙི, ཏཏྠ ཀཱརཎཾ ན དིསྶཏི. ཁཱིརཾ པཀྑིཔིཏྭཱ ཀཏཾ མདྷུཀཕཱཎིཏཾ ཡཱཝཀཱལིཀནྟི ཨེཏྠ ཁཱིརཾ པཀྑིཔིཏྭཱ པཀྐཏེལཾ ཀསྨཱ ཝིཀཱལེ ཝཊྚཏཱིཏི ཙེ? ཏེལེ པཀྑིཏྟཾ ཁཱིརཾ ཏེལམེཝ ཧོཏི, ཨཉྙཾ པན ཁཱིརཾ པཀྑིཔིཏྭཱ ཀཏཾ ཁཱིརབྷཱཝཾ གཎྷཱཏཱིཏི ཨིདམེཏྠ ཀཱརཎཾ. ཡདི ཨེཝཾ ཁཎྜསཀྑརམྤི ཁཱིརཾ པཀྑིཔིཏྭཱ ཀརོནྟི, ཏཾ ཀསྨཱ ཝཊྚཏཱིཏི ཨཱཧ ‘‘ཁཎྜསཀྑརཾ པནཱ’’ཏིཨཱདི. ཏཏྠ ཁཱིརཛལླིཀནྟི ཁཱིརཕེཎཾ.

༩༩. ‘‘མདྷུཀཔུཔྥཾ པནཱ’’ཏིཨཱདི ཡཱཝཀཱལིཀརཱུཔེན ཋིཏསྶཱཔི ཨཝཊྚནཀཾ མེརཡབཱིཛཝཏྠུཾ དསྶེཏུཾ ཨཱརདྡྷཾ. ཨཱཧཱརཀིཙྩཾ ཀརོནྟཱནི ཨེཏཱནི ཀསྨཱ ཨེཝཾ པརིབྷུཉྫིཏབྦཱནཱིཏི ཙོདནཱཔརིཧཱརཱཡ བྷེསཛྫོདིསྶཾ དསྶེནྟེན ཏཔྤསངྒེན ¶ སབྦཱནིཔི ཨོདིསྶཀཱནི ¶ ཨེཀཏོ དསྶེཏུཾ ‘‘སཏྟཝིདྷཉྷཱི’’ཏིཨཱདི ཝུཏྟཾ སམནྟཔཱསཱདིཀཱཡཾ (པཱརཱ. ཨཊྛ. ༢.༦༢༣). ཝིནཡསངྒཧཔྤཀརཎེ པན ཏཾ ན ཝུཏྟཾ, ‘‘པཙྪཱབྷཏྟཏོ པཊྛཱཡ སཏི པཙྩཡེཏི ཝུཏྟཏྟཱ པཊིགྒཧིཏབྷེསཛྫཱནི དུཏིཡདིཝསཏོ པཊྛཱཡ པུརེབྷཏྟམྤི སཏི པཙྩཡེཝ པརིབྷུཉྫིཏབྦཱནི, ན ཨཱཧཱརཏྠཱཡ བྷེསཛྫཏྠཱཡ པཊིགྒཧིཏཏྟཱ’’ཏི ཝདནྟི. དྭཱརཝཱཏཔཱནཀཝཱཊེསཱུཏི མཧཱདྭཱརསྶ ཝཱཏཔཱནཱནཉྩ ཀཝཱཊཕལཀེསུ. ཀསཱཝེ པཀྑིཏྟཱནི ཏཱནི ཨཏྟནོ སབྷཱཝཾ པརིཙྩཛནྟཱིཏི ‘‘ཀསཱཝེ…པེ… མཀྑེཏབྦཱནཱི’’ཏི ཝུཏྟཾ, གྷུཎཔཱཎཀཱདིཔརིཧཱརཏྠཾ མཀྑེཏབྦཱནཱིཏི ཨཏྠོ. ཨདྷིཊྛེཏཱིཏི ‘‘ཨིདཱནི མཡ྄ཧཾ ཨཛ྄ཛྷོཧརཎཱིཡཾ ན བྷཝིསྶཏི, བཱཧིརཔརིབྷོགཏྠཱཡ བྷཝིསྶཏཱི’’ཏི ཙིཏྟཾ ཨུཔྤཱདེཏཱིཏི ཨཏྠོ. ཏེནེཝཱཧ ‘‘སཔྤིཉྩ ཏེལཉྩ ཝསཉྩ མུདྡྷནི ཏེལཾ ཝཱ ཨབྦྷཉྫནཾ ཝཱ’’ཏིཨཱདི, ཨེཝཾ པརིབྷོགེ ཨནཔེཀྑཏཱཡ པཊིགྒཧཎཾ ཝིཛཧཏཱིཏི ཨདྷིཔྤཱཡོ. ཨེཝཾ ཨཉྙེསུཔི ཀཱལིཀེསུ ཨནཛ྄ཛྷོཧརིཏུཀཱམཏཱཡ སུདྡྷཙིཏྟེན བཱཧིརཔརིབྷོགཏྠཱཡ ནིཡམེཔི པཊིགྒཧཎཾ ཝིཛཧཏཱིཏི ཨིདམྤི ཝིསུཾ ཨེཀཾ པཊིགྒཧཎཝིཛཧནནྟི དཊྛབྦཾ.

ཨཉྙེན བྷིཀྑུནཱ ཝཏྟབྦོཏི ཨེཏྠ སུདྡྷཙིཏྟེན དིནྣཏྟཱ སཡམྤི ཨཱཧརཱཔེཏྭཱ པརིབྷུཉྫིཏུཾ ཝཊྚཏིཡེཝ. དྭིནྣམྤི ཨནཱཔཏྟཱིཏི ཡཐཱ ཨཉྙསྶ སནྟཀཾ ཨེཀེན པཊིགྒཧིཏཾ སཏྟཱཧཱཏིཀྐམེཔི ནིསྶགྒིཡཾ ན ཧོཏི པརསནྟཀབྷཱཝཏོ, ཨེཝམིདམྤི ཨཝིབྷཏྟཏྟཱ ཨུབྷཡསཱདྷཱརཎམྤི ཝིནིབྦྷོགཱབྷཱཝཏོ ནིསྶགྒིཡཾ ན ཧོཏཱིཏི ཨདྷིཔྤཱཡོ. པརིབྷུཉྫིཏུཾ པན ན ཝཊྚཏཱིཏི བྷིཀྑུནཱ པཊིགྒཧིཏཏྟཱ སཏྟཱཧཱཏིཀྐམེ ཡསྶ ཀསྶཙི བྷིཀྑུནོ པརིབྷུཉྫིཏུཾ ན ཝཊྚཏི པཊིགྒཧིཏསཔྤིཨཱདཱིནཾ པརིབྷོགསྶ སཏྟཱཧེནེཝ པརིཙྪིནྣཏྟཱ. ‘‘ཏཱནི པཊིགྒཧེཏྭཱ སཏྟཱཧཔརམཾ སནྣིདྷིཀཱརཀཾ པརིབྷུཉྫིཏབྦཱནཱི’’ཏི (པཱརཱ. ༦༢༣) ཧི ཝུཏྟཾ.

‘‘ཨཱཝུསོ ¶ ཨིམཾ ཏེལཾ སཏྟཱཧམཏྟཾ པརིབྷུཉྫིཏུཾ ཝཊྚཏཱི’’ཏི ཨིམིནཱ ཡེན པཊིགྒཧིཏཾ, ཏེན ཨནྟོསཏྟཱཧེཡེཝ པརསྶ ཝིསྶཛྫིཏབྷཱཝཾ དསྶེཏི. ཀསྶ ཨཱཔཏྟཱིཏི ‘‘པཋམཾ ཏཱཝ ཨུབྷིནྣཾ སཱདྷཱརཎཏྟཱ ཨནཱཔཏྟི ཝུཏྟཱ, ཨིདཱནི པན ཨེཀེན ཨིཏརསྶ ཝིསྶཊྛབྷཱཝཏོ ཨུབྷཡསཱདྷཱརཎཏཱ ནཏྠཱིཏི ཝིབྷཏྟསདིསཾ ཧུཏྭཱ ཋིཏཾ, ཏསྨཱ ཨེཏྠ པཊིགྒཧིཏསྶ སཏྟཱཧཱཏིཀྐམེ ཨེཀསྶ ཨཱཔཏྟིཡཱ བྷཝིཏབྦ’’ནྟི མཉྙམཱནོ ‘‘ཀིཾ པཊིགྒཧཎཔཙྩཡཱ པཊིགྒཱཧཀསྶ ཨཱཔཏྟི, ཨུདཱཧུ ཡསྶ སནྟཀཾ ཛཱཏཾ, ཏསྶཱ’’ཏི པུཙྪཏི. ནིསྶཊྛབྷཱཝཏོཡེཝ ཙ ཨིདྷ ‘‘ཨཝིབྷཏྟབྷཱཝཏོ’’ཏི ཀཱརཎཾ ཨཝཏྭཱ ‘‘ཡེན པརིགྒཧིཏཾ, ཏེན ཝིསྶཛྫིཏཏྟཱ’’ཏི ཝུཏྟཾ, ཨིདཉྩ ¶ ཝིསྶཊྛཱབྷཱཝཏོ ཨུབྷཡསཱདྷཱརཎཏཾ པཧཱཡ ཨེཀསྶ སནྟཀཾ ཧོནྟམྤི ཡེན པཊིགྒཧིཏཾ, ཏཏོ ཨཉྙསྶ སནྟཀཾ ཛཱཏཾ, ཏསྨཱ པརསནྟཀཔཊིགྒཧཎེ ཝིཡ པཊིགྒཱཧཀསྶ པཊིགྒཧཎཔཙྩཡཱ ནཏྠི ཨཱཔཏྟཱིཏི དསྶནཏྠཾ ཝུཏྟཾ, ན པན ‘‘ཡེན པཊིགྒཧིཏཾ, ཏེན ཝིསྶཛྫིཏཏྟཱ’’ཏི ཝཙནཏོ ཨཝིསྶཛྫིཏེ སཏི ཨཝིབྷཏྟེཔི སཏྟཱཧཱཏིཀྐམེ ཨཱཔཏྟཱིཏི དསྶནཏྠཾ ཨཝིསྶཛྫིཏེ ཨཝིབྷཏྟབྷཱཝཏོཡེཝ ཨནཱཔཏྟིཡཱ སིདྡྷཏྟཱ. སཙེ པན ཨིཏརོ ཡེན པཊིགྒཧིཏཾ, ཏསྶེཝ ཨནྟོསཏྟཱཧེ ཨཏྟནོ བྷཱགམྤི ཝིསྶཛྫེཏི, སཏྟཱཧཱཏིཀྐམེ སིཡཱ ཨཱཔཏྟི ཡེན པཊིགྒཧིཏཾ, ཏསྶེཝ སནྟཀབྷཱཝམཱཔནྣཏྟཱ. ‘‘ཨིཏརསྶ ཨཔྤཊིགྒཧིཏཏྟཱ’’ཏི ཨིམིནཱ ཏསྶ སནྟཀབྷཱཝེཔི ཨཉྙེཧི པཊིགྒཧིཏསཀསནྟཀེ ཝིཡ ཏེན ཨཔྤཊིགྒཧིཏབྷཱཝཏོ ཨནཱཔཏྟཱིཏི དཱིཔེཏི, ཨིམཾ པན ཨདྷིཔྤཱཡཾ ཨཛཱནིཏྭཱ ཨིཏོ ཨཉྙཐཱ གཎྛིཔདཀཱརཱདཱིཧི པཔཉྩིཏཾ, ན ཏཾ སཱརཏོ པཙྩེཏབྦཾ, ཨིདཾ སཱརཏྠདཱིཔནཱིཝཙནཾ (སཱརཏྠ. ཊཱི. ༢.༦༢༥).

ཝིམཏིཝིནོདནིཡཾ (ཝི. ཝི. ཊཱི. ༡.༦༢༥) པན – སཙེ དྭིནྣཾ…པེ… ན ཝཊྚཏཱིཏི ཨེཏྠ པཱཋོ གལི༹ཏོ, ཨེཝཾ པནེཏྠ པཱཋོ ཝེདིཏབྦོ – སཙེ དྭིནྣཾ ¶ སནྟཀཾ ཨེཀེན པཊིགྒཧིཏཾ ཨཝིབྷཏྟཾ ཧོཏི, སཏྟཱཧཱཏིཀྐམེ དྭིནྣམྤི ཨནཱཔཏྟི, པརིབྷུཉྫིཏུཾ པན ན ཝཊྚཏཱིཏི. ཨཉྙཐཱ པན སདྡཔྤཡོགོཔི ན སངྒཧཾ གཙྪཏི, ‘‘གཎྛིཔདེཔི ཙ ཨཡམེཝ པཱཋོ དསྶིཏོ’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༦༢༥) ཝུཏྟཾ. ‘‘དྭིནྣམྤི ཨནཱཔཏྟཱི’’ཏི ཨཝིབྷཏྟཏྟཱ ཝུཏྟཾ. ‘‘པརིབྷུཉྫིཏུཾ པན ན ཝཊྚཏཱི’’ཏི ཨིདཾ ‘‘སཏྟཱཧཔརམཾ སནྣིདྷིཀཱརཀཾ པརིབྷུཉྫིཏབྦ’’ནྟི (པཱརཱ. ༦༢༣) ཝཙནཏོ ཝུཏྟཾ. ‘‘ཡེན པཊིགྒཧིཏཾ, ཏེན ཝིསྶཛྫིཏཏྟཱ’’ཏི ཨིམིནཱ ཨུཔསམྤནྣསྶ དཱནམྤི སནྡྷཱཡ ‘‘ཝིསྶཛྫེཏཱི’’ཏི ཨིདཾ ཝུཏྟནྟི དསྶེཏི. ཨུཔསམྤནྣསྶ ནིརཔེཀྑདིནྣཝཏྠུམྷི པཊིགྒཧཎསྶ ཨཝིགཏཏྟེཔི སཀསནྟཀཏཱ ཝིགཏཱཝ ཧོཏི, ཏེན ནིསྶགྒིཡཾ ན ཧོཏི. ‘‘ཨཏྟནཱཝ པཊིགྒཧིཏཏྟཾ སཀསནྟཀཏྟཉྩཱ’’ཏི ཨིམེཧི དྭཱིཧི ཀཱརཎེཧེཝ ནིསྶགྒིཡཾ ཧོཏི, ན ཨེཀེན. ཨནུཔསམྤནྣསྶ ནིརཔེཀྑདཱནེ པན ཏདུབྷཡམྤི ཝིཛཧཏི, པརིབྷོགོཔེཏྠ ཝཊྚཏི, ན སཱཔེཀྑདཱནེ དཱནལཀྑཎཱབྷཱཝཏོ. ‘‘ཝིསྶཛྫཏཱི’’ཏི ཨེཏསྨིཉྩ པཱལི༹པདེ ཀསྶཙི ཨདཏྭཱ ཨནཔེཀྑཏཱཡ ཚཌྜནམྤི སངྒཧིཏནྟི ཝེདིཏབྦཾ. ‘‘ཨནཔེཀྑཱ དཏྭཱ’’ཏི ཨིདཉྩ པཊིགྒཧཎཝིཛཧནཝིདྷིདསྶནཏྠམེཝ ཝུཏྟཾ. པཊིགྒཧཎེ ཧི ཝིཛཧིཏེ པུན པཊིགྒཧེཏྭཱ པརིབྷོགོ སཡམེཝ ཝཊྚིསྶཏི, ཏབྦིཛཧནཉྩ ཝཏྠུནོ སཀསནྟཀཏཱཔརིཙྩཱགེན ཧོཏཱིཏི. ཨེཏེན ཙ ཝཏྠུམྷི ཨཛ྄ཛྷོཧརཎཱཔེཀྑཱཡ སཏི པཊིགྒཧཎཝིསྶཛྫནཾ ནཱམ ཝིསུཾ ན ལབྦྷཏཱིཏི སིཛ྄ཛྷཏི. ཨིཏརཐཱ ཧི ‘‘པཊིགྒཧཎེ ཨནཔེཀྑོཝ ¶ པཊིགྒཧཎཾ ཝིསྶཛྫེཏྭཱ པུན པཊིགྒཧེཏྭཱ བྷུཉྫཏཱི’’ཏི ཝཏྟབྦཾ སིཡཱ, ‘‘ཨཔྤཊིགྒཧིཏཏྟཱ’’ཏི ཨིམིནཱ ཨེཀསྶ སནྟཀཾ ཨཉྙེན པཊིགྒཧིཏམྤི ནིསྶགྒིཡཾ ཧོཏཱིཏི དསྶེཏི. ཨེཝནྟི ‘‘པུན གཧེསྶཱམཱི’’ཏི ཨཔེཀྑཾ ཨཀཏྭཱ སུདྡྷཙིཏྟེན པརིཙཏྟཏཾ པརཱམསཏི. པརིབྷུཉྫནྟསྶ ཨནཱཔཏྟིདསྶནཏྠནྟི ¶ ནིསྶགྒིཡམཱུལིཀཱཧི པཱཙིཏྟིཡཱདིཨཱཔཏྟཱིཧི ཨནཱཔཏྟིདསྶནཏྠནྟི ཨདྷིཔྤཱཡོ. པརིབྷོགེ ཨནཱཔཏྟིདསྶནཏྠནྟི ཨེཏྠ པན ནིསྶཊྛཔཊིལཱབྷསྶ ཀཱཡིཀཔརིབྷོགཱདཱིསུ ཡཱ དུཀྐཊཱཔཏྟི ཝུཏྟཱ, ཏཱཡ ཨནཱཔཏྟིདསྶནཏྠནྟི ཨདྷིཔྤཱཡོ.

༡༠༠. ཨེཝཾ ཙཏུཀཱལིཀཔཙྩཡཾ དསྶེཏྭཱ ཨིདཱནི ཏེསུ ཝིསེསལཀྑཎཾ དསྶེནྟོ ‘‘ཨིམེསུ པནཱ’’ཏིཨཱདིམཱཧ. ཏཏྠ ཨཀཔྤིཡབྷཱུམིཡཾ སཧསེཡྻཱཔཧོནཀེ གེཧེ ཝུཏྟཾ སངྒྷིཀཾ ཝཱ པུགྒལིཀཾ ཝཱ བྷིཀྑུསྶ, བྷིཀྑུནིཡཱ ཝཱ སནྟཀཾ ཡཱཝཀཱལིཀཾ ཡཱམཀཱལིཀཉྩ ཨེཀརཏྟམྤི ཋཔིཏཾ ཨནྟོཝུཏྠཾ ནཱམ ཧོཏི, ཏཏྠ པཀྐཉྩ ཨནྟོཔཀྐཾ ནཱམ ཧོཏི. སཏྟཱཧཀཱལིཀཾ པན ཡཱཝཛཱིཝིཀཉྩ ཝཊྚཏི. པཊིགྒཧེཏྭཱ ཨེཀརཏྟཾ ཝཱིཏིནཱམིཏཾ པན ཡཾ ཀིཉྩི ཡཱཝཀཱལིཀཾ ཝཱ ཡཱམཀཱལིཀཾ ཝཱ ཨཛ྄ཛྷོཧརིཏུཀཱམཏཱཡ གཎྷནྟསྶ པརིགྒཧཎེ ཏཱཝ དུཀྐཊཾ, ཨཛ྄ཛྷོཧརཏོ པན ཨེཀམེཀསྨིཾ ཨཛ྄ཛྷོཧཱརེ སནྣིདྷིཔཙྩཡཱ པཱཙིཏྟིཡཾ ཧོཏཱིཏི ཨཏྠོ. ཨིདཱནི ཨཉྙམྤི ཝིསེསལཀྑཎཾ དསྶེནྟོ ‘‘ཡཱཝཀཱལིཀཾ པནཱ’’ཏིཨཱདིམཱཧ. ཏཏྠ སམྦྷིནྣརསཱནཱིཏི སཾསཊྛརསཱནི. དཱིགྷཀཱལཱནི ཝཏྠཱུནི རསྶཀཱལེན སཾསཊྛཱནི རསྶཀཱལམེཝ ཨནུཝཏྟནྟཱིཏི ཨཱཧ ‘‘ཡཱཝཀཱལིཀཾ པན…པེ… ཏཱིཎིཔི ཡཱམཀཱལིཀཱདཱིནཱི’’ཏི. ཨིཏརེསུཔི ཨེསེཝ ནཡོ. ཏསྨཱཏིཨཱདཱིསུ ཏདཧུཔུརེབྷཏྟམེཝ ཝཊྚཏི, ན ཏདཧུཔཙྪཱབྷཏྟཾ, ན རཏྟིཡཾ, ན དུཏིཡདིཝསཱདཱིསཱུཏི ཨཏྠོ.

ཀསྨཱཏི ཙེ? ཏདཧུཔཊིགྒཧིཏེན ཡཱཝཀཱལིཀེན སཾསཊྛཏྟཱཏི. ཨེཏྠ ཙ ‘‘ཡཱཝཀཱལིཀེན སཾསཊྛཏྟཱ’’ཏི ཨེཏྟཀམེཝ ཨཝཏྭཱ ‘‘ཏདཧུཔཊིགྒཧིཏེནཱ’’ཏི ཝིསེསནསྶ ཝུཏྟཏྟཱ པུརེཔཊིགྒཧིཏཡཱཝཀཱལིཀེན སཾསཊྛེ སཏི ཏདཧུཔུརེབྷཏྟམྤི ན ཝཊྚཏི, ཨནཛ྄ཛྷོཧརཎཱིཡཾ ཧོཏཱིཏི ཝིཉྙཱཡཏི. ‘‘སམྦྷིནྣརས’’ནྟི ཨིམིནཱ སཙེཔི སཾསཊྛཾ, ཨསམྦྷིནྣརསཾ སེསཀཱལིཀཏྟཡཾ ཨཏྟནོ ཨཏྟནོ ཀཱལེ ཝཊྚཏཱིཏི དསྶེཏི ¶ . ཡཱམཀཱལིཀེནཱཏི ཨེཏྠ ‘‘ཏདཧུཔཊིགྒཧིཏེནཱ’’ཏི ཏཏིཡནྟཝིསེསནཔདཾ ཨཛ྄ཛྷཱཧརིཏབྦཾ, པུབྦཝཱཀྱཏོ ཝཱ ཨནུཝཏྟེཏབྦཾ. ཏསྶ ཕལཾ ཝུཏྟནཡམེཝ.

པོཏྠཀེསུ ¶ པན ‘‘ཡཱམཀཱལིཀེན སཾསཊྛཾ པན ཨིཏརདྭཡཾ ཏདཧུཔཊིགྒཧིཏ’’ནྟི དིསྶཏི, ཏཾ ན སུནྡརཾ. ཡཏྠ ནཏྠི, ཏམེཝ སུནྡརཾ, ཀསྨཱ? དུཏིཡནྟཉྷི ཝིསེསནཔདཾ ཨིཏརདྭཡཾ ཝིསེསེཏི. ཏཏོ ཏདཧུཔཊིགྒཧིཏམེཝ སཏྟཱཧཀཱལིཀཾ ཡཱཝཛཱིཝིཀཉྩ ཡཱམཀཱལིཀེན སཾསཊྛེ སཏི ཡཱཝ ཨརུཎུགྒམནཱ ཝཊྚཏི, ན པུརེཔཊིགྒཧིཏཱནཱིཏི ཨཏྠོ བྷཝེཡྻ, སོ ན ཡུཏྟོ. ཀསྨཱ? སཏྟཱཧཀཱལིཀཡཱཝཛཱིཝིཀཱནཾ ཨསནྣིདྷིཛནཀཏྟཱ, ‘‘དཱིགྷཀཱལིཀཱནི རསྶཀཱལིཀཾ ཨནུཝཏྟནྟཱི’’ཏི ཨིམིནཱ ལཀྑཎེན ཝིརུདྡྷཏྟཱ ཙ, ཏསྨཱ ཏདཧུཔཊིགྒཧིཏཾ ཝཱ ཧོཏུ པུརེཔཊིགྒཧིཏཾ ཝཱ, སཏྟཱཧཀཱལིཀཾ ཡཱཝཛཱིཝིཀཉྩ ཏདཧུཔཊིགྒཧིཏེན ཡཱམཀཱལིཀེན སཾསཊྛཏྟཱ ཡཱཝ ཨརུཎུགྒམནཱ ཝཊྚཏཱིཏི ཨཏྠོ ཡུཏྟོ, ཨེཝཉྩ ཨུཔརི ཝཀྑམཱནེན ‘‘སཏྟཱཧཀཱལིཀེན པན ཏདཧུཔཊིགྒཧིཏེན སདྡྷིཾ སཾསཊྛཾ ཏདཧུཔཊིགྒཧིཏཾ ཝཱ པུརེཔཊིགྒཧིཏཾ ཝཱ ཡཱཝཛཱིཝིཀཾ སཏྟཱཧཾ ཀཔྤཏཱི’’ཏི ཝཙནེན སམཾ བྷཝེཡྻ.

ཨཔིཙ ‘‘ཡཱམཀཱལིཀེན སཾསཊྛཾ པན ཨིཏརདྭཡཾ ཏདཧུ ཡཱཝ ཨརུཎུགྒམནཱ ཝཊྚཏཱི’’ཏི པུབྦཔཱཋེན བྷཝིཏབྦཾ, ཏཾ ལེཁཀེཧི ཨཉྙེསུ པཱཋེསུ ‘‘ཏདཧུཔཊིགྒཧིཏ’’ནྟི ཝིཛྫམཱནཾ དིསྭཱ, ཨིདྷ ཏདཧུཔདཏོ པཊིགྒཧིཏཔདཾ གལི༹ཏནྟི མཉྙམཱནེཧི པཀྑིཔིཏྭཱ ལིཁིཏཾ བྷཝེཡྻ, ‘‘ཏདཧཱུ’’ཏི ཨིདཾ པན ‘‘ཡཱཝ ཨརུཎུགྒམནཱ’’ཏི པདཾ ཝིསེསེཏི, ཏེན ཡཱཝ ཏདཧུཨརུཎུགྒམནཱ ཝཊྚཏི, ན དུཏིཡཱཧཱདིཨརུཎུགྒམནཱཏི ཨཏྠཾ དསྶེཏི. ཏེནེཝ ཨུཔརིཔཱཋེཔི ‘‘སཏྟཱཧཀཱལིཀེན པན ཏདཧུཔཊིགྒཧིཏེནཱ’’ཏི རསྶཀཱལིཀཏྠཔདེན ཏུལྱཱདྷིཀརཎཾ ཝིསེསནཔདཾ ཏམེཝ ཝིསེསེཏི, ན དཱིགྷཀཱལིཀཏྠཾ ཡཱཝཛཱིཝིཀཔདཾ ¶ , ཏསྨཱ ‘‘ཏདཧུཔཊིགྒཧིཏེན སཏྟཱཧཀཱལིཀེན སཾསཊྛཾ ཏདཧུཔཊིགྒཧིཏཾ ཝཱ པུརེཔཊིགྒཧིཏཾ ཝཱ ཡཱཝཛཱིཝིཀཾ སཏྟཱཧཾ ཀཔྤཏཱི’’ཏི ཝུཏྟཾ.

དྭཱིཧཔཊིགྒཧིཏེནཱཏིཨཱདཱིསུཔི ‘‘དྭཱིཧཔཊིགྒཧིཏེན སཏྟཱཧཀཱལིཀེན སཾསཊྛཾ ཏདཧུཔཊིགྒཧིཏཾ ཝཱ པུརེཔཊིགྒཧིཏཾ ཝཱ ཡཱཝཛཱིཝིཀཾ ཚཱཧཾ ཝཊྚཏི, ཏཱིཧཔཊིགྒཧིཏེན སཏྟཱཧཀཱལིཀེན སཾསཊྛཾ ཏདཧུཔཊིགྒཧིཏཾ ཝཱ པུརེཔཊིགྒཧིཏཾ ཝཱ ཡཱཝཛཱིཝིཀཾ པཉྩཱཧཾ ཝཊྚཏི, ཙཏཱུཧཔཊིགྒཧིཏེན སཏྟཱཧཀཱལིཀེན སཾསཊྛཾ ཏདཧུཔཊིགྒཧིཏཾ ཝཱ པུརེཔཊིགྒཧིཏཾ ཝཱ ཡཱཝཛཱིཝིཀཾ ཙཏུརཱཧཾ ཝཊྚཏི, པཉྩཱཧཔཊིགྒཧིཏེན སཏྟཱཧཀཱལིཀེན སཾསཊྛཾ ཏདཧུཔཊིགྒཧིཏཾ ཝཱ པུརེཔཊིགྒཧིཏཾ ཝཱ ཡཱཝཛཱིཝིཀཾ ཏཱིཧཾ ཝཊྚཏི, ཚཱཧཔཊིགྒཧིཏེན སཏྟཱཧཀཱལིཀེན སཾསཊྛཾ ཏདཧུཔཊིགྒཧིཏཾ ཝཱ པུརེཔཊིགྒཧིཏཾ ཝཱ ཡཱཝཛཱིཝིཀཾ དྭཱིཧཾ ཝཊྚཏི, སཏྟཱཧཔཊིགྒཧིཏེན སཏྟཱཧཀཱལིཀེན སཾསཊྛཾ ཏདཧུཔཊིགྒཧིཏཾ ཝཱ པུརེཔཊིགྒཧིཏཾ ཝཱ ཡཱཝཛཱིཝིཀཾ ཏདཧེཝ ཝཊྚཏཱི’’ཏི ¶ ཨེཝཾ སཏྟཱཧཀཱལིཀསྶེཝ ཨཏཱིཏདིཝསཾ པརིཧཱཔེཏྭཱ སེསདིཝསཝསེན ཡོཛེཏབྦཾ, ན ཡཱཝཛཱིཝིཀསྶ. ན ཧི ཡཱཝཛཱིཝིཀསྶ ཧཱཔེཏབྦོ ཨཏཱིཏདིཝསོ ནཱམ ཨཏྠི སཏི པཙྩཡེ ཡཱཝཛཱིཝཾ པརིབྷུཉྫིཏབྦཏོ. ཏེནཱཧ ‘‘སཏྟཱཧཀཱལིཀམྤི ཨཏྟནཱ སདྡྷིཾ སཾསཊྛཾ ཡཱཝཛཱིཝིཀཾ ཨཏྟནོ སབྷཱཝཉྙེཝ ཨུཔནེཏཱི’’ཏི. ཀེསུཙི པོཏྠཀེསུ ‘‘ཡཱམཀཱལིཀེན སཾསཊྛཾ པན ཨིཏརདྭཡཾ ཏདཧུཔཊིགྒཧིཏ’’ནྟི ལིཁིཏཾ པཱཋཾ ནིསྶཱཡ ཨིམསྨིམྤི པཱཋེ ‘‘ཏདཧུཔཊིགྒཧིཏནྟི ཨིདམེཝ ཨིཙྪིཏབྦ’ནྟི མཉྙམཱནཱ ‘‘པུརེཔཊིགྒཧིཏ’’ནྟི པཱཋཾ པཊིཀྑིཔནྟི. ཀེསུཙི ‘‘པུརེབྷཏྟཾ པཊིགྒཧིཏཾ ཝཱ’’ཏི ལིཁནྟི, ཏཾ སབྦཾ ཡཐཱཝུཏྟནཡཾ ཨམནསིཀརོནྟཱ ཝིབྦྷནྟཙིཏྟཱ ཨེཝཾ ཀརོནྟཱིཏི དཊྛབྦཾ.

ཨིམེསུ ¶ ཙཏཱུསུ ཀཱལིཀེསུ ཡཱཝཀཱལིཀཾ མཛ྄ཛྷནྷིཀཀཱལཱཏིཀྐམེ, ཡཱམཀཱལིཀཾ པཙྪིམཡཱམཱཏིཀྐམེ, སཏྟཱཧཀཱལིཀཾ སཏྟཱཧཱཏིཀྐམེ པརིབྷུཉྫནྟསྶ ཨཱཔཏྟཱིཏི ཝུཏྟཾ. ཀཏརསིཀྑཱཔདེན ཨཱཔཏྟི ཧོཏཱིཏི པུཙྪཱཡམཱཧ ‘‘ཀཱལཡཱམ’’ཨིཙྩཱདི. ཏསྶཏྠོ – ཡཱཝཀཱལིཀཾ ཀཱལཱཏིཀྐམེ པརིབྷུཉྫནྟསྶ ‘‘ཡོ པན བྷིཀྑུ ཝིཀཱལེ ཁཱདནཱིཡཾ ཝཱ བྷོཛནཱིཡཾ ཝཱ ཁཱདེཡྻ ཝཱ བྷུཉྫེཡྻ ཝཱ, པཱཙིཏྟིཡ’’ནྟི ཨིམིནཱ ཝིཀཱལེབྷོཛནསིཀྑཱཔདེན (པཱཙི. ༢༤༨) ཨཱཔཏྟི ཧོཏི. ཡཱམཀཱལིཀཾ ཡཱམཱཏིཀྐམེ པརིབྷུཉྫནྟསྶ ‘‘ཡོ པན བྷིཀྑུ སནྣིདྷིཀཱརཀཾ ཁཱདནཱིཡཾ ཝཱ བྷོཛནཱིཡཾ ཝཱ ཁཱདེཡྻ ཝཱ བྷུཉྫེཡྻ ཝཱ, པཱཙིཏྟིཡ’’ནྟི ཨིམིནཱ སནྣིདྷིསིཀྑཱཔདེན (པཱཙི. ༢༥༣) ཨཱཔཏྟི ཧོཏི. སཏྟཱཧཀཱལིཀཾ སཏྟཱཧཱཏིཀྐམེ པརིབྷུཉྫནྟསྶ ‘‘ཡཱནི ཁོ པན ཏཱནི གིལཱནཱནཾ བྷིཀྑཱུནཾ པཊིསཱཡནཱིཡཱནི བྷེསཛྫཱནི, སེཡྻཐིདཾ, སཔྤི ནཝནཱིཏཾ ཏེལཾ མདྷུ ཕཱཎིཏཾ, ཏཱནི པཊིགྒཧེཏྭཱ སཏྟཱཧཔརམཾ སནྣིདྷིཀཱརཀཾ པརིབྷུཉྫིཏབྦཱནི, ཏཾ ཨཏིཀྐཱམཡཏོ ནིསྶགྒིཡཾ པཱཙིཏྟིཡ’’ནྟི ཨིམིནཱ བྷེསཛྫསིཀྑཱཔདེན (པཱརཱ. ༦༢༢) ཨཱཔཏྟི ཧོཏཱིཏི.

ཨིམཱནི ཙཏྟཱརི ཀཱལིཀཱནི ཨེཀཏོ སཾསཊྛཱནི སམྦྷིནྣརསཱནི པུརིམཔུརིམཀཱལིཀསྶ ཀཱལཝསེན པརིབྷུཉྫིཏབྦཱནཱིཏི ཝུཏྟཾ. ཨསམྦྷིནྣརསཱནི ཙེ ཧོནྟི, ཀཐཾ པརིབྷུཉྫིཏབྦཱནཱིཏི ཨཱཧ ‘‘སཙེ པནཱ’’ཏིཨཱདི. ཏསྶཏྠོ སུཝིཉྙེཡྻོཝ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཙཏུཀཱལིཀཝིནིཙྪཡཀཐཱལངྐཱརོ ནཱམ

ཨཊྛཱརསམོ པརིཙྪེདོ.

༡༩. ཀཔྤིཡབྷཱུམིཝིནིཙྪཡཀཐཱ

༡༠༡. ཨེཝཾ ¶ ¶ ཙཏུཀཱལིཀཝིནིཙྪཡཾ ཀཐེཏྭཱ ཨིདཱནི ཀཔྤིཡཀུཊིཝིནིཙྪཡཾ ཀཐེཏུཾ ‘‘ཀཔྤིཡཱ ཙཏུབྷཱུམིཡོ’’ཏིཨཱདིམཱཧ. ཏཏྠ ཀཔྤནྟཱིཏི ཀཔྤིཡཱ, ཀཔྤ སཱམཏྠིཡེཏི དྷཱཏུ. བྷཝནྟི ཨེཏཱསུ ཨནྟོཝུཏྠཨནྟོཔཀྐཱནཱིཏི བྷཱུམིཡོ, ཙཏསྶོ བྷཱུམིཡོ ཙཏུབྷཱུམིཡོ, ཙཏསྶོ ཀཔྤིཡཀུཊིཡོཏི ཨཏྠོ. ཀཏམཱ ཏཱཏི ཨཱཧ ‘‘ཨུསྶཱཝནནྟིཀཱ…པེ… ཝེདིཏབྦཱ’’ཏི. ཀཐཾ ཝིཉྙཱཡཏིཙྩཱཧ ‘‘ཨནུཛཱནཱམི…པེ… ཝཙནཏོ’’ཏི. ཨིདཾ བྷེསཛྫཀྑནྡྷཀཔཱལི༹ཾ (མཧཱཝ. ༢༩༥) སནྡྷཱཡཱཧ. ཏཏྠ ཨུདྡྷཾ སཱཝནཱ ཨུསྶཱཝནཱ, ཨུསྶཱཝནཱ ཨནྟོ ཡསྶཱ ཀཔྤིཡབྷཱུམིཡཱཏི ཨུསྶཱཝནནྟིཀཱ. གཱཝོ ནིསཱིདནྟི ཨེཏྠཱཏི གོནིསཱདིཀཱ, གོ-སདྡཱུཔཔད ནི-པུབྦསད ཝིསརཎགཏྱཱཝསཱནེསཱུཏི དྷཱཏུ. གཧཔཏཱིཧི དིནྣཱཏི གཧཔཏི, ཨུཏྟརཔདལོཔཏཏིཡཱཏཔྤུརིསོཡཾ. ཀམྨཝཱཙཱཡ སམྨནྣིཏབྦཱཏི སམྨུཏཱིཏི ཨེཝམིམཱསཾ ཝིགྒཧོ ཀཱཏབྦོ. ཏཏྠཱཏི ཀཔྤིཡཀུཊིཝིནིཙྪཡེ. ཏཾ པན ཨཝཏྭཱཔཱིཏི ཨནྡྷཀཊྛཀཐཱཡཾ ཝུཏྟནཡཾ ཨཝཏྭཱཔི. པི-སདྡེན ཏཐཱཝཙནམྤི ཨནུཛཱནཱཏི. ཨཊྛཀཐཱསུ ཝུཏྟནཡེན ཝུཏྟེཏི སེསཨཊྛཀཐཱསུ ཝུཏྟནཡེན ‘‘ཀཔྤིཡཀུཊིཾ ཀརོམཱ’’ཏི ཝཱ ‘‘ཀཔྤིཡཀུཊཱི’’ཏི ཝཱ ཝུཏྟེ. སཱདྷཱརཎལཀྑཎནྟི སབྦཨཊྛཀཐཱནཾ སཱདྷཱརཎཾ ཨུསྶཱཝནནྟིཀཀུཊིཀརཎལཀྑཎཾ. ཙཡནྟི ཨདྷིཊྛཱནཾ ཨུཙྩཝཏྠུཾ. ཡཏོ པཊྛཱཡཱཏི ཡཏོ ཨིཊྛཀཏོ སིལཏོ མཏྟིཀཱཔིཎྜཏོ ཝཱ པཊྛཱཡ. པཋམིཊྛཀཱདཱིནཾ ཧེཊྛཱ ན ཝཊྚནྟཱིཏི པཋམིཊྛཀཱདཱིནཾ ཧེཊྛཱབྷཱུམིཡཾ པཏིཊྛཱཔིཡམཱནཱ ཨིཊྛཀཱདཡོ བྷཱུམིགཏིཀཏྟཱ ‘‘ཀཔྤིཡཀུཊིཾ ཀརོམཱ’’ཏི ཝཏྭཱ པཏིཊྛཱཔེཏུཾ ན ཝཊྚནྟི. ཡདི ཨེཝཾ བྷཱུམིཡཾ ནིཁཎིཏྭཱ ཋཔིཡམཱནཱ ཐམྦྷཱ ཀསྨཱ ཏཐཱ ཝཏྭཱ པཏིཊྛཱཔེཏུཾ ཝཊྚནྟཱིཏི ཨཱཧ ‘‘ཐམྦྷཱ པན…པེ… ཝཊྚནྟཱི’’ཏི.

སངྒྷསནྟཀམེཝཱཏི ¶ ཝཱསཏྠཱཡ ཀཏཾ སངྒྷིཀསེནཱསནཾ སནྡྷཱཡ ཝདཏི. བྷིཀྑུསནྟཀནྟི ཝཱསཏྠཱཡ ཨེཝ ཀཏཾ བྷིཀྑུསྶ པུགྒལིཀསེནཱསནཾ.

༡༠༢. མུཁསནྣིདྷཱིཏི ཨིམིནཱ ཨནྟོཝུཏྠདུཀྐཊམེཝ དཱིཔེཏི.

ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༢༩༥) པན ཨེཝཾ ཝུཏྟཾ – ཏཾ པན ཨཝཏྭཱཔཱིཏི པི-སདྡེན ཏཐཱཝཙནམྤི ཨནུཛཱནཱཏི. ཨཊྛཀཐཱསཱུཏི ཨནྡྷཀཊྛཀཐཱཝིརཧིཏཱསུ སེསཊྛཀཐཱསུ. སཱདྷཱརཎལཀྑཎནྟི ཨནྡྷཀཊྛཀཐཱཡ སཧ སབྦཊྛཀཐཱནཾ སམཱནཾ. ཙཡནྟི ཨདྷིཊྛཱནཾ ཨུཙྩཝཏྠུཾ. ¶ ཡཏོ པཊྛཱཡཱཏི ཡཏོ ཨིཊྛཀཱདིཏོ པཊྛཱཡ ཙཡཾ ཨཱདིཾ ཀཏྭཱ བྷིཏྟིཾ ཨུཊྛཱཔེཏུཀཱམཱཏི ཨཏྠོ. ‘‘ཐམྦྷཱ པན ཨུཔརི ཨུགྒཙྪནྟི, ཏསྨཱ ཝཊྚནྟཱི’’ཏི ཨེཏེན ཨིཊྛཀཔཱསཱཎཱ ཧེཊྛཱ པཏིཊྛཱཔིཡམཱནཱཔི ཡདི ཙཡཏོ, བྷཱུམིཏོ ཝཱ ཨེཀངྒུལམཏྟམྤི ཨུགྒཏཱ ཏིཊྛནྟི, ཝཊྚནྟཱིཏི སིདྡྷཾ ཧོཏི.

ཨཱརཱམོཏི ཨུཔཙཱརསཱིམཱཔརིཙྪིནྣོ སཀལོ ཝིཧཱརོ. སེནཱསནཱནཱིཏི ཝིཧཱརསྶ ཨནྟོ ཏིཎཀུཊིཨཱདིཀཱནི སངྒྷསྶ ནིཝཱསགེཧཱནི. ཝིཧཱརགོནིསཱདིཀཱ ནཱམཱཏི སེནཱསནགོནིསཱདིཀཱ ནཱམ. སེནཱསནཱནི ཧི སཡཾ པརིཀྑིཏྟཱནིཔི ཨཱརཱམཔརིཀྑེཔཱབྷཱཝེན ‘‘གོནིསཱདིཀཱ’’ཏི ཝུཏྟཱ. ‘‘ཨུཔཌྜྷཔརིཀྑིཏྟོཔཱི’’ཏི ཨིམིནཱ ཏཏོ ཨཱུནཔརིཀྑིཏྟོ ཡེབྷུཡྻེན ཨཔརིཀྑིཏྟོ ནཱམ, ཏསྨཱ ཨཔརིཀྑིཏྟསངྑམེཝ གཙྪཏཱིཏི དསྶེཏི. ཨེཏྠཱཏི ཨུཔཌྜྷཱདིཔརིཀྑིཏྟེ. ཀཔྤིཡཀུཊི ལདྡྷུཾ ཝཊྚཏཱིཏི གོནིསཱདིཀཱཡ ཨབྷཱཝེན སེསཀཔྤིཡཀུཊཱིསུ ཏཱིསུ ཡཱ ཀཱཙི ཀཔྤིཡཀུཊི ཀཱཏབྦཱཏི ཨཏྠོ.

ཏེསཾ གེཧཱནཱིཏི ཨེཏྠ བྷིཀྑཱུནཾ ཝཱསཏྠཱཡ ཀཏམྤི ཡཱཝ ན དེནྟི, ཏཱཝ ཏེསཾ སནྟཀཾཡེཝ བྷཝིསྶཏཱིཏི དཊྛབྦཾ. ཝིཧཱརཾ ¶ ཋཔེཏྭཱཏི ཨུཔསམྤནྣཱནཾ ཝཱསཏྠཱཡ ཀཏཾ གེཧཾ ཋཔེཏྭཱཏི ཨཏྠོ. གེཧནྟི ནིཝཱསགེཧཾ. ཏདཉྙཾ པན ཨུཔོསཐཱགཱརཱདི སབྦཾ ཨནིཝཱསགེཧཾ ཙཏུཀཔྤིཡབྷཱུམིཝིམུཏྟཱ པཉྩམཱི ཀཔྤིཡབྷཱུམི. སངྒྷསནྟཀེཔི ཧི ཨེཏཱདིསེ གེཧེ སུཊྛུ པརིཀྑིཏྟཱརཱམཊྛེཔི ཨབྦྷོཀཱསེ ཝིཡ ཨནྟོཝུཏྠཱདིདོསོ ནཏྠི. ཡེན ཀེནཙི ཚནྣེ པརིཙྪནྣེ ཙ སཧསེཡྻཔྤཧོནཀེ བྷིཀྑུསྶ, སངྒྷསྶ ཝཱ ནིཝཱསགེཧེ ཨནྟོཝུཏྠཱདིདོསོ, ན ཨཉྙཏྠ. ཏེནཱཧ ‘‘ཡཾ པནཱ’’ཏིཨཱདི. ཏཏྠ ‘‘སངྒྷིཀཾ ཝཱ པུགྒལིཀཾ ཝཱ’’ཏི ཨིདཾ ཀིཉྩཱཔི བྷིཀྑུབྷིཀྑུནཱིནཾ སཱམཉྙཏོ ཝུཏྟཾ བྷིཀྑཱུནཾ པན སངྒྷིཀཾ པུགྒལིཀཉྩ བྷིཀྑུནཱིནཾ, ཏཱསཾ སངྒྷིཀཾ པུགྒལིཀཉྩ བྷིཀྑཱུནཾ གིཧིསནྟཀཊྛཱནེ ཏིཊྛཏཱིཏི ཝེདིཏབྦཾ.

མུཁསནྣིདྷཱིཏི ཨནྟོསནྣིཧིཏདོསོ ཧི མུཁཔྤཝེསནནིམིཏྟཾ ཨཱཔཏྟིཾ ཀརོཏི, ནཱཉྙཐཱ, ཏསྨཱ ‘‘མུཁསནྣིདྷཱི’’ཏི (ཝི. ཝི. ཊཱི. མཧཱཝགྒ ༢.༢༩༥) ཝུཏྟོཏི.

ཏཏྠ ཏཏྠ ཁཎྜཱ ཧོནྟཱིཏི ཨུཔཌྜྷཏོ ཨདྷིཀཾ ཁཎྜཱ ཧོནྟི. སབྦསྨིཾ ཚདནེ ཝིནཊྛེཏི ཏིཎཔཎྞཱདིཝསྶཔརིཏྟཱཡཀེ ཚདནེ ཝིནཊྛེ. གོཔཱནསཱིནཾ པན ཨུཔརི ཝལླཱིཧི བདྡྷདཎྜེསུ ཋིཏེསུཔི ¶ ཛཧིཏཝཏྠུཀཱ ཧོནྟི ཨེཝ. པཀྑཔཱསཀམཎྜལནྟི ཨེཀསྨིཾ པསྶེ ཏིཎྞཾ གོཔཱནསཱིནཾ ཨུཔརི ཋིཏཏིཎཔཎྞཱདིཚདནཾ ཝུཙྩཏི.

༡༠༣. ‘‘ཨནུཔསམྤནྣསྶ དཏྭཱ ཏསྶཱ’’ཏིཨཱདིནཱ ཨཀཔྤིཡཀུཊིཡཾ ཝུཏྠམྤི ཨནུཔསམྤནྣསྶ དིནྣེ ཀཔྤིཡཾ ཧོཏི, སཱཔེཀྑདཱནཉྩེཏྠ ཝཊྚཏི, པཊིགྒཧཎཾ ཝིཡ ན ཧོཏཱིཏི དསྶེཏི. ཨནྟོཔཀྐསཱམཾཔཀྐེསུ པན ‘‘ན, བྷིཀྑཝེ, ཨནྟོཝུཏྠཾ ཨནྟོཔཀྐཾ སཱམཾཔཀྐཾ པརིབྷུཉྫིཏབྦཾ, ཡོ པརིབྷུཉྫེཡྻ, ཨཱཔཏྟི དུཀྐཊསྶ. ཨནྟོ ཙེ, བྷིཀྑཝེ, ཝུཏྠཾ ཨནྟོཔཀྐཾ ¶ སཱམཾཔཀྐཾ, ཏཉྩེ པརིབྷུཉྫེཡྻ, ཨཱཔཏྟི ཏིཎྞཾ དུཀྐཊཱནཾ. ཨནྟོ ཙེ, བྷིཀྑཝེ, ཝུཏྠཾ ཨནྟོཔཀྐཾ ཨཉྙེཧི པཀྐཾ, ཏཉྩེ པརིབྷུཉྫེཡྻ, ཨཱཔཏྟི དྭིནྣཾ དུཀྐཊཱནཾ. ཨནྟོ ཙེ, བྷིཀྑཝེ, ཝུཏྠཾ བཧིཔཀྐཾ སཱམཾཔཀྐཾ, ཏཉྩེ པརིབྷུཉྫེཡྻ, ཨཱཔཏྟི དྭིནྣཾ དུཀྐཊཱནཾ. བཧི ཙེ, བྷིཀྑཝེ, ཝུཏྠཾ ཨནྟོཔཀྐཾ སཱམཾཔཀྐཾ, ཏཉྩེ པརིབྷུཉྫེཡྻ, ཨཱཔཏྟི དྭིནྣཾ དུཀྐཊཱནཾ. ཨནྟོ ཙེ, བྷིཀྑཝེ, ཝུཏྠཾ བཧིཔཀྐཾ ཨཉྙེཧི པཀྐཾ, ཏཉྩེ པརིབྷུཉྫེཡྻ, ཨཱཔཏྟི དུཀྐཊསྶ. བཧི ཙེ, བྷིཀྑཝེ, ཝུཏྠཾ ཨནྟོཔཀྐཾ ཨཉྙེཧི པཀྐཾ, ཏཉྩེ པརིབྷུཉྫེཡྻ, ཨཱཔཏྟི དུཀྐཊསྶ. བཧི ཙེ, བྷིཀྑཝེ, ཝུཏྠཾ བཧིཔཀྐཾ སཱམཾཔཀྐཾ, ཏཉྩེ པརིབྷུཉྫེཡྻ, ཨཱཔཏྟི དུཀྐཊསྶ. བཧི ཙེ, བྷིཀྑཝེ, ཝུཏྠཾ བཧིཔཀྐཾ ཨཉྙེཧི པཀྐཾ, ཏཉྩེ པརིབྷུཉྫེཡྻ, ཨནཱཔཏྟཱི’’ཏི (མཧཱཝ. ༢༧༤) ཝཙནཏོ ཨེཀཾ ཏིརཱཔཏྟིཀཾ, ཏཱིཎི དུརཱཔཏྟིཀཱནི, ཏཱིཎི ཨེཀཱཔཏྟིཀཱནི, ཨེཀཾ ཨནཱཔཏྟིཀནྟི ཨཊྛ ཧོནྟི. ཏཏྠ ཨནྟོཝུཏྠནྟི ཨཀཔྤིཡཀུཊིཡཾ ཝུཏྠཾ. ཨནྟོཔཀྐེཔི ཨེསེཝ ནཡོ. སཱམཾཔཀྐནྟི ཡཾ ཀིཉྩི ཨཱམིསཾ བྷིཀྑུསྶ པཙིཏུཾ ན ཝཊྚཏི. ཏཏྠ ཡཾ ཝཏྟབྦཾ, ཏཾ ཨཊྛཀཐཱཡཾ ཝུཏྟམེཝ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཀཔྤིཡབྷཱུམིཝིནིཙྪཡཀཐཱལངྐཱརོ ནཱམ

ཨེཀཱུནཝཱིསཏིམོ པརིཙྪེདོ.

༢༠. པཊིགྒཧཎཝིནིཙྪཡཀཐཱ

༡༠༤. ཨེཝཾ ¶ ཀཔྤིཡབྷཱུམིཝིནིཙྪཡཾ ཀཐེཏྭཱ ཨིདཱནི པཊིགྒཧཎཝིནིཙྪཡཾ ཀཐེཏུཾ ‘‘ཁཱདནཱིཡཱདིཔཊིགྒཱཧོ’’ཏིཨཱདིམཱཧ. ཏཏྠ ཁཱདིཡཏེཏི ཁཱདནཱིཡཾ, ཋཔེཏྭཱ པཉྩ བྷོཛནཱནི སབྦསྶ ཨཛ྄ཛྷོཧརིཏབྦསྶེཏཾ ཨདྷིཝཙནཾ. ཨཱདིསདྡེན བྷོཛནཱིཡཾ ¶ སངྒཎྷཱཏི. པཊིགྒཧཎཾ སམྤཊིཙྪནཾ པཊིགྒཱཧོ, ཁཱདནཱིཡཱདཱིནཾ པཊིགྒཱཧོ ཁཱདནཱིཡཱདིཔཊིགྒཱཧོ. ཏེནཱཧ ‘‘ཨཛ྄ཛྷོཧརིཏབྦསྶ ཡསྶ ཀསྶཙི ཁཱདནཱིཡསྶ ཝཱ བྷོཛནཱིཡསྶ ཝཱ པཊིགྒཧཎ’’ནྟི. པཉྩསུ ཨངྒེསུ ཨུཙྩཱརཎམཏྟནྟི ཨུཀྑིཔནམཏྟཾ, ཨིམིནཱ པཊིགྒཧིཏབྦབྷཱརསྶ པམཱཎཾ དསྶེཏི. ཏེནེཝ ཏཱདིསེན པུརིསེན ཨནུཀྑིཔནཱིཡཝཏྠུསྨིཾ པཊིགྒཧཎཾ ན རུཧཏཱིཏི དཱིཔེཏི. ‘‘ཧཏྠཔཱསོ’’ཏི ཨིམིནཱ ཨཱསནྣབྷཱཝཾ. ཏེནེཝ ཙ དཱུརེ ཋཏྭཱ ཨབྷིཧརནྟསྶ པཊིགྒཧཎཾ ན རུཧཏཱིཏི དཱིཔེཏི. ཨབྷིཧཱརོཏི པརིཎཱམིཏབྷཱཝོ, ཏེན ཙ ཏཏྲཊྛཀཱདཱིསུ ན རུཧཏཱིཏི དཱིཔེཏི. ‘‘དེཝོ ཝཱ’’ཏིཨཱདིནཱ དཱཡཀཏོ པཡོགཏྟཡཾ དསྶེཏི. ‘‘ཏཉྩེ’’ཏིཨཱདིནཱ པཊིགྒཱཧཀཏོ པཡོགདྭཡཾ དསྶེཏི.

ཨིདཱནི ཏེསུ པཉྩསུ ཨངྒེསུ ཧཏྠཔཱསསྶ དུརཱཛཱནཏཱཡ ཏཾ དསྶེཏུམཱཧ ‘‘ཏཏྠི’’ཙྩཱདི. ཏཏྠ ཨཌྜྷཏེཡྻཧཏྠོ ཧཏྠཔཱསོ ནཱམཱཏི ཡོཛནཱ. ‘‘ཏསྶ ཨོརིམནྟེནཱ’’ཏི ཨིམིནཱ ཨཱཀཱསེ ཨུཛུཾ ཋཏྭཱ པརེན ཨུཀྑིཏྟཾ གཎྷནྟསྶཱཔི ཨཱསནྣངྒབྷཱུཏཔཱདཏལཏོ པཊྛཱཡ ཧཏྠཔཱསོ པརིཙྪིནྡིཏབྦོ, ན སཱིསཏོ པཊྛཱཡཱཏི དསྶེཏི. ཏཏྠ ‘‘ཨོརིམནྟེནཱ’’ཏི ཨིམསྶ ཧེཊྛིམནྟེནཱཏི ཨཏྠོ གཧེཏབྦོ.

ཨེཏྠ ཙ པཝཱརཎསིཀྑཱཔདཊྛཀཐཱཡཾ (པཱཙི. ཨཊྛ. ༢༣༨-༢༣༩) ‘‘སཙེ པན བྷིཀྑུ ནིསིནྣོ ཧོཏི, ཨཱསནྣསྶ པཙྪིམནྟཏོ པཊྛཱཡཱ’’ཏིཨཱདིནཱ པཊིགྒཱཧཀཱནཾ ཨཱསནྣངྒསྶ པཱརིམནྟཏོ པཊྛཱཡ པརིཙྪེདསྶ དསྶིཏཏྟཱ ཨིདྷཱཔི ཨཱཀཱསེ ཋིཏསྶ པཊིགྒཱཧཀསྶ ཨཱསནྣངྒབྷཱུཏཔཱདཏལསྶ པཱརིམནྟབྷཱུཏཏོ པཎྷིཔརིཡནྟསྶ ཧེཊྛིམཏལཏོ པཊྛཱཡ, དཱཡཀསྶ པན ཨོརིམནྟབྷཱུཏཏོ པཱདངྒུལསྶ ཧེཊྛིམཔརིཡནྟཏོ པཊྛཱཡ ཧཏྠཔཱསོ ¶ པརིཙྪིནྡིཏབྦོཏི དཊྛབྦཾ. ཨིམིནཱཝ ནཡེན བྷཱུམིཡཾ ནིཔཛྫིཏྭཱ ཨུསྶཱིསཀེ ནིསིནྣསྶ ཧཏྠཏོ པཊིགྒཎྷནྟསྶཱཔི ཨཱསནྣསཱིསངྒསྶ པཱརིམནྟབྷཱུཏཏོ གཱིཝནྟཏོ པཊྛཱཡེཝ ཧཏྠཔཱསོ མིནིཏབྦོ, ན པཱདཏལཏོ པཊྛཱཡ. ཨེཝཾ ནིཔཛྫིཏྭཱ དཱནེཔི ཡཐཱནུརཱུཔཾ ཝེདིཏབྦཾ. ‘‘ཡཾ ཨཱསནྣཏརཾ ཨངྒ’’ནྟི (པཱཙི. ཨཊྛ. ༢༣༨-༢༣༩) ཧི ¶ ཝུཏྟཾ. ཨཀལླཀོཏི གིལཱནོ སཧཏྠཱ པརིབྷུཉྫིཏུཾ ཨསཀྐོནྟོ མུཁེན པཊིགྒཎྷཱཏི. ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༢༦༥) པན ‘‘ཨཀལླཀོཏི གིལཱནོ གཧེཏུཾ ཝཱ’’ཏི ཨེཏྟཀམེཝ ཝུཏྟཾ, ཨེཏེན ཨཀལླཀོཏི གིལཱནོ ཝཱ ཨཐ ཝཱ གཧེཏུཾ ཨཀལླཀོ ཨསམཏྠོཏི ཨཏྠོ དསྶིཏོ. ཏེནཱཧ ‘‘སཙེཔི ནཏྠུཀརཎིཡཾ དཱིཡམཱནཾ ནཱསཱཔུཊེན ཨཀལླཀོ ཝཱ མུཁེན པཊིགྒཎྷཱཏཱི’’ཏི.

༡༠༥. ཨེཀདེསེནཱཔཱིཏི ཨངྒུལིཡཱ ཕུཊྛམཏྟེན.

ཏཉྩེ པཊིགྒཎྷཱཏི, སབྦཾ པཊིགྒཧིཏམེཝཱཏི ཝེཎུཀོཊིཡཾ བནྡྷིཏྭཱ ཋཔིཏཏྟཱ. སཙེ བྷཱུམིཡཾ ཋིཏམེཝ གྷཊཾ དཱཡཀེན ཧཏྠཔཱསེ ཋཏྭཱ ‘‘གྷཊཾ དསྶཱམཱི’’ཏི དིནྣཾ ཝེཎུཀོཊིཡཱ གཧཎཝསེན པཊིགྒཎྷཱཏི, ཨུབྷཡཀོཊིབདྡྷཾ སབྦམྤི པཊིགྒཧིཏམེཝ ཧོཏི. བྷིཀྑུསྶ ཧཏྠེ ཨཔཱིལེ༹ཏྭཱ པཀཏིཡཱ པཱིལི༹ཡམཱནཾ ཨུཙྪུརསཾ སནྡྷཱཡ ‘‘གཎྷཐཱ’’ཏི ཝུཏྟཏྟཱ ‘‘ཨབྷིཧཱརོ ན པཉྙཱཡཏཱི’’ཏི ཝུཏྟཾ, ཧཏྠཔཱསེ ཋིཏསྶ པན བྷིཀྑུསྶ ཨཏྠཱཡ པཱིལི༹ཡམཱནཾ ཨུཙྪུཏོ པགྒྷརནྟཾ རསཾ གཎྷིཏུཾ ཝཊྚཏི. དོཎིཀཱཡ སཡཾ པགྒྷརནྟཾ ཨུཙྪུརསཾ མཛ྄ཛྷེ ཨཱཝརིཏྭཱ ཝིསྶཛྫིཏམྤི གཎྷིཏུཾ ཝཊྚཏི. པཊིགྒཧཎསཉྙཱཡཱཏི ‘‘མཉྩཱདིནཱ པཊིགྒཧེསྶཱམཱི’’ཏི ཨུཔྤཱདིཏསཉྙཱཡ, ཨིམིནཱ ‘‘པཊིགྒཎྷཱམཱི’’ཏི ཝཱཙཱཡ ཝཏྟབྦཀིཙྩཾ ནཏྠཱིཏི དསྶེཏི.

ཡཏྠ ¶ ཀཏྠཙི ཨཊྛཀཐཱསུ, པདེསེསུ ཝཱ. ཨསཾཧཱརིམེ ཕལཀེཏི ཐཱམམཛ྄ཛྷིམེན ཨསཾཧཱརིཡེ. ‘‘ཏིནྟིཎིཀཱདིཔཎྞེསཱུཏི ཝཙནཏོ སཱཁཱསུ པཊིགྒཧཎཾ རུཧཏཱིཏི དཊྛབྦ’’ནྟི སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༢༦༥) ཝུཏྟཾ. པོརཱཎཊཱིཀཱཡམྤི ཏཐེཝ ཝུཏྟཾ, ཏདེཏཾ ཝིཙཱརེཏབྦཾ. ཨཊྛཀཐཱཡཉྷི ‘‘བྷཱུམིཡཾ ཨཏྠཏེསུ སུཁུམེསུ ཏིནྟིཎིཀཱདིཔཎྞེསུ པཊིགྒཧཎཾ ན རུཧཏཱི’’ཏི ཝུཏྟཾ. ཏཾ ཏིནྟིཎིཀཱདིཔཎྞཱནཾ སུཁུམཏྟཱ ཏཏྠ ཋཔིཏཨཱམིསསྶ ཨསཎྛཧནཏོ བྷཱུམིཡཾ ཋཔིཏསདིསཏྟཱ ‘‘ན རུཧཏཱི’’ཏི ཝུཏྟཾ, ཏིནྟིཎིཀཱདིསཱཁཱསུ ཋཔིཏེཔི ཨེཝམེཝ སིཡཱ, ཏསྨཱ ‘‘སཱཁཱསུ པཊིགྒཧཎཾ རུཧཏཱི’’ཏི ཝཙནཾ ཨཡུཏྟཾ ཝིཡ དིསྶཏི. ཨཊྛཀཐཱཡཾ ‘‘ན རུཧཏཱི’’ཏི ཀིརིཡཱཔདསྶ ‘‘ཀསྨཱ’’ཏི ཧེཏུཔརིཡེསནེ སཏི ན ཨཉྙཾ པརིཡེསིཏབྦཾ, ‘‘སུཁུམེསཱུ’’ཏི ཝུཏྟཾ ཝིསེསནཔདཾཡེཝ ཧེཏུམནྟཝིསེསནཾ བྷཝཏི, ཏསྨཱ ཏིནྟིཎིཀཔཎྞཱདཱིསུ པཊིགྒཧཎཾ ན རུཧཏི, ཀསྨཱ? ཏེསཾ སུཁུམཏྟཱ. ཨཉྙེསུ པན པདུམིནཱིཔཎྞཱདཱིསུ རུཧཏི, ཀསྨཱ? ཏེསཾ ཨོལཱ༹རིཀཏྟཱཏི ཧེཏུཕལསམྦནྡྷོ ཨིཙྪིཏབྦོཏི དིསྶཏི ¶ , ཏསྨཱ ‘‘ཏདེཏཾ ཝིཙཱརེཏབྦ’’ནྟི ཝུཏྟཾ. ཏཐཱ ཧི ཝུཏྟཾ ཨཊྛཀཐཱཡཾ ‘‘ན ཧི ཏཱནི སནྡྷཱརེཏུཾ སམཏྠཱནཱིཏི མཧནྟེསུ པན པདུམིནཱིཔཎྞཱདཱིསུ རུཧཏཱི’’ཏི.

༡༠༦. པུཉྪིཏྭཱ པཊིགྒཧེཏྭཱཏི པུཉྪིཏེཔི རཛནཙུཎྞཱསངྐཱཡ སཏི པཊིགྒཧཎཏྠཱཡ ཝུཏྟཾ, ནཱསཏི. ཏཾ པནཱཏི པཏིཏརཛཾ ཨཔྤཊིགྒཧེཏྭཱ ཨུཔརི གཧིཏཔིཎྜཔཱཏཾ. ཨནཱཔཏྟཱིཏི དུརཱུཔཙིཎྞཱདིདོསོ ནཏྠི. པུབྦཱབྷོགསྶ ཨནུརཱུཔཝསེན ‘‘ཨནུཔསམྤནྣསྶ དཏྭཱ…པེ… ཝཊྚཏཱི’’ཏི ཝུཏྟཾ. ཡསྨཱ པན ཏཾ ‘‘ཨཉྙསྶ དསྶཱམཱི’’ཏི ཙིཏྟུཔྤཱདམཏྟེན པརསནྟཀཾ ན ཧོཏི, ཏསྨཱ ཏསྶ ཨདཏྭཱཔི པཊིགྒཧེཏྭཱ པརིབྷུཉྫིཏུཾ ཝཊྚཏི. ‘‘ཨནུཔསམྤནྣསྶ དསྶཱམཱི’’ཏིཨཱདིཔི ཝིནཡདུཀྐཊསྶ པརིཧཱརཱཡ ¶ ཝུཏྟཾ, ཏཐཱ ཨཀཏྭཱ གཧིཏེཔི པཊིགྒཧེཏྭཱ པརིབྷུཉྫཏོ ཨནཱཔཏྟིཡེཝ. བྷིཀྑུསྶ དེཏཱིཏི ཨཉྙསྶ བྷིཀྑུསྶ དེཏི. ཀཉྫིཀནྟི ཁཱིརརསཱདིཾ ཡཾ ཀིཉྩི དྲཝཾ སནྡྷཱཡ ཝུཏྟཾ. ཧཏྠཏོ མོཙེཏྭཱ པུན གཎྷཱཏི, ཨུགྒཧིཏཀཾ ཧོཏཱིཏི ཨཱཧ ‘‘ཧཏྠཏོ ཨམོཙེནྟེནེཝཱ’’ཏི. ཨཱལུལེ༹ནྟཱནནྟི ཨཱལོལེ༹ནྟཱནཾ, ཨཡམེཝ ཝཱ པཱཋོ. ཨཱཧརིཏྭཱ བྷཱུམིཡཾ ཋཔིཏཏྟཱ ཨབྷིཧཱརོ ནཏྠཱིཏི ཨཱཧ ‘‘པཏྟོ པཊིགྒཧེཏབྦོ’’ཏི.

༡༠༧. པཋམཏརཾ ཨུལུ༹ངྐཏོ ཐེཝཱ པཏྟེ པཏནྟཱིཏི ཨེཏྠ ‘‘ཡཐཱ པཋམཏརཾ པཏིཏཐེཝེ དོསོ ནཏྠི, ཏཐཱ ཨཱཀིརིཏྭཱ ཨཔནེནྟཱནཾ པཙྪཱ པཏིཏཐེཝེཔི ཨབྷིཧཊཏྟཱ ནེཝཏྠི དོསོ’’ཏི ཝདནྟི. ཙརུཀེནཱཏི ཁུདྡཀབྷཱཛནེན. ‘‘ཨབྷིཧཊཏྟཱཏི དཱིཡམཱནཀྑཎཾ སནྡྷཱཡ ཝུཏྟཾ. དཏྭཱ ཨཔནཡནཀཱལེ པན ཚཱརིཀཱ ཝཱ བིནྡཱུནི ཝཱ པཏནྟི, པུན པཊིགྒཧེཏབྦཾ ཨབྷིཧཱརསྶ ཝིགཏཏྟཱ’’ཏི ཝདནྟི, ཏཾ ཡཐཱ ན པཏཏི, ཏཐཱ ཨཔནེསྶཱམཱིཏི པཊིཧརནྟེ ཡུཛྫཏི, པཀཏིསཉྙཱཡ ཨཔནེནྟེ ཨབྷིཧཱརོ ན ཚིཛྫཏི, སུཔཏིཏཾ. པཊིགྒཧིཏམེཝ ཧི ཏཾ ཧོཏི. མུཁཝཊྚིཡཱཔི གཧེཏུཾ ཝཊྚཏཱིཏི ཨབྷིཧརིཡམཱནསྶ པཏྟསྶ མུཁཝཊྚིཡཱ ཨུཔརིབྷཱགེ ཧཏྠཾ པསཱརེཏྭཱ ཕུསིཏུཾ ཝཊྚཏི. པཱདེན པེལླེཏྭཱཏི པཱདེན ‘‘པཊིགྒཧེསྶཱམཱི’’ཏི སཉྙཱཡ ཨཀྐམིཏྭཱ. ཀེཙཱིཏི ཨབྷཡགིརིཝཱསིནོ. ཝཙནམཏྟམེཝཱཏི པཊིབདྡྷཾ པཊིབདྡྷཔཊིབདྡྷནྟི སདྡམཏྟམེཝ ནཱནཾ, ཀཱཡཔཊིབདྡྷམེཝ ཧོཏི, ཏསྨཱ ཏེསཾ ཝཙནཾ ན གཧེཏབྦནྟི ཨདྷིཔྤཱཡོ. ཨེས ནཡོཏི ‘‘པཊིབདྡྷཔཊིབདྡྷམྤི ཀཱཡཔཊིབདྡྷམེཝཱ’’ཏི ཨཡཾ ནཡོ. ཏཐཱ ཙ ཏཏྠ ཀཱཡཔཊིབདྡྷེ ཏཔྤཊིབདྡྷེ ཙ ཐུལླཙྩཡམེཝ ཝུཏྟཾ.

ཏེན ཨཱཧརཱཔེཏུནྟི ཡསྶ བྷིཀྑུནོ སནྟིཀཾ གཏཾ, ཏཾ ‘‘ཨིདྷ ནཾ ཨཱནེཧཱི’’ཏི ཨཱཎཱཔེཏྭཱ ¶ ཏེན ཨཱཧརཱཔེཏུཾ ཨིཏརསྶ ཝཊྚཏཱིཏི ཨཏྠོ. ཏསྨཱཏི ཡསྨཱ མཱུལཊྛསྶེཝ ¶ པརིབྷོགོ ཨནུཉྙཱཏོ, ཏསྨཱ. ཏཾ དིཝསཾ ཧཏྠེན གཧེཏྭཱ དུཏིཡདིཝསེ པཊིགྒཧེཏྭཱ པརིབྷུཉྫནྟསྶ ཨུགྒཧིཏཀཔཊིགྒཧིཏཾ ཧོཏཱིཏི ཨཱཧ ‘‘ཨནཱམསིཏྭཱ’’ཏི. ཨཔྤཊིགྒཧིཏཏྟཱ ‘‘སནྣིདྷིཔཙྩཡཱ ཨནཱཔཏྟཱི’’ཏི ཝུཏྟཾ. ཨཔྤཊིགྒཧེཏྭཱ པརིབྷུཉྫནྟསྶ ཨདིནྣམུཁདྭཱརཱཔཏྟི ཧོཏཱིཏི ཨཱཧ ‘‘པཊིགྒཧེཏྭཱ པན པརིབྷུཉྫིཏབྦ’’ནྟི. ‘‘ན ཏཏོ པརནྟི ཏདཧེཝ སཱམཾ ཨཔྤཊིགྒཧིཏཾ སནྡྷཱཡ ཝུཏྟཾ, ཏདཧེཝ པཊིགྒཧིཏཾ པན པུནདིཝསཱདཱིསུ ཨཔྤཊིགྒཧེཏྭཱཔི པརིབྷུཉྫིཏུཾ ཝཊྚཏཱི’’ཏི ཝདནྟི.

༡༠༨. ཁཱིཡནྟཱིཏི ཁཡཾ གཙྪནྟི, ཏེསཾ ཙུཎྞེཧི ཐུལླཙྩཡཨཔྤཊིགྒཧཎཱཔཏྟིཡོ ན ཧོནྟཱིཏི ཨདྷིཔྤཱཡོ. སཏྠཀེནཱཏི པཊིགྒཧིཏསཏྠཀེན. ནཝསམུཊྛིཏནྟི ཨེཏེནེཝ ཨུཙྪུཨཱདཱིསུ ཨབྷིནཝལགྒཏྟཱ ཨབྦོཧཱརིཀཾ ན ཧོཏཱིཏི དསྶེཏི. ཨེསེཝ ནཡོཏི སནྣིདྷིདོསཱདིཾ སནྡྷཱཡ ཝདཏི. ཏེནཱཧ ‘‘ན ཧཱི’’ཏིཨཱདི. ཀསྨཱ པནེཏྠ ཨུགྒཧིཏཔཙྩཡཱ, སནྣིདྷིཔཙྩཡཱ ཝཱ དོསོ ན སིཡཱཏི ཨཱཧ ‘‘ན ཧི ཏཾ པརིབྷོགཏྠཱཡ པརིཧརནྟཱི’’ཏི. ཨིམིནཱ ཙ བཱཧིརཔརིབྷོགཏྠཾ སཱམཾ གཧེཏྭཱ ཝཱ ཨནུཔསམྤནྣེན དིནྣཾ ཝཱ པརིཧརིཏུཾ ཝཊྚཏཱིཏི དཱིཔེཏི, ཏསྨཱ པཏྟསམྨཀྑནཱདིཨཏྠཾ སཱམཾ གཧེཏྭཱ པརིཧརིཏཏེལཱདིཾ སཙེ པརིབྷུཉྫིཏུཀཱམོ ཧོཏི, པཊིགྒཧེཏྭཱ པརིབྷུཉྫནྟསྶ ཨནཱཔཏྟི. ཨབྦྷནྟརཔརིབྷོགཏྠཾ པན སཱམཾ གཧིཏཾ པཊིགྒཧེཏྭཱ པརིབྷུཉྫནྟསྶ ཨུགྒཧིཏཔཊིགྒཧཎཾ ཧོཏི, ཨཔྤཊིགྒཧེཏྭཱ པརིབྷུཉྫནྟསྶ ཨདིནྣམུཁདྭཱརཱཔཏྟི ཧོཏི. ཨབྦྷནྟརཔརིབྷོགཏྠམེཝ ཨནུཔསམྤནྣེན དིནྣཾ གཧེཏྭཱ པརིཧརནྟསྶ སིངྒཱིལོཎཀཔྤོ ཝིཡ སནྣིདྷིཔཙྩཡཱ ཨཱཔཏྟི ཧོཏི. ཀེཙི པན ‘‘ཐཱམམཛ྄ཛྷིམསྶ པུརིསསྶ ཨུཙྩཱརཎམཏྟཾ ཧོཏཱིཏིཨཱདིནཱ ཝུཏྟཔཉྩངྒསམྤཏྟིཡཱ པཊིགྒཧཎསྶ རུཧཎཏོ བཱཧིརཔརིབྷོགཏྠམྤི སཙེ ཨནུཔསམྤནྣེཧི དིནྣཾ གཎྷཱཏི, པཊིགྒཧིཏམེཝཱ’’ཏི ¶ ཝདནྟི. ཨེཝཾ སཏི ཨིདྷ བཱཧིརཔརིབྷོགཏྠཾ ཨནུཔསམྤནྣེན དིནྣཾ གཧེཏྭཱ པརིཧརནྟསྶ སནྣིདྷིཔཙྩཡཱ ཨཱཔཏྟི ཝཏྟབྦཱ སིཡཱ. ‘‘ན ཧི ཏཾ པརིབྷོགཏྠཱཡ པརིཧརནྟཱི’’ཏི ཙ ན ཝཏྟབྦཾ, ཏསྨཱ བཱཧིརཔརིབྷོགཏྠཾ གཧིཏཾ པཊིགྒཧིཏཾ ནཱམ ན ཧོཏཱིཏི ཝེདིཏབྦཾ.

ཡདི ཨེཝཾ པཉྩསུ པཊིགྒཧཎངྒེསུ ‘‘པརིབྷོགཏྠཱཡཱ’’ཏི ཝིསེསནཾ ཝཏྟབྦནྟི? ན ཝཏྟབྦཾ. པཊིགྒཧཎཉྷི པརིབྷོགཏྠམེཝ ཧོཏཱིཏི ‘‘པརིབྷོགཏྠཱཡཱ’’ཏི ཝིསུཾ ཨཝཏྭཱ ‘‘ཏཉྩེ བྷིཀྑུ ཀཱཡེན ཝཱ ཀཱཡཔཊིབདྡྷེན ཝཱ པཊིགྒཎྷཱཏཱི’’ཏི ཨེཏྟཀམེཝ ཝུཏྟཾ. ཨཔརེ པན ‘‘སཏིཔི ¶ པཊིགྒཧཎེ ‘ན ཧི ཏཾ པརིབྷོགཏྠཱཡ པརིཧརནྟཱི’ཏི ཨིདྷ ཨཔརིབྷོགཏྠཱཡ པརིཧརཎེ ཨནཱཔཏྟི ཝུཏྟཱ’’ཏི ཝདནྟི. ཏེན ཙ པཊིགྒཧཎངྒེསུ པཉྩསུ སམིདྡྷེསུ ཨཛ྄ཛྷོཧརིཏུཀཱམཏཱཡ གཧིཏམེཝ པཊིགྒཧིཏཾ ནཱམ ཧོཏི ཨཛ྄ཛྷོཧརིཏབྦེསུཡེཝ པཊིགྒཧཎསྶ ཨནུཉྙཱཏཏྟཱཏི དསྶེཏི. ཏཐཱ བཱཧིརཔརིབྷོགཏྠཱཡ གཧེཏྭཱ ཋཔིཏཏེལཱདིཾ ཨཛ྄ཛྷོཧརིཏུཀཱམཏཱཡ སཏི པཊིགྒཧེཏྭཱ པརིབྷུཉྫིཏུཾ ཝཊྚཏཱིཏི དསྶེཏི. ཨུདུཀྑལམུསལཱདཱིནི ཁཱིཡནྟཱིཏི ཨེཏྠ ཨུདུཀྑལམུསལཱནཾ ཁཡེན པིསིཏཀོཊྚིཏབྷེསཛྫེསུ སཙེ ཨཱགནྟུཀཝཎྞོ པཉྙཱཡཏི, ན ཝཊྚཏི. སུདྡྷཾ ཨུདཀཾ ཧོཏཱིཏི རུཀྑསཱཁཱདཱིཧི གལི༹ཏྭཱ པཏནཨུདཀཾ སནྡྷཱཡ ཝུཏྟཾ.

༡༠༩. པཏྟོ ཝཱསྶ པཊིགྒཧེཏབྦོཏི ཨེཏྠཱཔི པཏྟགཏཾ ཚུཔིཏྭཱ དེནྟསྶ ཧཏྠེ ལགྒེན ཨཱམིསེན དོསཱབྷཱཝཏྠཾ པཏྟཔཊིགྒཧཎནྟི ཨབྦྷནྟརཔརིབྷོགཏྠམེཝ པཏྟཔཊིགྒཧཎཾ ཝེདིཏབྦཾ. ཡཾ སཱམཎེརསྶ པཏྟེ པཏཏི…པེ… པཊིགྒཧཎཾ ན ཝིཛཧཏཱིཏི ཨེཏྠ པུནཔྤུནཾ གཎྷནྟསྶ ཨཏྟནོ པཏྟེ པཀྑིཏྟམེཝ ཨཏྟནོ སནྟཀནྟི སནྣིཊྛཱནཀརཎཏོ ཧཏྠགཏཾ པཊིགྒཧཎཾ ན ཝིཛཧཏི. པརིཙྪིནྡིཏྭཱ དིནྣཾ པན གཎྷནྟསྶ གཧཎསམཡེཡེཝ ཨཏྟནོ སནྟཀནྟི སནྣིཊྛཱནསྶ ཀཏཏྟཱ ¶ ཧཏྠགཏཾ པཊིགྒཧཎཾ ཝིཛཧཏི. ཀེསཉྩི ཨཏྠཱཡ བྷཏྟཾ པཀྑིཔཏཱིཏི ཨེཏྠ ཨནུཔསམྤནྣསྶ ཨཏྠཱཡ པཀྑིཔནྟེཔི ཨཱགནྟྭཱ གཎྷིསྶཏཱིཏི སཡམེཝ པཀྑིཔིཏྭཱ ཋཔནཏོ པཊིགྒཧཎཾ ན ཝིཛཧཏི. ཨནུཔསམྤནྣསྶ ཧཏྠེ པཀྑིཏྟཾ པན ཨནུཔསམྤནྣེནེཝ ཋཔིཏཾ ནཱམ ཧོཏཱིཏི པཊིགྒཧཎཾ ཝིཛཧཏི པརིཙྩཏྟབྷཱཝཏོ. ཏེན ཝུཏྟཾ ‘‘སཱམཎེར…པེ… པརིཙྩཏྟཏྟཱ’’ཏི. ཀེསཉྩཱིཏིཨཱདཱིསུ ཨནུཔསམྤནྣཱནཾ ཨཏྠཱཡ ཀཏྠཙི ཋཔིཡམཱནམྤི ཧཏྠཏོ མུཏྟམཏྟེ ཨེཝ པཊིགྒཧཎཾ ན ཝིཛཧཏི, ཨཐ ཁོ བྷཱཛནེ པཏིཏམེཝ པཊིགྒཧཎཾ ཝིཛཧཏི. བྷཱཛནཉྩ བྷིཀྑུནཱ པུནདིཝསཏྠཱཡ ཨཔེཀྑིཏམེཝཱཏི ཏགྒཏམྤི ཨཱམིསཾ དུདྡྷོཏཔཏྟགཏཾ ཝིཡ པཊིགྒཧཎཾ ཝིཛཧཏཱིཏི སངྐཱཡ ‘‘སཱམཎེརསྶ ཧཏྠེ པཀྑིཔིཏབྦ’’ནྟི ཝུཏྟནྟི ཝེདིཏབྦཾ. ཨཱིདིསེསུ ཧི ཡུཏྟི ན གཝེསིཏབྦཱ, ཝུཏྟནཡེནེཝ པཊིཔཛྫིཏབྦཾ.

༡༡༠. པཏྟགཏཱ ཡཱགཱུཏི ཨིམིནཱ པཏྟམུཁཝཊྚིཡཱ ཕུཊྛེཔི ཀུཊེ ཡཱགུ པཊིགྒཧིཏཱ, ཨུགྒཧིཏཱ ཝཱ ན ཧོཏི བྷིཀྑུནོ ཨནིཙྪཱཡ ཕུཊྛཏྟཱཏི དསྶེཏི. ཨཱརོཔེཏཱིཏི ཧཏྠཾ ཕུསཱཔེཏི. པཊིགྒཧཎཱུཔགཾ བྷཱརཾ ནཱམ ཐཱམམཛ྄ཛྷིམསྶ པུརིསསྶ ཨུཀྑེཔཱརཧཾ. ཀིཉྩཱཔི ཨཝིསྶཛྫེཏྭཱཝ ཨཉྙེན ཧཏྠེན པིདཧནྟསྶ དོསོ ནཏྠི, ཏཐཱཔི ན པིདཧིཏབྦནྟི ཨཊྛཀཐཱཔམཱཎེནེཝ གཧེཏབྦཾ. ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༢༦༥) པན ‘‘ན ¶ པིདཧིཏབྦནྟི ཧཏྠཏོ མུཏྟཾ སནྡྷཱཡ ཝུཏྟཾ, ཧཏྠགཏཾ པན ཨིཏརེན ཧཏྠེན པིདཧཏོ, ཧཏྠཏོ མུཏྟམྤི ཝཱ ཨཕུསིཏྭཱ ཨུཔརི པིདྷཱནཾ པཱཏེནྟསྶ ན དོསོ’’ཏི ཝུཏྟཾ.

༡༡༡. པཊིགྒཎྷཱཏཱིཏི ཚཱཡཏྠཱཡ ཨུཔརི དྷཱརིཡམཱནཱ མཧཱསཱཁཱ ཡེན ཀེནཙི ཚིཛྫེཡྻ, ཏཏྠ ལགྒརཛཾ མུཁེ པཱཏེཡྻ ཝཱཏི ཀཔྤིཡཾ ཀཱརཱཔེཏྭཱ པཊིགྒཎྷཱཏི.

མཙྪིཀཝཱརཎཏྠནྟི ¶ ཨེཏྠ ‘‘སཙེཔི སཱཁཱཡ ལགྒརཛཾ པཏྟེ པཏཏི, སུཁེན པརིབྷུཉྫིཏུཾ སཀྐཱཏི སཱཁཱཡ པཊིགྒཧིཏཏྟཱ ཨབྦྷནྟརཔརིབྷོགཏྠམེཝིདྷ པཊིགྒཧཎནྟི མཱུལཔཊིགྒཧཎམེཝ ཝཊྚཏཱི’’ཏི ཝུཏྟཾ. ཨཔརེ པན ‘‘མཙྪིཀཝཱརཎཏྠནྟི ཝཙནམཏྟཾ གཧེཏྭཱ བཱཧིརཔརིབྷོགཏྠཾ གཧིཏ’’ནྟི ཝདནྟི. ཀུཎྜཀེཏི མཧཱགྷཊེ. ཏསྨིམྤཱིཏི ཙཱཊིགྷཊེཔི. ཨནུཔསམྤནྣཾ གཱཧཱཔེཏྭཱཏི ཏམེཝ ཨཛ྄ཛྷོཧརཎཱིཡཾ བྷཎྜཾ ཨནུཔསམྤནྣེན གཱཧཱཔེཏྭཱ.

ཐེརསྶ པཏྟཾ དུཏིཡཏྠེརསྶཱཏི ‘‘ཐེརསྶ པཏྟཾ མཡ྄ཧཾ དེཐཱ’’ཏི ཏེན ཨཏྟནོ པརིཙྩཛཱཔེཏྭཱ དུཏིཡཏྠེརསྶ དེཏི. ཏུཡ྄ཧཾ ཡཱགུཾ མཡ྄ཧཾ དེཧཱིཏི ཨེཏྠ ཨེཝཾ ཝཏྭཱ སཱམཎེརསྶ པཏྟཾ གཧེཏྭཱ ཨཏྟནོཔི པཏྟཾ ཏསྶ དེཏི. ཨེཏྠ པནཱཏི ‘‘པཎྜིཏོ སཱམཎེརོ’’ཏིཨཱདིཔཏྟཔརིཝཏྟནཀཐཱཡཾ. ཀཱརཎཾ ཨུཔཔརིཀྑིཏབྦནྟི ཡཐཱ མཱཏུཨཱདཱིནཾ ཏེལཱདཱིནི ཧརནྟོ ཏཐཱརཱུཔེ ཀིཙྩེ ཨནུཔསམྤནྣེན ཨཔརིཝཏྟེཏྭཱཝ པརིབྷུཉྫིཏུཾ ལབྷཏི, ཨེཝམིདྷ པཏྟཔརིཝཏྟནཾ ཨཀཏྭཱ པརིབྷུཉྫིཏུཾ ཀསྨཱ ན ལབྷཏཱིཏི ཀཱརཎཾ ཝཱིམཾསིཏབྦནྟི ཨཏྠོ. ཨེཏྠ པན ‘‘སཱམཎེརེཧི གཧིཏཏཎྜུལེསུ པརིཀྑཱིཎེསུ ཨཝསྶཾ ཨམྷཱཀཾ སཱམཎེརཱ སངྒཧཾ ཀརོནྟཱིཏི ཙིཏྟུཔྤཏྟི སམྦྷཝཏི, ཏསྨཱ ཏཾ པརིཝཏྟེཏྭཱཝ པརིབྷུཉྫིཏབྦཾ. མཱཏཱཔིཏཱུནཾ ཨཏྠཱཡ པན ཚཱཡཏྠཱཡ ཝཱ གཧཎེ པརིབྷོགཱསཱ ནཏྠི, ཏསྨཱ ཏཾ ཝཊྚཏཱི’’ཏི ཀཱརཎཾ ཝདནྟི. ཏེནེཝ ཨཱཙརིཡབུདྡྷདཏྟཏྠེརེནཔི ཝུཏྟཾ –

‘‘མཱཏཱཔིཏཱུནམཏྠཱཡ, ཏེལཱདིཾ ཧརཏོཔི ཙ;

སཱཁཾ ཚཱཡཱདིཨཏྠཱཡ, ཨིམསྶ ན ཝིསེསཏཱ.

‘‘ཏསྨཱ ཧིསྶ ཝིསེསསྶ, ཙིནྟེཏབྦཾ ཏུ ཀཱརཎཾ;

ཏསྶ སཱལཡབྷཱཝཾ ཏུ, ཝིསེསཾ ཏཀྐཡཱམཧ’’ནྟི.

ཨིདམེཝེཏྠ ¶ ¶ ཡུཏྟཏརཾ ཨཝསྶཾ ཏཐཱཝིདྷཝིཏཀྐུཔྤཏྟིཡཱ སམྦྷཝཏོ. ན ཧི སཀྐཱ ཨེཏྠ ཝིཏཀྐཾ སོདྷེཏུནྟི. མཱཏཱདཱིནཾ ཨཏྠཱཡ ཧརཎེ པན ནཱཝསྶཾ ཏཐཱཝིདྷཝིཏཀྐུཔྤཏྟཱིཏི སཀྐཱ ཝིཏཀྐཾ སོདྷེཏུཾ. ཡཏྠ ཧི ཝིཏཀྐཾ སོདྷེཏུཾ སཀྐཱ, ཏཏྠ ནེཝཏྠི དོསོ. ཏེནེཝ ཝཀྑཏི ‘‘སཙེ པན སཀྐོཏི ཝིཏཀྐཾ སོདྷེཏུཾ, ཏཏོ ལདྡྷཾ ཁཱདིཏུམྤི ཝཊྚཏཱི’’ཏི. ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༢༦༥) པན ‘‘ཨེཏྠ པནཱཏི པཏྟཔརིཝཏྟནེ. ཀཱརཎནྟི ཨེཏྠ ཡཐཱ སཱམཎེརཱ ཨིཏོ ཨམྷཱཀམྤི དེནྟཱིཏི ཝིཏཀྐོ ཨུཔྤཛྫཏི, ན ཏཐཱ ཨཉྙཏྠཱཏི ཀཱརཎཾ ཝདནྟི, ཏཉྩ ཡུཏྟཾ. ཡསྶ པན ཏཱདིསོ ཝིཏཀྐོ ནཏྠི, ཏེན ཨཔརིཝཏྟེཏྭཱཔི བྷུཉྫིཏུཾ ཝཊྚཏཱི’’ཏི ཝུཏྟཾ.

༡༡༢. ནིཙྩཱལེཏུནྟི ཙཱལེཏྭཱ པཱསཱཎསཀྑརཱདིཨཔནཡནཾ ཀཱཏུཾ. ཨུདྡྷནཾ ཨཱརོཔེཏབྦནྟི ཨནགྒིཀཾ ཨུདྡྷནཾ སནྡྷཱཡ ཝུཏྟཾ. ཨུདྡྷནེ པཙྩམཱནསྶ ཨཱལུལ༹ནེ ཨུཔརི ཨཔཀྐཏཎྜུལཱ ཧེཊྛཱ པཝིསིཏྭཱ པཙྩནྟཱིཏི ཨཱཧ ‘‘སཱམཾཔཱཀཉྩེཝ ཧོཏཱི’’ཏི.

༡༡༣. ཨཱདྷཱརཀེ པཏྟོ ཋཔིཏོཏི ཨཔྤཊིགྒཧིཏཱམིསོ པཏྟོ པུན པཊིགྒཧཎཏྠཱཡ ཋཔིཏོ. ཙཱལེཏཱིཏི ཝིནཱ ཀཱརཎཾ ཙཱལེཏི, སཏིཔི ཀཱརཎེ བྷིཀྑཱུནཾ པརིབྷོགཱརཧཾ ཙཱལེཏུཾ ན ཝཊྚཏི. ཀིཉྩཱཔི ‘‘ཨནུཛཱནཱམི, བྷིཀྑཝེ, ཨམནུསྶིཀཱབཱདྷེ ཨཱམཀམཾསཾ ཨཱམཀལོཧིཏ’’ནྟི (མཧཱཝ. ༢༦༤) ཏཱདིསེ ཨཱབཱདྷེ ཨཏྟནོ ཨཏྠཱཡ ཨཱམཀམཾསཔཊིགྒཧཎཾ ཨནུཉྙཱཏཾ, ‘‘ཨཱམཀམཾསཔཊིགྒཧཎཱ པཊིཝིརཏོ ཧོཏཱི’’ཏི (དཱི. ནི. ༡.༡༠, ༡༩༤) ཙ སཱམཉྙཏོ པཊིཀྑིཏྟཾ, ཏཐཱཔི ཨཏྟནོ, ཨཉྙསྶ ཝཱ བྷིཀྑུནོ ཨཏྠཱཡ ཨགྒཧིཏཏྟཱ ‘‘སཱིཧཝིགྷཱསཱདིཾ…པེ… ཝཊྚཏཱི’’ཏི ཝུཏྟཾ. སཀྐོཏི ཝིཏཀྐཾ སོདྷེཏུནྟི ‘‘མཡ྄ཧམྤི དེཏཱི’’ཏི ཝིཏཀྐསྶ ཨནུཔྤནྣབྷཱཝཾ སལླཀྑེཏུཾ སཀྐོཏི ¶ , ‘‘སཱམཎེརསྶ དསྶཱམཱི’’ཏི སུདྡྷཙིཏྟེན མཡཱ གཧིཏནྟི ཝཱ སལླཀྑེཏུཾ སཀྐོཏི. སཙེ པན མཱུལེཔི པཊིགྒཧིཏཾ ཧོཏཱིཏི ཨེཏྠ ‘‘གཧེཏྭཱ གཏེ མཡ྄ཧམྤི དདེཡྻུནྟི སཉྙཱཡ སཙེ པཊིགྒཧིཏཾ ཧོཏཱི’’ཏི ཝདནྟི.

༡༡༤. ཀོཊྛཱསེ ཀརོཏཱིཏི ‘‘བྷིཀྑཱུ སཱམཎེརཱ ཙ ཨཏྟནོ ཨཏྟནོ ཨབྷིརུཙིཏཾ ཀོཊྛཱསཾ གཎྷནྟཱུ’’ཏི སབྦེསཾ སམཀེ ཀོཊྛཱསེ ཀརོཏི. གཧིཏཱཝསེསནྟི སཱམཎེརེཧི གཧིཏཀོཊྛཱསཏོ ཨཝསེསཾ. གཎྷིཏྭཱཏི ‘‘མཡ྄ཧཾ ཨིདཾ གཎྷིསྶཱམཱི’’ཏི གཧེཏྭཱ. ཨིདྷ གཧིཏཱཝསེསཾ ནཱམ ཏེན གཎྷིཏྭཱ པུན ཋཔིཏཾ.

པཊིགྒཧེཏྭཱཏི ¶ ཏདཧུ པཊིགྒཧེཏྭཱ. ཏེནེཝ ‘‘ཡཱཝཀཱལིཀེན ཡཱཝཛཱིཝིཀསཾསགྒེ དོསོ ནཏྠཱི’’ཏི ཝུཏྟཾ. སཙེ པན པུརིམདིཝསེ པཊིགྒཧེཏྭཱ ཋཔིཏཱ ཧོཏི, སཱམིསེན མུཁེན ཏསྶཱ ཝཊྚིཡཱ དྷཱུམཾ པིཝིཏུཾ ན ཝཊྚཏི. སམུདྡོདཀེནཱཏི ཨཔྤཊིགྒཧིཏསམུདྡོདཀེན.

ཧིམཀརཀཱ ནཱམ ཀདཱཙི ཝསྶོདཀེན སཧ པཏནཀཱ པཱསཱཎལེཁཱ ཝིཡ གྷནཱིབྷཱུཏཱ ཨུདཀཝིསེསཱ, ཏེསུ པཊིགྒཧཎཀིཙྩཾ ནཏྠི. ཏེནཱཧ ‘‘ཨུདཀགཏིཀཱ ཨེཝཱ’’ཏི. ཡསྨཱ ཀཏཀཊྛི ཨུདཀཾ པསཱདེཏྭཱ ཝིསུཾ ཏིཊྛཏི, ཏསྨཱ ‘‘ཨབྦོཧཱརིཀ’’ནྟི ཝུཏྟཾ. ཨིམིནཱ ཨཔྤཊིགྒཧིཏཱཔཏྟཱིཧི ཨབྦོཧཱརིཀཾ, ཝིཀཱལབྷོཛནཱཔཏྟཱིཧིཔི ཨབྦོཧཱརིཀནྟི དསྶེཏི. ལགྒཏཱིཏི སུཀྑེ མུཁེ ཙ ཧཏྠེ ཙ མཏྟིཀཱཝཎྞཾ དསྶེནྟཾ ལགྒཏི. བཧལནྟི ཧཏྠམུཁེསུ ཨལགྒནཀམྤི པཊིགྒཧེཏབྦཾ.

ཝཱསམཏྟནྟི རེཎུཁཱིརཱབྷཱཝཾ དསྶེཏི. པཱནཱིཡཾ གཧེཏྭཱཏི ཨཏྟནོཡེཝ ཨཏྠཱཡ གཧེཏྭཱ. སཙེ པན པཱིཏཱཝསེསཀཾ ཏཏྠེཝ ཨཱཀིརིསྶཱམཱིཏི གཎྷཱཏི, པུན པཊིགྒཧཎཀིཙྩཾ ¶ ནཏྠི. ཨཱཀིརཏི, པཊིགྒཧེཏབྦནྟི པུཔྥརསསྶ པཉྙཱཡནཏོ ཝུཏྟཾ. ཝིཀྑམྦྷེཏྭཱཏི ཝིཡཱུཧིཏྭཱ, ཨཔནེཏྭཱཏི ཨཏྠོ.

༡༡༥. མཧཱབྷཱུཏེསཱུཏི པཱཎསརཱིརསནྣིསྶིཏེསུ པཐཝཱིཨཱདིམཧཱབྷཱུཏེསུ. སབྦཾ ཝཊྚཏཱིཏི ཨཏྟནོ པརེསཉྩ སརཱིརསནྣིསྶིཏཾ སབྦཾ ཝཊྚཏི, ཨཀཔྤིཡམཾསཱནུལོམཏཱཡ ཐུལླཙྩཡཱདིཾ ན ཛནེཏཱིཏི ཨདྷིཔྤཱཡོ. པཏཏཱིཏི ཨཏྟནོ སརཱིརཏོ ཚིཛྫིཏྭཱ པཏཏི. ‘‘རུཀྑཏོ ཚིནྡིཏྭཱ’’ཏི ཝུཏྟཏྟཱ མཏྟིཀཏྠཱཡ པཐཝིཾ ཁཎིཏུཾ, ཨཉྙམྤི ཡཾ ཀིཉྩི མཱུལཔཎྞཱདིཝིསབྷེསཛྫཾ ཚིནྡིཏྭཱ ཚཱརིཀཾ ཨཀཏྭཱཔི ཨཔྤཊིགྒཧིཏམྤི པརིབྷུཉྫིཏུཾ ཝཊྚཏཱིཏི དཊྛབྦཾ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

པཊིགྒཧཎཝིནིཙྪཡཀཐཱལངྐཱརོ ནཱམ

ཝཱིསཏིམོ པརིཙྪེདོ.

༢༡. པཝཱརཎཱཝིནིཙྪཡཀཐཱ

༡༡༦. ཨེཝཾ ¶ པཊིགྒཧཎཝིནིཙྪཡཾ ཀཐེཏྭཱ ཨིདཱནི པཝཱརཎཱཝིནིཙྪཡཾ ཀཐེཏུཾ ‘‘པཊིཀྑེཔཔཝཱརཎཱ’’ཏིཨཱདིམཱཧ. ཏཏྠ པཊིཀྑིཔནཾ པཊིཀྑེཔོ, ཨསམྤཊིཙྪནནྟི ཨཏྠོ. པཝཱརིཡཏེ པཝཱརཎཱ, པཊིསེདྷནནྟྱཏྠོ. པཊིཀྑེཔསངྑཱཏཱ པཝཱརཎཱ པཊིཀྑེཔཔཝཱརཎཱ. ཨཐ ཝཱ པཊིཀྑེཔཝསེན པཝཱརཎཱ པཊིཀྑེཔཔཝཱརཎཱ. པཉྩནྣཾ བྷོཛནཱནཾ ཨཉྙཏརཾ བྷུཉྫནྟསྶ ཨཉྙསྨིཾ བྷོཛནེ ཨབྷིཧཊེ པཊིཀྑེཔསངྑཱཏཱ པཝཱརཎཱཏི སམྦནྡྷོ.

༡༡༧. ཡཾ ཨསྣཱཏཱིཏི ཡཾ བྷུཉྫཏི. ཨམྦིལཔཱཡཱསཱདཱིསཱུཏི ཨཱདི-སདྡེན ཁཱིརཔཱཡཱསཱདིཾ སངྒཎྷཱཏི. ཏཏྠ ཨམྦིལཔཱཡཱསགྒཧཎེན ¶ ཏཀྐཱདིཨམྦིལསཾཡུཏྟཱ གྷནཡཱགུ ཝུཏྟཱ. ཁཱིརཔཱཡཱསགྒཧཎེན ཁཱིརསཾཡུཏྟཱ ཡཱགུ སངྒཡ྄ཧཏི. པཝཱརཎཾ ཛནེཏཱིཏི ཨནཏིརིཏྟབྷོཛནཱཔཏྟིནིབནྡྷནཾ པཊིཀྑེཔཾ སཱདྷེཏི. ཀཏོཔི པཊིཀྑེཔོ ཨནཏིརིཏྟབྷོཛནཱཔཏྟིནིབནྡྷནོ ན ཧོཏི, ཨཀཏཊྛཱནེཡེཝ ཏིཊྛཏཱིཏི ཨཱཧ ‘‘པཝཱརཎཾ ན ཛནེཏཱི’’ཏི.

‘‘ཡཱགུ-སདྡསྶ པཝཱརཎཛནཀཡཱགུཡཱཔི སཱདྷཱརཎཏྟཱ ‘ཡཱགུཾ གཎྷཐཱ’ཏི ཝུཏྟེཔི པཝཱརཎཱ ཧོཏཱིཏི པཝཱརཎཾ ཛནེཏིཡེཝཱཏི ཝུཏྟ’’ནྟི ཏཱིསུཔི གཎྛིཔདེསུ ཝུཏྟཾ. ཏཾ པརཏོ ཏཏྠེཝ ‘‘བྷཏྟམིསྶཀཾ ཡཱགུཾ ཨཱཧརིཏྭཱ’’ཏི ཨེཏྠ ཝུཏྟཀཱརཎེན ན སམེཏི. ཝུཏྟཉྷི ཏཏྠ – ཧེཊྛཱ ཨཡཱགུཀེ ནིམནྟནེ ཨུདཀཀཉྫིཀཁཱིརཱདཱིཧི སདྡྷིཾ མདྡིཏཾ བྷཏྟམེཝ སནྡྷཱཡ ‘‘ཡཱགུཾ གཎྷཐཱ’’ཏི ཝུཏྟཏྟཱ པཝཱརཎཱ ཧོཏི. ‘‘བྷཏྟམིསྶཀཾ ཡཱགུཾ ཨཱཧརིཏྭཱ’’ཏི ཨེཏྠ པན ཝིསུཾ ཡཱགུཡཱ ཝིཛྫམཱནཏྟཱ པཝཱརཎཱ ན ཧོཏཱིཏི. ཏསྨཱ ཏཏྠ ཝུཏྟནཡེནེཝ ཁཱིརཱདཱིཧི སདྡྷིཾ མདྡིཏཾ བྷཏྟམེཝ སནྡྷཱཡ ‘‘ཡཱགུཾ གཎྷཐཱ’’ཏི ཝུཏྟཏྟཱ ཡཱགུཡཱཝ ཏཏྠ ཨབྷཱཝཏོ པཝཱརཎཱ ཧོཏཱིཏི ཨེཝམེཏྠ ཀཱརཎཾ ཝཏྟབྦཾ. ཨེཝཉྷི སཏི པརཏོ ‘‘ཡེནཱཔུཙྪིཏོ, ཏསྶ ཨཏྠིཏཱཡཱ’’ཏི ཨཊྛཀཐཱཡ ཝུཏྟཀཱརཎེནཔི སཾསནྡཏི, ཨཉྙཐཱ གཎྛིཔདེསུཡེཝ པུབྦཱཔརཝིརོདྷོ ཨཱཔཛྫཏི, ཨཊྛཀཐཱཡ ཙ ན སམེཏཱིཏི. སཙེ…པེ… པཉྙཱཡཏཱིཏི ཨིམིནཱ ཝུཏྟཔྤམཱཎསྶ མཙྪམཾསཁཎྜསྶ ནཧཱརུནོ ཝཱ སབྦྷཱཝམཏྟཾ དསྶེཏི. ཏཱཧཱིཏི པུཐུཀཱཧི.

སཱལིཝཱིཧིཡཝེཧི ཀཏསཏྟཱུཏི ཡེབྷུཡྻནཡེན ཝུཏྟཾ, སཏྟ དྷཉྙཱནི པན བྷཛྫིཏྭཱ ཀཏོཔི སཏྟུཡེཝ. ཏེནེཝཱཧ ‘‘ཀངྒུཝརཀ…པེ… སཏྟུསངྒཧམེཝ གཙྪཏཱི’’ཏི. སཏྟུམོདཀོཏི སཏྟུཡོ པིཎྜེཏྭཱ ¶ ཀཏོ ཨཔཀྐོ སཏྟུགུལོ༹ ¶ . ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༢༣༨-༢༣༩) པན ‘‘སཏྟུམོདཀོཏི སཏྟུཾ ཏེམེཏྭཱ ཀཏོ ཨཔཀྐོ, སཏྟུཾ པན པིསིཏྭཱ པིཊྛཾ ཀཏྭཱ ཏེམེཏྭཱ པཱུཝཾ ཀཏྭཱ པཙནྟི, ཏཾ ན པཝཱརེཏཱི’’ཏི ཝུཏྟཾ.

པཉྩནྣཾ བྷོཛནཱནཾ ཨཉྙཏརཝསེན ཝིཔྤཀཏབྷོཛནབྷཱཝསྶ ཨུཔཙྪིནྣཏྟཱ ‘‘མུཁེ སཱསཔམཏྟམྤི…པེ… ན པཝཱརེཏཱི’’ཏི ཝུཏྟཾ. ‘‘ཨཀཔྤིཡམཾསཾ པཊིཀྑིཔཏི, ན པཝཱརེཏཱི’’ཏི ཝཙནཏོ སཙེ སངྒྷིཀཾ ལཱབྷཾ ཨཏྟནོ ཨཔཱཔུཎནྟཾ ཛཱནིཏྭཱ ཝཱ ཨཛཱནིཏྭཱ ཝཱ པཊིཀྑིཔཏི, ན པཝཱརེཏི པཊིཀྑིཔིཏབྦསྶེཝ པཊིཀྑིཏྟཏྟཱ, ཨལཛྫིསནྟཀཾ པཊིཀྑིཔནྟོཔི ན པཝཱརེཏི. ཨཝཏྠུཏཱཡཱཏི ཨནཏིརིཏྟཱཔཏྟིསཱདྷིཀཱཡ པཝཱརཎཱཡ ཨཝཏྠུབྷཱཝཏོ. ཨེཏེན པཊིཀྑིཔིཏབྦསྶེཝ པཊིཀྑིཏྟབྷཱཝཾ དཱིཔེཏི. ཡཉྷི པཊིཀྑིཔིཏབྦཾ ཧོཏི, ཏསྶ པཊིཀྑེཔོ ཨཱཔཏྟིཡཱ ཨངྒཾ ན ཧོཏཱིཏི ཏཾ པཝཱརཎཱཡ ཨཝཏྠཱུཏི ཝུཙྩཏི.

༡༡༨. ཨཱསནྣཏརཾ ཨངྒནྟི ཧཏྠཔཱསཏོ བཧི ཋཏྭཱ ཨོནམིཏྭཱ དེནྟསྶ སཱིསཾ ཨཱསནྣཏརཾ ཧོཏི, ཏསྶ ཨོརིམནྟེན པརིཙྪིནྡིཏབྦཾ.

ཨུཔནཱམེཏཱིཏི ཨིམིནཱ ཀཱཡཱབྷིཧཱརཾ དསྶེཏི. ཨཔནཱམེཏྭཱཏི ཨབྷིམུཁཾ ཧརིཏྭཱ. ཨིདཾ བྷཏྟཾ གཎྷཱཏི ཝདཏཱིཏི ཀིཉྩི ཨཔནཱམེཏྭཱ ཝདཏི. ཀེཝལཾ ཝཱཙཱབྷིཧཱརསྶ ཨནདྷིཔྤེཏཏྟཱ གཎྷཐཱཏི གཧེཏུཾ ཨཱརདྡྷཾ. ཧཏྠཔཱསཏོ བཧི ཋིཏསྶ སཏིཔི དཱཏུཀཱམཏཱབྷིཧཱརེ པཊིཀྑིཔནྟསྶ དཱུརབྷཱཝེནེཝ པཝཱརཎཱཡ ཨབྷཱཝཏོ ཐེརསྶཔི དཱུརབྷཱཝམཏྟཾ གཧེཏྭཱ པཝཱརཎཱཡ ཨབྷཱཝཾ དསྶེནྟོ ‘‘ཐེརསྶ དཱུརབྷཱཝཏོ’’ཏིཨཱདིམཱཧ, ན པན ཐེརསྶ ཨབྷིཧཱརསམྦྷཝཏོ. སཙེཔི གཧེཏྭཱ གཏོ ཧཏྠཔཱསེ ཋིཏོ ¶ ཧོཏི, ཀིཉྩི པན ཨཝཏྭཱ ཨཱདྷཱརཊྛཱནེ ཋིཏཏྟཱ ཨབྷིཧཱརོ ནཱམ ན ཧོཏཱིཏི ‘‘དཱུཏསྶ ཙ ཨནབྷིཧརཎཏོ’’ཏི ཝུཏྟཾ. ‘‘གཧེཏྭཱ ཨཱགཏེན ‘བྷཏྟཾ གཎྷཐཱ’ཏི ཝུཏྟེ ཨབྷིཧཱརོ ནཱམ ཧོཏཱིཏི ‘སཙེ པན གཧེཏྭཱ ཨཱགཏོ བྷིཀྑུ…པེ… པཝཱརཎཱ ཧོཏཱི’ཏི ཝུཏྟ’’ནྟི ཏཱིསུཔི གཎྛིཔདེསུ ཝུཏྟཾ. ཀེཙི པན ‘‘པཏྟཾ ཀིཉྩིཔི ཨུཔནཱམེཏྭཱ ‘ཨིམཾ བྷཏྟཾ གཎྷཐཱ’ཏི ཝུཏྟནྟི གཧེཏབྦ’’ནྟི ཝདནྟི, ཏཾ ཡུཏྟཾ ཝིཡ དིསྶཏི ཝཱཙཱབྷིཧཱརསྶ ཨིདྷ ཨནདྷིཔྤེཏཏྟཱ.

པརིཝེསནཱཡཱཏི བྷཏྟགྒེ. ཨབྷིཧཊཱཝ ཧོཏཱིཏི པརིཝེསཀེནེཝ ཨབྷིཧཊཱ ཧོཏི. ཏཏོ ¶ དཱཏུཀཱམཏཱཡ གཎྷནྟཾ པཊིཀྑིཔནྟསྶ པཝཱརཎཱ ཧོཏཱིཏི ཨེཏྠ ཨགྒཎྷནྟམྤི པཊིཀྑིཔཏོ པཝཱརཎཱ ཧོཏིཡེཝ. ཀསྨཱ? དཱཏུཀཱམཏཱཡ ཨབྷིཧཊཏྟཱ, ‘‘ཏསྨཱ སཱ ཨབྷིཧཊཱཝ ཧོཏཱི’’ཏི ཧི ཝུཏྟཾ. ཏེནེཝ ཏཱིསུཔི གཎྛིཔདེསུ ‘‘དཱཏུཀཱམཱབྷིཧཱརེ སཏི ཀེཝལཾ ‘དསྶཱམཱི’ཏི གཧཎམེཝ ཨབྷིཧཱརོ ན ཧོཏི, ‘དསྶཱམཱི’ཏི གཎྷནྟེཔི ཨགཎྷནྟེཔི དཱཏུཀཱམཏཱབྷིཧཱརོཝ ཨབྷིཧཱརོ ཧོཏི, ཏསྨཱ གཧཎསམཡེ ཝཱ ཨགྒཧཎསམཡེ ཝཱ ཏཾ པཊིཀྑིཔཏོ པཝཱརཎཱ ཧོཏཱི’’ཏི ཝུཏྟཾ. ཨིདཱནི ཏསྶ ཨསཏི དཱཏུཀཱམཏཱབྷིཧཱརེ གཧཎསམཡེཔི པཊིཀྑིཔཏོ པཝཱརཎཱ ན ཧོཏཱིཏི དསྶེཏུཾ ‘‘སཙེ པནཱ’’ཏིཨཱདི ཝུཏྟཾ. ཀཊཙྪུནཱ ཨནུཀྑིཏྟམྤི པུབྦེ ཨེཝ ཨབྷིཧཊཏྟཱ པཝཱརཎཱ ཧོཏཱིཏི ‘‘ཨབྷིཧཊཱཝ ཧོཏཱི’’ཏི ཝུཏྟཾ. ཨུདྡྷཊམཏྟེཏི བྷཱཛནཏོ ཝིཡོཛིཏམཏྟེ. དྭིནྣཾ སམབྷཱརེཔཱིཏི པརིཝེསཀསྶ ཙ ཨཉྙསྶ ཙ བྷཏྟཔཙྪིབྷཱརགྒཧཎེ སམྦྷཱུཏེཔཱིཏི ཨཏྠོ.

༡༡༩. རསཾ གཎྷཐཱཏི ཨེཏྠ ཀེཝལཾ མཾསརསསྶ ཨཔཝཱརཎཱཛནཀསྶ ནཱམེན ཝུཏྟཏྟཱ པཊིཀྑིཔཏོ པཝཱརཎཱ ན ¶ ཧོཏི. མཙྪརསནྟིཨཱདཱིསུ མཙྪོ ཙ རསཉྩཱཏི ཨཏྠསམྦྷཝཏོ, ཝཏྠུནོཔི ཏཱདིསཏྟཱ པཝཱརཎཱ ཧོཏི. ‘‘ཨིདཾ གཎྷཐཱ’’ཏིཔི ཨཝཏྭཱ ཏུཎྷཱིབྷཱུཏེན ཨབྷིཧཊཾ པཊིཀྑིཔཏོཔི ཧོཏི ཨེཝ.

ཀརམྦཀོཏི མིསྶཀཱདྷིཝཙནམེཏཾ. ཡཉྷི བཧཱུཧི མིསྶེཏྭཱ ཀརོནྟི, སོ ‘‘ཀརམྦཀོ’’ཏི ཝུཙྩཏི, སོ སཙེཔི མཾསེན མིསྶེཏྭཱ ཀཏོ ཧོཏི, ‘‘ཀརམྦཀཾ གཎྷཐཱ’’ཏི ཨཔཝཱརཎཱརཧསྶ ནཱམེན ཝུཏྟཏྟཱ པཊིཀྑིཔཏོ པཝཱརཎཱ ན ཧོཏི. ‘‘མཾསཀརམྦཀཾ གཎྷཐཱ’’ཏི ཝུཏྟེ པན ‘‘མཾསམིསྶཀཾ གཎྷཐཱ’’ཏི ཝུཏྟཾ ཧོཏི, ཏསྨཱ པཝཱརཎཱཝ ཧོཏི.

༡༢༠. ‘‘ཨུདྡིསྶཀཏ’’ནྟི མཉྙམཱནོཏི ཨེཏྠ ‘‘ཝཏྠུནོ ཀཔྤིཡཏྟཱ ཨཀཔྤིཡསཉྙཱཡ པཊིཀྑེཔཏོཔི ཨཙིཏྟཀཏྟཱ ཨིམསྶ སིཀྑཱཔདསྶ པཝཱརཎཱ ཧོཏཱི’’ཏི ཝདནྟི. ‘‘ཧེཊྛཱ ཨཡཱགུཀེ ནིམནྟནེ ཨུདཀཀཉྫིཀཁཱིརཱདཱིཧི སདྡྷིཾ མདྡིཏཾ བྷཏྟམེཝ སནྡྷཱཡ ‘ཡཱགུཾ གཎྷཐཱ’ཏི ཝུཏྟཏྟཱ པཝཱརཎཱ ཧོཏི, ‘བྷཏྟམིསྶཀཾ ཡཱགུཾ ཨཱཧརིཏྭཱ’ཏི ཨེཏྠ པན ཝིསུཾ ཡཱགུཡཱ ཝིཛྫམཱནཏྟཱ པཝཱརཎཱ ན ཧོཏཱི’’ཏི ཝདནྟི. ཨཡམེཏྠ ཨདྷིཔྤཱཡོཏི ‘‘ཡེནཱཔུཙྪིཏོ’’ཏིཨཱདིནཱ ཝུཏྟམེཝཏྠཾ སནྡྷཱཡ ཝདཏི. ཀཱརཎཾ པནེཏྠ དུདྡསནྟི ཨེཏྠ ཨེཀེ ཏཱཝ ཝདནྟི ‘‘ཡསྨཱ ཡཱགུམིསྶཀཾ ནཱམ བྷཏྟམེཝ ན ཧོཏི, ཁཱིརཱདིཀམྤི ཧོཏིཡེཝ, ཏསྨཱ ཀརམྦཀེ ཝིཡ པཝཱརཎཱཡ ན བྷཝིཏབྦཾ, ཨེཝཉྩ སཏི ‘ཡཱགུ བཧུཏརཱ ཝཱ ཧོཏི སམསམཱ ཝཱ ¶ , ན པཝཱརེཏི, ཡཱགུ མནྡཱ, བྷཏྟཾ བཧུཏརཾ, པཝཱརེཏཱི’ཏི ཨེཏྠ ཀཱརཎཾ དུདྡས’’ནྟི. ཀེཙི པན ཝདནྟི ‘‘ཡཱགུམིསྶཀཾ ནཱམ བྷཏྟཾ, ཏསྨཱ ཏཾ པཊིཀྑིཔཏོ པཝཱརཎཱཡ ཨེཝ བྷཝིཏབྦཾ, ཨེཝཉྩ སཏི ‘ཨིདྷ པཝཱརཎཱ ཧོཏི, ན ཧོཏཱི’ཏི ཨེཏྠ ཀཱརཎཾ དུདྡས’’ནྟི.

ཡཐཱ ¶ ཙེཏྠ ཀཱརཎཾ དུདྡསཾ, ཨེཝཾ པརཏོ ‘‘མིསྶཀཾ གཎྷཐཱ’’ཏི ཨེཏྠཱཔི ཀཱརཎཾ དུདྡསམེཝཱཏི ཝེདིཏབྦཾ. ན ཧི པཝཱརཎཔྤཧོནཀསྶ ཨཔྤབཧུབྷཱཝོ པཝཱརཎཱཡ བྷཱཝཱབྷཱཝནིམིཏྟཾ, ཀིཉྩརཧི པཝཱརཎཱཛནཀསྶ ནཱམ གཧཎམེཝེཏྠ པམཱཎཾ, ཏསྨཱ ‘‘ཨིདཉྩ ཀརམྦཀེན ན སམཱནེཏབྦ’’ནྟིཨཱདིནཱ ཡམྤི ཀཱརཎཾ ཝུཏྟཾ, ཏམྤི པུབྦེ ཝུཏྟེན སཾསནྡིཡམཱནཾ ན སམེཏི. ཡདི ཧི མིསྶཀནྟི བྷཏྟམིསྶཀེཡེཝ རུལ༹ྷཾ སིཡཱ, ཨེཝཾ སཏི ཡཐཱ ‘‘བྷཏྟམིསྶཀཾ གཎྷཐཱ’’ཏི ཝུཏྟེ བྷཏྟཾ བཧུཏརཾ ཝཱ སམཾ ཝཱ ཨཔྤཏརཾ ཝཱ ཧོཏི, པཝཱརེཏིཡེཝ, ཨེཝཾ ‘‘མིསྶཀཾ གཎྷཐཱ’’ཏི ཝུཏྟེཔི ཨཔྤཏརེཔི བྷཏྟེ པཝཱརཎཱཡ བྷཝིཏབྦཾ ‘‘མིསྶཀ’’ནྟི བྷཏྟམིསྶཀེཡེཝ རུལ༹ྷཏྟཱ. ཏཐཱ ཧི ‘‘མིསྶཀནྟི བྷཏྟམིསྶཀེཡེཝ རུལ༹ྷཝོཧཱརཏྟཱ ཨིདཾ པན བྷཏྟམིསྶཀམེཝཱཏི ཝུཏྟ’’ནྟི ཏཱིསུཔི གཎྛིཔདེསུ ཝུཏྟཾ. ཨཐ མིསྶཀནྟི བྷཏྟམིསྶཀེ རུལ༹ྷཾ ན ཧོཏི, མིསྶཀབྷཏྟཾ པན སནྡྷཱཡ ‘‘མིསྶཀཾ གཎྷཐཱ’’ཏི ཝུཏྟནྟི. ཨེཝམྤི ཡཐཱ ཨཡཱགུཀེ ནིམནྟནེ ཁཱིརཱདཱིཧི སམྨདྡིཏཾ བྷཏྟམེཝ སནྡྷཱཡ ‘‘ཡཱགུཾ གཎྷཐཱ’’ཏི ཝུཏྟེ པཝཱརཎཱ ཧོཏི, ཨེཝམིདྷཱཔི མིསྶཀབྷཏྟམེཝ སནྡྷཱཡ ‘‘མིསྶཀཾ གཎྷཐཱ’’ཏི ཝུཏྟེ བྷཏྟཾ ཨཔྤཾ ཝཱ ཧོཏུ, བཧུ ཝཱ, པཝཱརཎཱ ཨེཝ སིཡཱ, ཏསྨཱ མིསྶཀནྟི བྷཏྟམིསྶཀེ རུལ༹ྷཾ ཝཱ ཧོཏུ, མིསྶཀཾ སནྡྷཱཡ བྷཱསིཏཾ ཝཱ, ཨུབྷཡཐཱཔི པུབྦེནཱཔརཾ ན སམེཏཱིཏི ཀིམེཏྠ ཀཱརཎཙིནྟཱཡ. ཨཱིདིསེསུ པན ཋཱནེསུ ཨཊྛཀཐཱཔམཱཎེནེཝ གནྟབྦནྟི ཨཡཾ ཨམྷཱཀཾ ཁནྟི.

ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༢༣༨-༢༣༩) པན ‘‘ཨུདྡིསྶཀཏནྟི མཉྙམཱནོཏི ཨེཏྠ ཝཏྠུནོ ཀཔྤིཡཏྟཱ ‘པཝཱརིཏོཝ ཧོཏཱི’ཏི ཝུཏྟཾ. ཏཉྩེ ཨུདྡིསྶཀཏམེཝ ཧོཏི, པཊིཀྑེཔོ ནཏྠི. ཨཡམེཏྠཱདྷིཔྤཱཡོཏི ‘ཡེནཱཔུཙྪིཏོ’ཏིཨཱདིནཱ ཝུཏྟམེཝཏྠཾ སནྡྷཱཡ ཝདཏི. ཀཱརཎཾ པནེཏྠ དུདྡསནྟི བྷཏྟསྶ བཧུཏརབྷཱཝེ ¶ པཝཱརཎཱཡ སམྦྷཝཀཱརཎཾ དུདྡསཾ, ཨཉྙཐཱ ཀརམྦཀེཔི མཙྪཱདིབཧུབྷཱཝེ པཝཱརཎཱ བྷཝེཡྻཱཏི ཨདྷིཔྤཱཡོ. ཡཐཱ ཙེཏྠ ཀཱརཎཾ དུདྡསཾ, ཨེཝཾ པརཏོ ‘མིསྶཀཾ གཎྷཐཱ’ཏི ཨེཏྠཱཔི ཀཱརཎཾ དུདྡསམེཝཱཏི དཊྛབྦཾ. ཡཉྩ ‘ཨིདཾ པན བྷཏྟམིསྶཀམེཝཱ’ཏིཨཱདི ¶ ཀཱརཎཾ ཝུཏྟཾ, ཏམྤི ‘ཨཔྤཏརཾ ན པཝཱརེཏཱི’ཏི ཝཙནེན ན སམེཏཱི’’ཏི ཨེཏྟཀམེཝ ཝུཏྟཾ.

‘‘ཝིསུཾ ཀཏྭཱ དེཏཱིཏི བྷཏྟསྶ ཨུཔརི ཋིཏཾ རསཱདིཾ ཝིསུཾ གཧེཏྭཱ དེཏཱི’’ཏི ཏཱིསུཔི གཎྛིཔདེསུ ཝུཏྟཾ. ཀེཧིཙི པན ‘‘ཡཐཱ བྷཏྟསིཏྠཾ ན པཏཏི, ཏཐཱ གཱལ༹ྷཾ ཧཏྠེན པཱིལེ༹ཏྭཱ པརིསྶཱཝེཏྭཱ དེཏཱི’’ཏི ཝུཏྟཾ. ཏཏྠཱཔི ཀཱརཎཾ ན དིསྶཏི. ཡཐཱ ཧི བྷཏྟམིསྶཀཾ ཡཱགུཾ ཨཱཧརིཏྭཱ ‘‘ཡཱགུཾ གཎྷཐཱ’’ཏི ཝཏྭཱ ཡཱགུམིསྶཀཾ བྷཏྟམྤི དེནྟཾ པཊིཀྑིཔཏོ པཝཱརཎཱ ན ཧོཏི, ཨེཝམིདྷཱཔི བཧུཁཱིརརསཱདཱིསུ བྷཏྟེསུ ‘‘ཁཱིརཾ གཎྷཐཱ’’ཏིཨཱདཱིནི ཝཏྭཱ དིནྣཱནི ཁཱིརཱདཱིནི ཝཱ དེཏུ ཁཱིརཱདིམིསྶཀཾ བྷཏྟཾ ཝཱ, ཨུབྷཡཐཱཔི པཝཱརཎཱཡ ན བྷཝིཏབྦཾ, ཏསྨཱ ‘‘ཝིསུཾ ཀཏྭཱ དེཏཱི’’ཏི ཏེནཱཀཱརེན དེནྟཾ སནྡྷཱཡ ཝུཏྟཾ, ན པན བྷཏྟམིསྶཀཾ ཀཏྭཱ དཱིཡམཱནཾ པཊིཀྑིཔཏོ པཝཱརཎཱ ཧོཏཱིཏི དསྶནཏྠནྟི གཧེཏབྦཾ. ཡདི པན བྷཏྟམིསྶཀཾ ཀཏྭཱ དཱིཡམཱནེ པཝཱརཎཱ ཧོཏཱིཏི ཨདྷིཔྤཱཡེན ཨཊྛཀཐཱཡཾ ‘‘ཝིསུཾ ཀཏྭཱ དེཏཱི’’ཏི ཝུཏྟཾ, ཨེཝཾ སཏི ཨཊྛཀཐཱཡེཝེཏྠ པམཱཎནྟི གཧེཏབྦཾ, ན པན ཀཱརཎནྟརཾ གཝེསིཏབྦཾ. ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༢༣༨-༢༣༩) པན ‘‘ཝིསུཾ ཀཏྭཱ དེཏཱིཏི ‘རསཾ གཎྷཐཱ’ཏིཨཱདིནཱ ཝཱཙཱཡ ཝིསུཾ ཀཏྭཱ དེཏཱིཏི ཨཏྠོ གཧེཏབྦོ, ན པན ཀཱཡེན རསཱདིཾ ཝིཡོཛེཏྭཱཏི ཏཐཱ ཨཝིཡོཛིཏེཔི པཊིཀྑིཔཏོ པཝཱརཎཱཡ ཨསམྦྷཝཏོ ཨཔཝཱརཎཱཔཧོནཀསྶ ནཱམེན ཝུཏྟཏྟཱ བྷཏྟམིསྶཀཡཱགུཾ ཨཱཧརིཏྭཱ ‘ཡཱགུཾ ¶ གཎྷཐཱ’ཏི ཝུཏྟཊྛཱནཱདཱིསུ ཝིཡ, ཨཉྙཐཱ ཨེཏྠ ཡཐཱ པུབྦཱཔརཾ ན ཝིརུཛ྄ཛྷཏི, ཏཐཱ ཨདྷིཔྤཱཡོ གཧེཏབྦོ’’ཏི ཝུཏྟཾ.

