📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཀངྑཱཝིཏརཎཱིཔུརཱཎ-ཊཱིཀཱ

གནྠཱརམྦྷཀཐཱ

བུདྡྷཾ ¶ ¶ དྷམྨཉྩ སངྒྷནྟི-ཨཱདིནཱ ཡཱ པཀཱསིཏཱ;

བྷདནྟབུདྡྷགྷོསེན, མཱཏིཀཱཊྛཀཐཱ སུབྷཱ;

ཏསྶཱ ཧི ལཱིནཔདཾ ཝི-ཀཱསནཀོཡམཱརམྦྷོ.

གནྠཱརམྦྷཀཐཱཝཎྞནཱ

ཝིཔྤསནྣེནཱཏི ¶ ཝིཝིདྷཔྤསནྣེན. ཀཐཾ? ‘‘ཨིཏིཔི སོ…པེ… བུདྡྷོ བྷགཝཱ, སྭཱཀྑཱཏོ…པེ… ཝིཉྙཱུཧི, སུཔྤཊིཔནྣོ…པེ… ལོཀསྶཱ’’ཏི (ཨ. ནི. ༥.༡༠) ཨེཝམཱདིནཱ. ‘‘ཙེཏསཱ’’ཏི ཝུཏྟཏྟཱ ཏཱིསུ ཝནྡནཱསུ ཙེཏོཝནྡནཱ ཨདྷིཔྤེཏཱ. ཏནྣིནྣཏཱདིཝསེན ཀཱཡཱདཱིཧི པཎཱམཀརཎཾ ཝནྡནཱ, གུཎཝསེན མནསཱཔི ཏཐཱཝ ཀརཎཾ མཱནཾ, པཙྩཡཔྤཊིཔཏྟིཡཱདཱིཧི པཱུཛཱཀརཎཾ པཱུཛཱ, པཙྩཡཱདཱིནཾ ཨབྷིསངྑརཎཾ སཀྐཙྩ ཀརཎཾ སཀྐཱརོ, ཏེསཾ. བྷཱཛནནྟི ཨཱདྷཱརོ, ཨདྷིཀརཎཾ ཝཱ.

ཐེརཱ མཧཱཀསྶཔཱདཡོ, ཏེསཾ ཝཾསོཏི ཐེརཝཾསོ, ཨཱགམཱདྷིགམསམྤདཱཡ ཏསྶ ཝཾསསྶ པདཱིཔབྷཱུཏཱཏི ཐེརཝཾསཔྤདཱིཔཱ, ཏེསཾ ཐེརཝཾསཔྤདཱིཔཱནཾ. ཨསཾཧཱིརཏྟཱ ཐིརཱནཾ. ཝིནཡཀྐམེཏི ཝིནཡཔིཊཀེ, ཨཱརམྦྷཱནུརཱུཔཝཙནམེཏཾ. སུཏྟཱབྷིདྷམྨེསུཔི ཏེ ཐིརཱ ཨེཝ. ‘‘བུདྡྷཾ དྷམྨཉྩ སངྒྷཉྩ པུབྦཱཙརིཡསཱིཧཱནཉྩཱ’’ཏི ཨཝཏྭཱ ཀསྨཱ ཝིསུཾ ཝུཏྟནྟི ཙེ? པཡོཛནཝིསེསདསྶནཏྠཾ. ཝཏྠུཏྟཡསྶ ཧི པཎཱམཀརཎསྶ ཨནྟརཱཡནིཝཱརཎཾ པཡོཛནཾ ¶ ཨཏྟནོ ནིསྶཡབྷཱུཏཱནཾ ཨཱཙརིཡཱནཾ པཎཱམཀརཎསྶ ཨུཔཀཱརཉྙུཏཱདསྶནཾ. ཏེན བུདྡྷཉྩ དྷམྨཉྩ སངྒྷཉྩ ཝནྡིཏྭཱ, ཙ-སདྡེན པུབྦཱཙརིཡསཱིཧཱནཉྩ ནམོ ཀཏྭཱཏི ཡོཛནཱ. ཨཐ ཝཱ ‘‘ཝནྡིཏྭཱ’’ཏི ཙེཏོཝནྡནཾ དསྶེཏྭཱ ཏཏོ ‘‘ནམོ ཀཏྭཱ’’ཏི ཝཱཙཱཝནྡནཱ, ‘‘ཀཏཉྫལཱི’’ཏི ཀཱཡཝནྡནཱཔི དསྶིཏཱཏི ཡོཛེཏབྦཾ.

ཨིདཱནི ཨབྷིདྷཱནཔྤཡོཛནཾ དསྶེཏུཾ ‘‘པཱམོཀྑ’’ནྟིཨཱདིམཱཧ. ཏཏྠ པཱམོཀྑནྟི པདྷཱནཾ. སཱིལཉྷི སབྦེསཾ ཀུསལདྷམྨཱནཾ པདྷཱནཾ ཨཱདིབྷཱཝཏོ. ཡཐཱ ཙ སཏྟཱནཾ ཁཛྫབྷོཛྫལེཡྻཔེཡྻཝསེན ཙཏུབྦིདྷོཔི ཨཱཧཱརོ མུཁེན པཝིསིཏྭཱ ཨངྒམངྒཱནི ཕརཏི, ཨེཝཾ ཡོགིནོཔི ཙཱཏུབྷཱུམཀཾ ཀུསལཾ སཱིལམུཁེན པཝིསིཏྭཱ ཨཏྠསིདྡྷིཾ སམྤཱདེཏི. ཏེན ཝུཏྟཾ ‘‘མུཁ’’ནྟིཨཱདི. ཨཐ ཝཱ མུཁནྟི ཨུཔཱཡོ, ཏེན མོཀྑཔྤཝེསཱཡ ནིབྦཱནསཙྪིཀིརིཡཱཡ མུཁཾ ཨུཔཱཡོཏི ཨཏྠོ. མཧེསིནཱ ཡཾ པཱཏིམོཀྑཾ པཀཱསིཏནྟི སམྦནྡྷོ. མཧནྟེ སཱིལཱདིཀྑནྡྷེ ཨེསི གཝེསཱིཏི མཧེསི.

སཱུརཏེན ནིཝཱཏེནཱཏི ‘‘ཏཏྠ ཀཏམཾ སོརཙྩཾ? ཡོ ཀཱཡིཀོ ཨཝཱིཏིཀྐམོ’’ཏིཨཱདིནཱ (དྷ. ས. ༡༣༤༩) སཱུརཏེན, ནཱིཙཝུཏྟིནཱ མཱནུདྡྷཙྩཝསེན ཨཏྟཱནཾ ཨནུཀྑིཔནབྷཱཝེན ནིཝཱཏེན. ཝིནཡཱཙཱརཡུཏྟེན ཙཱརིཏྟཝཱརིཏྟེཧི ཡུཏྟེན. ‘‘སོཎཏྠེརེན ཡཱཙིཏོ’’ཏི ཨཝཏྭཱ ‘‘སཱུརཏེནཱ’’ཏིཨཱདི ¶ ཀསྨཱ ཝུཏྟཾ, ཀིཾ དུསྶཱིལེན ཝཱ དུཊྛེན ཝཱ ཨལཛྫིནཱ ཝཱ ཡཱཙིཏེན ཝཎྞནཱ ཀཱཏུཾ ན ཝཊྚཏཱིཏི ཙེ? ན ན ཝཊྚཏི. ཐེརསྶ ཝཙནཾ པཊིཀྑིཔིཏུཾ ན སཀྐཱ, ཨེཝརཱུཔགུཎོ ཐེརོཝ, ཡཱཙནཝསེན ཀཏྟབྦོ ཨཱདརེནཱཏི དསྶེཏུཾ ཝུཏྟཾ.

ནཱམེནཱཏི ཨཏྟནོ གུཎནཱམེན. སདྡལཀྑཎསུབྷཏོ, ཝིནིཙྪཡསུབྷཏོ, ཝིཉྙེཡྻསུབྷཏོ ཙ སུབྷཾ.

གནྠཱརམྦྷཀཐཱཝཎྞནཱ ནིཊྛིཏཱ.

ནིདཱནཝཎྞནཱ

‘‘ཨཱཝིཀཏཱ ཧིསྶ ཕཱསུ ཧོཏི, ཏཏྠཱཡསྨནྟེ པུཙྪཱམི…པེ… ཏུཎྷཱི, ཨེཝམེཏཾ དྷཱརཡཱམཱི’’ཏི ཝཏྭཱ ‘‘ཨུདྡིཊྛཾ ཁོ ཨཱཡསྨནྟོ ནིདཱན’’ནྟིཨཱདིནཱ ནཡེན ཝུཏྟཾ. ཨེཏྠེཝ ཡཱཝཏཏིཡཱནུསཱཝནཀཐཱཝསཱནེ ཨཐ ¶ ཁོ ཨུདྡེསཀཱལེ ‘‘ཨཱཝིཀཏཱ ཧིསྶ ཕཱསུ ཧོཏཱི’’ཏི ཝཏྭཱ ‘‘ཨུདྡིཊྛཾ ཁོ ཨཱཡསྨནྟོ ནིདཱནཾ. ཏཏྠཱཡསྨནྟེ པུཙྪཱམཱི’’ཏིཨཱདིནཱ ནཡེན ཨཱགཏཾ. ཨུཔོསཐཀྑནྡྷཀེཔི ཨེཝམེཝ ཨཱགཏཾ. ཏཏྠ པུབྦེ ཝུཏྟཾ པཙྪཱ ཨཱགཏསུཏྟེན ཝིརུཛ྄ཛྷཏི. ཏསྨཱ ཡཐཱ ན ཝིརུཛ྄ཛྷཏི, ཏཐཱ ཨུཔཔརིཀྑིཏྭཱ གཧེཏབྦཾ. ཨེཝཾ ན ཝིརུཛ྄ཛྷཏཱིཏི ཨེཀེ. ཀཐཾ? ‘‘ཨཱཝིཀཏཱ ཧིསྶ ཕཱསུ ཧོཏཱི’’ཏི ཝཏྭཱ ‘‘ཨུདྡིཊྛཾ ཁོ ཨཱཡསྨནྟོ ནིདཱནཾ. ཏཏྠཱཡསྨནྟེ པུཙྪཱམཱི’’ཏིཨཱདིནཱ སུཨུདྡིཊྛཾ ཧོཏཱིཏི ཨེཏཾ ཨུདྡེསལཀྑཎཾ ཨིདྷཱཔི ཁནྡྷཀེཔི ཝུཏྟཏྟཱ. ཏསྨཱ ‘‘ཕཱསུ ཧོཏཱི’’ཏི ཝཏྭཱ ‘‘ཏཏྠཱཡསྨནྟེ པུཙྪཱམཱི’’ཏི ཝུཏྟཊྛཱནེ ཨཝུཏྟམྤི ཨཱནེཏྭཱ གཧེཏབྦཾ. ཀསྨཱ? ཨིདྷ ནིདཱནཾ ན དསྶིཏཾ, ཨུདྡེསོ ཨུདྡེསཀཱལེ ཨུདྡིསིཏབྦལཀྑཎསྶ ཏཏྠ ཝུཏྟཏྟཱ. ཨཔིཙ ‘‘ནིདཱནུདྡེསོ’’ཏི པདཾ ཨུདྡྷརིཏྭཱ ནིདཱནུདྡེསཾ དསྶེཏུཀཱམོཔི ‘‘སུཎཱཏུ མེ, བྷནྟེ, སངྒྷོ…པེ… ཨཱཝིཀཏཱ ཧིསྶ ཕཱསུ ཧོཏཱི’’ཏི པཱཋཝསེན ཨཱགཏཾ ནིདཱནཾ ནིཊྛཱཔེཏྭཱ ཨུཔརི ཨཊྛཀཐཱཝསེན ཡོཛེཏབྦཾ པཱལི༹ཾ ཨིདྷ ཡོཛེཏྭཱ ‘‘ཏཏྠཱཡསྨནྟེ པུཙྪཱམི…པེ… དྷཱརཡཱམཱི’’ཏི ནིདཱནཔཱལི༹ཾ པརིཔུཎྞཾ ཀཏྭཱ པུན ‘‘ཏཏྠ ནིདཱནུདྡེསོ’’ཏི ཨུདྡྷཊཔདཝསེན སངྑེཔཏོ ནིདཱནུདྡེསལཀྑཎཾ དསྶེཏུཾ ‘‘ཨེཝམེཏཾ དྷཱརཡཱམཱི’’ཏི ཝཏྭཱ ‘‘ཨུདྡིཊྛཾ ཁོ ཨཱཡསྨནྟོ ནིདཱན’’ནྟིཨཱདི ཝུཏྟཾ, ཏསྨཱ ཨེཝཾ ཨུཔརི ཙ ཁནྡྷཀེ ཙ, ཨཐ ཁོ ཨུདྡེསཀཱལེ ‘‘ཨཱཝིཀཏཱ ཧིསྶ ¶ ཕཱསུ ཧོཏཱི’’ཏི ཝཏྭཱ ‘‘ཨུདྡིཊྛཾ ཁོ ཨཱཡསྨནྟོ ནིདཱནཾ. ཏཏྠཱཡསྨནྟེ པུཙྪཱམཱི’’ཏིཨཱདི ནིདཱནུདྡེསོཝ དསྶིཏོ, ན ནིདཱནཾ.

སཝནཱཎཏྟིཝཙནནྟི ཨེཏྠ སངྒྷནཝཀཏརེན ཝཏྟུཾ ཨཡུཏྟནྟི ཙེ? ཡུཏྟམེཝ. ‘‘པཱཏིམོཀྑུདྡེསཀེན ཨེཝཾ ཝཏྟབྦ’’ནྟི བྷགཝཏཱ ཝུཏྟཏྟཱ བྷགཝཏོཝ ཨཱཎཏྟི, ན ཨུདྡེསཀསྶ. ཨིདྷ ནཝཀཏརཝསེན ཝུཏྟཾ. ཐེརོཔི པན ཨུདྡིསིཏུཾ ལབྷཏཱིཏི དསྶནཏྠཾ ‘‘ཐེརཱདྷིཀཾ པཱཏིམོཀྑ’’ནྟི ཝུཏྟཾ. ཨིམིནཱ སུཏྟེན ནཝཀཏརོ ན ལབྷཏཱིཏི ཙེ? ཏཾ དསྶེཏུཾ ‘‘ཡོ ཏཏྠ བྷིཀྑཱུ’’ཏིཨཱདི ཝུཏྟཾ.

ཡཐཱ ཙཏུཝགྒེན ཋཔེཏྭཱ ཨུཔསམྤདཱཔཝཱརཎཱཨབྦྷཱནཱནི སབྦཾ སངྒྷཀམྨཾ ཀཱཏུཾ ཝཊྚཏི, ཨེཝཾ ‘‘ཨཏིརེཀཝཱིསཏིཝགྒེན ཨིམཾ ནཱམ ཀམྨཾ ཀཱཏབྦ’’ནྟི ཨཝཏྭཱ ཨཏིརེཀཝཙནཏྟཱ ཨཉྙཾ ཨཏྠཾ སཱུཙེཏི, ཀིཾ ཏནྟི ‘‘ཙཏུཝགྒཱདིནཱ’’ཏིཨཱདི. ཏཉྷི ཏེཧི ཨེཝ སིདྡྷཾ. ཀཐཾ? ཙཏུཝགྒེན ཨུཔསམྤདཱཔཝཱརཎཱ…པེ… ཝཱིསཏིཝགྒེན ¶ ན ཀིཉྩི སངྒྷཀམྨཾ ཀཱཏུཾ ན ཝཊྚཏཱིཏི. ཨེཏྠ ‘‘དསཝགྒེན ཨབྦྷཱནཀམྨམཏྟཾ ཋཔེཏྭཱ’’ཏི ཝདནྟེན ཙཏུཔཉྩཝགྒེན ཀརཎཱིཡཱནིཔི དསཝགྒེན ཀཱཏུཾ ཨནུཉྙཱཏཱནི. ཏསྨཱ ཨཏིརེཀེན ཝཊྚཏཱིཏི དཱིཔིཏཾ, ‘‘ཋཔེཏྭཱ’’ཏི ཝཙནེན ཨཱུནཏརེན ན ཝཊྚཏཱིཏི དཱིཔིཏམེཝ. ཏསྨཱ ན ཝཏྟབྦཾ ཨཏིརེཀཝཱིསཏིཝགྒོཏི ཙེ? ཝཏྟབྦམེཝ. ཙཏུཔཉྩཝགྒེན ཀཏྟབྦཾ ཚསཏྟཨཊྛནཝཝགྒེན ཀཱཏབྦནྟི ཙ, དསཝགྒེན ཀཱཏབྦཾ ཨེཀཱདསདྭཱདས…པེ… ཨེཀཱུནཝཱིསཏིཝགྒེན ཀཱཏབྦནྟི ཙ དཱིཔིཏཾ. ཨཱུནཏརེན ན ཝཊྚཏཱིཏི དཱིཔིཏཾ པཱཀཊཏོ. སབྦཔྤཀཱརེན པན ཨཏིརེཀཝཱིསཏིཨནཏིརེཀཝཱིསཏིཝགྒེ ཝུཏྟེཔི དཱིཔིཏཾ ཧོཏཱིཏི ཝཛིརབུདྡྷིཏྠེརེན ལིཁིཏཾ. ཨིཏོ པཊྛཱཡ ‘‘ལིཁིཏ’’ནྟི ཝུཏྟེ ཝཛིརབུདྡྷིཏྠེརེནཱཏི གཧེཏབྦཾ.

སཙེ ཨནུཔོསཐེཔི ཝཊྚེཡྻ, ‘‘ཨུཔོསཐཾ ཀརེཡྻཱ’’ཏི ན ཝདེཡྻ, ཡསྨཱ ཨནུཔོསཐེ ཀཱཏུཾ ན ཝཊྚཏི, ཏསྨཱ ‘‘ཨཛྫུཔོསཐོ’’ཏི ཝཏྭཱ པུན ‘‘ཨུཔོསཐཾ ཀརེཡྻཱ’’ཏི ཝུཏྟཾ. ‘‘པཙྪིམཀཏྟིཀཔུཎྞམཱ ཨེཝཱ’’ཏི ཨཝདྷཱརཎཾ ཏཏོ པརཾ པཝཱརཎཱདིཝསསྶ ནཏྠིཏཱཡ ཀཏཾ. ཨུདྡྷཾ པཀཏིཨུཔོསཐེ ཝུཏྟེན པཀཏིཙཱརིཏྟེན སདྡྷིཾ ཨིདམྤི.

