📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིནཡཱལངྐཱར-ཊཱིཀཱ (དུཏིཡོ བྷཱགོ)

༢༧. ཨུཔཛ྄ཛྷཱཡཱདིཝཏྟཝིནིཙྪཡཀཐཱ

ཨུཔཛ྄ཛྷཱཡཝཏྟཀཐཱཝཎནཱ

༡༨༣. ཨེཝཾ ¶ ¶ ཝསྶཱུཔནཱཡིཀཝིནིཙྪཡཾ ཀཐེཏྭཱ ཨིདཱནི ཨུཔཛ྄ཛྷཱཡཝཏྟཱདིཝཏྟཀཐཾ ཀཐེཏུཾ ‘‘ཝཏྟནྟི ཨེཏྠཱ’’ཏིཨཱདིམཱཧ. ཏཏྠ ཝཏྟེཏབྦཾ པཝཏྟེཏབྦནྟི ཝཏྟཾ, སདྡྷིཝིཧཱརིཀཱདཱིཧི ཨུཔཛ྄ཛྷཱཡཱདཱིསུ པཝཏྟེཏབྦཾ ཨཱབྷིསམཱཙཱརིཀསཱིལཾ. ཏཾ ཀཏིཝིདྷནྟི ཨཱཧ ‘‘ཝཏྟཾ ནཱམེཏཾ…པེ… བཧུཝིདྷ’’ནྟི. ཝཙྩཀུཊིཝཏྟནྟི ཨེཏྠ ཨིཏི-སདྡོ ཨཱདྱཏྠོ. ཏེན སདྡྷིཝིཧཱརིཀཝཏྟཨནྟེཝཱསིཀཝཏྟཨནུམོདནཝཏྟཱནི སངྒཡ྄ཧནྟི. ཝུཏྟཉྷི ཏཏྠ ཏཏྠ ཨཊྛཀཐཱསུ ‘‘ཙུདྡས ཁནྡྷཀཝཏྟཱནཱི’’ཏི. ཝཏྟཀྑནྡྷཀེ (ཙཱུལ༹ཝ. ༣༥༦) ཙ པཱལི༹ཡཾ ཨཱགཏམེཝ, ཏཏྠ པན ¶ ཨཱགནྟུཀཝཏྟཏོ པཊྛཱཡ ཨཱགཏཾ, ཨིདྷ ཨུཔཛ྄ཛྷཱཡཝཏྟཏོ. ཨིཏོ ཨཉྙཱནིཔི པཉྩསཏྟཏི སེཁིཡཝཏྟཱནི དྭེཨསཱིཏི མཧཱཝཏྟཱནི ཙ ཝཏྟམེཝ. ཏེསུ པན སེཁིཡཝཏྟཱནི མཧཱཝིབྷངྒེ ཨཱགཏཱནི, མཧཱཝཏྟཱནི ཀམྨཀྑནྡྷཀཔཱརིཝཱསིཀཀྑནྡྷཀེསུ (ཙཱུལ༹ཝ. ༧༥ ཨཱདཡོ), ཏསྨཱ ཨིདྷ ཙུདྡས ཁནྡྷཀཝཏྟཱནིཡེཝ དསྶིཏཱནི. ཏེསུ ཨུཔཛ྄ཛྷཱཡཝཏྟཾ པཋམཾ དསྶེནྟོ ‘‘ཏཏྠ ཨུཔཛ྄ཛྷཱཡཝཏྟཾ ཏཱཝ ཨེཝཾ ཝེདིཏབྦ’’ནྟྱཱདིམཱཧ.

ཏཏྠ ¶ ཀོ ཨུཔཛ྄ཛྷཱཡོ, ཀེནཊྛེན ཨུཔཛ྄ཛྷཱཡོ, ཀཐཾ གཧིཏོ ཨུཔཛ྄ཛྷཱཡོ, ཀེན ཝཏྟིཏབྦཾ ཨུཔཛ྄ཛྷཱཡཝཏྟཾ, ཀཏམཾ ཏཾ ཝཏྟནྟི? ཏཏྠ ཀོ ཨུཔཛ྄ཛྷཱཡོཏི ‘‘ཨནུཛཱནཱམི, བྷིཀྑཝེ, བྱཏྟེན བྷིཀྑུནཱ པཊིབལེན དསཝསྶེན ཝཱ ཨཏིརེཀདསཝསྶེན ཝཱ ཨུཔསམྤཱདེཏུ’’ནྟིཨཱདིཝཙནཏོ (མཧཱཝ. ༧༦) བྱཏྟིབལསམྤནྣོ ཨུཔསམྤདཏོ པཊྛཱཡ དསཝསྶོ ཝཱ ཨཏིརེཀདསཝསྶོ ཝཱ བྷིཀྑུ ཨུཔཛ྄ཛྷཱཡོ. ཀེནཊྛེན ཨུཔཛ྄ཛྷཱཡོཏི ཝཛྫཱཝཛྫཾ ཨུཔནིཛ྄ཛྷཱཡཏཱིཏི ཨུཔཛ྄ཛྷཱཡོ, སདྡྷིཝིཧཱརིཀཱནཾ ཁུདྡཀཾ ཝཛྫཾ ཝཱ མཧནྟཾ ཝཛྫཾ ཝཱ བྷུསོ ཙིནྟེཏཱིཏི ཨཏྠོ. ཀཐཾ གཧིཏོ ཧོཏི ཨུཔཛ྄ཛྷཱཡོཏི སདྡྷིཝིཧཱརིཀེན ཨེཀཾསཾ ཨུཏྟརཱསངྒཾ ཀརིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ‘‘ཨུཔཛ྄ཛྷཱཡོ མེ, བྷནྟེ, ཧོཧཱི’’ཏི ཏིཀྑཏྟུཾ ཝུཏྟེ སཙེ ཨུཔཛ྄ཛྷཱཡོ ‘‘སཱཧཱུ’’ཏི ཝཱ ‘‘ལཧཱུ’’ཏི ཝཱ ‘‘ཨོཔཱཡིཀ’’ནྟི ཝཱ ‘‘པཏིརཱུཔ’’ནྟི ཝཱ ‘‘པཱསཱདིཀེན སམྤཱདེཧཱི’’ཏི ཝཱ ཨིམེསུ པཉྩསུ པདེསུ ཡསྶ ཀསྶཙི པདསྶ ཝསེན ཀཱཡེན ཝཱ ཝཱཙཱཡ ཝཱ ཀཱཡཝཱཙཱཧི ཝཱ ‘‘གཧིཏོ ཏཡཱ ཨུཔཛ྄ཛྷཱཡོ’’ཏི ཨུཔཛ྄ཛྷཱཡགྒཧཎཾ ཝིཉྙཱཔེཏི, གཧིཏོ ཧོཏི ཨུཔཛ྄ཛྷཱཡོ. ཏཏྠ སཱཧཱུཏི སཱདྷུ. ལཧཱུཏི ཨགརུ, སུབྷརཏཱཏི ཨཏྠོ. ཨོཔཱཡིཀནྟི ཨུཔཱཡཔཊིསཾཡུཏྟཾ, ཨེཝཾ པཊིཔཛྫནཾ ནིཏྠརཎུཔཱཡོཏི ཨཏྠོ. པཏིརཱུཔནྟི སཱམཱིཙིཀམྨམིདནྟི ཨཏྠོ. པཱསཱདིཀེནཱཏི པསཱདཱཝཧེན ཀཱཡཝཙཱིཔཡོགེན སམྤཱདེཧཱིཏི ཨཏྠོ.

ཀེན ཝཏྟིཏབྦཾ ཨུཔཛ྄ཛྷཱཡཝཏྟནྟི གཧིཏཨུཔཛ྄ཛྷཱཡེན སདྡྷིཝིཧཱརིཀེན ཝཏྟིཏབྦཾ. ཀཏམཾ ཏཾ ཝཏྟནྟི ཨིདཾ ཨཱགཏམེཝ, ཏཏྠ ཀཱལསྶེཝ ཨུཊྛཱཡ ཨུཔཱཧནཱ ཨོམུཉྩིཏྭཱཏི སཙསྶ པཙྩཱུསཀཱལེ ཙངྐམནཏྠཱཡ ཝཱ དྷོཏཔཱདཔརིཧརཎཏྠཱཡ ཝཱ པཊིམུཀྐཱ ཨུཔཱཧནཱ པཱདགཏཱ ཧོནྟི, ཏཱ ཀཱལསྶེཝ ཨུཊྛཱཡ ¶ ཨཔནེཏྭཱ. ཏཱདིསམེཝ མུཁདྷོཝནོདཀཾ དཱཏབྦནྟི ཨུཏུམྤི སརཱིརསབྷཱཝེ ཙ ཨེཀཱཀཱརེ ཏཱདིསམེཝ དཱཏབྦཾ.

སགུཎཾ ¶ ཀཏྭཱཏི ཨུཏྟརཱསངྒཾ སངྒྷཱཊིཉྩཱཏི དྭེ ཙཱིཝརཱནི ཨེཀཏོ ཀཏྭཱ ཏཱ དྭེཔི སངྒྷཱཊིཡོ དཱཏབྦཱ. སབྦཉྷི ཙཱིཝརཾ སངྒྷཊིཏཏྟཱ སངྒྷཱཊཱིཏི ཝུཙྩཏི. ཏེན ཝུཏྟཾ ‘‘སངྒྷཱཊིཡོ དཱཏབྦཱ’’ཏི. པདཝཱིཏིཧཱརེཧཱིཏི ཨེཏྠ པདཾ ཝཱིཏིཧརཏི ཨེཏྠཱཏི པདཝཱིཏིཧཱརོ, པདཝཱིཏིཧཱརཊྛཱནཾ. དུཏཝིལམྦིཏཾ ཨཀཏྭཱ སམགམནེན དྭིནྣཾ པདཱནཾ ཨནྟརེ མུཊྛིརཏནམཏྟཾ. པདཱནཾ ཝཱ ཝཱིཏིཧརཎཾ ཨབྷིམུཁཾ ཧརིཏྭཱ ནིཀྑེཔོ པདཝཱིཏིཧཱརོཏི ཨེཝམེཏྠ ཨཏྠོ དཊྛབྦོ. ན ཨུཔཛ྄ཛྷཱཡསྶ བྷཎམཱནསྶ ཨནྟརནྟརཱ ཀཐཱ ཨོཔཱཏེཏབྦཱཏི ཨནྟརགྷརེ ཝཱ ཨཉྙཏྲ ཝཱ བྷཎམཱནསྶ ཨནིཊྛིཏེ ཏསྶ ཝཙནེ ཨཉྙཱ ཀཐཱ ན སམུཊྛཱཔེཏབྦཱ. ཨིཏོ པཊྛཱཡཱཏི ‘‘ན ཨུཔཛ྄ཛྷཱཡསྶ བྷཎམཱནསྶཱ’’ཏི ཨེཏྠ ན-ཀཱརཏོ པཊྛཱཡ. ཏེན ནཱཏིདཱུརེཏིཨཱདཱིསུ ན-ཀཱརཔཊིསིདྡྷེསུ ཨཱཔཏྟི ནཏྠཱིཏི དསྶེཏི. སབྦཏྠ དུཀྐཊཱཔཏྟཱིཏི ཨཱཔདཱཨུམྨཏྟཁིཏྟཙིཏྟཝེདནཱཊྚཏཱདཱིཧི ཝིནཱ པཎྞཏྟིཾ ཨཛཱནིཏྭཱཔི ཝདནྟསྶ གིལཱནསྶ ཙ དུཀྐཊམེཝ. ཨཱཔདཱསུ ཧི ཨནྟརནྟརཱ ཀཐཱ ཝཏྟུཾ ཝཊྚཏི, ཨེཝམཉྙེསུ ན-ཀཱརཔཊིསིདྡྷེསུ ཨཱིདིསེསུ, ཨིཏརེསུ པན གིལཱནོཔི ན མུཙྩཏི. སབྦཏྠ དུཀྐཊཱཔཏྟི ཝེདིཏབྦཱཏི ‘‘ཨཱིདིསེསུ གིལཱནོཔི ན མུཙྩཏཱི’’ཏི དསྶནཏྠཾ ཝུཏྟཾ. ཨཉྙམྤི ཧི ཡཐཱཝུཏྟཾ ཨུཔཛ྄ཛྷཱཡཝཏྟཾ ཨནཱདརིཡེན ཨཀརོནྟསྶ ཨགིལཱནསྶ ཝཏྟབྷེདེ སབྦཏྠ དུཀྐཊམེཝ, ཏེནེཝ ཝཀྑཏི ‘‘ཨགིལཱནེན ཧི སདྡྷིཝིཧཱརིཀེན སཊྛིཝསྶེནཔི སབྦཾ ཨུཔཛ྄ཛྷཱཡཝཏྟཾ ཀཱཏབྦཾ, ཨནཱདརིཡེན ཨཀརོནྟསྶ ཝཏྟབྷེདེ དུཀྐཊཾ. ན-ཀཱརཔཊིསཾཡུཏྟེསུ པན པདེསུ གིལཱནསྶཔི པཊིཀྑིཏྟཀིརིཡཾ ཀརོནྟསྶ དུཀྐཊམེཝཱ’’ཏི. ཨཱཔཏྟིསཱམནྟཱ བྷཎམཱནོཏི པདསོདྷམྨ(པཱཙི. ༤༤ ཨཱདཡོ)-དུཊྛུལླཱདིཝསེན ¶ (པཱརཱ. ༢༨༣) ཨཱཔཏྟིཡཱ ཨཱསནྣཝཱཙཾ བྷཎམཱནོ. ཨཱཔཏྟིཡཱ ཨཱསནྣཝཱཙནྟི ཙ ཨཱཔཏྟིཛནཀམེཝ ཝཙནཾ སནྡྷཱཡ ཝདཏི. ཡཱཡ ཧི ཝཱཙཱཡ ཨཱཔཏྟིཾ ཨཱཔཛྫཏི, སཱ ཝཱཙཱ ཨཱཔཏྟིཡཱ ཨཱསནྣཱཏི ཝུཙྩཏི.

ཙཱིཝརེན པཏྟཾ ཝེཋེཏྭཱཏི ཨེཏྠ ‘‘ཨུཏྟརཱསངྒསྶ ཨེཀེན ཀཎྞེན ཝེཋེཏྭཱ’’ཏི གཎྛིཔདེསུ ཝུཏྟཾ. ཧེཊྛཱཔཱིཋཾ ཝཱ པརཱམསིཏྭཱཏི ཨིདཾ པུབྦེ ཏཏྠ ཋཔིཏཔཏྟཱདིནཱ ཨསངྒྷཊྚནཏྠཱཡ ཝུཏྟཾ. ཙཀྑུནཱ ཨོལོཀེཏྭཱཔི ཨཉྙེསཾ ཨབྷཱཝཾ ཉཏྭཱཔི ཋཔེཏུཾ ཝཊྚཏི ཨེཝ. ཙཏུརངྒུལཾ ཀཎྞཾ ཨུསྶཱརེཏྭཱཏི ཀཎྞཾ ཙཏུརངྒུལཔྤམཱཎཾ ཨཏིརེཀཾ ཀཏྭཱ ཨེཝཾ ཙཱིཝརཾ སངྒྷརིཏབྦཾ. ཨོབྷོགེ ཀཱཡབནྡྷནཾ ཀཱཏབྦནྟི ཀཱཡབནྡྷནཾ སངྒྷརིཏྭཱ ཙཱིཝརབྷོགེ པཀྑིཔིཏྭཱ ཋཔེཏབྦཾ. སཙེ པིཎྜཔཱཏོ ཧོཏཱིཏི ཨེཏྠ ཡོ གཱམེཡེཝ ཝཱ ཨནྟརགྷརེ ཝཱ པཊིཀྐམནེ ཝཱ བྷུཉྫིཏྭཱ ཨཱགཙྪཏི, པིཎྜཾ ཝཱ ན ལབྷཏི, ཏསྶ པིཎྜཔཱཏོ ན ཧོཏི, གཱམེ ཨབྷུཏྟསྶ པན ལདྡྷབྷིཀྑསྶ ¶ ཝཱ ཧོཏི, ཏསྨཱ ‘‘སཙེ པིཎྜཔཱཏོ ཧོཏཱི’’ཏིཨཱདི ཝུཏྟཾ. ཏཏྠ གཱམེཏི གཱམཔརིཡཱཔནྣེ ཏཱདིསེ ཀིསྨིཉྩི པདེསེ. ཨནྟརགྷརེཏི ཨནྟོགེཧེ. པཊིཀྐམནེཏི ཨཱསནསཱལཱཡཾ. སཙེཔི ཏསྶ ན ཧོཏི, བྷུཉྫིཏུཀཱམོ ཙ ཧོཏི, ཨུདཀཾ དཏྭཱ ཨཏྟནཱ ལདྡྷཏོཔི པིཎྜཔཱཏོ ཨུཔནེཏབྦོ. ཏིཀྑཏྟུཾ པཱནཱིཡེན པུཙྪིཏབྦོཏི སམྦནྡྷོ, ཨཱདིམྷི མཛ྄ཛྷེ ཨནྟེཏི ཨེཝཾ ཏིཀྑཏྟུཾ པུཙྪིཏབྦོཏི ཨཏྠོ. ཨུཔཀཊྛོཏི ཨཱསནྣོ. དྷོཏཝཱལིཀཱཡཱཏི ཨུདཀེན གཏཊྛཱནེ ནིརཛཱཡ པརིསུདྡྷཝཱལིཀཱཡ.

ནིདྡྷཱུམེཏི ཛནྟཱགྷརེ ཛལམཱནཨགྒིདྷཱུམརཧིཏེ. ཛནྟཱགྷརཉྷི ནཱམ ཧིམཔཱཏབཧུཀེསུ དེསེསུ ཏཔྤཙྩཡརོགཔཱིལཱ༹དིནིཝཱརཎཏྠཾ སརཱིརསེདཏཱཔནཊྛཱནཾ. ཏཏྠ ཀིར ཨནྡྷཀཱརཔཊིཙྪནྣཏཱཡ ¶ བཧཱུཔི ཨེཀཏོ པཝིསིཏྭཱ ཙཱིཝརཾ ནིཀྑིཔིཏྭཱ ཨགྒིཏཱཔཔརིཧཱརཱཡ མཏྟིཀཱཡ མུཁཾ ལིམྤིཏྭཱ སརཱིརཾ ཡཱཝདཏྠཾ སེདེཏྭཱ ཙུཎྞཱདཱིཧི ཨུབྦཊྚེཏྭཱ ནཧཱཡནྟི. ཏེནེཝ པཱལི༹ཡཾ (མཧཱཝ. ༦༦) ‘‘ཙུཎྞཾ སནྣེཏབྦ’’ནྟིཨཱདི ཝུཏྟཾ. སཙེ ཨུསྶཧཏཱིཏི སཙེ པཧོཏི. ཝུཏྟམེཝཏྠཾ ཝིབྷཱཝེཏི ‘‘ཀེནཙི གེལཉྙེན ཨནབྷིབྷཱུཏོ ཧོཏཱི’’ཏི. ཨཔཊིགྷཾསནྟེནཱཏི བྷཱུམིཡཾ ཨཔཊིགྷཾསནྟེན. ཀཝཱཊཔཱིཋནྟི ཀཝཱཊཔཱིཋཉྩ པིཊྛསངྒྷཱཏཉྩ ཨཙྪུཔནྟེན. སནྟཱནཀནྟི ཡཾ ཀིཉྩི ཀཱིཊཀུལཱཝཀམཀྐཊཀསུཏྟཱདི. ཨུལློཀཱ པཋམཾ ཨོཧཱརེཏབྦནྟི ཨུལློཀཏོ པཋམཾ ཨུལློཀཾ ཨཱདིཾ ཀཏྭཱ ཨཝཧརིཏབྦནྟི ཨཏྠོ. ཨུལློཀནྟི ཙ ཨུདྡྷཾ ཨོལོཀནཊྛཱནཾ, ཨུཔརིབྷཱགནྟི ཨཏྠོ. ཨཱལོཀསནྡྷིཀཎྞབྷཱགཱཏི ཨཱལོཀསནྡྷིབྷཱགཱ ཙ ཀཎྞབྷཱགཱ ཙ, ཨབྦྷནྟརབཱཧིརཝཱཏཔཱནཀཝཱཊཀཱནི ཙ གབྦྷསྶ ཙ ཙཏྟཱརོ ཀོཎཱ སམྨཛྫིཏབྦཱཏི ཨཏྠོ.

ཨཉྙཏྠ ནེཏབྦོཏི ཡཏྠ ཝིཧཱརཏོ སཱསནེ ཨནབྷིརཏི ཨུཔྤནྣཱ, ཏཏོ ཨཉྙཏྠ ཀལྱཱཎམིཏྟཱདིསམྤཏྟིཡུཏྟཊྛཱནེ ནེཏབྦོ. ན ཙ ཨཙྪིནྣེ ཐེཝེ པཀྐམིཏབྦནྟི རཛིཏཙཱིཝརཏོ ཡཱཝ ཨཔྤམཏྟཀམྤི རཛནཾ གལ༹ཏི, ན ཏཱཝ པཀྐམིཏབྦཾ. ན ཨུཔཛ྄ཛྷཱཡཾ ཨནཱཔུཙྪཱ ཨེཀཙྩསྶ པཏྟོ དཱཏབྦོཏིཨཱདི སབྦཾ ཨུཔཛ྄ཛྷཱཡསྶ ཝིསབྷཱགཔུགྒལཱནཾ ཝསེན ཀཐིཏཾ. ཨེཏྠ ཙ ཝིསབྷཱགཔུགྒལཱནནྟི ལཛྫིནོ ཝཱ ཨལཛྫིནོ ཝཱ ཨུཔཛ྄ཛྷཱཡསྶ ཨཝཌྜྷིཀཱམེ སནྡྷཱཡ ཝུཏྟཾ. སཙེ པན ཨུཔཛ྄ཛྷཱཡོ ཨལཛྫཱི ཨོཝཱདམྤི ན གཎྷཱཏི, ལཛྫིནོ ཙ ཨེཏསྶ ཝིསབྷཱགཱ ཧོནྟི, ཏཏྠ ཨུཔཛ྄ཛྷཱཡཾ ཝིཧཱཡ ལཛྫཱིཧེཝ སདྡྷིཾ ཨཱམིསཱདིཔརིབྷོགོ ཀཱཏབྦོ. ཨུཔཛ྄ཛྷཱཡཱདིབྷཱཝོ ཧེཏྠ ནཔྤམཱཎནྟི དཊྛབྦཾ. པརིཝེཎཾ གནྟྭཱཏི ཨུཔཛ྄ཛྷཱཡསྶ པརིཝེཎཾ གནྟྭཱ. སུསཱནནྟི ¶ ཨིདཾ ཨུཔལཀྑཎཾ. ཨུཔཙཱརསཱིམཏོ ¶ བཧི གནྟུཀཱམེན ཨནཱཔུཙྪཱ གནྟུཾ ན ཝཊྚཏི. ཝུཊྛཱནམསྶ ཨཱགམེཏབྦནྟི གེལཉྙཏོ ཝུཊྛཱནཾ ཨསྶ ཨཱགམེཏབྦཾ.

ཨུཔཛ྄ཛྷཱཡཝཏྟཀཐཱཝཎྞནཱ ནིཊྛིཏཱ.

ཨཱཙརིཡཝཏྟཀཐཱཝཎྞནཱ

༡༨༤. ཨཱཙརིཡཝཏྟཀཐཱཡཾ ཀོ ཨཱཙརིཡོ, ཀེནཊྛེན ཨཱཙརིཡོ, ཀཏིཝིདྷོ ཨཱཙརིཡོ, ཀཐཾ གཧིཏོ ཨཱཙརིཡོ, ཀེན ཝཏྟིཏབྦཾ ཨཱཙརིཡཝཏྟཾ, ཀཏམཾ ཏཾ ཝཏྟནྟི? ཏཏྠ ཀོ ཨཱཙརིཡོཏི ‘‘ཨནུཛཱནཱམི, བྷིཀྑཝེ, དསཝསྶཾ ནིསྶཱཡ ཝཏྠུཾ དསཝསྶེན ནིསྶཡཾ དཱཏུ’’ནྟིཨཱདིཝཙནཏོ (མཧཱཝ. ༧༧) བྱཏྟིབལསམྤནྣོ དསཝསྶོ ཝཱ ཨཏིརེཀདསཝསྶོ ཝཱ བྷིཀྑུ ཨཱཙརིཡོ. ཀེནཊྛེན ཨཱཙརིཡོཏི ཨནྟེཝཱསིཀེན ཨཱབྷུསོ ཙརིཏབྦོཏི ཨཱཙརིཡོ, ཨུཔཊྛཱཏབྦོཏི ཨཏྠོ. ཀཏིཝིདྷོ ཨཱཙརིཡོཏི ནིསྶཡཱཙརིཡཔབྦཛྫཱཙརིཡཨུཔསམྤདཱཙརིཡདྷམྨཱཙརིཡཝསེན ཙཏུབྦིདྷོ. ཏཏྠ ནིསྶཡཾ གཧེཏྭཱ ཏཾ ནིསྶཱཡ ཝཏྠབྦོ ནིསྶཡཱཙརིཡོ. པབྦཛིཏཀཱལེ སིཀྑིཏབྦསིཀྑཱཔཀོ པབྦཛྫཱཙརིཡོ. ཨུཔསམྤདཀཱལེ ཀམྨཝཱཙཱནུསྶཱཝཀོ ཨུཔསམྤདཱཙརིཡོ. བུདྡྷཝཙནསིཀྑཱཔཀོ དྷམྨཱཙརིཡོ ནཱམ. ཀཐཾ གཧིཏོ ཧོཏི ཨཱཙརིཡོཏི ཨནྟེཝཱསིཀེན ཨེཀཾསཾ ཨུཏྟརཱསངྒཾ ཀརིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ‘‘ཨཱཙརིཡོ མེ, བྷནྟེ, ཧོཧི, ཨཱཡསྨཏོ ནིསྶཱཡ ཝཙྪཱམཱི’’ཏི ཏིཀྑཏྟུཾ ཝུཏྟེ ཨཱཙརིཡོ ‘‘སཱཧཱུ’’ཏི ཝཱ ‘‘ལཧཱུ’’ཏི ཝཱ ‘‘ཨོཔཱཡིཀ’’ནྟི ཝཱ ‘‘པཏིརཱུཔ’’ནྟི ཝཱ ‘‘པཱསཱདིཀེན སམྤཱདེཧཱི’’ཏི ཝཱ ཀཱཡེན ཝིཉྙཱཔེཏི ¶ , ཝཱཙཱཡ ཝིཉྙཱཔེཏི, ཀཱཡཝཱཙཱཧི ཝིཉྙཱཔེཏི, གཧིཏོ ཧོཏི ཨཱཙརིཡོ.

ཀེན ཝཏྟིཏབྦཾ ཨཱཙརིཡཝཏྟནྟི ཨནྟེཝཱསིཀེན ཝཏྟིཏབྦཾ ཨཱཙརིཡཝཏྟཾ. བྱཏྟེན བྷིཀྑུནཱ པཉྩ ཝསྶཱནི ནིསྶཱཡ ཝཏྠབྦཾ, ཨབྱཏྟེན ཡཱཝཛཱིཝཾ. ཨེཏྠ སཙཱཡཾ བྷིཀྑུ ཝུཌྜྷཏརཾ ཨཱཙརིཡཾ ན ལབྷཏི, ཨུཔསམྤདཱཡ སཊྛིཝསྶོ ཝཱ སཏྟཏིཝསྶོ ཝཱ ཧོཏི, ནཝཀཏརསྶཔི བྱཏྟསྶ སནྟིཀེ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ‘‘ཨཱཙརིཡོ མེ, ཨཱཝུསོ, ཧོཧི, ཨཱཡསྨཏོ ནིསྶཱཡ ཝཙྪཱམཱི’’ཏི ཨེཝཾ ཏིཀྑཏྟུཾ ཝཏྭཱ ནིསྶཡོ གཧེཏབྦོ. གཱམཔྤཝེསནཾ ཨཱཔུཙྪནྟེནཔི ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ‘‘གཱམཔྤཝེསནཾ ཨཱཔུཙྪཱམི ¶ ཨཱཙརིཡཱ’’ཏི ཝཏྟབྦཾ. ཨེས ནཡོ སབྦཨཱཔུཙྪནེསུ. ཀཏམཾ ཏཾ ཝཏྟནྟི ཨེཏྠ ཨུཔཛ྄ཛྷཱཡཝཏྟཏོ ཨཉྙཾ ནཏྠཱིཏི ཨཱཧ ‘‘ཨིདམེཝ ཙ…པེ… ཨཱཙརིཡཝཏྟནྟི ཝུཙྩཏཱི’’ཏི. ནནུ ཨུཔཛ྄ཛྷཱཙརིཡཱ བྷིནྣཔདཏྠཱ, ཨཐ ཀསྨཱ ཨིདམེཝ ‘‘ཨཱཙརིཡཝཏྟ’’ནྟི ཝུཙྩཏཱིཏི ཨཱཧ ‘‘ཨཱཙརིཡསྶ ཀཏྟབྦཏྟཱ’’ཏི. ཡཐཱ ཨེཀོཔི བྷིཀྑུ མཱཏུབྷཱཏཱབྷཱུཏཏྟཱ ‘‘མཱཏུལོ’’ཏི ཙ དྷམྨེ སིཀྑཱཔཀཏྟཱ ‘‘ཨཱཙརིཡོ’’ཏི ཙ ཝུཙྩཏི, ཨེཝཾ ཨེཀམེཝ ཝཏྟཾ ཨུཔཛ྄ཛྷཱཡསྶ ཀཏྟབྦཏྟཱ ‘‘ཨུཔཛ྄ཛྷཱཡཝཏྟ’’ནྟི ཙ ཨཱཙརིཡསྶ ཀཏྟབྦཏྟཱ ‘‘ཨཱཙརིཡཝཏྟ’’ནྟི ཙ ཝུཙྩཏཱིཏི ཨདྷིཔྤཱཡོ. ཨེཝཾ སནྟེཔི ནཱམེ བྷིནྣེ ཨཏྠོ བྷིནྣོ སིཡཱཏི ཨཱཧ ‘‘ནཱམམཏྟམེཝ ཧེཏྠ ནཱན’’ནྟི. ཡཐཱ ‘‘ཨིནྡོ སཀྐོ’’ཏིཨཱདཱིསུ ནཱམམཏྟམེཝ བྷིནྣཾ, ན ཨཏྠོ, ཨེཝམེཏྠཱཔཱིཏི དཊྛབྦོཏི.

ཨིདཱནི ཏསྨིཾ ཝཏྟེ སདྡྷིཝིཧཱརིཀཨནྟེཝཱསིཀཱནཾ ཝསེན ལབྦྷམཱནཾ ཀཉྩི ཝིསེསཾ དསྶེནྟོ ‘‘ཏཏྠ ཡཱཝ ཙཱིཝརརཛན’’ནྟྱཱདིམཱཧ. ཏཏོ ཨུཔཛ྄ཛྷཱཡཱཙརིཡཱནཾ ཝསེན ཝིསེསཾ དསྶེཏུཾ ‘‘ཨུཔཛ྄ཛྷཱཡེ’’ཏྱཱདིམཱཧ. ཏེསུ ཝཏྟཾ སཱདིཡནྟེསུ ཨཱཔཏྟི, ཨསཱདིཡནྟེསུ ཨནཱཔཏྟི, ཏེསུ ཨཛཱནནྟེསུ ¶ , ཨེཀསྶ བྷཱརཀརཎེཔི ཨནཱཔཏྟཱིཏི ཨཡམེཏྠ པིཎྜཏྠོ. ཨིདཱནི ཨནྟེཝཱསིཀཝིསེསཝསེན ལབྦྷམཱནཝིསེསཾ དསྶེཏུམཱཧ ‘‘ཨེཏྠ ཙཱ’’ཏིཨཱདི.

ཨཱཙརིཡཝཏྟཀཐཱཝཎྞནཱ ནིཊྛིཏཱ.

སདྡྷིཝིཧཱརིཀཝཏྟཀཐཱཝཎྞནཱ

སདྡྷིཝིཧཱརིཀཝཏྟེ ཀོ སདྡྷིཝིཧཱརིཀོ, ཀེནཊྛེན སདྡྷིཝིཧཱརིཀོ, ཀེན ཝཏྟིཏབྦཾ སདྡྷིཝིཧཱརིཀཝཏྟཾ, ཀཏམཾ ཏཾ ཝཏྟནྟི? ཏཏྠ ཀོ སདྡྷིཝིཧཱརིཀོཏི ཨུཔསམྤནྣོ ཝཱ ཧོཏུ སཱམཎེརོ ཝཱ, ཡོ ཨུཔཛ྄ཛྷཾ གཎྷཱཏི, སོ སདྡྷིཝིཧཱརིཀོ ནཱམ. ཀེནཊྛེན སདྡྷིཝིཧཱརིཀོཏི ཨུཔཛ྄ཛྷཱཡེན སདྡྷིཾ ཝིཧཱརོ ཨེཏསྶ ཨཏྠཱིཏི སདྡྷིཝིཧཱརིཀོཏི ཨཏྠེན. ཀེན ཝཏྟིཏབྦཾ སདྡྷིཝིཧཱརིཀཝཏྟནྟི ཨུཔཛ྄ཛྷཱཡེན ཝཏྟིཏབྦཾ. ཏེན ཝུཏྟཾ ཝཏྟཀྑནྡྷཀེ (མཧཱཝ. ༣༧༨) ‘‘ཏེན ཧི, བྷིཀྑཝེ, ཨུཔཛ྄ཛྷཱཡཱནཾ སདྡྷིཝིཧཱརིཀེསུ ཝཏྟཾ པཉྙཔེསྶཱམི, ཡཐཱ ཨུཔཛ྄ཛྷཱཡེཧི སདྡྷིཝིཧཱརིཀེསུ ཝཏྟིཏབྦ’’ནྟི. ཀཏམཾ ཏཾ ཝཏྟནྟི ཨིདཱནི པཀརཎཱགཏཾ. ཨིམསྨིཾ པན པཀརཎེ ¶ སངྑེཔརུཙིཏྟཱ, ཨཱཙརིཡསདྡྷིཝིཧཱརིཀཨནྟེཝཱསིཀཝཏྟཱནཉྩ སམཱནཏྟཱ དྭེཔི ཨེཀཏོ ཝུཏྟཱ, ཏཐཱཔི ཝཏྟཀྑནྡྷཀེ ཝིསུཾ ཝིསུཾ ཨཱགཏཏྟཱ ཝིསུཾ ཝིསུཾཡེཝ ཀཐཡཱམ.

སངྒཧེཏབྦོ ཨནུགྒཧེཏབྦོཏི ཨུདྡེསཱདཱིཧིསྶ སངྒཧོ ཙ ཨནུགྒཧོ ཙ ཀཱཏབྦོ. ཏཏྠ ཨུདྡེསོཏི པཱལི༹ཝཙནཾ. པརིཔུཙྪཱཏི པཱལི༹ཡཱ ཨཏྠཝཎྞནཱ. ཨོཝཱདོཏི ཨནོཏིཎྞེ ཝཏྠུསྨིཾ ‘‘ཨིདཾ ཀརོཧི, ཨིདཾ མཱ ཀརིཏྠཱ’’ཏི ཝཙནཾ. ཨནུསཱསནཱིཏི ཨོཏིཎྞེ ཝཏྠུསྨིཾ. ཨཔིཙ ཨོཏིཎྞེ ཝཱ ཨནོཏིཎྞེ ཝཱ པཋམཾ ཝཙནཾ ཨོཝཱདོ, པུནཔྤུནཾ ཝཙནཾ ཨནུསཱསནཱིཏི ¶ དཊྛབྦཾ. སཙེ ཨུཔཛ྄ཛྷཱཡསྶ པཏྟོ ཧོཏཱིཏི སཙེ ཨཏིརེཀཔཏྟོ ཧོཏི. ཨེས ནཡོ སབྦཏྠ. པརིཀྑཱརོཏི ཨཉྙོཔི སམཎཔརིཀྑཱརོ. ཨིདྷ ཨུསྶུཀྐཾ ནཱམ དྷམྨིཡེན ནཡེན ཨུཔྤཛྫམཱནཨུཔཱཡཔརིཡེསནཾ. ཨིཏོ པརཾ དནྟཀཊྛདཱནཾ ཨཱདིཾ ཀཏྭཱ ཨཱཙམནཀུམྦྷིཡཱ ཨུདཀསིཉྩནཔརིཡོསཱནཾ ཝཏྟཾ གིལཱནསྶེཝ སདྡྷིཝིཧཱརིཀསྶ ཀཱཏབྦཾ. ཨནབྷིརཏིཝཱུཔཀཱསནཱདི པན ཨགིལཱནསྶཔི ཀཏྟབྦམེཝ. ཙཱིཝརཾ རཛནྟེནཱཏི ‘‘ཨེཝཾ རཛེཡྻཱསཱི’’ཏི ཨུཔཛ྄ཛྷཱཡཏོ ཨུཔཱཡཾ སུཏྭཱ རཛནྟེན. སེསཾ ཝུཏྟནཡེནེཝ ཝེདིཏབྦཾ. སངྒཧེཏབྦོ ཨནུགྒཧེཏབྦོཏིཨཱདཱིསུ ཨནཱདརིཡཾ པཊིཙྩ དྷམྨཱམིསེཧི ཨསངྒཎྷནྟཱནཾ ཨཱཙརིཡུཔཛ྄ཛྷཱཡཱནཾ དུཀྐཊཾ ཝཏྟབྷེདཏྟཱ. ཏེནེཝ པརིཝཱརེཔི (པརི. ༣༢༢) ‘‘ན དེནྟོ ཨཱཔཛྫཏཱི’’ཏི ཝུཏྟཾ. སེསཾ སུཝིཉྙེཡྻམེཝ.

སདྡྷིཝིཧཱརིཀཝཏྟཀཐཱཝཎྞནཱ ནིཊྛིཏཱ.

ཨནྟེཝཱསིཀཝཏྟཀཐཱཝཎྞནཱ

ཨནྟེཝཱསིཀཝཏྟེ ཀོ ཨནྟེཝཱསིཀོ, ཀེནཊྛེན ཨནྟེཝཱསིཀོ, ཀཏིཝིདྷཱ ཨནྟེཝཱསིཀཱ, ཀེན ཝཏྟིཏབྦཾ ཨནྟེཝཱསིཀཝཏྟཾ, ཀཏམཾ ཏཾ ཝཏྟནྟི? ཏཏྠ ཀོ ཨནྟེཝཱསིཀོཏི ཨུཔསམྤནྣོ ཝཱ ཧོཏུ སཱམཎེརོ ཝཱ, ཡོ ཨཱཙརིཡསྶ སནྟིཀེ ནིསྶཡཾ གཎྷཱཏི, ཡོ ཝཱ ཨཱཙརིཡསྶ ཨོཝཱདཾ གཧེཏྭཱ པབྦཛཏི, ཡོ ཝཱ ཏེནཱནུསྶཱཝིཏོ ཧུཏྭཱ ཨུཔསམྤཛྫཏི, ཡོ ཝཱ ཏསྶ སནྟིཀེ དྷམྨཾ པརིཡཱཔུཎཱཏི, སོ སབྦོ ཨནྟེཝཱསིཀོཏི ཝེདིཏབྦོ. ཏཏྠ པཋམོ ནིསྶཡནྟེཝཱསིཀོ ནཱམ, དུཏིཡོ ¶ པབྦཛྫནྟེཝཱསིཀོ ནཱམ, ཏཏིཡོ ཨུཔསམྤདནྟེཝཱསིཀོ ནཱམ, ཙཏུཏྠོ དྷམྨནྟེཝཱསིཀོ ནཱམ. ཨཉྙཏྠ པན སིཔྤནྟེཝཱསིཀོཔི ཨཱགཏོ, སོ ཨིདྷ ནཱདྷིཔྤེཏོ ¶ . ཀེནཊྛེན ཨནྟེཝཱསིཀོཏི ཨནྟེ ཝསཏཱིཏི ཨནྟེཝཱསིཀོ ཨལུཏྟསམཱསཝསེན. ཀཏིཝིདྷཱ ཨནྟེཝཱསིཀཱཏི ཡཐཱཝུཏྟནཡེན ཙཏུབྦིདྷཱ ཨནྟེཝཱསིཀཱ.

ཀེན ཝཏྟིཏབྦཾ ཨནྟེཝཱསིཀཝཏྟནྟི ཙཏུབྦིདྷེཧི ཨཱཙརིཡེཧི ཨནྟེཝཱསིཀེསུ ཝཏྟིཏབྦཾ. ཡཐཱཧ ཝཏྟཀྑནྡྷཀེ (ཙཱུལ༹ཝ. ༣༨༢) ‘‘ཏེན ཧི, བྷིཀྑཝེ, ཨཱཙརིཡཱནཾ ཨནྟེཝཱསིཀེསུ ཝཏྟཾ པཉྙཔེསྶཱམི, ཡཐཱ ཨཱཙརིཡེཧི ཨནྟེཝཱསིཀེསུ ཝཏྟིཏབྦ’’ནྟི. ཀཏམཾ ཏཾ ཝཏྟནྟི ཡཾ བྷགཝཏཱ ཝཏྟཀྑནྡྷཀེ ཝུཏྟཾ, ཨིདྷ ཙ སངྑེཔེན དསྶིཏཾ, ཏཾ ཝཏྟནྟི. ཨིདྷ པན ཨཏྠོ སདྡྷིཝིཧཱརིཀཝཏྟེ ཝུཏྟནཡེནེཝ ཝེདིཏབྦོ. ཨཡཾ པན ཝིསེསོ – ཨེཏེསུ པབྦཛྫནྟེཝཱསིཀོ ཙ ཨུཔསམྤདནྟེཝཱསིཀོ ཙ ཨཱཙརིཡསྶ ཡཱཝཛཱིཝཾ བྷཱརོ, ནིསྶཡནྟེཝཱསིཀོ ཙ དྷམྨནྟེཝཱསིཀོ ཙ ཡཱཝ སམཱིཔེ ཝསནྟི, ཏཱཝདེཝ, ཏསྨཱ ཨཱཙརིཡེཧིཔི ཏེསུ སམྨཱ ཝཏྟིཏབྦཾ. ཨཱཙརིཡནྟེཝཱསིཀེསུ ཧི ཡོ ཡོ ན སམྨཱ ཝཏྟཏི, ཏསྶ ཏསྶ ཨཱཔཏྟི ཝེདིཏབྦཱ.

ཨནྟེཝཱསིཀཝཏྟཀཐཱཝཎྞནཱ ནིཊྛིཏཱ.

ཨཱགནྟུཀཝཏྟཀཐཱཝཎྞནཱ

༡༨༥. ཨཱགནྟུཀཝཏྟེ ཨཱགཙྪཏཱིཏི ཨཱགནྟུཀོ, ཏེན ཝཏྟིཏབྦནྟི ཨཱགནྟུཀཝཏྟཾ. ‘‘ཨིདཱནི ཨཱརཱམཾ པཝིསིསྶཱམཱི’’ཏི ཨིམིནཱ ཨུཔཙཱརསཱིམཱསམཱིཔཾ དསྶེཏི, ཏསྨཱ ཨུཔཙཱརསཱིམཱསམཱིཔཾ པཏྭཱ ཨུཔཱཧནཱཨོམུཉྩནཱདི སབྦཾ ཀཱཏབྦཾ. གཧེཏྭཱཏི ¶ ཨུཔཱཧནདཎྜཀེན གཧེཏྭཱ. ཨུཔཱཧནཔུཉྪནཙོལ༹ཀཾ པུཙྪིཏྭཱ ཨུཔཱཧནཱ པུཉྪིཏབྦཱཏི ‘‘ཀཏརསྨིཾ ཋཱནེ ཨུཔཱཧནཔུཉྪནཙོལ༹ཀ’’ནྟི ཨཱཝཱསིཀེ བྷིཀྑཱུ པུཙྪིཏྭཱ. པཏྠརིཏབྦནྟི སུཀྑཱཔནཏྠཱཡ ཨཱཏཔེ པཏྠརིཏབྦཾ. སཙེ ནཝཀོ ཧོཏི, ཨབྷིཝཱདཱཔེཏབྦོཏི ཏསྶ ཝསྶེ པུཙྪིཏེ ཡདི དཧརོ ཧོཏི, སཡམེཝ ཝནྡིསྶཏི, ཏདཱ ཨིམིནཱ ཝནྡཱཔིཏོ ཧོཏི. ནིལློཀེཏབྦོཏི ཨོལོཀེཏབྦོ. བཧི ཋིཏེནཱཏི བཧི ནིཀྑམནྟསྶ ཨཧིནོ ཝཱ ཨམནུསྶསྶ ཝཱ མགྒཾ ཋཏྭཱ ཋིཏེན ནིལློཀེཏབྦོ. སེསཾ པུབྦེ ཝུཏྟནཡེནེཝ ཝེདིཏབྦཾ.

ཨཱགནྟུཀཝཏྟཀཐཱཝཎྞནཱ ནིཊྛིཏཱ.

ཨཱཝཱསིཀཝཏྟཀཐཱཝཎྞནཱ

༡༨༦. ཨཱཝཱསིཀཝཏྟེ ¶ ཨཱཝསཏཱིཏི ཨཱཝཱསིཀོ, ཏེན ཝཏྟིཏབྦནྟི ཨཱཝཱསིཀཝཏྟཾ. ཏཏྠ ཨཱཝཱསིཀེན བྷིཀྑུནཱ ཨཱགནྟུཀཾ བྷིཀྑུཾ ཝུཌྜྷཏརཾ དིསྭཱ ཨཱསནཾ པཉྙཔེཏབྦནྟིཨཱདི པཱལི༹ཡཾ (ཙཱུལ༹ཝ. ༣༥༩) ཨཱགཏཉྩ ཨཊྛཀཐཱཡཾ ཨཱགཏཉྩ (ཙཱུལ༹ཝ. ཨཊྛ. ༣༥༩) གཧེཏབྦཾ, གཧེཏྭཱ ཝུཏྟཏྟཱ པཱཀཊམེཝ, ཨུཔཱཧནཔུཉྪནཾ པན ཨཏྟནོ རུཙིཝསེན ཀཱཏབྦཾ. ཏེནེཝ ཧེཏྠ ‘‘སཙེ ཨུསྶཧཏཱི’’ཏི ཝུཏྟཾ, ཏསྨཱ ཨུཔཱཧནཱ ཨཔུཉྪནྟསྶཔི ཨནཱཔཏྟི. སེནཱསནཾ པཉྙཔེཏབྦནྟི ཨེཏྠ ‘‘ཀཏྠ མཡ྄ཧཾ སེནཱསནཾ པཱཔུཎཱཏཱི’’ཏི པུཙྪིཏེན སེནཱསནཾ པཉྙཔེཏབྦཾ, ‘‘ཨེཏཾ སེནཱསནཾ ཏུམྷཱཀཾ པཱཔུཎཱཏཱི’’ཏི ཨེཝཾ ཨཱཙིཀྑིཏབྦནྟི ཨཏྠོ. པཔྥོཊེཏྭཱ པཏྠརིཏུཾ པན ཝཊྚཏིཡེཝ. ཨེཏེན མཉྩཔཱིཋཱདིཾ པཔྥོཊེཏྭཱ པཏྠརིཏྭཱ ཨུཔརི པཙྩཏྠརཎཾ དཏྭཱ དཱནམྤི སེནཱསནཔཉྙཱཔནམེཝཱཏི དསྶེཏི. མཧཱཨཱཝཱསེཔི ཨཏྟནོ ¶ སནྟིཀཾ སམྤཏྟསྶ ཨཱགནྟུཀསྶ ཝཏྟཾ ཨཀཱཏུཾ ན ལབྦྷཏི. སེསཾ པུརིམསདིསམེཝ.

ཨཱཝཱསིཀཝཏྟཀཐཱཝཎྞནཱ ནིཊྛིཏཱ.

གམིཀཝཏྟཀཐཱཝཎྞནཱ

༡༨༧. གམིཀཝཏྟེ གནྟུཾ བྷབྦོཏི གམིཀོ, ཏེན ཝཏྟིཏབྦནྟི གམིཀཝཏྟཾ. ཏཏྲཱཡཾ ཨནུཏྟཱནཔདཝཎྞནཱ – དཱརུབྷཎྜནྟི སེནཱསནཀྑནྡྷཀེ (ཙཱུལ༹ཝ. ༣༢༢) ཝུཏྟཾ མཉྩཔཱིཋཱདི. མཏྟིཀཱབྷཎྜམྤི རཛནབྷཱཛནཱདི སབྦཾ ཏཏྠ ཝུཏྟཔྤབྷེདམེཝ. ཏཾ སབྦཾ ཨགྒིསཱལཱཡཾ ཝཱ ཨཉྙཏརསྨིཾ ཝཱ གུཏྟཊྛཱནེ པཊིསཱམེཏྭཱ གནྟབྦཾ, ཨནོཝསྶཀེ པབྦྷཱརེཔི ཋཔེཏུཾ ཝཊྚཏི. སེནཱསནཾ ཨཱཔུཙྪིཏྭཱ པཀྐམིཏབྦནྟི ཨེཏྠ ཡཾ པཱསཱཎཔིཊྛིཡཾ ཝཱ པཱསཱཎཏྠམྦྷེསུ ཝཱ ཀཏསེནཱསནཾ, ཡཏྠ ཨུཔཙིཀཱ ནཱརོཧནྟི, ཏཾ ཨནཱཔུཙྪནྟསྶཔི ཨནཱཔཏྟི. ཙཏཱུསུ པཱསཱཎེསཱུཏིཨཱདི ཨུཔཙིཀཱནཾ ཨུཔྤཏྟིཊྛཱནེ པཎྞསཱལཱདིསེནཱསནེ ཀཏྟབྦཱཀཱརདསྶནཏྠཾ ཝུཏྟཾ. ཨཔྤེཝ ནཱམ ཨངྒཱནིཔི སེསེཡྻུནྟི ཨཡཾ ཨཛ྄ཛྷོཀཱསེ ཋཔིཏམྷི ཨཱནིསཾསོ. ཨོཝསྶཀགེཧེ པན ཏིཎེསུ ཙ མཏྟིཀཱཔིཎྜེསུ ཙ ཨུཔརི པཏནྟེསུ མཉྩཔཱིཋཱནཾ ཨངྒཱནིཔི ཝིནསྶནྟི.

གམིཀཝཏྟཀཐཱཝཎྞནཱ ནིཊྛིཏཱ.

བྷཏྟགྒཝཏྟཀཐཱཝཎྞནཱ

༡༨༨. ཝཏྟཀྑནྡྷཀེ ¶ ཨིམསྨིཾ ཋཱནེ ཨནུམོདནཝཏྟཾ ཨཱགཏཾ, ཏཏོ བྷཏྟགྒཝཏྟཾ. སཱརཏྠདཱིཔནིཡཉྩ (སཱརཏྠ. ཊཱི. ཙཱུལ༹ཝགྒ ༣.༣༧༣-༣༧༤) ‘‘ཨིམསྨིཾ ཝཏྟཀྑནྡྷཀེ ¶ (ཙཱུལ༹ཝ. ༣༥༦) ཨཱགཏཱནི ཨཱགནྟུཀཱཝཱསིཀགམིཡཱནུམོདནབྷཏྟགྒཔིཎྜཙཱརིཀཱརཉྙིཀསེནཱསནཛནྟཱགྷརཝཙྩཀུཊིཨུཔཛ྄ཛྷཱཡཱཙརིཡསདྡྷིཝིཧཱརིཀཨནྟེཝཱསིཀཝཏྟཱནི ཙུདྡས མཧཱཝཏྟཱནི ནཱམཱ’’ཏི ཨནུཀྐམོ ཝུཏྟོ, ཨིདྷ པན ཝིནཡསངྒཧཔྤཀརཎེ གམིཀཝཏྟཏོ བྷཏྟགྒཝཏྟཾ ཨཱགཏཾ, ཨནུམོདནཝཏྟཾ པན ཝིསུཾ ཨཝཏྭཱ བྷཏྟགྒཝཏྟེཡེཝ ཨནྟོགདྷཾ ཀཏྭཱ པཙྪཱ ཝུཏྟཾ བྷཏྟགྒཾ གནྟྭཱ བྷཏྟེ བྷུཏྟེཡེཝ ཨནུམོདནཱཀརཎཏོ, པཱལི༹ཡཉྩ ཨཉྙེསུ ཝཏྟེསུ ཝིཡ ‘‘ཏེན ཧི, བྷིཀྑཝེ, བྷིཀྑུནཱ ཨནུམོདནཝཏྟཾ པཉྙཱཔེསྶཱམཱི’’ཏི ཝིསུཾ ཝཏྟབྷཱཝེན ཨནཱགཏཏྟཱ བྷཏྟགྒཝཏྟེཡེཝ ཨནྟོགདྷནྟི ཨཱཙརིཡསྶ ཨདྷིཔྤཱཡོ སིཡཱ. ཨིམསྶ ཙ ཝིནཡཱལངྐཱརཔཀརཎསྶ ཏསྶཱ ཝཎྞནཱབྷཱུཏཏྟཱ སཾཝཎྞེཏབྦཀྐམེནེཝ སཾཝཎྞནཾ ཀཐཡིསྶཱམ.

བྷུཉྫིཏབྦནྟི བྷཏྟཾ. ཨཛཏི གཙྪཏི པཝཏྟཏི ཨེཏྠཱཏི ཨགྒཾ. ‘‘ཨཱདིཀོཊྛཱསཀོཊཱིསུ, པུརཏོགྒཾ ཝརེ ཏཱིསཱུ’’ཏི ཨབྷིདྷཱནཔྤདཱིཔིཀཱཡཾ ཨཱགཏེཔི ‘‘རཱཛགྒནྟི རཱཛཱརཧཾ, སལཱཀགྒནྟི སལཱཀགྒཧཎཊྛཱན’’ནྟིཨཱདཱིསུ ཨཉྙཏྠེསུཔི པཝཏྟནཏོ བྷཏྟསྶ ཨགྒཾ བྷཏྟགྒཾ, བྷཏྟཔརིཝིསནཊྛཱནཾ, བྷཏྟགྒེ ཝཏྟིཏབྦཾ ཝཏྟཾ བྷཏྟགྒཝཏྟནྟི ཝིགྒཧོ. ཏཏྠ ཨཱརཱམེ ཀཱལོ ཨཱརོཙིཏོ ཧོཏཱིཏི ‘‘ཀཱལོ བྷནྟེ, ནིཊྛིཏཾ བྷཏྟ’’ནྟི ཨཱརོཙིཏོ ཧོཏི. ཏིམཎྜལཾ པཊིཙྪཱདེནྟེནཱཏི དྭེ ཛཱཎུམཎྜལཱནི ནཱབྷིམཎྜལཉྩ པཊིཙྪཱདེནྟེན. པརིམཎྜལཾ ནིཝཱསེཏྭཱཏི སམནྟཏོ མཎྜལཾ ནིཝཱསེཏྭཱ. ཨུདྡྷཾ ནཱབྷིམཎྜལཾ, ཨདྷོ ཛཱཎུམཎྜལཾ པཊིཙྪཱདེནྟེན ཛཱཎུམཎྜལསྶ ཧེཊྛཱ ཛངྒྷཊྛིཏོ པཊྛཱཡ ཨཊྛངྒུལམཏྟཾ ནིཝཱསནཾ ཨོཏཱརེཏྭཱ ནིཝཱསེཏབྦཾ, ཏཏོ པརཾ ཨོཏཱརེནྟསྶ དུཀྐཊནྟི ཝུཏྟཾ, ཡཐཱནིསིནྣསྶ ཛཱཎུམཎྜལཏོ ཧེཊྛཱ ཙཏུརངྒུལམཏྟཾ པཊིཙྪནྣཾ ཧོཏཱིཏི མཧཱཔཙྩརིཡཾ ¶ ཝུཏྟཾ. ཀཱཡབནྡྷནཾ བནྡྷིཏྭཱཏི ཏསྶ ནིཝཱསནསྶ ཨུཔརི ཀཱཡབནྡྷནཾ བནྡྷིཏྭཱ ‘‘ན, བྷིཀྑཝེ, ཨཀཱཡབནྡྷནེན གཱམོ པཝིསིཏབྦོ, ཡོ པཝིསེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༢༧༨) ཝུཏྟཏྟཱ. སགུཎཾ ཀཏྭཱཏི ཨིདཾ ཨུཔཛ྄ཛྷཱཡཝཏྟེ ཝུཏྟམེཝ. ‘‘གཎྛིཀཾ པཊིམུཉྩིཏྭཱཏི པཱསཀེ གཎྛིཀཾ པཝེསེཏྭཱ ཨནྟོགཱམོ ཝཱ ཧོཏུ ཝིཧཱརོ ཝཱ, མནུསྶཱནཾ པརིཝིསནཊྛཱནཾ གཙྪནྟེན ཙཱིཝརཾ པཱརུཔིཏྭཱ ཀཱཡབནྡྷནཾ བནྡྷིཏྭཱ གམནམེཝ ཝཊྚཏཱི’’ཏི ¶ མཧཱཨཊྛཀཐཱསུ ཝུཏྟཾ. ཨེཏྠ ཙ མནུསྶཱནཾ པརིཝིསནཊྛཱནནྟི ཡཏྠ ཨནྟོཝིཧཱརེཔི མནུསྶཱ སཔུཏྟདཱརཱ ཨཱཝསིཏྭཱ བྷིཀྑཱུ ནེཏྭཱ བྷོཛེནྟི.

སུཔྤཊིཙྪནྣེནཱཏི ན སསཱིསཾ པཱརུཏེན, ཨཐ ཁོ གཎྛིཀཾ པཊིམུཉྩིཏྭཱ ཨནུཝཱཏནྟེན གཱིཝཾ པཊིཙྪཱདེཏྭཱ ཨུབྷོ ཀཎྞེ སམཾ ཀཏྭཱ པཊིསཾཧརིཏྭཱ ཡཱཝ མཎིབནྡྷཱ པཊིཙྪཱདེནྟེན. སུསཾཝུཏེནཱཏི ཧཏྠཾ ཝཱ པཱདཾ ཝཱ ཨཀཱིལཱ༹པེནྟེན, སུཝིནཱིཏེནཱཏི ཨཏྠོ. ཨོཀྑིཏྟཙཀྑུནཱཏི ཧེཊྛཱཁིཏྟཙཀྑུནཱ. ཡོ ཨནཱདརིཡཾ པཊིཙྩ ཏཧཾ ཏཧཾ ཨོལོཀེནྟོ བྷིཡྻོ ཏཾ ཏཾ དིསཱབྷཱགཾ པཱསཱདཾ ཀཱུཊཱགཱརཾ ཝཱིཐིཾ ཨོལོཀེནྟོ གཙྪཏི, ཨཱཔཏྟི དུཀྐཊསྶ. ཨེཀསྨིཾ པན ཋཱནེ ཋཏྭཱ ཧཏྠིཨསྶཱདིཔརིསྶཡཱབྷཱཝཾ ཨོལོཀེཏུཾ ཝཊྚཏི. ཨཔྤསདྡེནཱཏི ཨེཏྠ ཀིཏྟཱཝཏཱ ཨཔྤསདྡོ ཧོཏི? དྭཱདསཧཏྠེ གེཧེ ཨཱདིམྷི སངྒྷཏྠེརོ མཛ྄ཛྷེ དུཏིཡཏྠེརོ ཨནྟེ ཏཏིཡཏྠེརོཏི ཨེཝཾ ནིསིནྣེསུ སངྒྷཏྠེརོ དུཏིཡེན སདྡྷིཾ མནྟེཏི, དུཏིཡཏྠེརོ ཏསྶ སདྡཉྩེཝ སུཎཱཏི, ཀཐཉྩ ཝཝཏྠཔེཏི, ཏཏིཡཏྠེརོ པན སདྡམེཝ སུཎཱཏི, ཀཐཾ ན ཝཝཏྠཔེཏི, ཨེཏྟཱཝཏཱ ཨཔྤསདྡོ ཧོཏི. སཙེ པན ཏཏིཡཏྠེརོ ཀཐཾ ཝཝཏྠཔེཏི, མཧཱསདྡོ ནཱམ ཧོཏི.

ན ¶ ཨུཀྑིཏྟཀཱཡཱཏི ན ཨུཀྑེཔེན, ཨིཏྠམྦྷཱུཏལཀྑཎེ ཀརཎཝཙནཾ, ཨེཀཏོ ཝཱ ཨུབྷཏོ ཝཱ ཨུཀྑིཏྟཙཱིཝརོ ཧུཏྭཱཏི ཨཏྠོ. ཨནྟོཨིནྡཁཱིལཏོ པཊྛཱཡ ན ཨེཝཾ གནྟབྦཾ. ནིསིནྣཀཱལེ པན དྷམཀརཎཾ ནཱིཧརནྟེནཔི ཙཱིཝརཾ ཨནུཀྑིཔིཏྭཱཝ ནཱིཧརིཏབྦཾ. ན ཨུཛྫགྒྷིཀཱཡཱཏི ན མཧཱཧསིཏཾ ཧསནྟོ, ཝུཏྟནཡེནེཝེཏྠ ཀརཎཝཙནཾ. ན ཀཱཡཔྤཙཱལཀནྟི ཀཱཡཾ ཨཙཱལེཏྭཱ ཀཱཡཾ པགྒཧེཏྭཱ ནིཙྩལཾ ཀཏྭཱ ཨུཛུཀེན ཀཱཡེན སམེན ཨིརིཡཱཔཐེན. ན བཱཧུཔྤཙཱལཀནྟི བཱཧུཾ ཨཙཱལེཏྭཱ བཱཧུཾ པགྒཧེཏྭཱ ནིཙྩལཾ ཀཏྭཱ. ན སཱིསཔྤཙཱལཀནྟི སཱིསཾ ཨཙཱལེཏྭཱ སཱིསཾ པགྒཧེཏྭཱ ནིཙྩལཾ ཨུཛུཾ ཋཔེཏྭཱ. ན ཁམྦྷཀཏོཏི ཁམྦྷཀཏོ ནཱམ ཀཊིཡཾ ཧཏྠཾ ཋཔེཏྭཱ ཀཏཁམྦྷོ. ན ཨུཀྐུཊིཀཱཡཱཏི ཨེཏྠ ཨུཀྐུཊིཀཱ ཝུཙྩཏི པཎྷིཡོ ཨུཀྑིཔིཏྭཱ ཨགྒཔཱདེཧི ཝཱ ཨགྒཔཱདེ ཨུཀྑིཔིཏྭཱ པཎྷེཧིཡེཝ ཝཱ བྷཱུམིཾ ཕུསནྟསྶ གམནཾ. ཀརཎཝཙནཾ པནེཏྠ ཝུཏྟལཀྑཎམེཝ. ན ཨོགུཎྛིཏེནཱཏི སསཱིསཾ པཱརུཏེན. ན པལླཏྠིཀཱཡཱཏི ན དུསྶཔལླཏྠིཀཱཡ. ཨེཏྠ ཨཱཡོགཔལླཏྠིཀཱཔི དུསྶཔལླཏྠིཀཱ ཨེཝ. ན ཐེརེ བྷིཀྑཱུ ཨནུཔཁཛྫཱཏི ཐེརེ བྷིཀྑཱུ ཨཏིཨལླཱིཡིཏྭཱ ན ནིསཱིདིཏབྦཾ. ན སངྒྷཱཊིཾ ཨོཏྠརིཏྭཱཏི ན སངྒྷཱཊིཾ ཨཏྠརིཏྭཱ ནིསཱིདིཏབྦཾ.

སཀྐཙྩནྟི ¶ སཏིཾ ཨུཔཊྛཱཔེཏྭཱ. པཏྟསཉྙཱིཏི པཏྟེ སཉྙཾ ཀཏྭཱ. སམསཱུཔཀོ ནཱམ ཡཏྠ བྷཏྟསྶ ཙཏུཏྠབྷཱགཔྤམཱཎོ སཱུཔོ ཧོཏི. སམཏིཏྠིཀནྟི སམཔུཎྞཾ སམབྷརིཏཾ. ཐཱུཔཱིཀཏཾ པིཎྜཔཱཏཾ པཊིགྒཎྷཱཏི, ཨཱཔཏྟི དུཀྐཊསྶཱཏི ཨེཏྠ ཐཱུཔཱིཀཏོ ནཱམ པཏྟསྶ ཨནྟོམུཁཝཊྚིལེཁཾ ཨཏིཀྐམིཏྭཱ ཀཏོ, པཏྟེ པཀྑིཏྟོ བྷརིཏོ པཱུརིཏོཏི ཨཏྠོ. ཨེཝཾ ཀཏཾ ཨགྒཧེཏྭཱ ཨནྟོམུཁཝཊྚིལེཁཱསམཔྤམཱཎོ གཧེཏབྦོ. ‘‘ཡཾ ཀཉྩི ཡཱགུཾ ཝཱ བྷཏྟཾ ཝཱ ཕལཱཕལཾ ཝཱ ཨཱམིསཛཱཏིཀཾ སམཏིཏྠིཀམེཝ གཧེཏབྦཾ, ཏཉྩ ཁོ ཨདྷིཊྛཱནུཔགེན ¶ པཏྟེན, ཨིཏརེན པན ཐཱུཔཱིཀཏམྤི ཝཊྚཏི. ཡཱམཀཱལིཀསཏྟཱཧཀཱལིཀཡཱཝཛཱིཝིཀཱནི པན ཨདྷིཊྛཱནུཔགཔཏྟེ ཐཱུཔཱིཀཏཱནིཔི ཝཊྚནྟི. ཡཾ པན དྭཱིསུ པཏྟེསུ བྷཏྟཾ གཧེཏྭཱ ཨེཀསྨིཾ པཱུརེཏྭཱ ཝིཧཱརཾ པེསེཏུཾ ཝཊྚཏཱི’’ཏི མཧཱཔཙྩརིཡཾ ཝུཏྟཾ. ཡཾ པཏྟེ པཀྑིཔིཡམཱནཾ པཱུཝཨུཙྪུཁཎྜཕལཱཕལཱདི ཧེཊྛཱ ཨོརོཧཏི, ཏཾ ཐཱུཔཱིཀཏཾ ནཱམ ན ཧོཏི. པཱུཝཝཊཾསཀཾ ཋཔེཏྭཱ པིཎྜཔཱཏཾ དེནྟི, ཐཱུཔཱིཀཏམེཝ ཧོཏི. པུཔྥཝཊཾསཀཏཀྐོལཀཊུཀཕལཱདིཝཊཾསཀེ པན ཋཔེཏྭཱ དིནྣཾ ཐཱུཔཱིཀཏཾ ན ཧོཏི. བྷཏྟསྶ ཨུཔརི ཐཱལཀཾ ཝཱ པཏྟཾ ཝཱ ཋཔེཏྭཱ པཱུརེཏྭཱ གཎྷཱཏི, ཐཱུཔཱིཀཏཾ ནཱམ ན ཧོཏི. ཀུརུནྡིཡམྤི ཝུཏྟཾ ‘‘ཐཱལཀེ ཝཱ པཏྟེ ཝཱ པཀྑིཔིཏྭཱ ཏཾ པཏྟམཏྠཀེ ཋཔེཏྭཱ དེནྟི, པཱཊེཀྐབྷཱཛནཾ ཝཊྚཏི. ཨིདྷ ཨནཱཔཏྟིཡཾ གིལཱནོ ན ཨཱགཏོ, ཏསྨཱ གིལཱནསྶཔི ཐཱུཔཱིཀཏཾ ན ཝཊྚཏི, སབྦཏྠ པན པཊིགྒཧེཏུམེཝ ན ཝཊྚཏི, པཊིགྒཧིཏཾ པན བྷུཉྫིཏུཾ ཝཊྚཏཱི’’ཏི.

‘‘སཀྐཙྩ’’ནྟི ཙ ‘‘པཏྟསཉྙཱི’’ཏི ཙ ཨུབྷཡཾ ཝུཏྟནཡམེཝ. སཔདཱནནྟི ཏཏྠ ཏཏྠ ཨོདྷིཾ ཨཀཏྭཱ ཨནུཔཊིཔཱཊིཡཱ. སམསཱུཔཀེ ཝཏྟབྦཾ ཝུཏྟམེཝ. ཐཱུཔཀཏོཏི མཏྠཀཏོ, ཝེམཛ྄ཛྷཏོཏི ཨཏྠོ. ན སཱུཔཾ ཝཱ བྱཉྫནཾ ཝཱཏིཨཱདི པཱཀཊམེཝ. ཝིཉྙཏྟིཡཾ ཝཏྟབྦཾ ནཏྠི. ཨུཛ྄ཛྷཱནསཉྙཱིསིཀྑཱཔདེཔི གིལཱནོ ན མུཉྩཏི. ནཱཏིམཧནྟོ ཀབལོ༹ཏི མཡཱུརཎྜཾ ཨཏིམཧནྟཾ, ཀུཀྐུཊཎྜཾ ཨཏིཁུདྡཀཾ, ཏེསཾ ཝེམཛ྄ཛྷཔྤམཱཎོ. པརིམཎྜལཾ ཨཱལོཔོཏི ནཱཏིདཱིགྷོ ཨཱལོཔོ. ཨནཱཧཊེཏི ཨནཱཧརིཏེ, མུཁདྭཱརཾ ཨསམྤཱཔིཏེཏི ཨཏྠོ. སབྦོ ཧཏྠོཏི ཨེཏྠ ཧཏྠསདྡོ ཏདེཀདེསེསུ ཨངྒུལཱིསུ དཊྛབྦོ ‘‘ཧཏྠམུདྡོ’’ཏིཨཱདཱིསུ ཝིཡ སམུདཱཡེ པཝཏྟཝོཧཱརསྶ ཨཝཡཝེ པཝཏྟནཏོ. ཨེཀངྒུལིམྤི མུཁེ པཀྑིཔིཏུཾ ན ཝཊྚཏི. ན སཀབལེ༹ནཱཏི ཨེཏྠ དྷམྨཾ ཀཐེནྟོ ཧརཱིཏཀཾ ཝཱ ལཊྛིམདྷུཀཾ ཝཱ ¶ མུཁེ པཀྑིཔིཏྭཱ ཀཐེཏི, ཡཏྟཀེན ཝཙནཾ པརིཔུཎྞཾ ཧོཏི, ཏཏྟཀེ མུཁམྷི སནྟེ ཀཐེཏུཾ ཝཊྚཏི.

པིཎྜུཀྑེཔཀནྟི པིཎྜཾ ཨུཀྑིཔིཏྭཱ ཨུཀྑིཔིཏྭཱ. ཀབལཱ༹ཝཙྪེདཀནྟི ཀབལ༹ཾ ཨཝཚིནྡིཏྭཱ ¶ ཨཝཚིནྡིཏྭཱ. ཨཝགཎྜཀཱརཀནྟི མཀྐཊོ ཝིཡ གཎྜེ ཀཏྭཱ ཀཏྭཱ. ཧཏྠནིདྡྷུནཀནྟི ཧཏྠཾ ནིདྡྷུནིཏྭཱ ནིདྡྷུནིཏྭཱ. སིཏྠཱཝཀཱརཀནྟི སིཏྠཱནི ཨཝཀིརིཏྭཱ ཨཝཀིརིཏྭཱ. ཛིཝ྄ཧཱནིཙྪཱརཀནྟི ཛིཝ྄ཧཾ ནིཙྪཱརེཏྭཱ ནིཙྪཱརེཏྭཱ. ཙཔུཙཔུཀཱརཀནྟི ‘‘ཙཔུཙཔཱུ’’ཏི ཨེཝཾ སདྡཾ ཀཏྭཱ ཀཏྭཱ. སུརུསུརུཀཱརཀནྟི ‘‘སུརུསུརཱུ’’ཏི ཨེཝཾ སདྡཾ ཀཏྭཱ ཀཏྭཱ. ཧཏྠནིལླེཧཀནྟི ཧཏྠཾ ནིལླེཧིཏྭཱ ནིལླེཧིཏྭཱ. བྷུཉྫནྟེན ཧི ཨངྒུལིམཏྟམྤི ནིལླེཧིཏུཾ ན ཝཊྚཏི, གྷནཡཱགུཕཱཎིཏཔཱཡཱསཱདིཀེ པན ཨངྒུལཱིཧི གཧེཏྭཱ ཨངྒུལིཡོ མུཁེ པཝེསེཏྭཱ བྷུཉྫིཏུཾ ཝཊྚཏི. པཏྟནིལླེཧཀཨོཊྛནིལླེཧཀེསུཔི ཨེསེཝ ནཡོ, ཏསྨཱ ཨངྒུལིཡཱཔི པཏྟོ ན ནིལླེཧིཏབྦོ, ཨེཀཨོཊྛོཔི ཛིཝ྄ཧཱཡ ན ནིལླེཧིཏབྦོ, ཨོཊྛམཾསེཧི ཨེཝ པན གཧེཏྭཱ ཨནྟོ པཝེསེཏུཾ ཝཊྚཏི.

ན སཱམིསེན ཧཏྠེན པཱནཱིཡཐཱལཀོཏི ཨེཏཾ པཊིཀཱུལཝསེན པཊིཀྑིཏྟཾ, ཏསྨཱ སངྒྷིཀམྤི པུགྒལིཀམྤི གིཧིསནྟཀམྤི ཨཏྟནོ སནྟཀམྤི སངྑམྤི སརཱཝམྤི ཨཱམིསམཀྑིཏཾ ན གཧེཏབྦམེཝ, གཎྷནྟསྶ དུཀྐཊཾ. སཙེ པན ཧཏྠསྶ ཨེཀདེསོ ཨཱམིསམཀྑིཏོ ན ཧོཏི, ཏེན པདེསེན གཧེཏུཾ ཝཊྚཏི. ན སསིཏྠཀཾ པཏྟདྷོཝནཾ ཨནྟརགྷརེ ཚཌྜེཏབྦནྟི ཨེཏྠ ཨུདྡྷརིཏྭཱ ཝཱཏི སིཏྠཱནི ཨེཀཏོ ཨུདྡྷརིཏྭཱ ཨེཀསྨིཾ ཋཱནེ རཱསིཾ ཀཏྭཱ ཨུདཀཾ ཚཌྜེཏི. བྷིནྡིཏྭཱ ཝཱ ཨུདཀགཏིཀཱནི ཀཏྭཱ ཚཌྜེཏི, པཊིགྒཧེན སམྤཊིཙྪནྟོ ནཾ པཊིགྒཧེ ཚཌྜེཏི, བཧི ནཱིཧརིཏྭཱ ཝཱ ཚཌྜེཏི, ཨེཝཾ ཚཌྜེནྟསྶ ཨནཱཔཏྟི. ན ཏཱཝ ཐེརེན ཨུདཀནྟི ཨིདཾ ཧཏྠདྷོཝནཨུདཀཾ སནྡྷཱཡ ཝུཏྟཾ. ཨནྟརཱ པིཔཱསིཏེན ¶ , པན གལེ ཝིལགྒཱམིསེན ཝཱ པཱནཱིཡཾ པིཝིཏྭཱ ན དྷོཝིཏབྦཱཏི.

བྷཏྟགྒཝཏྟཀཐཱཝཎྞནཱ ནིཊྛིཏཱ.

ཨནུམོདནཝཏྟཀཐཱཝཎྞནཱ

ཨནུམོདནཝཏྟེ ཨནུ པུནཔྤུནཾ མོདིཡཏེ པམོདིཡཏེཏི ཨནུམོདནཱ. ཀཱ སཱ? དྷམྨཀཐཱ. ཨནུམོདནཱཡ ཀཏྟབྦཾ ཝཏྟཾ ཨནུམོདནཝཏྟཾ. པཉྩམེ ནིསིནྣེཏི ཨནུམོདནཏྠཱཡ ནིསིནྣེ. ཨུཔནིསིནྣཀཐཱ ནཱམ བཧཱུསུ སནྣིཔཏིཏེསུ པརིཀཐཱཀཐནཾ. སེསཾ སུཝིཉྙེཡྻམེཝ.

ཨནུམོདནཝཏྟཀཐཱཝཎྞནཱ ནིཊྛིཏཱ.

པིཎྜཙཱརིཀཝཏྟཀཐཱཝཎྞནཱ

༡༨༩. པིཎྜཙཱརིཀཝཏྟེ ¶ པིཎྜིཏབྦོ སངྒྷརིཏབྦོཏི པིཎྜོ, པིཎྜཔཱཏོ. པིཎྜཱཡ ཙརཎཾ སཱིལམསྶཱཏི པིཎྜཙཱརཱི, སོ ཨེཝ པིཎྜཙཱརིཀོ སཀཏྠེ ཀཔཙྩཡཝསེན. པིཎྜཙཱརིཀེན ཝཏྟིཏབྦཾ ཝཏྟཾ པིཎྜཙཱརིཀཝཏྟཾ. ཏཏྲཱཡམནུཏྟཱནཔདཝཎྞནཱ – ནིཝེསནཾ ནཱམ ཨིཏྠིཀུམཱརིཀཱདཱིནཾ ཝསནཊྛཱནཾ. ཡསྨཱ པཝིསནནིཀྑམནདྭཱརཾ ཨསལླཀྑེཏྭཱ སཧསཱ པཝིསནྟོ ཝིསབྷཱགཱརམྨཎཾ ཝཱ པསྶེཡྻ, པརིསྶཡོ ཝཱ བྷཝེཡྻ, ཏསྨཱ ‘‘ནིཝེསནཾ…པེ… པཝིསིཏབྦ’’ནྟི ཝུཏྟཾ. ཨཏིདཱུརེ ཏིཊྛནྟོ ཨཔསྶནྟོ ཝཱ བྷཝེཡྻ, ‘‘ཨཉྙསྶ གེཧེ ཏིཊྛཏཱི’’ཏི ཝཱ མཉྙེཡྻ. ཨཙྩཱསནྣེ ཏིཊྛནྟོ ཨཔསྶིཏབྦཾ ཝཱ པསྶེཡྻ, ཨསུཎིཏབྦཾ ཝཱ སུཎེཡྻ, ཏེན མནུསྶཱནཾ ཨགཱརཝོ ཝཱ ཨཔྤསཱདོ ཝཱ བྷཝེཡྻ, ཏསྨཱ ‘‘ནཱཏིདཱུརེ ནཱཙྩཱསནྣེ ཋཱཏབྦ’’ནྟི ཝུཏྟཾ. ཨཏིཙིརཾ ཏིཊྛནྟོ ཨདཱཏུཀཱམཱནཾ ¶ མནོཔདོསོ བྷཝེཡྻ, ཨཉྙཏྠ བྷིཀྑཱ ཙ པརིཀྑཡེཡྻ, ཨཏིལཧུཀཾ ནིཝཏྟནྟོ དཱཏུཀཱམཱནཾ པུཉྙཧཱནི ཙ བྷཝེཡྻ, བྷིཀྑུནོ ཙ བྷིཀྑཱཡ ཨསམྤཛྫནཾ, ཏསྨཱ ‘‘ནཱཏིཙིརཾ ཋཱཏབྦཾ, ནཱཏིལཧུཀཾ ནིཝཏྟིཏབྦཾ, ཋིཏེན སལླཀྑེཏབྦ’’ནྟི ཝུཏྟཾ. སལླཀྑཎཱཀཱརཾ དསྶེཏི ‘‘སཙེ ཀམྨཾ ཝཱ ནིཀྑིཔཏཱི’’ཏིཨཱདིནཱ. ཏཏྠ ཀམྨཾ ཝཱ ནིཀྑིཔཏཱིཏི ཀཔྤཱསཾ ཝཱ སུཔྤཾ ཝཱ མུསལཾ ཝཱ ཡཉྩ གཧེཏྭཱ ཀམྨཾ ཀརོནྟི, ཋིཏཱ ཝཱ ནིསིནྣཱ ཝཱ ཧོནྟི, ཏཾ ནིཀྑིཔཏི. པརཱམསཏཱིཏི གཎྷཱཏི. ཋཔེཏི ཝཱཏི ‘‘ཏིཊྛཐ བྷནྟེ’’ཏི ཝདནྟཱི ཋཔེཏི ནཱམ. ཨཝཀྐཱརཔཱཏཱིཏི ཨཏིརེཀཔིཎྜཔཱཏཾ ཨཔནེཏྭཱ ཋཔནཏྠཱཡ ཨེཀཱ སམུགྒཔཱཏི. ཨེཏྠ ཙ སམུགྒཔཱཏི ནཱམ སམུགྒཔུཊསདིསཱ པཱཏི. སེསཾ ཝུཏྟནཡམེཝ.

པིཎྜཙཱརིཀཝཏྟཀཐཱཝཎྞནཱ ནིཊྛིཏཱ.

ཨཱརཉྙིཀཝཏྟཀཐཱཝཎྞནཱ

༡༩༠. ཨཱརཉྙིཀཝཏྟེ ན རམནྟི ཛནཱ ཨེཏྠཱཏི ཨརཉྙཾ. ཝུཏྟཉྷི –

‘‘རམཎཱིཡཱནི ཨརཉྙཱནི, ཡཏྠ ན རམཏཱི ཛནོ;

ཝཱིཏརཱགཱ རམིསྶནྟི, ན ཏེ ཀཱམགཝེསིནོ’’ཏི. (དྷ. པ. ༩༩);

ཨརཉྙེ ¶ ཝསཏཱིཏི ཨཱརཉྙིཀོ, ཏེན ཝཏྟིཏབྦཾ ཝཏྟཾ ཨཱརཉྙིཀཝཏྟཾ. ཏཏྲཱཡཾ ཝིསེསཔདཱནམཏྠོ – ཀཱལསྶེཝ ཨུཊྛཱཡཱཏི ཨརཉྙསེནཱསནསྶ གཱམཏོ དཱུརཏྟཱ ཝུཏྟཾ, ཏེནེཝ ཀཱརཎེན ‘‘པཏྟཾ གཧེཏྭཱ ཙཱིཝརཾ པཱརུཔིཏྭཱ གཙྪནྟོ པརིསྶམོ ཧོཏཱི’’ཏི ཝུཏྟཾ. པཏྟཾ ཐཝིཀཱཡ པཀྑིཔིཏྭཱ ཨཾསེ ལགྒེཏྭཱ ཙཱིཝརཾ ཁནྡྷེ ཀརིཏྭཱ ཨརཉྙམགྒོ ན དུསྶོདྷནོ ཧོཏི, ཏསྨཱ ཀཎྚཀསརཱིསཔཱདིཔརིསྶཡཝིམོཙནཏྠཾ ཨུཔཱཧནཱ ཨཱརོཧིཏྭཱ. ཨརཉྙཾ ནཱམ ¶ ཡསྨཱ ཙོརཱདཱིནཾ ཝིཙརཊྛཱནཾ ཧོཏི, ཏསྨཱ ‘‘དཱརུབྷཎྜཾ མཏྟིཀཱབྷཎྜཾ པཊིསཱམེཏྭཱ དྭཱརཝཱཏཔཱནཾ ཐཀེཏྭཱ ཝསནཊྛཱནཏོ ནིཀྑམིཏབྦ’’ནྟི ཝུཏྟཾ. ཨིཏོ པརཱནི བྷཏྟགྒཝཏྟཔིཎྜཙཱརིཀཝཏྟེསུ ཝུཏྟསདིསཱནེཝ. གཱམཏོ ནིཀྑམིཏྭཱ སཙེ བཧིགཱམེ ཨུདཀཾ ནཏྠི, ཨནྟོགཱམེཡེཝ བྷཏྟཀིཙྩཾ ཀཏྭཱ, ཨཐ བཧིགཱམེ ཨཏྠི, བྷཏྟཀིཙྩཾ ཀཏྭཱ པཏྟཾ དྷོཝིཏྭཱ ཝོདཀཾ ཀཏྭཱ ཐཝིཀཱཡ པཀྑིཔིཏྭཱ ཙཱིཝརཾ སངྒྷརིཏྭཱ ཨཾསེ ཀརིཏྭཱ ཨུཔཱཧནཱ ཨཱརོཧིཏྭཱ གནྟབྦཾ.

བྷཱཛནཾ ཨལབྷནྟེནཱཏིཨཱདི ཨརཉྙསེནཱསནསྶ དུལླབྷདབྦསམྦྷཱརཏྟཱ ཝུཏྟཾ, ཨགྒི ཨུཔཊྛཱཔེཏབྦོཏིཨཱདི ཝཱལ༹མིགསརཱིསཔཱདིབཱཧིརཔརིསྶཡཀཱལེ ཙ ཝཱཏཔིཏྟཱདིཨཛ྄ཛྷཏྟཔཨསྶཡཀཱལེ ཙ ཨིཙྪིཏབྦཏྟཱ. བཧཱུནཾ པན ཝསནཊྛཱནེ ཏཱདིསཱནི སུལབྷཱནི ཧོནྟཱིཏི ཨཱཧ ‘‘གཎཝཱསིནོ པན ཏེན ཝིནཱཔི ཝཊྚཏཱི’’ཏི. ཀཏྟརདཎྜོ ནཱམ པརིསྶཡཝིནོདནོ ཧོཏི, ཏསྨཱ ཨརཉྙེ ཝིཧརནྟེན ཨཝསྶཾ ཨིཙྪིཏབྦོཏི ཝུཏྟཾ ‘‘ཀཏྟརདཎྜོ ཨུཔཊྛཱཔེཏབྦོ’’ཏི. ནཀྑཏྟཱནེཝ ནཀྑཏྟཔདཱནི. ཙོརཱདཱིསུ ཨཱགནྟྭཱ ‘‘ཨཛྫ, བྷནྟེ, ཀེན ནཀྑཏྟེན ཙནྡོ ཡུཏྟོ’’ཏི པུཙྪིཏེསུ ‘‘ན ཛཱནཱམཱ’’ཏི ཝུཏྟེ ཀུཛ྄ཛྷནྟི, ཏསྨཱ ཝུཏྟཾ ‘‘ནཀྑཏྟཔདཱནི ཨུགྒཧེཏབྦཱནི སཀལཱནི ཝཱ ཨེཀདེསཱནི ཝཱ’’ཏི, ཏཐཱ དིསཱམཱུལ༹ྷེསུ ‘‘ཀཏམཱཡཾ, བྷནྟེ, དིསཱ’’ཏི པུཙྪིཏེསུ, ཏསྨཱ ‘‘དིསཱཀུསལེན བྷཝིཏབྦ’’ནྟི.

ཨཱརཉྙིཀཝཏྟཀཐཱཝཎྞནཱ ནིཊྛིཏཱ.

སེནཱསནཝཏྟཀཐཱཝཎྞནཱ

༡༩༡. སེནཱསནཝཏྟེ སཡནྟི ཨེཏྠཱཏི སེནཾ, སཡནནྟི ཨཏྠོ. ཨཱཝསནྟི ཨེཏྠཱཏི ཨཱསནཾ. སེནཉྩ ཨཱསནཉྩ སེནཱསནཾ. སེནཱསནེསུ ཀཏྟབྦཾ ཝཏྟཾ སེནཱསནཝཏྟཾ ¶ . ཨིདྷ པན ཡཾ ཝཏྟབྦཾ, ཏཾ ཨུཔཛ྄ཛྷཱཡཝཏྟཀཐཱཡཾ (ཝི. སངྒ. ཨཊྛ. ༡༨༣ ) ཝུཏྟམེཝ. ཏཏྠ པན ཨུཔཛ྄ཛྷཱཡེན ཝུཏྠཝིཧཱརོ ཝུཏྟོ, ཨིདྷ པན ཨཏྟནཱ ཝུཏྠཝིཧཱརོཏི ཨཡམེཝ ཝིསེསོ. ན ཝུཌྜྷཾ ཨནཱཔུཙྪཱཏི ¶ ཨེཏྠ ཏསྶ ཨོཝརཀེ ཏདུཔཙཱརེ ཙ ཨཱཔུཙྪིཏབྦནྟི ཝདནྟི. བྷོཛནསཱལཱདཱིསུཔི ཨེཝམེཝ པཊིཔཛྫིཏབྦནྟི བྷོཛནསཱལཱདཱིསུཔི ཨུདྡེསདཱནཱདི ཨཱཔུཙྪིཏྭཱཝ ཀཱཏབྦནྟི ཨཏྠོ.

སེནཱསནཝཏྟཀཐཱཝཎྞནཱ ནིཊྛིཏཱ.

ཛནྟཱགྷརཝཏྟཀཐཱཝཎྞནཱ

༡༩༢. ཛནྟཱགྷརཝཏྟེ ཛཱཡཏཱིཏི ཛཾ, ཀིཾ ཏཾ? སརཱིརཾ. ཛཾ ཏཱཡཏི རཀྑཏཱིཏི ཛནྟཱ, ཀཱ སཱ? ཏིཀིཙྪཱ. གཡ྄ཧཏེཏི གྷརཾ, ཀིཾ ཏཾ? ནིཝེསནཾ, ཛནྟཱཡ སརཱིརཏིཀིཙྪཱཡ ཀཏཾ གྷརཾ ཛནྟཱགྷརཾ, ཛནྟཱགྷརེ ཀཏྟབྦཾ ཝཏྟཾ ཛནྟཱགྷརཝཏྟཾ. ཏཏྠ པརིབྷཎྜནྟི བཧིཛགཏི. སེསཾ ཨུཔཛ྄ཛྷཱཡཝཏྟེ ཝུཏྟནཡཏྟཱ སུཝིཉྙེཡྻམེཝ.

ཛནྟཱགྷརཝཏྟཀཐཱཝཎྞནཱ ནིཊྛིཏཱ.

ཝཙྩཀུཊིཝཏྟཀཐཱཝཎྞནཱ

༡༩༣. ཝཙྩཀུཊིཝཏྟེ ཝཙྩཡཏེ ཨཱུཧདཡཏེཏི ཝཙྩཾ, ཀརཱིསཾ. ཀུཊཱིཡཏི ཚིནྡཱིཡཏི ཨཱཏཔོ ཨེཏཱཡཱཏི ཀུཊི, ཝཙྩཏྠཱཡ ཀཏཱ ཀུཊི ཝཙྩཀུཊི, ཝཙྩཀུཊིཡཱ ཝཏྟིཏབྦཾ ཝཏྟཾ ཝཙྩཀུཊིཝཏྟཾ, ཨིདྷ ཙ ཝཏྟཀྑནྡྷཀེ ཨཱཙམནཝཏྟཾ པཋམཾ ཨཱགཏཾ, པཙྪཱ ཝཙྩཀུཊིཝཏྟཾ. ཨིམསྨིཾ པན པཀརཎེ པཋམཾ ཝཙྩཾ ཀཏྭཱ པཙྪཱ ཨཱཙམཏཱིཏི ¶ ཨདྷིཔྤཱཡེན ཝཙྩཀུཊིཝཏྟཾ པཋམཾ ཨཱགཏཾ, ཏསྨཱ ཏདནུཀྐམེན ཀཐཡིསྶཱམ. དནྟཀཊྛཾ ཁཱདནྟེནཱཏི ཨཡཾ ཝཙྩཀུཊིཡཱཔི སབྦཏྠེཝ པཊིཀྑེཔོ. ནིབདྡྷགམནཏྠཱཡཱཏི ཨཏྟནཱ ནིབདྡྷགམནཏྠཱཡ. པུགྒལིཀཊྛཱནཾ ཝཱཏི ཨཏྟནོ ཝིཧཱརཾ སནྡྷཱཡ ཝུཏྟཾ. སེསཾ སུཝིཉྙེཡྻམེཝཱཏི.

ཝཙྩཀུཊིཝཏྟཀཐཱཝཎྞནཱ ནིཊྛིཏཱ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཨུཔཛ྄ཛྷཱཡཝཏྟཱདིཝཏྟཝིནིཙྪཡཀཐཱལངྐཱརོ ནཱམ

སཏྟཝཱིསཏིམོ པརིཙྪེདོ.

༢༨. ཙཏུཔཙྩཡབྷཱཛནཱིཡཝིནིཙྪཡཀཐཱ

ཙཱིཝརབྷཱཛནཀཐཱཝཎྞནཱ

༡༩༤. ཨེཝཾ ¶ ཨུཔཛ྄ཛྷཱཡཱདིཝཏྟསངྑཱཏཱནི ཙུདྡས ཁནྡྷཀཝཏྟཱནི ཀཐེཏྭཱ ཨིདཱནི ཙཏུནྣཾ པཙྩཡཱནཾ བྷཱཛནཾ ཀཐེནྟོ ‘‘ཙཏུཔཙྩཡབྷཱཛན’’ནྟིཨཱདིམཱཧ. ཏཏྠ ཙཏཱུཏི སངྑྱཱསབྦནཱམཔདཾ. པཊིཙྩ ཨེཏི སཱིཏཔཊིགྷཱཏཱདིཀཾ ཕལཾ ཨེཏསྨཱཏི པཙྩཡོ, ཙཱིཝརཱདི, པཙྩཡོ ཙ པཙྩཡོ ཙ པཙྩཡཱ, ཙཏྟཱརོ པཙྩཡཱ ཙཏུཔཙྩཡཾ, བྷཱཛཱིཡཏེ ཝིབྷཱཛཱིཡཏེ བྷཱཛནཾ. ཙཏུཔཙྩཡསྶ བྷཱཛནཾ ཙཏུཔཙྩཡབྷཱཛནཾ. ཏེནཱཧ ‘‘ཙཱིཝརཱདཱིནཾ ཙཏུནྣཾ པཙྩཡཱནཾ བྷཱཛན’’ནྟི. ཏཏྠ ཏསྨིཾ ཙཏུཔཙྩཡབྷཱཛནེ སམབྷིནིཝིཊྛེ ཙཱིཝརབྷཱཛནེ ཏཱཝ པཋམཾ ཙཱིཝརཔཊིགྒཱཧཀོ…པེ… ཝེདིཏབྦོ. ཀསྨཱ? སངྒྷིཀཙཱིཝརསྶ དུཀྐརབྷཱཛནཏྟཱཏི སམྦནྡྷོ. ཏཏྠ ཨཱགཏཱགཏཾ ཙཱིཝརཾ པཊིགྒཎྷཱཏི, པཊིགྒཧཎམཏྟམེཝསྶ བྷཱརོཏི ཙཱིཝརཔཊིགྒཱཧཀོ. ཙཱིཝརཔཊིགྒཱཧཀེན པཊིགྒཧིཏཾ ཙཱིཝརཾ ནིདཧཏི, ནིདཧནམཏྟམེཝསྶ བྷཱརོཏི ཙཱིཝརནིདཧཀོ. བྷཎྜཱགཱརེ ནིཡུཏྟོ བྷཎྜཱགཱརིཀོ. ཙཱིཝརཱདིཀསྶ བྷཎྜསྶ ཋཔནཊྛཱནབྷཱུཏཾ ཨགཱརཾ བྷཎྜཱགཱརཾ. ཙཱིཝརཾ བྷཱཛེཏི བྷཱགཾ ཀརོཏཱིཏི ¶ ཙཱིཝརབྷཱཛཀོ. ཙཱིཝརསྶ བྷཱཛནཾ ཝིབྷཱགཀརཎཾ ཙཱིཝརབྷཱཛནཾ, ཝིབྷཛནཀིརིཡཱ.

ཏཏྠ ‘‘ཙཱིཝརཔཊིགྒཱཧཀོ ཝེདིཏབྦོ’’ཏི ཝུཏྟོ, སོ ཀུཏོ ལབྦྷཏེཏི ཨཱཧ ‘‘པཉྩཧངྒེཧི…པེ… སམྨནྣིཏབྦོ’’ཏི. ཀཐཾ ཝིཉྙཱཡཏཱིཏི ཨཱཧ ‘‘ཨནུཛཱནཱམི…པེ… ཝཙནཏོ’’ཏི. ཚནྡནཾ ཚནྡོ, ཨིཙྪནཾ པིཧནནྟི ཨཏྠོ. གམནཾ ཀརཎཾ གཏི, ཀིརིཡཱ. གཱརེཡ྄ཧཱ གཏི ཨགཏི, ཚནྡེན ཨགཏི ཚནྡཱགཏི. སེསེསུཔི ཨེསེཝ ནཡོ. ཀཐཾ ཚནྡཱགཏིཾ གཙྪཏཱིཏི ཨཱཧ ‘‘ཏཏྠ པཙྪཱ ཨཱགཏཱནམྤཱི’’ཏིཨཱདི. ཨེཝམིཏརེསུཔི. པཉྩམངྒཾ པན སཏིསམྤཛཉྙཡུཏྟཱབྷཱཝཾ དསྶེཏི. སུཀྐཔཀྑེཔི ཨིཏོ པཊིཔཀྑཝསེན ཝེདིཏབྦོ. ཏེནཱཧ ‘‘ཏསྨཱ’’ཏིཨཱདི.

ཨིམཱཡ ཀམྨཝཱཙཱཡ ཝཱ ཨཔལོཀནེན ཝཱཏི ཨིདཾ ཨིམསྶ སམྨུཏིཀམྨསྶ ལཧུཀཀམྨཏྟཱ ཝུཏྟཾ. ཏཐཱ ཧི ཝུཏྟཾ པརིཝཱརཊྛཀཐཱཡཾ (པརི. ཨཊྛ. ༤༨༢) ‘‘ཨཝསེསཱ ཏེརས སམྨུཏིཡོ སེནཱསནགྒཱཧམཏཀཙཱིཝརདཱནཱདིསམྨུཏིཡོ ཙཱཏི ཨེཏཱནི ལཧུཀཀམྨཱནི ཨཔལོཀེཏྭཱཔི ཀཱཏུཾ ཝཊྚནྟཱི’’ཏི. ཨནྟོཝིཧཱརེ སབྦསངྒྷམཛ྄ཛྷེཔི ཁཎྜསཱིམཱཡམྤི སམྨནྣིཏུཾ ཝཊྚཏཱིཏི ཨེཏྠ ཨནྟོཝིཧཱརེཏི ¶ བདྡྷསཱིམཝིཧཱརཾ སནྡྷཱཡ ཝུཏྟཾ. ན ཧི ཨབདྡྷསཱིམཝིཧཱརེ ཨཔལོཀནཱདིཙཏུབྦིདྷཀམྨཾ ཀཱཏུཾ ཝཊྚཏི དུབྦིསོདྷནཏྟཱ. དྷུརཝིཧཱརཊྛཱནེཏི ཝིཧཱརདྭཱརསྶ སམྨུཁཊྛཱནེ.

༡༩༧. བྷཎྜཱགཱརསམྨུཏིཡཾ ཝིཧཱརམཛ྄ཛྷེཡེཝཱཏི ཨཝིཔྤཝཱསསཱིམཱསངྑཱཏམཧཱསཱིམཱ ཝིཧཱརསྶ མཛ྄ཛྷེཡེཝ སམྨནྣིཏབྦཱ. ཨིམསྨིཾ པན ཋཱནེ ཨིམཾ པན བྷཎྜཱགཱརཾ ཁཎྜསཱིམཾ གནྟྭཱ ཁཎྜསཱིམཱཡཾ ནིསིནྣེཧི སམྨནྣིཏུཾ ན ཝཊྚཏི, ཝིཧཱརམཛ྄ཛྷེཡེཝ ‘‘སུཎཱཏུ མེ, བྷནྟེ, སངྒྷོ, ཡདི སངྒྷསྶ པཏྟཀལླཾ, སངྒྷོ ¶ ཨིཏྠནྣཱམཾ ཝིཧཱརཾ བྷཎྜཱགཱརཾ སམྨནྣེཡྻཱ’’ཏིཨཱདིནཱ ནཡེན ‘‘ཀམྨཝཱཙཱཡ ཝཱ ཨཔལོཀནེན ཝཱ སམྨནྣིཏབྦ’’ནྟི ཝཙནཾ ནིསྶཱཡ ཉཏྟིདུཏིཡཀམྨཾ ཨུཔཙཱརསཱིམཱཡཾ ཀཱཏུཾ ཝཊྚཏཱིཏི གཧེཏྭཱ ཀཐིནདཱནཀམྨམྤི ཨབདྡྷསཱིམཱབྷཱུཏེ ཝིཧཱརེ ཨུཔཙཱརསཱིམཱཡཾ ཀརོནྟི, ཨེཀཙྩེ ཉཏྟིཀམྨམྤི ཏཐེཝ གཧེཏྭཱ ཨབདྡྷསཱིམཝིཧཱརེ ཨུཔཙཱརསཱིམཱམཏྟེཡེཝ ཨུཔོསཐཔཝཱརཎཾ ཀརོནྟི, ཏདཡུཏྟཾ, ཀཱརཎཾ པནེཏྠ ཀཐིནཝིནིཙྪཡཀཐཱཡཾ (ཝི. སངྒ. ཨཊྛ. ༢༢༦) ཨཱཝི བྷཝིསྶཏི.

༡༩༨. ཏུལཱབྷཱུཏོཏི ཏུལཱསདིསོ. ཨིདནྟི སཱམཎེརཱནཾ ཨུཔཌྜྷཔཊིཝཱིསདཱནཾ. ཨིམཾ ཀིར པཱཋཾ ཨམནསིཀརོནྟཱ ཨིདཱནི ཀཱལཙཱིཝརམྤི སཱམཎེརཱནཾ ཨུཔཌྜྷཔཊིཝཱིསཾ དེནྟི. ཕཱཏིཀམྨནྟི པཧོནཀཀམྨཾ, ཡཏྟཀེན ཝིནཡཱགཏེན སམྨུཉྫནཱིབནྡྷནཱདིཧཏྠཀམྨེན ཝིཧཱརསྶ ཨཱུནཏཱ ན ཧོཏི, ཏཏྟཀཾ ཀཏྭཱཏི ཨཏྠོ. སབྦེསནྟི ཏཏྲུཔྤཱདཝསྶཱཝཱསིཀཾ གཎྷནྟཱནཾ སབྦེསཾ བྷིཀྑཱུནཾ སཱམཎེརཱནཉྩ. བྷཎྜཱགཱརཙཱིཝརེཔཱིཏི ཨཀཱལཙཱིཝརཾ སནྡྷཱཡ ཝུཏྟཾ. ཨུཀྐུཊྛིཾ ཀརོནྟཱིཏི མཧཱསདྡཾ ཀརོནྟི. ཨེཏནྟི ཨུཀྐུཊྛིཡཱ ཀཏཱཡ སམབྷཱགདཱནཾ. ཝིརཛ྄ཛྷིཏྭཱ ཀརོནྟཱིཏི ཀཏྟབྦཀཱལེསུ ཨཀཏྭཱ ཡཐཱརུཙིཏཀྑཎེ ཀརོནྟི. སམཔཊིཝཱིསོ དཱཏབྦོཏི ཀརིསྶཱམཱཏི ཡཱཙནྟཱནཾ པཊིཉྙཱམཏྟེནཔི སམཀོ ཀོཊྛཱསོ དཱཏབྦོ.

ཨཏིརེཀབྷཱགེནཱཏི དས བྷིཀྑཱུ ཧོནྟི, སཱཊཀཱཔི དསེཝ, ཏེསུ ཨེཀོ དྭཱདས ཨགྒྷཏི, སེསཱ དསགྒྷནཀཱ. སབྦེསུ དསགྒྷནཀཝསེན ཀུསེ པཱཏིཏེ ཡསྶ བྷིཀྑུནོ དྭཱདསགྒྷནཀོ ཀུསོ པཱཏིཏོ, སོ ‘‘ཨེཏྟཀེན མམ ཙཱིཝརཾ པཧོཏཱི’’ཏི ཏེན ཨཏིརེཀབྷཱགེན གནྟུཀཱམོ ཧོཏི. ཨེཏྠ ཙ ཨེཏྟཀེན མམ ཙཱིཝརཾ པཧོཏཱིཏི དྭཱདསགྒྷནཀེན མམ ཙཱིཝརཾ པརིཔུཎྞཾ ཧོཏི, ན ཏཏོ ཨཱུནེནཱཏི སབྦཾ གཧེཏུཀཱམོཏི ¶ ཨཏྠོ. བྷིཀྑཱུ ‘‘ཨཏིརེཀཾ ཨཱཝུསོ སངྒྷསྶ སནྟཀ’’ནྟི ཝདནྟི, ཏཾ སུཏྭཱ བྷགཝཱ ‘‘སངྒྷིཀེ ཙ གཎསནྟཀེ ཙ ཨཔྤཀཾ ནཱམ ནཏྠི, སབྦཏྠ ¶ སཾཡམོ ཀཱཏབྦོ, གཎྷནྟེནཔི ཀུཀྐུཙྩཱཡིཏབྦ’’ནྟི དསྶེཏུཾ ‘‘ཨནུཛཱནཱམི, བྷིཀྑཝེ, ཨནུཀྑེཔེ དིནྣེ’’ཏི ཨཱཧ. ཏཏྠ ཨནུཀྑེཔོ ནཱམ ཡཾ ཀིཉྩི ཨནུཀྑིཔིཏབྦཾ ཨནུཔྤདཱཏབྦཾ ཀཔྤིཡབྷཎྜཾ, ཡཏྟཀཾ ཏསྶ པཊིཝཱིསེ ཨདྷིཀཾ, ཏཏྟཀེ ཨགྒྷནཀེ ཡསྨིཾ ཀིསྨིཉྩི ཀཔྤིཡབྷཎྜེ དིནྣེཏི ཨཏྠོཏི ཨིམམཏྠཾ སངྑེཔེན དསྶེཏུཾ ‘‘སཙེ དས བྷིཀྑཱུ ཧོནྟི’’ཏྱཱདི ཝུཏྟཾ.

ཝིཀལཀེ ཏོསེཏྭཱཏི ཨེཏྠ ཙཱིཝརཝིཀལཀཾ པུགྒལཝིཀལཀནྟི དྭེ ཝིཀལཀཱ. ཏཏྠ ཙཱིཝརཝིཀལཀཾ ནཱམ སབྦེསཾ པཉྩ པཉྩ ཝཏྠཱནི པཏྟཱནི, སེསཱནིཔི ཨཏྠི, ཨེཀེཀཾ པན ན པཱཔུཎཱཏི, ཚིནྡིཏྭཱ དཱཏབྦཱནི. ཚིནྡནྟེཧི ཙ ཨཌྜྷམཎྜལཱདཱིནཾ ཝཱ ཨུཔཱཧནཐཝིཀཱདཱིནཾ ཝཱ པཧོནཀཱནི ཁཎྜཱནི ཀཏྭཱ དཱཏབྦཱནི, ཧེཊྛིམཔརིཙྪེདེན ཙཏུརངྒུལཝིཏྠཱརམྤི ཨནུཝཱཏཔྤཧོནཀཱཡཱམཾ ཁཎྜཾ ཀཏྭཱ དཱཏུཾ ཝཊྚཏི. ཨཔརིབྷོགཾ པན ན ཀཱཏབྦནྟི ཨེཝམེཏྠ ཙཱིཝརསྶ ཨཔྤཧོནཀབྷཱཝོ ཙཱིཝརཝིཀལཀཾ. ཚིནྡིཏྭཱ དིནྣེ པནེཏཾ ཏོསིཏཾ ཧོཏི. ཨཐ ཀུསཔཱཏོ ཀཱཏབྦོ, སཙེཔི ཨེཀསྶ བྷིཀྑུནོ ཀོཊྛཱསེ ཨེཀཾ ཝཱ དྭེ ཝཱ ཝཏྠཱནི ནཔྤཧོནྟི, ཏཏྠ ཨཉྙཾ སཱམཎཀཾ པརིཀྑཱརཾ ཋཔེཏྭཱ ཡོ ཏེན ཏུསྶཏི, ཏསྶ ཏཾ བྷཱགཾ དཏྭཱ པཙྪཱ ཀུསཔཱཏོ ཀཱཏབྦོ. ཨིདམྤི ཙཱིཝརཝིཀལཀནྟི ཨནྡྷཊྛཀཐཱཡཾ ཝུཏྟཾ.

པུགྒལཝིཀལཀཾ ནཱམ དས དས བྷིཀྑཱུ གཎེཏྭཱ ཝགྒཾ ཀརོནྟཱནཾ ཨེཀོ ཝགྒོ ན པཱུརཏི, ཨཊྛ ཝཱ ནཝ ཝཱ ཧོནྟི, ཏེསཾ ཨཊྛ ཝཱ ནཝ ཝཱ ཀོཊྛཱསཱ ‘‘ཏུམྷེ ཨིམེ གཧེཏྭཱ ཝིསུཾ བྷཱཛེཐཱ’’ཏི དཱཏབྦཱ. ཨེཝམཡཾ པུགྒལཱནཾ ཨཔྤཧོནཀབྷཱཝོ པུགྒལཝིཀལཀཾ ནཱམ. ཝིསུཾ དིནྣེ པན ཏཾ ཏོསིཏཾ ¶ ཧོཏི, ཨེཝཾ ཏོསེཏྭཱ ཀུསཔཱཏོ ཀཱཏབྦོཏི. ཨཐ ཝཱ ཝིཀལཀེ ཏོསེཏྭཱཏི ཡོ ཙཱིཝརཝིབྷཱགོ ཨཱུནཀོ, ཏཾ ཨཉྙེན པརིཀྑཱརེན སམཾ ཀཏྭཱ ཀུསཔཱཏོ ཀཱཏབྦོཏི ཨིམམཏྠཾ དསྶེཏི ‘‘སཙེ སབྦེསཾ པཉྩ པཉྩ ཝཏྠཱནཱི’’ཏིཨཱདིནཱ.

༡༩༩. ཨིཏོ པརཾ ཏེསུ ཏེསུ ཝཏྠཱུསུ ཨཱགཏཝསེན ཨཊྛཀཐཱཡཾ ཝུཏྟེསུ ཝིནིཙྪཡེསུ སནྟེསུཔི ཏེསཾ ཝིནིཙྪཡཱནཾ ཨཊྛམཱཏིཀཱཝིནིཙྪཡཏོ ཨཝིམུཏྟཏྟཱ ཨཊྛམཱཏིཀཱཝིནིཙྪཡེསྭེཝ པཀྑིཔིཏྭཱ དསྶེཏུཾ ‘‘ཨིདཱནི ཨཊྛིམཱ, བྷིཀྑཝེ’’ཏིཨཱདིམཱཧ. ཡཱ ཏཱ ཨཊྛ མཱཏིཀཱ བྷགཝཏཱ ཝུཏྟཱ, ཏཱསཾ ཨཊྛནྣཾ མཱཏིཀཱནཾ ཝསེན ཝིནིཙྪཡོ ཨིདཱནི ཝེདིཏབྦོཏི ཡོཛནཱ. པརིཀྑེཔཱརཧཊྛཱནེན པརིཙྪིནྣཱཏི ཨིམིནཱ ཨཔརིཀྑིཏྟསྶ ཝིཧཱརསྶ དྷུཝསནྣིཔཱཏཊྛཱནཱདིཏོ པཋམལེཌྜུཔཱཏསྶ ¶ ཨནྟོ ཨུཔཙཱརསཱིམཱཏི དསྶེཏི. ཨིདཱནི དུཏིཡལེཌྜུཔཱཏསྶ ཨནྟོཔི ཨུཔཙཱརསཱིམཱཡེཝཱཏི དསྶེཏུཾ ‘‘ཨཔིཙཱ’’ཏིཨཱདི ཨཱརདྡྷཾ. དྷུཝསནྣིཔཱཏཊྛཱནམྤི པརིཡནྟགཏམེཝ གཧེཏབྦཾ. ‘‘ཨེཝཾ སནྟེ ཏིཡོཛནེ ཋིཏཱ ལཱབྷཾ གཎྷིསྶནྟཱི’’ཏིཨཱདིནཱ ཨིམེ ལཱབྷགྒཧཎཱདཡོ ཨུཔཙཱརསཱིམཱཝསེནེཝ ཧོཏི, ན ཨཝིཔྤཝཱསསཱིམཱཝསེནཱཏི དསྶེཏི, ཏེན ཙ ཨིམཱནི ལཱབྷགྒཧཎཱདཱིནིཡེཝ ཨུཔཙཱརསཱིམཱཡཾ ཀཏྟབྦཱནི, ན ཨཔལོཀནཀམྨཱདཱིནི ཙཏྟཱརི ཀམྨཱནི, ཏཱནི པན ཨཝིཔྤཝཱསསཱིམཱདཱིསུཡེཝ ཀཏྟབྦཱནཱིཏི པཀཱསེཏི. ཏཐཱ ཧི ཝུཏྟཾ སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༣༧༩) ‘‘བྷིཀྑུནཱིནཾ ཨཱརཱམཔྤཝེསནསེནཱསནཔུཙྪནཱདི པརིཝཱསམཱནཏྟཱརོཙནཝསྶཙྪེདནིསྶཡསེནཱསནགྒཱཧཱདི ཝིདྷཱནནྟི ཨིདཾ སབྦཾ ཨིམིསྶཱཡེཝ ཨུཔཙཱརསཱིམཱཡ ཝསེན ཝེདིཏབྦ’’ནྟི.

ལཱབྷཏྠཱཡ ¶ ཋཔིཏཱ སཱིམཱ ལཱབྷསཱིམཱ. ལོཀེ གཱམསཱིམཱདཡོ ཝིཡ ལཱབྷསཱིམཱ ནཱམ ཝིསུཾ པསིདྡྷཱ ནཏྠི, ཀེནཱཡཾ ཨནུཉྙཱཏཱཏི ཨཱཧ ‘‘ནེཝ སམྨཱསམྦུདྡྷེནཱ’’ཏིཨཱདི. ཨེཏེན ནཱཡཾ སཱསནཝོཧཱརསིདྡྷཱ, ལོཀཝོཧཱརསིདྡྷཱ ཨེཝཱཏི དསྶེཏི. ཛནཔདཔརིཙྪེདོཏི ཨིདཾ ལོཀཔསིདྡྷསཱིམཱསདྡཏྠཝསེན ཝུཏྟཾ, པརིཙྪེདབྦྷནྟརམྤི སབྦཾ ཛནཔདསཱིམཱཏི གཧེཏབྦཾ. ཛནཔདོ ཨེཝ ཛནཔདསཱིམཱ, ཨེཝཾ རཊྛསཱིམཱདཱིསུཔི. ཏེནཱཧ ‘‘ཨཱཎཱཔཝཏྟིཊྛཱན’’ནྟིཨཱདི. པཐཝཱིཝེམཛ྄ཛྷགཏསྶཱཏི ཡཱཝ ཨུདཀཔརིཡནྟཱ ཁཎྜསཱིམཏྟཱ ཝུཏྟཾ. ཨུཔཙཱརསཱིམཱདཱིསུ པན ཨབདྡྷསཱིམཱསུ ཧེཊྛཱཔཐཝིཡཾ སབྦཏྠ ཋིཏཱནཾ ན པཱཔུཎཱཏི, ཀཱུཔཱདིཔཝེསཱརཧཊྛཱནེ ཋིཏཱནཉྙེཝ པཱཔུཎཱཏཱིཏི ཧེཊྛཱ སཱིམཀཐཱཡཾ ཝུཏྟནཡེནེཝ ཏཾཏཾསཱིམཊྛབྷཱཝོ ཝེདིཏབྦོ. ཙཀྐཝཱལ༹སཱིམཱཡ དིནྣཾ པཐཝཱིསནྡྷཱརཀཨུདཀཊྛཱནེཔི ཋིཏཱནཾ པཱཔུཎཱཏི སབྦཏྠ ཙཀྐཝཱལ༹ཝོཧཱརཏྟཱཏི. སམཱནསཾཝཱསཨཝིཔྤཝཱསསཱིམཱསུ དིནྣསྶ ཨིདཾ ནཱནཏྟཾ – ‘‘ཨཝིཔྤཝཱསསཱིམཱཡ དམྨཱི’’ཏི དིནྣཾ གཱམཊྛཱནཾ ན པཱཔུཎཱཏི. ཀསྨཱ? ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི (མཧཱཝ. ༡༤༤) ཝུཏྟཏྟཱ. ‘‘སམཱནསཾཝཱསཀསཱིམཱཡདམྨཱི’’ཏི དིནྣཾ པན གཱམེ ཋིཏཱནམྤི པཱཔུཎཱཏཱིཏི.

༢༠༠-༡. བུདྡྷཱདྷིཝུཏྠོཏི བུདྡྷེན བྷགཝཏཱ ཨདྷིཝུཏྠོ. ཨེཀསྨིནྟི ཨེཀསྨིཾ ཝིཧཱརེ. པཱཀཝཏྟནྟི ནིབདྡྷདཱནཾ. ཝཏྟཏཱིཏི པཝཏྟཏི. ཏེཧི ཝཏྟབྦནྟི ཡེསཾ སམྨུཁེ ཨེས དེཏི, ཏེཧི བྷིཀྑཱུཧི ཝཏྟབྦཾ.

༢༠༢. དུཏིཡབྷཱགེ པན ཐེརཱསནཾ ཨཱརུལ༹ྷེཏི ཡཱཝ སངྒྷནཝཀཾ ཨེཀཝཱརཾ སབྦེསཾ བྷཱགཾ དཏྭཱ ¶ ཙཱིཝརེ ཨཔརིཀྑཱིཎེ པུན སབྦེསཾ དཱཏུཾ དུཏིཡབྷཱགེ ཐེརསྶ དིནྣེཏི ཨཏྠོ. པུབྦེ ཝུཏྟནཡེནཱཏི ‘‘ཏུཡ྄ཧེཝ བྷིཀྑུ ཏཱནི ཙཱིཝརཱནཱི’’ཏི (མཧཱཝ. ༣༦༣) བྷགཝཏཱ ¶ ཝུཏྟནཡེན. པཾསུཀཱུལིཀཱནམྤི ཝཊྚཏཱིཏི ‘‘ཏུཡ྄ཧཾ དེམཱ’’ཏི ཨཝཏྭཱ, ‘བྷིཀྑཱུནཾ དེམ, ཐེརཱནཾ དེམཱ’’ཏི ཝུཏྟཏྟཱ ‘‘པཾསུཀཱུལིཀཱནམྤི ཝཊྚཏཱི’’ཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༣༧༩) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༣༧༩) པན པཾསུཀཱུལིཀཱནམྤི ཝཊྚཏཱིཏི ཨེཏྠ ‘‘ཏུཡ྄ཧཾ དེམཱ’’ཏི ཨཝུཏྟཏྟཱཏི ཀཱརཎཾ ཝདནྟི. ཡདི ཨེཝཾ ‘‘སངྒྷསྶ དེམཱ’’ཏི ཝུཏྟེཔི ཝཊྚེཡྻ, ‘‘བྷིཀྑཱུནཾ དེམ, ཐེརཱནཾ དེམ, སངྒྷསྶ དེམཱ’’ཏི ཝཙནཏོ བྷེདོ ན དིསྶཏི, ཝཱིམཾསིཏབྦམེཏྠ ཀཱརཎནྟི. པཱརུཔིཏུཾ ཝཊྚཏཱིཏི པཾསུཀཱུལིཀཱནཾ ཝཊྚཏི. སཱམིཀེཧི ཝིཙཱརིཏམེཝཱཏི ཨུཔཱཧནཏྠཝིཀཱདཱིནམཏྠཱཡ ཝིཙཱརིཏམེཝ.

༢༠༣. ཨུཔཌྜྷཾ དཱཏབྦནྟི ཡཾ ཨུབྷཏོསངྒྷསྶ དིནྣཾ, ཏཏོ ཨུཔཌྜྷཾ བྷིཀྑཱུནཾ ཨུཔཌྜྷཾ བྷིཀྑུནཱིནཾ དཱཏབྦཾ. སཙེཔི ཨེཀོ བྷིཀྑུ ཧོཏི, ཨེཀཱ ཝཱ བྷིཀྑུནཱི, ཨནྟམསོ ཨནུཔསམྤནྣསྶཔི ཨུཔཌྜྷམེཝ དཱཏབྦཾ. ‘‘བྷིཀྑུསངྒྷསྶ ཙ བྷིཀྑུནཱིནཉྩ དམྨཱི’’ཏི ཝུཏྟེ པན ན མཛ྄ཛྷེ བྷིནྡིཏྭཱ དཱཏབྦནྟི ཨེཏྠ ཡསྨཱ བྷིཀྑུནིཔཀྑེ སངྒྷསྶ པཙྩེཀཾ ཨཔརཱམཊྛཏྟཱ བྷིཀྑུནཱིནཾ གཎནཱཡ བྷཱགོ དཱཏབྦོཏི དཱཡཀསྶ ཨདྷིཔྤཱཡོཏི སིཛ྄ཛྷཏི, ཏཐཱ དཱནཉྩ བྷིཀྑཱུཔི གཎེཏྭཱ དིནྣེ ཨེཝ ཡུཛྫཏི. ཨིཏརཐཱ ཧི ‘‘ཀིཏྟཀཾ བྷིཀྑཱུནཾ དཱཏབྦཾ, ཀིཏྟཀཾ བྷིཀྑུནཱིན’’ནྟི ན ཝིཉྙཱཡཏི, ཏསྨཱ ‘‘བྷིཀྑུསངྒྷསྶཱ’’ཏི ཝུཏྟཝཙནམྤི ‘‘བྷིཀྑཱུན’’ནྟི ཝུཏྟཝཙནསདིསམེཝཱཏི ཨཱཧ ‘‘བྷིཀྑཱུ ཙ བྷིཀྑུནིཡོ ཙ གཎེཏྭཱ དཱཏབྦ’’ནྟི. ཏེནཱཧ ‘‘པུགྒལོ…པེ… བྷིཀྑུསངྒྷགྒཧཎེན གཧིཏཏྟཱ’’ཏི. ‘‘བྷིཀྑུསངྒྷསྶ ཙ བྷིཀྑུནཱིནཉྩ ཏུཡ྄ཧཉྩཱ’’ཏི ཝུཏྟེ པན པུགྒལོ ཝིསུཾ ན ལབྷཏཱིཏི ཨིདཾ ཨཊྛཀཐཱཔམཱཎེནེཝ གཧེཏབྦཾ, ན ཧེཏྠ ཝིསེསཀཱརཎཾ ཨུཔལབྦྷཏི. ཏཐཱ ཧི ‘‘ཨུབྷཏོསངྒྷསྶ ཙ ཏུཡ྄ཧཉྩ དམྨཱི’’ཏི ཝུཏྟེ སཱམཉྙཝིསེསཝཙནེཧི སངྒཧིཏཏྟཱ ཡཐཱ པུགྒལོ ཝིསུཾ ལབྷཏི, ཨེཝམིདྷཱཔི ‘‘བྷིཀྑུསངྒྷསྶ ཙ ཏུཡ྄ཧཉྩཱ’’ཏི ¶ སཱམཉྙཝིསེསཝཙནསབྦྷཱཝཏོ བྷཝིཏབྦམེཝ ཝིསུཾ པུགྒལཔཊིཝཱིསེནཱཏི ཝིཉྙཱཡཏི, ཏསྨཱ ཨཊྛཀཐཱཝཙནམེཝེཏྠ པམཱཎཾ. པཱཔུཎནཊྛཱནཏོ ཨེཀམེཝ ལབྷཏཱིཏི ཨཏྟནོ ཝསྶགྒེན པཏྟཊྛཱནཏོ ཨེཀམེཝ ཀོཊྛཱསཾ ལབྷཏི. ཏཏྠ ཀཱརཎམཱཧ ‘‘ཀསྨཱ? བྷིཀྑུསངྒྷགྒཧཎེན གཧིཏཏྟཱ’’ཏི, བྷིཀྑུསངྒྷགྒཧཎེནེཝ པུགྒལསྶཔི གཧིཏཏྟཱཏི ཨདྷིཔྤཱཡོཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༣༧༩) ཝུཏྟཾ.

ཝིམཏིཝིནོདནིཡཾ ¶ (ཝི. ཝི. ཊཱི. མཧཱཝགྒ ༢.༣༧༩) པན བྷིཀྑུསངྒྷསདྡེན བྷིཀྑཱུནཉྙེཝ གཧིཏཏྟཱ, པུགྒལསྶ པན ‘‘ཏུཡ྄ཧཉྩཱ’’ཏི ཝིསུཾ གཧིཏཏྟཱ ཙ ཏཏྠསྶ ཨགྒཧིཏཏྟཱ དཊྛབྦཱ, ‘‘བྷིཀྑཱུནཉྩ བྷིཀྑུནཱིནཉྩ ཏུཡ྄ཧཉྩཱ’’ཏི ཝུཏྟཊྛཱནསདིསཏྟཱཏི ཨདྷིཔྤཱཡོ. པུགྒལཔྤདྷཱནོ ཧེཏྠ སངྒྷ-སདྡོ དཊྛབྦོ. ཀེཙི པན ‘‘བྷིཀྑུསངྒྷགྒཧཎེན གཧིཏཏྟཱ’’ཏི པཱཋཾ ལིཁནྟི, ཏཾ ན སུནྡརཾ ཏསྶ ཝིསུཾ ལཱབྷགྒཧཎེ ཀཱརཎཝཙནཏྟཱ. ཏཐཱ ཧི ‘‘ཝིསུཾ སངྒྷགྒཧཎེན གཧིཏཏྟཱ’’ཏི ཝིསུཾ པུགྒལསྶཔི བྷཱགགྒཧཎེ ཀཱརཎཾ ཝུཏྟཾ. ཡཐཱ ཙེཏྠ པུགྒལསྶ ཨགྒཧཎཾ, ཨེཝཾ ཨུཔརི ‘‘བྷིཀྑུསངྒྷསྶ ཙ ཏུཡ྄ཧཉྩཱ’’ཏིཨཱདཱིསུཔི ཝིསུཾ སངྒྷཱདིསདྡེཧི པུགྒལསྶ ཨགྒཧཎཾ དཊྛབྦཾ. ཡདི ཧི གཧཎཾ སིཡཱ, སངྒྷཏོཔི ཝིསུམྤཱིཏི བྷཱགདྭཡཾ ལབྷེཡྻ ཨུབྷཡཏྠ གཧིཏཏྟཱཏི ཝུཏྟཾ. པཱུཛེཏབྦནྟིཨཱདི གིཧིཀམྨཾ ན ཧོཏཱིཏི དསྶནཏྠཾ ཝུཏྟཾ. བྷིཀྑུསངྒྷསྶ ཧརཱཏི ཨིདཾ པིཎྜཔཱཏཧརཎཾ སནྡྷཱཡ ཝུཏྟཾ. ཏེནཱཧ ‘‘བྷུཉྫིཏུཾ ཝཊྚཏཱི’’ཏི. ‘‘བྷིཀྑུསངྒྷསྶ ཧརཱ’’ཏི ཝུཏྟེཔི ཧརིཏབྦནྟི ཨཱིདིསཾ གིཧིཝེཡྻཱཝཙྩཾ ན ཧོཏཱིཏི ཀཏྭཱ ཝུཏྟཾ.

༢༠༤. ཨནྟོཧེམནྟེཏི ཨིམིནཱ ཨནཏྠཏེ ཀཐིནེ ཝསྶཱནཾ པཙྪིམེ མཱསེ དིནྣཾ པུརིམཝསྶཾཝུཏྠཱནཉྙེཝ པཱཔུཎཱཏི, ཏཏོ པརཾ ཧེམནྟེ དིནྣཾ པཙྪིམཝསྶཾཝུཏྠཱནམྤི ཝུཏྠཝསྶཏྟཱ ¶ པཱཔུཎཱཏི, ཧེམནྟཏོ པན པརཾ པིཊྛིསམཡེ ‘‘ཝསྶཾཝུཏྠསངྒྷསྶཱ’’ཏི ཨེཝཾ པརིཙྪིནྡིཏྭཱ དིནྣཾ ཨནནྟརེ ཝསྶེ ཝཱ ཏཏོ པརེསུ ཝཱ ཡཏྠ ཀཏྠཙི ཏསྨིཾ བྷིཀྑུབྷཱཝེ ཝུཏྠཝསྶཱནཾ སབྦེསཾ པཱཔུཎཱཏི. ཡེ པན སབྦཐཱ ཨཝུཏྠཝསྶཱ, ཏེསཾ ན པཱཔུཎཱཏཱིཏི དསྶེཏི. ལཀྑཎཉྙཱུ ཝདནྟཱིཏི ཝིནཡལཀྑཎཉྙུནོ ཨཱཙརིཡཱ ཝདནྟི. ལཀྑཎཉྙཱུ ཝདནྟཱིཏི ཨིདཾ སནྣིཊྛཱནཝཙནཾ, ཨཊྛཀཐཱསུ ཨནཱགཏཏྟཱ པན ཨེཝཾ ཝུཏྟཾ. བཧིཨུཔཙཱརསཱིམཱཡཾ…པེ… སབྦེསཾ པཱཔུཎཱཏཱིཏི ཡཏྠ ཀཏྠཙི ཝུཏྠཝསྶཱནཾ སབྦེསཾ པཱཔུཎཱཏཱིཏི ཨདྷིཔྤཱཡོ. ཏེནེཝ མཱཏིཀཱཊྛཀཐཱཡམྤི (ཀངྑ. ཨཊྛ. ཨཀཱལཙཱིཝརསིཀྑཱཔདཝཎྞནཱ) ‘‘སཙེ པན བཧིཨུཔཙཱརསཱིམཱཡཾ ཋིཏོ ‘ཝསྶཾཝུཏྠསངྒྷསྶ དམྨཱི’ཏི ཝདཏི, ཡཏྠ ཀཏྠཙི ཝུཏྠཝསྶཱནཾ སབྦེསཾ སམྤཏྟཱནཾ པཱཔུཎཱཏཱི’’ཏི ཝུཏྟཾ. གཎྛིཔདེསུ པན ‘‘ཝསྶཱཝཱསསྶ ཨནནུརཱུཔེ པདེསེ ཋཏྭཱ ཝུཏྟཏྟཱ ཝསྶཾཝུཏྠཱནཉྩ ཨཝུཏྠཱནཉྩ སབྦེསཾ པཱཔུཎཱཏཱི’’ཏི ཝུཏྟཾ, ཏཾ ན གཧེཏབྦཾ. ན ཧི ‘‘ཝསྶཾཝུཏྠསངྒྷསྶ དམྨཱི’’ཏི ཝུཏྟེ ཨཝུཏྠཝསྶཱནཾ པཱཔུཎཱཏི. སབྦེསམྤཱིཏི ཏསྨིཾ བྷིཀྑུབྷཱཝེ ཝུཏྠཝསྶཱནཾ སབྦེསམྤཱིཏི ཨཏྠོ དཊྛབྦོ ‘‘ཝསྶཾཝུཏྠསངྒྷསྶཱ’’ཏི ཝུཏྟཏྟཱ. སམྨུཁཱིབྷཱུཏཱནཾ སབྦེསམྤཱིཏི ཨེཏྠཱཔི ཨེསེཝ ནཡོ. ཨེཝཾ ཝདཏཱིཏི ཝསྶཾཝུཏྠསངྒྷསྶ དམྨཱིཏི ཝདཏི. ཨཏཱིཏཝསྶནྟི ཨནནྟརཱཏཱིཏཝསྶཾ.

༢༠༥. ཨིདཱནི ¶ ‘‘ཨཱདིསྶ དེཏཱི’’ཏི པདཾ ཝིབྷཛནྟོ ‘‘ཨཱདིསྶ དེཏཱིཏི ཨེཏྠཱ’’ཏིཨཱདིམཱཧ. ཏཏྠ ཡཱགུཡཱ ཝཱ…པེ… བྷེསཛྫེ ཝཱ ཨཱདིསིཏྭཱ པརིཙྪིནྡིཏྭཱ དེནྟོ དཱཡཀོ ཨཱདིསྶ དེཏི ནཱམཱཏི ཡོཛནཱ. སེསཾ པཱཀཊམེཝ.

༢༠༦. ཨིདཱནི ‘‘པུགྒལསྶ དེཏཱི’’ཏི པདཾ ཝིབྷཛནྟོ ཨཱཧ ‘‘པུགྒལསྶ དེཏི ཨེཏྠཱ’’ཏིཨཱདི. སངྒྷཏོ ཙ གཎཏོ ཙ ཝིནིམུཏྟསྶ ¶ ཨཏྟནོ ཀུལཱུཔཀཱདིཔུགྒལསྶ དེནྟོ དཱཡཀོ པུགྒལསྶ དེཏི ནཱམ. ཏཾ པན པུགྒལིཀདཱནཾ པརམྨུཁཱ ཝཱ ཧོཏི སམྨུཁཱ ཝཱ. ཏཏྠ པརམྨུཁཱ དེནྟོ ‘‘ཨིདཾ ཙཱིཝརཾ ཨིཏྠནྣཱམསྶ དམྨཱི’’ཏི ནཱམཾ ཨུདྡྷརིཏྭཱ དེཏི, སམྨུཁཱ དེནྟོ ཙ བྷིཀྑུནོ པཱདམཱུལེ ཙཱིཝརཾ ཋཔེཏྭཱ ‘‘ཨིདཾ, བྷནྟེ, ཏུམྷཱཀཾ དམྨཱི’’ཏི ཝཏྭཱ དེཏི, ཏདུབྷཡཐཱཔི དེནྟོ པུགྒལསྶ དེཏི ནཱམཱཏི ཨཏྠོ. ན ཀེཝལཾ ཨེཀསྶེཝ དེནྟོ པུགྒལསྶ དེཏི ནཱམ, ཨཐ ཁོ ཨནྟེཝཱསིཀཱདཱིཧི སདྡྷིཾ དེནྟོཔི པུགྒལསྶ དེཏི ནཱམཱཏི དསྶེཏུཾ ‘‘སཙེ པནཱ’’ཏིཨཱདིམཱཧ. ཏཏྠ ཨུདྡེསཾ གཧེཏུཾ ཨཱགཏོཏི ཏསྶ སནྟིཀེ ཨུདྡེསཾ ཨགྒཧིཏཔུབྦསྶཔི ཨུདྡེསཾ གཎྷིསྶཱམཱིཏི ཨཱགཏཀཱལཏོ པཊྛཱཡ ཨནྟེཝཱསིཀབྷཱཝཱུཔགམནཏོ ཝུཏྟཾ. གཧེཏྭཱ གཙྪནྟོཏི པརིནིཊྛིཏཨུདྡེསོ ཧུཏྭཱ གཙྪནྟོ. ཝཏྟཾ ཀཏྭཱ ཨུདྡེསཔརིཔུཙྪཱདཱིནི གཧེཏྭཱ ཝིཙརནྟཱནནྟི ཨིདཾ ‘‘ཨུདྡེསནྟེཝཱསིཀཱན’’ནྟི ཨིམསྶེཝ ཝིསེསནཾ. ཏེན ཨུདྡེསཀཱལེ ཨཱགནྟྭཱ ཨུདྡེསཾ གཧེཏྭཱ གནྟྭཱ ཨཉྙཏྠ ནིཝསནྟེ ཨནིབདྡྷཙཱརིཀེ ནིཝཏྟེཏི.

ཨེཝཾ ཙཱིཝརཀྑནྡྷཀེ (མཧཱཝ. ༣༧༩) ཨཱགཏཨཊྛམཱཏིཀཱཝསེན ཙཱིཝརཝིབྷཛནཾ དསྶེཏྭཱ ཨིདཱནི ཏསྨིཾཡེཝ ཙཱིཝརཀྑནྡྷཀེ མཛ྄ཛྷེ ཨཱགཏེསུ ཝཏྠཱུསུ ཨཱགཏནཡཾ ནིཝཏྟེཏྭཱ དསྶེནྟོ ‘‘སཙེ ཀོཙི བྷིཀྑཱུ’’ཏིཨཱདིམཱཧ. ཏཏྠ ཀིཾ ཀཱཏབྦནྟི པུཙྪཱཡ ཏསྶེཝ ཏཱནི ཙཱིཝརཱནཱིཏི ཝིསྶཛྫནཱ, སེསཱནི ཉཱཔཀཱདིཝསེན ཝུཏྟཱནི. པཉྩ མཱསེཏི ཨཙྩནྟསཾཡོགེ ཨུཔཡོགཝཙནཾ. ཝཌྜྷིཾ པཡོཛེཏྭཱ ཋཔིཏཨུཔནིཀྑེཔཏོཏི ཝསྶཱཝཱསིཀཏྠཱཡ ཝེཡྻཱཝཙྩཀརེཧི ཝཌྜྷིཾ པཡོཛེཏྭཱ ཋཔིཏཨུཔནིཀྑེཔཏོ. ཏཏྲུཔྤཱདཏོཏི ནཱལི༹ཀེརཱརཱམཱདིཏཏྲུཔྤཱདཏོ. ཨཊྛཀཐཱཡཾ པན ‘‘ཨིདཾ ཨིདྷ ཝསྶཾཝུཏྠསངྒྷསྶ དེམཱཏི ཝཱ ཝསྶཱཝཱསིཀཾ དེམཱཏི ཝཱ ཝཏྭཱ ¶ དིནྣཾ ཏཾ ཨནཏྠཏཀཐིནསྶཔི པཉྩ མཱསེ པཱཔུཎཱཏཱི’’ཏི ཝུཏྟཾ, ཏཾ ཝསྶཱཝཱསིཀལཱབྷཝསེན ཨུཔྤནྣེ ལབྦྷམཱནཝིསེསཾ དསྶེཏུཾ ཝུཏྟཾ. ཏཏྠ ཨིདྷཱཏི ཨབྷིལཱཔམཏྟམེཝེཏཾ, ཨིདྷ-སདྡཾ ཝིནཱ ‘‘ཝསྶཾཝུཏྠསངྒྷསྶ དེམཱ’’ཏི ཝུཏྟེཔི སོ ཨེཝ ནཡོ. ཨནཏྠཏཀཐིནསྶཔི པཉྩ མཱསེ པཱཔུཎཱཏཱིཏི ཝསྶཱཝཱསིཀལཱབྷཝསེན ཨུཔྤནྣཏྟཱ ཨནཏྠཏཀཐིནསྶཔི ཝུཏྠཝསྶསྶ པཉྩ མཱསེ པཱཔུཎཱཏི, ཏཏོ པརཾ པན ཨུཔྤནྣཝསྶཱཝཱསིཀཾ པུཙྪིཏབྦཾ ¶ ‘‘ཀིཾ ཨཏཱིཏཝསྶེ ཨིདཾ ཝསྶཱཝཱསིཀཾ, ཨུདཱཧུ ཨནཱགཏཝསྶེ’’ཏི. ཏཏྠ ཏཏོ པརནྟི པཉྩམཱསཏོ པརཾ, གིམྷཱནསྶ པཋམདིཝསཏོ པཊྛཱཡཱཏི ཨཏྠོ.

ཋིཏིཀཱ པན ན ཏིཊྛཏཱིཏི ཨེཏྠ ཨཊྛིཏཱཡ ཋིཏིཀཱཡ པུན ཨཉྙསྨིཾ ཙཱིཝརེ ཨུཔྤནྣེ སཙེ ཨེཀོ བྷིཀྑུ ཨཱགཙྪཏི, མཛ྄ཛྷེ ཚིནྡིཏྭཱ དྭཱིཧིཔི གཧེཏབྦཾ. ཋིཏཱཡ པན ཋིཏིཀཱཡ པུན ཨཉྙསྨིཾ ཙཱིཝརེ ཨུཔྤནྣེ སཙེ ནཝཀཏརོ ཨཱགཙྪཏི, ཋིཏིཀཱ ཧེཊྛཱ གཙྪཏི. སཙེ ཝུཌྜྷཏརོ ཨཱགཙྪཏི, ཋིཏིཀཱ ཨུདྡྷཾ ཨཱརོཧཏི. ཨཐ ཨཉྙོ ནཏྠི, པུན ཨཏྟནོ པཱཔེཏྭཱ གཧེཏབྦཾ. དུགྒཧིཏཱནཱིཏི ཨགྒཧིཏཱནི, སངྒྷིཀཱནེཝ ཧོནྟཱིཏི ཨཏྠོ. ‘‘པཱཏིཏེ ཀུསེ’’ཏི ཨེཀཀོཊྛཱསེ ཀུསདཎྜཀེ པཱཏིཏམཏྟེ སཙེཔི བྷིཀྑུསཧསྶཾ ཧོཏི, གཧིཏམེཝ ནཱམ ཙཱིཝརཾ. ‘‘ནཱཀཱམཱ བྷཱགོ དཱཏབྦོ’’ཏི ཨཊྛཀཐཱཝཙནཾ (མཧཱཝ. ཨཊྛ. ༣༦༣), ཏཏྠ གཧིཏམེཝ ནཱམཱཏི ‘‘ཨིམསྶ ཨིདཾ པཏྟ’’ནྟི ཀིཉྩཱཔི ན ཝིདིཏཾ, ཏེ པན བྷཱགཱ ཨཏྠཏོ ཏེསཾ པཏྟཱཡེཝཱཏི ཨདྷིཔྤཱཡོ.

སཏྟཱཧཝཱརེན ཨརུཎམེཝ ཨུཊྛཱཔེཏཱིཏི ཨིདཾ ནཱནཱསཱིམཝིཧཱརེསུ ཀཏྟབྦནཡེན ཨེཀསྨིམྤི ཝིཧཱརེ དྭཱིསུ སེནཱསནེསུ ནིཝུཏྠབྷཱཝདསྶནཏྠཾ ཝུཏྟཾ, ཨརུཎུཊྛཱཔནེནེཝ ཏཏྠ ཝུཏྠོ ཧོཏི, ན པན ཝསྶཙྪེདཔརིཧཱརཱཡ. ཨནྟོཨུཔཙཱརསཱིམཱཡ ¶ ཧི ཡཏྠ ཀཏྠཙི ཨརུཎཾ ཨུཊྛཱཔེནྟོ ཨཏྟནཱ གཧིཏསེནཱསནཾ ཨཔྤཝིཊྛོཔི ཝུཏྠཝསྶོ ཨེཝ ཧོཏི. གཧིཏསེནཱསནེ པན ནིཝུཏྠོ ནཱམ ན ཧོཏི, ཏཏྠ ཨརུཎུཊྛཱཔནེ སཏི ཧོཏི. ཏེནཱཧ ‘‘པུརིམསྨིཾ བཧུཏརཾ ནིཝསཏི ནཱམཱ’’ཏི. ཨེཏེན ཙ ཨིཏརསྨིཾ སཏྟཱཧཝཱརེནཔི ཨརུཎུཊྛཱཔནེ སཏི ཨེཝ ཨཔྤཏརཾ ནིཝསཏི ནཱམ ཧོཏི, ནཱསཏཱིཏི དཱིཔིཏཾ ཧོཏི. ཨིདནྟི ཨེཀཱདྷིཔྤཱཡདཱནཾ. ནཱནཱལཱབྷེཧཱིཏིཨཱདཱིསུ ནཱནཱ ཝིསུཾ ཝིསུཾ ལཱབྷོ ཨེཏེསཱུཏི ནཱནཱལཱབྷཱ, དྭེ ཝིཧཱརཱ, ཏེཧི ནཱནཱལཱབྷེཧི. ནཱནཱ ཝིསུཾ ཝིསུཾ པཱཀཱརཱདཱིཧི པརིཙྪིནྣོ ཨུཔཙཱརོ ཨེཏེསནྟི ནཱནཱུཔཙཱརཱ, ཏེཧི ནཱནཱུཔཙཱརེཧི. ཨེཀསཱིམཝིཧཱརེཧཱིཏི ཨེཀསཱིམཱཡཾ དྭཱིཧི ཝིཧཱརེཧཱིཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༣༦༤) ཝུཏྟཾ. ནཱནཱལཱབྷེཧཱིཏི ཝིསུཾ ཝིསུཾ ནིབདྡྷཝསྶཱཝཱསིཀལཱབྷེཧི. ནཱནཱུཔཙཱརེཧཱིཏི ནཱནཱཔརིཀྑེཔནཱནཱདྭཱརེཧི. ཨེཀསཱིམཝིཧཱརེཧཱིཏི དྭིནྣཾ ཝིཧཱརཱནཾ ཨེཀེན པཱཀཱརེན པརིཀྑིཏྟཏྟཱ ཨེཀཱཡ ཨུཔཙཱརསཱིམཱཡ ཨནྟོགཏེཧི དྭཱིཧི ཝིཧཱརེཧཱིཏི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༣༦༤). སེནཱསནགྒཱཧོ པཊིཔྤསྶམྦྷཏཱིཏི པཋམཾ གཧིཏོ པཊིཔྤསྶམྦྷཏི. ཏཏྠཱཏི ཡཏྠ སེནཱསནགྒཱཧོ པཊིཔྤསྶམྦྷཏི, ཏཏྠ.

༢༠༧. བྷིཀྑུསྶ ¶ ཀཱལཀཏེཏི ཨེཏྠ ཀཱལཀཏ-སདྡོ བྷཱཝསཱདྷནོཏི ཨཱཧ ‘‘ཀཱལཀིརིཡཱཡཱ’’ཏི. པཱལི༹ཡཾ གིལཱནུཔཊྛཱཀཱནཾ ཙཱིཝརདཱནེ སཱམཎེརཱནཾ ཏིཙཱིཝརཱདྷིཊྛཱནཱབྷཱཝཱ ‘‘ཙཱིཝརཉྩ པཏྟཉྩཱ’’ཏིཨཱདི སབྦཏྠ ཝུཏྟཾ.

༢༠༨. སཙེཔི སཧསྶཾ ཨགྒྷཏི, གིལཱནུཔཊྛཱཀཱནཉྙེཝ དཱཏབྦནྟི སམྦནྡྷོ. ཨཉྙནྟི ཏིཙཱིཝརཔཏྟཏོ ཨཉྙཾ. ཨཔྤགྒྷནྟི ཨཏིཛིཎྞཱདིབྷཱཝེན ནིཧཱིནཾ. ཏཏོཏི ཨཝསེསཔརིཀྑཱརཏོ. སབྦནྟི པཏྟཾ ཙཱིཝརཉྩ. ཏཏྠ ཏཏྠ སངྒྷསྶེཝཱཏི ཏསྨིཾ ཏསྨིཾ ¶ ཝིཧཱརེ སངྒྷསྶེཝ. བྷིཀྑུནོ ཀཱལཀཏཊྛཱནཾ སནྡྷཱཡ ‘‘ཨིདྷཱ’’ཏི ཝཏྟབྦེ ‘‘ཏཏྠཱ’’ཏི ཝུཏྟཏྟཱ ཝིཙྪཱཝཙནཏྟཱ ཙ པརིཀྑཱརསྶ ཋཔིཏཊྛཱནཾ ཝུཏྟནྟི ཝིཉྙཱཡཏི. པཱལི༹ཡཾ ཨཝིསྶཛྫིཀཾ ཨཝེབྷངྒིཀནྟི ཨཱགཏཱནཱགཏསྶ ཙཱཏུདྡིསསྶ སངྒྷསྶེཝ སནྟཀཾ ཧུཏྭཱ ཀསྶཙི ཨཝིསྶཛྫིཀཾ ཨཝེབྷངྒིཀཉྩ བྷཝིཏུཾ ཨནུཛཱནཱམཱིཏི ཨཏྠོ. ‘‘སནྟེ པཏིརཱུཔེ གཱཧཀེ’’ཏི ཝུཏྟཏྟཱ གཱཧཀེ ཨསཏི ཨདཏྭཱ བྷཱཛིཏེཔི སུབྷཱཛིཏམེཝཱཏི དཊྛབྦཾ. དཀྑིཎོདཀཾ པམཱཎནྟི ཨེཏྠ སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༣༧༦) ཏཱཝ ‘‘ཡཏྠ པན དཀྑིཎོདཀཾ པམཱཎནྟི བྷིཀྑཱུ ཡསྨིཾ རཊྛེ དཀྑིཎོདཀཔཊིགྒཧཎམཏྟེནཔི དེཡྻདྷམྨསྶ སཱམིནོ ཧོནྟཱིཏི ཨདྷིཔྤཱཡོ’’ཏི ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༣༧༦) པན ‘‘དཀྑིཎོདཀཾ པམཱཎནྟི ཨེཏྟཀཱནི ཙཱིཝརཱནི དསྶཱམཱིཏི པཋམཾ ཨུདཀཾ པཱཏེཏྭཱ པཙྪཱ དེནྟི, ཏཾ ཡེཧི གཧིཏཾ, ཏེ བྷཱགིནོཝ ཧོནྟཱིཏི ཨདྷིཔྤཱཡོ’’ཏི ཝུཏྟཾ. པརསམུདྡེཏི ཛམྦུདཱིཔེ. ཏམྦཔཎྞིདཱིཔཉྷི ཨུཔཱདཱཡེས ཨེཝཾ ཝུཏྟོ.

‘‘མཏཀཙཱིཝརཾ ཨདྷིཊྛཱཏཱི’’ཏི ཨེཏྠ མགྒཾ གཙྪནྟོ ཏསྶ ཀཱལཀིརིཡཾ སུཏྭཱ ཨཝིཧཱརཊྛཱནེ ཙེ དྭཱདསཧཏྠབྦྷནྟརེ ཨཉྙེསཾ བྷིཀྑཱུནཾ ཨབྷཱཝཾ ཉཏྭཱ ‘‘ཨིདཾ ཙཱིཝརཾ མཡ྄ཧཾ པཱཔུཎཱཏཱི’’ཏི ཨདྷིཊྛཱཏི, སྭཱདྷིཊྛིཏཾ. ཏེན ཁོ པན སམཡེན ཨཉྙཏརོ བྷིཀྑུ བཧུབྷཎྜོ བཧུཔརིཀྑཱརོ ཀཱལཀཏོ ཧོཏི. བྷགཝཏོ ཨེཏམཏྠཾ ཨཱརོཙེསུཾ, ‘‘བྷིཀྑུསྶ, བྷིཀྑཝེ, ཀཱལཀཏེ སངྒྷོ སཱམཱི པཏྟཙཱིཝརེ. ཨཔིཙ གིལཱནུཔཊྛཱཀཱ བཧུཔཀཱརཱ, ཨནུཛཱནཱམི, བྷིཀྑཝེ, ཏིཙཱིཝརཉྩ པཏྟཉྩ གིལཱནུཔཊྛཱཀཱནཾ དཱཏུཾ. ཡཾ ཏཏྠ ལཧུབྷཎྜཾ ལཧུཔརིཀྑཱརཾ, ཏཾ སམྨུཁཱིབྷཱུཏེན སངྒྷེན བྷཱཛེཏུཾ. ཡཾ ཏཏྠ གརུབྷཎྜཾ གརུཔརིཀྑཱརཾ, ཏཾ ཨཱགཏཱནཱགཏསྶ ཙཱཏུདྡིསསྶ ¶ སངྒྷསྶ ཨཝིསྶཛྫིཀཾ ཨཝེབྷངྒིཀ’’ནྟི (མཧཱཝ. ༣༦༩) ཨིམིནཱ པཱཋེན བྷགཝཱ སབྦཉྙཱུ བྷིཀྑཱུནཾ ཨཱམིསདཱཡཛྫཾ ཝིཙཱརེསི.

ཏཏྠ ¶ ཏིཙཱིཝརཔཏྟཨཝསེསལཧུབྷཎྜགརུབྷཎྜཝསེན ཨཱམིསདཱཡཛྫཾ ཏིཝིདྷཾ ཧོཏི. ཏེསུ ཏིཙཱིཝརཔཏྟཾ གིལཱནུཔཊྛཱཀསྶ བྷཱགོ ཧོཏི, ཨཝསེསལཧུབྷཎྜཾ སམྨུཁཱིབྷཱུཏསངྒྷསྶ, པཉྩཝཱིསཏིཝིདྷ གརུབྷཎྜཾ ཙཱཏུདྡིསསངྒྷསྶ. ཨིམིནཱ ཨིཏོ ཏིཝིདྷབྷཎྜཏོ ཨཉྙཾ བྷིཀྑུབྷཎྜཾ ནཱམ ནཏྠི, ཨིམེཧི ཏིཝིདྷེཧི པུགྒལེཧི ཨཉྙོ དཱཡཱདོ ནཱམ ནཏྠཱིཏི དསྶེཏི. ཨིདཱནི པན ཝིནཡདྷརཱ ‘‘བྷིཀྑཱུནཾ ཨཀཔྤིཡབྷཎྜཾ གིཧིབྷཱུཏཱ ཉཱཏཀཱ ལབྷནྟཱི’’ཏི ཝདནྟི, ཏཾ ཀསྨཱཏི ཙེ? ‘‘ཡེ ཏསྶ དྷནེ ཨིསྶརཱ གཧཊྛཱ ཝཱ པབྦཛིཏཱ ཝཱ, ཏེསཾ དཱཏབྦ’’ནྟི ཨཊྛཀཐཱཡཾ ཨཱགཏཏྟཱཏི. སཙྩཾ ཨཱགཏོ, སོ པན པཱཋོ ཝིསྶཱསགྒཱཧཝིསཡེ ཨཱགཏོ, ན དཱཡཛྫགཧཎཊྛཱནེ. ‘‘གཧཊྛཱ ཝཱ པབྦཛིཏཱ ཝཱ’’ཨིཙྩེཝ ཨཱགཏོ, ན ‘‘ཉཱཏཀཱ ཨཉྙཱཏཀཱ ཝཱ’’ཏི, ཏསྨཱ ཉཱཏཀཱ ཝཱ ཧོནྟུ ཨཉྙཱཏཀཱ ཝཱ, ཡེ ཏཾ གིལཱནཾ ཨུཔཊྛཧནྟི, ཏེ གིལཱནུཔཊྛཱཀབྷཱགབྷཱུཏསྶ དྷནསྶ ཨིསྶརཱ གཧཊྛཔབྦཛིཏཱ, ཨནྟམསོ མཱཏུགཱམཱཔི. ཏེ སནྡྷཱཡ ‘‘ཏེསཾ དཱཏབྦ’’ནྟི ཝུཏྟཾ, ན པན ཡེ གིལཱནཾ ནུཔཊྛཧནྟི, ཏེ སནྡྷཱཡ. ཝུཏྟཉྷི ཨཊྛཀཐཱཡཾ (མཧཱཝ. ཨཊྛ. ༣༦༩) ‘‘གིལཱནུཔཊྛཱཀོ ནཱམ གིཧཱི ཝཱ ཧོཏུ པབྦཛིཏོ ཝཱ, ཨནྟམསོ མཱཏུགཱམོཔི, སབྦེ བྷཱགཾ ལབྷནྟཱི’’ཏི.

ཨཐ ཝཱ ཡོ བྷིཀྑུ ཨཏྟནོ ཛཱིཝམཱནཀཱལེཡེཝ སབྦཾ ཨཏྟནོ པརིཀྑཱརཾ ནིསྶཛྫིཏྭཱ ཀསྶཙི ཉཱཏཀསྶ ཝཱ ཨཉྙཱཏཀསྶ ཝཱ གཧཊྛསྶ ཝཱ པབྦཛིཏསྶ ཝཱ ཨདཱསི, ཀོཙི ཙ ཉཱཏཀོ ཝཱ ཨཉྙཱཏཀོ ཝཱ གཧཊྛོ ཝཱ པབྦཛིཏོ ཝཱ ཝིསྶཱསཾ ཨགྒཧེསི, ཏཱདིསེ སནྡྷཱཡ ‘‘ཡེ ཏསྶ དྷནསྶ ཨིསྶརཱ གཧཊྛཱ ཝཱ པབྦཛིཏཱ ཝཱ, ཏེསཾ དཱཏབྦ’’ནྟི ¶ ཝུཏྟཾ, ན པན ཨཏཱདིསེ ཉཱཏཀེ. ཝུཏྟཉྷི ཨཊྛཀཐཱཡཾ (མཧཱཝ. ཨཊྛ. ༣༦༩) ‘‘སཙེ པན སོ ཛཱིཝམཱནོཡེཝ སབྦཾ ཨཏྟནོ པརིཀྑཱརཾ ནིསྶཛྫིཏྭཱ ཀསྶཙི ཨདཱསི, ཀོཙི ཝཱ ཝིསྶཱསཾ ཨགྒཧེསི, ཡསྶ དིནྣཾ, ཡེན ཙ གཧིཏཾ, ཏསྶེཝ ཧོཏི, ཏསྶ རུཙིཡཱ ཨེཝ གིལཱནུཔཊྛཱཀཱ ལབྷནྟཱི’’ཏི. ཨེཝཾ ཧོཏུ, ཀཔྤིཡབྷཎྜེ པན ཀཐནྟི? ཏམྤི ‘‘གིཧིཉཱཏཀཱནཾ དཱཏབྦ’’ནྟི པཱལི༹ཡཾ ཝཱ ཨཊྛཀཐཱཡཾ ཝཱ ཊཱིཀཱསུ ཝཱ ནཏྠི, ཏསྨཱ ཝིཙཱརེཏབྦམེཏཾ.

ཙཱིཝརབྷཱཛནཀཐཱཝཎྞནཱ ནིཊྛིཏཱ.

པིཎྜཔཱཏབྷཱཛནཀཐཱཝཎྞནཱ

༢༠༩. ཨིདཱནི ¶ པིཎྜཔཱཏབྷཱཛནཝིནིཙྪཡཾ ཀཐེཏུཾ ‘‘པིཎྜཔཱཏབྷཱཛནེ པནཱ’’ཏིཨཱདིམཱཧ. ཏཏྠ སེནཱསནཀྑནྡྷཀེ སེནཱསནབྷཱཛནེཡེཝ པཋམཾ ཨཱགཏེཔི ཙཏུཔཙྩཡབྷཱཛནཝིནིཙྪཡཏྟཱ པཙྩཡཱནུཀྐམེན པིཎྜཔཱཏབྷཱཛནཾ པཋམཾ དསྶེཏི. པིཎྜཔཱཏབྷཱཛནེ པན སངྒྷབྷཏྟཱདཱིསུ ཨཡཾ ཝིནིཙྪཡོཏི སམྦནྡྷོ. ཀཐཾ ཨེཏཱནི སངྒྷབྷཏྟཱདཱིནི བྷགཝཏཱ ཨནུཉྙཱཏཱནཱིཏི ཨཱཧ ‘‘ཨནུཛཱནཱམི…པེ… ཨནུཉྙཱཏེསཱུ’’ཏི. སངྒྷསྶ ཨཏྠཱཡ ཨཱབྷཏཾ བྷཏྟཾ སངྒྷབྷཏྟཾ ཡཐཱ ‘‘ཨཱགནྟུཀསྶ ཨཱབྷཏཾ བྷཏྟཾ ཨཱགནྟུཀབྷཏྟ’’ནྟི. སངྒྷཏོ ཨུདྡིསྶ ཨུདྡིསིཏྭཱ དཱཏབྦཾ བྷཏྟཾ ཨུདྡེསབྷཏྟཾ. ནིམནྟེཏྭཱ དཱཏབྦཾ བྷཏྟཾ ནིམནྟནབྷཏྟཾ. སལཱཀཾ པཱཏེཏྭཱ གཱཧེཏབྦཾ བྷཏྟཾ སལཱཀབྷཏྟཾ. པཀྑེ པཀྑདིཝསེ དཱཏབྦཾ བྷཏྟཾ པཀྑབྷཏྟཾ. ཨུཔོསཐེ ཨུཔོསཐདིཝསེ དཱཏབྦཾ བྷཏྟཾ ཨུཔོསཐབྷཏྟཾ. པཱཊིཔདེ ཨུཔོསཐདིཝསཏོ དུཏིཡདིཝསེ དཱཏབྦཾ བྷཏྟཾ པཱཊིཔདབྷཏྟནྟི ཝིགྒཧོ. ཋིཏིཀཱ ནཱམ ནཏྠཱིཏི སངྒྷཏྠེརཏོ པཊྛཱཡ ཝསྶགྒེན གཱཧཎཾ ཋིཏིཀཱ ནཱམ.

ཨཏྟནོ ¶ ཝིཧཱརདྭཱརེཏི ཝིཧཱརསྶ དྭཱརཀོཊྛཀསམཱིཔཾ སནྡྷཱཡ ཝུཏྟཾ. བྷོཛནསཱལཱཡཱཏི བྷཏྟུདྡེསཊྛཱནབྷཱུཏཱཡ བྷོཛནསཱལཱཡཾ. ཝསྶགྒེནཱཏི ཝསྶཀོཊྛཱསེན. དིནྣཾ པནཱཏི ཝཏྭཱ ཡཐཱ སོ དཱཡཀོ ཝདཏི, ཏཾ ཝིདྷིཾ དསྶེཏུཾ ‘‘སངྒྷཏོ བྷནྟེ’’ཏིཨཱདིམཱཧ. ཨནྟརགྷརེཏི ཨནྟོགེཧེ. ཨནྟོཨུཔཙཱརགཏཱནནྟི ཨེཏྠ གཱམདྭཱརཝཱིཐིཙཏུཀྐེསུ དྭཱདསཧཏྠབྦྷནྟརཾ ཨུཔཙཱརོ ནཱམ.

ཨནྟརགྷརསྶ ཨུཔཙཱརེ པན ལབྦྷམཱནཝིསེསཾ དསྶེཏུཾ ‘‘གྷརཱུཔཙཱརོ ཙེཏྠཱ’’ཏིཨཱདིམཱཧ. ཨེཀཝལ༹ཉྫནྟི ཨེཀེན དྭཱརེན ཝལ༹ཉྫིཏབྦཾ. ནཱནཱནིཝེསནེསཱུཏི ནཱནཱཀུལསྶ ནཱནཱུཔཙཱརེསུ ནིཝེསནེསུ. ལཛྫཱི པེསལོ ཨགཏིགམནཾ ཝཛྫེཏྭཱ མེདྷཱཝཱི ཙ ཨུཔཔརིཀྑིཏྭཱ ཨུདྡིསཏཱིཏི ཨཱཧ ‘‘པེསལོ ལཛྫཱི མེདྷཱཝཱི ཨིཙྪིཏབྦོ’’ཏི. ནིསིནྣསྶཔི ནིདྡཱཡནྟསྶཔཱིཏི ཨནཱདརེ སཱམིཝཙནཾ, ཝུཌྜྷཏརེ ནིདྡཱཡནྟེ ནཝཀསྶ གཱཧིཏཾ སུགྒཱཧིཏནྟི ཨཏྠོ. ཏིཙཱིཝརཔརིཝཱརཾ ཝཱཏི ཨེཏྠ ‘‘ཨུདཀམཏྟལཱབྷཱི ཝིཡ ཨཉྙོཔི ཨུདྡེསབྷཏྟཾ ཨལབྷིཏྭཱ ཝཏྠཱདིཨནེཀཔྤཀཱརཀཾ ལབྷཏི ཙེ, ཏསྶེཝ ཏ’’ནྟི གཎྛིཔདེསུ ཝུཏྟཾ. ཨཏྟནོ རུཙིཝསེན ཡཾ ཀིཉྩི ཝཏྭཱ ཨཱཧརིཏུཾ ཝིསྶཛྫིཏཏྟཱ ཝིསྶཊྛདཱུཏོ ནཱམ. ཡཾ ཨིཙྪཏཱིཏི ‘‘ཨུདྡེསབྷཏྟཾ དེཐཱ’’ཏིཨཱདཱིནི ཝདནྟོ ཡཾ ཨིཙྪཏི. པུཙྪཱསབྷཱགེནཱཏི པུཙྪཱསདིསེན.

‘‘ཨེཀཱ ¶ ཀཱུཊཊྛིཏིཀཱ ནཱམ ཧོཏཱི’’ཏི ཝཏྭཱ ཏམེཝ ཋིཏིཀཾ ཝིབྷཱཝེནྟོ ‘‘རཉྙོ ཝཱ ཧཱི’’ཏིཨཱདིམཱཧ. ཨཉྙེཧི ཨུདྡེསབྷཏྟཱདཱིཧི ཨམིསྶེཏྭཱ ཝིསུཾཡེཝ ཋིཏིཀཱཡ གཧེཏབྦཏྟཱ ‘‘ཨེཀཙཱརིཀབྷཏྟཱནཱི’’ཏི ཝུཏྟཾ. ཐེཡྻཱཡ ཧརནྟཱིཏི པཏྟཧཱརཀཱ ཧརནྟི. གཱིཝཱ ཧོཏཱིཏི ཨཱཎཱཔཀསྶ གཱིཝཱ ཧོཏི. སབྦཾ པཏྟསྶཱམིཀསྶ ཧོཏཱིཏི ཙཱིཝརཱདིཀམྤི སབྦཾ པཏྟསྶཱམིཀསྶེཝ ཧོཏི, ‘‘མཡཱ ¶ བྷཏྟམེཝ སནྡྷཱཡ ཝུཏྟཾ, ན ཙཱིཝརཱདི’’ནྟི ཝཏྭཱ གཧེཏུཾ ཝཊྚཏཱིཏི ཨཏྠོ. མནུསྶཱནཾ ཝཙནཾ ཀཱཏུཾ ཝཊྚཏཱིཏི ཝུཏྟཱ གཙྪནྟཱིཏི མནུསྶཱནཾ ཝཙནཾ ཀཱཏུཾ ཝཊྚཏཱིཏི ཏེན བྷིཀྑུནཱ ཝུཏྟཱ གཙྪནྟི. ཨཀཏབྷཱགོ ནཱམཱཏི ཨཱགནྟུཀབྷཱགོ ནཱམ, ཨདིནྣཔུབྦབྷཱགོཏི ཨཏྠོ. སབྦོ སངྒྷོ པརིབྷཱུཉྫཏཱུཏི ཝུཏྟེཏི ཨེཏྠ ‘‘པཋམམེཝ ‘སབྦསངྒྷིཀབྷཏྟཾ དེཐཱ’ཏི ཝཏྭཱ པཙྪཱ ‘སབྦོ སངྒྷོ པརིབྷུཉྫཏཱུ’ཏི ཨཝུཏྟེཔི བྷཱཛེཏྭཱ པརིབྷུཉྫིཏབྦ’’ནྟི གཎྛིཔདེསུ ཝུཏྟཾ. ཀིཾ ཨཱཧརཱིཡཏཱིཏི ཨཝཏྭཱཏི ‘‘ཀཏརབྷཏྟཾ ཏཡཱ ཨཱཧརཱིཡཏཱི’’ཏི དཱཡཀཾ ཨཔུཙྪིཏྭཱ. པཀཏིཋིཏིཀཱཡཱཏི ཨུདྡེསབྷཏྟཋིཏིཀཱཡ.

པིཎྜཔཱཏབྷཱཛནཀཐཱཝཎྞནཱ ནིཊྛིཏཱ.

ནིམནྟནབྷཏྟཀཐཱཝཎྞནཱ

༢༡༠. ‘‘ཨེཏྟཀེ བྷིཀྑཱུ སངྒྷཏོ ཨུདྡིསིཏྭཱ དེཐཱ’’ཏིཨཱདཱིནི ཨཝཏྭཱ ‘‘ཨེཏྟཀཱནཾ བྷིཀྑཱུནཾ བྷཏྟཾ དེཐཱ’’ཏི ཝཏྭཱ དིནྣཾ སངྒྷིཀཾ ནིམནྟནཾ ནཱམ. པིཎྜཔཱཏིཀཱནམྤི ཝཊྚཏཱིཏི བྷིཀྑཱཔརིཡཱཡེན ཝུཏྟཏྟཱ ཝཊྚཏི. པཊིཔཱཊིཡཱཏི ལདྡྷཔཊིཔཱཊིཡཱ. ཝིཙྪིནྡིཏྭཱཏི ‘‘བྷཏྟཾ གཎྷཐཱ’’ཏི པདཾ ཨཝཏྭཱ. ཏེནེཝཱཧ ‘‘བྷཏྟནྟི ཨཝདནྟེནཱ’’ཏི. ཨཱལོཔསངྑེཔེནཱཏི ཨེཀེཀཔིཎྜཝསེན. ཨཡཉྩ ནཡོ ནིམནྟནེཡེཝ, ན ཨུདྡེསབྷཏྟེ. ཏསྶ ཧི ཨེཀསྶ པཧོནཀཔྤམཱཎཾཡེཝ བྷཱཛེཏབྦཾ, ཏསྨཱ ཨུདྡེསབྷཏྟེ ཨཱལོཔཊྛིཏིཀཱ ནཱམ ནཏྠི.

ཨཱརུལ༹ྷཱཡེཝ མཱཏིཀཾ. སངྒྷཏོ ཨཊྛ བྷིཀྑཱུཏི ཨེཏྠ ཡེ མཱཏིཀཾ ཨཱརུལ༹ྷཱ, ཏེ ཨཊྛ བྷིཀྑཱུཏི ཡོཛེཏབྦཾ. ཨུདྡེསབྷཏྟནིམནྟནབྷཏྟཱདིསངྒྷིཀབྷཏྟམཱཏིཀཱསུ ནིམནྟནབྷཏྟམཱཏིཀཱཡ ཋིཏིཀཱཝསེན ཨཱརུལ༹ྷེ བྷཏྟུདྡེསཀེན ཝཱ སཡཾ ཝཱ སངྒྷཏོ ཨུདྡིསཱཔེཏྭཱ གཧེཏྭཱ གནྟབྦཾ, ན ཨཏྟནཱ ¶ རུཙིཏེ གཧེཏྭཱཏི ཨདྷིཔྤཱཡོ. མཱཏིཀཾ ཨཱརོཔེཏྭཱཏི ‘‘སངྒྷཏོ གཎྷཱམཱི’’ཏིཨཱདིནཱ ཝུཏྟམཱཏིཀཱབྷེདཾ དཱཡཀསྶ ཝིཉྙཱཔེཏྭཱཏི ཨཏྠོ. ‘‘ཨེཀཝཱརནྟི ཡཱཝ ཏསྨིཾ ཨཱཝཱསེ ཝསནྟི བྷིཀྑཱུ ¶ , སབྦེ ལབྷནྟཱི’’ཏི གཎྛིཔདེསུ ཝུཏྟཾ. ཨཡཾ པནེཏྠ ཨདྷིཔྤཱཡོ – ཨེཀཝཱརནྟི ན ཨེཀདིཝསཾ སནྡྷཱཡ ཝུཏྟཾ, ཡཏྟཀཱ པན བྷིཀྑཱུ ཏསྨིཾ ཨཱཝཱསེ ཝསནྟི, ཏེ སབྦེ. ཨེཀསྨིཾ དིཝསེ གཧིཏབྷིཀྑཱུ ཨཉྙདཱ ཨགྒཧེཏྭཱ ཡཱཝ ཨེཀཝཱརཾ སབྦེ བྷིཀྑཱུ བྷོཛིཏཱ ཧོནྟཱིཏི ཛཱནཱཏི ཙེ, ཡེ ཛཱནནྟི, ཏེ གཧེཏྭཱ གནྟབྦནྟི. པཊིབདྡྷཀཱལཏོ པཊྛཱཡཱཏི ཏཏྠེཝ ཝཱསསྶ ནིབདྡྷཀཱལཏོ པཊྛཱཡ.

ནིམནྟནབྷཏྟཀཐཱཝཎྞནཱ ནིཊྛིཏཱ.

སལཱཀབྷཏྟཀཐཱཝཎྞནཱ

༢༡༡. ཨུཔནིབནྡྷིཏྭཱཏི ལིཁིཏྭཱ. གཱམཝསེནཔཱིཏི ཡེབྷུཡྻེན སམལཱབྷགཱམཝསེནཔི. བཧཱུནི སལཱཀབྷཏྟཱནཱིཏི ཏིཾསཾ ཝཱ ཙཏྟཱརཱིསཾ ཝཱ བྷཏྟཱནི. སཙེ ཧོནྟཱིཏི ཨཛ྄ཛྷཱཧརིཏྭཱ ཡོཛེཏབྦཾ. སལླཀྑེཏྭཱཏི ཏཱནི བྷཏྟཱནི པམཱཎཝསེན སལླཀྑེཏྭཱ. ནིགྒཧེན དཏྭཱཏི དཱུརཾ གནྟུཾ ཨནིཙྪནྟསྶ ནིགྒཧེན སམྤཊིཙྪཱཔེཏྭཱ. པུན ཝིཧཱརཾ ཨཱགནྟྭཱཏི ཨེཏྠ ཝིཧཱརཾ ཨནཱགནྟྭཱ བྷཏྟཾ གཧེཏྭཱ པཙྪཱ ཝིཧཱརེ ཨཏྟནོ པཱཔེཏྭཱ བྷུཉྫིཏུམྤི ཝཊྚཏི. ཨེཀགེཧཝསེནཱཏི ཝཱིཐིཡམྤི ཨེཀཔསྶེ གྷརཔཱལི༹ཡཱ ཝསེན. ཨུདྡིསིཏྭཱཔཱིཏི ‘‘ཨསུཀཀུལེ སལཱཀབྷཏྟཱནི ཏུཡ྄ཧཾ པཱཔུཎནྟཱི’’ཏི ཝཏྭཱ.

༢༡༢. ཝཱརགཱམེཏི ཨཏིདཱུརཏྟཱ ཝཱརེན གནྟབྦགཱམེ. སཊྛིཏོ ཝཱ པཎྞཱསཏོ ཝཱཏི དཎྜཀམྨཏྠཱཡ ཨུདཀགྷཊཾ སནྡྷཱཡ ཝུཏྟཾ. ཝིཧཱརཝཱརོཏི སབྦབྷིཀྑཱུསུ བྷིཀྑཱཡ ¶ གཏེསུ ཝིཧཱརརཀྑཎཝཱརོ. ནེསནྟི ཝིཧཱརཝཱརིཀཱནཾ. ཕཱཏིཀམྨམེཝཱཏི ཝིཧཱརརཀྑཎཀིཙྩསྶ པཧོནཀཔཊིཔཱདནམེཝ. དཱུརཏྟཱ ནིགྒཧེཏྭཱཔི ཝཱརེན གཧེཏབྦོ གཱམོ ཝཱརགཱམོ. ཝིཧཱརཝཱརེ ནིཡུཏྟཱ ཝིཧཱརཝཱརིཀཱ, ཝཱརེན ཝིཧཱརརཀྑཎཀཱ. ཨཉྙཐཏྟནྟི པསཱདཉྙཐཏྟཾ. ཕཱཏིཀམྨམེཝ བྷཝནྟཱིཏི ཝིཧཱརརཀྑཎཏྠཱཡ སངྒྷེན དཱཏབྦཱ ཨཏིརེཀལཱབྷཱ ཧོནྟི. ཨེཀསྶེཝ པཱཔུཎནྟཱིཏི དིཝསེ དིཝསེ ཨེཀེཀསྶེཝ པཱཔིཏཱནཱིཏི ཨཏྠོ. སངྒྷནཝཀེན ལདྡྷཀཱལེཏི དིཝསེ དིཝསེ ཨེཀེཀསྶ པཱཔིཏཱནི དྭེ ཏཱིཎི ཨེཀཙཱརིཀབྷཏྟཱནི ཏེནེཝ ནིཡཱམེན ཨཏྟནོ པཱཔུཎནཊྛཱནེ སངྒྷནཝཀེན ལདྡྷཀཱལེ.

ཡསྶ ¶ ཀསྶཙི སམྨུཁཱིབྷཱུཏསྶ པཱཔེཏྭཱཏི ཨེཏྠ ‘‘ཡེབྷུཡྻེན ཙེ བྷིཀྑཱུ བཧིསཱིམགཏཱ ཧོནྟི, སམྨུཁཱིབྷཱུཏསྶ ཡསྶ ཀསྶཙི པཱཔེཏབྦཾ སབྷཱགཏྟཱ ཨེཀེན ལདྡྷཾ སབྦེསཾ ཧོཏི, ཏསྨིམྤི ཨསཏི ཨཏྟནོ པཱཔེཏྭཱ དཱཏབྦ’’ནྟི གཎྛིཔདེསུ ཝུཏྟཾ. རསསལཱཀནྟི ཨུཙྪུརསསལཱཀཾ. སལཱཀཝསེན པན གཱཧིཏཏྟཱ ན སཱདིཏབྦཱཏི ཨིདཾ ཨསཱརུཔྤཝསེན ཝུཏྟཾ, ན དྷུཏངྒབྷེདཝསེན. ‘‘སངྒྷཏོ ནིརཱམིསསལཱཀཱ…པེ… ཝཊྚཏིཡེཝཱ’’ཏི ཧི ཝིསུདྡྷིམགྒེ (ཝིསུདྡྷི. ༡.༢༦) ཝུཏྟཾ. སཱརཏྠདཱིཔནིཡམྤི (སཱརཏྠ. ཊཱི. ཙཱུལ༹ཝགྒ ༣.༣༢༥) – སངྒྷཏོ ནིརཱམིསསལཱཀཱཔི ཝིཧཱརེ པཀྐབྷཏྟམྤི ཝཊྚཏིཡེཝཱཏི སཱདྷཱརཎཾ ཀཏྭཱ ཝིསུདྡྷིམགྒེ (ཝིསུདྡྷི. ༡.༢༦) ཝུཏྟཏྟཱ, ‘‘ཨེཝཾ གཱཧིཏེ སཱདིཏབྦཾ, ཨེཝཾ ན སཱདིཏབྦ’’ནྟི ཝིསེསེཏྭཱ ཨཝུཏྟཏྟཱ ཙ ‘‘བྷེསཛྫཱདིསལཱཀཱཡོ ཙེཏྠ ཀིཉྩཱཔི པིཎྜཔཱཏིཀཱནམྤི ཝཊྚནྟི, སལཱཀཝསེན པན གཱཧིཏཏྟཱ ན སཱདིཏབྦཱ’’ཏི ཨེཏྠ ཨདྷིཔྤཱཡོ ཝཱིམཾསིཏབྦོ. ཡདི ཧི བྷེསཛྫཱདིསལཱཀཱ སལཱཀཝསེན གཱཧིཏཱ ན སཱདིཏབྦཱ སིཡཱ, ‘‘སངྒྷཏོ ནིརཱམིསསལཱཀཱ ཝཊྚཏིཡེཝཱ’’ཏི ¶ ན ཝདེཡྻ, ‘‘ཨཏིརེཀལཱབྷོ སངྒྷབྷཏྟཾ ཨུདྡེསབྷཏྟ’’ནྟིཨཱདིཝཙནཏོ (མཧཱཝ. ༡༢༨) ཙ ‘‘ཨཏིརེཀལཱབྷཾ པཊིཀྑིཔཱམཱི’’ཏི སལཱཀཝསེན གཱཧེཏབྦཾ བྷཏྟམེཝ པཊིཀྑིཏྟཾ, ན བྷེསཛྫཾ. སངྒྷབྷཏྟཱདཱིནི ཧི ཙུདྡས བྷཏྟཱནིཡེཝ ཏེན ན སཱདིཏབྦཱནཱིཏི ཝུཏྟཱནི. ཁནྡྷཀབྷཱཎཀཱནཾ ཝཱ མཏེན ཨིདྷ ཨེཝཾ ཝུཏྟནྟི གཧེཏབྦནྟི ཝུཏྟཾ. ཨགྒཏོ དཱཏབྦཱ བྷིཀྑཱ ཨགྒབྷིཀྑཱ. ཨགྒབྷིཀྑཱམཏྟནྟི ཨེཀཀཊཙྪུབྷིཀྑཱམཏྟཾ. ལདྡྷཱ ཝཱ ཨལདྡྷཱ ཝཱ སྭེཔི གཎྷེཡྻཱསཱིཏི ལདྡྷེཔི ཨཔྤམཏྟཏཱཡ ཝུཏྟཾ. ཏེནཱཧ ‘‘ཡཱཝདཏྠཾ ལབྷཏི…པེ… ཨལབྷིཏྭཱ སྭེ གཎྷེཡྻཱསཱིཏི ཝཏྟབྦོ’’ཏི. ཨགྒབྷིཀྑམཏྟནྟི ཧི ཨེཏྠ མཏྟ-སདྡོ བཧུབྷཱཝཾ ནིཝཏྟེཏི.

སལཱཀབྷཏྟཾ ནཱམ ཝིཧཱརེཡེཝ ཨུདྡིསཱིཡཏི ཝིཧཱརམེཝ སནྡྷཱཡ དཱིཡམཱནཏྟཱཏི ཨཱཧ ‘‘ཝིཧཱརེ ཨཔཱཔིཏཾ པནཱ’’ཏིཨཱདི. ཏཏྲ ཨཱསནསཱལཱཡཱཏི ཏསྨིཾ གཱམེ ཨཱསནསཱལཱཡ. ཝིཧཱརཾ ཨཱནེཏྭཱ གཱཧེཏབྦནྟི ཏཐཱ ཝཏྭཱ ཏསྨིཾ དིཝསེ དིནྣབྷཏྟཾ ཝིཧཱརམེཝ ཨཱནེཏྭཱ ཋིཏིཀཱཡ གཱཧེཏབྦཾ. ཏཏྠཱཏི ཏསྨིཾ དིསཱབྷཱགེ. ཏཾ གཧེཏྭཱཏི ཏཾ ཝཱརགཱམསལཱཀཾ ཨཏྟནཱ གཧེཏྭཱ. ཏེནཱཏི ཡོ ཨཏྟནོ པཏྟཝཱརགཱམེ སལཱཀཾ དིསཱགམིཀསྶ ཨདཱསི, ཏེན. ཨནཏིཀྐམནྟེཡེཝ ཏསྨིཾ ཏསྶ སལཱཀཱ གཱཧེཏབྦཱཏི ཡསྨཱ ཨུཔཙཱརསཱིམཊྛསྶེཝ སལཱཀཱ པཱཔུཎཱཏི, ཏསྨཱ ཏསྨིཾ དིསཾགམིཀེ ཨུཔཙཱརསཱིམཾ ཨནཏིཀྐནྟེཡེཝ ཏསྶ དིསཾགམིཀསྶ པཏྟསལཱཀཱ ཨཏྟནོ པཱཔེཏྭཱ གཱཧེཏབྦཱ.

དེཝསིཀཾ ¶ པཱཔེཏབྦཱཏི ཨུཔཙཱརསཱིམཱཡཾ ཋིཏསྶ ཡསྶ ཀསྶཙི ཝསྶགྒེན པཱཔེཏབྦཱ. ཨེཝཾ ཨེཏེསུ ཨནཱགཏེསུ ཨཱསནྣཝིཧཱརེ བྷིཀྑཱུནཾ བྷུཉྫིཏུཾ ཝཊྚཏི, ཨིཏརཐཱ སངྒྷིཀཾ ཧོཏི. ཨནཱགཏདིཝསེཏི ཨེཏྠ ཀཐཾ ཏེསཾ བྷིཀྑཱུནཾ ཨཱགཏཱནཱགཏབྷཱཝོ ¶ ཝིཉྙཱཡཏཱིཏི ཙེ? ཡསྨཱ ཏཏོ ཏཏོ ཨཱགཏཱ བྷིཀྑཱུ ཏསྨིཾ གཱམེ ཨཱསནསཱལཱཡ སནྣིཔཏནྟི, ཏསྨཱ ཏེསཾ ཨཱགཏཱནཱགཏབྷཱཝོ སཀྐཱ ཝིཉྙཱཏུཾ. ཨམྷཱཀཾ གོཙརགཱམེཏི སལཱཀབྷཏྟདཱཡཀཱནཾ གཱམེ. བྷུཉྫིཏུཾ ཨཱགཙྪནྟཱིཏི ‘‘མཧཱཐེརོ ཨེཀཀོཝ ཝིཧཱརེ ཨོཧཱིནོ ཨཝསྶཾ སབྦསལཱཀཱ ཨཏྟནོ པཱཔེཏྭཱ ཋིཏོ’’ཏི མཉྙམཱནཱ ཨཱགཙྪནྟི.

སལཱཀབྷཏྟཀཐཱཝཎྞནཱ ནིཊྛིཏཱ.

པཀྑིཀབྷཏྟཱདིཀཐཱཝཎྞནཱ

༢༡༣. ཨབྷིལཀྑིཏེསུ ཙཏཱུསུ པཀྑདིཝསེསུ དཱཏབྦཾ བྷཏྟཾ པཀྑིཀཾ. ཨབྷིལཀྑིཏེསཱུཏི ཨེཏྠ ཨབྷཱིཏི ཨུཔསཱརམཏྟཾ, ལཀྑཎིཡེསུཨིཙྩེཝཏྠོ, ཨུཔོསཐསམཱདཱནདྷམྨསྶཝནཔཱུཛཱསཀྐཱརཱདིཀརཎཏྠཾ ལཀྑིཏབྦེསུ སལླཀྑེཏབྦེསུ ཨུཔལཀྑེཏབྦེསཱུཏི ཝུཏྟཾ ཧོཏི. སྭེ པཀྑོཏི ཨཛྫཔཀྑིཀཾ ན གཱཧེཏབྦནྟི ཨཊྛམིཡཱ བྷུཉྫིཏབྦཾ, སཏྟམིཡཱ བྷུཉྫནཏྠཱཡ ན གཱཧེཏབྦཾ, དཱཡཀེཧི ནིཡམིཏདིཝསེནེཝ གཱཧེཏབྦནྟི ཨཏྠོ. ཏེནཱཧ ‘‘སཙེ པནཱ’’ཏིཨཱདི. སྭེ ལཱུཁནྟི ཨཛྫ ཨཱཝཱཧམངྒལཱདིཀརཎཏོ ཨཏིཔཎཱིཏཾ བྷོཛནཾ ཀརཱིཡཏི, སྭེ ཏཐཱ ན བྷཝིསྶཏི, ཨཛྫེཝ བྷིཀྑཱུ བྷོཛེསྶཱམཱཏི ཨདྷིཔྤཱཡོ. སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༣༢༥) པན ཨཉྙཐཱ ཝུཏྟཾ. པཀྑིཀབྷཏྟཏོ ཨུཔོསཐིཀབྷཏྟསྶ བྷེདཾ དསྶེནྟོ ཨཱཧ ‘‘ཨུཔོསཐངྒཱནི སམཱདིཡིཏྭཱ’’ཏིཨཱདི. ཨུཔོསཐེ དཱཏབྦཾ བྷཏྟཾ ཨུཔོསཐིཀཾ.

པཀྑིཀབྷཏྟཱདིཀཐཱཝཎྞནཱ ནིཊྛིཏཱ.

ཨཱགནྟུཀབྷཏྟཱདིཀཐཱཝཎྞནཱ

༢༡༤. ནིབནྡྷཱཔིཏནྟི ¶ ‘‘ཨསུཀཝིཧཱརེ ཨཱགནྟུཀཱ བྷུཉྫནྟཱུ’’ཏི ནིཡམིཏཾ. གམིཀོ ཨཱགནྟུཀབྷཏྟམྤཱིཏི གཱམནྟརཏོ ཨཱགནྟྭཱ ཨཝཱུཔསནྟེན གམིཀཙིཏྟེན ཝསིཏྭཱ པུན ཨཉྙཏྠ གཙྪནྟཾ ¶ སནྡྷཱཡ ཝུཏྟཾ, ཨཱཝཱསིཀསྶ པན གནྟུཀཱམསྶ གམིཀབྷཏྟམེཝ ལབྦྷཏི. ‘‘ལེསཾ ཨོཌྜེཏྭཱ’’ཏི ཝུཏྟཏྟཱ ལེསཱབྷཱཝེན ཡཱཝ གམནཔརིབནྡྷོ ཝིགཙྪཏི, ཏཱཝ བྷུཉྫིཏུཾ ཝཊྚཏཱིཏི ཉཱཔིཏནྟི དཊྛབྦཾ.

དྷུརབྷཏྟཱདིཀཐཱཝཎྞནཱ

༢༡༥. ཏཎྜུལཱདཱིནི པེསེནྟི…པེ… ཝཊྚཏཱིཏི ཨབྷིཧཊབྷིཀྑཏྟཱ ཝཊྚཏི.

༢༡༦. ཏཐཱ པཊིགྒཧིཏཏྟཱཏི བྷིཀྑཱནཱམེན པཊིགྒཧིཏཏྟཱ. པཏྟཾ པཱུརེཏྭཱ ཐཀེཏྭཱ དིནྣནྟི ‘‘གུལ༹ཀབྷཏྟཾ དེམཱ’’ཏི དིནྣཾ. སེསཾ སུཝིཉྙེཡྻམེཝ.

པིཎྜཔཱཏབྷཱཛནཀཐཱཝཎྞནཱ ནིཊྛིཏཱ.

གིལཱནཔཙྩཡབྷཱཛནཀཐཱཝཎྞནཱ

༢༡༧. ཨིཏོ པརཾ པཙྩཡཱནུཀྐམེན སེནཱསནབྷཱཛནཀཐཱཡ ཝཏྟབྦཱཡཔི ཏསྶཱ མཧཱཝིསཡཏྟཱ, གིལཱནཔཙྩཡབྷཱཛནཱིཡཀཐཱཡ པན ཨཔྤཝིསཡཏྟཱ, པིཎྜཔཱཏབྷཱཛནཱིཡཀཐཱཡ ཨནུལོམཏྟཱ ཙ ཏདནནྟརཾ ཏཾ དསྶེཏུམཱཧ ‘‘གིལཱནཔཙྩཡབྷཱཛནཱིཡཾ པནཱ’’ཏིཨཱདི. ཏཏྠ རཱཛརཱཛམཧཱམཏྟཱཏི ཨུཔལཀྑཎམཏྟམེཝེཏཾ. བྲཱཧྨཎམཧཱསཱལགཧཔཏིམཧཱསཱལཱདཡོཔི ཨེཝཾ ཀརོནྟིཡེཝ. གྷཎྚིཾ པཧརིཏྭཱཏིཨཱདི ཧེཊྛཱ ཝུཏྟནཡཏྟཱ ཙ པཱཀཊཏྟཱ ¶ ཙ སུཝིཉྙེཡྻམེཝ. ཨུཔཙཱརསཱིམཾ…པེ… བྷཱཛེཏབྦནྟི ཨིདཾ སངྒྷཾ ཨུདྡིསྶ དིནྣཏྟཱ ཝུཏྟཾ. ཀུམྦྷཾ པན ཨཱཝཛྫེཏྭཱཏི ཀུམྦྷཾ དིསཱམུཁཾ ཀཏྭཱ. སཙེ ཐིནཾ སཔྤི ཧོཏཱིཏི ཀཀྑལ༹ཾ སཔྤི ཧོཏི. ཐོཀཾ ཐོཀམྤི པཱཔེཏུཾ ཝཊྚཏཱིཏི ཨེཝཾ ཀཏེ ཋིཏིཀཱཔི ཏིཊྛཏི. སིངྒིཝེརམརིཙཱདིབྷེསཛྫམྤི ཨཝསེསཔཏྟཐཱལཀཱདིསམཎཔརིཀྑཱརོཔཱིཏི ཨིམིནཱ ན ཀེཝལཾ བྷེསཛྫམེཝ གིལཱནཔཙྩཡོ ཧོཏི, ཨཐ ཁོ ཨཝསེསཔརིཀྑཱརོཔི གིལཱནཔཙྩཡེ ཨནྟོགདྷོཡེཝཱཏི དསྶེཏི.

གིལཱནཔཙྩཡབྷཱཛནཀཐཱཝཎྞནཱ ནིཊྛིཏཱ.

སེནཱསནགྒཱཧཀཐཱཝཎྞནཱ

༢༡༨. སེནཱསནབྷཱཛནཀཐཱཡཾ ¶ སེནཱསནགྒཱཧེ ཝིནིཙྪཡོཏི སེནཱསནབྷཱཛནམེཝཱཧ. ཏཏྠ ཨུཏུཀཱལེ སེནཱསནགྒཱཧོ ཙ ཝསྶཱཝཱསེ སེནཱསནགྒཱཧོ ཙཱཏི ཀཱལཝསེན སེནཱསནགྒཱཧོ ནཱམ དུཝིདྷོ ཧོཏཱིཏི ཡོཛནཱ. ཏཏྠ ཨུཏུཀཱལེཏི ཧེམནྟགིམྷཱནཨུཏུཀཱལེ. ཝསྶཱཝཱསེཏི ཝསྶཱནཀཱལེ. བྷིཀྑུཾ ཨུཊྛཱཔེཏྭཱ སེནཱསནཾ དཱཏབྦཾ, ཨཀཱལོ ནཱམ ནཏྠི དཱཡཀེཧི ‘‘ཨཱགཏཱནཱགཏསྶ ཙཱཏུདྡིསསྶ སངྒྷསྶ དམྨཱི’’ཏི དིནྣསངྒྷིཀསེནཱསནཏྟཱ. ཨེཀེཀཾ པརིཝེཎནྟི ཨེཀེཀསྶ བྷིཀྑུསྶ ཨེཀེཀཾ པརིཝེཎཾ. ཏཏྠཱཏི ཏསྨིཾ ལདྡྷཔརིཝེཎེ. དཱིགྷསཱལཱཏི ཙངྐམནསཱལཱ. མཎྜལམཱལོ༹ཏི ཨུཔཊྛཱནསཱལཱ. ཨནུདཧཏཱིཏི པཱིལེ༹ཏི. ཨདཱཏུཾ ན ལབྷཏཱིཏི ཨིམིནཱ སཉྩིཙྩ ཨདེནྟསྶ པཊིབཱཧནེ པཝིསནཏོ དུཀྐཊནྟི དཱིཔེཏི. ཛམྦུདཱིཔེ པནཱཏི ཨརིཡདེསེ བྷིཀྑཱུ སནྡྷཱཡ ཝུཏྟཾ. ཏེ ཀིར ཏཐཱ པཉྙཱཔེནྟི.

༢༡༩. ན ¶ གོཙརགཱམོ གྷཊྚེཏབྦོཏི ཝུཏྟམེཝཏྠཾ ཝིབྷཱཝེཏི ‘‘ན ཏཏྠ མནུསྶཱ ཝཏྟབྦཱ’’ཏིཨཱདིནཱ. ཝིཏཀྐཾ ཚིནྡིཏྭཱཏི ‘‘ཨིམིནཱ ནཱིཧཱརེན གཙྪནྟཾ དིསྭཱ ནིཝཱརེཏྭཱ པཙྩཡེ དསྶནྟཱི’’ཏི ཨེཝརཱུཔཾ ཝིཏཀྐཾ ཨནུཔྤཱདེཏྭཱ. ཏེསུ ཙེ ཨེཀོཏི ཏེསུ མནུསྶེསུ ཨེཀོ པཎྜིཏཔུརིསོ. བྷཎྜཔཊིཙྪཱདནནྟི པཊིཙྪཱདནབྷཎྜཾ, སརཱིརཔཊིཙྪཱདནཾ ཙཱིཝརནྟི ཨཏྠོ. སུདྡྷཙིཏྟཏྟཱཝ ཨནཝཛྫནྟི ཨིདཾ པུཙྪིཏཀྑཎེ ཀཱརཎཱཙིཀྑཎཾ སནྡྷཱཡ ཝུཏྟཾ ན ཧོཏི ཨསུདྡྷཙིཏྟསྶཔི པུཙྪིཏཔཉྷཝིསྶཛྫནེ དོསཱབྷཱཝཱ. ཨེཝཾ པན གཏེ མཾ པུཙྪིསྶནྟཱིཏི སཉྙཱཡ ཨགམནཾ སནྡྷཱཡ ཝུཏྟནྟི དཊྛབྦཾ.

པཊིཛགྒིཏབྦཱནཱིཏི ཁཎྜཕུལླཱབྷིསངྑརཎསམྨཛྫནཱདཱིཧི པཊིཛགྒིཏབྦཱནི. མུཎྜཝེདིཀཱཡཱཏི ཙེཏིཡསྶ ཧམྨིཡཝེདིཀཱཡ གྷཊཱཀཱརསྶ ཨུཔརི ཙཏུརསྶཝེདིཀཱཡ. ཀཏྠ པུཙྪིཏབྦནྟི པུཙྪཱཡ ཡཏོ པཀཏིཡཱ ལབྦྷཏི, ཏཏྠ པུཙྪིཏབྦནྟི ཝིསྶཛྫནཱ. ཀསྨཱ པུཙྪིཏབྦནྟིཨཱདི ཡཏོ པཀཏིཡཱ ལབྦྷཏི, ཏཏྠཱཔི པུཙྪནསྶ ཀཱརཎསནྡསྶནཏྠཾ ཝུཏྟཾ. པཊིཀྐམྨཱཏི ཝིཧཱརཏོ ཨཔསཀྐིཏྭཱ. ཏམཏྠཾ དསྶེནྟོ ‘‘ཡོཛནདྭིཡོཛནནྟརེ ཧོཏཱི’’ཏི ཨཱཧ. ཨུཔནིཀྑེཔནྟི ཁེཏྟཾ ཝཱ ནཱལི༹ཀེརཱདིཨཱརཱམཾ ཝཱ ཀཧཱཔཎཱདཱིནི ཝཱ ཨཱརཱམིཀཱནཾ ནིཡྻཱཏེཏྭཱ ‘‘ཨིཏོ ཨུཔྤནྣཱ ཝཌྜྷི ཝསྶཱཝཱསིཀཏྠཱཡ ཧོཏཱུ’’ཏི དིནྣཾ. ཝཏྟཾ ཀཏྭཱཏི ཏསྨིཾ སེནཱསནེ ¶ ཀཏྟབྦཝཏྟཾ ཀཏྭཱ. ཨིཏི སདྡྷཱདེཡྻེཏི ཨེཝཾ ཧེཊྛཱ ཝུཏྟནཡེན སདྡྷཱཡ དཱཏབྦེ ཝསྶཱཝཱསིཀལཱབྷཝིསཡེཏི ཨཏྠོ.

ཝཏྠུ པནཱཏི ཏཏྲུཔྤཱདེ ཨུཔྤནྣརཱུཔིཡཾ, ཏཉྩ ‘‘ཏཏོ ཙཏུཔཙྩཡཾ པརིབྷུཉྫཐཱ’’ཏི དིནྣཁེཏྟཱདིཏོ ཨུཔྤནྣཏྟཱ ཀཔྤིཡཀཱརཀཱནཾ ཧཏྠེ ‘‘ཀཔྤིཡབྷཎྜཾ པརིབྷུཉྫཐཱ’’ཏི དཱཡཀེཧི དིནྣཝཏྠུསདིསཾ ཧོཏཱིཏི ཨཱཧ ‘‘ཀཔྤིཡཀཱརཀཱནཉྷཱི’’ཏིཨཱདི. སངྒྷསུཊྛུཏཱཡཱཏི སངྒྷསྶ ཧིཏཱཡ ¶ . པུགྒལཝསེནེཝ ཀཱཏབྦནྟི པརཏོ ཝཀྑམཱནནཡེན བྷིཀྑཱུ ཙཱིཝརེན ཀིལམནྟི, ཨེཏྟཀཾ ནཱམ ཏཎྜུལབྷཱགཾ བྷིཀྑཱུནཾ ཙཱིཝརཾ ཀཱཏུཾ རུཙྩཏཱིཏིཨཱདིནཱ པུགྒལཔརཱམཱསཝསེནེཝ ཀཱཏབྦཾ, ‘‘སངྒྷོ ཙཱིཝརེན ཀིལམཏཱི’’ཏིཨཱདིནཱ པན སངྒྷཔརཱམཱསཝསེན ན ཀཱཏབྦཾ. ཀཔྤིཡབྷཎྜཝསེནཱཏི སཱམཉྙཏོ ཝུཏྟམེཝཏྠཾ ཝིབྷཱཝེཏུཾ ‘‘ཙཱིཝརཏཎྜུལཱདིཝསེནེཝ ཙཱ’’ཏི ཝུཏྟཾ. ཙ-ཀཱརོ ཙེཏྠ པནསདྡཏྠེ ཝཏྟཏི, ན སམུཙྩཡཏྠེཏི དཊྛབྦཾ. པུགྒལཝསེནེཝ ཀཔྤིཡབྷཎྜཝསེན ཙ ཨཔལོཀནཔྤཀཱརཾ དསྶེཏུཾ ‘‘ཏཾ པན ཨེཝཾ ཀཏྟབྦ’’ནྟིཨཱདི ཝུཏྟཾ.

ཙཱིཝརཔཙྩཡཾ སལླཀྑེཏྭཱཏི སདྡྷཱདེཡྻཏཏྲུཔྤཱདཝསེན ཏསྨིཾ ཝསྶཱཝཱསེ ལབྦྷམཱནཙཱིཝརསངྑཱཏཾ པཙྩཡཾ ‘‘ཨེཏྟཀ’’ནྟི པརིཙྪིནྡིཏྭཱ. སེནཱསནསྶཱཏི སེནཱསནགྒཱཧཱཔཎསྶ. ཝུཏྟནྟི མཧཱཨཊྛཀཐཱཡཾ ཝུཏྟཾ. ཀསྨཱ ཨེཝཾ ཝུཏྟནྟི ཨཱཧ ‘‘ཨེཝཉྷཱི’’ཏིཨཱདི, སེནཱསནགྒཱཧཱཔཀསྶ ཨཏྟནཱཝ ཨཏྟནོ གཧཎཾ ཨསཱརུཔྤཾ, ཏསྨཱ ཨུབྷོ ཨཉྙམཉྙཾ གཱཧེསྶནྟཱིཏི ཨདྷིཔྤཱཡོ. སམྨཏསེནཱསནགྒཱཧཱཔཀསྶ ཨཱཎཏྟིཡཱ ཨཉྙེན གཧིཏོཔི གཱཧོ རུཧཏིཡེཝཱཏི ཝེདིཏབྦཾ. ཨཊྛཔི སོལ༹སཔི ཛནེ སམྨནྣིཏུཾ ཝཊྚཏཱིཏི ཝིསུཾ ཝིསུཾ སམྨནྣིཏུཾ ཝཊྚཏི, ཨུདཱཧུ ཨེཀཏོཏི? ཨེཀཏོཔི ཝཊྚཏི. ཨེཀཀམྨཝཱཙཱཡ སབྦེཔི ཨེཀཏོ སམྨནྣིཏུཾ ཝཊྚཏི. ནིགྒཧཀམྨམེཝ ཧི སངྒྷོ སངྒྷསྶ ན ཀརོཏི. སམྨུཏིདཱནཾ པན བཧཱུནམྤི ཨེཀཏོ ཀཱཏུཾ ཝཊྚཏི. ཏེནེཝ སཏྟསཏིཀཀྑནྡྷཀེ ཨུབྦཱཧིཀསམྨུཏིཡཾ ཨཊྛཔི ཛནཱ ཨེཀཏོ སམྨཏཱཏི. ཨཱསནགྷརནྟི པཊིམཱགྷརཾ. མགྒོཏི ཨུཔཙཱརསཱིམབྦྷནྟརགཏེ གཱམཱབྷིམུཁམགྒེ ཀཏསཱལཱ ཝུཙྩཏི, ཨེཝཾ པོཀྑརཎིརུཀྑམཱུལཱདཱིསུཔི. རུཀྑམཱུལཱདཡོ ¶ ཚནྣཱ ཀཝཱཊབདྡྷཱཝ སེནཱསནཾ. ཨིཏོ པརཱནི སུཝིཉྙེཡྻཱནི.

༢༢༠. མཧཱལཱབྷཔརིཝེཎཀཐཱཡཾ ལབྷནྟཱིཏི ཏཏྲ ཝཱསིནོ བྷིཀྑཱུ ལབྷནྟི. ཝིཛཊེཏྭཱཏི ཨེཀེཀསྶ པཧོནཀཔྤམཱཎེན ཝིཡོཛེཏྭཱ. ཨཱཝཱསེསཱུཏི སེནཱསནེསུ. པཀྑིཔིཏྭཱཏི ཨེཏྠ པཀྑིཔནཾ ¶ ནཱམ ཏེསུ ཝསནྟཱནཾ ཨིཏོ ཨུཔྤནྣཝསྶཱཝཱསིཀདཱནཾ. པཝིསིཏབྦནྟི ཨཉྙེཧི བྷིཀྑཱུཧི ཏསྨིཾ མཧཱལཱབྷེ པརིཝེཎེ ཝསིཏྭཱ ཙེཏིཡེ ཝཏྟཾ ཀཏྭཱཝ ལཱབྷོ གཧེཏབྦོཏི ཨདྷིཔྤཱཡོ.

༢༢༡. པཙྩཡཾ ཝིསྶཛྫེཏཱིཏི ཙཱིཝརཔཙྩཡཾ ནཱདྷིཝཱསེཏི. ཨཡམྤཱིཏི ཏེན ཝིསྶཛྫིཏཔཙྩཡོཔི. པཱདམཱུལེ ཋཔེཏྭཱ སཱཊཀཾ དེནྟཱིཏི པཙྩཡདཱཡཀཱ དེནྟི. ཨེཏེན གཧཊྛེཧི པཱདམཱུལེ ཋཔེཏྭཱ དིནྣམྤི པཾསུཀཱུལིཀཱནམྤི ཝཊྚཏཱིཏི དསྶེཏི. ཨཐ ཝསྶཱཝཱསིཀཾ དེམཱཏི ཝདནྟཱིཏི ཨེཏྠ ‘‘པཾསུཀཱུལིཀཱནཾ ན ཝཊྚཏཱི’’ཏི ཨཛ྄ཛྷཱཧརིཏྭཱ ཡོཛེཏབྦཾ. ཝསྶཾ ཝུཏྠབྷིཀྑཱུནནྟི པཾསུཀཱུལིཀཏོ ཨཉྙེསཾ བྷིཀྑཱུནཾ. ཨུཔནིབནྡྷིཏྭཱ གཱཧེཏབྦནྟི ‘‘ཨིམསྨིཾ རུཀྑེ ཝཱ མཎྜཔེ ཝཱ ཝསིཏྭཱ ཙེཏིཡེ ཝཏྟཾ ཀཏྭཱ གཎྷཐཱ’’ཏི ཨེཝཾ ཨུཔནིབནྡྷིཏྭཱ གཱཧེཏབྦཾ.

པཱཊིཔདཨརུཎཏོཏིཨཱདི ཝསྶཱུཔནཱཡིཀདིཝསཾ སནྡྷཱཡ ཝུཏྟཾ. ཨནྟརཱམུཏྟཀཾ པན པཱཊིཔདཾ ཨཏིཀྐམིཏྭཱཔི གཱཧེཏུཾ ཝཊྚཏི. ‘‘ཀཏྠ ནུ ཁོ ཝསིསྶཱམི, ཀཏྠ ཝསནྟསྶ ཕཱསུ བྷཝིསྶཏི, ཀཏྠ ཝཱ པཙྩཡེ ལབྷིསྶཱམཱི’’ཏི ཨེཝཾ ཨུཔྤནྣེན ཝིཏཀྐེན ཙརཏཱིཏི ཝིཏཀྐཙཱརིཀོ. ཨིདཱནི ཡཾ དཱཡཀཱ པཙྪིམཝསྶཾཝུཏྠཱནཾ ཝསྶཱཝཱསིཀཾ དེཏི, ཏཏྠ པཊིཔཛྫནཝིདྷིཾ དསྶེཏུཾ ‘‘པཙྪིམཝསྶཱུཔནཱཡིཀདིཝསེ པནཱ’’ཏིཨཱདི ཨཱརདྡྷཾ. ཨཱགནྟུཀོ ཙེ བྷིཀྑཱུཏི ཙཱིཝརེ གཱཧིཏེ པཙྪཱ ཨཱགཏོ ཨཱགནྟུཀོ བྷིཀྑུ. པཏྟཊྛཱནེཏི ཝསྶགྒེན ཨཱགནྟུཀབྷིཀྑུནོ ¶ པཏྟཊྛཱནེ. པཋམཝསྶཱུཔགཏཱཏི ཨཱགནྟུཀསྶ ཨཱགམནཏོ པུརེཏརམེཝ པཙྪིམིཀཱཡ ཝསྶཱུཔནཱཡིཀཱཡ ཝསྶཱུཔགཏཱ. ལདྡྷཾ ལདྡྷནྟི པུནཔྤུནཾ དཱཡཀཱནཾ སནྟིཀཱ ཨཱགཏཱགཏསཱཊཀཾ.

སཱདིཡནྟཱཔི ཧི ཏེནེཝ ཝསྶཱཝཱསིཀསྶ སཱམིནོཏི ཚིནྣཝསྶཏྟཱ ཝུཏྟཾ. པཋམམེཝ ཀཏིཀཱཡ ཀཏཏྟཱ ‘‘ནེཝ ཨདཱཏུཾ ལབྷནྟཱི’’ཏི ཝུཏྟཾ, དཱཏབྦཾ ཝཱརེནྟཱནཾ གཱིཝཱ ཧོཏཱིཏི ཨདྷིཔྤཱཡོ. ཏེསམེཝ དཱཏབྦནྟི ཝསྶཱུཔགཏེསུ ཨལདྡྷཝསྶཱཝཱསིཀཱནཾ ཨེཀཙྩཱནམེཝ དཱཏབྦཾ. བྷཏིནིཝིཊྛནྟི བྷཏིཾ ཀཏྭཱ ཝིཡ ནིཝིཊྛཾ པརིཡིཊྛཾ. བྷཏིནིཝིཊྛནྟི ཝཱ པཱནཱིཡུཔཊྛཱནཱདིབྷཏིཾ ཀཏྭཱ ལདྡྷཾ. སངྒྷིཀཾ པནཱཏིཨཱདི ཀེསཉྩི ཝཱདདསྶནཾ. ཏཏྠ སངྒྷིཀཾ པན ཨཔལོཀནཀམྨཾ ཀཏྭཱ གཱཧིཏནྟི ཏཏྲུཔྤཱདཾ སནྡྷཱཡ ཝུཏྟཾ. ཏཏྠ ཨཔལོཀནཀམྨཾ ཀཏྭཱ གཱཧིཏནྟི ‘‘ཚིནྣཝསྶཱཝཱསིཀཉྩ ཨིདཱནི ཨུཔྤཛྫནཀཝསྶཱཝཱསིཀཉྩ ཨིམེསཾ དཱཏུཾ རུཙྩཏཱི’’ཏི ཨནནྟརེ ཝུཏྟནཡེན ¶ ཨཔལོཀནཾ ཀཏྭཱ གཱཧིཏཾ སངྒྷེན དིནྣཏྟཱ ཝིབྦྷནྟོཔི ལབྷཏེཝ, པགེཝ ཚིནྣཝསྶོ. པཙྩཡཝསེན གཱཧིཏཾ པན ཏེམཱསཾ ཝསིཏྭཱ གཧེཏུཾ ཨཏྟནཱ དཱཡཀེཧི ཙ ཨནུམཏཏྟཱ བྷཏིནིཝིཊྛམྤི ཚིནྣཝསྶོཔི ཝིབྦྷནྟོཔི ན ལབྷཏཱིཏི ཀེཙི ཨཱཙརིཡཱ ཝདནྟི. ཨིདཉྩ པཙྪཱ ཝུཏྟཏྟཱ པམཱཎཾ, ཏེནེཝ ཝསྶཱུཔནཱཡིཀདིཝསེ ཨེཝཾ དཱཡཀེཧི དིནྣཾ ཝསྶཱཝཱསིཀཾ གཧིཏབྷིཀྑུནོ ཝསྶཙྪེདཾ ཨཀཏྭཱ ཝཱསོཝ ཧེཊྛཱ ཝིཧིཏོ, ན པཱནཱིཡུཔཊྛཱནཱདིབྷཏིཀརཎམཏྟཾ. ཡདི ཧི ཏཾ བྷཏིནིཝིཊྛམེཝ སིཡཱ, བྷཏིཀརཎམེཝ ཝིདྷཱཏབྦཾ, ཏསྨཱ ཝསྶགྒེན གཱཧིཏཾ ཚིནྣཝསྶཱདཡོ ན ལབྷནྟཱིཏི ཝེདིཏབྦཾ.

‘‘ཨིདྷ, བྷིཀྑཝེ, ཝསྶཾཝུཏྠོ བྷིཀྑུ ཝིབྦྷམཏི, སངྒྷསྶེཝ ཏ’’ནྟི (མཧཱཝ. ༣༧༤-༣༧༥) ཝཙནཏོ ‘‘ཝཏཊྛཱནེ…པེ… སངྒྷིཀཾ ཧོཏཱི’’ཏི ཝུཏྟཾ ¶ . སངྒྷིཀཾ ཧོཏཱིཏི ཨེཏེན ཝུཏྠཝསྶཱནམྤི ཝསྶཱཝཱསིཀབྷཱགོ སངྒྷིཀཏོ ཨམོཙིཏོ ཏེསཾ ཝིབྦྷམེན སངྒྷིཀོ ཧོཏཱིཏི དསྶེཏི. མནུསྶེཏི དཱཡཀམནུསྶེ. ལབྷཏཱིཏི ‘‘མམ པཏྟབྷཱཝཾ ཨེཏསྶ དེཐཱ’’ཏི དཱཡཀེ སམྤཊིཙྪཱཔེནྟེནེཝ སངྒྷིཀཏོ ཝིཡོཛིཏཾ ཧོཏཱིཏི ཝུཏྟཾ. ཝརབྷཱགཾ སཱམཎེརསྶཱཏི ཏསྶ པཋམགཱཧཏྟཱ, ཐེརེན པུབྦེ པཋམབྷཱགསྶ གཧིཏཏྟཱ, ཨིདཱནི གཡ྄ཧམཱནསྶ དུཏིཡབྷཱགཏྟཱ ཙ ཝུཏྟཾ.

༢༢༢. ཨིདཱནི ཨནྟརཱམུཏྟསེནཱསནགྒཱཧཾ དསྶེཏུཾ ‘‘ཨཡམཔརོཔཱི’’ཏྱཱདིམཱཧ. ཏཏྠ ཨཔརོཔཱིཏི པུབྦེ ཝུཏྟསེནཱསནགྒཱཧདྭཡཏོ ཨཉྙོཔཱིཏི ཨཏྠོ. ནནུ ཙ ‘‘ཨཡཾ སེནཱསནགྒཱཧོ ནཱམ དུཝིདྷོ ཧོཏི ཨུཏུཀཱལེ ཙ ཝསྶཱཝཱསེ ཙཱ’’ཏི ཝུཏྟོ, ཨཐ ཀསྨཱ ‘‘ཨཡམཔརོཔཱི’’ཏྱཱདི ཝུཏྟོཏི ཙོདནཾ སནྡྷཱཡཱཧ ‘‘དིཝསཝསེན ཧཱི’’ཏིཨཱདི. ཨཔརཛྫུགཏཱཡ ཨཱསཱལ༹ྷིཡཱཏི པཋམཝསྶཱུཔནཱཡིཀདིཝསབྷཱུཏཾ ཨཱསཱལ༹ྷིཔུཎྞམིཡཱ པཱཊིཔདཾ སནྡྷཱཡ ཝུཏྟཾ, མཱསགཏཱཡ ཨཱསཱལ༹ྷིཡཱཏི དུཏིཡཝསྶཱུཔནཱཡིཀདིཝསབྷཱུཏསཱཝཎཔུཎྞམིཡཱ པཱཊིཔདཾ. ཨཔརཛྫུགཏཱཡ པཝཱརཎཱཏི ཨསྶཡུཛཔུཎྞམིཡཱ པཱཊིཔདཾ.

༢༢༣. ཨུཏུཀཱལེ པཊིབཱཧིཏུཾ ན ལབྷཏཱིཏི ཧེམནྟགིམྷེསུ ཨཉྙེ སམྤཏྟབྷིཀྑཱུ པཊིབཱཧིཏུཾ ན ལབྷཏི. ནཝཀམྨནྟི ནཝཀམྨསམྨུཏི. ཨཀཏནྟི ཨཔརིསངྑཏཾ. ཝིཔྤཀཏནྟི ཨནིཊྛིཏཾ. ཨེཀཾ མཉྩཊྛཱནཾ དཏྭཱཏི ཨེཀཾ མཉྩཊྛཱནཾ པུགྒལིཀཾ དཏྭཱ. ཏིབྷཱགནྟི ཏཏིཡབྷཱགཾ. ཨེཝཾ ཝིསྶཛྫནམྤི ཐཱཝརེན ཐཱཝརཾ པརིཝཏྟནཊྛཱནེཡེཝ པཝིསཏི, ན ཨིཏརཐཱ སབྦསེནཱསནཝིསྶཛྫནཏོ ¶ . སཙེ སདྡྷིཝིཧཱརིཀཱདཱིནཾ དཱཏུཀཱམོ ཧོཏཱིཏི སཙེ སོ སངྒྷསྶ བྷཎྜཋཔནཊྛཱནཾ ཝཱ ཨཉྙེསཾ བྷིཀྑཱུནཾ ཝསནཊྛཱནཾ ཝཱ དཱཏུཾ ན ཨིཙྪཏི, ཨཏྟནོ སདྡྷིཝིཧཱརིཀཱདཱིནཉྙེཝ དཱཏུཀཱམོ ཧོཏི, ཏཱདིསསྶ ¶ ‘‘ཏུཡ྄ཧཾ པུགྒལིཀམེཝ ཀཏྭཱ ཛགྒཱཧཱི’’ཏི ན སབྦཾ དཱཏབྦནྟི ཨདྷིཔྤཱཡོ. ཏཏྠསྶ ཀཏྟབྦཝིདྷིཾ དསྶེནྟོ ཨཱཧ ‘‘ཀམྨ’’ནྟིཨཱདི. ཨེཝཉྷཱིཏིཨཱདིམྷི ཙཡཱནུརཱུཔཾ ཏཏིཡབྷཱགེ ཝཱ ཨུཔཌྜྷབྷཱགེ ཝཱ གཧིཏེ ཏཾ བྷཱགཾ དཱཏུཾ ལབྷཏཱིཏི ཨཏྠོ. ཡེནཱཏི ཏེསུ དྭཱིསུ ཏཱིསུ བྷིཀྑཱུསུ ཡེན. སོ སཱམཱིཏི ཏསྶཱ བྷཱུམིཡཱ ཝིཧཱརཀརཎེ སོཝ སཱམཱི, ཏཾ པཊིབཱཧིཏྭཱ ཨིཏརེན ན ཀཱཏབྦནྟི ཨདྷིཔྤཱཡོ.

༢༢༤. ཨཀཏཊྛཱནེཏི སེནཱསནཏོ བཧི ཙཡཱདཱིནཾ ཨཀཏཊྛཱནེ. ཙཡཾ ཝཱ པམུཁཾ ཝཱཏི སངྒྷིཀསེནཱསནཾ ནིསྶཱཡ ཏཏོ བཧི བནྡྷིཏྭཱ ཨེཀཾ སེནཱསནཾ ཝཱ. བཧིཀུཊྚེཏི ཀུཊྚཏོ བཧི, ཨཏྟནོ ཀཏཊྛཱནེཏི ཨཏྠོ. སེསཾ སུཝིཉྙེཡྻམེཝ.

སེནཱསནགྒཱཧཀཐཱཝཎྞནཱ ནིཊྛིཏཱ.

ཙཏུཔཙྩཡསཱདྷཱརཎཀཐཱཝཎྞནཱ

༢༢༥. ཙཏུཔཙྩཡསཱདྷཱརཎཀཐཱཡཾ སམྨཏེན ཨཔྤམཏྟཀཝིསྶཛྫཀེནཱཏི ཉཏྟིདུཏིཡཀམྨཝཱཙཱཡ ཝཱ ཨཔལོཀནཀམྨེན ཝཱ སམྨཏེན ཨཔྤམཏྟཀཝིསྶཛྫཀསམྨུཏིལདྡྷེན. ཨཝིབྷཏྟཾ སངྒྷིཀབྷཎྜནྟི པུཙྪིཏབྦཀིཙྩཾ ནཏྠཱིཏི ཨེཏྠ ཨཝིབྷཏྟཾ སངྒྷིཀབྷཎྜནྟི ཀུཀྐུཙྩུཔྤཏྟིཨཱཀཱརདསྶནཾ, ཨེཝཾ ཀུཀྐུཙྩཾ ཀཏྭཱ པུཙྪིཏབྦཀིཙྩཾ ནཏྠི, ཨཔུཙྪིཏྭཱཝ དཱཏབྦནྟི ཨདྷིཔྤཱཡོ. ཀསྨཱཏི ཙེ? ཨེཏྟཀསྶ སངྒྷིཀབྷཎྜསྶ ཝིསྶཛྫནཏྠཱཡེཝ སམགྒསྶ སངྒྷསྶ ཨནུམཏིཡཱ ཀཏསམྨུཏིཀམྨཏྟཱ. གུལ༹པིཎྜེ…པེ… དཱཏབྦོཏི ཨེཏྠ གུལ༹པིཎྜཾ ཏཱལཔཀྐཔྤམཱཎནྟི ཝེདིཏབྦཾ. པིཎྜཱཡ པཝིཊྛསྶཔཱིཏི ཨིདཾ ཨུཔལཀྑཎམཏྟཾ. ཨཉྙེན ཀཱརཎེན བཧིསཱིམགཏསྶཔི ཨེསེཝ ¶ ནཡོ. ཨོདནཔཊིཝཱིསོཏི སངྒྷབྷཏྟཱདིསངྒྷིཀཨོདནཔཊིཝཱིསོ. ཨནྟོཨུཔཙཱརསཱིམཱཡཾ ཋིཏསྶཱཏི ཨནཱདརེ སཱམིཝཙནཾ, ཨནྟོཨུཔཙཱརསཱིམཱཡཾ ཋིཏསྶེཝ གཱཧེཏུཾ ཝཊྚཏི, ན བཧིཨུཔཙཱརསཱིམཾ པཏྟསྶཱཏི ཨཏྠོ. ཝུཏྟཉྷེཏཾ ཨཊྛཀཐཱཡཾ (ཙཱུལ༹ཝ. ཨཊྛ. ༣༢༥) ‘‘བཧིཨུཔཙཱརསཱིམཱཡ ཋིཏཱནཾ གཱཧེཐཱཏི ཝདནྟི, ན གཱཧེཏབྦ’’ནྟི. ཨནྟོགཱམཊྛཱནམྤཱིཏི ཨེཏྠ པི-སདྡོ ཨཝུཏྟསམྤིཎྜནཏྠོ, ཨནྟོགཱམཊྛཱནམྤི བཧིགཱམཊྛཱནམྤི ¶ གཱཧེཏུཾ ཝཊྚཏཱིཏི ཨཏྠོ. སམྦྷཱཝནཏྠོ ཝཱ, ཏེན ཨནྟོགཱམཊྛཱནམྤི གཱཧེཏུཾ ཝཊྚཏི, པགེཝ བཧིགཱམཊྛཱནནྟི.

ཙཏུཔཙྩཡསཱདྷཱརཎཀཐཱཝཎྞནཱ ནིཊྛིཏཱ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཙཏུཔཙྩཡབྷཱཛནཱིཡཝིནིཙྪཡཀཐཱལངྐཱརོ ནཱམ

ཨཊྛཝཱིསཏིམོ པརིཙྪེདོ.

ཝིཧཱརཝིནིཙྪཡཀཐཱཝཎྞནཱ

ཨིདཱནི ཙཏུཔཙྩཡནྟོགདྷཏྟཱ ཝིཧཱརསྶ ཙཏུཔཙྩཡབྷཱཛནཀཐཱནནྟརཾ ཝིཧཱརཝིནིཙྪཡཀཐཱ ཨཱརབྷཱིཡཏེ. ཏཏྲིདཾ ཝུཙྩཏི –

‘‘ཀོ ཝིཧཱརོ ཀེནཊྛེན;

ཝིཧཱརོ སོ ཀཏིཝིདྷོ;

ཀེན སོ ཀསྶ དཱཏབྦོ;

ཀཐཾ ཀོ ཏསྶ ཨིསྶརོ.

‘‘ཀེན སོ གཱཧིཏོ ཀསྶ;

ཨནུཊྛཱཔནིཡཱ ཀཏི;

ཀཏིཧངྒེཧི ཡུཏྟསྶ;

དྷུཝཝཱསཱཡ དཱིཡཏེ’’ཏི.

ཏཏྠ ¶ ཀོ ཝིཧཱརོཏི ཙཏཱུསུ པཙྩཡེསུ སེནཱསནསངྑཱཏོ ཙཏཱུསུ སེནཱསནེསུ ཝིཧཱརསེནཱསནསངྑཱཏོ བྷིཀྑཱུནཾ ནིཝཱསབྷཱུཏོ པཏིསྶཡཝིསེསོ. ཀེནཊྛེན ཝིཧཱརོཏི ཝིཧརནྟི ཨེཏྠཱཏི ཝིཧཱརོ, ཨིརིཡཱཔཐདིབྦབྲཧྨཨརིཡསངྑཱཏེཧི ཙཏཱུཧི ཝིཧཱརེཧི ཨརིཡཱ ཨེཏྠ ཝིཧརནྟཱིཏྱཏྠོ. ¶ སོ ཀཏིཝིདྷོཏི སངྒྷིཀཝིཧཱརགཎསནྟཀཝིཧཱརཔུགྒལིཀཝིཧཱརཝསེན ཏིབྦིདྷོ. ཝུཏྟཉྷེཏཾ སམནྟཔཱསཱདིཀཱཡཾ ‘‘ཙཱཏུདྡིསཾ སངྒྷཾ ཨུདྡིསྶ བྷིཀྑཱུནཾ དིནྣཾ ཝིཧཱརཾ ཝཱ པརིཝེཎཾ ཝཱ ཨཱཝཱསཾ ཝཱ མཧནྟམྤི ཁུདྡཀམྤི ཨབྷིཡུཉྫཏོ ཨབྷིཡོགོ ན རུཧཏི, ཨཙྪིནྡིཏྭཱ གཎྷིཏུམྤི ན སཀྐོཏི. ཀསྨཱ? སབྦེསཾ དྷུརནིཀྑེཔཱབྷཱཝཏོ. ན ཧེཏྠ སབྦེ ཙཱཏུདྡིསཱ བྷིཀྑཱུ དྷུརནིཀྑེཔཾ ཀརོནྟཱིཏི. དཱིགྷབྷཱཎཀཱདིབྷེདསྶ པན གཎསྶ, ཨེཀཔུགྒལསྶ ཝཱ སནྟཀཾ ཨབྷིཡུཉྫིཏྭཱ གཎྷནྟོ སཀྐོཏི ཏེ དྷུརཾ ནིཀྑིཔཱཔེཏུཾ, ཏསྨཱ ཏཏྠ ཨཱརཱམེ ཝུཏྟནཡེནེཝ ཝིནིཙྪཡོ ཝེདིཏབྦོ’’ཏི. ཨིམིནཱ དཱཡཀསནྟཀོ ཝིཧཱརོ ནཱམ ནཏྠཱིཏི དཱིཔེཏི.

ཀེན སོ དཱཏབྦོཏི ཁཏྟིཡེན ཝཱ བྲཱཧྨཎེན ཝཱ ཡེན ཀེནཙི སོ ཝིཧཱརོ དཱཏབྦོ. ཀསྶ དཱཏབྦོཏི སངྒྷསྶ ཝཱ གཎསྶ ཝཱ པུགྒལསྶ ཝཱ དཱཏབྦོ. ཀཐཾ དཱཏབྦོཏི ཡདི སངྒྷསྶ དེཏི, ‘‘ཨིམཾ ཝིཧཱརཾ ཨཱགཏཱནཱགཏསྶ ཙཱཏུདྡིསསྶ སངྒྷསྶ དམྨཱི’’ཏི, ཡདི གཎསྶ, ‘‘ཨིམཾ ཝིཧཱརཾ ཨཱཡསྨནྟཱནཾ དམྨཱི’’ཏི, ཡདི པུགྒལསྶ, ‘‘ཨིམཾ ཝིཧཱརཾ ཨཱཡསྨཏོ དམྨཱི’’ཏི དཱཏབྦོ. ཀོ ཏསྶ ཨིསྶརོཏི ཡདི སངྒྷསྶ དེཏི, སངྒྷོ ཏསྶ ཝིཧཱརསྶ ཨིསྶརོ. ཡདི གཎསྶ དེཏི, གཎོ ཏསྶ ཨིསྶརོ. ཡདི པུགྒལསྶ དེཏི, པུགྒལོ ཏསྶ ཨིསྶརོཏི. ཏཐཱ ¶ ཧི ཝུཏྟཾ ཨཊྛཀཐཱཡཾ ‘‘དཱིགྷབྷཱཎཀཱདིཀསྶ པན གཎསྶ ཨེཀཔུགྒལསྶ ཝཱ སནྟཀ’’ནྟི.

ཀེན སོ གཱཧིཏོཏི སེནཱསནགྒཱཧཱཔཀེན སོ ཝིཧཱརོ གཱཧིཏོ. ཝུཏྟཉྷེཏཾ བྷགཝཏཱ ‘‘ཨནུཛཱནཱམི, བྷིཀྑཝེ, པཉྩཧངྒེཧི སམནྣཱགཏཾ སེནཱསནགྒཱཧཱཔཀཾ སམྨནྣིཏུཾ, ཡོ ན ཚནྡཱགཏིཾ གཙྪེཡྻ, ན དོསཱགཏིཾ གཙྪེཡྻ, ན མོཧཱགཏིཾ གཙྪེཡྻ, ཨེཝཉྩ, བྷིཀྑཝེ, སམྨནྣིཏབྦོ, པཋམཾ བྷིཀྑུ ཡཱཙིཏབྦོ, ཡཱཙིཏྭཱ བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –

‘‘སུཎཱཏུ མེ, བྷནྟེ, སངྒྷོ, ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཾ བྷིཀྑུཾ སེནཱསནགྒཱཧཱཔཀཾ སམྨནྣེཡྻ, ཨེསཱ ཉཏྟི.

‘‘སུཎཱཏུ མེ, བྷནྟེ, སངྒྷོ, སངྒྷོ ཨིཏྠནྣཱམཾ བྷིཀྑུཾ སེནཱསནགྒཱཧཱཔཀཾ སམྨནྣཏི. ཡསྶཱཡསྨཏོ ཁམཏི ཨིཏྠནྣཱམསྶ བྷིཀྑུནོ སེནཱསནགྒཱཧཱཔཀསྶ སམྨུཏི, སོ ཏུཎྷསྶ. ཡསྶ ནཀྑམཏི, སོ བྷཱསེཡྻ.

‘‘སམྨཏོ ¶ སངྒྷེན ཨིཏྠནྣཱམོ བྷིཀྑུ སེནཱསནགྒཱཧཱཔཀོ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི (ཙཱུལ༹ཝ. ༣༡༧).

ཀསྶ སོ གཱཧིཏོཏི བྷིཀྑཱུནཾ སོ ཝིཧཱརོ གཱཧིཏོ. ཝུཏྟཉྷེཏཾ བྷགཝཏཱ ‘‘ཨནུཛཱནཱམི, བྷིཀྑཝེ, པཋམཾ བྷིཀྑཱུ གཎེཏུཾ, བྷིཀྑཱུ གཎེཏྭཱ སེཡྻཱ གཎེཏུཾ, སེཡྻཱ གཎེཏྭཱ སེཡྻགྒེན གཱཧེཏུ’’ནྟི (ཙཱུལ༹ཝ. ༣༡༨). ཨནུཊྛཱཔནིཡཱ ཀཏཱིཏི ཙཏྟཱརོ ཨནུཊྛཱཔནཱིཡཱ ཝུཌྜྷཏརོ གིལཱནོ བྷཎྜཱགཱརིཀོ སངྒྷཏོ ལདྡྷསེནཱསནོཏི. ཝུཏྟཉྷེཏཾ ཀངྑཱཝིཏརཎིཡཾ (ཀངཁཱ. ཨཊྛ. ཨནུཔཁཛྫསིཀྑཱཔདཝཎྞནཱ) ‘‘ཝུཌྜྷོ ཧི ཨཏྟནོ ཝུཌྜྷཏཱཡ ཨནུཊྛཱཔནཱིཡོ ¶ , གིལཱནོ གིལཱནཏཱཡ, སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརགཎཝཱཙཀཱཙརིཡཱནཾ ཝཱ བཧཱུཔཀཱརཏཾ གུཎཝིསིཊྛཏཉྩ སལླཀྑེཏྭཱ དྷུཝཝཱསཏྠཱཡ ཝིཧཱརཾ སལླཀྑེཏྭཱ སམྨནྣིཏྭཱ དེཏི, ཏསྨཱ ཡསྶ སངྒྷེན དིནྣོ, སོཔི ཨནུཊྛཱཔནཱིཡོ’’ཏི.

ཀཏིཧངྒེཧི ཡུཏྟསྶ དྷུཝཝཱསཱཡ དཱིཡཏེཏི ཨུཀྐཊྛཔརིཙྪེདེན དྭཱིཧི ཨངྒེཧི ཡུཏྟསྶ དྷུཝཝཱསཏྠཱཡ ཝིཧཱརོ དཱིཡཏེ. ཀཏམེཧི དྭཱིཧི? བཧཱུཔཀཱརཏཱཡ གུཎཝིསིཊྛཏཱཡ ཙེཏི. ཀཐཾ ཝིཉྙཱཡཏཱིཏི ཙེ? ‘‘བཧཱུཔཀཱརཏནྟི བྷཎྜཱགཱརིཀཏཱདིབཧུཨུཔཀཱརབྷཱཝཾ, ན ཀེཝལཾ ཨིདམེཝཱཏི ཨཱཧ ‘གུཎཝིསིཊྛཏཉྩཱ’ཏི. ཏེན བཧཱུཔཀཱརཏྟེཔི གུཎཝིསིཊྛཏྟཱབྷཱཝེ གུཎཝིསིཊྛཏྟེཔི བཧཱུཔཀཱརཏྟཱབྷཱཝེ དཱཏུཾ ཝཊྚཏཱིཏི དསྶེཏཱི’’ཏི ཝིནཡཏྠམཉྫཱུསཱཡཾ (ཀངཁཱ. ཨབྷི. ཊཱི. ཨནུཔཁཛྫསིཀྑཱཔདཝཎྞནཱ) ཝཙནཏོ. ཨོམཀཔརིཙྪེདེན ཨེཀེན ཨངྒེན ཡུཏྟསྶཔི. ཀཏམེན ཨེཀེན ཨངྒེན? བཧཱུཔཀཱརཏཱཡ ཝཱ གུཎཝིསིཊྛཏཱཡ ཝཱ. ཀཐཾ ཝིཉྙཱཡཏཱིཏི ཙེ? ‘‘བཧཱུཔཀཱརཏཾ གུཎཝིསིཊྛཏཉྩ སལླཀྑེནྟོཏི བྷཎྜཱགཱརིཀསྶ བཧཱུཔཀཱརཏཾ, དྷམྨཀཐིཀཱདཱིནཾ གུཎཝིསིཊྛཏཉྩ སལླཀྑེནྟོ’’ཏི སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༡༡༩-༡༢༡) ཝཙནཏོ.

སེནཱསནགྒཱཧོ པན དུཝིདྷོ ཨུཏུཀཱལེ ཙ ཝསྶཱཝཱསེ ཙཱཏི ཀཱལཝསེན. ཨཐ ཝཱ ཏཡོ སེནཱསནགྒཱཧཱ པུརིམཀོ པཙྪིམཀོ ཨནྟརཱམུཏྟཀོཏི. ཏེསཾ ཝིསེསོ ཧེཊྛཱ ཝུཏྟོཝ. ‘‘ཨུཏུཀཱལེ སེནཱསནགྒཱཧོ ཨནྟརཱམུཏྟཀོ ཙ ཏངྑཎཔཊིསལླཱནོ ཙཱཏི དུབྦིདྷོ. ཝསྶཱཝཱསེ སེནཱསནགྒཱཧོ པུརིམཀོ ཙ པཙྪིམཀོ ཙཱཏི དུབྦིདྷོཏི ཙཏྟཱརོ སེནཱསནགྒཱཧཱ’’ཏི ཨཱཙརིཡཱ ¶ ཝདནྟི, ཏཾ ཝཙནཾ པཱལི༹ཡམྤི ཨཊྛཀཐཱཡམྤི ན ཨཱགཏཾ ¶ . པཱལི༹ཡཾ (ཙཱུལ༹ཝ. ༣༡༨) པན ‘‘ཏཡོམེ, བྷིཀྑཝེ, སེནཱསནགྒཱཧཱ པུརིམཀོ པཙྪིམཀོ ཨནྟརཱམུཏྟཀོ’’ཨིཙྩེཝ ཨཱགཏོ, ཨཊྛཀཐཱཡམྤི (ཙཱུལ༹ཝ. ཨཊྛ. ༣༡༨) ‘‘ཏཱིསུ སེནཱསནགྒཱཧེསུ པུརིམཀོ ཙ པཙྪིམཀོ ཙཱཏི ཨིམེ དྭེ གཱཧཱ ཐཱཝརཱ, ཨནྟརཱམུཏྟཀེ ཨཡཾ ཝིནིཙྪཡོ’’ཏི ཨཱགཏོ.

ཨིདཱནི པན ཨེཀཙྩེ ཨཱཙརིཡཱ ‘‘ཨིམསྨིཾ ཀཱལེ སབྦེ ཝིཧཱརཱ སངྒྷིཀཱཝ, པུགྒལིཀཝིཧཱརོ ནཱམ ནཏྠི. ཀསྨཱ? ཝིཧཱརདཱཡཀཱནཾ ཝིཧཱརདཱནཀཱལེ ཀུལཱུཔཀཱ ‘ཨིམཾ ཝིཧཱརཾ ཨཱགཏཱནཱགཏསྶ ཙཱཏུདྡིསསྶ སངྒྷསྶ དེམཱ’ཏི ཝཙཱིབྷེདཾ ཀཱརཱཔེནྟི, ཏསྨཱ ནཝཝིཧཱརཱཔི སངྒྷིཀཱ ཨེཝ. ཨེཀཙྩེསུ ཝིཧཱརེསུ ཨེཝཾ ཨཝཏྭཱ དེནྟེསུཔི ‘ཏསྨིཾ ཛཱིཝནྟེ པུགྒལིཀོ ཧོཏི, མཏེ སངྒྷིཀོཡེཝཱ’ཏི ཝུཏྟཏྟཱ པོརཱཎཀཝིཧཱརཱཔི སངྒྷིཀཱཝ ཧོནྟཱི’’ཏི ཝདནྟི. ཏཏྲེཝཾ ཝིཙཱརེཏབྦོ – ཝཙཱིབྷེདཾ ཀཱརཱཔེཏྭཱ དིནྣཝིཧཱརེསུཔི དཱཡཀཱ སངྒྷཾ ཨུདྡིསྶ ཀརོནྟཱ ནཱམ ཨཔྤཀཱ, ‘‘ཨིམཾ ནཱམ བྷིཀྑུཾ ཨིམཾ ནཱམ ཐེརཾ ཝསཱཔེསྶཱམཱི’’ཏི ཙིནྟེཏྭཱ པུཏྟདཱརམིཏྟཱམཙྩཱདཱིཧི སམྨནྟེཏྭཱ པཏིཊྛཱཔེནྟི, པཏིཊྛཱནཀཱལེ ཨཝདནྟཱཔི དཱནཀཱལེ ཡེབྷུཡྻེན ཝདནྟི. ཨཐ པན ཀུལཱུཔཀཱ དཱནཀཱལེ སིཀྑཱཔེཏྭཱ ཝདཱཔེནྟི, ཨེཝཾ ཝདནྟཱཔི དཱཡཀཱ ཨཔྤཀཱ སངྒྷཾ ཨུདྡིསྶ དེནྟི, བཧུཏརཱ ཨཏྟནོ ཀུལཱུཔཀམེཝ ཨུདྡིསྶ དེནྟི. ཨེཝཾ སནྟེ ཀུལཱུཔཀཱནཾ ཝཙནཾ ནཝསུ ཨདྷམྨིཀདཱནེསུ ‘‘པུགྒལསྶ པརིཎཏཾ སངྒྷསྶ པརིཎཱམེཏཱི’’ཏི (པཱརཱ. ༦༦༠; པཱཙི. ༤༩༢) ཝུཏྟཾ ཨེཀཾ ཨདྷམྨིཀདཱནཾ ཨཱཔཛྫཏི. ‘‘ཏསྨིཾ ཛཱིཝནྟེ པུགྒལིཀོ, མཏེ སངྒྷིཀོ’’ཏི ཨཡཾ པཱཋོ མཱུལཔུགྒལིཀཝིསཡེ ན ཨཱགཏོ, མཱུལསངྒྷིཀཝིཧཱརཾ ཛགྒཱཔེཏུཾ པུགྒལིཀཀཱརཱཔནཊྛཱནེ ཨཱགཏོ, ཏསྨཱ ནཝཝིཧཱརཱཔི པུགྒལཾ ཨུདྡིསྶ དིནྣཱ སནྟིཡེཝ. པོརཱཎཀཝིཧཱརཱཔི མཱུལེ པུགྒལིཀཝསེན ¶ དིནྣཱ སདྡྷིཝིཧཱརིཀཱདཱིནཾ པུགྒལིཀཝསེནེཝ དཱིཡམཱནཱཔི ཏསྨིཾ ཛཱིཝནྟེཡེཝ ཝིསྶཱསཝསེན གཡ྄ཧམཱནཱཔི པུགྒལིཀཱ ཧོནྟིཡེཝ, ཏསྨཱ སབྦསོ པུགྒལིཀཝིཧཱརསྶ ཨབྷཱཝཝཱདོ ཝིཙཱརེཏབྦོཝ.

ཨཉྙེ པན ཨཱཙརིཡཱ ‘‘ཨིམསྨིཾ ཀཱལེ སངྒྷིཀཝིཧཱརཱ ནཱམ ན སནྟི, སབྦེ པུགྒལིཀཱཝ. ཀསྨཱ? ནཝཝིཧཱརཱཔི པཏིཊྛཱཔནཀཱལེ དཱནཀཱལེ ཙ ཀུལཱུཔཀབྷིཀྑུཾཡེཝ ཨུདྡིསྶ ཀཏཏྟཱ པུགྒལིཀཱཝ, པོརཱཎཀཝིཧཱརཱཔི སིསྶཱནུསིསྶེཧི ཝཱ ཨཉྙེཧི ཝཱ པུགྒལེཧི ཨེཝ པརིགྒཧིཏཏྟཱ, ན ཀདཱཙི སངྒྷེན པརིགྒཧིཏཏྟཱ པུགྒལིཀཱཝ ཧོནྟི, ན སངྒྷིཀཱ’’ཏི ཝདནྟི. ཏཏྲཱཔྱེཝཾ ཝིཙཱརེཏབྦཾ – ནཝཝིཧཱརེཔི པཏིཊྛཱནཀཱལེཔི དཱནཀཱལེཔི ཨེཀཙྩེ སངྒྷཾ ཨུདྡིསྶ ¶ ཀརོནྟི, ཨེཀཙྩེ པུགྒལཾ. པུབྦེཝ པུགྒལཾ ཨུདྡིསྶ ཀཏེཔི ཨཏྠཀཱམཱནཾ པཎྜིཏཱནཾ ཝཙནཾ སུཏྭཱ པུགྒལིཀདཱནཏོ སངྒྷིཀདཱནམེཝ མཧཔྥལཏརནྟི སདྡཧིཏྭཱ སངྒྷིཀེ ཀརོནྟཱཔི དཱཡཀཱ སནྟི, པུགྒལིཀཝསེན པཊིགྒཧིཏེ པོརཱཎཀཝིཧཱརེཔི ཀེཙི བྷིཀྑཱུ མརཎཀཱལེ སངྒྷསྶ ནིཡྻཱཏེནྟི. ཀེཙི ཀསྶཙི ཨདཏྭཱ མརནྟི, ཏདཱ སོ ཝིཧཱརོ སངྒྷིཀོ ཧོཏི. སཝཏྠུཀམཧཱཝིཧཱརེ པན ཀརོནྟཱ རཱཛརཱཛམཧཱམཏྟཱདཡོ ‘‘པཉྩཝསྶསཧསྶཔརིམཱཎཾ སཱསནཾ ཡཱཝ ཏིཊྛཏི, ཏཱཝ མམ ཝིཧཱརེ ཝསིཏྭཱ སངྒྷོ ཙཏྟཱརོ པཙྩཡེ པརིབྷུཉྫཏཱུ’’ཏི པཎིདྷཱཡ ཙིརཀཱལཾ སངྒྷསྶ པཙྩཡུཔྤཱདཀརཾ གཱམཁེཏྟཱདིཀཾ ‘‘ཨམྷཱཀཾ ཝིཧཱརསྶ དེམཱ’’ཏི དེནྟི, ཝིཧཱརསྶཱཏི ཙ ཝིཧཱརེ ཝསནཀསངྒྷསྶ ཨུདྡིསྶ དེནྟི, ན ཀུལཱུཔཀབྷཱུཏསྶ ཨེཀཔུགྒལསྶ ཨེཝ, ཏསྨཱ ཡེབྷུཡྻེན སངྒྷིཀཱ དིསྶནྟི, པཱསཱཎེསུ ཨཀྑརཾ ལིཁིཏྭཱཔི ཋཔེནྟི, ཏསྨཱ སབྦསོ སངྒྷིཀཝིཧཱརཱབྷཱཝཝཱདོཔི ཝིཙཱརེཏབྦོཝ.