ནཱཝཱ ཝཱ སེཏུ ཝཱཏིཨཱདིམྷི ནཱཝཱདིཨབྷིརུཧནཱདིཀྑཎེ ཀིཉྩི ཋཏྭཱཔི ཨབྷིརུཧནཱདིཀཱཏབྦཏྟེཔི གམནཏཔྤརཏཱཡ ཋཱནཾ ནཱམ ན ཧོཏི, ཛནསམྨདྡེན པན ཨནོཀཱསཱདིབྷཱཝེན ཋཱཏུཾ ན ཝཊྚཏི. ཨཙཱལེཏྭཱཏི ཝུཏྟཊྛཱནཏོ ཨཉྙསྨིཾ པཱིཋཔྤདེསེ ཝཱ ཨུདྡྷཾ ཝཱ ཨཔེལླེཏྭཱ, ཏསྨིཾ ཨེཝ པན ཋཱནེ པརིཝཏྟེཏུཾ ལབྷཏི. ཏེནཱཧ ‘‘ཡེན པསྶེནཱ’’ཏིཨཱདི. སཙེ ཨུཀྐུཊིཀཾ ནིསིནྣོ པཱདེ ཨམུཉྩིཏྭཱཔི བྷཱུམིཡཾ ནིསཱིདཏི, ཨིརིཡཱཔཐཾ ཝིཀོཔེནྟོ ནཱམ ཧོཏཱིཏི ཨུཀྐུཊིཀཱསནཾ ཨཝིཀོཔེཏྭཱ སུཁེན ནིསཱིདིཏུཾ ‘‘ཏསྶ པན ཧེཊྛཱ…པེ… ནིསཱིདནཀཾ དཱཏབྦ’’ནྟི ཝུཏྟཾ. ‘‘ཨཱསནཾ ཨཙཱལེཏྭཱཏི པཱིཋེ ཕུཊྛོཀཱསཏོ ཨཱནིསདམཾསཾ ¶ ཨམོཙེཏྭཱ ཨནུཊྛཧིཏྭཱཏི ཝུཏྟཾ ཧོཏི. ཨདིནྣཱདཱནེ ཝིཡ ཋཱནཱཙཱཝནཾ ན གཧེཏབྦ’’ནྟི ཏཱིསུཔི གཎྛིཔདེསུ ཝུཏྟཾ.

༡༢༡. ཨཀཔྤིཡཀཏནྟི ཨེཏྠ ཨཀཔྤིཡཀཏསྶེཝ ཨནཏིརིཏྟབྷཱཝཏོ ཀཔྤིཡཾ ཨཀཱརཱཔེཏྭཱ ཏསྨིཾ པཏྟེ པཀྑིཏྟཾ མཱུལཕལཱདིཡེཝ ཨཏིརིཏྟཾ ན ཧོཏི, ཨཀཔྤིཡབྷོཛནཾ ཝཱ ཀུལདཱུསནཱདིནཱ ཨུཔྤནྣཾ. སེསཾ པན པཏྟཔརིཡཱཔནྣཾ ཨཏིརིཏྟམེཝ ཧོཏི, པརིབྷུཉྫིཏུཾ ཝཊྚཏི, ཏཾ པན མཱུལཕལཱདིཾ པརིབྷུཉྫིཏུཀཱམེན ཏཏོ ནཱིཧརིཏྭཱ ཀཔྤིཡཾ ཀཱརཱཔེཏྭཱ ཨཉྙསྨིཾ བྷཱཛནེ ཋཔེཏྭཱ ཨཏིརིཏྟཾ ཀཱརཱཔེཏྭཱ པརིབྷུཉྫིཏབྦཾ.

༡༢༢. སོ པུན ཀཱཏུཾ ན ལབྷཏཱིཏི ཏསྨིཾཡེཝ བྷཱཛནེ ཀརིཡམཱནཾ པཋམཾ ཀཏེན སདྡྷིཾ ཀཏཾ ཧོཏཱིཏི པུན སོཡེཝ ཀཱཏུཾ ན ལབྷཏི, ཨཉྙོ ལབྷཏི. ཨཉྙསྨིཾ པན བྷཱཛནེ ཏེན ཝཱ ཨཉྙེན ཝཱ ཀཱཏུཾ ཝཊྚཏི. ཏེནཱཧ ¶ ‘‘ཡེན ཨཀཏཾ, ཏེན ཀཱཏབྦཾ, ཡཉྩ ཨཀཏཾ, ཏཾ ཀཱཏབྦ’’ནྟི. ཏེནཱཔཱིཏི ཨེཏྠ པི-སདྡོ ན ཀེཝལཾ ཨཉྙེནེཝཱཏི ཨིམམཏྠཾ དཱིཔེཏི. ཨེཝཾ ཀཏནྟི ཨཉྙསྨིཾ བྷཱཛནེ ཀཏཾ.

པེསེཏྭཱཏི ཨནུཔསམྤནྣསྶ ཧཏྠེ པེསེཏྭཱ. ཨིམསྶ ཝིནཡཀམྨབྷཱཝཏོ ‘‘ཨནུཔསམྤནྣསྶ ཧཏྠེ ཋིཏཾ ན ཀཱཏབྦ’’ནྟི ཝུཏྟཾ.

སཙེ པན ཨཱམིསསཾསཊྛཱནཱིཏི ཨེཏྠ སཙེ མུཁགཏེནཱཔི ཨནཏིརིཏྟེན ཨཱམིསེན སཾསཊྛཱནི ཧོནྟི, པཱཙིཏྟིཡམེཝཱཏི ཝེདིཏབྦཾ, ཏསྨཱ པཝཱརིཏེན བྷོཛནཾ ཨཏིརིཏྟཾ ཀཱརཱཔེཏྭཱ བྷུཉྫནྟེནཔི ཡཐཱ ཨཀཏེན མིསྶཾ ན ཧོཏི, ཨེཝཾ མུཁཉྩ ཧཏྠཉྩ སུདྡྷཾ ཀཏྭཱ བྷུཉྫིཏབྦཾ. ཀིཉྩཱཔི ཨཔཝཱརིཏསྶ པུརེབྷཏྟཾ ཡཱམཀཱལིཀཱདཱིནི ཨཱཧཱརཏྠཱཡ པརིབྷུཉྫཏོཔི ཨནཱཔཏྟི, པཝཱརིཏསྶ པན པཝཱརཎམཱུལཀཾ དུཀྐཊཾ ཧོཏིཡེཝཱཏི ‘‘ཡཱམཀཱལིཀཾ…པེ… ཨཛ྄ཛྷོཧཱརེ ཨཛ྄ཛྷོཧཱརེ ཨཱཔཏྟི དུཀྐཊསྶཱ’’ཏི པཱལི༹ཡཾ (པཱཙི. ༢༤༠) ཝུཏྟཾ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

པཊིཀྑེཔཔཝཱརཎཱཝིནིཙྪཡཀཐཱལངྐཱརོ ནཱམ

ཨེཀཝཱིསཏིམོ པརིཙྪེདོ.

༢༢. པབྦཛྫཱཝིནིཙྪཡཀཐཱ

༡༢༣. ཨེཝཾ ¶ པཊིཀྑེཔཔཝཱརཎཱཝིནིཙྪཡཾ ཀཐེཏྭཱ ཨིདཱནི པབྦཛྫཱཝིནིཙྪཡཾ ཀཐེཏུཾ ‘‘པབྦཛྫཱཏི ཨེཏྠ པནཱ’’ཏྱཱདིམཱཧ. ཏཏྠ པཋམཾ ཝཛིཏབྦཱཏི པབྦཛྫཱ, ཨུཔསམྤདཱཏོ པཋམཾ ཨུཔགཙྪིཏབྦཱཏི ¶ ཨཏྠོ. པ-པུབྦ ཝཛ གཏིམྷཱིཏི དྷཱཏུ. ཀུལཔུཏྟནྟི ཨཱཙཱརཀུལཔུཏྟཾ སནྡྷཱཡ ཝདཏི. ཡེ པུགྒལཱ པཊིཀྑིཏྟཱ, ཏེ ཝཛྫེཏྭཱཏི སམྦནྡྷོ. པབྦཛྫཱདོསཝིརཧིཏོཏི པབྦཛྫཱཡ ཨནྟརཱཡཀརེཧི པཉྩཱབཱདྷཱདིདོསེཧི ཝིརཧིཏོ. ནཁཔིཊྛིཔྤམཱཎནྟི ཨེཏྠ ཀནིཊྛངྒུལིནཁཔིཊྛི ཨདྷིཔྤེཏཱ. ‘‘ཏཉྩེ ནཁཔིཊྛིཔྤམཱཎམྤི ཝཌྜྷནཔཀྑེ ཋིཏཾ ཧོཏི, ན པབྦཱཛེཏབྦོཏི ཨིམིནཱ སཱམཉྙལཀྑཎཾ དསྶིཏཾ, ཏསྨཱ ཡཏྠ ཀཏྠཙི སརཱིརཱཝཡཝེསུ ནཁཔིཊྛིཔྤམཱཎཾ ཝཌྜྷནཀཔཀྑེ ཋིཏཾ ཙེ, ན ཝཊྚཏཱིཏི སིདྡྷཾ. ཨེཝཉྩ སཏི ནཁཔིཊྛིཔྤམཱཎམྤི ཨཝཌྜྷནཀཔཀྑེ ཋིཏཾ ཙེ, སབྦཏྠ ཝཊྚཏཱིཏི ཨཱཔནྣཾ, ཏཉྩ ན སཱམཉྙཏོ ཨདྷིཔྤེཏནྟི པདེསཝིསེསེཡེཝ ནིཡམེཏྭཱ དསྶེནྟོ ‘སཙེ པནཱ’ཏིཨཱདིམཱཧ. སཙེ ཧི ཨཝིསེསེན ནཁཔིཊྛིཔྤམཱཎཾ ཨཝཌྜྷནཀཔཀྑེ ཋིཏཾ ཝཊྚེཡྻ, ‘ནིཝཱསནཔཱརུཔནེཧི པཀཏིཔཊིཙྪནྣཊྛཱནེ’ཏི པདེསནིཡམཾ ན ཀརེཡྻ, ཏསྨཱ ནིཝཱསནཔཱརུཔནེཧི པཀཏིཔཊིཙྪནྣཊྛཱནཏོ ཨཉྙཏྠ ནཁཔིཊྛིཔྤམཱཎཾ ཨཝཌྜྷནཀཔཀྑེ ཋིཏམྤི ན ཝཊྚཏཱིཏི སིདྡྷཾ. ནཁཔིཊྛིཔྤམཱཎཏོ ཁུདྡཀཏརཾ པན ཨཝཌྜྷནཀཔཀྑེ ཝཱ ཝཌྜྷནཀཔཀྑེ ཝཱ ཋིཏཾ ཧོཏུ, ཝཊྚཏི ནཁཔིཊྛིཔྤམཱཎཏོ ཁུདྡཀཏརསྶ ཝཌྜྷནཀཔཀྑེ ཨཝཌྜྷནཀཔཀྑེ ཝཱ ཋིཏསྶ མུཁཱདཱིསུཡེཝ པཊིཀྑིཏྟཏྟཱ’’ཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༨༨) ཝུཏྟཾ.

ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༨༨-༨༩) པན ‘‘པཊིཙྪནྣཊྛཱནེ ནཁཔིཊྛིཔྤམཱཎཾ ཨཝཌྜྷནཀཔཀྑེ ཋིཏཾ ཧོཏི, ཝཊྚཏཱིཏི ཝུཏྟཏྟཱ ཨཔྤཊིཙྪནྣཊྛཱནེ ཏཱདིསམྤི ན ཝཊྚཏི, པཊིཙྪནྣཊྛཱནེཔི ཙ ཝཌྜྷནཀཔཀྑེ ཋིཏཾ ན ཝཊྚཏཱིཏི སིདྡྷམེཝ ཧོཏི. པཱཀཊཊྛཱནེཔི པན ནཁཔིཊྛིཔྤམཱཎཏོ ཨཱུནཏརཾ ཨཝཌྜྷནཀཾ ཝཊྚཏཱིཏི ཡེ གཎྷེཡྻུཾ, ཏེསཾ ཏཾ གཧཎཾ པཊིསེདྷེཏུཾ ‘མུཁེ པནཱ’ཏིཨཱདི ཝུཏྟ’’ནྟི ཝུཏྟཾ. གོདྷཱ…པེ… ན ཝཊྚཏཱིཏི ཨིམིནཱ ཏཱདིསོཔི རོགོ ཀུཊྛེཡེཝ ¶ ཨནྟོགདྷོཏི དསྶེཏི. གཎྜེཔི ཨིམིནཱ ནཡེན ཝིནིཙྪཡོ ཝེདིཏབྦོ. ཏཏྠ པན མུཁཱདཱིསུ ཀོལཊྛིམཏྟཏོ ཁུདྡཀཏརོཔི གཎྜོ ན ཝཊྚཏཱིཏི ཝིསུཾ ན དསྶིཏོ. ‘‘ཨཔྤཊིཙྪནྣཊྛཱནེ ཨཝཌྜྷནཀཔཀྑེ ཋིཏེཔི ན ཝཊྚཏཱི’’ཏི ཨེཏྟཀམེཝ ཧི ཏཏྠ ཝུཏྟཾ, ཏཐཱཔི ཀུཊྛེ ཝུཏྟནཡེན མུཁཱདཱིསུ ཀོལཊྛིཔྤམཱཎཏོ ཁུདྡཀཏརོཔི གཎྜོ ན ཝཊྚཏཱིཏི ཝིཉྙཱཡཏི, ཏསྨཱ ཨཝཌྜྷནཀཔཀྑེ ཋིཏེཔཱིཏི ཨེཏྠ པི-སདྡོ ཨཝུཏྟསམྤིཎྜནཏྠོ, ཏེན ཀོལཊྛིམཏྟཏོ ¶ ཁུདྡཀཏརོཔི ན ཝཊྚཏཱིཏི ཨཡམཏྠོ དསྶིཏོཡེཝཱཏི ཨམྷཱཀཾ ཁནྟི. པཀཏིཝཎྞེ ཛཱཏེཏི རོགཧེཏུཀསྶ ཝིཀཱརཝཎྞསྶ ཨབྷཱཝཾ སནྡྷཱཡ ཝུཏྟཾ.

ཀོལཊྛིམཏྟཀོཏི བདརཊྛིཔྤམཱཎོ. ‘‘སཉྫཱཏཚཝིཾ ཀཱརེཏྭཱ’’ཏི པཱཋོ, ཝིཛྫམཱནཚཝིཾ ཀཱརེཏྭཱཏི ཨཏྠོ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༨༨-༨༩) པན ‘‘སཙྪཝིཾ ཀཱརེཏྭཱཏི ཝིཛྫམཱནཚཝིཾ ཀཱརེཏྭཱཏི ཨཏྠོ, སཉྪཝིནྟི ཝཱ པཱཋོ, སཉྫཱཏཚཨནྟི ཨཏྠོ. གཎྜཱདཱིསུ ཝཱུཔསནྟེསུཔི ཏཾ ཋཱནཾ ཝིཝཎྞམྤི ཧོཏི, ཏཾ ཝཊྚཏཱི’’ཏི ཝུཏྟཾ.

པདུམཔུཎྜརཱིཀཔཏྟཝཎྞནྟི རཏྟཔདུམསེཏཔདུམཔུཔྥདལཝཎྞཾ. ཀུཊྛེ ཝུཏྟནཡེནེཝཱཏི ‘‘པཊིཙྪནྣཊྛཱནེ ཨཝཌྜྷནཀཾ ཝཊྚཏི, ཨཉྙཏྠ ན ཀིཉྩི ཝཊྚཏཱི’’ཏི ཝུཏྟནཡཾ དསྶེཏི. སོསབྱཱདྷཱིཏི ཁཡརོགོ. ཡཀྑུམྨཱདོཏི ཀདཱཙི ཨཱགནྟྭཱ བྷཱུམིཡཾ པཱཏེཏྭཱ ཧཏྠམུཁཱདིཀཾ ཨཝཡཝཾ བྷཱུམིཡཾ གྷཾསནཀོ ཡཀྑོཝ རོགོ.

༡༢༤. མཧཱམཏྟོཏི མཧཏིཡཱ ཨིསྶརིཡམཏྟཱཡ སམནྣཱགཏོ. ‘‘ན དཱནཱཧཾ དེཝསྶ བྷཊོ’’ཏི ཨཱཔུཙྪཏཱིཏི རཉྙཱ ཨེཝ དིནྣཾ ཋཱནནྟརཾ སནྡྷཱཡ ཝུཏྟཾ. ཡོ པན རཱཛཀམྨིཀེཧི ¶ ཨམཙྩཱདཱིཧི ཋཔིཏོ, ཨམཙྩཱདཱིནཾ ཨེཝ ཝཱ བྷཊོ ཧོཏི, ཏེན ཏཾ ཏཾ ཨམཙྩཱདིམྤི ཨཱཔུཙྪིཏུཾ ཝཊྚཏཱིཏི.

༡༢༥. ‘‘དྷཛབནྡྷོ’’ཏི ཝུཏྟཏྟཱ ཨཔཱཀཊཙོརོ པབྦཱཛེཏབྦོཏི ཝིཉྙཱཡཏི. ཏེན ཝཀྑཏི ‘‘ཡེ པན ཨམྦལབུཛཱདིཙོརཀཱ’’ཏིཨཱདི. ཨེཝཾ ཛཱནནྟཱིཏི ‘‘སཱིལཝཱ ཛཱཏོ’’ཏི ཛཱནནྟི.

༡༢༦. བྷིནྡིཏྭཱཏི ཨནྡུབནྡྷནཾ བྷིནྡིཏྭཱ. ཚིནྡིཏྭཱཏི སངྑལིཀབནྡྷནཾ ཚིནྡིཏྭཱ. མུཉྩིཏྭཱཏི རཛྫུབནྡྷནཾ མུཉྩིཏྭཱ. ཝིཝརིཏྭཱཏི གཱམབནྡྷནཱདཱིསུ གཱམདྭཱརཱདཱིནི ཝིཝརིཏྭཱ. ཨཔསྶམཱནཱནཾ ཝཱ པལཱཡཏཱིཏི པུརིསགུཏྟིཡཾ པུརིསཱནཾ གོཔཀཱནཾ ཨཔསྶམཱནཱནཾ པལཱཡཏི.

༡༢༩. པུརིམནཡེནེཝཱཏི ‘‘ཀསཱཧཏོ ཀཏདཎྜཀམྨོ’’ཏི ཨེཏྠ ཝུཏྟནཡེནེཝ.

༡༣༠. པལཱཏོཔཱིཏི ¶ ཨིཎསྶཱམིཀཱནཾ ཨཱགམནཾ ཉཏྭཱ བྷཡེན པལཱཏོཔི ཨིཎཱཡིཀོ. གཱིཝཱ ཧོཏི ཨིཎཱཡིཀབྷཱཝཾ ཉཏྭཱ ཨནཱདརེན ཨིཎམུཏྟཀེ བྷིཀྑུབྷཱཝེ པཝེསིཏཏྟཱ.

ཨུཔཌྜྷུཔཌྜྷནྟི ཐོཀཾ ཐོཀཾ. དཱཏབྦམེཝཱཏི ཨིཎཱཡིཀེན དྷནཾ སམྤཛྫཏུ ཝཱ, མཱ ཝཱ, དཱནེ སཨུསྶཱཧེནེཝ བྷཝིཏབྦཾ, ཨཉྙེཧི ཙ བྷིཀྑཱུཧི ‘‘མཱ དྷུརཾ ནིཀྑིཔཱཧཱི’’ཏི ཝཏྭཱ སཧཱཡཀེཧི བྷཝིཏབྦནྟི དསྶེཏི. དྷུརནིཀྑེཔེན ཧིསྶ བྷཎྜགྒྷེན ཀཱརེཏབྦཏཱ སིཡཱཏི.

༡༣༡. དཱསཙཱརིཏྟཾ ཨཱརོཔེཏྭཱ ཀཱིཏོཏི ཨིམིནཱ དཱསབྷཱཝཔརིམོཙནཏྠཱཡ ཀཱིཏཾ ནིཝཏྟེཏི. ཏཱདིསོ ཧི དྷནཀྐཱིཏོཔི ཨདཱསོ ཨེཝ. ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༩༧) པན ‘‘དེསཙཱརིཏྟནྟི ¶ སཱཝནཔཎྞཱརོཔནཱདིཀཾ ཏཾ ཏཾ དེསཙཱརིཏྟ’’ནྟི ཝུཏྟཾ. ཏཏྠ ཏཏྠ ཙཱརིཏྟཝསེནཱཏི ཏསྨིཾ ཏསྨིཾ ཛནཔདེ དཱསཔཎྞཛ྄ཛྷཱཔནཱདིནཱ ཨདཱསཀརཎནིཡཱམེན. ཨབྷིསེཀཱདཱིསུ སབྦབནྡྷནཱནི མོཙཱཔེནྟི, ཏཾ སནྡྷཱཡ ‘‘སབྦསཱདྷཱརཎེནཱ’’ཏི ཝུཏྟཾ.

སཙེ སཡམེཝ པཎྞཾ ཨཱརོཔེནྟི, ན ཝཊྚཏཱིཏི ཏཱ བྷུཛིསྶིཏྠིཡོ ‘‘མཡམྤི ཝཎྞདཱསིཡོ ཧོམཱ’’ཏི ཨཏྟནོ རཀྑཎཏྠཱཡ སཡམེཝ རཱཛཱུནཾ དཱསིཔཎྞེ ཨཏྟནོ ནཱམཾ ལིཁཱཔེནྟི, ཏཱསཾ པུཏྟཱཔི རཱཛདཱསཱཝ ཧོནྟི, ཏསྨཱ ཏེ པབྦཱཛེཏུཾ ན ཝཊྚཏི. ཏེཧི ཨདིནྣཱ ན པབྦཱཛེཏབྦཱཏི ཡཏྟཀཱ ཏེསཾ སཱམིནོ, ཏེསུ ཨེཀེན ཨདིནྣེཔི ན པབྦཱཛེཏབྦཱ. བྷུཛིསྶེ ཀཏྭཱ པན པབྦཱཛེཏུཾ ཝཊྚཏཱིཏི ཡསྶ ཝིཧཱརསྶ ཏེ ཨཱརཱམིཀཱ དིནྣཱ, ཏསྨིཾ ཝིཧཱརེ སངྒྷཾ ཉཱཔེཏྭཱ ཕཱཏིཀམྨེན དྷནཱདིཾ ཀཏྭཱ བྷུཛིསྶེ ཀཏྭཱ པབྦཱཛེཏུཾ ཝཊྚཏི. ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༩༧) པན ‘‘དེཝདཱསིཔུཏྟེ ཝཊྚཏཱིཏི ལིཁིཏཾ. ‘ཨཱརཱམིཀཉྩེ པབྦཱཛེཏུཀཱམོ, ཨཉྙམེཀཾ དཏྭཱ པབྦཱཛེཏབྦ’ནྟི ཝུཏྟཾ. མཧཱཔཙྩརིཝཱདསྶ ཨཡམིདྷ ཨདྷིཔྤཱཡོ, ‘བྷིཀྑུསངྒྷསྶ ཨཱརཱམིཀེ དེམཱ’ཏི དིནྣཏྟཱ ན ཏེ ཏེསཾ དཱསཱ, ‘ཨཱརཱམིཀོ ཙ ནེཝ དཱསོ ན བྷུཛིསྶོ’ཏི ཝཏྟབྦཏོ ན དཱསོཏི ལིཁིཏཾ. ཏཀྐཱསིཉྩནཾ སཱིཧལ༹དཱིཔེ ཙཱརིཏྟཾ, ཏེ ཙ པབྦཱཛེཏབྦཱ སངྒྷསྶཱརཱམིཀཏྟཱ. ནིསྶཱམིཀཾ དཱསཾ ཨཏྟནཱཔི བྷུཛིསྶཾ ཀཱཏུཾ ལབྷཏཱི’’ཏི ཝུཏྟཾ.

སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༩༧) པན ‘‘ཏཀྐཾ སཱིསེ ཨཱསིཏྟཀསདིསཱཝ ཧོནྟཱིཏི ཡཐཱ ཨདཱསེ ཀརོནྟཱ ཏཀྐེན སཱིསཾ དྷོཝིཏྭཱ ཨདཱསཾ ཀརོནྟི, ཨེཝཾ ཨཱརཱམིཀཝཙནེན དིནྣཏྟཱ ཨདཱསཱཝ ཏེཏི ཨདྷིཔྤཱཡོ. ‘ཏཀྐཱསིཉྩནཾ པན སཱིཧལ༹དཱིཔེ ཙཱརིཏྟ’ནྟི ¶ ཝདནྟི. ནེཝ པབྦཱཛེཏབྦོཏི ཝུཏྟནྟི ཀཔྤིཡཝཙནེན དིནྣེཔི ¶ སངྒྷསྶ ཨཱརཱམིཀདཱསཏྟཱ ཨེཝཾ ཝུཏྟ’’ནྟི ཝུཏྟཾ. ཝིམཏིཝིནོདནིཡམྤི (ཝི. ཝི. ཊཱི. མཧཱཝགྒ ༢.༩༧) ‘‘ཏཀྐཾ སཱིསེ ཨཱསིཏྟཀསདིསཱཝ ཧོནྟཱིཏི ཀེསུཙི ཛནཔདེསུ ཨདཱསེ ཀརོནྟཱ ཏཀྐཾ སཱིསེ ཨཱསིཉྩནྟི, ཏེན ཀིར ཏེ ཨདཱསཱ ཧོནྟི, ཨེཝམིདམྤི ཨཱརཱམིཀཝཙནེན དིནྣམྤཱིཏི ཨདྷིཔྤཱཡོ. ཏཐཱ དིནྣེཔི སངྒྷསྶ ཨཱརཱམིཀདཱསོ ཨེཝཱཏི ‘ནེཝ པབྦཱཛེཏབྦོ’ཏི ཝུཏྟཾ. ‘ཏཱཝཀཱལིཀོ ནཱམ’ཏི ཝུཏྟཏྟཱ ཀཱལཔརིཙྪེདཾ ཀཏྭཱ ཝཱ པཙྪཱཔི གཧེཏུཀཱམཏཱཡ ཝཱ དིནྣཾ སབྦཾ ཏཱཝཀཱལིཀམེཝཱཏི གཧེཏབྦཾ. ནིསྶཱམིཀདཱསོ ནཱམ ཡསྶ སཱམིཀུལཾ ཨཉྙཱཏིཀཾ མརཎེན པརིཀྑཱིཎཾ, ན ཀོཙི ཏསྶ དཱཡཱདོ, སོ པན སམཱནཛཱཏིཀེཧི ཝཱ ནིཝཱསགཱམཝཱསཱིཧི ཝཱ ཨིསྶརེཧི ཝཱ བྷུཛིསྶོ ཀཏོཝ པབྦཱཛེཏབྦོ. དེཝདཱསཱཔི དཱསཱ ཨེཝ. ཏེ ཧི ཀཏྠཙི དེསེ རཱཛདཱསཱ ཧོནྟི, ཀཏྠཙི ཝིཧཱརདཱསཱ ཝཱ, ཏསྨཱ པབྦཱཛེཏུཾ ན ཝཊྚཏཱི’’ཏི ཝུཏྟཾ.

སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༩༧) པན ‘‘ནིསྶཱམིཀདཱསོ ནཱམ ཡསྶ སཱམིཀཱ སཔུཏྟདཱརཱ མཏཱ ཧོནྟི, ན ཀོཙི ཏསྶ པརིགྒཱཧཀོ, སོཔི པབྦཱཛེཏུཾ ན ཝཊྚཏི, ཏཾ པན ཨཏྟནཱཔི བྷུཛིསྶཾ ཀཱཏུཾ ཝཊྚཏི. ཡེ ཝཱ པན ཏསྨིཾ རཊྛེ སཱམིནོ, ཏེཧིཔི ཀཱརཱཔེཏུཾ ཝཊྚཏི, ‘དེཝདཱསིཔུཏྟཾ པབྦཱཛེཏུཾ ཝཊྚཏཱི’ཏི ཏཱིསུཔི གཎྛིཔདེསུ ཝུཏྟཾ. ‘དཱསསྶ པབྦཛིཏྭཱ ཨཏྟནོ སཱམིཀེ དིསྭཱ པལཱཡནྟསྶ ཨཱཔཏྟི ནཏྠཱི’ཏི ཝདནྟཱི’’ཏི ཝུཏྟཾ. ཝིམཏིཝིནོདནིཡཾ པན ‘‘དཱསམྤི པབྦཱཛེཏྭཱ སཱམིཀེ དིསྭཱ པཊིཙྪཱདནཏྠཾ ཨཔནེནྟོ པདཝཱརེན ཨདིནྣཱདཱནཱཔཏྟིཡཱ ཀཱརེཏབྦོ, དཱསསྶ པན པལཱཡཏོ ཨནཱཔཏྟཱི’’ཏི ཝུཏྟཾ.

༡༣༢. ཧཏྠཙྪིནྣཀཱདིཝཏྠཱུསུ ཀཎྞམཱུལེཏི སཀལསྶ ཀཎྞསྶ ཚེདཾ སནྡྷཱཡཱཧ. ཀཎྞསཀྑལིཀཱཡཱཏི ཀཎྞཙཱུལི༹ཀཱཡ ¶ . ཡསྶ པན ཀཎྞཱཝཊྚེཏི ཧེཊྛཱ ཀུཎྜལཱདིཋཔནཚིདྡཾ སནྡྷཱཡ ཝུཏྟཾ. ‘‘ཏཉྷི སངྒྷཊྚནཀྑམཾ. ཨཛཔདཀེཏི ཨཛཔདནཱསིཀཊྛིཀོཊིཡཾ. ཏཏོ ཧི ཨུདྡྷཾ ན ཝིཙྪིནྡིཏུཾ སཀྐཱ ཧོཏི. སནྡྷེཏུནྟི ཨཝིརཱུཔསཎྛཱནཾ སནྡྷཱཡ ཝུཏྟཾ, ཝིརཱུཔཾ པན པརིསདཱུསཀཾ ཨཱཔཱདེཏི.

ཁུཛྫསརཱིརོཏི ཝངྐསརཱིརོ. བྲཧྨུནོ ཝིཡ ཨུཛུཀཾ གཏྟཾ སརཱིརཾ ཡསྶ སོ བྲཧྨུཛུགཏྟོ, བྷགཝཱ. ཨཝསེསོ སཏྟོཏི ཨིམིནཱ ལཀྑཎེན རཧིཏསཏྟོ. ཨེཏེན ཋཔེཏྭཱ མཧཱཔུརིསཾ ཙཀྐཝཏྟིཉྩ ¶ ཨིཏརེ སཏྟཱ ཁུཛྫཔཀྑིཀཱཏི དསྶེཏི. ཡེབྷུཡྻེན ཧི སཏྟཱ ཁནྡྷེ ཀཊིཡཾ ཛཱཎཱུསཱུཏི ཏཱིསུ ཋཱནེསུ ནམནྟི, ཏེ ཀཊིཡཾ ནམནྟཱ པཙྪཏོ ནམནྟི, དྭཱིསུ ཋཱནེསུ ནམནྟཱ པུརཏོ ནམནྟི, དཱིགྷསརཱིརཱ པན ཨེཀེན པསྶེན ཝངྐཱ ཧོནྟི, ཨེཀེ མུཁཾ ཨུནྣཱམེཏྭཱ ནཀྑཏྟཱནི གཎཡནྟཱ ཝིཡ ཙརནྟི, ཨེཀེ ཨཔྤམཾསལོཧིཏཱ སཱུལསདིསཱ ཧོནྟི, ཨེཀེ པུརཏོ པབྦྷཱརཱ ཧོནྟི, པཝེདྷམཱནཱ གཙྪནྟི. པརིཝཊུམོཏི སམནྟཏོ ཝཊྚཀཱཡོ. ཨེཏེན ཨེཝརཱུཔཱ ཨེཝ ཝཱམནཀཱ ན ཝཊྚནྟཱིཏི དསྶེཏི.

༡༣༣. ཨཊྛིསིརཱཙམྨསརཱིརོཏི ཨཊྛིསིརཱཙམྨམཏྟསརཱིརོ. ཀཱུཊཀཱུཊསཱིསོཏི ཨནེཀེསུ ཋཱནེསུ པིཎྜིཏམཾསཏཾ དསྶེཏུཾ ཨཱམེཌིཏཾ ཀཏཾ. ཏེནཱཧ ‘‘ཏཱལཕལཔིཎྜིསདིསེནཱ’’ཏི. ཏཱལཕལཱནཾ མཉྫརཱི པིཎྜི ནཱམ. ཨནུཔུབྦཏནུཀེན སཱིསེནཱཏི ཙེཏིཡཐཱུཔིཀཱ ཝིཡ ཀམེན ཀིསེན སཱིསེན. མཧཱཝེལུ༹པབྦཾ ཝིཡ ཨཱདིཏོ པཊྛཱཡ ཡཱཝ པརིཡོསཱནཱ ཨཝིསམཐཱུལེན སཱིསེན སམནྣཱགཏོ ནཱལི༹སཱིསོ ནཱམ. ཀཔྤསཱིསོཏི གཛམཏྠཀཾ ཝིཡ དྭིདྷཱ བྷིནྣསཱིསོ. ‘‘ཀཎྞིཀཀེསོ ཝཱ’’ཏི ཨིམསྶ ཝིཝརཎཾ ‘‘པཱཎཀེཧཱི’’ཏིཨཱདི. མཀྐཊསྶེཝ ནལཱཊེཔི ཀེསཱནཾ ཨུཊྛིཏབྷཱཝཾ སནྡྷཱཡཱཧ ‘‘སཱིསལོམེཧཱི’’ཏིཨཱདི.

མཀྐཊབྷམུཀོཏི ¶ ནལཱཊལོམེཧི ཨཝིབྷཏྟལོམབྷམུཀོ. ཨཀྑིཙཀྐེཧཱིཏི ཨཀྑིམཎྜལེཧི. ཀེཀརོཏི ཏིརིཡཾ པསྶནཀོ. ཨུདཀཏཱརཀཱཏི ཨོལོཀེནྟཱནཾ ཨུདཀེ པཊིབིམྦིཀཙྪཱཡཱ. ཨུདཀབུབྦུལ༹ནྟི ཀེཙི. ཨཀྑིཏཱརཀཱཏི ཨབྷིམུཁེ ཋིཏཱནཾ ཚཱཡཱ. ཨཀྑིབྷཎྜཀཱཏིཔི ཝདནྟི. ཨཏིཔིངྒལཀྑི མཛྫཱརཀྑི. མདྷུཔིངྒལནྟི མདྷུཝཎྞཔིངྒལཾ. ནིཔྤཁུམཀྑཱིཏི ཨེཏྠ པཁུམ-སདྡོ ཨཀྑིདལལོམེསུ ནིརུལ༹ྷོ, ཏདབྷཱཝཱ ནིཔྤཁུམཀྑི. ཨཀྑིཔཱཀེནཱཏི ཨཀྑིདལཔརིཡནྟེསུ པཱུཏིཏཱཔཛྫནརོགེན.

ཙིཔིཊནཱསིཀོཏི ཨནུནྣཏནཱསིཀོ. པཊངྒམཎྜཱུཀོ ནཱམ མཧཱམུཁམཎྜཱུཀོ. བྷིནྣམུཁོཏི ཨུཔཀྐམུཁཔརིཡོསཱནོ, སབྦདཱ ཝིཝཊམུཁོ ཝཱ. ཝངྐམུཁོཏི ཨེཀཔསྶེ ཨཔཀྐམྨ ཋིཏཧེཊྛིམཧནུཀཊྛིཀོ. ཨོཊྛཙྪིནྣཀོཏི ཨུབྷོསུ ཨོཊྛེསུ ཡཏྠ ཀཏྠཙི ཛཱཏིཡཱ ཝཱ པཙྪཱ ཝཱ སཏྠཱདིནཱ ཨཔནཱིཏམཾསེན ཨོཊྛེན སམནྣཱགཏོ. ཨེལ༹མུཁོཏི ནིཙྩཔགྒྷརིཏལཱལཱམུཁོ.

བྷིནྣགལོཏི ཨཝནཏགལོ. བྷིནྣཨུརོཏི ཨཏིནིནྣཨུརམཛ྄ཛྷོ. ཨེཝཾ བྷིནྣཔིཊྛཱིཏི. སབྦཉྩེཏནྟི ¶ ‘‘ཀཙྪུགཏྟོ’’ཏིཨཱདིཾ སནྡྷཱཡ ཝུཏྟཾ. ཨེཏྠ ཙ ཝིནིཙྪཡོ ཀུཊྛཱདཱིསུ ཝུཏྟོ ཨེཝཱཏི ཨཱཧ ‘‘ཝིནིཙྪཡོ’’ཏིཨཱདི.

ཝཱཏཎྜིཀོཏི ཨཎྜཀེསུ ཝུདྡྷིརོགེན སམནྣཱགཏོ, ཨཎྜཝཱཏརོགེན ཨུདྡྷུཏབཱིཛཎྜཀོསེན སམནྣཱགཏོ ཝཱ. ཡསྶ ནིཝཱསནེན པཊིཙྪནྣམྤི ཨུཎྞཏཾ པཀཱསཏི, སོཝ ན པབྦཱཛེཏབྦོ. ཝིཀཊོཏི ཏིརིཡཾ གམནཔཱདེཧི སམནྣཱགཏོ, ཡསྶ ཙངྐམཏོ ཛཱཎུཀཱ བཧི ནིགཙྪནྟི. སངྒྷཊྚོཏི གཙྪཏོ པརིཝཏྟནཔཱདེཧི སམནྣཱགཏོ, ཡསྶ ཙངྐམཏོ ཛཱཎུཀཱ ཨནྟོ པཝིསནྟི. མཧཱཛངྒྷོཏི ཐཱུལཛངྒྷོ. མཧཱཔཱདོཏི མཧནྟེན པཱདཏལེན ¶ ཡུཏྟོ. པཱདཝེམཛ྄ཛྷེཏི པིཊྛིཔཱདཝེམཛ྄ཛྷེ. ཨེཏེན ཨགྒཔཱདོ ཙ པཎྷི ཙ སདིསཱཝཱཏི དསྶེཏི.

༡༣༤. མཛ྄ཛྷེ སཾཀུཊིཏཔཱདཏྟཱཏི ཀུཎྛཔཱདཏཱཡ ཀཱརཎཾ དསྶེཏི, ཨགྒེ སཾཀུཊིཏཔཱདཏྟཱཏི ཀུཎྛཔཱདཏཱཡ. ཀུཎྛཔཱདསྶེཝ ཙངྐམནཝིབྷཱཝནཾ ‘‘པིཊྛིཔཱདགྒེན ཙངྐམནྟོ’’ཏི. ‘‘པཱདསྶ བཱཧིརནྟེནཱ’’ཏི ཙ ‘‘ཨབྦྷནྟརནྟེནཱ’’ཏི ཙ ཨིདཾ པཱདཏལསྶ ཨུབྷོཧི པརིཡནྟེཧི ཙངྐམནཾ སནྡྷཱཡ ཝུཏྟཾ.

མམྨནནྟི ཁལིཏཝཙནཾ, ཡོ ཨེཀམེཝཀྑརཾ ཙཏུཔཉྩཀྑཏྟུཾ ཝདཏི, ཏསྶེཏཾ ཨདྷིཝཙནཾ, ཋཱནཀརཎཝིསུདྡྷིཡཱ ཨབྷཱཝེན ཨཕུཊྛཀྑརཝཙནཾ. ཝཙནཱནུཀརཎེན ཧི སོ ‘‘མམྨནོ’’ཏི ཝུཏྟོ. ཡོ ཙ ཀརཎསམྤནྣོཔི ཨེཀམེཝཀྑརཾ ཧིཀྐཱརབཧུསོ ཝདཏི, སོཔི ཨིདྷེཝ སངྒཡ྄ཧཏི. ཡོ ཝཱ པན ཏཾ ནིགྒཧེཏྭཱཔི ཨནཱམེཌིཏཀྑརམེཝ སིཐིལཾ སིལིཊྛཝཙནཾ ཝཏྟུཾ སམཏྠོ, སོ པབྦཱཛེཏབྦོ. ཨཱཔཏྟིཏོ ན མུཙྩནྟཱིཏི ཉཏྭཱ ཀརོནྟཱཝ ན མུཙྩནྟི. ཛཱིཝིཏནྟརཱཡཱདིཨཱཔདཱསུ ཨརུཙིཡཱ ཀཱཡསཱམགྒིཾ དེནྟསྶ ཨནཱཔཏྟི.

༡༣༥. ཨབྷབྦཔུགྒལཀཐཱསུ ‘‘ཡོ ཀཱལ༹པཀྑེ ཨིཏྠཱི ཧོཏི, ཛུཎྷཔཀྑེ པུརིསོ, ཨཡཾ པཀྑཔཎྜཀོ’’ཏི ཀེཙི ཝདནྟི. ཨཊྛཀཐཱཡཾ པན ‘‘ཀཱལ༹པཀྑེ པཎྜཀོ ཧོཏི, ཛུཎྷཔཀྑེ པནསྶ པརིལཱ༹ཧོ ཝཱུཔསམྨཏཱི’’ཏི ཨཔཎྜཀཔཀྑེ པརིལཱ༹ཧཝཱུཔསམསྶེཝ ཝུཏྟཏྟཱ པཎྜཀཔཀྑེ ཨུསྶནྣཔརིལཱ༹ཧཏཱ པཎྜཀབྷཱཝཱཔཏྟཱིཏི ཝིཉྙཱཡཏཱིཏི ཝཱིམཾསིཏྭཱ ཡུཏྟཏརཾ གཧེཏབྦཾ. ཨིཏྠིབྷཱཝོ པུམྦྷཱཝོ ཝཱ ནཏྠི ཨེཏསྶཱཏི ཨབྷཱཝཀོ. ‘‘ཏསྨིཾཡེཝསྶ པཀྑེ པབྦཛྫཱ ཝཱརིཏཱཏི ཨེཏྠ ཨཔཎྜཀཔཀྑེ པབྦཱཛེཏྭཱ པཎྜཀཔཀྑེ ནཱསེཏབྦོ’’ཏི ཏཱིསུཔི གཎྛིཔདེསུ ཝུཏྟཾ. ཀེཙི པན ‘‘ཨཔཎྜཀཔཀྑེ ¶ ¶ པབྦཛིཏོ སཙེ ཀིལེསཀྑཡཾ པཱཔུཎཱཏི, ན ནཱསེཏབྦོ’’ཏི ཝདནྟི, ཏཾ ཏེསཾ མཏིམཏྟཾ. པཎྜཀསྶ ཧི ཀིལེསཀྑཡཱསམྦྷཝཏོ, ཁཱིཎཀིལེསསྶ ཙ པཎྜཀབྷཱཝཱནཱཔཏྟིཏོ. ཨཧེཏུཀཔཊིསནྡྷིཀཐཱཡཉྷི ཨཝིསེསེན པཎྜཀསྶ ཨཧེཏུཀཔཊིསནྡྷིཏཱ ཝུཏྟཱ, ཨཱསིཏྟཨུསཱུཡཔཀྑཔཎྜཀཱནཉྩ པཊིསནྡྷིཏོ པཊྛཱཡེཝ པཎྜཀབྷཱཝོ, ན པཝཏྟིཡཾཡེཝཱཏི ཝདནྟི. ཏེནེཝ ཨཧེཏུཀཔཊིསནྡྷིནིདྡེསེ ཛཙྩནྡྷབདྷིརཱདཡོ ཝིཡ པཎྜཀོ ཛཱཏིསདྡེན ཝིསེསེཏྭཱ ན ནིདྡིཊྛོ. ཙཏུཏྠཔཱརཱཛིཀསཾཝཎྞནཱཡཉྩ (པཱརཱ. ཨཊྛ. ༢.༢༣༣) ཨབྷབྦཔུགྒལེ དསྶེནྟེན པཎྜཀཏིརཙྪཱནགཏཨུབྷཏོབྱཉྫནཀཱ ཏཡོ ཝཏྠུཝིཔནྣཱ ཨཧེཏུཀཔཊིསནྡྷིཀཱ, ཏེསཾ སགྒོ ཨཝཱརིཏོ, མགྒོ པན ཝཱརིཏོཏི ཨཝིསེསཏོ ཝུཏྟནྟི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༠༩) ཨཱགཏཾ.

ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༠༩) པན པཎྜཀཝཏྠུསྨིཾ ཨཱསིཏྟཨུསཱུཡཔཀྑཔཎྜཀཱ ཏཡོཔི པུརིསབྷཱཝལིངྒཱདིཡུཏྟཱ ཨཧེཏུཀཔཊིསནྡྷིཀཱ, ཏེ ཙ ཀིལེསཔརིཡུཊྛཱནསྶ བལཝཏཱཡ ནཔུཾསཀཔཎྜཀསདིསཏྟཱ ‘‘པཎྜཀཱ’’ཏི ཝུཏྟཱ, ཏེསུ ཨཱསིཏྟཨུསཱུཡཔཎྜཀཱནཾ དྭིནྣཾ ཀིལེསཔརིཡུཊྛཱནཾ ཡོནིསོམནསིཀཱརཱདཱིཧི ཝཱིཏིཀྐམཏོ ནིཝཱརེཏུམྤི སཀྐཱ, ཏེན ཏེ པབྦཱཛེཏབྦཱཏི ཝུཏྟཱ. པཀྑཔཎྜཀསྶ པན ཀཱལ༹པཀྑེ ཨུམྨཱདོ ཝིཡ ཀིལེསཔརིལཱ༹ཧོ ཨཝཏྠརནྟོ ཨཱགཙྪཏི, ཝཱིཏིཀྐམཾ པཏྭཱ ཨེཝ ཙ ནིཝཏྟཏི, ཏསྨཱ ཏསྨིཾ པཀྑེ སོ ན པབྦཱཛེཏབྦོཏི ཝུཏྟོ, ཏདེཏཾ ཝིབྷཱགཾ དསྶེཏུཾ ‘‘ཡསྶ པརེས’’ནྟི ཝུཏྟཾ. ཏཏྠ ཨཱསིཏྟསྶཱཏི མུཁེ ཨཱསིཏྟསྶ ཨཏྟནོཔི ཨསུཙིམུཙྩནེན པརིལཱ༹ཧོ ཝཱུཔསམྨཏི. ཨུསཱུཡཱཡ ཨུཔྤནྣཱཡཱཏི ཨུསཱུཡཱཡ ཝསེན ཨཏྟནོ སེཝེཏུཀཱམཏཱརཱགེ ཨུཔྤནྣེ ཨསུཙིམུཏྟིཡཱ པརིལཱ༹ཧོ ཝཱུཔསམྨཏི.

‘‘བཱིཛཱནི ¶ ཨཔནཱིཏཱནཱི’’ཏི ཝུཏྟཏྟཱ བཱིཛེསུ ཋིཏེསུ ནིམིཏྟམཏྟེ ཨཔནཱིཏེ པཎྜཀོ ན ཧོཏི. བྷིཀྑུནོཔི ཨནཱབཱདྷཔཙྩཡཱ ཏདཔནཡནེ ཐུལླཙྩཡམེཝ, ན པཎྜཀཏྟཾ. བཱིཛེསུ པན ཨཔནཱིཏེསུ ཨངྒཛཱཏམྤི རཱགེན ཀམྨནིཡཾ ན ཧོཏི, པུམབྷཱཝོ ཝིགཙྪཏི, མསྶུཨཱདིཔུརིསལིངྒམྤི ཨུཔསམྤདཱཔི ཝིགཙྪཏི, ཀིལེསཔརིལཱ༹ཧོཔི དུནྣིཝཱརཝཱིཏིཀྐམོ ཧོཏི ནཔུཾསཀཔཎྜཀསྶ ཝིཡ, ཏསྨཱ ཨཱིདིསོ ཨུཔསམྤནྣོཔི ནཱསེཏབྦོཏི ཝདནྟི. ཡདི ཨེཝཾ ཀསྨཱ བཱིཛུདྡྷརཎེ པཱརཱཛིཀཾ ན པཉྙཏྟནྟི? ཨེཏྠ ཏཱཝ ཀེཙི ཝདནྟི ‘‘པཉྙཏྟམེཝེཏཾ བྷགཝཏཱ ‘པཎྜཀོ བྷིཀྑཝེ ཨནུཔསམྤནྣོ ན ཨུཔསམྤཱདེཏབྦོ, ཨུཔསམྤནྣོ ནཱསེཏབྦོ’ཏི ཝུཏྟཏྟཱ’’ཏི. ཀེཙི ¶ པན ‘‘ཡསྨཱ བཱིཛུདྡྷརཎཀྑཎེ པཎྜཀོ ན ཧོཏི, ཏསྨཱ ཏསྨིཾ ཁཎེ པཱརཱཛིཀཾ ན པཉྙཏྟཾ. ཡསྨཱ པན སོ ཨུདྡྷཊབཱིཛོ བྷིཀྑུ ཨཔརེན སམཡེན ཝུཏྟནཡེན པཎྜཀཏྟཾ ཨཱཔཛྫཏི, ཨབྷཱཝཀོ ཧོཏི, ཨུཔསམྤདཱཡ ཨཝཏྠུ, ཏཏོ ཨེཝ ཙསྶ ཨུཔསམྤདཱ ཝིགཙྪཏི, ཏསྨཱ ཨེས པཎྜཀཏྟུཔགམནཀཱལཏོ པཊྛཱཡ ཛཱཏིཡཱ ནཔུཾསཀཔཎྜཀེན སདྡྷིཾ ཡོཛེཏྭཱ ‘ཨུཔསམྤནྣོ ནཱསེཏབྦོ’ཏི ཨབྷབྦོཏི ཝུཏྟོ, ན ཏཏོ པུབྦེ. ཨཡཉྩ ཀིཉྩཱཔི སཧེཏུཀོ, བྷཱཝཀྑཡེན པནསྶ ཨཧེཏུཀསདིསཏཱཡ མགྒོཔི ན ཨུཔྤཛྫཏཱི’’ཏི ཝདནྟི. ཨཔརེ པན ‘‘པབྦཛྫཏོ པུབྦེ ཨུཔཀྐམེན པཎྜཀབྷཱཝམཱཔནྣཾ སནྡྷཱཡ ‘ཨུཔསམྤནྣོ ནཱསེཏབྦོ’ཏི ཝུཏྟཾ, ཨུཔསམྤནྣསྶ པན པཙྪཱ ཨུཔཀྐམེན ཨུཔསམྤདཱཔི ན ཝིགཙྪཏཱི’’ཏི, ཏཾ ན ཡུཏྟཾ. ཡདགྒེན ཧི པབྦཛྫཏོ པུབྦེ ཨུཔཀྐམེན ཨབྷབྦོ ཧོཏི, ཏདགྒེན པཙྪཱཔི ཧོཏཱིཏི ཝཱིམཾསིཏྭཱ གཧེཏབྦཾ.

ཨིཏྠཏྟཱདི བྷཱཝོ ནཏྠི ཨེཏསྶཱཏི ཨབྷཱཝཀོ. པབྦཛྫཱ ན ཝཱརིཏཱཏི ཨེཏྠ པབྦཛྫཱགྒཧཎེནེཝ ཨུཔསམྤདཱཔི གཧིཏཱ. ཏེནཱཧ ‘‘ཡསྶ ཙེཏྠ པབྦཛྫཱ ཝཱརིཏཱ’’ཏིཨཱདི. ཏསྨིཾ ¶ ཡེཝསྶ པཀྑེ པབྦཛྫཱ ཝཱརིཏཱཏི ཨེཏྠ པན ཨཔཎྜཀཔཀྑེཔི པབྦཛྫཱམཏྟམེཝ ལབྷཏི, ཨུཔསམྤདཱ པན ཏདཱཔི ན ཝཊྚཏི, པཎྜཀཔཀྑེ པན ཨཱགཏོ ལིངྒནཱསནཱཡ ནཱསེཏབྦོཏི ཝེདིཏབྦནྟི ཝུཏྟཾ.

༡༣༦. ཨུབྷཏོབྱཉྫནམསྶ ཨཏྠཱིཏི ཨུབྷཏོབྱཉྫནཀོཏི ཨིམིནཱ ཨསམཱནཱདྷིཀརཎཝིསཡོ བཱཧིརཏྠསམཱསོཡཾ, པུརིམཔདེ ཙ ཝིབྷཏྟིཨལོཔོཏི དསྶེཏི. བྱཉྫནནྟི ཙེཏྠ པུརིསནིམིཏྟཾ ཨིཏྠིནིམིཏྟཉྩ ཨདྷིཔྤེཏཾ. ཨཐ ཨུབྷཏོབྱཉྫནཀསྶ ཨེཀམེཝ ཨིནྡྲིཡཾ ཧོཏི, ཨུདཱཧུ དྭེཏི? ཨེཀམེཝ ཧོཏི, ན དྭེ. ཀཐཾ ཝིཉྙཱཡཏཱིཏི ཙེ? ‘‘ཡསྶ ཨིཏྠིནྡྲིཡཾ ཨུཔྤཛྫཏི, ཏསྶ པུརིསིནྡྲིཡཾ ཨུཔྤཛྫཏཱིཏི, ནོ. ཡསྶ ཝཱ པན པུརིསིནྡྲིཡཾ ཨུཔྤཛྫཏི, ཏསྶ ཨིཏྠིནྡྲིཡཾ ཨུཔྤཛྫཏཱིཏི, ནོ’’ཏི (ཡམ. ༣.ཨིནྡྲིཡཡམཀ.༡༨༨) ཨེཀསྨིཾ སནྟཱནེ ཨིནྡྲིཡབྷཱུཏབྷཱཝདྭཡསྶ ཨུཔྤཏྟིཡཱ ཨབྷིདྷམྨེ པཊིསེདྷིཏཏྟཱ, ཏཉྩ ཁོ ཨིཏྠིཨུབྷཏོབྱཉྫནཀསྶ ཨིཏྠིནྡྲིཡཾ, པུརིསཨུབྷཏོབྱཉྫནཀསྶ པུརིསིནྡྲིཡནྟི. ཡདི ཨེཝཾ དུཏིཡབྱཉྫནསྶ ཨབྷཱཝོ ཨཱཔཛྫཏི ཨིནྡྲིཡཉྷི བྱཉྫནསྶ ཀཱརཎཾ ཝུཏྟཾ, ཏཉྩ ཏསྶ ནཏྠཱིཏི? ཝུཙྩཏེ – ན ཏསྶ ཨིནྡྲིཡཾ དུཏིཡབྱཉྫནཀཱརཎཾ. ཀསྨཱ? སདཱ ཨབྷཱཝཏོ. ཨིཏྠིཨུབྷཏོབྱཉྫནཀསྶ ཧི ཡདཱ ཨིཏྠིཡཱ རཱགཙིཏྟཾ ཨུཔྤཛྫཏི, ཏདཱ པུརིསབྱཉྫནཾ པཱཀཊཾ ཧོཏི, ཨིཏྠིབྱཉྫནཾ པཊིཙྪནྣཾ གུལ༹ྷཾ ཧོཏི, ཏཐཱ ¶ ཨིཏརསྶ ཨིཏརཾ. ཡདི ཙ ཏེསཾ ཨིནྡྲིཡཾ དུཏིཡབྱཉྫནཀཱརཎཾ བྷཝེཡྻ, སདཱཔི བྱཉྫནདྭཡཾ ཏིཊྛེཡྻ, ན པན ཏིཊྛཏི, ཏསྨཱ ཝེདིཏབྦམེཏཾ ‘‘ན ཏསྶ ཏཾ བྱཉྫནཀཱརཎཾ, ཀམྨསཧཱཡཾ པན རཱགཙིཏྟམེཝེཏྠ ཀཱརཎ’’ནྟི. ཡསྨཱ ཙསྶ ཨེཀམེཝ ཨིནྡྲིཡཾ ཧོཏི, ཏསྨཱ ཨིཏྠིཨུབྷཏོབྱཉྫནཀོ སཡམྤི གབྦྷཾ གཎྷཱཏི, པརམྤི གཎྷཱཔེཏི. པུརིསཨུབྷཏོབྱཉྫནཀོ པརཾ གཎྷཱཔེཏི, སཡཾ པན ན གཎྷཱཏཱིཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༡༦) ཨཱགཏཾ.

ཝིམཏིཝིནོདནིཡཾ ¶ (ཝི. ཝི. ཊཱི. མཧཱཝགྒ ༢.༡༡༦) པན – ཨིཏྠིཨུབྷཏོབྱཉྫནཀོཏི ཨིཏྠིནྡྲིཡཡུཏྟོ, ཨིཏརོ པན པུརིསིནྡྲིཡཡུཏྟོ. ཨེཀསྶ ཧི བྷཱཝདྭཡཾ སཧ ན ཨུཔྤཛྫཏི ཡམཀེ (ཡམ. ༣.ཨིནྡྲིཡཡམཀ.༡༨༨) པཊིཀྑིཏྟཏྟཱ. དུཏིཡབྱཉྫནཾ པན ཀམྨསཧཱཡེན ཨཀུསལཙིཏྟེནེཝ བྷཱཝརཧིཏཾ ཨུཔྤཛྫཏི. པཀཏིཏྠིཔུརིསཱནམྤི ཀམྨམེཝ བྱཉྫནལིངྒཱནཾ ཀཱརཎཾ, ན བྷཱཝོ ཏསྶ ཀེནཙི པཙྩཡེན པཙྩཡཏྟསྶ པཊྛཱནེ ཨཝུཏྟཏྟཱ. ཀེཝལཾ བྷཱཝསཧིཏཱནཾཡེཝ བྱཉྫནལིངྒཱནཾ པཝཏྟདསྶནཏྠཾ ཨཊྛཀཐཱསུ (དྷ. ས. ཨཊྛ. ༦༣༢-༦༣༣) ‘‘ཨིཏྠིནྡྲིཡཾ པཊིཙྩ ཨིཏྠིལིངྒཱདཱིནཱི’’ཏིཨཱདིནཱ ཨིནྡྲིཡསྶ བྱཉྫནཀཱརཎཏྟེན ཝུཏྟཾ. ཨིདྷ པན ཨཀུསལབལེན ཨིནྡྲིཡཾ ཝིནཱཔི བྱཉྫནཾ ཨུཔྤཛྫཏཱིཏི ཝེདིཏབྦཾ. ཨུབྷིནྣམྤི ཙེ ཏེསཾ ཨུབྷཏོབྱཉྫནཀཱནཾ. ཡདཱ ཨིཏྠིཡཱ རཱགོ ཨུཔྤཛྫཏི, ཏདཱ པུརིསབྱཉྫནཾ པཱཀཊཾ ཧོཏི, ཨིཏརཾ པཊིཙྪནྣཾ. ཡདཱ པུརིསེ རཱགོ ཨུཔྤཛྫཏི, ཏདཱ ཨིཏྠིབྱཉྫནཾ པཱཀཊཾ ཧོཏི, ཨིཏརཾ པཊིཙྪནྣནྟི ཨཱགཏཾ.

༡༣༧. ཐེཡྻཱཡ སཾཝཱསོ ཨེཏསྶཱཏི ཐེཡྻསཾཝཱསཀོ. སོ ཙ ན སཾཝཱསམཏྟསྶེཝ ཐེནཀོ ཨིདྷཱདྷིཔྤེཏོ, ཨཐ ཁོ ལིངྒསྶ ཏདུབྷཡསྶ ཙ ཐེནཀོཔཱིཏི ཨཱཧ ‘‘ཏཡོ ཐེཡྻསཾཝཱསཀཱ’’ཏིཨཱདི. ན ཡཐཱཝུཌྜྷཾ ཝནྡནཾ སཱདིཡཏཱིཏི ཡཐཱཝུཌྜྷཾ བྷིཀྑཱུནཾ ཝཱ སཱམཎེརཱནཾ ཝཱ ཝནྡནཾ ན སཱདིཡཏི. ཡཐཱཝུཌྜྷཾ ཝནྡནཾ སཱདིཡཏཱིཏི ཨཏྟནཱ མུསཱཝཱདཾ ཀཏྭཱ དསྶིཏཝསྶཱནུརཱུཔཾ ཡཐཱཝུཌྜྷཾ ཝནྡནཾ སཱདིཡཏི. བྷིཀྑུཝསྶགཎནཱདིཀོཏི ཨིམིནཱ ན ཨེཀཀམྨཱདིཀོཝ ཨིདྷ སཾཝཱསོ ནཱམཱཏི དསྶེཏི.

༡༣༨. རཱཛ…པེ… བྷཡེནཱཏི ཨེཏྠ བྷཡ-སདྡོ པཙྩེཀཾ ཡོཛེཏབྦོ ‘‘རཱཛབྷཡེན དུབྦྷིཀྑབྷཡེནཱ’’ཏིཨཱདིནཱ. སཾཝཱསཾ ནཱདྷིཝཱསེཏི, ཡཱཝ སོ སུདྡྷམཱནསོཏི རཱཛབྷཡཱདཱིཧི ¶ གཧིཏལིངྒཏཱཡ ¶ སོ སུདྡྷམཱནསོ ཡཱཝ སཾཝཱསཾ ནཱདྷིཝཱསེཏཱིཏི ཨཏྠོ. ཡོ ཧི རཱཛབྷཡཱདིཾ ཝིནཱ ཀེཝལཾ བྷིཀྑཱུ ཝཉྩེཏྭཱ ཏེཧི སདྡྷིཾ སཾཝསིཏུཀཱམཏཱཡ ལིངྒཾ གཎྷཱཏི, སོ ཨསུདྡྷཙིཏྟཏཱཡ ལིངྒགྒཧཎེནེཝ ཐེཡྻསཾཝཱསཀོ ནཱམ ཧོཏི. ཨཡཾ པན ཏཱདིསེན ཨསུདྡྷཙིཏྟེན བྷིཀྑཱུ ཝཉྩེཏུཀཱམཏཱཡ ཨབྷཱཝཏོ ཡཱཝ སཾཝཱསཾ ནཱདྷིཝཱསེཏི, ཏཱཝ ཐེཡྻསཾཝཱསཀོ ནཱམ ན ཧོཏི. ཏེནེཝ ‘‘རཱཛབྷཡཱདཱིཧི གཧིཏལིངྒཱནཾ ‘གིཧཱི མཾ སམཎོཏི ཛཱནནྟཱུ’ཏི ཝཉྩནཙིཏྟེ སཏིཔི བྷིཀྑཱུནཾ ཝཉྩེཏུཀཱམཏཱཡ ཨབྷཱཝཱ དོསོ ན ཛཱཏོ’’ཏི ཏཱིསུཔི གཎྛིཔདེསུ ཝུཏྟཾ. ཀེཙི པན ‘‘ཝཱུཔསནྟབྷཡཏཱ ཨིདྷ སུདྡྷཙིཏྟཏཱ’’ཏི ཝདནྟི, ཨེཝཉྩ སཏི སོ ཝཱུཔསནྟབྷཡོ ཡཱཝ སཾཝཱསཾ ནཱདྷིཝཱསེཏི, ཏཱཝ ཐེཡྻསཾཝཱསཀོ ན ཧོཏཱིཏི ཨཡམཏྠོ ཝིཉྙཱཡཏི. ཨིམསྨིཉྩ ཨཏྠེ ཝིཉྙཱཡམཱནེ ཨཝཱུཔསནྟབྷཡསྶ སཾཝཱསསཱདིཡནེཔི ཐེཡྻསཾཝཱསཀོ ན ཧོཏཱིཏི ཨཱཔཛྫེཡྻ, ན ཙ ཨཊྛཀཐཱཡཾ ཨཝཱུཔསནྟབྷཡསྶ སཾཝཱསསཱདིཡནེཔི ཨཐེཡྻསཾཝཱསཀཏཱ དསྶིཏཱ. སབྦཔཱསཎྜིཡབྷཏྟཱནི བྷུཉྫནྟོཏི ཙ ཨིམིནཱ ཨཝཱུཔསནྟབྷཡེནཔི སཾཝཱསཾ ཨསཱདིཡནྟེནེཝ བྷཝིཏབྦནྟི དཱིཔེཏི. ཏེནེཝ ཏཱིསུཔི གཎྛིཔདེསུ ཝུཏྟཾ ‘‘ཡསྨཱ ཝིཧཱརཾ ཨཱགནྟྭཱ སངྒྷིཀཾ གཎྷནྟསྶ སཾཝཱསཾ པརིཧརིཏུཾ དུཀྐརཾ, ཏསྨཱ ‘སབྦཔཱསཎྜིཡབྷཏྟཱནི བྷུཉྫནྟོ’ཏི ཨིདཾ ཝུཏྟ’’ནྟི. ཏསྨཱ རཱཛབྷཡཱདཱིཧི གཧིཏལིངྒཏཱཡེཝེཏྠ སུདྡྷཙིཏྟཏཱཏི གཧེཏབྦཾ.

སབྦཔཱསཎྜིཡབྷཏྟཱནཱིཏི སབྦསཱམཡིཀཱནཾ སཱདྷཱརཎཾ ཀཏྭཱ ཝཱིཐིཙཏུཀྐཱདཱིསུ ཋཔེཏྭཱ དཱཏབྦབྷཏྟཱནི. ཀཱཡཔརིཧཱརིཡཱནཱིཏི ཀཱཡེན པརིཧརིཏབྦཱནི. ཨབྦྷུགྒཙྪནྟཱིཏི ཨབྷིམུཁཾ གཙྪནྟི. ཀམྨནྟཱནུཊྛཱནེནཱཏི ཀསིགོརཀྑཱདིཀམྨཱཀརཎེན. ཏདེཝ པཏྟཙཱིཝརཾ ཨཱདཱཡ ཝིཧཱརཾ གཙྪཏཱིཏི ¶ ཙཱིཝརཱནི ནིཝཱསནཔཱརུཔནཝསེན ཨཱདཱཡ, པཏྟཉྩ ཨཾསཀཱུཊེ ལགྒེཏྭཱ ཝིཧཱརཾ གཙྪཏི.

ནཱཔི སཡཾ ཛཱནཱཏཱིཏི ‘‘ཡོ ཨེཝཾ པབྦཛཏི, སོ ཐེཡྻསཾཝཱསཀོ ནཱམ ཧོཏཱི’’ཏི ཝཱ ‘‘ཨེཝཾ ཀཱཏུཾ ན ལབྷཏཱི’’ཏི ཝཱ ‘‘ཨེཝཾ པབྦཛིཏོ སམཎོ ནཱམ ན ཧོཏཱི’’ཏི ཝཱ ན ཛཱནཱཏི. ཡོ ཨེཝཾ པབྦཛཏི, སོ ཐེཡྻསཾཝཱསཀོ ནཱམ ཧོཏཱིཏི ཨིདཾ པན ནིདསྶནམཏྟཾ. ཨནུཔསམྤནྣཀཱལེཡེཝཱཏི ཨིམིནཱ ཨུཔསམྤནྣཀཱལེ སུཏྭཱ སཙེཔི ནཱརོཙེཏི, ཐེཡྻསཾཝཱསཀོ ན ཧོཏཱིཏི དཱིཔེཏི.

སིཀྑཾ ¶ ཨཔྤཙྩཀྑཱཡ…པེ… ཐེཡྻསཾཝཱསཀོ ན ཧོཏཱིཏི ཨིདཾ བྷིཀྑཱུཧི དིནྣལིངྒསྶ ཨཔརིཙྩཏྟཏྟཱ ན ལིངྒཏྠེནཀོ ཧོཏི, ལིངྒཱནུརཱུཔསྶ སཾཝཱསསྶ སཱདིཏཏྟཱ ནཱཔི སཾཝཱསཏྠེནཀོ ཧོཏཱིཏི ཝུཏྟཾ. ཨེཀོ བྷིཀྑུ ཀཱསཱཡེ སཨུསྶཱཧོཝ ཨོདཱཏཾ ནིཝཱསེཏྭཱཏི ཨེཏྠཱཔི ཨིདམེཝ ཀཱརཎཾ དཊྛབྦཾ. པརཏོ ‘‘སཱམཎེརོ སལིངྒེ ཋིཏོ’’ཏིཨཱདིནཱ སཱམཎེརསྶ ཝུཏྟཝིདྷཱནེསུཔི ཨཐེཡྻསཾཝཱསཔཀྑེ ཨཡམེཝ ནཡོ. ‘‘བྷིཀྑུནིཡཱཔི ཨེསེཝ ནཡོ’’ཏི ཝུཏྟམེཝཏྠཾ ‘‘སཱཔི གིཧིབྷཱཝཾ པཏྠཡམཱནཱ’’ཏིཨཱདིནཱ ཝིབྷཱཝེཏི.

སཙེ ཀོཙི ཝུཌྜྷཔབྦཛིཏོཏི སཱམཎེརཾ སནྡྷཱཡ ཝུཏྟཾ. མཧཱཔེལཱ༹དཱིསཱུཏི ཨེཏེན གིཧིསནྟཀཾ དསྶིཏཾ. སཱམཎེརཔཊིཔཱཊིཡཱ…པེ… ཐེཡྻསཾཝཱསཀོ ན ཧོཏཱིཏི ཨེཏྠ ཀིཉྩཱཔི ཐེཡྻསཾཝཱསཀོ ན ཧོཏི, པཱརཱཛིཀཾ པན ཨཱཔཛྫཏིཡེཝ. སེསམེཏྠ ཨུཏྟཱནམེཝཱཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༡༠) ཝུཏྟཾ.

ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༡༠) པན – ཐེཡྻཱཡ ལིངྒགྒཧཎམཏྟམྤི ཨིདྷ སཾཝཱསོ ཨེཝཱཏི ཨཱཧ ‘‘ཏཡོ ཐེཡྻསཾཝཱསཀཱ’’ཏི. ན ¶ ཡཐཱཝུཌྜྷཾ ཝནྡནནྟི བྷིཀྑཱུནཾ སཱམཎེརཱནཾ ཝཱ ཝནྡནཾ ན སཱདིཡཏི. ཡཐཱཝུཌྜྷཾ ཝནྡནནྟི ཨཏྟནཱ མུསཱཝཱདེན དསྶིཏཝསྶཀྐམེན བྷིཀྑཱུནཾ ཝནྡནཾ སཱདིཡཏི. དཧརསཱམཎེརོ པན ཝུཌྜྷསཱམཎེརཱནཾ, དཧརབྷིཀྑཱུ ཙ ཝུཌྜྷཱནཾ ཝནྡནཾ སཱདིཡནྟོཔི ཐེཡྻསཾཝཱསཀོ ན ཧོཏི. ཨིམསྨིཾ ཨཏྠེཏི སཾཝཱསཏྠེནཀཏྠེ. བྷིཀྑུཝསྶཱནཱིཏི ཨིདཾ སཾཝཱསཏྠེནཀེ ཝུཏྟཔཱཋཝསེན ཝུཏྟཾ, སཡམེཝ པན པབྦཛིཏྭཱ སཱམཎེརཝསྶཱནི གཎེནྟོཔི ཨུབྷཡཏྠེནཀོ ཨེཝ. ན ཀེཝལཉྩ པུརིསོཝ, ཨིཏྠཱིཔི བྷིཀྑཱུནཱིསུ ཨེཝཾ པཊིཔཛྫཏི, ཐེཡྻསཾཝཱསིཀཱཝ. ཨཱདིཀམྨིཀཱཔི ཙེཏྠ ན མུཙྩནྟི. ཨུཔསམྤནྣེསུ ཨེཝ པཉྙཏྟཱཔཏྟིཾ པཊིཙྩ ཨཱདིཀམྨིཀཱ ཝུཏྟཱ, ཏེནེཝེཏྠ ཨཱདིཀམྨིཀོཔི ན མུཏྟོ.

རཱཛ…པེ… བྷཡེནཱཏི ཨེཏྠ བྷཡ-སདྡོ པཙྩེཀཾ ཡོཛེཏབྦོ. ཡཱཝ སོ སུདྡྷམཱནསོཏི ‘‘ཨིམིནཱ ལིངྒེན བྷིཀྑཱུ ཝཉྩེཏྭཱ ཏེཧི སཾཝསིསྶཱམཱི’’ཏི ཨསུདྡྷཙིཏྟཱབྷཱཝེན སུདྡྷཙིཏྟོ. ཏེན ཧི ཨསུདྡྷཙིཏྟེན ལིངྒེ གཧིཏམཏྟེ པཙྪཱ བྷིཀྑཱུཧི སཧ སཾཝསཏུ ཝཱ མཱ ཝཱ, ལིངྒཏྠེནཀོ ཧོཏི. པཙྪཱ སཾཝསནྟོཔི ཨབྷབྦོ ཧུཏྭཱ སཾཝསཏི, ཏསྨཱ ཨུབྷཡཏྠེནཀོཔི ལིངྒཏྠེནཀེ ཨེཝ པཝིསཏཱིཏི ཝེདིཏབྦཾ. ཡོ པན རཱཛཱདིབྷཡེན སུདྡྷཙིཏྟོཝ ལིངྒཾ གཧེཏྭཱ ཝིཙརནྟོ ¶ པཙྪཱ ‘‘བྷིཀྑུཝསྶཱནི གཎེཏྭཱ ཛཱིཝསྶཱམཱི’’ཏི ཨསུདྡྷཙིཏྟཾ ཨུཔྤཱདེཏི, སོ ཙིཏྟུཔྤཱདམཏྟེན ཐེཡྻསཾཝཱསཀོ ན ཧོཏི སུདྡྷཙིཏྟེན གཧིཏལིངྒཏྟཱ. སཙེ པན སོ བྷིཀྑཱུནཾ སནྟིཀཾ གནྟྭཱ སཱམཎེརཝསྶགཎནཱདིཾ ཀརོཏི, ཏདཱ སཾཝཱསཏྠེནཀོ, ཨུབྷཡཏྠེནཀོ ཝཱ ཧོཏཱིཏི དཊྛབྦཾ. ཡཾ པན པརཏོ ‘‘སཧ དྷུརནིཀྑེཔེན ཨཡམྤི ཐེཡྻསཾཝཱསཀོཝཱ’’ཏི ཝུཏྟཾ, ཏཾ བྷིཀྑཱུཧི སངྒམྨ སཾཝཱསཱདྷིཝཱསནཝསེན དྷུརནིཀྑེཔཾ སནྡྷཱཡ ཝུཏྟཾ. ཏེན ཝུཏྟཾ ‘‘སཾཝཱསཾ ནཱདྷིཝཱསེཏི, ཡཱཝཱ’’ཏི ¶ , ཏསྶ ཏཱཝ ཐེཡྻསཾཝཱསཀོ ནཱམ ན ཝུཙྩཏཱིཏི སམྦནྡྷོ དཊྛབྦོ. ཨེཏྠ ཙ ཙོརཱདིབྷཡཾ ཝིནཱཔི ཀཱིལཱ༹དྷིཔྤཱཡེན ལིངྒཾ གཧེཏྭཱ བྷིཀྑཱུནམྤི སནྟིཀེ པབྦཛིཏཱལཡཾ དསྶེཏྭཱ ཝནྡནཱདིཾ ཨསཱདིཡནྟོཔི ‘‘སོབྷཏི ནུ ཁོ མེ པབྦཛིཏལིངྒ’’ནྟིཨཱདིནཱ སུདྡྷཙིཏྟེན གཎྷནྟོཔི ཐེཡྻསཾཝཱསཀོ ན ཧོཏཱིཏི དཊྛབྦཾ.

སབྦཔཱསཎྜིཡབྷཏྟཱནཱིཏི སབྦསཱམཡིཀཱནཾ སཱདྷཱརཎཾ ཀཏྭཱ པཉྙཏྟཱནི བྷཏྟཱནི. ཨིདཉྩ བྷིཀྑཱུནཉྙེཝ ནིཡམིཏབྷཏྟགྒཧཎེ སཾཝཱསོཔི སམྦྷཝེཡྻཱཏི སབྦསཱདྷཱརཎབྷཏྟཾ ཝུཏྟཾ. སཾཝཱསཾ པན ཨསཱདིཡིཏྭཱ ཨབྷིཀྑུཀཝིཧཱརཱདཱིསུ ཝིཧཱརབྷཏྟཱདཱིནི བྷུཉྫནྟོཔི ཐེཡྻསཾཝཱསཀོ ན ཧོཏི ཨེཝ. ཀམྨནྟཱནུཊྛཱནེནཱཏི ཀསིཨཱདིཀམྨཱཀརཎེན. པཏྟཙཱིཝརཾ ཨཱདཱཡཱཏི བྷིཀྑུལིངྒཝསེན སརཱིརེན དྷཱརེཏྭཱ.

ཡོ ཨེཝཾ པབྦཛཏི, སོ ཐེཡྻསཾཝཱསཀོ ནཱམ ཧོཏཱིཏི ཨིདཾ ནིདསྶནམཏྟཾ. ‘‘ཐེཡྻསཾཝཱསཀོ’’ཏི པན ནཱམཾ ཨཛཱནནྟོཔི ‘‘ཨེཝཾ ཀཱཏུཾ ན ཝཊྚཏཱི’’ཏི ཝཱ ‘‘ཀརོནྟོ སམཎོ ནཱམ ན ཧོཏཱི’’ཏི ཝཱ ‘‘ཡདི ཨཱརོཙེསྶཱམི, ཚཌྜཡིསྶནྟི མ’’ནྟི ཝཱ ‘‘ཡེན ཀེནཙི པབྦཛྫཱ མེ ན རུཧཏཱི’’ཏི ཛཱནཱཏི, ཐེཡྻསཾཝཱསཀོ ཧོཏི. ཡོ པན པཋམཾ ‘‘པབྦཛྫཱ ཨེཝཾ མེ གཧིཏཱ’’ཏི སཉྙཱི ཀེཝལཾ ཨནྟརཱ ཨཏྟནོ སེཏཝཏྠནིཝཱསནཱདིཝིཔྤཀཱརཾ པཀཱསེཏུཾ ལཛྫནྟོ ན ཀཐེཏི, སོ ཐེཡྻསཾཝཱསཀོ ན ཧོཏི. ཨནུཔསམྤནྣཀཱལེཡེཝཱཏི ཨེཏྠ ཨཝདྷཱརཎེན ཨུཔསམྤནྣཀཱལེ ཐེཡྻསཾཝཱསཀལཀྑཎཾ ཉཏྭཱ ཝཉྩནཱཡཔི ནཱརོཙེཏི, ཐེཡྻསཾཝཱསཀོ ན ཧོཏཱིཏི དཱིཔེཏི. སོ ཧི སུདྡྷཙིཏྟེན གཧིཏལིངྒཏྟཱ ལིངྒཏྠེནཀོ ན ཧོཏི, ལདྡྷཱུཔསམྤདཏྟཱ ཏདནུགུཎསྶེཝ སཾཝཱསསྶ སཱདིཏཏྟཱ སཾཝཱསཏྠེནཀོཔི ¶ ན ཧོཏི. ཨནུཔསམྤནྣོ པན ལིངྒཏྠེནཀོ ཧོཏི, སཾཝཱསཱརཧསྶ ལིངྒསྶ གཧིཏཏྟཱ སཾཝཱསསཱདིཡནམཏྟེན སཾཝཱསཏྠེནཀོ ཧོཏི.

སལིངྒེ ¶ ཋིཏོཏི སལིངྒབྷཱཝེ ཋིཏོ. ཐེཡྻསཾཝཱསཀོ ན ཧོཏཱིཏི བྷིཀྑཱུཧི དིནྣལིངྒསྶ ཨཔརིཙྩཏྟཏྟཱ ལིངྒཏྠེནཀོ ན ཧོཏི. བྷིཀྑུཔཊིཉྙཱཡ ཨཔརིཙྩཏྟཏྟཱ སཾཝཱསཏྠེནཀོ ན ཧོཏི. ཡཾ པན མཱཏིཀཱཊྛཀཐཱཡཾ (ཀངྑཱ. ཨཊྛ. པཋམཔཱརཱཛིཀཝཎྞནཱ) ‘‘ལིངྒཱནུརཱུཔསྶ སཾཝཱསསྶ སཱདིཏཏྟཱ ནཱཔི སཾཝཱསཏྠེནཀོ’’ཏི ཀཱརཎཾ ཝུཏྟཾ, ཏམྤི ཨིདམེཝ ཀཱརཎཾ སནྡྷཱཡ ཝུཏྟཾ. ཨིཏརཐཱ སཱམཎེརསྶཱཔི བྷིཀྑུཝསྶགཎནཱདཱིསུ ལིངྒཱནུརཱུཔསཾཝཱསོ ཨེཝ སཱདིཏོཏི སཾཝཱསཏྠེནཀཏཱ ན སིཡཱ བྷིཀྑཱུཧི དིནྣལིངྒསྶ ཨུབྷིནྣམྤི སཱདྷཱརཎཏྟཱ. ཡཐཱ ཙེཏྠ བྷིཀྑུ, ཨེཝཾ སཱམཎེརོཔི པཱརཱཛིཀཾ སམཱཔནྣོ སཱམཎེརཔཊིཉྙཱཡ ཨཔརིཙྩཏྟཏྟཱ སཾཝཱསཏྠེནཀོ ན ཧོཏཱིཏི ཝེདིཏབྦོ. སོབྷཏཱིཏི སམྤཊིཙྪིཏྭཱཏི ཀཱསཱཝདྷཱརཎེ དྷུརཾ ནིཀྑིཔིཏྭཱ གིཧིབྷཱཝཾ སམྤཊིཙྪིཏྭཱ.

སཙེ ཀོཙི ཝུཌྜྷཔབྦཛིཏོཏི སཱམཎེརཾ སནྡྷཱཡ ཝུཏྟཾ. མཧཱཔེལཱ༹དཱིསཱུཏི ཝིལཱིཝཱདིམཡེསུ གྷརདྭཱརེསུ ཋཔིཏེསུ བྷཏྟབྷཱཛནཝིསེསེསུ. ཨེཏེན ཝིཧཱརེ བྷིཀྑཱུཧི སདྡྷིཾ ཝསྶགཎནཱདཱིནཾ ཨཀརཎཾ དསྶེཏཱིཏི ཝུཏྟཾ.

༡༣༩. ཏིཏྠིཡཔཀྐནྟཀཀཐཱཡཾ ཏེསཾ ལིངྒེ ཨཱདིནྣམཏྟེ ཏིཏྠིཡཔཀྐནྟཀོ ཧོཏཱིཏི ‘‘ཏིཏྠིཡོ བྷཝིསྶཱམཱི’’ཏི གཏསྶ ལིངྒགྒཧཎེནེཝ ཏེསཾ ལདྡྷིཔི གཧིཏཱཡེཝ ཧོཏཱིཏི ཀཏྭཱ ཝུཏྟཾ. ཀེནཙི པན ‘‘ཏེསཾ ལིངྒེ ཨཱདིནྣམཏྟེ ལདྡྷིཡཱ གཧིཏཱཡཔི ཨགྒཧིཏཱཡཔི ཏིཏྠིཡཔཀྐནྟཀོ ཧོཏཱི’’ཏི ཝུཏྟཾ, ཏཾ ན གཧེཏབྦཾ. ན ཧི ‘‘ཏིཏྠིཡོ བྷཝིསྶཱམཱི’’ཏི གཏསྶ ལིངྒསམྤཊིཙྪནཏོ ཨཉྙཾ ལདྡྷིགྒཧཎཾ ¶ ནཱམ ཨཏྠི. ལིངྒསམྤཊིཙྪནེནེཝ ཧི སོ གཧིཏལདྡྷིཀོ ཧོཏི. ཏེནེཝ ‘‘ཝཱིམཾསནཏྠཾ ཀུསཙཱིརཱདཱིནི…པེ… ཡཱཝ ན སམྤཊིཙྪཏི, ཏཱཝ ཏཾ ལདྡྷི རཀྑཏི, སམྤཊིཙྪིཏམཏྟེ ཏིཏྠིཡཔཀྐནྟཀོ ཧོཏཱི’’ཏི ཝུཏྟཾ. ནགྒོཝ ཨཱཛཱིཝཀཱནཾ ཨུཔསྶཡཾ གཙྪཏི, པདཝཱརེ པདཝཱརེ དུཀྐཊནྟི ‘‘ཨཱཛཱིཝཀོ བྷཝིསྶ’’ནྟི ཨསུདྡྷཙིཏྟེན གམནཔཙྩཡཱ དུཀྐཊཾ ཝུཏྟཾ. ནགྒེན ཧུཏྭཱ གམནཔཙྩཡཱཔི པདཝཱརེ དུཀྐཊཱ ན མུཙྩཏིཡེཝཱཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༡༠) ཝུཏྟཾ.

ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༡༠) པན – ཏིཏྠིཡཔཀྐནྟཀཱདིཀཐཱསུ ཏེསཾ ལིངྒེ ཨཱདིནྣམཏྟེཏི ཝཱིམཾསཱདིཨདྷིཔྤཱཡཾ ཝིནཱ ‘‘ཏིཏྠིཡོ བྷཝིསྶཱམཱི’’ཏི སནྣིཊྛཱནཝསེན ལིངྒེ ཀཱཡེན དྷཱརིཏམཏྟེ. སཡམེཝཱཏི ཏིཏྠིཡཱནཾ སནྟིཀཾ ཨགནྟྭཱ ¶ སཡམེཝ སངྒྷཱརཱམེཔི ཀུསཙཱིརཱདཱིནི ནིཝཱསེཏི. ཨཱཛཱིཝཀོ བྷཝིསྶནྟི…པེ… གཙྪཏཱིཏི ཨཱཛཱིཝཀཱནཾ སནྟིཀེ ཏེསཾ པབྦཛནཝིདྷིནཱ ‘‘ཨཱཛཱིཝཀོ བྷཝིསྶཱམཱི’’ཏི གཙྪཏི. ཏསྶ ཧི ཏིཏྠིཡབྷཱཝཱུཔགམནཾ པཏི སནྣིཊྛཱནེ ཝིཛྫམཱནེཔི ‘‘གནྟྭཱ བྷཝིསྶཱམཱི’’ཏི པརིཀཔྤིཏཏྟཱ པདཝཱརེ དུཀྐཊམེཝ ཝུཏྟཾ. དུཀྐཊནྟི པཱལི༹ཡཱ ཨཝུཏྟེཔི མེཐུནཱདཱིསུ ཝུཏྟཔུབྦཔཡོགདུཀྐཊཱནུལོམཏོ ཝུཏྟཾ. ཨེཏེན ཙ སནྣིཊྛཱནཝསེན ལིངྒེ སམྤཊིཙྪིཏེ པཱརཱཛིཀཾ, ཏཏོ པུརིམཔཡོགེ ཐུལླཙྩཡཉྩ ཝཏྟབྦམེཝ. ཐུལླཙྩཡཀྑཎེ ནིཝཏྟནྟོཔི ཨཱཔཏྟིཾ དེསཱཔེཏྭཱ མུཙྩཏི ཨེཝཱཏི དཊྛབྦཾ. ཡཐཱ ཙེཏྠ, ཨེཝཾ སངྒྷབྷེདེཔི ལོཧིཏུཔྤཱདེཔི བྷིཀྑཱུནཾ པུབྦཔཡོགཱདཱིསུ དུཀྐཊཐུལླཙྩཡཔཱརཱཛིཀཱཧི མུཙྩནསཱིམཱ ཙ ཝེདིཏབྦཱ. སཱསནཝིརུདྡྷཏཱཡེཏྠ ཨཱདིཀམྨིཀཱནམྤི ཨནཱཔཏྟི ན ཝུཏྟཱ. པབྦཛྫཱཡཔི ཨབྷབྦཏཱདསྶནཏྠཾ པནེཏེ ཨཉྙེ ཙ པཱརཱཛིཀཀཎྜེ ཝིསུཾ ¶ སིཀྑཱཔདེན པཱརཱཛིཀཱདིཾ ཨདསྶེཏྭཱ ཨིདྷ ཨབྷབྦེསུ ཨེཝ ཝུཏྟཱཏི ཝེདིཏབྦཾ.

ཏཾ ལདྡྷཱིཏི ཏིཏྠིཡཝེསེ སེཊྛབྷཱཝགྒཧཎམེཝ སནྡྷཱཡ ཝུཏྟཾ. ཏེསཉྷི ཏིཏྠིཡཱནཾ སསྶཏཱདིགྒཱཧཾ གཎྷནྟོཔི ལིངྒེ ཨསམྤཊིཙྪིཏེ ཏིཏྠིཡཔཀྐནྟཀོ ན ཧོཏི, ཏཾ ལདྡྷིཾ ཨགྒཧེཏྭཱཔི ‘‘ཨེཏེསཾ ཝཏཙརིཡཱ སུནྡརཱ’’ཏི ལིངྒཾ སམྤཊིཙྪནྟོ ཏིཏྠིཡཔཀྐནྟཀོ ཧོཏི ཨེཝ. ལདྡྷིཡཱ ཨབྷཱཝེནཱཏི བྷིཀྑུབྷཱཝེ སཱལཡཏཱཡ ཏིཏྠིཡབྷཱཝཱུཔགམནལདྡྷིཡཱ ཨབྷཱཝེན. ཨེཏེན ཙ ཨཱཔདཱསུ ཀུསཙཱིརཱདིཾ པཱརུཔནྟསྶཔི ནགྒསྶ ཝིཡ ཨནཱཔཏྟཱིཏི དསྶེཏི. ཨུཔསམྤནྣབྷིཀྑུནཱ ཀཐིཏོཏི ཨེཏྠ སངྒྷབྷེདཀོཔི ཨུཔསམྤནྣབྷིཀྑུནཱཝ ཀཐིཏོ, མཱཏུགྷཱཏཀཱདཡོ པན ཨནུཔསམྤནྣེནཱཏིཔི དཊྛབྦནྟི ཨཱགཏཾ.

༡༤༠. ཏིརཙྪཱནཀཐཱཡཾ ‘‘ཡོ ཀོཙི ཨམནུསྶཛཱཏིཡོ, སབྦོཝ ཨིམསྨིཾ ཨཏྠེ ཏིརཙྪཱནགཏོཏི ཝེདིཏབྦོ’’ཏི ཨེཏེན ཨེསོ མནུསྶཛཱཏིཡོ ཨེཝ བྷགཝཏོ སཱསནེ པབྦཛིཏུཾ ཝཱ ཨུཔསམྤཛྫིཏུཾ ཝཱ ལབྷཏི, ན ཏཏོ ཨཉྙེཏི དཱིཔེཏི. ཏེནཱཧ བྷགཝཱ ‘‘ཏུམྷེ ཁོཏྠ ནཱགཱ ཨཝིརུལ༹ྷིདྷམྨཱ ཨིམསྨིཾ དྷམྨཝིནཡེ’’ཏི (མཧཱཝ. ༡༡༡).

༡༤༡. ཨཱནནྟརིཡཀཐཱཡཾ ཏིརཙྪཱནཱདིཨམནུསྶཛཱཏིཏོ མནུསྶཛཱཏིཀཱནཉྙེཝ པུཏྟེསུ མེཏྟཱདཡོཔི ཏིཀྑཝིསདཱ ཧོནྟི ལོཀུཏྟརགུཎཱ ཝིཡཱཏི ཨཱཧ ‘‘མནུསྶིཏྠིབྷཱུཏཱ ཛནིཀཱ མཱཏཱ’’ཏི. ཡཐཱ མནུསྶཱནཉྙེཝ ཀུསལཔཝཏྟི ཏིཀྑཝིསདཱ, ཨེཝཾ ཨཀུསལཔཝཏྟིཔཱིཏི ཨཱཧ ‘‘སཡམྤི ¶ མནུསྶཛཱཏིཀེནེཝཱ’’ཏིཨཱདི. ཨཐ ཝཱ ཡཐཱ སམཱནཛཱཏིཡསྶ ཝིཀོཔནེ ཀམྨཾ གརུཏརཾ, ན ཏཐཱ ཝིཛཱཏིཡསྶཱཏི ཨཱཧ ‘‘མནུསྶིཏྠིབྷཱུཏཱ’’ཏི. པུཏྟསམྦནྡྷེན མཱཏུཔིཏུསམཉྙཱ ¶ , དཏྟཀིཏྟིམཱདིཝསེནཔི པུཏྟཝོཧཱརོ ལོཀེ དིསྶཏི, སོ ཙ ཁོ པརིཡཱཡཏོཏི ནིཔྤརིཡཱཡསིདྡྷཏཾ དསྶེཏུཾ ‘‘ཛནིཀཱ མཱཏཱ’’ཏི ཝུཏྟཾ. ཡཐཱ མནུསྶཏྟབྷཱཝེ ཋིཏསྶེཝ ཀུསལདྷམྨཱནཾ ཏིཀྑཝིསདསཱུརབྷཱཝཱཔཏྟི ཡཐཱ ཏཾ ཏིཎྞམྤི བོདྷིསཏྟཱནཾ བོདྷིཏྟཡནིབྦཏྟིཡཾ, ཨེཝཾ མནུསྶཏྟབྷཱཝེ ཋིཏསྶེཝ ཨཀུསལདྷམྨཱནམྤི ཏིཀྑཝིསདསཱུརབྷཱཝཱཔཏྟཱིཏི ཨཱཧ ‘‘སཡམྤི མནུསྶཛཱཏིཀེནེཝཱ’’ཏི. ཨཱནནྟརིཡེནཱཏི ཨེཏྠ ཙུཏིཨནནྟརཾ ནིརཡེ པཊིསནྡྷིཕལཾ ཨནནྟརཾ ནཱམ, ཏསྨིཾ ཨནནྟརེ ཛནཀཏྟེན ནིཡུཏྟཾ ཨཱནནྟརིཡཾ, ཏེན. ཨཐ ཝཱ ཙུཏིཨནནྟརཾ ཕལཾ ཨནནྟརཾ ནཱམ, ཏསྨིཾ ཨནནྟརེ ནིཡུཏྟཾ, ཏནྣིབྦཏྟནེན ཨནནྟརཀརཎསཱིལཾ, ཨནནྟརཔྤཡོཛནཾ ཝཱ ཨཱནནྟརིཡཾ, ཏེན ཨཱནནྟརིཡེན མཱཏུགྷཱཏཀཀམྨེན. པིཏུགྷཱཏཀེཔི ‘‘ཡེན མནུསྶབྷཱུཏོ ཛནཀོ པིཏཱ སཡམྤི མནུསྶཛཱཏིཀེནེཝ སཏཱ སཉྩིཙྩ ཛཱིཝིཏཱ ཝོརོཔིཏོ, ཨཡཾ ཨཱནནྟརིཡེན པིཏུགྷཱཏཀཀམྨེན པིཏུགྷཱཏཀོ’’ཏིཨཱདིནཱ སབྦཾ ཝེདིཏབྦནྟི ཨཱཧ ‘‘པིཏུགྷཱཏཀེཔི ཨེསེཝ ནཡོ’’ཏི.

པརིཝཏྟིཏལིངྒམྤི མཱཏརཾ ཝཱ པིཏརཾ ཝཱ ཛཱིཝིཏཱ ཝོརོཔེནྟསྶ ཨཱནནྟརིཡཀམྨཾ ཧོཏིཡེཝ. སཏིཔི ཧི ལིངྒཔརིཝཏྟེ སོ ཨེཝ ཨེཀཀམྨནིབྦཏྟོ བྷཝངྒཔྤབནྡྷོ ཛཱིཝིཏཔྤབནྡྷོ, ན ཨཉྙོཏི. ཡོ པན སཡཾ མནུསྶོ ཏིརཙྪཱནབྷཱུཏཾ པིཏརཾ ཝཱ མཱཏརཾ ཝཱ, སཡཾ ཝཱ ཏིརཙྪཱནབྷཱུཏོ མནུསྶབྷཱུཏཾ, ཏིརཙྪཱནོཡེཝ ཝཱ ཏིརཙྪཱནབྷཱུཏཾ ཛཱིཝིཏཱ ཝོརོཔེཏི, ཏསྶ ཀམྨཾ ཨཱནནྟརིཡཾ ན ཧོཏི, བྷཱརིཡཾ པན ཧོཏི, ཨཱནནྟརིཡཾ ཨཱཧཙྩེཝ ཏིཊྛཏི. ཨེལ༹ཀཙཏུཀྐཾ སངྒཱམཙཏུཀྐཾ ཙོརཙཏུཀྐཉྩེཏྠ ཀཐེཏབྦཾ. ‘‘ཨེལ༹ཀཾ མཱརེམཱི’’ཏི ཨབྷིསནྡྷིནཱཔི ཧི ཨེལ༹ཀཊྛཱནེ ཋིཏཾ མནུསྶོ མནུསྶབྷཱུཏཾ མཱཏརཾ ཝཱ པིཏརཾ ཝཱ མཱརེནྟོ ཨཱནནྟརིཡཾ ¶ ཕུསཏི མརཎཱདྷིཔྤཱཡེནེཝ ཨཱནནྟརིཡཝཏྠུནོ ཝིཀོཔིཏཏྟཱ. ཨེལ༹ཀཱབྷིསནྡྷིནཱ, པན མཱཏཱཔིཏིཨབྷིསནྡྷིནཱ ཝཱ ཨེལ༹ཀཾ མཱརེནྟོ ཨཱནནྟརིཡཾ ན ཕུསཏི ཨཱནནྟརིཡཝཏྠུནོ ཨབྷཱཝཏོ. མཱཏཱཔིཏིཨབྷིསནྡྷིནཱ མཱཏཱཔིཏརོ མཱརེནྟོ ཕུསྶཏེཝ. ཨེས ནཡོ ཨིཏརསྨིམྤི ཙཏུཀྐདྭཡེ. ཡཐཱ ཙ མཱཏཱཔིཏཱུསུ, ཨེཝཾ ཨརཧནྟེསུ ཨེཏཱནི ཙཏུཀྐཱནི ཝེདིཏབྦཱནི. སབྦཏྠ ཧི པུརིམཾ ཨབྷིསནྡྷིཙིཏྟཾ ཨཔྤམཱཎཾ, ཝདྷཀཙིཏྟཾ, པན ཏདཱརམྨཎཛཱིཝིཏིནྡྲིཡཉྩ པམཱཎཾ. ཀཏཱནནྟརིཡཀམྨོ ཙ ‘‘ཏསྶ ཀམྨསྶ ཝིཔཱཀཾ པཊིབཱཧེསྶཱམཱི’’ཏི སཀལཙཀྐཝཱལ༹ཾ མཧཱཙེཏིཡཔྤམཱཎེཧི ཀཉྩནཐཱུཔེཧི པཱུརེཏྭཱཔི སཀལཙཀྐཝཱལ༹ཾ པཱུརེཏྭཱ ནིསིནྣསྶ བྷིཀྑུསངྒྷསྶ མཧཱདཱནཾ ¶ དཏྭཱཔི བུདྡྷསྶ བྷགཝཏོ སངྒྷཱཊིཀཎྞཾ ཨམུཉྩནྟོ ཝིཙརིཏྭཱཔི ཀཱཡསྶ བྷེདཱ ནིརཡམེཝ ཨུཔཔཛྫཏི, པབྦཛྫཉྩ ན ལབྷཏི. པིཏུགྷཱཏཀེ ཝེསིཡཱ པུཏྟོཏི ཨུཔལཀྑཎམཏྟཾ, ཀུལིཏྠིཡཱ ཨཏིཙཱརིནིཡཱ པུཏྟོཔི ཨཏྟནོ པིཏརཾ ཨཛཱནིཏྭཱ གྷཱནྟེནྟོཔི པིཏུགྷཱཏཀོཝ ཧོཏི.

ཨརཧནྟགྷཱཏཀཀམྨེ ཨཝསེསནྟི ཨནཱགཱམིཨཱདིཀཾ. ཨཡམེཏྠ སངྑེཔོ, ཝིཏྠཱརོ པན ཏཏིཡཔཱརཱཛིཀཝཎྞནཱཏོ གཧེཏབྦོ.

‘‘དུཊྛཙིཏྟེནཱ’’ཏི ཝུཏྟམེཝཏྠཾ ཝིབྷཱཝེཏི ‘‘ཝདྷཀཙིཏྟེནཱ’’ཏི. ཝདྷཀཙེཏནཱཡ ཧི དཱུསིཏཾ ཙིཏྟཾ ཨིདྷ དུཊྛཙིཏྟཾ ནཱམ. ལོཧིཏཾ ཨུཔྤཱདེཏཱིཏི ཨེཏྠ ཏཐཱགཏསྶ ཨབྷེཛྫཀཱཡཏཱཡ པརཱུཔཀྐམེན ཙམྨཙྪེདཾ ཀཏྭཱ ལོཧིཏཔགྒྷརཎཾ ནཱམ ནཏྠི, སརཱིརསྶ པན ཨནྟོཡེཝ ཨེཀསྨིཾ ཋཱནེ ལོཧིཏཾ སམོསརཏི, ཨཱགྷཱཏེན པཀུཔྤམཱནཾ སཉྩིཏཾ ཧོཏི. དེཝདཏྟེན པཝིདྡྷསིལཏོ བྷིཛྫིཏྭཱ གཏཱ སཀྑལིཀཱཔི ཏཐཱགཏསྶ པཱདནྟཾ པཧརི, ཕརསུནཱ པཧཊོ ཝིཡ ¶ པཱདོ ཨནྟོལོཧིཏོཡེཝ ཨཧོསི. ཛཱིཝཀོ པན ཏཐཱགཏསྶ རུཙིཡཱ སཏྠཀེན ཙམྨཾ ཚིནྡིཏྭཱ ཏམྷཱ ཋཱནཱ དུཊྛལོཧིཏཾ ནཱིཧརིཏྭཱ ཕཱསུམཀཱསི, ཏེནསྶ པུཉྙཀམྨམེཝ ཨཧོསི. ཏེནཱཧ ‘‘ཛཱིཝཀོ ཝིཡཱ’’ཏིཨཱདི.

ཨཐ ཡེ པརིནིབྦུཏེ ཏཐཱགཏེ ཙེཏིཡཾ བྷིནྡནྟི, བོདྷིཾ ཚིནྡནྟི, དྷཱཏུམྷི ཨུཔཀྐམནྟི, ཏེསཾ ཀིཾ ཧོཏཱིཏི? བྷཱརིཡཾ ཀམྨཾ ཧོཏི ཨཱནནྟརིཡསདིསཾ. སདྷཱཏུཀཾ པན ཐཱུཔཾ ཝཱ པཊིམཾ ཝཱ བཱདྷམཱནཾ བོདྷིསཱཁཾ ཚིནྡིཏུཾ ཝཊྚཏི. སཙེཔི ཏཏྠ ནིལཱིནཱ སཀུཎཱ ཙེཏིཡེ ཝཙྩཾ པཱཏེནྟི, ཚིནྡིཏུཾ ཝཊྚཏིཡེཝ. པརིབྷོགཙེཏིཡཏོ ཧི སརཱིརཙེཏིཡཾ གརུཏརཾ. ཙེཏིཡཝཏྠུཾ བྷིནྡིཏྭཱ གཙྪནྟེ བོདྷིམཱུལེཔི ཚིནྡིཏྭཱ ཧརིཏུཾ ཝཊྚཏི. ཡཱ པན བོདྷིསཱཁཱ བོདྷིགྷརཾ བཱདྷཏི, ཏཾ གེཧརཀྑཎཏྠཾ ཚིནྡིཏུཾ ན ལབྷཏི. བོདྷིཨཏྠཱཡ ཧི གེཧཾ, ན གེཧཏྠཱཡ བོདྷི. ཨཱསནགྷརེཔི ཨེསེཝ ནཡོ. ཡསྨིཾ པན ཨཱསནགྷརེ དྷཱཏུ ནིཧིཏཱ ཧོཏི, ཏསྶ རཀྑཎཏྠཱཡ ཏཾ སཱཁཾ ཚིནྡིཏུཾ ཝཊྚཏི. བོདྷིཛགྒནཏྠཾ ཨོཛོཧརཎསཱཁཾ ཝཱ པཱུཏིཊྛཱནཾ ཝཱ ཚིནྡིཏུཾ ཝཊྚཏིཡེཝ, སཏྠུ རཱུཔཀཱཡཔཊིཛགྒནེ ཝིཡ པུཉྙམྤི ཧོཏི.

སངྒྷབྷེདེ ཙཏུནྣཾ ཀམྨཱནནྟི ཨཔལོཀནཱདཱིནཾ ཙཏུནྣཾ ཀམྨཱནཾ. ཨཡཾ སངྒྷབྷེདཀོཏི པཀཏཏྟཾ བྷིཀྑུཾ ¶ སནྡྷཱཡ ཝུཏྟཾ. པུབྦེ ཨེཝ པཱརཱཛིཀཾ སམཱཔནྣོ ཝཱ ཝཏྠཱདིདོསེན ཝིཔནྣུཔསམྤདོ ཝཱ སངྒྷཾ བྷིནྡནྟོཔི ཨཱནནྟརིཡཾ ན ཕུསཏི, སངྒྷོ པན བྷིནྣོཝ ཧོཏི, པབྦཛྫཱ ཙསྶ ན ཝཱརིཏཱཏི དཊྛབྦཾ.

བྷིཀྑུནཱིདཱུསནེ ཨིཙྪམཱནནྟི ཨོདཱཏཝཏྠཝསནཾ ཨིཙྪམཱནཾ. ཏེནེཝཱཧ ‘‘གིཧིབྷཱཝེ སམྤཊིཙྪིཏམཏྟེཡེཝཱ’’ཏི. ནེཝ པབྦཛྫཱ ¶ ཨཏྠཱིཏི ཡོཛནཱ. ཡོ ཙ པཊིཀྑིཏྟེ ཨབྷབྦེ ཙ པུགྒལེ ཉཏྭཱ པབྦཱཛེཏི, ཨུཔསམྤཱདེཏི ཝཱ, དུཀྐཊཾ. ཨཛཱནནྟསྶ སབྦཏྠ ཨནཱཔཏྟཱིཏི ཝེདིཏབྦཾ.

༡༤༢. གབྦྷམཱསེཧི སདྡྷིཾ ཝཱིསཏི ཝསྶཱནི ཨསྶཱཏི གབྦྷཝཱིསོ. ཧཱཡནཝཌྜྷནནྟི གབྦྷམཱསེསུ ཨདྷིཀེསུ ཨུཏྟརི ཧཱཡནཾ, ཨཱུནེསུ ཝཌྜྷནནྟི ཝེདིཏབྦཾ. ཨེཀཱུནཝཱིསཏིཝསྶནྟི དྭཱདས མཱསེ མཱཏུཀུཙྪིསྨིཾ ཝསིཏྭཱ མཧཱཔཝཱརཎཱཡ ཛཱཏཀཱལཏོ པཊྛཱཡ ཨེཀཱུནཝཱིསཏིཝསྶཾ. པཱཊིཔདདིཝསེཏི པཙྪིམིཀཱཡ ཝསྶཱུཔགམནདིཝསེ. ‘‘ཏིཾསརཏྟིདིཝོ མཱསོ’’ཏི (ཨ. ནི. ༣.༧༡; ༨.༤༣; ཝིབྷ. ༡༠༢༣) ཝཙནཏོ ‘‘ཙཏྟཱརོ མཱསཱ པརིཧཱཡནྟཱི’’ཏི ཝུཏྟཾ. ཝསྶཾ ཨུཀྐཌྜྷནྟཱིཏི ཝསྶཾ ཨུདྡྷཾ ཀཌྜྷནྟི, ཏཏིཡསཾཝཙྪརེ ཨེཀམཱསསྶ ཨདྷིཀཏྟཱ མཱསཔརིཙྩཛནཝསེན ཝསྶཾ ཨུདྡྷཾ ཀཌྜྷནྟཱིཏི ཨཏྠོ, ཏསྨཱ ཏཏིཡོ སཾཝཙྪརོ ཏེརསམཱསིཀོ ཧོཏི. སཾཝཙྪརསྶ པན དྭཱདསམཱསིཀཏྟཱ ཨཊྛཱརསསུ ཝསྶེསུ ཨདྷིཀམཱསེ ཝིསུཾ གཧེཏྭཱ ‘‘ཚ མཱསཱ ཝཌྜྷནྟཱི’’ཏི ཝུཏྟཾ. ཏཏོཏི ཚམཱསཏོ. ནིཀྐངྑཱ ཧུཏྭཱཏི ཨདྷིཀམཱསེཧི སདྡྷིཾ པརིཔུཎྞཝཱིསཏིཝསྶཏྟཱ ནིབྦེམཏིཀཱ ཧུཏྭཱ. ཡཾ པན ཝུཏྟཾ ཏཱིསུཔི གཎྛིཔདེསུ ‘‘ཨཊྛཱརསནྣཾཡེཝ ཝསྶཱནཾ ཨདྷིཀམཱསེ གཧེཏྭཱ གཎིཏཏྟཱ སེསཝསྶདྭཡསྶཔི ཨདྷིཀདིཝསཱནི ཧོནྟི, ཏཱནི ཨདྷིཀདིཝསཱནི སནྡྷཱཡ ‘ནིཀྐངྑཱ ཧུཏྭཱ’ཏི ཝུཏྟ’’ནྟི, ཏཾ ན གཧེཏབྦཾ. ན ཧི དྭཱིསུ ཝསྶེསུ ཨདྷིཀདིཝསཱནི ནཱམ ཝིསུཾ ཨུཔལབྦྷནྟི ཏཏིཡེ ཝསྶེ ཝསྶུཀྐཌྜྷནཝསེན ཨདྷིཀམཱསེ པརིཙྩཏྟེཡེཝ ཨཏིརེཀམཱསསམྦྷཝཏོ, ཏསྨཱ དྭཱིསུ ཝསྶེསུ ཨཏིརེཀདིཝསཱནི ཝིསུཾ ན སམྦྷཝནྟི.

‘‘ཏེ དྭེ མཱསེ གཧེཏྭཱ ཝཱིསཏི ཝསྶཱནི པརིཔུཎྞཱནི ཧོནྟཱི’’ཏི ཀསྨཱ ཝུཏྟཾ, ཨེཀཱུནཝཱིསཏིཝསྶམྷི ཙ པུན ཨཔརསྨིཾ ¶ ཝསྶེ པཀྑིཏྟེ ཝཱིསཏི ཝསྶཱནི པརིཔུཎྞཱནི ཧོནྟཱིཏི ཨཱཧ ‘‘ཨེཏྠ པན…པེ… ཝུཏྟ’’ནྟི. ཨནེཀཏྠཏྟཱ ནིཔཱཏཱནཾ པན-སདྡོ ཧིསདྡཏྠོ, ཨེཏྠ ¶ ཧཱིཏི ཝུཏྟཾ ཧོཏི. ཨིདཉྷི ཝུཏྟསྶེཝཏྠསྶ སམཏྠནཝསེན ཝུཏྟཾ. ཨིམིནཱ ཙ ཨིམཾ དཱིཔེཏི – ཡཾ ཝུཏྟཾ ‘‘ཨེཀཱུནཝཱིསཏིཝསྶཾ སཱམཎེརཾ ནིཀྑམནཱིཡཔུཎྞམཱསིཾ ཨཏིཀྐམྨ པཱཊིཔདདིཝསེ ཨུཔསམྤཱདེནྟཱི’’ཏི, ཏཏྠ གབྦྷམཱསེཔི གཧེཏྭཱ དྭཱིཧི མཱསེཧི ཨཔརིཔུཎྞཝཱིསཏིཝསྶཾ སནྡྷཱཡ ‘‘ཨེཀཱུནཝཱིསཏིཝསྶ’’ནྟི ཝུཏྟཾ, ཏསྨཱ ཨདྷིཀམཱསེསུ དྭཱིསུ གཧིཏེསུ ཨེཝ ཝཱིསཏི ཝསྶཱནི པརིཔུཎྞཱནི ནཱམ ཧོནྟཱིཏི. ཏསྨཱཏི ཡསྨཱ གབྦྷམཱསཱཔི གཎནཱུཔགཱ ཧོནྟི, ཏསྨཱ. ཨེཀཝཱིསཏིཝསྶོ ཧོཏཱིཏི ཛཱཏདིཝསཏོ པཊྛཱཡ ཝཱིསཏིཝསྶོ སམཱནོ གབྦྷམཱསེཧི སདྡྷིཾ ཨེཀཝཱིསཏིཝསྶོ ཧོཏི. ཨཉྙཾ ཨུཔསམྤཱདེཏཱིཏི ཨུཔཛ྄ཛྷཱཡོ, ཀམྨཝཱཙཱཙརིཡོ ཝཱ ཧུཏྭཱ ཨུཔསམྤཱདེཏཱིཏི སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༤༠༦) ཨཱགཏཾ.

གབྦྷེ སཡིཏཀཱལེན སདྡྷིཾ ཝཱིསཏིམཾ ཝསྶཾ པརིཔུཎྞམསྶཱཏི གབྦྷཝཱིསོ. ནིཀྑམནཱིཡཔུཎྞམཱསཱིཏི སཱཝཎམཱསསྶ པུཎྞམིཡཱ ཨཱསཱལ༹ྷཱིཔུཎྞམིཡཱ ཨནནྟརཔུཎྞམཱི. པཱཊིཔདདིཝསེཏི པཙྪིམིཀཱཡ ཝསྶཱུཔནཱཡིཀཱཡ, དྭཱདས མཱསེ མཱཏུཀུཙྪིསྨིཾ ཝསིཏྭཱ མཧཱཔཝཱརཎཱཡ ཛཱཏཾ ཨུཔསམྤཱདེནྟཱིཏི ཨཏྠོ. ‘‘ཏིཾསརཏྟིདིཝོ མཱསོ, དྭཱདསམཱསིཀོ སཾཝཙྪརོ’’ཏི ཝཙནཏོ ‘‘ཙཏྟཱརོ མཱསཱ པརིཧཱཡནྟཱི’’ཏི ཝུཏྟཾ. ཝསྶཾ ཨུཀྐཌྜྷནྟཱིཏི ཝསྶཾ ཨུདྡྷཾ ཀཌྜྷནྟི, ‘‘ཨེཀམཱསཾ ཨདྷིཀམཱསོ’’ཏི ཚཌྜེཏྭཱ ཝསྶཾ ཨུཔགཙྪནྟཱིཏི ཨཏྠོ, ཏསྨཱ ཏཏིཡོ ཏཏིཡོ སཾཝཙྪརོ ཏེརསམཱསིཀོ ཧོཏི. ཏེ དྭེ མཱསེ གཧེཏྭཱཏི ནིཀྑམནཱིཡཔུཎྞམཱསཏོ ཡཱཝ ཛཱཏདིཝསབྷཱུཏཱ མཧཱཔཝཱརཎཱ, ཏཱཝ ཡེ དྭེ མཱསཱ ཨནཱགཏཱ, ཏེསཾ ཨཏྠཱཡ ¶ ཨདྷིཀམཱསཏོ ལདྡྷེ དྭེ མཱསེ གཧེཏྭཱ. ཏེནཱཧ ‘‘ཡོ པཝཱརེཏྭཱ ཝཱིསཏིཝསྶོ བྷཝིསྶཏཱི’’ཏིཨཱདི. ‘‘ནིཀྐངྑཱ ཧུཏྭཱ’’ཏི ཨིདཾ ཨཊྛཱརསནྣཾ ཝསྶཱནཾ ཨེཝ ཨདྷིཀམཱསེ གཧེཏྭཱ ཏཏོ ཝཱིསཏིཡཱ ཝསྶེསུཔི ཙཱཏུདྡསཱིནཾ ཨཏྠཱཡ ཙཏུནྣཾ མཱསཱནཾ པརིཧཱཔནེན སབྦཐཱ པརིཔུཎྞཝཱིསཏིཝསྶཏཾ སནྡྷཱཡ ཝུཏྟཾ.

པཝཱརེཏྭཱ ཝཱིསཏིཝསྶོ བྷཝིསྶཏཱིཏི མཧཱཔཝཱརཎཱདིཝསེ ཨཏིཀྐནྟེ གབྦྷཝསྶེན སཧ ཝཱིསཏིཝསྶོ བྷཝིསྶཏཱིཏི ཨཏྠོ. ཏསྨཱཏི ཡསྨཱ གབྦྷམཱསཱཔི གཎནཱུཔགཱ ཧོནྟི, ཏསྨཱ. ཨེཀཝཱིསཏིཝསྶོཏི ཛཱཏིཡཱ ཝཱིསཏིཝསྶཾ སནྡྷཱཡ ཝུཏྟཾ. ཨཉྙཾ ཨུཔསམྤཱདེཏཱིཏི ཨུཔཛ྄ཛྷཱཡོ, ཨཱཙརིཡོ ཝཱ ཧུཏྭཱ ཨུཔསམྤཱདེཏི. སོཔཱིཏི ཨུཔསམྤཱདེནྟོཔི ཨནུཔསམྤནྣོཏི ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༤༠༦) ཨཱགཏཾ.

ཨེཏྠ ¶ སིཡཱ – ཨཊྛཀཐཱཊཱིཀཱསུ ‘‘ཨཊྛཱརསསུ ཝསྶེསུ ཚ མཱསཱ ཝཌྜྷནྟཱི’’ཏི ཝུཏྟཾ, ཨིདཱནི པན ‘‘ཨེཀཱུནཝཱིསཏིཡཱ ཝསྶེསུ སཏྟ མཱསཱ ཨདྷིཀཱ’’ཏི ཝདནྟི, ཀཐམེཏྠ ཝིཉྙཱཏབྦནྟི? ཝུཙྩཏེ – ཨཊྛཀཐཱཊཱིཀཱསུ སཱསནཝོཧཱརེན ལོཀིཡགཏིཾ ཨནུཔགམྨ ཏཱིསུ ཏཱིསུ སཾཝཙྪརེསུ མཱསཚཌྜནཾ གཧེཏྭཱ ‘‘ཨཊྛཱརསསུ ཝསྶེསུ ཚ མཱསཱ ཝཌྜྷནྟཱི’’ཏི ཝུཏྟཾ, ཨིདཱནི པན ཝེདཝོཧཱརེན ཙནྡསཱུརིཡགཏིསངྑཱཏཾ ཏིཐིཾ གཧེཏྭཱ གཎེནྟོ ‘‘ཨེཀཱུནཝཱིསཏིཡཱ ཝསྶེསུ སཏྟ མཱསཱ ཨདྷིཀཱ’’ཏི ཝདནྟཱིཏི, ཏཾ ཝསྶཱུཔནཱཡིཀཀཐཱཡཾ ཨཱཝི བྷཝིསྶཏི.

༡༤༣. མཱཏཱ ཝཱ མཏཱ ཧོཏཱིཏི སམྦནྡྷོ. སོཡེཝཱཏི པབྦཛྫཱཔེཀྑོ ཨེཝ.

༡༤༤. ‘‘ཨེཀསཱིམཱཡཉྩ ¶ ཨཉྙེཔི བྷིཀྑཱུ ཨཏྠཱིཏི ཨིམིནཱ ཨེཀསཱིམཱཡཾ བྷིཀྑུམྷི ཨསཏི བྷཎྜུཀམྨཱརོཙནཀིཙྩཾ ནཏྠཱིཏི དསྶེཏི. ཁཎྜསཱིམཱཡ ཝཱ ཋཏྭཱ ནདཱིསམུདྡཱདཱིནི ཝཱ གནྟྭཱ པབྦཱཛེཏབྦོཏི ཨེཏེན སབྦེ སཱིམཊྛཀབྷིཀྑཱུ ཨཱཔུཙྪིཏབྦཱ, ཨནཱཔུཙྪཱ པབྦཱཛེཏུཾ ན ཝཊྚཏཱིཏི དཱིཔེཏི.

༡༤༥. ཨནཱམཊྛཔིཎྜཔཱཏནྟི ཨགྒཧིཏཨགྒཾ པིཎྜཔཱཏཾ. སཱམཎེརབྷཱགསམཀོ ཨཱམིསབྷཱགོཏི ཨེཏྠ ཀིཉྩཱཔི སཱམཎེརཱནཾ ཨཱམིསབྷཱགསྶ སམཀམེཝ དཱིཡམཱནཏྟཱ ཝིསུཾ སཱམཎེརབྷཱགོ ནཱམ ནཏྠི, ཧེཊྛཱ གཙྪནྟཾ པན བྷཏྟཾ ཀདཱཙི མནྡཾ བྷཝེཡྻ, ཏསྨཱ ཨུཔརི ཨགྒཧེཏྭཱ སཱམཎེརཔཱལི༹ཡཱཝ གཧེཏྭཱ དཱཏབྦོཏི ཨདྷིཔྤཱཡོ. ནིཡཏཔབྦཛྫསྶེཝ ཙཱཡཾ བྷཱགོ དཱིཡཏི. ཏེནེཝ ‘‘ཨཔཀྐཾ པཏྟ’’ནྟིཨཱདི ཝུཏྟཾ. ཨཉྙེ ཝཱ བྷིཀྑཱུ དཱཏུཀཱམཱ ཧོནྟཱིཏི སམྦནྡྷོ.

༡༤༦. སཡཾ པབྦཱཛེཏབྦོཏི ཀེསཙྪེདནཱདཱིནི སཡཾ ཀརོནྟེན པབྦཱཛེཏབྦོ. ཀེསཙྪེདནཾ ཀཱསཱཡཙྪཱདནཾ སརཎདཱནནྟི ཧི ཨིམཱནི ཏཱིཎི ཀརོནྟོ ‘‘པབྦཱཛེཏཱི’’ཏི ཝུཙྩཏི, ཏེསུ ཨེཀཾ དྭེ ཝཱཔི ཀརོནྟོ ཏཐཱ ཝོཧརཱིཡཏིཡེཝ, ཏསྨཱ ཨེཏཾ པབྦཱཛེཧཱིཏི ཀེསཙྪེདནཾ ཀཱསཱཡཙྪཱདནཉྩ སནྡྷཱཡ ཝུཏྟཾ. ཨུཔཛ྄ཛྷཱཡཾ ཨུདྡིསྶ པབྦཱཛེཏཱིཏི ཨེཏྠཱཔི ཨེསེཝ ནཡོ. ཁཎྜསཱིམཾ ནེཏྭཱཏི བྷཎྜུཀམྨཱརོཙནཔརིཧརཎཏྠཾ ཝུཏྟཾ. ཏེན སབྷིཀྑུཀེ ཝིཧཱརེ ཨཉྙམྤི ‘‘ཨེཏསྶ ཀེསེ ཚིནྡཱ’’ཏི ཝཏྟུཾ ན ཝཊྚཏི. པབྦཱཛེཏྭཱཏི ཀེསཙྪེདནཾ སནྡྷཱཡ ཝདཏི. བྷིཀྑུཏོ ཨཉྙོ པབྦཱཛེཏུཾ ན ལབྷཏཱིཏི སརཎདཱནཾ སནྡྷཱཡ ཝུཏྟཾ. ཏེནེཝཱཧ ‘‘སཱམཎེརོ པནཱ’’ཏིཨཱདཱིཏི ¶ སཱརཏྠདཱིཔནིཡཾ (སཱརཏྠ ཊཱི. མཧཱཝགྒ ༣.༣༤) ཨཱགཏཾ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༣༤) པན – སཡཾ པབྦཱཛེཏབྦོཏི ¶ ཨེཏྠ ‘‘ཀེསམསྶུཾ ཨོཧཱརེཏྭཱ’’ཏིཨཱདིཝཙནཏོ ཀེསཙྪེདནཀཱསཱཡཙྪཱདནསརཎདཱནཱནི པབྦཛནཾ ནཱམ, ཏེསུ པཙྪིམདྭཡཾ བྷིཀྑཱུཧི ཨེཝ ཀཱཏབྦཾ, ཀཱརེཏབྦཾ ཝཱ. པབྦཱཛེཧཱིཏི ཨིདཾ ཏིཝིདྷམྤི སནྡྷཱཡ ཝུཏྟཾ. ཁཎྜསཱིམཾ ནེཏྭཱཏི བྷཎྜུཀམྨཱརོཙནཔརིཧརཎཏྠཾ. བྷིཀྑཱུནཉྷི ཨནཱརོཙེཏྭཱ ཨེཀསཱིམཱཡ ‘‘ཨེཏསྶ ཀེསེ ཚིནྡཱ’’ཏི ཨཉྙཾ ཨཱཎཱཔེཏུམྤི ན ཝཊྚཏི. པབྦཱཛེཏྭཱཏི ཀེསཱདིཙྪེདནམེཝ སནྡྷཱཡ ཝུཏྟཾ ‘‘ཀཱསཱཡཱནི ཨཙྪཱདེཏྭཱ’’ཏི ཝིསུཾ ཝུཏྟཏྟཱ. པབྦཱཛེཏུཾ ན ལབྷཏཱིཏི སརཎདཱནཾ སནྡྷཱཡ ཝུཏྟཾ. ཨནུཔསམྤནྣེན བྷིཀྑུཨཱཎཏྟིཡཱ དིནྣམྤི སརཎཾ ན རུཧཏཱིཏི ཝུཏྟཾ.

ཝཛིརབུདྡྷིཊཱིཀཱཡམྤི (ཝཛིར ཊཱི. མཧཱཝགྒ ༣༤) – ཁཎྜསཱིམཾ ནེཏྭཱཏི བྷཎྜུཀམྨཱརོཙནཔརིཧརཎཏྠཾ ཝུཏྟཾ, ཏེན སབྷིཀྑུཀེ ཝིཧཱརེ ཨཉྙམྤི ‘‘ཨེཏསྶ ཀེསེ ཚིནྡཱ’’ཏི ཝཏྟུཾ ན ཝཊྚཏི. ‘‘པབྦཱཛེཏྭཱ’’ཏི ཨིམསྶ ཨདྷིཔྤཱཡཔཀཱསནཏྠཾ ‘‘ཀཱསཱཡཱནི ཨཙྪཱདེཏྭཱ ཨེཧཱི’’ཏི ཝུཏྟཾ. ཨུཔཛ྄ཛྷཱཡོ ཙེ ཀེསམསྶུཨོརོཔནཱདཱིནི ཨཀཏྭཱ པབྦཛྫཏྠཾ སརཎཱནི དེཏི, ན རུཧཏི པབྦཛྫཱ. ཀམྨཝཱཙཱཡ སཱཝེཏྭཱ ཨུཔསམྤཱདེཏི, རུཧཏི ཨུཔསམྤདཱ. ཨཔཏྟཙཱིཝརཱནཾ ཨུཔསམྤདཱསིདྡྷིདསྶནཏོ, ཀམྨཝིཔཏྟིཡཱ ཨབྷཱཝཏོ ཙེཏཾ ཡུཛྫཏེཝཱཏི ཨེཀེ. ཧོཏི ཙེཏྠ –

‘‘སལིངྒསྶེཝ པབྦཛྫཱ, ཝིལིངྒསྶཱཔི ཙེཏརཱ;

ཨཔེཏཔུབྦཝེསསྶ, ཏཾདྭཡཱ ཨིཏི ཙཱཔརེ’’ཏི.

བྷིཀྑུནཱ ཧི སཧཏྠེན ཝཱ ཨཱཎཏྟིཡཱ ཝཱ དིནྣམེཝ ཀཱསཱཝཾ ཝཊྚཏི, ཨདིནྣཾ ན ཝཊྚཏཱིཏི པན སནྟེསྭེཝ ཀཱསཱཝེསུ, ནཱསནྟེསུ ཨསམྦྷཝཏོཏི ཏེསཾ ཨདྷིཔྤཱཡོཏི ཨཱགཏོ.