‘‘ནིམིཏྟེན ནིམིཏྟཾ སམྦནྡྷིཏྭཱ’’ཏི ན ཝཏྟབྦཾ ‘‘ཏིཝིདྷསམྤཏྟིཡུཏྟཱ’’ཏི ཝུཏྟཏྟཱཏི ཙེ? ཝཏྟབྦམེཝ. ཀསྨཱ? ཏིཝིདྷསམྤཏྟི ནཱམ ནིམིཏྟསམྤཏྟི, པརིསཱསམྤཏྟི, ཀམྨཝཱཙཱསམྤཏྟཱིཏིཨཱདིཾ ཝཏྭཱ ‘‘ནིམིཏྟསམྤཏྟི ནཱམ པབྦཏནིམིཏྟཾ, པཱསཱཎནིམིཏྟ’’ནྟིཨཱདི ¶ ཝུཏྟཾ, ན ནིམིཏྟེན ནིམིཏྟསམྦནྡྷནཾ ཝུཏྟཾ. ཨཔིཙ ‘‘ཏིཝིདྷསམྤཏྟིཡུཏྟཱ’’ཏི སམྤཡོགངྒེསུ དསྶེཏྭཱ པུན ཏམེཝ པཧཱནངྒེསུ དསྶེཏུཾ ‘‘ནིམིཏྟེན ནིམིཏྟཾ སམྦནྡྷིཏྭཱ’’ཏི ཝུཏྟཾ. ནདིསམུདྡཛཱཏསྶརེསུ སམྨཏསཱིམཱཏོ ཀམྨཱནི ན ཝིཔཛྫནྟི ཨུདཀུཀྑེཔསཱིམཏྟཱཏི ‘‘ཝིཔཏྟིསཱིམཱཡོ ནཱམཱ’’ཏི ཀསྨཱ ཝུཏྟཱཏི ཙེ? སེསལཀྑཎཱནི སམྤཱདེཏྭཱ ནདིཡཾ སཱིམཱཡ བདྡྷཱཡ ཨུདཀཔརིཡནྟཾ ཀཏྭཱ སཱིམཱགཏཏྟཱ པུན ཏཾ ནདིཾ ཨནྟོ ཀཏྭཱ ཏལཱ༹ཀེ ཀཏེ སཙེ ཏསྶཱ སཱིམཱཡ ཀམྨཾ ཀཱཏུཾ ཝཊྚེཡྻ, སཱིམཱཏོ ཀམྨཱནི ན ཝིཔཛྫེཡྻུཾ. ཡསྨཱ པན ཨེཝཾ ཀཱཏུཾ ན ཝཊྚཏི, ཏསྨཱ ‘‘ཨུདཀུཀྑེཔསཱིམཏྟཱ’’ཏི ཝུཏྟཾ ཨཀཱརཎཾ.

ཝཱིསཏིཝགྒཀརཎཱིཡཏྟཱ སངྒྷཀམྨསྶ ཀམྨཱརཧེན སདྡྷིཾ ཨེཀཝཱིསཏི བྷིཀྑཱུ ནིསཱིདིཏུཾ ན སཀྐོནྟཱི’’ཏི ཝུཏྟཾ, སུཁནིསཛྫཱཝསེན ནིསཱིདིཏུནྟི ཨདྷིཔྤཱཡོ. ‘‘པརིམཎྜལཱཀཱརེན ནིསཱིདིཏུ’’ནྟི ཨཊྛཀཐཱཡཾ ཝུཏྟཾ. ཏིཡོཛནཾ ཨཏིཀྐམིཏྭཱཏི མཛ྄ཛྷེ ཋཏྭཱ དིཡཌྜྷཾ ཀཏྭཱ ཏིཡོཛནཾ. ཀོཎཏོ ¶ ཧི ཀོཎཾ ཏིཡོཛནཾ ཨཏིཀྐཱམེཏི, ཨཱཔཏྟིཉྩ ཨཱཔཛྫཏི, སཱིམཱ ཙ ཨསཱིམཱ ཧོཏི. ཀིཏྟེཏྭཱཏི ནིམིཏྟཱནི སམྤནྣཱནིཔི ཨཉྙམཉྙནཱམཝིཔརིཡཱཡེན, ཨནིམིཏྟཱནཾ ནཱམེཧི ཙ ཀིཏྟེཏྭཱཏི ཨཏྠོ.

རཱསིཀཏཾ པཾསུཔི རུཀྑེསུ ཛཱཏེསུ སུདྡྷཔཾསུཔབྦཏོ ཧོཏི. གུལ༹པིཎྜཔརིམཱཎོ ཐཱུལཏཱཡ, ན ཏུལགཎནཱཡ. བྷཱུམིཡཾ པཏིཊྛིཏོ’’ཏི ཨིམིནཱ ཀུཊསརཱཝཱདཱིསུ རོཔིཏཾ པཊིཀྑིཔཏི, ཏཏོ ཨཔནེཏྭཱ པན ཏངྑཎམྤི བྷཱུམིཡཾ རོཔིཏོ ཝཊྚཏི. ནཝམཱུལསཱཁཱནིགྒམནཾ པན ཨཀཱརཎཾ. ཁནྡྷཾ ཚིནྡིཏྭཱ རོཔིཏེ པན ཨེཏཾ ཡུཛྫཏི. སཱུཙིདཎྜཀཔྤམཱཎོ ཀནིཊྛངྒུལིཔརིམཱཎམཏྟོ. ‘‘ཨཊྛངྒུལུབྦེདྷོ’’ཏི ཨིམིནཱ ཨུབྦེདྷོ པརིཙྪིནྣོ ཧོཏི, ‘‘གོཝིསཱཎམཏྟོ’’ཏི ཨིམིནཱ པརིཎཱཧོ. ‘‘ཨེཝཾ སནྟེཔི གོཝིསཱཎཔརིཎཱཧེ པརིཙྪེདོ ནཏྠི, ཏསྨཱ ཁུདྡཀོཔི མཧནྟོཔི ཝཊྚཏི ཨེཝཱཏི ཝདནྟི.

ཛཱཏསྶརེ པརིཔུཎྞམེཝ ཨུདཀཾ ནིམིཏྟཱུཔགཾ དིསྭཱ ཨཔརིཔུཎྞཾ ཨནྟརཱ ཋིཏིབྷཱུཏཾ ‘‘ཛཱཏསྶརེ སམྨཏཱ’’ཏི ཝུཏྟཾ ཝིཔཏྟིཾ ན ཨཱཔཛྫཏཱིཏི ‘‘ནདིཡཱ སམྨཏཱ, སམུདྡེ སམྨཏཱ, ཛཱཏསྶརེ སམྨཏཱ’’ཏི ཨེཏྠཱཔི ལོཎཱི ན གཧིཏཱ. བདྡྷསཱིམཾ ཝཱ ནདིསམུདྡཛཱཏསྶརེ ཝཱ ཨནོཀྐམིཏྭཱཏི ཨེཏྠཱཔི ‘‘ནདིཡཱ ཝཱ, བྷིཀྑཝེ, སམུདྡེ ཝཱ ཛཱཏསྶརེ ཝཱ’’ཏི (མཧཱཝ. ༡༤༧) ཨེཏྠཱཔི ན གཧིཏཱ. ཏསྨཱ ལོཎཱི ན ཨབདྡྷསཱིམཱཏི ཙེ? ཨབདྡྷསཱིམཱཝ. ‘‘ཡོཔི ནདིཾ ཝཱ སམུདྡཾ ཝཱ བྷིནྡིཏྭཱ ནིཀྑནྟཨུདཀེན ཀཏོ སོབྦྷོ ཨེཏཾ ལཀྑཎཾ པཱཔུཎཱཏི, ཨཡམྤི ¶ ཛཱཏསྶརོཡེཝཱ’’ཏི (ཀངྑཱ. ཨཊྛ. ནིདཱནཝཎྞནཱ) ཝུཏྟཏྟཱ ཛཱཏསྶརགྒཧཎེན གཧིཏཱཏི ཏཏྠ ཏཏྠ ཨཝུཏྟཱ. ‘‘ཡཱཝཏིཀཱ ཏསྨིཾ གཱམཁེཏྟེ’’ཏི ཝུཏྟཏྟཱ ཨཉྙམྤི གཱམཾ ཨནྟོ ཀཏྭཱ སམཱནསཾཝཱསཀསཱིམཱསམྨནྣནཀཱལེ ཏསྨིཾ གཱམེ བྷིཀྑཱུ ཨཱགཙྪནྟུ ཝཱ མཱ ཝཱ, ཝཊྚཏི. ཨཝིཔྤཝཱསསཱིམཱསམྨནྣནཀཱལེ ཨཱགནྟབྦམེཝ.

ཨགམནཔཐེསཱུཏི ཨེཏྠ ཨེཀདིཝསེན གནྟྭཱ པཙྩཱགནྟུཾ ཨསཀྐུཎེཡྻཊྛཱནེཏི ཝདནྟི, བདྡྷསཱིམཱབྷཱཝཾ པཊིཀྑིཔིཏྭཱཏི ཨཏྠོ.

‘‘སམནྟཱ ཨུདཀུཀྑེཔཱ’’ཏི ཝུཏྟཏྟཱ སབྦདིསཱསུ གཧེཏབྦམེཝཱཏི ཙེ? ཡཏོ ལབྦྷཏི, ཏཏོ གཧེཏབྦོ ‘‘ཡསྨིཾ པདེསེ པཀཏིཝཱིཙིཡོ ཨོཏྠརིཏྭཱ ¶ སཎྛཧནྟི, ཏཏོ པཊྛཱཡ ཀཔྤིཡབྷཱུམི, ཏཏྠ ཋཏྭཱ ཨུཔོསཐཱདིཀམྨཾ ཀཱཏུཾ ཝཊྚཏཱི’’ཏི ཝུཏྟཏྟཱ. ཨནུབནྡྷོ ཨཌྜྷམཱསོ ཨནྭཌྜྷམཱསོ, ཨཌྜྷམཱསསྶ ཝཱ ཨནུ. ཡོ པན ཀེནཙི ཨནྟམསོ ཏིརཙྪཱནེནཔི ཁཎིཏྭཱ ཨཀཏོཏི ཨདྷིཔྤཱཡོ.

‘‘ཨཉྙཾ ཏཏྟཀཾཡེཝ པརིཙྪེདཾ ཨནཏིཀྐམིཏྭཱ ཋིཏོཔི ཀམྨཾ ཀོཔེཏཱི’’ཏི ཝུཏྟཏྟཱ ཨཏིཀྐམིཏྭཱ ཋིཏོ ན ཀོཔེཏཱིཏི དཱིཔིཏམེཝ ཧོཏཱིཏི ཨུཔཏིསྶཏྠེརོ, ཏཾ པན ‘‘དྭིནྣཾ ཨུདཀུཀྑེཔཱནཾ ཨནྟརེ ཨཉྙོ ཨེཀོ ཨུདཀུཀྑེཔོ ཨུཔཙཱརཏྠཱཡ ཋཔེཏབྦོ’’ཏི ཝཙནེན ཝིརུཛ྄ཛྷཏི. སམནྟཔཱསཱདིཀཱཡཉྷི ‘‘ཨཉྙཾ ཏཏྟཀཾཡེཝཱ’’ཏི པདཾ ནཏྠི. ཏསྨཱ ཏསྶཱདྷིཔྤཱཡོ པརིཡེསིཏབྦོ. ཨནྟོཨུདཀུཀྑེཔསཱིམཱཡ ཨུཔཙཱརཏྠཱཡ ཋཔིཏཾ ཨུདཀུཀྑེཔཔརིཙྪེདཾ ཨནཏིཀྐམིཏྭཱཏི ཨཏྠོ གཧེཏབྦོ. ཐེརེན ཨཉྙཐཱ པཔཉྩིཏྭཱ ལིཁིཏཾ.

‘‘སབྷཱགཝཏྠུནཱ ལཧུཀཱཔཏྟི’’ནྟི ཝུཏྟཏྟཱ སབྷཱགསངྒྷཱདིསེསཾ ཨཱརོཙེཏུཾ ཝཊྚཏཱིཏི ཙེ? ན ཝཊྚཏི དེསནཱགཱམིནིཾ སནྡྷཱཡ ཨིདྷ ཝུཏྟཏྟཱ. ཏསྨཱ ཨེཝ སམུཙྩཡཀྑནྡྷཀེ ‘‘སབྷཱགསངྒྷཱདིསེསཾ ཨཱཔནྣསྶ པན སནྟིཀེ ཨཱཝིཀཱཏུཾ ན ཝཊྚཏི. སཙེ ཨཱཝིཀརོཏི, ཨཱཔཏྟི ཨཱཝིཀཏཱ ཧོཏི, དུཀྐཊཱ པན ན མུཙྩཏཱི’’ཏི (ཙཱུལ༹ཝ. ཨཊྛ. ༡༠༢) ཝུཏྟཾ. ཡཐཱ སངྒྷེན ‘‘སུཎཱཏུ མེ, བྷནྟེ, སངྒྷོ…པེ… པཊིཀརིསྶཏཱི’’ཏི ཝཏྭཱ ཨུཔོསཐཾ ཀཱཏུཾ ལབྷཏི, ཨེཝཾ ཏཱིཧི དྭཱིཧིཔི ཨཉྙཾ སུདྡྷཾ པསྶིཏྭཱ ‘‘པཊིཀརིསྶཱམཱ’’ཏི ཝཏྭཱ ཨུཔོསཐཾ ཀཱཏུཾ ཝཊྚཏི. ཨེཀེནཱཔི ‘‘པརིསུདྡྷཾ ལབྷིཏྭཱ པཊིཀརིསྶཱམཱི’’ཏི ཨཱབྷོགཾ ཀཏྭཱ ཨུཔོསཐཾ ཀཱཏུཾ ཝཊྚཏཱིཏི. ཨཊྛཀཐཱཡམྤི ‘‘སཱམནྟོ བྷིཀྑུ ཨེཝམསྶ ཝཙནཱིཡོཏི ཨེཏྠ སབྷཱགོ ཨེཝ ཝཏྟབྦོ. ཝིསབྷཱགསྶ ཧི ཝུཙྩམཱནེ བྷཎྜནཀལཧསངྒྷབྷེདཱདཱིནིཔི ཧོནྟི, ཏསྨཱ ཏསྶ ཨཝཏྭཱ ཨིཏོ ཝུཊྛཧིཏྭཱ ¶ པཊིཀརིསྶཱམཱི’’ཏི ཨཱབྷོགཾ ཀཏྭཱ ཨུཔོསཐོ ཀཱཏབྦོཏི ཨནྡྷཀཊྛཀཐཱཡཾ ཝུཏྟ’’ནྟི ཝཏྭཱ ཏསྶ ཨཔྤཊིཀྑིཏྟཏྟཱ ཝཊྚཏཱིཏི དཱིཔིཏམེཝ. ‘‘ཡདཱ ཨཉྙཾ སུདྡྷཾ བྷིཀྑུཾ ཨནཱཔཏྟིཀཾ པསྶིསྶཏི, ཏདཱ ཏསྶ སནྟིཀེ’’ཏི ཝུཏྟཏྟཱ ལཧུཀསྶེཝ ཨནུཉྙཱཏཏྟཱ སམུཙྩཡཀྑནྡྷཀེ ཝུཏྟཏྟཱ སབྷཱགསངྒྷཱདིསེསཾ པན ཉཏྟིཡཱ ཨཱརོཙེཏྭཱ ཨུཔོསཐཾ ཀཱཏུཾ ན ཝཊྚཏི.

དེཝབྲཧྨཱ ¶ པན ‘‘ཏིརཙྪཱནགཏོ’’ཏི པདཾ ཋཔེཏྭཱ ཡེན ཀེནཙི པདེན ཨསངྒཧིཏཱཔི ཨིམིནཱ སངྒཧིཏཱཏི དསྶནཏྠཾ ‘‘ཡསྶ ཨུཔསམྤདཱ པཊིཀྑིཏྟཱ’’ཏི ཝུཏྟཾ.

‘‘ཙཱཏུམཱསིནིཡཾ པན པཝཱརིཏཱནཾ སནྟིཀེ ཨནུཔགཏེན ཝཱ ཚིནྣཝསྶེན ཝཱ ཝུཊྛཝསྶེན ཝཱ’’ཏི ཨཝཏྭཱ ‘‘ཨནུཔགཏེན ཝཱ ཚིནྣཝསྶེན ཝཱ’’ཏི ཨེཏྟཀམེཝ ཝུཏྟཾ. ཝུཊྛཝསྶོ པན ཏསྨིཾ ཀཱལེ ཨནུཔགཏཏྟཱ ‘‘ཨནུཔགཏོ’’ཏི སངྑྱཾ གཏོཏི. སབྦཱཡ ཝུཊྛིཏཱཡ སབྦེ ཝུཊྛཧིཏྭཱ གཏེ སནྣིཔཱཏེཏུཾ ན སཀྐཱ, ཨེཀཙྩེ སནྣིཔཱཏེཏྭཱ པཱརིསུདྡྷིཾ ཨཱརོཙེཏུཾ ཝཊྚཏཱིཏི ཝདནྟི. ཀསྨཱ? ཉཏྟིཾ ཋཔེཏྭཱ ཀཏྟབྦསངྒྷཀམྨཱབྷཱཝཱ ཝགྒཾ ན ཧོཏཱིཏི. པཝཱརཎཱཡཔི ཨེསེཝ ནཡོ. ཨཡཉྷེཏྠ ཝིསེསོ – སཙེ པུརིམིཀཱཡ ཨུཔགཏེཧི པཙྪིམིཀཱཡ ཨུཔགཏཱ ཐོཀཏརཱ ཙེཝ ཧོནྟི སམསམཱ ཙ, སངྒྷཔཝཱརཎཱཡ ཙ གཎཾ པཱུརེནྟི, སངྒྷཔཝཱརཎཱཝསེན ཉཏྟི ཋཔེཏབྦཱཏི. ‘‘ཨེཀོཝ བྷིཀྑུ ཧོཏི…པེ… ཨཉྙེསཾ ཨནཱགཏབྷཱཝཾ ཉཏྭཱ’’ཏི ཝུཏྟཏྟཱ ཨདྷིཊྛཱནུཔོསཐཾ སཱིམཾ པཝིསིཏྭཱ ཀཱཏུཾ ན སཀྐཱཏི ཝདནྟི.