ཨཔརེ ¶ པན ཨཱཙརིཡཱ ‘‘ཨིམསྨིཾ ཀཱལེ ཝིཧཱརདཱཡཀསནྟཀཱཝ, ཏསྨཱ དཱཡཀཱཡེཝ ཝིཙཱརེཏུཾ ཨིསྶརཱ, ན སངྒྷོ, ན པུགྒལོ. ཝིཧཱརདཱཡཀེ ཨསནྟེཔི ཏསྶ པུཏྟདྷཱིཏུནཏྟཔནཏྟཱདཡོ ཡཱཝ ཀུལཔརམྤརཱ ཏསྶ ཝིཧཱརསྶ ཨིསྶརཱཝ ཧོནྟི. ཀསྨཱཏི ཙེ? ‘ཡེན ཝིཧཱརོ ཀཱརིཏོ, སོ ཝིཧཱརསཱམིཀོ’ཏི (པཱཙི. ཨཊྛ. ༡༡༦) ཨཱགཏཏྟཱ ཙ ‘ཏསྶ ཝཱ ཀུལེ ཡོ ཀོཙི ཨཱཔུཙྪིཏབྦོ’ཏི (པཱཙི. ཨཊྛ. ༡༡༦) ཙ ཝཙནཏོ ཝིཧཱརསྶཱམིབྷཱུཏོ དཱཡཀོ ཝཱ ཏསྶ ཝཾསེ ཨུཔྤནྣོ ཝཱ ཝིཙཱརེཏུཾ ཨིསྶརོ. ‘པཙྪིནྣེ ཀུལཝཾསེ ཡོ ཏསྶ ཛནཔདསྶ སཱམིཀོ, སོ ཨཙྪིནྡིཏྭཱ པུན དེཏི ཙིཏྟལཔབྦཏེ བྷིཀྑུནཱ ནཱིཧཊཾ ཨུདཀཝཱཧཀཾ ཨལ༹ནཱགརཱཛམཧེསཱི ཝིཡ, ཨེཝམྤི ཝཊྚཏཱི’ཏི ཨཊྛཀཐཱཡཾ (པཱརཱ. ཨཊྛ. ༢.༥༣༨-༥༣༩) ཝཙནཏོ ཝིཧཱརདཱཡཀསྶ ཀུལཝཾསེ པཙྪིནྣེཔི ཏསྶ ཛནཔདསྶ ཨིསྶརོ རཱཛཱ ཝཱ རཱཛམཧཱམཏྟོ ཝཱ ཡོ ཀོཙི ཨིསྶརོ ཝཱ ཝིཧཱརཾ ཝིཙཱརེཏུཾ ཡཐཱཛ྄ཛྷཱསཡཾ དཱཏུཾ ཝཊྚཏཱི’’ཏི ཝདནྟི, ཏམྤི ཨཉྙེ པཎྜིཏཱ ནཱནུཛཱནནྟི.

ཀཐཾ? ‘‘ཡེན ཝིཧཱརོ ཀཱརིཏོ, སོ ཝིཧཱརསཱམིཀོ’’ཏི ཝཙནཾ པུབྦཝོཧཱརཝསེན ཝུཏྟཾ, ན ཨིདཱནི ཨིསྶརཝསེན ཡཐཱ ཛེཏཝནཾ, པཏྟསྶཱམིཀོཏྱཱདི. ཡཐཱ ཧི ཛེཏསྶ རཱཛཀུམཱརསྶ ཝནཾ ཨུཡྻཱནཾ ཛེཏཝནནྟི ཝིགྒཧེ ཀཏེ ཡདིཔི ཨནཱཐཔིཎྜིཀེན ཀིཎིཏྭཱ ཝིཧཱརཔཏིཊྛཱཔནཀཱལཏོ པཊྛཱཡ རཱཛཀུམཱརོ ཏསྶ ཨུཡྻཱནསྶ ཨིསྶརོ ན ཧོཏི, ཏཐཱཔི ཨནཱཐཔིཎྜིཀེན ཀིཎིཏཀཱལཏོ པུབྦེ ཨིསྶརབྷཱུཏཔུབྦཏྟཱ པུབྦཝོཧཱརཝསེན སབྦདཱཔི ཛེཏཝནནྟྭེཝ ¶ ཝོཧརཱིཡཏི. ཡཐཱ ཙ པཏྟསྶ སཱམིཀོ པཏྟསྶཱམིཀོཏི ཝིགྒཧེ ཀཏེ ཡདིཔི དཱཡཀེཧི ཀིཎིཏྭཱ བྷིཀྑུསྶ དིནྣཀཱལཏོ པཊྛཱཡ ཀམྨཱརོ པཏྟསྶ ཨིསྶརོ ན ཧོཏི, ཏཐཱཔི དཱཡཀེན ཀིཎིཏཀཱལཏོ ¶ པུབྦེ ཨིསྶརབྷཱུཏཔུབྦཏྟཱ པུབྦཝོཧཱརཝསེན པཏྟསྶཱམིཀོཏྭེཝ ཝོཧརཱིཡཏི, ཨེཝཾ ཡདིཔི བྷིཀྑུསྶ དིནྣཀཱལཏོ པཊྛཱཡ དཱཡཀོ ཝིཧཱརསྶ ཨིསྶརོ ན ཧོཏི ཝཏྠུཔརིཙྩཱགལཀྑཎཏྟཱ དཱནསྶ, ཏཐཱཔི དཱནཀཱལཏོ པུབྦེ ཨིསྶརབྷཱུཏཔུབྦཏྟཱ པུབྦཝོཧཱརཝསེན ཝིཧཱརསྶཱམིཀོཏྭེཝ ཝོཧརཱིཡཏི, ན མུཁྱཏོ ཨིསྶརབྷཱཝཏོཏི ཝིཉྙཱཡཏི, ཏསྨཱ སངྒྷསྶ ཝཱ གཎསྶ ཝཱ པུགྒལསྶ ཝཱ དིནྣཀཱལཏོ པཊྛཱཡ སངྒྷཱདཡོ པཊིགྒཱཧཀཱ ཨེཝ ཝིཙཱརེཏུཾ ཨིསྶརཱ, ན དཱཡཀོ.

ཀཐཾ ཝིཉྙཱཡཏཱིཏི ཙེ? སནྟེསུཔི ཨནཱཐཔིཎྜིཀཱདཱིསུ ཝིཧཱརདཱཡཀེསུ ‘‘ཨནུཛཱནཱམི, བྷིཀྑཝེ, པཉྩཧངྒེཧི སམནྣཱགཏཾ བྷིཀྑུཾ སེནཱསནགྒཱཧཱཔཀཾ སམྨནྣིཏུ’’ནྟིཨཱདིནཱ (ཙཱུལ༹ཝ. ༣༡༧) སངྒྷེན སམྨཏཾ སེནཱསནགྒཱཧཱཔཀཾ ཨནུཛཱནིཏྭཱ, ‘‘ཨནུཛཱནཱམི, བྷིཀྑཝེ…པེ… སེཡྻགྒེན གཱཧེཏུ’’ནྟིཨཱདིནཱ (ཙཱུལ༹ཝ. ༣༡༨) སེནཱསནགྒཱཧཱཔཀསྶེཝ ཝིཙཱརེཏུཾ ཨིསྶརབྷཱཝསྶ ཝཙནཏོ ཙ ‘‘དྭེ བྷིཀྑཱུ སངྒྷིཀཾ བྷཱུམིཾ གཧེཏྭཱ སོདྷེཏྭཱ སངྒྷིཀཾ སེནཱསནཾ ཀརོནྟི, ཡེན སཱ བྷཱུམི པཋམཾ གཧིཏཱ, སོ སཱམཱི’’ཏི ཙ ‘‘ཨུབྷོཔི པུགྒལིཀཾ ཀརོནྟི, སོཡེཝ སཱམཱི’’ཏི ཙ ‘‘ཡོ པན སངྒྷིཀཾ ཝལླིམཏྟམྤི ཨགྒཧེཏྭཱ ཨཱཧརིམེན ཨུཔཀརཎེན སངྒྷིཀཱཡ བྷཱུམིཡཱ པུགྒལིཀཝིཧཱརཾ ཀཱརེཏི, ཨུཔཌྜྷཾ སངྒྷིཀཾ ཨུཔཌྜྷཾ པུགྒལིཀ’’ནྟི ཙ སངྒྷཔུགྒལཱནཾཡེཝ སཱམིབྷཱཝསྶ ཨཊྛཀཐཱཡཾ ཝུཏྟཏྟཱ ཙ ཝིཉྙཱཡཏི.

‘‘ཏསྶ ཝཱ ཀུལེ ཡོ ཀོཙི ཨཱཔུཙྪིཏབྦོ’’ཏི ཨཊྛཀཐཱཝཙནམྤི ཏེསཾ ཝིཧཱརསྶ ཨིསྶརབྷཱཝདཱིཔཀཾ ན ཧོཏི, ཨཐ ཁོ གམིཀོ བྷིཀྑུ དིསཾ གནྟུཀཱམོ ཝིཧཱརེ ཨཱཔུཙྪིཏབྦབྷིཀྑུསཱམཎེརཨཱརཱམིཀེསུ ¶ ཨསནྟེསུ ཏེ ཨཱཔུཙྪིཏྭཱ གནྟབྦབྷཱཝམེཝ དཱིཔེཏི. ཝུཏྟཉྷེཏཾ ཨཊྛཀཐཱཡཾ ‘‘ཨིམཾ པན དསཝིདྷམྤི སེཡྻཾ སངྒྷིཀེ ཝིཧཱརེ སནྠརིཏྭཱ ཝཱ སནྠརཱཔེཏྭཱ ཝཱ པཀྐམནྟེན ཨཱཔུཙྪིཏྭཱ པཀྐམིཏབྦཾ, ཨཱཔུཙྪནྟེན ཙ བྷིཀྑུམྷི སཏི བྷིཀྑུ ཨཱཔུཙྪིཏབྦོ…པེ… ཏསྨིཾ ཨསཏི ཨཱརཱམིཀོ, ཏསྨིམྤི ཨསཏི ཡེན ཝིཧཱརོ ཀཱརིཏོ, སོ ཝིཧཱརསྶཱམིཀོ, ཏསྶ ཝཱ ཀུལེ ཡོ ཀོཙི ཨཱཔུཙྪིཏབྦོ’’ཏི. ཨེཝཾ ཨཱརཱམིཀསྶཔི ཨཱཔུཙྪིཏབྦཏོ ཨོལོཀནཏྠཱཡ ཝཏྟསཱིསེནེཝ ཨཱཔུཙྪིཏབྦོ, ན ཏེསཾ སངྒྷིཀསེནཱསནསྶ ཨིསྶརབྷཱཝཏོཏི དཊྛབྦཾ.

‘‘པཙྪིནྣེ ¶ ཀུལཝཾསེ’’ཏྱཱདིཝཙནཉྩ ཨཀཔྤིཡཝསེན ཀཏཱནཾ ཨཀཔྤིཡཝོཧཱརེན པཊིགྒཧིཏཱནཾ ཁེཏྟཝཏྠུཏལཱ༹ཀཱདཱིནཾ ཨཀཔྤིཡཏྟཱ བྷིཀྑཱུཧི པརིཙྩཏྟཱནཾ ཀཔྤིཡཀརཎཏྠཱཡ རཱཛཱདཱིཧི གཧེཏྭཱ པུན ཏེསཾཡེཝ བྷིཀྑཱུནཾ དཱནམེཝ དཱིཔེཏི, ན ཏེསཾ རཱཛཱདཱིནཾ ཏེཧི བྷིཀྑཱུཧི ཨཉྙེསཾ སངྒྷགཎཔུགྒལཙེཏིཡཱནཾ དཱནཾ. ཡདི དདེཡྻུཾ, ཨདྷམྨིཀདཱནཨདྷམྨིཀཔཨགྒཧཨདྷམྨིཀཔརིབྷོགཱ སིཡུཾ. ཝུཏྟཉྷེཏཾ པརིཝཱརེ (པརི. ཨཊྛ. ༣༢༩) ‘‘ནཝ ཨདྷམྨིཀཱནི དཱནཱནི སངྒྷསྶ པརིཎཏཾ ཨཉྙསངྒྷསྶ ཝཱ ཙེཏིཡསྶ ཝཱ པུགྒལསྶ ཝཱ པརིཎཱམེཏི, ཙེཏིཡསྶ པརིཎཏཾ ཨཉྙཙེཏིཡསྶ ཝཱ སངྒྷསྶ ཝཱ པུགྒལསྶ ཝཱ པརིཎཱམེཏི, པུགྒལསྶ པརིཎཏཾ ཨཉྙཔུགྒལསྶ ཝཱ སངྒྷསྶ ཝཱ ཙེཏིཡསྶ ཝཱ པརིཎཱམེཏཱི’’ཏི. ཨཊྛཀཐཱཡཉྩ (པརི. ཨཊྛ. ༣༢༩) ‘‘ནཝ ཨདྷམྨིཀཱནི དཱནཱནཱིཏི…པེ… ཨེཝཾ ཝུཏྟཱནི. ནཝ པཊིགྒཧཔརིབྷོགཱཏི ཨེཏེསཾཡེཝ དཱནཱནཾ པཊིགྒཧཱ ཙ པརིབྷོགཱ ཙཱ’’ཏི ཝུཏྟཾ. ཏསྨཱ ཡདི རཱཛཱདཡོ ཨིསྶརཱཏི གཧེཏྭཱ ཨཉྙསྶ དེཡྻུཾ, ཏམྤི དཱནཾ ཨདྷམྨིཀདཱནཾ ཧོཏི, ཏཾ དཱནཾ པཊིགྒཧཱ ¶ ཙ ཨདྷམྨིཀཔཊིགྒཧཱ ཧོནྟི, ཏཾ དཱནཾ པརིབྷུཉྫནྟཱ ཙ ཨདྷམྨིཀཔརིབྷོགཱ ཧོནྟཱིཏི དཊྛབྦཾ.

ཨཐཱཔི ཨེཝཾ ཝདེཡྻུཾ ‘‘ཝིཧཱརདཱནཾ སངྒྷསྶ, ཨགྒཾ བུདྡྷེན ཝཎྞིཏནྟིཨཱདཱིསུ (ཙཱུལ༹ཝ. ༢༩༥, ༣༡༥) ‘སངྒྷསྶཱ’ཏི ཨཡཾ སདྡོ ‘དཱན’ནྟི ཨེཏྠ སཱམིསམྦནྡྷོ ན ཧོཏི, ཨཐ ཁོ སམྤདཱནམེཝ, ‘དཱཡཀསྶཱ’ཏི པན སཱམིསམྦནྡྷོ ཨཛ྄ཛྷཱཧརིཏབྦོ, ཏསྨཱ སཱམིབྷཱུཏོ དཱཡཀོཝ ཨིསྶརོ, ན སམྤདཱནབྷཱུཏོ སངྒྷོ’’ཏི. ཏེ ཨེཝཾ ཝཏྟབྦཱ – ‘‘ཝིཧཱརདཱནཾ སངྒྷསྶཱ’’ཏི ཨིདཾ དཱནསམཡེ པཝཏྟཝསེན ཝུཏྟཾ, ན དིནྣསམཡེ པཝཏྟཝསེན. དཱནཀཱལེ ཧི དཱཡཀོ ཨཏྟནོ ཝཏྠུབྷཱུཏཾ ཝིཧཱརཾ སངྒྷསྶ པརིཙྩཛིཏྭཱ དེཏི, ཏསྨཱ ཏསྨིཾ སམཡེ དཱཡཀོ སཱམཱི ཧོཏི, སངྒྷོ སམྤདཱནཾ, དིནྣཀཱལེ པན སངྒྷོཝ སཱམཱི ཧོཏི ཝིཧཱརསྶ པཊིགྒཧིཏཏྟཱ, ན དཱཡཀོ པརིཙྩཏྟཏྟཱ, ཏསྨཱ སངྒྷོ ཝིཙཱརེཏུཾ ཨིསྶརོ. ཏེནཱཧ བྷགཝཱ ‘‘པརིཙྩཏྟཾ ཏཾ, བྷིཀྑཝེ, དཱཡཀེཧཱི’’ཏི (ཙཱུལ༹ཝ. ༢༧༣). ཨིདཾ པན སདྡལཀྑཎགརུཀཱ སདྡཧིསྶནྟཱིཏི ཝུཏྟཾ, ཨཏྠཏོ པན ཙཱིཝརཱདཱིནཾ ཙཏུནྣཾ པཙྩཡཱནཾ དཱནཀཱལེཡེཝ དཱཡཀསནྟཀབྷཱཝོ དིནྣཀཱལཏོ པཊྛཱཡ པཊིགྒཱཧཀསནྟཀབྷཱཝོ སབྦེསཾ པཱཀཊོ, ཏསྨཱ ཨིདམྤི ཝཙནཾ དཱཡཀསནྟཀབྷཱཝསཱདྷཀཾ ན ཧོཏཱིཏི དཊྛབྦཾ.

ཨེཝཾ ཧོཏུ, ཏཐཱཔི ‘‘སཙེ བྷིཀྑཱུཧི པརིཙྩཏྟབྷཱཝཾ ཉཏྭཱ སཱམིཀོ ཝཱ ཏསྶ པུཏྟདྷཱིཏརོ ¶ ཝཱ ཨཉྙོ ཝཱ ཀོཙི ཝཾསེ ཨུཔྤནྣོ པུན ཀཔྤིཡཝོཧཱརེན དེཏི, ཝཊྚཏཱི’’ཏི ཨཊྛཀཐཱཡཾ (པཱརཱ. ཨཊྛ. ༢.༥༣༨-༥༣༩) ཝུཏྟཏྟཱ ཝིཧཱརསྶཱམིཀབྷཱུཏདཱཡཀསྶ ཝཱ ཏསྶ པུཏྟདྷཱིཏཱདཱིནཾ ཝཾསེ ཨུཔྤནྣཱནཾ ཝཱ དཱཏུཾ ཨིསྶརབྷཱཝོ སིདྡྷོཡེཝཱཏི. ན སིདྡྷོ. ཀསྨཱཏི ཙེ? ནནུ ཝུཏྟཾ ‘‘བྷིཀྑཱུཧི པརིཙྩཏྟབྷཱཝཾ ཉཏྭཱ’’ཏི, ཏསྨཱ ཨཀཔྤིཡཏྟཱ བྷིཀྑཱུཧི པརིཙྩཏྟམེཝ ཀཔྤིཡཀརཎཏྠཱཡ དཱཡཀཱདཱིཧི པུན ¶ ཀཔྤིཡཝོཧཱརེན དེཏི, ཝཊྚཏི. ཡཐཱ ཨཔྤཊིགྒཧིཏཏྟཱ བྷིཀྑཱུཧི ཨཔརིབྷུཏྟམེཝ ཁཱདནཱིཡབྷོཛནཱིཡཾ བྷིཀྑུསནྟཀཾཡེཝ ཨཱཔཏྟིམོཙནཏྠཾ དཱཡཀཱདཡོ པཊིགྒཧཱཔེཏི, ན པརིབྷུཏྟཾ, ཡཐཱ ཙ བཱིཛགཱམཔརིཡཱཔནྣཾཡེཝ བྷིཀྑུསནྟཀཾ བཱིཛགཱམབྷཱུཏགཱམབྷཱཝཏོ པརིམོཙནཏྠཾ ཀཔྤིཡཀཱརཀཱདཡོ ཀཔྤིཡཾ ཀརོནྟི, ན ཨཔརིཡཱཔནྣཾ, ཨེཝཾ ཨཀཔྤིཡཾ བྷིཀྑཱུཧི པརིཙྩཏྟཾཡེཝ ཏལཱ༹ཀཱདིཀཾ ཀཔྤིཡཀརཎཏྠཾ དཱཡཀཱདཡོ པུན དེནྟི, ན ཨཔརིཙྩཏྟཾ, ཏསྨཱ ཨིདམྤི ཝཙནཾ ཀཔྤིཡཀརཎཏྟཾཡེཝ སཱདྷེཏི, ན ཨིསྶརཏྟནྟི ཝིཉྙཱཡཏི.

ཏཐཱཔི ཨེཝཾ ཝདེཡྻུཾ ‘‘ཛཱཏིབྷཱུམིཡཾ ཛཱཏིབྷཱུམིཀཱ ཨུཔཱསཀཱ ཨཱཡསྨནྟཾ དྷམྨིཀཏྠེརཾ སཏྟཧི ཛཱཏིབྷཱུམིཀཝིཧཱརེཧི པབྦཱཛཡིཾསཱུཏི ཝཙནཏོ དཱཡཀོ ཝིཧཱརསྶ ཨིསྶརོཏི ཝིཉྙཱཡཏི. ཨིསྶརཏྟཱཡེཝ ཧི ཏེ ཐེརཾ པབྦཱཛེཏུཾ སཀྐཱ, ནོ ཨནིསྶརཱ’’ཏི, ན ཁོ པནེཝཾ དཊྛབྦཾ. ཀསྨཱ? ‘‘ཛཱཏིབྷཱུམིཀཱ ཨུཔཱསཀཱ’’ཨིཙྩེཝ ཧི ཝུཏྟཾ, ན ‘‘ཝིཧཱརདཱཡཀཱ’’ཏི, ཏསྨཱ ཏསྨིཾ དེསེ ཝསནྟཱ བཧཝོ ཨུཔཱསཀཱ ཨཱཡསྨནྟཾ དྷམྨིཀཏྠེརཾ ཨཡུཏྟཙཱརིཏྟཱ སཀལསཏྟཝིཧཱརཏོ པབྦཱཛཡིཾསུ, ན ཨཏྟནོ ཝིཧཱརདཱཡཀབྷཱཝེན ཨིསྶརཏྟཱ, ཏསྨཱ ཨིདམྤི ཨུདཱཧརཎཾ ན ཨིསྶརབྷཱཝདཱིཔཀཾ, ཨཐ ཁོ ཨཔརཱདྷཱནུརཱུཔཀརཎབྷཱཝདཱིཔཀནྟི དཊྛབྦཾ. ཨེཝཾ ཡདཱ དཱཡཀོ ཝིཧཱརཾ པཏིཊྛཱཔེཏྭཱ དེཏི, ཏསྶ མུཉྩཙེཏནཾ པཏྭཱ དིནྣཀཱལཏོ པཊྛཱཡ སོ ཝཱ ཏསྶ ཝཾསེ ཨུཔྤནྣོ ཝཱ ཛནཔདསྶཱམིཀརཱཛཱདཡོ ཝཱ ཨིསྶརཱ བྷཝིཏུཾ ཝཱ ཝིཙཱརེཏུཾ ཝཱ ན ལབྷནྟི, པཊིགྒཱཧཀབྷཱུཏོ སངྒྷོ ཝཱ གཎོ ཝཱ པུགྒལོ ཝཱ སོཡེཝ ཨིསྶརོ བྷཝིཏུཾ ཝཱ ཝིཙཱརེཏུཾ ཝཱ ལབྷཏཱིཏི དཊྛབྦཾ.

ཏཏྠ དཱཡཀཱདཱིནཾ ཨིསྶརོ བྷཝིཏུཾ ཨལབྷནབྷཱཝོ ཀཐཾ ཝིཉྙཱཡཏཱིཏི ཙེ? ‘‘ཝཏྠུཔརིཙྩཱགལཀྑཎཏྟཱ དཱནསྶ, པཐཝཱདིཝཏྠུཔརིཙྩཱགེན ¶ ཙ པུན གཧཎསྶ ཨཡུཏྟཏྟཱ’’ཏི ཝིམཏིཝིནོདནིཡཾ ཝཙནཏོ ‘‘ཨནུཛཱནཱམི, བྷིཀྑཝེ, ཡཾ དཱིཡམཱནཾ པཏཏི, ཏཾ སཱམཾ གཧེཏྭཱ པརིབྷུཉྫིཏུཾ, པརིཙྩཏྟཾ ཏཾ, བྷིཀྑཝེ, དཱཡཀེཧཱི’’ཏི (ཙཱུལ༹ཝ. ༢༧༣) བྷགཝཏཱ ཝུཏྟཏྟཱ ཙ ‘‘པརིཙྩཏྟཾ ཏཾ, བྷིཀྑཝེ, དཱཡཀེཧཱིཏི ཝཙནེན པནེཏྠ པརསནྟཀཱབྷཱཝོ དཱིཔིཏོ’’ཏི ཨཊྛཀཐཱཡཾ ¶ ཝུཏྟཏྟཱ ཙ ཝིཉྙཱཡཏི. སངྒྷཱདཱིནཾ ཨིསྶརོ བྷཝིཏུཾ ལབྷནབྷཱཝོ ཀཐཾ ཉཱཏབྦོཏི ཙེ? སངྒྷིཀོ ནཱམ ཝིཧཱརོ སངྒྷསྶ དིནྣོ ཧོཏི པརིཙྩཏྟོ, ‘‘པུགྒལིཀེ པུགྒལིཀསཉྙཱི ཨཉྙསྶ པུགྒལིཀེ ཨཱཔཏྟི དུཀྐཊསྶ, ཨཏྟནོ པུགྒལིཀེ ཨནཱཔཏྟཱི’’ཏི པཱཙིཏྟིཡཔཱལི༹ཡཾ (པཱཙི. ༡༡༧, ༡༢༧) ཨཱགམནཏོ ཙ ‘‘ཨནྟམསོ ཙཏུརངྒུལཔཱདཀཾ གཱམདཱརཀེཧི པཾསྭཱགཱརཀེསུ ཀཱིལ༹ནྟེཧི ཀཏམྤི སངྒྷསྶ དིནྣཏོ པཊྛཱཡ གརུབྷཎྜཾ ཧོཏཱི’’ཏི (ཙཱུལ༹ཝ. ཨཊྛ. ༣༢༡) སམནྟཔཱསཱདིཀཱཡཾ ཝཙནཏོ ཙ ‘‘ཨབྷིཡོགེཔི ཙེཏྠ ཙཱཏུདྡིསཾ སངྒྷཾ ཨུདྡིསྶ བྷིཀྑཱུནཾ དིནྣཾ ཝིཧཱརཾ ཝཱ པརིཝེཎཾ ཝཱ ཨཱཝཱསཾ ཝཱ མཧནྟམྤི ཁུདྡཀམྤི ཨབྷིཡུཉྫཏོ ཨབྷིཡོགོ ན རུཧཏི, ཨཙྪིནྡིཏྭཱ གཎྷིཏུམྤི ན སཀྐོཏི. ཀསྨཱ? སབྦེསཾ དྷུརནིཀྑེཔཱབྷཱཝཏོ. ན ཧེཏྠ སབྦེ ཙཱཏུདྡིསཱ བྷིཀྑཱུ དྷུརནིཀྑེཔཾ ཀརོནྟཱིཏི. དཱིགྷབྷཱཎཀཱདིབྷེདསྶ པན གཎསྶ ཨེཀཔུགྒལསྶ ཝཱ སནྟཀཾ ཨབྷིཡུཉྫིཏྭཱ གཎྷནྟོ སཀྐོཏི ཏེ དྷུརཾ ནིཀྑིཔཱཔེཏུ’’ནྟི དུཏིཡཔཱརཱཛིཀཝཎྞནཱཡཾ (པཱརཱ. ཨཊྛ. ༡.༡༠༢) ཝཙནཏོ ཙ ཝིཉྙཱཡཏི.

ཀཐཾ དཱཡཀཱདཱིནཾ ཝིཙཱརེཏུཾ ཨལབྷནབྷཱཝོ ཝིཉྙཱཡཏཱིཏི ཙེ? སནྟེསུཔི ཝེལུ༹ཝནཝིཧཱརཱདིདཱཡཀེསུ ཏེསཾ ཝིཙཱརཎཾ ཨནནུཛཱནིཏྭཱ ‘‘ཨནུཛཱནཱམི, བྷིཀྑཝེ, པཉྩཧངྒེཧི སམནྣཱགཏཾ བྷིཀྑུཾ སེནཱསནགྒཱཧཱཔཀཾ སམྨནྣིཏུ’’ནྟི བྷིཀྑུསྶེཝ སེནཱསནགྒཱཧཱཔཀསམྨུཏིཨནུཛཱནཏོ ཙ བྷཎྜནཀཱརཀེསུ ¶ ཀོསམྦཀབྷིཀྑཱུསུ སཱཝཏྠིཾ ཨཱགཏེསུ ཨནཱཐཔིཎྜིཀེན ཙ ཝིསཱཁཱཡ མཧཱཨུཔཱསིཀཱཡ ཙ ‘‘ཀཐཱཧཾ, བྷནྟེ, ཏེསུ བྷིཀྑཱུསུ པཊིཔཛྫཱམཱི’’ཏི (མཧཱཝ. ༤༦༨) ཨེཝཾ ཛེཏཝནཝིཧཱརདཱཡཀཔུབྦཱརཱམཝིཧཱརདཱཡཀབྷཱུཏེསུ ཨཱརོཙིཏེསུཔི ཏེསཾ སེནཱསནཝིཙཱརཎཾ ཨཝཏྭཱ ཨཱཡསྨཏཱ སཱརིཔུཏྟཏྠེརེན ‘‘ཀཐཾ ནུ ཁོ, བྷནྟེ, ཏེསུ བྷིཀྑཱུསུ སེནཱསནེ པཊིཔཛྫིཏབྦ’’ནྟི ཨཱརོཙིཏེ ‘‘ཏེན ཧི, སཱརིཔུཏྟ, ཝིཝིཏྟཾ སེནཱསནཾ དཱཏབྦ’’ནྟི ཝཏྭཱ ‘‘སཙེ པན, བྷནྟེ, ཝིཝིཏྟཾ ན ཧོཏི, ཀཐཾ པཊིཔཛྫིཏབྦ’’ནྟི ཝུཏྟེ ‘‘ཏེན ཧི ཝིཝིཏྟཾ ཀཏྭཱཔི དཱཏབྦཾ, ན ཏྭེཝཱཧཾ, སཱརིཔུཏྟ, ཀེནཙི པརིཡཱཡེན ཝུཌྜྷཏརསྶ བྷིཀྑུནོ སེནཱསནཾ པཊིབཱཧིཏབྦནྟི ཝདཱམི, ཡོ པཊིབཱཧེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༤༧༣) ཐེརསྶེཝ སེནཱསནསྶ ཝིཙཱརཎསྶ ཨནུཉྙཱཏཏྟཱ ཙ ཝིཉྙཱཡཏི.

ཀཐཾ པན སངྒྷཱདཱིནཾ སེནཱསནཾ ཝིཙཱརེཏུཾ ལབྷནབྷཱཝོ ཝིཉྙཱཡཏཱིཏི? ‘‘ཨེཝཉྩ, བྷིཀྑཝེ, ¶ སམྨནྣིཏབྦོ – པཋམཾ བྷིཀྑུ ཡཱཙིཏབྦོ, ཡཱཙིཏྭཱ བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –

སུཎཱཏུ མེ, བྷནྟེ, སངྒྷོ…པེ… སམྨཏོ སངྒྷེན ཨིཏྠནྣཱམོ བྷིཀྑུ སེནཱསནགྒཱཧཱཔཀོ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི (ཙཱུལ༹ཝ. ༣༡༧).

ཨེཝཾ སངྒྷེན སེནཱསནགྒཱཧཱཔཀཾ སམྨནྣཱཔེཏྭཱ པུན ཏེན སངྒྷསམྨཏེན སེནཱསནགྒཱཧཱཔཀེན སེནཱསནགྒཱཧཀཝིདྷཱནཾ ཨནུཛཱནིཏུཾ ཨནུཛཱནཱམི, བྷིཀྑཝེ, པཋམཾ བྷིཀྑཱུ གཎེཏུཾ, བྷིཀྑཱུ གཎེཏྭཱ སེཡྻཱ གཎེཏུཾ, སེཡྻཱ གཎེཏྭཱ སེཡྻགྒེན གཱཧེཏུ’’ནྟི ཝཙནཏོ སངྒྷིཀསེནཱསནསྶ ¶ སངྒྷེན ཝིཙཱརེཏུཾ ལབྷནབྷཱཝོ ཝིཉྙཱཡཏི.

‘‘དཱིགྷབྷཱཎཀཱདིབྷེདསྶ པན གཎསྶ ཨེཀཔུགྒལསྶ ཝཱ དིནྣཝིཧཱརཱདིཾ ཨཙྪིནྡིཏྭཱ གཎྷནྟེ དྷུརནིཀྑེཔསམྦྷཝཱ པཱརཱཛིཀ’’ནྟི ཨཊྛཀཐཱཡཾ (པཱརཱ. ཨཊྛ. ༡.༡༠༢) ཨཱགམནཏོ ཙ ‘‘ཨཏྟནོ པུགྒལིཀེ ཨནཱཔཏྟཱི’’ཏི པཱལི༹ཡཾ (པཱཙི. ༡༡༧) ཨཱགམནཏོ ཙ ‘‘ཡསྨིཾ པན ཝིསྶཱསོ རུཧཏི, ཏསྶ སནྟཀཾ ཨཏྟནོ པུགྒལིཀམིཝ ཧོཏཱིཏི མཧཱཔཙྩརིཨཱདཱིསུ ཝུཏྟ’’ནྟི ཨཊྛཀཐཱཡཾ (པཱཙི. ཨཊྛ. ༡༡༢) ཝཙནཏོ ཙ གཎསྶ དིནྣོ གཎསནྟཀཝིཧཱརོ གཎེནེཝ ཝིཙཱརཱིཡཏེ, ནོ དཱཡཀཱདཱིཧི. པུགྒལསྶ དིནྣོ པུགྒལིཀཝིཧཱརོཔི པཊིགྒཱཧཀཔུགྒལེནེཝ ཝིཙཱརཱིཡཏེ, ནོ དཱཡཀཱདཱིཧཱིཏི ཝིཉྙཱཡཏི. ཨེཝཾ ཝིནཡཔཱལི༹ཡཾ ཨཊྛཀཐཱཊཱིཀཱསུ ཙ ཝིཧཱརསྶ སངྒྷིཀགཎསནྟཀཔུགྒལིཀཝསེན ཏིཝིདྷསྶེཝ ཝཙནཏོ ཙ ཏེསཾཡེཝ སངྒྷགཎཔུགྒལཱནཾ ཝིཧཱརཝིཙཱརཎསྶ ཨནུཉྙཱཏཏྟཱ ཙ དཱཡཀསནྟཀསྶ ཝིཧཱརསྶ ཝིསུཾ ཨཝུཏྟཏྟཱ ཙ དཱཡཀཱནཾ ཝིཧཱརཝིཙཱརཎསྶ ཨནནུཉྙཱཏཏྟཱ ཙ སངྒྷཱདཡོ ཨེཝ ཝིཧཱརསྶ ཨིསྶརཱ ཧོནྟི, ཏེཡེཝ ཙ ཝིཙཱརེཏུཾ ལབྷནྟཱིཏི དཊྛབྦཾ.

ཨེཝཾ ཧོཏུ, ཏེསུ པཊིགྒཱཧཀབྷཱུཏེསུ སངྒྷགཎཔུགྒལེསུ སོ ཝིཧཱརོ ཀསྶ སནྟཀོ ཧོཏི, ཀེན ཙ ཝིཙཱརེཏབྦོཏི? ཝུཙྩཏེ – སངྒྷིཀཝིཧཱརེ ཏཱཝ ‘‘ཨཱགཏཱནཱགཏསྶ ཙཱཏུདྡིསསྶ སངྒྷསྶ དམྨཱི’’ཏི དིནྣཏྟཱ པཊིགྒཱཧཀེསུ ཀཱལཀཏེསུཔི ཏདཉྙོ ཙཱཏུདྡིསསངྒྷོ ཙ ཨནཱགཏསངྒྷོ ཙ ཨིསྶརོ, ཏསྶ སནྟཀོ, ཏེན ཝིཙཱརེཏབྦོ. གཎསནྟཀེ པན ཏསྨིཾ གཎེ ཡཱཝ ཨེཀོཔི ཨཏྠི, ཏཱཝ གཎསནྟཀོཝ, ཏེན ཨཝསིཊྛེན བྷིཀྑུནཱ ཝིཙཱརེཏབྦོ. སབྦེསུ ཀཱལཀཏེསུ ¶ ཡདི སཀལགཎོ ཝཱ ཏཾགཎཔརིཡཱཔནྣཨཝསིཊྛཔུགྒལོ ¶ ཝཱ ཛཱིཝམཱནཀཱལེཡེཝ ཡསྶ ཀསྶཙི དིནྣོ, ཡེན ཙ ཝིསྶཱསགྒཱཧཝསེན གཧིཏོ, སོ ཨིསྶརོ. སཙེཔི སཀལགཎོ ཛཱིཝམཱནཀཱལེཡེཝ ཨཉྙགཎསྶ ཝཱ སངྒྷསྶ ཝཱ པུགྒལསྶ ཝཱ དེཏི, ཏེ ཨཉྙགཎསངྒྷཔུགྒལཱ ཨིསྶརཱ ཧོནྟི. པུགྒལིཀཝིཧཱརེ པན སོ ཝིཧཱརསྶཱམིཀོ ཨཏྟནོ ཛཱིཝམཱནཀཱལེཡེཝ སངྒྷསྶ ཝཱ གཎསྶ ཝཱ པུགྒལསྶ ཝཱ དེཏི, ཏེ ཨིསྶརཱ ཧོནྟི. ཡོ ཝཱ པན ཏསྶ ཛཱིཝམཱནསྶེཝ ཝིསྶཱསགྒཱཧཝསེན གཎྷཱཏི, སོཝ ཨིསྶརོ ཧོཏཱིཏི དཊྛབྦོ.

ཀཐཾ ཝིཉྙཱཡཏཱིཏི ཙེ? སངྒྷིཀེ ཝིཧཱརསྶ གརུབྷཎྜཏྟཱ ཨཝིསྶཛྫིཡཾ ཨཝེབྷངྒིཀཾ ཧོཏི, ན ཀསྶཙི དཱཏབྦཾ. གཎསནྟཀཔུགྒལིཀེསུ པན ཏེསཾ སཱམིཀཏྟཱ དཱནཝིསྶཱསགྒཱཧཱ རུཧནྟི, ‘‘ཏསྨཱ སོ ཛཱིཝམཱནོཡེཝ སབྦཾ ཨཏྟནོ པརིཀྑཱརཾ ནིསྶཛྫིཏྭཱ ཀསྶཙི ཨདཱསི, ཀོཙི ཝཱ ཝིསྶཱསཾ ཨགྒཧེསི. ཡསྶ དིནྣཾ, ཡེན ཙ གཧིཏཾ, ཏསྶེཝ ཧོཏཱི’’ཏི ཙ ‘‘དྭིནྣཾ སནྟཀཾ ཧོཏི ཨཝིབྷཏྟཾ, ཨེཀསྨིཾ ཀཱལཀཏེ ཨིཏརོ སཱམཱི, བཧཱུནམྤི སནྟཀེ ཨེསེཝ ནཡོ’’ཏི (མཧཱཝ. ཨཊྛ. ༣༦༩) ཙ ཨཊྛཀཐཱཡཾ ཝུཏྟཏྟཱ ཝིཉྙཱཡཏི.

ཨེཝཾ པན ཝིསྶཛྫེཏྭཱ ཨདིནྣཾ ‘‘མམཙྩཡེན ཨསུཀསྶ ཧོཏཱུ’’ཏི དཱནཾ ཨཙྩཡདཱནཏྟཱ ན རུཧཏི. ཝུཏྟཉྷེཏཾ ཨཊྛཀཐཱཡཾ (ཙཱུལ༹ཝ. ཨཊྛ. ༤༡༩) ‘‘སཙེ ཧི པཉྩསུ སཧདྷམྨིཀེསུ ཡོ ཀོཙི ཀཱལཾ ཀརོནྟོ ‘མམཙྩཡེན མཡ྄ཧཾ པརིཀྑཱརོ ཨུཔཛ྄ཛྷཱཡསྶ ཧོཏུ, ཨཱཙརིཡསྶ ཧོཏུ, སདྡྷིཝིཧཱརིཀསྶ ཧོཏུ, ཨནྟེཝཱསིཀསྶ ཧོཏུ, མཱཏུ ཧོཏུ, པིཏུ ཧོཏུ, ཨཉྙསྶ ཝཱ ཀསྶཙི ཧོཏཱུ’ཏི ཝདཏི, ཏེསཾ ན ཧོཏི, སངྒྷསྶེཝ ཧོཏི. ན ཧི པཉྩནྣཾ སཧདྷམྨིཀཱནཾ ཨཙྩཡདཱནཾ རུཧཏི, གིཧཱིནཾ པན རུཧཏཱི’’ཏི. ཨེཏྠ ཙ ཨེཀཙྩེ པན ཝིནཡདྷརཱ ‘‘གིཧཱིནནྟི ¶ པདཾ སམྤདཱནནྟི གཧེཏྭཱ བྷིཀྑཱུནཾ སནྟཀཾ ཨཙྩཡདཱནཝསེན གིཧཱིནཾ དདནྟེ རུཧཏི, པཉྩནྣཾ པན སཧདྷམྨིཀཱནཾ དེནྟོ ན རུཧཏཱི’’ཏི ཝདནྟི. ཨེཝཾ སནྟེ མཱཏཱཔིཏཱུནཾ དདནྟོཔི རུཧེཡྻ ཏེསཾ གིཧིབྷཱུཏཏྟཱ. ‘‘ཨཐ ཙ པན ‘མཱཏུ ཧོཏུ, པིཏུ ཧོཏུ, ཨཉྙསྶ ཝཱ ཀསྶཙི ཧོཏཱུ’ཏི ཝདཏི, ཏེསཾ ན ཧོཏཱི’’ཏི ཝཙནཏོ ན རུཧཏཱིཏི ཝིཉྙཱཡཏི, ཏསྨཱ ‘‘གིཧཱིནཾ པནཱ’’ཏི ཨིདཾ ན སམྤདཱནཝཙནཾ, ཨཐ ཁོ སཱམིཝཙནམེཝཱཏི དཊྛབྦཾ. ཏེན གིཧཱིནཾ པན སནྟཀཾ ཨཙྩཡདཱནཾ རུཧཏཱིཏི སམྦནྡྷོ ཀཱཏབྦོ.

ཀིཉྩ བྷིཡྻོ – ‘‘སཙེ ཧི པཉྩསུ སཧདྷམྨིཀེསུ ཡོ ཀོཙི ཀཱལཾ ཀརོནྟོ མམཙྩཡེན ¶ མཡ྄ཧཾ པརིཀྑཱརོ’’ཏི ཨཱརབྷིཏྭཱ ‘‘ན ཧི པཉྩནྣཾ སཧདྷམྨིཀཱནཾ ཨཙྩཡདཱནཾ རུཧཏི, གིཧཱིནཾ པན རུཧཏཱི’’ཏི ཝུཏྟཏྟཱ སཱམྱཏྠེ ཚཊྛཱིབཧུཝཙནཾ སམཏྠིཏཾ བྷཝཏི. ཡདི ཨེཝཾ ‘‘གིཧཱིན’’ནྟི པདསྶ ཨསམྤདཱནཏྟེ སཏི ཀཏམཾ སམྤདཱནཾ ཧོཏཱིཏི? ‘‘ཡསྶ ཀསྶཙཱི’’ཏི པདཾ. ཝུཏྟཉྷི ཨཊྛཀཐཱཡཾ (ཙཱུལ༹ཝ. ཨཊྛ. ༤༡༩) ‘‘མཱཏུ ཧོཏུ, པིཏུ ཧོཏུ, ཨཉྙསྶ ཝཱ ཀསྶཙི ཧོཏཱུ’’ཏི. ཨཡམཏྠོ ཨཛྫུཀཝཏྠུནཱ (པཱརཱ. ༡༥༨) དཱིཔེཏབྦོ. ཨེཝཾ ཛཱིཝམཱནཀཱལེཡེཝ དཏྭཱ མཏེསུ ཝིནིཙྪཡོ ཨམྷེཧི ཉཱཏོ, ཀསྶཙི ཨདཏྭཱ མཏེསུ ཝིནིཙྪཡོ ཀཐཾ ཉཱཏབྦོཏི? ཏཏྠཱཔི སངྒྷིཀེ ཏཱཝ ཧེཊྛཱ ཝུཏྟནཡེན སངྒྷོཝ ཨིསྶརོ, གཎསནྟཀེ པན ཨེཀཙྩེསུ ཨཝསེསཱ ཨིསྶརཱ, སབྦེསུ མཏེསུ སངྒྷོཝ ཨིསྶརོ. ཝུཏྟཉྷི ཨཊྛཀཐཱཡཾ (མཧཱཝ. ཨཊྛ. ༣༦༩) ‘‘སབྦེསུ མཏེསུ སངྒྷིཀཾ ཧོཏཱི’’ཏི. པུགྒལིཀེ པན ཝིཧཱརསྶ གརུབྷཎྜཏྟཱ ཨཝིསྶཛྫིཡཾ ཨཝེབྷངྒིཀཾ སངྒྷིཀམེཝ ཧོཏི.

ཀཐཾ ཝིཉྙཱཡཏཱིཏི ཙེ? ‘‘བྷིཀྑུསྶ, བྷིཀྑཝེ, ཀཱལཀཏེ སངྒྷོ སཱམཱི པཏྟཙཱིཝརེ, ཨཔིཙ གིལཱནུཔཊྛཱཀཱ བཧཱུཔཀཱརཱ, ཨནུཛཱནཱམི ¶ , བྷིཀྑཝེ, སངྒྷེན ཏིཙཱིཝརཉྩ པཏྟཉྩ གིལཱནུཔཊྛཱཀཱནཾ དཱཏུཾ. ཡཾ ཏཏྠ ལཧུབྷཎྜཾ ལཧུཔརིཀྑཱརཾ, ཏཾ སམྨུཁཱིབྷཱུཏེན སངྒྷེན བྷཱཛེཏུཾ. ཡཾ ཏཏྠ གརུབྷཎྜཾ གརུཔརིཀྑཱརཾ, ཏཾ ཨཱགཏཱནཱགཏསྶ ཙཱཏུདྡིསསྶ སངྒྷསྶ ཨཝིསྶཛྫིཡཾ ཨཝེབྷངྒིཀ’’ནྟི (མཧཱཝ. ༣༦༩) ཏེན བྷགཝཏཱ ཛཱནཏཱ པསྶཏཱ ཨརཧཏཱ སམྨཱསམྦུདྡྷེན ཝུཏྟཏྟཱ ཝིཉྙཱཡཏི. ཨེཝམྤི ‘‘གརུབྷཎྜཾ གརུཔརིཀྑཱརཾ’’ཨིཙྩེཝ བྷགཝཏཱ ཝུཏྟཾ, ན ‘‘ཝིཧཱར’’ནྟི, ཏསྨཱ ཀཐཾ ཝིཧཱརསྶ གརུབྷཎྜབྷཱཝོཏི ཝིཉྙཱཡཏཱིཏི? ‘‘ཝིཧཱརོ ཝིཧཱརཝཏྠུ, ཨིདཾ དུཏིཡཾ ཨཝེབྷངྒིཀ’’ནྟི པཱལི༹ཡཾ,

‘‘དྭིསངྒཧཱནི དྭེ ཧོནྟི, ཏཏིཡཾ ཙཏུསངྒཧཾ;

ཙཏུཏྠཾ ནཝཀོཊྛཱསཾ, པཉྩམཾ ཨཊྛབྷེདནཾ.

‘‘ཨིཏི པཉྩཧི རཱསཱིཧི, པཉྩནིམྨལལོཙནོ;

པཉྩཝཱིསཝིདྷཾ ནཱཐོ, གརུབྷཎྜཾ པཀཱསཡཱི’’ཏི. (ཙཱུལ༹ཝ. ཨཊྛ. ༣༢༡) –

ཨཊྛཀཐཱཡཉྩ ཝུཏྟཏྟཱ ཝིཉྙཱཡཏི.

ཨིཏི ¶ དཱཡཀོ ཝིཧཱརཾ ཀཏྭཱ ཀུལཱུཔཀབྷིཀྑུསྶ དེཏི, ཏསྶ མུཉྩཙེཏནུཔྤཏྟིཏོ པུབྦཀཱལེ དཱཡཀོ ཝིཧཱརསྶཱམིཀོ ཧོཏི, དཱཏུཾ ཝཱ ཝིཙཱརེཏུཾ ཝཱ ཨིསྶརོ, མུཉྩཙེཏནུཔྤཏྟིཏོ པཊྛཱཡ པཊིགྒཱཧཀབྷིཀྑུ སཱམིཀོ ཧོཏི, པརིབྷུཉྫིཏུཾ ཝཱ ཨཉྙེསཾ དཱཏུཾ ཝཱ ཨིསྶརོ. སོ པུགྒལོ ཨཏྟནོ ཛཱིཝམཱནཀྑཎེཡེཝ སདྡྷིཝིཧཱརིཀཱདཱིནཾ ནིསྶཛྫིཏྭཱ དེཏི, ཏདཱ ཏེ སདྡྷིཝིཧཱརིཀཱདཡོ སཱམིཀཱ ཧོནྟི, པརིབྷུཉྫིཏུཾ ཝཱ ཨཉྙསྶ ཝཱ དཱཏུཾ ཨིསྶརཱ. ཡདི པན ཀསྶཙི ཨདཏྭཱཝ ཀཱལཾ ཀརོཏི, ཏདཱ སངྒྷོཝ ཏསྶ ཝིཧཱརསྶ སཱམིཀོ ཧོཏི, ན དཱཡཀོ ཝཱ པུགྒལོ ཝཱ, སངྒྷཱནུམཏིཡཱ ཨེཝ པུགྒལོ པརིབྷུཉྫིཏུཾ ལབྷཏི, ན ཨཏྟནོ ཨིསྶརཝཏཱཡཱཏི དཊྛབྦོ.

ཨེཝཾ ¶ མཱུལཏོཡེཝ སངྒྷསྶ དིནྣཏྟཱ སངྒྷིཀབྷཱུཏཝིཧཱརོ ཝཱ མཱུལེ གཎཔུགྒལཱནཾ དིནྣཏྟཱ གཎསནྟཀཔུགྒལིཀབྷཱུཏོཔི ཏེསཾ གཎཔུགྒལཱནཾ ཨཉྙསྶ ནིསྶཛྫནཝསེན ཨདཏྭཱ ཀཱལཀཏཏྟཱ པཙྪཱ སངྒྷིཀབྷཱཝཾ པཏྟཝིཧཱརོ ཝཱ སངྒྷེན ཝིཙཱརེཏབྦོ ཧོཏི. སངྒྷེནཔི བྷགཝཏོ ཨནུམཏིཡཱ སེནཱསནགྒཱཧཱཔཀཾ སམྨནྣིཏྭཱ གཱཧཱཔེཏབྦོ. ཝུཏྟཉྷེཏཾ སེནཱསནཀྑནྡྷཀེ (ཙཱུལ༹ཝ. ༣༡༧) ‘‘ཨཐ ཁོ བྷིཀྑཱུནཾ ཨེཏདཧོསི ‘ཀེན ནུ ཁོ སེནཱསནཾ གཱཧེཏབྦ’ནྟི. བྷགཝཏོ ཨེཏམཏྠཾ ཨཱརོཙེསུཾ – ‘ཨནུཛཱནཱམི, བྷིཀྑཝེ, པཉྩཧངྒེཧི སམནྣཱགཏཾ བྷིཀྑུཾ སེནཱསནགྒཱཧཱཔཀཾ སམྨནྣིཏུ’ནྟི’’ཨཱདི.

ཨིམསྨིཾ ཋཱནེ ‘‘སེནཱསནགྒཱཧོ ནཱམ ཝསྶཀཱལཝསེན སེནཱསནགྒཱཧོ, ཨུཏུཀཱལཝསེན སེནཱསནགྒཱཧོ, དྷུཝཝཱསཝསེན སེནཱསནགྒཱཧོཏི ཏིཝིདྷོ ཧོཏི. ཏེསུ ཝསྶཀཱལཝསེན སེནཱསནགྒཱཧོ པུརིམཝསྶཝསེན སེནཱསནགྒཱཧོ, པཙྪིམཝསྶཝསེན སེནཱསནགྒཱཧོཏི དུཝིདྷོ. ཨུཏུཀཱལཝསེན སེནཱསནགྒཱཧོཔི ཨནྟརཱམུཏྟཀཝསེན སེནཱསནགྒཱཧོ, ཏངྑཎཔཊིསལླཱནཝསེན སེནཱསནགྒཱཧོཏི དུཝིདྷོ’’ཏི ཨཱཙརིཡཱ ཝདནྟི, ཨེཏཾ པཱལི༹ཡཱ ཙ ཨཊྛཀཐཱཡ ཙ ཨསམེནྟཾ ཝིཡ དིསྶཏི. པཱལི༹ཡཉྷི (ཙཱུལ༹ཝ. ༣༡༨) ‘‘ཨཐ ཁོ བྷིཀྑཱུནཾ ཨེཏདཧོསི ‘ཀཏི ནུ ཁོ སེནཱསནགྒཱཧོ’ཏི. བྷགཝཏོ ཨེཏམཏྠཾ ཨཱརོཙེསུཾ – ཏཡོམེ, བྷིཀྑཝེ, སེནཱསནགྒཱཧཱ པུརིམཀོ པཙྪིམཀོ ཨནྟརཱམུཏྟཀོ. ཨཔརཛྫུགཏཱཡ ཨཱསཱལ༹ྷིཡཱ པུརིམཀོ གཱཧེཏབྦོ, མཱསགཏཱཡ ཨཱསཱལ༹ྷིཡཱ པཙྪིམཀོ གཱཧེཏབྦོ, ཨཔརཛྫུགཏཱཡ པཝཱརཎཱཡ ཨཱཡཏིཾ ཝསྶཱཝཱསཏྠཱཡ ཨནྟརཱམུཏྟཀོ གཱཧེཏབྦོ. ཨིམེ ཁོ, བྷིཀྑཝེ, ཏཡོ སེནཱསནགྒཱཧཱ’’ཏི ཨེཝཾ ཨཱགཏོ, ཨཊྛཀཐཱཡམྤི ¶ (ཙཱུལ༹ཝ. ཨཊྛ. ༣༡༨) ‘‘ཏཱིསུ སེནཱསནགྒཱཧེསུ པུརིམཀོ ཙ པཙྪིམཀོ ¶ ཙཱཏི ཨིམེ དྭེ གཱཧཱ ཐཱཝརཱ. ཨནྟརཱམུཏྟཀེ ཨཡཾ ཝིནིཙྪཡོ…པེ… ཨཡཾ ཏཱཝ ཨནྟོཝསྶེ ཝསྶཱུཔནཱཡིཀཱདིཝསེན པཱལི༹ཡཾ ཨཱགཏསེནཱསནགྒཱཧཀཐཱ, ཨཡཾ པན སེནཱསནགྒཱཧོ ནཱམ དུཝིདྷོ ཧོཏི ཨུཏུཀཱལེ ཙ ཝསྶཱཝཱསེ ཙཱ’’ཏི ཨེཝཾ ཨཱགཏོ, ཏསྨཱ སངྒྷེན སམྨཏསེནཱསནགྒཱཧཱཔཀེན ཝིཙཱརེཏབྦཱ.

སེནཱསནགྒཱཧོ ནཱམ ཨུཏུཀཱལེ སེནཱསནགྒཱཧོ, ཝསྶཱཝཱསེ སེནཱསནགྒཱཧོཏི དུཝིདྷོ. ཏཏྠ ཨུཏུཀཱལོ ནཱམ ཧེམནྟཨུཏུགིམྷཨུཏུཝསེན ཨཊྛ མཱསཱ, ཏསྨིཾ ཀཱལེ བྷིཀྑཱུ ཨནིཡཏཱཝཱསཱ ཧོནྟི, ཏསྨཱ ཡེ ཡདཱ ཨཱགཙྪནྟི, ཏེསཾ ཏདཱ བྷིཀྑཱུ ཨུཊྛཱཔེཏྭཱ སེནཱསནཾ དཱཏབྦཾ, ཨཀཱལོ ནཱམ ནཏྠི. ཨཡཾ ཨུཏུཀཱལེ སེནཱསནགྒཱཧོ ནཱམ. ཝསྶཱཝཱསེ སེནཱསནགྒཱཧོ པན ‘‘པུརིམཀོ པཙྪིམཀོ ཨནྟརཱམུཏྟཀོ’’ཏི པཱལི༹ཡཾ ཨཱགཏནཡེན ཏིཝིདྷོ ཧོཏི. ཨནྟརཱམུཏྟཀོཔི ཧི ཨཱཡཏིཾ ཝསྶཱཝཱསཏྠཱཡ གཱཧིཏཏྟཱ ཝསྶཱཝཱསེ སེནཱསནགྒཱཧམེཝ པཝིསཏི, ན ཨུཏུཀཱལེ སེནཱསནགྒཱཧོ. ཝུཏྟཉྷི བྷགཝཏཱ ‘‘ཨཔརཛྫུགཏཱཡ པཝཱརཎཱཡ ཨཱཡཏིཾ ཝསྶཱཝཱསཏྠཱཡ ཨནྟརཱམུཏྟཀོ གཱཧེཏབྦོ’’ཏི. ཏངྑཎཔཊིསལླཱནཝསེན སེནཱསནགྒཱཧོཏི ཙ ནེཝ པཱལི༹ཡཾ ན ཨཊྛཀཐཱཡཾ ཝིསུཾ ཨཱགཏོ, ཨུཏུཀཱལེ སེནཱསནགྒཱཧོཡེཝ ཏདངྒསེནཱསནགྒཱཧོཏིཔི ཏངྑཎཔཊིསལླཱནཝསེན སེནཱསནགྒཱཧོཏིཔི ཝདནྟི, ཏསྨཱ ཨུཏུཀཱལཝསེན སེནཱསནགྒཱཧོཔི ‘‘ཨནྟརཱམུཏྟཀཝསེན སེནཱསནགྒཱཧོ ཏངྑཎཔཊིསལླཱནཝསེན སེནཱསནགྒཱཧོཏི དུབྦིདྷོ’’ཏི ན ཝཏྟབྦོ.

ཨཐཱཔི ¶ ཝདནྟི ‘‘ཡཐཱཝུཏྟེསུ པཉྩསུ སེནཱསནགྒཱཧེསུ ཙཏྟཱརོ སེནཱསནགྒཱཧཱ པཉྩངྒསམནྣཱགཏེན སེནཱསནགྒཱཧཱཔཀསམྨུཏིལདྡྷེན བྷིཀྑུནཱ ཨནྟོཨུཔཙཱརསཱིམཊྛེན ཧུཏྭཱ ཨནྟོསཱིམཊྛཱནཾ བྷིཀྑཱུནཾ ཡཐཱཝིནཡཾ ཝིཙཱརེཏབྦཱ ཧོནྟི, ཏེ པན ཝིཙཱརཎཱ ཡཱཝཛྫཀཱལཱ ཐཱཝརཱ ཧུཏྭཱ ན ཏིཊྛནྟི, དྷུཝཝཱསཝསེན ཝིཙཱརཎམེཝ ཡཱཝཛྫཀཱལཱ ཐཱཝརཾ ཧུཏྭཱ ཏིཊྛཏཱི’’ཏི, ཏམྤི ཏཐཱ ན སཀྐཱ ཝཏྟུཾ. ཀསྨཱ? སེནཱསནགྒཱཧཱཔཀབྷེདེ ‘‘དྷུཝཝཱསཝསེན སེནཱསནགྒཱཧོ’’ཏི པཱལི༹ཡཾ ཨཊྛཀཐཱཡཉྩ ནཏྠི. དྷུཝཝཱསཝསེན ཝིཙཱརཎཉྩ སམྨུཏིལདྡྷེན སེནཱསནགྒཱཧཱཔཀེན ཝིཙཱརེཏབྦཾ ན ཧོཏི, ཨཐ ཁོ སམགྒེན སངྒྷེན ཨཔལོཀནཀམྨཝསེན དུཝངྒསམནྣཱགཏསྶ བྷིཀྑུསྶ ཨནུཊྛཱཔནཱིཡཾ ཀཏྭཱ དཱནམེཝ, ཏསྨཱ སམགྒོ སངྒྷོ བཧཱུཔཀཱརཏཱགུཎཝིསིཊྛཏཱསངྑཱཏེཧི དྭཱིཧི ཨངྒེཧི སམནྣཱགཏཾ བྷིཀྑུཾ ཨཔལོཀནཀམྨཝསེན སམྨནྣིཏྭཱ ¶ ཏསྶ ཕཱསུཀཾ ཨཱཝཱསཾ དྷུཝཝཱསཝསེན ཨནུཊྛཱཔནཱིཡཾ ཀཏྭཱ དེཏི, ཏཾ ཡཱཝཛྫཀཱལཱ ཐཱཝརཾ ཧུཏྭཱ ཏིཊྛཏཱིཏི ཝཏྟབྦཾ.

སམགྒོ སངྒྷོཝ དྷུཝཝཱསཝསེན དེཏི, ན སེནཱསནགྒཱཧཱཔཀོཏི ཨཡམཏྠོ ཀཐཾ ཉཱཏབྦོཏི ཙེ? ‘‘སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརཱདཱིནཾ ཝཱ གཎཝཱཙཀཨཱཙརིཡསྶ ཝཱ བཧཱུཔཀཱརཏཾ གུཎཝིསིཊྛཏཉྩ སལླཀྑེནྟོ དྷུཝཝཱསཏྠཱཡ ཝིཧཱརཾ སམྨནྣིཏྭཱ དེཏཱི’’ཏི (པཱཙི. ཨཊྛ. ༡༢༠; ཀངྑཱ. ཨཊྛ. ཨནུཔཁཛྫསིཀྑཱཔདཝཎྞནཱ) ‘‘སངྒྷོ པན བཧུསྶུཏསྶ ཨུདྡེསཔརིཔུཙྪཱདཱིཧི བཧཱུཔཀཱརསྶ བྷཱརནིཏྠཱརཀསྶ ཕཱསུཀཾ ཨཱཝཱསཾ ཨནུཊྛཱཔནཱིཡཾ ཀཏྭཱ དེཏཱི’’ཏི ཙ ‘‘སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརགཎཝཱཙཀཱཙརིཡཱནཾ ཝཱ བཧཱུཔཀཱརཏཾ གུཎཝིསིཊྛཏཉྩ སལླཀྑེཏྭཱ དྷུཝཝཱསཏྠཱཡ ཝིཧཱརཾ སལླཀྑེཏྭཱ སམྨནྣིཏྭཱ དེཏཱི’’ཏི ཙ ‘‘བཧུསྶུཏསྶ སངྒྷབྷཱརནིཏྠཱརཀསྶ ¶ བྷིཀྑུནོ ཨནུཊྛཱཔནཱིཡསེནཱསནམྤཱི’’ཏི (པརི. ཨཊྛ. ༤༩༥-༤༩༦) ཙ ‘‘ཨཔལོཀནཀམྨཾ ནཱམ སཱིམཊྛཀཾ སངྒྷཾ སོདྷེཏྭཱ ཚནྡཱརཧཱནཾ ཚནྡཾ ཨཱཧརིཏྭཱ སམགྒསྶ སངྒྷསྶ ཨནུམཏིཡཱ ཏིཀྑཏྟུཾ སཱཝེཏྭཱ ཀཏྟབྦཾ ཀམྨ’’ནྟི ཙ ཨཊྛཀཐཱསུ (པརི. ཨཊྛ. ༤༨༢) ཝཙནཏོ སཱདྷུཀཾ ནིསྶཾསཡེན ཉཱཏབྦོཏི.

ཀཐཾ པན ཨཔལོཀནཀམྨེན དཱཏབྦབྷཱཝོ ཝིཉྙཱཡཏཱིཏི? ‘‘བཧུསྶུཏསྶ སངྒྷབྷཱརནིཏྠཱརཀསྶ བྷིཀྑུནོ ཨནུཊྛཱཔནཱིཡསེནཱསནམྤི སངྒྷཀིཙྩཾ ཀརོནྟཱནཾ ཀཔྤིཡཀཱརཀཱདཱིནཾ བྷཏྟཝེཏནམྤི ཨཔལོཀནཀམྨེན དཱཏུཾ ཝཊྚཏཱི’’ཏི པརིཝཱརཊྛཀཐཱཡཾ (པརི. ཨཊྛ. ༤༩༥-༤༩༦) ཀམྨཝགྒེ ཨཱགཏཏྟཱ ཝིཉྙཱཡཏི. ཀཐཾ པན དུཝངྒསམནྣཱགཏསྶ བྷིཀྑུནོཡེཝ དཱཏབྦབྷཱཝོ ཝིཉྙཱཡཏཱིཏི? ‘‘བཧཱུཔཀཱརཏནྟི བྷཎྜཱགཱརིཀཏཱདིབཧུཨུཔཀཱརབྷཱཝཾ. ན ཀེཝལཾ ཨིདམེཝཱཏི ཨཱཧ ‘གུཎཝིསིཊྛཏཉྩཱ’ཏིཨཱདི. ཏེན བཧཱུཔཀཱརཏྟེཔི གུཎཝིསིཊྛཏྟཱབྷཱཝེ, གུཎཝིསིཊྛཏྟེཔི བཧཱུཔཀཱརཏྟཱབྷཱཝེ དཱཏུཾ ན ཝཊྚཏཱིཏི དསྶེཏཱི’’ཏི ཝིནཡཏྠམཉྫཱུསཱཡཾ (ཀངྑཱ. ཨཊྛ. ཊཱི. ཨནུཔཁཛྫསིཀྑཱཔདཝཎྞནཱ) ཝུཏྟཏྟཱ ཝིཉྙཱཡཏི.

ཀསྨཱ པན སེནཱསནགྒཱཧཱཔཀེན ཝིཙཱརེཏབྦོ སེནཱསནགྒཱཧོ ཡཱཝཛྫཀཱལཱ ན ཏིཊྛཏཱིཏི? པཉྩངྒསམནྣཱགཏསྶ སེནཱསནགྒཱཧཱཔཀསྶ བྷིཀྑུནོ དུལླབྷཏྟཱ, ནཱནཱདེསཝཱསཱིནཾ ནཱནཱཙརིཡཀུལསམྦྷཝཱནཾ བྷིཀྑཱུནཾ ཨེཀསམྦྷོགཔརིབྷོགསྶ དུཀྐརཏྟཱ ཙ ཨིམེཧི དྭཱིཧི ཀཱརཎེཧི ¶ ན ཏིཊྛཏི. ཝུཏྟཉྷེཏཾ བྷགཝཏཱ ‘‘ཨནུཛཱནཱམི, བྷིཀྑཝེ, པཉྩཧངྒེཧི སམནྣཱགཏཾ བྷིཀྑུཾ སེནཱསནགྒཱཧཱཔཀཾ སམྨནྣིཏུཾ, ཡོ ན ཚནྡཱགཏིཾ གཙྪེཡྻ, ན དོསཱགཏིཾ གཙྪེཡྻ, ན མོཧཱགཏིཾ གཙྪེཡྻ, ན བྷཡཱགཏིཾ གཙྪེཡྻ ¶ , གཧིཏཱགཧིཏཉྩ ཛཱནེཡྻཱ’’ཏི (ཙཱུལ༹ཝ. ༣༡༧). ཨཊྛཀཐཱཡམྤི (པཱཙི. ཨཊྛ. ༡༢༢) ‘‘ཨེཝརཱུཔེན ཧི སབྷཱགཔུགྒལེན ཨེཀཝིཧཱརེ ཝཱ ཨེཀཔརིཝེཎེ ཝཱ ཝསནྟེན ཨཏྠོ ནཏྠཱི’’ཏི ཝུཏྟཾ. ཀསྨཱ པན དྷུཝཝཱསཏྠཱཡ དཱནཝིཙཱརོ ཡཱཝཛྫཀཱལཱ ཏིཊྛཏཱིཏི? པཉྩངྒསམནྣཱགཏཱབྷཱཝེཔི སཱིམཊྛཀསྶ སམགྒསྶ སངྒྷསྶ ཨནུམཏིཡཱ ཀཏྟབྦཏྟཱ. ཝུཏྟཉྷི ‘‘ཨཔལོཀནཀམྨཾ ནཱམ སཱིམཊྛཀཾ སངྒྷཾ སོདྷེཏྭཱ ཚནྡཱརཧཱནཾ ཚནྡཾ ཨཱཧརིཏྭཱ སམགྒསྶ སངྒྷསྶ ཨནུམཏིཡཱ ཏིཀྑཏྟུཾ སཱཝེཏྭཱ ཀཏྟབྦཾ ཀམྨ’’ནྟི (པརི. ཨཊྛ. ༤༨༢).

ཨུཏུཀཱལེ སངྒྷིཀསེནཱསནེ ཝསནྟེན ཨཱགཏོ བྷིཀྑུ ན པཊིབཱཧེཏབྦོ ཨཉྙཏྲ ཨནུཊྛཱཔནཱིཡཱ. ཝུཏྟཉྷི བྷགཝཏཱ ‘‘ཨནུཛཱནཱམི, བྷིཀྑཝེ, ཝསྶཱནཾ ཏེམཱསཾ པཊིབཱཧིཏུཾ, ཨུཏུཀཱལཾ པན ན པཊིབཱཧིཏུ’’ནྟི (ཙཱུལ༹ཝ. ༣༡༨). ‘‘ཨཉྙཏྲ ཨནུཊྛཱཔནཱིཡཱ’’ཏི ཝུཏྟཾ, ཀཏམེ ཨནུཊྛཱཔནཱིཡཱཏི? ཙཏྟཱརོ ཨནུཊྛཱཔནཱིཡཱ ཝུཌྜྷཏརོ, བྷཎྜཱགཱརིཀོ, གིལཱནོ, སངྒྷཏོ ལདྡྷསེནཱསནོ ཙ. ཏཏྠ ཝུཌྜྷཏརོ བྷིཀྑུ ཏསྨིཾ ཝིཧཱརེ ཨནྟོསཱིམཊྛཀབྷིཀྑཱུསུ ཨཏྟནཱ ཝུཌྜྷཏརསྶ ཨཉྙསྶ ཨབྷཱཝཱ ཡཐཱཝུཌྜྷཾ ཀེནཙི ཨནུཊྛཱཔནཱིཡོ. བྷཎྜཱགཱརིཀོ སངྒྷེན སམྨནྣིཏྭཱ བྷཎྜཱགཱརསྶ དིནྣཏཱཡ སངྒྷསྶ བྷཎྜཾ རཀྑནྟོ གོཔེནྟོ ཝསཏི, ཏསྨཱ སོ བྷཎྜཱགཱརིཀོ ཀེནཙི ཨནུཊྛཱཔནཱིཡོ. གིལཱནོ གེལཉྙཱབྷིབྷཱུཏོ ཨཏྟནོ ལདྡྷསེནཱསནེ ཝསནྟོ ཀེནཙི ཨནུཊྛཱཔནཱིཡོ. སངྒྷཏོ ལདྡྷསེནཱསནོ སམགྒེན སངྒྷེན དིནྣསེནཱསནཏྟཱ ཀེནཙི ཨནུཊྛཱཔནཱིཡོ. ཝུཏྟཉྷི ཨཊྛཀཐཱཡཾ (མཧཱཝ. ཨཊྛ. ༣༤༣) ‘‘ཙཏྟཱརོ ཧི ན ཝུཊྛཱཔེཏབྦཱ ཝུཌྜྷཏརོ, བྷཎྜཱགཱརིཀོ, གིལཱནོ, སངྒྷཏོ ལདྡྷསེནཱསནོཏི. ཏཏྠ ཝུཌྜྷཏརོ ཨཏྟནོ ཝུཌྜྷཏཱཡ ནཝཀཏརེན ན ¶ ཝུཊྛཱཔེཏབྦོ, བྷཎྜཱགཱརིཀོ སངྒྷེན སམྨནྣིཏྭཱ བྷཎྜཱགཱརསྶ དིནྣཏཱཡ, གིལཱནོ ཨཏྟནོ གིལཱནཏཱཡ, སངྒྷོ པན བཧུསྶུཏསྶ ཨུདྡེསཔརིཔུཙྪཱདཱིཧི བཧཱུཔཀཱརསྶ བྷཱརནིཏྠཱརཀསྶ ཕཱསུཀཾ ཨཱཝཱསཾ ཨནུཊྛཱཔནཱིཡཾ ཀཏྭཱ དེཏི, ཏསྨཱ སོ ཨུཔཀཱརཀཏཱཡ ཙ སངྒྷཏོ ལདྡྷཏཱཡ ཙ ན ཝུཊྛཱཔེཏབྦོ’’ཏི. ཋཔེཏྭཱ ཨིམེ ཙཏྟཱརོ ཨཝསེསཱ ཝུཊྛཱཔནཱིཡཱཝ ཧོནྟི.

ཨཔརསྨིཾ བྷིཀྑུམྷི ཨཱགཏེ ཝུཊྛཱཔེཏྭཱ སེནཱསནཾ དཱཔེཏབྦཾ. ཝུཏྟཉྷི ཨཊྛཀཐཱཡཾ (ཙཱུལ༹ཝ. ཨཊྛ. ༣༡༨) ‘‘ཨུཏུཀཱལེ ཏཱཝ ཀེཙི ཨཱགནྟུཀཱ བྷིཀྑཱུ པུརེབྷཏྟཾ ཨཱགཙྪནྟི, ཀེཙི ¶ པཙྪཱབྷཏྟཾ པཋམཡཱམཾ ཝཱ མཛ྄ཛྷིམཡཱམཾ ཝཱ པཙྪིམཡཱམཾ ཝཱ, ཡེ ཡདཱ ཨཱགཙྪནྟི, ཏེསཾ ཏདཱཝ བྷིཀྑཱུ ཨུཊྛཱཔེཏྭཱ སེནཱསནཾ དཱཏབྦཾ, ཨཀཱལོ ནཱམ ནཏྠཱི’’ཏི. ཨེཏརཧི པན སདྡྷཱ པསནྣཱ མནུསྶཱ ཝིཧཱརཾ ཀཏྭཱ ཨཔྤེཀཙྩེ པཎྜིཏཱནཾ ཝཙནཾ སུཏྭཱ ‘‘སངྒྷེ དིནྣཾ མཧཔྥལ’’ནྟི ཉཏྭཱ ཙཱཏུདྡིསཾ སངྒྷཾ ཨཱརབྦྷ ‘‘ཨིམཾ ཝིཧཱརཾ ཨཱགཏཱནཱགཏསྶ ཙཱཏུདྡིསསྶ སངྒྷསྶ དེམཱ’’ཏི ཝཏྭཱ དེནྟི, ཨཔྤེཀཙྩེ ཨཏྟནཱ པསནྣཾ བྷིཀྑུཾ ཨཱརབྦྷ ཝིཧཱརཾ ཀཏྭཱཔི དཱནཀཱལེ ཏེན ཨུཡྻོཛིཏཱ ཧུཏྭཱ ཙཱཏུདྡིསཾ སངྒྷཾ ཨཱརབྦྷ ཝུཏྟནཡེན དེནྟི, ཨཔྤེཀཙྩེ ཀརཎཀཱལེཔི དཱནཀཱལེཔི ཨཏྟནོ ཀུལཱུཔཀབྷིཀྑུམེཝ ཨཱརབྦྷ པརིཙྩཛནྟི, ཏཐཱཔི དཀྑིཎོདཀཔཱཏནཀཱལེ ཏེན སིཀྑཱཔིཏཱ ཡཐཱཝུཏྟཔཱཋཾ ཝཙཱིབྷེདཾ ཀརོནྟི, ཙིཏྟེན པན ཀུལཱུཔཀསྶེཝ དེནྟི, ན སབྦསངྒྷསཱདྷཱརཎཏྠཾ ཨིཙྪནྟི.

ཨིམེསུ ཏཱིསུ དཱནེསུ པཋམཾ པུབྦཀཱལེཔི དཱནཀཱལེཔི སངྒྷཾ ཨུདྡིསྶ པཝཏྟཏྟཱ སབྦསངྒྷིཀཾ ཧོཏི. དུཏིཡཾ པུབྦཀཱལེ པུགྒལཾ ཨུདྡིསྶ པཝཏྟམཱནམྤི དཱནཀཱལེ སངྒྷཾ ཨུདྡིསྶ པཝཏྟཏྟཱ སངྒྷིཀམེཝ. ཏཏིཡཾ པན པུབྦཀཱལེཔི དཱནཀཱལེཔི ¶ ཀུལཱུཔཀཔུགྒལམེཝ ཨུདྡིསྶ པཝཏྟཏི, ན སངྒྷཾ, ཀེཝལཾ བྷིཀྑུནཱ ཝུཏྟཱནུསཱརེནེཝ ཝཙཱིབྷེདཾ ཀརོནྟི. ཨེཝཾ སནྟེ ‘‘ཀིཾ ཨཡཾ ཝིཧཱརོ ཙིཏྟཝསེན པུགྒལིཀོ ཧོཏི, ཝཙཱིབྷེདཝསེན སངྒྷིཀོ’’ཏི ཙིནྟཱཡཾ ཨེཀཙྩེ ཨེཝཾ ཝདེཡྻུཾ –

‘‘མནོཔུབྦངྒམཱ དྷམྨཱ, མནོསེཊྛཱ མནོམཡཱ;

མནསཱ ཙེ པསནྣེན, བྷཱསཏི ཝཱ ཀརོཏི ཝཱ;

ཏཏོ ནཾ སུཁམནྭེཏི, ཚཱཡཱཝ ཨནཔཱཡིནཱིཏི. (དྷ. པ. ༢) –

ཝཙནཏོ ཙིཏྟཝསེན པུགྒལིཀོ ཧོཏཱི’’ཏི. ཨཉྙེ ‘‘ཡཐཱ དཱཡཀཱ ཝདནྟི, ཏཐཱ པཊིཔཛྫིཏབྦནྟི (ཙཱུལ༹ཝ. ཨཊྛ. ༣༢༥) ཝཙནཏོ ཝཙཱིབྷེདཝསེན སངྒྷིཀོ ཧོཏཱི’’ཏི.

ཏཏྲཱཡཾ ཝིཙཱརཎཱ – ཨིདཾ དཱནཾ པུབྦེ པུགྒལསྶ པརིཎཏཾ པཙྪཱ སངྒྷསྶ པརིཎཱམིཏཾ, ཏསྨཱ ‘‘སངྒྷིཀོ’’ཏི ཝུཏྟེ ནཝསུ ཨདྷམྨིཀདཱནེསུ ‘‘པུགྒལསྶ པརིཎཏཾ སངྒྷསྶ པརིཎཱམེཏཱི’’ཏི (པཱརཱ. ༦༦༠) ཝུཏྟཾ ཨཊྛམཾ ཨདྷམྨིཀདཱནཾ ཧོཏི, ཏསྶ དཱནསྶ པཊིགྒཧཱཔི པརིབྷོགཱཔི ཨདྷམྨིཀཔཊིགྒཧཱ ཨདྷམྨིཀཔརིབྷོགཱ ཧོནྟི. ‘‘པུགྒལིཀོ’’ཏི ཝུཏྟེ ཏཱིསུ དྷམྨིཀདཱནེསུ ‘‘པུགྒལསྶ དིནྣཾ པུགྒལསྶེཝ དེཏཱི’’ཏི ཝུཏྟཾ ཏཏིཡདྷམྨིཀདཱནཾ ཧོཏི, ཏསྶ ¶ པཊིགྒཧཱཔི པརིབྷོགཱཔི དྷམྨིཀཔཊིགྒཧཱ དྷམྨིཀཔརིབྷོགཱ ཧོནྟི, ཏསྨཱ པུགྒལིཀཔཀྑཾ བྷཛཏི. ཨཔྤེཀཙྩེ སུཏྟནྟིཀཱདིགཎེ པསཱིདིཏྭཱ ཝིཧཱརཾ ཀཱརེཏྭཱ གཎསྶ དེནྟི ‘‘ཨིམཾ ཝིཧཱརཾ ཨཱཡསྨནྟཱནཾ དམྨཱི’’ཏི. ཨཔྤེཀཙྩེ པུགྒལེ པསཱིདིཏྭཱ ཝིཧཱརཾ ཀཏྭཱ པུགྒལསྶ དེནྟི ‘‘ཨིམཾ ཝིཧཱརཾ ཨཱཡསྨཏོ དམྨཱི’’ཏི. ཨེཏེ པན གཎསནྟཀཔུགྒལིཀཱ ཝིཧཱརཱ དཱནཀཱལཏོ པཊྛཱཡ པཊིགྒཱཧཀསནྟཀཱཝ ཧོནྟི, ན དཱཡཀསནྟཀཱ. ཏེསུ གཎསནྟཀོ ཏཱཝ ཨེཀཙྩེསུ མཏེསུ ཨཝསེསཱནཾ སནྟཀོ, ཏེསུ དྷརམཱནེསུཡེཝ ¶ ཀསྶཙི དེནྟི, ཏསྶ སནྟཀོ. ཀསྶཙི ཨདཏྭཱ སབྦེསུ མཏེསུ སངྒྷིཀོ ཧོཏི. ཝུཏྟཉྷི ཨཊྛཀཐཱཡཾ (མཧཱཝ. ཨཊྛ. ༣༦༩) ‘‘དྭིནྣཾ སནྟཀཾ ཧོཏི ཨཝིབྷཏྟཾ, ཨེཀསྨིཾ ཀཱལཀཏེ ཨིཏརོ སཱམཱི, བཧཱུནཾ སནྟཀེཔི ཨེསེཝ ནཡོ. སབྦེསུ མཏེསུ སངྒྷིཀཾཝ ཧོཏཱི’’ཏི.

པུགྒལིཀཝིཧཱརོཔི ཡདི སོ པཊིགྒཱཧཀཔུགྒལོ ཨཏྟནོ ཛཱིཝམཱནཀཱལེཡེཝ སདྡྷིཝིཧཱརིཀཱདཱིནཾ དེཏི, ཀོཙི ཝཱ ཏསྶ ཝིསྶཱསེན ཏཾ ཝིཧཱརཾ ཨགྒཧེསི, ཏསྶ སནྟཀོ ཧོཏི. ཀསྶཙི ཨདཏྭཱ ཀཱལཀཏེ སངྒྷིཀོ ཧོཏི. ཝུཏྟཉྷི ཨཊྛཀཐཱཡཾ ‘‘སོ ཛཱིཝམཱནོཡེཝ སབྦཾ ཨཏྟནོ པརིཀྑཱརཾ ནིསྶཛྫིཏྭཱ ཀསྶཙི ཨདཱསི, ཀོཙི ཝཱ ཝིསྶཱསཾ ཨགྒཧེསི. ཡསྶ དིནྣོ, ཡེན ཙ གཧིཏོ, ཏསྶེཝ ཧོཏཱི’’ཏི. པཱལི༹ཡཉྩ (མཧཱཝ. ༣༦༩) ‘‘བྷིཀྑུསྶ, བྷིཀྑཝེ, ཀཱལཀཏེ སངྒྷོ སཱམཱི པཏྟཙཱིཝརེ, ཨཔིཙ གིལཱནུཔཊྛཱཀཱ བཧཱུཔཀཱརཱ. ཨནུཛཱནཱམི, བྷིཀྑཝེ, སངྒྷེན ཏིཙཱིཝརཉྩ པཏྟཉྩ གིལཱནུཔཊྛཱཀཱནཾ དཱཏུཾ, ཡཾ ཏཏྠ ལཧུབྷཎྜཾ ལཧུཔརིཀྑཱརཾ, ཏཾ སམྨུཁཱིབྷཱུཏེན སངྒྷེན བྷཱཛེཏུཾ, ཡཾ ཏཏྠ གརུབྷཎྜཾ གརུཔརིཀྑཱརཾ, ཏཾ ཨཱགཏཱནཱགཏསྶ ཙཱཏུདྡིསསྶ སངྒྷསྶ ཨཝིསྶཛྫིཡཾ ཨཝེབྷངྒིཀ’’ནྟི (མཧཱཝ. ༣༦༩) ཝུཏྟཾ, ཏསྨཱ ཨིམིནཱ ནཡེན ཝིནིཙྪཡོ ཀཱཏབྦོ.

སངྒྷིཀེ པན པཱལི༹ཡཾ ཨཱགཏཱནཾ ‘‘པུརིམཀོ པཙྪིམཀོ ཨནྟརཱམུཏྟཀོ ཙཱ’’ཏི (ཙཱུལ༹ཝ. ༣༡༨) ཝུཏྟཱནཾ ཏིཎྞཾ སེནཱསནགྒཱཧཱནཉྩ ཨཊྛཀཐཱཡཾ (ཙཱུལ༹ཝ. ཨཊྛ. ༣༡༨) ཨཱགཏཱནཾ ‘‘ཨུཏུཀཱལེ ཙ ཝསྶཱཝཱསེ ཙཱ’’ཏི ཝུཏྟཱནཾ དྭིནྣཾ སེནཱསནགྒཱཧཱནཉྩ ཨེཏརཧི ཨསམྤཛྫནཏོ ཨནུཊྛཱཔནཱིཡཔཱལི༹ཡཾ ཨཱགཏསྶ ཨཏྟནོ སབྷཱཝེན ཨནུཊྛཱཔནཱིཡསྶ དྷུཝཝཱསཏྠཱཡ སངྒྷེན དིནྣཏཱཡ ཨནུཊྛཱཔནཱིཡསྶ ཝསེནེཝ ཝིནིཙྪཡོ ཧོཏི. ཝུཌྜྷཏརགིལཱནཱ ཧི ¶ ཨཏྟནོ སབྷཱཝེན ཨནུཊྛཱཔནཱིཡཱ ཧོནྟི. ཝུཏྟཉྷེཏཾ ཨཊྛཀཐཱཡཾ (མཧཱཝ. ཨཊྛ. ༣༤༣) ‘‘ཝུཌྜྷཏརོ ཨཏྟནོ ཝུཌྜྷཏཱཡ ནཝཀཏརེན ན ཝུཊྛཱཔེཏབྦོ, གིལཱནོ ཨཏྟནོ གིལཱནཏཱཡཱ’’ཏི. བྷཎྜཱགཱརིཀདྷམྨཀཐིཀཱདཡོ ¶ དྷུཝཝཱསཏྠཱཡ སངྒྷེན དིནྣཏཱཡ ཨནུཊྛཱཔནཱིཡཱ ཧོནྟི. ཝུཏྟཉྷི ‘‘སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརཱདཱིནཾ ཝཱ…པེ… དྷུཝཝཱསཏྠཱཡ ཝིཧཱརཾ སམྨནྣིཏྭཱ དེཏི, ཏསྨཱ ཡསྶ སངྒྷེན དིནྣོ, སོཔི ཨནུཊྛཱཔནཱིཡོ’’ཏི (པཱཙི. ཨཊྛ. ༡༢༠; ཀངྑཱ. ཨཊྛ. ཨནུཔཁཛྫསིཀྑཱཔདཝཎྞནཱ). སོ ཨེཝཾ ཝེདིཏབྦོ – ཨེཏརཧི སངྒྷིཀཝིཧཱརེསུ སངྒྷཏྠེརེསུ ཡཐཱཀམྨངྒཏེསུ ཏསྨིཾ ཝིཧཱརེ ཡོ བྷིཀྑུ ཝུཌྜྷཏརོ, སོཔི ‘‘ཨཡཾ ཝིཧཱརོ མཡཱ ཝསིཏབྦོ’’ཏི ཝདཏི. ཡོ ཏཏྠ བྱཏྟོ པཊིབལོ, སོཔི ཏཐེཝ ཝདཏི. ཡེན སོ ཝིཧཱརོ ཀཱརིཏོ, སོཔི ‘‘མཡཱ པསཱིདིཏཔུགྒལོ ཨཱརོཔེཏབྦོ’’ཏི ཝདཏི. སངྒྷོཔི ‘‘མཡམེཝ ཨིསྶརཱ, ཏསྨཱ ཨམྷེཧི ཨིཙྪིཏཔུགྒལོ ཨཱརོཔེཏབྦོ’’ཏི ཝདཏི. ཨེཝཾདྭིདྷཱ ཝཱ ཏིདྷཱ ཝཱ ཙཏུདྷཱ ཝཱ བྷིནྣེསུ མཧནྟཾ ཨདྷིཀརཎཾ ཧོཏི.

ཏེསུ ཝུཌྜྷཏརོ ‘‘ན ཏྭེཝཱཧཾ, བྷིཀྑཝེ, ཀེནཙི པརིཡཱཡེན ཝུཌྜྷཏརསྶ ཨཱསནཾ པཊིབཱཧིཏབྦནྟི ཝདཱམི, ཡོ པཊིབཱཧེཡྻ, ཨཱཔཏྟི དུཀྐཊསྶཱ’’ཏི པཱལི༹པཱཋཉྩ (མཧཱཝ. ༤༧༣; ཙཱུལ༹ཝ. ༣༡༦), ‘‘ཝུཌྜྷཏརོ ཨཏྟནོ ཝུཌྜྷཏཱཡ ནཝཀཏརེན ན ཝུཊྛཱཔེཏབྦོ’’ཏི ཨཊྛཀཐཱཝཙནཉྩ (པཱཙི. ཨཊྛ. ༡༡༩ ཨཱདཡོ; ཀངྑཱ. ཨཊྛ. ཨནུཔཁཛྫསིཀྑཱཔདཝཎྞནཱ) གཧེཏྭཱ ‘‘ཨཧམེཝ ཨེཏྠ ཝུཌྜྷཏརོ, མཡཱ ཝུཌྜྷཏརོ ཨཉྙོ ནཏྠི, ཏསྨཱ ཨཧམེཝ ཨིམསྨིཾ ཝིཧཱརེ ཝསིཏུམནུཙྪཝིཀོ’’ཏི སཉྙཱི ཧོཏི. བྱཏྟོཔི ‘‘བཧུསྶུཏསྶ སངྒྷབྷཱརནིཏྠཱརཀསྶ བྷིཀྑུནོ ཨནུཊྛཱཔནཱིཡསེནཱསནམྤཱི’’ཏི པརིཝཱརཊྛཀཐཱཝཙནཉྩ (པརི. ཨཊྛ. ༤༩༥-༤༩༦), ‘‘ཨནུཛཱནཱམི, བྷིཀྑཝེ, བྱཏྟེན ¶ བྷིཀྑུནཱ པཊིབལེན དསཝསྶེན ཝཱ ཨཏིརེཀདསཝསྶེན ཝཱ ཨུཔསམྤཱདེཏུཾ, ནིསྶཡཾ དཱཏུ’’ནྟིཨཱདིཔཱལི༹ཝཙནཉྩ (མཧཱཝ. ༧༦, ༨༢) གཧེཏྭཱ ‘‘ཨཧམེཝ ཨེཏྠ བྱཏྟོ པཊིབལོ, ན མཡཱ ཨཉྙོ བྱཏྟཏརོ ཨཏྠི, ཏསྨཱ ཨཧམེཝ ཨིམསྶ ཝིཧཱརསྶ ཨནུཙྪཝིཀོ’’ཏི སཉྙཱི. ཝིཧཱརཀཱརཀོཔི ‘‘ཡེན ཝིཧཱརོ ཀཱརིཏོ, སོ ཝིཧཱརསཱམིཀོཏི ཝིནཡཔཱཋོ (པཱཙི. ཨཊྛ. ༡༡༦) ཨཏྠི, མཡཱ ཙ བཧུཾ དྷནཾ ཙཛིཏྭཱ ཨཡཾ ཝིཧཱརོ ཀཱརིཏོ, ཏསྨཱ མཡཱ པསནྣཔུགྒལོ ཨཱརོཔེཏབྦོ, ན ཨཉྙོ’’ཏི སཉྙཱི. སངྒྷོཔི ‘‘སངྒྷིཀོ ནཱམ ཝིཧཱརོ སངྒྷསྶ དིནྣོ ཧོཏི པརིཙྩཏྟོ’’ཏིཨཱདིཔཱལི༹ཝཙནཉྩ (པཱཙི. ༡༡༦, ༡༢༡, ༡༢༦, ༡༣༡), ཨནྟམསོ ཙཏུརངྒུལཔཱདཀཾ གཱམདཱརཀེཧི པཾསྭཱགཱརཀེསུ ཀཱིལ༹ནྟེཧི ཀཏམྤི སངྒྷསྶ དིནྣཀཱལཏོ པཊྛཱཡ གརུབྷཎྜཾ ཧོཏཱི’’ཏིཨཱདིཨཊྛཀཐཱཝཙནཉྩ (ཙཱུལ༹ཝ. ཨཊྛ. ༣༢༡) གཧེཏྭཱ ‘‘ཨཡཾ ཝིཧཱརོ སངྒྷིཀོ ¶ སངྒྷསནྟཀོ, ཏསྨཱ ཨམྷེཧི ཨབྷིརུཙིཏཔུགྒལོཝ ཨཱརོཔེཏབྦོ, ན ཨཉྙོ’’ཏི སཉྙཱི.

ཏཏྠ ཝུཌྜྷཏརསྶ ཝཙནེཔི ‘‘ན ཏྭེཝཱཧཾ, བྷིཀྑཝེ’’ཏྱཱདིཝཙནཾ (ཙཱུལ༹ཝ. ༣༡༦) ཏེསུ ཏེསུ ཨཱསནསཱལཱདཱིསུ ཨགྒཱསནསྶ ཝུཌྜྷཏརཱརཧཏྟཱ བྷཏྟཾ བྷུཉྫིཏྭཱ ནིསིནྣོཔི བྷིཀྑུ ཝུཌྜྷཏརེ ཨཱགཏེ ཝུཊྛཱཡ ཨཱསནཾ དཱཏབྦཾ སནྡྷཱཡ བྷགཝཏཱ ཝུཏྟཾ, ན དྷུཝཝཱསཾ སནྡྷཱཡ. ‘‘ཝུཌྜྷཏརོ ཨཏྟནོ ཝུཌྜྷཏཱཡ’’ཏྱཱདིཝཙནཉྩ (པཱཙི. ཨཊྛ. ༡༢༠; ཀངྑཱ. ཨཊྛ. ཨནུཔཁཛྫསིཀྑཱཔདཝཎྞནཱ) ཡཐཱཝུཌྜྷཾ སེནཱསནེ དཱིཡམཱནེ ཝུཌྜྷཏརེ ཨཱགཏེ ནཝཀཏརོ ཝུཊྛཱཔེཏབྦོ, ཝུཊྛཱཔེཏྭཱ ཝུཌྜྷཏརསྶ སེནཱསནཾ དཱཏབྦཾ, ཝུཌྜྷཏརོ པན ནཝཀཏརེན ན ཝུཊྛཱཔེཏབྦོ. ཀསྨཱ? ‘‘ཨཏྟནོ ཝུཌྜྷཏརཏཱཡཱ’’ཏི ཨུཏུཀཱལེ ཡཐཱཝུཌྜྷཾ སེནཱསནདཱནཾ སནྡྷཱཡ ཝུཏྟཾ, ན དྷུཝཝཱསཏྠཱཡ དཱནཾ སནྡྷཱཡ ¶ , ཏསྨཱ ཨིདམྤི ཝཙནཾ ཨུཔཔརིཀྑིཏབྦཾ, ན སཱིགྷཾ ཨནུཛཱནིཏབྦཾ.

བྱཏྟཝཙནེཔི ‘‘བཧུསྶུཏསྶ སངྒྷབྷཱརནིཏྠཱརཀསྶ’’ཏྱཱདིཝཙནཉྩ (པརི. ཨཊྛ. ༤༤༥-༤༩༦) ན བཧུསྶུཏམཏྟེན སངྒྷིཀཝིཧཱརསྶ ཨིསྶརབྷཱཝཾ སནྡྷཱཡ ཝུཏྟཾ, ཨཐ ཁོ ཏསྶ བྷིཀྑུསྶ བཧཱུཔཀཱརཏཾ གུཎཝིསིཊྛཏཉྩ སལླཀྑེཏྭཱ སངྒྷེན ཕཱསུཀཾ ཨཱཝཱསཾ ཨནུཊྛཱཔནཱིཡཾ ཀཏྭཱ དིནྣེ སོ བྷིཀྑུ ཀེནཙི ཏམྷཱ ཝིཧཱརཱ ཨནུཊྛཱཔནཱིཡོ ཧོཏི, ཨིམམཏྠཾ སནྡྷཱཡ ཝུཏྟཾ. ‘‘ཨནུཛཱནཱམི, བྷིཀྑཝེ’’ཏྱཱདིཝཙནཉྩ (མཧཱཝ. ༨༢) ནིསྶཡཱཙརིཡཱནཾ ལཀྑཎཾ པཀཱསེཏུཾ བྷགཝཏཱ ཝུཏྟཾ, ན སངྒྷིཀཝིཧཱརསྶ ཨིསྶརཏྟཾ, ཏསྨཱ ཨིདམྤི ཝཙནཾ ཨུཔཔརིཀྑིཏབྦཾ, ན སཱིགྷཾ ཨནུཛཱནིཏབྦཾ.

དཱཡཀཝཙནཾ པན ནཱནུཛཱནིཏབྦཾ པཊིབཱཧིཏབྦཾ. ཀསྨཱ? ‘‘ཡེན ཝིཧཱརོ ཀཱརིཏོ’’ཏྱཱདིཔཱཋསྶ ཨམུཁྱཝོཧཱརཏྟཱ. ཡཐཱ ཧི པུཐུཛྫནཀཱལེ རཱུཔཱདཱིསུ སཉྫནསྶ བྷཱུཏཔུབྦཏྟཱ བྷཱུཏཔུབྦགཏིཡཱ ཨརཧཱཔི ‘‘སཏྟོ’’ཏི, ཨེཝཾ དཱནཀཱལཏོ པུབྦེ ཏསྶ ཝིཧཱརསྶ སཱམིབྷཱུཏཔུབྦཏྟཱ དཱཡཀོ ‘‘ཝིཧཱརསཱམིཀོ’’ཏི ཝུཙྩཏི, ན ཨིསྶརཏྟཱ. ན ཧི སཀལེ ཝིནཡཔིཊཀེ ཨཊྛཀཐཱཊཱིཀཱསུ ཙ ‘‘ཝིསྶཛྫེཏྭཱ དིནྣསྶ ཝིཧཱརསྶ དཱཡཀོ ཨིསྶརོ’’ཏི ཝཱ ‘‘དཱཡཀེན ཝིཙཱརེཏབྦོ’’ཏི ཝཱ ‘‘དཱཡཀསནྟཀཝིཧཱརོ’’ཏི ཝཱ པཱཋོ ཨཏྠི, ‘‘སངྒྷིཀོ, གཎསནྟཀོ, པུགྒལིཀོ’’ཨིཙྩེཝ ཨཏྠི, ཏསྨཱ ཏསྶ ཝཙནཾ ནཱནུཛཱནིཏབྦཾ.

སངྒྷསྶ ¶ ཝཙནེཔི ‘‘སངྒྷིཀོ ནཱམ ཝིཧཱརོ’’ཏྱཱདིཝཙནཾ (པཱཙི. ༡༡༦, ༡༢༡, ༡༢༦, ༡༣༡) སངྒྷསནྟཀབྷཱཝཾ སངྒྷེན ཝིཙཱརེཏབྦབྷཱཝཾ དཱིཔེཏི, སངྒྷོ པན ཝིཙཱརེནྟོ པཉྩངྒསམནྣཱགཏཾ བྷིཀྑུཾ སེནཱསནགྒཱཧཱཔཀཾ སམྨནྣིཏྭཱ ཏེན ཡཐཱཝུཌྜྷཾ ཝིཙཱརེཏབྦོ ཝཱ ཧོཏི, སམགྒེན སངྒྷེན དུཝངྒསམནྣཱགཏསྶ བྷིཀྑུནོ ཨཔལོཀནཀམྨེན ¶ དྷུཝཝཱསཏྠཱཡ དཱཏབྦོ ཝཱ. ཏེསུ པཉྩངྒསམནྣཱགཏསྶ བྷིཀྑུནོ དུལླབྷཏྟཱ སེནཱསནགྒཱཧཱཔཀསམྨུཏིཡཱ ཨབྷཱཝེ སཏི དུཝངྒསམནྣཱགཏོ བྷིཀྑུ པརིཡེསིཏབྦོ. ཨེཝཾ པན ཨཔརིཡེསིཏྭཱ བྷཎྜཱགཱརིཀཏཱདིབཧཨཱུཔཀཱརཏཱཡུཏྟསྶ བཧུསྶུཏཏཱདིགུཎཝིསིཊྛཏཱཝིརཧསྶ བྷིཀྑུནོ ཨཱམིསགརུཀཏཱདིཝསེན སངྒྷེན ཝིཧཱརོ དཱཏབྦོ ན ཧོཏི, ཏསྨཱ སངྒྷཝཙནམྤི ཨུཔཔརིཀྑིཏབྦཾ, ན ཏཱཝ ཨནུཛཱནིཏབྦཾ.

ཨཐ ཏཱིཎིཔི ཝཙནཱནི སཾསནྡེཏབྦཱནི. ཏཏྠ སངྒྷསྶ ཨིསྶརཏྟཱ སངྒྷོ པུཙྪིཏབྦོ ‘‘ཀོ པུགྒལོ ཏུམྷེཧི ཨབྷིརུཙིཏོ’’ཏི, པུཙྪིཏྭཱ ‘‘ཨེསོ’’ཏི ཝུཏྟེ ‘‘ཀསྨཱ ཨབྷིརུཙིཏོ’’ཏི པུཙྪིཏྭཱ ‘‘ཨེསོ པུགྒལོ ཨམྷེ ཙཱིཝརཱདིཔཙྩཡེཧི ཨནུགྒཧེཏཱ, ཨམྷཱཀཾ ཉཱཏིསཱལོཧིཏོ, ཨུཔཛ྄ཛྷཱཡོ, ཨཱཙརིཡོ, སདྡྷིཝིཧཱརིཀོ, ཨནྟེཝཱསིཀོ, སམཱནུཔཛ྄ཛྷཱཡཀོ, སམཱནཱཙརིཡཀོ, པིཡསཧཱཡོ, ལཱབྷཱི, ཡསསྶཱི, ཏསྨཱ ཨམྷེཧི ཨབྷིརུཙིཏོ’’ཏི ཝུཏྟེ ‘‘ན ཨེཏྟཱཝཏཱ དྷུཝཝཱསཏྠཱཡ ཝིཧཱརོ དཱཏབྦོ’’ཏི པཊིཀྑིཔིཏབྦོ. ཨཐ ‘‘ཨེསོ པུགྒལོ སབྦེཧི ཨམྷེཧི ཝུཌྜྷཏརོ ཨགྒཱསནཾ ཨགྒོདཀཾ ཨགྒཔིཎྜཾ ཨརཧཏི, དྷུཝཝཱསཏྠཱཡ ཝིཧཱརོ པན ཏསྶ དཱཏབྦོཏི ཨཊྛཀཐཱཙརིཡེཧི ན ཝུཏྟོ’’ཏི ཝཏྭཱ པཊིཀྑིཔིཏབྦོ. ཨཐ ‘‘དྷམྨཀཐིཀོ, ཝིནཡདྷརོ, གཎཝཱཙཀཨཱཙརིཡོ’’ཏི ཝུཏྟེ ‘‘ཨེསོ དྷུཝཝཱསཏྠཱཡ དིནྣཝིཧཱརསྶ ཨནུཙྪཝིཀོ, ཨེཏསྶ དཱཏབྦོ’’ཏི ཨནུམོདིཏབྦོ. ཀཐཾ ཝིཉྙཱཡཏཱིཏི ཙེ? ‘‘སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརཱདཱིནཾ ཝཱ གཎཝཱཙཀཨཱཙརིཡསྶ ཝཱ བཧཱུཔཀཱརཏཾ གུཎཝིསིཊྛཏཉྩ སལླཀྑེནྟོ དྷུཝཝཱསཏྠཱཡ ཝིཧཱརཾ སམྨནྣིཏྭཱ དེཏཱི’’ཏི ཝཙནཏོ ཝིཉྙཱཡཏི (པཱཙི. ཨཊྛ. ༡༢༩; ཀངྑཱ. ཨཊྛ. ཨནུཔཁཛྫསིཀྑཱཔདཝཎྞནཱ).

ཨིདྷ ¶ པན སཱདྷཀཔཱཋེ ‘‘བྷཎྜཱགཱརིཀསྶ ཝཱ’’ཏི ཝིཛྫམཱནེ ཀསྨཱ སཱདྷྱཝཙནེ བྷཎྜཱགཱརིཀོ ན ཝུཏྟོཏི? ཨེཏརཧི བྷཎྜཱགཱརསྶ ཨབྷཱཝཱ. ཡདི ཀེསུཙི ཝིཧཱརེསུ བྷཎྜཱགཱརཾ སམྨནྣེཡྻ, སོ བྷཎྜཱགཱརཝིཧཱརེ ནིསིནྣོ སངྒྷསྶ པཏྟཙཱིཝརརཀྑཎཱདིཀཾ ཨུཔཀཱརཾ ཀརེཡྻ, ཏསྶ བཧཱུཔཀཱརཏཾ སལླཀྑེནྟོ སངྒྷོ བྷཎྜཱགཱརིཀསྶ ཕཱསུཀཾ ཨཱཝཱསཾ ཨེཏརཧིཔི དྷུཝཝཱསཏྠཱཡ ¶ དདེཡྻ, སོ ཏསྶ ཝིསུཾ དྷུཝཝཱསཝིཧཱརོཏི. ཨེཏྠ སཱདྷཀཔཱཋེ ‘‘དྷམྨཀཐིཀཝིནཡདྷརཱདཱིནཾ ཝཱ’’ཏིཨཱདིསདྡེན བཧུསྶུཏོ ཨཱགཏཱགམོ དྷམྨདྷརོ ཝིནཡདྷརོ མཱཏིཀཱདྷརོ པཎྜིཏོ བྱཏྟོ མེདྷཱཝཱི ལཛྫཱི ཀུཀྐུཙྩཀོ སིཀྑཱཀཱམོཏི ཝུཏྟགུཎཝནྟེ སངྒཎྷཱཏི. ཨཐཱཔི ‘‘ཨེསོ པུགྒལོ བཧུསྶུཏོ ཨུདྡེསཔརིཔུཙྪཱདཱིཧི བྷིཀྑཱུནཾ བཧཱུཔཀཱརོ སངྒྷབྷཱརནིཏྠཱརཀོ’’ཏི ཝདཏི, ‘‘སཱདྷུ ཨེསོཔི ཕཱསུཀཱཝཱསསྶ ཨརཧོ, ཨནུཊྛཱཔནཱིཡཾ ཀཏྭཱ དྷུཝཝཱསཏྠཱཡ ཝིཧཱརོ ཨེཏསྶཔི དཱཏབྦོ’’ཏི ཝཏྭཱ ཨནུམོདིཏབྦོ. ཀཐཾ ཝིཉྙཱཡཏཱིཏི ཙེ? ‘‘སངྒྷོ པན བཧུསྶུཏསྶ ཨུདྡེསཔརིཔུཙྪཱདཱིཧི བཧཱུཔཀཱརསྶ བྷཱརནིཏྠཱརཀསྶ ཕཱསུཀཾ ཨཱཝཱསཾ ཨནུཊྛཱཔནཱིཡཾ ཀཏྭཱ དེཏཱི’’ཏི (མཧཱཝ. ཨཊྛ. ༣༤༣) ཝཙནཏོ ཝིཉྙཱཡཏི.

ཨཐཱཔི ‘‘ཨཡཾ པུགྒལོ དྷམྨཀཐིཀོ ཝིནཡདྷརོ གཎཝཱཙཀཱཙརིཡོ སངྒྷསྶ བཧཱུཔཀཱརོ ཝིསིཊྛགུཎཡུཏྟོ’’ཏི ཝདཏི, ‘‘སཱདྷུ ཨེཏསྶཔི པུགྒལསྶ དྷུཝཝཱསཏྠཱཡ ཝིཧཱརཾ སལླཀྑེཏྭཱ སམྨནྣིཏྭཱཝ དཱཏབྦོ’’ཏི ཝཏྭཱ ཨནུམོདིཏབྦོ. ཀཐཾ ཝིཉྙཱཡཏཱིཏི ཙེ? ‘‘སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརཱདཱིནཾ ཝཱ གཎཝཱཙཀཱཙརིཡསྶ ཝཱ བཧཱུཔཀཱརཏཾ གུཎཝིསིཊྛཏཉྩ སལླཀྑེཏྭཱ དྷུཝཝཱསཏྠཱཡ ¶ ཝིཧཱརཾ སམྨནྣིཏྭཱ དེཏཱི’’ཏི (པཱཙི. ཨཊྛ. ༡༢༠; ཀངྑཱ. ཨཊྛ. ཨནུཔཁཛྫསིཀྑཱཔདཝཎྞནཱ) ཝཙནཏོ ཝིཉྙཱཡཏི.

ཨཐཱཔི ‘‘ཨེསོ པུགྒལོ བཧུསྶུཏོ སངྒྷབྷཱརནིཏྠཱརཀོ’’ཏི ཝདཏི, ‘‘སཱདྷུ ཨེཏསྶཔི ཨནུཊྛཱཔནཱིཡཾ ཀཏྭཱ དཱཏབྦོ’’ཏི ཝཏྭཱ ཨནུམོདིཏབྦོ. ཀཐཾ ཝིཉྙཱཡཏཱིཏི ཙེ? ‘‘བཧུསྶུཏསྶ སངྒྷབྷཱརནིཏྠཱརཀསྶ བྷིཀྑུནོ ཨནུཊྛཱཔནཱིཡསེནཱསནམྤཱི’’ཏི པརིཝཱརཊྛཀཐཱཡཾ (པརི. ཨཊྛ. ༤༩༥-༤༩༦) ཝུཏྟཏྟཱ ཝིཉྙཱཡཏི. ཏཏོ ‘‘ཨེཝཾ དུཝངྒསམྤནྣོ པུགྒལོ ཨནྟོསཱིམཊྛོ ཝཱ བཧིསཱིམཊྛོ ཝཱ’’ཏི པུཙྪིཏྭཱ ‘‘ཨནྟོསཱིམཊྛོ’’ཏི ཝུཏྟེ ‘‘སཱདྷུ སུཊྛུ ཏསྶ དཱཏབྦོ’’ཏི སམྤཊིཙྪིཏབྦཾ. ‘‘བཧིསཱིམཊྛོ’’ཏི ཝུཏྟེ ‘‘ན དཱཏབྦོ’’ཏི པཊིཀྑིཔིཏབྦཾ. ཀསྨཱཏི ཙེ? ‘‘ན, བྷིཀྑཝེ, ནིསྶཱིམེ ཋིཏསྶ སེནཱསནཾ གཱཧེཏབྦཾ, ཡོ གཱཧེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༣༡༨) ཝཙནཏོཏི.

ཨཐ ‘‘དུཝངྒསམནྣཱགཏེ ཨནྟོསཱིམཊྛེ ཨསཏི ཨེཀངྒསམནྣཱགཏོ ཨནྟོསཱིམཊྛོ ཨཏྠཱི’’ཏི པུཙྪིཏྭཱ ‘‘ཨཏྠཱི’’ཏི ཝུཏྟེ ‘‘སཱདྷུ སུཊྛུ ཨེཏསྶ དཱཏབྦོ’’ཏི སམྤཊིཙྪིཏབྦཾ. ཀཐཾ ཝིཉྙཱཡཏཱིཏི ཙེ? ‘‘བཧཱུཔཀཱརཏཾ གུཎཝིསིཊྛཏཉྩ སལླཀྑེནྟོཏི བྷཎྜཱགཱརིཀསྶ བཧཱུཔཀཱརཏཾ དྷམྨཀཐིཀཱདཱིནཾ ¶ གུཎཝིསིཊྛཏཉྩ སལླཀྑེནྟོ’’ཏི སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༡༡༩-༡༢༡) ཨེཀེཀངྒཝསེན ཨཱགཏཏྟཱ ཝིཉྙཱཡཏི. ‘‘ཨནྟོསཱིམཊྛོ ཨེཀངྒསམནྣཱགཏོཔི ནཏྠི, བཧིསཱིམཊྛོཝ ཨཏྠཱི’’ཏི ཝུཏྟེ ‘‘ཨཱགནྟྭཱ ཨནྟོསཱིམེ ཋིཏསྶ དཱཏབྦོ’’ཏི ཝཏྟབྦོ. ཀསྨཱཏི ཙེ? ‘‘ཨསམྤཏྟཱནམྤི ཨུཔཙཱརསཱིམཾ པཝིཊྛཱནཾ ཨནྟེཝཱསིཀཱདཱིསུ གཎྷནྟེསུ དཱཏབྦམེཝཱ’’ཏི ཨཊྛཀཐཱཡཾ (མཧཱཝ. ཨཊྛ. ༣༧༩) ཝཙནཏོ ཝིཉྙཱཡཏི.

སཙེ ¶ པན ཨེཀངྒཡུཏྟབྷཱཝེན ཝཱ དུཝངྒཡུཏྟབྷཱཝེན ཝཱ སམཱནཱ དྭེ ཏཡོ བྷིཀྑཱུ ཨནྟོསཱིམཱཡཾ ཝིཛྫམཱནཱ བྷཝེཡྻུཾ, ཀསྶ དཱཏབྦོཏི? ཝཌྜྷཏརསྶཱཏི. ཀཐཾ ཝིཉྙཱཡཏཱིཏི ཙེ? ‘‘ན ཙ, བྷིཀྑཝེ, སངྒྷིཀཾ ཡཐཱཝུཌྜྷཾ པཊིབཱཧིཏབྦཾ, ཡོ པཊིབཱཧེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༣༡༡) ཝཙནཏོཏི. སཙེ པན ཨནྟོསཱིམཱཡཾ ཨེཀངྒཡུཏྟོ ཝཱ དུཝངྒཡུཏྟོ ཝཱ བྷིཀྑུ ནཏྠི, སབྦེཝ ཨཱཝཱསིཀཱ བཱལཱ ཨབྱཏྟཱ, ཨེཝཾ སཏི ཀསྶ དཱཏབྦོཏི? ཡོ ཏཾ ཝིཧཱརཾ ཨཱགཙྪཏི ཨཱགནྟུཀོ བྷིཀྑུ, སོ ཙེ ལཛྫཱི ཧོཏི པེསལོ བཧུསྶུཏོ སིཀྑཱཀཱམོ, སོ ཏེཧི ཨཱཝཱསིཀེཧི བྷིཀྑཱུཧི ཨཉྙཏྠ ཨགམནཏྠཾ སངྒཧཾ ཀཏྭཱ སོ ཨཱཝཱསོ དཱཏབྦོ.

ཨཡམཏྠོ ཀཐཾ ཛཱནིཏབྦོཏི ཙེ? ‘‘ཨིདྷ པན, བྷིཀྑཝེ, ཨཉྙཏརསྨིཾ ཨཱཝཱསེ སམྦཧུལཱ བྷིཀྑཱུ ཝིཧརནྟི བཱལཱ ཨབྱཏྟཱ, ཏེ ན ཛཱནནྟི ཨུཔོསཐཾ ཝཱ ཨུཔོསཐཀམྨཾ ཝཱ པཱཏིམོཀྑཾ ཝཱ པཱཏིམོཀྑུདྡེསཾ ཝཱ. ཏཏྠ ཨཉྙོ བྷིཀྑུ ཨཱགཙྪཏི བཧུསྶུཏོ ཨཱགཏཱགམོ དྷམྨདྷརོ ཝིནཡདྷརོ མཱཏིཀཱདྷརོ པཎྜིཏོ བྱཏྟོ མེདྷཱཝཱི ལཛྫཱི ཀུཀྐུཙྩཀོ སིཀྑཱཀཱམོ, ཏེཧི, བྷིཀྑཝེ, བྷིཀྑཱུཧི སོ བྷིཀྑུ སངྒཧེཏབྦོ ཨནུགྒཧེཏབྦོ ཨུཔལཱཔེཏབྦོ ཨུཔཊྛཱཔེཏབྦོ ཙུཎྞེན མཏྟིཀཱཡ དནྟཀཊྛེན མུཁོདཀེན. ནོ ཙེ སངྒཎྷེཡྻུཾ ཨནུགྒཎྷེཡྻུཾ ཨུཔལཱཔེཡྻུཾ ཨུཔཊྛཱཔེཡྻུཾ ཙུཎྞེན མཏྟིཀཱཡ དནྟཀཊྛེན མུཁོདཀེན, ཨཱཔཏྟི དུཀྐཊསྶཱ’’ཏི (མཧཱཝ. ༡༦༣) སམྨཱསམྦུདྡྷེན པཉྙཏྟཏྟཱ, ཨཊྛཀཐཱཡཉྩ (མཧཱཝ. ཨཊྛ. ༡༦༣) ‘‘སངྒཧེཏབྦོཏི ‘སཱདྷུ, བྷནྟེ, ཨཱགཏཏྠ, ཨིདྷ བྷིཀྑཱ སུལབྷཱ སཱུཔབྱཉྫནཾ ཨཏྠི, ཝསཐ ཨནུཀྐཎྛམཱནཱ’ཏི ཨེཝཾ པིཡཝཙནེན སངྒཧེཏབྦོ, པུནཔྤུནཾ ཏཐཱཀརཎཝསེན ཨནུགྒཧེཏབྦོ, ‘ཨཱམ ཝསིསྶཱམཱི’ཏི པཊིཝཙནདཱཔནེན ¶ ཨུཔལཱཔེཏབྦོ. ཨཐ ཝཱ ཙཏཱུཧི པཙྩཡེཧི སངྒཧེཏབྦོ ཙེཝ ཨནུགྒཧེཏབྦོ ཙ, པིཡཝཙནེན ཨུཔལཱཔེཏབྦོ, ཀཎྞསུཁཾ ཨཱལཔིཏབྦོཏི ཨཏྠོ, ཙུཎྞཱདཱིཧི ཨུཔཊྛཱཔེཏབྦོ. ཨཱཔཏྟི དུཀྐཊསྶཱཏི སཙེ སཀལོཔི སངྒྷོ ན ཀརོཏི, སབྦེསཾ དུཀྐཊཾ. ཨིདྷ ནེཝ ཐེརཱ, ན དཧརཱ ¶ མུཙྩནྟི, སབྦེཧི ཝཱརེན ཨུཔཊྛཱཏབྦོ, ཨཏྟནོ ཝཱརེ ཨནུཔཊྛཧནྟསྶ ཨཱཔཏྟི. ཏེན པན མཧཱཐེརཱནཾ པརིཝེཎསམྨཛྫནདནྟཀཊྛདཱནཱདཱིནི ན སཱདིཏབྦཱནི. ཨེཝམྤི སཏི མཧཱཐེརེཧི སཱཡཾཔཱཏཾ ཨུཔཊྛཱནཾ ཨཱགནྟབྦཾ. ཏེན པན ཏེསཾ ཨཱགམནཾ ཉཏྭཱ པཋམཏརཾ མཧཱཐེརཱནཾ ཨུཔཊྛཱནཾ གནྟབྦཾ. སཙསྶ སདྡྷིཾཙརཱ བྷིཀྑཱུ ཨུཔཊྛཱཀཱ ཨཏྠི, ‘མཡ྄ཧཾ ཨུཔཊྛཱཀཱ ཨཏྠི, ཏུམྷེ ཨཔྤོསྶུཀྐཱ ཝིཧརཐཱ’ཏི ཝཏྟབྦཾ. ཨཐཱཔིསྶ སདྡྷིཾ ཙརཱ ནཏྠི, ཏསྨིཾཡེཝ པན ཝིཧཱརེ ཨེཀོ ཝཱ དྭེ ཝཱ ཝཏྟསམྤནྣཱ ཝདནྟི ‘མཡ྄ཧཾ ཐེརསྶ ཀཏྟབྦཾ ཀརིསྶཱམ, ཨཝསེསཱ ཕཱསུ ཝིཧརནྟཱུ’ཏི, སབྦེསཾ ཨནཱཔཏྟཱི’’ཏི ཝུཏྟཏྟཱ. ཨེཝཾ ཏཱདིསཾ བཧིསཱིམཏོ ཨནྟོསཱིམམཱགཏཾ ལཛྫཱིཔེསལབཧུསྶུཏསིཀྑཱཀཱམབྷཱུཏཾ བྷིཀྑུཾ ཨནྟོསཱིམཱཡ དྷུཝནིཝཱསཏྠཱཡ ཕཱསུཀཾ ཨཱཝཱསཾ ཨནུཊྛཱཔནཱིཡཾ ཀཏྭཱ དཱཏབྦོཏི ཝིཉྙཱཡཏི.

ནནུ ཙ ‘‘ན, བྷིཀྑཝེ, ནིསྶཱིམེ ཋིཏསྶ སེནཱསནཾ གཱཧེཏབྦཾ, ཡོ གཱཧེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༣༡༨) བྷགཝཏཱ ཝུཏྟཾ, ཨཐ ཀསྨཱ ནིསྶཱིམཏོ ཨཱགཏསྶ དྷུཝཝཱསཏྠཱཡ ཝིཧཱརོ དཱཏབྦོཏི? ཝུཙྩཏེ – ‘‘ནིསྶཱིམེ ཋིཏསྶཱ’’ཏི ཨིདཾ ཨནཱདརེ སཱམིཝཙནཾ, ཏསྨཱ ནིསྶཱིམེ ཋིཏཾཡེཝ སེནཱསནཾ ན གཱཧེཏབྦནྟི ཨཏྠོ དཊྛབྦོ, ན ནིསྶཱིམེ ཋིཏསྶ ཏསྶ བྷིཀྑུསྶ ཨནྟོསཱིམཾ པཝིཊྛསྶཔི སེནཱསནཾ ན གཱཧེཏབྦནྟི ཨཏྠོ, ཏསྨཱ པུབྦེ བཧིསཱིམཱཡཾ ཋིཏེཔི ཨིདཱནི ཨནྟོསཱིམཾ པཝིཊྛཀཱལཏོ པཊྛཱཡ ཙཏུཔཙྩཡབྷཱགོ ལབྦྷཏི. ཝུཏྟཉྷི ཨཊྛཀཐཱཡཾ ¶ (མཧཱཝ. ཨཊྛ. ༣༧༩) ‘‘ཨསུཀཝིཧཱརེ ཀིར བཧུཾ ཙཱིཝརཾ ཨུཔྤནྣནྟི སུཏྭཱ ཡོཛནནྟརིཀཝིཧཱརཏོཔི བྷིཀྑཱུ ཨཱགཙྪནྟི, སམྤཏྟསམྤཏྟཱནཾ ཋིཏཊྛཱནཏོ པཊྛཱཡ དཱཏབྦ’’ནྟི. ཨནྟོསཱིམཊྛེསུ པཱཏིམོཀྑཾ ཨུདྡིསིཏུཾ ཨསཀྐོནྟེསུ ཡཏྠ པཱཏིམོཀྑུདྡེསཀོ ཨཏྠི, སོ ཨཱཝཱསོ གནྟབྦོ ཧོཏི. ཨནྟོཝསྶེཔི པཱཏིམོཀྑུདྡེསཀེན ཝིནཱ ཝསྶཾ ཝསིཏུཾ ན ལབྷཏི. ཡཏྠ པཱཏིམོཀྑུདྡེསཀོ ཨཏྠི, ཏཏྠ གནྟྭཱ ཝསྶཾ ཝསིཏབྦཾ, ཏསྨཱ བཧིསཱིམཏོ ཨཱགཏོཔི ལཛྫཱིཔེསལབཧུསྶུཏསིཀྑཱཀཱམབྷིཀྑུ སངྒཧེཏབྦོ ཧོཏི. ཝུཏྟཉྷེཏཾ བྷགཝཏཱ –

‘‘ཨིདྷ པན, བྷིཀྑཝེ, ཨཉྙཏརསྨིཾ ཨཱཝཱསེ ཏདཧུཔོསཐེ སམྦཧུལཱ བྷིཀྑཱུ ཝིཧརནྟི བཱལཱ ཨབྱཏྟཱ, ཏེ ན ཛཱནནྟི ཨུཔོསཐཾ ཝཱ ཨུཔོསཐཀམྨཾ ཝཱ པཱཏིམོཀྑཾ ཝཱ པཱཏིམོཀྑུདྡེསཾ ཝཱ. ཏེཧི, བྷིཀྑཝེ, བྷིཀྑཱུཧི ཨེཀོ བྷིཀྑུ སཱམནྟཱ ཨཱཝཱསཱ སཛྫུཀཾ པཱཧེཏབྦོ ‘གཙྪཱཝུསོ སཾཁིཏྟེན ཝཱ ཝིཏྠཱརེན ཝཱ པཱཏིམོཀྑཾ པརིཡཱཔུཎིཏྭཱ ཨཱགཙྪཱ’ཏི. ཨེཝཉྩེཏཾ ལབྷེཐ, ཨིཙྩེཏཾ ཀུསལཾ. ནོ ཙེ ལབྷེཐ, ཏེཧི, བྷིཀྑཝེ, བྷིཀྑཱུཧི སབྦེཧེཝ ཡཏྠ ཛཱནནྟི ¶ ཨུཔོསཐཾ ཝཱ ཨུཔོསཐཀམྨཾ ཝཱ པཱཏིམོཀྑཾ ཝཱ པཱཏིམོཀྑུདྡེསཾ ཝཱ, སོ ཨཱཝཱསོ གནྟབྦོ. ནོ ཙེ གཙྪེཡྻུཾ, ཨཱཔཏྟི དུཀྐཊསྶ. ཨིདྷ པན, བྷིཀྑཝེ, ཨཉྙཏརསྨིཾ ཨཱཝཱསེ སམྦཧུལཱ བྷིཀྑཱུ ཝསྶཾ ཝསནྟི བཱལཱ ཨབྱཏྟཱ, ཏེ ན ཛཱནནྟི ཨུཔོསཐཾ ཝཱ ཨུཔོསཐཀམྨཾ ཝཱ པཱཏིམོཀྑཾ ཝཱ པཱཏིམོཀྑུདྡེསཾ ཝཱ. ཏེཧི, བྷིཀྑཝེ, བྷིཀྑཱུཧི ཨེཀོ བྷིཀྑུ སཱམནྟཱ ཨཱཝཱསཱ སཛྫུཀཾ པཱཧེཏབྦོ ‘གཙྪཱཝུསོ སཾཁིཏྟེན ཝཱ ཝིཏྠཱརེན ཝཱ པཱཏིམོཀྑཾ པརིཡཱཔུཎིཏྭཱ ཨཱགཙྪཱ’ཏི. ཨེཝཉྩེཏཾ ལབྷེཐ, ཨིཙྩེཏཾ ཀུསལཾ. ནོ ཙེ ལབྷེཐ, ཨེཀོ བྷིཀྑུ སཏྟཱཧཀཱལིཀཾ ¶ པཱཧེཏབྦོ ‘གཙྪཱཝུསོ སཾཁིཏྟེན ཝཱ ཝིཏྠཱརེན ཝཱ པཱཏིམོཀྑཾ པརིཡཱཔུཎིཏྭཱ ཨཱགཙྪཱ’ཏི. ཨེཝཉྩེཏཾ ལབྷེཐ, ཨིཙྩེཏཾ ཀུསལཾ. ནོ ཙེ ལབྷེཐ, ན, བྷིཀྑཝེ, ཏེཧི བྷིཀྑཱུཧི ཏསྨིཾ ཨཱཝཱསེ ཝསྶཾ ཝསིཏབྦཾ, ཝསེཡྻུཾ ཙེ, ཨཱཔཏྟི དུཀྐཊསྶཱཏི’’ (མཧཱཝ. ༡༦༣).

ཨེཝཾ བཧིསཱིམཏོ ཨཱགཏསྶཔི སངྒྷསྶ ཨུཔཀཱརཾ ཀཱཏུཾ སཀྐོནྟསྶ ཝིསིཊྛགུཎཡུཏྟསྶ དཱཏབྦབྷཱཝོ ཝིཉྙཱཡཏི, ཏསྨཱ ‘‘ཨམྷཱཀཾ གཎོ ན ཧོཏི, ཨམྷཱཀཾ ཝཾསོ པཝེཎཱི ན ཧོཏི, ཨམྷཱཀཾ སནྡིཊྛསམྦྷཏྟོ ན ཧོཏཱི’’ཏིཨཱདཱིནི ཝཏྭཱ ན པཊིཀྑིཔིཏབྦོ. གཎཱདིབྷཱཝོ ཧི ཨཔྤམཱཎཾ, ཡཐཱཝུཏྟབཧཱུཔཀཱརཏཱདིབྷཱཝོཡེཝ པམཱཎཾ. སཱམགྒིཀརཎཏོ པཊྛཱཡ ཧི སམཱནགཎོ ཧོཏི. ཏཐཱ ཧི ཨུཀྑིཏྟཱནུཝཏྟཀཱནཾ ལདྡྷིནཱནཱསཾཝཱསཀཱནམྤི ལདྡྷིཝིསྶཛྫནེན ཏིཝིདྷཨུཀྑེཔནཱིཡཀམྨཀཏཱནཾ ཀམྨནཱནཱསཾཝཱསཀཱནམྤི ཨོསཱརཎཾ ཀཏྭཱ སཱམགྒིཀརཎེན སཾཝཱསོ བྷགཝཏཱ ཨནུཉྙཱཏོ. ཨལཛྫིཾ པན བཧུསྶུཏམྤི སངྒཧཾ ཀཱཏུཾ ན ཝཊྚཏི. སོ ཧི ཨལཛྫཱིཔརིསཾ ཝཌྜྷཱཔེཏི, ལཛྫཱིཔརིསཾ ཧཱཔེཏི. བྷཎྜནཀཱརཀཾ པན ཝིཧཱརཏོཔི ནིཀྐཌྜྷིཏབྦཾ. ཏཐཱ ཧི ‘‘བྷཎྜནཀཱརཀཀལཧཀཱརཀམེཝ སཀལསངྒྷཱརཱམཏོ ནིཀྐཌྜྷིཏུཾ ལབྷཏི. སོ ཧི པཀྑཾ ལབྷིཏྭཱ སངྒྷམྤི བྷིནྡེཡྻ. ཨལཛྫཱིཨཱདཡོ པན ཨཏྟནོ ཝསནཊྛཱནཏོཡེཝ ནིཀྐཌྜྷིཏབྦཱ, སཀལསངྒྷཱརཱམཏོ ནིཀྐཌྜྷིཏུཾ ན ཝཊྚཏཱི’’ཏི ཨཊྛཀཐཱཡཾ (པཱཙི. ཨཊྛ. ༡༢༨) ཝུཏྟཾ.

ཝུཌྜྷཱཔཙཱཡནཱདིསཱམགྒིརསརཧིཏཾ ཝིསབྷཱགཔུགྒལམྤི སངྒཧཾ ཀཱཏུཾ ན ལབྷཏི. ཝུཏྟཉྷི ‘‘ཨེཝརཱུཔེན ཧི ཝིསབྷཱགཔུགྒལེན ཨེཀཝིཧཱརེ ཝཱ ཨེཀཔརིཝེཎེ ཝཱ ཝསནྟེན ཨཏྠོ ནཏྠི, ཏསྨཱ སབྦཏྠེཝསྶ ནིཝཱསོ ཝཱརིཏོ’’ཏི (པཱཙི. ཨཊྛ. ༡༢༢), ཏསྨཱ ཨཱཝཱསིཀོ ཝཱ ཧོཏུ ¶ ཨཱགནྟུཀོ ཝཱ, སགཎོ ཝཱ ཧོཏུ ཨཉྙགཎོ ¶ ཝཱ, བཧུསྶུཏསཱིལཝནྟབྷཱུཏོ བྷིཀྑུ སངྒཧེཏབྦོ. ཝུཏྟཉྷི བྷགཝཏཱ –

‘‘བཧུསྶུཏཾ དྷམྨདྷརཾ, སཔྤཉྙཾ བུདྡྷསཱཝཀཾ;

ནེཀྑཾ ཛམྦོནདསྶེཝ, ཀོ ཏཾ ནནྡིཏུམརཧཏི;

དེཝཱཔི ནཾ པསཾསནྟི, བྲཧྨུནཱཔི པསཾསིཏོ’’ཏི. (ཨ. ནི. ༤.༦) –

ཨཡཾ ཨནྟོསཱིམཊྛེན སངྒྷེན བཧཱུཔཀཱརཏཱགུཎཝིསིཊྛཏཱསངྑཱཏེཧི གུཎེཧི ཡུཏྟསྶ སངྒྷབྷཱརནིཏྠཱརཀསྶ བྷིཀྑུནོ ཕཱསུཀཾ ཨཱཝཱསཾ ཨནུཊྛཱཔནཱིཡཾ ཀཏྭཱ དཱནེ ཝིནིཙྪཡོ.

ཡདཱ པན སངྒྷཏྠེརོ ཛརཱདུབྦལཏཱཡ ཝཱ རོགཔཱིལི༹ཏཏཱཡ ཝཱ ཝིཝེཀཛ྄ཛྷཱསཡཏཱཡ ཝཱ གཎཾ ཨཔརིཧརིཏུཀཱམོ ཨཉྙསྶ དཱཏུཀཱམོ, ཨཏྟནོ ཨཙྩཡེན ཝཱ ཀལཧཝིཝཱདཱབྷཱཝམིཙྪནྟོ སདྡྷིཝིཧཱརིཀཱདཱིནཾ ནིཡྻཱཏེཏུཀཱམོ ཧོཏི, ཏདཱ ན ཨཏྟནོ ཨིསྶརཝཏཱཡ དཱཏབྦཾ, ཨཡཾ ཝིཧཱརོ སངྒྷིཀོ, ཏསྨཱ སངྒྷཾ སནྣིཔཱཏཱཔེཏྭཱ ཏཾ ཀཱརཎཾ ཨཱཙིཀྑིཏྭཱ བཧཱུཔཀཱརཏཱགུཎཝིསིཊྛཏཱཡུཏྟཔུགྒལོ ཝིཙིནཱཔེཏབྦོ. ཏཏོ སངྒྷོ ཙཏྟཱརི ཨགཏིགམནཱནི ཨནུཔགནྟྭཱ བྷགཝཏོ ཨཛ྄ཛྷཱསཡཱནུརཱུཔཾ ལཛྫཱིཔེསལབཧུསྶུཏསིཀྑཱཀཱམབྷཱུཏཾ པུགྒལཾ ཝིཙིནིཏྭཱ ‘‘ཨཡཾ བྷིཀྑུ ཨིམསྶ ཝིཧཱརསྶ ཨནུཙྪཝིཀོ’’ཏི ཨཱརོཙེཏི. མཧཱཐེརསྶཔི ཏམེཝ རུཙྩཏི, ཨིཙྩེཏཾ ཀུསལཾ. ནོ ཙེ རུཙྩཏི, ཨཏྟནོ བྷཱརབྷཱུཏཾ ཝུཏྟཔྤཀཱརཨངྒཝིཡུཏྟཾ པུགྒལཾ དཱཏུཀཱམོ ཧོཏི. ཨེཝཾ སནྟེ སངྒྷོ ཚནྡཱདིཨགཏིཾ ན གཙྪཏི, པུགྒལོཝ གཙྪཏི, ཏསྨཱ སངྒྷསྶེཝ ཨནུམཏིཡཱ ཝིཧཱརོ དཱཏབྦོ.

སཙེ པན སངྒྷོ ཡཾ ཀཉྩི ཨཱམིསཾ ལབྷིཏྭཱ ཡཐཱཝུཏྟགུཎཝིཡུཏྟསྶ བྷིཀྑུནོ དཱཏུཀཱམོ ཧོཏི, པུགྒལོ ¶ པན བྷགཝཏོ ཨཛ྄ཛྷཱསཡཱནུརཱུཔཾ ཝུཏྟཔྤཀཱརཨངྒཡུཏྟབྷཱུཏསྶེཝ བྷིཀྑུསྶ དཱཏུཀཱམོ, ཏདཱ པུགྒལོཔི སངྒྷཔརིཡཱཔནྣོཡེཝཱཏི ཀཏྭཱ དྷམྨཀམྨཀཱརཀསྶ པུགྒལསྶེཝ ཨནུམཏིཡཱ ཝིཧཱརོ དཱཏབྦོ, ན སངྒྷཱནུམཏིཡཱ. ཝུཏྟཉྷེཏཾ ཨཊྛཀཐཱཡཾ (པཱརཱ. ཨཊྛ. ༢.༥༣༨-༥༣༩) ‘‘སཙེ སངྒྷོ ཀིཉྩི ལབྷིཏྭཱ ཨཱམིསགརུཀཏཱཡ ན ནིཝཱརེཏི, ཨེཀོ བྷིཀྑུ ནིཝཱརེཏི, སོཝ བྷིཀྑུ ཨིསྶརོ. སངྒྷིཀེསུ ཧི ཀམྨེསུ ཡོ དྷམྨཀམྨཾ ཀརོཏི, སོཝ ཨིསྶརོ’’ཏི. ཝུཏྟཉྷི –

‘‘ཚནྡཱ ¶ དོསཱ བྷཡཱ མོཧཱ;

ཡོ དྷམྨཾ ཨཏིཝཏྟཏི;

ནིཧཱིཡཏི ཏསྶ ཡསོ;

ཀཱལ༹པཀྑེཝ ཙནྡིམཱ.

‘‘ཚནྡཱ དོསཱ བྷཡཱ མོཧཱ;

ཡོ དྷམྨཾ ནཱཏིཝཏྟཏི;

ཨཱཔཱུརཏི ཏསྶ ཡསོ;

སུཀྐཔཀྑེཝ ཙནྡིམཱ’’ཏི. (དཱི. ནི. ༣.༢༤༦; ཨ. ནི. ༤.༡༧-༡༨; པཱརི. ༣༨༢, ༣༨༦);

ཡདཱ པན ཐེརོཔི ཀིཉྩི ཨཝཏྭཱ ཡཐཱཀམྨངྒཏོ, སངྒྷོཔི ན ཀསྶཙི ཝིཙཱརེཏི, ཨེཝཾ སངྒྷིཀཝིཧཱརེ ཨབྷིཀྑུཀེ སུཉྙེ ཝཏྟམཱནེ ཏསྨིཾ དེསེ ཡེན ཀེནཙི སཱསནསྶ ཝུདྡྷིམིཙྪནྟེན ཨཱཙརིཡེན ཨནྟོསཱིམཊྛཀཱ བྷིཀྑཱུ ཨེཝཾ སམུསྶཱཧེཏབྦཱ ‘‘མཱ ཏུམྷེ ཨཱཡསྨནྟོ ཨེཝཾ ཨཀཏྠ, ཨནྟོསཱིམཊྛཀེསུ བྷིཀྑཱུསུ བཧཱུཔཀཱརཏཱདིཡུཏྟཾ པུགྒལཾ ཝིཙིནཐ, ཝིཙིནིཏྭཱ ལབྷནྟཱ ཏསྶ པུགྒལསྶ སམགྒེན སངྒྷེན དྷུཝཝཱསཏྠཱཡ ཝིཧཱརཾ ཨནུཊྛཱཔནཱིཡཾ ཀཏྭཱ དེཐ, ནོ ཙེ ཨནྟོསཱིམཊྛཀེསུ བྷིཀྑཱུསུ ཨལཏྠ, ཨཐ བཧིསཱིམཊྛཀེསུ བྷིཀྑཱུསུ ཝིཙིནཐ. བཧིསཱིམཊྛཀེསུ བྷིཀྑཱུསུ ཝིཙིནིཏྭཱ ཡཐཱཝུཏྟཨངྒཡུཏྟཔུགྒལེ ལབྦྷམཱནེ ཏཾ པུགྒལཾ ཨནྟོསཱིམཾ པཝེསེཏྭཱ ¶ ཨནྟོསཱིམཊྛཀསྶ སངྒྷསྶ ཨནུམཏིཡཱ དྷུཝཝཱསཏྠཱཡ ཝིཧཱརཾ སམྨནྣིཏྭཱ ཨནུཊྛཱཔནཱིཡཾ ཀཏྭཱ དེཐ. ཨེཝཾ ཀརོནྟཱ ཧི ཏུམྷེ ཨཱཡསྨནྟོ ཨཔྤིཙྪཀཐཱ-སནྟོསཀཐཱ-སལླེཁཀཐཱ-པཝིཝིཏྟཀཐཱཝཱིརིཡཱརམྦྷཀཐཱ-སཱིལཀཐཱ-སམཱདྷིཀཐཱ-པཉྙཱཀཐཱ-ཝིམུཏྟིཀཐཱ-ཝིམུཏྟིཉཱཎདསྶནཀཐཱསངྑཱཏདསཀཐཱཝཏྠུསམྤནྣཾ པུགྒལཾ ཨུཔནིསྶཱཡ ཨསྶུཏཔུབྦཾ དྷམྨཾ སུཎིསྶཐ, སུཏཔུབྦཾ དྷམྨཾ པརིཡོདཱཔིསྶཐ, ཀངྑཾ ཝིནོདིསྶཐ, དིཊྛིཾ ཨུཛུཾ ཀརིསྶཐ, ཙིཏྟཾ པསཱདེསྶཐ. ཡསྶ ལཛྫིནོ པེསལསྶ བཧུསྶུཏསྶ སིཀྑཱཀཱམསྶ བྷིཀྑུནོ བྷིཀྑཾ ཨནུསིཀྑམཱནཱ སདྡྷཱཡ ཝཌྜྷིསྶནྟི, སཱིལེན ཝཌྜྷིསྶནྟི, སུཏེན ཝཌྜྷིསྶནྟི, ཙཱགེན ཝཌྜྷིསྶནྟི, པཉྙཱཡ ཝཌྜྷིསྶནྟཱི’’ཏི. ཝུཏྟཉྷེཏཾ ཝིསུདྡྷིམགྒེ (ཝིསུདྡྷི. ༡.༡༤) ‘‘ཀཏམོ ཨུཔནིསྶཡགོཙརོ དསཀཐཱཝཏྠུགུཎསམནྣཱགཏོ ཀལྱཱཎམིཏྟོ, ཡཾ ནིསྶཱཡ ཨསྶུཏཾ སུཎཱཏི, སུཏཾ པརིཡོདཔེཏི, ཀངྑཾ ཝིཏརཏི, དིཊྛིཾ ཨུཛུཾ ཀརོཏི, ཙིཏྟཾ པསཱདེཏི. ཡསྶ ཝཱ ཨནུསིཀྑམཱནོ སདྡྷཱཡ ཝཌྜྷཏི, སཱིལེན ཝཌྜྷཏི, སུཏེན ཝཌྜྷཏི ¶ , ཙཱགེན ཝཌྜྷཏི, པཉྙཱཡ ཝཌྜྷཏི, ཨཡཾ ཝུཙྩཏི ཨུཔནིསྶཡགོཙརོ’’ཏི. ཨེཝཾ སམུསྶཱཧེཏྭཱ དྷམྨཀཐཾ ཀཏྭཱ ཨནྟོསཱིམཊྛཀསངྒྷེནེཝ དྷུཝཝཱསཝིཧཱརོ དཱཔེཏབྦོཏི.

ཨེཝཾ ཛིནསཱསནསྶ, ཝཌྜྷིཀཱམོ སུཔེསལོ;

ཨཀཱསི པཉྙཝཱ བྷིཀྑུ, སུཊྛུ ཨཱཝཱསནིཙྪཡནྟི.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཝིཧཱརཝིནིཙྪཡཀཐཱལངྐཱརོ.

༢༩. ཀཐིནཏྠཱརཝིནིཙྪཡཀཐཱ

༢༢༦. ཨེཝཾ ¶ ཙཏུཔཙྩཡབྷཱཛནཝིནིཙྪཡཾ ཀཐེཏྭཱ ཨིདཱནི ཀཐིནཝིནིཙྪཡཾ ཀཐེཏུམཱཧ ‘‘ཀཐིནནྟི ཨེཏྠ པནཱ’’ཏིཨཱདི. ཏཏྠ ཀཐིནནྟི ཀཏམཾ ཀཐིནཾ? སམཱུཧཔཉྙཏྟི. ན ཧི པརམཏྠཏོ ཀཐིནཾ ནཱམ ཨེཀོ དྷམྨོ ཨཏྠི, པུརིམཝསྶཾཝུཏྠཱ བྷིཀྑཱུ, ཨནཱུནཔཉྩཝགྒསངྒྷོ, ཙཱིཝརམཱསོ, དྷམྨེན སམེན ཨུཔྤནྣཙཱིཝརནྟིཨཱདཱིསུ ཡེསུ ནཱམརཱུཔེསུ སམུཔྤཛྫམཱནེསུ ཏེསཾ ནཱམརཱུཔདྷམྨཱནཾ སམཱུཧསམཝཱཡསངྑཱཏཾ སམཱུཧཔཉྙཏྟིམཏྟམེཝ ཀཐིནཾ. ཨཡམཏྠོ ཀཐཾ ཛཱནིཏབྦོཏི? ‘‘ཏེསཉྙེཝ དྷམྨཱནཾ སངྒཧོ སམཝཱཡོ ནཱམཾ ནཱམཀམྨཾ ནཱམདྷེཡྻཾ ནིརུཏྟི བྱཉྫནཾ ཨབྷིལཱཔོ, ཡདིདཾ ཀཐིན’’ནྟི པརིཝཱརཔཱལི༹ཡཾ (པརི. ༤༡༢) ཨཱགཏཏྟཱ ཙ, ‘‘ཏེསཉྙེཝ དྷམྨཱནནྟི ཡེསུ རཱུཔཱདིདྷམྨེསུ སཏི ཀཐིནཾ ནཱམ ཧོཏི, ཏེསཾ སམོདྷཱནཾ མིསྶཱིབྷཱཝོ. ནཱམཾ ནཱམཀམྨནྟིཨཱདིནཱ པན ‘ཀཐིན’ནྟི ཨིདཾ བཧཱུསུ དྷམྨེསུ ནཱམམཏྟཾ, ན པརམཏྠཏོ ཨེཀོ དྷམྨོ ཨཏྠཱིཏི དསྶེཏཱི’’ཏི ཨཊྛཀཐཱཡཾ (པརི. ཨཊྛ. ༤༡༢) ཨཱགཏཏྟཱ ཙ, ‘‘ཡེསུ རཱུཔཱདིདྷམྨེསཱུཏི པུརིམཝསྶཾཝུཏྠཱ བྷིཀྑཱུ, པཉྩཧི ཨནཱུནོ སངྒྷོ, ཙཱིཝརམཱསོ, དྷམྨེན སམེན སམུཔྤནྣཾ ཙཱིཝརནྟི ཨེཝམཱདཱིསུ ཡེསུ རཱུཔཱརཱུཔདྷམྨེསུ. སཏཱིཏི སནྟེསུ. མིསྶཱིབྷཱཝོཏི སཾསགྒཏཱ སམཱུཧཔཉྙཏྟིམཏྟཾ. ཏེནཱཧ ན པརམཏྠཏོ ཨེཀོ དྷམྨོ ཨཏྠཱིཏི དསྶེཏཱི’’ཏི ཝིམཏིཝིནོདནིཡཾ (ཝི. ཝི. ཊཱི. པརིཝཱར ༢.༤༡༢) ཨཱགཏཏྟཱ ཙ ཛཱནིཏབྦོཏི.

ཀེནཊྛེན ¶ ཀཐིནནྟི? ཐིརཊྛེན. ཀསྨཱ ཐིརནྟི? ཨནཱམནྟཙཱརཨསམཱདཱནཙཱརགཎབྷོཛནཡཱཝདཏྠཙཱིཝརཡོཙཏཏྠཙཱིཝརུཔྤཱདསངྑཱཏེ པཉྩཱནིསཾསེ ཨནྟོཀརཎསམཏྠཏཱཡ. ཝུཏྟཉྷི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༣༠༦) ‘‘པཉྩཱནིསཾསེ ཨནྟོཀརཎསམཏྠཏཱཡ ཐིརནྟི ཨཏྠོ’’ཏི, ཏཐཱ ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༣༠༦) ཝཛིརབུདྡྷིཊཱིཀཱཡཉྩ ¶ (ཝཛིར. ཊཱི. མཧཱཝགྒ ༣༠༦). ཨཐ ཝཱ ཀེནཊྛེན ཀཐིནནྟི? སངྒཎྷནཊྛེན. ཀཐཾ སངྒཎྷཱཏཱིཏི? པཉྩཱནིསཾསེ ཨཉྙཏྠ གནྟུཾ ཨདཏྭཱ སངྒཎྷཱཏི སངྑིཔིཏྭཱ གཎྷཱཏི. ཝུཏྟཉྷི ཝིནཡཏྠམཉྫཱུསཱཡཾ (ཀངྑཱ. ཨབྷི. ཊཱི. ཀཐིནསིཀྑཱཔདཝཎྞནཱ) ‘‘པཉྩཱནིསཾསེ ཨཉྙཏྠ གནྟུཾ ཨདཏྭཱ སངྒཎྷནཊྛེན ཀཐིན’’ནྟི.

ཀཐིན-སདྡོ ཀཱཡ དྷཱཏུཡཱ ཀེན པཙྩཡེན སིཛ྄ཛྷཏཱིཏི? ཊཱིཀཱཙརིཡཱ དྷཱཏུཔཙྩཡེ ཨཙིནྟེཏྭཱ ཨནིཔྥནྣཔཱཊིཔདིཀཝསེནེཝ ཝཎྞེནྟི, ཏསྨཱ ཨཡཾ སདྡོ རུལ༹ྷཱིསུདྡྷནཱམབྷཱུཏོ ཨནིཔྥནྣཔཱཊིཔདིཀསདྡོཏི ཝུཙྩཏི. ཀཐཾ ཝིཉྙཱཡཏཱིཏི ཙེ? ཏཱིསུཔི ཝིནཡཊཱིཀཱསུ (སཱརཏྠ. ཊཱི. མཧཱཝགྒ ༣.༣༠༦; ཝི. ཝི. ཊཱི. མཧཱཝགྒ ༢.༣༠༦; ཝཛིར. ཊཱི. མཧཱཝགྒ ༣༠༦; ཀངྑཱ. ཨབྷི. ཊཱི. ཀཐིནསིཀྑཱཔདཝཎྞནཱ) ‘‘ཐིརནྟི ཨཏྠོ’’ ཨིཙྩེཝ ཝཎྞིཏཏྟཱ. པཉྩཱནིསཾསེ ཨནྟོཀརཎསམཏྠཏཱཡཱཏི པན ཐིརཏཱ ཙསྶ ཧེཏུཔདམེཝ. ཨཐ ཝཱ ཀཐིན-སདྡོ ཀཐདྷཱཏུཡཱ ཨིནཔཙྩཡེན སིཛ྄ཛྷཏི. ཀཐཾ? ཀཐ སངྒཧཎེཏིམསྶ ལདྡྷདྷཱཏུསཉྙཱདིསྶ པཉྩཱནིསཾསེ ཨཉྙཏྠ གནྟུཾ ཨདཏྭཱ སངྒཎྷཱཏཱིཏི ཨཏྠེ ‘‘ཨིན སབྦཏྠཱ’’ཏི ཡོགཝིབྷཱགེན ཝཱ ‘‘སུཔཏོ ཙཱ’’ཏི ཨེཏྠ ཙ-སདྡེན ཝཱ ཨིནཔཙྩཡཾ ཀཏྭཱ པརཀྑརཾ ནེཏྭཱ ཀཐིནསདྡཏོ སྱུཔྤཏྟཱདིམྷི ཀཏེ རཱུཔཾ. ཀཐཾ ཝིཉྙཱཡཏཱིཏི ཙེ? ‘‘སངྒཎྷནཊྛེནཱ’’ཏི ཝུཏྟཾ ཀངྑཱཝིཏརཎཱིཊཱིཀཱཔཱཋཾ ནིསྶཱཡ ཝིཉྙཱཡཏི. ཨཐ ཝཱ ཀཋ ཀིཙྪཛཱིཝནེཏི དྷཱཏུཏོ ཨིནཔཙྩཡཾ ཀཏྭཱ སིཛ྄ཛྷཏི. ཨཡམཏྠོ ‘‘ཀཋ ཀིཙྪཛཱིཝནེ, མུདྡྷཛདུཏིཡནྟོ དྷཱཏུ, ཨིནོ’’ཏི ཨབྷིདྷཱནཔྤདཱིཔིཀཱཊཱིཀཱཡཾ ཝུཏྟཏྟཱ ཝིཉྙཱཡཏི.

བཧཱུ པན པཎྜིཏཱ ཨིམཾ པཱཋཾཡེཝ གཧེཏྭཱ ‘‘ཀཐིན-སདྡོ མུདྡྷཛདུཏིཡནྟོཡེཝ ཧོཏི, ན དནྟཛོ’’ཏི ཝདནྟི ཙེཝ ལིཁནྟི ཙ, ན པནེཝཾ ཨེཀནྟཏོ ཝཏྟབྦཾ. ཀསྨཱ? ཨབྷིདྷཱནཔྤདཱིཔིཀཱཊཱིཀཱཡཾ ཀཀྑལ༹པརིཡཱཡཾ གུཎསདྡབྷཱུཏཾ ཀཋིནསདྡཾ ¶ སནྡྷཱཡ ཝུཏྟཾ, ན སཱསནཝོཧཱརཏོ ནཱམསདྡབྷཱུཏཾ. ཏེནེཝཱཧ ‘‘པཉྩཀཾ ཀཀྑལེ༹’’ཏི. ཨནེཀེསུ པན པཱལི༹ཨཊྛཀཐཱདིཔོཏྠཀེསུ ཛིནསཱསནཝོཧཱརཏོ ནཱམསདྡབྷཱུཏོ ཀཐིན-སདྡོ དནྟཛོཡེཝ ཡེབྷུཡྻེན པཉྙཱཡཏི ¶ , ཏེནེཝ ཙ ཀཱརཎེན ཨབྷིདྷཱནཔྤདཱིཔིཀཱཊཱིཀཱཡམྤི ཝཎྞཝིཔརིཡཱཡེ ཀཐིནནྟིཔི ཝུཏྟཾ. ཨཐ ཝཱ ཀཏྠ སིལཱགྷཱཡནྟི དྷཱཏུཏོ ཨིནཔཙྩཡཾ ཀཏྭཱ སསཾཡོགཏྠཀཱརཾ ནིསཾཡོགཾ ཀཏྭཱ སིཛ྄ཛྷཏི. ཨཡམཏྠོ སིལཱགྷཱདིསུཏྟསྶ ཝུཏྟིཡཾ ‘‘སིལཱགྷ ཀཏྠནེ’’ཏི ཝཙནཏོ, སདྡནཱིཏིཡཉྩ ‘‘ཀཏྠནཾ པསཾསན’’ནྟི ཝཎྞིཏཏྟཱ ཙ ཝིཉྙཱཡཏི. ཨིདཉྩ ཝཙནཾ ‘‘ཨིདཉྷི ཀཐིནཝཏྟཾ ནཱམ བུདྡྷཔྤསཏྠ’’ནྟི ཨཊྛཀཐཱཝཙནེན (མཧཱཝ. ཨཊྛ. ༣༠༦) སམེཏི. ཨཱཙརིཡཱ པན ‘‘ཀཋདྷཱཏུ ཨིནཔཙྩཡོ’’ཏི ཝིཀཔྤེཏྭཱ ‘‘ཀཋ སམཏྠནེ’’ཏི ཨཏྠཾ ཝདནྟི, ཏཾ ཊཱིཀཱསུ (སཱརཏྠ. ཊཱི. མཧཱཝགྒ ༣.༣༠༦; ཝི. ཝི. ཊཱི. མཧཱཝགྒ ༢.༣༠༦; ཝཛིར. ཊཱི. མཧཱཝགྒ ༣༠༦; ཀངྑཱ. ཨབྷི. ཊཱི. ཀཐིནསིཀྑཱཔདཝཎྞནཱ) ‘‘ཐིརནྟི ཨཏྠོ’’ཏི ཝཙནཾ ཨནཔེཀྑིཏྭཱ ‘‘པཉྩཱནིསཾསེ ཨནྟོཀརཎསམཏྠཏཱཡཱ’’ཏི ཧེཏུམེཝ ཨཏྠབྷཱཝེན གཧེཏྭཱ ཝུཏྟཾ སིཡཱ, ཏཾ པན ཐིརབྷཱཝསྶ ཧེཏུཡེཝ.

ཀཐཾ ཝིགྒཧོ ཀཱཏབྦོཏི? ཨཡཾ ཀཐིན-སདྡོ ཙཏཱུསུ པདེསུ ནཱམཔདཾ, པཉྩསུ ནཱམེསུ སུདྡྷནཱམཾ, ཙཏཱུསུ སུདྡྷནཱམེསུ རུལ༹ྷཱིསུདྡྷནཱམཾ, དྭཱིསུ པཱཊིཔདིཀསདྡེསུ ཨནིཔྥནྣཔཱཊིཔདིཀསདྡོ, ཏསྨཱ ཝིགྒཧོ ན ཀཱཏབྦོ. ཝུཏྟཉྷི –

‘‘རུལ༹ྷཱིཁྱཱཏཾ ནིཔཱཏཉྩུ-པསགྒཱལཔནཾ ཏཐཱ;

སབྦནཱམིཀམེཏེསུ, ན ཀཏོ ཝིགྒཧོ ཚསཱུ’’ཏི.

ཨཡམཏྠོ ‘‘ཀཐིནནྟི…པེ… ཐིརནྟི ཨཏྠོ’’ཏི ཊཱིཀཱསུ (སཱརཏྠ. ཊཱི. མཧཱཝགྒ ༣.༣༠༦; ཝི. ཝི. ཊཱི. མཧཱཝགྒ ༢.༣༠༦; ཝཛིར. ཊཱི. མཧཱཝགྒ ༣༠༦; ཀངྑཱ. ཨབྷི. ཊཱི. ཀཐིནསིཀྑཱཔདཝཎྞནཱ) ཝཙནཏོ ཝིཉྙཱཡཏི. ཨཐ ཝཱ པཉྩཱནིསཾསེ ཨཉྙཏྠ གནྟུཾ ¶ ཨདཏྭཱ ཀཐཏི སངྒཎྷཱཏཱིཏི ཀཐིནཾ, ཨཡཾ ཝཙནཏྠོ ཡཐཱཝུཏྟཝིནཡཏྠམཉྫཱུསཱཔཱཋཝསེན (ཀངྑཱ. ཨབྷི. ཊཱི. ཀཐིནསིཀྑཱཔདཝཎྞནཱ) ཝིཉྙཱཡཏི. ཨཐ ཝཱ ཀཋཏི ཀིཙྪེན ཛཱིཝཏཱིཏི ཀཐིནོ, རུཀྑོ, ཏསྶ ཨེསོཏི ཀཐིནོ, ཐིརབྷཱཝོ, སོ ཨེཏསྶ ཨཏྠཱིཏི ཀཐིནཾ, པཉྙཏྟིཛཱཏཾ ཋ-ཀཱརསྶ ཐ-ཀཱརཾ ཀཏྭཱ ཀཐིནནྟི ཝུཏྟཾ. ཨཡཾ ནཡོ ‘‘ཀཋ ཀིཙྪཛཱིཝནེ’’ཏི དྷཱཏྭཏྠསཾཝཎྞནཱཡ ཙ ‘‘པཉྩཱནིསཾསེ ཨནྟོཀརཎསམཏྠཏཱཡ ཐིརནྟི ཨཏྠོ’’ཏི ཊཱིཀཱཝཙནེན (སཱརཏྠ. ཊཱི. མཧཱཝགྒ ༣.༣༠༦; ཝི. ཝི. ཊཱི. མཧཱཝགྒ ༢.༣༠༦; ཝཛིར. ཊཱི. མཧཱཝགྒ ༣༠༦; ཀངྑཱ. ཨབྷི. ཀཐིནསིཀྑཱཔདཝཎྞནཱ) ཙ སམེཏཱིཏི དཊྛབྦོ. ཨཐ ཝཱ ཀཐཱིཡཏེ ¶ སིལཱགྷཏེ པསཾསཱིཡཏེ བུདྡྷཱདཱིཧཱིཏི ཀཐིནཾ, ཨཡཾ ནཡོ ‘‘ཀཏྠ སིལཱགྷཱཡ’’ནྟི དྷཱཏྭཏྠསཾཝཎྞནཱཡ ཙ ‘‘ཨིདཉྷི ཀཐིནཝཏྟཾ ནཱམ བུདྡྷཔྤསཏྠ’’ནྟི (མཧཱཝ. ཨཊྛ. ༣༠༦) ཨཊྛཀཐཱཝཙནེན ཙ སམེཏཱིཏི དཊྛབྦོ.

ཨེཏྠ པན སངྑེཔརུཙིཏྟཱ ཨཱཙརིཡསྶ སདྡལཀྑཎཾ ཨཝིཙཱརེཏྭཱ ཨཏྠམེཝ པུཙྪཾ ཀཏྭཱ ཝིསྶཛྫེཏུཾ ‘‘ཀཐིནཾ ཨཏྠརིཏུཾ ཀེ ལབྷནྟི, ཀེ ན ལབྷནྟཱི’’ཏིཨཱདིམཱཧ. ཏཏྠ ཀེ ལབྷནྟཱིཏི ཀེ སཱདྷེནྟཱིཏི ཨཏྠོ. པཉྩ ཛནཱ ལབྷནྟཱིཏི པཉྩ ཛནཱ སཱདྷེནྟི. ཀཐིནདུསྶསྶ ཧི དཱཡཀཱ པཙྪིམཀོཊིཡཱ ཙཏྟཱརོ ཧོནྟི, ཨེཀོ པཊིགྒཱཧཀོཏི. ‘‘ཏཏྲ, བྷིཀྑཝེ, ཡྭཱཡཾ ཙཏུཝགྒོ བྷིཀྑུསངྒྷོ ཋཔེཏྭཱ ཏཱིཎི ཀམྨཱནི ཨུཔསམྤདཾ པཝཱརཎཾ ཨབྦྷཱན’’ནྟི ཙམྤེཡྻཀྑནྡྷཀེ (མཧཱཝ. ༣༨༨) ཝུཏྟཏྟཱ ན པཉྩཝགྒཀརཎཱིཡནྟི གཧེཏབྦཾ. པཋམཔྤཝཱརཎཱཡ པཝཱརིཏཱཏི ཨིདཾ ཝསྶཙྪེདཾ ཨཀཏྭཱ ཝསྶཾཝུཏྠབྷཱཝསནྡསྶནཏྠཾ ཝུཏྟཾ ཨནྟརཱཡེན ཨཔཝཱརིཏཱནམྤི ཝུཏྠཝསྶཱནཾ ཀཐིནཏྠཱརསམྦྷཝཏོ. ཏེནེཝ ‘‘ཨཔྤཝཱརིཏཱ ཝཱ’’ཏི ཨཝཏྭཱ ‘‘ཚིནྣཝསྶཱ ཝཱ པཙྪིམིཀཱཡ ཨུཔགཏཱ ཝཱ ན ལབྷནྟཱི’’ཏི ཨེཏྟཀམེཝ ཝུཏྟཾ. ཨཉྙསྨིཾ ཝིཧཱརེ ཝུཏྠཝསྶཱཔི ¶ ན ལབྷནྟཱིཏི ནཱནཱསཱིམཱཡ ཨཉྙསྨིཾ ཝིཧཱརེ ཝུཏྠཝསྶཱ ཨིམསྨིཾ ཝིཧཱརེ ཀཐིནཏྠཱརཾ ན ལབྷནྟཱིཏི ཨཏྠོ. སབྦེཏི ཚིནྣཝསྶཱདཡོ, ཨནུཔགཏཱཔི ཏཏྠེཝ སངྒཧིཏཱ. ཨཱནིསཾསནྟི ཀཐིནཱནིསཾསཙཱིཝརཾ. ཨེཀཾ ཨཏྠཏཙཱིཝརཾཡེཝ ཧི ཀཐིནཙཱིཝརཾ ནཱམ ཧོཏི, ཨཝསེསཱནི ཙཱིཝརཱནི ཝཱ སཱཊཀཱ ཝཱ ཀཐིནཱནིསཾསཱཡེཝ ནཱམ. ཝཀྑཏི ཧི ‘‘ཨཝསེསཀཐིནཱནིསཾསེ བལཝཝཏྠཱནི ཝསྶཱཝཱསིཀཋིཏིཀཱཡ དཱཏབྦཱནཱི’’ཏི. (ཝི. སངྒ. ཨཊྛ. ༢༢༦) ཨིཏརེསནྟི པུརིམིཀཱཡ ཨུཔགཏཱནཾ.

སོ ཙེ པཙྪིམིཀཱཡ ཨུཔསམྤཛྫཏི, གཎཔཱུརཀོ ཙེཝ ཧོཏི, ཨཱནིསཾསཉྩ ལབྷཏཱིཏི ཨིམིནཱ སཱམཎེརཱནཾ ཝསྶཱུཔགམནཾ ཨནུཉྙཱཏཾ ཧོཏི. སོ ཧི པུརིམིཀཱཡ ཝསྶཱུཔགཏཏྟཱ ཨཱནིསཾསཾ ལབྷཏི, པཙྪིམིཀཱཡ པན ཨུཔསམྤཛྫིཏཏྟཱ གཎཔཱུརཀོ ཧོཏཱིཏི. སཙེ པུརིམིཀཱཡ ཨུཔགཏཱ ཀཐིནཏྠཱརཀུསལཱ ན ཧོནྟཱིཏིཨཱདིནཱ ‘‘ཨཊྛདྷམྨཀོཝིདོ བྷིཀྑུ, ཀཐིནཏྠཱརམརཧཏཱི’’ཏི ཝིནཡཝིནིཙྪཡེ (ཝི. ཝི. ༢༧༠༤) ཨཱགཏཏྟཱ སཡཾ ཙེ ཨཊྛདྷམྨཀུསལོ, སཡམེཝ ཨཏྠརིཏབྦཾ. ནོ ཙེ, ཨཉྙེ ཨཊྛདྷམྨཀུསལེ པརིཡེསིཏྭཱ ནེཏབྦཱ, ཨེཝཾ ཨཀཏྭཱ ཀཐིནཾ ཨཏྠརིཏུཾ ན ཝཊྚཏཱིཏི དསྶེཏི. ཀཐིནཾ ཨཏྠརཱཔེཏྭཱཏི སཀཱརིཏཝཙནེན ཏེཧི བཱཧིརཏོ ཨཱགཏཏྠེརེཧི སཡཾ ཀཐིནཾ ན ཨཏྠརིཏབྦཾ, སབྦཔུབྦཀིཙྩཱདིཀཾ སཾཝིདཧིཏྭཱ ཏེ ¶ པུརིམིཀཱཡ ཝསྶཱུཔགཏཱ ཨནྟོསཱིམཊྛབྷིཀྑཱུཡེཝ ཨཏྠརཱཔེཏབྦཱཏི དསྶེཏི, ཨཉྙཐཱ ཨཉྙོ ཀཐིནཾ ཨཏྠརཏི, ཨཉྙོ ཨཱནིསཾསཾ ལབྷཏཱིཏི ཨཱཔཛྫཏི, ན པནེཝཾ ཡུཛྫཏི. ཝཀྑཏི ཧི ‘‘ཨཱནིསཾསོ པན ཨིཏརེསཾཡེཝ ཧོཏཱི’’ཏི. དཱནཉྩ བྷུཉྫིཏྭཱཏི ཁཱདནཱིཡབྷོཛནཱིཡབྷཱུཏཾ ཨནྣཔཱནཱདིདཱནཾ བྷུཉྫིཏྭཱ. ན ཧི ཏེ ཝཏྠུདཱནཾ ལབྷནྟི.

ཀཐིནཙཱིཝརཾ ¶ དེམཱཏི དཱཏུཾ ཝཊྚཏཱིཏི ཨེཏྠ ‘‘སངྒྷསྶ ཀཐིནཙཱིཝརཾ དེམཱ’’ཏི ཝཏྟབྦཾ. ཨེཝཉྷི སཏི ‘‘ཨིདཾ སངྒྷསྶ ཀཐིནདུསྶཾ ཨུཔྤནྣ’’ནྟི (མཧཱཝ. ༣༠༧) ཀམྨཝཱཙཱཡ སམེཏི. ཨཐ ཙ པན པུབྦེ ཀཏཔརིཙཡཏྟཱ ‘‘སངྒྷསྶཱ’’ཏི ཨཝུཏྟེཔི སམྤདཱནཾ པཱཀཊནྟི ཀཏྭཱ ཨཝུཏྟཾ སིཡཱཏི. ཨེཏྠེཀེ ཨཱཙརིཡཱ ཝདནྟི ‘‘སངྒྷསྶཱཏི ཨཝུཏྟེཔི ཀཱལེ དིནྣཾ སངྒྷིཀཾ ཧོཏཱི’’ཏི, ཏཏྲེཝཾ ཝཏྟབྦཾ ‘‘ན ཀཱལེ དིནྣཾ སབྦཾ སངྒྷིཀཾ ཧོཏཱི’’ཏི. ཀཐཾ ཝིཉྙཱཡཏཱིཏི ཙེ? ‘‘ཡཉྩ ཀཱལེཔི སངྒྷསྶ ཝཱ ཨིདཾ ཨཀཱལཙཱིཝརནྟི, པུགྒལསྶ ཝཱ ཨིདཾ ཏུཡ྄ཧཾ དམྨཱིཏིཨཱདིནཱ ནཡེན དིནྣཾ, ཨེཏཾ ཨཀཱལཙཱིཝརཾ ནཱམཱ’’ཏི ཀངྑཱཝིཏརཎིཡཾ (ཀངྑཱ. ཨཊྛ. ཨཀཱལཙིཝརསིཀྑཱཔདཝཎྞནཱ) ཨཱགཏཏྟཱ པུགྒལིཀམྤི ཧོཏཱིཏི ཝིཉྙཱཡཏི, ཏསྨཱ པརམྨུཁཱཔི ནཱམཾ ཝཏྭཱ སམྨུཁཱཔི པཱདམཱུལེ ཋཔེཏྭཱ དིནྣཾ པུགྒལིཀམེཝ ཧོཏི, ན སངྒྷིཀཾ. ཝུཏྟཉྷེཏཾ ཨཊྛཀཐཱཡཾ (མཧཱཝ. ཨཊྛ. ༣༧༩) ‘‘པུགྒལསྶ དེཏཱིཏི ‘ཨིམཾ ཙཱིཝརཾ ཨིཏྠནྣཱམསྶ དམྨཱི’ཏི ཨེཝཾ པརམྨུཁཱ ཝཱ, པཱདམཱུལེ ཋཔེཏྭཱ ‘ཨིམཾ, བྷནྟེ, ཏུམྷཱཀཾ དམྨཱི’ཏི ཨེཝཾ སམྨུཁཱ ཝཱ དེཏཱི’’ཏི. ཨེཝཾ པུགྒལིཀེ སཏི ཏཾ ཙཱིཝརཾ སངྒྷསྶ བྷཱཛེཏབྦཾ ཧོཏི ཝཱ ན ཧོཏི ཝཱཏི? སོ པུགྒལོ ཨཏྟནོ སདྡྷིཝིཧཱརིཀཨནྟེཝཱསིཀབྷཱུཏསྶ སངྒྷསྶ ཝཱ ཨཉྙསྶ སཧདྷམྨིཀསངྒྷསྶ ཝཱ བྷཱཛེཏུཀཱམོ བྷཱཛེཡྻ, ཨབྷཱཛེཏུཀཱམོ ‘‘བྷཱཛེཏཱུ’’ཏི ན ཀེནཙི ཝཙནཱིཡོ. ཀཐཾ ཝིཉྙཱཡཏཱིཏི ཙེ? ‘‘ན ཧི པུགྒལསྶ ཨཱདིསྶ དིནྣཾ ཀེནཙི བྷཱཛནཱིཡཾ ཧོཏཱི’’ཏི ཊཱིཀཱསུ ཨཱགམནཏོ ཝིཉྙཱཡཏི. ཨཐེཀེ ཨཱཙརིཡཱ ཨེཝཾ ཝདནྟི ‘‘ཀཐིནསྶ ཨེཀཾ མཱུལཾ སངྒྷོཏི (པརི. ༤༠༨) ཝུཏྟཏྟཱ པུགྒལཾ ཨུདྡིསྶ དིནྣེཔི སངྒྷཱཡཏྟཾ སངྒྷིཀཾ ཧོཏི. ཡཐཱ ཀིཾ ‘སཱིམཱཡ དམྨི, སེནཱསནསྶ དམྨཱི’ཏི ཝུཏྟེཔི ཏཾ དཱནཾ སངྒྷིཀཾ ཧོཏི, ཡཐཱ ཙ ‘ཀཐིནཙཱིཝརཾ དམྨཱི’ཏི ཝུཏྟེ སངྒྷིཀཾ ཧོཏཱི’’ཏི.

ཏཏྲེཝཾ ¶ ཝིཙཱརེཏབྦཾ – ‘‘ཀཐིནསྶ ཨེཀཾ མཱུལཾ སངྒྷོ’’ཏི ཝཙནཾ (པརི. ༤༠༨) ཀཐིནསྶ མཱུལཾ ཀཐིནསྶ ཀཱརཎཾ དསྶེཏི. ཡཐཱ ཧི མཱུལེ ཝིཛྫམཱནེ རུཀྑོ ཏིཊྛཏི, ཨཝིཛྫམཱནེ ན ཏིཊྛཏི, ཏསྨཱ མཱུལཾ རུཀྑསྶ ཀཱརཎཾ ཧོཏི, པཏིཊྛཾ ཧོཏི, ཨེཝཾ སངྒྷེ ཝིཛྫམཱནེ ¶ ཀཐིནཾ ཧོཏི, ནོ ཨཝིཛྫམཱནེ, ཏསྨཱ སངྒྷོ ཀཐིནསྶ མཱུལཾ ཀཐིནསྶ ཀཱརཎཾ ནཱམ ཧོཏི. ཀཐཾ སངྒྷེ ཝིཛྫམཱནེ ཀཐིནཾ ཧོཏི? སབྦནྟིམེན པརིཙྪེདེན ཙཏུཝགྒབྷཱུཏེན སངྒྷེན ཨཏྠཱརཱརཧསྶ བྷིཀྑུནོ ཉཏྟིདུཏིཡཀམྨཝཱཙཱཡ ཀཐིནཙཱིཝརེ དིནྣེཡེཝ ཏེན ཙཱིཝརེན ཨཏྠཏཾ ཀཐིནཾ ནཱམ ཧོཏི, ནོ ཨདིནྣེ, ཏསྨཱ ཙཏུཝགྒསངྒྷེ ཨལབྦྷམཱནེ སཧསྶཀྑཏྟུཾ ‘‘ཀཐིནཾ དམྨཱི’’ཏི ཝུཏྟེཔི ཀཐིནཾ ནཱམ ན ཧོཏི, ཏསྨཱ ཨུཔཙཱརསཱིམཱཡ པརིཙྪིནྣེ ཝིཧཱརེ ཨེཀོ ཝཱ དྭེ ཝཱ ཏཡོ ཝཱ ཙཏྟཱརོ ཝཱ བྷིཀྑཱུ ཝིཧརནྟི, ཏཏྠ ཀཐིནཙཱིཝརེ ཨུཔྤནྣེ ཨཉྙཏོ པརིཡེསིཏྭཱ ཙཏུཝགྒསངྒྷོ ཨེཀོ པཊིགྒཱཧཀོཏི པཉྩནྣཾ བྷིཀྑཱུནཾ པཱུརཎེ སཏི ཀཐིནཾ ཨཏྠརིཏུཾ ལབྷཏི, ནཱསཏི, ཨེཝཾ སངྒྷེ ཝིཛྫམཱནེཡེཝ ཀཐིནཾ ནཱམ ཧོཏི, ནོ ཨཝིཛྫམཱནེ, ཏསྨཱ སངྒྷསྶ ཀཐིནསྶ མཱུལབྷཱུཏཏཾ ཀཱརཎབྷཱུཏཏཾ སནྡྷཱཡ ‘‘ཀཐིནསྶ ཨེཀཾ མཱུལཾ སངྒྷོ’’ཏི ཝུཏྟཾ. ‘‘ཀཐིན’’ནྟི ཝུཏྟེ སངྒྷིཀཾཡེཝ ཧོཏི, ནོ པུགྒལིཀནྟི ཨདྷིཔྤཱཡོ ཨེཏསྨིཾ པཱཋེ ན ལབྦྷཏི. ཡཐཱ ཀིཾ ‘‘ཀིཙྩཱདྷིཀརཎསྶ ཨེཀཾ མཱུལཾ སངྒྷོ’’ཏི (ཙཱུལ༹ཝ. ༢༡༩) ཨེཏྠ ཨཔལོཀནཀམྨཉཏྟིཀམྨཉཏྟིདུཏིཡཀམྨཉཏྟིཙཏུཏྠཀམྨསངྑཱཏཾ ཀིཙྩཱདྷིཀརཎཾ ཙཏུཝགྒཱདིཀེ སངྒྷེ ཝིཛྫམཱནེཡེཝ ཧོཏི, ནོ ཨཝིཛྫམཱནེ, ཏསྨཱ སངྒྷསྶ ཀིཙྩཱདྷིཀརཎསྶ མཱུལབྷཱུཏཏཾ ཀཱརཎབྷཱུཏཏཾ སནྡྷཱཡ ‘‘ཀིཙྩཱདྷིཀརཎསྶ ཨེཀཾ མཱུལཾ སངྒྷོ’’ཏི ཝུཙྩཏི, ཨེཝཾསམྤདམིདཾ དཊྛབྦཾ.

ཡདིཔི ¶ ཝུཏྟཾ ‘‘ཡཐཱ ‘སཱིམཱཡ དམྨི, སེནཱསནསྶ དམྨཱི’ཏིཨཱདཱིསུ ཏཾ དཱནཾ སངྒྷཱཡཏྟམེཝ ཧོཏི, ཏཐཱ ‘ཀཐིན དམྨཱི’ཏི ཝུཏྟེ པུགྒལཾ ཨུདྡིསྶ དིནྣེཔི སངྒྷཱཡཏྟམེཝ སངྒྷིཀམེཝ ཧོཏཱི’’ཏི, ཏཐཱཔི ཨེཝཾ ཝིཙཱརཎཱ ཀཱཏབྦཱ – ‘‘སཱིམཱཡ དམྨི, སེནཱསནསྶ དམྨཱི’’ཏིཨཱདཱིསུ སཱིམཱ ཙ སེནཱསནཉྩ དཱནཔཊིགྒཱཧཀཱ ན ཧོནྟི, ཏསྨཱ སཱིམཊྛསྶ ཙ སེནཱསནཊྛསྶ ཙ སངྒྷསྶ ཨཱཡཏྟཾ ཧོཏི, པུགྒལོ པན དཱནཔཊིགྒཱཧཀོཝ, ཏསྨཱ ‘‘ཨིམཾ ཀཐིནཙཱིཝརཾ ཨིཏྠནྣཱམསྶ བྷིཀྑུནོ དམྨཱི’’ཏི པརམྨུཁཱ ཝཱ ཏསྶ བྷིཀྑུནོ པཱདམཱུལེ ཋཔེཏྭཱ སམྨུཁཱ ཝཱ དིནྣཾ ཀཐཾ སངྒྷཱཡཏྟཾ སངྒྷསནྟཀཾ བྷཝེཡྻ, ཨེཝཾ སངྒྷསྶ ཨཔརིཎཏཾ པུགྒལིཀཙཱིཝརཾ སངྒྷསྶ པརིཎཱམེཡྻ, ནཝསུ ཨདྷམྨིཀདཱནེསུ ཨེཀཾ བྷཝེཡྻ, ཏསྶ ཙཱིཝརསྶ པཊིགྒཧོཔི ནཝསུ ཨདྷམྨིཀཔཊིགྒཧེསུ ཨེཀོ བྷཝེཡྻ, ཏསྶ ཙཱིཝརསྶ པརིབྷོགོཔི ནཝསུ ཨདྷམྨིཀཔརིབྷོགེསུ ཨེཀོ བྷཝེཡྻ. ཀཐཾ ཝིཉྙཱཡཏཱིཏི ཙེ? ནཝ ཨདྷམྨིཀཱནི དཱནཱནཱིཏི སངྒྷསྶ པརིཎཏཾ ཨཉྙསངྒྷསྶ ཝཱ ཙེཏིཡསྶ ཝཱ པུགྒལསྶ ཝཱ པརིཎཱམེཏི, ཙེཏིཡསྶ པརིཎཏཾ ཨཉྙཙེཏིཡསྶ ཝཱ སངྒྷསྶ ཝཱ པུགྒལསྶ ཝཱ པརིཎཱམེཏི, པུགྒལསྶ པརིཎཏཾ ཨཉྙཔུགྒལསྶ ¶ ཝཱ སངྒྷསྶ ཝཱ ཙེཏིཡསྶ ཝཱ པརིཎཱམེཏི, ‘‘ནཝ ཨདྷམྨིཀཱ པརིབྷོགཱ’’ཏི ཨཱགཏཾ པརིཝཱརཔཱལི༹ཉྩ (པརི. ༣༢༩) ‘‘ནཝ པཊིགྒཧཔརིབྷོགཱཏི ཨེཏེསཾཡེཝ དཱནཱནཾ པཊིགྒཧཱ ཙ པརིབྷོགཱ ཙཱ’’ཏི ཨཱགཏཾ ཨཊྛཀཐཉྩ (པརི. ཨཊྛ. ༣༢༩) ཨོལོཀེཏྭཱ ཝིཉྙཱཡཏཱིཏི.

ཨཐཱཔི ཨེཝཾ ཝདནྟི – དཱཡཀོ སངྒྷཏྠེརསྶ ཝཱ གནྠདྷུཏངྒཝསེན ཨབྷིཉྙཱཏསྶ ཝཱ བྷཏྟུདྡེསཀསྶ ཝཱ པཧིཎཏི ‘‘ཨམྷཱཀཾ བྷཏྟགྒཧཎཏྠཱཡ ཨཊྛ བྷིཀྑཱུ གཧེཏྭཱ ཨཱགཙྪཐཱ’’ཏི, སཙེཔི ཉཱཏིཨུཔཊྛཱཀེཧི པེསིཏཾ ¶ ཧོཏི, ཨིམེ ཏཡོ ཛནཱ པུཙྪིཏུཾ ན ལབྷནྟི. ཨཱརུལ༹ྷཱཡེཝ མཱཏིཀཾ, སངྒྷཏོ ཨཊྛ བྷིཀྑཱུ ཨུདྡིསཱཔེཏྭཱ ཨཏྟནཝམེཧི གནྟབྦཾ. ཀསྨཱ? བྷིཀྑུསངྒྷསྶ ཧི ཨེཏེ བྷིཀྑཱུ ནིསྶཱཡ ལཱབྷོ ཨུཔྤཛྫཏཱིཏི. གནྠདྷུཏངྒཱདཱིཧི པན ཨནབྷིཉྙཱཏོ ཨཱཝཱསིཀབྷིཀྑུ པུཙྪིཏུཾ ལབྷཏི, ཏསྨཱ ཏེན ‘‘ཀིཾ སངྒྷཏོ གཎྷཱམི, ཨུདཱཧུ ཡེ ཛཱནཱམི, ཏེཧི སདྡྷིཾ ཨཱགཙྪཱམཱི’’ཏི མཱཏིཀཾ ཨཱརོཔེཏྭཱ ཡཐཱ དཱཡཀཱ ཝདནྟི, ཏཐཱ པཊིཔཛྫིཏབྦནྟི (ཙཱུལ༹ཝ. ཨཊྛ. ༣༢༥), ཨཱིདིསེསུ ཋཱནེསུ ‘‘སངྒྷསྶ ལཱབྷོ པུགྒལཾ ཨུཔནིསྶཱཡ ཨུཔྤཛྫཏཱི’’ཏི ཝཙནཾ ཨུཔནིདྷཱཡ ‘‘སངྒྷསྶ ལཱབྷོ པུགྒལཾ ནིསྶཱཡ ཨུཔྤཛྫཏི, པུགྒལསྶ པཏྟལཱབྷོ སངྒྷཾ ཨཱམསིཏྭཱ དེནྟོ སངྒྷཱཡཏྟོ ཧོཏཱི’’ཏི ཝིཉྙཱཡཏཱིཏི.

ཨིམསྨིམྤི ཝཙནེ ཨེཝཾ ཝིཙཱརཎཱ ཀཱཏབྦཱ – ཏསྨིཾ ཏུ ནིམནྟནེ ན པུགྒལཾཡེཝ ནིམནྟེཏི, ཨཐ ཁོ སསངྒྷཾ པུགྒལཾ ནིམནྟེཏི. ཏཏྠ ཏུ ‘‘སངྒྷ’’ནྟི ཨཝཏྭཱ ‘‘ཨཊྛ བྷིཀྑཱུ’’ཏི ཝུཏྟཏྟཱ ‘‘ཀིཾ སངྒྷཏོ གཎྷཱམི, ཨུདཱཧུ ཡེ ཛཱནཱམི, ཏེཧི སདྡྷིཾ ཨཱགཙྪཱམཱི’’ཏི ཨནབྷིཉྙཱཏོ པུགྒལོ པུཙྪིཏུཾ ལབྷཏི. སངྒྷཏྠེརསྶ པན སངྒྷཾ པརིཧརིཏྭཱ ཝསིཏཏྟཱ ‘‘ཨཊྛ བྷིཀྑཱུ’’ཏི ཝུཏྟེ སངྒྷཾ ཋཔེཏྭཱ ཨཉྙེསཾ གཧཎཀཱརཎཾ ནཏྠི, གནྠདྷུཏངྒཝསེན ཨབྷིཉྙཱཏཔུགྒལོཔི སངྒྷསྶ པུཉྙནིསྶིཏཏྟཱ ‘‘ཨཊྛ བྷིཀྑཱུ’’ཏི ཝུཏྟེ སངྒྷཏོཡེཝ གཎྷཱཏི, བྷཏྟུདྡེསཀསྶཔི དེཝསིཀཾ སངྒྷསྶེཝ བྷཏྟཝིཙཱརཎཏྟཱ ‘‘ཨཊྛ བྷིཀྑཱུ’’ཏི ཝུཏྟེ སངྒྷཾ ཋཔེཏྭཱ ཨཉྙེསཾ གཧཎཀཱརཎཾ ནཏྠི. ཨེཝཾ ‘‘ཨཊྛ བྷིཀྑཱུ གཧེཏྭཱ ཨཱགཙྪཐཱ’’ཏི སཧ སངྒྷེན ནིམནྟིཏཏྟཱ ‘‘ཨིམེ ཏཡོ ཛནཱ པུཙྪིཏུཾ ན ལབྷནྟཱི’’ཏི ཝུཏྟཾ, ན ‘‘ཏྭཾ ཨཱགཙྪཱཧཱི’’ཏི པུགྒལསྶེཝ ནིམནྟནེ སཏིཔི སངྒྷཾ ¶ གཧེཏྭཱ ཨཱགནྟབྦཏོཏི. ཨེཝཾ ‘‘ཨཊྛ བྷིཀྑཱུ གཧེཏྭཱ ཨཱགཙྪཐཱ’’ཏི སསངྒྷསྶེཝ པུགྒལསྶ ནིམནྟིཏཏྟཱ སངྒྷོ གཧེཏབྦོ ཧོཏི, ན ‘‘ཏུམྷེ ཨཱགཙྪཐཱ’’ཏི པུགྒལསྶེཝ ནིམནྟིཏཏྟཱ, ཏསྨཱ ‘‘པུགྒལསྶ ལཱབྷོ སངྒྷཱཡཏྟོ’’ཏི ན སཀྐཱ ཝཏྟུཾ ¶ , ཨཊྛཀཐཱདཱིསུ པཀརཎེསུཔི ‘‘པུགྒལཾ ནིསྶཱཡ སངྒྷསྶ ལཱབྷོ ཨུཔྤཛྫཏི’’ ཨིཙྩེཝ ཝུཏྟོ, ན ‘‘པུགྒལསྶ ལཱབྷོ སངྒྷཱཡཏྟོ’’ཏི. ཙཱིཝརལཱབྷཁེཏྟབྷཱུཏཱསུ ཨཊྛསུ མཱཏིཀཱསུ ཙ ‘‘སངྒྷསྶ དེཏཱི’’ཏི ཙ ཝིསུཾ, ‘‘པུགྒལསྶ དེཏཱི’’ཏི ཙ ཝིསུཾ ཨཱགཏཾ. པུགྒལསྶ དེཏཱིཏི ‘‘ཨིམཾ ཙཱིཝརཾ ཨིཏྠནྣཱམསྶ དམྨཱི’’ཏི ཨེཝཾ པརམྨུཁཱ ཝཱ, པཱདམཱུལེ ཋཔེཏྭཱ ‘‘ཨིམཾ བྷནྟེ ཏུམྷཱཀཾ དམྨཱི’’ཏི ཨེཝཾ སམྨུཁཱ ཝཱ དེཏཱིཏི.

ཨིདཱནི པན ཙཱིཝརཾ དཱཏུཀཱམཱ ཨུཔཱསཀཱ ཝཱ ཨུཔཱསིཀཱཡོ ཝཱ སཡཾ ཨནཱགནྟྭཱ པུཏྟདཱསཱདཡོ ཨཱཎཱཔེནྟཱཔི ‘‘ཨིམཾ ཙཱིཝརཾ ཨིཏྠནྣཱམསྶ ཐེརསྶ དེཐཱ’’ཏི ཝཏྭཱ པུགྒལསྶེཝ དཱཔེནྟི, སཱམཾ གནྟྭཱ དདནྟཱཔི པཱདམཱུལེ ཋཔེཏྭཱ ཝཱ ཧཏྠེ ཋཔེཏྭཱ ཝཱ ཧཏྠེན ཕུསཱཔེཏྭཱ ཝཱ དདནྟི ‘‘ཨིམཾ, བྷནྟེ, ཙཱིཝརཾ ཏུམྷེ ཨུདྡིསྶ ཨེཏྟཀཾ དྷནཾ པརིཙྩཛིཏྭཱ ཀཏཾ, ཨེཝཉྩ ཨེཝཉྩ ཧཏྠཀམྨཾ ཀཏྭཱ སམྤཱདིཏཾ, ཏསྨཱ ཏུམྷེ ནིཝཱསཐ པཱརུཔཐ པརིབྷུཉྫཐཱ’’ཏིཨཱདཱིནི ཝདནྟི, ཏསྶ པུགྒལསྶ པརིབྷོགཀརཎམེཝ ཨིཙྪནྟི, ན སངྒྷསྶ དཱནཾ. ཀེཙི ཨཏུཊྛཀཐམྤི ཀཐེནྟི. ཨེཝཾ པུགྒལམེཝ ཨུདྡིསྶ དིནྣཙཱིཝརསྶ སངྒྷེན ཨཱཡཏྟཀཱརཎཾ ནཏྠི. ‘‘སཙེ པན ‘ཨིདཾ ཏུམྷཱཀཉྩ ཏུམྷཱཀཾ ཨནྟེཝཱསིཀཱནཉྩ དམྨཱི’ཏི ཨེཝཾ ཝདཏི, ཐེརསྶ ཙ ཨནྟེཝཱསིཀཱནཉྩ པཱཔུཎཱཏཱི’’ཏི (མཧཱཝ. ཨཊྛ. ༣༧༩) ཨཱགམནཏོ ཨེཝཾ ཝཏྭཱ དེནྟེ པན ཨཱཙརིཡནྟེཝཱསིཀཱནཾ པཱཔུཎཱཏི, ཨནནྟེཝཱསིཀསྶ པན ན པཱཔུཎཱཏི. ‘‘ཨུདྡེསཾ གཧེཏུཾ ཨཱགཏོ གཧེཏྭཱ གཙྪནྟོ ཙ ཨཏྠི, ཏསྶཔི པཱཔུཎཱཏཱི’’ཏི ཨཱགམནཏོ ¶ བཧིསཱིམཊྛསྶ དྷམྨནྟེཝཱསིཀསྶཔི པཱཔུཎཱཏི. ‘‘ཏུམྷེཧི སདྡྷིཾ ནིབདྡྷཙཱརིཀབྷིཀྑཱུནཾ དམྨཱིཏི ཝུཏྟེ ཨུདྡེསནྟེཝཱསིཀཱནཾ ཝཏྟཾ ཀཏྭཱ ཨུདྡེསཔརིཔུཙྪཱདཱིནི གཧེཏྭཱ ཝིཙརནྟཱནཾ སབྦེསཾ པཱཔུཎཱཏཱི’’ཏི (མཧཱཝ. ཨཊྛ. ༣༧༩) ཨཱགམནཏོ ཨེཝཾ ཝཏྭཱ དེནྟེ དྷམྨནྟེཝཱསིཀཱནཾ ཝཏྟཔཊིཔཏྟིཀཱརཀཱནཉྩ ཨནྟེཝཱསིཀཱནཾ པཱཔུཎཱཏི. ཨེཝཾ དཱཡཀཱནཾ ཝཙནཱནུརཱུཔམེཝ དཱནསྶ པཝཏྟནཏོ ‘‘ཡཐཱ དཱཡཀཱ ཝདནྟི, ཏཐཱ པཊིཔཛྫིཏབྦ’’ནྟི (ཙཱུལ༹ཝ. ཨཊྛ. ༣༢༥) ཨཊྛཀཐཱཙརིཡཱ ཝདནྟི.

ཨེཝཾ ཨིདཱནི དཱཡཀཱ ཡེབྷུཡྻེན པུགྒལསྶེཝ དེནྟི, སཏེསུ སཧསྶེསུ ཨེཀོཡེཝ པཎྜིཏོ བཧུསྶུཏོ དཱཡཀོ སངྒྷསྶ དདེཡྻ, པུགྒལིཀཙཱིཝརཉྩ སངྒྷིཀབྷཝནཏྠཱཡ ཨཀརིཡམཱནཾ ན ཉཏྟིཡཱ ཀམྨཝཱཙཱཡ ཙ ཨརཧཾ ཧོཏི. ཀཐཾ ཝིཉྙཱཡཏཱིཏི ཙེ? ཉཏྟིཀམྨཝཱཙཱཝིརོདྷཏོ. ཀཐཾ ཝིརོདྷོཏི ཙེ? ཉཏྟིཡཱ ཀམྨཝཱཙཱཡ ཙ ‘‘ཨིདཾ སངྒྷསྶ ཀཐིནདུསྶཾ ཨུཔྤནྣ’’ནྟི ཀཐིནཙཱིཝརསྶ ¶ སངྒྷིཀབྷཱཝོ ཝུཏྟོ, ཨིདཱནི པན ཏཾ ཙཱིཝརཾ ‘‘པུགྒལསྶ དིནྣཾ པུགྒལིཀ’’ནྟི ཝཙནཏྠཱནུརཱུཔཏོ པུགྒལིཀཾ ཧོཏི, ཨེཝམྤི ཝིརོདྷོ. ‘‘སངྒྷོ ཨིམཾ ཀཐིནདུསྶཾ ཨིཏྠནྣཱམསྶ བྷིཀྑུནོ དདེཡྻ ཀཐིནཾ ཨཏྠརིཏུ’’ནྟི ཨེཏྠ ཙ སངྒྷོཏི དྷཱཏུཡཱ ཀཏྟཱ ཧོཏི, བྷིཀྑུནོཏི སམྤདཱནཾ, ཨིདྷ པན སངྒྷསྶ ཏསྨིཾ ཀཐིནཙཱིཝརེ ཨནིསྶརབྷཱཝཏོ སངྒྷོ ཀཏྟཱ ན ཧོཏི, བྷིཀྑུ པཊིགྒཱཧལཀྑཎཱབྷཱཝཏོ སམྤདཱནཾ ན ཧོཏི, ཨེཝམྤི ཝིརོདྷོ. དཱཡཀེན པན སངྒྷསྶ པརིཙྩཏྟཏྟཱ སངྒྷིཀབྷཱུཏཾ ཀཐིནཙཱིཝརཾ ཡསྨིཾ ཀཱལེ སངྒྷོ ཀཐིནཾ ཨཏྠརིཏུཾ ཨཊྛངྒསམནྣཱགཏསྶ བྷིཀྑུནོ དེཏི, ཏསྨིཾ ཀཱལེ ཉཏྟིདུཏིཡཀམྨཝཱཙཾ ཨིདཱནི མནུསྶཱ ‘‘ཉཏྟཱི’’ཏི ཝོཧརནྟི, ཏཉྩ ཙཱིཝརཾ ‘‘ཉཏྟིལདྡྷཙཱིཝར’’ནྟི, ཏཾ ཙཱིཝརདཱཡཀཉྩ ‘‘ཉཏྟིལདྡྷདཱཡཀོ’’ཏི ¶ , ཏསྨཱ སངྒྷིཀཙཱིཝརམེཝ ཉཏྟིལདྡྷཾ ཧོཏི, ནོ པུགྒལིཀཙཱིཝརཾ. ཉཏྟིལདྡྷཀཱལཏོ པན པཊྛཱཡ ཏཾ ཙཱིཝརཾ པུགྒལིཀཾ ཧོཏི. ཀསྨཱ? ཨཏྠཱརཀཔུགྒལསྶ ཙཱིཝརབྷཱཝཏོཏི.

ཨཐཱཔི ཝདནྟི ‘‘དིནྣནྟི པཱཋཉྩ ‘སཱདྷེནྟཱི’ཏི པཱཋཉྩ ‘ཨཱནིསཾསཾ ལབྷནྟཱི’ཏི པཱཋཉྩ ཨུཔནིདྷཱཡ ཨཡམཏྠོ ཝིཉྙཱཡཏཱི’’ཏི, ཏཏྠཱཡམཱཙརིཡཱནམདྷིཔྤཱཡོ – ‘‘དིནྣཾ ཨིདཾ སངྒྷེནཱ’’ཏི ཨེཏྠ དཱ-དྷཱཏུཡཱ སངྒྷེནཱཏི ཀཏྟཱ, ཨིདནྟི ཀམྨཾ, ཨིམསྶ ཀཐིནཙཱིཝརསྶ སངྒྷིཀཏྟཱ སངྒྷེན དིནྣཾ ཧོཏི, ཏེན ཝིཉྙཱཡཏི ‘‘ཀཐིན’’ནྟི ཝུཏྟེ སངྒྷིཀཾ ཧོཏཱིཏི. ‘‘ཀཐིནཏྠཱརཾ ཀེ ལབྷནྟཱིཏི ཨེཏྠ ཀེ ལབྷནྟཱིཏི ཀེ སཱདྷེནྟཱིཏི ཨཏྠོ. པཉྩ ཛནཱ སཱདྷེནྟཱི’’ཏི ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༣༠༦) ཝུཏྟཾ. ཏཏྠ པཉྩ ཛནཱཏི སངྒྷོ ཝུཏྟོ, ཨིམིནཱཔི ཝིཉྙཱཡཏི ‘‘ཀཐིནནྟི ཝུཏྟེ སངྒྷིཀཾ ཧོཏཱི’’ཏི. ཨཱནིསཾསཾ ལབྷནྟཱིཏི ཨེཏྠ ཙ སངྒྷིཀཏྟཱ སབྦེ སཱིམཊྛཀབྷིཀྑཱུ ཨཱནིསཾསཾ ལབྷནྟི, ཨིམིནཱཔི ཝིཉྙཱཡཏི ‘‘ཀཐིནནྟི ཝུཏྟེ སངྒྷིཀཾ ཧོཏཱི’’ཏི.

ཏཏྲཱཔྱེཝཾ ཝིཙཱརཎཱ ཀཱཏབྦཱ – པུབྦེདཱཡཀཱ ཙཏྟཱརོཔི པཙྩཡེ ཡེབྷུཡྻེན སངྒྷསྶེཝ དེནྟི, ཏསྨཱ སངྒྷསྶ ཙཏུཔཙྩཡབྷཱཛནཀཐཱ ཨཏིཝིཏྠཱརཱ ཧོཏི. ཨཔྤཀཏོ པན པུགྒལསྶ དེནྟི, ཏསྨཱ སངྒྷསྶ དིནྣཾ ཀཐིནཙཱིཝརཾ སངྒྷེན ཨཏྠཱརཀསྶ པུགྒལསྶ དིནྣཾ སནྡྷཱཡ ཝུཏྟཾ. སཱདྷེནྟཱིཏི ཙ ཀཐིནདུསྶསྶ དཱཡཀཱ ཙཏྟཱརོ, པཊིགྒཱཧཀོ ཨེཀོཏི པཉྩ ཛནཱ ཀཐིནདཱནཀམྨཾ སཱདྷེནྟཱིཏི ཝུཏྟཾ. ཨཱནིསཾསཾ ལབྷནྟཱིཏི ཨིདཉྩ ཨཏྠཱརཀསྶ ཙ ཨནུམོདནཱནཉྩ བྷིཀྑཱུནཾ ཨཱནིསཾསལཱབྷམེཝ ཝུཏྟཾ, ན ཨེཏེཧི པཱཋེཧི ‘‘ཀཐིན’’ནྟི ཝུཏྟེ སངྒྷིཀཾ ཧོཏཱིཏི ཨཏྠོ ཝིཉྙཱཏབྦོ ཧོཏཱིཏི དཊྛབྦོ. སངྒྷསྶ ཨུཔྤནྣཙཱིཝརཾ སངྒྷེན ཨཏྠཱརཀསྶ ¶ དིནྣབྷཱཝོ ཀཐཾ ཝིཉྙཱཡཏཱིཏི? ‘‘ཨིདཾ ¶ སངྒྷསྶ ཀཐིནདུསྶཾ ཨུཔྤནྣཾ, སངྒྷོ ཨིམཾ ཀཐིནདུསྶཾ ཨིཏྠནྣཱམསྶ བྷིཀྑུནོ དེཏི ཀཐིནཾ ཨཏྠརིཏུ’’ནྟི ཝུཏྟཾ པཱལི༹པཱཋཉྩ (མཧཱཝ. ༣༠༧) ‘‘སངྒྷོ ཨཛྫ ཀཐིནདུསྶཾ ལབྷིཏྭཱ པུནདིཝསེ དེཏི, ཨཡཾ ནིཙཡསནྣིདྷཱི’’ཏི ཝུཏྟཾ ཨཊྛཀཐཱཔཱཋཉྩ དིསྭཱ ཝིཉྙཱཡཏཱིཏི. སངྒྷསནྟཀབྷཱུཏཾ ཙཱིཝརམེཝ དཱནཀིརིཡཱཡ ཀམྨཾ, སངྒྷོ ཀཏྟཱ, པུགྒལོ སམྤདཱནཾ བྷཝིཏུཾ ཨརཧབྷཱཝོ ཙ ཡཐཱཝུཏྟཔཱལི༹པཱཋམེཝ ཨུཔནིདྷཱཡ ཝིཉྙཱཡཏཱིཏི.

ཨེཝཾ སནྟེ པུགྒལསྶ དིནྣཾ པུགྒལིཀཙཱིཝརཾ སངྒྷིཀཾ ཀཱཏུཾ ཀཐཾ པཊིཔཛྫིཏབྦནྟི? སཙེ སོ པཊིགྒཱཧཀཔུགྒལོ དཱཡཀཱནཾ ཨེཝཾ ཝདཏི ‘‘ཨུཔཱསཀ དཱནཾ ནཱམ པུགྒལསྶ དིནྣཏོ སངྒྷསྶ དིནྣཾ མཧཔྥལཏརཾ ཧོཏི, ཏསྨཱ སངྒྷསྶ དེཧི, སངྒྷསྶ དཏྭཱ པུན སངྒྷེན ཨཏྠཱརཱརཧསྶ བྷིཀྑུནོ ཀམྨཝཱཙཱཡ དཏྭཱ ཏེན པུགྒལེན ཡཐཱཝིནཡཾ ཨཏྠཏེཡེཝ ཀཐིནཾ ནཱམ ཧོཏི, ན པུགྒལསྶ དཏྭཱ པུགྒལེན སཱམཾཡེཝ ཨཏྠཏེ, ཏསྨཱ སངྒྷསྶ དེཧཱི’’ཏི ཨུཡྻོཛེཏྭཱ སངྒྷསྶ དཱཔིཏེཔི ཏཾ ཙཱིཝརཾ སངྒྷིཀཾ ཧོཏི ཀཐིནཏྠཱརཱརཧཾ. ཡདི པན དཱཡཀོ ཨཔྤསྶུཏཏཱཡ ‘‘ནཱཧཾ, བྷནྟེ, ཀིཉྩི ཛཱནཱམི, ཨིམཾ ཙཱིཝརཾ ཏུམྷཱཀམེཝ དམྨཱི’’ཏི ཝཀྑཏི, ཨེཝཾ སཏི པུགྒལིཀཝསེནེཝ སམྤཊིཙྪིཏྭཱ ཏེན པུགྒལེན ཏཾ ཙཱིཝརཾ སངྒྷསྶ དིནྣམྤི སངྒྷིཀཾ ཧོཏི.

ཡདི ཨེཝཾ སམཎེནེཝ སམཎསྶ དིནྣཾ ཙཱིཝརཾ ཀཐཾ ཀཐིནཏྠཱརཱརཧཾ བྷཝེཡྻཱཏི? ནོ ན བྷཝེཡྻ. ཝུཏྟཉྷེཏཾ ཨཊྛཀཐཱཡཾ (མཧཱཝ. ཨཊྛ. ༣༠༦) ‘‘ཀཐིནཾ ཀེན དིནྣཾ ཝཊྚཏི? ཡེན ཀེནཙི དེཝེན ཝཱ མནུསྶེན ཝཱ པཉྩནྣཾ ཝཱ སཧདྷམྨིཀཱནཾ ཨཉྙཏརེན དིནྣཾ ཝཊྚཏཱི’’ཏི. ཨཐ ཀསྨཱ པརམྤརབྷཱུཏེཧི ཨཱཙརིཡེཧི ཉཏྟིལདྡྷཙཱིཝརཏོ ཨཝསེསཱནི ཙཱིཝརཱནི སངྒྷསྶ བྷཱཛེཏྭཱ ཨེཝ པརིབྷུཉྫིཏཱནཱིཏི? ཝུཙྩཏེ – ཨེཀཙྩེ བྷིཀྑཱུ ཨཱཙརིཡཔརམྤརཱགཏཨནཨུསཱརེནེཝ ¶ པཊིཔཛྫནྟི, ཀེཙི བཧཱུནཾ ཀིརིཡཾ དིསྭཱ དིཊྛཱནུགཏིཝསེན པཊིཔཛྫནྟི, བཧུསྶུཏཱཔི ཀེཙི ཐེརཱ ཨརུཙྩནྟཱཔི པཝེཎིབྷེདབྷཡེན པཊིཔཛྫནྟི, ཨཔརེ རུཙིཝསེན ཨཏྠཉྩ ཨདྷིཔྤཱཡཉྩ པརིཎཱམེཏྭཱ གཎྷནྟི, པཀརཎམེཝཱནུགཏབྷིཀྑཱུ པན ཡཐཱཔཀརཎཱགཏམེཝ ཨཏྠཾ གཧེཏྭཱ སངྒྷིཀཉྩ པུགྒལིཀཉྩ ཨམིསྶཾ ཀཏྭཱ, ཀཱལཙཱིཝརཉྩ ཨཀཱལཙཱིཝརཉྩ ཨམིསྶཾ ཀཏྭཱ གཎྷནྟི. བྷིཀྑུནིཝིབྷངྒེ (པཱཙི. ༧༣༨) ‘‘ཐཱུལནནྡཱ བྷིཀྑུནཱི ཨཀཱལཙཱིཝརཾ ‘ཀཱལཙཱིཝར’ནྟི ཨདྷིཊྛཧིཏྭཱ བྷཱཛཱཔེསྶཏི, ཨཐ བྷགཝཱ ནིསྶགྒིཡཔཱཙིཏྟིཡཱཔཏྟིཾ པཉྙཔེསཱི’’ཏི ཨཱགཏཾ, ཏསྨཱ ལཛྫཱིཔེསལབཧུསྶུཏསིཀྑཱཀཱམབྷཱུཏེན བྷིཀྑུནཱ ཨནེཀ-པཱལི༹ཨཊྛཀཐཱདཡོ ¶ པཀརཎེ ཨོལོཀེཏྭཱ སཾསནྡིཏྭཱ པཀརཎམེཝཱནུགནྟབྦཾ, ན ཨཉྙེསཾ ཀིརིཡཾ སདྡཧིཏབྦཾ, ན ཙ ཨནུགནྟབྦཾ. བྷགཝཏོ ཧི དྷརམཱནཀཱལེ ཝཱ ཏཏོ པཙྪཱ ཝཱ པུབྦེ དཱཡཀཱ ཡེབྷུཡྻེན ཙཏྟཱརོ པཙྩཡེ སངྒྷསྶེཝ དེནྟི, ཏསྨཱ སངྒྷིཀསེནཱསནསྶ སངྒྷིཀཙཱིཝརསྶ ཙ བཱཧུལླཏོ པུབྦཱཙརིཡཱ སངྒྷསྶ བྷཱཛེཏྭཱ ཨེཝ པརིབྷུཉྫིཾསུ.

ཨིདཱནི པན དཱཡཀཱ ཡེབྷུཡྻེན ཙཏྟཱརོ པཙྩཡེ པུགྒལསྶེཝ དེནྟི, ཏསྨཱ སེནཱསནམྤི ཨབྷིནཝབྷཱུཏཾ པུགྒལིཀམེཝ བཧུལཾ ཧོཏི, ཙཱིཝརམྤི པུགྒལིཀམེཝ བཧུལཾ. དལིདྡཱཔི སུཏྟཀནྟནཀཱལཏོ པཊྛཱཡ ‘‘ཨིམཾ ཙཱིཝརཾ ཀཐིནཀཱལེ ཨིཏྠནྣཱམསྶ བྷིཀྑུནོ དསྶཱམཱི’’ཏི ཙིནྟེཏྭཱ ཙ ཏཐེཝ ཝཏྭཱ ཙ སབྦཀིཙྩཱནི ཀརོནྟི, མཧདྡྷནཱ ཙ སཱཊཀསྶ ཀཱིཎིཏཀཱལཏོ པཊྛཱཡ ཏཐེཝ ཙིནྟེཏྭཱ ཀཐེཏྭཱ ཀརོནྟི, དཱནཀཱལེ ཙ ‘‘ཨིམཾ ཙཱིཝརཾ ཨིཏྠནྣཱམསྶ དེཧཱི’’ཏི པུཏྟདཱསཱདཡོ ཝཱ པེསེནྟི, སཱམཾ ཝཱ གནྟྭཱ ཙཱིཝརཾ ཏསྶ བྷིཀྑུསྶ པཱདམཱུལེ ཝཱ ཧཏྠེ ཝཱ ཋཔེཏྭཱ ‘‘ཨིམཾ ཙཱིཝརཾ ཏུཡ྄ཧཾ ¶ དམྨཱི’’ཏི ཝཏྭཱ ཝཱ ཙིནྟེཏྭཱ ཝཱ དེནྟི, སཏེསུ ཝཱ སཧསྶེསུ ཝཱ ཨེཀོ པཎྜིཏཔུརིསོ ‘‘པུགྒལསྶ དིནྣདཱནཏོ སངྒྷསྶ དིནྣཾ མཧཔྥལ’’ནྟི ཉཏྭཱ ‘‘ཨིམཾ ཀཐིནཙཱིཝརཾ སངྒྷསྶ དམྨཱི’’ཏི ཝཏྭཱ ཝཱ ཙིནྟེཏྭཱ ཝཱ དེཏི, ཏསྶ སཱ དཀྑིཎཱ སངྒྷགཏཱ ཧོཏི. སཙེ པན དཱཡཀོ པུགྒལསྶ དཱཏུཀཱམོ ཧོཏི, པུགྒལོ པན ཏསྶ མཧཔྥལབྷཱཝམིཙྪནྟོ དཀྑིཎཱ-ཝིབྷངྒསུཏྟཱདིདྷམྨདེསནཱཡ (མ. ནི. ༣.༣༧༦ ཨཱདཡོ) པུགྒལིཀདཱནཏོ སངྒྷིཀདཱནསྶ མཧཔྥལབྷཱཝཾ ཛཱནཱཔེཏྭཱ ‘‘ཨིམཾ ཏཝ ཙཱིཝརཾ སངྒྷསྶ དེཧཱི’’ཏི ཨུཡྻོཛེཏི, དཱཡཀོཔི ཏསྶ ཝཙནཾ སམྤཊིཙྪིཏྭཱ ‘‘ཨིམཾ ཀཐིནཙཱིཝརཾ སངྒྷསྶ དམྨཱི’’ཏི ཝཏྭཱ ཝཱ ཙིནྟེཏྭཱ ཝཱ དེཏི, ཨེཝམྤི སཱ དཀྑིཎཱ སངྒྷགཏཱ ཧོཏི.

ཡདི པན བྷིཀྑུནཱ ཨུཡྻོཛིཏོཔི དུཔྤཉྙོ དཱཡཀོ ཏསྶ ཝཙནཾ ཨནཱདིཡིཏྭཱ པུགྒལསྶེཝ དེཏི, ཏསྶ སཱ དཀྑིཎཱ པུགྒལགཏཱ ཧོཏི. ཨཐ པན སོ པུགྒལོ སཡཾ སམྤཊིཙྪིཏྭཱ པུན སངྒྷསྶ པརིཙྩཛཏི, ཨེཝམྤི ཏཾ ཙཱིཝརཾ སངྒྷིཀཾ ཧོཏི, ཏཾ སངྒྷིཀཝསེན བྷཱཛེཏབྦཾ. ཡདི པན དཱཡཀོཔི པུགྒལསྶེཝ དེཏི, པུགྒལོཔི སམྤཊིཙྪིཏྭཱ ན པརིཙྩཛཏི, ཨེཝཾ སནྟེ ཏཾ ཙཱིཝརཾ པུགྒལིཀཾ ཧོཏི, ན ཀཐིནཀཱལམཏྟེན ཝཱ ཀཐིནཝཙནམཏྟེན ཝཱ སངྒྷིཀཾ ཧོཏི. ཨིདཱནི པན ཨིམིནཱ ནཡེན པུགྒལིཀཙཱིཝརཾཡེཝ བཧུལཾ ཧོཏི. ཨེཝཾ སནྟེཔི ཨཱཙརིཡཔརམྤརཱ པཝེཎིཾ ཨབྷིནྡིཏུཀཱམཱ སངྒྷིཀཾ ཝིཡ ཀཏྭཱ བྷཱཛེཏྭཱ པརིབྷུཉྫིཾསུ ¶ . ཡདི མུཁྱཏོ སངྒྷིཀཾ སིཡཱ, སངྒྷེན དིནྣཏོ པརཾ ཨེཀསཱུཙིམཏྟམྤི པུགྒལོ ཨདྷིཀཾ གཎྷིཏུཾ ན ལབྷེཡྻ.

ཨེཀཙྩེ ཐེརཱ སངྒྷིཀནྟི པན ཝདནྟི, བྷཱཛནཀཱལེ པན ཨིསྶརཝཏཱཡ ཡཐཱརུཙི ཝིཙཱརེནྟི, ཨེཀཙྩེ བྷིཀྑཱུ མུཁྱསངྒྷིཀནྟི ¶ མཉྙམཱནཱ ཨབྷཱཛེཏུཀཱམམྤི པུགྒལཾ ཨབྷིབྷཝིཏྭཱ བྷཱཛཱཔེནྟི, ཏསྶ པུགྒལསྶ མཱཏཱ པིཏཱ ཉཱཏཀཱ ཨུཔཱསཀཱདཡོ ‘‘ཨམྷཱཀཾ པུཏྟསྶ དེམ, ཨམྷཱཀཾ ཉཱཏཀབྷིཀྑུསྶ དེམ, ཨམྷཱཀཾ ཀུལཱུཔཀསྶ དེམཱ’’ཏི, ཨཉྙེཔི སདྡྷཱ པསནྣཱ དཱཡཀཱ ‘‘ཨིཏྠནྣཱམསྶ པུགྒལསྶ དེམཱ’’ཏི ཝིཙཱརེཏྭཱ པརམྨུཁཱཔི ‘‘ཨིམཾ ཙཱིཝརཾ ཨིཏྠནྣཱམསྶ དམྨཱི’’ཏི ཝཏྭཱ སམྨུཁཱཔི པཱདམཱུལེ ཝཱ ཧཏྠེ ཝཱ ཋཔེཏྭཱ དེནྟི, ཨེཝརཱུཔཾ ཙཱིཝརཾ པུགྒལིཀཾ ཧོཏི, སངྒྷཾ ཨཱམསིཏྭཱ ཨཝུཏྟཏྟཱ སངྒྷཱཡཏྟཾ ན ཧོཏི, ‘‘ཀཐིནཾ དསྶཱམཱི’’ཏི ཝཱ ‘‘ཀཐིནཾ དཱཏུཾ གཏོ’’ཏི ཝཱ ‘‘ཀཐིནཙཱིཝར’’ནྟི ཝཱ པུབྦཱཔརཀཱལེསུ ཝཙནཾ པན མུཁྱཀཐིནབྷཱུཏསྶ སངྒྷིཀཙཱིཝརསྶ ཀཱལེ དིནྣཏྟཱ ཏདུཔཙཱརཏོ ཝོཧཱརམཏྟཾ ཧོཏི. ཡཐཱ ཀིཾ? ‘‘ཨུཔོསཐིཀ’’ནྟི ཝུཏྟཾ བྷཏྟཾ ཙུདྡསསུ སངྒྷིཀབྷཏྟེསུ ཨནྟོགདྷཾ མུཁྱསངྒྷིཀཾ ཧོཏི, སམཱདིནྣཨུཔོསཐཱ དཱཡཀཱ སཱཡཾ བྷུཉྫིཏབྦབྷཏྟབྷཱགཾ སངྒྷསྶ དེནྟི, ཏཾ སངྒྷོ སལཱཀབྷཏྟཾ ཝིཡ ཋིཏིཀཾ ཀཏྭཱ བྷུཉྫཏི, ཨིཏི སངྒྷསྶ དིནྣཏྟཱ སངྒྷིཀཾ ཧོཏི. ཨིདཱནི པན དཱཡཀཱ ཨཏྟནོ ཨཏྟནོ ཀུལཱུཔཀསྶ ཝཱ ཉཱཏིབྷིཀྑུསྶ ཝཱ ཨུཔོསཐདིཝསེསུ བྷཏྟཾ དེནྟི, ཏཾ སངྒྷསྶ ཨདིནྣཏྟཱ སངྒྷིཀཾ ན ཧོཏི. ཨེཝཾ སནྟེཔི ཨུཔོསཐདིཝསེ དིནྣཏྟཱ མུཁྱཝསེན པཝཏྟཨུཔོསཐབྷཏྟཾ ཝིཡ ཏདུཔཙཱརེན ‘‘ཨུཔོསཐབྷཏྟ’’ནྟི ཝོཧརཱིཡཏི, ཨེཝཾསམྤདམིདཾ དཊྛབྦཾ.

ཨེཝཾ ཨིམསྨིཾ ཀཱལེ ཡེབྷུཡྻེན པུགྒལསྶེཝ དིནྣཏྟཱ པུགྒལིཀབྷཱུཏཾ ཙཱིཝརཾ ཉཏྟིཀམྨཝཱཙཱརཧཾ ན ཧོཏི, སངྒྷིཀམེཝ ཉཏྟིཀམྨཝཱཙཱརཧཾ ཧོཏི, ཏདེཝ ཙ པཉྩཱནིསཾསཀཱརཎཾ ཧོཏི, ཏསྨཱ པཎྜིཏེན པུགྒལེན ‘‘ཨུཔཱསཀཱ སངྒྷེ དེཐ, སངྒྷེ དིནྣཾ མཧཔྥལཾ ཧོཏཱི’’ཏིཨཱདིནཱ ནིཡོཛེཏྭཱ དཱཔེཏབྦཾ, སཡཾ ཝཱ སམྤཊིཙྪིཏྭཱ སངྒྷསྶ པརིཙྩཛིཏབྦཾ. ཨེཝཾ པརིཙྩཛིཏཏྟཱ སངྒྷིཀབྷཱུཏཾ ཙཱིཝརཾ ཉཏྟིཀམྨཝཱཙཱརཧཉྩ ¶ ཧོཏི པཉྩཱནིསཾསནིཔྥཱདཀཉྩ. ཨེཝཾ ནིཡོཛནཉྩ ‘‘སངྒྷེ གོཏམི དེཧི, སངྒྷེ ཏེ དིནྣེ ཨཧཉྩེཝ པཱུཛིཏོ བྷཝིསྶཱམི སངྒྷོ ཙཱ’’ཏི (མ. ནི. ༣.༣༧༦) བྷགཝཏཱ ཝུཏྟཝཙནཾ ཨནུགཏཾ ཧོཏཱིཏི དཊྛབྦཾ.

པརིཀམྨཾ ¶ ཀརོནྟཱནཾ བྷིཀྑཱུནཾ ཡཱགུབྷཏྟཉྩ དཱཏུཾ ཝཊྚཏཱིཏི ཨིདཾ པུཙྪིཏཏྟཱ དོསོ ནཏྠཱིཏི ཀཏྭཱ ཝུཏྟཾ, ཨཔུཙྪིཏེ པན ཨེཝཾ ཀཐེཏུཾ ན ཝཊྚཏི. ཁལིམཀྑིཏསཱཊཀོཏི ཨཧཏཝཏྠཾ སནྡྷཱཡ ཝུཏྟཾ. སུཊྛུ དྷོཝིཏྭཱཏིཨཱདིནཱ སཔུབྦཀརཎཾ ཨཏྠཱརཾ དསྶེཏི. དྷོཝནསིབྦནརཛནཀཔྤཀརཎེན ཧི ཝིཙཱརཎཚེདནབནྡྷནཱནིཔི དསྶིཏཱནིཡེཝ ཧོནྟི, ཨཏྠཱརདསྶནེན པཙྩུདྡྷཱརཨདྷིཊྛཱནཱནིཔི དསྶེཏི. སཱུཙིཨཱདཱིནི ཙཱིཝརཀམྨུཔཀརཎཱནི སཛྫེཏྭཱ བཧཱུཧི བྷིཀྑཱུཧི སདྡྷིནྟི ཨིདཾ པན སིབྦནསྶ ཨུཔཀརཎནིདསྶནཾ. ཏདཧེཝཱཏི ཨིདཾ པན ཀརཎསནྣིདྷིམོཙནཏྠཾ ཝུཏྟཾ. དཱཡཀསྶ ཧཏྠཏོ སཱཊཀཾ ལདྡྷདིཝསེཡེཝ སངྒྷེན ཨཏྠཱརཀསྶ བྷིཀྑུནོ དཱཏབྦཾ, ཨེཝཾ ཨདེནྟེ ནིཙཡསནྣིདྷི ཧོཏི. ཨཏྠཱརཀེནཔི སངྒྷཏོ ལདྡྷདིཝསེཡེཝ ཀཐིནཾ ཨཏྠརིཏབྦཾ, ཨེཝཾ ཨཀརོནྟེ ཀརཎསནྣིདྷི ཧོཏི.

ཨཉྙཱནི ཙ བཧཱུནི ཨཱནིསཾསཝཏྠཱནི དེཏཱིཏི ཨིམིནཱ ཨཏྠརིཏབྦསཱཊཀོཡེཝ ཀཐིནསཱཊཀོ ནཱམ, ཏཏོ ཨཉྙེ སཱཊཀཱ བཧཝོཔི ཀཐིནཱནིསཾསཱཡེཝ ནཱམཱཏི དསྶེཏི. ཨེཏེན ཙ ‘‘ཀཐིནཱནིསཾསོ’’ཏི ཝཏྠཱནིཡེཝ ཝུཏྟཱནི ན ཨགྒྷོཏི དཱིཔེཏི. ཡདི ཨགྒྷོ ཝུཏྟོ སིཡཱ, ཨེཝཾ སཏི ‘‘བཧྭཱནིསཾསཱནི ཀཐིནཝཏྠཱནི དེཏཱི’’ཏི ཝཏྟབྦཾ, ཨེཝཾ པན ཨཝཏྭཱ ‘‘བཧཱུནི ཀཐིནཱནིསཾསཝཏྠཱནི དེཏཱི’’ཏི ཝུཏྟཾ, ཏེན ཉཱཡཏི ‘‘ན ཨགྒྷོ ཝུཏྟོ’’ཏི, ཏསྨཱ བཧྭཱནིསཾསབྷཱཝོ ཨགྒྷཝསེན ན གཧེཏབྦོ, ཨཐ ཁོ ཝཏྠཝསེནེཝ གཧེཏབྦོཏི. ཨིཏརོཏི ཨཉྙོ དཱཡཀོ. ཏཐཱ ¶ ཏཐཱ ཨོཝདིཏྭཱ སཉྙཱཔེཏབྦོཏི ‘‘ཨུཔཱསཀ དཱནཾ ནཱམ སངྒྷསྶ དིནྣཀཱལཏོ པཊྛཱཡ མཧཔྥལཾ ཧོཏི མཧཱནིསཾསཾ, ཨཏྠཱརོ པན བྷིཀྑཱུནཾ ཨུཔཀཱརཏྠཱཡ བྷགཝཏཱ ཨནུཉྙཱཏོ, ཏསྨཱ ཉཏྟིལདྡྷམྤི ཨལདྡྷམྤི མཧཔྥལམེཝཱ’’ཏི ཝཱ ‘‘ཨུཔཱསཀ ཨཡམྤི དཱཡཀོ སངྒྷསྶེཝ དེཏི, ཏྭམྤི སངྒྷསྶེཝ དེསི, བྷགཝཏཱ ཙ –

‘ཡོ སཱིལཝཱ སཱིལཝནྟེསུ དདཱཏི དཱནཾ;

དྷམྨེན ལདྡྷཾ སུཔསནྣཙིཏྟོ;

ཨབྷིསདྡཧཾ ཀམྨཕལཾ ཨུལཱ༹རཾ;

ཏཾ ཝེ དཱནཾ ཝིཔུལཕལནྟི བྲཱུམཱི’ཏི. (མ. ནི. ༣.༣༨༢) –

ཝུཏྟཾ, ཏསྨཱ སངྒྷསྶ དིནྣཀཱལཏོ པཊྛཱཡ མཧཔྥལམེཝཱ’’ཏི ཝཱ ཨིཏིཨཱདཱིནི ཝཏྭཱ སཉྙཱཔེཏབྦོ.

ཡསྶ ¶ སངྒྷོ ཀཐིནཙཱིཝརཾ དེཏི, ཏེན བྷིཀྑུནཱ ཀཐིནཾ ཨཏྠརིཏབྦནྟི ཡོཛནཱ. ཡོ ཛིཎྞཙཱིཝརོ ཧོཏི བྷིཀྑུ, ཏསྶ དཱཏབྦནྟི སམྦནྡྷོ. ཨིམསྨིཾ ཋཱནེ ཨིདཱནི བྷིཀྑཱུ –

‘‘པཊིགྒཧཎཉྩ སཔྤཱཡཾ, ཉཏྟི ཙ ཨནུསཱཝནཾ;

ཀཔྤབིནྡུ པཙྩུདྡྷཱརོ, ཨདྷིཊྛཱནཏྠརཱནི ཙ;

ནིཡོཛནཱནུམོདཱ ཙ, ཨིཙྩཡཾ ཀཐིནེ ཝིདྷཱི’’ཏི. –

ཨིམཾ གཱཐཾ ཨཱཧརིཏྭཱ ཀཐིནདཱནཀམྨཝཱཙཱཡ པཋམཾ ཀཐིནཙཱིཝརསྶ པཊིགྒཧཎཉྩ སཔྤཱཡཔུཙྪནཉྩ ཀརོནྟི, ཏདཡུཏྟཾ ཝིཡ དིསྶཏི. ཀསྨཱཏི ཙེ? ‘‘ཨཊྛཧངྒེཧི སམནྣཱགཏོ པུགྒལོ བྷབྦོ ཀཐིནཾ ཨཏྠརིཏུཾ…པེ… པུབྦཀརཎཾ ཛཱནཱཏི, པཙྩུདྡྷཱརཾ ཛཱནཱཏི, ཨདྷིཊྛཱནཾ ཛཱནཱཏི, ཨཏྠཱརཾ ཛཱནཱཏི, མཱཏིཀཾ ཛཱནཱཏི, པལིབོདྷཾ ཛཱནཱཏི, ཨུདྡྷཱརཾ ཛཱནཱཏི, ཨཱནིསཾསཾ ཛཱནཱཏཱི’’ཏི པརིཝཱརཔཱལི༹ཡཉྩ (པརི. ༤༠༩),

‘‘ཨཊྛདྷམྨཝིདོ ¶ བྷིཀྑུ, ཀཐིནཏྠཱརམརཧཏི;

པུབྦཔཙྩུདྡྷཱརཱདྷིཊྛཱ-ནཏྠཱརོ མཱཏིཀཱཏི ཙ;

པལིབོདྷོ ཙ ཨུདྡྷཱརོ, ཨཱནིསཾསཱ པནཊྛིམེ’’ཏི. (ཝི. ཝི. ༢༧༠༤, ༢༧༠༦) –

ཝིནཡཝིནིཙྪཡཔྤཀརཎེ ཙ ཨཱགཏེསུ ཨཊྛསུ ཨངྒེསུ ཨནཱགཏཏྟཱ ཙ ‘‘པུབྦཀརཎཾ སཏྟཧི དྷམྨེཧི སངྒཧིཏཾ དྷོཝནེན ཝིཙཱརཎེན ཚེདནེན བནྡྷནེན སིབྦནེན རཛནེན ཀཔྤཀརཎེནཱ’’ཏི པརིཝཱརཔཱལི༹ཡཉྩ (པརི. ༤༠༨),

‘‘དྷོཝནཉྩ ཝིཙཱརོ ཙ, ཚེདནཾ བནྡྷནམྤི ཙ;

སིབྦནཾ རཛནཾ ཀཔྤཾ, པུབྦཀིཙྩནྟི ཝུཙྩཏཱི’’ཏི. (ཝི. ཝི. ༢༧༠༧) –

ཝིནཡཝིནིཙྪཡཔྤཀརཎེ ཙ ཝུཏྟེསུ སཏྟསུ པུབྦཀརཎེསུ ཨནཱགཏཏྟཱ ཙ.

ན ¶ ཀེཝལཉྩ པཀརཎེསུ ཨནཱགཏམེཝ, ཨཐ ཁོ ཡུཏྟིཔི ན དིསྶཏི. ཀཐཾ? པཊིགྒཧཎཾ ནཱམ ‘‘ཡོ པན བྷིཀྑུ ཨདིནྣཾ མུཁདྭཱརཾ ཨཱཧཱརཾ ཨཱཧཱརེཡྻ ཨཉྙཏྲ ཨུདཀདནྟཔོནཱ, པཱཙིཏྟིཡ’’ནྟི (པཱཙི. ༢༦༥) ཡཱཝཀཱལིཀཱདཱིསུ ཨཛ྄ཛྷོཧརིཏབྦེསུ ཙཏཱུསུ ཀཱལིཀཝཏྠཱུསུ བྷགཝཏཱ ཝུཏྟཾ, ན ཙཱིཝརེ, ཏཾ པན པཱདམཱུལེ ཋཔེཏྭཱ དིནྣམྤི པརམྨུཁཱ དིནྣམྤི ལབྦྷཏེཝ. ཝུཏྟཉྷི ཨཊྛཀཐཱཡཾ (མཧཱཝ. ཨཊྛ. ༣༧༩) ‘‘ཨིམཾ ཙཱིཝརཾ ཨིཏྠནྣཱམསྶ དམྨཱིཏི ཨེཝཾ པརམྨུཁཱ ཝཱ པཱདམཱུལེ ཋཔེཏྭཱ ‘ཨིམཾ ཏུམྷཱཀ’ནྟི ཨེཝཾ སམྨུཁཱ ཝཱ དེཏཱི’’ཏི, ཏསྨཱ པཊིགྒཧཎཀིཙྩཾ ནཏྠི, དཱཡཀེན ཙཱིཝརེ དིནྣེ སངྒྷསྶ ཙིཏྟེན སམྤཊིཙྪནམཏྟམེཝ པམཱཎཾ ཧོཏི.

སཔྤཱཡཔུཙྪནཉྩ ཨེཝཾ ཀརོནྟི – ཨེཀེན བྷིཀྑུནཱ ‘‘བྷོནྟོ སངྒྷཱ སངྒྷསྶ ཀཐིནེ སམྤཏྟེ ཀསྶ པུགྒལསྶ སཔྤཱཡཱརཧཾ ཧོཏཱི’’ཏི པུཙྪིཏེ ཨེཀོ བྷིཀྑུ ནཱམཾ ¶ ཝཏྭཱ ‘‘ཨིཏྠནྣཱམསྶ ཐེརསྶ སཔྤཱཡཱརཧཾ ཧོཏཱི’’ཏི ཝདཏི, སཔྤཱཡཨིཏི ཙ ནིཝཱསནཔཱརུཔནཏྠཾ གཧེཏྭཱ ཝདནྟི. ཨེཏསྨིཾ ཝཙནེ སདྡཏོ ཙ ཨཏྠཏོ ཙ ཨདྷིཔྤཱཡཏོ ཙ ཡུཏྟི གཝེསིཏབྦཱ ཧོཏི. ཀཐཾ? སདྡཏོ ཝགྒབྷེདེ སཏིཡེཝ བཧུཝཙནཾ ཀཏྟབྦཾ, ན ཨབྷེདེ, ཨེཝཾ སདྡཏོ. སཔྤཱཡཨིཏིཝཙནཉྩ ཨནུརཱུཔཏྠེཡེཝ ཝཏྟབྦཾ, ན ནིཝཱསནཔཱརུཔནཏྠེ, ཨེཝཾ ཨཏྠཏོ. ཨིདཉྩ ཙཱིཝརཾ སངྒྷོ ཀཐིནཾ ཨཏྠརིཏུཾ པུགྒལསྶ དེཏི, ན ནིཝཱསནཔཱརུཔནཏྠཾ. ཝུཏྟཉྷི པཱལི༹ཡཾ (མཧཱཝ. ༣༠༧) ‘‘སངྒྷོ ཨིམཾ ཀཐིནདུསྶཾ ཨིཏྠནྣཱམསྶ བྷིཀྑུནོ དེཏི ཀཐིནཾ ཨཏྠརིཏུ’’ནྟི, ཏསྨཱ ཡུཏྟི གཝེསིཏབྦཱ ཧོཏི. ‘‘པཊིགྒཧཎཉྩ སཔྤཱཡ’’ནྟིཨཱདིགཱཐཱཔི ཀཏྠཙི པཱལི༹ཡཾ ཨཊྛཀཐཱཊཱིཀཱདཱིསུ ཙ ན དིསྶཏི, ཏསྨཱ ཨིདྷ ཝུཏྟནཡེནེཝ པཊིཔཛྫིཏབྦཾ.

སཙེ བཧཱུ ཛིཎྞཙཱིཝརཱ, ཝུཌྜྷསྶ དཱཏབྦནྟི ཨིདཾ ཀཐིནཙཱིཝརསྶ སངྒྷིཀཏྟཱ ‘‘ན ཙ, བྷིཀྑཝེ, སངྒྷིཀཾ ཡཐཱཝུཌྜྷཾ པཊིབཱཧིཏབྦཾ, ཡོ པཊིབཱཧེཡྻ, ཨཱཔཏྟི དུཀྐཊསྶཱ’’ཏི ཨིམིནཱ པཱལི༹ནཡེན (ཙཱུལ༹ཝ. ༣༡༡) ཝུཏྟཾ. ཨེཏེནེཝ ནཡེན སབྦེསུ བལཝཙཱིཝརེསུ སནྟེསུཔི ཝུཌྜྷསྶེཝ དཱཏབྦནྟི སིདྡྷཾ. ཝུཌྜྷེསུ…པེ… དཱཏབྦནྟི ཀརཎསནྣིདྷིམོཙནཏྠཾ ཝུཏྟཾ. ཏེནེཝཱཧ ‘‘སཙེ ཝུཌྜྷོ’’ཏྱཱདི. ནཝཀཏརེནཔི ཧི ཀརཎསནྣིདྷིཾ མོཙེཏྭཱ ཀཐིནེ ཨཏྠཏེ ཨནུམོདནཾ ཀརོནྟསྶ སངྒྷསྶ པཉྩཱནིསཾསལཱབྷོ ཧོཏཱིཏི. ཨཔིཙཱཏིཨཱདིནཱ སངྒྷེན ཀཏྟབྦཝཏྟཾ དསྶེཏི. ཝཙནཀྐམོ པན ཨེཝཾ ཀཱཏབྦོ – ཀཐིནདུསྶཾ ལབྷིཏྭཱ སངྒྷེ སཱིམཱཡ སནྣིཔཏིཏེ ཨེཀེན བྷིཀྑུནཱ ‘‘བྷནྟེ, སངྒྷསྶ ཨིདཾ ཀཐིནདུསྶཾ ཨུཔྤནྣཾ, སངྒྷོ ཨིམཾ ཀཐིནདུསྶཾ ཀཐནྣཱམསྶ བྷིཀྑུནོ ¶ དདེཡྻ ཀཐིནཾ ཨཏྠརིཏུ’’ནྟི ཝུཏྟེ ཨཉྙེན ‘‘ཡོ ཛིཎྞཙཱིཝརོ, ཏསྶཱ’’ཏི ཝཏྟབྦཾ, ཏཏོ པུརིམེན ‘‘བཧཱུ ¶ ཛིཎྞཙཱིཝརཱ’’ཏི ཝཱ ‘‘ནཏྠི ཨིདྷ ཛིཎྞཙཱིཝརཱ’’ཏི ཝཱ ཝུཏྟེ ཨཔརེན ‘‘ཏེན ཧི ཝུཌྜྷསྶཱ’’ཏི ཝཏྟབྦཾ, པུན པུརིམེན ‘‘ཀོ ཨེཏྠ ཝུཌྜྷོ’’ཏི ཝུཏྟེ ཨིཏརེན ‘‘ཨིཏྠནྣཱམོ བྷིཀྑཱུ’’ཏི ཝཏྟབྦཾ, པུན པུརིམེན ‘‘སོ བྷིཀྑུ ཏདཧེཝ ཙཱིཝརཾ ཀཏྭཱ ཨཏྠརིཏུཾ སཀྐོཏཱི’’ཏི ཝུཏྟེ ཨིཏརེན ‘‘སོ སཀྐོཏཱི’’ཏི ཝཱ ‘‘སངྒྷོ མཧཱཐེརསྶ སངྒཧཾ ཀརིསྶཏཱི’’ཏི ཝཱ ཝཏྟབྦཾ, པུན པུརིམེན ‘‘སོ མཧཱཐེརོ ཨཊྛཧི ཨངྒེཧི སམནྣཱགཏོ’’ཏི ཝུཏྟེ ཨིཏརེན ‘‘ཨཱམ སམནྣཱགཏོ’’ཏི ཝཏྟབྦཾ, ཏཏོ ‘‘སཱདྷུ སུཊྛུ ཏསྶ དཱཏབྦ’’ནྟི ཝུཏྟེ བྱཏྟེན བྷིཀྑུནཱ པཊིབལེན སངྒྷོ ཉཱཏབྦོ.

ཨེཏྠ ཙ ‘‘བྷནྟེ, སངྒྷསྶཱ’’ཏིཨཱདིཝཙནཾ ‘‘སུཎཱཏུ མེ, བྷནྟེ, སངྒྷོ, ཨིདཾ སངྒྷསྶ ཀཐིནདུསྶཾ ཨུཔྤནྣཾ, ཡདི སངྒྷསྶ པཏྟཀལླཾ, སངྒྷོ ཨིམཾ ཀཐིནདུསྶཾ ཨིཏྠནྣཱམསྶ བྷིཀྑུནོ དདེཡྻ ཀཐིནཾ ཨཏྠརིཏུ’’ནྟི ཨིམཱཡ ཉཏྟིཔཱལི༹ཡཱ སམེཏི. ‘‘ཡོ ཛིཎྞཙཱིཝརོ, ཏསྶཱ’’ཏིཨཱདི ‘‘སངྒྷེན ཀསྶཱ’’ཏིཨཱདི ‘‘སངྒྷེན ཀསྶ དཱཏབྦཾ, ཡོ ཛིཎྞཙཱིཝརོ ཧོཏཱི’’ཏིཨཱདིནཱ ཨཊྛཀཐཱཝཙནེན (མཧཱཝ. ཨཊྛ. ༣༠༦) སམེཏི. ‘‘སོ མཧཱཐེརོ ཨཊྛཧངྒེཧི སམནྣཱགཏོ’’ཏིཨཱདི ‘‘ཨཊྛཧངྒེཧི སམནྣཱགཏོ པུགྒལོ བྷབྦོ ཀཐིནཾ ཨཏྠརིཏུ’’ནྟིཨཱདིཀཱཡ པརིཝཱརཔཱལི༹ཡཱ (པརི. ༤༠༩) སམེཏཱིཏི དཊྛབྦཾ. ཡསྶ པན དཱིཡཏི, ཏསྶ ཉཏྟིདུཏིཡཀམྨཝཱཙཱཡ དཱཏབྦནྟི སམྦནྡྷོ. ཨིམིནཱ ཨིམསྶ ཀཐིནདཱནཀམྨསྶ གརུཀཏྟཱ ན ཨཔལོཀནམཏྟེན དཱཏབྦནྟི ཨིམམཏྠཾ པཀཱསེཏི. གརུཀལཧུཀཱནཾ བྷེདོ ཀམྨཱཀམྨཝིནིཙྪཡཀཐཱཡཾ ཨཱཝི བྷཝིསྶཏི.