བྷབྦརཱུཔོཏི ¶ བྷབྦསབྷཱཝོ. ཏམེཝཏྠཾ པརིཡཱཡནྟརེན ཝིབྷཱཝེཏི ‘‘སཧེཏུཀོ’’ཏི. ཉཱཏོཏི པཱཀཊོ. ཡསསྶཱིཏི པརིཝཱརསམྤཏྟིཡཱ སམནྣཱགཏོ.

ཝཎྞསཎྛཱནགནྡྷཱསཡོཀཱསཝསེན ཨསུཙིཛེགུཙྪཔཊིཀཱུལབྷཱཝཾ པཱཀཊཾ ཀརོནྟེནཱཏི སམྦནྡྷོ. ཏཏྠ ཀེསཱ ནཱམེཏེ ཝཎྞཏོཔི པཊིཀཱུལཱ, སཎྛཱནཏོཔི གནྡྷཏོཔི ཨཱསཡཏོཔི ཨོཀཱསཏོཔི ¶ པཊིཀཱུལཱ. མནུཉྙེཔི ཧི ཡཱགུཔཏྟེ ཝཱ བྷཏྟཔཏྟེ ཝཱ ཀེསཝཎྞཾ ཀིཉྩི དིསྭཱ ‘‘ཀེསམིསྶཀམིདཾ, ཧརཐ ན’’ནྟི ཛིགུཙྪནྟི, ཨེཝཾ ཀེསཱ ཝཎྞཏོ པཊིཀཱུལཱ. རཏྟིཾ བྷུཉྫནྟཱཔི ཀེསསཎྛཱནཾ ཨཀྐཝཱཀཾ ཝཱ མཀཙིཝཱཀཾ ཝཱ ཚུཔིཏྭཱ ཏཐེཝ ཛིགུཙྪནྟི, ཨེཝཾ སཎྛཱནཏོཔི པཊིཀཱུལཱ. ཏེལམཀྑནཔུཔྥདྷཱུམཱདིསངྑཱརཝིརཧིཏཱནཉྩ ཀེསཱནཾ གནྡྷོ པརམཛེགུཙྪོ ཧོཏི. ཏཏོ ཛེགུཙྪཏརོ ཨགྒིམྷི པཀྑིཏྟཱནཾ. ཀེསཱ ཧི ཝཎྞསཎྛཱནཏོ ཨཔྤཊིཀཱུལཱཔི སིཡུཾ, གནྡྷེན པན པཊིཀཱུལཱཡེཝ. ཡཐཱ ཧི དཧརསྶ ཀུམཱརཀསྶ ཝཙྩཾ ཝཎྞཏོ ཧལིདྡིཝཎྞཾ, སཎྛཱནཏོ ཧལིདྡིཔིཎྜིསཎྛཱནཾ. སངྐརཊྛཱནེ ཚཌྜིཏཉྩ ཨུདྡྷུམཱཏཀཀཱལ༹སུནཁསརཱིརཾ ཝཎྞཏོ ཏཱལཔཀྐཝཎྞཾ, སཎྛཱནཏོ ཝཊྚེཏྭཱ ཝིསྶཊྛམུདིངྒསཎྛཱནཾ, དཱཋཱཔིསྶ སུམནམཀུལ༹སདིསཱ, ཏཾ ཨུབྷཡམྤི ཝཎྞསཎྛཱནཏོ སིཡཱ ཨཔྤཊིཀཱུལཾ, གནྡྷེན པན པཊིཀཱུལམེཝ, ཨེཝཾ ཀེསཱཔི སིཡུཾ ཝཎྞསཎྛཱནཏོ ཨཔྤཊིཀཱུལཱ, གནྡྷེན པན པཊིཀཱུལཱཡེཝཱཏི.

ཡཐཱ པན ཨསུཙིཊྛཱནེ གཱམནིསྶནྡེན ཛཱཏཱནི སཱུཔེཡྻཔཎྞཱནི ནཱགརིཀམནུསྶཱནཾ ཛེགུཙྪཱནི ཧོནྟི ཨཔརིབྷོགཱནི, ཨེཝཾ ཀེསཱཔི པུབྦལོཧིཏམུཏྟཀརཱིསཔིཏྟསེམྷཱདིནིསྶནྡེན ཛཱཏཏྟཱ པརམཛེགུཙྪཱཏི. ཨེཝཾ ཨཱསཡཏོཔི པཊིཀཱུལཱ. ཨིམེ ཙ ཀེསཱ ནཱམ གཱུཐརཱསིམྷི ཨུཊྛིཏཀཎྞཀཱ ཝིཡ ཨེཀཏིཾསཀོཊྛཱསརཱསིམྷི ཛཱཏཱ, ཏེ སུསཱནསངྐཱརཊྛཱནཱདཱིསུ ¶ ཛཱཏསཱཀཾ ཝིཡ, པརིཁཱདཱིསུ ཛཱཏཀམལཀུཝལཡཱདིཔུཔྥཾ ཝིཡ ཙ ཨསུཙིཊྛཱནེ ཛཱཏཏྟཱ པརམཛེགུཙྪཱཏི ཨེཝཾ ཨོཀཱསཏོ པཊིཀཱུལཱཏིཨཱདིནཱ ནཡེན ཏཙཔཉྩཀསྶ ཝཎྞཱདིཝསེན པཊིཀཱུལབྷཱཝཾ པཀཱསེནྟེནཱཏི ཨཏྠོ.

ནིཛྫཱིཝནིསྶཏྟབྷཱཝཾ ཝཱ པཱཀཊཾ ཀརོནྟེནཱཏི ཨིམེ ཀེསཱ ནཱམ སཱིསཀཊཱཧཔལིཝེཋནཙམྨེ ཛཱཏཱ, ཏཏྠ ཡཐཱ ཝམྨིཀམཏྠཀེ ཛཱཏེསུ ཀུཎྛཏིཎེསུ ན ཝམྨིཀམཏྠཀོ ཛཱནཱཏི ‘‘མཡི ཀུཎྛཏིཎཱནི ཛཱཏཱནཱི’’ཏི, ནཱཔི ཀུཎྛཏིཎཱནི ཛཱནནྟི ‘‘མཡཾ ཝམྨིཀམཏྠཀེ ཛཱཏཱནཱི’’ཏི. ཨེཝམེཝ ན སཱིསཀཊཱཧཔལིཝེཋནཙམྨཾ ཛཱནཱཏི ‘‘མཡི ཀེསཱ ཛཱཏཱ’’ཏི, ནཱཔི ཀེསཱ ཛཱནནྟི ‘‘མཡཾ སཱིསཀཊཱཧཔལིཝེཋནཙམྨེ ཛཱཏཱ’’ཏི, ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ‘‘ཀེསཱ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུ’’ཏིཨཱདིནཱ ནཡེན ནིཛྫཱིཝནིསྶཏྟབྷཱཝཾ པཀཱསེནྟེན. པུབྦེཏི པུརིམབུདྡྷཱནཾ སནྟིཀེ. མདྡིཏསངྑཱརོཏི ནཱམརཱུཔཝཝཏྠཱནེན ཙེཝ པཙྩཡཔརིགྒཧཝསེན ཙ ཉཱཎེན པརིམདྡིཏསངྑཱརོ. བྷཱཝིཏབྷཱཝནོཏི ཀལཱཔསམྨསནཱདིནཱ སབྦསོ ཀུསལབྷཱཝནཱཡ པཱུརཎེན བྷཱཝིཏབྷཱཝནོ ¶ . ཨདིནྣཾ ན ཝཊྚཏཱིཏི ཨེཏྠ ‘‘པབྦཛྫཱ ན རུཧཏཱིཏི ཝདནྟཱི’’ཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༣༤) ཝུཏྟཾ.

ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༣༤) པན – ཡསསྶཱིཏི པརིཝཱརསམྤནྣོ. ནིཛྫཱིཝནིསྶཏྟབྷཱཝནྟི ‘‘ཀེསཱ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུ’’ཏིཨཱདིནཡཾ སངྒཎྷཱཏི, སབྦཾ ཝིསུདྡྷིམགྒེ (ཝིསུདྡྷི. ༡.༣༡༡) ཨཱགཏནཡེན གཧེཏབྦཾ. པུབྦེཏི པུབྦབུདྡྷུཔྤཱདེསུ ¶ . མདྡིཏསངྑཱརོཏི ཝིཔསྶནཱཝསེན ཝུཏྟཾ. བྷཱཝིཏབྷཱཝནོཏི སམཐཝསེནཔི.

ཀཱསཱཡཱནི ཏིཀྑཏྟུཾ ཝཱ…པེ… པཊིགྒཱཧཱཔེཏབྦོཏི ཨེཏྠ ‘‘སབྦདུཀྑནིསྶརཎཏྠཱཡ ཨིམཾ ཀཱསཱཝཾ གཧེཏྭཱ’’ཏི ཝཱ ‘‘ཏཾ ཀཱསཱཝཾ དཏྭཱ’’ཏི ཝཱ ཝཏྭཱ ‘‘པབྦཱཛེཐ མཾ, བྷནྟེ, ཨནུཀམྤཾ ཨུཔཱདཱཡཱ’’ཏི ཨེཝཾ ཡཱཙནཔུབྦཀཾ ཙཱིཝརཾ པཊིཙྪཱཔེཏི. ཨཐཱཔཱིཏིཨཱདི ཏིཀྑཏྟུཾ པཊིགྒཱཧཱཔནཏོ པརཾ ཀཏྟབྦཝིདྷིདསྶནཾ, ཨཐཱཔཱིཏི ཏཏོ པརམྤཱིཏི ཨཏྠོ. ཀེཙི པན ‘‘ཙཱིཝརཾ ཨཔྤཊིགྒཱཧཱཔེཏྭཱ པབྦཱཛནཔྤཀཱརབྷེདདསྶནཏྠཾ ‘ཨཐཱཔཱི’ཏི ཝུཏྟཾ. ཨཐཱཔཱིཏི ཨཐ ཝཱཏི ཨཏྠོ’’ཏི ཝདནྟི. ཨདིནྣཾ ན ཝཊྚཏཱིཏི ཨིམིནཱ པབྦཛྫཱ ན རུཧཏཱིཏི དསྶེཏི.

༡༤༧. པཱདེ ཝནྡཱཔེཏྭཱཏི པཱདཱབྷིམུཁཾ ནམཱཔེཏྭཱ. དཱུརེ ཝནྡནྟོཔི ཧི པཱདེ ཝནྡཏཱིཏི ཝུཙྩཏཱིཏི. ཨུཔཛ྄ཛྷཱཡེན ཝཱཏི ཨེཏྠ ཡསྶ སནྟིཀེ ཨུཔཛ྄ཛྷཾ གཎྷཱཏི, ཨཡཾ ཨུཔཛ྄ཛྷཱཡོ. ཡཾ ཨཱབྷིསམཱཙཱརིཀེསུ ཝིནཡནཏྠཱཡ ཨཱཙརིཡཾ ཀཏྭཱ ནིཡྻཱཏེནྟི, ཨཡཾ ཨཱཙརིཡོ. སཙེ པན ཨུཔཛ྄ཛྷཱཡོ སཡམེཝ སབྦཾ སིཀྑཱཔེཏི, ཨཉྙམྤི ན ནིཡྻཱཏེཏི, ཨུཔཛ྄ཛྷཱཡོཝསྶ ཨཱཙརིཡོཔི ཧོཏི. ཡཐཱ ཨུཔསམྤདཱཀཱལེ སཡམེཝ ཀམྨཝཱཙཾ ཝཱཙེནྟོ ཨུཔཛ྄ཛྷཱཡོཝ ཀམྨཝཱཙཱཙརིཡོཔི ཧོཏཱིཏི ཝུཏྟཾ.

ཨནུཉྙཱཏཨུཔསམྤདཱཏི ཉཏྟིཙཏུཏྠཀམྨེན ཨནུཉྙཱཏཨུཔསམྤདཱ. ཋཱནཀརཎསམྤདནྟི ཨེཏྠ ཨུརཨཱདཱིནི ཋཱནཱནི, སཾཝུཏཱདཱིནི ཀརཎཱནཱིཏི ཝེདིཏབྦཱནི. ཨནུནཱསིཀནྟཾ ཀཏྭཱ དཱནཀཱལེ ཨནྟརཱཝིཙྪེདཾ ཨཀཏྭཱ དཱཏབྦཱནཱིཏི དསྶེཏུཾ ‘‘ཨེཀསམྦནྡྷཱནཱི’’ཏི ཝུཏྟཾ. ཝིཙྪིནྡིཏྭཱཏི མ-ཀཱརནྟཾ ཀཏྭཱ དཱནསམཡེ ཝིཙྪེདཾ ཀཏྭཱ.

༡༤༨. སབྦམསྶ ¶ ¶ ཀཔྤིཡཱཀཔྤིཡཾ ཨཱཙིཀྑིཏབྦནྟི དསསིཀྑཱཔདཝིནིམུཏྟཾ པརཱམཱསཱཔརཱམཱསཱདིབྷེདཾ ཀཔྤིཡཱཀཔྤིཡཾ ཨཱཙིཀྑིཏབྦཾ. ཨཱབྷིསམཱཙཱརིཀེསུ ཝིནེཏབྦོཏི ཨིམིནཱ ‘‘སེཁིཡཨུཔཛ྄ཛྷཱཡཝཏྟཱདིཨཱབྷིསམཱཙཱརིཀསཱིལམནེན པཱུརེཏབྦཾ. ཏཏྠ ཙ ཀཏྟབྦསྶ ཨཀརཎེ, ཨཀཏྟབྦསྶ ཙ ཀརཎེ དཎྜཀམྨཱརཧོ ཧོཏཱིཏི དཱིཔེཏཱིཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༣༤) ཝུཏྟཾ. ཨནུནཱསིཀནྟཾ ཀཏྭཱ དཱནཀཱལེ ཨནྟརཱཝིཙྪེདོ ན ཀཱཏབྦོཏི ཨཱཧ ‘‘ཨེཀསམྦནྡྷཱནཱི’’ཏི. ཨཱབྷིསམཱཙཱརིཀེསུ ཝིནེཏབྦོཏི ཨིམིནཱ སེཁིཡཝཏྟཱཀྑནྡྷཀཝཏྟེསུ, ཨཉྙེསུ ཙ སུཀྐཝིསྶཊྛིཨཱདིལོཀཝཛྫསིཀྑཱཔདེསུ ཙ སཱམཎེརེཧི ཝཏྟིཏབྦཾ, ཏཏྠ ཨཝཏྟམཱནོ ཨལཛྫཱི དཎྜཀམྨཱརཧོ ཙ ཧོཏཱིཏི དསྶེཏཱིཏི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༣༤).

ཨུརཱདཱིནི ཋཱནཱནི ནཱམ, སཾཝུཏཱདཱིནི ཀརཎཱནི ནཱམ. ཨནུནཱསིཀནྟཾ ཀཏྭཱ ཨེཀསམྦནྡྷཾ ཀཏྭཱ དཱནཀཱལེ ཨནྟརཱ ཨཊྛཏྭཱ ཝཏྟབྦཾ, ཝིཙྪིནྡིཏྭཱ དཱནཀཱལེཔི ཡཐཱཝུཏྟཊྛཱནེ ཨེཝ ཝིཙྪེདོ, ཨཉྙཏྲ ན ཝཊྚཏཱིཏི ལིཁིཏཾ, ཨནུནཱསིཀནྟེ དཱིཡམཱནེ ཁལིཏྭཱ ‘‘བུདྡྷཾ སརཎཾ གཙྪཱམཱི’’ཏི མ-ཀཱརེན མིསྶཱིབྷཱུཏེ ཁེཏྟེ ཨོཏིཎྞཏྟཱ ཝཊྚཏཱིཏི ཨུཔཏིསྶཏྠེརོ. མིསྶཾ ཀཏྭཱ ཝཏྟུཾ ཝཊྚཏི, ཝཙནཀཱལེ པན ཨནུནཱསིཀཊྛཱནེ ཝིཙྪེདཾ ཨཀཏྭཱ ཝཏྟབྦནྟི དྷམྨསིརིཏྠེརོ. ‘‘ཨེཝཾ ཀམྨཝཱཙཱཡམྤཱི’’ཏི ཝུཏྟཾ. ཨུབྷཏོསུདྡྷིཡཱཝ ཝཊྚཏཱིཏི ཨེཏྠ མཧཱཐེརོ པཏིཏདནྟཱདིཀཱརཎཏཱཡ ཨཙཏུརསྶཾ ཀཏྭཱ ཝདཏི, བྱཏྟསཱམཎེརོ སམཱིཔེ ཋིཏོ པབྦཛྫཱཔེཀྑཾ བྱཏྟཾ ཝདཱཔེཏི, མཧཱཐེརེན ཨཝུཏྟཾ ཝདཱཔེཏཱིཏི ན ཝཊྚཏི. ཀམྨཝཱཙཱཡ ཨིཏརོ བྷིཀྑུ ཙེ ཝདཏི, ཝཊྚཏཱིཏི. སངྒྷོ ཧི ཀམྨཾ ཀརོཏི, ན པུགྒལོཏི. ན, ནཱནཱསཱིམཔཝཏྟཀམྨཝཱཙཱསཱམཉྙནཡེན པཊིཀྑིཔིཏབྦཏྟཱ. ཨཐ ཐེརེན ཙཏུརསྶཾ ཝུཏྟཾ ¶ པབྦཛྫཱཔེཀྑཾ ཝཏྟུཾ ཨསཀྐོནྟཾ སཱམཎེརོ སཡཾ ཝཏྭཱ ཝདཱཔེཏི, ཨུབྷཏོསུདྡྷི ཨེཝ ཧོཏི ཐེརེན ཝུཏྟསྶེཝ ཝུཏྟཏྟཱ. ‘‘བུདྡྷཾ སརཎཾ གཙྪནྟོ ཨསཱདྷཱརཎེ བུདྡྷགུཎཾ, དྷམྨཾ སརཎཾ གཙྪནྟོ ནིབྦཱནཾ, སངྒྷཾ སརཎཾ གཙྪནྟོ སེཀྑདྷམྨཾ ཨསེཀྑདྷམྨཉྩ སརཎཾ གཙྪཏཱི’’ཏི ཨགྒཧིཏགྒཧཎཝསེན ཡོཛནཱ ཀཱཏབྦཱ. ཨཉྙཐཱ སརཎཏྟཡསངྐརདོསོ. སབྦམསྶ ཀཔྤིཡཱཀཔྤིཡནྟི དསསིཀྑཱཔདཝིནིམུཏྟཾ པརཱམཱསཱཔརཱམཱསཱདིབྷེདཾ. ‘‘ཨཱབྷིསམཱཙཱརིཀེསུ ཝིནེཏབྦོ’’ཏི ཝཙནཏོ སེཁིཡཨུཔཛ྄ཛྷཱཡཝཏྟཱདིཨཱབྷིསམཱཙཱརིཀསཱིལམནེན པཱུརེཏབྦཾ. ཏཏྠ ཙཱརིཏྟསྶ ཨཀརཎེ, ཝཱརིཏྟསྶ ཀརཎེ དཎྜཀམྨཱརཧོ ཧོཏཱི’’ཏི དཱིཔེཏཱིཏི ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༣༤) ཨཱགཏོ.

ཨནུཛཱནཱམི ¶ བྷིཀྑཝེ སཱམཎེརཱནཾ དས སིཀྑཱཔདཱནཱིཏིཨཱདཱིསུ སིཀྑིཏབྦཱནི པདཱནི སིཀྑཱཔདཱནི, སིཀྑཱཀོཊྛཱསཱཏི ཨཏྠོ. སིཀྑཱཡ ཝཱ པདཱནི སིཀྑཱཔདཱནི, ཨདྷིསཱིལཨདྷིཙིཏྟཨདྷིཔཉྙཱསིཀྑཱནཾ ཨདྷིགམུཔཱཡོཏི ཨཏྠོ. ཨཏྠཏོ པན ཀཱམཱཝཙརཀུསལཙིཏྟསམྤཡུཏྟཱ ཝིརཏིཡོ, ཏཾསམྤཡུཏྟདྷམྨཱ པནེཏྠ ཏགྒཧཎེནེཝ གཧེཏབྦཱ. པཱཎོཏི པརམཏྠཏོ ཛཱིཝིཏིནྡྲིཡཾ, ཏསྶ ཨཏིཔཱཏནཾ པབནྡྷཝསེན པཝཏྟིཏུཾ ཨདཏྭཱ སཏྠཱདཱིཧི ཨཏིཀྐམྨ ཨབྷིབྷཝིཏྭཱ པཱཏནཾ པཱཎཱཏིཔཱཏོ, པཱཎཝདྷོཏི ཨཏྠོ. སོ པན ཨཏྠཏོ པཱཎེ པཱཎསཉྙིནོ ཛཱིཝིཏིནྡྲིཡུཔཙྪེདཀཨུཔཀྐམསམུཊྛཱཔིཀཱ ཝདྷཀཙེཏནཱཝ, ཏསྨཱ པཱཎཱཏིཔཱཏཱ ཝེརམཎི, ཝེརཧེཏུཏཱཡ ཝེརསངྑཱཏཾ པཱཎཱཏིཔཱཏཱདིཔཱཔདྷམྨཾ མཎཏི ནཱིཧརཏཱིཏི ཝིརཏི ‘‘ཝེརམཎཱི’’ཏི ཝུཙྩཏི. ཝིརམཏི ཨེཏཱཡཱཏི ཝཱ ‘‘ཝིརམཏཱི’’ཏི ཝཏྟབྦེ ནིརུཏྟིནཡེན ‘‘ཝེརམཎཱི’’ཏི སམཱདཱནཝིརཏི ཝུཏྟཱ. ཨེས ནཡོ སེསེསུཔི.

ཨདིནྣསྶ ¶ ཨཱདཱནཾ ཨདིནྣཱདཱནཾ, ཐེཡྻཙེཏནཱ. ཨབྲམྷཙརིཡནྟི ཨསེཊྛཙརིཡཾ, མགྒེནམགྒཔཊིཔཏྟིསམུཊྛཱཔིཀཱ མེཐུནཙེཏནཱ. མུསཱཏི ཨབྷཱུཏཝཏྠུ, ཏསྶ ཝཱདོ ཨབྷཱུཏཾ ཉཏྭཱཝ བྷཱུཏཏོ ཝིཉྙཱཔནཙེཏནཱ མུསཱཝཱདོ. པིཊྛཔཱུཝཱདིནིབྦཏྟཱ སུརཱ ཙེཝ པུཔྥཱསཝཱདིབྷེདཾ མེརཡཉྩ སུརཱམེརཡཾ. ཏདེཝ མདནཱིཡཊྛེན མཛྫཉྩེཝ པམཱདཀཱརཎཊྛེན པམཱདཊྛཱནཉྩ, ཏཾ ཡཱཡ ཙེཏནཱཡ པིཝཏི, ཏསྶཱ ཨེཝཾ ཨདྷིཝཙནཾ.

ཨརུཎུགྒམནཏོ པཊྛཱཡ ཡཱཝ མཛ྄ཛྷནྷིཀཱ, ཨཡཾ ཨརིཡཱནཾ བྷོཛནསྶ ཀཱལོ ནཱམ, ཏདཉྙོ ཝིཀཱལོ. བྷུཉྫིཏབྦཊྛེན བྷོཛནནྟི ཨིདྷ སབྦཾ ཡཱཝཀཱལིཀཾ ཝུཙྩཏི, ཏསྶ ཨཛ྄ཛྷོཧརཎཾ ཨིདྷ ཨུཏྟརཔདལོཔེན བྷོཛནནྟི ཨདྷིཔྤེཏཾ. ཝིཀཱལེ བྷོཛནཾ ཨཛ྄ཛྷོཧརཎཾ ཝིཀཱལབྷོཛནཾ, ཝིཀཱལེ ཝཱཡཱཝཀཱལིཀསྶ བྷོཛནཾ ཨཛ྄ཛྷོཧརཎཾ ཝིཀཱལབྷོཛནནྟིཔི ཨཏྠོ གཧེཏབྦོ, ཏཾ ཨཏྠཏོ ཝིཀཱལེ ཡཱཝཀཱལིཀཨཛ྄ཛྷོཧརཎཙེཏནཱཝ.

སཱསནསྶ ཨནནུལོམཏྟཱ ཝིསཱུཀཾ པཊཱཎཱིབྷཱུཏཾ དསྶནཾ ‘‘ཝིསཱུཀདསྶནཾ, ནཙྩགཱིཏཱདིདསྶནསཝནཱནཉྩེཝ ཝཊྚཀཡུདྡྷཛཱུཏཀཱིལཱ༹དིསབྦཀཱིལཱ༹ནཉྩ ནཱམཾ. དསྶནནྟི ཙེཏྠ པཉྩནྣམྤི ཝིཉྙཱཎཱནཾ ཡཐཱསཀཾ ཝིསཡསྶ ཨཱལོཙནསབྷཱཝཏཱཡ དསྶནསདྡེན སངྒཧེཏབྦཏྟཱ སཝནམྤི སངྒཧིཏཾ. ནཙྩགཱིཏཝཱདིཏསདྡེཧི ཙེཏྠ ཨཏྟནོ ནཙྩནགཱཡནཱདཱིནིཔི སངྒཧིཏཱནཱིཏི དཊྛབྦཾ.

མཱལཱཏི ¶ བདྡྷམབདྡྷཾ ཝཱ པུཔྥཾ, ཨནྟམསོ སུཏྟཱདིམཡམྤི ཨལངྐཱརཏྠཱཡ པིལ༹ནྡྷིཡམཱནཾ མཱལཱཏྭེཝ ཝུཙྩཏི. གནྡྷནྟི ཝཱསཙུཎྞཱདིཝིལེཔནཏོ ཨཉྙཾ ཡཾ ཀིཉྩི གནྡྷཛཱཏཾ. ཝིལེཔནནྟི པིསིཏྭཱ གཧིཏཾ ཚཝིརཱགཀརཎཉྩེཝ གནྡྷཛཱཏཉྩ. དྷཱརཎཾ ནཱམ པིལ༹ནྡྷནཾ. མཎྜནཾ ནཱམ ཨཱུནཊྛཱནཔཱུརཎཾ. གནྡྷཝསེན, ཚཝིརཱགཝསེན ཝཱ སཱདིཡནཾ ཝིབྷཱུསནཾ ནཱམ, མཱལཱདཱིསུ ¶ ཝཱ དྷཱརཎཱདཱིནི ཡཐཱཀྐམཾ ཡོཛེཏབྦཱནི. ཏེསཾ དྷཱརཎཱདཱིནཾ ཋཱནཾ ཀཱརཎཾ ཝཱིཏིཀྐམཙེཏནཱ.

ཨུཙྩཱཏི ཨུཙྩ-སདྡེན སམཱནཏྠོ ནིཔཱཏོ. ཨུཙྩཱསཡནཾ ཝུཙྩཏི པམཱཎཱཏིཀྐནྟཾ ཨཱསནྡཱདི. མཧཱསཡནཾ ཨཀཔྤིཡཏྠརཎེཧི ཨཏྠཏཾ སལོཧིཏཝིཏཱནཉྩ. ཨེཏེསུ ཧི ཨཱསནཾ སཡནཉྩ ཨུཙྩཱསཡནམཧཱསཡནསདྡེཧི གཧིཏཱནི ཨུཏྟརཔདལོཔེན. ཛཱཏརཱུཔརཛཏཔཊིགྒཧཎཱཏི ཨེཏྠ རཛཏསདྡེན དཱརུམཱསཀཱདི སབྦཾ རཱུཔིཡཾ སངྒཧིཏཾ. མུཏྟཱམཎིཨཱདཡོཔེཏྠ དྷཉྙཀྑེཏྟཝཏྠཱདཡོ ཙ སངྒཧིཏཱཏི དཊྛབྦཱ. པཊིགྒཧཎ-སདྡེན པན པཊིགྒཱཧཱཔནསཱདིཡནཱནིཔི སངྒཧིཏཱནི.

༡༤༩. སེནཱསནགྒཱཧོ ཙ པཊིཔྤསྶམྦྷནྟཱིཏི ཨིམིནཱ ཝསྶཙྪེདཾ དསྶེཏི. ཨུཔསམྤནྣཱནམྤི པཱརཱཛིཀསམཱཔཏྟིཡཱ སརཎགམནཱདིསཱམཎེརབྷཱཝསྶཔི ཝིནསྶནཏོ སེནཱསནགྒཱཧོ ཙ པཊིཔྤསྶམྦྷཏི, སངྒྷལཱབྷམྤི ཏེ ན ལབྷནྟཱིཏི ཝེདིཏབྦཾ. པུརིམིཀཱཡ པུན སརཎཱནི གཧིཏཱནཱིཏི སརཎགཧཎེན སཧ ཏདཧེཝསྶ ཝསྶཱུཔགམནམྤི དསྶེཏི. པཙྪིམིཀཱཡ ཝསྶཱཝཱསིཀནྟི ཝསྶཱཝཱསིཀལཱབྷགྒཧཎདསྶནམཏྟམེཝེཏཾ, ཏཏོ པུརེཔི ཝཱ པཙྪཱཔི ཝཱ ཝསྶཱཝཱསིཀཉྩ ཙཱིཝརམཱསེསུ སངྒྷེ ཨུཔྤནྣཀཱལཙཱིཝརཉྩ པུརིམིཀཱཡ ཨུཔགནྟྭཱ ཨཝིཔནྣསཱིལོ སཱམཎེརོ ལབྷཏི ཨེཝ. སཙེ པཙྪིམིཀཱཡ གཧིཏཱནཱིཏི པཙྪིམིཀཱཡ ཝསྶཱུཔགམནཉྩ ཚིནྣཝསྶཏཉྩ དསྶེཏི. ཏསྶ ཧི ཀཱལཙཱིཝརལཱབྷོ ན པཱཔུཎཱཏི, ཏསྨཱ ‘‘ཨཔལོཀེཏྭཱ ལཱབྷོ དཱཏབྦོ’’ཏི ཝུཏྟཾ. ཝསྶཱཝཱསིཀལཱབྷོ པན ཡདི སེནཱསནསྶཱམིཀཱ དཱཡཀཱ སེནཱསནགུཏྟཏྠཱཡ པཙྪིམིཀཱཡ ཨུཔགནྟྭཱ ཝཏྟཾ ཀཏྭཱ ཨཏྟནོ སེནཱསནེ ཝསནྟསྶཔི ཝསྶཱཝཱསིཀཾ དཱཏབྦནྟི ཝདནྟི, ཨནཔལོཀེཏྭཱཔི དཱཏབྦོཝ. ཡཾ པན སཱརཏྠདཱིཔནིཡཾ ¶ (སཱརཏྠ. ཊཱི. མཧཱཝགྒ ༣.༡༠༨) ‘‘པཙྪིམིཀཱཡ ཝསྶཱཝཱསིཀཾ ལཙྪཏཱིཏི པཙྪིམིཀཱཡ པུན ཝསྶཾ ཨུཔགཏཏྟཱ ལཙྪཏཱི’’ཏི ཝུཏྟཾ, ཏམྤི ཝསྶཱཝཱསིཀེ དཱཡཀཱནཾ ཨིམཾ ཨདྷིཔྤཱཡཾ ནིསྶཱཡ ཝུཏྟཉྩེ, སུནྡརཾ, སངྒྷིཀཾ, ཀཱལཙཱིཝརམྤི སནྡྷཱཡ ཝུཏྟཉྩེ, ན ཡུཛྫཏཱིཏི ཝེདིཏབྦཾ.

ན ཨཛཱནིཏྭཱཏི ‘‘སུརཱ’’ཏི ཨཛཱནིཏྭཱ པིཝཏོ པཱཎཱཏིཔཱཏཱཝེརམཎིཨཱདིསབྦསཱིལབྷེདཾ སརཎབྷེདཉྩ ¶ ན ཨཱཔཛྫཏི. ཨཀུསལཾ པན སུརཱཔཱནཱཝེརམཎིསཱིལབྷེདོ ཙ ཧོཏི མཱལཱདིདྷཱརཎཱདཱིསུ ཝིཡཱཏི དཊྛབྦཾ. ཨིཏརཱནཱིཏི ཝིཀཱལབྷོཛནཱཝེརམཎིཨཱདཱིནི. ཏཱནིཔི ཧི སཉྩིཙྩ ཝཱིཏིཀྐམནྟསྶ ཏཾ ཏཾ བྷིཛྫཏི ཨེཝ, ཨིཏརཱིཏརེསཾ པན ཨབྷིཛྫནེན ནཱསནངྒཱནི ན ཧོནྟི. ཏེནེཝ ‘‘ཨེཏེསུ བྷིནྣེསཱུ’’ཏི བྷེདཝཙནཾ ཝུཏྟཾ.

ཨཙྩཡཾ དེསཱཔེཏབྦོཏི ‘‘ཨཙྩཡོ མཾ བྷནྟེ ཨཙྩཱགམཱ’’ཏིཨཱདིནཱ སངྒྷམཛ྄ཛྷེ དེསཱཔེཏྭཱ སརཎསཱིལཾ དཱཏབྦནྟི ཨདྷིཔྤཱཡོ པཱརཱཛིཀཏྟཱ ཏེསཾ. ཏེནཱཧ ‘‘ལིངྒནཱསནཱཡ ནཱསེཏབྦོ’’ཏི. ཨཡམེཝ ཧི ནཱསནཱ ཨིདྷཱདྷིཔྤེཏཱཏི ལིངྒནཱསནཱཀཱརཎེཧི པཱཎཱཏིཔཱཏཱདཱིཧི ཨཝཎྞབྷཱསནཱདཱིནཾ སཧ པཏིཏཏྟཱ ཝུཏྟཾ. ནནུ ཙ ཀཎྚཀསཱམཎེརོཔི མིཙྪཱདིཊྛིཀོ ཨེཝ, ཏསྶ ཙ ཧེཊྛཱ དཎྜཀམྨནཱསནཱཝ ཝུཏྟཱ, ཨིདྷ པན མིཙྪཱདིཊྛིཀསྶ ལིངྒནཱསནཱ ཝུཙྩཏི, ཀོ ཨིམེསཾ བྷེདོཏི ཙོདནཾ མནསི ནིདྷཱཡཱཧ ‘‘སསྶཏུཙྪེདཱནཉྷི ཨཉྙཏརདིཊྛིཀོ’’ཏི. ཨེཏྠ ཙཱཡཾ ཨདྷིཔྤཱཡོ – ཡོ ཧི ‘‘ཨཏྟཱ ཨིསྶརོ’’ཏི ཝཱ ‘‘ནིཙྩོ དྷུཝོ’’ཏིཨཱདིནཱ ཝཱ ‘‘ཨཏྟཱ ཨུཙྪིཛྫིསྶཏི ཝིནསྶིསྶཏཱི’’ཏིཨཱདིནཱ ཝཱ ཏིཏྠིཡཔརིཀཔྤིཏཾ ཡཾ ཀིཉྩི སསྶཏུཙྪེདདིཊྛིཾ དལ༹ྷཾ གཧེཏྭཱ ཝོཧརཏི, ཏསྶ སཱ པཱརཱཛིཀཊྛཱནཾ ཧོཏི, སོ ཙ ལིངྒནཱསནཱཡ ནཱསེཏབྦོ. ཡོ པན ཨཱིདིསཾ ¶ དིཊྛིཾ ཨགྒཧེཏྭཱ སཱསནིཀོཝ ཧུཏྭཱ ཀེཝལཾ བུདྡྷཝཙནཱདྷིཔྤཱཡཾ ཝིཔརཱིཏཏོ གཧེཏྭཱ བྷིཀྑཱུཧི ཨོཝདིཡམཱནོཔི ཨཔྤཊིནིསྶཛྫིཏྭཱ ཝོཧརཏི, ཏསྶ སཱ དིཊྛི པཱརཱཛིཀཾ ན ཧོཏི, སོ པན ཀཎྚཀནཱསནཱཡ ཨེཝ ནཱསེཏབྦོཏི ཝིམཏིཝིནོདནིཡཾ. ཨིམསྨིཾ ཋཱནེ སཱརཏྠདཱིཔནིཡཾ དསསིཀྑཱཔདཏོ པཊྛཱཡ ཝིཏྠཱརཏོ ཝཎྞནཱ ཨཱགཏཱ, སཱ པོརཱཎཊཱིཀཱཡཾ སབྦསོ པོཏྠཀཾ ཨཱརུལ༹ྷཱ, ཏསྨཱ ཨིདྷ ན ཝིཏྠཱརཡིམྷ.

༡༥༠. ‘‘ཨཏྟནོ པརིཝེཎནྟི ཨིདཾ པུགྒལིཀཾ སནྡྷཱཡ ཝུཏྟ’’ནྟི གཎྛིཔདེསུ ཝུཏྟཾ. ཨཡཾ པནེཏྠ གཎྛིཔདཀཱརཱནཾ ཨདྷིཔྤཱཡོ – ཝསྶགྒེན པཏྟསེནཱསནནྟི ཨིམིནཱ ཏསྶ ཝསྶགྒེན པཏྟཾ སངྒྷིཀསེནཱསནཾ ཝུཏྟཾ. ཨཏྟནོ པརིཝེཎནྟི ཨིམིནཱཔི ཏསྶེཝ པུགྒལིཀསེནཱསནཾ ཝུཏྟནྟི. ཨཡཾ པནེཏྠ ཨམྷཱཀཾ ཁནྟི – ཡཏྠ ཝཱ ཝསཏཱིཏི ཨིམིནཱ སངྒྷིཀཾ ཝཱ ཧོཏུ པུགྒལིཀཾ ཝཱ, ཏསྶ ནིབདྡྷཝསནཀསེནཱསནཾ ཝུཏྟཾ. ཡཏྠ ཝཱ པཊིཀྐམཏཱིཏི ཨིམིནཱ པན ཡཾ ཨཱཙརིཡུཔཛ྄ཛྷཱཡསྶ ཝསནཊྛཱནཾ ཨུཔཊྛཱནཱདིནིམིཏྟཾ ནིབདྡྷཾ པཝིསཏི, ཏཾ ཨཱཙརིཡུཔཛ྄ཛྷཱཡཱནཾ པཝིསནཊྛཱནཾ ཝུཏྟཾ, ཏསྨཱ ཏདུབྷཡཾ དསྶེཏུཾ ‘‘ཨུབྷཡེནཔི ཨཏྟནོ པརིཝེཎཉྩ ཝསྶགྒེན པཏྟསེནཱསནཉྩ ཝུཏྟ’’ནྟི ཨཱཧ. ཏཏྠ ཨཏྟནོ པརིཝེཎནྟི ཨིམིནཱ ཨཱཙརིཡུཔཛ྄ཛྷཱཡཱནཾ ནིཝཱསནཊྛཱནཾ དསྶིཏཾ, ཝསྶགྒེན པཏྟསེནཱསནནྟི ¶ ཨིམིནཱ པན ཏསྶ ཝསནཊྛཱནཾ, ཏསྨཱ ཏདུབྷཡམྤི སངྒྷིཀཾ ཝཱ ཧོཏུ པུགྒལིཀཾ ཝཱ, ཨཱཝརཎཾ ཀཱཏབྦམེཝཱཏི. མུཁདྭཱརིཀནྟི མུཁདྭཱརེན བྷུཉྫིཏབྦཾ. དཎྜཀམྨཾ ཀཏྭཱཏི དཎྜཀམྨཾ ཡོཛེཏྭཱ. དཎྜེནྟི ཝིནེནྟི ཨེཏེནཱཏི དཎྜོ, སོཡེཝ ཀཏྟབྦཏྟཱ ཀམྨནྟི དཎྜཀམྨཾ, ཨཱཝརཎཱདི. དཎྜཀམྨམསྶ ཀརོཐཱཏི ཨསྶ དཎྜཀམྨཾ ཡོཛེཐ ཨཱཎཱཔེཐ. དཎྜཀམྨནྟི ཝཱ ནིགྒཧཀམྨཾ, ཏསྨཱ ནིགྒཧམསྶ ཀརོཐཱཏི ¶ ཝུཏྟཾ ཧོཏི. ཨེས ནཡོ སབྦཏྠ ཨཱིདིསེསུ ཋཱནེསུ.

སེནཱསནགྒཱཧོ ཙ པཊིཔྤསྶམྦྷནྟཱིཏི ཨིམིནཱ ཚིནྣཝསྶོ ཧོཏཱིཏི དཱིཔེཏི. སཙེ ཨཱཀིཎྞདོསོཝ ཧོཏི, ཨཱཡཏིཾ སཾཝརེ ན ཏིཊྛཏི, ནིཀྐཌྜྷིཏབྦོཏི ཨེཏྠ སཙེ ཡཱཝཏཏིཡཾ ཝུཙྩམཱནོ ན ཨོརམཏི, སངྒྷཾ ཨཔལོཀེཏྭཱ ནཱསེཏབྦོ, པུན པབྦཛྫཾ ཡཱཙམཱནོཔི ཨཔལོཀེཏྭཱ པབྦཱཛེཏབྦོཏི ཝདནྟི. པཙྪིམིཀཱཡ ཝསྶཱཝཱསིཀཾ ལཙྪཏཱིཏི པཙྪིམིཀཱཡ པུན ཝསྶཾ ཨུཔགཏཏྟཱ ལཙྪཏི. ཨཔལོཀེཏྭཱ ལཱབྷོ དཱཏབྦོཏི ཚིནྣཝསྶཏཱཡ ཝུཏྟཾ. ཨིཏརཱནི པཉྩ སིཀྑཱཔདཱནཱིཏི ཝིཀཱལབྷོཛནཱདཱིནི པཉྩ. ཨཙྩཡཾ དེསཱཔེཏབྦོཏི ‘‘ཨཙྩཡོ མཾ བྷནྟེ ཨཙྩཱགམཱ’’ཏིཨཱདིནཱ ནཡེན དེསཱཔེཏབྦོཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༠༨) ཝུཏྟཾ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

པབྦཛྫཱཝིནིཙྪཡཀཐཱལངྐཱརོ ནཱམ

དྭཱཝཱིསཏིམོ པརིཙྪེདོ.

ཨུཔསམྤདཱཝིནིཙྪཡཀཐཱ

ཨེཝཾ པབྦཛྫཱཝིནིཙྪཡཾ ཀཐེཏྭཱ ཏདནནྟརཾ ཨུཔསམྤདཱཝིནིཙྪཡོ ཀཐེཏབྦོ, ཨེཝཾ སནྟེཔི ཨཊྛཀཐཱཡཾ ཨུཔསམྤདཱཝིནིཙྪཡཀཐཱ པཱལི༹ཝཎྞནཱཝསེནེཝ ཨཱགཏཱ, ནོ པཱལི༹མུཏྟཀཝིནིཙྪཡཝསེན, ཨིམསྶ པན པཀརཎསྶ པཱལི༹མུཏྟཀཝིནིཙྪཡཀཐཱབྷཱུཏཏྟཱ ཏམཀཐེཏྭཱ ནིསྶཡཝིནིཙྪཡོ ཨེཝ ཨཱཙརིཡེན ཀཐིཏོ, མཡཾ པན ཨུཔསམྤདཱཝིནིཙྪཡསྶ ཨཏིསུཁུམཏྟཱ ¶ ཨཏིགམྦྷཱིརཏྟཱ སུདུལླབྷཏྟཱ སཱསནཱནུགྒཧཏྠཾ ཨཱཙརིཡེན ¶ ཨཝུཏྟམྤི སམནྟཔཱསཱདིཀཏོ ནཱིཧརིཏྭཱ ཝིམཏིཝིནོདནཱིཨཱདིཔྤཀརཎེསུ ཨཱགཏཝིནིཙྪཡེན ཨལངྐརིཏྭཱ ཏཾ ཝིནིཙྪཡཾ ཀཐཡིསྶཱམ.

ཏེན ཁོ པན སམཡེནཱཏི ཡེན སམཡེན བྷགཝཏཱ ‘‘ན བྷིཀྑཝེ ཨནུཔཛ྄ཛྷཱཡཀོ’’ཏིཨཱདིསིཀྑཱཔདཾ ཨཔཉྙཏྟཾ ཧོཏི, ཏེན སམཡེན. ཨནུཔཛ྄ཛྷཱཡཀནྟི ཨུཔཛ྄ཛྷཾ ཨགཱཧཱཔེཏྭཱ སབྦེན སབྦཾ ཨུཔཛ྄ཛྷཱཡཝིརཧིཏཾ, ཨེཝཾ ཨུཔསམྤནྣཱ ནེཝ དྷམྨཏོ ན ཨཱམིསཏོ སངྒཧཾ ལབྷནྟི, ཏེ པརིཧཱཡནྟིཡེཝ, ན ཝཌྜྷནྟི. ན བྷིཀྑཝེ ཨནུཔཛ྄ཛྷཱཡཀོཏི ཨུཔཛ྄ཛྷཾ ཨགཱཧཱཔེཏྭཱ ནིརུཔཛ྄ཛྷཱཡཀོ ན ཨུཔསམྤཱདེཏབྦོ, ཡོ ཨུཔསམྤཱདེཡྻ, ཨཱཔཏྟི དུཀྐཊསྶཱཏི སིཀྑཱཔདཔཉྙཏྟིཏོ པཊྛཱཡ ཨེཝཾ ཨུཔསམྤཱདེནྟསྶ ཨཱཔཏྟི ཧོཏི, ཀམྨཾ པན ན ཀུཔྤཏི. ཀེཙི ‘‘ཀུཔྤཏཱི’’ཏི ཝདནྟི, ཏཾ ན གཧེཏབྦཾ. ‘‘སངྒྷེན ཨུཔཛ྄ཛྷཱཡེནཱ’’ཏིཨཱདཱིསུཔི ཨུབྷཏོབྱཉྫནཀུཔཛ྄ཛྷཱཡཔརིཡོསཱནེསུ ཨེསེཝ ནཡོ.

ཨཔཏྟཀཱ ཧཏྠེསུ པིཎྜཱཡ ཙརནྟཱིཏི ཡོ ཧཏྠེསུ པིཎྜོ ལབྦྷཏི, ཏདཏྠཱཡ ཙརནྟི. སེཡྻཐཱཔི ཏིཏྠིཡཱཏི ཡཐཱ ཨཱཛཱིཝཀནཱམཀཱ ཏིཏྠིཡཱ. སཱུཔབྱཉྫནེཧི མིསྶེཏྭཱ ཧཏྠེསུ ཋཔིཏཔིཎྜམེཝ ཧི ཏེ བྷུཉྫནྟི. ཨཱཔཏྟི དུཀྐཊསྶཱཏི ཨེཝཾ ཨུཔསམྤཱདེནྟསྶེཝ ཨཱཔཏྟི ཧོཏི, ཀམྨཾ པན ན ཀུཔྤཏི, ཨཙཱིཝརཀཱདིཝཏྠཱུསུཔི ཨེསེཝ ནཡོ.

ཡཱཙིཏཀེནཱཏི ‘‘ཡཱཝ ཨུཔསམྤདཾ ཀརོམ, ཏཱཝ དེཐཱ’’ཏི ཡཱཙིཏྭཱ གཧིཏེན, ཏཱཝཀཱལིཀེནཱཏི ཨཏྠོ. ཨཱིདིསེན ཧི པཏྟེན ཝཱ ཙཱིཝརེན ཝཱ པཏྟཙཱིཝརེན ཝཱ ཨུཔསམྤཱདེནྟསྶེཝ ཨཱཔཏྟི ཧོཏི, ཀམྨཾ པན ན ཀུཔྤཏི, ཏསྨཱ པརིཔུཎྞཔཏྟཙཱིཝརོཝ ཨུཔསམྤཱདེཏབྦོ. སཙེ ཏསྶ ནཏྠི, ཨཱཙརིཡུཔཛ྄ཛྷཱཡཱ ཙསྶ དཱཏུཀཱམཱ ཧོནྟི ¶ , ཨཉྙེ ཝཱ བྷིཀྑཱུ, ནིརཔེཀྑེཧི ཝིསྶཛྫེཏྭཱ ཨདྷིཊྛཱནཱུཔགཾ པཏྟཙཱིཝརཾ དཱཏབྦཾ.

གོཏྟེནཔི ཨནུསྶཱཝེཏུནྟི ‘‘མཧཱཀསྶཔསྶ ཨུཔསམྤདཱཔེཀྑོ’’ཏི ཨེཝཾ གོཏྟཾ ཝཏྭཱ ཨནུསྶཱཝེཏུཾ ཨནུཛཱནཱམཱིཏི ཨཏྠོ. དྭེ ཨེཀཱནུསྶཱཝནེཏི དྭེ ཨེཀཏོ ཨནུསྶཱཝནེ, ཨེཀེན ཨེཀསྶ, ཨཉྙེན ཨིཏརསྶཱཏི ཨེཝཾ དྭཱིཧི ཝཱ ཨཱཙརིཡེཧི ཨེཀེན ཝཱ ཨེཀཀྑཎེ ཀམྨཝཱཙཾ ཨནུསྶཱཝེནྟེཧི ཨུཔསམྤཱདེཏུཾ ཨནུཛཱནཱམཱིཏི ཨཏྠོ. དྭེ ཏཡོ ཨེཀཱནུསྶཱཝནེ ཀཱཏུཾ, ཏཉྩ ཁོ ཨེཀེན ¶ ཨུཔཛ྄ཛྷཱཡེནཱཏི དྭེ ཝཱ ཏཡོ ཝཱ ཛནེ པུརིམནཡེནེཝ ཨེཀཏོ ཨནུསྶཱཝནེ ཀཱཏུཾ ཨནུཛཱནཱམི, ཏཉྩ ཁོ ཨནུསྶཱཝནཀིརིཡཾ ཨེཀེན ཨུཔཛ྄ཛྷཱཡེན ཨནུཛཱནཱམཱིཏི ཨཏྠོ. ཏསྨཱ ཨེཀེན ཨཱཙརིཡེན དྭེ ཝཱ ཏཡོ ཝཱ ཨནུསྶཱཝེཏབྦཱ. དྭཱིཧི ཝཱ ཏཱིཧི ཝཱ ཨཱཙརིཡེཧི ཝིསུཾ ཝིསུཾ ཨེཀེན ཨེཀསྶཱཏི ཨེཝཾ ཨེཀཔྤཧཱརེནེཝ དྭེ ཏིསྶོ ཝཱ ཀམྨཝཱཙཱ ཀཱཏབྦཱ. སཙེ པན ནཱནཱཙརིཡཱ ནཱནུཔཛ྄ཛྷཱཡཱ ཧོནྟི, ཏིསྶཏྠེརོ སུམནཏྠེརསྶ སདྡྷིཝིཧཱརིཀཾ, སུམནཏྠེརོ ཏིསྶཏྠེརསྶ སདྡྷིཝིཧཱརིཀཾ ཨནུསྶཱཝེཏི, ཨཉྙམཉྙཉྩ གཎཔཱུརཀཱ ཧོནྟི, ཝཊྚཏི. སཙེ ནཱནུཔཛ྄ཛྷཱཡཱ ཧོནྟི, ཨེཀོ ཨཱཙརིཡོ ཧོཏི, ‘‘ན ཏྭེཝ ནཱནུཔཛ྄ཛྷཱཡེནཱ’’ཏི པཊིཀྑིཏྟཏྟཱ ན ཝཊྚཏི. ཨིདཾ སནྡྷཱཡ ཧི ཨེས པཊིཀྑེཔོ.

པཋམཾ ཨུཔཛ྄ཛྷཾ གཱཧཱཔེཏབྦོཏི ཨེཏྠ ཝཛྫཱཝཛྫཾ ཨུཔནིཛ྄ཛྷཱཡཏཱིཏི ཨུཔཛ྄ཛྷཱ, ཏཾ ཨུཔཛ྄ཛྷཾ ‘‘ཨུཔཛ྄ཛྷཱཡོ མེ, བྷནྟེ, ཧོཧཱི’’ཏི ཨེཝཾ ཝདཱཔེཏྭཱ གཱཧཱཔེཏབྦོ. ཝིཏྠཱཡནྟཱིཏི ཝིཏྠདྡྷགཏྟཱ ཧོནྟི. ཡཾ ཛཱཏནྟི ཡཾ ཏཝ སརཱིརེ ཛཱཏཾ ནིབྦཏྟཾ ཝིཛྫམཱནཾ, ཏཾ སངྒྷམཛ྄ཛྷེ པུཙྪནྟེ སནྟཾ ཨཏྠཱིཏི ཝཏྟབྦནྟིཨཱདི. ཨུལླུམྤཏུ མནྟི ཨུདྡྷརཏུ མཾ.

ཏཱཝདེཝཱཏི ¶ ཨུཔསམྤནྣསམནནྟརམེཝ. ཚཱཡཱ མེཏབྦཱཏི ཨེཀཔོརིསཱ ཝཱ དྭིཔོརིསཱ ཝཱཏི ཚཱཡཱ མེཏབྦཱ. ཨུཏུཔྤམཱཎཾ ཨཱཙིཀྑིཏབྦནྟི ‘‘ཝསྶཱནོ ཧེམནྟོ གིམྷོ’’ཏི ཨུཏུཔྤམཱཎཾ ཨཱཙིཀྑིཏབྦཾ. ཨེཏྠ ཙ ཨུཏུཡེཝ ཨུཏུཔྤམཱཎཾ. སཙེ ཝསྶཱནཱདཡོ ཨཔརིཔུཎྞཱ ཧོནྟི, ཡཏྟཀེཧི དིཝསེཧི ཡསྶ ཡོ ཨུཏུ ཨཔརིཔུཎྞོ, ཏེ དིཝསེ སལླཀྑེཏྭཱ སོ དིཝསབྷཱགོ ཨཱཙིཀྑིཏབྦོ. ཨཐ ཝཱ ‘‘ཨཡཾ ནཱམ ཨུཏུ, སོ ཙ ཁོ པརིཔུཎྞོ ཨཔརིཔུཎྞོ ཝཱ’’ཏི ཨེཝཾ ཨུཏུཔྤམཱཎཾ ཨཱཙིཀྑིཏབྦཾ, ‘‘པུབྦཎྷོ ཝཱ སཱཡནྷོ ཝཱ’’ཏི ཨེཝཾ དིཝསབྷཱགོ ཨཱཙིཀྑིཏབྦོ. སངྒཱིཏཱིཏི ཨིདམེཝ སབྦཾ ཨེཀཏོ ཀཏྭཱ ‘‘ཏྭཾ ཀིཾ ལབྷསི, ཀཱ ཏེ ཚཱཡཱ, ཀིཾ ཨུཏུཔྤམཱཎཾ, ཀོ དིཝསབྷཱགོ’’ཏི པུཊྛོ ‘‘ཨིདཾ ནཱམ ལབྷཱམི ཝསྶཾ ཝཱ ཧེམནྟཾ ཝཱ གིམྷཾ ཝཱ, ཨཡཾ མེ ཚཱཡཱ, ཨིདཾ ཨུཏུཔྤམཱཎཾ, ཨཡཾ དིཝསབྷཱགོཏི ཝདེཡྻཱསཱི’’ཏི ཨེཝཾ ཨཱཙིཀྑིཏབྦཾ.

ཨོཧཱཡཱཏི ཚཌྜེཏྭཱ. དུཏིཡཾ དཱཏུནྟི ཨུཔསམྤདམཱལ༹ཀཏོ པརིཝེཎཾ གཙྪནྟསྶ དུཏིཡཀཾ དཱཏུཾ ཨནུཛཱནཱམི, ཙཏྟཱརི ཙ ཨཀརཎཱིཡཱནི ཨཱཙིཀྑིཏུནྟི ཨཏྠོ. པཎྜུཔལཱསོཏི པཎྜུཝཎྞོ པཏྟོ. བནྡྷནཱ པཝུཏྟོཏི ཝཎྚཏོ པཏིཏོ. ཨབྷབྦོ ཧརིཏཏྠཱཡཱཏི པུན ཧརིཏོ བྷཝིཏུཾ ¶ ཨབྷབྦོ. པུཐུསིལཱཏི མཧཱསིལཱ. ཨཡཾ སམནྟཔཱསཱདིཀཏོ ནཱིཧརིཏྭཱ ཨཱབྷཏོ ཨུཔསམྤདཱཝིནིཙྪཡོ.

ཨནུཔཛ྄ཛྷཱཡཱདིཝཏྠཱུསུ སིཀྑཱཔདཾ ཨཔཉྙཏྟནྟི ‘‘ན ཨནུཔཛ྄ཛྷཱཡཀོ ཨུཔསམྤཱདེཏབྦོ’’ཏི (མཧཱཝ. ༡༡༧) ཨིདྷེཝ པཉྙཱཔིཡམཱནཾ སིཀྑཱཔདཾ སནྡྷཱཡ ཝུཏྟཾ. ཀམྨཾ པན ན ཀུཔྤཏཱིཏི ཨིདཾ ཨུཔཛ྄ཛྷཱཡཱབྷཱཝེཔི ‘‘ཨིཏྠནྣཱམསྶ ཨུཔསམྤདཱཔེཀྑཱ ཨིཏྠནྣཱམེན ཨུཔཛ྄ཛྷཱཡེནཱ’’ཏི ¶ མཏསྶ ཝཱ ཝིབྦྷནྟསྶ ཝཱ པུརཱཎཨུཔཛ྄ཛྷཱཡསྶ, ཨཉྙསྶ ཝཱ ཡསྶ ཀསྶཙི ཨཝིཛྫམཱནསྶཔི ནཱམེན སབྦཏྠ ཨུཔཛ྄ཛྷཱཡཀིཏྟནསྶ ཀཏཏྟཱ ཝུཏྟཾ. ཡདི ཧི ཨུཔཛ྄ཛྷཱཡཀིཏྟནཾ ན ཀརེཡྻ, ‘‘པུགྒལཾ ན པརཱམསཏཱི’’ཏི ཝུཏྟཀམྨཝིཔཏྟི ཨེཝ སིཡཱ. ཏེནེཝ པཱལི༹ཡཾ (མཧཱཝ. ༡༡༧) ‘‘ཨནུཔཛ྄ཛྷཱཡཀ’’ནྟི ཝུཏྟཾ, ཨཊྛཀཐཱཡམྤི (མཧཱཝ. ཨཊྛ. ༡༡༧) ཨསྶ ‘‘ཨུཔཛ྄ཛྷཱཡཾ ཨཀིཏྟེཏྭཱ’’ཏི ཨཝཏྭཱ ‘‘ཨུཔཛ྄ཛྷཱཡཾ ཨགཱཧཱཔེཏྭཱ སབྦེན སབྦཾ ཨུཔཛ྄ཛྷཱཡཝིརཧིཏཾ’’ ཨིཙྩེཝ ཨཏྠོ ཝུཏྟོ. པཱལི༹ཡཾ སངྒྷེན ཨུཔཛ྄ཛྷཱཡེནཱཏི ‘‘ཨཡཾ ཨིཏྠནྣཱམོ སངྒྷསྶ ཨུཔསམྤདཱཔེཀྑོ, ཨིཏྠནྣཱམོ སངྒྷཾ ཨུཔསམྤདཾ ཡཱཙཏི སངྒྷེན ཨུཔཛ྄ཛྷཱཡེནཱ’’ཏི ཨེཝཾ ཀམྨཝཱཙཱཡ སངྒྷམེཝ ཨུཔཛ྄ཛྷཱཡཾ ཀིཏྟེཏྭཱཏི ཨཏྠོ. ཨེཝཾ གཎེན ཨུཔཛ྄ཛྷཱཡེནཱཏི ཨེཏྠཱཔི ‘‘ཨཡཾ ཨིཏྠནྣཱམོ གཎསྶ ཨུཔསམྤདཱཔེཀྑོ’’ཏིཨཱདིནཱ ཡོཛནཱ ཝེདིཏབྦཱ. ཨེཝཾ ཝུཏྟེཔི ཀམྨཾ ན ཀུཔྤཏི ཨེཝ དུཀྐཊསྶེཝ ཝུཏྟཏྟཱ, ཨཉྙཐཱ ‘‘སོ ཙ པུགྒལོ ཨནུཔསམྤནྣོ’’ཏི ཝདེཡྻ. ཏེནཱཧ ‘‘སངྒྷེནཱ’’ཏིཨཱདི. ཏཏྠ པཎྜཀཱདིཨུཔཛ྄ཛྷཱཡེཧི ཀརིཡམཱནེསུ ཀམྨེསུ པཎྜཀཱདིཀེ ཝིནཱཝ ཡདི པཉྩཝགྒཱདིགཎོ པཱུརཏི, ཀམྨཾ ན ཀུཔྤཏི, ཨིཏརཐཱ ཀུཔྤཏཱིཏི ཝེདིཏབྦཾ.

ཨཔཏྟཙཱིཝརཝཏྠཱུསུཔི པཏྟཙཱིཝརཱནཾ ཨབྷཱཝེཔི ‘‘པརིཔུཎྞསྶ པཏྟཙཱིཝར’’ནྟི ཀམྨཝཱཙཱཡ སཱཝིཏཏྟཱ ཀམྨཀོཔཾ ཨཝཏྭཱ དུཀྐཊམེཝ ཝུཏྟཾ. ཨིཏརཐཱ སཱཝནཱཡ ཧཱཔནཏོ ཀམྨཀོཔོ ཨེཝ སིཡཱ. ཀེཙི པན ‘‘པཋམཾ ཨནུཉྙཱཏཀམྨཝཱཙཱཡཾ ཨུཔསམྤནྣཱ ཝིཡ ཨིདཱནིཔི ‘པརིཔུཎྞསྶ པཏྟཙཱིཝར’ནྟི ཨཝཏྭཱ ཀམྨཝཱཙཱཡ ཨུཔསམྤནྣཱཔི སཱུཔསམྤནྣཱ ཨེཝཱ’’ཏི ཝདནྟི, ཏཾ ན ཡུཏྟཾ. ཨནུཉྙཱཏཀཱལཏོ པཊྛཱཡ ཧི ཨཔརཱམསནཾ སཱཝནཱཡ ཧཱཔནཝིཔཏྟི ཨེཝ ཧོཏི ‘‘ཨིཏྠནྣཱམོ སངྒྷཾ ཨུཔསམྤདཾ ཡཱཙཏཱི’’ཏི པདསྶ ཧཱཔནེ ཝིཡ ¶ . ཏམྤི ཧི པཙྪཱ ཨནུཉྙཱཏཾ, ‘‘སངྒྷཾ, བྷནྟེ, ཨུཔསམྤདཾ ཡཱཙཱམཱི’’ཏིཨཱདིཝཱཀྱེན ཨཡཱཙེཏྭཱ ཏམྤི ཨུཔསམྤཱདེནྟོ ‘‘ཨཡཾ ཨིཏྠནྣཱམོ སངྒྷཾ ཨུཔསམྤདཾ ཡཱཙཏཱི’’ཏི ཝཏྭཱཝ ཡདི ཀམྨཝཱཙཾ ཀརོཏི, ཀམྨཾ སུཀཏམེཝ ཧོཏི. ནོ ཙེ, ཝིཔནྣཾ. སབྦཔཙྪཱ ཧི ཨནུཉྙཱཏཀམྨཝཱཙཏོ ཀིཉྩིཔི པརིཧཱཔེཏུཾ ན ཝཊྚཏི, སཱཝནཱཡ ཧཱཔནམེཝ ¶ ཧོཏི, ཨཉྙེ ཝཱ བྷིཀྑཱུ དཱཏུཀཱམཱ ཧོནྟཱིཏི སམྦནྡྷོ, ཨཡམེཏྠ ཝིམཏིཝིནོདནིཡཱ (ཝི. ཝི. ཊཱི. མཧཱཝགྒ ༢.༡༡༧) ཨཱབྷཏོ ཝིནིཙྪཡོ. སཱརཏྠདཱིཔནཱིཝིནིཙྪཡོ པན ཨིདྷེཝ ཨནྟོགདྷཱ ཧོཏི ཨཔྤཏརཏྟཱ ཨཝིསེསཏྟཱ ཙ.

ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༡༡༧) པན ‘‘ཀེཙི ཀུཔྤཏཱིཏི ཝདནྟི, ཏཾ ན གཧེཏབྦ’’ནྟི ཡཾ ཝུཏྟཾ, ཏཾ ‘‘པཉྩཝགྒཀརཎཱིཡཉྩེ, བྷིཀྑཝེ, ཀམྨཾ, བྷིཀྑུནིཔཉྩམོ ཀམྨཾ ཀརེཡྻ, ཨཀམྨཾ ན ཙ ཀརཎཱིཡ’’ནྟིཨཱདིནཱ (མཧཱཝ. ༣༩༠) ནཡེན ཝུཏྟཏྟཱ པཎྜཀཱནཾ གཎཔཱུརཎབྷཱཝེ ཨེཝ ཀམྨཾ ཀུཔྤཏི, ན སབྦནྟི ཀཏྭཱ སུཝུཏྟཾ, ཨིཏརཐཱ ‘‘པཎྜཀུཔཛ྄ཛྷཱཡེན ཀམྨཾ ཀརེཡྻ, ཨཀམྨཾ ན ཙ ཀརཎཱིཡ’’ནྟིཨཱདིཀཱཡ པཱལི༹ཡཱ བྷཝིཏབྦཾ སིཡཱ. ཡཐཱ ཨཔརིཔུཎྞཔཏྟཙཱིཝརསྶ ཨུཔསམྤཱདནཀཱལེ ཀམྨཝཱཙཱཡཾ ‘‘པརིཔུཎྞསྶ པཏྟཙཱིཝར’’ནྟི ཨསནྟཾ ཝཏྠུཾ ཀིཏྟེཏྭཱ ཨུཔསམྤདཱཡ ཀཏཱཡ ཏསྨིཾ ཨསནྟེཔི ཨུཔསམྤདཱ རུཧཏི, ཨེཝཾ ‘‘ཨཡཾ བུདྡྷརཀྑིཏོ ཨཱཡསྨཏོ དྷམྨརཀྑིཏསྶ ཨུཔསམྤདཱཔེཀྑོ’’ཏི ཨཝཏྠུཾ པཎྜཀུཔཛ྄ཛྷཱཡཱདིཾ, ཨསནྟཾ ཝཱ ཝཏྠུཾ ཀིཏྟེཏྭཱ ཀཏཱཡཔི གཎཔཱུརཀཱནམཏྠིཏཱཡ ཨུཔསམྤདཱ རུཧཏེཝ. ‘‘ན, བྷིཀྑཝེ, པཎྜཀུཔཛ྄ཛྷཱཡེན ཨུཔསམྤཱདེཏབྦོ, ཡོ ཨུཔསམྤཱདེཡྻ, ཨཱཔཏྟི དུཀྐཊསྶ, སོ ཙ པུགྒལོ ཨནུཔསམྤནྣོ’’ཏིཨཱདིཝཙནསྶ ཨབྷཱཝཱ ཨཡམཏྠོ སིདྡྷོཝ ཧོཏི. ན ཧི བུདྡྷཱ ཝཏྟབྦཡུཏྟཾ ན ཝདནྟི. ཏེན ཝུཏྟཾ ‘‘ཡོ པན བྷིཀྑུ ཛཱནཾ ཨཱུནཝཱིསཏིཝསྶཾ ¶ …པེ… སོ ཙ པུགྒལོ ཨནུཔསམྤནྣོ’’ཏིཨཱདི (པཱཙི. ༤༠༣). ཏཐཱ ‘‘བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ’’ཏི (མཧཱཝ. ༧༡) ཝཙནཏོ ཐེཡྻསཾཝཱསཀཱདིཨཱཙརིཡེཧི ཨནུསྶཱཝནཱཡ ཀཏཱཡ ཨུཔསམྤདཱ ན རུཧཏི ཏེསཾ ཨབྷིཀྑུཏྟཱཏི ཝཙནམྤི ན གཧེཏབྦཾ.

ཀིཉྩ བྷིཡྻོ – ‘‘ཨིམཱནི ཙཏྟཱརི ཀམྨཱནི པཉྩཧཱཀཱརེཧི ཝིཔཛྫནྟཱི’’ཏིཨཱདིནཱ (པརི. ༤༨༢) ནཡེན ཀམྨཱནཾ སམྤཏྟིཝིཔཏྟིཡཱ ཀཐིཡམཱནཱཡ ‘‘སཏྟཧི ཨཱཀཱརེཧི ཀམྨཱནི ཝིཔཛྫནྟི ཝཏྠུཏོ ཝཱ ཉཏྟིཏོ ཝཱ ཨནུསྶཱཝནཏོ ཝཱ སཱིམཏོ ཝཱ པརིསཏོ ཝཱ ཨུཔཛ྄ཛྷཱཡཏོ ཝཱ ཨཱཙརིཡཏོ ཝཱ’’ཏི ཨཀཐིཏཏྟཱ ན གཧེཏབྦཾ. ‘‘པརིསཏོ ཝཱ’’ཏི ཝཙནེན ཨཱཙརིཡུཔཛ྄ཛྷཱཡཱནཾ ཝཱ སངྒཧོ ཀཏོཏི ཙེ? ན, ‘‘དྭཱདསཧི ཨཱཀཱརེཧི པརིསཏོ ཀམྨཱནི ཝིཔཛྫནྟཱི’’ཏི ཨེཏསྶ ཝིབྷངྒེ ཏེསམནཱམཊྛཏྟཱ, ཨཡམཏྠོ ཡསྨཱ ཏཏྠ ཏཏྠ སརཱུཔེན ཝུཏྟཔཱལི༹ཝསེནེཝ ¶ སཀྐཱ ཛཱནིཏུཾ, ཏསྨཱ ནཡམུཁཾ དསྶེཏྭཱ སཾཁིཏྟོཏི ཨཡམསྶ ཡུཏྟིགཝེསནཱཏི ཝུཏྟཾ.

ཏཏྲིདཾ ཝིཙཱརེཏབྦཾ – ཨནུཔཛ྄ཛྷཱཡཀཾ ཨུཔསམྤཱདེནྟཱ ཏེ བྷིཀྑཱུ ཡཐཱཝུཏྟནཡེན ཨབྷཱུཏཾ ཝཏྠུཾ ཀིཏྟཡིཾསུ, ཨུདཱཧུ མུསཱཝཱདབྷཡཱ ཏཱནེཝ པདཱནི ན སཱཝེསུནྟི. ཀིཉྩེཏྠ – ཡདི ཏཱཝ ཨུཔཛ྄ཛྷཱཡཱབྷཱཝཏོ ན སཱཝེསུཾ, ‘‘པུགྒལཾ ན པརཱམསཏཱི’’ཏི ཝུཏྟཝིཔཏྟིཔྤསངྒོ ཧོཏི, ཨཐ སཱཝེསུཾ, མུསཱཝཱདོ ནེསཾ བྷཝཏཱིཏི? ཝུཙྩཏེ – སཱཝེསུཾཡེཝ ཡཐཱཝུཏྟཝིཔཏྟིཔྤསངྒབྷཡཱ, ‘‘ཀམྨཾ པན ན ཀུཔྤཏཱི’’ཏི ཨཊྛཀཐཱཡཾ ཝུཏྟཏྟཱ ཙ. ན, མུསཱཝཱདསྶ ཨསམྦྷཝཏོ, མུསཱཝཱདེནཔི ཀམྨསམྦྷཝཏོ ཙ. ན ཧི སཀྐཱ མུསཱཝཱདེན ཀམྨཝིཔཏྟིསམྤཏྟིཾ ཀཱཏུནྟི. ཏསྨཱ ‘‘ཨནུཔཛ྄ཛྷཱཡཀཾ ཨུཔསམྤཱདེནྟཱི’’ཏི ཝཙནསྶ ཙ ཨུབྷཡདོསཝིནིམུཏྟོ ཨཏྠོ པརིཡེསིཏབྦོ.

ཨཡཉྩེཏྠ ¶ ཡུཏྟི – ཡཐཱ པུབྦེ པབྦཛྫུཔསམྤདུཔཛ྄ཛྷཱཡེསུ ཝིཛྫམཱནེསུཔི ཨུཔཛ྄ཛྷཱཡགྒཧཎཀྐམེན ཨགྒཧིཏཏྟཱ ‘‘ཏེན ཁོ པན སམཡེན བྷིཀྑཱུ ཨནུཔཛ྄ཛྷཱཡཀ’’ནྟིཨཱདི ཝུཏྟཾ, ཏཐཱ ཨིདྷཱཔི ཨུཔཛ྄ཛྷཱཡསྶ ཝིཛྫམཱནསྶེཝ སཏོ ཨགྒཧིཏཏྟཱ ‘‘ཨནུཔཛ྄ཛྷཱཡཀཾ ཨུཔསམྤཱདེནྟཱི’’ཏི ཝུཏྟཾ. ཀམྨཝཱཙཱཙརིཡེན པན ‘‘གཧིཏོ ཏེན ཨུཔཛ྄ཛྷཱཡོ’’ཏི སཉྙཱཡ ཨུཔཛ྄ཛྷཱཡཾ ཀིཏྟེཏྭཱ ཀམྨཝཱཙཾ སཱཝེཏབྦཾ. ཀེནཙི ཝཱ ཀཱརཎེན ཀཱཡསཱམགྒིཾ ཨདེནྟསྶ ཨུཔཛ྄ཛྷཱཡསྶ ཚནྡཾ གཧེཏྭཱ ཀམྨཝཱཙཾ སཱཝེཏི, ཨུཔཛ྄ཛྷཱཡོ ཝཱ ཨུཔསམྤདཱཔེཀྑསྶ ཨུཔཛ྄ཛྷཾ དཏྭཱ པཙྪཱ ཨུཔསམྤནྣེ ཏསྨིཾ ཏཱདིསེ ཝཏྠུསྨིཾ སམནུཡུཉྫིཡམཱནོ ཝཱ ཨསམནུཡུཉྫིཡམཱནོ ཝཱ ཨུཔཛ྄ཛྷཱཡདཱནཏོ པུབྦེ ཨེཝ སཱམཎེརོ པཊིཛཱནཱཏི, སིཀྑཱཔཙྩཀྑཱཏཀོ ཝཱ ཨནྟིམཝཏྠུཨཛ྄ཛྷཱཔནྣཀོ ཝཱ པཊིཛཱནཱཏི, ཚནྡཧཱརཀཱདཡོ ཝིཡ ཨུཔཛ྄ཛྷཱཡོ ཝཱ ཨཉྙསཱིམཱགཏོ ཧོཏི. ཀམྨཝཱཙཱ རུཧཏཱིཏི ཝཏྭཱ ‘‘ཨནུཛཱནཱམི བྷིཀྑཝེ པཙྩནྟིམེསུ ཛནཔདེསུ ཝིནཡདྷརཔཉྩམེན གཎེན ཨུཔསམྤད’’ནྟི ཝུཏྟཏྟཱ. ཀེཙི ‘‘ཝིནཡདྷརཔཉྩམེན ཨུཔཛ྄ཛྷཱཡེན སནྣིཧིཏེནེཝ བྷཝིཏབྦ’’ནྟི ཝདནྟཱིཏི པོརཱཎགཎྛིཔདེ ཝུཏྟཾ. སོ ཙ པཱཋོ ཨཔྤམཱཎོ མཛ྄ཛྷིམེསུ ཛནཔདེསུ ཏསྶ ཝཙནསྶཱབྷཱཝཏོ. ཨསནྣིཧིཏེཔི ཨུཔཛ྄ཛྷཱཡེ ཀམྨཝཱཙཱ རུཧཏཱིཏི ཨཱཔཛྫཏཱིཏི ཙེ? ན. ཀསྨཱ? ཀམྨསམྤཏྟིཡཾ ‘‘པུགྒལཾ པརཱམསཏཱི’’ཏི ཝུཏྟཔཱཋོཝ ནོ པམཱཎཾ. ན ཧི ཏཏྠ ཨསནྣིཧིཏོ ཨུཔཛ྄ཛྷཱཡསངྑཱཏོ པུགྒལོ པརཱམསནཾ ཨརཧཏི, ཏསྨཱ ཏཏྠ སངྒྷཔརཱམསནཾ ཝིཡ པུགྒལཔརཱམསནཾ ཝེདིཏབྦཾ. སངྒྷེན གཎེན ཨུཔཛ྄ཛྷཱཡེན ¶ ཨུཔསམྤཱདེནྟི ཏེསཾ ཨཏྠཏོ པུགྒལཏྟཱ, པཎྜཀཱདིཨུཔཛ྄ཛྷཱཡེན ཨུཔསམྤཱདེནྟི ཨུཔསམྤཱདནཀཱལེ ཨཝིདིཏཏྟཱཏི པོརཱཎཱ.

ཨཔཏྟཙཱིཝརཾ ¶ ཨུཔསམྤཱདེནྟཱིཏི ཀམྨཝཱཙཱཙརིཡོ ‘‘པརིཔུཎྞསྶ པཏྟཙཱིཝར’’ནྟི སཉྙཱཡ, ཀེཝལཾ ཨཏྠསམྤཏྟིཾ ཨནཔེཀྑིཏྭཱ སནྟཔདནཱིཧཱརེན ཝཱ ‘‘པརིཔུཎྞསྶ པཏྟཙཱིཝར’’ནྟི ཀམྨཝཱཙཾ སཱཝེཏི. ཡཐཱ ཨེཏརཧི མཏཝིཔྤཝུཏྟམཱཏཱཔིཏིཀོཔི ‘‘ཨནུཉྙཱཏོསི མཱཏཱཔིཏཱུཧཱི’’ཏི པུཊྛོ ‘‘ཨཱམ བྷནྟེ’’ཏི ཝདཏི, ཀིཾ བཧུནཱ? ཨཡཾ པནེཏྠ སཱརོ – ‘‘ཏསྨིཾ སམཡེ ཙཏྟཱརི ཀམྨཱནི པཉྩཧཱཀཱརེཧི ཝིཔཛྫནྟཱི’’ཏི ལཀྑཎསྶ ན ཏཱཝ པཉྙཏྟཏྟཱ ཨནུཔཛ྄ཛྷཱཡཀཱདིཾ ཨུཔསམྤཱདེནྟི. ཝཛྫནཱིཡཔུགྒལཱནཾ ཨཝུཏྟཏྟཱ པཎྜཀུཔཛ྄ཛྷཱཡཱདིཾ ཨུཔསམྤཱདེནྟི, ཏེརསནྟརཱཡཔུཙྪཱཡ ཨདསྶནཏྟཱ ཨཔཏྟཙཱིཝརཀཾ ཨུཔསམྤཱདེནྟི, ‘‘ཨནུཛཱནཱམི བྷིཀྑཝེ ཉཏྟིཙཏུཏྠེན ཀམྨེན ཨུཔསམྤཱདེཏུ’’ནྟི (མཧཱཝ. ༦༩) ཨེཝཾ སབྦཔཋམཾ ཨནུཉྙཱཏཱཡ ཀམྨཝཱཙཱཡ ‘‘པརིཔུཎྞསྶ པཏྟཙཱིཝར’’ནྟི ཨཝཙནམེཏྠ སཱདྷཀནྟི ཝེདིཏབྦཾ. ཏཉྷི ཝཙནཾ ཨནུཀྐམེནཱནུཉྙཱཏནྟི.

ཨིདཾ ཏཱཝ སབྦཐཱ ཧོཏུ, ‘‘མཱུགཾ པབྦཱཛེནྟི བདྷིརཾ པབྦཱཛེནྟཱི’’ཏི ཨིདཾ ཀཐཾ སམྦྷཝིཏུམརཧཏི ཨཱདིཏོ པཊྛཱཡ ‘‘ཨནུཛཱནཱམི བྷིཀྑཝེ ཨིམེཧི ཏཱིཧི སརཎགམནེཧི པབྦཛྫ’’ནྟིཨཱདིནཱ ཨནུཉྙཱཏཏྟཱཏི? ཝུཙྩཏེ – ‘‘ཨེཝཉྩ པན, བྷིཀྑཝེ, པབྦཱཛེཏབྦོཏི, ཨེཝཾ ཝདེཧཱིཏི ཝཏྟབྦོ…པེ… ཏཏིཡམྤི སངྒྷཾ སརཎཾ གཙྪཱམཱི’’ཏི ཨེཏྠ ‘‘ཨེཝཾ ཝདེཧཱིཏི ཝཏྟབྦོ’’ཏི ཨིམསྶ ཝཙནསྶ མིཙྪཱ ཨཏྠཾ གཧེཏྭཱ མཱུགཾ པབྦཱཛེསུཾ. ‘‘ཨེཝཾ ཝདེཧཱི’’ཏི ཏཾ པབྦཛྫཱཔེཀྑཾ ཨཱཎཱཔེཏྭཱ སཡཾ ཨུཔཛ྄ཛྷཱཡེན ཝཏྟབྦོ ‘‘ཏཏིཡམྤི སངྒྷཾ སརཎཾ གཙྪཱམཱི’’ཏི, སོ པབྦཛྫཱཔེཀྑཱ ཏཐཱ ཨཱཎཏྟོ ཨུཔཛ྄ཛྷཱཡཝཙནསྶ ཨནུ ཨནུ ཝདཏུ ཝཱ མཱ ཝཱ, ཏཏྠ ཏཏྠ བྷགཝཱ ‘‘ཀཱཡེན ཝིཉྙཱཔེཏི, ཝཱཙཱཡ ཝིཉྙཱཔེཏི, ཀཱཡེན ཝཱཙཱཡ ཝིཉྙཱཔེཏི, གཧིཏོ ཧོཏི ཨུཔཛ྄ཛྷཱཡོ. དིནྣོ ཧོཏི ཚནྡོ, དིནྣཱ ཧོཏི པཱརིསུདྡྷི, དིནྣཱ ཧོཏི པཝཱརཎཱ’’ཏི ཝདཏི ¶ . ཏདནུམཱནེན ཝཱ ཀཱཡེན ཏེན པབྦཛྫཱཔེཀྑེན ཝིཉྙཏྟཾ ཧོཏི སརཎགམནནྟི ཝཱ ལོཀེཔི ཀཱཡེན ཝིཉྙཱཔེནྟོ ཨེཝཾ ཝདཏཱིཏི ཝུཙྩཏི, ཏཾ པརིཡཱཡཾ གཧེཏྭཱ མཱུགཾ པབྦཱཛེནྟཱིཏི ཝེདིཏབྦཾ. པོརཱཎགཎྛིཔདེ ‘‘མཱུགཾ ཀཐཾ པབྦཱཛེནྟཱིཏི པུཙྪཾ ཀཏྭཱ ཏསྶ ཀཱཡཔསཱདསམྦྷཝཏོ ཀཱཡེན པཧཱརཾ དཏྭཱ ཧཏྠམུདྡཱཡ ཝིཉྙཱཔེཏྭཱ པབྦཱཛེསུ’’ནྟི ཝུཏྟཾ. ཀིཾ བཧུནཱ?

ཨཡཾ ¶ པནེཏྠ སཱརོ – ཡཐཱ པུབྦེ པབྦཛྫཱདྷིཀཱརེ ཝཏྟམཱནེ པབྦཛྫཱབྷིལཱཔཾ ཨུཔཙྪིནྡིཏྭཱ ‘‘པཎྜཀོ, བྷིཀྑཝེ, ཨནུཔསམྤནྣོ ན ཨུཔསམྤཱདེཏབྦོ’’ཏིཨཱདིནཱ (མཧཱཝ. ༡༠༩) ནཡེན ཨུཔསམྤདཝསེནེཝ ཨབྷིལཱཔོ ཀཏོ. ཐེཡྻསཾཝཱསཀཔདེ ཨསམྦྷཝཏོ ཀིཉྩཱཔི སོ ན ཀཏོ, པབྦཛྫཱཝ ཏཏྠ ཀཏཱ, སབྦཏྠ པན ཨུཔསམྤདཱབྷིལཱཔེན ཨདྷིཔྤེཏཱ ཏདནུབྷཱཝཏོ ཨུཔསམྤདཱཡ, པབྦཛྫཱཡ ཝཱརིཏཱཡ ཨུཔསམྤདཱ ཝཱརིཏཱ ཧོཏཱིཏི ཀཏྭཱ, ཏཐཱ ཨིདྷ ཨུཔསམྤདཱདྷིཀཱརེ ཝཏྟམཱནེ ཨུཔསམྤདཱབྷིལཱཔཾ ཨུཔཙྪིནྡིཏྭཱ ཨུཔསམྤདམེཝ སནྡྷཱཡ པབྦཛྫཱབྷིལཱཔོ ཀཏོཏི ཝེདིཏབྦོ. ཀཱམཾ སོ ན ཀཏྟབྦོ, མཱུགཔདེ ཨསམྦྷཝཏོ ཏསྶ ཝསེན ཨཱདིཏོ པཊྛཱཡ ཨུཔསམྤདཱབྷིལཱཔོཝ ཀཏྟབྦོ ཝིཡ དིསྶཏི, ཏཐཱཔི ཏསྶེཝ མཱུགཔདསྶ ཝསེན ཨཱདིཏོ པཊྛཱཡ པབྦཛྫཱབྷིལཱཔོཝ ཀཏོ མིཙྪཱགཧཎནིཝཱརཎཏྠཾ. ཀཐཾ? ‘‘མཱུགོ, བྷིཀྑཝེ, ཨཔཏྟོ ཨོསཱརཎཾ, ཏཉྩེ སངྒྷོ ཨོསཱརེཏི, སོསཱརིཏོ’’ཏི (མཧཱཝ. ༣༩༦) ཝཙནཏོ ཧི མཱུགོ ཨུཔསམྤནྣོ ཧོཏཱིཏི སིདྡྷཾ, སོ ཀེཝལཾ ཨུཔསམྤནྣོཝ ཧོཏི, ན པན པབྦཛིཏོ ཏསྶ པབྦཛྫཱཡ ཨསམྦྷཝཏོཏི མིཙྪཱགཱཧོ ཧོཏི, ཏཾ པརིཝཛྫཱཔེཏྭཱ ཡོ ཨུཔསམྤནྣོ, སོ པབྦཛིཏོཝ ཧོཏི. པབྦཛིཏོ པན ¶ ཨཏྠི ཀོཙི ཨུཔསམྤནྣོ, ཨཏྠི ཀོཙི ཨནུཔསམྤནྣོཏི ཨིམཾ སམྨཱགཱཧཾ ཨུཔྤཱདེཏི བྷགཝཱཏི ཝེདིཏབྦཾ.

ཨཔིཙ ཏེསཾ ཧཏྠཙྪིནྣཱདཱིནཾ པབྦཛིཏཱནཾ སུཔབྦཛིཏབྷཱཝདཱིཔནཏྠཾ, པབྦཛྫཱབྷཱཝསངྐཱནིཝཱརཎཏྠཉྩེཏྠ པབྦཛྫཱབྷིལཱཔོ ཀཏོ. ཀཐཾ? ‘‘ན, བྷིཀྑཝེ, ཧཏྠཙྪིནྣོ པབྦཱཛེཏབྦོ’’ཏིཨཱདིནཱ (མཧཱཝ. ༡༡༩) པཊིཀྑེཔེན, ‘‘པབྦཛིཏཱ སུཔབྦཛིཏཱ’’ཏི ཝུཏྟཊྛཱནཱབྷཱཝེན ཙ ཏེསཾ པབྦཛྫཱབྷཱཝསངྐཱ བྷཝེཡྻ, ཡཐཱ པསངྐཱ བྷཝེ, ཏཐཱ པསངྐཾ ཋཔེཡྻ. ཁནྡྷཀེ ཨུཔསམྤདཾ སནྡྷཱཡ ‘‘ཧཏྠཙྪིནྣོ, བྷིཀྑཝེ, ཨཔཏྟོ ཨོསཱརཎཾ, ཏཉྩེ སངྒྷོ ཨོསཱརེཏི, སོསཱརིཏོ’’ཏིཨཱདིནཱ (མཧཱཝ. ༣༩༦) ནཡེན བྷགཝཱ ནིཝཱརེཏི. ཏེནེཝ ནཡེན པབྦཛིཏཱ པནེཏེ སབྦེཔི སུཔབྦཛིཏཱ ཨེཝཱཏི དཱིཔེཏི. ཨཉྙཐཱ སབྦེཔེཏེ ཨུཔསམྤནྣཱཝ ཧོནྟི, ན པབྦཛིཏཱཏི ཨཡམནིཊྛཔྤསངྒོ ཨཱཔཛྫཏི. ཀཐཾ? ‘‘ཧཏྠཙྪིནྣོ, བྷིཀྑཝེ, ན པབྦཱཛེཏབྦོ, པབྦཛིཏོ ནཱསེཏབྦོ’’ཏི ཝཱ ‘‘ན, བྷིཀྑཝེ, ཧཏྠཙྪིནྣོ པབྦཱཛེཏབྦོ, ཡོ པབྦཱཛེཡྻ, ཨཱཔཏྟི དུཀྐཊསྶ, སོ ཙ ཨཔབྦཛིཏོ’’ཏི (མཧཱཝ. ༡༡༩) ཝཱ ཏནྟིཡཱ ཋཔིཏཱཡ ཙམྤེཡྻཀྑནྡྷཀེ ‘‘སོསཱརིཏོ’’ཏི ཝུཏྟཏྟཱ ཀེཝལཾ ‘‘ཨིམེ ཧཏྠཙྪིནྣཱདཡོ ཨུཔསམྤནྣཱཝ ཧོནྟི, ན པབྦཛིཏཱ’’ཏི ཝཱ ‘‘ཨུཔསམྤནྣཱཔི ཙེ པབྦཛིཏཱ, ནཱསེཏབྦཱ’’ཏི ཝཱ ཨནིཊྛཀོཊྛཱསོ ཨཱཔཛྫཏཱིཏི ཨདྷིཔྤཱཡོ.

ཨིདཾ ¶ པནེཏྠ ཝིཙཱརེཏབྦཾ – ‘‘སོ ཙ ཨཔབྦཛིཏོ’’ཏི ཝཙནཱབྷཱཝཏོ མཱུགསྶ པབྦཛྫཱསིདྡྷིཔསངྒཏོ པབྦཛྫཱཔི ཨེཀཏོསུདྡྷིཡཱ ཧོཏཱིཏི ཨཡམནིཊྛཀོཊྛཱསོ ཀཐཾ ནཱཔཛྫཏཱིཏི? པབྦཛྫཱབྷིལཱཔེན ཨུཔསམྤདཱ ཨིདྷཱདྷིཔྤེཏཱཏི སམྨཱགཱཧེན ནཱཔཛྫཏཱིཏི, ཨཉྙཐཱ ཡཐཱབྱཉྫནཾ ཨཏྠེ གཧིཏེ ཡཐཱཔཉྙཏྟདུཀྐཊཱབྷཱཝསངྑཱཏོ ཨཔརོ ཨནིཊྛཀོཊྛཱསོ ཨཱཔཛྫཏི. ཀཐཾ? ‘‘ན, བྷིཀྑཝེ, མཱུགོ པབྦཱཛེཏབྦོ, ཡོ ¶ པབྦཱཛེཡྻ, ཨཱཔཏྟི དུཀྐཊསྶཱ’’ཏི ཝུཏྟདུཀྐཊཾ པབྦཛྫཱཔརིཡོསཱནེ ཧོཏི, ན ཏསྶཱཝིཔྤཀཏཱཡ. པུབྦཔཡོགདུཀྐཊམེཝ ཧི པཋམཾ ཨཱཔཛྫཏི, ཏསྨཱ མཱུགསྶ པབྦཛྫཱཔརིཡོསཱནསྶེཝ ཨབྷཱཝཏོ ཨིམསྶ དུཀྐཊསྶ ཨོཀཱསོ ཙ ན སབྦཀཱལཾ སམྦྷཝེཡྻ, ཨུཔསམྤདཱཝསེན པན ཨཏྠེ གཧིཏེ སམྦྷཝཏི ཀམྨནིབྦཏྟིཏོ. ཏེནེཝ པཱལི༹ཡཾ ‘‘ན, བྷིཀྑཝེ, པཎྜཀོ ཨུཔསམྤཱདེཏབྦོ, ཡོ ཨུཔསམྤཱདེཡྻ, ཨཱཔཏྟི དུཀྐཊསྶཱ’’ཏི དུཀྐཊཾ ན པཉྙཏྟཾ. ཨཔཉྙཏྟཏྟཱ པུབྦཔཡོགདུཀྐཊམེཝ ཙེཏྠ སམྦྷཝཏི, ནེཏརཾ. ཨེཏྟཱཝཏཱ སིདྡྷམེཏཾ པབྦཛྫཱབྷིལཱཔེན ཨུཔསམྤདཱཝ ཏཏྠ ཨདྷིཔྤེཏཱ, ན པབྦཛྫཱཏི. ཨེཏྠཱཧ སཱམཎེརཔབྦཛྫཱ ན ཀཱཡཔཡོགཏོ ཧོཏཱིཏི ཀཐཾ པཉྙཱཡཏཱིཏི? ཝུཙྩཏེ – ཀཱཡེན ཝིཉྙཱཔེཏཱིཏིཨཱདིཏྟིཀཱ དསྶནཏོཏི ཨཱགཏོ.

‘‘གོཏྟེནཔི ཨནུསྶཱཝེཏུ’’ནྟི (མཧཱཝ. ༡༢༢) ཝཙནཏོ ཡེན ཝོཧཱརེན ཝོཧརཏི, ཏེན ཝཊྚཏཱིཏི སིདྡྷཾ, ཏསྨཱ ‘‘ཀོ ནཱམོ ཏེ ཨུཔཛ྄ཛྷཱཡོ’’ཏི པུཊྛེནཔི གོཏྟམེཝ ནཱམཾ ཀཏྭཱ ཝཏྟབྦནྟི སིདྡྷཾ ཧོཏི, ཏསྨཱ ཙཏུབྦིདྷེསུ ནཱམེསུ ཡེན ཀེནཙི ནཱམེན ཨནུསྶཱཝནཱ ཀཱཏབྦཱཏི ཝདནྟི. ཨེཀསྶ བཧཱུནི ནཱམཱནི ཧོནྟི, ཏཏྠ ཨེཀཾ ནཱམཾ ཉཏྟིཡཱ, ཨེཀཾ ཨནུསྶཱཝནཱཡ ཀཱཏུཾ ན ཝཊྚཏི, ཨཏྠཏོ བྱཉྫནཏོ ཙ ཨབྷིནྣཱཧི ཨནུསྶཱཝནཱཧི བྷཝིཏབྦནྟི. ཀིཉྩཱཔི ‘‘ཨིཏྠནྣཱམོ ཨིཏྠནྣཱམསྶ ཨཱཡསྨཏོ’’ཏི པཱལི༹ཡཾ ‘‘ཨཱཡསྨཏོ’’ཏི པདཾ པཙྪཱ ཝུཏྟཾ, ཀམྨཝཱཙཱཔཱལི༹ཡཾ པན ‘‘ཨཡཾ བུདྡྷརཀྑིཏོ ཨཱཡསྨཏོ དྷམྨརཀྑིཏསྶཱ’’ཏི པཋམཾ ལིཁནྟི, ཏཾ ཨུཔྤཊིཔཱཊིཡཱ ཝུཏྟནྟི ན པཙྩེཏབྦཾ. པཱལི༹ཡཉྷི ‘‘ཨིཏྠནྣཱམོ ཨིཏྠནྣཱམསྶཱ’’ཏི ཨཏྠམཏྟཾ དསྶིཏཾ, ཏསྨཱ པཱལི༹ཡཾ ཨཝུཏྟོཔི ‘‘ཨཡཾ བུདྡྷརཀྑིཏོ ཨཱཡསྨཏོ དྷམྨརཀྑིཏསྶཱ’’ཏི ཀམྨཝཱཙཱཔཱལི༹ཡཾ པཡོགོ དསྶིཏོ. ‘‘ན མེ ¶ དིཊྛོ ཨིཏོ པུབྦེ ཨིཙྩཱཡསྨཱ སཱརིཔུཏྟོ’’ཏི ཙ ‘‘ཨཱཡསྨཱ སཱརིཔུཏྟོ ཨཏྠཀུསལོ’’ཏི ཙ པཋམཾ ‘‘ཨཱཡསྨཱ’’ཏི པཡོགསྶ དསྶནཏོཏི ཝདནྟི. ཀཏྠཙི ‘‘ཨཱཡསྨཏོ བུདྡྷརཀྑིཏསྶཱ’’ཏི ཝཏྭཱ ཀཏྠཙི ཀེཝལཾ ‘‘བུདྡྷརཀྑིཏསྶཱ’’ཏི སཱཝེཏི, སཱཝནཾ ཧཱཔེཏཱིཏི ན ཝུཙྩཏི ནཱམསྶ ཨཧཱཔིཏཏྟཱཏི ¶ ཨེཀེ. སཙེ ཀཏྠཙི ‘‘ཨཱཡསྨཏོ བུདྡྷརཀྑིཏསྶཱ’’ཏི ཝཏྭཱ ཀཏྠཙི ‘‘བུདྡྷརཀྑིཏསྶཱཡསྨཏོ’’ཏི སཱཝེཏི, པཱཋཱནུརཱུཔཏྟཱ ཁེཏྟམེཝ ཨོཏིཎྞནྟིཔི ཨེཀེ. བྱཉྫནབྷེདཔྤསངྒཏོ ཨནུསྶཱཝནཱནཾ ཏཾ ན ཝཊྚཏཱིཏི ཝདནྟི. སཙེ པན སབྦཊྛཱནེཔི ཨེཀེནེཝ པཀཱརེན ཝདཏི, ཝཊྚཏི.

ཨེཀཱནུསྶཱཝནེཏི ཨེཏྠ ཨེཀཏོ ཨནུསྶཱཝནཾ ཨེཏེསནྟི ཨེཀཱནུསྶཱཝནཱཏི ཨསམཱནཱདྷིཀརཎཝིསཡོ བཱཧིརཏྠསམཱསོཏི དཊྛབྦཾ. ཏེནེཝཱཧ ‘‘དྭེ ཨེཀཏོ ཨནུསྶཱཝནེ’’ཏི. ཏཏྠ ཨེཀཏོཏི ཨེཀཀྑཎེཏི ཨཏྠོ, ཝིབྷཏྟིཨལོཔེན ཙཱཡཾ ནིདྡེསོ. པུརིམནཡེནེཝ ཨེཀཏོ ཨནུསྶཱཝནེ ཀཱཏུནྟི ‘‘ཨེཀེན ཨེཀསྶ, ཨཉྙེན ཨིཏརསྶཱ’’ཏིཨཱདིནཱ པུབྦེ ཝུཏྟནཡེན དྭཱིཧི ཝཱ ཏཱིཧི ཝཱ ཨཱཙརིཡེཧི ཨེཀེན ཝཱ ཨེཀཏོ ཨནུསྶཱཝནེ ཀཱཏུཾ. ཝཛྫཱཝཛྫཾ ཨུཔནིཛ྄ཛྷཱཡཏཱིཏི ཨུཔཛ྄ཛྷཱཏི ཨིམིནཱ ཨུཔཛ྄ཛྷཱཡསདྡསམཱནཏྠོ ཨུཔཛ྄ཛྷཱསདྡོཔཱིཏི ཨཏྠཾ དསྶེཏཱིཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༢༣).

གོཏྟེནཱཔཱིཏི ‘‘ཨཱཡསྨཏོ པིཔྤལིསྶ ཨུཔསམྤདཱཔེཀྑོ’’ཏི ཨེཝཾ ནཱམཾ ཨཝཏྭཱ གོཏྟནཱམེནཔཱིཏི ཨཏྠོ, ཏེན ‘‘ཀོ ནཱམོ ཏེ ཨུཔཛ྄ཛྷཱཡོ’’ཏི པུཊྛེན གོཏྟནཱམེན ‘‘ཨཱཡསྨཱ ཀསྶཔོ’’ཏི ཝཏྟབྦནྟི སིདྡྷཾ ཧོཏི. ཏསྨཱ ཨཉྙམྤི ཡཾ ཀིཉྩི ཏསྶ ནཱམཾ པསིདྡྷཾ, ཏསྨིཾ ཝཱ ཁཎེ སུཁགྒཧཎཏྠཾ ནཱམཾ པཉྙཱཔིཏཾ, ཏཾ སབྦཾ གཧེཏྭཱཔི ཨནུསྶཱཝནཱ ཀཱཏབྦཱ. ཡཐཱ ཨུཔཛ྄ཛྷཱཡསྶ, ཨེཝཾ ཨུཔསམྤདཱཔེཀྑསྶཱཔི གོཏྟཱདིནཱམེན ¶ ཏངྑཎིཀནཱམེན ཙ ཨནུསྶཱཝནཾ ཀཱཏུཾ ཝཊྚཏི, ཏསྨིམྤི ཁཎེ ‘‘ཨཡཾ ཏིསྶོ’’ཏི ཝཱ ‘‘ནཱགོ’’ཏི ཝཱ ནཱམཾ ཀརོནྟེཧི ཨནུསཱསཀསམྨུཏིཏོ པཋམམེཝ ཀཱཏབྦཾ. ཨེཝཾ ཨཀཏྭཱཔི ཨནྟརཱཡིཀདྷམྨཱནུསཱསནཔུཙྪནཀཱལེསུ ‘‘ཀིནྣཱམོསི, ཨཧཾ བྷནྟེ ནཱགོ ནཱམ, ཀོ ནཱམོ ཏེ ཨུཔཛ྄ཛྷཱཡོ, ཨུཔཛ྄ཛྷཱཡོ མེ བྷནྟེ ཏིསྶོ ནཱམཱ’’ཏིཨཱདིནཱ ཝིཉྙཱཔེནྟེན ཨུབྷིནྣམྤི ཙིཏྟེ ‘‘མམེཏཾ ནཱམ’’ནྟི ཡཐཱ སཉྙཾ ཨུཔྤཛྫཏི, ཨེཝཾ ཝིཉྙཱཔེཏབྦཾ. སཙེ པན ཏསྨིཾ ཁཎེ པཀཏིནཱམེན ཝཏྭཱ པཙྪཱ ‘‘ཏིསྶོ ནཱམཱ’’ཏི ཨཔུབྦནཱམེན ཨནུསྶཱཝེཏི, ན ཝཊྚཏི.

ཏཏྠ ཙ ཀིཉྩཱཔི ཨུཔཛ྄ཛྷཱཡསྶེཝ ནཱམཾ ཨགྒཧེཏྭཱ ཡེན ཀེནཙི ནཱམེན ‘‘ཏིསྶསྶ ཨུཔསམྤདཱཔེཀྑོ’’ཏིཨཱདིནཱཔི པུགྒལེ པརཱམཊྛེ ཀམྨཾ སུཀཏམེཝ ཧོཏི ཨནུཔཛ྄ཛྷཱཡཀཱདཱིནཾ ཨུཔསམྤདཱཀམྨཾ ཝིཡ ཨུཔཛ྄ཛྷཱཡསྶ ཨབྷཱཝེཔི ཨབྷབྦཏྟེཔི ཀམྨཝཱཙཱཡ པུགྒལེ པརཱམཊྛེ ཀམྨསྶ ¶ སིཛ྄ཛྷནཏོ. ཨུཔསམྤདཱཔེཀྑསྶ པན ཡཐཱསཀཾ ནཱམཾ ཝིནཱ ཨཉྙེན ནཱམེན ཨནུསྶཱཝིཏེ ཀམྨཾ ཀུཔྤཏི, སོ ཨནུཔསམྤནྣོཝ ཧོཏི. ཏཏྠ ཋིཏོ ཨཉྙོ ཨནུཔསམྤནྣོ ཝིཡ གཧིཏནཱམསྶ ཝཏྠུཔུགྒལསྶ ཏཏྠ ཨབྷཱཝཱ, ཨེཏསྶ ཙ ནཱམསྶ ཨནུསྶཱཝནཱཡ ཨཝུཏྟཏྟཱ. ཏསྨཱ ཨུཔསམྤདཱཔེཀྑསྶ པཀཏིནཱམཾ པརིཝཏྟེཏྭཱ ཨཔུབྦེན ནཱགཱདིནཱམེན ཨནུསྶཱཝིཏུཀཱམེན པཊིཀཙྩེཝ ‘‘ཏྭཾ ནཱགོ’’ཏིཨཱདིནཱ ཝིཉྙཱཔེཏྭཱ ཨནུསཱསནཨནྟརཱཡིཀདྷམྨཱཔུཙྪནཀྑཎེསུཔི ཏསྶ ཙ སངྒྷསྶ ཙ ཡཐཱ པཱཀཊཾ ཧོཏི, ཏཐཱ པཀཱསེཏྭཱཝ ནཱགཱདིནཱམེན ཨནུསྶཱཝེཏབྦཾ. ཨེཀསྶ བཧཱུནི ནཱམཱནི ཧོནྟི, ཏེསུ ཨེཀཾ གཧེཏུཾ ཝཊྚཏི.

ཡཾ པན ཨུཔསམྤདཱཔེཀྑཨུཔཛ྄ཛྷཱཡཱནཾ ཨེཀཏྠ གཧིཏཾ ནཱམཾ ཏདེཝ ཉཏྟིཡཱ, སབྦཏྠ ཨནུསྶཱཝནཱསུ ཙ གཧེཏབྦཾ. གཧིཏཏོ ཧི ཨཉྙསྨིཾ གཧིཏེ བྱཉྫནཾ བྷིནྣཾ ནཱམ ཧོཏི, ཀམྨཾ ¶ ཝིཔཛྫཏི. ཨཏྠཏོ ཧི བྱཉྫནཏོ ཙ ཨབྷིནྣཱ ཨེཝ ཉཏྟི ཨནུསྶཱཝནཱ ཙ ཝཊྚནྟི. ཨུཔཛ྄ཛྷཱཡནཱམསྶ པན པུརཏོ ‘‘ཨཱཡསྨཏོ ཏིསྶསྶཱ’’ཏིཨཱདིནཱ ཨཱཡསྨནྟཔདཾ སབྦཏྠ ཡོཛེཏྭཱཔི ཨནུསྶཱཝེཏི. ཏཐཱ ཨཡོཛིཏེཔི དོསོ ནཏྠི.

པཱལི༹ཡཾ (མཧཱཝ. ༡༢༦) པན ཀིཉྩཱཔི ‘‘ཨིཏྠནྣཱམསྶ ཨཱཡསྨཏོ’’ཏི པཙྪཏོ ‘‘ཨཱཡསྨཏོ’’ཏི པདཾ ཝུཏྟཾ, ཏཐཱཔི ‘‘ཨཱཡསྨཱ སཱརིཔུཏྟོ ཨཏྠཀུསལོ’’ཏིཨཱདིནཱ ནཱམསྶ པུརཏོ ‘ཨཱཡསྨནྟཔད’ཡོགསྶ དསྶནཏོ པུརཏོཝ པཡོགོ ཡུཏྟཏརོ, ཏཉྩ ཨེཀཏྠ ཡོཛེཏྭཱ ཨཉྙཏྠ ཨཡོཛིཏེཔི ཨེཀཏྠ པུརཏོ ཡོཛེཏྭཱ ཨཉྙཏྠ པཙྪཏོ ཡོཛནེཔི སཱཝནཱཡ ཧཱཔནཾ ནཱམ ན ཧོཏི ནཱམསྶ ཨཧཱཔིཏཏྟཱ. ཏེནེཝ པཱལི༹ཡམྤི ‘‘ཨིཏྠནྣཱམསྶ ཨཱཡསྨཏོ’’ཏི ཨེཀཏྠ ཡོཛེཏྭཱ ‘‘ཨིཏྠནྣཱམེན ཨུཔཛ྄ཛྷཱཡེནཱ’’ཏིཨཱདཱིསུ ‘‘ཨཱཡསྨཏོ’’ཏི ན ཡོཛིཏནྟི ཝདནྟི. ཏཉྩ ཀིཉྩཱཔི ཨེཝཾ, ཏཐཱཔི སབྦཊྛཱནེཔི ཨེཀེནེཝ པཀཱརེན ཡོཛེཏྭཱ ཨེཝ ཝཱ ཨཡོཛེཏྭཱ ཝཱ ཨནུསྶཱཝནཾ པསཏྠཏརནྟི གཧེཏབྦཾ.

ཨེཀཏོ སཧེཝ ཨེཀསྨིཾ ཁཎེ ཨནུསྶཱཝནཾ ཨེཏེསནྟི ཨེཀཱནུསྶཱཝནཱ, ཨུཔསམྤདཱཔེཀྑཱ, ཨེཏེ ཨེཀཱནུསྶཱཝནེ ཀཱཏུཾ. ཏེནཱཧ ‘‘ཨེཀཏོཨནུསཱཝནེ’’ཏི. ཨིདཉྩ ཨེཀཾ པདཾ ཝིབྷཏྟིཨལོཔེན དཊྛབྦཾ. ཨེཀེན ཝཱཏི དྭིནྣམྤི ཨེཀསྨིཾ ཁཎེ ཨེཀཱཡ ཨེཝ ཀམྨཝཱཙཱཡ ཨནུསྶཱཝནེ ཨེཀེན ཨཱཙརིཡེནཱཏི ཨཏྠོ. ‘‘ཨཡཾ བུདྡྷརཀྑིཏོ ཙ ཨཡཾ དྷམྨརཀྑིཏོ ཙ ཨཱཡསྨཏོ སངྒྷརཀྑིཏསྶ ¶ ཨུཔསམྤདཱཔེཀྑོ’’ཏིཨཱདིནཱ ནཡེན ཨེཀེན ཨཱཙརིཡེན དྭིནྣམེཀསྨིཾ ཁཎེ ཨནུསྶཱཝནནཡོ དཊྛབྦོ, ཨིམིནཱཝ ནཡེན ཏིཎྞམྤི ཨེཀེན ཨཱཙརིཡེན ཨེཀཀྑཎེ ཨནུསྶཱཝནཾ ཝེདིཏབྦཾ.

པུརིམནཡེནེཝ ¶ ཨེཀཏོ ཨནུསྶཱཝནེ ཀཱཏུནྟི ‘‘ཨེཀེན ཨེཀསྶ, ཨཉྙེན ཨིཏརསྶཱ’’ཏིཨཱདིནཱ པུབྦེ ཝུཏྟནཡེན དྭིནྣཾ དྭཱིཧི ཝཱ ཏིཎྞཾ ཏཱིཧི ཝཱ ཨཱཙརིཡེཧི, ཨེཀེན ཝཱ ཨཱཙརིཡེན ཏཡོཔི ཨེཀཏོཨནུསྶཱཝནེ ཀཱཏུནྟི ཨཏྠོ. ‘‘ཏཉྩ ཁོ ཨེཀེན ཨུཔཛ྄ཛྷཱཡེན, ན ཏྭེཝ ནཱནུཔཛ྄ཛྷཱཡེནཱ’’ཏི ཨིདཾ ཨེཀེན ཨཱཙརིཡེན དྭཱིཧི ཝཱ ཏཱིཧི ཝཱ ཨུཔཛ྄ཛྷཱཡེཧི དྭེ ཝཱ ཏཡོ ཝཱ ཨུཔསམྤདཱཔེཀྑེ ཨེཀཀྑཎེ ཨེཀཱཡ ཨནུསྶཱཝནཱཡ ཨེཀཱནུསྶཱཝནེ ཀཱཏུཾ ན ཝཊྚཏཱིཏི པཊིཀྑེཔཔདཾ, ན པན ནཱནཱཙརིཡེཧི ནཱནུཔཛ྄ཛྷཱཡེཧི ཏཡོ ཨེཀཱནུསྶཱཝནེ ཀཱཏུཾ ན ཝཊྚཏཱིཏི ཨཱཧ ‘‘སཙེ པན ནཱནཱཙརིཡཱ ནཱནུཔཛ྄ཛྷཱཡཱ…པེ… ཝཊྚཏཱི’’ཏི. ཡཉྩེཏྠ ‘‘ཏིསྶཏྠེརོ སུམནཏྠེརསྶ སདྡྷིཝིཧཱརིཀཾ, སུམནཏྠེརོ ཏིསྶཏྠེརསྶ སདྡྷིཝིཧཱརིཀ’’ནྟི ཨེཝཾ ཨུཔཛ྄ཛྷཱཡེཧི ཨཉྙམཉྙཾ སདྡྷིཝིཧཱརིཀཱནཾ ཨནུསྶཱཝནཀརཎཾ ཝུཏྟཾ, ཏཾ ཨུཔལཀྑཎམཏྟཾ. ཏསྨཱ སཙེ ཏིསྶཏྠེརོ སུམནཏྠེརསྶ སདྡྷིཝིཧཱརིཀཾ, སུམནཏྠེརོ ནནྡཏྠེརསྶ སདྡྷིཝིཧཱརིཀཾ ཨནུསྶཱཝེཏི, ཨཉྙམཉྙཉྩ གཎཔཱུརཀཱ ཧོནྟི, ཝཊྚཏི ཨེཝ. སཙེ པན ཨུཔཛ྄ཛྷཱཡོ སཡམེཝ ཨཏྟནོ སདྡྷིཝིཧཱརིཀཾ ཨནུསྶཱཝེཏི, ཨེཏྠ ཝཏྟབྦམེཝ ནཏྠི, ཀམྨཾ སུཀཏམེཝ ཧོཏི, ཨནུཔཛ྄ཛྷཱཡཀསྶཔི ཡེན ཀེནཙི ཨནུསྶཱཝིཏེ ཨུཔསམྤདཱ ཧོཏི, ཀིམངྒཾ པན སཨུཔཛ྄ཛྷཱཡཀསྶ ཨུཔཛ྄ཛྷཱཡེནེཝ ཨནུསྶཱཝནེཏི དཊྛབྦཾ. ཏེནེཝ ནཝཊྚནཔཀྑཾ དསྶེཏུཾ ‘‘སཙེ པནཱ’’ཏིཨཱདིམཱཧ.

ཨུཔཛ྄ཛྷཱཏི ཨུཔཛ྄ཛྷཱཡསདྡསམཱནཏྠོ ཨཱཀཱརནྟོ ཨུཔཛ྄ཛྷཱསདྡོཏི དསྶེཏི. ཨུཔཛ྄ཛྷཱཡ-སདྡོ ཨེཝ ཝཱ ཨུཔཛ྄ཛྷཱ, ཨུཔཡོགཔཙྩཏྟཝཙནེསུ ཡ-ཀཱར ལོཔཾ ཀཏྭཱ ཨེཝཾ ཝུཏྟོ ཀརཎཝཙནཱདཱིསུ ཨུཔཛ྄ཛྷཱསདྡསྶ པཡོགཱབྷཱཝཱཏི དཊྛབྦཾ. པཱལི༹ཡཾ ཨཏྟནཱཝ ཨཏྟཱནཾ སམྨནྣིཏབྦནྟི ཨཏྟནཱཝ ཀཏྟུབྷཱུཏེན ཀརཎབྷཱུཏེན ཨཏྟཱནམེཝ ཀམྨབྷཱུཏཾ ¶ པཏི སམྨནྣནཀིཙྩཾ ཀཱཏབྦཾ, ཨཏྟཱནནྟི ཝཱ པཙྩཏྟེ ཨུཔཡོགཝཙནཾ, ཨཏྟནཱཝ ཨཏྟཱ སམྨནྣིཏབྦོཏི ཨཏྠོ. ན ཀེཝལཉྩ ཨེཏྠེཝ, ཨཉྙཏྲཱཔི ཏེརསསམྨུཏིཨཱདཱིསུ ཨིམིནཱཝ ལཀྑཎེན ཨཏྟནཱཝ ཨཏྟཱ སམྨནྣིཏབྦོཝ. ཨཔིཙ སཡཾ ཀམྨཱརཧཏྟཱ ཨཏྟཱནཾ མུཉྩིཏྭཱ ཙཏུཝགྒཱདིཀོ གཎོ སབྦཏྠ ཨིཙྪིཏབྦོ.

སཙྩཀཱལོཏི ¶ ‘‘ནིགཱུཧིསྶཱམཱི’’ཏི ཝཉྩནཾ པཧཱཡ སཙྩསྶེཝ ཏེ ཨིཙྪིཏབྦཀཱལོ. བྷཱུཏཀཱལོཏི ཝཉྩནཱཡ ཨབྷཱཝེཔི མནུསྶཏྟཱདིཝཏྠུནོ བྷཱུཏཏཱཡ ཨཝསྶཾ ཨིཙྪིཏབྦཀཱལོ, ཨིཏརཐཱ ཀམྨཀོཔཱདིཨནྟརཱཡོ ཧོཏཱིཏི ཨདྷིཔྤཱཡོ. མངྐཱུཏི ཨདྷོམུཁོ. ཨུདྡྷརཏཱུཏི ཨནུཔསམྤནྣབྷཱཝཏོ ཨུཔསམྤཏྟིཡཾ པཏིཊྛཔེཏཱུཏི ཨཏྠོ.

སབྦཀམྨཝཱཙཱསུ ཨཏྠཀོསལླཏྠཾ པནེཏྠ ཨུཔསམྤདཀམྨཝཱཙཱཡ ཨེཝམཏྠོ དཊྛབྦོ – སུཎཱཏཱུཏི སཝནཱཎཏྟིཡཾ པཋམཔུརིསེཀཝཙནཾ. ཏཉྩ ཀིཉྩཱཔི ཡོ སོ སངྒྷོ སཝནཀིརིཡཱཡཾ ནིཡོཛཱིཡཏི, ཏསྶ སམྨུཁཏྟཱ ‘‘སུཎཱཧཱི’’ཏི མཛ྄ཛྷིམཔུརིསཝཙནེན ཝཏྟབྦཾ, ཏཐཱཔི ཡསྨཱ སངྒྷསདྡསནྣིདྷཱནེ པཋམཔུརིསཔྤཡོགོཝ སདྡཝིདཱུཧི སམཱཙིཎྞོ བྷཝནྟབྷགཝནྟཨཱཡསྨཱདིསདྡསནྣིདྷཱནེསུ ཝིཡ ‘‘ཨདྷིཝཱསེཏུ མེ བྷཝཾ གོཏམོ (པཱརཱ. ༢༢), ཨེཏསྶ སུགཏ ཀཱལོ, ཡཾ བྷགཝཱ སཱཝཀཱནཾ སིཀྑཱཔདཾ པཉྙཔེཡྻ (པཱརཱ. ༢༡), པཀྐམཏཱཡསྨཱ (པཱརཱ. ༤༣༦), སུཎནྟུ མེ ཨཱཡསྨནྟོ’’ཏིཨཱདཱིསུ (མཧཱཝ. ༡༦༨). ཏསྨཱ ཨིདྷ པཋམཔུརིསཔྤཡོགོ ཀཏོ. ཨཐ ཝཱ གཱརཝཝསེནེཏཾ ཝུཏྟཾ. གརུཊྛཱནིཡེསུ ཧི གཱརཝཝསེན མཛ྄ཛྷིམཔུརིསཔཡོགུཔྤཏྟིཡམྤི པཋམཔུརིསཔྤཡོགཾ པཡུཛྫནྟི ‘‘དེསེཏུ སུགཏོ དྷམྨ’’ནྟིཨཱདཱིསུ (དཱི. ནི. ༢.༦༦; མ. ནི. ༢.༣༣༨; མཧཱཝ. ༨) ཝིཡཱཏི དཊྛབྦཾ. ཀེཙི པན ¶ ‘‘བྷནྟེ ཨཱཝུསོཏི པདེ ཨཔེཀྑིཏྭཱ ཨིདྷ པཋམཔུརིསཔྤཡོགོ’’ཏི ཝདནྟི, ཏཾ ན སུནྡརཾ ‘‘ཨཱཙརིཡོ མེ, བྷནྟེ, ཧོཧི (མཧཱཝ. ༧༧), ཨིངྒྷཱཝུསོ ཨུཔཱལི, ཨིམཾ པབྦཛིཏཾ ཨནུཡུཉྫཱཧཱི’’ཏིཨཱདཱིསུ (པཱརཱ. ༥༡༧) ཏཔྤཡོགེཔི མཛ྄ཛྷིམཔུརིསཔྤཡོགསྶེཝ དསྶནཏོ.

མེཏི ཡོ སཱཝེཏི, ཏསྶ ཨཏྟནིདྡེསེ སཱམིཝཙནཾ. བྷནྟེཏི ཨཱལཔནཏྠེ ཝུཌྜྷེསུ སགཱརཝཝཙནཾ, ‘‘ཨཱཝུསོ’’ཏི པདཾ པན ནཝཀེསུ. ཏདུབྷཡམྤི ནིཔཱཏོ ‘‘ཏུམྷེ བྷནྟེ ཏུམྷེ ཨཱཝུསོ’’ཏི བཧཱུསུཔི སམཱནརཱུཔཏྟཱ. སངྒྷོཏི ཨཝིསེསཏོ ཙཏུཝགྒཱདིཀེ པཀཏཏྟཔུགྒལསམཱུཧེ ཝཏྟཏི. ཨིདྷ པན པཙྩནྟིམེསུ ཛནཔདེསུ པཉྩཝགྒཏོ པཊྛཱཡ, མཛ྄ཛྷིམེསུ ཛནཔདེསུ དསཝགྒཏོ པཊྛཱཡ སངྒྷོཏི གཧེཏབྦོ. ཏཏྲཱཡཾ པིཎྜཏྠོ – བྷནྟེ, སངྒྷོ མམ ཝཙནཾ སུཎཱཏཱུཏི. ཨིདཉྩ ནཝཀཏརེན ཝཏྟབྦཝཙནཾ. སཙེ པན ཨནུསྶཱཝཀོ སབྦེཧི བྷིཀྑཱུཧི ཝུཌྜྷཏརོ ཧོཏི, ‘‘སུཎཱཏུ མེ, ཨཱཝུསོ སངྒྷོ’’ཏི ཝཏྟབྦཾ. སོཔི ཙེ ‘‘བྷནྟེ’’ཏི ཝདེཡྻ, ནཝཀཏརོ ཝཱ ‘‘ཨཱཝུསོ’’ཏི, ཀམྨཀོཔོ ནཏྠི. ཀེཙི པན ‘‘ཨེཀཏྠ ‘ཨཱཝུསོ’ཏི ཝཏྭཱ ཨཉྙཏྠ ‘བྷནྟེ’ཏི ཝུཏྟེཔི ནཏྠི དོསོ ཨུབྷཡེནཔི ཨཱལཔནསྶ སིཛ྄ཛྷནཏོ’’ཏི ཝདནྟི.

ཨིདཱནི ¶ ཡམཏྠཾ ཉཱཔེཏུཀཱམོ ‘‘སུཎཱཏཱུ’’ཏི སངྒྷཾ སཝནེ ནིཡོཛེཏི, ཏཾ ཉཱཔེནྟོ ‘‘ཨཡཾ ཨིཏྠནྣཱམོ’’ཏིཨཱདིམཱཧ. ཏཏྠ ཨཡནྟི ཨུཔསམྤདཱཔེཀྑསྶ ཧཏྠཔཱསེ སནྣིཧིཏབྷཱཝདསྶནཾ, ཏེན ཙ ཧཏྠཔཱསེ ཋིཏསྶེཝ ཨུཔསམྤདཱ རུཧཏཱིཏི སིཛ྄ཛྷཏི ཧཏྠཔཱསཏོ བཧི ཋིཏསྶ ‘‘ཨཡ’’ནྟི ན ཝཏྟབྦཏོ. ཏེནེཝ ཨནུསཱསཀསམྨུཏིཡཾ སོ ཧཏྠཔཱསཏོ བཧི ཋིཏཏྟཱ ‘‘ཨཡ’’ནྟི ན ཝུཏྟོ, ཏསྨཱ ¶ ཨུཔསམྤདཱཔེཀྑོ ཨནུཔསམྤནྣོ ཧཏྠཔཱསེ ཋཔེཏབྦོ. ཨཡཾ ཨིཏྠནྣཱམོཏི ཨཡཾ-སདྡོ ཙ ཨཝསྶཾ པཡུཛྫིཏབྦོ, སོ ཙ ཨིམསྨིཾ པཋམནཱམཔཡོགེ ཨེཝཱཏི གཧེཏབྦཾ. ‘‘ཨིཏྠནྣཱམོ’’ཏི ཨིདཾ ཨནིཡམཏོ ཏསྶ ནཱམདསྶནཾ, ཨུབྷཡེནཔི ཨཡཾ བུདྡྷརཀྑིཏོཏིཨཱདིནཱམཾ དསྶེཏི. ‘‘ཨུཔསམྤདཱཔེཀྑོ’’ཏི བྷིནྣཱདྷིཀརཎཝིསཡེ བཧུབྦཱིཧིསམཱསོ, ཨུཔསམྤདཾ མེ སངྒྷོ ཨཔེཀྑམཱནོཏི ཨཏྠོ. ཏསྶ ཙ ཨུཔཛ྄ཛྷཱཡཏཾ སམངྒིབྷཱཝེན དསྶེཏུཾ ‘‘ཨིཏྠནྣཱམསྶ ཨཱཡསྨཏོ’’ཏི ཝུཏྟཾ. ཨེཏེན ‘‘ཨཡཾ བུདྡྷརཀྑིཏོ ཨཱཡསྨཏོ དྷམྨརཀྑིཏསྶ སདྡྷིཝིཧཱརིཀབྷཱུཏོ ཨུཔསམྤདཱཔེཀྑོ’’ཏི ཨེཝམཱདིནཱ ནཡེན ནཱམཡོཛནཱཡ སཧ ཨཏྠོ དསྶིཏོ. ཨེཏྠ ཙ ‘‘ཨཱཡསྨཏོ’’ཏི པདཾ ཨཝཏྭཱཔི ‘‘ཨཡཾ བུདྡྷརཀྑིཏོ དྷམྨརཀྑིཏསྶ ཨུཔསམྤདཱཔེཀྑོ’’ཏི ཝཏྟུཾ ཝཊྚཏི. ཏེནེཝ པཱལི༹ཡཾ ‘‘ཨིཏྠནྣཱམེན ཨུཔཛ྄ཛྷཱཡེནཱ’’ཏི ཨེཏྠ ‘‘ཨཱཡསྨཏོ’’ཏི པདཾ ན ཝུཏྟཾ. ཡཉྩེཏྠ ཝཏྟབྦཾ, ཏཾ ཧེཊྛཱ ཝུཏྟམེཝ.

ནནུ ཙེཏྠ ཨུཔཛ྄ཛྷཱཡོཔི ཨུཔསམྤདཱཔེཀྑོ ཝིཡ ཧཏྠཔཱསེ ཋིཏོ ཨེཝ ཨིཙྪིཏབྦོ, ཨཐ ཀསྨཱ ‘‘ཨཡཾ ཨིཏྠནྣཱམོ ཨིམསྶ ཨིཏྠནྣཱམསྶ ཨུཔསམྤདཱཔེཀྑོ’’ཏི ཨེཝཾ ཨུཔཛ྄ཛྷཱཡསྶ ནཱམཔརཱམསནེཔི ཨིདཾ-སདྡཔྤཡོགོ ན ཀཏོཏི? ནཱཡཾ ཝིརོདྷོ ཨུཔཛ྄ཛྷཱཡསྶ ཨབྷཱཝེཔི ཀམྨཀོཔཱབྷཱཝཏོ. ཀེཝལཉྷི ཀམྨནིབྦཏྟིཡཱ སནྟཔདཝསེན ཨཝིཛྫམཱནསྶཔི ཨུཔཛ྄ཛྷཱཡསྶ ནཱམཀིཏྟནཾ ཨནུཔཛ྄ཛྷཱཡསྶ ཨུཔསམྤདཱདཱིསུཔི ཀརཱིཡཏི, ཏསྨཱ ཨུཔཛ྄ཛྷཱཡསྶ ཨསནྣིཧིཏཱཡཔི ཏཔྤརཱམསནམཏྟེནེཝ ཀམྨསིདྡྷིཏོ ‘‘ཨིམསྶཱ’’ཏི ནིདྡིསིཏུཾ ན ཝཊྚཏཱིཏི.