‘‘ཀིཾ སངྒྷསྶ པུབྦཀིཙྩ’’ནྟི ཨིདཾ ན ཉཏྟིཾ ཋཔེཏྭཱ ཝཏྟབྦཾ. ཏཉྷི ཉཏྟིཏོ པུརེཏརམེཝ ཀརཱིཡཏི. ཏསྨཱ ‘‘སུཎཱཏུ མེ, བྷནྟེ, སངྒྷོ, ཀིཾ སངྒྷསྶ པུབྦཀིཙྩཾ, ཡདི སངྒྷསྶ པཏྟཀལླ’’ནྟི ཝཏྟབྦཾ སིཡཱཏི. ཏཐཱཔི ན ཝཏྟབྦཾ. ན ཧི ཏཾ ཉཏྟིཡཱ ཨནྟོ ཀརཱིཡཏཱིཏི. ཨེཝཾ སནྟེ ནེཏཾ ཝཏྟབྦནྟི ཨཱཔཛྫཏི པཡོཛནཱབྷཱཝཱཏི ཙེ? ན, ཡཐཱགཏཊྛཱནེ ཨེཝ ཝཏྟབྦཏོ, པརཔདཱཔེཀྑཏཱཡཱཏི ཝུཏྟཾ ཧོཏི. ཨིདཾ པུབྦཀིཙྩཾ ཨཀཏྭཱ ཨུཔོསཐཀམྨཾ ཀརོནྟོ སངྒྷོ, པུགྒལོ ཝཱ ཋཔནཀྑེཏྟཱཏིཀྐམེ ཨཱཔཛྫཏི. ཏསྨིཉྷི ཁེཏྟེ ཨཏིཀྐནྟེ སམྨཛྫནཱདིཀརཎེ ཨཱཔཏྟིམོཀྑོ ན ཧོཏི ཨུཔོསཐཀམྨཏོ པུབྦེ ཀཏྟབྦཀམྨཱཀརཎཔཙྩཡཏྟཱ ཏསྶཱ ཨཱཔཏྟིཡཱ. ན སཱ ཀམྨཔརིཡོསཱནཱཔེཀྑཱ ཨེཏྠཱགཏསམྤཛཱནམུསཱཝཱདཱཔཏྟི ཝིཡ, ཏསྨཱ པཱཏིམོཀྑུདྡེསཀོ བྷིཀྑུ ‘‘པཱརིསུདྡྷིཾ ཨཱཡསྨནྟོ ཨཱརོཙེཐཱ’’ཏི ཝཏྟུཀཱམོ པཋམམེཝ པཱརིསུདྡྷཱཔཱརིསུདྡྷིཔཙྩཡཾ པུབྦཀིཙྩཾ སརཱཔེཏི. ཏཉྷི ཀཏཾ པཱརིསུདྡྷིཔཙྩཡོ ཧོཏི, ཨཀཏཾ ཨཔཱརིསུདྡྷིཔཙྩཡོ. ཏེནེཝ ཨུབྷཡཱཔེཀྑཱདྷིཔྤཱཡེན ཀཏཾ, ན ཀཏནྟི ཨཝཏྭཱ ‘‘ཀིཾ སངྒྷསྶ པུབྦཀིཙྩ’’མིཙྩེཝཱཧ. ཏཏྠ ཨཀཏཔཀྑེ ཏཱཝ པཱརིསུདྡྷིཨཱརོཙནཀྐམནིདསྶནཏྠཾ པརཏོ ¶ ‘‘ཡསྶ ¶ སིཡཱ ཨཱཔཏྟི, སོ ཨཱཝིཀརེཡྻཱ’’ཏི ཙ, ཀཏཔཀྑེ ‘‘ཨསནྟིཡཱ ཨཱཔཏྟིཡཱ ཏུཎྷཱི བྷཝིཏབྦ’’ནྟི ཙ ཝཀྑཏི.

‘‘སབྦནྟིམེན པརིཙྪེདེན ཙཏཱུཧི བྷིཀྑཱུཧི སནྣིཔཏིཏྭཱ’’ཏི ཙ, ‘‘ཨུཔོསཐཀརཎཏྠཾ སནྣིཔཏིཏེ སངྒྷེ བཧི…པེ… ཨདེནྟེན ཚནྡོ དཱཏབྦོ’’ཏི ཙ ཝདནྟི. ཨསནྣིཔཏིཏེཔི པན ཝཊྚཏི. ཨིདཉྷི ཚནྡདཱནསམཡདསྶནཏྠཾ ཝུཏྟཾ. ཨུཔོསཐཀརཎཏྠཾ སནྣིཔཏིཏེ སངྒྷེ བཧི ཨུཔོསཐཾ ཀཏྭཱ ཨཱགཏསྶ ཀཏྟབྦཱཀཱརདསྶནཏྠཉྩ ཝུཏྟཾ. པདྷཱནགྷརཝཱསིནོ པདྷཱནགྷརཾ པཝིསིཏུཀཱམཱ ཨཏྟནོ སབྷཱགབྷིཀྑཱུནཾ ཚནྡཾ དཏྭཱ སཙེ སངྒྷོ སནྣིཔཏཏི, ‘‘མཡ྄ཧཾ ཚནྡོ ཨཱརོཙེཏབྦོ’’ཏི ཝཏྭཱ པདྷཱནགྷརཾ པཝིསནྟི. ཨཡཾ སཱིཧལ༹དཱིཔེ པཡོགོ. ཨཱརོཙེནྟེན པན སནྣིཔཏིཏེ ཨཱརོཙེཏབྦཾ. པཉྩསུ བྷིཀྑཱུསུ ཨེཀསྨིཾ ཝིཧཱརེ ཝསནྟེསུ ཨེཀསྶ ཚནྡཔཱརིསུདྡྷིཾ ཨཱཧརིཏྭཱ ཙཏུནྣཾ པཱཏིམོཀྑཾ ཨུདྡིསིཏུཾ ཨནུཉྙཱཏཏྟཱ སནྣིཔཏིཏེ ཚནྡོ གཧེཏབྦོ ཨཱརོཙེཏབྦོཏི ཝཙནཾ ནིརཏྠཀཾ ཝིཡ. ‘‘ཐེཡྻསཾཝཱསཀོ པཊིཛཱནཱཏཱིཏི (མཧཱཝ. ༡༦༥) ཝཙནཏོ སཱམཎེརེན ཨཱཧཊཱཔི ཝཊྚཏི. ཀམྨཾ ན ཀོཔེཏཱི’’ཏི ཙ, ‘‘སཙེ པུབྦེ ཚནྡཾ དཏྭཱ བཧིསཱིམཱགཏོ པུན པཝིསཏི, པཙྪཱ ཚནྡགྒཧཎཀིཙྩཾ ནཏྠི, ཏསྶ པཡོགོ སཱིམཱསམྨུཏིཝསེན ཝེདིཏབྦོ’’ཏི ཙ ‘‘ཚནྡདཱནེ ཏིཀྑཏྟུཾ ཝཙནེ ཨིདཾ པཡོཛནཾ – པཋམཾ སམགྒབྷཱཝཾ, དུཏིཡཾ པཙྪཱ ཝིདྷཱཏབྦབྷཱཝཾ, ཏཏིཡཾ ཚནྡཧཱརཀསྶ དུཀྐཊམོཙནཾ དཱིཔེཏཱི’’ཏི (ཝཛིར. ཊཱི. མཧཱཝགྒ ༡༦༤) ཙ ལིཁིཏཾ. བིལཱ༹ལསངྑལིཀཱབདྡྷཱཝ ཧོཏི ཨནྟོགེཧེ ཨེཝ སམྤཡོཛནཏྟཱ, ཡཐཱ སཱ ན ཀཏྠཙི གཙྪཏི, ཏཐཱ སཱཔི ན ཀཏྠཙི གཙྪཏཱིཏི ཨདྷིཔྤཱཡོ. ཨིཏརཐཱ ཝིསེསནཾ ནིརཏྠཀཾ ཧོཏཱིཏི ཨཱཙརིཡེན གཧིཏཾ.

‘‘ན ཧི ཏཾ ཨཀཏྭཱ ཨུཔོསཐཾ ཀཱཏུཾ ཝཊྚཏཱི’’ཏི པུབྦེ དསྶིཏཏྟཱ ‘‘ཨིདམྤི ཧི ཨུབྷཡ’’ནྟི ཀསྨཱ ཝུཏྟནྟི ཙེ? སེསཱནི ཐེརེན ཨཱཎཏྟེན ཀཱཏབྦཱནི དསྶིཏཱནི, ཨིམེ པན དྭེ ཐེརེན ཝཱ པཱཏིམོཀྑུདྡེསཀེན ཝཱ ཉཏྟིཊྛཔནཀེན ཝཱ ཡེན ཝཱ ཏེན ཝཱ ཀཱཏབྦཱནཱིཏི ཙ, སམྨཛྫནཱདཱིནི ཏཏྠ ཏཏྠ ཏཱདིསཱནི པཡོཛནཱནི ནིཔྥཱདེནྟི, ཨིམེ པན དྭེ ཏཏྠ ཏཏྠ ན ཀིཉྩི ཀམྨཾ སཱདྷེནྟི, ཏསྨཱ ‘‘ཀིཾ ཨིམིནཱ’’ཏི ཨཝཏྭཱ ཀཱཏབྦམེཝཱཏི དསྶེཏུཉྩ ‘‘ཨིདམྤི ཧི ཨུབྷཡ’’ནྟིཨཱདི ཝུཏྟཾ. ‘‘ཨཱཡསྨནྟཱནཾ པཱདེ ཝནྡཏཱི’’ཏི ¶ གཎཝསེན ཝཏྭཱ པུགྒལཝསེན ན ཝུཏྟཾ ཏེན ཨཱརོཙེཏབྦསྶ ཨཉྙསྶ ཨབྷཱཝཱ.

སངྒྷསྶ ཨུདྡིཊྛཾ ཧོཏཱིཏི སངྒྷེན ཨུདྡིཊྛཾ ཧོཏཱིཏི ཨཏྠོ. སམགྒསྶ ཧི སངྒྷསྶཱཏི ཨེཏྠ སམགྒབྷཱཝསྶ ཀཱཡསཱམགྒིཀཱརཎཏྟཱ ནཏྠི དོསོཏི ཙེ? ཏཾ ན, ཨུདྡེསེཔི སཝནེཔི སམགྒབྷཱཝསྶ ¶ ཨིཙྪིཏབྦཏྟཱ. ‘‘སུཎཱཏུ མེ, བྷནྟེ’’ཏི ཧི ཨིམིནཱ ཙིཏྟསཱམགྒིཾ དཱིཔེཏི སཝནེ སབྦེཧི ཨེཀཱིབྷཱུཏབྷཱཝཏོ.

སཉྩིཙྩ ཨཱཔཏྟིཾ ཨཱཔཛྫཏཱིཏི ཨེཏྠ ཨནཱདརིཡཝསེན ཨཱཔཛྫནྟོ ཨེཝ ཨལཛྫཱི ཧོཏི, ན ཨིཏརོཏི. ཨཱཔཏྟིཾ པརིགཱུཧཏཱིཏི ཨེཏྠ ལཛྫཱཡ པརིགཱུཧནྟོ ཨལཛྫཱི ན ཧོཏི, ‘ཀིཾ ཨིམིནཱ’ཏི ཨནཱདརིཡཝསེན པརིགཱུཧནྟོ ཧོཏཱི’’ཏི ཙ ལིཁིཏཾ.

‘‘སཏྟནྣཾ ཨཱཔཏྟིཀྑནྡྷཱན’’ནྟི ན ཝཏྟབྦཾ, ‘‘ཚནྣ’’ནྟི ཝཏྟབྦནྟི ཙེ? སཏྟནྣམེཝཱཏི ཝཏྟབྦཾ. པཱརཱཛིཀཱཔཏྟིཾ ཨཱཔནྣོ ཧི སཙེ ཨཏྟནོ སཱཔཏྟིཀབྷཱཝཾ པཀཱསེཏི, སངྒྷསྶ ཙ ཨུཔོསཐོ སམྤཛྫཏི, ཏསྶ ཙ གིཧིབྷཱཝེན ཝཱ སཱམཎེརབྷཱཝེན ཝཱ སུདྡྷི ཧོཏཱིཏི.

ཨེཀཙྩེ ཨཱཙརིཡཱ ནཱམ དྷམྨབྷཱརིཀོ ཀིར ཨཱཙརིཡོ. ཀསྨཱ ཨེཝཾ ཝུཏྟནྟི ཙེ? ཡཱཝཏཏིཡཱནུསཱཝནཱ ནཱམ ཏིཀྑཏྟུཾ ཝཙནཾ. ཏཐཱ པཱཋེ ཨནཱགཏཏྟཱ ཀེཝལཾ ‘‘ཡཱཝཏཏིཡཾ ཨནུསཱཝིཏ’’ནྟི པདམེཝ དིསྭཱ ‘‘ཡསྶ སིཡཱ ཨཱཔཏྟི, སོ ཨཱཝིཀརེཡྻཱ’’ཏི ཨིདཾ ‘‘སཙེ ཨཱཔཏྟིཾ ཨཱཔནྣཱ, ཨཱཝིཀརོཐཱ’’ཏི ཨིམམཏྠཾ དཱིཔེཏི. ‘‘ཨསནྟིཡཱ ཨཱཔཏྟིཡཱ ཏུཎྷཱི བྷཝིཏབྦ’’ནྟི ཨིདམྤི ཏམེཝཏྠཾ དཱིཔེཏི. ‘‘ཏུཎྷཱིབྷཱཝེན ཁོ པནཱཡསྨནྟེ པརིསུདྡྷཱཏི ཝེདིསྶཱམཱི’’ཏི ཨིདམྤི ཏམེཝཱཏི ཨེཝམཏྠཾ གཧེཏྭཱ ཝུཏྟཾ ཀིར.

ཨཔརེཏི ཨཏྠདསྶིཏྠེརོ ཀིར. ཨེཏཾ སནྡྷཱཡཱཏི ཨེཏྠ ‘‘སཀིམྤི ཨནུསཱཝིཏ’’ནྟི པདསྶ ཝཙནེན ཏིཀྑཏྟུཾ ཨནུསཱཝནཱ ཀཱཏབྦཱཏི ཨེཏྟཀམེཝ དཱིཔིཏཾ ཝིཡ དིསྶཏི.

ཨིམམཏྠཾ སནྡྷཱཡ ཝུཏྟནྟི ཀཐཾ ཝིཉྙཱཡཏཱིཏི ཙེ? ‘‘ཨཡམེཏྠ ཨཱཙརིཡཔརམྤརཱབྷཏོ ཝིནིཙྪཡོ’’ཏི ཝུཏྟཾ.

‘‘སརམཱནེནཱ’’ཏི ¶ ཨིམིནཱ སམྤཛཱནམུསཱཝཱདསྶ སཙིཏྟཀཏྟཾ དསྶེཏི. སངྒྷམཛ྄ཛྷེ ཝཱཏིཨཱདི ལཀྑཎཝཙནཾ ཀིར. སངྒྷུཔོསཐཀརཎཏྠཾ སངྒྷམཛ྄ཛྷེ ཙེ ནིསིནྣོ, ཏསྨིཾ སངྒྷམཛ྄ཛྷེ ཨཱཝིཀཱཏབྦཱ. གཎུཔོསཐཀརཎཏྠཉྩེ གཎམཛ྄ཛྷེ ནིསིནྣོ, ཏསྨིཾ གཎམཛ྄ཛྷེ. ཨེཀསྶེཝ སནྟིཀེ ཙེ པཱརིསུདྡྷིཨུཔོསཐཾ ཀཏྟུཀཱམོ, ཏསྨིཾ ཨེཀཔུགྒལེ ཨཱཝིཀཱཏབྦཱཏི, ཨེཏེན ན ཀེཝལཾ སངྒྷམཛ྄ཛྷེ ཨེཝཱཡཾ མུསཱཝཱདོ སམྦྷཝཏི, ཨཐ ཁོ ཨེཏྠ ཝུཏྟལཀྑཎེན ཨསཏིཔི ‘‘པཱརིསུདྡྷིཾ ཨཱཡསྨནྟོ ཨཱརོཙེཐཱ’’ཏིཨཱདིཝིདྷཱནེ གཎུཔོསཐེཔི སཱཔཏྟིཀོ ཧུཏྭཱ ཨུཔོསཐཾ ¶ ཀཏྟུཀཱམོ ཨནཱརོཙེཏྭཱ ཏུཎྷཱིབྷཱུཏོཝ ཙེ ཀརོཏི, ཨཡཾ སམྤཛཱནམུསཱཝཱདཱཔཏྟིཾ ཨཱཔཛྫཏཱིཏི ཨིམསྶཏྠསྶ ཨཱཝིཀརཎཏོ ལཀྑཎཝཙནཾ ཀིརེཏནྟི ཝུཏྟནྟི ཏཀྐིཀཱ. ཨཉྙཐཱ ‘‘གཎམཛ྄ཛྷེ ཝཱ’’ཏི ན ཝཏྟབྦནྟི ཏེསཾ ཨདྷིཔྤཱཡོ. ཨཱརོཙནཱདྷིཔྤཱཡཝསེན ཝུཏྟནྟི ཨཱཙརིཡསྶ ཏཀྐོ. ཨཱརོཙེནྟོ ཧི ‘‘སངྒྷསྶ ཨཱརོཙེམཱི’’ཏི ཨདྷིཔྤཱཡེན ཨཱཝིཀརོནྟོ སངྒྷམཛ྄ཛྷེ ཨཱཝིཀརོཏི ནཱམ, ཨུབྷཏོཔསྶེ ནིསིནྣཱནཾ ཨཱརོཙེནྟོ གཎམཛ྄ཛྷེ ཨཱཝིཀརོཏི ནཱམ, ‘‘ཨེཀསྶེཝ ཨཱརོཙེསྶཱམཱི’’ཏི ཨདྷིཔྤཱཡེན ཨཱཝིཀརོནྟོ ཨེཀཔུགྒལེ ཨཱཝིཀརོཏི ནཱམ. སཙེཔི ཝེམཏིཀོ ཧོཏི…པེ… པཊིཀརིསྶཱམཱིཏི ཨེཝཾ ཀཏེ ཡཱཝ ཝེམཏིཀོ ཧོཏི, ཏཱཝ སབྷཱགཱཔཏྟིཾ པཊིགྒཧེཏུཾ ལབྷཏི, ཨཉྙེསཉྩ ཀམྨཱནཾ པརིསུདྡྷོ ནཱམ ཧོཏི. པུན ནིབྦེམཏིཀོ ཧུཏྭཱ དེསེཏབྦཾ ཝཱ ན ཝཱཏི ནེཝ པཱལི༹ཡཾ, ན ཨཊྛཀཐཱཡཾ ཨཏྠི, དེསིཏེ པན དོསོ ནཏྠི. ཏཐཱ ཨིཏོ ཝུཊྛཧིཏྭཱ ཏཾ ཨཱཔཏྟིཾ པཊིཀརིསྶཱམཱིཏི ཨེཏྠ ཙ སཀལསངྒྷེ སབྷཱགཱཔཏྟིཾ ཨཱཔནྣེ, ཝེམཏིཀེ ཙཱཏི ལིཁིཏཾ (ཝཛིར. ཊཱི. མཧཱཝགྒ ༡༦༩-༡༧༠).