ཨེཝཾ དིནྣེ པན ཀཐིནེ པཙྩུདྡྷརིཏབྦཱ ཨདྷིཊྛཱཏབྦཱ ཝཱཙཱ བྷིནྡིཏབྦཱཏི སམྦནྡྷོ. སཙེ ཏཾ ཀཐིནདུསྶཾ ནིཊྛིཏཔརིཀམྨམེཝ ཧོཏཱིཏི ཨིམིནཱ ཀཐིནདུསྶཾ ནཱམ ན ཀེཝལཾ པཀཏིསཱཊཀམེཝ ¶ ཧོཏི, ཨཐ ཁོ པརིནིཊྛིཏསཏྟཝིདྷཔུབྦཀིཙྩཙཱིཝརམྤི ཧོཏཱིཏི དསྶེཏི, ཏསྨཱ ནིཊྛིཏཙཱིཝརསྨིཾ དིནྣེ སཏྟཝིདྷཔུབྦཀིཙྩཀརཎེན ཨཏྠོ ནཏྠི, ཀེཝལཾ པཙྩུདྡྷརཎཱདཱིནིཡེཝ ཀཱཏབྦཱནི. སཙེ པན ཀིཉྩི ཨཔརིནིཊྛིཏཾ ཧོཏི, ཨནྟམསོ ཀཔྤབིནྡུམཏྟམྤི, ཏཾ ནིཊྛཱཔེཏྭཱཡེཝ པཙྩུདྡྷརཎཱདཱིནི ཀཱཏབྦཱནི. གཎྛིཀཔཊྚཔཱསཀཔཊྚཱནི པན སིབྦནནྟོགདྷཱནི, ཏཱནིཔི ནིཊྛཱཔེཏྭཱཡེཝ ཀཱཏབྦཱནི. ཨནིཊྛཱཔེནྟོ ཨནིཊྛིཏསིབྦནཀིཙྩམེཝ ཧོཏི. ཝུཏྟཉྷི ཨཊྛཀཐཱཡཾ (པཱརཱ. ཨཊྛ. ༢.༤༦༢-༤༦༣) ‘‘ཏཏྠ ཀཏནྟི སཱུཙིཀམྨཔརིཡོསཱནེན ¶ ཀཏཾ, སཱུཙིཀམྨཔརིཡོསཱནཾ ནཱམ ཡཾ ཀིཉྩི སཱུཙིཡཱ ཀཏྟབྦཾ. པཱསཀཔཊྚགཎྛིཀཔཊྚཔརིཡོསཱནཾ ཀཏྭཱ སཱུཙིཡཱ པཊིསཱམན’’ནྟི. ཨིདཉྷི ཀཐིནཝཏྟཾ ནཱམ བུདྡྷཔྤསཏྠནྟི ‘‘ཨཏྠཏཀཐིནཱནཾ ཝོ བྷིཀྑཝེ པཉྩ ཀཔྤིསྶནྟཱི’’ཏིཨཱདིནཱ པསཏྠཾ.

ཀཏཔརིཡོསིཏཾ པན ཀཐིནཾ གཧེཏྭཱཏི –

‘‘དྷོཝནཉྩ ཝིཙཱརོ ཙ, ཚེདནཾ བནྡྷནམྤི ཙ;

སིབྦནཾ རཛནཾ ཀཔྤཾ, པུབྦཀིཙྩནྟི ཝུཙྩཏཱི’’ཏི. (ཝི. ཝི. ༢༧༠༧) –

ཝུཏྟཱནི སཏྟཝིདྷཔུབྦཀརཎཱནི ཀཏྭཱ པརིཡོསཱཔིཏཾ ཀཐིནཙཱིཝརཾ གཧེཏྭཱ. ཨཏྠཱརཀེན བྷིཀྑུནཱ པཙྩུདྡྷརིཏབྦཱ ཨདྷིཊྛཱཏབྦཱ ཝཱཙཱ བྷིནྡིཏབྦཱཏི སམྦནྡྷོ. སངྒྷཱཊིཡཱ ཀཐིནཾ ཨཏྠརིཏུཀཱམོ བྷིཀྑུ པུབྦེ ཏིཙཱིཝརཱདྷིཊྛཱནེན ཨདྷིཊྛིཏཾ པོརཱཎིཀཾ སངྒྷཱཊིཾ ‘‘ཨིམཾ སངྒྷཱཊིཾ པཙྩུདྡྷརཱམཱི’’ཏི ཝཏྭཱ པཙྩུདྡྷརིཏབྦཱ, ཏཏོ ཨནདྷིཊྛིཏཾ ནཝཾ སངྒྷཱཊིཾ ‘‘ཨིམཾ སངྒྷཱཊིཾ ཨདྷིཊྛཱམཱི’’ཏི ཝཏྭཱ ཨདྷིཊྛཱཏབྦཱ, ཏཏོ ཨཏྠརཎཀཱལེ ཏམེཝ ཨདྷིཊྛིཏསངྒྷཱཊིཾ ‘‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’’ཏི ཝཱཙཱ བྷིནྡིཏབྦཱཏི ཨཏྠོ. ཨེས ནཡོ ཨིཏརེསུ. ཨེཏེན ཀཐིནཏྠཱརཎཾ ནཱམ ཝཙཱིབྷེདཀརཎམེཝ ཧོཏི, ན ཀིཉྩི ཀཱཡཝིཀཱརཀརཎནྟི ཨིམམཏྠཾ དཱིཔེཏི ¶ . ཏཐཱ ཧི ཝུཏྟཾ ཝིནཡཏྠམཉྫཱུསཱཡཾ (ཀངྑཱ. ཨབྷི. ཊཱི. ཀཐིནསིཀྑཱཔདཝཎྞནཱ) ‘‘ཨཏྠརིཏབྦནྟི ཨཏྠརཎཾ ཀཱཏབྦཾ, ཏཉྩ ཁོ ཏཐཱཝཙཱིབྷེདཀརཎམེཝཱཏི དཊྛབྦ’’ནྟི.

ཏཏྠ པཙྩུདྡྷཱརོ ཏིཝིདྷོ ‘‘ཨིམཾ སངྒྷཱཊིཾ པཙྩུདྡྷརཱམཱི’’ཏི སངྒྷཱཊིཡཱ པཙྩུདྡྷཱརོ, ‘‘ཨིམཾ ཨུཏྟརཱསངྒཾ པཙྩུདྡྷརཱམཱི’’ཏི ཨུཏྟརཱསངྒསྶ པཙྩུདྡྷཱརོ, ‘‘ཨིམཾ ཨནྟརཝཱསཀཾ པཙྩུདྡྷརཱམཱི’’ཏི ཨནྟརཝཱསཀསྶ པཙྩུདྡྷཱརོཏི. ཝུཏྟཉྷེཏཾ པརིཝཱརེ (པརི. ༤༠༨) ‘‘པཙྩུདྡྷཱརོ ཏཱིཧི དྷམྨེཧི སངྒཧིཏོ སངྒྷཱཊིཡཱ ཨུཏྟརཱསངྒེན ཨནྟརཝཱསཀེནཱ’’ཏི. ཨདྷིཊྛཱནཾ ཏིཝིདྷཾ ‘‘ཨིམཾ སངྒྷཱཊིཾ ཨདྷིཊྛཱམཱི’’ཏི སངྒྷཱཊིཡཱ ཨདྷིཊྛཱནཾ, ‘‘ཨིམཾ ཨུཏྟརཱསངྒཾ ཨདྷིཊྛཱམཱི’’ཏི ཨུཏྟརཱསངྒསྶ ཨདྷིཊྛཱནཾ, ‘‘ཨིམཾ ཨནྟརཝཱསཀཾ ཨདྷིཊྛཱམཱི’’ཏི ཨནྟརཝཱསཀསྶ ཨདྷིཊྛཱནནྟི. ཝུཏྟཉྷེཏཾ པརིཝཱརེ (པརི. ༤༠༨) ‘‘ཨདྷིཊྛཱནཾ ཏཱིཧི དྷམྨེཧི སངྒཧིཏཾ སངྒྷཱཊིཡཱ ཨུཏྟརཱསངྒེན ཨནྟརཝཱསཀེནཱ’’ཏི.

ཨཐ ¶ ཝཱ ཨདྷིཊྛཱནཾ དུཝིདྷཾ ཀཱཡེན ཨདྷིཊྛཱནཾ, ཝཱཙཱཡ ཨདྷིཊྛཱནནྟི. ཏཏྠ པོརཱཎིཀཾ སངྒྷཱཊིཾ ‘‘ཨིམཾ སངྒྷཱཊིཾ པཙྩུདྡྷརཱམཱི’’ཏི པཙྩུདྡྷརིཏྭཱ ནཝཾ སངྒྷཱཊིཾ ཧཏྠེན གཧེཏྭཱ ‘‘ཨིམཾ སངྒྷཱཊིཾ ཨདྷིཊྛཱམཱི’’ཏི ཙིཏྟེན ཨཱབྷོགཾ ཀཏྭཱ ཀཱཡཝིཀཱརཀརཎེན ཀཱཡེན ཝཱ ཨདྷིཊྛཱཏབྦཾ, ཝཙཱིབྷེདཾ ཀཏྭཱ ཝཱཙཱཡ ཝཱ ཨདྷིཊྛཱཏབྦཾ. ཝུཏྟཉྷི ཨཊྛཀཐཱཡཾ (པཱརཱ. ཨཊྛ. ༢.༤༦༩; ཀངྑཱ. ཨཊྛ. ཀཐིནསིཀྑཱཔདཝཎྞནཱ) ‘‘ཏཏྠ ཡསྨཱ དྭེ ཙཱིཝརསྶ ཨདྷིཊྛཱནཱནི ཀཱཡེན ཝཱ ཨདྷིཊྛེཏི, ཝཱཙཱཡ ཝཱ ཨདྷིཊྛེཏཱིཏི ཝུཏྟཾ, ཏསྨཱ…པེ… ཨདྷིཊྛཱཏབྦཱ’’ཏི. ཨཐ ཝཱ ཨདྷིཊྛཱནཾ དུཝིདྷཾ སམྨུཁཱདྷིཊྛཱནཔརམྨུཁཱདྷིཊྛཱནཝསེན. ཏཏྠ ཡདི ཙཱིཝརཾ ཧཏྠཔཱསེ ཋིཏཾ ཧོཏི, ‘‘ཨིམཾ སངྒྷཱཊིཾ ཨདྷིཊྛཱམཱི’’ཏི ཝཙཱིབྷེདཾ ཀཏྭཱ ཨདྷིཊྛཱཏབྦཾ, ཨཐ ཨནྟོགབྦྷེ ཝཱ སཱམནྟཝིཧཱརེ ཝཱ ཧོཏི, ཋཔིཏཊྛཱནཾ སལླཀྑེཏྭཱ ‘‘ཨེཏཾ སངྒྷཱཊིཾ ཨདྷིཊྛཱམཱི’’ཏི ཝཙཱིབྷེདཾ ཀཏྭཱ ཨདྷིཊྛཱཏབྦཾ. ཝུཏྟཉྷི ¶ ཨཊྛཀཐཱཡཾ (པཱརཱ. ཨཊྛ. ༢.༤༦༩; ཀངྑཱ. ཨཊྛ. ཀཐིནསིཀྑཱཔདཝཎྞནཱ) ‘‘ཏཏྲ དུཝིདྷཾ ཨདྷིཊྛཱནཾ སཙེ ཧཏྠཔཱསེ ཧོཏཱི’’ཏིཨཱདི, ཝིནཡཏྠམཉྫཱུསཱཡཉྩ (ཀངྑཱ. ཨབྷི. ཊཱི. ཀཐིནསིཀྑཱཔདཝཎྞནཱ) ‘‘དུཝིདྷནྟི སམྨུཁཱཔརམྨུཁཱབྷེདེན དུཝིདྷ’’ནྟི.

ཨཏྠཱརོ ཀཏིཝིདྷོ? ཨཏྠཱརོ ཨེཀཝིདྷོ. ཝཙཱིབྷེདཀརཎེནེཝ ཧི ཨཏྠཱརོ སམྤཛྫཏི, ན ཀཱཡཝིཀཱརཀརཎེན. ཨཡམཏྠོ ཡཐཱཝུཏྟ-པརིཝཱརཔཱལི༹ཡཱ ཙ ‘‘ཨཏྠརིཏབྦནྟི ཨཏྠརཎཾ ཀཱཏབྦཾ, ཏཉྩ ཁོ ཏཐཱཝཙཱིབྷེདཀརཎམེཝཱཏི དཊྛབྦ’’ནྟི ཝིནཡཏྠམཉྫཱུསཱཝཙནེན ཙ ཝིཉྙཱཡཏི. ཨཐ ཝཱ ཨཏྠཱརོ ཏིཝིདྷོ ཝཏྠུཔྤབྷེདེན. ཏཏྠ ཡདི སངྒྷཱཊིཡཱ ཀཐིནཾ ཨཏྠརིཏུཀཱམོ ཧོཏི, པོརཱཎིཀཱ སངྒྷཱཊི པཙྩུདྡྷརིཏབྦཱ, ནཝཱ སངྒྷཱཊི ཨདྷིཊྛཱཏབྦཱ, ‘‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’’ཏི ཝཱཙཱ བྷིནྡིཏབྦཱ. ཨཐ ཨུཏྟརཱསངྒེན ཀཐིནཾ ཨཏྠརིཏུཀཱམོ ཧོཏི, པོརཱཎཀོ ཨུཏྟརཱསངྒོ པཙྩུདྡྷརིཏབྦོ, ནཝོ ཨུཏྟརཱསངྒོ ཨདྷིཊྛཱཏབྦོ, ‘‘ཨིམིནཱ ཨུཏྟརཱསངྒེན ཀཐིནཾ ཨཏྠརཱམཱི’’ཏི ཝཱཙཱ བྷིནྡིཏབྦཱ. ཨཐ ཨནྟརཝཱསཀེན ཀཐིནཾ ཨཏྠརིཏུཀཱམོ ཧོཏི, པོརཱཎཀོ ཨནྟརཝཱསཀོ པཙྩུདྡྷརིཏབྦོ, ནཝོ ཨནྟརཝཱསཀོ ཨདྷིཊྛཱཏབྦོ, ‘‘ཨིམིནཱ ཨནྟརཝཱསཀེན ཀཐིནཾ ཨཏྠརཱམཱི’’ཏི ཝཱཙཱ བྷིནྡིཏབྦཱ. ཝུཏྟཉྷེཏཾ པརིཝཱརེ (པརི. ༤༡༣) ‘‘སཙེ སངྒྷཱཊིཡཱ’’ཏིཨཱདི.

ཨེཏྠ སིཡཱ – ཀིཾ པན ‘‘ཨིམཾ སངྒྷཱཊིཾ པཙྩུདྡྷརཱམཱི’’ཏི ཝིསེསཾ ཀཏྭཱཝ པཙྩུདྡྷརིཏབྦཱ, ཨུདཱཧུ ‘‘ཨིམཾ པཙྩུདྡྷརཱམཱི’’ཏི སཱམཉྙཏོཔི པཙྩུདྡྷརིཏབྦཱཏི? པརིཀྑཱརཙོལཱ༹དྷིཊྛཱནེན ¶ ཨདྷིཊྛིཏཾ ཙཱིཝརཾ ‘‘ཨིམཾ པཙྩུདྡྷརཱམཱི’’ཏི སཱམཉྙཏོ པཙྩུདྡྷརིཏབྦཾ, ན ‘‘ཨིམཾ སངྒྷཱཊིཾ པཙྩུདྡྷརཱམཱི’’ཏི ཝིསེསཏོ པཙྩུདྡྷརིཏབྦཾ. ཀསྨཱ? པུབྦེ ཨལདྡྷནཱམཏྟཱ. ཏིཙཱིཝརཱདྷིཊྛཱནེན ཨདྷིཊྛིཏཾ པན ཙཱིཝརཾ ཝིསེསཏོཡེཝ པཙྩུདྡྷརིཏབྦཾ, ན སཱམཉྙཏོ. ཀསྨཱ? པཊིལདྡྷཝིསེསནཱམཏྟཱ ¶ . ཨིདྷ པན ཀཐིནཱདྷིཀཱརེ པུབྦེཝ ཏིཙཱིཝརཱདྷིཊྛཱནེན ཨདྷིཊྛིཏཏྟཱ ཝིསེསཏོཡེཝ པཙྩུདྡྷརིཏབྦནྟི དཊྛབྦཾ. ཝུཏྟཉྷེཏཾ པརིཝཱརེ (པརི. ༤༠༨) ཀཐིནཱདྷིཀཱརེ ‘‘པཙྩུདྡྷཱརོ ཏཱིཧི དྷམྨེཧི སངྒཧིཏོ སངྒྷཱཊིཡཱ ཨུཏྟརཱསངྒེན ཨནྟརཝཱསཀེནཱ’’ཏི. ཀིཾ པན ནིཙྩཏེཙཱིཝརིཀོཡེཝ ཀཐིནཾ ཨཏྠརིཏུཾ ལབྷཏི, ཨུདཱཧུ ཨཝཏྠཱཏེཙཱིཝརིཀོཔཱིཏི? ཏེཙཱིཝརིཀོ དུཝིདྷོ དྷུཏངྒཏེཙཱིཝརིཀཝིནཡཏེཙཱིཝརིཀཝསེན. ཏཏྠ དྷུཏངྒཏེཙཱིཝརིཀོ ‘‘ཨཏིརེཀཙཱིཝརཾ པཊིཀྑིཔཱམི, ཏེཙཱིཝརིཀངྒཾ སམཱདིཡཱམཱི’’ཏི ཨདྷིཊྛཧིཏྭཱ དྷཱརཎཏོ སབྦཀཱལམེཝ དྷཱརེཏི. ཝིནཡཏེཙཱིཝརིཀོ པན ཡདཱ ཏིཙཱིཝརཱདྷིཊྛཱནེན ཨདྷིཊྛཧིཏྭཱ དྷཱརེཏུཀཱམོ ཧོཏི, ཏདཱ ཏཐཱ ཨདྷིཊྛཧིཏྭཱ དྷཱརེཏི. ཡདཱ པན པརིཀྑཱརཙོལཱ༹དྷིཊྛཱནེན ཨདྷིཊྛཧིཏྭཱ དྷཱརེཏུཀཱམོ ཧོཏི, ཏདཱ ཏཐཱ ཨདྷིཊྛཧིཏྭཱ དྷཱརེཏི, ཏསྨཱ ཏིཙཱིཝརཱདྷིཊྛཱནསྶ དུཔྤརིཧཱརཏྟཱ སབྦདཱ དྷཱརེཏུཾ ཨསཀྐོནྟོ ཧུཏྭཱ པརིཀྑཱརཙོལ༹ཝསེན དྷཱརེནྟོཔི ཏཾ པཙྩུདྡྷརིཏྭཱ ཨཱསནྣེ ཀཱལེ ཏིཙཱིཝརཱདྷིཊྛཱནེན ཨདྷིཊྛཧནྟོཔི ཀཐིནཾ ཨཏྠརིཏུཾ ལབྷཏིཡེཝཱཏི དཊྛབྦཾ.

ཀཙྩི ནུ བྷོ ཀཐིནདཱནཀམྨཝཱཙཱབྷཎནསཱིམཱཡམེཝ ཀཐིནཾ ཨཏྠརིཏབྦཾ, ཨུདཱཧུ ཨཉྙསཱིམཱཡཱཏི? ཡདི ཀཐིནདཱནཀམྨཝཱཙཱབྷཎནབདྡྷསཱིམཱ ཝསྶཱུཔནཱཡིཀཁེཏྟབྷཱུཏཨུཔཙཱརསཱིམཱཡ ཨནྟོ ཋིཏཱ, ཨེཝཾ སཏི ཏསྨིཾཡེཝ སཱིམམཎྜལེ ཨཏྠརཎཾ ཀཱཏབྦཾ. ཀཐཾ ཝིཉྙཱཡཏཱིཏི ཙེ? ‘‘པརིནིཊྛིཏཔུབྦཀརཎམེཝ ཙེ དཱཡཀོ སངྒྷསྶ དེཏི, སམྤཊིཙྪིཏྭཱ ཀམྨཝཱཙཱཡ དཱཏབྦཾ. ཏེན ཙ ཏསྨིཾཡེཝ སཱིམམཎྜལེ ཨདྷིཊྛཧིཏྭཱ ཨཏྠརིཏྭཱ སངྒྷོ ཨནུམོདཱཔེཏབྦོ’’ཏི ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༣༠༨) ཨཱགཏཏྟཱ ཝིཉྙཱཡཏཱིཏི. ཡདི ཨེཝཾ ‘‘ཏསྨིཾཡེཝ སཱིམམཎྜལེ’’ཨིཙྩེཝ ཊཱིཀཱཡཾ ཝུཏྟཏྟཱ ‘‘ཡསྨིཾ ཀིསྨིཉྩི ¶ སཱིམམཎྜལེ ཀམྨཝཱཙཾ བྷཎིཏྭཱ ཏསྨིཾཡེཝ སཱིམམཎྜལེ ཨཏྠརིཏབྦ’’ནྟི ཝཏྟབྦཾ, ན ‘‘ཀཐིནདཱནཀམྨཝཱཙཱབྷཎནབདྡྷསཱིམཱ ཝསྶཱུཔནཱཡིཀཁེཏྟབྷཱུཏཨུཔཙཱརསཱིམཱཡ ཨནྟོ ཋིཏཱ’’ཏི ཝིསེསཾ ཀཏྭཱ ཝཏྟབྦནྟི? ན ན ཝཏྟབྦཾ. ཀམྨཝཱཙཱབྷཎནསཱིམཱ ཧི བདྡྷསཱིམཱབྷཱུཏཱ, ཀཐིནཏྠཱརསཱིམཱ པན ཨུཔཙཱརསཱིམཱབྷཱུཏཱ, ཨུཔཙཱརསཱིམཱ ཙ ནཱམ བདྡྷསཱིམཾ ཨཝཏྠརིཏྭཱཔི གཙྪཏི, ཏསྨཱ སཱ སཱིམཱ བདྡྷསཱིམཱ ཙ ཧོཏི ཨུཔཙཱརསཱིམཱ ཙཱཏི ཏསྨིཾཡེཝ སཱིམམཎྜལེ ཀཐིནདཱནཀམྨཝཱཙཾ ¶ བྷཎིཏྭཱ ཏཏྠེཝ ཨཏྠརཎཾ ཀཱཏབྦཾ, ན ཡསྨིཾ ཀིསྨིཉྩི སཱིམམཎྜལེ ཀམྨཝཱཙཾ བྷཎིཏྭཱ ཏཏྠེཝ ཨཏྠརཎཾ ཀཏྟབྦནྟི དཊྛབྦཾ. ཨེཝམྤི ‘‘ཨུཔཙཱརསཱིམཱཡ’’ཨིཙྩེཝ ཝཏྟབྦཾ, ན ‘‘ཝསྶཱུཔནཱཡིཀཁེཏྟབྷཱུཏཨུཔཙཱརསཱིམཱཡཱ’’ཏི, ཏམྤི ཝཏྟབྦམེཝ. ཏེསཾ བྷིཀྑཱུནཾ ཝསྶཱུཔནཱཡིཀཁེཏྟབྷཱུཏཱཡ ཨེཝ ཨུཔཙཱརསཱིམཱཡ ཀཐིནཏྠཱརཾ ཀཱཏུཾ ལབྷཏི, ན ཨཉྙཨུཔཙཱརསཱིམཱཡ. ཝུཏྟཉྷི ཨཊྛཀཐཱཡཾ (མཧཱཝ. ཨཊྛ. ༣༠༦) ‘‘ཨཉྙསྨིཾ ཝིཧཱརེ ཝུཏྠཝསྶཱཔི ན ལབྷནྟཱིཏི མཧཱཔཙྩརིཡཾ ཝུཏྟ’’ནྟི.

ཡཐིཙྪསི, ཏཐཱ བྷཝཏུ, ཨཔི ཏུ ཁལུ ‘‘ཀམྨཝཱཙཱབྷཎནསཱིམཱ བདྡྷསཱིམཱབྷཱུཏཱ, ཀཐིནཏྠཱརསཱིམཱ ཨུཔཙཱརསཱིམཱབྷཱུཏཱ’’ཏི ཏུམྷེཧི ཝུཏྟཾ, ཏཐཱབྷཱུཏབྷཱཝོ ཀཐཾ ཛཱནིཏབྦོཏི? ཝུཙྩཏེ – ཀཐིནཏྠཱརསཱིམཱཡཾ ཏཱཝ ཨུཔཙཱརསཱིམཱབྷཱུཏབྷཱཝོ ‘‘སཙེ པན ཨེཀསཱིམཱཡ བཧཱུ ཝིཧཱརཱ ཧོནྟི, སབྦེ བྷིཀྑཱུ སནྣིཔཱཏེཏྭཱ ཨེཀཏྠ ཀཐིནཾ ཨཏྠརིཏབྦ’’ནྟི ཨིམིསྶཱ ཨཊྛཀཐཱཡ (མཧཱཝ. ཨཊྛ. ༣༠༦) ཨཏྠཾ སཾཝཎྞེཏུཾ ‘‘ཨེཀསཱིམཱཡཱཏི ཨེཀཨུཔཙཱརསཱིམཱཡཱཏི ཨཏྠོ ཡུཛྫཏཱི’’ཏི ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༣༠༦) ཨཱགཏཏྟཱ ཝིཉྙཱཡཏི. ཀམྨཝཱཙཱབྷཎནསཱིམཱཡ བདྡྷསཱིམཱབྷཱུཏབྷཱཝོ པན ‘‘ཏེ ཙ ཁོ ཧཏྠཔཱསཾ ཨཝིཛཧིཏྭཱ ཨེཀསཱིམཱཡཾ ཋིཏཱ. སཱིམཱ ཙ ནཱམེསཱ བདྡྷསཱིམཱ ¶ ཨབདྡྷསཱིམཱཏི དུཝིདྷཱ ཧོཏཱི’’ཏི ཀངྑཱཝིཏརཎིཡཾ (ཀངྑཱ. ཨཊྛ. ནིདཱནཝཎྞནཱ) ཨཱགཏཏྟཱ ཙ ‘‘སཱིམཱ ཙ ནཱམེསཱ ཀཏམཱ, ཡཏྠ ཧཏྠཔཱསཾ ཨཝིཛཧིཏྭཱ ཋིཏཱ ཀམྨཔྤཏྟཱ ནཱམ ཧོནྟཱིཏི ཨནུཡོགཾ སནྡྷཱཡ སཱིམཾ དསྶེནྟོ ཝིབྷཱགཝནྟཱནཾ སབྷཱཝཝིབྷཱཝནཾ ཝིབྷཱགདསྶནམུཁེནེཝ ཧོཏཱིཏི ‘སཱིམཱ ཙ ནཱམེསཱ’ཏིཨཱདིམཱཧཱ’’ཏི ཝིནཡཏྠམཉྫཱུསཱཡཾ (ཀངྑཱ. ཨབྷི. ཊཱི. ནིདཱནཝཎྞནཱ) ཨཱགཏཏྟཱ ཙ ཝིཉྙཱཡཏི.

ཏཏྠ ཀཏིཝིདྷཱ བདྡྷསཱིམཱ, ཀཏིཝིདྷཱ ཨབདྡྷསཱིམཱཏི? ཏིཝིདྷཱ བདྡྷསཱིམཱ ཁཎྜསཱིམཱསམཱནསཾཝཱསསཱིམཱཨཝིཔྤཝཱསསཱིམཱཝསེན. ཏིཝིདྷཱ ཨབདྡྷསཱིམཱ གཱམསཱིམཱཨུདཀུཀྑེཔསཱིམཱསཏྟབྦྷནྟརསཱིམཱཝསེནཱཏི དཊྛབྦཱ. ཀཐཾ ཝིཉྙཱཡཏཱིཏི ཙེ? ‘‘ཨེཝཾ ཨེཀཱདས ཝིཔཏྟིསཱིམཱཡོ ཨཏིཀྐམིཏྭཱ ཏིཝིདྷསམྤཏྟིཡུཏྟཱ ནིམིཏྟེན ནིམིཏྟཾ སམྦནྡྷིཏྭཱ སམྨཏཱ སཱིམཱ བདྡྷསཱིམཱཏི ཝེདིཏབྦཱ. ཁཎྜསཱིམཱ སམཱནསཾཝཱསསཱིམཱ ཨཝིཔྤཝཱསསཱིམཱཏི ཏསྶཱཡེཝ བྷེདོ. ཨབདྡྷསཱིམཱ པན གཱམསཱིམཱ སཏྟབྦྷནྟརསཱིམཱ ཨུདཀུཀྑེཔསཱིམཱཏི ཏིཝིདྷཱ’’ཏི ཀངྑཱཝིཏརཎིཡཾ (ཀངྑཱ. ཨཊྛ. ནིདཱནཝཎྞནཱ) ཨཱགཏཏྟཱ ཝིཉྙཱཡཏི. ཨེཝཾ ཏཱིསུ བདྡྷསཱིམཱསུ ¶ , ཏཱིསུ ཨབདྡྷསཱིམཱསཱུཏི ཚསུཡེཝ སཱིམཱསུ ཀམྨཔྤཏྟསངྒྷསྶ ཙཏུཝགྒཀརཎཱིཡཱདིཀམྨསྶ ཀཏྟབྦབྷཱཝཝཙནཏོ སུདྡྷཱཡ ཨུཔཙཱརསཱིམཱཡ ཀམྨཝཱཙཱཡ ཨབྷཎིཏབྦབྷཱཝོ ཝིཉྙཱཡཏི. ཨནྟོཨུཔཙཱརསཱིམཱཡ བདྡྷསཱིམཱཡ སཏི ཏཾ བདྡྷསཱིམཾ ཨཝཏྠརིཏྭཱཔི ཨུཔཙཱརསཱིམཱཡ གམནཏོ སཱ བདྡྷསཱིམཱ ཀམྨཝཱཙཱབྷཎནཱརཧཱ ཙ ཧོཏི ཀཐིནཏྠཱརཱརཧཱ ཙཱཏི ཝེདིཏབྦཾ.

ནནུ ཙ པནྣརསཝིདྷཱ སཱིམཱ ཨཊྛཀཐཱསུ (མཧཱཝ. ཨཊྛ. ༣༧༩; ཀངྑཱ. ཨཊྛ. ཨཀཱལཙཱིཝརསིཀྑཱཔདཝཎྞནཱ) ཨཱགཏཱ, ཨཐ ཀསྨཱ ཚལེ༹ཝ ཝུཏྟཱཏི? སཙྩཾ, ཏཱསུ པན པནྣརསསུ སཱིམཱསུ ཨུཔཙཱརསཱིམཱ སངྒྷལཱབྷཝིབྷཛནཱདིཊྛཱནམེཝ ཧོཏི, ལཱབྷསཱིམཱ ¶ ཏཏྲུཔྤཱདགཧཎཊྛཱནམེཝ ཧོཏཱིཏི ཨིམཱ དྭེ སཱིམཱཡོ སངྒྷཀམྨཀརཎཊྛཱནཾ ན ཧོནྟི, ནིགམསཱིམཱ ནགརསཱིམཱ ཛནཔདསཱིམཱ རཊྛསཱིམཱ རཛྫསཱིམཱ དཱིཔསཱིམཱ ཙཀྐཝཱལ༹སཱིམཱཏི ཨིམཱ པན སཱིམཱཡོ གཱམསཱིམཱཡ སམཱནགཏིཀཱ གཱམསཱིམཱཡམེཝ ཨནྟོགདྷཱཏི ན ཝིསུཾ ཝུཏྟཱཏི དཊྛབྦཾ. ཨེཏྠ ཙ ཨུཔཙཱརསཱིམཱཡ བདྡྷསཱིམཾ ཨཝཏྠརིཏྭཱ གཏབྷཱཝོ ཀཐཾ ཛཱནིཏབྦོཏི? ‘‘ཨུཔཙཱརསཱིམཱ པརིཀྑིཏྟསྶ ཝིཧཱརསྶ པརིཀྑེཔེན, ཨཔརིཀྑིཏྟསྶ པརིཀྑེཔཱརཧཊྛཱནེན པརིཙྪིནྣཱ’’ཏི ཨཊྛཀཐཱཡཾ (མཧཱཝ. ཨཊྛ. ༣༧༩) ཝུཏྟཏྟཱ པརིཀྑེཔཔརིཀྑེཔཱརཧཊྛཱནཱནཾ ཨནྟོ བདྡྷསཱིམཱཡ ཝིཛྫམཱནཱཡ ཏཾ ཨཝཏྠརིཏྭཱ ཨུཔཙཱརསཱིམཱ གཏཱ. ཏཐཱ ཧི ‘‘ཨིམིསྶཱ ཨུཔཙཱརསཱིམཱཡ ‘སངྒྷསྶ དམྨཱི’ཏི དིནྣཾ པན ཁཎྜསཱིམསཱིམནྟརིཀཱསུ ཋིཏཱནམྤི པཱཔུཎཱཏཱི’’ཏི (མཧཱཝ. ཨཊྛ. ༣༧༩) ཝུཏྟཾ. ཏེན ཉཱཡཏི ‘‘ཨུཔཙཱརསཱིམཱཡ ཨནྟོ ཋིཏཱ བདྡྷསཱིམཱ ཨུཔཙཱརསཱིམཱཔི ནཱམ ཧོཏཱི’’ཏི. ཧོཏུ, ཨེཝཾ སཏི ཨནྟོཨུཔཙཱརསཱིམཱཡཾ བདྡྷསཱིམཱཡ སཏི ཏཏྠེཝ ཀཐིནདཱནཀམྨཝཱཙཾ ཝཱཙཱཔེཏྭཱ ཏཏྠེཝ ཀཐིནཾ ཨཏྠརིཏབྦཾ བྷཝེཡྻ, ཨནྟོཨུཔཙཱརསཱིམཱཡཾ བདྡྷསཱིམཱཡ ཨཝིཛྫམཱནཱཡ ཀཐཾ ཀརིསྶནྟཱིཏི? ཨནྟོཨུཔཙཱརསཱིམཱཡཾ བདྡྷསཱིམཱཡ ཨཝིཛྫམཱནཱཡ བཧིཨུཔཙཱརསཱིམཱཡཾ ཝིཛྫམཱནབདྡྷསཱིམཾ ཝཱ ཨུདཀུཀྑེཔལབྷནཊྛཱནཾ ཝཱ གནྟྭཱ ཀམྨཝཱཙཾ ཝཱཙཱཔེཏྭཱ པུན ཝིཧཱརཾ ཨཱགནྟྭཱ ཝསྶཱུཔནཱཡིཀཁེཏྟབྷཱུཏཱཡ ཨུཔཙཱརསཱིམཱཡཾ ཋཏྭཱ ཀཐིནཾ ཨཏྠརིཏབྦནྟི དཊྛབྦཾ.

ནནུ ཙ བྷོ ཨེཝཾ སནྟེ ཨཉྙིསྶཱ སཱིམཱཡ ཉཏྟི, ཨཉྙིསྶཱ ཨཏྠཱརོ ཧོཏི, ཨེཝཾ སནྟེ ‘‘པརིནིཊྛིཏཔུབྦཀརཎམེཝ ཙེ དཱཡཀོ སངྒྷསྶ དེཏི, སམྤཊིཙྪིཏྭཱ ཀམྨཝཱཙཱཡ དཱཏབྦཾ. ཏེན ཙ ཏསྨིཾཡེཝ སཱིམམཎྜལེ ཨདྷིཊྛཧིཏྭཱ ཨཏྠརིཏྭཱ སངྒྷོ ཨནུམོདཱཔེཏབྦོ’’ཏི ཝུཏྟེན ¶ ཝཛིརབུདྡྷིཊཱིཀཱཝཙནེན (ཝཛིར. ཊཱི. མཧཱཝགྒ ༣༠༨) ཝིརུཛ྄ཛྷཏཱིཏི? ནནུ ¶ ཨཝོཙུམྷ ‘‘ཀམྨཝཱཙཱབྷཎནསཱིམཱ བདྡྷསཱིམཱབྷཱུཏཱ, ཀཐིནཏྠཱརསཱིམཱ ཨུཔཙཱརསཱིམཱབྷཱུཏཱ’’ཏི. ཏསྨཱ ཝཛིརབུདྡྷིཊཱིཀཱཝཙནེན ན ཝིརུཛ྄ཛྷཏི. ཏཏྠ པུབྦེ ཡེབྷུཡྻེན བདྡྷསཱིམཝིཧཱརཏྟཱ སམགྒཾ སངྒྷཾ སནྣིཔཱཏེཏྭཱ ཀམྨཝཱཙཾ ཝཱཙཱཔེཏྭཱ ཨུཔཙཱརསཱིམབདྡྷསཱིམབྷཱུཏེ ཏསྨིཾཡེཝ ཝིཧཱརེ ཨཏྠརཎཾ སནྡྷཱཡ ཝུཏྟཾ. བདྡྷསཱིམཝིཧཱརེ ཨཧོནྟེཔི ཨནྟོཨུཔཙཱརསཱིམཱཡཾ བདྡྷསཱིམཱཡ ཝིཛྫམཱནཱཡ ཏཏྠེཝ སཱིམམཎྜལེ ཀམྨཝཱཙཾ ཝཱཙཱཔེཏྭཱ ཏཏྠེཝ ཨཏྠརིཏབྦབྷཱཝོ ཨམྷེཧིཔི ཝུཏྟོཡེཝ. ཡདི པན ན ཙེཝ བདྡྷསཱིམཝིཧཱརོ ཧོཏི, ན ཙ ཨནྟོཨུཔཙཱརསཱིམཱཡཾ བདྡྷསཱིམཱ ཨཏྠི, ཨེཝརཱུཔེ ཝིཧཱརེ ཀམྨཝཱཙཾ ཝཱཙཱཔེཏུཾ ན ལབྷཏི, ཨཉྙཾ བདྡྷསཱིམཾ ཝཱ ཨུདཀུཀྑེཔཾ ཝཱ གནྟྭཱ ཀམྨཝཱཙཾ ཝཱཙཱཔེཏྭཱ ཨཏྟནོ ཝིཧཱརཾ ཨཱགནྟྭཱ ཝསྶཱུཔནཱཡིཀཁེཏྟབྷཱུཏཱཡ ཨུཔཙཱརསཱིམཱཡ ཋཏྭཱ ཀཐིནཾ ཨཏྠརིཏབྦཾ. ཨེཝམེཝ པརམྤརབྷཱུཏཱ བཧཝོ ཨཱཙརིཡཝརཱ ཀརོནྟཱིཏི དཊྛབྦཾ.

ཨཔརེ པན ཨཱཙརིཡཱ ‘‘བདྡྷསཱིམཝིརཧཱཡ སུདྡྷཨུཔཙཱརསཱིམཱཡ སཏི ཏསྶཾཡེཝ ཨུཔཙཱརསཱིམཱཡཾ ཉཏྟིཀམྨཝཱཙཱཔི ཝཱཙེཏབྦཱ, ཀཐིནཾ ཨཏྠརིཏབྦཾ, ན ཨཉྙིསྶཱ སཱིམཱཡ ཉཏྟི, ཨཉྙིསྶཱ ཨཏྠརཎཾ ཀཱཏབྦ’’ནྟི ཝདནྟི. ཨཡཾ པན ནེསམདྷིཔྤཱཡོ – ‘‘ཀཐིནཏྠཏསཱིམཱཡནྟི ཨུཔཙཱརསཱིམཾ སནྡྷཱཡ ཝུཏྟ’’ནྟི ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༣༠༦) ཀཐིནཏྠཱརཊྛཱནབྷཱུཏཱཡ སཱིམཱཡ ཨུཔཙཱརསཱིམཱབྷཱཝོ ཝུཏྟོ, ཏསྶཾཡེཝ ཊཱིཀཱཡཾ (ཝཛིར. ཊཱི. མཧཱཝགྒ ༣༠༨) པུབྦེ ནིདྡིཊྛཔཱཋེ ‘‘ཏསྨིཾཡེཝ སཱིམམཎྜལེ ཨདྷིཊྛཧིཏྭཱ ཨཏྠརིཏྭཱ སངྒྷོ ཨནུམོདཱཔེཏབྦོ’’ཏི ཀམྨཝཱཙཱབྷཎནསཱིམཱཡམེཝ ཨཏྠརིཏབྦབྷཱཝོ ཙ ཝུཏྟོ, ཏསྨཱ ཨཉྙིསྶཱ སཱིམཱཡ ཉཏྟི, ཨཉྙིསྶཱ ཨཏྠརཎཾ ན ཀཱཏབྦཾ, ཏསྶཾཡེཝ ཨུཔཙཱརསཱིམཱཡཾ ཀམྨཝཱཙཾ སཱཝེཏྭཱ ཏསྨིཾཡེཝ ཨཏྠཱརོ ཀཱཏབྦོ, ཨུཔཙཱརསཱིམཏོ བཧི ཋིཏཾ བདྡྷསཱིམཾ གནྟྭཱ ཨཏྠརཎཀིཙྩཾ ནཏྠཱིཏི.

ཏཏྲེཝཾ ¶ ཝིཙཱརཎཱ ཀཱཏབྦཱ – ཨིདཾ བྷཱསནྟརེསུ ‘‘ཉཏྟཱི’’ཏི ཀཐིཏཾ ཀཐིནདཱནཀམྨཾ ཙཏཱུསུ སངྒྷཀམྨེསུ ཉཏྟིདུཏིཡཀམྨཾ ཧོཏི, ཉཏྟིདུཏིཡཀམྨསྶ ནཝསུ ཋཱནེསུ ཀཐིནདཱནཾ, གརུཀལཧུཀེསུ གརུཀཾ, ཡདི ‘‘ཨུཔཙཱརསཱིམཱཡཾ ཙཏྟཱརི སངྒྷཀམྨཱནི ཀཱཏབྦཱནཱི’’ཏི པཀརཎེསུ ཨཱགཏཾ ཨབྷཝིསྶཱ, ཨེཝཾ སནྟེ ཏེསཾ ཨཱཙརིཡཱནཾ ཝཙནཱནུརཱུཔཏོ ཨུཔཙཱརསཱིམཱཡཾ ཀཐིནདཱནཉཏྟིཀམྨཝཱཙཾ ཝཱཙེཏབྦཾ ཨབྷཝིསྶཱ, ན པན པཀརཎེསུ ‘‘ཨུཔཙཱརསཱིམཱཡཾ ཙཏྟཱརི སངྒྷཀམྨཱནི ཀཱཏབྦཱནཱི’’ཏི ཨཱགཏཾ, ཨཐ ཁོ ‘‘སངྒྷལཱབྷཝིབྷཛནཾ, ཨཱགནྟུཀཝཏྟཾ ཀཏྭཱ ཨཱརཱམཔྤཝིསནཾ ¶ , གམིཀསྶ བྷིཀྑུནོ སེནཱསནཨཱཔུཙྪནཾ, ནིསྶཡཔཨཔྤསྶམྦྷནཾ, པཱརིཝཱསིཀམཱནཏྟཙཱརིཀབྷིཀྑཱུནཾ ཨརུཎུཊྛཱཔནཾ, བྷིཀྑུནཱིནཾ ཨཱརཱམཔྤཝིསནཨཱཔུཙྪནཾ ཨིཙྩེཝམཱདཱིནི ཨེཝ ཨུཔཙཱརསཱིམཱཡ ཀཏྟབྦཱནཱི’’ཏི ཨཱགཏཾ, ཏསྨཱ ཀཐིནདཱནཉཏྟིདུཏིཡཀམྨཝཱཙཱ ཀེཝལཱཡཾ ཨུཔཙཱརསཱིམཱཡཾ ན ཝཱཙེཏབྦཱཏི སིདྡྷཱ. ཀཐཾ ཝིཉྙཱཡཏཱིཏི ཙེ? ‘‘ཨཝིཔྤཝཱསསཱིམཱ ནཱམ ཏིཡོཛནཱཔི ཧོཏི, ཨེཝཾ སནྟེ ཏིཡོཛནེ ཋིཏཱ ལཱབྷཾ གཎྷིསྶནྟི, ཏིཡོཛནེ ཋཏྭཱ ཨཱགནྟུཀཝཏྟཾ པཱུརེཏྭཱ ཨཱརཱམཾ པཝིསིཏབྦཾ བྷཝིསྶཏི, གམིཀོ ཏིཡོཛནཾ གནྟྭཱ སེནཱསནཾ ཨཱཔུཙྪིསྶཏི, ནིསྶཡཔཊིཔནྣསྶ བྷིཀྑུནོ ཏིཡོཛནཱཏིཀྐམེ ནིསྶཡོ པཊིཔྤསྶམྦྷིསྶཏི, པཱརིཝཱསིཀེན ཏིཡོཛནཾ ཨཏིཀྐམིཏྭཱ ཨརུཎཾ ཨུཊྛཔེཏབྦཾ བྷཝིསྶཏི, བྷིཀྑུནིཡཱ ཏིཡོཛནེ ཋཏྭཱ ཨཱརཱམཔྤཝིསནཾ ཨཱཔུཙྪིཏབྦཾ བྷཝིསྶཏི, སབྦམྤེཏཾ ཨུཔཙཱརསཱིམཱཡ པརིཙྪེདཝསེནེཝ ཀཱཏུཾ ཝཊྚཏི, ཏསྨཱ ཨུཔཙཱརསཱིམཱཡམེཝ བྷཱཛེཏབྦ’’ནྟི ཨེཝམཱདིཨཊྛཀཐཱཔཱཋཏོ (མཧཱཝ. ཨཊྛ. ༣༧༩) ཝིཉྙཱཡཏཱིཏི.

ཨཐེཝཾ ¶ ཝདེཡྻུཾ – ‘‘ཨུཔཙཱརསཱིམཱ ཉཏྟིདུཏིཡཀམྨཝཱཙཱཡ ཋཱནཾ ན ཧོཏཱི’’ཏི ཏུམྷེཧི ཝུཏྟཾ, ཨཐ ཙ པན ཀཏཔུབྦཾ ཨཏྠི. ཏཐཱ ཧི ཙཱིཝརཔཊིགྒཱཧཀསམྨུཏིཙཱིཝརནིདཧཀསམྨུཏིཙཱིཝརབྷཱཛཀསམྨུཏཱིནཾ ‘‘སུཎཱཏུ མེ…པེ… དྷཱརཡཱམཱིཏི ཨིམཱཡ ཀམྨཝཱཙཱཡ ཝཱ ཨཔལོཀནེན ཝཱ ཨནྟོཝིཧཱརེ སབྦསངྒྷམཛ྄ཛྷེཔི ཁཎྜསཱིམཱཡཔི སམྨནྣིཏུཾ ཝཊྚཏིཡེཝཱ’’ཏི ཨུཔཙཱརསཱིམཱཡཾ ཉཏྟིདུཏིཡཀམྨཝཱཙཱཡ ནིཔྥཱདེཏབྦབྷཱཝོ ཨཊྛཀཐཱཡཾ (ཝི. སངྒ. ཨཊྛ. ༡༩༤) ཨཱགཏོ. བྷཎྜཱགཱརསྶ པན ‘‘ཨིམཾ པན བྷཎྜཱགཱརཾ ཁཎྜསཱིམཾ གནྟྭཱ ཁཎྜསཱིམཱཡ ནིསིནྣེཧི སམྨནྣིཏུཾ ན ཝཊྚཏི, ཝིཧཱརམཛ྄ཛྷེཡེཝ ‘སུཎཱཏུ མེ, བྷནྟེ, སངྒྷོ, ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཾ ཝིཧཱརཾ བྷཎྜཱགཱརཾ སམྨནྣེཡྻཱ’ཏིཨཱདིནཱ ནཡེན ཀམྨཝཱཙཱཡ ཝཱ ཨཔལོཀནེན ཝཱ སམྨནྣིཏབྦ’’ནྟི ཨཊྛཀཐཱཡཾ (ཝི. སངྒ. ཨཊྛ. ༡༩༧) ཨུཔཙཱརསཱིམཱཡམེཝ ཉཏྟིདུཏིཡཀམྨཝཱཙཱཡ སམྨནྣིཏབྦབྷཱཝོ ཨཱགཏོཏི.

ཏེ ཨེཝཾ ཝཏྟབྦཱ – སཙེཔི ཨཊྛཀཐཱཡཾ ཨཱགཏཾ ‘‘ཨནྟོཝིཧཱརེ’’ཏི པཱཋོ ‘‘ཝིཧཱརམཛ྄ཛྷེ’’ཏི པཱཋོ ཙ ཨུཔཙཱརསཱིམཾ སནྡྷཱཡ ཝུཏྟོཏི མཉྙམཱནཱ ཏུམྷེ ཨཱཡསྨནྟོ ཨེཝཾ ཨཝཙུཏྠ, ཏེ པན པཱཋཱ ཨུཔཙཱརསཱིམཾ སནྡྷཱཡ ཨཊྛཀཐཱཙརིཡེཧི ན ཝུཏྟཱ, ཨཐ ཁོ ཨཝིཔྤཝཱསསཱིམཱསངྑཱཏཾ མཧཱསཱིམཾ སནྡྷཱཡ ཝུཏྟཱ. ཀཐཾ ཝིཉྙཱཡཏཱིཏི ཙེ? ཁཎྜསཱིམཱཡ ཝཀྑམཱནཏྟཱ. ཁཎྜསཱིམཱཡ ཧི མཧཱསཱིམཱ ཨེཝ པཊིཡོགཱི ཧོཏི. ཨུཔཙཱརསཱིམཱཏི ཨཡམཏྠོ ཀཐཾ ¶ ཛཱནིཏབྦོཏི ཙེ? ‘‘ཨིམཾ པན སམཱནསཾཝཱསཀསཱིམཾ སམྨནྣནྟེཧི པབྦཛྫཱུཔསམྤདཱདཱིནཾ སངྒྷཀམྨཱནཾ སུཁཀརཎཏྠཾ པཋམཾ ཁཎྜསཱིམཱ སམྨནྣིཏབྦཱ…པེ… ཨེཝཾ བདྡྷཱསུ པན སཱིམཱསུ ཁཎྜསཱིམཱཡ ཋིཏཱ བྷིཀྑཱུ མཧཱསཱིམཱཡ ཀམྨཾ ཀརོནྟཱནཾ ན ཀོཔེནྟི ¶ , མཧཱསཱིམཱཡ ཝཱ ཋིཏཱ ཁཎྜསཱིམཱཡ ཀམྨཾ ཀརོནྟཱནཾ. སཱིམནྟརིཀཱཡ པན ཋིཏཱ ཨུབྷིནྣམྤི ན ཀོཔེནྟཱི’’ཏི ཝུཏྟཨཊྛཀཐཱཔཱཋཝསེན (མཧཱཝ. ཨཊྛ. ༡༣༨) ཛཱནིཏབྦོཏི. ཨཐ ཝཱ ཏེཧི ཨཱཡསྨནྟེཧི ཨཱབྷཏབྷཎྜཱགཱརསམྨུཏིཔཱཋཝསེནཔི ཨཡམཏྠོ ཝིཉྙཱཡཏི. ཀཐཾ? ཙཱིཝརཔཊིགྒཱཧཀཱདིཔུགྒལསམྨུཏིཡོ པན ཨནྟོཝིཧཱརེ སབྦསངྒྷམཛ྄ཛྷེཔི ཁཎྜསཱིམཱཡམྤི སམྨནྣིཏུཾ ཝཊྚཏི, བྷཎྜཱགཱརསངྑཱཏཝིཧཱརསམྨུཏི པན ཝིཧཱརམཛ྄ཛྷེཡེཝཱཏི ཨཊྛཀཐཱཡཾ ཝུཏྟཾ, ཏཏྠ ཝིསེསཀཱརཎཾ པརིཡེསིཏབྦཾ.

ཏཏྲེཝཾ ཝིསེསཀཱརཎཾ པཉྙཱཡཏི – ‘‘ཨཉྙིསྶཱ སཱིམཱཡ ཝཏྠུ ཨཉྙིསྶཱ ཀམྨཝཱཙཱ’’ཏི ཝཏྟབྦདོསཔརིཧཱརཏྠཾ ཝུཏྟཾ. པུགྒལསམྨུཏིཡོ ཧི པུགྒལསྶ ཝཏྠུཏྟཱ ཡདི མཧཱསཱིམབྷཱུཏེ ཨནྟོཝིཧཱརེ ཀཏྟུཀཱམཱ ཧོནྟི, སབྦསངྒྷམཛ྄ཛྷེ ཏཾ ཝཏྠུབྷཱུཏཾ པུགྒལཾ ཧཏྠཔཱསེ ཀཏྭཱ ཀརེཡྻུཾ. ཡདི ཁཎྜསཱིམཱཡ ཀཏྟུཀཱམཱ, ཏཾ ཝཏྠུབྷཱུཏཾ པུགྒལཾ ཁཎྜསཱིམཾ ཨཱནེཏྭཱ ཏཏྠ སནྣིཔཏིཏཀམྨཔྤཏྟསངྒྷསྶ ཧཏྠཔཱསེ ཀཏྭཱ ཀརེཡྻུཾ. ཨུབྷཡཐཱཔི ཡཐཱཝུཏྟདོསོ ནཏྠི, བྷཎྜཱགཱརསམྨུཏི པན བྷཎྜཱགཱརསྶ ཝིཧཱརཏྟཱ ཁཎྜསཱིམཾ ཨཱནེཏུཾ ན སཀྐཱ, ཏསྨཱ ཡདི ཏཾ སམྨུཏིཾ ཁཎྜསཱིམཱཡཾ ཋཏྭཱ ཀརེཡྻུཾ, ཝཏྠུ མཧཱསཱིམཱཡཾ ཧོཏི, ཀམྨཝཱཙཱ ཁཎྜསཱིམཱཡནྟི ཡཐཱཝུཏྟདོསོ ཧོཏི, ཏསྨིཉྩ དོསེ སཏི ཝཏྠུཝིཔནྣཏྟཱ ཀམྨཾ ཝིཔཛྫཏི, ཏསྨཱ མཧཱསཱིམབྷཱུཏཝིཧཱརམཛ྄ཛྷེཡེཝ སཱ སམྨུཏི ཀཱཏབྦཱཏི ཨཊྛཀཐཱཙརིཡཱནཾ མཏི, ན ཨུཔཙཱརསཱིམཱཡ ཉཏྟིདུཏིཡཀམྨཾ ཀཱཏབྦནྟི.

ཨཐཱཔི ཨེཝཾ ཝདེཡྻུཾ ‘‘ཝིཧཱརསདྡེན ཨཝིཔྤཝཱསསཱིམབྷཱུཏཱ མཧཱསཱིམཱཝ ཝུཏྟཱ, ན ཨུཔཙཱརསཱིམཱ’’ཏི ཨིདཾ ཝཙནཾ ཀཐཾ པཙྩེཏབྦནྟི? ཨིམིནཱཡེཝ ཨཊྛཀཐཱཝཙནེན. ཡདི ཧི ཨུཔཙཱརསཱིམཱ ¶ ཝུཏྟཱ བྷཝེཡྻ, ཨུཔཙཱརསཱིམཱ ནཱམ བདྡྷསཱིམཾ ཨཝཏྠརིཏྭཱཔི པཝཏྟཱ ཨཱཝཱསེསུ ཝཱ བྷིཀྑཱུསུ ཝཱ ཝཌྜྷནྟེསུ ཨནིཡམཝསེན ཝཌྜྷཏི, ཏསྨཱ ཁཎྜསཱིམཾ ཨཝཏྠརིཏྭཱ པཝཏྟནཏོ ཝིཧཱརེན སཧ ཁཎྜསཱིམཱ ཨེཀསཱིམཱཡེཝ ཧོཏི, ཨེཝཾ སཏི ཝིཧཱརེ ཋིཏཾ བྷཎྜཱགཱརཾ ཁཎྜསཱིམཱཡ ཋཏྭཱ སམྨནྣིཏུཾ སཀྐཱ བྷཝེཡྻ, ན པན སཀྐཱ ‘‘ཁཎྜསཱིམཱཡ ནིསིནྣེཧི སམྨནྣིཏུཾ ན ཝཊྚཏཱི’’ཏི ཨཊྛཀཐཱཡཾ (མཧཱཝ. ཨཊྛ. ༣༤༣) པཊིསིདྡྷཏྟཱ. ཏེན ཉཱཡཏི ‘‘ཨིམསྨིཾ ¶ ཋཱནེ ཝིཧཱརསདྡེན ཨཝིཔྤཝཱསསཱིམབྷཱུཏཱ མཧཱསཱིམཱ ཝུཏྟཱ, ན ཨུཔཙཱརསཱིམཱ’’ཏི. ཨུཔཙཱརསཱིམཱཡ ཨནིཡམཝསེན ཝཌྜྷནབྷཱཝོ ཀཐཾ ཛཱནིཏབྦོཏི? ‘‘ཨུཔཙཱརསཱིམཱ པརིཀྑིཏྟསྶ ཝིཧཱརསྶ པརིཀྑེཔེན, ཨཔརིཀྑིཏྟསྶ པརིཀྑེཔཱརཧཊྛཱནེན པརིཙྪིནྣཱ ཧོཏི. ཨཔིཙ བྷིཀྑཱུནཾ དྷུཝསནྣིཔཱཏཊྛཱནཏོ ཝཱ པརིཡནྟེ ཋིཏབྷོཛནསཱལཏོ ཝཱ ནིབདྡྷཝསནཀཨཱཝཱསཏོ ཝཱ ཐཱམམཛ྄ཛྷིམསྶ པུརིསསྶ དྭིནྣཾ ལེཌྜུཔཱཏཱནཾ ཨནྟོ ཨུཔཙཱརསཱིམཱ ཝེདིཏབྦཱ, སཱ པན ཨཱཝཱསེསུ ཝཌྜྷནྟེསུ ཝཌྜྷཏི, པརིཧཱཡནྟེསུ པརིཧཱཡཏི. མཧཱཔཙྩརིཡཾ པན ‘བྷིཀྑཱུསུཔི ཝཌྜྷནྟེསུ ཝཌྜྷཏཱི’ཏི ཝུཏྟཾ, ཏསྨཱ སཙེ ཝིཧཱརེ སནྣིཔཏིཏབྷིཀྑཱུཧི སདྡྷིཾ ཨེཀཱབདྡྷཱ ཧུཏྭཱ ཡོཛནསཏམྤི པཱུརེཏྭཱ ནིསཱིདནྟི, ཡོཛནསཏམྤི ཨུཔཙཱརསཱིམཱཝ ཧོཏི, སབྦེསཾ ལཱབྷོ པཱཔུཎཱཏཱི’’ཏི ཨཊྛཀཐཱཡཾ (མཧཱཝ. ཨཊྛ. ༣༧༩) ཝཙནཏོཏི.

ཡདི ཨེཝཾ ཨུཔཙཱརསཱིམཱཡ ཀཐིནཏྠཏབྷཱཝོ ཀསྨཱ ཝུཏྟོཏི? ཀཐིནཏྠརཎཾ ནཱམ ན སངྒྷཀམྨཾ, པུགྒལཀམྨམེཝ ཧོཏི, ཏསྨཱ ཝསྶཱུཔནཱཡིཀཁེཏྟབྷཱུཏཱཡ ཨུཔཙཱརསཱིམཱཡ ཀཱཏབྦཱ ཧོཏི. ཉཏྟིཀམྨཝཱཙཱ པན སངྒྷཀམྨབྷཱུཏཱ, ཏསྨཱ ཨུཔཙཱརསཱིམཱཡ ཀཱཏུཾ ན ཝཊྚཏི, སུཝིསོདྷིཏཔརིསཱཡ བདྡྷཱབདྡྷསཱིམཱཡམེཝ ཝཊྚཏཱིཏི དཊྛབྦཾ. ནནུ ཙ བྷོ ‘‘ཀཐིནཾ ཨཏྠརིཏུཾ ཀེ ལབྷནྟི, ཀེ ན ལབྷནྟི? གཎནཝསེན ¶ ཏཱཝ པཙྪིམཀོཊིཡཱ པཉྩ ཛནཱ ལབྷནྟི, ཨུདྡྷཾ སཏསཧསྶམྤི, པཉྩནྣཾ ཧེཊྛཱ ན ལབྷནྟཱི’’ཏི ཨཊྛཀཐཱཡཾ ཝུཏྟཾ, ཨཐ ཀསྨཱ ‘‘ཀཐིནཏྠརཎཾ ནཱམ ན སངྒྷཀམྨཾ, པུགྒལཀམྨམེཝ ཧོཏཱི’’ཏི ཝུཏྟནྟི? ‘‘ན སངྒྷོ ཀཐིནཾ ཨཏྠརཏི, ན གཎོ ཀཐིནཾ ཨཏྠརཏི, པུགྒལོ ཀཐིནཾ ཨཏྠརཏཱི’’ཏི པརིཝཱརེ (པརི. ༤༡༤) ཝུཏྟཏྟཱ ཙ ཨཔལོཀནཀམྨཱདཱིནཾ ཙཏུནྣཾ སངྒྷཀམྨཱནཾ ཋཱནེསུ ཨཔཝིཊྛཏྟཱ ཙ. ཨཊྛཀཐཱཡཾ པན ཀཐིནཏྠཱརསྶ ཨུཔཙཱརབྷཱུཏཾ ཀཐིནདཱནཀམྨཝཱཙཱབྷཎནཀཱལཾ སནྡྷཱཡ ཝུཏྟཾ. ཏསྨིཉྷི ཀཱལེ ཀཐིནདཱཡཀཱ ཙཏྟཱརོ, པཊིགྒཱཧཀོ ཨེཀོཏི པཙྪིམཀོཊིཡཱ པཉྩ ཧོནྟི, ཏཏོ ཧེཊྛཱ ན ལབྷཏཱིཏི. ཉཏྟིཀམྨཝཱཙཱཡ སངྒྷཀམྨབྷཱཝོ ཀཐཾ ཛཱནིཏབྦོཏི? ‘‘ཙཏུནྣཾ སངྒྷཀམྨཱནཾ ཉཏྟིདུཏིཡཀམྨསྶ ནཝསུ ཋཱནེསུ ཀཐིནདཱན’’ནྟི ཨཱགཏཏྟཱ, ‘‘སུཎཱཏུ མེ, བྷནྟེ, སངྒྷོ, ཨིདཾ སངྒྷསྶ ཀཐིནདུསྶཾ ཨུཔྤནྣ’’ནྟིཨཱདིནཱ ཝུཏྟཏྟཱ ཙཱཏི.

ཨཔརེ པན ཨཱཙརིཡཱ ‘‘བྷཱསནྟརེསུ ཉཏྟཱིཏི ཝུཏྟཱ ཀཐིནདཱནཀམྨཝཱཙཱ ཨཏྠཱརཀིརིཡཱཡ པཝིསཏི, ཨཏྠཱརཀིརིཡཱ ཙ ཨུཔཙཱརསཱིམཱཡཾ ཀཱཏབྦཱ, ཏསྨཱ ཀཐིནདཱནཀམྨཝཱཙཱཔི ཨུཔཙཱརསཱིམཱཡཾ ཀཱཏབྦཱཡེཝཱ’’ཏི ཝདནྟི, ཏེསཾ ཨཡམདྷིཔྤཱཡོ – མཧཱཝགྒཔཱལི༹ཡཾ ¶ (མཧཱཝ. ༣༠༦) ‘‘ཨེཝཉྩ པན, བྷིཀྑཝེ, ཀཐིནཾ ཨཏྠརིཏབྦ’’ནྟི ཨཱརབྷིཏྭཱ ‘‘བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ…པེ… ཨེཝཾ ཁོ, བྷིཀྑཝེ, ཨཏྠཏཾ ཧོཏི ཀཐིན’’ནྟི ཀཐིནདཱནཉཏྟིཀམྨཝཱཙཱཏོ པཊྛཱཡ ཡཱཝ ཨནུམོདནཱ པཱཋོ ཨཱགཏོ, པརིཝཱརཔཱལི༹ཡཉྩ (པརི. ༤༡༢) ‘‘ཀཐིནཏྠཱརོ ཛཱནིཏབྦོ’’ཏི ཨུདྡེསསྶ ནིདྡེསེ ‘‘སཙེ སངྒྷསྶ ཀཐིནདུསྶཾ ཨུཔྤནྣཾ ཧོཏི, སངྒྷེན ཀཐཾ པཊིཔཛྫིཏབྦཾ, ཨཏྠཱརཀེན ཀཐཾ པཊིཔཛྫིཏབྦཾ, ཨནུམོདཀེན ཀཐཾ པཊིཔཛྫིཏབྦ’’ནྟི པུཙྪཾ ནཱིཧརིཏྭཱ ‘‘སངྒྷེན ཉཏྟིདུཏིཡེན ¶ ཀམྨེན ཀཐིནཏྠཱརཀསྶ བྷིཀྑུནོ དཱཏབྦཾ…པེ… ཨནུམོདཱམཱ’’ཏི ཉཏྟིཏོ པཊྛཱཡ ཡཱཝ ཨནུམོདནཱ པཱཋོ ཨཱགཏོ, ཏསྨཱ ཉཏྟིཏོ པཊྛཱཡ ཡཱཝ ཨནུམོདནཱ སབྦོ ཝིདྷི ཀཐིནཏྠཱརཀིརིཡཱཡཾ པཝིསཏི, ཏཏོ ཀཐིནཏྠཱརཀིརིཡཱཡ ཨུཔཙཱརསཱིམཱཡཾ ཀཏྟབྦཱཡ སཏི ཉཏྟིསངྑཱཏཀཐིནདཱནཀམྨཝཱཙཱཔི ཨུཔཙཱརསཱིམཱཡཾ ཀཏྟབྦཱཡེཝཱཏི.

ཏཏྲེཝཾ ཝིཙཱརཎཱ ཀཱཏབྦཱ – ཨཏྠཱརཀིརིཡཱཡ ཝིསུཾ ཨནཱགཏཱཡ སཏི ‘‘སབྦོ ཝིདྷི ཨཏྠཱརཀིརིཡཱཡཾ པཝིསཏཱི’’ཏི ཝཏྟབྦཾ བྷཝེཡྻ, ཨཐ ཙ པན མཧཱཝགྒཔཱལི༹ཡཉྩ པརིཝཱརཔཱལི༹ཡཉྩ ཨཏྠཱརཀིརིཡཱ ཝིསུཾ ཨཱགཏཱཡེཝ, ཏསྨཱ ཉཏྟིསངྑཱཏཱ ཀཐིནདཱནཀམྨཝཱཙཱ ཨཏྠཱརཀིརིཡཱཡཾ ན པཝིསཏི, ཀེཝལཾ ཨཏྠཱརཀིརིཡཱཡ ཨུཔཙཱརབྷཱུཏཏྟཱ པན ཏཏོ པཊྛཱཡ ཨནུཀྐམེན ཝུཏྟཾ. ཡཐཱ ‘‘ཨནུཛཱནཱམི, བྷིཀྑཝེ, སཱིམཾ སམྨནྣིཏུ’’ནྟི སཱིམཱསམྨུཏིཾ ཨནུཛཱནིཏྭཱ ‘‘ཨེཝཉྩ པན, བྷིཀྑཝེ, སམྨནྣིཏབྦཱ’’ཏི སཱིམཱསམྨུཏིཝིདྷིཾ དསྶེནྟོ ‘‘པཋམཾ ནིམིཏྟཱ ཀིཏྟེཏབྦཱ…པེ… ཨེཝམེཏཾ དྷཱརཡཱམཱི’’ཏི ནིམིཏྟཀིཏྟནེན སཧ སཱིམཱསམྨུཏིཀམྨཝཱཙཱ དེསིཏཱ, ཏཏྠ ནིམིཏྟཀིཏྟནཾ སཱིམཱསམྨུཏིཀམྨཾ ན ཧོཏི, ཀམྨཝཱཙཱཡེཝ སཱིམཱསམྨུཏིཀམྨཾ ཧོཏི, ཏཐཱཔི སཱིམཱསམྨུཏིཀམྨཝཱཙཱཡ ཨུཔཙཱརབྷཱཝཏོ སཧ ནིམིཏྟཀིཏྟནེན སཱིམཱསམྨུཏིཀམྨཝཱཙཱ དེསིཏཱ. ཡཐཱ ཙ ཨུཔསམྤདཱཀམྨཝིདྷིཾ དེསེནྟོ ‘‘པཋམཾ ཨུཔཛ྄ཛྷཾ གཱཧཱཔེཏབྦོ…པེ… ཨེཝམེཏཾ དྷཱརཡཱམཱི’’ཏི ཨུཔཛ྄ཛྷཱཡགཱཧཱཔནཱདིནཱ སཧ ཨུཔསམྤདཱཀམྨཾ དེསིཏཾ, ཏཏྠ ཨུཔཛ྄ཛྷཱཡགཱཧཱཔནཱདི ཨུཔསམྤདཱཀམྨཾ ན ཧོཏི, ཉཏྟིཙཏུཏྠཀམྨཝཱཙཱཡེཝ ཨུཔསམྤདཱཀམྨཾ ཧོཏི, ཏཐཱཔི ཨུཔསམྤདཱཀམྨསྶ སམཱིཔེ བྷཱུཏཏྟཱ ཨུཔཛ྄ཛྷཱཡགཱཧཱཔནཱདིནཱ སཧ ཉཏྟིཙཏུཏྠཀམྨཝཱཙཱ དེསིཏཱ, ཨེཝམེཏྠ ཀཐིནདཱནཀམྨཝཱཙཱ ཨཏྠཱརཀིརིཡཱ ན ཧོཏི, ཏཐཱཔི ¶ ཨཏྠཱརཀིརིཡཱཡ ཨུཔཙཱརབྷཱུཏཏྟཱ ཀཐིནདཱནཉཏྟིདུཏིཡཀམྨཝཱཙཱཡ སཧ ཀཐིནཏྠཱརཀིརིཡཱ དེསིཏཱ, ཏསྨཱ ཀཐིནདཱནཀམྨཝཱཙཱ ཨཏྠཱརཀིརིཡཱཡཾ ན པཝིསཏཱིཏི དཊྛབྦཾ.

ཨཐ ¶ ཝཱ ཉཏྟིདུཏིཡཀམྨཝཱཙཱ ཙ ཨཏྠཱརོ ཙཱཏི ཨིམེ དྭེ དྷམྨཱ ཨཏུལྱཀིརིཡཱ ཨཏུལྱཀཏྟཱརོ ཨཏུལྱཀམྨཱ ཨཏུལྱཀཱལཱ ཙ ཧོནྟི, ཏེན ཝིཉྙཱཡཏི ‘‘བྷཱསནྟརེསུ ཉཏྟཱིཏི ཝུཏྟཱ ཉཏྟིདུཏིཡཀམྨཝཱཙཱ ཨཏྠཱརཀིརིཡཱཡཾ ན པཝིསཏཱི’’ཏི. ཏཏྠ ཀཐཾ ཨཏུལྱཀིརིཡཱ ཧོནྟི? ཀམྨཝཱཙཱ དཱནཀིརིཡཱ ཧོཏི, ཨཏྠཱརོ པནྣརསདྷམྨཱནཾ ཀཱརཎབྷཱུཏཱ ཨཏྠཱརཀིརིཡཱ, ཨེཝཾ ཨཏུལྱཀིརིཡཱ. ཀཐཾ ཨཏུལྱཀཏྟཱརོཏི? ཀམྨཝཱཙཱཡ ཀཏྟཱ སངྒྷོ ཧོཏི, ཨཏྠཱརསྶ ཀཏྟཱ པུགྒལོ, ཨེཝཾ ཨཏུལྱཀཏྟཱརོ ཧོནྟི. ཀཐཾ ཨཏུལྱཀམྨཱ ཧོནྟི? ཀམྨཝཱཙཱཡ ཀམྨཾ ཀཐིནདུསྶཾ ཧོཏི, ཨཏྠཱརསྶ ཀམྨཾ ཀཐིནསངྑཱཏཱ སམཱུཧཔཉྙཏྟི, ཨེཝཾ ཨཏུལྱཀམྨཱ ཧོནྟི. ཀཐཾ ཨཏུལྱཀཱལཱ ཧོནྟི? ཀཐིནདཱནཀམྨཝཱཙཱ པུབྦཀརཎཔཙྩུདྡྷཱརཨདྷིཊྛཱནཱནཾ པུབྦེ ཧོཏི, ཨཏྠཱརོ ཏེསཾ པཙྪཱ, ཨེཝཾ ཨཏུལྱཀཱལཱ ཧོནྟཱིཏི. ཨཐ ཝཱ ཨཏྠཱརོ ‘‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’’ཏིཨཱདིནཱ ཝཙཱིབྷེདསངྑཱཏེན ཨེཀེན དྷམྨེན སངྒཧིཏོ, ན ཉཏྟིཨནུསྶཱཝནཱདིནཱ ཨནེཀེཧི དྷམྨེཧི སངྒཧིཏོ. ཝུཏྟཉྷེཏཾ པརིཝཱརེ (པརི. ༤༠༨) ‘‘ཨཏྠཱརོ ཨེཀེན དྷམྨེན སངྒཧིཏོ ཝཙཱིབྷེདེནཱ’’ཏི. ཨིམིནཱཔི ཀཱརཎེན ཛཱནིཏབྦཾ ‘‘ན ཉཏྟི ཨཏྠཱརེ པཝིཊྛཱ’’ཏི.

ཨཉྙེ པན ཨཱཙརིཡཱ ཨེཝཾ ཝདནྟི – ‘‘ཀཐིནཏྠཱརཾ ཀེ ལབྷནྟི, ཀེ ན ལབྷནྟཱིཏི? གཎནཝསེན ཏཱཝ པཙྪིམཀོཊིཡཱ པཉྩ ཛནཱ ལབྷནྟི, ཨུདྡྷཾ སཏསཧསྶམྤི, པཉྩནྣཾ ཧེཊྛཱ ན ལབྷནྟཱི’’ཏི ཨཊྛཀཐཱཡཾ (མཧཱཝ. ཨཊྛ. ༣༠༦) ཨཱགཏཏྟཱ ‘‘ཧེཊྛིམནྟཏོ ¶ པཉྩ བྷིཀྑཱུ ཀཐིནཏྠཱརཾ ལབྷནྟི, ཏཏོ ཨཔྤཀཏརཱ ན ལབྷནྟཱི’’ཏི ཝིཉྙཱཡཏི. ‘‘པཉྩནྣཾ ཛནཱནཾ ཝཊྚཏཱིཏི པཙྪིམཀོཊིཡཱ ཙཏྟཱརོ ཀཐིནདུསྶསྶ དཱཡཀཱ, ཨེཀོ པཊིགྒཱཧཀོཏི པཉྩནྣཾ ཛནཱནཾ ཝཊྚཏཱི’’ཏི ཀངྑཱཝིཏརཎཱིཊཱིཀཱཡཾ (ཀངྑཱ. ཨབྷི. ཊཱི. ཀཐིནསིཀྑཱཔདཝཎྞནཱ) ཨཱགཏཏྟཱ ཏསྨིཾ ཝཱཀྱེ ‘‘ཝཊྚཏཱི’’ཏི ཀིརིཡཱཡ ཀཏྟཱ ‘‘སོ ཀཐིནཏྠཱརོ’’ཏི ཝུཙྩཏི, ཏསྨཱ ཨཏྠཱརོཏི ཨིམིནཱ ‘‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’’ཏི ཝུཏྟཨཏྠརཎཀིརིཡཱ ན ཨདྷིཔྤེཏཱ, ཙཏཱུཧི བྷིཀྑཱུཧི ཨཏྠཱརཀསྶ བྷིཀྑུནོ ཉཏྟིཡཱ དཱནཾ ཨདྷིཔྤེཏནྟི ཝིཉྙཱཡཏི. ‘‘ཀཐིནཏྠཱརཾ ཀེ ལབྷནྟི…པེ… ཨུདྡྷཾ སཏསཧསྶནྟི ཨིདཾ ཨཏྠཱརཀསྶ བྷིཀྑུནོ སངྒྷསྶ ཀཐིནདུསྶདཱནཀམྨཾ སནྡྷཱཡ ཝུཏྟ’’ནྟི ཝིནཡཝིནིཙྪཡཊཱིཀཱཡཾ ཝུཏྟཾ. ཏསྨིམྤི པཱཋེ ཉཏྟིཡཱ དིནྣཾཡེཝ སནྡྷཱཡ ‘‘པཉྩ ཛནཱ ཨཏྠཱརཾ ལབྷནྟཱི’’ཏི ཨིདཾ ཝཙནཾ ཨཊྛཀཐཱཙརིཡེཧི ཝུཏྟཾ, ‘‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’’ཏིཨཱདི པུགྒལསྶ ཨཏྠརཎཾ སནྡྷཱཡ ན ཝུཏྟནྟི ཊཱིཀཱཙརིཡསྶ ཨདྷིཔྤཱཡོ. ཨེཝཾ ཀངྑཱཝིཏརཎཱིཊཱིཀཱ-ཝིནཡཝིནིཙྪཡཊཱིཀཱཀཱརཀེཧི ཨཱཙརིཡེཧི ‘‘ཉཏྟིདུཏིཡཀམྨཾ ཨཏྠཱརོ ནཱམཱ’’ཏི ¶ ཝིནིཙྪིཏཏྟཱ ཨུཔཙཱརསཱིམཱཡཾ ཀཐིནདཱནཉཏྟིཀམྨཝཱཙཱཀརཎཾ ཡུཏྟནྟི ཝིཉྙཱཡཏཱིཏི ཝདནྟི.

ཏཏྲེཝཾ ཝིཙཱརཎཱ ཀཱཏབྦཱ – ‘‘ཉཏྟིདུཏིཡཀམྨཾཡེཝ ཨཏྠཱརོ ནཱམཱ’’ཏི ཊཱིཀཱཙརིཡཱ ན ཝདེཡྻུཾ. ཝདེཡྻུཾ ཙེ, ཨཊྛཀཐཱཡ ཝིརུདྡྷོ སིཡཱ. ཀཐཾ ཝིརུདྡྷོཏི ཙེ? ‘‘ཚིནྣཝསྶཱ ཝཱ པཙྪིམིཀཱཡ ཨུཔགཏཱ ཝཱ ན ལབྷནྟི, ཨཉྙསྨིཾ ཝིཧཱརེ ཝུཏྠཝསྶཱཔི ན ལབྷནྟཱིཏི མཧཱཔཙྩརིཡཾ ཝུཏྟ’’ནྟི ཨཊྛཀཐཱཡཾ (མཧཱཝ. ཨཊྛ. ༣༠༦) ཨཱགཏཏྟཱ ‘‘ཏེ ཚིནྣཝསྶཱདཡོ ཀཐིནཏྠཱརཾ ན ལབྷནྟཱི’’ཏི ཝིཉྙཱཡཏི. ཡདི ཉཏྟིདུཏིཡཀམྨཾ ཨཏྠཱརོ ནཱམ སིཡཱ, ཨེཝཾ སཏི ཏེ བྷིཀྑཱུ ཉཏྟིདུཏིཡཀམྨེཔི གཎཔཱུརཀབྷཱཝེན ཨཔྤཝིཊྛཱ སིཡུཾ. ཨཐ ཙ པན ‘‘པུརིམིཀཱཡ ¶ ཨུཔགཏཱནཾ པན སབྦེ གཎཔཱུརཀཱ ཧོནྟཱི’’ཏི ཨཊྛཀཐཱཡ (མཧཱཝ. ཨཊྛ. ༣༠༦) ཝུཏྟཏྟཱ ཏེ ཉཏྟིདུཏིཡཀམྨེ པཝིཊྛཱཝ ཧོནྟི, ཏསྨཱ ཨཊྛཀཐཱཙརིཡོ པཉྩཱནིསཾསཧེཏུབྷཱུཏཾ ‘‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’’ཏིཨཱདིཀཾ ཝཙཱིབྷེདཾཡེཝ ‘‘ཨཏྠཱརོ’’ཏི ཝདཏི, ན ཉཏྟིདུཏིཡཀམྨཾ, ཏསྨཱ ཏེ ཚིནྣཝསྶཱདཡོ པཉྩཱནིསཾསཧེཏུབྷཱུཏཾ ཀཐིནཏྠཱརཾ ན ལབྷནྟི, ཉཏྟིདུཏིཡཀམྨེ པན ཙཏུཝགྒསངྒྷཔཱུརཀབྷཱཝཾ ལབྷནྟཱིཏི ཝིཉྙཱཡཏི. པུནཔི ཝུཏྟཾ ཨཊྛཀཐཱཡཾ ‘‘སཙེ པུརིམིཀཱཡ ཨུཔགཏཱ ཙཏྟཱརོ ཝཱ ཧོནྟི ཏཡོ ཝཱ དྭེ ཝཱ ཨེཀོ ཝཱ, ཨིཏརེ གཎཔཱུརཀེ ཀཏྭཱ ཀཐིནཾ ཨཏྠརིཏབྦ’’ནྟི. ཨེཝཾ ཨལབྦྷམཱནཀཐིནཏྠཱརེཡེཝ ཚིནྣཝསྶཱདཡོ གཎཔཱུརཀེ ཀཏྭཱ ཉཏྟིདུཏིཡཀམྨཝཱཙཱཡ ཀཐིནདུསྶཾ དཱཔེཏྭཱ པུརིམིཀཱཡ ཨུཔགཏེཧི ཀཐིནསྶ ཨཏྠརིཏབྦབྷཱཝཏོ ‘‘ཉཏྟིདུཏིཡཀམྨཾཡེཝ ཨཏྠཱརོ ནཱམཱཏི ཊཱིཀཱཙརིཡཱ ན ཝདེཡྻུ’’ནྟི ཨཝཙིམྷཱཏི.

ནནུ ཙ བྷོ ཨིམསྨིམྤི ཨཊྛཀཐཱཝཙནེ ‘‘ཨིཏརེ གཎཔཱུརཀེ ཀཏྭཱ ཀཐིནཾ ཨཏྠརིཏབྦ’’ནྟི ཝཙནེན ཙཏུཝགྒསངྒྷེན ཀཏྟབྦཾ ཉཏྟིདུཏིཡཀམྨཾཡེཝ ‘‘ཨཏྠཱརོ’’ཏི ཝུཏྟནྟི? ན, པུབྦཱཔརཝིརོདྷཏོ. པུབྦེ ཧི ཚིནྣཝསྶཱདཱིནཾ ཀཐིནཾ ཨཏྠརིཏུཾ ཨལབྦྷམཱནབྷཱཝོ ཝུཏྟོ, ཨིདྷ ‘‘ཉཏྟིདུཏིཡཀམྨཾ ཨཏྠཱརོ’’ཏི ཝུཏྟེ ཏེསམྤི ལབྦྷམཱནབྷཱཝོ ཝུཏྟོ བྷཝེཡྻ, ན ཨཊྛཀཐཱཙརིཡཱ པུབྦཱཔརཝིརུདྡྷཾ ཀཐེཡྻུཾ, ཏསྨཱ ‘‘ཀཏྭཱ’’ཏི པདཾ ‘‘ཨཏྠརིཏབྦ’’ནྟི པདེན སམྦཛ྄ཛྷནྟེན སམཱནཀཱལཝིསེསནཾ ཨཀཏྭཱ པུབྦཀཱལཝིསེསནམེཝ ཀཏྭཱ སམྦནྡྷིཏབྦཾ, ཨེཝཾ སཏི པུབྦཝཙནེནཱཔརཝཙནཾ གངྒོདཀེན ཡམུནོདཀཾ ཝིཡ སཾསནྡཏི, པཙྪཱཔི ཙ ‘‘ཀམྨཝཱཙཾ སཱཝེཏྭཱ ཀཐིནཾ ཨཏྠརཱཔེཏྭཱ དཱནཉྩ བྷུཉྫིཏྭཱ གམིསྶནྟཱི’’ཏི ཝིསུཾ ཀམྨཝཱཙཱསཱཝནཾ ཝིསུཾ ཀཐིནཏྠརཎཾ ¶ པུབྦཱཔརཱནུཀྐམཏོ ཝུཏྟཾ ¶ , ཏསྨཱ ཉཏྟིདུཏིཡཀམྨཾ ཨཏྠཱརོ ནཱམ ན ཧོཏི, ཀེཝལཾ ཨཏྠཱརསྶ ཀཱརཎམེཝ ཨུཔཙཱརམེཝ ཧོཏཱིཏི དཊྛབྦཾ. ཀིཉྩ བྷིཡྻོ – ‘‘ན སངྒྷོ ཀཐིནཾ ཨཏྠརཏི, ན གཎོ ཀཐིནཾ ཨཏྠརཏི, པུགྒལོ ཀཐིནཾ ཨཏྠརཏཱི’’ཏི པརིཝཱརཝཙནེན (པརི. ༤༡༤) ཨཡམཏྠོ ཛཱནིཏབྦོཏི.

ཡདི ཨེཝཾ ཀངྑཱཝིཏརཎཱིཊཱིཀཱ-ཝིནཡཝིནིཙྪཡཊཱིཀཱསུ ཨཱགཏཔཱཋཱནཾ ཨདྷིཔྤཱཡོ ཀཐཾ བྷཱསིཏབྦོ བྷཝེཡྻ. ནནུ ཀངྑཱཝིཏརཎཱིཊཱིཀཱཡཾ ‘‘ཝཊྚཏཱི’’ཏི ཨིམིསྶཱ ཀིརིཡཱཡ ཀཏྟཱ ‘‘སོ ཀཐིནཏྠཱརོ’’ཏི ཝུཏྟོ, ཝིནཡཝིནིཙྪཡཊཱིཀཱཡཉྩ ‘‘ཀཐིནདུསྶདཱནཀམྨ’’ནྟི པདཾ ‘‘སནྡྷཱཡཱ’’ཏི ཀིརིཡཱཡ ཀམྨཾ, ཀཐིནཏྠཱརོ…པེ… ཨིདཾ ‘‘ཝུཏྟ’’ནྟི ཀིརིཡཱཡ ཀམྨཾ ཧོཏི. ཨེཝཾ ཊཱིཀཱསུ ནཱིཏཏྠཏོ ཨཱགཏཔཱཋེསུ སནྟེསུ ‘‘ཉཏྟིདུཏིཡཀམྨཾཡེཝ ཨཏྠཱརོ ནཱམཱཏི ཊཱིཀཱཙརིཡཱ ན ཝདེཡྻུ’’ནྟི ན ཝཏྟབྦནྟི? ཡེནཱཀཱརེན ཨཊྛཀཐཱཝཙནེན ཊཱིཀཱཝཙནཉྩ པུབྦཱཔརཨཊྛཀཐཱཝཙནཉྩ ཨཝིརུདྡྷཾ བྷཝེཡྻ, ཏེནཱཀཱརེན ཊཱིཀཱཔཱཋཱནཾ ཨདྷིཔྤཱཡོ གཧེཏབྦོ. ཀཐཾ? ཀངྑཱཝིཏརཎཱིཨཊྛཀཐཱཡཾ (ཀངྑཱ. ཨཊྛ. ཀཐིནསིཀྑཱཔདཝཎྞནཱ) ‘‘སོ སབྦནྟིམེན པརིཙྪེདེན པཉྩནྣཾ ཛནཱནཾ ཝཊྚཏཱི’’ཏི ཨཱགཏོ, ཏསྨིཾ ཨཊྛཀཐཱཝཙནེ ཙོདཀེན ཙོདེཏབྦསྶ ཨཏྠིཏཱཡ ཏཾ པརིཧརིཏུཾ ‘‘པཉྩནྣཾ ཛནཱནཾ ཝཊྚཏཱིཏི པཙྪིམཀོཊིཡཱ ཙཏྟཱརོ ཀཐིནདུསྶསྶ དཱཡཀཱ, ཨེཀོ པཊིགྒཱཧཀོཏི པཉྩནྣཾ ཛནཱནཾ ཝཊྚཏཱི’’ཏི པཱཋོ ཊཱིཀཱཙརིཡེན ཝུཏྟོ, ཀཐཾ ཙོདེཏབྦཾ ཨཏྠཱིཏི? བྷོ ཨཊྛཀཐཱཙརིཡ ‘‘སོ སབྦནྟིམེན པརིཙྪེདེན པཉྩནྣཾ ཛནཱནཾ ཝཊྚཏཱི’’ཏི ཝུཏྟོ, ཨེཝཾ སཏི པཉྩནྣཾ ཀཐིནཏྠཱརཀཱནཾ ཨེཝ སོ ཀཐིནཏྠཱརོ ཝཊྚཏི, ན ཨེཀདྭིཏིཙཏུཔུགྒལཱནནྟི ཨཏྠོ ཨཱཔཛྫཏི, ཨེཝཾ སཏི ‘‘ན སངྒྷོ ཀཐིནཾ ཨཏྠརཏི, ན གཎོ ཀཐིནཾ ཨཏྠརཏི, པུགྒལོ ཀཐིནཾ ཨཏྠརཏཱི’’ཏི ཨཱགཏཔཱལི༹ཡཱ ཝིརུཛ྄ཛྷནཏོ ཨཱགམཝིརོདྷོ ¶ ཨཱཔཛྫཏི, ཏཾ ཙོདནཾ པརིཧརནྟོ ‘‘པཉྩནྣཾ ཛནཱནཾ ཝཊྚཏཱིཏི པཙྪིམཀོཊིཡཱ ཙཏྟཱརོ ཀཐིནདུསྶསྶ དཱཡཀཱ, ཨེཀོ པཊིགྒཱཧཀོཏི པཉྩནྣཾ ཛནཱནཾ ཝཊྚཏཱི’’ཏི པཱཋོ ཊཱིཀཱཙརིཡེན ཝུཏྟོ. ཏཏྠཱཡམདྷིཔྤཱཡོ – བྷོ ཙོདཀཱཙརིཡ ཨཊྛཀཐཱཙརིཡེན ཀཐིནཏྠཱརཀཱལེ པཉྩནྣཾ ཨཏྠཱརཀཱནཾ བྷིཀྑཱུནཾ ཝསེན ‘‘སོ སབྦནྟིམེན པརིཙྪེདེན པཉྩནྣཾ ཛནཱནཾ ཝཊྚཏཱི’’ཏི པཱཋོ ན ཝུཏྟོ, ཨཐ ཁོ སངྒྷེན ཨཏྠཱརཀསྶ ཀཐིནདུསྶདཱནཀཱལེ པཙྪིམཀོཊིཡཱ ཙཏྟཱརོ ཀཐིནདུསྶསྶ དཱཡཀཱ, ཨེཀོ པཊིགྒཱཧཀོཏི པཉྩནྣཾ དཱཡཀཔཊིགྒཱཧཀཔུགྒལཱནཾ ཨཏྠིཏཱཡ སོ པཙྪཱ ཀཏྟབྦོ ཨཏྠཱརོ ཝཊྚཏི, ཀཱརཎསམྤཏྟིཡཱ ཕལསམྤཏྟི ཧོཏི, ཏསྨཱ ཏསྨིཾ ཨཊྛཀཐཱཝཙནེ ཨཱགམཝིརོདྷོ ནཱཔཛྫཏཱིཏི.

ཝིནཡཝིནིཙྪཡཊཱིཀཱཡམྤི ¶ ‘‘ཀཐིནཏྠཱརཾ ཀེ ལབྷནྟི, ཀེ ན ལབྷནྟཱིཏི? གཎནཝསེན ཏཱཝ པཙྪིམཀོཊིཡཱ པཉྩ ཛནཱ ལབྷནྟི, ཨུདྡྷཾ སཏསཧསྶམྤི, པཉྩནྣཾ ཧེཊྛཱ ན ལབྷནྟཱི’’ཏི ཨཊྛཀཐཱཝཙནེ པརེཧི པུཙྪིཏབྦསྶ ཨཏྠིཏཱཡ ཏཾ པུཙྪཾ ཝིསྶཛྫེཏུཾ ‘‘ཨིདཾ ཨཏྠཱརཀསྶ བྷིཀྑུནོ སངྒྷསྶ ཀཐིནདུསྶདཱནཀམྨཾ སནྡྷཱཡ ཝུཏྟ’’ནྟི པཱཋོ ཊཱིཀཱཙརིཡེན ཝུཏྟོ. ཀཐཾ པུཙྪིཏབྦནྟི ཙེ? བྷོ ཨཊྛཀཐཱཙརིཡ ‘‘ཧེཊྛིམཀོཊིཡཱ པཉྩནྣཾ ཛནཱནཾ ཝཊྚཏཱི’’ཏི ཨིདཾ ཝཙནཾ ཀིཾ པཉྩཱནིསཾསསྶ ཀཱརཎབྷཱུཏཾ ‘‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’’ཏིཨཱདིཨཏྠཱརཀིརིཡཾ སནྡྷཱཡ ཝུཏྟཾ, ཨུདཱཧུ ཨཏྠཱརསྶ ཀཱརཎབྷཱུཏཾ ཀཐིནདུསྶདཱནཀམྨནྟི. ཀཐཾ ཝིསྶཛྫནཱཏི? བྷོ བྷདྲམུཁ ‘‘ཧེཊྛིམཀོཊིཡཱ པཉྩནྣཾ ཛནཱནཾ ཝཊྚཏཱི’’ཏི ཨིདཾ པཉྩཱནིསཾསསྶ ཀཱརཎབྷཱུཏཾ ‘‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’’ཏིཨཱདིཀཾ ཨཏྠཱརཀིརིཡཾ སནྡྷཱཡ ཨཊྛཀཐཱཙརིཡེན ན ཝུཏྟཾ, ཨཐ ཁོ ཨཏྠཱརསྶ ཀཱརཎབྷཱུཏཾ ཀཐིནདཱནཀམྨཾ སནྡྷཱཡ ཝུཏྟནྟི ¶ . ཏཏྲཱཡམདྷིཔྤཱཡོ – སངྒྷེན ཨཏྠཱརཀསྶ དིནྣདུསྶེན ཨེཝ ཀཐིནཏྠཱརོ སམྦྷཝཏི, ན ཋིཏིཀཱཡ ལདྡྷཙཱིཝརེན ཝཱ པུགྒལིཀཙཱིཝརེན ཝཱ སམྦྷཝཏི, ཏཉྩ ཀཐིནདུསྶདཱནཀམྨཾ ཙཏྟཱརོ ཀཐིནདུསྶདཱཡཀཱ, ཨེཀོ པཊིགྒཱཧཀོཏི པཉྩསུ བྷིཀྑཱུསུ ཝིཛྫམཱནེསུཡེཝ སམྤཛྫཏི, ན ཏཏོ ཨཱུནེསཱུཏི པཙྪིམཀོཊིཡཱ པཉྩནྣཾ ཝཊྚཏི, ཀཱརཎསིདྡྷིཡཱ ཕལསིདྡྷི ཧོཏི, ཏེནེཝ ཙ ཀཱརཎེན ‘‘ཀཐིནདུསྶདཱནཀམྨཾ ཝུཏྟ’’ནྟི མུཁྱཝསེན ཨཝཏྭཱ ‘‘སནྡྷཱཡ ཝུཏྟ’’ནྟི ཨུཔཙཱརཝསེནཱཧ. ཨེཝཾ ཝུཏྟེཡེཝ ཨཊྛཀཐཱཝཙནསྶ པུབྦཱཔརཝིརོདྷོ ནཏྠི, ཨཊྛཀཐཱཝཙནེན ཙ ཊཱིཀཱཝཙནཾ ཝིརུདྡྷཾ ན ཧོཏཱིཏི དཊྛབྦཾ, ‘‘ཨཔལོཀནཱདིསངྒྷཀམྨཀརཎཏྠཾ བདྡྷསཱིམཱ བྷགཝཏཱ ཨནུཉྙཱཏཱ’’ཏི ཨིམིནཱ ཝིནཡལཀྑཎེན ཙ སམེཏི.

‘‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’’ཏིཨཱདིཀཱ པན ཨཏྠཱརཀིརིཡཱ ཨཔལོཀནཱདཱིསུ ཙཏཱུསུ སངྒྷཀམྨེསུ ཨཔྤཝིཊྛཱ, ཨདྷིཊྛཱནཱདཡོ ཝིཡ པཉྩཱནིསཾསལཱབྷཀཱརཎབྷཱུཏཱ པུགྒལཀིརིཡཱཝ ཧོཏཱིཏི ཝསྶཱུཔནཱཡིཀཁེཏྟབྷཱུཏཱཡ ཨནྟོཨུཔཙཱརསཱིམཱཡ ཀཱཏབྦཱ, ཏསྨཱ ཨནྟོཨུཔཙཱརསཱིམཱཡཾ བདྡྷསཱིམཱཡ ཨཝིཛྫམཱནཱཡ བཧིཨུཔཙཱརསཱིམཱཡཾ བདྡྷསཱིམཾ ཝཱ ཨུདཀུཀྑེཔསཏྟབྦྷནྟརལབྷམཱནཊྛཱནཾ ཝཱ གནྟྭཱ ཉཏྟིདུཏིཡཀམྨེན ཀཐིནདུསྶཾ དཱཔེཏྭཱ པུན ཝིཧཱརཾ ཨཱགནྟྭཱ ཨནྟོཨུཔཙཱརསཱིམཱཡམེཝ ཀཐིནཏྠརཎཾ པུབྦཱཙརིཡེཧི ཀཏཾ, ཏཾ སུཀཏམེཝ ཧོཏཱིཏི དཊྛབྦཾ. ཨེཝཾ ཨགྒཧེཏྭཱ སུདྡྷཨུཔཙཱརསཱིམཱཡམེཝ ཉཏྟིདུཏིཡཀམྨཾ ཀཱཏབྦནྟི གཡ྄ཧམཱནེ སཏི ཏེསཾ ཨཱཡསྨནྟཱནཾ དིཊྛཱནུགཏིཾ ཨཱཔཛྫམཱནཱ སིསྶཱནུསིསྶཱ དྷུཝཝཱསཏྠཱཡ ཝིཧཱརདཱནཱདིཨཔལོཀནཀམྨཾ ཝཱ ཨུཔོསཐཔཝཱརཎཱདིཉཏྟིཀམྨཾ ཝཱ སཱིམཱསམྨནྣནཱདིཉཏྟིདུཏིཡཀམྨཾ ¶ ཝཱ ཨུཔསམྤདཱདིཉཏྟིཙཏུཏྠཀམྨཾ ཝཱ ཨུཔཙཱརསཱིམཱཡམེཝ ཀརེཡྻུཾ, ཨེཝཾ ཀརོནྟཱ བྷགཝཏོ ¶ སཱསནེ མཧནྟཾ ཛཊཾ མཧནྟཾ གུམྦཾ མཧནྟཾ ཝིསམཾ ཀརེཡྻུཾ, ཏསྨཱ ཏམཀརཎཏྠཾ ཡུཏྟིཏོ ཙ ཨཱགམཏོ ཙ ཨནེཀཱནི ཀཱརཎཱནི ཨཱཧརིཏྭཱ ཀཐཡིམྷཱཏི.

སཱསནེ གཱརཝཾ ཀཏྭཱ, སདྡྷམྨསྶཱནུལོམཏོ;

མཡཱ ཀཏཾ ཝིནིཙྪཡཾ, སམྨཱ ཙིནྟེནྟུ སཱདྷཝོ.

པུནཔྤུནཾ ཝིཙིནྟེཏྭཱ, ཡུཏྟཾ ཙེ ཧོཏི གཎྷནྟུ;

ནོ ཙེ ཡུཏྟཾ མཱ གཎྷནྟུ, སམྨཱསམྦུདྡྷསཱཝཀཱཏི.

ཨིཏོ པརཱནིཔི ཀཱརཎསཱདྷཀཱནི ཨཱཧརནྟི ཨཱཙརིཡཱ, ཏེསཾ པཊིཝཙནེན ཨཏིཝིཏྠཱརོ བྷཝིསྶཏི, ཨུཔཙཱརསཱིམཱཡ ཙཏུནྣཾ སངྒྷཀམྨཱནཾ ཀཏཊྛཱནབྷཱཝོ པུབྦེ ཝུཏྟོཝ, ཏསྨཱ ཏཾ ཝཙནཾ མནསི ཀཏྭཱ སཾསཡཾ ཨཀཏྭཱ དྷཱརེཏབྦོཏི.

‘‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’’ཏི ཝཱཙཱ བྷིནྡིཏབྦཱཏི ཀིཾ ཨེཏྟཀེན ཝཙཱིབྷེདེན ཀཐིནཾ ཨཏྠཏཾ ཧོཏི, ཨུདཱཧུ ཨཉྙོ ཀོཙི ཀཱཡཝིཀཱརོ ཀཱཏབྦོ? ན ཀཱཏབྦོ. ཨེཏྟཀེནེཝ ཧི ཝཙཱིབྷེདེན ཨཏྠཏཾ ཧོཏི, ཀཐིནཾ. ཝུཏྟཉྷེཏཾ པརིཝཱརེ (པརི. ༤༠༨) ‘‘ཨཏྠཱརོ ཨེཀེན དྷམྨེན སངྒཧིཏོ ཝཙཱིབྷེདེནཱ’’ཏི.

ཨེཝཾ ཀཐིནཏྠཱརཾ དསྶེཏྭཱ ཨནུམོདཱཔནཨནུམོདནེ དསྶེནྟོ ‘‘ཏེན ཀཐིནཏྠཱརཀེནཱ’’ཏིཨཱདིམཱཧ. ཏཏྠ ཡེན བྷིཀྑུནཱ ‘‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’’ཏིཨཱདིནཱ ཝཙཱིབྷེདེན ཀཐིནཾ ཨཏྠཏཾ, ཏེན ‘‘ཀཐིནསྶ ཨཏྠཱརཱ པནྣརས དྷམྨཱ ཛཱཡནྟཱི’’ཏི པརིཝཱརེ (པརི. ༤༠༣) ཨཱགཏཏྟཱ ཀཐིནཏྠཱརེན སཧེཝ པཉྩ ཨཱནིསཾསཱ ཨཱགཏཱ, ཨཐ ཀསྨཱ སངྒྷཾ ཨནུམོདཱཔེཏཱིཏི? ཀིཉྩཱཔི ཨཏྠཱརཀསྶ བྷིཀྑུནོ པཉྩ ཨཱནིསཾསཱ ཨཱགཏཱ, སངྒྷསྶ པན ཨནཱགཏཱ, ཏསྨཱ སངྒྷསྶ ཙ ཨཱགམནཏྠཾ སངྒྷཾ ཨནུམོདཱཔེཏི, སངྒྷོ ¶ ཙ ཨནུམོདནཾ ཀརོཏི, ཨེཝཾ ཀཏེ ཨུབྷིནྣམྤི ཨཱནིསཾསཱ ཨཱགཏཱ ཧོནྟི. ཝུཏྟཉྷེཏཾ པརིཝཱརེ (པརི. ༤༠༣) ‘‘དྭིནྣཾ པུགྒལཱནཾ ཨཏྠཏཾ ཧོཏི ཀཐིནཾ ཨཏྠཱརཀསྶ ཙ ཨནུམོདཀསྶ ཙཱ’’ཏི. ཨེཏྠ ཙ ཀཐིནཏྠཱརཀབྷིཀྑུཏོ ཝུཌྜྷཏརོ བྷིཀྑུ ཏསྨིཾ ¶ སངྒྷེ ཨཏྠི, ཨིདྷ ཝུཏྟནཡེན ཨཏྠཱརཀེན ‘‘བྷནྟེ’’ཏི ཝཏྟབྦཾ, ཨནུམོདཀེན ‘‘ཨཱཝུསོ’’ཏི. ཡདི པན ཀཐིནཏྠཱརཀོ བྷིཀྑུ སབྦེསཾ ཝུཌྜྷཏརོ ཧོཏི, ཏེན ‘‘ཨཱཝུསོ’’ཏི ཝཏྟབྦཾ, ཨིཏརེཧི ‘‘བྷནྟེ’’ཏི, ཨེཝཾ སེསནཡདྭཡེཔི. ཨེཝཾ སབྦེསཾ ཨཏྠཏཾ ཧོཏི ཀཐིནནྟི. ཨིམེསུ པན སངྒྷཔུགྒལེསུ ཡེ ཏསྨིཾ ཝིཧཱརེ པུརིམིཀཱཡ ཝསྶཾ ཨུཔགནྟྭཱ པཋམཔཝཱརཎཱཡ པཝཱརིཏཱ, ཏེཡེཝ ཨནུམོདིཏུཾ ལབྷནྟི, ཚིནྣཝསྶཱ ཝཱ པཙྪིམིཀཱཡ ཨུཔགཏཱ ཝཱ ཨཉྙསྨིཾ ཝིཧཱརེ ཝུཏྠཝསྶཱ ཝཱ ན ལབྷནྟི, ཨནནུམོདནྟཱཔི ཨཱནིསཾསཾ ན ལབྷནྟི.

ཨེཝཾ ཀཐིནཏྠཱརཾ དསྶེཏྭཱ ཨིདཱནི ཙཱིཝརཝིབྷཱགཾ དསྶེཏུཾ ‘‘ཨེཝཾ ཨཏྠཏེ པན ཀཐིནེ’’ཏིཨཱདིམཱཧ. ཏཏྠ སཙེ ཀཐིནཙཱིཝརེན སདྡྷིཾ ཨཱབྷཏཾ ཨཱནིསཾསནྟི ཨིམིནཱ ཨེཀཾ ཨཏྠཏཙཱིཝརམེཝ ཀཐིནཙཱིཝརཾ ནཱམ, ཏཏོ ཨཉྙཾ ཏེན སདྡྷིཾ ཨཱབྷཏཾ སབྦཾ ཙཱིཝརཾ ཀཐིནཱནིསཾསཙཱིཝརཾ ནཱམཱཏི དསྶེཏི. ཝཀྑཏི ཧི ‘‘ཨཝསེསཀཐིནཱནིསཾསེ བལཝཝཏྠཱནཱི’’ཏིཨཱདི. ཏེན ཉཱཡཏི ‘‘ཝཏྠམེཝ ཨིདྷ ཨཱནིསཾསོ ནཱམ, ན ཨགྒྷོ, ཀཐིནསཱཊཀེན སདྡྷིཾ ཨཱབྷཏཱནཾ ཨཉྙསཱཊཀཱནཾ བཧུལཝསེན ཨཏྠརིཏབྦཾ, ན ཀཐིནསཱཊཀསྶ མཧགྒྷཝསེནཱ’’ཏི. བྷིཀྑུསངྒྷོ ཨནིསྶརོ, ཨཏྠཏཀཐིནོ བྷིཀྑུཡེཝ ཨིསྶརོ. ཀསྨཱ? དཱཡཀེཧི ཝིཙཱརིཏཏྟཱ. བྷིཀྑུསངྒྷོ ཨིསྶརོ, ཀསྨཱ? དཱཡཀེཧི ཨཝིཙཱརིཏཏྟཱ, མཱུལཀཐིནསྶ ཙ སངྒྷེ དིནྣཏྟཱ. ཨཝསེསཀཐིནཱནིསཾསེཏི ¶ ཏསྶ དིནྣཝཏྠེཧི ཨཝསེསཀཐིནཱནིསཾསཝཏྠེ. བལཝཝཏྠཱནཱིཏི ཨཏྠརིཏབྦཀཐིནསཱཊཀཾཡེཝ ཨཧཏཾ ཝཱ ཨཧཏཀཔྤཾ ཝཱ དཱཏུཾ ཝཊྚཏི, ཨཱནིསཾསཙཱིཝརཾ པན ཡཐཱསཏྟི ཡཐཱབལཾ པུརཱཎཾ ཝཱ ཨབྷིནཝཾ ཝཱ དུབྦལཾ ཝཱ བལཝཾ ཝཱ དཱཏུཾ ཝཊྚཏི, ཏསྨཱ ཏེསུ དུབྦལཝཏྠེ ཋིཏིཀཱཡ དིནྣེ ལདྡྷབྷིཀྑུསྶ ཨུཔཀཱརཀཾ ན ཧོཏི, ཏསྨཱ ཨུཔཀཱརཎཡོགྒཱནི བལཝཝཏྠཱནི དཱཏབྦཱནཱིཏི ཨདྷིཔྤཱཡོ. ཝསྶཱཝཱསིཀཋིཏིཀཱཡ དཱཏབྦཱནཱིཏི ཡཏྟཀཱ བྷིཀྑཱུ ཝསྶཱཝཱསིཀཙཱིཝརཾ ལབྷིཾསུ, ཏེ ཋཔེཏྭཱ ཏེསཾ ཧེཊྛཏོ པཊྛཱཡ ཡཐཱཀྐམཾ དཱཏབྦཱནི. ཐེརཱསནཏོ པཊྛཱཡཱཏི ཡཏྟཀཱ བྷིཀྑཱུ ཏིསྶཾ ཀཐིནཏྠཏསཱིམཱཡཾ སནྟི, ཏེསུ ཛེཊྛཀབྷིཀྑུཏོ པཊྛཱཡ དཱཏབྦཱནི. ཨཱསནགྒཧཎཾ པན ཡཐཱཝུཌྜྷཾ ནིསིནྣེ སནྡྷཱཡ ཀཏཾ. ཨེཏེན ཝསྶཱཝཱསིཀཀཐིནཱནིསཾསཱནཾ སམཱནགཏིཀཏཾ དཱིཔེཏི. གརུབྷཎྜཾ ན བྷཱཛེཏབྦནྟི ཀཐིནསཱཊཀེན སདྡྷིཾ ཨཱབྷཏེསུ མཉྩཔཱིཋཱདིཀཾ གརུབྷཎྜཾ ན བྷཱཛེཏབྦཾ, སངྒྷིཀཝསེནེཝ པརིབྷུཉྫིཏབྦནྟི ཨཏྠོ. ཏཏྠ གརུབྷཎྜཝིནིཙྪཡོ ཨནནྟརཀཐཱཡཾ ཨཱཝི བྷཝིསྶཏི.

ཨིམསྨིཾ པན ཋཱནེ ཝཏྟབྦཾ ཨཏྠི. ཀཐཾ? ཨིདཱནི བྷིཀྑཱུ ཀཐིནཱནིསཾསཙཱིཝརཾ ཀུསཔཱཏཾ ཀཏྭཱ ¶ ཝིབྷཛནྟི, ཏཾ ཡུཏྟཾ ཝིཡ ན དིསྶཏཱིཏི. ཀསྨཱཏི ཙེ? ‘‘ཨཝསེསཀཐིནཱནིསཾསེ བལཝཝཏྠཱནི ཝསྶཱཝཱསིཀཋིཏིཀཱཡ དཱཏབྦཱནི, ཋིཏིཀཱཡ ཨབྷཱཝེ ཐེརཱསནཏོ པཊྛཱཡ དཱཏབྦཱནཱི’’ཏི ཝཙནཏོཏི. ཨེཝཾ སནྟེ ཀཏྠ ཀུསཔཱཏོ ཀཱཏབྦོཏི? བྷཎྜཱགཱརེ ཋཔིཏཙཱིཝརེཏི. ཀཐཾ ཝིཉྙཱཡཏཱིཏི ཙེ? ‘‘ཨུསྶནྣཾ ཧོཏཱིཏི བཧུ རཱསིཀཏཾ ཧོཏི, བྷཎྜཱགཱརཾ ན གཎྷཱཏི. སམྨུཁཱིབྷཱུཏེནཱཏི ཨནྟོཨུཔཙཱརསཱིམཱཡཾ ཋིཏེན. བྷཱཛེཏུནྟི ཀཱལཾ གྷོསཱཔེཏྭཱ པཊིཔཱཊིཡཱ བྷཱཛེཏུཾ…པེ… ཨེཝཾ ཋཔིཏེསུ ཙཱིཝརཔཊིཝཱིསེསུ ཀུསོ པཱཏེཏབྦོ’’ཏི ཨཊྛཀཐཱཡཾ ¶ (མཧཱཝ. ཨཊྛ. ༣༤༣) ཝུཏྟཏྟཱ, ཏསྨཱ ཨིམིསྶཾ ཨཊྛཀཐཱཡཾ ཝུཏྟནཡེནེཝ བྷཱཛེཏབྦནྟི ཨམྷཱཀཾ ཁནྟི.

ཨེཀཙྩེ པན བྷིཀྑཱུ ཨེཀེཀསྶ ཨེཀེཀསྨིཾ ཙཱིཝརེ ཨཔྤཧོནྟེ ཙཱིཝརཾ པརིཝཏྟེཏྭཱ ཨཀཔྤིཡཝཏྠུཾ གཧེཏྭཱ བྷཱཛེནྟི, ཏཾ ཨཏིཨོལཱ༹རིཀམེཝ. ཨཉྙེཔི ཨེཀཙྩཱནཾ ཙཱིཝརཱནཾ མཧགྒྷཏཱཡ ཨེཀཙྩཱནཾ ཨཔྤགྒྷཏཱཡ སམགྒྷཾ ཀཱཏུཾ ན སཀྐཱཏི ཏཐེཝ ཀརོནྟི, ཏམྤི ཨོལཱ༹རིཀམེཝ. ཏཏྠ ཧི ཨཀཔྤིཡཝཏྠུནཱ པརིཝཏྟནེཔི ཏསྶ ཝིཙཱརཎེཔི བྷཱགགྒཧཎེཔི ཨཱཔཏྟིཡེཝ ཧོཏི. ཨེཀེ ‘‘ཀཐིནཾ ནཱམ དུབྦིཙཱརཎཱིཡ’’ནྟི ཝཏྭཱ ཨཏྠརཎཾ ན ཀརོནྟི, པུགྒལིཀཝསེནེཝ ཡཐཱཛ྄ཛྷཱསཡཾ ཝིཙཱརེནྟི, ཏཾ པན ཡདི དཱཡཀེཧི པུགྒལསྶེཝ དིནྣཾ, པུགྒལེན ཙ སངྒྷསྶ ཨཔརིཙྩཛིཏཾ, ཨེཝཾ སཏི ཨཏྟནོ སནྟཀཏྟཱ ཡུཏྟཾ ཝིཡ དིསྶཏི. ཡདི པན སངྒྷསྶ ཝཱ གཎསྶ ཝཱ དིནྣཾ, པུགྒལསྶ དིནྣེཔི སངྒྷསྶ ཝཱ གཎསྶ ཝཱ པརིཙྩཛིཏཾ, ཨེཝཾ སནྟེ སངྒྷགཎཱནཾ སནྟཀཏྟཱ ཨཡུཏྟཾ བྷཝེཡྻ. ཨཔརེ པན ཀཐིནཝསེན པཊིགྒཧིཏེ ཝིཙཱརེཏུཾ དུཀྐརནྟི མཉྙམཱནཱ ‘‘ན མཡཾ ཀཐིནཝསེན པཊིགྒཎྷཱམ, ཝསྶཱཝཱསིཀབྷཱཝེནེཝ པཊིགྒཎྷཱམཱ’’ཏི ཝཏྭཱ ཡཐཱརུཙི ཝིཙཱརེནྟི, ཏམྤི ཨཡུཏྟཾ. ཝསྶཱཝཱསིཀམྤི ཧི སངྒྷསྶ དིནྣཾ སངྒྷིཀཾ ཧོཏིཡེཝ, པུགྒལསྶ དིནྣཾ པུགྒལིཀཾ. ཀཐཾ ཝིཉྙཱཡཏཱིཏི ཙེ? ‘‘སཙེ པན ཏེསཾ སེནཱསནེ པཾསུཀཱུལིཀོ ཝསཏི, ཨཱགཏཉྩ ཏཾ དིསྭཱ ‘ཏུམྷཱཀཾ ཝསྶཱཝཱསིཀཾ དེམཱ’ཏི ཝདནྟི, ཏེན སངྒྷསྶ ཨཱཙིཀྑིཏབྦཾ. སཙེ ཏཱནི ཀུལཱནི སངྒྷསྶ དཱཏུཾ ན ཨིཙྪནྟི, ‘ཏུམྷཱཀཾཡེཝ དེམཱ’ཏི ཝདནྟི, སབྷཱགོ བྷིཀྑུ ‘ཝཏྟཾ ཀཏྭཱ གཎྷཱཧཱི’ཏི ཝཏྟབྦོ, པཾསུཀཱུལིཀསྶ པནེཏཾ ན ཝཊྚཏཱི’’ཏི ཨཊྛཀཐཱཡཾ (ཙཱུལ༹ཝ. ཨཊྛ. ༣༡༨; ཝི. སངྒ. ཨཊྛ. ༢༡༩) ཝུཏྟཏྟཱ.

ཝསྶཱཝཱསིཀཾ ¶ དུཝིདྷཾ སདྡྷཱདེཡྻཏཏྲུཔྤཱདཝསེན. ཝུཏྟཉྷི ཨཊྛཀཐཱཡཾ (ཙཱུལ༹ཝ. ཨཊྛ. ༣༡༨) ‘‘ཨིཏི ¶ སདྡྷཱདེཡྻེ དཱཡཀམནུསྶཱ པུཙྪིཏབྦཱ, ཏཏྲུཔྤཱདེ པན ཀཔྤིཡཀཱརཀཱ པུཙྪིཏབྦཱ’’ཏི. སདྡྷཱདེཡྻཝསྶཱཝཱསིཀམྤི སཝིཧཱརཱཝིཧཱརཝསེན དུཝིདྷཾ. ཝུཏྟཉྷེཏཾ ཨཊྛཀཐཱཡཾ (ཙཱུལ༹ཝ. ཨཊྛ. ༣༡༨) ‘‘མཧཱཔདུམཏྠེརོ པནཱཧ ན ཨེཝཾ ཀཱཏབྦཾ. མནུསྶཱ ཧི ཨཏྟནོ ཨཱཝཱསཔཊིཛགྒནཏྠཱཡ པཙྩཡཾ དེནྟི, ཏསྨཱ ཨཉྙེཧི བྷིཀྑཱུཧི ཏཏྠ པཝིསིཏབྦ’’ནྟི, ‘‘ཡེསཾ པན སེནཱསནཾ ནཏྠི, ཀེཝལཾ པཙྩཡམེཝ དེནྟི, ཏེསཾ པཙྩཡཾ ཨཝསྶཱཝཱསིཀེ སེནཱསནེ གཱཧེཏུཾ ཝཊྚཏཱི’’ཏི ཙ. ཏཏྲུཔྤཱདཝསྶཱཝཱསིཀཾ ནཱམ ཀཔྤིཡཀཱརཀཱནཾ ཧཏྠེ ཀཔྤིཡཝཏྠུཔཨབྷུཉྫནཏྠཱཡ དིནྣཝཏྠུཏོ ནིབྦཏྟཾ. ཝུཏྟམྤི ཙེཏཾ ཨཊྛཀཐཱཡཾ (ཙཱུལ༹ཝ. ཨཊྛ. ༣༡༨) ‘‘ཀཔྤིཡཀཱརཀཱནཉྷི ཧཏྠེ ‘ཀཔྤིཡབྷཎྜཾ པརིབྷུཉྫཐཱ’ཏི དིནྣཝཏྠུཏོ ཡཾ ཡཾ ཀཔྤིཡཾ, ཏཾ སབྦཾ པརིབྷུཉྫིཏུཾ ཨནུཉྙཱཏ’’ནྟི. ཨེཝཾ ཝསྶཱཝཱསིཀཙཱིཝརམྤི པུབྦེ ཡེབྷུཡྻེན སངྒྷསྶེཝ དེནྟི, ཏསྨཱ ‘‘ཀཐིནཙཱིཝརཾ དེམཱ’’ཏི ཝུཏྟེ ཀཐིནཙཱིཝརབྷཱཝེན པཊིགྒཧེཏབྦཾ, ‘‘ཝསྶཱཝཱསིཀཾ དེམཱ’’ཏི ཝུཏྟེ ཝསྶཱཝཱསིཀཙཱིཝརབྷཱཝེནེཝ པཊིགྒཧེཏབྦཾ. ཀསྨཱ? ‘‘ཡཐཱ དཱཡཀཱ ཝདནྟི, ཏཐཱ པཊིཔཛྫིཏབྦ’’ནྟི (ཙཱུལ༹ཝ. ཨཊྛ. ༣༢༥) ཝཙནཏོ.

ཀིཉྩི ཨཝཏྭཱ ཧཏྠེ ཝཱ པཱདམཱུལེ ཝཱ ཋཔེཏྭཱ གཏེ ཀིཾ ཀཱཏབྦནྟི? ཏཏྠ སཙེ ‘‘ཨིདཾ ཝཏྠུ ཙེཏིཡསྶ ཝཱ སངྒྷསྶ ཝཱ པརཔུགྒལསྶ ཝཱ ཨཏྠཱཡ པརིཎཏ’’ནྟི ཛཱནེཡྻ, ཏེསཾ ཨཏྠཱཡ པཊིགྒཧེཏབྦཾ. ཨཐ ‘‘མམཏྠཱཡ པརིཎཏ’’ནྟི ཛཱནེཡྻ, ཨཏྟནོ ཨཏྠཱཡ པཊིགྒཧེཏབྦཾ. ཝུཏྟཉྷེཏཾ པརིཝཱརེ (པརི. ༣༢༩) ‘‘ནཝ ཨདྷམྨིཀདཱནཱནཱི’’ཏིཨཱདི. ཨཐ ན ཀིཉྩི ཛཱནེཡྻ, ཨཏྟནོ ཧཏྠེ ཝཱ པཱདམཱུལེ ཝཱ ཀིཉྩི ཨཝཏྭཱ ཋཔིཏཾ ཏསྶེཝ པུགྒལིཀཾ ཧོཏི. ན ཧི ཙེཏིཡཱདཱིནཾ ཨཏྠཱཡ པརིཎཏཾ ¶ ཀིཉྩི ཨཝཏྭཱ བྷིཀྑུསྶ ཧཏྠེ ཝཱ པཱདམཱུལེ ཝཱ ཋཔེཏཱིཏི. ཝུཏྟཉྷེཏཾ སམནྟཔཱསཱདིཀཱཡཾ (མཧཱཝ. ཨཊྛ. ༣༧༩) ‘‘པུགྒལསྶ དེཏཱིཏི ‘ཨིམཾ ཙཱིཝརཾ ཨིཏྠནྣཱམསྶ དམྨཱི’ཏི ཨེཝཾ པརམྨུཁཱ ཝཱ པཱདམཱུལེ ཋཔེཏྭཱ ‘ཨིམཾ, བྷནྟེ, ཏུམྷཱཀཾ དམྨཱི’ཏི ཨེཝཾ སམྨུཁཱ ཝཱ དེཏཱི’’ཏིཨཱདི.

‘‘ཨིམིསྶཾ ཨཊྛཀཐཱཡཾ ཝུཏྟནཡེནེཝ བྷཱཛེཏབྦ’’ནྟི ཝུཏྟཾ, ཀཐཾ བྷཱཛེཏབྦནྟི? ‘‘ཨཝསེསཀཐིནཱནིསཾསེ བལཝཝཏྠཱནི ཝསྶཱཝཱསིཀཋིཏིཀཱཡ དཱཏབྦཱནཱི’’ཏི ཝུཏྟཏྟཱ ཡེ བྷིཀྑཱུ ཨིམསྨིཾ ཝསྶེ ཝསྶཱཝཱསིཀཾ ན ལབྷིཾསུ, ཏེསཾ ཧེཊྛཏོ པཊྛཱཡ ཨེཀེཀཾ ཙཱིཝརཾ ཝཱ སཱཊཀཾ ཝཱ དཱཏབྦཾ. ཨཐ ཙཱིཝརཱནཾ ཝཱ སཱཊཀཱནཾ ཝཱ ཨཝསིཊྛེསུ སནྟེསུ པུན ཐེརཱསནཏོ པཊྛཱཡ དུཏིཡབྷཱགོ དཱཏབྦོ. ཏཏོ ཙཱིཝརེསུ ཝཱ སཱཊཀེསུ ཝཱ ཁཱིཎེསུ ཡེ ལབྷནྟི, ཏེསུ པཙྪིམསྶ ¶ ཝསྶཱདཱིནི སལླཀྑེཏབྦཱནི. ན ཀེཝལཾ ཏསྨིཾ ཀཐིནཏྠཏདིཝསེ དིནྣདུསྶཱནི ཨེཝ ཀཐིནཱནིསཾསཱནི ནཱམ ཧོནྟི, ཨཐ ཁོ ཡཱཝ ཀཐིནསྶ ཨུབྦྷཱརཱ སངྒྷཾ ཨུདྡིསྶ དིནྣཙཱིཝརཱནིཔི སངྒྷིཀེན ཏཏྲུཔྤཱདེན ཨཱརཱམིཀེཧི ཨཱབྷཏཙཱིཝརཱནིཔི ཀཐིནཱནིསཾསཱནིཡེཝ ཧོནྟི. ཏསྨཱ ཏཱདིསེསུ ཙཱིཝརེསུ ཨུཔྤཛྫམཱནེསུ ཡཐཱཝུཏྟསལླཀྑིཏཝསྶསྶ བྷིཀྑུནོ ཧེཊྛཏོ པཊྛཱཡ པུནཔྤུནཾ གཱཧེཏབྦཾ. ‘‘ཋིཏིཀཱཡ ཨབྷཱཝེ ཐེརཱསནཏོ པཊྛཱཡ དཱཏབྦཱནཱི’’ཏི (མཧཱཝ. ཨཊྛ. ༣༠༦) ཝཙནཏོ ཏསྨིཾ ཝསྶེ ཝསྶཱཝཱསིཀཙཱིཝརཱནཾ ཨནུཔྤཛྫནཏོ ཝཱ ཨུཔྤཛྫམཱནེསུཔི ཋིཏིཀཱཡ ཨགཱཧཱཔནཏོ ཝཱ ཝསྶཱཝཱསིཀཋིཏིཀཱཡ ཨབྷཱཝེ སཏི ལདྡྷབྦཀཐིནཱནིསཾསེ ཏསྶཾ ཨུཔཙཱརསཱིམཱཡཾ སབྦེ བྷིཀྑཱུ པཊིཔཱཊིཡཱ ནིསཱིདཱཔེཏྭཱ ཐེརཱསནཏོ པཊྛཱཡ ཋིཏིཀཾ ཀཏྭཱ ཨེཀེཀསྶ བྷིཀྑུནོ ཨེཀེཀཾ ཙཱིཝརཾ ཝཱ སཱཊཀཾ ཝཱ དཱཏབྦཾ. སངྒྷནཝཀསྶ ¶ དཱནཀཱལེཔི མཧཱཐེརཱ ཨཱགཙྪནྟི, ‘‘བྷནྟེ, ཝཱིསཏིཝསྶཱནཾ དཱིཡཏི, ཏུམྷཱཀཾ ཋིཏིཀཱ ཨཏིཀྐནྟཱ’’ཏི ན ཝཏྟབྦཱ, ཋིཏིཀཾ ཋཔེཏྭཱ ཏེསཾ དཏྭཱ པཙྪཱ ཋིཏིཀཱཡ དཱཏབྦཾ. དུཏིཡབྷཱགེ པན ཐེརཱསནཾ ཨཱརུལ༹ྷེ པཙྪཱ ཨཱགཏཱནཾ པཋམབྷཱགོ ན པཱཔུཎཱཏི, དུཏིཡབྷཱགཏོ ཝསྶགྒེན དཱཏབྦོ. ཨཡཾ ཋིཏིཀཱཝིཙཱརོ ཙཏུཔཙྩཡབྷཱཛནཀཐཱཏོ (ཝི. སངྒ. ཨཊྛ. ༢༠༢) གཧེཏབྦོཏི.

ནནུ ཙ བྷོ ཨེཀཙྩཱནི ཀཐིནཱནིསཾསཙཱིཝརཱནི མཧགྒྷཱནི, ཨེཀཙྩཱནི ཨཔྤགྒྷཱནི ཧོནྟི, ཀཐཾ ཨེཀེཀསྶ ཨེཀེཀསྨིཾ དིནྣེ ཨགྒྷསམཏྟཾ བྷཝེཡྻཱཏི? ཝུཙྩཏེ – བྷཎྜཱགཱརཙཱིཝརབྷཱཛནེ ཨགྒྷསམཏྟཾ ཨིཙྪིཏབྦཾ. ཏཐཱ ཧི ཝུཏྟཾ ཙཱིཝརཀྑནྡྷཀེ (མཧཱཝ. ༣༤༣) ‘‘ཏེན ཁོ པན སམཡེན སངྒྷསྶ བྷཎྜཱགཱརེ ཙཱིཝརཾ ཨུསྶནྣཾ ཧོཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, སམྨུཁཱིབྷཱུཏེན སངྒྷེན བྷཱཛེཏུཾ…པེ… ཨཐ ཁོ ཙཱིཝརབྷཱཛཀཱནཾ བྷིཀྑཱུནཾ ཨེཏདཧོསི ‘ཀཐཾ ནུ ཁོ ཙཱིཝརཾ བྷཱཛེཏབྦ’ནྟི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, པཋམཾ ཨུཙྩིནིཏྭཱ ཏུལཡིཏྭཱ ཝཎྞཱཝཎྞཾ ཀཏྭཱ བྷིཀྑཱུ གཎེཏྭཱ ཝགྒཾ བནྡྷིཏྭཱ ཙཱིཝརཔཊིཝཱིསཾ ཋཔེཏུ’’ནྟི. ཨཊྛཀཐཱཡཉྩ (མཧཱཝ. ཨཊྛ. ༣༤༣) ‘‘ཨུཙྩིནིཏྭཱཏི ‘ཨིདཾ ཐཱུལཾ, ཨིདཾ སཎྷཾ, ཨིདཾ གྷནཾ, ཨིདཾ ཏནུཀཾ, ཨིདཾ པརིབྷུཏྟཾ, ཨིདཾ ཨཔརིབྷུཏྟཾ, ཨིདཾ དཱིགྷཏོ ཨེཏྟཀཾ, པུཐུལཏོ ཨེཏྟཀ’ནྟི ཨེཝཾ ཝཏྠཱནི ཝིཙིནིཏྭཱ. ཏུལཡིཏྭཱཏི ‘ཨིདཾ ཨེཏྟཀཾ ཨགྒྷཏི, ཨིདཾ ཨེཏྟཀ’ནྟི ཨེཝཾ ཨགྒྷཔརིཙྪེདཾ ཀཏྭཱ. ཝཎྞཱཝཎྞཾ ཀཏྭཱཏི སཙེ སབྦེསཾ ཨེཀེཀམེཝ དསདསཨགྒྷནཀཾ པཱཔུཎཱཏི, ཨིཙྩེཏཾ ཀུསལཾ. ནོ ཙེ པཱཔུཎཱཏི, ཡཾ ནཝ ཝཱ ཨཊྛ ཝཱ ཨགྒྷཏི, ཏཾ ཨཉྙེན ཨེཀཨགྒྷནཀེན ཙ དྭིཨགྒྷནཀེན ཙ སདྡྷིཾ བནྡྷིཏྭཱ ཨེཏེན ཨུཔཱཡེན ¶ སམེ པཊིཝཱིསེ ཋཔེཏྭཱཏི ཨཏྠོ ¶ . བྷིཀྑཱུ གཎེཏྭཱ ཝགྒཾ བནྡྷིཏྭཱཏི སཙེ ཨེཀེཀསྶ དཱིཡམཱནེ དིཝསོ ན པཧོཏི, དས དས བྷིཀྑཱུ གཎེཏྭཱ དས དས ཙཱིཝརཔཊིཝཱིསེ ཨེཀཝགྒཾ བནྡྷིཏྭཱ ཨེཀཾ བྷཎྜིཀཾ ཀཏྭཱ ཨེཝཾ ཙཱིཝརཔཊིཝཱིསཾ ཋཔེཏུཾ ཨནུཛཱནཱམཱིཏི ཨཏྠོ. ཨེཝཾ ཋཔིཏེསུ ཙཱིཝརཔཊིཝཱིསེསུ ཀུསོ པཱཏེཏབྦོ’’ཏི ཝུཏྟཾ. ཏེན ཉཱཡཏི ‘‘བྷཎྜཱགཱརཙཱིཝརབྷཱཛནེ ཨགྒྷསམཏྟཾ ཨིཙྪིཏབྦཾ, ཀུསཔཱཏོ ཙ ཀཱཏབྦོ’’ཏི.

ཨིམསྨིཾ པན ཀཐིནཱནིསཾསཙཱིཝརབྷཱཛནེ ཨགྒྷསམཏྟཾ ན ཨིཙྪིཏབྦཾ, ཀུསཔཱཏོ ཙ ན ཀཱཏབྦོ. ཏཐཱ ཧི ཝུཏྟཾ ཀཐིནཀྑནྡྷཀཊྛཀཐཱཡཾ (མཧཱཝ. ཨཊྛ. ༣༠༦) ‘‘ཨེཝཾ ཨཏྠཏེ པན ཀཐིནེ སཙེ ཀཐིནཙཱིཝརེན སདྡྷིཾ ཨཱབྷཏཾ ཨཱནིསཾསཾ དཱཡཀཱ ‘ཡེན ཨམྷཱཀཾ ཀཐིནཾ གཧིཏཾ, ཏསྶེཝ དེམཱ’ཏི དེནྟི, བྷིཀྑུསངྒྷོ ཨནིསྶརོ. ཨཐ ཨཝིཙཱརེཏྭཱཝ དཏྭཱ གཙྪནྟི, བྷིཀྑུསངྒྷོ ཨིསྶརོ, ཏསྨཱ སཙེ ཀཐིནཏྠཱརཀསྶ སེསཙཱིཝརཱནིཔི དུབྦལཱནི ཧོནྟི, སངྒྷེན ཨཔལོཀེཏྭཱ ཏེསམྤི ཨཏྠཱཡ ཝཏྠཱནི དཱཏབྦཱནི, ཀམྨཝཱཙཱ པན ཨེཀཱཡེཝ ཝཊྚཏི. ཨཝསེསཀཐིནཱནིསཾསེ བལཝཝཏྠཱནི ཝསྶཱཝཱསིཀཋིཏིཀཱཡ དཱཏབྦཱནི. ཋིཏིཀཱཡ ཨབྷཱཝེ ཐེརཱསནཏོ པཊྛཱཡ དཱཏབྦཱནི’’ཨིཙྩེཝ ཝུཏྟཾ, ན ཝུཏྟཾ ‘‘ཨགྒྷཔརིཙྪེདཾ ཀཏྭཱ’’ཏི ཝཱ ‘‘ཀུསཔཱཏོ ཀཱཏབྦོ’’ཏི ཝཱ. ཏེན ཉཱཡཏི ‘‘ཀཐིནཱནིསཾསཙཱིཝརཱནི ཝསྶཱཝཱསིཀཋིཏིཀཱཡ ཝཱ ཝུཌྜྷཏརཏོ ཝཱ པཊྛཱཡེཝ དཱཏབྦཱནི, ནེཝ ཨགྒྷསམཏྟཾ ཀཱཏབྦཾ, ན ཀུསོ པཱཏེཏབྦོ’’ཏི.

ཨིདཱནི པན ཝསྶཱཝཱསིཀབྷཱཝེན ཨདིནྣཏྟཱ ཝསྶཱཝཱསིཀཋིཏིཀཱཡ ཨཀཏཏྟཱ ཙ ཀཐིནཏྠཏཙཱིཝརཏོ ཙ ཀཐིནཏྠཱརཀསྶ ཨཝསེསཙཱིཝརཏྠཱཡ དིནྣཝཏྠཏོ ཙ ཨཝསེསཀཐིནཱནིསཾསེ བལཝཝཏྠཱནི ཝུཌྜྷཏརཏོ པཊྛཱཡ ཨེཀསྶ བྷིཀྑུསྶ ཨེཀཾ ཝཏྠཾ དཱཏབྦཾ, ཏེསུ པན ཝརཾ ཝརཾ ཝུཌྜྷསྶ དཱཏབྦཾ ¶ . ཀཐཾ ཝིཉྙཱཡཏཱིཏི ཙེ? ‘‘པཙྪིམཝསྶཱུཔནཱཡིཀདིཝསེ པན སཙེ ཀཱལཾ གྷོསེཏྭཱ སནྣིཔཏིཏེ སངྒྷེ ཀོཙི དསཧཏྠཾ ཝཏྠཾ ཨཱཧརིཏྭཱ ཝསྶཱཝཱསིཀཾ དེཏི, ཨཱགནྟུཀོ སཙེ བྷིཀྑུསངྒྷཏྠེརོ ཧོཏི, ཏསྶ དཱཏབྦཾ. ནཝཀོ ཙེ ཧོཏི, སམྨཏེན བྷིཀྑུནཱ སངྒྷཏྠེརོ ཝཏྟབྦོ ‘སཙེ, བྷནྟེ, ཨིཙྪཐ, པཋམབྷཱགཾ མུཉྩིཏྭཱ ཨིདཾ ཝཏྠཾ གཎྷཐཱ’ཏི. ཨམུཉྩནྟསྶ ན དཱཏབྦཾ. སཙེ པན པུབྦེ གཱཧིཏཾ མུཉྩིཏྭཱ གཎྷཱཏི, དཱཏབྦཾ. ཨེཏེནེཝ ཨུཔཱཡེན དུཏིཡཏྠེརཏོ པཊྛཱཡ པརིཝཏྟེཏྭཱ པཏྟཊྛཱནེ ཨཱགནྟུཀསྶ དཱཏབྦཾ. སཙེ པཋམཝསྶཱུཔགཏཱ དྭེ ཏཱིཎི ཙཏྟཱརི པཉྩ ཝཱ ཝཏྠཱནི ཨལཏྠུཾ, ལདྡྷཾ ལདྡྷཾ ཨེཏེནེཝ ཨུཔཱཡེན ཝིསྶཛྫཱཔེཏྭཱ ཡཱཝ ཨཱགནྟུཀསྶ སམཀཾ ཧོཏི, ཏཱཝ དཱཏབྦཾ. ཏེན པན སམཀེ ལདྡྷེ ཨཝསིཊྛོ ཨནུབྷཱགོ ཐེརཱསནེ དཱཏབྦོ’’ཏི ¶ སེནཱསནཀྑནྡྷཀཊྛཀཐཱཡཾ (ཙཱུལ༹ཝ. ཨཊྛ. ༣༡༨) ཝཙནཏོ ཏཾསཾཝཎྞནཱབྷཱུཏཱཡཾ ཝིམཏིཝིནོདནིཡཉྩ (ཝི. ཝི. ཊཱི. ཙཱུལ༹ཝགྒ ༢.༣༡༨) ‘‘ཨཱགནྟུཀོ སཙེ བྷིཀྑཱུཏི ཙཱིཝརེ གཱཧིཏེ པཙྪཱ ཨཱགཏོ ཨཱགནྟུཀོ བྷིཀྑུ. པཏྟཊྛཱནེཏི ཝསྶགྒེན པཏྟཊྛཱནེ. པཋམཝསྶཱུཔགཏཱཏི ཨཱགནྟུཀསྶ ཨཱགམནཏོ པུརེཏརམེཝ པཙྪིམིཀཱཡ ཝསྶཱུཔནཱཡིཀཱཡ ཝསྶཱུཔགཏཱ. ལདྡྷཾ ལདྡྷནྟི དཱཡཀཱནཾ སནྟིཀཱ ཨཱགཏཱགཏསཱཊཀ’’ནྟི ཝཙནཏོ, ཝཛིརབུདྡྷིཊཱིཀཱཡཉྩ (ཝཛིར. ཊཱི. ཙཱུལ༹ཝགྒ ༣༡༨) ‘‘པཋམབྷཱགཾ མུཉྩིཏྭཱཏི ཨིདཾ ཙེ པཋམགཱཧིཏཝཏྠུཏོ མཧགྒྷཾ ཧོཏཱིཏི ལིཁིཏ’’ནྟི ཝཙནཏོ ཙ ཝིཉྙཱཡཏི. ཨེཝཾ ཨཊྛཀཐཱཡཾ ཊཱིཀཱསུ ཙ ཝསྶཱཝཱསིཀདཱནེ པཙྪཱ ཨཱབྷཏཾ མཧགྒྷཝཏྠཾ མཧཱཐེརཏོ པཊྛཱཡ པརིཝཏྟེཏྭཱ ཏེཧི ཨནིཙྪིཏཾཡེཝ ཝསྶགྒེན པཏྟསྶ པཙྪཱ ཨཱགཏསྶ བྷིཀྑུནོ དཱཏབྦབྷཱཝསྶ ཝུཏྟཏྟཱ ཝརཾ ཝརཾ ཝུཌྜྷསྶ དཱཏབྦནྟི ཝིཉྙཱཡཏི.

‘‘སཙེ ¶ པཋམཝསྶཱུཔགཏཱ དྭེ ཏཱིཎི ཙཏྟཱརི པཉྩ ཝཱ ཝཏྠཱནི ཨལཏྠུ’’ནྟི ཝཏྠགཎནཱཡ ཨེཝ ཝུཏྟཏྟཱ, ཨགྒྷགཎནཱཡ ཨཝུཏྟཏྟཱ ཙ ཀཐིནཱནིསཾསཝཏྠསྶ ཙ ཝསྶཱཝཱསིཀགཏིཀབྷཱཝསྶ ཝཙནཏོ ཀཐིནཱནིསཾསཝཏྠཱནི ཝཏྠགཎནཱཝསེནེཝ བྷཱཛེཏབྦཱནི, ན ཨགྒྷསམབྷཱཝེནཱཏི ཙ དཊྛབྦཱནི, ཏེནེཝ ཙ ཀཱརཎེན ‘‘ཡོ བཧཱུནི ཀཐིནཱནིསཾསཝཏྠཱནི དེཏི, ཏསྶ སནྟཀེནེཝ ཨཏྠརིཏབྦ’’ནྟི (མཧཱཝ. ཨཊྛ. ༣༠༦) ཝུཏྟཾ. བཧཱུནི ཧི ཀཐིནཱནིསཾསཝཏྠཱནི ཝིབྷཛནཀཱལེ སངྒྷསྶ ཨུཔཀཱརཀཱནི ཧོནྟཱིཏི.

པཱལི༹ཨཊྛཀཐཱདཱིཧི, ནེཏྭཱ ཝུཏྟཾ ཝིནིཙྪཡཾ;

ཀཐིནེ ཙཱིཝརེ མཡ྄ཧཾ, ཙིནྟཡནྟུ ཝིཙཀྑཎཱ.

ཙིནྟཡིཏྭཱ པུནཔྤུནཾ, ཡུཏྟཾ ཙེ དྷཱརཡནྟུ ཏཾ;

ཨཡུཏྟཉྩེ ཨིཏོ ཨཉྙཾ, པརིཡེསནྟུ ཀཱརཎནྟི.

‘‘ཡོ ཙ ཏཏྠ ཙཱིཝརུཔྤཱདོ, སོ ནེསཾ བྷཝིསྶཏཱི’’ཏི ཙཱིཝརསྶེཝ ཨཏྠཏཀཐིནཱནཾ བྷིཀྑཱུནཾ སནྟཀབྷཱཝསྶ བྷགཝཏཱ ཝུཏྟཏྟཱ ཙཱིཝརཏོ ཨཉྙཱནི སངྒྷཾ ཨུདྡིསྶ དིནྣཱནི པིཎྜཔཱཏཱདཱིནི ཝཏྠཱུནི ཨུཔཙཱརསཱིམཾ པཝིཊྛསྶ ཨཱགཏཱགཏསྶ སངྒྷསྶ སནྟཀཾ ཧོནྟི. ཏཐཱ ཧི ཝུཏྟཾ ཨཊྛཀཐཱཡཾ (མཧཱཝ. ཨཊྛ. ༣༠༦) ‘‘ཀཐིནཾ ཨཏྠརཱཔེཏྭཱ དཱནཉྩ བྷུཉྫིཏྭཱ གམིསྶནྟི ¶ , ཨཱནིསཾསོ པན ཨིཏརེསཾཡེཝ ཧོཏཱི’’ཏི. ‘‘ཨནུཛཱནཱམི, བྷིཀྑཝེ, སཱམཎེརཱནཾ ཨུཔཌྜྷཔཊིཝཱིསཾ དཱཏུ’’ནྟི (མཧཱཝ. ༣༤༣) པཱཋཾ ཨུཔནིསྶཱཡ ཀཐིནཱནིསཾསཙཱིཝརམྤི སཱམཎེརཱནཾ ཨུཔཌྜྷཔཊིཝཱིསཾཡེཝ དེནྟི, ན པནེཝཾ ཀཱཏབྦཾ. བྷཎྜཱགཱརེ ཋཔིཏཉྷི ཨཀཱལཙཱིཝརམེཝ སཱམཎེརཱནཾ ཨུཔཌྜྷཔཊིཝཱིསཾ ཀཏྭཱ དཱཏབྦཾ. ཝསྶཱཝཱསིཀཀཐིནཱནིསཾསཱདིཀཱལཙཱིཝརཾ པན སམཀམེཝ དཱཏབྦཾ. ཝུཏྟཉྷེཏཾ ཙཱིཝརཀྑནྡྷཀཊྛཀཐཱཡཾ (མཧཱཝ. ཨཊྛ. ༣༤༣) ‘‘སཱམཎེརཱནཾ ཨུཔཌྜྷཔཊིཝཱིསནྟི ཨེཏྠ ཡེ སཱམཎེརཱ ཨཏྟིསྶརཱ བྷིཀྑུསངྒྷསྶ ¶ ཀཏྟབྦཀམྨཾ ན ཀརོནྟི, ཨུདྡེསཔརིཔུཙྪཱསུ ཡུཏྟཱ ཨཱཙརིཡུཔཛ྄ཛྷཱཡཱནཾཡེཝ ཝཏྟཔཊིཔཏྟིཾ ཀརོནྟི, ཨཉྙེསཾ ན ཀརོནྟི, ཨེཏེསཾཡེཝ ཨུཔཌྜྷབྷཱགོ དཱཏབྦོ. ཡེ པན པུརེབྷཏྟཉྩ པཙྪཱབྷཏྟཉྩ བྷིཀྑུསངྒྷསྶེཝ ཀཏྟབྦཀིཙྩཾ ཀརོནྟི, ཏེསཾ སམཀོ དཱཏབྦོ. ཨིདཉྩ པིཊྛིསམཡེ ཨུཔྤནྣེན བྷཎྜཱགཱརེ ཋཔིཏེན ཨཀཱལཙཱིཝརེནེཝ ཀཐིཏཾ, ཀཱལཙཱིཝརཾ པན སམཀམེཝ དཱཏབྦ’’ནྟི.

ཀཙྩི ནུ ཁོ སཱམཎེརཱ ཝསྶཾ ཨུཔགཏཱ, ཡེན ཨཱནིསཾསཾ ལབྷེཡྻུནྟི? ཨཱམ ཨུཔགཏཱཏི. ཀཐཾ ཝིཉྙཱཡཏཱིཏི? ‘‘ཨཐ ཙཏྟཱརོ བྷིཀྑཱུ ཨུཔགཏཱ, ཨེཀོ པརིཔུཎྞཝསྶོ སཱམཎེརོ, སོ ཙེ པཙྪིམིཀཱཡ ཨུཔསམྤཛྫཏི, གཎཔཱུརཀོ ཙེཝ ཧོཏི, ཨཱནིསཾསཉྩ ལབྷཏཱི’’ཏི ཨཊྛཀཐཱཡཾ (མཧཱཝ. ཨཊྛ. ༣༠༦) ཝཙནཏོ ཝཛིརབུདྡྷིཊཱིཀཱཡཉྩ (ཝཛིར. ཊཱི. མཧཱཝགྒ ༣༠༦) ‘‘པཙྪིམིཀཱཡ ཨུཔསམྤནྣོ པཋམཔཝཱརཎཱཡ པཝཱརེཏུམྤི ལབྷཏི, ཝསྶིཀོ ཙ ཧོཏི, ཨཱནིསཾསཉྩ ལབྷཏཱིཏི སཱམཎེརཱནཾ ཝསྶཱུཔགམནཾ ཨནུཉྙཱཏཾ ཧོཏི. སཱམཎེརཱ ཀཐིནཱནིསཾསཾ ལབྷནྟཱིཏི ཝདནྟཱི’’ཏི ཝཙནཏོཏི.

ཏཏྲུཔྤཱདེསུ ཀཐིནཱནིསཾསེསུ ཡདི ཨཱརཱམིཀཱ ཏཎྜུལཱདཱིཧི ཝཏྠཱནི ཙེཏཱཔེནྟི, ཝཏྠེཧིཔི ཏཎྜུལཱདཱིནི ཙེཏཱཔེནྟི, ཏཏྠ ཀཐཾ པཊིཔཛྫིཏབྦནྟི? ཝིབྷཛནཀཱལེ ཝིཛྫམཱནཝཏྠུཝསེན ཀཱཏབྦཾ. ཏཐཱ ཧི ཝུཏྟཾ ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༣༠༦) ‘‘ཏཏྲུཔྤཱདེན ཏཎྜུལཱདིནཱ ཝཏྠཱུསུ ཙེཏཱཔིཏེསུ ཨཏྠཏཀཐིནཱནམེཝ ཏཱནི ཝཏྠཱནི པཱཔུཎནྟི. ཝཏྠེཧི པན ཏཎྜུལཱདཱིསུ ཙེཏཱཔིཏེསུ སབྦེསཾ ཏཱནི པཱཔུཎནྟཱིཏི ཝུཏྟ’’ནྟི. ‘‘སཙེ པན ཨེཀསཱིམཱཡཾ བཧཱུ ཝིཧཱརཱ ཧོནྟཱི’’ཏི ཨེཏྠ ཀཏརསཱིམཱ ཨདྷིཔྤེཏཱཏི? ཨུཔཙཱརསཱིམཱ. ཨུཔཙཱརསཱིམཱཡཾཡེཝ ཧི སངྒྷལཱབྷཝིབྷཛནཱདིཀཾ སིཛ྄ཛྷཏི. ཝུཏྟཉྷེཏཾ ¶ ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༣༠༦) ‘‘ཀཐིནཏྠཏསཱིམཱཡནྟི ¶ ཨུཔཙཱརསཱིམཾ སནྡྷཱཡ ཝུཏྟཾ, ཨུཔཙཱརསཱིམཊྛསྶ མཏཀཙཱིཝརཱདིབྷཱགིཡཏཱཡ བདྡྷསཱིམཱཡ ཏཏྲུཔྤཱདཱབྷཱཝཏོ ཝིཉྙེཡྻམེཏཾ ‘ཨུཔཙཱརསཱིམཱཝ ཨདྷིཔྤེཏཱ’ཏི’’.

ཨེཝཾ ཀཐིནཏྠཱརཾ དསྶེཏྭཱ སངྒྷེ རུཙིཏཱཡ མཱཏིཀཱཔལིབོདྷཨུབྦྷཱརེ ཨདསྶེཏྭཱཝ ཨནྟེ ཨཱནིསཾསཾ དསྶེཏུཾ ‘‘ཨཏྠཏཀཐིནཱནཾ ཝོ བྷིཀྑཝེ’’ཏིཨཱདིམཱཧ. ཏཏྠ ཨཊྛཝིདྷཱ མཱཏིཀཱ པཀྐམནནྟིཀཱ, ནིཊྛཱནནྟིཀཱ, སནྣིཊྛཱནནྟིཀཱ, ནཱསནནྟིཀཱ, སཝནནྟིཀཱ, ཨཱསཱཝཙྪེདིཀཱ, སཱིམཱཏིཀྐནྟིཀཱ, སཧུབྦྷཱརཱཏི. ཏཏྠ ཨཏྠཏཀཐིནོ བྷིཀྑུ ཀཏཔརིཡོསིཏཾ ཙཱིཝརཾ ཨཱདཱཡ ‘‘ཨིམཾ ཝིཧཱརཾ ན པཙྩེསྶཱམཱི’’ཏི པཀྐམཏི, ཏསྶ བྷིཀྑུནོ ཨུཔཙཱརསཱིམཱཏིཀྐམེནེཝ ཀཐིནུབྦྷཱརོ བྷཝཏི, པཉྩཱནིསཾསཱནི ཨལབྷནེཡྻོ ཧོཏི. ཨཡཾ ཀཐིནུབྦྷཱརོ པཀྐམནམེཝསྶ ཨནྟབྷཱུཏཏྟཱ པཀྐམནནྟིཀོ ནཱམ ཧོཏི.

ཨཏྠཏཀཐིནོ བྷིཀྑུ ཨནིཊྛིཏམེཝ ཨཏྟནོ བྷཱགབྷཱུཏཾ ཙཱིཝརཾ ཨཱདཱཡ ཨཉྙཾ ཝིཧཱརཾ གཏོ, ཏསྶ བཧིཨུཔཙཱརསཱིམགཏསྶ ཨེཝཾ ཧོཏི ‘‘ཨིམསྨིཾཡེཝ ཝིཧཱརེ ཨིམཾ ཙཱིཝརཾ ཀཱརེསྶཱམི, ན པུརཱཎཝིཧཱརཾ པཙྩེསྶཱམཱི’’ཏི, སོ བཧིསཱིམཱཡམེཝ ཏཾ ཙཱིཝརཾ ཀཱརེཏི, ཏསྶ བྷིཀྑུནོ ཏསྨིཾ ཙཱིཝརེ ནིཊྛིཏེ ཀཐིནུབྦྷཱརོ ཧོཏི. ཨཡཾ ཀཐིནུབྦྷཱརོ ཙཱིཝརནིཊྛཱནམེཝསྶ ཨནྟོཏི ནིཊྛཱནནྟིཀོ ནཱམ.

བྷིཀྑུ ཨཏྠཏཀཐིནོ ཨཀཏཙཱིཝརམཱདཱཡ པཀྐམཏི, ཏསྶ བཧིཨུཔཙཱརསཱིམགཏསྶ ཨེཝཾ ཧོཏི ‘‘ཨིམཾ ཙཱིཝརཾ ནེཝ ཀཱརེསྶཱམི, པོརཱཎཝིཧཱརཉྩ ན པཙྩེསྶཱམཱི’’ཏི, ཏསྶ བྷིཀྑུནོ ཏེན སནྣིཊྛཱནེན ཀཐིནུབྦྷཱརོ ཧོཏི. ཨཡཾ ཀཐིནུབྦྷཱརོ སནྣིཊྛཱནམེཝསྶ ཨནྟོཏི སནྣིཊྛཱནནྟིཀོ ནཱམ.

ཨཏྠཏཀཐིནོ ¶ བྷིཀྑུ ཨཀཏམེཝ ཙཱིཝརཾ ཨཱདཱཡ པཀྐམཏི, བཧིསཱིམགཏསྶ ཏསྶ ཨེཝཾ ཧོཏི ‘‘ཨིདྷེཝིམཾ ཙཱིཝརཾ ཀཱརེསྶཱམི, ན ཙ པོརཱཎཝིཧཱརཾ པཙྩེསྶཱམཱི’’ཏི, ཏསྶ ཙཱིཝརཾ ཀུརུམཱནཾ ཙོརཱདཱིཧི ནསྶཏི, ཨགྱཱདཱིཧི ཝིནསྶཏི, ཀཐིནུབྦྷཱརོ ཧོཏི. ཨཡཾ ཀཐིནུབྦྷཱརོ ནཱསནམེཝསྶ ཨནྟོཏི ནཱསནནྟིཀོ ནཱམ.

ཨཏྠཏཀཐིནོ བྷིཀྑུ ཨཀཏཙཱིཝརམཱདཱཡ ‘‘ཨིམཾ ཝིཧཱརཾ པཙྩེསྶཱམཱི’’ཏི ཙིནྟེཏྭཱ པཀྐམཏི ¶ , ཏསྶ བཧིསཱིམགཏསྶ ཨེཝཾ ཧོཏི ‘‘ཨིདྷེཝིམཾ ཙཱིཝརཾ ཀཱརེསྶཱམཱི’’ཏི, སོ ཀཏཙཱིཝརོ སུཎཱཏི ‘‘ཝིཧཱརེ ཀིར སངྒྷེན ཀཐིནཾ ཨུབྦྷཏ’’ནྟི, ཏེན སཝནམཏྟེནསྶ ཀཐིནཾ ཨུབྦྷཏཾ ཧོཏི. ཨཡཾ ཀཐིནབྦྷཱརོ སཝནམེཝསྶ ཨནྟོཏི སཝནནྟིཀོ ནཱམ.

ཨཏྠཏཀཐིནོ བྷིཀྑུ ཨཉྙཏྠ པཙྩཱསཱཙཱིཝརཀཱརཎཱ པཀྐམཏི, ཏསྶ བཧིསཱིམགཏསྶ ཨེཝཾ ཧོཏི ‘‘ཨིདྷ བཧིསཱིམཱཡམེཝ ཙཱིཝརཔཙྩཱསཾ པཡིརུཔཱསཱམི, ན ཝིཧཱརཾ པཙྩེསྶཱམཱི’’ཏི, སོ ཏཏྠེཝ ཏཾ ཙཱིཝརཔཙྩཱསཾ པཡིརུཔཱསཏི, སོ ཏཾ ཙཱིཝརཔཙྩཱསཾ ཨལབྷམཱནོ ཙཱིཝརཱསཱ པཙྪིཛྫཏི, ཏེནེཝ ཏསྶ བྷིཀྑུནོ ཀཐིནུབྦྷཱརོ བྷཝཏི. ཨཡཾ ཀཐིནུབྦྷཱརོ ཨཱསཱཝཙྪེདསཧིཏཏྟཱ ཨཱསཱཝཙྪེདིཀོ ནཱམ.

ཨཏྠཏཀཐིནོ བྷིཀྑུ ཨཀཏཙཱིཝརཾ ཨཱདཱཡ ‘‘ཨིམཾ ཝིཧཱརཾ པཙྩེསྶཱམཱི’’ཏི ཙིནྟེཏྭཱ པཀྐམཏི, སོ བཧིསཱིམགཏོ ཏཾ ཙཱིཝརཾ ཀཱརེཏི, སོ ཀཏཙཱིཝརོ ‘‘ཝིཧཱརཾ པཙྩེསྶཱམཱི’’ཏི ཙིནྟེནྟོ བཧིཨུཔཙཱརསཱིམཱཡམེཝ ཀཐིནུབྦྷཱརཀཱལཾ ཝཱིཏིནཱམེཏི, ཏསྶ ཀཐིནུབྦྷཱརོ བྷཝཏི. ཨཡཾ ཀཐིནུབྦྷཱརོ ཙཱིཝརཀཱལསྶ ཨནྟིམདིཝསསངྑཱཏཱཡ སཱིམཱཡ ཨཏིཀྐནྟཏྟཱ སཱིམཱཏིཀྐནྟིཀོ ནཱམ.

ཨཏྠཏཀཐིནོ བྷིཀྑུ ཙཱིཝརཾ ཨཱདཱཡ ‘‘ཨིམཾ ཝིཧཱརཾ པཙྩེསྶཱམཱི’’ཏི ཙིནྟེཏྭཱ པཀྐམཏི, སོ ཀཏཙཱིཝརོ ‘‘ཝིཧཱརཾ ¶ པཙྩེསྶཱམཱི’’ཏི ཙིནྟེནྟོ པཙྩཱགནྟྭཱ ཝིཧཱརེ ཀཐིནུབྦྷཱརཾ པཔྤོཏི, ཏསྶ བྷིཀྑུནོ ཝིཧཱརེ བྷིཀྑཱུཧི སཧ ཀཐིནུབྦྷཱརོ བྷཝཏི. ཨཡཾ ཀཐིནུབྦྷཱརོ ཝིཧཱརེ བྷིཀྑཱུཧི སཧ ཀཏཏྟཱ སཧུབྦྷཱརོ ནཱམ. ཨཡཾ ཨཊྛཝིདྷོ ཀཐིནུབྦྷཱརོ ཨཊྛ མཱཏིཀཱ ནཱམ. ཝུཏྟཉྷེཏཾ ཀཐིནཀྑནྡྷཀཔཱལི༹ཡཾ (མཧཱཝ. ༣༡༠) ‘‘ཨཊྛིམཱ, བྷིཀྑཝེ, མཱཏིཀཱ ཀཐིནསྶ ཨུབྦྷཱརཱཡ པཀྐམནནྟིཀཱ ནིཊྛཱནནྟིཀཱ སནྣིཊྛཱནནྟིཀཱ ནཱསནནྟིཀཱ སཝནནྟིཀཱ ཨཱསཱཝཙྪེདིཀཱ སཱིམཱཏིཀྐནྟིཀཱ སཧུབྦྷཱརཱཏི. བྷིཀྑུ ཨཏྠཏཀཐིནོ ཀཏཙཱིཝརམཱདཱཡ པཀྐམཏི ‘ན པཙྩེསྶ’ནྟི, ཏསྶ བྷིཀྑུནོ པཀྐམནནྟིཀོ ཀཐིནུབྦྷཱརོ’’ཏིཨཱདི, ཝིནཡཝིནིཙྪཡཔྤཀརཎེ ཙ –

‘‘པཀྐམནཉྩ ¶ ནིཊྛཱནཾ, སནྣིཊྛཱནཉྩ ནཱསནཾ;

སཝནམཱསཱ ཙ སཱིམཱ ཙ, སཧུབྦྷཱརོཏི ཨཊྛིམཱ’’ཏི. (ཝི. ཝི. ༢༧༠༩);

པལིབོདྷོ དུཝིདྷོ ཨཱཝཱསཔལིབོདྷོ, ཙཱིཝརཔལིབོདྷོཏི. ཏཏྠ ‘‘ཡསྨིཾ ཝིཧཱརེ ཀཐིནཾ ཨཏྠཏཾ ཧོཏི, ཏསྨིཾ ཝསིསྶཱམཱི’’ཏི ཨཉྙཏྠ གཙྪནྟོཔི ‘‘པུན ཏཾ ཝིཧཱརཾ ཨཱགཙྪིསྶཱམཱི’’ཏི སཱཔེཀྑོ ཧོཏི. ཨཡཾ ཨཱཝཱསཔལིབོདྷོ ནཱམ. ཏསྶ བྷིཀྑུནོ ཙཱིཝརཾ ཨཀཏཾ ཝཱ ཧོཏི ཨཔརིཡོསིཏཾ ཝཱ, ‘‘ཨཉྙཏོ ཙཱིཝརཾ ལཙྪཱམཱི’’ཏི ཨཱསཱ ཝཱ ཨནུཔཙྪིནྣཱ ཧོཏི. ཨཡཾ ཙཱིཝརཔལིབོདྷོ ནཱམ. ཝུཏྟཉྷེཏཾ ཀཐིནཀྑནྡྷཀེ (མཧཱཝ. ༣༢༥) ‘‘ཀཏམེ ཙ, བྷིཀྑཝེ, དྭེ ཀཐིནསྶ པལིབོདྷཱ? ཨཱཝཱསཔལིབོདྷོ ཙ ཙཱིཝརཔལིབོདྷོ ཙ. ཀཐཉྩ, བྷིཀྑཝེ, ཨཱཝཱསཔལིབོདྷོ ཧོཏི? ཨིདྷ, བྷིཀྑཝེ, བྷིཀྑུ ཝསཏི ཝཱ ཏསྨིཾ ཨཱཝཱསེ, སཱཔེཀྑོ ཝཱ པཀྐམཏི ‘པཙྩེསྶ’ནྟི, ཨེཝཾ ཁོ, བྷིཀྑཝེ, ཨཱཝཱསཔལིབོདྷོ ཧོཏི. ཀཐཉྩ, བྷིཀྑཝེ, ཙཱིཝརཔལིབོདྷོ ཧོཏི? ཨིདྷ, བྷིཀྑཝེ, བྷིཀྑུནོ ཙཱིཝརཾ ཨཀཏཾ ¶ ཝཱ ཧོཏི ཝིཔྤཀཏཾ ཝཱ, ཙཱིཝརཱསཱ ཝཱ ཨནུཔཙྪིནྣཱ, ཨེཝཾ ཁོ, བྷིཀྑཝེ, ཙཱིཝརཔལིབོདྷོ ཧོཏཱི’’ཏི.

ཨུབྦྷཱརོ དུཝིདྷོ ཨཊྛམཱཏིཀཱཨུབྦྷཱརཨནྟརུབྦྷཱརཝསེན. ཏཏྠ བཧིཨུཔཙཱརསཱིམགཏཱནཾ བྷིཀྑཱུནཾ ཝསེན ཝུཏྟཱ སཏྟ ཀཐིནུབྦྷཱརཱ ཙ བཧིཨུཔཙཱརསཱིམཾ གནྟྭཱ ནིཝཏྟེཏྭཱ ཀཐིནཏྠཏཝིཧཱརེ ཨནྟརུབྦྷཱརཾ པཏྭཱ བྷིཀྑཱུཧི སཧ ཨནྟརུབྦྷཱརསྶ ཀཏཏྟཱ སཧུབྦྷཱརསངྑཱཏོ ཨེཀོ ཀཐིནུབྦྷཱརོ ཙཱཏི ཨིམེ ཨཊྛ ཀཐིནུབྦྷཱརཱ ཨཊྛམཱཏིཀཱཡ པཝིཊྛཏྟཱ ཨཊྛམཱཏིཀཱཨུབྦྷཱརོ ནཱམ. བཧིསཱིམཾ ཨགནྟྭཱ ཏསྨིཾཡེཝ ཝིཧཱརེ ནིསཱིདིཏྭཱ ཀཐིནུབྦྷཱརཾ ཉཏྟིདུཏིཡཀམྨཝཱཙཱཡ ཀཐིནུབྦྷཱརོ ཨཊྛམཱཏིཀཱཡ ཨཔྤཝིཊྛོ ཧུཏྭཱ ཀཱལཔརིཙྪེདཾ ཨཔྤཏྭཱ ཨནྟརཱཡེཝ ཀཏཏྟཱ ཨནྟརུབྦྷཱརོ ནཱམ.

ཨནྟརུབྦྷཱརསཧུབྦྷཱརཱ ཉཏྟིདུཏིཡཀམྨཝཱཙཱཡེཝ ཀཏཱ, ཨེཝཾ སནྟེ ཀོ ཏེསཾ ཝིསེསོཏི? ཨནྟརུབྦྷཱརོ བཧིསཱིམཾ ཨགནྟྭཱ ཨནྟོསཱིམཱཡམེཝ ཋིཏེཧི བྷིཀྑཱུཧི ཀཏོ. སཧུབྦྷཱརོ བཧིསཱིམཾ གཏེན བྷིཀྑུནཱ པཙྩཱགནྟྭཱ ཏཾ ཨནྟརུབྦྷཱརཾ པཏྭཱ ཏེཧི ཨནྟོསཱིམཊྛེཧི བྷིཀྑཱུཧི སཧ ཀཏོཏི ཨཡམེཏེསཾ ཝིསེསོ. པཀྐམནནྟིཀཱདཡོ སཏྟ ཀཐིནུབྦྷཱརཱ ན ཀམྨཝཱཙཱཡ ¶ ཀཏཱ, ཀེཝལཾ དྭིནྣཾ པལིབོདྷཱནཾ ཨུཔཙྪེདེན པཉྩཧི ཨཱནིསཾསེཧི ཝིགཏཏྟཱ ཀཐིནུབྦྷཱརཱ ནཱམ ཧོནྟི. ཝུཏྟཉྷེཏཾ ཨཱཙརིཡབུདྡྷདཏྟཏྠེརེན ཝིནཡཝིནིཙྪཡེ –

‘‘ཨཊྛནྣཾ མཱཏིཀཱནཾ ཝཱ, ཨནྟརུབྦྷཱརཏོཔི ཝཱ;

ཨུབྦྷཱརཱཔི དུཝེ ཝུཏྟཱ, ཀཐིནསྶ མཧེསིནཱ’’ཏི.

ཏཊྚཱིཀཱཡམྤི ‘‘ཨཊྛནྣཾ མཱཏིཀཱནནྟི བཧིསཱིམགཏཱནཾ ཝསེན ཝུཏྟཱ. པཀྐམནནྟིཀཱདཡོ སཏྟ མཱཏིཀཱ བཧིསཱིམཾ གནྟྭཱ ཨནྟརུབྦྷཱརཾ ¶ སམྤཏྟསྶ ཝསེན ཝུཏྟཱ, སཧུབྦྷཱརོ ཨིམཱསཾ ཨཊྛནྣཾ མཱཏིཀཱནཾ ཝསེན ཙ. ཨནྟརུབྦྷཱརཏོཔི ཝཱཏི བཧིསཱིམཾ ཨགནྟྭཱ ཏཏྠེཝ ཝསིཏྭཱ ཀཐིནུབྦྷཱརཀམྨེན ཨུབྦྷཏཀཐིནཱནཾ ཝསེན ལབྦྷནཏོ ཨནྟརུབྦྷཱརོཏི མཧེསིནཱ ཀཐིནསྶ ཨུབྦྷཱརཱ དུཝེ ཝུཏྟཱཏི ཡོཛནཱ. བཧིསཱིམཾ གནྟྭཱ ཨཱགཏསྶ ཝསེན སཨུབྦྷཱརོ, བཧིསཱིམཾ ཨགཏཱནཾ ཝསེན ཨནྟརུབྦྷཱརོཏི ཨེཀོཡེཝ ཨུབྦྷཱརོ དྭིདྷཱ ཝུཏྟོ’’ཏི ཝུཏྟཾ.

ཀསྨཱ པན ཨནྟརུབྦྷཱརཝསེན ཀམྨཝཱཙཱཡ ཀཐིནཾ ཨུབྦྷཏནྟི? མཧཱདཱནཾ དཱཏུཀཱམེཧི ཨུཔཱསཀེཧི ཨཱགཏསྶ སངྒྷསྶ ཨཀཱལཙཱིཝརཾ དཱཏུཀཱམེཧི ཡཱཙིཏཏྟཱ. ཝུཏྟཉྷི བྷིཀྑུནཱིཝིབྷངྒཔཱལི༹ཡཾ (པཱཙི. ༩༢༥) ‘‘ཏེན ཁོ པན སམཡེན ཨཉྙཏརེན ཨུཔཱསཀེན སངྒྷཾ ཨུདྡིསྶ ཝིཧཱརོ ཀཱརཱཔིཏོ ཧོཏི, སོ ཏསྶ ཝིཧཱརསྶ མཧེ ཨུབྷཏོསངྒྷསྶ ཨཀཱལཙཱིཝརཾ དཱཏུཀཱམོ ཧོཏི. ཏེན ཁོ པན སམཡེན ཨུབྷཏོསངྒྷསྶ ཀཐིནཾ ཨཏྠཏཾ ཧོཏི. ཨཐ ཁོ སོ ཨུཔཱསཀོ སངྒྷཾ ཨུཔསངྐམིཏྭཱ ཀཐིནུདྡྷཱརཾ ཡཱཙཱི’’ཏིཨཱདི. ཀཐཾ པན ཀམྨཝཱཙཱ ཀཱཏབྦཱཏི? ‘‘སུཎཱཏུ མེ, བྷནྟེ, སངྒྷོ, ཡདི སངྒྷསྶ པཏྟཀལླཾ, སངྒྷོ ཀཐིནཾ ཨུདྡྷརེཡྻ, ཨེསཱ ཉཏྟི. སུཎཱཏུ མེ, བྷནྟེ, སངྒྷོ, སངྒྷོ ཀཐིནཾ ཨུདྡྷརཏི. ཡསྶཱཡསྨཏོ ཁམཏི ཀཐིནསྶ ཨུདྡྷཱརོ, སོ ཏུཎྷསྶ. ཡསྶ ནཀྑམཏི, སོ བྷཱསེཡྻ. ཨུབྦྷཏཾ སངྒྷེན ཀཐིནཾ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི ཨེཝཾ ཀཱཏབྦཱཏི. ཝུཏྟཉྷི བྷིཀྑུནཱིཝིབྷངྒེ ‘‘ཨནུཛཱནཱམི, བྷིཀྑཝེ, ཀཐིནཾ ཨུདྡྷརིཏུཾ, ཨེཝཉྩ པན, བྷིཀྑཝེ, ཀཐིནཾ ཨུདྡྷརིཏབྦཾ. བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ – སུཎཱཏུ མེ…པེ… དྷཱརཡཱམཱི’’ཏི.

ཨེཏེན ¶ ¶ ཙ ཀཐིནུབྦྷཱརེན པུབྦེ ཀཏཾ ཀཐིནདུསྶདཱནཉཏྟིདུཏིཡཀམྨཝཱཙཾ ཨུབྦྷཏནྟི ཝདནྟི, ན པན ཀཐིནདུསྶདཱནཉཏྟིདུཏིཡཀམྨཾ ཨུབྦྷཏཾ, ཨཐ ཁོ ཨཏྠཱརཀམྨམེཝཱཏི དཊྛབྦཾ. ཡདི ཧི ཀཐིནདུསྶདཱནཉཏྟིདུཏིཡཀམྨཾ ཨུབྦྷཏཾ བྷཝེཡྻ, ཏཱཡ ཀམྨཝཱཙཱཡ ཀཐིནདུསྶདཱནསྶ སིཛ྄ཛྷནཏོ ཨིམཱཡ ཀཐིནུབྦྷཱརཀམྨཝཱཙཱཡ ཏཾ པུབྦེ དིནྣདུསྶཾ པུན ཨཱཧརཱཔེཏབྦཾ སིཡཱ, ན པཉྩཱནིསཾསཝིགམནཾ. ཡསྨཱ པན ཨིམཱཡ ཀཐིནུབྦྷཱརཀམྨཝཱཙཱཡ པཉྩཱནིསཾསཝིགམནམེཝ ཧོཏི, ན པུབྦེ དིནྣཀཐིནདུསྶསྶ པུན ཨཱཧརཱཔནཾ. ཏེན ཝིཉྙཱཡཏི ‘‘པཉྩཱནིསཾསལཱབྷཀཱརཎཾ ཨཏྠརཎཀམྨམེཝ ཨིམཱཡ ཀཐིནབྦྷཱརཀམྨཝཱཙཱཡ ཨུདྡྷརཱིཡཏི, ན ཀཐིནདུསྶདཱནཉཏྟིདུཏིཡཀམྨཝཱཙཱཏི, ཏསྨཱ ཀཐིནུབྦྷཱརཀམྨཝཱཙཱཀརཎཏོ པཙྪཱ སངྒྷསྶ ཨུཔྤནྣཾ ཙཱིཝརཾ ཨཀཱལཙཱིཝརཾ ཧོཏི, སངྒྷོ པཉྩཱནིསཾསེ ན ལབྷཏི, ཙཱིཝརཾ སབྦསངྒྷིཀཾ ཧུཏྭཱ ཨཱགཏཱགཏསྶ སངྒྷསྶ བྷཱཛནཱིཡཾ ཧོཏཱིཏི དཊྛབྦཾ. ཨཡམཏྠོ ཀཐིནདུསྶདཱནཉཏྟིདུཏིཡཀམྨཝཱཙཱཡ ཙ ཀཐིནུབྦྷཱརཀམྨཝཱཙཱཡ ཙ ཨཏྠཉྩ ཨདྷིཔྤཱཡཉྩ སུཊྛུ ཝིནིཙྪིནིཏྭཱ པུབྦཱཔརཾ སཾསནྡིཏྭཱ པཙྩེཏབྦོཏི.

ཨེཏྠ སིཡཱ – ཀཐིནུབྦྷཱརཾ ཡཱཙནྟཱནཾ སབྦེསཾ ཀཐིནུབྦྷཱརོ དཱཏབྦོ, ཨུདཱཧུ ཨེཀཙྩཱནནྟི, ཀིཉྩེཏྠ – ཡདི ཏཱཝ སབྦེསཾ དཱཏབྦོ, ཀཐིནུབྦྷཱརཀམྨེན པཉྩཱནིསཾསཝིགམནཏོ སངྒྷསྶ ལཱབྷནྟརཱཡོ བྷཝེཡྻ, ཨཐ ཨེཀཙྩཱནཾ མུཁོལོཀནཾ ཝིཡ སིཡཱཏི? ཡདི ཀཐིནཏྠཱརམཱུལཀལཱབྷཏོ ཀཐིནུབྦྷཱརམཱུལཀལཱབྷོ མཧནྟོ བྷཝེཡྻ, ཏེསཾ ཡཱཙནྟཱནཾ ཀཐིནུབྦྷཱརོ དཱཏབྦོ. ཡདི ཨཔྤཀོ, ན དཱཏབྦོ. ཡདི སམོ, ཀུལཔྤསཱདཏྠཱཡ དཱཏབྦོཏི. ཏཐཱ ཧི ཝུཏྟཾ ཨཊྛཀཐཱཡཾ (པཱཙི. ཨཊྛ. ༩༢༧) ‘‘ཀཱིདིསོ ཀཐིནུདྡྷཱརོ དཱཏབྦོ, ཀཱིདིསོ ན དཱཏབྦོཏི? ཡསྶ ¶ ཨཏྠཱརམཱུལཀོ ཨཱནིསཾསོ མཧཱ, ཨུབྦྷཱརམཱུལཀོ ཨཔྤོ, ཨེཝརཱུཔོ ན དཱཏབྦོ. ཡསྶ པན ཨཏྠཱརམཱུལཀོ ཨཱནིསཾསོ ཨཔྤོ, ཨུབྦྷཱརམཱུལཀོ མཧཱ, ཨེཝརཱུཔོ དཱཏབྦོ. སམཱནིསཾསོཔི སདྡྷཱཔརིཔཱལནཏྠཾ དཱཏབྦོཝཱ’’ཏི. ཨིམིནཱཔི ཝིཉྙཱཡཏི ‘‘པཉྩཱནིསཾསཱནཾ ཀཱརཎབྷཱུཏཾ ཨཏྠཱརཀམྨམེཝ ཨུདྡྷརཱིཡཏི, ན ཀཐིནདུསྶདཱནབྷཱུཏཾ ཉཏྟིདུཏིཡཀམྨ’’ནྟི.

ཨཱནིསཾསཀཐཱཡཾ པཉྩཱཏི ཨིདཱནི ཝུཙྩམཱནཱ ཨནཱམནྟཙཱརཱདཡོ པཉྩ ཀིརིཡཱ. ཀཔྤིསྶནྟཱིཏི ཀཔྤཱ བྷཝིསྶནྟི, ཨནཱཔཏྟིཀཱརཎཱ བྷཝིསྶནྟཱིཏི ཨཏྠོ. ཨནཱམནྟཙཱརོཏི ཨནཱམནྟེཏྭཱ ཙརཎཾ. ཡོ ཧི དཱཡཀེཧི བྷཏྟེན ནིམནྟིཏོ ཧུཏྭཱ སབྷཏྟོ སམཱནོ ཝིཧཱརེ སནྟཾ ¶ བྷིཀྑུཾ ཨནཱམནྟེཏྭཱ ཀུལེསུ ཙཱརིཏྟཾ ཨཱཔཛྫཏི, ཏསྶ བྷིཀྑུནོ ཙཱརིཏྟསིཀྑཱཔདེན པཱཙིཏྟིཡཱཔཏྟི ཧོཏི, སཱ ཨཱཔཏྟི ཨཏྠཏཀཐིནསྶ ན ཧོཏཱིཏི ཨཏྠོ. ཏཏྠ ཙཱརིཏྟསིཀྑཱཔདཾ ནཱམ ‘‘ཡོ པན བྷིཀྑུ ནིམནྟིཏོ སབྷཏྟོ སམཱནོ སནྟཾ བྷིཀྑུཾ ཨནཱཔུཙྪཱ པུརེབྷཏྟཾ ཝཱ པཙྪཱབྷཏྟཾ ཝཱ ཀུལེསུ ཙཱརིཏྟཾ ཨཱཔཛྫེཡྻ ཨཉྙཏྲ སམཡཱ, པཱཙིཏྟིཡཾ. ཏཏྠཱཡཾ སམཡོ ཙཱིཝརདཱནསམཡོ ཙཱིཝརཀཱརསམཡོ, ཨཡཾ ཏཏྠ སམཡོ’’ཏི ཨཙེལཀཝགྒེ པཉྩམསིཀྑཱཔདཾ (པཱཙི. ༢༩༩-༣༠༠). ཙཱིཝརཝིཔྤཝཱསོཏི ཏིཎྞཾ ཙཱིཝརཱནཾ ཨཉྙཏརེན ཝཱ སབྦེན ཝཱ ཝིནཱ ཧཏྠཔཱསེ ཨཀཏྭཱ ཨརུཎུཊྛཱཔནཾ, ཨེཝཾ ཀརོཏོཔི དུཏིཡཀཐིནསིཀྑཱཔདེན ཨཱཔཏྟི ན ཧོཏཱིཏི ཨདྷིཔྤཱཡོ. ཏཏྠ ཙ དུཏིཡཀཐིནསིཀྑཱཔདཾ ནཱམ ‘‘ནིཊྛིཏཙཱིཝརསྨིཾ པན བྷིཀྑུནཱ ཨུབྦྷཏསྨིཾ ཀཐིནེ ཨེཀརཏྟམྤི ཙེ བྷིཀྑུ ཏིཙཱིཝརེན ཝིཔྤཝསེཡྻ ཨཉྙཏྲ བྷིཀྑུསམྨུཏིཡཱ, ནིསྶགྒིཡཾ པཱཙིཏྟིཡ’’ནྟི ཨཱགཏཾ ནིསྶགྒིཡེསུ དུཏིཡསིཀྑཱཔདཾ (པཱརཱ. ༤༧༢).

གཎབྷོཛནནྟི ¶ ཨེཏེན གཎབྷོཛནསིཀྑཱཔདེན ཨནཱཔཏྟི ཝུཏྟཱཏི སམྦནྡྷོ. ཏཏྠ གཎབྷོཛནཾ ནཱམ ‘‘ཨམྷཱཀཾ བྷཏྟཾ དེཐཱ’’ཏི བྷིཀྑཱུནཾ ཝིཉྙཏྟིཡཱ ཝཱ ‘‘ཨམྷཱཀཾ བྷཏྟཾ གཎྷཐཱ’’ཏི དཱཡཀཱནཾ ནིམནྟནེན ཝཱ ཨཀཔྤིཡཝོཧཱརེན ཙཏྟཱརོ ཝཱ ཨཏིརེཀཱ ཝཱ བྷིཀྑཱུ ཨེཀཏོ པཊིགྒཎྷིཏྭཱ ཨེཀཏོ བྷུཉྫནཾ. གཎབྷོཛནསིཀྑཱཔདཾ ནཱམ ‘‘གཎབྷོཛནེ ཨཉྙཏྲ སམཡཱ པཱཙིཏྟིཡཾ. ཏཏྠཱཡཾ སམཡོ གིལཱནསམཡོ ཙཱིཝརདཱནསམཡོ ཙཱིཝརཀཱརསམཡོ ཨདྡྷཱནགམནསམཡོ ནཱཝཱབྷིརུཧནསམཡོ མཧཱསམཡོ སམཎབྷཏྟསམཡོ, ཨཡཾ ཏཏྠ སམཡོ’’ཏི ཨཱགཏཾ བྷོཛནཝགྒེ དུཏིཡསིཀྑཱཔདཾ (པཱཙི. ༢༡༥). ཨནདྷིཊྛིཏཾ ཨཝིཀཔྤིཏཾ ཝཊྚཏཱིཏི པཋམཀཐིནསིཀྑཱཔདེན ཨཱཔཏྟི ན ཧོཏཱིཏི ཨདྷིཔྤཱཡོ. ཏཏྠ པཋམཀཐིནསིཀྑཱཔདཾ ནཱམ ‘‘ནིཊྛིཏཙཱིཝརསྨིཾ པན བྷིཀྑུནཱ ཨུབྦྷཏསྨིཾ ཀཐིནེ དསཱཧཔརམཾ ཨཏིརེཀཙཱིཝརཾ དྷཱརེཏབྦཾ, ཏཾ ཨཏིཀྐཱམཡཏོ ནིསྶགྒིཡཾ པཱཙིཏྟིཡ’’ནྟི ཨཱགཏཾ ནིསྶགྒིཡེསུ པཋམསིཀྑཱཔདཾ (པཱརཱ. ༤༧༢). ཀཐིནཏྠཏསཱིམཱཡཱཏི ཨུཔཙཱརསཱིམཾ སནྡྷཱཡ ཝུཏྟཾ. མཏཀཙཱིཝརནྟི མཏསྶ ཙཱིཝརཾ. ཏཏྲུཔྤཱདེནཱཏི སངྒྷསནྟཀེན ཨཱརཱམུཡྻཱནཁེཏྟཝཏྠུཨཱདིནཱ. ཡཾ སངྒྷིཀཾ ཙཱིཝརཾ ཨུཔྤཛྫཏི, ཏཾ ཏེསཾ བྷཝིསྶཏཱིཏི ཨིམིནཱ ཙཱིཝརམེཝ ཀཐིནཏྠཱརཀཱནཾ བྷིཀྑཱུནཾ སནྟཀཾ ཧོཏི, ཏཏོ ཨཉྙཾ པིཎྜཔཱཏབྷེསཛྫཱདིཀཾ ཨཱགཏཱགཏསྶ སངྒྷསྶ སནྟཀཾ ཧོཏཱིཏི དསྶེཏི.

ཨེཝཾ ¶ ཨཊྛངྒསམྤནྣོ, ལཛྫཱི བྷིཀྑུ སུཔེསལོ;

ཀརེཡྻ ཀཐིནཏྠཱརཾ, ཨུབྦྷཱརཉྩཱཔི སཱདྷུཀནྟི.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཀཐིནཏྠཱརཝིནིཙྪཡཀཐཱལངྐཱརོ ནཱམ

ཨེཀཱུནཏིཾསཏིམོ པརིཙྪེདོ.

༣༠. གརུབྷཎྜཝིནིཙྪཡཀཐཱ

༢༢༧. ཨེཝཾ ¶ ཀཐིནཝིནིཙྪཡཾ ཀཐེཏྭཱ ཨིདཱནི གརུབྷཎྜཱདིཝིནིཙྪཡཾ དསྶེཏུཾ ‘‘གརུབྷཎྜཱནཱིཏི ཨེཏྠཱ’’ཏིཨཱདིམཱཧ. ཏཏྠ གརཱུཏི –

‘‘པུམེ ཨཱཙརིཡཱདིམྷི, གརུ མཱཏཱཔིཏཱུསུཔི;

གརུ ཏཱིསུ མཧནྟེ ཙ, དུཛྫརཱལཧུཀེསུ ཙཱ’’ཏི. –

ཝུཏྟེསུ ཨནེཀཏྠེསུ ཨལཧུཀཝཱཙཀོ. བྷཎྜ-སདྡོ ‘‘བྷཱཛནཱདིཔརིཀྑཱརེ, བྷཎྜཾ མཱུལདྷནེཔི ཙཱ’’ཏི ཨེཏྠ བྷཱཛནཱདིཔརིཀྑཱརཏྠོ ཧོཏི. ཝཙནཏྠོ པན གརནྟི ཨུགྒཙྪནྟི ཨུགྒཏཱ པཱཀཊཱ ཧོནྟཱིཏི གརཱུནི, བྷཌིཏབྦཱནི ཨིཙྪིཏབྦཱནཱིཏི བྷཎྜཱནི, གརཱུནི ཙ ཏཱནི བྷཎྜཱནི ཙཱཏི གརུབྷཎྜཱནི, ཨཱརཱམཱདཱིནི ཝཏྠཱུནི. ཨིཏི ཨཱདིནཱ ནཡེན སེནཱསནཀྑནྡྷཀེ བྷགཝཏཱ དསྶིཏཱནི ཨིམཱནི པཉྩ ཝཏྠཱུནི གརུབྷཎྜཱནི ནཱམཱཏི ཡོཛེཏབྦཾ.

མཉྩེསུ མསཱརཀོཏི མཉྩཔཱདེ ཝིཛ྄ཛྷིཏྭཱ ཏཏྠ ཨཊནིཡོ པཝེསེཏྭཱ ཀཏོ. བུནྡིཀཱབདྡྷོཏི ཨཊནཱིཧི མཉྩཔཱདེ ཌཾསཱཔེཏྭཱ པལླངྐསངྑེཔེན ཀཏོ. ཀུལཱི༹རཔཱདཀོཏི ཨསྶམེཎྜཀཱདཱིནཾ པཱདསདིསེཧི པཱདེཧི ཀཏོ. ཡོ ཝཱ པན ཀོཙི ཝངྐཔཱདཀོ, ཨཡཾ ཝུཙྩཏི ‘‘ཀུལཱི༹རཔཱདཀོ’’ཏི. ཨཱཧཙྩཔཱདཀོཏི ཨཡཾ པན ‘‘ཨཱཧཙྩཔཱདཀོ ནཱམ མཉྩོ ཨངྒེ ཝིཛ྄ཛྷིཏྭཱ ཀཏོ ཧོཏཱི’’ཏི ཨེཝཾ པརཏོ པཱལི༹ཡཾཡེཝ (པཱཙི. ༡༣༡) ཝུཏྟོ, ཏསྨཱ ཨཊནིཡོ ཝིཛ྄ཛྷིཏྭཱ ¶ ཏཏྠ པཱདསིཁཾ པཝེསེཏྭཱ ཨུཔརི ཨཱཎིཾ དཏྭཱ ཀཏམཉྩོ ཨཱཧཙྩཔཱདཀོཏི ཝེདིཏབྦོ. པཱིཋེཔི ཨེསེཝ ནཡོ.

ཨུཎྞབྷིསིཨཱདཱིནཾ པཉྩནྣཾ ཨཉྙཏརཱཏི ཨུཎྞབྷིསི ཙོལ༹བྷིསི ཝཱཀབྷིསི ཏིཎབྷིསི པཎྞབྷིསཱིཏི ཨིམེསཾ པཉྩནྣཾ བྷིསཱིནཾ ཨཉྙཏརཱ ¶ . པཉྩ བྷིསིཡོཏི པཉྩཧི ཨུཎྞཱདཱིཧི པཱུརིཏབྷིསིཡོ. ཏཱུལགཎནཱཡ ཧི ཨེཏཱསཾ གཎནཱ. ཏཏྠ ཨུཎྞགྒཧཎེན ན ཀེཝལཾ ཨེལ༹ཀལོམམེཝ གཧིཏཾ, ཋཔེཏྭཱ པན མནུསྶལོམཾ ཡཾ ཀིཉྩི ཀཔྤིཡཱཀཔྤིཡམཾསཛཱཏཱིནཾ པཀྑིཙཏུཔྤདཱནཾ ལོམཾ, སབྦཾ ཨིདྷ ཨུཎྞགྒཧཎེནེཝ གཧིཏཾ, ཏསྨཱ ཚནྣཾ ཙཱིཝརཱནཾ, ཚནྣཾ ཨནུལོམཙཱིཝརཱནཉྩ ཨཉྙཏརེན བྷིསིཙྪཝིཾ ཀཏྭཱ ཏཾ སབྦཾ པཀྑིཔིཏྭཱ བྷིསིཾ ཀཱཏུཾ ཝཊྚཏི. ཨེལ༹ཀལོམཱནི པན ཨཔཀྑིཔིཏྭཱ ཀམྦལམེཝ ཙཏུགྒུཎཾ ཝཱ པཉྩགུཎཾ ཝཱ པཀྑིཔིཏྭཱ ཀཏཱཔི ཨུཎྞབྷིསིསངྑམེཝ གཙྪཏི. ཙོལ༹བྷིསིཨཱདཱིསུ ཡཾ ཀིཉྩི ནཝཙོལ༹ཾ ཝཱ པུརཱཎཙོལ༹ཾ ཝཱ སཾཧརིཏྭཱ ཝཱ ཨནྟོ པཀྑིཔིཏྭཱ ཝཱ ཀཏཱ ཙོལ༹བྷིསི, ཡཾ ཀིཉྩི ཝཱཀཾ པཀྑིཔིཏྭཱ ཀཏཱ ཝཱཀབྷིསི, ཡཾ ཀིཉྩི ཏིཎཾ པཀྑིཔིཏྭཱ ཀཏཱ ཏིཎབྷིསི, ཨཉྙཏྲ སུདྡྷཏམཱལཔཏྟཾ ཡཾ ཀིཉྩི པཎྞཾ པཀྑིཔིཏྭཱ ཀཏཱ པཎྞབྷིསཱིཏི ཝེདིཏབྦཱ. ཏམཱལཔཏྟཾ པན ཨཉྙེན མིསྶམེཝ ཝཊྚཏི, སུདྡྷཾ ན ཝཊྚཏི. བྷིསིཡཱ པམཱཎནིཡམོ ནཏྠི, མཉྩབྷིསི པཱིཋབྷིསི བྷཱུམཏྠརཎབྷིསི ཙངྐམནབྷིསི པཱདཔུཉྪནབྷིསཱིཏི ཨེཏཱསཾ ཨནུརཱུཔཏོ སལླཀྑེཏྭཱ ཨཏྟནོ རུཙིཝསེན པམཱཎཾ ཀཱཏབྦཾ. ཡཾ པནེཏཾ ཨུཎྞཱདིཔཉྩཝིདྷཏཱུལམྤི བྷིསིཡཾ ཝཊྚཏི, ཏཾ མསཱུརཀེཔི ཝཊྚཏཱིཏི ཀུརུནྡིཡཾ ཝུཏྟཾ. ཏཏྠ མསཱུརཀེཏི ཙམྨམཡབྷིསིཡཾ. ཨེཏེན མསཱུརཀཾ པརིབྷུཉྫིཏུཾ ཝཊྚཏཱིཏི སིདྡྷཾ ཧོཏི.

བིམྦོཧནེ ཏཱིཎི ཏཱུལཱནི རུཀྑཏཱུལཾ ལཏཱཏཱུལཾ པོཊཀཱིཏཱུལནྟི. ཏཏྠ རུཀྑཏཱུལནྟི སིམྦལིརུཀྑཱདཱིནཾ ཡེསཾ ཀེསཉྩི རུཀྑཱནཾ ཏཱུལཾ. ལཏཱཏཱུལནྟི ཁཱིརཝལླིཨཱདཱིནཾ ཡཱསཾ ཀཱསཉྩི ལཏཱནཾ ཏཱུལཾ. པོཊཀཱིཏཱུལནྟི པོཊཀཱིཏིཎཱདཱིནཾ ཡེསཾ ཀེསཉྩི ཏིཎཛཱཏིཀཱནཾ ཨནྟམསོ ཨུཙྪུནལཱ༹དཱིནམྤི ཏཱུལཾ. སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༢༩༧) པན ‘‘པོཊཀཱིཏཱུལནྟི ཨེརཀཏིཎཏཱུལ’’ནྟི ཝུཏྟཾ, ཨེཏེཧི ཏཱིཧི སབྦབྷཱུཏགཱམཱ སངྒཧིཏཱ ཧོནྟི. རུཀྑཝལླིཏིཎཛཱཏིཡོ ¶ ཧི མུཉྩིཏྭཱ ཨཉྙོ བྷཱུཏགཱམོ ནཱམ ནཏྠི, ཏསྨཱ ཡསྶ ཀསྶཙི བྷཱུཏགཱམསྶ ཏཱུལཾ བིམྦོཧནེ ཝཊྚཏི, བྷིསིཾ པན པཱཔུཎིཏྭཱ སབྦམྤེཏཾ ‘‘ཨཀཔྤིཡཏཱུལ’’ནྟི ཝུཙྩཏི ན ཀེཝལཉྩ བིམྦོཧནེ ཨེཏཾ ཏཱུལམེཝ, ཧཾསམོརཱདཱིནཾ སབྦསཀུཎཱནཾ, སཱིཧཱདཱིནཾ སབྦཙཏུཔྤདཱནཉྩ ¶ ལོམམྤི ཝཊྚཏི. པིཡངྒུཔུཔྥབཀུལ༹པུཔྥཱདི པན ཡཾ ཀིཉྩི པུཔྥཾ ན ཝཊྚཏི. ཏམཱལཔཏྟཾ སུདྡྷམེཝ ན ཝཊྚཏི, མིསྶཀཾ པན ཝཊྚཏི, བྷིསཱིནཾ ཨནུཉྙཱཏཾ པཉྩཝིདྷཾ ཨུཎྞཱདིཏཱུལམྤི ཝཊྚཏི. ཨདྡྷཀཱཡིཀཱནི པན བིམྦོཧནཱནི ན ཝཊྚནྟི. ཨདྡྷཀཱཡིཀཱནཱིཏི ཨུཔཌྜྷཀཱཡཔྤམཱཎཱནི, ཡེསུ ཀཊིཏོ པཊྛཱཡ ཡཱཝ སཱིསཾ ཨུཔདཧནྟི ཋཔེནྟི. སཱིསཔྤམཱཎཾ པན ཝཊྚཏི, སཱིསཔྤམཱཎཾ ནཱམ ཡསྶ ཝིཏྠཱརཏོ ཏཱིསུ ཀཎྞེསུ དྭིནྣཾ ཀཎྞཱནཾ ཨནྟརཾ མིནིཡམཱནཾ ཝིདཏྠི ཙེཝ ཙཏུརངྒུལཉྩ ཧོཏི, མཛ྄ཛྷཊྛཱནཾ མུཊྛིརཏནཾ ཧོཏི, དཱིགྷཏོ པན དིཡཌྜྷརཏནཾ ཝཱ དྭིརཏནཾ ཝཱཏི ཀུརུནྡིཡཾ ཝུཏྟཾ, ཨཡཾ སཱིསཔྤམཱཎསྶ ཨུཀྐཊྛཔརིཙྪེདོ, ཨིཏོ ཨུདྡྷཾ ན ཝཊྚཏི, ཧེཊྛཱ པན ཝཊྚཏཱིཏི ཨཊྛཀཐཱཡཾ (ཙཱུལ༹ཝ. ཨཊྛ. ༢༩༧) ཝུཏྟཾ. ཏཏྠ ‘‘ཏཱིསུ ཀཎྞེསུ དྭིནྣཾ ཀཎྞཱན’’ནྟི པཱཋཾ ཨུཔནིདྷཱཡ བིམྦོཧནསྶ ཨུབྷོསུ ཨནྟེསུ ཋཔེཏབྦཙོལ༹ཀཾ ཏིཀོཎམེཝ ཀརོནྟི ཨེཀཙྩེ. ‘‘ཨིདཉྩ ཋཱནཾ གཎྛིཊྛཱན’’ནྟི ཝདནྟི.

ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༢༩༧) པན ‘‘སཱིསཔྤམཱཎཾ ནཱམ ཡཏྠ གཱིཝཱཡ སཧ སཀལཾ སཱིསཾ ཋཔེཏུཾ སཀྐཱ, ཏསྶ ཙ མུཊྛིརཏནཾ ཝིཏྠཱརཔྤམཱཎནྟི དསྶེནྟོ ‘ཝིཏྠཱརཏོ’ཏིཨཱདིམཱཧ. ཨིདཉྩ བིམྦོཧནསྶ ཨུབྷོསུ ཨནྟེསུ ཋཔེཏབྦཙོལ༹པྤམཱཎདསྶནཾ, ཏསྶ ཝསེན བིམྦོཧནསྶ ཝིཏྠཱརཔྤམཱཎཾ པརིཙྪིཛྫཏི, ཏཾ ཝཊྚཾ ཝཱ ཙཏུརསྶཾ ཝཱ ཀཏྭཱ སིབྦིཏཾ ཡཐཱ ཀོཊིཏོ ཀོཊི ཝིཏྠཱརཏོ པུཐུལཊྛཱནཾ མུཊྛིརཏནཔྤམཱཎཾ ཧོཏི, ཨེཝཾ སིབྦིཏབྦཾ, ཨིཏོ ཨདྷིཀཾ ན ཝཊྚཏི. ཏཾ པན ཨནྟེསུ ཋཔིཏཙོལ༹ཾ ཀོཊིཡཱ ཀོཊིཾ ཨཱཧཙྩ དིགུཎཾ ཀཏཾ ¶ ཏིཀཎྞཾ ཧོཏི, ཏེསུ ཏཱིསུ ཀཎྞེསུ དྭིནྣཾ ཀཎྞཱནཾ ཨནྟརཾ ཝིདཏྠིཙཏུརངྒུལཾ ཧོཏི, མཛ྄ཛྷཊྛཱནཾ ཀོཊིཏོ ཀོཊིཾ ཨཱཧཙྩ མུཊྛིརཏནཾ ཧོཏི, ཨིདམསྶ ཨུཀྐཊྛཔྤམཱཎ’’ནྟི ཝུཏྟཏྟཱ བིམྦོཧནསྶ ཨུབྷོསུ ཨནྟེསུ ཋཔེཏབྦཙོལ༹ཀཾ པཀཏིཡཱཡེཝ ཏིཀཎྞཾ ན ཧོཏི, ཨཐ ཁོ ཀོཊིཡཱ ཀོཊིཾ ཨཱཧཙྩ དིགུཎཀཏཀཱལེཡེཝ ཧོཏི, ཏསྨཱ ཏཾ ཙོལ༹ཀཾ ཝཊྚཾ ཝཱ ཧོཏུ ཙཏུརསྶཾ ཝཱ, དིགུཎཾ ཀཏྭཱ མིནིཡམཱནཾ ཏིཀཎྞམེཝ ཧོཏི, དྭིནྣཉྩ ཀཎྞཱནཾ ཨནྟརཾ ཙཏུརངྒུལཱདྷིཀཝིདཏྠིམཏྟཾ ཧོཏི, ཏསྶ ཙ ཙོལ༹ཀསྶ མཛ྄ཛྷཊྛཱནཾ མུཊྛིརཏནཾ ཧོཏི, ཏསྶེཝ ཙོལ༹ཀསྶ པམཱཎེན བིམྦོཧནསྶ མཛ྄ཛྷཊྛཱནམྤི མུཊྛིརཏནཾ ཧོཏཱིཏི ཝིཉྙཱཡཏཱིཏི.

‘‘ཀམྦལམེཝ…པེ… ཨུཎྞབྷིསིསངྑམེཝ གཙྪཏཱིཏི སཱམཉྙཏོ ཝུཏྟཏྟཱ གོནཀཱདིཨཀཔྤིཡམྤི ཨུཎྞམཡཏྠརཎཾ བྷིསིཡཾ པཀྑིཔིཏྭཱ སཡིཏུཾ ཝཊྚཏཱིཏི དཊྛབྦཾ. མསཱུརཀེཏི ཙམྨམཡབྷིསིཡཾ, ཙམྨམཡཾ པན བིམྦོཧནཾ ཏཱུལཔུཎྞམྤི ན ཝཊྚཏཱི’’ཏི ཙ ཝིམཏིཝིནོདནིཡཾ ¶ (ཝི. ཝི. ཊཱི. ཙཱུལ༹ཝགྒ ༢.༢༩༧) ཝུཏྟཾ. སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༢༩༧) པན ‘‘སཱིསཔྤམཱཎནྟི ཡཏྠ གལཝཱཊཀཏོ པཊྛཱཡ སབྦསཱིསཾ ཨུཔདཧནྟི, ཏཾ སཱིསཔྤམཱཎཾ ཧོཏི, ཏཉྩ ཨུཀྐཊྛཔརིཙྪེདཏོ ཏིརིཡཾ མུཊྛིརཏནཾ ཧོཏཱིཏི དསྶེཏུཾ ‘ཡཏྠ ཝིཏྠཱརཏོ ཏཱིསུ ཀཎྞེསཱུ’ཏིཨཱདིམཱཧ. མཛ྄ཛྷཊྛཱནཾ མུཊྛིརཏནཾ ཧོཏཱིཏི བིམྦོཧནསྶ མཛ྄ཛྷཊྛཱནཾ ཏིརིཡཏོ མུཊྛིརཏནཔྤམཱཎཾ ཧོཏཱི’’ཏི ཝུཏྟཾ. ཨརཉྫརོཏི བཧུཨུདཀགཎྷནཀཱ མཧཱཙཱཊི. ཛལཾ གཎྷིཏུཾ ཨལནྟི ཨརཉྫརོ, ཝཊྚཙཱཊི ཝིཡ ཧུཏྭཱ ཐོཀཾ དཱིགྷམུཁོ མཛ྄ཛྷེ པརིཙྪེདཾ དསྶེཏྭཱ ཀཏོཏི གཎྛིཔདེསུ ཝུཏྟཾ. ཝུཏྟཉྷེཏཾ ཨཊྛཀཐཱཡནྟི ཨཛ྄ཛྷཱཧཱརསམྦནྡྷོ.

དྭིསངྒཧཱནི ¶ དྭེ ཧོནྟཱིཏི དྭེ པཋམདུཏིཡཨཝིསྶཛྫིཡཱནི ‘‘ཨཱརཱམོ ཨཱརཱམཝཏྠཱུ’’ཏི ཙ ‘‘ཝིཧཱརོ ཝིཧཱརཝཏྠཱུ’’ཏི ཙ ཝུཏྟདྭེདྭེཝཏྠུསངྒཧཱནི ཧོནྟི. ཏཏིཡཾ ཨཝིསྶཛྫིཡཾ ‘‘མཉྩོ པཱིཋཾ བྷིསི བིམྦོཧན’’ནྟི ཝུཏྟཙཏུཝཏྠུསངྒཧཾ ཧོཏི. ཙཏུཏྠཾ ཨཝིསྶཛྫིཡཾ ‘‘ལོཧཀུམྦྷཱི ལོཧབྷཱཎཀཾ ལོཧཝཱརཀོ ལོཧཀཊཱཧཾ ཝཱསི ཕརསུ ཀུཋཱརཱི ཀུདཱལོ ནིཁཱདན’’ནྟི ཝུཏྟནཝཀོཊྛཱསཝནྟཾ ཧོཏི. པཉྩམཾ ཨཝིསྶཛྫིཡཾ ‘‘ཝལླི ཝེལུ༹ མུཉྫཾ པབྦཛཾ ཏིཎཾ མཏྟིཀཱ དཱརུབྷཎྜཾ མཏྟིཀཱབྷཎྜ’’ནྟི ཝུཏྟཨཊྛབྷེདནཾ ཨཊྛཔབྷེདཝནྟཾ ཧོཏཱིཏི ཡོཛནཱ. པཉྩནིམྨལལོཙནོཏི མཾསཙཀྑུདིབྦཙཀྑུདྷམྨཙཀྑུབུདྡྷཙཀྑུསམནྟཙཀྑཱུནཾ ཝསེན ནིམྨལཔཉྩལོཙནོ.

སེནཱསནཀྑནྡྷཀེ ཨཝིསྶཛྫིཡཾ ཀཱིཊཱགིརིཝཏྠུསྨིཾ ཨཝེབྷངྒིཡནྟི ཨེཏྠ ‘‘སེནཱསནཀྑནྡྷཀེ གཱམཀཱཝཱསཝཏྠུསྨིཾ ཨཝིསྶཛྫིཡཾ ཀཱིཊཱགིརིཝཏྠུསྨིཾ ཨཝེབྷངྒིཡ’’ནྟི ཝཏྟབྦཾ. ཀསྨཱ? དྭིནྣམྤི ཝཏྠཱུནཾ སེནཱསནཀྑནྡྷཀེ ཨཱགཏཏྟཱ. སེནཱསནཀྑནྡྷཀེཏི ཨཡཾ སཱམཉྙཱདྷཱརོ. གཱམཀཱཝཱསཝཏྠུསྨིཾ ཀཱིཊཱགིརིཝཏྠུསྨིནྟི ཝིསེསཱདྷཱརོ. ཨཡམཏྠོ པཱལི༹ཾ ཨོལོཀེཏྭཱ པཙྩེཏབྦོ. ཏེནེཝ ཧི སམནྟཔཱསཱདིཀཱཡཾ (ཙཱུལ༹ཝ. ཨཊྛ. ༣༢༡) ‘‘སེནཱསནཀྑནྡྷཀེ’’ཏི ཨཝཏྭཱ ‘‘ཨིདྷ’’ཨིཙྩེཝ ཝུཏྟཾ, ཨིདྷཱཏི ཨིམིནཱ གཱམཀཱཝཱསཝཏྠུཾ དསྶེཏི, ཀཱིཊཱགིརིཝཏྠུ པན སརཱུཔཏོ དསྶིཏམེཝ. སཱམཉྙཱདྷཱརོ པན ཏཾསཾཝཎྞནཱབྷཱཝཏོ ཨཝུཏྟོཔི སིཛ྄ཛྷཏཱིཏི ན ཝུཏྟོཏི ཝིཉྙཱཡཏི.

༢༢༨. ཐཱཝརེན ཙ ཐཱཝརཾ, གརུབྷཎྜེན ཙ གརུབྷཎྜནྟི ཨེཏྠ པཉྩསུ ཀོཊྛཱསེསུ པུརིམདྭཡཾ ཐཱཝརཾ, པཙྪིམཏྟཡཾ གརུབྷཎྜནྟི ཝེདིཏབྦཾ. སམཀམེཝ དེཏཱིཏི ཨེཏྠ ཨཱུནཀཾ དེནྟམྤི ཝིཧཱརཝཏྠུསཱམནྟཾ ¶ གཧེཏྭཱ དཱུརཏརཾ དུཀྑགོཔཾ ཝིསྶཛྫེཏུཾ ཝཊྚཏཱིཏི ¶ དཊྛབྦཾ. ཝཀྑཏི ཧི ‘‘བྷིཀྑཱུནཉྩེ མཧགྒྷཏརཾ…པེ… སམྤཊིཙྪིཏུཾ ཝཊྚཏཱི’’ཏི. ཛཱནཱཔེཏྭཱཏི བྷིཀྑུསངྒྷསྶ ཛཱནཱཔེཏྭཱ, ཨཔལོཀེཏྭཱཏི ཨཏྠོ. ནནུ ཏུམྷཱཀཾ བཧུཏརཾ རུཀྑཱཏི ཝཏྟབྦནྟི ཨིདཾ སཱམིཀེསུ ཨཏྟནོ བྷཎྜསྶ མཧགྒྷཏཾ ཨཛཱནིཏྭཱ དེནྟེསུ ཏཾ ཉཏྭཱ ཐེཡྻཙིཏྟེན གཎྷཏོ ཨཝཧཱརོ ཧོཏཱིཏི ཝུཏྟཾ. ཝིཧཱརེན ཝིཧཱརོ པརིཝཏྟེཏབྦོཏི སཝཏྠུཀེན ཨཉྙེསཾ བྷཱུམིཡཾ ཀཏཔཱསཱདཱདིནཱ, ཨཝཏྠུཀེན ཝཱ སཝཏྠུཀཾ པརིཝཏྟེཏབྦཾ, ཨཝཏྠུཀཾ པན ཨཝཏྠུཀེནེཝ པརིཝཏྟེཏབྦཾ ཀེཝལཾ པཱསཱདསྶ བྷཱུམིཏོ ཨཐཱཝརཏྟཱ. ཨེཝཾ ཐཱཝརེསུཔི ཐཱཝརཝིབྷཱགཾ ཉཏྭཱཝ པརིཝཏྟེཏབྦཾ.

‘‘ཀཔྤིཡམཉྩཱ སམྤཊིཙྪིཏབྦཱཏི ཨིམིནཱ སུཝཎྞཱདིཝིཙིཏྟཾ ཨཀཔྤིཡམཉྩཾ ‘སངྒྷསྶཱ’ཏི ཝུཏྟེཔི སམྤཊིཙྪིཏུཾ ན ཝཊྚཏཱིཏི དསྶེཏི. ‘ཝིཧཱརསྶ དེམཱ’ཏི ཝུཏྟེ སངྒྷསྶ ཝཊྚཏི, ན པུགྒལསྶ ཁེཏྟཱདི ཝིཡཱཏི དཊྛབྦ’’ནྟི ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༣༢༡) ཝུཏྟཾ. སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ྭགྒ ༣.༣༢༡) པན ‘‘ཀཔྤིཡམཉྩཱ སམྤཊིཙྪིཏབྦཱཏི ‘སངྒྷསྶ དེམཱ’ཏི དིནྣཾ སནྡྷཱཡ ཝུཏྟཾ. སཙེ པན ‘ཝིཧཱརསྶ དེམཱ’ཏི ཝདནྟི, སུཝཎྞརཛཏམཡཱདིཨཀཔྤིཡམཉྩེཔི སམྤཊིཙྪིཏུཾ ཝཊྚཏཱི’’ཏི ཝུཏྟཾ. ན ཀེཝལཾ…པེ… པརིཝཏྟེཏུཾ ཝཊྚནྟཱིཏི ཨིམིནཱ ཨཐཱཝརེན ཐཱཝརམྤི ཨཐཱཝརམྤི པརིཝཏྟེཏུཾ ཝཊྚཏཱིཏི དསྶེཏི. ཐཱཝརེན ཨཐཱཝརམེཝ ཧི པརིཝཏྟེཏུཾ ན ཝཊྚཏི. ‘‘ཨཀཔྤིཡཾ ཝཱ མཧགྒྷཾ ཀཔྤིཡཾ ཝཱཏི ཨེཏྠ ཨཀཔྤིཡཾ ནཱམ སུཝཎྞམཡམཉྩཱདི ཨཀཔྤིཡབྷིསིབིམྦོཧནཱནི ཙ. མཧགྒྷཾ ཀཔྤིཡཾ ནཱམ དནྟམཡམཉྩཱདི, པཱཝཱརཱདིཀཔྤིཡཨཏྠརཎཱདཱིནི ཙཱ’’ཏི སཱརཏྠདཱིཔནིཡཾ ཝུཏྟཾ, ཝིམཏིཝིནོདནིཡཾ པན ‘‘ཨཀཔྤིཡཾ ཝཱཏི ཨཱསནྡིཨཱདི, པམཱཎཱཏིཀྐནྟཾ བིམྦོཧནཱདི ཙ. མཧགྒྷཾ ཀཔྤིཡཾ ཝཱཏི སུཝཎྞཱདིཝིཙིཏྟཾ ཀཔྤིཡཝོཧཱརེན དིནྣ’’ནྟི ཝུཏྟཾ.

༢༢༩. ‘‘ཀཱལ༹ལོཧ ¶ …པེ… བྷཱཛེཏབྦོ’’ཏི ཝུཏྟཏྟཱ ཝཊྚཀཾསལོཧམཡམྤི བྷཱཛནཾ པུགྒལིཀམྤི སམྤཊིཙྪིཏུམྤི པརིཧརིཏུམྤི ཝཊྚཏི པུགྒལཱནཾ པརིཧརིཏབྦསྶེཝ བྷཱཛེཏབྦཏྟཱཏི ཝདནྟི, ཏཾ ཨུཔརི ‘‘ཀཾསལོཧཝཊྚལོཧབྷཱཛནཝིཀཏི སངྒྷིཀཔརིབྷོགེན ཝཱ གིཧིཝིཀཊཱ ཝཱ ཝཊྚཏཱི’’ཏིཨཱདིཀེན མཧཱཔཙྩརིཝཙནེན ཝིརུཛ྄ཛྷཏི. ཨིམསྶ ཧི ‘‘ཝཊྚལོཧཀཾསལོཧཱནཾ ཡེན ཀེནཙི ཀཏོ སཱིཧལ༹དཱིཔེ པཱདགྒཎྷནཀོ བྷཱཛེཏབྦོ’’ཏི ཝུཏྟསྶ མཧཱཨཊྛཀཐཱཝཙནསྶ པཊིཀྑེཔཱཡ ཏཾ མཧཱཔཙྩརིཝཙནཾ པཙྪཱ དསྶིཏཾ, ཏསྨཱ ཝཊྚལོཧཀཾསལོཧམཡཾ ཡཾ ཀིཉྩི པཱདགྒཎྷནཀཝཱརཀམྤི ཨུཔཱདཱཡ ཨབྷཱཛནཱིཡམེཝ, གིཧཱིཧི དཱིཡམཱནམྤི པུགྒལསྶ སམྤཊིཙྪིཏུམྤི ¶ ན ཝཊྚཏི. པཱརིཧཱརིཡཾ ན ཝཊྚཏཱིཏི པཏྟཱདིཔརིཀྑཱརཾ ཝིཡ སཡམེཝ པཊིསཱམེཏྭཱ པརིབྷུཉྫིཏུཾ ན ཝཊྚཏི. གིཧིསནྟཀཾ ཝིཡ ཨཱརཱམིཀཱདཡོ ཙེ སཡམེཝ གོཔེཏྭཱ ཝིནིཡོགཀཱལེ ཨཱནེཏྭཱ པཊིདེནྟི, པརིབྷུཉྫིཏུཾ ཝཊྚཏི, ‘‘པཊིསཱམེཏྭཱ བྷིཀྑཱུནཾ དེཐཱ’’ཏི ཝཏྟུམྤི ཝཊྚཏཱིཏི.

པཎྞསཱུཙི ནཱམ ལེཁནཱིཏི ཝདནྟི. ཨཏྟནཱ ལདྡྷཱནིཔཱིཏིཨཱདིནཱ པཊིགྒཧཎེ དོསོ ནཏྠི, པརིཧརིཏྭཱ པརིབྷོགོཝ ཨཱཔཏྟིཀརོཏི དསྶེཏི. ཡཐཱ ཙེཏྠ, ཨེཝཾ ཨུཔརི བྷཱཛནཱིཡཝཱསིཨཱདཱིསུ ཨཏྟནོ སནྟཀེསུཔི.

ཨནཱམཱསམྤཱིཏི སུཝཎྞཱདིམཡམྤི, སབྦཾ ཏཾ ཨཱམསིཏྭཱ པརིབྷུཉྫིཏུཾ ཝཊྚཏི.

ཨུཔཀྑརེཏི ཨུཔཀརཎེ. སིཁརཾ ནཱམ ཡེན པརིབྦྷམནྟཱ ཚིནྡནྟི. པཏྟབནྡྷཀོ ནཱམ པཏྟསྶ གཎྛིཨཱདིཀཱརཀོ. ‘‘པཊིམཱནཾ སུཝཎྞཱདིཔཏྟཀཱརཀོ’’ཏིཔི ཝདནྟི.

‘‘ཨཌྜྷབཱཧཱུཏི ཀཔྤརཏོ པཊྛཱཡ ཡཱཝ ཨཾསཀཱུཊ’’ནྟི གཎྛིཔདེསུ ཝུཏྟཾ. ‘‘ཨཌྜྷབཱཧུ ནཱམ ཝིདཏྠིཙཏུརངྒུལནྟིཔི ཝདནྟཱི’’ཏི ¶ སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༢.༣༢༡) ཝུཏྟཾ. ཝཛིརབུདྡྷིཊཱིཀཱཡམྤི (ཝཛིར. ཊཱི. ཙཱུལ༹ཝགྒ ༣༢༡) ‘‘ཨཌྜྷབཱཧཱུཏི ཀཔྤརཏོ པཊྛཱཡ ཡཱཝ ཨཾསཀཱུཊནྟི ལིཁིཏ’’ནྟི ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༣༢༡) པན ‘‘ཨཌྜྷབཱཧུཔྤམཱཎཱ ནཱམ ཨཌྜྷབཱཧུམཏྟཱ, ཨཌྜྷབྱཱམམཏྟཱཏིཔི ཝདནྟཱི’’ཏི ཝུཏྟཾ. ཡོཏྟཱནཱིཏི ཙམྨརཛྫུཀཱ. ཏཏྠཛཱཏཀཱཏི སངྒྷིཀབྷཱུམིཡཾ ཛཱཏཱ.

‘‘ཨཊྛངྒུལསཱུཙིདཎྜམཏྟོཏི དཱིགྷསོ ཨཊྛངྒུལམཏྟོ པརིཎཱཧཏོ པཎྞསཱུཙིདཎྜམཏྟོ’’ཏི སཱརཏྠདཱིཔནིཡཾ (སཱརཏྠ. ཊཱི.. ཙཱུལ༹ཝགྒ ༣.༣༢༡) ཝིམཏིཝིནོདནིཡཾ པན (ཝི. ཝི. ཊཱི. ཙཱུལ༹ཝགྒ ༢.༣༢༡) ‘‘ཨཊྛངྒུལསཱུཙིདཎྜམཏྟོཏི སརདཎྜཱདིསཱུཙིཨཱཀཱརཏནུདཎྜཀམཏྟོཔཱི’’ཏི ཝུཏྟཾ. ཨཊྛངྒུལཔྤམཱཎོཏི དཱིགྷཏོ ཨཊྛངྒུལཔྤམཱཎོ. རིཏྟཔོཏྠཀོཔཱིཏི ཨལིཁིཏཔོཏྠཀོཔི, ཨིདཉྩ པཎྞཔྤསངྒེན ཝུཏྟཾ.

ཨཱསནྡིཀོཏི ཙཏུརསྶཔཱིཋཾ ཝུཙྩཏི ‘‘ཨུཙྩཀམྤི ཨཱསནྡིཀ’’ནྟི (ཙཱུལ༹ཝ. ༢༩༧) ཝཙནཏོ ¶ . ཨེཀཏོབྷཱགེན དཱིགྷཔཱིཋམེཝ ཧི ཨཊྛངྒུལཔཱདཀཾ ཝཊྚཏི, ཙཏུརསྶཱསནྡིཀོ པན པམཱཎཱཏིཀྐནྟོཔི ཝཊྚཏཱིཏི ཝེདིཏབྦོ. སཏྟངྒོ ནཱམ ཏཱིསུ དིསཱསུ ཨཔསྶཡཾ ཀཏྭཱ ཀཏམཉྩོ, ཨཡམྤི པམཱཎཱཏིཀྐནྟོཔི ཝཊྚཏི. བྷདྡཔཱིཋནྟི ཝེཏྟམཡཾ པཱིཋཾ ཝུཙྩཏི. པཱིཋིཀཱཏི པིལོཏིཀབནྡྷཾ པཱིཋམེཝ. ཨེལ༹ཀཔཱདཔཱིཋཾ ནཱམ དཱརུཔཊིཀཱཡ ཨུཔརིཔཱདེ ཋཔེཏྭཱ བྷོཛནཕལཀཾ ཝིཡ ཀཏཔཱིཋཾ ཝུཙྩཏི. ཨཱམཎྜཀཝཎྚཀཔཱིཋཾ ནཱམ ཨཱམལཀཱཀཱརེན ཡོཛིཏབཧཨུཔཱདཔཱིཋཾ. ཨིམཱནི ཏཱཝ པཱལི༹ཡཾ ཨཱགཏཔཱིཋཱནི. དཱརུམཡཾ པན སབྦམྤི པཱིཋཾ ཝཊྚཏི.

‘‘གྷཊྚནཕལཀཾ ནཱམ ཡཏྠ ཋཔེཏྭཱ རཛིཏཙཱིཝརཾ ཧཏྠེན གྷཊྚེནྟི. གྷཊྚནམུགྒརོ ནཱམ ཨནུཝཱཏཱདིགྷཊྚནཏྠཾ ཀཏོཏི ཝདནྟཱི’’ཏི སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༣༢༡) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༣༢༡) ‘‘གྷཊྚནཕལཀཾ གྷཊྚནམུགྒརོཏི ཨིདཾ རཛིཏཙཱིཝརཾ ཨེཀསྨིཾ མཊྛེ དཎྜམུགྒརེ ¶ ཝེཋེཏྭཱ ཨེཀསྶ མཊྛཕལཀསྶ ཨུཔརི ཋཔེཏྭཱ ཨུཔརི ཨཔརེན མཊྛཕལཀེན ནིཀྐུཛྫིཏྭཱ ཨེཀོ ཨུཔརི ཨཀྐམིཏྭཱ ཏིཊྛཏི, དྭེ ཛནཱ ཨུཔརིཕལཀཾ དྭཱིསུ ཀོཊཱིསུ གཧེཏྭཱ ཨཔརཱཔརཾ ཨཱཀཌྜྷནཝིཀཌྜྷནཾ ཀརོནྟི, ཨེཏཾ སནྡྷཱཡ ཝུཏྟཾ. ཧཏྠེ ཋཔཱཔེཏྭཱ ཧཏྠེན པཧརཎཾ པན ནིཊྛིཏརཛནསྶ ཙཱིཝརསྶ ཨལླཀཱལེ ཀཱཏབྦཾ, ཨིདཾ པན ཕལཀམུགྒརེཧི གྷཊྚནཾ སུཀྑཀཱལེ ཐདྡྷབྷཱཝཝིམོཙནཏྠནྟི དཊྛབྦ’’ནྟི ཝུཏྟཾ. ‘‘ཨམྦཎནྟི ཕལཀེཧི པོཀྑརཎཱིསདིསཀཏཔཱནཱིཡབྷཱཛནཾ. རཛནདོཎཱིཏི ཡཏྠ པཀྐརཛནཾ ཨཱཀིརིཏྭཱ ཋཔེནྟཱི’’ཏི སཱརཏྠདཱིཔནིཡཾ. ཝིམཏིཝིནོདནིཡཾ པན ‘‘ཨམྦཎནྟི ཨེཀདོཎིཀནཱཝཱཕལཀེཧི པོཀྑརཎཱིསདིསཾ ཀཏཾ. པཱནཱིཡབྷཱཛནནྟིཔི ཝདནྟི. རཛནདོཎཱིཏི ཨེཀདཱརུནཱཝ ཀཏཾ རཛནབྷཱཛནཾ. ཨུདཀདོཎཱིཏི ཨེཀདཱརུནཱཝ ཀཏཾ ཨུདཀབྷཱཛན’’ནྟི ཝུཏྟཾ.

‘‘བྷཱུམཏྠརཎཾ ཀཱཏུཾ ཝཊྚཏཱིཏི ཨཀཔྤིཡཙམྨཾ སནྡྷཱཡ ཝུཏྟཾ. པཙྩཏྠརཎགཏིཀནྟི ཨིམིནཱ མཉྩཔཱིཋེཔི ཨཏྠརིཏུཾ ཝཊྚཏཱིཏི དཱིཔེཏི. པཱཝཱརཱདིཔཙྩཏྠརཎམྤི གརུབྷཎྜནྟི ཨེཀེ. ནོཏི ཨཔརེ, ཝཱིམཾསིཏྭཱ གཧེཏབྦ’’ནྟི སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༣༢༡) ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༣༢༡) པན ‘‘དཎྜམུགྒརོ ནཱམ ‘ཡེན རཛིཏཙཱིཝརཾ པོཐེནྟི, ཏམྤི གརུབྷཎྜམེཝཱ’ཏི ཝུཏྟཏྟཱ, ‘པཙྩཏྠརཎགཏིཀ’ནྟི ཝུཏྟཏྟཱ ཙ ཨཔི-སདྡེན པཱཝཱརཱདིཔཙྩཏྠརཎཾ སབྦཾ གརུབྷཎྜམེཝཱཏི ཝདནྟི. ཨེཏེནེཝ སུཏྟེན ཨཉྙཐཱ ཨཏྠཾ ཝཏྭཱ པཱཝཱརཱདིཔཙྩཏྠརཎཾ ན གརུབྷཎྜཾ, བྷཱཛནཱིཡམེཝ, སེནཱསནཏྠཱཡ དིནྣཔཙྩཏྠརཎམེཝ གརུབྷཎྜནྟི ཝདནྟི. ཨུཔཔརིཀྑིཏབྦ’’ནྟི ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༣༢༡) པན ¶ ‘‘བྷཱུམཏྠརཎཾ ཀཱཏུཾ ཝཊྚཏཱིཏི ཨཀཔྤིཡཙམྨཾ སནྡྷཱཡ ཝུཏྟཾ. ཏཏྠ བྷཱུམཏྠརཎསངྑེཔེན སཡིཏུམྤི ཝཊྚཏིཡེཝ. པཙྩཏྠརཎགཏིཀནྟི ཨིམིནཱ མཉྩཱདཱིསུ ¶ ཨཏྠརིཏབྦཾ མཧཱཙམྨཾ ཨེལ༹ཀཙམྨཾ ནཱམཱཏི དསྶེཏཱི’’ཏི ཝུཏྟཾ. ཚཏྟམུཊྛིཔཎྞནྟི ཏཱལཔཎྞཾ སནྡྷཱཡ ཝུཏྟཾ. པཏྟཀཊཱཧནྟི པཏྟཔཙནཀཊཱཧཾ. གཎྛིཀཱཏི ཙཱིཝརགཎྛིཀཱ. ཝིདྷོཏི ཀཱཡབནྡྷནཝིདྷོ.

ཨིདཱནི ཝིནཡཏྠམཉྫཱུསཱཡཾ (ཀངྑཱ. ཨབྷི. ཊཱི. དུབྦལསིཀྑཱཔདཝཎྞནཱ) ཨཱགཏནཡོ ཝུཙྩཏེ – ཨཱརཱམོ ནཱམ པུཔྥཱརཱམོ ཝཱ ཕལཱརཱམོ ཝཱ. ཨཱརཱམཝཏྠུ ནཱམ ཏེསཾཡེཝ ཨཱརཱམཱནཾ ཨཏྠཱཡ པརིཙྪིནྡིཏྭཱ ཋཔིཏོཀཱསོ. ཏེསུ ཝཱ ཨཱརཱམེསུ ཝིནཊྛེསུ ཏེསཾ པོརཱཎཀབྷཱུམིབྷཱགོ. ཝིཧཱརོ ནཱམ ཡཾ ཀིཉྩི པཱསཱདཱདིསེནཱསནཾ. ཝིཧཱརཝཏྠུ ནཱམ ཏསྶ པཏིཊྛཱནོཀཱསོ. མཉྩོ ནཱམ མསཱརཀོ བུནྡིཀཱབདྡྷོ ཀུལཱི༹རཔཱདཀོ ཨཱཧཙྩཔཱདཀོཏི ཨིམེསཾ པུབྦེ ཝུཏྟཱནཾ ཙཏུནྣཾ མཉྩཱནཾ ཨཉྙཏརོ. པཱིཋཾ ནཱམ མསཱརཀཱདཱིནཾཡེཝ ཙཏུནྣཾ པཱིཋཱནཾ ཨཉྙཏརཾ. བྷིསི ནཱམ ཨུཎྞབྷིསིཨཱདཱིནཾ པཉྩནྣཾ བྷིསཱིནཾ ཨཉྙཏརཾ. བིམྦོཧནཾ ནཱམ རུཀྑཏཱུལལཏཱཏཱུལཔོཊཀཱིཏཱུལཱནཾ ཨཉྙཏརེན པུཎྞཾ. ལོཧཀུམྦྷཱི ནཱམ ཀཱལ༹ལོཧེན ཝཱ ཏམྦལོཧེན ཝཱ ཡེན ཀེནཙི ཀཏཀུམྦྷཱི. ལོཧབྷཱཎཀཱདཱིསུཔི ཨེསེཝ ནཡོ. ཨེཏྠ པན བྷཱཎཀནྟི ཨརཉྫརོ ཝུཙྩཏི. ཝཱརཀོཏི གྷཊོ. ཀཊཱཧཾ ཀཊཱཧམེཝ. ཝཱསིཨཱདཱིསུ ཝལླིཨཱདཱིསུ ཙ དུཝིཉྙེཡྻཾ ནཱམ ནཏྠི…པེ….

ཏཏྠ ཐཱཝརེན ཐཱཝརནྟི ཝིཧཱརཝིཧཱརཝཏྠུནཱ ཨཱརཱམཨཱརཱམཝཏྠུཾ ཝིཧཱརཝིཧཱརཝཏྠུཾ. ཨིཏརེནཱཏི ཨཐཱཝརེན, པཙྪིམརཱསིཏྟཡེནཱཏི ཝུཏྟཾ ཧོཏི. ཨཀཔྤིཡེནཱཏི སུཝཎྞམཡམཉྩཱདིནཱ ཙེཝ ཨཀཔྤིཡབྷིསིབིམྦོཧནེཧི ཙ. མཧགྒྷཀཔྤིཡེནཱཏི དནྟམཡམཉྩཱདིནཱ ཙེཝ པཱཝཱརཱདིནཱ ཙ. ཨིཏརནྟི ཨཐཱཝརཾ. ཀཔྤིཡཔརིཝཏྟནེན པརིཝཏྟེཏུནྟི ཡཐཱ ཨཀཔྤིཡཾ ན ཧོཏི, ཨེཝཾ པརིཝཏྟེཏུཾ…པེ… ཨེཝཾ ¶ ཏཱཝ ཐཱཝརེན ཐཱཝརཔརིཝཏྟནཾ ཝེདིཏབྦཾ. ཨིཏརེན ཨིཏརཔརིཝཏྟནེ པན མཉྩཔཱིཋཾ མཧནྟཾ ཝཱ ཧོཏུ, ཁུདྡཀཾ ཝཱ, ཨནྟམསོ ཙཏུརངྒུལཔཱདཀཾ གཱམདཱརཀེཧི པཾསྭཱགཱརཀེསུ ཀཱིལ༹ནྟེཧི ཀཏམྤི སངྒྷསྶ དིནྣཀཱལཏོ པཊྛཱཡ གརུབྷཎྜཾ ཧོཏི…པེ… སཏགྒྷནཀེན ཝཱ སཧསྶགྒྷནཀེན ཝཱ མཉྩེན ཨཉྙཾ མཉྩསཏམྤི ལབྷཏི, པརིཝཏྟེཏྭཱ གཧེཏབྦཾ. ན ཀེཝལཾ མཉྩེན མཉྩོཡེཝ, ཨཱརཱམཨཱརཱམཝཏྠུཝིཧཱརཝིཧཱརཝཏྠུཔཱིཋབྷིསིབིམྦོཧནཱནིཔི པརིཝཏྟེཏུཾ ཝཊྚནྟི. ཨེས ནཡོ པཱིཋབྷིསིབིམྦོཧནེསུཔི.

ཀཱལ༹ལོཧཏམྦལོཧཀཾསལོཧཝཊྚལོཧཱནནྟི ཨེཏྠ ཀཾསལོཧཾ ཝཊྚལོཧཉྩ ཀིཏྟིམལོཧཾ. ཏཱིཎི ཧི ¶ ཀིཏྟིམལོཧཱནི ཀཾསལོཧཾ ཝཊྚལོཧཾ ཧཱརཀཱུཊནྟི. ཏཏྠ ཏིཔུཏམྦེ མིསྶེཏྭཱ ཀཏཾ ཀཾསལོཧཾ. སཱིསཏམྦེ མིསྶེཏྭཱ ཀཏཾ ཝཊྚལོཧཾ. རསཏམྦེ མིསྶེཏྭཱ ཀཏཾ ཧཱརཀཱུཊཾ. ཏེན ཝུཏྟཾ ‘‘ཀཾསལོཧཾ ཝཊྚལོཧཉྩ ཀིཏྟིམལོཧ’’ནྟི. ཏཏོ ཨཏིརེཀནྟི ཏཏོ ཨཏིརེཀགཎྷནཀོ. སཱརཀོཏི མཛ྄ཛྷེ མཀུལ༹ཾ དསྶེཏྭཱ མུཁཝཊྚིཝིཏྠཏཾ ཀཏྭཱ པིཊྛིཏོ ནཱམེཏྭཱ ཀཱཏབྦཾ ཨེཀཾ བྷཱཛནཾ. སརཱཝནྟིཔི ཝདནྟི. ཨཱདི-སདྡེན ཀཉྩནཀཱདཱིནཾ གིཧིཨུཔཀརཎཱནཾ གཧཎཾ. ཏཱནི ཧི ཁུདྡཀཱནིཔི གརུབྷཎྜཱནེཝ གིཧིཨུཔཀརཎཏྟཱ. པི-སདྡེན པགེཝ མཧནྟཱནཱིཏི དསྶེཏི, ཨིམཱནི པན བྷཱཛནཱིཡཱནི བྷིཀྑུཔཀརཎཏྟཱཏི ཨདྷིཔྤཱཡོ. ཡཐཱ ཙ ཨེཏཱནི, ཨེཝཾ ཀུཎྜིཀཱཔི བྷཱཛནཱིཡཱ. ཝཀྑཏི ཧི ‘‘ཡཐཱ ཙ མཏྟིཀཱབྷཎྜེ, ཨེཝཾ ལོཧབྷཎྜེཔི ཀུཎྜིཀཱ བྷཱཛནཱིཡཀོཊྛཱསམེཝ བྷཛཏཱི’’ཏི. སངྒྷིཀཔརིབྷོགེནཱཏི ཨཱགནྟུཀཱནཾ ཝུཌྜྷཏརཱནཾ དཏྭཱ པརིབྷོགེན. གིཧིཝིཀཊཱཏི གིཧཱིཧི ཝིཀཏཱ པཉྙཏྟཱ, ཨཏྟནོ ཝཱ སནྟཀཀརཎེན ཝིརཱུཔཾ ཀཏཱ. པུགྒལིཀཔརིབྷོགེན ན ཝཊྚཏཱིཏི ཨཱགནྟུཀཱནཾ ཨདཏྭཱ ཨཏྟནོ སནྟཀཾ ཝིཡ གཧེཏྭཱ ¶ པརིབྷུཉྫིཏུཾ ན ཝཊྚཏི. པིཔྥལིཀོཏི ཀཏྟརི. ཨཱརཀཎྚཀཾ སཱུཙིཝེདྷཀཾ. ཏཱལ༹ཾ ཡནྟཾ. ཀཏྟརཡཊྛིཝེདྷཀོ ཀཏྟརཡཊྛིཝལཡཾ. ཡཐཱ ཏཐཱ གྷནཀཏཾ ལོཧནྟི ལོཧཝཊྚི ལོཧགུལོ༹ ལོཧཔིཎྜི ལོཧཙཀྐལིཀནྟི ཨེཝཾ གྷནཀཏཾ ལོཧཾ. ཁཱིརཔཱསཱཎམཡཱནཱིཏི མུདུཀཁཱིརཝཎྞཔཱསཱཎམཡཱནི.

གིཧིཝིཀཊཱནིཔི ན ཝཊྚནྟི ཨནཱམཱསཏྟཱ. པི-སདྡེན པགེཝ སངྒྷིཀཔརིབྷོགེན ཝཱ པུགྒལིཀཔརིབྷོགེན ཝཱཏི དསྶེཏི. སེནཱསནཔརིབྷོགོ པན སབྦཀཔྤིཡོ, ཏསྨཱ ཛཱཏརཱུཔཱདིམཡཱ སབྦཱཔི སེནཱསནཔརིཀྑཱརཱ ཨཱམཱསཱ. ཏེནཱཧ ‘‘སེནཱསནཔརིབྷོགེ པནཱ’’ཏིཨཱདི.

སེསཱཏི ཏཏོ མཧཏྟརཱི ཝཱསི. ཡཱ པནཱཏི ཡཱ ཀུཋཱརཱི པན. ཀུདཱལོ ཨནྟམསོ ཙཏུརངྒུལམཏྟོཔི གརུབྷཎྜམེཝ. ནིཁཱདནཾ ཙཏུརསྶམུཁཾ ཝཱ ཧོཏུ དོཎིམུཁཾ ཝཱ ཝངྐཾ ཝཱ ཨུཛུཀཾ ཝཱ, ཨནྟམསོ སམྨུཉྫནཱིདཎྜཝེདྷནམྤི, དཎྜབནྡྷཉྩེ, གརུབྷཎྜམེཝ. ཏེནཱཧ ‘‘ཀུདཱལོ དཎྜབནྡྷནིཁཱདནཾ ཝཱ ཨགརུབྷཎྜཾ ནཱམ ནཏྠཱི’’ཏི. སིཔཱཊིཀཱ ནཱམ ཁུརཀོསོ, སིཁརཾ པན དཎྜབནྡྷནིཁཱདནཾ ཨནུལོམེཏཱིཏི ཨཱཧ ‘‘སིཁརམྤི ནིཁཱདནེནེཝ སངྒཧིཏ’’ནྟི. སཙེ པན ཝཱསི ཨདཎྜཀཾ ཕལམཏྟཾ, བྷཱཛནཱིཡཾ. ཨུཔཀྑརེཏི ཝཱསིཨཱདིབྷཎྜེ.

པཏྟབནྡྷཀོ ནཱམ པཏྟསྶ གཎྛིཀཱདིཀཱརཀོ. ‘‘པཊིམཱནཾ སུཝཎྞཱདིཔཏྟཀཱརཀོ’’ཏིཔི ཝདནྟི. ཏིཔུཙྪེདནཀསཏྠཾ སུཝཎྞཙྪེདནཀསཏྠཾ ཀཏཔརིཀམྨཙམྨཙྪིནྡནཀཁུདྡཀསཏྠནྟི ཨིམཱནི ¶ ཙེཏྠ ཏཱིཎི པིཔྥལིཀཾ ཨནུལོམནྟཱིཏི ཨཱཧ ‘‘ཨཡཾ པན ཝིསེསོ’’ཏིཨཱདི. ཨིཏརཱནཱིཏི མཧཱཀཏྟརིཨཱདཱིནི.

ཨཌྜྷབཱཧུཔྤམཱཎཱཏི ¶ ཀཔྤརཏོ པཊྛཱཡ ཡཱཝ ཨཾསཀཱུཊཔྤམཱཎཱ, ཝིདཏྠིཙཏུརངྒུལཔྤམཱཎཱཏི ཝུཏྟཾ ཧོཏི. ཏཏྠཛཱཏཀཱཏི སངྒྷིཀབྷཱུམིཡཾ ཛཱཏཱ, ཨཱརཀྑསཾཝིདྷཱནེན རཀྑིཏཏྟཱ རཀྑིཏཱ ཙ སཱ མཉྫཱུསཱདཱིསུ པཀྑིཏྟཾ ཝིཡ ཡཐཱ ཏཾ ན ནསྶཏི, ཨེཝཾ གོཔནཏོ གོཔིཏཱ ཙཱཏི རཀྑིཏགོཔིཏཱ. ཏཏྠཛཱཏཀཱཔི པན ཨརཀྑིཏཱ གརུབྷཎྜམེཝ ན ཧོཏི. སངྒྷཀམྨེ ཙ ཙེཏིཡཀམྨེ ཙ ཀཏེཏི ཨིམིནཱ སངྒྷསནྟཀེན ཙེཏིཡསནྟཀཾ རཀྑིཏུཾ པརིཝཏྟིཏུཉྩ ཝཊྚཏཱིཏི དཱིཔེཏི. སུཏྟཾ པནཱཏི ཝཊྚིཏཉྩེཝ ཨཝཊྚིཏཉྩ སུཏྟཾ.

ཨཊྛངྒུལསཱུཙིདཎྜམཏྟོཏི ཨནྟམསོ དཱིགྷསོ ཨཊྛངྒུལམཏྟོ པརིཎཱཧཏོ སཱིཧལ༹-པཎྞསཱུཙིདཎྜམཏྟོ. ཨེཏྠཱཏི ཝེལུ༹བྷཎྜེ. དཌྜྷཾ གེཧཾ ཡེསཾ ཏེཏི དཌྜྷགེཧཱ. ན ཝཱརེཏབྦཱཏི ‘‘མཱ གཎྷིཏྭཱ གཙྪཐཱ’’ཏི ན ནིསེདྷེཏབྦཱ. དེསནྟརགཏེན སམྤཏྟཝིཧཱརེ སངྒྷིཀཱཝཱསེ ཋཔེཏབྦཱ.