པརིསུདྡྷོ ཨནྟརཱཡིཀེཧི དྷམྨེཧཱིཏི ཨབྷབྦཏྟཱདིཀེཧི ཨུཔསམྤདཱཡ ཨཝཏྠུཀརེཧི ཙེཝ པཉྩཱབཱདྷཧཏྠཙྪིནྣཱདཱིཧི ཨཱཔཏྟིཀརེཧི ཙ ཨནྟརཱཡིཀསབྷཱཝེཧི པརིམུཏྟོ. ཨེཝཾ ཝུཏྟེ ¶ ཨེཝ ཨཱཔཏྟིམཏྟཀརེཧི པཉྩཱབཱདྷཱདཱིཧི ཨཔརིམུཏྟསྶཔི ཨུཔསམྤདཱ རུཧཏི, ནཱཉྙཐཱ. པརིཔུཎྞསྶ པཏྟཙཱིཝརནྟི པརིཔུཎྞམསྶ ཨུཔསམྤདཱཔེཀྑསྶ པཏྟཙཱིཝརཾ. ཨེཝཾ ཝུཏྟེ ཨེཝ ཨཔཏྟཙཱིཝརསྶཔི ཨུཔསམྤདཱ རུཧཏི, ནཱཉྙཐཱ. ཨུཔསམྤདཾ ཡཱཙཏཱིཏི ‘‘སངྒྷཾ, བྷནྟེ, ཨུཔསམྤདཾ ཡཱཙཱམཱི’’ཏིཨཱདིནཱ (མཧཱཝ. ༡༢༦) ཡཱཙཱཔིཏབྷཱཝཾ སནྡྷཱཡ ཝུཏྟཾ. ཨེཝཾ ཏེན སངྒྷེ ཨཡཱཙིཏེཔི ¶ ‘‘ཨིཏྠནྣཱམོ སངྒྷཾ ཨུཔསམྤདཾ ཡཱཙཏཱི’’ཏི ཝུཏྟེ ཨེཝ ཀམྨཾ ཨཝིཔནྣཾ ཧོཏི, ནཱཉྙཐཱ. ཨུཔཛ྄ཛྷཱཡེནཱཏི ཨུཔཛ྄ཛྷཱཡེན ཀརཎབྷཱུཏེན, ཨིཏྠནྣཱམཾ ཨུཔཛ྄ཛྷཱཡཾ ཀཏྭཱ ཀམྨབྷཱུཏཾ ཨུཔསམྤདཾ དཱཏུཾ ནིཔྥཱདེཏུཾ ཀཏྟུབྷཱུཏཾ སངྒྷཾ ཡཱཙཏཱིཏི ཨཏྠོ. ཡཱཙདྷཱཏུནོ པན དྭིཀམྨཀཏྟཱ ‘‘སངྒྷཾ ཨུཔསམྤད’’ནྟི དྭེ ཀམྨཔདཱནི ཝུཏྟཱནི.

ཡདི སངྒྷསྶ པཏྟཀལླནྟི ཨེཏྠ པཏྟོ ཀཱལོ ཨིམསྶ ཀམྨསྶཱཏི པཏྟཀཱལཾ, ཨཔལོཀནཱདིཙཏུབྦིདྷཾ སངྒྷགཎཀམྨཾ, ཏདེཝ སཀཏྠེ ཡ-པཙྩཡེན ‘‘པཏྟཀལླ’’ནྟི ཝུཙྩཏི. ཨིདྷ པན ཉཏྟིཙཏུཏྠཨུཔསམྤདཱཀམྨཾ ཨདྷིཔྤེཏཾ, ཏཾ ཀཱཏུཾ སངྒྷསྶ པཏྟཀལླཾ ཛཱཏཾ. ཡདཱིཏི ཨནུམཏིགཧཎཝསེན ཀམྨསྶ པཏྟཀལླཏཾ ཉཱཔེཏི, ཡོ ཧི ཀོཙི ཏཏྠ ཨཔཏྟཀལླཏཾ མཉྙིསྶཏི, སོ ཝཀྑཏི. ཨིམམེཝ ཧི ཨཏྠཾ སནྡྷཱཡ ཨནུསྶཱཝནཱསུ ‘‘ཡསྶཱཡསྨཏོ ཁམཏི…པེ… སོ བྷཱསེཡྻཱ’’ཏི (མཧཱཝ. ༡༢༧) ཝུཏྟཾ. ཏདེཏཾ པཏྟཀལླཾ ཝཏྠུསམྤདཱ, ཨནྟརཱཡིཀེཧི དྷམྨེཧི ཙསྶ པརིསུདྡྷཏཱ, སཱིམཱསམྤདཱ, པརིསཱསམྤདཱ, པུབྦཀིཙྩནིཊྛཱནནྟི ཨིམེཧི པཉྩཧི ཨངྒེཧི སངྒཧིཏཾ.

ཏཏྠ ཝཏྠུསམྤདཱ ནཱམ ཡཐཱཝུཏྟེཧི ཨེཀཱདསཨབྷབྦཔུགྒལེཧི ཙེཝ ཨནྟིམཝཏྠུཨཛ྄ཛྷཱཔནྣེཧི ཙ ཨཉྙོ པརིཔུཎྞཝཱིསཏིཝསྶོ ཨནུཔསམྤནྣབྷཱུཏོ མནུསྶཔུརིསོ. ཨེཏསྨིཉྷི པུགྒལེ ¶ སཏི ཨེཝ ཨིདཾ སངྒྷསྶ ཨུཔསམྤདཱཀམྨཾ པཏྟཀལླཾ ནཱམ ཧོཏི, ནཱསཏི, ཀཏཉྩ ཀུཔྤམེཝ ཧོཏི.

ཨནྟརཱཡིཀེཧི དྷམྨེཧི ཙསྶ པརིསུདྡྷཏཱ ནཱམ ཡཐཱཝུཏྟསྶེཝ ཨུཔསམྤདཱཝཏྠུབྷཱུཏསྶ པུགྒལསྶ ཡེ ཨིམེ བྷགཝཏཱ པཊིཀྑིཏྟཱ པཉྩཱབཱདྷཕུཊྛཏཱདཡོ མཱཏཱཔིཏཱུཧི ཨནནུཉྙཱཏཏཱཔཨཡོསཱནཱ ཙེཝ ཧཏྠཙྪིནྣཱདཡོ ཙ དོསདྷམྨཱ ཀཱརཀསངྒྷསྶ ཨཱཔཏྟཱདིཨནྟརཱཡཧེཏུཏཱཡ ‘‘ཨནྟརཱཡིཀཱ’’ཏི ཝུཙྩནྟི, ཏེཧི ཨནྟརཱཡིཀེཧི དོསདྷམྨེཧི པརིམུཏྟཏཱ, ཨིམིསྶཱ ཙ སཏི ཨེཝ ཨིདཾ ཀམྨཾ པཏྟཀལླཾ ནཱམ ཧོཏི, ནཱསཏི, ཀཏཾ པན ཀམྨཾ སུཀཏམེཝ ཧོཏི ཋཔེཏྭཱ ཨཱུནཝཱིསཏིཝསྶཾ པུགྒལཾ.

སཱིམཱསམྤདཱ པན ཨུཔོསཐཀྑནྡྷཀེ (མཧཱཝ. ༡༣༨ ཨཱདཡོ) ཝཀྑམཱནནཡེན སབྦདོསརཧིཏཱཡ བདྡྷཱབདྡྷཝསེནེཝ དུཝིདྷཱཡ སཱིམཱཡ ཝསེན ཝེདིཏབྦཱ. ཏཱདིསཱཡ ཧི སཱིམཱཡ སཏི ཨེཝ ཨིདཾ ཀམྨཾ པཏྟཀལླཾ ནཱམ ཧོཏི, ནཱསཏི, ཀཏཉྩ ཀམྨཾ ཝིཔཛྫཏི.

པརིསཱསམྤདཱ ¶ པན ཡེ ཨིམེ ཨུཔསམྤདཱཀམྨསྶ སབྦནྟིམེན པརིཙྪེདེན ཀམྨཔྤཏྟཱ དསཧི ཝཱ པཉྩཧི ཝཱ ཨནཱུནཱཔཱརཱཛིཀཾ ཨནཱཔནྣཱ ཨནུཀྑིཏྟཱ ཙ སམཱནསཾཝཱསཀཱ བྷིཀྑཱུ, ཏེསཾ ཨེཀསཱིམཱཡ ཧཏྠཔཱསཾ ཨཝིཛཧིཏྭཱ ཋཱནཾ, ཚནྡཱརཧཱནཉྩ ཚནྡསྶ ཨཱནཡནཾ, སམྨུཁཱིབྷཱུཏཱནཉྩ ཨཔྤཊིཀོསནཾ, ཨུཔསམྤདཱཔེཀྑརཧིཏཱནཾ ཨུཔོསཐཀྑནྡྷཀེ པཊིཀྑིཏྟཱནཾ གཧཊྛཱདིཨནུཔསམྤནྣཱནཉྩེཝ པཱརཱཛིཀུཀྑིཏྟཀནཱནཱསཾཝཱསཀབྷིཀྑུནཱིནཉྩ ཝཛྫནཱིཡཔུགྒལཱནཾ སངྒྷསྶ ཧཏྠཔཱསེ ཨབྷཱཝོ ཙཱཏི ཨིམེཧི ཙཏཱུཧི ཨངྒེཧི སངྒཧིཏཱ. ཨེཝརཱུཔཱཡ ཙ པརིསཱསམྤདཱཡ སཏི ཨེཝ ཨིདཾ པཏྟཀལླཾ ནཱམ ཧོཏི, ནཱསཏི. ཏཏྠ པུརིམཱནཾ ཏིཎྞཾ ཨངྒཱནཾ ཨཉྙཏརསྶཔི ཨབྷཱཝེ ཀཏཾ ཀམྨཾ ཝིཔཛྫཏི, ན པཙྪིམསྶ.

པུབྦཀིཙྩནིཊྛཱནཾ ¶ ནཱམ ཡཱནིམཱནི ‘‘པཋམཾ ཨུཔཛ྄ཛྷཾ གཱཧཱཔེཏབྦོ’’ཏིཨཱདིནཱ པཱལི༹ཡཾ (མཧཱཝ. ༡༢༦) ཝུཏྟཱནི ‘‘ཨུཔཛ྄ཛྷཱགཱཧཱཔནཾ, པཏྟཙཱིཝརཱཙིཀྑཎཾ, ཏཏོ ཏཾ ཧཏྠཔཱསཏོ བཧི པེསེཏྭཱ ཨནུསཱསཀསམྨུཏིཀམྨཀརཎཾ, སམྨཏེན ཙ གནྟྭཱ ཨནུསཱསནཾ, ཏེན ཙ པཋམཏརཾ ཨཱགནྟྭཱ སངྒྷསྶ ཉཏྟིཾ ཉཱཔེཏྭཱ ཨུཔསམྤདཱཔེཀྑཾ ‘ཨཱགཙྪཱཧཱི’ཏི ཧཏྠཔཱསེ ཨེཝ ཨབྦྷཱནཾ, ཏེན བྷིཀྑཱུནཾ པཱདེ ཝནྡཱཔེཏྭཱ ཨུཔསམྤདཱཡཱཙཱཔནཾ, ཏཏོ ཨནྟརཱཡིཀདྷམྨཔུཙྪཀསམྨུཏིཀམྨཀརཎཾ, སམྨཏེན ཙ པུཙྪན’’ནྟི ཨིམཱནི ཨཊྛ པུབྦཀིཙྩཱནི, ཏེསཾ སབྦེསཾ ཡཱཐཱཝཏོ ཀརཎེན ནིཊྛཱནཾ. ཨེཏསྨིཉྩ པུབྦཀིཙྩནིཊྛཱཔནེ སཏི ཨེཝ ཨིདཾ སངྒྷསྶ ཨུཔསམྤདཱཀམྨཾ པཏྟཀལླཾ ནཱམ ཧོཏི, ནཱསཏི. ཨེཏེསུ པན པུབྦཀམྨེསུ ཨཀཏེསུཔི ཀཏཾ ཀམྨཾ ཡཐཱཝུཏྟེསུ ཝཏྠུསམྤཏྟིཨཱདཱིསུ ཝིཛྫམཱནེསུ ཨཀུཔྤམེཝ ཧོཏི. ཏདེཝམེཏྠ པཏྟཀལླཾ ཨིམེཧི པཉྩཧི ཨངྒེཧི སངྒཧིཏནྟི ཝེདིཏབྦཾ. ཨིམིནཱཝ ནཡེན ཧེཊྛཱ ཝུཏྟེསུ, ཝཀྑམཱནེསུ ཙ སབྦེསུ ཀམྨེསུ པཏྟཀལླཏཱ ཡཐཱརཧཾ ཡོཛེཏྭཱ ཉཱཏབྦཱ.

ཨིཏྠནྣཱམཾ ཨུཔསམྤཱདེཡྻཱཏི ཨུཔསམྤདཱནིཔྥཱདནེན ཏཾསམངྒིཾ ཀརེཡྻ ཀརོཏཱུཏི པཏྠནཱཡཾ, ཝིདྷིམྷི ཝཱ ཨིདཾ དཊྛབྦཾ. ཡཐཱ ཧི ‘‘དེཝདཏྟཾ སུཁཱཔེཡྻཱ’’ཏི ཝུཏྟེ སུཁམསྶ ནིཔྥཱདེཏྭཱ ཏཾ སུཁསམངྒིནཾ ཀརེཡྻཱཏི ཨཏྠོ ཧོཏི, ཨེཝམིདྷཱཔི ཨུཔསམྤདམསྶ ནིཔྥཱདེཏྭཱ ཏཾ ཨུཔསམྤདཱསམངྒིནཾ ཀརེཡྻཱཏི ཨཏྠོ. པཡོཛཀབྱཱཔཱརེ ཙེཏཾ. ཡཐཱ སུཁཡནྟཾ ཀིཉྩི སུདྡྷཀཏྟཱརཾ ཀོཙི ཧེཏུཀཏྟཱ སུཁཧེཏུནིཔྥཱདནེན སུཁཱཔེཡྻཱཏི ཝུཙྩཏི, ཨེཝམིདྷཱཔི ཨུཔསམྤཛྫནྟཾ སུདྡྷཀཏྟཱརཾ པུགྒལཾ ཧེཏུཀཏྟུབྷཱུཏོ སངྒྷོ ཨུཔསམྤདཱཧེཏུནིཔྥཱདནེན ཨུཔསམྤཱདེཡྻཱཏི ཝུཏྟོ. ཨེཏེན ཙ སུཁཾ ཝིཡ སུཁདཱཡཀེན སངྒྷེན པུགྒལསྶ དཱིཡམཱནཱ ཏཐཱཔཝཏྟཔརམཏྠདྷམྨེ ¶ ¶ ཨུཔཱདཱཡ ཨརིཡཛནཔཉྙཏྟཱ ཨུཔསམྤདཱ ནཱམ སམྨུཏིསཙྩཏཱ ཨཏྠཱིཏི སམཏྠིཏཾ ཧོཏི. ཨེཏྠ ཙ ‘‘ཨིཏྠནྣཱམོ སངྒྷཾ ཨུཔསམྤདཾ ཡཱཙཏཱི’’ཏི (མཧཱཝ. ༡༢༧) ཝུཏྟཏྟཱ པརིཝཱསཱདཱིསུ ཝིཡ ཡཱཙནཱནུགུཎཾ ‘‘ཨིཏྠནྣཱམསྶ ཨུཔསམྤདཾ དདེཡྻཱ’’ཏི ཨཝཏྭཱ ‘‘ཨིཏྠནྣཱམཾ ཨུཔསམྤཱདེཡྻཱ’’ཏི ཝུཏྟཏྟཱ ཨིདཾ ཨུཔསམྤདཱཀམྨཾ དཱནེ ཨསངྒཧེཏྭཱ ཀམྨལཀྑཎེ ཨེཝ སངྒཧིཏནྟི དཊྛབྦཾ. ཨིམིནཱ ནཡེན ‘‘ཨིཏྠནྣཱམཾ ཨུཔསམྤཱདེཏི, ཨུཔསམྤནྣོ སངྒྷེནཱ’’ཏི ཨེཏྠཱཔི ཨཏྠོ ཝེདིཏབྦོ. ཀེཝལཉྷི ཏཏྠ ཝཏྟམཱནཀཱལཨཏཱིཏཀཱལཝསེན, ཨིདྷ པན ཨནཱམཊྛཀཱལཝསེནཱཏི ཨེཏྟཀམེཝ ཝིསེསོ.

ཨེསཱ ཉཏྟཱིཏི ‘‘སངྒྷོ ཉཱཔེཏབྦོ’’ཏི ཝུཏྟཉཱཔནཱ ཨེསཱ. ཨིདཉྩ ཨནུསྶཱཝནཱནམྤི སབྦྷཱཝསཱུཙནཏྠཾ ཝུཙྩཏི. ཨཝསྶཉྩེཏཾ ཝཏྟབྦམེཝ. ཉཏྟིཀམྨེ ཨེཝ ཏཾ ན ཝཏྟབྦཾ. ཏཏྠ པན ཡྻ-ཀཱརེ ཝུཏྟམཏྟེ ཨེཝ ཉཏྟིཀམྨཾ ནིཊྛིཏཾ ཧོཏཱིཏི དཊྛབྦཾ. ཁམཏཱིཏི རུཙྩཏི. ཨུཔསམྤདཱཏི སངྒྷེན དཱིཡམཱནཱ ནིཔྥཱདིཡམཱནཱ ཨུཔསམྤདཱ, ཡསྶ ཁམཏི, སོ ཏུཎྷསྶཱཏི ཡོཛནཱ. ཏུཎྷཱིཏི ཙ ཨཀཐནཏྠེ ནིཔཱཏོ, ཨཀཐནཀོ ཨསྶ བྷཝེཡྻཱཏི ཨཏྠོ. ཁམཏི སངྒྷསྶ ཨིཏྠནྣཱམསྶ ཨུཔསམྤདཱཏི པཀཏེན སམྦནྡྷོ. ཏཏྠ ཀཱརཎམཱཧ ‘‘ཏསྨཱ ཏུཎྷཱི’’ཏི. ཏཏྠ ‘‘ཨཱསཱི’’ཏི སེསོ. ཡསྨཱ ‘‘ཡསྶ ནཀྑམཏི, སོ བྷཱསེཡྻཱ’’ཏི ཏིཀྑཏྟུཾ ཝུཙྩམཱནོཔི སངྒྷོ ཏུཎྷཱི ནིརཝོ ཨཧོསི, ཏསྨཱ ཁམཏི སངྒྷསྶཱཏི ཨཏྠོ. ཨེཝནྟི ཨིམིནཱ པཀཱརེན. ཏུཎྷཱིབྷཱཝེནེཝེཏཾ སངྒྷསྶ རུཙྩནབྷཱཝཾ དྷཱརཡཱམི, བུཛ྄ཛྷཱམི ཛཱནཱམཱིཏི ཨཏྠོ. ཨིཏི-སདྡོ པརིསམཱཔནཏྠེ ཀཏོ, སོ ཙ ཀམྨཝཱཙཱཡ ཨནངྒཾ, ཏསྨཱ ཨནུསྶཱཝཀེན ‘‘དྷཱརཡཱམཱི’’ཏི ཨེཏྠ མི-ཀཱརཔརིཡོསཱནམེཝ ཝཏྭཱ ནིཊྛཔེཏབྦཾ, ཨིཏི-སདྡོ ན པཡུཛྫིཏབྦོཏི དཊྛབྦཾ. ཨིམིནཱ ནཡེན སབྦཀམྨཝཱཙཱནམཏྠོ ཝེདིཏབྦོ.

ཨེཀཔོརིསཱ ¶ ཝཱཏིཨཱདི སཏྟཱནཾ སརཱིརཚཱཡཾ པཱདེཧི མིནིཏྭཱ ཛཱནནཔྤཀཱརདསྶནཾ. ཚསཏྟཔདཔརིམིཏཱ ཧི ཚཱཡཱ ‘‘པོརིསཱ’’ཏི ཝུཙྩཏི, ཨིདཉྩ ཨུཏུཔྤམཱཎཱཙིཀྑཎཱདི ཙ ཨཱགནྟུཀེཧི སདྡྷིཾ ཝཱིམཾསིཏྭཱ ཝུཌྜྷནཝབྷཱཝཾ ཉཏྭཱ ཝནྡནཝནྡཱཔནཱདིཀརཎཏྠཾ ཝུཏྟཾ. ཨེཏི ཨཱགཙྪཏི, གཙྪཏི ཙཱཏི ཨུཏུ, སོཝ པམཱིཡཏེ ཨནེན སཾཝཙྪརནྟི པམཱཎནྟི ཨཱཧ ‘‘ཨུཏུཡེཝ ཨུཏུཔྤམཱཎ’’ནྟི. ཨཔརིཔུཎྞཱཏི ཨུཔསམྤདཱདིཝསེན ཨཔརིཔུཎྞཱ. ཡདི ཨུཏུཝེམཛ྄ཛྷེ ཨུཔསམྤཱདིཏོ, ཏདཱ ཏསྨིཾ ཨུཏུམྷི ཨཝསིཊྛདིཝསཱཙིཀྑཎཾ དིཝསབྷཱགཱཙིཀྑཎནྟི དསྶེཏི. ཏེནཱཧ ‘‘ཡཏྟཀེཧི དིཝསེཧི ཡསྶ ཡོ ཨུཏུ ཨཔརིཔུཎྞོ, ཏེ དིཝསེ’’ཏི. ཏཏྠ ཡསྶ ཏངྑཎཾ ལདྡྷཱུཔསམྤདསྶ ¶ པུགྒལསྶ སམྦནྡྷཱི ཡོ ཨུཏུ ཡཏྟཀེཧི དིཝསེཧི ཨཔརིཔུཎྞོ, ཏེ དིཝསེཏི ཡོཛནཱ.

ཚཱཡཱདིཀམེཝ སབྦཾ སངྒཧེཏྭཱ གཱཡིཏབྦཏོ ཀཐེཏབྦཏོ སངྒཱིཏཱིཏི ཨཱཧ ‘‘ཨིདམེཝཱ’’ཏིཨཱདི. ཏཏྠ ཨེཀཏོ ཀཏྭཱ ཨཱཙིཀྑིཏབྦཾ. ཏྭཾ ཀིཾ ལབྷསཱིཏི ཏྭཾ ཨུཔསམྤཱདནཀཱལེ ཀཏརཝསྶཾ, ཀཏརཨུཏུཉྩ ལབྷསི, ཀཏརསྨིཾ ཏེ ཨུཔསམྤདཱ ལདྡྷཱཏི ཨཏྠོ. ཝསྶནྟི ཝསྶཱནཨུཏུ, ཨིདཉྩ སཾཝཙྪརཱཙིཀྑཎཾ ཝིནཱ ཝུཏྟམྤི ན ཝིཉྙཱཡཏཱིཏི ཨིམིནཱ ཨུཏུཨཱཙིཀྑཎེནེཝ སཱསནཝསྶེསུ ཝཱ ཀལིཡུགཝསྶཱདཱིསུ ཝཱ སཧསྶིམེ ཝཱ སཏིམེ ཝཱ ཨསུཀཨུཏུཾ ལབྷཱམཱིཏི དསྶིཏནྟི དཊྛབྦཾ. ཚཱཡཱཏི ཨིདཾ པཱལི༹ཡཾ ཨཱགཏཔཊིཔཱཊིཾ སནྡྷཱཡ ཝུཏྟཾ, ཝཏྟབྦཀམྨཏོ པན ཀལིཡུགཝསྶཱདཱིསུ སབྦདེསཔསིདྡྷེསུ ཨསུཀཝསྶེ ཨསུཀཨུཏུམྷི ཨསུཀམཱསེ ཨསུཀཀཎྷེ ཝཱ སུཀྐེ ཝཱ པཀྑེ ཨསུཀེ ཏིཐིཝཱརཝིསེསཡུཏྟེ པུབྦཎྷཱདིདིཝསབྷཱགེ ཨེཏྟཀེ ཚཱཡཱཔམཱཎེ, ནཱཌིཀཱཔམཱཎེ ཝཱ མཡཱ ཨུཔསམྤདཱ ལདྡྷཱཏི ཝདེཡྻཱསཱིཏི ཨེཝཾ ཨཱཙིཀྑིཏབྦཾ. ཨིདཾ སུཊྛུ ཨུགྒཧེཏྭཱ ཨཱགནྟུཀེཧི ¶ ཝུཌྜྷཔཊིཔཱཊིཾ ཉཏྭཱ པཊིཔཛྫཱཧཱིཏི ཝཏྟབྦཾ. ཨིཏི ཨེཏྟཀོ ཀཐཱམགྒོ ཝིམཏིཝིནོདནིཡཾ ཨཱགཏོ. ཝཛིརབུདྡྷིཊཱིཀཱནཡོ པན ཨེཀཙྩོ ཨིདྷེཝ སངྒཧཾ གཏོ, ཨེཀཙྩོ ཨསནྣིཊྛཱནཝིནིཙྪཡཏྟཱ སཾསཡཧེཏུཀོ ཧོཏི, ཏསྨཱ ཨིདྷ ན གཧིཏོཏི.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཨུཔསམྤདཱཝིནིཙྪཡཀཐཱལངྐཱརོ.

༢༣. ནིསྶཡཝིནིཙྪཡཀཐཱ

༡༥༡. ཨེཝཾ ཨུཔསམྤདཱཝིནིཙྪཡཾ ཀཐེཏྭཱ ཨིདཱནི ནིསྶཡཝིནིཙྪཡཾ ཀཐེཏུཾ ‘‘ནིསྶཡོཏི ཨེཏྠ པནཱ’’ཏིཨཱདིམཱཧ. ཏཏྠ ནིསྶཡནཾ ནིསྶཡོ, སེཝནཾ བྷཛནནྟྱཏྠོ. ནིཔུབྦསི སེཝཱཡནྟི དྷཱཏུ བྷཱཝསཱདྷནོ, ན ‘‘ནིསྶཱཡ ནཾ ཝསཏཱིཏི ནིསྶཡོ’’ཏི ཨིདྷ ཝིཡ ཨཝུཏྟཀམྨསཱདྷནོ. ཏཏྠ ཧི སེཝིཏབྦོ པུགྒལོ ལབྦྷཏི, ཨིདྷ པན སེཝནཀིརིཡཱཏི. ཨིདཱནི ཏཾ ནིསྶཡཾ པུཙྪཱཔུབྦངྒམཱཡ ¶ ཝིསྶཛྫནཱཡ ཝིཏྠཱརཏོ ཋཔེཏུཾ ‘‘ཀེན དཱཏབྦོ’’ཏིཨཱདིམཱཧ. ཏཏྠ ཀེན དཱཏབྦོ, ཀེན ན དཱཏབྦོཏི ནིསྶཡདཱཡཀཾ ཀཏྟཱརཾ པུཙྪཏི, ཀསྶ དཱཏབྦོ, ཀསྶ ན དཱཏབྦོཏི ནིསྶཡཔཊིགྒཱཧཀཾ སམྤདཱནཾ, ཀཐཾ གཧིཏོ ཧོཏི, ཀཐཾ པཊིཔྤསྶམྦྷཏཱིཏི ཀཱརཎཾ, ནིསྶཱཡ ཀེན ཝསིཏབྦཾ, ཀེན ན ཝསིཏབྦནྟི ནིསྶཡཔཊིཔནྣཀཾ. ཏཏོ པུཙྪཱནུཀྐམེན ཝིསྶཛྫེཏུཾ ‘‘ཏཏྠ’’ཏྱཱདིམཱཧ. ན ཀེཝལཾ ཨེཏྠེཝ, ཨཐ ཁོ ནིསྶཡམུཙྩནངྒེཔི ‘‘བྱཏྟེནཱ’’ཏི ཨཱགཏོ.

ཏཏྠ ¶ ཨེཏྠ ཙ ཀོ ཝིསེསོཏི ཨཱཧ ‘‘ཨེཏྠ ཙ ‘བྱཏྟོ’ཏི ཨིམིནཱ པརིསུཔཊྛཱཔཀོ བཧུསྶུཏོ ཝེདིཏབྦོ’’ཏི. ཨིདཱནི པརིསུཔཊྛཱཔཀལཀྑཎཾ དསྶེཏུཾ ‘‘པརིསུཔཊྛཱཔཀེན ཧཱི’’ཏིཨཱདིམཱཧ. ཏཏྠ ཨབྷིཝིནཡེཏི སཀལེ ཝིནཡཔིཊཀེ. ཝིནེཏུནྟི སིཀྑཱཔེཏུཾ. དྭེ ཝིབྷངྒཱ པགུཎཱ ཝཱཙུགྒཏཱ ཀཱཏབྦཱཏི ཨིདཾ པརིཔུཙྪཱཝསེན ཨུགྒཎྷནཾ སནྡྷཱཡ ཝུཏྟནྟི ཝདནྟི. ཨེཀསྶ པམུཊྛཾ, ཨིཏརེསཾ པགུཎཾ བྷཝེཡྻཱཏི ཨཱཧ ‘‘ཏཱིཧི ཛནེཧི སདྡྷིཾ པརིཝཏྟནཀྑམཱ ཀཱཏབྦཱ’’ཏི. ཨབྷིདྷམྨེཏི ནཱམརཱུཔཔརིཙྪེདེ. ཧེཊྛིམཱ ཝཱ ཏཡོ ཝགྒཱཏི མཧཱཝགྒཏོ ཧེཊྛཱ སགཱཐཱཝགྒོ ནིདཱནཝགྒོ ཁནྡྷཝགྒོཏི ཨིམེ ཏཡོ ཝགྒཱ. ‘‘དྷམྨཔདམྤི སཧ ཝཏྠུནཱ ཨུགྒཧེཏུཾ ཝཊྚཏཱི’’ཏི མཧཱཔཙྩརིཡཾ ཝུཏྟཏྟཱ ཛཱཏཀབྷཱཎཀེན སཱཊྛཀཐཾ ཛཱཏཀཾ ཨུགྒཧེཏྭཱཔི དྷམྨཔདཾ སཧ ཝཏྠུནཱ ཨུགྒཧེཏབྦམེཝ.

པཉྩཧི བྷིཀྑཝེ ཨངྒེཧི སམནྣཱགཏེནཱཏིཨཱདཱིསུ ན སཱམཎེརོ ཨུཔཊྛཱཔེཏབྦོཏི ཨུཔཛ྄ཛྷཱཡེན ཧུཏྭཱ སཱམཎེརོ ན ཨུཔཊྛཱཔེཏབྦོ. ཨསེཀྑེན སཱིལཀྑནྡྷེནཱཏི ཨསེཀྑསྶ སཱིལཀྑནྡྷོཔི ཨསེཀྑོ སཱིལཀྑནྡྷོ ནཱམ. ཨསེཀྑསྶ ཨཡནྟི ཧི ཨསེཀྑོ, སཱིལཀྑནྡྷོ. ཨེཝཾ སབྦཏྠ. ཨེཝཉྩ ཀཏྭཱ ཝིམུཏྟིཉཱཎདསྶནསངྑཱཏསྶ པཙྩཝེཀྑཎཉཱཎསྶཔི ཝསེན ཨཔེཀྑིཏྭཱ ཨུཔྤནྣཱ ཨཡཾ ཀཐཱ. ཨསེཀྑསཱིལནྟི ཙ ན ཨགྒཕལསཱིལམེཝ ཨདྷིཔྤེཏཾ, ཨཐ ཁོ ཡཾ ཀིཉྩི ཨསེཀྑསནྟཱནེ པཝཏྟསཱིལཾ ལོཀིཡལོཀུཏྟརམིསྶཀསྶ སཱིལསྶ ཨིདྷཱདྷིཔྤེཏཏྟཱ. སམཱདྷིཀྑནྡྷཱདཱིསུཔི ཝིམུཏྟིཀྑནྡྷཔརིཡོསཱནེསུ ཨཡམེཝ ནཡོ, ཏསྨཱ ཡཐཱ སཱིལསམཱདྷིཔཉྙཱཀྑནྡྷཱ ལོཀིཡམིསྶཀཱ ཀཐིཏཱ, ཨེཝཾ ཝིམུཏྟིཀྑནྡྷོཔཱིཏི ཏདངྒཝིམུཏྟིཨཱདཡོཔི ཝེདིཏབྦཱ, ན པཊིཔྤསྶདྡྷིཝིམུཏྟི ཨེཝ. ཝིམུཏྟིཉཱཎདསྶནཾ པན ལོཀིཡམེཝ. ཏེནེཝ སཾཡུཏྟནིཀཱཡཊྛཀཐཱཡཾ (སཾ.ནི. ཨཊྛ. ༡.༡.༡༣༥) ཝུཏྟཾ ‘‘པུརིམེཧི ¶ ཙཏཱུཧི པདེཧི ལོཀིཡལོཀུཏྟརསཱིལསམཱདྷིཔཉྙཱཝིམུཏྟིཡོ ¶ ཀཐིཏཱ, ཝིམུཏྟིཉཱཎདསྶནཾ པཙྩཝེཀྑཎཉཱཎཾ ཧོཏི, ཏཾ ལོཀིཡམེཝཱ’’ཏི.

ཨསྶདྡྷོཏིཨཱདཱིསུ ཏཱིསུ ཝཏྠཱུསུ སདྡྷཱ ཨེཏསྶ ནཏྠཱིཏི ཨསྶདྡྷོ. ནཏྠི ཨེཏསྶ ཧིརཱིཏི ཨཧིརིཀོ, ཨཀུསལསམཱཔཏྟིཡཱ ཨཛིགུཙྪམཱནསྶེཏཾ ཨདྷིཝཙནཾ. ན ཨོཏྟཔྤཏཱིཏི ཨནོཏྟཔྤཱི, ཨཀུསལསམཱཔཏྟིཡཱ ན བྷཱཡཏཱིཏི ཝུཏྟཾ ཧོཏི. ཀུཙྪིཏཾ སཱིདཏཱིཏི ཀུསཱིཏོ, ཧཱིནཝཱིརིཡསྶེཏཾ ཨདྷིཝཙནཾ. ཨཱརདྡྷཾ ཝཱིརིཡཾ ཨེཏསྶཱཏི ཨཱརདྡྷཝཱིརིཡོ, སམྨཔྤདྷཱནཡུཏྟསྶེཏཾ ཨདྷིཝཙནཾ. མུཊྛཱ སཏི ཨེཏསྶཱཏི མུཊྛསྶཏཱི, ནཊྛསྶཏཱིཏི ཝུཏྟཾ ཧོཏི. ཨུཔཊྛིཏཱ སཏི ཨེཏསྶཱཏི ཨུཔཊྛིཏསྶཏཱི, ནིཙྩཾ ཨཱརམྨཎཱབྷིམུཁཔཝཏྟསཏིསྶེཏཾ ཨདྷིཝཙནཾ.

ཨདྷིསཱིལེ སཱིལཝིཔནྣོ ཙ ཨཛ྄ཛྷཱཙཱརེ ཨཱཙཱརཝིཔནྣོ ཙ ཨཱཔཛྫིཏྭཱ ཨཝུཊྛིཏོ ཨདྷིཔྤེཏོ. སསྶཏུཙྪེདསངྑཱཏཾ ཨནྟཾ གཎྷཱཏི, གཱཧཡཏཱིཏི ཝཱ ཨནྟགྒཱཧིཀཱ, མིཙྪཱདིཊྛི. པུརིམཱནི དྭེ པདཱནཱིཏི ‘‘ན པཊིབལོ ཧོཏི ཨནྟེཝཱསིཾ ཝཱ སདྡྷིཝིཧཱརིཾ ཝཱ གིལཱནཾ ཨུཔཊྛཱཏུཾ ཝཱ ཨུཔཊྛཱཔེཏུཾ ཝཱ, ཨནབྷིརཏཾ ཝཱུཔཀཱསེཏུཾ ཝཱ ཝཱུཔཀཱསཱཔེཏུཾ ཝཱ’’ཏི ཨིམཱནི དྭེ པདཱནི.

ཨབྷི ཝིསིཊྛོ ཨུཏྟམོ སམཱཙཱརོ ཨབྷིསམཱཙཱརོ, ཨབྷིསམཱཙཱརོཝ ཨཱབྷིསམཱཙཱརིཀོཏི ཙ སིཀྑིཏབྦཏོ སིཀྑཱཏི ཙ ཨཱབྷིསམཱཙཱརིཀསིཀྑཱ. ཨབྷིསམཱཙཱརཾ ཝཱ ཨཱརབྦྷ པཉྙཏྟཱ སིཀྑཱ ཨཱབྷིསམཱཙཱརིཀསིཀྑཱ, ཁནྡྷཀཝཏྟཔརིཡཱཔནྣསིཀྑཱཡེཏཾ ཨདྷིཝཙནཾ. མགྒབྲཧྨཙརིཡསྶ ཨཱདིབྷཱུཏཱཏི ཨཱདིབྲཧྨཙརིཡཀཱ, ཨུབྷཏོཝིབྷངྒཔརིཡཱཔནྣསིཀྑཱཡེཏཾ ཨདྷིཝཙནཾ. ཏེནེཝ ‘‘ཨུབྷཏོཝིབྷངྒཔརིཡཱཔནྣཾ ¶ ཝཱ ཨཱདིབྲཧྨཙརིཡཀཾ, ཁནྡྷཀཝཏྟཔརིཡཱཔནྣཾ ཨཱབྷིསམཱཙཱརིཀ’’ནྟི ཝིསུདྡྷིམགྒེ (ཝིསུདྡྷི. ༡.༡༡) ཝུཏྟཾ, ཏསྨཱ སེཀྑཔཎྞཏྟིཡནྟི ཨེཏྠ སིཀྑིཏབྦཏོ སེཀྑཱ, བྷགཝཏཱ པཉྙཏྟཏྟཱ པཎྞཏྟི, སབྦཱཔི ཨུབྷཏོཝིབྷངྒཔརིཡཱཔནྣཱ སིཀྑཱཔདཔཎྞཏྟི ‘‘སེཀྑཔཎྞཏྟཱི’’ཏི ཝུཏྟཱཏི གཧེཏབྦཾ. ཏེནེཝ གཎྛིཔདེཔི ཝུཏྟཾ ‘‘སེཀྑཔཎྞཏྟིཡནྟི པཱརཱཛིཀམཱདིཾ ཀཏྭཱ སིཀྑིཏབྦསིཀྑཱཔདཔཉྙཏྟིཡ’’ནྟི. སེསམེཏྠ ཨུཏྟཱནཏྠམེཝཱཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༨༤).

ཨུཔཛ྄ཛྷཱཡཱཙརིཡཀཐཱཡཾ ན སཱམཎེརོ ཨུཔཊྛཱཔེཏབྦོཏི ཨུཔཛ྄ཛྷཱཡེན ཧུཏྭཱ ན པབྦཱཛེཏབྦོ. ཨསེཀྑསྶ ¶ ཨཡནྟི ཨསེཀྑོ, ལོཀིཡལོཀུཏྟརོ སཱིལཀྑནྡྷོ. ཨནྟགྒཱཧིཀཱཡཱཏི སསྶཏུཙྪེདཀོཊྛཱསགྒཱཧིཀཱཡ. པཙྪིམཱནི དྭེཏི ཨཔྤསྶུཏོ ཧོཏི, དུཔྤཉྙོ ཧོཏཱིཏི ཨིམཱནི དྭེ ཨངྒཱནི. པཙྪིམཱནི ཏཱིཎཱིཏི ན པཊིབལོ ཨུཔྤནྣཾ ཀུཀྐུཙྩཾ དྷམྨཏོ ཝིནོདེཏུཾ, ཨཱཔཏྟིཾ ན ཛཱནཱཏི, ཨཱཔཏྟིཝུཊྛཱནཾ ན ཛཱནཱཏཱིཏི ཨིམཱནི ཏཱིཎི. ཀུཀྐུཙྩསྶ ཧི པཱལི༹ཨཊྛཀཐཱནཡསངྑཱཏདྷམྨཏོ ཝིནོདེཏུཾ ཨཔྤཊིབལཏཱ ནཱམ ཨབྱཏྟཏྟཱ ཨེཝ ཧོཏཱིཏི སཱཔི ཨཱཔཏྟིཨངྒམེཝ ཝུཏྟཱ.

ཨབྷི ཝིསིཊྛོ ཨུཏྟམོ སམཱཙཱརོ ཨབྷིསམཱཙཱརོ, ཝཏྟཔྤཊིཔཏྟིསཱིལཾ, ཏཾ ཨཱརབྦྷ པཉྙཏྟཱ ཁནྡྷཀསིཀྑཱཔདསངྑཱཏཱ སིཀྑཱ ཨཱབྷིསམཱཙཱརིཀཱ. སིཀྑཱཔདམྤི ཧི ཏདཏྠཔརིཔཱུརཎཏྠིཀེཧི ཨུགྒཧཎཱདིཝསེན སིཀྑིཏབྦཏོ སིཀྑཱཏི ཝུཙྩཏི. མགྒབྲཧྨཙརིཡསྶ ཨཱདིབྷཱུཏཱ ཀཱརཎབྷཱུཏཱ ཨཱདིབྲཧྨཙརིཡཀཱ, ཨུབྷཏོཝིབྷངྒཔརིཡཱཔནྣསིཀྑཱཔདཾ. ཏེནེཝེཏྠ ཝིསུདྡྷིམགྒེཔི (ཝིསུདྡྷི. ༡.༡༡) ‘‘ཨུབྷཏོཝིབྷངྒཔརིཡཱཔནྣཾ སིཀྑཱཔདཾ ཨཱདིབྲཧྨཙརིཡཀཾ, ཁནྡྷཀཝཏྟཔརིཡཱཔནྣཾ ཨཱབྷིསམཱཙཱརིཀ’’ནྟི ཝུཏྟཾ, ཏསྨཱ སེཀྑཔཎྞཏྟིཡནྟི ཨེཏྠ སིཀྑིཏབྦཏོ སེཀྑཱ, བྷགཝཏཱཝ ¶ པཉྙཏྟཏྟཱ པཉྙཏྟི. སབྦཱཔི ཨུབྷཏོཝིབྷངྒཔརིཡཱཔནྣཱ སིཀྑཱཔདཔཎྞཏྟི ‘‘སེཀྑཔཎྞཏྟཱི’’ཏི ཝུཏྟཱཏི གཧེཏབྦཾ. ནཱམརཱུཔཔརིཙྪེདེཏི ཨེཏྠ ཀུསལཏྟིཀཱདཱིཧི ཝུཏྟཾ ཛཱཏིབྷཱུམིཔུགྒལསམྤཡོགཝཏྠཱརམྨཎཀམྨདྭཱརལཀྑཎརསཱདིབྷེདེཧི ཝེདནཱཀྑནྡྷཱདིཙཏུབྦིདྷཾ སནིབྦཱནཾ ནཱམཾ, བྷཱུཏོཔཱདཱཡབྷེདཾ རཱུཔཉྩ པརིཙྪིནྡིཏྭཱ ཛཱནནཔཉྙཱ, ཏཔྤཀཱསཀོ ཙ གནྠོ ནཱམརཱུཔཔརིཙྪེདོ ནཱམ. ཨིམིནཱ ཨབྷིདྷམྨཏྠཀུསལེན བྷཝིཏབྦནྟི དསྶེཏི. སིཀྑཱཔེཏུནྟི ཨུགྒཎྷཱཔེཏུནྟི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༨༤) ཝུཏྟཾ.

༡༥༣. ཨཱཡསྨཏོ ནིསྶཱཡ ཝཙྪཱམཱིཏི ཨེཏྠ ཨཱཡསྨཏོཏི ཨུཔཡོགཏྠེ སཱམིཝཙནཾ, ཨཱཡསྨནྟཾ ནིསྶཱཡ ཝསིསྶཱམཱིཏི ཨཏྠོ. ཡཾ པན ཝུཏྟཾ སམནྟཔཱསཱདིཀཱཡཾ (མཧཱཝ. ཨཊྛ. ༧༦) ‘‘བྱཏྟོ…པེ… ཝུཏྟལཀྑཎོཡེཝཱ’’ཏི, ཏཾ པརིསཱུཔཊྛཱཀབཧུསྶུཏཾ སནྡྷཱཡ ཝདཏི. པབྦཛྫཱཨུཔསམྤདདྷམྨནྟེཝཱསིཀེཧི པན…པེ… ཏཱཝ ཝཏྟཾ ཀཱཏབྦནྟི པབྦཛྫཱཙརིཡཨུཔསམྤདཱཙརིཡདྷམྨཱཙརིཡཱནཾ ཨེཏེཧི ཡཐཱཝུཏྟཝཏྟཾ ཀཱཏབྦཾ. ཏཏྠ ཡེན སིཀྑཱཔདཱནི དིནྣཱནི, ཨཡཾ པབྦཛྫཱཙརིཡོ. ཡེན ཨུཔསམྤདཀམྨཝཱཙཱ ཝུཏྟཱ, ཨཡཾ ཨུཔསམྤདཱཙརིཡོ. ཡོ ཨུདྡེསཾ ཝཱ པརིཔུཙྪཾ ཝཱ དེཏི, ཨཡཾ དྷམྨཱཙརིཡོཏི ཝེདིཏབྦཾ. སེསམེཏྠ ཨུཏྟཱནཏྠམེཝ.

༡༥༤. ནིསྶཡཔཊིཔྤསྶདྡྷིཀཐཱཡཾ ¶ དིསཾ གཏོཏི པུན ཨཱགནྟུཀཱམོ, ཨནཱགནྟུཀཱམོ ཝཱ ཧུཏྭཱ ཝཱསཏྠཱཡ ཀཉྩི དིསཾ གཏོ. བྷིཀྑུསྶ སབྷཱགཏནྟི པེསལབྷཱཝཾ. ཨོལོཀེཏྭཱཏི ཨུཔཔརིཀྑིཏྭཱ. ཝིབྦྷནྟེ…པེ… ཏཏྠ གནྟབྦནྟི ཨེཏྠ ‘‘སཙེ ཀེནཙི ཀརཎཱིཡེན ཏདཧེཝ གནྟུཾ ཨསཀྐོནྟོ ‘ཀཏིཔཱཧེན གམིསྶཱམཱི’ཏི གམནེ སཨུསྶཱཧོ ཧོཏི, རཀྑཏཱི’’ཏི ཝདནྟི. མཱ ཨིདྷ པཊིཀྐམཱིཏི མཱ ¶ ཨིདྷ པཝིསི. ཏཏྲེཝ ཝསིཏབྦནྟི ཏཏྠེཝ ནིསྶཡཾ གཧེཏྭཱ ཝསིཏབྦཾ. ཏཾཡེཝ ཝིཧཱརཾ…པེ… ཝསིཏུཾ ཝཊྚཏཱིཏི ཨེཏྠ ཨུཔཛ྄ཛྷཱཡེན པརིཙྩཏྟཏྟཱ ཨུཔཛ྄ཛྷཱཡསམོདྷཱནཔརིཧཱརོ ནཏྠི, ཏསྨཱ ཨུཔཛ྄ཛྷཱཡསམོདྷཱནགཏསྶཔི ཨཱཙརིཡསྶ སནྟིཀེ གཧིཏནིསྶཡོ ན པཊིཔྤསྶམྦྷཏི.

ཨཱཙརིཡམྷཱ ནིསྶཡཔཊིཔྤསྶདྡྷཱིསུ ཨཱཙརིཡོ པཀྐནྟོ ཝཱ ཧོཏཱིཏི ཨེཏྠ ‘‘པཀྐནྟོཏི དིསཾ གཏོ’’ཏིཨཱདིནཱ ཨུཔཛ྄ཛྷཱཡསྶ པཀྐམནེ ཡོ ཝིནིཙྪཡོ ཝུཏྟོ, སོ ཏཏྠ ཝུཏྟནཡེནེཝ ཨིདྷཱཔི སཀྐཱ ཝིཉྙཱཏུནྟི ཏཾ ཨཝཏྭཱ ‘‘ཀོཙི ཨཱཙརིཡོ ཨཱཔུཙྪིཏྭཱ པཀྐམཏཱི’’ཏིཨཱདིནཱ ཨཉྙོཡེཝ ནཡོ ཨཱརདྡྷོ. ཨཡཉྩ ནཡོ ཨུཔཛ྄ཛྷཱཡཔཀྐམནེཔི ཝེདིཏབྦོཡེཝ. ཨཱིདིསེསུ ཧི ཋཱནེསུ ཨེཀཏྠཝུཏྟལཀྑཎཾ ཨཉྙཏྠཱཔི དཊྛབྦཾ. སཙེ དྭེ ལེཌྜུཔཱཏེ ཨཏིཀྐམིཏྭཱ ནིཝཏྟཏི, པཊིཔྤསྶདྡྷོ ཧོཏཱིཏི ཨེཏྠ ཨེཏྟཱཝཏཱ དིསཱཔཀྐནྟོ ནཱམ ཧོཏཱིཏི ཨནྟེཝཱསིཀེ ཨནིཀྑིཏྟདྷུརེཔི ནིསྶཡོ པཊིཔྤསྶམྦྷཏི. ཨཱཙརིཡུཔཛ྄ཛྷཱཡཱ དྭེ ལེཌྜུཔཱཏེ ཨཏིཀྐམྨ ཨཉྙསྨིཾ ཝིཧཱརེ ཝསནྟཱིཏི བཧིཨུཔཙཱརསཱིམཱཡཾ ཨནྟེཝཱསིཀསདྡྷིཝིཧཱརིཀཱནཾ ཝསནཊྛཱནཏོ དྭེ ལེཌྜུཔཱཏེ ཨཏིཀྐམྨ ཨཉྙསྨིཾ སེནཱསནེ ཝསནྟི, ཨནྟོཨུཔཙཱརསཱིམཱཡཾ པན དྭེ ལེཌྜུཔཱཏེ ཨཏིཀྐམིཏྭཱཔི ཝསཏོ ནིསྶཡོ ན པཊིཔྤསྶམྦྷཏི. ‘‘སཙེཔི ཨཱཙརིཡོ མུཉྩིཏུཀཱམོཝ ཧུཏྭཱ ནིསྶཡཔཎཱམནཱཡ པཎཱམེཏཱི’’ཏིཨཱདི སབྦཾ ཨུཔཛ྄ཛྷཱཡསྶ ཨཱཎཏྟིཡམྤི ཝེདིཏབྦནྟི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༨༣) ཝུཏྟཾ.

༡༥༣. སཱཧཱུཏི སཱདྷུ སུནྡརཾ. ལཧཱུཏི ཨགརུ, སུབྷརཏཱཏི ཨཏྠོ. ཨོཔཱཡིཀནྟི ཨུཔཱཡཔཊིསཾཡུཏྟཾ, ཨེཝཾ པཊིཔཛྫནཾ ནིཏྠརཎུཔཱཡོཏི ཨཏྠོ. པཏིརཱུཔནྟི སཱམཱིཙིཀམྨམིདནྟི ཨཏྠོ ¶ . པཱསཱདིཀེནཱཏི པསཱདཱཝཧེན, ཀཱཡཝཙཱིཔཡོགེན སམྤཱདེཧཱིཏི ཨཏྠོ. ཀཱཡེནཱཏི ཨེཏདཏྠཝིཉྙཱཔཀཾ ཧཏྠམུདྡཱདིཾ དསྶེནྟོ ཀཱཡེན ཝིཉྙཱཔེཏི. ‘‘སཱདྷཱུ’’ཏི སམྤཊིཙྪནཾ སནྡྷཱཡཱཏི ཨུཔཛ྄ཛྷཱཡེན ‘‘སཱཧཱུ’’ཏིཨཱདཱིསུ ཝུཏྟེསུ སདྡྷིཝིཧཱརིཀསྶ ‘‘སཱདྷཱུ’’ཏི སམྤཊིཙྪནཝཙནཾ སནྡྷཱཡ ‘‘ཀཱཡེན ཝིཉྙཱཔེཏཱི’’ཏིཨཱདི ཝུཏྟནྟི ཨདྷིཔྤཱཡོ. ཨཱཡཱཙནདཱནམཏྟེནཱཏི ¶ སདྡྷིཝིཧཱརིཀསྶ པཋམཾ ཨཱཡཱཙནམཏྟེན, ཏཏོ ཨུཔཛ྄ཛྷཱཡསྶ ཙ ‘‘སཱཧཱུ’’ཏིཨཱདིནཱ ཝཙནམཏྟེནཱཏི ཨཏྠོ. ཨཱཙརིཡསྶ སནྟིཀེ ནིསྶཡགྒཧཎེ ཨཱཡསྨཏོ ནིསྶཱཡ ཝཙྪཱམཱིཏི ཨཱཡསྨནྟཾ ནིསྶཱཡ ཝསིསྶཱམཱིཏི ཨཏྠོ.

༡༥༤. ནིསྶཡཔཊིཔྤསྶདྡྷིཀཐཱཡཾ ཡོ ཝཱ ཨེཀསམྦྷོགཔརིབྷོགོ, ཏསྶ སནྟིཀེ ནིསྶཡོ གཧེཏབྦོཏི ཨིམིནཱ ལཛྫཱིསུ ཨེཝ ནིསྶཡགྒཧཎཾ ནིཡོཛེཏི ཨལཛྫཱིསུ པཊིཀྑིཏྟཏྟཱ. ཨེཏྠ ཙ པརིབྷོགསདྡེན ཨེཀཀམྨཱདིཀོ སཾཝཱསོ གཧིཏོ པཙྩཡཔརིབྷོགསྶ སམྦྷོགསདྡེན གཧིཏཏྟཱ. ཨེཏེན ཙ སམྦྷོགསཾཝཱསཱནཾ ཨལཛྫཱིཧི སདྡྷིཾ ན ཀཏྟབྦཏཾ དསྶེཏི. པརིཧཱརོ ནཏྠཱིཏི ཨཱཔཏྟིཔརིཧཱརོ ནཏྠི. ཏཱདིསོཏི ཡཏྠ ནིསྶཡོ གཧིཏཔུབྦོ, ཡོ ཙ ཨེཀསམྦྷོགཔརིབྷོགོ, ཏཱདིསོ. ཏཐཱ ཝུཏྟནྟི ‘‘ལཧུཾ ཨཱགམིསྶཏཱི’’ཏི ཝུཏྟཉྩེཏི ཨཏྠོ. ཙཏྟཱརི པཉྩ དིཝསཱནཱིཏི ཨིདཾ ཨུཔལཀྑཎམཏྟཾ. ཡདི ཨེཀཱཧདྭཱིཧེན སབྷཱགཏཱ པཉྙཱཡཏི, ཉཱཏདིཝསེ གཧེཏབྦོཝ. ཨཐཱཔི ཙཏུཔཉྩཱཧེནཔི ན པཉྙཱཡཏི, ཡཏྟཀེཧི དིཝསེཧི པཉྙཱཡཏི, ཏཏྟཀཱནི ཨཏིཀྐཱམེཏབྦཱནི. སབྷཱགཏཾ ཨོལོཀེམཱིཏི པན ལེསོ ན ཀཱཏབྦོ. དཧརཱ སུཎནྟཱིཏི ཨེཏྠ ཨསུཏྭཱཔི ‘‘ཨཱགམིསྶཏི, ཀེནཙི ཨནྟརཱཡེན ཙིརཱཡནྟཱི’’ཏི སཉྙཱཡ སཏིཔི ལབྦྷཏེཝ པརིཧཱརོ ¶ . ཏེནཱཧ ‘‘ཨིདྷེཝཱཧཾ ཝསིསྶཱམཱིཏི པཧིཎཏི, པརིཧཱརོ ནཏྠཱི’’ཏི. ཨེཀདིཝསམྤི པརིཧཱརོ ནཏྠཱིཏི གམནེ ནིརུསྶཱཧཾ སནྡྷཱཡ ཝུཏྟཾ, སཨུསྶཱཧསྶ པན སེནཱསནཔཊིསཱམནཱདིཝསེན ཀཏིཔཱཧེ གཏེཔི ན དོསོ.

ཏཏྲེཝ ཝསིཏབྦནྟི ཏཏྲ སབྷཱགཊྛཱནེ ཨེཝ ནིསྶཡཾ གཧེཏྭཱ ཝསིཏབྦཾ. ཏཾཡེཝ ཝིཧཱརཾ…པེ… ཝསིཏུཾ ཝཊྚཏཱིཏི ཨིམིནཱ ཨུཔཛ྄ཛྷཱཡེ སངྒཎྷནྟེཡེཝ ཏཾསམོདྷཱནེ ནིསྶཡཔཊིཔྤསྶདྡྷི ཝུཏྟཱ, ཏསྨིཾ པན ཀོདྷེན ཝཱ གཎནིརཔེཀྑཏཱཡ ཝཱ ཨསངྒཎྷནྟེ ཨཉྙེསུ གཧིཏོ ནིསྶཡོ ན པཊིཔྤསྶམྦྷཏཱིཏི དསྶེཏི.

ཨཱཙརིཡམྷཱ ནིསྶཡཔཊིཔྤསྶདྡྷིཡཾ ཝུཏྟོ ‘‘ཀོཙི ཨཱཙརིཡོ’’ཏིཨཱདིཀོ ནཡོ ཨུཔཛ྄ཛྷཱཡཔཀྐམནཱདཱིསུཔི ནེཏྭཱ ཏཏྠ ཙ ཝུཏྟོ ཨིདྷཱཔི ནེཏྭཱ ཡཐཱརཧཾ ཡོཛེཏབྦོ. དྭེ ལེཌྜུཔཱཏེ ཨཏིཀྐམྨ ཨཉྙསྨིཾ ཝིཧཱརེ ཝསནྟཱིཏི ཨུཔཙཱརསཱིམཏོ བཧི ཨཉྙསྨིཾ ཝིཧཱརེ ཨནྟེཝཱསིཀཱདཱིནཾ ཝསནཊྛཱནཏོ དྭེ ལེཌྜུཔཱཏེ ཨཏིཀྐམིཏྭཱ ཝསནྟི. ཏེན བཧིཨུཔཙཱརེཔི ཨནྟེཝཱསིཀཱདཱིནཾ ཝསནཊྛཱནཏོ དྭིནྣཾ ལེཌྜུཔཱཏཱནཾ ཨནྟརེ ཨཱསནྣེ པདེསེ ཝསཏི, ནིསྶཡོ ན པཊིཔྤསྶམྦྷཏཱིཏི ¶ དསྶེཏི. ཨནྟོཨུཔཙཱརསཱིམཱཡཾ པན དྭེ ལེཌྜུཔཱཏེ ཨཏིཀྐམིཏྭཱ ཝསཏོ ནིསྶཡོ ན པཊིཔྤསྶམྦྷཏེཝཱཏི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༨༣) ཝུཏྟཾ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ནིསྶཡཝིནིཙྪཡཀཐཱལངྐཱརོ ནཱམ

ཏེཝཱིསཏིམོ པརིཙྪེདོ.

༢༤. སཱིམཱཝིནིཙྪཡཀཐཱ

༡༥༦. ཨེཝཾ ¶ ནིསྶཡཝིནིཙྪཡཾ ཀཐེཏྭཱ ཨིདཱནི སཱིམཱཝིནིཙྪཡཾ ཀཐེཏུཾ ‘‘སཱིམཱཏི ཨེཏྠ’’ཏྱཱདིམཱཧ. ཏཏྠ སཱིམཱཏི སིནཱིཡཏེ སམགྒེན སངྒྷེན ཀམྨཝཱཙཱཡ བནྡྷཱིཡཏེཏི སཱིམཱ. སི བནྡྷནེཏི དྷཱཏུ, མ-པཙྩཡོ, ཀིཡཱདིགཎོཡཾ. ཝིབྷཱགཝནྟཱནཾ སབྷཱཝཝིབྷཱཝནཾ ཝིབྷཱགེན ཝིནཱ ན ཧོཏཱིཏི ཨཱཧ ‘‘སཱིམཱ ནཱམེསཱ…པེ… ཧོཏཱི’’ཏི. ཏཏྠ བདྡྷསཱིམཾ ཏཱཝ དསྶེཏུཾ ‘‘ཏཏྠ ཨེཀཱདས’’ཏྱཱདིམཱཧ.

ཝཱིསཏིཝགྒཀརཎཱིཡཔརམཏྟཱ སངྒྷཀམྨསྶ ཧེཊྛིམནྟཏོ ཡཏྠ ཀམྨཱརཧེན སདྡྷིཾ ཨེཀཝཱིསཏི བྷིཀྑཱུ ནིསཱིདིཏུཾ སཀྐོནྟི, ཏཏྟཀེ པདེསེ སཱིམཾ བནྡྷིཏུཾ ཝཊྚཏི, ན ཏཏོ ཨོརནྟི ཨཱཧ ‘‘ཨཏིཁུདྡཀཱ ནཱམ ཡཏྠ ཨེཀཝཱིསཏི བྷིཀྑཱུ ནིསཱིདིཏུཾ ན སཀྐོནྟཱི’’ཏི. པུརཏྠིམཱཡ དིསཱཡཱཏི ཨིདཾ ནིདསྶནམཏྟཾ, ཏསྶཾ པན དིསཱཡཾ ནིམིཏྟེ ཨསཏི ཡཏྠ ཨཏྠི, ཏཏོ པཊྛཱཡ པཋམཾ ‘‘པུརཏྠིམཱཡ ཨནུདིསཱཡ, དཀྑིཎཱཡ དིསཱཡཱ’’ཏིཨཱདིནཱ སམནྟཱ ཝིཛྫམཱནཊྛཱནེསུ ནིམིཏྟཱནི ཀིཏྟེཏྭཱ པུན ‘‘པུརཏྠིམཱཡ ཨནུདིསཱཡཱ’’ཏི པཋམཀིཏྟིཏཾ པཊིཀིཏྟེཏུཾ ཝཊྚཏི ཏཱིཧི ནིམིཏྟེཧི སིངྒྷཱཊཀསཎྛཱནཱཡཔི སཱིམཱཡ སམྨནྣིཏབྦཏོ. ཏིཀྑཏྟུཾ སཱིམམཎྜལཾ སམྦནྡྷནྟེནཱཏི ཝིནཡདྷརེན སཡཾ ཨེཀསྨིཾཡེཝ ཋཱནེ ཋཏྭཱ ཀེཝལཾ ནིམིཏྟཀིཏྟནཝཙནེནེཝ སཱིམམཎྜལཾ སམནྟཱ ནིམིཏྟེན ནིམིཏྟཾ བནྡྷནྟེནཱཏི ཨཏྠོ. ཏཾཏཾནིམིཏྟཊྛཱནཾ ཨགནྟྭཱཔི ཧི ཀིཏྟེཏུཾ ཝཊྚཏི. ཏིཡོཛནཔརམཱཡཔི སཱིམཱཡ སམནྟཏོ ཏིཀྑཏྟུཾ ཨནུཔརིགམནསྶ ཨེཀདིཝསེན དུཀྐརཏྟཱ ¶ ཝིནཡདྷརེན སཡཾ ཨདིཊྛམྤི པུབྦེ བྷིཀྑཱུཧི ཡཐཱཝཝཏྠིཏཾ ནིམིཏྟཾ ‘‘པཱསཱཎོ བྷནྟེ’’ཏིཨཱདིནཱ ཀེནཙི ཝུཏྟཱནུསཱརེན སལླཀྑེཏྭཱ ‘‘ཨེསོ པཱསཱཎོ ནིམིཏྟ’’ནྟིཨཱདིནཱ ཀིཏྟེཏུམྤི ཝཊྚཏི ཨེཝ.

སཾསཊྛཝིཊཔཱཏི ¶ ཨིམིནཱ ཨཉྙམཉྙསྶ ཨཱསནྣཏཾ དཱིཔེཏི. བདྡྷཱ ཧོཏཱིཏི པཙྪིམདིསཱབྷཱགེ སཱིམཾ སནྡྷཱཡ ཝུཏྟཾ. ཨེཀརཏནམཏྟཱ སུཝིཉྙེཡྻཏརཱ ཧོཏཱིཏི ཀཏྭཱ ཝུཏྟཾ ‘‘པཙྪིམཀོཊིཡཱ ཧཏྠམཏྟཱ སཱིམནྟརིཀཱ ཋཔེཏབྦཱ’’ཏི. ཨེཀངྒུལིམཏྟཱཔི སཱིམནྟརིཀཱ ཝཊྚཏིཡེཝ. ཏཏྟཀེནཔི ཧི སཱིམཱ ཨསམྦྷིནྣཱཝ ཧོཏི. དྭིནྣཾ སཱིམཱནཾ ནིམིཏྟཾ ཧོཏཱིཏི ནིམིཏྟསྶ སཱིམཏོ བཱཧིརཏྟཱ སཱིམསམྦྷེདོ ན ཧོཏཱིཏི ཝུཏྟཾ. སཱིམསངྐརཾ ཀརོཏཱིཏི ཝཌྜྷིཏྭཱ སཱིམཔྤདེསཾ པཝིཊྛེ དྭིནྣཾ སཱིམཱནཾ གཏཊྛཱནསྶ དུཝིཉྙེཡྻཏྟཱ ཝུཏྟཾ, ན, པན ཏཏྠ ཀམྨཾ ཀཱཏུཾ ན ཝཊྚཏཱིཏི དསྶནཏྠཾ. ན ཧི སཱིམཱ ཏཏྟཀེན ཨསཱིམཱ ཧོཏི, དྭེ པན སཱིམཱ པཙྪཱ ཝཌྜྷིཏརུཀྑེན ཨཛ྄ཛྷོཏྠཊཏྟཱ ཨེཀཱབདྡྷཱ ཧོནྟི, ཏསྨཱ ཨེཀཏྠ ཋཏྭཱ ཀམྨཾ ཀརོནྟེཧི ཨིཏརཾ སོདྷེཏྭཱ ཀཱཏབྦཾ. ཏསྶཱ པདེསནྟི ཡཏྠ ཋཏྭཱ བྷིཀྑཱུཧི ཀམྨཾ ཀཱཏུཾ སཀྐཱ ཧོཏི, ཏཱདིསཾ པདེསཾ, ཡཏྠ པན ཋིཏེཧི ཀམྨཾ ཀཱཏུཾ ན སཀྐཱ ཧོཏི, ཏཱདིསཾ པདེསཾ ཨནྟོཀརིཏྭཱ བནྡྷནྟཱ སཱིམཱཡ སཱིམཾ སཾབྷིནྡནྟི ནཱམ. ན ཀམྨཝཱཙཾ ཝགྒཾ ཀརོནྟཱིཏི ཀམྨཝཱཙཾ ན བྷིནྡནྟི, ཀམྨཾ ན ཀོཔེནྟཱིཏི ཨདྷིཔྤཱཡོ.

༡༥༨. སུདྡྷཔཾསུཔབྦཏོཏི ན ཀེནཙི ཀཏོ སཡཾཛཱཏོཝ ཝུཏྟོ. ཏཐཱ སེསཱཔི. ཨིཏརོཔཱིཏི སུདྡྷཔཾསུཔབྦཏཱདིཀོ པབྦཏོཔི. ཧཏྠིཔྤམཱཎོཏི ཨེཏྠ བྷཱུམིཏོ ཨུགྒཏཔདེསེན ཧཏྠིཔྤམཱཎཾ གཧེཏབྦཾ. སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༣༨) པན ཝཛིརབུདྡྷིཊཱིཀཱཡཉྩ (ཝཛིར. ཊཱི. མཧཱཝགྒ ༡༣༨) ‘‘ཧཏྠིཔྤམཱཎོ ནཱམ པབྦཏོ ཧེཊྛིམཀོཊིཡཱ ཨཌྜྷཊྛམརཏནུབྦེདྷོ’’ཏི ཝུཏྟཾ. ཙཏཱུཧི ཝཱ ཏཱིཧི ཝཱཏི སཱིམབྷཱུམིཡཾ ཙཏཱུསུ, ཏཱིསུ ཝཱ དིསཱསུ ཋིཏེཧི, ཨེཀིསྶཱ ཨེཝ པན དིསཱཡ ཋིཏེཧི ཏཏོ བཧཱུཧིཔི སམྨནྣིཏུཾ ན ཝཊྚཏི, དྭཱིཧི པན དྭཱིསུ དིསཱསུ ཋིཏེཧིཔི ན ཝཊྚཏི. ཏསྨཱཏི ཡསྨཱ ¶ ཨེཀེན ན ཝཊྚཏི, ཏསྨཱ. ཏཾ བཧིདྡྷཱ ཀཏྭཱཏི ཀིཏྟིཏནིམིཏྟསྶ ཨསཱིམཏྟཱ ཨནྟོསཱིམཱཡ ཀརཎཾ ཨཡུཏྟནྟི ཝུཏྟཾ. ཏེནཱཧ ‘‘སཙེ’’ཏིཨཱདི.

དྭཏྟིཾསཔལགུལ༹པིཎྜཔྤམཱཎཏཱ སཎྛཱནཏོ གཧེཏབྦཱ, ན ཏུལགཎནཱཝསེན, བྷཱརཏོ པལཔརིམཱཎཉྩ ¶ མགདྷཏུལཱཡ གཧེཏབྦཾ, སཱ ཙ ལོཀིཡཏུལཱཡ དྭིགུཎཱཏི ཝདནྟི. སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༣༨) པན ‘‘དྭཏྟིཾསཔལགུལ༹པིཎྜཔྤམཱཎཏཱ ཏུལཏཱཡ གཧེཏབྦཱ, ན ཏུལགཎནཱཡཱ’’ཏི ཝུཏྟཾ. ཨཏིམཧནྟོཔཱིཏི བྷཱུམིཏོ ཧཏྠིཔྤམཱཎཾ ཨནུགནྟྭཱ ཧེཊྛཱབྷཱུམིཡཾ ཨོཏིཎྞགྷནཏོ ཨནེཀཡོཛནཔྤམཱཎོཔི. སཙེ ཧི ཏཏོ ཧཏྠིཔྤམཱཎཾ ཀཱུཊཾ ཨུགྒཙྪཏི, པབྦཏསངྑམེཝ གཙྪཏི. ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༡༣༨) – སཙེ ཨེཀཱབདྡྷོ ཧོཏི, ན ཀཱཏབྦོཏི ཨེཏྠ ཙཏཱུསུ དིསཱསུ ཙཏུནྣཾ པབྦཏཀཱུཊཱནཾ ཧེཊྛཱ པིཊྛིཔཱསཱཎསདིསེ པཱསཱཎེ ཋིཏཏྟཱ ཨེཀཱབདྡྷབྷཱཝེ སཏིཔི པཐཝིཏོ ཨུདྡྷཾ ཏེསཾ སམྦནྡྷེ ཨསཏི ཧེཊྛཱ པཐཝཱིགཏསམྦནྡྷམཏྟེ ཨབྦོཧཱརིཀཾ ཀཏྭཱ ཀིཏྟེཏུཾ ཝཊྚཏི. ཏེནེཝ ‘‘པིཊྛིཔཱསཱཎོ ཨཏིམཧནྟོཔི པཱསཱཎསངྑྱམེཝ གཙྪཏཱི’’ཏི ཝུཏྟཾ. པཐཝིཏོ ཧེཊྛཱ ཏསྶ མཧནྟབྷཱཝེ གཡ྄ཧམཱནེ པབྦཏམེཝ ཧོཏཱིཏི ཨནུགཎྛིཔདེ ཝུཏྟཾ. ཙིནིཏྭཱ ཀཏཔཾསུཔུཉྫེ ཏིཎགུམྦརུཀྑཱ ཙེ ཛཱཡནྟི, པབྦཏོ ཧོཏཱིཏི དྷམྨསིརིཏྠེརོ, ནེཝཱཏི ཨུཔཏིསྶཏྠེརོཏི ཝུཏྟཾ. པཱསཱཎོཏི སུདྷཱམཡཔཱསཱཎོཔི ཝཊྚཏཱིཏི ཝདནྟི, ཝཱིམཾསིཏབྦཾ ཨིཊྛཀཱཡ པཊིཀྑིཏྟཏྟཱ. སོཔཱིཏི ཁཱཎུཀོ ཝིཡ ཨུཊྛིཏཔཱསཱཎོཔི. ཙཏུཔཉྩརུཀྑནིམིཏྟམཏྟམྤཱིཏི ཨེཀཙྩེསུ ནིམིཏྟསདྡོ ནཏྠཱིཏི ཝུཏྟཾ.

ཨནྟོསཱརཱནནྟི ཏསྨིཾ ཁཎེ ཏརུཎཏཱཡ སཱརེ ཨཝིཛྫམཱནེཔི པརིཎཱམེན བྷཝིསྶམཱནསཱརེཔི སནྡྷཱཡ ཝུཏྟཾ ¶ . ཏཱདིསཱནཉྷི སཱུཙིདཎྜཀཔྤམཱཎཔརིཎཱཧཱནཾ ཙཏུཔཉྩམཏྟཱནམྤི ཝནཾ ཝཊྚཏི. ཨནྟོསཱརམིསྶཀཱནནྟི ཨནྟོསཱརེཧི རུཀྑེཧི སམྨིསྶཱནཾ. ཨེཏེན ཏཙསཱརརུཀྑམིསྶཀཱནམྤི ཝནཾ ཝཊྚཏཱིཏི དསྶེཏི. ཙཏུཔཉྩརུཀྑམཏྟམྤཱིཏི སཱརརུཀྑེ སནྡྷཱཡ ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༡༣༨) པན ‘‘ཨེཏྠ ཏཡོ ཙེ སཱརརུཀྑཱ ཧོནྟི, དྭེ ཨསཱརཱ, སཱརརུཀྑཱནཾ བཧུཏྟཾ ཨིཙྪིཏབྦཾ. སུསཱནམྤི ཨིདྷ ཝནམེཝཱཏི སངྑྱཾ གཙྪཏི སཡཾཛཱཏཏྟཱཏི ཝུཏྟཾ. ཀེཙི པན ‘ཙཏཱུསུ དྭེ ཨནྟོསཱརཱ ཙེ, ཝཊྚཏི, ཨནྟོསཱརཱ ཨདྷིཀཱ, སམཱ ཝཱ, ཝཊྚཏི, ཏསྨཱ བཧཱུསུཔི དྭེ ཙེ ཨནྟོསཱརཱ ཨཏྠི, ཝཊྚཏཱི’ཏི ཝདནྟཱི’’ཏི ཝུཏྟཾ. ཝནམཛ྄ཛྷེ ཝིཧཱརཾ ཀརོནྟཱིཏི རུཀྑགྷཊཱཡ ཨནྟརེ རུཀྑེ ཨཙྪིནྡིཏྭཱ ཝཏིཨཱདཱིཧི ཝིཧཱརཔརིཙྪེདཾ ཀཏྭཱཝ ཨནྟོརུཀྑནྟརེསུ ཨེཝ པརིཝེཎཔཎྞསཱལཱདཱིནཾ ཀརཎཝསེན ཡཐཱ ཨནྟོཝིཧཱརམྤི ཝནམེཝ ཧོཏི, ཨེཝཾ ཝིཧཱརཾ ཀརོནྟཱིཏི ཨཏྠོ. ཡདི ཧི སབྦཾ རུཀྑཾ ཚིནྡིཏྭཱ ཝིཧཱརཾ ཀརེཡྻུཾ, ཝིཧཱརསྶ ཨཝནཏྟཱ ཏཾ པརིཀྑིཔིཏྭཱ ཋིཏཝནཾ ཨེཀཏྠ ཀིཏྟེཏབྦཾ སིཡཱ, ཨིདྷ པན ཨནྟོཔི ཝནཏྟཱ ‘‘ཝནཾ ན ཀིཏྟེཏབྦ’’ནྟི ཝུཏྟཾ. སཙེ ཧི ཏཾ ཀིཏྟེནྟི, ‘‘ནིམིཏྟསྶ ཨུཔརི ཝིཧཱརོ ཧོཏཱི’’ཏིཨཱདིནཱ ཨནནྟརེ ཝུཏྟདོསོ ཨཱཔཛྫཏི ¶ . ཨེཀདེསནྟི ཝནེཀདེསཾ, རུཀྑཝིརཧིཏཊྛཱནེ ཀཏཝིཧཱརསྶ ཨེཀཔསྶེ ཋིཏཝནསྶ ཨེཀདེསནྟི ཨཏྠོ.

སཱུཙིདཎྜཀཔྤམཱཎོཏི ཝཾསདཎྜཔྤམཱཎོ. ‘‘ལེཁནིདཎྜཔྤམཱཎོ’’ཏི ཀེཙི. མཱཏིཀཱཊྛཀཐཱཡཾ (ཀངྑཱ. ཨཊྛ. དུབྦལསིཀྑཱཔདཝཎྞནཱ) པན ཨཝེབྷངྒིཡཝིནིཙྪཡེ ‘‘ཡོ ཀོཙི ཨཊྛངྒུལསཱུཙིདཎྜམཏྟོཔི ཝེལུ༹…པེ… གརུབྷཎྜ’’ནྟི ཝུཏྟཏྟཱ ཏནུཏརོ ཝེལུ༹དཎྜོཏི ཙ སཱུཙིདཎྜོཏི ཙ གཧེཏབྦཾ. ཝཾསནལ༹ཀསརཱཝཱདཱིསཱུཏི ཝེལུ༹པབྦེ ཝཱ ནལ༹པབྦེ ཝཱ ཀཔལླཀཱདིམཏྟིཀབྷཱཛནེསུ ཝཱཏི ཨཏྠོ. ཏངྑཎམྤཱིཏི ¶ ཏརུཎཔོཏཀེ ཨམིལཱཡིཏྭཱ ཝིརུཧནཛཱཏིཀེ སནྡྷཱཡ ཝུཏྟཾ. ཡེ པན པརིཎཏཱ སམཱུལཾ ཨུདྡྷརིཏྭཱ རོཔིཏཱཔི ཚིནྣསཱཁཱ ཝིཡ མིལཱཡིཏྭཱ ཙིརེན ནཝམཱུལངྐུརུཔྤཏྟིཡཱ ཛཱིཝནྟི, མིཡནྟིཡེཝ ཝཱ, ཏཱདིསེ ཀིཏྟེཏུཾ ན ཝཊྚཏི. ཨེཏནྟི ནཝམཱུལསཱཁཱནིགྒམནཾ. སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༣༨) པན ‘‘སཱུཙིདཎྜཀཔྤམཱཎོཏི སཱིཧལ༹དཱིཔེ ལེཁནིདཎྜཔྤམཱཎོཏི ཝདནྟི, སོ ཙ ཀནིཊྛངྒུལིཔརིམཱཎོཏི དཊྛབྦ’’ནྟི ཝུཏྟཾ.

མཛ྄ཛྷེཏི སཱིམཱཡ མཧཱདིསཱནཾ ཨནྟོ. ཀོཎནྟི སཱིམཱཡ ཙཏཱུསུ ཀོཎེསུ དྭིནྣཾ དྭིནྣཾ མགྒཱནཾ སམྦནྡྷཊྛཱནཾ. པརབྷཱགེ ཀིཏྟེཏུཾ ཝཊྚཏཱིཏི ཏེསཾ ཙཏུནྣཾ ཀོཎཱནཾ བཧི ནིཀྑམིཏྭཱ ཋིཏེསུ ཨཊྛསུ མགྒེསུ ཨེཀིསྶཱ དིསཱཡ ཨེཀཾ, ཨཉྙིསྶཱ དིསཱཡ ཙཱཔརནྟི ཨེཝཾ ཙཏྟཱརོཔི མགྒཱ ཙཏཱུསུ དིསཱསུ ཀིཏྟེཏུཾ ཝཊྚཏཱིཏི ཨདྷིཔྤཱཡོ. ཨེཝཾ པན ཀིཏྟིཏམཏྟེན ཀཐཾ ཨེཀཱབདྡྷཏཱ ཝིགཙྪཏཱིཏི ཝིཉྙཱཡཏི. པརཏོ གཏཊྛཱནེཔི ཨེཏེ ཨེཝ ཏེ ཙཏྟཱརོ མགྒཱ. ‘‘ཙཏྟཱརོ མགྒཱ ཙཏཱུསུ དིསཱསུ གཙྪནྟཱི’’ཏི ཧི ཝུཏྟཾ, ཏསྨཱ ཨེཏྠ ཀཱརཎཾ ཝིཙིནིཏབྦནྟི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༣༨) ཝུཏྟཾ. ཝིཙིནནྟོ པན ཨེཝཾ ཀཱརཎཾ པཉྙཱཡཏི – པུབྦཝཱཀྱེཔི ‘‘ཝིཧཱརཾ པརིཀྑིཔིཏྭཱ ཙཏྟཱརོ མགྒཱ’’ཏི, པརཝཱཀྱེཔི ‘‘ཝིཧཱརམཛ྄ཛྷེན ནིབྦིཛ྄ཛྷིཏྭཱ གཏམགྒོཔཱི’’ཏི ཝིཧཱརམེཝ སནྡྷཱཡ ཝུཏྟོ, ཏསྨཱ ཨིདྷཱཔི ‘‘ཀོཎཾ ནིབྦིཛ྄ཛྷིཏྭཱ གཏཾ པནཱ’’ཏི (མཧཱཝ. ཨཊྛ. ༡༣༨) ཨཊྛཀཐཱཡཾ ཝུཏྟཏྟཱ ཨེཏེ མགྒཱ ཝིཧཱརསྶ ཀོཎམེཝ ནིབྦིཛ྄ཛྷིཾསུ, ན ཨཉྙམཉྙཾ མིསྶིཾསུ, ཏསྨཱ ཨེཀཱབདྡྷབྷཱཝཱབྷཱཝཱ ཙཏུནྣཾ མགྒཱནཾ ཙཏཱུསུ ཋཱནེསུ ཀིཏྟེཏུཾ ཝཊྚཏཱིཏི. སཱརཏྠདཱིཔནིཡཾ པན ‘‘པརབྷཱགེ ཀིཏྟེཏུཾ ཝཊྚཏཱིཏི བཧི ནིཀྑམིཏྭཱ ཋིཏེསུ ཨཊྛསུ མགྒེསུ ཨེཀིསྶཱ དིསཱཡ ཨེཀཾ, ཨཔརཱཡ ཨེཀནྟི ཨེཝཾ ཙཏཱུསུ ཋཱནེསུ ཀིཏྟེཏུཾ ཝཊྚཏཱི’’ཏི ཨེཏྟཀམེཝ ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༡༣༨) པན ‘‘པརབྷཱགེཏི ¶ ¶ ཨེཏྠ ཨེཏེཧི བདྡྷཊྛཱནཏོ གཏཏྟཱ ཝཊྚཏི, ཏཐཱ དཱིགྷམགྒེཔི གཧིཏཊྛཱནཏོ གཏཊྛཱནསྶ ཨཉྙཏྟཱཏི ཝདནྟཱི’’ཏི ཝུཏྟཾ. ཏམྤི ཨེཀཱབདྡྷནིམིཏྟཏྟཱ ཝིཙཱརེཏབྦཾ.

ཨུཏྟརནྟིཡཱ བྷིཀྑུནིཡཱཏི ཨིདཉྩ པཱལི༹ཡཾ བྷིཀྑུནཱིནཾ ནདཱིཔཱརགམནེ ནདཱིལཀྑཎསྶ ཨཱགཏཏྟཱ ཝུཏྟཾ, བྷིཀྑཱུནཾ ཨནྟརཝཱསཀཏེམནམཏྟམྤི ཝཊྚཏིཡེཝ. སཱརཏྠདཱིཔནིཡམྤི (སཱརཏྠ. ཊཱི. མཧཱཝགྒ ༣.༡༣༨) ‘‘བྷིཀྑུནིཡཱ ཨེཝ གཧཎཉྩེཏྠ བྷིཀྑུནཱིཝིབྷངྒེ བྷིཀྑུནཱིཝསེན ནདཱིལཀྑཎསྶ པཱལི༹ཡཾ ཨཱགཏཏྟཱ ཏེནེཝ ནཡེན དསྶནཏྠཾ ཀཏཾ. སཱིམཾ བནྡྷནྟཱནཾ ནིམིཏྟཾ ཧོཏཱིཏི ཨཡཾ ཝུཏྟལཀྑཎཱ ནདཱི སམུདྡཾ ཝཱ པཝིསཏུ ཏལཱ༹ཀཾ ཝཱ, པབྷཝཏོ པཊྛཱཡ ནིམིཏྟཾ ཧོཏཱི’’ཏི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༡༣༨) པན ‘‘ཨནྟརཝཱསཀོ ཏེམིཡཏཱིཏི ཝུཏྟཏྟཱ ཏཏྟཀཔྤམཱཎཨུདཀེཡེཝ ཀཱཏུཾ ཝཊྚཏཱིཏི ཀེཙི. ‘ཏེམིཡཏཱི’ཏི ཨིམིནཱ ཧེཊྛིམཀོཊིཡཱ ནདཱིལཀྑཎཾ ཝུཏྟཾ, ཨེཝརཱུཔཱཡ ནདིཡཱ ཡསྨིཾ ཋཱནེ ཙཏྟཱརོ མཱསེ ཨཔྤཾ ཝཱ བཧུཾ ཝཱ ཨུདཀཾ ཨཛ྄ཛྷོཏྠརིཏྭཱ པཝཏྟཏི, ཏསྨིཾ ཋཱནེ ཨཔྤོདཀེཔི ཋཏྭཱ ཀཱཏུཾ ཝཊྚཏཱིཏི ཨེཀེ’’ཏི ཝུཏྟཾ.

ནདཱིཙཏུཀྐེཔི ཨེསེཝ ནཡོཏི ཨིམིནཱ ཨེཀཏྠ ཀིཏྟེཏྭཱ ཨཉྙཏྠ པརཏོ གཏཊྛཱནེཔི ཀིཏྟེཏུཾ ན ཝཊྚཏཱིཏི དསྶེཏི. ཏེནེཝ ཙ ‘‘ཨསམྨིསྶཱ ནདིཡོ པན ཙཏསྶོཔི ཀིཏྟེཏུཾ ཝཊྚཏཱི’’ཏི ཨསམྨིསྶགྒཧཎཾ ཀཏཾ. ཨཛ྄ཛྷོཏྠརིཏྭཱ ཨཱཝརཎཾ པཝཏྟཏིཡེཝཱཏི ཨཱཝརཎཾ ཨཛ྄ཛྷོཏྠརིཏྭཱ སནྡཏིཡེཝ. ཨཔཝཏྟམཱནཱཏི ཨསནྡམཱནུདཀཱ. ཨཱཝརཎཉྷི པཏྭཱ ནདིཡཱ ཡཏྟཀེ པདེསེ ཨུདཀཾ ཨསནྡམཱནཾ སནྟིཊྛཏི, ཏཏྠ ནདཱིནིམིཏྟཾ ཀཱཏུཾ ན ཝཊྚཏི, ཨུཔརི སནྡམཱནཊྛཱནེཡེཝ ཝཊྚཏི. ཨསནྡམཱནཊྛཱནེ པན ཨུདཀནིམིཏྟཾ ཀཱཏུཾ ཝཊྚཏི. ཋིཏམེཝ ཧི ཨུདཀཾ ཨུདཀནིམིཏྟེ ཝཊྚཏི, ན སནྡམཱནཾ. ཏེནེཝཱཧ ‘‘པཝཏྟནཊྛཱནེ ནདཱིནིམིཏྟཾ, ཨཔཝཏྟནཊྛཱནེ ཨུདཀནིམིཏྟཾ ཀཱཏུཾ ཝཊྚཏཱི’’ཏི. ‘‘པཝཏྟནཊྛཱནེ ¶ ནདཱིནིམིཏྟནྟི ཝུཏྟཏྟཱ སེཏུཏོ པརཏོ ཏཏྟཀཾ ཨུདཀཾ ཡདི པཝཏྟཏི, ནདཱི ཨེཝཱཏི ཝདནྟི. ཛཱཏསྶརཱདཱིསུ ཋིཏོདཀཾ ཛཱཏསྶརཱདིཔདེསེན ཨནྟརིཀམྤི ནིམིཏྟཾ ཀཱཏུཾ ཝཊྚཏི ནདཱིཔཱརསཱིམཱཡ ནིམིཏྟཾ ཝིཡ. སཙེ སོ པདེསོ ཀཱལནྟརེན གཱམཁེཏྟབྷཱཝཾ པཱཔུཎཱཏི, ཏཏྠ ཨཉྙཾ སཱིམཾ སམྨནྣིཏུཾ ཝཊྚཏཱི’’ཏི ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༡༣༨) ཝུཏྟཾ. མཱུལེཏི ཨཱདིཀཱལེ. ནདིཾ བྷིནྡིཏྭཱཏི ཡཐཱ ཨུདཀཾ ཨནིཙྪནྟེཧི ཀསྶཀེཧི མཧོགྷེ ནིཝཊྚེཏུཾ ན སཀྐཱ, ཨེཝཾ ཀཱུལཾ བྷིནྡིཏྭཱ. ནདིཾ བྷིནྡིཏྭཱཏི ཝཱ མཱཏིཀཱམུཁདྭཱརེན ནདཱིཀཱུལཾ བྷིནྡིཏྭཱ.

ཨུཀྑེཔིམནྟི ¶ དཱིགྷརཛྫུནཱ ཀཱུཊེཧི ཨུསྶིཉྩནཱིཡཾ. ཨུཀྑེཔིམནྟི ཝཱ ཀཱུཔཏོ ཝིཡ ཨུཀྑིཔིཏྭཱ གཧེཏབྦཾ. ཨུཀྑེཔིམནྟི ཝཱ ཨུདྡྷརིཏྭཱ གཧེཏབྦཀཾ.

ཨསམྨིསྶེཧཱིཏི སབྦདིསཱསུ ཋིཏཔབྦཏེཧི ཨེཝ ཝཱ པཱསཱཎཱདཱིསུ ཨཉྙཏརེཧི ཝཱ ནིམིཏྟནྟརཱབྱཝཧིཏེཧི. སམྨིསྶེཧཱིཏི ཨེཀཏྠ པབྦཏོ, ཨཉྙཏྠ པཱསཱཎོཏི ཨེཝཾ ཋིཏེཧི ཨཊྛཧི. ནིམིཏྟཱནཾ སཏེནཱཔཱིཏི ཨིམིནཱ ཨེཀིསྶཱཡེཝ དིསཱཡ བཧཱུནིཔི ནིམིཏྟཱནི ‘‘པུརཏྠིམཱཡ དིསཱཡ ཀིཾ ནིམིཏྟཾ, པབྦཏོ, བྷནྟེ. པུན པུརཏྠིམཱཡ དིསཱཡ ཀིཾ ནིམིཏྟཾ, པཱསཱཎོ, བྷནྟེ’’ཏིཨཱདིནཱ (མཧཱཝ. ཨཊྛ. ༡༣༨) ཀིཏྟེཏུཾ ཝཊྚཏཱིཏི དསྶེཏི. སིངྒྷཱཊཀསཎྛཱནཱཏི ཏིཀོཎཱ. སིངྒྷཱཊཀསཎྛཱནཱཏི ཝཱ ཏིཀོཎརཙྪཱསཎྛཱནཱ. ཙཏུརསྶཱཏི སམཙཏུརསྶཱ. མུདིངྒསཎྛཱནཱ པན ཨཱཡཏཙཏུརསྶཱ, ཨེཀཀོཊིཡཾ སངྐོཙིཏཱ, ཏདཉྙཱཡ ཝིཏྠིཎྞཱ ཝཱ ཧོཏི. མུདིངྒསཎྛཱནཱཏི ཝཱ མུདིངྒབྷེརཱི ཝིཡ མཛ྄ཛྷེ ཝིཏྠཏཱ ཨུབྷོསུ ཀོཊཱིསུ སངྐོཙིཏཱ ཧོཏི.

༡༥༩. ཨེཝཾ བདྡྷསཱིམཱཡ ནིམིཏྟསམྤཏྟིཡུཏྟཏཾ དསྶེཏྭཱ ཨིདཱནི པརིསསམྤཏྟིཡུཏྟཏཾ དསྶེཏུཾ ‘‘པརིསསམྤཏྟིཡུཏྟཱ ནཱམཱ’’ཏིཨཱདིམཱཧ ¶ . ཏཏྠ སབྦནྟིམེན པརིཙྪེདེནཱཏི སབྦཧེཊྛིམེན གཎནཔརིཙྪེདེན, ཨཔྤཏརོ ཙེ གཎོ ཧོཏཱིཏི ཨདྷིཔྤཱཡོ. ཨིམསྶ པན སཱིམཱསམྨུཏིཀམྨསྶ ཙཏུཝགྒཀརཎཱིཡཏྟཱ ‘‘ཙཏཱུཧི བྷིཀྑཱུཧཱི’’ཏི ཝུཏྟཾ. སནྣིཔཏིཏཱཏི སམགྒཱ ཧུཏྭཱ ཨཉྙམཉྙསྶ ཧཏྠཔཱསཾ ཨཝིཛཧིཏྭཱ སནྣིཔཏིཏཱ. ཨིམིནཱ ‘‘ཙཏུཝགྒཀརཎཱིཡེ ཀམྨེ ཙཏྟཱརོ བྷིཀྑཱུ པཀཏཏྟཱ ཀམྨཔྤཏྟཱ, ཏེ ཨཱགཏཱ ཧོནྟཱི’’ཏི ཝུཏྟཾ པཋམསམྤཏྟིལཀྑཎཾ དསྶེཏི. ཡཱཝཏིཀཱ ཏསྨིཾ གཱམཀྑེཏྟེཏི ཡསྨིཾ པདེསེ སཱིམཾ བནྡྷིཏུཀཱམཱ, ཏསྨིཾ ཨེཀསྶ གཱམབྷོཛཀསྶ ཨཱཡུཔྤཏྟིཊྛཱནབྷཱུཏེ གཱམཀྑེཏྟེ ཋིཏཱ བྷིཀྑཱུཏི སམྦནྡྷོ. བདྡྷསཱིམཾ ཝཱ ནདཱིསམུདྡཛཱཏསྶརེ ཝཱ ཨནོཀྐམིཏྭཱཏི ཨེཏེན ཨེཏཱ བདྡྷསཱིམཱདཡོ གཱམསཱིམཏོ སཱིམནྟརབྷཱུཏཱ, ན ཏཱསུ ཋིཏཱ གཱམསཱིམཱཡ ཀམྨཾ ཀརོནྟཱནཾ ཝགྒཾ ཀརོནྟི, ཏསྨཱ ན ཏེསཾ ཚནྡོ ཨཱཧརིཏབྦོཏི དསྶེཏི. ཏེ སབྦེ ཧཏྠཔཱསེ ཝཱ ཀཏྭཱཏི ཝགྒཀམྨཔརིཧརཎཏྠཾ སནྣིཔཏིཏུཾ སམཏྠེ ཏེ གཱམཀྑེཏྟཊྛེ སབྦེ བྷིཀྑཱུ སངྒྷསྶ ཧཏྠཔཱསེ ཀཏྭཱཏི ཨཏྠོ. ཚནྡཾ ཝཱ ཨཱཧརིཏྭཱཏི སནྣིཔཏིཏུཾ ཨསམཏྠཱནཾ ཚནྡཾ ཨཱཧརིཏྭཱ. ཏསྨིཾ གཱམཀྑེཏྟེ ཡདིཔི སཧསྶབྷིཀྑཱུ ཧོནྟི, ཏེསུ ཙཏྟཱརོཡེཝ ཀམྨཔྤཏྟཱ, ཨཝསེསཱ ཚནྡཱརཧཱ, ཏསྨཱ ཨནཱགཏཱནཾ ཚནྡོ ཨཱཧརིཏབྦོཏི ཨཏྠོ, ཨིམིནཱ ‘‘ཚནྡཱརཧཱནཾ ཚནྡོ ¶ ཨཱཧཊོ ཧོཏཱི’’ཏི ཝུཏྟཾ དུཏིཡསམྤཏྟིལཀྑཎམཱཧ. ‘‘སམྨུཁཱིབྷཱུཏཱ ན པཊིཀྐོསནྟཱི’’ཏི ཝུཏྟཾ ཏཏིཡསམྤཏྟིལཀྑཎཾ པན ཨིམེསཾ སཱམཏྠིཡེན ཝུཏྟཾ ཧོཏི.

༡༦༠. ཨེཝཾ བདྡྷསཱིམཱཡ པརིསསམྤཏྟིཡུཏྟཏཾ དསྶེཏྭཱ ཨིདཱནི ཀམྨཝཱཙཱསམྤཏྟིཡུཏྟཏཾ དསྶེཏུཾ ‘‘ཀམྨཝཱཙཱསམྤཏྟིཡུཏྟཱ ནཱམཱ’’ཏིཨཱདིམཱཧ. ཏཏྠ ‘‘སུཎཱཏུ མེ’’ཏིཨཱདཱིནཾ ཨཏྠོ ཧེཊྛཱ ཨུཔསམྤདཀམྨཝཱཙཱཝཎྞནཱཡཾ ཝུཏྟོཝ ¶ . ཨེཝཾ ཝུཏྟཱཡཱཏི ཨེཝཾ ཨིམིནཱ ཨནུཀྐམེན ཨུཔོསཐཀྑནྡྷཀེ (མཧཱཝ. ༡༣༨-༡༣༩) བྷགཝཏཱ ཝུཏྟཱཡ. པརིསུདྡྷཱཡཱཏི ཉཏྟིདོསཨནཨུསྶཱཝནདོསེཧི པརིསམནྟཏོ སུདྡྷཱཡ. ཉཏྟིདུཏིཡཀམྨཝཱཙཱཡཱཏི ཨེཀཱཡ ཉཏྟིཡཱ ཨེཀཱཡ ཨནུསྶཱཝནཱཡ ཀརིཡམཱནཏྟཱ ཉཏྟི ཨེཝ དུཏིཡཱ ཨིམིསྶཱ ཀམྨཝཱཙཱཡཱཏི ཉཏྟིདུཏིཡཀམྨཝཱཙཱ, ཏཱཡ. ནིམིཏྟཱནཾ ཨནྟོ སཱིམཱ ཧོཏི, ནིམིཏྟཱནི སཱིམཏོ བཧི ཧོནྟི ནིམིཏྟཱནི བཧི ཀཏྭཱ ཧེཊྛཱ པཐཝཱིསནྡྷཱརཨུདཀཾ པརིཡནྟཾ ཀཏྭཱ སཱིམཱཡ གཏཏྟཱ.

༡༦༡. ཨེཝཾ སམཱནསཾཝཱསཀསཱིམཱསམྨུཏིཡཱ ཀམྨཝཱཙཱསམྤཏྟིཾ དསྶེཏྭཱ ཨིདཱནི ཨདྷིཊྛིཏཏེཙཱིཝརིཀཱནཾ བྷིཀྑཱུནཾ ཙཱིཝརེ སུཁཔརིབྷོགཏྠཾ བྷགཝཏཱ པཉྙཏྟཾ ཨཝིཔྤཝཱསསཱིམཱསམྨུཏིཀམྨཝཱཙཱསམྤཏྟིཾ དསྶེནྟོ ‘‘ཨེཝཾ བདྡྷཱཡ ཙ’’ཏྱཱདིམཱཧ. ཏཏྠ ཏིཙཱིཝརེན ཨཝིཔྤཝཱསཾ སམྨནྣེཡྻཱཏི ཡཐཱ ཨདྷིཊྛིཏཏེཙཱིཝརིཀོ བྷིཀྑུ ཨནྟོསཱིམཱཡཾ ཏིཙཱིཝརེན ཝིཔྤཝསནྟོཔི ཨཝིཔྤཝཱསོཡེཝ ཧོཏི, དུཏིཡཀཐིནསིཀྑཱཔདེན (པཱརཱ. ༤༧༡ ཨཱདཡོ) ཨཱཔཏྟི ན ཧོཏི, ཨེཝཾ ཏཾ སམཱནསཾཝཱསཀསཱིམཾ ཏིཙཱིཝརེན ཨཝིཔྤཝཱསཾ སམྨནྣེཡྻཱཏི ཨཏྠོ. ཋཔེཏྭཱ གཱམཉྩ གཱམཱུཔཙཱརཉྩཱཏི ཡདི ཏིསྶཱ སམཱནསཾཝཱསཀསཱིམཱཡ ཨནྟོ གཱམོ ཨཏྠི, ཏཾ གཱམཉྩ གཱམཱུཔཙཱརཉྩ ཋཔེཏྭཱ ཏཏོ ཝིནིམུཏྟཾ ཏཾ སམཱནསཾཝཱསཀསཱིམཾ ཏིཙཱིཝརེན ཨཝིཔྤཝཱསཾ སམྨནྣེཡྻཱཏི ཨཏྠོ.

སཱིམསངྑྱཾཡེཝ གཙྪཏཱིཏི ཨཝིཔྤཝཱསསཱིམསངྑྱཾཡེཝ གཙྪཏི. ཨེཀམྤི ཀུལཾ པཝིཊྛཾ ཝཱཏི ཨབྷིནཝཀཏགེཧེསུ སབྦཔཋམཾ ཨེཀམྤི ཀུལཾ པཝིཊྛཾ ཨཏྠི. ཨགཏཾ ཝཱཏི པོརཱཎཀགཱམེ ཨཉྙེསུ ཀུལེསུ གེཧཱནི ཚཌྜེཏྭཱ གཏེསུཔི ཨེཀམྤི ཀུལཾ ཨགཏཾ ཨཏྠཱིཏི ཨཏྠོ.

༡༦༢. ཨེཝཾ ¶ སངྑེཔེན སཱིམཱསམྨུཏིཾ དསྶེཏྭཱ པུན ཝིཏྠཱརེན དསྶེནྟོ ‘‘ཨཡམེཏྠ སངྑེཔོ, ཨཡཾ པན ཝིཏྠཱརོ’’ཏིཨཱདིམཱཧ. སཱིམཱཡ ཨུཔཙཱརཾ ཋཔེཏྭཱཏི ཨཱཡཏིཾ བནྡྷིཏབྦཱཡ སཱིམཱཡ ¶ ནེསཾ ཝིཧཱརཱནཾ པརིཙྪེདཏོ བཧི སཱིམནྟརིཀཔྤཧོནཀཾ ཨུཔཙཱརཾ ཋཔེཏྭཱ. བདྡྷཱ སཱིམཱཡེསུ ཝིཧཱརེསུ, ཏེ བདྡྷསཱིམཱ. པཱཊིཡེཀྐནྟི པཙྩེཀཾ. བདྡྷསཱིམཱསདིསཱནཱིཏི ཡཐཱ བདྡྷསཱིམཱསུ ཋིཏཱ ཨཉྙམཉྙཾ ཚནྡཱདིཾ ཨནཔེཀྑིཏྭཱ པཙྩེཀཾ ཀམྨཾ ཀཱཏུཾ ལབྷནྟི, ཨེཝཾ གཱམསཱིམཱསུ ཋིཏཱཔཱིཏི དསྶེཏི. ཨནྟོནིམིཏྟགཏེཧི པནཱཏི ཨེཀསྶ གཱམསྶ ཨུཔཌྜྷཾ ཨནྟོཀཏྟུཀཱམཏཱཡ སཏི སབྦེསཾ ཨཱགམནེ པཡོཛནཾ ནཏྠཱིཏི ཀཏྭཱ ཝུཏྟཾ. ཨཱགནྟབྦནྟི ཙ སཱམཱིཙིཝསེན ཝུཏྟཾ, ནཱཡཾ ནིཡམོ ‘‘ཨཱགནྟབྦམེཝཱ’’ཏི. ཏེནེཝཱཧ ‘‘ཨཱགམནམྤི ཨནཱགམནམྤི ཝཊྚཏཱི’’ཏི. ཨབདྡྷཱཡ ཧི སཱིམཱཡ ནཱནཱགཱམཀྑེཏྟཱནཾ ནཱནཱསཱིམསབྷཱཝཏྟཱ ཏེསཾ ཨནཱགམནེཔི ཝགྒཀམྨཾ ན ཧོཏི, ཏསྨཱ ཨནཱགམནམྤི ཝཊྚཏི. བདྡྷཱཡ པན སཱིམཱཡ ཨེཀསཱིམབྷཱཝཏོ པུན ཨཉྙསྨིཾ ཀམྨེ ཀརིཡམཱནེ ཨནྟོསཱིམགཏེཧི ཨཱགནྟབྦམེཝཱཏི ཨཱཧ ‘‘ཨཝིཔྤཝཱསསཱིམཱ…པེ… ཨཱགནྟབྦ’’ནྟི. ནིམིཏྟཀིཏྟནཀཱལེ ཨསོདྷིཏཱཡཔི སཱིམཱཡ ནེཝཏྠི དོསོ ནིམིཏྟཀིཏྟནསྶ ཨཔལོཀནཱདཱིསུ ཨཉྙཏརཱབྷཱཝཏོ.

བྷེརིསཉྙཾ ཝཱཏི སམྨནྣནཔརིཡོསཱནཾ ཀརོམཱཏི ཝཏྭཱཏི ལིཁིཏཾ. ཏེན ཏཱདིསེ ཀཱལེ ཏཾ ཀཔྤཏཱིཏི སིདྡྷཾ ཧོཏི. བྷེརིསཉྙཾ ཝཱ སངྑསཉྙཾ ཝཱཏི པན ཏེསཾ སདྡཾ སུཏྭཱ ཨིདཱནི སངྒྷོ སཱིམཾ བནྡྷཏཱིཏི ཉཏྭཱ ཨཱགནྟུཀབྷིཀྑཱུནཾ ཏཾ གཱམཀྑེཏྟཾ ཨཔྤཝེསནཏྠཾ, ཨཱརཱམིཀཱདཱིནཉྩ ཏེསཾ ནིཝཱརཎཏྠཾ ཀམྨཝཱཙཱརདྡྷཀཱལེཡེཝ སཉྙཱ ཀརཱིཡཏི, ཨེཝཾ སཏི ཏཾ ཀརཎཾ སཔྤཡོཛནཾ ཧོཏི. ཏེནེཝ ‘‘བྷེརིསངྑསདྡཾ ཀཏྭཱ’’ཏི ཨཝཏྭཱ ‘‘བྷེརིསངྑསཉྙཾ ཀཏྭཱ’’ཏི སཉྙཱགྒཧཎཾ ཀཏཾ. ‘‘སཉྙཾ ཀཏྭཱ’’ཏི ཙ པུབྦཀཱལཀིརིཡཾ ¶ ཝཏྭཱ ‘‘ཀམྨཝཱཙཱཡ སཱིམཱ བནྡྷིཏབྦཱ’’ཏི ཨཔརཀཱལཀིརིཡཾ ཝདཏི, པརིཡོསཱནཀཱལེ པན སབྦཏཱུརིཡཱཏཱལིཀསངྒྷུཊྛཾ ཀཏྭཱ དེཝམནུསྶཱནཾ ཨནུམོདནཾ ཀཱརེཏབྦཾ ཧོཏཱིཏི ཝེདིཏབྦཾ.

༡༦༣. བྷཎྜུཀམྨཱཔུཙྪནཾ སནྡྷཱཡ པབྦཛྫཱགྒཧཎཾ. སུཁཀརཎཏྠནྟི སབྦེསཾ སནྣིཔཱཏནཔརིསྶམཾ པཧཱཡ ཨཔྤཏརེཧི སུཁཀརཎཏྠཾ. ཨེཀཝཱིསཏི བྷིཀྑཱུ གཎྷཱཏཱིཏི ཝཱིསཏིཝགྒཀརཎཱིཡཔརམཏྟཱ སངྒྷཀམྨསྶ ཀམྨཱརཧེན སདྡྷིཾ ཨེཀཝཱིསཏི བྷིཀྑཱུ གཎྷཱཏི. ཨིདཉྩ ནིསིནྣཱནཾ ཝསེན ཝུཏྟཾ. ཧེཊྛིམནྟཏོ ཧི ཡཏྠ ཨེཀཝཱིསཏི བྷིཀྑཱུ ནིསཱིདིཏུཾ སཀྐོནྟི, ཏཏྟཀེ པདེསེ སཱིམཾ བནྡྷིཏུཾ ཝཊྚཏི. ཨིདཉྩ ཀམྨཱརཧེན སཧ ཨབྦྷཱནཀཱརཀཱནམྤི པཧོནཀཏྠཾ ཝུཏྟཾ. ནིམིཏྟུཔགཱ པཱསཱཎཱ ཋཔེཏབྦཱཏི ཨིདཾ ཡཐཱརུཙིཏཊྛཱནེ རུཀྑནིམིཏྟཱདཱིནཾ དུལླབྷཏཱཡ ཝཌྜྷིཏྭཱ ཨུབྷིནྣཾ བདྡྷསཱིམཱནཾ སངྐརཀརཎཏོ ཙ པཱསཱཎནིམིཏྟསྶ ཙ ཏདབྷཱཝཏོ ཡཏྠ ¶ ཀཏྠཙི ཨཱནེཏྭཱ ཋཔེཏུཾ སུཀརཏཱཡ ཙ ཝུཏྟཾ. ཏཐཱ སཱིམནྟརིཀཔཱསཱཎཱ ཋཔེཏབྦཱཏི ཨེཏྠཱཔི. ཙཏུརངྒུལཔྤམཱཎཱཔཱིཏི ཡཐཱ ཁཎྜསཱིམཔརིཙྪེདཏོ བཧི ནིམིཏྟཔཱསཱཎཾ ཙཏུརངྒུལམཏྟཾ ཋཱནཾ སམནྟཱ ནིགཙྪཏི, ཨཝསེསཾ ཋཱནཾ ཨནྟོཁཎྜསཱིམཱཡཾ ཧོཏིཡེཝ, ཨེཝཾ ཏེསུ ཋཔིཏེསུ ཙཏུརངྒུལམཏྟཱ སཱིམནྟརིཀཱ ཧོཏཱིཏི དཊྛབྦཾ.

སཱིམནྟརིཀཔཱསཱཎཱཏི སཱིམནྟརིཀཱཡ ཋཔིཏནིམིཏྟཔཱསཱཎཱ. ཏེ པན ཀིཏྟེནྟེན དཀྑིཎཏོ ཨནུཔརིཡཱཡནྟེནེཝ ཀིཏྟེཏབྦཱ. ཀཐཾ? ཁཎྜསཱིམཏོ ཧི པཙྪིམཱཡ དིསཱཡ པུརཏྠིམཱབྷིམུཁེན ཋཏྭཱ ‘‘པུརཏྠིམཱཡ དིསཱཡ ཀིཾ ནིམིཏྟ’’ནྟི ཏཏྠ སབྦཱནི ནིམིཏྟཱནི ཨནུཀྐམེན ཀིཏྟེཏྭཱ, ཏཐཱ ཨུཏྟརཱཡ དིསཱཡ དཀྑིཎཱབྷིམུཁེན ཋཏྭཱ ‘‘དཀྑིཎཱཡ དིསཱཡ ཀིཾ ནིམིཏྟ’’ནྟི ཨནུཀྐམེན ཀིཏྟེཏྭཱ, ཏཐཱ པུརཏྠིམཱཡ དིསཱཡ པཙྪིམཱབྷིམུཁེན ཋཏྭཱ ‘‘པཙྪིམཱཡ དིསཱཡ ¶ ཀིཾ ནིམིཏྟ’’ནྟི ཨནུཀྐམེན ཀིཏྟེཏྭཱ, ཏཐཱ དཀྑིཎཱཡ དིསཱཡ ཨུཏྟརཱབྷིམུཁེན ཋཏྭཱ ‘‘ཨུཏྟརཱཡ དིསཱཡ ཀིཾ ནིམིཏྟ’’ནྟི ཏཏྠ སབྦཱནི ནིམིཏྟཱནི ཨནུཀྐམེན ཀིཏྟེཏྭཱ པུན པཙྪིམཱཡ དིསཱཡ པུརཏྠིམཱབྷིམུཁེན ཋཏྭཱ པུརིམཀིཏྟིཏཾ ཝུཏྟནཡེན པུན ཀིཏྟེཏབྦཾ. ཨེཝཾ བཧཱུནམྤི ཁཎྜསཱིམཱནཾ སཱིམནྟརིཀཔཱསཱཎཱ པཙྩེཀཾ ཀིཏྟེཏབྦཱ. ཏཏོཏི པཙྪཱ. ཨཝསེསནིམིཏྟཱནཱིཏི མཧཱསཱིམཱཡ བཱཧིརནྟརེསུ ཨཝསེསནིམིཏྟཱནི. ན སཀྑིསྶནྟཱིཏི ཨཝིཔྤཝཱསསཱིམཱཡ བདྡྷབྷཱཝཾ ཨསལླཀྑེཏྭཱ ‘‘སམཱནསཾཝཱསཀསཱིམམེཝ སམཱུཧནིསྶཱམཱ’’ཏི ཝཱཡམནྟཱ ན སཀྑིསྶནྟི. བདྡྷཱཡ ཧི ཨཝིཔྤཝཱསསཱིམཱཡ ཏཾ སམཱུཧནིཏྭཱ ‘‘སམཱནསཾཝཱསཀསཱིམཾ སམཱུཧནིསྶཱམཱ’’ཏི ཀཏཱཡཔི ཀམྨཝཱཙཱཡ ཨསམཱུཧཏཱཝ ཧོཏི སཱིམཱ. པཋམཉྷི ཨཝིཔྤཝཱསཾ སམཱུཧནིཏྭཱ པཙྪཱ སཱིམཱ སམཱུཧནིཏབྦཱ. ཁཎྜསཱིམཏོ པཊྛཱཡ བནྡྷནཾ ཨཱཙིཎྞཾ, ཨཱཙིཎྞཀརཎེནེཝ ཙ སམྨོཧོ ན ཧོཏཱིཏི ཨཱཧ ‘‘ཁཎྜསཱིམཏོཝ པཊྛཱཡ བནྡྷིཏབྦཱ’’ཏི. ཨུབྷིནྣམྤི ན ཀོཔེནྟཱིཏི ཨུབྷིནྣམྤི ཀམྨཾ ན ཀོཔེནྟི. ཨེཝཾ བདྡྷཱསུ པན…པེ… སཱིམནྟརིཀཱ ཧི གཱམཀྑེཏྟཾ བྷཛཏཱིཏི ན ཨཱཝཱསཝསེན སཱམགྒིཔརིཙྪེདོ, ཀིནྟུ སཱིམཱཝསེནེཝཱཏི དསྶནཏྠཾ ཝུཏྟཾ.

ཀུཊིགེཧེཏི བྷཱུམིཡཾ ཀཏཏིཎཀུཊིཡཾ. ཨུདུཀྑལནྟི ཨུདུཀྑལཱཝཱཊསདིསཁུདྡཀཱཝཱཊཾ. ནིམིཏྟཾ ན ཀཱཏབྦནྟི རཱཛི ཝཱ ཨུདུཀྑལཾ ཝཱ ནིམིཏྟཾ ན ཀཱཏབྦཾ. ཨིདཉྩ ཡཐཱཝུཏྟེསུ ཨཊྛསུ ནིམིཏྟེསུ ཨནཱགཏཏྟེན ན ཝཊྚཏཱིཏི སིདྡྷམྤི ‘‘ཨཝིནསྶཀསཉྙཱཎམིད’’ནྟི སཉྙཱཡ ཀོཙི མོཧེན ནིམིཏྟཾ ཀརེཡྻཱཏི དཱུརཏོ ཝིཔཏྟིཔརིཧཱརཏྠཾ ཝུཏྟཾ. ནིམིཏྟུཔགཔཱསཱཎེ ཋཔེཏྭཱཏི སཉྩཱརིམནིམིཏྟསྶ ¶ ཀམྤནཏཱཡ ཝུཏྟཾ. ཨེཝཾ ཨུཔརི ‘‘བྷིཏྟིཾ ཨཀིཏྟེཏྭཱ’’ཏིཨཱདཱིསུཔི སིདྡྷམེཝཏྠཾ པུནཔྤུནཾ ཀཐནེ ཀཱརཎཾ ཝེདིཏབྦཾ. སཱིམཱཝིཔཏྟི ཧི ཨུཔསམྤདཱདིསབྦཀམྨཝིཔཏྟིམཱུལནྟི ¶ ཏསྶ དྭཱརཾ སབྦཐཱཔི པིདཧནཝསེན ཝཏྟབྦཾ. སབྦཾ ཝཏྭཱཝ ཨིདྷ ཨཱཙརིཡཱ ཝིནིཙྪཡཾ ཀཐེསུནྟི དཊྛབྦཾ.

བྷིཏྟིནྟི ཨིཊྛཀདཱརུམཏྟིཀཱམཡཾ. སིལཱམཡཱཡ པན བྷིཏྟིཡཱ ནིམིཏྟུཔགཾ ཨེཀཾ པཱསཱཎཾ ཏཾཏཾདིསཱཡ ཀིཏྟེཏུཾ ཝཊྚཏི. ཨནེཀསིལཱཧི ཙིནིཏཾ སཀལཾ བྷིཏྟིཾ ཀིཏྟེཏུཾ ན ཝཊྚཏི ‘‘ཨེསོ པཱསཱཎོ ནིམིཏྟ’’ནྟི ཨེཀཝཙནེན ཝཏྟབྦཏོ. ཨནྟོཀུཊྚམེཝཱཏི ཨེཏྠ ཨནྟོཀུཊྚེཔི ནིམིཏྟཱནཾ ཋིཏོཀཱསཏོ ཨནྟོ ཨེཝ སཱིམཱཏི གཧེཏབྦཾ. པམུཁེ ནིམིཏྟཔཱསཱཎེ ཋཔེཏྭཱཏི གབྦྷཱབྷིམུཁེཔི བཧིཔམུཁེ གབྦྷཝིཏྠཱརཔྤམཱཎེ ཋཱནེ པཱསཱཎེ ཋཔེཏྭཱ སམྨནྣིཏབྦཱ. ཨེཝཉྷི གབྦྷཔམུཁཱནཾ ཨནྟརེ ཋིཏཀུཊྚམྤི ཨུཔཱདཱཡ ཨནྟོ ཙ བཧི ཙ ཙཏུརསྶསཎྛཱནཱཝ སཱིམཱ ཧོཏི. བཧཱིཏི སཀལསྶ ཀུཊིལེཎསྶ སམནྟཏོ བཧི.

ཨནྟོ ཙ བཧི ཙ སཱིམཱ ཧོཏཱིཏི མཛ྄ཛྷེ ཋིཏབྷིཏྟིཡཱ སཧ ཙཏུརསྶསཱིམཱ ཧོཏི. ཨུཔརིཔཱསཱདེཡེཝ ཧོཏཱི’’ཏི ཨིམིནཱ གབྦྷསྶ ཙ པམུཁསྶ ཙ ཨནྟརཱ ཋིཏབྷིཏྟིཡཱ ཨེཀཏྟཱ ཏཏྠ ཙ ཨེཀཝཱིསཏིཡཱ བྷིཀྑཱུནཾ ཨོཀཱསཱབྷཱཝེན ཧེཊྛཱ ན ཨོཏརཏི, ཨུཔརིབྷིཏྟི པན སཱིམཊྛཱཝ ཧོཏཱིཏི དསྶེཏི. ཧེཊྛཱ ན ཨོཏརཏཱིཏི བྷིཏྟིཏོ ཨོརཾ ནིམིཏྟཱནི ཋཔེཏྭཱ ཀིཏྟིཏཏྟཱ ཧེཊྛཱ ཨཱཀཱསཔྤདེསཾ ན ཨོཏརཏི, ཨུཔརི ཀཏེ པཱསཱདེཏི ཨཏྠོ. ཧེཊྛིམཏལེ ཀུཊྚོཏི ཧེཊྛིམཏལེ ཙཏཱུསུ དིསཱསུ ཋིཏཀུཊྚོ. སཙེ ཧི དྭཱིསུ, ཏཱིསུ ཨེཝ ཝཱ དིསཱསུ ཀུཊྚོ ཏིཊྛེཡྻ, ཧེཊྛཱ ན ཨོཏརཏི. ཧེཊྛཱཔི ཨོཏརཏཱིཏི སཙེ ཧེཊྛཱ ཨནྟོབྷིཏྟིཡཾ ཨེཀཝཱིསཏིཡཱ བྷིཀྑཱུནཾ ཨོཀཱསོ ཧོཏི, ཨོཏརཏི. ཨོཏརམཱནཱ ཙ ན ཨུཔརིསཱིམཔྤམཱཎེན ཨོཏརཏི, སམནྟཱ བྷིཏྟིཔྤམཱཎེན ཨོཏརཏི. ཙཏུནྣཾ པན བྷིཏྟཱིནཾ བཱཧིརནྟཔརིཙྪེདེན ཧེཊྛཱབྷཱུམིབྷཱགེ ཨུདཀཔརིཡནྟཾ ¶ ཀཏྭཱ ཨོཏརཏི, ན པན བྷིཏྟཱིནཾ བཧི ཀེསགྒམཏྟམྤི ཋཱནཾ. པཱསཱདབྷིཏྟིཏོཏི ཨུཔརིམཏལེ བྷིཏྟིཏོ. ཨོཏརཎཱནོཏརཎཾ ཝུཏྟནཡེནེཝ ཝེདིཏབྦནྟི སཙེ ཧེཊྛཱ ཨེཀཝཱིསཏིཡཱ བྷིཀྑཱུནཾ ཨོཀཱསོ ཧོཏི, ཨོཏརཏི, ནོ ཙེ, ན ཨོཏརཏཱིཏི ཨདྷིཔྤཱཡོཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༣༨) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༣༨) པན ‘‘ཨུཔརིསཱིམཔྤམཱཎསྶ ཨནྟོགདྷཱནཾ ཧེཊྛིམཏལེ ཙཏཱུསུ དིསཱསུ ཀུཊྚཱནཾ ཏུལཱརུཀྑེཧི ཨེཀསམྦནྡྷཏཾ, ཏདནྟོ པཙྪིམསཱིམཔྤམཱཎཏཱདིཉྩ སནྡྷཱཡ ཝུཏྟ’’ནྟི ཝུཏྟཾ ¶ . ཀིཉྩཱཔེཏྠ ནིཡྻཱུཧཀཱདཡོ ནིམིཏྟཱནཾ ཋིཏོཀཱསཏཱཡ བཛ྄ཛྷམཱནཀྑཎེ སཱིམཱ ན ཧོནྟི, བདྡྷཱཡ པན སཱིམཱཡ སཱིམཊྛཱཝ ཧོནྟཱིཏི དཊྛབྦཱ.

པརིཡནྟཐམྦྷཱནནྟི ནིམིཏྟགཏཔཱསཱཎཏྠམྦྷེ སནྡྷཱཡ ཝུཏྟཾ. ཨུཔརིམཏལེན སམྦདྡྷོ ཧོཏཱིཏི ཨིདཾ ཀུཊྚཱནཾ ཨནྟརཱ སཱིམཊྛཱནཾ ཐམྦྷཱནཾ ཨབྷཱཝཏོ ཝུཏྟཾ. ཡདི ཧི བྷཝེཡྻུཾ, ཀུཊྚེ ཨུཔརིམཏལེན ཨསམྦནྡྷེཔི སཱིམཊྛཐམྦྷཱནཾ ཨུཔརི ཋིཏོ པཱསཱདོ སཱིམཊྛོཝ ཧོཏི. སཙེ པན བཧཱུནཾ ཐམྦྷཔནྟཱིནཾ ཨུཔརི ཀཏཔཱསཱདསྶ ཧེཊྛཱཔཐཝིཡཾ སབྦབཱཧིརཱཡ ཐམྦྷཔནྟིཡཱ ཨནྟོ ནིམིཏྟཔཱསཱཎེ ཋཔེཏྭཱ སཱིམཱ བདྡྷཱ ཧོཏི, ཨེཏྠ ཀཐནྟི? ཨེཏྠཱཔི ‘‘ཡཾ ཏཱཝ སཱིམཊྛཐམྦྷེཧེཝ དྷཱརིཡམཱནཱནཾ ཏུལཱནཾ ཨུཔརིམཏལཾ, སབྦཾ ཏཾ སཱིམཊྛམེཝ, ཨེཏྠ ཝིཝཱདོ ནཏྠི, ཡཾ པན སཱིམཊྛཐམྦྷཔནྟིཡཱ, ཨསཱིམཊྛཱཡ བཱཧིརཐམྦྷཔནྟིཡཱ ཙ སམདྷུརཾ དྷཱརཡམཱནཱནཾ ཏུལཱནཾ ཨུཔརིམཏལཾ, ཏཏྠ ཨུཔཌྜྷཾ སཱིམཱ’’ཏི ཀེཙི ཝདནྟི. ‘‘སཀལམྤི གཱམསཱིམཱ’’ཏི ཨཔརེ. ‘‘བདྡྷསཱིམཱ ཨེཝཱ’’ཏི ཨཉྙེ. ཏསྨཱ ཀམྨཾ ཀརོནྟེཧི གརཱུཧི ནིརཱསངྐཊྛཱནེ ཋཏྭཱ སབྦཾ ཏཾ ཨཱསངྐཊྛཱནཾ སོདྷེཏྭཱཝ ཀམྨཾ ཀཱཏབྦཾ, སནྣིཊྛཱནཀཱརཎཾ ཝཱ གཝེསིཏྭཱ ཏདནུགུཎཾ ཀཱཏབྦཾ.

ཏཱལམཱུལཀཔབྦཏེཏི ¶ ཏཱལཀྑནྡྷམཱུལསདིསེ ཧེཊྛཱ ཐཱུལོ ཧུཏྭཱ ཀམེན ཀིསོ ཧུཏྭཱ ཨུགྒཏོ ཧིནྟཱལམཱུལསདིསོ ནཱམ ཧོཏི. ཝིཏཱནསཎྛཱནོཏི ཨཧིཙྪཏྟཀསཎྛཱནོ. པཎཝསཎྛཱནོཏི མཛ྄ཛྷེ ཏནུཀོ, ཧེཊྛཱ ཙ ཨུཔརི ཙ ཝིཏྠིཎྞོ. ཧེཊྛཱ ཝཱ མཛ྄ཛྷེ ཝཱཏི མུདིངྒསཎྛཱནསྶ ཧེཊྛཱ, པཎཝསཎྛཱནསྶ མཛ྄ཛྷེ. སཔྤཕཎསདིསོ པབྦཏོཏི སཔྤཕཎོ ཝིཡ ཁུཛྫོ, མཱུལཊྛཱནཏོ ཨཉྙཏྠ ཨཝནཏསཱིསོ. ཨཱཀཱསཔབྦྷཱརནྟི བྷིཏྟིཡཱ ཨཔརིཀྑིཏྟཔབྦྷཱརཾ. སཱིམཔྤམཱཎོཏི ཨནྟོ ཨཱཀཱསེན སདྡྷིཾ པཙྪིམསཱིམཔྤམཱཎོ. སོ ཙ པཱསཱཎོ སཱིམཊྛོཏི ཨིམིནཱ ཨཱིདིསེཧི སུསིརཔཱསཱཎལེཎཀུཊྚཱདཱིཧི པརིཙྪིནྣེ བྷཱུམིབྷཱགེ ཨེཝ སཱིམཱ པཏིཊྛཱཏི, ན ཨཔརིཙྪིནྣེ. ཏེ པན སཱིམཊྛཏྟཱ སཱིམཱ ཧོནྟི, ན སརཱུཔེན སཱིམཊྛམཉྩཱདི ཝིཡཱཏི དསྶེཏི. སཙེ པན སོ སུསིརཔཱསཱཎོ བྷཱུམིཾ ཨནཱཧཙྩ ཨཱཀཱསགཏོ ཨོལམྦཏི, སཱིམཱ ན ཨོཏརཏི. སུསིརཔཱསཱཎོ པན སཡཾ སཱིམཱཔཊིབདྡྷཏྟཱ སཱིམཱ ཧོཏི, ཀཐཾ པན པཙྪིམཔྤམཱཎརཧིཏེཧི ཨེཏེཧི སུསིརཔཱསཱཎཱདཱིཧི སཱིམཱ ན ཨོཏརཏཱིཏི ཨིདཾ སདྡྷཱཏབྦནྟི? ཨཊྛཀཐཱཔམཱཎཏོ.