ནིདཱནཝཎྞནཱ ནིཊྛིཏཱ.

པཱརཱཛིཀཀཎྜཾ

༡. པཋམཔཱརཱཛིཀཝཎྞནཱ

ཨིདྷ ¶ ¶ པན ཋཏྭཱ སིཀྑཱཔདཱནཾ ཀམབྷེདོ པཀཱསེཏབྦོ. ཀཐཾ – སབྦསིཀྑཱཔདཱནཾ ཡཐཱསམྦྷཝཾ དེསནཱཀྐམོ, པཧཱནཀྐམོ, པཊིཔཏྟིཀྐམོ, ཨུཔྤཏྟིཀྐམོཏི ཙཏུབྦིདྷོ ཀམོ ལབྦྷཏི. ཏཏྠ བྷགཝཏཱ རཱཛགཧེ བྷིཀྑཱུནཾ པཱཏིམོཀྑུདྡེསཾ ཨནུཛཱནནྟེན པཱཏིམོཀྑུདྡེསསྶ ཡོ དེསནཱཀྐམོ ཨནུཉྙཱཏོ, ཏཾ དེསནཱཀྐམཾ ཨནུཀྐམནྟོཝ མཧཱཀསྶཔོ པཋམཾ པཱརཱཛིཀུདྡེསཾ པུཙྪི, ཏདནནྟརཾ སངྒྷཱདིསེསུདྡེསཾ, ཏདནནྟརཾ ཨནིཡཏུདྡེསཾ, ཏདནནྟརཾ ཝིཏྠཱརུདྡེསཾ. ཏདནནྟརཾ བྷིཀྑུནིཝིབྷངྒཉྩ ཏེནེཝ ཨནུཀྐམེན པུཙྪི. ཏཏོ པརཾ ཏཡོ ཨཱཔཏྟིཀྑནྡྷེ སངྒཧེཏུཾ ཝིནཱ གཎནཔརིཙྪེདེན སེཁིཡདྷམྨེ པུཙྪི. ཨཱཔཏྟིཀྑནྡྷེ སབྷཱགཏོ པཊྛཱཡ པུཙྪནྟོ ཝཱིསཏིཁནྡྷཀེ པུཙྪི. ནིདཱནུདྡེསནྟོགདྷཱནཾ ཝཱ སརཱུཔེན ཨནུདྡིཊྛཱནཾ པུཙྪནཏྠཾ ཁནྡྷཀེ པུཙྪི. ཨེཏེན ཁནྡྷཀེ པཉྙཏྟཱ ཐུལླཙྩཡཱཔི སངྒཧིཏཱ ཧོནྟི. པུཙྪིཏཱནུཀྐམེནེཝ ཨཱཡསྨཱ ཨུཔཱལིཏྠེརོ བྱཱཀཱསི. ཨཡམེཏྠ དེསནཱཀྐམོ. ཨུབྷཏོཝིབྷངྒཁནྡྷཀཏོ པན ཨུཙྩིནིཏྭཱ ཏདཱ པརིཝཱརོ ཝིསུཾ པཱལི༹ ཀཏོ, ཨིམམེཝ ཝཙནཾ སནྡྷཱཡ ཨཊྛཀཐཱཡཾ ཝུཏྟཾ ‘‘ཨེཏེནེཝ ཨུཔཱཡེན ཁནྡྷཀཾ པརིཝཱརེཔི ཨཱརོཔཡིཾསཱུ’’ཏིཨཱདི (པཱརཱ. ཨཊྛ. ༡.པཋམམཧཱསངྒཨཱིཏིཀཐཱ). ཨཔིཙ པཱལི༹ཡཾ ‘‘ཨེཏེནེཝ ཨུཔཱཡེན ཨུབྷཏོཝིབྷངྒེ པུཙྪི. པུཊྛོ པུཊྛོ ཨཱཡསྨཱ ཨུཔཱལི ཝིསྶཛྫེསཱི’’ཏི (ཙཱུལ༹ཝ. ༤༣༩) ཨེཏྟཀམེཝ ཝུཏྟཾ. ཏསྨཱ ཐེརོ ཨུབྷཏོཝིབྷངྒེ ཨེཝ པུཙྪི. ཝིསྶཛྫནྟོ པན ཨཱཡསྨཱ ཨུཔཱལི ནིརཝསེསཾ དསྶེནྟོ ཁནྡྷཀཔརིཝཱརེ ཨནྟོ ཀཏྭཱ དེསེསི. གཎསཛ྄ཛྷཱཡཀཱལེ པན ཏདཱ ཁནྡྷཀཔརིཝཱརཱ ཝིསུཾ པཱལི༹ ཀཏཱཏི ཨཡམེཏྠ དེསནཱཀྐམོ.

ཡདི ཨེཝཾ ནིདཱནུདྡེསོ པཋམདེསནཱཏི ཙེ? ན, ཨུཔོསཐཀྑནྡྷཀེ (མཧཱཝ. ༡༣༣) ‘‘ཡཱནི མཡཱ བྷིཀྑཱུནཾ སིཀྑཱཔདཱནི པཉྙཏྟཱནི, ཏཱནི ནེསཾ པཱཏིམོཀྑུདྡེསཾ ཨནུཛཱནེཡྻ’’ནྟི ¶ ཝཙནཏོ, ‘‘ཡསྶ སིཡཱ ཨཱཔཏྟཱི’’ཏི (མཧཱཝ. ༡༣༤) ཝཙནཏོ ཙ. ཨཀུསལཱབྱཱཀཏཱནཾ ཨཱཔཏྟཱིནཾ དིཊྛདྷམྨསམྤརཱཡིཀཱསཝཊྛཱནིཡཏྟཱ ཡཐཱབྷཱུཏཾ སཱིལསཾཝརཀེན པརིཝཛྫནེན པཧཱཏབྦཏྟཱ པཧཱནཀྐམོཔེཏྠ སམྦྷཝཏི ‘‘ཏཱཝདེཝ ཙཏྟཱརི ཨཀརཎཱིཡཱནི ཨཱཙིཀྑིཏབྦཱནཱི’’ཏི ¶ ཝཙནཏོ. ཏཐཱ ‘‘སམཱདཱཡ སིཀྑཏི སིཀྑཱཔདེསཱུ’’ཏི (མ. ནི. ༣.༧༥; ཝིབྷ. ༥༠༨) ཝཙནཏོ ཡཐཱབྷཱུཏཾ ཨཱཙིཀྑནསིཀྑནེན པཊིཔཏྟིཀྐམོཔི སམྦྷཝཏི. ཡཐུདྡེསཀྐམཾ པརིཡཱཔུཎིཏབྦཔརིཡཏྟིཨཏྠེནཱཔི པཊིཔཏྟིཀྐམོ, ཨེཝམིམེཧི ཏཱིཧི ཀམེཧི དེསེཏབྦཱནམེཏེསཾ སིཀྑཱཔདཱནཾ ཡཐཱསམྦྷཝཾ ཨུཔྤཏྟིཀྐམོ སམྦྷཝཏི. ཏཐཱ ཧི ཡཾ ཡཾ སཱདྷཱརཎཾ, ཏཾ ཏཾ བྷིཀྑུཾ ཨཱརབྦྷ ཨུཔྤནྣེ ཨེཝ ཝཏྠུསྨིཾ ‘‘ཡཱ པན བྷིཀྑུནཱི ཚནྡསོ མེཐུནཾ དྷམྨ’’ནྟིཨཱདིནཱ ནཡེན བྷིཀྑུནཱིནམྤི པཉྙཏྟཾ. ཡཏོ བྷིཀྑུནཱིནཾ ཏཾ ཨནུཔྤནྣཔཉྙཏྟི ན སིཡཱ, ཏཏོ ཨནུཔྤནྣཔཉྙཏྟི ཏསྨིཾ ནཏྠཱིཏི (པརི. ༢༠༡-༢༠༢) པརིཝཱརཝཙནཾ ན ཝིརུཛ྄ཛྷཏི. ཨེཏྟཱཝཏཱ པུརིམེན ཀམཏྟཡེན ཡཾ པཋམཾ དེསེཏབྦཾ, ཏཾ པཱརཱཛིཀུདྡེསེ པཋམུཔྤནྣཏྟཱ མེཐུནདྷམྨཔཱརཱཛིཀཾ སབྦཔཋམཾ དེསེཏུཀཱམོ ཨཱཡསྨཱ ཨུཔཱལིཏྠེརོ ‘‘ཏཏྲ སུདཾ བྷགཝཱ ཝེསཱལིཡཾ ཝིཧརཏཱི’’ཏི (པཱརཱ. ༢༣) ཝེསཱལིཡམེཝ པཱཔེཏྭཱ ཋཔེསི.

ཨིདཱནི སབྦེསཾ སིཀྑཱཔདཱནཾ པཉྙཱཔནཝིདྷཱནཾ ཝེདིཏབྦཾ. ཀཐཾ? ‘‘ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐཱ’’ཏི (པཱརཱ. ༣༩, ༤༣) ཨེཝཾ སཨུདྡེསཨནུདྡེསབྷེདཏོ དུཝིདྷཾ. ཏཏྠ པཱཏིམོཀྑེ སརཱུཔཏོ ཨཱགཏཱ པཉྩ ཨཱཔཏྟིཀྑནྡྷཱ སཨུདྡེསཔཉྙཏྟི ནཱམ. སཱཔི དྭིདྷཱ སཔུགྒལཱཔུགྒལནིདྡེསབྷེདཏོ. ཏཏྠ ཡསྶཱ པཉྙཏྟིཡཱ ཨནྟོ ཨཱཔཏྟིཡཱ སཧ, ཝིནཱ ཝཱ པུགྒལོ དསྶིཏོ, སཱ སཔུགྒལནིདྡེསཱ. ཨིཏརཱ ཨཔུགྒལནིདྡེསཱ.

ཏཏྠ སཔུགྒལནིདྡེསཱ དྭིདྷཱ ཨདསྶིཏདསྶིཏཱཔཏྟིབྷེདཏོ. ཏཏྠ ཨདསྶིཏཱཔཏྟིཀཱ ནཱམ ཨཊྛ པཱརཱཛིཀཱ དྷམྨཱ ཝེདིཏབྦཱ. ‘‘པཱརཱཛིཀོ ཧོཏི ཨསཾཝཱསོ’’ཏི (པཱརཱ. ༣༩, ༤༤, ༨༩, ༩༡, ༡༦༧, ༡༧༡, ༡༩༥, ༡༩༧) ཧི པུགྒལོཝ ཏཏྠ དསྶིཏོ, ནཱཔཏྟི. དསྶིཏཱཔཏྟིཀཱ ནཱམ བྷིཀྑུནིཔཱཏིམོཀྑེ ཨཱགཏཱ སཏྟརས སངྒྷཱདིསེསཱ དྷམྨཱ. ‘‘ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེས’’ནྟི (པཱཙི. ༦༨༣, ༦༨༧) ཧི ཏཏྠ ཨཱཔཏྟི དསྶིཏཱ སདྡྷིཾ པུགྒལེན.

ཏཐཱ ཨཔུགྒལནིདྡེསཱཔི ཨདསྶིཏདསྶིཏཱཔཏྟིབྷེདཏོ དྭིདྷཱ. ཏཏྠ ཨདསྶིཏཱཔཏྟིཀཱ ནཱམ སེཁིཡཱ དྷམྨཱ. ཝུཏྟཱཝསེསཱ དསྶིཏཱཔཏྟིཀཱཏི ཝེདིཏབྦཱ.

སཱཔི ¶ ¶ དྭིདྷཱ ཨནིདྡིཊྛཀཱརཀནིདྡིཊྛཀཱརཀབྷེདཏོ. ཏཏྠ ཨནིདྡིཊྛཀཱརཀཱ ནཱམ སུཀྐཝིསཊྛིམུསཱཝཱདོམསཝཱདཔེསུཉྙབྷཱུཏགཱམཨཉྙཝཱདཀཨུཛ྄ཛྷཱཔནཀགཎབྷོཛནཔརམྤརབྷོཛནསུརཱམེརཡཨངྒུལིཔཏོདཀཧསདྷམྨཨནཱདརིཡཏལགྷཱཏཀཛཏུམཊྛཀསིཀྑཱཔདཱནཾ ཝསེན པཉྩདསཝིདྷཱ ཧོནྟི. ཏཏྠ ནིདྡིཊྛཀཱརཀེ མིསྶཱམིསྶབྷེདོ ཝེདིཏབྦོ – ཏཏྠ ཨུཔཡོགབྷུམྨཝིབྷཏྟིཡོ ཨེཀཾསེན མིསྶཱ. ཨཝསེསཱ མིསྶཱ ཙ ཨམིསྶཱ ཙ. སེཡྻཐིདཾ – པཙྩཏྟཾ ཏཱཝ དྭཱིསུ ཨནིཡཏེསུ ཨུཔཡོགེན མིསྶཾ, དྭཱདསསུ པཱཊིདེསནཱིཡེསུ ཀརཎེན མིསྶཾ, ཨཱུནཔཉྩབནྡྷནཔཏྟསིཀྑཱཔདེསུ སཱམིཀརཎེཧི, ཨཱུནཝཱིསཏིཝསྶེ བྷུམྨེན, མོཧནཀེ ཨུཔཡོགསཱམིབྷུམྨེཧི. ཡསྨཱ ‘‘ཝིཝཎྞཀ’’ནྟི བྷཱཝོ ཨདྷིཔྤེཏོ, ན ཀཏྟཱ, ཏསྨཱ ཝིཝཎྞཀསིཀྑཱཔདཾ ཡདཱ ན སམྦྷཝཏི, ཨེཝཾ པཙྩཏྟཾ པཉྩཝིདྷཾ མིསྶཾ ཧོཏི. སེསེསུ པཋམཱནིཡཏཾ ཋཔེཏྭཱ ཨཱདིམྷི ‘‘ཡོ པན བྷིཀྑཱུ’’ཏི ཨེཝམཱགཏཾ པཙྩཏྟཾ ཝཱ, དུཏིཡཱནིཡཏཾ ཋཔེཏྭཱ པཎཱིཏབྷོཛནསམཎུདྡེསཏཏིཡཙཏུཏྠཔཱཊིདེསནཱིཡསིཀྑཱཔདེསུ མཛ྄ཛྷེ ‘‘ཡོ པན བྷིཀྑཱུ’’ཏི ཨེཝམཱགཏཾ པཙྩཏྟཾ ཝཱ, དུབྦཙཀུལདཱུསཀསཾསཊྛསིཀྑཱཔདེསུ ཨཱདིམྷི ཀེཝལཾ ‘‘བྷིཀྑཱུ’’ཏི ཨཱགཏཾ པཙྩཏྟཾ ཝཱ, བྷེདཱནུཝཏྟཀསིཀྑཱཔདེ མཛ྄ཛྷེ ཨཱགཏཾ པཙྩཏྟཾ ཝཱ ཨཉྙཱཡ ཝིབྷཏྟིཡཱ ཨམིསྶམེཝ ཧོཏི. ཏཏྠ བྷེདཱནུཝཏྟཀཏུཝཊྚནདྭཡསཾསཊྛདུཏིཡཔཱཊིདེསནཱིཡསིཀྑཱཔདེསུ བཧུཝཙནཾ, ཨིཏརཏྠ སབྦཏྠ ཨེཀཝཙནམེཝཱཏི ཝེདིཏབྦཾ.