ཨཝསེསཉྩ ཚདནཏིཎནྟི མུཉྫཔབྦཛེཧི ཨཝསེསཾ ཡཾ ཀིཉྩི ཚདནཏིཎཾ. ཨཊྛངྒུལཔྤམཱཎོཔཱིཏི ཝིཏྠཱརཏོ ཨཊྛངྒུལཔྤམཱཎོ. ལིཁིཏཔོཏྠཀོ པན གརུབྷཎྜཾ ན ཧོཏི. ཀཔྤིཡཙམྨཱནཱིཏི མིགཱདཱིནཾ ཙམྨཱནི. སབྦཾ ཙཀྐཡུཏྟཡཱནནྟི རཐསཀཊཱདིཀཾ སབྦཾ ཙཀྐཡུཏྟཡཱནཾ. ཝིསངྑཏཙཀྐཾ པན ཡཱནཾ བྷཱཛནཱིཡཾ. ཨནུཉྙཱཏཝཱསི ནཱམ ཡཱ སིཔཱཊིཀཱཡ པཀྑིཔིཏྭཱ པརིཧརིཏུཾ སཀྐཱཏི ཝུཏྟཱ. མུཊྛིཔཎྞཾ ཏཱལཔཏྟཾ. ཏཉྷི མུཊྛིནཱ གཧེཏྭཱ པརིཧརནྟཱིཏི ‘‘མུཊྛིཔཎྞ’’ནྟི ཝུཙྩཏི. ‘‘མུཊྛིཔཎྞནྟི ཚཏྟཙྪདཔཎྞམེཝཱ’’ཏི ཀེཙི. ཨརཎཱིསཧིཏནྟི ཨརཎཱིཡུགལ༹ཾ, ཨུཏྟརཱརཎཱི ཨདྷརཱརཎཱིཏི ཨརཎཱིདྭཡནྟི ཨཏྠོ. ཕཱཏིཀམྨཾ ཀཏྭཱཏི ཨནྟམསོ ཏཾཨགྒྷནཀཝཱལིཀཱཡཔི ཐཱཝརཾ ཝཌྜྷིཀམྨཾ ཀཏྭཱ. ཀུཎྜིཀཱཏི ཨཡཀུཎྜིཀཱ ཙེཝ ཏམྦལོཧཀུཎྜིཀཱ ཙ. བྷཱཛནཱིཡཀོཊྛཱསམེཝ བྷཛཏཱིཏི བྷཱཛནཱིཡཔཀྑམེཝ སེཝཏི ¶ , ན ཏུ གརུབྷཎྜནྟི ཨཏྠོ. ཀཉྩནཀོ པན གརུབྷཎྜམེཝཱཏི ཨདྷིཔྤཱཡོ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

གརུབྷཎྜཝིནིཙྪཡཀཐཱལངྐཱརོ ནཱམ

ཏིཾསཏིམོ པརིཙྪེདོ.

༣༡. ཙོདནཱདིཝིནིཙྪཡཀཐཱ

༢༣༠. ཨེཝཾ ¶ གརུབྷཎྜཝིནིཙྪཡཾ ཀཐེཏྭཱ ཨིདཱནི ཙོདནཱདིཝིནིཙྪཡཾ ཀཐེཏུཾ ‘‘ཙོདནཱདིཝིནིཙྪཡོཏི ཨེཏྠ པནཱ’’ཏིཨཱདིམཱཧ. ཏཏྠ ཙོདཱིཡཏེ ཙོདནཱ, དོསཱརོཔནནྟི ཨཏྠོ. ཨཱདི-སདྡེན སཱརཎཱདཡོ སངྒཎྷཱཏི. ཝུཏྟཉྷེཏཾ ཀམྨཀྑནྡྷཀེ (ཙཱུལ༹ཝ. ༤, ༥) ‘‘ཙོདེཏྭཱ ཀཏཾ ཧོཏི, སཱརེཏྭཱ ཀཏཾ ཧོཏི, ཨཱཔཏྟིཾ རོཔེཏྭཱ ཀཏཾ ཧོཏཱི’’ཏི. ‘‘ཙོདེཏུཾ པན ཀོ ལབྷཏི, ཀོ ན ལབྷཏཱི’’ཏི ཨིདཾ ཨནུདྡྷཾསནཱདྷིཔྤཱཡཾ ཝིནཱཔི ཙོདནཱལཀྑཎཾ དསྶེཏུཾ ཝུཏྟཾ. སཱིལསམྤནྣོཏི ཨིདཾ དུསྶཱིལསྶ ཝཙནཾ ཨཔྤམཱཎནྟི ཨདྷིཔྤཱཡེན ཝུཏྟཾ. བྷིཀྑུནཱིནཾ པན བྷིཀྑུཾ ཙོདེཏུཾ ཨནིསྶརཏྟཱ ‘བྷིཀྑུནིམེཝཱ’ཏི ཝུཏྟཾ. སཏིཔི བྷིཀྑུནཱིནཾ བྷིཀྑཱུསུ ཨནིསྶརབྷཱཝེ ཏཱཧི ཀཏཙོདནཱཔི ཙོདནཱརཧཏྟཱ ཙོདནཱཡེཝཱཏི ཨདྷིཔྤཱཡེན ‘‘པཉྩཔི སཧདྷམྨིཀཱ ལབྷནྟཱི’’ཏི ཝུཏྟཾ. བྷིཀྑུསྶ སུཏྭཱ ཙོདེཏཱིཏིཨཱདིནཱ ཙོདཀོ ཡེསཾ སུཏྭཱ ཙོདེཏི, ཏེསམྤི ཝཙནཾ པམཱཎམེཝཱཏི སམྤཊིཙྪིཏཏྟཱ ཏེསཾ ཙོདནཱཔི རུཧཏེཝཱཏི དསྶེཏུཾ ‘‘ཐེརོ སུཏྟཾ ནིདསྶེསཱི’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༣༨༥-༣༨༦) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ༡.༣༨༦) པན ‘‘ཨམཱུལཀཙོདནཱཔསངྒེན སམཱུལཀཙོདནཱལཀྑཎཱདིཾ དསྶེཏུཾ ‘ཙོདེཏུཾ པན ཀོ ¶ ལབྷཏི, ཀོ ན ལབྷཏཱི’ཏིཨཱདི ཨཱརདྡྷཾ. ‘བྷིཀྑུསྶ སུཏྭཱ ཙོདེཏཱི’ཏིཨཱདིསུཏྟཾ ཡསྨཱ ཡེ ཙོདཀསྶ ཨཉྙེསཾ ཝིཔཏྟིཾ པཀཱསེནྟི, ཏེཔི ཏསྨིཾ ཁཎེ ཙོདཀབྷཱཝེ ཋཏྭཱཝ པཀཱསེནྟི, ཏེསཉྩ ཝཙནཾ གཧེཏྭཱ ཨིཏརོཔི ཡསྨཱ ཙོདེཏུཉྩ ཨསམྤཊིཙྪནྟཾ ཏེཧི ཏིཏྠིཡསཱཝཀཔརིཡོསཱནེཧི པཋམཙོདཀེཧི སམྤཊིཙྪཱཔེཏུཉྩ ལབྷཏི, ཏསྨཱ ཨིདྷ སཱདྷཀབྷཱཝེན ཨུདྡྷཊནྟི ཝེདིཏབྦ’’ནྟི ཝུཏྟཾ.

གརུཀཱནཾ དྭིནྣནྟི པཱརཱཛིཀསངྒྷཱདིསེསཱནཾ. ཨཝསེསཱནནྟི ཐུལླཙྩཡཱདཱིནཾ པཉྩནྣཾ ཨཱཔཏྟཱིནཾ. མིཙྪཱདིཊྛི ནཱམ ‘‘ནཏྠི དིནྣ’’ནྟིཨཱདིནཡཔྤཝཏྟཱ དསཝཏྠུཀཱ དིཊྛི. ‘‘ཨནྟཝཱ ལོཀོ ཨནནྟཝཱ ལོཀོ’’ཏིཨཱདིཀཱ ཨནྟཾ གཎྷཱཔཀདིཊྛི ཨནྟགྒཱཧིཀཱ ནཱམ. ཨཱཛཱིཝཧེཏུ པཉྙཏྟཱནཾ ཚནྣནྟི ཨཱཛཱིཝཧེཏུཔི ཨཱཔཛྫིཏབྦཱནཾ ཨུཏྟརིམནུསྶདྷམྨེ པཱརཱཛིཀཾ, སཉྩརིཏྟེ སངྒྷཱདིསེསོ, ‘‘ཡོ ཏེ ཝིཧཱརེ ཝསཏི, སོ ཨརཧཱ’’ཏི པརིཡཱཡེན ཐུལླཙྩཡཾ, བྷིཀྑུསྶ པཎཱིཏབྷོཛནཝིཉྙཏྟིཡཱ པཱཙིཏྟིཡཾ, བྷིཀྑུནིཡཱ པཎཱིཏབྷོཛནཝིཉྙཏྟིཡཱ པཱཊིདེསནཱིཡཾ, སཱུཔོདནཝིཉྙཏྟིཡཱ དུཀྐཊནྟི ཨིམེསཾ པརིཝཱརེ (པརི. ༢༨༧) ཝུཏྟཱནཾ ཚནྣཾ. ན ཧེཏཱ ཨཱཔཏྟིཡོ ཨཱཛཱིཝཧེཏུ ཨེཝ པཉྙཏྟཱ སཉྩརིཏྟཱདཱིནཾ ཨཉྙཐཱཔི ཨཱཔཛྫིཏབྦཏོ. ཨཱཛཱིཝཧེཏུཔི ¶ ཨེཏཱསཾ ཨཱཔཛྫནཾ སནྡྷཱཡ ཨེཝཾ ཝུཏྟཾ, ཨཱཛཱིཝཧེཏུཔི པཉྙཏྟཱནནྟི ཨཏྠོ. དིཊྛིཝིཔཏྟིཨཱཛཱིཝཝིཔཏྟཱིཧི ཙོདེནྟོཔི ཏམྨཱུལིཀཱཡ ཨཱཔཏྟིཡཱ ཨེཝ ཙོདེཏི.

‘‘ཀསྨཱ མཾ ན ཝནྡསཱི’’ཏི པུཙྪིཏེ ‘‘ཨསྶམཎོསི, ཨསཀྱཔུཏྟིཡོསཱི’’ཏི ཨཝནྡནཀཱརཎསྶ ཝུཏྟཏྟཱ ཨནྟིམཝཏྠུཾ ཨཛ྄ཛྷཱཔནྣོ ན ཝནྡིཏབྦོཏི ཝདནྟི. ཙོདེཏུཀཱམཏཱཡ ཨེཝ ཨཝནྡིཏྭཱ ཨཏྟནཱ ཝཏྟབྦསྶ ཝུཏྟམཏྠཾ ཋཔེཏྭཱ ¶ ཨཝནྡིཡབྷཱཝེ ཏཾ ཀཱརཎཾ ན ཧོཏཱིཏི ཙཱུལ༹གཎྛིཔདེ མཛ྄ཛྷིམགཎྛིཔདེ ཙ ཝུཏྟཾ. ཨནྟིམཝཏྠུཨཛ྄ཛྷཱཔནྣསྶ ཨཝནྡིཡེསུ ཨཝུཏྟཏྟཱ ཏེན སདྡྷིཾ སཡནྟསྶ སཧསེཡྻཱཔཏྟིཡཱ ཨབྷཱཝཏོ, ཏསྶ ཙ པཊིགྒཧཎསྶ རུཧནཏོ ཏདེཝ ཡུཏྟཏརནྟི ཝིཉྙཱཡཏི. ཀིཉྩཱཔི ཡཱཝ སོ བྷིཀྑུབྷཱཝཾ པཊིཛཱནཱཏི, ཏཱཝ ཝནྡིཏབྦོ, ཡདཱ པན ‘‘ཨསྶམཎོམྷཱི’’ཏི པཊིཛཱནཱཏི, ཏདཱ ན ཝནྡིཏབྦོཏི ཨཡམེཏྠ ཝིསེསོ ཝེདིཏབྦོ. ཨནྟིམཝཏྠུཾ ཨཛ྄ཛྷཱཔནྣསྶ ཧི བྷིཀྑུབྷཱཝཾ པཊིཛཱནནྟསྶེཝ བྷིཀྑུབྷཱཝོ, ན ཏཏོ པརཾ. བྷིཀྑུབྷཱཝཾ ཨཔྤཊིཛཱནནྟོ ཧི ཨནུཔསམྤནྣཔཀྑཾ བྷཛཏི. ཡསྨཱ ཨཱམིསཾ དེནྟོ ཨཏྟནོ ཨིཙྪིཏཊྛཱནེཡེཝ དེཏི, ཏསྨཱ པཊིཔཱཊིཡཱ ནིསིནྣཱནཾ ཡཱགུབྷཏྟཱདཱིནི དེནྟེན ཨེཀསྶ ཙོདེཏུཀཱམཏཱཡ ཨདིནྣེཔི ཙོདནཱ ནཱམ ན ཧོཏཱིཏི ཨཱཧ ‘‘ན ཏཱཝ ཏཱ ཙོདནཱ ཧོཏཱི’’ཏི.

༢༣༡. ཙོདེཏབྦོཏི ཙུདིཏོ, ཙུདིཏོ ཨེཝ ཙུདིཏཀོ, ཨཔརཱདྷཝནྟོ པུགྒལོ. ཙོདེཏཱིཏི ཙོདཀོ, ཨཔརཱདྷཔཀཱསཀོ. ཙུདིཏཀོ ཙ ཙོདཀོ ཙ ཙུདིཏཀཙོདཀཱ. ཨུབྦཱཧིཀཱཡཱཏི ཨུབྦཧནྟི ཝིཡོཛེནྟི ཨེཏཱཡ ཨལཛྫཱིནཾ ཏཛྫནིཾ ཝཱ ཀལཧཾ ཝཱཏི ཨུབྦཱཧིཀཱ, སངྒྷསམྨུཏི, ཏཱཡ. ཝིནིཙྪིནནཾ ནཱམ ཏཱཡ སམྨཏབྷིཀྑཱུཧི ཝིནིཙྪིནནམེཝ. ཨལཛྫུསྶནྣཱཡ ཧི པརིསཱཡ སམཐཀྑནྡྷཀེ ཨཱགཏེཧི དསཧངྒེཧི སམནྣཱགཏཱ དྭེ ཏཡོ བྷིཀྑཱུ ཏཏྠེཝ ཝུཏྟཱཡ ཉཏྟིདུཏིཡཀམྨཝཱཙཱཡ སམྨནྣིཏབྦཱ. ཝུཏྟཉྷེཏཾ སམཐཀྑནྡྷཀེ (ཙཱུལ༹ཝ. ༢༣༡-༢༣༢) –

‘‘ཏེཧི ཙེ, བྷིཀྑཝེ, བྷིཀྑཱུཧི ཏསྨིཾ ཨདྷིཀརཎེ ཝིནིཙྪིཡམཱནེ ཨནནྟཱནི ཙེཝ བྷསྶཱནི ཛཱཡནྟི, ན ཙེཀསྶ བྷཱསིཏསྶ ཨཏྠོ ཝིཉྙཱཡཏི ¶ . ཨནུཛཱནཱམི, བྷིཀྑཝེ, ཨེཝརཱུཔཾ ཨདྷིཀརཎཾ ཨུབྦཱཧིཀཱཡ ཝཱུཔསམེཏུཾ. དསཧངྒེཧི སམནྣཱགཏོ བྷིཀྑུ ཨུབྦཱཧིཀཱཡ སམྨནྣིཏབྦོ, སཱིལཝཱ ཧོཏི, པཱཏིམོཀྑསཾཝརསཾཝུཏོ ཝིཧརཏི ཨཱཙཱརགོཙརསམྤནྣོ ཨཎུམཏྟེསུ ཝཛྫེསུ བྷཡདསྶཱཝཱི སམཱདཱཡ སིཀྑཏི སིཀྑཱཔདེསུ ¶ , བཧུསྶུཏོ ཧོཏི སུཏདྷརོ སུཏསནྣིཙཡོ, ཡེ ཏེ དྷམྨཱ ཨཱདིཀལྱཱཎཱ མཛ྄ཛྷེཀལྱཱཎཱ པརིཡོསཱནཀལྱཱཎཱ སཱཏྠཾ སབྱཉྫནཾ ཀེཝལཔརིཔུཎྞཾ པརིསུདྡྷཾ བྲཧྨཙརིཡཾ ཨབྷིཝདནྟི, ཏཐཱརཱུཔསྶ དྷམྨཱ བཧུསྶུཏཱ ཧོནྟི དྷཱཏཱ ཝཙསཱ པརིཙིཏཱ མནསཱནུཔེཀྑིཏཱ དིཊྛིཡཱ སུཔྤཊིཝིདྡྷཱ, ཨུབྷཡཱནི ཁོ པནསྶ པཱཏིམོཀྑཱནི ཝིཏྠཱརེན སྭཱགཏཱནི ཧོནྟི སུཝིབྷཏྟཱནི སུཔྤཝཏྟཱིནི སུཝིནིཙྪིཏཱནི སུཏྟསོ ཨནུབྱཉྫནསོ, ཝིནཡེ ཁོ པན ཚེཀོ ཧོཏི ཨསཾཧཱིརོ, པཊིབལོ ཧོཏི ཨུབྷོ ཨཏྠཔཙྩཏྠིཀེ ཨསྶཱསེཏུཾ སཉྙཱཔེཏུཾ ནིཛ྄ཛྷཱཔེཏུཾ པེཀྑེཏུཾ པསྶིཏུཾ པསཱདེཏུཾ, ཨདྷིཀརཎསམུཔྤཱདཝཱུཔསམཀུསལོ ཧོཏི, ཨདྷིཀརཎཾ ཛཱནཱཏི, ཨདྷིཀརཎསམུདཡཾ ཛཱནཱཏི, ཨདྷིཀརཎནིརོདྷཾ ཛཱནཱཏི, ཨདྷིཀརཎནིརོདྷགཱམིནིཔཊིཔདཾ ཛཱནཱཏི. ཨནུཛཱནཱམི, བྷིཀྑཝེ, ཨིམེཧི དསཧངྒེཧི སམནྣཱགཏཾ བྷིཀྑུཾ ཨུབྦཱཧིཀཱཡ སམྨནྣིཏུཾ.

‘‘ཨེཝཉྩ པན, བྷིཀྑཝེ, སམྨནྣིཏབྦོ. པཋམཾ བྷིཀྑུ ཡཱཙིཏབྦོ, ཡཱཙིཏྭཱ བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –

‘‘སུཎཱཏུ མེ, བྷནྟེ, སངྒྷོ, ཨམྷཱཀཾ ཨིམསྨིཾ ཨདྷིཀརཎེ ཝིནིཙྪིཡམཱནེ ཨནནྟཱནི ཙེཝ བྷསྶཱནི ¶ ཛཱཡནྟི, ན ཙེཀསྶ བྷཱསིཏསྶ ཨཏྠོ ཝིཉྙཱཡཏི. ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཉྩ ཨིཏྠནྣཱམཉྩ བྷིཀྑུཾ སམྨནྣེཡྻ ཨུབྦཱཧིཀཱཡ ཨིམཾ ཨདྷིཀརཎཾ ཝཱུཔསམེཏུཾ, ཨེསཱ ཉཏྟི.

‘‘སུཎཱཏུ མེ, བྷནྟེ, སངྒྷོ, ཨམྷཱཀཾ ཨིམསྨིཾ ཨདྷིཀརཎེ ཝིནིཙྪིཡམཱནེ ཨནནྟཱནི ཙེཝ བྷསྶཱནི ཛཱཡནྟི, ན ཙེཀསྶ བྷཱསིཏསྶ ཨཏྠོ ཝིཉྙཱཡཏི. སངྒྷོ ཨིཏྠནྣཱམཉྩ ཨིཏྠནྣཱམཉྩ བྷིཀྑུཾ སམྨནྣཏི ཨུབྦཱཧིཀཱཡ ཨིམཾ ཨདྷིཀརཎཾ ཝཱུཔསམེཏུཾ. ཡསྶཱཡསྨཏོ ཁམཏི ཨིཏྠནྣཱམསྶ ཙ ཨིཏྠནྣཱམསྶ ཙ བྷིཀྑུནོ སམྨུཏི ཨུབྦཱཧིཀཱཡ ཨིམཾ ཨདྷིཀརཎཾ ཝཱུཔསམེཏུཾ, སོ ཏུཎྷསྶ. ཡསྶ ནཀྑམཏི, སོ བྷཱསེཡྻ.

‘‘སམྨཏོ སངྒྷེན ཨིཏྠནྣཱམོ ཙ ཨིཏྠནྣཱམོ ཙ བྷིཀྑུ ཨུབྦཱཧིཀཱཡ ཨིམཾ ཨདྷིཀརཎཾ ཝཱུཔསམེཏུཾ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི.

ཏེཧི ¶ ཙ སམྨཏེཧི ཝིསུཾ ཝཱ ནིསཱིདིཏྭཱ ཏསྶཱ ཨེཝ ཝཱ པརིསཱཡ ‘‘ཨཉྙེཧི ན ཀིཉྩི ཀཐེཏབྦ’’ནྟི སཱཝེཏྭཱ ཏཾ ཨདྷིཀརཎཾ ཝིནིཙྪིཏབྦཾ. ཏུམྷཱཀནྟི ཙུདིཏཀཙོདཀེ སནྡྷཱཡ ཝུཏྟཾ.

‘‘ཀིམྷཱིཏི ཀིསྨིཾ ཝཏྠུསྨིཾ. ཀིམྷི ནམྤི ན ཛཱནཱསཱིཏི ཀིམྷི ནནྟི ཝཙནམྤི ན ཛཱནཱསི. ནཱསྶ ཨནུཡོགོ དཱཏབྦོཏི ནཱསྶ པུཙྪཱ པཊིཔུཙྪཱ དཱཏབྦཱ’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༣༨༥-༣༨༦) ཝུཏྟཾ, ཝིམཏིཝིནོདནིཡཾ (ཝི. ཝི. ཊཱི. ༡.༣༨༦) པན – ཀིམྷཱིཏི ཀིསྨིཾ ཝཏྠུསྨིཾ, ཀཏརཝིཔཏྟིཡནྟི ཨཏྠོ. ཀིམྷི ནཾ ནཱམཱཏི ཨིདཾ ‘‘ཀཏརཱཡ ཝིཔཏྟིཡཱ ¶ ཨེཏཾ ཙོདེསཱི’’ཏི ཡཱཡ ཀཱཡཙི ཝིཉྙཱཡམཱནཱཡ བྷཱསཱཡ ཝུཏྟེཔི ཙོདཀསྶ ཝིནཡེ ཨཔཀཏཉྙུཏཱཡ ‘‘སཱིལཱཙཱརདིཊྛིཨཱཛཱིཝཝིཔཏྟཱིསུ ཀཏརཱཡཱཏི མཾ པུཙྪཏཱི’’ཏི ཝིཉྙཱཏུཾ ཨསཀྐོནྟསྶ པུཙྪཱ, ན པན ‘‘ཀིམྷཱི’’ཏིཨཱདིཔདཏྠམཏྟཾ ཨཛཱནནྟསྶ. ན ཧི ཨནུཝིཛྫཀོ ཙོདཀཾ བཱལཾ ཨཔརིཙིཏབྷཱསཱཡ ‘‘ཀིམྷི ན’’ནྟི པུཙྪཏི. ཀིམྷི ནམྤི ན ཛཱནཱསཱིཏི ཨིདམྤི ཝཙནམཏྟཾ སནྡྷཱཡ ཝུཏྟཾ ན ཧོཏི. ‘‘ཀཏརཝིཔཏྟིཡཱ’’ཏི ཝུཏྟེ ‘‘ཨསུཀཱཡ ཝིཔཏྟིཡཱ’’ཏི ཝཏྟུམྤི ‘‘ན ཛཱནཱསཱི’’ཏི ཝཙནསྶ ཨདྷིཔྤཱཡམེཝ སནྡྷཱཡ ཝུཏྟནྟི གཧེཏབྦཾ. ཏེནེཝ ཝཀྑཏི ‘‘ནཱསྶ ཨནུཡོགོ དཱཏབྦོ’’ཏི.

‘‘ཏསྶ ནཡོ དཱཏབྦོ’’ཏི ཏསྶཱཏི བཱལསྶ ལཛྫིསྶ. ‘‘ཏསྶ ནཡོ དཱཏབྦོ’’ཏི ཝཏྭཱ ཙ ‘‘ཀིམྷི ནཾ ཙོདེསཱིཏི སཱིལཝིཔཏྟིཡཱ’’ཏིཨཱདི ཨདྷིཔྤཱཡཔྤཀཱསནམེཝ ནཡདཱནཾ ཝུཏྟཾ, ན པན ཀིམྷི-ནཾ-པདཱནཾཔརིཡཱཡམཏྟདསྶནཾ. ན ཧི བཱལོ ‘‘ཀཏརཝིཔཏྟིཡཾ ནཾ ཙོདེསཱི’’ཏི ཨིམསྶ ཝཙནསྶ ཨཏྠེ ཉཱཏེཔི ཝིཔཏྟིཔྤབྷེདཾ, ཨཏྟནཱ ཙོདིཡམཱནཾ ཝིཔཏྟིསརཱུཔཉྩ ཛཱནིཏུཾ སཀྐོཏི, ཏསྨཱ ཏེནེཝ ཨཛཱནནེན ཨལཛྫཱི ཨཔསཱདེཏབྦོ. ཀིམྷི ནནྟི ཨིདམྤི ཨུཔལཀྑཎམཏྟཾ. ཨཉྙེན ཝཱ ཡེན ཀེནཙི ཨཱཀཱརེན ཨཝིཉྙུཏཾ པཀཱསེཏྭཱ ཝིསྶཛྫེཏབྦོཝ. ‘‘དུམྨངྐཱུནཾ པུགྒལཱནཾ ནིགྒཧཱཡཱ’’ཏིཨཱདིཝཙནཏོ ‘‘ཨལཛྫཱིནིགྒཧཏྠཱཡ…པེ… པཉྙཏྟ’’ནྟི ཝུཏྟཾ. ཨེཧིཏཱིཏི ཨེཏི, ཧི-ཀཱརོ ཨེཏྠ ཨཱགམོ དཊྛབྦོ, ཨཱགམིསྶཏཱིཏི ཨཏྠོ. དིཊྛསནྟཱནེནཱཏི དིཊྛནིཡཱམེན. ཨལཛྫིསྶ པཊིཉྙཱཡ ཨེཝ ཀཱཏབྦནྟི ཝཙནཔཊིཝཙནཀྐམེནེཝ དོསེ ཨཱཝིབྷཱུཏེཔི ཨལཛྫིསྶ ‘‘ཨསུདྡྷོ ཨཧ’’ནྟི དོསསམྤཊིཙྪནཔཊིཉྙཱཡ ཨེཝ ཨཱཔཏྟིཡཱ ཀཱཏབྦནྟི ཨཏྠོ. ཀེཙི པན ‘‘ཨལཛྫིསྶ ཨེཏཾ ནཏྠཱིཏི སུདྡྷཔཊིཉྙཱཡ ཨེཝ ཨནཱཔཏྟིཡཱ ཀཱཏབྦནྟི ཨཡམེཏྠ ཨཏྠོ སངྒཧིཏོ’’ཏི ¶ ཝདནྟི, ཏཾ ¶ ན ཡུཏྟཾ ཨནུཝིཛྫཀསྶེཝ ནིརཏྠཀཏྟཱཔཏྟིཏོ, ཙོདཀེནེཝ ཨལཛྫིཔཊིཉྙཱཡ ཋཱཏབྦཏོ. དོསོཔགམཔཊིཉྙཱ ཨེཝ ཧི ཨིདྷ པཊིཉྙཱཏི ཨདྷིཔྤེཏཱ, ཏེནེཝ ཝཀྑཏི ‘‘ཨེཏམྤི ནཏྠི, ཨེཏམྤི ནཏྠཱིཏི པཊིཉྙཾ ན དེཏཱི’’ཏིཨཱདི.

ཏདཏྠདཱིཔནཏྠནྟི ཨལཛྫིསྶ དོསེ ཨཱཝིབྷཱུཏེཔི ཏསྶ དོསོཔགམཔཊིཉྙཱཡ ཨེཝ ཀཱཏབྦཏཱདཱིཔནཏྠཾ. ཝིཝཱདཝཏྠུསངྑཱཏེ ཨཏྠེ པཙྩཏྠིཀཱ ཨཏྠཔཙྩཏྠིཀཱ. སཉྙཾ དཏྭཱཏི ཏེསཾ ཀཐཱཔཙྪེདཏྠཾ ཨབྷིམུཁཀརཎཏྠཉྩ སདྡཾ ཀཏྭཱ. ཝིནིཙྪིནིཏུཾ ཨནནུཙྪཝིཀོཏི ཨསུདྡྷོཏི སཉྙཱཡ ཙོདཀཔཀྑེ པཝིཊྛཏྟཱ ཨནུཝིཛྫཀབྷཱཝཏོ བཧིབྷཱུཏཏྟཱ ཨནུཝིཛྫིཏུཾ ཨསཀྐུཎེཡྻཏྟཾ སནྡྷཱཡ ཝུཏྟཾ. སནྡེཧེ ཨེཝ ཧི སཏི ཨནུཝིཛྫིཏུཾ སཀྐཱ, ཨསུདྡྷལདྡྷིཡཱ པན སཏི ཙུདིཏཀེན ཝུཏྟཾ སབྦཾ ཨསཙྩཏོཔི པཊིབྷཱཏི, ཀཐཾ ཏཏྠ ཨནུཝིཛྫནཱ སིཡཱཏི.

ཏཐཱ ནཱསིཏཀོཝ བྷཝིསྶཏཱིཏི ཨིམིནཱ ཝིནིཙྪཡམྤི ཨདཏྭཱ སངྒྷཏོ ཝིཡོཛནཾ ནཱམ ལིངྒནཱསནཱ ཝིཡ ཨཡམྤི ཨེཀོ ནཱསནཔྤཀཱརོཏི དསྶེཏི. ཨེཀསམྦྷོགཔརིབྷོགཱཏི ཨིདཾ ཨཏྟནོ སནྟིཀཱ ཏེསཾ ཝིམོཙནཏྠཾ ཝུཏྟཾ, ན པན ཏེསཾ ཨཉྙམཉྙསམྦྷོགེ ཡོཛནཏྠཾ.

ཝིརདྡྷཾ ཧོཏཱིཏི སཉྩིཙྩ ཨཱཔཏྟིཾ ཨཱཔནྣོ ཧོཏི. ཨཱདིཏོ པཊྛཱཡ ཨལཛྫཱི ནཱམ ནཏྠཱིཏི ཨིདཾ ‘‘པཀྑཱནཾ ཨནུརཀྑཎཏྠཱཡ པཊིཉྙཾ ན དེཏཱི’’ཏི ཨིམསྶ ཨལཛྫཱིལཀྑཎསམྦྷཝསྶ ཀརཎཝཙནཾ. པཊིཙྪཱདིཏཀཱལཏོ པཊྛཱཡ ཨལཛྫཱི ནཱམ ཨེཝ, པུརིམོ ལཛྫིབྷཱཝོ ན རཀྑཏཱིཏི ཨཏྠོ. པཊིཉྙཾ ན དེཏཱིཏི ‘‘སཙེ མཡཱ ཀཏདོསཾ ཝཀྑཱམི, མཡ྄ཧཾ ཨནུཝཏྟཀཱ བྷིཛྫིསྶནྟཱི’’ཏི པཊིཉྙཾ ན དེཏི. ཋཱནེ ན ཏིཊྛཏཱིཏི ལཛྫིཊྛཱནེ ན ཏིཊྛཏི, ཀཱཡཝཱཙཱསུ ཝཱིཏིཀྐམོ ¶ ཧོཏི ཨེཝཱཏི ཨདྷིཔྤཱཡོ. ཏེནཱཧ ‘‘ཝིནིཙྪཡོ ན དཱཏབྦོ’’ཏི, པུབྦེ པཀྑིཀཱནཾ པཊིཉྙཱཡ ཝཱུཔསམིཏསྶཔི ཨདྷིཀརཎསྶ དུཝཱུཔསནྟཏཱཡ ཨཡམྤི ཏཐཱ ནཱསིཏཀོཝ བྷཝིསྶཏཱིཏི ཨདྷིཔྤཱཡོ.

༢༣༢. ཨདིནྣཱདཱནཝཏྠུཾ ཝིནིཙྪིནནྟེན པཉྩཝཱིསཏི ཨཝཧཱརཱ སཱདྷུཀཾ སལླཀྑེཏབྦཱཏི ཨེཏྠ པཉྩཝཱིསཏི ཨཝཧཱརཱ ནཱམ པཉྩ པཉྩཀཱནི, ཏཏྠ པཉྩ པཉྩཀཱནི ནཱམ ནཱནཱབྷཎྜཔཉྩཀཾ ཨེཀབྷཎྜཔཉྩཀཾ སཱཧཏྠིཀཔཉྩཀཾ པུབྦཔཡོགཔཉྩཀཾ ཐེཡྻཱཝཧཱརཔཉྩཀནྟི. ཏཐཱ ཧི ཝུཏྟཾ ཀངྑཱཝིཏརཎིཡཾ (ཀངྑཱ. ཨཊྛ. དུཏིཡཔཱརཱཛིཀཝཎྞནཱ) ‘‘ཏེ པན ཨཝཧཱརཱ པཉྩ ¶ པཉྩཀཱནི སམོདྷཱནེཏྭཱ སཱདྷུཀཾ སལླཀྑེཏབྦཱ’’ཏིཨཱདི. ཏཏྠ ནཱནཱབྷཎྜཔཉྩཀཨེཀབྷཎྜཔཉྩཀཱནི པདབྷཱཛནེ (པཱརཱ. ༩༢) ཝུཏྟཱནཾ ‘‘ཨཱདིཡེཡྻ, ཧརེཡྻ, ཨཝཧརེཡྻ, ཨིརིཡཱཔཐཾ ཝིཀོཔེཡྻ, ཋཱནཱ ཙཱཝེཡྻཱ’’ཏི ཨིམེསཾ པདཱནཾ ཝསེན ལབྦྷནྟི. ཏཐཱ ཧི ཝུཏྟཾ པོརཱཎེཧི –

‘‘ཨཱདིཡནྟོ ཧརནྟོཝ;

ཧརནྟོ ཨིརིཡཱཔཐཾ;

ཝིཀོཔེནྟོ ཏཐཱ ཋཱནཱ;

ཙཱཝེནྟོཔི པརཱཛིཀོ’’ཏི.

ཏཏྠ ནཱནཱབྷཎྜཔཉྩཀཾ སཝིཉྙཱཎཀཨཝིཉྙཱཎཀཝསེན དཊྛབྦཾ, ཨིཏརཾ སཝིཉྙཱཎཀཝསེནེཝ. ཀཐཾ? ཨཱདིཡེཡྻཱཏི ཨཱརཱམཾ ཨབྷིཡུཉྫཏི, ཨཱཔཏྟི དུཀྐཊསྶ. སཱམིཀསྶ ཝིམཏིཾ ཨུཔྤཱདེཏི, ཨཱཔཏྟི ཐུལླཙྩཡསྶ. སཱམིཀོ ‘‘ན མཡ྄ཧཾ བྷཝིསྶཏཱི’’ཏི དྷུརཾ ནིཀྑིཔཏི, ཨཱཔཏྟི པཱརཱཛིཀསྶ. ཧརེཡྻཱཏི ཨཉྙསྶ བྷཎྜཾ ཧརནྟོ སཱིསེ བྷཱརཾ ཐེཡྻཙིཏྟོ ཨཱམསཏི, དུཀྐཊཾ. ཕནྡཱཔེཏི, ཐུལླཙྩཡཾ. ཁནྡྷཾ ཨོརོཔེཏི, པཱརཱཛིཀཾ. ཨཝཧརེཡྻཱཏི ཨུཔནིཀྑིཏྟཾ བྷཎྜཾ ‘‘དེཧི ¶ མེ བྷཎྜ’’ནྟི ཝུཙྩམཱནོ ‘‘ནཱཧཾ གཎྷཱམཱི’’ཏི བྷཎཏི, དུཀྐཊཾ. སཱམིཀསྶ ཝིམཏིཾ ཨུཔྤཱདེཏི, ཐུལླཙྩཡཾ. སཱམིཀོ ‘‘ན མཡ྄ཧཾ བྷཝིསྶཏཱི’’ཏི དྷུརཾ ནིཀྑིཔཏི, པཱརཱཛིཀཾ. ཨིརིཡཱཔཐཾ ཝིཀོཔེཡྻཱཏི ‘‘སཧབྷཎྜཧཱརཀཾ ནེསྶཱམཱི’’ཏི པཋམཾ པཱདཾ ཨཏིཀྐཱམེཏི, ཐུལླཙྩཡཾ. དུཏིཡཾ པཱདཾ ཨཏིཀྐཱམེཏི, པཱརཱཛིཀཾ. ཋཱནཱ ཙཱཝེཡྻཱཏི ཐལཊྛཾ བྷཎྜཾ ཐེཡྻཙིཏྟོ ཨཱམསཏི, དུཀྐཊཾ. ཕནྡཱཔེཏི, ཐུལླཙྩཡཾ. ཋཱནཱ ཙཱཝེཏི, པཱརཱཛིཀཾ. ཨེཝཾ ཏཱཝ ནཱནཱབྷཎྜཔཉྩཀཾ ཝེདིཏབྦཾ. སསྶཱམིཀསྶ པན དཱསསྶ ཝཱ ཏིརཙྪཱནགཏསྶ ཝཱ ཡཐཱཝུཏྟེན ཨབྷིཡོགཱདིནཱ ནཡེན ཨཱདིཡནཧརཎ ཨཝཧརཎ ཨིརིཡཱཔཐཝིཀོཔན ཋཱནཱཙཱཝནཝསེན ཨེཀབྷཎྜཔཉྩཀཾ ཝེདིཏབྦཾ. ཏེནཱཧུ པོརཱཎཱ –

‘‘ཏཏྠ ནཱནེཀབྷཎྜཱནཾ, པཉྩཀཱནཾ ཝསཱ པན;

ཨཱདིཡནཱདིཔཉྩཀཱ, དུཝིདྷཱཏི ཨུདཱིརིཏཱ’’ཏི.

ཀཏམཾ ¶ སཱཧཏྠིཀཔཉྩཀཾ? སཱཧཏྠིཀོ ཨཱཎཏྟིཀོ ནིསྶགྒིཡོ ཨཏྠསཱདྷཀོ དྷུརནིཀྑེཔོཏི. ཏཐཱ ཧི ཝུཏྟཾ –

‘‘སཱཧཏྠཱཎཏྟིཀོ ཙེཝ, ནིསྶགྒིཡོཏྠསཱདྷཀོ;

དྷུརནིཀྑེཔཀོ ཙཱཏི, ཨིདཾ སཱཧཏྠཔཉྩཀ’’ནྟི.

ཏཏྠ སཱཧཏྠིཀོ ནཱམ པརསྶ བྷཎྜཾ སཧཏྠཱ ཨཝཧརཏི. ཨཱཎཏྟིཀོ ནཱམ ‘‘ཨསུཀསྶ བྷཎྜཾ ཨཝཧརཱ’’ཏི ཨཉྙཾ ཨཱཎཱཔེཏི. ནིསྶགྒིཡོ ནཱམ སུངྐགྷཱཏཔརིཀཔྤིཏོཀཱསཱནཾ ཨནྟོ ཋཏྭཱ བཧི པཱཏནཾ. ཨཏྠསཱདྷཀོ ནཱམ ‘‘ཨསུཀསྶ བྷཎྜཾ ཡདཱ སཀྐོསི, ཏདཱ ཏཾ ཨཝཧརཱ’’ཏི ཨཱཎཱཔེཏི. ཏཏྠ སཙེ པརོ ཨནནྟརཱཡིཀོ ཧུཏྭཱ ཏཾ ཨཝཧརཏི, ཨཱཎཱཔཀསྶ ཨཱཎཏྟིཀྑཎེཡེཝ པཱརཱཛིཀཾ. པརསྶ ཝཱ པན ཏེལཀུམྦྷིཡཱ པཱདགྒྷནཀཾ ཏེལཾ ཨཝསྶཾ པིཝནཀཱནི ཨུཔཱཧནཱདཱིནི པཀྑིཔཏི ¶ , ཧཏྠཏོ མུཏྟམཏྟེཡེཝ པཱརཱཛིཀཾ. དྷུརནིཀྑེཔོ པན ཨཱརཱམཱབྷིཡོགཨུཔནིཀྑིཏྟབྷཎྜཝསེན ཝེདིཏབྦོ. ཏཱཝཀཱལིཀབྷཎྜདེཡྻཱནི ཨདེནྟསྶཔི ཨེསེཝ ནཡོཏི ཨིདཾ སཱཧཏྠིཀཔཉྩཀཾ.

ཀཏམཾ པུབྦཔཡོགཔཉྩཀཾ? པུབྦཔཡོགོ སཧཔཡོགོ སཾཝིདཱཝཧཱརོ སངྐེཏཀམྨཾ ནིམིཏྟཀམྨནྟི. ཏེན ཝུཏྟཾ –

‘‘པུབྦསཧཔཡོགོ ཙ, སཾཝིདཱཧརཎཾ ཏཐཱ;

སངྐེཏཀམྨཾ ནིམིཏྟཾ, ཨིདཾ སཱཧཏྠཔཉྩཀ’’ནྟི.

ཏཏྠ ཨཱཎཏྟིཝསེན པུབྦཔཡོགོ ཝེདིཏབྦོ. ཋཱནཱཙཱཝནཝསེན, ཁིལཱདཱིནི སངྐཱམེཏྭཱ ཁེཏྟཱདིགྒཧཎཝསེན ཙ སཧཔཡོགོ ཝེདིཏབྦོ. སཾཝིདཱཝཧཱརོ ནཱམ ‘‘ཨསུཀཾ ནཱམ བྷཎྜཾ ཨཝཧརིསྶཱམཱ’’ཏི སཾཝིདཧིཏྭཱ སམྨནྟཡིཏྭཱ ཨཝཧརཎཾ. ཨེཝཾ སཾཝིདཧིཏྭཱ གཏེསུ ཧི ཨེཀེནཔི ཏསྨིཾ བྷཎྜེ ཋཱནཱ ཙཱཝིཏེ སབྦེསཾ ཨཝཧཱརོ ཧོཏི. སངྐེཏཀམྨཾ ནཱམ སཉྫཱནནཀམྨཾ. སཙེ ཧི པུརེབྷཏྟཱདཱིསུ ཡཾ ཀིཉྩི ཀཱལཾ པརིཙྪིནྡིཏྭཱ ‘‘ཨསུཀསྨིཾ ཀཱལེ ཨིཏྠནྣཱམཾ བྷཎྜཾ ཨཝཧརཱ’’ཏི ཝུཏྟོ སངྐེཏཏོ ཨཔཙྪཱ ཨཔུརེ ཏཾ ཨཝཧརཏི, སངྐེཏཀཱརཀསྶ སངྐེཏཀརཎཀྑཎེཡེཝ ཨཝཧཱརོ. ནིམིཏྟཀམྨཾ ནཱམ སཉྙུཔྤཱདནཏྠཾ ཨཀྑིནིཁཎནཱདིནིམིཏྟཀརཎཾ ¶ . སཙེ ཧི ཨེཝཾ ཀཏནིམིཏྟཏོ ཨཔཙྪཱ ཨཔུརེ ‘‘ཡཾ ཨཝཧརཱ’’ཏི ཝུཏྟོ, ཏཾ ཨཝཧརཏི, ནིམིཏྟཀཱརཀསྶ ནིམིཏྟཀྑཎེཡེཝ ཨཝཧཱརོཏི ཨིདཾ པུབྦཔཡོགཔཉྩཀཾ.

ཀཏམཾ ཐེཡྻཱཝཧཱརཔཉྩཀཾ? ཐེཡྻཱཝཧཱརོ པསཡ྄ཧཱཝཧཱརོ པརིཀཔྤཱཝཧཱརོ པཊིཙྪནྣཱཝཧཱརོ ཀུསཱཝཧཱརོཏི. ཏེན ཝུཏྟཾ –

‘‘ཐེཡྻཱ ¶ པསཡ྄ཧཱ པརིཀཔྤཱ, པཊིཙྪནྣཱ ཀུསཱ ཏཐཱ;

ཨཝཧཱརཱ ཨིམེ པཉྩ, ཐེཡྻཱཝཧཱརཔཉྩཀ’’ནྟི.

ཏཏྠ ཡོ སནྡྷིཙྪེདཱདཱིནི ཀཏྭཱ ཨདིསྶམཱནོ ཨཝཧརཏི, ཀཱུཊཏུལཱཀཱུཊམཱནཀཱུཊཀཧཱཔཎཱདཱིཧི ཝཱ ཝཉྩེཏྭཱ གཎྷཱཏི, ཏསྶེཝཾ གཎྷཏོ ཨཝཧཱརོ ཐེཡྻཱཝཧཱརོཏི ཝེདིཏབྦོ. ཡོ པན པསཡ྄ཧ བལཀྐཱརེན པརེསཾ སནྟཀཾ གཎྷཱཏི གཱམགྷཱཏཀཱདཡོ ཝིཡ, ཨཏྟནོ པཏྟབལིཏོ ཝཱ ཝུཏྟནཡེནེཝ ཨདྷིཀཾ གཎྷཱཏི རཱཛབྷཊཱདཡོ ཝིཡ, ཏསྶེཝཾ གཎྷཏོ ཨཝཧཱརོ པསཡ྄ཧཱཝཧཱརོཏི ཝེདིཏབྦོ. པརིཀཔྤེཏྭཱ གཧཎཾ པན པརིཀཔྤཱཝཧཱརོ ནཱམ.

སོ བྷཎྜོཀཱསསྶ ཝསེན དུཝིདྷོ. ཏཏྲཱཡཾ བྷཎྜཔརིཀཔྤོ – སཱཊཀཏྠིཀོ ཨནྟོགབྦྷཾ པཝིསིཏྭཱ ‘‘སཙེ སཱཊཀོ བྷཝིསྶཏི, གཎྷིསྶཱམི. སཙེ སུཏྟཾ, ན གཎྷིསྶཱམཱི’’ཏི པརིཀཔྤེཏྭཱ ཨནྡྷཀཱརེ པསིབྦཀཾ གཎྷཱཏི. ཏཏྲ ཙེ སཱཊཀོ ཧོཏི, ཨུདྡྷཱརེཡེཝ པཱརཱཛིཀཾ. སུཏྟཉྩེ ཧོཏི, རཀྑཏི. བཧི ནཱིཧརིཏྭཱ མུཉྩིཏྭཱ ‘‘སུཏྟ’’ནྟི ཉཏྭཱ པུན ཨཱཧརིཏྭཱ ཋཔེཏི, རཀྑཏིཡེཝ. ‘‘སུཏྟ’’ནྟི ཉཏྭཱཔི ཡཾ ལདྡྷཾ, ཏཾ གཧེཏབྦནྟི གཙྪཏི, པདཝཱརེན ཀཱརེཏབྦོ. བྷཱུམིཡཾ ཋཔེཏྭཱ གཎྷཱཏི, ཨུདྡྷཱརེ པཱརཱཛིཀཾ. ‘‘ཙོརོ ཙོརོ’’ཏི ཨནུབནྡྷོ ཚཌྜེཏྭཱ པལཱཡཏི, རཀྑཏི. སཱམིཀཱ དིསྭཱ གཎྷནྟི, རཀྑཏིཡེཝ. ཨཉྙོ ཙེ གཎྷཱཏི, བྷཎྜདེཡྻཾ. སཱམིཀེསུ ནིཝཏྟནྟེསུ སཡཾ དིསྭཱ པཾསུཀཱུལསཉྙཱཡ ‘‘པགེཝེཏཾ མཡཱ གཧིཏཾ, མམ དཱནི སནྟཀ’’ནྟི གཎྷནྟསྶཔི བྷཎྜདེཡྻམེཝ. ཏཏྠ ཡྭཱཡཾ ‘‘སཙེ སཱཊཀོ བྷཝིསྶཏི, གཎྷིསྶཱམཱི’’ཏིཨཱདིནཱ ནཡེན པཝཏྟོ པརིཀཔྤོ, ཨཡཾ བྷཎྜཔརིཀཔྤོ ནཱམ. ཨོཀཱསཔརིཀཔྤོ པན ཨེཝཾ ཝེདིཏབྦོ – ཨེཀཙྩོ པན པརཔརིཝེཎཱདཱིནི པཝིཊྛོ ཀིཉྩི ལོབྷནེཡྻབྷཎྜཾ དིསྭཱ གབྦྷདྭཱརཔམུཁཧེཊྛཱ ¶ པཱསཱདདྭཱརཀོཊྛཀརུཀྑམཱུལཱདིཝསེན པརིཙྪེདཾ ཀཏྭཱ ‘‘སཙེ མཾ ཨེཏྠནྟརེ པསྶིསྶནྟི, དཊྛུཀཱམཏཱཡ གཧེཏྭཱ ཝིཙརནྟོ ཝིཡ དསྶཱམི. ནོ ཙེ པསྶིསྶནྟི ¶ , ཧརིསྶཱམཱི’’ཏི པརིཀཔྤེཏི, ཏསྶ ཏཾ ཨཱདཱཡ པརིཀཔྤིཏཔརིཙྪེདཾ ཨཏིཀྐནྟམཏྟེ ཨཝཧཱརོ ཧོཏི. ཨིཏི ཡྭཱཡཾ ཝུཏྟནཡེནེཝ པཝཏྟོ པརིཀཔྤོ, ཨཡཾ ཨོཀཱསཔརིཀཔྤོ ནཱམ. ཨེཝམིམེསཾ དྭིནྣཾ པརིཀཔྤཱནཾ ཝསེན པརིཀཔྤེཏྭཱ གཎྷཏོ ཨཝཧཱརོ པརིཀཔྤཱཝཧཱརོཏི ཝེདིཏབྦོ.

པཊིཙྪཱདེཏྭཱ པན ཨཝཧརཎཾ པཊིཙྪནྣཱཝཧཱརོ. སོ ཨེཝཾ ཝེདིཏབྦོ – ཡོ བྷིཀྑུ ཨུཡྻཱནཱདཱིསུ པརེསཾ ཨོམུཉྩིཏྭཱ ཋཔིཏཾ ཨངྒུལིམུདྡིཀཱདིཾ དིསྭཱ ‘‘པཙྪཱ གཎྷིསྶཱམཱི’’ཏི པཾསུནཱ ཝཱ པཎྞེན ཝཱ པཊིཙྪཱདེཏི, ཏསྶ ཨེཏྟཱཝཏཱ ཨུདྡྷཱརོ ནཏྠཱིཏི ན ཏཱཝ ཨཝཧཱརོ ཧོཏི. ཡདཱ པན སཱམིཀཱ ཝིཙིནནྟཱ ཨཔསྶིཏྭཱ ‘‘སྭེ ཛཱནིསྶཱམཱ’’ཏི སཱལཡཱཝ གཏཱ ཧོནྟི, ཨཐསྶ ཏཾ ཨུདྡྷརཏོ ཨུདྡྷཱརེ ཨཝཧཱརོ. ‘‘པཊིཙྪནྣཀཱལེཡེཝ ཨེཏཾ མམ སནྟཀ’’ནྟི སཀསཉྙཱཡ ཝཱ ‘‘གཏཱདཱནི ཏེ, ཚཌྜིཏབྷཎྜཾ ཨིད’’ནྟི པཾསུཀཱུལསཉྙཱཡ ཝཱ གཎྷནྟསྶ པན བྷཎྜདེཡྻཾ. ཏེསུ དུཏིཡཏཏིཡདིཝསེ ཨཱགནྟྭཱ ཝིཙིནིཏྭཱ ཨདིསྭཱ དྷུརནིཀྑེཔཾ ཀཏྭཱ གཏེསུཔི གཧིཏཾ བྷཎྜདེཡྻམེཝ. པཙྪཱ ཉཏྭཱ ཙོདིཡམཱནསྶ ཨདདཏོ སཱམིཀཱནཾ དྷུརནིཀྑེཔེ ཨཝཧཱརོ ཧོཏི. ཀསྨཱ? ཡསྨཱ ཏསྶ པཡོགེན ཏེཧི ན དིཊྛཾ. ཡོ པན ཏཐཱརཱུཔཾ བྷཎྜཾ ཡཐཱཋཱནེ ཋིཏཾཡེཝ ཨཔྤཊིཙྪཱདེཏྭཱ ཐེཡྻཙིཏྟོ པཱདེན ཨཀྐམིཏྭཱ ཀདྡམེ ཝཱ ཝཱལིཀཱཡ ཝཱ པཝེསེཏི, ཏསྶ པཝེསིཏམཏྟེཡེཝ ཨཝཧཱརོ.

ཀུསཾ སངྐཱམེཏྭཱ པན ཨཝཧརཎཾ ཀུསཱཝཧཱརོ ནཱམ. སོཔི ཨེཝཾ ཝེདིཏབྦོ – ཡོ བྷིཀྑུ ཝིལཱིཝམཡཾ ཝཱ ཏཱལཔཎྞམཡཾ ཝཱ ཀཏསཉྙཱཎཾ ཡཾ ཀིཉྩི ཀུསཾ པཱཏེཏྭཱ ཙཱིཝརེ ¶ བྷཱཛིཡམཱནེ ཨཏྟནོ ཀོཊྛཱསསྶ སམཱིཔེ ཋིཏཾ སམགྒྷཏརཾ ཝཱ མཧགྒྷཏརཾ ཝཱ སམསམཾ ཝཱ ཨགྒྷེན པརསྶ ཀོཊྛཱསཾ ཧརིཏུཀཱམོ ཨཏྟནོ ཀོཊྛཱསེ པཏིཏཾ ཀུསཾ པརསྶ ཀོཊྛཱསེ པཱཏེཏུཀཱམཏཱཡ ཨུདྡྷརཏི, རཀྑཏི ཏཱཝ. པརསྶ ཀོཊྛཱསེ པཱཏིཏེ རཀྑཏེཝ. ཡདཱ པན ཏསྨིཾ པཏིཏེ པརསྶ ཀོཊྛཱསཏོ པརསྶ ཀུསཾ ཨུདྡྷརཏི, ཨུདྡྷཊམཏྟེ ཨཝཧཱརོ. སཙེ པཋམཏརཾ པརསྶ ཀོཊྛཱསཏོ ཀུསཾ ཨུདྡྷརཏི, ཨཏྟནོ ཀོཊྛཱསེ པཱཏེཏུཀཱམཏཱཡ ཨུདྡྷཱརེ རཀྑཏི, པཱཏནེཔི རཀྑཏི. ཨཏྟནོ ཀོཊྛཱསཏོ པན ཨཏྟནོ ཀུསཾ ཨུདྡྷརཏོ ཨུདྡྷཱརེཡེཝ རཀྑཏི, ཏཾ ཨུདྡྷརིཏྭཱ པརཀོཊྛཱསེ པཱཏེནྟསྶ ཧཏྠཏོ མུཏྟམཏྟེ ཨཝཧཱརོ ཧོཏི, ཨཡཾ ཀུསཱཝཧཱརོ. ཨཡམེཏྠ སངྑེཔོ, ཝིཏྠཱརོ པན སམནྟཔཱསཱདིཀཏོ (པཱརཱ. ཨཊྛ. ༡.༩༢) གཧེཏབྦོ.

ཏུལཡིཏྭཱཏི ¶ ཨུཔཔརིཀྑིཏྭཱ.

སཱམཱིཙཱིཏི ཝཏྟཾ, ཨཱཔཏྟི པན ནཏྠཱིཏི ཨདྷིཔྤཱཡོ.

མཧཱཛནསམྨདྡོཏི མཧཱཛནསངྑོབྷོ. བྷཊྛེ ཛནཀཱཡེཏི ཨཔགཏེ ཛནཀཱཡེ. ‘‘ཨིདཉྩ ཀཱསཱཝཾ ཨཏྟནོ སནྟཀཾ ཀཏྭཱ ཨེཏསྶེཝ བྷིཀྑུནོ དེཧཱི’’ཏི ཀིཾ ཀཱརཎཱ ཨེཝམཱཧ? ཙཱིཝརསྶཱམིཀེན དྷུརནིཀྑེཔོ ཀཏོ, ཏསྨཱ ཏསྶ ཨདིནྣཾ གཧེཏུཾ ན ཝཊྚཏི. ཨཝཧཱརཀོཔི ཝིཔྤཊིསཱརསྶ ཨུཔྤནྣཀཱལཏོ པཊྛཱཡ ཙཱིཝརསྶཱམིཀཾ པརིཡེསནྟོ ཝིཙརཏི ‘‘དསྶཱམཱི’’ཏི, ཙཱིཝརསྶཱམིཀེན ཙ ‘‘མམེཏ’’ནྟི ཝུཏྟེ ཨེཏེནཔི ཨཝཧཱརཀེན ཨཱལཡོ པརིཙྩཏྟོ, ཏསྨཱ ཨེཝམཱཧ. ཡདི ཨེཝཾ ཙཱིཝརསྶཱམིཀོཡེཝ ‘‘ཨཏྟནོ སནྟཀཾ གཎྷཱཧཱི’’ཏི ཀསྨཱ ན ཝུཏྟོཏི? ཨུབྷིནྣཾ ཀུཀྐུཙྩཝིནོདནཏྠཾ. ཀཐཾ? ཨཝཧཱརཀསྶ ‘‘མཡཱ སཧཏྠེན ན དིནྣཾ, བྷཎྜདེཡྻམེཏ’’ནྟི ཀུཀྐུཙྩཾ ཨུཔྤཛྫེཡྻ ¶ , ཨིཏརསྶ ‘‘མཡཱ པཋམཾ དྷུརནིཀྑེཔཾ ཀཏྭཱ པཙྪཱ ཨདིནྣཾ གཧིཏ’’ནྟི ཀུཀྐུཙྩཾ ཨུཔྤཛྫེཡྻཱཏི.

སམགྒྷནྟི ཨཔྤགྒྷཾ.

དཱརུཨཏྠཾ ཕརཏཱིཏི དཱརཱུཧི ཀཏྟབྦཀིཙྩཾ སཱདྷེཏི. མཡི སནྟེཏིཨཱདི སབྦཾ རཉྙཱ པསཱདེན ཝུཏྟཾ, ཐེརེན པན ‘‘ཨནནུཙྪཝིཀཾ ཀཏ’’ནྟི ན མཉྙིཏབྦཾ.

ཨེཀདིཝསཾ དནྟཀཊྛཙྪེདནཱདིནཱ ཡཱ ཨཡཾ ཨགྒྷཧཱནི ཝུཏྟཱ, སཱ བྷཎྜསྶཱམིནཱ ཀིཎིཏྭཱ གཧིཏམེཝ སནྡྷཱཡ ཝུཏྟཱ. སབྦཾ པནེཏཾ ཨཊྛཀཐཱཙརིཡཔྤམཱཎེན གཧེཏབྦཾ. པཱསཱཎཉྩ སཀྑརཉྩ པཱསཱཎསཀྑརཾ.

‘‘དྷཱརེཡྻ ཨཏྠཾ ཝིཙཀྑཎོ’’ཏི ཨིམསྶེཝ ཝིཝརཎཾ ‘‘ཨཱཔཏྟིཾ ཝཱ ཨནཱཔཏྟིཾ ཝཱ’’ཏིཨཱདི. ‘‘སིཀྑཱཔདཾ སམཾ ཏེནཱ’’ཏི ཨིཏོ པུབྦེ ཨེཀཱ གཱཐཱ –

‘‘དུཏིཡཾ ཨདུཏིཡེན, ཡཾ ཛིནེན པཀཱསིཏཾ;

པརཱཛིཏཀིལེསེན, པཱརཱཛིཀཔདཾ ཨིདྷཱ’’ཏི.

ཏཱཡ ¶ སདྡྷིཾ གྷཊེཏྭཱ ཨདུཏིཡེན པརཱཛིཏཀིལེསེན ཛིནེན དུཏིཡཾ ཡཾ ཨིདཾ པཱརཱཛིཀཔདཾ པཀཱསིཏཾ, ཨིདྷ ཏེན སམཾ ཨནེཀནཡཝོཀིཎྞཾ གམྦྷཱིརཏྠཝིནིཙྪཡཾ ཨཉྙཾ ཀིཉྩི སིཀྑཱཔདཾ ན ཝིཛྫཏཱིཏི ཡོཛནཱ. ཏཏྠ པརཱཛིཏཀིལེསེནཱཏི སནྟཱནེ པུན ཨནུཔྤཏྟིདྷམྨཏཱཔཱདནེ ཙཏཱུཧི མགྒཉཱཎེཧི སཧ ཝཱསནཱཡ སམུཙྪིནྣསབྦཀིལེསེན. ཝིམཏིཝིནོདནིཡཾ (ཝི. ཝི. ཊཱི. ༡.༡༥༩) པན ‘‘པརཱཛིཏཀིལེསེནཱཏི ཝིཛིཏཀིལེསེན, ནིཀིལེསེནཱཏི ཨཏྠོ’’ཏི ཝུཏྟཾ. ཨིདྷཱཏི ཨིམསྨིཾ སཱསནེ.

ཏེནཱཏི ཏེན དུཏིཡཔཱརཱཛིཀསིཀྑཱཔདེན. ཨཏྠོ ནཱམ པཱལི༹ཨཏྠོ. ཝིནིཙྪཡོ ནཱམ པཱལི༹མུཏྟཝིནིཙྪཡོ. ཨཏྠོ ཙ ཝིནིཙྪཡོ ཙ ཨཏྠཝིནིཙྪཡཱ, ཏེ གམྦྷཱིརཱ ཡསྨིནྟི གམྦྷཱིརཏྠཝིནིཙྪཡཾ ¶ . ཝཏྠུམྷི ཨོཏིཎྞེཏི ཙོདནཱཝསེན ཝཱ ཨཏྟནཱཝ ཨཏྟནོ ཝཱིཏིཀྐམཱརོཙནཝསེན ཝཱ སངྒྷམཛ྄ཛྷེ ཨདིནྣཱདཱནཝཏྠུསྨིཾ ཨོཏིཎྞེ. ཨེཏྠཱཏི ཨོཏིཎྞེ ཝཏྠུསྨིཾ. ཝིནིཙྪཡོཏི ཨཱཔཏྟཱནཱཔཏྟིནིཡམནཾ. ཨཝཏྭཱཝཱཏི ‘‘ཏྭཾ པཱརཱཛིཀཾ ཨཱཔནྣོ’’ཏི ཨཝཏྭཱཝ. ཀཔྤིཡེཔི ཙ ཝཏྠུསྨིནྟི ཨཏྟནཱ གཧེཏུཾ ཀཔྤིཡེ མཱཏུཔིཏུཨཱདིསནྟཀེཔི ཝཏྠུསྨིཾ. ལཧུཝཏྟིནོཏི ཐེཡྻཙིཏྟུཔྤཱདེན ལཧུཔརིཝཏྟིནོ. ཨཱསཱིཝིསནྟི སཱིགྷམེཝ སཀལསརཱིརེ ཕརཎསམཏྠཝིསཾ.

༢༣༣. པཀཏིམནུསྶེཧི ཨུཏྟརིཏརཱནཾ བུདྡྷཱདིཨུཏྟམཔུརིསཱནཾ ཨདྷིགམདྷམྨོཏི ཨུཏྟརིམནུསྶདྷམྨོ, ཏསྶ པརེསཾ ཨཱརོཙནཾ ཨུཏྟརིམནུསྶདྷམྨཱརོཙནཾ. ཏཾ ཝིནིཙྪིནནྟེན ཚ ཋཱནཱནི སོདྷེཏབྦཱནཱིཏི ཡོཛནཱ. ཏཏྠ ཀིཾ ཏེ ཨདྷིགཏནྟི ཨདྷིགམཔུཙྪཱ. ཀིནྟི ཏེ ཨདྷིགཏནྟི ཨུཔཱཡཔུཙྪཱ. ཀདཱ ཏེ ཨདྷིགཏནྟི ཀཱལཔུཙྪཱ. ཀཏྠ ཏེ ཨདྷིགཏནྟི ཨོཀཱསཔུཙྪཱ. ཀཏམེ ཏེ ཀིལེསཱ པཧཱིནཱཏི པཧཱིནཀིལེསཔུཙྪཱ. ཀཏམེསཾ ཏྭཾ དྷམྨཱནཾ ལཱབྷཱིཏི པཊིལདྡྷདྷམྨཔུཙྪཱ. ཨིདཱནི ཏམེཝ ཚཊྛཱནཝིསོདྷནཾ ཝིཏྠཱརེཏུམཱཧ ‘‘སཙེ ཧཱི’’ཏིཨཱདི. ཏཏྠ ཨེཏྟཱཝཏཱཏི ཨེཏྟཀེན བྱཱཀརཎཝཙནམཏྟེན ན སཀྐཱརོ ཀཱཏབྦོ. བྱཱཀརཎཉྷི ཨེཀསྶ ཨཡཱཐཱཝཏོཔི ཧོཏཱིཏི. ཨིམེསུ ཚསུ ཋཱནེསུ སོདྷནཏྠཾ ཨེཝཾ ཝཏྟབྦོཏི ཡཐཱ ནཱམ ཛཱཏརཱུཔཔཏིརཱུཔཀམྤི ཛཱཏརཱུཔཾ ཝིཡ ཁཱཡཏཱིཏི ཛཱཏརཱུཔཾ ནིགྷཾསནཏཱཔནཚེདནེཧི སོདྷེཏབྦཾ, ཨེཝམེཝ ཨིདཱནེཝ ཝུཏྟེསུ ཚསུ ཋཱནེསུ པཀྑིཔིཏྭཱ སོདྷནཏྠཾ ཝཏྟབྦོ. ཝིམོཀྑཱདཱིསཱུཏི ཨཱདི-སདྡེན སམཱཔཏྟིཉཱཎདསྶནམགྒབྷཱཝནཱཕལསཙྪིཀིརིཡཱདིཾ སངྒཎྷཱཏི. པཱཀཊོ ཧོཏི ཨདྷིགཏཝིསེསསྶ སཏིསམྨོསཱབྷཱཝཏོ. སེསཔུཙྪཱསུཔི ‘‘པཱཀཊོ ཧོཏཱི’’ཏི པདེ ཨེསེཝ ནཡོ.

སབྦེསཉྷི ¶ ¶ ཨཏྟནཱ ཨདྷིགཏམགྒེན པཧཱིནཱ ཀིལེསཱ པཱཀཊཱ ཧོནྟཱིཏི ཨིདཾ ཡེབྷུཡྻཝསེན ཝུཏྟཾ. ཀསྶཙི ཧི ཨཏྟནཱ ཨདྷིགཏམགྒཝཛ྄ཛྷཀིལེསེསུ སནྡེཧོ ཨུཔྤཛྫཏིཡེཝ མཧཱནཱམསྶ སཀྐསྶ ཝིཡ. སོ ཧི སཀདཱགཱམཱི སམཱནོཔི ‘‘ཏསྶ མཡ྄ཧཾ, བྷནྟེ, ཨེཝཾ ཧོཏི – ཀོ སུ ནཱམ མེ དྷམྨོ ཨཛ྄ཛྷཏྟཾ ཨཔྤཧཱིནོ, ཡེན མེ ཨེཀདཱ ལོབྷདྷམྨཱཔི ཙིཏྟཾ པརིཡཱདཱཡ ཏིཊྛནྟི, དོསདྷམྨཱཔི ཙིཏྟཾ པརིཡཱདཱཡ ཏིཊྛནྟི, མོཧདྷམྨཱཔི ཙིཏྟཾ པརིཡཱདཱཡ ཏིཊྛནྟཱི’’ཏི (མ. ནི. ༡.༡༧༥) བྷགཝནྟཾ པུཙྪི. ཨཡཾ ཀིར རཱཛཱ སཀདཱགཱམིམགྒེན ལོབྷདོསམོཧཱ ནིརཝསེསཱ པཧཱིཡནྟཱིཏི སཉྙཱི ཨཧོསཱིཏི.

ཡཱཡ པཊིཔདཱཡ ཡསྶ ཨརིཡམགྒོ ཨཱགཙྪཏི, སཱ པུབྦབྷཱགཔཊིཔཏྟི ཨཱགམནཔཊིཔདཱ. སོདྷེཏབྦཱཏི སུདྡྷཱ, ཨུདཱཧུ ན སུདྡྷཱཏི ཝིཙཱརཎཝསེན སོདྷེཏབྦཱ. ‘‘ན སུཛ྄ཛྷཏཱིཏི ཏཏྠ ཏཏྠ པམཱདཔཊིཔཏྟིསམྦྷཝཏོ. ཨཔནེཏབྦོཏི ཨཏྟནོ པཊིཉྙཱཡ ཨཔནེཏབྦོ’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༡༩༧-༡༩༨). ཝིམཏིཝིནོདནིཡཾ (ཝི. ཝི. ཊཱི. ༡.༡༩༧) པན ‘‘ན སུཛ྄ཛྷཏཱིཏི པུཙྪིཡམཱནོ པཊིཔཏྟིཀྐམཾ ཨུལླངྒྷིཏྭཱ ཀཐེསི. ཨཔནེཏབྦོཏི ཏཡཱ ཝུཏྟཀྐམེནཱཡཾ དྷམྨོ ན སཀྐཱ ཨདྷིགནྟུནྟི ཨདྷིགཏམཱནཏོ ཨཔནེཏབྦོ’’ཏི ཝུཏྟཾ. ‘‘སུཛ྄ཛྷཏཱི’’ཏི ཝཏྭཱ སུཛ྄ཛྷནཱཀཱརཾ དསྶེཏུཾ ‘‘དཱིགྷརཏྟ’’ནྟིཨཱདི ཝུཏྟཾ. པཉྙཱཡཏཱིཏི ཨེཏྠཱཔི ‘‘ཡདཱི’’ཏི པདཾ ཨཱནེཏྭཱ ཡདི སོ བྷིཀྑུ ཏཱཡ པཊིཔདཱཡ པཉྙཱཡཏཱིཏི སམྦནྡྷོ. ཙཏཱུསུ པཙྩཡེསུ ཨལགྒཏྟཱ ‘‘ཨཱཀཱསེ པཱཎིསམེན ཙེཏསཱ’’ཏི ཝུཏྟཾ. ཝུཏྟསདིསཾ བྱཱཀརཎཾ ཧོཏཱིཏི ཡོཛནཱ. ཏཏྠ ཝུཏྟསདིསནྟི ཏསྶ བྷིཀྑུནོ བྱཱཀརཎཾ ཨིམསྨིཾ སུཏྟེ ཝུཏྟེན སདིསཾ, སམནྟི ཨཏྠོ. ཁཱིཎཱསཝསྶ པཊིཔཏྟིསདིསཱ པཊིཔཏྟི ཧོཏཱིཏི དཱིགྷརཏྟཾ ¶ སུཝིཀྑམྦྷིཏཀིལེསཏྟཱ, ཨིདཉྩ ཨརཧཏྟཾ པཊིཛཱནནྟསྶ ཝསེན ཝུཏྟཾ. ཏེནཱཧ ‘‘ཁཱིཎཱསཝསྶ ནཱམཱ’’ཏིཨཱདི. ཁཱིཎཱསཝསྶ ནཱམ…པེ… ན ཧོཏཱིཏི པཧཱིནཝིཔལླཱསཏྟཱ, ཛཱིཝིཏནིཀནྟིཡཱ ཙ ཨབྷཱཝཏོ ན ཧོཏི, པུཐུཛྫནསྶ པན ཨཔྤཧཱིནཝིཔལླཱསཏྟཱ ཛཱིཝིཏནིཀནྟིསབྦྷཱཝཏོ ཙ ཨཔྤམཏྟཀེནཔི ཧོཏི, ཨེཝཾ སུཝིཀྑམྦྷིཏཀིལེསསྶ ཝཏྟནསེཀྑདྷམྨཔཊིཛཱནནཾ ཨིམིནཱ བྷཡུཔྤཱདནེན, ཨམྦིལཱདིདསྶནེ ཁེལུ༹པྤཱདཱདིནཱ ཙ ན སཀྐཱ ཝཱིམཾསིཏུཾ, ཏསྨཱ ཏསྶ ཝཙནེནེཝ ཏཾ སདྡྷཱཏབྦཾ.

ཨཡཾ བྷིཀྑུ སམྤནྣཝེཡྻཱཀརཎོཏི ཨིདཾ ན ཀེཝལཾ ཨབྷཱཡནཀམེཝ སནྡྷཱཡ ཝུཏྟཾ ཨེཀཙྩསྶ སཱུརཛཱཏིཀསྶ པུཐུཛྫནསྶཔི ཨབྷཱཡནཏོ, རཛྫནཱིཡཱརམྨཎཱནཾ བདརསཱལ༹ཝཱདིཨམྦིལམདྡནཱདཱིནཾ ¶ ཨུཔཡོཛནེཔི ཁེལུ༹པྤཱདཱདིཏཎྷུཔྤཏྟིརཧིཏཾ སབྦཐཱ སུཝིསོདྷིཏམེཝ སནྡྷཱཡ ཝུཏྟནྟི ཝེདིཏབྦཾ.

༢༣༤. ‘‘ནཱིཧརིཏྭཱཏི སཱསནཏོ ནཱིཧརིཏྭཱ’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༤༥) ཝུཏྟཾ, ཝིམཏིཝིནོདནིཡཾ (ཝི. ཝི. ཊཱི. ༡.༤༥) པན ‘‘ནཱིཧརིཏྭཱཏི པཱལི༹ཏོ ཨུདྡྷརིཏྭཱ’’ཏི. ཏཐཱ ཧི ‘‘པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ ནཱནུཡུཉྫིཏབྦཾ. ཀཏམེཧི པཉྩཧི? སུཏྟཾ ན ཛཱནཱཏི, སུཏྟཱནུལོམཾ ན ཛཱནཱཏཱི’’ཏིཨཱདིཔཱལི༹ཏོ (པརི. ༤༤༢) སུཏྟཾ སུཏྟཱནུལོམཉྩ ནཱིཧརིཾསུ, ‘‘ཨནཱཔཏྟི ཨེཝཾ ཨམྷཱཀཾ ཨཱཙརིཡཱནཾ ཨུགྒཧོ པརིཔུཙྪཱཏི བྷཎཏཱི’’ཏི ཨེཝམཱདིཏོ ཨཱཙརིཡཝཱདཾ, ‘‘ཨཱཡསྨཱ ཨུཔཱལི ཨེཝམཱཧ ‘ཨནཱཔཏྟི ཨཱཝུསོ སུཔིནནྟེནཱ’’ཏི (པཱརཱ. ༧༨) ཨེཝམཱདིཏོ ཨཏྟནོམཏིཾ ནཱིཧརིཾསུ. སཱ ཙ ཐེརསྶ ཨཏྟནོམཏི སུཏྟེན སངྒཧིཏཏྟཱ སུཏྟཾ ཛཱཏཾ, ཨེཝམཉྙཱཔི སུཏྟཱདཱིཧི སངྒཧིཏཱཝ གཧེཏབྦཱ, ནེཏརཱཏི ཝེདིཏབྦཾ. ཨཐ ཝཱ ནཱིཧརིཏྭཱཏི ¶ ཝིབྷཛིཏྭཱ, སཱཊྛཀཐཾ སཀལཾ ཝིནཡཔིཊཀཾ སུཏྟཱདཱིསུ ཙཏཱུསུ པདེསེསུ པཀྑིཔིཏྭཱ ཙཏུདྷཱ ཝིབྷཛིཏྭཱ ཝིནཡཾ པཀཱསེསུཾ ཏབྦིནིམུཏྟསྶ ཨབྷཱཝཱཏི ཨདྷིཔྤཱཡོ. ཝཛིརབུདྡྷིཊཱིཀཱཡམྤི (ཝཛིར. ཊཱི. པཱརཱཛིཀ ༤༥) ‘‘ནཱིཧརིཏྭཱཏི ཨེཏྠ སཱསནཏོ ནཱིཧརིཏྭཱཏི ཨཏྠོ…པེ… ཏཱཡ ཧི ཨཏྟནོམཏིཡཱ ཐེརོ ཨེཏདགྒཊྛཔནཾ ལབྷཏི. ཨཔིཙ ཝུཏྟཉྷེཏཾ བྷགཝཏཱ ‘ཨནུཔསམྤནྣེན པཉྙཏྟེན ཝཱ ཨཔཉྙཏྟེན ཝཱ ཝུཙྩམཱནོ…པེ… ཨནཱདརིཡཾ ཀརོཏི, ཨཱཔཏྟི དུཀྐཊསྶཱ’ཏི. ཏཏྠ ཧི པཉྙཏྟཾ ནཱམ སུཏྟཾ, སེསཏྟཡཾ ཨཔཉྙཏྟཾ ནཱམ. ཏེནཱཡཾ ‘ཙཏུབྦིདྷཉྷི ཝིནཡཾ, མཧཱཐེརཱ’ཏི གཱཐཱ སུཝུཏྟཱ’’ཏི ཝུཏྟཾ.

ཝུཏྟནྟི མིལིནྡཔཉྷེ ནཱགསེནཏྠེརེན ཝུཏྟཾ. པཛྫཏེ ཨནེན ཨཏྠོཏི པདཾ, བྷགཝཏཱ ཀཎྛཱདིཝཎྞུཔྤཏྟིཊྛཱནཾ ཨཱཧཙྩ ཝིསེསེཏྭཱ བྷཱསིཏཾ པདཾ ཨཱཧཙྩཔདཾ, བྷགཝཏོཡེཝ ཝཙནཾ. ཏེནཱཧ ‘‘ཨཱཧཙྩཔདནྟི སུཏྟཾ ཨདྷིཔྤེཏ’’ནྟི སཱརཏྠདཱིཔནིཡཾ (སཱརཏྠ. ཊཱི. ༢.༤༥) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ༡.༤༥) པན ‘‘ཀཎྛཱདིཝཎྞུཔྤཏྟིཊྛཱནཀརཎཱདཱིཧི ནཱིཧརིཏྭཱ ཨཏྟནོ ཝཙཱིཝིཉྙཏྟིཡཱཝ བྷཱསིཏཾ ཝཙནཾ ཨཱཧཙྩཔད’’ནྟི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༤༥) པན ‘‘ཨཊྛ ཝཎྞཊྛཱནཱནི ཨཱཧཙྩ ཝུཏྟེན པདནིཀཱཡེནཱཏི ཨཏྠོ, ཨུདཱཧཊེན ཀཎྛོཀྐནྟེན པདསམཱུཧེནཱཏི ཨདྷིཔྤཱཡོ’’ཏི ཝུཏྟཾ. ‘‘ཨིདཾ ཀཔྤཏི, ཨིདཾ ན ཀཔྤཏཱི’’ཏི ཨེཝཾ ཨཝིསེསེཏྭཱ ‘‘ཡཾ བྷིཀྑཝེ མཡཱ ‘ཨིདཾ ན ཀཔྤཏཱི’ཏི ཨཔྤཊིཀྑིཏྟཾ ¶ , ཏཉྩེ ཨཀཔྤིཡཾ ཨནུལོམེཏི, ཀཔྤིཡཾ པཊིབཱཧཏི, ཏཾ ཝོ ན ཀཔྤཏཱི’’ཏིཨཱདིནཱ (མཧཱཝ. ༣༠༥) ཝུཏྟསཱམཉྙལཀྑཎཾ ཨིདྷ རསོཏི ཨདྷིཔྤེཏནྟི ཨཱཧ ‘‘རསོཏི སུཏྟཱནུལོམ’’ནྟི. རསོཏི སཱརོ ‘‘པཏྟརསོ’’ཏིཨཱདཱིསུ (དྷ. ས. ༦༢༨-༦༣༠) ཝིཡ, པཊིཀྑིཏྟཱནུཉྙཱཏསུཏྟསཱརོཏི ཨཏྠོ. རསོཏི ཝཱ ¶ ལཀྑཎཾ པཊིཝཏྠུཀཾ ཨནུདྡྷརིཏྭཱ ལཀྑཎཱནུལོམེན ཝུཏྟཏྟཱ. རསེནཱཏི ཏསྶ ཨཱཧཙྩབྷཱསིཏསྶ རསེན, ཏཏོ ཨུདྡྷཊེན ཝིནིཙྪཡེནཱཏི ཨཏྠོ. སུཏྟཚཱཡཱ ཝིཡ ཧི སུཏྟཱནུལོམནྟི. དྷམྨསངྒཱཧཀཔབྷུཏིཨཱཙརིཡཔརམྤརཏོ ཨཱནཱིཏཱ ཨཊྛཀཐཱཏནྟི ཨིདྷ ‘‘ཨཱཙརིཡཝཾསོ’’ཏི ཨདྷིཔྤེཏཱཏི ཨཱཧ ‘‘ཨཱཙརིཡཝཾསོཏི ཨཱཙརིཡཝཱདོ’’ཏི, ཨཱཙརིཡཝཱདོ ‘‘ཨཱཙརིཡཝཾསོ’’ཏི ཝུཏྟོ པཱལི༹ཡཾ ཝུཏྟཱནཾ ཨཱཙརིཡཱནཾ པརམྤརཱཡ ཨཱབྷཏོཝ པམཱཎནྟི དསྶནཏྠཾ. ཨདྷིཔྤཱཡོཏི ཀཱརཎོཔཔཏྟིསིདྡྷོ ཨུཧཱཔོཧནཡཔཝཏྟོ པཙྩཀྑཱདིཔམཱཎཔཏིརཱུཔཀོ. ཨདྷིཔྤཱཡོཏི ཨེཏྠ ‘‘ཨཏྟནོམཏཱི’’ཏི ཀེཙི ཨཏྠཾ ཝདནྟི.

ཝིནཡཔིཊཀེ པཱལཱི༹ཏི ཨིདྷ ཨདྷིཀཱརཝསེན ཝུཏྟཾ, སེསཔིཊཀེསུཔི སུཏྟཱདིཙཏུནཡཱ ཡཐཱནུརཱུཔཾ ལབྦྷནྟེཝ.

‘‘མཧཱཔདེསཱཏི མཧཱཨོཀཱསཱ. མཧནྟཱནི ཝིནཡསྶ པཏིཊྛཱཔནཊྛཱནཱནི, ཡེསུ པཏིཊྛཱཔིཏོ ཝིནཡོ ཝིནིཙྪིནཱིཡཏི ཨསནྡེཧཏོ, མཧནྟཱནི ཝཱ ཀཱརཎཱནི མཧཱཔདེསཱ, མཧནྟཱནི ཝིནཡཝིནིཙྪཡཀཱརཎཱནཱིཏི ཝུཏྟཾ ཧོཏི. ཨཏྠཏོ པན ‘ཡཾ བྷིཀྑཝེ’ཏིཨཱདིནཱ ཝུཏྟཱསཱདྷིཔྤཱཡཱ པཱལི༹ཡེཝ མཧཱཔདེསཱཏི ཝདནྟི. ཏེནེཝཱཧ ‘ཡེ བྷགཝཏཱ ཨེཝཾ ཝུཏྟཱ’ཏིཨཱདི. ཨིམེ ཙ མཧཱཔདེསཱ ཁནྡྷཀེ ཨཱགཏཱ, ཏསྨཱ ཏེསཾ ཝིནིཙྪཡཀཐཱ ཏཏྠེཝ ཨཱཝི བྷཝིསྶཏཱིཏི ཨིདྷ ན ཝུཙྩཏཱི’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༤༥) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ༡.༤༥) པན ‘‘མཧཱཔདེསཱཏི མཧཱཨོཀཱསཱ མཧཱཝིསཡཱ, ཏེ ཨཏྠཏོ ‘ཡཾ བྷིཀྑཝེཏིཨཱདིཔཱལི༹ཝསེན ཨཀཔྤིཡཱནུལོམཏོ ཀཔྤིཡཱནུལོམཏོ ཙ པུགྒལེཧི ནཡཏོ ཏཐཱ ཏཐཱ གཡ྄ཧམཱནཱ ཨཏྠནཡཱ ཨེཝ. ཏེ ཧི བྷགཝཏཱ སརཱུཔཏོ ཨཝུཏྟེསུཔི པཊིཀྑིཏྟཱནུལོམེསུ ཨནུཉྙཱཏཱནུལོམེསུ ¶ ཙ སེསེསུ ཀིཙྩེསུ ནིཝཏྟིཔཝཏྟིཧེཏུཏཱཡ མཧཱགོཙརཱཏི ‘མཧཱཔདེསཱ’ཏི ཝུཏྟཱ, ན པན ‘ཡཾ བྷིཀྑཝེ མཡཱ ཨིདཾ ན ཀཔྤཏཱི’ཏིཨཱདིནཱ ཝུཏྟཱ སཱདྷིཔྤཱཡཱ པཱལི༹ཡེཝ ཏསྶཱ སུཏྟེ པཝིཊྛཏྟཱ. ‘སུཏྟཱནུལོམམྤི སུཏྟེ ཨོཏཱརེཏབྦཾ…པེ… སུཏྟམེཝ བལཝཏར’ནྟི (པཱརཱ. ཨཊྛ. ༡.༤༥) ཧི ཝུཏྟཾ. ན ཧེསཱ སཱདྷིཔྤཱཡཱ པཱལི༹ སུཏྟེ ཨོཏཱརེཏབྦཱ, ན གཧེཏབྦཱ ¶ ཝཱ ཧོཏི. ཡེནཱཡཾ སུཏྟཱནུལོམཾ སིཡཱ, ཏསྨཱ ཨིམཾ པཱལི༹ཨདྷིཔྤཱཡཾ ནིསྶཱཡ པུགྒལེཧི གཧིཏཱ ཡཐཱཝུཏྟཨཏྠཱཝ སུཏྟཱནུལོམཾ, ཏཾཔཀཱསཀཏྟཱ པན ཨཡཾ པཱལི༹པི སུཏྟཱནུལོམནྟི གཧེཏབྦཾ. ཏེནཱཧ ‘ཡེ བྷགཝཏཱ ཨེཝཾ ཝུཏྟཱ’ཏིཨཱདི. ‘ཡཾ བྷིཀྑཝེ’ཏིཨཱདིཔཱལི༹ནཡེན ཧི པུགྒལེཧི གཧིཏབྦཱ ཡེ ཨཀཔྤིཡཱནུལོམཱདཡོ ཨཏྠཱ ཝུཏྟཱ, ཏེ མཧཱཔདེསཱཏི ཨཏྠོ’’ཏི ཝུཏྟཾ.

ཝཛིརབུདྡྷིཊཱིཀཱཡམྤི (ཝཛིར. ཊཱི. པཱརཱཛིཀ ༤༥) ‘‘པརིཝཱརཊྛཀཐཱཡཾ ཨིདྷ ཙ ཀིཉྩཱཔི ‘སུཏྟཱནུལོམཾ ནཱམ ཙཏྟཱརོ མཧཱཔདེསཱ’ཏི ཝུཏྟཾ, ཨཐ ཁོ མཧཱཔདེསནཡསིདྡྷཾ པཊིཀྑིཏྟཱཔཊིཀྑིཏྟཾ ཨནུཉྙཱཏཱནནུཉྙཱཏཾ ཀཔྤིཡཱཀཔྤིཡནྟི ཨཏྠཏོ ཝུཏྟཾ ཧོཏི. ཏཏྠ ཡསྨཱ ‘ཋཱནཾ ཨོཀཱསོ པདེསོཏི ཀཱརཎཝེཝཙནཱནི ‘ཨཊྛཱནམེཏཾ, ཨཱནནྡ, ཨནཝཀཱསོ’ཏིཨཱདི སཱསནཏོ, ‘ནིགྒཧཊྛཱན’ནྟི ཙ ‘ཨསནྡིཊྛིཊྛཱན’ནྟི ཙ ‘ཨསནྡིཊྛི ཙ པན པདེསོ’ཏི ཙ ལོཀཏོ, ཏསྨཱ མཧཱཔདེསཱཏི མཧཱཀཱརཎཱནཱིཏི ཨཏྠོ. ཀཱརཎཾ ནཱམ ཉཱཔཀོ ཧེཏུ ཨིདྷཱདྷིཔྤེཏཾ, མཧནྟབྷཱཝོ པན ཏེསཾ མཧཱཝིསཡཏྟཱ མཧཱབྷཱུཏཱནཾ ཝིཡ. ཏེ དུཝིདྷཱ ཝིནཡམཧཱཔདེསཱ སུཏྟནྟིཀམཧཱཔདེསཱ ཙཱཏི. ཏཏྠ ཝིནཡམཧཱཔདེསཱ ཝིནཡེ ཡོགཾ གཙྪནྟི, ཨིཏརེ ཨུབྷཡཏྠཱཔི, ཏེནེཝ པརིཝཱརེ (པརི. ༤༤༢) ཨནུཡོགཝཏྟེ ¶ ‘དྷམྨཾ ན ཛཱནཱཏི, དྷམྨཱནུལོམཾ ན ཛཱནཱཏཱི’ཏི’’ ཝུཏྟཾ. ཏཏྠ དྷམྨནྟི ཋཔེཏྭཱ ཝིནཡཔིཊཀཾ ཨཝསེསཾ པིཊཀདྭཡཾ, དྷམྨཱནུལོམནྟི སུཏྟནྟིཀེ ཙཏྟཱརོ མཧཱཔདེསེཏིཨཱདི.

ཡདི སཱཔི ཏཏྠ ཏཏྠ བྷགཝཏཱ པཝཏྟིཏཱ པཀིཎྞཀདེསནཱཝ ཨཊྛཀཐཱ, སཱ པན དྷམྨསངྒཱཧཀེཧི པཋམཾ ཏཱིཎི པིཊཀཱནི སངྒཱཡིཏྭཱ ཏསྶ ཨཏྠཝཎྞནཱནུརཱུཔེནེཝ ཝཱཙནཱམགྒཾ ཨཱརོཔིཏཏྟཱ ‘‘ཨཱཙརིཡཝཱདོ’’ཏི ཝུཙྩཏི ‘‘ཨཱཙརིཡཱ ཝདནྟི སཾཝཎྞེནྟི པཱལི༹ཾ ཨེཏེནཱ’’ཏི ཀཏྭཱ. ཏེནཱཧ ‘‘ཨཱཙརིཡཝཱདོ ནཱམ…པེ… ཨཊྛཀཐཱཏནྟཱི’’ཏི. ཏིསྶོ ཧི སངྒཱིཏིཡོ ཨཱརུལ༹ྷོཡེཝ བུདྡྷཝཙནསྶ ཨཏྠསཾཝཎྞནཱབྷཱུཏོ ཀཐཱམགྒོ མཧཱམཧིནྡཏྠེརེན ཏམྦཔཎྞིདཱིཔཾ ཨཱབྷཏོ, པཙྪཱ ཏམྦཔཎྞིཡེཧི མཧཱཐེརེཧི སཱིཧལ༹བྷཱསཱཡ ཋཔིཏོ ནིཀཱཡནྟརལདྡྷིསངྐརཔརིཧརཎཏྠཾ. བྷགཝཏོ པཀིཎྞཀདེསནཱབྷཱུཏཱ ཙ སུཏྟཱནུལོམབྷཱུཏཱ ཙ ཨཊྛཀཐཱ ཡསྨཱ དྷམྨསངྒཱཧཀཏྠེརེཧི པཱལི༹ཝཎྞནཱཀྐམེན སངྒཧེཏྭཱ ཝུཏྟཱ, ཏསྨཱ ཨཱཙརིཡཝཱདོཏི ཝུཏྟཱ. ཨེཏེན ཙ ཨཊྛཀཐཱ སུཏྟསུཏྟཱནུལོམེསུ ཨཏྠཏོ སངྒཡ྄ཧཏཱིཏི ཝེདིཏབྦཾ. ཡཐཱ ཙ ཨེསཱ, ཨེཝཾ ཨཏྟནོམཏིཔི པམཱཎབྷཱུཏཱ. ན ཧི བྷགཝཏོ ཝཙནཾ ཝཙནཱནུལོམཉྩ ཨནིསྶཱཡ ¶ ཨགྒསཱཝཀཱདཡོཔི ཨཏྟནོ ཉཱཎབལེན སུཏྟཱབྷིདྷམྨཝིནཡེསུ ཀིཉྩི སམྨུཏིཔརམཏྠབྷཱུཏཾ ཨཏྠཾ ཝཏྟུཾ སཀྐོནྟི, ཏསྨཱ སབྦམྤི ཝཙནཾ སུཏྟེ སུཏྟཱནུལོམེ ཙ སངྒཡ྄ཧཏི. ཝིསུཾ པན ཨཊྛཀཐཱདཱིནཾ སངྒཧིཏཏྟཱ ཏདཝསེསཾ སུཏྟསུཏྟཱནུལོམཏོ གཧེཏྭཱ ཙཏུདྷཱ ཝིནཡོ ནིདྡིཊྛོ.

ཀིཉྩཱཔི ཨཏྟནོམཏི སུཏྟཱདཱིཧི སཾསནྡིཏྭཱཝ པརིཀཔྤཱིཡཏི, ཏཐཱཔི སཱ ན སུཏྟཱདཱིསུ ཝིསེསཏོ ནིདྡིཊྛཱཏི ཨཱཧ ‘‘སུཏྟསུཏྟཱནུལོམཨཱཙརིཡཝཱདེ མུཉྩིཏྭཱ’’ཏི. ཨནུབུདྡྷིཡཱཏི སུཏྟཱདཱིནིཡེཝ ཨནུགཏབུདྡྷིཡཱ. ནཡགྒཱཧེནཱཏི སུཏྟཱདིཏོ ¶ ལབྦྷམཱནནཡགྒཧཎེན. ཨཏྟནོམཏིཾ སཱམཉྙཏོ པཋམཾ དསྶེཏྭཱ ཨིདཱནི ཏམེཝ ཝིསེསེཏྭཱ དསྶེནྟོ ‘‘ཨཔིཙཱ’’ཏིཨཱདིམཱཧ. ཏཏྠ ‘‘སུཏྟནྟཱབྷིདྷམྨཝིནཡཊྛཀཐཱསཱུ’’ཏི ཝཙནཏོ པིཊཀཏྟཡསྶཔི སཱདྷཱརཎཱ ཨེསཱ ཀཐཱཏི ཝེདིཏབྦཱ. ཐེརཝཱདོཏི མཧཱསུམཏྠེརཱདཱིནཾ གཱཧོ. ཨིདཱནི ཏཏྠ པཊིཔཛྫིཏབྦཱཀཱརཾ དསྶེནྟོ ཨཱཧ ‘‘ཏཾ པནཱ’’ཏིཨཱདི. ཏཏྠ ཨཏྠེནཱཏི ཨཏྟནཱ ནཡཏོ གཧིཏེན ཨཏྠེན. པཱལི༹ནྟི ཨཏྟནོ གཱཧསྶ ནིསྶཡབྷཱུཏཾ སཱཊྛཀཐཾ པཱལི༹ཾ. པཱལི༹ཡཱཏི ཏཔྤཊིཀྑེཔཏྠཾ པརེནཱབྷཏཱཡ སཱཊྛཀཐཱཡ པཱལི༹ཡཱ, ཨཏྟནཱ གཧིཏཾ ཨཏྠཾ ནིསྶཱཡ, པཱལི༹ཉྩ སཾསནྡིཏྭཱཏི ཨཏྠོ. ཨཱཙརིཡཝཱདེཏི ཨཏྟནཱ པརེན ཙ སམུདྡྷཊཨཊྛཀཐཱཡ. ཨོཏཱརེཏབྦཱཏི ཉཱཎེན ཨནུཔྤཝེསེཏབྦཱ. ཨོཏརཏི ཙེཝ སམེཏི ཙཱཏི ཨཏྟནཱ ཨུདྡྷཊེཧི སཾསནྡནཝསེན ཨོཏརཏི, པརེན ཨུདྡྷཊེན སམེཏི. སབྦདུབྦལཱཏི ཨསབྦཉྙུཔུགྒལསྶ དོསཝཱསནཱཡ ཡཱཐཱཝཏོ ཨཏྠསམྤཊིཔཏྟིཨབྷཱཝཏོ ཝུཏྟཾ.

པམཱདཔཱཋཝསེན ཨཱཙརིཡཝཱདསྶ སུཏྟཱནུལོམེན ཨསཾསནྡནཱཔི སིཡཱཏི ཨཱཧ ‘‘ཨིཏརོ ན གཧེཏབྦོ’’ཏི. སམེནྟམེཝ གཧེཏབྦནྟི ཡེ སུཏྟེན སཾསནྡནྟི, ཨེཝརཱུཔཱཝ ཨཏྠཱ མཧཱཔདེསཏོ ཨུདྡྷརིཏབྦཱཏི དསྶེཏི ཏཐཱ ཏཐཱ ཨུདྡྷཊཨཏྠཱནཾཡེཝ སུཏྟཱནུལོམཏྟཱ. ཏེནཱཧ ‘‘སུཏྟཱནུལོམཏོ ཧི སུཏྟམེཝ བལཝཏར’’ནྟི. ཨཐ ཝཱ སུཏྟཱནུལོམསྶ སུཏྟེཀདེསཏྟེཔི སུཏྟེ ཝིཡ ‘‘ཨིདཾ ཀཔྤཏི, ཨིདཾ ན ཀཔྤཏཱི’’ཏི པརིཙྪིནྡིཏྭཱ ཨཱཧཙྩབྷཱསིཏཾ ཀིཉྩི ནཏྠཱིཏི ཨཱཧ ‘‘སུཏྟཱ…པེ… བལཝཏར’’ནྟི. ཨཔྤཊིཝཏྟིཡནྟི ཨཔྤཊིབཱཧིཡཾ. ཀཱརཀསངྒྷསདིསནྟི པམཱཎཏྟཱ སངྒཱིཏིཀཱརཀསངྒྷསདིསཾ. ‘‘བུདྡྷཱནཾ ཋིཏཀཱལསདིས’’ནྟི ཨིམིནཱ བུདྡྷཱནཾཡེཝ ཀཐིཏདྷམྨབྷཱཝཾ དསྶེཏི, དྷརམཱནབུདྡྷསདིསནྟི ཝུཏྟཾ ¶ ཧོཏི. སུཏྟེ ཧི པཊིབཱཧིཏེ བུདྡྷོཝ པཊིབཱཧིཏོ ཧོཏི. ‘‘སཀཝཱདཱི སུཏྟཾ གཧེཏྭཱ ཀཐེཏཱིཏི སཀཝཱདཱི ཨཏྟནོ སུཏྟཾ གཧེཏྭཱ ཝོཧརཏི. པརཝཱདཱི སུཏྟཱནུལོམནྟི ¶ ཨཉྙནིཀཱཡཝཱདཱི ཨཏྟནོ ནིཀཱཡེ སུཏྟཱནུལོམཾ གཧེཏྭཱ ཀཐེཏཱི’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༤༥) ཝུཏྟཾ.

ཝིམཏིཝིནོདནིཡཾ (ཝི. ཝི. ཊཱི. ༡.༤༥) པན ‘‘སཀཝཱདཱི སུཏྟཾ གཧེཏྭཱ ཀཐེཏཱིཏིཨཱདཱིསུ ཡོ ཡཐཱབྷཱུཏམཏྠཾ གཧེཏྭཱ ཀཐནསཱིལོ, སོ སཀཝཱདཱི. སུཏྟནྟི སངྒཱིཏིཏྟཡཱརུལ༹ྷཾ པཱལི༹ཝཙནཾ. པརཝཱདཱིཏི མཧཱཝིཧཱརཝཱསཱི ཝཱ ཧོཏུ ཨཉྙནིཀཱཡཝཱསཱི ཝཱ, ཡོ ཝིཔརཱིཏཏོ ཨཏྠཾ གཧེཏྭཱ ཀཐནསཱིལོ, སོཝ ཨིདྷ ‘པརཝཱདཱི’ཏི ཝུཏྟོ. སུཏྟཱནུལོམནྟི སངྒཱིཏིཏྟཡཱརུལ༹ྷཾ ཝཱ ཨནཱརུལ༹ྷཾ ཝཱ ཡཾ ཀིཉྩི ཝིཔལླཱསཏོ ཝཱ ཝཉྩནཱཡ ཝཱ ‘སངྒཱིཏིཏྟཡཱགཏམིད’ནྟི དསྶིཡམཱནཾ སུཏྟཱནུལོམཾ. ཀེཙི ‘ཨཉྙནིཀཱཡེ སུཏྟཱནུལོམ’ནྟི ཝདནྟི, ཏཾ ན ཡུཏྟཾ སཀཝཱདཱིཔརཝཱདཱིནཾ ཨུབྷིནྣམྤི སངྒཱིཏིཏྟཡཱརུལ༹ྷསུཏྟཱདཱིནམེཝ གཧེཏབྦཏོ. ཏཐཱ ཧི ཝཀྑཏི ‘ཏིསྶོ སངྒཱིཏིཡོ ཨཱརུལ༹ྷཾ པཱལི༹ཨཱགཏཾ པཉྙཱཡཏི, གཧེཏབྦ’ནྟིཨཱདི (པཱརཱ. ཨཊྛ. ༡.༤༥). ན ཧི སཀཝཱདཱི ཨཉྙནིཀཱཡསུཏྟཱདིཾ པམཱཎཏོ གཎྷཱཏི. ཡེན ཏེསུ སུཏྟཱདཱིསུ དསྶིཏེསུ ཏཏྠ ཋཱཏབྦཾ བྷཝེཡྻ, ཝཀྑཏི ཙ ‘པརོ ཏསྶ ཨཀཔྤིཡབྷཱཝསཱདྷཀཾ སུཏྟཏོ བཧུཾ ཀཱརཎཉྩ ཝིནིཙྪཡཉྩ དསྶེཏི…པེ… སཱདྷཱུཏི སམྤཊིཙྪིཏྭཱ ཨཀཔྤིཡེཡེཝ ཋཱཏབྦ’ནྟི (པཱརཱ. ཨཊྛ. ༡.༤༥), ཏསྨཱ པརཝཱདིནཱཔི སངྒཱིཏིཏྟཡེ ཨནཱརུལ༹ྷམྤི ཨནཱརུལ༹ྷམིཙྩེཝ དསྶཱིཡཏི, ཀེཝལཾ ཏསྶ ཏསྶ སུཏྟཱདིནོ སངྒཱིཏིཏྟཡེ ཨནཱགཏསྶ ཀཱུཊཏཱ, ཨཱགཏསྶ ཙ བྱཉྫནཙྪཱཡཱཡ ཨཉྙཐཱ ཨདྷིཔྤཱཡཡོཛནཱ ཙ ཝིསེསཱ, ཏཏྠ ཙ ཡཾ ཀཱུཊཾ, ཏཾ ཨཔནཱིཡཏི. ཡཾ ཨཉྙཐཱ ཡོཛིཏཾ, ཏཾ ཏསྶ ཝིཔརཱིཏཏཱདསྶནཏྠཾ ཏདཉྙེན སུཏྟཱདིནཱ ¶ སཾསནྡནཱ ཀརཱིཡཏི. ཡོ པན པརཝཱདིནཱ གཧིཏོ ཨདྷིཔྤཱཡོ སུཏྟནྟཱདིནཱ སཾསནྡཏི, སོ སཀཝཱདིནཱཔི ཨཏྟནོ གཱཧཾ ཝིསྶཛྫེཏྭཱ གཧེཏབྦོཏི ཨུབྷིནྣམྤི སངྒཱིཏིཏྟཡཱགཏམེཝ སུཏྟཾ པམཱཎནྟི ཝེདིཏབྦཾ. ཏེནེཝ ཀཐཱཝཏྠུཔཀརཎེ ‘སཀཝཱདེ པཉྩ སུཏྟསཏཱནི པརཝཱདེ པཉྩཱ’ཏི, སུཏྟསཧསྶམྤི ཨདྷིཔྤཱཡགྒཧཎནཱནཏྟེན སངྒཱིཏིཏྟཡཱགཏམེཝ གཧིཏཾ, ན ནིཀཱཡནྟརེ’’ཏི ཝུཏྟཾ.

ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༤༥) པན ‘‘པརཝཱདཱིཏི ཨམྷཱཀཾ སམཡཝིཛཱནནཀོ ཨཉྙནིཀཱཡིཀོཏི ཝུཏྟཾ. པརཝཱདཱི སུཏྟཱནུལོམནྟི ཀཐཾ? ‘ཨཉྙཏྲ ཨུདཀདནྟཔོནཱ’ཏི སུཏྟཾ སཀཝཱདིསྶ, ཏདནུལོམཏོ ནཱལི༹ཀེརཕལསྶ ཨུདཀམྤི ཨུདཀམེཝ ཧོཏཱིཏི པརཝཱདཱི ཙ.

‘ནཱལི༹ཀེརསྶ ¶ ཡཾ ཏོཡཾ, པུརཱཎཾ པིཏྟཝཌྜྷནཾ;

ཏམེཝ ཏརུཎཾ ཏོཡཾ, པིཏྟགྷཾ བལཝཌྜྷན’ནྟི. –

ཨེཝཾ པརཝཱདིནཱ ཝུཏྟེ སཀཝཱདཱི དྷཉྙཕལསྶ གཏིཀཏྟཱ, ཨཱཧཱརཏྠསྶ ཙ ཕརཎཏོ ‘ཡཱཝཀཱལིཀམེཝ ཏ’ནྟི ཝདནྟོ པཊིཀྑིཔཏཱི’’ཏི. ཁེཔཾ ཝཱ གརཧཾ ཝཱ ཨཀཏྭཱཏི ‘‘ཀིཾ ཨིམིནཱ’’ཏི ཁེཔཾ པཊིཀྑེཔཾ ཚཌྜནཾ ཝཱ ‘‘ཀིམེས བཱལོ ཝདཏི, ཀིམེས བཱལོ ཛཱནཱཏཱི’’ཏི གརཧཾ ནིནྡཾ ཝཱ ཨཀཏྭཱ. སུཏྟཱནུལོམནྟི ཨཏྟནཱ ཨཝུཏྟཾ ཨཉྙནིཀཱཡེ སུཏྟཱནུལོམཾ. ‘‘སུཏྟེ ཨོཏཱརེཏབྦནྟི སཀཝཱདིནཱ སུཏྟེ ཨོཏཱརེཏབྦ’’ནྟི སཱརཏྠདཱིཔནིཡཾ (སཱརཏྠ. ཊཱི. ༢.༤༥). ཝིམཏིཝིནོདནིཡཾ (ཝི. ཝི. ཊཱི. ༡.༤༥) པན ‘‘སུཏྟེ ཨོཏཱརེཏབྦནྟི ཡསྶ སུཏྟསྶ ཨནུལོམནཏོ ཨིདཾ སུཏྟཱནུལོམཾ ཨཀཱསི, ཏསྨིཾ, ཏདནུརཱུཔེ ཝཱ ཨཉྙཏརསྨིཾ སུཏྟེ ཨཏྟནཱ གཧིཏཾ སུཏྟཱནུལོམཾ ཨཏྠཏོ སཾསནྡནཝསེན ཨོཏཱརེཏབྦཾ. ‘ཨིམིནཱ ཙ ཨིམིནཱ ཙ ཀཱརཎེན ཨིམསྨིཾ སུཏྟེ སཾསནྡཏཱི’ཏི སཾསནྡེཏྭཱ དསྶེཏབྦནྟི ཨཏྠོ’’ཏི ¶ ཝུཏྟཾ. སུཏྟསྨིཾཡེཝ ཋཱཏབྦནྟི ཨཏྟནོ སུཏྟེཡེཝ ཋཱཏབྦཾ. ཨཡནྟི སཀཝཱདཱི. པརོཏི པརཝཱདཱི. ཨཱཙརིཡཝཱདོ སུཏྟེ ཨོཏཱརེཏབྦོཏི ཡསྶ སུཏྟསྶ སཾཝཎྞནཱཝསེན ཨཡཾ ཨཱཙརིཡཝཱདོ པཝཏྟོ, ཏསྨིཾ, ཏཱདིསེ ཙ ཨཉྙསྨིཾ སུཏྟེ པུབྦཱཔརཨཏྠསཾསནྡནཝསེན ཨོཏཱརེཏབྦཾ. གཱརཡ྄ཧཱཙརིཡཝཱདོཏི པམཱདལིཁིཏོ, བྷིནྣལདྡྷིཀེཧི ཙ ཋཔིཏོ, ཨེས ནཡོ སབྦཏྠ.

ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༤༥) པན – པརོ ཨཱཙརིཡཝཱདནྟི ‘‘སུངྐཾ པརིཧརཏཱིཏི ཨེཏྠ ཨུཔཙཱརཾ ཨོཀྐམིཏྭཱ ཀིཉྩཱཔི པརིཧརཏི, ཨཝཧཱརོ ཨེཝཱ’’ཏི ཨཊྛཀཐཱཝཙནཏོ ‘‘ཏཐཱ ཀརོནྟོ པཱརཱཛིཀམཱཔཛྫཏཱི’’ཏི པརཝཱདིནཱ ཝུཏྟེ སཀཝཱདཱི ‘‘སུངྐཾ པརིཧརཏི, ཨཱཔཏྟི དུཀྐཊསྶཱ’’ཏི སུཏྟཾ ཏཏྠེཝ ཨཱགཏམཧཱཨཊྛཀཐཱཝཙནེན སདྡྷིཾ དསྶེཏྭཱ པཊིསེདྷེཏི. ཏཐཱ ཀརོནྟསྶ དུཀྐཊམེཝཱཏི. པརོ ཨཏྟནོམཏིནྟི ཨེཏྠ ‘‘པུརེབྷཏྟཾ པརསནྟཀཾ ཨཝཧརཱཏི པུརེབྷཏྟམེཝ ཧརིསྶཱམཱིཏི ཝཱཡམནྟསྶ པཙྪཱབྷཏྟཾ ཧོཏི, པུརེབྷཏྟཔཡོགོཝ སོ, ཏསྨཱ མཱུལཊྛོ ན མུཙྩཏཱིཏི ཏུམྷཱཀཾ ཐེརཝཱདཏྟཱ མཱུལཊྛསྶ པཱརཱཛིཀམེཝཱ’’ཏི པརཝཱདིནཱ ཝུཏྟེ སཀཝཱདཱི ‘‘ཏཾ སངྐེཏཾ པུརེ ཝཱ པཙྪཱ ཝཱ ཏཾ བྷཎྜཾ ཨཝཧརཏི, མཱུལཊྛསྶ ཨནཱཔཏྟཱི’’ཏི སུཏྟཾ དསྶེཏྭཱ པཊིཀྑིཔཏི.

པརོ སུཏྟནྟི ‘‘ཨནིཡཏཧེཏུདྷམྨོ སམྨཏྟནིཡཏཧེཏུདྷམྨསྶ ཨཱརམྨཎཔཙྩཡེན པཙྩཡོ’’ཏི སུཏྟཾ ¶ པཊྛཱནེ ལིཁིཏཾ དསྶེཏྭཱ ‘‘ཨརིཡམགྒསྶ ན ནིབྦཱནམེཝཱརམྨཎ’’ནྟི པརཝཱདིནཱ ཝུཏྟེ སཀཝཱདཱི ཨཱརམྨཎཏྟིཀཱདིསུཏྟཱནུལོམེན ཨོཏརཏཱིཏི པཊིཀྑིཔཏི. སུཏྟཱནུལོམེ ཨོཏརནྟཾཡེཝ ཧི སུཏྟཾ ནཱམ, ནེཏརཾ. ཏེན ཝུཏྟཾ ‘‘པཱལི༹ཨཱགཏཾ པཉྙཱཡཏཱི’’ཏི ཨེཏྟཀེནཔི ¶ སིདྡྷེ ‘‘ཏིསྶོ སངྒཱིཏིཡོ ཨཱརུལ༹ྷཾ པཱལི༹ཨཱགཏཾ པཉྙཱཡཏཱི’’ཏིཨཱདི. ཏཱདིསཉྷི པམཱདལེཁནྟི ཨཱཙརིཡོ. ‘‘ཨཔྤམཱདོ ཨམཏཔདཾ, པམཱདོ མཙྩུནོ པད’’ནྟི (དྷ. པ. ༢༡) ཝཙནཏོ དིནྣབྷོཛནེ བྷུཉྫིཏྭཱ པརིསྶཡཱནི པརིཝཛྫིཏྭཱ སཏིཾ པཙྩུཔཊྛཔེཏྭཱ ཝིཧརནྟོ ནིཙྩོ ཧོཏཱིཏི. ཨེཝརཱུཔསྶ ཨཏྠསྶ ཨཱརུལ༹ྷམྤི སུཏྟཾ ན གཧེཏབྦཾ. ཏེན ཝུཏྟཾ ‘‘ནོ ཙེ ཏཐཱ པཉྙཱཡཏཱི’’ཏི སིདྡྷེཔི ‘‘ནོ ཙེ ཏཐཱ པཉྙཱཡཏི, ན ཨོཏརཏི ན སམེཏཱིཏི. བཱཧིརཀསུཏྟཾ ཝཱ’’ཏི ཝུཏྟཏྟཱ ཨཏྟནོ སུཏྟམྤི ཨཏྠེན ཨསམེནྟཾ ན གཧེཏབྦཾ. པརོ ཨཱཙརིཡཝཱདནྟིཨཱདཱིསུ དྭཱིསུ ནཡེསུ པམཱདལེཁཝསེན ཏཏྠ ཏཏྠ ཨཱགཏཊྛཀཐཱཝཙནཾ ཐེརཝཱདེཧི སདྡྷིཾ ཡོཛེཏྭཱ ཝེདིཏབྦཾ.

ཨཐཱཡཾ ཨཱཙརིཡཝཱདཾ གཧེཏྭཱ ཀཐེཏི, པརོ སུཏྟནྟི པརཝཱདིནཱ ‘‘མཱུལབཱིཛཾ ནཱམ ཧལིདྡི སིངྒིཝེརཾ ཝཙཱ…པེ… བཱིཛེ བཱིཛསཉྙཱི ཚིནྡཏི ཝཱ ཚེདཱཔེཏི ཝཱ བྷིནྡཏི ཝཱ…པེ… ཨཱཔཏྟི པཱཙིཏྟིཡསྶཱ’’ཏི (པཱཙི. ༩༡) ཏུམྷཱཀཾ པཱཋཏྟཱ ‘‘ཧལིདྡིགཎྛིཾ ཚིནྡནྟསྶ པཱཙིཏྟིཡ’’ནྟི ཝུཏྟེ སཀཝཱདཱི ‘‘ཡཱནི ཝཱ པནཉྙཱནི ཨཏྠི མཱུལེ ཛཱཡནྟི, མཱུལེ སཉྫཱཡནྟཱི’’ཏིཨཱདིཾ དསྶེཏྭཱ ཏསྶ ཨཊྛཀཐཱསངྑཱཏེན ཨཱཙརིཡཝཱདེན པཊིཀྑིཔཏི. ན ཧི གཎྛིམྷི གཎྛི ཛཱཡཏཱིཏི. པརོ སུཏྟཱནུལོམནྟི པརཝཱདིནཱ ‘‘ཨནཱཔཏྟི ཨེཝཾ ཨམྷཱཀཾ ཨཱཙརིཡཱནཾ ཨུགྒཧོ’’ཏི ཝཙནསྶཱནུལོམཏོ ‘‘ཨམྷཱཀཾ པོརཱཎབྷིཀྑཱུ ཨེཀཔཱསཱདེ གབྦྷཾ ཐཀེཏྭཱ ཨནུཔསམྤནྣེན སཡིཏུཾ ཝཊྚཏཱིཏི ཏཐཱ ཀཏྭཱ ཨཱགཏཱ, ཏསྨཱ ཨམྷཱཀཾ ཝཊྚཏཱིཏི ཏུམྷེསུ ཨེཝ ཨེཀཙྩེསུ ཝདནྟེསུ ‘‘ཏུམྷཱཀཾ ན ཀིཉྩི ཝཏྟུཾ སཀྐཱ’’ཏི ཝུཏྟེ སཀཝཱདཱི ‘‘སུཏྟཾ སུཏྟཱནུལོམཉྩ ཨུགྒཧིཏཀཱནཾཡེཝ ཨཱཙརིཡཱནཾ ཨུགྒཧོ པམཱཎ’’ནྟིཨཱདིཨཊྛཀཐཱཝཙནཾ དསྶེཏྭཱ པཊིསེདྷེཏི. པརོ ཨཏྟནོམཏིནྟི ‘‘དྭཱརཾ ¶ ཝིཝརིཏྭཱ ཨནཱཔུཙྪཱ སཡིཏེསུ ཀེ མུཙྩནྟཱི’’ཏི ཨེཏྠ པན དྭེཔི ཛནཱ མུཙྩནྟི – ཡོ ཙ ཡཀྑགཧིཏཀོ, ཡོ ཙ བནྡྷིཏྭཱ ནིཔཛྫཱཔིཏོཏི ཏུམྷཱཀཾ ཐེརཝཱདཏྟཱ ཨཉྙེ སབྦེཔི ཡཐཱ ཏཐཱ ཝཱ ནིཔནྣཱདཡོཔི མུཙྩནྟཱིཏི པཊིསེདྷེཏི.

ཨཐ པནཱཡཾ ཨཏྟནོམཏིཾ གཧེཏྭཱ ཀཐེཏི, པརོ སུཏྟནྟི ‘‘ཨཱཔཏྟིཾ ཨཱཔཛྫནྟཱི’’ཏི པརཝཱདིནཱ ཝུཏྟེ སཀཝཱདཱི ‘‘དིཝཱ ཀིལནྟརཱུཔོ མཉྩེ ནིསིནྣོ པཱདེ བྷཱུམིཏོ ཨམོཙེཏྭཱཝ ནིདྡཱཝསེན ¶ ནིཔཛྫཏི, ཏསྶ ཨནཱཔཏྟཱི’’ཏིཨཱདིཨཊྛཀཐཱཝཙནཾ དསྶེཏྭཱ ཨེཀབྷངྒེན ནིཔནྣཱདཡོཔི མུཙྩནྟཱིཏི པཊིསེདྷེཏི.

ཨཐཱཡཾ ཨཏྟནོམཏིཾ གཧེཏྭཱ ཀཐེཏི, པརོ སུཏྟཱནུལོམནྟི ‘‘དོམནསྶམྤཱཧཾ དེཝཱནམིནྡ དུཝིདྷེན ཝདཱམི སེཝིཏབྦམྤི ཨསེཝིཏབྦམྤཱིཏིཨཱདིཝཙནེཧི (དཱི. ནི. ༢.༣༦༠) སཾསནྡནཏོ སདཱརཔོསེ དོསོ ཏུམྷཱཀཾ ནཏྠི, ཏེན ཝུཏྟཾ ‘པུཏྟདཱརསྶ སངྒཧོ’’ཏི (ཁུ. པཱ. ༥.༦; སུ. ནི. ༢༦༥) པརཝཱདིནཱ ཝུཏྟེ ‘‘ཀིཉྩཱཔི སཀཝཱདཱི བཧུསྶུཏོ ན ཧོཏི, ཨཐ ཁོ རཱགསཧིཏེནེཝ ཨཀུསལེན བྷཝིཏབྦ’’ནྟི པཊིཀྑིཔཏི. སེསེསུཔི ཨིམིནཱ ནཡེན ཨཉྙཐཱཔི ཨནུརཱུཔཏོ ཡོཛེཏབྦཾ, ཨིདཾ སབྦཾ ཨུཔཏིསྶཏྠེརཱདཡོ ཨཱཧུ. དྷམྨསིརིཏྠེརོ པན ‘‘ཨེཏྠ པརོཏི ཝུཏྟོ ཨཉྙནིཀཱཡིཀོ, སོ པན ཨཏྟནོ སུཏྟཱདཱིནིཡེཝ ཨཱཧརཏི, ཏཱནི སཀཝཱདཱི ཨཏྟནོ སུཏྟཱདིམྷི ཨོཏཱརེཏྭཱ སཙེ སམེཏི, གཎྷཱཏི. ནོ ཙེ, པཊིཀྑིཔཏཱི’’ཏི ཝདཏཱིཏི ཨཱགཏཾ.

ནནུ ཙ ‘‘སུཏྟཱནུལོམཏོ སུཏྟམེཝ བལཝཏར’’ནྟི ཧེཊྛཱ ཝུཏྟཾ, ཨིདྷ པན ‘‘སུཏྟཾ སུཏྟཱནུལོམེ ཨོཏཱརེཏབྦ’’ནྟིཨཱདི ཀསྨཱ ཝུཏྟནྟི? ནཱཡཾ ཝིརོདྷོ, ‘‘སུཏྟཱནུལོམཏོ སུཏྟམེཝ བལཝཏར’’ནྟི ཨིདཉྷི སཀམཏེཡེཝ སུཏྟཾ ¶ སནྡྷཱཡ ཝུཏྟཾ. ཏཏྠ ཧི སཀམཏིཔརིཡཱཔནྣམེཝ སུཏྟཱདིཾ སནྡྷཱཡ ‘‘ཨཏྟནོམཏི སབྦདུབྦལཱ, ཨཏྟནོམཏིཏོ ཨཱཙརིཡཝཱདོ བལཝཏརོ, ཨཱཙརིཡཝཱདཏོ སུཏྟཱནུལོམཾ བལཝཏརཾ, སུཏྟཱནུལོམཏོ སུཏྟམེཝ བལཝཏར’’ནྟི ཙ ཝུཏྟཾ. ཨིདྷ པན པརཝཱདིནཱ ཨཱནཱིཏཾ ཨཉྙནིཀཱཡེ སུཏྟཾ སནྡྷཱཡ ‘‘སུཏྟཱནུལོམེ སུཏྟཾ ཨོཏཱརེཏབྦ’’ནྟིཨཱདི ཝུཏྟཾ, ཏསྨཱ པརཝཱདིནཱ ཨཱནཱིཏཾ སུཏྟཱདི ཨཏྟནོ སུཏྟཱནུལོམཨཱཙརིཡཝཱདཨཏྟནོམཏཱིསུ ཨོཏཱརེཏྭཱ སམེནྟཾཡེཝ གཧེཏབྦཾ, ཨིཏརཾ ན གཧེཏབྦནྟི ཨཡཾ ནཡོ ཨིདྷ ཝུཙྩཏཱིཏི ན ཀོཙི པུབྦཱཔརཝིརོདྷོཏི ཨཡཾ སཱརཏྠདཱིཔནིཡཱགཏོ (སཱརཏྠ. ཊཱི. ༢.༤༥) ནཡོ. ཝིམཏིཝིནོདནིཡཾ (ཝི. ཝི. ཊཱི. ༡.༤༥) པན ‘‘ཡཾ ཀིཉྩི ཀཱུཊསུཏྟཾ བཱཧིརཀསུཏྟཱདིཝཙནཾ ན གཧེཏབྦནྟི དསྶེཏུཾ སུཏྟཾ སུཏྟཱནུལོམེ ཨོཏཱརེཏབྦནྟིཨཱདི ཝུཏྟ’’ནྟི ཝུཏྟཾ.

བཱཧིརཀསུཏྟནྟི ཏིསྶོ སངྒཱིཏིཡོ ཨནཱརུལ༹ྷགུལ༹ྷཝེསྶནྟརཱདཱིནི ཙ མཧཱསངྒྷིཀནིཀཱཡཝཱསཱིནཾ སུཏྟཱནི. ཝེདལླཱདཱིནནྟི ཨཱདི-སདྡེན གུལ༹ྷཨུམྨགྒཱདིགྒཧཎཾ ཝེདིཏབྦཾ ¶ . ཨིཏརཾ གཱརཡ྄ཧསུཏྟཾ ན གཧེཏབྦཾ. ‘‘ཨཏྟནོམཏིཡམེཝ ཋཱཏབྦ’’ནྟི ཨིམིནཱ ཨཉྙནིཀཱཡཏོ ཨཱནཱིཏསུཏྟཏོཔི སཀནིཀཱཡེ ཨཏྟནོམཏིཡེཝ བལཝཏརཱཏི དསྶེཏི. ‘‘སཀཝཱདཱི སུཏྟཾ གཧེཏྭཱ ཀཐེཏི, པརཝཱདཱི སུཏྟམེཝཱ’’ཏི ཨེཝམཱདིནཱ སམཱནཛཱཏིཀཱནཾ ཝསེན ཝཱརོ ན ཝུཏྟོ. སུཏྟསྶ སུཏྟེཡེཝ ཨོཏཱརཎཾ བྷིནྣཾ ཝིཡ ཧུཏྭཱ ན པཉྙཱཡཏི, ཝུཏྟནཡེནེཝ ཙ སཀྐཱ ཡོཛེཏུནྟི.

ཨིདཱནི སཀཝཱདཱིཔརཝཱདཱིནཾ ཀཔྤིཡཱཀཔྤིཡཱདིབྷཱཝཾ སནྡྷཱཡ ཝིཝཱདེ ཨུཔྤནྣེ ཏཏྠ པཊིཔཛྫིཏབྦཝིདྷིཾ དསྶེནྟོ ཨཱཧ ‘‘ཨཐ པནཱཡཾ ཀཔྤིཡནྟི གཧེཏྭཱ ཀཐེཏཱི’’ཏིཨཱདི. ཨཐ ཝཱ ཨེཝཾ སུཏྟསུཏྟཱནུལོམཱདིམུཁེན སཱམཉྙཏོ ཝིཝཱདཾ ¶ དསྶེཏྭཱ ཨིདཱནི ཝིསེསཏོ ཝིཝཱདཝཏྠུཾ ཏབྦིནིཙྪཡམུཁེན སུཏྟཱདིཉྩ དསྶེཏུཾ ‘‘ཨཐ པནཱཡཾ ཀཔྤིཡ’’ནྟིཨཱདི ཝུཏྟཾ. ཏཏྠ སུཏྟེ ཙ སུཏྟཱནུལོམེ ཙ ཨོཏཱརེཏབྦནྟི སཀཝཱདིནཱ ཨཏྟནོཡེཝ སུཏྟེ ཙ སུཏྟཱནུལོམེ ཙ ཨོཏཱརེཏབྦཾ. པརོ ཀཱརཎཾ ན ཝིནྡཏཱིཏི པརཝཱདཱི ཀཱརཎཾ ན ལབྷཏི. སུཏྟཏོ བཧུཾ ཀཱརཎཉྩ ཝིནིཙྪཡཉྩ དསྶེཏཱིཏི པརཝཱདཱི ཨཏྟནོ སུཏྟཏོ བཧུཾ ཀཱརཎཉྩ ཝིནིཙྪཡཉྩ ཨཱཧརིཏྭཱ དསྶེཏི, ‘‘སཱདྷཱུཏི སམྤཊིཙྪིཏྭཱ ཨཀཔྤིཡེཡེཝ ཋཱཏབྦ’’ནྟི ཨིམིནཱ ཨཏྟནོ ནིཀཱཡེ སུཏྟཱདཱིནི ཨལབྷནྟེན སཀཝཱདིནཱ པརཝཱདཱིཝཙནེཡེཝ ཋཱཏབྦནྟི ཝདཏི. སུཏྟེ ཙ སུཏྟཱནུལོམེ ཙཱཏི ཨེཏྠ ཙ-ཀཱརོ ཝིཀཔྤནཏྠོ, ཏེན ཨཱཙརིཡཝཱདཱདཱིནམྤི སངྒཧོ. ཏེནཱཧ ‘‘ཀཱརཎཉྩ ཝིནིཙྪཡཉྩ དསྶེཏཱི’’ཏི. ཏཏྠ ཀཱརཎནྟི སུཏྟཱདིནཡཾ ནིསྶཱཡ ཨཏྟནོམཏིཡཱ ཨུདྡྷཊཾ ཧེཏུཾ. ཝིནིཙྪཡནྟི ཨཊྛཀཐཱཝིནིཙྪཡཾ.

དྭིནྣམྤི ཀཱརཎཙྪཱཡཱ དིསྶཏཱིཏི སཀཝཱདཱིཔརཝཱདཱིནཾ ཨུབྷིནྣམྤི ཀཔྤིཡཱཀཔྤིཡབྷཱཝསཱདྷཀཾ ཀཱརཎཔཏིརཱུཔཀཙྪཱཡཱ དིསྶཏི. ཏཏྠ ཀཱརཎཙྪཱཡཱཏི སུཏྟཱདཱིསུ ‘‘ཀཔྤིཡ’’ནྟི གཱཧསྶ, ‘‘ཨཀཔྤིཡ’’ནྟི གཱཧསྶ ཙ ནིམིཏྟབྷཱུཏེན ཀིཙྪེན པཊིཔཱདནཱིཡཾ ཨཝིབྷཱུཏཀཱརཎཾ ཀཱརཎཙྪཱཡཱ, ཀཱརཎཔཏིརཱུཔཀནྟི ཨཏྠོ. ཡདི དྭིནྣམྤི ཀཱརཎཙྪཱཡཱ དིསྶཏི, ཀསྨཱ ཨཀཔྤིཡེཡེཝ ཋཱཏབྦནྟི ཨཱཧ ‘‘ཝིནཡཉྷི པཏྭཱ’’ཏིཨཱདི. ‘‘ཝིནཡཾ པཏྭཱ’’ཏི ཝུཏྟམེཝཏྠཾ པཱཀཊཏརཾ ཀཏྭཱ དསྶེནྟོ ཨཱཧ ‘‘ཀཔྤིཡཱཀཔྤིཡཝིཙཱརཎཾ ཨཱགམྨཱ’’ཏི. རུནྡྷིཏབྦནྟིཨཱདཱིསུ དུབྦིཉྙེཡྻཝིནིཙྪཡེ ཀཔྤིཡཱཀཔྤིཡབྷཱཝེ སཏི ‘‘ཀཔྤིཡ’’ནྟི གཧཎཾ རུནྡྷིཏབྦཾ, ‘‘ཨཀཔྤིཡ’’ནྟི གཧཎཾ གཱལ༹ྷཾ ཀཱཏབྦཾ, ཨཔརཱཔརཔྤཝཏྟཾ ཀཔྤིཡགྒཧཎཾ སོཏཾ པཙྪིནྡིཏབྦཾ, གརུཀབྷཱཝསངྑཏེ ¶ ཨཀཔྤིཡེཡེཝ ཋཱཏབྦནྟི ཨཏྠོ. ཨཐ ཝཱ རུནྡྷིཏབྦནྟི ཀཔྤིཡསཉྙཱཡ ¶ ཝཱིཏིཀྐམཀཱརཎཾ རུནྡྷིཏབྦཾ, ཏཾནིཝཱརཎཙིཏྟཾ དལ༹ྷཏརཾ ཀཱཏབྦཾ. སོཏཾ པཙྪིནྡིཏབྦནྟི ཏཏྠ ཝཱིཏིཀྐམཔྤཝཏྟི པཙྪིནྡིཏབྦཱ. གརུཀབྷཱཝེཏི ཨཀཔྤིཡབྷཱཝེཏི ཨཏྠོ.

བཧཱུཧི སུཏྟཝིནིཙྪཡཀཱརཎེཧཱིཏི བཧཱུཧི སུཏྟེཧི ཙེཝ ཏཏོ ཨཱནཱིཏཝིནིཙྪཡཀཱརཎེཧི ཙ. ཨཐ ཝཱ སུཏྟེན ཨཊྛཀཐཱཝིནིཙྪཡེན ཙ ལདྡྷཀཱརཎེཧི. ཨཏྟནོ གཧཎཾ ན ཝིསྶཛྫེཏབྦནྟི སཀཝཱདིནཱ ཨཏྟནོ ‘‘ཨཀཔྤིཡ’’ནྟི གཧཎཾ ན ཝིསྶཛྫེཏབྦནྟི ཨཏྠོ.

ཨིདཱནི ཝུཏྟམེཝཏྠཾ ནིགམེནྟོ ‘‘ཨེཝ’’ནྟིཨཱདིམཱཧ. ཏཏྠ ཡོཏི སཀཝཱདཱིཔརཝཱདཱིསུ ཡོ ཀོཙི. ཀེཙི པན ‘‘སཀཝཱདཱིསུཡེཝ ཡོ ཀོཙི ཨིདྷཱདྷིཔྤེཏོ’’ཏི ཝདནྟི, ཨེཝཾ སནྟེ ‘‘ཨཐ པནཱཡཾ ཀཔྤིཡནྟི གཧེཏྭཱ ཀཐེཏཱི’’ཏིཨཱདཱིསུ སབྦཏྠ ཨུབྷོཔི སཀཝཱདིནོཡེཝ སིཡུཾ ཧེཊྛཱ ཝུཏྟསྶེཝ ནིགམནཝསེན ‘‘ཨེཝ’’ནྟིཨཱདིནཱ ཝུཏྟཏྟཱ, ཏསྨཱ ཏཾ ན གཧེཏབྦཾ. ཨཏིརེཀཀཱརཎཾ ལབྷཏཱིཏི ཨེཏྠ སུཏྟཱདཱིསུ པུརིམཾ པུརིམཾ ཨཏིརེཀཀཱརཎཾ ནཱམ, ཡོ ཝཱ སུཏྟཱདཱིསུ ཙཏཱུསུ བཧུཏརཾ ཀཱརཎཾ ལབྷཏི, སོ ཨཏིརེཀཀཱརཎཾ ལབྷཏི ནཱམ.

སུཊྛུ པཝཏྟི ཨེཏསྶཱཏི, སུཊྛུ པཝཏྟཏི སཱིལེནཱཏི ཝཱ སུཔྤཝཏྟི. ཏེནཱཧ ‘‘སུཔྤཝཏྟཱིཏི སུཊྛུ པཝཏྟ’’ནྟི. ཝཱཙཱཡ ཨུགྒཏཾ ཝཱཙུགྒཏཾ, ཝཙསཱ སུགྒཧིཏནྟི ཝུཏྟཾ ཧོཏི. ཨཐ ཝཱ ཝཱཙུགྒཏནྟི ཝཱཙཱཡ ཨུགྒཏཾ, ཏཏྠ ནིརནྟརཾ ཋིཏནྟི ཨཏྠོ. སུཏྟཏོཏི ཨིམསྶ ཝིཝརཎཾ ‘‘པཱལི༹ཏོ’’ཏི. ཨེཏྠ ཙ ‘‘སུཏྟཾ ནཱམ སཀལཾ ཝིནཡཔིཊཀ’’ནྟི ཝུཏྟཏྟཱ པུན སུཏྟཏོཏི ཏདཏྠཔཊིཔཱདཀཾ སུཏྟཱབྷིདྷམྨཔཱལི༹ཝཙནཾ ཨདྷིཔྤེཏཾ. ཨནུབྱཉྫནསོཏི ཨིམསྶ ཝིཝརཎཾ ‘‘པརིཔུཙྪཏོ ཙ ཨཊྛཀཐཱཏོ ཙཱ’’ཏི. པཱལི༹ཾ ཨནུགནྟྭཱ ཨཏྠསྶ བྱཉྫནཏོ པཀཱསནཏོ ¶ ‘‘ཨནུབྱཉྫན’’ནྟི ཧི པརིཔུཙྪཱ ཨཊྛཀཐཱ ཙ ཝུཙྩཏི. ཨེཏྠ ཙ ཨཊྛཀཐཱཡ ཝིསུཾ གཧིཏཏྟཱ ‘‘པརིཔུཙྪཱ’’ཏི ཐེརཝཱདོ ཝུཏྟོ. ཨཐ ཝཱ པརིཔུཙྪཱཏི ཨཱཙརིཡསྶ སནྟིཀཱ པཱལི༹ཡཱ ཨཏྠསཝནཾ. ཨཊྛཀཐཱཏི པཱལི༹མུཏྟཀཝིནིཙྪཡོ. ཏདུབྷཡམྤི པཱལི༹ཾ ཨནུགནྟྭཱ ཨཏྠསྶ བྱཉྫནཏོ ‘‘ཨནུབྱཉྫན’’ནྟི ཝུཏྟཾ.

ཝིནཡེཏི ཝིནཡཱཙཱརེ. ཏེནེཝ ཝཀྑཏི ‘‘ཝིནཡཾ ཨཛཧནྟོ ཨཝོཀྐམནྟོ’’ཏིཨཱདི. ཏཏྠ པཏིཊྛཱནཾ ནཱམ སཉྩིཙྩ ཨཱཔཏྟིཡཱ ཨནཱཔཛྫནཱདིནཱ ཧོཏཱིཏི ཨཱཧ ‘‘ལཛྫིབྷཱཝེན པཏིཊྛིཏོ’’ཏི, ཏེན ལཛྫཱི ཧོཏཱིཏི ཝུཏྟཾ ཧོཏི. ཝིནཡདྷརསྶ ལཀྑཎེ ཝཏྟབྦེ ཀིཾ ཨིམིནཱ ལཛྫིབྷཱཝེནཱཏི ¶ ཨཱཧ ‘‘ཨལཛྫཱི ཧཱི’’ཏིཨཱདི. ཏཏྠ བཧུསྶུཏོཔཱིཏི ཨིམིནཱ པཋམལཀྑཎསམནྣཱགམཾ དསྶེཏི. ལཱབྷགརུཀཏཱཡཱཏི ཨིམིནཱ ཝིནཡེ ཋིཏཏཱཡ ཨབྷཱཝེ པཋམལཀྑཎཡོགཱ ཀིཙྩཀརོ ན ཧོཏི, ཨཐ ཁོ ཨཀིཙྩཀརོ ཨནཏྠཀརོ ཨེཝཱཏི དསྶེཏི. སངྒྷབྷེདསྶ པུབྦབྷཱགེ པཝཏྟཀལཧསྶེཏཾ ཨདྷིཝཙནཾ སངྒྷརཱཛཱིཏི. ཀུཀྐུཙྩཀོཏི ཨཎུམཏྟེསུཔི ཝཛྫེསུ བྷཡདསྶནཝསེན ཀུཀྐུཙྩཾ ཨུཔྤཱདེནྟོ. ཏནྟིཾ ཨཝིསཾཝཱདེཏྭཱཏི པཱལི༹ཾ ཨཉྙཐཱ ཨཀཏྭཱ. ཨཝོཀྐམནྟོཏི ཨནཏིཀྐམནྟོ.

ཝིཏྠུནཏཱིཏི ཨཏྠཾ ཨདིསྭཱ ནིཏྠུནཏི, ཝིཏྠམྦྷཏི ཝཱ. ཝིཔྥནྡཏཱིཏི ཀམྤཏི. སནྟིཊྛིཏུཾ ན སཀྐོཏཱིཏི ཨེཀསྨིཾཡེཝ ཨཏྠེ པཏིཊྛཱཏུཾ ན སཀྐོཏི. ཏེནཱཧ ‘‘ཡཾ ཡཾ པརེན ཝུཙྩཏི, ཏཾ ཏཾ ཨནུཛཱནཱཏཱི’’ཏི. སཀཝཱདཾ ཚཌྜེཏྭཱ པརཝཱདཾ གཎྷཱཏཱིཏི ‘‘ཨུཙྪུམྷི ཀསཊཾ ཡཱཝཛཱིཝིཀཾ, རསོ སཏྟཱཧཀཱལིཀོ, ཏདུབྷཡཝིནིམུཏྟོ ཙ ཨུཙྪུ ནཱམ ཝིསུཾ ནཏྠི, ཏསྨཱ ཨུཙྪུཔི ཝིཀཱལེ ཝཊྚཏཱི’’ཏི པརཝཱདིནཱ ཝུཏྟེ ཏམྤི གཎྷཱཏི. ཨེཀེཀལོམནྟི པལིཏཾ སནྡྷཱཡ ཝུཏྟཾ. ཡམྷཱིཏི ཡསྨིཾ པུགྒལེ. པརིཀྑཡཾ པརིཡཱདཱནནྟི ཨཏྠཏོ ཨེཀཾ.

ཨཱཙརིཡཔརམྤརཱཏི ¶ ཨཱཙརིཡཱནཾ ཝིནིཙྪཡཔརམྤརཱ. ཏེནེཝ ཝཀྑཏི ‘‘ཨཏྟནོམཏིཾ པཧཱཡ…པེ… ཡཐཱ ཨཱཙརིཡོ ཙ ཨཱཙརིཡཱཙརིཡོ ཙ པཱལི༹ཉྩ པརིཔུཙྪཉྩ ཝདནྟི, ཏཐཱ ཉཱཏུཾ ཝཊྚཏཱི’’ཏི. ན ཧི ཨཱཙརིཡཱནཾ ནཱམམཏྟཏོ པརམྤརཛཱནནེ པཡོཛནཾ ཨཏྠི. པུབྦཱཔརཱནུསནྡྷིཏོཏི པུབྦཝཙནསྶ ཨཔརཝཙནེན སཧ ཨཏྠསམྦནྡྷཛཱནནཏོ. ཨཏྠཏོཏི སདྡཏྠཔིཎྜཏྠཨདྷིཔྤེཏཏྠཱདིཏོ. ཀཱརཎཏོཏི ཏདཏྠུཔཔཏྟིཏོ. ཨཱཙརིཡཔརམྤརནྟི ཨིམསྶེཝ ཝེཝཙནཾ ‘‘ཐེརཝཱདངྒ’’ནྟི, ཐེརཔཊིཔཱཊིནྟི ཨཏྠོ. དྭེ ཏཡོ པརིཝཊྚཱཏི དྭེ ཏཡོ པརམྤརཱ.

ཨིམེཧི ཙ པན ཏཱིཧི ལཀྑཎེཧཱིཏི ཨེཏྠ པཋམེན ལཀྑཎེན ཝིནཡསྶ སུཊྛུ ཨུགྒཧིཏབྷཱཝོ ཝུཏྟོ, དུཏིཡེན ཏཏྠ ལཛྫིབྷཱཝེན ཙེཝ ཨཙལཏཱཡ ཙ སུཔྤཏིཊྛིཏཏཱ, ཏཏིཡེན པཱལི༹ཨཊྛཀཐཱསུ སརཱུཔེན ཨནཱགཏཱནམྤི ཏདནུལོམཏོ ཨཱཙརིཡེཧི དིནྣནཡཏོ ཝིནིཙྪིནིཏུཾ སམཏྠཏཱ. ཨོཏིཎྞེ ཝཏྠུསྨིནྟི ཙོདནཱཝསེན ཝཱིཏིཀྐམཝཏྠུསྨིཾ སངྒྷམཛ྄ཛྷེ ཨོཏིཎྞེ. ཙོདཀེན ཙ ཙུདིཏཀེན ཙ ཝུཏྟེ ཝཏྟབྦེཏི ཨེཝཾ ཨོཏིཎྞཝཏྠུཾ ནིསྶཱཡ ཙོདཀེན ‘‘དིཊྛཾ སུཏ’’ནྟིཨཱདིནཱ, ཙུདིཏཀེན ‘‘ཨཏྠཱི’’ཏིཨཱདིནཱ ཙ ཡཾ ཝཏྟབྦཾ, ཏསྨིཾ ཝཏྟབྦེ ཝུཏྟེཏི ཨཏྠོ. ཝཏྠུ ཨོལོཀེཏབྦནྟི ཏསྶ ཏསྶ སིཀྑཱཔདསྶ ཝཏྠུ ཨོལོཀེཏབྦཾ. ‘‘ཏིཎེན ཝཱ པཎྞེན ¶ ཝཱ…པེ… ཡོ ཨཱགཙྪེཡྻ, ཨཱཔཏྟི དུཀྐཊསྶཱ’’ཏི ཧིདཾ ནིསྶགྒིཡེ ཨཉྙཱཏཀཝིཉྙཏྟིསིཀྑཱཔདསྶ (པཱརཱ. ༥༡༧) ཝཏྠུསྨིཾ པཉྙཏྟཾ.

ཐུལླཙྩཡདུབྦྷཱསིཏཱཔཏྟཱིནཾ མཱཏིཀཱཡ ཨནཱགཏཏྟཱ ‘‘པཉྩནྣཾ ཨཱཔཏྟཱིནཾ ཨཉྙཏར’’ནྟི ཝུཏྟཾ. ཏིཀདུཀྐཊནྟི ‘‘ཨནུཔསམྤནྣེ ཨུཔསམྤནྣསཉྙཱི ཨུཛ྄ཛྷཱཡཏི ཁཱིཡཏི, ཨཱཔཏྟི དུཀྐཊསྶཱ’’ཏིཨཱདིནཱ (པཱཙི. ༡༠༦) ཨཱགཏཾ ཏིཀདུཀྐཊཾ. ཨཉྙཏརཾ ཝཱ ཨཱཔཏྟིནྟི ¶ ‘‘ཀཱལེ ཝིཀཱལསཉྙཱི, ཨཱཔཏྟི དུཀྐཊསྶ, ཀཱལེ ཝེམཏིཀོ, ཨཱཔཏྟི དུཀྐཊསྶཱ’’ཏིཨཱདིཀཾ (པཱཙི. ༢༥༠) དུཀདུཀྐཊཾ སནྡྷཱཡ ཝུཏྟཾ.

ཨནྟརཱཔཏྟིནྟི ཨེཏྠ ཏསྨིཾ ཏསྨིཾ སིཀྑཱཔདེ ཨཱགཏཝཏྠུཝཱིཏིཀྐམཾ ཝིནཱ ཨཉྙསྨིཾ ཝཏྠུཝཱིཏིཀྐམེ ནིདཱནཏོ པབྷུཏི ཝིནཱིཏཝཏྠུཔརིཡོསཱནཱ ཨནྟརནྟརཱ ཝུཏྟཱ ཨཱཔཏྟི. ཨིདྷ པན ‘‘ཝཏྠུཾ ཨོལོཀེཏཱི’’ཏི ཝིསུཾ གཧིཏཏྟཱ ཏདཝསེསཱ ཨནྟརཱཔཏྟཱིཏི གཧིཏཱ. པཊིལཱཏཾ ཨུཀྑིཔཏཱིཏི ཨིདམྤི ཝིསིབྦནསིཀྑཱཔདེ (པཱཙི. ༣༥༠) ཨཱགཏཾ, ཏཏྠ ཌཡ྄ཧམཱནཾ ཨལཱཏཾ ཨགྒིཀཔཱལཱདིཏོ བཧི པཏིཏཾ ཨཝིཛ྄ཛྷཱཏམེཝ པཊིཨུཀྑིཔཏི, པུན ཡཐཱཋཱནེ ཋཔེཏཱིཏི ཨཏྠོ. ཝིཛ྄ཛྷཱཏཾ པན པཊིཀྑིཔནྟསྶ པཱཙིཏྟིཡམེཝ.

ཨནཱཔཏྟིནྟི ཨེཏྠ ཨནྟརནྟརཱ ཝུཏྟཱ ཨནཱཔཏྟིཔི ཨཏྠི, ‘‘ཨནཱཔཏྟི, བྷིཀྑཝེ, ཨིདྡྷིམསྶ ཨིདྡྷིཝིསཡེ’’ཏིཨཱདི ཝིཡ སཱཔི སངྒཡ྄ཧཏི. སིཀྑཱཔདནྟརེསཱུཏི ཝིནཱིཏཝཏྠུཾ ཨནྟོཀཏྭཱ ཨེཀེཀསྨིཾ སིཀྑཱཔདནྟརེ.

པཱརཱཛིཀཱཔཏྟཱིཏི ན ཝཏྟབྦནྟི ཨིདཾ ཨཱཔནྣཔུགྒལེན ལཛྫིདྷམྨེ ཋཏྭཱ ཡཐཱབྷཱུཏཾ ཨཱཝིཀརཎེཔི དུབྦིནིཙྪཡཾ ཨདིནྣཱདཱནཱདིཾ སནྡྷཱཡ ཝུཏྟཾ. ཡཾ པན མེཐུནཱདཱིསུ ཝིཛཱནནཾ, ཏཾ ཝཏྟབྦམེཝ. ཏེནཱཧ ‘‘མེཐུནདྷམྨཝཱིཏིཀྐམོ ཧཱི’’ཏིཨཱདི. ཡོ པན ཨལཛྫིཏཱཡ པཊིཉྙཾ ཨདཏྭཱ ཝིཀྑེཔཾ ཀརོཏི, ཏསྶ ཨཱཔཏྟི ན སཀྐཱ ཨོལཱ༹རིཀཱཔི ཝིནིཙྪིནིཏུཾ. ཡཱཝ སོ ཡཐཱབྷཱུཏཾ ནཱཝིཀརོཏི, སངྒྷསྶ ཙ ཨཱཔཏྟིསནྡེཧོ ན ཝིགཙྪཏི, ཏཱཝ ནཱསིཏཀོཝ བྷཝིསྶཏི. སུཁུམཱཏི ཨཏྟནོཔི དུཝིཉྙེཡྻསབྷཱཝསྶ ལཧུཔརིཝཏྟིནོ ཙིཏྟསྶ སཱིགྷཔརིཝཏྟིཏཱཡ ཝུཏྟཾ. སུཁུམཱཏི ཝཱ ཙིཏྟཔརིཝཏྟིཡཱ སུཁུམཏཱཡ སུཁུམཱ. ཏེནཱཧ ‘‘ཙིཏྟལཧུཀཱ’’ཏི, ཙིཏྟཾ ཝིཡ ¶ ལཧུཀཱཏི ཨཏྠོ. ཨཐ ཝཱ ཙིཏྟཾ ལཧུ སཱིགྷཔརིཝཏྟི ཨེཏེསནྟི ¶ ཙིཏྟལཧུཀཱ. ཏེཏི ཏེ ཝཱིཏིཀྐམེ. ཏཾཝཏྠུཀནྟི ཏེ ཨདིནྣཱདཱནམནཨུསྶཝིགྒཧཝཱིཏིཀྐམཱ ཝཏྠུ ཨདྷིཊྛཱནཾ ཀཱརཎམེཏསྶཱཏི ཏཾཝཏྠུཀཾ.

ཡཾ ཨཱཙརིཡོ བྷཎཏི, ཏཾ ཀརོཧཱིཏིཨཱདི སབྦཾ ལཛྫཱིཔེསལཾ ཀུཀྐུཙྩཀམེཝ སནྡྷཱཡ ཝུཏྟཾ. ཡོ ཡཱཐཱཝཏོ པཀཱསེཏྭཱ སུདྡྷིམེཝ གཝེསཏི, ཏེནཔི. པཱརཱཛིཀོསཱིཏི ན ཝཏྟབྦོཏི ཨནཱཔཏྟིཀོཊིཡཱཔི སངྐིཡམཱནཏྟཱ ཝུཏྟཾ. ཏེནེཝ ‘‘པཱརཱཛིཀཙྪཱཡཱ’’ཏི ཝུཏྟཾ. ‘‘སཱིལཱནི སོདྷེཏྭཱཏི ཡཾཝཏྠུཀཾ ཀུཀྐུཙྩཾ ཨུཔྤནྣཾ, ཏཾ ཨམནསིཀརིཏྭཱ ཨཝསེསསཱིལཱནི སོདྷེཏྭཱ’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༤༥) ཝུཏྟཾ, ཝིམཏིཝིནོདནིཡཾ (ཝི. ཝི. ཊཱི. ༡.༤༥) པན ‘‘སཱིལཱནི སོདྷེཏྭཱཏི ཡསྨིཾ ཝཱིཏིཀྐམེ པཱརཱཛིཀཱསངྐཱ ཝཏྟཏི, ཏཏྠ པཱརཱཛིཀཱབྷཱཝཔཀྑཾ གཧེཏྭཱ དེསནཱཝུཊྛཱནགཱམིནཱིནཾ ཨཱཔཏྟཱིནཾ སོདྷནཝསེན སཱིལཱནི སོདྷེཏྭཱ’’ཏི. པཱཀཊབྷཱཝཏོ སུཁཝལཉྫཏཱཡ ཙ ‘‘དྭཏྟིཾསཱཀཱརཾ ཏཱཝ མནསི ཀརོཧཱི’’ཏི ཝུཏྟཾ, ཨུཔལཀྑཎཝསེན ཝཱ. ཨཉྙསྨིཾ ཀམྨཊྛཱནེ ཀཏཔརིཙཡེན ཏམེཝ མནསི ཀཱཏབྦཾ. ཡཾ ཀིཉྩི ཝཱ ཨབྷིརུཙིཏཾ མནསི ཀཱཏུཾ ཝཊྚཏེཝ. ཀམྨཊྛཱནཾ གྷཊཡཏཱིཏི ཨནྟརནྟརཱ ཁཎྜཾ ཨདསྶེཏྭཱ ཙིཏྟེན སདྡྷིཾ ཨཱརམྨཎབྷཱཝེན ཙིརཀཱལཾ གྷཊཡཏི. སངྑཱརཱ པཱཀཊཱ ཧུཏྭཱ ཨུཔཊྛཧནྟཱིཏི ཝིཔསྶནཱཀམྨཊྛཱནིཀོ ཙེ, ཏསྶ སངྑཱརཱ པཱཀཊཱ ཧུཏྭཱ ཨུཔཊྛཧནྟི.

སཙེ ཀཏཔཱརཱཛིཀཝཱིཏིཀྐམོ བྷཝེཡྻ, ཏསྶ སཏིཔི ཨསརིཏུཀཱམཏཱཡ ཝིཔྤཊིསཱརཝཏྠུཝསེན པུནཔྤུནཾ ཏཾ ཨུཔཊྛཧཏཱིཏི ཙིཏྟེཀགྒཏཾ ན ཝིནྡཏི. ཏེན ཝུཏྟཾ ‘‘ཀམྨཊྛཱནཾ ན གྷཊཡཏཱི’’ཏིཨཱདི. ཀམྨཊྛཱནཾ ན གྷཊཡཏཱིཏི ཙིཏྟཀྑོབྷཱདིབཧུལསྶ སུདྡྷསཱིལསྶཔི ཙིཏྟཾ ན སམཱདྷིཡཏི, ཏཾ ཨིདྷ ¶ པཱརཱཛིཀམཱུལནྟི ན གཧེཏབྦཾ. ཀཏཔཱཔམཱུལཀེན ཝིཔྤཊིསཱརེནེཝེཏྠ ཙིཏྟསྶ ཨསམཱདྷིཡནཾ སནྡྷཱཡ ‘‘ཀམྨཊྛཱནཾ ན གྷཊཡཏཱི’’ཏིཨཱདི ཝུཏྟཾ. ཏེནཱཧ ‘‘ཝིཔྤཊིསཱརགྒིནཱ’’ཏིཨཱདི. ཨཏྟནཱཏི ཙིཏྟེན ཀརཎབྷཱུཏེན པུགྒལོ ཀཏྟཱ ཛཱནཱཏི, པཙྩཏྟེ ཝཱ ཀརཎཝཙནཾ, ཨཏྟཱ སཡཾ ཛཱནཱཏཱིཏི ཨཏྠོ. ཨཉྙཱ ཙ དེཝཏཱ ཛཱནནྟཱིཏི ཨཱརཀྑདེཝཏཱཧི ཨཉྙཱ པརཙིཏྟཝིདུནིཡོ དེཝཏཱ ཛཱནནྟི.

ཨིམསྨིཾ ཋཱནེ པཎྜིཏེཧི ཝིཙཱརེཏབྦཾ ཀཱརཎཾ ཨཏྠི. ཀཐཾ? ཨིདཱནི ཨེཀཙྩེ ཝིནཡདྷརཱ པཋམཔཱརཱཛིཀཝིསཡེ ཝཏྠུམྷི ཨོཏིཎྞེ ཨིཏྠིཡཱ ཝཱ པུརིསེན ཝཱ གཧཊྛེན ཝཱ པབྦཛིཏེན ཝཱ ཙོདིཡམཱནེ ཙུདིཏཀཾ བྷིཀྑུཾ པུཙྪིཏྭཱ པཊིཉྙཱཡ ཨདཱིཡམཱནཱཡ ཏཾ བྷིཀྑུཾ སུསཱནེ ཨེཀཀམེཝ ¶ སཡཱཔེནྟི, ཨེཝཾ སཡཱཔིཡམཱནོ སོ བྷིཀྑུ སཙེ བྷཡསནྟཱསཝིརཧིཏོ སབྦརཏྟིཾ ཏསྨིཾ སུསཱནེ སཡིཏུཾ ཝཱ ནིསཱིདིཏུཾ ཝཱ སཀྐོཏི, ཏཾ ‘‘པརིསུདྡྷོ ཨེསོ’’ཏི ཝིནིཙྪིནནྟི. སཙེ པན བྷཡསནྟཱསཔྤཏྟོ སབྦརཏྟིཾ སཡིཏུཾ ཝཱ ནིསཱིདིཏུཾ ཝཱ ན སཀྐོཏི, ཏཾ ‘‘ཨསུདྡྷོ’’ཏི ཝིནིཙྪིནནྟི, ཏཾ ཨཡུཏྟཾ ཝིཡ དིསྶཏི. ཀསྨཱཏི ཙེ? ཨཊྛཀཐཱཡ ཝིརུདྡྷོཏི, ཨཊྛཀཐཱཡཾ དུཏིཡཏཏིཡཔཱརཱཛིཀཝིསཡེ ཨེཝ ཏཐཱརཱུཔོ ཝིཙཱརོ ཝུཏྟོ, ན པཋམཙཏཨུཏྠཔཱརཱཛིཀཝིསཡེ. ཝུཏྟཉྷི ཏཏྠ ‘‘མེཐུནདྷམྨཝཱིཏིཀྐམོ ཧི ཨུཏྟརིམནུསྶདྷམྨཝཱིཏིཀྐམོ ཙ ཨོལཱ༹རིཀོ, ཨདིནྣཱདཱནམནུསྶཝིགྒཧཝཱིཏིཀྐམཱ པན སུཁུམཱ ཙིཏྟལཧུཀཱ, ཏེ སུཁུམེནེཝ ཨཱཔཛྫཏི, སུཁུམེན རཀྑཏི, ཏསྨཱ ཝིསེསེན ཏཾཝཏྠུཀཾ ཀུཀྐུཙྩཾ པུཙྪིཡམཱནོ’’ཏི. ཊཱིཀཱཡཉྩ (སཱརཏྠ. ཊཱི. ༢.༤༥) ཝུཏྟཾ ‘‘ཏཾཝཏྠུཀནྟི ཏེ ཨདིནྣཱདཱནམནུསྶཝིགྒཧཝཱིཏིཀྐམཱ ཝཏྠུ ཨདྷིཊྛཱནཾ ཀཱརཎམེཏསྶཱཏི ཏཾཝཏྠུཀ’’ནྟི, ཨིདམྤི ཨེཀཾ ཀཱརཎཾ.

ཏཏྠཱཔི ¶ ཨཉྙེ པཎྜིཏེཔི ཝིནིཙྪིནཱཔེཏྭཱ ཏེསམྤི པཱརཱཛིཀཙྪཱཡཱདིསྶནེཡེཝ ཏཐཱ ཝིནིཙྪཡོ ཀཱཏབྦོ, ན སུདྡྷབྷཱཝདིསྶནེ. ཝུཏྟཉྷི ཨཊྛཀཐཱཡཾ ‘‘ཨཱཔཏྟཱིཏི ཨཝཏྭཱ ‘སཙསྶ ཨཱཙརིཡོ དྷརཏི…པེ… ཨཐ དཧརསྶཔི པཱརཱཛིཀཙྪཱཡཱཝ ཨུཔཊྛཱཏི, ཏེནཔི ‘པཱརཱཛིཀོསཱི’ཏི ན ཝཏྟབྦོ. དུལླབྷོ ཧི བུདྡྷུཔྤཱདོ, ཏཏོ དུལླབྷཏརཱ པབྦཛྫཱ ཙ ཨུཔསམྤདཱ ཙ, ཨེཝཾ པན ཝཏྟབྦ’’ནྟི, ཨིདམེཀཾ. ནིསཱིདཱཔིཡམཱནོཔི ཝིཝིཏྟོཀཱསེཡེཝ ནིསཱིདཱཔེཏབྦོ, ན སུསཱནེ. ཝུཏྟཉྷི ཏཏྠ ‘‘ཝིཝིཏྟཾ ཨོཀཱསཾ སམྨཛྫིཏྭཱ དིཝཱཝིཧཱརཾ ནིསཱིདིཏྭཱ’’ཏིཨཱདི, ཨིདམེཀཾ. ཝིཝིཏྟོཀཱསེ ནིསཱིདཱཔིཡམཱནོཔི དིཝཱཡེཝ ནིསཱིདཱཔེཏབྦོ, ན རཏྟིཾ. ཏཐཱ ཧི ཝུཏྟཾ ‘‘དིཝསཾ ཨཏིཀྐནྟམྤི ན ཛཱནཱཏི, སོ དིཝསཱཏིཀྐམེ ཨུཔཊྛཱནཾ ཨཱགཏོ ཨེཝཾ ཝཏྟབྦོ’’ཏི, ཨིདམེཀཾ.

ཨཱིདིསཾ ཝིདྷཱནཾ སཡཾ ཨཱརོཙིཏེ ཨེཝ ཝིདྷཱཏབྦཾ, ན པརེཧི ཙོདིཡམཱནེ. ཏཐཱ ཧི ཝུཏྟཾ ‘‘ཨེཝཾ ཀཏཝཱིཏིཀྐམེན བྷིཀྑུནཱ སཡམེཝ ཨཱགནྟྭཱ ཨཱརོཙིཏེ པཊིཔཛྫིཏབྦ’’ནྟི. ཨཐ ཀསྨཱ ཨིདཱནི ཨེཝཾ ཀརོནྟཱིཏི? གིཧཱིནཾ ཨསཀྑིཀཨཊྚཀརཎེ ཨུདཀེ ནིམུཛྫཱཔནཾ ཝིཡ མཉྙམཱནཱ ཨེཝཾ ཀརོནྟི. ཏམྤི མཱཡཱཀུསལཱ མནུསྶཱ ཝིཝིདྷེཧི ཨུཔཱཡེཧི ཝིཏཐཾ ཀརོནྟི, ཏསྨཱ སཙྩམྤི ཧོཏི, ཨསཙྩམྤི ཧོཏི. ཏེནེཝ ཙ ཀཱརཎེན མཧོསདྷཔཎྜིཏཱདཡོ བོདྷིསཏྟཱ ཨསཀྑིཀམྤི ཨཊྚཾ ཨུདཀནིམུཛྫཱཔནཱདིནཱ ན ཝིནིཙྪིནནྟི, ཨུབྷིནྣཾ ཝཙནཾ པརིསཾ གཱཧཱཔེཏྭཱ ཏེསཾ ཝཙནཉྩ ཀིརིཡཉྩ པརིགྒཧེཏྭཱ སཙྩཉྩ ཝིཏཐཉྩ ཉཏྭཱཝ ཝིནིཙྪིནནྟི. སཱསནེ ¶ པན བྷིཀྑཱུ སཱུརཛཱཏིཀཱཔི སནྟི, བྷཱིརུཀཛཱཏིཀཱཔི སནྟི. སུསཱནཉྩ ནཱམ པཀཏིམནུསྶཱནམྤི བྷཡསནྟཱསཀརཾ ཧོཏི, རཏྟིཀཱལེ པན ཨཏིཝིཡ བྷཡཱནཀཾ ཧུཏྭཱ ཨུཔཊྛཱཏི ¶ , ཨེཝཾབྷཱུཏེ སུསཱནེ རཏྟིཡཾ ཨེཀོ ཨསཧཱཡོ ཧུཏྭཱ ནིཔཛྫཱཔིཡམཱནོ བྷཱིརུཀཛཱཏིཀོ བྷིཀྑུ པརིསུདྡྷསཱིལོཔི སམཱནོ ཀིཾ ན བྷཱཡེཡྻ, ཀཐཾ སབྦརཏྟིཾ སཡིཏུཾ ཝཱ ནིསཱིདིཏུཾ ཝཱ སཀྐུཎེཡྻ, ཏཐཱརཱུཔཾ བྷིཀྑུཾ ‘‘ཨཔརིསུདྡྷོ’’ཏི ཝདནྟོ ཀཐཾ ཀིཙྩཀརོ བྷཝིསྶཏི.

ཨལཛྫཱི པན སཱུརཛཱཏིཀོ ཨཏྟནོ ཝཛྫཾ པཊིཙྪཱདེཏུཀཱམོ བྷཱཡནྟོཔི ཨབྷཱཡནྟོ ཝིཡ ཧུཏྭཱ ‘‘སཙེ ཝིཀཱརཾ དསྶེསྶཱམི, ཨནཏྠཾ མེ ཀརིསྶནྟཱི’’ཏི ཨནཏྠབྷཡེན ཨདྷིཝཱསེཏྭཱ སཡིཏུཾ ཝཱ ནིསཱིདིཏུཾ ཝཱ སཀྐུཎེཡྻ, ཨེཝརཱུཔཾ པུགྒལཾ ‘‘པརིསུདྡྷོ’’ཏི ཝདནྟོ ཀཐཾ སུཝིནིཙྪིཏོ བྷཝིསྶཏཱིཏི. ཨིདམྤི ཨེཀཾ ཀཱརཎཾ.

ཨཐཱཔི ཝདེཡྻུཾ – ཡཐཱ ཨུདཀེ ནིམུཛྫཱཔིཏམནུསྶཱནཾ ཨསཙྩཝཱདཱིནཾ དེཝཏཱནུབྷཱཝེན ཀུམྦྷཱིལཱདཡོ ཨཱགནྟྭཱ གཎྷནྟཱ ཝིཡ ཨུཔཊྛཧནྟི, ཏསྨཱ ཨསཙྩཝཱདིནོ སཱིགྷཾ པླཝནྟི, སཙྩཝཱདཱིནཾ པན ན ཨུཔཊྛཧནྟི, ཏསྨཱ ཏེ སུཁེན ནིསཱིདིཏུཾ སཀྐོནྟི, ཨེཝཾ ཏེསམྤི བྷིཀྑཱུནཾ ཨཔརིསུདྡྷསཱིལཱནཾ དེཝཏཱནུབྷཱཝེན སཱིཧབྱགྒྷཱདཡོ ཨཱགཏཱ ཝིཡ པཉྙཱཡནྟི, ཏསྨཱ ཏེ སབྦརཏྟིཾ སཡིཏུཾ ཝཱ ནིསཱིདིཏུཾ ཝཱ ན སཀྐོནྟི. པརིསུདྡྷསཱིལཱནཾ པན ཏཐཱ ན པཉྙཱཡནྟི, ཏསྨཱ ཏེ སབྦརཏྟིཾ དེཝཏཱཧི རཀྑིཏཱ ཧུཏྭཱ བྷཡསནྟཱསརཧིཏཱ སུསཱནེ སཡིཏུཾ ཝཱ ནིསཱིདིཏུཾ ཝཱ སཀྐོནྟི, ཨེཝཾ དེཝཏཱ སཀྑིཾ ཀཏྭཱ ཝིནིཙྪིཏཏྟཱ སུཝིནིཙྪིཏམེཝ ཧོཏཱིཏི, ཏམྤི ཏཐཱ ན སཀྐཱ ཝཏྟུཾ. ཀསྨཱ? ཨཊྛཀཐཱཊཱིཀཱདཱིསུ ཏཐཱ ཨཝུཏྟཏྟཱ. ཨཊྛཀཐཱཡཉྷི ‘‘ཝིཝིཏྟཾ ཨོཀཱསཾ སམྨཛྫིཏྭཱ དིཝཱཝིཧཱརཾ ནིསཱིདིཏྭཱ སཱིལཱནི སོདྷེཏྭཱ ‘དྭཏྟིཾསཱཀཱརཾ ཏཱཝ མནསིཀརོཧཱི’ཏི ཝཏྟབྦོ. སཙེ ཏསྶ ཨརོགཾ སཱིལཾ ཀམྨཊྛཱནཾ གྷཊཡཏི, སངྑཱརཱ པཱཀཊཱ ཧུཏྭཱ ཨུཔཊྛཧནྟི, ཨུཔཙཱརཔྤནཱཔྤཏྟཾ ཝིཡ ཙིཏྟཾ ཨེཀགྒཾ ཧོཏི, དིཝསཾ ཨཏིཀྐནྟམྤི ན ཛཱནཱཏི…པེ… ཡསྶ པན སཱིལཾ བྷིནྣཾ ཧོཏི, ཏསྶ ཀམྨཊྛཱནཾ ན ¶ གྷཊཡཏི, པཏོདཱབྷིཏུནྣཾ ཝིཡ ཙིཏྟཾ ཀམྤཏི, ཝིཔྤཊིསཱརགྒིནཱ ཌཡ྄ཧཏི, ཏཏྟཔཱསཱཎེ ནིསིནྣོ ཝིཡ ཏངྑཎཉྙེཝ ཝུཊྛཱཏཱི’’ཏི ཨེཏྟཀམེཝ ཝུཏྟཾ.

ཊཱིཀཱཡམྤི (སཱརཏྠ. ཊཱི. ༢.༤༥) ‘‘ཀམྨཊྛཱནཾ གྷཊཡཏཱིཏི ཨནྟརནྟརཱ ཁཎྜཾ ཨདསྶེཏྭཱ ཙིཏྟེན སདྡྷིཾ ཨཱརམྨཎབྷཱཝེན ཙིརཀཱལཾ གྷཊཡཏི. སངྑཱརཱ པཱཀཊཱ ཨུཔཊྛཧནྟཱིཏི ཝིཔསྶནཱཀམྨཊྛཱནིཀོ ¶ ཙེ, ཏསྶ སངྑཱརཱ པཱཀཊཱ ཧུཏྭཱ ཨུཔཊྛཧནྟི. སཙེ ཀཏཔཱརཱཛིཀཝཱིཏིཀྐམོ བྷཝེཡྻ, ཏསྶ སཏིཔི ཨསརིཏུཀཱམཏཱཡ ཝིཔྤཊིསཱརཝཏྠུཝསེན པུནཔྤུནཾ ཏཾ ཨུཔཊྛཧཏཱིཏི ཙིཏྟེཀགྒཏཾ ན ཝིནྡཏཱི’’ཏི ཨེཏྟཀམེཝ ཝུཏྟཾ.

ཝིམཏིཝིནོདནིཡམྤི (ཝི. ཝི. ཊཱི. ༡.༤༥) ‘‘ཀམྨཊྛཱནཾ གྷཊཡཏཱིཏི ཝིཔྤཊིསཱརམཱུལཀེན ཝིཀྑེཔེན ཨནྟརནྟརཱ ཁཎྜཾ ཨདསྶེཏྭཱ པབནྡྷཝསེན ཙིཏྟེན སངྒྷཊཡཏི. སངྑཱརཱཏི ཝིཔསྶནཱཀམྨཊྛཱནཝསེན ཝུཏྟཾ. སཱཔཏྟིཀསྶ ཧི པགུཎམྤི ཀམྨཊྛཱནཾ ན སུཊྛུ ཨུཔཊྛཱཏི. པགེཝ པཱརཱཛིཀསྶ. ཏསྶ ཧི ཝིཔྤཊིསཱརནིནྣཏཱཡ ཙིཏྟཾ ཨེཀགྒཾ ན ཧོཏི. ཨེཀསྶ པན ཝིཏཀྐཝིཀྑེཔཱདིབཧུལསྶ སུདྡྷསཱིལསྶཔི ཙིཏྟཾ ན སམཱདྷིཡཏི, ཏཾ ཨིདྷ པཱརཱཛིཀམཱུལནྟི ན གཧེཏབྦཾ. ཀཏཔཱཔམཱུལཀེན ཝིཔྤཊིསཱརེནེཝེཏྠ ཙིཏྟསྶ ཨསམཱདྷིཡནཾ སནྡྷཱཡ ‘ཀམྨཊྛཱནཾ ན གྷཊཡཏཱི’ཏིཨཱདི ཝུཏྟ’’ནྟི ཨེཏྟཀམེཝ ཝུཏྟཾ, ན ཝུཏྟཾ ‘‘དེཝཏཱནུབྷཱཝེནཱ’’ཏིཨཱདི, ཏསྨཱ ཡདི བུདྡྷསཱསནེ སགཱརཝོ སིཀྑཱཀཱམོ བྷིཀྑུ དུཏིཡཏཏིཡཔཱརཱཛིཀཝིསཡེ ཨཏྟནོ ཀཉྩི ཝཱིཏིཀྐམཾ དིསྭཱ ‘‘པཱརཱཛིཀཾ ཨཱཔནྣོ ནུ ཁོ ཨཧཾ, ན ནུ ཁོ’’ཏི སཾསཡཔཀྑནྡོ ཝིནཡདྷརཾ ཨུཔསངྐམིཏྭཱ ཏཾ ཝཱིཏིཀྐམཾ ཡཐཱབྷཱུཏཾ ཨཱཙིཀྑིཏྭཱ པུཙྪེཡྻ, ཏཏོ ཝིནཡདྷརེན ཨཊྛཀཐཱཡཾ ཝུཏྟནཡེནེཝ ‘‘སབྦཾ པུབྦཝིདྷཱནཾ ཀཏྭཱ ཝིཝིཏྟཾ ཨོཀཱསཾ སམྨཛྫིཏྭཱ དིཝཱཝིཧཱརཾ ནིསཱིདིཏྭཱ སཱིལཱནི སོདྷེཏྭཱ དྭཏྟིཾསཱཀཱརེ ཏཱཝ མནསིཀརོཧཱི’’ཏི ཨེཏྟཀམེཝ ཝཏྟབྦོ ¶ , ན ཝཏྟབྦོ ‘‘སུསཱནེ སེཡྻཾ ཀཔྤེཧཱི’’ཏིཨཱདི. ཨཱགཏཀཱལེཔི ཨཊྛཀཐཱཡཾ ཨཱགཏནཡེནེཝ པུཙྪིཏྭཱ ཨཊྛཀཐཱཡཾ ཨཱགཏནཡེནེཝསྶ སུདྡྷཱསུདྡྷབྷཱཝོ ཝཏྟབྦོཏི དཊྛབྦཾ.

ཨེཝཾ ཧོཏུ, ཨེཝཾ སནྟེ ཨིདཱནི པཋམཔཱརཱཛིཀཝིསཡེ ཙོདེནྟཱནཾ ཀཐཾ ཝིནིཙྪཡོ ཀཱཏབྦོཏི? ཙོདཀེན ཝཏྠུསྨིཾ ཨཱརོཙིཏེ ཙུདིཏཀོ པུཙྪིཏབྦོ ‘‘སནྟམེཏཾ, ནོ’’ཏི ཨེཝཾ ཝཏྠུཾ ཨུཔཔརིཀྑིཏྭཱ བྷཱུཏེན ཝཏྠུནཱ ཙོདེཏྭཱ སཱརེཏྭཱ ཉཏྟིསམྤདཱཡ ཨནུསྶཱཝནསམྤདཱཡ ཏཾ ཨདྷིཀརཎཾ ཝཱུཔསམེཏབྦཾ. ཨེཝམྤི ཨལཛྫཱི ནཱམ ‘‘ཨེཏམྤི ནཏྠི, ཨེཏམྤི ནཏྠཱི’’ཏི ཝདེཡྻ, པཊིཉྙཾ ན དདེཡྻ, ཨཐ ཀིཾ ཀཱཏབྦནྟི? ཨེཝམྤི ཨལཛྫིསྶ པཊིཉྙཱཡ ཨེཝ ཨཱཔཏྟིཡཱ ཀཱརེཏབྦཾ ཡཐཱ ཏཾ ཏིཔིཊཀཙཱུལཱ༹བྷཡཏྠེརེནཱཏི. ཝུཏྟཉྷེཏཾ ཨཊྛཀཐཱཡཾ (པཱརཱ. ཨཊྛ. ༢.༣༨༥-༣༨༦) ‘‘ཨེཝཾ ལཛྫིནཱ ཙོདིཡམཱནོ ཨལཛྫཱི བཧཱུསུཔི ཝཏྠཱུསུ ཨུཔྤནྣེསུ པཊིཉྙཾ ན དེཏི, སོ ‘ནེཝ སུདྡྷོ’ཏི ཝཏྟབྦོ, ན ‘ཨསུདྡྷོ’ཏི, ཛཱིཝམཏཀོ ནཱམ ཨཱམཀཔཱུཏིཀོ ནཱམ ¶ ཙེས. སཙེ པནསྶ ཨཉྙམྤི ཏཱདིསཾ ཝཏྠུ ཨུཔྤཛྫཏི, ན ཝིནིཙྪིཏབྦཾ, ཏཐཱ ནཱསིཏཀོཝ བྷཝིསྶཏཱི’’ཏིཨཱདི.

༢༣༥. ཨེཝཾ ཝིནཡདྷརལཀྑཎཉྩ ཚཊྛཱནཨོལོཀནཉྩ ཝིདིཏྭཱ ཨིདཱནི…པེ… ཝིནིཙྪཡོ ཝེདིཏབྦོཏི ཡོཛནཱ. ཀིམཏྠནྟི ཨཱཧ ‘‘ཡཱ སཱ…པེ… ཛཱནནཏྠ’’ནྟི. ཡཱ སཱ པུབྦེ ཝུཏྟཔྤབྷེདཱ ཙོདནཱ ཨཏྠི, ཏསྶཱཡེཝ སམྤཏྟིཝིཔཏྟིཛཱནནཏྠཾ ཨཱདིམཛ྄ཛྷཔཨཡོསཱནཱདཱིནཾ ཝསེན ཝིནིཙྪཡོ ཝེདིཏབྦོ, ན ཨཝུཏྟཙོདནཱཔབྷེདཛཱནནཏྠནྟི ཨཏྠོ. སེཡྻཐིདནྟི པུཙྪནཏྠེ ནིཔཱཏོ, སོ ཝིནིཙྪཡོ ཀཏམོཏི ཨཏྠོ.

ཙོདནཱཡ ¶ ཀཏི མཱུལཱནི, ཀཏི ཝཏྠཱུནི, ཀཏི བྷཱུམིཡོཏི ཨེཏྠ ‘‘ཀཏིཧཱཀཱརེཧཱི’’ཏིཔི ཝཏྟབྦཾ. ཝུཏྟཉྷེཏཾ པརིཝཱརེ (པརི. ༣༦༢) ཙོདནཱཀཎྜེ ‘‘ཙོདནཱཡ ཀཏི མཱུལཱནི, ཀཏི ཝཏྠཱུནི, ཀཏི བྷཱུམིཡོ, ཀཏིཧཱཀཱརེཧི ཙོདེཏཱི’’ཏི. མེཏྟཙིཏྟོ ཝཀྑཱམི, ནོ དོསནྟརོཏི ཨེཏསྶཔི པརཏོ ‘‘ཙོདནཱཡ ཨིམཱ པཉྩ བྷཱུམིཡོ. ཀཏམེཧི དྭཱིཧཱཀཱརེཧི ཙོདེཏི, ཀཱཡེན ཝཱ ཙོདེཏི, ཝཱཙཱཡ ཝཱ ཙོདེཏི, ཨིམེཧི དྭཱིཧཱཀཱརེཧི ཙོདེཏཱི’’ཏི ཝཏྟབྦཾ. ཀསྨཱ? ཙོདནཱཀཎྜེ (པརི. ༣༦༢) ཏཐཱ ཝིཛྫམཱནཏོཏི. པནྣརསསུ དྷམྨེསུ པཏིཊྛཱཏབྦནྟི པརིསུདྡྷཀཱཡསམཱཙཱརཏཱ, པརིསུདྡྷཝཙཱིསམཱཙཱརཏཱ, མེཏྟཙིཏྟེ པཙྩུཔཊྛིཏཏཱ, བཧུསྶུཏཏཱ, ཨུབྷཡཔཱཏིམོཀྑསྭཱགཏཏཱ, ཀཱལེན ཝཙནཏཱ, བྷཱུཏེན ཝཙནཏཱ, སཎྷེན ཝཙནཏཱ, ཨཏྠསཉྷིཏེན ཝཙནཏཱ, མེཏྟཙིཏྟོ ཧུཏྭཱ ཝཙནཏཱ, ཀཱརུཉྙཏཱ, ཧིཏེསིཏཱ, ཨནུཀམྤཏཱ, ཨཱཔཏྟིཝུཊྛཱནཏཱ, ཝིནཡཔུརེཀྑཱརཏཱཏི. ཝུཏྟཉྷེཏཾ ཨུཔཱལིཔཉྩཀེ (པརི. ༤༣༦) ‘‘ཙོདཀེནུཔཱལི བྷིཀྑུནཱ པརཾ ཙོདེཏུཀཱམེན ཨེཝཾ པཙྩཝེཀྑིཏབྦཾ – པརིསུདྡྷཀཱཡསམཱཙཱརོ ནུ ཁོམྷི…པེ… པརིསུདྡྷཝཙཱིསམཱཙཱརོ ནུ ཁོམྷི…པེ… མེཏྟཾ ནུ ཁོ མེ ཙིཏྟཾ པཙྩུཔཊྛིཏཾ སབྲཧྨཙཱརཱིསུ…པེ… བཧུསྶུཏོ ནུ ཁོམྷི སུཏདྷརོ སུཏསནྣིཙཡོ…པེ… ཨུབྷཡཱནི ཁོ མེ པཱཏིམོཀྑཱནི ཝིཏྠཱརེན སྭཱགཏཱནི…པེ… ཀཱལེན ཝཀྑཱམི, ནོ ཨཀཱལེན, བྷཱུཏེན ཝཀྑཱམི, ནོ ཨབྷཱུཏེན, སཎྷེན ཝཀྑཱམི, ནོ ཕརུསེན, ཨཏྠསཉྷིཏེན ཝཀྑཱམི, ནོ ཨནཏྠསཉྷིཏེན, མེཏྟཙིཏྟོ ཝཀྑཱམི, ནོ དོསནྟརོ…པེ… ཀཱརུཉྙཏཱ, ཧིཏེསིཏཱ, ཨནུཀམྤཏཱ, ཨཱཔཏྟིཝུཊྛཱནཏཱ, ཝིནཡཔུརེཀྑཱརཏཱ’’ཏི.

ཏཏྠ ཀཱརུཉྙཏཱཏི ཀཱརུཎིཀབྷཱཝོ. ཨིམིནཱ ཀརུཎཱ ཙ ཀརུཎཱཔུབྦབྷཱགོ ཙ དསྶིཏོ ¶ . ཧིཏེསིཏཱཏི ཧིཏགཝེསནཏཱ ¶ . ཨནུཀམྤཏཱཏི ཏེན ཧིཏེན སཾཡོཛནཏཱ. ཨཱཔཏྟིཝུཊྛཱནཏཱཏི ཨཱཔཏྟིཏོ ཝུཊྛཱཔེཏྭཱ སུདྡྷནྟེ པཏིཊྛཱཔནཏཱ. ཝཏྠུཾ ཙོདེཏྭཱ སཱརེཏྭཱ པཊིཉྙཾ ཨཱརོཔེཏྭཱ ཡཐཱཔཊིཉྙཱཡ ཀམྨཀརཎཾ ཝིནཡཔུརེཀྑཱརཏཱ ནཱམ. ཨམཱུལཀམྤི སམཱུལཀམྤི ‘‘མཱུལ’’ནྟི གཧེཏྭཱ ཝདནྟཱིཏི ཨཱཧ ‘‘དྭེ མཱུལཱནཱི’’ཏི. ཀཱལེན ཝཀྑཱམཱིཏིཨཱདཱིསུ ཨེཀོ ཨེཀཾ ཨོཀཱསཾ ཀཱརེཏྭཱ ཙོདེནྟོ ཀཱལེན ཝདཏི ནཱམ. སངྒྷམཛ྄ཛྷེ གཎམཛ྄ཛྷེ སལཱཀགྒཡཱགུཨགྒཝིཏཀྐམཱལ༹ཀབྷིཀྑཱཙཱརམགྒཨཱསནསཱལཱདཱིསུ, ཨུཔཊྛཱཀེཧི པརིཝཱརིཏཀྑཎེ ཝཱ ཙོདེནྟོ ཨཀཱལེན ཝདཏི ནཱམ. ཏཙྪེན ཝཏྠུནཱ ཙོདེནྟོ བྷཱུཏེན ཝདཏི ནཱམ. ཏུཙྪེན ཙོདེནྟོ ཨབྷཱུཏེན ཝདཏི ནཱམ. ‘‘ཨམྦྷོ མཧལླཀ པརིསཱཝཙར པཾསུཀཱུལིཀ དྷམྨཀཐིཀ པཏིརཱུཔཾ ཏཝ ཨིད’’ནྟི ཝདནྟོ ཕརུསེན ཝདཏི ནཱམ. ‘‘བྷནྟེ, མཧལླཀཱ པརིསཱཝཙརཱ པཾསུཀཱུལིཀཱ དྷམྨཀཐིཀཱ པཏིརཱུཔཾ ཏུམྷཱཀཾ ཨིད’’ནྟི ཝདནྟོ སཎྷེན ཝདཏི ནཱམ. ཀཱརཎནིསྶིཏཾ ཀཏྭཱ ཝདནྟོ ཨཏྠསཉྷིཏེན ཝདཏི ནཱམ. མེཏྟཙིཏྟོ ཝཀྑཱམི, ནོ དོསནྟརོཏི མེཏྟཙིཏྟཾ ཨུཔཊྛཱཔེཏྭཱ ཝཀྑཱམི, ན དུཊྛཙིཏྟོ ཧུཏྭཱ. སཙྩེ ཙ ཨཀུཔྤེ ཙཱཏི ཝཙཱིསཙྩེ ཙ ཨཀུཔྤཏཱཡ ཙ. ཙུདིཏཀེན ཧི སཙྩཉྩ ཝཏྟབྦཾ, ཀོཔོ ཙ ན ཀཱཏབྦོ, ཨཏྟནཱ ཙ ན ཀུཙྪིཏབྦཾ, པརོ ཙ ན གྷཊྚེཏབྦོཏི ཨཏྠོ.

ཨིམསྨིཾ ཋཱནེ ‘‘སངྒྷེན ཨོཏིཎྞཱནོཏིཎྞཾ ཛཱནིཏབྦཾ – ཨནུཝིཛྫཀེན ཡེན དྷམྨེན ཡེན ཝིནཡེན ཡེན སཏྠུསཱསནེན ཏཾ ཨདྷིཀརཎཾ ཝཱུཔསམྨཏི, ཏཐཱ ཏཾ ཨདྷིཀརཎཾ ཝཱུཔསམེཏབྦ’’ནྟི ཝཏྟབྦཾ. ཝུཏྟཉྷེཏཾ ཙོདནཱཀཎྜེ (པརི. ༣༦༣) ‘‘ཙོདཀེན ཀཐཾ པཊིཔཛྫིཏབྦཾ? ཙུདིཏཀེན ཀཐཾ པཊིཔཛྫིཏབྦཾ? སངྒྷེན ཀཐཾ པཊིཔཛྫིཏབྦཾ? ཨནུཝིཛྫཀེན ཀཐཾ པཊིཔཛྫིཏབྦཾ? ཙོདཀེན ¶ ཀཐཾ པཊིཔཛྫིཏབྦནྟི? ཙོདཀེན པཉྩསུ དྷམྨེསུ པཏིཊྛཱཡ པརོ ཙོདེཏབྦོ. ཀཱལེན ཝཀྑཱམི ནོ ཨཀཱལེན, བྷཱུཏེན ཝཀྑཱམི ནོ ཨབྷཱུཏེན, སཎྷེན ཝཀྑཱམི ནོ ཕརུསེན, ཨཏྠསཉྷིཏེན ཝཀྑཱམི ནོ ཨནཏྠསཉྷིཏེན, མེཏྟཙིཏྟོ ཝཀྑཱམི ནོ དོསནྟརོཏི. ཙོདཀེན ཨེཝཾ པཊིཔཛྫིཏབྦཾ. ཙུདིཏཀེན ཀཐཾ པཊིཔཛྫིཏབྦནྟི? ཙུདིཏཀེན དྭཱིསུ དྷམྨེསུ པཏིཊྛཱཏབྦཾ སཙྩེ ཙ ཨཀུཔྤེ ཙ. ཙུདིཏཀེན ཨེཝཾ པཊིཔཛྫིཏབྦཾ. སངྒྷེན ཀཐཾ པཊིཔཛྫིཏབྦནྟི? སངྒྷེན ཨོཏིཎྞཱནོཏིཎྞཾ ཛཱནིཏབྦཾ. སངྒྷེན ཨེཝཾ པཊིཔཛྫིཏབྦཾ. ཨནུཝིཛྫཀེན ཀཐཾ པཊིཔཛྫིཏབྦནྟི? ཨནུཝིཛྫཀེན ཡེན དྷམྨེན ཡེན ཝིནཡེན ཡེན སཏྠུསཱསནེན ཏཾ ཨདྷིཀརཎཾ ཝཱུཔསམྨཏི, ཏཐཱ ཏཾ ཨདྷིཀརཎཾ ཝཱུཔསམེཏབྦཾ. ཨནུཝིཛྫཀེན ཨེཝཾ པཊིཔཛྫིཏབྦ’’ནྟི.

ཨཊྛཀཐཱཡམྤི ¶ (པརི. ཨཊྛ. ༣༦༢-༣༦༣) ‘‘ཙོདནཱཡ ཀོ ཨཱདཱིཏིཨཱདིཔུཙྪཱནཾ ཝིསྶཛྫནེ སཙྩེ ཨཀུཔྤེ ཙཱཏི ཨེཏྠ སཙྩེ པཏིཊྛཱཏབྦཾ ཨཀུཔྤེ ཙ, ཡཾ ཀཏཾ ཝཱ ཨཀཏཾ ཝཱ, ཏདེཝ ཝཏྟབྦཾ, ན ཙོདཀེ ཝཱ ཨནུཝིཛྫཀེ ཝཱ སངྒྷེ ཝཱ ཀོཔོ ཨུཔྤཱདེཏབྦོ. ཨོཏིཎྞཱནོཏིཎྞཾ ཛཱནིཏབྦནྟི ཨོཏིཎྞཉྩ ཨནོཏིཎྞཉྩ ཝཙནཾ ཛཱནིཏབྦཾ. ཏཏྲཱཡཾ ཛཱནནཝིདྷི – ཨེཏྟཀཱ ཙོདཀསྶ པུབྦཀཐཱ, ཨེཏྟཀཱ པཙྪིམཀཐཱ, ཨེཏྟཀཱ ཙུདིཏཀསྶ པུབྦཀཐཱ, ཨེཏྟཀཱ པཙྪིམཀཐཱཏི ཛཱནིཏབྦཱ. ཙོདཀསྶ པམཱཎཾ གཎྷིཏབྦཾ, ཙུདིཏཀསྶ པམཱཎཾ གཎྷིཏབྦཾ, ཨནུཝིཛྫཀསྶ པམཱཎཾ གཎྷིཏབྦཾ. ཨནུཝིཛྫཀོ ཨཔྤམཏྟཀམྤི ཨཧཱཔེནྟོ ‘ཨཱཝུསོ, སམནྣཱཧརིཏྭཱ ཨུཛུཾ ཀཏྭཱ ཨཱཧརཱ’ཏི ཝཏྟབྦོ, སངྒྷེན ཨེཝཾ པཊིཔཛྫིཏབྦཾ. ཡེན དྷམྨེན ཡེན ཝིནཡེན ཡེན སཏྠུསཱསནེན ཏཾ ཨདྷིཀརཎཾ ཝཱུཔསམྨཏཱིཏི ཨེཏྠ དྷམྨོཏི བྷཱུཏཾ ཝཏྠུ. ཝིནཡོཏི ཙོདནཱ ཙེཝ སཱརཎཱ ཙ. སཏྠུསཱསནནྟི ཉཏྟིསམྤདཱ ཙེཝ ཨནུསྶཱཝནསམྤདཱ ¶ ཙ. ཨེཏེན ཧི དྷམྨེན ཙ ཝིནཡེན ཙ སཏྠུསཱསནེན ཙ ཨདྷིཀརཎཾ ཝཱུཔསམྨཏི, ཏསྨཱ ཨནུཝིཛྫཀེན བྷཱུཏེན ཝཏྠུནཱ ཙོདེཏྭཱ ཨཱཔཏྟིཾ སཱརེཏྭཱ ཉཏྟིསམྤདཱཡ ཙེཝ ཨནུསྶཱཝནསམྤདཱཡ ཙ ཏཾ ཨདྷིཀརཎཾ ཝཱུཔསམེཏབྦཾ, ཨནུཝིཛྫཀེན ཨེཝཾ པཊིཔཛྫིཏབྦ’’ནྟི ཨཱགཏཾ, ཏསྨཱ ཝཏྟབྦམེཏྟཀཾ དྭཡནྟི.

ཨེཝཾ ཨེཀདེསེན ཙོདནཱཀཎྜནཡཾ དསྶེཏྭཱ ཨིདཱནི ཨེཀདེསེནེཝ མཧཱསངྒཱམནཡཾ དསྶེནྟོ ‘‘ཨནུཝིཛྫཀེན ཙོདཀོ པུཙྪིཏབྦོ’’ཏིཨཱདིམཱཧ. ཏཏྠ ཡཾ ཁོ ཏྭཾ, ཨཱཝུསོ, ཨིམཾ བྷིཀྑུཾ ཙོདེསི, ཀིམྷི ནཾ ཙོདེསཱིཏི ཙོདནཱསཱམཉྙཏོ ཝུཏྟཾ, པཱལི༹ཡཾ (མཧཱཝ. ༢༣༧) པན པཝཱརཎཊྛཔནཝསེན ཙོདནཾ སནྡྷཱཡ ‘‘ཡཾ ཁོ ཏྭཾ, ཨཱཝུསོ, ཨིམསྶ བྷིཀྑུནོ པཝཱརཎཾ ཋཔེསཱི’’ཏི ཝུཏྟཾ. སེསཾ སུཝིཉྙེཡྻམེཝ.

ཨེཝཾ ཨེཀདེསེན མཧཱསངྒཱམནཡཾ དསྶེཏྭཱ ཨིདཱནི ཨེཀདེསེནེཝ ཙཱུལ༹སངྒཱམནཡཾ དསྶེཏུཾ ‘‘སངྒཱམཱཝཙརེན བྷིཀྑུནཱ’’ཏིཨཱདིམཱཧ. ཏཏྠ སངྒཱམཱཝཙརེན བྷིཀྑུནཱཏི སངྒཱམོ ཝུཙྩཏི ཨདྷིཀརཎཝིནིཙྪཡཏྠཱཡ སངྒྷསནྣིཔཱཏོ. ཏཏྲ ཧི ཨཏྟཔཙྩཏྠིཀཱ ཙེཝ སཱསནཔཙྩཏྠིཀཱ ཙ ཨུདྡྷམྨཾ ཨུབྦིནཡཾ སཏྠུསཱསནཾ དཱིཔེནྟཱ སམོསརནྟི ཝེསཱལིཀཱ ཝཛྫིཔུཏྟཀཱ ཝིཡ. ཡོ བྷིཀྑུ ཏེསཾ པཙྩཏྠིཀཱནཾ ལདྡྷིཾ མདྡིཏྭཱ སཀཝཱདདཱིཔནཏྠཱཡ ཏཏྠ ཨཝཙརཏི, ཨཛ྄ཛྷོགཱཧེཏྭཱ ཝིནིཙྪཡཾ པཝཏྟེཏི, སོ སངྒཱམཱཝཙརོ ནཱམ ཡསཏྠེརོ ཝིཡ, ཏེན སངྒཱམཱཝཙརེན བྷིཀྑུནཱ སངྒྷཾ ཨུཔསངྐམནྟེན ནཱིཙཙིཏྟེན སངྒྷོ ཨུཔསངྐམིཏབྦོ. ནཱིཙཙིཏྟེནཱཏི མཱནདྡྷཛཾ ནིཔཱཏེཏྭཱ ནིཧཏམཱནཙིཏྟེན ¶ . རཛོཧརཎསམེནཱཏི པཱདཔུཉྪནསམེན, ཡཐཱ རཛོཧརཎསྶ སཾཀིལིཊྛེ ཝཱ ཨསཾཀིལིཊྛེ ཝཱ པཱདེ པུཉྪིཡམཱནེ ¶ ནེཝ རཱགོ ན དོསོ, ཨེཝཾ ཨིཊྛཱནིཊྛེསུ ཨརཛྫནྟེན ཨདུསྶནྟེནཱཏི ཨཏྠོ. ཡཐཱཔཏིརཱུཔེ ཨཱསནེཏི ཡཐཱཔཏིརཱུཔཾ ཨཱསནཾ ཉཏྭཱ ཨཏྟནོ པཱཔུཎནཊྛཱནེ ཐེརཱནཾ བྷིཀྑཱུནཾ པིཊྛིཾ ཨདསྶེཏྭཱ ནིསཱིདིཏབྦཾ.

ཨནཱནཱཀཐིཀེནཱཏི ནཱནཱཝིདྷཾ ཏཾ ཏཾ ཨནཏྠཀཐཾ ཨཀཐེནྟེན. ཨཏིརཙྪཱནཀཐིཀེནཱཏི དིཊྛསུཏམུཏམྤི རཱཛཀཐཱདིཀཾ ཏིརཙྪཱནཀཐཾ ཨཀཐེནྟེན. སཱམཾ ཝཱ དྷམྨོ བྷཱསིཏབྦོཏི སངྒྷསནྣིཔཱཏཊྛཱནེ ཀཔྤིཡཱཀཔྤིཡསནྣིསྶིཏཱ ཝཱ རཱུཔཱརཱུཔཔརིཙྪེདསམཐཙཱརཝིཔསྶནཱཙཱརཊྛཱནནིསཛྫཝཏྟཱདིནིསྶིཏཱ ཝཱ ཀཐཱ དྷམྨོ ནཱམ. ཨེཝརཱུཔོ དྷམྨོ སཡཾ ཝཱ བྷཱསིཏབྦོ, པརོ ཝཱ ཨཛ྄ཛྷེསིཏབྦོ. ཡོ བྷིཀྑུ ཏཐཱརཱུཔིཾ ཀཐཾ ཀཐེཏུཾ པཧོཏི, སོ ཝཏྟབྦོ ‘‘ཨཱཝུསོ, སངྒྷམཛ྄ཛྷམྷི པཉྷེ ཨུཔྤནྣེ ཏྭཾ ཀཐེཡྻཱསཱི’’ཏི. ཨརིཡོ ཝཱ ཏུཎྷཱིབྷཱཝོ ནཱཏིམཉྙིཏབྦོཏི ཨརིཡཱ ཏུཎྷཱི ནིསཱིདནྟཱ ན བཱལཔུཐུཛྫནཱ ཝིཡ ནིསཱིདནྟི, ཨཉྙཏརཾ ཀམྨཊྛཱནཾ གཧེཏྭཱཝ ནིསཱིདནྟི. ཨིཏི ཀམྨཊྛཱནམནསིཀཱརཝསེན ཏུཎྷཱིབྷཱཝོ ཨརིཡོ ཏུཎྷཱིབྷཱཝོ ནཱམ, སོ ནཱཏིམཉྙིཏབྦོ, ‘‘ཀིཾ ཀམྨཊྛཱནཱནུཡོགེནཱ’’ཏི ནཱཝཛཱནིཏབྦོ, ཨཏྟནོ པཏིརཱུཔཾ ཀམྨཊྛཱནཾ གཧེཏྭཱཝ ནིསཱིདིཏབྦནྟི ཨཏྠོ.

ན ཨུཔཛ྄ཛྷཱཡོ པུཙྪིཏབྦོཏི ‘‘ཀོ ནཱམ ཏུཡ྄ཧཾ ཨུཔཛ྄ཛྷཱཡོ’’ཏི ན པུཙྪིཏབྦོ. ཨེས ནཡོ སབྦཏྠ. ན ཛཱཏཱིཏི ‘‘ཁཏྟིཡཛཱཏིཡོ ཏྭཾ བྲཱཧྨཎཛཱཏིཡོ’’ཏི ཨེཝཾ ཛཱཏི ན པུཙྪིཏབྦཱ. ན ཨཱགམོཏི ‘‘དཱིགྷབྷཱཎཀོ ཏྭཾ མཛ྄ཛྷིམབྷཱཎཀོ’’ཏི ཨེཝཾ ཨཱགམོ ན པུཙྪིཏབྦོ. ཀུལཔདེསོཔི ཁཏྟིཡཀུལཱདིཝསེནེཝ ཝེདིཏབྦོ. ཨཏྲསྶ པེམཾ ཝཱ དོསོ ཝཱཏི ཏཏྲ པུགྒལེ ཨེཏེསཾ ཀཱརཎཱནཾ ཨཉྙཏརཝསེན པེམཾ ཝཱ བྷཝེཡྻ དོསོ ཝཱ.

ནོ ¶ པརིསཀཔྤིཀེནཱཏི པརིསཀཔྤཀེན པརིསཱནུཝིདྷཱཡཀེན ན བྷཝིཏབྦཾ, ཡཾ པརིསཱཡ རུཙྩཏི, ཏདེཝ ཙེཏེཏྭཱ ཀཔྤེཏྭཱ ན ཀཐེཏབྦནྟི ཨཏྠོ. ན ཧཏྠམུདྡཱ དསྶེཏབྦཱཏི ཀཐེཏབྦེ ཙ ཨཀཐེཏབྦེ ཙ སཉྙཱཛནནཏྠཾ ཧཏྠཝིཀཱརོ ན ཀཱཏབྦོ.

ཨཏྠཾ ཨནུཝིདྷིཡནྟེནཱཏི ཝིནིཙྪཡཔཊིཝེདྷམེཝ སལླཀྑེནྟེན, ‘‘ཨིདཾ སུཏྟཾ ཨུཔལབྦྷཏི, ཨིམསྨིཾ ཝིནིཙྪཡེ ཨིདཾ ཝཀྑཱམཱི’’ཏི ཨེཝཾ པརིཏུལཡནྟེན ནིསཱིདིཏབྦནྟི ཨཏྠོ. ན ཙ ཨཱསནཱ ¶ ཝུཊྛཱཏབྦནྟི ན ཨཱསནཱ ཝུཊྛཱཡ སནྣིཔཱཏམཎྜལེ ཝིཙརིཏབྦཾ. ཝིནཡདྷརེ ཧི ཨུཊྛིཏེ སབྦཱ པརིསཱ ཝུཊྛཧནྟི, ཏསྨཱ ན ཝུཊྛཱཏབྦཾ. ན ཝཱིཏིཧཱཏབྦནྟི ན ཝིནིཙྪཡོ ཧཱཔེཏབྦོ. ན ཀུམྨགྒོ སེཝིཏབྦོཏི ན ཨཱཔཏྟི དཱིཔེཏབྦཱ. ཨསཱཧསིཀེན བྷཝིཏབྦནྟི ན སཧསཱ ཀཱརིནཱ བྷཝིཏབྦཾ, ན སཧསཱ དུརུཏྟཝཙནཾ ཀཐེཏབྦནྟི ཨཏྠོ. ཝཙནཀྑམེནཱཏི དུརུཏྟཝཱཙཾ ཁམནསཱིལེན. ཧིཏཔརིསཀྐིནཱཏི ཧིཏེསིནཱ ཧིཏགཝེསིནཱ ཀརུཎཱ ཙ ཀརུཎཱཔུབྦབྷཱགོ ཙ ཨུཔཊྛཱཔེཏབྦོཏི ཨཡཾ པདདྭཡེཔི ཨདྷིཔྤཱཡོ. ཨནསུརུཏྟེནཱཏི ན ཨསུརུཏྟེན, ཨསུརུཏྟཾ ཝུཙྩཏི ཝིགྒཱཧིཀཀཐཱསངྑཱཏཾ ཨསུནྡརཝཙནཾ, ཏཾ ན ཀཐེཏབྦནྟི ཨཏྠོ. ཨཏྟཱ པརིགྒཧེཏབྦོཏི ‘‘ཝིནིཙྪིནིཏུཾ ཝཱུཔསམེཏུཾ སཀྑིསྶཱམི ནུ ཁོ, ནོ’’ཏི ཨེཝཾ ཨཏྟཱ པརིགྒཧེཏབྦོ, ཨཏྟནོ པམཱཎཾ ཛཱནིཏབྦནྟི ཨཏྠོ. པརོ པརིགྒཧེཏབྦོཏི ‘‘ལཛྫིཡཱ ནུ ཁོ ཨཡཾ པརིསཱ སཀྐཱ སཉྙཱཔེཏུཾ, ཨུདཱཧུ ནོ’’ཏི ཨེཝཾ པརོ པརིགྒཧེཏབྦོ. ཙོདཀོ པརིགྒཧེཏབྦོཏི ‘‘དྷམྨཙོདཀོ ནུ ཁོ, ནོ’’ཏི ཨེཝཾ པརིགྒཧེཏབྦོ. ཙུདིཏཀོ པརིགྒཧེཏབྦོཏི ‘‘དྷམྨཙུདིཏཀོ ནུ ཁོ, ནོ’’ཏི ཨེཝཾ པརིགྒཧེཏབྦོ. ཨདྷམྨཙོདཀོ པརིགྒཧེཏབྦོཏི ཏསྶ པམཱཎཾ ཛཱནིཏབྦཾ. སེསེསུཔི ཨེསེཝ ནཡོ.

ཝུཏྟཾ ¶ ཨཧཱཔེནྟེནཱཏི ཙོདཀཙུདིཏཀེཧི ཝུཏྟཝཙནཾ ཨཧཱཔེནྟེན. ཨཝུཏྟཾ ཨཔཀཱསེནྟེནཱཏི ཨནོསཊཾ ཝཏྠུཾ ཨཔཀཱསེནྟེན. མནྡོ ཧཱསེཏབྦོཏི མནྡོ མོམཱུལ༹ྷོ པགྒཎྷིཏབྦོ, ‘‘ནནུ ཏྭཾ ཀུལཔུཏྟོ’’ཏི ཨུཏྟེཛེཏྭཱ ཨནུཡོགཝཏྟཾ ཀཐཱཔེཏྭཱ ཏསྶ ཨནུཡོགོ གཎྷིཏབྦོ. བྷཱིརུ ཨསྶཱསེཏབྦོཏི ཡསྶ སངྒྷམཛ྄ཛྷཾ ཝཱ གཎམཛ྄ཛྷཾ ཝཱ ཨནོསཊཔུབྦཏྟཱ སཱརཛྫཾ ཨུཔྤཛྫཏི, ཏཱདིསོ ‘‘མཱ བྷཱཡི, ཝིསྶཏྠོ ཀཐཡཱཧི, མཡཾ ཏེ ཨུཔཏྠམྦྷཱ བྷཝིསྶཱམཱ’’ཏི ཝཏྭཱཔི ཨནུཡོགཝཏྟཾ ཀཐཱཔེཏབྦོ. ཙཎྜོ ནིསེདྷེཏབྦོཏི ཨཔསཱརེཏབྦོ ཏཛྫེཏབྦོ. ཨསུཙི ཝིབྷཱཝེཏབྦོཏི ཨལཛྫིཾ པཀཱསེཏྭཱ ཨཱཔཏྟིཾ དེསཱཔེཏབྦོ. ཨུཛུམདྡཝེནཱཏི ཡོ བྷིཀྑུ ཨུཛུ སཱིལཝཱ ཀཱཡཝངྐཱདིརཧིཏོ, སོ མདྡཝེནེཝ ཨུཔཙརིཏབྦོ. དྷམྨེསུ ཙ པུགྒལེསུ ཙཱཏི ཨེཏྠ ཡོ དྷམྨགརུཀོ ཧོཏི, ན པུགྒལགརུཀོ, ཨཡམེཝ དྷམྨེསུ ཙ པུགྒལེསུ ཙ མཛ྄ཛྷཏྟོཏི ཝེདིཏབྦོ. སེསཾ སུཝིཉྙེཡྻམེཝ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཙོདནཱདིཝིནིཙྪཡཀཐཱལངྐཱརོ ནཱམ

ཨེཀཏིཾསཏིམོ པརིཙྪེདོ.

༣༢. གརུཀཱཔཏྟིཝུཊྛཱནཝིནིཙྪཡཀཐཱ

པཊིཙྪནྣཔརིཝཱསཀཐཱ

༢༣༦. ཨེཝཾ ¶ ཙོདནཱདིཝིནིཙྪཡཾ ཀཐེཏྭཱ ཨིདཱནི གརུཀཱཔཏྟིཝུཊྛཱནཝིནིཙྪཡཾ ཀཐེཏུཾ ‘‘གརུཀཱཔཏྟིཝུཊྛཱན’’ནྟིཨཱདིམཱཧ. ཏཏྠ གརུ ཨལཧུཀཾ པཊིཀརཎཾ ཨེཏིསྶཱ ཨཱཔཏྟིཡཱཏི གརུཀཱ, ཨཱཔཛྫིཏབྦཱཏི ཨཱཔཏྟི, གརུཀཱ ཙ སཱ ཨཱཔཏྟི ¶ ཙཱཏི གརུཀཱཔཏྟི, ཝུཊྛཧཏེ ཝུཊྛཱནཾ, གརུཀཱཔཏྟིཡཱ ཝུཊྛཱནཾ གརུཀཱཔཏྟི ཝུཊྛཱནཾ. ཀིཾ ཏཾ? སངྒྷཱདིསེསཱཔཏྟིཏོ པརིསུདྡྷབྷཱཝོ. ཏེནཱཧ ‘‘པརིཝཱསམཱནཏྟཱདཱིཧི ཝིནཡཀམྨེཧི གརུཀཱཔཏྟིཏོ ཝུཊྛཱན’’ནྟི. ཀིཉྩཱཔི ཙཏུབྦིདྷོ པརིཝཱསོ, ཨཔྤཊིཙྪནྣཔརིཝཱསོ པན ཨིདྷ ནཱདྷིཔྤེཏོཏི ཨཱཧ ‘‘ཏིཝིདྷོ པརིཝཱསོ’’ཏི. ཏཐཱ ཧི ཝུཏྟཾ སམནྟཔཱསཱདིཀཱཡཾ (ཙཱུལ༹ཝ. ཨཊྛ. ༧༥) ‘‘ཏཏྠ ཙཏུབྦིདྷོ པརིཝཱསོ – ཨཔྤཊིཙྪནྣཔརིཝཱསོ པཊིཙྪནྣཔརིཝཱསོ སུདྡྷནྟཔརིཝཱསོ སམོདྷཱནཔརིཝཱསོཏི. ཏེསུ ‘ཡོ སོ, བྷིཀྑཝེ, ཨཉྙོཔི ཨཉྙཏིཏྠིཡཔུབྦོ ཨིམསྨིཾ དྷམྨཝིནཡེ ཨཱཀངྑཏི པབྦཛྫཾ, ཨཱཀངྑཏི ཨུཔསམྤདཾ, ཏསྶ ཙཏྟཱརོ མཱསེ པརིཝཱསོ དཱཏབྦོ’ཏི ཨེཝཾ མཧཱཁནྡྷཀེ (མཧཱཝ. ༨༦) ཝུཏྟོ ཏིཏྠིཡཔརིཝཱསོ ཨཔྤཊིཙྪནྣཔརིཝཱསོ ནཱམ. ཏཏྠ ཡཾ ཝཏྟབྦཾ, ཏཾ ཝུཏྟམེཝ. ཨཡཾ པན ཨིདྷ ཨནདྷིཔྤེཏོ’’ཏི. ཨིཏོ པརཾ ཨཊྛཀཐཱཡཾ ཝུཏྟནཡེནེཝ སུཝིཉྙེཡྻོཏི ཏསྨཱ དུབྦིཉྙེཡྻཊྛཱནེཡེཝ ཝཎྞཡིསྶཱམ.

༢༣༧. ཨེཝཾ ཡོ ཡོ ཨཱཔནྣོ ཧོཏི, ཏསྶ ཏསྶ ནཱམཾ གཧེཏྭཱ ཀམྨཝཱཙཱ ཀཱཏབྦཱཏི ཨེཏེན པཱལི༹ཡཾ སབྦསཱདྷཱརཎཝསེན ‘‘སུཎཱཏུ མེ, བྷནྟེ, སངྒྷོ, ཨཡཾ ཨིཏྠནྣཱམོ བྷིཀྑཱུ’’ཏི ཙ ‘‘ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམསྶ བྷིཀྑུནོ’’ཏི ཙ ཨཱགཏེཔི ཀམྨཝཱཙཱབྷཎནཀཱལེ ཏཐཱ ཨབྷཎིཏྭཱ ‘‘ཨཡཾ བུདྡྷརཀྑིཏོ བྷིཀྑཱུ’’ཏི ཙ ‘‘ཨིམསྶ བུདྡྷརཀྑིཏསྶ བྷིཀྑུནོ’’ཏི ཙ ཨེཝཾ སཀསཀནཱམཾ ཨུདྡྷརིཏྭཱཝ ཀམྨཝཱཙཱ ཀཱཏབྦཱཏི དསྶེཏི.

མཱལ༹ཀསཱིམཱཡམེཝ ཝཏྟཾ སམཱདཱཏབྦཾ, ན ཏཏོ བཧི. ཀསྨཱ? ‘‘ཨཉྙཏྠ ཀམྨཝཱཙཱ ཨཉྙཏྠ སམཱདཱན’’ནྟི ཝཏྟབྦདོསཔྤསངྒཏོ. ཨསམཱདིནྣཝཏྟསྶ ཨཱརོཙནཱསམྦྷཝཏོ, མཱལ༹ཀསཱིམཱཡ ¶ སནྣིཔཏིཏཱནཾ བྷིཀྑཱུནཾ ཨེཀསྶཔི ཨནཱརོཙནེ སཏི རཏྟིཙྪེདསམྦྷཝཏོ ཙ. པརིཝཱསཾ སམཱདིཡཱམི, ཝཏྟཾ སམཱདིཡཱམཱིཏི ཨིམེསུ དྭཱིསུ པདེསུ ཨེཀེཀེན ཝཱ ཨུབྷོཧི པདེཧི ཝཱ ¶ སམཱདཱཏབྦཾ. ཀཐཾ ཝིཉྙཱཡཏཱིཏི ཙེ? ‘‘ཨེཀཔདེནཔི ཙེཏྠ ནིཀྑིཏྟོ ཧོཏི པརིཝཱསོ, དྭཱིཧི པན སུནིཀྑིཏྟོཡེཝ, སམཱདཱནེཔི ཨེསེཝ ནཡོ’’ཏི ཝཀྑམཱནཏྟཱ. སམཱདིཡིཏྭཱ ཏཏྠེཝ སངྒྷསྶ ཨཱརོཙེཏབྦཾ, ན ཏཏྠ ཨནཱརོཙེཏྭཱ ཨཉྙཏྠ གནྟབྦཾ. ཀསྨཱ? ཝུཊྛིཏཱཡ པརིསཱཡ པུན སནྣིཔཱཏེཏུཾ དུཀྐརཏྟཱ, ཨེཀསྶཔི བྷིཀྑུནོ ཨནཱརོཙེཏྭཱ ཨརུཎུཊྛཱཔནེ སཏི རཏྟིཙྪེདཀརཏྟཱ.

ཨཱརོཙེནྟེན ཨེཝཾ ཨཱརོཙེཏབྦནྟི སམྦནྡྷོ. ‘‘ཨཧཾ བྷནྟེ…པེ… སངྒྷོ དྷཱརེཏཱུ’’ཏི ཨེཏྟཀམེཝ ཝཏྭཱ ཡཱཙནེ ཝིཡ ‘‘དུཏིཡམྤི ཏཏིཡམྤཱི’’ཏི ཨཝུཏྟཏྟཱ ཨཙྩཱཡིཀཀརཎེ སཏི ཨེཀཝཱརཾ ཨཱརོཙིཏེཔི ཨུཔཔནྣམེཝཱཏི དཊྛབྦཾ. ཝེདིཡཱམཧཾ བྷནྟེ, ཝེདིཡཏཱིཏི མཾ སངྒྷོ དྷཱརེཏཱུཏི ཨེཏྠ ‘‘ཝེདིཡཱམཱིཏི ཙིཏྟེན སམྤཊིཙྪིཏྭཱ སུཁཾ ཨནུབྷཝཱམི, ན ཏཔྤཙྩཡཱ ཨཧཾ དུཀྑིཏོཏི ཨདྷིཔྤཱཡོ’’ཏི སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༩༧) ཝུཏྟཾ. ཨེཏྠ ཙ ‘‘སུཁཾ ཝེདེམི ཝེདན’’ནྟིཨཱདཱིསུ ཝིཡ པི-སདྡོ ཨནུབྷཝནཏྠོ ཧོཏི. ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༩༧) པན ‘‘ཝེདིཡཱམཱིཏི ཛཱནེམི, ཙིཏྟེན སམྤཊིཙྪིཏྭཱ སུཁཾ ཨནུབྷཝཱམི, ན ཏཔྤཙྩཡཱ ཨཧཾ དུཀྑིཏོཏི ཨདྷིཔྤཱཡོཏི ལིཁིཏ’’ནྟི ཝུཏྟཾ. ཨེཏྠ པན ‘‘དཱིཔངྐརོ ལོཀཝིདཱུ’’ཏིཨཱདཱིསུ ཝིཡ ཉཱཎཏྠོ ཨནུབྷཝནཏྠོ ཙ. ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༩༧) པན ‘‘ཝེདིཡཱམཧནྟི ཛཱནཱཔེམཧཾ, ཨཱརོཙེམཱིཏི ཨཏྠོ, ཨནུབྷཝཱམཱིཏིཔིསྶ ཨཏྠཾ ཝདནྟི. པུརིམཾ པན པསཾསནྟི ཨཱརོཙནཝཙནཏྟཱ’’ཏི. ཨེཏྠ ཏུ –

‘‘སམྤནྣཾ ¶ སཱལིཀེདཱརཾ, སུཝཱ ཁཱདནྟི བྲཱཧྨཎ;

པཊིཝེདེམི ཏེ བྲཧྨེ, ན ནཾ ཝཱརེཏུམུསྶཧེ’’ཏི. –

ཨཱདཱིསུ ཝིཡ ཨཱརོཙནཏྠོཏི དཊྛབྦོ.

ཨཱརོཙེཏྭཱ…པེ… ནིཀྑིཔིཏབྦནྟི དུཀྐཊཔརིམོཙནཏྠཾ ཝུཏྟཾ. ཀེཙི པན ‘‘ཏདཧེཝ པུན ཝཏྟཾ སམཱདིཡིཏྭཱ ཨརུཎཾ ཨུཊྛཱཔེཏུཀཱམསྶ རཏྟིཙྪེདཔརིཧཱརཏྠམྤཱི’’ཏི ཝདནྟི. ཡསྶ མཱལ༹ཀེ ནཱརོཙིཏཾ, ཏསྶ ཨཱརོཙེཏྭཱ ནིཀྑིཔིཏབྦཾ. ཡསྶ ཨཱརོཙིཏཾ, ཏསྶ པུན ཨཱརོཙནཀིཙྩཾ ནཏྠི, ཀེཝལཾ ནིཀྑིཔིཏབྦམེཝ. ‘‘སབྷཱགཱ བྷིཀྑཱུ ཝསནྟཱི’’ཏི ཝུཏྟཏྟཱ ཝིསབྷཱགཱནཾ ཝསནཊྛཱནེ ཝཏྟཾ ཨསམཱདིཡིཏྭཱ བཧི ཨེཝ ཀཱཏུམྤི ཝཊྚཏཱིཏི དཊྛབྦཾ. དྭེ ལེཌྜུཔཱཏེ ¶ ཨཏིཀྐམིཏྭཱཏི ཨིདཾ ཝིཧཱརེ བྷིཀྑཱུནཾ སཛ྄ཛྷཱཡཱདིསདྡསཝནཱུཔཙཱརཝིཛཧནཏྠཾ ཝུཏྟཾ, མཧཱམགྒཏོ ཨོཀྐམྨཱཏི ཨིདཾ མགྒཔཊིཔནྣཱནཾ བྷིཀྑཱུནཾ སཝནཱུཔཙཱརཱཏིཀྐམནཏྠཾ, གུམྦེན ཝཱཏིཨཱདི དསྶནཱུཔཙཱརཝིཛཧནཏྠཾ. སོཔི ཀེནཙི ཀམྨེན པུརེཨརུཎེ ཨེཝ གཙྪཏཱིཏི ཨིམིནཱ ཨཱརོཙནཱཡ ཀཏཱཡ སབྦེསུ བྷིཀྑཱུསུ བཧིཝིཧཱརཾ གཏེསུཔི ཨཱུནེགཎེཙརཎདོསོ ཝཱ ཝིཔྤཝཱསདོསོ ཝཱ ན ཧོཏི ཨཱརོཙནཏྠཏྟཱ སཧཝཱསསྶཱཏི དསྶེཏི. ཏེནཱཧ ‘‘ཨཡཉྩཱ’’ཏིཨཱདི. ཨནིཀྑིཏྟཝཏྟེན ཨནྟོཨུཔཙཱརགཏཱནཾ སབྦེསམྤི ཨཱརོཙེཏབྦཱ. ‘‘ཨཡཾ ནིཀྑིཏྟཝཏྟསྶ པརིཧཱརོ’’ཏི ཝུཏྟཾ, ཏཏྠ ནིཀྑིཏྟཝཏྟསྶཱཏི ཝཏྟཾ ནིཀྑིཔིཏྭཱ པརིཝསནྟསྶཱཏི ཨཏྠོ. ཨཡཾ པནེཏྠ ཐེརསྶ ཨདྷིཔྤཱཡོ – ཝཏྟཾ ནིཀྑིཔིཏྭཱ པརིཝསནྟསྶ ཨུཔཙཱརགཏཱནཾ སབྦེསཾ ཨཱརོཙནཀིཙྩཾ ནཏྠི, དིཊྛརཱུཔཱནཾ སུཏསདྡཱནཾ ཨཱརོཙེཏབྦཾ, ཨདིཊྛཨསུཏཱནམྤི ཨནྟོདྭཱདསཧཏྠགཏཱནཾ ཨཱརོཙེཏབྦཾ. ཨིདཾ ཝཏྟཾ ནིཀྑིཔིཏྭཱ པརིཝསནྟསྶ ལཀྑཎནྟི. ཐེརསྶཱཏི མཧཱཔདུམཏྠེརསྶ.

༢༣༨. ཀུཀྐུཙྩཝིནོདནཏྠཱཡཱཏི ཨིམེསུ པཊིཙྪནྣདིཝསཔྤམཱཎེན པརིཝསིཏདིཝསེསུ ‘‘སིཡུཾ ནུ ཁོ ཏིཝིདྷརཏྟིཙྪེདཀཱརཎཡུཏྟཱནི ¶ ཀཱནིཙི དིཝསཱནི, ཨེཝཾ སཏི ཨཔརིཔུཎྞཔརིཝཱསདིཝསཏྟཱ ན མཱནཏྟཱརཧོ བྷཝེཡྻ, ཨསཏི ཙ མཱནཏྟཱརཧབྷཱཝེ མཱནཏྟཾ དིནྣམྤི ཨདིནྣཾཡེཝ བྷཝེཡྻ, ཨེཝཉྩ སཏི ཨཱཔནྣཱཔཏྟིཏོ ཝུཊྛཱནཾ ན བྷཝེཡྻཱ’’ཏི ཨིམསྶ ཝིནཡཀུཀྐུཙྩསྶ ཝིནོདནཏྠཱཡ. ཨེཀེན ཝཱ དྭཱིཧི ཝཱ ཏཱིཧི ཝཱ དིཝསེཧི ཨདྷིཀཏརཱནི དིཝསཱནི པརིཝསིཏྭཱ ནནུ ཙཱཡཾ པརིཝུཏྠཔརིཝཱསོ, ཏསྨཱནེན མཱནཏྟམེཝ ཡཱཙིཏབྦཾ, ཨཐ ཀསྨཱ ཝཏྟཾ སམཱདིཡིཏྭཱ མཱནཏྟཾ ཡཱཙིཏབྦནྟི ཨཱཧཱཏི ཙོདནཾ མནསི ཀརོནྟེན ཝུཏྟཾ ‘‘ཨཡཉྷི ཝཏྟེ སམཱདིནྣེ’’ཏིཨཱདི. ཧི ཡསྨཱ ཨཡཾ བྷིཀྑུ ཝཏྟེ སམཱདིནྣེ ཨེཝ མཱནཏྟཱརཧོ ཧོཏི, ན ཨསམཱདིནྣེ, ཨིཏི ཏསྨཱ ཝཏྟཾ སམཱདིཡིཏྭཱ མཱནཏྟཾ ཡཱཙིཏབྦནྟི སམྦནྡྷོ. ནནུ ཙ ཀམྨཝཱཙཱཡཾ ‘‘སོ པརིཝུཏྠཔརིཝཱསོ སངྒྷཾ མཱནཏྟཾ ཡཱཙཏི’’ཨིཙྩེཝ ཝུཏྟཾ, ན ཝུཏྟཾ ‘‘སམཱདིནྣཝཏྟོ’’ཏི, ཨཐ ཀསྨཱ ‘‘ཝཏྟེ སམཱདིནྣེ ཨེཝ མཱནཏྟཱརཧོ ཧོཏཱི’’ཏི ཝུཏྟནྟི ཙོདནཾ སནྡྷཱཡཱཧ ‘‘ནིཀྑིཏྟཝཏྟེན པརིཝུཏྠཏྟཱ’’ཏི. ཡསྨཱ ཨཡཾ བྷིཀྑུ ནིཀྑིཏྟཝཏྟེན ཧུཏྭཱ པརིཝུཏྠོ ཧོཏི, ནོ ཨནིཀྑིཏྟཝཏྟེན, ཏསྨཱ ནིཀྑིཏྟཝཏྟེན ཧུཏྭཱ པརིཝུཏྠཏྟཱ ཨཡཾ བྷིཀྑུ ཝཏྟེ སམཱདིནྣེ ཨེཝ མཱནཏྟཱརཧོ ཧོཏི, ནོ ཨསམཱདིནྣེཏི ཡོཛནཱ. ཏཐཱ ཧི ཝུཏྟཾ ‘‘ཨནིཀྑིཏྟཝཏྟསྶ པན པུན སམཱདཱནཀིཙྩཾ ནཏྠི. སོ ཧི པཊིཙྪནྣདིཝསཱཏིཀྐམེནེཝ མཱནཏྟཱརཧོ ཧོཏི, ཏསྨཱ ཏསྶ མཱནཏྟཾ དཱཏབྦམེཝཱ’’ཏི.

ཙཏཱུཧི ¶ པཉྩཧི ཝཱ བྷིཀྑཱུཧི སདྡྷིནྟི ཨཱུནེགཎེཙརཎདོསཱ ཝིམུཙྩནཏྠཾ. པརིཀྑིཏྟསྶ ཝིཧཱརསྶ པརིཀྑེཔཏོཏིཨཱདི ཀིཉྩཱཔི པཱལི༹ཡཾ ནཏྠི, ཨཐ ཁོ ཨཊྛཀཐཱཙརིཡཱནཾ ཝཙནེན ཏཐཱ ཨེཝ པཊིཔཛྫིཏབྦནྟི ཙ ཝུཏྟཾ. ‘‘ཨཏྠིབྷཱཝཾ སལླཀྑེཏྭཱཏི དྭཱདསཧཏྠེ ཨུཔཙཱརེ སལླཀྑེཏྭཱ, ཨནིཀྑིཏྟཝཏྟཱནཾ ཨུཔཙཱརསཱིམཱཡ ཨཱགཏབྷཱཝཾ སལླཀྑེཏྭཱ ¶ སཧཝཱསཱདིཀཾ ཝེདིཏབྦནྟི ཙ ཝུཏྟཾ. ‘ནིཀྑིཔནྟེན ཨཱརོཙེཏྭཱ ནིཀྑིཔིཏབྦཾ པཡོཛནཾ ཨཏྠཱི’ཏི ཙ ཝུཏྟཾ, ན པན ཏཾ པཡོཛནཾ དསྶིཏ’’ནྟི ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༩༧) ཝུཏྟཾ, ཝཏྟབྷེདདུཀྐཊཱ མུཙྩནཔཡོཛནཾ ཧོཏཱིཏི ཝེདིཏབྦཾ.

༢༣༩. ཨབྦྷཱནཾ ཀཱཏུཾ ན ཝཊྚཏཱིཏི ཀཏམྤི ཨཀཏམེཝ ཧོཏཱིཏི ཨཏྠོ. ‘‘ཏེནཱཔི ཝཏྟཾ སམཱདིཡིཏྭཱ ཨཱརོཙེཏྭཱ ཨབྦྷཱནཾ ཡཱཙིཏབྦ’’ནྟི ཝུཏྟཏྟཱ ཨབྦྷཱནཡཱཙནཏྠཾ མཱནཏྟསྶ སམཱདིཡནཀཱལེཔི ཨཱརོཙེཏབྦམེཝ. པུབྦེ མཱནཏྟཙཱརིཏཀཱལེ ཨཱརོཙིཏམེཝཱཏི ཨནཱརོཙེཏྭཱ ཨབྦྷཱནཾ ན ཡཱཙིཏབྦནྟི ཝིཉྙཱཡཏི. ཨེཝཾ མཱནཏྟཡཱཙནཀཱལེཔི པརིཝཱསཾ སམཱདིཡིཏྭཱ ཨཱརོཙེཏབྦམེཝཱཏི དཊྛབྦཾ.

༢༤༠. ཙིཎྞམཱནཏྟོ བྷིཀྑུ ཨབྦྷེཏབྦོཏི ཙིཎྞམཱནཏྟསྶ ཙ ཨབྦྷཱནཱརཧསྶ ཙ ནིནྣཱནཱཀརཎཏྟཱ ཝུཏྟཾ. ཨཉྙཐཱ ‘‘ཨབྦྷཱནཱརཧོ ཨབྦྷེཏབྦོ’’ཏི ཝཏྟབྦཾ སིཡཱ. ཨུཀྑེཔནཱིཡཀམྨཀཏོཔི ཨཏྟནོ ལདྡྷིགྒཧཎཝསེན སབྷཱགབྷིཀྑུམྷི སཏི ཏསྶ ཨནཱརོཙཱཔེཏུཾ ན ལབྷཏི.

‘‘ཨནནྟརཱཡིཀསྶ པན ཨནྟརཱཡིཀསཉྙཱཡ ཚཱདཡཏོ ཨཙྪནྣཱཝཱ’’ཏི པཱཋོ. ཨཝེརིབྷཱཝེན སབྷཱགོ ཨཝེརིསབྷཱགོ. ‘‘སབྷཱགསངྒྷཱདིསེསཾ ཨཱཔནྣསྶ པན སནྟིཀེ ཨཱཝི ཀཱཏུཾ ན ཝཊྚཏཱི’’ཏི པསངྒཏོ ཨིདྷེཝ པཀཱསིཏཾ. ལཧུཀེསུ པཊིཀྑེཔོ ནཏྠི. ཏཏྠ ཉཏྟིཡཱ ཨཱཝི ཀཏྭཱ ཨུཔོསཐཾ ཀཱཏུཾ ཨནུཉྙཱཏཏྟཱ ལཧུཀསབྷཱགཾ ཨཱཝི ཀཱཏུཾ ཝཊྚཏཱིཏི. སབྷཱགསངྒྷཱདིསེསཾ པན ཉཏྟིཡཱ ཨཱརོཙནཾ ན ཝཊྚཏཱིཏི ཀིར. ‘‘ཏསྶ སནྟིཀེ ཏཾ ཨཱཔཏྟིཾ པཊིཀརིསྶཏཱིཏི (མཧཱཝ. ༡༧༡) ཝུཏྟཏྟཱ ལཧུཀསྶེཝཱཡཾ སམནུཉྙཱཏཱ. ན ཧི སཀྐཱ སུདྡྷསྶ ཨེཀསྶ སནྟིཀེ སངྒྷཱདིསེསསྶ ¶ པཊིཀརཎཾ ཀཱཏུ’’ནྟི ལིཁིཏཾ. ལཧུཀེསུཔི སབྷཱགཾ ཨཱཝི ཀཱཏུཾ ན ཝཊྚཏཱིཏི. ཏསྨཱ ཨེཝ ཧི ཉཏྟིཡཱ ཨཱཝིཀརཎཾ ཨནུཉྙཱཏཾ, ཨིཏརཐཱ ཏཾ ནིརཏྠཀཾ སིཡཱ. ཨཉྙམཉྙཱརོཙནསྶ ཝཊྚཏི, ཏཏོ ན ཝཊྚཏཱིཏི དཱིཔནཏྠམེཝ ཉཏྟིཡཱ ཨཱཝིཀརཎམནུཉྙཱཏཾ ¶ , ཏེནེཝ ཨིདྷ ‘‘སབྷཱགསངྒྷཱདིསེསཾ ཨཱཔནྣསྶཱ’’ཏིཨཱདི ཝུཏྟཾ, ཨཡམཏྠོ ‘‘ཨེཏྟཱཝཏཱ ཏེ དྭེ ནིརཱཔཏྟིཀཱ ཧོནྟི, ཏེསཾ སནྟིཀེ སེསེཧི སབྷཱགཱཔཏྟིཡོ དེསེཏབྦཱ’’ཏི ཝཙནེན ཀངྑཱཝིཏརཎིཡམྤི (ཀངྑཱ. ཨཊྛ. ནིདཱནཝཎྞནཱ) པཀཱསིཏོཝ. སངྒྷཱདིསེསཾ པན ཉཏྟིཡཱ ཨཱརོཙེཏྭཱ ཨུཔོསཐཾ ཀཱཏུཾ ཝཊྚཏི. ཏསྶཱ ཉཏྟིཡཱ ཨཡམཏྠོ – ཡདཱ སུདྡྷཾ བྷིཀྑུཾ པསྶིསྶཏི, ཏསྶ སནྟིཀེ ཨཉྙམཉྙཱརོཙནཝསེན པཊིཀརིསྶཏི, ཨེཝཾ པཊིཀཏེ ‘‘ན ཙ, བྷིཀྑཝེ, སཱཔཏྟིཀེན པཱཏིམོཀྑཾ སོཏབྦཾ, ཡོ སུཎེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༣༨༦) ཝུཏྟཱཔཏྟིཏོ མོཀྑོ ཧོཏི, ཏསྨཱ ‘‘གརུཀཾ ཝཱ ཧོཏུ ལཧུཀཾ ཝཱ, ཉཏྟིཡཱ ཨཱཝི ཀཱཏུཾ ཝཊྚཏཱི’’ཏི ཝུཏྟཾ. ཨུབྷོསུ ནཡེསུ ཡུཏྟཏརཾ གཧེཏབྦཾ. ‘‘ནཱམཉྩེཝ ཨཱཔཏྟི ཙཱཏི ཏེན ཏེན ཝཱིཏིཀྐམེནཱཔནྣཱཔཏྟི ཨཱཔཏྟི. ནཱམནྟི ཏསྶཱ ཨཱཔཏྟིཡཱ ནཱམ’’ནྟི ལིཁིཏཾ. ཨཱརོཙེཏྭཱ ནིཀྑིཔིཏབྦནྟི ཨེཏྠ ཨཱརོཙནཾ ཝཏྟབྷེདདུཀྐཊཔརིཧརཎཔྤཡོཛནནྟི ཝེདིཏབྦཾ.

‘‘སཏིཡེཝ ཨནྟརཱཡེ ཨནྟརཱཡིཀསཉྙཱི ཚཱདེཏི, ཨཙྪནྣཱ ཧོཏི. ཨནྟརཱཡིཀསྶ པན ཨནྟརཱཡིཀསཉྙཱཡ ཝཱ ཨནནྟརཱཡིཀསཉྙཱཡ ཝཱ ཚཱདཡཏོ ཨཙྪནྣཱཝཱ’’ཏིཔི པཱཋོ. ཨཝེརཱིཏི ཧིཏཀཱམོ. ཨུདྡྷསྟེ ཨརུཎེཏི ཨུཊྛིཏེ ཨརུཎེ. སུདྡྷསྶ སནྟིཀེཏི སབྷཱགསངྒྷཱདིསེསཾ ཨནཱཔནྣསྶ སནྟིཀེ. ཝཏྠུནྟི ཨསུཙིམོཙནཱདིཝཱིཏིཀྐམཾ. སུཀྐཝིསྶཊྛཱིཏི ཝཏྠུ ཙེཝ གོཏྟཉྩཱཏི ‘‘སུཀྐཝིསྶཊྛཱི’’ཏི ཨིདཾ ཨསུཙིམོཙནལཀྑཎསྶ ཝཱིཏིཀྐམསྶ པཀཱསནཏོ ¶ ཝཏྠུ ཙེཝ ཧོཏི, སཛཱཏིཡསཱདྷཱརཎཝིཛཱཏིཡཝིནིཝཏྟསབྷཱཝཱཡ སུཀྐཝིསྶཊྛིཡཱ ཨེཝ པཀཱསནཏོ གོཏྟཉྩ ཧོཏཱིཏི ཨཏྠོ. གཾ ཏཱཡཏཱིཏི ཧི གོཏྟཾ. སངྒྷཱདིསེསོཏི ནཱམཉྩེཝ ཨཱཔཏྟི ཙཱཏི སངྒྷཱདིསེསོཏི ཏེན ཏེན ཝཱིཏིཀྐམེན ཨཱཔནྣསྶ ཨཱཔཏྟིནིཀཱཡསྶ ནཱམཔཀཱསནཏོ ནཱམཉྩེཝ ཧོཏི, ཨཱཔཏྟིསབྷཱཝཏོ ཨཱཔཏྟི ཙ.

སུདྡྷསྶཱཏི སབྷཱགསངྒྷཱདིསེསཾ ཨནཱཔནྣསྶ, ཏཏོ ཝུཊྛིཏསྶ ཝཱ. ཨཉྙསྨིནྟི སུདྡྷནྟཔརིཝཱསཝསེན ཨཱཔཏྟིཝུཊྛཱནཏོ ཨཉྙསྨིཾ ཨཱཔཏྟིཝུཊྛཱནེ. པཊིཙྪཱདིཡིཏྠཱཏི པཊིཙྪནྣཱ. ཀཱ སཱ? ཨཱཔཏྟི. དིཝསཱདཱིཧི པརིཙྪིནྡིཏྭཱ ཝསནཾ པརིཝཱསོ. ཀོ སོ? ཝིནཡཀམྨཀརཎཾ. པཊིཙྪནྣཱཡ ཨཱཔཏྟིཡཱ པརིཝཱསོ པཊིཙྪནྣཔརིཝཱསོ.

པཊིཙྪནྣཔརིཝཱསཀཐཱ ནིཊྛིཏཱ.

སུདྡྷནྟཔརིཝཱསཀཐཱ

༢༤༢. སུཛ྄ཛྷནཾ ¶ སུདྡྷོ, ཀོ སོ? ཨཱཔཏྟིཝིགམོ. ཨམཏི ཨོསཱནབྷཱཝཾ གཙྪཏཱིཏི ཨནྟོ, སུདྡྷོ ཨནྟོ ཡསྶ པརིཝཱསསྶཱཏི སུདྡྷནྟོ, སུདྡྷནྟོ ཙ སོ པརིཝཱསོ ཙཱཏི སུདྡྷནྟཔརིཝཱསོ, སུདྡྷཀཱལཾ པརིཡནྟཾ ཀཏྭཱ ཨསུདྡྷཀཱལཔྤམཱཎེན པརིཙྪིནྡིཏྭཱ ཀཏཔརིཝཱསོ.

སུདྡྷནྟཔརིཝཱསཀཐཱ ནིཊྛིཏཱ.

ཨོདྷཱནསམོདྷཱནཔརིཝཱསཀཐཱ

༢༤༣. སམོདྷཱིཡཏེ སམོདྷཱནཾ, ནཱནཱཀཱལིཀཱ ནཱནཱཝཏྠུཀཱ ཨཱཔཏྟིཡོ ཨགྒྷཱདིཝསེན སམོདྷཱནཾ ཨེཀཱིཀརཎཾ ¶ , སམོདྷཱནེཏྭཱ ཀཏོ པརིཝཱསོ སམོདྷཱནཔརིཝཱསོཏི ཝིགྒཧོ. ཀམྨཝཱཙཱཡཾ ‘‘པཊིཀསྶིཏོ སངྒྷེན ཨིཏྠནྣཱམོ བྷིཀྑུ ཨནྟརཱ སམྦཧུལཱནཾ ཨཱཔཏྟཱིནཾ ཨཔྤཊིཙྪནྣཱནཾ མཱུལཱཡཔཊིཀསྶནཱ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི ཨེཏྠ གཏྱཏྠདྷཱཏུཡཱ ཀམྨནི ཙ ནཡནཏྠདྷཱཏུཡཱ ཀམྨནི ཙ ཏདཏྠསམྤདཱནེ ཙ ཝིབྷཏྟིཔརིཎཱམེ ཙཱཏི ཨིམེསུ ཙཏཱུསུ ཋཱནེསུ ཨཱཡཱདེསསྶ ཝུཏྟཏྟཱ, པཊིཔུབྦཀསདྷཱཏུཡཱ ཙ ནཡནཏྠཏྟཱ ‘‘མཱུལཱཡཱ’’ཏི ཨིདཾ ‘‘པཊིཀསྶིཏོ’’ཏི ཨེཏྠ ཀམྨཾ, ཏསྨཱ ‘‘པཊིཀསྶིཏོ…པེ… མཱུལཱཡ’’ ཨིཏི ཨེཏྟཀམེཝ བྷཝིཏབྦཾ, ན ‘‘མཱུལཱཡཔཊིཀསྶནཱ’’ཏི ཨེཝཾ མཉྙམཱནཱ སདྡཝིདུནོ ‘‘པཊིཀསྶནཱ’’ཏི ཨིདཾ ཨདྷིཀནྟི ཝཱ ཝདེཡྻུཾ མཀྑེཡྻུཾ ཝཱ, ན པནེཏཾ ཝཏྟབྦཾ. ནཝཔཱཋེསུཡེཝ ཨཡཾ པཱཋོ སདྡལཀྑཎཡུཏྟོ ཝཱ ཨཡུཏྟོ ཝཱཏི ཙིནྟེཏབྦོ, ན པན པཱལི༹ཡཊྛཀཐཱདིཏོ ཨཱགཏེསུ པོརཱཎཔཱཋེསུ. ཏེསུ པན ཀཐཾ ཡོཛིཡམཱནོ ཨཡཾ པཱཋོ སདྡཡུཏྟིཡཱ ཙ ཨཏྠཡུཏྟིཡཱ ཙ སམནྣཱགཏོ བྷཝེཡྻཱཏི ཡོཛནཱཀཱརོཡེཝ ཙིནྟེཏབྦོ. ཨཡཉྩ པཱཋོ པོརཱཎཔཱལི༹པཱཋོཝ, ཏསྨཱ ‘‘མཱུལཱཡཔཊིཀསྶནཱ’’ཏི ཨིདཾ ཀརཎཝསེན ཝིཔརིཎཱམེཏྭཱ ‘‘མཱུལཱཡཔཊིཀསྶནཱཡ པཊིཀསྶིཏོ’’ཏི ཡོཛེཏབྦཾ.

ཀཐཾ པནེཏསྶ པོརཱཎཔཱཋབྷཱཝོ ཛཱནིཏབྦོཏི? པཀརཎེ ཨཱགཏཏྟཱ. ཝུཏྟཉྷི ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༡༠༢) ‘‘པཱལི༹ཡཾ པཊིཀསྶིཏོ སངྒྷེན ཨུདཱཡི བྷིཀྑུ ཨནྟརཱ ཨེཀིསྶཱ ཨཱཔཏྟིཡཱ…པེ… མཱུལཱཡཔཊིཀསྶནཱཏི ཨིདཾ ཀརཎཝསེན ཝིཔརིཎཱམེཏྭཱ ¶ མཱུལཱཡཔཊིཀསྶནཱཡ པཊིཀསྶིཏོཏི ཡོཛེཏབྦ’’ནྟི. ཨཐ ཝཱ ‘‘མཱུལཱཡ པཊིཀསྶནཱ མཱུལཱཡཔཊིཀསྶནཱ’’ཏི ཨལུཏྟསམཱསཝསེན ཨུཏྟརཔདེན སམཱསཾ ཀཏྭཱ སངྒྷེན ཨིཏྠནྣཱམོ བྷིཀྑུ ཨནྟརཱ སམྦཧུལཱནཾ ཨཱཔཏྟཱིནཾ ¶ ཨཔྤཊིཙྪནྣཱནཾ ཧེཏུ པཊིཀསྶིཏོ. སཱ མཱུལཱཡཔཊིཀསྶནཱ ཁམཏི སངྒྷསྶཱཏི ཡོཛེཏབྦཾ. ཏཐཱ ཧི ཝུཏྟཾ ཏཏྠེཝ (ཝི. ཝི. ཊཱི. ཙཱུལ༹ཝགྒ ༢.༡༠༢) ‘‘ཨཐ ཝཱ མཱུལཱཡཔཊིཀསྶནཱ ཁམཏི སངྒྷསྶཱཏི ཨུཏྟརཔདེན སཧ པཙྩཏྟཝསེནེཝ ཡོཛེཏུམྤི ཝཊྚཏཱི’’ཏི.