ཨཔིཙེཏྠ སུསིརཔཱསཱཎབྷིཏྟིཨནུསཱརེན མཱུསིཀཱདཱིནཾ ཝིཡ སཱིམཱཡ ཧེཊྛིམཏལེ ཨོཏརཎཀིཙྩཾ ནཏྠི, ཧེཊྛཱ པན པཙྪིམསཱིམཔྤམཱཎེ ཨཱཀཱསེ དྭངྒུལམཏྟབཧལེཧི པཱསཱཎབྷིཏྟིཨཱདཱིཧིཔི ¶ ཨུཔརིམཏལཾ ཨཱཧཙྩ ཋིཏེཧི སབྦསོ, ཡེབྷུཡྻེན ཝཱ པརིཙྪིནྣེ སཏི ཨུཔརི བཛ྄ཛྷམཱནཱ སཱིམཱ ཏེཧི པཱསཱཎཱདཱིཧི ཨནྟརིཏཱཡ ཏཔྤརིཙྪིནྣཱཡ ཧེཊྛཱབྷཱུམིཡཱཔི ཨུཔརིམཏལེན སདྡྷིཾ ཨེཀཀྑཎེ པཏིཊྛཱཏི, ནདཱིཔཱརསཱིམཱ ཝིཡ ནདཱིཨནྟརིཏེསུ ཨུབྷོསུ ཏཱིརེསུ ལེཎཱདཱིསུ ཨཔནཱིཏེསུཔི ཧེཊྛཱ ཨོཏིཎྞསཱིམཱ ཡཱཝ སཱསནནྟརདྷཱནཱ ན ¶ ཝིགཙྪཏི, པཋམཾ པན ཨུཔརི སཱིམཱཡ བདྡྷཱཡ པཙྪཱ ལེཎཱདིཀཏེསུཔི ཧེཊྛཱབྷཱུམིཡཾ སཱིམཱ ཨོཏརཏི ཨེཝ, ཀེཙི ཏཾ ན ཨིཙྪནྟི, ཨེཝཾ ཨུབྷཡཏྠ པཏིཊྛིཏཱ ཙ སཱ སཱིམཱ ཨེཀཱཝ ཧོཏི གོཏྟཱདིཛཱཏི ཝིཡ བྱཏྟིབྷེདེསཱུཏི གཧེཏབྦཾ. སབྦཱ ཨེཝ ཧི བདྡྷསཱིམཱ ཨབདྡྷསཱིམཱ ཙ ཨཏྟནོ ཨཏྟནོ པཀཏིནིསྶཡཀེ གཱམཱརཉྙཱདིཀེ ཁེཏྟེ ཡཐཱཔརིཙྪེདཾ སབྦཏྠ སཱཀལྱེན ཨེཀསྨིཾ ཁཎེ བྱཱཔིནཱི པརམཏྠཏོ ཨཝིཛྫམཱནམྤི ཏེ ཏེ ནིསྶཡབྷཱུཏེ པརམཏྠདྷམྨེ, ཏཾ ཏཾ ཀིརིཡཱཝིསེསམྤི ཝཱ ཨུཔཱདཱཡ ལོཀིཡེཧི སཱསནིཀེཧི ཙ ཡཐཱརཧཾ ཨེཀཏྟེན པཉྙཏྟཏྟཱ སནིསྶཡེཀརཱུཔཱ ཨེཝ. ཏཐཱ ཧི ཨེཀོ གཱམོ ཨརཉྙཾ ནདཱི ཛཱཏསྶརོ སམུདྡོཏི ཨེཝཾ ལོཀེ, ‘‘སམྨཏཱ སཱ སཱིམཱ སངྒྷེན, ཨགཱམཀེ ཙེ, བྷིཀྑཝེ, ཨརཉྙེ སམནྟཱ སཏྟབྦྷནྟརཱ, ཨཡཾ ཏཏྠ སམཱནསཾཝཱསཱ ཨེཀཱུཔོསཐཱ’’ཏིཨཱདིནཱ སཱསནེ ཙ ཨེཀཝོཧཱརོ དིསྶཏི, ན པརམཏྠཏོ. ཨེཀསྶ ཨནེཀདྷམྨེསུ བྱཱཔནམཏྠི ཀསིཎེཀདེསཱདིཝིཀཔྤཱསམཱནཏཱཡ ཨེཀཏྟཧཱནིཏོཏི ཨཡཾ ནོ མཏི.

ཨསྶ ཧེཊྛཱཏི སཔྤཕཎཔབྦཏསྶ ཧེཊྛཱ ཨཱཀཱསཔབྦྷཱརེ. ལེཎསྶཱཏི ལེཎཾ ཙེ ཀཏཾ, ཏསྶ ལེཎསྶཱཏི ཨཏྠོ. ཏམེཝ པུན ལེཎཾ པཉྩཧི པཀཱརེཧི ཝིཀཔྤེཏྭཱ ཨོཏརཎཱནོཏརཎཝིནིཙྪཡཾ དསྶེཏུཾ ཨཱཧ ‘‘སཙེ པན ཧེཊྛཱ’’ཏིཨཱདི. ཏཏྠ ‘‘ཧེཊྛཱ’’ཏི ཨིམསྶ ‘‘ལེཎཾ ཧོཏཱི’’ཏི ཨིམིནཱ སམྦནྡྷོ. ཧེཊྛཱ ལེཎཉྩ ཨེཀསྨིཾ པདེསེཏི ཨཱཧ ‘‘ཨནྟོ’’ཏི, པབྦཏསྶ ཨནྟོ, པབྦཏམཱུལེཏི ཨཏྠོ. ཏམེཝ ཨནྟོསདྡཾ སཱིམཱཔརིཙྪེདེན ཝིསེསེཏུཾ ‘‘ཨུཔརིམསྶ སཱིམཱཔརིཙྪེདསྶ པཱརཏོ’’ཏི ཝུཏྟཾ. པབྦཏཔཱདཾ པན ཨཔེཀྑིཏྭཱ ‘‘ཨོརཏོ’’ཏི ཝཏྟབྦེཔི སཱིམཱནིསྶཡཾ པབྦཏགྒཾ སནྡྷཱཡ ‘‘པཱརཏོ’’ཏི ཝུཏྟནྟི དཊྛབྦཾ. ཏེནེཝ ‘‘བཧི ལེཎ’’ནྟི ཨེཏྠ བཧིསདྡཾ ཝིསེསེནྟོ ‘‘ཨུཔརིམསྶ ¶ སཱིམཱཔརིཙྪེདསྶ ཨོརཏོ’’ཏི ཨཱཧ. བཧིསཱིམཱ ན ཨོཏརཏཱིཏི ཨེཏྠ བཧཱིཏི པབྦཏཔཱདེ ལེཎཾ སནྡྷཱཡ ཝུཏྟཾ. ལེཎསྶ ཙ བཧིབྷཱུཏེ ཨུཔརིསཱིམཱཔརིཙྪེདསྶ ཧེཊྛཱབྷཱགེ སཱིམཱ ན ཨོཏརཏཱིཏི ཨཏྠོ. ཨནྟོ སཱིམཱཏི ལེཎསྶ ཙ པབྦཏཔཱདསྶ ཙ ཨནྟོ ཨཏྟནོ ཨོཏརཎཱརཧཊྛཱནེ ན ཨོཏརཏཱིཏི ཨཏྠོ. ‘‘བཧི སཱིམཱ ན ཨོཏརཏི, ཨནྟོ སཱིམཱ ན ཨོཏརཏཱི’’ཏི ཙེཏྠ ཨཏྟནོ ཨོཏརཎཱརཧཊྛཱནེ ལེཎཱབྷཱཝེན སཱིམཱཡ སབྦཐཱ ¶ ཨནོཏརཎམེཝ དསྶིཏནྟི གཧེཏབྦཾ. ཏཏྠ ཧི ཨནོཏརནྟཱི ཨུཔརི ཨེཝ ཧོཏཱིཏི ཨཡཾ ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༣༨) ཨཱགཏོ ཝིནིཙྪཡོ.

སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༣༨) པན ‘‘ཨནྟོལེཎཾ ཧོཏཱིཏི པབྦཏསྶ ཨནྟོལེཎཾ ཧོཏཱི’’ཏི ཨེཏྟཀམེཝ ཨཱགཏོ. ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༡༣༨) ན ‘‘ཨནྟོལེཎནྟི པབྦཏསྶ ཨནྟོལེཎཾ. དྭཱརཾ པན སནྡྷཱཡ ‘པཱརཏོ ཨོརཏོ’ཏི ཝུཏྟཾ, སབྦཐཱཔི སཱིམཏོ བཧིལེཎེན ཨོཏརཏཱིཏི ཨདྷིཔྤཱཡོ’’ཏི ཨཱགཏོ. ཨཡཾ པན ཨནྟོལེཎབཧིལེཎཝིནིཙྪཡོ གམྦྷཱིརོ དུདྡསོ དུརནུབོདྷོཏི ཨཱཙརིཡཱ ཝདནྟི, ཏཐཱཔི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༣༨) ཨཱགཏཾ ནཡཾ ནིསྶཱཡ སུཊྛུ ཝིནིཙྪིཏབྦོ ཝིཉྙཱུཧཱིཏི. བཧི པཏིཏཾ ཨསཱིམཱཏིཨཱདིནཱ ཨུཔརིཔཱསཱདཱདཱིསུ ཨཐིརནིསྶཡེསུ ཋིཏཱ སཱིམཱཔི ཏེསཾ ཝིནཱསེན ཝིནསྶཏཱིཏི དསྶིཏནྟི དཊྛབྦཾ.

པོཀྑརཎིཾ ཁཎནྟི, སཱིམཱཡེཝཱཏི ཨེཏྠ སཙེ ཧེཊྛཱ ཨུམངྒནདཱི སཱིམཔྤམཱཎཏོ ཨནཱུནཱ པཋམམེཝ པཝཏྟཱ ཧོཏི, སཱིམཱ ཙ པཙྪཱ བདྡྷཱ ནདིཏོ ཨུཔརི ཨེཝ ཧོཏི, ནདིཾ ཨཱཧཙྩ པོཀྑརཎིཡཱ ཙ ཁཏཱཡ སཱིམཱ ཝིནསྶཏཱིཏི དཊྛབྦཾ. ཧེཊྛཱཔཐཝཱིཏལེཏི ཨནནྟརཱ བྷཱུམིཝིཝརེ.

སཱིམམཱལ༹ཀེཏི ¶ ཁཎྜསཱིམངྒཎེ. ཝཊརུཀྑོཏི ཨིདཾ པཱརོཧོཔཏྠམྦྷེན ཨཏིདཱུརམྤི གནྟུཾ སམཏྠསཱཁཱསམངྒིཏཱཡ ཝུཏྟཾ. སབྦརུཀྑལཏཱདཱིནམྤི སམྦནྡྷོ ན ཝཊྚཏི ཨེཝ. ཏེནེཝ ནཱཝཱརཛྫུསེཏུསམྦནྡྷོཔི པཊིཀྑིཏྟོ. ཏཏོཏི ཏཏོ སཱཁཏོ. མཧཱསཱིམཱཡ པཐཝཱིཏལནྟི ཨེཏྠ ཨཱསནྣཏརམྤི གཱམསཱིམཾ ཨགྒཧེཏྭཱ བདྡྷསཱིམཱཡ ཨེཝ གཧིཏཏྟཱ གཱམསཱིམབདྡྷསཱིམཱནཾ ཨཉྙམཉྙཾ རུཀྑཱདིསམྦནྡྷེཔི སམྦྷེདདོསོ ནཏྠི ཨཉྙམཉྙཾ ནིསྶཡནིསྶིཏབྷཱཝེན པཝཏྟིཏོཏི གཧེཏབྦཾ. ཡདི ཧི ཏཱསམྤི སམྦནྡྷདོསོ བྷཝེཡྻ, ཀཐཾ གཱམསཱིམཱཡ བདྡྷསཱིམཱ སམྨནྣིཏབྦཱ བྷཝེཡྻ? ཡསྶཱ ཧི སཱིམཱཡ ཡཱཡ སཱིམཱཡ སདྡྷིཾ སམྦནྡྷེ དོསོ བྷཝེཡྻ, སཱ ཏཏྠ བནྡྷིཏུམེཝ ན ཝཊྚཏི བདྡྷསཱིམཨུདཀུཀྑེཔསཱིམཱསུ བདྡྷསཱིམཱ ཝིཡ, ཨཏྟནོ ཨནིསྶཡབྷཱུཏགཱམསཱིམཱདཱིསུ ཨུདཀུཀྑེཔསཱིམཱ ཝིཡ ཙ, ཏེནེཝ ‘‘སཙེ པན རུཀྑསྶ སཱཁཱ ཝཱཏཏོ ནིཀྑནྟཔཱརོཧོ ཝཱ བཧིནདཱིཏཱིརེ ཝིཧཱརསཱིམཱཡ ཝཱ གཱམསཱིམཱཡ ཝཱ པཏིཊྛིཏོ’’ཏིཨཱདིནཱ ཨུདཀུཀྑེཔསཱིམཱཡ ཨཏྟནོ ཨནིསྶཡབྷཱུཏགཱམསཱིམཱདཱིཧི ཨེཝ སམྦནྡྷདོསོ དསྶིཏོ, ན ནདཱིསཱིམཱཡ ¶ , ཨེཝམིདྷཱཔཱིཏི དཊྛབྦཾ. ཨཡཉྩཏྠོ ཨུཔརི པཱཀཊོ བྷཝིསྶཏི. ཨཱཧཙྩཱཏི ཕུསིཏྭཱ.

མཧཱསཱིམཾ ཝཱ སོདྷེཏྭཱཏི མཧཱསཱིམགཏཱནཾ སབྦེསཾ བྷིཀྑཱུནཾ ཧཏྠཔཱསཱནཡནཚནྡཱཧརཎཱདིཝསེན སཀལཾ མཧཱསཱིམཾ སོདྷེཏྭཱ. ཨེཏེན སབྦཝིཔཏྟིཡོ མོཙེཏྭཱ པུབྦེ སུཊྛུ བདྡྷཱནམྤི དྭིནྣཾ བདྡྷསཱིམཱནཾ པཙྪཱ རུཀྑཱདིསམྦནྡྷེན ཨུཔྤཛྫནཏོ ཨཱིདིསོ པཱལི༹མུཏྟཀོ སམྦནྡྷདོསོ ཨཏྠཱིཏི དསྶེཏི, སོ ཙ ‘‘ན, བྷིཀྑཝེ, སཱིམཱཡ སཱིམཱ སམྦྷིནྡིཏབྦཱ’’ཏིཨཱདིནཱ བདྡྷསཱིམཱནཾ ཨཉྙམཉྙཾ སམྦྷེདཛ྄ཛྷོཏྠརཎཾ པཊིཀྑིཔིཏྭཱ ‘‘ཨནུཛཱནཱམི བྷིཀྑཝེ སཱིམཾ སམྨནྣནྟེན སཱིམནྟརིཀཾ ཋཔེཏྭཱ སཱིམཾ སམྨནྣིཏུ’’ནྟི (མཧཱཝ. ༡༤༨) ཨུབྷིནྣཾ བདྡྷསཱིམཱནཾ ཨནྟརཱ སཱིམནྟརིཀཾ ཋཔེཏྭཱ བནྡྷིཏུཾ ¶ ཨནུཛཱནནེན སམྦྷེདཛ྄ཛྷོཏྠརཎེ ཝིཡ ཏཱསཾ ཨཉྙམཉྙཾ ཕུསིཏྭཱ ཏིཊྛནཝསེན བནྡྷནམྤི ན ཝཊྚཏཱིཏི སིདྡྷཏྟཱ བདྡྷཱནམྤི ཏཱསཾ པཙྪཱ ཨཉྙམཉྙཾ ཨེཀརུཀྑཱདཱིཧི ཕུསིཏྭཱ ཋཱནམྤི ན ཝཊྚཏཱིཏི བྷགཝཏོ ཨདྷིཔྤཱཡཉྙཱུཧི སངྒཱིཏིཀཱརཀེཧི ནིདྡྷཱརིཏོ བནྡྷནཀཱལེ པཊིཀྑིཏྟསྶ སམྦནྡྷདོསསྶ ཨནུལོམེན ཨཀཔྤིཡཱནུལོམཏྟཱ. ཨཡཾ པན སམྦནྡྷདོསོ པུབྦེ སུཊྛུ བདྡྷཱནཾ པཙྪཱ སཉྫཱཏཏྟཱ བཛ྄ཛྷམཱནཀྑཎེ ཝིཡ ཨསཱིམཏྟཾ ཀཱཏུཾ ན སཀྐོཏི, ཏསྨཱ རུཀྑཱདིསམྦནྡྷེ ཨཔནཱིཏམཏྟེ ཏཱ སཱིམཱ པཱཀཏིཀཱ ཧོནྟི. ཡཐཱ ཙཱཡཾ པཙྪཱ ན ཝཊྚཏི, ཨེཝཾ བཛ྄ཛྷམཱནཀྑཎེཔི ཏཱསཾ རུཀྑཱདིསམྦནྡྷེ སཏི ཏཱ བནྡྷིཏུཾ ན ཝཊྚཏཱིཏི དཊྛབྦཾ.

ཀེཙི པན མཧཱསཱིམཾ ཝཱ སོདྷེཏྭཱཏི ཨེཏྠ ‘‘མཧཱསཱིམགཏཱ བྷིཀྑཱུ ཡཐཱ ཏཾ སཱཁཾ ཝཱ པཱརོཧཾ ཝཱ ཀཱཡཀཱཡཔཊིབདྡྷེཧི ན ཕུསནྟི, ཨེཝཾ སོདྷནམེཝ ཨིདྷཱདྷིཔྤེཏཾ, ན སཀལསཱིམཱསོདྷན’’ནྟི ཝདནྟི, ཏཾ ན ཡུཏྟཾ ཨཊྛཀཐཱཡ ཝིརུཛ྄ཛྷནཏོ. ཏཐཱ ཧི ‘‘མཧཱསཱིམཱཡ པཐཝཱིཏལཾ ཝཱ ཏཏྠཛཱཏཀརུཀྑཱདཱིནི ཝཱ ཨཱཧཙྩ ཏིཊྛཏཱི’’ཏི ཨེཝཾ སཱཁཱཔཱརོཧཱནཾ མཧཱསཱིམཾ ཕུསིཏྭཱ ཋཱནམེཝ སམྦནྡྷདོསེ ཀཱརཎཏྟེན ཝུཏྟཾ, ན པན ཏཏྠ ཋིཏབྷིཀྑཱུཧི སཱཁཱདཱིནཾ ཕུསནཾ. ཡདི ཧི བྷིཀྑཱུནཾ སཱཁཱདིཾ ཕུསིཏྭཱ ཋཱནམེཝ ཀཱརཎཾ སིཡཱ, ‘‘ཏསྶ སཱཁཾ ཝཱ ཏཏོ ནིགྒཏཔཱརོཧཾ ཝཱ མཧཱསཱིམཱཡ པཝིཊྛཾ ཏཏྲཊྛོ ཀོཙི བྷིཀྑུ ཕུསིཏྭཱ ཏིཊྛཏཱི’’ཏི བྷིཀྑུཕུསནམེཝ ཝཏྟབྦཾ སིཡཱ. ཡཉྷི ཏཏྠ མཧཱསཱིམཱསོདྷནེ ཀཱརཎཾ, ཏདེཝ ཏསྨིཾ ཝཱཀྱེ པདྷཱནཏོ དསྶེཏབྦཾ. ན ཧི ཨཱཧཙྩཊྛིཏམེཝ སཱཁཱདིཾ ཕུསིཏྭཱ ཋིཏོ བྷིཀྑུ སོདྷེཏབྦོ ཨཱཀཱསཊྛསཱཁཱདིཾ ཕུསིཏྭཱ ཋིཏབྷིཀྑུསྶཔི སོདྷེཏབྦཏོ, ཀིཾ ནིརཏྠཀེན ཨཱཧཙྩཊྛཱནཝཙནེན, ཨཱཀཱསཊྛསཱཁཱསུ ¶ ཙ བྷིཀྑུཕུསནམེཝ ཀཱརཎཏྟེན ཝུཏྟཾ ¶ , སོདྷནཉྩ ཏསྶེཝ བྷིཀྑུསྶ ཧཏྠཔཱསཱནཡནཱདིཝསེན སོདྷནཾ ཝུཏྟཾ. ཨིདྷ པན ‘‘མཧཱསཱིམཾ སོདྷེཏྭཱ’’ཏི སཀལསཱིམཱསཱདྷཱརཎཝཙནེན སོདྷནཾ ཝུཏྟཾ, ཨཔི ཙ སཱཁཱདིཾ ཕུསིཏྭཱ ཋིཏབྷིཀྑུམཏྟསོདྷནེ ཨབྷིམཏེ ‘‘མཧཱསཱིམཱཡ པཐཝཱིཏལ’’ནྟི ཝིསེསསཱིམོཔཱདཱནཾ ནིརཏྠཀཾ སིཡཱ ཡཏྠ ཀཏྠཙི ཨནྟམསོ ཨཱཀཱསེཔི ཋཏྭཱ སཱཁཱདིཾ ཕུསིཏྭཱ ཋིཏསྶ སོདྷེཏབྦཏོ.

ཚིནྡིཏྭཱ བཧིཊྛཀཱ ཀཱཏབྦཱཏི ཏཏྠ པཏིཊྛིཏབྷཱཝཝིཡོཛནཝཙནཏོ ཙ ཝིསབྷཱགསཱིམཱནཾ ཕུསནེནེཝ སཀལསཱིམཱསོདྷནཧེཏུཀོ ཨཊྛཀཐཱསིདྡྷོཡཾ ཨེཀོ སམྦནྡྷདོསོ ཨཏྠེཝཱཏི གཧེཏབྦོ. ཏེནེཝ ཨུདཀུཀྑེཔསཱིམཱཀཐཱཡམྤི (མཧཱཝ. ཨཊྛ. ༡༤༧) ‘‘ཝིཧཱརསཱིམཱཡ ཝཱ གཱམསཱིམཱཡ ཝཱ པཏིཊྛིཏོ’’ཏི ཙ ‘‘ནདཱིཏཱིརེ པན ཁཱཎུཀཾ ཀོཊྚེཏྭཱ ཏཏྠ བདྡྷནཱཝཱཡ ཝཱ ན ཝཊྚཏཱི’’ཏི ཙ ‘‘སཙེ པན སེཏུ ཝཱ སེཏུཔཱདཱ ཝཱ བཧིཏཱིརེ པཏིཊྛིཏཱ, ཀམྨཾ ཀཱཏུཾ ན ཝཊྚཏཱི’’ཏི ཙ ཨེཝཾ ཝིསབྷཱགཱསུ གཱམསཱིམཱསུ སཱཁཱདཱིནཾ ཕུསནམེཝ སངྐརདོསཀཱརཎཏྟེན ཝུཏྟཾ, ན བྷིཀྑུཕུསནཾ. ཏཐཱ ཧི ‘‘ཨནྟོནདིཡཾ ཛཱཏརུཀྑེ བནྡྷིཏྭཱ ཀམྨཾ ཀཱཏབྦ’’ནྟི ནདིཡཾ ནཱཝཱབནྡྷནཾ ཨནུཉྙཱཏཾ ཨུདཀུཀྑེཔནིསྶཡཏྟེན ནདཱིསཱིམཱཡ སབྷཱགཏྟཱ. ཡདི ཧི བྷིཀྑཱུནཾ ཕུསནམེཝ པཊིཙྩ སབྦཏྠ སམྦནྡྷདོསོ ཝུཏྟོ སིཡཱ, ནདིཡམྤི བནྡྷནཾ པཊིཀྑིཔིཏབྦཾ བྷཝེཡྻ. ཏཏྠཱཔི ཧི བྷིཀྑུཕུསནཾ ཀམྨཀོཔཀཱརཎཾ ཧོཏི, ཏསྨཱ སབྷཱགསཱིམཱསུ པཝིསིཏྭཱ བྷཱུམིཨཱདིཾ ཕུསིཏྭཱ, ཨཕུསིཏྭཱ ཝཱ སཱཁཱདིམྷི ཋིཏེ ཏཾ སཱཁཱདིཾ ཕུསནྟོཝ བྷིཀྑུ སོདྷེཏབྦོ. ཝིསབྷཱགསཱིམཱསུ པན སཱཁཱདིམྷི ཕུསིཏྭཱ ཋིཏེ ཏཾ སཱཁཱདིཾ ཨཕུསནྟཱཔི སབྦེ བྷིཀྑཱུ སོདྷེཏབྦཱ, ཨཕུསིཏྭཱ ཋིཏེ པན ཏཾ སཱཁཱདིཾ ཕུསནྟཱཝ བྷིཀྑཱུ སོདྷེཏབྦཱཏི ནིཊྛམེཏྠ གནྟབྦཾ.

ཡཾ ¶ པནེཏྠ ཀེཙི ‘‘བདྡྷསཱིམཱནཾ དྭིནྣཾ ཨཉྙམཉྙཾ ཝིཡ བདྡྷསཱིམགཱམསཱིམཱནམྤི ཏདཉྙཱསམྤི སབྦཱསཾ སམཱནསཾཝཱསཀསཱིམཱནཾ ཨཉྙམཉྙཾ རུཀྑཱདིསམྦནྡྷེ སཏི ཏདུབྷཡམྤི ཨེཀསཱིམཾ ཝིཡ སོདྷེཏྭཱ ཨེཀཏྠེཝ ཀམྨཾ ཀཱཏབྦཾ, ཨཉྙཐཱ ཀཏཾ ཀམྨཾ ཝིཔཛྫཏི, ནཏྠེཏྠ སབྷཱགཝིསབྷཱགབྷེདོ’’ཏི ཝདནྟི, ཏཾ ཏེསཾ མཏིམཏྟཾ སབྷཱགསཱིམཱནཾ ཨཉྙམཉྙཾ སམྦནྡྷདོསཱབྷཱཝསྶ ཝིསབྷཱགསཱིམཱནམེཝ ཏབྦྷཱཝསྶ སུཏྟསུཏྟཱནུལོམཱདིཝིནཡནཡེཧི སིདྡྷཏྟཱ. ཏཐཱ ཧི ‘‘ཨནུཛཱནཱམི, བྷིཀྑཝེ, སཱིམཾ སམྨནྣིཏུ’’ནྟི (མཧཱཝ. ༡༣༨) གཱམསཱིམཱཡམེཝ བདྡྷསཱིམཾ སམྨནྣིཏུཾ ཨནུཉྙཱཏཏྟཱ ཏཱསཾ ནིསྶཡནིསྶིཏབྷཱཝེན སབྷཱགཏཱ, སམྦྷེདཛ྄ཛྷོཏྠརཎདོསཱབྷཱཝོ ཙ སུཏྟཏོཝ ¶ སིདྡྷོ. བནྡྷནཀཱལེ པན ཨནུཉྙཱཏསྶ སམྦནྡྷསྶ ཨནུལོམཏོ པཙྪཱ སཉྫཱཏརུཀྑཱདིསམྦནྡྷོཔི ཏཱསཾ ཝཊྚཏི ཨེཝ. ‘‘ཡཾ, བྷིཀྑཝེ…པེ… ཀཔྤིཡཾ ཨནུལོམེཏི, ཨཀཔྤིཡཾ པཊིབཱཧཏི, ཏཾ ཝོ ཀཔྤཏཱི’’ཏི (མཧཱཝ. ༣༠༥) ཝུཏྟཏྟཱ ཨེཝཾ ཏཱཝ གཱམབདྡྷསཱིམཱནཾ ཨཉྙམཉྙཾ སབྷཱགཏཱ, སམྦྷེདཱདིདོསཱབྷཱཝོ ཙ སུཏྟསུཏྟཱནུལོམཏོ སིདྡྷོ, ཨིམིནཱ ཨེཝ ནཡེན ཨརཉྙསཱིམསཏྟབྦྷནྟརསཱིམཱནཾ ནདཱིཨཱདིསཱིམཨུདཀུཀྑེཔསཱིམཱནཉྩ སུཏྟསུཏྟཱནུལོམཏོ ཨཉྙམཉྙཾ སབྷཱགཏཱ, སམྦྷེདཱདིདོསཱབྷཱཝོ ཙ སིདྡྷོཏི ཝེདིཏབྦོ.

བདྡྷསཱིམཱཡ པན ཨཉྙཱཡ བདྡྷསཱིམཱཡ ནདཱིཨཱདིསཱིམཱསུ ཙ བནྡྷིཏུཾ པཊིཀྑེཔསིདྡྷིཏོ ཙེཝ ཨུདཀུཀྑེཔསཏྟབྦྷནྟརསཱིམཱནཾ ནདཱིཨཱདཱིསུ ཨེཝ ཀཱཏུཾ ནིཡམནསུཏྟསཱམཏྠིཡེན བདྡྷསཱིམགཱམསཱིམཱསུ ཀརཎཔཊིཀྑེཔསིདྡྷོ ཙ ཏཱསཾ ཨཉྙམཉྙསབྷཱགཏཱ ཨུཔྤཏྟིཀྑཎེ པཙྪཱ ཙ རུཀྑཱདཱིཧི སམྦྷེདཱདིདོསསམྦྷཝོ ཙ ཝུཏྟནཡེན སུཏྟསུཏྟཱནུལོམཏོཝ སིཛ྄ཛྷནྟི. ཏེནེཝ ཨཊྛཀཐཱཡཾ ཝིསབྷཱགསཱིམཱནམེཝ ཝཊརུཀྑཱདིཝཙནེཧི ¶ སམྦནྡྷདོསཾ དསྶེཏྭཱ སབྷཱགཱནཾ བདྡྷསཱིམགཱམསཱིམཱདཱིནཾ སམྦནྡྷདོསོ ན དསྶིཏོ. ན ཀེཝལཉྩ ན དསྶིཏོ, ཨཐ ཁོ ཏཱསཾ སབྷཱགསཱིམཱནཾ རུཀྑཱདིསམྦནྡྷེཔི དོསཱབྷཱཝོཔི པཱལི༹ཨཊྛཀཐཱསུ ཉཱཔིཏོ ཨེཝ. ཏཐཱ ཧི པཱལི༹ཡཾ (མཧཱཝ. ༡༣༨) ‘‘པབྦཏནིམིཏྟཾ པཱསཱཎནིམིཏྟཾ ཝནནིམིཏྟཾ རུཀྑནིམིཏྟ’’ནྟིཨཱདིནཱ ཝཌྜྷནཀནིམིཏྟཱནི ཨནུཉྙཱཏཱནི, ཏེན ནེསཾ རུཀྑཱདིནིམིཏྟཱནཾ ཝཌྜྷནེ བདྡྷསཱིམགཱམསཱིམཱནཾ སངྐརདོསཱབྷཱཝོ ཉཱཔིཏོཝ ཧོཏི, དྭིནྣཾ པན བདྡྷསཱིམཱནཾ ཨཱིདིསོ སམྦནྡྷོ ན ཝཊྚཏི. ཝུཏྟཉྷི ‘‘ཨེཀརུཀྑོཔི དྭིནྣཾ སཱིམཱནཾ ནིམིཏྟཾ ཧོཏི, སོ པན ཝཌྜྷནྟོ སཱིམསངྐརཾ ཀརོཏི, ཏསྨཱ ན ཀཱཏབྦོ’’ཏི. ‘‘ཨནུཛཱནཱམི, བྷིཀྑཝེ, ཏིཡོཛནཔརམཾ སཱིམཾ བནྡྷིཏུ’’ནྟི (མཧཱཝ. ༡༤༠) ཝཙནཏོཔི ཙཱཡཾ ཉཱཔིཏོ. ཏིཡོཛནཔརམཱཡ ཧི སཱིམཱཡ སམནྟཱ པརིཡནྟེསུ རུཀྑལཏཱགུམྦཱདཱིཧི བདྡྷགཱམསཱིམཱནཾ ནིཡམེན ཨཉྙམཉྙཾ སམྦནྡྷསྶ སམྦྷཝཏོ ‘‘ཨཱིདིསཾ སམྦནྡྷཾ ཝིནཱསེཏྭཱཝ སཱིམཱ སམྨནྣིཏབྦཱ’’ཏི ཨཊྛཀཐཱཡམྤི ན ཝུཏྟཾ.

ཡདི ཙེཏྠ རུཀྑཱདིསམྦནྡྷེན ཀམྨཝིཔཏྟི བྷཝེཡྻ, ཨཝསྶམེཝ ཝཏྟབྦཾ སིཡཱ. ཝིཔཏྟིཔརིཧཱརཏྠཉྷི ཨཱཙརིཡཱ ནིརཱསངྐཊྛཱནེསུཔི ‘‘བྷིཏྟིཾ ཨཀིཏྟེཏྭཱ’’ཏིཨཱདིནཱ སིདྡྷམེཝཏྠཾ པུནཔྤུནཾ ཨཝོཙུཾ, ཨིདྷ པན ‘‘ཝནམཛ྄ཛྷེ ཝིཧཱརཾ ཀརོནྟི, ཝནཾ ན ཀིཏྟེཏབྦ’’ནྟིཨཱདིནཱ རུཀྑལཏཱདཱིཧི ནིརནྟརེ ཝནམཛ྄ཛྷེཔི སཱིམཱབནྡྷནམཝོཙུཾ. ཏཐཱ ཐམྦྷཱནཾ ཨུཔརི ཀཏཔཱསཱདཱདཱིསུ ཧེཊྛཱ ཐམྦྷཱདཱིཧི ཨེཀཱབདྡྷེསུ ཨུཔརིམཏལཱདཱིསུ སཱིམཱབནྡྷནཾ བཧུདྷཱ ཝུཏྟཾ, ཏསྨཱ བདྡྷསཱིམགཱམསཱིམཱནཾ ¶ རུཀྑཱདིསམྦནྡྷོ ཏེཧི མུཁཏོཝ ཝིཧིཏོ, ཨཔིཙ གཱམསཱིམཱནམྤི པཱཊེཀྐཾ བདྡྷསཱིམཱསདིསཏཱཡ ཨེཀཱཡ གཱམསཱིམཱཡ ཀམྨཾ ཀརོནྟེཧི དབྦཏིཎམཏྟེནཔི སམྦནྡྷཱ གཱམནྟརཔརམྤརཱ ཨརཉྙནདཱིསམུདྡཱ ཙ སོདྷེཏབྦཱཏི སཀལཾ དཱིཔཾ ¶ སོདྷེཏྭཱཝ ཀཱཏབྦཾ སིཡཱ. ཨེཝཾ པན ཨསོདྷེཏྭཱ པཋམམཧཱསངྒཱིཏིཀཱལཏོ པབྷུཏི ཀཏཱནཾ ཨུཔསམྤདཱདིཀམྨཱནཾ སཱིམཱསམྨུཏཱིནཉྩ ཝིཔཛྫནཏོ སབྦེསམྤི བྷིཀྑཱུནཾ ཨནུཔསམྤནྣསངྐཱཔསངྒོ ཙ དུནྣིཝཱརོ ཧོཏི, ན ཙེཏཾ ཡུཏྟཾ, ཏསྨཱ ཝུཏྟནཡེན ཝིསབྷཱགསཱིམཱནམེཝ རུཀྑཱདིསམྦནྡྷདོསོ, ན བདྡྷསཱིམགཱམསཱིམཱདཱིནཾ སབྷཱགསཱིམཱནནྟི གཧེཏབྦཾ.

མཧཱསཱིམཱསོདྷནསྶ དུཀྐརཏཱཡ ཁཎྜསཱིམཱཡམེཝ ཡེབྷུཡྻེན སངྒྷཀམྨཀརཎནྟི ཨཱཧ ‘‘སཱིམམཱལ༹ཀེ’’ཏིཨཱདི. མཧཱསངྒྷསནྣིཔཱཏེསུ པན ཁཎྜསཱིམཱཡ ཨཔྤཧོནཀཏཱཡ མཧཱསཱིམཱཡ ཀམྨེ ཀརིཡམཱནེཔི ཨཡཾ ནཡོ གཧེཏབྦོཝ. ཨུཀྑིཔཱཔེཏྭཱཏི ཨིམིནཱ ཀཱཡཔཊིབདྡྷེན སཱིམཾ ཕུསནྟོཔི སཱིམཊྛོཝ ཧོཏཱིཏི དསྶེཏི. པུརིམནཡེཔཱིཏི ཁཎྜསཱིམཏོ མཧཱསཱིམཾ པཝིཊྛསཱཁཱནཡེཔི. སཱིམཊྛརུཀྑསཱཁཱཡ ནིསིནྣོ སཱིམཊྛོཝ ཧོཏཱིཏི ཨཱཧ ‘ཧཏྠཔཱསམེཝ ཨཱནེཏབྦོ’’ཏི. ཨེཏྠ ཙ ‘‘རུཀྑསཱཁཱདཱིཧི ཨཉྙམཉྙསམྦནྡྷཱསུ ཨེཏཱསུ ཁཎྜསཱིམཱཡ ཏཡོ བྷིཀྑཱུ, མཧཱསཱིམཱཡ དྭེཏི ཨེཝཾ དྭཱིསུ སཱིམཱསུ སཱིམནྟརིཀཾ ཨཕུསིཏྭཱ, ཧཏྠཔཱསཉྩ ཨཝིཛཧིཏྭཱ ཋིཏེཧི པཉྩཧི བྷིཀྑཱུཧི ཨུཔསམྤདཱདི ཀམྨཾ ཀཱཏུཾ ཝཊྚཏཱི’’ཏི ཀེཙི ཝདནྟི, ཏཾ ན ཡུཏྟཾ ‘‘ནཱནཱསཱིམཱཡཾ ཋིཏཙཏུཏྠོ ཀམྨཾ ཀརེཡྻ, ཨཀམྨཾ ན ཙ ཀརཎཱིཡ’’ནྟིཨཱདིཝཙནཏོ (མཧཱཝ. ༣༨༩). ཏེནེཝེཏྠཱཔི མཧཱསཱིམཾ སོདྷེཏྭཱ མཱལ༹ཀསཱིམཱཡམེཝ ཀམྨཀརཎཾ ཝིཧིཏཾ. ཨཉྙཐཱ བྷིནྣསཱིམཊྛཏཱཡ ཏཏྲཊྛསྶ གཎཔཱུརཀཏྟཱབྷཱཝཱ ཀམྨཀོཔོཝ ཧོཏཱིཏི.

ཡདི ཨེཝཾ ཀཐཾ ཚནྡཔཱརིསུདྡྷིཨཱཧརཎཝསེན མཧཱསཱིམཱསོདྷནནྟི? ཏམྤི ཝིནཡཉྙཱུ ན ཨིཙྪནྟི, ཧཏྠཔཱསཱནཡནབཧིསཱིམཀརཎཝསེན པནེཏྠ སོདྷནཾ ཨིཙྪནྟི, དིནྣསྶཔི ཚནྡསྶ ¶ ཨནཱགམནེན མཧཱསཱིམཊྛོ ཀམྨཾ ཀོཔེཏཱིཏི. ཡདི ཙསྶ ཚནྡཱདི ནཱགཙྪཏི, ཀཐཾ སོ ཀམྨཾ ཀོཔེསྶཏཱིཏི? དྭིནྣཾ ཝིསབྷཱགསཱིམཱནཾ སམྦནྡྷདོསཏོ, སོ ཙ སམྦནྡྷདོསོ ཨཊྛཀཐཱཝཙནཔྤམཱཎཏོ. ན ཧི ཝིནཡེ སབྦཏྠ ཡུཏྟི སཀྐཱ ཉཱཏུཾ བུདྡྷགོཙརཏྟཱཏི ཝེདིཏབྦཾ. ཀེཙི པན ‘‘སཙེ དྭེཔི སཱིམཱཡོ པཱུརེཏྭཱ ནིརནྟརཾ ཋིཏེསུ བྷིཀྑཱུསུ ཀམྨཾ ཀརོནྟེསུ ཨེཀཱཡ ཨེཝ སཱིམཱཡ གཎོ ཙ ཨུཔསམྤདཱཔེཀྑོ ཙ ཨནུསྶཱཝཀོ ཙ ཨེཀཏོ ཏིཊྛཏི ¶ , ཀམྨཾ སུཀཏམེཝ ཧོཏི. སཙེ པན ཀམྨཱརཧོ ཝཱ ཨནུསྶཱཝཀོ ཝཱ སཱིམནྟརཊྛོ ཧོཏི, ཀམྨཾ ཝིཔཛྫཏཱི’’ཏི ཝདནྟི, ཏཉྩ བདྡྷསཱིམགཱམསཱིམཱདིསབྷཱགསཱིམཱསུ ཨེཝ ཡུཛྫཏི. ཡཱསུ ཨཉྙམཉྙཾ རུཀྑཱདིསམྦནྡྷེསུཔི དོསོ ནཏྠི, ཡཱསུ པན ཨཏྠི, ན ཏཱསུ, ཝིསབྷཱགསཱིམཱསུ རུཀྑཱདིསམྦནྡྷེ སཏི ཨེཀཏྠ ཋིཏོ ཨིཏརཊྛཱནཾ ཀམྨཾ ཀོཔེཏི ཨེཝ ཨཊྛཀཐཱཡ སཱམཉྙཏོ སོདྷནསྶ ཝུཏྟཏྟཱཏི ཨམྷཱཀཾ ཁནྟི, ཝཱིམཾསིཏྭཱ གཧེཏབྦཾ.

སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༣༨) ‘‘ཨུཀྑིཔཱཔེཏྭཱ ཀཱཏུཾ ན ཝཊྚཏཱིཏི ཁཎྜསཱིམཱཡ ཨནྟོ ཋིཏཏྟཱ རུཀྑསྶ ཏཏྠ ཋིཏོ ཧཏྠཔཱསམེཝ ཨཱནེཏབྦོཏི ཨུཀྑིཔཱཔེཏྭཱ ཀཱཏུཾ ན ཝཊྚཏཱི’’ཏི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༡༣༨) པན ‘‘ཨུཀྑིཔཱཔེཏྭཱ ཀཱཏུཾ ན ཝཊྚཏི, ཀསྨཱ? ཨནྟོ ཋིཏཏྟཱ. རུཀྑསྶ ཧི ཧེཊྛཱ པཐཝཱིགཏཾ མཱུལཾ ཁཎྜསཱིམཱཡེཝ ཧོཏི. ཨབྦོཧཱརིཀཾ ཝཱཏི ཨཔརེ. ‘མཛ྄ཛྷེ པན ཚིནྣེ མཧཱསཱིམཱཡ ཋིཏཾ མཱུལཾ མཧཱསཱིམམེཝ བྷཛཏི, ཁཎྜསཱིམཱཡ ཋིཏཾ ཁཎྜསཱིམམེཝ བྷཛཏི ཏདཱཡཏྟཔཐཝཱིཨཱདཱིཧི ཨནུགྒཧིཏཏྟཱ’ཏི ཙ ཝུཏྟཾ. ‘སཱིམཱཡ པཙྪཱ ཨུཊྛིཏརུཀྑེ ནིསཱིདིཏྭཱ ཀམྨཾ ཀཱཏུཾ ཝཊྚཏི པཙྪཱ སཱིམཱཡཾ ཀཏགེཧེ ཝིཡཱ’ཏི ཝཏྭཱ ‘བནྡྷནཀཱལེ ཋིཏེ རུཀྑེ ནིསཱིདིཏྭཱ ཀཱཏུཾ ན ཝཊྚཏི ཨུཔརིསཱིམཱཡ ཨགམནཏོ’ཏི ཀཱརཎཾ ཝདནྟི. ཨེཝཾ སཏི བནྡྷནཀཱལེ ¶ པུན ཨཱརོཧཎཾ ནཱམ ནཏྠི, བནྡྷིཏཀཱལེ ཨེཝ ཨཱརོཧཏཱིཏི ཨཱཔཛྫཏི པཙྪཱ ཨུཊྛིཏརུཀྑོ པན ཏཔྤཊིབདྡྷཏྟཱ སཱིམཱསངྑམེཝ གཏོ. ཨེཝཾ པུབྦེ ཨུཊྛིཏརུཀྑོཔཱིཏི གཧེཏབྦཾ. ‘‘ཡཾ ཀིཉྩཱི’’ཏི ཝཙནཏོ ཏིཎཱདིཔི སངྒཧིཏཾ, མཧཱཐེརཱཔི ཏིཎཾ སོདྷེཏྭཱཝ ཀརོནྟཱི’’ཏི ཝུཏྟཾ.

ན ཨོཏརཏཱིཏི པཎཝསཎྛཱནཔབྦཏཱདཱིསུ ཧེཊྛཱ པམཱཎརཧིཏཾ ཋཱནཾ ན ཨོཏརཏི. ཀིཉྩཱཔི པནེཏྠ བཛ྄ཛྷམཱནཀྑཎེ ཨུདྡྷམྤི པམཱཎརཧིཏཔབྦཏཱདི ནཱརོཧཏི, ཏཐཱཔི ཏཾ པཙྪཱ སཱིམཊྛཏཱཡ སཱིམཱ ཧོཏི. ཧེཊྛཱ པཎཝསཎྛཱནཱདི པན ཨུཔརི བདྡྷཱཡཔི སཱིམཱཡ སཱིམསངྑཾ ན གཙྪཏི, ཏསྶེཝ ཝསེན ‘‘ན ཨོཏརཏཱི’’ཏི ཝུཏྟཾ, ཨིཏརཐཱ ཨོརོཧཎཱརོཧཎཱནཾ སཱདྷཱརཎཝསེན ‘‘ན ཨོཏརཏཱི’’ཏིཨཱདིནཱ ཝཏྟབྦཏོ. ཛཱཏཾ ཡཾ ཀིཉྩཱིཏི ནིཊྛིཏསཱིམཱཡ ཨུཔརི ཛཱཏཾ ཝིཛྫམཱནཾ པུབྦེ ཋིཏཾ པཙྪཱ སཉྫཱཏཾ པཝིཊྛཉྩ ཡཾ ཀིཉྩི སཝིཉྙཱཎཀཱཝིཉྙཱཎཀཾ སབྦམྤཱིཏི ཨཏྠོ. ཨནྟོསཱིམཱཡ ཧི ཧཏྠིཀྑནྡྷཱདིསཝིཉྙཱཎཀེསུ ནིསིནྣོཔི བྷིཀྑུ སཱིམཊྛོཝ ཧོཏི. བདྡྷཱཡ སཱིམཱཡཱཏི ཨིདཉྩ པཀརཎཝསེན ཨུཔལཀྑཎཏོ ཝུཏྟཾ. ཨབདྡྷསཱིམཱསུཔི ¶ སབྦཱསུ ཋིཏཾ ཏཾ སཱིམཱསངྑམེཝ གཙྪཏི. ཨེཀསམྦནྡྷེན གཏནྟི རུཀྑལཏཱདིཏཏྲཛཱཏམེཝསནྡྷཱཡ ཝུཏྟཾ. ཏཱདིསཉྷི ‘‘ཨིཏོ གཏ’’ནྟི ཝཏྟབྦཏཾ ཨརཧཏི.

ཡཾ པན ‘‘ཨིཏོ གཏ’’ནྟི ཝཱ ‘‘ཏཏོ ཨཱགཏ’’ནྟི ཝཱ ཝཏྟུཾ ཨསཀྐུཎེཡྻཾ ཨུབྷོསུ བདྡྷསཱིམགཱམསཱིམཱསུ ཨུདཀུཀྑེཔནདཱིཨཱདཱིསུ ཙ ཏིརིཡཾ པཏིཏརཛྫུདཎྜཱདི, ཏཏྠ ཀིཾ ཀཱཏབྦནྟི? ཨེཏྠ པན ‘‘བདྡྷསཱིམཱཡ པཏིཊྛིཏབྷཱགོ བདྡྷསཱིམཱ, གཱམསཱིམཱཡ པཏིཊྛིཏབྷཱགོ གཱམསཱིམཱ ཏདུབྷཡསཱིམཊྛཔབྦཏཱདི ཝིཡ, བདྡྷསཱིམཏོ ཨུཊྛིཏཝཊརུཀྑསྶ པཱརོཧེ, གཱམསཱིམཱཡ གཱམསཱིམཏོ ཨུཊྛིཏཝཊརུཀྑསྶ པཱརོཧེ ཙ བདྡྷསཱིམཱཡ ¶ པཏིཊྛིཏེཔི ཨེསེཝ ནཡོ. མཱུལེ པཏིཊྛིཏཀཱལཏོ པཊྛཱཡ ཧི ‘ཨིཏོ གཏཾ, ཏཏོ ཨཱགཏ’ནྟི ཝཏྟུཾ ཨསཀྐུཎེཡྻཏོ སོ བྷཱགོ ཡཐཱཔཝིཊྛསཱིམཊྛསངྑམེཝ གཙྪཏི. ཏེསཾ རུཀྑཔཱརོཧཱནཾ ཨནྟརཱ པན ཨཱཀཱསཊྛསཱཁཱ བྷཱུམིཡཾ སཱིམཱཔརིཙྪེདཔྤམཱཎེན ཏདུབྷཡསཱིམཱ ཧོཏཱི’’ཏི ཀེཙི ཝདནྟི. ཡསྨཱ པནསྶཱ སཱཁཱཡ པཱརོཧོ པཝིཊྛསཱིམཱཡ པཐཝིཡཾ མཱུལེཧི པཏིཊྛཧིཏྭཱཔི ཡཱཝ སཱཁཾ ཝིནཱ ཋཱཏུཾ ན སཀྐོཏི, ཏཱཝ མཱུལསཱིམཊྛཏཾ ན ཝིཛཧཏི. ཡདཱ པན སཎྛཱཏུཾ སཀྐོཏི, ཏདཱཔི པཱརོཧམཏྟམེཝ པཝིཊྛསཱིམཏཾ སམུཔེཏི, ཏསྨཱ སབྦོཔི ཨཱཀཱསཊྛསཱཁཱབྷཱགོ པུརིམསཱིམཊྛཏཾ ན ཝིཛཧཏི ཏཏོ ཨཱགཏབྷཱགསྶ ཨཝིཛཧིཏཏྟཱཏི ཨམྷཱཀཾ ཁནྟི. ཨུདཀུཀྑེཔནདཱིཨཱདཱིསུཔི ཨེསེཝ ནཡོ. ཏཏྠ ཙ ཝིསབྷཱགསཱིམཱཡ ཨེཝ པཝིཊྛེ སཀལསཱིམཱསོདྷནཾ, སབྷཱགཱཡ པཝིཊྛེ ཕུསིཏྭཱ ཋིཏམཏྟབྷིཀྑུསོདྷནཉྩ སབྦཾ པུབྦེ ཝུཏྟནཡམེཝ.

༡༦༤. ཨེཏྠ ཙ ནདཱིཔཱརསཱིམཱཀཐཱཡ པཱརཡཏཱིཏི ཨཛ྄ཛྷོཏྠརཏི. ནདིཡཱ ཨུབྷོསུ ཏཱིརེསུ པཏིཊྛཧམཱནཱ སཱིམཱ ནདཱིཨཛ྄ཛྷོཏྠརཱ ནཱམ ཧོཏཱིཏི ཨཱཧ ‘‘ནདིཾ ཨཛ྄ཛྷོཏྠརམཱན’’ནྟི. ཨནྟོནདིཡཉྷི སཱིམཱ ན ཨོཏརཏི. ནདཱིལཀྑཎེ པན ཨསཏི ཨོཏརཏི. སཱ ཙ ཏདཱ ནདཱིཔཱརསཱིམཱ ན ཧོཏཱིཏི ཨཱཧ ‘‘ནདིཡཱ ལཀྑཎཾ ནདཱིནིམིཏྟེ ཝུཏྟནཡམེཝཱ’’ཏི. ཨསྶཱཏི བྷཝེཡྻ. ཨཝསྶཾ ལབྦྷནེཡྻཱ པན དྷུཝནཱཝཱཝ ཧོཏཱིཏི སམྦནྡྷོ. ན ནཱཝཱཡཱཏི ཨིམིནཱ ནཱཝཾ ཝིནཱཔི སཱིམཱ བདྡྷཱ སུབདྡྷཱ ཨེཝ ཧོཏི, ཨཱཔཏྟིཔརིཧཱརཏྠཱ ནཱཝཱཏི དསྶེཏི.

རུཀྑསངྒྷཱཊམཡོཏི ཨནེཀརུཀྑེ ཨེཀཏོ གྷཊེཏྭཱ ཀཏསེཏུ. རུཀྑཾ ཚིནྡིཏྭཱ ཀཏོཏི པཱཋསེསོ. ‘‘སབྦནིམིཏྟཱནཾ ཨནྟོ ཋིཏབྷིཀྑཱུ ཧཏྠཔཱསེ ཀཏྭཱཏི ཨིདཾ ཨུབྷིནྣཾ ཏཱིརཱནཾ ཨེཀགཱམཁེཏྟབྷཱཝཾ ¶ སནྡྷཱཡ ཝུཏྟཾ. པབྦཏསཎྛཱནཱཏི ¶ ཨེཀཏོ ཨུགྒཏདཱིཔསིཁརཏྟཱ སམནྟཔཱསཱདིཀཱཡཾ ཝུཏྟཾ.

༡༦༥. སཱིམཱསམཱུཧནཀཐཱཡཾ སོཏི བྷིཀྑུནིསངྒྷོ. དྭེཔཱིཏི དྭེ སམཱནསཾཝཱསཨཝིཔྤཝཱསསཱིམཱཡོ. ཨཝིཔྤཝཱསསཱིམཱཏི མཧཱསཱིམཾ སནྡྷཱཡ ཝདཏི. ཏཏྠེཝ ཡེབྷུཡྻེན ཨཝིཔྤཝཱསཱཏི. ཨཝིཔྤཝཱསཾ ཨཛཱནནྟཱཔཱིཏི ཨིདཾ མཧཱསཱིམཱཡ ཝིཛྫམཱནཱཝིཛྫམཱནཏྟཾ, ཏསྶཱ བཱཧིརཔརིཙྪེདཉྩ ཨཛཱནནྟཱནཾ ཝསེན ཝུཏྟཾ. ཨེཝཾ ཨཛཱནནྟེཧིཔི ཨནྟོསཱིམཱཡ ཋཏྭཱ ཀམྨཝཱཙཱཡ ཀཏཱཡ སཱ སཱིམཱ སམཱུཧཏཱཝ ཧོཏཱིཏི ཨཱཧ ‘‘སམཱུཧནིཏུཉྩེཝ བནྡྷིཏུཉྩ སཀྑིསྶནྟཱི’’ཏི. ནིརཱསངྐཊྛཱནེཏི ཁཎྜསཱིམཱརཧིཏཊྛཱནེ. ཨིདཉྩ མཧཱསཱིམཱཡ ཝིཛྫམཱནཱཡཔི ཀམྨཀརཎསུཁཏྠཾ ཁཎྜསཱིམཱ ཨིཙྪིཏཱཏི ཏཾ ཙེཏིཡངྒཎཱདིབཧུསནྣིཔཱཏཊྛཱནེ ན བནྡྷཏཱིཏི ཝུཏྟཾ. ཏཏྠཱཔི སཱ བདྡྷཱ སུབདྡྷཱ ཨེཝ མཧཱསཱིམཱ ཝིཡ. པཊིབནྡྷིཏུཾ པན ན སཀྑིསྶནྟེཝཱཏི ཨིདཾ ཁཎྜསཱིམཱཡ ཨསམཱུཧཏཏྟཱ, ཏསྶཱ ཨཝིཛྫམཱནཏྟསྶ ཨཛཱནནཏོ ཙ མཧཱསཱིམཱབནྡྷནཾ སནྡྷཱཡ ཝུཏྟཾ. ཁཎྜསཱིམཱ པན ནིརཱསངྐཊྛཱནེ བནྡྷིཏུཾ སཀྑིསྶནྟེཝ. སཱིམཱསམྦྷེདཾ ཀཏྭཱཏི ཁཎྜསཱིམཱཡ ཝིཛྫམཱནཔཀྑེ སཱིམཱཡ སཱིམཾ ཨཛ྄ཛྷོཏྠརཎསམྦྷེདཾ ཀཏྭཱ ཨཝིཛྫམཱནཔཀྑེཔི སམྦྷེདསངྐཱཡ ཨནིཝཏྟནེན སམྦྷེདསངྐཾ ཀཏྭཱ. ཨཝིཧཱརཾ ཀརེཡྻུནྟི སངྒྷཀམྨཱནཱརཧཾ ཀརེཡྻུཾ. པུབྦེ ཧི ཙེཏིཡངྒཎཱདིནིརཱསངྐཊྛཱནེ ཀམྨཾ ཀཱཏུཾ སཀྐཱ, ཨིདཱནི ཏམྤི ཝིནཱསིཏནྟི ཨདྷིཔྤཱཡོ. ན སམཱུཧནིཏབྦཱཏི ཁཎྜསཱིམཾ ཨཛཱནནྟེཧི ན སམཱུཧནིཏབྦཱ. ཨུབྷོཔི ན ཛཱནནྟཱིཏི ཨུབྷིནྣཾ པདེསནིཡམཾ ཝཱ ཏཱསཾ དྭིནྣམྤི ཝཱ ཨཉྙཏརཱཡ ཝཱ ཝིཛྫམཱནཏཾ ཝཱ ཨཝིཛྫམཱནཏཾ ཝཱ ན ཛཱནནྟི, སབྦཏྠ སངྐཱ ཨེཝ ཧོཏི. ནེཝ སམཱུཧནིཏུཾ, ན བནྡྷིཏུཾ སཀྑིསྶནྟཱིཏི ཨིདཾ ནིརཱསངྐཊྛཱནེ ཋཏྭཱ སམཱུཧནིཏུཾ སཀྐོནྟཱཔི མཧཱསཱིམཾ པཊིབནྡྷིཏུཾ ན སཀྑིསྶནྟཱིཏི ཨིམམཏྠཾ སནྡྷཱཡ ¶ ཝུཏྟཾ. ན ཙ སཀྐཱ…པེ… ཀམྨཝཱཙཱ ཀཱཏུནྟི ཨིདཾ སཱིམཱབནྡྷནཀམྨཝཱཙཾ སནྡྷཱཡ ཝུཏྟཾ. ཏསྨཱཏི ཡསྨཱ བནྡྷིཏུཾ ན སཀྐཱ, ཏསྨཱ ན སམཱུཧནིཏབྦཱཏི ཨཏྠོ.

ཀེཙི པན ‘‘ཨཱིདིསེསུཔི ཝིཧཱརེསུ ཚཔཉྩམཏྟེ བྷིཀྑཱུ གཧེཏྭཱ ཝིཧཱརཀོཊིཏོ པཊྛཱཡ ཝིཧཱརཔརིཀྑེཔསྶ ཨནྟོ ཙ བཧི ཙ སམནྟཱ ལེཌྜུཔཱཏེ སབྦཏྠ མཉྩཔྤམཱཎེ ཨོཀཱསེ ནིརནྟརཾ ཋཏྭཱ པཋམཾ ཨཝིཔྤཝཱསསཱིམཾ, ཏཏོ སམཱནསཾཝཱསཀསཱིམཉྩ སམཱུཧནནཝསེན སཱིམཱཡ སམུགྒྷཱཏེ ཀཏེ ཏསྨིཾ ཝིཧཱརེ ཁཎྜསཱིམཱཡ, མཧཱསཱིམཱཡ ཝཱ ཋིཏཝིཛྫམཱནཏྟེ སཏི ཨཝསྶཾ ཨེཀསྨིཾ ¶ མཉྩཊྛཱནེ ཏཱསཾ མཛ྄ཛྷགཏཱ ཏེ བྷིཀྑཱུ ཏཱ སམཱུཧནེཡྻུཾ, ཏཏོ གཱམསཱིམཱ ཨེཝ ཨཝསིསྶེཡྻ. ན ཧེཏྠ སཱིམཱཡ, ཏཔྤརིཙྪེདསྶ ཝཱ ཛཱནནཾ ཨངྒཾ. སཱིམཱཡ པན ཨནྟོཋཱནཾ ‘སམཱུཧནིསྶཱམཱ’ཏི ཀམྨཝཱཙཱཀརཎཉྩེཏྠ ཨངྒཾ. ཨཊྛཀཐཱཡཾ ‘ཁཎྜསཱིམཾ པན ཛཱནནྟཱ ཨཝིཔྤཝཱསཾ ཨཛཱནནྟཱཔི སམཱུཧནིཏུཉྩེཝ བནྡྷིཏུཉྩ སཀྑིསྶནྟཱི’ཏི ཨེཝཾ མཧཱསཱིམཱཡ པརིཙྪེདསྶ ཨཛཱནནེཔི སམཱུཧནནསྶ ཝུཏྟཏྟཱ གཱམསཱིམཱཡ ཨེཝ ཙ ཨཝསིཊྛཱཡ ཏཏྠ ཡཐཱརུཙི དུཝིདྷམྤི སཱིམཾ བནྡྷིཏུཉྩེཝ ཨུཔསམྤདཱདིཀམྨཾ ཀཱཏུཉྩ ཝཊྚཏཱི’’ཏི ཝདནྟི, ཏཾ ཡུཏྟཾ ཝིཡ དིསྶཏི, ཝཱིམཾསིཏྭཱ གཧེཏབྦནྟི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༤༤) ཨཱགཏོ ཝིནིཙྪཡོ. སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༤༤) པན ‘‘ཨཝིཔྤཝཱསསཱིམཱ ན སམཱུཧནྟབྦཱཏི མཧཱསཱིམཾ སནྡྷཱཡ ཝདཏི. ནིརཱསངྐཊྛཱནེསུ ཋཏྭཱཏི ཙེཏིཡངྒཎཱདཱིནཾ ཁཎྜསཱིམཱཡ ཨནོཀཱསཏྟཱ ཝུཏྟཾ. ཁཎྜསཱིམཉྷི བནྡྷནྟཱ ཏཱདིསཾ ཋཱནཾ པཧཱཡ ཨཉྙསྨིཾ ཝིཝིཏྟེ ཨོཀཱསེ བནྡྷནྟི. ཨཔྤེཝ ནཱམ སམཱུཧནིཏུཾ སཀྑིསྶནྟཱིཏི ཨཝིཔྤཝཱསསཱིམཾཡེཝ སམཱུཧནིཏུཾ སཀྑིསྶནྟི, ན ཁཎྜསཱིམཾ. པཊིབནྡྷིཏུཾ པན ན སཀྑིསྶནྟེཝཱཏི ཁཎྜསཱིམཱཡཾ ཨཉྙཱཏཏྟཱ ན སཀྑིསྶནྟི. ན སམཱུཧནིཏབྦཱཏི ཁཎྜསཱིམཾ ཨཛཱནནྟེཧི ན སམཱུཧནིཏབྦཱ’’ཏི ཝུཏྟཾ.

༡༦༦. ཨེཝཾ ¶ བདྡྷསཱིམཱཝིནིཙྪཡཾ ཀཐེཏྭཱ ཨིདཱནི ཨབདྡྷསཱིམཱཝིནིཙྪཡཾ དསྶེཏུཾ ‘‘ཨབདྡྷསཱིམཱ པནཱ’’ཏི ཨཱཧ. སཱ ཀཏིཝིདྷཱཏི ཨཱཧ ‘‘གཱམསཱིམཱ སཏྟབྦྷནྟརསཱིམཱ ཨུདཀུཀྑེཔསཱིམཱཏི ཏིཝིདྷཱ’’ཏི. པཱལི༹ཡཾ (མཧཱཝ. ༡༤༧) ‘‘ཨསམྨཏཱཡ, བྷིཀྑཝེ, སཱིམཱཡཱ’’ཏིཨཱདིནཱ གཱམསཱིམཱ ཨེཝ བདྡྷསཱིམཱཡ ཁེཏྟཾ ཨརཉྙནདཱིཨཱདཡོ ཝིཡ སཏྟབྦྷནྟརཨུདཀུཀྑེཔཱདཱིནཾ, སཱ ཙ གཱམསཱིམཱ བདྡྷསཱིམཱཡ རཧིཏཊྛཱནེ སཡམེཝ སམཱནསཾཝཱསཱ ཧོཏཱིཏི དསྶེཏི. ‘‘ཡཱ ཏསྶ གཱམསྶ གཱམསཱིམཱ’’ཏི ཨེཏྠ གཱམཔརིཀྑེཔསྶ ཨནྟོ ཙ བཧི ཙ ཁེཏྟཝཏྠུཨརཉྙཔབྦཏཱདིཀཾ སབྦཾ གཱམཀྑེཏྟཾ སནྡྷཱཡ ‘‘གཱམསྶཱ’’ཏི ཝུཏྟཾ, ན ཨནྟརགྷརམེཝ, ཏསྨཱ ཏསྶ སཀལསྶ གཱམཀྑེཏྟསྶ སམྦནྡྷནཱིཡཱ གཱམསཱིམཱཏི ཨེཝམཏྠོ གཧེཏབྦོ. ཡོ ཧི སོ ཨནྟརགྷརཁེཏྟཱདཱིསུ ཨནེཀེསུ བྷཱུམིབྷཱགེསུ ‘‘གཱམོ’’ཏི ཨེཀཏྟེན ལོཀཛནེཧི པཉྙཏྟོ གཱམཝོཧཱརོ, སོཝ ཨིདྷ ‘‘གཱམསཱིམཱ’’ཏིཔི ཝུཙྩཏཱིཏི ཨདྷིཔྤཱཡོ. གཱམོ ཨེཝ ཧི གཱམསཱིམཱ. ཨིམིནཱཝ ནཡེན ཨུཔརི ཨརཉྙཾ ནདཱི སམུདྡོ ཛཱཏསྶརོཏི, ཨེཝཾ ཏེསུ ཏེསུ བྷཱུམིཔྤདེསེསུ ཨེཀཏྟེན ལོཀཛནཔཉྙཏྟཱནམེཝ ཨརཉྙཱདཱིནཾ ཨརཉྙསཱིམཱདིབྷཱཝོ ཝེདིཏབྦོ, ལོཀེ པན གཱམསཱིམཱདིཝོཧཱརོ གཱམཱདཱིནཾ མརིཡཱདཱཡམེཝ ཝཏྟུཾ ཝཊྚཏི, ན གཱམཀྑེཏྟཱདཱིསུ ¶ སབྦཏྠ. སཱསནེ པན ཏེ གཱམཱདཡོ ཨིཏརནིཝཏྟིཨཏྠེན སཡམེཝ ཨཏྟནོ མརིཡཱདཱཏི ཀཏྭཱ གཱམོ ཨེཝ གཱམསཱིམཱ, ཨརཉྙམེཝ ཨརཉྙསཱིམཱ, སམུདྡོ ཨེཝ སམུདྡསཱིམཱཏི སཱིམཱཝོཧཱརེན ཝུཏྟཱཏི ཝེདིཏབྦོ. པཱལི༹ཡཾ ནིགམསྶ ཝཱཏི ཨིདཾ གཱམསཱིམཔྤབྷེདཾ ཨུཔལཀྑཎཝསེན དསྶེཏུཾ ཝུཏྟཾ. ཏེནཱཧ ‘‘ནགརམྤི གཧིཏམེཝཱ’’ཏི.

བལིཾ ལབྷནྟཱིཏི ཨིདཾ ཡེབྷུཡྻཝསེན ཝུཏྟཾ. ‘‘ཨཡཾ གཱམོ ཨེཏྟཀོ ཀརཱིསབྷཱགོ’’ཏིཨཱདིནཱ པན རཱཛཔཎྞེསུ ཨཱརོཔིཏེསུ ¶ བྷཱུམིབྷཱགེསུ ཡསྨིཾ ཡསྨིཾ ཏལཱ༹ཀམཱཏིཀཱསུསཱནཔབྦཏཱདིཀེ པདེསེ བལིཾ ན གཎྷནྟི, སོཔི གཱམསཱིམཱ ཨེཝ. རཱཛཱདཱིཧི པརིཙྪིནྣབྷཱུམིབྷཱགོ ཧི སབྦོཝ ཋཔེཏྭཱ ནདཱིལོཎིཛཱཏསྶརེ གཱམསཱིམཱཏི ཝེདིཏབྦཱ. ཏེནཱཧ ‘‘པརིཙྪིནྡིཏྭཱ རཱཛཱ ཀསྶཙི དེཏཱི’’ཏི. སཙེ པན ཏཏྠ རཱཛཱ ཀཉྩི པདེསཾ གཱམནྟརེན ཡོཛེཏི, སོ པཝིཊྛགཱམསཱིམཏཾ ཨེཝ བྷཛཏི. ནདཱིཛཱཏསྶརེ ཝིནཱསེཏྭཱ ཏལཱ༹ཀཱདིབྷཱཝཾ ཝཱ པཱུརེཏྭཱ ཁེཏྟཱདིབྷཱཝཾ ཝཱ པཱཔིཏེསུཔི ཨེསེཝ ནཡོ.

ཡེ པན གཱམཱ རཱཛཙོརཱདིབྷཡཔཱིལི༹ཏེཧི མནུསྶེཧི ཚཌྜིཏཱ ཙིརམྤི ནིམྨནུསྶཱ ཏིཊྛནྟི, སམནྟཱ པན གཱམཱ སནྟི, ཏེཔི པཱཊེཀྐཾ གཱམསཱིམཱཝ. ཏེསུ ཧི རཱཛཱནོ སམནྟགཱམཝཱསཱིཧི ཀསཱཔེཏྭཱ ཝཱ ཡེཧི ཀེཧིཙི ཀསིཏཊྛཱནཾ ལིཁིཏྭཱ ཝཱ བལིཾ གཎྷནྟི, ཨཉྙེན ཝཱ གཱམེན ཨེཀཱིབྷཱཝཾ ཨུཔནེནྟི, ཡེ པན གཱམཱ རཱཛཱུཧིཔི པརིཙྩཏྟཱ གཱམཁེཏྟཱནནྟརིཀཱ མཧཱཨརཉྙེན ཨེཀཱིབྷཱུཏཱ, ཏེ ཨགཱམཀཱརཉྙསཱིམཏཾ པཱཔུཎནྟི, པུརིམཱ གཱམསཱིམཱ ཝིནསྶཏི, རཱཛཱནོ པན ཨེཀསྨིཾ ཨརཉྙཱདིཔདེསེ མཧནྟཾ གཱམཾ ཀཏྭཱ ཨནེཀསཧསྶཱནི ཀུལཱནི ཝཱསཱཔེཏྭཱ ཏཏྠ ཝཱསཱིནཾ བྷོགགཱམཱཏི སམནྟཱ བྷཱུཏགཱམེ པརིཙྪིནྡིཏྭཱ དེནྟི, པུརཱཎནཱམཾ པན པརིཙྪེདཉྩ ན ཝིནཱསེནྟི, ཏེཔི པཙྩེཀཾ གཱམསཱིམཱ ཨེཝ, ཨེཏྟཱཝཏཱ པུརིམགཱམསཱིམཏཾ ན ཝིཛཧནྟི. སཱ ཙ ཨིཏརཱ ཙཱཏིཨཱདི ‘‘སམཱནསཾཝཱསཱ ཨེཀཱུཔོསཐཱ’’ཏི པཱལི༹པདསྶ (མཧཱཝ. ༡༤༣) ཨདྷིཔྤཱཡཝིཝརཎཾ. ཏཏྠ ཧི སཱ ཙ རཱཛིཙྪཱཝསེན པརིཝཏྟེཏྭཱ སམུཔྤནྣཱ ཨབྷིནཝཱ, ཨིཏརཱ ཙ ཨཔརིཝཏྟཱ པཀཏིགཱམསཱིམཱ ཡཐཱ བདྡྷསཱིམཱཡ སབྦཾ སངྒྷཀམྨཾ ཀཱཏུཾ ཝཊྚཏི, ཨེཝམེཏཱཔི སབྦཀམྨཱརཧཏཱསདིསེན བདྡྷསཱིམཱསདིསཱ སམཱནསཾཝཱསཱ ཨེཀཱུཔོསཐཱཏི ཨདྷིཔྤཱཡོ ¶ . སཱམཉྙཏོ ‘‘བདྡྷསཱིམཱསདིསཱ’’ཏི ཝུཏྟེ ཏིཙཱིཝརཱཝིཔྤཝཱསསཱིམཾ བདྡྷསཱིམཾ ཨེཝ མཉྙནྟཱིཏི ཏཾསདིསཏཱནིཝཏྟནམུཁེན ¶ ཨུཔརིསཏྟབྦྷནྟརསཱིམཱཡ ཏཾསདིསཏཱཔི ཨཏྠཱིཏི དསྶནནཡསྶ ཨིདྷེཝ པསངྒཾ དསྶེཏུཾ ‘‘ཀེཝལ’’ནྟིཨཱདི ཝུཏྟཾ.

ཝིཉྫྷཱཊཝིསདིསེ ཨརཉྙེཏི ཡཏྠ ‘‘ཨསུཀགཱམསྶ ཨིདཾ ཁེཏྟ’’ནྟི གཱམཝོཧཱརོ ནཏྠི, ཡཏྠ ཙ ནེཝ ཀསནྟི ན ཝཔནྟི, ཏཱདིསེ ཨརཉྙེ. མཙྪབནྡྷཱནཾ ཨགམནཔཐཱ ནིམྨནུསྶཱཝཱསཱ སམུདྡནྟརདཱིཔཀཱཔི ཨེཏྠེཝ སངྒཡ྄ཧནྟི. ཡཾ ཡཉྷི ཨགཱམཀྑེཏྟབྷཱུཏཾ ནདཱིསམུདྡཛཱཏསྶརཝིརཧིཏཔདེསཾ, ཏཾ སབྦཾ ཨརཉྙསཱིམཱཏི ཝེདིཏབྦཾ. སཱ ཙ སཏྟབྦྷནྟརསཱིམཾ ཝིནཱ སཡམེཝ སམཱནསཾཝཱསཱ བདྡྷསཱིམཱསདིསཱ, ནདཱིཨཱདིསཱིམཱསུ ཝིཡ སབྦམེཏྠ སངྒྷཀམྨཾ ཀཱཏུཾ ཝཊྚཏི. ནདཱིསམུདྡཛཱཏསྶརཱནཾ ཏཱཝ ཨཊྛཀཐཱཡཾ ‘‘ཨཏྟནོ སབྷཱཝེནེཝ བདྡྷསཱིམཱསདིསཱ’’ཏིཨཱདིནཱ ཝུཏྟཏྟཱ སཱིམཏཱ སིདྡྷཱ. ཨརཉྙསྶ པན སཱིམཏཱ ཀཐནྟི? སཏྟབྦྷནྟརསཱིམཱནུཛཱནནསུཏྟཱདིསཱམཏྠིཡཏོ. ཡཐཱ ཧི གཱམསཱིམཱཡ ཝགྒཀམྨཔརིཧཱརཏྠཾ བཧཱུ བདྡྷསཱིམཱཡོ ཨནུཉྙཱཏཱ, ཏཱསཉྩ དྭིནྣཾ ཨནྟརཱ ཨཉྙམཉྙཾ ཨསམྦྷེདཏྠཾ སཱིམནྟརིཀཱ ཨནུཉྙཱཏཱ, ཨེཝམིདྷ ཨརཉྙེཔི སཏྟབྦྷནྟརསཱིམཱ. ཏཱསཉྩ དྭིནྣཾ ཨནྟརཱཔི སཱིམནྟརིཀཱཡ པཱལི༹ཨཊྛཀཐཱསུ ཝིདྷཱནསཱམཏྠིཡཏོ ཨརཉྙསྶཔི སབྷཱཝེནེཝ ནདཱིཨཱདཱིནཾ ཝིཡ སཱིམབྷཱཝོ ཏཏྠ ཝགྒཀམྨཔརིཧཱརཏྠམེཝ སཏྟབྦྷནྟརསཱིམཱཡ ཨནུཉྙཱཏཏྟཱཝ སིདྡྷོཏི ཝེདིཏབྦཾ. ཏཏྠ སཱིམཱཡམེཝ ཧི ཋིཏཱ སཱིམཊྛཱནཾ ཝགྒཀམྨཾ ཀརོནྟི, ན ཨསཱིམཱཡཾ ཨཱཀཱསེ ཋིཏཱ ཝིཡ ཨཱཀཱསཊྛཱནཾ. ཨེཝམེཝ ཧི སཱམཏྠིཡཾ གཧེཏྭཱ ‘‘སབྦཱ, བྷིཀྑཝེ, ནདཱི ཨསཱིམཱ’’ཏིཨཱདིནཱ (མཧཱཝ. ༡༤༧) པཊིཀྑིཏྟབདྡྷསཱིམཱནམྤི ནདཱིསམུདྡཛཱཏསྶརཱནཾ ཨཏྟནོ སབྷཱཝེནེཝ སཱིམབྷཱཝོ ཨཊྛཀཐཱཡཾ (མཧཱཝ. ཨཊྛ. ༡༤༧) ཝུཏྟོཏི གཧེཏབྦོ.

ཨཐསྶ ¶ ཋིཏོཀཱསཏོཏི ཏསྶ བྷིཀྑུསྶ ཋིཏོཀཱསཏོ. སཙེཔི ཧི བྷིཀྑུསཧསྶཾ ཏིཊྛཏི, ཏསྶ ཋིཏོཀཱསསྶ བཱཧིརནྟཏོ པཊྛཱཡ བྷིཀྑཱུནཾ ཝགྒཀམྨཔརིཧཱརཏྠཾ སཱིམཱཔེཀྑཱཡ ཨུཔྤནྣཱཡ ཏཱཡ སཧ སཡམེཝ ཨུཔྤནྣཱ སཏྟབྦྷནྟརསཱིམཱ སམཱནསཾཝཱསཀཱཏི ཨདྷིཔྤཱཡོ. ཡཏྠ པན ཁུདྡཀེ ཨརཉྙེ མཧནྟེཧི བྷིཀྑཱུཧི པརིཔུཎྞཏཱཡ ཝགྒཀམྨསངྐཱབྷཱཝེན སཏྟབྦྷནྟརསཱིམཱཔེཀྑཱ ནཏྠི, ཏཏྠ སཏྟབྦྷནྟརསཱིམཱ ན ཨུཔྤཛྫཏི. ཀེཝལཱརཉྙསཱིམཱཡམེཝ, ཏཏྠ སངྒྷེན ཀམྨཾ ཀཱཏབྦཾ. ནདཱིཨཱདཱིསུཔི ཨེསེཝ ནཡོ. ཝཀྑཏི ཧི ‘‘སཙེ ནདཱི ནཱཏིདཱིགྷཱ ཧོཏི, པབྷཝཏོ པཊྛཱཡ ཡཱཝ མུཁདྭཱརཱ སབྦཏྠ སངྒྷོ ནིསཱིདཏི, ཨུདཀུཀྑེཔསཱིམཱཡ ཀམྨཾ ནཏྠཱི’’ཏིཨཱདི (ཝི. སངྒ. ཨཊྛ. ༡༦༧), ཨིམིནཱ ཨེཝ ཙ ཝཙནེན ¶ ཝགྒཀམྨཔརིཧཱརཏྠཾ སཱིམཱཔེཀྑཱཡ སཏི ཨེཝ ཨུདཀུཀྑེཔསཏྟབྦྷནྟརསཱིམཱ ཨུཔྤཛྫནྟི, ནཱསཏཱིཏི དཊྛབྦཾ.

ཀེཙི པན ‘‘སམནྟཱ ཨབྦྷནྟརཾ མིནིཏྭཱ པརིཙྪེདཀརཎེནེཝ སཱིམཱ སཉྫཱཡཏི, ན སཡམེཝཱ’’ཏི ཝདནྟི, ཏཾ ན གཧེཏབྦཾ. ཡདི ཧི ཨབྦྷནྟརཔརིཙྪེདཀརཎཔྤཀཱརེན སཱིམཱ ཨུཔྤཛྫེཡྻ, ཨབདྡྷསཱིམཱཝ ན སིཡཱ བྷིཀྑཱུནཾ ཀིརིཡཱཔཀཱརསིདྡྷིཏོ. ཨཔིཙ ཝཌྜྷཀིཧཏྠཱནཾ པཀཏིཧཏྠཱནཉྩ ལོཀེ ཨནེཀཝིདྷཏྟཱ, ཝིནཡེ ‘‘ཨཱིདིསཾ ཧཏྠཔམཱཎ’’ནྟི ཨཝུཏྟཏྟཱ ཙ ‘‘ཡེན ཀེནཙི མིནིཏེ བྷགཝཏཱ ཨནུཉྙཱཏེན ནུ ཁོ ཧཏྠེན མིནིཏཾ, ན ནུ ཁོ’’ཏི སཱིམཱཡ ཝིཔཏྟིསངྐཱ བྷཝེཡྻ, མིནནྟེཧི ཙ ཨནུམཏྟམྤི ཨཱུནམདྷིཀམཀཏྭཱ མིནིཏུཾ ཨསཀྐུཎེཡྻཏཱཡ ཝིཔཏྟི ཨེཝ སིཡཱ, པརིསཝསེན ཙཱཡཾ ཝཌྜྷམཱནཱ ཏེསཾ མིནནེན ཝཌྜྷཏི, ཧཱཡཏི ཝཱ. སངྒྷེ ཙ ཀམྨཾ ཀཏྭཱ གཏེ ཨཡཾ བྷིཀྑཱུནཾ པཡོགེན སམུཔྤནྣཱ སཱིམཱ ཏེསཾ པཡོགེན ཝིགཙྪཏི ན ཝིགཙྪཏི ཙ, ཀཐཾ བདྡྷསཱིམཱ ཝིཡ ཡཱཝ སཱསནནྟརདྷཱནཱ ན ཏིཊྛེཡྻ, ཋིཏིཡཱ ཙ པུརཱཎཝིཧཱརེསུ ¶ ཝིཡ སཀལེཔི ཝིསུཾ ཨརཉྙེ ཀཏསཱིམཱ སམྦྷེདསངྐཱ ན བྷཝེཡྻ, ཏསྨཱ སཱིམཱཔེཀྑཱཡ ཨེཝ སམུཔྤཛྫཏི, ཏབྦིགམེན ཝིགཙྪཏཱིཏི གཧེཏབྦཾ. ཡཐཱ ཙེཏྠ, ཨེཝཾ ཨུདཀུཀྑེཔསཱིམཱཡམྤི ནདཱིཨཱདཱིསུཔི.

ཏཏྠཱཔི ཧི མཛ྄ཛྷིམཔུརིསོ ན པཉྙཱཡཏི, ཏཐཱ སབྦཐཱམེན ཁིཔནཾ, ཨུབྷཡཏྠཔི ཙ ཡསྶཾ དིསཱཡཾ སཏྟབྦྷནྟརསྶ, ཨུདཀུཀྑེཔསྶ ཝཱ ཨོཀཱསོ ནཔྤཧོཏི, ཏཏྠ ཀཐཾ མིནནཾ, ཁིཔནཾ ཝཱ བྷཝེཡྻ, གཱམཀྑེཏྟཱདཱིསུ པཝིསནཏོ ཨཁེཏྟེ སཱིམཱ པཝིཊྛཱ ཀིནྣཱམ སཱིམཱ ན ཝིཔཛྫེཡྻ. ཨཔེཀྑཱཡ སཱིམུཔྤཏྟིཡཾ པན ཡཏོ པཧོཏི, ཏཏྠ སཏྟབྦྷནྟརཨུདཀུཀྑེཔསཱིམཱ སཡམེཝ པརིཔུཎྞཱ ཛཱཡནྟི. ཡཏོ པན ནཔྤཧོཏི, ཏཏྠ ཨཏྟནོ ཁེཏྟཔྤམཱཎེནེཝ ཛཱཡནྟི, ན བཧི. ཡཾ པནེཏྠ ཨབྦྷནྟརམིནནཔྤམཱཎསྶ ཝཱལུཀཱདིཁིཔནཀམྨསྶ ཙ དསྶནཾ, ཏཾ སཡཾཛཱཏསཱིམཱནཾ ཋིཏཊྛཱནསྶ པརིཙྪེདནཏྠཾ ཀཏཾ གཱམཱུཔཙཱརགྷརཱུཔཙཱརཛཱནནཏྠཾ ལེཌྜུསུཔྤཱདིཁིཔནཝིདྷཱནདསྶནཾ ཝིཡ. ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. ཨཱུནཝཱིསཏིཝསྶསིཀྑཱཔདཝཎྞནཱ) ‘‘སཱིམཾ ཝཱ སམྨནྣཏི, ཨུདཀུཀྑེཔཾ ཝཱ པརིཙྪིནྡཏཱི’’ཏི ཝུཏྟཾ. ཨེཝཾ ཀཏེཔི ཏསྶ པརིཙྪེདསྶ ཡཱཐཱཝཏོ ཉཱཏུཾ ཨསཀྐུཎེཡྻཏྟེན པུཐུལཏོ ཉཏྭཱ ཨནྟོ ཏིཊྛནྟེཧི ནིརཱསངྐཊྛཱནེ ཋཱཏབྦཾ, ཨཉྙཾ བཧི ཀརོནྟེཧི ཨཏིདཱུརེ ནིརཱསངྐཊྛཱནེ པེསེཏབྦཾ.

ཨཔརེ ¶ པན ‘‘སཱིམཱཔེཀྑཱཡ ཀིཙྩཾ ནཏྠི, མགྒགམནནཧཱནཱདིཨཏྠེཧི ཨེཀབྷིཀྑུསྨིམྤི ཨརཉྙེ ཝཱ ནདཱིཨཱདཱིསུ ཝཱ པཝིཊྛེ ཏཾ པརིཀྑིཔིཏྭཱ སཏྟབྦྷནྟརཨུདཀུཀྑེཔསཱིམཱ སཡམེཝ པབྷཱ ཝིཡ པདཱིཔསྶ སམུཔྤཛྫཏི. གཱམཀྑེཏྟཱདཱིསུ ཏསྨིཾ ཨོཏིཎྞམཏྟེ ཝིགཙྪཏི. ཏེནེཝེཏྠ དྭིནྣཾ སངྒྷཱནཾ ཝིསུཾ ཀམྨཾ ཀརོནྟཱནཾ སཱིམཱདྭཡསྶ ཨནྟརཱ སཱིམནྟརིཀཾ ཨཉྙཾ སཏྟབྦྷནྟརཾ ཨུདཀུཀྑེཔཉྩ ཋཔེཏུཾ ཨནུཉྙཱཏཾ. སཱིམཱཔརིཡནྟེ ཧི ཀེནཙི ཀམྨེན ¶ པེསིཏསྶ བྷིཀྑུནོ སམནྟཱ སཉྫཱཏཱ སཱིམཱ ཨིཏརེསཾ སཱིམཱཡ ཕུསིཏྭཱ སཱིམཱསམྦྷེདཾ ཀརེཡྻ, སོ མཱ ཧོཏཱུཏི ཝཱ, ཨིཏརཐཱ ཧཏྠཙཏུརངྒུལམཏྟཱཡཔེཏྠ སཱིམནྟརིཀཱཡ ཨནུཛཱནིཏབྦཏོ. ཨཔིཙ སཱིམནྟརིཀཱཡ ཋིཏསྶ ཨུབྷཡཏྠ ཀམྨཀོཔཝཙནཏོཔི ཙེཏཾ སིཛ྄ཛྷཏི ཏམྤི པརིཀྑིཔིཏྭཱ སཡམེཝ སཉྫཱཏཱཡ སཱིམཱཡ ཨུབྷིནྣམྤི སཱིམཱནཾ, ཨེཀཱཡ ཨེཝ ཝཱ སངྐརཏོ. ཨིཏརཐཱ ཏསྶ ཀམྨཀོཔཝཙནཾ ན ཡུཛྫེཡྻ. ཝུཏྟཉྷི མཱཏིཀཱཊྛཀཐཱཡཾ (ཀངྑཱ. ཨཊྛ. ནིདཱནཝཎྞནཱ) ‘པརིཙྪེདབྦྷནྟརེ ཧཏྠཔཱསཾ ཝིཛཧིཏྭཱ ཋིཏོཔི པརིཙྪེདཏོ བཧི ཨཉྙཾ ཏཏྟཀཾཡེཝ པརིཙྪེདཾ ཨནཏིཀྐམིཏྭཱ ཋིཏོཔི ཀམྨཾ ཀོཔེཏཱི’ཏི. ཀིཉྩ ཨགཱམཀཱརཉྙེ ཋིཏསྶ ཀམྨཀརཎིཙྪཱཝིརཧིཏསྶཔི བྷིཀྑུནོ སཏྟབྦྷནྟརཔརིཙྪིནྣེ ཨབྦྷོཀཱསེ ཙཱིཝརཝིཔྤཝཱསོ བྷགཝཏཱ ཨནུཉྙཱཏོ, སོ ཙ པརིཙྪེདོ སཱིམཱ, ཨེཝཾ ཨཔེཀྑཾ ཝིནཱ སམུཔྤནྣཱ. ཏེནེཝེཏྠ ‘ཨཡཾ སཱིམཱ ཙཱིཝརཝིཔྤཝཱསཔརིཧཱརམྤི ལབྷཏཱི’ཏི (མཧཱཝ. ཨཊྛ. ༡༤༧) ཝུཏྟཾ, ཏསྨཱ ཀམྨཀརཎིཙྪཾ ཝིནཱཔི ཝུཏྟནཡེན སམུཔྤཏྟི གཧེཏབྦཱ’’ཏི ཝདནྟི. ཏཾ ན ཡུཏྟཾ པདཱིཔཔབྷཱ ཝིཡ སབྦཔུགྒལཱནམྤི པཙྩེཀཾ སཱིམཱསམྦྷཝེན སངྒྷེ, གཎེ ཝཱ ཀམྨཾ ཀརོནྟེ ཏཏྠ ཋིཏཱནཾ བྷིཀྑཱུནཾ སམནྟཱ པཙྩེཀཾ སམུཔྤནྣཱནཾ ཨནེཀསཱིམཱནཾ ཨཉྙམཉྙཾ སངྐརདོསཔྤསངྒཏོ. པརིསཝསེན ཙསྶཱ ཝཌྜྷི ཧཱནི ཙ སམྦྷཝཏི, པཙྪཱ ཨཱགཏཱནཾ ཨབྷིནཝསཱིམནྟརུཔྤཏྟི ཨེཝ, གཏཱནཾ སམནྟཱ ཋིཏསཱིམཱཝིནཱསོ ཙ བྷཝེཡྻ.

པཱལི༹ཡཾ (མཧཱཝ. ༡༤༧) པན ‘‘སམནྟཱ སཏྟབྦྷནྟརཱ, ཨཡཾ ཏཏྠ སམཱནསཾཝཱསཱ’’ཏིཨཱདིནཱ ཨེཀཱ ཨེཝ སཏྟབྦྷནྟརཱ ཨུདཀུཀྑེཔཱ ཙ ཨནུཉྙཱཏཱ, ན ཙེསཱ སཱིམཱ སབྷཱཝེན, ཀཱརཎསཱམཏྠིཡེན ཝཱ པབྷཱ ཝིཡ པདཱིཔསྶ ཨུཔྤཛྫཏི, ཀིནྟུ ¶ བྷགཝཏོ ཨནུཛཱནནེནེཝ. བྷགཝཱ ཙ ཨིམཱ ཨནུཛཱནནྟོ བྷིཀྑཱུནཾ ཝགྒཀམྨཔརིཧཱརེན ཀམྨཀརཎསུཁཏྠམེཝ ཨནུཉྙཱསཱིཏི ཀཐཾ ནཧཱནཱདིཀིཙྩེན པཝིཊྛཱནམྤི སམནྟཱ ཏཱསཾ སཱིམཱནཾ སམུཔྤཏྟི པཡོཛནཱབྷཱཝཱ, པཡོཛནེ ཙ ཨེཀཾ ཨེཝ པཡོཛནནྟི ཀཐཾ པཙྩེཀཾ བྷིཀྑུགཎནཱཡ ཨནེཀསཱིམཱསམུཔྤཏྟི. ‘‘ཨེཀསཱིམཱཡ ཧཏྠཔཱསཾ ཨཝིཛཧིཏྭཱ ཋིཏཱ’’ཏི (ཀངྑཱ. ཨཊྛ. ནིདཱནཝཎྞནཱ) ཧི ¶ ཝུཏྟཾ. ཡཾ པན དྭིནྣཾ སཱིམཱནཾ ཨནྟརཱ ཏཏྟཀཔརིཙྪེདེནེཝ སཱིམནྟརིཀཱཋཔནཝཙནཾ, ཏཏྠ ཋིཏཱནཾ ཀམྨཀོཔཝཙནཉྩ, ཏམྤི ཨིམཱསཾ སཱིམཱནཾ པརིཙྪེདསྶ དུབྦོདྷཏཱཡ སཱིམཱཡ སམྦྷེདསངྐཾ ཀམྨཀོཔསངྐཉྩ དཱུརཏོ པརིཧརིཏུཾ ཝུཏྟཾ.

ཡོ ཙ ཙཱིཝརཝིཔྤཝཱསཏྠཾ བྷགཝཏཱ ཨབྦྷོཀཱསེ དསྶིཏོ སཏྟབྦྷནྟརཔརིཙྪེདོ, སོ སཱིམཱ ཨེཝ ན ཧོཏི, ཁེཏྟཏལཱ༹ཀཱདིཔརིཙྪེདོ ཝིཡ ཨཡམེཏྠ ཨེཀོ པརིཙྪེདོཝ. ཏཏྠ ཙ བཧཱུསུ བྷིཀྑཱུསུ ཨེཀཏོ ཋིཏེསུ ཏེསཾ ཝིསུཾ ཝིསུཾ ཨཏྟནོ ཋིཏཊྛཱནཏོ པཊྛཱཡ སམནྟཱ སཏྟབྦྷནྟརཔརིཙྪེདབྦྷནྟརེ ཨེཝ ཙཱིཝརཾ ཋཔེཏབྦཾ, ན པརིསཔརིཡནྟཏོ. པརིསཔརིཡནྟཏོ པཊྛཱཡ ཧི ཨབྦྷནྟརེ གཡ྄ཧམཱནེ སཏྟབྦྷནྟརཔརིཡོསཱནེ ཋཔིཏཙཱིཝརཾ མཛ྄ཛྷེ ཋིཏསྶ སཏྟབྦྷནྟརཏོ བཧི ཧོཏཱིཏི ཏཾ ཨརུཎུགྒམནེ ནིསྶགྒིཡཾ སིཡཱ. སཱིམཱ པན པརིསཔརིཡནྟཏོཝ གཧེཏབྦཱ. ཙཱིཝརཝིཔྤཝཱསཔརིཧཱརོཔེཏྠ ཨཛ྄ཛྷོཀཱསཔརིཙྪེདསྶ ཝིཛྫམཱནཏྟཱ ཝུཏྟོ, ན པན ཡཱཝ སཱིམཱཔརིཙྪེདཾ ལབྦྷམཱནཏྟཱ མཧཱསཱིམཱཡ ཨཝིཔྤཝཱསསཱིམཱཝོཧཱརོ ཝིཡ. མཧཱསཱིམཱཡམྤི ཧི གཱམགཱམཱུཔཙཱརེསུ ཙཱིཝརཾ ནིསྶགྒིཡཾ ཧོཏི, ཨིདྷཱཔི མཛ྄ཛྷེ ཋིཏསྶ སཱིམཱཔརིཡནྟེ ནིསྶགྒིཡཾ ཧོཏི, ཏསྨཱ ཡཐཱཝུཏྟསཱིམཱཔེཀྑཱཝསེནེཝ ཏཱསཾ སཏྟབྦྷནྟརཨུདཀུཀྑེཔསཱིམཱནཾ ཨུཔྤཏྟི, ཏབྦིགམེན ཝིནཱསོ ཙ གཧེཏབྦོཏི ¶ ཨམྷཱཀཾ ཁནྟི, ཝཱིམཾསིཏྭཱ གཧེཏབྦཾ. ཨཉྙོ ཝཱ པཀཱརོ ཨིཏོ ཡུཏྟཏརོ གཝེསིཏབྦོ.

ཨིདྷ པན ‘‘ཨརཉྙེ སམནྟཱ སཏྟབྦྷནྟརཱ’’ཏི ཨེཝཾ པཱལི༹ཡཾ (མཧཱཝ. ༡༤༧), ‘‘ཝིཉྫྷཱཊཝིསདིསེ ཨརཉྙེ སམནྟཱ སཏྟབྦྷནྟརཱ’’ཏི ཨཊྛཀཐཱཡཉྩ (མཧཱཝ. ཨཊྛ. ༡༤༧) རུཀྑཱདིནིརནྟརེཔི ཨརཉྙེ སཏྟབྦྷནྟརསཱིམཱཡ ཝིཧིཏཏྟཱ ཨཏྟནོ ནིསྶཡབྷཱུཏཱཡ ཨརཉྙསཱིམཱཡ སཧ ཨེཏིསྶཱ རུཀྑཱདིསམྦནྡྷེ དོསཱབྷཱཝོ, པགེཝ ཨགཱམཀེ རུཀྑེཏི ནིསྶིཏེཔི པདེསེ ཙཱིཝརཝིཔྤཝཱསསྶ རུཀྑཔརིཧཱརཾ ཝིནཱཝ ཨཛ྄ཛྷོཀཱསཔརིཧཱརོ ཙ ཨནུམཏོཏི སིདྡྷོཏི ཝེདིཏབྦཾ.

ཨུཔཙཱརཏྠཱཡཱཏི སཱིམནྟརིཀཏྠཱཡ. སཏྟབྦྷནྟརཏོ ཨདྷིཀཾ ཝཊྚཏི, ཨཱུནཀཾ པན ན ཝཊྚཏི ཨེཝ སཏྟབྦྷནྟརཔརིཙྪེདསྶ དུབྦིཛཱནཏྟཱ. ཏསྨཱ སངྒྷཾ ཝིནཱ ཨེཀེནཔི བྷིཀྑུནཱ བཧི ཏིཊྛནྟེན ཨཉྙཾ སཏྟབྦྷནྟརཾ ཨཏིཀྐམིཏྭཱ དཱུརེ ཨེཝ ཋཱཏབྦཾ. ཨིཏརཐཱ ཀམྨཀོཔསངྐརཏོ. ཨུདཀུཀྑེཔེཔི ཨེསེཝ ནཡོ. ཏེནེཝ ཝཀྑཏི ‘‘ཨཱུནཀཾ པན ན ཝཊྚཏཱི’’ཏི (ཝི. སངྒ.ཨཊྛ. ༡༦༧). ཨིདཉྩེཏྠ ¶ སཱིམནྟརིཀཱཝིདྷཱནཾ དྭིནྣཾ བདྡྷསཱིམཱནཾ སཱིམནྟརིཀཱནུཛཱནནསུཏྟཱནུལོམཏོ སིདྡྷནྟི དཊྛབྦཾ. ཀིཉྩཱཔི ཧི བྷགཝཏཱ ནིདཱནཝསེན ཨེཀགཱམནིསྶིཏཱནཾ ཨེཀསབྷཱགཱནཉྩ དྭིནྣཾ བདྡྷསཱིམཱནམེཝ ཨཉྙམཉྙཾ སམྦྷེདཨཛ྄ཛྷོཏྠརཎདོསཔརིཧཱརཱཡ སཱིམནྟརིཀཱ ཨནུཉྙཱཏཱ, ཏཐཱཔི ཏདནུལོམཏོ ཨེཀཾ ཨརཉྙསཱིམཾ ནདཱིཨཱདིསཱིམཉྩ ནིསྶིཏཱནཾ ཨེཀསབྷཱགཱནཾ དྭིནྣཾ སཏྟབྦྷནྟརསཱིམཱནམྤི ཨུདཀུཀྑེཔསཱིམཱནམྤི ཨཉྙམཉྙཾ སམྦྷེདཛ྄ཛྷོཏྠརཎཾ, སཱིམནྟརིཀཾ ཝིནཱ ཨབྱཝདྷཱནེན ཋཱནཉྩ བྷགཝཏཱ ཨནབྷིམཏམེཝཱཏི ཉཏྭཱ ཨཊྛཀཐཱཙརིཡཱ ཨིདྷཱཔི སཱིམནྟརིཀཱཝིདྷཱནམཀཾསུ. ཝིསབྷཱགསཱིམཱནམྤི ཧི ཨེཀསཱིམཱནིསྶིཏཏྟཾ ཨེཀསབྷཱགཏྟཉྩཱཏི དྭཱིཧངྒེཧི སམནྣཱགམེ སཏི ¶ ཨེཝ སཱིམནྟརིཀཾ ཝིནཱ ཋཱནཾ སམྦྷེདཱཡ ཧོཏི, ནཱསཏཱིཏི དཊྛབྦཾ. སཱིམནྟརིཀཝིདྷཱནསཱམཏྠིཡེནེཝ ཙེཏཱསཾ རུཀྑཱདིསམྦནྡྷོཔི བདྡྷསཱིམཱ ཝིཡ ཨཉྙམཉྙཾ ན ཝཊྚཏཱིཏི ཨཡམྤི ནཡཏོ དསྶིཏོཝཱཏི གཧེཏབྦཾ.

༡༦༧. སབྷཱཝེནེཝཱཏི ཨིམིནཱ གཱམསཱིམཱ ཝིཡ ཨབདྡྷསཱིམཱཏི དསྶེཏི. སབྦམེཏྠ སངྒྷཀམྨཾ ཀཱཏུཾ ཝཊྚཏཱིཏི སམཱནསཾཝཱསཱ ཨེཀཱུཔོསཐཱཏི དསྶེཏི. ཡེན ཀེནཙཱིཏི ཨནྟམསོ སཱུཀརཱདིནཱ སཏྟེན. མཧོགྷེན པན ཨུཎྞཏཊྛཱནཏོ ནིནྣཊྛཱནེ པཏནྟེན ཁཏོ ཁུདྡཀོ ཝཱ མཧནྟོ ཝཱ ལཀྑཎཡུཏྟོ ‘‘ཛཱཏསྶརོ’’ཏྭེཝ ཝུཙྩཏི. ཨེཏྠཔི ཁུདྡཀེ ཨུདཀུཀྑེཔཀིཙྩཾ ནཏྠི. སམུདྡེ པན སབྦཏྠ ཨུདཀུཀྑེཔསཱིམཱཡམེཝ ཀམྨཾ ཀཱཏབྦཾ སོདྷེཏུཾ དུཀྐརཏྟཱ. པུན ཏཏྠཱཏི ལོཀཝོཧཱརསིདྡྷཱིསུ ཨེཝ ཏཱསུ ནདཱིཨཱདཱིསུ ཏཱིསུ ཨབདྡྷསཱིམཱསུ པུན ཝགྒཀམྨཔརིཧཱརཏྠཾ སཱསནཝོཧཱརསིདྡྷཱཡ ཨབདྡྷསཱིམཱཡ པརིཙྪེདཾ དསྶེནྟོཏི ཨདྷིཔྤཱཡོ. པཱལི༹ཡཾ (མཧཱཝ. ༡༤༧) ‘‘ཡཾ མཛ྄ཛྷིམསྶ པུརིསསྶཱ’’ཏིཨཱདཱིསུ ཨུདཀཾ ཨུཀྑིཔིཏྭཱ ཁིཔཱིཡཏི ཨེཏྠཱཏི ཨུདཀུཀྑེཔོ, ཨུདཀསྶ པཏནོཀཱསོ, ཏསྨཱ ཨུདཀུཀྑེཔཱ, ཨཡཉྷེཏྠ པདསམྦནྡྷཝསེན ཨཏྠོ – པརིསཔརིཡནྟཏོ པཊྛཱཡ སམནྟཱ ཡཱཝ མཛ྄ཛྷིམསྶ པུརིསསྶ ཨུདཀུཀྑེཔོ ཨུདཀསྶ པཏནཊྛཱནཾ, ཏཱཝ ཡཾ ཏཾ པརིཙྪིནྣཊྛཱནཾ, ཨཡཾ ཏཏྠ ནདཱིཨཱདཱིསུ ཨཔརཱ སམཱནསཾཝཱསཱ ཨུདཀུཀྑེཔསཱིམཱཏི.

ཏསྶ ཨནྟོཏི ཏསྶ ཨུདཀུཀྑེཔཔརིཙྪིནྣསྶ ཋཱནསྶ ཨནྟོ. ན ཀེཝལཉྩ ཏསྶེཝ ཨནྟོ, ཏཏོ བཧིཔི, ‘‘ཨེཀསྶ ཨུདཀུཀྑེཔསྶ ཨནྟོ ཋཱཏུཾ ན ཝཊྚཏཱི’’ཏི ཝཙནཾ ཨུདཀུཀྑེཔཔརིཙྪེདསྶ དུབྦིཛཱནཏོ ཀམྨཀོཔསངྐཱ ཧོཏཱིཏི ¶ . ཏེནེཝ མཱཏིཀཱཊྛཀཐཱཡཾ (ཀངྑཱ. ཨཊྛ. ནིདཱནཝཎྞནཱ) ‘‘པརིཙྪེདབྦྷནྟརེ ཧཏྠཔཱསཾ ཝིཛཧིཏྭཱ ཋིཏོཔི པརིཙྪེདཏོ བཧི ¶ ཨཉྙཾ ཏཏྟཀཾཡེཝ པརིཙྪེདཾ ཨནཏིཀྐམིཏྭཱ ཋིཏོཔི ཀམྨཾ ཀོཔེཏི, ཨིདཾ སབྦཨཊྛཀཐཱསུ སནྣིཊྛཱན’’ནྟི ཝུཏྟཾ. ཡཾ པནེཏྠ སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༤༧) ‘‘ཏསྶ ཨནྟོཧཏྠཔཱསཾ ཝིཛཧིཏྭཱ ཋིཏོ ཀམྨཾ ཀོཔེཏཱིཏི ཨིམིནཱ པརིཙྪེདཏོ བཧི ཡཏྠ ཀཏྠཙི ཋིཏོ ཀམྨཾ ན ཀོཔེཏཱི’’ཏི ཝཏྭཱ མཱཏིཀཱཊྛཀཐཱཝཙནམྤི པཊིཀྑིཔིཏྭཱ ‘‘ནེཝ པཱལི༹ཡཾ ན ཨཊྛཀཐཱཡཾ ཨུཔལབྦྷཏཱི’’ཏིཨཱདི བཧུ པཔཉྩིཏཾ, ཏཾ ན སུནྡརཾ ཨིདྷ ཨཊྛཀཐཱཝཙནེན མཱཏིཀཱཊྛཀཐཱཝཙནསྶ ནཡཏོ སཾསནྡནཏོ སངྒྷཊནཏོ. ཏཐཱ ཧི དྭིནྣཾ ཨུདཀུཀྑེཔཔཨཙྪེདཱནམནྟརཱ ཝིདཏྠིཙཏུརངྒུལམཏྟམྤི སཱིམནྟརིཀཾ ཨཋཔེཏྭཱ ‘‘ཨཉྙོ ཨུདཀུཀྑེཔོ སཱིམནྟརིཀཱཡ ཋཔེཏབྦོ, ‘‘ཏཏོ ཨདྷིཀཾ ཝཊྚཏི ཨེཝ, ཨཱུནཀཾ པན ན ཝཊྚཏཱི’’ཏི ཨེཝཾ ཨིདྷེཝ ཝུཏྟེན ཨིམིནཱ ཨཊྛཀཐཱཝཙནེན སཱིམནྟརིཀོཔཙཱརེ ཨུདཀུཀྑེཔཏོ ཨཱུནཀེ ཋཔིཏེ སཱིམཱཡ སཱིམཱསམྦྷེདཏོ ཀམྨཀོཔོཔི ཝུཏྟོ ཨེཝ. ཡདགྒེན ཙ ཨེཝཾ ཝུཏྟོ, ཏདགྒེན ཙ ཏཏྠ ཨེཀབྷིཀྑུནོ པཝེསེཔི སཏི ཏསྶ སཱིམཊྛབྷཱཝཏོ ཀམྨཀོཔོ ཝུཏྟོ ཨེཝ ཧོཏི. ཨཊྛཀཐཱཡཾ ‘‘ཨཱུནཀཾ པན ན ཝཊྚཏཱི’’ཏི ཀཐནཉྩེཏཾ ཨུདཀུཀྑེཔཔརིཙྪེདསྶ དུབྦིཛཱནནྟེནཔི སཱིམཱསམྦྷེདསངྐཱཔརིཧཱརཏྠཾ ཝུཏྟཾ. སཏྟབྦྷནྟརསཱིམཱནམནྟརཱ ཏཏྟཀཔརིཙྪེདེནེཝ སཱིམནྟརིཀཝིདྷཱནཝཙནཏོཔི ཨེཏཱསཾ དུབྦིཛཱནཔརིཙྪེདཏཱ, ཏཏྠ ཙ ཋིཏཱནཾ ཀམྨཀོཔསངྐཱ སིཛ྄ཛྷཏི. ཀམྨཀོཔསངྐཊྛཱནམྤི ཨཱཙརིཡཱ དཱུརཏོ པརིཧཱརཏྠཾ ‘‘ཀམྨཀོཔཊྛཱན’’ནྟི ཝཏྭཱཝ ཋཔེསུནྟི གཧེཏབྦཾ.

སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༤༧) པན – ཨཔརིཙྪིནྣཱཡཱཏི བདྡྷསཱིམཱཝསེན ཨཀཏཔརིཙྪེདཱཡ. ཡེན ཀེནཙི ཁཎིཏྭཱ ཨཀཏོཏི ཨནྟམསོ ¶ ཏིརཙྪཱནེནཔི ཁཎིཏྭཱ ཨཀཏོ. ཏསྶ ཨནྟོཧཏྠཔཱསཾ ཝིཛཧིཏྭཱ ཋིཏོ ཀམྨཾ ཀོཔེཏཱིཏི ཨིམིནཱ པརིཙྪེདཏོ བཧི ཡཏྠ ཀཏྠཙི ཋིཏོ ཀམྨཾ ན ཀོཔེཏཱིཏི དཱིཔེཏི. ཡཾ པན ཝུཏྟཾ མཱཏིཀཱཊྛཀཐཱཡཾ (ཀངྑཱ. ཨཊྛ. ནིདཱནཝཎྞནཱ) ‘‘པརིཙྪེདབྦྷནྟརེ ཧཏྠཔཱསཾ ཝིཛཧིཏྭཱ ཋིཏོཔི པརིཙྪེདཏོ བཧི ཨཉྙཾ ཏཏྟཀཾཡེཝ པརིཙྪེདཾ ཨནཏིཀྐམིཏྭཱ ཋིཏོཔི ཀམྨཾ ཀོཔེཏི, ཨིདཾ སབྦཨཊྛཀཐཱསུ སནྣིཊྛཱན’’ནྟི. ཏཏྠ ཨཉྙཾ ཏཏྟཀཾཡེཝ པརིཙྪེདཾ ཨནཏིཀྐམིཏྭཱ ཋིཏོཔི ཀམྨཾ ཀོཔེཏཱིཏི ཨིདཾ ནེཝ པཱལི༹ཡཾ, ན ཨཊྛཀཐཱཡཾ ཨུཔལབྦྷཏི, ཡདི ཙེཏཾ དྭིནྣཾ སངྒྷཱནཾ ཝིསུཾ ཨུཔོསཐཱདིཀམྨཀརཎཱདྷིཀཱརེ ཝུཏྟཏྟཱ ཨུདཀུཀྑེཔཏོ བཧི ཨཉྙཾ ཨུདཀུཀྑེཔཾ ཨནཏིཀྐམིཏྭཱ ཨུཔོསཐཱདིཀརཎཏྠཾ ཋིཏོ སངྒྷོ སཱིམཱསམྦྷེདསམྦྷཝཏོ ཀམྨཾ ཀོཔེཏཱིཏི ཨིམིནཱ ཨདྷིཔྤཱཡེན ཝུཏྟཾ སིཡཱ, ཨེཝམྤི ཡུཛྫེཡྻ. ཏེནེཝ མཱཏིཀཱཊྛཀཐཱཡ ལཱིནཏྠཔྤཀཱསནིཡཾ (ཀངྑཱ. ཊཱི. ནིདཱནཝཎྞནཱ) ཝུཏྟཾ ¶ ‘‘ཨཉྙཾ ཏཏྟཀཾཡེཝ པརིཙྪེདནྟི དུཏིཡཾ ཨུདཀུཀྑེཔཾ ཨནཏིཀྐནྟོཔི ཀོཔེཏི. ཀསྨཱ? ཨཏྟནོ ཨུདཀུཀྑེཔསཱིམཱཡ པརེསཾ ཨུདཀུཀྑེཔསཱིམཱཡ ཨཛ྄ཛྷོཏྠཊཏྟཱ སཱིམཱསམྦྷེདོ ཧོཏི, ཏསྨཱ ཀོཔེཏཱི’’ཏི. ‘‘ཨིདཾ སབྦཨཊྛཀཐཱསུ སནྣིཊྛཱན’’ནྟི ཙ ཨིམིནཱཝ ཨདྷིཔྤཱཡེན ཝུཏྟནྟི གཧེཏབྦཾ སབྦཱསུཔི ཨཊྛཀཐཱསུ སཱིམཱསམྦྷེདསྶ ཨནིཙྪིཏཏྟཱ. ཏེནེཝ ཧི ‘‘ཨཏྟནོ ཙ ཨཉྙེསཉྩ ཨུདཀུཀྑེཔཔརིཙྪེདསྶ ཨནྟརཱ ཨཉྙོ ཨུདཀུཀྑེཔོ སཱིམནྟརིཀཏྠཱཡ ཋཔེཏབྦོ’’ཏི ཝུཏྟཾ. ཨཉྙེ པནེཏྠ ཨཉྙཐཱཔི པཔཉྩེནྟི, ཏཾ ན གཧེཏབྦཾ.

སབྦཏྠ སངྒྷོ ནིསཱིདཏཱིཏི ཧཏྠཔཱསཾ ཨཝིཛཧིཏྭཱ ནིསཱིདཏི. ཨུདཀུཀྑེཔསཱིམཱཡ ཀམྨཾ ནཏྠཱིཏི ཡསྨཱ སབྦོཔི ནདཱིཔདེསོ བྷིཀྑཱུཧི ཨཛ྄ཛྷོཏྠཊོ, ཏསྨཱ སམནྟཏོ ནདིཡཱ ¶ ཨབྷཱཝཱ ཨུདཀུཀྑེཔཔྤཡོཛནཾ ནཏྠི. ཨུདཀུཀྑེཔཔྤམཱཎཱ སཱིམནྟརིཀཱ སུཝིཉྙེཡྻཏརཱ ཧོཏི, སཱིམཱསམྦྷེདསངྐཱ ཙ ན སིཡཱཏི སཱམཱིཙིདསྶནཏྠཾ ‘‘ཨཉྙོ ཨུདཀུཀྑེཔོ སཱིམནྟརིཀཏྠཱཡ ཋཔེཏབྦོ’’ཏི ཝུཏྟཾ. ཡཏྟཀེན པན སཱིམཱསམྦྷེདོ ན ཧོཏི, ཏཏྟཀཾ ཋཔེཏུཾ ཝཊྚཏིཡེཝ. ཏེནེཝཱཧུ པོརཱཎཱ ‘‘ཡཏྟཀེན སཱིམཱསམྦྷེདོ ན ཧོཏི, ཏཏྟཀམྤི ཋཔེཏུཾ ཝཊྚཏཱི’’ཏི. ཨཱུནཀཾ པན ན ཝཊྚཏཱིཏི ཨིདམྤི ཨུདཀུཀྑེཔསཱིམཱཡ པརིསཝསེན ཝཌྜྷནཏོ སཱིམཱསམྦྷེདསངྐཱ སིཡཱཏི ཏནྣིཝཱརཎཏྠམེཝ ཝུཏྟནྟི ཝུཏྟཾ.

ཝཛིརབུདྡྷིཊཱིཀཱཡམྤི (ཝཛིར. ཊཱི. མཧཱཝགྒ ༡༤༧) – ཡཾ མཛ྄ཛྷིམསྶ པུརིསསྶ སམནྟཱ ཨུདཀུཀྑེཔཱཏི པན ཨེཏིསྶཱ ནདིཡཱ ཙཏུཝགྒཱདཱིནཾ སངྒྷཱནཾ ཝིསུཾ ཙཏུཝགྒཀརཎཱིཡཱདིཀམྨཀརཎཀཱལེ སཱིམཱཔརིཙྪེདདསྶནཏྠཾ ཝུཏྟཾ ཏིཙཱིཝརེན ཝིཔྤཝཱསཱཝིཔྤཝཱསཔརིཙྪེདདསྶནཏྠམྤི སཏྟབྦྷནྟརསཱིམཱཡ པརིཙྪེདདསྶནཾ ཝིཡཱཏི ཨཱཙརིཡཱ, ཏསྨཱ ཨུདཀུཀྑེཔཔརིཙྪེདཱབྷཱཝེཔི ཨནྟོནདིཡཾ ཀམྨཾ ཀཱཏུཾ ཝཊྚཏཱིཏི སིདྡྷཾ. ཨཡཾ པན ཝིསེསོ – ཏཏྠ ནཱཝཱགཏོ ཙེ, ནཱཝཱཡཾ ཝུཏྟནཡེན, སཏྠགཏོ ཙེ, སཏྠེ ཝུཏྟནཡེན. སོ ཙེ ཨཏིརེཀཙཱཏུམཱསནིཝུཏྠོ ཙེ, གཱམེ ཝུཏྟནཡེན ཏིཙཱིཝརཱཝིཔྤཝཱསོ ཝེདིཏབྦོ. ཏཏྠཱཔི ཨཡཾ ཝིསེསོ – སཙེ སཏྠོ ཨུདཀུཀྑེཔསྶ ཨནྟོ ཧོཏི, ཨུདཀུཀྑེཔསཱིམཱ པམཱཎནྟི ཨེཀེ. སཏྠོཝ པམཱཎནྟི ཨཱཙརིཡཱ. སཙེ པནེཏྠ བཧཱུ བྷིཀྑཱུཏིཨཱདིམྷི ཀེཙི ཨདྷིཊྛཱནུཔོསཐཾ, ཀེཙི གཎུཔོསཐཾ, ཀེཙི སངྒྷུཔོསཐནྟི ཝཏྟུཀཱམཏཱཡ ‘‘བཧཱུ སངྒྷཱ’’ཏི ཨཝཏྭཱ ‘‘བྷིཀྑཱུ’’ཏི ཝུཏྟཾ. ཨཱུནཀཾ པན ན ཝཊྚཏཱིཏི ཨེཏྠ སཱིམཱསམྦྷེདསམྦྷཝཏོཏི ཨུཔཏིསྶཏྠེརོ. ཋཔེནྟེ ཧི ཨཱུནཀཾ ན ཋཔེཏབྦཾ, ‘‘ཨཊྛཔེཏུམྤི ཝཊྚཏི ཨེཝཱ’’ཏི ཝུཏྟནྟི ཝུཏྟཾ.

ཏནྟི ¶ ¶ སཱིམཾ. སཱིགྷམེཝ ཨཏིཀྐམཏཱིཏི ཨིམིནཱ ཏཾ ཨནཏིཀྐམིཏྭཱ ཨནྟོ ཨེཝ པརིཝཏྟམཱནཱཡ ཀཱཏུཾ ཝཊྚཏཱིཏི དསྶེཏི. ཨེཏདཏྠམེཝ ཧི ཝཱལིཀཱདཱིཧི སཱིམཱཔརིཙྪིནྡནཾ, ཨིཏརཐཱ བཧི པརིཝཏྟཱ ནུ ཁོ, ནོ ཝཱཏི ཀམྨཀོཔསངྐཱ བྷཝེཡྻཱཏི. ཨཉྙིསྶཱ ཨནུསྶཱཝནཱཏི ཀེཝལཱཡ ནདཱིསཱིམཱཡ ཨནུསྶཱཝནཱ. ཨནྟོནདིཡཾ ཛཱཏརུཀྑེ ཝཱཏི ཨུདཀུཀྑེཔཔརིཙྪེདསྶ བཧི ཋིཏེ རུཀྑེ ཝཱ. བཧིནདཱིཏཱིརམེཝ ཧི ཝིསབྷཱགསཱིམཏྟཱ ཨབནྡྷིཏབྦཊྛཱནཾ, ན ཨནྟོནདཱི ནིསྶཡཏྟེན སབྷཱགཏྟཱ. ཏེནེཝ ‘‘བཧིནདཱིཏཱིརེ ཝིཧཱརསཱིམཱཡ ཝཱ’’ཏིཨཱདིནཱ ཏཱིརམེཝ ཨབནྡྷིཏབྦཊྛཱནཏྟེན དསྶིཏཾ, ན པན ནདཱི. ཛཱཏརུཀྑེཔི ཋིཏེཧཱིཏི ཨིདཾ ཨནྟོཨུདཀུཀྑེཔཊྛཾ སནྡྷཱཡ ཝུཏྟཾ. ན ཧི བཧིཨུདཀུཀྑེཔེ བྷིཀྑཱུནཾ ཋཱཏུཾ ཝཊྚཏི.

རུཀྑསྶཱཏི ཏསྶེཝ ཨནྟོཨུདཀུཀྑེཔཊྛསྶ རུཀྑསྶ. སཱིམཾ ཝཱ སོདྷེཏྭཱཏི ཡཐཱཝུཏྟཾ ཝིཧཱརེ བདྡྷསཱིམཾ གཱམསཱིམཉྩ ཏཏྠ ཋིཏབྷིཀྑཱུནཾ ཧཏྠཔཱསཱནཡནབཧིསཱིམཀརཎཝསེནེཝ སོདྷེཏྭཱ. ཡཐཱ ཙ ཨུདཀུཀྑེཔསཱིམཱཡཾ ཀམྨཾ ཀརོནྟེཧི, ཨེཝཾ བདྡྷསཱིམཱཡཾ ཝཱ གཱམསཱིམཱཡཾ ཝཱ ཀམྨཾ ཀརོནྟེཧིཔི ཨུདཀུཀྑེཔསཱིམཊྛེ སོདྷེཏྭཱཝ ཀཱཏབྦཾ. ཨེཏེནེཝ སཏྟབྦྷནྟརཨརཉྙསཱིམཱཧིཔི སདྡྷིཾ ཨུདཀུཀྑེཔསཱིམཱཡ, ཨིམཱཡ ཙ སདྡྷིཾ ཏཱསཾ རུཀྑཱདིསམྦནྡྷདོསོཔི ནཡཏོ དསྶིཏོཝ ཧོཏི. ཨིམིནཱཝ ནཡེན སཏྟབྦྷནྟརསཱིམཱཡ བདྡྷསཱིམགཱམསཱིམཱཧིཔི སདྡྷིཾ, ཨེཏཱསཉྩ སཏྟབྦྷནྟརསཱིམཱཡ སདྡྷིཾ སམྦནྡྷདོསོ ཉཱཏབྦོ. ཨཊྛཀཐཱཡཾ པནེཏཾ སབྦཾ ཝུཏྟནཡཏོཝ སཀྐཱ ཝིཉྙཱཏུནྟི ཨཉྙམཉྙཱསནྣཱནམེཝེཏྠ དསྶིཏཾ.

ཏཏྲིདཾ སུཏྟཱནུལོམཏོ ནཡགྒཧཎམུཁཾ – ཡཐཱ ཧི བདྡྷསཱིམཱཡཾ སམྨཏཱ བདྡྷསཱིམཱ ཝིཔཏྟིསཱིམཱ ཧོཏཱིཏི ཏཱསཾ ཨཉྙམཉྙཾ རུཀྑཱདིསམྦནྡྷོ ན ཝཊྚཏི, ཨེཝཾ ནདཱིཨཱདཱིསུ སམྨཏཱཔི བདྡྷསཱིམཱ ཝིཔཏྟིསཱིམཱཝ ཧོཏཱིཏི ཏཱཧིཔི སདྡྷིཾ ཏསྶཱ རུཀྑཱདིསམྦནྡྷོ ¶ ན ཝཊྚཏཱིཏི སིཛ྄ཛྷཏི. ཨིམིནཱ ནཡེན སཏྟབྦྷནྟརསཱིམཱཡ གཱམནདཱིཨཱདཱིཧི སདྡྷིཾ, ཨུདཀུཀྑེཔསཱིམཱཡ ཙ ཨརཉྙཱདཱིཧི སདྡྷིཾ རུཀྑཱདིསམྦནྡྷསྶནཝཊྚནཀབྷཱཝོ ཉཱཏབྦོ, ཨེཝམེཏཱ བྷགཝཏཱ ཨནུཉྙཱཏཱ བདྡྷསཱིམསཏྟབྦྷནྟརཨུདཀུཀྑེཔསཱིམཱ ཨཉྙམཉྙཉྩེཝ ཨཏྟནོ ནིསྶཡཝིརཧིཏཱཧི ཨིཏརཱིཏརཱསཾ ནིསྶཡསཱིམཱཧི ཙ རུཀྑཱདིསམྦནྡྷེ སཏི སམྦྷེདདོསམཱཔཛྫཏཱིཏི སུཏྟཱནུལོམནཡོ ཉཱཏབྦོཝ.

ཨཏྟནོ ཨཏྟནོ པན ནིསྶཡབྷཱུཏགཱམཱདཱིཧི སདྡྷིཾ བདྡྷསཱིམཱདཱིནཾ ཏིསྶནྣཾ ཨུཔྤཏྟིཀཱལེ བྷགཝཏཱ ¶ ཨནུཉྙཱཏསྶ སམྦྷེདཛ྄ཛྷོཏྠརཎསྶ ཨནུལོམནཏོ རུཀྑཱདིསམྦནྡྷོཔི ཨནུཉྙཱཏོཝ ཧོཏཱིཏི དཊྛབྦཾ. ཡདི ཨེཝཾ ཨུདཀུཀྑེཔབདྡྷསཱིམཱདཱིནཾ ཨནྟརཱ ཀསྨཱ སཱིམནྟརིཀཱ ན ཝིཧིཏཱཏི? ནིསྶཡབྷེདསབྷཱཝབྷེདེཧི སཡམེཝ བྷིནྣཏྟཱ. ཨེཀནིསྶཡཨེཀསབྷཱཝཱནམེཝ ཧི སཱིམནྟརིཀཱཡ ཝིནཱསཾ ཀརོཏཱིཏི ཝུཏྟོཝཱཡམཏྠོ. ཨེཏེནེཝ ནདཱིནིམིཏྟཾ ཀཏྭཱ བདྡྷཱཡ སཱིམཱཡ སངྒྷེ ཀམྨཾ ཀརོནྟེ ནདིཡམྤི ཡཱཝ གཱམཀྑེཏྟཾ ཨཱཧཙྩ ཋིཏཱཡ ཨུདཀུཀྑེཔསཱིམཱཡ ཨཉྙེསཾ ཀམྨཾ ཀཱཏུཾ ཝཊྚཏཱིཏི སིདྡྷཾ ཧོཏི. ཡཱ པནེཏཱ ལོཀཝོཧཱརསིདྡྷཱ གཱམཱརཉྙནདཱིསམུདྡཛཱཏསྶརསཱིམཱ པཉྩ, ཏཱ ཨཉྙམཉྙཾ རུཀྑཱདིསམྦནྡྷེཔི སམྦྷེདདོསཾ ནཱཔཛྫཏི ཏཐཱ ལོཀཝོཧཱརཱབྷཱཝཏོ. ན ཧི གཱམཱདཡོ གཱམནྟརཱདཱིཧི ནདཱིཨཱདཱིཧི ཙ རུཀྑཱདིསམྦནྡྷམཏྟེན སམྦྷིནྣཱཏི ལོཀེ ཝོཧརནྟི. ལོཀཝོཧཱརསིདྡྷཱནཉྩ ལོཀཝོཧཱརཏོཝ སམྦྷེདོ ཝཱ ཨསམྦྷེདོ ཝཱ གཧེཏབྦོ, ན ཨཉྙཐཱ. ཏེནེཝ ཨཊྛཀཐཱཡཾ ཏཱསཾ ཨཉྙམཉྙཾ ཀཏྠཙིཔི སམྦྷེདནཡོ ན དསྶིཏོ, སཱསནཝོཧཱརསིདྡྷོ ཨེཝ དསྶིཏོཏི.

ཨེཏྠ པན བདྡྷསཱིམཱཡ ཏཱཝ ‘‘ཧེཊྛཱ པཐཝཱིསནྡྷཱརཀཾ ཨུདཀཾ པརིཡནྟཾ ཀཏྭཱ སཱིམཱ གཏཱ ཧོཏཱི’’ཏིཨཱདིནཱ ཨདྷོབྷཱགཔརིཙྪེདོ ¶ ཨཊྛཀཐཱཡཾ སབྦཐཱ དསྶིཏོ, གཱམསཱིམཱདཱིནཾ པན ན དསྶིཏོ. ཀཐམཡཾ ཛཱནིཏབྦོཏི? ཀེཙི ཏཱཝེཏྠ ‘‘གཱམསཱིམཱདཡོཔི བདྡྷསཱིམཱ ཝིཡ པཐཝཱིསནྡྷཱརཀཾ ཨུདཀཾ ཨཱཧཙྩ ཏིཊྛཏཱི’’ཏི ཝདནྟི.