ཏཐཱ ཨུཔཡོགོ དྭཱིསུ ཝིཀཔྤནསིཀྑཱཔདེསུ, ཏནྟཝཱཡསིཀྑཱཔདེ ཙ པཙྩཏྟེན མིསྶོ, ཨབྷིཧཊསིཀྑཱཔདེ ཀརཎེན, རཱཛསིཀྑཱཔདེ ཀརཎསཱམིཔཙྩཏྟེཧཱིཏི ཨུཔཡོགོ ཏིདྷཱ མིསྶོ ཧོཏི. ཀརཎཉྩ ཀུཊིཀཱརམཧལླཀདུཏིཡཀཐིནདྭེབྷཱགནིསཱིདནསནྠཏདུབྦཎྞཀརཎསིཀྑཱཔདེསུ ཚསུ པཙྩཏྟེན མིསྶཾ, པཋམཏཏིཡཀཐིནཨཊྛངྒུལཔཱདཀནིསཱིདནཀཎྜུཔྤཊིཙྪཱདིཀཝསྶིཀསཱཊིཀཨུདཀསཱཊིཀདྭེདྷམྨཔཙྩཱསཱིསནསིཀྑཱཔདེསུ ཨཊྛསུ སཱམིནཱ མིསྶནྟི ཀརཎཾ དྭིདྷཱ མིསྶཾ ཧོཏི. ཨཝསེསེསུ ཚབྦསྶཝསྶིཀསཱཊིཀདྭཏྟིཙྪདནཱཝསཐཔིཎྜམཧཱནཱམགརུལཧུཔཱཝུརཎསིཀྑཱཔདེསུ སཏྟསུ ཀརཎཝིབྷཏྟི ཨཉྙཝིབྷཏྟིཡཱ ཨམིསྶཱ, ཨཙྩེཀཨེལ༹ཀལོམསིཀྑཱཔདེསུ སཱམིཝིབྷཏྟི ཀརཎཝིབྷཏྟིཡཱ མིསྶཱ. ཨཏིརེཀཔཏྟབྷེསཛྫསིཀྑཱཔདེསུ ཨགྒཧིཏགྒཧཎེན སཱམིཝིབྷཏྟི ཨམིསྶཱཝ ཧོཏཱིཏི ཝེདིཏབྦཱ. ཨེཝཾ ཏཱཝ ནིདྡིཊྛཀཱརཀེསུ སིཀྑཱཔདེསུ –

པཉྩདྷཱ ¶ ཙ ཏིདྷཱ ཙེཝ, དྭིདྷཱ ཙེཔི ཏཐེཀདྷཱ;

བྷིནྣཱ ཝིབྷཏྟིཡོ པཉྩ, སབྦེཀཱདསདྷཱ སིཡུཾ.

ཨེཝཾ ¶ ཏཱཝ ཡཐཱཝུཏྟེསུ སཨུདྡེསཔཉྙཏྟིསངྑཱཏེསུ སིཀྑཱཔདེསུ ཨགྒཧིཏགྒཧཎེན པཉྙཱསུཏྟརེསུ ཏིསཏེསུ ནཝུཏིཨནིདྡིཊྛཀཱརཀེ ཝཛྫེཏྭཱ ནིདྡིཊྛཀཱརཀཱནི ཨཏིརེཀསཊྛིདྭིསཏཱནི ཧོནྟི. ཏེསུ པཙྩཏྟཀརཎཱནི ཏིཾསུཏྟརཱནི དྭིསཏཱནི ཧོནྟི. ཏེསུ ཨམིསྶཔཙྩཏྟཀརཎཱནི དྭཱདསུཏྟརཱནི དྭིསཏཱནི, མིསྶཔཙྩཏྟཀརཎཱནི ཨཊྛཱརས ཧོནྟི. ཨཝསེསེསུ ཏིཾསཏིཡཱ སིཀྑཱཔདེསུ མིསྶོཔཡོགཀརཎཱནི པཉྩ ཧོནྟི, མིསྶཀརཎཱནི ཙུདྡས, ཨམིསྶཱནི སཏྟ, མིསྶཱམིསྶཀརཎཱནི དྭེ, ཨམིསྶཱནི དྭེཏི སབྦེསུཔི ནིདྡིཊྛཀཱརཀེསུ བྷེདཱནུཝཏྟཀདུབྦཙཀུལདཱུསཀཔཋམདུཏིཡཏཏིཡཀཐིནཨབྷིཧཊཀུཊིཀཱརམཧལླཀཝིཀཔྤནདྭཡདྭེབྷཱགཚབྦསྶནིསཱིདནསནྠཏཨེལ༹ཀལོམཱཏིརེཀཔཏྟབྷེསཛྫཝསྶིཀསཱཊིཀཏནྟཝཱཡཨཙྩེཀཚཱརཏྟདྭ པཉྩཏྟིཾསེསུ ‘‘ཡོ པན བྷིཀྑཱུ’’ཏི ནཏྠི. དུཏིཡཱནིཡཏཔཎཱིཏབྷོཛནསམཎུདྡེསཏཏིཡཙཏུཏྠཔཱཊིདེསནཱིཡེསུ མཛ྄ཛྷེ ཨཏྠི.

ཨེཏྟཱཝཏཱ སཨུདྡེསཱནུདྡེསདུཀཾ, སཔུགྒལཱཔུགྒལནིདྡེསདུཀཾ, པཙྩེཀདསྶིཏཱཔཏྟིདུཀདྭཡཾ, ཨནིདྡིཊྛཀཱརཀདུཀཾ, ཏཏྠ ནིདྡིཊྛཀཱརཀེསུ པཙྩཏྟབྷུམྨདུཀཾ, སཡོཔནཱཡོཔནདུཀཾ, ཨཡོཔནམཛ྄ཛྷེཡོཔནདུཀཾ, ཨེཀཱནེཀཝཙནདུཀནྟི ནཝ དུཀཱནི དསྶིཏཱནི ཧོནྟི. ཝིསེསཀཱརཎཾ ཏསྨིཾ ཏསྨིཾ སིཀྑཱཔདེ སམྤཏྟེ ཨཱཝིབྷཝིསྶཏི. ཨེཝཾ ཏཱཝ སཨུདྡེསཔཉྙཏྟིཾ ཉཏྭཱ སེསཝིནཡཔིཊཀེ ཡཱ ཀཱཙི པཉྙཏྟི ཨནུདྡེསཔཉྙཏྟཱིཏི ཝེདིཏབྦཱ. སཱ པདབྷཱཛནནྟརཱཔཏྟིཝིནཱིཏཝཏྠུཔཊིཀྑེཔཔཉྙཏྟིཨཝུཏྟསིདྡྷིསིཀྑཱཔདཝསེན ཚབྦིདྷཱ ཧོཏི.

ཏཏྠ ‘‘ཡེབྷུཡྻེན ཁཡིཏེ ཨཱཔཏྟི ཐུལླཙྩཡསྶ (པརི. ༡༥༧-༡༥༨), ཝཊྚཀཏེ མུཁེ ཨཙྪུཔནྟསྶ ཨཱཔཏྟི དུཀྐཊསྶཱ’’ཏི (པཱརཱ. ༧༣) ཨེཝམཱདིཀཱ པདབྷཱཛནེ སནྡིསྶམཱནཱཔཏྟི པདབྷཱཛནསིཀྑཱཔདཾ ནཱམ. ‘‘ན ཙ, བྷིཀྑཝེ, སབྦམཏྟིཀཱམཡཱ ཀུཊི ཀཱཏབྦཱ, ཡོ ¶ ཀརེཡྻ, ཨཱཔཏྟི དུཀྐཊསྶཱ’’ཏིཨཱདི (པཱརཱ. ༨༥) ཨནྟརཱཔཏྟིསིཀྑཱཔདཾ ནཱམ. ‘‘ཨནུཛཱནཱམི, བྷིཀྑཝེ, དིཝཱཔཊིསལླཱིཡནྟེན དྭཱརཾ སཾཝརིཏྭཱ པཊིསལླཱིཡིཏུ’’ནྟི (པཱརཱ. ༧༧) ཨེཝམཱདི ཝིནཱིཏཝཏྠུསིཀྑཱཔདཾ ནཱམ. ‘‘སངྒྷབྷེདཀོ, བྷིཀྑཝེ, ཨནུཔསམྤནྣོ ན ཨུཔསམྤཱདེཏབྦོ’’ཏི (མཧཱཝ. ༡༡༥) ཨེཝམཱདི པཊིཀྑེཔསིཀྑཱཔདཾ ནཱམ.

ཡསྨཱ པན ཏེན ཏེན པཊིཀྑེཔེན ‘‘ཡོ པན བྷིཀྑུ སམགྒཾ སངྒྷཾ ཨདྷམྨསཉྙཱི བྷིནྡེཡྻ, པཱརཱཛིཀོ ཧོཏི ཨསཾཝཱསོ. ཡོ པན བྷིཀྑུ དུཊྛཙིཏྟོ བྷགཝཏོ ཛཱིཝམཱནཀསརཱིརེ ལོཧིཏཾ ¶ ཨུཔྤཱདེཡྻ, པཱརཱཛིཀོ ཧོཏི ཨསཾཝཱསོ’’ཏི སིཀྑཱཔདཱནི པཉྙཏྟཱནི ཧོནྟི. ཡཱནི སནྡྷཱཡ ‘‘ཨེཀསྶ ཚེཛྫཀཱ ཧོཏི, ཙཏུནྣཾ ཐུལླཙྩཡཾ, ཙཏུནྣཉྩེཝ ཨནཱཔཏྟི, སབྦེསཾ ཨེཀཝཏྠུཀཱ’’ཏི ཝུཏྟཾ. ‘‘ཨཏྠཱཔཏྟི ཏིཊྛནྟེ བྷགཝཏི ཨཱཔཛྫཏི, ནོ པརིནིབྦུཏེ’’ཏི (པརི. ༣༢༣) ཙ ཝུཏྟཾ. ཏེན ན ཀེཝལཾ ‘‘ན, བྷིཀྑཝེ, ཛཱནཾ སངྒྷབྷེདཀོ ཨནུཔསམྤནྣོ ཨུཔསམྤཱདེཏབྦོ…པེ… ཨཱཔཏྟི དུཀྐཊསྶཱ’’ཏི ཨིདམེཝ སིཀྑཱཔདཾ པཉྙཏྟཾ ཧོཏི སཱདྷཀཾ ཧོཏི. ‘‘པཎྜཀོ, བྷིཀྑཝེ, ཨནུཔསམྤནྣོ ན ཨུཔསམྤཱདེཏབྦོ, ཨུཔསམྤནྣོ ནཱསེཏབྦོ’’ཏི (མཧཱཝ. ༡༠༩) ཨེཝམཱདཱིསུ པན ཨུཔཛ྄ཛྷཱཡཱདཱིནཾ དུཀྐཊམེཝ པཉྙཏྟཾ, ན པཎྜཀཱདཱིནཾ པཱརཱཛིཀཱཔཏྟི. ན ཧི ཏེསཾ བྷིཀྑུབྷཱཝོ ཨཏྠི. ཡཏོ སིཡཱ པཱརཱཛིཀཱཔཏྟི. ཏཐཱ ‘‘ན ཨཙྪིནྣེ ཐེཝེ པཀྐམིཏབྦ’’ནྟི (མཧཱཝ. ༦༦, ༦༧, ༧༨, ༧༩) ཨེཝམཱདིཀཉྩ པཊིཀྑེཔསིཀྑཱཔདམེཝ ནཱམ.

ཁནྡྷཀེསུ པཉྙཏྟདུཀྐཊཐུལླཙྩཡཱནི པཉྙཏྟིསིཀྑཱཔདཾ ནཱམ. ‘‘ཏེན ཧི, སཱརིཔུཏྟ, བྷེདཱནུཝཏྟཀེ ཐུལླཙྩཡཾ དེསཱཔེཧཱི’’ཏི (ཙཱུལ༹ཝ. ༣༤༥) ཝུཏྟཾ, ཐུལླཙྩཡམྤི ཏཏྠེཝ སམོདྷཱནཾ གཙྪཏི. ཨིདཾ ཏེསཾ ཝིབྷཏྟིཀམྨཀྑཎེ ཨཔཉྙཏྟཏྟཱ ཨཝིཛྫམཱནམྤི བྷགཝཏོ ཝཙནེན ཝིསུདྡྷཀྑཎེཔི ཝིཛྫམཱནཾ ཛཱཏནྟི ཨེཀེ. ‘‘བྷེདཱནུཝཏྟཀེ དེསཱཔེཧཱི’’ཏི ཝཙནཏོ སེསབྷེདཱནུཝཏྟཀཱནཾ ‘‘ཡོ པན བྷིཀྑུ ཛཱནཾ སངྒྷབྷེདཀཱནཾ ཨནུཝཏྟེཡྻ, ཨཱཔཏྟི ཐུལླཙྩཡསྶཱ’’ཏི སིཀྑཱཔདཾ པཉྙཏྟཾ ཧོཏཱིཏི ཝེདིཏབྦཾ. ཏཐཱ སབྦཱནི ཁནྡྷཀཝཏྟཱནི, ཝིནཡཀམྨཱནི ཙ ཏཏྠེཝ སམོདྷཱནཾ གཙྪནྟི. ཡཐཱཧ ‘‘པཉྙཏྟེ ཏཾ ཨུཔཱལི མཡཱ ཨཱགནྟུཀཱནཾ བྷིཀྑཱུནཾ ཨཱགནྟུཀཝཏྟཾ…པེ… ཨེཝཾ སུཔཉྙཏྟེ ཁོ མཡཱ ཨུཔཱལི སིཀྑཱཔདེ’’ཏིཨཱདི. ‘‘ཡཱ པན བྷིཀྑུནཱི ནཙྩཾ ཝཱ གཱིཏཾ ཝཱ ཝཱདིཏཾ ཝཱ དསྶནཱཡ གཙྪེཡྻ ¶ , པཱཙིཏྟིཡ’’ནྟི (པཱཙི. ༨༣༤) ཨིམིནཱ སུཏྟེན བྷིཀྑུནཱི ནཙྩེཡྻ ཝཱ གཱཡེཡྻ ཝཱ ཝཱདེཡྻ ཝཱ, པཱཙིཏྟིཡནྟི ཨེཝམཱདིཀཾ ཡཾ ཀིཉྩི ཨཊྛཀཐཱཡ དིསྶམཱནཾ ཨཱཔཏྟིཛཱཏཾ ཝིནཡཀམྨཾ ཝཱ ཨཝུཏྟསིདྡྷིསིཀྑཱཔདཾ ནཱམ. ཚབྦིདྷམྤེཏཾ ཚཧི ཨཱཀཱརེཧི ཨུདྡེསཱརཧཾ ན ཧོཏཱིཏི ཨནུདྡེསསིཀྑཱཔདཾ ནཱམཱཏི ཝེདིཏབྦཾ. སེཡྻཐིདཾ – པཉྩཧི ཨུདྡེསེཧི ཡཐཱསམྦྷཝཾ ཝིསབྷཱགཏྟཱ ཐུལླཙྩཡདུབྦྷཱསིཏཱནཾ སབྷཱགཝཏྠུཀམྤི དུཀྐཊཐུལླཙྩཡདྭཡཾ ཨསབྷཱགཱཔཏྟིཀཏྟཱ ཨནྟརཱཔཏྟིཔཉྙཏྟིསིཀྑཱཔདཱནཾ, ནཱནཱཝཏྠུཀཱཔཏྟིཀཏྟཱ པཊིཀྑེཔསིཀྑཱཔདཱནཾ, ཀེསཉྩི ཝིནཱིཏཝཏྠུཔཉྙཏྟིསིཀྑཱཔདཱནཉྩ ཨདསྶིཏཱཔཏྟིཀཏྟཱ, ཨདསྶིཏཝཏྠུཀཏྟཱ བྷེདཱནུཝཏྟཀཐུལླཙྩཡསྶ, ཨདསྶིཏཱཔཏྟིཝཏྠུཀཏྟཱ ཨཝུཏྟསིདྡྷིསིཀྑཱཔདཱནནྟི. ཨེཏྟཱཝཏཱ ‘‘དུཝིདྷཾ སིཀྑཱཔདཔཉྙཱཔནཾ སཨུདྡེསཱནུདྡེསབྷེདཏོ’’ཏི ཡཾ ཝུཏྟཾ, ཏཾ སམཱསཏོ པཀཱསིཏཾ ཧོཏི.

པཉྙཏྟིཡཾ ¶ ཏཱཝ –

‘‘ཀཱརཀོ ཨིདྷ ནིདྡིཊྛོ, ཨཔེཀྑཱཡ ཨབྷཱཝཏོ;

པུབྦེ ཝཏྟབྦཝིདྷཱནཱ-བྷཱཝཏོ ཙ ཨཱདིཏོ ཡོཔནེན སཧཱ’’ཏི. –

ཨཡཾ ནཡོ ཝེདིཏབྦོ. ཏསྶཏྠོ – ཡེ ཏེ ཨནིདྡིཊྛཀཱརཀཱ པུབྦེ ཝུཏྟཔྤབྷེདཱ སུཀྐཝིསཊྛིཨཱདཡོ སིཀྑཱཔདཝིསེསཱ, ཏེསུ ཨདྷིཔྤཱཡཀམྨཝཏྠུཔུགྒལཔཡོགེ ཨཔེཀྑཱཡ བྷཱཝཏོ ཀཱརཀོ ན ནིདྡིཊྛོ ཏེསཾ སཱཔེཀྑབྷཱཝདསྶནཏྠཾ. ཏཾ སབྦཾ ཏསྨིཾ ཏསྨིཾ སིཀྑཱཔདེ ཨཱཝིབྷཝིསྶཏི, ཨིདྷ པན པཱརཱཛིཀཔཉྙཏྟིཡཾ ཨཔེཀྑཱཡ ཨབྷཱཝཏོ ཀཱརཀོ ནིདྡིཊྛོ. ཡོ པན ཀཱརཀོ ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨི’’ནྟིཨཱདཱིསུ (པཱརཱ. ༤༦༢, ༤༧༢, ༤༧༥) ཝིཡ པུབྦེ ཝཏྟབྦཝིདྷཱནཱབྷཱཝཏོ ཀརཎཱདིཝསེན ཨནིདྡིསིཏྭཱ པཙྩཏྟཝསེན ནིདྡིཊྛོ ཨཔེཀྑཱཡ ཨབྷཱཝཏོ. ཏཏྠ ནིདྡིསིཡམཱནོ སེསདུཏིཡཱནིཡཏཔཎཱིཏབྷོཛནཾ སམཎུདྡེསཏཏིཡཙཏཨུཏྠཔཱཊིདེསནཱིཡེསུ ཝིཡ མཛ྄ཛྷེ ཨནིདྡིསིཏྭཱ ‘‘ན ཧེཝ ཁོ པན…པེ… ཨོབྷཱསིཏུ’’ནྟིཨཱདི (པཱརཱ. ༤༥༣) ཝིཡ པུབྦེ ཝཏྟབྦཝིདྷཱནཱབྷཱཝཏོ ཨེཝ ཨཱདིམྷི ནིདྡིཊྛོ. ཨཱདིམྷི ནིདྡིསིཡམཱནོཔི པུབྦེ ཝུཏྟཔྤབྷེདེསུ བྷེདཱནུཝཏྟཀཱདཱིསུ པཉྩཏྟིཾསེསུ སིཀྑཱཔདེསུ ཝིཡ ཨནིདྡིསིཏྭཱ པུབྦེ ཝཏྟབྦཝིདྷཱནཱབྷཱཝཏོ ཨེཝ ‘‘ཡོ པན བྷིཀྑཱུ’’ཏིཨཱདིཏོཝ ཡོཔན-སདྡེན སཧ ¶ ནིདྡིཊྛོ. ཨེཝཾ ནིདྡིསིཡམཱནོཔི སོ ཡསྨཱ ‘‘ཡཱ པན བྷིཀྑུནིཡོ དྭེ ཨེཀམཉྩེ ཏུཝཊྚེཡྻུ’’ནྟིཨཱདི (པཱཙི. ༩༣༣) ཨཱཔཏྟི ཝིཡ པརཔྤབྷཝཾ ཨཱཔཏྟིཾ ན ཨཱཔཛྫཏི, ཏསྨཱ ‘‘ཡོ པན བྷིཀྑཱུ’’ཏི ཨེཀཝཙནེན ནིདྡིཊྛོ. མེཐུནདྷམྨཱཔཏྟིཔི པརཔྤབྷཝཱ ‘‘དྭཡཾདྭཡསམཱཔཏྟཱི’’ཏི (པཱརཱ. ༣༩) ཝཙནཏོཏི ཙེ? ཏཾ ན, ཨདྷིཔྤཱཡཛཱནནཏོ. ཨནེཀིསྶཱ ཨེཝ བྷིཀྑུནིཡཱ ཨཱཔཏྟི, ན ཨེཀིསྶཱཏི ནིཡམོ ཏཏྠ ཨཏྠི, ན ཨེཝཾ ཨིདྷ ནིཡམོཏི ཨནིཡམིཏཱདྷིཔྤཱཡོ. ལམྦཱིམུདུཔིཊྛཱིནཾ ཀུཏོ ‘‘དྭཡཾདྭཡསམཱཔཏྟཱི’’ཏི (པཱརཱ. ༥༥) ཝཙནཏོ ཏེསཾ མེཐུནདྷམྨཱཔཏྟི. ཨཡམཏྠོ ཙཏསྶོ མེཐུནདྷམྨཔཙྩཡཱཏི ཨཊྛཝཏྠུཀཾ སནྡྷཱཡ ‘‘ཚེཛྫཾ སིཡཱ མེཐུནདྷམྨཔཙྩཡཱ’’ཏི (པརི. ༤༨༡) ཙ པརིཝཱརེ ཝུཏྟཝཙནེན སཱདྷེཏབྦོ.