ཏཾ དེནྟེན པཋམཾ མཱུལཱཡ པཊིཀསྶིཏྭཱ པཙྪཱཔརིཝཱསོ དཱཏབྦོཏི ཨེཏྠ ཏཾ ཨོདྷཱནསམོདྷཱནཔརིཝཱསཾ དེནྟེན པཋམཾ ཏཾ བྷིཀྑུཾ མཱུལཱཡ པཊིཀསྶིཏྭཱ མཱུལདིཝསེ ཨཱཀཌྜྷིཏྭཱ ཏསྶ ཨནྟརཱཔཏྟིཡཱ སམོདྷཱནཔརིཝཱསོ དཱཏབྦོཏི ཨཏྠོ. ཡཐཱ ཀིཾ ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༡༠༢) ‘‘ཨུདཱཡིཾ བྷིཀྑུཾ ཨནྟརཱ ཨེཀིསྶཱ ཨཱཔཏྟིཡཱ…པེ… མཱུལཱཡ པཊིཀསྶིཏྭཱཏི ཨེཏྠ ཨནྟརཱ ཨེཀིསྶཱ ཨཱཔཏྟིཡཱ ཧེཏུབྷཱུཏཱཡ ཨུདཱཡིཾ བྷིཀྑུཾ མཱུལཱཡ པཊིཀསྶིཏྭཱ མཱུལདིཝསེ ཨཱཀཌྜྷིཏྭཱ ཏསྶཱ ཨནྟརཱཔཏྟིཡཱ སམོདྷཱནཔརིཝཱསཾ དེཏཱུཏི ཡོཛནཱ’’ཏི ཝུཏྟཾ. མཧཱསུམཏྠེརཝཱདེ ཨཱཝིཀཱརཱཔེཏྭཱ ཝིསྶཛྫེཏབྦོཏི ཏསྶ ཨཏེཀིཙྪབྷཱཝཾ ཏེནེཝ སངྒྷསྶ པཱཀཊཾ ཀཱརེཏྭཱ ལཛྫཱིགཎཏོ ཝིཡོཛནཝསེན ཝིསྶཛྫེཏབྦོཏི ཨཏྠོ.

ཨོདྷཱནསམོདྷཱནཔརིཝཱསཀཐཱ ནིཊྛིཏཱ.

ཨགྒྷསམོདྷཱནཔརིཝཱསཀཐཱ

༢༤༤. ཨགྒྷེན ཨགྒྷཝསེན ཨརཧཝསེན སམོདྷཱནཾ ཨགྒྷསམོདྷཱནཾ, ཨཱཔནྣཱསུ སམྦཧུལཱསུ ཨཱཔཏྟཱིསུ ཡཱ ཨཱཔཏྟིཡོ ཙིརཏརཔྤཊིཙྪནྣཱཡོ, ཏཱསཾ ཨགྒྷེན སམོདྷཱཡ ཏཱསཾ རཏྟིཔརིཙྪེདཝསེན ཨཝསེསཱནཾ ཨཱུནཏརཔྤཊིཙྪནྣཱནཾ ཨཱཔཏྟཱིནཾ པརིཝཱསོ དཱིཡཏི, ཨཡཾ ཝུཙྩཏི ཨགྒྷསམོདྷཱནོ ¶ . སཏཾ ཨཱཔཏྟིཡོཏི ཀཱཡསཾསགྒཱདིཝསེན ཨེཀདིཝསེ ཨཱཔནྣཱ སཏཾ ཨཱཔཏྟིཡོ. དསསཏནྟི སཧསྶཨཱཔཏྟིཡོ. རཏྟིསཏཾ ཚཱདཡིཏྭཱནཱཏི ཡོཛེཏབྦཾ. ‘‘ཨགྒྷསམོདྷཱནོ ནཱམ སབྷཱགཝཏྠུཀཱཡོ སམྦཧུལཱ ཨཱཔཏྟིཡོ ཨཱཔནྣསྶ བཧུརཏྟིཾ པཊིཙྪཱདིཏཱཔཏྟིཡཾ ནིཀྑིཔིཏྭཱ དཱཏབྦོ, ཨིཏརོ ནཱནཱཝཏྠུཀཱནཾ ཝསེནཱཏི ཨཡམེཏེསཾ ཝིསེསོ’’ཏི ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༡༠༢) ཝུཏྟཾ.

ཨགྒྷསམོདྷཱནཔརིཝཱསཀཐཱ ནིཊྛིཏཱ.

༢༤༦. ལིངྒཔརིཝཏྟནཀཀཐཱཡཾ ¶ ཡདི ཀསྶཙི བྷིཀྑུནོ ཨིཏྠིལིངྒཾ པཱཏུ བྷཝེཡྻ, ཀིཾ ཏེན པུན ཨུཔཛ྄ཛྷཱ གཧེཏབྦཱ, པུན ཨུཔསམྤདཱ ཀཱཏབྦཱ, ཀིཾ བྷིཀྑཱུཔསམྤདཱཏོ པཊྛཱཡ ཝསྶགཎནཱ ཀཱཏབྦཱ, ཨུདཱཧུ ཨིཏོ པཊྛཱཡཱཏི པུཙྪཱཡ སཏི ཏཾ པརིཧརིཏུམཱཧ ‘‘སཙེ’’ཏིཨཱདི. ཨེཝཾ སནྟེ སཱ བྷིཀྑུནཱི བྷིཀྑཱུནཾ མཛ྄ཛྷེཡེཝ ཝསིཏབྦཾ བྷཝེཡྻཱཏི ཙོདནཾ སནྡྷཱཡཱཧ ‘‘ཨཔྤཏིརཱུཔ’’ནྟིཨཱདི. ཨེཝཾ སནྟེ བྷིཀྑུབྷཱུཏཀཱལེ ཨཱཔཛྫིཏཱཔཏྟིཡོ ཀཐཾ ཀཱཏབྦཱཏི ཙོདནཾ མནསི ཀཏྭཱ ཨཱཧ ‘‘ཡཱ དེསནཱགཱམིནིཡོ ཝཱ’’ཏིཨཱདི. ཏཏྠ བྷིཀྑཱུནཾ བྷིཀྑུནཱིཧི སཱདྷཱརཎཱཏི སཉྩརིཏྟཱདཡོ. ཨསཱདྷཱརཎཱཏི སུཀྐཝིསྶཊྛིཨཱདཡོ. ཧོཏུ བྷགཝཏོ ཨནུཉྙཱཏཝསེན ལིངྒེ པརིཝཏྟེ ཨསཱདྷཱརཎཱཔཏྟཱིཧི ཝུཊྛིཏབྷཱཝོ, པུན པཀཏིལིངྒེ ཨུཔྤནྣེ པུན ཨཱཔཏྟི སིཡཱཏི ཨཱསངྐཾ པརིཧརིཏུཾ ‘‘པུན པཀཏིལིངྒེ’’ཏིཨཱདི ཝུཏྟཾ. ཨིདཱནི ཏམཏྠཾ པཱལི༹ཡཱ སཱདྷེཏུཾ ‘‘ཝུཏྟཉྩེཏ’’ནྟིཨཱདིམཱཧ. ཏསྶཏྠོ པཋམཔཱརཱཛིཀཝཎྞནཱཡ ཊཱིཀཱསུ (སཱརཏྠ. ཊཱི. ༢.༦༩; ཝཛིར. ཊཱི. པཱརཱཛིཀ ༦༩) ཝུཏྟནཡེནེཝ དཊྛབྦོ, ཨིདྷ པན གརུཀཱཔཏྟིཝུཊྛཱནཀཐཱབྷཱུཏཏྟཱ སཱཡེཝ ཀཐཱ ཝུཙྩཏེ.

༢༤༧. ཏཏྠ ¶ བྷིཀྑུནཱིཧི སཱདྷཱརཎཱཡ པཊིཙྪནྣཱཡ ཨཱཔཏྟིཡཱཏི སཉྩརིཏྟཱདིཨཱཔཏྟིཡཱ, ཧེཏྭཏྠེ ཙེཏཾ ཀརཎཝཙནཾ. པརིཝསནྟསྶཱཏི ཨནཱདརེ སཱམིཝཙནཾ. པཀྑམཱནཏྟམེཝ དཱཏབྦཾ, ན པུན པརིཝཱསོ དཱཏབྦོ བྷིཀྑུནིབྷཱཝེ ཨཔརིཝཱསཱརཧཏྟཱཏི ཨདྷིཔྤཱཡོ. མཱནཏྟཾ ཙརནྟསྶཱཏི ཨནཱདརེཡེཝ སཱམིཝཙནཾ, ཚཱརཏྟམཱནཏྟེ ཨཱཙིཎྞེཡེཝ པརིཝཏྟཏི, པུན པཀྑམཱནཏྟམེཝ དཱཏབྦནྟི. ཏེན ཝཀྑཏི ‘‘སཙེ ཙིཎྞམཱནཏྟསྶཱ’’ཏིཨཱདི. ཨཀུསལཝིཔཱཀེ པརིཀྑཱིཎེཏི པུརིསིནྡྲིཡསྶ ཨནྟརདྷཱནཾ སནྡྷཱཡ ཝུཏྟཾ. ཨིཏྠིནྡྲིཡཔཏིཊྛཱནཾ པན ཀུསལཝིཔཱཀམེཝ. ཝུཏྟཉྷི ཨཊྛཀཐཱཡཾ ‘‘ཨུབྷཡམྤི ཨཀུསལེན ཨནྟརདྷཱཡཏི, ཀུསལེན པཊིལབྦྷཏཱི’’ཏི. ཚཱརཏྟཾ མཱནཏྟམེཝ དཱཏབྦཾ, ན པརིཝཱསོ དཱཏབྦོ, ན ཝཱ པཀྑམཱནཏྟཾ དཱཏབྦཾ.

‘‘ཨཡཾ པན ཝིསེསོ’’ཏི ཝཏྭཱ ཏཾ ཝིསེསཾ དསྶེཏུམཱཧ ‘‘སཙེ’’ཏིཨཱདི. པརིཝཱསདཱནཾ ནཏྠི, ཚཱརཏྟཾ མཱནཏྟམེཝ དཱཏབྦཾ. ཀསྨཱ? བྷིཀྑུནིཀཱལེ པཊིཙྪནྣཏྟཱ. བྷིཀྑུཀཱལེ ཚནྣཱཡེཝ ཧི ཨཱཔཏྟི པརིཝཱསཱརཧཱ ཧོཏི, ནོ བྷིཀྑུནིཀཱལེཏི ཨཡམེཏཱསཾ ཝིསེསོ. པཀྑམཱནཏྟཾ ཙརནྟིཡཱཏི ཨནཱདརེ སཱམིཝཙནཾ, པཀྑམཱནཏྟེ ཨཱཙིཎྞེཡེཝཱཏི ཨཏྠོ. ཏཐཱ ཧི ཝཀྑཏི ‘‘ཙིཎྞམཱནཏྟཱཡཱ’’ཏིཨཱདི. ཚཱརཏྟཾ མཱནཏྟཾ ཙརནྟསྶཱཏིཨཱདི ཝུཏྟནཡམེཝ.

པརིཝཱསཝིནིཙྪཡཀཐཱ

ཨིདཱནི ¶ སངྒྷཱདིསེསཱཔཏྟི ཡསྨཱ སཱཝསེསགརུཀཱཔཏྟི ཧོཏི སཏེཀིཙྪཱ, ཏསྨཱ ཡཐཱ ནཱམ རོགཱཏུརོ པུགྒལོ ཀིཉྩི ཨཏྟནོ ཧིཏསུཁཀཱརཎཾ ཀཱཏུཾ ན སཀྐོཏི, ཏམེནཾ ཀཱརུཎིཀོ ཏིཀིཙྪཀོ ཀརུཎཱསཉྩོདིཏོ ཏིཀིཙྪཾ ཀཏྭཱ གེལཉྙཏོ ཝུཊྛཱཔེཏྭཱ ¶ ཧིཏསུཁཾ ཛནེཏི, ཨེཝཾ སངྒྷཱདིསེསཱཔཏྟིསམངྒཱི པུགྒལོ ཨཱཎཱཝཱིཏིཀྐམནྟརཱཡིཀབྷཱཝཏོ སགྒམོཀྑམགྒཾ སོདྷེཏུཾ ན སཀྐོཏི, ཏམེནཾ མཧཱཀཱརུཎིཀོ བྷགཝཱ མཧཱཀརུཎཱཡ སཉྩོདིཏམཱནསོ ཨནེཀེཧི ནཡེཧི ཨཱཔཏྟིཏོ ཝུཊྛཱནཾ ཀཏྭཱ སགྒམོཀྑསུཁེ པཏིཊྛཔེཏི, བྷགཝཏོ ཨདྷིཔྤཱཡཉྙུནོ ཨཊྛཀཐཱཙརིཡཱཔི ཨནེཀེཧི ཀཱརཎེཧི བྷགཝཏོ ཝཙནསྶ ཨཏྠཾ པཀཱསེཏྭཱ ཝིསུདྡྷཀཱམཱནཾ ནཡཾ དེནྟི, ཏཐཱ ཊཱིཀཱཙརིཡཱདཡོཔི. ཨེཝཾ དིནྣེ པན ནཡེ ཡོནིསོ མནསི ཀཱཏུཾ སཀྐོནྟཱ པཎྜིཏཱ ཡཐཱནུསིཊྛཾ པཊིཔཛྫནྟི, ཨསཀྐོནྟཱ ཨཉྙཐཱ ཨཏྠཾ གཧེཏྭཱ ན ཡཐཱནུསིཊྛཾ པཊིཔཛྫནྟི, ཏེསཾ དིཊྛཱནུགཏིཾ ཨནུགཙྪནྟཱ སིསྶཱདཡོཔི ཏཐེཝ ཀརོནྟི, ཏསྨཱ བྷགཝཏོ ཝཙནཉྩ པུབྦེནཱཔརཾ སཾསནྡིཏྭཱ ཨཊྛཀཐཱཊཱིཀཱདིཝཙནཉྩ སམྨཱ ཏུལཡིཏྭཱ ཏཐཏོ བྷགཝཏོ ཨདྷིཔྤཱཡཾ ཉཏྭཱ ཡཐཱནུསིཊྛཾ པཊིཔཛྫནྟེཧི གརུཀཱཔཏྟིཏོ ཝུཊྛཧནཏྠཾ ཡོགོ ཀརཎཱིཡོ.

ཏསྨཱ ཡདཱ བྷིཀྑཱུ ཨཱགཙྪནྟི ཝིནཡདྷརསྶ སནྟིཀཾ ‘‘གརུཀཱཔཏྟིཝུཊྛཱནཾ ཀརིསྶཱམཱ’’ཏི, ཏདཱ ཝིནཡདྷརེན ‘‘ཏྭཾ ཀཏརཱཔཏྟིཾ ཨཱཔནྣོ’’ཏི པུཙྪིཏབྦོ. ‘‘སངྒྷཱདིསེསཾ ཨཱཔནྣོ’’ཏི ཝུཏྟེ ‘‘ཀཏརསངྒྷཱདིསེས’’ནྟི པུཙྪིཏྭཱ ‘‘ཨིམཾ ནཱམཱ’’ཏི ཝུཏྟེ སུཀྐཝིསྶཊྛིཡཾ མོཙེཏུཀཱམཙེཏནཱ, ཨུཔཀྐམོ, མུཙྩནནྟི ཏཱིཎི ཨངྒཱནི. ཀཱཡསཾསགྒེ མནུསྶིཏྠཱི, ཨིཏྠིསཉྙིཏཱ, ཀཱཡསཾསགྒརཱགོ, ཏེན རཱགེན ཝཱཡཱམོ, ཧཏྠགྒཱཧཱདིསམཱཔཛྫནནྟི པཉྩ ཨངྒཱནི. དུཊྛུལླཝཱཙཱཡཾ མནུསྶིཏྠཱི, ཨིཏྠིསཉྙིཏཱ, དུཊྛུལླཝཱཙསྶཱདརཱགོ, ཏེན རཱགེན ཨོབྷཱསནཾ, ཏངྑཎཝིཛཱནནནྟི པཉྩ ཨངྒཱནི. ཨཏྟཀཱམེ མནུསྶིཏྠཱི, ཨིཏྠིསཉྙིཏཱ, ཨཏྟཀཱམཔཱརིཙརིཡཱཡ རཱགོ, ཏེན རཱགེན ཝཎྞབྷཎནཾ, ཏངྑཎཝིཛཱནནནྟི པཉྩ ཨངྒཱནི. སཉྩརིཏྟེ ཡེསུ སཉྩརིཏྟཾ སམཱཔཛྫཏི, ཏེསཾ མནུསྶཛཱཏིཀཏཱ ¶ , ནཱལཾཝཙནཱིཡཏཱ, པཊིགྒཎྷནཝཱིམཾསནཔཙྩཱཧརཎཱནཱིཏི པཉྩ ཨངྒཱནི. ཀུཊིཀཱརེ ཨུལླིཏྟཱདཱིནཾ ཨཉྙཏརཏཱ, ཧེཊྛིམཔམཱཎསམྦྷཝོ, ཨདེསིཏཝཏྠུཀཏཱ, པམཱཎཱཏིཀྐནྟཏཱ, ཨཏྟུདྡེསིཀཏཱ, ཝཱསཱགཱརཏཱ, ལེཔགྷཊནཱཏི སཏྟ པམཱཎཡུཏྟཱདཱིསུ ཚདྷཱ ཨངྒཱནི. ཝིཧཱརཀཱརེ ཏཱནིཡེཝ ཚ ཨངྒཱནི. དུཊྛདོསེ ཡཾ ཙོདེཏི, ཏསྶ ཨུཔསམྤནྣོཏི སངྑྱུཔགམནཾ, ཏསྨིཾ སུདྡྷསཉྙིཏཱ, ཡེན པཱརཱཛིཀེན ཙོདེཏི ¶ , ཏསྶ དིཊྛཱདིཝསེན ཨམཱུལཀཏཱ, ཙཱཝནཱདྷིཔྤཱཡེན སམྨུཁཱཙོདནཱ, ཏསྶ ཏངྑཎཝིཛཱནནནྟི པཉྩ ཨངྒཱནི. ཨཉྙབྷཱགིཡེ ཨཉྙབྷཱགིཡསྶ ཨདྷིཀརཎསྶ ཀཉྩིདེསཾ ལེསམཏྟཾ ཨུཔཱདིཡནཏཱ, པུརིམཱནི པཉྩཱཏི ཚ ཨངྒཱནི. སངྒྷབྷེདེ བྷེདཱཡ པརཀྐམནཾ, དྷམྨཀམྨེན སམནུབྷཱསནཾ, ཀམྨཝཱཙཱཔརིཡོསཱནཾ, ཨཔྤཊིནིསྶཛྫནནྟི ཙཏྟཱརི ཨངྒཱནི. བྷེདཱནུཝཏྟཀེ ཨངྒེསུ ཡཐཱ ཏཏྠ པརཀྐམནཾ, ཨེཝཾ ཨིདྷ ཨནུཝཏྟནནྟི ཙཏྟཱརི ཨངྒཱནི. དུབྦཙེ ཨངྒེསུ ཡཐཱ ཏཏྠ པརཀྐམནཾ, ཨེཝཾ ཨིདྷ ཨཝཙནཱིཡཀརཎཏཱཏི ཙཏྟཱརི ཨངྒཱནི. ཀུལདཱུསཀེ ཨངྒེསུ ཡཐཱ ཏཏྠ པརཀྐམནཾ, ཨེཝཾ ཨིདྷ ཚནྡཱདཱིཧི པཱཔནནྟི ཙཏྟཱརི ཨངྒཱནི. ཨིཏི ཨིམཱནི ཨངྒཱནི སོདྷེཏྭཱ སཙེ ཨངྒཔཱརིཔཱུརཱི ཧོཏི, ‘‘སངྒྷཱདིསེསོ’’ཏི ཝཏྟབྦོ. ནོ ཙེ, ‘‘ནཱཡཾ སངྒྷཱདིསེསོ, ཐུལླཙྩཡཱདཱིསུ ཨཉྙཏརཱཔཏྟཱི’’ཏི ཝཏྭཱ ‘‘ནཱཡཾ ཝུཊྛཱནགཱམིནཱི, དེསནཱགཱམིནཱི ཨཡཾ ཨཱཔཏྟི, ཏསྨཱ པཏིརཱུཔསྶ བྷིཀྑུསྶ སནྟིཀེ དེསེཧཱི’’ཏི ཝཏྭཱ དེསཱཔེཏབྦོ.

ཨཐ པན ཨནཱཔཏྟིཙྪཱཡཱ པཉྙཱཡཏི, ‘‘ཨནཱཔཏྟཱི’’ཏི ཝཏྭཱ ཨུཡྻོཛེཏབྦཱ. སཙེ པན སངྒྷཱདིསེསཙྪཱཡཱ པཉྙཱཡཏི, ‘‘ཏྭཾ ཨིམཾ ཨཱཔཏྟིཾ ཨཱཔཛྫིཏྭཱ ཚཱདེསི, ན ཚཱདེསཱི’’ཏི པུཙྪིཏྭཱ ‘‘ན ཚཱདེམཱི’’ཏི ཝུཏྟེ ‘‘ཏེན ཧི ཏྭཾ ན པརིཝཱསཱརཧོ, མཱནཏྟཱརཧོཝ ཧོཏཱི’’ཏི ཝཏྟབྦོ. ‘‘ཚཱདེམཱི’’ཏི པན ཝུཏྟེ ‘‘དསསུ ཨཱཀཱརེསུ ཨཉྙཏརཀཱརཎེན ¶ ཚཱདེསི, ཨུདཱཧུ ཨཉྙཀཱརཎེནཱ’’ཏི པུཙྪིཏྭཱ ‘‘དསསུ ཨཉྙཏརཀཱརཎེནཱ’’ཏི ཝུཏྟེ ‘‘ཨེཝམྤི མཱནཏྟཱརཧོ ཧོཏི, ན པརིཝཱསཱརཧོ’’ཏི ཝཏྟབྦོ. ཨཐ ‘‘ཨཉྙཀཱརཎེནཱ’’ཏི ཝདཏི, ཨེཝཾ སནྟེཔི ‘‘ཏྭཾ ཨཱཔཏྟིཨཱཔནྣབྷཱཝཾ ཛཱནནྟོ པཊིཙྪཱདེསི, ཨུདཱཧུ ཨཛཱནནྟོ’’ཏི པུཙྪིཏྭཱ ‘‘ཨཛཱནནྟོ པཊིཙྪཱདེམཱི’’ཏི ཝུཏྟེ ཙ ‘‘ཨཱཔཏྟིཨཱཔནྣབྷཱཝཾ སརནྟོ པཊིཙྪཱདེསི, ཨུདཱཧུ ཝིསརིཏྭཱ པཊིཙྪཱདེསཱི’’ཏི པུཙྪིཏྭཱ ‘‘ཝིསརིཏྭཱ པཊིཙྪཱདེམཱི’’ཏི ཝུཏྟེ ཙ ‘‘ཨཱཔཏྟིཨཱཔནྣབྷཱཝེ ཝེམཏིཀོ ཧུཏྭཱ པཊིཙྪཱདེསི, ཨུདཱཧུ ནིབྦེམཏིཀོ ཧུཏྭཱ’’ཏི པུཙྪིཏྭཱ ‘‘ཝེམཏིཀོ ཧུཏྭཱ’’ཏི ཝུཏྟེ ཙ ‘‘ན ཏྭཾ པརིཝཱསཱརཧོ, མཱནཏྟཱརཧོཝ ཧོཏཱི’’ཏི ཝཏྟབྦོ.

ཨཐ ‘‘ཛཱནནྟོ པཊིཙྪཱདེམཱི’’ཏི ཝུཏྟེ ཙ ‘‘སརནྟོ པཊིཙྪཱདེམཱི’’ཏི ཝུཏྟེ ཙ ‘‘ནིབྦེམཏིཀོ ཧུཏྭཱ པཊིཙྪཱདེམཱི’’ཏི ཝུཏྟེ ཙ ‘‘ཏྭཾ པརིཝཱསཱརཧོ’’ཏི ཝཏྟབྦོ. ཝུཏྟཉྷེཏཾ སམུཙྩཡཀྑནྡྷཀེ (ཙཱུལ༹ཝ. ༡༤༤) ‘‘སོ ཨེཝཾ ཝདཏི ‘ཡཱཡཾ, ཨཱཝུསོ, ཨཱཔཏྟི ཛཱནཔཊིཙྪནྣཱ, དྷམྨིཀཾ ཏསྶཱ ཨཱཔཏྟིཡཱ པརིཝཱསདཱནཾ, དྷམྨཏྟཱ རུཧཏི. ཡཱ ཙ ཁྭཱཡཾ, ཨཱཝུསོ, ཨཱཔཏྟི ཨཛཱནཔྤཊིཙྪནྣཱ, ཨདྷམྨིཀཾ ཏསྶཱ ཨཱཔཏྟིཡཱ པརིཝཱསདཱནཾ, ཨདྷམྨཏྟཱ ན ¶ རུཧཏི. ཨེཀིསྶཱ, ཨཱཝུསོ, ཨཱཔཏྟིཡཱ བྷིཀྑུ མཱནཏྟཱརཧོ’’’ཏི ཙ, ‘‘སོ ཨེཝཾ ཝདཏི ‘ཡཱཡཾ ཨཱཔཏྟི སརམཱནཔཊིཙྪནྣཱ, དྷམྨིཀཾ ཏསྶཱ ཨཱཔཏྟིཡཱ པརིཝཱསདཱནཾ, དྷམྨཏྟཱ རུཧཏི. ཡཱ ཙ ཁྭཱཡཾ ཨཱཔཏྟི ཨསརམཱནཔཊིཙྪནྣཱ, ཨདྷམྨིཀཾ ཏསྶཱ ཨཱཔཏྟིཡཱ པརིཝཱསདཱནཾ, ཨདྷམྨཏྟཱ ན རུཧཏི. ཨེཀིསྶཱ, ཨཱཝུསོ, ཨཱཔཏྟིཡཱ བྷིཀྑུ མཱནཏྟཱརཧོ’’’ཏི ཙ, ‘‘སོ ཨེཝཾ ཝདཏི ‘ཡཱཡཾ, ཨཱཝུསོ, ཨཱཔཏྟི ནིབྦེམཏིཀཔཊིཙྪནྣཱ, དྷམྨིཀཾ ཏསྶཱ ཨཱཔཏྟིཡཱ པརིཝཱསདཱནཾ, དྷམྨཏྟཱ རུཧཏི. ཡཱ ཙ ཁྭཱཡཾ, ཨཱཝུསོ, ཨཱཔཏྟི ¶ ཝེམཏིཀཔཊིཙྪནྣཱ, ཨདྷམྨིཀཾ ཏསྶཱ ཨཱཔཏྟིཡཱ པརིཝཱསདཱནཾ, ཨདྷམྨཏྟཱ ན རུཧཏི. ཨེཀིསྶཱ, ཨཱཝུསོ, ཨཱཔཏྟིཡཱ བྷིཀྑུམཱནཏྟཱརཧོ’’’ཏི ཙ.

ཨེཝཾ པརིཝཱསཱརཧབྷཱཝཾ པཀཱསེཏྭཱ ‘‘ཨཡཾ བྷིཀྑུ པརིཝཱསཱརཧོ, ཏཱིསུ པརིཝཱསེསུ ཀཏརཔརིཝཱསཱརཧོ’’ཏི ཙིནྟེཏྭཱ ‘‘བྷིཀྑུ ཏྭཾ ཀཏི ཨཱཔཏྟིཡོ ཚཱདེསཱི’’ཏི པུཙྪིཏྭཱ ‘‘ཨེཀཾ ཨཱཔཏྟི’’ནྟི ཝཱ ‘‘དྭེ ཏཱིཎི ཏཏུཏྟརི ཝཱ ཨཱཔཏྟིཡོ ཚཱདེམཱི’’ཏི ཝཱ ཝུཏྟེ ‘‘ཀཏཱིཧཾ ཏྭཾ ཨཱཔཏྟིཾ པཊིཙྪཱདེསཱི’’ཏི པུཙྪིཏྭཱ ‘‘ཨེཀཱཧམེཝཱཧཾ པཊིཙྪཱདེམཱི’’ཏི ཝཱ ‘‘དྭཱིཧཾ ཏཱིཧཾ ཏཏུཏྟརི ཝཱ པཊིཙྪཱདེམཱི’’ཏི ཝཱ ཝུཏྟེ ‘‘ཡཱཝཏཱིཧཾ པཊིཙྪཱདེསི, ཏཱཝཏཱིཧཾ ཏྭཾ པཊིཝསིསྶསཱི’’ཏི ཝཏྟབྦོ. ཝུཏྟཉྷེཏཾ བྷགཝཏཱ ‘‘ཡཱཝཏཱིཧཾ ཛཱནཾ པཊིཙྪཱདེཏི, ཏཱཝཏཱིཧཾ ཏེན བྷིཀྑུནཱ ཨཀཱམཱ པརིཝཏྠབྦ’’ནྟི. ཏཏོ ‘‘ཨཡཾ བྷིཀྑུ ཨཱཔཏྟིཔརིཡནྟཾ ཛཱནཱཏི, ཏསྨཱ པཊིཙྪནྣཔརིཝཱསཱརཧོ’’ཏི (པཱརཱ. ༤༤༢) ཉཏྭཱ ཏདནུརཱུཔཱ ཀམྨཝཱཙཱ ཀཱཏབྦཱ.

ཨེཏྠ ཙ ཨཱཔཏྟིཔརིཡནྟཔུཙྪནཾ ཀམྨཝཱཙཱཀརཎཏྠམེཝ ཧོཏི, རཏྟིཔརིཡནྟཔུཙྪནཾ པན ཏདཏྠཉྩེཝ སུདྡྷནྟཔརིཝཱསསྶ ཨནནུརཱུཔབྷཱཝདསྶནཏྠཉྩ ཧོཏི. ཝུཏྟཉྷི ཨཊྛཀཐཱཡཾ (ཙུལ༹ཝ. ཨཊྛ. ༡༠༢) ‘‘སོ དུཝིདྷོ ཙཱུལ༹སུདྡྷནྟོ མཧཱསུདྡྷནྟོཏི, དུཝིདྷོཔི ཙེས རཏྟིཔརིཙྪེདཾ སཀལཾ ཝཱ ཨེཀཙྩཾ ཝཱ ཨཛཱནནྟསྶ ཙ ཨསརནྟསྶ ཙ ཏཏྠ ཝེམཏིཀསྶ ཙ དཱཏབྦོ. ཨཱཔཏྟིཔརིཡནྟཾ པན ‘ཨཧཾ ཨེཏྟཀཱ ཨཱཔཏྟིཡོ ཨཱཔནྣོ’ཏི ཛཱནཱཏུ ཝཱ, མཱ ཝཱ, ཨཀཱརཎམེཏ’’ནྟི. ཏཏོ ཏསྶ བྷིཀྑུནོ ནིསཱིདནཊྛཱནཾ ཛཱནིཏབྦཾ. དུཝིདྷཉྷི ནིསཱིདནཊྛཱནཾ ཨནིཀྑིཏྟཝཏྟེན ནིསཱིདིཏབྦཊྛཱནཾ, ནིཀྑིཏྟཝཏྟེན ནིསཱིདིཏབྦཊྛཱནནྟི.

ཏཏྠ ¶ ཨཔྤབྷིཀྑུཀེ ཝིཧཱརེ སབྷཱགབྷིཀྑཱུནཾ ཝསནཊྛཱནེ ཨུཔཙཱརསཱིམཱཔརིཙྪིནྣོ ཨནྟོཝིཧཱརོ ཨནིཀྑིཏྟཝཏྟེན ནིསཱིདིཏབྦཊྛཱནཾ ཧོཏི. ཨུཔཙཱརསཱིམཾ ཨཏིཀྐམྨ མཧཱམགྒཏོ ཨོཀྐམྨ ¶ གུམྦཝཏིཔཊིཙྪནྣཊྛཱནཾ ནིཀྑིཏྟཝཏྟེན ནིསཱིདིཏབྦཊྛཱནཾ ཧོཏི. ཝུཏྟཉྷི ཨཊྛཀཐཱཡཾ (ཙཱུལ༹ཝ. ཨཊྛ. ༡༠༢) ‘‘སཙེ ཨཔྤབྷིཀྑུཀོ ཝིཧཱརོ ཧོཏི, སབྷཱགཱ བྷིཀྑཱུ ཝསནྟི, ཝཏྟཾ ཨནིཀྑིཔིཏྭཱ ཝིཧཱརེཡེཝ རཏྟིཔརིགྒཧོ ཀཱཏབྦོ. ཨཐ ན སཀྐཱ སོདྷེཏུཾ, ཝུཏྟནཡེནེཝ ཝཏྟཾ ནིཀྑིཔིཏྭཱ པཙྩཱུསསམཡེ ཨེཀེན བྷིཀྑུནཱ སདྡྷིཾ མཱནཏྟཝཎྞནཱཡཾ ཝུཏྟནཡེནེཝ ཨུཔཙཱརསཱིམཾ ཨཏིཀྐམིཏྭཱ མཧཱམགྒཱ ཨོཀྐམྨ པཊིཙྪནྣཊྛཱནེ ནིསཱིདིཏྭཱ ཨནྟོཨརུཎེཡེཝ ཝུཏྟནཡེནེཝ ཝཏྟཾ སམཱདིཡིཏྭཱ ཏསྶ བྷིཀྑུནོ པརིཝཱསོ ཨཱརོཙེཏབྦོ’’ཏི. ‘‘མཱནཏྟཝཎྞནཱཡཾ ཝུཏྟནཡེནེཝཱ’’ཏི ཙ ‘‘སཙེ ཨཔྤབྷིཀྑུཀོ ཝིཧཱརོ ཧོཏི, སབྷཱགཱ བྷིཀྑཱུ ཝསནྟི, ཝཏྟཾ ཨནིཀྑིཔིཏྭཱ ཨནྟོཝིཧཱརེཡེཝ རཏྟིཡོ གཎེཏབྦཱ. ཨཐ ན སཀྐཱ སོདྷེཏུཾ, ཝུཏྟནཡེནེཝ ཝཏྟཾ ནིཀྑིཔིཏྭཱ པཙྩཱུསསམཡེ ཙཏཱུཧི པཉྩཧི ཝཱ བྷིཀྑཱུཧི སདྡྷིཾ པརིཀྑིཏྟསྶ ཝིཧཱརསྶ པརིཀྑེཔཏོ, ཨཔརིཀྑིཏྟསྶ པརིཀྑེཔཱརཧཊྛཱནཏོ དྭེ ལེཌྜུཔཱཏེ ཨཏིཀྐམིཏྭཱ མཧཱམགྒཏོ ཨོཀྐམྨ གུམྦེན ཝཱ ཝཏིཡཱ ཝཱ པཊིཙྪནྣཊྛཱནེ ནིསཱིདིཏབྦ’’ནྟི (ཝི. སངྒ. ཨཊྛ. ༢༣༨) ཨིདཾ ཝཙནཾ སནྡྷཱཡ ཝུཏྟཾ.

ཏཏྠ ཨཔྤབྷིཀྑུཀོ ཝིཧཱརོ ཧོཏཱིཏི ཨིདཾ བཧུབྷིཀྑུཀེ ཝིཧཱརེ ཨཉྙེ བྷིཀྑཱུ གཙྪནྟི, ཨཉྙེ བྷིཀྑཱུ ཨཱགཙྪནྟི, ཏསྨཱ རཏྟིཙྪེདཝཏྟབྷེདཀཱརཎཱནི སོདྷེཏུཾ དུཀྐརཏྟཱ ཝུཏྟཾ. ཝཀྑཏི ཧི ‘‘ཨཐ ན སཀྐཱ སོདྷེཏུ’’ནྟི. སབྷཱགཱ བྷིཀྑཱུ ཝསནྟཱིཏི ཨིདཾ ཝིསབྷཱགཱནཾ ཝེརཱིབྷིཀྑཱུནཾ སནྟིཀེ ཝཏྟཾ ཨཱརོཙེནྟོ པཀཱསེཏུཀཱམོ ཧོཏི ¶ , ཏསྨཱ ཝུཏྟཾ. ཝུཏྟཉྷི ཨཊྛཀཐཱཡཾ (ཙཱུལ༹ཝ. ཨཊྛ. ༡༠༢; ཝི. སངྒ. ཨཊྛ. ༢༣༦) ‘‘ཏསྨཱ ཨཝེརིསབྷཱགསྶ སནྟིཀེ ཨཱརོཙེཏབྦཱ. ཡོ པན ཝིསབྷཱགོ ཧོཏི སུཏྭཱ པཀཱསེཏུཀཱམོ, ཨེཝརཱུཔསྶ ཨུཔཛ྄ཛྷཱཡསྶཔི སནྟིཀེ ནཱརོཙེཏབྦཱ’’ཏི, ཏསྨཱ ཝིསབྷཱགཱནཾ ཝསནཊྛཱནེ ཝཏྟཾ ཨསམཱདིཡིཏྭཱ བཧིཡེཝ ཀཱཏུམྤི ཝཊྚཏཱིཏི དཊྛབྦཾ. ཝིཧཱརེཡེཝཱཏི ཨནྟོཨུཔཙཱརསཱིམཱཡམེཝ. ཝཀྑཏི ཧི ‘‘ཨཐ ན སཀྐཱ…པེ… ཨུཔཙཱརསཱིམཾ ཨཏིཀྐམིཏྭཱ’’ཏི. རཏྟིཔརིགྒཧོ ཀཱཏབྦོཏི རཏྟིགཎནཱ ཀཱཏབྦཱ. ཝུཏྟཉྷི མཱནཏྟཝཎྞནཱཡཾ ‘‘རཏྟིཡོ གཎེཏབྦཱ’’ཏི. ཨཐ ན སཀྐཱ སོདྷེཏུནྟི བཧུབྷིཀྑུཀཏྟཱ ཝཱ ཝིཧཱརསྶ ཝིསབྷཱགཱནཾ ཝསནཊྛཱནཏྟཱ ཝཱ རཏྟིཙྪེདཝཏྟཱབྷེདཀཱརཎཱནིཔི སོདྷེཏུཾ ན སཀྐཱ. ཝཏྟཾ ནིཀྑིཔིཏྭཱཏི པརིཝཱསཝཏྟཾ ནིཀྑིཔིཏྭཱ. པཙྩཱུསསམཡེཏི པཙྪིམཡཱམཀཱལེ ཨརུཎོདཡཏོ པུརེཏརམེཝ. ཏཐཱ ཧི ཝཀྑཏི ‘‘ཨནྟོཨརུཎེཡེཝ ཝུཏྟནཡེན ཝཏྟཾ སམཱདིཡིཏྭཱ ཏསྶ བྷིཀྑུནོ པརིཝཱསོ ཨཱརོཙེཏབྦོ’’ཏི. ཨེཀེན བྷིཀྑུནཱ སདྡྷིནྟི ཝིཔྤཝཱསརཏྟིཙྪེདཝིམུཙྩནཏྠཾ ཝིནཱ པཀཏཏྟེན སབྷིཀྑུཀཨཱཝཱསཨབྷིཀྑུཀཨནཱཝཱསགམནསངྑཱཏཝཏྟབྷེདཝིམུཙྩནཏྠཉྩ ¶ ཝུཏྟཾ. ཏཐཱ ཧི ཝུཏྟཾ ‘‘ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཨབྷིཀྑུཀོ ཨནཱཝཱསོ གནྟབྦོ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ’’ཏི (ཙཱུལ༹ཝ. ༧༦).

མཱནཏྟཝཎྞནཱཡཾ ཝུཏྟནཡེནཱཏི ‘‘པརིཀྑིཏྟསྶ ཝིཧཱརསྶ པརིཀྑེཔཏོ, ཨཔརིཀྑིཏྟསྶ པརིཀྑེཔཱརཧཊྛཱནཏོ དྭེ ལེཌྜུཔཱཏེ ཨཏིཀྐམིཏྭཱ’’ཏི ཝུཏྟནཡེན. ཡདི ཨེཝཾ ཝིསམམིདཾ ནཡདསྶནཾ, པརིཀྑེཔཔརིཀྑེཔཱརཧཊྛཱནེ ཨེཝ ཧི ཨུཔཙཱརསཱིམཱ ཧོཏི, ཀསྨཱ ཏཏྠ ཨུཔཙཱརསཱིམཏོ དྭེལེཌྜུཔཱཏཱཏིཀྐམོ ཝུཏྟོ, ཨིདྷ པན ཨུཔཙཱརསཱིམཱཏིཀྐམོ ཨེཝཱཏི ¶ ? སཙྩཾ, ཏཐཱཔི ཝིཧཱརེ བྷིཀྑཱུནཾ སཛ྄ཛྷཱཡཱདིསདྡསཝནསབྦྷཱཝཏོ སུཝིདཱུརཱཏིཀྐམོ ཝུཏྟོ, ཨིདྷ པན ཨུཔཙཱརསཱིམཏོ ཨཏིཀྐམམཏྟོཔི ཨཏིཀྐམོཡེཝཱཏི ཀཏྭཱ ཝུཏྟོ. བུདྡྷམཏཉྙུནོ ཧི ཨཊྛཀཐཱཙརིཡཱ. ཏཐཱ ཧི ཝུཏྟཾ ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༩༧) ‘‘པརིཀྑིཏྟསྶ ཝིཧཱརསྶ པརིཀྑེཔཏོཏིཨཱདི ཀིཉྩཱཔི པཱལི༹ཡཾ ནཏྠི, ཨཐ ཁོ ཨཊྛཀཐཱཙརིཡཱནཾ ཝཙནེན ཏཐཱ ཨེཝ པཊིཔཛྫིཏབྦནྟི ཙ ཝུཏྟ’’ནྟི.

མཱནཏྟཝཎྞནཱཡཾ ཙཏཱུཧི པཉྩཧི ཝཱ བྷིཀྑཱུཧི སདྡྷིནྟི ཨིདཾ པན ཨཱུནེགཎེཙརཎརཏྟིཙྪེདཝིམུཙྩནཏྠཾ ཝུཏྟཾ. དྭེ ལེཌྜུཔཱཏེ ཨཏིཀྐམིཏྭཱཏིཨཱདི ཨཉྙེསཾ བྷིཀྑཱུནཾ སཝནཱུཔཙཱརདསྶནཱུཔཙཱརཝིཛཧནཏྠཾ ཝུཏྟཾ. ཏེནེཝཱཧ ཊཱིཀཱཙརིཡོ ‘‘དྭེ ལེཌྜུཔཱཏེ ཨཏིཀྐམིཏྭཱཏི ཨིདཾ ཝིཧཱརེ བྷིཀྑཱུནཾ སཛ྄ཛྷཱཡཱདིསདྡསཝནཱུཔཙཱརཝིཛཧནཏྠཾ ཝུཏྟཾ, ‘མཧཱམགྒཏོ ཨོཀྐམྨཱཏི ཨིདཾ མགྒཔཊིཔནྣཱནཾ བྷིཀྑཱུནཾ སཝནཱུཔཙཱརཝིཛཧནཏྠཾ, གུམྦེན ཝཱཏིཨཱདི དསྶནཱུཔཙཱརཝིཛཧནཏྠ’’ནྟི. ཏསྨཱ ཡཐཱཝུཏྟཾ དུཝིདྷཾ ཋཱནཾ པརིཝསནྟམཱནཏྟཙཱརིཀབྷིཀྑཱུཧི ནིསཱིདིཏབྦཊྛཱནཾ ཧོཏི. ཏེསུ ཙ ཡདི ཨནྟོཝིཧཱརེཡེཝ ནིསཱིདིཏྭཱ པརིཝསཏི, ཨུཔཙཱརསཱིམགཏཱནཾ སབྦེསཾ བྷིཀྑཱུནཾ ཨཱརོཙེཏབྦཾ ཧོཏི. ཨཐ བཧིཨུཔཙཱརསཱིམཱཡཾ, དིཊྛརཱུཔཱནཾ སུཏསདྡཱནཾ ཨཱརོཙེཏབྦཾ. ཨདིཊྛཨསུཏཱནམྤི ཨནྟོདྭཱདསཧཏྠགཏཱནཾ ཨཱརོཙེཏབྦམེཝ. ཝུཏྟཉྷི ཝཛིརབུདྡྷིཊཱིཀཱཡཾ ‘‘ཝཏྟཾ ནིཀྑིཔིཏྭཱ ཝསནྟསྶ ཨུཔཙཱརསཱིམགཏཱནཾ སབྦེསཾ ཨཱརོཙནཀིཙྩཾ ནཏྠི, དིཊྛརཱུཔཱནཾ སུཏསདྡཱནཾ ཨཱརོཙེཏབྦཾ. ཨདིཊྛཨསྶུཏཱནམྤི ཨནྟོདྭཱདསཧཏྠགཏཱནཾ ཨཱརོཙེཏབྦཾ. ཨིདཾ ཝཏྟཾ ནིཀྑིཔིཏྭཱ ཝསནྟསྶ ལཀྑཎནྟི ཝུཏྟ’’ནྟི. ཨིདཉྩ ཝཏྟཾ ཨནིཀྑིཔིཏྭཱ ཝསནྟསྶ ཨནྟོཝིཧཱརེཡེཝ རཏྟིཔརིགྒཧསྶ ཙ ནིཀྑིཔིཏྭཱ ཝསནྟསྶ ཨུཔཙཱརསཱིམཾ ཨཏིཀྐམིཏྭཱ ཝཏྟསམཱདཱནསྶ ཙ ཨཊྛཀཐཱཡཾ ཝུཏྟཏྟཱ ཝུཏྟཾ. ཨུཔཙཱརོ པན ¶ ཨནྟོསཱིམཱཡ ¶ ཋིཏཱནཾ སཀལཨུཔཙཱརསཱིམཱ ཧོཏི, བཧིཨུཔཙཱརསཱིམཱཡ ཋིཏཱནཾ དྭཱདསཧཏྠམཏྟཾ. ཏེནེཝ ཧི ཨུདྡེསབྷཏྟཱདིསངྒྷལཱབྷོ ཡདི ཨནྟོསཱིམཱཡ ཨུཔྤཛྫཏི, སཱིམཊྛཀསངྒྷསྶ ཧོཏི. ཡདི བཧིསཱིམཱཡཾ, དྭཱདསཧཏྠབྦྷནྟརེ པཏྟབྷིཀྑཱུནཾ, ཏསྨཱ ཨུཔཙཱརཝསེནཔི ཨེས ཨཏྠོ ཝིཉྙཱཡཏི. ཏཐཱ ཧི ཝུཏྟཾ ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༩༧) ‘‘ཨཏྠིབྷཱཝཾ སལླཀྑེཏྭཱཏི དྭཱདསཧཏྠེ ཨུཔཙཱརེ སལླཀྑེཏྭཱ ཨནིཀྑིཏྟཝཏྟཱནཾ ཨུཔཙཱརསཱིམཱཡ ཨཱགཏབྷཱཝཾ སལླཀྑེཏྭཱ སཧཝཱསཱདིཀཾ ཝེདིཏབྦནྟི ཙ ཝུཏྟ’’ནྟི.

ཨེཝཾ ཨནིཀྑིཏྟཝཏྟཱནཾ ཧུཏྭཱ པརིཝསནྟཱནཾ ཨནྟོཝིཧཱརེཡེཝ ཝསནསྶ, ནིཀྑིཏྟཝཏྟཱནཾ ཧུཏྭཱ པརིཝསནྟཱནཾ ཝིཧཱརཏོ བཧི དྭེ ལེཌྜུཔཱཏེ ཨཏིཀྐམིཏྭཱ ཝསནསྶ ཙ ཨཊྛཀཐཱདཱིསུ པཀརཎེསུ ཨཱགཏཏྟཱ ཏཐཱགཏནཡོ པཀརཎཱགཏནཡོ ཧོཏི. ཨིདཱནི པན ཨཱཙརིཡཱ ཨནིཀྑིཏྟཝཏྟསྶ ཙ རཏྟིཙྪེདཝཏྟབྷེདདོསེ པརིཧརིཏུཾ ཨཏིདུཀྐརཏྟཱ, ནིཀྑིཏྟཝཏྟསྶ ཙ དེཝསིཀཾ པཙྩཱུསསམཡེ བཧིསཱིམགམནསྶ དུཀྑཏྟཱ, ཝཱལ༹སརཱིསཔཱདིཔརིསཡསྶ ཙ ཨཱསངྐིཏབྦབྷཱཝཏོ རཏྟིཙྪེདཝཏྟབྷེདཔརིཧརཎཝསེན ལཀྑཎཔཱརིཔཱུརིམེཝ མནསི ཀརོནྟཱ ནིཀྑིཏྟཝཏྟཱཔི སམཱནཱ ཨནྟོཝིཧཱརེཡེཝ པརིཝཱསཝསནཉྩ མཱནཏྟཙརཎཉྩ ཀརོནྟི.

ཨེཀཙྩེ ཨཱཙརིཡཱ བཧིཨུཔཙཱརསཱིམཱཡཾ པཏིརཱུཔཊྛཱནེ པཀཏཏྟཱནཾ བྷིཀྑཱུནཾ ཝསནསཱལཾ ཀཱརཱཔེཏྭཱ པཱརིཝཱསིཀབྷིཀྑཱུནཾ ནིཔཛྫནམཉྩཾ སབྦཏོ ཚནྣཔརིཙྪིནྣཾ སདྭཱརབནྡྷནཾ སུགུཏྟཾ ཀཱརཱཔེཏྭཱ ཏཾ པདེསཾ ཝཏིཡཱ པརིཀྑིཔཱཔེཏྭཱ སཱཡནྷསམཡེ ཏཏྠ གནྟྭཱ ཨུཔཊྛཱཀསཱམཎེརཱདཡོ ནིཝཏྟཱཔེཏྭཱ པུརིམཡཱམེ ཝཱ མཛ྄ཛྷིམཡཱམེ ཝཱ སམནྟཏོ སདྡཚིཛྫནཀཱལེ པཀཏཏྟབྷིཀྑཱུ སཱལཱཡཾ ནིཔཛྫཱཔེཏྭཱ པཱརིཝཱསིཀབྷིཀྑཱུ ¶ ཝཏྟཾ སམཱདཱཔེཏྭཱ ཨཱརོཙཱཔེཏྭཱ ཨཏྟནོ ཨཏྟནོ མཉྩཀེསུ ནིཔཛྫཱཔེཏྭཱ པཙྪིམཡཱམཀཱལེ ཨུཊྛཱཔེཏྭཱ ཨརུཎེ ཨུཊྛིཏེ ཨཱརོཙཱཔེཏྭཱ ཝཏྟཾ ནིཀྑིཔཱཔེནྟི. ཨེས ནཡོ པཀརཎེསུ ཨནཱགཏཏྟཱ ཨཱཙརིཡཱནཾ མཏེན ཀཏཏྟཱ ཨཱཙརིཡནཡོ ནཱམ. ཨེས ནཡོཔི ཡཐཱརུཏཏོ པཀརཎེསུ ཨནཱགཏོཔི པཀརཎཱནུལོམཝསེན རཏྟིཙྪེདཝཏྟབྷེདདོསེ པརིཧརིཏྭཱ ལཛྫིཔེསལེཧི བཧུསྶུཏེཧི སིཀྑཱཀཱམེཧི ཝིནཡེ པཀཏཉྙཱུཧི ཝིཙཱརིཏོ སམཱནོ སུནྡརོ པསཏྠོཝ ཧོཏི, ཏསྨཱ ‘‘ཨནུལོམནཡོ’’ཏིཔི ཝཏྟུཾ ཝཊྚཏི.

ནནུ ཙ ཨནིཀྑིཏྟཝཏྟཱནཾཡེཝ ཨནྟོཝིཧཱརེ ཝསནཾ ཨཊྛཀཐཱཡཾ ཝུཏྟཾ, ཨཐ ཀསྨཱ ནིཀྑིཏྟཝཏྟཱཔི སམཱནཱ ཝསནྟཱིཏི? སཙྩཾ, ཏཏྠ པན ཨཔྤབྷིཀྑུཀཏྟཱ སབྷཱགབྷིཀྑཱུནཾ ཝསནཊྛཱནཏྟཱ ¶ ཙ རཏྟིཙྪེདཝཏྟབྷེདདོསེ ཙ པརིཧརིཏུཾ སཀྐུཎེཡྻབྷཱཝཏོ སཀལརཏྟིནྡིཝམྤི ཝཏྟཾ ཨནིཀྑིཔིཏྭཱ ཝསནཾ ཝུཏྟཾ, ཨིདྷ པན ཏཐཱ ཨསཀྐུཎེཡྻབྷཱཝཏོ དིཝཱ ཝཏྟཾ ནིཀྑིཔིཏྭཱ རཏྟིཡཾ སམཱདིཡནྟོ ཨཱགནྟུཀཱནཾ ཨནཱགམནཀཱལབྷཱཝཏོ, སདྡཚིཛྫནཀཱལབྷཱཝཏོ ཙ རཏྟིཙྪེདཱདིདོསེ པརིཧརིཏུཾ སཀྐུཎེཡྻཏྟཱ ཏདནུལོམོཡེཝ ཧོཏཱིཏི མནྟྭཱ ཨཱཙརིཡཱ ཨེཝཾ ཀརོནྟཱིཏི དཊྛབྦཾ.

ཨེཝཾ ཧོཏུ, བཧིཨུཔཙཱརསཱིམཱཡ ཝསནྟཱནཾ པཊིཙྪནྣཊྛཱནེ ནིསཱིདནམེཝ ཨཊྛཀཐཱཡཾ ཝུཏྟཾ, ན པཀཏཏྟསཱལཱཀརཎམཉྩཀརཎཱདཱིནི, ཨཐ ཀསྨཱ ཨེཏཱནི ཀརོནྟཱིཏི? སཙྩཾ, ཏཐཱཔི པཀཏཏྟསཱལཱཀརཎཾ པཱརིཝཱསིཀཱནཾ བྷིཀྑཱུནཾ པཀཏཏྟེཧི བྷིཀྑཱུཧི ཝིཔྤཝཱསརཏྟིཙྪེདཝཏྟབྷེདདོསཔརིཧརཎཏྠཾ, ཏཾ ‘‘ཏཡོ ཁོ, ཨུཔཱལི, པཱརིཝཱསིཀསྶ བྷིཀྑུནོ རཏྟིཙྪེདཱ སཧཝཱསོ, ཝིཔྤཝཱསོ, ཨནཱརོཙནཱ’’ཏི ཝུཏྟཔཱཋཾ ¶ (ཙཱུལ༹ཝ. ༨༣) ཨནུལོམེཏི. མཉྩཀརཎཾ སཧཝཱསརཏྟིཙྪེདཝཏྟབྷེདདོསཔརིཧརཎཏྠཾ, ཏཾ ‘‘ན, བྷིཀྑཝེ, པཱརིཝཱསིཀེན བྷིཀྑུནཱ པཀཏཏྟེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ཝཏྠབྦཾ, ན ཨེཀཙྪནྣེ ཨནཱཝཱསེ ཝཏྠབྦཾ, ན ཨེཀཙྪནྣེ ཨཱཝཱསེ ཝཱ ཨནཱཝཱསེ ཝཱ ཝཏྠབྦ’’ནྟི ཝུཏྟཔཱཋཉྩ (ཙཱུལ༹ཝ. ༨༡) ཡཐཱཝུཏྟཔཱཋཉྩ ཨནུལོམེཏི. ཨཱདི-སདྡེན སཱཡནྷསམཡེ གམནཱདཱིནི སངྒཎྷཱཏི. ཏེསུ ཨཊྛཀཐཱཡཾ པཙྩཱུསསམཡེ གམནེ ཨེཝ ཝུཏྟེཔི སཱཡནྷསམཡེ གམནཾ རཏྟིགམནསྶ བཧུཔརིསྶཡཏྟཱ པརིསྶཡཝིནོདནཏྠཾ, ཏཾ ‘‘ཨནྟརཱཡཏོ པརིམུཙྩནཏྠཱཡ གནྟབྦམེཝཱ’’ཏི ཝུཏྟཾ ཨཊྛཀཐཱཔཱཋཾ (ཙཱུལ༹ཝ. ཨཊྛ. ༧༦) ཨནུལོམེཏི. ཨུཔཊྛཱཀསཱམཎེརཱདཱིནཾ ནིཝཏྟཱཔནཾ ཨནུཔསམྤནྣེན སཧསེཡྻསངྐཱནིཝཏྟནཏྠཾ, ཏཾ ‘‘ཡོ པན བྷིཀྑུ ཨནུཔསམྤནྣེན སཧསེཡྻཾ ཀཔྤེཡྻ, པཱཙིཏྟིཡ’’ནྟི ཝུཏྟཾ མཱཏིཀཱཔཱཋཾ (པཱཙི. ༤༩) ཨནུལོམེཏི. པུརིམཡཱམེ ཝཱ མཛ྄ཛྷིམཡཱམེ ཝཱ སམནྟཏོ སདྡཚིཛྫནཀཱལེ པཀཏཏྟབྷིཀྑཱུ སཱལཱཡཾ ནིཔཛྫཱཔེཏྭཱ པཱརིཝཱསིཀབྷིཀྑཱུནཾ ཝཏྟསམཱདཱཔནཾ ཨཉྙབྷིཀྑཱུནཾ སདྡསཝནཝིཝཛྫནཏྠཾ, ཏཾ ཨནཱརོཙནརཏྟིཙྪེདདོསཔརིཧརཎཏྠཾ, ཏཾ ཡཐཱཝུཏྟརཏྟིཙྪེདཔཱཋཾ ཨནུལོམེཏི.

ནནུ ཙ ཨཊྛཀཐཱཡཾ ཨནྟོཨརུཎེཡེཝ ཝཏྟསམཱདཱཔནཾ ཝུཏྟཾ, ཨཐ ཀསྨཱ ‘‘པུརིམཡཱམམཛ྄ཛྷིམཡཱམེསཱུ’’ཏི ཝུཏྟནྟི? ནཱཡཾ དོསོ, ཧིཡྻོཨརུཎུགྒམནཏོ པཊྛཱཡ ཧི ཡཱཝ ཨཛྫཨརུཎུགྒམནཱ ཨེཀོ རཏྟིནྡིཝོ ཨཛྫཨརུཎསྶ ཨནྟོ ནཱམ, ཨཛྫཨརུཎཏོ པཊྛཱཡ པཙྪཱཀཱལོ ཨརུཎསྶ བཧི ནཱམ, ཏསྨཱ པུརིམམཛ྄ཛྷིམཡཱམེསུ ཀཏཝཏྟསམཱདཱནམྤི ཨརུཎོདཡཏོ ¶ པུརེ ཀཏཏྟཱ ཨནྟོཨརུཎེ ཀཏཾཡེཝ ཧོཏི. ཝཏྟཾ ཨསམཱདིཡིཏྭཱ ནིཔཛྫནེ ཙ སཏི ནིདྡཱཝསེན ཨརུཎུགྒམནཀཱལཾ ཨཛཱནིཏྭཱ ཝཏྟསམཱདཱནཾ ཨཏིཀྐནྟཾ ¶ བྷཝེཡྻ, ཏསྨཱ པུརེཏརམེཝ སམཱདཱནཾ ཀཏྭཱ ནིཔཛྫནཾ ཉཱཡཱགཏཾ ཧོཏི, ‘‘ཨནྟོཨརུཎེཡེཝ ཝུཏྟནཡེནེཝ ཝཏྟཾ སམཱདིཡིཏྭཱ’’ཏི ཝུཏྟཨཊྛཀཐཱཔཱཋཉྩ (ཙཱུལ༹ཝ. ཨཊྛ. ༡༠༢) ཨནུལོམེཏི.

ཨེཝཾ ཧོཏུ, ཨེཝཾ སནྟེཔི ཀསྨཱ ‘‘ཨཱརོཙཱཔེཏྭཱ’’ཏི ཝུཏྟཾ, ནནུ མཱལ༹ཀསཱིམཱཡཾ སམཱདིནྣཀཱལེཡེཝ ཝཏྟམཱརོཙིཏནྟི? སཙྩཾ ཨཱརོཙིཏཾ, ཨཡཾ པན བྷིཀྑུ དིཝཱ ཝཏྟཾ ནིཀྑིཔིཏྭཱ ནིསིནྣོ, ཨིདཱནི སམཱདིནྣོ, ཏསྨཱ མཱལ༹ཀསཱིམཱཡ ཨཱརོཙིཏམྤི པུན ཨཱརོཙེཏབྦཾ ཧོཏི. ཨིདམྤི ‘‘ཨནྟོཨརུཎེཡེཝ ཝུཏྟནཡེནེཝ ཝཏྟཾ སམཱདིཡིཏྭཱ ཏསྶ བྷིཀྑུནོ པརིཝཱསོ ཨཱརོཙེཏབྦོ’’ཏི པཱཋཾ (ཙཱུལ༹ཝ. ཨཊྛ. ༡༠༢) ཨནུལོམེཏི. ཨཐ ‘‘ཨཏྟནོ ཨཏྟནོ མཉྩཀེསུ ནིཔཛྫཱཔེཏྭཱ’’ཏི ཀསྨཱ ཝུཏྟཾ, ནནུ ཨཉྙམཉྙསྶ མཉྩེསུ ནིཔཛྫམཱནཱཔི པཀཏཏྟསཱལཏོ ནིབྦོདཀཔཏནཊྛཱནཏོ བཧི ནིཔཛྫམཱནཱ སཧཝཱསརཏྟིཙྪེདདོསཏོ མུཏྟཱཡེཝཱཏི? ན པནེཝཾ དཊྛབྦཾ. ན ཧི པཱརིཝཱསིཀོ པཀཏཏྟབྷིཀྑཱུཧེཝ ཨེཀཙྪནྣེ ནིཔནྣོ སཧཝཱསརཏྟིཙྪེདཔྤཏྟོ ཧོཏི, ཨཐ ཁོ ཨཉྙམཉྙམྤི ཧོཏིཡེཝ. ཝུཏྟཉྩེཏཾ སམནྟཔཱསཱདིཀཱཡཾ (ཙཱུལ༹ཝ. ཨཊྛ. ༨༡) ‘‘སཙེ ཧི དྭེ པཱརིཝཱསིཀཱ ཨེཀཏོ ཝསེཡྻུཾ, ཏེ ཨཉྙམཉྙསྶ ཨཛ྄ཛྷཱཙཱརཾ ཉཏྭཱ ཨགཱརཝཱ ཝཱ ཝིཔྤཊིསཱརིནོ ཝཱ ཧུཏྭཱ པཱཔིཊྛཏརཾ ཝཱ ཨཱཔཏྟིཾ ཨཱཔཛྫེཡྻུཾ ཝིབྦྷམེཡྻུཾ ཝཱ, ཏསྨཱ ནེསཾ སཧསེཡྻཱ སབྦཔྤཀཱརེན པཊིཀྑིཏྟཱ’’ཏི. ‘‘པཙྪིམཡཱམཀཱལེ ཨུཊྛཱཔེཏྭཱ ཨརུཎེ ཨུཊྛིཏེ ཨཱརོཙཱཔེཏྭཱ ཝཏྟཾ ནིཀྑིཔཱཔེནྟཱི’’ཏི ཨེཏྠ ཨརུཎེ ཨནུཊྛིཏེཡེཝ ཝཏྟནིཀྑིཔནེ ཀརིཡམཱནེ རཏྟིཙྪེདོ ཧོཏི, སཱ རཏྟི གཎནཱུཔགཱ ན ཧོཏི, ཏསྨཱ པཋམཔརིཙྪེདེ ཝུཏྟཾ ཨརུཎཀཐཱཝིནིཙྪཡཾ ཨོལོཀེཏྭཱ ཨརུཎུགྒམནབྷཱཝོ སུཊྛུ ཛཱནིཏབྦོ.

‘‘ཨཱརོཙཱཔེཏྭཱ ¶ ཝཏྟཾ ནིཀྑིཔཱཔེཏབྦ’’ནྟི ཝུཏྟཾ. ཀསྨཱ ཨཱརོཙཱཔེཏི, ནནུ སམཱདིནྣཀཱལེཡེཝ ཨཱརོཙིཏནྟི? སཙྩཾ, ཏཐཱཔི པཱརིཝཱསིཀཝཏྟསམཱདཱནཀཱལེ ཨཱརོཙིཏེསུ བྷིཀྑཱུསུ ཨེཀཙྩེ ནིཀྑིཔནཀཱལེ གཙྪནྟི, ཨཉྙེ ཨཱགཙྪནྟི, ཨེཝཾ པརིསསངྐམནམྤི སིཡཱ, ཏཐཱ ཙ སཏི ཨབྷིནཝཱགཏཱནཾ སབྦྷཱཝཱ ཨཱརོཙེཏབྦཾ ཧོཏི, ཨསཏི པན ཨབྷིནཝཱགཏབྷིཀྑུམྷི ཨཱརོཙནཀིཙྩཾ ནཏྠི. ཨེཝཾ སནྟེཔི ཨཱརོཙནེ དོསཱབྷཱཝཏོ པུན ཨཱརོཙནཾ ཉཱཡཱགཏཾ ཧོཏི, མཱནཏྟཙརཎཀཱལེ པན སམཱདཱནེ ཨཱརོཙིཏེཔི ནིཀྑིཔནེ ཨཝསྶཾ ཨཱརོཙེཏབྦམེཝ ¶ . ཀསྨཱ? དིཝསནྟརབྷཱཝཏོ. ‘‘དེཝསིཀཾ ཨཱརོཙེཏབྦ’’ནྟི (ཙཱུལ༹ཝ. ཨཊྛ. ༩༠) ཧི ཝུཏྟཾ. ཨེཝཾ སནྟེཔི སཱཡཾ སམཱདཱནཀཱལེ ཨཱརོཙེསྶཏི, ཏསྨཱ ནིཀྑིཔནེ ཨཱརོཙནཀིཙྩཾ ནཏྠཱིཏི ཙེ? ན, སཱཡཾ སམཱདཱནཀཱལེ ཨེཏེ བྷིཀྑཱུ ཨཱགཙྪིསྶནྟིཔི, ན ཨཱགཙྪིསྶནྟིཔི, ཨནཱགཏཱནཾ ཀཐཾ ཨཱརོཙེཏུཾ ལབྷིསྶཏི, ཨནཱརོཙནེ ཙ སཏི རཏྟིཙྪེདོ སིཡཱ, ཏསྨཱ ཏསྨིཾ དིཝསེ ཨརུཎེ ཨུཊྛིཏེ ཝཏྟནིཀྑིཔནཏོ པུརེཡེཝ ཨཱརོཙེཏབྦནྟི ནོ མཏི, སུཊྛུཏརཾ ཨུཔདྷཱརེཏྭཱ གཧེཏབྦཾ. ཨེཝཾ པཀརཎཱགཏནཡེན ཝཱ པཀརཎཱནུལོམཨཱཙརིཡནཡེན ཝཱ སམྨཱསམྦུདྡྷསྶ ཨཱཎཾ པཏིཊྛཱཔེནྟེན ཝིནཡཀོཝིདེན བཧུསྶུཏེན ལཛྫཱིཔེསལབྷཱུཏེན ཝིནཡདྷརེན ཝིསུདྡྷིཀཱམཱནཾ པེསལཱནཾ བྷིཀྑཱུནཾ སཱིལཝིསུདྡྷཏྠཱཡ སུཊྛུ ཝིཙཱརེཏྭཱ པརིཝཱསཝཏྟཱམཱནཏྟཙརཎཝཏྟཱནི ཨཱཙིཀྑིཏབྦཱནཱིཏི.

ཨིམསྨིཾ ཋཱནེ ལཛྫཱིབྷིཀྑཱུནཾ པརིཝཱསཱདིཀཐཱཡ ཀུསལཏྠཾ ནཱནཱཝཱདནཡོ ཝུཙྩཏེ – ཀེཙི བྷིཀྑཱུ ‘‘པཀཏཏྟསཱལཾ ཀུརུམཱནེན ཏསྶཱ སཱལཱཡ མཛ྄ཛྷེ ཐམྦྷཾ ནིམིཏྟཾ ཀཏྭཱ ཏཏོ དྭཱདསཧཏྠམཏྟཾ པདེསཾ སལླཀྑེཏྭཱ ཡཐཱ པཉྙཏྟེ ¶ པཱརིཝཱསིཀཱནཾ མཉྩེ ནིཔནྣསྶ བྷིཀྑུསྶ གཱིཝཱ ཏསྶ པདེསསྶ ཨུཔརི ཧོཏི, ཏཐཱ པཉྙཱཔེཏབྦོ. ཨེཝཾ ཀཏེ སུཀཏཾ ཧོཏཱི’’ཏི ཝདནྟི ཀརོནྟི ཙ. ཨེཀཙྩེ ‘‘མཉྩེ ནིཔནྣསྶ བྷིཀྑུསྶ ཀཊི ཏསྶ པདེསསྶ ཨུཔརི ཧོཏི, ཡཐཱ པཉྙཱཔེཏབྦོ, ཨེཝཾ ཀཏེ སུཀཏཾ ཧོཏཱི’’ཏི ཝདནྟི ཀརོནྟི ཙ, ཏཾ ཝཙནཾ ནེཝ པཱལི༹ཡཾ, ན ཨཊྛཀཐཱཊཱིཀཱདཱིསུ ཝིཛྫཏི, ཀེཝལཾ ཏེསཾ པརིཀཔྤམེཝ. ཨཡཾ པན ནེསཾ ཨདྷིཔྤཱཡོ སིཡཱ – ‘‘དྭཱདསཧཏྠཾ པན ཨུཔཙཱརཾ མུཉྩིཏྭཱ ནིསཱིདིཏུཾ ཝཊྚཏཱི’’ཏི ཨཊྛཀཐཱཡཾ ཝུཏྟཝཙནཉྩ ‘‘ཨཐ དྭཱདསཧཏྠཾ ཨུཔཙཱརཾ ཨོཀྐམིཏྭཱ ཨཛཱནནྟསྶེཝ གཙྪཏི, རཏྟིཙྪེདོ ཧོཏི ཨེཝ, ཝཏྟབྷེདོ པན ནཏྠཱི’’ཏི ཨཊྛཀཐཱཝཙནཉྩ (ཙཱུལ༹ཝ. ཨཊྛ. ༩༧) ‘‘ཨདིཊྛཨསྶུཏཱནམྤི ཨནྟོདྭཱདསཧཏྠགཏཱནཾ ཨཱརོཙེཏབྦ’’ནྟི ཝུཏྟཊཱིཀཱཝཙནཉྩ (སཱརཏྠ. ཊཱི. ཙཱུལ༹ཝགྒ ༣.༩༧) ‘‘ཨདིཊྛཨསྶུཏཱནམྤི ཨནྟོདྭཱདསཧཏྠགཏཱནཾ ཨཱརོཙེཏབྦཾ, ‘ཨིདཾ ཝཏྟཾ ནིཀྑིཔིཏྭཱ ཝསནྟསྶ ལཀྑཎ’ནྟི ཝུཏྟ’’ནྟི ཝུཏྟཝཛིརབུདྡྷིཊཱིཀཱཝཙནཉྩ (ཝཛིར. ཊཱི. ཙཱུལ༹ཝགྒ ༩༧) ‘‘ཨཏྠིབྷཱཝཾ སལླཀྑེཏྭཱཏི དྭཱདསཧཏྠེ ཨུཔཙཱརེ སལླཀྑེཏྭཱ, ཨནིཀྑིཏྟཝཏྟཱནཾ ཨུཔཙཱརསཱིམཱཡ ཨཱགཏབྷཱཝཾ སལླཀྑེཏྭཱ སཧཝཱསཱདིཀཾ ཝེདིཏབྦ’’ནྟི ཝུཏྟཾ ཝཛིརབུདྡྷིཊཱིཀཱཝཙནཉྩ པསྶིཏྭཱ ཨཡོནིསོ ཨཏྠཾ གཧེཏྭཱ སབྦཏྠ དྭཱདསཧཏྠམེཝ པམཱཎཾ, ཏཏོ ཨཱུནམྤི ཨདྷིཀམྤི ན ཝཊྚཏི, ཏསྨཱ ཡཐཱཝུཏྟནཡེན མཛ྄ཛྷེ ཐམྦྷཏོ དྭཱདསཧཏྠམཏྟེ པདེསེ ནིཔནྣསྶ བྷིཀྑུསྶ ¶ གཱིཝཱ ཝཱ ཀཊི ཝཱ ཧོཏུ, ཨེཝཾ སནྟེ དྭཱདསཧཏྠཔྤདེསེ པཱརིཝཱསིཀབྷིཀྑུ ཧོཏི, ཏཏོ སཧཝཱསཏོ ཝཱ ཝིཔྤཝཱསཏོ ཝཱ རཏྟིཙྪེདཝཏྟབྷེདདོསཱ ན ཧོནྟཱིཏི.

ཏཏྲེཝཾ ཡུཏྟཱཡུཏྟཝིཙཱརཎཱ ཀཱཏབྦཱ. ཡཐཱཝུཏྟཔཱཋེསུ པཋམཔཱཋསྶ ཨཡམདྷིཔྤཱཡོ – པཀཏཏྟབྷིཀྑུམྷི ཚམཱཡ ¶ ནིསིནྣེ ཡདི པཱརིཝཱསིཀབྷིཀྑུ ཨཱསནེ ནིསཱིདིཏུཀཱམོ, པཀཏཏྟསྶ བྷིཀྑུནོ ནིསིནྣཊྛཱནཏོ དྭཱདསཧཏྠཾ ཨུཔཙཱརཾ མུཉྩིཏྭཱཝ ནིསཱིདིཏུཾ ཝཊྚཏི, ན དྭཱདསཧཏྠབྦྷནྟརེཏི. ཨེཏེན དྭཱིསུཔི ཚམཱཡ ནིསིནྣེསུ དྭཱདསཧཏྠབྦྷནྟརེཔི ཝཊྚཏི, དྭཱདསཧཏྠཔྤདེསཏོ བཧི ནིསཱིདནྟོ ཨཱསནེཔི ནིསཱིདིཏུཾ ཝཊྚཏཱིཏི དསྶེཏི. ཏེནཱཧ ‘‘ན ཚམཱཡ ནིསིནྣེཏི པཀཏཏྟེ བྷཱུམིཡཾ ནིསིནྣེ ཨིཏརེན ཨནྟམསོ ཏིཎསནྠརེཔི ཨུཙྩཏརེ ཝཱལིཀཏལེཔི ཝཱ ན ནིསཱིདིཏབྦཾ, དྭཱདསཧཏྠཾ པན ཨུཔཙཱརཾ མུཉྩིཏྭཱ ནིསཱིདིཏུཾ ཝཊྚཏཱི’’ཏི (ཙཱུལ༹ཝ. ཨཊྛ. ༨༡). ཨིཏི པཀཏཏྟེ ཚམཱཡ ནིསིནྣེ པཱརིཝཱསིཀེན ནིསཱིདིཏབྦཊྛཱནདཱིཔཀོ ཨཡཾ པཱཋོ, ན མཉྩཔཉྙཱཔནཊྛཱནསཡནཊྛཱནདཱིཔཀོ, ཏཾ པུབྦཱཔརཔརིཔུཎྞཾ སཀལཾ པཱཋཾ ཨནོལོཀེཏྭཱ ཨེཀདེསམཏྟམེཝ པསྶིཏྭཱ པརིཀཔྤཝསེན ཨཡོནིསོ ཨདྷིཔྤཱཡཾ གཎྷནྟི.

དུཏིཡཔཱཋསྶ པན ཨཡམདྷིཔྤཱཡོ – བཧི ཨུཔཙཱརསཱིམཱཡ པཊིཙྪནྣཊྛཱནེ ཝཏྟཾ སམཱདིཡིཏྭཱ ནིསིནྣེ བྷིཀྑུསྨིཾ ཏསྶ ནིསིནྣཊྛཱནཏོ དྭཱདསཧཏྠཾ ཨུཔཙཱརཾ ཨོཀྐམིཏྭཱ ཏསྶ ཨཛཱནནྟསྶེཝ ཨཉྙོ བྷིཀྑུ གཙྪཏི, ཏསྶ པཱརིཝཱསིཀསྶ བྷིཀྑུནོ རཏྟིཙྪེདོ ཧོཏི, ཝཏྟབྷེདོ པན ནཏྠི. ཀསྨཱ རཏྟིཙྪེདོ ཧོཏི? ཨུཔཙཱརཾ ཨོཀྐམིཏཏྟཱ. ཀསྨཱ ན ཝཏྟབྷེདོ? ཨཛཱནནྟཏྟཱཏི. ཨེཏེན བཧིཨུཔཙཱརསཱིམཱཡ ཨུཔཙཱརོ དྭཱདསཧཏྠཔྤམཱཎོ ཧོཏི ཨཱརོཙནཀྑེཏྟབྷཱུཏོཏི དསྶེཏི. ཏེནཱཧ ‘‘གུམྦེན ཝཱ ཝཏིཡཱ ཝཱ པཊིཙྪནྣཊྛཱནེ ནིསཱིདིཏབྦཾ, ཨནྟོཨརུཎེཡེཝ ཝུཏྟནཡེན ཝཏྟཾ སམཱདིཡིཏྭཱ ཨཱརོཙེཏབྦཾ. སཙེ ཨཉྙོ ཀོཙི བྷིཀྑུ ཀེནཙིདེཝ ཀརཎཱིཡེན ཏཾ ཋཱནཾ ཨཱགཙྪཏི, སཙེ ཨེས ཏཾ པསྶཏི, སདྡཾ ཝཱསྶ སུཎཱཏི, ཨཱརོཙེཏབྦཾ. ཨནཱརོཙེནྟསྶ རཏྟིཙྪེདོ ཙེཝ ཝཏྟབྷེདོ ཙ. ཨཐ དྭཱདསཧཏྠཾ ¶ ཨུཔཙཱརཾ ཨོཀྐམིཏྭཱ ཨཛཱནནྟསྶེཝ གཙྪཏི, རཏྟིཙྪེདོ ཧོཏི ཨེཝ, ཝཏྟབྷེདོ པན ནཏྠཱི’’ཏི (ཙཱུལ༹ཝ. ཨཊྛ. ༩༧). ཨིཏི ཨཡམྤི པཱཋོ ཨཱརོཙནཀྑེཏྟདཱིཔཀོ ཧོཏི, ན མཉྩཔཉྙཱཔནཱདིདཱིཔཀོཏི དཊྛབྦཾ.

ཏཏིཡཔཱཋསྶ པན ཨཡམདྷིཔྤཱཡོ – ཀིཾ བཧིཨུཔཙཱརསཱིམཱཡ ཝཏྟསམཱདཱནཊྛཱནཾ ཨཱགཏབྷིཀྑཱུནཾ ¶ དིཊྛརཱུཔཱནཾ སུཏསདྡཱནཾཡེཝ ཨཱརོཙེཏབྦནྟི པུཙྪཱཡ སཏི ཨདིཊྛཨསྶུཏཱནམྤི ཨནྟོདྭཱདསཧཏྠགཏཱནཾ ཨཱརོཙེཏབྦནྟི ཝིསྶཛྫེཏབྦནྟི. ཨེཏེན ཨདིཊྛཨསྶུཏཱནཾ པན ཨནྟོདྭཱདསཧཏྠགཏཱནཾཡེཝ ཨཱརོཙེཏབྦཾ, ན བཧིདྭཱདསཧཏྠགཏཱནཾ, དིཊྛསུཏཱནཾ པན ཨནྟོདྭཱདསཧཏྠགཏཱནམྤི བཧིདྭཱདསཧཏྠགཏཱནམྤི ཨཱཀཱསཱདིགཏཱནམྤི ཨཱརོཙེཏབྦམེཝཱཏི དསྶེཏི. ཏེནཱཧ ‘‘ཨཡཾ པནེཏྠ ཐེརསྶ ཨདྷིཔྤཱཡོ – ཝཏྟཾ ནིཀྑིཔིཏྭཱ པརིཝསནྟསྶ ཨུཔཙཱརགཏཱནཾ སབྦེསཾ ཨཱརོཙནཀིཙྩཾ ནཏྠི, དིཊྛརཱུཔཱནཾ སུཏསདྡཱནཾ ཨཱརོཙེཏབྦཾ, ཨདིཊྛཨསྶུཏཱནམྤི ཨནྟོདྭཱདསཧཏྠགཏཱནཾ ཨཱརོཙེཏབྦཾ. ཨིདཾ ཝཏྟཾ ནིཀྑིཔིཏྭཱ པརིཝསནྟསྶ ལཀྑཎ’’ནྟི (སཱརཏྠ. ཊཱི. ཙཱུལ༹ཝགྒ ༣.༩༧). ཨིཏི ཨཡམྤི པཱཋོ ཨཱརོཙེཏབྦལཀྑཎདཱིཔཀོ ཧོཏི, ན མཉྩཔཉྙཱཔནཱདིདཱིཔཀོཏི. ཙཏུཏྠཔཱཋསྶ ཨདྷིཔྤཱཡོཔི ཏཏིཡཔཱཋསྶ ཨདྷིཔྤཱཡསདིསོཝ.

པཉྩམཔཱཋསྶ པན ཨཡམདྷིཔྤཱཡོ – ཨཏྠིབྷཱཝཾ སལླཀྑེཏྭཱཏི ཨེཏྠ ཨེཏསྨིཾ ཨཊྛཀཐཱཝཙནེ ནིཀྑིཏྟཝཏྟཱནཾ བྷིཀྑཱུནཾ ཨཏྟནོ ནིསིནྣཊྛཱནཏོ དྭཱདསཧཏྠེ ཨུཔཙཱརེ ཨཉྙེསཾ བྷིཀྑཱུནཾ ཨཏྠིབྷཱཝཾ སལླཀྑེཏྭཱ ཨནིཀྑིཏྟཝཏྟཱནཾ ཨུཔཙཱརསཱིམཱཡ ཨཉྙེསཾ བྷིཀྑཱུནཾ ཨཱགཏབྷཱཝཾ སལླཀྑེཏྭཱ སཧཝཱསཱདིཀཾ ཝེདིཏབྦཾ. ཨཱདི-སདྡེན ཝིཔྤཝཱསཨནཱརོཙནཨཱུནེགཎེཙརཎཱནི སངྒཎྷཱཏི. ཨཡཉྩ ཡསྨཱ གཎསྶ ཨཱརོཙེཏྭཱ བྷིཀྑཱུནཉྩ ཨཏྠིབྷཱཝཾ སལླཀྑེཏྭཱ ཝསི ¶ , ཏསྨཱ ནིཀྑིཏྟཝཏྟཱནཾ བཧིཨུཔཙཱརསཱིམཱཡ སམཱདིནྣཏྟཱ ཨཏྟནོ ནིསིནྣཊྛཱནཏོ དྭཱདསཧཏྠེ ཨུཔཙཱརེ ཨཉྙེསཾ བྷིཀྑཱུནཾ ཨཏྠིབྷཱཝཾ སལླཀྑེཏྭཱ ཨནིཀྑིཏྟཝཏྟཱནཾ ཨནྟོཝིཧཱརེ སམཱདིནྣཏྟཱ ཨུཔཙཱརསཱིམཱཡ ཨཉྙེསཾ བྷིཀྑཱུནཾ ཨཱགཏབྷཱཝཾ སལླཀྑེཏྭཱ སཧཝཱསཝིཔྤཝཱསཨནཱརོཙནཨཱུནེགཎེཙརཎསངྑཱཏཱནི ཝཏྟཙྪེདཀཱརཎཱནི ཝེདིཏབྦཱནཱིཏི. ཝུཏྟཉྷི ཨཊྛཀཐཱཡཾ (ཙཱུལ༹ཝ. ཨཊྛ. ༩༧) ‘‘ཨཡཉྩ ཡསྨཱ གཎསྶ ཨཱརོཙེཏྭཱ བྷིཀྑཱུནཉྩ ཨཏྠིབྷཱཝཾ སལླཀྑེཏྭཱཝ ཝསི, ཏེནསྶ ཨཱུནེགཎེཙརཎདོསོ ཝཱ ཝིཔྤཝཱསོ ཝཱ ན ཧོཏཱི’’ཏི. ཨིཏི ཨཡཉྩ པཱཋོ པཀཏཏྟབྷིཀྑཱུསུ གཏེསུཔི ཝཏྟཾ ཨཱརོཙེཏྭཱ བྷིཀྑཱུནཾ ཨཏྠིབྷཱཝཾ སལླཀྑེཏྭཱ ཝསིཏཏྟཱ དོསཱབྷཱཝམེཝ དཱིཔེཏི, ན མཉྩཔཉྙཱཔནཱདཱིནི. ཨིཏི ཨིམེསཾ པཱཋཱནཾ ཨཡོནིསོ ཨདྷིཔྤཱཡཾ གཧེཏྭཱ ‘‘སབྦཏྠ དྭཱདསཧཏྠམེཝ པམཱཎ’’ནྟི མཉྙམཱནཱ ཝིཙཱརིཾསུ, ཏེསཾ དིཊྛཱནུགཏིཾ ཨཱཔཛྫམཱནཱ སིསྶཱནུསིསྶཱདཡོཔི ཏཐེཝ ཀརོནྟི, ཏདེཏཾ ཨཔྤམཱཎཾ.

ཀཐཾ? ཡཾ ཏཏྠ པཀཏཏྟསཱལཱཡ མཛ྄ཛྷེ ཐམྦྷཾ ནིམིཏྟཾ ཀཏྭཱ དྭཱདསཧཏྠཾ མིནིཾསུ, ཏདཔྤམཱཎཾ ¶ . ན ཧི ཐམྦྷེན ཝཱ སཱལཱཡ ཝཱ སཧཝཱསོ ཝཱ ཝིཔྤཝཱསོ ཝཱ ཝུཏྟོ, ཨཐ ཁོ པཀཏཏྟབྷིཀྑུནཱཝ. ཝུཏྟཉྷི སམནྟཔཱསཱདིཀཱཡཾ (ཙཱུལ༹ཝ. ཨཊྛ. ༨༣) ‘‘ཏཏྠ སཧཝཱསོཏི ཡྭཱཡཾ པཀཏཏྟེན བྷིཀྑུནཱ སདྡྷིཾ ཨེཀཙྪནྣེཏིཨཱདིནཱ ནཡེན ཝུཏྟོ ཨེཀཏོ ཝཱསོ. ཝིཔྤཝཱསོཏི ཨེཀཀསྶེཝ ཝཱསོ’’ཏི. ཡཉྷི ཏཏོ དྭཱདསཧཏྠམཏྟཊྛཱནེ བྷིཀྑུསྶ གཱིཝཱཊྛཔནཾ ཝཱ ཀཊིཊྛཔནཾ ཝཱ ཝདནྟི, ཏདཔི ཨཔྤམཱཎཾ. བཧིཨུཔཙཱརསཱིམཱཡ ཧི པརིཝསནྟསྶ བྷིཀྑུསྶ སཀལསརཱིརཾ པཀཏཏྟབྷིཀྑཱུནཾ ཨནྟོདྭཱདསཧཏྠེ ཨུཔཙཱརེ ཋཔེཏབྦཾ ཧོཏི, ན ཨེཀདེསམཏྟཾ.

ཏེསཾ ¶ པན ཨཡམདྷིཔྤཱཡོ སིཡཱ – དྭཱདསཧཏྠཔྤདེསཏོ སཀལསརཱིརསྶ ཨནྟོཀརཎེ སཏི སཧཝཱསོ བྷཝེཡྻ, བཧིཀརཎེ སཏི ཝིཔྤཝཱསོ, ཏེན ཨུཔཌྜྷཾ ཨནྟོ ཨུཔཌྜྷཾ བཧི ཧོཏཱུཏི, ཏཾ མིཙྪཱཉཱཎཝསེན ཧོཏི. ན ཧི སཧཝཱསདོསོ དྭཱདསཧཏྠེན ཀཐིཏོ, ཨཐ ཁོ ཨེཀཙྪནྣེ སཡནེན. ཝུཏྟཉྷེཏཾ བྷགཝཏཱ པཱརིཝཱསིཀཀྑནྡྷཀེ (ཙཱུལ༹ཝ. ༨༡) ‘‘ན, བྷིཀྑཝེ, པཱརིཝཱསིཀེན བྷིཀྑུནཱ པཀཏཏྟེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ཝཏྠབྦཾ, ན ཨེཀཙྪནྣེ ཨནཱཝཱསེ ཝཏྠབྦཾ, ན ཨེཀཙྪནྣེ ཨཱཝཱསེ ཝཱ ཨནཱཝཱསེ ཝཱ ཝཏྠབྦ’’ནྟི. ཨཊྛཀཐཱཡམྤི (ཙཱུལ༹ཝ. ཨཊྛ. ༨༡) ཝུཏྟཾ ‘‘ཨེཀཙྪནྣེ ཨཱཝཱསེ’’ཏིཨཱདཱིསུ ཨཱཝཱསོ ནཱམ ཝསནཏྠཱཡ ཀཏསེནཱསནཾ. ཨནཱཝཱསོ ནཱམ ཙེཏིཡགྷརཾ བོདྷིགྷརཾ སམྨུཉྫནིཨཊྚཀོ དཱརུཨཊྚཀོ པཱནཱིཡམཱལོ༹ ཝཙྩཀུཊི དྭཱརཀོཊྛཀོཏི ཨེཝམཱདི. ཏཏིཡཔདེན ཏདུབྷཡམྤི གཧིཏཾ, ‘ཨེཏེསུ ཡཏྠ ཀཏྠཙི ཨེཀཙྪནྣེ ཚདནཏོ ཨུདཀཔཏནཊྛཱནཔརིཙྪིནྣེ ཨོཀཱསེ ཨུཀྑིཏྟཀོ ཝསིཏུཾ ན ལབྷཏི, པཱརིཝཱསིཀོ པན ཨནྟོཨཱཝཱསེཡེཝ ན ལབྷཏཱི’ཏི མཧཱཔཙྩརིཡཾ ཝུཏྟཾ. མཧཱཨཊྛཀཐཱཡཾ པན ‘ཨཝིསེསེན ཨུདཀཔཱཏེན ཝཱརིཏ’ནྟི ཝུཏྟཾ. ཀུརུནྡིཡཾ ‘ཨེཏེསུ ཨེཏྟཀེསུ པཉྩཝཎྞཚདནབདྡྷཊྛཱནེསུ པཱརིཝཱསིཀསྶ ཙ ཨུཀྑིཏྟཀསྶ ཙ པཀཏཏྟེན སདྡྷིཾ ཨུདཀཔཱཏེན ཝཱརིཏ’ནྟི ཝུཏྟཾ, ཏསྨཱ ནཱནཱུཔཙཱརེཔི ཨེཀཙྪནྣེ ན ཝཊྚཏི. སཙེ པནེཏྠ ཏདཧུཔསམྤནྣེཔི པཀཏཏྟེ པཋམཾ པཝིསིཏྭཱ ནིཔནྣེ སཊྛིཝསྶོཔི པཱརིཝཱསིཀོ པཙྪཱ པཝིསིཏྭཱ ཛཱནནྟོ ནིཔཛྫཏི, རཏྟིཙྪེདོ ཙེཝ ཝཏྟབྷེདདུཀྐཊཉྩ, ཨཛཱནནྟསྶ རཏྟིཙྪེདོཝ, ན ཝཏྟབྷེདདུཀྐཊཾ. སཙེ པན ཏསྨིཾ པཋམཾ ནིཔནྣེ པཙྪཱ པཀཏཏྟོ པཝིསིཏྭཱ ནིཔཛྫཏི, པཱརིཝཱསིཀོ ཙ ཛཱནཱཏི, རཏྟིཙྪེདོ ཙེཝ ཝཏྟབྷེདདུཀྐཊཉྩ. ནོ ཙེ ཛཱནཱཏི ¶ , རཏྟིཙྪེདོཝ, ན ཝཏྟབྷེདདུཀྐཊནྟི, ཏསྨཱ སཱལཱཡཔི ཝིཧཱརེཔི ཚདནཏོ ཨུདཀཔཏནཊྛཱནཏོ མུཏྟམཏྟེཡེཝ སཧཝཱསདོསོ ན ཝིཛྫཏཱིཏི དཊྛབྦཾ.

ཨེཀཙྩེ ¶ པན མཛ྄ཛྷིམཏྠམྦྷཏོ དྭཱདསཧཏྠཱཡཱམེན དཎྜཀེན ཙཀྐཾ བྷམིཏྭཱ སམནྟཏོ བཱཧིརེ ལེཁཾ ཀརོནྟི, ཨེཝཾ ཀཏེ སཱ བཱཧིརལེཁཱ ཨཱཝཊྚཏོ དྭཱསཏྟཏིཧཏྠམཏྟཱ ཧོཏི, ཏཏོ ཏཾ པདེསཾ དྭཱདསཧཏྠེན དཎྜཀེན མིནིཏྭཱ བྷཱཛིཡམཱནཾ ཚབྷཱགམེཝ ཧོཏི, ཏཏོ ཏེསཾ ཚབྷཱགཱནཾ སཱིམཱཡ ཨེཀེཀསྨིཾ མཉྩེ པཉྙཔིཡམཱནེ ཚལེ༹ཝ མཉྩཊྛཱནཱནི ཧོནྟི, ཏསྨཱ ཨེཀསྨིཾ ཝཊྚམཎྜལེ ཚ བྷིཀྑཱུཡེཝ ཨཔུབྦཾ ཨཙརིམཾ ཝསིཏུཾ ལབྷནྟི, ན ཏཏོ ཨུདྡྷནྟི ཝདནྟི. ཀསྨཱ པན ཨེཝཾ ཀརོནྟཱིཏི? པུབྦེ ཝུཏྟནཡེན ‘‘སབྦཏྠ དྭཱདསཧཏྠམཏྟམེཝ པམཱཎ’’ནྟི གཧིཏཏྟཱ. ཨེཝཾ ཀིར ནེསམདྷིཔྤཱཡོ – པཱརིཝཱསིཀོ པཀཏཏྟསྶ བྷིཀྑུནོ དྭཱདསཧཏྠབྦྷནྟརེ སཡམཱནོ སཧཝཱསོ སིཡཱ, བཱཧིརེ སཡམཱནོ ཝིཔྤཝཱསོ, ཏཐཱ ཨཉྙམཉྙསྶཔཱིཏི. ཨེཝཾ ཀརོནྟཱནཾ པན ནེསཾ སཀཨདྷིཔྤཱཡོཔི ན སིཛ྄ཛྷཏི, ཀུཏོ བྷགཝཏོ ཨདྷིཔྤཱཡོ.

ཀཐཾ? པཱརིཝཱསིཀོ བྷིཀྑུ པཀཏཏྟབྷིཀྑཱུནཉྩ ཨཉྙམཉྙསྶ ཙ དྭཱདསཧཏྠམཏྟེ པདེསེ ཧོཏཱུཏི ནེསམདྷིཔྤཱཡོ. ཨཐ པན མཛ྄ཛྷིམཏྠམྦྷཾ ནིམིཏྟཾ ཀཏྭཱ མིནིཡམཱནཱ སམནྟཏོ བཱཧིརལེཁཱ ཐམྦྷཏོཡེཝ དྭཱདསཧཏྠམཏྟཱ ཧོཏི, ན པཀཏཏྟབྷིཀྑཱུཧི. ཏེ ཧི ཐམྦྷཏོ བཧི ཨེཀརཏནདྭིཏིརཏནཱདིཊྛཱནེ ཋིཏཱ, བཱཧིརཏོཔི ལེཁཱཡེཝ ཐམྦྷཏོ དྭཱདསཧཏྠམཏྟཱ ཧོཏི, ན ཏསྶཱུཔརི ནིཔནྣབྷིཀྑུ. སོ ཧི དྭིརཏནམཏྟེནཔི ཏིརཏནམཏྟེནཔི ལེཁཱཡ ཨནྟོཔི ཧོཏི བཧིཔི. ཨཉྙམཉྙསྶཔི ཚབྷཱགསཱིམཱཡེཝ ཨཉྙམཉྙསྶ དྭཱདསཧཏྠམཏྟཱ ཧོཏི ¶ , ན ཏསྶཱུཔརི པཉྙཏྟམཉྩོ ཝཱ ཏཏྠ ནིཔནྣབྷིཀྑུ ཝཱ. མཉྩོ ཧི ཨེཀརཏནམཏྟེན ཝཱ དྭིརཏནམཏྟེན ཝཱ སཱིམཾ ཨཏིཀྐམིཏྭཱ ཋིཏོ, བྷིཀྑཱུཔི སཡམཱནཱ ན སཱིམཱཡ ཨུཔརིཡེཝ སཡནྟི, ཝིདཏྠིམཏྟེན ཝཱ རཏནམཏྟེན ཝཱ སཱིམཾ ཨཏིཀྐམིཏྭཱ ཝཱ ཨཔྤཏྭཱ ཝཱ སཡནྟི, ཏསྨཱ ཏེ པཱརིཝཱསིཀཱ བྷིཀྑཱུ པཀཏཏྟབྷིཀྑཱུནམྤི ཨཉྙམཉྙསྶཔི དྭཱདསཧཏྠམཏྟཊྛཱཡིནོ ན ཧོནྟི, ཏཏོ ཨཱུནཱཝ ཧོནྟི, ཏསྨཱ སཀཨདྷིཔྤཱཡོཔི ན སིཛ྄ཛྷཏི.

བྷགཝཏོ པན ཨདྷིཔྤཱཡོ – ཡདི ཨཔྤབྷིཀྑུཀཱདིཨངྒསམྤནྣཏྟཱ ཝིཧཱརསྶ ཝཏྟཾ ཨནིཀྑིཔིཏྭཱ ཨནྟོཝིཧཱརེཡེཝ པརིཝསཏི, ཨེཝཾ སཏི པཀཏཏྟེན བྷིཀྑུནཱ ན ཨེཀཙྪནྣེ ཨཱཝཱསེ ཝསིཏབྦཾ. ཡདི ཏཱདིསཨཱཝཱསེ ཝཱ ཨནཱཝཱསེ ཝཱ ཚདནཏོ ཨུདཀཔཏནཊྛཱནསྶ ཨནྟོ སཡེཡྻ, སཧཝཱསོ ནཱམ, རཏྟིཙྪེདོ ཧོཏཱིཏི ཨཡམཏྠོ ཡཐཱཝུཏྟ-པཱལི༹ཡཱ ཙ ཨཊྛཀཐཱཡ ཙ པཀཱསེཏབྦོ. ན ཨེཀཙྪནྣེ ཨཱཝཱསེ དྭཱིཧི ཝཏྠབྦཾ. ཡདི ཝསེཡྻ, ཝུཌྜྷསྶ རཏྟིཙྪེདོཡེཝ, ནཝཀསྶ རཏྟིཙྪེདོ ཙེཝ ཝཏྟབྷེདདུཀྐཊཉྩ ཧོཏི. སམཝསྶཱ ཙེ, ཨཛཱནནྟསྶ རཏྟིཙྪེདོཡེཝ ¶ , ཛཱནནྟསྶ ཨུབྷཡམྤཱིཏི ཨཡམཏྠོ ‘‘ཏཡོ ཁོ, ཨུཔཱལི, པཱརིཝཱསིཀསྶ བྷིཀྑུནོ རཏྟིཙྪེདཱ སཧཝཱསོ ཝིཔྤཝཱསོ ཨནཱརོཙནཱ’’ཏི ཙ ‘‘ན, བྷིཀྑཝེ, པཱརིཝཱསིཀེན བྷིཀྑུནཱ པཱརིཝཱསིཀེན ཝུཌྜྷཏརེན སདྡྷིཾ ན ཨེཀཙྪནྣེ ཨཱཝཱསེ ཝཏྠབྦ’’ནྟི (ཙཱུལ༹ཝ. ༨༢) ཙ ‘‘ཝུཌྜྷཏརེནཱཏི ཨེཏྠ…པེ… སཙེ ཧི དྭེ པཱརིཝཱསིཀཱ ཨེཀཏོ ཝསེཡྻུཾ, ཏེ ཨཉྙམཉྙསྶ ཨཛ྄ཛྷཱཙཱརཾ ཉཏྭཱ ཨགཱརཝཱ ཝཱ ཝིཔྤཊིསཱརིནོ ཝཱ ཧུཏྭཱ པཱཔིཊྛཏརཾ ཝཱ ཨཱཔཏྟིཾ ཨཱཔཛྫེཡྻུཾ ཝིབྦྷམེཡྻུཾ ཝཱ, ཏསྨཱ ནེསཾ སཧསེཡྻཱ སབྦཔྤཀཱརེན པཊིཀྑིཏྟཱ’’ཏི (ཙཱུལ༹ཝ. ཨཊྛ. ༨༡) ཙ ཨིམེཧི པཱལི༹ཨཊྛཀཐཱཔཱཋེཧི པཀཱསེཏབྦོ. ཝིཔྤཝཱསེཔི པཱརིཝཱསིཀེན ཨབྷིཀྑུཀེ ¶ ཨཱཝཱསེ ན ཝཏྠབྦཾ, པཀཏཏྟེན ཝིནཱ ཨབྷིཀྑུཀོ ཨཱཝཱསོ ན གནྟབྦོ, བཧིསཱིམཱཡཾ བྷིཀྑཱུནཾ ཝསནཊྛཱནཏོ དྭཱདསཧཏྠཔྤམཱཎསྶ ཨུཔཙཱརསྶ ཨནྟོ ནིསཱིདིཏབྦནྟི བྷགཝཏོ ཨདྷིཔྤཱཡོ.

ཨཡམཏྠོ ‘‘ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཨབྷིཀྑུཀོ ཨཱཝཱསོ གནྟབྦོ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ’’ཏིཨཱདི (ཙཱུལ༹ཝ. ༧༦) ཙ ‘‘ཏཡོ ཁོ, ཨུཔཱལི…པེ… ཨནཱརོཙནཱ’’ཏི ཙ ‘‘ཙཏྟཱརོ ཁོ, ཨུཔཱལི, མཱནཏྟཙཱརིཀསྶ བྷིཀྑུནོ རཏྟིཙྪེདཱ སཧཝཱསོ, ཝིཔྤཝཱསོ, ཨནཱརོཙནཱ, ཨཱུནེགཎེཙརཎ’’ནྟི (ཙཱུལ༹ཝ. ༩༢) ཙ ‘‘ཝིཔྤཝཱསོཏི ཨེཀཀསྶེཝ ཝཱསོ’’ཏི ཙ ‘‘ཨཡཉྩ ཡསྨཱ གཎསྶ ཨཱརོཙེཏྭཱ བྷིཀྑཱུནཉྩ ཨཏྠིབྷཱཝཾ སལླཀྑེཏྭཱཝ ཝསི, ཏེནསྶ ཨཱུནེགཎེཙརཎདོསོ ཝཱ ཝིཔྤཝཱསོ ཝཱ ན ཧོཏཱི’’ཏི ཙ ‘‘ཨཏྠིབྷཱཝཾ སལླཀྑེཏྭཱཏི དྭཱདསཧཏྠེ ཨུཔཙཱརེ སལླཀྑེཏྭཱ, ཨནིཀྑིཏྟཝཏྟཱནཾ ཨུཔཙཱརསཱིམཱཡ ཨཱགཏབྷཱཝཾ སལླཀྑེཏྭཱ སཧཝཱསཱདིཀཾ ཝེདིཏབྦ’’ནྟི ཙ ཨཱགཏེཧི པཱལི༹ཡཊྛཀཐཱ-ཝཛིརབུདྡྷིཊཱིཀཱཔཱཋེཧི པཀཱསེཏབྦོ, ཏསྨཱ ཝིཧཱརེ པརིཝསནྟསྶ ཨུཔཙཱརསཱིམཱཡ ཨབྦྷནྟརེ ཡཏྠ ཀཏྠཙི ཝསནྟསྶ ནཏྠི ཝིཔྤཝཱསོ, བཧིཨུཔཙཱརསཱིམཱཡཾ པརིཝསནྟསྶ བྷིཀྑཱུནཾ ནིསིནྣཔརིཡནྟཏོ དྭཱདསཧཏྠབྦྷནྟརེ ཝསནྟསྶ ཙ ནཏྠི ཝིཔྤཝཱསོཏི, ཏཉྩ པརིཝཱསཀཱལེ ‘‘ཨེཀེན བྷིཀྑུནཱ སདྡྷི’’ནྟི ཝཙནཏོ ཨེཀསྶཔི བྷིཀྑུནོ, མཱནཏྟཙརཎཀཱལེ ‘‘ཙཏཱུཧི པཉྩཧི ཝཱ བྷིཀྑཱུཧི སདྡྷི’’ནྟི (ཙཱུལ༹ཝ. ཨཊྛ. ༡༠༢) ཝཙནཏོ ཙ ཙཏུནྣཾ པཉྩནྣམྤི བྷིཀྑཱུནཾ ཧཏྠཔཱསབྷཱུཏེ དྭཱདསཧཏྠབྦྷནྟརེཔི ཝསིཏུཾ ལབྷཏི, ནཏྠི ཝིཔྤཝཱསོཏི དཊྛབྦཾ.

ཝཏྟཾ སམཱདིཡིཏྭཱ ཏེསཾ བྷིཀྑཱུནཾ ཨཱརོཙིཏཀཱལཏོ པན པཊྛཱཡ ཀེནཙི ཀརཎཱིཡེན ཏེསུ ¶ བྷིཀྑཱུསུ གཏེསུཔི ¶ ཡཐཱཝུཏྟཨཊྛཀཐཱཔཱཋནཡེན ཝིཔྤཝཱསོ ན ཧོཏི. ཏཐཱ ཧི ཝུཏྟཾ ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༩༧) ‘‘སོཔི ཀེནཙི ཀམྨེན པུརེཨརུཎེ ཨེཝ གཙྪཏཱིཏི ཨིམིནཱ ཨཱརོཙནཱཡ ཀཏཱཡ སབྦེསུཔི བྷིཀྑཱུསུ བཧིཝིཧཱརཾ གཏེསུ ཨཱུནེགཎེཙརཎདོསོ ཝཱ ཝིཔྤཝཱསདོསོ ཝཱ ན ཧོཏི ཨཱརོཙིཏཏྟཱ སཧཝཱསསྶཱཏི དསྶེཏི. ཏེནཱཧ ‘ཨཡཉྩཱ’ཏིཨཱདཱི’’ཏི. ཨཔརེ པན ཨཱཙརིཡཱ ‘‘བཧིསཱིམཱཡ ཝཏྟསམཱདཱནཊྛཱནེ ཝཏིཔརིཀྑེཔོཔི པཀཏཏྟབྷིཀྑཱུཧེཝ ཀཱཏབྦོ, ན ཀམྨཱརཧབྷིཀྑཱུཧི. ཡཐཱ ལོཀེ བནྡྷནཱགཱརཱདི དཎྜཀཱརཀེཧི ཨེཝ ཀཏྟབྦཾ, ན དཎྜཱརཧེཧི, ཨེཝམིདྷཱཔཱི’’ཏི ཝདནྟི, ཏམྤི ཨཊྛཀཐཱདཱིསུ ན དིསྶཏི. ན ཧི ཝཏིཔརིཀྑེཔོ དཎྜཀམྨཏྠཱཡ ཀཱརིཏོ, ཨཐ ཁོ དསྶནཱུཔཙཱརཝིཛཧནཏྠམེཝ. ཏཐཱ ཧི ཝུཏྟཾ སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༩༧) ‘‘གུམྦེན ཝཱ ཝཏིཡཱ ཝཱ པཊིཙྪནྣཊྛཱནེཏི དསྶནཱུཔཙཱརཝིཛཧནཏྠ’’ནྟི. ཏཐཱ ཝིམཏིཝིནོདནིཡམྤི (ཝི. ཝི. ཊཱི. ཙཱུལ༹ཝགྒ ༢.༩༧) ‘‘གུམྦེན ཝཱཏིཨཱདི དསྶནཱུཔཙཱརཝིཛཧནཏྠ’’ནྟི. ཨིཏོ པརཾ ཨཊྛཀཐཱཡཾ ཝུཏྟནཡེནེཝ པརིཝཱསདཱནཉྩ མཱནཏྟདཱནཉྩ ཝེདིཏབྦཾ. ཡཏྠ པན སཾསཡིཏབྦཾ ཨཏྠི, ཏཏྠ སཾསཡཝིནོདནཏྠཱཡ ཀཐེཏབྦཾ ཀཐཡཱམ.

ཨེཀཙྩེ བྷིཀྑཱུ ཨེཝཾ ཝདནྟི – པཱརིཝཱསིཀོ བྷིཀྑུ ཝུཌྜྷཏརོཔི སམཱནོ ཝཏྟེ སམཱདིནྣེ ནཝཀཊྛཱནེ ཋིཏོ. ཏཐཱ ཧི ཝུཏྟཾ ‘‘ཡཏྠ པན ནིསཱིདཱཔེཏྭཱ པརིཝིསནྟི, ཏཏྠ སཱམཎེརཱནཾ ཛེཊྛཀེན, བྷིཀྑཱུནཾ སངྒྷནཝཀེན ཧུཏྭཱ ནིསཱིདིཏབྦ’’ནྟི (ཙཱུལ༹ཝ. ཨཊྛ. ༧༥) ཏསྨཱ ཨཱརོཙིཏཀཱལཱདཱིསུ ‘‘ཨཧཾ བྷནྟེ’’ཨིཙྩེཝ ཝཏྟབྦཾ, ན ‘‘ཨཧཾ ཨཱཝུསོ’’ཏི. ཏཏྲེཝཾ ཝིཙཱརཎཱ ཀཱཏབྦཱ – པཱརིཝཱསིཀཱདཡོ བྷིཀྑཱུ སེཡྻཱཔརིཡནྟཨཱསནཔརིཡནྟབྷཱགིཏཱཡ ནཝཀཊྛཱནེ ཋིཏཱ, ན ཨེཀནྟེན ¶ ནཝཀབྷཱུཏཏྟཱ. ཏཐཱ ཧི ཝུཏྟཾ བྷགཝཏཱ ‘‘ཨནུཛཱནཱམི, བྷིཀྑཝེ, པཱརིཝཱསིཀཱནཾ བྷིཀྑཱུནཾ པཉྩ ཡཐཱཝུཌྜྷཾ ཨུཔོསཐཾ པཝཱརཎཾ ཝསྶིཀསཱཊིཀཾ ཨོཎོཛནཾ བྷཏྟ’’ནྟི (ཙཱུལ༹ཝ. ༧༥). ཨཊྛཀཐཱཡཉྩ (ཙཱུལ༹ཝ. ཨཊྛ. ༨༡) ‘‘པཀཏཏྟཾ བྷིཀྑུཾ དིསྭཱ ཨཱསནཱ ཝུཊྛཱཏབྦཾ, པཀཏཏྟོ བྷིཀྑུ ཨཱསནེན ནིམནྟེཏབྦོ’’ཏི ཨེཏིསྶཱ པཱལི༹ཡཱ སཾཝཎྞནཱཡ ‘‘ཝུཊྛཱཏབྦཾ, ནིམནྟེཏབྦོཏི ཏདཧུཔསམྤནྣམྤི དིསྭཱ ཝུཊྛཱཏབྦམེཝ, ཝུཊྛཱཡ ཙ ‘ཨཧཾ ཨིམིནཱ སུཁནིསིནྣོ ཝུཊྛཱཔིཏོ’ཏི པརམྨུཁེན ན གནྟབྦཾ, ‘ཨིདཾ ཨཱཙརིཡ ཨཱསནཾ, ཨེཏྠ ནིསཱིདཐཱ’ཏི ཨེཝཾ ནིམནྟེཏབྦོཡེཝཱ’’ཏི ཨེཏྠེཝ ‘‘ཨཱཙརིཡཱ’’ཏི ཨཱལཔནཝིསེསོ ཝུཏྟོ, ན ཨཉྙཏྠ. ཡདི ཝུཌྜྷཏརེནཔི ‘‘བྷནྟེ’’ཨིཙྩེཝ ཝཏྟབྦོ སིཡཱ, ཨིདྷཱཔི ‘‘ཨིདཾ, བྷནྟེ, ཨཱསན’’ནྟི ཝཏྟབྦཾ བྷཝེཡྻ, ན པན ཝུཏྟཾ, ཏསྨཱ ན ཏེསཾ ཏཾ ཝཙནཾ སཱརཏོ པཙྩེཏབྦཾ. ཨིམསྨིཾ ¶ པན ཝིནཡསངྒཧཔྤཀརཎེ (ཝི. སངྒ. ཨཊྛ. ༢༣༧) ‘‘ཨཱརོཙེནྟེན སཙེ ནཝཀཏརོ ཧོཏི, ‘ཨཱཝུསོ’ཏི ཝཏྟབྦཾ. སཙེ ཝུཌྜྷཏརོ, ‘བྷནྟེ’ཏི ཝཏྟབྦ’’ནྟི ཝུཏྟཾ, ཨིདཉྩ ‘‘ཨེཀེན བྷིཀྑུནཱ སདྡྷི’’ནྟི ཧེཊྛཱ ཝུཏྟཏྟཱ ཏཾ པཊིགྒཱཧཀབྷཱུཏཾ པཀཏཏྟཾ བྷིཀྑུཾ སནྡྷཱཡ ཝུཏྟནྟི དཊྛབྦཾ.

བཧཝོ པན བྷིཀྑཱུ པཱརིཝཱསིཀཾ བྷིཀྑུཾ སངྒྷམཛ྄ཛྷེ ནིསཱིདཱཔེཏྭཱ ཝཏྟཾ ཡཱཙཱཔེཏྭཱ ཀམྨཝཱཙཱཔརིཡོསཱནེ སམཱདཱཔེཏྭཱ ཨཱརོཙནམཀཱརེཏྭཱ སངྒྷམཛ྄ཛྷཏོ ནིཀྑམཱཔེཏྭཱ པརིསཔརིཡནྟེ ནིསཱིདཱཔེཏྭཱ ཏཏྠ ནིསིནྣེན ཨཱརོཙཱཔེཏྭཱ ཝཏྟཾ ནིཀྑིཔཱཔེནྟི, ཨེཝཾ ཀརོནྟཱནཉྩ ནེསཾ ཨཡམདྷིཔྤཱཡོ – ཨཡཾ བྷིཀྑུ ཝཏྟེ ཨསམཱདིནྣེ ཝུཌྜྷཊྛཱནིཡོཔི ཧོཏི, ཏསྨཱ ཡཱཙནཀཱལེ ཙ ཀམྨཝཱཙཱསཝནཀཱལེ ཙ ཝཏྟསམཱདཱནཀཱལེ ཙ སངྒྷམཛ྄ཛྷེ ནིསཱིདནཱརཧོ ཧོཏི, ཝཏྟེ པན སམཱདིནྣེ ནཝཀཊྛཱནིཡོ, ཏསྨཱ ན སངྒྷམཛ྄ཛྷེ ནིསཱིདནཱརཧོ, ཨཱསནཔརིཡནྟབྷཱགིཏཱཡ ¶ པརིསཔརིཡནྟེཡེཝ ནིསཱིདནཱརཧོཏི, ཏདེཏཾ ཨེཝཾ ཝིཙཱརེཏབྦཾ – ཨཡཾ བྷིཀྑུ སངྒྷམཛ྄ཛྷེ ནིསཱིདམཱནོ ཨཱསནཾ གཧེཏྭཱ ཡཐཱཝུཌྜྷཾ ནིསིནྣོ ན ཧོཏི, ཨཐ ཁོ ཀམྨཱརཧབྷཱཝེན ཨཱསནཾ ཨགྒཧེཏྭཱ ཨཉྫལིཾ པགྒཧེཏྭཱ ཨུཀྐུཊིཀམེཝ ནིསིནྣོ ཧོཏི, ཀམྨཱརཧོ ཙ ནཱམ སངྒྷམཛ྄ཛྷེཡེཝ ཋཔེཏབྦོ ཧོཏི, ནོ བཧི, ཏསྨཱ ‘‘སངྒྷམཛ྄ཛྷེ ནིསཱིདནཱརཧོ ན ཧོཏཱི’’ཏི ན སཀྐཱ ཝཏྟུཾ ཏསྨིཾ ཀཱལེ, ནིཀྑམཱཔིཏེ ཙ ཝཏྟཱརོཙནཝཏྟནིཀྑིཔནཱནཾ ཨནིཊྛིཏཏྟཱ ཨཉྙམཉྙཾ ཨཱཧཙྩ སུཊྛུ ནིསིནྣཾ བྷིཀྑུསངྒྷཾ པརིཧརིཏུམསཀྐུཎེཡྻཏྟཱ, ཙཱིཝརཀཎྞཔཱདཔིཊྛིཨཱདཱིཧི བཱདྷིཏཏྟཱ ཨགཱརཝཀིརིཡཱ ཝིཡ དིསྶཏི, ཨཱརོཙནཀིརིཡཉྩ ཝཏྟནིཀྑིཔནཉྩ སངྒྷམཛ྄ཛྷེཡེཝ ཀཏྟབྦཾ པརིཡནྟེ ནིསཱིདིཏྭཱ ཀརོནྟོ ཨཊྛཀཐཱཝིརོདྷོ ཧོཏི. ཝུཏྟཉྷི ཨཊྛཀཐཱཡཾ (ཙཱུལ༹ཝ. ཨཊྛ. ༩༧) ‘‘ཝཏྟཾ སམཱདིཡིཏྭཱ ཏཏྠེཝ སངྒྷསྶ ཨཱརོཙེཏབྦཾ…པེ… ཨཱརོཙེཏྭཱ སཙེ ནིཀྑིཔིཏུཀཱམོ, ཝུཏྟནཡེནེཝ སངྒྷམཛ྄ཛྷེ ནིཀྑིཔིཏབྦ’’ནྟི. ཀསྨཱ? སམཱདཱནཊྛཱནེཡེཝ ཨཱརོཙཱཔེཏྭཱ ཏཏྠེཝ ནིཀྑིཔཱཔེཏྭཱ ནིཊྛིཏསབྦཀིཙྩམེཝ ནིཀྑམཱཔེཏྭཱ ཨཏྟནོ ཨཱསནེ ནིསཱིདཱཔེནྟོ ཉཱཡཱགཏོཏི ཨམྷཱཀཾ ཁནྟི.

ཏཐཱ སཱཡཾ ཝཏྟཱརོཙནཀཱལེ བཧཱུསུ པཱརིཝཱསིཀེསུ ཝུཌྜྷཏརཾ པཋམཾ སམཱདཱཔེཏྭཱ ཨཱརོཙཱཔེཏྭཱ ཨནུཀྐམེན སབྦཔཙྪཱ ནཝཀཏརཾ སམཱདཱཔེནྟི ཨཱརོཙཱཔེནྟི, པཱཏོ ནིཀྑིཔནཀཱལེ པན ནཝཀཏརཾ པཋམཾ ཨཱརོཙཱཔེཏྭཱ ནིཀྑིཔཱཔེནྟི, ཏཏོ ཨནུཀྐམེན ཝུཌྜྷཏརཾ སབྦཔཙྪཱ ཨཱརོཙཱཔེཏྭཱ ནིཀྑིཔཱཔེནྟི. ཏེསཾ ཨཡམདྷིཔྤཱཡོ སིཡཱ – ཡདཱ དས བྷིཀྑཱུ པཀཏཏྟཱ ¶ དས བྷིཀྑཱུ པཱརིཝཱསིཀཱ ཧོནྟི, ཏདཱ ཝུཌྜྷཏརེན པཋམཾ སམཱདིཡིཏྭཱ ཨཱརོཙིཏེ ཏསྶ ཨཱརོཙནཾ ཨཝསེསཱ ཨེཀཱུནཝཱིསཏི བྷིཀྑཱུ ¶ སུཎནྟི, དུཏིཡསྶ ཨཊྛཱརས, ཏཏིཡསྶ སཏྟརསཱཏི ཨནུཀྐམེན ཧཱཡིཏྭཱ སབྦནཝཀསྶ ཨཱརོཙནཾ དས པཀཏཏྟཱ སུཎནྟི སེསཱནཾ ཨཔཀཏཏྟབྷཱཝཏོ. ཏཏོ ནིཀྑིཔནཀཱལེ སབྦནཝཀོ པུབྦེ ཨཏྟནཱ ཨཱརོཙིཏཱནཾ དསནྣཾ བྷིཀྑཱུནཾ ཨཱརོཙེཏྭཱ ནིཀྑིཔཏི, ཏཏོ པཊིལོམེན དུཏིཡོ ཨེཀཱདསནྣཾ, ཏཏིཡོ དྭཱདསནྣནྟི ཨནུཀྐམེན ཝཌྜྷིཏྭཱ སབྦཛེཊྛཀོ ཨཏྟནཱ པུབྦེ ཨཱརོཙིཏཱནཾ ཨེཀཱུནཝཱིསཏིབྷིཀྑཱུནཾ ཨཱརོཙེཏྭཱ ནིཀྑིཔཏི, ཨེཝཾ ཡཐཱནུཀྐམེན ནིཀྑིཔནཾ ཧོཏི. སབྦཛེཊྛཀེ པན པཋམཾ ནིཀྑིཏྟེ སཏི པུབྦེ ཨཏྟནཱ ཨཱརོཙིཏཱནཾ ནཝནྣཾ བྷིཀྑཱུནཾ ཏདཱ ཨཔཀཏཏྟབྷཱཝཏོ ཨཱརོཙིཏཱནཾ སནྟིཀེ ནིཀྑིཔནཾ ན ཧོཏི, ཏཐཱ སེསཱནཾ. ཏེསཾ པན ཨེཀཙྩཱནཾ ཨཱུནཾ ཧོཏི, ཨེཀཙྩཱནཾ ཨདྷིཀཾ, ཏསྨཱ ཡཐཱཝུཏྟནཡེན སབྦནཝཀཏོ པཊྛཱཡ ཨནུཀྐམེན ནིཀྑིཔིཏབྦནྟི.

ཨེཝཾཝཱདཱིནཾ པན ཏེསམཱཡསྨནྟཱནཾ ཝཱདེ པཀཏཏྟཱཡེཝ བྷིཀྑཱུ ཨཱརོཙེཏབྦཱ ཧོནྟི, ནོ ཨཔཀཏཏྟཱ. པུབྦེ ཨཱརོཙིཏཱནཾཡེཝ སནྟིཀེ ཝཏྟཾ ནིཀྑིཔིཏབྦཾ ཧོཏི, ནོ ཨནཱརོཙིཏཱནཾ. ཨེཝཾ པན པཀཏཏྟཱཡེཝ བྷིཀྑཱུ ཨཱརོཙེཏབྦཱ ན ཧོནྟི, ཨཐ ཁོ ཨཔཀཏཏྟཱཔི ‘‘སཙེ དྭེ པཱརིཝཱསིཀཱ གཏཊྛཱནེ ཨཉྙམཉྙཾ པསྶནྟི, ཨུབྷོཧི ཨཉྙམཉྙསྶ ཨཱརོཙེཏབྦ’’ནྟི ཨཊྛཀཐཱཡཾ ཝུཏྟཏྟཱ. པུབྦེ ཨཱརོཙིཏཱནམྤི ཨནཱརོཙིཏཱནམྤི སནྟིཀེ ཨཱརོཙེཏྭཱ ནིཀྑིཔིཏབྦམེཝ ‘‘སཙེ སོ བྷིཀྑུ ཀེནཙིདེཝ ཀརཎཱིཡེན པཀྐནྟོ ཧོཏི, ཡཾ ཨཉྙཾ སབྦཔཋམཾ པསྶཏི, ཏསྶ ཨཱརོཙེཏྭཱ ནིཀྑིཔིཏབྦ’’ནྟི (ཙཱུལ༹ཝ. ཨཊྛ. ༡༠༢) ཝུཏྟཏྟཱ, ཏསྨཱ ཏཐཱ ཨཀརོནྟེཔི སབྦེསཾ ཨཱརོཙིཏཏྟཱ ནཏྠི དོསོ. ཨཔྤེཀཙྩེ བྷིཀྑཱུ ‘‘པཀཏཏྟསྶེཝཱཡཾ ཨཱརོཙནཱ’’ཏི མཉྙམཱནཱ སཱཡཾ ཝུཌྜྷཔཊིཔཱཊིཡཱ ཝཏྟཾ སམཱདིཡིཏྭཱ ཨཱརོཙེཏྭཱ ¶ ཨཏྟནོ སཡནཾ པཝིསིཏྭཱ དྭཱརཛགྒནསཡནསོདྷནཱདཱིནི ཀརོནྟཱ ཨཉྙེསཾ ཨཱརོཙིཏཾ ན སུཎནྟི. ཨཔྤེཀཙྩེ པཱཏོ སཡཾ ཨཱརོཙེཏྭཱ ནིཀྑིཔིཏྭཱ ཨཉྙེསཾ ཨཱརོཙནཾ ཝཱ ནིཀྑིཔནཾ ཝཱ ཨནཱགམེཏྭཱ བྷིཀྑཱཙཱརཱདཱིནཾ ཨཏྠཱཡ གཙྪནྟི, ཨེཝཾ ཀརོནྟཱནཾ ཏེསཾ ཨཱརོཙནཾ ཨེཀཙྩཱནཾ ཨསུཏབྷཱཝསམྦྷཝཏོ སཱསངྐོ ཧོཏི པཱརིཝཱསིཀཱནཾ ཨཉྙམཉྙཱརོཙནསྶ པཀརཎེསུ ཨཱགཏཏྟཱ. ན ཀེཝལཾ སཱརཏྠདཱིཔནིཡཾཡེཝ, ཨཐ ཁོ ཝཛིརབུདྡྷིཊཱིཀཱཡམྤི (ཝཛིར. ཊཱི. ཙཱུལ༹ཝགྒ ༧༦) ‘‘སཙེ དྭེ པཱརིཝཱསིཀཱ གཏཊྛཱནེ ཨཉྙམཉྙཾ པསྶནྟི, ཨུབྷོཧིཔི ཨཉྙམཉྙསྶ ཨཱརོཙེཏབྦཾ ཨཝིསེསེན ‘ཨཱགནྟུཀེན ཨཱརོཙེཏབྦཾ, ཨཱགནྟུཀསྶ ཨཱརོཙེཏབྦ’ནྟི ཝུཏྟཏྟཱ’’ཏི ཝུཏྟཾ.

ཏཐཱ ¶ ཨཔྤེཀཙྩེ པཀཏཏྟཱ བྷིཀྑཱུ པཱརིཝཱསིཀེསུ བྷིཀྑཱུསུ སཱཡཾ ཝཏྟསམཱདཱནཏྠཾ པཀཏཏྟསཱལཏོ ནིཀྑམིཏྭཱ ཨཏྟནོ ཨཏྟནོ སཡནསམཱིཔཾ གཏེསུ ཨཏྟནོ སཡནཔཉྙཱཔནཔཨཀྑཱརཋཔནཨཉྙམཉྙཨཱལཱཔསལླཱཔཀརཎཱདིཝསེན ཨཱལོ༹ལེནྟཱ པཱརིཝཱསིཀཱནཾ ཝཏྟཱརོཙནཾ ན སུཎནྟི, ན མནསི ཀརོནྟི. ཨཔྤེཀཙྩེ པཱཏོ ཝཏྟནིཀྑིཔནཀཱལེ པཱརིཝཱསིཀབྷིཀྑཱུསུ ཝཏྟཱརོཙནཝཏྟནིཀྑིཔནཱནི ཀརོནྟེསུཔི ནིདྡཱཔསུཏཱ ཧུཏྭཱ ན སུཎནྟི. ཨེཝཾ ཀརོནྟཱནམྤི ཏེསཾ ཨེཀཙྩཱནཾ ཨསྶུཏསམྦྷཝཏོ ཝཏྟཱརོཙནཾ སཱསངྐཾ ཧོཏཱིཏི. ཧོཏུ སཱསངྐཾ, སུཎནྟཱནཾ ཨསྶུཏསམྦྷཝེཔི ཨཱརོཙཀཱནཾ སམྨཱཨཱརོཙནེན ཝཏྟསྶ པརིཔུཎྞཏྟཱ ཀོ དོསོཏི ཙེ? ཨཱརོཙཀཱནཾ སམྨཱ ཨཱརོཙིཏཏྟཱ ཝཏྟེ པརིཔུཎྞེཔི ཝཏྟབྷེདདུཀྐཊཏོཝ ཝིམུཏྟོ སིཡཱ, ན རཏྟིཙྪེདཏོ. ཝུཏྟཉྷི སམནྟཔཱསཱདིཀཱཡཾ (ཙཱུལ༹ཝ. ཨཊྛ. ༧༦) ‘‘སཙེ ཝཱཡམནྟོཔི སམྤཱཔུཎིཏུཾ ཝཱ སཱཝེཏུཾ ¶ ཝཱ ན སཀྐོཏི, རཏྟིཙྪེདོཝ ཧོཏི, ན ཝཏྟབྷེདདུཀྐཊ’’ནྟི.

ཨཐཉྙེ བྷིཀྑཱུ ཝཏྟཾ སམཱདིཡིཏྭཱ རཏྟིཾ ནིཔནྣཱ ནིདྡཱབྷཱཝེན མནུསྶསདྡམྤི སུཎནྟི, བྷེརིཨཱདིསདྡམྤི སུཎནྟི, སཀཊནཱཝཱདིཡཱནསདྡམྤི སུཎནྟི, ཏེ ཏེན སདྡེན ཨཱསངྐནྟི ‘‘བྷིཀྑཱུནཾ ནུ ཁོ ཨཡ’’ནྟི, ཏེ ཏེན ཀཱརཎེན རཏྟིཙྪེདཾ མཉྙནྟི. ཀསྨཱ? ‘‘ཨཡཉྩ ནེསཾ ཚཏྟསདྡཾ ཝཱ ཨུཀྐཱསིཏསདྡཾ ཝཱ ཁིཔིཏསདྡཾ ཝཱ སུཏྭཱ ཨཱགནྟུཀབྷཱཝཾ ཛཱནཱཏི, གནྟྭཱ ཨཱརོཙེཏབྦཾ. གཏཀཱལེ ཛཱནནྟེནཔི ཨནུབནྡྷིཏྭཱ ཨཱརོཙེཏབྦམེཝ. སམྤཱཔུཎིཏུཾ ཨསཀྐོནྟསྶ རཏྟིཙྪེདོཝ ཧོཏི, ན ཝཏྟབྷེདདུཀྐཊ’’ནྟི (ཙཱུལ༹ཝ. ཨཊྛ. ༧༦) ཝུཏྟཏྟཱཏི. ཏེ ཨེཝཾ སཉྙཱཔེཏབྦཱ – མཱཡསྨནྟོ ཨེཝཾ མཉྙིཏྠ, ནཱཡཾ པཱཋོ བཧིསཱིམཊྛཝསེན ཝུཏྟོ, ཨཐ ཁོ ཨུཔཙཱརསཱིམཊྛཝསེན ཝུཏྟོ. ཝུཏྟཉྷི ཏཏྠེཝ ‘‘ཡེཔི ཨནྟོཝིཧཱརཾ ཨཔྤཝིསིཏྭཱ ཨུཔཙཱརསཱིམཾ ཨོཀྐམིཏྭཱ གཙྪནྟཱི’’ཏི. ཏཏྠཔི ཨཱགནྟུཀབྷཱཝསྶ ཛཱནིཏཏྟཱ རཏྟིཙྪེདོ ཧོཏི, ཏསྨཱ དཱུརེསདྡསཝནམཏྟེན རཏྟིཙྪེདོ ནཏྠི, ‘‘ཨཡཾ བྷིཀྑཱུནཾ སདྡོ, ཨཡཾ བྷིཀྑཱུཧི ཝཱདིཏབྷེརིགྷཎྚཱདིསདྡོ, ཨཡཾ བྷིཀྑཱུཧི པཱཛིཏསཀཊནཱཝཱདིསདྡོ’’ཏི ནིསིནྣཊྛཱནཏོ ཛཱནནྟོཡེཝ རཏྟིཙྪེདཀརོ ཧོཏི. ཏེནཱཧ ‘‘ཨཱཡསྨཱ ཀརཝཱིཀཏིསྶཏྠེརོ ‘སམཎོ ཨཡ’ནྟི ཝཝཏྠཱནམེཝ པམཱཎ’’ནྟི.

དིཝཱ དཱུརེ གཙྪནྟཾ ཛནཀཱཡཾ དིསྭཱཔི ‘‘ཨིམེ བྷིཀྑཱུ ནུ ཁོ’’ཏི པརིཀཔྤེནྟཱ རཏྟིཙྪེདཾ མཉྙནྟི, ཏམྤི ཨཀཱརཎཾ. ཀསྨཱ? ‘‘བྷིཀྑཱུ’’ཏི ཝཝཏྠཱནསྶ ཨབྷཱཝཱ. ཝུཏྟཉྷི ཨཊྛཀཐཱཡཾ ‘‘ནདཱིཨཱདཱིསུ ནཱཝཱཡ གཙྪནྟམྤི པརཏཱིརེ ཋིཏམྤི ཨཱཀཱསེ གཙྪནྟམྤི པབྦཏཐལཨརཉྙཱདཱིསུ ¶ དཱུརེ ཋིཏམྤི བྷིཀྑུཾ དིསྭཱ སཙེ ‘བྷིཀྑཱུ’ཏི ཝཝཏྠཱནཾ ཨཏྠི, ནཱཝཱདཱིཧི ཝཱ གནྟྭཱ མཧཱསདྡཾ ཀཏྭཱ ¶ ཝཱ ཝེགེན ཨནུབནྡྷིཏྭཱ ཝཱ ཨཱརོཙེཏབྦ’’ནྟི. ཨིཏི བྷིཀྑུཾ དིསྭཱཔི ‘‘བྷིཀྑཱུ’’ཏི ཝཝཏྠཱནམེཝ པམཱཎཾ. ཨབྷིཀྑུཾ པན ‘‘བྷིཀྑཱུ’’ཏི ཝཝཏྠཱནེ སནྟེཔི ཝཱ ཨསནྟེཔི ཝཱ ཀིཾ ཝཏྟབྦཾ ཨཏྠི, བཧཝོ པན བྷིཀྑཱུ ཨིདཾ རཱུཔདསྶནཾ སདྡསཝནཉྩ ཨཱསངྐནྟཱ ‘‘པབྷཱཏེ སཏི ཏཾ དྭཡཾ བྷཝེཡྻ, ཏསྨཱ མནུསྶཱནཾ གམནཀཱལསདྡཀརཎཀཱལཏོ པུབྦེཡེཝ ཝཏྟཾ ནིཀྑིཔིཏབྦ’’ནྟི མཉྙམཱནཱ ཨནུགྒཏེཡེཝ ཨརུཎེ ཝཏྟཾ ནིཀྑིཔནྟི, ཏདཡུཏྟཾ རཏྟིཙྪེདཏྟཱཏི.

ཨཐ པན ཝིནཡདྷརེན ‘‘ཀིཏྟཀཱ ཏེ ཨཱཔཏྟིཡོ, ཚཱདེསི, ཀཱིཝཏཱིཧཾ པཊིཙྪཱདེསཱི’’ཏི པུཊྛོ སམཱནོ ‘‘ཨཧཾ, བྷནྟེ, ཨཱཔཏྟིཔརིཡནྟཾ ན ཛཱནཱམི, རཏྟིཔརིཡནྟཾ ན ཛཱནཱམི, ཨཱཔཏྟིཔརིཡནྟཾ ནསྶརཱམི, རཏྟིཔརིཡནྟཾ ནསྶརཱམི, ཨཱཔཏྟིཔརིཡནྟེ ཝེམཏིཀོ, རཏྟིཔརིཡནྟེ ཝེམཏིཀོ’’ཏི ཝུཏྟེ ‘‘ཨཡཾ བྷིཀྑུ སུདྡྷནྟཔརིཝཱསཱརཧོ’’ཏི ཉཏྭཱ ཏསྶཔི དུཝིདྷཏྟཱ ཙཱུལ༹སུདྡྷནྟམཧཱསུདྡྷནྟཝསེན ‘‘ཏེསུ ཨཡཾ བྷིཀྑུ ཨིམསྶ ཨརཧོ’’ཏི ཉཱཔནཏྠཾ ཨུཔསམྤདཏོ པཊྛཱཡ ཨནུལོམཀྐམེན ཝཱ ཨཱརོཙིཏདིཝསཏོ པཊྛཱཡ པཊིལོམཀྐམེན ཝཱ ‘‘ཀིཏྟཀཾ ཀཱལཾ ཏྭཾ ཨཱརོཙནཨཱཝིཀརཎཱདིཝསེན སུདྡྷོ’’ཏི པུཙྪིཏྭཱ ‘‘ཨཱམ བྷནྟེ, ཨེཏྟཀཾ ཀཱལཾ ཨཧཾ སུདྡྷོམྷཱི’’ཏི ཝུཏྟེ ‘‘ཨཡཾ བྷིཀྑུ ཨེཀཙྩཾ རཏྟིཔརིཡནྟཾ ཛཱནཱཏི, ཏསྨཱ ཙཱུལ༹སུདྡྷནྟཱརཧོ’’ཏི ཉཏྭཱ ཏསྶ སུདྡྷཀཱལཾ ཨཔནེཏྭཱ ཨསུདྡྷཀཱལཝསེན པརིཡནྟཾ ཀཏྭཱ ཙཱུལ༹སུདྡྷནྟཔརིཝཱསོ དཱཏབྦོ. ཨཡཾ ཨུདྡྷམྤི ཨཱརོཧཏི, ཨདྷོཔི ཨོརོཧཏི. ཡོ པན ཨནུལོམཝསེན ཝཱ པཊིལོམཝསེན ཝཱ པུཙྪིཡམཱནོ ‘‘སཀལམྤི རཏྟིཔརིཡནྟཾ ཨཧཾ ན ཛཱནཱམི ནསྶརཱམི, ཝེམཏིཀོ ཧོམཱི’’ཏི ཝུཏྟེ ‘‘ཨཡཾ བྷིཀྑུ སཀལམྤི རཏྟིཔརིཡནྟཾ ན ཛཱནཱཏི, ཏསྨཱ མཧཱསུདྡྷནྟཱརཧོ’’ཏི ཉཏྭཱ ཏསྶ ཨུཔསམྤདཏོ པཊྛཱཡ ཡཱཝ ཝཏྟསམཱདཱནཱ ཨེཏྟཀཾ ཀཱལཾ པརིཡནྟཾ ཀཏྭཱ མཧཱསུདྡྷནྟཔརིཝཱསོ ¶ དཱཏབྦོ. ཨུདྡྷཾཨཱརོཧནཨདྷོཨོརོཧནབྷཱཝོ པནེསཾ ཨཊྛཀཐཱཡཾ (ཙཱུལ༹ཝ. ཨཊྛ. ༡༠༢) ཝུཏྟོཡེཝ. ཨིཏོ པརམྤི ཝིདྷཱནཾ ཨཊྛཀཐཱཡཾ ཨཱགཏནཡེནེཝ དཊྛབྦཾ.

ཨིདཱནི པན བཧཝོ བྷིཀྑཱུ ‘‘ཨཡཾ ཙཱུལ༹སུདྡྷནྟཱརཧོ, ཨཡཾ མཧཱསུདྡྷནྟཱརཧོ’’ཏི ཨཝིཙིནནྟཱ ཨནྟོཀམྨཝཱཙཱཡཾ ‘‘ཨཱཔཏྟིཔརིཡནྟཾ ན ཛཱནཱཏི, རཏྟིཔརིཡནྟཾ ན ཛཱནཱཏི, ཨཱཔཏྟིཔརིཡནྟཾ ནསྶརཏི, རཏྟིཔརིཡནྟཾ ནསྶརཏི, ཨཱཔཏྟིཔརིཡནྟེ ཝེམཏིཀོ, རཏྟིཔརིཡནྟེ ཝེམཏིཀོ’’ཏི ¶ ཨཝིསེསཝཙནམེཝ མནསི ཀརོནྟཱ ‘‘ཨིམཱཡ ཀམྨཝཱཙཱཡ དིནྣཾ སུདྡྷནྟཔརིཝཱསཾ གཧེཏྭཱ པཉྩཱཧམཏྟཾ ཝཱ དསཱཧམཏྟཾ ཝཱ པརིཝསིཏྭཱ ཨཔརིཡནྟརཏྟིཔཊིཙྪཱདིཏཱཧི ཨཔརིཡནྟཱཧི ཨཱཔཏྟཱིཧི མོཀྑོ ཧོཏཱི’’ཏི མཉྙནྟཱ པཉྩཱཧམཏྟཾ ཝཱ དསཱཧམཏྟཾ ཝཱ པརིཝསིཏྭཱ མཱནཏྟཾ ཡཱཙནྟི, ཨེཝཾ ཀརོནྟཱ ཏེ བྷིཀྑཱུ སཧསྶཀྑཏྟུཾ པརིཝསནྟཱཔི ཨཱཔཏྟིཏོ ན མུཙྩེཡྻུཾ. ཀསྨཱཏི ཙེ? པཱལི༹ཡཱ ཙ ཨཊྛཀཐཱཡ ཙ ཝིརུཛ྄ཛྷནཏོ. ཝུཏྟཉྷི པཱལི༹ཡཾ (པཱརཱ. ༤༤༢) ‘‘ཡཱཝཏཱིཧཾ ཛཱནཾ པཊིཙྪཱདེཏི, ཏཱཝཏཱིཧཾ ཏེན བྷིཀྑུནཱ ཨཀཱམཱ པརིཝཏྠབྦཾ. པརིཝུཏྠཔརིཝཱསེན བྷིཀྑུནཱ ཨུཏྟརི ཚཱརཏྟཾ བྷིཀྑུམཱནཏྟཱཡ པཊིཔཛྫིཏབྦཾ. ཙིཎྞམཱནཏྟོ བྷིཀྑུ ཡཏྠ སིཡཱ ཝཱིསཏིགཎོ བྷིཀྑུསངྒྷོ, ཏཏྠ སོ བྷིཀྑུ ཨབྦྷེཏབྦོ’’ཏི, ཏསྨཱ པཊིཙྪནྣདིཝསམཏྟཾ ཨཔརིཝསིཏྭཱ མཱནཏྟཱརཧོ ནཱམ ན ཧོཏི, ཨམཱནཏྟཱརཧསྶ མཱནཏྟདཱནཾ ན རུཧཏི, ཨཙིཎྞམཱནཏྟོ ཨབྦྷཱནཱརཧོ ན ཧོཏི, ཨནབྦྷཱནཱརཧསྶ ཨབྦྷཱནཾ ན རུཧཏི, ཨནབྦྷིཏོ བྷིཀྑུ ཨཱཔཏྟིམུཏྟོ པཀཏཏྟོ ན ཧོཏཱིཏི ཨཡམེཏྠ བྷགཝཏོ ཨདྷིཔྤཱཡོ.

ཨཊྛཀཐཱཡཾ (ཙཱུལ༹ཝ. ཨཊྛ. ༡༠༢) པན ཙཱུལ༹སུདྡྷནྟེ ‘‘ཏཾ གཧེཏྭཱ པརིཝསནྟེན ཡཏྟཀཾ ཀཱལཾ ཨཏྟནོ སུདྡྷིཾ ཛཱནཱཏི, ཏཏྟཀཾ ཨཔནེཏྭཱ ¶ ཨཝསེསཾ མཱསཾ ཝཱ དྭིམཱསཾ ཝཱ པརིཝསིཏབྦ’’ནྟི, མཧཱསུདྡྷནྟེ ‘‘ཏཾ གཧེཏྭཱ གཧིཏདིཝསཏོ ཡཱཝ ཨུཔསམྤདདིཝསོ, ཏཱཝ རཏྟིཡོ གཎེཏྭཱ པརིཝསིཏབྦ’’ནྟི ཝུཏྟཾ, ཏསྨཱ པཊིཙྪནྣརཏྟིཔྤམཱཎཾ པརིཝསནྟོཡེཝ མཱནཏྟཱརཧོ ཧོཏི, ན པཉྩཱཧདསཱཧརཏྟིཔྤམཱཎམཏྟཾ པརིཝསནྟོཏི ཨཡཾ ཨཊྛཀཐཱཙརིཡཱནཾ ཨདྷིཔྤཱཡོ. ཏེནེཝ ཙ ཀཱརཎེན དེསནཱཨཱརོཙནཱདཱིཧི སབྦཀཱལཾ ཨཱཔཏྟིཾ སོདྷེཏྭཱ ཝསནྟཱནཾ ལཛྫཱིཔེསལཱནཾ སིཀྑཱཀཱམཱནཾ བྷིཀྑཱུནཾ སུདྡྷནྟཔརིཝཱསཾ དཱཏུཾ ཨཡུཏྟརཱུཔོ, དེསནཱཨཱརོཙནཱདཱིཧི ཨཱཔཏྟིཾ ཨསོདྷེཏྭཱ པམཱདཝསེན ཙིརཀཱལཾ ཝསནྟཱནཾ ཛནཔདཝཱསིཀཱདཱིནཾ དཱཏུཾ ཡུཏྟརཱུཔོཏི ཝེདིཏབྦཾ. ཨེཏྠཱཔི ཨཝསེསཝིནིཙྪཡོ ཨཊྛཀཐཱཡཾ ཝུཏྟནཡེནེཝ ཝེདིཏབྦོ.

ཨཐ པན ཝིནཡདྷརེན ‘‘ཏྭཾ, ཨཱཝུསོ, ཀཏརཨཱཔཏྟིཾ ཨཱཔནྣོ, ཀཏི རཏྟིཡོ ཏེ ཚཱདིཏཱ’’ཏི པུཊྛོ ‘‘ཨཧཾ, བྷནྟེ, སངྒྷཱདིསེསཾ ཨཱཔཏྟིཾ ཨཱཔཛྫིཏྭཱ པཀྑམཏྟཾ པཊིཙྪཱདིཏཱ, ཏེནཱཧཾ སངྒྷཾ པཀྑཔརིཝཱསཾ ཡཱཙིཏྭཱ སངྒྷེན དིནྣེ པཀྑཔརིཝཱསེ པརིཝསིཏྭཱ ཨནིཀྑིཏྟཝཏྟོཝ ཧུཏྭཱ ཨནྟརཱ སངྒྷཱདིསེསཱཔཏྟིཾ ཨཱཔཛྫིཏྭཱ པཉྩཱཧམཏྟཾ ཚཱདིཏཱ’’ཏི ཝུཏྟེ ‘‘ཨཡཾ བྷིཀྑུ སམོདྷཱནཔརིཝཱསཱརཧོ, ཏཱིསུ ཙ སམོདྷཱནཔརིཝཱསེསུ ཨོདྷཱནསམོདྷཱནཱརཧོ’’ཏི ཉཏྭཱ ¶ ‘‘ཏེན ཧི བྷིཀྑུ ཏྭཾ མཱུལཱཡཔཊིཀསྶནཱརཧོ’’ཏི ཝཏྭཱ ཏཾ མཱུལཱཡ པཊིཀསྶིཏྭཱ པརིཝུཏྠདིཝསེ ཨདིཝསེ ཀཏྭཱ ཨནྟརཱ པཊིཙྪནྣེ པཉྩ དིཝསེ མཱུལཱཔཏྟིཡཱ པཊིཙྪནྣེསུ དིཝསེསུ སམོདྷཱནེཏྭཱ ཨོདྷཱནསམོདྷཱནོ དཱཏབྦོ. ཨིཏོ པརཱནི ཨོདྷཱནསམོདྷཱནེ ཝཏྟབྦཝཙནཱནི པཱལི༹ཡཾ ཨཊྛཀཐཱཡཉྩ ཝུཏྟནཡེནེཝ ཝེདིཏབྦཱནི.

ཨཐ པན ཝིནཡདྷརེན པུཊྛོ ‘‘ཨཧཾ, བྷནྟེ, སམྦཧུལཱ སངྒྷཱདིསེསཱ ཨཱཔཏྟིཡོ ཨཱཔཛྫིཾ, སམྦཧུལཱ ཨཱཔཏྟིཡོ ¶ ཨེཀཱཧཔྤཊིཙྪནྣཱཡོ…པེ… སམྦཧུལཱ ཨཱཔཏྟིཡོ དསཱཧཔྤཊིཙྪནྣཱཡོ’’ཏི ཝུཏྟེ ‘‘ཨཡཾ བྷིཀྑུ ཨགྒྷསམོདྷཱནཱརཧོ’’ཏི ཉཏྭཱ ཏཱསཾ ཨཱཔཏྟཱིནཾ ཡཱ ཨཱཔཏྟིཡོ ཙིརཏརཔྤཊིཙྪནྣཱཡོ, ཏཱསཾ ཨགྒྷེན སམོདྷཱནཔརིཝཱསོ དཱཏབྦོ. ཏཏྲེཝཾ ཝདནྟི – ‘‘ཡཱ ཨཱཔཏྟིཡོ ཙིརཏརཔྤཊིཙྪནྣཱཡོ, ཏཱསཾ ཨགྒྷེན སམོདྷཱནཔརིཝཱསོ དཱཏབྦོ’’ཏི ཝུཏྟོ, ཨེཝཾ སནྟེ པཀྑཔྤཊིཙྪནྣམཱསཔྤཊིཙྪནྣཱདཱིསུ ཀཐནྟི? ཏེསུཔི ‘‘ཡཱ ཨཱཔཏྟིཡོ པཀྑཔྤཊིཙྪནྣཱཡོ, ཡཱ ཨཱཔཏྟིཡོ མཱསཔྤཊིཙྪནྣཱཡོ’’ཏི ཝཏྟབྦོཏི. ཡདི ཨེཝཾ པཱལི༹ཝིརོདྷོ ཨཱཔཛྫཏི. པཱལི༹ཡཉྷི དསཱཧཔྤཊིཙྪནྣཔརིཡོསཱནཱ ཨེཝ ཨཱཔཏྟི དསྶིཏཱ, ན པཀྑཔྤཊིཙྪནྣམཱསཔྤཊིཙྪནྣཱདཡོཏི? སཙྩཾ, པཱལི༹ཡཾ ཏཐཱདསྶནཾ པན ནཡདསྶནམཏྟཾ. ཏཐཱ ཧི ཝུཏྟཾ ཨཊྛཀཐཱཡཾ (ཙཱུལ༹ཝ. ཨཊྛ. ༡༠༢) ‘‘པཉྩདས དིཝསཱནི པཊིཙྪནྣཱཡ ‘པཀྑཔྤཊིཙྪནྣ’ནྟི ཝཏྭཱ ཡོཛནཱ ཀཱཏབྦཱ…པེ… ཨེཝཾ ཡཱཝ སཊྛིསཾཝཙྪརཾ, ཨཏིརེཀསཊྛིསཾཝཙྪརཔྤཊིཙྪནྣནྟི ཝཱ ཏཏོ ཝཱ བྷིཡྻོཔི ཝཏྭཱ ཡོཛནཱ ཀཱཏབྦཱ’’ཏི. མཧཱཔདུམཏྠེརེནཔི ཝུཏྟཾ ‘‘ཨཡཾ སམུཙྩཡཀྑནྡྷཀོ ནཱམ བུདྡྷཱནཾ ཋིཏཀཱལསདིསོ, ཨཱཔཏྟི ནཱམ པཊིཙྪནྣཱ ཝཱ ཧོཏུ ཨཔྤཊིཙྪནྣཱ ཝཱ སམཀཨཱུནཏརཨཏིརེཀཔྤཊིཙྪནྣཱ ཝཱ, ཝིནཡདྷརསྶ ཀམྨཝཱཙཾ ཡོཛེཏུཾ སམཏྠབྷཱཝོཡེཝེཏྠ པམཱཎ’’ནྟི, ཏསྨཱ པཀྑཔྤཊིཙྪནྣཱདཱིནཾ ཀམྨཝཱཙཱཀརཎེ ཀུཀྐུཙྩཾ ན ཀཱཏབྦནྟི.

ཧོཏུ, ཨེཝམྤི པཀྑཔྤཊིཙྪནྣཾ པརིཡནྟཾ ཀཏྭཱ ཀཏཱཡ ཀམྨཝཱཙཱཡ ཏཏོ ཨུདྡྷཾ ཨཱཔཏྟི ནཏྠཱིཏི ཀཐཾ ཛཱནེཡྻཱཏི? ཨིདཱནི སིཀྑཱཀཱམཱ བྷིཀྑཱུ དེཝསིཀམྤི དེསནཱརོཙནཱཝིཀརཎཱནི ཀརོནྟི ཨེཀཱཧིཀདྭཱིཧིཀཱདིཝསེནཔི, ཀིཙྩཔསུཏཱ ཧུཏྭཱ ཏཐཱ ཨསཀྐོནྟཱཔི ཨུཔོསཐདིཝསཾ ནཱཏིཀྐམནྟི, གིལཱནཱདིཝསེན ཏདཏིཀྐནྟཱཔི ཨཏིཀྐནྟབྷཱཝཾ ¶ ཛཱནནྟི, ཏསྨཱ ཏདཏིཀྐནྟབྷཱཝེ སཏི ཨཏིརེཀཔཀྑཔྤཊིཙྪནྣམཱསཔྤཊིཙྪནྣཱདིཝསེན ཝཌྜྷེཏྭཱ ཀམྨཝཱཙཾ ཀརེཡྻ, ཏདཏིཀྐནྟབྷཱཝེ པན ཨསཏི པཀྑཔྤཊིཙྪནྣཔརིཡནྟཱ ¶ ཧོཏི, ཏསྨཱ པཀྑཔརིཡནྟཀམྨཝཱཙཱཀརཎཾ ཉཱཡཱགཏཾ ཧོཏཱིཏི དཊྛབྦཾ.

ཨེཝཾ ཧོཏུ, ཏཐཱཔི ཡདེཏཾ ‘‘སམྦཧུལཱ ཨཱཔཏྟིཡོ ཨེཀཱཧཔྤཊིཙྪནྣཱཡོ…པེ… སམྦཧུལཱ ཨཱཔཏྟིཡོ པཀྑཔྤཊིཙྪནྣཱཡོ’’ཏི ཝུཏྟཾ, ཏཏྠ ཨིམིནཱཡེཝ ཨནུཀྐམེན མཡཱ པཊིཙྪཱདིཏཱ ཨཱཔཏྟིཡོ ཧོནྟཱིཏི ཀཐཾ ཛཱནེཡྻ, ཨཛཱནནེ ཙ སཏི ‘‘ཡཱ ཙ ཁྭཱཡཾ, ཨཱཝུསོ, ཨཱཔཏྟི ཨཛཱནཔྤཊིཙྪནྣཱ, ཨདྷམྨིཀཾ ཏསྶཱ ཨཱཔཏྟིཡཱ པརིཝཱསདཱནཾ, ཨདྷམྨཏྟཱ ན རུཧཏཱི’’ཏི ཨིདཾ ཨཱཔཛྫཏཱིཏི? ནཱཔཛྫཏི. ཏཏྠ ཧི ཨཱཔཏྟིཡཱ ཨཱཔནྣབྷཱཝཾ ཨཛཱནནྟོ ཧུཏྭཱ པཊིཙྪཱདེཏི, ཏསྨཱ ‘‘ཨཱཔཏྟི ཙ ཧོཏི ཨཱཔཏྟིསཉྙཱི ཙཱ’’ཏི ཝུཏྟཨཱཔཏྟིསཉྙིཏཱབྷཱཝཱ ཨཔྤཊིཙྪནྣམེཝ ཧོཏི, ཏསྨཱ ཨཔྤཊིཙྪནྣཱཡ ཨཱཔཏྟིཡཱ པརིཝཱསདཱནཾ ཨདྷམྨིཀཾ ཧོཏི. ཨིདྷ པན ‘‘ཨེཏྟཀཱ རཏྟིཡོ མཡཱ ཚཱདིཏཱ’’ཏི ཚནྣཀཱལམེཝ ན ཛཱནཱཏི, ཏདཛཱནབྷཱཝེ སཏིཔི པརིཝཱསདཱནཾ རུཧཏི. ཏེནེཝ ཙ ཀཱརཎེན སུདྡྷནྟཔརིཝཱསེ (ཙཱུལ༹ཝ. ༡༥༦-༡༥༧) ‘‘ཨཱཔཏྟིཔརིཡནྟཾ ན ཛཱནཱཏི, རཏྟིཔརིཡནྟཾ ན ཛཱནཱཏི, ཨཱཔཏྟིཔརིཡནྟཾ ནསྶརཏི, རཏྟིཔརིཡནྟཾ ནསྶརཏི, ཨཱཔཏྟིཔརིཡནྟེ ཝེམཏིཀོ, རཏྟིཔརིཡནྟེ ཝེམཏིཀོ’’ཏི རཏྟིཔརིཡནྟསྶ ཨཛཱནནཨསརཎཝེམཏིཀབྷཱཝེ སཏིཔི པརིཝཱསདཱནཾ ཝུཏྟཾ, ཏསྨཱ ཚཱདིཏཀཱལཾ ཏཐཏོ ཨཛཱནནྟོཔི ‘‘སམྦཧུལཱ ཨཱཔཏྟིཡོ ཨེཀཱཧཔྤཊིཙྪནྣཱཡོ…པེ… སམྦཧུལཱ ཨཱཔཏྟིཡོ པཀྑཔྤཊིཙྪནྣཱཡོ’’ཏི ཨེཏྠ ཨཔྤཝིཊྛསྶ ཨབྷཱཝཱ སམྤཛྫཏིཡེཝཱཏི དཊྛབྦཾ.

ཨཐཱཔི ¶ ཨེཝཾ ཝདེཡྻུཾ – ‘‘སམྦཧུལཱ ཨཱཔཏྟིཡོ ཨེཀཱཧཔྤཊིཙྪནྣཱཡོ…པེ… སམྦཧུལཱ ཨཱཔཏྟིཡོ པཀྑཔྤཊིཙྪནྣཱཡོ’’ཏི ཝུཏྟེ ཏེསུ དིཝསེསུ ཨཱཔཏྟིཡོ ཨཏྠི པཊིཙྪནྣཱཡོཔི, ཨཏྠི ཨཔྤཊིཙྪནྣཱཡོཔི, ཨཏྠི ཙིརཔྤཊིཙྪནྣཱཡོཔི, ཨཏྠི ཨཙིརཔྤཊིཙྪནྣཱཡོཔི, ཨཏྠི ཨེཀཱཔི, ཨཏྠི སམྦཧུལཱཔི, སབྦཱ ཏཱ ཨཱཔཏྟིཡོ ཨེཏེནེཝ པདེན སངྒཧིཏཱ སིཡུནྟི? སངྒཧིཏཱ ཨེཝ. ན ཧེཏྠ སཾསཡོ ཀཱཏབྦོ. ཝུཏྟཉྷེཏཾ ཨཊྛཀཐཱཡཾ (ཙཱུལ༹ཝ. ཨཊྛ. ༡༠༢) ‘‘ཨཉྙསྨིཾ པན ཨཱཔཏྟིཝུཊྛཱནེ ཨིདཾ ལཀྑཎཾ – ཡོ ཨཔྤཊིཙྪནྣཾ ཨཱཔཏྟིཾ ‘པཊིཙྪནྣཱ’ཏི ཝིནཡཀམྨཾ ཀརོཏི, ཏསྶ ཨཱཔཏྟི ཝུཊྛཱཏི. ཡོ པཊིཙྪནྣཾ ‘ཨཔྤཊིཙྪནྣཱ’ཏི ཝིནཡཀམྨཾ ཀརོཏི, ཏསྶ ན ཝུཊྛཱཏི. ཨཙིརཔྤཊིཙྪནྣཾ ‘ཙིརཔྤཊིཙྪནྣཱ’ཏི ཀརོནྟསྶཔི ཝུཊྛཱཏི, ཙིརཔྤཊིཙྪནྣཾ ‘ཨཙིརཔྤཊིཙྪནྣཱ’ཏི ཀརོནྟསྶ ན ཝུཊྛཱཏི. ཨེཀཾ ཨཱཔཏྟིཾ ཨཱཔཛྫིཏྭཱ ‘སམྦཧུལཱ’ཏི ཀརོནྟསྶཔི ཝུཊྛཱཏི ཨེཀཾ ཝིནཱ སམྦཧུལཱནཾ ཨབྷཱཝཏོ. སམྦཧུལཱ པན ཨཱཔཛྫིཏྭཱ ¶ ‘ཨེཀཾ ཨཱཔཛྫི’ནྟི ཀརོནྟསྶ ན ཝུཊྛཱཏཱི’’ཏི, ཏསྨཱ ཨེཏེཧི པདེཧི སབྦཱསཾ པཊིཙྪནྣཱཔཏྟཱིནཾ སངྒཧིཏཏྟཱ ཏཱཧི ཨཱཔཏྟཱིཧི ཝུཊྛཱནཾ སམྦྷཝཏཱིཏི དཊྛབྦཾ.

ཨཐ པན ཝིནཡདྷརེན པུཊྛོ ‘‘ཨཧཾ, བྷནྟེ, སམྦཧུལཱ སངྒྷཱདིསེསཱ ཨཱཔཏྟིཡོ ཨཱཔཛྫིཾ ཨེཀཾ སུཀྐཝིསྶཊྛིཾ, ཨེཀཾ ཀཱཡསཾསགྒཾ, ཨེཀཾ དུཊྛུལླཝཱཙཾ, ཨེཀཾ ཨཏྟཀཱམཾ, ཨེཀཾ སཉྩརིཏྟཾ, ཨེཀཾ ཀུཊིཀཱརཾ, ཨེཀཾ ཝིཧཱརཀཱརཾ, ཨེཀཾ དུཊྛདོསཾ, ཨེཀཾ ཨཉྙབྷཱགིཡཾ, ཨེཀཾ སངྒྷབྷེདཾ, ཨེཀཾ བྷེདཱནུཝཏྟཀཾ, ཨེཀཾ དུབྦཙཾ, ཨེཀཾ ཀུལདཱུསཀ’’ནྟི ཝུཏྟེ ‘‘ཨཡཾ བྷིཀྑུ མིསྶཀསམོདྷཱནཔརིཝཱསཱརཧོ’’ཏི ཉཏྭཱ ཨཊྛཀཐཱཡཾ (ཙཱུལ༹ཝ. ཨཊྛ. ༡༠༢) ཨཱགཏནཡེན པརིཝཱསོ དཱཏབྦོ. ཨེཏྠཱཧ – ཨགྒྷསམོདྷཱནམིསྶཀསམོདྷཱནཱནཾ ཀོ ཝིསེསོ, ཀིཾ ནཱནཱཀརཎནྟི? ཝུཙྩཏེ – ཨགྒྷསམོདྷཱནཔརིཝཱསོ ཨཙིརཔྤཊིཙྪནྣཱ ¶ ཨཱཔཏྟིཡོ ཙིརཔྤཊིཙྪནྣཱཡཾ ཨཱཔཏྟིཡཾ སམོདྷཱནེཏྭཱ ཏསྶཱ ཙིརཔྤཊིཙྪནྣཱཡ ཨཱཔཏྟིཡཱ ཨགྒྷཝསེན དཱིཡཏི, མིསྶཀསམོདྷཱནཔརིཝཱསོ ནཱནཱཝཏྠུཀཱ ཨཱཔཏྟིཡོ སམོདྷཱནེཏྭཱ ཏཱསཾ མིསྶཀཝསེན དཱིཡཏི, ཨཡམེཏེསཾ ཝིསེསོ. ཨཐ ཝཱ ཨགྒྷསམོདྷཱནོ སབྷཱགཝཏྠཱུནཾ ཨཱཔཏྟཱིནཾ སམོདྷཱནཝསེན ཧོཏི, ཨིཏརོ ཝིསབྷཱགཝཏྠཱུནནྟི ཨཱཙརིཡཱ. ཏེནེཝཱཧ ཨཱཙརིཡཝཛིརབུདྡྷིཏྠེརོ (ཝཛིར. ཊཱི. ཙཱུལ༹ཝགྒ ༡༠༢) ‘‘ཨགྒྷསམོདྷཱནོ ནཱམ སབྷཱགཝཏྠུཀཱཡོ སམྦཧུལཱ ཨཱཔཏྟིཡོ ཨཱཔནྣསྶ བཧུརཏྟིཾ པཊིཙྪཱདིཏཱཔཏྟིཡཾ ནིཀྑིཔིཏྭཱ དཱཏབྦོ, ཨིཏརོ ནཱནཱཝཏྠུཀཱནཾ ཝསེནཱཏི ཨཡམེཏེསཾ ཝིསེསོ’’ཏི.

ཨཐ སིཡཱ ‘‘ཨེཝཾ ཙིརཔྤཊིཙྪནྣཱཡོ ཙ ཨཙིརཔྤཊིཙྪནྣཱཡོ ཙ ནཱནཱཝཏྠུཀཱཡོ ཨཱཔཏྟིཡོ ཨཱཔཛྫནྟསྶ ཀོ པརིཝཱསོ དཱཏབྦོ ཨགྒྷསམོདྷཱནོ ཝཱ མིསྶཀསམོདྷཱནོ ཝཱ, ཨཐ ཏདུབྷཡཱ ཝཱ’’ཏི. ཀིཉྩེཏྠ – ཡདི ཨགྒྷསམོདྷཱནཾ དདེཡྻ, ཙིརཔྤཊིཙྪནྣཱཧི ཙ ཨཙིརཔྤཊིཙྪནྣཱཧི ཙ སབྷཱགཝཏྠུཀཱཧི ཨཱཔཏྟཱིཧི ཝུཊྛིཏོ བྷཝེཡྻ, ཙིརཔྤཊིཙྪནྣཱཧི ཙ ཨཙིརཔྤཊིཙྪནྣཱཧི ཙ ནོ ཝིསབྷཱགཝཏྠུཀཱཧི. ཡདི ཙ མིསྶཀསམོདྷཱནཾ དདེཡྻ, སམཱནཀཱལཔྤཊིཙྪནྣཱཧི ཝིསབྷཱགཝཏྠཱུཧི ཨཱཔཏྟཱིཧི ཝུཊྛིཏོ བྷཝེཡྻ, ནོ ཨསམཱནཀཨཱལཔྤཊིཙྪནྣཱཧི སབྷཱགཝཏྠུཀཱཧི ཙ, ཨཐ ཏདུབྷཡམྤི དདེཡྻ, ‘‘ཨེཀསྨིཾ ཀམྨེ དྭེ པརིཝཱསཱ དཱཏབྦཱ’’ཏི ནེཝ པཱལི༹ཡཾ, ན ཨཊྛཀཐཱཡཾ ཝུཏྟནྟི? ཝུཙྩཏེ – ཨིདཉྷི སབྦམྤི པརིཝཱསཱདིཀཾ ཝིནཡཀམྨཾ ཝཏྠུཝསེན ཝཱ གོཏྟཝསེན ཝཱ ནཱམཝསེན ཝཱ ཨཱཔཏྟིཝསེན ཝཱ ཀཱཏུཾ ཝཊྚཏིཡེཝ.

ཏཏྠ ¶ ¶ སུཀྐཝིསྶཊྛཱིཏི ཝཏྠུ ཙེཝ གོཏྟཉྩ. སངྒྷཱདིསེསོཏི ནཱམཉྩེཝ ཨཱཔཏྟི ཙ. ཏཏྠ ‘‘སུཀྐཝིསྶཊྛིཾ ཀཱཡསཾསགྒ’’ནྟིཨཱདིཝཙནེནཱཔི ‘‘ནཱནཱཝཏྠུཀཱཡོ’’ཏི ཝཙནེནཔི ཝཏྠུ ཙེཝ གོཏྟཉྩ གཧིཏཾ ཧོཏི, ‘‘སངྒྷཱདིསེསོ’’ཏི ཝཙནེནཔི ‘‘ཨཱཔཏྟིཡོ’’ཏི ཝཙནེནཔི ནཱམཉྩེཝ ཨཱཔཏྟི ཙ གཧིཏཱ ཧོཏི, ཏསྨཱ ཨགྒྷསམོདྷཱནཝསེན པརིཝཱསེ དིནྣེ ‘‘ཨཧཾ, བྷནྟེ, སམྦཧུལཱ སངྒྷཱདིསེསཱ ཨཱཔཏྟིཡོ ཨཱཔཛྫི’’ནྟིཨཱདིཝཙནེནེཝ ཝཏྠུསྶ ཙ གོཏྟསྶ ཙ ནཱམསྶ ཙ ཨཱཔཏྟིཡཱ ཙ གཧིཏཏྟཱ ཙིརཔྤཊིཙྪནྣཱཧི ཨཙིརཔྤཊིཙྪནྣཱཧི ཙ སབྷཱགཝཏྠུཀཱཧི ཙ ཝིསབྷཱགཝཏྠུཀཱཧི ཙ སབྦཱཧི ཨཱཔཏྟཱིཧི ཝུཊྛཱཏཱིཏི དཊྛབྦཾ. ཝུཏྟཉྷེཏཾ སམནྟཔཱསཱདིཀཱཡཾ ‘‘ཨེཏྠ ཙ ‘སངྒྷཱདིསེསཱ ཨཱཔཏྟིཡོ ཨཱཔཛྫིཾ ནཱནཱཝཏྠུཀཱཡོ’ཏིཔི ‘སངྒྷཱདིསེསཱ ཨཱཔཏྟིཡོ ཨཱཔཛྫི’ནྟིཔི ཨེཝཾ པུབྦེ ཝུཏྟནཡེན ཝཏྠུཝསེནཔི གོཏྟཝསེནཔི ནཱམཝསེནཔི ཨཱཔཏྟིཝསེནཔི ཡོཛེཏྭཱ ཀམྨཝཱཙཾ ཀཱཏུཾ ཝཊྚཏིཡེཝཱཏི ཨཡཾ མིསྶཀསམོདྷཱནོ’’ཏི, ཨིམསྨིཉྩ ཝིནཡསངྒཧཔྤཀརཎེ (ཝི. སངྒ. ཨཊྛ. ༢༤༥) ཏཐེཝ ཝཏྭཱ ‘‘ཏསྨཱ ན ཨིདྷ ཝིསུཾ ཀམྨཝཱཙཾ ཡོཛེཏྭཱ དསྶཡིསྶཱམ, པུབྦེ སབྦཱཔཏྟིསཱདྷཱརཎཾ ཀཏྭཱ ཡོཛེཏྭཱ དསྶིཏཱཡ ཨེཝ ཀམྨཝཱཙཱཡ ནཱནཱཝཏྠུཀཱཧིཔི ཨཱཔཏྟཱིཧི ཝུཊྛཱནསམྦྷཝཏོ སཱཡེཝེཏྠ ཀམྨཝཱཙཱ ཨལ’’ནྟི.

ཡདི ཨེཝཾ ཨཱཙརིཡཝཛིརབུདྡྷིཏྠེརེན དྭིནྣཾ ཝིསེསོ ན ཝཏྟབྦོ, ཨཐ ཀསྨཱ ཝུཏྟོཏི? ཏཱིསུ སམོདྷཱནཔརིཝཱསེསུ ཨོདྷཱནསམོདྷཱནོ མཱུལཱཡཔཊིཀསྶནཱཡ ཨོདྷཱུནིཏཀཱལེཡེཝ དཱཏབྦོ, ཨགྒྷསམོདྷཱནམིསྶཀསམོདྷཱནཔརིཝཱསཱ པན ཝིསུཾཡེཝ དཱཏབྦཱ. ‘‘ཨེཝཾ དིནྣེ ཨེཏེསཾ ¶ ཀོ ཝིསེསོ’’ཏི ཙིནྟཱཡཾ ཝིསེསསམྦྷཝམཏྟདསྶནཏྠཾ ཝུཏྟོ. ཨཊྛཀཐཱཡཾ པན པརིཝཱསཱདིཀམྨསྶ ལཀྑཎཾ དསྶེཏུཾ ‘‘ཝཏྠུཝསེན ཝཱ’’ཏིཨཱདིམཱཧ, ཏསྨཱ ལཀྑཎཝསེནེཝ སབྷཱགཝཏྠུཀཱཧིཔི ཨཱཔཏྟཱིཧི ཝུཊྛཱནཾ སམྦྷཝཏི. ཏེནེཝ ཙ ཀཱརཎེན སཱརཏྠདཱིཔནིནཱམིཀཱཡཾ ཝིནཡཊཱིཀཱཡཉྩ ཝིམཏིཝིནོདནིནཱམིཀཱཡཾ ཝིནཡཊཱིཀཱཡཉྩ ན ཀོཙི ཝིསེསོ ཝུཏྟོཏི དཊྛབྦོ.

ཡདི ཨེཝཾ མིསྶཀསམོདྷཱནཀམྨཝཱཙཱཡཔི ཙིརཔྤཊིཙྪནྣཱཧི ཨཙིརཔྤཊིཙྪནྣཱཧིཔི ཨཱཔཏྟཱིཧི ཝུཊྛཱནཾ སམྦྷཝེཡྻ. ཏཏྠཔི ཧི ‘‘ཨཧཾ, བྷནྟེ, སམྦཧུལཱ སངྒྷཱདིསེསཱ ཨཱཔཏྟིཡོ ཨཱཔཛྫིཾ ནཱནཱཝཏྠུཀཱཡོ’’ཏིཔི ‘‘ཨེཀཱ སུཀྐཝིསྶཊྛི…པེ… ཨེཀཱ ཀུལདཱུསཀཱ’’ཏིཔི ཝཏྟབྦཾ. ཨེཝཾ སཏི ‘‘སམྦཧུལཱ’’ཏིཔི ‘‘སངྒྷཱདིསེསཱ ཨཱཔཏྟིཡོ’’ཏིཔི ཝཏྠུགོཏྟནཱམཱཔཏྟཱིཧི ཀིཏྟནསམྦྷཝཏོ ཙིརཔྤཊིཙྪནྣཱཧིཔི ཨཙིརཔྤཊིཙྪནྣཱཧིཔི ཨཱཔཏྟཱིཧི ཝུཊྛཱནཾ སམྦྷཝེཡྻཱཏི? ན པནེཝཾ དཊྛབྦཾ. ཝཏྠཱདིཀིཏྟནཉྷི སབྦཱཔཏྟཱིནཾ གཎྷནཏྠཾ ཧོཏི. ཨེཝཾ གཎྷནྟེཔི པཊིཙྪནྣཀཱལསྶ ¶ ཨཀཐིཏཏྟཱ ‘‘ཨེཏྟཀཾ ནཱམ ཀཱལཾ པརིཝསིཏབྦ’’ནྟི ན པཉྙཱཡཏི, ཏསྨིཾ ཨཔཉྙཱཡམཱནེ ཏེན པམཱཎེན པརིཝཱསོ ན ཧོཏི, ཏསྨིཾ ཨསཏི ཨཱཔཏྟིཏོ ཝུཊྛཱནཾ ན སམྦྷཝཏི, ཏསྨཱ མིསྶཀསམོདྷཱནཀམྨཝཱཙཱཡ ཙིརཔྤཊིཙྪནྣཱཧིཔི ཨཙིརཔྤཊིཙྪནྣཱཧིཔི ཨཱཔཏྟཱིཧི ཝུཊྛཱནཾ ན སམྦྷཝཏཱིཏི དཊྛབྦཾ.

པརིཝཱསཝིནིཙྪཡཀཐཱ ནིཊྛིཏཱ.

མཱནཏྟཝིནིཙྪཡཀཐཱ

མཱནཏྟཀཐཱཡམྤི མཱནཏྟཾ ནཱམ ཨཔྤཊིཙྪནྣམཱནཏྟཾ པཊིཙྪནྣམཱནཏྟཾ པཀྑམཱནཏྟཾ སམོདྷཱནམཱནཏྟནྟི ཙཏུབྦིདྷཾ ཧོཏི. ཏཏྠ ¶ ཡོ བྷིཀྑུ སངྒྷཱདིསེསཾ ཨཱཔཏྟིཾ ཨཱཔཛྫིཏྭཱ ཏཾ དིཝསམེཝ ཨཱརོཙེཏི, ཨེཀརཏྟིམཏྟམྤི ན པཊིཙྪཱདེཏི, ཏསྶ པརིཝཱསཾ ཨདཏྭཱཝ དིནྣཾ མཱནཏྟཾ ཨཔྤཊིཙྪནྣམཱནཏྟཾ ནཱམ. ཡོ ཨཱཔཛྫིཏྭཱ དསཧི ཨཱཀཱརེཧི ཝིནཱ ཏཾ དིཝསཾ ནཱརོཙེཏི, ཨེཀརཏྟཱདིཝསེན པཊིཙྪཱདེཏི, ཏཏྠ ཡཐཱཔཊིཙྪནྣདིཝསཾ པརིཝཱསཾ དཏྭཱ པརིཝུཏྠཔརིཝཱསསྶ དིནྣཾ མཱནཏྟཾ པཊིཙྪནྣམཱནཏྟཾ ནཱམ. ཨཱཔཏྟིཾ ཨཱཔཛྫིཏྭཱ པཊིཙྪནྣཱཡ ཝཱ ཨཔྤཊིཙྪནྣཱཡ ཝཱ བྷིཀྑུནིཡཱ པཀྑམཏྟམེཝ དིནྣཾ མཱནཏྟཾ པཀྑམཱནཏྟཾ ནཱམ. བྷིཀྑུ པན པཊིཙྪནྣཱཡ ཨཱཔཏྟིཡཱ པརིཝསིཏྭཱ ཨནིཀྑིཏྟཝཏྟཀཱལེཡེཝ པུན ཨཱཔཛྫིཏྭཱ ན པཊིཙྪཱདེཏི, ཏསྶ མཱུལཱཡ པཊིཀསྶིཏྭཱ པརིཝུཏྠདིཝསེ ཨདིཝསེ ཀཏྭཱ ཨཔྤཊིཙྪཱདིཏཏྟཱ སམོདྷཱནཔརིཝཱསཾ ཨདཏྭཱ དིནྣཾ མཱནཏྟཾ སམོདྷཱནམཱནཏྟཾ ནཱམ. མཱནཏྟཱརཧཀཱལེཔི མཱནཏྟཙརཎཀཱལེཔི ཨབྦྷཱནཱརཧཀཱལེཔི ཨེསེཝ ནཡོ. ཏེསུ ཏཱིཎི མཱནཏྟཱནི ཨཊྛཀཐཱཡཾ ཝུཏྟནཡེན སུཝིཉྙེཡྻཏྟཱ ན ཝུཏྟཱནི. པཀྑམཱནཏྟཾ པཙྪཱ ཨཱགམིསྶཏི.

ཡཱནི པན པརིཝཱསམཱནཏྟཱནི ཨནཝཊྛིཏཏྟཱ པུཐུཛྫནསྶ གིཧིཨཱདིཝསེན པརིཝཏྟནེ སཏི པུན དཱཏབྦཱདཱཏབྦབྷཱཝེ སངྐིཏབྦཱནི, ཏཱནི དསྶེཏུཾ པཱལི༹ཡཾ ཨནེཀེཧི པཀཱརེཧི ཝིཏྠཱརཏོ ཝུཏྟཱནི. ཏེསུ བྷིཀྑཱུནཾ སཾསཡཝིནོདནཏྠཱཡ ཨེཀདེསཾ དསྶེཏུཾ ‘‘སཙེ ཀོཙཱི’’ཏིཨཱདིམཱཧ. ཏཏྠ ཝིབྦྷམཏཱིཏི ཝིརཱུཔོ ཧུཏྭཱ བྷམཏི, ཧཱིནཱཡཱཝཏྟཏི གིཧཱི ཧོཏཱིཏི ཨཏྠོ. སཱམཎེརོ ཧོཏཱིཏི ཨུཔསམྤནྣབྷཱཝཾ ཛཧིཏྭཱ སཱམཎེརབྷཱཝཾ ཨུཔགཙྪཏི. ཏཏྠ པཱརཱཛིཀཔྤཏྟབྷཱཝེན ཝཱ ‘‘གིཧཱིཏི མཾ དྷཱརེཐཱ’’ཏིཨཱདིནཱ སིཀྑཱཔཙྩཀྑཱནེན ཝཱ གིཧཱི ཧོཏི ¶ . ཏེསུ པཋམེན པུན ཨུཔསམྤདཱཡ ཨབྷབྦཏྟཱ པུན པརིཝཱསོ ན རུཧཏིཡེཝ, དུཏིཡེན པན པུན ཨུཔསམྤདཱཡ བྷབྦཏྟཱ ‘‘སོ ཙེ པུན ཨུཔསམྤཛྫཏཱི’’ཏི ¶ ཝུཏྟཾ. ཨིཏརོ པན པཱརཱཛིཀཔྤཏྟབྷཱཝེན སཱམཎེརོ ན ཧོཏི. ཀསྨཱ? སརཎགམནཱདཱིནཾ ཝིནསྶནཏོ. ཝུཏྟཉྷི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༡༠༨) ‘‘ཨུཔསམྤནྣཱནམྤི པཱརཱཛིཀསམཨཱཔཏྟིཡཱ སརཎགམནཱདིསཱམཎེརབྷཱཝསྶཔི ཝིནསྶནཏོ སེནཱསནགྒཱཧོ ཙ པཊིཔྤསྶམྦྷཏི, སངྒྷལཱབྷམྤི ཏེན ལབྷནྟཱིཏི ཝེདིཏབྦ’’ནྟི, གིཧཱི པན ཧུཏྭཱ པུན སཱམཎེརབྷཱཝམཏྟཾ ལདྡྷབྦཾ ཧོཏི. ‘‘སཱམཎེརོཏི མཾ དྷཱརེཐཱ’’ཏིཨཱདིནཱ པན སིཀྑཱཔཙྩཀྑཱནེ ཀཏེ སིཡཱ སཱམཎེརབྷཱཝོ, ཏཏོཔི པུན ཨུཔསམྤཛྫིཏུཀཱམཏཱཡ སཏི སིཡཱ ཨུཔསམྤནྣབྷཱཝོ. ‘‘གིཧཱིཏི མཾ དྷཱརེཐཱ’’ཏིཨཱདིནཱ སིཀྑཱཔཙྩཀྑཱནཾ ཀཏྭཱ གིཧིབྷཱཝཾ ཨུཔགཏེཔི པུན སཱམཎེརཔབྦཛྫཾ པབྦཛིཏྭཱ སཱམཎེརོ ཧོཏི. ཏཏོ པུན ཨུཔསམྤཛྫིཏུཾ ལདྡྷབྦཏྟཱ ‘‘པུན ཨུཔསམྤཛྫཏཱི’’ཏི ཝུཏྟོ. ཏེསཾ བྷིཀྑུབྷཱཝེ པརིཝཱསེ ཨནིཊྛིཏེཔི གིཧིསཱམཎེརབྷཱཝཾ པཏྟཏྟཱ པརིཝཱསོ ན རུཧཏི ཨུཔསམྤནྣཱནམེཝ པརིཝཱསསྶ བྷགཝཏཱ པཉྙཏྟཏྟཱཏི ཨཏྠོ.

ཨེཝཾ སནྟེ པུན ཨུཔསམྤཛྫནྟསྶ ཀིཾ པརིཝཱསོ པུན དཱཏབྦོཏི ཨཱཧ ‘‘སོ ཙེ པུན ཨུཔསམྤཛྫཏཱི’’ཏིཨཱདི. ཏསྶཏྠོ – སོ ཝིབྦྷནྟཀོ སོ ཝཱ སཱམཎེརོ པུན ཨུཔསམྤནྣབྷཱཝཾ ཨུཔགཙྪཏི, པུརིམཾ པུབྦེ བྷིཀྑུབྷཱུཏཀཱལེ དིནྣཾ པརིཝཱསདཱནཾ ཨེཝ ཨིདཱནི པརིཝཱསདཱནཾ ཧོཏི. ཡོ པརིཝཱསོ པུབྦེ བྷིཀྑུབྷཱུཏཀཱལེ དིནྣོ, སོ པརིཝཱསོ སུདིནྣོ, དུདིནྣོ ན ཧོཏི. ཡོ ཡཏྟཀོ ཀཱལོ པརིཝུཏྠོ, སོ ཏཏྟཀོ ཀཱལོ སུཔརིཝུཏྠོཡེཝ ཧོཏི, ན དུཔརིཝུཏྠོ, ཏསྨཱ ཨཝསེསོ ཀཱལོ པརིཝསིཏབྦོཏི. ཨིདཾ ཝུཏྟཾ ཧོཏི – པུབྦེ བྷིཀྑུཀཱལེ པཀྑཔྤཊིཙྪནྣཱཡ ཨཱཔཏྟིཡཱ པརིཝཱསཾ གཧེཏྭཱ དསདིཝསམཏྟཾ པརིཝསིཏྭཱ ཨནིཊྛིཏེཡེཝ པརིཝཱསེ ཝིབྦྷམིཏྭཱ སཱམཎེརོ ¶ ཝཱ ཧུཏྭཱ པུན ཨུཔསམྤནྣེན ཨཝསེསཔཉྩདིཝསེ པརིཝསིཏྭཱ པརིཝཱསོ ནིཊྛཱཔེཏབྦོཏི. མཱནཏྟཱརཧཱདཱིསུཔི ཨེསེཝ ནཡོ. ཨུམྨཏྟཀཱདཱིསུཔི ཏསྨིཾ ཀཱལེ ཨཛཱནནྟཏྟཱ ‘‘པརིཝཱསོ ན རུཧཏཱི’’ཏི ཝུཏྟཾ. ཏིཎྞམྤི ཨུཀྑིཏྟཀཱནཾ ཀམྨནཱནཱསཾཝཱསཀཏྟཱ ཏེཧི སཧསཾཝཱསོཡེཝ ནཏྠཱིཏི ཨུཀྑིཏྟཀཱནཾ པརིཝཱསོ ན རུཧཏཱིཏི ཝུཏྟཾ.

སཙེ པུན ཨོསཱརཱིཡཏཱིཏི ཨུཀྑེཔནཱིཡཀམྨཾ པཊིཔྤསྶམྦྷནཝསེན སམཱནསཾཝཱསཀབྷཱཝཾ པཝེསཱིཡཏི. ‘‘སཙེ ཀསྶཙི བྷིཀྑུནོ ཨིཏྠིལིངྒཾ པཱཏུབྷཝཏཱི’’ཏིཨཱདཱིསུ ཨཊྛཀཐཱཡཾ ཝུཏྟནཡེནེཝ ཨཏྠོ སུཝིཉྙེཡྻོ ཧོཏི. ཡཾ པན ཝུཏྟཾ ‘‘པཀྑམཱནཏྟཾ པཙྪཱ ཨཱགམིསྶཏཱི’’ཏི, ཏཏྲེཝཾ ¶ ཛཱནིཏབྦཾ – པཀྑམཱནཏྟནྟི བྷིཀྑུནིཡཱ དཱཏབྦམཱནཏྟཾ. ཏཾ པན པཊིཙྪནྣཱཡཔི ཨཔྤཊིཙྪནྣཱཡཔི ཨཱཔཏྟིཡཱ ཨཌྜྷམཱསམཏྟམེཝ དཱཏབྦཾ. ཝུཏྟཉྷེཏཾ ‘‘གརུདྷམྨཾ ཨཛ྄ཛྷཱཔནྣཱཡ བྷིཀྑུནིཡཱ ཨུབྷཏོསངྒྷེ པཀྑམཱནཏྟཾ ཙརིཏབྦ’’ནྟི (པཱཙི. ༡༤༩; ཙཱུལ༹ཝ. ༤༠༣; ཨ. ནི. ༨.༥༡). ཏཾ པན བྷིཀྑུནཱིཧི ཨཏྟནོ སཱིམཾ སོདྷེཏྭཱ ཝིཧཱརསཱིམཱཡ ཝཱ ཝིཧཱརསཱིམཾ སོདྷེཏུཾ ཨསཀྐོནྟཱིཧི ཁཎྜསཱིམཱཡ ཝཱ སབྦནྟིམེན པརིཙྪེདེན ཙཏུཝགྒགཎཾ སནྣིཔཱཏཱཔེཏྭཱ དཱཏབྦཾ. སཙེ ཨེཀཱ ཨཱཔཏྟི ཧོཏི, ཨེཀིསྶཱ ཝསེན, སཙེ དྭེ ཝཱ ཏིསྶོ ཝཱ སམྦཧུལཱ ཝཱ ཨེཀཝཏྠུཀཱ ཝཱ ནཱནཱཝཏྠུཀཱ ཝཱ, ཏཱསཾ ཏཱསཾ ཝསེན ཝཏྠུགོཏྟནཱམཨཱཔཏྟཱིསུ ཡཾ ཡཾ ཨིཙྪཏི, ཏཾ ཏཾ ཨཱདཱཡ ཡོཛནཱ ཀཱཏབྦཱ.

ཏཏྲིདཾ ཨེཀཱཔཏྟིཝསེན མུཁམཏྟནིདསྶནཾ – ཏཱཡ ཨཱཔནྣཱཡ བྷིཀྑུནིཡཱ བྷིཀྑུནིསངྒྷཾ ཨུཔསངྐམིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ ཝུཌྜྷཱནཾ བྷིཀྑུནཱིནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཨེཝམསྶ ཝཙནཱིཡོ ‘‘ཨཧཾ ¶ , ཨཡྻེ, ཨེཀཾ ཨཱཔཏྟིཾ ཨཱཔཛྫིཾ གཱམནྟརཾ, སཱཧཾ, ཨཡྻ,ཨེ ཨེཀིསྶཱ ཨཱཔཏྟིཡཱ གཱམནྟརཱཡ པཀྑམཱནཏྟཾ ཡཱཙཱམཱི’’ཏི. ཨེཝཾ ཏིཀྑཏྟུཾ ཡཱཙཱཔེཏྭཱ བྱཏྟཱཡ བྷིཀྑུནིཡཱ པཊིབལཱཡ སངྒྷོ ཉཱཔེཏབྦོ ‘‘སུཎཱཏུ མེ, ཨཡྻེ, སངྒྷོ, ཨཡཾ ཨིཏྠནྣཱམཱ བྷིཀྑུནཱི ཨེཀཾ ཨཱཔཏྟིཾ ཨཱཔཛྫི གཱམནྟརཾ, སཱ སངྒྷཾ ཨེཀིསྶཱ ཨཱཔཏྟིཡཱ གཱམནྟརཱཡ པཀྑམཱནཏྟཾ ཡཱཙཏི. ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཱཡ བྷིཀྑུནིཡཱ ཨེཀིསྶཱ ཨཱཔཏྟིཡཱ གཱམནྟརཱཡ པཀྑམཱནཏྟཾ དདེཡྻ, ཨེསཱ ཉཏྟི. སུཎཱཏུ མེ, ཨཡྻེ, སངྒྷོ…པེ… དུཏིཡམྤི. ཏཏིཡམྤི ཨེཏམཏྠཾ ཝདཱམི. སུཎཱཏུ མེ, ཨཡྻེ, སངྒྷོ…པེ… བྷཱསེཡྻ. དིནྣཾ སངྒྷེན ཨིཏྠནྣཱམཱཡ བྷིཀྑུནིཡཱ ཨེཀིསྶཱ ཨཱཔཏྟིཡཱ གཱམནྟརཱཡ པཀྑམཱནཏྟཾ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི.

ཀམྨཝཱཙཱཔརིཡོསཱནེ ཝཏྟཾ སམཱདིཡིཏྭཱ བྷིཀྑུམཱནཏྟཀཐཱཡཾ ཝུཏྟནཡེནེཝ སངྒྷསྶ ཨཱརོཙེཏྭཱ ནིཀྑིཏྟཝཏྟཾ ཝསིཏུཀཱམཱཡ ཏཐེཝ སངྒྷསྶ མཛ྄ཛྷེ ཝཱ པཀྐནྟཱསུ བྷིཀྑུནཱིསུ ཨེཀབྷིཀྑུནིཡཱ ཝཱ དུཏིཡིཀཱཡ ཝཱ སནྟིཀེ ཝུཏྟནཡེནེཝ ནིཀྑིཔིཏབྦཾ. ཨཉྙིསྶཱ པན ཨཱགནྟུཀཱཡ སནྟིཀེ ཨཱརོཙེཏྭཱ ནིཀྑིཔིཏབྦཾ, ནིཀྑིཏྟཀཱལཏོ པཊྛཱཡ པཀཏཏྟཊྛཱནེ ཏིཊྛཏི.

པུན སམཱདིཡིཏྭཱ ཨརུཎཾ ཨུཊྛཔེནྟིཡཱ པན བྷིཀྑུནཱིནཾཡེཝ སནྟིཀེ ཝསིཏུཾ ན ལབྦྷཏི ¶ . ‘‘ཨུབྷཏོསངྒྷེ པཀྑམཱནཏྟཾ ཙརིཏབྦ’’ནྟི ཧི ཝུཏྟཾ, ཏསྨཱ ཨསྶཱ ཨཱཙརིཡུཔཛ྄ཛྷཱཡཱཧི ཝིཧཱརཾ གནྟྭཱ སངྒཱཧཀཔཀྑེ ཋིཏོ ཨེཀོ མཧཱཐེརོ ཝཱ དྷམྨཀཐིཀོ ཝཱ བྷིཀྑུ ཝཏྟབྦོ ‘‘ཨེཀིསྶཱ བྷིཀྑུནིཡཱ ཝིནཡཀམྨཾ ཀཏྟབྦམཏྠི, ཏཏྲ ནོ ཨཡྻཱ ཙཏྟཱརོ བྷིཀྑཱུ པེསེཐཱ’’ཏི. སངྒཧཾ ཨཀཱཏུཾ ན ལབྦྷཏི, ‘‘པེསེསྶཱམཱ’’ཏི ཝཏྟབྦཾ. ཙཏཱུཧི པཀཏཏྟབྷིཀྑུནཱིཧི མཱནཏྟཙཱརིནིཾ བྷིཀྑུནིཾ ¶ གཧེཏྭཱ ཨནྟོཨརུཎེཡེཝ ནིཀྑིཔིཏྭཱ གཱམཱུཔཙཱརཏོ དྭེ ལེཌྜུཔཱཏེ ཨཏིཀྐམིཏྭཱ མགྒཱ ཨོཀྐམྨ གུམྦཝཏིཨཱདཱིཧི པཊིཙྪནྣེ ཋཱནེ ནིསཱིདིཏབྦཾ, ཝིཧཱརཱུཔཙཱརཏོཔི དྭེ ལེཌྜུཔཱཏཱ ཨཏིཀྐམིཏབྦཱ. ཙཏཱུཧི པཀཏཏྟབྷིཀྑཱུཧིཔི ཏཏྠ གནྟབྦཾ, གནྟྭཱ པན བྷིཀྑུནཱིཧི སདྡྷིཾ ན ཨེཀཊྛཱནེ ནིསཱིདིཏབྦཾ, པཊིཀྐམིཏྭཱ ཨཝིདཱུརེ ཋཱནེ ནིསཱིདིཏབྦཾ. ཀུརུནྡིམཧཱཔཙྩརཱིསུ པན ‘‘བྷིཀྑུནཱིཧི བྱཏྟཾ ཨེཀཾ ཝཱ དྭེ ཝཱ ཨུཔཱསིཀཱཡོ བྷིཀྑཱུཧིཔི ཨེཀཾ ཝཱ དྭེ ཝཱ ཨུཔཱསཀེ ཨཏྟརཀྑཎཏྠཱཡ གཧེཏྭཱ གནྟབྦ’’ནྟི ཝུཏྟཾ. ཀུརུནྡིཡཾཡེཝ ཙ ‘‘བྷིཀྑུནུཔསྶཡསྶ ཙ ཝིཧཱརསྶ ཙ ཨུཔཙཱརཾ མུཉྩིཏུཾ ཝཊྚཏཱི’’ཏི ཝུཏྟཾ, ‘‘གཱམསྶཱ’’ཏི ན ཝུཏྟཾ.

ཨེཝཾ ནིསིནྣེསུ པན བྷིཀྑུནཱིསུ ཙ བྷིཀྑཱུསུ ཙ ཏཱཡ བྷིཀྑུནིཡཱ ‘‘མཱནཏྟཾ སམཱདིཡཱམི, ཝཏྟཾ སམཱདིཡཱམཱི’’ཏི ཝཏྟཾ སམཱདིཡིཏྭཱ བྷིཀྑུནིསངྒྷསྶ ཏཱཝ ཨེཝཾ ཨཱརོཙེཏབྦཾ ‘‘ཨཧཾ, ཨཡྻེ, ཨེཀཾ ཨཱཔཏྟིཾ ཨཱཔཛྫིཾ གཱམནྟརཾ, སཱཧཾ སངྒྷཾ ཨེཀིསྶཱ ཨཱཔཏྟིཡཱ གཱམནྟརཱཡ པཀྑམཱནཏྟཾ ཡཱཙིཾ, ཏསྶཱ མེ སངྒྷོ ཨེཀིསྶཱ ཨཱཔཏྟིཡཱ གཱམནྟརཱཡ པཀྑམཱནཏྟཾ ཨདཱསི, སཱཧཾ མཱནཏྟཾ ཙརཱམི, ཝེདིཡཱམཧཾ ཨཡྻེ, ཝེདིཡཏཱིཏི མཾ སངྒྷོ དྷཱརེཏཱུ’’ཏི.

ཏཏོ བྷིཀྑུསངྒྷསྶ སནྟིཀཾ གནྟྭཱ ཨེཝཾ ཨཱརོཙེཏབྦཾ ‘‘ཨཧཾ, ཨཡྻཱ, ཨེཀཾ ཨཱཔཏྟིཾ ཨཱཔཛྫིཾ…པེ… ཝེདིཡཱམཧཾ ཨཡྻཱ, ཝེདིཡཏཱིཏི མཾ སངྒྷོ དྷཱརེཏཱུ’’ཏི. ཨིདྷཱཔི ཡཱཡ ཀཱཡཙི བྷཱསཱཡ ཨཱརོཙེཏུཾ ཝཊྚཏི. ཨཱརོཙེཏྭཱ ཙ བྷིཀྑུནིསངྒྷསྶེཝ སནྟིཀེ ནིསཱིདིཏབྦཾ, ཨཱརོཙིཏཀཱལཏོ པཊྛཱཡ བྷིཀྑཱུནཾ གནྟུཾ ཝཊྚཏི. སཙེ སཱསངྐཱ ཧོཏི, བྷིཀྑུནིཡོ ཏཏྠེཝ ཋཱནཾ པཙྩཱསཱིསནྟི, ཋཱཏབྦཾ. སཙེ ཨཉྙོ བྷིཀྑུ ཝཱ བྷིཀྑུནཱི ཝཱ ཏཾ ཋཱནཾ ཨེཏི, པསྶནྟིཡཱ ཨཱརོཙེཏབྦཾ. ནོ ཙེ ཨཱརོཙེཏི, རཏྟིཙྪེདོ ཙེཝ ཝཏྟབྷེདདུཀྐཊཉྩ ¶ . སཙེ ཨཛཱནནྟིཡཱ ཨེཝ ཨུཔཙཱརཾ ཨོཀྐམིཏྭཱ གཙྪཏི, རཏྟིཙྪེདོཝ ཧོཏི, ན ཝཏྟབྷེདདུཀྐཊཾ. སཙེ བྷིཀྑུནིཡོ ཨུཔཛ྄ཛྷཱཡཱདཱིནཾ ཝཏྟཀརཎཏྠཾ པགེཝ གནྟུཀཱམཱ ཧོནྟི, རཏྟིཝིཔྤཝཱསགཎཨོཧཱིཡནགཱམནྟརཱཔཏྟིརཀྑཎཏྠཾ ¶ ཨེཀཾ བྷིཀྑུནིཾ ཋཔེཏྭཱ གནྟབྦཾ, ཏཱཡ ཨརུཎེ ཨུཊྛིཏེ ཏསྶཱ སནྟིཀེ ཝཏྟཾ ནིཀྑིཔིཏབྦཾ. ཨེཏེནུཔཱཡེན ཨཁཎྜཱ པཉྩདས རཏྟིཡོ མཱནཏྟཾ ཙརིཏབྦཾ.

ཨནིཀྑིཏྟཝཏྟཱཡ པན པཱརིཝཱསིཀཀྑནྡྷཀེ ཝུཏྟནཡེནེཝ སམྨཱ ཝཏྟིཏབྦཾ. ཨཡཾ པན ཝིསེསོ – ‘‘ཨཱགནྟུཀསྶ ཨཱརོཙེཏབྦ’’ནྟི ཨེཏྠ ཡཏྟཀཱ པུརེབྷཏྟཾ ཝཱ པཙྪཱབྷཏྟཾ ཝཱ ཏཾ གཱམཾ བྷིཀྑཱུ ཝཱ བྷིཀྑུནིཡོ ཝཱ ཨཱགཙྪནྟི, སབྦེསཾ ཨཱརོཙེཏབྦཾ. ཨནཱརོཙེནྟིཡཱ རཏྟིཙྪེདོ ཙེཝ ཝཏྟབྷེདདུཀྐཊཉྩ. སཙེཔི རཏྟིཾ ཀོཙི བྷིཀྑུ ཏཾ གཱམཱུཔཙཱརཾ ཨོཀྐམིཏྭཱ གཙྪཏི, རཏྟིཙྪེདོ ཧོཏིཡེཝ, ཨཛཱནནཔཙྩཡཱ པན ཝཏྟབྷེདཏོ མུཙྩཏི. ཀུརུནྡཱིཨཱདཱིསུ པན ‘‘ཨནིཀྑིཏྟཝཏྟབྷིཀྑཱུནཾ ཝུཏྟནཡེནེཝ ཀཐེཏབྦ’’ནྟི ཝུཏྟཾ, ཏཾ པཱརིཝཱསིཀཝཏྟཱདཱིནཾ ཨུཔཙཱརསཱིམཱཡ པརིཙྪིནྣཏྟཱ ཡུཏྟཏརཾ དིསྶཏི. ཨུཔོསཐེ ཨཱརོཙེཏབྦཾ, པཝཱརཎཱཡ ཨཱརོཙེཏབྦཾ, ཙཏུནྣཾ བྷིཀྑཱུནཉྩ བྷིཀྑུནཱིནཉྩ དེཝསིཀཾ ཨཱརོཙེཏབྦཾ. སཙེ བྷིཀྑཱུནཾ ཏསྨིཾ གཱམེ བྷིཀྑཱཙཱརོ སམྤཛྫཏི, ཏཏྠེཝ གནྟབྦཾ. ནོ ཙེ སམྤཛྫཏི, ཨཉྙཏྲ ཙརིཏྭཱཔི ཏཏྲ ཨཱགནྟྭཱ ཨཏྟཱནཾ དསྶེཏྭཱ གནྟབྦཾ, བཧིགཱམེ ཝཱ སངྐེཏཊྛཱནཾ ཀཱཏབྦཾ ‘‘ཨསུཀསྨིཾ ནཱམ ཋཱནེ ཨམྷེ པསྶིསྶཏཱི’’ཏི. ཏཱཡ སངྐེཏཊྛཱནཾ གནྟྭཱ ཨཱརོཙེཏབྦཾ, སངྐེཏཊྛཱནེ ཨདིསྭཱ ཝིཧཱརཾ གནྟྭཱ ཨཱརོཙེཏབྦཾ. ཝིཧཱརེ སབྦབྷིཀྑཱུནཾ ཨཱརོཙེཏབྦཾ. སཙེ སབྦེསཾ སཀྐཱ ན ཧོཏི ཨཱརོཙེཏུཾ, བཧི ཨུཔཙཱརསཱིམཱཡ ཋཏྭཱ བྷིཀྑུནིཡོ པེསེཏབྦཱ, ཏཱཧི ཨཱནཱིཏཱནཾ ཙཏུནྣཾ བྷིཀྑཱུནཾ ཨཱརོཙེཏབྦཾ. སཙེ ཝིཧཱརོ དཱུརོ ཧོཏི སཱསངྐོ, ཨུཔཱསཀེ ཙ ཨུཔཱསིཀཱཡོ ¶ ཙ གཧེཏྭཱ གནྟབྦཾ. སཙེ པན ཨཡཾ ཨེཀཱ ཝསཏི, རཏྟིཝིཔྤཝཱསཾ ཨཱཔཛྫཏི, ཏསྨཱསྶཱ ཨེཀཱ པཀཏཏྟཱ བྷིཀྑུནཱི སམྨནྣིཏྭཱ དཱཏབྦཱ ཨེཀཙྪནྣེ ཝསནཏྠཱཡ.

ཨེཝཾ ཨཁཎྜཾ མཱནཏྟཾ ཙརིཏྭཱ ཝཱིསཏིགཎེ བྷིཀྑུནིསངྒྷེ ཝུཏྟནཡེནེཝ ཨབྦྷཱནཾ ཀཱཏབྦཾ. ‘‘སཙེ མཱནཏྟཾ ཙརམཱནཱ ཨནྟརཱཔཏྟིཾ ཨཱཔཛྫཏི, མཱུལཱཡ པཊིཀསྶིཏྭཱ ཏསྶཱ ཨཱཔཏྟིཡཱ མཱནཏྟཾ དཱཏབྦ’’ནྟི ཀུརུནྡིཡཾ ཝུཏྟཾ, ཨིདཾ པཀྑམཱནཏྟཾ ནཱམ. ཨིདཾ པན པཀྑམཱནཏྟཾ སམནྟཔཱསཱདིཀཱཡཾ (ཙཱུལ༹ཝ. ཨཊྛ. ༡༠༢) པཱལི༹མུཏྟཝིནཡཝིནིཙྪཡབྷཱཝེན ཨཱགཏམྤི ཨིམསྨིཾ ཝིནཡསངྒཧཔྤཀརཎེ ཨཱཙརིཡེན ཨནུདྡྷཊཾ. ཨཡཾ པནཱཙརིཡསྶ ཨདྷིཔྤཱཡོ སིཡཱ – ཨིདཾ པཀྑམཱནཏྟཾ བྷིཀྑུནིཡོཡེཝ སནྡྷཱཡ བྷགཝཏཱ ཝིསུཾ པཉྙཏྟཾ, བྷིཀྑཱུཧི ཨསཱདྷཱརཎཾ, ཨིམསྨིཉྩ ཀཱལེ བྷིཀྑུནིསངྒྷོ ནཏྠི, ཏསྨཱ གནྠསྶ ལཧུབྷཱཝཏྠཾ ཨིདམྤི ཨཉྙམྤི ཨཱིདིསཾ ཨཛ྄ཛྷུཔེཀྑིཏབྦནྟི. ཨམྷེཧི པན བྷིཀྑུནིསངྒྷེ ཨཝིཛྫམཱནེཔི ‘‘བྷིཀྑུསངྒྷོ ¶ བྷིཀྑུནཱིཧི སམཱདཱཏབྦཝཏྟཾ ཛཱནིསྶཏི. ‘དུབྦལཛཱཏིཀཱ ཧི བྷཱིརུཀཛཱཏིཀཱ བྷིཀྑུནིཡོ བྷགཝཏོ ཨཱཎཾ པཏིཊྛཱཔེནྟིཡོ ཨེཝརཱུཔཾ དུཀྐརཾ དུརབྷིསམྦྷཝཾ ཝཏྟཾ སམཱདཡིཾསུ, ཀིམངྒཾ པན མཡ’ནྟི མནསི ཀརོནྟཱ བྷགཝཏོ ཨཱཎཾ པཏིཊྛཱཔེནྟཱ པརིཝཱསཱདིཝཏྟཾ སམཱདིཡིསྶནྟཱི’’ཏི མནྟྭཱ ཨཱཙརིཡེན ཨནུདྡྷཊམྤི ཨིམསྨིཾ ཝིནཡཱལངྐཱརཔྤཀརཎེ ཨུདྡྷཊཾ, ཏསྨཱ སམྨཱསམྦུདྡྷེ སཉྫཱཏསདྡྷཱཔེམགཱརཝཱདིཡུཏྟེཧི སཏྠུསཱསནཀརེཧི བྷིཀྑཱུཧི སམྨཱ སིཀྑིཏབྦཾ. ཨིཏོ པརཱནི ཨཊྛཀཐཱཡཾ ཨཱགཏནཡེནེཝ ཝེདིཏབྦཱནི.

མཱནཏྟཝིནིཙྪཡཀཐཱ ནིཊྛིཏཱ.

༢༤༨. པཱརིཝཱསིཀཝཏྟཀཐཱཡཾ ནཝཀཏརཾ པཱརིཝཱསིཀནྟི ཨཏྟནཱ ནཝཀཏརཾ པཱརིཝཱསིཀཾ. པཱརིཝཱསིཀསྶ ཧི ¶ ཨཏྟནཱ ནཝཀཏརཾ པཱརིཝཱསིཀཾ ཋཔེཏྭཱ ཨཉྙེ མཱུལཱཡཔཊིཀསྶནཱརཧ མཱནཏྟཱརཧ མཱནཏྟཙཱརིཀ ཨབྦྷཱནཱརཧཱཔི པཀཏཏྟཊྛཱནེཡེཝ ཏིཊྛནྟི. ཏེནཱཧ ‘‘ཨནྟམསོ མཱུལཱཡཔཊིཀསྶནཱརཧཱདཱིནམྤཱི’’ཏི. ཨནྟམསོ མཱུལཱཡཔཊིཀསྶནཱརཧཱདཱིནམྤཱིཏི ཨཱདི-སདྡེན མཱནཏྟཱརཧམཱནཏྟཙཱརིཀཨབྦྷཱནཱརཧེ སངྒཎྷཱཏི. ཏེ ཧི པཱརིཝཱསིཀཱནཾ, པཱརིཝཱསིཀཱ ཙ ཏེསཾ པཀཏཏྟཊྛཱནེ ཨེཝ ཏིཊྛནྟི. ཨདྷོཏཔཱདཊྛཔནཀནྟི ཡཏྠ ཋཏྭཱ པཱདེ དྷོཝནྟི, ཏཱདིསཾ དཱརུཕལཀཁཎྜཱདིཾ. པཱདགྷཾསནནྟི སཀྑརཀཐལཱདིཾ. པཱདེ གྷཾསནྟི ཨེཏེནཱཏི པཱདགྷཾསནཾ, སཀྑརཀཐལཱདི. ཝུཏྟཉྷི བྷགཝཏཱ ‘‘ཨནུཛཱནཱམི, བྷིཀྑཝེ, ཏིསྶོ པཱདགྷཾསནིཡོ སཀྑརཾ ཀཐལཾ སམུདྡཕེཎ’’ནྟི (ཙཱུལ༹ཝ. ༢༦༩). སདྡྷིཝིཧཱརིཀཱནམྤི སཱདིཡནྟསྶཱཏི སདྡྷིཝིཧཱརིཀཱནམྤི ཨབྷིཝཱདནཱདིཾ སཱདིཡནྟསྶ. ཝཏྟཾ ཀརོནྟཱིཏི ཨེཏྟཀམཏྟསྶེཝ ཝུཏྟཏྟཱ སདྡྷིཝིཧཱརིཀཱདཱིཧིཔི ཨབྷིཝཱདནཱདིཾ ཀཱཏུཾ ན ཝཊྚཏི. ‘‘མཱ མཾ གཱམཔྤཝེསནཾ ཨཱཔུཙྪཐཱ’’ཏི ཝུཏྟེ ཨནཱཔུཙྪཱཔི གཱམཾ པཝིསིཏུཾ ཝཊྚཏི.

ཡོ ཡོ ཝུཌྜྷོཏི པཱརིཝཱསིཀེསུ བྷིཀྑཱུསུ ཡོ ཡོ ཝུཌྜྷོ. ནཝཀཏརསྶ སཱདིཏུནྟི པཱརིཝཱསིཀནཝཀཏརསྶ ཨབྷིཝཱདནཱདིཾ སཱདིཏུཾ. ‘‘པཱརིསུདྡྷིཨུཔོསཐེ ཀརིཡམཱནེ’’ཏི ཨིདཾ པཝཱརཎདིཝསེསུ སངྒྷེ པཝཱརེནྟེ ཨནུཔགཏཚིནྣཝསྶཱདཱིཧི ཀརིཡམཱནཾ པཱརིསུདྡྷིཨུཔོསཐམྤི སནྡྷཱཡ ཝུཏྟཾ. ཏཏྠེཝཱཏི སངྒྷནཝཀཊྛཱནེཡེཝ. ཨཏྟནོ པཱལི༹ཡཱ པཝཱརེཏབྦནྟི ཨཏྟནོ ཝསྶགྒེན པཏྟཔཱལི༹ཡཱ པཝཱརེཏབྦཾ, ན པན སབྦེསུ པཝཱརིཏེསཱུཏི ཨཏྠོ.

ཨོཎོཛནཾ ¶ ནཱམ ཝིསྶཛྫནཾ, ཏཾ པན པཱརིཝཱསིཀེན པཱཔིཏསྶ ཨཏྟནཱ སམྤཊིཙྪིཏསྶེཝ པུནདིཝསཱདིཨཏྠཱཡ ཝིསྶཛྫནཾ ཀཱཏབྦཾ. ཨསམྤཊིཙྪིཏྭཱ ཙེ ཝིསྶཛྫེཏི, ན ལབྷཏཱིཏི ¶ ཝུཏྟཾ. ཡདི པན ན གཎྷཱཏི ན ཝིསྶཛྫེཏཱིཏི ཡདི པུརིམདིཝསེ ཨཏྟནོ ན གཎྷཱཏི, གཧེཏྭཱ ཙ ན ཝིསྶཛྫེཏི.

ཙཏུསྶཱལབྷཏྟནྟི བྷོཛནསཱལཱཡ པཊིཔཱཊིཡཱ དཱིཡམཱནཾ བྷཏྟཾ. ཧཏྠཔཱསེ ཋིཏེནཱཏི དཱཡཀསྶ ཧཏྠཔཱསེ ཋིཏེན, པཊིགྒཧཎརུཧནཊྛཱནེཏི ཨདྷིཔྤཱཡོ. མཧཱཔེལ༹བྷཏྟེཔཱིཏི མཧནྟེསུ བྷཏྟཔཙྪིཨཱདིབྷཱཛནེསུ ཋཔེཏྭཱ དཱིཡམཱནབྷཏྟེསུཔི. ཨིཏོ པརམྤི པཱརིཝཱསིཀཝཏྟཾ པཱལི༹ཡཾ (ཙཱུལ༹ཝ. ༧༥) ཨཱགཏནཡེནེཝ ཝེདིཏབྦཾ. ཏཏྠ པན ཨཊྛཀཐཱཡཾ ཨཱགཏནཡེནེཝ ཨཏྠོ སུཝིཉྙེཡྻོ ཧོཏི, ཏསྨཱ དུབྦིཉྙེཡྻཊྛཱནེཡེཝ ཀཐཡིསྶཱམ.

‘‘ན སཱམཎེརོ ཨུཔཊྛཱཔེཏབྦོ’’ཏི ཨེཏྠ དུབྦིདྷཾ སཱམཎེརཾ དསྶེཏུཾ ‘‘ཨཉྙོ’’ཏིཨཱདིམཱཧ. ‘‘ན བྷིཀྑུནིཡོ ཨོཝདིཏབྦཱ’’ཏི ཨེཏྠ ལདྡྷསམྨུཏིཀེན ཨཱཎཏྟོཔི གརུདྷམྨེཧི ཨཉྙེཧི ཝཱ ཨོཝདིཏུཾ ན ལབྷཏཱིཏི ཨཱཧ ‘‘པཊིབལསྶ ཝཱ བྷིཀྑུསྶ བྷཱརོ ཀཱཏབྦོ’’ཏི. ཨཱགཏཱ བྷིཀྑུནིཡོ ཝཏྟབྦཱཏི སམྦནྡྷོ. སཝཙནཱིཡནྟི སདོསཾ. ཛེཊྛཀཊྛཱནཾ ན ཀཱཏབྦནྟི པདྷཱནཊྛཱནཾ ན ཀཱཏབྦཾ. ཀིཾ ཏནྟི ཨཱཧ ‘‘པཱཏིམོཀྑུདྡེསཀེནཱ’’ཏིཨཱདི.

རཛེཧི ཧཏཱ ཨུཔཧཏཱ བྷཱུམི ཨེཏིསྶཱཏི རཛོཧཏབྷཱུམི, རཛོཀིཎྞབྷཱུམཱིཏི ཨཏྠོ. པཙྩཡནྟི ཝསྶཱཝཱསིཀལཱབྷཾ སནྡྷཱཡ ཝུཏྟཾ. ཨེཀཔསྶེ ཋཏྭཱཏི པཱལི༹ཾ ཝིཧཱཡ བྷིཀྑཱུནཾ པཙྪཏོ ཋཏྭཱ. སེནཱསནཾ ན ལབྷཏཱིཏི སེཡྻཔརིཡནྟབྷཱགིཏཱཡ ཝསྶགྒེན གཎྷིཏུཾ ན ལབྷཏི. ཨསྶཱཏི བྷཝེཡྻ. ‘‘ཨཱགནྟུཀེན ཨཱརོཙེཏབྦཾ, ཨཱགནྟུཀསྶ ཨཱརོཙེཏབྦ’’ནྟི ཨཝིསེསེན ཝུཏྟཏྟཱ སཙེ དྭེ པཱརིཝཱསིཀཱ གཏཊྛཱནེ ཨཉྙམཉྙཾ པསྶནྟི, ཨུབྷོཧིཔི ཨཉྙམཉྙསྶ ཨཱརོཙེཏབྦཾ. ཡཐཱ བཧི དིསྭཱ ཨཱརོཙིཏསྶ བྷིཀྑུནོ ¶ ཝིཧཱརཾ ཨཱགཏེན པུན ཨཱརོཙནཀིཙྩཾ ནཏྠི, ཨེཝཾ ཨཉྙཝིཧཱརཾ གཏེནཔི ཏཏྠ པུབྦེ ཨཱརོཙིཏསྶ པུན ཨཱརོཙནཀིཙྩཾ ནཏྠཱིཏི ཝདནྟི. ཨཝིསེསེནཱཏི པཱརིཝཱསིཀསྶ ཙ ཨུཀྑིཏྟཀསྶ ཙ ཨཝིསེསེན.

ཨོབདྡྷནྟི པལིབུདྡྷཾ. སཧཝཱསོཏི ཝུཏྟཔྤཀཱརེ ཚནྣེ བྷིཀྑུནཱ སདྡྷིཾ སཡནམེཝ ཨདྷིཔྤེཏཾ, ན སེསཨིརིཡཱཔཐཀཔྤནཾ. སེསམེཏྠ སུཝིཉྙེཡྻམེཝ.

པཱཔིཊྛཏརཱཏི ¶ པཱརཱཛིཀཱཔཏྟཱིཏི ཨུཀྐཾསཝསེན ཝུཏྟཾ. སཉྩརིཏྟཱདིཔཎྞཏྟིཝཛྫཏོ པན སུཀྐཝིསྶཊྛཱདིཀཱ ལོཀཝཛྫཱཝ. ཏཏྠཔི སངྒྷབྷེདཱདིཀཱ པཱཔིཊྛཏརཱ ཨེཝ. ཀམྨནྟི པཱརིཝཱསིཀཀམྨཝཱཙཱཏི ཨེཏེན ‘‘ཀམྨབྷཱུཏཱ ཝཱཙཱ ཀམྨཝཱཙཱ’’ཏི ཀམྨཝཱཙཱསདྡསྶ ཨཏྠོཔི སིདྡྷོཏི ཝེདིཏབྦོ. སཝཙནཱིཡནྟི ཨེཏྠ ས-སདྡོ ‘‘སནྟི’’ཨཏྠཾ ཝདཏི, ཨཏྟནོ ཝཙནེན ཨཏྟནོ པཝཏྟནཀམྨནྟི ཨེཝམེཏྠ ཨཏྠོ དཊྛབྦོ, ‘‘མཱ པཀྐམཱཧཱི’’ཏི ཝཱ ‘‘ཨེཧི ཝིནཡདྷརཱནཾ སམྨུཁཱིབྷཱཝ’’ནྟི ཝཱ ཨེཝཾ ཨཏྟནོ ཨཱཎཱཡ པཝཏྟནཀཀམྨཾ ན ཀཱཏབྦནྟི ཨདྷིཔྤཱཡོ. ཨེཝཉྷི ཀེནཙི སཝཙནཱིཡེ ཀཏེ ཨནཱདརེན ཨཏིཀྐམིཏུཾ ན ཝཊྚཏི, བུདྡྷསྶ སངྒྷསྶ ཨཱཎཱ ཨཏིཀྐནྟཱ ནཱམ ཧོཏི. རཛོཧཏབྷཱུམཱིཏི པཎྞསཱལཱཝིསེསནཾ. པཙྩཡནྟི ཝསྶཱཝཱསིཀཙཱིཝརཾ. སེནཱསནཾ ན ལབྷཏཱིཏི ཝསྶགྒེན ན ལབྷཏི. ཨཔཎྞཀཔཊིཔདཱཏི ཨཝིརདྡྷཔཊིཔདཱ. སཙེ ཝཱཡམནྟོཔཱིཏི ཨེཏྠ ཨཝིསཡབྷཱཝཾ ཉཏྭཱ ཨཝཱཡམནྟོཔི སངྒཡ྄ཧཏི. ཨཝིསེསེནཱཏི པཱརིཝཱསིཀུཀྑིཏྟཀཱནཾ སཱམཉྙེན. པཉྩཝཎྞཚདནབནྡྷནཊྛཱནེསཱུཏི པཉྩཔྤཀཱརཚདནེཧི ཚནྣཊྛཱནེསུ. ཨོབདྡྷནྟི ཨུཊྛཱནཱདིབྱཱཔཱརཔཊིབདྡྷཾ, པཱིལི༹ཏནྟི ཨཏྠོ. མཉྩེ ཝཱ པཱིཋེ ཝཱཏི ཨེཏྠ ཝཱསདྡོ སམུཙྩཡཏྠོ. ཏེན ཏཊྚིཀཱཙམྨཁཎྜཱདཱིསུ དཱིགྷཱསནེསུཔི ནིསཱིདིཏུཾ ན ཝཊྚཏཱིཏི དཱིཔིཏཾ ཧོཏི. ན ཝཏྟབྷེདདུཀྐཊནྟི ཝུཌྜྷཏརསྶ ¶ ཛཱནནྟསྶཔི ཝཏྟབྷེདེ དུཀྐཊཾ ནཏྠཱིཏི དསྶེཏི. ཝཏྟཾ ནིཀྑིཔཱཔེཏྭཱཏི ཨིདམྤི པརིཝཱསཱདིམེཝ སནྡྷཱཡ ཝུཏྟཾ, ན སེསཀམྨཱནི.

‘‘སེནཱསནཾ ན ལབྷཏི སེཡྻཔརིཡནྟབྷཱགིཏཱཡ. ཨུདྡེསཱདཱིནི དཱཏུམྤི ན ལབྷཏཱིཏི ཝདནྟི. ‘ཏདཧུཔསམྤནྣེཔི པཀཏཏྟེ’ཏི ཝཙནཏོ ཨནུཔསམྤནྣེཧི ཝསིཏུཾ ཝཊྚཏི. སམཝསྶཱཏི ཨེཏེན ཨཔཙྪཱ ཨཔུརིམཾ ནིཔཛྫནེ དྭིནྣམྤི ཝཏྟབྷེདཱཔཏྟིབྷཱཝཾ དཱིཔེཏི. ཨཏྟནོ ཨཏྟནོ ནཝཀཏརནྟི པཱརིཝཱསིཀཱདིནཝཀཏརཾ. པཋམཾ སངྒྷམཛ྄ཛྷེ པརིཝཱསཾ གཧེཏྭཱ ནིཀྑིཏྟཝཏྟེན པུན ཨེཀསྶཔི སནྟིཀེ སམཱདིཡིཏུཾ ནིཀྑིཔིཏུཉྩ ཝཊྚཏི, མཱནཏྟེ པན ནིཀྑིཔིཏུཾ ཝཊྚཏི. ཨཱུནེགཎེཙརཎདོསཏྟཱ ན གཧེཏུནྟི ཨེཀེ. པཋམཾ ཨཱདིནྣཝཏྟཾ ཨེཀསྶ སནྟིཀེ ཡཐཱ ནིཀྑིཔིཏུཾ ཝཊྚཏི, ཏཐཱ སམཱདིཡིཏུམྤི ཝཊྚཏཱིཏི པོརཱཎགཎྛིཔདེ’’ཏི ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༧༦) ཝུཏྟནྟི.

ཨིདཾ ཨེཏྠ ཡཾ ཝཏྟཾ ‘‘ཙཏུནཝུཏིཔཱརིཝཱསིཀཝཏྟ’’ནྟི པཱརིཝཱསིཀཀྑནྡྷཀཔཱལི༹ཡཾ (ཙཱུལ༹ཝ. ༧༥) ཨཱགཏཾ, སམནྟཔཱསཱདིཀཱཡམྤི ཨེཏྟཀཱཡ པཱལི༹ཡཱ (ཙཱུལ༹ཝ. ཨཊྛ. ༧༥-༨༤) ཝཎྞནཾ ཝཏྭཱ ‘‘པཱརིཝཱསིཀཝཏྟཀཐཱ ནིཊྛིཏཱ’’ཏི ཨཱཧ. ཨིམསྨིཾ ཝིནཡསངྒཧཔཀརཎེ ¶ (ཝི. སངྒ. ཨཊྛ. ༢༤༨) པན ‘‘ན ཚམཱཡཾ ཙངྐམནྟེ ཙངྐམེ ཙངྐམིཏབྦ’’ནྟི ཨིམསྶཱནནྟརཾ ‘‘པཱརིཝཱསིཀཙཏུཏྠོ ཙེ, བྷིཀྑཝེ’’ཏིཨཱདཱིནི ཨགྒཧེཏྭཱ ‘‘ན, བྷིཀྑཝེ, པཱརིཝཱསིཀེན བྷིཀྑུནཱ སཱདིཏབྦ’’ནྟིཨཱདཱིནི པཋམཾ པཉྙཏྟཔདཱནི གཧེཏྭཱ ཏེསཾ པདཱནཾ སཾཝཎྞནཾ ཀཏྭཱ ‘‘ཨིདཾ པཱརིཝཱསིཀཝཏྟ’’ནྟི ཨཉྙཐཱ ཨནུཀྐམོ ཝུཏྟོ, སོ པཱལི༹ཡཱ ཙ ཨཊྛཀཐཱཡ ཙ ན སམེཏི. ཨཱཙརིཡསྶ པན ཨཡམདྷིཔྤཱཡོ སིཡཱ – ‘‘པཱརིཝཱསིཀཙཏུཏྠོ ཙེ, བྷིཀྑཝེ’’ཏིཨཱདཱིནི པཱརིཝཱསིཀབྷིཀྑཱུནཾ སམཱདིཡིཏབྦཱནི ན ཧོནྟི ¶ , ཨཐ ཁོ ཀམྨཀཱརཀཱནཾ བྷིཀྑཱུནཾ ཀཏྟབྦཱཀཏྟབྦཀམྨདསྶནམེཏཾ, ཏསྨཱ པཱརིཝཱསིཀཝཏྟེ ན པཝེསེཏབྦཾ. ‘‘ན, བྷིཀྑཝེ, པཱརིཝཱསིཀེན བྷིཀྑུནཱ སཱདིཏབྦ’’ནྟིཨཱདཱིནི པན པཱརིཝཱསིཀབྷིཀྑཱུནཾ སམྨཱཝཏྟིཏབྦཝཏྟཱནིཡེཝ ཧོནྟི, ཏསྨཱ ཨིམཱནིཡེཝ པཱརིཝཱསིཀཝཏྟེ པཝེསེཏབྦཱནཱིཏི. ཨམྷེཧི པན པཱལི༹ཨཊྛཀཐཱཊཱིཀཱསུ ཨཱགཏཱནུཀྐམེན པཋམཾ པཉྙཏྟཝཏྟཱནཾ ཨཏྠཾ པཋམཾ དསྶེཏྭཱ པཙྪཱ པཉྙཏྟཔདཱནཾ ཨཏྠོ པཙྪཱ ཝུཏྟོཏི དཊྛབྦོ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

གརུཀཱཔཏྟིཝུཊྛཱནཝིནིཙྪཡཀཐཱལངྐཱརོ ནཱམ

དྭཏྟིཾསཏིམོ པརིཙྪེདོ.

༣༣. ཀམྨཱཀམྨཝིནིཙྪཡཀཐཱ

༢༤༩. ཨེཝཾ གརུཀཱཔཏྟིཝུཊྛཱནཝིནིཙྪཡཀཐཾ ཀཐེཏྭཱ ཨིདཱནི ཀམྨཱཀམྨཝིནིཙྪཡཀཐཾ ཀཐེཏུཾ ‘‘ཀམྨཱཀམྨནྟི ཨེཏྠ པནཱ’’ཏིཨཱདིམཱཧ. ཏཏྠ སམགྒེན སངྒྷེན ཀརཱིཡཏེ ཏནྟི ཀམྨཾ, ཨཔལོཀནཱདིཙཏུབྦིདྷཝིནཡཀམྨཾ. ཨིཏརསྨིམྤི ཨེསེཝ ནཡོ. ཨ-ཀཱརོ ཝུདྡྷིཨཏྠོ, ན ཝུདྡྷིཔྤཏྟཾ ཀམྨཾ ཨཀམྨཾ. ཀམྨཉྩ ཨཀམྨཉྩ ཀམྨཱཀམྨཾ ཝཛྫཱཝཛྫཾ ཝིཡ, ཕལཱཕལཾ ཝིཡ ཙ. ཏཏྠ ཙ ཀམྨནྟི ཨཔལོཀནཀམྨཉཏྟིཀམྨདྭཡཾ. ཨཀམྨནྟི ཉཏྟིདུཏིཡཀམྨཉཏྟིཙཏཨུཏྠཀམྨདྭཡཾ. ཨཐ ཝཱ ཀམྨནྟི ཙཏཱུསུཔི ཨེཏེསུ ལཧུཀཀམྨཾ. ཨཀམྨནྟི གརུཀཀམྨཾ. ཀམྨཱཀམྨནྟི ཨེཏྠ པན ཝིནིཙྪཡོ ཨེཝཾ ཝེདིཏབྦོཏི ཡོཛནཱ. ཏཏྠ པནཱཏི པཀྑནྟརཏྠེ ནིཔཱཏོ ¶ , གརུཀཱཔཏྟིཝུཊྛཱནཝིནིཙྪཡཀཐཱཔཀྑཏོ ཨཉྙོ ཀམྨཱཀམྨཝིནིཙྪཡཀཐཱཔཀྑོ ཝེདིཏབྦོཏི ཝཱ མཡཱ ཝུཙྩཏེཏི ཝཱ ཨཏྠོ.

ཙཏྟཱརི ¶ ཀམྨཱནཱིཏི ཨེཏྠ ཙཏྟཱརཱིཏི པརིཙྪེདནིདསྶནཾ. ཏེན ཝིནཡཀམྨཱནི ནཱམ ཙཏྟཱརི ཨེཝ ཧོནྟི, ན ཨིཏོ ཨཱུནཱདྷིཀཱནཱིཏི དསྶེཏི. ཀམྨཱནཱིཏི པརིཙྪིནྣཀམྨནིདསྶནཾ. ཨཔལོཀནཀམྨནྟིཨཱདཱིནི པརིཙྪིནྣཀམྨཱནཾ ཨུདྡེསཀཐནཾ. ཏཏྠ ཨཔལོཀཱིཡཏེ ཨཱཡཱཙཱིཡཏེ ཨཔལོཀནཾ, ཨཔཔུབྦལོཀདྷཱཏུ ཨཱཡཱཙནཏྠེ, ཡུཔཙྩཡོ བྷཱཝཏྠཝཱཙཀོ. ཨཔལོཀནཝསེན ཀཏྟབྦཾ ཀམྨཾ ཨཔལོཀནཀམྨཾ, སཱིམཊྛཀསངྒྷཾ ཨཔལོཀེཏྭཱ སངྒྷཱནུམཏིཡཱ ཀཏྟབྦཾ ཀམྨཾ. ཉཱཔནཱ ཉཏྟི, སངྒྷསྶ ཛཱནཱཔནཱཏི ཨཏྠོ. ཉཏྟིཡཱ ཀཏྟབྦཾ ཀམྨཾ ཉཏྟིཀམྨཾ, ཨནུསྶཱཝནཾ ཨཀཏྭཱ སུདྡྷཉཏྟིཡཱཡེཝ ཀཏྟབྦཀམྨཾ. དྭིནྣཾ པཱུརཎཱི དུཏིཡཱ, ཉཏྟི དུཏིཡཱ ཨེཏསྶ ཀམྨསྶཱཏི ཉཏྟིདུཏིཡཾ, ཉཏྟིདུཏིཡཉྩ ཏཾ ཀམྨཉྩཱཏི ཉཏྟིདུཏིཡཀམྨཾ, ཨེཀཱཡ ཉཏྟིཡཱ ཨེཀཱཡ ཨནུསྶཱཝནཱཡ ཀཏྟབྦཀམྨཾ. ཙཏུནྣཾ པཱུརཎཱི ཙཏུཏྠཱི, ཉཏྟི ཙཏུཏྠཱི ཨེཏསྶ ཀམྨསྶཱཏི ཉཏྟིཙཏུཏྠཾ, ཉཏྟིཙཏུཏྠཉྩ ཏཾ ཀམྨཉྩཱཏི ཉཏྟིཙཏུཏྠཀམྨཾ, ཨེཀཱཡ ཉཏྟིཡཱ ཏཱིཧི ཨནུསྶཱཝནཱཧི ཀཏྟབྦཀམྨཾ. ཏེན ཝཀྑཏི ‘‘ཨཔལོཀནཀམྨཾ ནཱམ སཱིམཊྛཀསངྒྷཾ སོདྷེཏྭཱ’’ཏིཨཱདི.

ཨེཝཾ ཙཏྟཱརི ཀམྨཱནི ཨུདྡིསིཏྭཱ པརིཝཱརེ (པརི. ༤༨༢ ཨཱདཡོ) ཀམྨཝགྒེ ཨཱགཏནཡེནེཝ ཏེསཾ ཙཏུནྣཾ ཀམྨཱནཾ ཝིཔཏྟིཀཱརཎཱནི པུཙྪིཏྭཱ ཝིསྶཛྫེཏུཾ ‘‘ཨིམཱནི ཙཏྟཱརི ཀམྨཱནི ཀཏིཧཱཀཱརེཧི ཝིཔཛྫནྟི? པཉྩཧཱཀཱརེཧི ཝིཔཛྫནྟཱི’’ཏིཨཱདིམཱཧ. ཏཏྠ ཝཏྠུཏོཏི ཝིནཡཀམྨསྶ ཀཱརཎབྷཱུཏཝཏྠུཏོ. ཉཏྟིཏོ ཨནུསྶཱཝནཏོཏི དྭེཔི ཀམྨཝཱཙཱཡམེཝ. སཱིམཏོཏི ཀམྨཀརཎཊྛཱནབྷཱུཏབདྡྷསཱིམཏོ. པརིསཏོཏི ཀམྨཔྤཏྟཚནྡཱརཧབྷཱུཏཀཱརཀསངྒྷཏོ. ཏཱནིཡེཝ ཧི པཉྩ སབྦེསཾ ཝིནཡཀམྨཱནཾ ཝིཔཏྟིཀཱརཎཱནི ཧོནྟི.

ཏཏོ ¶ ཏཾ ཀམྨཝིཔཏྟིཀཱརཎབྷཱུཏཾ ཝཏྠུཾ པཱལི༹ནཡེན ཝིཏྠཱརེཏུཾ ‘‘སམྨུཁཱཀརཎཱིཡཾ ཀམྨཾ ཨསམྨུཁཱ ཀརོཏི, ཝཏྠུཝིཔནྣཾ ཨདྷམྨཀམྨ’’ནྟྱཱདིམཱཧ. ཏཏྠ སམྨུཁཱཀརཎཱིཡཾ པཊིཔུཙྪཱཀརཎཱིཡཾ པཊིཉྙཱཡཀརཎཱིཡནྟི ཨིམེསཾ ཏིཎྞཾ ཨཏཐཱཀརཎེན, སཏིཝིནཡོ ཨམཱུལ༹ྷཝིནཡོ ཏསྶཔཱཔིཡསིཀཱ ཏཛྫནཱིཡཀམྨཾ ནིཡསཀམྨཾ པབྦཱཛནཱིཡཀམྨཾ པཊིསཱརཎཱིཡཀམྨཾ ཨུཀྑེཔནཱིཡཀམྨཾ པརིཝཱསོ མཱུལཱཡཔཊིཀསྶནཱ མཱནཏྟཾ ཨབྦྷཱནཾ ཨུཔསམྤདནྟི ¶ ཨིམེསཾ ཏེརསཀམྨཱནཾ ཨཉྙཀམྨཱརཧསྶ ཨཉྙཀམྨཀརཎེན, ཨུཔོསཐོ པཝཱརཎཱཏི ཨིམེསཾ དྭིནྣཾ ཨདིཝསེ ཀརཎེན, པཎྜཀོ ཐེཡྻསཾཝཱསཀོ ཏིཏྠིཡཔཀྐནྟཀོ ཏིརཙྪཱནགཏོ མཱཏུགྷཱཏཀོ པིཏུགྷཱཏཀོ ཨརཧནྟགྷཱཏཀོ ལོཧིཏུཔྤཱདཀོ སངྒྷབྷེདཀོ བྷིཀྑུནིདཱུསཀོ ཨུབྷཏོབྱཉྫནཀོ ཨཱུནཝཱིསཏིཝསྶོ ཨནྟིམཝཏྠུཨཛ྄ཛྷཱཔནྣཔུབྦོཏི ཨིམེསཾ ཏེརསནྣཾ པུགྒལཱནཾ ཨུཔསམྤདཱཀམྨཀརཎེན ཨིཏི ཨིམཱནི ཨེཀཏིཾས ཀམྨཱནི ཝཏྠུཝིཔནྣཾ ཨདྷམྨཀམྨཾ ཧོཏི. ཉཏྟིཏོ པཉྩ, ཨནུསྶཱཝནཏོ པཉྩཱཏི ཨིམཱནི དས ཀཱརཎཱནི ཨནྟོཀམྨཝཱཙཱཡམེཝ ལབྷནྟི, སཱིམཏོ ཨེཀཱདས ཀཱརཎཱནི སཱིམཱསམྨུཏིཝསེན ལབྷནྟི, པརིསཏོ དྭཱདས ཀཱརཎཱནི ཙཏུཝགྒཔཉྩཝགྒདསཝགྒཝཱིསཏིཝགྒསངྑཱཏེསུ ཙཏཱུསུ སངྒྷེསུ ཨེཀེཀསྨིཾ ཀམྨཔཏྟཚནྡཱརཧསམྨུཁཱིབྷཱུཏསངྑཱཏཱནཾ ཏིཎྞཾ ཏིཎྞཾ སངྒྷཱནཾ ཝསེན ལབྷནྟཱིཏི.

ཨེཝཾ ཀམྨཝིཔཏྟིཀཱརཎཱནི དསྶེཏྭཱ པུན ཙཏུཝགྒསངྒྷཱདཱིསུ སནྣིསིནྣཱནཾ བྷིཀྑཱུནཾ ཝིསེསནཱམཾ དསྶེཏུཾ ‘‘ཙཏུཝགྒཀརཎེ ཀམྨེ’’ཏིཨཱདིམཱཧ. ཏཾ སུཝིཉྙེཡྻམེཝ.

༢༥༠. ཏཏོ པརཾ ཙཏུནྣཾ ཀམྨཱནཾ ཋཱནཾ སངྑེཔཏོ དསྶེཏུཾ ‘‘ཨཔལོཀནཀམྨཾ ཀཏི ཋཱནཱནི གཙྪཏཱི’’ཏིཨཱདིམཱཧ. ཏམྤི སུཝིཉྙེཡྻམེཝ.

༢༥༡. ཏཏོ ¶ ཏཱནིཡེཝ ཀམྨཱནི ཏེསུ ཋཱནེསུ པཝཏྟཱནི ཝིཏྠཱརཏོ པཀཱསེཏུཀཱམོ ‘‘ཨཡཾ ཏཱཝ པཱལི༹ནཡོ. ཨཡཾ པནེཏྠ ཨཱདིཏོ པཊྛཱཡ ཝིནིཙྪཡཀཐཱ’’ཏིཨཱདིམཱཧ. ཏཏྠ ཏསྶཾ ཝིནིཙྪཡཀཐཱཡཾ ཙཏཱུསུ ཀམྨེསུ ཀཏམཾ ཨཔལོཀནཀམྨཾ ནཱམཱཏི པུཙྪཱཡཾ ཏཾ དསྶེཏུམཱཧ ‘‘ཨཔལོཀནཀམྨཾ ནཱམཱ’’ཏིཨཱདི. ཏཏྠ སཱིམཊྛཀསངྒྷཾ སོདྷེཏྭཱཏི ཨཝིཔྤཝཱསསངྑཱཏམཧཱསཱིམཊྛཀཾ སངྒྷཾ སོདྷེཏྭཱ. ན ཧི ཁཎྜསཱིམཱཡ སནྣིཔཏིཏེ སངྒྷེ སོདྷེཏབྦཀིཙྩཾ ཨཏྠི, ཨཝིཔྤཝཱསསཱིམཱསངྑཱཏཱཡ མཧཱསཱིམཱཡ པན ཝིཏྠཱརཏྟཱ བཧཱུནཾ བྷིཀྑཱུནཾ ཝསནཊྛཱནཏྟཱ སམགྒབྷཱཝཏྠཾ སོདྷེཏབྦཾ ཧོཏི. ཚནྡཱརཧཱནཾ ཚནྡཾ ཨཱཧརིཏྭཱཏི ཏིསྶཾ སཱིམཱཡཾ ཙཏུཝགྒཱདིགཎཾ པཱུརེཏྭཱ ཧཏྠཔཱསཾ ཨཝིཛཧིཏྭཱ ཋིཏེཧི བྷིཀྑཱུཧི ཨཉྙེསཾ ཧཏྠཔཱསཾ ཨནཱགཏཱནཾ པཀཏཏྟབྷིཀྑཱུནཾ ཚནྡཾ ཨཱཧརིཏྭཱ. ཝུཏྟཉྷི ‘‘ཙཏུཝགྒཀརཎེ ཀམྨེ ཙཏྟཱརོ བྷིཀྑཱུ པཀཏཏྟཱ ཀམྨཔྤཏྟཱ, ཨཝསེསཱ པཀཏཏྟཱ ཚནྡཱརཧཱ’’ཏི (པརི. ༤༩༧). སམགྒསྶ སངྒྷསྶ ཨནུམཏིཡཱཏི ཚནྡསྶ ཨཱཧརིཏཏྟཱ ཧཏྠཔཱསཾ ཨཱགཏཱཔི ཨནཱགཏཱཔི སབྦེ བྷིཀྑཱུ སམགྒཱཡེཝ ཧོནྟི, ཏསྨཱ སམགྒསྶ སངྒྷསྶ ཨནུམཏིཡཱ. ཏིཀྑཏྟུཾ སཱཝེཏྭཱཏི ‘‘སུཎཱཏུ མེ, བྷནྟེ, སངྒྷོ’’ཏིཨཱདིནཱ ཀམྨཝཱཙཾ ཨབྷཎིཏྭཱ ¶ ‘‘རུཙྩཏི སངྒྷསྶ. དུཏིཡམྤི…པེ… ཏཏིཡམྤི རུཙྩཏི སངྒྷསྶཱ’’ཏི ཏིཀྑཏྟུཾ སཱཝེཏྭཱ ཀཏྟབྦཀམྨཾ ཨཔལོཀནཀམྨཾ ནཱམཱཏི ཡོཛནཱ. ཝུཏྟནཡེནེཝཱཏི ཨཔལོཀནཀམྨེ ཝུཏྟནཡེནེཝ. ཨིམིནཱ ‘‘སཱིམཊྛཀསངྒྷཾ སོདྷེཏྭཱ, ཚནྡཱརཧཱནཾ ཚནྡཾ ཨཱཧརིཏྭཱ’’ཏི ཨིདཾ དྭཡཾ ཨཏིདིསཏི. ཨིཏརེསུཔི ཨེསེཝ ནཡོ.