ཀེཙི པན ཏཾ པཊིཀྑིཔིཏྭཱ ‘‘ནདཱིསམུདྡཛཱཏསྶརསཱིམཱ, ཏཱཝ ཏནྣིསྶིཏཨུདཀུཀྑེཔསཱིམཱ ཙ པཐཝིཡཱ ཨུཔརིཏལེ ཧེཊྛཱ ཙ ཨུདཀེན ཨཛ྄ཛྷོཏྠརཎཔྤདེསེ ཨེཝ ཏིཊྛནྟི, ན ཏཏོ ཧེཊྛཱ ཨུདཀསྶ ཨཛ྄ཛྷོཏྠརཎཱབྷཱཝཱ. སཙེ པན ཨུདཀོགྷཱདིནཱ ཡོཛནཔྤམཱཎམྤི ནིནྣཊྛཱནཾ ཧོཏི, ནདཱིསཱིམཱདཡོཝ ཧོནྟི, ན ཏཏོ ཧེཊྛཱ. ཏསྨཱ ནདཱིཨཱདཱིནཾ ཧེཊྛཱ བཧིཏཱིརམུཁེན ཨུམངྒེན, ཨིདྡྷིཡཱ ཝཱ པཝིཊྛོ བྷིཀྑུ ནདིཡཾ ཋིཏཱནཾ ཀམྨཾ ན ཀོཔེཏི, སོ པན ཨཱསནྣགཱམེ བྷིཀྑཱུནཾ ཀམྨཾ ཀོཔེཏི. སཙེ པན སོ ཨུབྷིནྣཾ ཏཱིརགཱམཱནཾ མཛ྄ཛྷེ ནིསིནྣོ ཧོཏི, ཨུབྷཡགཱམཊྛཱནཾ ཀམྨཾ ཀོཔེཏི. སཙེ པན ཏཱིརཾ གཱམཀྑེཏྟཾ ན ཧོཏི, ཨགཱམཀཱརཉྙམེཝ. ཏཏྠ པན ཏཱིརདྭཡེཔི སཏྟབྦྷནྟརསཱིམཾ ཝིནཱ ཀེཝལཱཡ ཁུདྡཀཱརཉྙསཱིམཱཡམེཝ ཀམྨཾ ཀོཔེཏི. སཙེ སཏྟབྦྷནྟརསཱིམཱཡ ཀརོནྟི, ཏདཱ ཡདི ཏེསཾ སཏྟབྦྷནྟརསཱིམཱཡ པརིཙྪེདོ ཨེཏསྶ ནིསིནྣོཀཱསསྶ པརཏོ ཨེཀཾ སཏྟབྦྷནྟརཾ ཨཏིཀྐམིཏྭཱ ཋིཏོ ན ཀམྨཀོཔོ. ནོ ཙེ, ཀམྨཀོཔོ. གཱམསཱིམཱཡཾ པན ཨནྟོཨུམངྒེ ཝཱ བིལེ ཝཱ ཁཎིཏྭཱ ¶ ཝཱ ཡཏྠ པཝིསིཏུཾ སཀྐཱ, ཡཏྠ ཝཱ སུཝཎྞམཎིཨཱདིཾ ཁཎིཏྭཱ གཎྷནྟི, གཧེཏུཾ སཀྐཱཏི ཝཱ སམྦྷཱཝནཱ ཧོཏི, ཏཏྟཀཾ ཧེཊྛཱཔི གཱམསཱིམཱ, ཏཏྠ ཨིདྡྷིཡཱ ཨནྟོ ནིསིནྣོཔི ཀམྨཾ ཀོཔེཏི. ཡཏྠ པན པཀཏིམནུསྶཱནཾ པཝེསསམྦྷཱཝནཱཔི ནཏྠི, ཏཾ སབྦཾ ཡཱཝ པཐཝཱིསནྡྷཱརཀཨུདཀཱ ཨརཉྙསཱིམཱཝ, ན གཱམསཱིམཱ. ཨརཉྙསཱིམཱཡམྤི ཨེསེཝ ནཡོ. ཏཏྠཔི ཧི ཡཏྟཀེ པདེསེ པཝེསསམྦྷཱཝནཱ, ཏཏྟཀམེཝ ཨུཔརིཏལེ ཨརཉྙསཱིམཱ པཝཏྟཏི. ཏཏོ པན ཧེཊྛཱ ན ཨརཉྙསཱིམཱ ཏཏྠ ཨུཔརིཏལེན ¶ སཧ ཨེཀཱརཉྙཝོཧཱརཱབྷཱཝཏོ. ན ཧི ཏཏྠ པཝིཊྛཾ ཨརཉྙཾ པཝིཊྛོཏི ཝོཧརནྟི, ཏསྨཱ ཏཏྲཊྛོ ཨུཔརི ཨརཉྙཊྛཱནཾ ཀམྨཾ ན ཀོཔེཏི ཨུམངྒནདིཡཾ ཋིཏོ ཝིཡ ཨུཔརིནདིཡཾ ཋིཏཱནཾ. ཨེཀསྨིཉྷི ཙཀྐཝཱལེ༹ གཱམནདཱིསམུདྡཛཱཏསྶརེ མུཉྩིཏྭཱ ཏདཝསེསཾ ཨམནུསྶཱཝཱསཾ དེཝབྲཧྨལོཀཾ ཨུཔཱདཱཡ སབྦཾ ཨརཉྙམེཝ. ‘གཱམཱ ཝཱ ཨརཉྙཱ ཝཱ’ཏི ཝུཏྟཏྟཱ ཧི ནདཱིསམུདྡཛཱཏསྶརཱདིཔི ཨརཉྙམེཝ. ཨིདྷ པན ནདཱིཨཱདཱིནཾ ཝིསུཾ སཱིམཱབྷཱཝེན གཧིཏཏྟཱ ཏདཝསེསམེཝ ཨརཉྙཾ གཧེཏབྦཾ. ཏཏྠ ཙ ཡཏྟཀེ པདེསེ ཨེཀཾ ཨརཉྙནྟི ཝོཧརནྟི, ཨཡམེཀཱ ཨརཉྙསཱིམཱ. ཨིནྡཔུརཉྷི སབྦཾ ཨེཀཱརཉྙསཱིམཱ, ཏཐཱ ཨསུརཡཀྑཔུརཱདི. ཨཱཀཱསཊྛདེཝབྲཧྨཝིམཱནཱནི པན སམནྟཱ ཨཱཀཱསཔརིཙྪིནྣཱནི པཙྩེཀཾ ཨརཉྙསཱིམཱ སམུདྡམཛ྄ཛྷེ པབྦཏདཱིཔཀཱ ཝིཡ. ཏཏྠ སབྦཏྠ སཏྟབྦྷནྟརསཱིམཱཡཾ, ཨརཉྙསཱིམཱཡམེཝ ཝཱ ཀམྨཾ ཀཱཏབྦཾ, ཏསྨཱ ཨིདྷཱཔི ཨུཔརིཨརཉྙཏལེན སདྡྷིཾ ཧེཊྛཱཔཐཝིཡཱ ཨེཀཱརཉྙཝོཧཱརཱབྷཱཝཱ ཝིསུཾ ཨརཉྙསཱིམཱཏི གཧེཏབྦཾ. ཏེནེཝེཏྠ གཱམནདཱིཨཱདིསཱིམཱཀཐཱཡ ཨཊྛཀཐཱཡཾ (མཧཱཝ. ཨཊྛ. ༡༣༨) ‘ཨིདྡྷིམཱ བྷིཀྑུ ཧེཊྛཱཔཐཝིཏལེ ཋིཏོ ཀམྨཾ ཀོཔེཏཱི’ཏི བདྡྷསཱིམཱཡཾ དསྶིཏནཡོ ན དསྶིཏོ’’ཏི ཝདནྟི.

ཨིདཉྩེཏཱསཾ གཱམསཱིམཱདཱིནཾ ཧེཊྛཱཔམཱཎདསྶནཾ སུཏྟཱདིཝིརོདྷཱབྷཱཝཱ ཡུཏྟཾ ཝིཡ དིསྶཏི, ཝཱིམཾསིཏྭཱ གཧེཏབྦཾ. ཨེཝཾ གཧཎེ ཙ གཱམསཱིམཱཡཾ སམྨཏཱ བདྡྷསཱིམཱ ཨུཔརིགཱམསཱིམཾ, ཧེཊྛཱ ཨུདཀཔརིཡནྟཾ ཨརཉྙསཱིམཉྩ ཨཝཏྠརཏཱིཏི ཏསྶཱ ཨརཉྙསཱིམཱཔི ཁེཏྟནྟི སིཛ྄ཛྷཏི. བྷགཝཏཱ ཙ ‘‘སབྦཱ, བྷིཀྑཝེ, ནདཱི ཨསཱིམཱ’’ཏིཨཱདིནཱ (མཧཱཝ. ༡༤༧) ནདཱིསམུདྡཛཱཏསྶརཱ བདྡྷསཱིམཱཡ ཨཁེཏྟབྷཱཝེན ཝུཏྟཱ, ན པན ཨརཉྙཾ, ཏསྨཱ ཨརཉྙམྤི བདྡྷསཱིམཱཡ ཁེཏྟམེཝཱཏི གཧེཏབྦཾ. ཡདི ཨེཝཾ ཀསྨཱ ¶ ཏཏྠ སཱ ན བཛ྄ཛྷཏཱིཏི? པཡོཛནཱབྷཱཝཱ. སཱིམཱཔེཀྑཱནནྟརམེཝ ཧི སཏྟབྦྷནྟརསཱིམཱཡ སམྦྷཝཏོ, ཏསྶཱ ཙ ཨུཔརི སམྨཏཱཡ བདྡྷསཱིམཱཡ སམྦྷེདཛ྄ཛྷོཏྠརཎཱནུལོམཏོ ཝིཔཏྟིསཱིམཱ ཨེཝ སིཡཱ. གཱམཀྑེཏྟེ པན ཋཏྭཱ ཨགཱམཀཱརཉྙེཀདེསམྤི ཨནྟོཀརིཏྭཱ སམྨཏཱ ཀིཉྩཱཔི སུསམྨཏཱ ཨགཱམཀཱརཉྙེ བྷགཝཏཱ ¶ ཝིཧིཏཱཡ སཏྟབྦྷནྟརསཱིམཱཡཔི ཨནིཝཏྟནཏོ, ཏཏྠ པན ཀམྨཾ ཀཱཏུཾ པཝིཊྛཱནམྤི ཏཏོ བཧི ཀེཝལཱརཉྙེ ཀརོནྟཱནམྤི ཨནྟརཱ ཏཱིཎི སཏྟབྦྷནྟརཱནི ཋཔེཏབྦཱནི. ཨཉྙཐཱ ཝིཔཏྟི ཨེཝ སིཡཱཏི སབྦཐཱ ནིརཏྠཀམེཝ ཨགཱམཀེ ཨརཉྙེ བདྡྷསཱིམཱཀརཎནྟི ཝེདིཏབྦཾ.

ཨནྟོནདིཡཾ པཝིཊྛསཱཁཱཡཱཏི ནདིཡཱ པཐཝཱིཏལཾ ཨཱཧཙྩ ཋིཏཱཡ སཱཁཱཡཔི, པགེཝ ཨནཱཧཙྩ ཋིཏཱཡ. པཱརོཧེཔི ཨེསེཝ ནཡོ. ཨེཏེན སབྷཱགནདཱིསཱིམཾ ཕུསིཏྭཱ ཋིཏེན ཝིསབྷཱགསཱིམཱསམྦནྡྷསཱཁཱདིནཱ ཨུདཀུཀྑེཔསཱིམཱཡ སམྦནྡྷོ ན ཝཊྚཏཱིཏི དསྶེཏི. ཨེཏེནེཝ མཧཱསཱིམཾ གཱམསཱིམཉྩ ཕུསིཏྭཱ ཋིཏེན སཱཁཱདིནཱ མཱལ༹ཀསཱིམཱཡ སམྦནྡྷོ ན ཝཊྚཏཱིཏི ཉཱཔིཏོཏི དཊྛབྦོ. ཨནྟོནདིཡཾཡེཝཱཏི སེཏུཔཱདཱནཾ ཏཱིརཊྛིཏཏྟཾ ནིཝཏྟེཏི. ཏེན ཨུདཀུཀྑེཔཔརིཙྪེདཏོ བཧིནདིཡཾ པཏིཊྛིཏཏྟེཔི སམྦྷེདཱབྷཱཝཾ དསྶེཏི. ཏེནཱཧ ‘‘བཧིཏཱིརེ པཏིཊྛིཏཱ’’ཏིཨཱདི. ཡདི ཧི ཨུདཀུཀྑེཔཏོ བཧི ཨནྟོནདིཡམྤི པཏིཊྛིཏཏྟེ སམྦྷེདོ བྷཝེཡྻ, ཏམྤི པཊིཀྑིཔིཏབྦཾ བྷཝེཡྻ ཀམྨཀོཔསྶ སམཱནཏྟཱ, ན ཙ པཊིཀྑིཏྟཾ, ཏསྨཱ སབྦཏྠ ཨཏྟནོ ནིསྶཡསཱིམཱཡ སམྦྷེདདོསོ ནཏྠེཝཱཏི གཧེཏབྦཾ.

ཨཱཝརཎེན ཝཱཏི དཱརུཨཱདཱིནི ཁཎིཏྭཱ ཨུདཀནིཝཱརཎེན. ཀོཊྚཀབནྡྷནེན ཝཱཏི མཏྟིཀཱདཱིཧི པཱུརེཏྭཱ ཀཏསེཏུབནྡྷནེན ཝཱ, ཨུབྷཡེནཱཔི ཨཱཝརཎམེཝ དསྶེཏི. ‘‘ནདིཾ ཝིནཱསེཏྭཱ’’ཏི ཝུཏྟམེཝཏྠཾ ཝིབྷཱཝེཏི ‘‘ཧེཊྛཱ པཱལི༹ ¶ བདྡྷཱ’’ཏི, ཧེཊྛཱ ནདིཾ ཨཱཝརིཏྭཱ པཱལི༹ བདྡྷཱཏི ཨཏྠོ. ཚཌྜིཏོདཀནྟི ཨཏིརིཏྟོདཀཾ. ནདིཾ ཨོཏརིཏྭཱ སནྡནཊྛཱནཏོཏི ཨིམིནཱ ཏལཱ༹ཀནདཱིནཾ ཨནྟརཱ པཝཏྟནཊྛཱནེ ན ཝཊྚཏཱིཏི དསྶེཏི. ཨུཔྤཏིཏྭཱཏི ཏཱིརཱདིབྷིནྡནཝསེན ཝིཔུལཱ ཧུཏྭཱ. ཝིཧཱརསཱིམནྟི བདྡྷསཱིམཾ.

ཨགམནཔཐེཏི ཏདཧེཝ གནྟྭཱ ནིཝཏྟིཏུཾ ཨསཀྐུཎེཡྻེ. ཨརཉྙསཱིམཱསངྑྱམེཝ གཙྪཏཱིཏི ལོཀཝོཧཱརསིདྡྷཾ ཨགཱམཀཱརཉྙསཱིམཾ སནྡྷཱཡ ཝདཏི. ཏཏྠཱཏི པཀཏིཡཱ མཙྪབནྡྷཱནཾ གམནཔཐེསུ དཱིཔཀེསུ.

ཏཾ ཋཱནནྟི ཏེསཾ ཨཱཝཱཊཱདཱིནཾ ཀཏཊྛཱནམེཝ, ན ཨཀཏནྟི ཨཏྠོ. ལོཎཱིཏི སམུདྡོདཀསྶ ཨུཔྤཏྟིཝེགནིནྣོ མཱཏིཀཱཀཱརེན པཝཏྟནཀོ.

སཱརཏྠདཱིཔནིཡཾ ¶ (སཱརཏྠ. ཊཱི. མཧཱཝགྒ ༣.༡༤༧) པན – གཙྪནྟིཡཱ པན ནཱཝཱཡ ཀཱཏུཾ ན ཝཊྚཏཱིཏི ཨེཏྠ ཨུདཀུཀྑེཔམནཏིཀྐམིཏྭཱ པརིཝཏྟམཱནཱཡ ཀཱཏུཾ ཝཊྚཏཱིཏི ཝེདིཏབྦཾ. སཱིམཾ ཝཱ སོདྷེཏྭཱཏི ཨེཏྠ སཱིམཱསོདྷནཾ ནཱམ གཱམསཱིམཱདཱིསུ ཋིཏཱནཾ ཧཏྠཔཱསཱནཡནཱདི. ‘‘ནདིཾ ཝིནཱསེཏྭཱ ཏལཱ༹ཀཾ ཀརོནྟཱི’’ཏི ཝུཏྟམེཝཏྠཾ ཝིབྷཱཝེཏི ‘‘ཧེཊྛཱ པཱལི༹ བདྡྷཱ’’ཏི, ཧེཊྛཱ ནདིཾ ཨཱཝརིཏྭཱ པཱལི༹ བདྡྷཱཏི ཨཏྠོ. ཚཌྜིཏོདཀནྟི ཏལཱ༹ཀརཀྑཎཏྠཾ ཨེཀམནྟེན ཚཌྜིཏམུདཀཾ. དེཝེ ཨཝསྶནྟེཏི དུབྦུཊྛིཀཱལེ ཝསྶཱནེཔི དེཝེ ཨཝསྶནྟེ. ཨུཔྤཏིཏྭཱཏི ཨུཏྟརིཏྭཱ. གཱམནིགམསཱིམཾ ཨོཏྠརིཏྭཱ པཝཏྟཏཱིཏི ཝུཏྟཔྤཀཱརེ ཝསྶཀཱལེ ཙཏྟཱརོ མཱསེ ཨབྦོཙྪིནྣཱ པཝཏྟཏི. ཝིཧཱརསཱིམནྟི བདྡྷསཱིམཾ སནྡྷཱཡ ཝདཏི.

ཨགམནཔཐེཏི ཡཏྠ ཏདཧེཝ གནྟྭཱ པཙྩཱགནྟུཾ ན སཀྐོཏི, ཏཱདིསེ པདེསེ. ཨརཉྙསཱིམཱསངྑྱམེཝ གཙྪཏཱིཏི སཏྟབྦྷནྟརསཱིམཾ སནྡྷཱཡ ཝདཏི. ཏེསནྟི མཙྪབནྡྷཱནཾ. གམནཔརིཡནྟསྶ ¶ ཨོརཏོཏི གམནཔརིཡནྟསྶ ཨོརིམབྷཱགེ དཱིཔཀཾ པབྦཏཉྩ སནྡྷཱཡ ཝུཏྟཾ, ན སམུདྡཔྤདེསནྟི ཝུཏྟཾ.

སམྦྷིནྡནྟཱིཏི ཡཏྠ ཙཏཱུཧི བྷིཀྑཱུཧི ནིསཱིདིཏུཾ ན སཀྐཱ, ཏཏྠ ཏཏོ པཊྛཱཡ ཡཱཝ ཀེསགྒམཏྟམྤི ཨཏྟནོ སཱིམཱཡ ཀརོནྟཱ སམྦྷིནྡནྟི, ཙཏུནྣམྤི བྷིཀྑཱུནཾ པཧོནཀཏོ པཊྛཱཡ ཡཱཝ སཀལམྤི ཨནྟོཀརོནྟཱ ཨཛ྄ཛྷོཏྠརནྟཱིཏི ཝེདིཏབྦཾ. སཾསཊྛཝིཊཔཱཏི ཨཉྙམཉྙཾ སིབྦིཏྭཱ ཋིཏམཧཱསཱཁམཱུལཱ, ཨེཏེན ཨཉྙམཉྙསྶ ཨཏིཨཱསནྣཏཾ དཱིཔེཏི. སཱཁཱཡ སཱཁཾ ཕུསནྟཱཔི ཧི དཱུརཊྛཱཔི སིཡུཾ, ཏཏོ ཨེཀཾསཏོ སམྦྷེདལཀྑཎཾ ན དསྶིཏཾ སིཡཱཏི ཏཾ དསྶེཏུཾ ཝིཊཔགྒཧཎཾ ཀཏཾ. ཨེཝཉྷི བྷིཀྑཱུནཾ ནིསཱིདིཏུཾ ཨཔྤཧོནཀཊྛཱནཾ ཨཏྟནོ སཱིམཱཡ ཨནྟོསཱིམཊྛཾ ཀརིཏྭཱ པུརཱཎཝིཧཱརཾ ཀརོནྟཱ སཱིམཱཡ སཱིམཾ སམྦྷིནྡནྟི ནཱམ, ན ཏཏོ པརནྟི དསྶིཏམེཝ ཧོཏི. བདྡྷཱ ཧོཏཱིཏི པོརཱཎཀཝིཧཱརསཱིམཾ སནྡྷཱཡ ཝུཏྟཾ. ཏཾ ཨམྦནྟི ཨཔརེན སམཡེན པུརཱཎཝིཧཱརཔརིཀྑེཔཱདཱིནཾ ཝིནཊྛཏྟཱ ཨཛཱནནྟཱནཾ ཏཾ པུརཱཎཝིཧཱརསཱིམཱཡ ནིམིཏྟབྷཱུཏཾ ཨམྦཾ. ཨཏྟནོ སཱིམཱཡ ཨནྟོསཱིམཊྛཾ ཀརིཏྭཱ པུརཱཎཝིཧཱརསཱིམཊྛཾ ཛམྦུཾ ཀིཏྟེཏྭཱ ཨམྦཛམྦཱུནཾ ཨནྟརེ ཡཾ ཋཱནཾ, ཏཾ ཨཏྟནོ སཱིམཱཡ པཝེསེཏྭཱ བདྡྷཱཏི ཨཏྠོ. ཨེཏྠ ཙ པུརཱཎསཱིམཱཡ ནིམིཏྟབྷཱུཏསྶ གཱམཊྛསྶ ཨམྦརུཀྑསྶ ཨནྟོསཱིམཊྛཱཡ ཛམྦུཡཱ སཧ སཾསཊྛཝིཊཔཏྟེཔི སཱིམཱཡ བནྡྷནཀཱལེ ཝིཔཏྟི ཝཱ པཙྪཱ གཱམསཱིམཱཡ སཧ སམྦྷེདོ ཝཱ ཀམྨཝིཔཏྟི ཝཱ ནཱཧོསཱིཏི མུཁཏོཝ ཝུཏྟནྟི ཝེདིཏབྦཾ.

པདེསནྟི ¶ སངྒྷསྶ ནིསཱིདནཔྤཧོནཀཾ པདེསཾ. སཱིམནྟརིཀཾ ཋཔེཏྭཱཏིཨཱདིནཱ སམྦྷེདཛ྄ཛྷོཏྠརཎཾ ཀཏྭཱ བདྡྷསཱིམཱཔི ཨཉྙམཉྙཾ ཕུསཱཔེཏྭཱ ཨབྱཝདྷཱནེན བདྡྷསཱིམཱཔི ཨསཱིམཱ ཨེཝཱཏི དསྶེཏི, ཏསྨཱ ཨེཀདྭངྒུལམཏྟཱཔི སཱིམནྟརིཀཱ ཝཊྚཏི ཨེཝ. སཱ པན དུབྦོདྷཱཏི ཨཊྛཀཐཱསུ ཙཏུརངྒུལཱདིཀཱ ཝུཏྟཱཏི ¶ དཊྛབྦཾ. དྭིནྣཾ སཱིམཱནནྟི དྭིནྣཾ བདྡྷསཱིམཱནཾ. ནིམིཏྟཾ ཧོཏཱིཏི ནིམིཏྟསྶ སཱིམཏོ བཱཧིརཏྟཱ བནྡྷནཀཱལེ ཏཱཝ སམྦྷེདདོསོ ནཏྠཱིཏི ཨདྷིཔྤཱཡོ. ན ཀེཝལཉྩ ནིམིཏྟཀཏོ ཨེཝ སངྐརཾ ཀརོཏི, ཨཐ ཁོ སཱིམནྟརིཀཱཡ ཋིཏོ ཨཉྙོཔི རུཀྑོ ཀརོཏི ཨེཝ, ཏསྨཱ ཨཔྤམཏྟིཀཱཡ སཱིམནྟརིཀཱཡ ཝཌྜྷནཀརུཀྑཱདཡོ ན ཝཊྚནྟི ཨེཝ. ཨེཏྠ ཙ ཨུཔརི དིསྶམཱནཁནྡྷསཱཁཱདིཔཝེསེསུ ཨེཝ སངྐརདོསསྶ སབྦཏྠ དསྶིཏཏྟཱ ཨདིསྶམཱནཱནཾ མཱུལཱནཾ པཝེསེཔི བྷཱུམིགཏིཀཏྟཱ དོསོ ནཏྠཱིཏི སིཛ྄ཛྷཏི. སཙེ པན མཱུལཱནིཔི དིསྶམཱནཱནི ནེཝ པཝིསནྟི, སངྐརོཝ, པབྦཏཔཱསཱཎཱ པན དིསྶམཱནཱཔི བྷཱུམིགཏིཀཱཡེཝ. ཡདི པན བནྡྷནཀཱལེ ཨེཝ ཨེཀོ ཐཱུལརུཀྑོ ཨུབྷཡམྤི སཱིམཾ ཨཱཧཙྩ ཏིཊྛཏི, པཙྪཱ བདྡྷཱ ཨསཱིམཱ ཧོཏཱིཏི དཊྛབྦཾ.

སཱིམསངྐརནྟི སཱིམསམྦྷེདཾ. ཡཾ པནེཏྠ སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༤༨) ཝུཏྟཾ ‘‘སཱིམསངྐརཾ ཀརོཏཱིཏི ཝཌྜྷིཏྭཱ སཱིམཔྤདེསཾ པཝིཊྛེ དྭིནྣཾ སཱིམཱནཾ གཏཊྛཱནསྶ དུབྦིཉྙེཡྻཏྟཱ ཝུཏྟ’’ནྟི, ཏཾ ན ཡུཏྟཾ གཱམསཱིམཱཡཔི སཧ སངྐརཾ ཀརོཏཱིཏི ཝཏྟབྦཏོ. ཏཏྠཱཔི ཧི ནིམིཏྟེ ཝཌྜྷིཏེ གཱམསཱིམབདྡྷསཱིམཱནཾ གཏཊྛཱནཾ དུབྦིཉྙེཡྻམེཝ ཧོཏི. ཏཏྠ པན ཨཝཏྭཱ དྭིནྣཾ བདྡྷསཱིམཱནམེཝ སངྐརསྶ ཝུཏྟཏྟཱ ཡཐཱཝུཏྟསམྦནྡྷདོསོཝ སངྐརསདྡེན ཝུཏྟོཏི གཧེཏབྦཾ. པཱལི༹ཡཾ (མཧཱཝ. ༡༤༨) པན ནིདཱནཝསེན ‘‘ཡེསཾ, བྷིཀྑཝེ, སཱིམཱ པཙྪཱ སམྨཏཱ, ཏེསཾ ཏཾ ཀམྨཾ ཨདྷམྨིཀ’’ནྟིཨཱདིནཱ པཙྪཱ སམྨཏཱཡ ཨསཱིམཏྟེ ཝུཏྟེཔི དྭཱིསུ གཱམསཱིམཱསུ ཋཏྭཱ དྭཱིཧི སངྒྷེཧི སམྦྷེདཾ ཝཱ ཨཛ྄ཛྷོཏྠརཎཾ ཝཱ ཀཏྭཱ སཱིམནྟརིཀཾ ཨཊྛཔེཏྭཱ ཝཱ རུཀྑཔཱརོཧཱདིསམྦནྡྷཾ ཨཝིཡོཛེཏྭཱ ཝཱ ཨེཀསྨིཾ ཁཎེ ཀམྨཝཱཙཱནིཊྛཱཔནཝསེན ཨེཀཏོ སམྨཏཱནཾ དྭིནྣམྤི སཱིམཱནཾ ཨསཱིམཏཱ པཀཱསིཏཱཏི ཝེདིཏབྦཾ.

སཱརཏྠདཱིཔནིཡཾ ¶ (སཱརཏྠ. ཊཱི. མཧཱཝགྒ ༣.༡༤༨) ‘‘སཾསཊྛཝིཊཔཱཏི ཨིམིནཱ ཨཉྙམཉྙསྶ ཨཱསནྣཏཾ དཱིཔེཏི. བདྡྷཱ ཧོཏཱིཏི པཙྪིམདིསཱབྷཱགེ སཱིམཾ སནྡྷཱཡ ཝུཏྟཾ. ཏསྶཱ པདེསནྟི ཡཏྠ ཋཏྭཱ བྷིཀྑཱུཧི ཀམྨཾ ཀཱཏུཾ སཀྐཱ ཧོཏི, ཏཱདིསཾ པདེསཾ. ཡཏྠ པན ཋིཏེཧི ཀམྨཾ ཀཱཏུཾ ན སཀྐཱ ཧོཏི, ཏཱདིསཾ པདེསཾ ཨནྟོ ཀརིཏྭཱ བནྡྷནྟཱ སཱིམཱཡ སཱིམཾ སམྦྷིནྡནྟི ¶ ནཱམ. དྭིནྣཾ སཱིམཱནཾ ནིམིཏྟཾ ཧོཏཱིཏི ནིམིཏྟསྶ སཱིམཏོ བཱཧིརཏྟཱ སཱིམསམྦྷེདོ ན ཧོཏཱིཏི ཝུཏྟཾ. སཱིམསངྐརཾ ཀརོཏཱིཏི ཝཌྜྷིཏྭཱ སཱིམཔྤདེསཾ པཝིཊྛེ དྭིནྣཾ སཱིམཱནཾ གཏཊྛཱནསྶ དུཝིཉྙེཡྻཏྟཱ ཝུཏྟཾ, ན ཙ པན ཏཏྠ ཀམྨཾ ཀཱཏུཾ ན ཝཊྚཏཱིཏི དསྶནཏྠཾ. ན ཧི སཱིམཱ ཏཏྟཀེན ཨསཱིམཱ ཧོཏི, དྭེ པན སཱིམཱ པཙྪཱ ཝཌྜྷིཏེན རུཀྑེན ཨཛ྄ཛྷོཏྠཊཱ ཨེཀཱབདྡྷཱ ཧོནྟི, ཏསྨཱ ཨེཀཏྠ ཋཏྭཱ ཀམྨཾ ཀརོནྟེཧི ཨིཏརཾ སོདྷེཏྭཱ ཀཱཏབྦ’’ནྟི ཝུཏྟཾ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

སཱིམཱཝིནིཙྪཡཀཐཱལངྐཱརོ ནཱམ

ཙཏུཝཱིསཏིམོ པརིཙྪེདོ.

སཱིམཱབནྡྷནཝིནིཙྪཡཀཐཱ

ཨེཝཾ སཱིམཱཝིནིཙྪཡཾ ཀཐེཏྭཱ པཱལི༹ཡཾ སཱིམཀཐཱཡ ཨུཔོསཐཀྑནྡྷཀཔརིཡཱཔནྣཏྟཱ ཨུཔོསཐཀྑནྡྷཀཱནནྟརཉྩ པཝཱརཎཀྑནྡྷཀསྶ ཨཱགཏཏྟཱ ཏདནུཀྐམེན སཱིམཱཝིནིཙྪཡཏོ ཨུཔོསཐཔཝཱརཎཝིནིཙྪཡཾ ཀཐེཏུམཱརདྡྷེཔི སཱསནཝུདྡྷིཀརཎཏྠཾ ཨུཔསམྤདཱདིཝིནཡཀམྨཀརཎཊྛཱནབྷཱུཏཾ སཱིམཾ བནྡྷིཏུཀཱམཱནཾ ལཛྫིཔེསལབཧུསྶུཏསིཀྑཱཀཱམབྷིཀྑཱུནཾ པཉྙཱསཏིཝཱིརིཡཛནནཏྠཾ སཱིམཱབནྡྷནཀཐཱ ཨམྷེཧི ཨཱརབྷཱིཡཏེ ¶ . ཏཏྠ ཨཔལོཀནཱདིཙཏུབྦིདྷཀམྨཀརཎཊྛཱནབྷཱུཏཱ སཱིམཱ ནཱམ བདྡྷཨབདྡྷཝསེན དུཝིདྷཱ ཧོཏི. ཏཏྠཱཔི བདྡྷསཱིམཱ ཁཎྜསཱིམཱ, སམཱནསཾཝཱསཀསཱིམཱ, ཨཝིཔྤཝཱསསཱིམཱཏི ཏིབྦིདྷཱ ཧོཏི, ཏཐཱ ཨབདྡྷསཱིམཱཔི གཱམསཱིམཱ, ཨུདཀུཀྑེཔསཱིམཱ, སཏྟབྦྷནྟརསཱིམཱཏི. ཝུཏྟཉྷེཏཾ ཨཱཙརིཡབུདྡྷདཏྟཏྠེརེན ཝིནཡཝིནིཙྪཡེ –

‘‘ཁཎྜསམཱནསཾཝཱསཱ-ཝིཔྤཝཱསཱཏི བྷེདཏོ;

ཨིཏི བདྡྷཱ ཏིདྷཱ ཝུཏྟཱ, ཨབདྡྷཱཔི ཏིདྷཱ མཏཱ.

‘‘གཱམཏོ ཨུདཀུཀྑེཔཱ, སཏྟབྦྷནྟརཏོཔི ཙ;

ཏཏྠ གཱམཔརིཙྪེདོ, གཱམསཱིམཱཏི ཝུཙྩཏཱི’’ཏི.

ཏཏྠ ¶ བདྡྷསཱིམཾ བནྡྷིཏུཀཱམེན ཨཏིཁུདྡིཀཱ, ཨཏིམཧཏཱི, ཁཎྜནིམིཏྟཱ, ཚཱཡཱནིམིཏྟཱ, ཨནིམིཏྟཱ, བཧིསཱིམེ ཋིཏསམྨཏཱ, ནདིཡཱ སམྨཏཱ, སམུདྡེ སམྨཏཱ, ཛཱཏསྶརེ སམྨཏཱ, སཱིམཱཡ སཱིམཾ སམྦྷིནྡནྟེན སམྨཏཱ, སཱིམཱཡ སཱིམཾ ཨཛ྄ཛྷོཏྠརནྟེན སམྨཏཱཏི ཝུཏྟཱ ཨིམཱ ཨེཀཱདས ཝིཔཏྟིསཱིམཱཡོ ཨཏིཀྐམིཏྭཱ ནིམིཏྟསམྤཏྟི, པརིསསམྤཏྟི, ཀམྨཝཱཙཱསམྤཏྟཱིཏི ཝུཏྟཱཡ ཏིཝིདྷསམྤཏྟིཡཱ ཡུཏྟཾ ཀཏྭཱ པཋམཾ ཀིཏྟིཏནིམིཏྟེན སབྦཔཙྪིམཀིཏྟིཏནིམིཏྟཾ སམྦནྡྷཾ ཀཏྭཱ བནྡྷིཏབྦཱ. ཝུཏྟཉྷེཏཾ ཨཊྛཀཐཱཙརིཡེན ཀངྑཱཝིཏརཎིཡཾ (ཀངྑཱ. ཨཊྛ. ནིདཱནཝཎྞནཱ) ‘‘ཏཏྠ ཨེཀཱདས ཝིཔཏྟིསཱིམཱཡོ ཨཏིཀྐམིཏྭཱ ཏིཝིདྷསམྤཏྟིཡུཏྟཱ ནིམིཏྟེན ནིམིཏྟཾ སམྦནྡྷིཏྭཱ སམྨཏཱ སཱིམཱ བདྡྷསཱིམཱ ནཱམཱ’’ཏི. ཨེཏེན ཨེཏེསུ ཨེཀཱདསསུ ཝིཔཏྟཱིསུ ཨེཀཱཡཔི ཡུཏྟཱཡ, ཏིཝིདྷསམྤཏྟཱིསུ ཨེཀཱཡཔི ཨཡུཏྟཱཡ, ནིམིཏྟེན ནིམིཏྟཾ ཨསམྦནྡྷཾ ཀཏྭཱ སམྨཏཱཡ ཙ སཏི སཱིམཱ ན ཧོཏཱིཏི དསྶེཏི.

ཨེཝཾ སཱིམཾ བནྡྷིཏུཀཱམེན བྷིཀྑུནཱ སབྦལཀྑཎཔརིཔཱུརཏྠཾ མཧནྟོ ཨུསྶཱཧོ ཀརཎཱིཡོ ཧོཏི, ཏསྨཱ སཱིམཱབནྡྷནཀཱལེ ¶ ཏཱིསུ སམྤཏྟཱིསུ པརིསསམྤཏྟིསིདྡྷིཡཱ པཋམཾ ཏཱཝ གཱམསཱིམཱ ཨུཔཔརིཀྑིཏབྦཱ. ཨེཏྠཱཧ ‘‘ནནུ བདྡྷསཱིམཱ ཝཱ བནྡྷིཏབྦཱ, ཨཐ ཀསྨཱ གཱམསཱིམཱ ཨུཔཔརིཀྑིཏབྦཱ’’ཏི? གཱམསཱིམཱཡཾ ཋཏྭཱ བདྡྷསཱིམཱཡ བནྡྷིཏབྦཏོ. ཝུཏྟཉྷེཏཾ བྷགཝཏཱ ‘‘ཨསམྨཏཱཡ, བྷིཀྑཝེ, སཱིམཱཡ ཨཊྛཔིཏཱཡ ཡཾ གཱམཾ ཝཱ ནིགམཾ ཝཱ ཨུཔནིསྶཱཡ ཝིཧརཏི, ཡཱ ཏསྶ ཝཱ གཱམསྶ གཱམསཱིམཱ, ནིགམསྶ ཝཱ ནིགམསཱིམཱ, ཨཡཾ ཏཏྠ སམཱནསཾཝཱསཱ ཨེཀཱུཔོསཐཱ’’ཏི (མཧཱཝ. ༡༤༧). ཨིདྷ པཱལི༹ཡཾ སརཱུཔེན ཨནཱགཏམྤི ཨཊྛཀཐཱཡཾ (མཧཱཝ. ཨཊྛ. ༡༤༧) ‘‘གཱམགྒཧཎེན ཙེཏྠ ནགརམྤི གཧིཏམེཝ ཧོཏཱི’’ཏི ཝུཏྟཏྟཱ ནགརསཱིམཱཔི གཧིཏཱ ཧོཏི, ཏསྨཱ ཡསྨིཾ ཨབདྡྷསཱིམཝིཧཱརེ བྷིཀྑཱུ ཡཾ གཱམཾ ཨུཔནིསྶཱཡ ཝིཧརནྟི, ཏསྶ གཱམསྶ པརིཙྪེདོ གཱམསཱིམཱ ནཱམ. ཡཾ ནིགམཾ ཨུཔནིསྶཱཡ ཝིཧརནྟི, ཏསྶ ནིགམསྶ པརིཙྪེདོ ནིགམསཱིམཱ ནཱམ. ཡཾ ནགརཾ ཨུཔནིསྶཱཡ ཝིཧརནྟི, ཏསྶ ནགརསྶ པརིཙྪེདོ ནགརསཱིམཱ ནཱམ. ཏཱ སབྦཱཔི གཱམསཱིམཱཏི ཝུཙྩནྟི. ཏེསཾ བྷིཀྑཱུནཾ སམཱནསཾཝཱསཱ ཨེཀཱུཔོསཐབདྡྷསཱིམཱ ཝིཡ ཨེཀཏོ ཨུཔོསཐཱདིསངྒྷཀམྨཀརཎཱརཧཱ ཧོནྟི, ཨཱིདིསེཡེཝ ཙ པདེསེ སཱིམཾ བནྡྷིཏུམརཧཏི, ན ཨུཔོསཐཱདིསངྒྷཀམྨཱནརཧེ པདེསེཏི ཝུཏྟཾ ཧོཏི.

ཏཏྠ ‘‘ཡཏྟཀེ པདེསེ ཏསྶ ཏསྶ གཱམསྶ གཱམབྷོཛཀཱ བལིཾ ལབྷནྟི, སོ པདེསོ ཨཔྤོ ཝཱ ཧོཏུ མཧནྟོ ཝཱ, གཱམསཱིམཱཏྭེཝ སངྑྱཾ གཙྪཏཱི’’ཏི ཨཊྛཀཐཱཡཾ ཝཙནཏོ གཱམཱདིབྷོཛཀཱནཾ ¶ བལིལབྷནཊྛཱནཾ གཱམསཱིམཱ ཧོཏི, ཨིདཉྩ ཡེབྷུཡྻཝསེན ཝུཏྟཾ. བལིཾ ཨལབྷནྟོཔི རཱཛཔཎྞེ ཨཱརོཔིཏཔདེསེ ཏསྶ གཱམསྶ གཱམསཱིམཱཡེཝ. ཝུཏྟཉྷི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༤༧) ‘‘བལིཾ ལབྷནྟཱིཏི ཨིདཾ ཡེབྷུཡྻཝསེན ཝུཏྟཾ. ‘ཨཡཾ གཱམོ ཨེཏྟཀོ ¶ ཀརཱིསབྷཱགོ’ཏིཨཱདིནཱ པན རཱཛཔཎྞེསུ ཨཱརོཔིཏེསུ བྷཱུམིབྷཱགེསུ ཡསྨིཾ ཡསྨིཾ ཏལཱ༹ཀམཱཏིཀཱསུསཱནཔབྦཏཱདིཀེ པདེསེ བལིཾ ན གཎྷནྟི, སོཔི གཱམསཱིམཱ ཨེཝ. རཱཛཱདཱིཧི པརིཙྪིནྣབྷཱུམིབྷཱགོ ཧི སབྦོཝ ཋཔེཏྭཱ ནདཱིལོཎིཛཱཏསྶརེ གཱམསཱིམཱཏི ཝེདིཏབྦོ’’ཏི. ཨཡཾ པཀཏིགཱམསཱིམཱ ནཱམ. ‘‘ཡམྤི ཨེཀསྨིཾཡེཝ གཱམཀྑེཏྟེ ཨེཀཾ པདེསཾ, ‘ཨཡཾ ཝིསུཾགཱམོ ཧོཏཱུ’ཏི པརིཙྪིནྡིཏྭཱ རཱཛཱ ཀསྶཙི དེཏི, སོཔི ཝིསུཾགཱམསཱིམཱ ཧོཏིཡེཝཱ’’ཏི ཨཊྛཀཐཱཡཾ (མཧཱཝ. ཨཊྛ. ༡༤༧) ཝཙནཏོ རཱཛཱ ‘‘པཀཏིགཱམཀྑེཏྟེཡེཝ པཀཏིགཱམཏོ ཝིསུཾ པཀཏིགཱམེན ཨསམྨིསྶོ གཱམོ ཧོཏཱུ’’ཏི ཡཾ པདེསཾ དེཏི, སོ པདེསོ ཝིསུཾགཱམསཱིམཱ ནཱམ. ཨིཏི པཀཏིགཱམསཱིམཱ ཙ རཱཛཱུནཾ ཨིཙྪཱཝསེན པཝཏྟཱ ཝིསུཾགཱམསཱིམཱ ཙ བདྡྷསཱིམཱ ཝིཡ སབྦཀམྨཱརཧཱ, ཏསྨཱ ཨབྷིནཝབདྡྷསཱིམཾ བནྡྷིཏུཀཱམེཧི པཀཏིགཱམསཱིམཾ ཝཱ ཝིསུཾགཱམསཱིམཾ ཝཱ སོདྷེཏྭཱ ཀཏྟབྦཾ ཧོཏི. ཏཐཱ ཧི ཝུཏྟཾ ཨཊྛཀཐཱཡཾ ‘‘ཏསྨཱ སཱ ཙ ཨིཏརཱ ཙ པཀཏིགཱམནགརནིགམསཱིམཱ བདྡྷསཱིམཱསདིསཱཡེཝ ཧོནྟཱི’’ཏི. ཝིམཏིཝིནོདནིཡཉྩ (ཝི. ཝི. ཊཱི. མཧཱཝགྒ ༢.༡༤༧) ‘‘ཏཏྠ ཧི སཱ ཙ རཱཛིཙྪཱཝསེན པརིཝཏྟིཏྭཱ སམུཔྤནྣཱ ཨབྷིནཝཱ ཙ ཨིཏརཱ ཙ ཨཔརིཝཏྟཱ པཀཏིགཱམསཱིམཱ, ཡཐཱ བདྡྷསཱིམཱཡཾ སབྦཾ སངྒྷཀམྨཾ ཀཱཏུཾ ཝཊྚཏི, ཨེཝམེཏཱཔི སབྦཀམྨཱརཧཏཱསདིསེན བདྡྷསཱིམཱསདིསཱ, སཱ སམཱནསཾཝཱསཱ ཨེཀཱུཔོསཐཱཏི ཨདྷིཔྤཱཡོ’’ཏི ཝུཏྟཾ.

ཀེཙི པན ཨཱཙརིཡཱ ‘‘མཡཾ སཱིམཾ བནྡྷིཏུཀཱམཱ, ཏསྨཱ ཨེཏྟཀོ བྷཱུམིཔརིཙྪེདོ ཝིསུཾ ཁེཏྟཾ ཧོཏཱུ’’ཏི རཱཛཱནཾ ཨཱཔུཙྪིཏྭཱ ཏེན ཨོཀཱསེ ཀཏེ ‘‘ཨིདཾ ཋཱནཾ ཝིསུཾགཱམཀྑེཏྟཾ ཧོཏཱི’’ཏི མནསི ཀཏྭཱ ཏཏྲཊྛེཡེཝ བྷིཀྑཱུ ¶ ཙ ཧཏྠཔཱསཱནཡནཱདིནཱ སོདྷེཏྭཱ སཱིམཱསམཱུཧནསཱིམཱབནྡྷནཱདཱིནི ཀརོནྟི, ཏཾ ཀརཎཾ ‘‘ཨཡཾ ཝིསུཾགཱམོ ཧོཏཱུཏི པརིཙྪིནྡིཏྭཱ རཱཛཱ ཀསྶཙི དེཏཱི’’ཏི ཨཊྛཀཐཱཝཙནེན, ‘‘སཱ ཙ རཱཛིཙྪཱཝསེན པརིཝཏྟིཏྭཱ སམུཔྤནྣཱ ཨབྷིནཝཱ ཙཱ’’ཏི ཨཱགཏེན ཝིམཏིཝིནོདནཱིཊཱིཀཱཝཙནེན ཙ སམེནྟཾ ཝིཡ ན དིསྶཏི. ཀཐཾ? ཨཊྛཀཐཱཝཙནེ ཏཱཝ ‘‘ཨཡཾ ཝིསུཾགཱམོ ཧོཏཱུ’’ཏི ཨིམིནཱ ན ཀེཝལཾ པུརིམགཱམོཡེཝ གཱམོ ཧོཏུ, ཨཐ ཁོ ཨིདཱནི པརིཙྪིནྣཔདེསོཔི ཝིསུཾཡེཝ གཱམོ ཧོཏཱུཏི ཨེཀཾཡེཝ གཱམཀྑེཏྟཾ དྭེ ¶ གཱམེ ཀརོཏཱིཏི དསྶེཏི. ‘‘རཱཛཱ ཀསྶཙི དེཏཱི’’ཏི ཨིམིནཱ གཱམབྷོཛཀསྶ དིནྣབྷཱཝཾ པཀཱསེཏི, ཨིདྷ པན ནེཝ དྭེ གཱམེ ཀརོཏི, ན ཙ གཱམབྷོཛཀསྶ དེཏི, ཀེཝལཾ བྷིཀྑཱུནཾ ཨནུམཏིཡཱ ཡཱཝཀཱལིཀཝསེནེཝ ཨོཀཱསཾ ཀརོཏི, ཨེཝཾ ཨཊྛཀཐཱཝཙནེནཔི སམེནྟཾ ཝིཡ ན དིསྶཏི. ཝིམཏིཝིནོདནཱིཊཱིཀཱཝཙནེནཔི ‘‘རཱཛིཙྪཱཝསེན པརིཝཏྟིཏྭཱ’’ཏི ཨིམིནཱ ཨགཱམབྷཱུཏཾ ཁེཏྟཾ རཱཛིཙྪཱཝསེན པརིཝཏྟིཏྭཱ གཱམོ ཧོཏཱིཏི དསྶེཏི. ‘‘ཨབྷིནཝཱ ཙཱ’’ཏི ཨིམིནཱ པུརཱཎགཱམསཱིམཱ ཙ ཨབྷིནཝགཱམསཱིམཱ ཙཱཏི པུརིམགཱམེན ཨམིསྶཾ ཝིསུཾགཱམལཀྑཎཾ དསྶེཏི. ཨིདྷ པན རཱཛིཙྪཱཝསེན པརིཝཏྟིཏྭཱ ཁེཏྟསྶ ཝིསུཾགཱམབྷཱུཏབྷཱཝོ ཙ ཨབྷིནཝབྷཱཝེན ཝིསུཾགཱམལཀྑཎཉྩ ན དིསྶཏི, ཨེཝཾ ཊཱིཀཱཝཙནེནཔི སམེནྟཾ ཝིཡ ན དིསྶཏི.

ཝིནཡཝིནིཙྪཡཊཱིཀཱཡཉྩ ‘‘གཱམཔརིཙྪེདོཏི སབྦདིསཱསུ སམྨཱ པརིཙྪིནྡིཏྭཱ ‘ཨིམསྶ པདེསསྶ ཨེཏྟཀོ ཀརོ’ཏི ཨེཝཾ ཀརེན ནིཡམིཏོ གཱམཔྤདེསོ’’ཏི ཨེཝཾ ཨཱཡཝསེནེཝ པརིཙྪིནྡནཾ ཝུཏྟཾ, ན ཨནུམཏིཀརཎམཏྟེན, ཏསྨཱ ཝིསུཾགཱམལཀྑཎཾ ཨཔྤཏྟཏཱཡ པཀཏིགཱམེན སངྐརོ ཧོཏི, ན ཏཏྠ ཨུཔོསཐཱདིསངྒྷཀམྨཾ ཀཱཏུམརཧཏི, ཨུཔོསཐཱདིསངྒྷཀམྨཀརཎཱརཧཔདེསེཡེཝ ¶ སཱིམཱསམཱུཧནནསཱིམཱབནྡྷནཀམྨམྤི ཀརཎཱརཧཾ ཧོཏི ཉཏྟིདུཏིཡཀམྨཏྟཱ ཏེསཾ ཀམྨཱནཾ, ཏསྨཱ ཏེསཾ ཨཱཙརིཡཱནཾ ཏཾ ཀརཎཾ ཨཉྙེ ཨཱཙརིཡཱ ན ཨིཙྪནྟི. ཨཉྙེ པན ཨཱཙརིཡཱ ‘‘ཏཾ པརིཙྪིནྣཔྤདེསཾ ‘ཝིསུཾགཱམོ ཧོཏཱུ’ཏི རཱཛཱ ཀསྶཙི དེཏི, གཱམབྷོཛཀོ ཙ ཏཏོ བལིཾ པཊིགྒཎྷཱཏི, ཏདཱ ཝིསུཾགཱམོ ཧོཏི, ན ཏཏོ པུབྦེ’’ཏི ཝདནྟི. ཏེསཾ ཏཾ ཝཙནཾ ‘‘ཨེཝཾ ཀརེན ནིཡམིཏོ པདེསོ’’ཏི ཝིནིཙྪཡཊཱིཀཱཝཙནཉྩ ‘‘གཱམཱདཱིནཾ ཀརགྒཱཧཔརིཙྪིནྣོ སམནྟཏོ པདེསོ གཱམསཱིམཱ’’ཏི སཱིམཱལངྐཱརགཎྛིཝཙནཉྩ སནྡྷཱཡ ཝུཏྟཾ སིཡཱ, ཏེསུ པན ‘‘ཨིམསྶ པདེསསྶ ཨེཏྟཀོ ཀརོ’’ཏི ཨེཝཾ ཀརཔརིཙྪིནྡནཾ ཝུཏྟཾ, ན གཱམབྷོཛཀསྶ བལིགྒཧཎཾ. ཨཊྛཀཐཱཡཉྩ ‘‘རཱཛཱ ཀསྶཙི དེཏཱི’’ཏི དཱནམེཝ ཝདཏི, ན ‘‘གཱམབྷོཛཀོ ཙ བལིཾ གཎྷཱཏཱི’’ཏི པཊིགྒཧཎཾ, ཏསྨཱ ཏམྤི ཝཙནཾ ཨཉྙེ པཎྜིཏཱ ན སམྤཊིཙྪནྟི, ཏསྨཱ པཐཝིསྶརོ རཱཛཱ ‘‘ཨིམསྨིཾ གཱམཀྑེཏྟེ ཨེཏྟཀཀརཱིསམཏྟོ པདེསོ པུརིམགཱམཏོ ཝིསུཾགཱམོ ཧོཏཱུ’’ཏི པརིཙྪིནྡིཏྭཱ དེཏི, ཨེཏྟཱཝཏཱ སོ པདེསོ བལིཾ པཊིགྒཧིཏོ ཝཱ ཧོཏུ ཨཔྤཊིགྒཧིཏོ ཝཱ, ཝིསུཾགཱམོ ནཱམ ཧོཏཱིཏི དཊྛབྦོ.

ཨེཝཾ པཀཏིགཱམལཀྑཎཉྩ ཝིསུཾགཱམལཀྑཎཉྩ ཏཐཏོ ཉཏྭཱ བདྡྷསཱིམཾ བནྡྷིཏུཀཱམོ ཡདི པཀཏིགཱམསཱིམཱ ནཱཏིཝིཏྠཱརཱ ཧོཏི སུཁརཀྑིཏཱ, ཏམེཝ པཀཏིགཱམསཱིམཾ སུཊྛུ རཀྑཱཔེཏྭཱ ¶ སུཊྛུ སོདྷེཏྭཱ སཱིམཱསམཱུཧནནསཱིམཱསམྨུཏིཀམྨཱནི ཀཱཏབྦཱནི. ཡདི པན པཀཏིགཱམསཱིམཱ ཨཏིཝིཏྠཱརཱ ཧོཏི, ནིགམསཱིམཱ, ནགརསཱིམཱ ཝཱ ཧོནྟི, བཧཱུནཾ བྷིཀྑཱུནཾ ནིསིནྣཊྛཱནསཉྩརཎཊྛཱནཏྟཱ སོདྷེཏུཾ ཝཱ རཀྑིཏུཾ ཝཱ ན སཀྐོནྟི, ཨེཝཉྩ སཏི པཐཝིསྶརརཱཛཱུཧི པརིཙྪིནྣཱཡ ཝིསུཾགཱམསཱིམཱཡ སུཊྛུ སོདྷེཏྭཱ སུརཀྑིཏཾ ཀཏྭཱ སཱིམཱསམཱུཧནནསཱིམཱསམྨུཏིཀམྨཾ ཀཱཏབྦཾ. ཀཐཾ པན སུཊྛུ སོདྷནཉྩ ¶ སུཊྛུ རཀྑཎཉྩ ཀཱཏབྦཾ? སཱིམཾ བནྡྷིཏུཀཱམེན ཧི སཱམནྟཝིཧཱརེསུ བྷིཀྑཱུ ཏསྶ ཏསྶ ཝིཧཱརསྶ སཱིམཱཔརིཙྪེདཾ པུཙྪིཏྭཱ བདྡྷསཱིམཝིཧཱརཱནཾ སཱིམཱཡ སཱིམནྟརིཀཾ, ཨབདྡྷསཱིམཝིཧཱརཱནཾ སཱིམཱཡ ཨུཔཙཱརཾ ཋཔེཏྭཱ དིསཱཙཱརིཀབྷིཀྑཱུནཾ ནིསྶཉྩཱརསམཡེ སཙེ ཨེཀསྨིཾ གཱམཀྑེཏྟེ སཱིམཾ བནྡྷིཏུཀཱམཱ, ཡེ ཏཏྠ བདྡྷསཱིམཝིཧཱརཱ, ཏེསུ བྷིཀྑཱུནཾ ‘‘མཡཾ ཨཛྫ སཱིམཾ བནྡྷིསྶཱམ, ཏུམྷེ སཀསཀསཱིམཱཡ པརིཙྪེདཏོ མཱ ནིཀྑམཐཱ’’ཏི པེསེཏབྦཾ. ཡེ ཨབདྡྷསཱིམཝིཧཱརཱ, ཏེསུ བྷིཀྑཱུ ཨེཀཛ྄ཛྷཾ སནྣིཔཱཏེཏབྦཱ, ཚནྡཱརཧཱནཾ ཚནྡོ ཨཱཧརཱཔེཏབྦོ. ཨེཝཾ སནྣིཔཏིཏེསུ པན བྷིཀྑཱུསུ ཚནྡཱརཧཱནཾ ཚནྡེ ཨཱཧཊེ ཏེསུ ཏེསུ མགྒེསུ ཙ ནདཱིཏིཏྠགཱམདྭཱརཱདཱིསུ ཙ ཨཱགནྟུཀབྷིཀྑཱུནཾ སཱིགྷཾ སཱིགྷཾ ཧཏྠཔཱསཱནཡནཏྠཉྩ བཧིསཱིམཀརཎཏྠཉྩ ཨཱརཱམིཀེ ཙེཝ སམཎུདྡེསེ ཙ ཋཔེཏྭཱ བྷེརིསཉྙཾ ཝཱ སངྑསཉྙཾ ཝཱ ཀཏྭཱ སཱིམཱ སམཱུཧནིཏབྦཱཏི.

ནནུ ཙ ཨིདཾ སོདྷནཾ རཀྑཎཉྩ སཱིམཱསམྨུཏིཀཱལེཡེཝ ཨཊྛཀཐཱཡཾ ཝུཏྟཾ, ཨཐ ཀསྨཱ ཨིདྷ སཱིམཱསམཱུཧནནེ ཝུཏྟནྟི? ཨིམསྶཔི སཱིམཱསམཱུཧནནཀམྨསྶ ཉཏྟིདུཏིཡཀམྨཏྟཱ པརིསསམྤཏྟིཛནནཏྠཾ ཝུཏྟནྟི དཊྛབྦཾ. ཨེཝཾ སནྟེཔི ཨིདཾ སཱིམཱསམཱུཧནནཀམྨཾ ནཱམ ཡདི པོརཱཎཱ བདྡྷསཱིམཱ ཨཏྠི, ཏདཊྛཀསངྒྷེ ཧཏྠཔཱསགཏེ ཨཉྙེསུ བྷིཀྑཱུསུ གཱམསཱིམཾ པཝིཊྛེསུཔི ཀམྨབྷེདོ ནཏྠི. ཡདི པོརཱཎཱ བདྡྷསཱིམཱ ནཏྠི, ཨེཝམྤི སཏི ཀེཝལཾ གཱམསཱིམཱབྷཱུཏཏྟཱ སཱིམཱསམཱུཧནནཀམྨེ ཨསམྤཛྫནྟེཔི དོསོ ནཏྠི, ཨཐ ཀསྨཱ སོདྷནཱ ཝུཏྟཱཏི? སཙྩཾ, ཏཐཱཔི སམཱུཧནིཏབྦཱ པོརཱཎསཱིམཱཔརིཙྪེདསྶ དུཝིཉྙེཡྻཏྟཱ. སཙེ ཧི མཧཏིཡཱ པོརཱཎབདྡྷསཱིམཱཡ ཨེཀསྨིཾ པདེསེ སཱིམཾ སམཱུཧནིསྶཱམཱཏི སངྒྷེ སནྣིཔཏིཏེ ཏསྶཱཡེཝ སཱིམཱཡ ཨཉྙསྨིཾ པདེསེ བྷིཀྑུམྷི པཝིཊྛེ ཨཛཱནནྟསྶཔི ཀམྨཾ ཝིཔཛྫཏི, ཏསྨཱ མཧུསྶཱཧེན སོདྷེཏབྦཱཝཱཏི ¶ དཊྛབྦཾ. ཨེཝཾ གཱམསཱིམསོདྷནཾ ‘‘པརིསསམྤཏྟིཡཱ ཡུཏྟཱ ནཱམ སབྦནྟིམེན པརིཙྪེདེན ཙཏཱུཧི བྷིཀྑཱུཧི སནྣིཔཏིཏྭཱ ཡཱཝཏིཀཱ ཏསྨིཾ གཱམཀྑེཏྟེ བདྡྷསཱིམཾ ཝཱ ནདཱིསམུདྡཛཱཏསྶརེ ཝཱ ཨནོཀྐམིཏྭཱ ཋིཏཱ བྷིཀྑཱུ, ཏེ སབྦེ ཧཏྠཔཱསེ ཝཱ ཀཏྭཱ ཚནྡཾ ཝཱ ཨཱཧརིཏྭཱ སམྨཏཱ’’ཏི ཀངྑཱཝིཏརཎིཡཾ (ཀངྑཱ. ཨཊྛ. ནིདཱནཝཎྞནཱ) ཨཱགཏཏྟཱ པརིསསམྤཏྟིཀཱརཎཾ ¶ ཧོཏཱིཏི ཝིཉྙཱཡཏི. ཏཏོ ‘‘སཱིམཱཡ སཱིམཾ སམྦྷིནྡནྟེན སམྨཏཱ, སཱིམཱཡ སཱིམཾ ཨཛ྄ཛྷོཏྠརནྟེན སམྨཏཱ’’ཏི ཝུཏྟེཧི དྭཱིཧི ཝིཔཏྟིདོསེཧི མུཙྩནཏྠཾ སཱིམསམཱུཧནནཀམྨཾ ཀཱཏབྦཾ.

སཱིམཱཡ ཨསམཱུཧཏཱཡ སཏི ཀཐཾ ཝིཔཏྟིདྭཡཾ ཨཱཔཛྫེཡྻཱཏི, ཏཐཱ སོདྷིཏཱཡཔི གཱམསཱིམཱཡ. ཡདི པོརཱཎབདྡྷསཱིམཱ ཝིཛྫམཱནཱ བྷཝེཡྻ, ཏསྶཱ ཝིཛྫམཱནབྷཱཝཾ ཨཛཱནནྟཱ ནཝཾ བདྡྷསཱིམཾ བནྡྷེཡྻུཾ. པོརཱཎསཱིམཱཡ ཧི ནིམིཏྟཾ ཨནྟོ ཀཏྭཱ ཏསྶ སམཱིཔེ པོརཱཎསཱིམཱཡ ཨནྟོ ཋིཏཾ ཨཉྙཾ ནིམིཏྟཾ ཀཏྭཱ ནཝཾ བདྡྷསཱིམཾ བནྡྷེཡྻུཾ, སཱིམཱཡ སཱིམཾ སམྦྷིནྡནྟེན སམྨཏཱ ནཱམ ཧོཏི. ཏེན ཝུཏྟཾ ཀངྑཱཝིཏརཎིཡཾ (ཀངྑཱ. ཨཊྛ. ནིདཱནཝཎྞནཱ) ‘‘སཱིམཱཡ སཱིམཾ སམྦྷིནྡནྟེན སམྨཏཱ ནཱམ ཨཏྟནོ སཱིམཱཡ པརེསཾ སཱིམཾ སམྦྷིནྡནྟེན སམྨཏཱ. སཙེ ཧི པོརཱཎཀསྶ ཝིཧཱརསྶ པུརཏྠིམཱཡ དིསཱཡ ཨམྦོ ཙེཝ ཛམྦཱུ ཙཱཏི དྭེ རུཀྑཱ ཨཉྙམཉྙཾ སཾསཊྛཝིཊཔཱ ཧོནྟི, ཏེསུ ཨམྦསྶ པཙྪིམདིསཱབྷཱགེ ཛམྦཱུ. ཝིཧཱརསཱིམཱ ཙ ཛམྦུཾ ཨནྟོ ཀཏྭཱ ཨམྦཾ ཀིཏྟེཏྭཱ བདྡྷཱ ཧོཏི, ཨཐ པཙྪཱ ཏསྶ ཝིཧཱརསྶ པུརཏྠིམདིསཱཡཾ ཝིཧཱརེ ཀཏེ སཱིམཾ བནྡྷནྟཱ བྷིཀྑཱུ ཨམྦཾ ཨནྟོ ཀཏྭཱ ཛམྦུཾ ཀིཏྟེཏྭཱ བནྡྷནྟི, སཱིམཱཡ སཱིམཱ སམྦྷིནྣཱ ནཱམ ཧོཏཱི’’ཏི. པོརཱཎསཱིམཱཡ ཙ ཨེཀདེསཾ ཝཱ སཀལཔོརཱཎསཱིམཾ ཝཱ ཨནྟོ ཀརིཏྭཱ ནཝཾ སཱིམཾ བནྡྷེཡྻུཾ, སཱིམཱཡ སཱིམཾ ཨཛ྄ཛྷོཏྠརནྟེན སམྨཏཱ ནཱམ ¶ . ཝུཏྟཉྷེཏཾ ཀངྑཱཝིཏརཎིཡཾ (ཀངྑཱ. ཨཊྛ. ནིདཱནཝཎྞནཱ) ‘‘སཱིམཱཡ སཱིམཾ ཨཛ྄ཛྷོཏྠརནྟེན སམྨཏཱ ནཱམ ཨཏྟནོ སཱིམཱཡ པརེསཾ སཱིམཾ ཨཛ྄ཛྷོཏྠརནྟེན སམྨཏཱ. སཙེ ཧི པརེསཾ བདྡྷསཱིམཾ སཀལཾ ཝཱ ཏསྶཱ པདེསཾ ཝཱ ཨནྟོ ཀཏྭཱ ཨཏྟནོ སཱིམཾ སམྨནྣནྟི, སཱིམཱཡ སཱིམཾ ཨཛ྄ཛྷོཏྠརིཏཱ ནཱམ ཧོཏཱི’’ཏི.

ཡསྨིཾ པདེསེ ཙཏྟཱརོ བྷིཀྑཱུ ནིསཱིདིཏྭཱ ཀམྨཾ ཀཱཏུཾ ན སཀྐོནྟི, ཏཏྠ ཏཏོ པཊྛཱཡ ཡཱཝ ཀེསགྒམཏྟམྤི ཨཉྙེསཾ པོརཱཎབདྡྷསཱིམཔྤདེསཾ ཨཏྟནོ སཱིམཱཡ ཨནྟོ ཀརོནྟོ སཱིམཱཡ སཱིམཾ སམྦྷིནྡཏི ནཱམ. ཙཏུནྣཾ བྷིཀྑཱུནཾ ནིསཱིདིཏུཾ པཧོནཀཊྛཱནཏོ པཊྛཱཡ ཡཱཝ སཀལམྤི ཨཉྙེསཾ པོརཱཎབདྡྷསཱིམཱཔདེསཾ ཨཏྟནོ སཱིམཱཡ ཨནྟོ ཀརོནྟོ སཱིམཱཡ སཱིམཾ ཨཛ྄ཛྷོཏྠརཏི ནཱམ. ཝུཏྟཉྷེཏཾ ཀངྑཱཝིཏརཎིཡཱ ལཱིནཏྠཔཀཱསནིཡཾ (ཀངྑཱ. ཨབྷི. ཊཱི. ནིདཱནཝཎྞནཱ) ‘‘ཏསྶཱ པདེསནྟི ཏསྶཱ ཨེཀདེསཾ, ཡཏྠ ཋཏྭཱ ཙཏཱུཧི བྷིཀྑཱུཧི ཀམྨཾ ཀཱཏུཾ སཀྐཱ ཧོཏི, ཏཱདིསཾ ཨེཀདེསནྟི ཝུཏྟཾ ཧོཏི. ཡཏྠ པན ཋིཏེཧི ཀམྨཾ ཀཱཏུཾ ན སཀྐཱ, ཏཱདིསཾ ¶ པདེསཾ ཨནྟོ ཀརིཏྭཱ སཱིམཱཡ སཱིམཾ སམྦྷིནྡནྟི ནཱམ, ན ཏུ ཨཛ྄ཛྷོཏྠརནྟི ནཱམཱཏི གཧེཏབྦ’’ནྟི. ཝིམཏིཝིནོདནིཡམྤི (ཝི. ཝི. ཊཱི. མཧཱཝགྒ ༢.༡༤༨) ‘‘ཡཏྠ ཙཏཱུཧི བྷིཀྑཱུཧི ནིསཱིདིཏུཾ ན སཀྐཱ, ཏཏྟཀཏོ པཊྛཱཡ ཡཱཝ ཀེསགྒམཏྟམྤི ཨཏྟནོ སཱིམཱཡ ཀརོནྟཱ སམྦྷིནྡནྟི, ཙཏུནྣམྤི བྷིཀྑཱུནཾ པཧོནཀཏོ པཊྛཱཡ ཡཱཝ སཀལམྤི ཨནྟོ ཀརོནྟཱ ཨཛ྄ཛྷོཏྠརནྟཱིཏི ཝེདིཏབྦ’’ནྟི ཝུཏྟཾ.

ཨེཝཾ ཧོཏུ, ཏསྨིཾ གཱམསཱིམཔརིཙྪེདེ པོརཱཎཀསཱིམཱཡ ཝིཛྫམཱནཱཡ ཝིཔཏྟིདྭཡམོཙནཏྠཾ སཱིམཱསམཱུཧནནཀམྨཾ སཱཏྠཀཾ, ཨཝིཛྫམཱནཱཡ ཀཐཾ སཱཏྠཀཾ བྷཝེཡྻཱཏི སངྐཱནིཝཏྟནཏྠཾ ¶ སཱིམཱསམཱུཧནནཀམྨཾ ཨཀཏྭཱ ཨབྷིནཝསཱིམཱཡ བཛ྄ཛྷམཱནཱཡ སངྐཱ ཨུཔྤཛྫེཡྻ, བྷགཝཏོ དྷརམཱནཀཱལཏོ པཊྛཱཡ ཡཱཝཛྫཏནཱ གཎནཔཐཾ ཝཱིཏིཀྐནྟཱ བྷིཀྑཱུ ཨུཔསམྤདཱདིཀམྨཀརཎཏྠཾ ཏསྨིཾ ཏསྨིཾ པདེསེ སཱིམཾ བནྡྷནྟི. སཱ སཱིམཱ ཨེཏྠ ཨཏྠི, ཨེཏྠ ནཏྠཱིཏི ན སཀྐཱ ཛཱནིཏུཾ, ཏསྨཱ ‘‘ཨམྷཱཀཾ སཱིམཱབནྡྷནཊྛཱནེ པོརཱཎཀསཱིམཱ བྷཝེཡྻ ནུ ཁོ’’ཏི སངྐཱ བྷཝེཡྻ, ཨེཝཾ སཏི སཱ ཨབྷིནཝསཱིམཱ ཙ ཨཱསངྐནཱིཡཱ ཧོཏཱིཏི སཱིམཱཡཾ ཀཏཾ ཨུཔསམྤདཱདིཀམྨམྤི ཨཱསངྐནཱིཡཾ ཧོཏི, ཏསྨཱ སངྐཱནིཝཏྟནཏྠཾ ཨབྷིནཝསཱིམཾ བནྡྷིཏུཀཱམེཧི ཡཏིཔུངྒཝེཧི ཨཝསྶཾ སཱིམཱསམཱུཧནནཀམྨཾ ཀཱཏབྦཾ ཧོཏི. སམཱུཧནནྟེཧི པན ‘‘སཱིམཾ, བྷིཀྑཝེ, སམཱུཧནནྟེན པཋམཾ ཏིཙཱིཝརེན ཨཝིཔྤཝཱསོ སམཱུཧནྟབྦོ, པཙྪཱ སཱིམཱ སམཱུཧནྟབྦཱ’’ཏི (མཧཱཝ. ༡༤༤) ཝཙནཏོ པཋམཾ ཨཝིཔྤཝཱསསཱིམཱ སམཱུཧནིཏབྦཱ, ཏཏོ སམཱནསཾཝཱསཀསཱིམཱ སམཱུཧནིཏབྦཱ. ཏསྨིཾ སམཱུཧནནཀཱལེ ཙ ‘‘ཁཎྜསཱིམཱཡཾ ཋཏྭཱ ཨཝིཔྤཝཱསསཱིམཱ ན སམཱུཧནྟབྦཱ, ཏཐཱ ཨཝིཔྤཝཱསསཱིམཱཡ ཋཏྭཱ ཁཎྜསཱིམཱཔི. ཁཎྜསཱིམཱཡ པན ཋིཏེན ཁཎྜསཱིམཱཝ སམཱུཧནིཏབྦཱ, ཏཐཱ ཨིཏརཱཡ ཋིཏེན ཨིཏརཱ’’ཏི ཨཊྛཀཐཱཡཾ (མཧཱཝ. ཨཊྛ. ༡༤༤) ཝཙནཏོ ཁཎྜསཱིམཱཡཾ ཋཏྭཱཝ ཁཎྜསཱིམཱ སམཱུཧནིཏབྦཱ, མཧཱསཱིམཱཡམེཝ ཋཏྭཱ མཧཱསཱིམཱ སམཱུཧནིཏབྦཱ, ཨཉྙིསྶཱ སཱིམཱཡ ཋཏྭཱ ཨཉྙཱ སཱིམཱ ན སམཱུཧནིཏབྦཱ. ཨཊྛཀཐཱཡཾ ཨཝིཔྤཝཱསསཱིམཱཏི མཧཱསཱིམཾ ཝདཏི ཏཏྠེཝ ཡེབྷུཡྻེན ཙཱིཝརེན ཝིཔྤཝསནཏོ.

‘‘ཏཏྠ སཙེ ཁཎྜསཱིམཉྩ ཨཝིཔྤཝཱསསཱིམཉྩ ཛཱནནྟི, སམཱུཧནིཏུཉྩེཝ བནྡྷིཏུཉྩ སཀྑིསྶནྟི. ཁཎྜསཱིམཾ པན ཛཱནནྟཱ ཨཝིཔྤཝཱསཾ ཨཛཱནནྟཱཔི སམཱུཧནིཏུཉྩེཝ བནྡྷིཏུཉྩ སཀྑིསྶནྟི. ཁཎྜསཱིམཾ པན ཨཛཱནནྟཱ ཨཝིཔྤཝཱསཾཡེཝ ཛཱནནྟཱ ཙེཏིཡངྒཎབོདྷིཡངྒཎཨུཔོསཐཱགཱརཱདཱིསུ ནིརཱསངྐཊྛཱནེསུ ཋཏྭཱ ¶ ཨཔྤེཝ ནཱམ སམཱུཧནིཏུཾ སཀྑིསྶནྟི, པཊིབནྡྷིཏུཾ པན ¶ ན སཀྑིསྶནྟེཝ. སཙེ བནྡྷེཡྻུཾ, སཱིམཱསམྦྷེདཾ ཀཏྭཱ ཝིཧཱརཾ ཨཝིཧཱརཾ ཀརེཡྻུཾ, ཏསྨཱ ན སམཱུཧནིཏབྦཱ. ཡེ པན ཨུབྷོཔི ན ཛཱནནྟི, ཏེནེཝ སམཱུཧནིཏུཾ ན བནྡྷིཏུཾ སཀྑིསྶནྟི. ཨཡཉྷི སཱིམཱ ནཱམ ཀམྨཝཱཙཱཡ ཝཱ ཨསཱིམཱ ཧོཏི སཱསནནྟརདྷཱནེན ཝཱ, ན ཙ སཀྐཱ སཱིམཾ ཨཛཱནནྟེཧི ཀམྨཝཱཙཱ ཀཱཏུཾ, ཏསྨཱ ན སམཱུཧནིཏབྦཱ, སཱདྷུཀཾ པན ཉཏྭཱཡེཝ སམཱུཧནིཏབྦཱ ཙ བནྡྷིཏབྦཱ ཙཱ’’ཏི ཨཊྛཀཐཱཡཾ (མཧཱཝ. ཨཊྛ. ༡༤༤) ཝཙནཏོ ‘‘ཨིདཱནི སཱིམཾ སམཱུཧནིསྶཱམཱ’’ཏི པརིཙྪིནྣཱཡ གཱམསཱིམཱཡ ཨནྟོ ཁཎྜསཱིམམཧཱསཱིམཱནཾ ཨཏྠིབྷཱཝཾ ཝཱ ནཏྠིབྷཱཝཾ ཝཱ ཏཱསཾ སཱིམཱནཾ པརིཙྪེདཉྩ ན ཛཱནནྟི, ཨེཝཾ ཨཛཱནནྟཱ བྷིཀྑཱུ ཏཱ པོརཱཎསཱིམཱཡོ སམཱུཧནིཏུཾ ན སཀྐུཎེཡྻུཾ, པོརཱཎསཱིམཾ སམཱུཧནིཏུཾ ཨསཀྐོནྟཱ ཙ ཀཐཾ ཨབྷིནཝསཱིམཾ བནྡྷིཏུཾ སཀྐུཎིསྶནྟཱིཏི པརམྤརེཧི ཨཱཙརིཡེཧི སམྨཱ ཝིནིཙྪིཏཾ ཨནུལོམནཡཾ ནིསྶཱཡ མཧནྟཾ ཨུསྶཱཧཾ ཀརིཏྭཱ ཨངྒཾ ཨཔརིཧཱཔེཏྭཱ སམྨཱ ཝིཧིཏནཡེན པོརཱཎསཱིམཾ སམཱུཧནིཏུཾ སཀྑིསྶནྟི.

ཀཐཾ? ཏསྨིཾ སཱིམཱསམཱུཧནནཀཱལེ ཡདི པཀཏིགཱམསཱིམཱཡཾ ཨཱརདྡྷཾ, ཏཾ པཀཏིགཱམཔརིཙྪེདཾ, ཡདི ཝིསུཾགཱམསཱིམཱཡཾ ཨཱརདྡྷཾ, ཏཾ ཝིསུཾགཱམཔརིཙྪེདཾ ཨཉྙེསཾ བྷིཀྑཱུནཾ ཨཔྤཝིསནཏྠཱཡ སམནྟཏོ སུསཾཝིཧིཏཱརཀྑཾ ཀཱརཱཔེཏྭཱ ཀམྨཝཱཙཾ སཱཝེཏུཾ སམཏྠེན བྱཏྟིབལསམྤནྣེན ཝིནཡདྷརེན སཧ སམཱནསཾཝཱསཀེ ལཛྫིཔེསལེ ཨིམསྶ ཀམྨསྶ ཙཏུཝགྒཀརཎཱིཡཏྟཱ ཙཏྟཱརོ བྷིཀྑཱུ ཀམྨཔྤཏྟེ བྷིཀྑཱུནཾ པཀཏཏྟབྷཱཝསྶ དུབྦིཉྙེཡྻཏྟཱ ཝཱ ཏཏོ ཨདྷིཀཔྤམཱཎེ བྷིཀྑཱུ གཧེཏྭཱ ཨིདཱནི བནྡྷིཏབྦཱཡ སཱིམཱཡ ནིམིཏྟཱནཾ ཝིཧཱརཔརིཀྑེཔསྶ ཙ ཨནྟོ ཙ སབྦཏྠ བཧི ཙ སམནྟཱ ལེཌྜུཔཱཏམཏྟེ པདེསེ སབྦཏྠ མཉྩཔྤམཱཎེ མཉྩཔྤམཱཎེ ཋཱནེ ཧཏྠཔཱསཾ ཨཝིཛཧིཏྭཱ ¶ ཏིཊྛནྟཱ, ནིསཱིདནྟཱ ཝཱ ཧུཏྭཱ པཋམཾ ཨཝིཔྤཝཱསསཱིམཱསམཱུཧནནཀམྨཝཱཙཾ, ཏཏོ སམཱནསཾཝཱསཀསཱིམཱསམཱུཧནནཀམྨཝཱཙཾ སཱཝེཏྭཱ སཱིམཱཡ སམུགྒྷཱཏེ ཀཏེ པོརཱཎསཱིམཱསུ ཝིཛྫམཱནཱསུཔི པཙྪིམནྟེན ཨེཀཝཱིསཏིཡཱ བྷིཀྑཱུནཾ ནིསཱིདནཱརཧཏྟཱ སཱིམཱཡ མཉྩཔྤམཱཎེ མཉྩཔྤམཱཎེ ཋཱནེ ཏིཊྛནྟཱ བྷིཀྑཱུ ཨཝསྶཾ ཏཱསུ སཱིམཱསུ ཏིཊྛནྟཱ བྷཝེཡྻུཾ, ཏསྨཱ སཱིམཊྛཱ ཧུཏྭཱ སཱིམཱསམཱུཧནནཀམྨཝཱཙཾ ཝཏྭཱ ཏཱ སཱིམཱ སམཱུཧནེཡྻུཾ. ཏཏོ པོརཱཎབདྡྷསཱིམཱནཾ སམཱུཧཏཏྟཱ གཱམསཱིམཱཡེཝ ཨཝསིཊྛཱ བྷཝེཡྻཱཏི. ཝུཏྟཉྷེཏཾ ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༤༤) ‘‘ཀེཙི པན ཨཱིདིསེསུ ཝིཧཱརེསུ ཚཔཉྩམཏྟེ བྷིཀྑཱུ གཧེཏྭཱ ཝིཧཱརཀོཊིཏོ པཊྛཱཡ ཝིཧཱརཔརིཀྑེཔསྶ ཨནྟོ ཙ བཧི ཙ སམནྟཱ ལེཌྜུཔཱཏེ སབྦཏྠ མཉྩཔྤམཱཎེ མཉྩཔྤམཱཎེ ཨོཀཱསེ ནིརནྟརཾ ཋཏྭཱ པཋམཾ ཨཝིཔྤཝཱསསཱིམཾ ¶ , ཏཏོ སམཱནསཾཝཱསཀསཱིམཉྩ སམཱུཧནནཝསེན སཱིམཱཡ སམུགྒྷཱཏེ ཀཏེ ཏསྨིཾ ཝིཧཱརེ ཁཎྜསཱིམཱཡ མཧཱསཱིམཱཡ ཙ ཝིཛྫམཱནཏྟེ སཏིཔི ཨཝསྶཾ ཨེཀསྨིཾ མཉྩཊྛཱནེ ཏཱསཾ མཛ྄ཛྷགཏཱ ཏེ བྷིཀྑཱུ ཏཱ སམཱུཧནེཡྻུཾ, ཏཏོ གཱམསཱིམཱ ཨེཝ ཨཝསིསྶེཡྻཱ’’ཏི.

‘‘སཱདྷུཀཾ པན ཉཏྭཱཡེཝ སམཱུཧནིཏབྦཱ ཙེཝ བནྡྷིཏབྦཱ ཙཱ’’ཏི ཨཊྛཀཐཱཡཾ (མཧཱཝ. ཨཊྛ. ༡༤༤) ཝཙནཏོ སཱིམཾ ཛཱནནྟཱཡེཝ སམཱུཧནིཏུཾ སཀྑིསྶནྟི, ཀཐཾ ཨཛཱནནྟཱཏི. ཨིམསྨིཾ སཱིམཱསམཱུཧནནཱདྷིཀཱརེ སཱིམཾ ཝཱ སཱིམཱཔརིཙྪེདཾ ཝཱ ཛཱནནབྷཱཝོ ཨངྒཾ ན ཧོཏི, ཨནྟོསཱིམཱཡཾ ཋིཏབྷཱཝོ, ‘‘སཱིམཾ སམཱུཧནིསྶཱམཱ’’ཏི ཀམྨཝཱཙཱཀརཎནྟི ཨིདམེཝ དྭཡཾ ཨངྒཾ ཧོཏི, ཏསྨཱ ཨིམིནཱ ཨངྒདྭཡེན སམྤནྣེ སཏི ཨིམཾ ཨཛཱནནྟཱཔི སམཱུཧནིཏུཾ སཀྐོནྟཱིཏི. ཨིམིནཱ ཨངྒདྭཡེན སམྤནྣེ སཏི སཱིམཾ ཨཛཱནནྟཱནཾ སམཱུཧནིཏུཾ སམཏྠབྷཱཝོ ཀཐཾ ཝིཉྙཱཏབྦོཏི? ཨཊྛཀཐཱཡཾ ‘‘ཁཎྜསཱིམཾ པན ཛཱནནྟཱ ཨཝིཔྤཝཱསཾ ཨཛཱནནྟཱཔི ¶ སམཱུཧནིཏུཉྩེཝ བནྡྷིཏུཉྩ སཀྑིསྶནྟཱི’’ཏི ཨེཝཾ མཧཱསཱིམཱཡ པརིཙྪེདཾ ཨཛཱནནཊྛཱནེཔི སམཱུཧནནསྶ ཝུཏྟཏྟཱ ཝིམཏིཝིནོདནིཡམྤི (ཝི. ཝི. ཊཱི. མཧཱཝགྒ ༢.༡༤༤) ‘‘ན ཧེཏྠ སཱིམཱཡ, ཏཔྤརིཙྪེདསྶ ཝཱ ཛཱནནཾ ཨངྒཾ, སཱིམཱཡ པན ཨནྟོཋཱནཾ, ‘སམཱུཧནིསྶཱམཱ’ཏི ཀམྨཝཱཙཱཀརཎཉྩ ཨངྒཾ. ཨཊྛཀཐཱཡཾ (མཧཱཝ. ཨཊྛ. ༡༤༤) ‘ཁཎྜསཱིམཾ པན ཛཱནནྟཱ ཨཝིཔྤཝཱསཾ ཨཛཱནནྟཱཔི སམཱུཧནིཏུཉྩེཝ བནྡྷིཏུཉྩ སཀྑིསྶནྟཱི’ཏི ཨེཝཾ མཧཱསཱིམཱཡ པརིཙྪེདསྶ ཨཛཱནནེཔི སམཱུཧནནསྶ ཝུཏྟཏྟཱ’’ཏི ཝུཏྟཾ. ཏཏོ པོརཱཎབདྡྷསཱིམཱནཾ སམཱུཧཏཏྟཱ གཱམསཱིམཱཡེཝ ཨཝསིཊྛཱ བྷཝེཡྻཱཏི ཏསྨིཾ ཨཝསིཊྛཱཡ ཏཏོ པརཾ ཀིཾ ཀཱཏབྦནྟི. གཱམསཱིམཱཡ ཨཝསིཊྛཱཡ སཏི ཏཾ གཱམསཱིམཾ པུབྦེ ཝུཏྟནཡེན སོདྷནཾ རཀྑཎཉྩ ཀཏྭཱ ཏིསྶཾ གཱམསཱིམཱཡཾ ཁཎྜསཱིམཾ མཧཱསཱིམཉྩ ཡཐཱརུཙི བནྡྷིཏུཾ ལབྷཏི, སཱིམཾ ཨབནྡྷིཏྭཱཝ ཀེཝལཱཡ གཱམསཱིམཱཡ ཨུཔསམྤདཱདིསངྒྷཀམྨཉྩ ཀཱཏུམྤི ལབྷཏི.

ཝུཏྟཉྷི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༤༤) – ‘‘གཱམསཱིམཱཡ ཨེཝ ཙ ཨཝསིཊྛཱཡ ཏཏྠ ཡཐཱརུཙི དུཝིདྷམྤི སཱིམཾ བནྡྷིཏུཉྩེཝ ཨུཔསམྤདཱདིཀམྨཾ ཀཱཏུཉྩ ཝཊྚཏཱིཏི ཝདནྟི, ཏཾ ཡུཏྟཾ ཝིཡ དིསྶཏི, ཝཱིམཾསིཏྭཱ གཧེཏབྦ’’ནྟི. ཏསྨཱ ཡདི སཊྛིཧཏྠཱཡཱམཾ ཙཏྟཱལཱིསཧཏྠཝིཏྠཱརཾ ཁཎྜསཱིམམེཝ ཀཏྟུཀཱམཱ ཧོནྟི, ཨེཏྟཀེ པདེསེ མཉྩཊྛཱནཾ གཎྷནྟོ པམཱཎཡུཏྟཀོ མཉྩོཏི སབྦཔཙྪིམཔྤམཱཎཡུཏྟོ མཉྩོ. སོ ཧི པཀཏིཝིདཏྠིཡཱ ནཝཝིདཏྠིཀོ, ཨཊྛཝིདཏྠིཀོ ཝཱ ཧོཏི. ཏཏོ ཁུདྡཀོ མཉྩོ སཱིསུཔདྷཱནཾ ཋཔེཏྭཱ པཱདཾ པསཱརེཏྭཱ ¶ ནིཔཛྫིཏུཾ ནཔྤཧོཏཱིཏི སབྦཔཙྪིམམཉྩསྶ ཨཱཡཱམཔྤམཱཎསྶ སམནྟཔཱསཱདིཀཱཡཾ ཝུཏྟཏྟཱ ཏཏོ ཨདྷིཀཱཡཱམོཔི ཧོཏིཡེཝ. མཉྩསྶ ཝིཏྠཱརོ པན ཨཱཡཱམསྶ ཨུཔཌྜྷོ ཧོཏི, ཏསྨཱ མཉྩཔྤམཱཎཊྛཱནཾ ཨཱཡཱམཏོ པཉྩཧཏྠཾ, ཝིཏྠཱརཏོ པཉྩཝིདཏྠིཀནྟི གཧེཏྭཱ ཏེན ¶ པམཱཎེན གཎྷནྟོ སཊྛིཧཏྠཱཡཱམཾ སཱིམཊྛཱནཾ ཙཏུཝཱིསཏིམཉྩཀཾ ཧོཏི, ཙཏྟཱལཱིསཧཏྠཝིཏྠཱརཾ ཨཊྛམཉྩཀཾ ཧོཏི. ཨེཝཾ གཎྷནྟོ དཀྑིཎུཏྟརཱཡཱམོ མཉྩོ ཧོཏི, སཊྛིཧཏྠཱཡཱམཾ སཱིམཊྛཱནཾ དྭཱདསམཉྩཀཾ ཧོཏི, ཙཏྟཱལཱིསཧཏྠཝིཏྠཱརཾ སོལ༹སམཉྩཀཾ ཧོཏི. ཨེཝཾ གཎྷནྟོ པཱཙཱིནཔཙྪིམཱཡཱམོ མཉྩོ ཧོཏི. དུཝིདྷེཔི ཨཱཡཱམཾ ཝིཏྠཱརེན གུཎིཏཾ ཀརོནྟོ སཀལཾ ཨནྟོསཱིམཊྛཱནཾ དྭཱནཧུཏྟརསཏམཉྩཀཾ ཧོཏི, བཧིསཱིམཊྛཱནམྤི སམནྟཏོ ཨེཀམཉྩཀཾ ཝཱ དྭིཏིམཉྩཀཾ ཝཱ གཧེཏབྦཾ. ཏེན སཧ གཎནཾ ཝཌྜྷེཏབྦཾ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༤༤) པན ‘‘སམནྟཱ ལེཌྜུཔཱཏོ’’ཏི ཝུཏྟཾ, ཏཾ པན མཧཱསཱིམཱབནྡྷནཀཱལེ ཝིཧཱརཔརིཀྑེཔསྶ བཧིཨུཔཙཱརཾ སནྡྷཱཡ ཝུཏྟཾ སིཡཱ. ཁཎྜསཱིམཱཡཔི དཱུརཏོ སམཱུཧནནེ དོསོ ནཏྠི, དུཀྐརཏྟཱ པན ཀཱརཀཱནཾ པམཱཎཾ ཛཱནིཏབྦཾ. ཀལྱཱཎིཡཾ ནཱམ སཱིམཱཡཾ པན ཨཱཡཱམཏོ ཙ ཝིཏྠཱརཏོ ཙ པཉྩཧཏྠཔྤམཱཎཾ ཋཱནཾ ཨེཀཀོཊྛཱསཾ ཀཏྭཱ སམཱུཧནཏི. ཏམྤི པཙྪིམམཉྩཔྤམཱཎཏོ ཨདྷིཀམེཝཱཏི ཀཏྭཱ ཀཏཾ. ཨིདཱནི ཨམྷེཏི ཝུཏྟཊྛཱནཾ པན པཀརཎནཡེན སཾསནྡནཏྟཱ ཡུཏྟཏརནྟི དཊྛབྦཾ.

སམཱུཧནནཱཀཱརོ པན ཨེཝཾ ཝེདིཏབྦོ – ཨིདཱནི བནྡྷིཏབྦཱཡ སཱིམཱཡ ནིམིཏྟཱནཾ ཨནྟོ ཙ བཧི ཙ ཡཐཱཝུཏྟནཡེན སམཱུཧནིཏབྦསཱིམཊྛཱནཾ ཨཱདཱསཏལཾ ཝིཡ སམཾ སུདྡྷཾ ཝིམལཾ ཀཏྭཱ ཡཐཱཝུཏྟམཉྩཔྤམཱཎཾ མཉྩཔྤམཱཎཾ ཋཱནཾ ཨཊྛཔདཀལེཁཾ ཝིཡ རཛྫུནཱ ཝཱ དཎྜེན ཝཱ ལེཁཾ ཀཱརཱཔེཏྭཱ ལེཁཱནུསཱརེན ཏམྦམཏྟིཀཙུཎྞེན ཝཱ སེཏམཏྟིཀཙུཎྞེན ཝཱ ཝཎྞཝིསེསཾ ཀཱརཱཔེཏྭཱ པནྟི པནྟི ཀོཊྛཱསཾ ཀོཊྛཱསཾ ཀཱརཱཔེཏྭཱ པུབྦེ ཝུཏྟནཡེན ཨཱརཀྑཾ སོདྷནཉྩ ཀཱརཱཔེཏྭཱ ‘‘ཨིདཱནི སཱིམཾ སམཱུཧནིསྶཱམཱ’’ཏི ཙཏྟཱརོ ¶ ཝཱ ཏདུཏྟརི ཝཱ སམཱནསཾཝཱསཀབྷིཀྑཱུ གཧེཏྭཱ པཋམཔནྟིཡཾ པཋམཀོཊྛཱསེ མཉྩཊྛཱནེ ཋཏྭཱ པཋམཾ ཨཝིཔྤཝཱསསཱིམཱསམཱུཧནནཀམྨཝཱཙཾ, ཏཏོ སམཱནསཾཝཱསཀསཱིམཱསམཱུཧནནཀམྨཝཱཙཾ སཱཝེཏྭཱ ཏསྨིཾ ཀོཊྛཱསེཡེཝ ཨཉྙམཉྙསྶ ཋིཏཊྛཱནཾ པརིཝཏྟེཏྭཱ པརིཝཏྟེཏྭཱ ཏིཀྑཏྟུཾ ཝཱ སཏྟཀྑཏྟུཾ ཝཱ སམཱུཧནིཏྭཱ ཏཏོ ནིཀྑམིཏྭཱ པཋམཔནྟིཡཾཡེཝ དུཏིཡཀོཊྛཱསེ ཋཏྭཱ ཏཐེཝ ཀཏྭཱ ཏཏོ པཋམཔནྟིཡཾཡེཝ ཨནུལོམནཡེན ཡཱཝ ཨནྟིམཀོཊྛཱསཱ ཨེཀེཀསྨིཾ ཀོཊྛཱསེ ཏཐེཝ ཀཏྭཱ པཋམཔནྟིཡཱ པརིཀྑཱིཎཱཡ དུཏིཡཔནྟིཡཱ ཨནྟིམཀོཊྛཱསེ ཋཏྭཱ ཏཐེཝ ཀཏྭཱ ཏཏོ པཊྛཱཡ དུཏིཡཔནྟིཡཾཡེཝ པཊིལོམནཡེན ཡཱཝ ཨཱདིཀོཊྛཱསཱ ¶ ཏཐེཝ ཀཏྭཱ ཨེཝཾ ཏཏིཡཔནྟིཨཱདཱིསུཔི ཨེཀདཱ ཨནུལོམཏོ ཨེཀདཱ པཊིལོམཏོ གནྟྭཱ སབྦཱསུ པནྟཱིསུ སབྦསྨིཾ ཀོཊྛཱསེ པརིཀྑཱིཎེ ཨིདཾ སཱིམཱསམཱུཧནནཀམྨཾ ནིཊྛིཏཾ ནཱམ ཧོཏི. ‘‘ཙཏྟཱརོ ཏདུཏྟརི ཝཱ’’ཏི ཨིདཾ པན ཨིམསྶ ཀམྨསྶ ཙཏུཝགྒཀརཎཱིཡཏྟཱ ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༤༤) པན བྷིཀྑཱུནཾ པཀཏཏྟབྷཱཝསྶ དུཝིཉྙེཡྻཏྟཱ ལཛྫཱིཔེསལབྷིཀྑཱུནཉྩ དུལླབྷཏྟཱ ‘‘ཚཔཉྩམཏྟེ’’ཏི ཝུཏྟཾ.

ཀལྱཱཎཱིསཱིམཱཡཾ པན སཱིཧལ༹དཱིཔཏོ ཨབྷིནཝསིཀྑཾ གཧེཏྭཱ ནིཝཏྟནྟེཧི གརཧཝིཝཱདམཏྟམྤི ཨལབྷནྟེཧི དྷམྨཙེཏིཡརཉྙཱ ཝིཙིནིཏྭཱ གཧིཏེཧི ཙུདྡསཧི བྷིཀྑཱུཧི ཀཏནྟི པཱསཱཎལེཁཱཡཾ ཨཱགཏཾ. རཏནཔཱུརནགརེ པན སིརཱིསུདྷམྨརཱཛཱདྷིཔཏིནཱམཀསྶ ཙཱུལ༹ཨགྒརཱཛིནོ ཀཱལེ མཧཱསཱིཧལ༹པྤཏྟོཏི ཝིསྶུཏོ སིརཱིསདྡྷམྨཀིཏྟིནཱམཀོ མཧཱཐེརཝརོ ཨཏྟནོ ཝསནཊྛཱནསྶ ཨཝིདཱུརེ པབྦཏམཏྠཀེ སཱིམཾ བནྡྷནྟོ ཨཏྟནོ ནིསྶིཏཀེ ཨགྒཧེཏྭཱ ཨཏྟནཱ ¶ ཨབྷིརུཙིཏེ ལཛྫིཔེསལབཧུསྶུཏསིཀྑཱཀཱམབྷཱུཏེ ཨཉྙེ མཧཱཐེརེ གཧེཏྭཱ ཨཏྟཙཏུཏྠོཝ ཧུཏྭཱ ཀམྨཾ ཀརོཏཱིཏི ཝདནྟི. ཏཾ ཨིམསྶ ཀམྨསྶ ཙཏུཝགྒཀརཎཱིཡཏྟཱ ཏེསཉྩ ཐེརཱནཾ པཀཏཏྟབྷཱཝེ ནིརཱསངྐཏྟཱ ཀཏཾ བྷཝེཡྻ, ཨེཝཾ སནྟེཔི བྷིཀྑཱུནཾ པཀཏཏྟབྷཱཝསྶ དུབྦིཉྙེཡྻཏྟཱ ཙཏུཝགྒཀརཎཱིཡཀམྨསྶ ཨཏིརེཀཙཏུཝགྒེན ཀརཎེ དོསཱབྷཱཝཏོ ཨཏིརེཀབྷིཀྑཱུཧི ཀཏབྷཱཝོ པསཏྠཏརོ ཧོཏི. ཏེནེཝ ཙ ཀཱརཎེན ཝིམཏིཝིནོདནཱིནཱམིཀཱཡཾ ཝིནཡཊཱིཀཱཡཾ (ཝི. ཝི. ཊཱི. མཧཱཝགྒ ༢.༡༤༤) ‘‘ཚཔཉྩམཏྟེ བྷིཀྑཱུ གཧེཏྭཱ’’ཏི ཝུཏྟཾ, ཀལྱཱཎཱིསཱིམཱཡཉྩ ཙུདྡསཧི བྷིཀྑཱུཧི ཀཏནྟི དཊྛབྦཾ. ཨེཝཾ ནིཊྛིཏེཔི པན སཱིམཱསམཱུཧནནཀམྨེ ནཱནཱཝཱདཱནཾ ནཱནཱཙརིཡཱནཾ ནཱནཱནིཀཱཡཱནཾ ནཱནཱདེསཝཱསིཀཱནཾ བྷིཀྑཱུནཾ ཙིཏྟཱརཱདྷནཏྠཾ གརཧཝིཝཱདམོཙནཏྠཉྩ པུནཔྤུནཾ ཏེཧིཔི བྷིཀྑཱུཧི ཏཐེཝ ཀཱརཱཔེཏབྦཾ. ཝུཏྟཉྷི ཨཊྛཀཐཱཡཾ (པརི. ཨཊྛ. ༤༨༢-༤༨༣; ཝི. སངྒ. ཨཊྛ. ༢༥༡) ‘‘པུནཔྤུནཾ པན ཀཱཏབྦཾ. ཏཉྷི ཀུཔྤསྶ ཀམྨསྶ ཀམྨཾ ཧུཏྭཱ ཏིཊྛཏི, ཨཀུཔྤསྶ ཐིརཀམྨབྷཱཝཱཡ ཧོཏཱི’’ཏི. ཏེནེཝ ཙ ཀཱརཎེན ཧཾསཱཝཏཱིནགརེ ཨནེཀཔཎྜརཧཏྠིསཱམིམཧཱདྷམྨརཱཛཱ སཧཔུཉྙཀམྨབྷཱུཏཏོ མཧཱཙེཏིཡཏོ ཙཏཱུསུ དིསཱསུ སཱིམཱསམཱུཧནནཀཱལེ རཱམཉྙདེསཝཱསཱིཧི མཧཱཐེརེཧི ཙ མརམྨདེསཝཱསཱིཧི མཧཱཐེརེཧི ཙ ཝིསུཾ ཝིསུཾ ཀཱརཱཔེསཱིཏི དཊྛབྦཾ.

ཡདི པན མཧཱསཱིམཾ བནྡྷིཏུཀཱམོ ཧོཏི, ཏདཱ ཨུསབྷམཏྟཾ ཝཱ དྭིཨུསབྷམཏྟཾ ཝཱ ཏདུཏྟརི ཝཱ པདེསཾ སལླཀྑེཏྭཱ ‘‘ཨེཏྟཀེ ཋཱནེ ཝིཧཱརཾ ཀརིསྶཱམཱ’’ཏི པརིཀྑེཔཾ ཀཱརཱཔེཏྭཱ ཏསྶ ཝིཧཱརཔརིཀྑེཔསྶ ¶ ཨནྟོ ཙ སབྦཏྠ བཧི ཙ སམནྟཱ ལེཌྜུཔཱཏཊྛཱནེ མཉྩཔྤམཱཎེ མཉྩཔྤམཱཎེ ¶ ཨོཀཱསེ ཧེཊྛཱ ཝུཏྟནཡེན པནྟིཀོཊྛཱསེ ཀཏྭཱ ཀམྨཔྤཏྟེཧི བྷིཀྑཱུཧི སདྡྷིཾ ནིརནྟརཾ ཋཏྭཱ པཋམཾ ཨཝིཔྤཝཱསསཱིམཱ ཏཏོ སམཱནསཾཝཱསཀསཱིམཱ ཙ སམཱུཧནིཏབྦཱ. ཨེཝཾ སཱིམཱཡ སམུགྒྷཱཏེ ཀཏེ ཏསྨིཾ ཝིཧཱརེ ཁཎྜསཱིམཱཡ མཧཱསཱིམཱཡ ཙ ཝིཛྫམཱནཏྟེ སཏི ཨཝསྶཾ ཨེཀསྨིཾ མཉྩཊྛཱནེ ཏཱསཾ མཛ྄ཛྷགཏཱ ཏེ བྷིཀྑཱུ ཏཱ སམཱུཧནེཡྻུཾ, ཏཏོ གཱམསཱིམཱ ཨེཝ ཨཝསིསྶེཡྻ, ཏསྶཾ གཱམསཱིམཱཡཾ ཁཎྜསཱིམཱམཧཱསཱིམཱཝསེན དུཝིདྷཱ སཱིམཱ ཡཐཱརུཙི བནྡྷིཏབྦཱ. བནྡྷནཱཀཱརཾ པན ཨུཔརི ཝཀྑཱམ.

ཀསྨཱ པན ནིམིཏྟཱནཾ བཧིཔི སཱིམཱསམཱུཧནནཾ ཀཏཾ, ནནུ ནིམིཏྟཱནཾ ཨནྟོཡེཝ ཨབྷིནཝསཱིམཱ ཨིཙྪིཏབྦཱཏི ཏཏྠེཝ སམྦྷེདཛ྄ཛྷོཏྠརཎཝིམོཙནཏྠཾ པོརཱཎཀསཱིམཱཡ སམཱུཧནནཾ ཀཱཏབྦནྟི? སཙྩཾ, དུཝིཉྙེཡྻཏྟཱ པན ཨེཝཾ ཀཏནྟི དཊྛབྦཾ. དུཝིཉྙེཡྻོ ཧི པོརཱཎཀསཱིམཱཡ ཝིཛྫམཱནཱཝིཛྫམཱནབྷཱཝོ, ཏསྨཱ ཡདི ནིམིཏྟཱནཾ ཨནྟོཡེཝ སཱིམཱསམཱུཧནནཾ ཀརེཡྻ, ཏཏོ བཧི པོརཱཎཀསཱིམཱ ཏིཊྛེཡྻ, ཏཏོ ཨཔྤམཏྟཀཾ ཋཱནཾ ཨནྟོ པཝིསེཡྻ, ཏཾ ཋཱནཾ ཀམྨཝཱཙཱཔཱཋཀེན སཧ སཱིམཱསམཱུཧནནཀཱརཀསངྒྷསྶ པཏིཊྛཧནཔྤཧོནཀཾ ན བྷཝེཡྻ, ཨེཝཾ སནྟེ སཱ པོརཱཎཀསཱིམཱ ཨསམཱུཧཏཱཝ བྷཝེཡྻ. ཏཾ སམཱུཧཏསཉྙཱཡ སཱིམཱསམྨནྣནཀཱལེ ཨནྟོནིམིཏྟཊྛཱནཾ སམྨནྣེཡྻུཾ, ཏཾ ཨསམཱུཧཏཔོརཱཎསཱིམཱཀོཊིཔཝིཊྛཏྟཱ སཱིམཱཡ སཱིམཾ སམྦྷེདདོསོ, ཡདི པན ཏཾ ཋཱནཾ ཙཏུནྣཾ ནིསིནྣཔྤཧོནཀཾ བྷཝེཡྻ, སཱིམཱཡ སཱིམཾ ཨཛ྄ཛྷོཏྠརཎདོསོ, ཡདིཔི ཨནྟོ ན པཝིསཏི, ནིརནྟརཾ ཕུཊྛམཏྟཾ ཧོཏི, ཨེཝམྤི སཱིམཱསངྐརདོསོཏི ཨིམསྨཱ དོསཏྟཡཱ ཝིམོཙནཏྠཾ ནིམིཏྟཱནཾ བཧིཔི སཱིམཱསམཱུཧནནཾ ཀཏཾ. ཏེནེཝ ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༤༤) ‘‘བཧི ཙ སམནྟཱ ལེཌྜུཔཱཏེ’’ཏིཨཱདི ཝུཏྟནྟི དཊྛབྦཾ.

ཀེཙི ¶ པན ཨཱཙརིཡཱ སམནྟཱ ནིམིཏྟཱནཾ ཨནྟོ རཛྫུཔསཱརཎཾ ཀཏྭཱ ཨནྟོ ཋཏྭཱ རཛྫུཡཱ ཧེཊྛཱ པཱདེ པཝེསེཏྭཱ རཛྫུཏོ བཧི ཀིཉྩིམཏྟཾ ཋཱནཾ ཨཏིཀྐམིཏྭཱ སཱིམཱསམཱུཧནནཾ ཀརོནྟི, ཏདེཏཾ ཝིཙཱརེཏབྦཾ. པཱདགྒཊྛཔནམཏྟེན པོརཱཎསཱིམཱསམུགྒྷཱཏོ ན ཧོཏི, ཨཐ ཁོ ཀམྨཝཱཙཱཔཱཋཀེན སཧ ཀམྨཔཏྟསངྒྷསྶ པཏིཊྛཱནེན ཀམྨཝཱཙཱཡ པཱཋནེན ཙ སམུགྒྷཱཏོ ཧོཏི. ཝུཏྟཉྷི ཝིམཏིཝིནོདནིཔྤཀརཎེ (ཝི. ཝི. ཊཱི. མཧཱཝགྒ ༢.༡༤༤) ‘‘སཱིམཱཡ པན ཨནྟོཋཱནཾ, ‘སམཱུཧནིསྶཱམཱ’ཏི ཀམྨཝཱཙཱཡ ཀརཎཉྩེཏྠ ཨངྒ’’ནྟི, ཏསྨཱ ཨེཀདེསེན ཨནྟོཔཝིཊྛཱཡ ¶ ཙ ཨེཀསམྦནྡྷེན ཋིཏཱཡ པོརཱཎཀབདྡྷསཱིམཱཡ སམུགྒྷཱཏེ ཨཀཏེ ཝུཏྟནཡེན དོསཏྟཡཏོ ན མུཙྩེཡྻ, ཏསྨཱ ནིམིཏྟཏོ བཧིཔི ཋཏྭཱ སམཱུཧནནཀརཎབྷཱཝོཝ པཱསཾསཏརོ ཧོཏི. ཨཉྙེ པན ཨཱཙརིཡཱ ཀམྨཀཱརཀབྷིཀྑཱུནཾ པདཝལཉྫསམྦནྡྷཾ ཀཏྭཱ སམཱུཧནནྟི, ཏཾ གརུཀརཎཝསེན ཀཏནྟི གཡ྄ཧམཱནེ དོསོ ནཏྠི. ཨེཀཙྩེ པན ཐེརཱ ‘‘ཀཱརཀསངྒྷསྶ ཨཀྐནྟཊྛཱནེཡེཝ སཱིམཱ སམཱུཧཏཱ, ན ཨནཀྐནྟཊྛཱནེཏི སཉྙཱཡ པཋམཏརཾ སཱལཾ ཀརིཏྭཱ པཙྪཱ སཱིམཱཡ སམཱུཧཏཱཡ ཐམྦྷཊྛཱནེ ཨཀྐམིཏུཾ ན ལབྷཏི, ཏསྨཱ ཨསམཱུཧཏཱ སཱིམཱ’’ཏི ཝདནྟི.

པུབྦེཔི སིརཱིཁེཏྟནགརེ མཧཱསཏྟདྷམྨརཱཛསྶ ཀཱལེ ཏེན རཉྙཱ ཀཏསྶ ནནྡནཝིཧཱརསྶ པུརཏོ ཏསྶ རཉྙོ ཨགྒམཧེསིཡཱ སཱིམཱཡ པཏིཊྛཱཔིཏཱཡ པཋམཾ ཛེཏཝནསཱལཾ ཀཏྭཱ པཙྪཱ སཱིམཾ སམཱུཧནིཾསུ, ཏདཱ ཏསྨིཾ ནགརེ མཧཱརུཀྑམཱུལིཀོ ནཱམ ཨེཀོ གཎཔཱམོཀྑཏྠེརོ ‘‘སཙེ ཐམྦྷཾ ཝིཛ྄ཛྷིཏྭཱ པཱདེ ཋཔེཏུཾ སཀྑིསྶཱམི, ཨེཝཾ སནྟེ ཨཧཾ ཨཱགཙྪིསྶཱམཱི’’ཏི ཝཏྭཱ ནཱགཙྪཏི. སབྦེ ཐེརཱ ‘‘ན ཐམྦྷམཏྟེན པོརཱཎསཱིམཱ ཏིཊྛཏི, ཐམྦྷསྶ སམནྟཏོ ཋཏྭཱ ¶ ཀམྨཝཱཙཱཡ ཀཏཱཡ སཱིམཱ སམཱུཧཏཱ ཧོཏཱི’’ཏི ཝཏྭཱ ཏསྶ ཝཙནཾ ཨགྒཧེཏྭཱ སམཱུཧནིཾསུ ཙེཝ བནྡྷིཾསུ ཙ. ཧཾསཱཝཏཱིནགརེ དྷམྨཙེཏིཡརཉྙོ ཀལྱཱཎིཡསཱིམཱབནྡྷནཀཱལེཔི པཋམཾ སཱལཾ ཀརིཏྭཱཝ པཙྪཱ སམཱུཧནིཾསུ, ན ཙ པཱལི༹ཨཊྛཀཐཱཊཱིཀཱདཱིསུ ‘‘པདཝལཉྫསམྦནྡྷཾ ཀཏྭཱ སཱིམཱ སམཱུཧནིཏབྦཱ’’ཏི པཱཋོ ཨཏྠི, ‘‘མཉྩཔྤམཱཎེ མཉྩཔྤམཱཎེ ཋཱནེ’’ཏི (ཝི. ཝི. ཊཱི. མཧཱཝགྒ ༢.༡༤༤) པན ཨཏྠི. པོརཱཎསཱིམཱཡ ཨནྟོ ཋཏྭཱ ཨེཀསྨིཾ ཋཱནེ སཱིམཱསམཱུཧནནཀམྨཝཱཙཱཡ ཀཏཱཡ སཀལཱཔི སཱིམཱ སམཱུཧཏཱཝ ཧོཏི, ཏསྨཱ ‘‘པདཝལཉྫསམྦནྡྷཾ ཀཏྭཱ སམཱུཧནིཏབྦ’’ནྟི ཝཙནཾ པཎྜིཏཱ ན སམྤཊིཙྪནྟི. ཨཱིདིསཾ པན ཝཙནཾ གརུཀརཎཝསེན ཝུཏྟནྟི གཡ྄ཧམཱནེ ཀིཉྩཱཔི དོསོ ནཏྠི, ཏཐཱཔི སིསྶཱནུསིསྶཱནཾ དིཊྛཱནུགཏིཨཱཔཛྫནཀཱརཎཾ ཧོཏི. ཏེ ཧི ‘‘ཨམྷཱཀཾ ཨཱཙརིཡཱ ཨེཝཾ ཀཐེནྟི, ཨེཝཾ ཀརོནྟཱི’’ཏི དལ༹ྷཱིཀམྨཝསེན གཧེཏྭཱ ཏཐཱ ཨཀཏེ སཱིམཱ སམཱུཧཏཱ ན ཧོཏཱིཏི མཉྙནྟི, ཏསྨཱ པཀརཎཱགཏནཡཝསེནེཝ ཀརཎཾ ཝརཾ པསཏྠཾ ཧོཏཱིཏི དཊྛབྦཾ.

ཨཔརམྤི ཨིམསྨིཾ སཱིམཱསམཱུཧནནཱདྷིཀཱརེ དྷམྨགཱརཝེཧི ཝིནཡདྷརེཧི ཙིནྟེཏབྦཾ གམྦྷཱིརཾ དུདྡསཾ ཋཱནཾ ཨཏྠི, ཏཾ ཀཏམནྟི ཙེ? ‘‘ཨནུཛཱནཱམི, བྷིཀྑཝེ, ཏིཡོཛནཔརམཾ སཱིམཾ སམྨནྣིཏུ’’ནྟི (མཧཱཝ. ༡༤༠) ཝཙནཏོ ནཱནཱགཱམཀྑེཏྟཱནི ཨཝཏྠརིཏྭཱ སམྨཏཱ ཏིཡོཛནིཀཱདིཀཱཡོ ¶ མཧཱསཱིམཱཡོ བྷགཝཏཱ ཨནུཉྙཱཏཱ ཨཏྠི, ཨཐ ཨེཀཾ གཱམཀྑེཏྟཾ སོདྷེཏྭཱ ཨཱརཀྑཾ དཏྭཱ སཱིམཱཡ སམཱུཧཏཱཡ ཡདི ཏཏོ ཨཉྙེསུ གཱམཀྑེཏྟེསུ བྷིཀྑཱུ སནྟི, ན གཱམསཱིམཱ བདྡྷསཱིམཾ པརིཙྪིནྡིཏུཾ སཀྐོཏི, ཏསྨཱ ཏེ བྷིཀྑཱུ ཏསྨིཾ ཀམྨེ ཝགྒཾ ཀརེཡྻུཾ, ཨེཝཾ སཏི སཱིམཱ སམཱུཧཏཱ ན བྷཝེཡྻ, ཏཱཡ ཨསམཱུཧཏཱཡ སཏི ཨབྷིནཝསཱིམཱ སམྨནྣིཏབྦཱ ན བྷཝེཡྻ, ཨིཏི ཨིདཾ ཋཱནཾ དུཛྫཱནཾ དུདྡསཾ, ཏསྨཱ པཱསཱཎཙྪཏྟཾ ཝིཡ བྷགཝཏོ ¶ ཨཱཎཾ གརུཾ ཀརོནྟེཧི ལཛྫིཔེསལབཧུསྶུཏསིཀྑཱཀཱམབྷཱུཏེཧི ཝིནཡཝིདཱུཧི སུཊྛུ ཙིནྟེཏབྦནྟི.

ཨིམསྨིཾ ཨདྷིཀཱརེ ཙིནྟེནྟོ གཝེསནྟོ ཝིཙིནནྟོ ཨིདཾ ཀཱརཎཾ དིསྶཏི – ཏིཡོཛནིཀཱདིམཧཱསཱིམཱཡོ ཨིདྡྷིམནྟཱནཾ བྷིཀྑཱུནཾ དྷརམཱནཀཱལེ སནྣིཔཏིཏུཾ ཝཱ ཝིསོདྷེཏུཾ ཝཱ སཀྐུཎེཡྻབྷཱཝཏོ ཏམཱརབྦྷ བྷགཝཏཱ ཨནུཛཱནིཏཱ བྷཝེཡྻུཾ. སབྦསྨིཾ ཀཱལེ སབྦསྨིཾ པདེསེ སབྦེ བྷིཀྑཱུ ཏཱདིསཾ མཧཱསཱིམཾ སོདྷེཏུཾ ཝཱ སནྣིཔཏིཏུཾ ཝཱ ན སཀྐཱ, ན ཙ བྷགཝཱ ཨསཀྐུཎེཡྻཾ ཨལབྦྷནེཡྻཾ ཀཱརཎཾ ཝདེཡྻ. བྷགཝཏོ དྷརམཱནཀཱལེ རཱཛགཧནགརེ ཨཊྛཱརས མཧཱཝིཧཱརཱ ཨེཀསཱིམཱཝ དྷམྨསེནཱཔཏིསཱརིཔུཏྟཏྠེརེན སམྨཏཱཏི. སཱིཧལ༹དཱིཔེ མཧཱཝིཧཱརསཱིམཱ ཨནུརཱདྷཔུརཾ ཨནྟོཀཏྭཱ པཝཏྟཱ མཧཱམཧིནྡཏྠེརེན སམྨཏཱཏི ཙ པཀརཎེསུ དིསྶཏི, ན ཏཐཱ ཨིམསྨིཾ ནཱམ དེསེ དྭིཡོཛནིཀཱ ཝཱ ཏིཡོཛནིཀཱ ཝཱ སཱིམཱ ཨསུཀེན བྷིཀྑུནཱ སམྨཏཱཏི དིསྶཏི. ཨིམསྨིཉྩ མརམྨདེསེ ཏཱདིསཱནཾ སཱིམཱནཾ ནཏྠིབྷཱཝོ ཨུཔཔརིཀྑིཏྭཱ ཛཱནིཏབྦོ. ཏཐཱ ཧི ཨནེཀསཏཨནེཀསཧསྶཝསྶཀཱལཏོ ཨུཔྤནྣཱ བདྡྷསཱིམཱ པཱསཱཎཐམྦྷནིམིཏྟེན སཧ ཏསྨིཾ ཏསྨིཾ པདེསེ དིསྶནྟི. ཨརིམདྡནཔུརེ ཙ ཨནུརུདྡྷམཧཱརཱཛེན སམྨནྣཱཔིཏཱ དྭཱསཊྛཡཱདྷིཀསཏཧཏྠཱཡཱམཱ སཏྟཙཏྟཱལཱིསཱདྷིཀསཏཧཏྠཝིཏྠཱརཱ མཧཱསཱིམཱ ནིམིཏྟེན སཧ དིསྶཏི. རཏནཔཱུརནགརེ ཙ ནརཔཏིཛེཡྻསཱུརམཧཱརཱཛཀཱལེ ཨཊྛསཏྟཏཱདྷིཀཙཏུསཏཀལིཡུགེ སམྨནྣིཏཱ སཱིམཱ པཱསཱཎལེཁཱཡ སདྡྷིཾ དིསྶཏི. ཡདི ཏིཡོཛནཔརམཱདིམཧཱསཱིམཱཡོ ཨཏྠི, པོརཱཎཱཙརིཡཱ ནཝཾ ནཝཾ བདྡྷསཱིམཾ ན བནྡྷེཡྻུཾ, ཨཐ ཙ པན བནྡྷནྟི, ཏཱསུ ཙ ནཝསཱིམཱསུ ཨུཔསམྤདཱདིསངྒྷཀམྨཾ ཀརོནྟི, ཏཏོ ཨེཝ ཙ གཎནཔཐམཏིཀྐནྟཱ བྷིཀྑཱུ པརམྤརཏོ ཝཌྜྷེནྟཱ ཡཱཝཛྫཏནཱ ¶ སཱསནཾ པཏིཊྛཔེནྟི. ཨིམིནཱ ཙ ཀཱརཎེན ཨིམསྨིཾ པདེསེ ཏིཡོཛནཱ སཱིམཱཡོ ནཏྠཱིཏི ཝིཉྙཱཡཏི.

ཨཐ ཝཱ ‘‘ཝིཧཱརཔརིཀྑེཔསྶ ཨནྟོ ཙ བཧི ཙ སམནྟཱ ལེཌྜུཔཱཏེ’’ཏི ཝིཧཱརཔརིཀྑེཔསྶ ཨནྟོ ཙ ཝིཧཱརཱུཔཙཱརབྷཱུཏེ བཧི ལེཌྜུཔཱཏེ ཙ ཋཱནེཡེཝ སཱིམཱསམཱུཧནནསྶ ཝིམཏིཝིནོདནིཡཾ ¶ (ཝི. ཝི. ཊཱི. མཧཱཝགྒ ༢.༡༤༤) ཝུཏྟཏྟཱཔི ཏཱདིསཱ མཧཱསཱིམཱཡོ ནཏྠཱིཏི ཝིཉྙཱཡཏི. ཡདི ཨཏྠི, སཱིམཱསམཱུཧནནཾ པཀརཎཱཙརིཡཱ ན ཀཐེཡྻུཾ. ཀཐེནྟཱཔི སམནྟཱ ཏིཡོཛནཾ ཋཱནཾ སོདྷེཏྭཱ སཱིམཱསམཱུཧནནཾ ཀརེཡྻུཾ, ཏཐཱ པན ཨཀཐེཏྭཱ ཝིཧཱརཝིཧཱརཱུཔཙཱརེསུཡེཝ སཱིམཱསམཱུཧནནསྶ ཀཐིཏཏྟཱ ཏིཡོཛནིཀཱདཡོ མཧཱསཱིམཱཡོ ནཏྠཱིཏི ཝིཉྙཱཡཏི.

ཨཐ ཝཱ ‘‘ཁཎྜསཱིམཾ པན ཛཱནནྟཱ ཨཝིཔྤཝཱསཾ ཨཛཱནནྟཱཔི སམཱུཧནིཏུཉྩེཝ བནྡྷིཏུཉྩ སཀྑིསྶནྟཱི’’ཏི ཨཊྛཀཐཱཡཾ (མཧཱཝ. ཨཊྛ. ༡༤༤) ཝཙནཏོཔི ཏེསུ ཏེསུ ཛནཔདེསུ ཏིཡོཛནིཀཱདིཀཱཡོ མཧཱསཱིམཱཡོ ནཏྠཱིཏི ཝིཉྙཱཡཏི. ཀཐཾ? ཡདི ཏཱདིསཱ སཱིམཱཡོ ཨཏྠི, སཀལམྤི ཏཾ སཱིམཾ ཨསོདྷེཏྭཱ སཱིམཱསམཱུཧནནཾ ཨཊྛཀཐཱཙརིཡཱ ན ཀཐེཡྻུཾ, ཨཐ ཙ པན ཁཎྜསཱིམཾ ཛཱནནྟཱ ཨཝིཔྤཝཱསཾ ཨཛཱནནྟཱཔི སཱིམཾ སམཱུཧནིཏུཾ བནྡྷིཏུཉྩ སམཏྠབྷཱཝཾ ཀཐེནྟི, སཱ ཀཐཱ ཁནྡྷསཱིམཱཡ སཱིམནྟརིཀནྟརིཏམཏྟཱ ཧུཏྭཱ ཏསྨིཾ གཱམཀྑེཏྟེ ཨཝིཔྤཝཱསསཱིམཱ བྷཝེཡྻ, ཏསྨཱ ཏསྨིཾ ཋཱནེ ཋཏྭཱ སམཱུཧནིཏུཾ སམཏྠབྷཱཝེན ཨཊྛཀཐཱཙརིཡེཧི ཀཐཱིཡཏི, ན ནཱནཱགཱམཀྑེཏྟཱནི ཨཝཏྠརིཏྭཱ སམྨཏཱཡ ཏིཡོཛནིཀཱདིབྷེདཱཡ སཱིམཱཡ ཨཉྙེསུ གཱམཀྑེཏྟེསུ ཨཉྙེསུ བྷིཀྑཱུསུ སནྟེསུཔི སམཱུཧནིཏུཾ སམཏྠབྷཱཝེན, ཏེན ཉཱཡཏི ‘‘ན ¶ སབྦེསུ ཋཱནེསུ ཏིཡོཛནིཀཱདིབྷེདཱཡོ མཧཱསཱིམཱཡོ ན སནྟཱི’’ཏི. ཨཱིདིསཱནི ཀཱརཎཱནི བྷགཝཏོ ཨཱཎཾ གརུཾ ཀརོནྟེཧི ཝིནཡཏྠཝིདཱུཧི ཝིནཡདྷརེཧི པུནཔྤུནཾ ཙིནྟེཏབྦཱནི ཨུཔཔརིཀྑིཏབྦཱནི, ཨིཏོ ཨཉྙཱནིཔི ཀཱརཎཱནི གཝེསིཏབྦཱནཱིཏི.

ཨིཏོ པརམྤི ‘‘སཙེ ཨཉྙཱནིཔི གཱམཀྑེཏྟཱནི ཨནྟོཀཱཏུཀཱམཱ, ཏེསུ གཱམེསུ ཡེ བྷིཀྑཱུ ཝསནྟི, ཏེཧིཔི ཨཱགནྟབྦ’’ནྟིཨཱདིཝཙནཏོ (མཧཱཝ. ཨཊྛ. ༡༣༨) ཨེཀསྨིཾཡེཝ གཱམཀྑེཏྟེ སཱིམཾ ན བནྡྷནྟི, ཨཐ ཁོ ཨཉྙཱནིཔི གཱམཀྑེཏྟཱནི ཨནྟོཀརིཏྭཱཔི བནྡྷནྟི, ཏསྨཱ ཨིདཱནི སམྨནྣིཏབྦཱཡ སཱིམཱཡ ནིསྶཡབྷཱུཏཾ པཀཏིགཱམཀྑེཏྟཾ ཝཱ ཝིསུཾགཱམཀྑེཏྟཾ ཝཱ སོདྷིཏནྟི མནསི ན ཀཱཏབྦཾ. ཀངྑཙྪེདནཏྠཾ སཱིམཱསམཱུཧནནཀམྨཝཱཙཱབྷཎནསམཡེ ཏེན གཱམཀྑེཏྟེན སམྦནྡྷེསུ ཨཉྙེསུ གཱམཀྑེཏྟེསུ ཝསནྟེ བྷིཀྑཱུཔི ཡཱཙིཏྭཱ ཏཏོ གཱམཀྑེཏྟཏོ བཧི དཱུརེ ཝཱསཱཔེཏབྦཱ. ཨེཝཉྷི ཀརོནྟེ ཨཉྙཱནི གཱམཀྑེཏྟཱནི ཨནྟོཀརིཏྭཱ པོརཱཎསཱིམཱཡ ཝིཛྫམཱནཱཡཔི ཏེ ཝགྒཾ ཀཱཏུཾ ན སཀྐོནྟི. ཏཏོ སཱིམཱསམཱུཧནནཀམྨཝཱཙཱ སམྤཛྫཏི, ཏསྨཱ ཨེཝརཱུཔོ སུཁུམོ ནིཔུཎོ ཨཏྠོ ཝིནཡདྷརེཧི ཙིནྟེཏབྦོ. ཨེཝཾ སཱིམཱསམཱུཧནནཝིདྷཱནེན ¶ སཱིམཱཡ སཱིམཾ སམྦྷིནྡནྟེན སམྨཏཱ, སཱིམཱཡ སཱིམཾ ཨཛ྄ཛྷོཏྠརནྟེན སམྨཏཱཏི ཝུཏྟེཧི དྭཱིཧི ཝིཔཏྟིདོསེཧི མུཏྟཱ ཧོཏི.