བྷེདཱནུཝཏྟཀསིཀྑཱཔདེ ཏིཎྞཾ ཨུདྡྷཾ ན སམནུབྷཱསིཏབྦཱ, ན སངྒྷེན སངྒྷཾ ཨེཀཏོ ཀཱཏབྦནྟི. ནཡདསྶནཏྠཾ ཨཱདིཏོཝ ‘‘བྷིཀྑཱུ ཧོནྟཱི’’ཏི བཧུཝཙནནིདྡེསཾ ཀཏྭཱ པུན ‘‘ཨེཀོ ཝཱ དྭེ ཝཱ ཏཡོ ཝཱ’’ཏི (པཱརཱ. ༤༡༨) ཝུཏྟཾ, ཨཉྙཐཱ ན ཏཏོ ཨུདྡྷཾ ‘‘ཨནུཝཏྟཀཱ ཧོནྟཱི’’ཏི ཨཱཔཛྫཏི. ཏཏོ ནིདཱནཝིརོདྷོ. པཉྩསཏམཏྟཱ ཧི ཏདནུཝཏྟཀཱ ཨཧེསུཾ. ཡཾ པན སཏྟསཏིཀཀྑནྡྷཀེ ‘‘སངྒྷོ ཙཏྟཱརོ པཱཙཱིནཀེ བྷིཀྑཱུ, ཙཏྟཱརོ པཱཝེཡྻཀེ བྷིཀྑཱུ སམྨནྣེཡྻ ¶ …པེ… སམྨཏཱ’’ཏིཨཱདི (ཙཱུལ༹ཝ. ༤༥༦) ཉཏྟིདུཏིཡཀམྨཾ ཝུཏྟཾ, ཏཾ ‘‘ཨུབྦཱཧིཀཱཡ ཨིམཾ ཨདྷིཀརཎཾ ཝཱུཔསམེཏུ’’ནྟི ཝུཏྟཏྟཱ ཏེཧི ཀཏྟབྦཝིདྷཱནཾ. སམྨུཏིཀརཎམེཝ ཝཱ ཏཏིཡཾ ཀཏྭཱ ཀཔྤཏི. ན ཧི ཏེ ཏེན ཀམྨེན ཀམྨཱརཧཱ ཀམྨཀཏཱ ཧོནྟི. ཡསྶ སངྒྷོ ཀམྨཾ ཀརོཏི, སོ ཀམྨཱརཧོཏི ལཀྑཎཾ. ན ཙ ཏདཱ སངྒྷོ ཏེསཾ ཨཊྛནྣམྤི བྷིཀྑཱུནཾ ཀམྨཾ ཨཀཱསི. བྷཛཱཔིཡམཱནཱ ཏེ ཀམྨཔཏྟབྷཱཝཾ བྷཛནྟི. ཨདྷིཀརཎཝཱུཔསམཀམྨསྶ པཏྟཱ ཡུཏྟཱ སངྒྷེན ཀཏཱཏི ཀཏྭཱ ཀམྨཔཏྟཱ ཨེཝ ཧི ཏེ ཧོནྟི. ‘‘ཏེ བྷིཀྑཱུ བྷིཀྑཱུཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡཱ’’ཏི (པཱརཱ. ༤༡༨) ཝཙནཏོ ཏེཧི ཀཏྟབྦཝིདྷཱནཾ. སམྨུཏིཀརཎམེཝ ཀམྨཾ ཧོཏཱིཏི ཙེ? ཏཾ ན, ཨདྷིཔྤཱཡཛཱནནཏོ, ཏསྶ པཊིནིསྶགྒཱཡ ཨེཝ ཏེ བྷིཀྑཱུ ཀམྨཱརཧཱ ཀཱཏབྦཱ, ན དོསཱགཏིཝསེནཱཏི ཨཡམེཏྠ ཨདྷིཔྤཱཡོ. ན ཧི པཱཙཱིནཀཱདཱིནཾ སམྨུཏིཡཱ ཨདྷིཀརཎཝཱུཔསམསིདྡྷི ཝིཡ ཏེསཾ སམནུབྷཱསནཀམྨེན ཏསྶ པཊིནིསྶགྒསིདྡྷི ཧོཏི, སམྨུཏི ནཱམེསཱ ¶ པཋམཾ ཨནུམཏིཾ གཧེཏྭཱ ཡཱཙིཏྭཱཝ ཀརཱིཡཏི, ན ཏཐཱ ཀམྨནྟི. ཀམྨཀརཎེ པན ཏདཏྠསིདྡྷི ཧོཏིཡེཝ. པརསམྨུཏིཡཱ བཧུཏརཱཝ སམྨནྣིཏབྦཱཏི ཝེདིཏབྦཾ.

‘‘མེཐུནདྷམྨ’’ནྟི ཨེཝཾ བཱཧུལླནཡེན ལདྡྷནཱམཀཾ སཀཔཡོགེན ཝཱ པརཔཡོགེན ཝཱ ཨཏྟནོ ནིམིཏྟསྶ སཀམགྒེ ཝཱ པརམགྒེ ཝཱ པརནིམིཏྟསྶ ཝཱ སཀམགྒེ ཨེཝ པཝེསནཔཝིཊྛཊྛིཏཨུདྡྷརཎེསུ ཡཾ ཀིཉྩི ཨེཀཾ པཊིསཱདིཡནཝསེན སེཝེཡྻ, པཱརཱཛིཀོ ཧོཏི ཨསཾཝཱསོཏི. ཀེཙི པན ‘‘པཝེསནཱདཱིནི ཙཏྟཱརི ཝཱ ཏཱིཎི ཝཱ དྭེ ཝཱ ཨེཀཾ ཝཱ པཊིསེཝེཡྻ, པཱརཱཛིཀོ ཧོཏི. ཝུཏྟཉྷེཏཾ ‘སོ ཙེ པཝེསནཾ སཱདིཡཏི, པཝིཊྛཾ སཱདིཡཏི, ཋིཏཾ སཱདིཡཏི, ཨུདྡྷརཎཾ སཱདིཡཏི, ཨཱཔཏྟི པཱརཱཛིཀསྶཱ’ཏིཨཱདཱི’’ཏི (པཱརཱ. ༥༨) ཝདནྟི. ཏེསཾ མཏེན ཙཏཱུསུཔི ཙཏསྶོ པཱརཱཛིཀཱཔཏྟིཡོ ཨཱཔཛྫཏི. ཏེཡེཝ ཨེཝཾ ཝདནྟི – ཨཱཔཛྫཏུ མེཐུནདྷམྨཔཱརཱཛིཀཱཔཏྟི, མེཐུནདྷམྨཔཱརཱཛིཀཱཔཏྟིཡཱ ཏཾབྷཱགིཡཱཏི ཨཏྟནོ ཝཱིཏིཀྐམེ པཱརཱཛིཀཱཔཏྟིཡོ, སངྒྷཱདིསེསཱཔཏྟིཉྩ ཨཱཔཛྫིཏྭཱ སིཀྑཾ པཙྩཀྑཱཡ གཧཊྛཀཱལེ མེཐུནཱདིཀཾ པཱརཱཛིཀཾ ཨཱཔཛྫིཏྭཱ པུན པབྦཛིཏྭཱ ཨུཔསམྤཛྫིཏྭཱ ཨེཀཾ སངྒྷཱདིསེསཱཔཏྟིཾ ཨེཀམནེཀཾ ཝཱ པཊིཀརིཏྭཱཝ སོ པུགྒལོ ཡསྨཱ ནིརཱཔཏྟིཀོ ཧོཏི, ཏསྨཱ སོ གཧཊྛཀཱལེ སཱཔཏྟིཀོཝཱཏི. ཨནྟིམཝཏྠུཨཛ྄ཛྷཱཔནྣསྶཱཔི ཨཏྠེཝ ཨཱཔཏྟི. ཝུཊྛཱནདེསནཱཧི པན ཨསུཛ྄ཛྷནཏོ ‘‘པཡོགེ པཡོགེ ཨཱཔཏྟི པཱརཱཛིཀསྶཱ’’ཏི ན ཝུཏྟཾ. གཎནཔཡོཛནཱབྷཱཝཏོ ཀིཉྩཱཔི ན ཝུཏྟཾ, ཨཐ ཁོ པདབྷཱཛནེ (པཱརཱ. ༥༨) ‘‘ཨཱཔཏྟི པཱརཱཛིཀསྶཱ’’ཏི ཝཙནེནཱཡམཏྠོ སིདྡྷོཏི ཡུཏྟིཉྩ ཝདནྟི.

ཡདི ¶ ཨེཝཾ མཱཏིཀཱཡམྤི ‘‘ཡོ པན བྷིཀྑུ མེཐུནཾ དྷམྨཾ པཊིསེཝེཡྻ, པཱརཱཛིཀ’’ནྟི ཝཏྟབྦཾ བྷཝེཡྻ, པཱརཱཛིཀསྶ ཨནཝསེསཝཙནམྤི ན ཡུཛྫེཡྻ. སབྦེཔི ཧི ཨཱཔཏྟིཀྑནྡྷེ, བྷིཀྑུགཎནཉྩ ཨནཝསེསེཏྭཱ ཏིཊྛཏཱིཏི ཨནཝསེསཝཙནནྟི ཀཏྭཱ པཝེསེཝ ཨཱཔཏྟི, ན པཝིཊྛཱདཱིསུ. ཏམེཝེཀཾ སནྡྷཱཡ ‘‘ཡསྶ སིཡཱ ཨཱཔཏྟཱི’’ཏི (མཧཱཝ. ༡༣༤) པཱརཱཛིཀཱཔཏྟིམྤི ཨནྟོ ཀཏྭཱ ནིདཱནུདྡེསཝཙནཾ ཝེདིཏབྦཾ. ཏསྨཱ མཱཏིཀཱཡཾ ‘‘པཱརཱཛིཀ’’ནྟི ཨཝཏྭཱ ‘‘པཱརཱཛིཀོ ཧོཏཱི’’ཏི (པཱརཱ. ༤༢, ༤༤) པུགྒལནིདྡེསཝཙནཾ ཏེན སརཱིརབནྡྷནེན ཨུཔསམྤདཱཡ ཨབྷབྦབྷཱཝདཱིཔནཏྠཾ. ‘‘ཨཱཔཏྟི པཱརཱཛིཀསྶཱ’’ཏི པདབྷཱཛནེ ཝཙནཾ ཨནྟིམཝཏྠུཾ ཨཛ྄ཛྷཱཔནྣསྶཱཔི ¶ པཱརཱཛིཀསྶ ཨསཾཝཱསསྶ སཏོ པུགྒལསྶ ཨཐེཡྻསཾཝཱསཀབྷཱཝདཱིཔནཏྠཾ. ན ཧི སོ སཾཝཱསཾ སཱདིཡནྟོཔི ཐེཡྻསཾཝཱསཀོ ཧོཏི, ཏསྨཱ ཨུཔསམྤནྣོ ‘‘བྷིཀྑཱུ’’ཏྭེཝ ཝུཙྩཏི. ཏེནེཝཱཧ ‘‘ཨསུདྡྷོ ཧོཏི པུགྒལོ ཨཉྙཏརཾ པཱརཱཛིཀཾ དྷམྨཾ ཨཛ྄ཛྷཱཔནྣོ, ཏཉྩེ སུདྡྷདིཊྛི སམཱནོ ཨནོཀཱསཾ ཀཱརཱཔེཏྭཱ ཨཀྐོསཱདྷིཔྤཱཡོ ཝདཏི, ཨཱཔཏྟི ཨོམསཝཱདེན དུཀྐཊསྶཱ’’ཏི (པཱརཱ. ༣༨༩) ཨནུཔསམྤནྣསྶ ཏདབྷཱཝཏོ སིདྡྷོ སོ ཨུཔསམྤནྣོ ‘‘བྷིཀྑཱུ’’ཏྭེཝ ཝུཙྩཏཱིཏི, ཏེན པདསོདྷམྨཾ, སཧསེཡྻཉྩ ཛནེཏི, བྷིཀྑུཔེསུཉྙཱདིཉྩ ཛནེཏཱིཏི ཝེདིཏབྦཾ (ཝཛིར. ཊཱི. པཱརཱཛིཀ ༣༩).

ནིདཱནཱ མཱཏིཀཱབྷེདོ, ཝིབྷངྒོ ཏནྣིཡཱམཀོ;