ཏཏྠ ¶ ཏེསུ ཙཏཱུསུ ཀམྨེསུ ཀིཾ ཨཉྙཀམྨཾ ཨིཏརཀམྨཝསེན ཀཱཏབྦནྟི ཙོདནཾ སནྡྷཱཡཱཧ ‘‘ཏཏྲ’’ཨིཙྩཱདི. ཨེཝཾ ཧོཏུ, ཨེཝཾ སནྟེ ཨཝིསེསེན སབྦམྤི ཀམྨཾ ཨཉྙཝསེན ཀཏྟབྦནྟི ཨཱཧ ‘‘ཉཏྟིདུཏིཡཀམྨཾ པནཱ’’ཏིཨཱདི. ཏཏྠ པན-སདྡོ ཝིསེསཏྠཛོཏཀོ, ཉཏྟིདུཏིཡཀམྨེ པན ཝིསེསོ ཨཏྠཱིཏི ཨཏྠོ. ཨིཏོ པརཱནི སུཝིཉྙེཡྻཱནེཝ. པཊིཀྑིཏྟམེཝ ཨཊྛཀཐཱཡནྟི ཨཛ྄ཛྷཱཧཱརསམྦནྡྷོ. ཡདི ཨེཝཾ ཨཀྑརཔརིཧཱིནཱདཱིསུ སནྟེསུ ཀམྨཀོཔོ སིཡཱཏི ཙོདནཾ མནསི ཀཏྭཱ ཨཱཧ ‘‘སཙེ པནཱ’’ཏིཨཱདི. ཏཏྠ ཨཀྑརཔརིཧཱིནནྟི ‘‘སུཎཱཏུ མེ’’ཏིཨཱདཱིསུ སུ-ཀཱར ཎཱ-ཀཱར ཏུ-ཀཱརཱདཱིནཾ བྷསྶནཾ. པདཔརིཧཱིནནྟི སུཎཱཏཱུཏིཨཱདཱིནཾ ཝིབྷཏྱནྟཔདཱནཾ བྷསྶནཾ. དུརུཏྟཔདཾ པན ཨུཔརི ཝཀྑཏི.

ཨིདཱནི པུནཔྤུནཝཙནེ པཡོཛནཾ དསྶེནྟོ ‘‘ཨིདཾ ཨཀུཔྤཀམྨེ དལ༹ྷིཀམྨཾ ཧོཏི, ཀུཔྤཀམྨེ ཀམྨཾ ཧུཏྭཱ ཏིཊྛཏཱི’’ཏི ཨཱཧ. ཏཏྠ ཨིདནྟི ཨིདཾ པུནཔྤུནཾ ཝུཏྟཀམྨཾ. ཨཀུཔྤཀམྨེཏི ཨཀུཔྤེ ཋཱནཱརཧེ པུརེཀཏཀམྨེ. དལ༹ྷིཀམྨཾ ཧོཏཱིཏི ཐིརཏརཀམྨཾ ཧོཏི ཨེཀཱཡ རཛྫུཡཱ བནྡྷིཏབྦབྷཱརེ དུཏིཡཏཏིཡཱདིརཛྫཱུཧི བནྡྷནཾ ཝིཡ. ཀུཔྤཀམྨེཏི ཨཀྑརཔརིཧཱིནཱདིཝསེན ཀུཔྤེ ཨཊྛཱནཱརཧེ པུརེཀཏཀམྨེ. ཀམྨཾ ཧུཏྭཱ ཏིཊྛཏཱིཏི པུནཔྤུནཾ ཝུཏྟེ སཏི ཏེསཾ ཨཀྑརཔརིཧཱིནཱདཱིནཾ སོདྷིཏཏྟཱ པརིསུདྡྷཀམྨཾ ཧུཏྭཱ ཏིཊྛཏི. ཨཀུཔྤཀམྨེ ཀུཔྤཀམྨེཏི ཝཱ བྷཱཝེནབྷཱཝལཀྑཎཏྠེ བྷུམྨཝཙནཾ. པུརེཏརཾ ཀཏཀམྨསྨིཾ ཨཀུཔྤཀམྨེ སཏི པཙྪཱ ཨིདཾ པུནཔྤུནཾ ཝུཏྟཀམྨཾ དལ༹ྷིཀམྨཾ ཧོཏི, པུརེཀཏཀམྨསྨིཾ ཀུཔྤཀམྨེ སཏི ཨིདཾ པུནཔྤུནཾ ཝུཏྟཀམྨཾ ཨཀུཔྤཾ ཋཱནཱརཧཾ པརིསུདྡྷཀམྨཾ ཧུཏྭཱ ཏིཊྛཏཱིཏི. ཨིམཾ པཱཋཾ ནིསྶཱཡ ཨཱཙརིཡཝརཱ ཨེཀཔུགྒལམྤི ཨནེཀཀྑཏྟུཾ ཨུཔསམྤདཀམྨཾ ཀརོནྟི. ཀསྨཱ པན ཏེ བྷིཀྑཱུ ལཛྫཱིཔེསལབཧུསྶུཏསིཀྑཱཀཱམབྷཱུཏཱནཾ ཨཏྟནོ ¶ ཨཱཙརིཡུཔཛ྄ཛྷཱཡཱནཾ སནྟིཀེ སིཀྑཾ གཎྷནྟཱིཏི? ན ཏེ ཨཏྟནོ ཨཱཙརིཡུཔཛ྄ཛྷཱཡཱནཾ སནྟིཀཱ ལདྡྷསིཀྑཾ པཙྩཀྑཱཡ ཨཉྙཾ གཎྷནྟི, ཨཐ ཁོ ཏཱཡ ཨེཝ སདྡྷིཾ དིགུཎཏིགུཎཾ ཀརོནྟི. ཨེཝཾ སནྟེཔི པུརིམསིཀྑཱཡ ཨསདྡཧནྟཱཡེཝ ཀརེཡྻུཾ, ནོ སདྡཧནྟཱཏི? ནོ ཨསདྡཧནྟཱ ¶ , སདྡཧནྟཱཔི ཏེ བྷིཀྑཱུ པུནཔྤུནཀརཎེ ཡུཏྟིཏོཔི ཨཱགམཏོཔི ཨཱདཱིནཝཾ ཨཔསྶནྟཱ ཨཱནིསཾསམེཝ པསྶནྟཱ ཀརོནྟཱིཏི.

ཀཐཾ ཡུཏྟིཏོ ཨཱནིསཾསཾ པསྶནྟི? ཡཐཱ ཧི ལོཀེ ཨབྷིསིཏྟམྤི རཱཛཱནཾ པུནཔྤུནཱབྷིསིཉྩནེ ཨཱདཱིནཝཾ ན པསྶནྟི, ཨཐ ཁོ ཨབྷིསེཀཱནུབྷཱཝེན རཱཛིདྡྷིཔྤཏྟཏཱདཱིཧི ཀཱརཎེཧི ཨཱནིསཾསམེཝ པསྶནྟི, ཡཐཱ ཙ སཱསནེ ཙེཏིཡཾ ཝཱ པཊིམཾ ཝཱ ནིཊྛིཏསབྦཀིཙྩཾ ‘‘ཨནེཀཛཱཏིསཾསཱར’’ནྟིཨཱདཱིཧི བྷགཝཏོ ཝཙནེཧི ཨབྷིསེཀམངྒལཾ ཀརོནྟཱཔི པུནཔྤུནཀརཎེ ཨཱདཱིནཝཾ ཨཔསྶནྟཱ ཨཏིརེཀཏརཾ མཧིདྡྷིཀཏཱམཧཱནུབྷཱཝཏཱདིཨཱནིསཾསམེཝ པསྶནྟཱ པུནཔྤུནཾ ཀརོནྟིཡེཝ, ཨེཝམེཝ ཀཏཨུཔསམྤདཀམྨཾ བྷིཀྑུཾ པུནདེཝ ཀམྨཝཱཙཱབྷཎནེ ཨཱདཱིནཝཾ ཨཔསྶནྟཱ པུབྦེ ཀཏཀམྨསྨིཾ ཝཏྠུཨཱདཱིསུ པཉྩསུ ཨངྒེསུ ཨེཀསྨིམྤི ཨངྒེ ཨཔརིཔུཎྞེ སཏི ཀམྨཀོཔསམྦྷཝཏོ ཨིདཱནི ཀཏཀམྨེན པརིཔུཎྞཨངྒེ སཏི ཀམྨསམྤཏྟིསམྦྷཝཉྩ པུབྦེཝ ཀམྨསམྤཏྟིསམྦྷཝེཔི དལ༹ྷིཀམྨཐིརཏརསམྦྷཝཉྩ ཨཱནིསཾསཾ པསྶནྟཱ ཀརོནྟི. ཀཐཾ ཨཱགམཏོ ཨཱནིསཾསཾ པསྶནྟི? ཡཐཱཝུཏྟཔརིཝཱརཊྛཀཐཱཔཱཋཝིནཡསངྒཧཔཱཋེསུ དུརུཏྟཔདསྶ སོདྷནཏྠཾ པུནཔྤུནཾ ཝཏྟབྦབྷཱཝསྶ ཨུཔལཀྑཎནཡེན ཝཙནཏོ. སེསཉཏྟིདོསཨནུསྶཱཝནདོསཱནཉྩ ཝཏྠུཝིཔཏྟིསཱིམཝིཔཏྟིཔརིསཝིཔཏྟིདོསཱནཉྩ སོདྷནཾ དསྶིཏཾ ཧོཏི. ཏེནེཝ ཙ ཀཱརཎེན ཨཡམྤི པཙྪིམཔཱཋོ ཨཱཙརིཡེན ཝུཏྟོ. ཏསྶཏྠོ ཧེཊྛཱ ¶ ཝུཏྟོཝ. ཨིཏི པུབྦེ ཀཏཀམྨསྶ ཀོཔསམྦྷཝེཔི ཨིདཱནི ཀཏཀམྨེན སམྤཛྫནསངྑཱཏཾ ཨཱནིསཾསཾ ཨཱགམཏོ པསྶནྟཱིཏི དཊྛབྦཾ.

ཀེཙི པན ཨཱཙརིཡཱ ཨིམཾ ‘‘པུནཔྤུནཾ ཝཏྟུཾ ཝཊྚཏཱིཏི པཱཋཾ ཏསྨིཾཡེཝ པཋམཀམྨཀརཎཀཱལེ དུརུཏྟསོདྷནཏྠཾ ཝཏྟབྦཏཾ སནྡྷཱཡ ཝུཏྟཾ, ན ཙིརཀཱལེ’’ཏི ཝདནྟི, ཏདེཏཾ ཝཙནཾ ནེཝ ཨཊྛཀཐཱཡཾ ཨཱགཏཾ, ན ཊཱིཀཱདཱིསུ ཝིནིཙྪིཏཾ, ཏེསཾ མཏིམཏྟམེཝ, ཏསྨཱ ན གཧེཏབྦཾ. ཨཔིཙ ཏསྨིཾ ཁཎེ པུནཔྤུནཾ ཝཙནཏོཔི ཨཔརབྷཱགེ ཝཙནཾ མཧཔྥལཾ ཧོཏི མཧཱནིསཾསཾ. ཏསྨིཉྷི ཀཱལེ པུནཔྤུནཾ བྷཎནེ ཉཏྟིདོསཨནུསྶཱཝནདོསཱནི པཙྪིམབྷཎནེ སུཊྛུ བྷཎནྟོ སོདྷེཏུཾ སཀྐུཎེཡྻ, ན ཝཏྠུཝིཔཏྟིསཱིམཝིཔཏྟིཔརིསཝིཔཏྟིདོསཱནི. ཏསྨིཉྷི ཁཎེ ཏམེཝ ཝཏྠུ, སཱ ཨེཝ སཱིམཱ, སཱ ཨེཝ པརིསཱ, ཏསྨཱ ཏཱནི པུནཔྤུནཝཙནེན སོདྷེཏུམསཀྐུཎེཡྻཱནི ཧོནྟི. ཨཔརབྷཱགེ ཀརོནྟོ པན པུབྦེ ཨཔརིཔུཎྞཝཱིསཏིཝསྶབྷཱཝེན ཝཏྠུཝིཔཏྟིབྷཱུཏེཔི ཨིདཱནི པརིཔུཎྞཝཱིསཏིཝསྶཏྟཱ ཝཏྠུསམྤཏྟི ཧོཏི, པུབྦེ སཱིམསངྐརཱདིབྷཱཝེན སཱིམཝིཔཏྟིསམྦྷཝེཔི ཨིདཱནི ཏདབྷཱཝཏྠཱཡ སུཊྛུ སོདྷིཏཏྟཱ སཱིམསམྤཏྟི ཧོཏི, པུབྦེ ཝགྒཀམྨཱདིཝསེན ¶ པརིསཝིཔཏྟིསམྦྷཝེཔི ཨིདཱནི ཏདབྷཱཝཏྠཱཡ སུཊྛུ སོདྷིཏཏྟཱ པརིསསམྤཏྟི ཧོཏི, ཨེཝཾ པཉྩ ཝིཔཏྟིཡོ སོདྷེཏྭཱ པཉྩ སམྤཏྟིཡོ སམྤཱདེཏྭཱ ཀཱཏུཾ སཀྐུཎེཡྻཏོ པཋམཀཱལེ པུནཔྤུནཾ བྷཎནཏོཔི ཨཔརབྷཱགེ བྷཎནཾ མཧཔྥལཾ ཧོཏི མཧཱནིསཾསནྟི ཝེདིཏབྦཾ.

ཡདི ཨེཝཾ ཨུཔསམྤདསིཀྑཱཡ དཧརོ བྷཝེཡྻཱཏི? ན བྷཝེཡྻ. ཀསྨཱ? པོརཱཎསིཀྑཾ ཨཔྤཙྩཀྑིཏྭཱ ཏཱཡ ཨེཝ པཏིཊྛིཏཏྟཱཏི. ཨེཝཾ སནྟེཔི པུརེཀཏཀམྨསྶ སམྤཛྫནབྷཱཝེན ¶ ཏིཊྛནྟེ སཏི ཏཱཡ ཋིཏཏྟཱ ཨདཧརོ སིཡཱ. པུརིམཀམྨསྶ ཨསམྤཛྫནབྷཱཝེན ཨིདཱནི ཀཏཀམྨེཡེཝ ཨུཔསམྤདབྷཱཝེན ཏིཊྛནྟེ སཏི ཀསྨཱ དཧརོ ན བྷཝེཡྻཱཏི? ཨེཝཾ སནྟེ དཧརོ བྷཝེཡྻ. ཨེཝཾ དཧརོ སམཱནོ པུརིམསིཀྑཱཡ ཝསྶཾ གཎེཏྭཱ ཡཐཱཝུཌྜྷཾ ཝནྡནཱདཱིནི སམྤཊིཙྪནྟོ མཧཱསཱཝཛྫོ བྷཝེཡྻཱཏི? ཨེཝཾ པུརིམསིཀྑཱཡ ཨཊྛིཏབྷཱཝཾ པཙྪིམསིཀྑཱཡ ཨེཝ ལདྡྷུཔསམྤདབྷཱཝཾ ཏཐཏོ ཛཱནནྟོ ཨེཝཾ ཀརོནྟོ སཱཝཛྫོ ཧོཏི, ཨེཝཾ པན ཨཛཱནནྟོ ‘‘པུརིམསིཀྑཱཡམེཝ ཋིཏོ’’ཏི མཉྙིཏྭཱ ཨེཝཾ ཀརོནྟོ ཨནཝཛྫོཏི ཝེདིཏབྦོ. ཀཐཾ ཝིཉྙཱཡཏཱིཏི ཙེ? ‘‘ཨནཱཔཏྟི ཨཱུནཝཱིསཏིཝསྶཾ པརིཔུཎྞསཉྙཱིཏི ཨེཏྠ ཀིཉྩཱཔི ཨུཔསམྤཱདེནྟསྶ ཨནཱཔཏྟི, པུགྒལོ པན ཨནུཔསམྤནྣོཝ ཧོཏི. སཙེ པན སོ དསཝསྶཙྩཡེན ཨཉྙཾ ཨུཔསམྤཱདེཏི, ཏཾ ཙེ མུཉྩིཏྭཱ གཎོ པཱུརཏི, སཱུཔསམྤནྣོ. སོཔི ཙ ཡཱཝ ན ཛཱནཱཏི, ཏཱཝསྶ ནེཝ སགྒནྟརཱཡོ, ན མོཀྑནྟརཱཡོ. ཉཏྭཱ པན པུན ཨུཔསམྤཛྫིཏབྦ’’ནྟི སམནྟཔཱསཱདིཀཱཡཾ (པཱཙི. ཨཊྛ. ༤༠༦) ཨཱགཏཏྟཱ ཝིཉྙཱཡཏི. ཨེཝཾ ཝཏྠུཝིཔནྣཏྟཱ ཀམྨཀོཔཏོ ཨནུཔསམྤནྣསྶ པུགྒལསྶ ཨུཔཛ྄ཛྷཱཡོ བྷཝིཏུཾ ཡུཏྟཀཱལེ པུན ཨུཔསམྤཛྫནེན ཨུཔསམྤནྣབྷཱུཏབྷཱཝསྶ ཨཊྛཀཐཱཡཾ ཨཱགཏཏྟཱ ཨིམིནཱ ནཡེན སཱིམཝིཔནྣཔཨསཝིཔནྣཉཏྟིཝིཔནྣཨནུསྶཱཝནཝིཔནྣབྷཱུཏཏྟཱ ཀམྨཀོཔཏོ པུབྦེ ཨནུཔསམྤནྣབྷཱུཏཾ པུགྒལམྤི ཨཔརབྷཱགེ ཝུཌྜྷིཔྤཏྟིཀཱལེཔི པཉྩ ཝིཔཏྟིདོསཱནི སོདྷེཏྭཱ པུན ཨུཔསམྤདཀམྨཝཱཙཱཀརཎེན ཨུཔསམྤཱདེཏུཾ ཝཊྚཏི. སོཔི པུགྒལོ པུབྦཀམྨཀཱལེ ཨནུཔསམྤནྣོ ཧུཏྭཱཔི ཨཔརཀམྨཀཱལེ ཨུཔསམྤནྣོ ཧོཏཱིཏི དཊྛབྦོ.

ཨེཀཙྩེ པན བྷིཀྑཱུ པོརཱཎསིཀྑཾ པཙྩཀྑཱཡ ནཝསིཀྑམེཝ གཎྷིཾསུ, ཏེ པན བྷིཀྑཱུ ནཝསིཀྑཱཝསེན དཧརཱཝ བྷཝནྟི, ཨེཝཾ ¶ ཀརཎཉྩ ཨཏིཝིཡ གུཎཝིསིཊྛཾ ཨཏྟནོ ནཝཀཏརཾ བྷིཀྑུཾ དིསྭཱ ཏསྨིཾ པུགྒལེ པཡིརུཔཱསིཏུཀཱམོ ཏཾ པུགྒལཾ ཨཏྟནཱ ཝུཌྜྷཏརཾ ཀཱཏུཀཱམོ ཨཏྟཱནཾ དཧརཾ ཀཱཏུཀཱམོ ཧུཏྭཱ དྷམྨགཱརཝེན ཀརོནྟོ ཡུཏྟོ བྷཝེཡྻ. ཨཐ པན སིཀྑཱསམྤནྣཾ ¶ ཀཏྟུཀཱམོ ཨེཝཾ ཀརེཡྻ, སིཀྑཱ ནཱམ པཉྩངྒསམནྣཱགཏེ སཏི སམྤཛྫཏི, སཱིལཝིསུདྡྷིཡེཝ ཀཱརཎཾ ཧོཏི, ཏསྨཱ ཡདི པུརིམསིཀྑཱ ཨཊྛིཏཱ བྷཝེཡྻ, པཙྩཀྑཱནཀིཙྩཾ ནཏྠི, སཡམེཝ པཏིཏཱ ཧོཏི. པུརིམསིཀྑཱཡ ཋིཏཱཡ སཏི ཝིབྦྷམིཏུཀཱམོཡེཝ པཙྩཀྑཱནཾ ཀརེཡྻ, ན བྷིཀྑུབྷཝིཏུཀཱམོ, སོ པན ཙཏུཔཱརིསུདྡྷིསཱིལམེཝ པརིསུདྡྷཾ ཀརེཡྻ, ཏསྨཱ པོརཱཎསིཀྑཱཡ པཙྩཀྑཱནཾ ཨཡུཏྟཾ ཝིཡ དིསྶཏི. ཏཏོ པོརཱཎསིཀྑཾ པཙྩཀྑཱཡ ནཝསིཀྑཱགཧཎཏོ པུནཔྤུནཾ ཀརཎཾཡེཝ ཡུཏྟཏརཾ དིསྶཏི. ཀསྨཱ? པོརཱཎསིཀྑཾ པཙྩཀྑཱཡ ནཝསིཀྑཱགཧཎེ པུརིམཀམྨཾ ཨསམྤཛྫིཏྭཱ པཙྪིམཀམྨསམྤཛྫནེ སཏི ཀིཉྩཱཔི པུརིམསིཀྑཱ ནཏྠི, ཡཱ པཙྩཀྑཱཏབྦཱ, ཏཐཱཔི ནཝསིཀྑཱཡ སམྤཛྫིཏཏྟཱ དོསོ ནཏྠི, དཧརབྷཱཝཾ པཏྟོཔི ཡུཏྟརཱུཔོཡེཝ.

ཡདི པུརིམཀམྨམྤི པཙྪིམཀམྨམྤི སམྤཛྫཏིཡེཝ, ཨེཝཾ སཏི པུརིམསིཀྑཱཡ པཙྩཀྑཱནཾ ནིརཏྠཀཾ. པཙྪིམསིཀྑཱཡ ཋིཏོཔི དཧརབྷཱཝཾ པཏྟཏྟཱ ཨཡུཏྟརཱུཔོ. ཡདི པན པུརིམཀམྨམེཝ སམྤཛྫཏི, ན པཙྪིམཀམྨཾ, ཨེཝཾ སཏི པུབྦེ ཋིཏཔོརཱཎསིཀྑཱཔི པཙྩཀྑཱནེན པཏིཏཱ. པཙྪིམསིཀྑཱཔི པཙྪིམཀམྨསྶ པཉྩནྣཾ ཝིཔཏྟཱིནཾ ཨཉྙཏརེན ཡོགཏོ ན སམྤཛྫཏི, ཏསྨཱ པུརིམསིཀྑཱཡ ཙ པཏིཏཏྟཱ པཙྪིམསིཀྑཱཡ ཙ ཨལདྡྷཏྟཱ ཨུབྷཏོ བྷཊྛཏྟཱ ཨཡུཏྟོཝ ཧོཏི. པོརཱཎསིཀྑཾ ཨཔྤཙྩཀྑཱཡ ནཝསིཀྑཱགཧཎེ པན སཏི པུརིམཀམྨཾ སམྤནྣཾ ཧུཏྭཱ པཙྪིམཀམྨཾ ཨསམྤནྣཾ ཧོནྟམྤི པུརིམསིཀྑཱཡ པཏིཊྛིཏོཡེཝ, པུརིམཾ ཨསམྤནྣཾ ཧུཏྭཱ པཙྪིམཾ སམྤནྣམྤི ¶ པཙྪིམསིཀྑཱཡ ཋིཏོ ཨེཝ. པུརིམཔཙྪིམཀམྨདྭཡམྤི པཉྩཧངྒེཧི སམྤནྣམྤི དལ༹ྷིཀམྨཐིརཏརབྷཱུཏཱཡ པུརིམསིཀྑཱཡ ཋིཏོཡེཝ སོ བྷིཀྑུ ཧོཏི, ཏསྨཱ པུརིམསིཀྑཾ པཙྩཀྑཱཡ ནཝསིཀྑཱགཧཎཏོ པུརིམསིཀྑཾ ཨཔྤཙྩཀྑཱཡ པུནཔྤུནཾ ནཝསིཀྑཱགཧཎཾ ཡུཏྟཏརཾ ཧོཏཱིཏི དཊྛབྦཾ.

ཨིམཾ པན པུནཔྤུནཾ ཀརོནྟཱནཾ ཨཱཙརིཡཱནཾ ཝཱདཾ ཨམནསིཀརོནྟཱ ཨཉྙེ ཨཱཙརིཡཱ ཨནེཀཔྤཀཱརཾ ཨནིཙྪིཏཀཐཾ ཀཐེནྟི. ཀཐཾ? ཨེཀཙྩེ ཐེརཱ ཨེཝཾ ཝདནྟི ‘‘ཀིཾ ཨིམེ བྷིཀྑཱུ ཨེཝཾ ཀརོནྟཱ པཱརཱཛིཀཔྤཏྟཾ བྷིཀྑུཾ པུན སིཀྑཱཡ པཏིཊྛཱཔེསྶཱམཱཏི མཉྙནྟཱི’’ཏི. ཏེ ཐེརཱ པུནཔྤུནཾ ཀམྨཝཱཙཾ བྷཎནྟེ བྷིཀྑཱུ དིསྭཱ ‘‘ཨིམེ བྷིཀྑཱུ ཨིམིནཱ ཀཱརཎེན ཨེཝཾ ཀརོནྟཱི’’ཏི ཙིནྟེཏྭཱ ཨེཝམཱཧཾསུ. ཨེཀཙྩེ པན ཐེརཱ ‘‘ཀསྨཱ ཨིམེ བྷིཀྑཱུ པུནཔྤུནཾ ཀརོནྟི, ཡཐཱ ནཱམ ཨསནི ཨེཀཝཱརམེཝ པཏནྟཱི སཏྟེ ཛཱིཝིཏཀྑཡཾ པཱཔེཏི, ཨེཝམེཝ བྷགཝཏོ ཨཱཎཱབྷཱུཏཱ ཀམྨཝཱཙཱ ¶ ཨེཀཝཱརཾ བྷཎམཱནཱ ཀམྨཾ སིཛ྄ཛྷཱཔེཏི, ན ཨནེཀཝཱར’’ནྟི, ཏེཔི ‘‘ཀམྨསིཛ྄ཛྷནཏྠཱཡ པུནཔྤུནཾ བྷཎནྟཱི’’ཏི ཙིནྟེཏྭཱ ཨེཝམཱཧཾསུ. བཧཝོ པན བྷིཀྑཱུ པུནཔྤུནཾ ཀརོནྟེ དིསྭཱ ཨེཝཾ ཝདནྟི ‘‘ཨིམེ བྷིཀྑཱུ ཨཱཙརིཡུཔཛ྄ཛྷཱཡེཧི དིནྣསིཀྑཾ ཨསདྡཧནྟཱ ཨེཝཾ ཀརོནྟི, ཨཱཙརིཡུཔཛ྄ཛྷཱཡགུཎཱཔརཱདྷཀཱ ཨེཏེ སམཎཱ’’ཏི. ཏེ ‘‘པུབྦསིཀྑཾ ཨསདྡཧིཏྭཱ པུནཔྤུནཾ ཀརོནྟཱི’’ཏི མཉྙནྟཱ ཨེཝམཱཧཾསུ.

ཨཔརེ པན ཐེརཱ ‘‘པཋམཾ ཨུཔསམྤདཀམྨཝཱཙཱབྷཎནཀཱལེཡེཝ པུནཔྤུནཾ ཝཏྟབྦཾ, ན ཨཔརབྷཱགེ’’ཏི, ཏཏྠ ཀཱརཎཾ ཧེཊྛཱ ཝུཏྟམེཝ. ཨཉྙེ ཨེཝམཱཧཾསུ ‘‘ཉཏྟིདུཏིཡཀམྨཝཱཙཱཡམེཝ པུནཔྤུནཾ ཝཏྟབྦནྟི ཨཊྛཀཐཱཡཾ ཝུཏྟཾ, ན ཉཏྟིཙཏུཏྠཀམྨེ, ཨཐ ཙ པནིམེ བྷིཀྑཱུ ཉཏྟིཙཏུཏྠཀམྨབྷཱུཏཱཡ ཨུཔསམྤདཀམྨཝཱཙཱཡ པུནཔྤུནཾ ཀརོནྟི, ཨེཏཾ ཨཊྛཀཐཱཡ ན སམེཏཱི’’ཏི, ཏཾ ནཱིཏཏྠམེཝ གཧེཏྭཱ ¶ ཝདིཾསུ. ནེཡྻཏྠཏོ པན ཨིམིནཱ ནཡེན ཙཏཱུསུཔི ཀམྨེསུ པུནཔྤུནཾ ཀཱཏབྦནྟི དསྶེཏི. ཀམྨསངྐརམེཝ ཧི ཉཏྟིདུཏིཡཀམྨེ ཝིསེསཏོ ཝདཏི, པུནཔྤུནཾ ཝཏྟབྦབྷཱཝོ པན སབྦེསཱུཏི དཊྛབྦོ. ཏེནེཝ ཧི ཉཏྟིཙཏུཏྠཀམྨཝཱཙཱཡ ཨུཔསམྤནྣཊྛཱནེཡེཝ པུབྦེ ཨནུཔསམྤནྣསྶ པུགྒལསྶ པཙྪཱ ཨུཔསམྤཛྫིཏབྦབྷཱཝོ ཨཊྛཀཐཱཡཾ ཝུཏྟོཏི.

པཊིཔུཙྪཱཀརཎཱིཡཱདཱིསུཔཱིཏི ཨེཏྠ ཨཱདིསདྡེན པཊིཾཉྙཱཡ ཀརཎཱིཡཱདཡོ སངྒཎྷཱཏི. ཏཏྠ པཊིཔུཙྪཱཡ ཀརཎཱིཡཾ ཨཔྤཊིཔུཙྪཱ ཀརོཏཱིཏི པུཙྪིཏྭཱ ཙོདེཏྭཱ སཱརེཏྭཱ ཀཱཏབྦཾ ཨཔུཙྪིཏྭཱ ཨཙོདེཏྭཱ ཨསཱརེཏྭཱ ཀརོཏི. པཊིཉྙཱཡ ཀརཎཱིཡཾ ཨཔྤཊིཉྙཱཡ ཀརོཏཱིཏི པཊིཉྙཾ ཨཱརོཔེཏྭཱ ཡཐཱདིནྣཱཡ པཊིཉྙཱཡ ཀཱཏབྦཾ ཨཔཊིཉྙཱཡ པཊིཉྙཾ ཨཀརོནྟསྶ ཝིལཔནྟསྶ བལཀྐཱརེན ཀརོཏི. སཏིཝིནཡཱརཧསྶཱཏི དབྦམལླཔུཏྟཏྠེརསདིསསྶ ཁཱིཎཱསཝསྶ. ཨམཱུལ༹ྷཝིནཡཱརཧསྶཱཏི གགྒབྷིཀྑུསདིསསྶ ཨུམྨཏྟཀསྶ. ཏསྶཔཱཔིཡསིཀཀམྨཱརཧསྶཱཏི ཨུཔཝཱལ༹བྷིཀྑུསདིསསྶ ཨུསྶནྣཔཱཔསྶ. ཏཛྫནཱིཡཀམྨཱརཧསྶཱཏི པཎྜཀལོཧིཏཀབྷིཀྑུསདིསསྶ བྷཎྜནཀཱརཀསྶ. ནིཡསཀམྨཱརཧསྶཱཏི སེཡྻསཀབྷིཀྑུསདིསསྶ ཨབྷིཎྷཱཔཏྟིཀསྶ. པབྦཱཛནཱིཡཀམྨཱརཧསྶཱཏི ཨསྶཛིཔུནབྦསུཀབྷིཀྑུསདིསསྶ ཀུལདཱུསཀསྶ. པཊིསཱརཎཱིཡཀམྨཱརཧསྶཱཏི སུདྷམྨབྷིཀྑུསཨསསྶ ཨུཔཱསཀེ ཛཱཏིཨཱདཱིཧི དཱུསེནྟསྶ. ཨུཀྑེཔནཱིཡཀམྨཱརཧསྶཱཏི ཚནྣབྷིཀྑུསདིསསྶ ཨཱཔཏྟིཾ ཨཔསྶནྟསྶ ཨཱཔཏྟིཾ ཨདེསེནྟསྶ ཨརིཊྛབྷིཀྑུསདིསསྶ མིཙྪཱདིཊྛིཾ ཨཝིསྶཛྫེནྟསྶ. པརིཝཱསཱརཧསྶཱཏི པཊིཙྪནྣསངྒྷཱདིསེསཱཔཏྟིཀསྶ. མཱུལཱཡཔཊིཀསྶནཱརཧསྶཱཏི ཨནྟརཱཔཏྟིཾ ¶ ཨཱཔནྣསྶ. མཱནཏྟཱརཧནྟི ཨཔྤཊིཙྪནྣསངྒྷཱདིསེསཱཔཏྟིཀཾ. ཨབྦྷཱནཱརཧནྟི ཙིཎྞམཱནཏྟཾ བྷིཀྑུཾ. ཨུཔསམྤཱདེཏཱིཏི ཨུཔསམྤདཀམྨཾ ཀརོཏི.

ཨནུཔོསཐེ ¶ ཨུཔོསཐཾ ཀརོཏཱིཏི ཨནུཔོསཐདིཝསེ ཨུཔོསཐཾ ཀརོཏི. ཨུཔོསཐདིཝསོ ནཱམ ཋཔེཏྭཱ ཀཏྟིཀམཱསཾ ཨཝསེསེསུ ཨེཀཱདསསུ མཱསེསུ བྷིནྣསྶ སངྒྷསྶ སཱམགྒིདིཝསོ ཙ ཡཐཱཝུཏྟཱ ཙཱཏུདྡསཔནྣརསཱ ཙ, ཨེཏཾ ཏིཔྤཀཱརམྤི ཨུཔོསཐདིཝསཾ ཋཔེཏྭཱ ཨཉྙསྨིཾ དིཝསེ ཨུཔོསཐཾ ཀརོནྟོ ཨནུཔོསཐེ ཨུཔོསཐཾ ཀརོཏི ནཱམ. ཡཏྲ ཧི པཏྟཙཱིཝརཱདིཨཏྠཱཡ ཨཔྤམཏྟཀེན ཀཱརཎེན ཝིཝདནྟཱ ཨུཔོསཐཾ ཝཱ པཝཱརཎཾ ཝཱ ཋཔེནྟི, ཏཏྠ ཏསྨིཾ ཨདྷིཀརཎེ ཝིནིཙྪིཏེ ‘‘སམགྒཱ ཛཱཏམྷཱ’’ཏི ཨནྟརཱ སཱམགྒཱིཨུཔོསཐཾ ཀཱཏུཾ ན ལབྷནྟི, ཀརོནྟེཧི ཨནུཔོསཐེ ཨུཔོསཐོ ཀཏོ ནཱམ ཧོཏི.

ཨཔྤཝཱརཎཱཡ པཝཱརེཏཱིཏི ཨཔྤཝཱརཎདིཝསེ པཝཱརེཏི. པཝཱརཎདིཝསོ ནཱམ ཨེཀསྨིཾ ཀཏྟིཀམཱསེ བྷིནྣསྶ སངྒྷསྶ སཱམགྒིདིཝསོ ཙ པཙྩུཀྐཌྜྷིཏྭཱ ཋཔིཏདིཝསོ ཙ དྭེ ཙ པུཎྞམཱསིཡོ, ཨེཏཾ ཙཏུབྦིདྷཾ པཝཱརཎདིཝསཾ ཋཔེཏྭཱ ཨཉྙསྨིཾ དིཝསེ པཝཱརེནྟོ ཨཔྤཝཱརཎཱཡ པཝཱརེཏི ནཱམ. ཨིདྷཱཔི ཨཔྤམཏྟཀསྶ ཝིཝཱདསྶ ཝཱུཔསམེ སཱམགྒཱིཔཝཱརཎཾ ཀཱཏུཾ ན ལབྷནྟི. ཀརོནྟེཧི ཨཔྤཝཱརཎཱཡ པཝཱརཎཱ ཀཏཱ ཧོཏཱིཏི ཨཡཾ ཨཊྛཀཐཱཔཱཋོ (པརི. ཨཊྛ. ༤༨༣).

‘‘ཨུམྨཏྟཀསྶ བྷིཀྑུནོ ཨུམྨཏྟཀསམྨུཏི ཨུམྨཏྟཀེན ཡཱཙིཏྭཱ ཀཏེ ཨསམྨུཁཱཔི དཱཏུཾ ཝཊྚཏི, ཏཏྠ ནིསིནྣེཔི ན ཀུཔྤཏི ནིཡམཱབྷཱཝཏོ. ཨསམྨུཁཱ ཀཏེ པན དོསཱབྷཱཝཾ དསྶེཏུཾ ‘ཨསམྨུཁཱ ཀཏཾ སུཀཏཾ ཧོཏཱི’ཏི ཝུཏྟཾ. དཱུཏེན ཨུཔསམྤདཱ པན སམྨུཁཱ ཀཱཏུཾ ན སཀྐཱ ཀམྨཝཱཙཱནཱནཏྟསམྦྷཝཏོ. པཏྟནིཀྐུཛྫནཱདཡོ ཧཏྠཔཱསཏོ ཨཔནཱིཏམཏྟེཔི ཀཱཏུཾ ཝཊྚནྟི. སངྒྷསམྨུཁཏཱཏིཨཱདཱིསུ ཡཱཝཏིཀཱ བྷིཀྑཱུ ཀམྨཔྤཏྟཱ, ཏེ ཨཱགཏཱ ཧོནྟི, ཚནྡཱརཧཱནཾ ¶ ཚནྡོ ཨཱཧཏོ ཧོཏི, སམྨུཁཱིབྷཱུཏཱ ན པཊིཀྐོསནྟི, ཨཡཾ སངྒྷསམྨུཁཏཱ. ཡེན དྷམྨེན ཡེན ཝིནཡེན ཡེན སཏྠུསཱསནེན སངྒྷོ ཀམྨཾ ཀརོཏི, ཨཡཾ དྷམྨསམྨུཁཏཱ ཝིནཡསམྨུཁཏཱ. ཏཏྠ དྷམྨོཏི བྷཱུཏཾ ཝཏྠུ. ཝིནཡོཏི ཙོདནཱ ཙེཝ སཱརཎཱ ཙ. སཏྠུསཱསནཾ ནཱམ ཉཏྟིསམྤདཱ ཙེཝ ཨནུསྶཱཝནསམྤདཱ ¶ ཙ. ཡསྶ སངྒྷོ ཀམྨཾ ཀརོཏི, ཏསྶ སམྨུཁཱབྷཱཝོ པུགྒལསམྨུཁཏཱ. ཀཏྟིཀམཱསསྶ པཝཱརཎམཱསཏྟཱ ‘ཋཔེཏྭཱ ཀཏྟིཀམཱས’ནྟི ཝུཏྟཾ. པཙྩུཀྐཌྜྷིཏྭཱ ཋཔིཏདིཝསོ ཙཱཏི ཀཱལ༹པཀྑེ ཙཱཏུདྡསིཾ པནྣརསིཾ ཝཱ སནྡྷཱཡ ཝུཏྟཾ. དྭེ པུཎྞམཱསིཡོཏི པཋམཔཙྪིམཝསྶཱུཔགཏཱནཾ ཝསེན ཝུཏྟ’’ནྟི སཱརཏྠདཱིཔནིཡཾ (སཱརཏྠ. ཊཱི. པརིཝཱར ༣.༤༨༣) ཨཱགཏཾ.

‘‘ཋཔིཏཨུཔོསཐཔཝཱརཎཱནཾ ཀཏྟིཀམཱསེ སཱམགྒིཡཱ ཀཏཱཡ སཱམགྒཱིཔཝཱརཎཾ མུཉྩིཏྭཱ ཨུཔོསཐཾ ཀཱཏུཾ ན ཝཊྚཏཱིཏི ཨཱཧ ‘ཋཔེཏྭཱ ཀཏྟིཀམཱས’ནྟི. སཙེ པན ཏེསཾ ནཱནཱསཱིམཱསུ མཧཱཔཝཱརཎཱཡ ཝིསུཾ པཝཱརིཏཱནཾ ཀཏྟིཀམཱསབྦྷནྟརེ སཱམགྒཱི ཧོཏི, སཱམགྒཱིཨུཔོསཐོ ཨེཝ ཏེཧི ཀཱཏབྦོ, ན པཝཱརཎཱ ཨེཀསྨིཾ ཝསྶེ ཀཏཔཝཱརཎཱནཾ པུན པཝཱརཎཱཡ ཨཝིཧིཏཏྟཱ. སཱམགྒཱིདིཝསོ ཧོཏཱིཏི ཨནུཔོསཐདིཝསེ སཱམགྒཱིཀརཎཾ སནྡྷཱཡ ཝུཏྟཾ. སཙེ པན ཙཱཏུདྡསིཡཾ པནྣརསིཡཾ ཝཱ སངྒྷོ སཱམགྒིཾ ཀརོཏི, ཏདཱ སཱམགྒཱིཨུཔོསཐདིཝསོ ན ཧོཏི, ཙཱཏུདྡསཱིཔནྣརསཱིཨུཔོསཐོཝ ཧོཏི. ཨུཔརི པཝཱརཎཱཡཔི ཨེསེཝ ནཡོ. པཙྩུཀྐཌྜྷིཏྭཱ ཋཔིཏདིཝསོ ཙཱཏི བྷཎྜནཀཱརཀེཧི ཨུཔདྡུཏཱ ཝཱ ཀེནཙིདེཝ ཀརཎཱིཡེན པཝཱརཎསངྒཧཾ ཝཱ ཀཏྭཱ ཋཔིཏོ ཀཱལ༹པཀྑཙཱཏུདྡསཱིདིཝསོ ཙ. དྭེ ཙ པུཎྞམཱསིཡོཏི པུབྦཀཏྟིཀཔུཎྞམཱ པཙྪིམཀཏྟིཀཔུཎྞམཱ ཙཱཏི དྭེ པུཎྞམཱསིཡོ. ཨེཏཾ ¶ ཙཏུབྦིདྷནྟི པུཎྞམཱསིདྭཡེན སདྡྷིཾ སཱམགྒཱིཔཝཱརཎཾ ཙཱཏུདྡསཱིཔཝཱརཎཉྩ སམྤིཎྜེཏྭཱ, ཨིདཉྩ པཀཏིཙཱརིཏྟཝསེན ཝུཏྟཾ. ཏཐཱརཱུཔཔཙྩཡེ པན སཏི ཨུབྷིནྣཾ པུཎྞམཱསཱིནཾ པུརིམཱ དྭེ ཙཱཏུདྡསིཡོ, ཀཱལ༹པཀྑཙཱཏུདྡསིཡཱ ཨནནྟརཱ པནྣརསཱིཔཱིཏི ཨིམེཔི ཏཡོ དིཝསཱ པཝཱརཎཱདིཝསཱ ཨེཝཱཏི ཨིམཾ སཏྟཝིདྷམྤི པཝཱརཎཱདིཝསཾ ཋཔེཏྭཱ ཨཉྙསྨིཾ དིཝསེ པཝཱརེཏུཾ ན ཝཊྚཏཱི’’ཏི ཝིམཏིཝིནོདནིཡཾ (ཝི. ཝི. ཊཱི. པརིཝཱར ༢.༤༨༣) ཨཱགཏཾ.

ཨེཝཾ ཝཏྠུཝིཔཏྟིཝིནིཙྪཡཾ དསྶེཏྭཱ ཨིདཱནི ཉཏྟིཝིཔཏྟིཝིནིཙྪཡཾ ཨནུསྶཱཝནཝིཔཏྟིཝིནིཙྪཡཉྩ དསྶེནྟོ ‘‘ཉཏྟིཏོ ཝིཔཏྟིཡཾ པནཱ’’ཏིཨཱདིམཱཧ. ཏཏྠ པཉྩམཉཏྟིཝིཔཏྟིཡཾ ‘‘པཙྪཱ ཝཱ ཉཏྟིཾ ཋཔེཏཱི’’ཏི ཨེཏསྶ སཾཝཎྞནཱཡཾ ཨནུསྶཱཝནཀམྨཾ ཀཏྭཱཏི པཋམཾ ཨནུསྶཱཝནཾ སཱཝེཏྭཱ ‘‘ཨེསཱ ཉཏྟཱི’’ཏི ཨནུསྶཱཝནཱནནྟརམེཝ སཀལཾ ཉཏྟིཾ ཝཏྭཱ, པརིཡོསཱནེ ‘‘ཨེསཱ ཉཏྟཱི’’ཏི ཝཏྭཱཏི ཨདྷིཔྤཱཡོ.

༢༥༢. ཙཏུཏྠཨནུསྶཱཝནཝིཔཏྟིསཾཝཎྞནཱཡཾ ¶ ‘‘ཡྭཱཡནྟི བྱཉྫནཔྤབྷེདོ ཨདྷིཔྤེཏོ. དསདྷཱ བྱཉྫནབུདྡྷིཡཱ པབྷེདོཏི ཨེཏྠ དསདྷཱ དསཝིདྷེན བྱཉྫནཱནཾ པབྷེདོཏི ཡོཛེཏབྦཾ. ཀེནཱཡཾ པབྷེདོཏི ཨཱཧ ‘བྱཉྫནབུདྡྷིཡཱ’ཏི. ཡཐཱདྷིཔྤེཏཏྠབྱཉྫནཏོ བྱཉྫནསངྑཱཏཱནཾ ཨཀྑརཱནཾ ཛནིཀཱ བུདྡྷི བྱཉྫནབུདྡྷི, ཏཱཡ བྱཉྫནབུདྡྷིཡཱ, ཨཀྑརསམུཊྛཱཔཀཙིཏྟབྷེདེནེཝཱཏི ཨཏྠོ. ཡཾ ཝཱ སཾཡོགཔརཾ ཀཏྭཱ ཝུཙྩཏི, ཨིདམྤི གརུཀནྟི ཡོཛནཱ’’ཏི ཝིམཏིཝིནོདནིཡཾ ཝུཏྟཾ.

སཱརཏྠདཱིཔནིཡཾ (སཱརཏྠ. ཊཱི. པརིཝཱར ༣.༤༨༥) པན ‘‘ཋཱནཀརཎཱནི སིཐིལཱནི ཀཏྭཱ ཨུཙྩཱརེཏབྦམཀྑརཾ སིཐིལཾ, ཏཱནིཡེཝ དྷནིཏཱནི ཨསིཐིལཱནི ཀཏྭཱ ཨུཙྩཱརེཏབྦམཀྑརཾ དྷནིཏཾ. དྭིམཏྟཀཱལཾ དཱིགྷཾ, ཨེཀམཏྟཀཱལཾ རསྶཾ. དསདྷཱ བྱཉྫནབུདྡྷིཡཱ པབྷེདོཏི ཨེཝཾ སིཐིལཱདིཝསེན བྱཉྫནབུདྡྷིཡཱ ཨཀྑརུཔྤཱདཀཙིཏྟསྶ དསཔྤཀཱརེན ¶ པབྷེདོ. སབྦཱནི ཧི ཨཀྑརཱནི ཙིཏྟསམུཊྛཱནཱནི ཡཐཱདྷིཔྤེཏཏྠབྱཉྫནཏོ བྱཉྫནཱནི ཙ. སཾཡོགོ པརོ ཨེཏསྨཱཏི སཾཡོགཔརོ. ན སཾཡོགཔརོ ཨསཾཡོགཔརོ ‘ཨཱཡསྨཏོ བུདྡྷརཀྑིཏཐེརསྶ ཡསྶ ན ཁམཏཱི’ཏི ཨེཏྠ ཏ-ཀཱར ན-ཀཱརསཧིཏཱརོ ཨསཾཡོགཔརོ. ཀརཎཱནཱིཏི ཀཎྛཱདཱིནི’’ ཨིཏི ཨེཏྟཀཾ ཝུཏྟཾ.

པུན ཝིམཏིཝིནོདནིཡཾ (ཝི. ཝི. ཊཱི. པརིཝཱར ༢.༤༨༥) ‘‘ཏཏྠ ཨཱཡསྨཏོཏིཨཱདཱིསུ སརཱནནྟརིཏཱནི ས-ཀཱར མ-ཀཱརཱདིབྱཉྫནཱནི ‘སཾཡོགོ’ཏི ཝུཙྩནྟི. ཡོ སཾཡོགོ པརོ ཡསྶ ཨ-ཀཱརཱདིནོ, སོ སཾཡོགཔརོ ནཱམ. རསྶནྟི ཨ-ཀཱརཱདིབྱཉྫནརཧིཏཾ པདཾ. ཨསཾཡོགཔརནྟི ‘ཡསྶ ན ཁམཏཱི’ཏིཨཱདཱིསུ ས-ཀཱར ན-ཀཱརཱདིབྱཉྫནསཧིཏཾ པདཾ སནྡྷཱཡ ཝུཏྟཾ. ཏ-ཀཱརསྶ ཐ-ཀཱརཾ ཨཀཏྭཱ ‘སུཎཱཏུ མེ’ཏིཨཱདིཾ ཨཝཏྭཱ ཝགྒནྟརེ སིཐིལམེཝ ཀཏྭཱ ‘སུཎཱཊུ མེ’ཏིཨཱདིཾ ཝདནྟོཔི དུརུཏྟཾ ཀརོཏིཡེཝ ཋཔེཏྭཱ ཨནུརཱུཔཾ ཨཱདེསཾ. ཡཉྷི ‘སཙྩིཀཏྠཔརམཏྠེནཱ’ཏི ཝཏྟབྦེ ‘སཙྩིཀཊྛཔརམཊྛེནཱ’ཏི ཙ ‘ཨཏྠཀཐཱ’ཏི ཙ ཝཏྟབྦེ ‘ཨཊྛཀཐཱ’ཏི ཙ ཏཏྠ ཏཏྠ ཝུཙྩཏི, ཏཱདིསཾ པཱལི༹ཨཊྛཀཐཱདཱིསུ དིཊྛཔཡོགཾ ཏདནུརཱུཔཉྩ ཝཏྟུཾ ཝཊྚཏི, ཏཏོ ཨཉྙཾ ན ཝཊྚཏི. ཏེནཱཧ ‘ཨནུཀྐམཱགཏཾ པཝེཎིཾ ཨཝིནཱསེནྟེནཱ’ཏིཨཱདི. ‘དཱིགྷེ ཝཏྟབྦེ རསྶ’ནྟིཨཱདཱིསུ ‘བྷིཀྑཱུན’ནྟི ཝཏྟབྦེ ‘བྷིཀྑུན’ནྟི ཝཱ ‘བཧཱུསཱུ’ཏི ཝཏྟབྦེ ‘བཧུསཱུ’ཏི ཝཱ ‘ནཀྑམཏཱི’ཏི ཝཏྟབྦེ ‘ན ཁམཏཱི’ཏི ཝཱ ‘ཨུཔསམྤདཱཔེཀྑོ’ཏི ཝཏྟབྦེ ‘ཨུཔསམྤདཱཔེཁོ’ཏི ཝཱ ཨེཝཾ ཨནུརཱུཔཊྛཱནེསུ ཨེཝ དཱིགྷརསྶཱདིརསྶདཱིགྷཱདིཝསེན པརིཝཏྟེཏུཾ ཝཊྚཏི, ན པན ‘ནཱགོ’ཏི ཝཏྟབྦེ ‘ནགོ’ཏི ཝཱ ‘སངྒྷོ’ཏི ¶ ཝཏྟབྦེ ‘སགྷོ’ཏི ཝཱ ‘ཏིསྶོ’ཏི ཝཏྟབྦེ ‘ཏིསོ’ཏི ཝཱ ‘ཡཱཙཏཱི’ཏི ཝཏྟབྦེ ‘ཡཱཙནྟཱི’ཏི ཝཱ ཨེཝཾ ཨནནུརཱུཔཊྛཱནེསུ ཝཏྟུཾ ¶ . སམྦནྡྷཾ པན ཝཝཏྠཱནཉྩ སབྦཐཱཔི ཝཊྚཏཱིཏི གཧེཏབྦ’’ནྟི ཨཱགཏཾ. སེསཱནི ཨཊྛཀཐཱཡཾ ཝུཏྟནཡེནེཝ སུཊྛུ སལླཀྑེཏབྦཱནི.

༢༥༣. སཱིམཝིཔཏྟིཝིནིཙྪཡོ པན ཧེཊྛཱ སཱིམཀཐཱཡཾ སབྦེན ཀཐིཏོ, ཏསྨཱ ཏཏྠ ཝུཏྟནཡེནེཝ གཧེཏབྦོ.

པརིསཝིཔཏྟིཀཐཱཡ ཙཏུཝགྒཀརཎེཏི ཙཏུཝགྒེན སངྒྷེན ཀཏྟབྦེ. ཨནིསྶཱརིཏཱཏི ཨུཔོསཐཊྛཔནཱདིནཱ ཝཱ ལདྡྷིནཱནཱསཾཝཱསཀབྷཱཝེན ཝཱ ན བཧིཀཏཱ. ཨཊྛཀཐཱཡཉྷི ‘‘ཨཔཀཏཏྟསྶཱཏི ཨུཀྑིཏྟཀསྶ ཝཱ ཡསྶ ཝཱ ཨུཔོསཐཔཝཱརཎཱ ཋཔིཏཱ ཧོནྟཱི’’ཏི (པརི. ཨཊྛ. ༤༢༥) ཝུཏྟཏྟཱ ཋཔིཏཨུཔོསཐཔཝཱརཎོ བྷིཀྑུ ཨཔཀཏཏྟོ ཨེཝཱཏི གཧེཏབྦཾ. པརིསུདྡྷསཱིལཱཏི པཱརཱཛིཀཾ ཨནཱཔནྣཱ ཨདྷིཔྤེཏཱ. པརིཝཱསཱདིཀམྨེསུ པན གརུཀཊྛཱཔི ཨཔཀཏཏྟཱ ཨེཝཱཏི གཧེཏབྦཾ. ཨཝསེསཱ…པེ… ཚནྡཱརཧཱཝ ཧོནྟཱིཏི ཧཏྠཔཱསཾ ཝིཛཧིཏྭཱ ཋིཏེ སནྡྷཱཡ ཝུཏྟཾ, ཨཝིཛཧིཏྭཱ ཋིཏཱ པན ཚནྡཱརཧཱ ན ཧོནྟི, ཏེཔི ཙཏུཝགྒཱདིཏོ ཨདྷིཀཱ ཧཏྠཔཱསཾ ཝིཛཧིཏྭཱཝ ཚནྡཱརཧཱ ཧོནྟི, ཏསྨཱ སངྒྷཏོ ཧཏྠཔཱསཾ ཝིཛཧིཏྭཱ ཋིཏེནེཝ ཚནྡོ ཝཱ པཱརིསུདྡྷི ཝཱ དཱཏབྦཱ.

སཱརཏྠདཱིཔནིཡཾ (སཱརཏྠ. ཊཱི. པརིཝཱར ༣.༤༨༨) པན ‘‘ཨནུཀྑིཏྟཱ པཱརཱཛིཀཾ ཨནཱཔནྣཱ ཙ པཀཏཏྟཱཏི ཨཱཧ ‘པཀཏཏྟཱ ཨནུཀྑིཏྟཱ’ཏིཨཱདི. ཏཏྠ ཨནིསྶཱརིཏཱཏི པུརིམཔདསྶེཝ ཝེཝཙནཾ. པརིསུདྡྷསཱིལཱཏི པཱརཱཛིཀཾ ཨནཱཔནྣཱ. ན ཏེསཾ ཚནྡོ ཝཱ པཱརིསུདྡྷི ཝཱ ཨེཏཱིཏི ཏཱིསུ དྭཱིསུ ཝཱ ནིསིནྣེསུ ཨེཀསྶ ཝཱ དྭིནྣཾ ཝཱ ཚནྡཔཱརིསུདྡྷི ཨཱཧཊཱཔི ཨནཱཧཊཱཝ ཧོཏཱིཏི ཨདྷིཔྤཱཡོ’’ཏི ཨཱགཏོ. ཨེཝཾ པཱལི༹ཡཉྩ ཨཊྛཀཐཱཡ ཙ ཙཏུནྣམྤི ཀམྨཱནཾ སམྤཏྟི ཙ ཝིཔཏྟི ཙ ཨཱགཏཱ, ཊཱིཀཱཙརིཡེཧི ཙ ཝིནིཙྪིཏཱ, ཏསྨཱ ¶ ཨཊྛཀཐཱཡཾ ཝུཏྟནཡེནེཝ ཙཏྟཱརི ཀམྨཱནི ཀཏྟབྦཱནི, ན ཨཝུཏྟནཡེན. ཝུཏྟཉྷི སམནྟཔཱསཱདིཀཱཡཾ (པཱརཱ. ཨཊྛ. ༡. གནྠཱརམྦྷཀཐཱ; ༢.༤༣༡) –

‘‘བུདྡྷེན ¶ དྷམྨོ ཝིནཡོ ཙ ཝུཏྟོ;

ཡོ ཏསྶ པུཏྟེཧི ཏཐེཝ ཉཱཏོ;

སོ ཡེཧི ཏེསཾ མཏིམཙྩཛནྟཱ;

ཡསྨཱ པུརེ ཨཊྛཀཐཱ ཨཀཾསུ.

‘‘ཏསྨཱ ཧི ཡཾ ཨཊྛཀཐཱསུ ཝུཏྟཾ;

ཏཾ ཝཛྫཡིཏྭཱན པམཱདལེཁཾ;

སབྦམྤི སིཀྑཱསུ སགཱརཝཱནཾ;

ཡསྨཱ པམཱཎཾ ཨིདྷ པཎྜིཏཱན’’ནྟི.

ཨིམསྨིཉྷི ཀམྨཝགྒེ ཨཔལོཀནཱདཱིནཾ ཙཏུནྣཾ ཀམྨཱནཾ ཀརཎཊྛཱནཾ ཨེཀཱདསཝིཔཏྟིསཱིམཝིམུཏྟཾ བདྡྷསཱིམབྷཱུཏཾཡེཝ ཝུཏྟཾ, ‘‘ཨེཀཱདསཧི ཨཱཀཱརེཧི སཱིམཏོ ཀམྨཱནི ཝིཔཛྫནྟཱི’’ཏི (པརི. ༤༨༦) ཝཙནཏོ ན ཨབདྡྷཨུཔཙཱརསཱིམབྷཱུཏཾ. ན ཧི ཏཏྠ ཨེཀཱདསཝིཔཏྟི ཨཏྠི. ཨཊྛཀཐཱཡམྤི (པརི. ཨཊྛ. ༤༨༢) ‘‘ཨཔལོཀནཀམྨཾ ནཱམ སཱིམཊྛཀསངྒྷཾ སོདྷེཏྭཱ ཚནྡཱརཧཱནཾ ཚནྡཾ ཨཱཧརིཏྭཱ སམགྒསྶ སངྒྷསྶ ཨནུམཏིཡཱ ཏིཀྑཏྟུཾ སཱཝེཏྭཱ ཀཏྟབྦཾ ཀམྨ’’ནྟི ཨཔལོཀནཀམྨསྶཱཔི བདྡྷསཱིམཱཡམེཝ ཀཏྟབྦབྷཱཝོ ཝུཏྟོ, ན ཨུཔཙཱརསཱིམཱཡཾ. ན ཧི ཏཏྠ སཱིམཊྛཀསངྒྷསོདྷནཉྩ ཚནྡཱརཧཱནཉྩ ཨཏྠི, ཨནྟོསཱིམཾ པཝིཊྛཔཝིཊྛཱནཾ སངྒྷལཱབྷོ དཱཏབྦོཡེཝ ཧོཏི, ཏསྨཱ ‘‘ཉཏྟིཀམྨབྷཱུཏཾ ཨུཔོསཐཔཝཱརཎཱཀམྨཾ ཨབདྡྷསཱིམཝིཧཱརེཔི ཀཏྟབྦ’’ནྟི གཎྷནྟཱནཾ ཨཱཙརིཡཱནཾ ཝཱདོཔི ‘‘ཉཏྟིདུཏིཡཀམྨབྷཱུཏཾ ཀཐིནདཱནཀམྨཾ ཨུཔཙཱརསཱིམཱཡམེཝ ཀཏྟབྦ’’ནྟི གཎྷནྟཱནཾ ཨཱཙརིཡཱནཾ ཝཱདོཔི པཱལི༹ཝིརོདྷོ ཨཊྛཀཐཱཝིརོདྷོ ཙ ཧོཏཱིཏི ཝེདིཏབྦོ. ཡམེཏྠ ཝཏྟབྦཾ, ཏཾ ཨུཔོསཐཔཝཱརཎཀཐཱཝཎྞནཱཡཉྩ ¶ ཀཐིནཀཐཱཝཎྞནཱཡཉྩ ཝུཏྟཾ, ཨཏྠིཀེཧི ཏཏྠ སུཊྛུ ཨོལོཀེཏྭཱ སཾསཡོ ཝིནོདེཏབྦོ.

ཨིདཱནི སབྦེ བྷིཀྑཱུ ལེཁཀཱརེཧི པརིཙཡཝསེན སབྦགནྠཱནཾ ཨཱདིམྷི ལིཁིཏཾ མཧཱནམཀྐཱརཔཱཋཾ སརཎགམནསྶ, ཀམྨཝཱཙཱཡ ཙ ཨཱརམྦྷཀཱལེ མཧཏཱ ཨུསྶཱཧེན བྷཎནྟི, སོ པན པཱཋོ ནེཝ སརཎགམནཔརིཡཱཔནྣོ, ན ཀམྨཝཱཙཱཔརིཡཱཔནྣོ, ནཱཔི ཀམྨཝཱཙཱཡ པུབྦཀརཎཔརིཡཱཔནྣོ, ཏསྨིཾ ཨབྷཎིཏེཔི ན སརཎགམནསྶ ཝཱ ཀམྨཝཱཙཱཡ ཝཱ ཧཱནི ཨཏྠི, ན བྷཎིཏེ ཝཌྜྷི, ཏསྨཱ པཀརཎཱཙརིཡཱ སརཎགམནཱརམྦྷེཔི ཀམྨཝཱཙཱརམྦྷེཔི ཏསྶ མཧཱནམཀྐཱརཔཱཋསྶ ¶ ཝཎྞནཾ ན ཝདནྟི, ཝདནྟོ པན ‘‘བྷགཝཏོ ཨརཧཏོ སམྨཱསམྦུདྡྷསྶ’’ ཨིཏི པདཱནཾ ཨཏྠོ ཝིསུདྡྷིམགྒསམནྟཔཱསཱདིཀཱསཱརཏྠདཱིཔནཱིཨཱདིཔྤཀརཎེསུ ‘‘བྷགཝཱ ཨརཧཾ སམྨཱསམྦུདྡྷོ’’ ཨིཏིཔདཱནཾ ཨཏྠོ ཝིཡ ཝིཏྠཱརེན ཝཏྟབྦོ སིཡཱ, ཨེཝཾ སནྟེཔི བྷགཝཏོ ཡཐཱབྷཱུཏགུཎདཱིཔནཝསེན པཝཏྟཏྟཱ སབྦེཔི ཨཱཙརིཡཱ སབྦེསུ གནྠཱརམྦྷེསུ ཏིཀྑཏྟུཾ མངྒལཏྠཾ བྷཎནྟི. བྷཎནྟེཧི ཙ པན ན-ཀཱར མོ-ཀཱརཱདཱིནཾ ཋཱནཀརཎཱདིསམྤདཾ ཨཧཱཔེནྟེན སིཐིལདྷནིཏདཱིགྷརསྶཱདིཝིསེསཾ མནསི ཀརོནྟེན སམཎསཱརུཔྤེན པརིམཎྜལེན པདབྱཉྫནེན བྷཎིཏབྦོ ཧོཏི, ན ཨཏིཨཱཡཏཀེན གཱིཏསདྡསདིསེན སདྡེན. ཝུཏྟཉྷེཏཾ བྷགཝཏཱ ‘‘ན, བྷིཀྑཝེ, ཨཱཡཏཀེན གཱིཏསྶརེན དྷམྨོ གཱཡིཏབྦོ, ཡོ གཱཡེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༢༤༩).

‘‘ཨེཀམཏྟོ བྷཝེ རསྶོ, དྭིམཏྟོ དཱིགྷམུཙྩཏེ;

ཏིམཏྟོ ཏུ པླུཏོ ཉེཡྻོ, བྱཉྫནཉྩཌྜྷམཏྟིཀ’’ནྟི. –

སདྡཔྤཀརཎཱཙརིཡེཧི ཝུཏྟཾ སདྡལཀྑཎཾ ནིསྶཱཡ ན-ཀཱརཱདཱིསུ རསྶབྷཱུཏེ ཨསརེ ཨེཀམཏྟཾ, ན-བྱཉྫནེ ཨཌྜྷམཏྟཾ སམྤིཎྜེཏྭཱ ¶ དིཡཌྜྷམཏྟཀཱལཾ པམཱཎཾ ཀཏྭཱ ཨུཙྩཱརཱིཡཏེ. མོ-ཀཱརཱདཱིསུ དཱིགྷབྷཱུཏེ ཨོ-ཀཱརཱདིསརེ དྭིམཏྟཾ, མ-ཀཱརཱདིབྱཉྫནེ ཨཌྜྷམཏྟཾ སམྤིཎྜེཏྭཱ ཨཌྜྷཏེཡྻམཏྟཱཀཱལཾ པམཱཎཾ ཀཏྭཱ ཨུཙྩཱརཱིཡཏེ, ན ཏཏོ ཨུདྡྷནྟི. ནནུ ‘‘པླུཏོ ཏིམཏྟོ ཉེཡྻོ’’ཏི ཝུཏྟནྟི? སཙྩཾ, སཱ པན དཱུརཏོ ཨཝ྄ཧཱཡནཱདཱིསུཡེཝ ལབྦྷཏི, ནཱཉྙཏྠ. ཝུཏྟཉྷི ཀཱརིཀཱཡཾ –

‘‘དཱུརཏོ ཨཝ྄ཧཱནེ གཱིཏེ, ཏཐེཝ རོདནེཔི ཙ;

པླུཏཱ ཏིམཏྟིཀཱ ཝུཏྟཱ, སབྦེཏེ ནེཏྠ གཡ྄ཧརེ’’ཏི. –

ཀིཏྟཀེན པན ཀཱལེན ཨེཀམཏྟཱ ཝིཉྙེཡྻཱཏི? ཨཀྑིནིམིསཨུམྨིསམཏྟཀཱལེནཱཏི ཨཱཙརིཡཱ. ཨེཀེ པན ཨཱཙརིཡཱ ‘‘ཨངྒུལིཕོཊནཀཱལཔྤམཱཎེནཱ’’ཏི ཝདནྟི. ཝུཏྟཉྷི ཨཱཙརིཡདྷམྨསེནཱཔཏིཏྠེརེན –

‘‘པམཱཎཾ ཨེཀམཏྟསྶ, ནིམིསུམྨིསཏོབྲཝུཾ;

ཨངྒུལིཕོཊཀཱལསྶ, པམཱཎེནཱཔི ཨབྲཝུ’’ནྟི.

ཨེཝཾ ¶ སདྡསཏྠཱཙརིཡེཧི ཝཙནཏོ སུདྡྷརསྶསརཊྛཱནེ ཨེཀམཏྟཱཔམཱཎཾ, སབྱཉྫནརསྶསརཊྛཱནེ དིཡཌྜྷམཏྟཱཔམཱཎཾ, སུདྡྷདཱིགྷསརཊྛཱནེ དྭིམཏྟཱཔམཱཎཾ, སབྱཉྫནདཱིགྷསརཊྛཱནེ ཨཌྜྷཏེཡྻམཏྟཱཔམཱཎཾ ཀཱལཾ སལླཀྑེཏྭཱ ཨུཙྩཱརཱིཡཏེ.

ཨིདཱནི པན བྷིཀྑཱུ མཧཱནམཀྐཱརབྷཎནེ བལཝཨུསྶཱཧཾ ཀཏྭཱ བྷཎནྟཱ རསྶཊྛཱནེསུ དྭིཏིམཏྟཱཀཱལཾ དཱིགྷཊྛཱནེསུ ཙཏུཔཉྩམཏྟཱཀཱལཾ སརཾ པཋཔེཏྭཱ བྷཎནྟི, ཏདཡུཏྟཾ ཝིཡ དིསྶཏི. ཨཔརེ པཋམཝཱརེ བྷཎིཏྭཱ ‘‘སམྨཱསམྦུདྡྷསྶཱ’’ཏི པརིཡོསཱནཔདཾ པཏྭཱཔི ཏཏྠ ཨཊྛཔེཏྭཱ པུན ‘‘ནམོ ཏསྶཱ’’ཏི བྷཎིཏྭཱ ས-ཀཱརེ ཋཔེཏྭཱ ཐོཀཾ ཝིསྶམིཏྭཱ དུཏིཡཝཱརེ ‘‘བྷགཝཏོ’’ཏི ཨིདཾ ཨཱདིཾ ཀཏྭཱ ཡཱཝ པརིཡོསཱནཾ བྷཎིཏྭཱ ཋཔེནྟི. ཏཏིཡཝཱརེ པན ཨཱདིཏོ པཊྛཱཡ པརིཡོསཱནེ ཋཔེནྟི. ཨེཝཾ བྷཎནྟཉྩ བཧཱུ པསཾསནྟི, ཨེཝཾ པན ཀཱཏབྦནྟི ནེཝ ¶ པཱལི༹ཡཾ, ན ཨཊྛཀཐཱཡཾ ཝིཛྫཏི. ཡཐཱ ཉཏྟིཙཏུཏྠཀམྨེ ཀརིཡམཱནེ ཏཱིཎི ཨནུསྶཱཝནཱནི སདྡཏོ ཙ ཨཏྠཏོ ཙ ཨབྷིནྣཱནི ཨཉྙམཉྙཾ སངྐརཝིརཧིཏཱནི ཀཏྭཱ བྷཎིཏབྦཱནི, ཨེཝཾ མཧཱནམཀྐཱརཔཱཋེ ཏིཀྑཏྟུཾ བྷཉྙམཱནེ ཏཡོ ཝཱརཱ སདྡཏོ ཙ ཨཏྠཏོ ཙ ཨབྷིནྣེ ཀཏྭཱ སངྐརཝིརཧིཏེ ཀཏྭཱ ཨཱདིཏོ ཨཱརབྷིཏྭཱ པརིཡོསཱནེ ཋཔེཏབྦཱ ཧོནྟཱིཏི.

ཏཏྲཱཡམེཀེཨེཝཾ ཝདནྟི – ཡཐཱ ནཱམ ཛཝེན གཙྪནྟསྶ ཋཱཏབྦཊྛཱནཾ པཏྭཱཔི སཧསཱ ཋཱཏུཾ ན སཀྐོཏི, ཨེཀཔཱདམཏྟཾ གནྟྭཱ ཏིཊྛཏི, ཨེཝཾ ཨཱདིཏོ བྷཎནྟསྶ བལཝཨུསྶཱཧཏྟཱ པརིཡོསཱནེ པཏྟེཔི ཋཔེཏུཾ ན སཀྐོཏི, ‘‘ནམོ ཏསྶཱ’’ཏི དྭིཔདམཏྟཾ བྷཎིཏྭཱ སཀྐོཏཱིཏི. ཨེཝཾ སནྟེ དུཏིཡཏཏིཡཝཱརེསུ ཀསྨཱ སཀྐོཏཱིཏི? ཏདཱ པན དུཏིཡཝཱརེ ཐོཀཾ ཝིསྶམིཏཏྟཱ ལདྡྷསྶཱསོ ཧུཏྭཱ སཀྐོཏཱིཏི. ཨེཝཾ ཏེ ཨཱཡསྨནྟོ སཡམེཝ ཨཏྟཱནཾ ཝིགྷཱཏཾ པཱཔེནྟི. ན ཧི ‘‘མཧཱནམཀྐཱརཾ བྷཎནྟེན པཋམཝཱརེ བལཝཨུསྶཱཧེན བྷཎིཏབྦོ’’ཏི བྷགཝཏཱ པཉྙཏྟོ, དྷམྨསངྒཱཧཀཏྠེརེཧི ཝཱ ཋཔིཏོ ཨཏྠི. ཨེཝཾ སནྟེ ཡཐཱ པཱཏིམོཀྑུདྡེསཀེན པཱཏིམོཀྑཾ ཨུདྡིསནྟེན ཡཏྟཀཱ བྷིཀྑཱུ པཱཏིམོཀྑཾ སུཎནྟི, ཏེསཾ སཝནཔྤམཱཎེན ཡཱཝ པརིཡོསཱནཱ ཨུདྡིསིཏུཾ ཨཏྟནོ སརཔྤམཱཎཾ གཧེཏྭཱ པཱཏིམོཀྑོ ཨུདྡིསིཏབྦོ, ཨེཝཾ ཀམྨཝཱཙཾ བྷཎནྟེནཔི སཱིམམཎྜལེ ནིསིནྣབྷིཀྑཱུནཾ སཝནཔྤམཱཎེན ཡཱཝ པརིཡོསཱནཱ ཨཏྟནོ སརཔྤམཱཎཾ གཧེཏྭཱ བྷཎིཏབྦཱཏི.

ཨཔརེ པན ཨཱཙརིཡཱ མོ-ཀཱརཱདཱིསུ ཨོ-ཀཱརནྟཔདེསུ ཨཉྙེསཾ པདཱནཾ ཨཏིརེཀེན སརེན དྭཏྟིཀྑཏྟུཾ ¶ ཨནུཀརཎསདྡཾ ཨནུབནྡྷཱཔཡམཱནཱ བྷཎནྟི, ཏེསཾ ཨཱཙརིཡཱནཾ ཏཱདིསཾ བྷཎནཾ སུཏྭཱ པརིཙཡཔྤཏྟཱ ཨཉྙེ བྷིཀྑཱུ ཝཱ གཧཊྛཱ ཝཱ ཨཉྙེསཾ ¶ ཨཱཙརིཡཱནཾ ཀམྨཝཱཙཾ ན གརུཾ ཀརོནྟི, ཏཱཡ ཀམྨཝཱཙཱཡ ཨུཔསམྤདཱ ཨལབྷིཏབྦཱ ཝིཡ མཉྙནྟི, ཏཱདིསཾ པན བྷཎནཾ ཏེསཾ ཨཱཙརིཡཱནཾ སིསྶཱནུསིསྶཱ ཨེཝ ཏཐཱ བྷཎནྟི, ན ཨཉྙེ ཨཱཙརིཡཱ. ཏེ པན པོརཱཎཱཙརིཡཱནཾ སརསམྤནྣཱནཾ ཨནུཀརཎསདྡརཧིཏམྤི སཧིཏཾ ཝིཡ ཁཱཡམཱནཾ སུཎནྟཱནཾ ཨཏིམནོརཐཾ སདྡཾ སུཏྭཱ དིཊྛཱནུགཏིཾ ཨཱཔཛྫནྟཱ ཨེཝཾ ཀརོནྟི མཉྙེ. ན ཧི ཝིནཡེ ཝཱ སདྡསཏྠེསུ ཝཱ ཏཐཱ བྷཎིཏབྦནྟི ཨཏྠི, ཏསྨཱ ཝིཙཱརེཏབྦམེཏནྟི.

བཧཱུ པན བྷིཀྑཱུ ‘‘སིཐིལཾ དྷནིཏཉྩ དཱིགྷརསྶ’’ནྟིཨཱདིནཱ ཝིནཡེ ཀཐིཏཝིནིཙྪཡཉྩ ‘‘ཨེཏྠ པཉྩསུ ཝགྒེསཱུ’’ཏིཨཱདིནཱ སདྡསཏྠེསུ ཀཏཝིནིཙྪཡཉྩ ཨཛཱནནྟཱ པིཊཀཏྟཡཀོཝིདཱནཾ ཝིནཡདྷརབཧུསྶུཏཏྠེརཱནཾ སནྟིཀཱ ཨལདྡྷོཔདེསཱ ཧུཏྭཱ ཏཏྠ ཏཏྠ ཨུཔསམྤདཾ ཀརོནྟཱནཾ བྷིཀྑཱུནཾ ཝཙནམེཝ གཧེཏྭཱ ཧེཡྻོཔཱདེཡྻཾ ཨཛཱནནྟཱ པུབྦེ པརདེསཏོ ཨཱགཏཱནཾ པུཉྙཝནྟཱནཾ སརསམྤནྣཱནཾ མཧཱཐེརཱནཾ ཨནོསརེན བྷཎམཱནཱནཾ སརཾ སུཏྭཱ ཏེསཾ ཐེརཝརཱནཾ མཏིཾ ཨཔུཙྪིཏྭཱཝ ཡཐཱདིཊྛཾ ཡཐཱསུཏཾ ལིཁིཏྭཱ ཋཔེནྟཱ ཨནུཀྐམེན པཎྜིཏེཧི ཧསིཏབྦཾ ཨཡུཏྟཾ ཀཐཾ དཱིཔེནྟཱ ‘‘ཨིམསྨིཾ ཋཱནེ བྱགྒྷིཡཱ སདྡསདིསཾ སདྡཾ ཀརོནྟི, ཨིམསྨིཾ ཋཱནེ སཀུཎིཡཱ སདྡསདིསཾ སདྡཾ ཀརོནྟི, ཨིམསྨིཾ ཋཱནེ ཏམྦུལཀསཊཔཱཏཾ ཀརོནྟི, ཨིམསྨིཾ ཋཱནེ དཀྑིཎཏོ ནམནྟཱ བྷཎནྟི, ཨིམསྨིཾ ཋཱནེ ཝཱམཏོ ནམནྟཱ བྷཎནྟི, ཨིམསྨིཾ ཋཱནེ ཝིལཱསཾ ཀུརུམཱནཱ བྷཎནྟཱི’’ཏིཨཱདཱིནི ཝཏྭཱ ཏདེཝ སདྡཧནྟཱ རུཀྑམཱུལཨུམངྒལེཎཱདཱིསུ ནིསཱིདིཏྭཱ ཏམེཝ ཝཙནཾ ཨནུསིཀྑནྟཱ ཏདནུརཱུཔཾ ཀམྨཝཱཙཾ བྷཎནྟཱ ‘‘ཨཧཾ ཀམྨཝཱཙཱཀུསལོ’’ཏི ཝཏྭཱ བཱལཛནེ སཉྙཱཔེཏྭཱ ཏེསཾ ཏེསཾ ཨུཔསམྤདཱཔེཀྑཱནཾ ཀམྨཝཱཙཾ བྷཎནྟི, ཨིམེ བྷིཀྑཱུ བྷགཝཏོ ཨཱཎཾ ཨཏིཀྐཱམེནྟི, སཱསནཾ ཨོསཀྐཱཔེནྟཱིཏི དཊྛབྦཱ.

ཨཐཱཔརེཔི ¶ བྷིཀྑཱུ གཱམཀཱཝཱསཱདཱིསུ ཝསནྟཱ པཎྜིཏཱནཾ སནྟིཀེ ཨཔཡིརུཔཱསམཱནཱ ཝཏྠུསམྤཏྟིམྤི ཝཏྠུཝིཔཏྟིམྤི ཉཏྟིཨནུསྶཱཝནསཱིམཔརིསསམྤཏྟིམྤི ཝིཔཏྟིམྤི ཏཐཏོ ཨཛཱནནྟཱ བཧཝོ སིསྶེ ཋཔེཏྭཱ པབྦཛྫཉྩ ཨུཔསམྤདཉྩ ཀརོནྟཱ པརིསཾ ཝཌྜྷཱཔེནྟི, ཏེཔི བྷགཝཏོ སཱསནཾ ཨོསཀྐཱཔེནྟི, ཏསྨཱ བྷགཝཏོ ཨཱཎཾ ཀརོནྟེཧི ལཛྫཱིཔེསལེཧི བཧུསྶུཏེཧི སིཀྑཱཀཱམེཧི སཔྤུརིསབྷིཀྑཱུཧི ཨེཝརཱུཔཱནཾ བྷིཀྑཱུནཾ སཧཱཡཀེཧི ཨུཔཏྠམྦྷཀེཧི ཨེཀསམྦྷོགསཾཝཱསཀརེཧི ན བྷཝིཏབྦཾ. ཨིདཱནི བྷིཀྑཱུ –

‘‘ཙ-ཀཱརནྟཾ ¶ ས-ཀཱརནྟཾ, ཏ-ཀཱརནྟསམཾ ཝདེ;

ཉ-ཀཱརནྟཾ ལ-ཀཱརནྟཾ, ན-ཀཱརནྟསམཾ ཝདེ’’ཏི. –

ཨིམཾ སིལོཀཾ ཨུཔནིསྶཱཡ སརཎགམནེཔི ‘‘བུདྡྷཾ སརཎཾ གཙྪཱམཱི’’ཏི པཱཋཾ ‘‘བུདྡྷཾ སརཎཾ གཙྪཱམཱི’’ཏི པཋནྟི. ཀམྨཝཱཙཱཡམྤི ‘‘པཋམཾ ཨུཔཛ྄ཛྷཾ གཱཧཱཔེཏབྦོ’’ཏིཨཱདིཔཱཋཾ ‘‘པཋམཾ ཨུཔཛ྄ཛྷཾ གཱཧཱཔེཏབྦོ’’ཏིཨཱདིནཱ པཋནྟི. ཨེཏྠ ཡུཏྟིཏོཔི ཨཱགམཏོཔི ཀཱརཎཾ ཙིནྟེཏབྦཾ.

ཏཏྲཱཡཾ ཡུཏྟིཙིནྟཱ – ‘‘ཙ-ཀཱརནྟཾ ས-ཀཱརནྟཾ, ཏ-ཀཱརནྟསམཾ ཝདེ’’ཏི ཨེཏྠ ཙ-ཀཱརོ ཏཱལུཛོ, ཏ-ཀཱརོ དནྟཛོ, ཨེཝམེཏེ ཨཀྑརཱ ཋཱནཏོཔི ཨསམཱནཱ. ཙ-ཀཱརོ ཛིཝ྄ཧཱམཛ྄ཛྷཀརཎོ, ཏ-ཀཱརོ ཛིཝ྄ཧགྒཀརཎོ, ཨེཝཾ ཀརཎཏོཔི ཨསམཱནཱ. ཙ-ཀཱརོ དུཏིཡཝགྒཔརིཡཱཔནྣོ, ཏ-ཀཱརོ ཙཏུཏྠཝགྒཔརིཡཱཔནྣོ, ཨེཝཾ ཝགྒཏོཔི ཨསམཱནཱ. སཾཡོགཀྑརཝསེན ན པུབྦཀྑརཱ སུཏིཾ ལབྷནྟཱ སརཝིསེསཾ པཱཔུཎནྟི, ཏེནེཝ ཙ-ཀཱརེན སདྡསཏྠཀཱརཱཙརིཡཱ ‘‘སཾཡོགེ པརེ རསྶཏྟ’’ནྟི ཙ ‘‘སཾཡོགཔུབྦཱ ཨེ-ཀཱརོ-ཀཱརཱ རསྶཱཨིཝ ཝཏྟབྦཱ’’ཏི ཙ ཝདནྟི. ཨེཝཾ སནྟེ ཀཐཾ ཨསམཱནཊྛཱནིཀེན ཨསམཱནཀརཎེན ཨསམཱནཝགྒེན སཾཡོགཀྑརེན ལདྡྷསུཏིཀཱ ཨཀྑརཱ ཏཏོ ཨཉྙེན ཨསམཱནཊྛཱནིཀེན ཨསམཱནཀརཎེན ཨསམཱནཝགྒེན ¶ སཾཡོགཀྑརེན ལདྡྷསམཱནསུཏིཀཱ བྷཝེཡྻུཾ. ན ཀེཝལཉྩ ཨེཏེ ཨཀྑརཱ ཨསམཱནཊྛཱནིཀཱ ཨསམཱནཀརཎཱ ཨསམཱནཝགྒཱཝ ཧོནྟི, ཨཐ ཁོ ཨནཱསནྣཊྛཱནིཀཱ ཨནཱསནྣཀརཎཱ ཨནཱསནྣཝགྒཱ ཙ ཧོནྟི. ཡཐཱ ཙ ཝཱིཎཾ ཝཱདེནྟཱནཾ དཱུརེ ཏནྟིསྶརེན ཏཏོ དཱུརེ ཏནྟིསྶརོ ཨསམཱནོ ཧོཏི, ཨེཝཾ དཱུརཊྛཱནིཀེན ཨཀྑརེན དཱུརཀརཎེན ཏཏོ དཱུརཊྛཱནིཀོ དཱུརཀརཎོ སམཱནསུཏིཀོ ཀཐཾ བྷཝེཡྻ, ཝགྒཀྑརཱནཉྩ ཨཉྙམཉྙཾ ཨསངྐརཝསེན ཨསམཱནསུཏིཝསེན པཝཏྟནཏོ ‘‘ཝགྒནྟཾ ཝཱ ཝགྒེ’’ཏི སུཏྟེ ནིགྒཧིཏསྶ ཝགྒནྟཀརཎེ སཏི ཨཉྙཝགྒསྨིཾ པརེ ཨཉྙཝགྒནྟཾ ན པཱཔུཎཱཏི, ‘‘ཝགྒེ གྷོསཱགྷོསཱནཾ ཏཏིཡཔཋམཱ’’ཏི སུཏྟེན ཙ ཨསདིསདྭེབྷཱཝཀརཎེ ཨཉྙཝགྒེ ཨཉྙཝགྒདྭེབྷཱཝོ ན ཧོཏི.

ཡདི ཙ ཙ-ཀཱརནྟཀྑརོ ཏ-ཀཱརནྟཀྑརེན སམཱནསུཏིཀོ སིཡཱ, ཨེཝཾ སཏི ཀིཾ ཙ-ཀཱརནྟཀྑརལེཁནེན སབྦཏྠ ཏ-ཀཱརནྟམེཝ ལིཁེཡྻ, ཏཐཱ པན ཨལིཁིཏྭཱ པཡོགཱནུརཱུཔཾ པཋམཀྑརསྶ སདིསདྭེབྷཱཝཊྛཱནེ ‘‘ཀཙྩོ ཀཙྩཱཡནོ’’ཏི, ཨསདིསདྭེབྷཱཝཊྛཱནེ ‘‘ཝཙྪོ ཝཙྪཱཡནོ’’ཏི ཏཏིཡཀྑརསྶ སདིསདྭེབྷཱཝཊྛཱནེ ‘‘མཛྫཾ སམྨཛྫ’’ནྟི, ཨསདིསདྭེབྷཱཝཊྛཱནེ ‘‘ཨུཔཛ྄ཛྷཱ ¶ ཨུཔཛ྄ཛྷཱཡོ’’ཏི སམཱནཊྛཱནསམཱནཀརཎསམཱནཝགྒཀྑརཱནམེཝ དྭེབྷཱཝོ ལིཁཱིཡཏི, ནོ ཨིཏརེསཾ, ཏསྨཱ པཡོགཱནུརཱུཔཾ ཙ-ཀཱརནྟ ཛ-ཀཱརནྟཊྛཱནེསུ སཀཝགྒསུཏིཝསེནེཝ ཝཏྟབྦཾ, ན ཨཉྙཝགྒསུཏིཝསེན. ས-ཀཱརནྟེ པན ས-ཀཱརསྶ ཏ-ཀཱརེན སམཱནཊྛཱནིཀཏྟཱ སམཱནཀརཎཏྟཱ ཙ ཝགྒཨཝགྒཝསེན བྷིནྣེཔི ཨཝགྒཀྑརཱནཾ ཝགྒཀྑརེཧི སཱདྷཱརཎཏྟཱ ཙ ཨཝགྒཀྑརཱནཾ ཝགྒཀྑརཱནཾ ཝིཡ ཝིསུཾ སུཏིཡཱ ཨབྷཱཝཏོ ཙ ས-ཀཱརནྟསྶ ཏ-ཀཱརནྟབྷཎནཾ ཡུཏྟཾ སིཡཱ. ས-ཀཱརོཔི ཧི དནྟཛོ, ཏ-ཀཱརོཔི, ས-ཀཱརོཔི ཛིཝ྄ཧགྒཀརཎོ, ཏ-ཀཱརོཔི ¶ , ཏསྨཱ སམཱནཊྛཱནིཀཱནཾ སམཱནཀརཎཱནཾ ཨཀྑརཱནཾ སམཱནསུཏིབྷཱཝོ ཡུཏྟོ. ཉ-ཀཱརནྟ ལ-ཀཱརནྟཱནཾ ན-ཀཱརནྟབྷཎནེཔི ཨིམིནཱ ནཡེན ཉ-ཀཱརནྟ ན-ཀཱརནྟཱནཾ ཨསམཱནསུཏིབྷཱཝོ ལ-ཀཱརནྟ ན-ཀཱརནྟཱནཾ སམཱནསུཏིབྷཱཝོ དཊྛབྦོཏི. ཨཡམེཏྠ ཡུཏྟིཙིནྟཱ.

ཨཱགམཙིནྟཱ པན ཨེཝཾ ཀཱཏབྦཱ –

‘‘ཙ-ཀཱརནྟཾ ས-ཀཱརནྟཾ, ཏ-ཀཱརནྟསམཾ ཝདེ;

ཉ-ཀཱརནྟཾ ལ-ཀཱརནྟཾ, ན-ཀཱརནྟསམཾ ཝདེ’’ཏི. –

ཨཡཾ སིལོཀོ ཀུཏོ པབྷཝོ, ཀཏྠ ཨཱགཏོ, ཀེན ཀཱརིཏོཏི? ཏཏྠ ཀུཏོ པབྷཝོཏི བྷགཝནྟསྨཱ ཝཱ དྷམྨསངྒཱཧཀཏྠེརེཧི ཝཱ ཨཊྛཀཐཱཙརིཡེཧི ཝཱ པབྷཝོ. ཀཏྠ ཨཱགཏོཏི ཝིནཡེ ཝཱ སུཏྟནྟེ ཝཱ ཨབྷིདྷམྨེ ཝཱ པཱལི༹ཡཾ ཝཱ ཨཊྛཀཐཱཡ ཝཱ ཊཱིཀཱདཱིསུ ཝཱ ཨཱགཏོ. ཀེན ཀཱརིཏོཏི ནེཏྟིནིརུཏྟིཔེཊཀོཔདེསཀཙྩཱཡནཔྤཀརཎཀཱརཀེན ཨཱཡསྨཏཱ མཧཱཀཙྩཱཡནཏྠེརེན ཝཱ མུཁམཏྟདཱིཔནིཀཱརཀེན ཝཛིརབུདྡྷཱཙརིཡེན ཝཱ པདརཱུཔསིདྡྷིཀཱརཀེན བུདྡྷཔིཡཱཙརིཡེན ཝཱ སདྡནཱིཏིཔྤཀརཎཀཱརཀེན ཨགྒཝཾསཱཙརིཡེན ཝཱ ཏདཉྙསཏྠཀཱརཀེཧི མཧཱཐེརེཧི ཝཱ ཀཱརིཏོཏི ཨེཝཾ ཨཱགམཙིནྟཱཡཾ སཏི ཨཡཾ སིལོཀོ བྷགཝནྟསྨཱ པབྷཝོ དྷམྨསངྒཱཧཀཏྠེརེཧི ཝཱ ཨཊྛཀཐཱཙརིཡེཧི ཝཱཏི ན པཉྙཱཡཏི. ‘‘ཝིནཡེ ཝཱ སུཏྟནྟེ ཝཱ ཨབྷིདྷམྨེ ཝཱ པཱལི༹ཡཾ ཝཱ ཨཊྛཀཐཱཡ ཝཱ ཊཱིཀཱསུ ཝཱ ཨཱགཏོ’’ཏི ཧི ན སཀྐཱ ཝཏྟུཾ. ཀཙྩཱཡནཱཙརིཡཱདཱིཧི སདྡསཏྠཀཱརཀེཧི ཨཱཙརིཡེཧི ཀཏོཏིཔི ན དིསྶཏི. ཨེཝཾ སནྟེ ཨཔྤཱཊིཧཱིརཀཏཾ ཨིདཾ ཝཙནཾ ཨཱཔཛྫཏི.

ཨེཝཾ པན མཡཾ ཙིནྟཡིམྷཱ – རཱམཉྙདེསེ ཀིར སཀབྷཱསཱཡཾ ཙ-ཀཱརནྟ ཉ-ཀཱརནྟཱ ན སནྟི ¶ , ཏེནེཝ རཱམཉྙདེསིཡཱ བྷིཀྑཱུ ¶ ‘‘སཙྩ’’ཨིཏི ཨིམཾ པཱཋཾ ཝདནྟཱ ‘‘སཏྩ’’ཨིཏི ཝདནྟི, ‘‘པཉྩངྒ’’ཨིཏི པཱཋཾ ཝདནྟཱ ‘‘པནྩངྒ’’ཨིཏི ཝདནྟི, ཏསྨཱ ཨཏྟནོ ཝིསཡེ ཨཝིཛྫམཱནཾ ཙ-ཀཱརནྟ ཉ-ཀཱརནྟཾ ཡཐཱཔཱཋཾ ཝཏྟུམསཀྐོནྟེཧི ཏེཧི བྷིཀྑཱུཧི སཀབྷཱསཱནུརཱུཔཏོ ཨཡཾ སིལོཀོ ཀཱརིཏོ བྷཝིསྶཏཱིཏི. ཨེཝཾ སནྟེཔི མརམྨབྷཱསཱཡ ཙ-ཀཱརནྟ ཉ-ཀཱརནྟཔདཱནཾ སུཏིཝིསེསཝསེན ཝིསུཾ པཉྙཱཡནཏོ མརམྨདེསིཡཱ བྷིཀྑཱུ ཏཾ སིལོཀཾ ཨནུཝཏྟིཏྭཱ ‘‘བུདྡྷཾ སརཎཾ གཙྪཱམཱི’’ཏི ཝཱ ‘‘པཋམཾ ཨུཔཏྫྷཾ གཱཧཱཔེཏབྦོ’’ཏི ཝཱ ‘‘ཧེཏུཔཏྩཡོ ཨཱརམྨཎཔཏྩཡོ’’ཏི ཝཱ ཝཏྟུཾ ན ཨརཧནྟི. རཱམཉྙདེསིཡཱཔི སཀབྷཱསཱཡ ཝིསུཾ ཨཝིཛྫམཱནམྤི ཙ-ཀཱརནྟ ཉ-ཀཱརནྟཔདཾ སཀབྷཱསཱཀཐནཀཱལེཡེཝ བྷཱསཱནུརཱུཔཾ ཏ-ཀཱརནྟ ན-ཀཱརནྟབྷཱཝེན ཀཐེཏབྦཾ, མཱགདྷབྷཱསཱཀཐནཀཱལེ པན མཱགདྷབྷཱསཱཡ ཙ-ཀཱརནྟ ཉ-ཀཱརནྟཔདཱནཾ ཝིསུཾ པཡོགདསྶནཏོ མཱགདྷབྷཱསཱནུརཱུཔཾ ཙ-ཀཱརནྟ ཉ-ཀཱརནྟཔདཱནཾ ཝིསུཾ སུཏིཝསེན ཡཐཱཔཱཋམེཝ ཀཐེཏབྦཱནཱིཏི ནོ མཏི. ཨཡམེཏྠ ཨཱགམཙིནྟཱ.

ཛིནསཱསནམཱརབྦྷ, ཀཐཱཡཾ ཀཐིཏཱ མཡཱ;

ཡུཏྟཱཡུཏྟཾ ཙིནྟཡནྟུ, པཎྜིཏཱ ཛིནསཱཝཀཱ.

ཡུཏྟཱཡུཏྟཾ ཙིནྟཡིཏྭཱ, ཡུཏྟཉྩེ དྷཱརཡནྟུ ཏཾ;

ཨཡུཏྟཉྩེ པཛཧནྟུ, མཱནདོསཝིཝཛྫིཏཱཏི.

༢༥༤. ཨེཝཾ ཙཏུནྣཾ ཀམྨཱནཾ སམྤཏྟིཝིཔཏྟིཾ དསྶེཏྭཱ ཨིདཱནི ཏེསཾ ཀམྨཱནཾ ཋཱནཔྤབྷེདཾ དསྶེནྟོ ‘‘ཨཔལོཀནཀམྨཾ ཀཏམཱནི པཉྩ ཋཱནཱནི གཙྪཏཱི’’ཏིཨཱདིམཱཧ. ཏཏྠ ཝིནིཙྪཡོ ཨཊྛཀཐཱཡཾ ཝུཏྟནཡེནེཝ ཝེདིཏབྦོ. ཨནུཏྟཱནཔདཏྠམེཝ དསྶཡིསྶཱམ. ‘‘ཨེཏརཧི སཙེཔི སཱམཎེརོ’’ཏིཨཱདཱིསུ བུདྡྷཱདཱིནཾ ཨཝཎྞབྷཱསནམྤི ཨཀཔྤིཡཱདིཾ ཀཔྤིཡཱདིབྷཱཝེན དཱིཔནམྤི དིཊྛིཝིཔཏྟིཡཾཡེཝ པཝིསཏི, ཏེནེཝ ཝཀྑཏི ‘‘ཏཾ ལདྡྷིཾ ཝིསྶཛྫཱཔེཏབྦོ’’ཏི. བྷིཀྑཱུནམྤི ཨེསེཝ ¶ ནཡོ. མིཙྪཱདིཊྛིཀོཏི བུདྡྷཝཙནཱདྷིཔྤཱཡཾ ཝིཔརཱིཏཏོ གཎྷནྟོ, སོ ཨེཝ ‘‘ཨནྟགྒཱཧིཀཱཡ དིཊྛིཡཱ སམནྣཱགཏོ’’ཏི ཝུཏྟོ. ཀེཙི པན ‘‘སསྶཏུཙྪེདཱནཾ ཨཉྙཏརདིཊྛིཡཱ སམནྣཱགཏོ’’ཏི ཝདནྟི, ཏཾ ན ཡུཏྟཾ. སསྶཏུཙྪེདགཱཧསྶ སཱམཎེརཱནཾ ལིངྒནཱསནཱཡ ཀཱརཎཏྟེན ཧེཊྛཱ ཨཊྛཀཐཱཡམེཝ ཝུཏྟཏྟཱ ཨིདྷ ཙ དཎྜཀམྨནཱསནཱཡ ཨེཝ ཨདྷིཔྤེཏཏྟཱ. ཀཱཡསམྦྷོགསཱམགྒཱིཏི ¶ སཧསེཡྻཔཊིགྒཧཎཱདི. སོརཏོཏི སུབྷེ རཏོ, སུཊྛུ ཨོརཏོཏི ཝཱ སོརཏོ. ནིཝཱཏཝུཏྟཱིཏི ནཱིཙཝུཏྟི.

ཏསྶཱཔི དཱཏབྦོཏི ཝིཛྫམཱནཾ མུཁརཱདིབྷཱཝཾ ནིསྶཱཡ ཨཔྤཊིཔུཙྪིཏྭཱཔི པཊིཉྙཾ ཨགྒཧེཏྭཱཔི ཨཱཔཏྟིཾ ཨནཱརོཔེཏྭཱཔི དེསིཏཱཡཔི ཨཱཔཏྟིཡཱ ཁུཾསནཱདིཏོ ཨནོརམནྟསྶ དཱཏབྦོཝ. ཨོརམནྟསྶ པན ཁམཱཔེནྟསྶ ན དཱཏབྦོ. བྲཧྨདཎྜསྶ དཱནནྟི ཁརདཎྜསྶ ཨུཀྐཊྛདཎྜསྶ དཱནཾ. ཏཛྫནཱིཡཱདིཀམྨེ ཧི ཀཏེ ཨོཝཱདཱནུསཱསནིཔྤདཱནཔཊིཀྑེཔོ ནཏྠི, དིནྣབྲཧྨདཎྜེ པན ཏསྨིཾ སདྡྷིཾ ཏཛྫནཱིཡཀམྨཱདིཀཏེཧི པཊིཀྑིཏྟམྤི ཀཱཏུཾ ན ཝཊྚཏི ‘‘ནེཝ ཝཏྟབྦོ’’ཏིཨཱདིནཱ ཨཱལཱཔསལླཱཔམཏྟསྶཔི ན-ཀཱརེན པཊིཀྑིཏཏྟཱ. ཏཉྷི དིསྭཱ བྷིཀྑཱུ གཱིཝཾ པརིཝཏྟེཏྭཱ ཨོལོཀནམཏྟམྤི ན ཀརོནྟི, ཨེཝཾ ཝིཝཛྫེཏབྦཾ ནིམྨདནཀརཎཏྠམེཝ ཏསྶ དཎྜསྶ ཨནུཉྙཱཏཏྟཱ. ཏེནེཝ ཚནྣཏྠེརོཔི ཨུཀྑེཔནཱིཡཱདིཀམྨཀཏོཔི ཨབྷཱཡིཏྭཱ བྲཧྨདཎྜེ དིནྣེ ‘‘སངྒྷེནཱཧཾ སབྦཐཱ ཝིཝཛྫིཏོ’’ཏི མུཙྪིཏོ པཔཏི. ཡོ པན བྲཧྨདཎྜཀཏེན སདྡྷིཾ ཉཏྭཱ སཾསཊྛོ ཨཝིཝཛྫེཏྭཱ ཝིཧརཏི, ཏསྶ དུཀྐཊམེཝཱཏི གཧེཏབྦཾ. ཨཉྙཐཱ བྲཧྨདཎྜཝིདྷཱནསྶ ནིརཏྠཀཏཱཔསངྒཏོ. ཏེནཱཏི བྲཧྨདཎྜཀཏེན. ཡཐཱ ཏཛྫནཱིཡཱདིཀམྨཀཏེཧི, ཨེཝམེཝ ཏཏོ ཨདྷིཀམྤི སངྒྷཾ ཨཱརཱདྷེནྟེན སམྨཱ ཝཏྟིཏབྦཾ, ཏཉྩ ‘‘སོརཏོ ¶ ནིཝཱཏཝུཏྟཱི’’ཏིཨཱདིནཱ སརཱུཔཏོ དསྶིཏམེཝ. ཏེནཱཧ ‘‘སམྨཱ ཝཏྟིཏྭཱ ཁམཱཔེནྟསྶ བྲཧྨདཎྜོ པཊིཔྤསྶམྦྷེཏབྦོ’’ཏི. པཊིསངྑཱཏི པཊིསངྑཱཡ, ཉཱཎེན ཨུཔཔརིཀྑིཏྭཱ.

ཡཾ ཏཾ བྷགཝཏཱ ཨཝནྡིཡཀམྨཾ ཨནུཉྙཱཏནྟི སམྦནྡྷོ. ‘‘ཏསྶ བྷིཀྑུནོ དཎྜཀམྨཾ ཀཱཏུ’’ནྟི སཱམཉྙཏོ ཨནུཉྙཱཏཔྤཀཱརཾ དསྶེཏྭཱ པུན ཝིསེསཏོ ཨནུཉྙཱཏཔྤཀཱརཾ དསྶེཏུཾ ‘‘ཨཐ ཁོ’’ཏིཨཱདི པཱལི༹ཨུདྡྷཊཱཏི ཝེདིཏབྦཾ. ཨིམསྶ ཨཔལོཀནཀམྨསྶ ཋཱནཾ ཧོཏཱིཏི ཨཔལོཀནཀམྨསཱམཉྙསྶ པཝཏྟིཊྛཱནཾ ཧོཏི. ཝིསེསབྱཏིརེཀེན ཨཝིཛྫམཱནམྤི ཏདཉྙཏྠ ཨཔྤཝཏྟིཾ དསྶེཏུཾ ཝིསེསནིསྶིཏཾ ཝིཡ ཝོཧརཱིཡཏི. ‘‘ཀམྨཉྙེཝ ལཀྑཎ’’ནྟི ཨིམིནཱ ཨོསཱརཎཱདིཝསེན གཧིཏཱཝསེསཱནཾ སབྦེསཾ ཨཔལོཀནཀམྨསཱམཉྙལཀྑཎཝསེན གཧིཏཏྟཱ ‘‘ཀམྨཉྙེཝ ལཀྑཎམསྶཱཏི ཀམྨལཀྑཎ’’ནྟི ནིབྦཙནཾ དསྶེཏི, ཨིདཉྩ ཝུཏྟཱཝསེསཱནཾ ཀམྨཱནཾ ནིཊྛཱནཊྛཱནཾ སངྑཱརཀྑནྡྷདྷམྨཱཡཏནཱདཱིནི ཝིཡ ཝུཏྟཱཝསེསཁནྡྷཱཡཏནཱནནྟི དཊྛབྦཾ. ཏེནེཝ ཝཀྑཏི ‘‘ཨཡཾ པནེཏྠ པཱལི༹མུཏྟཀོཔི ཀམྨལཀྑཎཝིནིཙྪཡོ’’ཏིཨཱདི. ཡཐཱ ཙེཏྠ, ཨེཝཾ ¶ ཨུཔརི ཉཏྟིཀམྨཱདཱིསུཔི ཀམྨལཀྑཎཾ ཝུཏྟནྟི ཝེདིཏབྦཾ. སཱརཏྠདཱིཔནིཡཾ (སཱརཏྠ. ཊཱི. པརིཝཱར ༣.༤༩༥-༤༩༦) པན ‘‘ཀམྨམེཝ ལཀྑཎནྟི ཀམྨལཀྑཎཾ. ཨོསཱརཎནིསྶཱརཎབྷཎྜུཀམྨཱདཡོ ཝིཡ ཀམྨཉྩ ཧུཏྭཱ ཨཉྙཉྩ ནཱམཾ ན ལབྷཏི, ཀམྨམེཝ ཧུཏྭཱ ཨུཔལཀྑཱིཡཏཱིཏི ཀམྨལཀྑཎནྟི ཝུཙྩཏཱི’’ཏི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. པརིཝཱར ༤༩༥-༤༩༦) པན ‘‘ཨིམསྶ ཨཔལོཀནཀམྨསྶ ཋཱནཾ ཧོཏཱིཏི ཨེཝམྤི ཨཔལོཀནཀམྨཾ པཝཏྟཏཱིཏི ཨཏྠོ. ཀམྨཉྙེཝ ལཀྑཎནྟི ཀམྨལཀྑཎཾ. ཨོསཱརཎནིསྶཱརཎབྷཎྜུཀམྨཱདཡོ ཝིཡ ཀམྨཉྩ ཧུཏྭཱ ཨཉྙཉྩ ནཱམཾ ན ལབྷཏི, ཀམྨམེཝ ཧུཏྭཱ ཨུཔལཀྑཱིཡཏཱིཏི ¶ ཀམྨལཀྑཎཾ ཨུཔནིསྶཡོ ཝིཡ. ཧེཏུཔཙྩཡཱདིལཀྑཎཝིམུཏྟོ ཧི སབྦོ པཙྩཡཝིསེསོ ཏཏྠ སངྒཡ྄ཧཏཱི’’ཏི ཝུཏྟཾ. ཏསྶ ཀརཎནྟི ཨཝནྡིཡཀམྨསྶ ཀརཎཝིདྷཱནཾ. ན ཝནྡིཏབྦོཏི, ཨིམིནཱ ཝནྡནྟིཡཱ དུཀྐཊནྟི དསྶེཏཱིཏི དཊྛབྦཾ. སངྒྷེན ཀཏཾ ཀཏིཀཾ ཉཏྭཱ མདྡནཾ ཝིཡ ཧི སངྒྷསམྨུཏིཾ ཨནཱདརེན ཨཏིཀྐམནྟསྶ ཨཱཔཏྟི ཨེཝ ཧོཏི.

༢༥༥. བྷིཀྑུསངྒྷསྶཔི པནེཏཾ ལབྦྷཏིཡེཝཱཏི ཨཝནྡིཡཀམྨསྶ ཨུཔལཀྑཎམཏྟེན གཧིཏཏྟཱ བྷིཀྑུསངྒྷསྶཔི ཀམྨལཀྑཎཾ ལབྦྷཏི ཨེཝ. སལཱཀདཱནཊྛཱནཾ སལཱཀགྒཾ ནཱམ, ཡཱགུབྷཏྟཱནཾ བྷཱཛནཊྛཱནཱནི ཡཱགགྒབྷཏྟགྒཱནི ནཱམ. ཨེཏེསུཔི ཧི ཋཱནེསུ སབྦོ སངྒྷོ ཨུཔོསཐེ ཝིཡ སནྣིཔཏིཏོ, ཀམྨཉྩ ཝགྒཀམྨཾ ན ཧོཏི, ‘‘མཡམེཏཾ ན ཛཱནིམྷཱ’’ཏི པཙྪཱ ཁཱིཡནྟཱཔི ན ཧོནྟི, ཁཎྜསཱིམཱཡ པན ཀཏེ ཁཱིཡནྟི. སངྒྷིཀཔཙྩཡཉྷི ཨཙྪིནྣཙཱིཝརཱདཱིནཾ དཱཏུཾ ཨཔལོཀེནྟེཧི ཨུཔཙཱརསཱིམཊྛཱནཾ སབྦེསཾ ཨནུམཏིཾ གཧེཏྭཱཝ ཀཱཏབྦཾ. ཡོ པན ཝིསབྷཱགཔུགྒལོ དྷམྨིཀཾ ཨཔལོཀནཾ པཊིབཱཧཏི, ཏཾ ཨུཔཱཡེན བཧིཨུཔཙཱརསཱིམགཏཾ ཝཱ ཀཏྭཱ ཁཎྜསཱིམཾ ཝཱ པཝིསིཏྭཱ ཀཱཏུཾ ཝཊྚཏི. ཡཾ སནྡྷཱཡ ‘‘ཨཔལོཀནཀམྨཾ ཀརོཏཱི’’ཏི སཱམཉྙཏོ དསྶེཏི, ཏཾ ཨཔལོཀནཀམྨཾ སརཱུཔཏོ དསྶེཏུཾ ཨཱཧ ‘‘ཨཙྪིནྣཙཱིཝརཾ’’ཨིཙྩཱདི. ཡདི ཨཔལོཀེཏྭཱཝ ཙཱིཝརཾ དཱཏབྦཾ, ཀིཾ པན ཨཔྤམཏྟཀཝིསྶཛྫཀསམྨུཏིཡཱཏི ཨཱཧ ‘‘ཨཔྤམཏྟཀཝིསྶཛྫཀེན པནཱ’’ཏིཨཱདི. ནཱལི༹ ཝཱ ཨུཔཌྜྷནཱལི༹ ཝཱཏི དིཝསེ དིཝསེ ཨཔལོཀེཏྭཱ དཱཏབྦསྶ པམཱཎདསྶནཾ. ཏེན ཡཱཔནམཏྟམེཝ ཨཔལོཀེཏབྦཾ, ན ཨདྷིཀནྟི དསྶེཏི. ཨེཀདིཝསཾཡེཝ ཝཱཏིཨཱདི དསཝཱིསཏིདིཝསཱནཾ ཨེཀསྨིཾ དིཝསེཡེཝ དཱཏབྦཔརིཙྪེདདསྶནཾ. ཏེན ‘‘ཡཱཝཛཱིཝ’’ནྟི ཝཱ ‘‘ཡཱཝརོགཱ ¶ ཝུཊྛཧཏཱི’’ཏི ཝཱ ཨེཝཾ ཨཔལོཀེཏུཾ ན ཝཊྚཏཱིཏི དསྶེཏི. ཨིཎཔལིབོདྷནྟི ཨིཎཝཏྠུཾ དཱཏུཾ ཝཊྚཏཱིཏི སམྦནྡྷོ. ཏཉྩ ཨིཎཱཡིཀེཧི པལིབུདྡྷསྶ ལཛྫཱིཔེསལསྶ སཱསནུཔཀཱརཀསྶ པམཱཎཡུཏྟམེཝ ཀཔྤིཡབྷཎྜཾ ནིཡམེཏྭཱ ¶ བྷིཀྑཱུཧི ཨཔལོཀེཏྭཱ དཱཏབྦཾ, ན པན སཧསྶཾ ཝཱ སཏསཧསྶཾ ཝཱ མཧཱཨིཎཾ. ཏཱདིསཉྷི བྷིཀྑཱཙརིཡཝཏྟེན སབྦེཧི བྷིཀྑཱུཧི ཏཱདིསསྶ བྷིཀྑུནོ པརིཡེསིཏྭཱ དཱཏབྦཾ.

‘‘ཚཏྟཾ ཝཱ ཝེདིཀཾ ཝཱཏི ཨེཏྠ ཝེདིཀཱཏི ཙེཏིཡསྶ ཨུཔརི ཙཏུརསྶཙཡོ ཝུཙྩཏི. ཚཏྟནྟི ཏཏོ ཨུདྡྷཾ ཝལཡཱནི དསྶེཏྭཱ ཀཏོ ཨགྒཙཡོ ཝུཙྩཏཱི’’ཏི སཱརཏྠདཱིཔནིཡཾ (སཱརཏྠ. ཊཱི. པརིཝཱར ༣.༤༩༥-༤༩༦) ཝུཏྟཾ. ཙེཏིཡསྶ ཨུཔནིཀྑེཔཏོཏི ཙེཏིཡསྶ པཊིཛགྒནཏྠཱཡ ཝཌྜྷིཡཱ པཡོཛེཏྭཱ ཀཔྤིཡཀཱརཀེཧི ཋཔིཏཝཏྠུཏོ. སངྒྷིཀེནཔཱིཏི ན ཀེཝལཉྩ ཏཏྲུཔྤཱདཏོ པཙྩཡདཱཡཀེཧི ཙཏུཔཙྩཡཏྠཱཡ སངྒྷསྶ དིནྣཝཏྠུནཱཔཱིཏི ཨཏྠོ. སངྒྷབྷཏྟཾ ཀཱཏུཾ ན ཝཊྚཏཱིཏི མཧཱདཱནཾ དདནྟེཧིཔི ཀརིཡམཱནཾ སངྒྷབྷཏྟཾ ཝིཡ ཀཱརེཏུཾ ན ཝཊྚཏཱིཏི ཨདྷིཔྤཱཡོ. ‘‘ཡཐཱསུཁཾ པརིབྷུཉྫིཏུཾ རུཙྩཏཱི’’ཏི ཝུཏྟཏྟཱ ཨཏྟནོ ཨཏྟནོ པརིབྷོགཔཧོནཀཾ ཨཔྤཾ ཝཱ བཧུཾ ཝཱ གཧེཏབྦཾ, ཨདྷིཀཾ པན གཧེཏུཾ ན ལབྷཏི.

ཨུཔོསཐདིཝསེཏི ནིདསྶནམཏྟཾ, ཡསྨིཾ ཀིསྨིཉྩི དིཝསེཔི ཀཏཾ སུཀཏམེཝ ཧོཏི. ཀརོནྟེན ‘‘ཡཾ ཨིམསྨིཾ ཝིཧཱརེ ཨནྟོསཱིམཱཡ སངྒྷསནྟཀཾ…པེ… ཡཐཱསུཁཾ པརིབྷུཉྫིཏུཾ མཡ྄ཧཾ རུཙྩཏཱི’’ཏི ཨེཝཾ ཀཏིཀཱ ཀཱཏབྦཱ. ཏཐཱ དྭཱིཧི ཏཱིཧིཔི ‘‘ཨཱཡསྨནྟཱནཾ རུཙྩཏཱི’’ཏི ཝཙནམེཝ ཧེཏྠ ཝིསེསོ. ཏེསམྤཱིཏི རུཀྑཱནཾ. སཱ ཨེཝ ཀཏིཀཱཏི ཝིསུཾ ཀཏིཀཱ ན ཀཱཏབྦཱཏི ཨཏྠོ.

ཏེསནྟི ¶ རུཀྑཱནཾ, སངྒྷོ སཱམཱིཏི སམྦནྡྷོ. པུརིམཝིཧཱརེཏི པུརིམེ ཡཐཱསུཁཾ པརིབྷོགཏྠཱཡ ཀཏཀཏིཀེ ཝིཧཱརེ. པརིཝེཎཱནི ཀཏྭཱ ཛགྒནྟཱིཏི ཡཏྠ ཨརཀྑིཡམཱནེ ཕལཱཕལཱནི རུཀྑཱ ཙ ཝིནསྶནྟི, ཏཱདིསཾ ཋཱནཾ སནྡྷཱཡ ཝུཏྟཾ, ཏཏྠ སངྒྷསྶ ཀཏིཀཱ ན པཝཏྟཏཱིཏི ཨདྷིཔྤཱཡོ. ཡེཧི པན རུཀྑབཱིཛཱནི རོཔེཏྭཱ ཨཱདིཏོ པཊྛཱཡ པཊིཛགྒིཏཱ, ཏེཔི དསམབྷཱགཾ དཏྭཱ རོཔཀེཧེཝ པརིབྷུཉྫིཏབྦཱནི. ཏེཧཱིཏི ཛགྒིཏེཧི.

ཏཏྠཱཏི ཏསྨིཾ ཝིཧཱརེ. མཱུལེཏིཨཱདིཀཱལེ, པུབྦེཏི ཨཏྠོ. དཱིགྷཱ ཀཏིཀཱཏི ཨཔརིཙྪིནྣཀཱལཱ ཡཐཱསུཁཾ པརིབྷོགཏྠཱཡ ཀཏིཀཱ. ནིཀྐུཀྐུཙྩེནཱཏི ‘‘ཨབྷཱཛིཏམིད’’ནྟི ཀུཀྐུཙྩཾ ¶ ཨཀཏྭཱཏི ཨཏྠོ. ཁཱིཡནམཏྟམེཝ ཏནྟི ཏེན ཁཱིཡནེན བཧུཾ ཁཱདནྟཱནཾ དོསོ ནཏྠི ཨཏྟནོ པརིབྷོགཔྤམཱཎསྶེཝ གཧིཏཏྟཱ, ཁཱིཡནྟེཔི ཨཏྟནོ པཧོནཀཾ གཧེཏྭཱ ཁཱདིཏབྦནྟི ཨདྷིཔྤཱཡོ.

གཎྷཐཱཏི ན ཝཏྟབྦཱཏི ཏཐཱ ཝུཏྟེ ཏེནེཝ བྷིཀྑུནཱ དིནྣཾ ཝིཡ མཉྙེཡྻུཾ. ཏཾ ནིསྶཱཡ མིཙྪཱཛཱིཝསམྦྷཝོ ཧོཏཱིཏི ཝུཏྟཾ. ཏེནཱཧ ‘‘ཨནུཝིཙརིཏྭཱ’’ཏིཨཱདི. ཨུཔཌྜྷབྷཱགོཏི ཨེཀསྶ བྷིཀྑུནོ པཊིཝཱིསཏོ ཨུཔཌྜྷབྷཱགོ, དེནྟེན ཙ ‘‘ཨེཏྟཀཾ དཱཏུཾ སངྒྷོ ཨནུཉྙཱསཱི’’ཏི ཨེཝཾ ཨཏྟཱནཾ པརིམོཙེཏྭཱ ཡཐཱ ཏེ སངྒྷེ ཨེཝ པསཱིདནྟི, ཨེཝཾ ཝཏྭཱ དཱཏབྦཾ. ཨཔཙྩཱསཱིསནྟེནཱཏི གིལཱནགམིཀིསྶརཱདཱིནཾ ཨནུཉྙཱཏཔུགྒལཱནམྤི ཨཏྟནོ སནྟཀཾ དེནྟེན ཨཔཙྩཱསཱིསནྟེནེཝ དཱཏབྦཾ. ཨནནུཉྙཱཏཔུགྒལཱནཾ པན ཨཔཙྩཱསཱིསནྟེནཔི དཱཏུཾ ན ཝཊྚཏཱིཏི. སངྒྷིཀམེཝ ཡཐཱཀཏིཀཱཡ དཱཔེཏབྦཾ. ཨཏྟནོ སནྟཀམྤི པཙྩཡདཱཡཀཱདཡོ སཡམེཝ ཝིསྶཱསེན གཎྷནྟི, ན ཝཱརེཏབྦཱ, ‘‘ལདྡྷཀཔྤིཡ’’ནྟི ཏུཎྷཱི བྷཝིཏབྦཾ. པུབྦེ ཝུཏྟམེཝཱཏི ‘‘ཀུདྡྷོ ཧི སོ རུཀྑེཔི ཚིནྡེཡྻཱ’’ཏིཨཱདིནཱ ཏུཎྷཱིབྷཱཝེ ཀཱརཎཾ པུབྦེ ཝུཏྟམེཝ, ཏེཧི ཀཏཨནཏྠཱབྷཱཝེཔི ¶ ཀཱརུཉྙེན ཏུཎྷཱི བྷཝིཏུཾ ཝཊྚཏི, ‘‘གཎྷཐཱ’’ཏིཨཱདི པན ཝཏྟུཾ ན ཝཊྚཏི.

གརུབྷཎྜཏྟཱ…པེ… ན དཱཏབྦནྟི ཛཱིཝརུཀྑཱནཾ ཨཱརཱམཊྛཱནིཡཏྟཱ དཱརཱུནཉྩ གེཧསམྦྷཱརཱནུཔགཏཏྟཱ ‘‘སབྦཾ ཏྭམེཝ གཎྷཱཏི དཱཏུཾ ན ཝཊྚཏཱི’’ཏི ཝུཏྟཾ. ཨཀཏཱཝཱསཾ ཝཱ ཀཏྭཱཏི པུབྦེ ཨཝིཛྫམཱནཾ སེནཱསནཾ ཀཏྭཱ. ཛགྒིཏཀཱལེཏི ཕལཝཱརེ སམྤཏྟེ. ཛགྒནཀཱལེཏི ཛགྒིཏུཾ ཨཱརདྡྷཀཱལེ.

༢༥༦. ཉཏྟིཀམྨཊྛཱནབྷེདེཏི ཉཏྟིཀམྨསྶ ཋཱནབྷེདེ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

ཀམྨཱཀམྨཝིནིཙྪཡཀཐཱལངྐཱརོ ནཱམ

ཏེཏྟིཾསཏིམོ པརིཙྪེདོ.

༣༤. པཀིཎྞཀཝིནིཙྪཡཀཐཱ

ཨེཝཾ ¶ ཀམྨཱཀམྨཝིནིཙྪཡཀཐཾ ཀཐེཏྭཱ ཨིདཱནི པཀིཎྞཀཝིནིཙྪཡཀཐཾ ཀཐེཏུཾ ‘‘ཨིདཱནི པཀིཎྞཀཀཐཱ ཝེདིཏབྦཱ’’ཏིཨཱདིམཱཧ. ཏཏྠ པཀཱརེན ཀིཎྞཱཏི པཀིཎྞཱ, དིཝཱསེཡྻཱཏི ཀཐཱ ཝིཡ ཝིསུཾ ཝིསུཾ ཨཔྤཝཏྟིཏྭཱ ཨེཀསྨིཾཡེཝ པརིཙྪེདེ ཀརཎཝསེན པཝཏྟཱ གཎབྷོཛནཀཐཱདཡོ. པཀིཎྞཀཱ སཀཏྠེ ཀ-པཙྩཡཝསེན.

ཏཏྲཱཡཾ པཀིཎྞཀམཱཏིཀཱ –

གཎབྷོཛནཀཐཱ ཙ, པརམྤརཱ ཙ བྷོཛནཱ;

ཨནཱཔུཙྪཱ པཾསུཀཱུལཾ, ཏཏོ ཨཙྪིནྣཙཱིཝརཾ.

པཊིབྷཱནཙིཏྟཾ ཝིཔྤ-ཀཏབྷོཛནམེཝ ཙ;

ཨུདྡིསནྟུདྡིསཱཔེནྟཱ, ཏིཝསྶནྟརིཀཱ ཏཐཱ.

དཱིགྷཱསནཾ ¶ གིལཱནུཔ-ཊྛཱནཾ མརཎཝཎྞཀཾ;

ཨཏྟཔཱཏནམཔྤཙྩ-ཝེཀྑིཏྭཱ ནིསིནྣཾ ཏཐཱ.

དཝཱཡ སིལཱཝིཛ྄ཛྷནཾ, དཱཡཱལི༹མྤནཀཾ ཏཐཱ;

མིཙྪཱདིཊྛིཀུལཱབྷཏཾ, གོཔཀདཱནམེཝ ཙ.

དྷམྨིཀཱཡཱཙནཱ ཙེཝ, ཨུཙྩཱརཱདཱིན ཚཌྜནཾ;

ནྷཱནེ རུཀྑགྷཾསནཱནི, ཝལིཀཱདཱིན དྷཱརཎཾ.

དཱིགྷཀེསཱ ཨཱདཱསཱདི, ནཙྩཱདྱངྒཙྪེདཱདི ཙ;

པཏྟོ སབྦཔཾསུཀཱུལཾ, པརིསྶཝན ནགྒིཡཾ.

གནྡྷཔུཔྥཾ ¶ ཨཱསིཏྟཀཾ, མལོ༹རིཀེཀབྷཱཛནཾ;

ཙེལཔཏི པཱདགྷཾསཱི, བཱིཛནཱི ཚཏྟམེཝ ཙ.

ནཁཱལོམཱ ཀཱཡབནྡྷཱ, ནིཝཱསནཔཱརུཔནཱ;

ཀཱཛ དནྟཀཊྛཉྩེཝ, རུཀྑཱརོཧནཀམྤི ཙ.

ཚནྡཱརོཔཱ ལོཀཱཡཏཱ, ཁིཔིཏཾ ལསུཎཾ ཏཐཱ;

ན ཨཀྐམིཏབྦཱདཱིནི, ཨཝནྡིཡཱ ཙ ཝནྡིཡཱ.

ཝནྡནཱཀཱརཀཐཱ ཙ, ཨཱསནྡཱདིཀཐཱཔི ཙ;

ཨུཙྩཱསནམཧཱསནཾ, པཱསཱདཔརིབྷོགཀཾ.

ཨུཔཱཧནཾ ཡཱནཉྩེཝ, ཙཱིཝརཾ ཚིནྣཙཱིཝརཾ;

ཨཀཔྤིཡཙཱིཝརཉྩ, ཙཱིཝརསྶ ཝིཙཱརཎཱ.

དཎྜཀཐིནཀཉྩེཝ, གཧཔཏིཙཱིཝརཾ ཏཐཱ;

ཚཙཱིཝརཾ རཛནཱདི, ཨཏིརེཀཉྩ ཙཱིཝརཾ.

ཨཊྛཝརཾ ནིསཱིདནཾ, ཨདྷམྨཀམྨམེཝ ཙ;

ཨོཀཱསོ སདྡྷཱདེཡྻོ ཙ, སནྟརུཏྟརཀོཔི ཙ.

ཙཱིཝརནིཀྑེཔོ ཙེཝ, སཏྠཝཏྠིཀམྨཾ ཏཐཱ;

ནཧཱཔིཏོ དསབྷཱགོ, པཱཐེཡྻཾ པདེསོཔི ཙ.

སཾསཊྛཾ པཉྩབྷེསཛྫཾ, དུཏིཡཾ ཝསཱ མཱུལཀཾ;

པིཊྛཾ ཀསཱཝ པཎྞཉྩ, ཕལཉྩ ཛཏུ ལོཎཀཾ.

ཙུཎྞཾ ¶ ¶ ཨམནུསྶཱབཱདྷཾ, ཨཉྫནཾ ནཏྠུམེཝ ཙ;

དྷཱུམནེཏྟཾ ཏེལཔཱཀཾ, སེདཾ ལོཧིཏམོཙནཾ.

པཱདབྦྷཉྫཾ གཎྜཱབཱདྷོ, ཝིསཉྩ གྷརདིནྣཀོ;

དུཊྛགཧཎིཀོ པཎྜུ-རོགོ ཚཝིདོསོཔི ཙ.

ཨབྷིསནྣདོསཀཱཡོ, ལོཎསུཝཱིརཀོ ཏཐཱ;

ཨནྟོཝུཏྠཱདིཀཐཱ ཙ, ཨུགྒཧིཏཔཊིགྒཧོ.

ཏཏོ ནིཧཏཀཐཱ ཙ, པུརེབྷཏྟཔཊིགྒཧོ;

ཝནཊྛཾ པོཀྑརཊྛཉྩ, ཏཐཱ ཨཀཏཀཔྤཏཾ.

ཡཱགུཀཐཱ གུལ༹ཀཐཱ, མཧཱཔདེསམེཝ ཙ;

ཨཱནིསཾསཀཐཱ ཙེཏི, པཀིཎྞཀམྷི ཨཱགཏཱ.

གཎབྷོཛནཀཐཱ

༡. ཏཏྠ གཎིཏབྦོ སངྑྱཱཏབྦོཏི གཎོ, ཡོ ཀོཙི སམཱུཧོ, ཨིདྷ པན ཙཏུཝགྒཱདིགཎོ ཨདྷིཔྤེཏོ. བྷུཉྫཏེ བྷོཛནཾ, བྱཝཧརཎབྷཱཝསངྑཱཏཱ བྷོཛནཀིརིཡཱ, གཎསྶ བྷོཛནཾ གཎབྷོཛནཾ, ཏསྨིཾ. གཎབྷོཛནེ པཱཙིཏྟིཡཾ ཧོཏཱིཏི ཨེཏྠ ཛནཀཧེཏུམྷི བྷུམྨཝཙནཾ. ཨཉྙཏྲ སམཡཱཏི གིལཱནཱདིསཏྟཝིདྷཾ སམཡཾ ཋཔེཏྭཱ. ཨིམསྶ སིཀྑཱཔདསྶ ཝིཉྙཏྟིཾ ཀཏྭཱ བྷུཉྫནཝཏྠུསྨིཾ པཉྙཏྟཏྟཱ ཝིཉྙཏྟིཏོ གཎབྷོཛནཾ ཝཏྠུཝསེནེཝ པཱཀཊནྟི ཏཾ ཨཝཏྭཱ ‘‘གཎབྷོཛནཾ ནཱམ ཡཏྠ…པེ… ནིམནྟིཏཱ བྷུཉྫནྟཱི’’ཏི ནིམནྟནཝསེནེཝསྶ པདབྷཱཛནེ གཎབྷོཛནཾ ཝུཏྟཾ. ཀིཉྩི པན སིཀྑཱཔདཾ ཝཏྠུཨནུརཱུཔམྤི སིཡཱཏི ‘‘པདབྷཱཛནེ ཝུཏྟནཡེནེཝ གཎབྷོཛནཾ ཧོཏཱི’’ཏི ཀེསཉྩི ཨཱསངྐཱ བྷཝེཡྻཱཏི ཏནྣིཝཏྟནཏྠཾ ‘‘གཎབྷོཛནཾ དྭཱིཧི ཨཱཀཱརེཧི པསཝཏཱི’’ཏི ཝུཏྟཾ. ཨེཀཏོ གཎྷནྟཱིཏི ཨེཏྠ ཨཉྙམཉྙསྶ དྭཱདསཧཏྠཾ ཨམུཉྩིཏྭཱ ཋིཏཱ ཨེཀཏོ གཎྷནྟི ནཱམཱཏི གཧེཏབྦཾ. ‘‘ཨམྷཱཀཾ ཙཏུནྣམྤི ¶ བྷཏྟཾ དེཧཱི’ཏི ཝཱ ཝིཉྙཱཔེཡྻུ’’ནྟི ཝཙནཏོ, ཧེཊྛཱ ‘‘ཏྭཾ ཨེཀསྶ བྷིཀྑུནོ བྷཏྟཾ དེཧི, ཏྭཾ དྭིནྣནྟི ཨེཝཾ ཝིཉྙཱཔེཏྭཱ’’ཏི ¶ ཝཙནཏོ ཙ ཨཏྟནོ ཨཏྠཱཡ ཨཉྙེན ཝིཉྙཏྟམྤི སཱདིཡནྟསྶ གཎབྷོཛནཾ ཧོཏིཡེཝཱཏི དཊྛབྦཾ. ཨེཝཾ ཝིཉྙཏྟིཏོ པསཝཏཱིཏི ཨེཏྠ ཝིཉྙཏྟིཡཱ སཏི གཎནྟསྶ ཨེཀཏོ ཧུཏྭཱ གཧཎེ ཨིམིནཱ སིཀྑཱཔདེན ཨཱཔཏྟི, ཝིསུཾ གཧཎེ པཎཱིཏབྷོཛནསཱུཔོདནཝིཉྙཏྟཱིཧི ཨཱཔཏྟི ཝེདིཏབྦཱ.

པཉྩནྣཾ བྷོཛནཱནཾ ནཱམཾ གཧེཏྭཱཏི ཨེཏྠ ‘‘བྷོཛནཾ གཎྷཐཱཏི ཝུཏྟེཔི གཎབྷོཛནཾ ཧོཏིཡེཝཱ’’ཏི ཝདནྟི. ‘‘ཧེཊྛཱ ཨདྡྷཱནགམནཝཏྠུསྨིཾ, ནཱཝཱབྷིརུཧནཝཏྠུསྨིཉྩ ‘ཨིདྷེཝ, བྷནྟེ, བྷུཉྫཐཱ’ཏི ཝུཏྟེ ཡསྨཱ ཀུཀྐུཙྩཱཡནྟཱ ན པཊིགྒཎྷིཾསུ, ཏསྨཱ ‘བྷུཉྫཐཱ’ཏི ཝུཏྟེཔི གཎབྷོཛནཾ ཧོཏིཡེཝཱ’’ཏི ཏཱིསུཔི གཎྛིཔདེསུ ཝུཏྟཾ. ‘‘པཉྩནྣཾ བྷོཛནཱནཾ ནཱམཾ གཧེཏྭཱ ནིམནྟེཏཱི’’ཏི ཝུཏྟཏྟཱ པན ‘‘ཨོདནཾ བྷུཉྫཐཱ’’ཏི ཝཱ ‘‘བྷཏྟཾ བྷུཉྫཐཱ’’ཏི ཝཱ བྷོཛནནཱམཾ གཧེཏྭཱཝ ཝུཏྟེ གཎབྷོཛནཾ ཧོཏི, ན ཨཉྙཐཱ. ‘‘ཨིདྷེཝ, བྷནྟེ, བྷུཉྫཐཱ’’ཏི ཨེཏྠཱཔི ‘‘ཨོདན’’ནྟི ཝཱ ‘‘བྷཏྟ’’ནྟི ཝཱ ཝཏྭཱཝ ཏེ ཨེཝཾ ནིམནྟེསུནྟི གཧེཏབྦཾ. གཎཝསེན ཝཱ ནིམནྟིཏཏྟཱ ཏེ བྷིཀྑཱུ ཨཔཀཏཉྙུཏཱཡ ཀུཀྐུཙྩཱཡནྟཱ ན པཊིགྒཎྷིཾསཱུཏི ཨཡཾ ཨམྷཱཀཾ ཁནྟི, ཝཱིམཾསིཏྭཱ ཡུཏྟཏརཾ གཧེཏབྦཾ. ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༢༡༧-༢༡༨) པན ‘‘ཡེན ཀེནཙི ཝེཝཙནེནཱཏི ཝུཏྟཏྟཱ ‘བྷོཛནཾ གཎྷཐཱ’ཏིཨཱདིསཱམཉྙནཱམེནཔི གཎབྷོཛནཾ ཧོཏི. ཡཾ པན པཱལི༹ཡཾ ཨདྡྷཱནགམནཱདིཝཏྠཱུསུ ‘ཨིདྷེཝ བྷུཉྫཐཱ’ཏི ཝུཏྟཝཙནསྶ ཀུཀྐུཙྩཱཡནཾ, ཏམྤི ཨོདནཱདིནཱམཾ གཧེཏྭཱ ཝུཏྟཏྟཱ ཨེཝ ཀཏནྟི ཝེདིཏབྦ’’ནྟི ཝུཏྟཾ.

ཀུརུནྡཱིཝཙནེ ¶ ཝིཙཱརེཏཱིཏི པཉྩཁཎྜཱདིཝསེན སཾཝིདཧཏི. གྷཊྚེཏཱིཏི ཨནུཝཱཏཾ ཚིནྡིཏྭཱ ཧཏྠེན, དཎྜཀེན ཝཱ གྷཊྚེཏི. སུཏྟཾ ཀརོཏཱིཏི སུཏྟཾ ཝཊྚེཏི. ཝལེཏཱིཏི དཎྜཀེ ཝཱ ཧཏྠེ ཝཱ ཨཱཝཊྚེཏི. ‘‘ཨབྷིནཝསྶེཝ ཙཱིཝརསྶ ཀརཎཾ ཨིདྷ ཙཱིཝརཀམྨཾ ནཱམ, པུརཱཎཙཱིཝརེ སཱུཙིཀམྨཾ ཙཱིཝརཀམྨཾ ནཱམ ན ཧོཏཱི’’ཏི ཝདནྟི. ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༢༡༧-༢༡༨) པན ‘‘ཨཱགནྟུཀཔཊྚནྟི ཨཙྪིནྡིཏྭཱ ཨནྭཱདྷིཾ ཨཱརོཔེཏྭཱ ཀརཎཙཱིཝརཾ སནྡྷཱཡ ཝུཏྟཾ. ཋཔེཏཱིཏི ཨེཀཾ ཨནྟཾ ཙཱིཝརེ བནྡྷནཝསེན ཋཔེཏི. པཙྩཱགཏཾ སིབྦཏཱིཏི ཏསྶེཝ དུཏིཡཨནྟཾ པརིཝཏྟིཏྭཱ ཨཱཧཏཾ སིབྦཏི. ཨཱགནྟུཀཔཊྚཾ བནྡྷཏཱིཏི ཙཱིཝརེན ལགྒཾ ཀརོནྟོ པུནཔྤུནཾ ཏཏྠ ཏཏྠ སུཏྟེན བནྡྷཏི. གྷཊྚེཏཱིཏི པམཱཎེན གཧེཏྭཱ དཎྜཱདཱིཧི གྷཊྚེཏི. སུཏྟཾ ཀརོཏཱིཏི སུཏྟཾ ཏིགུཎཱདིབྷཱཝེན ཝཊྚེཏི. ཝལེཏཱིཏི ཨནེཀགུཎསུཏྟཾ ཧཏྠེན ¶ ཝཱ ཙཀྐདཎྜེན ཝཱ ཝཊྚེཏི ཨེཀཏྟཾ ཀརོཏི. པརིཝཏྟནཾ ཀརོཏཱིཏི པརིཝཏྟནདཎྜཡནྟཀཾ ཀརོཏི. ཡསྨིཾ སུཏྟགུལ༹ཾ པཝེསེཏྭཱ ཝེལུ༹ནཱལི༹ཀཱདཱིསུ ཋཔེཏྭཱ པརིབྦྷམཱཔེཏྭཱ སུཏྟཀོཊིཏོ པཊྛཱཡ ཨཱཀཌྜྷནྟཱི’’ཏི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. པཱཙིཏྟིཡ ༢༠༩-༢༡༨) ན ‘‘ཨཱགནྟུཀཔཊྚཾ མོགྷསུཏྟེན སིབྦིཏྭཱ ཋཔེནྟི. ཏཏྠ ཨནུཝཱཏེ ཡཐཱ ཨེཀཏལཾ ཧོཏི, ཏཐཱ ཧཏྠེཧི གྷཊྚེཏི. ཝལེཏཱིཏི ཨཱཝཊྚེཏི. པརིཝཏྟནནྟི སུཏྟཾ གཎྷནྟཱནཾ སུཁགྒཧཎཏྠཾ སུཏྟཔརིཝཏྟནཾ ཀརོཏི, པཊྚཾ སིབྦནྟཱནཾ སུཁསིབྦནཏྠཾ པཊྚཔརིཝཏྟནཉྩ, ནཝཙཱིཝརཀཱརཀོ ཨིདྷཱདྷིཔྤེཏོ, ན ཨིཏརོ’’ཏི ཝུཏྟཾ.

ཨནིམནྟིཏཙཏུཏྠནྟི ཨནིམནྟིཏོ ཙཏུཏྠོ ཡསྶ བྷིཀྑུཙཏུཀྐསྶ, ཏཾ ཨནིམནྟིཏཙཏུཏྠཾ. ཨེཝཾ སེསེསུཔི. ཏེནཱཧ ‘‘པཉྩནྣཾ ཙཏུཀྐཱན’’ནྟི, ‘‘ཙཏུཏྠེ ཨཱགཏེ ན ཡཱཔེནྟཱིཏི ¶ ཝཙནཏོ སཙེ ཨཉྙོ ཀོཙི ཨཱགཙྪནྟོ ནཏྠི, ཙཏྟཱརོཡེཝ ཙ ཏཏྠ ནིསིནྣཱ ཡཱཔེཏུཾ ན སཀྐོནྟི, ན ཝཊྚཏཱི’’ཏི ཝདནྟི. གཎབྷོཛནཱཔཏྟིཛནཀནིམནྟནབྷཱཝཏོ ‘‘ཨཀཔྤིཡནིམནྟན’’ནྟི ཝུཏྟཾ. སམྤཝེསེཏྭཱཏི ནིསཱིདཱཔེཏྭཱ. གཎོ བྷིཛྫཏཱིཏི གཎོ ཨཱཔཏྟིཾ ན ཨཱཔཛྫཏཱིཏི ཨདྷིཔྤཱཡོ. ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༢༢༠) པན ‘‘སམྤཝེསེཏྭཱཏི ཏེཧི ཡོཛེཏྭཱ. གཎོ བྷིཛྫཏཱིཏི ནིམནྟིཏསངྒྷོ ན ཧོཏཱིཏི ཨཏྠོ’’ཏི ཝུཏྟཾ.

‘‘ཡཏྠ ཙཏྟཱརོ བྷིཀྑཱུ…པེ… བྷུཉྫནྟཱི’’ཏི ཨིམཱཡ པཱལི༹ཡཱ སཾསནྡནཏོ ‘‘ཨིཏརེསཾ པན གཎཔཱུརཀོ ཧོཏཱི’’ཏི ཝུཏྟཾ. ཨཝིསེསེནཱཏི ‘‘གིལཱནོ ཝཱ ཙཱིཝརཀཱརཀོ ཝཱ’’ཏི ཨཝིསེསེཏྭཱ སབྦསཱདྷཱརཎཝཙནེན. ཏསྨཱཏི ཨཝིསེསིཏཏྟཱ.

ཨདྷིཝཱསེཏྭཱ གཏེསཱུཏི ཨེཏྠ ཨཀཔྤིཡནིམནྟནཱདྷིཝཱསནཀྑཎེ པུབྦཔཡོགེ དུཀྐཊམྤི ནཏྠི, ཝིཉྙཏྟིཏོ པསཝནེ པན ཝིཉྙཏྟིཀྑཎེ ཨིཏརསིཀྑཱཔདེཧི དུཀྐཊཾ ཧོཏཱིཏི གཧེཏབྦཾ. བྷུཏྭཱ གཏེསཱུཏི ཨེཏྠ ཨཱགཏེསུཔི བྷོཛནཀིཙྩེ ནིཊྛིཏེ གཎྷིཏུཾ ཝཊྚཏི. ཏཱནི ཙ ཏེཧི ཨེཀཏོ ན གཧིཏཱནཱིཏི ཡེཧི བྷོཛནེཧི ཝིསངྐེཏོ ནཏྠི, ཏཱནི བྷོཛནཱནི ཏེཧི བྷིཀྑཱུཧི ཨེཀཏོ ན གཧིཏཱནི ཨེཀེན པཙྪཱ གཧིཏཏྟཱ. མཧཱཐེརེཏི བྷིཀྑཱུ སནྡྷཱཡ ཝུཏྟཾ. ནིམནྟནཾ སཱདིཡཐཱཏི ནིམནྟནབྷཏྟཾ པཊིགྒཎྷཐ. ཡཱནཱིཏི ཀུམྨཱསཱདཱིནི ཏེཧི བྷིཀྑཱུཧི ཨེཀེན པཙྪཱ གཧིཏཏྟཱ ཨེཀཏོ ན གཧིཏཱནི. བྷཏྟུདྡེསཀེན པཎྜིཏེན བྷཝིཏབྦཾ…པེ… མོཙེཏབྦཱཏི ཨེཏེན བྷཏྟུདྡེསཀེན ¶ ཨཀཔྤིཡནིམནྟནེ སཱདིཏེ སབྦེསམྤི སཱདིཏཾ ཧོཏི, ཨེཀཏོ གཎྷནྟཱནཾ གཎབྷོཛནཱཔཏྟི ཙ ཧོཏཱིཏི དསྶེཏི. དཱུཏསྶ དྭཱརེ ཨཱགནྟྭཱ པུན ‘‘བྷཏྟཾ གཎྷཐཱ’’ཏི ¶ ཝཙནབྷཡེན ‘‘གཱམདྭཱརེ ཨཊྛཏྭཱ’’ཏི ཝུཏྟཾ. ཏཏྠ ཏཏྠ གནྟྭཱཏི ཨནྟརཝཱིཐིཨཱདཱིསུ ཏཏྠ ཏཏྠ ཋིཏཱནཾ སནྟིཀཾ གནྟྭཱ. བྷིཀྑཱུནཾ ཨཏྠཱཡ གྷརདྭཱརེ ཋཔེཏྭཱ དཱིཡམཱནེཔི ཨེསེཝ ནཡོ. ནིཝཏྟཐཱཏི ཝུཏྟེ པན ནིཝཏྟིཏུཾ ཝཊྚཏཱིཏི ‘‘ནིཝཏྟཐཱ’’ཏི ཝིཙྪིནྡིཏྭཱ པཙྪཱ ‘‘བྷཏྟཾ གཎྷཐཱ’’ཏི ཝུཏྟཏྟཱ ཝཊྚཏི.

པརམྤརབྷོཛནཀཐཱ

༢. པརམྤརབྷོཛནཀཐཱཡཾ པན པརསྶ པརསྶ བྷོཛནཾ པརམྤརབྷོཛནཾ. ཀིཾ ཏཾ? པཋམཾ ནིམནྟིཏབྷཏྟཾ ཋཔེཏྭཱ ཨཉྙསྶ བྷོཛནཀིརིཡཱ. པརམྤརབྷོཛནཾ གཎབྷོཛནཾ ཝིཡ ཝིཉྙཏྟིཏོ ཙ ནིམནྟནཏོ ཙ ན པསཝཏཱིཏི ཨཱཧ ‘‘པརམྤརབྷོཛནཾ པནཱ’’ཏིཨཱདི. པན-སདྡོ ཝིསེསཏྠཛོཏཀོ. ཝིཀཔྤནཱཝསེནེཝ ཏཾ བྷཏྟཾ ཨསནྟཾ ནཱམ ཧོཏཱིཏི ཨནུཔཉྙཏྟིཝསེན ཝིཀཔྤནཾ ཨཊྛཔེཏྭཱ ཡཐཱཔཉྙཏྟསིཀྑཱཔདམེཝ ཋཔིཏཾ. པརིཝཱརེ (པརི. ༨༦) པན ཝིཀཔྤནཱཡཾ ཨནུཛཱནནམྤི ཨནུཔཉྙཏྟིསདིསནྟི ཀཏྭཱ ‘‘ཙཏསྶོ ཨནུཔཉྙཏྟིཡོ’’ཏི ཝུཏྟཾ, མཧཱཔཙྩརིཡཱདཱིསུ ཝུཏྟནཡཾ པཙྪཱ ཝདནྟོ པཱལི༹ཡཱ སཾསནྡནཏོ པརམྨུཁཱཝིཀཔྤནམེཝ པཏིཊྛཱཔེཏི. ཀེཙི པན ‘‘ཏདཱ ཨཏྟནོ སནྟིཀེ ཋཔེཏྭཱ བྷགཝནྟཾ ཨཉྙསྶ ཨབྷཱཝཏོ ཐེརོ སམྨུཁཱཝིཀཔྤནཾ ནཱཀཱསི, བྷགཝཏཱ ཙ ཝིསུཾ སམྨུཁཱཝིཀཔྤནཱ ན ཝུཏྟཱ, ཏཐཱཔི སམྨུཁཱཝིཀཔྤནཱཔི ཝཊྚཏཱི’’ཏི ཝདནྟི. ཏེནེཝ མཱཏིཀཱཊྛཀཐཱཡམྤི (ཀངྑཱ. ཨཊྛ. པརམྤརབྷོཛནསིཀྑཱཔདཝཎྞནཱ) ‘‘ཡོ བྷིཀྑུ པཉྩསུ སཧདྷམྨིཀེསུ ཨཉྙཏརསྶ ‘མཡ྄ཧཾ བྷཏྟཔཙྩཱསཾ ཏུཡ྄ཧཾ དམྨཱི’ཏི ཝཱ ‘ཝིཀཔྤེམཱི’ཏི ཝཱ ཨེཝཾ སམྨུཁཱ ཝཱ ‘ཨིཏྠནྣཱམསྶ དམྨཱི’ཏི ཝཱ ‘ཝིཀཔྤེམཱི’ཏི ཝཱ ཨེཝཾ པརམྨུཁཱ ཝཱ པཋམནིམནྟནཾ ཨཝིཀཔྤེཏྭཱ པཙྪཱ ནིམནྟིཏཀུལེ ལདྡྷབྷིཀྑཏོ ཨེཀསིཏྠམྤི ཨཛ྄ཛྷོཧརཏི, པཱཙིཏྟིཡ’’ནྟི ཝུཏྟཾ.

པཉྩཧི ¶ བྷོཛནེཧི ནིམནྟིཏསྶ ཡེན ཡེན པཋམཾ ནིམནྟིཏོ, ཏསྶ ཏསྶ བྷོཛནཏོ ཨུཔྤཊིཔཱཊིཡཱ ཨཝིཀཔྤེཏྭཱ ཝཱ པརསྶ པརསྶ བྷོཛནཾ པརམྤརབྷོཛནནྟི ཨཱཧ ‘‘སཙེ པན མཱུལནིམནྟནཾ ཧེཊྛཱ ཧོཏི, པཙྪིམཾ པཙྪིམཾ ཨུཔརི, ཏཾ ཨུཔརིཏོ པཊྛཱཡ བྷུཉྫནྟསྶ ཨཱཔཏྟཱི’’ཏི. ཧཏྠཾ ཨནྟོ པཝེསེཏྭཱ སབྦཧེཊྛིམཾ གཎྷནྟསྶ མཛ྄ཛྷེ ཋིཏམྤི ཨནྟོཧཏྠགཏཾ ཧོཏཱིཏི ཨཱཧ ‘‘ཧཏྠཾ ¶ པན…པེ… ཡཐཱ ཡཐཱ ཝཱ བྷུཉྫནྟསྶ ཨནཱཔཏྟཱི’’ཏི. ཁཱིརསྶ རསསྶ ཙ བྷཏྟེན ཨམིསྶཾ ཧུཏྭཱ ཨུཔརི ཋིཏཏྟཱ ‘‘ཁཱིརཾ ཝཱ རསཾ ཝཱ པིཝཏོ ཨནཱཔཏྟཱི’’ཏི ཝུཏྟཾ.

‘‘མཧཱཨུཔཱསཀོཏི གེཧསྶཱམིཀོ. མཧཱཨཊྛཀཐཱཡཾ ‘ཨཱཔཏྟཱི’ཏི ཝཙནེན ཀུརུནྡིཡཾ ‘ཝཊྚཏཱི’ཏི ཝཙནཾ ཝིརུདྡྷཾ ཝིཡ དིསྶཏི. དྭིནྣམྤི ཨདྷིཔྤཱཡོ མཧཱཔཙྩརིཡཾ ཝིབྷཱཝིཏོ’’ཏི མཧཱགཎྛིཔདེ ཝུཏྟཾ.

སབྦེ ནིམནྟེནྟཱིཏི ཨཀཔྤིཡནིམནྟནཝསེན ནིམནྟེནྟི. ‘‘པརམྤརབྷོཛནཾ ནཱམ པཉྩནྣཾ བྷོཛནཱནཾ ཨཉྙཏརེན བྷོཛནེན ནིམནྟིཏོ, ཏཾ ཋཔེཏྭཱ ཨཉྙཾ པཉྩནྣཾ བྷོཛནཱནཾ ཨཉྙཏརཾ བྷོཛནཾ བྷུཉྫཏི, ཨེཏཾ པརམྤརབྷོཛནཾ ནཱམཱ’’ཏི ཝུཏྟཏྟཱ སཏིཔི བྷིཀྑཱཙརིཡཱཡ པཋམཾ ལདྡྷབྷཱཝེ ‘‘པིཎྜཱཡ ཙརིཏྭཱ ལདྡྷཾ བྷཏྟཾ བྷུཉྫཏི, ཨཱཔཏྟཱི’’ཏི ཝུཏྟཾ.

ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༢༢༩) པན ‘‘ཁཱིརཾ ཝཱ རསཾ ཝཱཏི པཉྩབྷོཛནཱམིསྶཾ བྷཏྟཏོ ཨུཔརི ཋིཏཾ སནྡྷཱཡ ཝུཏྟཾ. ཏཉྷི ཨབྷོཛནཏྟཱ ཨུཔྤཊིཔཱཊིཡཱ པིཝཏོཔི ཨནཱཔཏྟི. ཏེནཱཧ ‘བྷུཉྫནྟེནཱ’ཏིཨཱདཱི’’ཏི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. པཱཙིཏྟིཡ ༢༢༩) པན ‘‘ཨེཏྠ ‘མཧཱཨུཔཱསཀོ བྷིཀྑཱུ ནིམནྟེཏི…པེ… པཙྪཱ ལདྡྷཾ བྷཏྟཾ བྷུཉྫནྟསྶ ཨཱཔཏྟི. པིཎྜཱཡ ཙརིཏྭཱ ལདྡྷབྷཏྟཾ བྷུཉྫཏི, ཨཱཔཏྟཱི’ཏི ཨཊྛཀཐཱཡཾ ཝཙནཏོ, ‘ཀཱལསྶེཝ པིཎྜཱཡ ཙརིཏྭཱ ¶ བྷུཉྫིམྷཱ’ཏི པཱལི༹ཏོ, ཁནྡྷཀེ ‘ན ཙ, བྷིཀྑཝེ, ཨཉྙཏྲ ནིམནྟནེ ཨཉྙསྶ བྷོཛྫཡཱགུ པརིབྷུཉྫིཏབྦཱ, ཡོ བྷུཉྫེཡྻ, ཡཐཱདྷམྨོ ཀཱརེཏབྦོ’ཏི ཝཙནཏོ ཙ ནིམནྟེཏྭཱ ཝཱ པཝེདེཏུ ཨནིམནྟེཏྭཱ ཝཱ, པཋམགཧིཏནིམནྟིཏསྶ བྷིཀྑུནོ པཋམནིམནྟནབྷོཛནཏོ ཨཉྙཾ ཡཾ ཀིཉྩི པརསནྟཀཾ བྷོཛནཾ པརམྤརབྷོཛནཱཔཏྟིཾ ཀརོཏི. ཨཏྟནོ སནྟཀཾ, སངྒྷགཎཏོ ལདྡྷཾ ཝཱ ཨགཧཊྛསནྟཀཾ ཝཊྚཏི, ནིམནྟནཏོ པཋམཾ ནིབདྡྷཏྟཱ པན ནིཙྩབྷཏྟཱདིཔརསནྟཀམྤི ཝཊྚཏཱི’’ཏི ཝུཏྟཾ.

ཨནཱཔུཙྪཱཀཐཱ

༣. ཨནཱཔུཙྪཱཀཐཱཡཾ ‘‘པཀཏིཝཙནེནཱཏི ཨེཏྠ ཡཾ དྭཱདསཧཏྠབྦྷནྟརེ ཋིཏེན སོཏུཾ སཀྐཱ བྷཝེཡྻ, ཏཾ པཀཏིཝཙནཾ ནཱམ. ཨཱཔུཙྪིཏབྦོཏི ‘ཨཧཾ ཨིཏྠནྣཱམསྶ གྷརཾ གཙྪཱམཱི’ཏི ཝཱ ‘ཙཱརིཏྟཀཾ ¶ ཨཱཔཛྫཱམཱི’ཏི ཝཱ ཨཱིདིསེན ཝཙནེན ཨཱཔུཙྪིཏབྦོ. སེསམེཏྠ ཨུཏྟཱནམེཝ. པཉྩནྣཾ བྷོཛནཱནཾ ཨཉྙཏརེན ནིམནྟནསཱདིཡནཾ, སནྟཾ བྷིཀྑུཾ ཨནཱཔུཙྪཱ, བྷཏྟིཡགྷརཏོ ཨཉྙགྷརཔྤཝེསནཾ, མཛ྄ཛྷནྷིཀཱནཏིཀྐམོ, སམཡསྶ ཝཱ ཨཱཔདཱནཾ ཝཱ ཨབྷཱཝོཏི ཨིམཱནི པནེཏྠ པཉྩ ཨངྒཱནཱི’’ཏི སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༢༩༨) ཨེཏྟཀམེཝ ཝུཏྟཾ, ཝིམཏིཝིནོདནིཡཾ (ཝི. ཝི. ཊཱི. པཙིཏྟིཡ ༢.༢༩༨) པན ‘‘པརིཡེསིཏྭཱ ཨཱརོཙནཀིཙྩཾ ནཏྠཱིཏི ཝུཏྟཏྟཱ ཡོ ཨཔརིཡེསིཏབྦོ ཨུཔསངྐམིཏུཾ ཡུཏྟཊྛཱནེ དིསྶཏི, སོ སཙེཔི པཀཏིཝཙནསྶ སཝནཱུཔཙཱརཾ ཨཏིཀྐམྨ ཋིཏོ, ཨུཔསངྐམིཏྭཱ ཨཱཔུཙྪིཏབྦོ. ཏེནཱཧ ‘ཨཔིཙ…པེ… ཡཾ པསྶཏི, སོ ཨཱཔུཙྪིཏབྦོ’ཏིཨཱདི. ཨནཱཔཏྟིཝཱརེ ཙེཏྠ ཨནྟརཱརཱམཱདཱིནཉྙེཝ ཝུཏྟཏྟཱ ཝིཧཱརཏོ གཱམཝཱིཐིཾ ཨནུཉྙཱཏཀཱརཎཾ ཝིནཱ ཨཏིཀྐམནྟསྶཱཔི ཨཱཔཏྟི ཧོཏི, ན པན གྷརཱུཔཙཱརཾ ¶ ཨཏིཀྐམནྟསྶེཝ. ཡཾ པན པཱལི༹ཡཾ ‘ཨཉྙསྶ གྷརཱུཔཙཱརཾ ཨོཀྐམནྟསྶ…པེ… པཋམཔཱདཾ ཨུམྨཱརཾ ཨཏིཀྐཱམེཏཱི’ཏིཨཱདི ཝུཏྟཾ, ཏཾ གཱམེ པཝིཊྛཾ སནྡྷཱཡ ཝུཏྟཾ, ཏཐཱཔི ཨཉྙསྶ གྷརཱུཔཙཱརཾ ཨནོཀྐམིཏྭཱ ཝཱིཐིམཛ྄ཛྷེནེཝ གནྟྭཱ ཨིཙྪིཏིཙྪིཏགྷརདྭཱརཱབྷིམུཁེ ཋཏྭཱ མནུསྶེ ཨོལོཀེཏྭཱ གཙྪནྟསྶཔི པཱཙིཏྟིཡམེཝ. ཏཏྠ ཀེཙི ‘ཝཱིཐིཡཾ ཨཏིཀྐམནྟསྶ གྷརཱུཔཙཱརགཎནཱཡ ཨཱཔཏྟིཡོ’ཏི ཝདནྟི. ཨཉྙེ པན ‘ཡཱནི ཀུལཱནི ཨུདྡིསྶ གཏོ, ཏེསཾ གཎནཱཡཱ’ཏི. པཉྩནྣཾ བྷོཛནཱནཾ ཨཉྙཏརེན ནིམནྟནསཱདིཡནཾ, སནྟཾ བྷིཀྑུཾ ཨནཱཔུཙྪནཱ, བྷཏྟིཡགྷརཏོ ཨཉྙགྷརཱུཔསངྐམནཾ, མཛ྄ཛྷནྷིཀཱནཏིཀྐམོ, སམཡཱཔདཱནཾ ཨབྷཱཝོཏི ཨིམཱནེཏྠ པཉྩ ཨངྒཱནཱི’’ཏི. ཝིཀཱལགཱམཔྤཝེསནེཔི ‘‘ཨཔརིཀྑིཏྟསྶ གཱམསྶ ཨུཔཙཱརོ ཨདིནྣཱདཱནེ ཝུཏྟནཡེནེཝ ཝེདིཏབྦོ’’ཏི ཨིམིནཱ དུཏིཡལེཌྜུཔཱཏོ ཨིདྷ ཨུཔཙཱརོཏི དསྶེཏི. སེསམེཏྠ ཨུཏྟཱནམེཝ. སནྟཾ བྷིཀྑུཾ ཨནཱཔུཙྪནཱ, ཨནུཉྙཱཏཀཱརཎཱབྷཱཝོ, ཝིཀཱལེ གཱམཔྤཝེསནནྟི ཨིམཱནི པནེཏྠ ཏཱིཎི ཨངྒཱནི.

པཾསུཀཱུལཀཐཱ

༤. པཾསུཀཱུལཀཐཱཡཾ ཨབྷིནྣེ སརཱིརེཏི ཨབྦྷུཎྷེ ཨལླསརཱིརེ. ‘‘ཨབྦྷུཎྷེ’’ཏི ཨིམིནཱཔི ཝུཏྟམེཝ པརིཡཱཡབྷེདམནྟརེན ཝིབྷཱཝེཏུཾ ‘‘ཨལླསརཱིརེ’’ཏི ཝུཏྟཾ.

ཝིསབྷཱགསརཱིརེཏི ཨིཏྠིསརཱིརེ. ཝིསབྷཱགསརཱིརཏྟཱ ཨཙྩཱསནྣེན ན བྷཝིཏབྦནྟི ཨཱཧ ‘‘སཱིསེ ཝཱ’’ཏིཨཱདི. ཝཊྚཏཱིཏི ཝིསབྷཱགསརཱིརེཔི ཨཏྟནཱཝ ཝུཏྟཝིདྷིཾ ཀཱཏུཾ སཱཊཀཉྩ གཧེཏུཾ ཝཊྚཏི ¶ . ཀེཙི པན ‘‘ཀིཉྩཱཔི ཨིམིནཱ སིཀྑཱཔདེན ཨནཱཔཏྟི, ཨིཏྠིརཱུཔཾ པན ཨཱམསནྟསྶ དུཀྐཊ’’ནྟི ཝདནྟི. ‘‘ཡཐཱཀམྨཾ གཏོཏི ཏཏོ པེཏཏྟབྷཱཝཏོ མཏབྷཱཝཾ དསྶེཏི. ཨབྦྷུཎྷེཏི ཨཱསནྣམརཎཏཱཡ སརཱིརསྶ ཨུཎྷསམངྒིཏཾ དསྶེཏི, ཏེནེཝཱཧ ‘ཨལླསརཱིརེ’ཏི. ཀུཎཔསབྷཱཝཾ ¶ ཨུཔགཏམྤི བྷིནྣམེཝ ཨལླབྷཱཝཏོ བྷིནྣཏྟཱ. ཝིསབྷཱགསརཱིརེཏི ཨིཏྠིསརཱིརེ. ‘སཱིསེ ཝཱ’ཏིཨཱདི ཨདྷཀྑཀེ ཨུབྦྷཛཱཎུམཎྜལེ པདེསེ ཙིཏྟཝིཀཱརཔྤཏྟིཾ སནྡྷཱཡ ཝུཏྟཾ, ཡཏྠ ཀཏྠཙི ཨནཱམསནྟེན ཀཏཾ སུཀཏམེཝ. མཏསརཱིརམྤི ཧི ཡེན ཀེནཙི ཨཱཀཱརེན སཉྩིཙྩ ཕུསནྟསྶ ཨནཱམཱསདུཀྐཊམེཝཱཏི ཝདནྟི, ཏཾ ཡུཏྟམེཝ. ན ཧི ཨཔཱརཱཛིཀཝཏྠུཀེཔི ཙིཏྟཱདིཨིཏྠིརཱུཔེ བྷཝནྟཾ དུཀྐཊཾ པཱརཱཛིཀཝཏྠུབྷཱུཏེ མཏིཏྠིསརཱིརེ ནིཝཏྟཏཱི’’ཏི ཝིམཏིཝིནོདནིཡཾ (ཝི. ཝི. ཊཱི. ༡.༡༣༥) ཝུཏྟ.

ཨིམསྨིཾ ཋཱནེ ཨཱཙརིཡེན ཨཝུཏྟཱཔི པཾསུཀཱུལཀཐཱ པཾསུཀཱུལསཱམཉྙེན ཝེདིཏབྦཱ. སཱ ཧི ཙཱིཝརཀྑནྡྷཀེ (མཧཱཝ. ༣༤༠) ཨེཝཾ ཨཱགཏཱ ‘‘ཏེན ཁོ པན སམཡེན ཡེ ཏེ བྷིཀྑཱུ གཧཔཏིཙཱིཝརཾ སཱདིཡནྟི, ཏེ ཀུཀྐུཙྩཱཡནྟཱ པཾསུཀཱུལཾ ན སཱདིཡནྟི ‘ཨེཀཾཡེཝ བྷགཝཏཱ ཙཱིཝརཾ ཨནུཉྙཱཏཾ, ན དྭེ’ཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, གཧཔཏིཙཱིཝརཾ སཱདིཡནྟེན པཾསུཀཱུལམྤི སཱདིཡིཏུཾ, ཏདུབྷཡེནཔཱཧཾ, བྷིཀྑཝེ, སནྟུཊྛིཾ ཝཎྞེམཱི’’ཏི. ཏཏྠ ‘‘ཨེཀཾཡེཝ བྷགཝཏཱ ཙཱིཝརཾ ཨནུཉྙཱཏཾ, ན དྭེཏི ཏེ ‘ཀིར ཨིཏརཱིཏརེན ཙཱིཝརེནཱ’ཏི ཨེཏསྶ ‘གཧཔཏིཀེན ཝཱ པཾསུཀཱུལེན ཝཱ’ཏི ཨེཝཾ ཨཏྠཾ སལླཀྑིཾསུ. ཏཏྠ པན ཨིཏརཱིཏརེནཔཱིཏི ཨཔྤགྒྷེནཔི མཧགྒྷེནཔི ཡེན ཀེནཙཱིཏི ཨཏྠོ’’ཏི ཨཊྛཀཐཱཡཾ ཝུཏྟོ, ཏསྨཱ དྷུཏངྒཾ ཨསམཱདིཡིཏྭཱ ཝིནཡཔཾསུཀཱུལམཏྟསཱདིཡཀེན བྷིཀྑུནཱ གཧཔཏིཙཱིཝརམྤི སཱདིཏབྦཾ ཧོཏི, པཾསུཀཱུལདྷུཏངྒདྷརསྶ པན གཧཔཏིཙཱིཝརཾ ན ཝཊྚཏི ‘‘གཧཔཏིཙཱིཝརཾ པཊིཀྑིཔཱམི, པཾསུཀཱུལིཀངྒཾ སམཱདིཡཱམཱི’’ཏི སམཱདཱནཏོཏི དཊྛབྦཾ.

ཏེན ཁོ པན སམཡེན སམྦཧུལཱ བྷིཀྑཱུ ཀོསལེསུ ཛནཔདེསུ ཨདྡྷཱནམགྒཔྤཊིཔནྣཱ ཧོནྟི. ཨེཀཙྩེ བྷིཀྑཱུ སུསཱནཾ ཨོཀྐམིཾསུ ¶ པཾསུཀཱུལཱཡ, ཨེཀཙྩེ བྷིཀྑཱུ ནཱགམེསུཾ. ཡེ ཏེ བྷིཀྑཱུ སུསཱནཾ ཨོཀྐམིཾསུ པཾསུཀཱུལཱཡ, ཏེ པཾསུཀཱུལཱནི ལབྷིཾསུ. ཡེ ཏེ བྷིཀྑཱུ ནཱགམེསུཾ, ཏེ ཨེཝམཱཧཾསུ ‘‘ཨམྷཱཀམྤི, ཨཱཝུསོ, བྷཱགཾ དེཐཱ’’ཏི. ཏེ ཨེཝམཱཧཾསུ ‘‘ན མཡཾ, ཨཱཝུསོ, ཏུམྷཱཀཾ བྷཱགཾ དསྶཱམ, ཀིསྶ ཏུམྷེ ནཱགམིཏྠཱ’’ཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, ནཱགམེནྟཱནཾ ནཱཀཱམཱ བྷཱགཾ དཱཏུནྟི. ཏཏྠ ནཱགམེསུནྟི ཡཱཝ ཏེ སུསཱནཏོ ¶ ཨཱགཙྪནྟི, ཏཱཝ ཏེ ན ཨཙྪིཾསུ, པཀྐམིཾསུཡེཝ. ནཱཀཱམཱ བྷཱགཾ དཱཏུནྟི ན ཨནིཙྪཱཡ དཱཏུཾ. ཡདི པན ཨིཙྪནྟི, དཱཏབྦོ.

ཏེན ཁོ པན སམཡེན སམྦཧུལཱ བྷིཀྑཱུ ཀོསལེསུ ཛནཔདེསུ ཨདྡྷཱནམགྒཔྤཊིཔནྣཱ ཧོནྟི. ཨེཀཙྩེ བྷིཀྑཱུ སུསཱནཾ ཨོཀྐམིཾསུ པཾསུཀཱུལཱཡ, ཨེཀཙྩེ བྷིཀྑཱུ ཨཱགམེསུཾ. ཡེ ཏེ བྷིཀྑཱུ སུསཱནཾ ཨོཀྐམིཾསུ པཾསུཀཱུལཱཡ, ཏེ པཾསུཀཱུལཱནི ལབྷིཾསུ. ཡེ ཏེ བྷིཀྑཱུ ཨཱགམེསུཾ, ཏེ ཨེཝམཱཧཾསུ ‘‘ཨམྷཱཀམྤི, ཨཱཝུསཱ,ཨེ བྷཱགཾ དེཐཱ’’ཏི. ཏེ ཨེཝམཱཧཾསུ ‘‘ན མཡཾ, ཨཱཝུསོ, ཏུམྷཱཀཾ བྷཱགཾ དསྶཱམ, ཀིསྶ ཏུམྷེ ན ཨོཀྐམིཏྠཱ’’ཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, ཨཱགམེནྟཱནཾ ཨཀཱམཱ བྷཱགཾ དཱཏུནྟི.

ཏེན ཁོ པན སམཡེན སམྦཧུལཱ བྷིཀྑཱུ ཀོསལེསུ ཛནཔདེསུ ཨདྡྷཱནམགྒཔྤཊིཔནྣཱ ཧོནྟི. ཨེཀཙྩེ བྷིཀྑཱུ པཋམཾ སུསཱནཾ ཨོཀྐམིཾསུ པཾསུཀཱུལཱཡ, ཨེཀཙྩེ བྷིཀྑཱུ པཙྪཱ ཨོཀྐམིཾསུ. ཡེ ཏེ བྷིཀྑཱུ པཋམཾ སུསཱནཾ ཨོཀྐམིཾསུ པཾསུཀཱུལཱཡ, ཏེ པཾསུཀཱུལཱནི ལབྷིཾསུ. ཡེ ཏེ བྷིཀྑཱུ པཙྪཱ ཨོཀྐམིཾསུ, ཏེ ན ལབྷིཾསུ. ཏེ ཨེཝམཱཧཾསུ ‘‘ཨམྷཱཀམྤི, ཨཱཝུསོ, བྷཱགཾ དེཐཱ’’ཏི. ཏེ ཨེཝམཱཧཾསུ ‘‘ན མཡཾ, ཨཱཝུསོ, ཏུམྷཱཀཾ བྷཱགཾ དསྶཱམ, ཀིསྶ ཏུམྷེ པཙྪཱ ཨོཀྐམིཏྠཱ’’ཏི. བྷགཝཏོ ¶ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, པཙྪཱ ཨོཀྐནྟཱནཾ ནཱཀཱམཱ བྷཱགཾ དཱཏུནྟི.

ཏེན ཁོ པན སམཡེན སམྦཧུལཱ བྷིཀྑཱུ ཀོསལེསུ ཛནཔདེསུ ཨདྡྷཱནམགྒཔྤཊིཔནྣཱ ཧོནྟི. ཏེ སདིསཱ སུསཱནཾ ཨོཀྐམིཾསུ པཾསུཀཱུལཱཡ. ཨེཀཙྩེ བྷིཀྑཱུ པཾསུཀཱུལཱནི ལབྷིཾསུ, ཨེཀཙྩེ བྷིཀྑཱུ ན ལབྷིཾསུ. ཡེ ཏེ བྷིཀྑཱུ ན ལབྷིཾསུ, ཏེ ཨེཝམཱཧཾསུ ‘‘ཨམྷཱཀམྤི, ཨཱཝུསོ, བྷཱགཾ དེཐཱ’’ཏི. ཏེ ཨེཝམཱཧཾསུ ‘‘ན མཡཾ, ཨཱཝུསོ, ཏུམྷཱཀཾ བྷཱགཾ དསྶཱམ, ཀིསྶ ཏུམྷེ ན ལབྷིཏྠཱ’’ཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, སདིསཱནཾ ཨོཀྐནྟཱནཾ ཨཀཱམཱ བྷཱགཾ དཱཏུནྟི.

ཏཏྠ ཨཱགམེསུནྟི ཨུཔཙཱརེ ཨཙྪིཾསུ. ཏེནཱཧ བྷགཝཱ ‘‘ཨནུཛཱནཱམི, བྷིཀྑཝེ, ཨཱགམེནྟཱནཾ ཨཀཱམཱ བྷཱགཾ དཱཏུ’’ནྟི. ཨུཔཙཱརེཏི སུསཱནསྶ ཨཱསནྣཔྤདེསེ. ཡདི པན མནུསྶཱ ‘‘ཨིདྷཱགཏཱ ཨེཝ གཎྷནྟཱུ’’ཏི དེནྟི, སཉྙཱཎཾ ཝཱ ཀཏྭཱ གཙྪནྟི ‘‘སམྤཏྟཱ གཎྷནྟཱུ’’ཏི ¶ . སམྤཏྟཱནཾ སབྦེསམྤི པཱཔུཎཱཏི. སཙེ ཚཌྜེཏྭཱ གཏཱ, ཡེན གཧིཏཾ, སོ ཨེཝ སཱམཱི. སདིསཱ སུསཱནཾ ཨོཀྐམིཾསཱུཏི སབྦེ སམཾ ཨོཀྐམིཾསུ, ཨེཀདིསཱཡ ཝཱ ཨོཀྐམིཾསཱུཏིཔི ཨཏྠོ.

ཏེན ཁོ པན སམཡེན སམྦཧུལཱ བྷིཀྑཱུ ཀོསལེསུ ཛནཔདེསུ ཨདྡྷཱནམགྒཔྤཊིཔནྣཱ ཧོནྟི. ཏེ ཀཏིཀཾ ཀཏྭཱ སུསཱནཾ ཨོཀྐམིཾསུ པཾསུཀཱུལཱཡ. ཨེཀཙྩེ བྷིཀྑཱུ པཾསུཀཱུལཱནི ལབྷིཾསུ, ཨེཀཙྩེ བྷིཀྑཱུ ན ལབྷིཾསུ. ཡེ ཏེ བྷིཀྑཱུ ན ལབྷིཾསུ, ཏེ ཨེཝམཱཧཾསུ ‘‘ཨམྷཱཀམྤི, ཨཱཝུསོ, བྷཱགཾ དེཐཱ’’ཏི. ཏེ ཨེཝམཱཧཾསུ ‘‘ན མཡཾ, ཨཱཝུསོ, ཏུམྷཱཀཾ བྷཱགཾ དསྶཱམ, ཀིསྶ ཏུམྷེ ན ལབྷིཏྠཱ’’ཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, ཀཏིཀཾ ཀཏྭཱ ཨོཀྐནྟཱནཾ ཨཀཱམཱ བྷཱགཾ དཱཏུནྟི. ཏཏྠ ཏེ ཀཏིཀཾ ཀཏྭཱཏི ‘‘ལདྡྷཾ པཾསུཀཱུལཾ སབྦེ བྷཱཛེཏྭཱ ¶ གཎྷིསྶཱམཱ’’ཏི བཧིམེཝ ཀཏིཀཾ ཀཏྭཱ. ཚཌྜེཏྭཱ གཏཱཏི ཀིཉྩི ཨཝཏྭཱཡེཝ ཚཌྜེཏྭཱ གཏཱ. ཨེཏེན ‘‘བྷིཀྑཱུ གཎྷནྟཱུ’’ཏི ཚཌྜིཏེ ཨེཝ ཨཀཱམཱ བྷཱགདཱནཾ ཝིཧིཏཾ, ཀེཝལཾ ཚཌྜིཏེ པན ཀཏིཀཱཡ ཨསཏི ཨེཀཏོ བཧཱུསུ པཝིཊྛེསུ ཡེན གཧིཏཾ, ཏེན ཨཀཱམཱ བྷཱགོ ན དཱཏབྦོཏི དསྶེཏི. སམཱནཱ དིསཱ པུརཏྠིམཱདིབྷེདཱ ཨེཏེསནྟི སདིསཱཏི ཨཱཧ ‘‘ཨེཀདིསཱཡ ཝཱ ཨོཀྐམིཾསཱུ’’ཏི.

ཨཙྪིནྣཙཱིཝརཀཐཱ

༥. ཨཙྪིནྣཙཱིཝརཀཐཱཡཾ ཨནུཔུབྦཀཐཱཏི ཨནུཔུབྦེན ཝིནིཙྪཡཀཐཱ. སེསཔརིཀྑཱརཱནཾ སདྡྷིཝིཧཱརིཀེཧི གཧིཏཏྟཱ ནིཝཱསནཔཱརུཔནམེཝ ཨཝསིཊྛནྟི ཨཱཧ ‘‘ནིཝཱསནཔཱརུཔནམཏྟཾཡེཝ ཧརིཏྭཱ’’ཏི. སདྡྷིཝིཧཱརིཀཱནཾ ཏཱཝ ཨཱགམནསྶ ཝཱ ཨནཱགམནསྶ ཝཱ ཨཛཱནནཏཱཡ ཝུཏྟཾ ‘‘ཐེརེཧི ནེཝ ཏཱཝ…པེ… བྷུཉྫིཏབྦ’’ནྟི. པརེསམྤི ཨཏྠཱཡ ལབྷནྟཱིཏི ཨཏྟནོ ཙཱིཝརཾ དདམཱནཱ སཡཾ སཱཁཱབྷངྒེན པཊིཙྪཱདེནྟཱིཏི ཏེསཾ ཨཏྠཱཡཔི བྷཉྫིཏུཾ ལབྷནྟི. ‘‘ཏིཎེན ཝཱ པཎྞེན ཝཱ པཊིཙྪཱདེཏྭཱ ཨཱགནྟབྦ’’ནྟི ཝཙནཏོ ཨཱིདིསེསུ བྷཱུཏགཱམཔཱཏབྱཏཱཔི ཨནུཉྙཱཏཱཡེཝ ཧོཏཱིཏི ཨཱཧ ‘‘ནེཝ བྷཱུཏགཱམཔཱཏབྱཏཱཡ པཱཙིཏྟིཡཾ ཧོཏཱི’’ཏི. ན ཏེསཾ དྷཱརཎེ དུཀྐཊནྟི ཏེསཾ ཏིཏྠིཡདྷཛཱནཾ དྷཱརཎེཔི དུཀྐཊཾ ནཏྠི.

ཡཱནི ཙ ནེསཾ ཝཏྠཱནི དེནྟཱིཏི སམྦནྡྷོ. ཐེརཱནཾ སཡམེཝ དིནྣཏྟཱ ཝུཏྟཾ ‘‘ཨཙྪིནྣཙཱིཝརཊྛཱནེ ¶ ཋིཏཏྟཱ’’ཏི. ཡདི ལདྡྷིཾ གཎྷཱཏི, ཏིཏྠིཡཔཀྐནྟཀོ ནཱམ ཧོཏི. ཏསྨཱ ཝུཏྟཾ ‘‘ལདྡྷིཾ ཨགྒཧེཏྭཱ’’ཏི. ‘‘ནོ ཙེ ཧོཏི, སངྒྷསྶ ཝིཧཱརཙཱིཝརཾ ཝཱ…པེ… ཨཱཔཏྟི དུཀྐཊསྶཱ’’ཏི ཨིམིནཱ ཨནྟརཱམགྒེ པཝིཊྛཝིཧཱརཏོ ནིཀྑམིཏྭཱ ཨཉྙཏྠ ཨཏྟནོ ¶ ཨབྷིརུཙིཏཊྛཱནཾ གཙྪནྟསྶ དུཀྐཊཾ ཝུཏྟཾ, ཨིམིནཱ ཙ ‘‘ཡཾ ཨཱཝཱསཾ པཋམཾ ཨུཔགཙྪཏཱི’’ཏི ཝུཏྟཾ ཨནྟརཱམགྒེ ཋིཏཝིཧཱརམྤི སཙེ ནགྒོ ཧུཏྭཱ གཙྪཏི, དུཀྐཊམེཝཱཏི ཝེདིཏབྦཾ. ཡདི ཨེཝཾ ཏཏྠ ཀསྨཱ ན ཝུཏྟནྟི ཙེ? ཨནོཀཱསཏྟཱ. ཏཏྠ ཧི ‘‘ཨནུཛཱནཱམི, བྷིཀྑཝེ, ཨཙྪིནྣཙཱིཝརསྶ ཝཱ…པེ… ཙཱིཝརཾ ཝིཉྙཱཔེཏུ’’ནྟི ཨིམིནཱ སམྦནྡྷེན སངྒྷིཀམྤི ཙཱིཝརཾ ནིཝཱསེཏུཾ པཱརུཔིཏུཉྩ ཨནུཛཱནནྟོ ‘‘ཡཾ ཨཱཝཱསཾ པཋམཾ…པེ… གཧེཏྭཱ པཱརུཔིཏུ’’ནྟི ཨཱཧ, ཏསྨཱ ཏཏྠ ཨནོཀཱསཏྟཱ དུཀྐཊཾ ན ཝུཏྟཾ.

ཝིཧཱརཙཱིཝརནྟི སེནཱསནཙཱིཝརཾ. ཙིམིལིཀཱཧཱིཏི པཊཔིལོཏིཀཱཧི. ཏསྶ ཨུཔརཱིཏི བྷཱུམཏྠརཎསྶ ཨུཔརི. ཝིདེསགཏེནཱཏི ཨཉྙཾ ཙཱིཝརཾ ཨལབྷིཏྭཱ ཝིདེསགཏེན. ཨེཀསྨིཾ…པེ… ཋཔེཏབྦནྟི ཨེཏྠ སེསེན གཧེཏྭཱ ཨཱགཏཏྟཱ ཋཔེནྟེན ཙ སངྒྷིཀཔརིབྷོགཝསེནེཝ ཋཔིཏཏྟཱ ཨཉྙསྨིཾ སེནཱསནེ ནིཡམིཏམྤི ཨཉྙཏྠ ཋཔེཏུཾ ཝཊྚཏཱིཏི ཝདནྟི. པརིབྷོགེནེཝཱཏི ཨཉྙཾ ཙཱིཝརཾ ཨལབྷིཏྭཱ པརིབྷུཉྫནེན.

པརིབྷོགཛིཎྞནྟི ཡཐཱ ཏེན ཙཱིཝརེན སརཱིརཾ པཊིཙྪཱདེཏུཾ ན སཀྐཱ, ཨེཝཾ ཛིཎྞཾ. ཀཔྤིཡཝོཧཱརེནཱཏི ཀཡཝིཀྐཡཱཔཏྟིཏོ མོཙནཏྠཾ ཝུཏྟཾ. ‘‘ཝིཉྙཱཔེནྟསྶཱ’’ཏི ཨིམསྶེཝ ཨཏྠཾ ཝིབྷཱཝེཏི ‘‘ཙེཏཱཔེནྟསྶ པརིཝཏྟཱཔེནྟསྶཱ’’ཏི. ཨཏྟནོ དྷནེན ཧི ཝིཉྙཱཔནཾ ནཱམ པརིཝཏྟནམེཝཱཏི ཨདྷིཔྤཱཡོ. སངྒྷཝསེན པཝཱརིཏཱནཾ ཝིཉྙཱཔནེ ཝཏྟཾ དསྶེཏི ‘‘པམཱཎམེཝ ཝཊྚཏཱི’’ཏི. སངྒྷཝསེན ཧི པཝཱརིཏེ སབྦེསཾ སཱདྷཱརཎཏྟཱ ཨདྷིཀཾ ཝིཉྙཱཔེཏུཾ ན ཝཊྚཏི. ཡཾ ཡཾ པཝཱརེཏཱིཏི ཡཾ ཡཾ ཙཱིཝརཱདིཾ དསྶཱམཱིཏི པཝཱརེཏི. ཝིཉྙཱཔནཀིཙྩཾ ནཏྠཱིཏི ཝིནཱ ཝིཉྙཏྟིཡཱ དཱིཡམཱནཏྟཱ ཝིཉྙཱཔེཏྭཱ ཀིཾ ཀརིསྶཏཱིཏི ཨདྷིཔྤཱཡོ. ཨཉྙསྶཏྠཱཡཱཏི ཨེཏྠཔི ‘‘ཉཱཏཀཱནཾ པཝཱརིཏཱན’’ནྟི ¶ ཨིདཾ ཨནུཝཏྟཏིཡེཝཱཏི ཨཱཧ ‘‘ཨཏྟནོ ཉཱཏཀཔཝཱརིཏེ’’ཏིཨཱདི. ཝིཀཔྤནུཔགཙཱིཝརཏཱ, སམཡཱབྷཱཝོ, ཨཉྙཱཏཀཝིཉྙཏྟི, ཏཱཡ ཙ པཊིལཱབྷོཏི ཨིམཱནེཏྠ ཙཏྟཱརི ཨངྒཱནི.

ཝིམཏིཝིནོདནིཡཾ (ཝི. ཝི. ཊཱི. ༡.༥༡༥) པན པཱལི༹ཡཾ དྷམྨནིམནྟནཱཏི སམཎེསུ ཝཏྟབྦཱཙཱརདྷམྨམཏྟཝསེན ¶ ནིམནྟནཱ, དཱཏུཀཱམཏཱཡ ཀཏནིམནྟནཱ ན ཧོཏཱིཏི ཨཏྠོ. ཏེནེཝ ‘‘ཝིཉྙཱཔེསྶཏཱི’’ཏི ཝུཏྟཾ. ཨཉྙཱཏཀཨཔྤཝཱརིཏཏོ ཧི ཝིཉྙཏྟི ནཱམ ཧོཏི.

‘‘ཏིཎེན ཝཱ པཎྞེན ཝཱ པཊིཙྪཱདེཏྭཱ ཨཱགནྟབྦ’’ནྟི ཨིམིནཱ བྷཱུཏགཱམཝིཀོཔནཾ ཨནུཉྙཱཏནྟི ཨཱཧ ‘‘ནེཝབྷཱུཏགཱམཔཱཏབྱཏཱཡཱ’’ཏིཨཱདི. པཋམཾ སུདྡྷཙིཏྟེན ལིངྒཾ གཧེཏྭཱ པཙྪཱ ལདྡྷིཾ གཎྷནྟོཔི ཏིཏྠིཡཔཀྐནྟཀོ ཨེཝཱཏི ཨཱཧ ‘‘ནིཝཱསེཏྭཱཔི ལདྡྷི ན གཧེཏབྦཱ’’ཏི.

ཡཾ ཨཱཝཱསཾ པཋམཾ ཨུཔགཙྪཏཱིཏི ཨེཏྠཔི ཝིཧཱརཙཱིཝརཱདིཨཏྠཱཡ པཝིསནྟེནཔི ཏིཎཱདཱིཧི པཊིཙྪཱདེཏྭཱཝ གནྟབྦཾ, ‘‘ན ཏྭེཝ ནགྒེན ཨཱགནྟབྦ’’ནྟི སཱམཉྙཏོ དུཀྐཊསྶ ཝུཏྟཏྟཱ. ཙིམིལིཀཱཧཱིཏི པཊཔིལོཏིཀཱཧི. པརིབྷོགེནེཝཱཏི ཨཉྙཾ ཙཱིཝརཾ ཨལབྷིཏྭཱ པརིབྷུཉྫནེན. པརིབྷོགཛིཎྞནྟི ཡཐཱ ཏཾ ཙཱིཝརཾ པརིབྷུཉྫིཡམཱནཾ ཨོབྷགྒཝིབྷགྒཏཱཡ ཨསཱརུཔྤཾ ཧོཏི, ཨེཝཾ ཛིཎྞཾ.

ཨཉྙསྶཏྠཱཡཱཏི ཨེཏྠཔི ‘‘ཉཱཏཀཱནཾ པཝཱརིཏཱན’’ནྟི ཨིདཾ ཨནུཝཏྟཏེཝཱཏི ཨཱཧ ‘‘ཨཏྟནོ ཉཱཏཀཔཝཱརིཏེ’’ཏིཨཱདི. ཨིདྷ པན ཨཉྙསྶ ཨཙྪིནྣནཊྛཙཱིཝརསྶ ཨཏྠཱཡ ཨཉྙཱཏཀཨཔྤཝཱརིཏེ ཝིཉྙཱཔེནྟསྶ ནིསྶགྒིཡེན ཨནཱཔཏྟཱིཏི ཨཏྠོ གཧེཏབྦོ, ཨིཏརཐཱ ‘‘ཉཱཏཀཱནཾ པཝཱརིཏཱན’’ནྟི ཨིམིནཱ ཝིསེསོ ན བྷཝེཡྻ, ཏེནེཝ ཨནནྟརསིཀྑཱཔདེ ¶ ཝཀྑཏི ‘‘ཨཊྛཀཐཱསུ (པཱརཱ. ཨཊྛ. ༢.༥༢༦) པན ཉཱཏཀཔཝཱརིཏཊྛཱནེ…པེ… པམཱཎམེཝ ཝཊྚཏཱིཏི ཝུཏྟཾ, ཏཾ པཱལི༹ཡཱ ན སམེཏཱི’’ཏི ཙ ‘‘ཡསྨཱ པནིདཾ སིཀྑཱཔདཾ ཨཉྙསྶཏྠཱཡ ཝིཉྙཱཔནཝཏྠུསྨིཾཡེཝ པཉྙཏྟཾ, ཏསྨཱ ཨིདྷ ‘ཨཉྙསྶཏྠཱཡཱ’ཏི ན ཝུཏྟ’’ནྟི ཙ. ཝིཀཔྤནུཔགཙཱིཝརཏཱ, སམཡཱབྷཱཝོ, ཨཉྙཱཏཀཝིཉྙཏྟི, ཏཱཡ ཙ པཊིལཱབྷོཏི ཨིམཱནེཏྠ ཙཏྟཱརི ཨངྒཱནི.

‘‘ཏཉྩེ ཨཉྙཱཏཀོ གཧཔཏི ཝཱ གཧཔཏཱནཱི ཝཱ བཧཱུཧི ཙཱིཝརེཧི ཨབྷིཧཊྛུཾ པཝཱརེཡྻ, སནྟརུཏྟརཔརམཾ ཏེན བྷིཀྑུནཱ ཏཏོ ཙཱིཝརཾ སཱདིཏབྦཾ, ཏཏོ ཙེ ཨུཏྟརི སཱདིཡེཡྻ, ནིསྶགྒིཡཾ པཱཙིཏྟིཡ’’ནྟི ཨིམསྨིཾ ཏདུཏྟརིསིཀྑཱཔདེ (པཱརཱ. ༥༢༣) ཨབྷིཧཊྛུནྟི ཨེཏྠ ཨབྷཱིཏི ཨུཔསགྒོ, ཧརིཏུནྟི ཨཏྠོ, གཎྷིཏུནྟི ཝུཏྟཾ ཧོཏི. པཝཱརེཡྻཱཏི ཨིཙྪཱཔེཡྻ, ཨིཙྪཾ རུཙིཾ ¶ ཨུཔྤཱདེཡྻ ཝདེཡྻ ནིམནྟེཡྻཱཏི ཨཏྠོ. ཨབྷིཧཊྛུཾ པཝཱརེནྟེན པན ཡཐཱ ཝཏྟབྦཾ. ཏཾ ཨཱཀཱརཾ དསྶེཏུཾ ‘‘ཡཱཝཏྟཀཾ ཨིཙྪསི, ཏཱཝཏྟཀཾ གཎྷཱཧཱི’’ཏི ཨེཝམསྶ པདབྷཱཛནཾ ཝུཏྟཾ. ཨཐ ཝཱ ཡཐཱ ‘‘ནེཀྑམྨཾ དཊྛུ ཁེམཏོ’’ཏི ཨེཏྠ དིསྭཱཏི ཨཏྠོ, ཨེཝམིདྷཔི ཨབྷིཧཊྛུཾ པཝཱརེཡྻཱཏི ཨབྷིཧརིཏྭཱ པཝཱརེཡྻཱཏི ཨཏྠོ. ཏཏྠ ཀཱཡཱབྷིཧཱརོ ཝཱཙཱབྷིཧཱརོཏི དུཝིདྷོ ཨབྷིཧཱརོ. ཀཱཡེན ཝཱ ཧི ཝཏྠཱདཱིནི ཨབྷིཧརིཏྭཱ པཱདམཱུལེ ཋཔེཏྭཱ ‘‘ཡཏྟཀཾ ཨིཙྪསི, ཏཏྟཀཾ གཎྷཱཧཱི’’ཏི ཝདནྟོ པཝཱརེཡྻ, ཝཱཙཱཡ ཝཱ ‘‘ཨམྷཱཀཾ དུསྶཀོཊྛཱགཱརཾ པརིཔུཎྞཾ, ཡཏྟཀཾ ཨིཙྪསི, ཏཏྟཀཾ གཎྷཱཧཱི’’ཏི ཝདནྟོ པཝཱརེཡྻ, ཏདུབྷཡམྤི ཨེཀཛ྄ཛྷཾ ཀཏྭཱ ‘‘ཨབྷིཧཊྛུཾ པཝཱརེཡྻཱ’’ཏི ཝུཏྟཾ.

སནྟརུཏྟརཔརམནྟི སཨནྟརཾ ཨུཏྟརཾ པརམཾ ཨསྶ ཙཱིཝརསྶཱཏི སནྟརུཏྟརཔརམཾ, ནིཝཱསནེན སདྡྷིཾ པཱརུཔནཾ ཨུཀྐཊྛཔརིཙྪེདོ ཨསྶཱཏི ¶ ཝུཏྟཾ ཧོཏི. ཏཏོ ཙཱིཝརཾ སཱདིཏབྦནྟི ཏཏོ ཨབྷིཧཊཙཱིཝརཏོ ཨེཏྟཀཾ ཙཱིཝརཾ གཧེཏབྦཾ, ན ཨིཏོ པརནྟི ཨཏྠོ. ཡསྨཱ པན ཨཙྪིནྣསབྦཙཱིཝརེན ཏེཙཱིཝརིཀེནེཝ བྷིཀྑུནཱ ཨེཝཾ པཊིཔཛྫིཏབྦཾ, ཨཉྙེན ཨཉྙཐཱཔི, ཏསྨཱ ཏཾ ཝིབྷཱགཾ དསྶེཏུཾ ‘‘སཙེ ཏཱིཎི ནཊྛཱནི ཧོནྟཱི’’ཏིཨཱདིནཱ ནཡེནསྶ པདབྷཱཛནཾ ཝུཏྟཾ.

ཏཏྲཱཡཾ ཝིནིཙྪཡོ – ཡསྶ ཏཱིཎི ནཊྛཱནི, ཏེན དྭེ སཱདིཏབྦཱནི, ཨེཀཾ ནིཝཱསེཏྭཱ ཨེཀཾ པཱརུཔིཏྭཱ ཨཉྙཾ སབྷཱགཊྛཱནཏོ པརིཡེསིསྶཏི. ཡསྶ དྭེ ནཊྛཱནི, ཏེན ཨེཀཾ སཱདིཏབྦཾ. སཙེ པཀཏིཡཱཝ སནྟརུཏྟརེན ཙརཏི, དྭེ སཱདིཏབྦཱནི, ཨེཝཾ ཨེཀཾ སཱདིཡནྟེནེཝ སམོ བྷཝིསྶཏི. ཡསྶ ཏཱིསུ ཨེཀཾ ནཊྛཾ, ན སཱདིཏབྦཾ. ཡསྶ པན དྭཱིསུ ཨེཀཾ ནཊྛཾ, ཨེཀཾ སཱདིཏབྦཾ. ཡསྶ ཨེཀཾཡེཝ ཧོཏི, ཏཉྩ ནཊྛཾ, དྭེ སཱདིཏབྦཱནི. བྷིཀྑུནིཡཱ པན པཉྩསུཔི ནཊྛེསུ དྭེ སཱདིཏབྦཱནི, ཙཏཱུསུ ནཊྛེསུ ཨེཀཾ སཱདིཏབྦཾ, ཏཱིསུ ནཊྛེསུ ཀིཉྩི ན སཱདིཏབྦཾ, ཀོ པན ཝཱདོ དྭཱིསུ ཝཱ ཨེཀསྨིཾ ཝཱ. ཡེན ཀེནཙི ཧི སནྟརུཏྟརཔརམཏཱཡ ཋཱཏབྦཾ, ཏཏོ ཨུཏྟརི ན ལབྦྷཏཱིཏི ཨིདམེཏྠ ལཀྑཎཾ.

སེསཀཾ ཨཱཧརིསྶཱམཱིཏི དྭེ ཙཱིཝརཱནི ཀཏྭཱ སེསཾ པུན ཨཱཧརིསྶཱམཱིཏི ཨཏྠོ. ན ཨཙྪིནྣཀཱརཎཱཏི བཱཧུསཙྩཱདིགུཎཝསེན དེནྟི. ཉཱཏཀཱནནྟིཨཱདཱིསུ ཉཱཏཀཱནཾ དེནྟཱནཾ སཱདིཡནྟསྶ, པཝཱརིཏཱནཾ དེནྟཱནཾ སཱདིཡནྟསྶ, ཨཏྟནོ དྷནེན སཱདིཡནྟསྶ ཨནཱཔཏྟཱིཏི ཨཏྠོ. ཨཊྛཀཐཱསུ པན ‘‘ཉཱཏཀཔཝཱརིཏཊྛཱནེ པཀཏིཡཱ བཧུམྤི ཝཊྚཏི, ཨཙྪིནྣཀཱརཎཱ པམཱཎམེཝ ¶ ཝཊྚཏཱི’’ཏི ཝུཏྟཾ, ཏཾ པཱལི༹ཡཱ ན སམེཏི. ཡསྨཱ པནིདཾ སིཀྑཱཔདཾ ཨཉྙསྶཏྠཱཡ ཝིཉྙཱཔནཝཏྠུསྨིཾཡེཝ པཉྙཏྟཾ, ཏསྨཱ ཨིདྷ ‘‘ཨཉྙསྶཏྠཱཡཱ’’ཏི ན ཝུཏྟཾ. སེསཾ ཨུཏྟཱནཏྠམེཝ. སམུཊྛཱནཱདཱིསུ ཨིདམྤི ཚསམུཊྛཱནཾ ¶ , ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཝཙཱིཀམྨཾ, ཏིཙིཏྟཾ, ཏིཝེདནནྟི.

སཏྟམེ པཱལི༹ཡཾ པགྒཱཧིཀསཱལནྟི དུསྶཝཱཎིཛཀཱནཾ ཨཱཔཎཾ, ‘‘པགྒཱཧིཏསཱལ’’ནྟིཔི པཋནྟི. ཨབྷཱིཏི ཨུཔསགྒོཏི ཏསྶ ཝིསེསཏྠཱབྷཱཝཾ དསྶེཏི. ཏེནཱཧ ‘‘ཧརིཏུནྟི ཨཏྠོ’’ཏི. ཝརསདྡསྶ ཨིཙྪཱཡཾ ཝཏྟམཱནཏྟཱ ཨཱཧ ‘‘ཨིཙྪཱཔེཡྻཱ’’ཏི. དཊྛུ ཁེམཏོཏི ཨེཏྠ གཱཐཱབནྡྷཝསེན ཨནུནཱསིཀལོཔོ དཊྛབྦོ. སཨནྟརནྟི ཨནྟརཝཱསཀསཧིཏཾ. ཨུཏྟརནྟི ཨུཏྟརཱསངྒཾ. ཨསྶ ཙཱིཝརསྶཱཏི སཱདིཏབྦཙཱིཝརསྶ. ཨཙྪིནྣསབྦཙཱིཝརེནཱཏི ཨཙྪིནྣཱནི སབྦཱནི ཏཱིཎི ཙཱིཝརཱནི ཨསྶཱཏི ཨཙྪིནྣསབྦཙཱིཝརོ, ཏེནཱཏི ཨཏྠོ. ཡསྶ ཧི ཨཙྪིནྡནསམཡེ ཏཱིཎི ཙཱིཝརཱནི སནྣིཧིཏཱནི ཧོནྟི, ཏཱནི སབྦཱནི ཨཙྪིནྣཱནཱིཏི སོ ‘‘ཨཙྪིནྣསབྦཙཱིཝརོ’’ཏི ཝུཙྩཏི. ཏེནེཝ ‘‘ཨཙྪིནྣསབྦཙཱིཝརེན ཏེཙཱིཝརིཀེནཱ’’ཏི ཝུཏྟཾ. ཏེཙཱིཝརིཀེནཱཏི ཧི ཨཙྪིནྡནསམཡེ ཏིཙཱིཝརསྶ སནྣིཧིཏབྷཱཝཾ སནྡྷཱཡ ཝུཏྟཾ, ན པན ཝིནཡེ ཏེཙཱིཝརིཀཱབྷཱཝཾ, དྷུཏངྒཏེཙཱིཝརིཀབྷཱཝཾ ཝཱ སནྡྷཱཡ. ཨེཝཾ པཊིཔཛྫིཏབྦནྟི ‘‘སནྟརུཏྟརཔརམཾ ཏེན བྷིཀྑུནཱ ཏཏོ ཙཱིཝརཾ སཱདིཏབྦ’’ནྟི ཝུཏྟཝིདྷིནཱ པཊིཔཛྫིཏབྦཾ. ཨཉྙེནཱཏི ཨཙྪིནྣཨསབྦཙཱིཝརེན. ཡསྶ ཏཱིསུ ཙཱིཝརེསུ ཨེཀཾ ཝཱ དྭེ ཝཱ ཙཱིཝརཱནི ཨཙྪིནྣཱནི ཧོནྟི, ཏེནཱཏི ཨཏྠོ. ཨཉྙཐཱཔཱིཏི ‘‘སནྟརུཏྟརཔརམ’’ནྟི ཝུཏྟཝིདྷཱནཏོ ཨཉྙཐཱཔི. ཡསྶ ཧི ཏཱིསུ དྭེ ཙཱིཝརཱནི ཨཙྪིནྣཱནི ཧོནྟི, ཨེཀཾ སཱདིཏབྦཾ, ཨེཀསྨིཾ ཨཙྪིནྣེ ན སཱདིཏབྦནྟི ན ཏསྶ སནྟརུཏྟརཔརམསཱདིཡནཾ སམྦྷཝཏི. ཨཡམེཝ ཙ ཨཏྠོ པདབྷཱཛནེན ཝིབྷཱཝིཏོ. ཏེནཱཧ ‘‘ཏཾ ཝིབྷཱགཾ དསྶེཏུ’’ནྟི.

ཀེཙི པན ‘‘ཏེཙཱིཝརིཀེནཱཏི ཝུཏྟཏྟཱ ཏིཙཱིཝརཾ པརིཀྑཱརཙོལ༹ཝསེན ཨདྷིཊྛཧིཏྭཱ པརིབྷུཉྫཏོ ཏསྨིཾ ནཊྛེ བཧཱུནིཔི གཧེཏུཾ ལབྷཏཱི’’ཏི ཝདནྟི, ཏཾ ན གཧེཏབྦཾ. པདབྷཱཛནསྶ ཧི ¶ ཨདྷིཔྤཱཡཾ དསྶེནྟེན ཡསྨཱ པན ‘‘ཨཙྪིནྣསབྦཙཱིཝརེན…པེ… ཏཾ ཝིབྷཱགཾ དསྶེཏུ’’ནྟི ཝུཏྟཾ, པདབྷཱཛནེ ཙ ན ཏཱདིསོ ཨཏྠོ ཨུཔལབྦྷཏི, ཏསྨཱ ཏཾ ན གཧེཏབྦམེཝ. ཡམྤི མཱཏིཀཱཊྛཀཐཱཡཾ (ཀངྑཱ. ཨཊྛ. ཏཏུཏྟརིསིཀྑཱཔདཝཎྞནཱ) ཝུཏྟཾ ‘‘ཡསྶ ཨདྷིཊྛིཏཏིཙཱིཝརསྶ ཏཱིཎི ནཊྛཱནཱི’’ཏི, ཏཏྠཔི ཨདྷིཊྛིཏགྒཧཎཾ སརཱུཔཀཐནམཏྟནྟི གཧེཏབྦཾ, ན པན ཏིཙཱིཝརཱདྷིཊྛཱནེན ཨདྷིཊྛིཏཙཱིཝརསྶེཝཱཏི ཨེཝམཏྠོ གཧེཏབྦོ པཱལི༹ཡཾ ཨཊྛཀཐཱཡཉྩ ཏཐཱ ཨཏྠསྶཱསམྦྷཝཏོ ¶ . ན ཧི ཏིཙཱིཝརཱདྷིཊྛཱནེན ཨདྷིཊྛིཏཙཱིཝརསྶེཝ ཨིདཾ སིཀྑཱཔདཾ པཉྙཏྟནྟི སཀྐཱ ཝིཉྙཱཏུཾ. པུརིམསིཀྑཱཔདེན ཧི ཨཙྪིནྣཙཱིཝརསྶ ཨཉྙཱཏཀཝིཉྙཏྟིཡཱ ཨནུཉྙཱཏཏྟཱ པམཱཎཾ ཨཛཱནིཏྭཱ ཝིཉྙཱཔནཝཏྠུསྨིཾ པམཱཎཏོ སཱདིཡནཾ ཨནུཛཱནནྟེན བྷགཝཏཱ ཨིདཾ སིཀྑཱཔདཾ པཉྙཏྟཾ, ཏསྨཱ པརིཀྑཱརཙོལི༹ཀསྶ བཧུམྤི སཱདིཏུཾ ཝཊྚཏཱིཏི ཨཡམཏྠོ ནེཝ པཱལི༹ཡཱ སམེཏི, ན ཙ བྷགཝཏོ ཨདྷིཔྤཱཡཾ ཨནུལོམེཏི.

ཡསྶ ཏཱིཎི ནཊྛཱནི, ཏེན དྭེ སཱདིཏབྦཱནཱིཏི ཨེཏྠ ཡསྶ ཏིཙཱིཝརཏོ ཨདྷིཀམྤི ཙཱིཝརཾ ཨཉྙཏྠ ཋིཏཾ ཨཏྠི, ཏདཱ ཏསྶ ཙཱིཝརསྶ ཨལབྦྷནཱིཡབྷཱཝཏོ ཏེནཔི སཱདིཏུཾ ཝཊྚཏཱིཏི ཝེདིཏབྦཾ. པཀཏིཡཱཝ སནྟརུཏྟརེན ཙརཏཱིཏི སཱསངྐསིཀྑཱཔདཝསེན ཝཱ ཨཝིཔྤཝཱསསམྨུཏིཝསེན ཝཱ ཏཏིཡསྶ ཨལཱབྷེན ཝཱ ཙརཏི. ‘‘དྭེ ནཊྛཱནཱི’’ཏི ཨདྷིཀཱརཏྟཱ ཝུཏྟཾ ‘‘དྭེ སཱདིཏབྦཱནཱི’’ཏི. ཨེཀཾ སཱདིཡནྟེནེཝ སམོ བྷཝིསྶཏཱིཏི ཏིཎྞཾ ཙཱིཝརཱནཾ དྭཱིསུ ནཊྛེསུ ཨེཀཾ སཱདིཡནྟེན སམོ བྷཝིསྶཏི ཨུབྷིནྣམྤི སནྟརུཏྟརཔརམཏཱཡ ཨཝཊྛཱནཏོ. ཡསྶ ཨེཀཾཡེཝ ཧོཏཱིཏི ཨཉྙེན ཀེནཙི ཀཱརཎེན ཝིནཊྛསེསཙཱིཝརཾ སནྡྷཱཡ ཝུཏྟཾ.

‘‘སེསཀཾ ཏུམྷེཝ ཧོཏཱུཏི དེནྟཱི’’ཏི ཝུཏྟཏྟཱ ‘‘པམཱཎཡུཏྟཾ གཎྷིསྶཱམ, སེསཀཾ ཨཱཧརིསྶཱམཱ’’ཏི ཝཏྭཱ ¶ གཧེཏྭཱ གམནསམཡེཔི ‘‘སེསཀམྤི ཏུམྷཱཀཾཡེཝ ཧོཏཱུ’’ཏི ཝདནྟི, ལདྡྷཀཔྤིཡམེཝ. པཝཱརིཏཱནནྟི ཨཙྪིནྣཀཱལཏོ པུབྦེཡེཝ པཝཱརིཏཱནཾ. པཱལི༹ཡཱ ན སམེཏཱིཏི སནྟརུཏྟརཔརམཏོ ཨུཏྟརི སཱདིཡནེ ཨནཱཔཏྟིདསྶནཏྠཾ ‘‘ཨནཱཔཏྟི ཉཱཏཀཱནཾ པཝཱརིཏཱན’’ནྟི ཝུཏྟཏྟཱ ན སམེཏི. སནྟརུཏྟརཔརམཾ སཱདིཡནྟསྶ ཧི ཨཱཔཏྟིཔྤསངྒོཡེཝ ནཏྠི, སཏི ཙ སིཀྑཱཔདེན ཨཱཔཏྟིཔྤསངྒེ ཨནཱཔཏྟི ཡུཏྟཱ དསྶེཏུནྟི ཨདྷིཔྤཱཡོ. ཀེཙི པན ‘‘པམཱཎམེཝ ཝཊྚཏཱིཏི ཨིདཾ སལླེཁདསྶནཏྠཾ ཝུཏྟ’’ནྟི ཝདནྟི.

ཡསྨཱ པནིདཾ…པེ… ན ཝུཏྟནྟི ཨེཏྠཱཡམདྷིཔྤཱཡོ – ‘‘ཨཉྙསྶཏྠཱཡཱ’’ཏི ཝུཙྩམཱནེ ཨཉྙེསཾ ཨཏྠཱཡ པམཱཎཾ ཨཏིཀྐམིཏྭཱཔི གཎྷིཏུཾ ཝཊྚཏཱིཏི ཨཱཔཛྫཏི, ཏཉྩ ཨཉྙསྶཏྠཱཡ ཝིཉྙཱཔནཝཏྠུསྨིཾ པཉྙཏྟཏྟཱ ཝཏྠུནཱ སཾསནྡིཡམཱནཾ ན སམེཏི. ན ཧི ཡཾ ཝཏྠུཾ ནིསྶཱཡ སིཀྑཱཔདཾ པཉྙཏྟཾ, ཏསྨིཾཡེཝ ཨནཱཔཏྟིཝཙནཾ ཡུཏྟནྟི. གཎྛིཔདེསུ པན ཏཱིསུཔི ‘‘ཨིམསྶ སིཀྑཱཔདསྶ ཨཏྟནོ སཱདིཡནཔཊིབདྡྷཏཱཝསེན པཝཏྟཏྟཱ ‘ཨཉྙསྶཏྠཱཡཱ’ཏི ཝཏྟུཾ ཨོཀཱསོཡེཝ ནཏྠི, ཏསྨཱ ན ཝུཏྟ’’ནྟི ཀཐིཏཾ. ཨིདྷ ‘‘ཨཉྙསྶཏྠཱཡཱ’’ཏི ཨཝུཏྟཏྟཱ ཨཉྙེསཾ ཨཏྠཱཡ ¶ ཉཱཏཀཔཝཱརིཏེསུ ཨདྷིཀཾ ཝིཉྙཱཔེནྟསྶ ཨཱཔཏྟཱིཏི ཙེ? ན, ཏཏྠ པུརིམསིཀྑཱཔདེནེཝ ཨནཱཔཏྟིསིདྡྷིཏོ. ཏཏུཏྟརིཏཱ, ཨཙྪིནྣཱདིཀཱརཎཏཱ, ཨཉྙཱཏཀཝིཉྙཏྟི, ཏཱཡ ཙ པཊིལཱབྷོཏི ཨིམཱནེཏྠ ཙཏྟཱརི ཨངྒཱནི.

ཝིམཏིཝིནོདནིཡཾ (ཝི. ཝི. ཊཱི. ༡.༥༢༢-༥༢༤) པན ‘‘པཱལི༹ཡཾ པགྒཱཧིཀསཱལནྟི དུསྶཱཔཎཾ. ཏཉྷི ཝཱཎིཛཀེཧི དུསྶཱནི པགྒཧེཏྭཱ དསྶནཊྛཱནཏཱཡ ‘པགྒཱཧིཀསཱལཱ’ཏི ཝུཙྩཏི. ཨསྶ ཙཱིཝརསྶཱཏི སཱདིཏབྦཙཱིཝརསྶ. ཏེཙཱིཝརིཀེནཱཏི ཨིམིནཱ ཨཙྪིནྣཏིཙཱིཝརཏོ ཨཉྙསྶ ཝིཧཱརཱདཱིསུ ནིཧིཏསྶ ཙཱིཝརསྶ ཨབྷཱཝཾ དསྶེཏི ¶ . ཡདི བྷཝེཡྻ, ཝིཉྙཱཔེཏུཾ ན ཝཊྚེཡྻ, ཏཱཝཀཱལིཀཾ ནིཝཱསེཏྭཱ ཨཏྟནོ ཙཱིཝརཾ གཧེཏབྦཾ. ཏཱཝཀཱལིཀམྤི ཨལབྷནྟསྶ བྷཱུཏགཱམཝིཀོཔནཾ ཀཏྭཱ ཏིཎཔཎྞེཧི ཚདནཾ ཝིཡ ཝིཉྙཱཔནམྤི ཝཊྚཏི ཨེཝ. ཨཉྙེནཱཏི ཨཙྪིནྣཨསབྦཙཱིཝརེན. ‘དྭེ ནཊྛཱནཱི’ཏི ཨདྷིཀཱརཏོ ཝུཏྟཾ ‘དྭེ སཱདིཏབྦཱནཱི’ཏི. པཱལི༹ཡཱ ན སམེཏཱིཏི ‘ཨནཱཔཏྟི ཉཱཏཀཱནཾ པཝཱརིཏཱན’ནྟི (པཱརཱ. ༥༢༦) ཨིམཱཡ པཱལི༹ཡཱ ན སམེཏི ཏཏུཏྟརི ཝིཉྙཱཔནཨཱཔཏྟིཔྤསངྒེ ཨེཝ ཝུཏྟཏྟཱ. ཨཉྙསྶཏྠཱཡཱཏི ན ཝུཏྟནྟི ཨིདཾ ཨཉྙསྶཏྠཱཡ ཏཏུཏྟརི ཝིཉྙཱཔནེ ནིསྶགྒིཡཾ པཱཙིཏྟིཡཾ ཧོཏཱིཏི ཨིམམཏྠཾ དཱིཔེཏི. ཏཉྩ པཱཙིཏྟིཡཾ ཡེསཾ ཨཏྠཱཡ ཝིཉྙཱཔེཏི, ཏེསཾ ཝཱ སིཡཱ ཝིཉྙཱཔཀསྶེཝ ཝཱ, ན ཏཱཝ ཏེསཾ, ཏེཧི ཨཝིཉྙཱཔིཏཏྟཱ, ནཱཔི ཝིཉྙཱཔཀསྶ, ཨཏྟཱནཾ ཨུདྡིསྶ ཨཝིཉྙཏྟཏྟཱ. ཏསྨཱ ཨཉྙསྶཏྠཱཡ ཝིཉྙཱཔེནྟསྶཔི ནིསྶགྒིཡཾ པཱཙིཏྟིཡཾ ན དིསྶཏི. པཱལི༹ཡཾ པན ཨིམསྶ སིཀྑཱཔདསྶ ཨཏྟནོ སཱདིཡནཔཊིབདྡྷཏཱཝསེན པཝཏྟཏྟཱ ‘ཨཉྙསྶཏྠཱཡཱ’ཏི ཨནཱཔཏྟིཝཱརེ ན ཝུཏྟནྟི ཝདནྟི, ཏཉྩ ཡུཏྟཾ ཝིཡ དིསྶཏི, ཝཱིམཾསིཏྭཱ གཧེཏབྦཾ. ཏཏུཏྟརིཙཱིཝརཏཱ, ཨཙྪིནྣཱདིཀཱརཎཏཱ, ཨཉྙཱཏཀཝིཉྙཏྟི, ཏཱཡ ཙ པཊིལཱབྷོཏི ཨིམཱནེཏྠ ཙཏྟཱརི ཨངྒཱནཱི’’ཏི.

ཨིདཾ ཏཏུཏྟརིསིཀྑཱཔདཝིནིཙྪཡཾ ཨཱཙརིཡེན ཨཝུཏྟམྤི ཨཙྪིནྣཙཱིཝརཱདྷིཀཱརེཡེཝ པཝཏྟཏྟཱ ཨམྷེཧི གཧིཏཾ, ཨཉྙཱཏཀཝིཉྙཏྟིསིཀྑཱཔདསྶ སམཡེསུ ཨཙྪིནྣཙཱིཝརཀཱལེ ཨཉྙཱཏཀཱནཾ ཝིཉྙཱཔེཏབྦབྷཱཝོ བྷགཝཏཱ ཝུཏྟོ, ཏེཧི དིནྣཙཱིཝརསྶ མཏྟསོ གཧིཏབྷཱཝོ ཏཏུཏྟརིསིཀྑཱཔདེན ཝུཏྟོ. ཏསྨཱ ཨཙྪིནྣཙཱིཝརཨདྷིཀཱརོཡེཝ ཧོཏཱིཏི.

ཙཱིཝརཨཙྪིནྡནཝིནིཙྪཡཀཐཱ

ཨིཏོ ¶ ¶ པརཾ ཨཙྪིནྡནསཱམཉྙེན ཙཱིཝརཨཙྪིནྡནཝིནིཙྪཡཾ ཝཀྑཱམ – ཏཏྠ ཡམྤི ཏྱཱཧནྟི ཡམྤི ཏེ ཨཧཾ. སོ ཀིར ‘‘མམ པཏྟཙཱིཝརཨུཔཱཧནཔཙྩཏྠརཎཱནི ཝཧནྟོ མཡཱ སདྡྷིཾ ཙཱརིཀཾ པཀྐམིསྶཏཱི’’ཏི ཨདཱསི. ཏེནེཝམཱཧ ‘‘མཡཱ སདྡྷིཾ ཛནཔདཙཱརིཀཾ པཀྐམིསྶཏཱི’’ཏི. ཨཙྪིནྡཱིཏི བལཀྐཱརེན ཨགྒཧེསི, སཀསཉྙཱཡ གཧིཏཏྟཱ པནསྶ པཱརཱཛིཀཾ ནཏྠི, ཀིལམེཏྭཱ གཧིཏཏྟཱ ཨཱཔཏྟི པཉྙཏྟཱ.

སཡཾ ཨཙྪིནྡཏི, ནིསྶགྒིཡཾ པཱཙིཏྟིཡནྟི ཨེཀཾ ཙཱིཝརཾ ཨེཀཱབདྡྷཱནི ཙ བཧཱུནི ཨཙྪིནྡཏོ ཨེཀཱ ཨཱཔཏྟི, ཨེཀཏོ ཨབདྡྷཱནི ཝིསུཾ ཝིསུཾ ཋིཏཱནི བཧཱུནི ཨཙྪིནྡཏོ, ‘‘སངྒྷཱཊིཾ ཨཱཧར, ཨུཏྟརཱསངྒཾ ཨཱཧརཱ’’ཏི ཨེཝཾ ཨཱཧརཱཔཡཏོ ཙ ཝཏྠུགཎནཱཡ ཨཱཔཏྟིཡོ. ‘‘མཡཱ དིནྣཱནི སབྦཱནི ཨཱཧརཱ’’ཏི ཝདཏོཔི ཨེཀཝཙནེནེཝ སམྦཧུལཱ ཨཱཔཏྟིཡོ.

ཨཉྙཾ ཨཱཎཱཔེཏི, ཨཱཔཏྟི དུཀྐཊསྶཱཏི ‘‘ཙཱིཝརཾ གཎྷཱ’’ཏི ཨཱཎཱཔེཏི, ཨེཀཾ དུཀྐཊཾ. ཨཱཎཏྟོ བཧཱུནི གཎྷཱཏི, ཨེཀཾ པཱཙིཏྟིཡཾ. ‘‘སངྒྷཱཊིཾ གཎྷ, ཨུཏྟརཱསངྒཾ གཎྷཱ’’ཏི ཝདཏོ ཝཱཙཱཡ ཝཱཙཱཡ དུཀྐཊཾ. ‘‘མཡཱ དིནྣཱནི སབྦཱནི གཎྷཱ’’ཏི ཝདཏོ ཨེཀཝཱཙཱཡ སམྦཧུལཱ ཨཱཔཏྟིཡོ.

ཨཉྙཾ པརིཀྑཱརནྟི ཝིཀཔྤནུཔགཔཙྪིམཾ ཙཱིཝརཾ ཋཔེཏྭཱ ཡཾ ཀིཉྩི ཨནྟམསོ སཱུཙིམྤི. ཝེཋེཏྭཱ ཋཔིཏསཱུཙཱིསུཔི ཝཏྠུགཎནཱཡ དུཀྐཊཱནི. སིཐིལཝེཋིཏཱསུ ཨེཝཾ. གཱལ༹ྷཾ ཀཏྭཱ བདྡྷཱསུ པན ཨེཀམེཝ དུཀྐཊནྟི མཧཱཔཙྩརིཡཾ ཝུཏྟཾ. སཱུཙིགྷརེ པཀྑིཏྟཱསུཔི ཨེསེཝ ནཡོ. ཐཝིཀཱཡ པཀྑིཔིཏྭཱ སིཐིལབདྡྷགཱལ༹ྷབདྡྷེསུ ཏིཀཊུཀཱདཱིསུ བྷེསཛྫེསུཔི ཨེསེཝ ནཡོ.

སོ ཝཱ དེཏཱིཏི ‘‘བྷནྟེ, ཏུམྷཱཀཾཡེཝ ཨིདཾ སཱརུཔྤ’’ནྟི ཨེཝཾ ཝཱ དེཏི. ཨཐ ཝཱ པན ‘‘ཨཱཝུསོ, མཡཾ ཏུཡ྄ཧཾ ‘ཝཏྟཔཊིཔཏྟིཾ ¶ ཀརིསྶཏི, ཨམྷཱཀཾ སནྟིཀེ ཨུཔཛ྄ཛྷཾ གཎྷིསྶཏི, དྷམྨཾ པརིཡཱཔུཎིསྶཏཱི’ཏི ཙཱིཝརཾ ཨདམྷཱ, སོདཱནི ཏྭཾ ན ཝཏྟཾ ཀརོསི, ན ཨུཔཛ྄ཛྷཾ གཎྷཱསི, ན དྷམྨཾ པརིཡཱཔུཎཱསཱི’’ཏི ཨེཝམཱདཱིཧི ཝུཏྟོ ‘‘བྷནྟེ, ཙཱིཝརཏྠཱཡ མཉྙེ བྷཎཐ, ཨིདཾ ¶ ཝོ ཙཱིཝར’’ནྟི དེཏི, ཨེཝམྤི སོ ཝཱ དེཏི. དིསཱཔཀྐནྟཾ ཝཱ པན དཧརཾ ‘‘ནིཝཏྟེཐ ན’’ནྟི བྷཎཏི, སོ ན ནིཝཏྟཏི. ‘‘ཙཱིཝརཾ གཧེཏྭཱ རུནྡྷཐཱ’’ཏི ཨེཝཾ ཙེ ནིཝཏྟཏི, སཱདྷུ. སཙེ ‘‘པཏྟཙཱིཝརཏྠཱཡ མཉྙེ ཏུམྷེ བྷཎཐ, གཎྷཐ ན’’ནྟི དེཏི, ཨེཝམྤི སོཡེཝ དེཏི. ཝིབྦྷནྟཾ ཝཱ དིསྭཱ ‘‘མཡཾ ཏུཡ྄ཧཾ ‘ཝཏྟཾ ཀརིསྶཏཱི’ཏི པཏྟཙཱིཝརཾ ཨདམྷཱ, སོདཱནི ཏྭཾ ཝིབྦྷམིཏྭཱ ཙརསཱི’’ཏི ཝདཏི, ཨིཏརོ ‘‘གཎྷཐ ཏུམྷཱཀཾ པཏྟཙཱིཝར’’ནྟི དེཏི, ཨེཝམྤི སོ ཝཱ དེཏི. ‘‘མམ སནྟིཀེ ཨུཔཛ྄ཛྷཾ གཎྷནྟསྶེཝ ཏེ དེམི, ཨཉྙཏྠ གཎྷནྟསྶ ན དེམི. ཝཏྟཾ ཀརོནྟསྶེཝ དེམི, ཨཀརོནྟསྶ ན དེམི. དྷམྨཾ པརིཡཱཔུཎནྟསྶེཝ དེམི, ཨཔརིཡཱཔུཎནྟསྶ ན དེམི. ཨཝིབྦྷམནྟསྶེཝ དེམི, ཝིབྦྷམནྟསྶ ན དེམཱི’’ཏི ཨེཝཾ པན དཱཏུཾ ན ཝཊྚཏི, དདཏོ དུཀྐཊཾ, ཨཱཧརཱཔེཏུཾ པན ཝཊྚཏི. ཙཛིཏྭཱ དིནྣཾ ཨཙྪིནྡིཏྭཱ གཎྷནྟོ བྷཎྜགྒྷེན ཀཱརེཏབྦོ. སེསམེཏྠ ཨུཏྟཱནམེཝ. ཨཡཾ སམནྟཔཱསཱདིཀཏོ ཨུདྡྷཊཝིནིཙྪཡོ.

ཡམྤི ཏྱཱཧནྟི ཨེཏྠ ཡནྟི ཀཱརཎཝཙནཾ, ཏསྨཱ ཨེཝམེཏྠ སམྦནྡྷོ ཝེདིཏབྦོ – ‘‘མཡཱ སདྡྷིཾ ཛནཔདཙཱརིཀཾ པཀྐམིསྶཏཱིཏི ཡཾ ཀཱརཎཾ ནིསྶཱཡ ཨཧཾ ཏེ, ཨཱཝུསོ, ཙཱིཝརཾ ཨདཱསིཾ, ཏཾ ན ཀརོསཱི’’ཏི ཀུཔིཏོ ཨནཏྟམནོ ཨཙྪིནྡཱིཏི. ཡནྟི ཝཱ ཙཱིཝརཾ པརཱམསཏི. ཏཏྠ ‘‘མཡཱ སདྡྷིཾ ཛནཔདཙཱརིཀཾ པཀྐམིསྶཏཱིཏི ཡམྤི ཏེ ཨཧཾ ཙཱིཝརཾ ཨདཱསིཾ, ཏཾ ཙཱིཝརཾ གཎྷིསྶཱམཱི’’ཏི ཀུཔིཏོ ཨནཏྟམནོ ཨཙྪིནྡཱིཏི སམྦནྡྷིཏབྦཾ.

ཨཱཎཏྟོ ¶ བཧཱུནི གཎྷཱཏི, ཨེཀཾ པཱཙིཏྟིཡནྟི ‘‘ཙཱིཝརཾ གཎྷཱ’’ཏི ཨཱཎཏྟིཡཱ ཨེཀཙཱིཝརཝིསཡཏྟཱ ཨེཀམེཝ པཱཙིཏྟིཡཾ. ཝཱཙཱཡ ཝཱཙཱཡ དུཀྐཊནྟི ཨེཏྠ ཨཙྪིནྣེསུ ཝཏྠུགཎནཱཡ པཱཙིཏྟིཡཱནི. ཨེཀཝཱཙཱཡ སམྦཧུལཱ ཨཱཔཏྟིཡོཏི ཨིདཾ ཨཙྪིནྣེསུ ཝཏྠུགཎནཱཡ ཨཱཔཛྫིཏབྦཾ པཱཙིཏྟིཡཱཔཏྟིཾ སནྡྷཱཡ ཝུཏྟཾ, ཨཱཎཏྟིཡཱ ཨཱཔཛྫིཏབྦཾ པན དུཀྐཊཾ ཨེཀམེཝ.

ཨེཝནྟི ཨིམིནཱ ‘‘ཝཏྠུགཎནཱཡ དུཀྐཊཱནཱི’’ཏི ཨིདཾ པརཱམསཏི. ཨེསེཝ ནཡོཏི སིཐིལཾ གཱལ༹ྷཉྩ པཀྑིཏྟཱསུ ཨཱཔཏྟིཡཱ བཧུཏྟཾ ཨེཀཏྟཉྩ ཨཏིདིསཏི.

ཨཱཝུསོ མཡནྟིཨཱདཱིསུ གཎྷིཏུཀཱམཏཱཡ ཨེཝཾ ཝུཏྟེཔི ཏེནེཝ དིནྣཏྟཱ ཨནཱཔཏྟི. ཨམྷཱཀཾ ¶ སནྟིཀེ ཨུཔཛ྄ཛྷཾ གཎྷིསྶཏཱིཏི ཨིདཾ སཱམཎེརསྶཔི དཱནཾ དཱིཔེཏི, ཏསྨཱ ཀིཉྩཱཔི པཱལི༹ཡཾ ‘‘བྷིཀྑུསྶ སཱམཾ ཙཱིཝརཾ དཏྭཱ’’ཏི ཝུཏྟཾ, ཏཐཱཔི ཨནུཔསམྤནྣཀཱལེ དཏྭཱཔི ཨུཔསམྤནྣཀཱལེ ཨཙྪིནྡནྟསྶ པཱཙིཏྟིཡམེཝཱཏི ཝེདིཏབྦཾ. ཨཙྪིནྡནསམཡེ ཨུཔསམྤནྣབྷཱཝོཡེཝ ཧེཏྠ པམཱཎཾ. དེཏཱིཏི ཏུཊྛོ ཝཱ ཀུཔིཏོ ཝཱ དེཏི. རུདྡྷཐཱཏི ནིཝཱརེཐ. ཨེཝཾ པན དཱཏུཾ ན ཝཊྚཏཱིཏི ཨེཏྠ ཨེཝཾ དིནྣཾ ན ཏཱཝ ‘‘ཏསྶ སནྟཀ’’ནྟི ཨནདྷིཊྛཧིཏྭཱཝ པརིབྷུཉྫིཏབྦནྟི ཝེདིཏབྦཾ. ཨཱཧརཱཔེཏུཾ པན ཝཊྚཏཱིཏི ཨེཝཾ དིནྣཾ བྷཏིསདིསཏྟཱ ཨཱཧརཱཔེཏུཾ ཝཊྚཏི. ཙཛིཏྭཱ དིནྣནྟི ཝུཏྟནཡེན ཨདཏྭཱ ཨནཔེཀྑེན ཧུཏྭཱ ཏསྶེཝ དིནྣཾ. བྷཎྜགྒྷེན ཀཱརེཏབྦོཏི སཀསཉྙཱཡ ཝིནཱ གཎྷནྟོ བྷཎྜཾ ཨགྒྷཱཔེཏྭཱ ཨཱཔཏྟིཡཱ ཀཱརེཏབྦོ. ཝིཀཔྤནུཔགཔཙྪིམཙཱིཝརཏཱ, སཱམཾ དིནྣཏཱ, སཀསཉྙིཏཱ, ཨུཔསམྤནྣཏཱ, ཀོདྷཝསེན ཨཙྪིནྡནཾ ཝཱ ཨཙྪིནྡཱཔནཾ ཝཱཏི ཨིམཱནེཏྠ པཉྩ ཨངྒཱནི. ཨཡཾ སཱརཏྠདཱིཔནཱིཔཱཋོ (སཱརཏྠ. ཊཱི. ༢.༦༣༥).

ཝིམཏིཝིནོདནིཡཾ ¶ (ཝི. ཝི. ཊཱི. ༡.༦༣༡) པན ‘‘ཡམྤི…པེ… ཨཙྪིནྡཱིཏི ཨེཏྠ ཡཾ ཏེ ཨཧཾ ཙཱིཝརཾ ཨདཱསིཾ, ཏཾ ‘མཡཱ སདྡྷིཾ པཀྐམིསྶཏཱི’ཏི སཉྙཱཡ ཨདཱསིཾ, ན ཨཉྙཐཱཏི ཀུཔིཏོ ཨཙྪིནྡཱིཏི ཨེཝཾ ཨཛ྄ཛྷཱཧརིཏྭཱ ཡོཛེཏབྦཾ. ཨེཀཾ དུཀྐཊནྟི ཡདི ཨཱཎཏྟོ ཨཝསྶཾ ཨཙྪིནྡཏི, ཨཱཎཏྟིཀྑཎེ ཨེཝ པཱཙིཏྟིཡཾ. ཡདི ན ཨཙྪིནྡཏི, ཏདཱ ཨེཝ དུཀྐཊནྟི དཊྛབྦཾ. ཨེཀཝཱཙཱཡ སམྦཧུལཱཔཏྟིཡོཏི ཡདི ཨཱཎཏྟོ ཨནནྟརཱཡེན ཨཙྪིནྡཏི, ཨཱཎཏྟིཀྑཎེཡེཝ ཝཏྠུགཎནཱཡ པཱཙིཏྟིཡཱཔཏྟིཡོ པཡོགཀརཎཀྑཎེཡེཝ ཨཱཔཏྟིཡཱ ཨཱཔཛྫིཏབྦཏོ, ཙཱིཝརཾ པན ཨཙྪིནྣེཡེཝ ནིསྶགྒིཡཾ ཧོཏི. ཡདི སོ ན ཨཙྪིནྡཏི, ཨཱཎཏྟིཀྑཎེ ཨེཀམེཝ དུཀྐཊནྟི དཊྛབྦཾ. ཨེཝམཉྙཏྠཔི ཨཱིདིསེསུ ནཡོ ཉཱཏབྦོ. ཨུཔཛ྄ཛྷཾ གཎྷིསྶཏཱིཏི སཱམཎེརསྶ དཱནཾ དཱིཔེཏི, ཏེན ཙ སཱམཎེརཀཱལེ དཏྭཱ ཨུཔསམྤནྣཀཱལེ ཨཙྪིནྡཏོཔི པཱཙིཏྟིཡཾ དཱིཔེཏི. ‘‘བྷིཀྑུསྶ སཱམཾ ཙཱིཝརཾ དཏྭཱ’’ཏི ཨིདཾ ཨུཀྐཊྛཝསེན ཝུཏྟཾ. ཨཱཧརཱཔེཏུཾ པན ཝཊྚཏཱིཏི ཀམྨེ ཨཀཏེ བྷཏིསདིསཏྟཱ ཝུཏྟཾ. ཝིཀཔྤནུཔགཔཙྪིམཙཱིཝརཏཱ, སཱམཾ དིནྣཏཱ, སཀསཉྙིཏཱ, ཨུཔསམྤནྣཏཱ, ཀོདྷཝསེན ཨཙྪིནྡནཾ ཝཱ ཨཙྪིནྡཱཔནཾ ཝཱཏི ཨིམཱནེཏྠ པཉྩ ཨངྒཱནཱི’’ཏི ཝུཏྟཾ.

པཊིབྷཱནཙིཏྟཀཐཱ

༦. པཊིབྷཱནཙིཏྟཀཐཱཡཾ ¶ ཨཊྛཀཐཱཡཾ ཝུཏྟནཡེནེཝ སུཝིཉྙེཡྻནྟི སཱརཏྠདཱིཔནིཡཾ ན ཀིཉྩི ཝུཏྟཾ, ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༢༩༩) པན ‘‘ཀརོཧཱིཏི ཝཏྟུཾ ན ཝཊྚཏཱིཏི ཨཱཎཏྟིཡཱ ཨེཝ པཊིཀྑིཏྟཏྟཱ དྭཱརཔཱལཾ ‘ཀིཾ ན ཀརོསཱི’ཏིཨཱདིནཱ པརིཡཱཡེན ཝཏྟུཾ ཝཊྚཏི. ཛཱཏཀཔཀརཎནྟི ཛཱཏཀཔཊིསཾཡུཏྟཾ ཨིཏྠིཔུརིསཱདི ཡཾ ཀིཉྩི རཱུཔཾ ཨདྷིཔྤེཏཾ. ‘པརེཧི ཀཱརཱཔེཏུ’ནྟི ཝུཏྟཏྟཱ བུདྡྷརཱུཔམྤི སཡཾ ཀཱཏུཾ ན ལབྷཏཱི’’ཏི ཝུཏྟཾ.

ཝིཔྤཀཏབྷོཛནཀཐཱ

༧. ཝིཔྤཀཏབྷོཛནཀཐཱཡམྤི ¶ སཱརཏྠདཱིཔནཱི ཝིམཏིཝིནོདནཱི ཝཛིརབུདྡྷིཊཱིཀཱསུ ན ཀིཉྩི ཝུཏྟཾ. པཋམཾ ཀཏཾ པཀཏཾ, ཝི ཨནིཊྛིཏཾ པཀཏཾ ཝིཔྤཀཏཾ, ཝིཔྤཀཏཾ བྷོཛནཾ ཡེན སོ ཝིཔྤཀཏབྷོཛནོ, པཋམཾ བྷུཉྫིཏྭཱ ཨནིཊྛིཏབྷོཛནཀིཙྩོ བྷིཀྑུ. ཝུཏྟེན བྷིཀྑུནཱ པཝིསིཏབྦནྟི སམྦནྡྷོ. རིཏྟཧཏྠམྤི ཨུཊྛཱཔེཏུཾ ན ཝཊྚཏཱིཏི ཨེཏྠ ཀཱརཎམཱཧ ‘‘ཝིཔྤཀཏབྷོཛནོཡེཝ ཧི སོ ཧོཏཱི’’ཏི, ཡཱགུཁཛྫཀཱདཱིསུཔི པཱིཏེསུ ཁཱདིཏེསུཔི བྷཏྟསྶ ཨབྷུཏྟཏྟཱ ཨནིཊྛིཏབྷོཛནཀིཙྩོ ཧོཏི. པཝཱརིཏོ ཧོཏི, ཏེན ཝཏྟབྦོཏི པཝཱརིཏེན ཨཱསནཱ ཝུཊྛིཏེན བྷུཉྫིཏུཾ ཨལབྷམཱནཏྟཱ ཨཏྟནོ སནྟིཀེ ཨུདཀེ ཨསནྟེ ཝཏྟབྦོཏི ཨཏྠོ. སེསཾ སུཝིཉྙེཡྻམེཝ.

ཨུདྡིསནྟཨུདྡིསཱཔནཀཐཱ

༨. ཨུདྡིསནྟཨུདྡིསཱཔནཀཐཱཡཾ ཨུདྡིསནྟེནཱཏི ཨུདྡེསཾ དེནྟེན, པཱལི༹ཾ ཝཱཙེནྟེནཱཏི ཨཏྠོ. ཨུདྡིསཱཔེནྟེནཱཏི ཨུདྡེསཾ གཎྷནྟེན, པཱལི༹ཾ ཝཱཙཱཔེནྟེནཱཏི ཨཏྠོ. ཨུཙྩཏརེཔཱིཏི པི-སདྡེན སམཱནཱསནཾ སམྤིཎྜེཏི. ནཱིཙཏརེཔཱིཏི ཨེཏྠཱཔི ཨེསེཝ ནཡོ.

ཏིཝསྶནྟརིཀཀཐཱ

༩. ཏིཝསྶནྟརིཀཀཐཱཡཾ ཏཱིཎི ཝསྶཱནི ཏིཝསྶཾ, ཏཱིཎི ཝཱ ཝསྶཱནི ཏིཝསྶཱནི, ཏིཝསྶཱནཾ ¶ ཨནྟརཾ ཏིཝསྶནྟརཾ, ཏིཝསྶནྟརེ ཋིཏོཏི ཏིཝསྶནྟརོ, ཏེན ཏིཝསྶནྟརེན, ཨནྟར-སདྡོ མཛ྄ཛྷཏྠཝཱཙཀོ, ཎ-པཙྩཡོ ཋིཏཏྠེ. ཏེནཱཧ ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༣༢༠) ‘‘ཏིཝསྶནྟརེནཱཏི ཏིཎྞཾ ཝསྶཱནཾ ¶ ཨནྟོ ཋིཏེནཱ’’ཏི. ཨཊྛཀཐཱཡཾ (ཙཱུལ༹ཝ. ཨཊྛ. ༣༢༠) པན སརཱུཔམེཝ དསྶེནྟོ ‘‘ཏིཝསྶནྟརོ ནཱམཱ’’ཏིཨཱདིམཱཧ. ཨིམེ སབྦེཏི སབྦེ ཏིཝིདྷཱ ཨིམེ སམཱནཱསནིཀཱ. སེསཾ སུཝིཉྙེཡྻམེཝ.