ཏཏོ ‘‘ཨཏིཁུདྡིཀཱ ཨཏིམཧནྟཱི’’ཏི (པརི. ༤༨༦) ཝུཏྟེཧི ཝིཔཏྟིདོསེཧི ཝིམུཙྩནཏྠཾ སཱིམཱཡ པམཱཎཾ ཛཱནིཏབྦཾ. ཀཐཾ? སཱིམཱ ནཱམ ཨེཀཝཱིསཏིཡཱ བྷིཀྑཱུནཾ ནིསཱིདིཏུཾ ཨཔྤཧོནྟེ སཏི ཨཏིཁུདྡིཀཱ ནཱམ ཧོཏི, སམྨཏཱཔི སཱིམཱ ན ཧོཏི. ཏིཡོཛནཏོ པརཾ ཀེསགྒམཏྟམྤི ཋཱནཾ ཨནྟོ ཀརོནྟེ སཏི ཨཏིམཧཏཱི ནཱམ ཧོཏི, སམྨཏཱཔི སཱིམཱ ན ཧོཏི ¶ , ཏསྨཱ ཨེཀཝཱིསཏིཡཱ བྷིཀྑཱུནཾ ནིསཱིདནཔྤཧོནཀཏོ པཊྛཱཡ ཏིཡོཛནཾ ཨནཏིཀྐམིཏྭཱ ཡཏྠ ཡཾ པམཱཎཾ སངྒྷོ ཨིཙྪཏི, ཏཏྠ ཏཾ པམཱཎཾ ཀཏྭཱ སཱིམཱ སམྨནྣིཏབྦཱ. ཀཐཾ ཝིཉྙཱཡཏཱིཏི ཙེ? ‘‘ཏཏྠ ཨཏིཁུདྡིཀཱ ནཱམ ཡཏྠ ཨེཀཝཱིསཏི བྷིཀྑཱུ ནིསཱིདིཏུཾ ན སཀྐོནྟི. ཨཏིམཧནྟཱི ནཱམ ཨནྟམསོ ཀེསགྒམཏྟེནཔི ཏིཡོཛནཾ ཨཏིཀྐམིཏྭཱ སམྨཏཱ’’ཏི ཀངྑཱཝིཏརཎིཡཾ (ཀངྑཱ. ཨཊྛ. ནིདཱནཝཎྞནཱ) ཝཙནཏོ ཝིཉྙཱཡཏི. ཨེཝཾ སཱིམཱཡ པམཱཎགྒཧཎེན ‘‘ཨཏིཁུདྡིཀཱ ཨཏིམཧནྟཱི’’ཏི ཝུཏྟེཧི དྭཱིཧི དོསེཧི མུཏྟཱ ཧོཏི.

ཏཏོ ‘‘ཁཎྜནིམིཏྟཱ ཚཱཡཱནིམིཏྟཱ ཨནིམིཏྟཱ’’ཏི (པརི. ༤༨༦) ཝུཏྟེཧི ཏཱིཧི ཝིཔཏྟིདོསེཧི ཝིམུཙྩནཏྠཾ ནིམིཏྟཀིཏྟནཾ ཀཱཏབྦཾ, ཏཏྠ ཨསམྦནྡྷཀིཏྟནེན ནིམིཏྟཱ སཱིམཱ ཁཎྜནིམིཏྟཱ ནཱམ. ཀཐཾ? སཱིམཱཡ ཙཏཱུསུ དིསཱསུ ཋཔིཏནིམིཏྟེསུ པུརཏྠིམདིསཱཡ ནིམིཏྟཾ ཀིཏྟེཏྭཱ ཨནུཀྐམེན དཀྑིཎཔཙྪིམཨུཏྟརདིསཱསུ ནིམིཏྟཱནི ཀིཏྟེཏྭཱ པུན པུརཏྠིམདིསཱཡ ནིམིཏྟཾ ཀིཏྟེཏབྦཾ, ཨེཝཾ ཀཏེ ཨཁཎྜནིམིཏྟཱ ནཱམ ཧོཏི. ཡདི པན པུརཏྠིམདིསཱཡ ནིམིཏྟཾ ཀིཏྟེཏྭཱ ཨནུཀྐམེན དཀྑིཎཔཙྪིམཨུཏྟརདིསཱསུ ནིམིཏྟཱནི ཀིཏྟེཏྭཱ ཋཔེཏི, པུན པུརཏྠིམདིསཱཡ ནིམིཏྟཾ ན ཀིཏྟེཏི, ཨེཝཾ ཁཎྜནིམིཏྟཱ ནཱམ ཧོཏི. ཨཔརཱཔི ཁཎྜནིམིཏྟཱ ནཱམ ཡཱ ཨནིམིཏྟུཔགཔཱསཱཎཾ ཝཱ བཧིསཱརརུཀྑཾ ཝཱ ཁཱཎུཀཾ ཝཱ པཾསུཔུཉྫཾ ཝཱ ཨནྟརཱ ཨེཀཾ ནིམིཏྟཾ ཀཏྭཱ སམྨཏཱ. པབྦཏཙྪཱཡཱདཱིསུ ཡཾ ཀིཉྩི ཚཱཡཾ ནིམིཏྟཾ ཀཏྭཱ སམྨཏཱ ཚཱཡཱནིམིཏྟཱ ནཱམ. སབྦསོ ནིམིཏྟཾ ཨཀིཏྟེཏྭཱ སམྨཏཱ ཨནིམིཏྟཱ ནཱམ. ཨིམེཧི ཏཱིཧི དོསེཧི ཝིམུཙྩནཏྠཱཡ ནིམིཏྟཀིཏྟནཾ ཀཱཏབྦཾ.

ཀཐཾ? ཀམྨཝཱཙཱཡ པོརཱཎསཱིམཱསམཱུཧནནཾ ཀཏྭཱ པརིསུདྡྷཱཡ ཀེཝལཱཡ གཱམསཱིམཱཡ སངྒྷེན ¶ ཡཐཱཛ྄ཛྷཱསཡཾ གཧིཏཔྤམཱཎསྶ ¶ སཱིམམཎྜལསྶ ཙཏཱུསུ ཝཱ དིསཱསུ ཨཊྛསུ ཝཱ དིསཱསུ ནིམིཏྟུཔགེ ཧེཊྛིམཔརིཙྪེདེན དྭཏྟིཾསཔལགུལ༹པིཎྜཔྤམཱཎེ, ཨུཀྐཊྛཔརིཙྪེདེན ཧཏྠིཔྤམཱཎཏོ ཨཱུནཔྤམཱཎེ པཱསཱཎེ ཋཔེཏྭཱ ནིམིཏྟཱནཾ ཨནྟོ ཋིཏེན ཀམྨཝཱཙཱཔཱཋཀེན ཝིནཡདྷརེན ‘‘པུརཏྠིམཱཡ དིསཱཡ ཀིཾ ནིམིཏྟ’’ནྟི པུཙྪིཏབྦཾ. ཨཉྙེན ‘‘པཱསཱཎོ, བྷནྟེ’’ཏི ཝཏྟབྦཾ. པུན ཝིནཡདྷརེན ‘‘ཨེསོ པཱསཱཎོ ནིམིཏྟ’’ནྟི ཝཏྭཱ ཀིཏྟེཏབྦཾ. ཨིམིནཱ ནཡེན སཱིམམཎྜལཾ པདཀྑིཎཾ ཀརོནྟེན ‘‘པུརཏྠིམཱཡ ཨནུདིསཱཡ, དཀྑིཎཱཡ དིསཱཡ, དཀྑིཎཱཡ ཨནུདིསཱཡ, པཙྪིམཱཡ དིསཱཡ, པཙྪིམཱཡ ཨནུདིསཱཡ, ཨུཏྟརཱཡ དིསཱཡ, ཨུཏྟརཱཡ ཨནུདིསཱཡ ཀིཾ ནིམིཏྟཾ? པཱསཱཎོ, བྷནྟེ. ཨེསོ པཱསཱཎོ ནིམིཏྟ’’ནྟི ཀིཏྟེཏྭཱ པུན ‘‘པུརཏྠིམཱཡ དིསཱཡ ཀིཾ ནིམིཏྟཾ? པཱསཱཎོ, བྷནྟེ. ཨེསོ པཱསཱཎོ ནིམིཏྟ’’ནྟི ཀིཏྟེཏྭཱ ནིཊྛཔེཏབྦཾ. ཝུཏྟཉྷི ཀངྑཱཝིཏརཎིཡཾ (ཀངྑཱ. ཨཊྛ. ནིདཱནཝཎྞནཱ) ‘‘ཁཎྜནིམིཏྟཱ ནཱམ ཨགྷཊིཏནིམིཏྟཱ ཝུཙྩཏཱི’’ཏིཨཱདི. ཨེཝཾ ནིམིཏྟཀིཏྟནེན ‘‘ཁཎྜནིམིཏྟཱ ཚཱཡཱནིམིཏྟཱ ཨནིམིཏྟཱ’’ཏི ཝུཏྟེཧི ཏཱིཧི ཝིཔཏྟིདོསེཧི ཝིམུཏྟཱ ཧོཏི.

ཏཏོ པརཾ ‘‘བཧིསཱིམེ ཋིཏསམྨཏཱ’’ཏི (པརི. ༤༨༦) ཝུཏྟཝིཔཏྟིདོསཏོ ཝིམུཙྩནཏྠཾ སཱིམཱསམྨུཏིཀམྨཝཱཙཱཔཱཋཀཱལེ སངྒྷསྶ ཋིཏཊྛཱནཾ ཛཱནིཏབྦཾ. ཀཐཾ? ཡདི ནིམིཏྟཱནི ཀིཏྟེཏྭཱ སངྒྷོ ནིམིཏྟཱནཾ བཧི ཋཏྭཱ ཀམྨཝཱཙཱཡ སཱིམཾ སམྨནྣཏི, བཧིསཱིམེ ཋིཏསམྨཏཱ ནཱམ ཧོཏི, སཱིམཱ ན ཧོཏི, ཏསྨཱ ནིམིཏྟཱནི ཀིཏྟེཏྭཱ སངྒྷེན ནིམིཏྟཱནཾ ཨནྟོ ཋཏྭཱ ཀམྨཝཱཙཱཡ སཱིམཱ སམྨནྣིཏབྦཱ. ཝུཏྟཉྷེཏཾ ཀངྑཱཝིཏརཎིཡཾ ‘‘བཧིསཱིམེ ཋིཏསམྨཏཱ ནཱམ ནིམིཏྟཱནི ཀིཏྟེཏྭཱ ནིམིཏྟཱནཾ བཧི ཋིཏེན སམྨཏཱ’’ཏི. ཨེཝཾ སཱིམཱསམྨནྣནཊྛཱནནིཡམེན ‘‘བཧིསཱིམེ ཋིཏསམྨཏཱ’’ཏི (པརི. ༤༨༦) ཝུཏྟཝིཔཏྟིདོསཏོ མུཏྟཱ ཧོཏི.

ཏཏོ ¶ པརཾ ‘‘ནདིཡཾ སམྨཏཱ, སམུདྡེ སམྨཏཱ, ཛཱཏསྶརེ སམྨཏཱ’’ཏི (པརི. ༤༨༦) ཝུཏྟེཧི ཏཱིཧི ཝིཔཏྟིདོསེཧི ཙ ཝིམུཙྩནཏྠཾ ཨེཝཾ མནསི ཀཱཏབྦཾ – ‘‘སབྦཱ, བྷིཀྑཝེ, ནདཱི ཨསཱིམཱ, སབྦོ སམུདྡོ ཨསཱིམོ, སབྦོ ཛཱཏསྶརོ ཨསཱིམོ’’ཏི (མཧཱཝ. ༡༤༧) བྷགཝཏཱ ཝཙནཏོ ནདཱིསམུདྡཛཱཏསྶརེསུ སམྨཏཱ སཱིམཱ ན ཧོཏི, པོརཱཎསཱིམཝིགཏཱཡ སུདྡྷཱཡ གཱམསཱིམཱཡ སམྨཏཱ ཨེཝ སཱིམཱ ཧོཏི, ཏསྨཱ གཱམསཱིམཱཡམེཝ བདྡྷསཱིམཱ སམྨནྣིཏབྦཱ, ན ནདཱིཨཱདཱིསཱུཏི. ཝུཏྟཉྷི ཀངྑཱཝིཏརཎིཡཾ (ཀངྑཱ. ཨཊྛ. ནིདཱནཝཎྞནཱ) ‘‘ནདིཡཱ སམུདྡེ ཛཱཏསྶརེ སམྨཏཱ ནཱམ ཨེཏེསུ ནདཱིཨཱདཱིསུ སམྨཏཱ’’ཏིཨཱདི. ཨེཏྟཱཝཏཱ ‘‘ཨཡཾ སཱིམཱ ཨཏིཁུདྡིཀཱ ¶ , ཨཏིམཧནྟཱི, ཁཎྜནིམིཏྟཱ, ཚཱཡཱནིམིཏྟཱ, ཨནིམིཏྟཱ, བཧིསཱིམེ ཋིཏསམྨཏཱ, ནདིཡཾ སམྨཏཱ, སམུདྡེ སམྨཏཱ, ཛཱཏསྶརེ སམྨཏཱ, སཱིམཱཡ སཱིམཾ སམྦྷིནྡནྟེན སམྨཏཱ, སཱིམཱཡ སཱིམཾ ཨཛ྄ཛྷོཏྠརནྟེན སམྨཏཱ’’ཏི (པརི. ༤༨༦) ཝུཏྟེཧི ཨེཀཱདསཧི དོསེཧི ཝིམུཏྟཱ ཧུཏྭཱ ‘‘ཨབྦྷཱ མཧིཀཱ དྷཱུམོ རཛོ རཱཧཱུ’’ཏི ཝུཏྟེཧི པཉྩཧི ཨུཔཀྐིལེསེཧི མུཏྟཾ ཙནྡམཎྜལཾ ཝིཡ, སཱུརིཡམཎྜལཾ ཝིཡ ཙ སུཔརིསུདྡྷཱ ཧོཏི.

ཏིཝིདྷསམྤཏྟི ནཱམ ནིམིཏྟསམྤཏྟིཔརིསསམྤཏྟིཀམྨཝཱཙཱསམྤཏྟིཡོ. ཏཱསུ ‘‘པབྦཏནིམིཏྟཾ པཱསཱཎནིམིཏྟཾ ཝནནིམིཏྟཾ རུཀྑནིམིཏྟཾ མགྒནིམིཏྟཾ ཝམྨིཀནིམིཏྟཾ ནདཱིནིམིཏྟཾ ཨུདཀནིམིཏྟ’’ནྟི (མཧཱཝ. ༡༣༨) ཝུཏྟེསུ ཨཊྛསུ ནིམིཏྟེསུ ཏསྶཾ ཏསྶཾ དིསཱཡཾ ཡཐཱལདྡྷཱནི ནིམིཏྟཱནི ཀིཏྟེཏྭཱ སམྨནྣིཏབྦཱ. ཝུཏྟཉྷི ཀངྑཱཝིཏརཎིཡཾ (ཀངྑཱ. ཨཊྛ. ནིདཱནཝཎྞནཱ) ‘‘པུརཏྠིམཱཡ དིསཱཡ ཀིཾནིམིཏྟཾ? པཱསཱཎོ, བྷནྟེ. ཨེསོ པཱསཱཎོ ནིམིཏྟནྟིཨཱདིནཱ ནཡེན ཀིཏྟེཏྭཱ སམྨཏཱ’’ཏི. ཏེསུ ཙ ཨཊྛསུ ནིམིཏྟེསུ རུཀྑནིམིཏྟཱདཱིནཾ ཡཐཱཛ྄ཛྷཱསཡཊྛཱནེསུ དུལླབྷབྷཱཝཏོ ཝཌྜྷིཏྭཱ དྭིནྣཾ བདྡྷསཱིམཱནཾ སངྐརཀརཎཏོ ཙ པཱསཱཎནིམིཏྟསྶ པན ཏཐཱ ¶ སངྐརཀརཎཱབྷཱཝཏོ ཡཐིཙྪིཏཊྛཱནཾ ཨཱཧརིཏྭཱ ཋཔེཏུཾ སུཀརབྷཱཝཏོ ཙ སཱིམཾ བནྡྷནྟེཧི བྷིཀྑཱུཧི སཱིམམཎྜལསྶ སམནྟཱ ནིམིཏྟཱུཔགཱ པཱསཱཎཱ ཋཔེཏབྦཱ. ཏེན ཝུཏྟཾ མཧཱཝགྒཊྛཀཐཱཡཾ (མཧཱཝ. ཨཊྛ. ༡༣༨) ‘‘ཏཾ བནྡྷནྟེཧི སམནྟཱ ནིམིཏྟཱུཔགཱ པཱསཱཎཱ ཋཔེཏབྦཱ’’ཏི. ཝིམཏིཝིནོདནིཡཉྩ (ཝི. ཝི. ཊཱི. མཧཱཝགྒ ༢.༡༣༨) ‘‘ནིམིཏྟཱུཔགཱ པཱསཱཎཱ ཋཔེཏབྦཱཏི ཨིདཾ ཡཐཱརུཙིཏཊྛཱནེ རུཀྑནིམིཏྟཱདཱིནཾ དུལླབྷཏཱཡཱ’’ཏིཨཱདི. ཨེཏྟཱཝཏཱ ནིམིཏྟསམྤཏྟིསངྑཱཏཾ པཋམངྒཾ སཱུཔཔནྣཾ ཧོཏི.

ཏཏོ སཱིམཱསམྨུཏིཀརཎཏྠཾ སབྦནྟིམེན པརིཙྪེདེན ཙཏྟཱརོ བྷིཀྑཱུ སནྣིཔཏིཏྭཱ ཡཱཝཏཱ ཏསྨིཾ གཱམེ བདྡྷསཱིམཾ ཝཱ ནདཱིསམུདྡཛཱཏསྶརེ ཝཱ ཨནོཀྐམིཏྭཱ ཋིཏཱ བྷིཀྑཱུ སནྟི, སབྦེ ཏེ ཧཏྠཔཱསེ ཝཱ ཀཏྭཱ ཚནྡཾ ཝཱ ཨཱཧརིཏྭཱ ཡཱ སཱིམཱ སམྨཏཱ, སཱ པརིསསམྤཏྟིཡུཏྟཱ ནཱམ ཧོཏི. ཏེན ཝུཏྟཾ ཀངྑཱཝིཏརཎིཡཾ (ཀངྑཱ. ཨཊྛ. ནིདཱནཝཎྞནཱ) ‘‘པརིསསམྤཏྟིཡུཏྟཱ ནཱམ སབྦནྟིམེན པརིཙྪེདེན ཙཏཱུཧི བྷིཀྑཱུཧི སནྣིཔཏིཏྭཱ’’ཏིཨཱདི. ཨཐ ཏཾ སཱིམཾ བནྡྷནྟཱ བྷིཀྑཱུ སཱམནྟཝིཧཱརེསུ ཝསནྟེ བྷིཀྑཱུ ཏསྶ ཏསྶ ཝིཧཱརསྶ སཱིམཱཔརིཙྪེདཾ པུཙྪིཏྭཱ ཡེ བདྡྷསཱིམཝིཧཱརཱ, ཏེསཾ སཱིམཱཡ སཱིམནྟརིཀཾ ཋཔེཏྭཱ, ཡེ ཨབདྡྷསཱིམཝིཧཱརཱ, ཏེསཾ སཱིམཱཡ ཨུཔཙཱརཾ ཋཔེཏྭཱ དིསཱཙཱརིཀབྷིཀྑཱུནཾ ནིསྶཉྩཱརསམཡེ ཡདི ཨེཀསྨིཾཡེཝ གཱམཀྑེཏྟེ སཱིམཾ བནྡྷིཏུཀཱམཱ ¶ , ཏསྨིཾ ཡེ བྷིཀྑཱུ བདྡྷསཱིམཝིཧཱརཱ, ཏེསཾ པེསེཏབྦཾ ‘‘ཨཛྫ མཡཾ སཱིམཾ བནྡྷིསྶཱམ, ཏུམྷེ སཀསཀསཱིམཱཔརིཙྪེདཏོ མཱ ནིཀྑམཐཱ’’ཏི. ཡེ ཨབདྡྷསཱིམཝིཧཱརཱ, ཏེ སབྦེ ཨེཀཛ྄ཛྷཾ སནྣིཔཱཏཱཔེཏབྦཱ, ཚནྡཱརཧཱནཾ ཚནྡོ ཨཱཧརིཏབྦོ.

ཡདི ཨཉྙཾ གཱམཀྑེཏྟམྤི ཨནྟོཀཏྟུཀཱམཱ, ཏཏྠ ནིཝཱསིནོ བྷིཀྑཱུ སམཱནསཾཝཱསཀསཱིམཱསམྨནྣནཀཱལེ ཨཱགནྟུམྤི ¶ ཨནཱགནྟུམྤི ཝཊྚནྟི. ཨཝིཔྤཝཱསསཱིམཱསམྨནྣནཀཱལེ པན ཨནྟོནིམིཏྟགཏེཧི བྷིཀྑཱུཧི ཨཱགནྟབྦཾ, ཨནཱགཙྪནྟཱནཾ ཚནྡོ ཨཱཧརིཏབྦོ. ཝུཏྟཉྷེཏཾ སམནྟཔཱསཱདིཀཱཡཾ (མཧཱཝ. ཨཊྛ. ༡༣༨) ‘‘ཏཾ བནྡྷིཏུཀཱམེཧི སཱམནྟཝིཧཱརེསུ བྷིཀྑཱུ’’ཏིཨཱདི. ཨེཝཾ བྷིཀྑཱུསུ སནྣིཔཏིཏེསུ ཚནྡཱརཧཱནཾ ཚནྡེ ཨཱཧཊེ ཏེསུ ཏེསུ མགྒེསུ ནདཱིཏིཏྠགཱམདྭཱརཱདཱིསུ ཙ ཨཱགནྟུཀབྷིཀྑཱུནཾ སཱིགྷཾ སཱིགྷཾ ཧཏྠཔཱསཱནཡནཏྠཉྩ བཧིསཱིམཀརཎཏྠཉྩ ཨཱརཱམིཀསཱམཎེརེ ཋཔེཏྭཱ བྷེརིསཉྙཾ ཝཱ སངྑསཉྙཾ ཝཱ ཀཱརཱཔེཏྭཱ ནིམིཏྟཀིཏྟནཱནནྟརཾ ཝུཏྟཱཡ ‘‘སུཎཱཏུ མེ, བྷནྟེ སངྒྷོ’’ཏིཨཱདིཀཱཡ (མཧཱཝ. ༡༣༩) ཀམྨཝཱཙཱཡ སཱིམཱ བནྡྷིཏབྦཱ. ཝུཏྟཉྷི ཨཊྛཀཐཱཡཾ (མཧཱཝ. ཨཊྛ. ༡༣༨) ‘‘ཨེཝཾ སནྣིཔཏིཏེསུ པན བྷིཀྑཱུསཱུ’’ཏིཨཱདི. ཨེཏྟཱཝཏཱ པརིསསམྤཏྟིསངྑཱཏཾ དུཏིཡངྒཾ སཱུཔཔནྣཾ ཧོཏི.

ཏཏོ པརཾ ཀམྨཝཱཙཱཔཱཋསམཡེ ‘‘སཱིམཾ, བྷིཀྑཝེ, སམྨནྣནྟེན པཋམཾ སམཱནསཾཝཱསཀསཱིམཱ སམྨནྣིཏབྦཱ, པཙྪཱ ཏིཙཱིཝརེན ཨཝིཔྤཝཱསོ སམྨནྣིཏབྦོ’’ཏི (མཧཱཝ. ༡༤༤) ཝཙནཏོ པཋམཾ སམཱནསཾཝཱསཀསཱིམཱ སམྨནྣིཏབྦཱ, པཙྪཱ ཨཝིཔྤཝཱསསཱིམཱ སམྨནྣིཏབྦཱ, སམཱནསཾཝཱསཀཀམྨཝཱཙཱཔརིཡོསཱནེཡེཝ ནིམིཏྟཱནི བཧི ཀཏྭཱ ནིམིཏྟཱནཾ ཨནྟོཔམཱཎེནེཝ སམཱནསཾཝཱསཀསཱིམཱ ཙཏུནཧུཏཱདྷིཀདྭིལཀྑཡོཛནཔུཐུལཾ མཧཱཔཐཝིཾ ཝིནིཝིཛ྄ཛྷིཏྭཱ པཐཝཱིསནྡྷཱརཀཨུདཀཾ པརིཡནྟཾ ཀཏྭཱ གཏཱ. ཏེན ཝུཏྟཾ སམནྟཔཱསཱདིཀཱཡཾ ‘‘ཀམྨཝཱཙཱཔརིཡོསཱནེཡེཝ…པེ… གཏཱ ཧོཏཱི’’ཏི. ཨཝིཔྤཝཱསཀམྨཝཱཙཱཔརིཡོསཱནེ ཨཝིཔྤཝཱསསཱིམཱ ཡདི ཨནྟོསཱིམཱཡ གཱམོ ཨཏྠི, གཱམཉྩ གཱམཱུཔཙཱརཉྩ མུཉྩིཏྭཱ སམཱནསཾཝཱསཀསཱིམཱཡ གཏཔརིཙྪེདེནེཝ གཏཱ. ཨིཏི ཏིཙཱིཝརེན ཨཝིཔྤཝཱསསཱིམཱ གཱམཉྩ གཱམཱུཔཙཱརཉྩ ན ཨཝཏྠརཏི, སམཱནསཾཝཱསཀསཱིམཱཝ ཨཝཏྠརཏི, སམཱནསཾཝཱསཀསཱིམཱ ཨཏྟནོ དྷམྨཏཱཡ ¶ གཙྪཏི. ཨཝིཔྤཝཱསསཱིམཱ པན ཡཏྠ སམཱནསཾཝཱསཀསཱིམཱ, ཏཏྠེཝ གཙྪཏི. ཏེན ཝུཏྟཾ སམནྟཔཱསཱདིཀཱཡཾ ‘‘ཨིཏི བྷིཀྑཱུནཾ ཨཝིཔྤཝཱསསཱིམཱ…པེ… གཙྪཏཱི’’ཏི. ཏསྨཱ –

‘‘སུཎཱཏུ ¶ མེ, བྷནྟེ སངྒྷོ, ཡཱཝཏཱ སམནྟཱ ནིམིཏྟཱ ཀིཏྟིཏཱ. ཡདི སངྒྷསྶ པཏྟཀལླཾ, སངྒྷོ ཨེཏེཧི ནིམིཏྟེཧི སཱིམཾ སམྨནྣེཡྻ སམཱནསཾཝཱསཾ ཨེཀཱུཔོསཐཾ, ཨེསཱ ཉཏྟི.

‘‘སུཎཱཏུ མེ, བྷནྟེ སངྒྷོ, ཡཱཝཏཱ སམནྟཱ ནིམིཏྟཱ ཀིཏྟིཏཱ, སངྒྷོ ཨེཏེཧི ནིམིཏྟེཧི སཱིམཾ སམྨནྣཏི སམཱནསཾཝཱསཾ ཨེཀཱུཔོསཐཾ. ཡསྶཱཡསྨཏོ ཁམཏི ཨེཏེཧི ནིམིཏྟེཧི སཱིམཱཡ སམྨུཏི སམཱནསཾཝཱསཱཡ ཨེཀཱུཔོསཐཱཡ, སོ ཏུཎྷསྶ. ཡསྶ ནཀྑམཏི, སོ བྷཱསེཡྻ. སམྨཏཱ སཱ སཱིམཱ སངྒྷེན ཨེཏེཧི ནིམིཏྟེཧི སམཱནསཾཝཱསཱ ཨེཀཱུཔོསཐཱ, ཁམཏི སངྒྷསྶ, ཏསྨཱ ཏུཎྷཱི. ཨེཝམེཏཾ དྷཱརཡཱམཱི’’ཏི (མཧཱཝ. ༡༣༩).

ཨེསཱ སམཱནསཾཝཱསཀཀམྨཝཱཙཱ,

‘‘སུཎཱཏུ མེ, བྷནྟེ སངྒྷོ, ཡཱ སཱ སངྒྷེན སཱིམཱ སམྨཏཱ སམཱནསཾཝཱསཱ ཨེཀཱུཔོསཐཱ. ཡདི སངྒྷསྶ པཏྟཀལླཾ, སངྒྷོ ཏཾ སཱིམཾ ཏིཙཱིཝརེན ཨཝིཔྤཝཱསཾ སམྨནྣེཡྻ ཋཔེཏྭཱ གཱམཉྩ གཱམཱུཔཙཱརཉྩ, ཨེསཱ ཉཏྟི.

‘‘སུཎཱཏུ མེ, བྷནྟེ སངྒྷོ, ཡཱ སཱ སངྒྷེན སཱིམཱ སམྨཏཱ སམཱནསཾཝཱསཱ ཨེཀཱུཔོསཐཱ. སངྒྷོ ཏཾ སཱིམཾ ཏིཙཱིཝརེན ཨཝིཔྤཝཱསཾ སམྨནྣཏི ཋཔེཏྭཱ གཱམཉྩ གཱམཱུཔཙཱརཉྩ. ཡསྶཱཡསྨཏོ ཁམཏི ཨེཏིསྶཱ སཱིམཱཡ ཏིཙཱིཝརེན ཨཝིཔྤཝཱསསམྨུཏི ཋཔེཏྭཱ ¶ གཱམཉྩ གཱམཱུཔཙཱརཉྩ, སོ ཏུཎྷསྶ. ཡསྶ ནཀྑམཏི, སོ བྷཱསེཡྻ. སམྨཏཱ སཱ སཱིམཱ སངྒྷེན ཏིཙཱིཝརེན ཨཝིཔྤཝཱསཱ ཋཔེཏྭཱ གཱམཉྩ གཱམཱུཔཙཱརཉྩ, ཁམཏི སངྒྷསྶ, ཏསྨཱ ཏུཎྷཱི. ཨེཝམེཏཾ དྷཱརཡཱམཱི’’ཏི (མཧཱཝ. ༡༤༤).

ཨེསཱ ཨཝིཔྤཝཱསཀམྨཝཱཙཱ ཉཏྟིདོསཨནུསྶཱཝནཱདོསེ ཨནུཊྛཔེཏྭཱ སུཊྛུ བྷཎིཏབྦཱ. ཨེཏྟཱཝཏཱ ཀམྨཝཱཙཱསམྤཏྟིསངྑཱཏཾ ཏཏིཡངྒཾ སཱུཔཔནྣཾ ཧོཏི.

ཨེཝམཡཾ སཱིམཱ ཨནྟོ མཎིཝིམཱནཾ བཧི རཛཏཔརིཀྑིཏྟཾ ཝིམཱནསཱམིཀདེཝཔུཏྟོཏི ཨིམེཧི ཏཱིཧི ཨངྒེཧི སམྤནྣཾ ཙནྡམཎྜལཾ ཝིཡ, ཨནྟོ ཀནཀཝིམཱནཾ བཧི ཕལིཀཔརིཀྑིཏྟཾ ཝིམཱནསཱམིཀདེཝཔུཏྟོཏི ¶ ཨིམེཧི ཏཱིཧི ཨངྒེཧི སམྤནྣཾ སཱུརིཡམཎྜལཾ ཝིཡ ཙ ནིམིཏྟསམྤཏྟིཔརིསསམྤཏྟིཀམྨཝཱཙཱསམྤཏྟིསངྑཱཏེཧི ཏཱིཧི ཨངྒེཧི སམྤནྣཱ ཧུཏྭཱ ཨཏིཝིཡ སོབྷཏི ཝིརོཙཏི, ཛིནསཱསནསྶ ཙིརཊྛིཏིཀཱརཎབྷཱུཏཱ ཧུཏྭཱ ཏིཊྛཏཱིཏི དཊྛབྦཾ. ཝུཏྟཉྷེཏཾ ཨུཔོསཐཀྑནྡྷཀཔཱལི༹ཡཾ ‘‘སཱིམཾ, བྷིཀྑཝེ, སམྨནྣནྟེན པཋམཾ སམཱནསཾཝཱསཀསཱིམཱ སམྨནྣིཏབྦཱ’’ཏིཨཱདི.

‘‘ནིམིཏྟེན ནིམིཏྟཾ སམྦནྡྷིཏྭཱ’’ཏི ཨེཏྠ པན པུབྦེ ཝུཏྟནཡེནེཝ པུརཏྠིམདིསཏོ པཊྛཱཡ པདཀྑིཎཾ ཀཏྭཱ སབྦནིམིཏྟཱནི ཀིཏྟེཏྭཱ ཨུཏྟརཱནུདིསཾ པཏྭཱ ཏཏྠེཝ ཨཊྛཔེཏྭཱ པུབྦེ ཀིཏྟིཏཾ པུརཏྠིམདིསཱཡ ནིམིཏྟཾ པུན ཀིཏྟེཏྭཱ སམྨཏཱཏི ཨཏྠོ. ཨེཝཾ སམྨཏཱ ཨཡཾ སཱིམཱ ཨེཀཱདསཧི ཝིཔཏྟཱིཧི མུཏྟཱ, ཏཱིཧི སམྤཏྟཱིཧི སམནྣཱགཏཱ ཧུཏྭཱ སབྦཱཀཱརསམྤནྣཱ པཉྩཝསྶསཧསྶཔརིམཱཎཀཱལཾ ཨཔརིམཱཎཾ བྷིཀྑཱུནཾ ཨཔལོཀནཱདིཙཏུབྦིདྷཀམྨཀརཎཊྛཱནབྷཱུཏཱ བདྡྷསཱིམཱ ཧོཏཱིཏི དཊྛབྦཱ.

ཡདི ¶ པན སཁཎྜསཱིམཾ མཧཱསཱིམཾ བནྡྷིཏུཀཱམཱ, པུབྦེ ཝུཏྟནཡེན སུཊྛུ སོདྷེཏྭཱ སམཱུཧནིཏཔོརཱཎསཱིམཱཡ ཀེཝལཱཡ པཀཏིགཱམསཱིམཱཡ ཝཱ ཝིསུཾགཱམསཱིམཱཡ ཝཱ བནྡྷིཏབྦཱ, ཏཱསུ ཙ དྭཱིསུ སཱིམཱསུཔབྦཛྫུཔསམྤདཱདཱིནཾ སངྒྷཀམྨཱནཾ སུཁཀརཎཏྠཾ སཱིམཱ པཋམཾ བནྡྷིཏབྦཱ, ཏཾ པན བནྡྷནྟེཧི ཝཏྟཾ ཛཱནིཏབྦཾ. སཙེ ཧི བོདྷིཙེཏིཡབྷཏྟསཱལཱདཱིནི སབྦཝཏྠཱུནི པཏིཊྛཱཔེཏྭཱ ཀཏཝིཧཱརེ བནྡྷནྟི, ཝིཧཱརམཛ྄ཛྷེ བཧཱུནཾ སམོསརཎཊྛཱནེ ཨབནྡྷིཏྭཱ ཝིཧཱརཔཙྩནྟེ ཝིཝིཏྟོཀཱསེ བནྡྷིཏབྦཱ. ཨཀཏཝིཧཱརེ བནྡྷནྟེཧི བོདྷིཙེཏིཡཱདཱིནཾ སབྦཝཏྠཱུནཾ པཏིཊྛཱནཾ སལླཀྑེཏྭཱ ཡཐཱ པཏིཊྛིཏེསུ ཝཏྠཱུསུ ཝིཧཱརཔཙྩནྟེ ཝིཝིཏྟོཀཱསེ ཧོཏི, ཨེཝཾ བནྡྷིཏབྦཱ. ཏཐཱ ཧི ཝུཏྟཾ སམནྟཔཱསཱདིཀཱཡཾ (མཧཱཝ. ཨཊྛ. ༡༣༨) ‘‘ཨིམཾ པན སམཱནསཾཝཱསཀསཱིམཾ སམྨནྣནྟེཧཱི’’ཏིཨཱདི.

ཀིཏྟཀཔྤམཱཎཱ པན ཁཎྜསཱིམཱ བནྡྷིཏབྦཱཏི? ཧེཊྛིམཔརིཙྪེདེན སཙེ ཨེཀཝཱིསཏི བྷིཀྑཱུ གཎྷཱཏི, ཝཊྚཏི, ཏཏོ ཨོརཾ ན ཝཊྚཏི. པརཾ བྷིཀྑུསཧསྶཾ གཎྷནྟཱིཔི ཝཊྚཏི. ཝུཏྟཉྷི ཨཊྛཀཐཱཡཾ (མཧཱཝ. ༡༣༨) ‘‘སཱ ཧེཊྛིམཔརིཙྪེདེནཱ’’ཏིཨཱདི. ཨེཀཝཱིསཏི བྷིཀྑཱུཏི ཙ ནིསིནྣེ སནྡྷཱཡ ཝུཏྟཾ, ཨིདཉྩ ཨབྦྷཱནཀརཎཀཱལེ ཀམྨཱརཧབྷིཀྑུནཱ སདྡྷིཾ ཝཱིསཏིགཎསྶ སངྒྷསྶ ནིསཱིདནཔྤཧོནཀཏྠཾ ཝུཏྟཾ. ཝུཏྟཉྷི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༣༨) ‘‘ཨེཀཝཱིསཏི ¶ བྷིཀྑཱུ’’ཏིཨཱདི. ཏཾ ཁཎྜསཱིམཾ བནྡྷནྟེཧི བྷིཀྑཱུཧི སཱིམམཱལ༹ཀསྶ སམནྟཱ ནིམིཏྟཱུཔགཱ པཱསཱཎཱ ཋཔེཏབྦཱ. ཨནྟོཁཎྜསཱིམཱཡམེཝ ཋཏྭཱ ཁཎྜསཱིམཱ བནྡྷིཏབྦཱ. ‘‘ཨེསོ པཱསཱཎོ ནིམིཏྟ’’ནྟི ཨེཝཾ ནིམིཏྟཱནི ཀིཏྟེཏྭཱ ཀམྨཝཱཙཱཡ སཱིམཱ བནྡྷིཏབྦཱ, ཏསྶཱཡེཝ སཱིམཱཡ དལ༹ྷཱིཀམྨཏྠཾ ཨཝིཔྤཝཱསཀམྨཝཱཙཱ ཀཱཏབྦཱ. ཝུཏྟཉྷི ཨཊྛཀཐཱཡཾ (མཧཱཝ. ཨཊྛ. ༡༣༨) ‘‘ཏཾ བནྡྷནྟེཧཱི’’ཏིཨཱདི. ཨེཝཾ ཁཎྜསཱིམཾ སམྨནྣིཏྭཱ བཧི སཱིམནྟརིཀཔཱསཱཎཱ ཋཔེཏབྦཱ. སཱིམནྟརིཀཱ པཙྪིམཀོཊིཡཱ ཨེཀརཏནཔྤམཱཎཱ ¶ ཝཊྚཏི, ཝིདཏྠིཔྤམཱཎཱཔི ཙཏུརངྒུལཔྤམཱཎཱཔི ཝཊྚཏི. སཙེ པན ཝིཧཱརོ མཧཱ ཧོཏི, དྭེཔི ཏིསྶོཔི ཏཏུཏྟརིཔི ཁཎྜསཱིམཱཡོ བནྡྷིཏབྦཱ. ཝུཏྟཉྷི ཨཊྛཀཐཱཡཾ ‘‘སཱིམཾ སམྨནྣིཏྭཱ’’ཏིཨཱདི.

ཨེཝཾ ཁཎྜསཱིམཾ སམྨནྣིཏྭཱ མཧཱསཱིམཱསམྨུཏིཀཱལེ ཁཎྜསཱིམཏོ ནིཀྑམིཏྭཱ མཧཱསཱིམཱཡ ཋཏྭཱ སམནྟཱ ཨནུཔརིཡཱཡནྟེཧི སཱིམནྟརིཀཔཱསཱཎཱ ཀིཏྟེཏབྦཱ, ཏཏོ ཨཝསེསནིམིཏྟཱནི ཀིཏྟེཏྭཱ ཧཏྠཔཱསཾ ཨཝིཛཧནྟེཧི ཀམྨཝཱཙཱཡ སམཱནསཾཝཱསཀསཱིམཾ སམྨནྣིཏྭཱ ཏསྶ དལ༹ྷཱིཀམྨཏྠཾ ཨཝིཔྤཝཱསཀམྨཝཱཙཱཔི ཀཱཏབྦཱ. ཏཐཱ ཧི ཝུཏྟཾ ཨཊྛཀཐཱཡཾ (མཧཱཝ. ཨཊྛ. ༡༣༨) ‘‘ཨེཝཾ ཁཎྜསཱིམཾ སམྨནྣིཏྭཱ’’ཏིཨཱདི.

‘‘སམནྟཱ ཨནུཔརིཡཱཡནྟེཧི སཱིམནྟརིཀཔཱསཱཎཱ ཀིཏྟེཏབྦཱ’’ཏི ཝུཏྟཾ. ཀཐཾ ཀིཏྟེཏབྦཱཏི? དཀྑིཎཏོ ཨནུཔརིཡཱཡནྟེནེཝ ཀིཏྟེཏབྦཱ. ཏཐཱ ཧི ཁཎྜསཱིམཏོ པཙྪིམཱཡ དིསཱཡ པུརཏྠཱབྷིམུཁེན ཋཏྭཱ ‘‘པུརཏྠིམཱཡ དིསཱཡ ཀིཾ ནིམིཏྟ’’ནྟི ཏཏྠ སབྦཱནི ནིམིཏྟཱནི ཨནུཀྐམེན ཀིཏྟེཏྭཱ ཏཐཱ ཨུཏྟརཱཡ དིསཱཡ དཀྑིཎཱབྷིམུཁེན ཋཏྭཱ ‘‘དཀྑིཎཱཡ དིསཱཡ ཀིཾ ནིམིཏྟ’’ནྟི ཨནུཀྐམེན ཀིཏྟེཏྭཱ ཏཐཱ པུརཏྠིམཱཡ དིསཱཡ པཙྪིམཱབྷིམུཁེན ཋཏྭཱ ‘‘པཙྪིམཱཡ དིསཱཡ ཀིཾ ནིམིཏྟ’’ནྟི ཨནུཀྐམེན ཀིཏྟེཏྭཱ ཏཐཱ དཀྑིཎཱཡ དིསཱཡ ཨུཏྟརཱབྷིམུཁེན ཋཏྭཱ ‘‘ཨུཏྟརཱཡ དིསཱཡ ཀིཾ ནིམིཏྟ’’ནྟི ཏཏྠ སབྦཱནི ནིམིཏྟཱནི ཨནུཀྐམེན ཀིཏྟེཏྭཱ པུན པཙྪིམཱཡ དིསཱཡ པུརཏྠཱབྷིམུཁེན ཋཏྭཱ པུརིམཾ ཀིཏྟིཏཾ ཝུཏྟནཡེནེཝ པུན ཀིཏྟེཏབྦཾ. ཨེཝཾ བཧཱུནམྤི ཁཎྜསཱིམཱནཾ སཱིམནྟརིཀཔཱསཱཎཱ པཙྩེཀཾ ཀིཏྟེཏབྦཱ, ཏཏོ པཙྪཱ ཨཝསེསནིམིཏྟཱནཱིཏི མཧཱསཱིམཱཡ བཱཧིརབནྡྷནེསུ ནིམིཏྟཱནི. ཨེཝཾ སཱིམནྟརིཀཔཱསཱཎཱ མཧཱསཱིམཱཡ ཨནྟོ ནིམིཏྟཱནི ཧོནྟི དྭིནྣཾ སཱིམཱནཾ ¶ སངྐརདོསཱཔགམནཏྠཾ སཱིམནྟརིཀཔཱསཱཎཱནཾ ཋཔེཏབྦཏྟཱ. ཨེཝཾ སམནྟཱ ཨནུཔརིཡཱཡནྟེན སཱིམནྟརིཀཔཱསཱཎཱ ཀིཏྟེཏབྦཱ. ཏཐཱཧི ཝུཏྟཾ ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༣༨) ‘‘སཱིམནྟརིཀཔཱསཱཎཱཏི ¶ སཱིམནྟརིཀཱཡ ཋཔིཏནིམིཏྟཔཱསཱཎཱ, ཏེ པན ཀིཏྟེནྟེན པདཀྑིཎཏོ ཨནུཔརིཡཱཡནྟེནེཝ ཀིཏྟེཏབྦཱ’’ཏིཨཱདི.

ཀིཾ ཨིམིནཱ ཨནུཀྐམེནེཝ སཱིམཱ སམྨནྣིཏབྦཱ, ཨུདཱཧུ ཨཉྙེནཔི ཨནུཀྐམེན སམྨནྣིཏབྦཱཏི? སཙེ པན ཁཎྜསཱིམཱཡ ནིམིཏྟཱནི ཀིཏྟེཏྭཱ ཏཏོ སཱིམནྟརིཀཱཡ ནིམིཏྟཱནི ཀིཏྟེཏྭཱ མཧཱསཱིམཱཡ ནིམིཏྟཱནི ཀིཏྟེནྟི, ཨེཝཾ ཏཱིསུ ཋཱནེསུ ནིམིཏྟཱནི ཀིཏྟེཏྭཱ ཡཾ སཱིམཾ ཨིཙྪནྟི, ཏཾ པཋམཾ བནྡྷིཏུཾ ཝཊྚཏི. ཨེཝཾ སནྟེཔི ཡཐཱཝུཏྟནཡེན ཁཎྜསཱིམཏོཝ པཊྛཱཡ བནྡྷིཏབྦཱ. ཏཐཱ ཧི ཝུཏྟཾ ཨཊྛཀཐཱཡཾ (མཧཱཝ. ཨཊྛ. ༡༣༨) ‘‘སཙེ པན ཁཎྜསཱིམཱཡ ནིམིཏྟཱནཱི’’ཏིཨཱདི. ཨེཝཾ ཁཎྜསཱིམམཧཱསཱིམབནྡྷནེན བྷིཀྑཱུནཾ ཀོ གུཎོཏི ཙེ? ཨེཝཾ བདྡྷཱསུ པན སཱིམཱསུ ཁཎྜསཱིམཱཡ ཋིཏཱ བྷིཀྑཱུ མཧཱསཱིམཱཡཾ ཀམྨཾ ཀརོནྟཱནཾ བྷིཀྑཱུནཾ ཀམྨཾ ན ཀོཔེནྟི, མཧཱསཱིམཱཡ ཝཱ ཋིཏཱ ཁཎྜསཱིམཱཡ ཀམྨཾ ཀརོནྟཱནཾ, སཱིམནྟརིཀཱཡ པན ཋིཏཱ ཨུབྷིནྣམྤི ན ཀོཔེནྟི. གཱམཀྑེཏྟེ ཋཏྭཱ ཀམྨཾ ཀརོནྟཱནཾ པན སཱིམནྟརིཀཱཡ ཋིཏཱ ཀོཔེནྟི. སཱིམནྟརིཀཱ ཧི གཱམཀྑེཏྟཾ བྷཛཏི. ཏཐཱ ཧི ཝུཏྟཾ ཨཊྛཀཐཱཡཾ ‘‘ཨེཝཾ བདྡྷཱསུ པན སཱིམཱསཱུ’’ཏིཨཱདི, ཨེཝཾ བདྡྷསཱིམཝིཧཱརེསུ ཝསནྟཱ བྷིཀྑཱུ ཏིཙཱིཝརཱདྷིཊྛཱནེན ཨདྷིཊྛིཏེཧི ཏིཙཱིཝརེཧི ཝིནཱ ཡཐཱརུཙི ཝསིཏུཾ ལབྷནྟི. སཙེ པན གཱམོ ཨཏྠི, གཱམགཱམཱུཔཙཱརེསུ ན ལབྷཏཱིཏི དཊྛབྦཾ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

སཱིམཱབནྡྷནཝིནིཙྪཡཀཐཱལངྐཱརོ.

༢༥. ཨུཔོསཐཔཝཱརཎཱཝིནིཙྪཡཀཐཱ

༡༦༨. ཨེཝཾ ¶ སཱིམཱཝིནིཙྪཡཾ ཀཐེཏྭཱ ཨིདཱནི ཨུཔོསཐཔཝཱརཎཱཝིནིཙྪཡཾ ཀཐེཏུཾ ‘‘ཨུཔོསཐཔཝཱརཎཱཏི ཨེཏྠ’’ཏྱཱདིམཱཧ. ཏཏྠ ཨུཔོསཐསདྡོ ཏཱཝ –

‘‘ཨུདྡེསེ ¶ པཱཏིམོཀྑསྶ, པཎྞཏྟིཡམུཔོསཐོ;

ཨུཔཝཱསེ ཙ ཨཊྛངྒེ, ཨུཔོསཐདིནེ སིཡཱ’’ཏི. –

ཝཙནཏོ པཱཏིམོཀྑུདྡེསེ པཎྞཏྟིཡཾ ཨུཔཝཱསེ ཨཊྛངྒསཱིལེ ཨུཔོསཐདིནེ ཙ ཝཏྟཏི. ཏཐཱ ཧེས ‘‘ཨཱཡཱམཱཝུསོ ཀཔྤིན ཨུཔོསཐཾ གམིསྶཱམཱ’’ཏིཨཱདཱིསུ (དཱི. ནི. ཨཊྛ. ༡.༡༥༠; མ. ནི. ཨཊྛ. ༣.༨༥) པཱཏིམོཀྑུདྡེསེ ཨཱགཏོ, ‘‘ཨུཔོསཐོ ནཱམ ནཱགརཱཛཱ’’ཏིཨཱདཱིསུ (དཱི. ནི. ༢.༢༤༦) པཎྞཏྟིཡཾ, ‘‘སུདྡྷསྶ ཝེ སདཱ ཕེགྒུ, སུདྡྷསྶ ཨུཔོསཐོ སདཱ’’ཏིཨཱདཱིསུ (མ. ནི. ༡.༧༩) ཨུཔཝཱསེ, ‘‘ཨེཝཾ ཨཊྛངྒསམནྣཱགཏོ ཁོ, ཝིསཱཁེ, ཨུཔོསཐོ ཨུཔཝུཏྠོ’’ཏིཨཱདཱིསུ (ཨ. ནི. ༨.༤༣) ཨཊྛངྒསཱིལེ. ‘‘ན, བྷིཀྑཝེ, ཨུཔོསཐེ སབྷིཀྑུཀཱཨཱཝཱསཱ ཨབྷིཀྑུཀོ ཨཱཝཱསོ’’ཏིཨཱདཱིསུ (པཱཙི. ༡༠༤༨) ཨུཔོསཐདིནེ ཝཏྟཏི. ‘‘པཱརིསུདྡྷིཨུཔོསཐོ ཨདྷིཊྛཱནུཔོསཐོ’’ཏིཨཱདཱིསུ པཱརིསུདྡྷིཨདྷིཊྛཱནེསུཔི ཝཏྟཏི. ཏེ པན པཱཏིམོཀྑུདྡེསེ ཨནྟོགདྷཱཏི ཀཏྭཱ ཝིསུཾ ན ཝུཏྟཱ. ཨིདྷ པན པཱཏིམོཀྑུདྡེསེ ཨུཔོསཐདིནེ ཙ ཝཏྟཏི. ཏཏྠ པཱཏིམོཀྑུདྡེསེ ཨུཔཝསནཾ ཨུཔོསཐོ, སཱིལེན ཨུཔེཏཱ ཧུཏྭཱ ཝསནནྟྱཏྠོ. ཨུཔོསཐདིནེ ཨུཔཝསནྟི ཨེཏྠཱཏི ཨུཔོསཐོ, ཨེཏསྨིཾ དིཝསེ སཱིལེན ཨུཔེཏཱ ཧུཏྭཱ ཝསནྟཱིཏྱཏྠོ.

པཝཱརཎཱ-སདྡོ པན ‘‘པཝཱརཎཱ པཊིཀྑེཔེ, ཀཐིཏཱཛ྄ཛྷེསནཱཡ ཙཱ’’ཏི ཨབྷིདྷཱནཔྤདཱིཔིཀཱཡཾ ཝཙནཏོ པཊིཀྑེཔེ ཨཛ྄ཛྷེསནེ ཙ ཝཏྟཏི. ཏཏྠ ‘‘ཡོ པན བྷིཀྑུ བྷུཏྟཱཝཱི པཝཱརིཏོ ཨནཏིརིཏྟཾ ཁཱདནཱིཡཾ ཝཱ བྷོཛནཱིཡཾ ཝཱ ¶ ཁཱདེཡྻ ཝཱ བྷུཉྫེཡྻ ཝཱ, པཱཙིཏྟིཡ’’ནྟིཨཱདཱིསུ (པཱཙི. ༢༣༨) པཊིཀྑེཔེ, ‘‘སངྒྷོ པཝཱརེཡྻཱ’’ཏིཨཱདཱིསུ (མཧཱཝ. ༢༡༠) ཨཛ྄ཛྷེསནེ, ‘‘ཨཛྫཔཝཱརཎཱ ཙཱཏུདྡསཱི’’ཏིཨཱདཱིསུ (མཧཱཝ. ཨཊྛ. ༢༡༢) པཝཱརཎཱདིཝསེ. སོ པན ཨཛ྄ཛྷེསནདིཝསོཡེཝཱཏི ཝིསུཾ ན ཝུཏྟོ. ཨིདྷ པན ཨཛ྄ཛྷེསནེ ཝཏྟཏི, ཏསྨཱ པཝཱརཱིཡཏེ པཝཱརཎཱ, པཀཱརེན ཨིཙྪཱིཡཏེཏྱཏྠོ. པ-པུབྦ ཝརདྷཱཏུ ཙུརཱདིགཎིཀཱཡཾ.

ཨེཏྠ ཙ ཀིཉྩཱཔི པཱལི༹ཡཾ ཨུཔོསཐཀྑནྡྷཀཱནནྟརཾ ཝསྶཱུཔནཱཡིཀཀྑནྡྷཀོ, ཏདནནྟརཾ པཝཱརཎཀྑནྡྷཀོ སངྒཱིཏོ, ཏཐཱཔི ཨུཔོསཐཔཝཱརཎཀམྨཱནཾ ཡེབྷུཡྻེན སམཱནཏྟཱ ཡམཀམིཝ བྷཱུཏཏྟཱ མིསྶེཏྭཱ ཀཐེནྟོ སུཝིཉྙེཡྻོ ཧོཏི སལླཧུཀགནྠོ ཙཱཏི མནྟྭཱ ཁནྡྷཀདྭཡསངྒཧིཏཾ ཨཏྠཾ ¶ ཨེཀེནེཝ པརིཙྪེདེན དསྶེཏི ཨཱཙརིཡོ. ཏཏྠ ཙཱཏུདྡསིཀོ པནྣརསིཀོ སཱམགྒཱིཨུཔོསཐོཏི དིཝསཝསེན ཏཡོ ཨུཔོསཐཱ ཧོནྟཱིཏི སམྦནྡྷོ. ཙཏུདྡསིཡཾ ནིཡུཏྟོ ཙཱཏུདྡསིཀོ, ཨེཝཾ པནྣརསིཀོ. སཱམགྒཱིཨུཔོསཐོ ནཱམ སངྒྷསཱམགྒིཀདིཝསེ ཀཱཏབྦཨུཔོསཐོ. ཧེམནྟགིམྷཝསྶཱནཾ ཏིཎྞཾ ཨུཏཱུནནྟི ཨེཏྠ ཧེམནྟཨུཏུ ནཱམ ཨཔརཀཏྟིཀཀཱལ༹པཀྑསྶ པཱཊིཔདཏོ པཊྛཱཡ ཕགྒུནཔུཎྞམཔརིཡོསཱནཱ ཙཏྟཱརོ མཱསཱ. གིམྷཨུཏུ ནཱམ ཕགྒུནསྶ ཀཱལ༹པཀྑཔཱཊིཔདཏོ པཊྛཱཡ ཨཱསཱལ༹ྷིཔུཎྞམཔརིཡོསཱནཱ ཙཏྟཱརོ མཱསཱ. ཝསྶཱནཨུཏུ ནཱམ ཨཱསཱལ༹ྷསྶ ཀཱལ༹པཀྑཔཱཊིཔདཏོ པཊྛཱཡ ཨཔརཀཏྟིཀཔུཎྞམཔརིཡོསཱནཱ ཙཏྟཱརོ མཱསཱ. ཏཏིཡསཏྟམཔཀྑེསུ དྭེ དྭེ ཀཏྭཱ ཚ ཙཱཏུདྡསིཀཱཏི ཧེམནྟསྶ ཨུཏུནོ ཏཏིཡེ ཙ སཏྟམེ ཙ པཀྑེ དྭེ ཙཱཏུདྡསིཀཱ, མིགསིརམཱསསྶ ཀཱལ༹པཀྑེ, མཱགྷམཱསསྶ ཀཱལ༹པཀྑེ ཙཱཏི ཨཏྠོ. ཨེཝཾ གིམྷསྶ ཨུཏུནོ ཏཏིཡེ ཙིཏྟམཱསསྶ ཀཱལ༹པཀྑེ སཏྟམེ ཛེཊྛམཱསསྶ ¶ ཀཱལ༹པཀྑེ ཙ, ཝསྶཱནསྶ ཨུཏུནོ ཏཏིཡེ སཱཝཎསྶ ཀཱལ༹པཀྑེ ཙ སཏྟམེ ཨསྶཡུཛམཱསསྶ ཀཱལ༹པཀྑེ ཙཱཏི ཨཏྠོ. སེསཱ པནྣརསིཀཱཏི སེསཱ ཨཊྛཱརས པནྣརསིཀཱ.

ཧོཏི ཙེཏྠ –

‘‘ཀཏྟིཀསྶ ཙ ཀཱལ༹མྷཱ;

ཡཱཝ ཕགྒུནཔུཎྞམཱ;

ཧེམནྟཀཱལོཏི ཝིཉྙེཡྻོ;

ཨཊྛ ཧོནྟི ཨུཔོསཐཱ.

‘‘ཕགྒུནསྶ ཙ ཀཱལ༹མྷཱ;

ཡཱཝ ཨཱསཱལ༹ྷིཔུཎྞམཱ;

གིམྷཀཱལོཏི ཝིཉྙེཡྻོ;

ཨཊྛ ཧོནྟི ཨུཔོསཐཱ.

‘‘ཨཱསཱལ༹ྷསྶ ཙ ཀཱལ༹མྷཱ;

ཡཱཝ ཀཏྟིཀཔུཎྞམཱ;

ཝསྶཀཱལོཏི ¶ ཝིཉྙེཡྻོ;

ཨཊྛ ཧོནྟི ཨུཔོསཐཱ.

‘‘ཨུཏཱུནཾ པན ཏིཎྞནྣཾ, པཀྑེ ཏཏིཡསཏྟམེ;

ཙཏུདྡསོཏི པཱཏིམོཀྑཾ, ཨུདྡིསནྟི ནཡཉྙུནོ’’ཏི. (ཀངྑཱ. ཨབྷི. ཊཱི. ནིདཱནཝཎྞནཱ);

ཨེཝཾ ཨེཀསཾཝཙྪརེ ཙཏུཝཱིསཏི ཨུཔོསཐཱཏི ཨེཝཾ ཨིམིནཱ ཝུཏྟནཡེན ཧེམནྟཱདཱིནཾ ཏིཎྞཾ ཨུཏཱུནཾ ཨེཀེཀསྨིཾ ཨུཏུམྷི པཙྩེཀཾ ཨཊྛཨཊྛཨུཔོསཐཏྟཱ ཨུཏུཏྟཡསམོདྷཱནབྷཱུཏེ ཨེཀསྨིཾ སཾཝཙྪརེ ཙཏུཝཱིསཏི ཨུཔོསཐཱ ཧོནྟཱིཏི ཨཏྠོ. ཨིདཾ ཏཱཝ པཀཏིཙཱརིཏྟནྟི ཨིདཾ ཨེཀསྨིཾ སཾཝཙྪརེ ཚཙཱཏུདྡསིཀཨཊྛཱརསཔནྣརསིཀཨུཔོསཐཀརཎཾ ཏཱཝ པཋམཾ པཀཏིཡཱ སབྷཱཝེན ཙཱརིཏྟཾ ཀཱཏབྦཾ ཀམྨཾ ཧོཏི, ན བཧུཏརཱཝཱསིཀཱདིནཱ ཀཱརཎེན ཀཱཏབྦནྟི ཨཏྠོ.

ཏཐཱརཱུཔཔཙྩཡེ ¶ སཏི ཨཉྙསྨིམྤི ཙཱཏུདྡསེ ཨུཔོསཐཾ ཀཱཏུཾ ཝཊྚཏཱིཏི ‘‘སཀིཾ པཀྑསྶ ཙཱཏུདྡསེ ཝཱ པནྣརསེ ཝཱ པཱཏིམོཀྑཾ ཨུདྡིསིཏུ’’ནྟི (མཧཱཝ. ༡༣༦) ཝཙནཏོ ‘‘ཡོ པན ཨཱགནྟུཀེཧི ཨཱཝཱསིཀཱནཾ ཨནུཝཏྟིཏབྦ’’ནྟིཨཱདིཝཙནཏོ (མཧཱཝ. ༡༧༨) ཙ ཏཐཱརཱུཔཔཙྩཡེ སཏི ཨཉྙསྨིམྤི ཙཱཏུདྡསེ ཨུཔོསཐཾ ཀཱཏུཾ ཝཊྚཏཱིཏི ཨཏྠོ. ཏཏྠ སཀིནྟི ཨེཀཝཱརཾ. ཨཱཝཱསིཀཱནཾ ཨནུཝཏྟིཏབྦནྟི ཨཱཝཱསིཀེཧི ‘‘ཨཛྫུཔོསཐོ ཙཱཏུདྡསོ’’ཏི པུབྦཀིཙྩེ ཀརིཡམཱནེ ཨནུཝཏྟིཏབྦཾ, ན པཊིཀྐོསིཏབྦཾ. ཨཱདི-སདྡེན ‘‘ཨཱཝཱསིཀེཧི ཨཱགནྟུཀཱནཾ ཨནུཝཏྟིཏབྦ’’ནྟི ཝཙནཾ, ‘‘ཨནུཛཱནཱམི, བྷིཀྑཝེ, ཏེཧི བྷིཀྑཱུཧི དྭེ ཏཡོ ཨུཔོསཐེ ཙཱཏུདྡསིཀེ ཀཱཏུཾ, ཀཐཾ མཡཾ ཏེཧི བྷིཀྑཱུཧི པཋམཏརཾ པཝཱརེཡྻཱམཱ’’ཏི (མཧཱཝ. ༢༤༠) ཝཙནཉྩ སངྒཎྷཱཏི. ཨེཏྠ ཙ པཋམསུཏྟསྶ ཨེཀེཀསྶ ཨུཏུནོ ཏཏིཡསཏྟམཔཀྑསྶ ཙཱཏུདྡསེ ཝཱ ཨཝསེསསྶ པནྣརསེ ཝཱ སཀིཾ པཱཏིམོཀྑཾ ཨུདྡིསིཏབྦནྟི. པཀཏིཙཱརིཏྟཝསེནཔི ཨཏྠསམྦྷཝཏོ ‘‘ཨཱགནྟུཀེཧཱི’’ཏིཨཱདཱིནི སུཏྟཱནི དསྶིཏཱནཱིཏི ཝེདིཏབྦཾ. ཏཐཱརཱུཔཔཙྩཡེ སཏཱིཏི ཨཉྙསྨིམྤི ཙཱཏུདྡསེ ཨུཔོསཐཾ ཀཱཏུཾ ཨནུརཱུཔེ ཨཱཝཱསིཀཱ བཧུཏརཱ ཧོནྟཱིཏི ཨེཝམཱདིཀེ པཙྩཡེ སཏི. ཨཉྙསྨིམྤི ཙཱཏུདྡསེཏི ཏིཎྞཾ ཨུཏཱུནཾ ཏཏིཡསཏྟམཔཀྑཙཱཏུདྡསཏོ ཨཉྙསྨིཾ ཙཱཏུདྡསེ.

ཏཏྲཱཡཾ ¶ པཱལི༹ (མཧཱཝ. ༡༧༨) –

‘‘ཨིདྷ པན, བྷིཀྑཝེ, ཨཱཝཱསིཀཱནཾ བྷིཀྑཱུནཾ ཙཱཏུདྡསོ ཧོཏི, ཨཱགནྟུཀཱནཾ པནྣརསོ. སཙེ ཨཱཝཱསིཀཱ བཧུཏརཱ ཧོནྟི, ཨཱགནྟུཀེཧི ཨཱཝཱསིཀཱནཾ ཨནུཝཏྟིཏབྦཾ. སཙེ སམསམཱ ཧོནྟི, ཨཱགནྟུཀེཧི ཨཱཝཱསིཀཱནཾ ཨནུཝཏྟིཏབྦཾ. སཙེ ཨཱགནྟུཀཱ ¶ བཧུཏརཱ ཧོནྟི, ཨཱཝཱསིཀེཧི ཨཱགནྟུཀཱནཾ ཨནུཝཏྟིཏབྦཾ.

‘‘ཨིདྷ པན, བྷིཀྑཝེ, ཨཱཝཱསིཀཱནཾ བྷིཀྑཱུནཾ པནྣརསོ ཧོཏི, ཨཱགནྟུཀཱནཾ ཙཱཏུདྡསོ. སཙེ ཨཱཝཱསིཀཱ བཧུཏརཱ ཧོནྟི, ཨཱགནྟུཀེཧི ཨཱཝཱསིཀཱནཾ ཨནུཝཏྟིཏབྦཾ. སཙེ སམསམཱ ཧོནྟི, ཨཱགནྟུཀེཧི ཨཱཝཱསིཀཱནཾ ཨནུཝཏྟིཏབྦཾ. སཙེ ཨཱགནྟུཀཱ བཧུཏརཱ ཧོནྟི, ཨཱཝཱསིཀེཧི ཨཱགནྟུཀཱནཾ ཨནུཝཏྟིཏབྦཾ.

‘‘ཨིདྷ པན, བྷིཀྑཝེ, ཨཱཝཱསིཀཱནཾ བྷིཀྑཱུནཾ པཱཊིཔདོ ཧོཏི, ཨཱགནྟུཀཱནཾ པནྣརསོ. སཙེ ཨཱཝཱསིཀཱ བཧུཏརཱ ཧོནྟི, ཨཱཝཱསིཀེཧི ཨཱགནྟུཀཱནཾ ནཱཀཱམཱ དཱཏབྦཱ སཱམགྒཱི, ཨཱགནྟུཀེཧི ནིསྶཱིམཾ གནྟྭཱ ཨུཔོསཐོ ཀཱཏབྦོ. སཙེ སམསམཱ ཧོནྟི, ཨཱཝཱསིཀེཧི ཨཱགནྟུཀཱནཾ ནཱཀཱམཱ དཱཏབྦཱ སཱམགྒཱི, ཨཱགནྟུཀེཧི ནིསྶཱིམཾ གནྟྭཱ ཨུཔོསཐོ ཀཱཏབྦོ. སཙེ ཨཱགནྟུཀཱ བཧུཏརཱ ཧོནྟི, ཨཱཝཱསིཀེཧི ཨཱགནྟུཀཱནཾ སཱམགྒཱི ཝཱ དཱཏབྦཱ, ནིསྶཱིམཾ ཝཱ གནྟབྦཾ.

‘‘ཨིདྷ པན, བྷིཀྑཝེ, ཨཱཝཱསིཀཱནཾ བྷིཀྑཱུནཾ པནྣརསོ ཧོཏི, ཨཱགནྟུཀཱནཾ པཱཊིཔདོ. སཙེ ཨཱཝཱསིཀཱ བཧུཏརཱ ཧོནྟི, ཨཱགནྟུཀེཧི ཨཱཝཱསིཀཱནཾ སཱམགྒཱི ཝཱ དཱཏབྦཱ, ནིསྶཱིམཾ ཝཱ གནྟབྦཾ. སཙེ སམསམཱ ཧོནྟི, ཨཱགནྟུཀེཧི ཨཱཝཱསིཀཱནཾ སཱམགྒཱི ཝཱ དཱཏབྦཱ, ནིསྶཱིམཾ ཝཱ གནྟབྦཾ. སཙེ ཨཱགནྟུཀཱ བཧུཏརཱ ཧོནྟི, ཨཱགནྟུཀེཧི ཨཱཝཱསིཀཱནཾ ནཱཀཱམཱ དཱཏབྦཱ སཱམགྒཱི, ཨཱཝཱསིཀེཧི ནིསྶཱིམཾ གནྟྭཱ ཨུཔོསཐོ ཀཱཏབྦོ’’ཏི.

ཏཏྲཱཡཾ ¶ ཨཊྛཀཐཱ (མཧཱཝ. ཨཊྛ. ༡༧༨) –

ཨཱཝཱསིཀཱནཾ ¶ བྷིཀྑཱུནཾ ཙཱཏུདྡསོ ཧོཏི, ཨཱགནྟུཀཱནཾ པནྣརསོཏི ཨེཏྠ ཡེསཾ པནྣརསོ, ཏེ ཏིརོརཊྛཏོ ཝཱ ཨཱགཏཱ, ཨཏཱིཏཾ ཝཱ ཨུཔོསཐཾ ཙཱཏུདྡསིཀཾ ཨཀཾསཱུཏི ཝེདིཏབྦཱ. ཨཱཝཱསིཀཱནཾ ཨནུཝཏྟིཏབྦནྟི ཨཱཝཱསིཀེཧི ‘‘ཨཛྫུཔོསཐོ ཙཱཏུདྡསོ’’ཏི པུབྦཀིཙྩེ ཀརིཡམཱནེ ཨནུཝཏྟིཏབྦཾ, ན པཊིཀྐོསིཏབྦཾ. ནཱཀཱམཱ དཱཏབྦཱཏི ན ཨནིཙྪཱཡ དཱཏབྦཱཏི.

‘‘ཨནུཛཱནཱམི བྷིཀྑཝེ’’ཏིཨཱདིམྷི ཨཡཾ པཝཱརཎཀྑནྡྷཀཱགཏཱ པཱལི༹ (མཧཱཝ. ༢༤༠) – ཨིདྷ པན, བྷིཀྑཝེ, སམྦཧུལཱ སནྡིཊྛཱ སམྦྷཏྟཱ བྷིཀྑཱུ ཨཉྙཏརསྨིཾ ཨཱཝཱསེ ཝསྶཾ ཨུཔགཙྪནྟི, ཏེསཾ སཱམནྟཱ ཨཉྙེ བྷིཀྑཱུ བྷཎྜནཀཱརཀཱ ཀལཧཀཱརཀཱ ཝིཝཱདཀཱརཀཱ བྷསྶཀཱརཀཱ སངྒྷེ ཨདྷིཀརཎཀཱརཀཱ ཝསྶཾ ཨུཔགཙྪནྟི ‘‘མཡཾ ཏེསཾ བྷིཀྑཱུནཾ ཝསྶཾཝུཏྠཱནཾ པཝཱརཎཱཡ པཝཱརཎཾ ཋཔེསྶཱམཱ’’ཏི. ཨནུཛཱནཱམི, བྷིཀྑཝེ, ཏེཧི བྷིཀྑཱུཧི དྭེ ཏཡོ ཨུཔོསཐེ ཙཱཏུདྡསིཀེ ཀཱཏུཾ, ཀཐཾ མཡཾ ཏེཧི བྷིཀྑཱུཧི པཋམཏརཾ པཝཱརེཡྻཱམཱཏི.

ཏཏྲཱཡཾ ཨཊྛཀཐཱ (མཧཱཝ. ཨཊྛ. ༢༤༠) – དྭེ ཏཡོ ཨུཔོསཐེ ཙཱཏུདྡསིཀེ ཀཱཏུནྟི ཨེཏྠ ཙཏུཏྠཔཉྩམཱ དྭེ, ཏཏིཡོ པན པཀཏིཡཱཔི ཙཱཏུདྡསིཀོཡེཝཱཏི, ཏསྨཱ ཏཏིཡཙཏུཏྠཱ ཝཱ ཏཏིཡཙཏུཏྠཔཉྩམཱ ཝཱ དྭེ ཏཡོ ཙཱཏུདྡསིཀཱ ཀཱཏབྦཱ. ཨཐ ཙཏུཏྠེ ཀཏེ སུཎནྟི, པཉྩམོ ཙཱཏུདྡསིཀོ ཀཱཏབྦོ, ཨེཝམྤི དྭེ ཙཱཏུདྡསིཀཱ ཧོནྟི. ཨེཝཾ ཀརོནྟཱ བྷཎྜནཀཱརཀཱནཾ ཏེརསེ ཝཱ ཙཱཏུདྡསེ ཝཱ ཨིམེ པནྣརསཱིཔཝཱརཎཾ པཝཱརེསྶནྟཱིཏི.

ཏཏྠ ¶ ཨཡཾ སཱརཏྠདཱིཔནཱིཔཱཋོ (སཱརཏྠ. ཊཱི. མཧཱཝགྒ ༣.༢༤༠) – ཙཏུཏྠེ ཀཏེ སུཎནྟཱིཏི ཙཏུཏྠེ པནྣརསིཀུཔོསཐེ ཀཏེ ཨམྷཱཀཾ པཝཱརཎཾ ཋཔེསྶནྟཱིཏི སུཎནྟི. ཨེཝམྤི དྭེ ཙཱཏུདྡསིཀཱ ཧོནྟཱིཏི ཏཏིཡེན སདྡྷིཾ དྭེ ཙཱཏུདྡསིཀཱ ཧོནྟཱིཏི.

ཏཏྲཱཡཾ ཝིམཏིཝིནོདནཱིཔཱཋོ (ཝི. ཝི. ཊཱི. མཧཱཝགྒ ༢.༢༤༠) – དྭེ ཙཱཏུདྡསིཀཱ ཧོནྟཱིཏི ཏཏིཡཔཀྑེ ཙཱཏུདྡསིཡཱ སདྡྷིཾ དྭེ ཙཱཏུདྡསིཀཱ ཧོནྟི. བྷཎྜནཀཱརཀཱནཾ ཏེརསེ ཝཱ ཙཱཏུདྡསེ ཝཱ ཨིམེ པནྣརསཱིཔཝཱརཎཾ པཝཱརེསྶནྟཱིཏི ཨིམིནཱ ཡཐཱསཀཾ ཨུཔོསཐཀརཎདིཝསཏོ པཊྛཱཡ བྷིཀྑཱུནཾ ཙཱཏུདྡསཱིཔནྣརསཱིཝོཧཱརོ, ན ཙནྡགཏིསིདྡྷིཡཱ ཏིཐིཡཱ ཝསེནཱཏི དསྶེཏི. ཀིཉྩཱཔི ཨེཝཾ ‘‘ཨནུཛཱནཱམི, བྷིཀྑཝེ, རཱཛཱུནཾ ཨནུཝཏྟིཏུ’’ནྟི (མཧཱཝ. ༡༨༦) ཝཙནཏོ པནེཏྠ ལོཀིཡཱནཾ ཏིཐིཾ ཨནུཝཏྟནྟེཧིཔི ཨཏྟནོ ཨུཔོསཐཀྐམེན ཙཱཏུདྡསིཾ པནྣརསིཾ ཝཱ པནྣརསིཾ ཙཱཏུདྡསིཾ ¶ ཝཱ ཀརོནྟེཧེཝ ཨནུཝཏྟིཏབྦཾ, ན པན སོལ༹སམདིཝསཾ ཝཱ ཏེརསམདིཝསཾ ཝཱ ཨུཔོསཐདིཝསཾ ཀརོནྟེཧི. ཏེནེཝ པཱལི༹ཡམྤི (མཧཱཝ. ༢༤༠) ‘‘དྭེ ཏཡོ ཨུཔོསཐེ ཙཱཏུདྡསིཀེ ཀཱཏུ’’ནྟི ཝུཏྟཾ. ཨཉྙཐཱ ‘‘དྭཱདསིཡཾ, ཏེརསིཡཾ ཝཱ ཨུཔོསཐོ ཀཱཏབྦོ’’ཏི ཝཏྟབྦཏོ. ‘‘སཀིཾ པཀྑསྶ ཙཱཏུདྡསེ ཝཱ པནྣརསེ ཝཱ’’ཏིཨཱདིཝཙནམྤི (མཧཱཝ. ༡༣༦) ཨུཔཝུཏྟཀྐམེནེཝ ཝུཏྟཾ, ན ཏིཐིཀྐམེནཱཏི གཧེཏབྦནྟི.

ན ཀེཝལཾ ཨུཔོསཐདིཝསཱཡེཝ ཏཡོ ཧོནྟི, ཨཐ ཁོ པཝཱརཎཱདིཝསཱཔཱིཏི ཨཱཧ ‘‘པུརིམཝསྶཾཝུཏྠཱནཾ པནཱ’’ཏིཨཱདི. མཱཨིཏི ཙནྡོ ཝུཙྩཏི ཏསྶ གཏིཡཱ དིཝསསྶ མིནིཏབྦཏོ, སོ ཨེཏྠ སབྦཀལཱཔཔཱརིཔཱུརིཡཱ པུཎྞོཏི པུཎྞམཱ. པུབྦཀཏྟིཀཱཡ པུཎྞམཱ པུབྦཀཏྟིཀཔུཎྞམཱ, ཨསྶཡུཛཔུཎྞམཱ. སཱ ཧི པཙྪིམཀཏྟིཀཾ ནིཝཏྟེཏུཾ ཨེཝཾ ཝུཏྟཱ. ཏེསཾཡེཝཱཏི ¶ པུརིམཝསྶཾཝུཏྠཱནཾཡེཝ. བྷཎྜནཀཱརཀེཧཱིཏི ཀལཧཀཱརཀེཧི. པཙྩུཀྐཌྜྷནྟཱིཏི ཨུཀྐཌྜྷནྟི, བྷཎྜནཀཱརཀེ ཨནུཝཱདཝསེན ཨསྶཡུཛཔུཎྞམཱདིཾ པརིཙྩཛནྟཱ པཝཱརཎཾ ཀཱལ༹པཀྑཾ ཛུཎྷཔཀྑནྟི ཨུདྡྷཾ ཀཌྜྷནྟཱིཏི ཨཏྠོ, ‘‘སུཎནྟུ མེ, ཨཱཡསྨནྟོ ཨཱཝཱསིཀཱ, ཡདཱཡསྨནྟཱནཾ པཏྟཀལླཾ, ཨིདཱནི ཨུཔོསཐཾ ཀརེཡྻཱམ, པཱཏིམོཀྑཾ ཨུདྡིསེཡྻཱམ, ཨཱགམེ ཀཱལེ༹ པཝཱརེཡྻཱམཱ’’ཏི, ‘‘སུཎནྟུ མེ, ཨཱཡསྨནྟོ ཨཱཝཱསིཀཱ, ཡདཱཡསྨནྟཱནཾ པཏྟཀལླཾ, ཨིདཱནི ཨུཔོསཐཾ ཀརེཡྻཱམ, པཱཏིམོཀྑཾ ཨུདྡིསེཡྻཱམ, ཨཱགམེ ཛུཎྷེ པཝཱརེཡྻཱམཱ’’ཏི (མཧཱཝ. ༢༤༠) ཙ ཨེཝཾ ཉཏྟིཡཱ པཝཱརཎཾ ཨུདྡྷཾ ཀཌྜྷནྟཱིཏི ཝུཏྟཾ ཧོཏི.

ཨཐཱཏི ཨནནྟརཏྠེ ནིཔཱཏོ. ཙཏུདྡསནྣཾ པཱུརཎོ ཙཱཏུདྡསོ, དིཝསོ. ཡཾ སནྡྷཱཡ ‘‘ཨཱགམེ ཀཱལེ༹ པཝཱརེཡྻཱམཱ’’ཏི ཉཏྟིཾ ཋཔཡིཾསུ. པཙྪིམཀཏྟིཀཔུཎྞམཱ ཝཱཏི ཀོམུདིཙཱཏུམཱསིནིཔུཎྞམདིཝསོ ཝཱ. ཡཾ སནྡྷཱཡ ‘‘ཨཱགམེ ཛུཎྷེ པཝཱརེཡྻཱམཱ’’ཏི ཉཏྟིཾ ཋཔཡིཾསུ. ཏསྨིཾ པན ཨཱགམེ ཛུཎྷེ ཀོམུདིཡཱ ཙཱཏུམཱསིནིཡཱ ཨཝསྶཾ པཝཱརེཏབྦཾ. ན ཧི ཏཾ ཨཏིཀྐམིཏྭཱ པཝཱརེཏུཾ ལབྦྷཏི. ཝུཏྟཉྷེཏཾ ‘‘ཏེ ཙེ, བྷིཀྑཝེ, བྷིཀྑཱུ བྷཎྜནཀཱརཀཱ ཀལཧཀཱརཀཱ ཝིཝཱདཀཱརཀཱ བྷསྶཀཱརཀཱ སངྒྷེ ཨདྷིཀརཎཀཱརཀཱ ཏམྤི ཛུཎྷཾ ཨནུཝསེཡྻུཾ. ཏེཧི, བྷིཀྑཝེ, བྷིཀྑཱུཧི སབྦེཧེཝ ཨཱགམེ ཛུཎྷེ ཀོམུདིཡཱ ཙཱཏུམཱསིནིཡཱ ཨཀཱམཱ པཝཱརེཏབྦ’’ནྟི (མཧཱཝ. ༢༤༠). ཏེནེཝཱཧ ‘‘པཙྪིམཝསྶཾཝུཏྠཱནཉྩ པཙྪིམཀཏྟིཀཔུཎྞམཱ ཨེཝ ཝཱ’’ཏི. ཡདི ཧི ཏཾ ཨཏིཀྐམིཏྭཱ པཝཱརེཡྻ, དུཀྐཊཱཔཏྟིཾ ཨཱཔཛྫེཡྻུཾ. ཝུཏྟཉྷེཏཾ ‘‘ན ཙ, བྷིཀྑཝེ, ཨཔཝཱརཎཱཡ པཝཱརེཏབྦཾ ཨཉྙཏྲ སངྒྷསཱམགྒིཡཱ’’ཏི (མཧཱཝ. ༢༣༣). ཝིསུདྡྷིཔཝཱརཎཱཡོགཏོ ¶ པཝཱརཎཱདིཝསཱ. པི-སདྡེན ན ཀེཝལཾ པཝཱརཎཱདིཝསཱཝ ¶ , ཨཐ ཁོ ཏདཉྙེ ཨུཔོསཐདིཝསཱཔི ཧོནྟཱིཏི དསྶེཏི. ཨིདམྤཱིཏི པཝཱརཎཏྟཡམྤི. ཏཐཱརཱུཔཔཙྩཡེཏི བཧུཏརཱཝཱསིཀཱདིཔཙྩཡེ. དྭིནྣཾ ཀཏྟིཀཔུཎྞམཱནནྟི པུབྦཀཏྟིཀཔཙྪིམཀཏྟིཀསངྑཱཏཱནཾ དྭིནྣཾ ཨསྶཡུཛཀོམུདིཔུཎྞམཱནཾ.

ཨིདཱནི ཡོ སོ སཱམགྒིཨུཔོསཐདིཝསོ ཝུཏྟོ, ཏཉྩ ཏཔྤསངྒེན སཱམགྒིཔཝཱརཎཱདིཝསཉྩ དསྶེནྟོ ‘‘ཡདཱ པནཱ’’ཏིཨཱདིམཱཧ. ཏཏྠ ཨོསཱརིཏེ ཏསྨིཾ བྷིཀྑུསྨིནྟི ཨུཀྑིཏྟཀེ བྷིཀྑུསྨིཾ ཨོསཱརིཏེ, ཏཾ གཧེཏྭཱ སཱིམཾ གནྟྭཱ ཨཱཔཏྟིཾ དེསཱཔེཏྭཱ ཀམྨཝཱཙཱཡ ཀམྨཔཊིཔྤསྶདྡྷིཝསེན པཝེསིཏེཏི ཝུཏྟཾ ཧོཏི. ཏསྶ ཝཏྠུསྶཱཏི ཏསྶ ཨདྷིཀརཎསྶ. ཏདཱ ཋཔེཏྭཱ ཙུདྡསཔནྣརསེ ཨཉྙོ ཡོ ཀོཙི དིཝསོ ཨུཔོསཐདིཝསོ ནཱམ ཧོཏཱིཏི སམྦནྡྷོ. ཀསྨཱཏི ཨཱཧ ‘‘ཏཱཝདེཝ ཨུཔོསཐོ ཀཱཏབྦོ. ‘པཱཏིམོཀྑཾ ཨུདྡིསིཏབྦ’ནྟི ཝཙནཏོ’’ཏི. ཏཏྠ ཏཱཝདེཝཱཏི ཏཾ དིཝསམེཝ. ཝཙནཏོཏི ཀོསམྦཀཀྑནྡྷཀེ (མཧཱཝ. ༤༧༥) ཝུཏྟཏྟཱ. ཡཏྲ པན པཏྟཙཱིཝརཱདཱིནཾ ཨཏྠཱཡ ཨཔྤམཏྟཀེན ཀཱརཎེན ཝིཝདནྟཱ ཨུཔོསཐཾ ཝཱ པཝཱརཎཾ ཝཱ ཋཔེནྟི, ཏཏྠ ཏསྨིཾ ཨདྷིཀརཎེ ཝིནིཙྪིཏེ ‘‘སམགྒཱ ཛཱཏམྷཱ’’ཏི ཨནྟརཱ སཱམགྒིཨུཔོསཐཾ ཀཱཏུཾ ན ལབྷནྟི, ཀརོནྟེཧི ཨནུཔོསཐེ ཨུཔོསཐོ ཀཏོ ནཱམ ཧོཏི.

ཀཏྟིཀམཱསབྦྷནྟརེཏི ཨེཏྠ ཀཏྟིཀམཱསོ ནཱམ པུབྦཀཏྟིཀམཱསསྶ ཀཱལ༹པཀྑཔཱཊིཔདཏོ པཊྛཱཡ ཡཱཝ ཨཔརཀཏྟིཀཔུཎྞམཱ, ཏཱཝ ཨེཀཱུནཏིཾསརཏྟིདིཝཱ, ཏསྶ ཨབྦྷནྟརེ. ཏཏོ པུརེ ཝཱ པན པཙྪཱ ཝཱ ཝཊྚཏི. ཨཡམེཝཱཏི ཡོ ཀོཙི དིཝསོཡེཝ. ཨིདྷཱཔི ཀོསམྦཀཀྑནྡྷཀེ སཱམགྒིཡཱ སདིསཱཝ སཱམགྒཱི ཝེདིཏབྦཱ. ཡེ པན ཀིསྨིཉྩིདེཝ ཨཔྤམཏྟཀེ ¶ པཝཱརཎཾ ཋཔེཏྭཱ སམགྒཱ ཧོནྟི, ཏེཧི པཝཱརཎཱཡམེཝ པཝཱརཎཱ ཀཱཏབྦཱ, ཏཱཝདེཝ ན ཀཱཏབྦཱ, ཀརོནྟེཧི ཨཔཝཱརཎཱཡ པཝཱརཎཱ ཀཏཱ ནཱམ ཧོཏི, ‘‘ན ཀཱཏབྦཱཡེཝཱ’’ཏི ནིཡམེན ཡདི ཀརོཏི, དུཀྐཊནྟི དསྶེཏི. ཏཏྠ ཧི ཨུཔོསཐཀརཎེ དུཀྐཊཾ. ཝུཏྟཉྷེཏཾ ‘‘ན, བྷིཀྑཝེ, ཨནུཔོསཐེ ཨུཔོསཐོ ཀཱཏབྦོ ཨཉྙཏྲ སངྒྷསཱམགྒིཡཱ’’ཏི (མཧཱཝ. ༡༨༣).

༡༦༩. སངྒྷེ ཨུཔོསཐོ ནཱམ ཨེཀསཱིམཱཡཾ སནྣིཔཏིཏེན ཙཏུཝགྒཱདིསངྒྷེན ཀཏྟབྦོ ཨུཔོསཐོ, སོ ཙ པཱཏིམོཀྑུདྡེསོཡེཝ. གཎེ ཨུཔོསཐོ ནཱམ ཨེཀསཱིམཱཡཾ སནྣིཔཏིཏེཧི དྭཱིཧི, ཏཱིཧི ཝཱ བྷིཀྑཱུཧི ཀཏྟབྦོ ཨུཔོསཐོ, སོ ཙ པཱརིསུདྡྷིཨུཔོསཐོཡེཝ. པུགྒལེ ཨུཔོསཐོ ནཱམ ཨེཀསཱིམཱཡཾ ¶ ནིསིནྣེན ཨེཀེན བྷིཀྑུནཱ ཀཏྟབྦོ ཨུཔོསཐོ, སོ ཙ ཨདྷིཊྛཱནུཔོསཐོཡེཝ. ཏེནཱཧ ‘‘ཀཱརཀཝསེན ཨཔརེཔི ཏཡོ ཨུཔོསཐཱ’’ཏི. ཀཏྟབྦཱཀཱརཝསེན ཝུཏྟེསུ ཏཱིསུ ཨུཔོསཐེསུ སུཏྟུདྡེསོ ནཱམ པཱཏིམོཀྑུདྡེསོ. སོ དུཝིདྷོ ཨོཝཱདཔཱཏིམོཀྑུདྡེསོ ཙ ཨཱཎཱཔཱཏིམོཀྑུདྡེསོ ཙ. ཏཏྲ ཨོཝཱདོཝ པཱཏིམོཀྑཾ, ཏསྶ ཨུདྡེསོ སརཱུཔེན ཀཐནཾ ཨོཝཱདཔཱཏིམོཀྑུདྡེསོ. ‘‘ཨིམསྨིཾ ཝཱིཏིཀྐམེ ཨཡཾ ནཱམ ཨཱཔཏྟཱི’’ཏི ཨེཝཾ ཨཱཔཏྟིཝསེན ཨཱཎཱཔནཾ པཉྙཱཔནཾ ཨཱཎཱ. སེསཾ ཨནནྟརསདིསམེཝ.

ཏཏྠ ཨོཝཱདཔཱཏིམོཀྑུདྡེསོ ནཱམ –

‘‘ཁནྟི པརམཾ ཏཔོ ཏིཏིཀྑཱ;

ནིབྦཱནཾ པརམཾ ཝདནྟི བུདྡྷཱ;

ན ཧི པབྦཛིཏོ པརཱུཔགྷཱཏཱི;

ན སམཎོ ཧོཏི པརཾ ཝིཧེཋཡནྟོ.

‘‘སབྦཔཱཔསྶ ¶ ཨཀརཎཾ, ཀུསལསྶ ཨུཔསམྤདཱ;

སཙིཏྟཔརིཡོདཔནཾ, ཨེཏཾ བུདྡྷཱན སཱསནཾ.

‘‘ཨནུཔཝཱདོ ཨནུཔགྷཱཏོ, པཱཏིམོཀྑེ ཙ སཾཝརོ;

མཏྟཉྙུཏཱ ཙ བྷཏྟསྨིཾ, པནྟཉྩ སཡནཱསནཾ;

ཨདྷིཙིཏྟེ ཙ ཨཱཡོགོ, ཨེཏཾ བུདྡྷཱན སཱསན’’ནྟི. (དཱི. ནི. ༢.༩༠; དྷ. པ. ༡༨༣-༡༨༥) –

ཨིམཱ ཏིསྶོ གཱཐཱ.

ཏཏྠ ཁནྟི པརམཾ ཏཔོཏི ཨདྷིཝཱསནཁནྟི ནཱམ པརམཾ ཏཔོ. ཏིཏིཀྑཱཏི ཁནྟིཡཱ ཨེཝ ཝེཝཙནཾ, ཏིཏིཀྑཱསངྑཱཏཱ ཨདྷིཝཱསནཁནྟི ཨུཏྟམཾ ཏཔོཏི ཨཏྠོ. ནིབྦཱནཾ པརམཾ ཝདནྟཱིཏི སབྦཱཀཱརེན པན ནིབྦཱནཾ པརམནྟི ཝདནྟི བུདྡྷཱ. ན ཧི པབྦཛིཏོ པརཱུཔགྷཱཏཱིཏི ཡོ ཨདྷིཝཱསནཁནྟིཝིརཧིཏཏྟཱ པརཾ ཨུཔགྷཱཏེཏི བཱདྷཏི ཝིཧིཾསཏི, སོ པབྦཛིཏོ ནཱམ ན ཧོཏི ¶ . ཙཏུཏྠཔཱདོ པན ཏསྶེཝ ཝེཝཙནཾ. ‘‘ན ཧི པབྦཛིཏོ’’ཏི ཨེཏསྶ ཧི ན སམཎོ ཧོཏཱིཏི ཝེཝཙནཾ. ‘‘པརཱུཔགྷཱཏཱི’’ཏི ཨེཏསྶ པརཾ ཝིཧེཋཡནྟོཏི ཝེཝཙནཾ. ཨཐ ཝཱ པརཱུཔགྷཱཏཱིཏི སཱིལཱུཔགྷཱཏཱི. སཱིལཉྷི ཨུཏྟམཊྛེན པརནྟི ཝུཙྩཏི. ཡོ ཙ སམཎོ པརཾ ཡཾ ཀཉྩི སཏྟཾ ཝིཧེཋཡནྟོ པརཱུཔགྷཱཏཱི ཧོཏི ཨཏྟནོ སཱིལཝིནཱསཀོ, སོ པབྦཛིཏོ ནཱམ ན ཧོཏཱིཏི ཨཏྠོ. ཨཐ ཝཱ ཡོ ཨདྷིཝཱསནཁནྟིཡཱ ཨབྷཱཝཱ པརཱུཔགྷཱཏཱི ཧོཏི, པརཾ ཨནྟམསོ ཌཾསམཀསམྤི སཉྩིཙྩ ཛཱིཝིཏཱ ཝོརོཔེཏི, སོ ན ཧི པབྦཛིཏོ. ཀིཾ ཀཱརཎཱ? མལསྶ ཨཔབྦཛིཏཏྟཱ. ‘‘པབྦཱཛཡམཏྟནོ མལཾ, ཏསྨཱ ‘པབྦཛིཏོ’ཏི ཝུཙྩཏཱི’’ཏི (དྷ. པ. ༣༨༨) ཨིདཉྷི པབྦཛིཏལཀྑཎཾ. ཡོཔི ན ཧེཝ ཁོ ཨུཔགྷཱཏེཏི ན མཱརེཏི, ཨཔིཙ དཎྜཱདཱིཧི ཝིཧེཋེཏི, སོཔི པརཾ ཝིཧེཋཡནྟོ ན སམཎོ ཧོཏི. ཀིཾཀཱརཎཱ? ཝིཧེསཱཡ ཨསམིཏཏྟཱ. ‘‘སམིཏཏྟཱ ཧི པཱཔཱནཾ, སམཎོཏི པཝུཙྩཏཱི’’ཏི (དྷ. པ. ༢༦༥) ཨིདཉྷི སམཎལཀྑཎཾ.

དུཏིཡགཱཐཱཡ ¶ སབྦཔཱཔསྶཱཏི སབྦཱཀུསལསྶ. ཨཀརཎནྟི ཨནུཔྤཱདནཾ. ཀུསལསྶཱཏི ཙཏུབྷཱུམཀཀུསལསྶ. ཨུཔསམྤདཱཏི ཨུཔསམྤཱདནཾ པཊིལཱབྷོ. སཙིཏྟཔརིཡོདཔནནྟི ཨཏྟནོ ཙིཏྟསྶ ཝོདཱཔནཾ པབྷསྶརབྷཱཝཀརཎཾ སབྦསོ པརིསོདྷནཾ, ཏཾ པན ཨརཧཏྟེན ཧོཏི, ཨིཏི སཱིལསཾཝརེན སབྦཔཱཔཾ པཧཱཡ ལོཀིཡལོཀུཏྟརཱཧི སམཐཝིཔསྶནཱཧི ཀུསལཾ སམྤཱདེཏྭཱ ཨརཧཏྟཕལེན ཙིཏྟཾ པརིཡོདཔེཏབྦནྟི ཨེཏཾ བུདྡྷཱན སཱསནཾ ཨོཝཱདོ ཨནུསིཊྛི.

ཏཏིཡགཱཐཱཡ ཨནུཔཝཱདོཏི ཝཱཙཱཡ ཀསྶཙི ཨནུཔཝདནཾ. ཨནུཔགྷཱཏོཏི ཀཱཡེན ཀསྶཙི ཨུཔགྷཱཏཱཀརཎཾ. པཱཏིམོཀྑེཏི ཡཾ ཏཾ པཱཏིམོཀྑཾ པཨཏིམོཀྑཾ ཨཏིཔམོཀྑཾ ཨུཏྟམསཱིལཾ. པཱཏི ཝཱ ཨགཏིཝིསེསེཧི མོཀྑེཏི དུགྒཏིབྷཡེཧི, ཡོ ཝཱ ནཾ པཱཏི, ཏཾ མོཀྑེཏཱིཏི པཱཏིམོཀྑནྟི ཝུཙྩཏི, ཏསྨིཾ པཱཏིམོཀྑེ ཙ. སཾཝརོཏི སཏྟནྣཾ ཨཱཔཏྟིཀྑནྡྷཱནཾ ཨཝཱིཏིཀྐམལཀྑཎོ སཾཝརོ. མཏྟཉྙུཏཱཏི པཊིགྒཧཎཔརིབྷོགཝསེན པམཱཎཉྙུཏཱ. པནྟཉྩ སཡནཱསནནྟི ཛནསངྒྷཊྚནཝིརཧིཏཾ ནིཛྫནསམྦཱདྷཾ ཝིཝིཏྟཾ སེནཱསནཉྩ. ཨེཏྠ ཙ དྭཱིཧིཡེཝ པཙྩཡེཧི ཙཏུཔཙྩཡསནྟོསོ དཱིཔིཏོཏི ཝེདིཏབྦོ པཙྩཡསནྟོསསཱམཉྙེན ཨིཏརདྭཡསྶཔི ལཀྑཎཧཱརནཡེན ཛོཏིཏཏྟཱ. ཨདྷིཙིཏྟེ ཙ ཨཱཡོགོཏི ཝིཔསྶནཱཔཱདཀཾ ཨཊྛསམཱཔཏྟིཙིཏྟཾ ཨདྷིཙིཏྟཾ, ཏཏོཔི མགྒཕལཙིཏྟམེཝ ཨདྷིཙིཏྟཾ, ཏསྨིཾ ཡཐཱཝུཏྟེ ཨདྷིཙིཏྟེ ཨཱཡོགོ ཙ ཨནུཡོགོ ཙཱཏི ཨཏྠོ. ཨེཏཾ བུདྡྷཱན སཱསནནྟི ཨེཏཾ པརསྶ ཨནུཔཝདནཾ, ཨནུཔགྷཱཏནཾ ¶ , པཱཏིམོཀྑསཾཝརོ, པཊིགྒཧཎཔརིབྷོགེསུ མཏྟཉྙུཏཱ ¶ , ཨཊྛསམཱཔཏྟིཝསིབྷཱཝཱཡ ཝིཝིཏྟསེནཱསནསེཝནཉྩ བུདྡྷཱནཾ སཱསནཾ ཨོཝཱདོ ཨནུསིཊྛཱིཏི. ཨིམཱ པན ཏིསྶོ གཱཐཱཡོ སབྦབུདྡྷཱནཾ པཱཏིམོཀྑུདྡེསགཱཐཱ ཧོནྟཱིཏི ཝེདིཏབྦཱ, ཏཾ བུདྡྷཱ ཨེཝ ཨུདྡིསནྟི, ན སཱཝཀཱ. ‘‘སུཎཱཏུ མེ བྷནྟེ སངྒྷོ’’ཏིཨཱདིནཱ (མཧཱཝ. ༡༣༤) ནཡེན ཝུཏྟཾ ཨཱཎཱཔཱཏིམོཀྑཾ ནཱམ, ཏཾ སཱཝཀཱ ཨེཝ ཨུདྡིསནྟི, ན བུདྡྷཱ. ཨིདམེཝ ཙ ཨིམསྨིཾ ཨཏྠེ པཱཏིམོཀྑནྟི ཨདྷིཔྤེཏཾ.

ཨནུཔགཏོ ནཱམ ཏཏྠེཝ ཨུཔསམྤནྣོ, ཨསཏིཡཱ པུརིམིཀཱཡ ཨནུཔགཏོ ཝཱ. ཙཱཏུམཱསིནིཡནྟི ཙཏུམཱསིཡཾ. སཱ ཧི ཙཏུནྣཾ མཱསཱནཾ པཱརིཔཱུརིབྷཱུཏཱཏི ཙཱཏུམཱསཱི, སཱ ཨེཝ ‘‘ཙཱཏུམཱསིནཱི’’ཏི ཝུཙྩཏི, ཏསྶཾ ཙཱཏུམཱསིནིཡཾ, པཙྪིམཀཏྟིཀཔུཎྞམཱསིཡནྟི ཨཏྠོ. ཀཱཡསཱམགྒིནྟི ཀཱཡེན སམགྒབྷཱཝཾ, ཧཏྠཔཱསཱུཔགམནནྟི ཝུཏྟཾ ཧོཏི.

ཨཡཾ པནེཏྠ ཝིནིཙྪཡོ – སཙེ པུརིམིཀཱཡ པཉྩ བྷིཀྑཱུ ཝསྶཾ ཨུཔགཏཱ པཙྪིམིཀཱཡཔི པཉྩ, པུརིམེཧི ཉཏྟིཾ ཋཔེཏྭཱ པཝཱརིཏེ པཙྪིམེཧི ཏེསཾ སནྟིཀེ པཱརིསུདྡྷིཨུཔོསཐོ ཀཱཏབྦོ, ན ཨེཀསྨིཾ ཨུཔོསཐགྒེ དྭེ ཉཏྟིཡོ ཋཔེཏབྦཱ. སཙེ པཙྪིམིཀཱཡ ཨུཔགཏཱ ཙཏྟཱརོ ཏཡོ དྭེ ཨེཀོ ཝཱ ཧོཏི, ཨེསེཝ ནཡོ. ཨཐ པུརིམིཀཱཡ ཙཏྟཱརོ, པཙྪིམིཀཱཡཔི ཙཏྟཱརོ ཏཡོ དྭེ ཨེཀོ ཝཱ, ཨེསེཝ ནཡོ. ཨཐ པུརིམིཀཱཡ ཏཡོ, པཙྪིམིཀཱཡ ཏཡོ དྭེ ཨེཀོ ཝཱ, ཨེསེཝ ནཡོ. ཨིདཉྷེཏྠ ལཀྑཎཾ – སཙེ པུརིམིཀཱཡ ཨུཔགཏེཧི པཙྪིམིཀཱཡ ཨུཔགཏཱ ཐོཀཏརཱ ཙེཝ ཧོནྟི སམསམཱ ཙ, སངྒྷཔཝཱརཎཱཡ ཙ གཎཾ པཱུརེནྟི, སངྒྷཔཝཱརཎཱཝསེན ཉཏྟི ཋཔེཏབྦཱ. སཙེ པན ¶ པཙྪིམིཀཱཡ ཨེཀོ ཧོཏི, ཏེན སདྡྷིཾ ཏེ ཙཏྟཱརོ ཧོནྟི, ཙཏུནྣཾ སངྒྷཉཏྟིཾ ཋཔེཏྭཱ པཝཱརེཏུཾ ན ཝཊྚཏི. གཎཉཏྟིཡཱ པན སོ གཎཔཱུརཀོ ཧོཏི, ཏསྨཱ གཎཝསེན ཉཏྟིཾ ཋཔེཏྭཱ པུརིམེཧི པཝཱརེཏབྦཾ. ཨིཏརེན ཏེསཾ སནྟིཀེ པཱརིསུདྡྷིཨུཔོསཐོ ཀཱཏབྦོ. སཙེ པུརིམིཀཱཡ དྭེ, པཙྪིམིཀཱཡ དྭེ ཝཱ ཨེཀོ ཝཱ, ཨེཏྠཱཔི ཨེསེཝ ནཡོ. སཙེ པུརིམིཀཱཡཔི ཨེཀོ, པཙྪིམིཀཱཡཔི ཨེཀོ, ཨེཀེན ཨེཀསྶ སནྟིཀེ པཝཱརེཏབྦཾ, ཨེཀེན པཱརིསུདྡྷིཨུཔོསཐོ ཀཱཏབྦོ. སཙེ པུརིམེཧི ཝསྶཱུཔགཏེཧི པཙྪཱ ཝསྶཱུཔགཏཱ ཨེཀེནཔི ཨདྷིཀཏརཱ ཧོནྟི, པཋམཾ པཱཏིམོཀྑཾ ཨུདྡིསིཏྭཱ པཙྪཱ ཐོཀཏརེཧི ཏེསཾ སནྟིཀེ པཝཱརེཏབྦཾ. ཀཏྟིཀཙཱཏུམཱསིནིཔཝཱརཎཱཡ པན སཙེ པཋམཝསྶཱུཔགཏེཧི མཧཱཔཝཱརཎཱཡ པཝཱརིཏེཧི པཙྪཱ ཨུཔགཏཱ ཨདྷིཀཏརཱ ཝཱ སམསམཱ ཝཱ ཧོནྟི, པཝཱརཎཱཉཏྟིཾ ཋཔེཏྭཱ པཝཱརེཏབྦཾ, ཏེཧི པཝཱརིཏེ པཙྪཱ ཨིཏརེཧི པཱརིསུདྡྷིཨུཔོསཐོ ཀཱཏབྦོ. ཨཐ མཧཱཔཝཱརཎཱཡ ¶ པཝཱརིཏཱ བཧཱུ ཧོནྟི, པཙྪཱ ཝསྶཱུཔགཏཱ ཐོཀཱ ཝཱ ཨེཀོ ཝཱ, པཱཏིམོཀྑེ ཨུདྡིཊྛེ པཙྪཱ ཏེསཾ སནྟིཀེ ཏེན པཝཱརེཏབྦནྟི.

ཋཔེཏྭཱ པན པཝཱརཎཱདིཝསཾ ཨཉྙསྨིཾ ཀཱལེཏི ཨཉྙསྨིཾ ཨུཔོསཐདིཝསེ. ཨུདྡིཊྛམཏྟེ པཱཏིམོཀྑེཏི ‘‘པརིཡོསིཏམཏྟེ ཨུདྡིསྶམཱནེ’’ཏི ཨཔརིཡོསིཏེ ཨཱགཏེ སཏི ཨཝསེསསྶ པཱཏིམོཀྑསྶ སོཏབྦཏྟཱ པཱརིསུདྡྷིཨུཔོསཐཾ ཀཱཏུཾ ན ཝཊྚཏི. ཨཝུཊྛིཏཱཡཱཏིཨཱདཱིནིཔི པཱཏིམོཀྑསྶ ནིཊྛིཏཀཱལམེཝ པརིསཱཡ ཝིསེསེཏྭཱ ཝདཏི. སམསམཱ ཝཱཏི པུརིམེཧི སམཔརིམཱཎཱ. ཐོཀཏརཱ ཝཱཏི པུརིམེཧི ཐོཀཏརཔརིམཱཎཱ. ཨེཏེན བཧུཏརེསུ ཨཱགཏེསུ པུན པཱཏིམོཀྑཾ ཨུདྡིསིཏབྦཾ, ན པཱརིསུདྡྷིཨུཔོསཐོ ཀཱཏབྦོཏི དསྶེཏི.

ཨེཀཾསཾ ¶ ཨུཏྟརཱསངྒཾ ཀརིཏྭཱཏི ཨེཀསྨིཾ ཨཾསེ སཱདྷུཀཾ ཨུཏྟརཱསངྒཾ ཀརིཏྭཱཏི ཨཏྠོ. སུཏྟནིཔཱཏཊྛཀཐཱཡཾ (སུ. ནི. ཨཊྛ. ༢.༣༤༥) པན ‘‘ཨེཀཾསཾ ཙཱིཝརཾ ཀཏྭཱཏི ཨེཏྠ པན པུན སཎྛཱཔནེན ཨེཝཾ ཝུཏྟཾ. ཨེཀཾསནྟི ཙ ཝཱམཾསཾ པཱརུཔིཏྭཱ ཋིཏསྶེཏཾ ཨདྷིཝཙནཾ. ཡཏོ ཡཐཱ ཝཱམཾསཾ པཱརུཔིཏྭཱ ཋིཏཾ ཧོཏི, ཏཐཱ ཙཱིཝརཾ ཀཏྭཱཏི ཨེཝམསྶ ཨཏྠོ ཝེདིཏབྦོ’’ཏི ཝུཏྟཾ. ཨཉྫལིཾ པགྒཧེཏྭཱཏི དསནཁསམོདྷཱནསམུཛྫལཾ ཨཉྫལིཾ ཨུཀྑིཔིཏྭཱ. སཙེ པན ཏཏྠ པཱརིཝཱསིཀོཔི ཨཏྠི, སངྒྷནཝཀཊྛཱནེ ནིསཱིདིཏྭཱ ཏཏྠེཝ ནིསིནྣེན ཨཏྟནོ པཱལི༹ཡཱ པཱརིསུདྡྷིཨུཔོསཐོ ཀཱཏབྦོ. པཱཏིམོཀྑེ པན ཨུདྡིསིཡམཱནེ པཱལི༹ཡཱ ཨནིསཱིདིཏྭཱ པཱལི༹ཾ ཝིཧཱཡ ཧཏྠཔཱསཾ ཨམུཉྩནྟེན ནིསཱིདིཏབྦཾ. པཝཱརཎཱཡཔི ཨེསེཝ ནཡོ.

སབྦཾ པུབྦཀརཎཱིཡནྟི སམྨཛྫནཱདིནཝཝིདྷཾ པུབྦཀིཙྩཾ. ཨིམིནཱ བཧཱུནཾ ཝསནཊྛཱནེཡེཝ ཨུཔོསཐདིཝསེ པུབྦཀིཙྩཾ ཀཱཏབྦཾ ན ཧོཏི, ཨཐ ཁོ ཨེཀསྶ ཝསནཊྛཱནེཔི ཀཱཏབྦཾཡེཝཱཏི དསྶེཏི. ཡཐཱ ཙ སབྦོ སངྒྷོ སབྷཱགཱཔཏྟིཾ ཨཱཔཛྫིཏྭཱ ‘‘སུཎཱཏུ མེ, བྷནྟེ སངྒྷོ…པེ… པཊིཀརིསྶཏཱི’’ཏི (མཧཱཝ. ༡༧༡) ཉཏྟིཾ ཋཔེཏྭཱ ཨུཔོསཐཾ ཀཱཏུཾ ལབྷཏི, ཨེཝམེཏྠཱཔི ཏཱིཧི ‘‘སུཎནྟུ མེ, ཨཱཡསྨནྟཱ, ཨིམེ བྷིཀྑཱུ སབྷཱགཾ ཨཱཔཏྟིཾ ཨཱཔནྣཱ, ཡདཱ ཨཉྙཾ བྷིཀྑུཾ སུདྡྷཾ ཨནཱཔཏྟིཀཾ པསྶིསྶནྟི, ཏདཱ ཏསྶ སནྟིཀེ ཏཾ ཨཱཔཏྟིཾ པཊིཀརིསྶནྟཱི’’ཏི གཎཉཏྟིཾ ཋཔེཏྭཱ, དྭཱིཧིཔི ‘‘ཨཉྙཾ སུདྡྷཾ པསྶིཏྭཱ པཊིཀརིསྶཱམཱ’’ཏི ཝཏྭཱ ཨུཔོསཐཾ ཀཱཏུཾ ཝཊྚཏི. ཨེཀེནཔི ‘‘པརིསུདྡྷཾ ལབྷིཏྭཱ པཊིཀརིསྶཱམཱི’’ཏི ཨཱབྷོགཾ ཀཏྭཱ ཀཱཏུཾ ཝཊྚཏི.

ཏདཧཱུཏི ¶ ཏསྨིཾ ཨཧུ, ཏསྨིཾ དིཝསེཏི ཨཏྠོ. ནཱནཱསཾཝཱསཀེཧཱིཏི ལདྡྷིནཱནཱསཾཝཱསཀེཧི. ཨནཱཝཱསོ ནཱམ ནཝཀམྨསཱལཱདིཀོ ཡོ ཀོཙི པདེསོ ¶ . ཨཉྙཏྲ སངྒྷེནཱཏི སངྒྷཔྤཧོནཀེཧི བྷིཀྑཱུཧི ཝིནཱ. ཨཉྙཏྲ ཨནྟརཱཡཱཏི པུབྦེ ཝུཏྟཾ དསཝིདྷམནྟརཱཡཾ ཝིནཱ. སབྦནྟིམེན པན པརིཙྪེདེན ཨཏྟཙཏུཏྠེ ཝཱ ཨནྟརཱཡེ ཝཱ སཏི གནྟུཾ ཝཊྚཏི. ཡཐཱ ཙ ཨཱཝཱསཱདཡོ ན གནྟབྦཱ, ཨེཝཾ སཙེ ཝིཧཱརེ ཨུཔོསཐཾ ཀརོནྟི, ཨུཔོསཐཱདྷིཊྛཱནཏྠཾ སཱིམཱཔི ནདཱིཔི ན གནྟབྦཱ. སཙེ པནེཏྠ ཀོཙི བྷིཀྑུ ཧོཏི, ཏསྶ སནྟིཀཾ གནྟུཾ ཝཊྚཏི, ཝིསྶཊྛཨུཔོསཐཱཔི ཨཱཝཱསཱ གནྟུཾ ཝཊྚཏི. ཨེཝཾ གཏོ ཨདྷིཊྛཱཏུམྤི ལབྷཏི. ཨཱརཉྙཀེནཔི བྷིཀྑུནཱ ཨུཔོསཐདིཝསེ གཱམེ པིཎྜཱཡ ཙརིཏྭཱ ཨཏྟནོ ཝིཧཱརམེཝ ཨཱགནྟབྦཾ. སཙེ ཨཉྙཾ ཝིཧཱརཾ ཨོཀྐམཏི, ཏཏྠ ཨུཔོསཐཾ ཀཏྭཱཝ ཨཱགནྟབྦཾ, ཨཀཏྭཱ ཨཱགནྟུཾ ན ཝཊྚཏི, ཡཾ ཛཉྙཱ ‘‘ཨཛྫེཝ ཏཏྠ གནྟུཾ སཀྐོམཱི’’ཏི ཨེཝརཱུཔོ པན ཨཱཝཱསོ གནྟབྦོ. ཏཏྠ བྷིཀྑཱུཧི སདྡྷིཾ ཨུཔོསཐཾ ཀརོནྟེནཔི ཧི ཨིམིནཱ ནེཝ ཨུཔོསཐནྟརཱཡོ ཀཏོ བྷཝིསྶཏཱིཏི.

༡༧༠. བཧི ཨུཔོསཐཾ ཀཏྭཱ ཨཱགཏེནཱཏི ནདིཡཱ ཝཱ སཱིམཱཡ ཝཱ ཡཏྠ ཀཏྠཙི ཨུཔོསཐཾ ཀཏྭཱ ཨཱགཏེན ཚནྡོ དཱཏབྦོ, ‘‘ཀཏོ མཡཱ ཨུཔོསཐོ’’ཏི ཨཙྪིཏུཾ ན ལབྷཏཱིཏི ཨདྷིཔྤཱཡོ. ཀིཙྩཔསུཏོ ཝཱཏི གིལཱནུཔཊྛཱནཱདིཀིཙྩཔསུཏོ ཝཱ. སངྒྷོ ནཔྤཧོཏཱིཏི དྭིནྣཾ དྭིནྣཾ ཨནྟརཱ ཧཏྠཔཱསཾ ཨཝིཛཧིཏྭཱ པཊིཔཱཊིཡཱ ཋཱཏུཾ ནཔྤཧོཏི.

‘‘ཨདྷམྨེན ཝགྒ’’ནྟི ཨེཏྠ ཨེཀསཱིམཱཡ ཙཏཱུསུ བྷིཀྑཱུསུ ཝིཛྫམཱནེསུ པཱཏིམོཀྑུདྡེསོཝ ཨནུཉྙཱཏོ, ཏཱིསུ དྭཱིསུ ཙ པཱརིསུདྡྷིཨུཔོསཐོཝ, ཨིདྷ པན ཏཐཱ ཨཀཏཏྟཱ ‘‘ཨདྷམྨེནཱ’’ཏི ཝུཏྟཾ. ཡསྨཱ པན ཚནྡཔཱརིསུདྡྷི སངྒྷེ ཨེཝ ཨཱགཙྪཏི, ན གཎེ ན པུགྒལེ, ཏསྨཱ ‘‘ཝགྒ’’ནྟི ཝུཏྟཾ. སཙེ པན དྭེ སངྒྷཱ ཨེཀསཱིམཱཡཾ ཨཉྙམཉྙཾ ཚནྡཾ ཨཱཧརིཏྭཱ ཨེཀསྨིཾ ཁཎེ ཝིསུཾ སངྒྷཀམྨཾ ཀརོནྟི, ཨེཏྠ ཀཐནྟི? ཀེཙི པན ‘‘ཏཾ ཝཊྚཏཱི’’ཏི ཝདནྟི, ཏཾ ན གཧེཏབྦཾ ཝགྒཀམྨཏྟཱ. ཝགྒཀམྨཾ ཀརོནྟཱནཉྷི ཚནྡཔཱརིསུདྡྷི ¶ ཨཉྙཏྠ ན གཙྪཏི ཏཐཱ ཝཙནཱབྷཱཝཱ, ཝིསུཾ ཝིསུཾ ཀམྨཀརཎཏྠམེཝ སཱིམཱཡ ཨནུཉྙཱཏཏྟཱ ཙཱཏི གཧེཏབྦཾ. ཝིཧཱརསཱིམཱཡ པན སངྒྷེ ཝིཛྫམཱནེཔི ཀེནཙི པཙྩཡེན ཁཎྜསཱིམཱཡ ཏཱིསུ, དྭཱིསུ ཝཱ པཱརིསུདྡྷིཨུཔོསཐཾ ཀརོནྟེསུ ཀམྨཾ དྷམྨེན སམགྒམེཝ བྷིནྣསཱིམཊྛཏྟཱཏི དཊྛབྦཾ.

‘‘ཨནུཛཱནཱམི, བྷིཀྑཝེ, ཏདཧུཔོསཐེ པཱརིསུདྡྷིཾ དེནྟེན ཚནྡམྤི དཱཏུཾ, སནྟི སངྒྷསྶ ཀརཎཱིཡ’’ནྟི ¶ (མཧཱཝ. ༡༦༥) ཝུཏྟཏྟཱ བྷགཝཏོ ཨཱཎཾ ཀརོནྟེན ‘‘ཚནྡཾ དམྨཱི’’ཏི ཝུཏྟཾ. ‘‘ཚནྡཧཱརཀོ ཙེ, བྷིཀྑཝེ, དིནྣེ ཚནྡེ ཏཏྠེཝ པཀྐམཏི, ཨཉྙསྶ དཱཏབྦོ ཚནྡོ’’ཏིཨཱདིཝཙནཏོ (མཧཱཝ. ༡༦༥) པུན ཨཏྟནོ ཚནྡདཱནཔརིསྶམཝིནོདནཏྠཾ ‘‘ཚནྡཾ མེ ཧརཱ’’ཏི ཝུཏྟཾ. ‘‘ཚནྡཧཱརཀོ ཙེ, བྷིཀྑཝེ, དིནྣེ ཚནྡེ སངྒྷཔྤཏྟོ སཉྩིཙྩ ནཱརོཙེཏི, ཨཱཧཊོ ཧོཏི ཚནྡོ, ཚནྡཧཱརཀསྶ ཨཱཔཏྟི དུཀྐཊསྶཱ’’ཏི ཝུཏྟཏྟཱ དུཀྐཊཏོ ཏཾ མོཙེཏུཾ ‘‘ཚནྡཾ མེ ཨཱརོཙེཧཱི’’ཏི ཝུཏྟཾ. ཀཱཡེན ཝཱ ཝཱཙཱཡ ཝཱ ཨུབྷཡེན ཝཱ ཝིཉྙཱཔེཏབྦོཏི མནསཱཝ ཨཙིནྟེཏྭཱ ཀཱཡཔྤཡོགཾ ཀརོནྟེན ཡེན ཀེནཙི ཨངྒཔཙྩངྒེན ཝཱ, ཝཱཙཾ པན ནིཙྪཱརེཏུཾ སཀྐོནྟེན ཏཐེཝ ཝཱཙཱཡ ཝཱ, ཨུབྷཡཐཱཔི སཀྐོནྟེན ཀཱཡཝཱཙཱཧི ཝཱ ཝིཉྙཱཔེཏབྦོ, ཛཱནཱཔེཏབྦོཏི ཨཏྠོ. ‘‘ཨཡམཏྠོ’’ཏིཝཙནཏོ པན ཡཱཡ ཀཱཡཙིཔི བྷཱསཱཡ ཝིཉྙཱཔེཏུཾ ཝཊྚཏི.

པཱརིསུདྡྷིདཱནེཔི ཚནྡདཱནེ ཝུཏྟསདིསོཝ ཝིནིཙྪཡོ, ཏཾ པན དེནྟེན པཋམཾ སནྟཱི ཨཱཔཏྟི དེསེཏབྦཱ. ན ཧི སཱཔཏྟིཀོ སམཱནོ ‘‘པཱརིསུདྡྷིཾ དམྨི, པཱརིསུདྡྷིཾ མེ ཧར, པཱརིསུདྡྷིཾ མེ ཨཱརོཙེཧཱི’’ཏི ཝཏྟུམརཧཏི. ‘‘སནྟི སངྒྷསྶ ཀརཎཱིཡཱནཱི’’ཏི ཝཏྟབྦེ ཝཙནཝིཔལླཱསེན ‘‘སནྟི སངྒྷསྶ ཀརཎཱིཡ’’ནྟི ཝུཏྟཾ. ཏེསཉྩ ཨཏྟནོ ཙ ཚནྡཔཱརིསུདྡྷིཾ དེཏཱིཏི ཨེཏྠ ཚནྡོ ¶ ཙ པཱརིསུདྡྷི ཙ ཚནྡཔཱརིསུདྡྷི ཙ ཚནྡཔཱརིསུདྡྷི, ཏཾ དེཏཱིཏི སརཱུཔེཀསེསེན ཨཏྠོ དཊྛབྦོ. ཨིཏརཱཏི ཨཉྙེསཾ ཚནྡཔཱརིསུདྡྷི. བིལཱ༹ལསངྑལིཀཱ ཚནྡཔཱརིསུདྡྷཱིཏི ཨེཏྠ བིལཱ༹ལསངྑལིཀཱ ནཱམ བིལཱ༹ལབནྡྷནཾ. ཏཏྠ ཧི སངྑལིཀཱཡ པཋམཝལཡཾ དུཏིཡཝལཡཾཡེཝ པཱཔུཎཱཏི, ན ཏཏིཡཾ, ཨེཝམཡམྤི ཚནྡཔཱརིསུདྡྷི དཱཡཀེན ཡསྶ དིནྣཱ, ཏཏོ ཨཉྙཏྠ ན གཙྪཏི, ཏསྨཱ སཱ བིལཱ༹ལསངྑལིཀསདིསཏྟཱ ‘‘བིལཱ༹ལསངྑལིཀཱ’’ཏི ཝུཏྟཱ. བིལཱ༹ལསངྑལིཀཱགྒཧཎཉྩེཏྠ ཡཱསཾ ཀཱསཉྩི སངྑལིཀཱནཾ ཨུཔལཀྑཎམཏྟནྟི དཊྛབྦཾ.

༡༧༣. པཝཱརཎཱདཱནེཔི ཨེསེཝ ནཡོ. ཨཡཾ པན ཝིསེསོ – ཏཏྠ ‘‘ཚནྡཾ མེ ཨཱརོཙེཧཱི’’ཏི, ཨིདྷ པན ‘‘མམཏྠཱཡ པཝཱརེཧཱི’’ཏི. ཏཏྠ ཚནྡཧཱརཀེ སངྒྷསྶ ཧཏྠཾ ཨུཔགཏམཏྟེཡེཝ ཨཱགཏཱ ཧོཏི. ཨིདྷ པན ཨེཝཾ དིནྣཱཡ པཝཱརཎཱཡ པཝཱརཎཱཧཱརཀེན སངྒྷཾ ཨུཔསངྐམིཏྭཱ ཨེཝཾ པཝཱརེཏབྦཾ ‘‘ཏིསྶོ, བྷནྟེ, བྷིཀྑུ…པེ… པཊིཀརིསྶཱམཱི’’ཏི. ཝིམཏིཝིནོདནིཡཾ ‘‘ཨེཝམེཏཾ དྷཱརཡཱམི, སུཏཱ ཁོ པནཱཡསྨནྟེཧཱིཏི ཨེཏྠ ‘ཨེཝམེཏཾ དྷཱརཡཱམཱི’ཏི ཝཏྭཱ ¶ ཨུདྡིཊྛཾ ཁོ ཨཱཡསྨནྟོ ནིདཱནཾ, སུཏཱ ཁོ པནཱཡསྨནྟེཧི ཙཏྟཱརོ པཱརཱཛིཀཱ དྷམྨཱ’’ཏིཨཱདིནཱ ཝཏྟབྦཾ. མཱཏིཀཱཊྛཀཐཱཡཉྷི ཨེཝམེཝ ཝུཏྟཾ. སུཏེནཱཏི སུཏཔདེན.

༡༧༤. ནིདཱནུདྡེསེ ཨནིཊྛིཏེ པཱཏིམོཀྑཾ ནིདྡིཊྛཾ ནཱམ ན ཧོཏཱིཏི ཨཱཧ ‘‘དུཏིཡཱདཱིསུ ཨུདྡེསེསཱུ’’ཏིཨཱདི.

༡༧༥. ཏཱིཧིཔི ཝིདྷཱིཧཱིཏི ཨོསཱརཎཀཐནསརབྷཉྙེཧི. ཨེཏྠ ཙ ཨཏྠཾ བྷཎིཏུཀཱམཏཱཡ ཝཱ བྷཎཱཔེཏུཀཱམཏཱཡ ཝཱ སུཏྟསྶ ཨོཏཱརཎཾ ཨོསཱརཎཾ ནཱམ. ཏསྶེཝ ཨཏྠཔྤཀཱསནཱ ཀཐནཾ ནཱམ. ཀེཝལཾ པཱཋསྶེཝ སརེན བྷཎནཾ ¶ སརབྷཉྙཾ ནཱམ. སཛ྄ཛྷཱཡཾ ཨདྷིཊྛཧིཏྭཱཏི ‘‘སཛ྄ཛྷཱཡཾ ཀརོམཱི’’ཏི ཙིཏྟཾ ཨུཔྤཱདེཏྭཱ. ཨོསཱརེཏྭཱ པན ཀཐེནྟེནཱཏི སཡམེཝ པཱཋཾ ཝཏྭཱ པཙྪཱ ཨཏྠཾ ཀཐེནྟེན. ནཝཝིདྷནྟི སངྒྷགཎཔུགྒལེསུ ཏཡོ, སུཏྟུདྡེསཔཱརིསུདྡྷིཨདྷིཊྛཱནཝསེན ཏཡོ, ཙཱཏུདྡསཱིཔནྣརསཱིསཱམགྒིཝསེན ཏཡོཏི ནཝཝིདྷཾ. ཙཏུབྦིདྷནྟི ཨདྷམྨེནཝགྒཱདི ཙཏུབྦིདྷཾ. དུཝིདྷནྟི བྷིཀྑུབྷིཀྑུནཱིནཾ པཱཏིམོཀྑཝསེན དུཝིདྷཾ པཱཏིམོཀྑཾ. ནཝཝིདྷནྟི བྷིཀྑཱུནཾ པཉྩ, བྷིཀྑུནཱིནཾ ཙཏྟཱརོཏི ནཝཝིདྷཾ པཱཏིམོཀྑུདྡེསཾ. ཀཏིམཱིཏི ཀཏིསདྡཱཔེཀྑཾ ཨིཏྠིལིངྒཾ དཊྛབྦཾ.

ཨུཏུཝསྶེཡེཝཱཏི ཧེམནྟགིམྷེསུཡེཝ. ཝིཉྙཱཔེཏཱིཏི ཨེཏྠ མནསཱ ཙིནྟེཏྭཱ ཀཱཡཝིཀཱརཀརཎམེཝ ཝིཉྙཱཔནནྟི དཊྛབྦཾ. པཱལི༹ཡཾ ཨཉྙསྶ དཱཏབྦཱ པཱརིསུདྡྷཱིཏི པཱརིསུདྡྷིདཱཡཀེན པུན ཨཉྙསྶ བྷིཀྑུནོ སནྟིཀེ དཱཏབྦཱ. ‘‘བྷཱུཏཾ ཨེཝ སཱམཎེརབྷཱཝཾ ཨཱརོཙེཏཱི’’ཏི ཝུཏྟཏྟཱ ཨཱུནཝཱིསཏིཝསྶཀཱལེ ཨུཔསམྤནྣསྶ, ཨནྟིམཝཏྠུཨཛ྄ཛྷཱཔནྣསིཀྑཱཔཙྩཀྑཱཏཀཱདཱིནཾ ཝཱ ཡཱཝ བྷིཀྑུཔཊིཉྙཱ ཝཊྚཏི, ཏཱཝ ཏེཧི ཨཱཧཊཱཔི ཚནྡཔཱརིསུདྡྷི ཨཱགཙྪཏི. ཡདཱ པན ཏེ ཨཏྟནོ སཱམཎེརཱདིབྷཱཝཾ པཊིཛཱནནྟི, ཏཏོ པཊྛཱཡ ནཱགཙྪཏཱིཏི དསྶིཏནྟི དཊྛབྦཾ. པཱལི༹ཡམྤི (མཧཱཝ. ༡༦༤) ཧི ‘‘དིནྣཱཡ པཱརིསུདྡྷིཡཱ སངྒྷཔྤཏྟོ ཝིབྦྷམཏི…པེ… པཎྜཀོ པཊིཛཱནཱཏི, ཏིརཙྪཱནགཏོ པཊིཛཱནཱཏི, ཨུབྷཏོབྱཉྫནཀོ པཊིཛཱནཱཏི, ཨཱཧཊཱ ཧོཏི པཱརིསུདྡྷཱི’’ཏི ཝུཏྟཏྟཱ པཎྜཀཱདཱིནཾ བྷིཀྑུཔཊིཉྙཱཡ ཝཏྟམཱནཀཱལེསུ པན ཚནྡཔཱརིསུདྡྷིཡཱཝ ཨཱགམནཾ སིདྡྷམེཝ. ཏེནཱཧ ‘‘ཨེས ནཡོ སབྦཏྠཱ’’ཏི. ཨུམྨཏྟཀཁིཏྟཙིཏྟཝེདནཱཊྚཱནཾ པན པཀཏཏྟཱ ཨནྟརཱམགྒེ ཨུམྨཏྟཀཱདིབྷཱཝེ པཊིཉྙཱཏེཔི ཏེསཾ སངྒྷཔྤཏྟམཏྟེནེཝ ཚནྡཱདི ཨཱགཙྪཏཱིཏི དསྶེཏི.