ཏཏོ ཨཱཔཏྟིཡཱ བྷེདོ, ཨནཱཔཏྟི ཏདཉྙཐཱཏི. (ཝཛིར. ཊཱི. པཱརཱཛིཀ ༤༣-༤༤) –

ཨཡཾ ནཡོ ཝེདིཏབྦོ. ཏཏྠ སུདིནྣཝཏྠུ (པཱརཱ. ༢༤ ཨཱདཡོ)-མཀྐཊིཝཏྠུ (པཱརཱ. ༤༠ ཨཱདཡོ)-ཝཛྫིཔུཏྟཀཝཏྠུ (པཱརཱ. ༤༣) ཙཱཏི ཏིཔྤབྷེདཝཏྠུ ཨིམསྶ སིཀྑཱཔདསྶ ནིདཱནཾ ནཱམ. ཏཏོ ནིདཱནཱ ‘‘ཡོ པན བྷིཀྑུ བྷིཀྑཱུནཾ…པེ… ཨསཾཝཱསོ’’ཏི (པཱརཱ. ༤༤) ཨིམིསྶཱ མཱཏིཀཱཡ བྷེདོ ཛཱཏོ. ཏཏྠ ཧི ‘‘ཨནྟམསོ ཏིརཙྪཱནགཏཱཡཱ’’ཏི (པཱརཱ. ༤༤) ཨིཏྠིལིངྒཝསེན ‘‘སཙྩཾ, ཨཱཝུསོ, བྷགཝཏཱ སིཀྑཱཔདཾ པཉྙཏྟཾ, ཏཉྩ ཁོ ཨིཏྠིཡཱ, ནོ པུརིསེ, ནོ པཎྜཀེ, ནོ ཨུབྷཏོབྱཉྫནཀེ ཙཱ’’ཏི མཀྐཊིཔཱརཱཛིཀོ ཝིཡ ཨཉྙོཔི ལེསཾ ཨོཌྜེཏུཾ སཀྐོཏི, ཏསྨཱ ཏཱདིསསྶ ཨལེསོཀཱསསྶ དསྶནཏྠཾ ཨིདཾ ཝུཙྩཏི, མཀྐཊིསངྑཱཏཱ ནིདཱནཱ ‘‘ཨནྟམསོ ཏིརཙྪཱནགཏཱཡཔཱི’’ཏི མཱཏིཀཱཡ ཝཙནབྷེདོ, ན ཨིཏྠིཡཱ ཨེཝ མེཐུནསིདྡྷིདསྶནཏོ. ཏསྨཱ ཝིབྷངྒོ ཏནྣིཡཱམཀོ ཏསྶཱ མཱཏིཀཱཡ ཨདྷིཔྤེཏཏྠནིཡཱམཀོ ཝིབྷངྒོཏི. ཝིབྷངྒེ ཧི ‘‘ཏིསྶོ ཨིཏྠིཡོ, ཏཡོ ཨུབྷཏོབྱཉྫནཀཱ, ཏཡོ པཎྜཀཱ, ཏཡོ པུརིསཱ. མནུསྶིཏྠིཡཱ ཏཡོ མགྒེ, ཏིརཙྪཱནགཏཔུརིསསྶ དྭེ མགྒེ’’ཏིཨཱདིནཱ (པཱརཱ. ༥༦) ནཡེན ¶ སབྦལེསོཀཱསཾ པིདཧིཏྭཱ ནིཡམོ ཀཏོ. ཨེཏྠཱཧ – ཡདི ཨེཝཾ སཱདྷཱརཎསིཀྑཱཔདཝསེན ཝཱ ལིངྒཔརིཝཏྟནཝསེན ཝཱ ན ཀེཝལཾ བྷིཀྑཱུནཾ, བྷིཀྑུནཱིནམྤི ‘‘སིཀྑཱསཱཛཱིཝསམཱཔནྣོ’’ཏི ཝིབྷངྒེ ཝཏྟབྦཾ སིཡཱ. ཏདཝཙནེན ཧི བྷིཀྑུནཱི པུརིསལིངྒཔཱཏུབྷཱཝེན བྷིཀྑུབྷཱཝེ ¶ ཋིཏཱ ཨེཝཾ ཝདེཡྻ ‘‘ནཱཧཾ ཨུཔསམྤདཱཀརཎཀཱལེ བྷིཀྑཱུནཾ སིཀྑཱསཱཛཱིཝསམཱཔནྣཱ, ཏསྨཱ ན ཨཔཙྩཀྑཱཏསིཀྑཱཔི མེཐུནདྷམྨེན པཱརཱཛིཀཱ ཧོམཱི’’ཏི. ཝུཙྩཏེ – ཡཐཱ ཝུཏྟཾ, ཏཐཱ ན ཝཏྟབྦཾ ཨནིཊྛཔྤསངྒཏོ. ཏཐཱ ཝུཏྟེ བྷིཀྑུནཱིནམྤི སིཀྑཱཔཙྩཀྑཱནཾ ཨཏྠཱིཏི ཨཱཔཛྫཏི. ཏཉྩཱནིཊྛཾ. ཨིདམཔརམནིཊྛཾ ‘‘སབྦསིཀྑཱཔདཱནི སཱདྷཱརཎཱནེཝ ནཱསཱདྷཱརཎཱནཱི’’ཏི. ཨཔིཙཱཡཾ བྷིཀྑཱུནཾ སིཀྑཱསཱཛཱིཝསམཱཔནྣཱཝ ཧོཏཱིཏི དསྶནཏྠཾ ‘‘ཨནུཛཱནཱམི, བྷིཀྑཝེ, ཏཾཡེཝ ཨུཔཛ྄ཛྷཾ ཏམེཝ ཨུཔསམྤདཾ ཏཱནི ཝསྶཱནི བྷིཀྑཱུཧི སངྒམིཏུ’’ནྟིཨཱདི (པཱརཱ. ༦༩) ཝུཏྟཾ. ཏཏོ ཨཱཔཏྟིཡཱ བྷེདོཏི ཏཏོ ཝིབྷངྒཏོ ‘‘ཨཀྑཡིཏེ སརཱིརེ པཱརཱཛིཀཾ, ཡེབྷུཡྻེན ཁཡིཏེ ཐུལླཙྩཡ’’ནྟིཨཱདི (པཱརཱ. ༧༣, པརི. ༡༥༧) ཨཱཔཏྟིཡཱ བྷེདོ ཧོཏི. ཨནཱཔཏྟི ཏདཉྙཐཱཏི ཏཏོ ཨེཝ ཝིབྷངྒཏོ ཡེན ཨཱཀཱརེན ཨཱཔཏྟི ཝུཏྟཱ, ཏཏོ ཨཉྙེནཱཀཱརེན ཨནཱཔཏྟིབྷེདོཝ ཧོཏི. ‘‘སཱདིཡཏི, ཨཱཔཏྟི པཱརཱཛིཀསྶ, ན སཱདིཡཏི, ཨནཱཔཏྟཱི’’ཏི ཧི ཝིབྷངྒེ ཨསཏི ན པཉྙཱཡཏི. ཨེཏྟཱཝཏཱ ‘‘ནིདཱནཱ མཱཏིཀཱབྷེདོ’’ཏི ཨཡཾ གཱཐཱ སམཱསཏོ ཝུཏྟཏྠཱ ཧོཏི. ཝིསེསཀཱརཎཾ པན ཏསྨིཾ ཏསྨིཾ སིཀྑཱཔདེ ཨཱཝིབྷཝིསྶཏི.

པཋམཔཉྙཏྟི ཏཱཝ པཋམབོདྷིཾ ཨཏིཀྐམིཏྭཱ པཉྙཏྟཏྟཱ, ཨཱཡསྨཏོ སུདིནྣསྶ ཨཊྛཝསྶིཀཀཱལེ པཉྙཏྟཏྟཱ ཙ རཏྟཉྙུམཧཏྟཾ པཏྟཀཱལེ པཉྙཏྟཱ, དུཏིཡཔཉྙཏྟི བཱཧུསཙྩམཧཏྟཾ པཏྟཀཱལེ. སོ ཧི ཨཱཡསྨཱ མཀྐཊིཔཱརཱཛིཀོ ཡཐཱ མཱཏུགཱམཔྤཊིསཾཡུཏྟེསུ སིཀྑཱཔདེསུ ཏིརཙྪཱནགཏིཏྠཱི ན ཨདྷིཔྤེཏཱ, ཏཐཱ ཨིདྷཱཔཱིཏི སཉྙཱཡ ‘‘སཙྩཾ, ཨཱཝུསོ…པེ… ཏཉྩ ཁོ མནུསྶིཏྠིཡཱ, ནོ ཏིརཙྪཱནགཏཱཡཱ’’ཏི (པཱརཱ. ༤༡) ཨཱཧ. ཏཏིཡཔཉྙཏྟི ལཱབྷགྒམཧཏྟཾ པཏྟཀཱལེ ཨུཔྤནྣཱ ‘‘ཡཱཝདཏྠཾ བྷུཉྫིཏྭཱ’’ཏིཨཱདི (པཱརཱ. ༤༣) ཝཙནཏོ, ཝེཔུལླམཧཏྟམྤི ཨེཏྠེཝ ལབྦྷཏཱིཏི ཨིམཾ པཋམཔཱརཱཛིཀསིཀྑཱཔདཾ ཏིཝིདྷམྤི ཝཏྠུཾ ཨུཔཱདཱཡ ཙཏུབྦིདྷམྤི ཏཾ ཀཱལཾ པཏྭཱ པཉྙཏྟནྟི ཝེདིཏབྦཾ.

ཏཏྠ ཡོ པནཱཏི ཨནཝསེསཔརིཡཱདཱནཔདཾ. བྷིཀྑཱུཏི ཏསྶ ཨཏིཔྤསངྒནིཡམཔདཾ. བྷིཀྑཱུནཾ སིཀྑཱསཱཛཱིཝསམཱཔནྣོཏི ཏསྶ ཝིསེསནཝཙནཾ. ན ཧི སབྦོཔི བྷིཀྑུནཱམཀོ, ཡཱ བྷགཝཏཱ ཡཱཡ ཀཱཡཙི ཨུཔསམྤདཱཡ ཨུཔསམྤནྣབྷིཀྑཱུནཾ ཧེཊྛིམཔརིཙྪེདེན སིཀྑིཏབྦཱ སིཀྑཱ ཝིཧིཏཱ ¶ , ‘‘ཨེཏྠ སཧ ཛཱིཝནྟཱི’’ཏི ཡོ ཙ སཱཛཱིཝོ ཝུཏྟོ, ཏཾ ཨུབྷཡཾ སམཱཔནྣོཝ ཧོཏི. ཀདཱ པན སམཱཔནྣོ ཧོཏི? ཡཱཡ ཀཱཡཙི ཨུཔསམྤདཱཡ ཨུཔསམྤནྣསམནནྟརམེཝ ཏདུབྷཡཾ ¶ ཛཱནནྟོཔི ཨཛཱནནྟོཔི ཏདཛ྄ཛྷུཔགཏཏྟཱ སམཱཔནྣོཝ ནཱམ ཧོཏི. སཧ ཛཱིཝནྟཱིཏི ཡཱཝ སིཀྑཾ ན པཙྩཀྑཱཏི, པཱརཱཛིཀབྷཱཝཾ ཝཱ ན པཱཔུཎཱཏི. ཡཾ པན ཝུཏྟཾ ཨནྡྷཀཊྛཀཐཱཡཾ ‘‘སིཀྑཾ པརིཔཱུརེནྟོ སིཀྑཱསམཱཔནྣོ སཱཛཱིཝཾ ཨཝཱིཏིཀྐམནྟོ སཱཛཱིཝསམཱཔནྣོ’’ཏི, ཏཾ ཨུཀྐཊྛཔརིཙྪེདཝསེན ཝུཏྟཾ. ན ཧི སིཀྑཾ ཨཔརིཔཱུརེནྟོ, ཀཱམཝིཏཀྐཱདིབཧུལོ ཝཱ ཨེཀཙྩཾ སཱཝསེསཾ སཱཛཱིཝཾ ཝཱིཏིཀྐམནྟོ ཝཱ སིཀྑཱསཱཛཱིཝསམཱཔནྣོ ནཱམ ན ཧོཏི.

ཨུཀྐཊྛཔརིཙྪེདེན པན ཙཏུཀྐཾ ལབྦྷཏི – ‘‘ཨཏྠི བྷིཀྑུ སིཀྑཱསམཱཔནྣོ སཱིལཱནི པཙྩཝེཀྑནྟོ ན སཱཛཱིཝསམཱཔནྣོ ཨཙིཏྟཀཾ སིཀྑཱཔདཾ ཝཱིཏིཀྐམནྟོ, ཨཏྠི ན སིཀྑཱསམཱཔནྣོ ཀཱམཝིཏཀྐཱདིབཧུལོ སཱཛཱིཝསམཱཔནྣོ ནིརཱཔཏྟིཀོ, ཨཏྠི ན སིཀྑཱསམཱཔནྣོ ན ཙ སཱཛཱིཝསམཱཔནྣོ ཨནཝསེསཾ ཨཱཔཏྟིཾ ཨཱཔནྣོ, ཨཏྠི ཨུབྷཡསམཱཔནྣོ སིཀྑཾ པརིཔཱུརེནྟོ སཱཛཱིཝཉྩ ཨཝཱིཏིཀྐམནྟོ’’ཏི. ཨཡམེཏྠ ཙཏུཏྠོ བྷིཀྑུ ཨུཀྐཊྛོ ཨིདྷ ཨདྷིཔྤེཏོ སིཡཱ. ན ཧི བྷགཝཱ ཨནུཀྐཊྛཾ ཝཏྟུཾ ཡུཏྟོཏི ཙེ? ན, ‘‘ཏཏྲ ཡཱཡཾ ཨདྷིསཱིལསིཀྑཱ, ཨཡཾ ཨིམསྨིཾ ཨཏྠེ ཨདྷིཔྤེཏཱ སིཀྑཱ’’ཏི ཝཙནཝིརོདྷཏོ, ཨུཀྐཊྛགྒཧཎཱདྷིཔྤཱཡེ སཏི ‘‘སིཀྑཱཏི ཏིསྶོ སིཀྑཱ’’ཏི ཨེཏྟཀམེཝ ཝཏྟབྦནྟི ཨདྷིཔྤཱཡོ. སིཀྑཏྟཡསམཱཔནྣོ ཧི སབྦུཀྐཊྛོ. ‘‘མེཐུནཾ དྷམྨཾ པཊིསེཝེཡྻཱ’’ཏི པརཏོ ཝཙནཾ ཨཔེཀྑིཏྭཱ ཨདྷིསཱིལསིཀྑཱཝ ཝུཏྟཱཏི ཙེ? ན, ཏསྶཱཔི ཨབྷབྦཏྟཱ. ན ཧི ཨདྷིསཱིལསིཀྑཾ པརིཔཱུརེནྟོ, སཱཛཱིཝཉྩ ཨཝཱིཏིཀྐམནྟོ མེཐུནདྷམྨཾ པཊིསེཝིཏུཾ བྷབྦོ, ཏཾ སིཀྑཾ ཨཔརིཔཱུརེནྟོ, སཱཛཱིཝཉྩ ཝཱིཏིཀྐམནྟོཡེཝ ཧི པཊིསེཝེཡྻཱཏི ཨདྷིཔྤཱཡཱ. ཏསྨཱ ཨེཝམེཏྠ ཨཏྠོ གཧེཏབྦོ. ཡསྨཱ སིཀྑཱཔདསངྑཱཏོ སཱཛཱིཝོ ཨདྷིསཱིལསིཀྑམེཝ སངྒཎྷཱཏི, ན ཨིཏརསིཀྑཱདྭཡཾ, ཏསྨཱ ‘‘ཏཏྲ ཡཱཡཾ ཨདྷིསཱིལསིཀྑཱ, ཨཡཾ ཨིམསྨིཾ ཨཏྠེ ཨདྷིཔྤེཏཱ སིཀྑཱ’’ཏི ཝུཏྟཾ. ཏསྨཱ ཨདྷིསཱིལསིཀྑཱཡ སངྒཱཧཀོ སཱཛཱིཝོ སིཀྑཱསཱཛཱིཝོཏི ཝུཏྟོ. ཨིཏི སཱཛཱིཝཝིསེསནཏྠཾ སིཀྑཱགྒཧཎཾ ཀཏཾ. ཏདཏྠདཱིཔནཏྠམེཝ ཝིབྷངྒེ སིཀྑཾ ཨཔརཱམསིཏྭཱ ‘‘ཏསྨིཾ སིཀྑཏི, ཏེན ཝུཙྩཏི སཱཛཱིཝསམཱཔནྣོ’’ཏི (པཱརཱ. ༤༥) ཝུཏྟཾ. ཏེན ¶ ཨེཀམེཝིདཾ ཨཏྠཔདནྟི དཱིཔིཏཾ ཧོཏི. ཏཉྩ ཨུཔསམྤདཱུཔགམནནྟརཏོ པཊྛཱཡ སིཀྑནཱདྷིཀཱརཏྟཱ ‘‘སིཀྑཏཱི’’ཏི ཙ ‘‘སམཱཔནྣོ’’ཏི ཙ ཝུཙྩཏི. ཡོ ཨེཝཾ ‘‘སིཀྑཱསཱཛཱིཝསམཱཔནྣོ’’ཏི སངྑཾ གཏོ, ཏཱདིསཾ པཙྩཡཾ པཊིཙྩ ཨཔརབྷཱགེ སཱཛཱིཝསངྑཱཏམེཝ སིཀྑཾ ཨཔཙྩཀྑཱཡ ཏསྨིཾཡེཝ དུབྦལྱཾ ཨནཱཝིཀཏྭཱ མེཐུནཾ དྷམྨཾ པཊིསེཝེཡྻཱཏི ཨཡམཏྠོ ཡུཛྫཏི.

ཀིནྟུ ཨཊྛཀཐཱནཡོ པཊིཀྑིཏྟོ ཧོཏི, སོ ཙ ན པཊིཀྑེཔཱརཧོ ཧོཏི, ཨདྷིཔྤཱཡོ པནེཏྠ ¶ པརིཡེསིཏབྦོ. སབྦེསུ སིཀྑཱཔདེསུ ཨིདམེཝ བྷིཀྑུལཀྑཎཾ སཱདྷཱརཎཾ ཡདིདཾ ‘‘བྷིཀྑཱུནཾ སིཀྑཱསཱཛཱིཝསམཱཔནྣོ’’ཏི. ཁཱིཎཱསཝོཔི སཱཝཀོ ཨཱཔཏྟིཾ ཨཱཔཛྫཏི ཨཙིཏྟཀཾ, ཏཐཱ སེཀྑོ, པུཐུཛྫནོ པན སཙིཏྟཀམྤི, ཏསྨཱ སེཀྑཱསེཀྑཔུཐུཛྫནཱནཾ སཱམཉྙམིདཾ བྷིཀྑུལཀྑཎནྟི ཀཏྭཱ ཀེཝལཾ སིཀྑཱསམཱཔནྣོ, ཀེཝལཾ སཱཛཱིཝསམཱཔནྣོ, ཨུབྷཡསམཱཔནྣོ ཙཱཏི སརཱུཔེཀདེསཨེཀསེསནཡེན ‘‘སིཀྑཱསཱཛཱིཝསམཱཔནྣོ’’ཏྭེཝ སམྤིཎྜེཏྭཱ ཨུཀྐཊྛགྒཧཎེན ཨནུཀྐཊྛཱནཾ གཧཎསིདྡྷིཏོ ཨཊྛཀཐཱཡཾ ཨུཀྐཊྛོཝ ཝུཏྟོ. ཏམེཝ སམྤཱདེཏུཾ ‘‘ཏསྨིཾ སིཀྑཏི, ཏེན ཝུཙྩཏི སཱཛཱིཝསམཱཔནྣོ’’ཏི ཨེཏྠ སིཀྑཱསདྡསྶ ཨཝཙནེ པརིཧཱརཾ ཝཏྭཱ ཡསྨཱ པན སོ སིཀྑམྤི སམཱཔནྣོ, ཏསྨཱ སིཀྑཱསམཱཔནྣོཏིཔི ཨཏྠཏོ ཝེདིཏབྦོཏི ཙ ཝཏྭཱ ‘‘ཡཾ སིཀྑཾ སམཱཔནྣོ, ཏཾ ཨཔཙྩཀྑཱཡ, ཡཉྩ སཱཛཱིཝཾ སམཱཔནྣོ, ཏཏྠ དུབྦལྱཾ ཨནཱཝིཀཏྭཱ’’ཏི ཝུཏྟནྟི ཨཡམཊྛཀཐཱཡ ཨདྷིཔྤཱཡོ ཝེདིཏབྦོ. ཨེཏསྨིཾ པན ཨདྷིཔྤཱཡེ ཨདྷིསཱིལསིཀྑཱཡ ཨེཝ གཧཎཾ སབྦཏྠིཀཏྟཱ, སཱིལཱདྷིཀཱརཏོ ཙ ཝིནཡསྶཱཏི ཝེདིཏབྦཾ. ཡཐཱ ཙ སིཀྑཱཔདཾ སམཱདིཡནྟོ སཱིལཾ སམཱདིཡཏཱིཏི ཝུཙྩཏི, ཨེཝཾ སིཀྑཱཔདཾ པཙྩཀྑནྟོ སཱིལཾ པཙྩཀྑཱཏཱིཏི ཝཏྟུཾ ཡུཛྫཏི, ཏསྨཱ ཏཏྠ ཝུཏྟཾ ‘‘ཡཾ སིཀྑཾ སམཱཔནྣོ, ཏཾ ཨཔཙྩཀྑཱཡཱ’’ཏི (པཱརཱ. ཨཊྛ. སིཀྑཱཔཙྩཀྑཱནཝིབྷངྒཝཎྞནཱ). ཨེཏྟཱཝཏཱ སམཱསཏོ ‘‘སིཀྑཱསཱཛཱིཝསམཱཔནྣོ’’ཏི ཨེཏྠ ཝཏྟབྦཝིནིཙྪཡོ ནིཊྛིཏོ ཧོཏི.