དཱིགྷཱསནཀཐཱ

༡༠. དཱིགྷཱསནཀཐཱཡཾ སཾཧཱརིམཾ ཝཱཏི སཾཧརིཏུཾ ཡུཏྟཾ ཀཊསཱརཀཱདི. ཨསཾཧཱརིམཾ ཝཱཏི སཾཧརིཏུཾ ཨསཀྐུཎེཡྻཾ པཱསཱཎཱདི ཨཱསནཾ. ཏེནཱཧ སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༣༢༠) ‘‘དཱིགྷཱསནཾ ནཱམ མཉྩཔཱིཋཝིནིམུཏྟཾ ཡཾ ཀིཉྩི ཏིཎྞནྣཾ ཨེཀཏོ སུཁཾ ནིསཱིདིཏུཾ པཧོཏཱི’’ཏི. ཀསྨཱ པན ‘‘ཏིཎྞནྣཾ པཧོཏཱི’’ཏི ཝུཏྟཾ, ནནུ དྭིནྣཾ པཧོནཀཱསནམྤི དཱིགྷམེཝཱཏི ཙོདནཾ སནྡྷཱཡཱཧ ‘‘ཨནུཛཱནཱམི…པེ… ཨེཏྟཀཾ པཙྪིམཾ དཱིགྷཱསནནྟི ཧི ཝུཏྟ’’ནྟི. དྭིནྣཾ པཧོནཀེ ཧི ཨདཱིགྷཱསནེ སམཱནཱསནིཀེཧེཝ སཧ ནིསཱིདིཏུཾ ཝཊྚཏི, ཏིཎྞནྣཾ པཧོནཀཏོ པཊྛཱཡ གཧིཏེ དཱིགྷཱསནེ པན ཨསམཱནཱསནིཀེཧིཔི སཧ ནིསཱིདིཏུཾ ཝཊྚཏི. ཡདི ཨེཝཾ པཎྜཀཱདཱིཧིཔི སཧ ནིསཱིདིཏུཾ ཝཊྚེཡྻཱཏི ཙོདནཾ མནསི ཀཏྭཱ ཨཱཧ ‘‘ཨནུཛཱནཱམི, བྷིཀྑཝེ, ཋཔེཏྭཱ པཎྜཀ’’ནྟིཨཱདི. ཏཏྠ ཨཏྠོ སུཝིཉྙེཡྻོཝ.

གིལཱནུཔཊྛཱནཀཐཱ

༡༡. གིལཱནུཔཊྛཱནཀཐཱཡཾ པལིཔནྣོཏི ནིམུགྒོ, མཀྑིཏོཏི ཨཏྠོ. ཨུཙྩཱརེཏྭཱཏི ཨུཀྑིཔིཏྭཱ. སམཱནཱཙརིཡཀོཏི ཨེཏྠ ‘‘སཙེཔི ཨེཀསྶ ཨཱཙརིཡསྶ ཨེཀོ ཨནྟེཝཱསིཀོ ཧོཏི, ཨེཀོ སདྡྷིཝིཧཱརིཀོ, ཨེཏེཔི ཨཉྙམཉྙཾ སམཱནཱཙརིཡཀཱ ཨེཝཱ’’ཏི ཝདནྟི. བྷེསཛྫཾ ཡོཛེཏུཾ ཨསམཏྠོ ཧོཏཱིཏི ཝེཛྫེན ‘‘ཨིདཉྩིདཉྩ བྷེསཛྫཾ ¶ གཧེཏྭཱ ཨིམིནཱ ཡོཛེཏྭཱ དཱཏབྦ’’ནྟི ཝུཏྟེ ཏཐཱ ཀཱཏུཾ ཨསམཏྠོཏི ཨཏྠོ. ནཱིཧཱཏུནྟི ནཱིཧརིཏུཾ, ཚཌྜེཏུནྟི ཨཏྠོ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༣༦༥-༣༦༦) པན ‘‘བྷཱུམིཡཾ པརིབྷཎྜཾ ཨཀཱསཱིཏི གིལཱནེན ནིཔནྣབྷཱུམིཡཾ ཀིལིཊྛཊྛཱནཾ དྷོཝིཏྭཱ ཧརིཏཱུཔལིཏྟཾ ཀཱརེསཱིཏི ཨཏྠོ. བྷེསཛྫཾ ཡོཛེཏུཾ ཨསམཏྠོཏི པརེཧི ཝུཏྟཝིདྷིམྤི ཀཱཏུཾ ཨསམཏྠོ’’ཏི ཝུཏྟཾ.

མརཎཝཎྞཀཐཱ

༡༢. མརཎཝཎྞཀཐཱཡཾ ¶ མརཎཏྠིཀཱཝ ཧུཏྭཱཏི ཨིམསྶ ཀཱཡསྶ བྷེདེན སགྒཔཱཔནཱདྷིཔྤཱཡཏྟཱ ཨཏྠཏོ མརཎཏྠིཀཱཝ ཧུཏྭཱ. མརཎཏྠིཀབྷཱཝཾ ཨཛཱནནྟཱཏི ‘‘ཨེཝཾ ཨདྷིཔྤཱཡིནོ མརཎཏྠིཀཱ ནཱམ ཧོནྟཱི’’ཏི ཨཏྟནོ མརཎཏྠིཀབྷཱཝཾ ཨཛཱནནྟཱ. ན ཧི ཏེ ཨཏྟནོ ཙིཏྟཔྤཝཏྟིཾ ན ཛཱནནྟི. ཝོཧཱརཝསེནཱཏི པུབྦབྷཱགཝོཧཱརཝསེན, མརཎཱདྷིཔྤཱཡསྶ སནྣིཊྛཱཔཀཙེཏནཱཀྑཎེ ཀརུཎཱཡ ཨབྷཱཝཏོ ཀཱརུཉྙེན པཱསེ བདྡྷསཱུཀརམོཙནཾ ཝིཡ ན ཧོཏཱིཏི ཨདྷིཔྤཱཡོ. ‘‘ཡཐཱཡུནཱ’’ཏི ཝུཏྟམེཝཏྠཾ ཡཐཱནུསནྡྷིནཱཏི པརིཡཱཡནྟརེན ཝུཏྟཾ, ཡཐཱནུསནྡྷིནཱ ཡཐཱཡུཔརིཙྪེདེནཱཏི ཝུཏྟཾ ཧོཏི. ཨཐ ཝཱ ཡཐཱནུསནྡྷིནཱཏི ཡཐཱནུཔྤབནྡྷེན, ཡཱཝ ཏསྨིཾ བྷཝེ སནྟཱནསྶ ཨནུཔྤབནྡྷོ ཨཝིཙྪིནྣཔཝཏྟི ཧོཏི, ཏཱཝ ཋཏྭཱཏི ཝུཏྟཾ ཧོཏི.

ཝིམཏིཝིནོདནིཡཾ (ཝི. ཝི. ཊཱི. ༡.༡༨༠) ‘‘ཝོཧཱརཝསེནཱཏི པུབྦབྷཱགཝོཧཱརཝསེན མརཎཱདྷིཔྤཱཡསྶ སནྣིཊྛཱཔཀཙེཏནཱཀྑཎེ ཀརུཎཱཡ ཨབྷཱཝཏོ, ཀཱརུཉྙེན པཱསེ བདྡྷསཱུཀརམོཙནཾ ཝིཡ ན ཧོཏཱིཏི ཨདྷིཔྤཱཡོ. ‘ཡཐཱཡུནཱ’ཏི ཝུཏྟམེཝཏྠཾ ཡཐཱནུསནྡྷིནཱཏི པརིཡཱཡནྟརེན ཝུཏྟ’’ནྟི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༡༨༠) པན ‘‘མརཎཏྠིཀཱཝ ཧུཏྭཱཏི ¶ ཨིམསྶ ཀཱཡསྶ བྷེདེན སགྒཔཱཔནཱདྷིཔྤཱཡཏྟཱ ཨཏྠཏོ མརཎཏྠིཀཱཝ ཧུཏྭཱ. ‘‘ཨེཝཾཨདྷིཔྤཱཡིནོ མརཎཏྠིཀཱ ནཱམ ཧོནྟཱི’’ཏི ཨཏྟནོ མརཎཏྠིཀབྷཱཝཾ ཨཛཱནནྟཱ ཨཱཔནྣཱ པཱརཱཛིཀཾ. ན ཧི ཏེ ཨཏྟནོ ཙིཏྟཔྤཝཏྟིཾ ན ཛཱནནྟཱིཏི ཝུཙྩནྟི. ཝོཧཱརཝསེནཱཏི པུབྦབྷཱགེ ཝོཧཱརཝསེན, སནྣིཊྛཱནེ པནེཏཾ ནཏྠི, པཱསེ བདྡྷསཱུཀརམོཙནེ ཝིཡ ན ཧོཏི. ཡཐཱནུསནྡྷིནཱཏི ཨནྟརཱ ཨམརིཏྭཱཏི ཨཏྠོ’’ཏི ཝུཏྟཾ.

ཨཏྟཔཱཏནཀཐཱ

༡༣. ཨཏྟཔཱཏནཀཐཱཡཾ ཝིབྷཏྟིབྱཏྟཡེནཱཏི ཝིབྷཏྟིཝིཔརིཎཱམེན. ཝིསེསཱདྷིགམོཏི སམཱདྷི ཝིཔསྶནཱ ཙ. ཨཏིཝིཡ པཱཀཊཏྟཱ ‘‘ཧཏྠཔྤཏྟོ ཝིཡ དིསྶཏཱི’’ཏི ཝུཏྟཾ. ཨུཔཙྪིནྡཏཱིཏི ཝིསེསཱདྷིགམསྶ ཝིཀྑེཔོ མཱ ཧོཏཱུཏི ཨཱཧཱརཾ ཨུཔཙྪིནྡཏི. ཝིསེསཱདྷིགམནྟི ལོཀུཏྟརདྷམྨཔཊིལཱབྷཾ. བྱཱཀརིཏྭཱཏི ཨཱརོཙེཏྭཱ. ཨུཔཙྪིནྡཏི, ན ཝཊྚཏཱིཏི ཡསྨཱ སབྷཱགཱནཾ ལཛྫཱིབྷིཀྑཱུནཾཡེཝ ཨརིཡཱ ཨཏྟནཱ ཨདྷིགཏཝིསེསཾ ཏཱདིསེ ཀཱརཎེ སཏི ཨཱརོཙེནྟི, ཏེ ཙ བྷིཀྑཱུ ¶ ཨཔྤཏིརཱུཔཱཡ ཨནེསནཱཡ པཙྩཡཾ ན པརིཡེསནྟི, ཏསྨཱ ཏེཧི པརིཡེསིཏཔཙྩཡེ ཀུཀྐུཙྩཾ ཨུཔྤཱདེཏྭཱ ཨཱཧཱརཾ ཨུཔཙྪིནྡིཏུཾ ན ཝཊྚཏཱིཏི ཨཏྠོ. སབྷཱགཱནཉྷི བྱཱཀཏཏྟཱ ཨུཔཙྪིནྡིཏུཾ ན ལབྷཏི. ཏེ ཧི ཀཔྤིཡཁེཏྟཾ ཨཱརོཙེནྟི. ཏེནེཝ ‘‘སབྷཱགཱནཉྷི ལཛྫཱིབྷིཀྑཱུནཾ ཀཐེཏུཾ ཝཊྚཏཱིཏི ཨིདཾ ‘ཨུཔཙྪིནྡཏི, ན ཝཊྚཏཱི’ཏི ཨིམསྶ ཀཱརཎཾ དསྶེནྟེན ཝུཏྟ’’ནྟི ཏཱིསུཔི གཎྛིཔདེསུ ཝུཏྟཾ. ཨཐ ཝཱ ཝིསེསཱདྷིགམཾ བྱཱཀརིཏྭཱཏི ཨིདཾ ཝིསེསསྶ ཨདྷིགཏབྷཱཝདསྶནཏྠཾ ཝུཏྟཾ, ཨདྷིགམནྟརཱཡཾ ཨཱསངྐནྟེནེཝ ཙ ཨཱཧཱརུཔཙྪེདོ ཀཱཏབྦོཏི ཨནུཉྙཱཏཏྟཱ ཨདྷིགཏེན ན ཀཱཏབྦོཏི དསྶེཏུཾ ‘‘ཝིསེསཱདྷིགམཾ བྱཱཀརིཏྭཱ ཨཱཧཱརཾ ཨུཔཙྪིནྡཏི, ན ཝཊྚཏཱི’’ཏི ཝུཏྟཾ. ཀིཾ པན ཨརིཡཱ ཨཏྟནཱ ཨདྷིགཏཝིསེསཾ ཨཉྙེསཾ ¶ ཨཱརོཙེནྟཱིཏི ཨིམིསྶཱ ཙོདནཱཡ ‘‘སབྷཱགཱནཉྷི ལཛྫཱིབྷིཀྑཱུནཾ ཀཐེཏུཾ ཝཊྚཏཱི’’ཏི ཝུཏྟཾ, ཨཡམེཏྠ ཡུཏྟཏརོཏི ཨམྷཱཀཾ ཁནྟི, གཎྛིཔདེཔི ཨཡམཏྠོ དསྶིཏོཡེཝཱཏི.

ཝིམཏིཝིནོདནིཡམྤི (ཝི. ཝི. ཊཱི. ༡.༡༨༢-༡༨༣) ‘‘ཝིབྷཏྟིབྱཏྟཡེནཱཏི ཝིབྷཏྟིཝིཔརིཎཱམེན. ཝིསེསཱདྷིགམོཏི སམཱདྷི ཝིཔསྶནཱ ཙ. ཝིསེསཱདྷིགམནྟི ལོཀུཏྟརདྷམྨཔཊིལཱབྷཾ. བྱཱཀརིཏྭཱཏི ཨཱརོཙེཏྭཱ, ཨིདཉྩ ཝིསེསསྶ ཨདྷིགཏབྷཱཝདསྶནཏྠཾ ཝུཏྟཾ. ཨདྷིགཏཝིསེསཱ ཧི དིཊྛཱནུགཏིཨཱཔཛྫནཏྠཾ ལཛྫཱིབྷིཀྑཱུནཾ ཨཝསྶཾ ཨདྷིགམཾ བྱཱཀརོནྟི, ཨདྷིགཏཝིསེསེན པན ཨབྱཱཀརིཏྭཱཔི ཨཱཧཱརཾ ཨུཔཙྪིནྡིཏུཾ ན ཝཊྚཏི, ཨདྷིགམནྟརཱཡཝིནོདནཏྠམེཝ ཨཱཧཱརུཔཙྪེདསྶ ཨནུཉྙཱཏཏྟཱ ཏདདྷིགམེ སོ ན ཀཱཏབྦོཝ. ཀིཾ པནཱདྷིགམཾ ཨཱརོཙེཏུཾ ཝཊྚཏཱིཏི ཨཱཧ སབྷཱགཱནཉྷཱིཏིཨཱདཱི’’ཏི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༡༨༡-༡༨༣) ‘‘ཧཏྠཔྤཏྟོ ཝིཡ དིསྶཏི, ‘ཏསྶ ཝིཀྑེཔོ མཱ ཧོཏཱུ’ཏི ཨུཔཙྪིནྡཏི, ཝིསེསཱདྷིགམཾ བྱཱཀརིཏྭཱ ཏཔྤབྷཝཾ སཀྐཱརཾ ལཛྫཱཡནྟོ ཨཱཧཱརཾ ཨུཔཙྪིནྡཏི སབྷཱགཱནཾ བྱཱཀཏཏྟཱ. ཏེ ཧི ཀཔྤིཡཁེཏྟཾ ཨཱརོཙེནྟཱི’’ཏི ཝུཏྟཾ.

ཨཔྤཙྩཝེཀྑིཏྭཱནིསིནྣཀཐཱ

༡༤. ཨཔྤཙྩཝེཀྑིཏྭཱ ནིསིནྣཀཐཱཡཾ ཨཔྤཊིཝེཀྑིཏྭཱཏི ཨནུཔཔརིཀྑིཏྭཱ. ཨུདྡྷཾ ཝཱ ཨདྷོ ཝཱ སངྐམནྟཱིཏི པཙྪཱ ཨཱགཏཱནཾ ཨོཀཱསདཱནཏྠཾ ནིསིནྣཔཱལི༹ཡཱ ཨུདྡྷཾ ཝཱ ཨདྷོ ཝཱ གཙྪནྟི. པཊིཝེཀྑཎཀིཙྩཾ ནཏྠཱིཏི པཙྪཱ ཨཱགཏེཧི ཨུཔཔརིཀྑཎཀིཙྩཾ ནཏྠི. ཧེཊྛཱ ཀིསྨིཉྩི ཝིཛྫམཱནེ སཱཊཀཾ ཝལིཾ གཎྷཱཏཱིཏི ཨཱཧ ‘‘ཡསྨིཾ ཝལི ན པཉྙཱཡཏཱི’’ཏི. པཊིཝེཀྑཎཉྩེཏཾ ¶ གིཧཱིནཾ སནྟཀེཡེཝཱཏི དཊྛབྦཾ. ཝིམཏིཝིནོདནིཡམྤི (ཝི. ཝི. ཊཱི. ༡.༡༨༠) ‘‘ཧེཊྛཱ ཀིསྨིཉྩི ཝིཛྫམཱནེ སཱཊཀཾ ཝལིཾ གཎྷཱཏཱིཏི ཨཱཧ ¶ ‘ཡསྨིཾ ཝལི ན པཉྙཱཡཏཱི’ཏི. པཊིཝེཀྑཎཉྩེཏཾ གིཧཱིནཾ སནྟཀེ ཨེཝཱཏི དཊྛབྦ’’ནྟི ཨེཏྟཀམེཝ ཝུཏྟཾ, ཝཛིརབུདྡྷིཊཱིཀཱཡམྤི (ཝཛིར. ཊཱི. པཱརཱཛིཀ ༡༨༠) ‘‘ཨཔྤཊིཝེཀྑིཏྭཱཏི ཨཝིཙཱརེཏྭཱ. ཧེཊྛིམབྷཱགེ ཧི ཀིསྨིཉྩི ཝིཛྫམཱནེ ཝལི པཉྙཱཡཏཱི’’ཏི ཨེཏྟཀམེཝ.

དཝཱཡསིལཱཝིཛ྄ཛྷནཀཐཱ

༡༥. དཝཱཡསིལཱཝིཛ྄ཛྷནཀཐཱཡཾ དཝཱསདྡོ ཧསཱདྷིཔྤཱཡཝཱཙཀོ. པཊིཔུབྦཝིདྷ-དྷཱཏུ པཝཊྚནཏྠོཏི ཨཱཧ ‘‘ཧསཱདྷིཔྤཱཡེན པཱསཱཎོ ན པཝཊྚེཏབྦོ’’ཏི. སིལཱསདྡསྶ པཱསཱཎཝཱཙཀཏྟཱ སོ ཨེཝ ན པཊིཝིཛ྄ཛྷིཏབྦོཏི ཙོདནཾ སནྡྷཱཡཱཧ ‘‘ན ཀེཝལཉྩཱ’’ཏིཨཱདི. ཡདི ཨེཝཾ སབྦེསམྤི ཨཏྠཱཡ ན ཝཊྚེཡྻཱཏི ཨཱཧ ‘‘ཙེཏིཡཱདཱིནཾ ཨཏྠཱཡཱ’’ཏིཨཱདི. དྷོཝནདཎྜཀནྟི བྷཎྜདྷོཝནདཎྜཾ. ཝིམཏིཝིནོདནིཡཾ (ཝི. ཝི. ཊཱི. ༡.༡༨༢-༡༨༣) པན ‘‘བྷཎྜཀཾ ཝཱ དྷོཝནྟཱཏི ཙཱིཝརཾ ཝཱ དྷོཝནྟཱ. དྷོཝནདཎྜཀནྟི ཙཱིཝརདྷོཝནདཎྜ’’ནྟི ཝུཏྟཾ.

དཱཡཱལིམྤནཀཐཱ

༡༦. དཱཡཱལིམྤནཀཐཱཡཾ ཨལླ…པེ… པཱཙིཏྟིཡནྟི སུཀྑཊྛཱནེཔི ཨགྒིཾ པཱཏེཏྭཱ ཨིམིནཱ ཨདྷིཔྤཱཡེན ཨཱལིམྤེནྟསྶ པཱཙིཏྟིཡམེཝ. དུཀྐཊནྟི སུཀྑཊྛཱནེ ཝཱ སུཀྑཾ ‘‘ཨསུཀྑ’’ནྟི ཨཝཝཏྠཔེཏྭཱ ཝཱ ཨགྒིཾ པཱཏེནྟསྶ དུཀྐཊཾ. ཀཱིལཱ༹དྷིཔྤཱཡེཔི ཨེསེཝ ནཡོ, ཀཱིལཱ༹དྷིཔྤཱཡོ ཙ པཊཔཊཱཡམཱནསདྡསྶཱདཝསེནེཝ ཝེདིཏབྦོ. པཊིཔཀྑབྷཱུཏོ ཨགྒི པཊགྒི. པརིཏྟཀརཎནྟི ཨཱརཀྑཀརཎཾ. སཡཾ ཝཱ ཨུཊྛིཏནྟི ཝཱཏེརིཏཱནཾ ཝེལུ༹ཨཱདཱིནཾ ཨཉྙམཉྙསངྒྷཊྚནེན སམུཊྛིཏཾ. ནིརུཔཱདཱནོཏི ཨིནྡྷནརཧིཏོ. ཝིམཏིཝིནོདནིཡཾ (ཝི. ཝི. ཊཱི. ༡.༡༩༠) པན ‘‘ཁིཌྜཱདྷིཔྤཱཡེནཔི དུཀྐཊནྟི སུཀྑཏིཎཱདཱིསུ ཨགྒིཀརཎཾ སནྡྷཱཡ ཝུཏྟཾ. ཨལླེསུ པན ¶ ཀཱིལཱ༹དྷིཔྤཱཡེནཔི ཀརོནྟསྶ པཱཙིཏྟིཡམེཝ. པཊིཔཀྑབྷཱུཏོ, པཊིམུཁཾ གཙྪནྟོ ཝཱ ཨགྒི པཊགྒི, ཏསྶ ཨལླཏིཎཱདཱིསུཔི དཱནཾ ཨནུཉྙཱཏཾ. ཏཾ དེནྟེན དཱུརཏོཝ ཨཱགཙྪནྟཾ དཱཝགྒིཾ དིསྭཱ ཝིཧཱརསྶ སམནྟཏོ ཨེཀཀྑཎེ ཨཀཏྭཱ ཨེཀདེསཏོ པཊྛཱཡ ཝིཧཱརསྶ སམནྟཏོ སཎིཀཾ ཛྷཱཔེཏྭཱ ཡཐཱ མཧནྟོཔི ཨགྒི ཝིཧཱརཾ པཱཔུཎིཏུཾ ན སཀྐོཏི, ཨེཝཾ ཝིཧཱརསྶ སམནྟཱ ¶ ཨབྦྷོཀཱསཾ ཀཏྭཱ པཊགྒི དཱཏབྦོ. སོ ཌཱཝགྒིནོ པཊིཔཐཾ གནྟྭཱ ཨེཀཏོ ཧུཏྭཱ ཏེན སཧ ནིབྦཱཏི. པརིཏྟཀརཎནྟི སམནྟཱ རུཀྑཏིཎཱདིཙྪེདནཔརིཁཱཁཎནཱདིཨཱརཀྑཀརཎཾ. ཏེནཱཧ ‘ཏིཎཀུཊིཀཱནཾ སམནྟཱ བྷཱུམིཏཙྪན’ནྟིཨཱདཱི’’ཏི, ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༡༩༠) པན ‘‘པརིཏྟནྟི རཀྑཎཾ, ཏཾ དསྶེཏུཾ ‘སམནྟཱ བྷཱུམིཏཙྪན’ནྟིཨཱདི ཝུཏྟ’’ནྟི ཨེཏྟཀམེཝ ཝུཏྟཾ.

མིཙྪཱདིཊྛིཀུལཱབྷཏཀཐཱ

༡༧. མིཙྪཱདིཊྛིཀུལཱབྷཏཀཐཱཡཾ ནཏྠི སདྡྷཱ ཨེཏེསཱུཏི ཨསྶདྡྷཱ, མཙྪརིནོ, ཏེསུ ཨསྶདྡྷེསུ. མིཙྪཱདིཊྛིཡཱ ཡུཏྟཱནི ཀུལཱནི མིཙྪཱདིཊྛིཀུལཱནི, མཛ྄ཛྷེལོཔཏཏིཡཱཏཔྤུརིསསམཱསོ, ‘‘ནཏྠི དིནྣ’’ནྟིཨཱདིནཡཔྤཝཏྟཱཡ དསཝཏྠུཀཱཡ མིཙྪཱདིཊྛིཡཱ ཡུཏྟཀུལཱནི, ཏེསུ. མིཙྪཱདིཊྛིཀུལེསུ ལབྷིཏྭཱཏི སམྦནྡྷོ. ཨསཀྐཙྩཀཱརཱིནཾ ཏེསཾ སཀྐཙྩཀརཎེན, ཨཔྤཎཱིཏདཱཡཱིནཾ ཏེསཾ པཎཱིཏདཱནེན བྷཝིཏབྦམེཏྠ ཀཱརཎེནཱཏི ཀཱརཎཾ ཨུཔཔརིཀྑིཏྭཱཝ བྷུཉྫིཏུཾ ཡུཏྟནྟི ཨཱཧ ‘‘ཨནུཔཔརིཀྑིཏྭཱ ནེཝ ཨཏྟནཱ བྷུཉྫིཏབྦཾ, ན པརེསཾ དཱཏབྦ’’ནྟི. ཡེན ཀཱརཎེན བྷཝིཏབྦཾ, ཏཾ དསྶེཏུཾ ‘‘ཝིསམིསྶམྤི ཧཱི’’ཏིཨཱདི ཝུཏྟཾ. ན ཀེཝལཾ པིཎྜཔཱཏམེཝཱཏི ཨཱཧ ‘‘ཡམྤཱི’’ཏིཨཱདི. ཏཏྠ ཀཱརཎམཱཧ ‘‘ཨཔིཧིཏཝཏྠུསྨིམྤི ཧཱི’’ཏིཨཱདི. ཏཏོ ཨཉྙམྤི དསྶེཏི གནྡྷཧལིདྡཱདིམཀྑིཏོཏིཨཱདིནཱ ¶ . ཏཏྠཔི ཀཱརཎཾ དསྶེཏུམཱཧ ‘‘སརཱིརེ རོགཊྛཱནཱནཱི’’ཏིཨཱདི.

གོཔཀདཱནཀཐཱ

༡༨. གོཔཀདཱནཀཐཱཡཾ པརེསཾ སནྟཀཾ གོཔེཏི རཀྑཏཱིཏི གོཔཀོ, ཏསྶ དཱནཾ གོཔཀདཱནཾ, ཨུཡྻཱནཔཱལཀཱདཱིཧི བྷིཀྑཱུནཾ དཱཏབྦདཱནཾ. ཏཏྠ པཎྞཾ ཨཱརོཔེཏྭཱཏི ‘‘ཨེཏྟཀེཧེཝ རུཀྑེཧི ཨེཏྟཀམེཝ གཧེཏབྦ’’ནྟི པཎྞཾ ཨཱརོཔེཏྭཱ, ལིཁིཏྭཱཏི ཝུཏྟཾ ཧོཏི. ནིམིཏྟསཉྙཾ ཀཏྭཱཏི སངྐེཏཾ ཀཏྭཱ. དཱརཀཱཏི ཏེསཾ པུཏྟནཏྟཱདཡོ དཱརཀཱ. ཨཉྙེཔི ཡེ ཀེཙི གོཔཀཱ ཧོནྟི, ཏེ སབྦེཔི ཝུཏྟཱ. སབྦཏྠཔི གིཧཱིནཾ གོཔཀདཱནེ ཡཏྟཀཾ གོཔཀཱ དེནྟི, ཏཏྟཀཾ གཧེཏབྦཾ. སངྒྷིཀེ པན ཡཐཱཔརིཙྪེདམེཝ གཧེཏབྦནྟི དཱིཔིཏཏྟཱ ‘‘ཨཏྠཏོ ཨེཀ’’ནྟི ཝུཏྟཾ. ཝིམཏིཝིནོདནིཡམྤི (ཝི. ཝི. ཊཱི. ༡.༡༥༦) ‘‘པཎྞཾ ཨཱརོཔེཏྭཱཏི ‘ཨེཏྟཀེ རུཀྑེ རཀྑིཏྭཱ ¶ ཏཏོ ཨེཏྟཀཾ གཧེཏབྦ’ནྟི པཎྞཾ ཨཱརོཔེཏྭཱ. ནིམིཏྟསཉྙཾ ཀཏྭཱཏི སངྐེཏཾ ཀཏྭཱ. དཱརཀཱཏི ཏེསཾ པུཏྟནཏྟཱདཡོ ཡེ ཀེཙི གོཔེནྟི, ཏེ སབྦེཔི ཨིདྷ ‘དཱརཀཱ’ཏི ཝུཏྟཱ’’ཏི, ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༡༥༦) པན ‘‘ཨཱརཱམརཀྑཀཱཏི ཝིསྶཏྠཝསེན གཧེཏབྦཾ. ཨདྷིཔྤཱཡཾ ཉཏྭཱཏི ཨེཏྠ ཡསྶ དཱནཾ པཊིགྒཎྷནྟཾ བྷིཀྑུཾ, བྷཱགཾ ཝཱ སཱམིཀཱ ན རཀྑནྟི ན དཎྜེནྟི, ཏསྶ དཱནཾ ཨཔྤཊིཙྪཱདེཏྭཱ གཧེཏུཾ ཝཊྚཏཱིཏི ཨིདྷ སནྣིཊྛཱནཾ, ཏམྤི ‘ན ཝཊྚཏི སངྒྷིཀེ’ཏི ཝུཏྟ’’ནྟི ཝུཏྟཾ.

ཡཏྠཱཏི ཡསྨིཾ ཨཱཝཱསེ. ཨཉྙེསཾ ཨབྷཱཝནྟི ཨཉྙེསཾ ཨཱགནྟུཀབྷིཀྑཱུནཾ ཨབྷཱཝཾ. ཏཏྠཱཏི ཏཱདིསེ ཨཱཝཱསེ. བྷཱཛེཏྭཱ ཁཱདནྟཱིཏི ཨཱགནྟུཀཱནམྤི སམྤཏྟཱནཾ བྷཱཛེཏྭཱ ཁཱདནྟཱིཏི ཨདྷིཔྤཱཡོ. ཙཏཱུསུ པཙྩཡེསུ སམྨཱ ཨུཔནེནྟཱིཏི ¶ ཨམྦཕལཱདཱིནི ཝིཀྐིཎིཏྭཱ ཙཱིཝརཱདཱིསུ ཙཏཱུསུ པཙྩཡེསུ སམྨཱ ཨུཔནེནྟི. ཙཱིཝརཏྠཱཡ ནིཡམེཏྭཱ དིནྣཱཏི ‘‘ཨིམེསཾ རུཀྑཱནཾ ཕལཱནི ཝིཀྐིཎིཏྭཱ ཙཱིཝརེསུཡེཝ ཨུཔནེཏབྦཱནི, ན བྷཱཛེཏྭཱ ཁཱདིཏབྦཱནཱི’’ཏི ཨེཝཾ ནིཡམེཏྭཱ དིནྣཱ. ཏེསུཔི ཨཱགནྟུཀཱ ཨནིསྶརཱཏི པཙྩཡཔརིབྷོགཏྠཱཡ ནིཡམེཏྭཱ དིནྣཏྟཱ བྷཱཛེཏྭཱ ཁཱདིཏུཾ ཨནིསྶརཱ. ན ཏེསུ…པེ… ཋཱཏབྦནྟི ཨེཏྠ ཨཱགནྟུཀེཧི ཧེཊྛཱ ཝུཏྟནཡེན བྷཱཛེཏྭཱ ཁཱདིཏབྦནྟི ཨདྷིཔྤཱཡོ. ཏེསཾ ཀཏིཀཱཡ ཋཱཏབྦནྟི ‘‘བྷཱཛེཏྭཱ ན ཁཱདིཏབྦ’’ནྟི ཝཱ ‘‘ཨེཏྟཀེསུ རུཀྑེསུ ཕལཱནི གཎྷིསྶཱམཱ’’ཏི ཝཱ ‘‘ཨེཏྟཀཱནི ཕལཱནི གཎྷིསྶཱམཱ’’ཏི ཝཱ ‘‘ཨེཏྟཀཱནཾ དིཝསཱནཾ ཨབྦྷནྟརེ གཎྷིསྶཱམཱ’’ཏི ཝཱ ‘‘ན ཀིཉྩི གཎྷིསྶཱམཱ’’ཏི ཝཱ ཨེཝཾ ཀཏཱཡ ཨཱཝཱསིཀཱནཾ ཀཏིཀཱཡ ཨཱགནྟུཀེཧི ཋཱཏབྦཾ. མཧཱཨཊྛཀཐཱཡཾ ‘‘ཨནིསྶརཱ’’ཏི ཝཙནེན དཱིཔིཏོཡེཝ ཨཏྠོ མཧཱཔཙྩརིཡཾ ‘‘ཙཏུནྣཾ པཙྩཡཱན’’ནྟིཨཱདིནཱ ཝིཏྠཱརེཏྭཱ དསྶིཏོ. པརིབྷོགཝསེནེཝཱཏི ཨེཏྠ ཨེཝ-སདྡོ ཨཊྛཱནཔྤཡུཏྟོ, པརིབྷོགཝསེན ཏམེཝ བྷཱཛེཏྭཱཏི ཡོཛེཏབྦཾ. ཨེཏྠ ཨེཏསྨིཾ ཝིཧཱརེ, རཊྛེཝཱ.

སེནཱསནཔཙྩཡནྟི སེནཱསནཉྩ ཏདཏྠཱཡ ནིཡམེཏྭཱ ཋཔིཏཉྩ. ལཱམཀཀོཊིཡཱཏི ལཱམཀཾ ཨཱདིཾ ཀཏྭཱ, ལཱམཀསེནཱསནཏོ པཊྛཱཡཱཏི ཝུཏྟཾ ཧོཏི. སེནཱསནེཔི ཏིཎཱདཱིནི ལཱམཀཀོཊིཡཱཝ ཝིསྶཛྫེཏབྦཱནི, སེནཱསནཔརིཀྑཱརཱཔི ལཱམཀཀོཊིཡཱཝ ཝིསྶཛྫེཏབྦཱ. མཱུལཝཏྠུཙྪེདཾ པན ཀཏྭཱ ན ཨུཔནེཏབྦནྟི ཨིམིནཱ ཀིཾ ཝུཏྟཾ ཧོཏི? ཏཱིསུཔི གཎྛིཔདེསུ ཏཱཝ ཨིདཾ ཝུཏྟཾ ‘‘སབྦཱནི སེནཱསནཱནི ན ཝིསྶཛྫེཏབྦཱནཱིཏི ཝུཏྟཾ ཧོཏཱི’’ཏི. ལཱམཀཀོཊིཡཱ ཝིསྶཛྫནྟེཧིཔི ¶ སེནཱསནབྷཱུམིཡོ ན ཝིསྶཛྫེཏབྦཱཏི ཨཡམཏྠོ ཝུཏྟོ ཧོཏཱིཏི ནོ ཁནྟི. ཝཱིམཾསིཏྭཱ ཡཾ རུཙྩཏི, ཏཾ གཧེཏབྦཾ.

དྷམྨསནྟཀེན ¶ བུདྡྷཔཱུཛཾ ཀཱཏུཾ, བུདྡྷསནྟཀེན ཝཱ དྷམྨཔཱུཛཾ ཀཱཏུཾ ཝཊྚཏི ན ཝཊྚཏཱིཏི? ‘‘ཏཐཱགཏསྶ ཁོ ཨེཏཾ, ཝཱསེཊྛ, ཨདྷིཝཙནཾ དྷམྨཀཱཡོ ཨིཏིཔཱི’’ཏི ཙ ‘‘ཡོ ཁོ, ཝཀྐལི, དྷམྨཾ པསྶཏི, སོ མཾ པསྶཏཱི’’ཏི (སཾ. ནི. ༣.༨༧) ཙ ཝཙནཏོ ཝཊྚཏཱིཏི ཝདནྟི. ཀེཙི པན ‘‘ཨེཝཾ སནྟེ ‘ཡོ, བྷིཀྑཝེ, མཾ ཨུཔཊྛཧེཡྻ, སོ གིལཱནཾ ཨུཔཊྛཧེཡྻཱ’ཏི (མཧཱཝ. ༣༦༥) ཝཙནཏོ བུདྡྷསནྟཀེན གིལཱནསྶཔི བྷེསཛྫཾ ཀཱཏུཾ ཡུཏྟནྟི ཨཱཔཛྫེཡྻ, ཏསྨཱ ན ཝཊྚཏཱི’’ཏི ཝདནྟི, ཏཾ ཨཀཱརཎཾ. ན ཧི ‘‘ཡོ, བྷིཀྑཝེ, མཾ ཨུཔཊྛཧེཡྻ, སོ གིལཱནཾ ཨུཔཊྛཧེཡྻཱ’’ཏི (མཧཱཝ. ༣༦༥) ཨིམིནཱ ཨཏྟནོ ཙ གིལཱནསྶ ཙ ཨེཀསདིསཏཱ, ཏདུཔཊྛཱནསྶ ཝཱ སམཕལཏཱ ཝུཏྟཱ. ཨཡཉྷེཏྠ ཨཏྠོ – ‘‘ཡོ མཾ ཨོཝཱདཱནུསཱསནཱིཀརཎེན ཨུཔཊྛཧེཡྻ, སོ གིལཱནཾ ཨུཔཊྛཧེཡྻ, མམ ཨོཝཱདཀཱརཀེན གིལཱནོ ཨུཔཊྛཱཏབྦོ’’ཏི (མཧཱཝ. ཨཊྛ. ༣༦༥). བྷགཝཏོ ཙ གིལཱནསྶ ཙ ཨུཔཊྛཱནཾ ཨེཀསདིསནྟི ཨེཝཾ པནེཏྠ ཨཏྠོ ན གཧེཏབྦོ, ཏསྨཱ ‘‘ཡོ ཝོ, ཨཱནནྡ, མཡཱ དྷམྨོ ཙ ཝིནཡོ ཙ དེསིཏོ པཉྙཏྟོ, སོ ཝོ མམཙྩཡེན སཏྠཱ’’ཏི (དཱི. ནི. ༢.༢༡༦) ཝཙནཏོ ‘‘ཨཧཉྩ ཁོ པནིདཱནི ཨེཀཀོཝ ཨོཝདཱམི ཨནུསཱསཱམི, མཡི པརིནིབྦུཏེ ཨིམཱནི ཙཏུརཱསཱིཏི བུདྡྷསཧསྶཱནི ཏུམྷེ ཨོཝདིསྶནྟི ཨནུསཱསིསྶནྟཱི’’ཏི (དཱི. ནི. ཨཊྛ. ༢.༢༡༦) ཝུཏྟཏྟཱ ཙ བཧུསྶུཏཾ བྷིཀྑུཾ པསཾསནྟེན ཙ ‘‘ཡོ བཧུསྶུཏོ, ན སོ ཏུམྷཱཀཾ སཱཝཀོ ནཱམ, བུདྡྷོ ནཱམ ཨེས ཙུནྡཱ’’ཏི ཝུཏྟཏྟཱ དྷམྨགརུཀཏྟཱ ཙ ཏཐཱགཏསྶ པུབྦནཡོ ཨེཝ པསཏྠཏརོཏི ཨམྷཱཀཾ ཁནྟི. ཝིམཏིཝིནོདནིཡམྤི ‘‘ཡཏྠཱཏི ཡསྨིཾ ཨཱཝཱསེ. ཨཉྙེསནྟི ཨཉྙེསཾ ཨཱགནྟུཀཱནཾ. ཏེསུཔི ཨཱགནྟུཀཱ ཨནིསྶརཱཏི སེནཱསནེ ནིརནྟརཾ ཝསནྟཱནཾ ཙཱིཝརཏྠཱཡ དཱཡཀེཧི, བྷིཀྑཱུཧི ཝཱ ནིཡམེཏྭཱ དིནྣཏྟཱ བྷཱཛེཏྭཱ ཁཱདིཏུཾ ཨནིསྶརཱ. ཨཱགནྟུཀེཧིཔི ཨིཙྪནྟེཧི ཏསྨིཾ ¶ ཝིཧཱརེ ཝསྶཱནཱདཱིསུ པཝིསིཏྭཱ ཙཱིཝརཏྠཱཡ གཧེཏབྦཾ. ཏེསཾ ཀཏིཀཱཡ ཋཱཏབྦནྟི སབྦཱནི ཕལཱཕལཱནི ཨབྷཱཛེཏྭཱ ‘ཨེཏྟཀེསུ རུཀྑེསུ ཕལཱནི བྷཱཛེཏྭཱ པརིབྷུཉྫིསྶཱམ, ཨཉྙེསུ ཕལཱཕལེཧི སེནཱསནཱནི པཊིཛགྒིསྶཱམཱ’ཏི ཝཱ ‘པིཎྜཔཱཏཱདིཔཙྩཡཾ སམྤཱདེསྶཱམཱ’ཏི ཝཱ ‘ཀིཉྩིཔི ཨབྷཱཛེཏྭཱ ཙཏུཔཙྩཡཏྠཱཡེཝ ཨུཔནེམཱ’ཏི ཝཱ ཨེཝཾ སམྨཱ ཨུཔནེནྟཱནཾ ཨཱཝཱསིཀཱནཾ ཀཏིཀཱཡ ཨཱགནྟུཀེཧི ཋཱཏབྦཾ. མཧཱཨཊྛཀཐཱཡཾ ‘ཨནིསྶརཱ’ཏི ཝཙནེན དཱིཔིཏོ ཨེཝ ཨཏྠོ, མཧཱཔཙྩརིཡཾ ‘ཙཏུནྣཾ པཙྩཡཱན’ནྟིཨཱདིནཱ ཝིཏྠཱརེཏྭཱ དསྶིཏོ. པརིབྷོགཝསེནེཝཱཏི ཨེཏྠ ཨེཝ-སདྡོ ¶ ཨཊྛཱནཔྤཡུཏྟོ, པརིབྷོགཝསེན ཏམེཝ བྷཱཛེཏྭཱཏི ཡོཛེཏབྦཾ. ཨེཏྠཱཏི ཨེཏསྨིཾ ཝིཧཱརེ, རཊྛེ ཝཱ. སེནཱསནཔཙྩཡནྟི སེནཱསནཉྩ ཏདཏྠཱཡ ནིཡམེཏྭཱ ཋཔིཏཉྩ. ‘ཨེཀཾ ཝཱ དྭེ ཝཱ ཝརསེནཱསནཱནི ཋཔེཏྭཱ’ཏི ཝུཏྟམེཝཏྠཾ པུན བྱཏིརེཀམུཁེན དསྶེཏུཾ ‘མཱུལཝཏྠུཙྪེདཾ པན ཀཏྭཱ ན ཨུཔནེཏབྦ’ནྟི ཝུཏྟཾ, སེནཱསནསངྑཱཏཝཏྠུནོ མཱུལཙྪེདཾ ཀཏྭཱ སབྦཱནི སེནཱསནཱནི ན ཝིསྶཛྫེཏབྦཱནཱིཏི ཨཏྠོ. ཀེཙི པནེཏྠ ‘ཨེཀཾ ཝཱ དྭེ ཝཱ ཝརསེནཱསནཱནི ཋཔེཏྭཱ ལཱམཀཏོ པཊྛཱཡ ཝིསྶཛྫནྟེཧིཔི སེནཱསནབྷཱུམིཡོ ན ཝིསྶཛྫེཏབྦཱཏི ཨཡམཏྠོ ཝུཏྟོ’ཏི ཝདནྟི, ཏམྤི ཡུཏྟམེཝ ཨིམསྶཔི ཨཏྠསྶ ཨཝསྶཾ ཝཏྟབྦཏོ, ཨིཏརཐཱ ཀེཙི སཧ ཝཏྠུནཱཔི ཝིསྶཛྫེཏབྦཾ མཉྙེཡྻུ’’ནྟི.

ཝཛིརབུདྡྷིཊཱིཀཱཡཾ (ཝཛིར. ཊཱི. པཱརཱཛིཀ ༡༥༣) ‘‘ཨེཏྠ ཨེཏསྨིཾ ཝིཧཱརེ པརཙཀྐཱདིབྷཡཾ ཨཱགཏཾ. མཱུལཝཏྠུཙྪེདནྟི ‘སབྦསེནཱསནཱནཾ ཨེཏེ ཨིསྶརཱ’ཏི ཝཙནཏོ ཨིཏརེ ཨནིསྶརཱཏི དཱིཔིཏཾ ཧོཏི. ཨཡམེཝ བྷིཀྑུ ཨིསྶརོཏི ཡཏྠ སོ ཨིཙྪཏི, ཏཏྠ ཨཏྟཉཱཏཧེཏུཾ ¶ ལབྷཏཱིཏི ཀིར ཨཏྠོ, ཨཔི ཙ ‘དཧརོ’ཏི ཝདནྟི. སཝཏྠུཀནྟི སཧ བྷཱུམིཡཱཏི ཝུཏྟཾ ཧོཏཱི’’ཏི.

དྷམྨིཀཱརཀྑཡཱཙནཀཐཱ

༡༩. དྷམྨིཀཱརཀྑཡཱཙནཀཐཱཡཾ ‘‘གཱིཝཱཡེཝཱཏི ཨཱཎཏྟིཡཱ ཨབྷཱཝཏོ. ཏེསཾ ཨནཏྠཀཱམཏཱཡཱཏི ‘ཙོརོ’ཏི ཝུཏྟཾ མམ ཝཙནཾ སུཏྭཱ ཀེཙི དཎྜིསྶནྟི, ཛཱིཝིཏཱ ཝོརོཔེསྶནྟཱིཏི ཨེཝཾ སཉྙཱཡ. ཨེཏེན ཀེཝལཾ བྷཡེན ཝཱ པརིཀྑཱརགྒཧཎཏྠཾ ཝཱ སཧསཱ ‘ཙོརོ’ཏི ཝུཏྟེ དཎྜིཏེཔི ན དོསོཏི དསྶེཏི. རཱཛཔུརིསཱནཉྷི ‘ཙོརོ ཨཡ’ནྟི ཨུདྡིསྶཀཐནེ ཨེཝ གཱིཝཱ. བྷིཀྑཱུནཾ, པན ཨཱརཱམིཀཱདཱིནཾ ཝཱ སམྨུཁཱ ‘ཨསུཀོ ཙོརོ ཨེཝམཀཱསཱི’ཏི ཀེནཙི ཝུཏྟཝཙནཾ ནིསྶཱཡ ཨཱརཱམིཀཱདཱིསུ རཱཛཔུརིསཱནཾ ཝཏྭཱ དཎྜཱཔེནྟེསུཔི བྷིཀྑུསྶ ན གཱིཝཱ རཱཛཔུརིསཱནཾ ཨཝུཏྟཏྟཱ, ཡེསཉྩ ཝུཏྟཾ, ཏེཧི སཡཾ ཙོརསྶ ཨདཎྜིཏཏྟཱཏི གཧེཏབྦཾ. ‘ཏྭཾ ཨེཏསྶ སནྟཀཾ ཨཙྪིནྡཱ’ཏི ཨཱཎཏྟོཔི ཧི སཙེ ཨཉྙེན ཨཙྪིནྡཱཔེཏི, ཨཱཎཱཔཀསྶ ཨནཱཔཏྟི ཝིསངྐེཏཏྟཱ. ཨཏྟནོ ཝཙནཀརནྟི ཨིདཾ སཱམཱིཙིཝསེན ཝུཏྟཾ. ཝཙནཾ ཨཀརོནྟཱནཾ རཱཛཔུརིསཱནམྤི ‘ཨིམིནཱ གཧིཏཔརིཀྑཱརཾ ཨཱཧརཱཔེཧི, མཱ ཙསྶ དཎྜཾ ཀརོཧཱི’ཏི ཨུདྡིསྶ ཝདནྟསྶཔི དཎྜེ གཧིཏེཔི ན གཱིཝཱ ཨེཝ དཎྜགྒཧཎསྶ པཊིཀྑིཏྟཏྟཱ ¶ ‘ཨསུཀབྷཎྜཾ ཨཝཧརཱ’ཏི ཨཱཎཱཔེཏྭཱ ཝིཔྤཊིསཱརེ ཨུཔྤནྣེ པུན པཊིཀྑིཔནེ (པཱརཱ. ༡༢༡) ཝིཡ. དཱསཱདཱིནཾ སམྤཊིཙྪནེ ཝིཡ ཏདཏྠཱཡ ཨཌྜཀརཎེ བྷིཀྑཱུནམྤི དུཀྐཊནྟི ཨཱཧ ‘ཀཔྤིཡཨཌྜོ ནཱམ, ན ཝཊྚཏཱི’ཏི. ཀེནཙི པན བྷིཀྑུནཱ ཁེཏྟཱདིཨཏྠཱཡ ཝོཧཱརིཀཱནཾ སནྟིཀཾ གནྟྭཱ ཨཌྜེ ཀཏེཔི ཏཾ ཁེཏྟཱདིསམྤཊིཙྪནེ ཝིཡ སབྦེསཾ ཨཀཔྤིཡཾ ན ཧོཏི པུབྦེ ཨེཝ སངྒྷསནྟཀཏྟཱ. བྷིཀྑུསྶེཝ པན པཡོགཝསེན ¶ ཨཱཔཏྟིཡོ ཧོནྟི. དཱསཱདཱིནམྤི པན ཨཏྠཱཡ རཀྑཾ ཡཱཙིཏུཾ ཝོཧཱརིཀེན པུཊྛེན སངྒྷསྶ ཨུཔྤནྣཾ ཀཔྤིཡཀྐམཾ ཝཏྟུཾ ཨཱརཱམིཀཱདཱིཧི ཙ ཨཌྜཾ ཀཱརཱཔེཏུཾ ཝཊྚཏི ཨེཝ. ཝིཧཱརཝཏྠཱདིཀཔྤིཡཨཌྜཾ པན བྷིཀྑུནཱ སཡམྤི ཀཱཏུཾ ཝཊྚཏཱི’’ཏི ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༦༧༩) ཨཱགཏོ.

ཝཛིརབུདྡྷིཊཱིཀཱཡཾ (ཝཛིར. ཊཱི. པཱཙིཏྟིཡ ༦༨༡) ‘‘གཱིཝཱཏི ཀེཝལཾ གཱིཝཱ ཨེཝ ཧོཏི, ན པཱརཱཛིཀཾ. ཀཱརཱཔེཏྭཱ དཱཏབྦཱཏི ཨེཏྠ སཙེ ཨཱཝུདྷབྷཎྜཾ ཧོཏི, ཏསྶ དྷཱརཱ ན ཀཱརཱཔེཏབྦཱ, ཨཉྙེན པན ཨཱཀཱརེན སཉྙཱཔེཏབྦ’’ནྟི ཝུཏྟཾ.

ཨུཙྩཱརཱདིཚཌྜནཀཐཱ

༢༠. ཨུཙྩཱརཱདིཚཌྜནཀཐཱཡཾ ཨཊྛམེ ཨུཙྩཱརཱདིཚཌྜནེ ‘‘ཨུཙྩཱརཱདིབྷཱཝོ, ཨནཔལོཀནཾ, ཝལ༹ཉྫནཊྛཱནཾ, ཏིརོཀུཊྚཔཱཀཱརཏཱ, ཚཌྜནཾ ཝཱ ཚཌྜཱཔནཾ ཝཱཏི ཨིམཱནི པནེཏྠ པཉྩ ཨངྒཱནི, ནཝམེ ཧརིཏཱུཔརི ཚཌྜནེ སབྦེསནྟི བྷིཀྑུསྶ བྷིཀྑུནིཡཱ ཙ. ཨིདྷ ཁེཏྟཔཱལཀཱ ཨཱརཱམཱདིགོཔཀཱ ཙ སཱམིཀཱ ཨེཝཱ’’ཏི ཨེཏྟཀམེཝ སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༨༣༠) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༨༣༠) པན ‘‘ཨཊྛམེ ཝལ༹ཉྫིཡམཱནཏིརོཀུཊྚཱདིཏཱ, ཨནཔལོཀེཏྭཱ ཨུཙྩཱརཱདཱིནཾ ཚཌྜནཱདཱིཏི དྭེ ཨངྒཱནི. ནཝམེ ‘མཏྠཀཙྪིནྣནཱལི༹ཀེརམྤཱི’ཏི ཝུཏྟཏྟཱ ཧརིཏཱུཔརི ཚཌྜནམེཝ པཊིཀྑིཏྟཾ. ཏེནཱཧ ‘ཨནིཀྑིཏྟབཱིཛེསཱུ’ཏིཨཱདི. ཡཏྠ ཙ ཚཌྜེཏུཾ ཝཊྚཏི, ཏཏྠ ཧརིཏེ ཝཙྩཱདིཾ ཀཱཏུམྤི ཝཊྚཏི ཨེཝ. སབྦེསནྟི བྷིཀྑུབྷིཀྑུནཱིན’’ནྟི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. པཱཙིཏྟིཡ ༨༣༢) པན ‘‘སཱམིཀེ ཨཔལོཀེཏྭཱཝ ཚཌྜེཏཱིཏི ཀཏྠཙི པོཏྠཀེ ནཏྠི, ཀཏྠཙི ཨཏྠི, ཨཏྠིབྷཱཝོཝ སེཡྻོ ཀིརིཡཱཀིརིཡཏྟཱ སིཀྑཱཔདསྶ. ཨིདྷ ཁེཏྟཔཱལཀཱ ཨཱརཱམཱདིགོཔཀཱ ཙ སཱམིཀཱ ཨེཝ. ‘སངྒྷསྶ ཁེཏྟེ ཨཱརཱམེ ཙ ཏཏྠ ཀཙཝརཾ ¶ ན ཚཌྜེཏབྦནྟི ཀཏིཀཱ ཙེ ནཏྠི, བྷིཀྑུསྶ ¶ ཚཌྜེཏུཾ ཝཊྚཏི སངྒྷཔརིཡཱཔནྣཏྟཱ, ན བྷིཀྑུནཱིནཾ. ཏཱསམྤི བྷིཀྑུནིསངྒྷསནྟཀེ ཝུཏྟནཡེན ཝཊྚཏི, ན ཏཏྠ བྷིཀྑུསྶ. ཨེཝཾ སནྟེཔི སཱརུཔྤཝསེནེཝ ཀཱཏབྦནྟི ཝུཏྟ’’ནྟི ཝུཏྟཾ.

བྷིཀྑུཝིབྷངྒེ པན སེཁིཡཝཎྞནཱཡཾ (པཱཙི. ཨཊྛ. ༦༥༡) ‘‘ཨསཉྩིཙྩཱཏི པཊིཙྪནྣཊྛཱནཾ གཙྪནྟསྶ སཧསཱ ཨུཙྩཱརོ ཝཱ པསྶཱཝོ ཝཱ ནིཀྑམཏི, ཨསཉྩིཙྩཀཏོ ནཱམ, ཨནཱཔཏྟི. ན ཧརིཏེཏི ཨེཏྠ ཡམྤི ཛཱིཝརུཀྑསྶ མཱུལཾ པཐཝིཡཾ དིསྶམཱནཾ གཙྪཏི, སཱཁཱ ཝཱ བྷཱུམིལགྒཱ གཙྪཏི, སབྦཾ ཧརིཏསངྑཱཏམེཝ, ཁནྡྷེ ནིསཱིདིཏྭཱ ཨཔྤཧརིཏཊྛཱནེ པཱཏེཏུཾ ཝཊྚཏི. ཨཔྤཧརིཏཊྛཱནཾ ཨོལོཀེནྟསྶེཝ སཧསཱ ནིཀྑམཏི, གིལཱནཊྛཱནེ ཋིཏོ ཧོཏི, ཝཊྚཏི. ཨཔྤཧརིཏེ ཀཏོཏི ཨཔྤཧརིཏཾ ཨལབྷནྟེན ཏིཎཎྜུཔཀཾ ཝཱ པལཱལཎྜུཔཀཾ ཝཱ ཋཔེཏྭཱ ཀཏོཔི པཙྪཱ ཧརིཏཾ ཨོཏྠརཏི, ཝཊྚཏིཡེཝ. ‘ཁེལེ༹ན ཙེཏྠ སིངྒྷཱཎིཀཱཔི སངྒཧིཏཱ’ཏི མཧཱཔཙྩརིཡཾ ཝུཏྟཾ. ན ཨུདཀེཏི ཨེཏཾ པརིབྷོགཨུདཀམེཝ སནྡྷཱཡ ཝུཏྟཾ. ཝཙྩཀུཊིསམཨུདྡཱདིཨུདཀེསུ པན ཨཔརིབྷོགེསུ ཨནཱཔཏྟི. དེཝེ ཝསྶནྟེ སམནྟཏོ ཨུདཀོགྷོ ཧོཏི, ཨནུདཀཊྛཱནཾ ཨོལོཀེནྟསྶེཝ ནིཀྑམཏི, ཝཊྚཏི. མཧཱཔཙྩརིཡཾ ཝུཏྟཾ ཨེཏཱདིསེ ཀཱལེ ཨནུདཀཊྛཱནཾ ཨལབྷནྟེན ཀཱཏུཾ ཝཊྚཏཱི’’ཏི ཝུཏྟཾ. ཏསྶཾ ཝཎྞནཱཡཾ ཝིམཏིཝིནོདནིཡཉྩ (ཝི. ཝི. ཊཱི. པཱཙིཏྟིཡ ༢.༦༥༢) ‘‘ཁེལེ༹ན ཙེཏྠ སིངྒྷཱཎིཀཱཔི སངྒཧིཏཱཏི ཨེཏྠ ཨུདཀགཎྜུསཀཾ ཀཏྭཱ ཨུཙྪུཀཙཝརཱདིཉྩ མུཁེནེཝ ཧརིཏུཾ ཨུདཀེསུ ཚཌྜེཏུཾ ཝཊྚཏཱིཏི དཊྛབྦ’’ནྟི ཝུཏྟཾ.

ཨིམསྨིཾ ཋཱནེ པཎྜིཏེཧི ཝིཙཱརེཏབྦཾ ཨཏྠི – ‘‘ཝཙྩཀུཊིསམུདྡཱདིཨུདཀེསུ པན ཨཔརིབྷོགེསུ ཨནཱཔཏྟཱི’’ཏི ཨཊྛཀཐཱཡཾ ཝུཏྟཾ, ཨེཝཾ སནྟེ ནདཱིཛཱཏསྶརཱདཱིསུ ཨཱཔཏྟི ཝཱ ཨནཱཔཏྟི ཝཱཏི. ཏཏྠ སམུདྡཱདཱིཏི ཨཱདི-སདྡེན ནདཱིཛཱཏསྶརཱཔི སངྒཧིཏཱཝ, ཏསྨཱ ཨནཱཔཏྟཱིཏི ཙེ? ན ཙེཝཾ དཊྛབྦཾ. ཡདི ཧི སམུདྡཱདཱིཏི ཨེཏྠ ཨཱདི-སདྡེན ནདཱིཛཱཏསྶརཱཔི ¶ སངྒཧིཏཱ, ཨེཝཾ སཏི ཊཱིཀཱཙརིཡཱ ཝདེཡྻུཾ, ན པན ཝདནྟི, ཨཊྛཀཐཱཡཉྩ ‘‘ཝཙྩཀུཊིསམུདྡཱདིཨུདཀེསཱུ’’ཏི ཨེཏྟཀམེཝ ཝདེཡྻ, ཏཐཱ པན ཨཝཏྭཱ ‘‘ཨཔརིབྷོགེསཱུ’’ཏི ཧེཏུམནྟཝིསེསནཔདམྤི གཧིཏཾ. ཏེན ཉཱཡཏི ‘‘ཨཱདིསདྡེན ཨཔརིབྷོགཱནི ཙནྡནིཀཱདིཨུདཀཱནི ཨེཝ གཧིཏཱནི, ན པརིབྷོགཱནི ནདཱིཛཱཏསྶརཱདིཨུདཀཱནཱི’’ཏི. ཏེན ཙ ཝཙྩཀུཊིསམུདྡཱདིཨུདཀཱནི ཨཔརིབྷོགཏྟཱ ཨནཱཔཏྟིཀརཱནི ཧོནྟི, ནདཱིཛཱཏསྶརཱདིཨུདཀཱནི པན ¶ པརིབྷོགཏྟཱ ཨཱཔཏྟིཀརཱནཱིཏི. ཀཐཾ པན ‘‘ཨཔརིབྷོགེསཱུ’’ཏི ཨིམསྶ པདསྶ ཧེཏུམནྟཔདབྷཱཝོ ཛཱནིཏབྦོཏི? ཡུཏྟིཏོ ཨཱགམཏོ ཙ. ཀཐཾ ཡུཏྟིཏོ? ‘‘ཝཙྩཀུཊིསམུདྡཱདིཨུདཀཱནི པརིབྷོགཱནིཔི སནྟི, ཨཔརིབྷོགཱནིཔཱི’’ཏི ཨབྱབྷིཙཱརིཡབྷཱཝཏོ. བྱབྷིཙཱརེ ཧི སམྦྷཝེ ཨེཝ སཏི ཝིསེསནཾ སཱཏྠཀཾ སིཡཱ. ཀཐཾ ཨཱགམཏོ? ཝུཏྟཉྷེཏཾ ཨཱཙརིཡབུདྡྷདཏྟཏྠེརེན ཝིནཡཝིནིཙྪཡེ (ཝི. ཝི. ༡༩༥༤) ‘‘ཏེསཾ ཨཔརིབྷོགཏྟཱ’’ཏི. ཏསྨཱ ཨཱདི-སདྡེན ཨཔརིབྷོགཱནིཡེཝ ཨུདཀཱནི གཧིཏཱནི, ན པརིབྷོགཱནི. ཝུཏྟཉྷེཏཾ ཝིནཡཝིནིཙྪཡཊཱིཀཱཡཾ ‘‘ཝཙྩཀུཊིསམུདྡཱདིཨུདཀེསཱུཏི ཨེཏྠ ཨཱདི-སདྡེན སབྦཾ ཨཔརིབྷོགཛལཾ སངྒཡ྄ཧཏི, ཏེནེཝ ཏེསཾ ཨཔརིབྷོགཏྟམེཝ ཀཱརཎམཱཧཱ’’ཏི, ཏསྨཱ མནུསྶཱནཾ པརིབྷོགེསུ ནདཱིཛཱཏསྶརཏལཱ༹ཀཔོཀྑརཎིཡཱདིཨུདཀེསུ ཨུཙྩཱརཔསྶཱཝཱདིཀརཎཾ ན ཝཊྚཏཱིཏི ཛཱནིཏབྦམེཏཾ. ‘‘དེཝེ ཝསྶནྟེ སམནྟཏོ ཨུདཀོགྷོ ཧོཏི, ཨནུདཀཊྛཱནཾ ཨོལོཀེནྟསྶེཝ ནིཀྑམཏི, ཝཊྚཏི. མཧཱཔཙྩརིཡཾ ཝུཏྟཾ ཨེཏཱདིསེ ཀཱལེ ཨནུདཀཊྛཱནཾ ཨལབྷནྟེན ཀཱཏུཾ ཝཊྚཏཱིཏི ཝུཏྟ’’ནྟི ཨཊྛཀཐཱཡཾ ཨཱགཏཏྟཱ མཧནྟེསུ ནདཱིཛཱཏསྶརཱདཱིསུ ¶ ནཱཝཱདཱིཧི གཏཀཱལེ ཏཱདིསེ ཀཱརཎེ སཏི ‘‘ཏཱིརཾ ཨུཔནེཧཱི’’ཏི ཝཏྭཱ ‘‘ཨུཔནེཏུཾ ཨསཀྐུཎེཡྻཊྛཱནེ ཨུདཀེཔི ཀཱཏུཾ ཝཊྚཏི, ཨནཱཔཏྟཱི’’ཏི ཨཊྛཀཐཱནུལོམཏོ ཝིཉྙཱཡཏི, ཨུཔཔརིཀྑིཏྭཱ གཧེཏབྦཾ.

ནཧཱནེརུཀྑཱདིགྷཾསནཀཐཱ

༢༡. ནཧཱནེ རུཀྑཱདིགྷཾསནནྟི ཨེཏྠ ཨཊྛཔདཱཀཱརེནཱཏི ཨཊྛཔདཕལཀཱཀཱརེན, ཛཱུཏཕལཀསདིསནྟི ཝུཏྟཾ ཧོཏི. མལླཀམཱུལཀསཎྛཱནེནཱཏི ཁེལ༹མལླཀམཱུལསཎྛཱནེན. ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༢༤༣) པན ‘‘ཨཊྛཔདཱཀཱརེནཱཏི ཛཱུཏཕལཀེ ཨཊྛགབྦྷརཱཛིཨཱཀཱརེན. མལླཀམཱུལསཎྛཱནེནཱཏི ཁེལ༹མལླཀམཱུལསཎྛཱནེན. ཨིདཉྩ ཝཊྚཱདྷཱརཀཾ སནྡྷཱཡ ཝུཏྟཾ. ཀཎྚཀེ ཨུཊྛཱཔེཏྭཱ ཀཏཝཊྚཀཔཱལསྶེཏཾ ཨདྷིཝཙནཾ. པུཐུཔཱཎིཀནྟི མུཊྛིཾ ཨཀཏྭཱ ཝིཀསིཏཧཏྠཏལེཧི པིཊྛིཔརིཀམྨཾ ཝུཙྩཏི. ཨེཏམེཝ སནྡྷཱཡ ཧཏྠཔརིཀམྨ’’ནྟི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༢༤༤) པན ‘‘པུཐུཔཱཎིནཱ ཀཏྟབྦཾ ཀམྨཾ པུཐུཔཱཎིཀམྨ’’ནྟི ཝུཏྟཾ.

ཨེཝཾ པཱལི༹ཨནུསཱརེནེཝ ནཧཱནེ ཀཏྟབྦཱཀཏྟབྦཾ དསྶེཏྭཱ ཨིདཱནི ནཧཱནཏིཏྠེ ནཧཱཡནྟཱནཾ བྷིཀྑཱུནཾ ¶ ནཧཱནཝིདྷིཾ དསྶེནྟོ ‘‘ཨིདཾ པནེཏྠ ནཧཱནཝཏྟ’’ནྟིཨཱདིམཱཧ. ཏཏྠ པསྶནྟཱནཾ ཨཔྤསཱདཱཝཧནཏོ, གིཧིཔུརིསཱནཾ ཀམྨཾ ཝིཡཱཏི གརཧིཏབྦབྷཱཝཏོ ཙ ཝུཏྟཾ ‘‘ཡཏྠ ཝཱ ཏཏྠ ཝཱ…པེ… ན ཨོཏརིཏབྦ’’ནྟི. ཨཉྙེསུ སམྨུཁཱིབྷཱུཏེསུ ཨནུདཀསཱཊཀེན ནཧཱཡིཏུཾ དུཀྐརཏྟཱ ‘‘སབྦདིསཱ པན ཨོལོཀེཏྭཱ ཝིཝིཏྟབྷཱཝཾ ཉཏྭཱ’’ཏི ཝུཏྟཾ. ཨེཝམྤི ཁཱཎུགུམྦལཏཱདཱིཧི པཊིཙྪནྣཱཔི ཧུཏྭཱ ཏིཊྛེཡྻུནྟི ཨཱཧ ‘‘ཁཱཎུ…པེ… ཨུཀྐཱསིཏྭཱ’’ཏི. ཨུདྡྷཾམུཁེན ཙཱིཝརཱཔནཡནཾ ཧརཱཡིཏབྦཾ སིཡཱཏི ཝུཏྟཾ ‘‘ཨཝཀུཛྫ…པེ… ཨཔནེཏྭཱ’’ཏི. ཏཏོ ཀཱཡབནྡྷནཊྛཔནཝཏྟམཱཧ ‘‘ཀཱཡབནྡྷན’’ནྟྱཱདིནཱ ¶ . ཏཏོ ཨུདཀསཱཊིཀཱཡ སཏི ཏཾ ནིཝཱསེཏྭཱ ཨོཏརིཏབྦཾ སིཡཱ, ཏཱཡ ཨསཏིཡཱ ཀིཾ ཀཱཏབྦནྟི ཙོདནཾ སནྡྷཱཡཱཧ ‘‘སཙེ’’ཏིཨཱདི. ཏཏྠ པུབྦེ ‘‘ཋིཏཀེནེཝ ན ཨོཏརིཏབྦ’’ནྟི ཨཧིརིཀཱཀཱརསྶ པཊིསིདྡྷཏྟཱ ཨིདྷ ཧིརིམནྟཱཀཱརཾ དསྶེཏི ཨུདཀནྟེ ཨུཀྐུཊིཀཾ ནིསཱིདིཏྭཱ ནིཝཱསནཾ མོཙེཏྭཱཏི. ཨུཎྞཊྛཱནེ, སམཊྛཱནེ ཝཱ པསཱརིཏེ སཏི ཝཱ ཏེན ཨཉྙཏྠ གཙྪེཡྻཱཏི ཨཱཧ ‘‘སཙེ ནིནྣཊྛཱན’’ནྟིཨཱདི.

ཨོཏརནྟེན ཀིཾ ཀཱཏབྦནྟི པུཙྪཾ སནྡྷཱཡ ‘‘ཨོཏརནྟེན སཎིཀ’’ནྟྱཱདི. ཏཏྠ པུབྦེ ‘‘ཝེགེན ན ཨོཏརིཏབྦ’’ནྟི པཊིསིདྡྷཱནུརཱུཔམཱཧ ‘‘སཎིཀ’’ནྟི. ཨཏིགམྦྷཱིརཾ གཙྪནྟོ ཨུདཀོགྷཏརངྒཝཱཏཱདཱིཧི པཧརནྟོ ཙལིཏཀཱཡོ སིཡཱ, ཨཏིཨུཏྟཱནེ ནིསཱིདནྟོ ཨཔྤཊིཙྪནྣཀཱཡོ སིཡཱཏི ཝུཏྟཾ ‘‘ནཱབྷིཔྤམཱཎམཏྟཾ ཨོཏརིཏྭཱ’’ཏི. ཨཏྟནོ ཧཏྠཝིཀཱརཱདཱིཧི ཝཱིཙིཾ ཨུཊྛཱཔེནྟོ, སདྡཉྩ ཀརོནྟོ ཨུདྡྷཊཙཔལབྷཱཝོ སིཡཱཏི ཝུཏྟཾ ‘‘ཝཱིཙིཾ ཨནུཊྛཔེནྟེན སདྡཾ ཨཀརོནྟེན ནིཝཏྟིཏྭཱ’’ཏི. ནིཝཏྟིཏྭཱ ཀིཾ ཀཱཏབྦནྟི ཨཱཧ ཨཱགཏདིསཱབྷིམུཁེན ནིམུཛྫིཏབྦ’’ནྟི, ཨབྷིམུཁེན ཧུཏྭཱཏི པཱཋསེསོ. ཨིདཱནི ཏཔྥལཾ དསྶེནྟོ ‘‘ཨེཝ’’ནྟྱཱདིམཱཧ. ཏཏོ ཨུམྨུཛྫནྟེན ཀིཾ ཀཱཏབྦནྟི པུཙྪཱཡམཱཧ ‘‘ཨུམྨུཛྫནྟེནཔཱི’’ཏིཨཱདི. སེསཾ སུཝིཉྙེཡྻམེཝ. ཙཱིཝརཾ པཱརུཔིཏྭཱཝ ཋཱཏབྦཾ, ཀསྨཱཏི ཙེ? ན ཏཱཝ ཀཱཡཏོ ཨུདཀཾ ཨོཏརཏི, ཏསྨཱ ཐོཀཾ ཀཱལཾ ཨུཏྟརཱསངྒཾ ཙཱིཝརཾ ཨུབྷོཧི ཧཏྠེཧི ཨནྟེ གཧེཏྭཱ པུརཏོ ཀཏྭཱ ཋཱཏབྦཾ. ཏཏོ ཀཱཡསྶ སུཀྑབྷཱཝཾ ཉཏྭཱ ཙཱིཝརཾ པཱརུཔིཏྭཱ ཡཐཱརུཙི གནྟབྦནྟི.

ཝལིཀཱདིཀཐཱ

༢༢. ཝལིཀཱདིཀཐཱཡཾ ¶ ‘‘མུཏྟོལམྦཀཱདཱིནནྟི ཨཱདི-སདྡེན ཀུཎྜལཱདིཾ སངྒཎྷཱཏི. པལམྦཀསུཏྟནྟི ¶ ཡཉྙོཔཙིཏཱཀཱརེན ཨོལམྦཀསུཏྟ’’ནྟི སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༢༤༥). ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༢༤༥) པན ‘‘མུཏྟོལམྦཀཱདཱིནནྟི ཨཱདི-སདྡེན ཀུཎྜལཱདིཾ སངྒཎྷཱཏི. པལམྦཀསུཏྟནྟི བྲཱཧྨཎཱནཾ ཡཉྙོཔཙིཏསུཏྟཱདིཨཱཀཱརཾ ཝུཙྩཏི. ཝལཡནྟི ཧཏྠཔཱདཝལཡ’’ནྟི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༢༤༥) པན ‘‘ཀཎྞཏོ ནིཀྑནྟམུཏྟོལམྦཀཱདཱིནཾ ཀུཎྜལཱདཱིནནྟི ལིཁིཏཾ. ‘ཀཱཡཱུར’ནྟི པཱལི༹པཱཋོ. ‘ཀེཡཱུརཱདཱིནཱི’ཏི ཨཱཙརིཡེནུདྡྷཊ’’ནྟི ཝུཏྟཾ.

དཱིགྷཀེསཀཐཱ

༢༣. དཱིགྷཀེསཀཐཱཡཾ སཱརཏྠདཱིཔནིཡཾ ན ཀིཉྩི ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༢༤༦) པན ‘‘དྭངྒུལེཏི ཨུཔཡོགབཧུཝཙནཾ, དྭངྒུལཔྤམཱཎཾ ཨཏིཀྐཱམེཏུཾ ན ཝཊྚཏཱིཏི ཨཏྠོ. ཨེཏྠ ཙ དུམཱསསྶ ཝཱ དྭངྒུལསྶ ཝཱ ཨཏིཀྐནྟབྷཱཝཾ ཨཛཱནནྟསྶཔི ཀེསམསྶུགཎནཱཡ ཨཙིཏྟཀཱཔཏྟིཡོ ཧོནྟཱིཏི ཝདནྟི. ཀོཙྪེནཱཏི ཨུསཱིརཧཱིརཱདཱིནི བནྡྷིཏྭཱ སམཀཾ ཚིནྡིཏྭཱ གཧིཏཀོཙྪེན. ཙིཀྐལེནཱཏི སིལེསཡུཏྟཏེལེན. ཨུཎྷཱབྷིཏཏྟརཛསིརཱནམྤཱིཏི ཨུཎྷཱབྷིཏཏྟཱནཾ རཛོཀིཎྞསིརཱནཾ. ཨདྡཧཏྠེནཱཏི ཨལླཧཏྠེནཱ’’ཏི ཝུཏྟཾ.

ཨུཔརི པན པཱལི༹ཡཾ (ཙཱུལ༹ཝ. ༢༧༥) ‘‘ཏེན ཁོ པན སམཡེན ཚབྦགྒིཡཱ བྷིཀྑཱུ མསྶུཾ ཀཔྤཱཔེནྟི. མསྶུཾ ཝཌྜྷཱཔེནྟི. གོལོམིཀཾ ཀཱརཱཔེནྟི. ཙཏུརསྶཀཾ ཀཱརཱཔེནྟི. པརིམུཁཾ ཀཱརཱཔེནྟི. ཨཌྜྷདུཀཾ ཀཱརཱཔེནྟི. དཱཋིཀཾ ཋཔེནྟི. སམྦཱདྷེ ལོམཾ སཾཧརཱཔེནྟི. མནུསྶཱ ཨུཛ྄ཛྷཱཡནྟི ཁཱིཡནྟི ཝིཔཱཙེནྟི ‘སེཡྻཐཱཔི གིཧཱི ཀཱམབྷོགིནོ’ཏི ¶ . བྷགཝཏོ ཨེཏམཏྠཾ ཨཱརོཙེསུཾ – ན, བྷིཀྑཝེ, མསྶུ ཀཔྤཱཔེཏབྦཾ. ན མསྶུ ཝཌྜྷཱཔེཏབྦཾ. ན གོལོམིཀཾ ཀཱརཱཔེཏབྦཾ. ན ཙཏུརསྶཀཾ ཀཱརཱཔེཏབྦཾ. ན པརིམུཁཾ ཀཱརཱཔེཏབྦཾ. ན ཨཌྜྷདུཀཾ ཀཱརཱཔེཏབྦཾ. ན དཱཋིཀཱ ཋཔེཏབྦཱ. ན སམྦཱདྷེ ལོམཾ སཾཧརཱཔེཏབྦཾ, ཡོ སཾཧརཱཔེཡྻ, ཨཱཔཏྟི དུཀྐཊསྶཱ’’ཏི ཨཱགཏཾ. ཨཊྛཀཐཱཡམྤི (ཙཱུལ༹ཝ. ཨཊྛ. ༢༧༥) ‘‘མསྶུཾ ཀཔྤཱཔེནྟཱིཏི ཀཏྟརིཡཱ མསྶུཾ ཚེདཱཔེནྟི. མསྶུཾ ཝཌྜྷཱཔེནྟཱིཏི མསྶུཾ དཱིགྷཾ ཀཱརེནྟི. གོལོམིཀནྟི ཧནུཀམྷི དཱིགྷཾ ཀཏྭཱ ཋཔིཏཾ ཨེལ༹ཀམསྶུ ཝུཙྩཏི. ཙཏུརསྶཀནྟི ཙཏུཀོཎཾ. པརིམུཁནྟི ཨུདརེ ལོམསཾཧརཎཾ. ཨཌྜྷདུཀནྟི ཨུདརེ ལོམརཱཛིཊྛཔནཾ. ཨཱཔཏྟི དུཀྐཊསྶཱཏི མསྶུཀཔྤཱཔནཱདཱིསུ སབྦཏྠ ཨཱཔཏྟི དུཀྐཊསྶཱ’’ཏི ཝུཏྟཾ.

པུན ¶ པཱལི༹ཡཾ (ཙཱུལ༹ཝ. ༢༧༥) ‘‘ཏེན ཁོ པན སམཡེན བྷིཀྑཱུ སཀྑརིཀཱཡཔི མདྷུསིཏྠཀེནཔི ནཱསིཀཱལོམཾ གཱཧཱཔེནྟི, ནཱསིཀཱ དུཀྑཱ ཧོནྟི. ཨནུཛཱནཱམི, བྷིཀྑཝེ, སཎྜཱསནྟི. ཏེན ཁོ པན སམཡེན ཚབྦགྒིཡཱ བྷིཀྑཱུ པལིཏཾ གཱཧཱཔེནྟི. མནུསྶཱ ཨུཛ྄ཛྷཱཡནྟི ཁཱིཡནྟི ཝིཔཱཙེནྟི ‘སེཡྻཐཱཔི གིཧཱི ཀཱམབྷོགིནོ’ཏི. བྷགཝཏོ ཨེཏམཏྠཾ ཨཱརོཙེསུཾ – ན, བྷིཀྑཝེ, པལིཏཾ གཱཧཱཔེཏབྦཾ, ཡོ གཱཧཱཔེཡྻ, ཨཱཔཏྟི དུཀྐཊསྶཱ’’ཏི ཨཱགཏཾ. ‘‘སཀྑརཱདཱིཧི ནཱསིཀཱལོམགྒཱཧཱཔནེ ཨཱཔཏྟི ནཏྠི, ཨནུརཀྑཎཏྠཾ པན སཎྜཱསོ ཨནུཉྙཱཏོ’’ཏི ཨཊྛཀཐཱཡཾ ཝུཏྟཾ. ‘‘ན, བྷིཀྑཝེ, པལིཏཾ གཱཧཱཔེཏབྦནྟི ཨེཏྠ བྷམུཀཱཡ ཝཱ ནལཱཊེ ཝཱ དཱཋིཀཱཡ ཝཱ ཨུགྒནྟྭཱ བཱིབྷཙྪཾ ཋིཏཾ, ཏཱདིསཾ ལོམཾ པལིཏཾ ཝཱ ཨཔལིཏཾ ཝཱ གཱཧཱཔེཏུཾ ཝཊྚཏཱི’’ཏི ཙ ཝུཏྟཾ.

ཨཱདཱསཱདིཀཐཱ

༢༤. ཨཱདཱསཱདིཀཐཱཡཾ ཨཱདཱསོ ནཱམ མཎྜནཔཀཏིཀཱནཾ མནུསྶཱནཾ ཨཏྟནོ མུཁཙྪཱཡཱདསྶནཏྠཾ ཀཾསལོཧཱདཱིཧི ¶ ཀཏོ བྷཎྜཝིསེསོ. ཨུདཀཔཏྟོ ནཱམ ཨུདཀཊྛཔནཀོ པཱཏིསརཱཝཱདིཀོ བྷཱཛནཝིསེསོ. ཀཾསཔཏྟཱདཱིནཱིཏི ཨཱདཱསབྷཱཝེན ཨཀཏཱནི པརིསུདྡྷབྷཱཝེན ཨཱལོཀཀརཱནི ཝཏྠཱུནི. ཨཱདི-སདྡེན སུཝཎྞརཛཏཛཱཏིཕལིཀཱདཡོ སངྒཎྷཱཏི, ཀཉྫིཡཱདཱིནཱིཏི ཨེཏྠ ཨཱདི-སདྡེན དྲཝཛཱཏིཀཱནི ཏེལམདྷུཁཱིརཱདཱིནི. ཨཱབཱདྷཔཙྩཡཱཏི ཨཏྟནོ མུཁེ ཨུཔྤནྣཝཎཔཙྩཡཱ. ཏེནཱཧ ‘‘སཉྪཝི ནུ ཁོ མེ ཝཎོ’’ཏིཨཱདི. ཨཱཡུཾ སངྑརོཏཱིཏི ཨཱཡུསངྑཱརོ. ཀོ སོ? ཨཏྟབྷཱཝོ, ཏཾ ཨཱཡུསངྑཱརཾ, ཏཾ ཨོལོཀེནྟོ ཀེནཱཀཱརེན ཨོལོཀེཡྻཱཏི པུཙྪཱཡམཱཧ ‘‘ཛིཎྞོ ནུ ཁོམྷི ནོཏི ཨེཝ’’ནྟི. ཏསྶཏྠོ – མམ ཨཏྟབྷཱཝོ ཛིཎྞོ ནུ ཁོ ཝཱ, ནོ ཛིཎྞོ ནུ ཁོ ཝཱཏི ཨེཝཾ ཨིམིནཱ མནསིཀཱརེན ཀམྨཊྛཱནསཱིསེན ཨོལོཀེཏུཾ ཝཊྚཏི. ‘‘སོབྷཏི ནུ ཁོ མེ ཨཏྟབྷཱཝོ, ནོ ཝཱ’’ཏི ཨེཝཾ པཝཏྟེན ཨཏྟསིནེཧཝསེན ཨོལོཀེཏུཾ ན ཝཊྚཏཱིཏི.

ན མུཁཾ ཨཱལིམྤིཏབྦནྟི ཝིཔྤསནྣཚཝིཝཎྞཀརེཧི མུཁལེཔནེཧི ན ལིམྤིཏབྦཾ. ན ཨུམྨདྡིཏབྦནྟི ནཱནཱཨུམྨདྡནེཧི ན ཨུམྨདྡིཏབྦཾ. ན ཙུཎྞེཏབྦནྟི མུཁཙུཎྞཀེན ན མཀྑེཏབྦཾ. ན མནོསིལིཀཱཡ མུཁཾ ལཉྫེཏབྦནྟི མནོསིལཱཡ ཏིལཀཱདིལཉྫནཱནི ན ཀཱཏབྦཱནི ¶ . ན ཀེཝལཾ མནོསིལཱཡམེཝ, ཧརིཏཱལཱདཱིཧིཔི ཏཱནི ན ཝཊྚནྟིཡེཝ. ཨངྒརཱགཱདཡོ པཱཀཊཱཡེཝ.

ནཙྩཱདིཀཐཱ

༢༥. ནཙྩཱདིཀཐཱཡཾ ‘‘སཱདྷུགཱིཏནྟི ཨནིཙྩཏཱདིཔཊིསཾཡུཏྟགཱིཏཾ. ཙཏུརསྶེན ཝཏྟེནཱཏི པརིཔུཎྞེན ཨུཙྩཱརཎཝཏྟེན. ཏརངྒཝཏྟཱདཱིནཾ ཨུཙྩཱརཎཝིདྷཱནཱནི ནཊྛཔྤཡོགཱནཱི’’ཏི སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༢༤༨-༢༤༩) ཝུཏྟཾ, ཝིམཏིཝིནོདནིཡམྤི (ཝི. ཝི. ཊཱི. ཙཱུལ༹ཝགྒ ༢.༢༤༨-༢༤༩) ‘‘སཱདྷུགཱིཏནྟི ཨནིཙྩཏཱདིཔཊིསཉྙུཏྟཾ ¶ གཱིཏཾ. ཙཏུརསྶེན ཝཏྟེནཱཏི པརིཔུཎྞེན ཨུཙྩཱརཎཝཏྟེན. ཏརངྒཝཏྟཱདཱིནཾ སབྦེསཾ སཱམཉྙལཀྑཎཾ དསྶེཏུཾ ‘སབྦེསཾ…པེ… ལཀྑཎ’ནྟི ཝུཏྟཾ. ཡཏྟཀཱཧི མཏྟཱཧི ཨཀྑརཾ པརིཔུཎྞཾ ཧོཏི, ཏཏོཔི ཨདྷིཀམཏྟཱཡུཏྟཾ ཀཏྭཱ ཀཐནཾ ཝིཀཱརཀཐནཾ ནཱམ, ཏཐཱ ཨཀཏྭཱ ཀཐནམེཝ ལཀྑཎནྟི ཨཏྠོ’’ཏི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༢༤༨-༢༤༩) པན ‘‘སཱདྷུགཱིཏཾ ནཱམ པརིནིབྦུཏཊྛཱནེ གཱིཏནྟི ལིཁིཏཾ. དནྟགཱིཏཾ གཱཡིཏུཀཱམཱནཾ ཝཱཀྐརཎཱིཡཾ. དནྟགཱིཏསྶ ཝིབྷཱཝནཏྠཾ ‘ཡཾ གཱཡིསྶཱམཱ’ཏིཨཱདིམཱཧ. ཙཏུརསྶཝཏྟཾ ནཱམ ཙཏུཔཱདགཱཐཱཝཏྟཾ. ‘ཏརངྒཝཏྟཱདཱིནི ཨུཙྩཱརཎཝིདྷཱནཱནི ནཊྛཔྤཡོགཱནཱི’ཏི ལིཁིཏ’’ནྟི ཝུཏྟཾ.

ཨངྒཙྪེདཱདིཀཐཱ

༢༦. ཨངྒཙྪེདཱདིཀཐཱཡཾ ‘‘ཨཏྟནོ ཨངྒཛཱཏཾ ཚིནྡནྟསྶེཝ ཐུལླཙྩཡཾ, ཏཏོ ཨཉྙཾ ཚིནྡནྟསྶ དུཀྐཊཾ, ཨཱབཱདྷཔཙྩཡཱ ཚིནྡནྟསྶ ཨནཱཔཏྟཱི’’ཏི ཨཊྛཀཐཱཡཾ ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༢༥༡) པན ‘‘ཨངྒཛཱཏནྟི བཱིཛཝིརཧིཏཾ པུརིསནིམིཏྟཾ. བཱིཛེ ཧི ཚིནྣེ ཨོཔཀྐམིཀཔཎྜཀོ ནཱམ ཨབྷབྦོ ཧོཏཱིཏི ཝདནྟི. ཨེཀེ པན ‘བཱིཛསྶཔི ཚེདནཀྑཎེ དུཀྐཊཱཔཏྟི ཨེཝ, ཀམེན པུརིསིནྡྲིཡཱདིཀེ ཨནྟརཧིཏེ པཎྜཀོ ནཱམ ཨབྷབྦོ ཧོཏི, ཏདཱ ལིངྒནཱསནཱཡ ནཱསེཏབྦོ’ཏི ཝདནྟི. ཏཱདིསཾ ཝཱ དུཀྑཾ ཨུཔྤཱདེནྟསྶཱཏི མུཊྛིཔྤཧཱརཱདཱིཧི ཨཏྟནོ དུཀྑཾ ཨུཔྤཱདེནྟསྶཱ’’ཏི ཝུཏྟཾ.

པཏྟཀཐཱ

༢༨. པཏྟཀཐཱཡཾ ¶ ‘‘བྷཱུམིཨཱདྷཱརཀེཏི ཝལཡཱདྷཱརཀེ. དཱརུཨཱདྷཱརཀདཎྜཱདྷཱརཀེསཱུཏི ཨེཀདཱརུནཱ ཀཏཨཱདྷཱརཀེ, བཧཱུཧི དཎྜཀེཧི ཀཏཨཱདྷཱརཀེ ཝཱཏི ཨཏྠོ ¶ . ཏཱིཧི དཎྜེཧི ཀཏོ པན ན ཝཊྚཏི. བྷཱུམིཡཾ པན ནིཀྐུཛྫིཏྭཱ ཨེཀམེཝ ཋཔེཏབྦནྟི ཨེཏྠ ‘དྭེ ཋཔེནྟེན ཨུཔརི ཋཔིཏཔཏྟཾ ཨེཀེན པསྶེན བྷཱུམིཡཾ ཕུསཱཔེཏྭཱ ཋཔེཏུཾ ཝཊྚཏཱི’ཏི ཝདནྟི. ཨཱལིནྡཀམིཌྜྷིཀཱདཱིནནྟི པམུཁམིཌྜྷིཀཱདཱིནཾ. པརིཝཏྟེཏྭཱ ཏཏྠེཝ པཏིཊྛཱཏཱིཏི ཨེཏྠ ‘པརིཝཏྟེཏྭཱ ཏཏིཡཝཱརེ ཏཏྠེཝ མིཌྜྷིཡཱ པཏིཊྛཱཏཱི’ཏི གཎྛིཔདེསུ ཝུཏྟཾ. པརིབྷཎྜནྟེཏི ཨེཏྠ པརིབྷཎྜཾ ནཱམ གེཧསྶ བཧིཀུཊྚཔཱདསྶ ཐིརབྷཱཝཏྠཾ ཀཏཱ ཏནུཀམིཌྜྷིཀཱ ཝུཙྩཏི. ཏནུཀམིཌྜྷིཀཱཡཱཏི ཁུདྡཀམིཌྜྷིཀཱཡ. མིཌྜྷནྟེཔི ཨཱདྷཱརཀེ ཋཔེཏུཾ ཝཊྚཏི. ‘ཨནུཛཱནཱམི, བྷིཀྑཝེ, ཨཱདྷཱརཀ’ནྟི ཧི ཝཙནཏོ མིཌྜྷཱདཱིསུ ཡཏྠ ཀཏྠཙི ཨཱདྷཱརཀཾ ཋཔེཏྭཱ ཏཏྠ པཏྟཾ ཋཔེཏུཾ ཝཊྚཏི ཨཱདྷཱརཀེ ཋཔནོཀཱསསྶ ཨནིཡམིཏཏྟཱཏི ཝདནྟི. ‘པཏྟམཱལོ༹ ནཱམ ཝཊྚེཏྭཱ པཏྟཱནཾ ཨགམནཏྠཾ ཝཊྚཾ ཝཱ ཙཏུརསྶཾ ཝཱ ཨིཊྛཀཱདཱིཧི པརིཀྑིཔིཏྭཱ ཀཏོ’ཏི གཎྛིཔདེསུ ཝུཏྟཾ. གྷཊིཀནྟི ཨུཔརི ཡོཛིཏཾ ཨགྒལ༹ཾ. ཏཱཝཀཱལིཀཾ པརིབྷུཉྫིཏུཾ ཝཊྚཏཱིཏི སཀིདེཝ གཧེཏྭཱ ཏེན ཨཱམིསཾ པརིབྷུཉྫིཏྭཱ ཚཌྜེཏུཾ ཝཊྚཏཱིཏི ཨདྷིཔྤཱཡོ. གྷཊིཀཊཱཧེཏི བྷཱཛནཀཔཱལེ. པཱལི༹ཡཾ ཨབྷུཾ མེཏི ཨེཏྠ བྷཝཏཱིཏི བྷཱུ, ཝཌྜྷི. ན བྷཱུཏི ཨབྷཱུ, ཨཝཌྜྷི. བྷཡཝསེན པན སཱ ཨིཏྠཱི ‘ཨབྷུ’ནྟི ཨཱཧ, ཝིནཱསོ མཡ྄ཧནྟི ཨཏྠོ. ཚཝསཱིསསྶ པཏྟནྟི ཚཝསཱིསམཡཾ པཏྟཾ. པཀཏིཝིཀཱརསམྦནྡྷེ ཙེཏཾ སཱམིཝཙནཾ. ཨབྷེདེཔི ཝཱ ཏདུཔཙཱརཝསེནེཝཱཡཾ ཝོཧཱརོ ‘སིལཱཔུཏྟཀསྶ སརཱིར’ནྟིཨཱདཱིསུ ཝིཡ. ཙབྦེཏྭཱཏི ཁཱདིཏྭཱ. ཨེཀཾ ཨུདཀགཎྜུསཾ གཧེཏྭཱཏི ཝཱམཧཏྠེནེཝ པཏྟཾ ཨུཀྑིཔིཏྭཱ མུཁེན གཎྜུསཾ གཧེཏྭཱ. ཨུཙྪིཊྛཧཏྠེནཱཏི སཱམིསེན ཧཏྠེན. ཨེཏྟཱཝཏཱཏི ཨེཀགཎྜུསཾ གཧཎམཏྟེན. ལུཉྩིཏྭཱཏི ཏཏོ མཾསཾ ཨུདྡྷརིཏྭཱ. ཨེཏེསུ སབྦེསུ པཎྞཏྟིཾ ཛཱནཱཏུ ཝཱ, མཱ ཝཱ, ཨཱཔཏྟིཡེཝཱ’’ཏི སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༢༥༣-༢༥༥) ཝུཏྟཾ.

ཝིམཏིཝིནོདནིཡཾ ¶ (ཝི. ཝི. ཊཱི. ཙཱུལ༹ཝགྒ ༢.༢༥༢) པན ‘‘གིཧིཝིཀཊཱནཱིཏི གིཧིསནྟཀཱནི. པཱལི༹ཡཾ ན ཨཙྪུཔིཡནྟཱིཏི ན ཕུསྶིཏཱནི ཧོནྟི. རཱུཔཀཱཀིཎྞཱནི ཨིཏྠིརཱུཔཱདིཨཱཀིཎྞཱནི. བྷཱུམིཨཱདྷཱརཀེཏི དནྟཱདཱིཧི ཀཏེ ཝལཡཱདྷཱརཀེ. ཨེཏསྶ ཝལཡཱདྷཱརཀསྶ ཨནུཙྪཝིཏཱཡ ཋཔིཏཱ པཏྟཱ ན པརིཝཏྟནྟཱིཏི ‘ཏཡོ པཏྟེ ཋཔེཏུཾ ཝཊྚཏཱི’ཏི ཝུཏྟཾ. ཨནུཙྩཏཉྷི སནྡྷཱཡ ཨཡཾ ‘བྷཱུམིཨཱདྷཱརཀོ’ཏི ཝུཏྟོ. དཱརུཨཱདྷཱརཀདཎྜཱདྷཱརཀེསཱུཏི ཨེཀདཱརུནཱ ¶ ཀཏཨཱདྷཱརཀེ ཙ བཧཱུཧི དཎྜཀེཧི ཀཏཨཱདྷཱརཀེ ཙ, ཨེཏེ ཙ ཨུཙྩཏརཱ ཧོནྟི པཏྟེཧི སཧ པཏནསབྷཱཝཱ, ཏེན ‘སུསཛྫིཏེསཱུ’ཏི ཝུཏྟཾ. བྷམཀོཊིསདིསེནཱཏི ཡཏྠ དྷམཀརཎཱདིཾ པཝེསེཏྭཱ ལིཁནྟི, ཏསྶ བྷམཀསྶ ཀོཊིཡཱ སདིསོ. ཏཱདིསསྶ དཱརུཨཱདྷཱརཀསྶ ཨཝིཏྠིཎྞཏཱཡ ཋཔིཏོཔི པཏྟོ པཏཏཱིཏི ‘ཨནོཀཱསོ’ཏི ཝུཏྟོ. ཨཱལིནྡཀམིཌྜྷིཀཱདཱིནནྟི པམུཁམིཌྜྷིཀཱདཱིནཾ, ཨུཙྩཝཏྠུཀཱནནྟི ཨཏྠོ. བཱཧིརཔསྶེཏི པཱསཱདཱདཱིནཾ བཧིཀུཊྚེ. ཏནུཀམིཌྜྷིཀཱཡཱཏི ཝེདིཀཱཡ. སབྦཏྠ པན ཧཏྠཔྤམཱཎཏོ ཨབྦྷནྟརེ ཋཔེཏུཾ ཝཊྚཏི, ཨཱདྷཱརཀེ པན ཏཏོ བཧིཔི ཝཊྚཏི. ཨཉྙེན པན བྷཎྜཀེནཱཏི ཨཉྙེན བྷཱརབྷཎྜེན བྷཎྜཀེན. ‘བནྡྷིཏྭཱ ཨོལམྦིཏུ’ནྟི ཙ ཝུཏྟཏྟཱ པཏྟཏྠཝིཀཱཡ ཨཾསབདྡྷཀོ ཡཐཱ ལགྒིཏཊྛཱནཏོ ན པརིགལ༹ཏི, ཏཐཱ སབྦཐཱཔི བནྡྷིཏྭཱ ཋཔེཏུཾ ཝཊྚཏི. བནྡྷིཏྭཱཔི ཨུཔརི ཋཔེཏུཾ ན ཝཊྚཏཱིཏི ‘ཨུཔརི ནིསཱིདནྟཱ ཨོཏྠརིཏྭཱ བྷིནྡནྟཱི’ཏི ཝུཏྟཾ. ཏཏྠ ཋཔེཏུཾ ཝཊྚཏཱིཏི ནིསཱིདནསངྐཱབྷཱཝཏོ ཝུཏྟཾ. བནྡྷིཏྭཱ ཝཱཏི བནྡྷིཏྭཱ ཋཔིཏཚཏྟེ ཝཱ. ཡོ ཀོཙཱིཏི བྷཏྟཔཱུརོཔི ཏུཙྪཔཏྟོཔི. པརིཧརིཏུནྟི དིཝསེ དིཝསེ པིཎྜཱཡ ཙརཎཏྠཱཡ ཋཔེཏུཾ. པཏྟཾ ཨལབྷནྟེན པན ཨེཀདིཝསཾ པིཎྜཱཡ ཙརིཏྭཱ བྷུཉྫིཏྭཱ ཚཌྜེཏུཾ ཝཊྚཏི. པཎྞཔུཊཱདཱིསུཔི ཨེསེཝ ནཡོ. ཚཝསཱིསསྶ ¶ པཏྟོཏི ཚཝསཱིསམཡོ པཏྟོ, པཀཏིཝིཀཱརསམྦནྡྷེ ཙེཏཾ སཱམིཝཙནཾ. ཙབྦེཏྭཱཏི ནིཊྛུབྷིཏྭཱ. ‘པཊིགྒཧཾ ཀཏྭཱ’ཏི ཝུཏྟཏྟཱ ཨུཙྪིཊྛཧཏྠེན ཨུདཀཾ གཧེཏྭཱ པཏྟཾ པརིཔྥོསིཏྭཱ དྷོཝནགྷཾསནཝསེན ཧཏྠཾ དྷོཝིཏུཾ ཝཊྚཏི. ཨེཏྟཀེན ཧི པཏྟཾ པཊིགྒཧཾ ཀཏྭཱ ཧཏྠོ དྷོཝིཏོ ནཱམ ན ཧོཏི. ཨེཀཾ ཨུདཀགཎྜུསཾ གཧེཏྭཱཏི པཏྟཾ ཨཕུསིཏྭཱ ཏཏྠ ཨུདཀམེཝ ཨུཙྪིཊྛཧཏྠེན ཨུཀྑིཔིཏྭཱ གཎྜུསཾ ཀཏྭཱ, ཝཱམཧཏྠེནེཝ ཝཱ པཏྟཾ ཨུཀྑིཔིཏྭཱ མུཁེན གཎྜུསཾ གཧེཏུམྤི ཝཊྚཏི. བཧི ཨུདཀེན ཝིཀྑཱལེཏྭཱཏི དྭཱིསུ ཨངྒུལཱིསུ ཨཱམིསམཏྟཾ ཝིཀྑཱལེཏྭཱ བཧི གཧེཏུམྤི ཝཊྚཏི. པཊིཁཱདིཏུཀཱམོཏི ཨེཏྠ སཡཾ ན ཁཱདིཏུཀཱམོཔི ཨཉྙེསཾ ཁཱདནཱརཧཾ ཋཔེཏུཾ ལབྷཏི. ཏཏྠེཝ ཀཏྭཱཏི པཏྟེཡེཝ ཡཐཱཋཔིཏཊྛཱནཏོ ཨནུདྡྷརིཏྭཱ. ལུཉྩིཏྭཱཏི ཏཏོ མཾསམེཝ ནིརཝསེསཾ ཨུཔྤཊྚེཏྭཱ’’ཏི ཝུཏྟཾ.

ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༢༥༤) པན ‘‘ཨཱལིནྡཀམིཌྜྷིཀཱདཱིནནྟི པམུཁམིཌྜྷིཀཱདཱིནཾ. པརིཝཏྟེཏྭཱ ཏཏྠེཝཱཏི ཨེཏྠ ‘པརིཝཏྟེཏྭཱ ཏཏིཡཝཱརེ ཏཏྠེཝ མིཌྜྷིཀཱཡ པཏིཊྛཱཏཱི’ཏི ལིཁིཏཾ. པརིབྷཎྜཾ ནཱམ གེཧསྶ བཧིཀུཊྚཔཱདསྶ ཐིརབྷཱཝཏྠཾ ཀཏཱ ཏནུཀམིཌྜྷིཀཱ ཝུཙྩཏི, ཨེཏྠ ‘པརིཝཏྟེཏྭཱ པཏྟོ བྷིཛྫཏཱིཏི ཨདྷིཀརཎབྷེདཱསངྐཱརཨབྷཱཝེ ཋཱནེ ཋཔེཏུཾ ཝཊྚཏཱི’ཏི ལིཁིཏཾ. པཏྟམཱལོ༹ ཝཏྟེཏྭཱ པཏྟཱནཾ ཨཔཏནཏྠཾ ཝཊྚཾ ཝཱ ཙཏུརསྶཾ ཝཱ ཨིཊྛཀཱདཱིཧི པརིཀྑིཔིཏྭཱ ¶ མཱལ༹ཀཙྪནྣེན ཀཏོ. ‘པཏྟམཎྜལིཀཱ པཏྟཔཙྪིཀཱ ཀཱལཔཎྞཱདཱིཧི ཀཏཱ’ཏི ཙ ལིཁིཏཾ. མིཌྜྷནྟེ ཨཱདྷཱརཀེ ཋཔེཏུཾ ཝཊྚཏི པཏྟསནྡྷཱརཎཏྠཾ ཝུཏྟཏྟཱ. མཉྩེ ཨཱདྷཱརཀེཔི ན ཝཊྚཏི ནིསཱིདནཔཙྩཡཱ ཝཱརིཏཏྟཱ. ཨཱསནྣབྷཱུམིཀཏྟཱ ཨོལམྦེཏུཾ ཝཊྚཏི. ‘ཨཾསཀཱུཊེ ལགྒེཏྭཱཏི (ཙཱུལ༹ཝ. ཨཊྛ. ༢༥༤) ཝཙནཏོ ཨགྒཧཏྠེ ¶ ལགྒེཏྭཱ ཨངྐེ ཋཔེཏུཾ ན ཝཊྚཏཱི’ཏི ཀེཙི ཝདནྟི, ན སུནྡརཾ. ན ཀེཝལཾ ཡསྶ པཏྟོཏིཨཱདི ཡདི ཧཏྠེན གཧིཏཔཏྟེ བྷེདསཉྙཱ, པགེཝ ཨཉྙེན སརཱིརཱཝཡཝེནཱཏི ཀཏྭཱ ཝུཏྟཾ. པཱལི༹ཡཾ པན པཙུརཝོཧཱརཝསེན ཝུཏྟཾ. གྷཊིཀཔཱལམཡཾ གྷཊིཀཊཱཧཾ. ཚཝསཱིསསྶ པཏྟནྟི ‘སིལཱཔུཏྟཀསྶ སརཱིརཾ, ཁཱིརསྶ དྷཱརཱ’ཏིཨཱདིཝོཧཱརཝསེན ཝུཏྟཾ, མཉྩེ ནིསཱིདིཏུཾ ཨཱགཏོཏི ཨཏྠོ. པིསཱཙིལླིཀཱཏི པིསཱཙདཱརཀཱཏིཔི ཝདནྟི. དིནྣཀམེཝ པཊིགྒཧིཏམེཝ. ཙབྦེཏྭཱཏི ཁཱདིཏྭཱ. ཨཊྛཱིནི ཙ ཀཎྚཀཱནི ཙ ཨཊྛིཀཎྚཀཱནི. ཨེཏེསུ སབྦེསུ པཎྞཏྟིཾ ཛཱནཱཏུ ཝཱ, མཱ ཝཱ, ཨཱཔཏྟིཡེཝཱཏི ལིཁིཏ’’ནྟི ཝུཏྟཾ.

སབྦཔཾསུཀཱུལཱདིཀཐཱ

༢༩. སབྦཔཾསུཀཱུལཱདིཀཐཱཡཾ པཾསུ ཝིཡ ཀུཙྪིཏབྷཱཝེན ཨུལཏི པཝཏྟཏཱིཏི པཾསུཀཱུལཾ, སབྦཾ ཏཾ ཨེཏསྶཱཏི སབྦཔཾསུཀཱུལིཀོ, པཏྟཙཱིཝརཱདིཀཾ སབྦཾ སམཎཔརིཀྑཱརཾ པཾསུཀཱུལཾཡེཝ ཀཏྭཱ དྷཱརཎསཱིལོཏི ཨཏྠོ. སམཎཔརིཀྑཱརེསུ ཀཏམཾ པཾསུཀཱུལཾ ཀཏྭཱ དྷཱརེཏུཾ ཝཊྚཏཱིཏི པུཙྪཾ སནྡྷཱཡཱཧ ‘‘ཨེཏྠ པན ཙཱིཝརཉྩ མཉྩཔཱིཋཉྩ པཾསུཀཱུལཾ ཝཊྚཏཱི’’ཏི. ཏཏྠ ཙ ཙཱིཝརཾ ཝིནཡཝསེན ཙ དྷུཏངྒསམཱདཱནཝསེན ཙ ཝཊྚཏི, མཉྩཔཱིཋཾ ཝིནཡཝསེནེཝ. ཀཏམཾ པཾསུཀཱུལཾ ན ཝཊྚཏཱིཏི ཨཱཧ ‘‘ཨཛ྄ཛྷོཧརཎཱིཡཾ པན དིནྣམེཝ གཧེཏབྦ’’ནྟི, ན ཨདིནྣཾ, ཏསྨཱ པཾསུཀཱུལཾ ན ཝཊྚཏཱིཏི ཨདྷིཔྤཱཡོ. ཨེཏྠ ཙ ‘‘ཨཛ྄ཛྷོཧརཎཱིཡ’’ནྟི ཝཙནེན པིཎྜཔཱཏགིལཱནཔཙྩཡབྷེསཛྫཔཨཀྑཱརཝསེན ཨུབྷོཔི པཙྩཡེ དསྶེཏི.

པརིསྶཱཝནཀཐཱ

༣༠. པརིསྶཱཝནཀཐཱཡཾ ཨདྡྷཱནམགྒོ ནཱམ སབྦནྟིམཔརིཙྪེདེན ཨཌྜྷཡོཛནཔྤམཱཎོ, ཏཏྟཀཾ མགྒཾ པརིསྶཱཝནཾ ཨགྒཧེཏྭཱ ¶ གཙྪནྟོཔི ཨཉྙེན ཨཔརིསྶཱཝནཀེན བྷིཀྑུནཱ ཡཱཙིཡམཱནོ ཧུཏྭཱ ཨདེནྟོཔི ན ཝཊྚཏི, ཨཱཔཏྟིཡེཝ. ‘‘ཨནུཛཱནཱམི, བྷིཀྑཝེ, པརིསྶཱཝན’’ནྟི ཨནུཛཱནིཏྭཱ ‘‘ཙོལ༹ཀཾ ནཔྤཧོཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི ¶ , བྷིཀྑཝེ, ཀཊཙྪུཔརིསྶཱཝན’’ནྟི (ཙཱུལ༹ཝ. ༢༥༨) ཝུཏྟཏྟཱ པཀཏིཔརིསྶཱཝནཏོ ཀཊཙྪུཔརིསྶཱཝནཾ ཁུདྡཀནྟི ཝིཉྙཱཡཏི. པཀཏིཔརིསྶཱཝནསྶ ཝིདྷཱནཾ ཨཊྛཀཐཱཡཾ ན ཝུཏྟཾ, ཀཊཙྪུཔརིསྶཱཝནསྶ པན ཝིདྷཱནཾ ‘‘ཀཊཙྪུཔརིསྶཱཝནཾ ནཱམ ཏཱིསུ དཎྜཀེསུ ཝིནནྡྷིཏྭཱ ཀཏ’’ནྟི (ཙཱུལ༹ཝ. ཨཊྛ. ༢༥༨) ཝུཏྟཾ. ཀཊཙྪུཔརིསྶཱཝནཾ ཝཏྭཱ པུན ‘‘ཙོལ༹ཀཾ ནཔྤཧོཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, དྷམཀརཎ’’ནྟི (ཙཱུལ༹ཝ. ༢༥༨) ཝུཏྟཏྟཱ ཀཊཙྪུཔརིསྶཱཝནཏོཔི དྷམཀརཎོ ཁུདྡཀཏརོཏི ཝིཉྙཱཡཏི. དྷམཀརཎསྶ ཝིདྷཱནཾ ཧེཊྛཱ པརིཀྑཱརཀཐཱཡཾ ཝུཏྟམེཝ. ‘‘བྷིཀྑཱུ ནཝཀམྨཾ ཀརོནྟི, པརིསྶཱཝནཾ ན སམྨཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, དཎྜཔརིསྶཱཝན’’ནྟི (ཙཱུལ༹ཝ ༢༥༩) ཝུཏྟཏྟཱ པཀཏིཔརིསྶཱཝནཏོཔི དཎྜཔརིསྶཱཝནཾ མཧནྟཏརནྟི ཝིཉྙཱཡཏི. ‘‘དཎྜཔརིསྶཱཝནཾ ན སམྨཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, ཨོཏྠརཀ’’ནྟི (ཙཱུལ༹ཝ. ༢༥༩) ཝཙནཏོ དཎྜཔརིསྶཱཝནཏོཔི ཨོཏྠརཀཾ མཧནྟཏརནྟི ཝིཉྙཱཡཏི. ཏེསཾ པན དྭིནྣམྤི པརིསྶཱཝནཱནཾ ཝིདྷཱནཾ ཨཊྛཀཐཱཡཾ (ཙཱུལ༹ཝ. ཨཊྛ. ༢༥༩) ཨཱགཏམེཝ.

ནགྒཀཐཱ

༣༡. ནགྒཀཐཱཡཾ ན ནགྒེན ནགྒོ ཨབྷིཝཱདེཏབྦོཏི ནགྒེན ནཝཀཏརེན བྷིཀྑུནཱ ནགྒོ ཝུཌྜྷཏརོ བྷིཀྑུ ན ཨབྷིཝཱདེཏབྦོ ན ཝནྡིཏབྦོ. ཀསྨཱ? ‘‘ན, བྷིཀྑཝེ, ནགྒེན ནགྒོ ཨབྷིཝཱདེཏབྦོ, ཡོ ཨབྷིཝཱདེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༢༦༡) བྷགཝཏཱ ཝཙནཏོ ན ཨབྷིཝཱདེཏབྦོཏི ཡོཛནཱ ¶ . ཨེཏྠ པན ཝདི ཨབྷིཝཱདནཐུཏཱིསཱུཏི དྷཱཏུསྶ ཙུརཱདིགཎཏྟཱ ཎེ-པཙྩཡོ ཧོཏི, ན ཧེཏྭཏྠཏྟཱ.

‘‘ཨཀམྨཀེཧི དྷཱཏཱུཧི, བྷཱཝེ ཀིཙྩཱ བྷཝནྟི ཏེ;

སཀམྨཀེཧི ཀམྨཏྠེ, ཨརཧསཀྐཏྠདཱིཔཀཱ’’ཏི. –

ཝཙནཏོ ཀམྨཏྠེ ཏབྦ-པཙྩཡོཏི དཊྛབྦོ. ན ནགྒེན ཨབྷིཝཱདེཏབྦནྟི ཨེཏྠ ཏུ ནགྒེན བྷིཀྑུནཱ ན ཨབྷིཝཱདེཏབྦནྟི ཨེཏྟཀམེཝ ཡོཛནཱ. ནནུ ཙ བྷོ –

‘‘ཀིཙྩཱ ¶ དྷཱཏུཧྱཀམྨེཧི, བྷཱཝེཡེཝ ནཔུཾསཀེ;

ཏདནྟཱ པཱཡཏོ ཀམྨེ, སཀམྨེཧི ཏིལིངྒིཀཱ’’ཏི. –

ཝཙནཏོ, ཨིམིསྶཱ ཙ དྷཱཏུཡཱ སཀམྨཏྟཱ ཀམྨཾ ཨཛ྄ཛྷཱཧརིཏབྦཾ, ཀམྨཱནུརཱུཔཉྩ ལིངྒཾ ཋཔེཏབྦཾ, ཨཐ ཀསྨཱ ཨེཏྟཀམེཝ ཡོཛནཱ ཀཏཱཏི? ཀམྨཝཙནིཙྪཱབྷཱཝཏོ. ཝུཏྟཉྷི –

‘‘ཀམྨསྶཱཝཙནིཙྪཱཡཾ, སཀམྨཱཁྱཱཏཔཙྩཡཱ;

བྷཱཝེཔི ཏཾ ཡཐཱ གེཧེ, དེཝདཏྟེན པཙྩཏེ’’ཏི.

ཡཐཱ ཨཱཁྱཱཏཔཙྩཡསངྑཱཏཱ ཝིབྷཏྟིཡོ སཀམྨཀདྷཱཏུཏོ བྷཝནྟཱཔི ཀམྨཝཙནིཙྪཱཡ ཨསཏི ཀམྨཾ ཨཝཏྭཱ བྷཱཝཏྠམེཝ ཝདནྟི, ཨེཝཾ ཀིཙྩཔཙྩཡཱཔི སཀམྨཀདྷཱཏུཏོ བྷཝནྟཱཔི ཀམྨཝཙནིཙྪཱཡཱབྷཱཝཏོ ཀམྨཾ ཨཝཏྭཱ བྷཱཝཏྠམེཝ ཝདནྟི, ཏསྨཱ ཀམྨཉྩ ཨནཛ྄ཛྷཱཧརིཏཾ, ཀམྨཱནུརཱུཔཉྩ ལིངྒཾ ན ཋཔིཏཾ, བྷཱཝཏྠཱནུརཱུཔམེཝ ཋཔིཏནྟི དཊྛབྦཾ. ཨེཏྠ ཧི ‘‘ཨཡཾ ནཱམ པུགྒལོ ཨབྷིཝཱདེཏབྦོ’’ཏི ཨཙིནྟེཏྭཱ སཱམཉྙཏོ ཀཏྟཱརམེཝ གཧེཏྭཱ ཋཔིཏོཏི ཝེདིཏབྦོ.

ན ནགྒེན ནགྒོ ཨབྷིཝཱདཱཔེཏབྦོཏི ཨེཏྠ པན ནགྒེན ཝུཌྜྷཏརེན བྷིཀྑུནཱ ནགྒོ ནཝཀཏརོ བྷིཀྑུ ན ཨབྷིཝཱདཱཔེཏབྦོ, ན ཝནྡཱཔེཏབྦོཏི ཡོཛནཱ. ཨེཏྠ ཧི སཀཱརིཏསྶ ཀིཙྩཔཙྩཡསྶ དིཊྛཏྟཱ, དྷཱཏུཡཱ ཙ སཀམྨཀཏྟཱ ནཝཀཏརོ བྷིཀྑུ དྷཱཏུཀཏྟཱ ཧོཏི, ཝུཌྜྷཏརོ བྷིཀྑུ དྷཱཏུཀམྨཾ ¶ , པུན ཀཱརིཏསམྦནྡྷེ ཝུཌྜྷཏརོ བྷིཀྑུ ཀཱརིཏཀཏྟཱ ཧོཏི, ནཝཀཏརོ བྷིཀྑུ ཀཱརིཏཀམྨཾ. ཝུཏྟཉྷི –

‘‘ཧེཏུཀྲིཡཱཡ སམྦནྡྷཱི-བྷཱཝཱ ཀམྨནྟི མནྱཏེ;

ཧེཏུཀྲིཡཱཔདྷཱནཏྟཱ, ཨཉྙཐཱནུཔཔཏྟིཏོ’’ཏི.

ན ནགྒེན ཨབྷིཝཱདཱཔེཏབྦནྟི ཨེཏྠ ཏུ ནགྒེན ཝུཌྜྷཏརེན བྷིཀྑུནཱ ན ཨབྷིཝཱདཱཔེཏབྦཾ, ན ཝནྡཱཔེཏབྦནྟི ཡོཛནཱ, ཨེཏྠཱཔི ཀམྨཝཙནིཙྪཱཡཱབྷཱཝཏོ ཝུཏྟནཡེན བྷཱཝེཡེཝ ཀིཙྩཔཙྩཡོ ཧོཏཱིཏི དཊྛབྦོ. ནནུ ཝནྡཱཔཀེ སཏི ཝནྡཱཔེཏབྦོ ལབྦྷཏིཡེཝ, ཨཐ ‘‘ཀསྨཱ ཀམྨཝཙནིཙྪཱཡཱབྷཱཝཏོ’’ཏི ¶ ཝུཏྟནྟི? ‘‘ཝཏྟིཙྪཱནུཔུབྦིཀཱ སདྡཔཊིཔཏྟཱི’’ཏི ཝཙནཏོ ཝཏྟིཙྪཱབྷཱཝཏོ ན ཝུཏྟནྟི. ཝུཏྟཉྷེཏཾ པུབྦཱཙརིཡེཧི –

‘‘ཝཏྟིཙྪཱ ན བྷཝེ སནྟ-མཔྱསནྟམྤི སཱ བྷཝེ;

ཏཾ ཡཐཱནུདརཱ ཀཉྙཱ, སམུདྡོ ཀུཎྜིཀཱཏི ཙཱ’’ཏི.

ཨིཏརེསུཔི སུཝིཉྙེཡྻམེཝ. པཊིཙྪཱདེནྟི ཨངྒམངྒཱནི ཨེཏཱཧཱིཏི པཊིཙྪཱདིཡོ.

གནྡྷཔུཔྥཀཐཱ

༣༢. གནྡྷཔུཔྥཀཐཱཡཾ ‘‘གནྡྷགནྡྷཾ པན གཧེཏྭཱ ཀཝཱཊེ པཉྩངྒུལིཾ དཱཏུཾ ཝཊྚཏཱི’’ཏི ཝཙནཏོ གནྡྷེ དིནྣེ པཊིགྒཧིཏུཾ ཝཊྚཏི, ནོ ལིམྤིཏུནྟི སིདྡྷཾ. ཨིདཱནི པན མནུསྶཱ བྷིཀྑཱུ བྷོཛེཏྭཱ ཧཏྠདྷོཝནཱཝསཱནེ ཧཏྠཝཱསཏྠཱཡ གནྡྷཝིལེཔནཾ དེནྟི, ཏཾ བྷིཀྑཱུ པཊིགྒཧེཏྭཱ ཨེཀཙྩེ ཧཏྠམེཝ ལིམྤེནྟི, ཨེཀཙྩེ ཀཱཡམྤི མུཁམྤི ཨཱལིམྤེནྟི, ‘‘སུགནྡྷོ ཝཏཱ’’ཏིཨཱདཱིནི ཝཏྭཱ ཧཊྛཔཧཊྛཱཀཱརཾ ཀརོནྟི, ཏཾ ཝཊྚཏི, ན ཝཊྚཏཱིཏི? ‘‘ཀཝཱཊེ པཉྩངྒུལིཀཾ དཱཏུཾ ཝཊྚཏཱི’’ཏི ཝིཧཱརེ ཀཝཱཊདྷཱུཔནམཏྟསྶེཝ ཝུཏྟཏྟཱ ཀཱཡདྷཱུཔནསྶ ཨཝུཏྟཏྟཱ, ‘‘མཱལཱགནྡྷཝིལེཔནདྷཱརཎམཎྜནཝིབྷཱུསནཊྛཱནཱ ཝེརམཎཱི’’ཏི ¶ ཝཙནསྶཱནུལོམཏོ ཙ ན ཝཊྚཏཱིཏི དིསྶཏི, ཝཱིམཾསིཏྭཱ གཧེཏབྦཾ. ‘‘པུཔྥཾ གཧེཏྭཱ ཝིཧཱརེ ཨེཀམནྟཾ ནིཀྑིཔིཏུ’’ནྟི ཝཙནཏོ པུཔྥེ དིནྣེ གཧེཏུཾ ཝཊྚཏི, ན པིལ༹ནྡྷནཱདཱིནི ཀཱཏུནྟི སིདྡྷཾ. ཨིདཱནི པན བྷིཀྑཱུསུ གནྡྷཔུཔྥེསུ ལདྡྷེསུ ‘‘སུརབྷིགནྡྷཾ ཝཏིདཾ པུཔྥ’’ནྟིཨཱདཱིནི ཝཏྭཱ པཧཊྛཱཀཱརཾ ཀཏྭཱ སིངྒྷནྟི, ཏཾ ཝཊྚཏི, ན ཝཊྚཏཱིཏི? ཏམྤི ཝིཧཱརེཡེཝ ཨེཀམནྟཾ ཋཔནསྶ ཝུཏྟཏྟཱ སིངྒྷིཏབྦཱདིབྷཱཝསྶ ཨཝུཏྟཏྟཱ, མཱལཱགནྡྷཱདིཔཱཋསྶ ཨནུལོམཏོ ཙ ན ཝཊྚཏཱིཏི དིསྶཏི, ཝཱིམཾསིཏྭཱ གཧེཏབྦཾ. ‘‘ཨེཀམནྟཾ ནིཀྑིཔིཏུ’’ནྟི ཝཙནསྶ པན སཱམཏྠིཡཏོ ཙེཏིཡཔཊིམཱཔཱུཛནཱདཱིནི ཙ ཀཱཏུཾ ཝཊྚཏཱིཏི ཝིཉྙཱཡཏི.

ཨཱསིཏྟཀཱུཔདྷཱནཀཐཱ

༣༣. ཨཱསིཏྟཀཱུཔདྷཱནཀཐཱཡཾ མནུསྶཱནཾ བྷརཎསཱིལཏཾ སནྡྷཱཡ ‘‘ཏམྦལོཧེན ཝཱ རཛཏེན ཝཱ’’ཏི ¶ ཝུཏྟཾ, ཝིཀཔྤནཏྠེན པན ཝཱ-སདྡེན ཧིརཉྙེན ཝཱ སུཝཎྞེན ཝཱཏིཨཱདིཾ སངྒཎྷཱཏི. པཊིཀྑིཏྟཏྟཱ པནཱཏི བྷགཝཏཱ པན ཨཱསིཏྟཀཱུཔདྷཱནསྶ སཱམཉྙཝསེན པཊིཀྑིཏྟཏྟཱ. ན ཀེཝལཾ རཏནཔེལཱ༹ ཨེཝ ན ཝཊྚཏི, ཨཐ ཁོ དཱརུམཡཱཔཱིཏི. ཨེཏྠ པི-སདྡོ སམྤིཎྜནཏྠོ, ཏཾ ན ཝིལཱིཝམཡཏཱལཔཎྞམཡཝེཏྟམཡཱདིཀཾ སམྤིཎྜེཏི.

མལོ༹རིཀཀཐཱ

༣༤. མལོ༹རིཀཀཐཱཡཾ ‘‘ཨནུཛཱནཱམི, བྷིཀྑཝེ, མལོ༹རིཀ’’ནྟི གིལཱནོ བྷིཀྑུ བྷུཉྫམཱནོ ན སཀྐོཏི ཧཏྠེན པཏྟཾ སནྡྷཱརེཏུཾ, ཏསྨཱ ཨནུཉྙཱཏཾ. པུབྦེ པཏྟསངྒོཔནཏྠཾ ཨཱདྷཱརཀོ ཨནུཉྙཱཏོ, ཨིདཱནི བྷུཉྫནཏྠཾ. དཎྜཱདྷཱརཀོ ཝུཙྩཏཱིཏི དཎྜཱདྷཱརཀོ པདྷཱནཏོ མལོ༹རིཀོཏི ཝུཙྩཏི. ཡཊྛི…པེ… པཱིཋཱདཱིནིཔི ཨཱདྷཱརཀསཱམཉྙེན ཨེཏྠེཝ ¶ པཝིཊྛཱནཱིཏི སམྦནྡྷོ. ཨཱདྷཱརཀཾ ནཱམ ཚིདྡཾ ཝིདྡྷམྤི ཨཏྠི, ཨཝིདྡྷམྤི ཨཏྠི, ཏེསུ ཀཏམཾ ཝཊྚཏཱིཏི ཨཱཧ ‘‘ཨཱདྷཱརསངྑེཔགམནཏོ ཧི…པེ… ཝཊྚཏིཡེཝཱ’’ཏི.

ཨེཀབྷཱཛནཱདིཀཐཱ

༣༥. ཨེཀབྷཱཛནཱདིཀཐཱཡཾ ཨེཀཏོབྷུཉྫནཾ ནཱམ ཨེཀབྷཱཛནསྨིཾ ཨེཀཀྑཎེཡེཝ སཧབྷུཉྫནཾ, ན ནཱནཱབྷཱཛནེ. ཨེཀབྷཱཛནསྨིམྤི ན ནཱནཱཀྑཎེཏི ཨཱཧ ‘‘སཙེ པནཱ’’ཏིཨཱདི. ཏསྨིཾ ཨཔགཏེ ཏསྶ ཨཔགཏཏྟཱ ཨིཏརསྶ སེསཀཾ བྷུཉྫིཏུཾ ཝཊྚཏི. ཨིམིནཱ ཨེཀཀྑཎེ ཨབྷུཉྫནབྷཱཝཾ དསྶེཏི. ཨིཏརསྶཔཱིཏིཨཱདཱིསུ ཨིཏརསྶཔཱིཏི ཨིཏརཱིཏརཀཐནཾ, སེསབྷུཉྫཀཨིཏརཏོ ཨིཏརསྶཱཏི ཨཏྠོ. ཏེན པཋམཾ གཧེཏྭཱ གཏབྷིཀྑུམེཝཱཧ. ཏསྨིཾ ཁཱིཎེ ཏསྶ ཁཎཏྟཱ པཋམཾ གཧིཏཝཏྠུསྶ ཁཱིཎཏྟཱ པུན གཧེཏུཾ ཝཊྚཏི. ཨིམིནཱ སཧཨབྷུཉྫནབྷཱཝཾ དསྶེཏི.

ན ཨེཀམཉྩེ ནིཔཛྫིཏབྦཾ སཏིཔི ནཱནཱཨཏྠརཎེ ‘‘ན ཨེཀམཉྩེ ཏུཝཊྚིཏབྦཾ, ཡོ ཏུཝཊྚེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༢༦༤) ཝཙནཏོ. ན ཨེཀཏྠརཎེ ནིཔཛྫིཏབྦཾ སཏིཔི ནཱནཱམཉྩེ ‘‘ན ཨེཀཏྠརཎཱ ཏུཝཊྚིཏབྦ’’ནྟི (ཙཱུལ༹ཝ. ༢༦༤) ཝཙནཏོ, པགེཝ ཨུབྷིནྣཾ ཨེཀཏྟེཏི ཨཏྠོ. ཡདི ཨེཝཾ ནཱནཱམཉྩནཱནཱཨཏྠརཎེསུ ཨསནྟེསུ ཀཐཾ ཨནཱཔཏྟི སིཡཱཏི ¶ ཙིནྟཱཡམཱཧ ‘‘ཝཝཏྠཱནཾ པནཱ’’ཏིཨཱདི. ཨེཀཏྠརཎཔཱཝུརཎེཧཱིཏི ཨེཏྠ པན ཨཡཾ ཨེཀཏྠརཎཔཱཝུརཎསདྡོ ན ཙཏྠསམཱསོ ཧོཏི, ཨཐ ཁོ བཱཧིརཏྠསམཱསོཏི ཨཱཧ ‘‘ཨེཀཾ ཨཏྠརཎཉྩེཝ པཱཝུརཎཉྩ ཨེཏེསནྟི ཨེཀཏྠརཎཔཱཝུརཎཱ’’ཏི, ཏིཔདཏུལྱཱདྷིཀརཎབཱཧིརཏྠསམཱསོཡཾ. ཀེསམེཏམདྷིཝཙནནྟྱཱཧ ‘‘ཨེཀཾ ཨནྟཾ ཨཏྠརིཏྭཱ ཨེཀཾ པཱརུཔིཏྭཱ ནིཔཛྫནྟཱནམེཏཾ ཨདྷིཝཙན’’ནྟི, ཨེཝཾ ནིཔཛྫནྟཱནཾ བྷིཀྑཱུནཾ ཨེཏཾ ཨེཀཏྠརཎཔཱཝུརཎཔདཾ ¶ ཨདྷིཝཙནཾ ཧོཏཱིཏི ཨདྷིཔྤཱཡོ. ཀེསཾ པན ཨནྟནྟི ཨཱཧ ‘‘སཾཧཱརིམཱན’’ནྟིཨཱདི.

ཙེལཔཊིཀཀཐཱ

༣༦. ཙེལཔཊིཀཀཐཱཡཾ ཙེལཔཊིཀནྟི ཙེལསནྠརཾ. ཀིཾ པན བྷགཝཏོ སིཀྑཱཔདཔཉྙཱཔནེ ཀཱརཎནྟི? ‘‘བོདྷིརཱཛཀུམཱརོ ཀིར ‘སཙེ ཨཧཾ པུཏྟཾ ལཙྪཱམི, ཨཀྐམིསྶཏི མེ བྷགཝཱ ཙེལཔཊིཀ’ནྟི ཨིམིནཱ ཨཛ྄ཛྷཱསཡེན སནྠརི, ཨབྷབྦོ ཙེས པུཏྟལཱབྷཱཡ, ཏསྨཱ བྷགཝཱ ན ཨཀྐམི. ཡདི ཨཀྐམེཡྻ, པཙྪཱ པུཏྟཾ ཨལབྷནྟོ ‘ནཱཡཾ སབྦཉྙཱུ’ཏི དིཊྛིཾ གཎྷེཡྻ, ཨིདཾ ཏཱཝ བྷགཝཏོ ཨནཀྐམནེ ཀཱརཎཾ. ཡསྨཱ པན བྷིཀྑཱུཔི ཡེ ཨཛཱནནྟཱ ཨཀྐམེཡྻུཾ, ཏེ གིཧཱིནཾ པརིབྷཱུཏཱ བྷཝེཡྻུཾ, ཏསྨཱ བྷིཀྑཱུ པརིབྷཝཏོ མོཙེཏུཾ སིཀྑཱཔདཾ པཉྙཔེསི, ཨིདཾ སིཀྑཱཔདཔཉྙཱཔནེ ཀཱརཎ’’ནྟི ཨཊྛཀཐཱཡཾ (ཙཱུལ༹ཝ. ཨཊྛ. ༢༦༨) ཝུཏྟཾ.

སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༢༦༨) པན ‘‘བྷགཝཱ ཏུཎྷཱི ཨཧོསཱིཏི ‘ཀིསྶ ནུ ཁོ ཨཏྠཱཡ རཱཛཀུམཱརེན ཨཡཾ མཧཱསཀྐཱརོ ཀཏོ’ཏི ཨཱཝཛྫེནྟོ པུཏྟཔཏྠནཱཡ ཀཏབྷཱཝཾ ཨཉྙཱསི. སོ ཧི རཱཛཔུཏྟོ ཨཔུཏྟཀོ, སུཏཉྩཱནེན ཨཧོསི ‘བུདྡྷཱནཾ ཀིར ཨདྷིཀཱརཾ ཀཏྭཱ མནསཱ ཨིཙྪིཏཾ ལབྷནྟཱི’ཏི, སོ ‘སཙཱཧཾ པུཏྟཾ ལབྷིསྶཱམི, སམྨཱསམྦུདྡྷོ ཨིམཾ ཙེལཔཊིཀཾ ཨཀྐམིསྶཏི. ནོ ཙེ ལབྷིསྶཱམི, ན ཨཀྐམིསྶཏཱི’ཏི པཏྠནཾ ཀཏྭཱ སནྠརཱཔེསི. ཨཐ བྷགཝཱ ‘ནིབྦཏྟིསྶཏི ནུ ཁོ ཨེཏསྶ པུཏྟོ’ཏི ཨཱཝཛྫེཏྭཱ ‘ན ནིབྦཏྟིསྶཏཱི’ཏི ཨདྡས. པུབྦེ ཀིར སོ ཨེཀསྨིཾ དཱིཔེ ཝསམཱནོ བྷརིཡཱཡ སམཱནཙྪནྡོ ཨནེཀསཀུཎཔོཏཀེ ཁཱདི. ‘སཙསྶ མཱཏུགཱམོ པུཉྙཝཱ བྷཝེཡྻ, པུཏྟཾ ལབྷེཡྻ, ཨུབྷོཧི པན སམཱནཙྪནྡེཧི ཧུཏྭཱ པཱཔཀམྨཾ ཀཏཾ ¶ , ཏེནསྶ པུཏྟོ ན ནིབྦཏྟིསྶཏཱིཏི ཨཉྙཱསི. དུསྶེ པན ཨཀྐནྟེ ‘བུདྡྷཱནཾ ཨདྷིཀཱརཾ ཀཏྭཱ པཏྠིཏཾ ལབྷནྟཱིཏི ལོཀེ ཨནུསྶཝོ, མཡཱ ཙ མཧཱཨདྷིཀཱརོ ¶ ཀཏོ, ན ཙ པུཏྟཾ ལབྷཱམི, ཏུཙྪཾ ཨིདཾ ཝཙན’ནྟི མིཙྪཱགཱཧཾ གཎྷེཡྻ. ཏིཏྠིཡཱཔི ‘ནཏྠི སམཎཱནཾ ཨཀཏྟབྦཾ ནཱམ, ཙེལཔཊིཀམྤི མདྡནྟཱ ཨཱཧིཎྜནྟཱི’ཏི ཨུཛ྄ཛྷཱཡེཡྻུཾ, ཨེཏརཧི ཙ ཨཀྐམནྟེསུ བཧཱུ བྷིཀྑཱུ པརཙིཏྟཝིདུནོ, ཏེ བྷབྦཏྟཾ ཛཱནིཏྭཱ ཨཀྐམིསྶནྟི. ཨབྷབྦཏཾ ཛཱནིཏྭཱ ན ཨཀྐམིསྶནྟི. ཨནཱགཏེ པན ཨུཔནིསྶཡོ མནྡོ བྷཝིསྶཏི, ཨནཱགཏཾ ན ཛཱནིསྶནྟི. ཏེསུ ཨཀྐམནྟེསུ སཙེ པཏྠིཏཾ སམིཛ྄ཛྷིསྶཏི, ཨིཙྩེཏཾ ཀུསལཾ. ནོ ཙེ ཨིཛ྄ཛྷིསྶཏི, ‘པུབྦེ བྷིཀྑུསངྒྷསྶ ཨདྷིཀཱརཾ ཀཏྭཱ ཨིཙྪིཏིཙྪིཏཾ ལབྷནྟི, ཨིདཱནི ན ལབྷནྟི, ཏེཡེཝ མཉྙེ བྷིཀྑཱུ པཊིཔཏྟིཔཱུརཀཱ ཨཧེསུཾ, ཨིམེ པན པཊིཔཏྟིཾ པཱུརེཏུཾ ན སཀྐོནྟཱི’ཏི མནུསྶཱ ཝིཔྤཊིསཱརིནོ བྷཝིསྶནྟཱིཏི ཨིམེཧི ཏཱིཧི ཀཱརཎེཧི བྷགཝཱ ཨཀྐམིཏུཾ ཨནིཙྪནྟོ ཏུཎྷཱི ཨཧོསི. པཙྪིམཾ ཛནཏཾ ཏཐཱགཏོ ཨནུཀམྤཏཱིཏི ཨིདཾ པན ཐེརོ ཝུཏྟེསུ ཀཱརཎེསུ ཏཏིཡཀཱརཎཾ སནྡྷཱཡཱཧཱ’’ཏི ཝུཏྟཾ.

པཱལི༹ཡཾ (ཙཱུལ༹ཝ. ༢༦༨) ‘‘ཡཱཙིཡམཱནེན ཙེལཔཊིཀཾ ཨཀྐམིཏུ’’ནྟི ཝཙནཏོ ཡཱཙིཡམཱནེན ཨེཝ ཨཀྐམིཏབྦཾ, ནོ ཨཡཱཙིཡམཱནེནཱཏི སིདྡྷཾ, ཏཏྠཔི ‘‘མངྒལཏྠཱཡཱ’’ཏི (ཙཱུལ༹ཝ. ༢༦༨) ཝཙནཏོ མངྒལཏྠཱཡ ཡཱཙིཡམཱནེན ཨཀྐམིཏབྦཾ, ན སིརིསོབྷགྒཱདིཨཏྠཱཡ ཡཱཙིཡམཱནེནཱཏི ཙ, ཏཏྠཔི ‘‘གིཧཱིན’’ནྟི (ཙཱུལ༹ཝ. ༢༦༨) ཝཙནཏོ གིཧཱིནཾ ཨེཝ ཙེལསནྠརཾ ཨཀྐམིཏབྦཾ, ན པབྦཛིཏཱནནྟི ཙ. ཨཊྛཀཐཱཡཾ (ཙཱུལ༹ཝ. ཨཊྛ. ༢༦༨) ‘‘ཡཱ ཀཱཙི ཨིཏྠཱི ཨཔགཏགབྦྷཱ ཝཱ ཧོཏུ, གརུགབྦྷཱ ཝཱ’’ཏི ཨནིཡམཝཱཙཀེན ཝཱ-སདྡེན ཝཙནཏོ ན ཀེཝལཾ ཨིམཱ དྭེཡེཝ གཧེཏབྦཱ, ཨཐ ཁོ ‘‘པཏིཊྛིཏགབྦྷཱ ཝཱ ཝིཛཱཏིཔུཏྟཱ ཝཱ’’ཏིཨཱདིནཱ ཡཱ ཀཱཙི ¶ མངྒལིཀཱཡོ ཨིཏྠིཡོཔི པུརིསཱཔི གཧེཏབྦཱ. ‘‘ཨེཝརཱུཔེསུ ཋཱནེསཱུ’’ཏི ཝུཏྟཏྟཱ ན ཀེཝལཾ ཡཐཱཝུཏྟཊྛཱནེསུཡེཝ, ཨཐ ཁོ ཏཾསདིསེསུ ཡེསུ ཀེསུཙི མངྒལཊྛཱནེསུ ཡེསཾ ཀེསཉྩི གིཧཱིནཾ མངྒལཏྠཱཡ ཡཱཙིཡམཱནཱནཾ ཙེལསནྠརཾ ཨཀྐམིཏུཾ ཝཊྚཏཱིཏི སིཛ྄ཛྷཏི, ཝཱིམཾསིཏྭཱ གཧེཏབྦཾ. པཱལི༹ཡཾ (ཙཱུལ༹ཝ. ༢༦༨) ‘‘ཨནུཛཱནཱམི, བྷིཀྑཝེ, དྷོཏཔཱདཀཾ ཨཀྐམིཏུ’’ནྟི སཱམཉྙཝསེན ཝཙནཏོ, ཨཊྛཀཐཱཡཉྩ (ཙཱུལ༹ཝ. ཨཊྛ. ༢༦༨) ‘‘ཏཾ ཨཀྐམིཏུཾ ཝཊྚཏཱི’’ཏི ཨཝིསེསེན ཝུཏྟཏྟཱ དྷོཏཔཱདཀཾ ཨཡཱཙིཡམཱནེནཔི བྷིཀྑུནཱ ཨཀྐམིཏབྦནྟི སིདྡྷཾ, ‘‘དྷོཏེཧི པཱདེཧི ཨཀྐམནཏྠཱཡཱ’’ཏི པན ཝུཏྟཏྟཱ ཨདྷོཏེཧི ཨཀྐམིཏུཾ ན ཝཊྚཏཱིཏི ཙ, ཝཱིམཾསིཏྭཱ གཧེཏབྦཾ.

པཱདགྷཾསནཱིཡཀཐཱ

༣༧. པཱདགྷཾསནཱིཡཀཐཱཡཾ ¶ པཋམཾ ཏཱཝ ཨཀཔྤིཡཔཱདགྷཾསནིཾ དསྶེཏུཾ ‘‘ཀཏཀཾ ན ཝཊྚཏཱི’’ཏི ཨཱཧ. ཀཏཀཾ ནཱམ ཀཱིདིསནྟི པུཙྪཱཡ སཏི ཝུཏྟཾ ‘‘ཀཏཀཾ ནཱམ པདུམཀཎྞིཀཱཀཱར’’ནྟིཨཱདི. ཀསྨཱ པཊིཀྑིཏྟནྟི ཝུཏྟཾ ‘‘བཱཧུལིཀཱནུཡོགཏྟཱ’’ཏི. ཏཏོ ཀཔྤིཡཔཱདགྷཾསནིཡོ དསྶེཏུམཱཧ ‘‘ཨནུཛཱནཱམི, བྷིཀྑཝེ, ཏིསྶོ པཱདགྷཾསནིཡོ’’ཏིཨཱདི. སེསཾ སུཝིཉྙེཡྻམེཝ.

བཱིཛནཱིཀཐཱ

༣༨. བཱིཛནཱིཀཐཱཡཾ པཋམཾ ཏཱཝ ཨཀཔྤིཡབཱིཛནིཾ དསྶེཏུཾ ‘‘ཙམརཱིཝཱལེཧི ཀཏབཱིཛནཱི ན ཝཊྚཏཱི’’ཏི ཨཱཧ. ཏཏོ ཀཔྤིཡཚབཱིཛནིཡོ དསྶེཏུཾ ‘‘མཀསབཱིཛནཱིཨཱདི ཝཊྚཏཱི’’ཏི ཨཱཧ. ཏཏྠ ཀཔྤིཡཚབཱིཛནིཡོ ནཱམ མཀསབཱིཛནཱི, ཝཱཀམཡབཱིཛནཱི, ཨུསཱིརམཡབཱིཛནཱི, མོརཔིཉྪམཡབཱིཛནཱི, ཝིདྷཱུཔནཾ, ཏཱལཝཎྚཉྩཱཏི. ཏཱསཾ ཝིསེསཾ དསྶེཏུཾ ‘‘ཝིདྷཱུཔནནྟི བཱིཛནཱི ཝུཙྩཏཱི’’ཏིཨཱདིམཱཧ ¶ . ཨུསཱིརམཡཾ མོརཔིཉྪམཡཉྩ སུཝིཉྙེཡྻཏྟཱ ན ཝུཏྟཾ. ‘‘བཱིཛནིནྟི ཙཏུརསྶབཱིཛནིཾ. ཏཱལཝཎྚནྟི ཏཱལཔཏྟཱདཱིཧི ཀཏཾ མཎྜལིཀབཱིཛནི’’ནྟི སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༢༦༩) ཝུཏྟཾ.

ཚཏྟཀཐཱ

༣༩. ཚཏྟཀཐཱཡཾ ཚཏྟཾ ནཱམ ཏཱིཎི ཚཏྟཱནི སེཏཙྪཏྟཾ, ཀིལཉྫཙྪཏྟཾ, པཎྞཙྪཏྟནྟི. ཏཏྠ སེཏཙྪཏྟནྟི ཝཏྠཔལིགུཎྛིཏཾ པཎྜརཙྪཏྟཾ. ཀིལཉྫཙྪཏྟནྟི ཝིལཱིཝཙྪཏྟཾ. པཎྞཙྪཏྟནྟི ཏཱལཔཎྞཱདཱིཧི ཡེཧི ཀེཧིཙི ཀཏཾ. མཎྜལབདྡྷཾ སལཱཀབདྡྷནྟི ཨིདཾ པན ཏིཎྞམྤི ཚཏྟཱནཾ པཉྫརདསྶནཏྠཾ ཝུཏྟཾ. ཏཱནི ཧི མཎྜལབདྡྷཱནི ཙེཝ ཧོནྟི སལཱཀབདྡྷཱནི ཙ. ཡམྤི ཏཏྠཛཱཏཀདཎྜེན ཀཏཾ ཨེཀཔཎྞཙྪཏྟཾ ཧོཏི, ཏམྤི ཚཏྟམེཝ. ‘‘ཝིལཱིཝཙྪཏྟནྟི ཝེཎུཝིལཱིཝེཧི ཀཏཾ ཚཏྟཾ. ཏཏྠཛཱཏཀདཎྜཀེན ཀཏནྟི ཏཱལཔཎྞཾ སཧ དཎྜཀེན ཚིནྡིཏྭཱ ཏམེཝ ཚཏྟདཎྜཾ ཀརོནྟི གོཔཱལཀཱདཡོ ཝིཡ, ཏཾ སནྡྷཱཡེཏཾ ཝུཏྟ’’ནྟི སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༦༣༤) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. པཱཙིཏྟིཡ ༢.༦༣༤) པན ‘‘ཝིལཱིཝཙྪཏྟནྟི ¶ ཝེཎུཔེསིཀཱཧི ཀཏཾ. མཎྜལབདྡྷཱནཱིཏི དཱིགྷསལཱཀཱསུ ཏིརིཡཾ ཝལཡཱཀཱརེན སལཱཀཾ ཋཔེཏྭཱ སུཏྟེཧི བདྡྷཱནི དཱིགྷཉྩ ཏིརིཡཉྩ ཨུཛུཀམེཝ སལཱཀཱཡོ ཋཔེཏྭཱ དལ༹ྷབདྡྷཱནི ཙེཝ ཏིརིཡཾ ཋཔེཏྭཱ དཱིགྷདཎྜཀེཧེཝ སངྐོཙཱརཧཾ ཀཏྭཱ སུཏྟེཧེཝ ཏིརིཡཾ བདྡྷཱནི. ཏཏྠཛཱཏཀདཎྜཀེན ཀཏནྟི སཧ དཎྜཀེན ཚིནྣཏཱལཔཎྞཱདཱིཧི ཀཏ’’ནྟི ཝུཏྟཾ. ཨིདྷ པན ཚཏྟདྷཱརཀཔུགྒལཝསེན ཝུཏྟཾ, ཏསྨཱ ཨགིལཱནསྶ བྷིཀྑུནོ ཚཏྟཾ དྷཱརེཏུཾ ན ཝཊྚཏི. སེསཾ སུཝིཉྙེཡྻམེཝ.

ནཁཀཐཱ

༤༠. ནཁཀཐཱཡཾ དཱིགྷནཁདྷཱརཎཔཙྩཡཱ ཨུཔྤནྣེ ཝཏྠུསྨིཾ ‘‘ན, བྷིཀྑཝེ, དཱིགྷཱ ནཁཱ དྷཱརེཏབྦཱ, ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི ¶ (ཙཱུལ༹ཝ. ༢༧༤) ཝཙནཏོ དྷཱརེནྟསྶ ཨཱཔཏྟི. ‘‘ནཁེནཔི ནཁཾ ཚིནྡནྟི, མུཁེནཔི ནཁཾ ཚིནྡནྟི, ཀུཊྚེཔི གྷཾསནྟི, ཨངྒུལིཡོ དུཀྑཱ ཧོནྟི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, ནཁཙྪེདན’’ནྟི (ཙཱུལ༹ཝ. ༢༧༤) ཝཙནཏོ ནཁཙྪེདནསཏྠཀཾ དྷཱརེཏུཾ ཝཊྚཏི. ཧེཊྛཱ ཙ ‘‘ནཁཙྪེདནཾ ཝལིཏཀཾཡེཝ ཀརོནྟི, ཏསྨཱ ཏཾ ཝཊྚཏཱི’’ཏི ཨཊྛཀཐཱཡཾ (པཱརཱ. ཨཊྛ. ༡.༨༥) ཝུཏྟཾ. ‘‘ཝལིཏཀནྟི ནཁཙྪེདནཀཱལེ དལ༹ྷགྒཧཎཏྠཾ ཝལཱིཧི ཡུཏྟམེཝ ཀརོནྟི, ཏསྨཱ ཏཾ ཝཊྚཏཱི’’ཏི ཝིམཏིཝིནོདནིཡཾ (ཝི. ཝི. ཊཱི. ༡.༨༥) ཝུཏྟཾ. མཾསཔྤམཱཎེནཱཏི ཨངྒུལགྒམཾསཔྤམཱཎེན. ཝཱིསཏིམཊྛནྟི ཝཱིསཏིཔི ཧཏྠཔཱདནཁེ ལིཁིཏམཊྛེ ཀརོནྟི. སེསཾ སུཝིཉྙེཡྻམེཝ.

ལོམཀཐཱ

ལོམཀཐཱཡཾ ‘‘སམྦཱདྷེལོམཾ སཾཧརཱཔེནྟི. མནུསྶཱ ཨུཛ྄ཛྷཱཡནྟི ཁཱིཡནྟི ཝིཔཱཙེནྟི སེཡྻཐཱཔི གིཧཱི ཀཱམབྷོགིནོ’’ཏི ཝཏྠུསྨིཾ ཨུཔྤནྣེ ‘‘ན, བྷིཀྑཝེ…པེ… དུཀྐཊསྶཱ’’ཏི (ཙཱུལ༹ཝ. ༢༧༥) ཝཙནཏོ སཾཧརཱཔེནྟསྶ ཨཱཔཏྟི. ཨཉྙཏརསྶ བྷིཀྑུནོ སམྦཱདྷེ ཝཎོ ཧོཏི, བྷེསཛྫཾ ན ཏིཊྛཏཱིཏི ཨིམིསྶཱ ཨཊྛུཔྤཏྟིཡཱ ‘‘ཨནུཛཱནཱམི, བྷིཀྑཝེ, ཨཱབཱདྷཔཙྩཡཱ སམྦཱདྷེ ལོམཾ སཾཧརཱཔེཏུ’’ནྟི (ཙཱུལ༹ཝ. ༢༧༥) ཝཙནཏོ ཨཱབཱདྷཔཙྩཡཱ བྷེསཛྫཔཏིཊྛཱཔནཏྠཱཡ སམྦཱདྷེ ལོམཾ ཧརཱཔེནྟསྶ ཨནཱཔཏྟི. ‘‘སེཡྻཐཱཔི པིསཱཙིལླིཀཱ’’ཏི མནུསྶཱནཾ ཨུཛ྄ཛྷཱཡནཔཙྩཡཱ ‘‘ན, བྷིཀྑཝེ, དཱིགྷཾ ནཱསིཀཱལོམཾ དྷཱརེཏབྦཾ, ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི ¶ (ཙཱུལ༹ཝ. ༢༧༥) ཝཙནཏོ དྷཱརཎཔཙྩཡཱ ཨཱཔཏྟི. ‘‘ཨནུཛཱནཱམི, བྷིཀྑཝེ, སཎྜཱས’’ནྟི ཨནུརཀྑཎཏྠཱཡ སཎྜཱསོ ཨནུཉྙཱཏོ, ཏསྨཱ ནཱསིཀཱལོམཾ སཎྜཱསེན ཧརཱཔེཏུཾ ཝཊྚཏི. པལིཏནྟི པཎྜརཀེསཾ. གཱཧེཏུཾ ན ཝཊྚཏི ‘‘མཱ ¶ མེ ཛརཱབྷཱཝོ ཧོཏཱུ’’ཏི མནསི ཀཏཏྟཱ. བཱིབྷཙྪཾ ཧུཏྭཱཏི ཝིརཱུཔཾ ཧུཏྭཱ. པལིཏཾ ཝཱ ཨཔལིཏཾ ཝཱཏི པཎྜརཾ ཝཱ ཨཔཎྜརཾ ཝཱ. གཱཧཱཔེཏུཾ ཝཊྚཏི ཨཔྤསཱདཱཝཧཏྟཱཏི.

ཀཱཡབནྡྷནཀཐཱ

༤༡. ཀཱཡབནྡྷནཀཐཱཡཾ ཨཀཱཡབནྡྷནེནཱཏི ཨབནྡྷིཏཀཱཡབནྡྷནེན. བྷིཀྑུནཱཏི སེསོ. ཨཐ ཝཱ ཨཀཱཡབནྡྷནེནཱཏི ཨབནྡྷིཏཀཱཡབནྡྷནོ ཧུཏྭཱཏི ཨིཏྠམྦྷཱུཏཏྠེ ཀརཎཝཙནཾ ཡཐཱ ‘‘བྷིནྣེན སཱིསེན པགྒྷརནྟེན ལོཧིཏེན པཊིཝིསཀེ ཨུཛ྄ཛྷཱཔེསཱི’’ཏི. ཏེནཱཧ ‘‘ཨབནྡྷིཏྭཱ ནིཀྑམནྟེན ཡཏྠ སརཏི, ཏཏྠ བནྡྷིཏབྦ’’ནྟི. ཀཱཡབནྡྷནཾ ནཱམ ཚ ཀཱཡབནྡྷནཱནི ཀལཱབུཀཾ, དེཌྜུབྷཀཾ, མུརཛཾ, མདྡཝཱིཎཾ, པཊྚིཀཾ, སཱུཀརནྟཀནྟི. ཏཏྠ ཀལཱབུཀཾ ནཱམ བཧུརཛྫུཀཾ. དེཌྜུབྷཀཾ ནཱམ ཨུདཀསཔྤསཱིསསདིསཾ. མུརཛཾ ནཱམ མུརཛཝཊྚིསཎྛཱནཾ ཝེཋེཏྭཱ ཀཏཾ. མདྡཝཱིཎཾ ནཱམ པཱམངྒསཎྛཱནཾ. ཨཱིདིསཉྷི ཨེཀམྤི ན ཝཊྚཏི, པགེཝ བཧཱུནི. ཏསྨཱ པཊིཀྑིཏྟཱནི ཨཀཔྤིཡཀཱཡབནྡྷནཱནི ནཱམ ཙཏྟཱརི ཧོནྟི, པཊྚིཀཾ, སཱུཀརནྟཀནྟི ཨིམཱནི དྭེ ཀཱཡབནྡྷནཱནི བྷགཝཏཱ ཨནུཉྙཱཏཱནི ཀཔྤིཡཀཱཡབནྡྷནཱནི ནཱམ, ཏསྶ པཀཏིཝཱིཏཱ ཝཱ མཙྪཀཎྚཀཝཱཡིམཱ ཝཱ པཊྚིཀཱ ཝཊྚཏི, སེསཱ ཀུཉྫརཙྪིཀཱདིབྷེདཱ ན ཝཊྚཏི. སཱུཀརནྟཀཾ ནཱམ ཀུཉྩིཀཀོསཀསཎྛཱནཾ ཧོཏི, ཨེཀརཛྫུཀཾ, པན མུདྡིཀཀཱཡབནྡྷནཉྩ སཱུཀརནྟཀཾ ཨནུལོམེཏི. ཨིམེཧི པན དྭཱིཧི སདྡྷིཾ ཨཊྛ ཀཱཡབནྡྷནཱནི ཧོནྟི. ‘‘ཨནུཛཱནཱམི, བྷིཀྑཝེ, མུརཛཾ མདྡཝཱིཎ’’ནྟི ཨིདཾ དསཱསུཡེཝ ཨནུཉྙཱཏནྟི པཱམངྒདསཱ ཙེཏྠ ཙཏུནྣཾ ཨུཔརི ན ཝཊྚཏི. སོབྷཀཾ ནཱམ ཝེཋེཏྭཱ མུཁཝཊྚིསིབྦནཾ. གུཎཀཾ ནཱམ མུདིངྒསཎྛཱནེན སིབྦནཾ. ཨེཝཾ སིབྦིཏཱ ཧི ཨནྟོ ཐིརཱ ཧོནྟཱིཏི ཝུཙྩཏི. པཝནནྟོཏི པཱསནྟོ ཝུཙྩཏི. ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༢༧༧-༢༧༨) པན ‘‘མུདྡིཀཀཱཡབནྡྷནཾ ནཱམ ཙཏུརསྶཾ ཨཀཏྭཱ སཛྫིཏཾ ¶ . པཱམངྒདསཱ ཙཏུརསྶཱ. མུདིངྒསཎྛཱནེནཱཏི སངྒྷཱཊིཡཱ མུདིངྒསིབྦནཱཀཱརེན ཝརཀསཱིསཱཀཱརེན. པཝནནྟོཏི པཱསནྟོ, ‘དསཱམཱུལ’ནྟི ཙ ལིཁིཏཾ. ཨཀཱཡབནྡྷནེན སཉྩིཙྩ ཝཱ ཨསཉྩིཙྩ ཝཱ གཱམཔྤཝེསནེ ཨཱཔཏྟི. སརིཏཊྛཱནཏོ བནྡྷིཏྭཱ པཝིསིཏབྦཾ, ནིཝཏྟིཏབྦཾ ཝཱཏི ལིཁིཏ’’ནྟི ཝུཏྟཾ.

ནིཝཱསནཔཱརུཔནཀཐཱ

༤༢. ནིཝཱསནཔཱརུཔནཀཐཱཡཾ ¶ ཧཏྠིསོཎྜཱདིཝསེན གིཧིནིཝཏྠཾ ན ནིཝཱསེཏབྦནྟི ཨེཏྠ ཧཏྠིསོཎྜཀཾ (ཙཱུལ༹ཝ. ཨཊྛ. ༢༨༠; ཀངྑཱ. ཨཊྛ. པརིམཎྜལསིཀྑཱཔདཝཎྞནཱ) ནཱམ ནཱབྷིམཱུལཏོ ཧཏྠིསོཎྜསཎྛཱནཾ ཨོལམྦཀཾ ཀཏྭཱ ནིཝཏྠཾ ཙོལི༹ཀཨིཏྠཱིནཾ ནིཝཱསནཾ ཝིཡ. མཙྪཝཱལ༹ཀཾ ནཱམ ཨེཀཏོ དསནྟཾ ཨེཀཏོ པཱསནྟཾ ཨོལམྦིཏྭཱ ནིཝཏྠཾ. ཙཏུཀཎྞཀཾ ནཱམ ཨུཔརིཏོ དྭེ, ཧེཊྛཏོ དྭེཏི ཨེཝཾ ཙཏྟཱརོ ཀཎྞེ དསྶེཏྭཱ ནིཝཏྠཾ. ཏཱལཝཎྚཀཾ ནཱམ ཏཱལཝཎྚཱཀཱརེན སཱཊཀཾ ཨོལམྦིཏྭཱ ནིཝཱསནཾ. སཏཝལིཀཾ ནཱམ དཱིགྷསཱཊཀཾ ཨནེཀཀྑཏྟུཾ ཨོབྷུཛིཏྭཱ ཨོཝཊྚིཀཾ ཀརོནྟེན ནིཝཏྠཾ, ཝཱམདཀྑིཎཔསྶེསུ ཝཱ ནིརནྟརཾ ཝལིཡོ དསྶེཏྭཱ ནིཝཏྠཾ. སཙེ པན ཛཱཎུཏོ པཊྛཱཡ ཨེཀཾ ཝཱ དྭེ ཝཱ ཝལིཡོ པཉྙཱཡནྟི, ཝཊྚཏི. སཾཝེལླིཡཾ ནིཝཱསེནྟཱིཏི མལླཀམྨཀཱརཱདཡོ ཝིཡ ཀཙྪཾ བནྡྷིཏྭཱ ནིཝཱསེནྟི, ཨེཝཾ ནིཝཱསེཏུཾ གིལཱནསྶཔི མགྒཔྤཊིཔནྣསྶཔི ན ཝཊྚཏི. སེཏཔཊཔཱརུཏཱདིཝསེན ན གིཧིཔཱརུཏཾ པཱརུཔིཏབྦནྟི ཨེཏྠ ཡཾ ཀིཉྩི སེཏཔཊཔཱརུཏཾ པརིབྦཱཛཀཔཱརུཏཾ ཨེཀསཱཊཀཔཱརུཏཾ སོཎྜཔཱརུཏཾ ཨནྟེཔུརིཀཔཱརུཏཾ མཧཱཛེཊྛཀཔཱརུཏཾ ཀུཊིཔཝེསཀཔཱརུཏཾ བྲཱཧྨཎཔཱརུཏཾ པཱལི༹ཀཱརཀཔཱརུཏནྟི ཨེཝམཱདི པརིམཎྜལལཀྑཎཏོ ཨཉྙཐཱ པཱརུཏཾ སབྦམེཏཾ གིཧིཔཱརུཏཾ ནཱམ, ཏསྨཱ ཡཐཱ སེཏཔཊཱ ཨཌྜྷཔཱལཀནིགཎྛཱ ¶ པཱརུཔནྟི, ཡཐཱ ཙ ཨེཀཙྩེ པརིབྦཱཛཀཱ ཨུརཾ ཝིཝརིཏྭཱ དྭཱིསུ ཨཾསཀཱུཊེསུ པཱཝུརཎཾ ཋཔེནྟི, ཡཐཱ ཙ ཨེཀསཱཊཀཱ མནུསྶཱ ནིཝཏྠསཱཊཀསྶ ཨེཀེན ཨནྟེན པིཊྛིཾ པཱརུཔིཏྭཱ ཨུབྷོ ཀཎྞེ ཨུབྷོསུ ཨཾསཀཱུཊེསུ ཋཔེནྟི, ཡཐཱ ཙ སུརཱསོཎྜཱདཡོ སཱཊཀེན གཱིཝཾ པརིཀྑིཔིཏྭཱ ཨུབྷོ ཨནྟེ ཨུརེ ཝཱ ཨོལམྦེནྟི, པིཊྛིཡཾ ཝཱ ཁིཔེནྟི, ཡཐཱ ཙ ཨནྟེཔུརིཀཱཡོ ཨཀྑིཏཱརཀམཏྟཾ དསྶེཏྭཱ ཨོགུཎྛིཀཾ པཱརུཔནྟི, ཡཐཱ ཙ མཧཱཛེཊྛཱ དཱིགྷསཱཊཀཾ ནིཝཱསེཏྭཱ ཏསྶེཝ ཨེཀེན ཨནྟེན སཀལསརཱིརཾ པཱརུཔནྟི, ཡཐཱ ཙ ཀསྶཀཱ ཁེཏྟཀུཊིཾ པཝིསནྟཱ སཱཊཀཾ པལིཝེཋེཏྭཱ ཨུཔཀཙྪཀེ པཀྑིཔིཏྭཱ ཏསྶེཝ ཨེཀེན ཨནྟེན སརཱིརཾ པཱརུཔནྟི, ཡཐཱ ཙ བྲཱཧྨཎཱ ཨུབྷིནྣཾ ཨུཔཀཙྪཀཱནཾ ཨནྟརེ སཱཊཀཾ པཝེསེཏྭཱ ཨཾསཀཱུཊེསུ པཱརུཔནྟི, ཡཐཱ ཙ པཱལི༹ཀཱརཀོ བྷིཀྑུ ཨེཀཾསཔཱརུཔནེན པཱརུཏཾ ཝཱམབཱཧུཾ ཝིཝརིཏྭཱ ཙཱིཝརཾ ཨཾསཀཱུཊེ ཨཱརོཔེཏི. ཨེཝཾ ཨཔཱརུཔིཏྭཱ སབྦེཔི ཨེཏེ ཨཉྙེ ཙ ཨེཝརཱུཔེ པཱརུཔནདོསེ ཝཛྫེཏྭཱ ནིབྦིཀཱརཾ པརིམཎྜལཾ པཱརུཔིཏབྦཾ. ཏཐཱ ཨཔཱརུཔིཏྭཱ ཨཱརཱམེ ཝཱ ཨནྟརགྷརེ ཝཱ ཨནཱདརེན ཡཾ ཀིཉྩི ཝིཀཱརཾ ཀརོནྟསྶ དུཀྐཊཾ.

ཀཱཛཀཐཱ

༤༣. ཀཱཛཀཐཱཡཾ ¶ མུཎྜཝེཋཱིཏི ཡཐཱ རཉྙོ ཀུཧིཉྩི གཙྪནྟོ པརིཀྑཱརབྷཎྜགྒཧཎམནུསྶཱཏི ཨདྷིཔྤཱཡོ. ཨུབྷཏོཀཱཛནྟི ཨེཀསྨིཾཡེཝ ཀཱཛེ པུརཏོ ཙ པཙྪཏོ ཙ ཨུབྷོསུ བྷཱགེསུ ལགྒེཏྭཱ ཝཧིཏབྦབྷཱརཾ. ཨེཀཏོཀཱཛནྟི ཨེཀཏོ པཙྪཏོཡེཝ ལགྒེཏྭཱ ཝཧིཏབྦབྷཱརཾ. ཨནྟརཱཀཱཛནྟི མཛ྄ཛྷེ ལགྒེཏྭཱ དྭཱིཧི ཝཧིཏབྦབྷཱརཾ. སཱིསབྷཱརཱདཡོ སཱིསཱདཱིཧི ཝཧིཏབྦབྷཱརཱདཡོ ཨེཝ. ཨོལམྦཀནྟི ཧཏྠེན ཨོལམྦིཏྭཱ ཝཧིཏབྦབྷཱརཾ. ཨེཏེསུ ཨུབྷཏོཀཱཛམེཝ ན ཝཊྚཏི, སེསཱ ཝཊྚནྟི.

དནྟཀཊྛཀཐཱ

༤༤. དནྟཀཊྛཀཐཱཡཾ ¶ དནྟཀཊྛསྶ ཨཁཱདནེ པཉྩ དོསེ, ཁཱདནེ པཉྩཱནིསཾསེ ཙ དསྶེཏྭཱ བྷགཝཏཱ བྷིཀྑཱུནཾ དནྟཀཊྛཾ ཨནུཉྙཱཏཾ. ཏཏྠ པཉྩ དོསཱ ནཱམ ཨཙཀྑུསྶཾ, མུཁཾ དུགྒནྡྷཾ, རསཧརཎིཡོ ན ཝིསུཛ྄ཛྷནྟི, པིཏྟཾ སེམྷཾ བྷཏྟཾ པརིཡོནནྡྷཏི, བྷཏྟམསྶ ནཙྪཱདེཏཱིཏི. ཏཏྠ ཨཙཀྑུསྶནྟི ཙཀྑཱུནཾ ཧིཏཾ ན ཧོཏི, པརིཧཱནིཾ ཛནེཏི. ནཙྪཱདེཏཱིཏི ན རུཙྩཏི. པཉྩཱནིསཾསཱ ཝུཏྟཔཊིཔཀྑཏོ ཝེདིཏབྦཱ. ཏཏོ དཱིགྷདནྟཀཊྛཁཱདནེ ཙ ཨཏིམདཱཧཀདནྟཀཊྛཁཱདནེ ཙ དུཀྐཊཾ པཉྙཔེཏྭཱ ཨཊྛངྒུལཔརམཾ ཙཏུརངྒུལཔཙྪིམཾ དནྟཀཊྛཾ ཨནུཉྙཱཏཾ. ཏཏྠ ཨཊྛངྒུལཾ པརམཾ ཨེཏསྶ དནྟཀཊྛསྶཱཏི ཨཊྛངྒུལཔརམཾ. ཙཏུརངྒུལཾ པཙྪིམཾ པམཱཎཾ ཨེཏསྶ དནྟཀཊྛསྶཱཏི ཙཏུརངྒུལཔཙྪིམཾ. ཨཏིམདཱཧཀནྟི ཨཏིཁུདྡཀཾ. ཨཊྛངྒུལཾ མཧཱདནྟཀཊྛཾ ནཱམ, ཙཏུརངྒུལཾ ཁུདྡཀདནྟཀཊྛཾ ནཱམ, པཉྩཚསཏྟངྒུལཾ མཛ྄ཛྷིམདནྟཀཊྛཾ ནཱམ. ཏེན ཝུཏྟཾ ‘‘དུཝིདྷེན ཨུདཀེན ཏིཝིདྷེན དནྟཀཊྛེནཱ’’ཏི. ‘‘ཨཊྛངྒུལཔརམནྟི མནུསྶཱནཾ པམཱཎངྒུལེན ཨཊྛངྒུལཔརམ’’ནྟི ཨཊྛཀཐཱཡ (ཙཱུལ༹ཝ. ཨཊྛ. ༢༨༢) མཱཧ.

ཨེཏྠ ཙ པམཱཎངྒུལེནཱཏི ཨིདཾ པཀཏིཨངྒུལེནཱཏི གཧེཏྭཱ མནུསྶཱནཾ པཀཏིཨངྒུལེན ཨཊྛངྒུལཏོ ཨདྷིཀཔྤམཱཎཾ དནྟཀཊྛཾ ན ཝཊྚཏཱིཏི ཝདནྟི. ཏཏྟཀམེཝ ཙ ཀཏྭཱ ཁཱདནྟི. ཨཊྛཀཐཱཡཾ པན ‘‘མནུསྶཱནཾ པམཱཎངྒུལེན’’ ཨིཙྩེཝ ཝུཏྟཾ, ན ‘‘པཀཏིཨངྒུལེནཱ’’ཏི. ཏསྨཱ ཡཾ ཝཌྜྷཀིཧཏྠཏོ ཨངྒུལཾ པམཱཎཾ ཀཏྭཱ མནུསྶཱ གེཧཱདཱིནི མིནནྟི, ཏེན མནུསྶཱནཾ པམཱཎངྒུལབྷཱུཏེན ཝཌྜྷཀིཨངྒུལེན ཨཊྛངྒུལཔརམནྟི ཨཏྠོ གཧེཏབྦོ. ཝུཏྟཉྷི སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༢༨༠-༢༨༢) ‘‘པམཱཎངྒུལེནཱཏི ¶ ཝཌྜྷཀིཨངྒུལཾ སནྡྷཱཡ ཝུཏྟ’’ནྟི. ཝིམཏིཝིནོདནིཡཉྩ (ཝི. ཝི. ཊཱི. ཙཱུལ༹ཝགྒ ༢.༢༨༢) ‘‘པམཱཎངྒུལེནཱཏི ཝཌྜྷཀིཨངྒུལེན, ཀེཙི པན ‘པཀཏིཨངྒུལེནཱ’ཏི ཝདནྟི, ཏཾ ཙཏུརངྒུལཔཙྪིམཝཙནེན སམེཏི. ན ཧི པཀཏིཨངྒུལེན ¶ ཙཏུརངྒུལཔྤམཱཎཾ དནྟཀཊྛཾ ཀཎྛེ ཨཝིལགྒཾ ཁཱདིཏུཾ སཀྐཱ’’ཏི.

རུཀྑརོཧནཀཐཱ

༤༥. རུཀྑཱརོཧནཀཐཱཡཾ པུརིསོ པམཱཎོ ཡསྶ རུཀྑསྶཱཏི པོརིསོ, ཨུདྡྷཾ ཨུཀྑིཔིཏཧཏྠེན སདྡྷིཾ མནུསྶཀཱཡཔྤམཱཎོ པཉྩཧཏྠམཏྟཨུཙྩོ རུཀྑཔདེསོ, ཏཾ པོརིསཾ རུཀྑཾ, ཨཝཡཝེ སམུདཱཡཝོཧཱརོ ཡཐཱ ‘‘སམུདྡོ དིཊྛོ’’ཏི, ཨཱབྷུསོ པདནྟི གཙྪནྟི པཝཏྟནྟཱིཏི ཨཱཔདཱ, པརིསྶཡཱ. ཡཱཝ ཨཏྠོ ཨཏྠི ཨེཏསྨིཾ རུཀྑེཏི ཡཱཝདཏྠོ, རུཀྑོ, ཨཏྠ-སདྡོ པཡོཛནཝཱཙཀོ. ཡཱཝ ཏསྨིཾ རུཀྑེ བྷིཀྑུསྶ ཨཏྠོ པཡོཛནཾ ཨཏྠི, ཏཱཝ ཨབྷིརུཧིཏབྦོཏི ཨདྷིཔྤཱཡོ. སེསཾ སུཝིཉྙེཡྻམེཝ.

ཚནྡཱརོཔནཀཐཱ

༤༦. ཚནྡཱརོཔནཀཐཱཡཾ ཚནྡསོཏི སཀྐཊབྷཱསཱཡ. ན ཨཱརོཔེཏབྦནྟི ཝཱཙནཱམགྒཾ ན ཨཱརོཔེཏབྦཾ. སཀཱཡ ནིརུཏྟིཡཱཏི མཱགདྷབྷཱསཱཡ. ཏཏྠ སནྟེཧི ཀཏཱཏི སཀྐཊཱ, ཨཊྛཀཝཱམཀཱདཱིཧི སམིཏཔཱཔེཧི ཨིསཱིཧི ཀཏཱཏི ཨཏྠོ. ཨཐ ཝཱ སཀྐརིཏབྦཱ པཱུཛིཏབྦཱཏི སཀྐཊཱ མནུསྶཱནཾ ཧིཏསུཁཱཝཧནཏོ, ཏདཏྠིཀེཧི མནུསྶེཧི པཱུཛིཏབྦཱཏི ཨཏྠོ. བྷཱསཱིཡཏེཏི བྷཱསཱ, སཀྐཊཱ ཙ སཱ བྷཱསཱ ཙཱཏི སཀྐཊབྷཱསཱ. ཝེདཏྟཡགཏཱ ནིརུཏྟི, སསྶ ཨེསཱཏི སཀཱ, བྷགཝཏོ ཝཙནནྟྱཏྠོ. མགདྷེ ཛཱཏཱ མཱགདྷིཀཱ, ཨཱདིཀཔྤཀཱལེ མགདྷརཊྛེ ཛཱཏཱཏི ཨཏྠོ. ཨུཙྩཏེཏི ཨུཏྟི, ནཱིཧརིཏྭཱ ཨུཏྟི ནིརུཏྟི, པིཊཀཏྟཡཏོ ནཱིཧརིཏྭཱ ཀཐཱིཡཏེཏྱཏྠོ. ཝུཏྟཉྷེཏཾ པོརཱཎེཧི –

‘‘སཱ ¶ མཱགདྷཱི མཱུལབྷཱསཱ;

ནརཱ ཡཱཡཱདིཀཔྤིཀཱ;

བྲཧྨཱནོ ¶ ཙཱསྶུཏཱལཱཔཱ;

སམྦུདྡྷཱ ཙཱཔི བྷཱསརེ’’ཏི.

སེསཾ སུཝིཉྙེཡྻམེཝ.

ལོཀཱཡཏཀཐཱ

༤༧. ལོཀཱཡཏཀཐཱཡཾ ལོཀིཡནྟི པཏིཊྛཧནྟི པུཉྙཱཔུཉྙཱནི ཏབྦིཔཱཀོ ཙཱཏི ལོཀོ, སཏྟལོཀོ. ཨཱབྷུསོ ཡཏནྟི ཝཱིརིཡཾ ཀརོནྟི ཨེཏྠཱཏི ཨཱཡཏཾ, ལོཀསྶ ཨཱཡཏཾ ལོཀཱཡཏཾ, སཏྟཱནཾ བྷུསོ ཝཱིརིཡཀརཎཊྛཱནནྟྱཏྠོ. ཀིཾ ཏཾ? ཏིཏྠིཡསཏྠཾ. སབྦཾ ཨུཙྪིཊྛཾ, ཀསྨཱ? སཀུཎཱདཱིཧི པརིབྷུཏྟཔུབྦཏྟཱ. སབྦཾ ཨནུཙྪིཊྛཾ ཨིམསྶ ཨཝསེསབྷོཛནསྶ ཀེནཙི ཨཔརིབྷུཏྟཔུབྦཏྟཱ. སེཏོ ཀཱཀོ ཨཊྛིསྶ སེཏཏྟཱ, ཀཱལོ༹ བཀོ པཱདསྶ ཀཱལ༹ཏྟཱཏི. ནཏྠི ཨཏྠོ ཨེཏྠཱཏི ནིརཏྠཀཾ, ནིརཏྠཀམེཝ ཀཱརཎཾ ནིརཏྠཀཀཱརཎཾ. ཏེན པཊིསཾཡུཏྟཾ ནིརཏྠཀཀཱརཎཔཊིསཾཡུཏྟཾ. ཏརནྟི ཨེཏྠཱཏི ཏིཏྠཾ, པཊྚནཾ. ཏིཏྠཾ ཝིཡཱཏི ཏིཏྠཾ, ལདྡྷི, ཏཾ ཨེཏེསཾ ཨཏྠཱིཏི ཏིཏྠིཡཱ, ཝིཔརཱིཏདསྶནཱ. སཱསནྟི ཨཏྟནོ སཱཝཀེ ཨེཏྠཱཏི སཏྠཾ, ཏིཏྠིཡཱནཾ སཏྠཾ ཏིཏྠིཡསཏྠཾ. ན ཏིརཙྪཱནཝིཛྫཱ པརིཡཱཔུཎིཏབྦཱཏི ཨེཏྠ ཏིརཙྪཱནཝིཛྫཱ ནཱམ ཡཱ ཀཱཙི བཱཧིརཀཱ ཨནཏྠསཉྷིཏཱ. ན པརིཡཱཔུཎིཏབྦཱཏི ཨཏྟནཱ ན པརིཡཱཔུཎིཏབྦཱ. ན ཝཱཙེཏབྦཱཏི པརེསཾ ན ཝཱཙེཏབྦཱ. སེསཾ སུཝིཉྙེཡྻམེཝ.

ཁིཔིཏཀཐཱ

༤༨. ཁིཔིཏཀཐཱཡཾ ཁིཔཱིཡིཏྠཱཏི ཁིཔིཏོ. ཁིཔི ཨབྱཏྟསདྡེཏི དྷཱཏུ. བྷཱཝེནབྷཱཝལཀྑཎཏྟཱ ཏསྨིཾ ཁིཔིཏེཏི ¶ ཝིབྷཏྱནྟཾ. ‘‘ཡསྨིཾ ཀིསྨིཉྩི པུགྒལེ’’ཏི ལཀྑཎཝནྟཀཏྟཱ ཨཛ྄ཛྷཱཧརིཏབྦོ. ཛཱིཝཱཏི ཛཱིཝ པཱཎདྷཱརཎེཏི དྷཱཏུ, ཝིབྷཏྟིལོཔོ. ཡསྨིཾ ཀིསྨིཉྩི པུགྒལེ ཁིཔིཏེ བྷིཀྑུནཱ ‘‘ཛཱིཝཱ’’ཏི ཝཙནཾ ན ཝཏྟབྦཾ, བྷིཀྑུསྨིཾ ཁིཔིཏེ གིཧིནཱ ‘‘ཛཱིཝཐ བྷནྟེ’’ཏི ཝུཙྩམཱནེ སཏི ‘‘ཙིརཾ ཛཱིཝཱ’’ཏི བྷིཀྑུནཱ ཝཏྟུཾ ཝཊྚཏཱིཏི ཡོཛནཱ. ‘‘ཝུཙྩམཱནེ’’ཏི ཨེཏྠ པན ལཀྑཎསྶ ཀམྨཝཱཙཀཏྟཱ ཏེན སམཱནཱདྷིཀརཎཾ ཀམྨབྷཱུཏཾ ‘‘བྷིཀྑུསྨི’’ནྟི ལཀྑཎཝནྟཀམྨཾ ཨཛ྄ཛྷཱཧརིཏབྦཾ ཡཐཱ ཀིཾ ‘‘གོསུ དུཡ྄ཧམཱནཱསུ པུརིསོ ཨཱགཏོ’’ཏི ¶ . ཨཔརེ པན ཨཱཙརིཡཱ ཨཱིདིསེསུ ཋཱནེསུ ‘‘སནྟེསཱུ’’ཏི པདཾ ཨཛ྄ཛྷཱཧརིཏྭཱ ཨིདམེཝ ལཀྑཎཔདཾ, ‘‘གོསུ དུཡ྄ཧམཱནཱསཱུ’’ཏི པདདྭཡཾ པན ‘‘སནྟེསཱུ’’ཏི ཨེཏྠ པཀཏིཝིཀཏིཝསེན ཀཏྟཱ ཨེཝཱཏི ཝདནྟི, ཝཱིམཾསིཏྭཱ གཧེཏབྦཾ.

ལསུཎཀཐཱ

༤༩. ལསུཎཀཐཱཡཾ ‘‘ལསུཎཾ ནཱམ མཱགདྷཀ’’ནྟི (པཱཙི. ༧༩༥) པཱལི༹ཡཾ ཨཱགཏཾ. ཨཊྛཀཐཱཡཾ (པཱཙི. ཨཊྛ. ༧༩༥) པན ‘‘མཱགདྷཀནྟི མགདྷེསུ ཛཱཏཾ. མགདྷརཊྛེ ཛཱཏལསུཎམེཝ ཧི ཨིདྷ ལསུཎནྟི ཨདྷིཔྤེཏཾ, ཏམྤི བྷཎྜིཀལསུཎམེཝ, ན ཨེཀདྭིཏིམིཉྫཀཾ. ཀུརུནྡིཡཾ པན ‘ཛཱཏིདེསཾ ཨཝཏྭཱ ‘མཱགདྷཀཾ ནཱམ བྷཎྜིཀལསུཎ’ནྟི ཝུཏྟ’’ནྟི ཝུཏྟཾ. སཙེ དྭེ ཏཡོ བྷཎྜིཀེ ཨེཀཏོཡེཝ སངྑརིཏྭཱ ཨཛ྄ཛྷོཧརཏི, ཨེཀཾ པཱཙིཏྟིཡཾ. བྷིནྡིཏྭཱ ཨེཀེཀཾ མིཉྫཾ ཁཱདནྟིཡཱ པན པཡོགགཎནཱཡ པཱཙིཏྟིཡཱནི, ཨིདཾ བྷིཀྑུནཱིནཾ ཝསེན པཱཙིཏྟིཡཾ, བྷིཀྑུསྶ པན དུཀྐཊཾ.

པལཎྜུཀཱདཱིནཾ ཝཎྞེན ཝཱ མིཉྫཱཡ ཝཱ ནཱནཏྟཾ ཝེདིཏབྦཾ. ཝཎྞེན ཏཱཝ པལཎྜུཀོ ནཱམ པཎྜུཝཎྞོ ཧོཏི. བྷཉྫནཀོ ལོཧིཏཝཎྞོ, ཧརིཏཀོ ཧརིཏཝཎྞོ, མིཉྫཱཡ ¶ པན པལཎྜུཀསྶ ཨེཀཱ མིཉྫཱ ཧོཏི, བྷཉྫནཀསྶ དྭེ, ཧརིཏཀསྶ ཏིསྶོ, ཙཱཔལསུཎོ ཨམིཉྫཀོ. ཨངྐུརམཏྟམེཝ ཧི ཏསྶ ཧོཏི. མཧཱཔཙྩརིཡཱདཱིསུ པན ‘‘པལཎྜུཀསྶ ཏཱིཎི མིཉྫཱནི, བྷཉྫནཀསྶ དྭེ, ཧརིཏཀསྶ ཨེཀ’’ནྟི ཝུཏྟཾ. ཨེཏེ པལཎྜུཀཱདཡོ སབྷཱཝེནེཝ ཝཊྚནྟི, སཱུཔསམྤཱཀཱདཱིསུ པན མཱགདྷཀམྤི ཝཊྚཏི. ཏཉྷི པཙྩམཱནེསུ མུགྒསཱུཔཱདཱིསུ ཝཱ མཙྪམཾསཝིཀཏིཡཱ ཝཱ ཏེལཱདཱིསུ ཝཱ བདརསཱལ༹ཝཱདཱིསུ ཝཱ ཨམྦིལཔཱཀཱདཱིསུ ཝཱ ཨུཏྟརིབྷངྒེ ཝཱ ཡཏྠ ཀཏྠཙི ཨནྟམསོ ཡཱགུཔཏྟེཔི པཀྑིཔིཏུཾ ཝཊྚཏཱིཏི ཝུཏྟཾ. ‘‘སབྷཱཝེནེཝཱཏི སཱུཔསམྤཱཀཱདིཾ ཝིནཱཝ. བདརསཱལ༹ཝཾ ནཱམ བདརཕལཱནི སུཀྑཱཔེཏྭཱ ཙུཎྞེཏྭཱ ཀཏྟབྦཱ ཁཱདནཱིཡཝིཀཏཱི’’ཏི སཱརཏྠདཱིཔནིཡཾ (སཱརཏྠ. ཊཱི. པཱཙིཏྟིཡ ༣.༧༩༣-༧༩༧) ཝུཏྟཾ.

ནཨཀྐམིཏབྦཱདིཀཐཱ

༥༠. ནཨཀྐམིཏབྦཱདིཀཐཱཡཾ ‘‘པརིབྷཎྜཀཏབྷཱུམི ནཱམ སཎྷམཏྟིཀཱཧི ཀཏཱ ཀཱལ༹ཝཎྞཱདིབྷཱུམི ¶ . སེནཱསནཾ མཉྩཔཱིཋཱདིཀཱཡེཝ. ཏཐེཝ ཝལ༹ཉྫེཏུཾ ཝཊྚཏཱིཏི ཨཉྙེཧི ཨཱཝཱསིཀེཧི བྷིཀྑཱུཧི པརིབྷུཏྟནཱིཧཱརེན པརིབྷུཉྫིཏུཾ ཝཊྚཏི. ‘ནེཝཱསིཀཱ པཀཏིཡཱ ཨནཏྠཏཱཡ བྷཱུམིཡཱ ཋཔེནྟི ཙེ, ཏེསམྤི ཨནཱཔཏྟིཡེཝཱ’ཏི གཎྛིཔདེསུ ཝུཏྟཾ. ‘དྭཱརམྤཱི’ཏིཨཱདིནཱ ཝུཏྟདྭཱརཝཱཏཔཱནཱདཡོ ཨཔརིཀམྨཀཏཱཔི ན ཨཔསྶཡིཏབྦཱ. ལོམེསཱུཏི ལོམེསུ ཕུསནྟེསཱུ’’ཏི སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༣༢༤) ཝུཏྟཾ. ཝིམཏིཝིནོདནིཡམྤི (ཝི. ཝི. ཊཱི. ཙཱུལ༹ཝགྒ ༢.༣༢༤) ‘‘པརིབྷཎྜཀཏབྷཱུམི ཝཱཏི ཀཱལ༹ཝཎྞཱདིཀཏསཎྷབྷཱུམི ཝཱ. སེནཱསནཾ ཝཱཏི མཉྩཔཱིཋཱདི ཝཱ. ཏཐེཝ ཝལ༹ཉྫེཏུཾ ཝཊྚཏཱིཏི ཨིམིནཱ ནེཝཱསིཀེཧི དྷོཏཔཱདཱདཱིཧི ཝལ༹ཉྫནཊྛཱནེ སཉྩིཙྩ ཨདྷོཏཔཱདཱདཱིཧི ཝལ༹ཉྫནྟསྶེཝ ཨཱཔཏྟི པཉྙཏྟཱཏི དསྶེཏི ¶ , ‘དྭཱརམྤཱི’ཏིཨཱདིནཱ སཱམཉྙཏོ ཝུཏྟཏྟཱ དྭཱརཝཱཏཔཱནཱདཡོ ཨཔརིཀམྨཀཏཱཔི ན ཨཔསྶཡིཏབྦཱ. ཨཛཱནིཏྭཱ ཨཔསྶཡནྟསྶཔི ཨིདྷ ལོམགཎནཱཡ ཨཱཔཏྟཱི’’ཏི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༣༢༣-༣༢༤) ‘‘ནེཝཱསིཀཱ པཀཏིཡཱ ཨནཏྠཏཱཡ བྷཱུམིཡཱ ཋཔེནྟི ཙེ, ཏེསམྤི ཨནཱཔཏྟིཡེཝཱཏི ལིཁིཏཾ, དྭཱརཝཱཏཔཱནཱདཡོ ཨཔརིཀམྨཀཏཱཔི ན ཨཔསྶཡིཏབྦཱཏི ལིཁིཏ’’ནྟི ཝུཏྟཾ.

ཨཝནྡིཡཝནྡིཡཀཐཱ

༥༡. ཨཝནྡིཡཝནྡིཡཀཐཱཡཾ ཨིདྷ པཀརཎཱཙརིཡེན སེནཱསནཀྑནྡྷཀཔཱལི༹ཝསེན དས ཨཝནྡིཡཱ, ཏཡོ ཝནྡིཡཱ ཙ ཝུཏྟཱ, ཨཊྛཀཐཱཊཱིཀཱསུ ཙ ན ཀིཉྩི ཝུཏྟཱ, ཏསྨཱ ཨིདྷ ཨཱགཏནཡེནེཝ ཨཏྠོ དཊྛབྦོ. པརིཝཱརཔཱལི༹ཡཾ (པརི. ༤༦༧ ཨཱདཡོ) པན ཨུཔཱལིཔཉྩཀེ པཉྩཔཉྩཀཝསེན པཉྩཝཱིསཏི ཨཝནྡིཡཱ, པཉྩ ཝནྡིཡཱ ཙ ཝུཏྟཱ. ཀཐཾ? ‘‘ཀཏི ནུ ཁོ, བྷནྟེ, ཨཝནྡིཡཱཏི? པཉྩིམེ, ཨུཔཱལི, ཨཝནྡིཡཱ. ཀཏམེ པཉྩ? ཨནྟརགྷརཾ པཝིཊྛོ ཨཝནྡིཡོ, རཙྪགཏོ ཨཝནྡིཡོ, ཨོཏམསིཀོ ཨཝནྡིཡོ, ཨསམནྣཱཧརནྟོ ཨཝནྡིཡོ, སུཏྟོ ཨཝནྡིཡོ. ཨིམེ ཁོ, ཨུཔཱལི, པཉྩ ཨཝནྡིཡཱ. ཨཔརེཔི, ཨུཔཱལི, པཉྩ ཨཝནྡིཡཱ. ཀཏམེ པཉྩ? ཡཱགུཔཱནེ ཨཝནྡིཡོ, བྷཏྟགྒེ ཨཝནྡིཡོ, ཨེཀཱཝཏྟོ ཨཝནྡིཡོ, ཨཉྙཝིཧིཏོ ཨཝནྡིཡོ, ནགྒོ ཨཝནྡིཡོ. ཨིམེ ཁོ, ཨུཔཱལི, པཉྩ ཨཝནྡིཡཱ. ཨཔརེཔི, ཨུཔཱལི, པཉྩ ཨཝནྡིཡཱ. ཀཏམེ པཉྩ? ཁཱདནྟོ ཨཝནྡིཡོ, བྷུཉྫནྟོ ཨཝནྡིཡོ, ཨུཙྩཱརཾ ཀརོནྟོ ཨཝནྡིཡོ, པསྶཱཝཾ ཀརོནྟོ ཨཝནྡིཡོ, ཨུཀྑིཏྟཀོ ཨཝནྡིཡོ. ཨིམེ ཁོ, ཨུཔཱལི, པཉྩ ཨཝནྡིཡཱ. ཨཔརེཔི, ཨུཔཱལི, པཉྩ ཨཝནྡིཡཱ. ཀཏམེ པཉྩ? པུརེཨུཔསམྤནྣེན ¶ པཙྪཱཨུཔསམྤནྣོ ཨཝནྡིཡོ, ཨནུཔསམྤནྣོ ཨཝནྡིཡོ ¶ , ནཱནཱསཾཝཱསཀོ ཝུཌྜྷཏརོ ཨདྷམྨཝཱདཱི ཨཝནྡིཡོ, མཱཏུགཱམོ ཨཝནྡིཡོ, པཎྜཀོ ཨཝནྡིཡོ. ཨིམེ ཁོ, ཨུཔཱལི, པཉྩ ཨཝནྡིཡཱ. ཨཔརེཔི, ཨུཔཱལི, པཉྩ ཨཝནྡིཡཱ. ཀཏམེ པཉྩ? པཱརིཝཱསིཀོ ཨཝནྡིཡོ, མཱུལཱཡཔཊིཀསྶནཱརཧོ ཨཝནྡིཡོ, མཱནཏྟཱརཧོ ཨཝནྡིཡོ, མཱནཏྟཙཱརིཀོ ཨཝནྡིཡོ, ཨབྦྷཱནཱརཧོ ཨཝནྡིཡོ. ཨིམེ ཁོ, ཨུཔཱལི, པཉྩ ཨཝནྡིཡཱ’’ཏི.

‘‘ཀཏི ནུ ཁོ, བྷནྟེ, ཝནྡིཡཱཏི? པཉྩིམེ, ཨུཔཱལི, ཝནྡིཡཱ. ཀཏམེ པཉྩ? པཙྪཱཨུཔསམྤནྣེན པུརེཨུཔསམྤནྣོ ཝནྡིཡོ, ནཱནཱསཾཝཱསཀོ ཝུཌྜྷཏརོ དྷམྨཝཱདཱི ཝནྡིཡོ, ཨཱཙརིཡོ ཝནྡིཡོ, ཨུཔཛ྄ཛྷཱཡོ ཝནྡིཡོ, སདེཝཀེ ལོཀེ སམཱརཀེ སབྲཧྨཀེ སསྶམཎབྲཱཧྨཎིཡཱ པཛཱཡ སདེཝམནུསྶཱཡ ཏཐཱགཏོ ཨརཧཾ སམྨཱསམྦུདྡྷོ ཝནྡིཡོ. ཨིམེ ཁོ, ཨུཔཱལི, པཉྩ ཝནྡིཡཱ’’ཏི.

ཨཊྛཀཐཱཡཉྩ (པརི. ཨཊྛ. ༤༦༧) ‘‘ཨོཏམསིཏོཏི ཨནྡྷཀཱརགཏོ. ཏཉྷི ཝནྡནྟསྶ མཉྩཔཱདཱདཱིསུཔི ནལཱཊཾ པཊིཧཉྙེཡྻ. ཨསམནྣཱཧརནྟོཏི ཀིཙྩཔྤསུཏཏྟཱ ཝནྡནཾ ཨསམནྣཱཧརནྟོ. སུཏྟོཏི ནིདྡཾ ཨོཀྐནྟོ. ཨེཀཱཝཏྟོཏི ཨེཀཏོ ཨཱཝཏྟོ སཔཏྟཔཀྑེ ཋིཏོ ཝེརཱི ཝིསབྷཱགཔུགྒལོ ཝུཙྩཏི, ཨཡཾ ཨཝནྡིཡོ. ཨཡཉྷི ཝནྡིཡམཱནོ པཱདེནཔི པཧརེཡྻ. ཨཉྙཝིཧིཏོཏི ཨཉྙཾ ཙིནྟཡམཱནོ. ཁཱདནྟོཏི པིཊྛཁཛྫཀཱདཱིནི ཁཱདནྟོ. ཨུཙྩཱརཉྩ པསྶཱཝཉྩ ཀརོནྟོ ཨནོཀཱསགཏཏྟཱ ཨཝནྡིཡོ. ཨུཀྑིཏྟཀོཏི ཏིཝིདྷེནཔི ཨུཀྑེཔནཱིཡཀམྨེན ཨུཀྑིཏྟཀོ ཨཝནྡིཡོ, ཏཛྫནཱིཡཱདིཀམྨཀཏཱ པན ཙཏྟཱརོ ཝནྡིཏབྦཱ, ཨུཔོསཐཔཝཱརཎཱཔི ཏེཧི སདྡྷིཾ ལབྦྷནྟི. ཨཱདིཏོ པཊྛཱཡ ཙ ཝུཏྟེསུ ཨཝནྡིཡེསུ ནགྒཉྩ ཨུཀྑིཏྟཀཉྩ ཝནྡནྟསྶེཝ ཧོཏི ཨཱཔཏྟི ¶ , ཨིཏརེསཾ པན ཨསཱརུཔྤཊྛེན ཙ ཨནྟརཱ ཝུཏྟཀཱརཎེན ཙ ཝནྡནཱ པཊིཀྑིཏྟཱ. ཨིཏོ པརཾ པཙྪཱཨུཔསམྤནྣཱདཡོ དསཔི ཨཱཔཏྟིཝཏྠུབྷཱཝེནེཝ ཨཝནྡིཡཱ. ཏེ ཝནྡནྟསྶ ཧི ནིཡམེནེཝ ཨཱཔཏྟི. ཨིཏི ཨིམེསུ པཉྩསུ པཉྩཀེསུ ཏེརས ཛནེ ཝནྡནྟསྶ ཨནཱཔཏྟི, དྭཱདསནྣཾ ཝནྡནཱཡ ཨཱཔཏྟི. ཨཱཙརིཡོ ཝནྡིཡོཏི པབྦཛྫཱཙརིཡོ ཨུཔསམྤདཱཙརིཡོ ནིསྶཡཱཙརིཡོ ཨུདྡེསཱཙརིཡོ ཨོཝཱདཱཙརིཡོཏི ཨཡཾ པཉྩཝིདྷོཔི ཨཱཙརིཡོ ཝནྡིཡོ’’ཏི ཨཱགཏོ.

‘‘ཨནྟརཱ ¶ ཝུཏྟཀཱརཎེནཱཏི ཏཉྷི ཝནྡནྟསྶ མཉྩཔཱདཱདཱིསུ ནལཱཊཾ པཊིཧཉྙེཡྻཱཏིཨཱདིནཱ ཝུཏྟཀཱརཎེནཱ’’ཏི སཱརཏྠདཱིཔནིཡཾ (སཱརཏྠ. ཊཱི. པརིཝཱར ༣.༤༦༧) ཝུཏྟཾ. ཝིམཏིཝིནོདནིཡཾ (ཝི. ཝི. ཊི. པརིཝཱར ༢.༤༦༧) པན ‘‘མཉྩཔཱདཱདཱིསུཔི ནལཱཊཾ པཊིཧཉྙེཡྻཱཏི ཨནྡྷཀཱརེ ཙམྨཁཎྜཾ པཉྙཔེཏྭཱ ཝནྡིཏུཾ ཨོནམནྟསྶ ནལཱཊཾ ཝཱ ཨཀྑི ཝཱ མཉྩཱདཱིསུ པཊིཧཉྙཏི. ཨེཏེན ཝནྡཏོཔི ཨཱཔཏྟིཨབྷཱཝཾ ཝཏྭཱ ཝནྡནཱཡ སབྦཐཱ པཊིཀྑེཔཱབྷཱཝཉྩ དཱིཔེཏི. ཨེཝཾ སབྦཏྠ སུཏྟནྟརེཧི ཨཔྤཊིཀྑིཏྟེསུ. ནགྒཱདཱིསུ པན ཝནྡིཏུཾ ན ཝཊྚཏཱིཏི. ཨེཀཏོ ཨཱཝཏྟོཏི ཨེཀསྨིཾ དོསཱགཏིཔཀྑེ པརིཝཏྟོ, པཝིཊྛོཏི ཨཏྠོ. ཏེནཱཧ ‘སཔཏྟཔཀྑེ ཋིཏོ’ཏི. ཝནྡིཡམཱནོཏི ཨོནམིཏྭཱ ཝནྡིཡམཱནོ. ཝནྡིཏབྦེསུ ཨུདྡེསཱཙརིཡོ ནིསྶཡཱཙརིཡོ ཙ ཡསྨཱ ནཝཀཱཔི ཧོནྟི, ཏསྨཱ ‘ཏེ ཝུཌྜྷཱ ཨེཝ ཝནྡིཡཱ’ཏི ཝནྡིཏབྦཱ’’ཏི ཨཱགཏཾ. ཝཛིརབུདྡྷིཊཱིཀཱཡཾ (ཝཛིར. ཊཱི. པརིཝཱར ༤༦༧) ‘‘ཨེཀཱཝཏྟོཏིཔི པཋནྟི, ཏསྶ ཀུདྡྷོ ཀོདྷཱབྷིབྷཱུཏོཏི ཀིར ཨཏྠོ. ཨེཀཝཏྠོཏིཔི ཀེཙི, ཨུཏྟརཱསངྒཾ ཨཔནེཏྭཱ ཋིཏོཏི ཀིར ཨཏྠོ. ཏཾ སབྦཾ ཨཊྛཀཐཱཡཾ ཨུདྡྷཊཔཱལི༹ཡཱ ཝིརུཛ྄ཛྷཏི. ཨེཀཱཝཏྟོཏི ཧི ཨུདྡྷཊཾ, ཏསྨཱ ན གཧེཏབྦཾ. ཨནྟརཱ ཝུཏྟཀཱརཎེནཱཏི ཀིཙྩཔྤསུཏཏྟཱ ཨསམནྣཱཧརནྟོ ¶ ‘ནལཱཊཾ པཊིཧཉྙེཡྻཱ’ཏིཨཱདིཝུཏྟཀཱརཎེནཱ’’ཏི ཨཱགཏཾ.

དུཏིཡགཱཐཱསངྒཎིཀཊྛཀཐཱཡཾ (པརི. ཨཊྛ. ༤༧༧) ‘‘དས པུགྒལཱ ནཱབྷིཝཱདེཏབྦཱཏི སེནཱསནཀྑནྡྷཀེ ཝུཏྟཱ དས ཛནཱ. ཨཉྫལིསཱམཱིཙེན ཙཱཏི སཱམཱིཙིཀམྨེན སདྡྷིཾ ཨཉྫལི ཙ ཏེསཾ ན ཀཱཏབྦོ. ནེཝ པཱནཱིཡཔུཙྪནཏཱལཝཎྚགྒཧཎཱདི ཁནྡྷཀཝཏྟཾ ཏེསཾ དསྶེཏབྦཾ, ན ཨཉྫལི པགྒཎྷིཏབྦོཏི ཨཏྠོ. དསནྣཾ དུཀྐཊནྟི ཏེསཾཡེཝ དསནྣཾ ཨེཝཾ ཀརོནྟསྶ དུཀྐཊཾ ཧོཏཱི’’ཏི ཨཱགཏཾ, ཏསྨཱ ཨཉྫལིཀམྨམཏྟམྤི ནེསཾ ན ཀཏྟབྦནྟི.

‘‘ནཝཀཏརེན, བྷནྟེ, བྷིཀྑུནཱ ཝུཌྜྷཏརསྶ བྷིཀྑུནོ པཱདེ ཝནྡནྟེན ཀཏི དྷམྨེ ཨཛ྄ཛྷཏྟཾ ཨུཔཊྛཱཔེཏྭཱ པཱདཱ ཝནྡིཏབྦཱཏི? ནཝཀཏརེནུཔཱལི, བྷིཀྑུནཱ ཝུཌྜྷཏརསྶ བྷིཀྑུནོ པཱདེ ཝནྡནྟེན པཉྩ དྷམྨེ ཨཛ྄ཛྷཏྟཾ ཨུཔཊྛཱཔེཏྭཱ པཱདཱ ཝནྡིཏབྦཱ. ཀཏམེ པཉྩ? ནཝཀཏརེནུཔཱལི, བྷིཀྑུནཱ ཝུཌྜྷཏརསྶ བྷིཀྑུནོ པཱདེ ཝནྡནྟེན ཨེཀཾསཾ ཨུཏྟརཱསངྒཾ ཀཏྭཱ ཨཉྫལིཾ པགྒཧེཏྭཱ ཨུབྷོཧི པཱཎིཏལེཧི པཱདཱནི པརིསམྦཱཧནྟེན པེམཉྩ གཱརཝཉྩ ཨུཔཊྛཱཔེཏྭཱ པཱདཱ ཝནྡིཏབྦཱ. ནཝཀཏརེནུཔཱལི, བྷིཀྑུནཱ ཝུཌྜྷཏརསྶ བྷིཀྑུནོ པཱདེ ཝནྡནྟེན ¶ ཨིམེ པཉྩ དྷམྨེ ཨཛ྄ཛྷཏྟཾ ཨུཔཊྛཱཔེཏྭཱ པཱདཱ ཝནྡིཏབྦཱ’’ཏི (པརི. ༤༦༩) ཨིམསྨིཾ ཋཱནེ སམྨཱསམྦུདྡྷེན ཨཱཡསྨཏོ ཨུཔཱལིསྶ ཝནྡནཱནཡོཝ ཨཱཙིཀྑིཏོ.

པཉྩཔཏིཊྛིཏེན ཝནྡིཏྭཱཏི ཨེཏྠ པཉྩསརཱུཔཉྩ ཀཐིཏཾ. ཀཐཾ? ཝུཌྜྷཏརསྶ པཱདེ ཝནྡནྟེན ཨུབྷོ ཨཾསེ ཝིཝརིཏྭཱ ཝནྡིཏབྦཱ, ན ཙ ཨུབྷོ ཨཾསེ པཱརུཔིཏྭཱ ཝནྡིཏབྦཱ, ཨཐ ཁོ ཨེཀཾསཾ ཨུཏྟརཱསངྒཾ ཀརིཏྭཱ ཝནྡིཏབྦཱཏི. ཨེཏེན སངྒྷཱཊི པན ཨེཀཾསཾ ཀཏཱཔི ཨཀཏཱཔི ནཏྠི དོསོཏི པཀཱསིཏོ ¶ ཧོཏི. ‘‘དསནཁསམོདྷཱནསམུཛྫལཾ ཀརཔུཊསངྑཱཏཾ ཨཉྫལིཾ པགྒཧེཏྭཱཝ ཝནྡིཏབྦཱ, ན ཧཏྠཏལཔཀཱསནམཏྟེན ཝཱ ན ཧཏྠམུཊྛིཔཀཱསནཱདིནཱ ཝཱ ཝནྡིཏབྦཱ’’ཏི ཙ ‘‘ན ཨེཀེན ཧཏྠེན ཙཱིཝརཀཎྞཚུཔནཱདིམཏྟེན ཝནྡིཏབྦཱ, ཨཐ ཁོ ཨུབྷོཧི པཱཎིཏལེཧི པཱདཱནི པརིསམྦཱཧནྟེན ཝནྡིཏབྦཱ’’ཏི ཙ ‘‘ཨེཝཾ ཝནྡནྟེཧི ན དུཊྛཙིཏྟཉྩ ཨནཱདརཉྩ ཨུཔཊྛཱཔེཏྭཱ ཝནྡིཏབྦཱ, ཨཐ ཁོ པེམཉྩ གཱརཝཉྩ ཨུཔཊྛཱཔེཏྭཱ པཱདཱ ཝནྡིཏབྦཱ’’ཏི ཙ ཨེཝཾ ཝནྡནཱནཡོ ཨཱཙིཀྑིཏོ ཧོཏི.

ཀཐཾ པཉྩཔཏིཊྛིཏསརཱུཔཾ ཀཐིཏཾ? ཨིདྷ ཨེཀཾསཾ ཨུཏྟརཱསངྒཾ ཀརིཏྭཱཏི ཨེཀཾ, ཨཉྫལིཾ པགྒཧེཏྭཱཏི ཨེཀཾ, ཨུབྷོཧི པཱཎིཏལེཧི པཱདཱནི པརིསམྦཱཧནྟེནཱཏི ཨེཀཾ, པེམཉྩ ཨུཔཊྛཱཔེཏྭཱཏི ཨེཀཾ, གཱརཝཉྩ ཨུཔཊྛཱཔེཏྭཱཏི ཨེཀཾ, ཨེཝཾ པཉྩཔཏིཊྛིཏསརཱུཔཾ ཀཐིཏཾ ཧོཏི. ཏེནཱཧ ‘‘པཉྩ དྷམྨེ ཨཛ྄ཛྷཏྟཾ ཨུཔཊྛཱཔེཏྭཱ པཱདཱ ཝནྡིཏབྦཱ’’ཏི. ཨེཝཾ སཀལལོཀསྶ ཧིཏསུཁཀཱརཀེན དྷམྨསྶཱམིནཱ ཀཱཡཔཎཱམམནོཔཎཱམཝསེན མཧཏོ ཧིཏསུཁསྶ པཝཏྟནཏྠཾ ཨཱཡསྨཏོ ཨུཔཱལིཏྠེརསྶ ཨཱཙིཀྑིཏེན ཝནྡནཱནཡེན ཝནྡིཏུཾ ཝཊྚཏི.

ཨིདཱནི པན ཨཱཙརིཡཱ ཨབྷིནཝཨཱགཏཱནཾ དཧརཱནཉྩ སཱམཎེརཱནཉྩ ཝནྡནཱནཡཾ སིཀྑནྟཱ ན ཨིམཾ ཨཱཧཙྩབྷཱསིཏཾ པཱལི༹ཾ གཧེཏྭཱ སིཀྑནྟི, ཨཐ ཁོ པཝེཎཱིཨཱགཏནཡཾཡེཝ གཧེཏྭཱ སིཀྑནྟི. ཀཐཾ? ཡདི ཋཏྭཱ ཝནྡཐ, དྭེ པཱདཏལཱནི སམཾ བྷཱུམིཡཾ པཏིཊྛཱཔེཏྭཱ དྭེ ཧཏྠཏལཱནི སམཾ ཕུསཱཔེཏྭཱ ནལཱཊེ པཏིཊྛཱཔེཏྭཱ ཝནྡིཏབྦཱབྷིམུཁཾ ཨོནམིཏྭཱ ཝནྡཐཱཏི, ཨཡཾ ནཡོ ‘‘ཨེཝཾ མཧཱསཏྟོ སུཝཎྞཀདལི ཝིཡ བཱརཱཎསིནགརཱབྷིམུཁཾ ཨོནམིཏྭཱ མཱཏཱཔིཏརོ ཝནྡིཏྭཱ’’ཏི ཨིམཾ ཛཱཏཀཊྛཀཐཱཝཙནཉྩ ‘‘དསནཁསམོདྷཱནསམུཛྫལཾ ཨཉྫལིཾ པགྒཡ྄ཧ སིརསྨིཾ པཏིཊྛཱཔེཏྭཱ’’ཏིཨཱདིཨཊྛཀཐཱཝཙནཉྩ ¶ ཨནུལོམེཏི. ཨིདྷ པན དྭེ པཱདཏལཱནི, དྭེ ཧཏྠཏལཱནི, ནལཱཊཉྩཱཏི པཉྩསུ པཏིཊྛིཏཱནཱིཏི སརཱུཔཾ ཝདནྟི. ཡདི ནིསཱིདིཏྭཱ ཝནྡཐ, པཋམཾ དྭེ པཱདཏལཱནི ¶ བྷཱུམིཡཾ སམཾ པཏིཊྛཱཔེཏྭཱ དྭེ ཛཱཎུམཎྜལཱནི སམཾ ཨུསྶཱཔེཏྭཱ དྭེ ཀཔྤརཱནི དྭིནྣཾ ཛཱཎཱུནཾ ཨུཔརི སམཾ ཋཔེཏྭཱ དྭེ ཧཏྠཏལཱནི སམཾ ཕུསིཏཱནི ཀཏྭཱ ཨཉྫལིསངྑཱཏཾ ཀརཔུཊཾ སིརསངྑཱཏེ ནལཱཊེ པཏིཊྛཱཔེཏྭཱ ཝནྡཐ. ཏཏོ ཨོནམིཏྭཱ དྭེ ཛཱཎུམཎྜལཱནི ཙ དྭེ ཀཔྤརཱནི ཙ བྷཱུམིཡཾ སམཾ པཏིཊྛཱཔེཏྭཱ དྭེ ཧཏྠཏལཱནི པསཱརེཏྭཱ སམཾ བྷཱུམིཡཾ ཋཔེཏྭཱ སཱིསཾ ཨུབྷིནྣཾ ཧཏྠཔིཊྛཱིནཾ ཨུཔརི ཀཏྭཱ བྷཱུམིཡཾ པཏིཊྛཱཔེཏྭཱ ཝནྡཐཱཏི. ཨེཏྠ ཏུ དྭེ པཱདཏལཱནི ཨེཀཾ ཀཏྭཱ, ཏཐཱ དྭེ ཛཱཎུམཎྜལཱནི ཨེཀཾ, དྭེ ཀཔྤརཱནི ཨེཀཾ, དྭེ ཧཏྠཏལཱནི ཨེཀཾ, སཱིསཾ ཨེཀཾ ཀཏྭཱ པཉྩཔཏིཊྛིཏསརཱུཔཾ ཀཐེནྟི. ཨེས ནཡོ པཱལི༹ཨཊྛཀཐཱཊཱིཀཱསུ ན དིཊྛོ.

སམཱིཔཾ གནྟྭཱ པཱདཱནཾ ཝནྡནཀཱལེ པན ཨེཀཙྩེ པཋམཾ ཨཏྟནོ སཱིསཾ ཧཏྠེན པརཱམསིཏྭཱ ཏེན ཧཏྠདྭཡེན ཐེརཱནཾ ཛཱཎུམཎྜལཾ ཙཱིཝརསྶ ཨུཔརིཡེཝ སམྦཱཧནྟི. ཨེཀཙྩེ པཋམཾ ཐེརཱནཾ ཛཱཎུམཎྜལཾ སཙཱིཝརཾཡེཝ པརཱམསིཏྭཱ ཏེནེཝ ཧཏྠདྭཡེན ཨཏྟནོ སཱིསཾ པརཱམསནྟི. ཨེཀཙྩེ ཚུཔནམཏྟམེཝ ཀརོནྟི. ཨེསཔི ནཡོ ན ཀིསྨིཉྩི དིཊྛོ. རཱམཉྙདེསིཡཱ པན བྷིཀྑཱུ ཨེཝཾ སམཱིཔཾ གནྟྭཱ ཝནྡནཀཱལེ ཐེརཱནཾ པཱདགྒཾ ཨཔསྶནྟཱཔི པརིཡེསིཏྭཱ ཙཱིཝརཏོ ནཱིཧརིཏྭཱ པཱདགྒམེཝ པུནཔྤུནཾ ཧཏྠེན སམྦཱཧིཏྭཱ སཱིསེན པཝཊྚེཏྭཱ ཙུམྦིཏྭཱ ལེཧིཏྭཱ ཙིརཔྤཝཱསཱགཏཔིཡམནཱཔཨུཔཛ྄ཛྷཱཡཾ ཝཱ ཨཱཙརིཡཾ ཝཱ པསྶནྟཱ ཝིཡ ཀཏྭཱ ཝནྡནྟི. ཏཾ ཀིརིཡཾ པརིཝཱརཔཱལི༹ཡཾ ‘‘ཨུབྷོཧི པཱཎིཏལེཧི པཱདཱནི པརིསམྦཱཧནྟེན པེམཉྩ གཱརཝཉྩ ཨུཔཊྛཱཔེཏྭཱ པཱདཱ ཝནྡིཏབྦཱ’’ཏི ཨཱགཏཔཱལི༹ཡཱ སཾསནྡཏི ¶ ཝིཡ དིསྶཏི. ཏེཔི ན སབྦེ པཱལི༹ཾ པསྶནྟི, པཝེཎཱིཝསེནེཝ ཀརོནྟི, ཏསྨཱ སབྦེསཾ ཧིཏཏྠཾ པཱལི༹ནཡོ ཨམྷེཧི ཨུདྡྷཊོ. པཝེཎཱིཨཱགཏནཡཏོ ཧི པཱལི༹ནཡོ བལཝཏརོ, ཏསྨཱ བྷགཝཏོ ཨཱཎཾ གརུཾ ཀརོནྟེཧི སཔྤུརིསེཧི པཱལི༹ནཡོ སམཱསེཝིཏབྦོཏི ཨམྷཱཀཾ ཁནྟི, ཝཱིམཾསིཏྭཱ གཧེཏབྦཾ.

ཨཱསནྡཱདིཀཐཱ

༥༥. ཨཱསནྡཱདིཀཐཱཡཾ ཙཏུརསྶཔཱིཋནྟི སམཙཏུརསྶཾ. ཨཊྛངྒུལཔཱདཾ ཝཊྚཏཱིཏི ཨཊྛངྒུལཔཱདཀམེཝ ཝཊྚཏི. པམཱཎཱཏིཀྐནྟོཔི ཝཊྚཏཱིཏི སམཙཏུརསྶམེཝ སནྡྷཱཡ ཝུཏྟཾ. ཨཱཡཏཙཏུརསྶཱ པན སཏྟངྒཔཉྩངྒཱཔི ཨུཙྩཔཱདཱ ན ཝཊྚནྟི. ཝེཏྟེཧེཝ ཙཏུརསྶཱདིཨཱཀཱརེན ཀཏཾ བྷདྡཔཱིཋནྟི ཨཱཧ ‘‘ཝེཏྟམཡཔཱིཋ’’ནྟི. དཱརུཔཊྚིཀཱཡ ཨུཔརཱིཏི ཨཊནིཨཱཀཱརེན ཋིཏདཱརུཔཊལསྶ ཧེཊྛཱ. ཨུདྡྷཾ པཱདཾ ཀཏྭཱ པཝེསནཀཱལཉྷི སནྡྷཱཡ ‘‘ཨུཔརཱི’’ཏི ཝུཏྟཾ. ཨེལ༹ཀསྶ ¶ པཙྪིམཔཱདདྭཡཾ ཝིཡ ཝངྐཱཀཱརེན ཋིཏཏྟཱ པནེཏཾ ‘‘ཨེལ༹ཀཔཱདཔཱིཋ’’ནྟི (ཝི. ཝི. ཊཱི. ཙཱུལ༹ཝགྒ ༢.༢༩༧) ཝུཏྟཾ.

ཨུཙྩཱསཡནམཧཱསཡནཀཐཱ

༥༦. ཨུཙྩཱསཡནམཧཱསཡནཀཐཱཡཾ ‘‘ཝཱལ༹རཱུཔཱནཱིཏི ཨཱཧརིམཱནི ཝཱལ༹རཱུཔཱནི, ‘ཨཀཔྤིཡརཱུཔཱཀུལོ ཨཀཔྤིཡམཉྩོ པལླངྐོ’ཏི སཱརསམཱསེ ཝུཏྟཾ. དཱིགྷལོམཀོ མཧཱཀོཛཝོཏི ཙཏུརངྒུལཱདྷིཀལོམོ ཀཱལ༹ཀོཛཝོ. ‘ཙཏུརངྒུལཱདྷིཀཱནི ཀིར ཏསྶ ལོམཱནཱི’ཏི ཝཙནཏོ ཙཏུརངྒུལཏོ ཧེཊྛཱ ཝཊྚཏཱིཏི ཝདནྟི. ཝཱནཙིཏྲོ ཨུཎྞཱམཡཏྠརཎོཏི བྷིཏྟིཙྪེདཱདིཝསེན ཝིཙིཏྲོ ཨུཎྞཱམཡཏྠརཎོ. གྷནཔུཔྥཀོ ཨུཎྞཱམཡཏྠརཎོཏི ཨུཎྞཱམཡལོཧིཏཏྠརཎོ ¶ . པཀཏིཏཱུལིཀཱཏི རུཀྑཏཱུལལཏཱཏཱུལཔོཊཀཱིཏཱུལསངྑཱཏཱནཾ ཏིཎྞཾ ཏཱུལཱནཾ ཨཉྙཏརཔུཎྞཱ ཏཱུལིཀཱ. ‘ཨུདྡལོམཱིཏི ཨུབྷཏོདསཾ ཨུཎྞཱམཡཏྠརཎཾ. ཨེཀནྟལོམཱིཏི ཨེཀཏོདསཾ ཨུཎྞཱམཡཏྠརཎ’ནྟི དཱིགྷནིཀཱཡཊྛཀཐཱཡཾ ཝུཏྟཾ. སཱརསམཱསེ པན ‘ཨུདྡལོམཱིཏི ཨེཀཏོཨུགྒཏཔུཔྥཾ. ཨེཀནྟལོམཱིཏི ཨུབྷཏོཨུགྒཏཔུཔྥ’ནྟི ཝུཏྟཾ. ‘ཀོསེཡྻཀཊྚིསྶམཡནྟི ཀོསེཡྻཀསཊམཡ’ནྟི ཨཱཙརིཡདྷམྨཔཱལཏྠེརེན ཝུཏྟཾ. སུདྡྷཀོསེཡྻནྟི རཏནཔརིསིབྦནརཧིཏཾ. དཱིགྷནིཀཱཡཊྛཀཐཱཡཾ པནེཏྠ ‘ཋཔེཏྭཱ ཏཱུལིཀཾ སབྦཱནེཝ གོནཀཱདཱིནི རཏནཔརིསིབྦིཏཱནི ན ཝཊྚནྟཱི’ཏི ཝུཏྟཾ. ཏཏྠ ‘ཋཔེཏྭཱ ཏཱུལིཀ’ནྟི ཨེཏེན རཏནཔརིསིབྦནརཧིཏཱཔི ཏཱུལིཀཱ ན ཝཊྚཏཱིཏི དཱིཔེཏི. ‘རཏནཔརིསིབྦིཏཱནི ན ཝཊྚནྟཱི’ཏི ཨིམིནཱ པན ཡཱནི རཏནཔརིསིབྦིཏཱནི, ཏཱནི བྷཱུམཏྠརཎཝསེན ཡཐཱནུརཱུཔཾ མཉྩཱདཱིསུ ཙ ཨུཔནེཏུཾ ཝཊྚཏཱིཏི དཱིཔིཏནྟི ཝེདིཏབྦཾ. ཨེཏྠ ཙ ཝིནཡཔརིཡཱཡཾ པཏྭཱ གརུཀེ ཋཱཏབྦཏྟཱ ཨིདྷ ཝུཏྟནཡེནེཝེཏྠ ཝིནིཙྪཡོ ཝེདིཏབྦོ. སུཏྟནྟིཀདེསནཱཡ པན གཧཊྛཱནམྤི ཝསེན ཝུཏྟཏྟཱ ཏེསཾ སངྒཎྷནཏྠཾ ‘ཋཔེཏྭཱ ཏཱུལིཀཾ…པེ… ཝཊྚཏཱི’ཏི ཝུཏྟནྟི ཨཔརེ.

ཨཛིནཙམྨེཧཱིཏི ཨཛིནམིགཙམྨེཧི. ཏཱནི ཀིར ཙམྨཱནི སུཁུམཏརཱནི, ཏསྨཱ དུཔཊྚཏིཔཊྚཱནི ཀཏྭཱ སིབྦནྟི. ཏེན ཝུཏྟཾ ‘ཨཛིནཔྤཝེཎཱི’ཏི. ཨུཏྟརཾ ཨུཔརིབྷཱགཾ ཚཱདེཏཱིཏི ཨུཏྟརཙྪདོ, ཝིཏཱནཾ, ཏཉྩ ལོཧིཏཝིཏཱནཾ ཨིདྷཱདྷིཔྤེཏནྟི ཨཱཧ ‘ཨུཔརིབདྡྷེན རཏྟཝིཏཱནེནཱ’ཏི, ‘རཏྟཝིཏཱནེསུ ཙ ཀཱསཱཝཾ ཝཊྚཏི, ཀུསུམྦྷཱདིརཏྟམེཝ ན ཝཊྚཏཱི’ཏི གཎྛིཔདེསུ ཝུཏྟཾ. མཧཱཨུཔདྷཱནནྟི པམཱཎཱཏིཀྐནྟཾ ཨུཔདྷཱནཾ. ཨེཏྠ ཙ ཀིཉྩཱཔི དཱིགྷནིཀཱཡཊྛཀཐཱཡཾ ‘ཨལོཧིཏཀཱནི དྭེཔི ཝཊྚནྟིཡེཝ, ཏཏོ ཨུཏྟརི ལབྷིཏྭཱ ཨཉྙེསཾ ¶ དཱཏབྦཱནི. དཱཏུམསཀྐོནྟོ ¶ མཉྩེ ཏིརིཡཾ ཨཏྠརིཏྭཱ ཨུཔརིཔཙྩཏྠརཎཾ དཏྭཱ ནིཔཛྫིཏུམྤི ལབྷཏཱི’ཏི ཨཝིསེསེན ཝུཏྟཾ, སེནཱསནཀྑནྡྷཀཝཎྞནཱཡཾ (ཙཱུལ༹ཝ. ཨཊྛ. ༢༩༧) པན ‘ཨགིལཱནསྶ སཱིསཱུཔདྷཱནཉྩ པཱདཱུཔདྷཱནཉྩཱཏི དྭཡམེཝ ཝཊྚཏི. གིལཱནསྶ བིམྦོཧནཱནི སནྠརིཏྭཱ ཨུཔརི ཙ པཙྩཏྠརཎཾ དཏྭཱ ནིཔཛྫིཏུམྤི ཝཊྚཏཱི’ཏི ཝུཏྟཏྟཱ གིལཱནོཡེཝ མཉྩེ ཏིརིཡཾ ཨཏྠརིཏྭཱ ནིཔཛྫིཏུཾ ཝཊྚཏཱིཏི ཝེདིཏབྦཾ. ཨབྷིནིསྶཱཡ ནིསཱིདིཏུནྟི ཨཔསྶཱཡ ནིསཱིདིཏུ’’ནྟི ཨེཏྟཀོ ཝིནིཙྪཡོ སཱརཏྠདཱིཔནིཡཾ ཨཱགཏོ.

ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༢༥༤) – པན ཝཱལ༹རཱུཔཱནཱིཏི ཨཱཧརིམཱནི ཝཱལ༹རཱུཔཱནི. ཙཏུརངྒུལཱདྷིཀཱནཱིཏི ཨུདྡལོམཱིཨེཀནྟལོམཱིཧི ཝིསེསདསྶནཾ. ཙཏུརངྒུལཏོ ཧི ཨཱུནཱནི ཀིར ཨུདྡལོམཱིཨཱདཱིསུ པཝིསནྟི. ཝཱནཙིཏྲོ ཨུཎྞཱམཡཏྠརཎོཏི ནཱནཱཝཎྞེཧི ཨུཎྞཱམཡསུཏྟེཧི བྷིཏྟིཙྪེདཱདིཝསེན ཝཱཡིཏྭཱ ཀཏཙིཏྟཏྠརཎོ. གྷནཔུཔྥཀོཏི བཧལརཱགོ. པཀཏིཏཱུལིཀཱཏི ཏཱུལཔུཎྞཱ བྷིསི. ཝིཀཏིཀཱཏི སཱིཧརཱུཔཱདིཝསེན ཝཱནཙིཏྲཱཝ གཡ྄ཧཏི. ‘‘ཨུདྡལོམཱིཏི ཨུབྷཏོདསཾ ཨུཎྞཱམཡཏྠརཎཾ. ཨེཀནྟལོམཱིཏི ཨེཀནྟདསཾ ཨུཎྞཱམཡཏྠརཎ’’ནྟི དཱིགྷནིཀཱཡཊྛཀཐཱཡཾ ཝུཏྟཾ. ཀོསེཡྻཀཊྚིསྶམཡནྟི ཀོསིཡསུཏྟཱནཾ ཨནྟརཱ སུཝཎྞམཡསུཏྟཱནི པཝེསེཏྭཱ ཝཱིཏཾ, སུཝཎྞསུཏྟཾ ཀིར ཀཊྚིསྶཾ ཀསཊནྟི ཙ ཝུཙྩཏི. ཏེནེཝ ‘‘ཀོསེཡྻཀསཊམཡ’’ནྟི ཨཱཙརིཡདྷམྨཔཱལཏྠེརེན ཝུཏྟནྟི ཝདནྟི. རཏནཔརིསིབྦིཏནྟི སུཝཎྞལིཏྟཾ. སུདྡྷཀོསེཡྻནྟི རཏནཔརིསིབྦནརཧིཏཾ.

ཨཛིནམིགཙམྨཱནཾ ཨཏིསུཁུམཏྟཱ དུཔཊྚཏིཔཊྚཱནི ཀཏྭཱ སིབྦནྟཱིཏི ཝུཏྟཾ ‘‘ཨཛིནཔྤཝེཎཱི’’ཏི. རཏྟཝིཏཱནེནཱཏི སབྦརཏྟེན ¶ ཝིཏཱནེན. ཡཾ པན ནཱནཱཝཎྞཾ ཝཱནཙིཏྟཾ ཝཱ ལེཔཙིཏྟཾ ཝཱ, ཏཾ ཝཊྚཏི. ཨུབྷཏོལོཧིཏཀཱུཔདྷཱནེཔི ཨེསེཝ ནཡོ. ཙིཏྲཾ ཝཱཏི ཨིདཾ པན སབྦཐཱ ཀཔྤིཡཏྟཱ ཝུཏྟཾ, ན པན ཨུབྷཏོཨུཔདྷཱནེསུ ཨཀཔྤིཡཏྟཱ. ན ཧི ལོཧིཏཀསདྡོ ཙིཏྟེ ཝཊྚཏི. པཊལིགྒཧཎེནེཝ ཙིཏྟཀསྶཔི ཨཏྠརཎསྶ སངྒཧེཏབྦཔྤསངྒཏོ. ཀཱསཱཝཾ པན ལོཧིཏངྒཝོཧཱརཾ ན གཙྪཏི, ཏསྨཱ ཝིཏཱནེཔི ཨུབྷཏོཨུཔདྷཱནེཔི ཝཊྚཏི. སཙེ པམཱཎཡུཏྟནྟིཨཱདི ཨཉྙསྶ པམཱཎཱཏིཀྐནྟསྶ བིམྦོཧནསྶ པཊིཀྑིཏྟབྷཱཝདསྶནཏྠཾ ཝུཏྟཾ, ན པན ཨུཙྩཱསཡནམཧཱསཡནབྷཱཝདསྶནཏྠཾ ཏཐཱ ཨཝུཏྟཏྟཱ, ཏཾ པན ཨུཔདྷཱནཾ ཨུཔོསཐིཀཱནཾ གཧཊྛཱནཾ ཝཊྚཏི. ཨུཙྩཱསཡནམཧཱསཡནམེཝ ཧི ཏདཱ ཏེསཾ ན ཝཊྚཏི. དཱིགྷནིཀཱཡཊྛཀཐཱདཱིསུ ཀིཉྩཱཔི ‘‘ཋཔེཏྭཱ ཏཱུལིཀཾ སབྦཱནེཝ གོནཀཱདཱིནི རཏནཔརིསིབྦིཏཱནི ན ཝཊྚནྟཱི’’ཏི ཝུཏྟཾ, ཝིནཡཊྛཀཐཱ ¶ ཨེཝ པན ཀཔྤིཡཱཀཔྤིཡབྷཱཝེ པམཱཎནྟི གཧེཏབྦཾ. ཨབྷིནིསྶཱཡཱཏི ཨཔསྶཱཡཱཏི ཝུཏྟཾ.

པཱསཱདཔརིབྷོགཀཐཱ

པཱསཱདཔརིབྷོགཀཐཱཡཾ སཱརཏྠདཱིཔནིཡཾ ཝཛིརབུདྡྷིཊཱིཀཱཡཉྩ ན ཀིཉྩི ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ཙཱུལ༹ཝགྒ ༢.༣༢༠) པན ‘‘སུཝཎྞརཛཏཱདིཝིཙིཏྲཱནཱིཏི སངྒྷིཀསེནཱསནཾ སནྡྷཱཡ ཝུཏྟཾ. པུགྒལིཀཾ པན སུཝཎྞཱདིཝིཙིཏྲཾ བྷིཀྑུསྶ སམྤཊིཙྪིཏུམེཝ ན ཝཊྚཏི ‘ན ཀེནཙི པརིཡཱཡེན ཛཱཏརཱུཔརཛཏཾ སཱདིཏབྦ’ནྟི (མཧཱཝ. ༢༩༩) ཝུཏྟཏྟཱ. ཏེནེཝེཏྠ ཨཊྛཀཐཱཡཾ (ཙཱུལ༹ཝ. ཨཊྛ. ༣༢༠) ‘སངྒྷིཀཝིཧཱརེ ཝཱ པུགྒལིཀཝིཧཱརེ ཝཱ’ཏི ཝུཏྟཾ. གོནཀཱདིཨཀཔྤིཡབྷཎྜཝིསཡེ ཨེཝ ཝུཏྟཾ ཨེཀབྷིཀྑུསྶཔི ཏེསཾ གཧཎེ དོསཱབྷཱཝཱ’’ཏི ཝུཏྟཾ.

ཨུཔཱཧནཀཐཱ

ཨུཔཱཧནཀཐཱཡཾ ¶ ‘‘ཨདྡཱརིཊྛཀཝཎྞཱཏི ཨབྷིནཝཱརིཊྛཕལཝཎྞཱ, ཨུདཀེན ཏིནྟཀཱཀཔཏྟཝཎྞཱཏིཔི ཝདནྟི. ཨུཎྞཱཧི ཀཏཔཱདུཀཱཏི ཨུཎྞཱལོམམཡཀམྦལེཧི, ཨུཎྞཱལོམེཧི ཨེཝ ཝཱ ཀཏཔཱདུཀཱ. ཀཱལ༹སཱིཧོཏི ཀཱལ༹མུཁཝཱནརཛཱཏི. སེསམེཏྠ པཱལི༹ཏོ ཙ ཨཊྛཀཐཱཏོ ཙ སུཝིཉྙེཡྻམེཝཱ’’ཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༢༤༦) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༢༤༦) པན ‘‘ཨདྡཱརིཊྛཀཝཎྞཱཏི ཨལླཱརིཊྛཕལཝཎྞཱ, ཏིནྟཀཱཀཔཀྑཝཎྞཱཏིཔི ཝདནྟི. རཛནནྟི ཨུཔརིལིཏྟནཱིལཱདིཝཎྞཾ སནྡྷཱཡ ཝུཏྟཾ. ཏེནཱཧ ‘ཙོལ༹ཀེན པུཉྪིཏྭཱ’ཏི. ཏཉྷི ཏཐཱ པུཉྪིཏེ ཝིགཙྪཏི. ཡཾ པན ཙམྨསྶ དུགྒནྡྷཱཔནཡནཏྠཾ ཀཱལ༹རཏྟཱདིརཛནེཧི རཉྫིཏཏྟཱ ཀཱལ༹རཏྟཱདིཝཎྞཾ ཧོཏི, ཏཾ ཙོལཱ༹དཱིཧི ཨཔནེཏུཾ ན སཀྐཱ ཙམྨགཏིཀམེཝ, ཏསྨཱ ཏཾ ཝཊྚཏཱིཏི དཊྛབྦཾ. ཁལླཀནྟི སབྦཔཎྷིཔིདྷཱནཙམྨཾ ཨཔརིགལ༹ནཏྠཾ པཎྷིཡཱ ཨུཔརིབྷཱགེ ཨཔིདྷཱཡ ཨཱརོཔནབནྡྷནམཏྟཾ ཝཊྚཏི. ཝིཙིཏྲཱཏི སཎྛཱནཏོ ཝིཙིཏྲཔཊྚཱ ཨདྷིཔྤེཏཱ, ན ཝཎྞཏོ སབྦསོ ཨཔནེཏབྦེསུ ཁལླཀཱདཱིསུ པཝིཊྛཏྟཱ. བིལཱ༹ལསདིསམུཁཏྟཱ མཧཱཨུལཱུཀཱ པཀྑིབིལཱ༹ལཱཏི ཝུཙྩནྟི, ཏེསཾ ཙམྨཾ ནཱམ པཀྑལོམམེཝ. ཨུཎྞཱཧི ཀཏཔཱདུཀཱཏི ཨེཏྠ ཨུཎྞཱམཡཀམྦལེཧི ཀཏཔཱདུཀཱ སངྒཡ྄ཧནྟི. ཀཱལ༹སཱིཧོཏི ¶ ཀཱལ༹མུཁཝཱནརཛཱཏི. ཙམྨཾ ན ཝཊྚཏཱིཏི ནིསཱིདནཏྠརཎཾ ཀཱཏུཾ ན ཝཊྚཏི, བྷཱུམཏྠརཎཱདིཝསེན པརིབྷོགོ ཝཊྚཏེཝཱ’’ཏི ཝུཏྟཾ.

ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༢༥༩) པན ‘‘མིགམཱཏུཀོཏི ཏསྶ ནཱམཾ, ཝཱཏམིགོཏི ཙ ཏསྶ ནཱམཾ. ‘ཀཱལ༹སཱིཧོ ཀཱལ༹མུཁོ ཀཔཱི’ཏི ལིཁིཏཾ. ཙམྨཾ ན ཝཊྚཏཱིཏི ཡེན པརིཡཱཡེན ཙམྨཾ ཝཊྚིསྶཏི, སོ པརཏོ ཨཱཝིབྷཝིསྶཏི. ‘ཨཏྟནོ པུགྒལིཀཝསེན ¶ པཙྩཱཧཱརོ པཊིཀྑིཏྟོ’ཏི ཝུཏྟཾ. ‘ན, བྷིཀྑཝེ, ཀིཉྩི ཙམྨཾ དྷཱརེཏབྦ’ནྟི ཨེཏྟཱཝཏཱ སིདྡྷེ ‘ན, བྷིཀྑཝེ, གོཙམྨ’ནྟི ཨིདཾ པརཏོ ‘ཨནུཛཱནཱམི, བྷིཀྑཝེ, སབྦཔཙྩནྟིམེསུ ཛནཔདེསུ ཙམྨཱནི ཨཏྠརཎཱནཱི’ཏི (མཧཱཝ. ༢༥༩) ཨེཏྠ ཨནུམཏིཔྤསངྒབྷཡཱ ཝུཏྟནྟི ཝེདིཏབྦ’’ནྟི ཝུཏྟཾ.

ཡཱནཀཐཱ

ཡཱནཀཐཱཡཾ ‘‘ཨནུཛཱནཱམི, བྷིཀྑཝེ, པུརིསཡུཏྟཾ ཧཏྠཝཊྚཀ’’ནྟི (མཧཱཝ. ༢༥༣) ཨེཏྠ ཨནུཛཱནཱམི, བྷིཀྑཝེ, པུརིསཡུཏྟཾ, ཨནུཛཱནཱམི, བྷིཀྑཝེ, ཧཏྠཝཊྚཀནྟི ཨེཝཾ པཙྩེཀཾ ཝཱཀྱཔརིསམཱཔནཾ ཨདྷིཔྤེཏནྟི ཨཱཧ ‘‘པུརིསཡུཏྟཾ ཨིཏྠིསཱརཐི ཝཱ…པེ… པུརིསཱ ཝཱ, ཝཊྚཏིཡེཝཱ’’ཏི. ‘‘པཱིཋཀསིཝིཀནྟི པཱིཋཀཡཱནཾ. པཱཊངྐིནྟི ཨནྡོལིཀཱཡེཏཾ ཨདྷིཝཙན’’ནྟི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༢༥༣) ཝུཏྟཾ, ‘‘པཱིཋཀསིཝིཀནྟི ཕལཀཱདིནཱ ཀཏཾ པཱིཋཀཡཱནཾ. པཊཔོཏལིཀཾ ཨནྡོལིཀཱ. སབྦམྤི ཡཱནཾ ཨུཔཱཧནེནཔི གནྟུཾ ཨསམཏྠསྶ གིལཱནསྶ ཨནུཉྙཱཏ’’ནྟི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༢༥༣).

ཙཱིཝརཀཐཱ

༥༧. ཙཱིཝརཀཐཱཡཾ ‘‘ཨཧཏཀཔྤཱནནྟི ཨེཀཝཱརདྷོཏཱནཾ. ཨུཏུདྡྷཊཱནནྟི ཨུཏུཏོ དཱིགྷཀཱལཏོ ཨུདྡྷཊཱནཾ ཧཏཝཏྠཀཱནཾ, པིལོཏིཀཱནནྟི ཝུཏྟཾ ཧོཏི. པཱཔཎིཀེཏི ཨནྟརཱཔཎཏོ པཏིཏཔིལོཏིཀཙཱིཝརེ. ཨུསྶཱཧོ ཀརཎཱིཡོཏི པརིཡེསནཱ ཀཱཏབྦཱ. པརིཙྪེདོ པནེཏྠ ནཏྠི, པཊྚསཏམྤི ཝཊྚཏི. སབྦམིདཾ སཱདིཡནྟསྶ བྷིཀྑུནོ ཝསེན ཝུཏྟཾ. ཨགྒལ༹ཾ ཏུནྣནྟི ཨེཏྠ ཨུདྡྷརིཏྭཱ ཨལླཱིཡཱཔནཁཎྜཾ ཨགྒལ༹ཾ, སུཏྟེན སཾསིབྦིཏཾ ཏུནྣཾ, ཝཊྚེཏྭཱ ཀརཎཾ ཨོཝཊྚིཀཾ. ཀཎྜུཔཀཾ ¶ ཝུཙྩཏི མུདྡིཀཱ. དལཱི༹ཀམྨནྟི ཨནུདྡྷརིཏྭཱཝ ཨུཔསྶཡཾ ཀཏྭཱ ཨལླཱིཡཱཔནཀཾ ¶ ཝཏྠཁཎྜ’’ནྟི ཨཊྛཀཐཱཡཾ ཨཱགཏཾ. སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༣༤༨) པན ‘‘ཨཙྪུཔེཡྻནྟི པཏིཊྛཔེཡྻཾ. ཧཏཝཏྠཀཱནནྟི ཀཱལཱཏཱིཏཝཏྠཱནཾ. ཨུདྡྷརིཏྭཱ ཨལླཱིཡཱཔནཁཎྜནྟི དུབྦལཊྛཱནཾ ཨཔནེཏྭཱ ཨལླཱིཡཱཔནཝཏྠཁཎྜ’’ནྟི ཝུཏྟཾ. དིགུཎཾ སངྒྷཱཊིནྟི དུཔཊྚཾ སངྒྷཱཊིཾ. ཨེཀཙྩིཡནྟི ཨེཀཔཊྚཾ ཨགྒཔཊྚཾ. ཨགྒལ༹ཾ ཨཛ྄ཛྷཱཔེསྶནྟི ཛིཎྞཊྛཱནེ པིལོཏིཀཁཎྜཾ ལགྒཱཔེཡྻཾ.

ཚིནྣཙཱིཝརཀཐཱ

ཚིནྣཙཱིཝརཀཐཱཡཾ ཏཱིསུ པན ཙཱིཝརེསུ དྭེ ཝཱ ཨེཀཾ ཝཱ ཚིནྡིཏྭཱ ཀཱཏབྦནྟི ཨེཏྠ ‘‘ཨནུཛཱནཱམི, བྷིཀྑཝེ, ཚིནྣཀཾ སངྒྷཱཊིཾ ཚིནྣཀཾ ཨུཏྟརཱསངྒཾ ཚིནྣཀཾ ཨནྟརཝཱསཀ’’ནྟི (མཧཱཝ. ༣༤༥) ཝཙནཏོ པཉྩཁཎྜསཏྟཁཎྜཱདིཝསེན ཚིནྡིཏྭཱཝ ཀཱཏབྦཾ, ན ཨཙྪིནྡིཏྭཱཏི ཨཏྠོ. སཙེ ནཔྤཧོཏི, ཨཱགནྟུཀཔཊྚཾ དཱཏབྦནྟི ཨེཏྠ ཡདི ཚིནྡིཏྭཱ ཀཏེ ཏིཎྞམྤི ཙཱིཝརཱནཾ ཨཏྠཱཡ སཱཊཀོ ནཔྤཧོཏི, དྭེ ཙཱིཝརཱནི ཚིནྣཀཱནི ཀཱཏབྦཱནི, ཨེཀཾ ཙཱིཝརཾ ཨཙྪིནྣཀཾ ཀཏྟབྦཾ. དྭཱིསུ ཙཱིཝརེསུ ཚིནྡིཏྭཱ ཀཏེསུ སཱཊཀོ ནཔྤཧོཏི, དྭེ ཙཱིཝརཱནི ཨཙྪིནྣཀཱནི, ཨེཀཾ ཙཱིཝརཾ ཚིནྣཀཾ ཀཱཏབྦཾ. ཨེཀསྨིམྤི ཙཱིཝརེ ཚིནྡིཏྭཱ ཀཏེ སཱཊཀོ ནཔྤཧོཏི, ཨེཝཾ སཏི ཨཙྪིནྡིཏྭཱ ཨཱགནྟུཀཔཊྚཾ དཱཏབྦནྟི ཨཏྠོ. ཏམཏྠཾ པཱལི༹ཡཱ སཱདྷེཏུཾ ‘‘ཝུཏྟཉྷེཏ’’ནྟིཨཱདིམཱཧ. ཏཏྠ ཨནྭཱདྷིཀམྤི ཨཱརོཔེཏུནྟི ཨེཝཾ ཨཔྤཧོནྟེ སཏི ཨཱགནྟུཀཔཊྚམྤི ཨཱརོཔེཏུཾ ཨནུཛཱནཱམཱིཏི ཨཏྠོ.