བྷིཀྑཱུནཾ ¶ ¶ ཧཏྠཔཱསནྟི ཨིམིནཱ གཎཔུགྒལེསུ ཚནྡཔཱརིསུདྡྷིཡཱ ཨནཱགམནཾ དསྶེཏི. ‘‘སངྒྷཔྤཏྟོ’’ཏི ཧི པཱལི༹ཡཾ (མཧཱཝ. ༡༦༥) ཝུཏྟཾ. སངྒྷསནྣིཔཱཏཏོ པཋམཾ ཀཱཏབྦཾ པུབྦཀརཎཾ སངྒྷསནྣིཔཱཏེ ཀཱཏབྦཾ པུབྦཀིཙྩནྟི དཊྛབྦཾ. པཱལི༹ཡཾ ‘‘ནོ ཙེ ཨདྷིཊྛཧེཡྻ, ཨཱཔཏྟི དུཀྐཊསྶཱ’’ཏི ཨེཏྠ ཨསཉྩིཙྩ ཨསྶཏིཡཱ ཨནཱཔཏྟི. ཡཐཱ ཙེཏྠ, ཨེཝཾ ཨུཔརིཔི, ཡཏྠ པན ཨཙིཏྟཀཱཔཏྟི ཨཏྠི, ཏཏྠ ཝཀྑཱམ. པཉྙཏྟཾ ཧོཏཱིཏི ཨིམིནཱ ན སཱཔཏྟིཀེན ཨུཔོསཐོ ཀཱཏབྦོཏི ཝིསུཾ པཊིཀྑེཔཱབྷཱཝེཔི ཡཐཱཝུཏྟསུཏྟསཱམཏྠིཡཏོ པཉྙཏྟམེཝཱཏི དསྶེཏི. ཨིམིནཱ ཨེཝ ནཡེན ‘‘ཨཊྛཱནམེཏཾ, བྷིཀྑཝེ, ཨནཝཀཱསོ, ཡཾ ཏཐཱགཏོ ཨཔརིསུདྡྷཱཡ པརིསཱཡ ཨུཔོསཐཾ ཀརེཡྻ, པཱཏིམོཀྑཾ ཨུདྡིསེཡྻཱ’’ཏིཨཱདིསུཏྟནཡཏོཝ (ཨ. ནི. ༨.༢༠; ཨུདཱ. ༤༥; ཙཱུལ༹ཝ. ༣༨༦) ཨལཛྫཱིཧི སདྡྷིཾ ཨུཔོསཐཀརཎམྤི པཊིཀྑིཏྟམེཝ ཨལཛྫཱིནིགྒཧཏྠཏྟཱ སབྦསིཀྑཱཔདཱནནྟི དཊྛབྦཾ. པཱརིསུདྡྷིདཱནཔཉྙཱཔནེནཱཏི ཨིམིནཱ སཱཔཏྟིཀེན པཱརིསུདྡྷིཔི ན དཱཏབྦཱཏི དཱིཔིཏཾ ཧོཏི.

༡༧༦. ཨུབྷོཔི དུཀྐཊནྟི ཨེཏྠ སབྷཱགཱཔཏྟིབྷཱཝཾ ཨཛཱནིཏྭཱ ཀེཝལཾ ཨཱཔཏྟིནཱམེནེཝ དེསེནྟསྶ པཊིགྒཎྷནྟསྶ ཙ ཨཙིཏྟཀམེཝ དུཀྐཊཾ ཧོཏཱིཏི ཝདནྟི. ཡཐཱ སངྒྷོ སབྷཱགཱཔཏྟིཾ ཨཱཔནྣོཏི ཉཏྟིཾ ཋཔེཏྭཱ ཨུཔོསཐཾ ཀཱཏུཾ ལབྷཏི, ཨེཝཾ ཏཡོཔི ‘‘སུཎནྟུ མེ, ཨཱཡསྨནྟཱ, ཨིམེ བྷིཀྑཱུ སབྷཱགཾ ཨཱཔཏྟིཾ ཨཱཔནྣཱ’’ཏིཨཱདིནཱ ཝུཏྟནཡཱནུསཱརེནེཝ གཎཉཏྟིཾ ཋཔེཏྭཱ དྭཱིཧི ཨཉྙམཉྙཾ ཨཱརོཙེཏྭཱ ཨུཔོསཐཾ ཀཱཏུཾ ཝཊྚཏི. ཨེཀེན པན སཱཔཏྟིཀེན དཱུརཾ གནྟྭཱཔི པཊིཀཱཏུམེཝ ཝཊྚཏི, ཨསམྤཱཔུཎནྟེན ‘‘བྷིཀྑཱུ ལབྷིཏྭཱ པཊིཀརིསྶཱམཱི’’ཏི ཨུཔོསཐོ ཀཱཏབྦོ, པཊིཀརིཏྭཱ ཙ པུན ཨུཔོསཐོ ཀཱཏབྦོ ¶ . ཀེནཙི ཀརཎཱིཡེན གནྟྭཱཏི སཱིམཱཔརིཙྪེདཏོ བཧིབྷཱུཏཾ གཱམཾ ཝཱ ཨརཉྙཾ ཝཱ གནྟྭཱཏི ཨཏྠོ. ཨེཏེནེཝ ཨུཔོསཐཉཏྟིཡཱ ཋཔནཀཱལེ སམགྒཱ ཨེཝ ཏེ ཉཏྟིཾ ཋཔེསུནྟི སིདྡྷཾ. ཏེནེཝ པཱལི༹ཡཾ (མཧཱཝ. ༡༧༢) ‘‘ཨུདྡིཊྛཾ སུཨུདྡིཊྛ’’ནྟི སབྦཔནྣརསཀེསུཔི ཝུཏྟཾ.

སཙེ པན ཝུཌྜྷཏརོ ཧོཏཱིཏི པཝཱརཎདཱཡཀོ བྷིཀྑུ ཝུཌྜྷཏརོ ཧོཏི. ཨེཝཉྷི ཏེན ཏསྶཏྠཱཡ པཝཱརིཏཾ ཧོཏཱིཏི ཨེཏྠ ཨེཝཾ ཏེན ཨཔྤཝཱརིཏེཔི ཏསྶ སངྒྷཔྤཏྟམཏྟེན སངྒྷསྶ པཝཱརཎཱཀམྨཾ སམགྒཀམྨམེཝ ཧོཏཱིཏི དཊྛབྦཾ. ཏེན ཙ བྷིཀྑུནཱཏི པཝཱརཎདཱཡཀེན བྷིཀྑུནཱ. བཧཱུཔི སམཱནཝསྶིཀཱ ཨེཀཏོ པཝཱརེཏུཾ ལབྷནྟཱིཏི ཨེཀསྨིཾ སཾཝཙྪརེ ལདྡྷུཔསམྤདཏཱཡ སམཱནུཔསམྤདཝསྶཱ སབྦེ ཨེཀཏོ པཝཱརེཏུཾ ལབྷནྟཱིཏི ཨཏྠོ.

ཨེཏྠ ¶ པན པཎྜིཏེཧི ཙིནྟེཏབྦཾ ཝིཙཱརེཏབྦཾ ཀཱརཎཾ ཨཏྠི, ཀིཾ པན ཏནྟི? ཨིདཱནི པཱཏིམོཀྑུདྡེསཀཱལེ –

‘‘སམྨཛྫནཱི པདཱིཔོ ཙ, ཨུདཀཾ ཨཱསནེན ཙ;

ཨུཔོསཐསྶ ཨེཏཱནི, པུབྦཀརཎནྟི ཝུཙྩཏི.

‘‘ཚནྡཔཱརིསུདྡྷིཨུཏུཀྑཱནཾ, བྷིཀྑུགཎནཱ ཙ ཨོཝཱདོ;

ཨུཔོསཐསྶ ཨེཏཱནི, པུབྦཀིཙྩནྟི ཝུཙྩཏི.

‘‘ཨུཔོསཐོ ཡཱཝཏིཀཱ ཙ བྷིཀྑཱུ ཀམྨཔྤཏྟཱ;

སབྷཱགཱཔཏྟིཡོ ཙ ན ཝིཛྫནྟི;

ཝཛྫནཱིཡཱ ཙ པུགྒལཱ ཏསྨིཾ ན ཧོནྟི;

པཏྟཀལླནྟི ཝུཙྩཏཱི’’ཏི. (མཧཱཝ. ཨཊྛ. ༡༦༨) –

ཨིམཱ གཱཐཱཡོ དྷམྨཛ྄ཛྷེསཀེན པཱཋཾཡེཝ བྷཎཱཔེཏྭཱ པཱཏིམོཀྑུདྡེསཀོ ཨཏྠཾ ཀཐེཏི. ཏཏོ པུབྦཀརཎཔུབྦཀིཙྩཱནི སམྨཱ ནིཊྛཱཔེཏྭཱ ‘‘དེསིཏཱཔཏྟིཀསྶ སམགྒསྶ ¶ བྷིཀྑུསངྒྷསྶ ཨནུམཏིཡཱ པཱཏིམོཀྑཾ ཨུདྡིསིཏུཾ ཨཱརཱདྷནཾ ཀརོམཱ’’ཏི ཨིམཾ ཝཱཀྱཾ པཱཋམེཝ ཨཛ྄ཛྷེསཀེན བྷཎཱཔེཏྭཱ ཨཏྠཾ ཨཝཏྭཱཝ ‘‘སཱདྷཱུ’’ཏི ཝཏྭཱ པཱཏིམོཀྑཾ ཨུདྡིསཏི. པཝཱརཎཱཡཔི ཨེསེཝ ནཡོ. ‘‘པཝཱརཎཱཡ ཨེཏཱནཱི’’ཏི ཙ ‘‘པཝཱརཎཾ ཀཱཏུ’’ནྟི ཙ ཨིམཱནི པདཱནིཡེཝ ཝིསིཊྛཱནི.

ཀིཾ ཨིམཱནི དྷམྨཛ྄ཛྷེསཀསྶ ཝཙནཱནི, ཨུདཱཧུ པཱཏིམོཀྑུདྡེསཀསྶཱཏི? ཀིཉྩེཏྠ – ཡདི དྷམྨཛ྄ཛྷེསཀསྶ ཝཙནཱནི, ཨེཝཾ སཏི གཱཐཱཏྟཡཾ ཝཏྭཱ ཏཱསཾ ཨཏྠམྤི སོ ཨེཝ ཀཐེཏྭཱ ཨེཏཱནི པུབྦཀརཎཱནི ཙ ཨེཏཱནི པུབྦཀིཙྩཱནི ཙ སངྒྷེན ཀཏཱནི, ཨིདཉྩ སངྒྷསྶ པཏྟཀལླཾ སམཱནཱིཏཾ, ཏསྨཱ ‘‘ཨུདྡིསཏུ, བྷནྟེ, པཱཏིམོཀྑ’’ནྟི ཏེནེཝ ཝཏྟབྦཾ སིཡཱ. ཨཐ པཱཏིམོཀྑུདྡེསཀསྶ ཝཙནཱནི, ཨེཝཉྩ སཏི ‘‘སངྒྷོ, བྷནྟེ, ཐེརཾ པཱཏིམོཀྑུདྡེསཾ ཨཛ྄ཛྷེསཏི, ཨུདྡིསཏུ, བྷནྟེ, ཐེརོ པཱཏིམོཀྑ’’ནྟི དྷམྨཛ྄ཛྷེསཀེན ཡཱཝཏཏིཡཾ ཨཛ྄ཛྷོསཱཔེཏྭཱ ‘‘སམྨཛྫནཱི…པེ… ཝུཙྩཏཱི’’ཏི གཱཐཾ ཝཏྭཱ ཨིཏི ‘‘ཨཊྛཀཐཱཙརིཡེཧི ཝུཏྟཱནི ཨེཏཱནི པུབྦཀརཎཱནི ཀཏཱནཱི’’ཏི པུཙྪིཏྭཱ དྷམྨཛ྄ཛྷེསཀེན ‘‘ཨཱམ, བྷནྟེ’’ཏི ཝུཏྟེ ‘‘ཚནྡཔཱརིསུདྡྷི ¶ …པེ… ཝུཙྩཏཱི’’ཏི གཱཐཾ ཝཏྭཱ ཨིཏི ‘‘ཨཊྛཀཐཱཙརིཡེཧི ཝུཏྟཱནི ཨེཏཱནི པུབྦཀིཙྩཱནི ཀཏཱནཱི’’ཏི པུཙྪིཏྭཱ ‘‘ཨཱམ, བྷནྟེ’’ཏི ཝུཏྟེ ‘‘ཨུཔོསཐོ…པེ… ཝུཙྩཏཱི’’ཏི གཱཐཾ ཝཏྭཱ ཨིཏི ‘‘ཨཊྛཀཐཱཙརིཡེཧི ཝུཏྟཾ ཨིདཾ པཏྟཀལླཾ སམཱནཱིཏ’’ནྟི པུཙྪིཏྭཱ ‘‘ཨཱམ བྷནྟེ’’ཏི ཝུཏྟེ ‘‘པུབྦཀརཎཔུབྦཀིཙྩཱནི སམྨཱ ནིཊྛཱཔེཏྭཱ པཏྟཀལླེ སམཱནཱིཏེ སམགྒསྶ བྷིཀྑུསངྒྷསྶ ཨནུམཏིཡཱ པཱཏིམོཀྑཾ ཨུདྡིསིཏུཾ ཨཱརཱདྷནཾ མཡཾ ཀརོམཱ’’ཏི པཱཏིམོཀྑུདྡེསཀེན ཝཏྟབྦཾ སིཡཱ, ཨེཝཾ སཏི ཨཛ྄ཛྷེསཀཨཛ྄ཛྷེསིཏབྦཱནཾ ཝཙནཾ ཨསངྐརཏོ ཛཱནིཏབྦཾ བྷཝེཡྻཱཏི.

ཨེཏྠ ¶ ཙ གཱཐཱཏྟཡསྶ ཨཊྛཀཐཱཙརིཡེཧི ཝུཏྟབྷཱཝོ ཨཊྛཀཐཱཡམེཝ ཨཱགཏོ. པཙྪིམཝཱཀྱཾ པན ནེཝ པཱལི༹ཡཾ, ན ཨཊྛཀཐཱཡཾ, ན ཊཱིཀཱདཱིསུ དིསྶཏི. ཁུདྡསིཀྑཱཔཀརཎེཔི –

‘‘པུབྦཀིཙྩེ ཙ ཀརཎེ;

པཏྟཀལླེ སམཱནིཏེ;

སུཏྟཾ ཨུདྡིསཏི སངྒྷོ;

པཉྩདྷཱ སོ ཝིབྷཱཝིཏོ’’ཏི ཙ.

‘‘པུབྦཀིཙྩེ ཙ ཀརཎེ;

པཏྟཀལླེ སམཱནིཏེ;

ཉཏྟིཾ ཝཏྭཱན སངྒྷེན;

ཀཏྟབྦེཝཾ པཝཱརཎཱ’’ཏི ཙ. –

ཝུཏྟཾ, ན ཝུཏྟཾ ཏཐཱ. མཱུལསིཀྑཱཔཀརཎེཡེཝ ཏཐཱ ཝུཏྟཾ, ཏསྨཱ ཨཱཙརིཡཱནཾ ཨཏྟནོམཏི བྷཝེཡྻ.

ཏཏྠ ‘‘པུབྦཀརཎཔུབྦཀིཙྩཱནི སམྨཱ ནིཊྛཱཔེཏྭཱ’’ཏི ཨིམིནཱ པུརིམགཱཐཱདྭཡསྶ ཨཏྠམེཝ ཀཐེཏྭཱ ཏཏིཡགཱཐཱཡ ཨཏྠོ ན ཀཐིཏོ. ‘‘དེསིཏཱཔཏྟིཀསྶཱ’’ཏི ཨིམིནཱ ཙ ཨཱཔཏྟིཡཱ དེསིཏབྷཱཝོཡེཝ ཀཐིཏོ, ན སབྦཾ པཏྟཀལླཾ. ཨཱཔཏྟིཡཱ དེསིཏབྷཱཝེ ཙ སབྷཱགཱཔཏྟིཡཱ དེསིཏབྷཱཝོཡེཝ ¶ པཏྟཀལླསྨིཾ ཨནྟོགདྷོ, ན ཨིཏརོ. ཝུཏྟཉྷི ཀངྑཱཝིཏརཎིཡཾ (ཀངྑཱ. ཨཊྛ. ནིདཱནཝཎྞནཱ) ‘‘ཨེཏཱསུ ཧི སབྷཱགཱཔཏྟཱིསུ ཨཝིཛྫམཱནཱསུ, ཝིསབྷཱགཱཔཏྟཱིསུ ཝིཛྫམཱནཱསུཔི པཏྟཀལླཾ ཧོཏིཡེཝཱ’’ཏི. ‘‘པུབྦཀརཎཔུབྦཀིཙྩཱནི སམྨཱ ནིཊྛཱཔེཏྭཱ དེསིཏཱཔཏྟིཀསྶ སམགྒསྶ བྷིཀྑུསངྒྷསྶ ཨནུམཏིཡཱ པཱཏིམོཀྑཾ ཨུདྡིསིཏུཾ ཨཱརཱདྷནཾ ཀརོམཱ’’ཏི ཨེཏྟཀེཡེཝ ཝུཏྟེ ཨཝསེསཱནི ཏཱིཎི པཏྟཀལླངྒཱནི. སེཡྻཐིདཾ – ཨུཔོསཐོ, ཡཱཝཏིཀཱ ཙ བྷིཀྑཱུ ཀམྨཔྤཏྟཱ, ཝཛྫནཱིཡཱ ཙ པུགྒལཱ ཏསྨིཾ ན ཧོནྟཱིཏི (མཧཱཝ. ཨཊྛ. ༡༦༨). ཏེསུ ཨསནྟེསུཔི ཨུཔོསཐོ ¶ ཀཱཏབྦོཏི ཨཱཔཛྫཏི, ན པན ཀཱཏབྦོ. ཏེན ཝུཏྟཾ ‘‘ན, བྷིཀྑཝེ, ཨནུཔོསཐེ ཨུཔོསཐོ ཀཱཏབྦོ, ཡོ ཀརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༨༣) ཙ, ‘‘ཨནུཛཱནཱམི, བྷིཀྑཝེ, ཙཏུནྣཾ པཱཏིམོཀྑཾ ཨུདྡིསིཏུ’’ནྟི (མཧཱཝ. ༡༦༨) ཙ, ‘‘ན, བྷིཀྑཝེ, སགཧཊྛཱཡ པརིསཱཡ པཱཏིམོཀྑཾ ཨུདྡིསིཏབྦ’’ནྟིཨཱདི (མཧཱཝ. ༡༥༤) ཙ, ཏསྨཱ ཨུཔོསཐདིཝསེསུ སངྒྷེ སནྣིཔཏིཏེ སཙེ པུབྦེཝ སམྨཏོ དྷམྨཛ྄ཛྷེསཀོ ཨཏྠི, ཨིཙྩེཏཾ ཀུསལཾ. ནོ ཙེ, ཨེཀཾ བྱཏྟཾ པཊིབལཾ བྷིཀྑུཾ སངྒྷེན སམྨནྣཱཔེཏྭཱ ཏེན དྷམྨཛ྄ཛྷེསཀེན པཱཏིམོཀྑུདྡེསཀཾ ཨུཔསངྐམིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཨེཝམསྶ ཝཙནཱིཡོ – སངྒྷོ, བྷནྟེ, ཐེརཾ པཱཏིམོཀྑུདྡེསཾ ཨཛ྄ཛྷེསཏི, ཨུདྡིསཏུ ཐེརོ པཱཏིམོཀྑཾ. དུཏིཡམྤི, བྷནྟེ, སངྒྷོ…པེ… ཏཏིཡམྤི, བྷནྟེ, སངྒྷོ…པེ… ཨུདྡིསཏུ ཐེརོ པཱཏིམོཀྑནྟི ཏིཀྑཏྟུཾ ཡཱཙཱཔེཏྭཱ ཏཏོ པཱཏིམོཀྑུདྡེསཀེན –

‘‘སམྨཛྫནཱི པདཱིཔོ ཙ, ཨུདཀཾ ཨཱསནེན ཙ;

ཨུཔོསཐསྶ ཨེཏཱནི, པུབྦཀརཎནྟི ཝུཙྩཏཱིཏི. (མཧཱཝ. ཨཊྛ. ༡༦༨; ཀངྑཱ. ཨཊྛ. ནིདཱནཝཎྞནཱ) –

ཨཊྛཀཐཱཙརིཡེཧི ཝུཏྟཱནི ཙཏྟཱརི པུབྦཀརཎཱནི, ཀིཾ ཏཱནི ཀཏཱནཱི’’ཏི པུཙྪིཏེ དྷམྨཛ྄ཛྷེསཀེན ‘‘ཨཱམ, བྷནྟེ’’ཏི ཝུཏྟེ པུན པཱཏིམོཀྑུདྡེསཀེན –

‘‘ཚནྡཔཱརིསུདྡྷིཨུཏུཀྑཱནཾ, བྷིཀྑུགཎནཱ ཙ ཨོཝཱདོ;

ཨུཔོསཐསྶ ཨེཏཱནི, པུབྦཀིཙྩནྟི ཝུཙྩཏཱིཏི. (མཧཱཝ. ཨཊྛ. ༡༦༨; ཀངྑཱ. ཨཊྛ. ནིདཱནཝཎྞནཱ) –

ཨཊྛཀཐཱཙརིཡེཧི ¶ ཝུཏྟཱནི པཉྩ པུབྦཀིཙྩཱནི, ཀིཾ ཏཱནི ཀཏཱནཱི’’ཏི པུཙྪིཏེ དྷམྨཛ྄ཛྷེསཀེན ‘‘ཨཱམ བྷནྟེ’’ཏི ཝུཏྟེ པུན པཱཏིམོཀྑུདྡེསཀེན –

‘‘ཨུཔོསཐོ ¶ ཡཱཝཏིཀཱ ཙ བྷིཀྑཱུ ཀམྨཔྤཏྟཱ;

སབྷཱགཱཔཏྟིཡོ ཙ ན ཝིཛྫནྟི;

ཝཛྫནཱིཡཱ ཙ པུགྒལཱ ཏསྨིཾ ན ཧོནྟི;

པཏྟཀལླནྟི ཝུཙྩཏཱིཏི. (མཧཱཝ. ཨཊྛ. ༡༦༨; ཀངྑཱ ཨཊྛ. ནིདཱནཝཎྞནཱ) –

ཨཊྛཀཐཱཙརིཡེཧི ཝུཏྟཱནི ཙཏྟཱརི པཏྟཀལླངྒཱནི, ཀིཾ ཏཱནི སམཱནཱིཏཱནཱི’’ཏི པུཙྪིཏེ དྷམྨཛ྄ཛྷེསཀེན ‘‘ཨཱམ, བྷནྟེ’’ཏི ཝུཏྟེ པུན པཱཏིམོཀྑུདྡེསཀོ ‘‘པུབྦཀརཎཔུབྦཀིཙྩཱནི སམྨཱ ནིཊྛཱཔེཏྭཱ པཏྟཀལླངྒེ སམཱནཱིཏེ སངྒྷསྶ ཨནུམཏིཡཱ པཱཏིམོཀྑཾ ཨུདྡིསིསྶཱམཱ’’ཏི ཝཏྭཱ ‘‘སཱདྷུ སཱདྷཱུ’’ཏི བྷིཀྑུསངྒྷེན སམྤཊིཙྪིཏེ ‘‘སུཎཱཏུ མེ, བྷནྟེ, སངྒྷོ’’ཏིཨཱདིནཱ པཱཏིམོཀྑུདྡེསཀོ པཱཏིམོཀྑཾ ཨུདྡིསཏཱིཏི ཨཡམམྷཱཀཾ ཁནྟི.

ཨེཏྠ ཙ ‘‘དྷམྨཛ྄ཛྷེསཀེན…པེ… ཨེཝམསྶ ཝཙནཱིཡོ’’ཏི ཝུཏྟཾ, སོ དྷམྨཛ྄ཛྷེསཀེན ཝཙནཱིཡབྷཱཝོ ཀཐཾ ཝེདིཏབྦོཏི? ‘‘ན, བྷིཀྑཝེ, སངྒྷམཛ྄ཛྷེ ཨནཛ྄ཛྷིཊྛེན པཱཏིམོཀྑཾ ཨུདྡིསིཏབྦཾ, ཡོ ཨུདྡིསེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༥༤) ཝཙནཏོཏི. ‘‘སངྒྷེན སམྨནྣཱཔེཏྭཱ’’ཏི ཝུཏྟཾ, ཏཾ ཀཐནྟི? ‘‘ཨཛ྄ཛྷེསནཱ ཙེཏྠ སངྒྷེན སམྨཏདྷམྨཛ྄ཛྷེསཀཱཡཏྟཱ ཝཱ སངྒྷཏྠེརཱཡཏྟཱ ཝཱ’’ཏི ཨཊྛཀཐཱཡཾ ཝུཏྟཏྟཱ. ‘‘སངྒྷོ, བྷནྟེ, ཐེརཾ པཱཏིམོཀྑུདྡེསཾ ཨཛ྄ཛྷེསཏི, ཨུདྡིསཏུ, བྷནྟེ, ཐེརོ པཱཏིམོཀྑ’’ནྟི ཨཡཾ ཨཛ྄ཛྷེསནཱཀཱརོ ཀུཏོ ལབྦྷཏཱིཏི? པཱལི༹ཏོ. པཱལི༹ཡཉྷི (མཧཱཝ. ༡༥༥) ‘‘ཏེ ཐེརཾ ཨཛ྄ཛྷེསནྟི, ཨུདྡིསཏུ, བྷནྟེ, ཐེརོ པཱཏིམོཀྑ’’ནྟི ཨཱགཏོ.

སཙེ པན དྷམྨཛ྄ཛྷེསཀོ ཝུཌྜྷཏརོ, པཱཏིམོཀྑུདྡེསཀོ ནཝཀོ, ‘‘སངྒྷོ, ཨཱཝུསོ, ཨཱཡསྨནྟཾ པཱཏིམོཀྑུདྡེསཾ ཨཛ྄ཛྷེསཏི, ཨུདྡིསཏུ ཨཱཡསྨཱ པཱཏིམོཀྑ’’ནྟི ཝཏྟབྦཾ. ཏཾ ཀུཏོ ལབྦྷཏི? པཱལི༹ཏོཡེཝ. པཱལི༹ཡཉྷི ¶ (མཧཱཝ. ༡༥༥) ‘‘ཨེཏེནེཝ ཨུཔཱཡེན ཡཱཝ སངྒྷནཝཀཾ ཨཛ྄ཛྷེསནྟི ཨུདྡིསཏུ ཨཱཡསྨཱ པཱཏིམོཀྑ’’ནྟི ཨཱགཏོ. ཏཏོ ‘‘པཱཏིམོཀྑུདྡེསཀེན ¶ སམྨཛྫནཱི…པེ… པུཙྪིཏེ དྷམྨཛ྄ཛྷེསཀེན ‘ཨཱམ, བྷནྟེ’ཏི ཝུཏྟེ’’ཏི ཨིདཾ ཀུཏོ ལབྦྷཏཱིཏི? པཱལི༹ཏོ ཨཊྛཀཐཱཏོ ཙ. ནིདཱནཔཱལི༹ཡམྤི ཧི ‘‘ཀིཾ སངྒྷསྶ པུབྦཀིཙྩ’’ནྟི ཨཱགཏཾ, ཨཊྛཀཐཱཡམྤི (ཀངྑཱ. ཨཊྛ. ནིདཱནཝཎྞནཱ) ‘‘ཀིཾ སངྒྷསྶ པུབྦཀིཙྩནྟི སངྒྷོ ཨུཔོསཐཾ ཀརེཡྻཱཏི…པེ… ཨེཝཾ དྭཱིཧི ནཱམེཧི ནཝཝིདྷཾ པུབྦཀིཙྩཾ དསྶིཏཾ, ཀིཾ ཏཾ ཀཏནྟི པུཙྪཏཱི’’ཏི ཨཱགཏནྟི.

ནནུ ཙེཏཾ ཨནྟོནིདཱནེཡེཝ ཨཱགཏཾ, ཨཐ ཀསྨཱ པཱཏིམོཀྑུདྡེསཀེན པུབྦབྷཱགེ ཝཏྟབྦནྟི? སཙྩཾ, ཏཐཱཔི ཏདནུལོམཏོ ཛཱནིཏབྦཏོ ཝཏྟབྦཾ. ཨཊྛཀཐཱཡཉྷི ཨིམཱ གཱཐཱཡོ སམྨཛྫནཱདཱིནཾ པུབྦཀརཎཱདིབྷཱཝཉཱཔཀབྷཱཝེནེཝ ཝུཏྟཱ, ན པཱཏིམོཀྑཱརམྦྷཀཱལེ བྷཎིཏབྦབྷཱཝེན. ཨཐ ཙ པན ཨིདཱནི བྷཎནྟི, ཨེཝཾ སནྟེ ཀིམཏྠཾ བྷཎནྟཱིཏི ཙིནྟཱཡཾ ཨནྟོནིདཱནེ ‘‘ཀིཾ སངྒྷསྶ པུབྦཀིཙྩ’’ནྟི ཝུཏྟཔུཙྪཱནུལོམེན པུབྦཀརཎཱདཱིནཾ ནིཊྛབྷཱཝཔུཙྪནཏྠཾ བྷཎནྟཱིཏི ཛཱནིཏབྦཾ. ཝུཏྟཉྷི ‘‘ཨེཝཾ ཝུཏྟཾ ཙཏུབྦིདྷཾ པུབྦཀརཎཾ ཀཏྭཱཝ ཨུཔོསཐོ ཀཱཏབྦོ’’ཏི (ཝི. སངྒ. ཨཊྛ. ༡༧༧), ཏསྨཱ པཱལི༹ཨཊྛཀཐཱནུལོམཏོ ཨིམིནཱ ཨནུཀྐམེན ཀཏེ སཏི དྷམྨཛ྄ཛྷེསཀོ པཉྙཱཡཏི, ཏསྶ ཨཛ྄ཛྷེསནཱཀཱརོ པཉྙཱཡཏི, པཱཏིམོཀྑུདྡེསཀོ པཉྙཱཡཏི, ཏསྶ པུབྦཀརཎཱདཱིནཾ ནིཊྛབྷཱཝཔུཙྪནཾ པཉྙཱཡཏི, དྷམྨཛ྄ཛྷེསཀསྶ ཝིསྶཛྫནཾ པཉྙཱཡཏི, ཏཱནི ནིཊྛཱཔེཏྭཱ པཱཏིམོཀྑུདྡེསཀསྶ པཱཏིམོཀྑཾ ཨུདྡིསིཏུཾ པཊིཉྙཱ པཉྙཱཡཏི, ཨེཝཾ ཨིམེསཾ གཱཐཱཝཱཀྱཱནཾ ཝཙནེ པཡོཛནཾ པཉྙཱཡཏཱིཏི ཀཏྭཱ པཎྜིཏེཧི ཝིནཡཉྙཱུཧི ཙིརཔཊིཙྪནྣོ ཨཡཾ ཀཐཱམགྒོ པཊིཔཛྫིཏབྦོཏི. པཝཱརཎཱཡཔི ཨེསེཝ ནཡོ.

པཱལི༹ཡཊྛཀཐཱདཱིནཉྷི ¶ , ཨནུརཱུཔཾ ཨིམཾ ནཡཾ;

པུནཔྤུནཾ ཙིནྟཡནྟུ, པཎྜིཏཱ ཝིནཡཉྙུནོ.

པུནཔྤུནཾ ཙིནྟཡིཏྭཱ, ཡུཏྟཾ ཙེ དྷཱརཡནྟུ ཏཾ;

ནོ ཙེ ཡུཏྟཾ ཚཌྜཡནྟུ, སམྨཱསམྦུདྡྷསཱཝཀཱཏི.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཨུཔོསཐཔཝཱརཎཱཝིནིཙྪཡཀཐཱལངྐཱརོ ནཱམ

པཉྩཝཱིསཏིམོ པརིཙྪེདོ.

༢༦. ཝསྶཱུཔནཱཡིཀཝིནིཙྪཡཀཐཱ

༡༧༩. ཨེཝཾ ¶ ཨུཔོསཐཔཝཱརཎཱཝིནིཙྪཡཾ ཀཐེཏྭཱ ཨིདཱནི ཝསྶཱུཔནཱཡིཀཝིནིཙྪཡཾ ཀཐེཏུཾ ‘‘ཝསྶཱུཔནཱཡིཀཱཏི ཨེཏྠ’’ཏྱཱདིམཱཧ. ཏཏྠ ཝསནཾ ཝསྶཾ. ཀིཾ ཏཾ? ཝསནཀིརིཡཱ བྷཱཝཏྠེ ཎྱ-པཙྩཡཝསེན. ཨུཔནཡནཾ ཨུཔནཡོ. ཀོ སོ? ཨུཔགམནཀིརིཡཱ, ཝསྶསྶ ཨུཔནཡོ ཝསྶཱུཔནཡོ, སོ ཨེཏིསྶཱ པཉྙཏྟིཡཱ ཨཏྠི, ཏསྨིཾ ཝཱ ཝིཛྫཏཱིཏི ཝསྶཱུཔནཱཡིཀཱ. ཀཱ སཱ? ཝསྶཱུཔནཱཡིཀཔཉྙཏྟི. ཨཐ ཝཱ ཨུཔནཡཏི ཨེཏཱཡཱཏི ཨུཔནཱཡིཀཱ མཛ྄ཛྷེ དཱིགྷཝསེན. ཝསྶསྶ ཨུཔནཱཡིཀཱ ཝསྶཱུཔནཱཡིཀཱ, སཱ ཨེཝ པུརེ བྷཝཱ པུརིམཱ བྷཝཏྠེ ཨིམ-པཙྩཡཝསེན, སཱ ཨེཝ པུརིམིཀཱ སཀཏྠེ ཀ-པཙྩཡཝསེན, ཏསྨིཾ པརེ ཨིཏྠིལིངྒེ ཨ-ཀཱརསྶ ཨི-ཀཱརཱདེསོ. པཙྪཱ བྷཝཱ པཙྪིམཱ, སཱཝ པཙྪིམིཀཱ.

ཨསྶཏིཡཱ པན ཝསྶཾ ན ཨུཔེཏཱིཏི ‘‘ཨིམསྨིཾ ཝིཧཱརེ ཨིམཾ ཏེམཱསཾ ཝསྶཾ ཨུཔེམཱི’’ཏི ཝཙཱིབྷེདཾ ཀཏྭཱ ན ཨུཔེཏི. ‘‘ན, བྷིཀྑཝེ, ཨསེནཱསནིཀེན ཝསྶཾ ཨུཔགནྟབྦཾ, ཡོ ཨུཔགཙྪེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༢༠༤) ཝཙཱིབྷེདཾ ཀཏྭཱ ཝསྶཱུཔགམནཾ སནྡྷཱཡ པཊིཀྑེཔོ, ན ཨཱལཡཀརཎཝསེན ཨུཔགམནཾ ¶ སནྡྷཱཡཱཏི ཝདནྟི. པཱལི༹ཡཾ པན ཨཝིསེསེན ཝུཏྟཏྟཱ ཨཊྛཀཐཱཡཉྩ དུཏིཡཔཱརཱཛིཀསཾཝཎྞནཱཡཾ (པཱརཱ. ཨཊྛ. ༡.༨༤) ‘‘ཝསྶཾ ཨུཔགཙྪནྟེན ཧི ནཱལཀཔཊིཔདཾ པཊིཔནྣེནཔི པཉྩནྣཾ ཚདནཱནཾ ཨཉྙཏརེན ཚནྣེཡེཝ སདྭཱརབནྡྷེ སེནཱསནེ ཨུཔགནྟབྦཾ, ཏསྨཱ ཝསྶཀཱལེ སཙེ སེནཱསནཾ ལབྷཏི, ཨིཙྩེཏཾ ཀུསལཾ. ནོ ཙེ ལབྷཏི, ཧཏྠཀམྨཾ པརིཡེསིཏྭཱཔི ཀཱཏབྦཾ. ཧཏྠཀམྨཾ ཨལབྷནྟེན སཱམམྤི ཀཱཏབྦཾ, ན ཏྭེཝ ཨསེནཱསནིཀེན ཝསྶཾ ཨུཔགནྟབྦ’’ནྟི (མཧཱཝ. ༢༠༤) དལ༹ྷཾ ཀཏྭཱ ཝུཏྟཏྟཱ ཨསེནཱསནིཀསྶ ནཱཝཱདིཾ ཝིནཱ ཨཉྙཏྠ ཨཱལཡམཏྟེན ཨུཔགནྟུཾ ན ཝཊྚཏཱིཏི ཨམྷཱཀཾ ཁནྟི. ནཱཝཱསཏྠཝཛེསུཡེཝ ཧི ‘‘ཨནུཛཱནཱམི, བྷིཀྑཝེ, ནཱཝཱཡ ཝསྶཾ ཨུཔགནྟུ’’ནྟིཨཱདིནཱ (མཧཱཝ. ༢༠༣) སཏི, ཨསཏི ཝཱ སེནཱསནེ ཝསྶཱུཔགམནསྶ ཝིསུཾ ཨནུཉྙཱཏཏྟཱ ‘‘ན, བྷིཀྑཝེ, ཨསེནཱསནིཀེན ཝསྶཾ ཨུཔགནྟབྦ’’ནྟི (མཧཱཝ. ༢༠༤) ཨཡཾ པཊིཀྑེཔོ. ཏཏྠ ན ལབྷཏཱིཏི ཨསཏི སེནཱསནེ ཨཱལཡཝསེནཔི ནཱཝཱདཱིསུ ཨུཔགམནཾ ཝུཏྟཾ. ཙཏཱུསུ ཧི སེནཱསནེསུ ཝིཧཱརསེནཱསནཾ ཨིདྷཱདྷིཔྤེཏཾ, ན ཨིཏརཏྟཡཾ.

ཊངྐིཏམཉྩཱདིབྷེདཱ ཀུཊཱིཏི ཨེཏྠ ཊངྐིཏམཉྩོ ནཱམ དཱིགྷེ མཉྩཔཱདེ མཛ྄ཛྷེ ཝིཛ྄ཛྷིཏྭཱ ཨཊནིཡོ ¶ པཝེསེཏྭཱ ཀཏོ མཉྩོ, ཏསྶ ཨིདཾ ཨུཔརི, ཨིདཾ ཧེཊྛཱཏི ནཏྠི. པརིཝཏྟེཏྭཱ ཨཏྠཏོཔི ཏཱདིསོཝ ཧོཏི, ཏཾ སུསཱནེ དེཝཊྛཱནེ ཙ ཋཔེནྟི, ཙཏུནྣཾ པཱསཱཎཱནཾ ཨུཔརི པཱསཱཎཾ ཨཏྠརིཏྭཱ ཀཏཾ གེཧམྤི ‘‘ཊངྐིཏམཉྩོ’’ཏི ཝུཙྩཏི.

‘‘ཨིདྷ ཝསྶཾ ཨུཔེམཱི’’ཏི ཏིཀྑཏྟུཾ ཝཏྟབྦནྟི སཏྠསྶ ཨཝིཧཱརཏྟཱ ‘‘ཨིམསྨིཾ ཝིཧཱརེ’’ཏི ཨཝཏྭཱ ‘‘ཨིདྷ ཝསྶཾ ཨུཔེམཱི’’ཏི ཨེཏྟཀམེཝ ཝཏྟབྦཾ. སཏྠེ པན ཝསྶཾ ཨུཔགནྟུཾ ན ཝཊྚཏཱིཏི ཀུཊིཀཱདཱིནཾ ཨབྷཱཝེན ‘‘ཨིདྷ ཝསྶཾ ཨུཔེམཱི’’ཏི ཝཙཱིབྷེདཾ ཀཏྭཱ ཨུཔགནྟུཾ ན ཝཊྚཏི, ཨཱལཡཀརཎམཏྟེནེཝ ཝཊྚཏཱིཏི ཨདྷིཔྤཱཡོ. ཝིཔྤཀིརཏཱིཏི ཝིསུཾ ཝིསུཾ གཙྪཏི. ཏཱིསུ ¶ ཋཱནེསུ ནཏྠི ཝསྶཙྪེདེ ཨཱཔཏྟཱིཏི ཏེཧི སདྡྷིཾ གཙྪནྟསྶེཝ ནཏྠི ཨཱཔཏྟི, ཏེཧི ཝིཡུཛྫིཏྭཱ གམནེ པན ཨཱཔཏྟིཡེཝ, པཝཱརེཏུཉྩ ན ལབྷཏི.

པཝིསནདྭཱརཾ ཡོཛེཏྭཱཏི སཀཝཱཊབདྡྷམེཝ ཡོཛེཏྭཱ. པུརིམིཀཱཡ…པེ… ན པཀྐམིཏབྦཱཏི ཨིམིནཱ ཨཱསཱལ༹ྷཱིཔུཎྞམཱཡ ཨནནྟརེ པཱཊིཔདདིཝསེ པུརིམཝསྶཾ ཨུཔགནྟྭཱ ཝསྶཱནཨུཏུནོ ཙཏཱུསུ མཱསེསུ སབྦཔཙྪིམམཱསཾ ཋཔེཏྭཱ པུརིམཾ ཏེམཱསཾ ཝསིཏབྦཾ. སཱཝཎཔུཎྞམིཡཱ ཨནནྟརེ པཱཊིཔདདིཝསེ པཙྪིམཝསྶཾ ཨུཔགནྟྭཱ སབྦཔཋམམཱསཾ ཋཔེཏྭཱ པཙྪིམཾ ཏེམཱསཾ ཝསིཏབྦཾ. ཨེཝཾ ཨཝསིཏྭཱ པུརིམིཀཱཡ ཝསྶཾ ཨུཔགཏེན བྷིཀྑུནཱ མཧཱཔཝཱརཎཱཡ ཨནྟོ ཨརུཎཾ ཨནུཊྛཱཔེཏྭཱ པཙྪིམིཀཱཡ ཨུཔགཏེན ཙཱཏུམཱསིནིཔཝཱརཎཱཡ ཨནྟོ ཨརུཎཾ ཨནུཊྛཱཔེཏྭཱ ཨནྟརཱ ཙཱརིཀཾ པཀྐམེཡྻ, ཨུཔཙཱརསཱིམཱཏིཀྐམེཡེཝ ཏསྶ བྷིཀྑུནོ དུཀྐཊཱཔཏྟི ཧོཏཱིཏི དསྶེཏི. ཨིམམཏྠཾ པཱལི༹ཡཱ སམཏྠེཏུཾ ‘‘ན བྷིཀྑཝེ…པེ… ཝཙནཏོ’’ཏི ཝུཏྟཾ. ཡདི ཨེཝཾ ཝསྶཾ ཨུཔགནྟྭཱ སཏི ཀརཎཱིཡེ པཀྐམནྟསྶ སབྦཐཱཔི ཨཱཔཏྟིཡེཝ སིཡཱཏི ཙོདནཾ སནྡྷཱཡཱཧ ‘‘ཝསྶཾ ཨུཔགནྟྭཱ པནཱ’’ཏིཨཱདི. ཨེཝཾ སནྟེ ཏདཧེཝ སཏྟཱཧཀརཎཱིཡེན པཀྐམནྟསྶེཝ ཨནཱཔཏྟི སིཡཱ, ན དྭཱིཧཏཱིཧཾ ཝསིཏྭཱ པཀྐམནྟསྶཱཏི ཨཱཧ ‘‘ཀོ པན ཝཱདོ’’ཏིཨཱདི.

༡༨༠. ཨིདཱནི སཏྟཱཧཀརཎཱིཡལཀྑཎཾ ཝིཏྠཱརཏོ དསྶེཏུཾ ‘‘ཨནུཛཱནཱམི བྷིཀྑཝེ’’ཏིཨཱདིམཱཧ. ཏཏྠ ‘‘ཨནུཛཱནཱམི, བྷིཀྑཝེ, སཏྟནྣཾ སཏྟཱཧཀརཎཱིཡེན པཧིཏེ གནྟུཾ, ན ཏྭེཝ ཨཔྤཧིཏེ, བྷིཀྑུསྶ བྷིཀྑུནིཡཱ སིཀྑམཱནཱཡ སཱམཎེརསྶ སཱམཎེརིཡཱ ཨུཔཱསཀསྶ ཨུཔཱསིཀཱཡཱ’’ཏི (མཧཱཝ. ༡༨༧) ཨེཀཾ, ‘‘ཨནུཛཱནཱམི, བྷིཀྑཝེ, སཏྟནྣཾ སཏྟཱཧཀརཎཱིཡེན ¶ ཨཔྤཧིཏེཔི གནྟུཾ, པགེཝ པཧིཏེ, བྷིཀྑུསྶ བྷིཀྑུནིཡཱ ¶ སིཀྑམཱནཱཡ སཱམཎེརསྶ སཱམཎེརིཡཱ མཱཏུཡཱ ཙ པིཏུསྶ ཙཱ’’ཏི (མཧཱཝ. ༡༩༨) ཨེཀཾ, ‘‘སཙེ པན བྷིཀྑུནོ བྷཱཏཱ ཝཱ ཨཉྙོ ཝཱ ཉཱཏཀོ གིལཱནོ ཧོཏཱི’’ཏི ཨེཀཾ, ‘‘ཨེཀསྨིཾ ཝིཧཱརེ བྷིཀྑཱུཧི སདྡྷིཾ ཝསནྟོ བྷིཀྑུབྷཏྟིཀོ’’ཏི ཨེཀཾ, ‘‘སཙེ བྷིཀྑུསྶ…པེ… ཨནབྷིརཏི ཝཱ ཀུཀྐུཙྩཾ ཝཱ དིཊྛིགཏཾ ཝཱ ཨུཔྤནྣཾ ཧོཏཱི’’ཏི ཨེཀཾ, ‘‘ཀོཙི བྷིཀྑུ གརུདྷམྨཾ ཨཛ྄ཛྷཱཔནྣོ ཧོཏི པརིཝཱསཱརཧོ’’ཏི ཨེཀཾ, ‘‘བྷིཀྑུནིཡཱཔི མཱནཏྟཱརཧཱཡཱ’’ཏི ཨེཀཾ, ‘‘སཱམཎེརོ ཨུཔསམྤཛྫིཏུཀཱམོ…པེ… སིཀྑམཱནཱ ཝཱ…པེ… སཱམཎེརཱི ཝཱ’’ཏི ཨེཀཾ, ‘‘བྷིཀྑུསྶ བྷིཀྑུནིཡཱ ཝཱ སངྒྷོ ཀམྨཾ ཀཏྟུཀཱམོ ཏཛྫནཱིཡཾ ཝཱ’’ཏི ཨེཀཾ, ‘‘སཙེཔི ཀཏཾཡེཝ ཧོཏི ཀམྨ’’ནྟི ཨེཀཾ, ‘‘ཨནུཛཱནཱམི, བྷིཀྑཝེ, སངྒྷཀརཎཱིཡེན གནྟུ’’ནྟི (མཧཱཝ. ༡༩༩) ཨེཀནྟི ཨེཀཱདས ཋཱནཱནི ཧོནྟི. ཏཏྠ པཋམཏཏིཡཙཏུཏྠཝསེན ཏཱིསུ ཋཱནེསུ པཧིཏེ ཨེཝ གནྟབྦཾ, ནོ ཨཔྤཧིཏེ. སེསེསུ ཨཊྛསུ ཨཔྤཧིཏེཔི གནྟབྦཾ, པགེཝ པཧིཏེ. ཝུཏྟཉྷི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༩༩) ‘‘གནྟབྦནྟི སངྒྷཀརཎཱིཡེན ཨཔྤཧིཏེཔི གནྟབྦ’’ནྟི. ཨེཏྠ ཙ ཨནུཔཱསཀེཧིཔི སཱསནབྷཱཝཾ ཉཱཏུཀཱམེཧི པཧིཏེ ཏེསཾ པསཱདཝཌྜྷིསམྤཏྟེཧིཔི སཏྟཱཧཀརཎཱིཡེན གནྟུཾ ཝཊྚཏཱིཏི གཧེཏབྦཾ. བྷིཀྑུབྷཏྟིཀོཏི བྷིཀྑུནིསྶིཏཀོ. སོ པན ཡསྨཱ བྷིཀྑཱུཧི སདྡྷིཾ ཝསཏི, ཏསྨཱ ཝུཏྟཾ ‘‘བྷིཀྑཱུཧི སདྡྷིཾ ཝསནྟོ’’ཏི.

༡༨༡. ཨཔིཙེཏྠཱཏི ཨཔིཙ ཨེཏྠཱཏི ཚེདོ, ཨེཏྠ ཨེཏསྨིཾ སཏྟཱཧཀརཎཱིཡཝིནིཙྪཡེ ཨཔིཙ ཨཔརོ ཨཡཾ ཨཱིདིསོ པཱལི༹མུཏྟཀནཡོ ཝསྶཱུཔནཱཡིཀཀྑནྡྷཀཔཱལི༹ཏོ མུཏྟོ ནཡོ ཝེདིཏབྦོཏི ཡོཛནཱ. སམནྟཔཱསཱདིཀཱཡཾ (མཧཱཝ. ཨཊྛ. ༡༩༩) པན ‘‘པཱལི༹མུཏྟཀརཏྟིཙྪེདཝིནིཙྪཡོ’’ཏི དིསྶཏི. ཏཐཱ ¶ ཧི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༩༩) ‘‘རཏྟིཙྪེདཝིནིཙྪཡོཏི སཏྟཱཧཀརཎཱིཡེན གནྟྭཱ བཧིདྡྷཱ ཨརུཎུཊྛཱཔནསངྑཱཏསྶ རཏྟིཙྪེདསྶ ཝིནིཙྪཡོ’’ཏི. སཱརཏྠདཱིཔནིཡམྤི (སཱརཏྠ. ཊཱི. མཧཱཝགྒ ༣.༡༩༩) ‘‘སཏྟཱཧཀརཎཱིཡེན གནྟྭཱ བཧིདྡྷཱ ཨརུཎུཊྛཱཔནཾ རཏྟིཙྪེདོ’’ཏི. ཨནིམནྟིཏེན གནྟུཾ ན ཝཊྚཏཱིཏི ཨེཏྠ ཨནིམནྟིཏཏྟཱ སཏྟཱཧཀིཙྩཾ ཨདྷིཊྛཧིཏྭཱ གཙྪནྟསྶཔི ཝསྶཙྪེདོ ཙེཝ དུཀྐཊཉྩ ཧོཏཱིཏི ཝེདིཏབྦཾ. ཡཐཱཝུཏྟཉྷི རཏྟིཙྪེདཀཱརཎཾ ཝིནཱ ཏིརོཝིཧཱརེ ཝསིཏྭཱ ཨཱགམིསྶཱམཱིཏི གཙྪཏོ ཝསྶཙྪེདཾ ཝདནྟི. གནྟུཾ ཝཊྚཏཱིཏི ཨནྟོཨུཔཙཱརསཱིམཱཡཾ ཋིཏེནེཝ སཏྟཱཧཀརཎཱིཡནིམིཏྟཾ སལླཀྑེཏྭཱ ཨིམིནཱ ནིམིཏྟེན གནྟྭཱ ‘‘སཏྟཱཧབྦྷནྟརེ ¶ ཨཱགཙྪིསྶཱམཱི’’ཏི ཨཱབྷོགཾ ཀཏྭཱ གནྟུཾ ཝཊྚཏི. པུརིམཀྑཎེ ཨཱབྷོགཾ ཀཏྭཱ གམནཀྑཎེ ཝིསརིཏྭཱ གཏེཔི དོསོ ནཏྠི, ‘‘སཀརཎཱིཡོ པཀྐམཏཱི’’ཏི (མཧཱཝ. ༢༠༧) ཝུཏྟཏྟཱ སབྦཐཱ ཨཱབྷོགཾ ཨཀཏྭཱ གཏསྶ ཝསྶཙྪེདོཏི ཝདནྟི. ཡོ པན སཏྟཱཧཀརཎཱིཡནིམིཏྟཱབྷཱཝེཔི ‘‘སཏྟཱཧབྦྷནྟརེ ཨཱགམིསྶཱམཱི’’ཏི ཨཱབྷོགཾ ཀཏྭཱ གནྟྭཱ སཏྟཱཧབྦྷནྟརེ ཨཱགཙྪཏི, ཏསྶ ཨཱཔཏྟིཡེཝ, ཝསྶཙྪེདོ ནཏྠི སཏྟཱཧསྶ སནྣིཝཏྟཏྟཱཏི ཝདནྟི, ཝཱིམཾསིཏྭཱ གཧེཏབྦཾ.

བྷཎྜཀནྟི ཙཱིཝརབྷཎྜཾ. པཧིཎནྟཱིཏི ཙཱིཝརདྷོཝནཱདིཀམྨེན པཧིཎནྟི. སམྤཱཔུཎིཏུཾ ན སཀྐོཏི, ཝཊྚཏཱིཏི ཨེཏྠ ‘‘ཨཛྫེཝ ཨཱགམིསྶཱམཱི’’ཏི སཱམནྟཝིཧཱརཾ གནྟྭཱ པུན ཨཱགཙྪནྟསྶ ཨནྟརཱམགྒེ སཙེ ཨརུཎུགྒམནཾ ཧོཏི, ཝསྶཙྪེདོཔི ན ཧོཏི, རཏྟིཙྪེདདུཀྐཊཉྩ ནཏྠཱིཏི ཝདནྟི, ཏདཧེཝ ཨཱགམནེ སཨུསྶཱཧཏྟཱ ཝསྶཙྪེདོ ཝཱ ཨཱཔཏྟི ཝཱ ན ཧོཏཱིཏི ཨདྷིཔྤཱཡོ. ཨཱཙརིཡཾ པསྶིསྶཱམཱིཏི པན གནྟུཾ ལབྷཏཱིཏི ‘‘ཨགིལཱནམྤི ཨཱཙརིཡཾ, ཨུཔཛ྄ཛྷཱཡཾ ཝཱ པསྶིསྶཱམཱི’’ཏི སཏྟཱཧཀརཎཱིཡེན གནྟུཾ ལབྷཏི, ནིསྶཡཱཙརིཡཾ དྷམྨཱཙརིཡཉྩ, པགེཝ ¶ ཨུཔསམྤདཱཙརིཡཨུཔཛ྄ཛྷཱཡེ. སཙེ ནཾ ཨཱཙརིཡོ ‘‘ཨཛྫ མཱ གཙྪཱ’’ཏི ཝདཏི, ཝཊྚཏཱིཏི ཨེཝཾ སཏྟཱཧཀརཎཱིཡེན ཨཱགཏཱནཾ ཨནྟོསཏྟཱཧེཡེཝ པུན ཨཱགཙྪནྟཾ སཙེ ཨཱཙརིཡོ, ཨུཔཛ྄ཛྷཱཡོ ཝཱ ‘‘ཨཛྫ མཱ གཙྪཱ’’ཏི ཝདཏི, ཝཊྚཏི, སཏྟཱཧཱཏིཀྐམེཔི ཨནཱཔཏྟཱིཏི ཨདྷིཔྤཱཡོ. ཝསྶཙྪེདོ པན ཧོཏིཡེཝཱཏི དཊྛབྦཾ སཏྟཱཧསྶ བཧིདྡྷཱ ཝཱིཏིནཱམིཏཏྟཱ.

སཙེ དཱུརཾ གཏོ སཏྟཱཧཝཱརེན ཨརུཎོ ཨུཊྛཱཔེཏབྦོཏི ཨིམིནཱ ཝསྶཙྪེདཀཱརཎེ སཏི སཏྟཱཧཀརཎཱིཡེན གནྟུམྤི ཝཊྚཏཱིཏི དཱིཔེཏི. ཨེཏྠ ཚ དིཝསཱནི བཧིདྡྷཱ ཝཱིཏིནཱམེཏྭཱ སཏྟམེ དིཝསེ པུརཱརུཎཱ ཨེཝ ཨནྟོཨུཔཙཱརསཱིམཱཡཾ པཝིསིཏྭཱ ཨརུཎཾ ཨུཊྛཱཔེཏྭཱ པུནདིཝསེ སཏྟཱཧཾ ཨདྷིཊྛཱཡ གནྟབྦནྟི ཨདྷིཔྤཱཡོ. ཀེཙི པན ‘‘སཏྟམེ དིཝསེ ཨཱགནྟྭཱ ཨརུཎཾ ཨནུཊྛཱཔེཏྭཱ ཏདཧེཝ དིཝསབྷཱགེཔི གནྟུཾ ཝཊྚཏཱི’’ཏི ཝདནྟི, ཏཾ ན གཧེཏབྦཾ ‘‘ཨརུཎོ ཨུཊྛཱཔེཏབྦོ’’ཏི ཝུཏྟཏྟཱ. སཏྟམེ དིཝསེ ཏཏྠ ཨརུཎུཊྛཱཔནམེཝ ཧི སནྡྷཱཡ པཱལི༹ཡཾ (མཧཱཝ. ༡༩༩) ‘‘སཏྟཱཧཾ སནྣིཝཏྟོ ཀཱཏབྦོ’’ཏི ཝུཏྟཾ. ཨརུཎཾ ཨནུཊྛཱཔེཏྭཱ གཙྪནྟོ ཙ ཨནྟོ ཨཔྤཝིསིཏྭཱ བཧིདྡྷཱཝ སཏྟཱཧཾ ཝཱིཏིནཱམེནྟོ ཙ སམུཙྪིནྣཝསྶོ ཨེཝ བྷཝིསྶཏི ཨརུཎསྶ བཧི ཨེཝ ཨུཊྛཱཔིཏཏྟཱ. ཨིཏརཐཱ ‘‘ཨརུཎོ ཨུཊྛཱཔེཏབྦོ’’ཏི ཝཙནཾ ནིརཏྠཀཾ སིཡཱ. ‘‘སཏྟཱཧཝཱརེན ཨནྟོཝིཧཱརེ ¶ པཝིསིཏྭཱ ཨརུཎཾ ཨནུཊྛཱཔེཏྭཱ གནྟབྦ’’ནྟི ཝཏྟབྦཏོ ཨཉྙེསུ ཙ ཋཱནེསུ ཨརུཎུཊྛཱཔནམེཝ ཝུཙྩཏི. ཝཀྑཏི ཧི ཙཱིཝརཀྑནྡྷཀེ (མཧཱཝ. ཨཊྛ. ༣༦༤) ‘‘ཨེཀསྨིཾ ཝིཧཱརེ ཝསནྟོ ཨིཏརསྨིཾ སཏྟཱཧཝཱརེན ཨརུཎམེཝ ཨུཊྛཱཔེཏཱི’’ཏི.

ཨཐཱཔི ¶ ཡཾ ཏེ ཝདེཡྻུཾ ‘‘སཏྟམེ དིཝསེ ཡདཱ ཀདཱཙི པཝིཊྛེན ཏཾདིཝསནིསྶིཏོ ཨཏཱིཏཱརུཎོ ཨུཊྛཱཔིཏོ ནཱམ ཧོཏཱིཏི ཨིམམཏྠཾ སནྡྷཱཡ ཨཊྛཀཐཱཡཾ ཝུཏྟ’’ནྟི, ཏཾ སདྡགཏིཡཱཔི ན སམེཏི. ན ཧི ཨུཊྛིཏེ ཨརུཎེ པཙྪཱ པཝིཊྛོ ཏསྶ པཡོཛཀོ ཨུཊྛཱཔཀོ བྷཝིཏུམརཧཏི. ཡདི བྷཝེཡྻ, ‘‘ཝསྶཾ ཨུཔགནྟྭཱ པན ཨརུཎཾ ཨནུཊྛཱཔེཏྭཱ ཏདཧེཝ སཏྟཱཧཀརཎཱིཡེན པཀྐམནྟསྶཱ’’པཱིཏི (མཧཱཝ. ཨཊྛ. ༢༠༧) ཨེཏྠ ‘‘ཨརུཎཾ ཨནུཊྛཱཔེཏྭཱ’’ཏི ཝཙནཾ ཝིརུཛ྄ཛྷེཡྻ. ཏེནཔི ཏཾདིཝསནིསྶིཏསྶ ཨརུཎསྶ ཨུཊྛཱཔིཏཏྟཱ ཨཱརཉྙཀསྶཔི བྷིཀྑུནོ སཱཡནྷསམཡེ ཨངྒཡུཏྟཾ ཨརཉྙཾ གནྟྭཱ ཏདཱ ཨེཝ ནིཝཏྟནྟསྶ ཨརུཎོ ཨུཊྛཱཔིཏོ དྷུཏངྒཉྩ ཝིསོདྷིཏཾ སིཡཱ, ན ཙེཏཾ ཡུཏྟཾ ཨརུཎུགྒམནཀཱལེ ཨེཝ ཨརུཎུཊྛཱཔནསྶ ཝུཏྟཏྟཱ. ཝུཏྟཉྷི ‘‘ཀཱལསྶེཝ པན ནིཀྑམིཏྭཱ ཨངྒཡུཏྟེ ཋཱནེ ཨརུཎཾ ཨུཊྛཱཔེཏབྦཾ. སཙེ ཨརུཎུཊྛཱནཝེལཱཡཾ ཏེསཾ ཨཱབཱདྷོ ཝཌྜྷཏི, ཏེསཾ ཨེཝ ཀིཙྩཾ ཀཱཏབྦཾ, ན དྷུཏངྒཝིསུདྡྷིཀེན བྷཝིཏབྦ’’ནྟི (ཝིསུདྡྷི. ༡.༣༡). ཏཐཱ པཱརིཝཱསིཀཱདཱིནམྤི ཨརུཎཾ ཨནུཊྛཱཔེཏྭཱ ཝཏྟཾ ནིཀྑིཔནྟཱནཾ རཏྟིཙྪེདོ ཝུཏྟོ. ‘‘ཨུགྒཏེ ཨརུཎེ ནིཀྑིཔིཏབྦ’’ནྟི (ཙཱུལ༹ཝ. ཨཊྛ. ༩༧) ཧི ཝུཏྟཾ. སཧསེཡྻསིཀྑཱཔདེཔི ཨནུཔསམྤནྣེཧི སཧ ནིཝུཏྠབྷཱཝཔརིམོཙནཏྠཾ ‘‘པུརཱརུཎཱ ནིཀྑམིཏྭཱ’’ཏིཨཱདི (པཱཙི. ༥༤) ཝུཏྟཾ. ཨེཝཾ ཙཱིཝརཝིཔྤཝཱསཱདཱིསུ ཙ སབྦཏྠ རཏྟིཔརིཡོསཱནེ ཨཱགཱམིཨརུཎཝསེནེཝ ཨརུཎུཊྛཱནཾ དསྶིཏཾ, ན ཨཏཱིཏཱརུཎཝསེན, ཏསྨཱ ཝུཏྟནཡེནེཝེཏྠ ཨརུཎུཊྛཱཔནཾ ཝེདིཏབྦཾ ཨཉྙཐཱ ཝསྶཙྪེདཏྟཱ.

ཡཾ པན ཝསྶཾ ཨུཔགཏསྶ ཏདཧེཝ ཨརུཎཾ ཨནུཊྛཱཔེཏྭཱ སཀརཎཱིཡསྶ པཀྐམནཝཙནཾ, ཏཾ ཝསྶཾ ཨུཔགཏཀཱལཏོ པཊྛཱཡ ཡདཱ ཀདཱཙི ནིམིཏྟེ སཏི གམནསྶ ཨནུཉྙཱཏཏྟཱ ཡུཏྟཾ, ན པན སཏྟཱཧཝཱརེན གཏསྶ ཨརུཎཾ ཨནུཊྛཱཔེཏྭཱ ཏདཧེཝགམནཾ ¶ ‘‘ཨརུཎོ ཨུཊྛཱཔེཏབྦོ’’ཏི ཝུཏྟཏྟཱ. ཡཐཱ ཝཱ ‘‘སཏྟཱཧཱནཱགཏཱཡ པཝཱརཎཱཡ སཀརཎཱིཡོ པཀྐམཏི, ཨཱགཙྪེཡྻ ཝཱ སོ, བྷིཀྑཝེ, བྷིཀྑུ ཏཾ ཨཱཝཱསཾ ན ཝཱ ཨཱགཙྪེཡྻཱ’’ཏིཨཱདིནཱ (མཧཱཝ. ༢༠༧) པཙྪིམསཏྟཱཧེ ཨནཱགམནེ ཨནུཉྙཱཏེཔི ཨཉྙསཏྟཱཧེསུ ཏཾ ན ཝཊྚཏི. ཨེཝཾ པཋམསཏྟཱཧེ ཨརུཎཾ ¶ ཨནུཊྛཱཔེཏྭཱ གམནེ ཨནུཉྙཱཏེཔི ཏཏོ པརེསུ སཏྟཱཧེསུ ཨཱགཏསྶ ཨརུཎཾ ཨནུཊྛཱཔེཏྭཱ གམནཾ ན ཝཊྚཏི ཨེཝཱཏི ནིཊྛམེཏྠ གནྟབྦཾ.

སཙེ པཝཱརིཏཀཱལེ ཝསྶཱཝཱསིཀཾ དེནྟཱིཏིཨཱདིནཱ ཝསྶཱཝཱསིཀཙཱིཝརམྤི ཀཐིནཙཱིཝརཾ ཝིཡ ཝསྶཾཝུཏྠཝིཧཱརཔཊིབདྡྷནྟི ཝིཉྙཱཡཏི. ‘‘ཡདི སཏྟཱཧཝཱརེན ཨརུཎཾ ཨུཊྛཱཔཡིཾསུ, གཧེཏབྦ’’ནྟི པན ཝུཏྟཏྟཱ སཏྟཱཧཀརཎཱིཡེན གནྟྭཱ སཏྟཱཧབྦྷནྟརེ ཨཱགཏཱ ལབྷནྟི. ཀཐིནཱནིསཾསཙཱིཝརཾ པན སངྒྷཾ ཨནཱཔུཙྪཱ ཏེ ན ལབྷནྟི. ཝཀྑཏི ཧི ‘‘སཏྟཱཧཀརཎཱིཡེན གཏཱཔི བྷཱཛནཱིཡབྷཎྜཾ ལབྷནྟཱུཏི ཝཱ ཨེཝརཱུཔཾ ཨདྷམྨིཀཝཏྟཾ ན ཀཱཏབྦ’’ནྟི (ཝི. སངྒ. ཨཊྛ. ༡༨༢). ཨིདྷ ཨཱཧཊནྟི ཝིཧཱརཏོ བཧི ཨཱགཏཊྛཱནེ ཨཱནཱིཏཾ.

ཝཱལེ༹ཧི ཨུབྦཱལ༹ྷཱ ཧོནྟི, གཎྷནྟིཔི པརིཔཱཏེནྟིཔཱིཏི ཨེཏྠ གཎྷནྟཱིཏི གཧེཏྭཱ ཁཱདནྟི. པརིཔཱཏེནྟཱིཏི པལཱཔེནྟི, ཨནུབནྡྷནྟཱིཏི ཨཏྠོ. ཨིམེསུ ‘‘གཱལེ༹ཧི ཨུབྦཱལ༹ྷཱ ཧོནྟཱི’’ཏིཨཱདཱིསུ སངྒྷབྷེདཔརིཡནྟེསུ ཝཏྠཱུསུ ཀེཝལཾ ཨནཱཔཏྟི ཧོཏི, པཝཱརེཏུཾ པན ན ལབྷཏཱིཏི དཊྛབྦཾ. སཙེ པནཱཏིཨཱདཱིསུ ཡསྨཱ ནཱནཱསཱིམཱཡཾ དྭཱིསུ ཨཱཝཱསེསུ ཝསྶཾ ཨུཔགཙྪནྟསྶ ‘‘དུཏིཡེ ཝསིསྶཱམཱི’’ཏི ཨུཔཙཱརཏོ ནིཀྑནྟམཏྟེ པཋམོ སེནཱསནགྒཱཧོ པཊིཔྤསྶམྦྷཏི, ཏསྨཱ པཱལི༹ཡཾ (མཧཱཝ. ༢༠༧) ‘‘ཏསྶ, བྷིཀྑཝེ, བྷིཀྑུནོ པུརིམིཀཱ ཙ ན པཉྙཱཡཏཱི’’ཏི པཋམཾ སེནཱསནགྒཱཧཾ སནྡྷཱཡ ཝུཏྟཾ. དུཏིཡསེནཱསནགྒཱཧེ པན པུརིམིཀཱ པཉྙཱཡཏེཝ, ཏཏྠེཝ ཏེམཱསཾ ཝསནྟོ ¶ པུརིམཝསྶཾཝུཏྠོ ཨེཝ ཧོཏི. ཏཏོ ཝཱ པན དུཏིཡདིཝསཱདཱིསུ ‘‘པཋམསེནཱསནེ ཝསིསྶཱམཱི’’ཏི ཨུཔཙཱརཱཏིཀྐམེ པུརིམིཀཱཔི ན པཉྙཱཡཏཱིཏི དཊྛབྦཾ.

པཊིསྶཝསྶ ཝིསཾཝཱདནཔཙྩཡཱ ཧོནྟམྤི དུཀྐཊཾ སཏིཡེཝ པཊིསྶཝེ ཧོཏཱིཏི ཨཱཧ ‘‘ཏསྶ ཏསྶ པཊིསྶཝསྶ ཝིསཾཝཱདེ དུཀྐཊ’’ནྟི. ཏེནེཝཱཧ ‘‘ཏཉྩ ཁོ…པེ… ཝིསཾཝཱདནཔཙྩཡཱ’’ཏི. པཱལི༹ཡཾ (མཧཱཝ. ༢༠༧) ‘‘སོ སཏྟཱཧཱནཱགཏཱཡ པཝཱརཎཱཡ སཀརཎཱིཡོ པཀྐམཏཱི’’ཏི ཝུཏྟཏྟཱ པཝཱརཎཱདིཝསེཔི སཏྟཱཧཀརཎཱིཡཾ ཝིནཱ གནྟུཾ ན ཝཊྚཏཱིཏི དཊྛབྦཾ. ཨིམསྨིཾ ཋཱནེ ‘‘ནཝམིཏོ པཊྛཱཡ གནྟུཾ ཝཊྚཏཱི’’ཏི ཨཊྛཀཐཱཝཙནཾ ཀཙྩི ཨུཔོསཐདིཝསཏོ ཨུཔནིདྷཱཡ ནཝམཱི ཨིཙྪིཏབྦཱ, ཨུདཱཧུ ལོཀིཡཏིཐིཝསེནཱཏི ཨཱསངྐནྟི. ཏཏྲེཝཾ ཝིནིཙྪིཏབྦཾ – པུརིམབྷདྡཔདམཱསཀཱལ༹པཀྑཨུཔོསཐདིཝསཾ ཨུཔནིདྷཱཡ ཨིཙྪིཏབྦཱ, ན ལོཀིཡཏིཐིཝསེན. བྷདྡཔདམཱསསྶ ཧི ཀཱལ༹པཀྑཨུཔོསཐདིཝསཾ མརིཡཱདཾ ཀཏྭཱ ཏདནནྟརཔཱཊིཔདདིཝསཏོ ¶ པཊྛཱཡ གཎིཡམཱནེ སཏི ཡོ དིཝསོ ནཝམོ ཧོཏི, ཏཏོ པཊྛཱཡཱཏི ཝུཏྟཾ ཧོཏི. ཏིཐིཔེཀྑཱཡ པན ཨིཏྠིལིངྒཝོཧཱརོ, ཏཏོ ནཝམིཏོ པཊྛཱཡ ཨནཱགཏསཏྟཱཧེ པཝཱརཎཱ ཧོཏི.

སཏྟཱཧཾ ཨནཱགཏཱཡ ཨསྶཱཏི སཏྟཱཧཱནཱགཏཱ. ཀཱ སཱ? པཝཱརཎཱ. ཨསྶཡུཛམཱསསྶ སུཀྐཔཀྑནཝམིཡཾ སཏྟཱཧཀརཎཱིཡཾ ཨདྷིཊྛཱཡ གཙྪནྟོ བྷིཀྑུ ཨནྟོཝསྶསྶ སཏྟཱཧམཏྟཱཝསིཊྛཏྟཱ སཏྟམཨརུཎེ ཨུགྒཏམཏྟེ ཝུཏྠཝསྶོ ཧོཏི, དསམིཡཾ ཚཱཧམཏྟཾ, ཨེཀཱདསམིཡཾ པཉྩཱཧམཏྟཾ, དྭཱདསིཡཾ ཙཏུརཱཧམཏྟཾ, ཏེརསིཡཾ ཏཱིཧམཏྟཾ, ཙུདྡསིཡཾ དྭཱིཧམཏྟཾ, པནྣརསིཡཾ ཨེཀཱཧམཏྟཾ ཨཝསིཊྛཾ ཧོཏི, ཏསྨཱ པཝཱརཎཱདིཝསསྶ པརིཡོསཱནབྷཱུཏཨརུཎསྨིཾ ཨུགྒཏེ ཝུཏྠཝསྶོ ཧོཏི, ཏསྨཱ ཏེསཾ བྷིཀྑཱུནཾ ཀུཀྐུཙྩཝིནོདནཏྠཾ ¶ བྷགཝཱ དྷམྨསྶཱམཱི ‘‘སོ སཏྟཱཧཱནཱགཏཱཡ པཝཱརཎཱཡ སཀརཎཱིཡོ པཀྐམཏི, ཨཱགཙྪེཡྻ ཝཱ སོ, བྷིཀྑཝེ, བྷིཀྑུ ཏཾ ཨཱཝཱསཾ ན ཝཱ ཨཱགཙྪེཡྻ, ཏསྶ, བྷིཀྑཝེ, བྷིཀྑུནོ པུརིམིཀཱ ཙ པཉྙཱཡཏི, པཊིསྶཝེ ཙ ཨནཱཔཏྟཱི’’ཏི (མཧཱཝ. ༢༠༧) ཨཱཧ. སཏྟཱཧཱནཱགཏཱཡ ཀོམུདིཡཱ ཙཱཏུམཱསིནིཡཱཏི ཨེཏྠཱཔི ཨེསེཝ ནཡོ. ཏཏྠ ཀོམུདིཡཱ ཙཱཏུམཱསིནིཡཱཏི པཙྪིམཀཏྟིཀཔུཎྞམཱཡཾ. སཱ ཧི ཀུམུདཱནཾ ཨཏྠིཏཱཡ ཀོམུདཱི, ཙཏུནྣཾ ཝསྶིཀམཱསཱནཾ པརིཡོསཱནཏྟཱ ཙཱཏུམཱསིནཱིཏི ཝུཙྩཏི. ཏདཱ ཧི ཀུམུདཱནི སུཔུཔྥིཏཱནི ཧོནྟི, ཏསྨཱ ཀུམུདཱ ཨེཏྠ པུཔྥནྟཱིཏི ཀོམུདཱིཏི ཝུཙྩཏི, ཀུམུདཝཏཱིཏི ཝུཏྟཾ ཧོཏི.

༡༨༢. ཨནྟོཝསྶཝཏྟཀཐཱཡཾ ནིབདྡྷཝཏྟཾ ཋཔེཏྭཱཏི སཛ྄ཛྷཱཡམནསིཀཱརཱདཱིསུ ནིརནྟརཀརཎཱིཡེསུ ཀཏྟབྦཾ ཀཏིཀཝཏྟཾ ཀཏྭཱ. ཀསཱཝཔརིབྷཎྜནྟི ཀསཱཝེཧི བྷཱུམིཔརིཀམྨཾ. ཝཏྟནྟི ཀཏིཀཝཏྟཾ.

ཨེཝརཱུཔཾ ཨདྷམྨིཀཝཏྟཾ ན ཀཱཏབྦནྟི ནཱནཱཝེརཛྫཀཱ ཧི བྷིཀྑཱུ སནྣིཔཏནྟི, ཏཏྠ ཀེཙི དུབྦལཱ ཨཔྤཐཱམཱ ཨེཝརཱུཔཾ ཝཏྟཾ ཨནུཔཱལེཏུཾ ན སཀྐོནྟི, ཏསྨཱ ཨིདྷ ཨཱགཏཉྩ ཙཏུཏྠཔཱརཱཛིཀཝཎྞནཱཡཾ (པཱརཱ. ཨཊྛ. ༢.༢༢༧) ཨཱགཏཾ ཨཱཝཱསཾ ཝཱ མཎྜཔཾ ཝཱ སཱིམཾ ཝཱ ཡཾ ཀིཉྩི ཋཱནཾ པརིཙྪིནྡིཏྭཱ ‘‘ཡོ ཨིམམྷཱ ཨཱཝཱསཱ པཋམཾ པཀྐམིསྶཏི, ཏཾ ‘ཨརཧཱ’ཏི ཛཱནིསྶཱམཱ’’ཏི ཀཏཱཡ ཀཏིཀཱཡ ཡོ ‘‘མཾ ‘ཨརཧཱ’ཏི ཛཱནནྟཱུ’’ཏི ཏམྷཱ ཋཱནཱ པཋམཾ པཀྐམཏི, པཱརཱཛིཀོ ཧོཏི. ཡོ པན ཨཱཙརིཡུཔཛ྄ཛྷཱཡཱནཾ ཝཱ ཀིཙྩེན མཱཏཱཔིཏཱུནཾ ཝཱ ¶ ཀེནཙིདེཝ ཀརཎཱིཡེན བྷིཀྑཱཙཱརཝཏྟཾ ཝཱ ཨུདྡེསཔརིཔུཙྪཱདཱིནཾ ཨཏྠཱཡ ཨཉྙེན ཝཱ ཏཱདིསེན ཀརཎཱིཡེན ཏཾ ཋཱནཾ ཨཏིཀྐམིཏྭཱ གཙྪཏི, ཨནཱཔཏྟི. སཙེཔིསྶ ཨེཝཾ གཏསྶ པཙྪཱ ཨིཙྪཱཙཱརོ ཨུཔྤཛྫཏི ¶ ‘‘ན དཱནཱཧཾ ཏཏྠ གམིསྶཱམི, ཨེཝཾ མཾ ཨརཧཱཏི སམྦྷཱཝེསྶནྟཱི’’ཏི, ཨནཱཔཏྟིཡེཝ.

ཡོཔི ཀེནཙིདེཝ ཀརཎཱིཡེན ཏཾ ཋཱནཾ པཏྭཱ སཛ྄ཛྷཱཡམནསིཀཱརཱདིཝསེན ཨཉྙཝིཧིཏོ ཝཱ ཧུཏྭཱ ཙོརཱདཱིཧི ཝཱ ཨནུབདྡྷོ མེགྷཾ ཝཱ ཨུཊྛིཏཾ དིསྭཱ ཨནོཝསྶཀཾ པཝིསིཏུཀཱམོ ཏཾ ཋཱནཾ ཨཏིཀྐམཏི, ཨནཱཔཏྟི, ཡཱནེན ཝཱ ཨིདྡྷིཡཱ ཝཱ གཙྪནྟོཔི པཱརཱཛིཀཾ ནཱཔཛྫཏི, པདགམནེནེཝ ཨཱཔཛྫཏི. ཏམྤི ཡེཧི སཧ ཀཏིཀཱ ཀཏཱ, ཏེཧི སདྡྷིཾ ཨཔུབྦཾ ཨཙརིམཾ གཙྪནྟོ ནཱཔཛྫཏི. ཨེཝཾ གཙྪནྟཱ ཧི སབྦེཔི ཨཉྙམཉྙཾ རཀྑནྟི. སཙེཔི མཎྜཔརུཀྑམཱུལཱདཱིསུ ཀིཉྩི ཋཱནཾ པརིཙྪིནྡནྟི ‘‘ཡོ ཨེཏྠ ནིསཱིདཏི ཝཱ ཙངྐམཏི ཝཱ, ཏཾ ‘ཨརཧཱ’ཏི ཛཱནིསྶཱམ’’, པུཔྥཱནི ཝཱ ཋཔེཏྭཱ, ‘‘ཡོ ཨིམཱནི གཧེཏྭཱ པཱུཛཾ ཀརིསྶཏི, ཏཾ ‘ཨརཧཱ’ཏི ཛཱནིསྶཱམཱ’’ཏིཨཱདིནཱ ནཡེན ཀཏིཀཱ ཀཏཱ ཧོཏི, ཏཏྲཱཔི ཨིཙྪཱཙཱརཝསེན ཏཐཱ ཀརོནྟསྶ པཱརཱཛིཀམེཝ. སཙེཔི ཨུཔཱསཀེན ཨནྟརཱམགྒེ ཝིཧཱརོ ཝཱ ཀཏོ ཧོཏི, ཙཱིཝརཱདཱིནི ཝཱ ཋཔིཏཱནི ཧོནྟི ‘‘ཡེ ཨརཧནྟོ, ཏེ ཨིམསྨིཾ ཝིཧཱརེ ཝསནྟུ, ཙཱིཝརཱདཱིནི ཝཱ གཎྷནྟཱུ’’ཏི, ཏཏྲཱཔི ཨིཙྪཱཙཱརཝསེན ཝསནྟསྶ ཝཱ ཏཱནི ཝཱ གཎྷནྟསྶ པཱརཱཛིཀམེཝ, ཨེཏཾ པན ཨདྷམྨིཀཀཏིཀཝཏྟཾ, ཏསྨཱ ན ཀཱཏབྦཾ, ཨཉྙཾ ཝཱ ཨེཝརཱུཔཾ ‘‘ཨིམསྨིཾ ཏེམཱསབྦྷནྟརེ སབྦེཝ ཨཱརཉྙཀཱ ཧོནྟུ པིཎྜཔཱཏིཀདྷུཏངྒཱདིཨཝསེསདྷུཏངྒདྷརཱ ཝཱ, ཨཐ ཝཱ སབྦེཝ ཁཱིཎཱསཝཱ ཧོནྟཱུ’’ཏི ཨེཝམཱདི. ནཱནཱཝེརཛྫཀཱ ཧི བྷིཀྑཱུ སནྣིཔཏནྟི. ཏཏྠ ཀེཙི དུབྦལཱ ཨཔྤཐཱམཱ ཨེཝརཱུཔཾ ཝཏྟཾ ཨནུཔཱལེཏུཾ ན སཀྐོནྟི, ཏསྨཱ ཨེཝརཱུཔམྤི ཝཏྟཾ ན ཀཱཏབྦཾ. ‘‘ཨིམཾ ཏེམཱསཾ སབྦེཧེཝ ན ཨུདྡིསིཏབྦཾ, ན པརིཔུཙྪིཏབྦཾ, ན པབྦཱཛེཏབྦཾ, མཱུགབྦཏཾ གཎྷིཏབྦཾ, བཧིསཱིམཊྛསྶཔི སངྒྷལཱབྷོ དཱཏབྦོ’’ཏི ཨེཝམཱདིཀམྤི ན ཀཏྟབྦམེཝ.

ཏིཝིདྷམྤཱིཏི ¶ པརིཡཏྟིཔཊིཔཏྟིཔཊིཝེདྷཝསེན ཏིཝིདྷམྤི. སོདྷེཏྭཱ པབྦཱཛེཐཱཏི བྷབྦེ ཨཱཙཱརཀུལཔུཏྟེ ཨུཔཔརིཀྑིཏྭཱ པབྦཱཛེཐ. བྷསྶེ མཏྟཾ ཛཱནིཏྭཱཏི ཝཙནེ པམཱཎཾ ཉཏྭཱ. དསཀཐཱཝཏྠུ ནཱམ ཨཔྤིཙྪཱཀཐཱ སནྟུཊྛིཀཐཱ པཝིཝེཀཀཐཱ ཨསཾསགྒཀཐཱ ཝཱིརིཡཱརམྦྷཀཐཱ སཱིལཀཐཱ སམཱདྷིཀཐཱ པཉྙཱཀཐཱ ཝིམུཏྟིཀཐཱ ཝིམུཏྟིཉཱཎདསྶནཀཐཱཏི.

ཝིགྒཧསཾཝཏྟནིཀཾ ¶ ཝཙནཾ ཝིགྒཱཧིཀཾ. ཙཏུརཱརཀྑཾ ཨཧཱཔེནྟཱཏི བུདྡྷཱནུསྶཏི མེཏྟཱ ཨསུབྷཾ མརཎཱནུསྶཏཱིཏི ཨིམཾ ཙཏུརཱརཀྑཾ ཨཧཱཔེནྟཱ. དནྟཀཊྛཁཱདནཝཏྟཾ ཨཱཙིཀྑིཏབྦནྟི ཨེཏྠ ཨིདཾ དནྟཀཊྛཁཱདནཝཏྟཾ – ཡོ དེཝསིཀཾ སངྒྷམཛ྄ཛྷེ ཨོསརཏི, ཏེན སཱམཎེརཱདཱིཧི ཨཱཧརིཏྭཱ བྷིཀྑཱུནཾ ཡཐཱསུཁཾ བྷུཉྫནཏྠཱཡ དནྟཀཊྛམཱལ༹ཀེ ནིཀྑིཏྟེསུ དནྟཀཊྛེསུ དིཝསེ དིཝསེ ཨེཀམེཝ དནྟཀཊྛཾ གཧེཏབྦཾ. ཡོ པན དེཝསིཀཾ ན ཨོསརཏི, པདྷཱནགྷརེ ཝསིཏྭཱ དྷམྨསྶཝནེ ཝཱ ཨུཔོསཐགྒེ ཝཱ དིསྶཏི, ཏེན པམཱཎཾ སལླཀྑེཏྭཱ ཙཏྟཱརི པཉྩ དནྟཀཊྛཱནི ཨཏྟནོ ཝསནཊྛཱནེ ཋཔེཏྭཱ ཁཱདིཏབྦཱནི. ཏེསུ ཁཱིཎེསུ སཙེ པུནཔི དནྟཀཊྛམཱལ༹ཀེ བཧཱུནི ཧོནྟིཡེཝ, པུནཔི ཨཱཧརིཏྭཱ ཁཱདིཏབྦཱནི. ཡདི པན པམཱཎཾ ཨསལླཀྑེཏྭཱ ཨཱཧརཏི, ཏེསུ ཨཁཱིཎེསུཡེཝ མཱལ༹ཀེ ཁཱིཡཏི, ཏཏོ ཀེཙི ཐེརཱ ‘‘ཡེཧི གཧིཏཱནི, ཏེ པཊིཧརནྟཱུ’’ཏི ཝདེཡྻུཾ, ཀེཙི ‘‘ཁཱདནྟུ, པུན སཱམཎེརཱ ཨཱཧརིསྶནྟཱི’’ཏི, ཏསྨཱ ཝིཝཱདཔརིཧཱརཏྠཾ པམཱཎཾ སལླཀྑེཏབྦཾ, གཧཎེ པན དོསོ ནཏྠི. མགྒཾ གཙྪནྟེནཔི ཨེཀཾ ཝཱ དྭེ ཝཱ ཐཝིཀཱཡ པཀྑིཔིཏྭཱ གནྟབྦནྟི. བྷིཀྑཱཙཱརཝཏྟཾ པིཎྜཔཱཏིཀཝཏྟེ ཨཱཝིབྷཝིསྶཏི.

ཨནྟོགཱམེ…པེ… ན ཀཐེཏབྦཱཏི ཨེཏྠ ཙཏཱུསུ པཙྩཡེསུ ཙཱིཝརེ ཙ པིཎྜཔཱཏེ ཙ ཝིཉྙཏྟིཔི ན ཝཊྚཏི ནིམིཏྟོབྷཱསཔརིཀཐཱཔི. སེནཱསནེ ཝིཉྙཏྟིམེཝ ན ཝཊྚཏི, སེསཱནི ཏཱིཎི ¶ ཝཊྚནྟི. གིལཱནཔཙྩཡེ སབྦམྤི ཝཊྚཏི. ཨེཝཾ སནྟེཔི ཨཱཛཱིཝཾ སོདྷེནྟེཧི བྷིཀྑཱུཧི སུཊྛུ རཀྑིཏབྦཱཏི. ཨིམིནཱ ཨཱཛཱིཝཔཱརིསུདྡྷིསཱིལཾ དསྶིཏཾ. རཀྑིཏིནྡྲིཡེཧི བྷཝིཏབྦནྟི ཨིནྡྲིཡསཾཝརསཱིལཾ. ཁནྡྷཀཝཏྟཉྩ སེཁིཡཝཏྟཉྩ པཱུརེཏབྦནྟི པཱཏིམོཀྑསཾཝརསཱིལཾ. པཙྩཡསནྣིསྶིཏསཱིལཾ པན ཏཱིཧིཔི སཱམཏྠིཡཏོ དསྶིཏཾ. ཨིཏི ཙཏུཔཱརིསུདྡྷིསཱིལཔཊིསཾཡུཏྟཱ ཨེཝརཱུཔཱ ནིཡྻཱནིཀཀཐཱ བཧུཀཱཔི ཝཏྟབྦཱཏི ཨདྷིཔྤཱཡོ.

ཨིམསྨིཾ ཝསྶཱུཔནཱཡིཀཝིསཡེ ཏེསུ ཏེསུ ནགརེསུ ཏསྨིཾ ཏསྨིཾ རཱཛཀཱལེ ཨཔརིཡནྟཱ ཝིཝཱདཀཐཱ ཧོཏི. ཀཐཾ? ཝསྶཱུཔནཱཡིཀཀྑནྡྷཀེ (མཧཱཝ. ༡༨༦) ‘‘ཏེན ཁོ པན སམཡེན རཱཛཱ མཱགདྷོ སེནིཡོ བིམྦིསཱརོ ཝསྶཾ ཨུཀྐཌྜྷིཏུཀཱམོ བྷིཀྑཱུནཾ སནྟིཀེ དཱུཏཾ པཱཧེསི ‘ཡདི པནཱཡྻཱ ཨཱགམེ ཛུཎྷེ ཝསྶཾ ཨུཔགཙྪེཡྻུ’ནྟི. བྷགཝཏོ ཨེཏམཏྠཾ ཨཱརོཙེསུཾ, ‘ཨནུཛཱནཱམི, བྷིཀྑཝེ, རཱཛཱུནཾ ཨནུཝཏྟིཏུ’’’ནྟི ཝཙནཾ ནིསྶཱཡ བྷགཝཏཱ ཨདྷིམཱསཾ པཉྙཏྟནྟི མཉྙམཱནཱ ཝེདསམཡེན སཾསནྡིཏྭཱ གཡ྄ཧམཱནཱ ཨནེཀཝིཧིཏཾ ཝིཝཱདཾ ཀརོནྟི. ཝེདསམཡེ ཀིར དྭེ ཨདྷིམཱསཱནི ཡཱཙཱདྷིམཱསཉྩ པཏྟཱདྷིམཱསཉྩ. ཏཏྠ ཀལིཡུགགཎནེ ཨེཀཱུནཝཱིསཏིགཎནེན ¶ བྷཱཛིཏེ དྭེཔཉྩཊྛདསཏེརསསོལ༹སཊྛཱརསཝསེན སཏྟདྷཱ སེསོ ཧོཏི, ཏེསཾ ཝསེན ཙམྨཱདྷིམཱས པཉྩཱདྷིམཱས པསྭཱདྷིམཱས དསཱདྷིམཱས ཏེརསཱདྷིམཱས སོལ༹སཱདྷིམཱས ཨཊྛཱརསཱདྷིམཱསཱཏི ཝོཧརནྟི. ཨཊྛཱརསཱདྷིམཱསཾ པན ཨཝསཱནཱདྷིམཱསནྟིཔི ཝོཧརནྟི. ཏེསུ པསུསོལ༹སཱནི ཨཔཏྟེཡེཝ ཨདྷིམཱསཔཏནཀལིཡུགེ སཾཝཙྪརམཱསཱདིཝིསམབྷཡེན ཡཱཙིཏྭཱ མཱསསྶ ཨཱཀཌྜྷིཏབྦཏོ ཡཱཙཱདྷིམཱསནྟི ཝོཧརནྟི, སེསཱནི པན པཉྩམཏྟེཡེཝ ཨདྷིམཱསཔཏནཀལིཡུགེ མཱསསྶ ཨཱཀཌྜྷིཏབྦཏོ པཏྟཱདྷིམཱསནྟི. ཏཏྲེཏཾ ཡཱཙཱདྷིམཱསལཀྑཎཾ – ཏཐཏོ ¶ ཨཛཱནནྟཱ པཱལི༹ཡཱ སཾསནྡིཏྭཱ བིམྦིསཱརརཉྙཱ བྷགཝཏོ ཡཱཙིཏཱདྷིམཱསཏྟཱ ཡཱཙཱདྷིམཱསཾ ནཱམ བྷཝཏི, ཏསྨཱ དྭཱིསུ ཨེཝ ཡཱཙཱདྷིམཱསེསུ དིཝསེན སཧ མཱསོ ཨཱཀཌྜྷིཏབྦོ, ན ཨིཏརེསཱུཏི ཝདནྟི, ཨཉྙེ པན པཉྩསུ པཏྟཱདྷིམཱསེསུ ཨེཝ སཧ དིཝསེན མཱསོ ཨཱཀཌྜྷིཏབྦོ, ན ཡཱཙཱདྷིམཱསེསཱུཏི.

ཨཔརེ པན – ‘‘དྭེམཱ, བྷིཀྑཝེ, ཝསྶཱུཔནཱཡིཀཱ པུརིམིཀཱ པཙྪིམིཀཱཏི, ཨཔརཛྫུགཏཱཡ ཨཱསཱལ༹ྷིཡཱ པུརིམིཀཱ ཨུཔགནྟབྦཱ, མཱསགཏཱཡ ཨཱསཱལ༹ྷིཡཱ པཙྪིམིཀཱ ཨུཔགནྟབྦཱ’’ཏི ཏསྨིཾཡེཝ ཝསྶཱུཔནཱཡིཀཀྑནྡྷཀེ (མཧཱཝ. ༡༨༤) ཨཱགཏཱཡ པཱལི༹ཡཱ ཨཏྠཾ ཨཡོནིསོ གཧེཏྭཱ ཏིཐིནཀྑཏྟཡོགེ ཨེཝ ཝསྶཱུཔགམནཾ བྷགཝཏཱ ཨནུཉྙཱཏཾ, ཏསྨཱ ཨཱསཱལ༹ྷིཔུཎྞམཱཡ ཨནནྟརབྷཱུཏོ པཱཊིཔདདིཝསོ པུཎྞཱཏིཐིཡཱ ཙ ཡུཏྟོ ཧོཏུ, པུབྦཱསཱལ༹ྷཨུཏྟརཱསཱལ༹ྷསངྑཱཏེསུ དྭཱིསུ ནཀྑཏྟེསུ ཨེཀེཀེན ཡུཏྟོ ཙ, ཨེཝཾབྷཱུཏོ ཀཱལོ ཡདི ཝིནཱ དིཝསེན མཱསཀཌྜྷནེ སམྤཛྫཏི, ཏཐཱ ཙ སཏི མཱསམཏྟཱཀཌྜྷནམེཝ ཀཱཏབྦཾ, ཡདི ན སམྤཛྫཏི, སཧ དིཝསེན མཱསཱཀཌྜྷནཾ, ཨཡཾ པིཊཀེན ཙ ཝེདེན ཙ ཨནུལོམོ ཝིནིཙྪཡོཏི ཝདནྟི.

ཏཏྲཱཔྱེཀེ ཝདནྟི – ‘‘མཱ ཨིཏི ཙནྡོ ཝུཙྩཏི ཏསྶ གཏིཡཱ དིཝསསྶ མིནིཏབྦཏོ, སོ ཨེཏྠ སབྦཀལཱཔཱརིཔཱུརིཡཱ པུཎྞོཏི པུཎྞམཱ’’ཏིཨཱདིནཱ ཝིནཡཏྠམཉྫཱུསཱདཱིསུ (ཀངྑཱ. ཨབྷི. ཊཱི. ནིདཱནཝཎྞནཱ) ཨཱགམནཏོ པུཎྞཱཏིཐིཡོགོཔི པུཎྞམིཡཱ ཨེཝ ཨིཙྪིཏབྦོ, ན པཱཊིཔདེ, ཏཐཱ ནཀྑཏྟཡོགོཔི ཨཱསཱལ༹ྷིསུཀྐཔཀྑསྶ པནྣརསེ ཨུཔོསཐེ ‘‘ཨུཏྟརཱསཱལ༹ྷནཀྑཏྟེ, ཨེཝཾ དྷཱཏུ པཏིཊྛིཏཱ’’ཏི མཧཱཝཾསེ ཝཙནཏོཏི. ཏཏྠ པུརིམཱ ཝདནྟི – ཨེཝཾ སནྟེ ཨུཔོསཐདིཝསེཡེཝ ཙནྡགྒཱཧོ ཙ སཱུརིཡགྒཱཧོ ¶ ཙ བྷཝེཡྻ, ཨིདཱནི པན ཀཱལ༹པཀྑཔཱཊིཔདཱདཱིསུཡེཝ ཙནྡགྒཱཧོ, སུཀྐཔཀྑཔཱཊིཔདཱདཱིསུཡེཝ སཱུརིཡགྒཱཧོ པཉྙཱཡཏི, ཏསྨཱ ¶ པཱཊིཔདེཡེཝ ཏིཐིནཀྑཏྟཡོགོ ཨིཙྪིཏབྦོཏི. པཙྪིམཱཔི ཝདནྟི – ཏུམྷཱདིསཱནཾ ཝཱདཱིནཾ ཝཙནེན པུབྦེ ཨཱཀཌྜྷིཏབྦདིཝསཱནཾ ཨནཱཀཌྜྷིཏཏྟཱ དིཝསཔུཉྫབྷཱཝེན ཨེཝཾ ཧོཏི, སཙྩཏོ པན ཨུཔོསཐདིཝསེཡེཝ ཙནྡགྒཱཧོ སཱུརིཡགྒཱཧོ ཙ ཨིཙྪིཏབྦོཏི. ཧོཏུ, ཡཐཱ ཨིཙྪཐ, ཏཐཱ ཝདཐ, ཨེཝཾ བྷཱུཏཔུབྦོ སཱཊྛཀཐེ ཏེཔིཊཀེ བུདྡྷཝཙནེ ཨཏྠཱིཏི? ཨཏྠི. གནྡྷཱརཛཱཏཀེ (ཛཱ. ཨཊྛ. ༣.༧.༧༥ གནྡྷཱརཛཱཏཀཝཎྞནཱ) ཧི ཨུཔོསཐདིཝསེ ཙནྡགྒཱཧོ དྭིཀྑཏྟུཾ ཨཱགཏོ. ཏཉྷི ཛཱཏཀཾ ཏཱིསུ པིཊཀེསུ སུཏྟཔརིཡཱཔནྣཾ, པཉྩསུ ནིཀཱཡེསུ ཁུདྡཀནིཀཱཡཔརིཡཱཔནྣཾ, ནཝསུ སཱསནངྒེསུ ཛཱཏཀཔརིཡཱཔནྣནྟི. ཨེཝཾ ཝུཏྟེ པུརིམཀཱ པཊིཝཙནཾ དཱཏུཾ ན སཀྐུཎེཡྻུནྟི.

ཨཐེཀཙྩེ ‘‘པིཊཀཏྟཡེ ཨདྷིཀམཱསཱཡེཝ སནྟི, ན ཨདྷིཀདིཝསཱ སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༤༠༤) ‘ཡཾ པན ཝུཏྟཾ ཏཱིསུཔི གཎྛིཔདེསུ ཨཊྛཱརསནྣཾཡེཝ ཝསྶཱནཾ ཨདྷིཀམཱསེ གཧེཏྭཱ གཎིཏཏྟཱ སེསཝསྶདྭཡསྶཔི ཨདྷིཀཱནི དིཝསཱནི ཧོནྟེཝ, ཏཱནི ཨདྷིཀདིཝསཱནི སནྡྷཱཡ ནིཀྐངྑཱ ཧུཏྭཱཏི ཝུཏྟནྟི, ཏཾ ན གཧེཏབྦཾ. ན ཧི དྭཱིསུ ཝསྶེསུ ཨདྷིཀདིཝསཱ ནཱམ ཝིསུཾ ཨུཔལབྦྷནྟི ཏཏིཡེ ཝསྶེ ཝསྶུཀྐཌྜྷནཝསེན ཨདྷིཀམཱསེ པརིཙྩཏྟེཡེཝ ཨདྷིཀམཱསསམྦྷཝཏོ, ཏསྨཱ དྭཱིསུ ཝསྶེསུ ཨཏིརེཀདིཝསཱ ནཱམ ཝིསུཾ ན སམྦྷཝནྟཱི’ཏི ཝཙནཏོ’’ཏི ཝདནྟི. ཨཐཉྙེ ཝདནྟི – པིཊཀཏྟཡེ ཨདྷིཀདིཝསཱཏི ཨཱགཏཱ ཨཏྠི ཝཛིརབུདྡྷིཊཱིཀཱཡཾ (ཝཛིར. ཊཱི. པཱཙིཏྟིཡ ༤༠༤) ‘‘ཨཝསེསཱནཾ དྭིནྣཾ ཝསྶཱནཾ ཨདྷིཀདིཝསཱནི ཧོནྟེཝ, ཏསྨཱ ནིཀྐངྑཱ ཧུཏྭཱ ཨུཔསམྤཱདེནྟཱི’’ཏི ཝཙནཏོཏི. ཨིཏོ པརམྤི ཝིཝིདྷེན ཨཱཀཱརེན ཀཐེནྟི. སུདྡྷཝེདིཀཱཔི ¶ ཨེཝཾ ཝདནྟི, ཝིནཡདྷརཱ བྷིཀྑཱུ ཝིནཡསམཡཝསེན ཝདནྟི. ཨམྷཱཀཾ པན ཝེདསམཡེ ཧཏྠགཏགཎནཝསེནེཝ ཛཱནིཏབྦནྟི ཨལམཏིཔཔཉྩེན. ཨཏྠིཀེཧི ཏིཝསྶཱདྷིཀསཧསྶཀལིཡུགེ དྷམྨརཱཛེན པུཙྪིཏཏྟཱ ཀཏཾ ཨདྷིམཱསཔཀརཎཾ ཨོལོཀེཏྭཱ ཛཱནིཏབྦཾ.

ཨིདྷ པན ཨདྷིཔྤེཏཝིནིཙྪཡམེཝ ཀཐཡཱམ. པཋམདུཏིཡཝཱདེསུ ན བིམྦིསཱརརཱཛཱ བྷགཝནྟཾ ཨདྷིམཱསཔཉྙཱཔནཾ ཡཱཙཏི, ན ཙ བྷགཝཱ པཉྙཔེཏི, ན ‘‘ཏསྨིཾ ཝསྶེ ཨིདཾ ནཱམ ཨདྷིམཱསཾ ཧོཏཱི’’ཏི ཝཱ ‘‘མཱསམཏྟཾ ཝཱ སཧདིཝསཾ ཝཱ ཨཱཀཌྜྷིཏབྦ’’ནྟི ཝཱ པཱལི༹ཡཾ ཨཊྛཀཐཱཊཱིཀཱསུ ཙ ཨཏྠི, རཱཛཱ པན ཨུཔཀཊྛཱཡ ཝསྶཱུཔནཱཡིཀཱཡ ཝེདསམཡེ ཝསྶུཀྐཌྜྷནསམྦྷཝཏོ བྷིཀྑཱུནཾ པཋམཨཱསཱལ༹ྷམཱསེ ཝསྶཾ ཨནུཔགནྟྭཱ དུཏིཡཨཱསཱལ༹ྷམཱསེ ཨུཔགམནཏྠཾ ¶ ‘‘ཡདི པནཱཡྻཱ ཨཱགམེ ཛུཎྷེ ཝསྶཾ ཨུཔགཙྪེཡྻུ’’ནྟི དཱུཏཾ པཱཧེསི. ཡདི པན ཨུཔགཙྪེཡྻུཾ, སཱདྷུ ཝཏཱཏི སམྦནྡྷིཏབྦཾ. བྷིཀྑཱུ པན རཉྙོ པཧིཏསཱསནཾ བྷགཝཏོ ཨཱརོཙེསུཾ. བྷགཝཱ པན ཝསྶུཀྐཌྜྷནེ བྷིཀྑཱུནཾ གུཎཔརིཧཱནིཡཱ ཨབྷཱཝཏོ ‘‘ཨནུཛཱནཱམི, བྷིཀྑཝེ, རཱཛཱུནཾ ཨནུཝཏྟིཏུ’’ནྟི (མཧཱཝ. ༡༨༦) ཨཝོཙ. ཏེན ཝུཏྟཾ ཨཊྛཀཐཱཡཾ (མཧཱཝ. ཨཊྛ. ༡༨༥) ‘‘ཨནུཛཱནཱམི བྷིཀྑཝེ རཱཛཱུནཾ ཨནུཝཏྟིཏུནྟི ཨེཏྠ ཝསྶུཀྐཌྜྷནབྷིཀྑཱུནཾ ཀཱཙི པརིཧཱནི ནཱམ ནཏྠཱིཏིཨནུཝཏྟིཏུཾ ཨནུཉྙཱཏ’’ནྟི. ཝིམཏིཝིནོདནིཡཉྩ (ཝི. ཝི. ཊཱི. མཧཱཝགྒ ༢.༡༨༥) ཝུཏྟཾ ‘‘པརིཧཱནཱིཏི གུཎཔརིཧཱནཱི’’ཏི, ཏསྨཱ ཡཱཙཱདྷིམཱསོ ཝཱ ཧོཏུ པཏྟཱདྷིམཱསོ ཝཱ, ཡསྨིཾ ཡསྨིཾ ཀཱལེ ཨནུཝཏྟནེན བྷིཀྑཱུནཾ སཱིལཱདིགུཎམྤི པརིཧཱནི ནཏྠི, ཏསྨིཾ ཏསྨིཾ ཀཱལེ ཨནུཝཏྟིཏབྦཾ.

ཀཐཾ པན ཨནུཝཏྟིཏབྦཾ, ཀཐཾ ན ཨནུཝཏྟིཏབྦཾ? ཡདི ཨནུཝཏྟནྟེ པུབྦེ ཨུཔཝུཏྠདིཝསཏོ ཨིདཱནི ཨུཔཝསིཏབྦཨུཔོསཐདིཝསོ ཙཱཏུདྡསོ ཝཱ པནྣརསོ ཝཱ ཧོཏི, ཏཐཱ ¶ སཏི ཨནུཝཏྟིཏབྦཾ. ཡདི པན ཏེརསམོ ཝཱ སོལ༹སམོ ཝཱ ཧོཏི, ན ཨནུཝཏྟིཏབྦཾ. ཨནུཝཏྟནྟོ ཧི ཨནུཔོསཐེ ཨུཔོསཐཀཏོ ཧོཏི, ཏཏོ ‘‘ན, བྷིཀྑཝེ, ཨནུཔོསཐེ ཨུཔོསཐོ ཀཱཏབྦོ, ཡོ ཀརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༨༣) ཝུཏྟདུཀྐཊཾ ཨཱཔཛྫཏི, ཏསྨཱ སཱིལགུཎཔརིཧཱནིསམྦྷཝཏོ ན ཨནུཝཏྟིཏབྦཾ. ཝུཏྟཉྷི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༢༤༠) ‘‘ཨནུཛཱནཱམི, བྷིཀྑཝེ, རཱཛཱུནཾ ཨནུཝཏྟིཏུནྟི ཝཙནཏོ པནེཏྠ ལོཀིཡཱནཾ ཏིཐིཾ ཨནུཝཏྟནྟེཧིཔི ཨཏྟནོ ཨུཔོསཐཀྐམེན ཙཱཏུདྡསིཾ པནྣརསིཾ ཝཱ, པནྣརསིཾ ཙཱཏུདྡསིཾ ཝཱ ཀརོནྟེཧེཝ ཨནུཝཏྟིཏབྦཾ, ན པན སོལ༹སམདིཝསཾ ཝཱ ཏེརསམདིཝསཾ ཝཱ ཨུཔོསཐདིཝསཾ ཀརོནྟེཧཱི’’ཏི.

ཏཏིཡཙཏུཏྠཝཱདེཔི ‘‘ཀཏི ཝསྶཱུཔནཱཡིཀཱ’’ཏི སཾསཡནྟཱནཾ སཾསཡཝིནོདནཏྠཾ ‘‘དྭེམཱ, བྷིཀྑཝེ, ཝསྶཱུཔནཱཡིཀཱ པུརིམིཀཱ པཙྪིམིཀཱ’’ཏི (མཧཱཝ. ༡༨༤) བྷགཝཱ ཨཝོཙ. ཏཏོ ཏཱསཾ དྭིནྣཾ ཝསྶཱུཔནཱཡིཀཱནཾ ཨུཔགམནཀཱལཾ དསྶེཏུཾ ‘‘ཨཔརཛྫུགཏཱཡ ཨཱསཱལ༹ྷིཡཱ པུརིམིཀཱ ཨུཔགནྟབྦཱ, མཱསགཏཱཡ ཨཱསཱལ༹ྷིཡཱ པཙྪིམིཀཱ ཨུཔགནྟབྦཱ’’ཏི ཝུཏྟཾ. ཏཏྲཱཡཾ པིཎྜཏྠོ – ཨཱསཱལ༹ྷིཔུཎྞམིཡཱ ཨནནྟརེ པཱཊིཔདདིཝསེ པུརིམིཀཱ ཨུཔགནྟབྦཱ, སཱཝཎཔུཎྞམིཡཱ ཨནནྟརེ པཱཊིཔདདིཝསེ པཙྪིམིཀཱ ཨུཔགནྟབྦཱཏི. ཏེན ཝུཏྟཾ ཨཊྛཀཐཱཡཾ (མཧཱཝ. ཨཊྛ. ༡༨༤) ‘‘ཏསྨཱ ཨཱསཱལ༹ྷིཔུཎྞམཱཡ ཨནནྟརེ པཱཊིཔདདིཝསེ, ཨཱསཱལ༹ྷིཔུཎྞམིཏོ ¶ ཝཱ ཨཔརཱཡ པུཎྞམཱཡ ཨནནྟརེ པཱཊིཔདདིཝསེཡེཝ ཝིཧཱརཾ པཊིཛགྒིཏྭཱ པཱནཱིཡཾ པརིབྷོཛནཱིཡཾ ཨུཔཊྛཱཔེཏྭཱ སབྦཾ ཙེཏིཡཝནྡནཱདིསཱམཱིཙིཀམྨཾ ནིཊྛཱཔེཏྭཱ ‘ཨིམསྨིཾ ཝིཧཱརེ ཨིམཾ ཏེམཱསཾ ཝསྶཾ ཨུཔེམཱི’ཏི སཀིཾ ཝཱ དྭཏྟིཀྑཏྟུཾ ཝཱ ཝཱཙཾ ནིཙྪཱརེཏྭཱ ཝསྶཾ ཨུཔགནྟབྦ’’ནྟི ¶ , སཱརཏྠདཱིཔནིཡམྤི (སཱརཏྠ. ཊཱི. མཧཱཝགྒ ༣.༡༨༤) ‘‘ཨཔརཛྫཱུཏི ཨཱསཱལ༹ྷིཏོ ཨཔརཾ དིནཾ, པཱཊིཔདནྟི ཨཏྠོ’’ཏི, ཝིམཏིཝིནོདནིཡམྤི (ཝི. ཝི. ཊཱི. མཧཱཝགྒ ༢.༡༨༤) ‘‘ཨཔརསྨིཾ དིཝསེཏི དུཏིཡེ པཱཊིཔདདིཝསེ’’ཏི ཨེཝཾ པཱལི༹ཨཊྛཀཐཱཊཱིཀཱསུ པཱཊིཔདདིཝསེཡེཝ ཝསྶཱུཔགམནཾ ཝུཏྟཾ, ན ཝུཏྟཾ ‘‘ཨམུཀཏིཐིཡོགེ’’ཏི ཝཱ ‘‘ཨམུཀནཀྑཏྟཡོགེ’’ཏི ཝཱ, ཏསྨཱ པཱཊིཔདདིཝསེ པཱཏོ ཨརུཎུགྒམནཏོ པཊྛཱཡ སཀལདིཝསཾ སཀལརཏྟི ཡཱཝ དུཏིཡཨརུཎུགྒམནཱ ཡཐཱརུཙིཏེ ཀཱལེ ཝསྶཾ ཨུཔགནྟབྦནྟི དཊྛབྦཾ. ཏཏོ ཨེཝ ཝསྶཱུཔནཱཡིཀཀཱལེ པུཎྞཱཏིཐིཡཱ ཡོགོ, ཨུཏྟརཱསཱལ༹ྷནཀྑཏྟེན ཡོགོ ཧོཏཱུཏི ཝདནྟཱནཾ ཝཙནཾ ཝིནཡཝིརུདྡྷཾ ཧོཏི, ཏཾ ཝཙནཾ གཧེཏྭཱ པུཎྞཱཏིཐིཡོགཾ ཨུཏྟརཱསཱལ༹ྷནཀྑཏྟཡོགཉྩ ཨཱགམེཏྭཱ ཝསྶཾ ཨུཔགནྟྭཱཔི ཏཐཱགཏེན ཨཔཉྙཏྟཾ པཉྙཔེཏི ནཱམཱཏི དཊྛབྦཾ.

ཨེཝཾ པཱལི༹ཨཊྛཀཐཱཊཱིཀཱསུ ཙ པུཎྞཱཏིཐིཡོགེ ཨེཝ ཝསྶཾ ཨུཔགནྟབྦཾ, ན ཨེཀཱཡ ཏིཐིཡཱ ཡུཏྟེཏི ཝཱ ཨུཏྟརཱསཱལ༹ྷནཀྑཏྟཡོགེཡེཝ, ན སཱཝཎནཀྑཏྟཡོགེཏི ཝཱ ཨནཱགཏམེཝ ཚཱཡཾ གཧེཏྭཱ ཏཐཱགཏེན པཉྙཏྟཾ ཝིཡ པོཏྠཀེསུ ལིཁིཏྭཱ ཀེཧིཙི ཋཔིཏཏྟཱ སཀལཾ ཝིནཡཔིཊཀཾ ཨཔསྶནྟཱ ཝེདསཱམཡིཀཱ ཏཾ ཝཙནཾ སདྡཧིཏྭཱ ཝསྶཱུཔགམནཀཱལེ པུཎྞཱཏིཐིཨུཏྟརཱསཱལ༹ྷཡོགམེཝ གཝེསནྟཱ མཱསདིཝསེན སཧ ཨཱཀཌྜྷིཏབྦཀཱལེཔི མཱསམཏྟམེཝ ཨཱཀཌྜྷནྟི, མཱསམཏྟམེཝ ཨཱཀཌྜྷིཏབྦཀཱལེཔི སཧ དིཝསེན ཨཱཀཌྜྷནྟི, ཏསྨཱ ཨེཝཾཝཱདིནོ བྷིཀྑཱུ ‘‘ཨཔཉྙཏྟཾ ཏཐཱགཏེན པཉྙཏྟཾ ཏཐཱགཏེནཱཏི དཱིཔེཏཱི’’ཏི ཝཏྟབྦཏཾ ཨཱཔཛྫནྟི, ཏསྨཱ བྷགཝཏི གཱརཝསཧིཏཱ ལཛྫིནོ པཎྜིཏཱ ཨེཝཾ ན གཎྷནྟཱིཏི. ཏིཐིནཀྑཏྟཡོགོ པན ཨུཔོསཐདིཝསེཡེཝ བཧུདྷཱ པིཊཀཏྟཡེ ཨཱགཏོ, པོརཱཎཝེདགནྠེསུ ¶ ཙ པསཾསིཏོ, ཀདཱཙི པན ཝོཧཱརཀཱལོ ཏིཐིཡཱ ནཀྑཏྟེན ཙ ཝིསམོ ཧོཏི, ཏསྨཱ ཏཾ སམེཏུཾ ཨདྷིམཱསཔཏནཀཱལེ མཱསམྤི དིཝསམྤི ཨཱཀཌྜྷནྟི, ཏསྨཱ ཨཉྙསྨིཾ ཀཱལེ ཝིསམེཔི ཨཱཀཌྜྷནཀཱལེ སམཱཔེཏབྦཾ. ཨེཝཾ སཏི མཱསཨུཏུསཾཝཙྪརཱནཾ སམབྷཱཝོ ཧོཏཱིཏི དཊྛབྦཾ.

པཉྩམཚཊྛཝཱདེསུ ཨདྷིམཱསོཏི ཨཊྛཱརསཝསྶཏོ ཨདྷིཀམཱསཾ གཧེཏྭཱ ཝུཏྟོ, ཏསྨཱ ‘‘ཨདྷིཀོ ¶ མཱསོ ཨདྷིམཱསོ’’ཏི ཀམྨདྷཱརཡསམཱསཏྟཱ པུལླིངྒཾ ཀཏྭཱ ཝུཏྟོ. པུབྦེ པན མཱསཔུཉྫཏོ ཨདྷིཀགྷཊིཡོ གཧེཏྭཱ ཝུཏྟོ, ཏསྨཱ ‘‘མཱསཏོ ཨདྷིཀཾ ཨདྷིམཱས’’ནྟི ཨབྱཡཱིབྷཱཝསམཱསཏྟཱ ནཔུཾསཀལིངྒཾ ཀཏྭཱ ཝུཏྟཾ. ཨིདྷ པན ‘‘པོརཱཎཀཏྠེརཱ ཨེཀཱུནཝཱིསཏིཝསྶཾ སཱམཎེརཾ ནིཀྑམནཱིཡཔུཎྞམཱསིཾ ཨཏིཀྐམྨ པཱཊིཔདདིཝསེ ཨུཔསམྤཱདེནྟི, ཏཾ ཀསྨཱཏི? ཝུཙྩཏེ – ཨེཀསྨིཾ ཝསྶེ ཚ ཙཱཏུདྡསིཀཨུཔོསཐདིཝསཱ ཧོནྟི, ཨིཏི ཝཱིསཏིཡཱ ཝསྶེསུ ཙཏྟཱརོ མཱསཱ པརིཧཱཡནྟི, རཱཛཱནོ ཏཏིཡེ ཏཏིཡེ ཝསྶེ ཝསྶཾ ཨུཔཀཌྜྷནྟི, ཨིཏི ཨཊྛཱརསསུ ཝསྶེསུ ཚ མཱསཱ ཝཌྜྷནྟི, ཏཏོ ཨུཔོསཐཝསེན པརིཧཱིནེ ཙཏྟཱརོ མཱསེ ཨཔནེཏྭཱ དྭེ མཱསཱ ཨཝསེསཱ ཧོནྟི, ཏེ དྭེ མཱསེ གཧེཏྭཱ ཝཱིསཏི ཝསྶཱནི པརིཔུཎྞཱནི ཧོནྟཱིཏི ནིཀྐངྑཱ ཧུཏྭཱ ནིཀྑམནཱིཡཔུཎྞམཱསིཾ ཨཏིཀྐམྨ པཱཊིཔདེ ཨུཔསམྤཱདེནྟཱི’’ཏི ཨཊྛཀཐཱཝཙནེ (པཱཙི. ཨཊྛ. ༤༠༤) ‘‘ནིཀྐངྑཱ ཧུཏྭཱཏི ཨདྷིཀམཱསེཧི སདྡྷིཾ པརིཔུཎྞཝཱིསཏིཝསྶཏྟཱ ནིབྦེམཏིཀཱ ཧུཏྭཱ’’ཏི ཨཏྠོ སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༤༠༤) ཝུཏྟོ.

ཏཏྲ ནནུ ཙ ‘‘ཏཱིསུཔི གཎྛིཔདེསུ ཨཊྛཱརསནྣཾ…པེ… ཝུཏྟ’’ནྟི ཝུཏྟཾ, ཏཾ ཀཐནྟི ཙོདནཾ སནྡྷཱཡ ‘‘ཡཾ པན ཝུཏྟཾ…པེ… ཏཾ ན གཧེཏབྦ’’ནྟི ཀིཉྩཱཔི ཝུཏྟཾ, ཏཐཱཔི ཏཾ གཎྛིཔདེསུ ཝུཏྟཝཙནཾ ན ¶ གཧེཏབྦནྟི ཨཏྠོ, ཀསྨཱ ན གཧེཏབྦནྟི ཨཱཧ ‘‘ན ཧཱི’’ཏིཨཱདི. ཧི ཡསྨཱ ན ཨུཔལབྦྷནྟི, ཏསྨཱ ན གཧེཏབྦནྟི ཡོཛནཱ. ཀཐཾ ཝིཉྙཱཡཏཱིཏི ཨཱཧ ‘‘ཏཏིཡེ’’ཏིཨཱདི. པརིཙྩཏྟེཡེཝ སམྦྷཝཏོ, ཨཔརིཙྩཏྟེ ཨསམྦྷཝཏོ ན ཨུཔལབྦྷནྟཱིཏི བྱཏིརེཀཝསེན ཧེཏུཕལཡོཛནཱ. ཏསྨཱཏིཨཱདི ལདྡྷགུཎཾ.

ཝཛིརབུདྡྷིཊཱིཀཱཡཾ པན གཎྛིཔདེསུ ཝུཏྟམེཝ གཧེཏྭཱ ཝདཏི. ཨེཏཱནི ཝཙནཱནི སཱམཎེརཱནཾ ཝཱིསཏིཝསྶཔརིཔུཎྞབྷཱཝསཱདྷཀཱནིཡེཝ ཧོནྟི, ན ཨདྷིམཱསཔཏནཝཱརེསུ སདིཝསམཱསཱཀཌྜྷནབྷཱཝསཱདྷཀཱནི, ཏསྨཱ ཨིམཱནི ཨཱཧརིཏྭཱ ཏཾ ཨདྷིཀརཎཾ ཝིནིཙྪིཏུཾ ན སཀྐོནྟི. བྷིཀྑཱུ པན བཧཱུནཾ སནྣིཔཱཏེ ཀིཉྩི པཱཋཾ ཨཱཧརིཏྭཱ ཀཐེཏུཾ སམཏྠོ སོབྷཏཱིཏི ཀཏྭཱ ཨཱིདིསཾ པཱཋཾ ཨཱཧརནྟི. སུཏསནྣིཙཡཔཎྜིཏཱ པན ཨིཙྪིཏཏྠསྶ ཨསཱདྷཀཏྟཱ ཨེཝརཱུཔཾ ན ཨཱཧརནྟི. སུདྡྷཝེདིཀཱནམྤི ཝཙནེ ཝིནཡདྷརཱ ཝིནཡམེཝ ཛཱནནྟི, ན བཱཧིརསམཡཾ. ཨཡཾ པན ཀཐཱ བཱཧིརསམཡེ པཝཏྟཱ, ཏསྨཱ ཝིནཡདྷརཱནཾ ཨཝིསཡོཏི མཉྙནྟཱ ཝདནྟི.

ཝིནཡདྷརཱ པན ཨེཀཙྩེ ཝིནཡམེཝ ཛཱནནྟི, ཨེཀཙྩེ སཀལཾ པིཊཀཏྟཡཾ ཛཱནནྟི, ཨེཀཙྩེ ¶ སབཱཧིརསམཡཾ པིཊཀཏྟཡཾ ཛཱནནྟི, ཏསྨཱ ཀཐེཏུཾ སམཏྠབྷཱཝོཡེཝ པམཱཎཾ. ཝེདིཀཱནམྤི ཝཙནཾ ཝེདཔྤཀརཎཱགཏམེཝ པམཱཎཾ. ན ཡཾ ཀིཉྩི ཧཏྠགཏགཎནམཏྟཾ, ཏསྨཱ ཡདཱ པཐཝིསྶརོ རཱཛཱ སདིཝསཾ མཱསཾ ཨཱཀཌྜྷིཏུཀཱམོ ‘‘ཛེཊྛམཱསཀཱལ༹པཀྑཨུཔོསཐཾ པནྣརསིཡཾ ཀརོནྟཱུ’’ཏི ཡཱཙིསྶཏི, ཏདཱ ‘‘སཀིཾ པཀྑསྶ ཙཱཏུདྡསེ ཝཱ པནྣརསེ ཝཱ’’ཏི ཝཙནཏོ པནྣརསིཡཾ ཨུཔོསཐཀརཎེ དོསོ ནཏྠི, ཡདཱ སུདྡྷམཱསམེཝ ཨཱཀཌྜྷིཏུཀཱམོ ‘‘ཙཱཏུདྡསིཡཾ ཀརོནྟཱུ’’ཏི ཡཱཙིསྶཏི, ཨེཝཾ སཏི པཀཏིཡཱཔི ཛེཊྛམཱསཀཱལ༹པཀྑུཔོསཐོ ཙཱཏུདྡསོཡེཝཱཏི ཀཏྭཱ དོསོ ནཏྠི, ཨུབྷཡཐཱཔི ཨུཔོསཐོ ¶ སུཀཏོཡེཝ ཧོཏི, ཏསྨཱ ཨནུཝཏྟིཏབྦོ. ཏཏོ པརཾ པཋམཱསཱལ༹ྷམཱསསྶ ཛུཎྷཔཀྑེཔི ཀཱལ༹པཀྑེཔི དུཏིཡཱསཱལ༹ྷམཱསསྶ ཛུཎྷཔཀྑེཔི པནྣརསཱིཨུཔོསཐཾ ཀཏྭཱ པཱཊིཔདདིཝསེ ཏིཐིཡོགཾ ཝཱ ནཀྑཏྟཡོགཾ ཝཱ ཨནོལོཀེཏྭཱ པཱཏོ ཨརུཎུགྒམནཱནནྟརཏོ པཊྛཱཡ ཡཱཝ པུན ཨརུཎུགྒམནཱ སཀལདིཝསརཏྟིཡཾ ཡཐཱཛ྄ཛྷཱསཡཾ ཝསྶཾ ཨུཔགཙྪནྟོ སཱུཔགཏོཝ ཧོཏི, ནཏྠི ཀོཙི དོསོཏི དཊྛབྦོ. བྷཝཏྭེཝཾ, པཱཏོཝ ཝསྶཾ ཨུཔགཙྪནྟོ ཨཏྠཱིཏི? ཨཏྠི. ཝུཏྟཉྷེཏཾ སེནཱསནཀྑནྡྷཀཝཎྞནཱཡཾ (ཙཱུལ༹ཝ. ཨཊྛ. ༣༡༨) ‘‘སཙེ པཱཏོཝ གཱཧིཏེ སེནཱསནེ ཨཉྙོ ཝིཏཀྐཙཱརིཀོ བྷིཀྑུ ཨཱགནྟྭཱ སེནཱསནཾ ཡཱཙཏི, ‘གཧིཏཾ, བྷནྟེ, སེནཱསནཾ, ཝསྶཱུཔགཏོ སངྒྷོ, རམཎཱིཡོ ཝིཧཱརོ, རུཀྑམཱུལཱདཱིསུ ཡཏྠ ཨིཙྪཐ, ཏཏྠ ཝསཐཱ’ཏི ཝཏྟབྦོ’’ཏི.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཝསྶཱུཔནཱཡིཀཝིནིཙྪཡཀཐཱལངྐཱརོ ནཱམ

ཚབྦཱིསཏིམོ པརིཙྪེདོ.

པཋམོ བྷཱགོ ནིཊྛིཏོ.