ཨཀཔྤིཡཙཱིཝརཀཐཱ

ཨཀཔྤིཡཙཱིཝརཀཐཱཡཾ ‘‘ནགྒིཡཾ ཀུསཙཱིརཾ ཕལཀཙཱིརཾ ཀེསཀམྦལཾ ཝཱལ༹ཀམྦལཾ ཨུལཱུཀཔཀྑིཀཾ ཨཛིནཀྑིཔ’’ནྟི ཨིམཱནི ཏིཏྠིཡསམཱདཱནཏྟཱ ཐུལླཙྩཡཝཏྠཱུནཱིཏི བྷགཝཏཱ པཊིཀྑིཏྟཱནི ¶ . ཏཏྠ ནགྒིཡནྟི ནགྒབྷཱཝོ ཨཙེལཀབྷཱཝོ. ཀུསཙཱིརནྟི ཀུསེན གནྠེཏྭཱ ཀཏཙཱིཝརཾ. ཝཱཀཙཱིརནྟི ཏཱཔསཱནཾ ཝཀྐལཾ. ཕལཀཙཱིརནྟི ཕལཀསཎྛཱནཱནི ཕལཀཱནི སིབྦིཏྭཱ ཀཏཙཱིཝརཾ. ཀེསཀམྦལནྟི ཀེསེཧི ཏནྟེ ཝཱཡིཏྭཱ ཀཏཀམྦལཾ. ཝཱལཀམྦལནྟི ཙཱམརཱིཝཱལེཧི ཝཱཡིཏྭཱ ཀཏཀམྦལཾ. ཨུལཱུཀཔཀྑིཀནྟི ཨུལཱུཀསཀུཎསྶ པཀྑེཧི ཀཏནིཝཱསནཾ ¶ . ཨཛིནཀྑིཔནྟི སལོམཾ སཁུརཾ ཨཛིནམིགཙམྨཾ. ཏཱནི ཏིཏྠིཡདྡྷཛབྷཱུཏཱནི ཨཙཱིཝརབྷཱཝེན པཱཀཊཱནཱིཏི ཨཱཙརིཡེན ཨིདྷ ན ཝུཏྟཱནི. པོཏྠཀོ པན ཨཔཱཀཊོཏི ཏཾ ཝཏྭཱ སབྦནཱིལཀཱདཱིནི དུཀྐཊཝཏྠུཀཱནི ཝུཏྟཱནི. ‘‘ཏིཔཊྚཙཱིཝརསྶ ཝཱ མཛ྄ཛྷེ དཱཏབྦཱནཱི’’ཏི ཝུཏྟཏྟཱ ཏིཔཊྚཙཱིཝརཾ དྷཱརེཏུཾ ཝཊྚཏཱིཏི སིདྡྷཾ. ཏིཔཊྚཱདཱིནཉྩ བཧུཔཊྚཙཱིཝརཱནཾ ཨནྟརེ ཨཱིདིསཱནི ཨསཱརུཔྤཝཎྞཱནི པཊཔིལོཏིཀཱནི ཀཱཏབྦཱནཱིཏི དསྶེཏི. ཀཉྩུཀཾ ནཱམ སཱིསཏོ པཊིམུཉྩིཏྭཱ ཀཱཡཱརུལ༹ྷཝཏྠཾ. ཏེནཱཧ ‘‘ཕཱལེཏྭཱ རཛིཏྭཱ པརིབྷུཉྫིཏུཾ ཝཊྚཏཱི’’ཏི. ཝེཋནནྟི སཱིསཝེཋནཾ. ཏིརཱིཊནྟི མཀུཊཾ. ཏསྶ ཝིསེསཾ དསྶེཏུཾ ‘‘ཏིརཱིཊཀཾ པནཱ’’ཏིཨཱདིམཱཧ.

ཙཱིཝརཝིཙཱརཎཀཐཱ

ཙཱིཝརཝིཙཱརཎཀཐཱཡཾ ‘‘པཎྜིཏོ, བྷིཀྑཝེ, ཨཱནནྡོ, མཧཱཔཉྙོ, བྷིཀྑཝེ, ཨཱནནྡོ. ཡཏྲ ཧི ནཱམ མཡཱ སཾཁིཏྟེན བྷཱསིཏསྶ ཝིཏྠཱརེན ཨཏྠཾ ཨཱཛཱནིསྶཏི, ཀུསིམྤི ནཱམ ཀརིསྶཏི, ཨཌྜྷཀུསིམྤི ནཱམ ཀརིསྶཏི, མཎྜལམྤི ནཱམ ཀརིསྶཏི, ཨཌྜྷམཎྜལམྤི ནཱམ ཀརིསྶཏི, ཝིཝཊྚམྤི ནཱམ ཀརིསྶཏི, ཨནུཝིཝཊྚམྤི ནཱམ ཀརིསྶཏི, གཱིཝེཡྻཀམྤི ནཱམ ཀརིསྶཏི, ཛངྒྷེཡྻཀམྤི ནཱམ ཀརིསྶཏི, བཱཧནྟམྤི ནཱམ ཀརིསྶཏི, ཚིནྣཀཾ བྷཝིསྶཏི, སཏྠལཱུཁཾ སམཎསཱརུཔྤཾ པཙྩཏྠིཀཱནཉྩ ཨནབྷིཙྪིཏ’’ནྟི (མཧཱཝ. ༣༤༥) ཝཙནཏོ ‘‘པསྶསི ¶ ཏྭཾ, ཨཱནནྡ, མགདྷཁེཏྟཾ ཨཙྪིབདྡྷཾ པཱལི༹བདྡྷཾ མརིཡཱདབདྡྷཾ སིངྒྷཱཊཀབདྡྷ’’ནྟི བྷགཝཏོ སཾཁིཏྟེན ཝུཏྟཝཙནཾ སུཏྭཱ ཨཱཡསྨཱ ཨཱནནྡོ བྷགཝཏོ ཨཛ྄ཛྷཱསཡཱནུརཱུཔཾ སམྦཧུལཱནཾ བྷིཀྑཱུནཾ ཙཱིཝརཾ སཾཝིདཧི. ཏཐཱ ཨིདཱནིཔི ཨེཝརཱུཔཾ ཙཱིཝརཾ སཾཝིདཧིཏབྦཾ.

ཏཏྠ ‘‘ཨཙྪིབདྡྷནྟི ཙཏུརསྶཀེདཱརབདྡྷཾ. པཱལི༹བདྡྷནྟི ཨཱཡཱམཏོ ཙ ཝིཏྠཱརཏོ ཙ དཱིགྷམརིཡཱདབདྡྷཾ. མརིཡཱདབདྡྷནྟི ཨནྟརནྟརཱ རསྶམརིཡཱདབདྡྷཾ. སིངྒྷཱཊཀབདྡྷནྟི མརིཡཱདཱཡ མརིཡཱདཾ ཝིནིཝིཛ྄ཛྷིཏྭཱ གཏཊྛཱནེ སིངྒྷཱཊཀབདྡྷཾ, ཙཏུཀྐསཎྛཱནནྟི ཨཏྠོ. ཡཏྲ ཧི ནཱམཱཏི ཡོ ནཱམ. ཀུསིམྤི ནཱམཱཏིཨཱདཱིསུ ཀུསཱིཏི ཨཱཡཱམཏོ ཙ ཝིཏྠཱརཏོ ཙ ཨནུཝཱཏཱདཱིནཾ དཱིགྷཔཊྚཱནམེཏཾ ཨདྷིཝཙནཾ. ཨཌྜྷཀུསཱིཏི ཨནྟརནྟརཱརསྶཔཊྚཱནཾ ནཱམཾ. མཎྜལནྟི པཉྩཁཎྜིཀསྶ ཙཱིཝརསྶ ཨེཀེཀསྨིཾ ཁཎྜེ མཧཱམཎྜལཾ. ཨཌྜྷམཎྜལནྟི ཁུདྡཀམཎྜལཾ. ཝིཝཊྚནྟི མཎྜལཉྩ ཨཌྜྷམཎྜལཉྩ ཨེཀཏོ ཀཏྭཱ སིབྦིཏཾ མཛ྄ཛྷིམཁཎྜཾ. ཨནུཝིཝཊྚནྟི ཏསྶ ཨུབྷོསུ པསྶེསུ དྭེ ཁཎྜཱནི. གཱིཝེཡྻཀནྟི གཱིཝཱཝེཋནཊྛཱནེ དལ༹ྷཱིཀརཎཏྠཾ ཨཉྙསུཏྟསཾསིབྦིཏཾ ¶ ཨཱགནྟུཀཔཊྚཾ. ཛངྒྷེཡྻཀནྟི ཛངྒྷཔཱཔུཎནཊྛཱནེ ཏཐེཝ སཾསིབྦིཏཾ པཊྚཾ. གཱིཝཱཊྛཱནེ ཙ ཛངྒྷཊྛཱནེ ཙ པཊྚཱནམེཏཾ ནཱམནྟི. བཱཧནྟནྟི ཨནུཝིཝཊྚཱནཾ བཧི ཨེཀེཀཾ ཁཎྜཾ. ཨིཏི པཉྩཁཎྜིཀཙཱིཝརེནེཏཾ ཝིཙཱརིཏནྟི. ཨཐ ཝཱ ཨནུཝིཝཊྚནྟི ཝིཝཊྚསྶ ཨེཀཔསྶཏོ དྭིནྣཾ ཨེཀཔསྶཏོ དྭིནྣནྟི ཙཏུནྣམྤི ཁཎྜཱནམེཏཾ ནཱམཾ. བཱཧནྟནྟི སུཔྤམཱཎཾ ཙཱིཝརཾ པཱརུཔནྟེན སཾཧརིཏྭཱ བཱཧཱཡ ཨུཔརི ཋཔིཏཱ ཨུབྷོ ཨནྟཱ བཧིམུཁཱ ཏིཊྛནྟི, ཏེསཾ ཨེཏཾ ནཱམཾ. ཨཡམེཝ ཧི ནཡོ མཧཱཨཊྛཀཐཱཡཾ ཝུཏྟོ’’ཏི ཨཊྛཀཐཱཡཾ (མཧཱཝ. ཨཊྛ. ༣༤༥) ཨཱགཏོ.

ཙཱིཝརསིབྦནཀཐཱ

དཎྜཀཐིནེནཙཱིཝརསིབྦནཀཐཱཡཾ ¶ – ཏེན ཁོ པན སམཡེན བྷིཀྑཱུ ཏཏྠ ཏཏྠ ཁཱིལཾ ནིཀྑནིཏྭཱ སམྦནྡྷིཏྭཱ ཙཱིཝརཾ སིབྦེནྟི, ཙཱིཝརཾ ཝིཀཎྞཾ ཧོཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, ཀཐིནཾ ཀཐིནརཛྫུཾ, ཏཏྠ ཏཏྠ ཨོབནྡྷིཏྭཱ ཙཱིཝརཾ སིབྦེཏུནྟི. ཝིསམེ ཀཐིནཾ པཏྠརནྟི, ཀཐིནཾ པརིབྷིཛྫཏི…པེ… ན, བྷིཀྑཝེ, ཝིསམེ ཀཐིནཾ པཏྠརིཏབྦཾ, ཡོ པཏྠརེཡྻ, ཨཱཔཏྟི དུཀྐཊསྶཱཏི.

ཚམཱཡ ཀཐིནཾ པཏྠརནྟི, ཀཐིནཾ པཾསུཀིཏཾ ཧོཏི. ཨནུཛཱནཱམི, བྷིཀྑཝེ, ཏིཎསནྠཱརཀནྟི. ཀཐིནསྶ ཨནྟོ ཛཱིརཏི. ཨནུཛཱནཱམི, བྷིཀྑཝེ, ཨནུཝཱཏཾ པརིབྷཎྜཾ ཨཱརོཔེཏུནྟི. ཀཐིནཾ ནཔྤཧོཏི. ཨནུཛཱནཱམི, བྷིཀྑཝེ, དཎྜཀཐིནཾ བིདལཀཾ སལཱཀཾ ཝིནནྡྷནརཛྫུཾ ཝིནནྡྷནསུཏྟཀཾ ཝིནནྡྷིཏྭཱ ཙཱིཝརཾ སིབྦེཏུནྟི. སུཏྟནྟརིཀཱཡོ ཝིསམཱ ཧོནྟི. ཨནུཛཱནཱམི, བྷིཀྑཝེ, ཀལི༹མྦྷཀནྟི. སུཏྟཱ ཝངྐཱ ཧོནྟི. ཨནུཛཱནཱམི, བྷིཀྑཝེ, མོགྷསུཏྟཀནྟི.

ཏེན ཁོ པན སམཡེན བྷིཀྑཱུ ཨདྷོཏེཧི པཱདེཧི ཀཐིནཾ ཨཀྐམནྟི, ཀཐིནཾ དུསྶཏི. བྷགཝཏོ ཨེཏམཏྠཾ ཨཱརོཙེསུཾ – ན, བྷིཀྑཝེ, ཨདྷོཏེཧི པཱདེཧི ཀཐིནཾ ཨཀྐམིཏབྦཾ, ཡོ ཨཀྐམེཡྻ, ཨཱཔཏྟི དུཀྐཊསྶཱཏི.

ཏེན ཁོ པན སམཡེན བྷིཀྑཱུ ཨལླེཧི པཱདེཧི ཀཐིནཾ ཨཀྐམནྟི, ཀཐིནཾ དུསྶཏི. བྷགཝཏོ ¶ ཨེཏམཏྠཾ ཨཱརོཙེསུཾ – ན, བྷིཀྑཝེ, ཨལླེཧི པཱདེཧི ཀཐིནཾ ཨཀྐམིཏབྦཾ, ཡོ ཨཀྐམེཡྻ, ཨཱཔཏྟི དུཀྐཊསྶཱཏི.

ཏེན ཁོ པན སམཡེན བྷིཀྑཱུ སཨུཔཱཧནཱ ཀཐིནཾ ཨཀྐམནྟི, ཀཐིནཾ དུསྶཏི. བྷགཝཏོ ཨེཏམཏྠཾ ཨཱརོཙེསུཾ – ན, བྷིཀྑཝེ, སཨུཔཱཧནེན ཀཐིནཾ ཨཀྐམིཏབྦཾ. ཡོ ཨཀྐམེཡྻ, ཨཱཔཏྟི དུཀྐཊསྶཱཏི.

ཏེན ¶ ཁོ པན སམཡེན བྷིཀྑཱུ ཙཱིཝརཾ སིབྦནྟཱ ཨངྒུལིཡཱ པཊིགྒཎྷནྟི, ཨངྒུལིཡོ དུཀྑཱ ཧོནྟི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, པཊིགྒཧནྟི.

ཏེན ཁོ པན སམཡེན ཚབྦགྒིཡཱ བྷིཀྑཱུ ཨུཙྩཱཝཙེ པཊིགྒཧེ དྷཱརེནྟི སུཝཎྞམཡཾ རཱུཔིཡམཡཾ. མནུསྶཱ ཨུཛ྄ཛྷཱཡནྟི ཁཱིཡནྟི ཝིཔཱཙེནྟི ‘‘སེཡྻཐཱཔི གིཧཱི ཀཱམབྷོགིནོ’’ཏི. བྷགཝཏོ ཨེཏམཏྠཾ ཨཱརོཙེསུཾ – ན, བྷིཀྑཝེ, ཨུཙྩཱཝཙཱ པཊིགྒཧཱ དྷཱརེཏབྦཱ, ཡོ དྷཱརེཡྻ, ཨཱཔཏྟི དུཀྐཊསྶཱཏི. ཨནུཛཱནཱམི, བྷིཀྑཝེ, ཨཊྛིམཡཾ…པེ… སངྑནཱབྷིམཡནྟི.

ཏེན ཁོ པན སམཡེན སཱུཙིཡོཔི སཏྠཀཱཔི པཊིགྒཧཱཔི ནསྶནྟི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, ཨཱཝེསནཝིཏྠཀནྟི. ཨཱཝེསནཝིཏྠཀེ སམཱཀུལཱ ཧོནྟི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, པཊིགྒཧཐཝིཀནྟི. ཨཾསབདྡྷཀོ ན ཧོཏི…པེ… ཨནུཛཱནཱམི, བྷིཀྑཝེ, ཨཾསབདྡྷཀཾ བནྡྷནསུཏྟཀནྟི.

ཏེན ཁོ པན སམཡེན བྷིཀྑཱུ ཨབྦྷོཀཱསེ ཙཱིཝརཾ སིབྦནྟཱ སཱིཏེནཔི ཨུཎྷེནཔི ཀིལམནྟི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, ཀཐིནསཱལཾ ཀཐིནམཎྜཔནྟི. ཀཐིནསཱལཱ ནཱིཙཝཏྠུཀཱ ཧོཏི, ཨུདཀེན ཨོཏྠརཱིཡཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, ཨུཙྩཝཏྠུཀཾ ཀཱཏུནྟི. ཙཡོ པརིཔཏཏི. ཨནུཛཱནཱམི, བྷིཀྑཝེ, ཙིནིཏུཾ ཏཡོ ཙཡེ ཨིཊྛཀཙཡཾ, སིལཱཙཡཾ, དཱརུཙཡནྟི. ཨཱརོཧནྟཱ ཝིཧཉྙནྟི. ཨནུཛཱནཱམི, བྷིཀྑཝེ, ཏཡོ སོཔཱནེ ཨིཊྛཀསོཔཱནཾ, སིལཱསོཔཱནཾ, དཱརུསོཔཱནནྟི. ཨཱརོཧནྟཱ པརིཔཏནྟི. ཨནུཛཱནཱམི, བྷིཀྑཝེ, ཨཱལམྦནབཱཧནྟི. ཀཐིནསཱལཱཡ ཏིཎཙུཎྞཾ པརིཔཏཏི ¶ . ཨནུཛཱནཱམི, བྷིཀྑཝེ, ཨོགུམྥེཏྭཱ ¶ ཨུལླིཏྟཱཝལིཏྟཾ ཀཱཏུཾ སེཏཝཎྞཾ ཀཱལ༹ཝཎྞཾ གེརུཀཔརིཀམྨཾ མཱལཱཀམྨཾ ལཏཱཀམྨཾ མཀརདནྟཀཾ པཉྩཔཊིཀཾ ཙཱིཝརརཛྫུནྟི.

ཏེན ཁོ པན སམཡེན བྷིཀྑཱུ ཙཱིཝརཾ སིབྦེཏྭཱ ཏཐེཝ ཀཐིནཾ ཨུཛ྄ཛྷིཏྭཱ པཀྐམནྟི, ཨུནྡཱུརེཧིཔི ཨུཔཙིཀཱཧིཔི ཁཛྫཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, ཀཐིནཾ སངྒྷརིཏུནྟི. ཀཐིནཾ པརིབྷིཛྫཏི. ཨནུཛཱནཱམི, བྷིཀྑཝེ, གོགྷཾསིཀཱཡ ཀཐིནཾ སངྒྷརིཏུནྟི. ཀཐིནཾ ཝིནིཝེཋིཡཏི. ཨནུཛཱནཱམི, བྷིཀྑཝེ, བནྡྷནརཛྫུནྟི.

ཏེན ཁོ པན སམཡེན བྷིཀྑཱུ ཀུཊྚེཔི ཐམྦྷེཔི ཀཐིནཾ ཨུསྶཱཔེཏྭཱ པཀྐམནྟི, པརིཔཏིཏྭཱ ཀཐིནཾ བྷིཛྫཏི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, བྷིཏྟིཁཱིལེ ཝཱ ནཱགདནྟེ ཝཱ ལགྒེཏུནྟི. ཨཡཾ ཁུདྡཀཝཏྠུཁནྡྷཀེ ཨཱགཏོ པཱལི༹པཱཋོ.

‘‘ཀཐིནནྟི ནིསྶེཎིམྤི, ཏཏྠ ཨཏྠརིཏབྦཀཊསཱརཀཀིལཉྫཱནཾ ཨཉྙཏརམྤི. ཀཐིནརཛྫུནྟི ཡཱཡ དུཔཊྚཙཱིཝརཾ སིབྦནྟཱ ཀཐིནེ ཙཱིཝརཾ ཝིབནྡྷནྟི. ཀཐིནཾ ནཔྤཧོཏཱིཏི དཱིགྷསྶ བྷིཀྑུནོ པམཱཎེན ཀཏཾ ཀཐིནཾ ཨིཏྟརསྶ བྷིཀྑུནོ ཙཱིཝརཾ པཏྠརིཡམཱནཾ ནཔྤཧོཏི, ཨནྟོཡེཝ ཧོཏི, དཎྜཀེ ན པཱཔུཎཱཏཱིཏི ཨཏྠོ. དཎྜཀཐིནནྟི ཏསྶ མཛ྄ཛྷེ ཨིཏྟརསྶ བྷིཀྑུནོ པམཱཎེན ཨཉྙཾ ནིསྶེཎིཾ བནྡྷིཏུཾ ཨནུཛཱནཱམཱིཏི ཨཏྠོ. བིདལཀནྟི དཎྜཀཐིནཔྤམཱཎེན ཀཊསཱརཀསྶ པརིཡནྟེ པཊིསཾཧརིཏྭཱ དུགུཎཀརཎཾ. སལཱཀནྟི དུཔཊྚཙཱིཝརསྶ ཨནྟརེ པཝེསནསལཱཀཾ. ཝིནནྡྷནརཛྫུནྟི མཧཱནིསྶེཎིཡཱ སདྡྷིཾ ཁུདྡཀནིསྶེཎིཾ ཝིནནྡྷིཏུཾ རཛྫུཾ. ཝིནནྡྷནསུཏྟཀནྟི ཁུདྡཀནིསྶེཎིཡཱ ཙཱིཝརཾ ཝིནནྡྷིཏུཾ སུཏྟཀཾ. ཝིནནྡྷིཏྭཱ ཙཱིཝརཾ སིབྦིཏུནྟི ཏེན སུཏྟཀེན ཏཏྠ ཙཱིཝརཾ ཝིནནྡྷིཏྭཱ ¶ སིབྦེཏུཾ. ཝིསམཱ ཧོནྟཱིཏི ཀཱཙི ཁུདྡཀཱ ཧོནྟི, ཀཱཙི མཧནྟཱ. ཀལི༹མྦྷཀནྟི པམཱཎསཉྙཱཀརཎཾ ཡཾ ཀིཉྩི ཏཱལཔཎྞཱདིཾ. མོགྷསུཏྟཀནྟི ཝཌྜྷཀཱིནཾ དཱརཱུསུ ཀཱལ༹སུཏྟེན ཝིཡ ཧལིདྡིསུཏྟེན སཉྙཱཀརཎཾ. ཨངྒུལིཡཱ པཊིགྒཎྷནྟཱིཏི སཱུཙིམུཁཾ ཨངྒུལིཡཱ པཊིཙྪནྟི. པཊིགྒཧནྟི ཨངྒུལིཀོསཀཾ. ཨཱཝེསནཝིཏྠཀཾ ནཱམ ཡཾ ཀིཉྩི པཱཏིཙངྐོཊཀཱདི. ཨུཙྩཝཏྠུཀནྟི པཾསུཾ ཨཱཀིརིཏྭཱ ཨུཙྩཝཏྠུཀཾ ཀཱཏུཾ ཨནུཛཱནཱམཱིཏི ཨཏྠོ. ཨོགུམྥེཏྭཱ ཨུལླིཏྟཱཝལིཏྟཾ ཀཱཏུནྟི ཚདནཾ ཨོདྷུནིཏྭཱ གྷནདཎྜཀཾ ཀཏྭཱ ཨནྟོ ཙེཝ བཧི ཙ མཏྟིཀཱཡ ལིམྤིཏུནྟི ཨཏྠོ. གོགྷཾསིཀཱཡཱཏི ཝེལུ༹ཾ ཝཱ རུཀྑདཎྜཀཾ ¶ ཝཱ ཨནྟོ ཀཏྭཱ ཏེན སདྡྷིཾ སཾཧརིཏུནྟི ཨཏྠོ. བནྡྷནརཛྫུནྟི ཏཐཱ སཾཧརིཏསྶ བནྡྷནརཛྫུ’’ནྟི ཨཡཾ ཨཊྛཀཐཱཔཱཋོ (ཙཱུལ༹ཝ. ཨཊྛ. ༢༥༦).

‘‘ཨནུཝཱཏཾ པརིབྷཎྜནྟི ཀིལཉྫཱདཱིསུ ཀརོཏཱིཏི གཎྛིཔདེསུ ཝུཏྟཾ. བིདལཀནྟི དུགུཎཀརཎསངྑཱཏསྶ ཀིརིཡཱཝིསེསསྶ ཨདྷིཝཙནཾ. ཀསྶ དུགུཎཀརཎཾ? ཡེན ཀིལཉྫཱདིནཱ མཧནྟཾ ཀཐིནཾ ཨཏྠཏཾ, ཏསྶ. ཏཉྷི དཎྜཀཐིནཔྤམཱཎེན པརིཡནྟེ སཾཧརིཏྭཱ དུགུཎཾ ཀཱཏབྦཾ. པཊིགྒཧནྟི ཨངྒུལིཀཉྩུཀཾ. པཱཏི ནཱམ པཊིགྒཧསཎྛཱནེན ཀཏོ བྷཱཛནཝིསེསོ. ན སམྨཏཱིཏི ནཔྤཧོཏི. ནཱིཙཝཏྠུཀཾ ཙིནིཏུནྟི བཧིཀུཊྚསྶ སམནྟཏོ ནཱིཙཝཏྠུཀཾ ཀཏྭཱ ཙིནིཏུ’’ནྟི སཱརཏྠདཱིཔནིཡཾ (སཱརཏྠ. ཊཱི. ཙཱུལ༹ཝགྒ ༣.༢༦༠-༢༦༢).

‘‘ནིསྶེཎིམྤཱིཏི ཙཏཱུཧི དཎྜེཧི ཙཱིཝརཔྤམཱཎེན ཨཱཡཏཙཏུརསྶཾ ཀཏྭཱ བདྡྷཔཊལམྤི. ཨེཏྠ ཧི ཙཱིཝརཀོཊིཡོ སམཀཾ བནྡྷིཏྭཱ ཙཱིཝརཾ ཡཐཱསུཁཾ སིབྦནྟི. ཏཏྠ ཨཏྠརིཏབྦནྟི ཏསྶཱ ནིསྶེཎིཡཱ ཨུཔརི ཙཱིཝརསྶ ཨུཔཏྠམྦྷནཏྠཱཡ ཨཏྠརིཏབྦཾ. ཀཐིནསངྑཱཏཱཡ ནིསྶེཎིཡཱ ཙཱིཝརསྶ བནྡྷནཀརཛྫུ ཀཐིནརཛྫཱུཏི ¶ མཛ྄ཛྷིམཔདལོཔཱི སམཱསོཏི ཨཱཧ ‘‘ཡཱཡཱ’’ཏིཨཱདི. ཏཏྠ ཡསྨཱ དྭིནྣཾ པཊལཱནཾ ཨེཀསྨིཾ ཨདྷིཀེ ཛཱཏེ ཏཏྠ ཝལིཡོ ཧོནྟི, ཏསྨཱ དུཔཊྚཙཱིཝརསྶ པཊལདྭཡམྤི སམཀཾ ཀཏྭཱ བནྡྷནཀརཛྫུ ཀཐིནརཛྫཱུཏི ཝེདིཏབྦཾ. པཱལི༹ཡཾ (ཙཱུལ༹ཝ. ༢༥༦) ཀཐིནསྶ ཨནྟོ ཛཱིརཏཱིཏི ཀཐིནེ བདྡྷསྶ ཙཱིཝརསྶ པརིཡནྟོ ཛཱིརཏཱི’’ཏི ཝིམཏིཝིནོདནིཡཾ ཝུཏྟཾ.

‘‘བིདལཀཾ ནཱམ དིགུཎཀརཎསངྑཱཏསྶ ཀིརིཡཱཝིསེསསྶ ཨདྷིཝཙནཾ. ཀསྶ དིགུཎཀརཎཾ? ཡེན ཀིལཉྫཱདིནཱ མཧནྟཾ ཀཐིནཾ ཨཏྠཏཾ, ཏསྶ. ཏཉྷི དཎྜཀཐིནཔྤམཱཎེན པརིཡནྟེ སཾཧརིཏྭཱ དིགུཎཾ ཀཱཏབྦཾ, ཨཉྙཐཱ ཁུདྡཀཙཱིཝརསྶ ཨནུཝཱཏཔརིབྷཎྜཱདིཝིདྷཱནཀརཎེ ཧཏྠསྶ ཨོཀཱསོ ན ཧོཏི. སལཱཀཱཡ སཏི དྭིནྣཾ ཙཱིཝརཱནཾ ཨཉྙཏརཾ ཉཏྭཱ སིབྦིཏཱསིབྦིཏཾ སུཁཾ པཉྙཱཡཏི. དཎྜཀཐིནེ ཀཏེ ན བཧཱུཧི སཧཱཡེཧི པཡོཛནཾ. ‘ཨསཾཀུཊིཏྭཱ ཙཱིཝརཾ སམཾ ཧོཏི, ཀོཎཱཔི སམཱ ཧོནྟཱི’ཏི ལིཁིཏཾ, ‘ཧལིདྡིསུཏྟེན སཉྙཱཀརཎ’ནྟི ཝུཏྟཏྟཱ ‘ཧལིདྡིསུཏྟེན ཙཱིཝརཾ སིབྦེཏུམྤི ཝཊྚཏཱི’ཏི སིདྡྷཾ. ཏཏྠ ཧི ཀེཙི ཨཀཔྤིཡསཉྙིནོ. པཊིགྒཧོ ནཱམ ཨངྒུལིཀོསོ. པཱཏཱིཏི པཊིགྒཧསཎྛཱནཾ. པཊིགྒཧཐཝིཀནྟི ¶ ཨངྒུལིཀོསཐཝིཀ’’ནྟི ཝཛིརབུདྡྷིཊཱིཀཱཡཾ (ཝཛིར. ཊཱི. ཙཱུལ༹ཝགྒ ༢༥༦) ཨཱགཏཾ.

གཧཔཏིཙཱིཝརཱདིཀཐཱ

གཧཔཏིཙཱིཝརཱདིཀཐཱཡཾ ‘‘ཨནུཛཱནཱམི, བྷིཀྑཝེ, གཧཔཏིཙཱིཝརཾ, ཡོ ཨིཙྪཏི, པཾསུཀཱུལིཀོ ཧོཏུ, ཡོ ཨིཙྪཏི, གཧཔཏིཙཱིཝརཾ སཱདིཡཏུ, ཨིཏརཱིཏརེནཔཱཧཾ, བྷིཀྑཝེ, སནྟུཊྛིཾ ཝཎྞེམཱི’’ཏི (མཧཱཝ. ༣༣༧) ཝཙནཏོ ཨསམཱདིནྣདྷུཏངྒོ ཡོ བྷིཀྑུ པཾསུཀཱུལཾ དྷཱརེཏུཾ ཨིཙྪཏི, ཏེན པཾསུཀཱུལིཀེན བྷཝིཏབྦཾ ¶ . ཡོ པན གིཧཱིཧི དིནྣཾ གཧཔཏིཙཱིཝརཾ སཱདིཡིཏུཾ ཨིཙྪཏི, ཏེན གཧཔཏིཙཱིཝརསཱདིཡཀེན བྷཝིཏབྦཾ. སམཱདིནྣདྷུཏངྒོ པན བྷིཀྑུ ‘‘གཧཔཏིཙཱིཝརཾ པཊིཀྑིཔཱམི, པཾསུཀཱུལིཀངྒཾ སམཱདིཡཱམཱི’’ཏི ཨདྷིཊྛཧནཏོ གཧཔཏིཙཱིཝརཾ སཱདིཡིཏུཾ ན ཝཊྚཏི. གཧཔཏིཙཱིཝརནྟི གཧཔཏཱིཧི དིནྣཾ ཙཱིཝརཾ. ཨིཏརཱིཏརེནཔཱིཏི ཨཔྤགྒྷེནཔི མཧགྒྷེནཔི ཡེན ཀེནཙཱིཏི ཨཏྠོ.

‘‘ཨིཏརཱིཏརེནཱཏི ཨིཏརེན ཨིཏརེན. ཨིཏར-སདྡོ པན ཨནིཡམཝཙནོ དྭིཀྑཏྟུཾ ཝུཙྩམཱནོ ཡཾཀིཉྩི-སདྡེཧི སམཱནཏྠོ ཧོཏཱིཏི ཝུཏྟཾ ཨཔྤགྒྷེནཔི མཧགྒྷེནཔི ཡེན ཀེནཙཱི’’ཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༣༣༧), ‘‘ཨནུཛཱནཱམི, བྷིཀྑཝེ, པཱཝཱརཾ, ཨནུཛཱནཱམི, བྷིཀྑཝེ, ཀོསེཡྻཔཱཝཱརཾ, ཨནུཛཱནཱམི, བྷིཀྑཝེ, ཀོཛཝ’’ནྟི (མཧཱཝ. ༣༣༧) ཝཙནཏོ པཱཝཱརཱདཱིནིཔི སམྤཊིཙྪིཏུཾ ཝཊྚཏི. ཏཏྠ པཱཝཱརོཏི སལོམཀོ ཀཔྤཱསཱདིབྷེདོ. ཨནུཛཱནཱམི, བྷིཀྑཝེ, ཀོཛཝནྟི ཨེཏྠ པཀཏིཀོཛཝམེཝ ཝཊྚཏི, མཧཱཔིཊྛིཡཀོཛཝཾ ན ཝཊྚཏི. ཀོཛཝནྟི ཨུཎྞཱམཡོ པཱཝཱརསདིསོ. ‘‘མཧཱཔིཊྛི ཀོཛཝནྟི ཧཏྠིཔིཊྛཱིསུ ཨཏྠརིཏབྦཏཱཡ ‘མཧཱཔིཊྛིཡ’ནྟི ལདྡྷསམཉྙཾ ཙཏུརངྒུལཔུཔྥཾ ཀོཛཝ’’ནྟི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༣༣༧) ཝུཏྟཾ. ཝིམཏིཝིནོདནིཡམྤི (ཝི. ཝི. ཊཱི. མཧཱཝགྒ ༢.༣༣༧) ‘‘མཧཱཔིཊྛིཡཀོཛཝནྟི ཧཏྠིཔིཊྛིཡཾ ཨཏྠརིཏབྦཏཱཡ ‘མཧཱཔིཊྛིཡ’ནྟི ལདྡྷསམཉྙཾ ཨུཎྞཱམཡཏྠརཎ’’ནྟི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༣༣༧) པན ‘‘མཧཱཔིཊྛིཡཀོཛཝཾ ནཱམ ཨཏིརེཀཙཏུརངྒུལཔུཔྥཾ ཀིརཱ’’ཏི ཝུཏྟཾ. ‘‘ཨནུཛཱནཱམི, བྷིཀྑཝེ, ཀམྦལ’’ནྟི (མཧཱཝ. ༣༣༨) ཝཙནཏོ ཨཌྜྷཀཱསིཡཱདཱིནི མཧགྒྷཱནིཔི ཀམྦལཱནི ཝཊྚནྟི ¶ . ཨཌྜྷཀཱསིཡནྟི ཨེཏྠ ཀཱསཱིཏི སཧསྶཾ ཝུཙྩཏི, ཏཾཨགྒྷནཀོ ཀཱསིཡོ. ཨཡཾ པན པཉྩ སཏཱནི ཨགྒྷཏི, ཏསྨཱ ཨཌྜྷཀཱསིཡོཏི ཝུཏྟོ.

ཚཙཱིཝརཀཐཱ

ཚཙཱིཝརཀཐཱཡཾ ¶ ‘‘ཨནུཛཱནཱམི, བྷིཀྑཝེ, ཚ ཙཱིཝརཱནི ཁོམཾ ཀཔྤཱསིཀཾ ཀོསེཡྻཾ ཀམྦལཾ སཱཎཾ བྷངྒ’’ནྟི (མཧཱཝ. ༣༣༩) ཝཙནཏོ ཁོམཱདཱིནི ཚ ཙཱིཝརཱནི དུཀཱུལཱདཱིནི ཚ ཨནུལོམཙཱིཝརཱནི ཙ ཝཊྚནྟི. ཏཏྠ ‘‘ཁོམནྟི ཁོམསུཏྟེཧི ཝཱཡིཏཾ ཁོམཔཊྚཙཱིཝརཾ. ཀཔྤཱསིཀནྟི ཀཔྤཱསཏོ ནིབྦཏྟསུཏྟེཧི ཝཱཡིཏཾ. ཀོསེཡྻནྟི ཀོསཀཱརཀཔཱཎཀེཧི ནིབྦཏྟསུཏྟེཧི ཝཱཡིཏཾ. ཀམྦལནྟི ཨུཎྞཱམཡཙཱིཝརཾ. སཱཎནྟི སཱཎསུཏྟེཧི ཀཏཙཱིཝརཾ. བྷངྒནྟི ཁོམསུཏྟཱདཱིནི སབྦཱནི, ཨེཀཙྩཱནི ཝཱ མིསྶེཏྭཱ ཀཏཙཱིཝརཾ. བྷངྒམྤི ཝཱཀམཡམེཝཱཏི ཀེཙི. དུཀཱུལཾ པཊྚུཎྞཾ སོམཱརཔཊཾ ཙཱིནཔཊཾ ཨིདྡྷིཛཾ དེཝདིནྣནྟི ཨིམཱནི པན ཚ ཙཱིཝརཱནི ཨེཏེསཾཡེཝ ཨནུལོམཱནཱིཏི ཝིསུཾ ན ཝུཏྟཱནི. དུཀཱུལཉྷི སཱཎསྶ ཨནུལོམཾ ཝཱཀམཡཏྟཱ. པཊྚུཎྞདེསེ སཉྫཱཏཝཏྠཾ པཊྚུཎྞཾ. ‘པཊྚུཎྞཀོསེཡྻཝིསེསོ’ཏི ཧི ཨབྷིདྷཱནཀོསེ ཝུཏྟཾ. སོམཱརདེསེ ཙཱིནདེསེ ཙ ཛཱཏཝཏྠཱནི སོམཱརཙཱིནཔཊཱནི. པཊྚུཎྞཱདཱིནི ཏཱིཎི ཀོསེཡྻསྶ ཨནུལོམཱནི པཱཎཀེཧི ཀཏསུཏྟམཡཏྟཱ. ཨིདྡྷིཛཾ ཨེཧིབྷིཀྑཱུནཾ པུཉྙིདྡྷིཡཱ ནིབྦཏྟཙཱིཝརཾ, ཏཾ ཁོམཱདཱིནཾ ཨཉྙཏརཾ ཧོཏཱིཏི ཏེསཾ ཨེཝ ཨནུལོམཾ. དེཝཏཱཧི དིནྣཾ ཙཱིཝརཾ དེཝདིནྣཾ. ཀཔྤརུཀྑེ ནིབྦཏྟཾ ཛཱལིནིཡཱ དེཝཀཉྙཱཡ ཨནུརུདྡྷཏྠེརསྶ དིནྣཝཏྠསདིསཾ, ཏམྤི ཁོམཱདཱིནཾཡེཝ ཨནུལོམཾ ཧོཏི ཏེསུ ཨཉྙཏརབྷཱཝཏོ’’ཏི སཱརཏྠདཱིཔནིཡཾ (སཱརཏྠ. ཊཱི. ༢.༤༦༢-༤༦༣) ཝུཏྟཾ.

ཝིམཏིཝིནོདནིཡཾ (ཝི. ཝི. ཊཱི. ༡.༤༦༣) པན ‘‘ཁོམནྟི ཁོམསུཏྟེཧི ཝཱཡིཏཾ ཁོམཔཊཙཱིཝརཾ, ཏཾ ཝཱཀམཡནྟི ཝདནྟི. ཀཔྤཱསསུཏྟེཧི ཝཱཡིཏཾ ཀཔྤཱསིཀཾ. ཨེཝཾ སེསཱནིཔི. ཀམྦལནྟི ཨེལ༹ཀཱདཱིནཾ ལོམམཡསུཏྟེན ཝཱཡིཏཾ པཊཾ. བྷངྒནྟི ཁོམསུཏྟཱདཱིནི སབྦཱནི, ཨེཀཙྩཱནི ཝཱ མིསྶེཏྭཱ ཝཱཡིཏཾ ཙཱིཝརཾ, བྷངྒམྤི ཝཱཀམཡམེཝཱཏི ཀེཙི ¶ . དུཀཱུལཾ པཊྚུཎྞཾ སོམཱརཔཊཾ ཙཱིནཔཊཾ ཨིདྡྷིཛཾ དེཝདིནྣནྟི ཨིམཱནི ཚ ཙཱིཝརཱནི ཨེཏེསཉྙེཝ ཨནུལོམཱནཱིཏི ཝིསུཾ ན ཝུཏྟཱནི. དུཀཱུལཉྷི སཱཎསྶ ཨནུལོམཾ ཝཱཀམཡཏྟཱ. ‘པཊྚུཎྞཾ ཀོསེཡྻཝིསེསོ’ཏི ཨབྷིདྷཱནཀོསེ ཝུཏྟཾ. སོམཱརདེསེ ཙཱིནདེསེ ཙ ཛཱཏཝཏྠཱནི སོམཱརཙཱིནཔཊཱནི. པཊྚུཎྞཱདཱིནི ཏཱིཎི ¶ ཀོསེཡྻསྶ ཨནུལོམཱནི པཱཎཀེཧི ཀཏསུཏྟམཡཏྟཱ. ཨིདྡྷིཛནྟི ཨེཧིབྷིཀྑཱུནཾ པུཉྙིདྡྷིཡཱ ནིབྦཏྟཙཱིཝརཾ, ཀཔྤརུཀྑེཧི ནིབྦཏྟཾ, དེཝདིནྣཉྩ ཁོམཱདཱིནཾ ཨཉྙཏརཾ ཧོཏཱིཏི ཏེསཾ སབྦེསཾ ཨནུལོམཱནཱི’’ཏི ཝུཏྟཾ.

རཛནཱདིཀཐཱ

རཛནཱདིཀཐཱཡཾ ‘‘ཨནུཛཱནཱམི, བྷིཀྑཝེ, ཚ རཛནཱནི མཱུལརཛནཾ ཁནྡྷརཛནཾ ཏཙརཛནཾ པཏྟརཛནཾ པུཔྥརཛནཾ ཕལརཛན’’ནྟི ཝཙནཏོ ཨིམེསུ ཚསུ རཛནེསུ ཨེཀཀེན ཙཱིཝརཾ རཛིཏབྦཾ, ན ཚཀཎེན ཝཱ པཎྜུམཏྟིཀཱཡ ཝཱ རཛིཏབྦཾ. ཏཱཡ རཛིཏཙཱིཝརཾ དུབྦཎྞཾ ཧོཏི. ཚརཛནཱནཾ སརཱུཔཾ ཧེཊྛཱ པརིཀྑཱརཀཐཱཡཾ ཝུཏྟམེཝ. ཏཏྠ ཚཀཎེནཱཏི གོམཡེན. པཎྜུམཏྟིཀཱཡཱཏི ཏམྦམཏྟིཀཱཡ. ‘‘ཨནུཛཱནཱམི, བྷིཀྑཝེ, རཛནཾ པཙིཏུཾ ཙུལླཾ རཛནཀུམྦྷི’’ནྟི (མཧཱཝ. ༣༤༤) ཝཙནཏོ སཱིཏུདཀཱཡ ཙཱིཝརཾ ན རཛིཏབྦཾ. ཏཱཡ ཧི རཛིཏཙཱིཝརཾ དུགྒནྡྷཾ ཧོཏི. ཏཏྠ སཱིཏུདཀཱཏི ཨཔཀྐརཛནཾ ཝུཙྩཏི. ‘‘ཨནུཛཱནཱམི, བྷིཀྑཝེ, ཨུཏྟརཱལུ༹མྤཾ བནྡྷིཏུ’’ནྟི ཝཙནཏོ ཨུཏྟརཱལུ༹མྤཾ བནྡྷིཏུཾ ཝཊྚཏི. ཏཏྠ ཨུཏྟརཱལུ༹མྤནྟི ཝཊྚཱདྷཱརཀཾ, རཛནཀུམྦྷིཡཱ མཛ྄ཛྷེ ཋཔེཏྭཱ ཏཾ ཨཱདྷཱརཀཾ པརིཀྑིཔིཏྭཱ རཛནཾ པཀྑིཔིཏུཾ ཨནུཛཱནཱམཱིཏི ཨཏྠོ. ཨེཝཉྷི ཀཏེ རཛནཾ ན ཨུཏྟརཏི. ཏཏྠ ‘‘རཛནཀུམྦྷིཡཱ མཛ྄ཛྷེ ཋཔེཏྭཱཏི ཨནྟོརཛནཀུམྦྷིཡཱ མཛ྄ཛྷེ ཋཔེཏྭཱ. ཨེཝཾ ཝཊྚཱདྷཱརཀེ ཨནྟོརཛནཀུམྦྷིཡཱ པཀྑིཏྟེ མཛ྄ཛྷེ ཨུདཀཾ ཏིཊྛཏི, ཝཊྚཱདྷཱརཀཏོ བཧི སམནྟཱ ཨནྟོཀུམྦྷིཡཾ རཛནཙྪལླི. པཀྑིཔིཏུནྟི ¶ རཛནཙྪལླིཾ པཀྑིཔིཏུ’’ནྟི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༣༤༤) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༣༤༤) པན ‘‘ཨེཝཉྷི ཀཏེཏི ཝཊྚཱདྷཱརསྶ ཨནྟོ རཛནོདཀཾ, བཧི ཚལླིཀཉྩ ཀཏྭཱ ཝིཡོཛནེ ཀཏེ. ན ཨུཏྟརཏཱིཏི ཀེཝལཾ ཨུདཀཏོ ཕེཎུཊྛཱནཱབྷཱཝཱ ན ཨུཏྟརཏཱི’’ཏི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༣༤༤) པན ‘‘གོམཡེ ཨཱཔཏྟི ནཏྠི, ཝིརཱུཔཏྟཱ ཝཱརིཏཾ. ཀུངྐུམཔུཔྥཾ ན ཝཊྚཏཱིཏི ཝདནྟཱི’’ཏི ཝུཏྟཾ.

‘‘ཨནུཛཱནཱམི, བྷིཀྑཝེ, ཨུདཀེ ཝཱ ནཁཔིཊྛིཀཱཡ ཝཱ ཐེཝཀཾ དཱཏུ’’ནྟི (མཧཱཝ. ༣༤༤) ཝཙནཏོ ཏཐཱ ཀཏྭཱ རཛནསྶ པཀྐཱཔཀྐབྷཱཝོ ཛཱནིཏབྦོ. ཏཏྠ ཨུདཀེ ཝཱ ནཁཔིཊྛིཀཱཡ ཝཱཏི སཙེ པརིཔཀྐཾ ཧོཏི, ཨུདཀཔཱཏིཡཱ དིནྣོ ཐེཝོ སཧསཱ ན ཝིསརཏི, ནཁཔིཊྛིཡམྤི ཨཝིསརནྟོ ཏིཊྛཏི. ‘‘ཨནུཛཱནཱམི, བྷིཀྑཝེ, རཛནུལུ༹ངྐཾ དཎྜཀཐཱལཀ’’ནྟི (མཧཱཝ. ༣༤༤) ཝཙནཏོ ¶ རཛནསྶ ཨོལོཀནཀཱལེ ཀུམྦྷིཡཱ རཀྑཎཏྠཾ ཨུལུ༹ངྐདཎྜཀཐཱལིཀཱནི ཨིཙྪིཏབྦཱནི. ཏཏྠ རཛནུལུ༹ངྐནྟི རཛནཨུལུ༹ངྐཾ. དཎྜཀཐཱལཀནྟི དཎྜམེཝ དཎྜཀཾ. ‘‘ཨནུཛཱནཱམི, བྷིཀྑཝེ, རཛནཀོལམྦཾ རཛནགྷཊ’’ནྟི (མཧཱཝ. ༣༤༤) ཝཙནཏོ ཏཱནིཔི ཨིཙྪིཏབྦཱནི. ཏཏྠ རཛནཀོལམྦནྟི རཛནཀུཎྜཾ. ཏཏྠ རཛནཀུཎྜནྟི པཀྐརཛནཊྛཔནཀཾ མཧཱགྷཊཾ. ‘‘ཨནུཛཱནཱམི, བྷིཀྑཝེ, རཛནདོཎིཀ’’ནྟི (མཧཱཝ. ༣༤༤) ཝཙནཏོ པཱཏིཡམྤི པཏྟེ ཙཱིཝརེ མདྡནྟེ ཙཱིཝརསྶ པརིབྷིཛྫནཏོ ཙཱིཝརརཀྑཎཏྠཾ རཛནདོཎིཀཱ ཨིཙྪིཏབྦཱ. ‘‘ཨནུཛཱནཱམི, བྷིཀྑཝེ, ཏིཎསནྠརཀ’’ནྟི (མཧཱཝ. ༣༤༤) ཝཙནཏོ ཚམཱཡ ཙཱིཝརེ པཏྠརིཡམཱནེ ཙཱིཝརསྶ པཾསུཀིཏཏྟཱ ཏཏོ རཀྑཎཏྠཾ ཏིཎསནྠརཾ ཀཱཏབྦཾ. ‘‘ཨནུཛཱནཱམི, བྷིཀྑཝེ, ཙཱིཝརཝཾསཾ ཙཱིཝརརཛྫུ’’ནྟི (མཧཱཝ. ༣༤༤) ཝཙནཏོ ཏིཎསནྠཱརཀེ ཨུཔཙིཀཱདཱིཧི ཁཛྫམཱནེ ཙཱིཝརཝཾསེ ཝཱ ཙཱིཝརརཛྫུཡཱ ¶ ཝཱ ཙཱིཝརཾ པཏྠརིཏབྦཾ མཛ྄ཛྷེན ཙཱིཝརེ ལགྒིཏེ རཛནསྶ ཨུབྷཏོ གལི༹ཏཏྟཱ.

‘‘ཨནུཛཱནཱམི, བྷིཀྑཝེ, ཀཎྞེ བནྡྷིཏུ’’ནྟི (མཧཱཝ. ༣༤༤) ཝཙནཏོ ཀཎྞེ བནྡྷིཏབྦཾ ཙཱིཝརསྶ ཀཎྞེ བནྡྷིཡམཱནེ ཀཎྞསྶ ཛིཎྞཏྟཱ. ‘‘ཨནུཛཱནཱམི, བྷིཀྑཝེ, ཀཎྞསུཏྟཀ’’ནྟི (མཧཱཝ. ༣༤༤) ཝཙནཏོ ཀཎྞསུཏྟཀེན བནྡྷིཏབྦཾ ཨེཝཾ བནྡྷནྟེ རཛནསྶ ཨེཀཏོ གལི༹ཏཏྟཱ. ‘‘ཨནུཛཱནཱམི, བྷིཀྑཝེ, སམྤརིཝཏྟཀཾ སམྤརིཝཏྟཀཾ རཛེཏུཾ, ན ཙ ཨཙྪིནྣེ ཐེཝེ པཀྐམིཏུ’’ནྟི (མཧཱཝ. ༣༤༤) ཝཙནཏོ ཏཐཱ རཛིཏབྦཾ. ཡཱཝ རཛནབིནྡུ གལི༹ཏཾ ན ཚིཛྫཏི, ཏཱཝ ན ཨཉྙཏྲ གནྟབྦཾ. ‘‘ཨནུཛཱནཱམི, བྷིཀྑཝེ, ཨུདཀེ ཨོསཱརེཏུ’’ནྟི (མཧཱཝ. ༣༤༤) ཝཙནཏོ པཏྠིནྣཾ ཙཱིཝརཾ ཨུདཀེ ཨོསཱརེཏབྦཾ. ཏཏྠ པཏྠིནྣནྟི ཨཏིརཛིཏཏྟཱ ཐདྡྷཾ. ཨུདཀེ ཨོསཱརེཏུནྟི ཨུདཀེ པཀྑིཔིཏྭཱ ཋཔེཏུཾ. རཛནེ པན ནིཀྑནྟེ ཏཾ ཨུདཀཾ ཚཌྜེཏྭཱ ཙཱིཝརཾ མདྡིཏབྦཾ. ‘‘ཨནུཛཱནཱམི, བྷིཀྑཝེ, པཱཎིནཱ ཨཱཀོཊེཏུ’’ནྟི (མཧཱཝ. ༣༤༤) ཝཙནཏོ ཕརུསཾ ཙཱིཝརཾ པཱཎིནཱ ཨཱཀོཊེཏབྦཾ. ‘‘ན, བྷིཀྑཝེ, ཨཙྪིནྣཀཱནི ཙཱིཝརཱནི དྷཱརེཏབྦཱནི, ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༣༤༤) ཝཙནཏོ ཨཙྪིནྣཀཱནི ཙཱིཝརཱནི དནྟཀཱསཱཝཱནི ན དྷཱརེཏབྦཱནི. ཏཏྠ དནྟཀཱསཱཝཱནཱིཏི ཨེཀཾ ཝཱ དྭེ ཝཱ ཝཱརེ རཛིཏྭཱ དནྟཝཎྞཱནི དྷཱརེནྟི.

ཨཏིརེཀཙཱིཝརཀཐཱ

ཨཏིརེཀཙཱིཝརཀཐཱཡཾ ¶ ‘‘ན, བྷིཀྑཝེ, ཨཏིརེཀཙཱིཝརཾ དྷཱརེཏབྦཾ, ཡོ དྷཱརེཡྻ, ཡཐཱདྷམྨོ ཀཱརེཏབྦོ’’ཏི (མཧཱཝ. ༣༤༧) ཝཙནཏོ ནིཊྛིཏཙཱིཝརསྨིཾ ཨུབྦྷཏསྨིཾ ཀཐིནེ དསཱཧཏོ པརཾ ཨཏིརེཀཙཱིཝརཾ དྷཱརེནྟསྶ ནིསྶགྒིཡཾ པཱཙིཏྟིཡཾ. ‘‘ཨནུཛཱནཱམི, བྷིཀྑཝེ, དསཱཧཔརམཾ ཨཏིརེཀཙཱིཝརཾ དྷཱརེཏུ’’ནྟི (མཧཱཝ. ༣༤༧) ཝཙནཏོ ཨུབྦྷཏེཔི ཀཐིནེ དསཱཧབྦྷནྟརེ ¶ དྷཱརེནྟསྶ ཨཏྠཏཀཐིནཱནཾ ཨནུབྦྷཏེཔི ཀཐིནེ པཉྩམཱསབྦྷནྟརེ ཏཏོ པརམྤི དསཱཧབྦྷནྟརེ ཨནཏྠཏཀཐིནཱནམྤི དསཱཧབྦྷནྟརེ ཨཏིརེཀཙཱིཝརཾ ཨནཱཔཏྟི. ‘‘ཨནུཛཱནཱམི, བྷིཀྑཝེ, ཨཏིརེཀཙཱིཝརཾ ཝིཀཔྤེཏུ’’ནྟི (མཧཱཝ. ༣༤༧) ཝཙནཏོ དསཱཧཏོ པརཾ ཝིཀཔྤེཏྭཱ ཨཏིརེཀཙཱིཝརཾ དྷཱརེཏུཾ ཝཊྚཏི. ཀིཏྟཀཾ པན ཙཱིཝརཾ ཝིཀཔྤེཏབྦནྟི? ‘‘ཨནུཛཱནཱམི, བྷིཀྑཝེ, ཨཱཡཱམེན ཨཊྛངྒུལཾ སུགཏངྒུལེན ཙཏུརངྒུལཝིཏྠཏཾ པཙྪིམཾ ཙཱིཝརཾ ཝིཀཔྤེཏུ’’ནྟི (མཧཱཝ. ༣༥༨) ཝཙནཏོ སབྦནྟིམེན པརིཙྪེདེན སུགཏངྒུལེན ཨཊྛངྒུལཱཡཱམཾ ཙཏུརངྒུལཝིཏྠཱརཾ ཙཱིཝརཾ ཝིཀཔྤེཏུཾ ཝཊྚཏི. ཏཏྠ སུགཏངྒུལཾ ནཱམ མཛ྄ཛྷིམཔུརིསངྒུལསངྑཱཏེན ཝཌྜྷཀཱིཨངྒུལེན ཏིཝངྒུལཾ ཧོཏི, མནུསྶཱནཾ པཀཏིཨངྒུལེན ཨཌྜྷཔཉྩཀངྒུལཾ, ཏསྨཱ དཱིགྷཏོ ཝཌྜྷཀཱིཧཏྠེན ཨེཀཧཏྠཾ པཀཏིཧཏྠེན དིཡཌྜྷཧཏྠཾ ཝིཏྠཱརཏོ ཝཌྜྷཀཱིཧཏྠེན ཝིདཏྠིཔྤམཱཎཾ པཀཏིཧཏྠེན ཚལ༹ངྒུལཱདྷིཀཝིདཏྠིཔྤམཱཎཾ པཙྪིམཾ ཙཱིཝརཾ ཝིཀཔྤེཏུཾ ཝཊྚཏི, ཏཏོ ཨཱུནཔྤམཱཎཾ ན ཝཊྚཏི, ཨདྷིཀཔྤམཱཎཾ པན ཝཊྚཏཱིཏི དཊྛབྦཾ.

ཨཊྛཝརཀཐཱ

ཨཊྛཝརཀཐཱཡཾ ‘‘ཨནུཛཱནཱམི, བྷིཀྑཝེ, ཝསྶིཀསཱཊིཀཾ ཨཱགནྟུཀབྷཏྟཾ གམིཀབྷཏྟཾ གིལཱནབྷཏྟཾ གིལཱནུཔཊྛཱཀབྷཏྟཾ གིལཱནབྷེསཛྫཾ དྷུཝཡཱགུཾ བྷིཀྑུནིསངྒྷསྶ ཨུདཀསཱཊིཀ’’ནྟི ཝཙནཏོ ཨིམཱནི ཨཊྛ དཱནཱནི སམྤཊིཙྪིཏུཾ ཝཊྚཏི. ཏཏྠ ནིཀྑིཏྟཙཱིཝརཱ ཧུཏྭཱ ཀཱཡཾ ཨོཝསྶནྟཱནཾ བྷིཀྑཱུནཾ ནགྒིཡཾ ཨསུཙི ཛེགུཙྪཾ པཊིཀཱུལཾ ཧོཏི, ཏསྨཱ ཝསྶིཀསཱཊིཀཱ ཨནུཉྙཱཏཱ. ཨཱགནྟུཀོ བྷིཀྑུ ན ཝཱིཐིཀུསལོ ཧོཏི, ན གོཙརཀུསལོ, ཀིལནྟོ པིཎྜཱཡ ཙརཏི, ཏསྨཱ ཨཱགནྟུཀབྷཏྟཾ ཨནུཉྙཱཏཾ, གམིཀོ བྷིཀྑུ ཨཏྟནོ བྷཏྟཾ པརིཡེསམཱནོ སཏྠཱ ཝཱ ཝིཧཱཡིསྶཏི ¶ , ཡཏྠ ཝཱ ཝཱསཾ གནྟུཀཱམོ བྷཝིསྶཏི, ཏཏྠ ཝིཀཱལེན ཨུཔགཙྪིསྶཏི, ཀིལནྟོ ཨདྡྷཱནཾ གམིསྶཏི, ཏསྨཱ གམིཀབྷཏྟཾ. གིལཱནསྶ བྷིཀྑུནོ སཔྤཱཡཱནི བྷོཛནཱནི ཨལབྷནྟསྶ ཨཱབཱདྷོ ཝཱ ཨབྷིཝཌྜྷིསྶཏི, ཀཱལཀིརིཡཱ ཝཱ བྷཝིསྶཏི, ཏསྨཱ གིལཱནབྷཏྟཾ. གིལཱནུཔཊྛཱཀོ བྷིཀྑུ ཨཏྟནོ བྷཏྟཾ པརིཡེསམཱནོ གིལཱནསྶ ཨུསྶཱུརེ བྷཏྟཾ ནཱིཧརིསྶཏི, ཏསྨཱ གིལཱནུཔཊྛཱཀབྷཏྟཾ. གིལཱནསྶ བྷིཀྑུནོ སཔྤཱཡཱནི བྷེསཛྫཱནི ཨལབྷནྟསྶ ¶ ཨཱབཱདྷོ ཝཱ ཨབྷིཝཌྜྷིསྶཏི, ཀཱལཀིརིཡཱ ཝཱ བྷཝིསྶཏི, ཏསྨཱ གིལཱནབྷེསཛྫཾ. ཡསྨཱ བྷགཝཏཱ ཨནྡྷཀཝིནྡེ དསཱནིསཾསེ སམྤསྶམཱནེན ཡཱགུ ཨནུཉྙཱཏཱ, ཏསྨཱ དྷུཝཡཱགུ. ཡསྨཱ མཱཏུགཱམསྶ ནགྒིཡཾ ཨསུཙི ཛེགུཙྪཾ པཊིཀཱུལཾ ཧོཏི, ཏསྨཱ བྷིཀྑུནིསངྒྷསྶ ཨུདཀསཱཊིཀཱ ཨནུཉྙཱཏཱ.

ནིསཱིདནཱདིཀཐཱ

ནིསཱིདནཱདིཀཐཱཡཾ ‘‘ཨནུཛཱནཱམི, བྷིཀྑཝེ, ཀཱཡགུཏྟིཡཱ ཙཱིཝརགུཏྟིཡཱ སེནཱསནགུཏྟིཡཱ ནིསཱིདན’’ནྟི (མཧཱཝ. ༣༥༣) ཝཙནཏོ ཀཱཡཱདཱིནཾ ཨསུཙིམུཙྩནཱདིཏོ གོཔནཏྠཱཡ ནིསཱིདནཾ དྷཱརེཏུཾ ཝཊྚཏི. ཏསྶ ཝིདྷཱནཾ ཧེཊྛཱ ཝུཏྟམེཝ. ‘‘ཨནུཛཱནཱམི, བྷིཀྑཝེ, ཡཱཝམཧནྟཾ པཙྩཏྠརཎཾ ཨཱཀངྑཏི, ཏཱཝམཧནྟཾ པཙྩཏྠརཎཾ ཀཱཏུ’’ནྟི ཝཙནཏོ ཨཏིཁུདྡཀེན ནིསཱིདནེན སེནཱསནསྶ ཨགོཔནཏྟཱ མཧནྟམྤི པཙྩཏྠརཎཾ ཀཱཏུཾ ཝཊྚཏི. ‘‘ཨནུཛཱནཱམི, བྷིཀྑཝེ, ཡསྶ ཀཎྜུ ཝཱ པཱིལ༹ཀཱ ཝཱ ཨསྶཱཝོ ཝཱ ཐུལླཀཙྪུ ཝཱ ཨཱབཱདྷོ, ཀཎྜུཔཊིཙྪཱདི’’ནྟི ཝཙནཏོ ཨཱིདིསེསུ ཨཱབཱདྷེསུ སནྟེསུ ཙཱིཝརཱདིགུཏྟཏྠཱཡ ཀཎྜུཔཊིཙྪཱདི ཝཊྚཏི. ཏཏྠ པམཱཎཾ ཧེཊྛཱ ཝུཏྟམེཝ. ‘‘ཨནུཛཱནཱམི, བྷིཀྑཝེ ¶ , མུཁཔུཉྪནཙོལ༹’’ནྟི (མཧཱཝ. ༣༥༥) ཝཙནཏོ མུཁསོདྷནཏྠཱཡ མུཁཔུཉྪནཙོལ༹ཾ ཝཊྚཏི. ཏམྤི ཧེཊྛཱ ཝུཏྟམེཝ. ‘‘ཨནུཛཱནཱམི, བྷིཀྑཝེ, པརིཀྑཱརཙོལ༹ཀ’’ནྟི ཝཙནཏོ ཏིཙཱིཝརེ པརིཔུཎྞེ པརིསྶཱཝནཐཝིཀཱདཱིཧི ཨཏྠེ སཏི པརིཀྑཱརཙོལ༹ཾ ཝཊྚཏི. ‘‘ཨནུཛཱནཱམི, བྷིཀྑཝེ, ཏིཙཱིཝརཾ ཨདྷིཊྛཱཏུཾ ན ཝིཀཔྤེཏུཾ, ཝསྶིཀསཱཊིཀཾ ཝསྶཱནཾ ཙཱཏུམཱསཾ ཨདྷིཊྛཱཏུཾ ཏཏོ པརཾ ཝིཀཔྤེཏུཾ, ནིསཱིདནཾ ཨདྷིཊྛཱཏུཾ ན ཝིཀཔྤེཏུཾ, པཙྩཏྠརཎཾ ཨདྷིཊྛཱཏུཾ ན ཝིཀཔྤེཏུཾ, ཀཎྜུཔཊིཙྪཱདིཾ ཡཱཝ ཨཱབཱདྷཱ ཨདྷིཊྛཱཏུཾ ཏཏོ པརཾ ཝིཀཔྤེཏུཾ, མུཁཔུཉྪནཙོལ༹ཾ ཨདྷིཊྛཱཏུཾ ན ཝིཀཔྤེཏུཾ, པརིཀྑཱརཙོལ༹ཾ ཨདྷིཊྛཱཏུཾ ན ཝིཀཔྤེཏུ’’ནྟི (མཧཱཝ. ༣༥༨) ཝཙནཏོ ཝུཏྟནཡེན ཨདྷིཊྛཱནཉྩ ཝིཀཔྤནཱ ཙ ཀཱཏབྦཱ. ཨཡམེཏྠ སངྑེཔོ, ཝིཏྠཱརོ པན ཧེཊྛཱ ཝུཏྟོཝ.

ཨདྷམྨཀམྨཀཐཱ

༥༨. ཨདྷམྨཀམྨཀཐཱཡཾ ¶ ན, བྷིཀྑཝེ…པེ… དུཀྐཊསྶཱཏི ཨིདཾ ‘‘ཏེན ཁོ པན སམཡེན ཚབྦགྒིཡཱ བྷིཀྑཱུ སངྒྷམཛ྄ཛྷེ ཨདྷམྨཀམྨཾ ཀརོནྟི. བྷགཝཏོ ཨེཏམཏྠཾ ཨཱརོཙེསུཾ – ན, བྷིཀྑཝེ, ཨདྷམྨཀམྨཾ ཀཱཏབྦཾ, ཡོ ཀརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༥༤) ཨིམཾ ཨུཔོསཐཀྑནྡྷཀེ ཨཱགཏཔཱཋཾ སནྡྷཱཡ ཝུཏྟཾ. ཨནུཛཱནཱམི…པེ… པཊིཀྐོསིཏུནྟི ཏཐེཝ ཨཱགཏཾ ‘‘བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, ཨདྷམྨཀམྨེ ཀཡིརམཱནེ པཊིཀྐོསིཏུ’’ནྟི ཨིམཾ. ཏཏྠ ཀརོནྟིཡེཝཱཏི པཉྙཏྟམྤི སིཀྑཱཔདཾ མདྡིཏྭཱ ཨདྷམྨཀམྨཾ ཀརོནྟིཡེཝཱཏི ཨཏྠོ. ‘‘ཨནུཛཱནཱམི…པེ… པཊིཀྐོསིཏུ’’ནྟི ཨེཝཾ ཨདྷམྨཀམྨེ ཀཡིརམཱནེ སཏི ‘‘པེསལེཧི བྷིཀྑཱུཧི ཏཾ ཨདྷམྨཀམྨཾ ཨཀཏཾ, ཀམྨཾ དུཀྐཊཾ ཀམྨཾ པུན ཀཱཏབྦ’’ནྟི ཨེཝཾ པཊིཀྐོསིཏབྦཾ, ན ཏུཎྷཱིབྷཱཝེན ཁམིཏབྦནྟི ¶ ཨཏྠོ. ཨིཏི ཝཙནཏོཏི ཨིདཾ པན པུབྦཔཱཋཾ གཧེཏྭཱ ཨིཏི ཝཙནཏོ. ཨདྷམྨཀམྨཾ ན ཀཱཏབྦནྟི ཨཔརཔཱཋཾ གཧེཏྭཱ ཨིཏི ཝཙནཏོ ཀཡིརམཱནཉྩ ཨདྷམྨཀམྨཾ བྷིཀྑཱུཧི ནིཝཱརེཏབྦནྟི དྭིདྷཱ ཡོཛནཱ ཀཱཏབྦཱ.

ནིཝཱརེནྟེཧི ཙཱཏིཨཱདི པན ‘‘ཏེན ཁོ པན སམཡེན པེསལཱ བྷིཀྑཱུ ཚབྦགྒིཡེཧི བྷིཀྑཱུཧི ཨདྷམྨཀམྨེ ཀཡིརམཱནེ པཊིཀྐོསནྟི, ཚབྦགྒིཡཱ བྷིཀྑཱུ ལབྷནྟི ཨཱགྷཱཏཾ, ལབྷནྟི ཨཔྤཙྩཡཾ, ཝདྷེན ཏཛྫེནྟི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, དིཊྛིམྤི ཨཱཝིཀཱཏུ’’ནྟི (མཧཱཝ. ༡༥༤) པཱཋཉྩ ‘‘ཏེསཾཡེཝ སནྟིཀེ དིཊྛིཾ ཨཱཝིཀརོནྟི, ཚབྦགྒིཡཱ བྷིཀྑཱུ ལབྷནྟི ཨཱགྷཱཏཾ, ལབྷནྟི ཨཔྤཙྩཡཾ, ཝདྷེན ཏཛྫེནྟི. བྷགཝཏོ ཨེཏམཏྠཾ ཨཱརོཙེསུཾ – ཨནུཛཱནཱམི, བྷིཀྑཝེ, ཙཏཱུཧི པཉྩཧི པཊིཀྐོསིཏུཾ, དྭཱིཧི ཏཱིཧི དིཊྛིཾ ཨཱཝིཀཱཏུཾ, ཨེཀེན ཨདྷིཊྛཱཏུཾ ན མེཏཾ ཁམཏཱི’’ཏི ཨིམེ པཱཋེ སནྡྷཱཡ ཝུཏྟཾ. ཝཙནཏོཏི ཨིདཾ པན པཱལི༹ཡཾ ཏཱིཎི སམྤདཱནཱནི གཧེཏྭཱ ཏཱིཧི ཀིརིཡཱཔདེཧི ཝིསུཾ ཝིསུཾ ཡོཛེཏབྦཾ. སབྦཉྩེཏཾ ཨནུཔདྡཝཏྠཱཡ ཝུཏྟཾ, ན ཨཱཔཏྟིསབྦྷཱཝཏོཏི ཡོཛནཱ. ཀཐཾ ཨནུཔདྡཝསམྦྷཝོཏི? ནིགྒཧཀམྨཾ ཀཱཏུཾ ཨསཀྐུཎེཡྻབྷཱཝཏོ, ཨཉྙསྶ ཨུཔདྡཝསྶ ཙ ནིཝཱརཎཏོ. ཏེན ཝུཏྟཾ ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༡༥༤) ‘‘ཏེསཾ ཨནུཔདྡཝཏྠཱཡཱཏི སངྒྷོ སངྒྷསྶ ཀམྨཾ ན ཀརོཏི, ཨཉྙོཔི ཨུཔདྡཝོ བཧཱུནཾ ཧོཏི, ཏསྨཱ ཝུཏྟ’’ནྟི.

ཨོཀཱསཀཏཀཐཱ

༥༩. ཨོཀཱསཀཏཀཐཱཡཾ ¶ ན, བྷིཀྑཝེ, ཨནོཀཱསཀཏོཏིཨཱདི ‘‘ཏེན ཁོ པན སམཡེན ཚབྦགྒིཡཱ བྷིཀྑཱུ ཨནོཀཱསཀཏཾ ¶ བྷིཀྑུཾ ཨཱཔཏྟིཡཱ ཙོདེནྟི. བྷགཝཏོ ཨེཏམཏྠཾ ཨཱརོཙེསུཾ – ན, བྷིཀྑཝེ, ཨནོཀཱསཀཏོ བྷིཀྑུ ཨཱཔཏྟིཡཱ ཙོདེཏབྦོ, ཡོ ཙོདེཡྻ, ཨཱཔཏྟི དུཀྐཊསྶ. ཨནུཛཱནཱམི, བྷིཀྑཝེ, ཨོཀཱསཾ ཀཱརཱཔེཏྭཱ ཨཱཔཏྟིཡཱ ཙོདེཏུཾ, ཀརོཏུ ཨཱཡསྨཱ ཨོཀཱསཾ, ཨཧཾ ཏཾ ཝཏྟུཀཱམོ’’ཏི (མཧཱཝ. ༡༥༣) ཨིདཾ པཱཋཾ སནྡྷཱཡ ཝུཏྟཾ. ཨདྷིཔྤཱཡེསུ ཙཱཝནཱདྷིཔྤཱཡོཏི, སཱསནཏོ ཙཱཝེཏུཀཱམོ. ཨཀྐོསཱདྷིཔྤཱཡོཏི པརཾ ཨཀྐོསིཏུཀཱམོ པརིབྷཱསིཏུཀཱམོ. ཀམྨཱདྷིཔྤཱཡོཏི ཏཛྫནཱིཡཱདིཀམྨཾ ཀཏྟུཀཱམོ. ཝུཊྛཱནཱདྷིཔྤཱཡོཏི ཨཱཔཏྟིཏོ ཝུཊྛཱཔེཏུཀཱམོ. ཨུཔོསཐཔྤཝཱརཎཊྛཔནཱདྷིཔྤཱཡོཏི ཨུཔོསཐཾ, པཝཱརཎཾ ཝཱ ཋཔེཏུཀཱམོ. ཨནུཝིཛྫནཱདྷིཔྤཱཡོཏི ཨུཔཔརིཀྑིཏུཀཱམོ. དྷམྨཀཐཱདྷིཔྤཱཡོཏི དྷམྨཾ དེསེཏུཀཱམོ. ཨིཏི པརཾ ཙོདེནྟཱནཾ བྷིཀྑཱུནཾ ཨདྷིཔྤཱཡབྷེདོ ཨནེཀཝིདྷོ ཧོཏཱིཏི ཨཏྠོ. པུརིམེསུ ཙཏཱུསུ ཨདྷིཔྤཱཡེསཱུཏི ཙཱཝནཱདྷིཔྤཱཡཨཀྐོསཱདྷིཔྤཱཡཀམྨཱདྷིཔྤཱཡཝུཊྛཱནཱདྷིཔྤཱཡེསུ ཨོཀཱསཾ ཨཀཱརཱཔེནྟསྶ དུཀྐཊཾ. ཀཱརཱཔེཏྭཱཔི སམྨུཁཱ ཙོདེནྟསྶ ཡཐཱནུརཱུཔཾ སངྒྷཱདིསེསཔཱཙིཏྟིཡདུཀྐཊཱནི, ཨསམྨུཁཱ པན དུཀྐཊམེཝཱཏི ཨཡམེཏྠ པིཎྜཏྠོ. སེསཾ སུཝིཉྙེཡྻམེཝ.

‘‘ཋཔནཀྑེཏྟཾ པན ཛཱནིཏབྦ’’ནྟི ཝཏྭཱ ཏཾ དསྶེནྟོ ‘‘སུཎཱཏུ མེ’’ཏིཨཱདིམཱཧ. ཨནུཝིཛྫཀསྶ ཨནུཝིཛྫནཱདྷིཔྤཱཡེན ཝདནྟསྶ ཨོཀཱསཀམྨཾ ནཏྠཱིཏི ཡོཛནཱ. དྷམྨཀཐིཀསྶ ཨནོདིསྶ ཀམྨཾ ཀཐེནྟསྶ ཨོཀཱསཀམྨཾ ནཏྠི. སཙེ པན ཨོདིསྶ ཀཐེཏི, ཨཱཔཏྟི, ཏསྨཱ ཏཾ དསྶེཏྭཱ གནྟབྦནྟི ཡོཛེཏབྦཾ. སེསཾ སུཝིཉྙེཡྻམེཝ.

སདྡྷཱདེཡྻཝིནིཔཱཏནཀཐཱ

༦༠. སདྡྷཱདེཡྻཝིནིཔཱཏནཀཐཱཡཾ ¶ ‘‘མཱཏཱཔིཏརོཏི ཁོ, བྷིཀྑཝེ, ཝདམཱནེ ཀིཾ ཝདེཡྻཱམ. ཨནུཛཱནཱམི, བྷིཀྑཝེ, མཱཏཱཔིཏཱུནཾ དཱཏུཾ, ན ཙ, བྷིཀྑཝེ, སདྡྷཱདེཡྻཾ ཝིནིཔཱཏེཏབྦཾ, ཡོ ཝིནིཔཱཏེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༣༦༡) ཝཙནཏོ དཱཡཀེཧི སདྡྷཱཡ བྷིཀྑུསྶ དིནྣཾ ཝིནིཔཱཏེཏྭཱ གིཧཱིནཾ དཱཏུཾ ན ཝཊྚཏི. ‘‘ན ཙ, བྷིཀྑཝེ, སདྡྷཱདེཡྻནྟི ¶ ཨེཏྠ སེསཉཱཏཱིནཾ དེནྟོ ཝིནིཔཱཏེཏིཡེཝ. མཱཏཱཔིཏརོ པན སཙེ རཛྫེ ཋིཏཱཔི པཏྠཡནྟི, དཱཏབྦ’’ནྟི ཨཊྛཀཐཱཡཾ (མཧཱཝ. ཨཊྛ. ༣༦༡) ཝུཏྟཏྟཱ བྷཱཏུབྷགིནཱིཨཱདཱིནཾ ཉཱཏཀཱནམྤི དཱཏུཾ ན ཝཊྚཏི. ཝུཏྟཉྷི ཨཱཙརིཡདྷམྨསིརིཏྠེརེན ཁུདྡསིཀྑཱཡཾ –

‘‘ན ལབྦྷཾ ཝིནིཔཱཏེཏུཾ, སདྡྷཱདེཡྻཉྩ ཙཱིཝརཾ;

ལབྦྷཾ པིཏཱུནཾ སེསཱནཾ, ཉཱཏཱིནམྤི ན ལབྦྷཏཱི’’ཏི.

ཀཡཝིཀྐཡསམཱཔཏྟིསིཀྑཱཔདཝཎྞནཱཡམྤི ‘‘མཱཏརཾ པན པིཏརཾ ཝཱ ‘ཨིམཾ དེཧཱི’ཏི ཝདཏོ ཝིཉྙཏྟི ན ཧོཏི, ‘ཨིམཾ གཎྷཱཧཱི’ཏི ཝདཏོ སདྡྷཱདེཡྻཝིནིཔཱཏནཾ ན ཧོཏི. ཨཉྙཱཏཀཾ ‘ཨིམཾ དེཧཱི’ཏི ཝདཏོ ཝིཉྙཏྟི ཧོཏི, ‘ཨིམཾ གཎྷཱཧཱི’ཏི ཝདཏོ སདྡྷཱདེཡྻཝིནིཔཱཏནཾ ཧོཏི. ‘ཨིམིནཱ ཨིམཾ དེཧཱི’ཏི ཀཡཝིཀྐཡཾ ཨཱཔཛྫཏོ ནིསྶགྒིཡཾ ཧོཏཱི’’ཏི ཨཊྛཀཐཱཡཾ (པཱརཱ. ཨཊྛ. ༢.༥༩༥) ཝུཏྟཾ. ཏཏྠ ‘‘སེསཉཱཏཀེསུ སདྡྷཱདེཡྻཝིནིཔཱཏསམྦྷཝཏོ ཏདབྷཱཝཊྛཱནམྤི དསྶེཏུཾ ‘མཱཏརཾ པན པིཏརཾ ཝཱ’ཏི ཝུཏྟ’’ནྟི ཝིམཏིཝིནོདནིཡཾ (ཝི. ཝི. ཊཱི. ༡.༥༩༣-༥༩༥) ཝུཏྟཾ.

སནྟརུཏྟརཀཐཱ

༦༡. སནྟརུཏྟརཀཐཱཡཾ ཨནྟར-སདྡོ མཛ྄ཛྷཝཱཙཀོ. ཝསཏི སཱིལེནཱཏི ཝཱསཀོ, ‘‘ཨནྟརེ ཝཱསཀོ ཨནྟརཝཱསཀོ’’ཏི ¶ ཝཏྟབྦེ ‘‘རཱུཔབྷཝོ རཱུཔ’’ནྟིཨཱདཱིསུ ཝིཡ ཨུཏྟརཔདལོཔཱིསམཱསཝསེན ‘‘ཨནྟརོ’’ཏི ཝུཏྟོ. ཨུཏྟརསདྡོ ཨུཔརིཝཱཙཀོ, ཨཱབྷུསོ སཛྫཏཱིཏི ཨཱསངྒོ, ‘‘ཨུཏྟརེ ཨཱསངྒོ ཨུཏྟརཱསངྒོ’’ཏི ཝཏྟབྦེ ཝུཏྟནཡེན ‘‘ཨུཏྟརོ’’ཏི ཝུཏྟོ, ཨནྟརོ ཙ ཨུཏྟརོ ཙ ཨནྟརུཏྟརཱ, སཧ ཨནྟརུཏྟརེཧི ཡོ ཝཏྟཏཱིཏི སནྟརུཏྟརོ, སཧཔུབྦཔདབྷིནྣཱདྷིཀརཎདྭིཔདབཧུབྦཱིཧིསམཱསོ. ཨཐ ཝཱ སཧ ཨནྟརེན ཙ ཨུཏྟརེན ཙ ཡོ ཝཏྟཏཱིཏི སནྟརུཏྟརོ, ཏིཔདབཧུབྦཱིཧིསམཱསོ. སངྒྷཱཊིཾ ཋཔེཏྭཱ ཨནྟརཝཱསཀཨུཏྟརཱསངྒམཏྟདྷརོ ཧུཏྭཱ གཱམོ ན པཝིསིཏབྦོཏི ཨཏྠོ. ‘‘པརིབྦཱཛཀམདཀྑི ཏིདཎྜཀེནཱ’’ཏིཨཱདཱིསུ ཝིཡ ཨིཏྠམྦྷཱུཏལཀྑཎེ ཙེཏཾ ཀརཎཝཙནཾ, ཏསྨཱ ཨནྟརཝཱསཀཾ ཏིམཎྜལཾ པཊིཙྪཱདེནྟེན པརིམཎྜལཾ ནིཝཱསེཏྭཱ ཀཱཡབནྡྷནཾ བནྡྷིཏྭཱ སངྒྷཱཊིཉྩ ཨུཏྟརཱསངྒཉྩ དིགུཎཾ ཀཏྭཱ པཱརུཔིཏྭཱ གཱམོ པཝིསིཏབྦོ.

ཙཱིཝརནིཀྑེཔཀཐཱ

༦༢. ཙཱིཝརནིཀྑེཔཀཐཱཡཾ ¶ སཾཧརཱིཡཏེཏི སངྒྷཱཊི, ཏསྶཱ སངྒྷཱཊིཡཱ, བྷཱཝཡོགེ ཀམྨཏྠེ ཚཊྛཱི. ནིཀྑེཔཱཡཱཏི ཋཔནཱཡ, སངྒྷཱཊིཾ ཨགྒཧེཏྭཱ ཝིཧཱརེ ཋཔེཏྭཱ གམནཱཡ པཉྩ ཀཱརཎཱནི ཧོནྟཱིཏི ཨཏྠོ. གིལཱནོ ཝཱ ཧོཏཱིཏི གཧེཏྭཱ གནྟུཾ ཨསམཏྠོ གིལཱནོ ཝཱ ཧོཏི. ཝསྶིཀསངྐེཏཾ ཝཱ ཧོཏཱིཏི ‘‘ཝསྶིཀཀཱལོ ཨཡ’’ནྟི སངྐེཏཾ ཝཱ ཀཏཾ ཧོཏི. ནདཱིཔཱརགཏཾ ཝཱ ཧོཏཱིཏི ནདིཡཱ པཱརཾ གནྟྭཱ བྷུཉྫིཏབྦཾ ཧོཏི. ཨགྒལ༹གུཏྟིཝིཧཱརོ ཝཱ ཧོཏཱིཏི ཨགྒལ༹ཾ དཏྭཱཔི དཱཏབྦོ སུགུཏྟཝིཧཱརོ ཝཱ ཧོཏི. ཨཏྠཏཀཐིནཾ ཝཱ ཧོཏཱིཏི ཏསྨིཾ ཝིཧཱརེ ཀཐིནཾ ཨཏྠཏཾ ཝཱ ཧོཏི ཨཏྠཏཀཐིནཱནཾ ཨསམཱདཱནཙཱརསམྦྷཝཏོ. སེསཾ སུཝིཉྙེཡྻམེཝ. ཨཱརཉྙིཀསྶ པན ཝིཧཱརོ ན སུགུཏྟོ ཧོཏཱིཏི ¶ ཨཔྤབྷིཀྑུཀཏྟཱ ཙོརཱདཱིནཾ གམནཊྛཱནཏོ ཙ. བྷཎྜུཀྑལིཀཱཡཱཏི ཙཱིཝརཱདིཊྛཔནབྷཎྜུཀྑལིཀཱཡ. སེསཾ སུཝིཉྙེཡྻཾ.

སཏྠཀམྨཝཏྠིཀམྨཀཐཱ

༦༣. སཏྠཀམྨཝཏྠིཀམྨཀཐཱཡཾ སཏྠཀམྨཾ ཝཱ ཝཏྠིཀམྨཾ ཝཱཏི ཨེཏྠ ཡེན ཀེནཙི སཏྠཱདིནཱ ཚིནྡནཱདི སཏྠཀམྨཾ ནཱམ ཧོཏི. ཡེན ཀེནཙི ཙམྨཱདིནཱ ཝཏྠིཔཱིལ༹ནཾ ཝཏྠིཀམྨཾ ནཱམ. ‘‘སམྦཱདྷེ དཧནཀམྨཾ པཊིཀྑེཔཱབྷཱཝཱ ཝཊྚཏཱི’’ཏི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༢༧༩). ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༢༧༩) པན ‘‘ཝཏྠིཔཱིལ༹ནནྟི ཡཐཱ ཝཏྠིགཏཏེལཱདི ཨནྟོསརཱིརེ ཨཱརོཧནྟི, ཨེཝཾ ཧཏྠེན ཝཏྠིམདྡན’’ནྟི ཝུཏྟཾ.

ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༢༧༩) པན ‘‘སམྦཱདྷེཏི ཝཙྩམགྒེ, བྷིཀྑུསྶ བྷིཀྑུནིཡཱ ཙ པསྶཱཝམགྒེཔི ཨནུལོམཏོ དཧནཾ པཊིཀྑེཔཱབྷཱཝཱ ཝཊྚཏི. སཏྠཝཏྠིཀམྨཱནུལོམཏོ ན ཝཊྚཏཱིཏི ཙེ? ན, པཊིཀྑིཏྟཔཊིཀྑེཔཱ, པཊིཀྑིཔིཏབྦསྶ ཏཔྤརམཏཱདཱིཔནཏོ. ཀིཾ ཝུཏྟཾ ཧོཏི? པུབྦེ པཊིཀྑིཏྟམྤི སཏྠཀམྨཾ སམྤིཎྜེཏྭཱ པཙྪཱ ‘ན, བྷིཀྑཝེ…པེ… ཐུལླཙྩཡསྶཱ’ཏི དྭིཀྑཏྟུཾ སཏྠཀམྨསྶ པརིཀྑེཔོ ཀཏོ. ཏེན སམྦཱདྷསྶ སཱམནྟཱ དྭངྒུལཾ པཊིཀྑིཔིཏབྦཾ ནཱམ སཏྠཝཏྠིཀམྨཏོ ཨུདྡྷཾ ནཏྠཱིཏི དསྶེཏི. ཀིཉྩ བྷིཡྻོ – པུབྦེ སམྦཱདྷེཡེཝ སཏྠཀམྨཾ པཊིཀྑིཏྟཾ, པཙྪཱ སམྦཱདྷསྶ སཱམནྟཱ དྭངྒུལམྤི པཊིཀྑིཏྟཾ ¶ , ཏསྨཱ ཏསྶེཝ པཊིཀྑེཔོ, ནེཏརསྶཱཏི སིདྡྷཾ. ཨེཏྠ ‘སཏྠཾ ནཱམ སཏྠཧཱརཀཾ ཝཱསྶ པརིཡེསེཡྻཱ’ཏིཨཱདཱིསུ (པཱརཱ. ༡༦༧) ཝིཡ ཡེན ཚིནྡཏི, ཏཾ སབྦཾ. ཏེན ཝུཏྟཾ ‘ཀཎྚཀེན ཝཱ’ཏིཨཱདི. ཁཱརུདཱནཾ པནེཏྠ བྷིཀྑུནཱིཝིབྷངྒེ པསཱཁེ པམུཁེ ཨནུཉྙཱཏནྟི ཝེདིཏབྦཾ, ཨེཀེ པན ‘སཏྠཀམྨཾ ཝཱ’ཏི ¶ པཱཋཾ ཝིཀཔྤེཏྭཱ ཝཏྠིཀམྨཾ ཀརོནྟི. ཝཏྠཱིཏི ཀིཾ? ཨགྒྷིཀཱ ཝུཙྩཏི, ཏཱཡ ཚིནྡནཾ ཝཏྠིཀམྨཾ ནཱམཱཏི ཙ ཨཏྠཾ ཝཎྞཡནྟི, ཏེ ‘སཏྠཧཱརཀཾ ཝཱསྶ པརིཡེསེཡྻཱ’ཏི ཨིམསྶ པདབྷཱཛནཱིཡཾ དསྶེཏྭཱ པཊིཀྑིཔིཏབྦཱ. ཨཎྜཝུདྡྷཱིཏི ཝཱཏཎྜཀཱ, ཨཱདཱནཝཏྟཱིཏི ཨནཱཧཝཏྟཱི’’ཏི ཝུཏྟཾ. སེསཾ ཨཊྛཀཐཱཡཾ ཝུཏྟནཡེནེཝ ཝེདིཏབྦཾ.

ནཧཱཔིཏཔུབྦཀཐཱ

༦༤. ནཧཱཔིཏཔུབྦཀཐཱཡཾ ནཧཱཔིཏོ པུབྦེཏི ནཧཱཔིཏཔུབྦོ, པུབྦེ ནཧཱཔིཏོ ཧུཏྭཱ ཨིདཱནི བྷིཀྑུབྷཱུཏོཏི ཨཏྠོ. ཏེན ནཧཱཔིཏཔུབྦེན བྷིཀྑུནཱ. ཁུརབྷཎྜནྟི ཁུརཱདིནཧཱཔིཏབྷཎྜཾ, ‘‘ལདྡྷཱཏཔཏྟོ རཱཛཀུམཱརོ’’ཏིཨཱདཱིསུ ཝིཡ ཨུཔལཀྑཎནཡོཡཾ. ‘‘ན, བྷིཀྑཝེ, པབྦཛིཏེན ཨཀཔྤིཡཾ སམཱདཔེཏབྦཾ, ཡོ སམཱདཔེཡྻ, ཨཱཔཏྟི དུཀྐཊསྶ. ན ཙ, བྷིཀྑཝེ, ནཧཱཔིཏཔུབྦེན ཁུརབྷཎྜཾ པརིཧརིཏབྦཾ, ཡོ པརིཧརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༣༠༣) ཙ དྭིདྷཱ པཉྙཏྟི, ཏསྨཱ ནཧཱཔིཏཔུབྦེན ཝཱ ཨནཧཱཔིཏཔུབྦེན ཝཱ པབྦཛིཏེན ནཱམ ཨཀཔྤིཡསམཱདཔནཾ ན ཀཱཏབྦཾ. ནཧཱཔིཏཔུབྦེན པན བྷིཀྑུནཱ ཁུརེན ཨབྷིལཀྑིཏཾ ཁུརབྷཎྜཾ, ཁུརབྷཎྜཁུརཀོསནིསིཏཔཱསཱཎཁུརཐཝིཀཱདཡོ ན པརིཧརིཏབྦཱ ཨེཝ. སེསཾ ཨཊྛཀཐཱཡཾ ཝུཏྟནཡེནེཝ ཝེདིཏབྦཾ. ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༣༠༠) པན ‘‘ན, བྷིཀྑཝེ, པབྦཛིཏེན ཨཀཔྤིཡེ སམཱདཔེཏབྦནྟི ཝུཏྟཏྟཱ ཨནུཔསམྤནྣསྶཔི ན ཀེཝལཾ དསསུ ཨེཝ སིཀྑཱཔདེསུ, ཨཐ ཁོ ཡཾ བྷིཀྑུསྶ ན ཀཔྤཏི, ཏསྨིམྤཱིཏི ཨདྷིཔྤཱཡོ’’ཏི ཝུཏྟཾ.

དསབྷཱགཀཐཱ

༦༥. དསབྷཱགཀཐཱཡཾ སངྒྷིཀཱནཱིཏི སངྒྷསནྟཀཱནི བཱིཛཱནི. པུགྒལིཀཱཡཱཏི པུགྒལསྶ སནྟཀཱཡ བྷཱུམིཡཱ. བྷཱགཾ དཏྭཱཏི ¶ མཱུལབྷཱགསངྑཱཏཾ དསམབྷཱགཾ བྷཱུམིསཱམིཀཱནཾ དཏྭཱ. པརིབྷུཉྫིཏབྦཱནཱིཏི ཏེསཾ བཱིཛཱནཾ ཕལཱནི རོཔཀེཧི པརིབྷུཉྫིཏབྦཱནཱིཏི ཨཏྠོ. སེསཾ སུཝིཉྙེཡྻམེཝ ¶ . ཨིདཾ ཀིར ཛམྦུདཱིཔེ པོརཱཎཀཙཱརིཏྟནྟི ཨཱདིཀཔྤཀཱལེ པཋམཀཔྤིཀཱ མནུསྶཱ བོདྷིསཏྟཾ མཧཱསམྨཏཾ ནཱམ རཱཛཱནཾ ཀཏྭཱ སབྦེཔི ཨཏྟནོ ཨཏྟནོ ཏཎྜུལཕལསཱལིཁེཏྟཏོ པཝཏྟཏཎྜུལཕལཱནི དས ཀོཊྛཱསེ ཀཏྭཱ ཨེཀཾ ཀོཊྛཱསཾ བྷཱུམིསཱམིཀབྷཱུཏསྶ མཧཱསམྨཏརཱཛིནོ དཏྭཱ པརིབྷུཉྫིཾསུ. ཏཏོ པཊྛཱཡ ཛམྦུདཱིཔིཀཱནཾ མནུསྶཱནཾ ཙཱརིཏཏྟཱ ཝུཏྟཾ. ཏེནེཝ སཱརཏྠདཱིཔནཱིནཱམིཀཱཡམྤི ཝིནཡཊཱིཀཱཡཾ (ཝཛིར. ཊཱི. མཧཱཝགྒ ༣༠༤) ‘‘དསབྷཱགཾ དཏྭཱཏི དསམབྷཱགཾ དཏྭཱ. ཏེནེཝཱཧ ‘དས ཀོཊྛཱསེ ཀཏྭཱ ཨེཀོ ཀོཊྛཱསོ བྷཱུམིསཱམིཀཱནཾ དཱཏབྦོ’ཏི’’ ཝུཏྟཾ.

པཱཐེཡྻཀཐཱ

༦༦. པཱཐེཡྻཀཐཱཡཾ ‘‘ཨནུཛཱནཱམི, བྷིཀྑཝེ’’ཏིཨཱདི བྷདྡིཡནགརེ ཨམིཏཔརིབྷོགབྷཱུཏེན མེཎྜཀསེཊྛིནཱ ཨབྷིཡཱཙིཏོ ཧུཏྭཱ ཨནུཉྙཱཏཾ, ཨིདྷ པན པཋམཾ ‘‘ཨནུཛཱནཱམི, བྷིཀྑཝེ, པཉྩ གོརསེ ཁཱིརཾ དདྷིཾ ཏཀྐཾ ནཝནཱིཏཾ སཔྤི’’ནྟི (མཧཱཝ. ༢༩༩) པཉྩ གོརསཱ ཨནུཉྙཱཏཱ. ཏཏོ པརཾ སེཊྛིནོ ཨབྷིཡཱཙནཱནུརཱུཔཾ ཝཏྭཱ ཨནུཛཱནིཏུཾ ‘‘སནྟི, བྷིཀྑཝེ, མགྒཱ ཀནྟཱརཱ’’ཏིཨཱདིམཱཧ. སེསཾ ཨཊྛཀཐཱཡཾ ཝུཏྟནཡེནེཝ ཝེདིཏབྦཾ. ཏཐཱ ཨལབྷནྟེན ཨཉྙཱཏཀཨཔྤཝཱརིཏཊྛཱནཏོ ཡཱཙིཏྭཱཔི གཧེཏབྦནྟི ཨེཏེན ཨེཝརཱུཔེསུ ཀཱལེསུ ཝིཉྙཏྟིཔཙྩཡཱ དོསོ ནཏྠཱིཏི དསྶེཏི. ‘‘ཨེཀདིཝསེན གམནཱིཡེ མགྒེ ཨེཀབྷཏྟཏྠཱཡ པརིཡེསིཏབྦ’’ནྟི ཝུཏྟཏྟཱ པན ཏཏོ ཨུཔརི ཡཱཙནཾ ན ཝཊྚཏཱིཏི དསྶིཏཾ. ‘‘དཱིགྷེ ཨདྡྷཱནེ’’ཏིཨཱདིནཱ སཙེ མཱསགམནཱིཡེ ¶ མགྒེ སཏྟཱཧགམནཱིཡོ ཨེཝ ཀནྟཱརོ ཧོཏི, ཏཏྠ སཏྟཱཧཡཱཔནཱིཡམཏྟམེཝ པཱཐེཡྻཾ པརིཡེསིཏབྦཾ, ཏཏོ པརཾ པིཎྜཙཱརིཀཱདིཝསེན སུབྷིཀྑསུལབྷཔིཎྜམགྒཏྟཱ ན པརིཡེསིཏབྦནྟི.

མཧཱཔདེསཀཐཱ

༦༧. མཧཱཔདེསཀཐཱཡཾ མཧཱཔདེསཱ ནཱམ ཨཔྤཊིཀྑིཏྟཱ དྭེ, ཨནནུཉྙཱཏཱ དྭེཏི ཙཏྟཱརོཏི དསྶེནྟོ ‘‘ཡཾ བྷིཀྑཝེ’’ཏིཨཱདིམཱཧ. ཏེསུ ཨཔྤཊིཀྑིཏྟེཔི ཨཀཔྤིཡཱནུལོམཀཔྤིཡཱནུལོམཝསེན དྭེ, ཏཐཱ ཨནནུཉྙཱཏེཔཱིཏི.

ཏཏྠ ¶ ‘‘པརིམདྡནྟཱཏི ཨུཔཔརིཀྑནྟཱ. པཊྚཎྞུདེསེ སཉྫཱཏཝཏྠཾ པཊྚུཎྞཾ. ‘པཊྚུཎྞཾ ཀོསེཡྻཝིསེསོ’ཏི ཧི ཨབྷིདྷཱནཀོསེ ཝུཏྟཾ. ཙཱིནདེསེ སོམཱརདེསེ ཙ སཉྫཱཏཝཏྠཱནི ཙཱིནསོམཱརཔཊཱནི. པཊྚུཎྞཱདཱིནི ཏཱིཎི ཀོསེཡྻསྶ ཨནུལོམཱནི པཱཎཀེཧི ཀཏསུཏྟམཡཏྟཱ. ཨིདྡྷིམཡཾ ཨེཧིབྷིཀྑཱུནཾ པུཉྙིདྡྷིཡཱ ནིབྦཏྟཙཱིཝརཾ, ཏཾ ཁོམཱདཱིནཾ ཨཉྙཏརཾ ཧོཏཱིཏི ཏེསཾཡེཝ ཨནུལོམཾ. དེཝཏཱཧི དིནྣཙཱིཝརཾ དེཝདཏྟིཡཾ, ཏཾ ཀཔྤརུཀྑེ ནིབྦཏྟཾ ཛཱལིནིཡཱ དེཝཀཉྙཱཡ ཨནུརུདྡྷཏྠེརསྶ དིནྣཝཏྠསདིསཾ, ཏམྤི ཁོམཱདཱིནཾཡེཝ ཨནུལོམཾ ཧོཏི ཏེསུ ཨཉྙཏརབྷཱཝཏོ. དྭེ པཊཱནི དེསནཱམེན ཝུཏྟཱནཱིཏི ཏེསཾ སརཱུཔདསྶནམཏྟམེཏཾ, ནཱཉྙནིཝཏྟནཔདཾ པཊྚུཎྞཔཊྚསྶཔི དེསནཱམེནེཝ ཝུཏྟཏྟཱ. ཏུམྦཱཏི ཏཱིཎི བྷཱཛནཱནི. ཕལཀཏུམྦོ ལཱབུཨཱདི. ཨུདཀཏུམྦོ ཨུདཀུཀྑིཔནཀུཊཀོ. ཀིལཉྫཙྪཏྟནྟི ཝེལུ༹ཝིལཱིཝེཧི ཝཱཡིཏྭཱ ཀཏཚཏྟ’’ནྟི སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༣༠༥) ཝུཏྟཾ.

‘‘ཡཱཝཀཱལིཀཔཀྐཱནནྟི ¶ པཀྐེ སནྡྷཱཡ ཝུཏྟཾ. ཨཱམཱནི པན ཨནུཔསམྤནྣེཧི སཱིཏུདཀེ མདྡིཏྭཱ པརིསྶཱཝེཏྭཱ དིནྣཔཱནཾ པཙྪཱབྷཏྟམྤི ཀཔྤཏི ཨེཝ. ཨཡཉྩ ཨཏྠོ མཧཱཨཊྛཀཐཱཡཾ སརཱུཔཏོ ཨཝུཏྟོཏི ཨཱཧ ‘ཀུརུནྡིཡཾ པནཱ’ཏིཨཱདི. ཨུཙྪུརསོ ནིཀསཊོཏི ཨིདཾ པཱཏབྦཏཱསཱམཉྙེན ཡཱམཀཱལིཀཀཐཱཡཾ ཝུཏྟཾ, ཏཾ པན སཏྟཱཧཀཱལིཀམེཝཱཏི གཧེཏབྦཾ. ཨིམེ ཙཏྟཱརོ རསཱཏི ཕལཔཏྟཔུཔྥཨུཙྪུརསཱ ཙཏྟཱརོ’’ཏི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༣༠༠) ཝུཏྟཾ. ‘‘དྭེ པཊཱ དེསནཱམེནེཝཱཏི ཙཱིནཔཊསོམཱརཔཊཱནི. ཏཱིཎཱིཏི པཊྚུཎྞེན སཧ ཏཱིཎི. ཨིདྡྷིམཡཾ ཨེཧིབྷིཀྑཱུནཾ ནིབྦཏྟཾ. དེཝདཏྟིཡཾ ཨནུརུདྡྷཏྠེརེན ལདྡྷ’’ནྟི ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༣༠༥).

སཾསཊྛཀཐཱ

སཾསཊྛཀཐཱཡཾ ཏདཧུཔཊིགྒཧིཏཾ ཀཱལེ ཀཔྤཏཱིཏིཨཱདི སབྦཾ སམྦྷིནྣརསཾ སནྡྷཱཡ ཝུཏྟཾ. སཙེ ཧི ཚལླིམྤི ཨཔནེཏྭཱ སཀལེནེཝ ནཱལི༹ཀེརཕལེན སདྡྷིཾ པཱནཀཾ པཊིགྒཧིཏཾ ཧོཏི, ནཱལི༹ཀེརཾ ཨཔནེཏྭཱ ཏཾ ཝིཀཱལེཔི ཀཔྤཏི. ཨུཔརི སཔྤིཔིཎྜཾ ཋཔེཏྭཱ སཱིཏལཔཱཡཱསཾ དེནྟི, ཡཾ པཱཡཱསེན ཨསཾསཊྛཾ སཔྤི, ཏཾ ཨཔནེཏྭཱ སཏྟཱཧཾ པརིབྷུཉྫིཏུཾ ཝཊྚཏི. བདྡྷམདྷུཕཱཎིཏཱདཱིསུཔི ཨེསེཝ ནཡོ. ཏཀྐོལཛཱཏིཕལཱདཱིཧི ཨལངྐརིཏྭཱ པིཎྜཔཱཏཾ དེནྟི, ཏཱནི ཨུདྡྷརིཏྭཱ དྷོཝིཏྭཱ ཡཱཝཛཱིཝཾ པརིབྷུཉྫིཏབྦཱནི, ཡཱགུཡཾ པཀྑིཔིཏྭཱ དིནྣསིངྒིཝེརཱདཱིསུཔི, ཏེལཱདཱིསུ པཀྑིཔིཏྭཱ དིནྣལཊྛིམདྷུཀཱདཱིསུཔི ¶ ཨེསེཝ ནཡོ. ཨེཝཾ ཡཾ ཡཾ ཨསམྦྷིནྣརསཾ ཧོཏི, ཏཾ ཏཾ ཨེཀཏོ པཊིགྒཧིཏམྤི ཡཐཱ སུདྡྷཾ ཧོཏི, ཏཐཱ དྷོཝིཏྭཱ ཝཱ ཏཙྪེཏྭཱ ཝཱ ཏསྶ ཏསྶ ཀཱལསྶ ཝསེན པརིབྷུཉྫིཏུཾ ཝཊྚཏི.

སཙེ ¶ པན སམྦྷིནྣརསཾ ཧོཏི སཾསཊྛཾ, ན ཝཊྚཏི. ཡཱཝཀཱལིཀཉྷི ཨཏྟནཱ སདྡྷིཾ སམྦྷིནྣརསཱནི ཏཱིཎིཔི ཡཱམཀཱལིཀཱདཱིནི ཨཏྟནོ སབྷཱཝཾ ཨུཔནེཏི. ཡཱམཀཱལིཀཾ དྭེཔི སཏྟཱཧཀཱལིཀཱདཱིནི ཨཏྟནོ སབྷཱཝཾ ཨུཔནེཏི. སཏྟཱཧཀཱལིཀཾ ཨཏྟནཱ སདྡྷིཾ སཾསཊྛཾ ཡཱཝཛཱིཝིཀཾ ཨཏྟནོ སབྷཱཝཉྙེཝ ཨུཔནེཏི, ཏསྨཱ ཏེན ཏདཧུཔཊིགྒཧིཏེན སདྡྷིཾ ཏདཧུཔཊིགྒཧིཏཾ ཝཱ པུརེཔཊིགྒཧིཏཾ ཝཱ ཡཱཝཛཱིཝིཀཾ སཏྟཱཧཾ ཀཔྤཏི, དྭཱིཧཔཊིགྒཧིཏེན ཚཱཧཾ…པེ… སཏྟཱཧཔཊིགྒཧིཏེན ཏདཧེཝ ཀཔྤཏཱིཏི ཝེདིཏབྦཾ. ཏསྨཱཡེཝ ཧི ‘‘སཏྟཱཧཀཱལིཀེན, བྷིཀྑཝེ, ཡཱཝཛཱིཝིཀཾ ཏདཧུཔཊིགྒཧིཏ’’ནྟི ཨཝཏྭཱ ‘‘པཊིགྒཧིཏཾ སཏྟཱཧཾ ཀཔྤཏཱི’’ཏི ཝུཏྟཾ.

ཀཱལཡཱམསཏྟཱཧཱཏིཀྐམེསུ ཙེཏྠ ཝིཀཱལབྷོཛནསནྣིདྷིབྷེསཛྫསིཀྑཱཔདཱནཾ ཝསེན ཨཱཔཏྟིཡོ ཝེདིཏབྦཱ. ཨིམེསུ ཙ པན ཙཏཱུསུ ཀཱལིཀེསུ ཡཱཝཀཱལིཀཾ ཡཱམཀཱལིཀནྟི ཨིདམེཝ དྭཡཾ ཨནྟོཝུཏྠཀཉྩེཝ སནྣིདྷིཀཱརཀཉྩ ཧོཏི, སཏྟཱཧཀཱལིཀཉྩ ཡཱཝཛཱིཝིཀཉྩ ཨཀཔྤིཡཀུཊིཡཾ ནིཀྑིཔིཏུམྤི ཝཊྚཏི, སནྣིདྷིམྤི ན ཛནེཏཱིཏི. སེསཾ སབྦཏྠ ཨུཏྟཱནཏྠམེཝ.

པཉྩབྷེསཛྫཀཐཱ

པཉྩབྷེསཛྫཀཐཱཡཾ ‘‘ཨནུཛཱནཱམི, བྷིཀྑཝེ, ཏཱནི པཉྩ བྷེསཛྫཱནི ཀཱལེ པཊིགྒཧེཏྭཱ ཀཱལེ པརིབྷུཉྫིཏུ’’ནྟི (མཧཱཝ. ༢༦༡) ཝཙནཏོ སཱརདིཀེན ཨཱབཱདྷེན ཕུཊྛཱནཾ བྷིཀྑཱུནཾ ཡཱགུཔི པཱིཏཱ ཨུགྒཙྪཏི, བྷཏྟམྤི བྷུཏྟཾ ཨུགྒཙྪཏི, ཏེ ཏེན ཀིསཱ ཧོནྟི ལཱུཁཱ དུབྦཎྞཱ ཨུཔྤཎྜུཔྤཎྜུཀཛཱཏཱ དྷམནིསནྠཏགཏྟཱ. ཏེསཾ ཡཾ བྷེསཛྫཉྩེཝ ཨསྶ བྷེསཛྫསམྨཏཉྩ, ལོཀསྶ ཨཱཧཱརཏྠཉྩ ཕརེཡྻ, ན ཙ ཨོལཱ༹རིཀོ ཨཱཧཱརོ ¶ པཉྙཱཡེཡྻ. ཏཏྲིམཱནི པཉྩ བྷེསཛྫཱནི. སེཡྻཐིདཾ – སཔྤི ནཝནཱིཏཾ ཏེལཾ མདྷུ ཕཱཎིཏཾ, ཏཱནི བྷེསཛྫཱནི ཀཱལེ པཊིགྒཧེཏྭཱ ཀཱལེ པརིབྷུཉྫིཏུཾ ཝཊྚཏི. ཏཏྠ ‘‘སཱརདིཀེན ཨཱབཱདྷེནཱཏི སརདཀཱལེ ཨུཔྤནྣེན པིཏྟཱབཱདྷེན. ཏསྨིཉྷི ཀཱལེ ཝསྶོདཀེནཔི ཏེམེནྟི, ཀདྡམམྤི མདྡནྟི, ཨནྟརནྟརཱ ¶ ཨཱབཱདྷོཔི ཁརོ ཧོཏི, ཏེན ཏེསཾ པིཏྟཾ ཀོཊྛབྦྷནྟརགཏཾ ཧོཏི. ཨཱཧཱརཏྠཉྩ ཕརེཡྻཱཏི ཨཱཧཱརཏྠཾ སཱདྷེཡྻཱ’’ཏི ཨཊྛཀཐཱཡཾ (མཧཱཝ. ཨཊྛ. ༢༦༠) ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༢༦༠) ‘‘པིཏྟཾ ཀོཊྛབྦྷནྟརགཏཾ ཧོཏཱིཏི བཧིསརཱིརེ བྱཱཔེཏྭཱ ཋིཏཾ ཨབདྡྷཔིཏྟཾ ཀོཊྛབྦྷནྟརགཏཾ ཧོཏི, ཏེན པིཏྟཾ ཀུཔིཏཾ ཧོཏཱིཏི ཨདྷིཔྤཱཡོ’’ཏི ཝུཏྟཾ.

ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༢༦༠) ‘‘ཡཾ བྷེསཛྫཉྩེཝ ཨསྶཱཏི པརཏོ ‘ཏདུབྷཡེན བྷིཡྻོསོམཏྟཱཡ ཀིསཱ ཧོནྟཱི’ཏིཨཱདིནཱ ཝིརོདྷདསྶནཏོ ནིདཱནཱནཔེཀྑཾ ཡཐཱལཱབྷཝསེན ཝུཏྟནྟི ཝེདིཏབྦཾ. ཡཐཱནིདཱནཾ ཀསྨཱ ན ཝུཏྟནྟི ཙེ? ཏདཉྙཱཔེཀྑཱདྷིཔྤཱཡཏོ. སབྦབུདྡྷཀཱལེཔི ཧི སཔྤིཨཱདཱིནཾ སཏྟཱཧཀཱལིཀབྷཱཝཱཔེཀྑོཏི. ཏཐཱ ཝཙནེན བྷགཝཏོ ཨདྷིཔྤཱཡོ. ཏེནེཝ ‘ཨཱཧཱརཏྠཉྩ ཕརེཡྻ, ན ཙ ཨོལཱ༹རིཀོ ཨཱཧཱརོ པཉྙཱཡེཡྻཱ’ཏི ཝུཏྟཾ. ཏཐཱ ཧི ཀཱལེ པཊིགྒཧེཏྭཱ ཀཱལེ པརིབྷུཉྫིཏུནྟི ཨེཏྠ ཙ ཀཱལཔརིཙྪེདོ ན ཀཏོ, ཀུཏོཡེཝ པན ལབྦྷཱ ཏདཉྙཱཔེཀྑཱདྷིཔྤཱཡོ བྷགཝཏཱ མཱུལབྷེསཛྫཱདཱིནི ཏཱནི པཊིགྒཧེཏྭཱ ཡཱཝཛཱིཝནྟི ཀཱལཔརིཙྪེདོ. ཡཾ པན ‘ཨནུཛཱནཱམི, བྷིཀྑཝེ, ཏཱནི བྷེསཛྫཱནི ཀཱལེ པཊིགྒཧེཏྭཱ ཀཱལེ པརིབྷུཉྫིཏུ’ནྟི (མཧཱཝ. ༢༦༠) ཝཙནཾ, ཏཾ ‘སནྣིདྷིཾ ཀཏྭཱ ཨཔརཱཔརསྨིཾ དིཝསེ ཀཱལེ ཨེཝ པརིབྷུཉྫིཏུཾ ཨནུཛཱནཱམཱི’ཏི ཨདྷིཔྤཱཡཏོ ཝུཏྟནྟི ཝེདིཏབྦཾ. ཨཉྙཐཱ ཨཏིསཡཏྟཱ བྷགཝཏོ ¶ ‘ཡཾ བྷེསཛྫཉྩེཝ ཨསྶཱ’ཏིཨཱདིཝིཏཀྐུཔྤཱདོ ན སམྦྷཝཏི. པཎཱིཏབྷོཛནཱནུམཏིཡཱ པསིདྡྷཏྟཱ ཨཱབཱདྷཱནུརཱུཔསཔྤཱཡཱཔེཀྑཱཡ ཝུཏྟཱནཱིཏི ཙེ? ཏཉྩ ན, ‘བྷིཡྻོསོམཏྟཱཡཱ’ཏི ཀིསཱདིབྷཱཝཱཔཏྟིདསྶནཏོ. ཡཐཱ ཨུཙྪུརསཾ ཨུཔཱདཱཡ ཕཱཎིཏནྟི ཝུཏྟཾ, ཏཐཱ ནཝནཱིཏཾ ཨུཔཱདཱཡ སཔྤཱིཏི ཝཏྟབྦཏོ ནཝནཱིཏཾ ཝིསུཾ ན ཝཏྟབྦནྟི ཙེ? ན ཝིསེསདསྶནཱདྷིཔྤཱཡཏོ. ཡཐཱ ཕཱཎིཏགྒཧཎེན སིདྡྷེཔི པརཏོ ཨུཙྪུརསོ ཝིསུཾ ཨནུཉྙཱཏོ ཨུཙྪུསཱམཉྙཏོ གུལོ༹དཀཊྛཱནེ ཋཔནཱདྷིཔྤཱཡཏོ, ཏཐཱ ནཝནཱིཏེ ཝིསེསཝིདྷིདསྶནཱདྷིཔྤཱཡཏོ ནཝནཱིཏཾ ཝིསུཾ ཨནུཉྙཱཏནྟི ཝེདིཏབྦཾ. ཝིསེསཝིདྷི པནསྶ བྷེསཛྫསིཀྑཱཔདཊྛཀཐཱཝསེན (པཱརཱ. ཨཊྛ. ༢.༦༡༩-༦༢༡) ཝེདིཏབྦོ. ཝུཏྟཉྷི ཏཏྠ ‘པཙིཏྭཱ སཔྤིཾ ཀཏྭཱ པརིབྷུཉྫིཏུཀཱམེན ཨདྷོཏམྤི པཙིཏུཾ ཝཊྚཏཱི’ཏི. ཏཏྠ སཔྤི པཀྐཱཝ ཧོཏི, ནཱཔཀྐཱ, ཏཐཱ ཕཱཎིཏམྤི. ནཝནཱིཏཾ ཨཔཀྐམེཝཱ’’ཏིཨཱདི.

དུཏིཡབྷེསཛྫཀཐཱ

དུཏིཡབྷེསཛྫཀཐཱཡཾ ¶ ‘‘ཨནུཛཱནཱམི, བྷིཀྑཝེ, ཏཱནི པཉྩ བྷེསཛྫཱནི པཊིགྒཧེཏྭཱ ཀཱལེཔི ཝིཀཱལེཔི པརིབྷུཉྫིཏུ’’ནྟི (མཧཱཝ. ༢༦༡) ཝཙནཏོ ‘‘ཏཱནི པཉྩ བྷེསཛྫཱནི ཀཱལེ པཊིགྒཧེཏྭཱ ཀཱལེ པརིབྷུཉྫནྟཱནཾ ཏེསཾ བྷིཀྑཱུནཾ ཡཱནིཔི ཏཱནི པཱཀཏིཀཱནི ལཱུཁཱནི བྷོཛནཱནི, ཏཱནི ནཙྪཱདེནྟི, པགེཝ སེནེསིཏཱནི. ཏེ ཏེན ཙེཝ སཱརདིཀེན ཨཱབཱདྷེན ཕུཊྛཱ ཨིམིནཱ ཙ བྷཏྟཱཙྪཱདཀེན ཏདུབྷཡེན བྷིཡྻོསོམཏྟཱཡ ཀིསཱ ཧོནྟཱི’’ཏི ཨིམསྨིཾ ཝཏྠུསྨིཾ ཀཱལེཔི ཝིཀཱལེཔཱིཏི ཨནུཉྙཱཏཏྟཱ ཝིཀཱལེཔི པརིབྷུཉྫིཏུཾ ཝཊྚཏི. ཏཏྠ ‘‘ནཙྪཱདེནྟཱིཏི ན ཛཱིརནྟི, ན ཝཱཏརོགཾ པཊིཔྤསྶམྦྷེཏུཾ སཀྐོནྟི. སེནེསིཏཱནཱིཏི སིནིདྡྷཱནི. བྷཏྟཱཙྪཱདཀེནཱཏི ¶ བྷཏྟཾ ཨརོཙིཀེནཱ’’ཏི ཨཊྛཀཐཱཡཾ (མཧཱཝ. ཨཊྛ. ༢༦༡) ཝུཏྟཾ, ཊཱིཀཱསུ (སཱརཏྠ. ཊཱི. མཧཱཝགྒ ༣.༢༦༡; ཝི. ཝི. ཊཱི. མཧཱཝགྒ ༢.༢༦༡-༢༦༢) པན ‘‘ནཙྪཱདེནྟཱིཏི རུཙིཾ ན ཨུཔྤཱདེནྟཱི’’ཏི ཨེཏྟཀམེཝ ཝུཏྟཾ, མཧཱཝིབྷངྒེ (པཱརཱ. ༦༢༢) པན ‘‘ཡཱནི ཁོ པན ཏཱནི གིལཱནཱནཾ བྷིཀྑཱུནཾ པཊིསཱཡནཱིཡཱནི བྷེསཛྫཱནི. སེཡྻཐིདཾ – སཔྤི ནཝནཱིཏཾ ཏེལཾ མདྷུ ཕཱཎིཏཾ, ཏཱནི པཊིགྒཧེཏྭཱ སཏྟཱཧཔརམཾ སནྣིདྷིཀཱརཀཾ པརིབྷུཉྫིཏབྦཱནི, ཏཾ ཨཏིཀྐཱམཡཏོ ནིསྶགྒིཡཾ པཱཙིཏྟིཡ’’ནྟི ཝཙནཏོ ཨིམེསཾ པཉྩབྷེསཛྫཱནཾ སཏྟཱཧཀཱལིཀབྷཱཝོ ཝེདིཏབྦོ, ཨིདྷ པན ཨཊྛུཔྤཏྟིཝསེན ཝུཏྟོཏི.

ཝསཱབྷེསཛྫཀཐཱ

ཝསཱབྷེསཛྫཀཐཱཡཾ ‘‘ཨནུཛཱནཱམི, བྷིཀྑཝེ, ཝསཱནི བྷེསཛྫཱནི ཨཙྪཝསཾ མཙྪཝསཾ སུསུཀཱཝསཾ སཱུཀརཝསཾ གདྲབྷཝསཾ ཀཱལེ པཊིགྒཧིཏཾ ཀཱལེ ནིཔྤཀྐཾ ཀཱལེ སཾསཊྛཾ ཏེལཔརིབྷོགེན པརིབྷུཉྫིཏུཾ. ཝིཀཱལེ ཙེ, བྷིཀྑཝེ, པཊིགྒཧིཏཾ ཝིཀཱལེ ནིཔྤཀྐཾ ཝིཀཱལེ སཾསཊྛཾ, ཏཉྩེ པརིབྷུཉྫེཡྻ, ཨཱཔཏྟི ཏིཎྞཾ དུཀྐཊཱནཾ. ཀཱལེ ཙེ, བྷིཀྑཝེ, པཊིགྒཧིཏཾ ཝིཀཱལེ ནིཔྤཀྐཾ ཝིཀཱལེ སཾསཊྛཾ, ཏཉྩེ པརིབྷུཉྫེཡྻ, ཨཱཔཏྟི དྭིནྣཾ དུཀྐཊཱནཾ. ཀཱལེ ཙེ, བྷིཀྑཝེ, པཊིགྒཧིཏཾ ཀཱལེ ནིཔྤཀྐཾ ཝིཀཱལེ སཾསཊྛཾ, ཏཉྩེ པརིབྷུཉྫེཡྻ, ཨཱཔཏྟི དུཀྐཊསྶ. ཀཱལེ ཙེ, བྷིཀྑཝེ, པཊིགྒཧིཏཾ ཀཱལེ ནིཔྤཀྐཾ ཀཱལེ སཾསཊྛཾ, ཏཉྩེ པརིབྷུཉྫེཡྻ, ཨནཱཔཏྟཱི’’ཏི (མཧཱཝ. ༢༦༢). ཏཏྠ ‘‘ཀཱལེ པཊིགྒཧིཏནྟིཨཱདཱིསུ མཛ྄ཛྷནྷིཀེ ཨཝཱིཏིཝཏྟེ པཊིགྒཧེཏྭཱ པཙིཏྭཱ པརིསྶཱཝེཏྭཱ ཙཱཏི ཨཏྠོ. ཏེལཔརིབྷོགེན པརིབྷུཉྫིཏུནྟི ¶ སཏྟཱཧཀཱལིཀཏེལཔརིབྷོགེན པརིབྷུཉྫིཏུ’’ནྟི ཨཊྛཀཐཱཡཾ (མཧཱཝ. ཨཊྛ. ༢༦༢) ཝུཏྟཾ, ཊཱིཀཱསུ (སཱརཏྠ. ཊཱི. མཧཱཝགྒ ༣.༢༦༢; ཝི. ཝི. ཊཱི. མཧཱཝགྒ ༢.༢༦༡-༢༦༢) པན ‘‘སུསུཀཱཏི ¶ སམུདྡེ བྷཝཱ ཨེཀཱ མཙྪཛཱཏི, ཀུམྦྷིལཱཏིཔི ཝདནྟི. སཾསཊྛནྟི པརིསྶཱཝིཏཾ. ཏེལཔརིབྷོགེནཱཏི སཏྟཱཧཀཱལིཀཔརིབྷོགཾ སནྡྷཱཡ ཝུཏྟ’’ནྟི ཝུཏྟཾ. ཨཡམེཏྠ སངྑེཔོ, ཝིཏྠཱརོ པན ཧེཊྛཱ ཙཏུཀཱལིཀཀཐཱཡཾ ཝུཏྟོཡེཝ.

མཱུལབྷེསཛྫཀཐཱ

མཱུལབྷེསཛྫཀཐཱཡཾ ‘‘ཨནུཛཱནཱམི, བྷིཀྑཝེ, མཱུལཱནི བྷེསཛྫཱནི, ཧལིདྡིཾ སིངྒིཝེརཾ ཝཙཾ ཝཙཏྟཾ ཨཏིཝིསཾ ཀཊུཀརོཧིཎིཾ ཨུསཱིརཾ བྷདྡམུཏྟཀཾ, ཡཱནི ཝཱ པནཉྙཱནིཔི ཨཏྠི མཱུལཱནི བྷེསཛྫཱནི ནེཝ ཁཱདནཱིཡེ ཁཱདནཱིཡཏྠཾ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟི, ཏཱནི པཊིགྒཧེཏྭཱ ཡཱཝཛཱིཝཾ པརིཧརིཏུཾ, སཏི པཙྩཡེ པརིབྷུཉྫིཏུཾ. ཨསཏི པཙྩཡེ པརིབྷུཉྫནྟསྶ ཨཱཔཏྟི དུཀྐཊསྶཱ’’ཏི. ཏཏྠ ཝཙཏྟནྟི སེཏཝཙཾ. སེསཾ ཧེཊྛཱ ཝུཏྟམེཝ.

པིཊྛབྷེསཛྫཀཐཱ

པིཊྛབྷེསཛྫཀཐཱཡཾ ‘‘ཨནུཛཱནཱམི, བྷིཀྑཝེ, ནིསདཾ ནིསདཔོཏཀ’’ནྟི (མཧཱཝ. ༢༦༣) ཝཙནཏོ པིསིཏེཧི ཙུཎྞཀཏེཧི མཱུལབྷེསཛྫེཧི ཨཏྠེ སཏི ནིསདཉྩ ནིསདཔོཏཀཉྩ པརིཧརིཏུཾ ཝཊྚཏི. ཏཏྠ ནིསདཾ ནིསདཔོཏཀནྟི པིསནསིལཱ ཙ པིསནཔོཏོ ཙ. ནིསདནྟི པིསནྟི ཙུཎྞཝིཙུཎྞཾ ཀརོནྟི མཱུལབྷེསཛྫཱདཡོ ཨེཏྠཱཏི ནིསདཾ, པིསནསིལཱ. ནིསདནྟི པིསནྟི ཙུཎྞཝིཙུཎྞཾ ཀརོནྟི མཱུལབྷེསཛྫཱདཡོ ཨེཏེནཱཏི ནིསདཾ, པོསེཏབྦོཏི པོཏོ, དཱརཀོ. ཁུདྡཀཔྤམཱཎཏཱཡ པོཏོ ཝིཡཱཏི པོཏོ, ནིསདཉྩ ཏཾ པོཏོ ཙཱཏི ནིསདཔོཏོ, ཏཾ ནིསདཔོཏཀཾ. ནིཔུབྦསད ཙུཎྞཀརཎེཏི དྷཱཏུ.

ཀསཱཝབྷེསཛྫཀཐཱ

ཀསཱཝབྷེསཛྫཀཐཱཡཾ ¶ ‘‘ཨནུཛཱནཱམི, བྷིཀྑཝེ, ཀསཱཝཱནི བྷེསཛྫཱནི ནིམྦཀསཱཝཾ ཀུཊཛཀསཱཝཾ པཊོལཀསཱཝཾ ཕགྒཝཀསཱཝཾ ནཏྟམཱལཀསཱཝཾ, ཡཱནི ཝཱ པནཉྙཱནིཔི ཨཏྠི ཀསཱཝཱནི ¶ བྷེསཛྫཱནི ནེཝ ཁཱདནཱིཡེ ཁཱདནཱིཡཏྠཾ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟི, ཏཱནི པཊིགྒཧེཏྭཱ ཡཱཝཛཱིཝཾ པརིཧརིཏུཾ, སཏི པཙྩཡེ པརིབྷུཉྫིཏུཾ, ཨསཏི པཙྩཡེ པརིབྷུཉྫནྟསྶ ཨཱཔཏྟི དུཀྐཊསྶཱ’’ཏི (མཧཱཝ. ༢༦༣) ཝཙནཏོ ཏཱནིཔི ཀསཱཝབྷེསཛྫཱནི པཊིགྒཧེཏྭཱ ཡཱཝཛཱིཝཾ པརིཧརིཏུཾ སཏི པཙྩཡེ པརིབྷུཉྫིཏུཾ ཝཊྚཏི. ཏཏྠ ཕགྒཝནྟི ལཏཱཛཱཏི. ནཏྟམཱལནྟི ཀརཉྫཾ. ‘‘ཀསཱཝེཧཱིཏི ཏཙཱདཱིནི ཨུདཀེ ཏཱཔེཏྭཱ གཧིཏཨཱུསརེཧཱི’’ཏི ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༢༦༣) ཝུཏྟཾ.

པཎྞབྷེསཛྫཀཐཱ

པཎྞབྷེསཛྫཀཐཱཡཾ ‘‘ཨནུཛཱནཱམི, བྷིཀྑཝེ, པཎྞཱནི བྷེསཛྫཱནི ནིམྦཔཎྞཾ ཀུཊཛཔཎྞཾ པཊོལཔཎྞཾ ནཏྟམཱལཔཎྞཾ ཕགྒཝཔཎྞཾ སུལསིཔཎྞཾ ཀཔྤཱསཔཎྞཾ, ཡཱནི ཝཱ པནཉྙཱནིཔི ཨཏྠི པཎྞཱནི བྷེསཛྫཱནི ནེཝ ཁཱདནཱིཡེ ཁཱདནཱིཡཏྠཾ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟི, ཏཱནི པཊིགྒཧེཏྭཱ ཡཱཝཛཱིཝཾ པརིཧརིཏུཾ, སཏི པཙྩཡེ པརིབྷུཉྫིཏུཾ, ཨསཏི པཙྩཡེ པརིབྷུཉྫནྟསྶ ཨཱཔཏྟི དུཀྐཊསྶཱ’’ཏི (མཧཱཝ. ༢༦༣) ཝཙནཏོ ཁཱདནཱིཡབྷོཛནཱིཡཏྠཾ ཨཕརནྟཱནི ཏཱནིཔི པཎྞཱནི པཊིགྒཧེཏྭཱ ཡཱཝཛཱིཝཾ པརིཧརིཏུཾ, སཏི པཙྩཡེ པརིབྷུཉྫིཏུཾ ཝཊྚཏི. ཨཙྪཝསནྟིཨཱདཱིསུ ནིསྶགྒིཡཝཎྞནཱཡཾ (པཱརཱ. ཨཊྛ. ༢.༦༢༣) ཝུཏྟནཡེནེཝ ཨཏྠོ ཝེདིཏབྦོ. མཱུལབྷེསཛྫཱདིཝིནིཙྪཡོཔི ཁུདྡཀཝཎྞནཱཡཾ ཝུཏྟོཡེཝ, ཏསྨཱ ཨིདྷ ཡཾ ཡཾ པུབྦེ ཨཝུཏྟཾ, ཏཾ ཏདེཝ ཝཎྞཡིསྶཱམ.

ཕལབྷེསཛྫཀཐཱ

ཕལབྷེསཛྫཀཐཱཡཾ ¶ ‘‘ཨནུཛཱནཱམི, བྷིཀྑཝེ, ཕལཱནི བྷེསཛྫཱནི བིལ༹ངྒཾ པིཔྤལིཾ མརིཙཾ ཧརཱིཏཀཾ ཝིབྷཱིཏཀཾ ཨཱམལཀཾ གོཊྛཕལཾ, ཡཱནི ཝཱ པནཉྙཱནིཔི ཨཏྠི ཕལཱནི བྷེསཛྫཱནི ནེཝ ཁཱདནཱིཡེ ཁཱདནཱིཡཏྠཾ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟི, ཏཱནི པཊིགྒཧེཏྭཱ ཡཱཝཛཱིཝཾ པརིཧརིཏུཾ, སཏི པཙྩཡེ པརིབྷུཉྫིཏུཾ, ཨསཏི པཙྩཡེ པརིབྷུཉྫནྟསྶ ཨཱཔཏྟི དུཀྐཊསྶཱ’’ཏི (མཧཱཝ. ༢༦༣) ཝཙནཏོ ཁཱདནཱིཡབྷོཛནཱིཡཏྠཾ ཨཕརནྟཱནི ཏཱནི ཕལཱནི པཊིགྒཧེཏྭཱ ཡཱཝཛཱིཝཾ པརིཧརིཏུཾ, སཏི པཙྩཡེ པརིབྷུཉྫིཏུམྤི ཝཊྚཏི.

ཛཏུབྷེསཛྫཀཐཱ

ཛཏུབྷེསཛྫཀཐཱཡཾ ¶ ‘‘ཨནུཛཱནཱམི, བྷིཀྑཝེ, ཛཏཱུནི བྷེསཛྫཱནི ཧིངྒུཾ ཧིངྒུཛཏུཾ ཧིངྒུསིཔཱཊིཀཾ ཏཀཾ ཏཀཔཏྟིཾ ཏཀཔཎྞིཾ སཛྫུལསཾ, ཡཱནི ཝཱ པནཉྙཱནིཔི ཨཏྠི ཛཏཱུནི བྷེསཛྫཱནི ནེཝ ཁཱདནཱིཡེ ཁཱདནཱིཡཏྠཾ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟི, ཏཱནི པཊིགྒཧེཏྭཱ ཡཱཝཛཱིཝཾ པརིཧརིཏུཾ, སཏི པཙྩཡེ པརིབྷུཉྫིཏུཾ, ཨསཏི པཙྩཡེ པརིབྷུཉྫནྟསྶ ཨཱཔཏྟི དུཀྐཊསྶཱ’’ཏི (མཧཱཝ. ༢༦༣) ཝཙནཏོ ཏཱནི ཛཏཱུནི བྷེསཛྫཱནི པཊིགྒཧེཏྭཱ ཡཱཝཛཱིཝཾ པརིཧརིཏུཾ, སཏི པཙྩཡེ པརིབྷུཉྫིཏུཾ ཝཊྚཏི. ཏཏྠ ཧིངྒུཧིངྒུཛཏུཧིངྒུསིཔཱཊིཀཱ ཧིངྒུཛཱཏིཡོཡེཝ. ཏཀཏཀཔཏྟིཏཀཔཎྞཡོ ལཱཁཱཛཱཏིཡོ.

ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༢༦༣) པན ‘‘ཧིངྒུཛཏུ ནཱམ ཧིངྒུརུཀྑསྶ དཎྜཔལླཝཔཝཱལ༹པཱཀནིཔྥནྣཱ. ཧིངྒུསིཔཱཊིཀཱ ནཱམ ཏསྶ མཱུལསཱཁཔཱཀནིཔྥནྣཱ. ཏཀཾ ནཱམ ཏསྶ རུཀྑསྶ ཏཙཔཱཀོདཀཾ. ཏཀཔཏྟཱིཏི ཏསྶ པཏྟཔཱཀོདཀཾ. ཏཀཔཎྞཱིཏི ཏསྶ ཕལཔཱཀོདཀཾ. ཨཐ ཝཱ ‘ཏཀཾ ནཱམ ལཱཁཱ. ཏཀཔཏྟཱིཏི ཀིཏྟིམལོཧསཱཁཱ ¶ . ཏཀཔཎྞཱིཏི པཀྐལཱཁཱ’ཏི ལིཁིཏཾ. སཏི པཙྩཡེཏི ཨེཏྠ སཏིཔཙྩཡཏཱ གིལཱནཱགིལཱནཝསེན དྭིདྷཱ ཝེདིཏབྦཱ. ཝིཀཱལབྷོཛནསིཀྑཱཔདསྶ ཧི ཨནཱཔཏྟིཝཱརེ ཡཱམཀཱལིཀཱདཱིནཾ ཏིཎྞམྤི ཨཝིསེསེན སཏིཔཙྩཡཏཱ ཝུཏྟཱ. ཨིམསྨིཾ ཁནྡྷཀེ ‘ཨནུཛཱནཱམི, བྷིཀྑཝེ, གིལཱནསྶ གུལ༹ཾ ཨགིལཱནསྶ གུལོ༹དཀཾ. ཨནུཛཱནཱམི, བྷིཀྑཝེ, གིལཱནསྶ ལོཎསོཝཱིརཀཾ, ཨགིལཱནསྶ ཨུདཀསམྦྷིནྣ’ནྟི (མཧཱཝ. ༢༧༣) ཝུཏྟཾ, ཏསྨཱ སིདྡྷཾ ‘སཏིཔཙྩཡཏཱ གིལཱནཱགིལཱནཝསེན དུཝིདྷཱ’ཏི, ཨཉྙཐཱ ཨསཏི པཙྩཡེ གུལོ༹དཀཱདི ཨཱཔཛྫཏི, ཏཏོ ཙ པཱལི༹ཝིརོདྷོ. ཨཱཧཱརཏྠནྟི ཨཱཧཱརཔཡོཛནཾ, ཨཱཧཱརཀིཙྩཡཱཔནནྟི ཨཏྠོཏི ཙ. ཏེལཔརིབྷོགེནཱཏི སཏྟཱཧཀཱལིཀཔརིབྷོགེན. པིཊྛེཧཱིཏི པིསིཏཏེལེཧི. ཀོཊྛཕལནྟི ཀོཊྛརུཀྑསྶ ཕལཾ, མདནཕལཾ ཝཱཏི ཙ ལིཁིཏ’’ནྟི ཝུཏྟཾ.

ལོཎབྷེསཛྫཀཐཱ

ལོཎབྷེསཛྫཀཐཱཡཾ ‘‘ཨནུཛཱནཱམི, བྷིཀྑཝེ, ལོཎཱནི བྷེསཛྫཱནི སཱམུདྡིཀཾ ཀཱལ༹ལོཎཾ སིནྡྷཝཾ ཨུབྦྷིདཾ བིལཾ, ཡཱནི ཝཱ པནཉྙཱནིཔི ཨཏྠི ལོཎཱནི བྷེསཛྫཱནི ནེཝ ཁཱདནཱིཡེ ཁཱདནཱིཡཏྠཾ ¶ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟི, ཏཱནི པཊིགྒཧེཏྭཱ ཡཱཝཛཱིཝཾ པརིཧརིཏུཾ, སཏི པཙྩཡེ པརིབྷུཉྫིཏུཾ, ཨསཏི པཙྩཡེ པརིབྷུཉྫནྟསྶ ཨཱཔཏྟི དུཀྐཊསྶཱ’’ཏི (མཧཱཝ. ༢༦༣) ཝཙནཏོ ཏཱནི ལོཎཱནི པཊིགྒཧེཏྭཱ ཡཱཝཛཱིཝཾ པརིཧརིཏུཾ, སཏི པཙྩཡེ པརིབྷུཉྫིཏུཾ ཝཊྚཏི. ཏཏྠ སཱམུདྡནྟི སམུདྡཏཱིརེ ཝཱལུཀཾ ཝིཡ སནྟིཊྛཏི. ཀཱལ༹ལོཎནྟི པཀཏིལོཎཾ. སིནྡྷཝནྟི སེཏཝཎྞཾ པབྦཏེ ཨུཊྛཧཏི. ཨུབྦྷིདནྟི བྷཱུམིཏོ ཨངྐུརཾ ཝིཡ ཨུཊྛཧཏི. བིལནྟི དབྦསམྦྷཱརེཧི སདྡྷིཾ པཙིཏཾ, ཏཾ རཏྟཝཎྞཾ. སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༢༦༣) པན ‘‘ཨུབྦྷིདཾ ནཱམ ཨཱུསརཔཾསུམཡ’’ནྟི ¶ ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༢༦༣) པན ‘‘ཨུབྦྷིདནྟི ཨཱུསརཔཾསུམཡཾ ལོཎཾ. བིལནྟི ལོཎཝིསེསོ’’ཏི ཝུཏྟཾ. ཝཛིརབུདྡྷིཊཱིཀཱཡམྤི ཏཐེཝ ཝུཏྟཾ.

ཙུཎྞཀཐཱ

ཙུཎྞཀཐཱཡཾ ‘‘ཨནུཛཱནཱམི, བྷིཀྑཝེ, ཡསྶ ཀཎྜུ ཝཱ པཱིལ༹ཀཱ ཝཱ ཨསྶཱཝོ ཝཱ ཐུལླཀཙྪུ ཝཱ ཨཱབཱདྷོ ཀཱཡོ ཝཱ དུགྒནྡྷོ ཙུཎྞཱནི བྷེསཛྫཱནི, ཨགིལཱནསྶ ཚཀཎཾ མཏྟིཀཾ རཛནནིཔྤཀྐཾ. ཨནུཛཱནཱམི, བྷིཀྑཝེ, ཨུདུཀྑལཾ མུསལ’’ནྟི (མཧཱཝ. ༢༦༤). ‘‘ཀཱཡོ ཝཱ དུགྒནྡྷོཏི ཀསྶཙི ཨསྶཱདཱིནཾ ཝིཡ ཀཱཡགནྡྷོ ཧོཏི, ཏསྶཔི སིརཱིསཀོསུམྦཱདིཙུཎྞཱནི ཝཱ གནྡྷཙུཎྞཱནི ཝཱ སབྦཱནི ཝཊྚནྟི. ཚཀཎནྟི གོམཡཾ. རཛནནིཔྤཀྐནྟི རཛནཀསཊཾ, པཱཀཏིཀཙུཎྞམྤི ཀོཊྚེཏྭཱ ཨུདཀེན ཏེམེཏྭཱ ནྷཱཡིཏུཾ ཝཊྚཏི, ཨེཏམྤི རཛནནིཔྤཀྐསངྑམེཝ གཙྪཏཱི’’ཏི ཨཊྛཀཐཱཡཾ (མཧཱཝ. ཨཊྛ. ༢༦༤) ཝུཏྟཾ. སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༢༦༤) པན ‘‘ཚཀཎནྟི གོམཡཾ. པཱཀཏིཀཙུཎྞཾ ནཱམ ཨཔཀྐཀསཱཝཙུཎྞཾ. ཏེན ཋཔེཏྭཱ གནྡྷཙུཎྞཾ སབྦཾ ཝཊྚཏཱིཏི ཝདནྟཱི’’ཏི ཝུཏྟཾ. ཝིམཏིཝིནོདནིཡམྤི (ཝི. ཝི. ཊཱི. མཧཱཝགྒ ༢.༢༦༤-༢༦༥) ‘‘ཚཀཎནྟི གོམཡཾ. པཱཀཏིཀཙུཎྞནྟི ཨཔཀྐཀསཱཝཙུཎྞཾ, གནྡྷཙུཎྞཾ པན ན ཝཊྚཏཱི’’ཏི ཝུཏྟཾ. ཝཛིརབུདྡྷིཊཱིཀཱཡམྤི (ཝཛིར. ཊཱི. མཧཱཝགྒ ༢༦༤) ‘‘ཚཀཎནྟི གོམཡཾ. པཱཀཏིཀཙུཎྞཾ ནཱམ ཨཔཀྐཀསཱཝཙུཎྞཾ. ཏེན ཋཔེཏྭཱ གནྡྷཙུཎྞཾ སབྦཾ ཝཊྚཏཱིཏི ཝདནྟཱི’’ཏི ཝུཏྟཾ. ‘‘ཨནུཛཱནཱམི, བྷིཀྑཝེ, ཙུཎྞཙཱལིནི’’ནྟི (མཧཱཝ. ༢༦༤) ཝཙནཏོ གིལཱནཱནཾ བྷིཀྑཱུནཾ ཙུཎྞེཧི བྷེསཛྫེཧི ཙཱལིཏེཧི ཨཏྠེ སཏི ཙུཎྞཙཱལིནཱི ཝཊྚཏི. ‘‘ཨནུཛཱནཱམི, བྷིཀྑཝེ, དུསྶཙཱལིནི’’ནྟི (མཧཱཝ. ༢༦༤) ཝཙནཏོ སཎྷེཧི ཙུཎྞེཧི ཨཏྠེ སཏི དུསྶཙཱལིནཱི ཝཊྚཏི ¶ . ‘‘ཙུཎྞཙཱལིནིནྟི ཨུདུཀྑལེ ཀོཊྚིཏཙུཎྞཔརིསྶཱཝནི’’ནྟི ཝིམཏིཝིནོདནིཡཾ ¶ (ཝི. ཝི. ཊཱི. མཧཱཝགྒ ༢.༢༦༤-༢༦༥) ཝུཏྟཾ. ཝཛིརབུདྡྷིཊཱིཀཱཡམྤི (ཝཛིར. ཊཱི. མཧཱཝགྒ ༢༦༤) ‘‘ཙཱལིཏེཧཱིཏི པརིསྶཱཝིཏེཧཱི’’ཏི ཝུཏྟཾ.

ཨམནུསྶིཀཱབཱདྷཀཐཱ

ཨམནུསྶིཀཱབཱདྷཀཐཱཡཾ ‘‘ཨནུཛཱནཱམི, བྷིཀྑཝེ, ཨམནུསྶིཀཱབཱདྷེ ཨཱམཀམཾསཾ ཨཱམཀམཾསལོཧིཏ’’ནྟི (མཧཱཝ. ༢༦༤) ཝཙནཏོ ཡསྶ བྷིཀྑུནོ ཨཱམཀམཾསཾ ཁཱདིཏསྶ ཨཱམཀལོཧིཏཾ པིཝིཏསྶ སོ ཨམནུསྶཱབཱདྷོ པཊིཔྤསྶམྦྷཏི, ཏསྶ ཨནཱཔཏྟི. ཏཏྠ ཨཱམཀམཾསཉྩ ཁཱདི, ཨཱམཀལོཧིཏཉྩ པིཝཱིཏི ན ཏཾ བྷིཀྑུ ཁཱདི, ན པིཝི, ཨམནུསྶོ ཁཱདིཏྭཱ ཙ པིཝིཏྭཱ ཙ པཀྐནྟོ. ཏེན ཝུཏྟཾ ‘‘ཏསྶ སོ ཨམནུསྶིཀཱབཱདྷོ པཊིཔྤསྶམྦྷཱི’’ཏི.

ཨཉྫནཀཐཱ

ཨཉྫནཀཐཱཡཾ ‘‘ཨནུཛཱནཱམི, བྷིཀྑཝེ, ཨཉྫནཾ ཀཱལ༹ཉྫནཾ རསཉྫནཾ སོཏཉྫནཾ གེརུཀཾ ཀཔལླ’’ནྟི (མཧཱཝ. ༢༦༥) ཝཙནཏོ བྷིཀྑཱུནཾ ཙཀྑུརོགེ སཏི ཨཉྫནཱདཱིནི ཝཊྚནྟི. ཏཏྠ ‘‘ཨཉྫནནྟི སབྦསངྒཱཧིཀཝཙནམེཏཾ. ཀཱལ༹ཉྫནནྟི ཨེཀཱ ཨཉྫནཛཱཏི. རསཉྫནནྟི ནཱནཱསམྦྷཱརེཧི ཀཏཾ. སོཏཉྫནནྟི ནདཱིསོཏཱདཱིསུ ཨུཔྤཛྫནཀཨཉྫནཾ. གེརུཀོ ནཱམ སུཝཎྞགེརུཀོ. ཀཔལླནྟི དཱིཔསིཁཏོ གཧིཏམསཱི’’ཏི ཨཊྛཀཐཱཡཾ (མཧཱཝ. ཨཊྛ. ༢༦༤) ཝུཏྟཾ. སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༢༦༥) ‘‘སུཝཎྞགེརུཀོཏི སུཝཎྞཏུཏྠཱདཱི’’ཏི ཝུཏྟཾ. ཝིམཏིཝིནོདནིཡམྤི (ཝི. ཝི. ཊཱི. མཧཱཝགྒ ༢.༢༦༤-༢༦༥) ཏཐེཝ ཝུཏྟཾ. ‘‘ཨནུཛཱནཱམི, བྷིཀྑཝེ, ཙནྡནཾ ཏགརཾ ཀཱལཱ༹ནུསཱརིཡཾ ཏཱལཱིསཾ བྷདྡམུཏྟཀ’’ནྟི (མཧཱཝ. ༢༦༥) ཝཙནཏོ ཨཉྫནཱུཔཔིསནེཧི ཨཏྠེ སཏི ཨིམཱནི ཙནྡནཱདཱིནི ཝཊྚནྟི. ཏཏྠ ‘‘ཙནྡནནྟི ལོཧིཏཙནྡནཱདིཀཾ ཡཾ ཀིཉྩི ཙནྡནཾ. ཏགརཱདཱིནི ¶ པཱཀཊཱནི. ཨཉྙཱནིཔི ནཱིལུཔྤལཱདཱིནི ཝཊྚནྟིཡེཝ. ཨཉྫནཱུཔཔིསནེཧཱིཏི ཨཉྫནེཧི སདྡྷིཾ ཨེཀཏོ པིསིཏབྦེཧི. ན ཧི ཀིཉྩི ཨཉྫནཱུཔཔིསནཾ ན ཝཊྚཏཱི’’ཏི ཨཊྛཀཐཱཡཾ (མཧཱཝ. ཨཊྛ. ༢༦༤) ཊཱིཀཱཡཾ (སཱརཏྠ. ཊཱི. མཧཱཝགྒ ༣.༢༦༥) པན ‘‘ཨཉྫནཱུཔཔིསནནྟི ཨཉྫནཏྠཱཡ ཨུཔཔིསིཏབྦཾ ཡཾ ཀིཉྩི ¶ ཙུཎྞཛཱཏཱི’’ཏི ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༢༦༤-༢༦༥) པན ‘‘པཱལི༹ཡཾ ཨཉྫནཱུཔཔིསནནྟི ཨཉྫནེ ཨུཔནེཏུཾ པིསིཏབྦབྷེསཛྫ’’ནྟི ཝུཏྟཾ.

‘‘ཨནུཛཱནཱམི, བྷིཀྑཝེ, ཨཉྫནི’’ནྟི (མཧཱཝ. ༢༦༥) ཝཙནཏོ ཨཉྫནཋཔནཊྛཱནཾ ཝཊྚཏི. ‘‘ན, བྷིཀྑཝེ, ཨུཙྩཱཝཙཱ ཨཉྫནཱི དྷཱརེཏབྦཱ, ཡོ དྷཱརེཡྻ, ཨཱཔཏྟི དུཀྐཊསྶ. ཨནུཛཱནཱམི, བྷིཀྑཝེ, ཨཊྛིམཡཾ དནྟམཡཾ ཝིསཱཎམཡཾ ནལ༹མཡཾ ཝེལུ༹མཡཾ ཀཊྛམཡཾ ཛཏུམཡཾ ལོཧམཡཾ སངྑནཱབྷིམཡ’’ནྟི (མཧཱཝ. ༢༦༥) ཝཙནཏོ ཨེཏཱནི ཀཔྤིཡཱནི. ཏཏྠ ཨཊྛིམཡནྟི མནུསྶཊྛིཾ ཋཔེཏྭཱ ཨཝསེསཨཊྛིམཡཾ. དནྟམཡནྟི ཧཏྠིདནྟཱདིསབྦདནྟམཡཾ. ཝིསཱཎམཡེཔི ཨཀཔྤིཡཾ ནཱམ ནཏྠི. ནལ༹མཡཱདཡོ ཨེཀནྟཀཔྤིཡཱཡེཝ.

‘‘ཨནུཛཱནཱམི, བྷིཀྑཝེ, ཨཔིདྷཱན’’ནྟི (མཧཱཝ. ༢༦༥) ཝཙནཏོ ཨཉྫནཱིཨཔིདྷཱནམྤི ཝཊྚཏི. ‘‘ཨནུཛཱནཱམི, བྷིཀྑཝེ, སུཏྟཀེན བནྡྷིཏྭཱ ཨཉྫནིཡཱ བནྡྷིཏུ’’ནྟི (མཧཱཝ. ༢༦༥) ཝཙནཏོ ཨཔིདྷཱནཾ སུཏྟཀེན བནྡྷིཏྭཱ ཨཉྫནིཡཱ བནྡྷིཏབྦཾ. ‘‘ཨནུཛཱནཱམི, བྷིཀྑཝེ, སུཏྟཀེན སིབྦེཏུ’’ནྟི (མཧཱཝ. ༢༦༥) ཝཙནཏོ ཨཔཏནཏྠཱཡ ཨཉྫནཱིསུཏྟཀེན སིབྦེཏུཾ ཝཊྚཏི. ‘‘ཨནུཛཱནཱམི, བྷིཀྑཝེ, ཨཉྫནིསལཱཀ’’ནྟི (མཧཱཝ. ༢༦༥) ཝཙནཏོ ཨཉྫནིསལཱཀམྤི ཝཊྚཏི. ‘‘ན, བྷིཀྑཝེ, ཨུཙྩཱཝཙཱ ཨཉྫནིསལཱཀཱ དྷཱརེཏབྦཱ, ཡོ དྷཱརེཡྻ, ཨཱཔཏྟི དུཀྐཊསྶ. ཨནུཛཱནཱམི, བྷིཀྑཝེ, ཨཊྛིམཡཾ…པེ… སངྑནཱབྷིམཡ’’ནྟི (མཧཱཝ. ༢༦༥) ཝཙནཏོ ཨེཏཱཡེཝ ཨཉྫནིསལཱཀཱ ཝཊྚནྟི. ‘‘ཨནུཛཱནཱམི, བྷིཀྑཝེ, སལཱཀཊྛཱནིཡ’’ནྟི (མཧཱཝ. ༢༦༥) ཝཙནཏོ ཨཉྫནིསལཱཀཊྛཱནིཡམྤི ཝཊྚཏི. ཏཏྠ སལཱཀཊྛཱནིཡནྟི ཡཏྠ སལཱཀཾ ཨོདཧནྟི, ཏཾ སུསིརདཎྜཀཾ ཝཱ ཐཝིཀཾ ཝཱ ཨནུཛཱནཱམཱིཏི ¶ ཨཏྠོ. ‘‘ཨནུཛཱནཱམི, བྷིཀྑཝེ, ཨཉྫནིཏྠཝིཀ’’ནྟི (མཧཱཝ. ༢༦༥) ཝཙནཏོ ཐཝིཀམྤི ཝཊྚཏི. ‘‘ཨནུཛཱནཱམི, བྷིཀྑཝེ, ཨཾསབདྡྷཀཾ བནྡྷནསུཏྟཀ’’ནྟི (མཧཱཝ. ༢༦༥) ཝཙནཏོ ཨཉྫནིཏྠཝིཀཱཡ ཨཾསེ ལགྒནཏྠཱཡ ཨཾསབདྡྷཀམྤི བནྡྷནསུཏྟཀམྤི ཝཊྚཏི.

ནཏྠུཀཐཱ

ནཏྠུཀཐཱཡཾ ¶ ‘‘ཨནུཛཱནཱམི, བྷིཀྑཝེ, མུདྡྷནི ཏེལཀ’’ནྟི (མཧཱཝ. ༢༦༦) ཝཙནཏོ སཱིསཱབྷིཏཱཔསྶ བྷིཀྑུནོ མུདྡྷནི ཏེལཾ ཝཊྚཏི. ‘‘ཨནུཛཱནཱམི, བྷིཀྑཝེ, ནཏྠུཀམྨ’’ནྟི (མཧཱཝ. ༢༦༦) ཝཙནཏོ ནཀྑམནཱིཡེ སཏི ནཏྠུཀམྨཾ ཝཊྚཏི. ‘‘ཨནུཛཱནཱམི, བྷིཀྑཝེ, ནཏྠུཀརཎི’’ནྟི (མཧཱཝ. ༢༦༦) ཝཙནཏོ ནཏྠུཡཱ ཨགལ༹ནཏྠཾ ནཏྠུཀརཎཱི ཝཊྚཏི. ‘‘ན, བྷིཀྑཝེ, ཨུཙྩཱཝཙཱ ནཏྠུཀརཎཱི དྷཱརེཏབྦཱ, ཡོ དྷཱརེཡྻ, ཨཱཔཏྟི དུཀྐཊསྶ. ཨནུཛཱནཱམི, བྷིཀྑཝེ, ཨཊྛིམཡཾ…པེ… སངྑནཱབྷིམཡ’’ནྟི (མཧཱཝ. ༢༦༦) ཝཙནཏོ ཨེཏཱཡེཝ ནཏྠུཀརཎིཡོ ཝཊྚནྟི. ‘‘ཨནུཛཱནཱམི, བྷིཀྑཝེ, ཡམཀནཏྠུཀརཎི’’ནྟི (མཧཱཝ. ༢༦༦) ཝཙནཏོ ནཏྠུ ཝིསམཾ ཨཱསིཉྩཡནྟི ཙེ, ཡམཀནཏྠུཀརཎིཾ དྷཱརེཏབྦཾ. ཏཏྠ ཡམཀནཏྠུཀརཎིནྟི སམསོ ཏཱཧི དྭཱིཧི པནཱལི༹ཀཱཧི ཨེཀཾ ནཏྠུཀརཎིཾ.

དྷཱུམནེཏྟཀཐཱ

དྷཱུམནེཏྟཀཐཱཡཾ ‘‘ཨནུཛཱནཱམི, བྷིཀྑཝེ, དྷཱུམཾ པཱཏུ’’ནྟི (མཧཱཝ. ༢༦༦) ཝཙནཏོ ཡམཀནཏྠུཀརཎིཡཱ ནཀྑམནཱིཡེ སཏི དྷཱུམཾ པཱཏུཾ ཝཊྚཏི. ‘‘ཨནུཛཱནཱམི, བྷིཀྑཝེ, དྷཱུམནེཏྟ’’ནྟི (མཧཱཝ. ༢༦༦) ཝཙནཏོ ཏམེཝ ཝཊྚིཾ ཨཱལིམྦེཏྭཱ པིཝནཔཙྩཡཱ ཀཎྛེ དཧནྟེན དྷཱུམནེཏྟདྷཱུམོ པིཝིཏབྦོ. ‘‘ན, བྷིཀྑཝེ, ཨུཙྩཱཝཙཱནི དྷཱུམནེཏྟཱནི དྷཱརེཏབྦཱནི, ཡོ དྷཱརེཡྻ, ཨཱཔཏྟི དུཀྐཊསྶ. ཨནུཛཱནཱམི, བྷིཀྑཝེ, ཨཊྛིམཡཾ…པེ… སངྑནཱབྷིམཡ’’ནྟི (མཧཱཝ. ༢༦༦) ཝཙནཏོ ཨེཏཱནི ཨེཝ དྷཱུམནེཏྟཱནི དྷཱརེཏབྦཱནི. ‘‘ཨནུཛཱནཱམི ¶ , བྷིཀྑཝེ, ཨཔིདྷཱན’’ནྟི (མཧཱཝ. ༢༦༦) ཝཙནཏོ པཱཎཀཱདིཨཔྤཝིསནཏྠཾ དྷཱུམནེཏྟཏྠཝིཀམྤི ཝཊྚཏི. ‘‘ཨནུཛཱནཱམི, བྷིཀྑཝེ, ཡམཀཏྠཝིཀ’’ནྟི (མཧཱཝ. ༢༦༦) ཝཙནཏོ ཨེཀཏོ གྷཾསིཡམཱནེ སཏི ཡམཀཏྠཝིཀཾ ཝཊྚཏི. ‘‘ཨནུཛཱནཱམི, བྷིཀྑཝེ, ཨཾསབདྡྷཀཾ བནྡྷནསུཏྟཀ’’ནྟི (མཧཱཝ. ༢༦༦) ཝཙནཏོ དྷཱུམནེཏྟཏྠཝིཀསྶ ཨཾསབདྡྷབནྡྷནསུཏྟཾ ཝཊྚཏི.

ཏེལཔཱཀཀཐཱ

ཏེལཔཱཀཀཐཱཡཾ ‘‘ཨནུཛཱནཱམི, བྷིཀྑཝེ, ཏེལཔཱཀ’’ནྟི (མཧཱཝ. ༢༦༧) ཝཙནཏོ ཝཱཏཱབཱདྷེ ¶ སཏི ཏེལཔཱཀོ ཝཊྚཏི. ཏཏྠ ཨནུཛཱནཱམི, བྷིཀྑཝེ, ཏེལཔཱཀནྟི ཡཾ ཀིཉྩི བྷེསཛྫཔཀྑིཏྟཾ སབྦཾ ཨནུཉྙཱཏམེཝ ཧོཏི. ‘‘ན, བྷིཀྑཝེ, ཨཏིཔཀྑིཏྟམཛྫཾ ཏེལཾ པཱཏབྦཾ, ཡོ པིཝེཡྻ, ཡཐཱདྷམྨོ ཀཱརེཏབྦོ. ཨནུཛཱནཱམི, བྷིཀྑཝེ, ཡསྨིཾ ཏེལཔཱཀེ མཛྫསྶ ན ཝཎྞོ ན གནྡྷོ ན རསོ པཉྙཱཡཏི, ཨེཝརཱུཔཾ མཛྫཔཀྑིཏྟཾ ཏེལཾ པཱཏུ’’ནྟི (མཧཱཝ. ༢༦༧) ཝཙནཏོ ཡསྨིཾ ཏེལཔཱཀེ པཀྑིཏྟསྶ མཛྫསྶ ཝཎྞོ ཝཱ གནྡྷོ ཝཱ རསོ ཝཱ ན པཉྙཱཡཏི, ཏཱདིསཾ ཏེལཾ པིཝིཏབྦཾ. ཏཏྠ ཨཏིཔཀྑིཏྟམཛྫཱནཱིཏི ཨཏིཝིཡ ཁིཏྟམཛྫཱནི, བཧུཾ མཛྫཾ པཀྑིཔིཏྭཱ ཡོཛིཏཱནཱིཏི ཨཏྠོ. ‘‘ཨནུཛཱནཱམི, བྷིཀྑཝེ, ཨབྦྷཉྫནཾ ཨདྷིཊྛཱཏུ’’ནྟི (མཧཱཝ. ༢༦༧) ཝཙནཏོ ཨཏིཔཀྑིཏྟམཛྫཏྟཱ ཨཔིཝིཏབྦེ ཏེལེ སཏི ཨབྦྷཉྫནཾ ཨདྷིཊྛཱཏུཾ ཝཊྚཏི. ‘‘ཨནུཛཱནཱམི, བྷིཀྑཝེ, ཏཱིཎི ཏུམྦཱནི ལོཧཏུམྦཾ ཀཊྛཏུམྦཾ ཕལཏུམྦ’’ནྟི (མཧཱཝ. ༢༦༧) ཝཙནཏོ ཏེལཔཀྐབྷཱཛནཱནི ཨིམཱནི ཏཱིཎི ཏུམྦཱནི ཝཊྚནྟི.

སེདཀམྨཀཐཱ

སེདཀམྨཀཐཱཡཾ ‘‘ཨནུཛཱནཱམི, བྷིཀྑཝེ, སེདཀམྨ’’ནྟི (མཧཱཝ. ༢༦༧) ཝཙནཏོ ཨངྒཝཱཏེ སཏི སེདཀམྨཾ ཀཱཏུཾ ཝཊྚཏི ¶ . ཏཏྠ ཨངྒཝཱཏོཏི ཧཏྠཔཱདེ ཝཱཏོ. ནཀྑམནཱིཡོ ཧོཏི, ‘‘ཨནུཛཱནཱམི, བྷིཀྑཝེ, སམྦྷཱརསེད’’ནྟི (མཧཱཝ. ༢༦༧) ཝཙནཏོ སེདཀམྨེན ནཀྑམནཱིཡེ སཏི སམྦྷཱརསེདཾ ཀཱཏུཾ ཝཊྚཏི. ཏཏྠ སམྦྷཱརསེདནྟི ནཱནཱཝིདྷཔཎྞསམྦྷཱརསེདཾ. ནཀྑམནཱིཡོ ཧོཏི, ‘‘ཨནུཛཱནཱམི, བྷིཀྑཝེ, མཧཱསེད’’ནྟི (མཧཱཝ. ༢༦༧) ཝཙནཏོ སམྦྷཱརསེདནཀྑམནཱིཡེ སཏི མཧཱསེདཾ ཀཱཏུཾ ཝཊྚཏི. ཏཏྠ མཧཱསེདནྟི མཧནྟཾ སེདཾ, པོརིསཔྤམཱཎཾ ཨཱཝཱཊཾ ཨངྒཱརཱནཾ པཱུརེཏྭཱ པཾསུཝཱལིཀཱདཱིཧི པིདཧིཏྭཱ ཏཏྠ ནཱནཱཝིདྷཱནི ཝཱཏཧརཎཔཎྞཱནི སནྠརིཏྭཱ ཏེལམཀྑིཏེན གཏྟེན ཏཏྠ ནིཔཛྫིཏྭཱ སམྤརིཝཏྟནྟེན སརཱིརཾ སེདེཏུཾ ཨནུཛཱནཱམཱིཏི ཨཏྠོ. ནཀྑམནཱིཡོ ཧོཏི, ‘‘ཨནུཛཱནཱམི, བྷིཀྑཝེ, བྷངྒོདཀ’’ནྟི (མཧཱཝ. ༢༦༧) ཝཙནཏོ མཧཱསེདེན ནཀྑམནཱིཡེ སཏི བྷངྒོདཀཾ ཀཱཏུཾ ཝཊྚཏི. ཏཏྠ བྷངྒོདཀནྟི ནཱནཱཔཎྞབྷངྒཀུཐིཏཾ ཨུདཀཾ, ཏེཧི པཎྞེཧི ཙ ཨུདཀེན ཙ སིཉྩིཏྭཱ སིཉྩིཏྭཱ སེདེཏབྦོ. ནཀྑམནཱིཡོ ཧོཏི, ‘‘ཨནུཛཱནཱམི, བྷིཀྑཝེ, ཨུདཀཀོཊྛཀ’’ནྟི (མཧཱཝ. ༢༦༧) ཝཙནཏོ བྷངྒོདཀེན ནཀྑམནཱིཡེ སཏི ཨུདཀཀོཊྛཀཾ ཀཱཏུཾ ཝཊྚཏི. ཏཏྠ ཨུདཀཀོཊྛཀནྟི ¶ ཨུདཀཀོཊྛེ ཙཱཊིཾ ཝཱ དོཎིཾ ཝཱ ཨུཎྷོདཀསྶ པཱུརེཏྭཱ ཏཏྠ པཝིསིཏྭཱ སེདཀམྨཀརཎཾ ཨནུཛཱནཱམཱིཏི ཨཏྠོ.

ལོཧིཏམོཙནཀཐཱ

ལོཧིཏམོཙནཀཐཱཡཾ ‘‘ཨནུཛཱནཱམི, བྷིཀྑཝེ, ལོཧིཏཾ མོཙེཏུ’’ནྟི (མཧཱཝ. ༢༦༧) ཝཙནཏོ པབྦཝཱཏེ སཏི ལོཧིཏཾ མོཙེཏུཾ ཝཊྚཏི. ཏཏྠ པབྦཝཱཏོ ཧོཏཱིཏི པབྦེ པབྦེ ཝཱཏོ ཝིཛ྄ཛྷཏི. ལོཧིཏཾ མོཙེཏུནྟི སཏྠཀེན ལོཧིཏཾ མོཙེཏུཾ. ནཀྑམནཱིཡོ ཧོཏི, ཨནུཛཱནཱམི, བྷིཀྑཝེ, ལོཧིཏཾ མོཙེཏྭཱ ཝིསཱཎེན གཱཧེཏུནྟི (མཧཱཝ. ༢༦༧).

པཱདབྦྷཉྫནཀཐཱ

པཱདབྦྷཉྫནཀཐཱཡཾ ¶ ‘‘ཨནུཛཱནཱམི, བྷིཀྑཝེ, པཱདབྦྷཉྫན’’ནྟི (མཧཱཝ. ༢༦༧) ཝཙནཏོ པཱདེསུ ཕལིཏེསུ པཱདབྦྷཉྫནཾ པཙིཏབྦཾ. ནཀྑམནཱིཡོ ཧོཏི, ‘‘ཨནུཛཱནཱམི, བྷིཀྑཝེ, པཛྫཾ ཨབྷིསངྑརིཏུ’’ནྟི (མཧཱཝ. ༢༦༧) ཝཙནཏོ པཱདབྦྷཉྫནཏེལེན ནཀྑམནཱིཡེ སཏི པཛྫཾ ཨབྷིསངྑརིཏབྦཾ. ཏཏྠ པཛྫཾ ཨབྷིསངྑརིཏུནྟི ཡེན ཕལིཏཔཱདཱ པཱཀཏིཀཱ ཧོནྟི, ཏཾ ནཱལི༹ཀེརཱདཱིསུ ནཱནཱབྷེསཛྫཱནི པཀྑིཔིཏྭཱ པཛྫཾ ཨབྷིསངྑརིཏུཾ, པཱདཱནཾ སཔྤཱཡབྷེསཛྫཾ པཙིཏུནྟི ཨཏྠོ.

གཎྜཱབཱདྷཀཐཱ

གཎྜཱབཱདྷཀཐཱཡཾ ‘‘ཨནུཛཱནཱམི, བྷིཀྑཝེ, སཏྠཀམྨ’’ནྟི (མཧཱཝ. ༢༦༧) ཝཙནཏོ གཎྜཱབཱདྷེ སཏི སཏྠཀམྨཾ ཀཱཏབྦཾ. ‘‘ཨནུཛཱནཱམི, བྷིཀྑཝེ, ཀསཱཝོདཀ’’ནྟི (མཧཱཝ. ༢༦༧) ཝཙནཏོ ཀསཱཝོདཀེན ཨཏྠེ སཏི ཀསཱཝོདཀཾ དཱཏབྦཾ. ‘‘ཨནུཛཱནཱམི, བྷིཀྑཝེ, ཏིལཀཀྐ’’ནྟི (མཧཱཝ. ༢༦༧) ཝཙནཏོ ཏིལཀཀྐེན ཨཏྠེ སཏི ཏིལཀཀྐཾ དཱཏབྦཾ. ཏིལཀཀྐེན ཨཏྠོཏི པིཊྛེཧི ཏིལེཧི ཨཏྠོ. ‘‘ཨནུཛཱནཱམི བྷིཀྑཝེ ཀབལི༹ཀ’’ནྟི (མཧཱཝ. ༢༦༧) ཝཙནཏོ ཀབལི༹ཀཱཡ ཨཏྠེ སཏི ཀབལི༹ཀཱ དཱཏབྦཱ. ཏཏྠ ཀབལི༹ཀནྟི ཝཎམུཁེ སཏྟུཔིཎྜཾ པཀྑིཔིཏུཾ. ‘‘ཨནུཛཱནཱམི, བྷིཀྑཝེ, ཝཎབནྡྷནཙོལ༹’’ནྟི (མཧཱཝ. ༢༦༧) ཝཙནཏོ ¶ ཝཎབནྡྷནཙོལེ༹ན ཨཏྠེ སཏི ཝཎབནྡྷནཙོལ༹ཾ དཱཏབྦཾ. ‘‘ཨནུཛཱནཱམི, བྷིཀྑཝེ, སཱསཔཀུཊྚེན ཕོསིཏུ’’ནྟི (མཧཱཝ. ༢༦༧) ཝཙནཏོ སཙེ ཝཎོ ཀུཎྜཝཏཱི, སཱསཔཀུཊྚེན ཕོསིཏབྦཾ. ཏཏྠ སཱསཔཀུཊྚེནཱཏི སཱསཔཔིཊྛེན.

‘‘ཨནུཛཱནཱམི, བྷིཀྑཝེ, དྷཱུམཾ ཀཱཏུ’’ནྟི (མཧཱཝ. ༢༦༧) ཝཙནཏོ ཡདི ཝཎོ ཀིལིཛྫིཏྠ, དྷཱུམཾ ཀཱཏུཾ ཝཊྚཏི. ‘‘ཨནུཛཱནཱམི, བྷིཀྑཝེ, ལོཎསཀྑརིཀཱཡ ཚིནྡིཏུ’’ནྟི (མཧཱཝ. ༢༦༧) ཝཙནཏོ ཡདི ཝཌྜྷམཾསཾ ཝུཊྛཱཏི ¶ , ཚིནྡིཏབྦཾ. ཏཏྠ ཝཌྜྷམཾསནྟི ཨདྷིཀམཾསཾ ཨཱཎཱི ཝིཡ ཨུཊྛཧཏི. ལོཎསཀྑརིཀཱཡ ཚིནྡིཏུནྟི ཁཱརེན ཚིནྡིཏུཾ. ‘‘ཨནུཛཱནཱམི, བྷིཀྑཝེ, ཝཎཏེལ’’ནྟི (མཧཱཝ. ༢༦༧) ཝཙནཏོ ཡདི ཝཎོ ན རུཧཏི, ཝཎརུཧནཏེལཾ པཙིཏབྦཾ. ‘‘ཨནུཛཱནཱམི, བྷིཀྑཝེ, ཝིཀཱསིཀཾ སབྦཾ ཝཎཔཊིཀམྨ’’ནྟི (མཧཱཝ. ༢༦༧) ཝཙནཏོ ཡདི ཏེལཾ གལ༹ཏི, ཝིཀཱསིཀཾ དཱཏབྦཾ, སབྦཾ ཝཎཔཊིཀམྨཾ ཀཱཏབྦཾ. ཏཏྠ ཝིཀཱསིཀནྟི ཏེལརུནྡྷནཔིལོཏིཀཾ. སབྦཾ ཝཎཔཊིཀམྨནྟི ཡཾ ཀིཉྩི ཝཎཔཊིཀམྨཾ ནཱམ ཨཏྠི, སབྦཾ ཨནུཛཱནཱམཱིཏི ཨཏྠོ. མཧཱཝིཀཊཀཐཱ པུབྦེ ཝུཏྟཱཝ.

སཱམཾ གཧེཏྭཱཏི ཨིདཾ ན ཀེཝལཾ སཔྤདཊྛསྶེཝ, ཨཉྙསྨིམྤི དཊྛཝིསེ སཏི སཱམཾ གཧེཏྭཱ པརིབྷུཉྫིཏབྦཾ, ཨཉྙེསུ པན ཀཱརཎེསུ པཊིགྒཧིཏམེཝ ཝཊྚཏི.

ཝིསཔཱིཏཀཐཱ

ཝིསཔཱིཏཀཐཱཡཾ ‘‘ཨནུཛཱནཱམི, བྷིཀྑཝེ, གཱུཐཾ པཱཡེཏུ’’ནྟི (མཧཱཝ. ༢༦༨) ཝཙནཏོ པཱིཏཝིསཾ བྷིཀྑུཾ གཱུཐཾ པཱཡེཏུཾ ཝཊྚཏི. ‘‘ཨནུཛཱནཱམི, བྷིཀྑཝེ, ཡཾ ཀརོནྟོ པཊིགྒཎྷཱཏི, སྭེཝ པཊིགྒཧོ ཀཏོ, ན པུན པཊིགྒཧེཏབྦོ’’ཏི (མཧཱཝ. ༢༦༨) ཝཙནཏོ ཏདེཝ ཝཊྚཏི. ཨཊྛཀཐཱཡཾ (མཧཱཝ. ཨཊྛ. ༢༦༨) པན ན པུན པཊིགྒཧེཏབྦོཏི སཙེ བྷཱུམིཔྤཏྟོ, པཊིགྒཧཱཔེཏབྦོ, ཨཔྤཏྟཾ པན གཧེཏུཾ ཝཊྚཏི.

གྷརདིནྣཀཱབཱདྷཀཐཱ

གྷརདིནྣཀཱབཱདྷཀཐཱཡཾ ‘‘ཨནུཛཱནཱམི, བྷིཀྑཝེ, སཱིཏཱལོལི༹ཾ པཱཡེཏུ’’ནྟི (མཧཱཝ. ༢༦༩) ཝཙནཏོ ¶ གྷརདིནྣཀཱབཱདྷསྶ བྷིཀྑུནོ སཱིཏཱལོལི༹ཾ པཱཡེཏུཾ ཝཊྚཏི. ཏཏྠ གྷརདིནྣཀཱབཱདྷོཏི ཝསཱིཀརཎཔཱཎཀསམུཊྛིཏརོགོ. ཊཱིཀཱཡཾ (སཱརཏྠ. ཊཱི. མཧཱཝགྒ ༣.༢༦༩) པན ¶ ‘‘གྷརདིནྣཀཱབཱདྷོ ནཱམ ཝསཱིཀརཎཏྠཱཡ གྷརཎིཡཱ དིནྣབྷེསཛྫསམུཊྛིཏོ ཨཱབཱདྷོ. ཏེནཱཧ ‘ཝསཱིཀརཎཔཱཎཀསམུཊྛིཏརོགོ’ཏི. གྷར-སདྡོ ཙེཏྠ ཨབྷེདེན གྷརཎིཡཱ ཝཏྟམཱནོ ཨདྷིཔྤེཏོ’’ཏི ཝུཏྟཾ. ཝིམཏིཝིནོདནིཡམྤི (ཝི. ཝི. ཊཱི. མཧཱཝགྒ ༢.༢༦༧-༢༦༩) ‘‘གྷརདིནྣཀཱབཱདྷོ ནཱམ གྷརཎིཡཱ དིནྣཝསཱིཀརཎབྷེསཛྫསམུཊྛིཏོ ཨཱབཱདྷོ’’ཏི ཝུཏྟཾ. སཱིཏཱལོལི༹ནྟི ནངྒལེན ཀསནྟསྶ ཕཱལེ ལགྒམཏྟིཀཾ ཨུདཀེན ཨཱལོལེ༹ཏྭཱ པཱཡེཏུཾ ཨནུཛཱནཱམཱིཏི ཨཏྠོ.

དུཊྛགཧཎིཀཀཐཱ

དུཊྛགཧཎིཀཀཐཱཡཾ ‘‘ཨནུཛཱནཱམི, བྷིཀྑཝེ, ཨཱམིསཁཱརཾ པཱཡེཏུ’’ནྟི (མཧཱཝ. ༢༦༩) ཝཙནཏོ དུཊྛགཧཎིཀསྶ བྷིཀྑུནོ ཨཱམིསཁཱརཾ པཱཡེཏུཾ ཝཊྚཏི. ཏཏྠ དུཊྛགཧཎིཀོཏི ཝིཔནྣགཧཎིཀོ, ཀིཙྪེན ཨུཙྩཱརོ ནིཀྑམཏཱིཏི ཨཏྠོ. ཨཱམིསཁཱརནྟི སུཀྑོདནཾ ཛྷཱཔེཏྭཱ ཏཱཡ ཚཱརིཀཱཡ པགྒྷརིཏཾ ཁཱརོདཀཾ. ཝིམཏིཝིནོདནིཡཾ (ཝི. ཝི. ཊཱི. མཧཱཝགྒ ༢.༢༦༧-༢༦༩) པན ‘‘ཏཱཡ ཚཱརིཀཱཡ པགྒྷརིཏཾ ཁཱརོདཀནྟི པརིསྶཱཝནེ ཏཾ ཚཱརིཀཾ པཀྑིཔིཏྭཱ ཨུདཀེ ཨབྷིསིཉྩིཏེ ཏཏོ ཚཱརིཀཏོ ཧེཊྛཱ པགྒྷརིཏཾ ཁཱརོདཀ’’ནྟི ཝུཏྟཾ.

པཎྜུརོགཱབཱདྷཀཐཱ

པཎྜུརོགཱབཱདྷཀཐཱཡཾ ‘‘ཨནུཛཱནཱམི, བྷིཀྑཝེ, མུཏྟཧརཱིཏཀཾ པཱཡེཏུ’’ནྟི (མཧཱཝ. ༢༦༩) ཝཙནཏོ པཎྜུརོགཱབཱདྷསྶ བྷིཀྑུནོ མུཏྟཧརཱིཏཀཾ པཱཡེཏུཾ ཝཊྚཏི. ཏཏྠ མུཏྟཧརཱིཏཀནྟི གོམུཏྟཔརིབྷཱཝིཏཾ ཧརཱིཏཀཾ.

ཚཝིདོསཱབཱདྷཀཐཱ

ཚཝིདོསཱབཱདྷཀཐཱཡཾ ¶ ‘‘ཨནུཛཱནཱམི, བྷིཀྑཝེ, གནྡྷཱལེཔཾ ཀཱཏུ’’ནྟི (མཧཱཝ. ༢༦༩) ཝཙནཏོ ཚཝིདོསཱབཱདྷསྶ བྷིཀྑུནོ གནྡྷཱལེཔཾ ཀཱཏུཾ ཝཊྚཏི.

ཨབྷིསནྣཀཱཡཀཐཱ

ཨབྷིསནྣཀཱཡཀཐཱཡཾ ¶ ‘‘ཨནུཛཱནཱམི, བྷིཀྑཝེ, ཝིརེཙནཾ པཱཏུ’’ནྟི (མཧཱཝ. ༢༦༩) ཝཙནཏོ ཨབྷིསནྣཀཱཡསྶ བྷིཀྑུནོ ཝིརེཙནཾ པཱཏུཾ ཝཊྚཏི. ཏཏྠ ཨབྷིསནྣཀཱཡོཏི ཨུསྶནྣདོསཀཱཡོ. ཨཙྪཀཉྫིཡཱ ཨཏྠོ ཧོཏི, ‘‘ཨནུཛཱནཱམི, བྷིཀྑཝེ, ཨཙྪཀཉྫིཡ’’ནྟི (མཧཱཝ. ༢༦༩) ཝཙནཏོ ཨཙྪཀཉྫིཡཾ པཱཏུཾ ཝཊྚཏི. ཏཏྠ ཨཙྪཀཉྫིཡནྟི ཏཎྜུལོདཀམཎྜོ. ཨཀཊཡཱུསེན ཨཏྠོ ཧོཏི, ‘‘ཨནུཛཱནཱམི, བྷིཀྑཝེ, ཨཀཊཡཱུས’’ནྟི (མཧཱཝ. ༢༦༩) ཝཙནཏོ ཨཀཊཡཱུསཾ པཱཏུཾ ཝཊྚཏི. ཏཏྠ ཨཀཊཡཱུསནྟི ཨསིནིདྡྷོ མུགྒཔཙིཏཔཱནཱིཡོ. སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༢༦༩) པན ཝིམཏིཝིནོདནིཡཉྩ (ཝི. ཝི. ཊཱི. མཧཱཝགྒ ༢.༢༦༧-༢༦༩) ‘‘ཨཀཊཡཱུསེནཱཏི ཨནབྷིསངྑཏེན མུགྒཡཱུསེནཱ’’ཏི ཝུཏྟཾ. ཀཊཱཀཊེན ཨཏྠོ ཧོཏི, ‘‘ཨནུཛཱནཱམི, བྷིཀྑཝེ, ཀཊཱཀཊ’’ནྟི (མཧཱཝ. ༢༦༩) ཝཙནཏོ ཀཊཱཀཊཾ པཱཡེཏུཾ ཝཊྚཏི. ཏཏྠ ཀཊཱཀཊནྟི སོཝ དྷོཏསིནིདྡྷོ. སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༢༦༩) ཝིམཏིཝིནོདནིཡཉྩ (ཝི. ཝི. ཊཱི. མཧཱཝགྒ ༢.༢༦༧-༢༦༩) ‘‘ཀཊཱཀཊེནཱཏི མུགྒེ པཙིཏྭཱ ཨཙཱལེཏྭཱཝ པརིསྶཱཝིཏེན མུགྒཡཱུསེནཱ’’ཏི ཝུཏྟཾ. པཊིཙྪཱདནཱིཡེན ཨཏྠོ ཧོཏི, ‘‘ཨནུཛཱནཱམི, བྷིཀྑཝེ, པཊིཙྪཱདནཱིཡ’’ནྟི (མཧཱཝ. ༢༦༩) ཝཙནཏོ པཊིཙྪཱདནཱིཡཾ པཱཏུཾ ཝཊྚཏི. ཏཏྠ པཊིཙྪཱདནཱིཡེནཱཏི མཾསརསེན.

ལོཎསོཝཱིརཀཀཐཱ

ལོཎསོཝཱིརཀཀཐཱཡཾ ¶ ‘‘ཨནུཛཱནཱམི, བྷིཀྑཝེ, གིལཱནསྶ ལོཎསོཝཱིརཀཾ, ཨགིལཱནསྶ ཨུདཀསམྦྷིནྣཾ པཱནཔརིབྷོགེན པརིབྷུཉྫིཏུ’’ནྟི (མཧཱཝ. ༢༧༣) ཝཙནཏོ གིལཱནེན བྷིཀྑུནཱ ལོཎསོཝཱིརཀཾ པཱཏབྦཾ, ཨགིལཱནེན ཨུདཀསམྦྷིནྣཾ ཀཏྭཱ པརིབྷུཉྫིཏབྦཾ, ཏཉྩ ‘‘པཱནཔརིབྷོགེནཱ’’ཏི ཝཙནཏོ ཝིཀཱལེཔི ཝཊྚཏི.

ཏཏྠ ལོཎསོཝཱིརཀཾ ནཱམ སབྦརསཱབྷིསངྑཏཾ ཨེཀཾ བྷེསཛྫཾ, ཏཾ ཀིར ཀརོནྟོ ཧརཱིཏཀཱམལཀཝིབྷཱིཏཀཀསཱཝེ སབྦདྷཉྙཱནི སབྦཨཔརཎྞཱནི སཏྟནྣམྤི དྷཉྙཱནཾ ཨོདནཾ ཀདལིཕལཱདཱིནི སབྦཕལཱནི ཝེཏྟཀེཏཀཁཛྫཱུརིཀལཱི༹རཱདཡོ སབྦཀལཱི༹རེ མཙྪམཾསཁཎྜཱནི ཨནེཀཱནི ¶ ཙ མདྷུཕཱཎིཏསིནྡྷཝལོཎཏིཀཊུཀཱདཱིནི བྷེསཛྫཱནི པཀྑིཔིཏྭཱ ཀུམྦྷིམུཁཾ ལིམྤིཏྭཱ ཨེཀཾ དྭེ ཏཱིཎི སཾཝཙྪརཱནི ཋཔེནྟི, ཏཾ པརིཔཙྩིཏྭཱ ཛམྦུརསཝཎྞཾ ཧོཏི, ཝཱཏཀཱསཀུཊྛཔཎྜུབྷགཎྜལཱདཱིནཾ སིནིདྡྷབྷོཛནབྷུཏྟཱནཉྩ ཨུཏྟརཔཱནཾ བྷཏྟཛཱིརཎཀབྷེསཛྫཾ ཏཱདིསཾ ནཏྠི, ཏཾ པནེཏཾ བྷིཀྑཱུནཾ པཙྪཱབྷཏྟམྤི ཝཊྚཏི, གིལཱནཱནཾ པཱཀཏིཀམེཝ. ཨགིལཱནཱནཾ པན ཨུདཀསམྦྷིནྣཾ པཱནཔརིབྷོགེནཱཏི.

སཱརཏྠདཱིཔནིཡཾ (སཱརཏྠ. ཊཱི. ༢.༡༩༡-༡༩༢) པན ‘‘པཱནཔརིབྷོགེནཱཏི ཝུཏྟཏྟཱ ལོཎསོཝཱིརཀཾ ཡཱམཀཱལིཀ’’ནྟི ཝུཏྟཾ. ཝིམཏིཝིནོདནིཡཾ (ཝི. ཝི. ཊཱི. ༡.༡༩༢) པན ‘‘པཱནཔརིབྷོགེན ཝཊྚཏཱིཏི སམྦནྡྷོ. ཨེཝཾ པན ཝུཏྟཏྟཱ ལོཎསོཝཱིརཀཾ ཡཱམཀཱལིཀནྟི ཀེཙི ཝདནྟི, ཀེཙི པན ‘གིལཱནཱནཾ པཱཀཏིཀམེཝ, ཨགིལཱནཱནཾ པན ཨུདཀསམྦྷིནྣ’ནྟི ཝུཏྟཏྟཱ གུལ༹ཾ ཝིཡ སཏྟཱཧཀཱལིཀ’’ནྟི ཝུཏྟཾ. ཝཛིརབུདྡྷིཊཱིཀཱཡཾ (ཝཛིར. ཊཱི. མཧཱཝགྒ ༢༦༣) པན ‘‘ཨཝིསེསེན སཏིཔཙྩཡཏཱ ཝུཏྟཱ ¶ . ཨིམསྨིཾ ཁནྡྷཀེ ‘ཨནུཛཱནཱམི, བྷིཀྑཝེ, གིལཱནསྶ གུལ༹ཾ, ཨགིལཱནསྶ གུལོ༹དཀཾ, གིལཱནསྶ ལོཎསོཝཱིརཀཾ, ཨགིལཱནསྶ ཨུདཀསམྦྷིནྣ’ནྟི (མཧཱཝ. ༢༨༤) ཝུཏྟཾ, ཏསྨཱ སིདྡྷཾ ‘སཏིཔཙྩཡཏཱ གིལཱནཱགིལཱནཝསེན དུཝིདྷཱ’ཏི’’ ཝུཏྟཾ.

ཨནྟོཝུཏྠཱདིཀཐཱ

ཨནྟོཝུཏྠཱདིཀཐཱཡཾ ‘‘ཏེན ཁོ པན སམཡེན བྷགཝཏོ ཨུདརཝཱཏཱབཱདྷོ ཧོཏི, ཨཐ ཁོ ཨཱཡསྨཱ ཨཱནནྡོ ‘པུབྦེཔི བྷགཝཏོ ཨུདརཝཱཏཱབཱདྷོ ཏེཀཊུལཡཱགུཡཱ ཕཱསུ ཧོཏཱི’ཏི སཱམཾ ཏིལམྤི ཏཎྜུལམྤི མུགྒམྤི ཝིཉྙཱཔེཏྭཱ ཨནྟོ ཝཱསེཏྭཱ ཨནྟོ སཱམཾ པཙིཏྭཱ བྷགཝཏོ ཨུཔནཱམེསི ‘པིཝཏུ བྷགཝཱ ཏེཀཊུལཡཱགུ’ནྟི. ཛཱནནྟཱཔི ཏཐཱགཏཱ པུཙྪནྟི, ཛཱནནྟཱཔི ན པུཙྪནྟི, ཀཱལཾ ཝིདིཏྭཱ པུཙྪནྟི, ཀཱལཾ ཝིདིཏྭཱ ན པུཙྪནྟི, ཨཏྠསཉྷིཏཾ ཏཐཱགཏཱ པུཙྪནྟི, ནོ ཨནཏྠསཉྷིཏཾ, ཨནཏྠསཉྷིཏེ སེཏུགྷཱཏོ ཏཐཱགཏཱནཾ. དྭཱིཧི ཨཱཀཱརེཧི བུདྡྷཱ བྷགཝནྟོ བྷིཀྑཱུ པཊིཔུཙྪནྟི ‘དྷམྨཾ ཝཱ དེསེསྶཱམ, སཱཝཀཱནཾ ཝཱ སིཀྑཱཔདཾ པཉྙཔེསྶཱམཱ’ཏི.

ཨཐ ཁོ བྷགཝཱ ཨཱཡསྨནྟཾ ཨཱནནྡཾ ཨཱམནྟེསི ‘ཀུཏཱཡཾ, ཨཱནནྡ, ཡཱགཱུ’ཏི. ཨཐ ཁོ ¶ ཨཱཡསྨཱ ཨཱནནྡོ བྷགཝཏོ ཨེཏམཏྠཾ ཨཱརོཙེསི. ཝིགརཧི བུདྡྷོ བྷགཝཱ ཨནནུཙྪཝིཀཾ, ཨཱནནྡ, ཨནནུལོམིཀཾ ཨཔྤཏིརཱུཔཾ ཨསྶམཎཀཾ ཨཀཔྤིཡཾ ཨཀརཎཱིཡཾ, ཀཐཉྷི ནཱམ ཏྭཾ, ཨཱནནྡ, ཨེཝརཱུཔཱཡ བཱཧུལླཱཡ ཙེཏེསྶསི, ཡདཔི, ཨཱནནྡ, ཨནྟོ ཝུཏྠཾ, ཏདཔི ཨཀཔྤིཡཾ. ཡདཔི ཨནྟོ པཀྐཾ, ཏདཔི ཨཀཔྤིཡཾ. ཡདཔི སཱམཾ པཀྐཾ, ཏདཔི ཨཀཔྤིཡཾ. ནེཏཾ, ཨཱནནྡ, ཨཔྤསནྣཱནཾ ཝཱ པསཱདཱཡ…པེ… ཝིགརཧིཏྭཱ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ན, བྷིཀྑཝེ, ཨནྟོ ཝུཏྠཾ ཨནྟོ ¶ པཀྐཾ སཱམཾ པཀྐཾ པརིབྷུཉྫིཏབྦཾ, ཡོ པརིབྷུཉྫེཡྻ, ཨཱཔཏྟི དུཀྐཊསྶ. ཨནྟོ ཙེ, བྷིཀྑཝེ, ཝུཏྠཾ ཨནྟོ པཀྐཾ སཱམཾ པཀྐཾ, ཏཉྩེ པརིབྷུཉྫེཡྻ, ཨཱཔཏྟི ཏིཎྞཾ དུཀྐཊཱནཾ. ཨནྟོ ཙེ, བྷིཀྑཝེ, ཝུཏྠཾ ཨནྟོ པཀྐཾ ཨཉྙེཧི པཀྐཾ, ཏཉྩེ པརིབྷུཉྫེཡྻ, ཨཱཔཏྟི དྭིནྣཾ དུཀྐཊཱནཾ. ཨནྟོ ཙེ, བྷིཀྑཝེ, ཝུཏྠཾ བཧི པཀྐཾ སཱམཾ པཀྐཾ, ཏཉྩེ པརིབྷུཉྫེཡྻ, ཨཱཔཏྟི དྭིནྣཾ དུཀྐཊཱནཾ. བཧི ཙེ, བྷིཀྑཝེ, ཝུཏྠཾ ཨནྟོ པཀྐཾ སཱམཾ པཀྐཾ, ཏཉྩེ པརིབྷུཉྫེཡྻ, ཨཱཔཏྟི དྭིནྣཾ དུཀྐཊཱནཾ. ཨནྟོ ཙེ, བྷིཀྑཝེ, ཝུཏྠཾ བཧི པཀྐཾ ཨཉྙེཧི པཀྐཾ, ཏཉྩེ པརིབྷུཉྫེཡྻ, ཨཱཔཏྟི དུཀྐཊསྶ. བཧི ཙེ, བྷིཀྑཝེ, ཝུཏྠཾ ཨནྟོ པཀྐཾ ཨཉྙེཧི པཀྐཾ, ཏཉྩེ པརིབྷུཉྫེཡྻ, ཨཱཔཏྟི དུཀྐཊསྶ. བཧི ཙེ, བྷིཀྑཝེ, ཝུཏྠཾ བཧི པཀྐཾ སཱམཾ པཀྐཾ, ཏཉྩེ པརིབྷུཉྫེཡྻ, ཨཱཔཏྟི དུཀྐཊསྶ. བཧི ཙེ, བྷིཀྑཝེ, ཝུཏྠཾ བཧི པཀྐཾ ཨཉྙེཧི པཀྐཾ, ཏཉྩེ པརིབྷུཉྫེཡྻ, ཨནཱཔཏྟཱི’’ཏི (མཧཱཝ. ༢༧༤) ཝཙནཏོ སཧསེཡྻཔྤཧོནཀེ ཋཱནེ ཝུཏྠཏཱ, ཏཏྠ པཀྐཏཱ, ཨུཔསམྤནྣེན སཱམཾ པཀྐཏཱཏི ཨིམེསཾ ཏིཎྞཾ ཨངྒཱནཾ སམྦྷཝེ སཏི ཏིསྶོ ཨཱཔཏྟིཡོ, དྭིནྣཾ སམྦྷཝེ དྭེ ཨཱཔཏྟིཡོ, ཨེཀསྶ ཨངྒསྶ སམྦྷཝེ ཨེཀཱ ཨཱཔཏྟཱིཏི ཝེདིཏབྦཾ.

ཨནྟོ ཝུཏྠནྟི ཨཀཔྤིཡཀུཊིཡཾ ཝུཏྠཾ. སཱམཾ པཀྐནྟི ཨེཏྠ ཡཾ ཀིཉྩི ཨཱམིསཾ བྷིཀྑུནོ པཙིཏུཾ ན ཝཊྚཏི. སཙེཔིསྶ ཨུཎྷཡཱགུཡཱ སུལསིཔཎྞཱནི ཝཱ སིངྒིཝེརཾ ཝཱ ལོཎཾ ཝཱ པཀྑིཔནྟི, ཏམྤི ཙཱལེཏུཾ ན ཝཊྚཏི. ‘‘ཡཱགུཾ ནིབྦཱཔེམཱི’’ཏི པན ཙཱལེཏུཾ ཝཊྚཏི. ཨུཏྟཎྜུབྷཏྟཾ ལབྷིཏྭཱཔི པིདཧིཏུཾ ན ཝཊྚཏི. སཙེ པན མནུསྶཱ པིདཧིཏྭཱཝ དེནྟི, ཝཊྚཏི. ‘‘བྷཏྟཾ ཝཱ མཱ ནིབྦཱཡཏཱུ’’ཏི པིདཧིཏུཾ ཝཊྚཏི. ‘‘ཨནུཛཱནཱམི, བྷིཀྑཝེ, པུན པཱཀཾ པཙིཏུ’’ནྟི (མཧཱཝ. ༢༧༤) ཝཙནཏོ པུབྦེ ཨནུཔསམྤནྣེཧི པཀྐཾ པུན པཙིཏུཾ ཝཊྚཏི. ཝུཏྟཉྷི ཨཊྛཀཐཱཡཾ (མཧཱཝ. ཨཊྛ. ༢༧༤) ‘‘ཁཱིརཏཀྐཱདཱིསུ ¶ པན སཀིཾ ཀུཐིཏེསུ ཨགྒིཾ དཱཏུཾ ཝཊྚཏི པུནཔཱཀསྶ ཨནུཉྙཱཏཏྟཱ’’ཏི. ‘‘ཨནུཛཱནཱམི, བྷིཀྑཝེ, ཨནྟོ ཝཱསེཏུ’’ནྟི (མཧཱཝ. ༢༧༤) ཝཙནཏོ ¶ དུབྦྷིཀྑསམཡེ ཏཎྜུལཱདཱིནི ཨནྟོ ཝཱསེཏུཾ ཝཊྚཏི. ‘‘ཨནུཛཱནཱམི, བྷིཀྑཝེ, ཨནྟོ པཙིཏུ’’ནྟི (མཧཱཝ. ༢༧༤) ཝཙནཏོ དུབྦྷིཀྑསམཡེ ཨནྟོ པཙིཏུཾ ཝཊྚཏི. ‘‘ཨནུཛཱནཱམི, བྷིཀྑཝེ, སཱམཾ པཙིཏུ’’ནྟི (མཧཱཝ. ༢༧༤) ཝཙནཏོ དུབྦྷིཀྑསམཡེ སཱམམྤི པཙིཏུཾ ཝཊྚཏི. ‘‘ཨནུཛཱནཱམི, བྷིཀྑཝེ, ཨནྟོ ཝུཏྠཾ ཨནྟོ པཀྐཾ སཱམཾ པཀྐ’’ནྟི (མཧཱཝ. ༢༧༤) ཝཙནཏོ དུབྦྷིཀྑསམཡེ ཏཱིཎིཔི ཝཊྚནྟི.

ཨུགྒཧིཏཔཊིགྒཧིཏཀཐཱ

ཨུགྒཧིཏཔཊིགྒཧིཏཀཐཱཡཾ ‘‘ཨནུཛཱནཱམི, བྷིཀྑཝེ, ཡཏྠ ཕལཁཱདནཱིཡཾ པསྶཏི, ཀཔྤིཡཀཱརཀོ ཙ ན ཧོཏི, སཱམཾ གཧེཏྭཱ ཧརིཏྭཱ ཀཔྤིཡཀཱརཀེ པསྶིཏྭཱ བྷཱུམིཡཾ ནིཀྑིཔིཏྭཱ པཊིགྒཧཱཔེཏྭཱ པརིབྷུཉྫིཏུཾ, ཨནུཛཱནཱམི, བྷིཀྑཝེ, ཨུགྒཧིཏཾ པཊིགྒཧིཏུ’’ནྟི (མཧཱཝ. ༢༧༥) ཝཙནཏོ ཏཐཱ ཀཏྭཱ པརིབྷུཉྫིཏུཾ ཝཊྚཏི, ཨཱཔཏྟི ན ཧོཏཱིཏི.

ཏཏོནཱིཧཊཀཐཱ

ཏཏོ ནཱིཧཊཀཐཱཡཾ ‘‘པཊིགྒཎྷཐ, བྷིཀྑཝེ, པརིབྷུཉྫཐ. ཨནུཛཱནཱམི, བྷིཀྑཝེ, ཏཏོ ནཱིཧཊཾ བྷུཏྟཱཝིནཱ པཝཱརིཏེན ཨནཏིརིཏྟཾ པརིབྷུཉྫིཏུ’’ནྟི (མཧཱཝ. ༢༧༦) ཝཙནཏོ ཡསྨིཾ དཱནེ ནིམནྟིཏཱ ཧུཏྭཱ བྷིཀྑཱུ བྷུཉྫནྟི, ཏཏོ དཱནཏོ ནཱིཧཊཾ བྷོཛནཾ པཝཱརིཏེན བྷིཀྑུནཱ བྷུཉྫིཏབྦཾ, ན པཝཱརིཏསིཀྑཱཔདེན ཨཱཔཏྟི ཧོཏི. ཝུཏྟཉྷི ཨཊྛཀཐཱཡཾ (མཧཱཝ. ཨཊྛ. ༢༧༦) ‘‘ཏཏོ ནཱིཧཊནྟི ཡཏྠ ནིམནྟིཏཱ བྷུཉྫནྟི, ཏཏོ ནཱིཧཊ’’ནྟི.

པུརེབྷཏྟཔཊིགྒཧིཏཀཐཱ

པུརེབྷཏྟཔཊིགྒཧིཏཀཐཱཡཾ ¶ ‘‘པཊིགྒཎྷཐ, བྷིཀྑཝེ, པརིབྷུཉྫཐ, ཨནུཛཱནཱམི, བྷིཀྑཝེ, པུརེབྷཏྟཾ པཊིགྒཧིཏཾ བྷུཏྟཱཝིནཱ པཝཱརིཏེན ཨནཏིརིཏྟཾ པརིབྷུཉྫིཏུ’’ནྟི (མཧཱཝ. ༢༧༧) ཝཙནཏོ པུརེབྷཏྟཾ པཊིགྒཧེཏྭཱ ནིཀྑིཔིཏཾ པཝཱརིཏེན བྷིཀྑུནཱ ཨཏིརིཏྟཾ ཨཀཏྭཱ བྷུཉྫིཏུཾ ཝཊྚཏི, པཝཱརིཏསིཀྑཱཔདེན ཨཱཔཏྟི ན ཧོཏི.

ཝནཊྛཔོཀྑརཊྛཀཐཱ

ཝནཊྛཔོཀྑརཊྛཀཐཱཡཾ ¶ ‘‘ཏེན ཁོ པན སམཡེན ཨཱཡསྨཏོ སཱརིཔུཏྟསྶ ཀཱཡཌཱཧཱབཱདྷོ ཧོཏི. ཨཐ ཁོ ཨཱཡསྨཱ མཧཱམོགྒལླཱནོ ཡེནཱཡསྨཱ སཱརིཔུཏྟོ ཏེནུཔསངྐམི, ཨུཔསངྐམིཏྭཱ ཨཱཡསྨནྟཾ སཱརིཔུཏྟཾ ཨེཏདཝོཙ ‘པུབྦེ ཏེ, ཨཱཝུསོ སཱརིཔུཏྟ, ཀཱཡཌཱཧཱབཱདྷོ ཀེན ཕཱསུ ཧོཏཱི’ཏི. བྷིསེཧི ཙ མེ, ཨཱཝུསོ, མུལཱ༹ལིཀཱཧི ཙཱཏི…པེ… ཨཐ ཁོ ཨཱཡསྨཏོ སཱརིཔུཏྟསྶ བྷིསེ ཙ མུལཱ༹ལིཀཱཡོ ཙ པརིབྷུཏྟསྶ ཀཱཡཌཱཧཱབཱདྷོ པཊིཔྤསྶམྦྷི…པེ… པཊིགྒཎྷཐ, བྷིཀྑཝེ, པརིབྷུཉྫཐ. ཨནུཛཱནཱམི, བྷིཀྑཝེ, ཝནཊྛཾ པོཀྑརཊྛཾ བྷུཏྟཱཝིནཱ པཝཱརིཏེན ཨནཏིརིཏྟཾ པརིབྷུཉྫིཏུ’’ནྟི (མཧཱཝ. ༢༧༨) ཝཙནཏོ ཝནཊྛཾ པོཀྑརཊྛཾ པཝཱརིཏེན བྷིཀྑུནཱ པརིབྷུཉྫིཏུཾ ཝཊྚཏི, པཝཱརིཏསིཀྑཱཔདེན ཨཱཔཏྟི ན ཧོཏི. ཏཏྠ ཝནཊྛཾ པོཀྑརཊྛནྟི ཝནེ ཙེཝ པདུམིནིགཙྪེ ཙ ཛཱཏཾ.

ཨཀཏཀཔྤཀཐཱ

ཨཀཏཀཔྤཀཐཱཡཾ ‘‘ཨནུཛཱནཱམི, བྷིཀྑཝེ, ཨབཱིཛཾ ནིབྦཊྚབཱིཛཾ ཨཀཏཀཔྤཾ ཕལཾ པརིབྷུཉྫིཏུ’’ནྟི (མཧཱཝ. ༢༧༨) ཝཙནཏོ ཨབཱིཛཉྩ ནིབྦཊྚབཱིཛཉྩ ¶ ཕལཾ ཨགྒིསཏྠནཁེཧི སམཎཀཔྤཾ ཨཀཏྭཱཔི པརིབྷུཉྫིཏུཾ ཝཊྚཏི. ཏཏྠ ཨབཱིཛནྟི ཏརུཎཕལཾ, ཡསྶ བཱིཛཾ ཨངྐུརཾ ན ཛནེཏི. ནིབྦཊྚབཱིཛནྟི བཱིཛཾ ནིབྦཊྚེཏྭཱ ཨཔནེཏྭཱ པརིབྷུཉྫིཏབྦཀཾ ཨམྦཔནསཱདི, ཏཱནི ཕལཱནི ཀཔྤིཡཀཱརཀེ ཨསཏི ཀཔྤཾ ཨཀཏྭཱཔི པརིབྷུཉྫིཏུཾ ཝཊྚཏི.

ཡཱགུཀཐཱ

ཡཱགུཀཐཱཡཾ ‘‘དསཡིམེ, བྲཱཧྨཎ, ཨཱནིསཾསཱ ཡཱགུཡཱ. ཀཏམེ དས, ཡཱགུཾ དེནྟོ ཨཱཡུཾ དེཏི, ཝཎྞཾ དེཏི, སུཁཾ དེཏི, བལཾ དེཏི, པཊིབྷཱནཾ དེཏི, ཡཱགུཔཱིཏཱ ཁུདཾ པཊིཧནཏི, པིཔཱསཾ ཝིནེཏི, ཝཱཏཾ ཨནུལོམེཏི, ཝཏྠིཾ སོདྷེཏི, ཨཱམཱཝསེསཾ པཱཙེཏི. ཨིམེ ཁོ, བྲཱཧྨཎ, དསཱནིསཾསཱ ཡཱགུཡཱཏི.

‘ཡོ ¶ སཉྙཏཱནཾ པརདཏྟབྷོཛིནཾ;

ཀཱལེན སཀྐཙྩ དདཱཏི ཡཱགུཾ;

དསསྶ ཋཱནཱནི ཨནུཔྤཝེཙྪཏི;

ཨཱཡུཉྩ ཝཎྞཉྩ སུཁཾ བལཉྩ.

‘པཊིབྷཱནམསྶ ཨུཔཛཱཡཏེ ཏཏོ;

ཁུདྡཾ པིཔཱསཉྩ བྱཔནེཏི ཝཱཏཾ;

སོདྷེཏི ཝཏྠིཾ པརིཎཱམེཏི བྷཏྟཾ;

བྷེསཛྫམེཏཾ སུགཏེན ཝཎྞིཏཾ.

‘ཏསྨཱ ཧི ཡཱགུཾ ཨལམེཝ དཱཏུཾ;

ནིཙྩཾ མནུསྶེན སུཁཏྠིཀེན;

དིབྦཱནི ཝཱ པཏྠཡཏཱ སུཁཱནི;

མཱནུསྶསོབྷགྱཏམིཙྪཏཱ ཝཱ’ཏི.

ཨཐ ཁོ བྷགཝཱ ཏཾ བྲཱཧྨཎཾ ཨིམཱཧི གཱཐཱཧི ཨནུམོདིཏྭཱ ཨུཊྛཱཡཱསནཱ པཀྐཱམི. ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ཨནུཛཱནཱམི, བྷིཀྑཝེ, ཡཱགུཉྩ མདྷུགོལ༹ཀཉྩཱ’’ཏི ¶ (མཧཱཝ. ༢༨༢) ཝཙནཏོ ཡཱགུཉྩ མདྷུགོལ༹ཀཉྩ སམྤཊིཙྪིཏུཾ ཝཊྚཏི. ཨནུམོདནཱགཱཐཱཡ ‘‘པཏྠཡཏཾ ཨིཙྪཏ’’ནྟི པདཱནཾ ‘‘ཨལམེཝ དཱཏུ’’ནྟི ཨིམིནཱ སམྦནྡྷོ. སཙེ པན ‘‘པཏྠཡཏཱ ཨིཙྪཏཱ’’ཏི པཱཋོ ཨཏྠི, སོཡེཝ གཧེཏབྦོ. ‘‘ན, བྷིཀྑཝེ, ཨཉྙཏྲ ནིམནྟིཏེན ཨཉྙསྶ བྷོཛྫཡཱགུ པརིབྷུཉྫིཏབྦཱ, ཡོ པརིབྷུཉྫེཡྻ, ཡཐཱདྷམྨོ ཀཱརེཏབྦོ’’ཏི (མཧཱཝ. ༢༨༣) ཝཙནཏོ ཏཐཱ བྷུཉྫནྟསྶ པརམྤརབྷོཛནསིཀྑཱཔདེན ཨཱཔཏྟི ཧོཏི. བྷོཛྫཡཱགཱུཏི ཡཱ པཝཱརཎཾ ཛནེཏི. ཡཐཱདྷམྨོ ཀཱརེཏབྦོཏི པརམྤརབྷོཛནེན ཀཱརེཏབྦོ.

གུལ༹ཀཐཱ

གུལ༹ཀཐཱཡཾ ‘‘ཨནུཛཱནཱམི, བྷིཀྑཝེ, གིལཱནསྶ གུལ༹ཾ, ཨགིལཱནསྶ གུལོ༹དཀ’’ནྟི (མཧཱཝ. ༢༨༤) ཝཙནཏོ ¶ གིལཱནོ བྷིཀྑུ གུལ༹པིཎྜཾ ཝིཀཱལེཔི ཁཱདིཏུཾ ཝཊྚཏི. ཨགིལཱནོ པན ཨུདཀསམྦྷིནྣཾ ཀཏྭཱ གུལོ༹དཀཔརིབྷོགེན པརིབྷུཉྫིཏུཾ ཝཊྚཏི. ‘‘གིལཱནསྶ གུལ༹ནྟི ཏཐཱརཱུཔེན བྱཱདྷིནཱ གིལཱནསྶ པཙྪཱབྷཏྟཾ གུལ༹ཾ ཨནུཛཱནཱམཱིཏི ཨཏྠོ’’ཏི ཨཊྛཀཐཱཡཾ (མཧཱཝ. ཨཊྛ. ༢༨༤) ཝུཏྟཾ. ‘‘ཏཐཱརཱུཔེན བྱཱདྷིནཱ’’ཏི ཝུཏྟཏྟཱ ཡཐཱརཱུཔེན བྱཱདྷིནཱ གིལཱནསྶ གུལོ༹ པརིབྷུཉྫིཏབྦོ ཧོཏི, ཏཐཱརཱུཔེན ཨེཝ བྱཱདྷིནཱ གིལཱནསྶཱཏི ཝུཏྟཾ ཝིཡ དིསྶཏི, ཝཱིམཾསིཏྭཱ གཧེཏབྦཾ.

ཨེཏྟཀཱསུ ཀཐཱསུ ཡཱ ཡཱ སཾཝཎྞེཏབྦཔྤཀརཎེ ན དིསྶཏི, སཱ སཱ ཨམྷེཧི པེསལཱནཾ བྷིཀྑཱུནཾ ཀོསལླཏྠཾ པཱལི༹ཏོ ཙ ཨཊྛཀཐཱཏོ ཙ གཧེཏྭཱ ཊཱིཀཱཙརིཡཱནཾ ཝཙནེཧི ཨལངྐརིཏྭཱ ཋཔིཏཱ, ཏསྨཱ ནིཀྐངྑཱ ཧུཏྭཱ པཎྜིཏཱ ཨུཔདྷཱརེནྟུ.

ཙཏུམཧཱཔདེསཀཐཱ

༦༧. ཡཾ ¶ བྷིཀྑཝེཏིཨཱདི མཧཱཔདེསཀཐཱ ནཱམ. ཏཏྠ མཧནྟེ ཨཏྠེ ཨུཔདིསྶཏི ཨེཏེཧཱིཏི མཧཱཔདེསཱ, མཧནྟཱ ཝཱ ཨཏྠཱ པདིསྶནྟི པཉྙཱཡནྟི ཨེཏྠཱཏི མཧཱཔདེསཱ, མཧནྟཱནཾ ཝཱ ཨཏྠཱནཾ པདེསོ པཝཏྟིདེསོཏི མཧཱཔདེསཱ. ཀེ ཏེ? ཨིམེཡེཝ ཙཏྟཱརོ པཱཋཱ, ཨཏྠཱ ཝཱ. ཏེན ཝུཏྟཾ ‘‘ཨིམེ ཙཏྟཱརོ མཧཱཔདེསེ’’ཏིཨཱདི. ཏཏྠ དྷམྨསངྒཱཧཀཏྠེརཱཏི མཧཱཀསྶཔཱདཡོ. སུཏྟཾ གཧེཏྭཱཏི ‘‘ཋཔེཏྭཱ དྷཉྙཕལརས’’ནྟིཨཱདིཀཾ སུཏྟཾ གཧེཏྭཱ ཨུཔདྷཱརེནྟོ. སཏྟ དྷཉྙཱནཱིཏི –

‘‘སཱལི ཝཱིཧི ཙ ཀུདྲཱུསོ, གོདྷུམོ ཝརཀོ ཡཝོ;

ཀངྒཱུཏི སཏྟ དྷཉྙཱནི, ནཱིཝཱརཱདཱི ཏུ ཏབྦྷིདཱ’’ཏི –.

ཝུཏྟཱནི སཏྟ དྷཉྙཱནི. སབྦཾ ཨཔརཎྞནྟི མུགྒམཱསཱདཡོ. ཨཊྛ པཱནཱནཱིཏི ཨམྦཔཱནཾ ཛམྦུཔཱནཾ ཙོཙཔཱནཾ མོཙཔཱནཾ སཱལུཀཔཱནཾ མུདྡིཀཔཱནཾ མདྷུཀཔཱནཾ ཕཱརུསཀཔཱནཉྩ.

ཨིམིནཱ ནཡེནཱཏི སུཏྟཱནུལོམནཡེན. ཝུཏྟཉྷེཏཾ ཨཊྛཀཐཱཡཾ ‘‘སུཏྟཱནུལོམཾ ནཱམ ཙཏྟཱརོ མཧཱཔདེསཱ’’ཏི. པཱལི༹ཉྩ ཨཊྛཀཐཉྩ ཨནཔེཀྑིཏྭཱཏི པཱལི༹ཡཾ ནཱིཏཏྠཏོ ཨཱགཏམེཝ ཨགྒཧེཏྭཱ ¶ . ཨཉྙཱནིཔཱིཏི ཏཏོ ཨཉྙཱནིཔི. ཨེཏེན མཧཱཔདེསཱ ནཱམ ན ཀེཝལཾ ཡཐཱཝུཏྟཱ ཨེཝ, ཨཐ ཁོ ཨནེཀཱནི ནཱནཔྤཀཱརཱནི ཝིནཡདྷརསྶ ཉཱཎཱནུབྷཱཝཔྤཀཱསིཏཱནཱིཏི དསྶེཏི.

ཨཱནིསཾསཀཐཱ

༦༨. ཨཱནིསཾསཀཐཱཡཾ ཝིནཡཾ དྷཱརེཏཱིཏི ཝིནཡདྷརོ, སིཀྑནཝཱཙནམནསིཀཱརཝིནིཙྪཡནཏདནུལོམཀརཎཱདིནཱ ཝིནཡཔརིཡཏྟིཀུསལོ ¶ བྷིཀྑུ. ཝིནཡཔརིཡཏྟིམཱུལཾ ཨེཏེསནྟི ཝིནཡཔརིཡཏྟིམཱུལཀཱ. ཀེ ཏེ? པཉྩཱནིསཾསཱ. ཝིནཡཔརིཡཏྟིཡེཝ མཱུལཾ ཀཱརཎཾ ཀཏྭཱ ལབྷིཏབྦཨཱནིསཾསཱ, ན ཨཉྙཔརིཡཏྟིཾ ཝཱ པཊིཔཏྟིཨཱདཡོ ཝཱ མཱུལཾ ཀཏྭཱཏི ཨཏྠོ. ཨཐ ཝཱ པརིཡཱཔུཎནཾ པརིཡཏྟི, ཝིནཡསྶ པརིཡཏྟི ཝིནཡཔརིཡཏྟི, སཱ མཱུལཾ ཨེཏེསནྟི ཝིནཡཔརིཡཏྟིམཱུལཀཱ, ཝིནཡཔརིཡཱཔུཎནཧེཏུབྷཝཱ ཨཱནིསཾསཱཏི ཨཏྠོ. ‘‘ཀཏམེ’’ཏིཨཱདིནཱ ཏེསཾ པཉྩཱནིསཾསཱདཱིནཾ སརཱུཔཾ པུཙྪིཏྭཱ ‘‘ཨཏྟནོ’’ཏིཨཱདིནཱ ཝིསྶཛྫེཏྭཱ ཏཾ ཝཙནཾ པཱལི༹ཡཱ སམཏྠེཏུཾ ‘‘ཝུཏྟཉྷེཏ’’ནྟིཨཱདིམཱཧ.

ཨེཝཾ པཉྩཱནིསཾསཱནཾ སརཱུཔཾ དསྶེཏྭཱ ཨིདཱནི ཏེཡེཝ ཝིཏྠཱརཏོ དསྶེཏུཾ ‘‘ཀཐམསྶཱ’’ཏིཨཱདིནཱ པུཙྪིཏྭཱ ‘‘ཨིདྷེཀཙྩོ’’ཏིཨཱདིནཱ ཝིསྶཛྫེཏི. ཏཏྠ ཨཏྟནོ སཱིལཀྑནྡྷསུགུཏྟབྷཱཝོ ནཱམ ཨཱཔཏྟིཨནཱཔཛྫནབྷཱཝེནེཝ ཧོཏི, ནོ ཨཉྙཐཱཏི ཨཱཔཏྟིཨཱཔཛྫནཀཱརཎཾ དསྶེཏྭཱ ཏདབྷཱཝེན ཨནཱཔཛྫནཾ དསྶེཏུཾ ‘‘ཨཱཔཏྟིཾ ཨཱཔཛྫནྟོ ཚཧཱཀཱརེཧི ཨཱཔཛྫཏཱི’’ཏིཨཱདིམཱཧ. ཏཏྠ –

‘‘སཉྩིཙྩ ཨཱཔཏྟིཾ ཨཱཔཛྫཏི;

ཨཱཔཏྟིཾ པརིགཱུཧཏི;

ཨགཏིགམནཉྩ གཙྪཏི;

ཨེདིསོ ཝུཙྩཏི ཨལཛྫིཔུགྒལོ’’ཏི. (པརི. ༣༥༩) –

ཝུཏྟེན ཨལཛྫཱིལཀྑཎེན ན ལཛྫཏི ན ཧིརཱིཡཏཱིཏི ཨལཛྫཱི, ཏསྶ བྷཱཝོ ཨལཛྫིཏཱ. ནཏྠི ཉཱཎཾ ཨེཏསྶཱཏི ཨཉྙཱཎཾ, ཏསྶ བྷཱཝོ ཨཉྙཱཎཏཱ. ཀུཀཏསྶ བྷཱཝོ ཀུཀྐུཙྩཾ, ཏེན པཀཏོ ཀུཀྐུཙྩཔཀཏོ, ཏསྶ བྷཱཝོ ཀུཀྐུཙྩཔཀཏཏཱ. ཀཔྤཏཱིཏི ཀཔྤིཡཾ, ན ཀཔྤིཡཾ ཨཀཔྤིཡཾ ¶ , ཏསྨིཾ ཨཀཔྤིཡེ ¶ , ཀཔྤིཡཾ ཨིཏི སཉྙཱ ཡསྶ སོ ཀཔྤིཡསཉྙཱི, ཏསྶ བྷཱཝོ ཀཔྤིཡསཉྙིཏཱ. ཨིཏརཾ ཏཔྤཊིཔཀྑཏོ ཀཱཏབྦཾ, ཨིམེསུ པཉྩསུ པདེསུ ཡཀཱརལོཔོ, ཏསྨཱ ‘‘ཨལཛྫིཏཱཡ ཨཱཔཏྟིཾ ཨཱཔཛྫཏཱི’’ཏིཨཱདིནཱ ཡོཛེཏབྦཱནི. ཧེཏྭཏྠེ ཙེཏཾ ནིསྶཀྐཝཙནཾ. སརཏཱིཏི སཏི, སམུསྶནཾ སམྨོསོ. སཏིཡཱ སམྨོསོ སཏིསམྨོསོ, ཏསྨཱ སཏིསམྨོསཱ. ཧེཏྭཏྠེ ཙེཏཾ ཀརཎཝཙནཾ. ཨིདཱནི ཏཱནི ཀཱརཎཱནི ཝིཏྠཱརཏོ དསྶེཏུཾ ‘‘ཀཐ’’ནྟྱཱདིམཱཧ. ཏཾ ནཡཱནུཡོགེན ཝིཉྙེཡྻམེཝ.

ཨརིཊྛོ ཨིཏི བྷིཀྑུ ཨརིཊྛབྷིཀྑུ, ཀཎྚཀོ ཨིཏི སཱམཎེརོ ཀཎྚཀསཱམཎེརོ, ཝེསཱལིཡཱ ཛཱཏཱ ཝེསཱལིཀཱ, ཝཛྫཱིནཾ པུཏྟཱ ཝཛྫིཔུཏྟཱ, ཝེསཱལིཀཱ ཙ ཏེ ཝཛྫིཔུཏྟཱ ཙཱཏི ཝེསཱལིཀཝཛྫིཔུཏྟཱ, ཨརིཊྛབྷིཀྑུ ཙ ཀཎྚཀསཱམཎེརོ ཙ ཝེསཱལིཀཝཛྫིཔུཏྟཱ ཙ ཨརིཊྛབྷིཀྑུཀཎྚཀསཱམཎེརཝེསཱལིཀཝཛྫིཔུཏྟཀཱ. པརཱུཔཧཱརོ ཙ ཨཉྙཱཎཉྩ ཀངྑཱཝིཏརཎཉྩ པརཱུཔཧཱརཨཉྙཱཎཀངྑཱཝིཏརཎཱ. ཀེ ཏེ? ཝཱདཱ. ཏེ ཨཱདི ཡེསཾ ཏེཏི པརཱུཔཧཱརཨཉྙཱཎཀངྑཱཝིཏརཎཱདཡོ. ཝདནྟི ཨེཏེཧཱིཏི ཝཱདཱ, པརཱུཔཧཱརཨཉྙཱཎཀངྑཱཝིཏརཎཱདཡོ ཝཱདཱ ཨེཏེསནྟི པརཱུ…པེ… ཝཱདཱ. ཀེ ཏེ? མིཙྪཱཝཱདིནོ. ཨརིཊྛ…པེ… པུཏྟཱ ཙ པརཱུཔཧཱར…པེ… ཝཱདཱ ཙ མཧཱསངྒྷིཀཱདཡོ ཙ སཱསནཔཙྩཏྠིཀཱ ནཱམཱཏི སམུཙྩཡདྭནྡཝསེན ཡོཛནཱ ཀཱཏབྦཱ. སེསཾ སུཝིཉྙེཡྻམེཝ.

ཨཱནིསཾསཀཐཱ ནིཊྛིཏཱ.

ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

པཀིཎྞཀཝིནིཙྪཡཀཐཱལངྐཱརོ ནཱམ

ཙཏུཏྟིཾསཏིམོ པརིཙྪེདོ.

ནིགམནཀཐཱཝཎྞནཱ

ནིགམགཱཐཱསུ ¶ པཋམགཱཐཱཡཾ སདྡྷམྨཊྛིཏིཀཱམེན སཱསནུཛྫོཏཀཱརིནཱ པརཀྐམབཱཧུནཱ ནརིནྡེན ཨཛ྄ཛྷེསིཏོ སོ ཨཧཾ ཝིནཡསངྒཧཾ ཨཀཱསིནྟི ཡོཛནཱ.

དུཏིཡཏཏིཡགཱཐཱཡཾ ¶ ཏེནེཝ པརཀྐམབཱཧུནརིནྡེནེཝ ཀཱརིཏེ རམྨེ རམཎཱིཡེ པཱསཱདསཏམཎྜིཏེ པཱསཱདཱནཾ སཏེན པཊིམཎྜིཏེ ནཱནཱདུམགཎཱཀིཎྞེ བྷཱཝནཱབྷིརཏཱལཡེ བྷཱཝནཱཡ ཨབྷིརཏཱནཾ བྷིཀྑཱུནཾ ཨཱལཡབྷཱུཏེ སཱིཏལཱུདཀསམྤནྣེ ཛེཏཝནེ ཛེཏཝནནཱམཀེ ཝིཧཱརེ ཝསཾ ཝསནྟོ ཧུཏྭཱ, ཨཐ ཝཱ ཝསཾ ཝསནྟོ སོཧཾ སོ ཨཧཾ ཡོགཱིནཾ ཧིཏཾ ཧིཏབྷཱུཏཾ སཱརཾ སཱརཝནྟཾ ཨིམཾ ཨཱིདིསཾ ཝིནཡསངྒཧཾ ཨཀཱསིནྟི ཡོཛནཱ.

སེསགཱཐཱསུ ཨིམིནཱ གནྠཀརཎེན ཡཾ པུཉྙཾ མཡ྄ཧཾ སིདྡྷཾ, ཨཉྙཾ ཨིཏོ གནྠཀརཎཏོ ཨཉྙབྷཱུཏཾ ཡཾ པུཉྙཾ མཡཱ པསུཏཾ ཧོཏི, ཨེཏེན པུཉྙཀམྨེན དུཏིཡེ ཨཏྟསམྦྷཝེ ཏཱཝཏིཾསེ པམོདེནྟོ སཱིལཱཙཱརགུཎེ རཏོ པཉྩཀཱམེསུ ཨལགྒོ དེཝཔུཏྟོ ཧུཏྭཱ པཋམཾ པཋམབྷཱུཏཾ ཕལཾ སོཏཱཔཏྟིཕལཾ པཏྭཱན ཨནྟིམེ ཨཏྟབྷཱཝམྷི ལོཀགྒཔུགྒལཾ ནཱཐཾ ནཱཐབྷཱུཏཾ སབྦསཏྟཧིཏེ རཏཾ མེཏྟེཡྻཾ མེཏྟེཡྻནཱམཀཾ མུནིཔུངྒཝཾ མུནིསེཊྛཾ དིསྭཱན ཏསྶ དྷཱིརསྶ སདྡྷམྨདེསནཾ སུཏྭཱ ཨགྒཾ ཕལཾ ཨརཧཏྟཕལཾ ཨདྷིགནྟྭཱ ལབྷིཏྭཱ ཛིནསཱསནཾ སོབྷེཡྻཾ སོབྷཱཔེཡྻནྟི ཨཡཾ པཱཀཊཡོཛནཱ.

ཨེཏིསྶཱཡ པན ཡོཛནཱཡ སཏི ཨཱཙརིཡཝརསྶ ཝཙནཾ ན སམྤཊིཙྪནྟི པཎྜིཏཱ. ཀཐཾ? ཨེཏྠ ཧི ཨིཏོ དུཏིཡབྷཝེ ཏཱཝཏིཾསབྷཝནེ དེཝཔུཏྟོ ཧུཏྭཱ སོཏཱཔཏྟིཕལཾ པཏྭཱ ཨནྟིམབྷཝེ མེཏྟེཡྻསྶ བྷགཝཏོ དྷམྨདེསནཾ སུཏྭཱ ཨརཧཏྟཕལཾ ལབྷེཡྻནྟི ཨཱཙརིཡསྶ པཏྠནཱ, སཱ ཨཡུཏྟརཱུཔཱ ¶ ཧོཏི. སོཏཱཔནྣསྶ ཧི སཏྟབྷཝཏོ ཨུདྡྷཾ པཊིསནྡྷི ནཏྠི, ཏཱཝཏིཾསཱནཉྩ དེཝཱནཾ བྷཝསཏེནཔི བྷཝསཧསྶེནཔི བྷཝསཏསཧསྶེནཔི མེཏྟེཡྻསྶ བྷགཝཏོ ཨུཔྤཛྫནཀཱལོ ཨཔྤཏྟབྦོ ཧོཏི. ཨཐཱཔི ཝདེཡྻ ‘‘ཨནྟརཱ བྲཧྨལོཀེ ནིབྦཏྟིཏྭཱ མེཏྟེཡྻསྶ བྷགཝཏོ ཀཱལེ མནུསྶོ བྷཝེཡྻཱ’’ཏི, ཨེཝམྤི ན ཡུཛྫཏི. ན ཧི བྲཧྨལོཀགཏཱནཾ ཨརིཡཱནཾ པུན ཀཱམབྷཝཱུཔཔཏྟི ཨཏྠི. ཝུཏྟཉྷི ཨབྷིདྷམྨེ ཡམཀཔྤཀརཎེ (ཡམ. ༢.ཨནུསཡཡམཀ. ༣༡༢) ‘‘རཱུཔདྷཱཏུཡཱ ཙུཏསྶ ཀཱམདྷཱཏུཾ ཨུཔཔཛྫནྟསྶ སཏྟེཝ ཨནུསཡཱ ཨནུསེནྟཱི’’ཏི. ཨཐཱཔི ཝདེཡྻ ‘‘བྲཧྨལོཀེཡེཝ ཋཏྭཱ ཨགྒཕལཾ ལབྷེཡྻཱ’’ཏི, ཏཐཱ ཙ ཨཱཙརིཡསྶ ཝཙནེ ན དིསྶཏི, ‘‘སོབྷེཡྻཾ ཛིནསཱསན’’ནྟི ཝུཏྟཏྟཱ བྷིཀྑུབྷཱུཏཏྟམེཝ དིསྶཏི. ན ཧི བྷིཀྑུབྷཱུཏོ སཱསནཾ སོབྷཱཔེཏུཾ སཀྐོཏི. ཨབྷིདྷམྨཏྠཝིབྷཱཝནིཡཉྩ –

‘‘ཛོཏཡནྟཾ ¶ ཏདཱ ཏསྶ, སཱསནཾ སུདྡྷམཱནསཾ;

པསྶེཡྻཾ སཀྐརེཡྻཉྩ, གརུཾ མེ སཱརིསམྦྷཝ’’ནྟི. –

བྷིཀྑུབྷཱུཏམེཝ ཝུཏྟཾ. ཨཐཱཔི ཝདེཡྻ ‘‘ཨནྟརཱ དཱིགྷཱཡུཀོ བྷུམྨདེཝོ ཧུཏྭཱ ཏདཱ མནུསྶོ བྷཝེཡྻཱ’’ཏི, ཨེཝམྤི ཨེཀསྶ བུདྡྷསྶ སཱཝཀབྷཱུཏོ ཨརིཡཔུགྒལོ པུན ཨཉྙསྶ བུདྡྷསྶ སཱཝཀོ ན བྷཝེཡྻཱཏི, ཨཱཙརིཡོ པན སབྦཔརིཡཏྟིདྷརོ ཨནེཀགནྠཀཱརཀོ ཨནེཀེསཾ གནྠཀཱརཀཱནཾ ཐེརཱནཾ ཨཱཙརིཡཔཱཙརིཡབྷཱུཏོ, ཏེན ན ཀེཝལཾ ཨིདྷེཝ ཨིམཱ གཱཐཱཡོ ཋཔིཏཱ, ཨཐ ཁོ སཱརཏྠདཱིཔནཱིནཱམིཀཱཡ ཝིནཡཊཱིཀཱཡ ཨཝསཱནེ ཙ ཋཔིཏཱ, ཏསྨཱ བྷཝིཏབྦམེཏྠ ཀཱརཎེནཱཏི ཝཱིམཾསིཏབྦམེཏཾ.

ཨཐ ཝཱ ཨིམིནཱ…པེ… དེཝཔུཏྟོ ཧུཏྭཱ པཋམཾ ཏཱཝ ཕལཾ ཡཐཱཝུཏྟཾ ཏཱཝཏིཾསེ པམོདནསཱིལཱཙཱརགུཎེ རཏཾ ¶ པཉྩཀཱམེསུ ཨལགྒབྷཱཝསངྑཱཏཾ ཨཱནིསཾསཾ པཏྭཱན ཨནྟིམེ ཨཏྟབྷཱཝམྷི…པེ… སོབྷེཡྻནྟི ཡོཛནཱ. ཨཐ ཝཱ ཨིམིནཱ…པེ… པཉྩཀཱམེསུ ཨལགྒོ ཧུཏྭཱ ཨནྟིམེ ཨཏྟབྷཱཝམྷི…པེ… སདྡྷམྨདེསནཾ སུཏྭཱ པཋམཾ ཕལཾ སོཏཱཔཏྟིཕལཾ པཏྭཱ ཏཏོ པརཾ ཨགྒཕལཾ ཨརཧཏྟཕལཾ ཨདྷིགནྟྭཱ ཛིནསཱསནཾ སོབྷེཡྻནྟི ཡོཛནཱ. ཡཐཱ ཨམྷཱཀཾ བྷགཝཏོ དྷམྨཙཀྐཔྤཝཏྟནསུཏྟནྟདྷམྨདེསནཾ སུཏྭཱ ཨཉྙཱཏཀོཎྜཉྙཏྠེརོ སོཏཱཔཏྟིཕལཾ པཏྭཱ པཙྪཱ ཨརཧཏྟཕལཾ ཨདྷིགནྟྭཱ ཛིནསཱསནཾ སོབྷེསི, ཨེཝནྟི ཨཏྠོ. ཨིཏོ ཨཉྙཱནིཔི ནཡཱནི ཡཐཱ ཐེརསྶ ཝཙནཱནུཀཱུལཱནི, ཏཱནི པཎྜིཏེཧི ཙིནྟེཏབྦཱནི.

ནིགམནཀཐཱཝཎྞནཱ ནིཊྛིཏཱ.

ནིགམནཀཐཱ

༡.

ཛམྦུདཱིཔཏལེ ¶ རམྨེ, མརམྨཝིསཡེ སུཏེ;

ཏམྦདཱིཔརཊྛེ ཋིཏཾ, པུརཾ རཏནནཱམཀཾ.

༢.

ཛིནསཱསནཔཛྫོཏཾ ¶ , ཨནེཀརཏནཱཀརཾ;

སཱདྷུཛྫནཱནམཱཝཱསཾ, སོཎྞཔཱསཱདལངྐཏཾ.

༣.

ཏསྨིཾ རཏནཔུརམྷི, རཱཛཱནེཀརཊྛིསྶརོ;

སིརཱིསུདྷམྨརཱཛཱཏི, མཧཱཨདྷིཔཏཱིཏི ཙ.

༤.

ཨེཝཾནཱམོ མཧཱཏེཛོ, རཛྫཾ ཀཱརེསི དྷམྨཏོ;

ཀཱརཱཔེསི རཱཛཱ མཎི-ཙཱུལ༹ཾ མཧནྟཙེཏིཡཾ.

༥.

ཏསྶ ཀཱལེ བྲཧཱརཉྙེ, ཏིརིཡོ ནཱམ པབྦཏོ;

པུབྦཀཱརཉྙཝཱསཱིནཾ, ནིཝཱསོ བྷཱཝནཱརཧོ.

༦.

ཨཊྛཱརསཧི དོསེཧི, མུཏྟོ པཉྩངྒུཔཱགཏོ;

ཨརཉྙལཀྑཎཾ པཏྟོ, བདྡྷསཱིམཱཡལངྐཏོ.

༧.

ཏསྨིཾ པབྦཏེ ཝསནྟོ, མཧཱཐེརོ སུཔཱཀཊོ;

ཏིཔེཊཀཱལངྐཱརོཏི, དྭིཀྑཏྟུཾ ལདྡྷལཉྪནོ.

༨.

ཏེབྷཱཏུཀནརིནྡཱནཾ, གརུབྷཱུཏོ སུཔེསལོ;

ཀུསལོ པརིཡཏྟིམྷི, པཊིཔཏྟིམྷི ཀཱརཀོ.

༩.

སོཧཾ ལཛྫཱིཔེསལེཧི, བྷིཀྑཱུཧི ཨབྷིཡཱཙིཏོ;

སཱསནསྶོཔཀཱརཱཡ, ཨཀཱསིཾ སཱིལཝཌྜྷནཾ.

༡༠.

ཝིནཡཱལངྐཱརཾ ནཱམ, ལཛྫཱིནཾ ཨུཔཀཱརཀཾ;

སུཊྛུ ཝིནཡསངྒཧ-ཝཎྞནཾ སཱདྷུསེཝིཏཾ.

༡༡.

རཱུཔཚིདྡནཱསཀཎྞེ ¶ ¶ , སམྤཏྟེ ཛིནསཱསནེ;

ཚིདྡསུཉྙསུཉྙརཱུཔེ, ཀལིཡུགམྷི ཨཱགཏེ.

༡༢.

ནིཊྛཱཔིཏཱ ཨཡཾ ཊཱིཀཱ, མཡཱ སཱསནཀཱརཎཱ;

དྭཱིསུ སོཎྞཝིཧཱརེསུ, དྭིཀྑཏྟུཾ ལདྡྷཀེཏུནཱ.

༡༣.

ཨིམིནཱ པུཉྙཀམྨེན, ཨཉྙེན ཀུསལེན ཙ;

ཨིཏོ ཙུཏཱཧཾ དུཏིཡེ, ཨཏྟབྷཱཝམྷི ཨཱགཏེ.

༡༤.

ཧིམཝནྟཔདེསམྷི, པབྦཏེ གནྡྷམཱདནེ;

ཨཱསནྣེ མཎིགུཧཱཡ, མཉྫཱུསཀདུམསྶ ཙ.

༡༥.

ཏསྨིཾ ཧེསྶཾ བྷུམྨདེཝོ, ཨཏིདཱིགྷཱཡུཀོ ཝརོ;

པཉྙཱཝཱིརིཡསམྤནྣོ, བུདྡྷསཱསནམཱམཀོ.

༡༦.

ཡཱཝ ཏིཊྛཏི སཱསནཾ, ཏཱཝ ཙེཏིཡཝནྡནཾ;

བོདྷིཔཱུཛཾ སངྒྷཔཱུཛཾ, ཀརེཡྻཾ ཏུཊྛམཱནསོ.

༡༧.

བྷིཀྑཱུནཾ པཊིཔནྣཱནཾ, ཝེཡྻཱཝཙྩཾ ཀརེཡྻཧཾ;

པརིཡཏྟཱབྷིཡུཏྟཱནཾ, ཀངྑཱཝིནོདཡེཡྻཧཾ.

༡༨.

སཱསནཾ པགྒཎྷནྟཱནཾ, རཱཛཱུནཾ སཧཱཡོ ཨསྶཾ;

སཱསནཾ ནིགྒཎྷནྟཱནཾ, ཝཱརེཏུཾ སམཏྠོ ཨསྶཾ.

༡༩.

སཱསནནྟརདྷཱནེ ཏུ, མཉྫཱུསཾ རུཀྑམུཏྟམཾ;

ནནྡམཱུལཉྩ པབྦྷཱརཾ, ནིཙྩཾ པཱུཛཾ ཀརེཡྻཧཾ.

༢༠.

ཡདཱ ¶ ཏུ པཙྩེཀབུདྡྷཱ, ཨུཔྤཛྫནྟི མཧཱཡསཱ;

ཏདཱ ཏེསཾ ནིཙྩཀཔྤཾ, ཨུཔཊྛཱནཾ ཀརེཡྻཧཾ.

༢༡.

ཏེནེཝ ཨཏྟབྷཱཝེན, ཡཱཝ བུདྡྷུཔྤཱདཱ ཨཧཾ;

ཏིཊྛནྟོ བུདྡྷུཔྤཱདམྷི, མནུསྶེསུ བྷཝཱམཧཾ.

༢༢.

མེཏྟེཡྻསྶ ¶ བྷགཝཏོ, པབྦཛིཏྭཱན སཱསནེ;

ཏོསཡིཏྭཱན ཛིནཾ ཏཾ, ལབྷེ བྱཱཀརཎུཏྟམཾ.

༢༣.

བྱཱཀརཎཾ ལབྷིཏྭཱན, པཱུརེཏྭཱ སབྦཔཱརམཱི;

ཨནཱགཏམྷི ཨདྡྷཱནེ, བུདྡྷོ ཧེསྶཾ སདེཝཀེཏི.

ཝིནཡཱལངྐཱརཊཱིཀཱ སམཏྟཱ.