ཀིཾ ཨིམིནཱ ཝིསེསཝཙནེན པཡོཛནཾ, ནནུ ‘‘ཡོ པན བྷིཀྑུ སིཀྑཾ ཨཔཙྩཀྑཱཡ དུབྦལྱཾ ཨནཱཝིཀཏྭཱ…པེ… ཨསཾཝཱསོ’’ཏི ཨེཏྟཀམེཝ ཝཏྟབྦནྟི ཙེ? ན ཝཏྟབྦཾ ཨནིཊྛཔྤསངྒཏོ. ‘‘ཡོ པན སིཀྑཱསཱཛཱིཝསམཱཔནྣོ ཐེཡྻསཾཝཱསཱདིཀོ ཀེཝལེན སམཉྙཱམཏྟེན, པཊིཉྙཱམཏྟེན ¶ ཝཱ བྷིཀྑུ, ཏསྶཱཔི སིཀྑཱཔཙྩཀྑཱནཾ ཨཏྠི, སིཀྑཾ ཨཔཙྩཀྑཱཡ ཙ མེཐུནཾ དྷམྨཾ པཊིསེཝནྟསྶ པཱརཱཛིཀཱཔཏྟི. ཡོ ཝཱ པཙྪཱ པཱརཱཛིཀཾ ཨཱཔཏྟིཾ ཨཱཔཛྫིཏྭཱ ན སིཀྑཱསཱཛཱིཝསམཱཔནྣོ, ཏསྶ ཙ, ཡོ ཝཱ པཀྑཔཎྜཀཏྟཱ པཎྜཀབྷཱཝཱུཔགམནེན ན སིཀྑཱསཱཛཱིཝསམཱཔནྣོ, ཏསྶ ཙ ཏདུབྷཡཾ ཨཏྠཱིཏི ཨཱཔཛྫཏི. པཎྜཀབྷཱཝཔཀྑེ ཙ པཎྜཀོ ཨུཔསམྤདཱཡ ན ཝཏྠཱུ’’ཏི ཝུཏྟཾ. ཏསྨཱ ཨིཏརསྨིཾ པཀྑེ ཝཏྠཱུཏི སིདྡྷཾ. ཏསྨིཾ པཀྑེ ཨུཔསམྤནྣོ པཎྜཀབྷཱཝཔཀྑེ པཎྜཀཏྟཱ ན སིཀྑཱསཱཛཱིཝསམཱཔནྣོ, སོ པརིཙྩཛིཏབྦཱཡ སིཀྑཱཡ ཨབྷཱཝེན སིཀྑཾ ཨཔཙྩཀྑཱཡ མུཁེན པརསྶ ཨངྒཛཱཏགྒཧཎནཡེན མེཐུནཾ དྷམྨཾ པཊིསེཝེཡྻ, ཏསྶ ཀུཏོ པཱརཱཛིཀཱཔཏྟཱིཏི ཨདྷིཔྤཱཡོ. ཨཡཾ ནཡོ ཨཔཎྜཀཔཀྑཾ ཨལབྷམཱནསྶེཝ པརཏོ ཡུཛྫཏི, ལབྷནྟསྶ པན ཨརཱུཔསཏྟཱནཾ ཀུསལཱདིསམཱཔཏྟིཀྑཎེ བྷཝངྒཝིཙྪེདེ སཏིཔི ཨམརཎཾ ཝིཡ པཎྜཀབྷཱཝཔཀྑེཔི བྷིཀྑུབྷཱཝོ ཨཏྠི. སཾཝཱསཾ ཝཱ སཱདིཡནྟསྶ ན ཐེཡྻསཾཝཱསཀབྷཱཝོ ཨཏྠི ཨནྟིམཝཏྠུཨཛ྄ཛྷཱཔནྣསྶ ཝིཡ. ན ཙ སཧསེཡྻཱདིཾ ཛནེཏི ¶ . གཎཔཱུརཀོ པན ན ཧོཏི ཨནྟིམཝཏྠུཾ ཨཛ྄ཛྷཱཔནྣོ ཝིཡ. ན སོ སིཀྑཱསཱཛཱིཝསམཱཔནྣོ. ཨིཏརསྨིཾ པན པཀྑེ ཧོཏི, ཨཡཾ ཨིམསྶ ཏཏོ ཝིསེསོ. ཀིམཡཾ སཧེཏུཀོ, ཨུདཱཧུ ཨཧེཏུཀོཏི? ན ཨཧེཏུཀོ. ཡཏོ ཨུཔསམྤདཱ ཏསྶ ཨཔཎྜཀཔཀྑེ ཨནུཉྙཱཏཱ སཧེཏུཀཔྤཊིསནྡྷིཀཏྟཱ. པཎྜཀབྷཱཝཔཀྑེཔི ཀིསྶ ནཱནུཉྙཱཏཱཏི ཙེ? པཎྜཀབྷཱུཏཏྟཱ ཨོཔཀྐམིཀཔཎྜཀསྶ ཝིཡ.

ཨཔིཙ ‘‘སིཀྑཱསཱཛཱིཝསམཱཔནྣོ’’ཏི ཨིམིནཱ ཏསྶ སིཀྑཱསམཱདཱནཾ དཱིཔེཏྭཱ ཏཾ སམཱདིནྣཾ སིཀྑཾ ཨཔཙྩཀྑཱཡ, ཏཏྠ ཙ དུབྦལྱཾ ཨནཱཝིཀཏྭཱཏི ཝཏྟུཾ ཡུཛྫཏི, ན ཨཉྙཐཱཏི ཨིམིནཱ ཀཱརཎེན ཡཐཱཝུཏྟཱནིཊྛཔྤསངྒཏོ ‘‘ཡོ པན བྷིཀྑུ བྷིཀྑཱུནཾ སིཀྑཱསཱཛཱིཝསམཱཔནྣོ སིཀྑཾ ཨཔཙྩཀྑཱཡཱ’’ཏིཨཱདི ཝུཏྟཾ. ཡཐཱ ཙེཏྠ, ཨེཝཾ ‘‘ཡོ པན བྷིཀྑུ བྷིཀྑཱུནཾ སིཀྑཱསཱཛཱིཝསམཱཔནྣོ སིཀྑཾ ཨཔཙྩཀྑཱཡ དུབྦལྱཾ ཨནཱཝིཀཏྭཱ གཱམཱ ཝཱ ཨརཉྙཱ ཝཱ ཨདིནྣཾ…པེ… ཡོ པན བྷིཀྑུ བྷིཀྑཱུནཾ སིཀྑཱསཱཛཱིཝསམཱཔནྣོ སིཀྑཾ ཨཔཙྩཀྑཱཡ དུབྦལྱཾ ཨནཱཝིཀཏྭཱ སུགཏཙཱིཝརཔྤམཱཎཾ ཙཱིཝརཾ ཀཱརཱཔེཡྻཱ’’ཏི སབྦཏྠ ཡོཛེཏབྦཾ.

‘‘ཨནྟམསོ ཏིརཙྪཱནགཏཱཡཔཱི’’ཏི མནུསྶིཏྠིཾ ཨུཔཱདཱཡ ཝུཏྟཾ. ན ཧི པགེཝ པཎྜཀེ, པུརིསེ ཝཱཏི ཝཏྟུཾ ཡུཛྫཏི. སེསཾ ཏཏྠ ཏཏྠ ཝུཏྟནཡམེཝ ¶ . ཨཡཾ ཏཱཝ མཱཏིཀཱཡ ཝིནིཙྪཡོ ཨཉྙཏྠཱཔི ཡཐཱསམྦྷཝཾ ཡོཛེཏྭཱ དཱིཔེཏབྦོ.

སཱརིཔུཏྟབེལཊྛསཱིསཱནནྡཱདཡོཔི སིཀྑཱཔདཔཉྙཏྟིཀཱརཎཏྟཱ ཙ ཨཱཔཏྟིཨཱཔཛྫནཏོ ཙ ཀསྨཱ མཧཱཝིབྷངྒེ ཉཏྟིཙཏུཏྠཨུཔསམྤདཱཡེཝ ཨཱགཏཱཏི? པཊིཀྑིཏྟཱཡ སརཎགམནཱུཔསམྤདཱཡ ཨནུཉྙཱཏཔྤསངྒབྷཡཱཏི ཨུཔཏིསྶཏྠེརོ. ཨཱཔཏྟིཡཱ བྷབྦཏཾ སནྡྷཱཡ ཏསྨིམྤི ཝུཏྟེ པུབྦེ པཊིཀྑིཏྟཱཔི བྷགཝཏཱ པུན ཨནུཉྙཱཏཱཏི བྷིཀྑཱུནཾ མིཙྪཱགཱཧོ ཝཱ ཝིམཏི ཝཱ ཨུཔྤཛྫཏི, ཏསྨཱ ན ཝུཏྟཱཏི ཝུཏྟཾ ཧོཏི.

‘‘ཨདྷམྨཀམྨཾ ཝགྒཀམྨ’’ཏི (མཧཱཝ. ༣༨༧) ཝཙནཏོ ཀུཔྤཀམྨམྤི ཀཏྠཙི ‘‘ཀམྨ’’ནྟི ཝུཙྩཏི, ཏསྨཱ ‘‘ཨཀུཔྤེནཱ’’ཏི ཝུཏྟཾ. ཡསྨཱ ཨཀུཔྤཀམྨམྤི ཨེཀཙྩཾ ན ཋཱནཱརཧཾ, ཡེན ཨཔཏྟོ ཨོསཱརཎཾ སུཨོསཱརིཏོཏི ཝུཙྩཏི, ཏསྨཱ ‘‘ཋཱནཱརཧེནཱ’’ཏི ཝུཏྟཾ. ཡདི ཨེཝཾ ‘‘ཋཱནཱརཧེནཱ’’ཏི ཨིདམེཝ ཝཏྟབྦཾ ཨིམིནཱ ཨཀུཔྤསིདྡྷིཏོཏི ཙེ? ན, ཨཊྛཱནཱརཧེན ཨཀུཔྤེན ཨུཔསམྤནྣོ ཨིམསྨིཾ ཨཏྠེ ན ཨདྷིཔྤེཏོ ཨནིཊྛཔྤསངྒཏོ. དྭཱིཧི པནེཏེཧི ཨེཀཏོ ཝུཏྟེཧི ¶ ཨཡམཏྠོ པཉྙཱཡཏི – ཀེཝལཾ ཏེན ཨཀུཔྤེན ཨུཔསམྤནྣོ ཨཡམྤི ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི, ཋཱནཱརཧེན ཙ ཨཀུཔྤེན ཙ ཨུཔསམྤནྣོ ཨཡམྤི ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི, ཀུཔྤེན ཨུཔསམྤནྣོ ནཱདྷིཔྤེཏོཏི.

‘‘པཊིསནྡྷིགྒཧཎཏོ པཊྛཱཡ ཨཔརིཔུཎྞཝཱིསཏིཝསྶོ’’ཏི ཝུཏྟཏྟཱ ཨོཔཔཱཏིཀཉྩཱཏི སོལ༹སཝསྶུདྡེསིཀཱ ཨོཔཔཱཏིཀཱ པཊིསནྡྷིཏོ པཊྛཱཡ ཨཔརིཔུཎྞཝཱིསཏིཝསྶཱཏི ཝདནྟི. ‘སོལ༹སཝསྶུདྡེསིཀཱ ཧོནྟཱི’ཏི ཝུཏྟཏྟཱ པུན ཙཏྟཱརི ཝསྶཱནི ཨིཙྪིཏབྦཱནི, ‘པཊིསནྡྷིགྒཧཎཏོ པཊྛཱཡཱ’ཏི ཨིདཾ གབྦྷསེཡྻཀཱནཾ ཝསེན ཝུཏྟ’’ནྟི ཨེཀེ. ‘‘ཀེཙི ཝདནྟཱི’’ཏི ཡཏྠ ཡཏྠ ལིཁཱིཡཏི, ཏཏྠ ཏཏྠ ཝིཙཱརེཏྭཱ ཨཏྠཾ སུཊྛུ ཨུཔལཀྑཡེ. ཨོཔཀྐམིཀེ པཎྜཀབྷཱཝོ ཨཱརུལ༹ྷནཡེན ཝེདིཏབྦོ. ‘‘པཀྑཔཎྜཀོ ཨཔཎྜཀཔཀྑེ པབྦཱཛེཏྭཱ པཎྜཀཔཀྑེ ནཱསེཏབྦོ’’ཏི (ཝཛིར. ཊཱི. མཧཱཝགྒ ༡༠༩) ལིཁིཏཾ.

‘‘བིནྡུཾ ཨདཏྭཱ ཙེ ནིཝཱསེཏི, ཐེཡྻསཾཝཱསཀོ ན ཧོཏཱི’’ཏི ཝདནྟི, ཝཱིམཾསིཏབྦཾ. ལིངྒཱནུརཱུཔསྶཱཏི སཱམཎེརཱརཧསྶ སཾཝཱསསྶ སཱདིཏཏྟཱཏི ཨདྷིཔྤཱཡོ.

རཱཛབྷཡཱདཱིཧི ¶ གཧིཏལིངྒཱནཾ ‘‘གིཧཱི མཾ ‘སམཎོ’ཏི ཛཱནནྟཱུ’’ཏི ཝཉྩནཙིཏྟེ སཏིཔི བྷིཀྑཱུནཾ ཝཉྩེཏུཀཱམཏཱཡ ཙ ཏེཧི སཾཝསིཏུཀཱམཏཱཡ ཙ ཨབྷཱཝཱ དོསོ ན ཛཱཏོཏི. ‘‘ཡོ ཨེཝཾ པབྦཛཏི, སོ ཐེཡྻསཾཝཱསཀོ ནཱམ ཧོཏཱི’’ཏི ཝཱ ‘‘ཨེཝཾ ཀཱཏུཾ ན ལབྦྷཏཱི’’ཏི ཝཱ ‘‘ཨེཝཾ པབྦཛིཏོ སཱམཎེརོ ན ཧོཏཱི’’ཏི ཝཱ ན ཛཱནཱཏི, ཝཊྚཏི. ‘‘ཛཱནཱཏི, ན ཝཊྚཏཱི’’ཏི ཙ ལིཁིཏཾ. ‘‘རཱཛདུབྦྷིཀྑཱདིཨཏྠཱཡ ཙཱིཝརཾ པཱརུཔིཏྭཱ སཾཝཱསཾ སཱདིཡནྟོ ཐེཡྻསཾཝཱསཀོ ཧོཏི. ཀསྨཱ? ཨསུདྡྷཙིཏྟཏྟཱ. པུན སོ ‘སུདྡྷཾ བྲཧྨཙརིཡཾ ཀརིསྶཱམི, ཀིཾ ཨེཏེནཱཏི ཝིཔྤཊིསཱརེན ཝཱ པཙྩཡཱདིསུལབྷཏཱཡ ཝཱ ཀརིསྶཱམཱི’ཏི སུདྡྷམཱནསོ ཧུཏྭཱ ཡཱཝ སོ སཾཝཱསཾ ནཱདྷིཝཱསེཏི, ཏཱཝ ཐེཡྻསཾཝཱསཀོ ན ཧོཏི. ཨེཝཾ སུདྡྷཙིཏྟུཔྤཏྟིཏོ པཊྛཱཡ སཾཝཱསཾ སཱདིཡཏི ཙེ, ཐེཡྻསཾཝཱསཀོ ཧོཏཱིཏི ཨདྷིཔྤེཏོ. ཨིཏརཐཱ སབྦཾ ཝིརུཛ྄ཛྷཏཱི’’ཏི ཨེཀེ.

‘‘ནཱབྷིཔརཱམཱསཱདིནཱ ཛཱཏོ ཏཐཱརཱུཔཾ པིཏརཾ གྷཱཏེཏི ཙེ, པིཏུགྷཱཏཀོ ཧོཏཱི’’ཏི ཝདནྟི.

ཡོ པན ཀཱཡསཾསགྒེན སཱིལཝིནཱསཾ པཱཔེཏི, ན སོ བྷིཀྑུནིདཱུསཀོ ‘‘ཏིཎྞཾ མགྒཱན’’ནྟི ¶ ཝཙནཏོ. བྷིཀྑུནིཾ པན ཨེཀཏོཨུཔསམྤནྣཾ དཱུསེཏྭཱཔི བྷིཀྑུནིདཱུསཀོ ཧོཏི, སོཔི པཱརཱཛིཀོ ཧོཏཱིཏི ཝིནིཙྪཡོ. བྷིཀྑུནཱི པན ཐེཡྻསཾཝཱསིཀཱ, མཱཏུཔིཏུཨརཧནྟགྷཱཏིཀཱ, ལོཧིཏུཔྤཱདིཀཱ, ཏིཏྠིཡཔཀྐནྟིཀཱ ཙ ཧོཏི, ཨཊྛཀཐཱསུ ཨནཱགཏཾ ཝིནཡདྷརཱ སམྤཊིཙྪནྟི.

‘‘སམྤཛཱནམུསཱཝཱདེ པཱཙིཏྟིཡ’’ནྟི (པཱཙི. ༢) ཝུཏྟཾ མརིཡཱདཾ ཨཝཱིཏིཀྐམནྟོ ཏསྨིཉྩ སིཀྑཱཔདེ སིཀྑཏཱིཏི ཝུཙྩཏི. སིཀྑཱཔདནྟི ཨསབྷཱཝདྷམྨོ སངྐེཏོཝ, ཨིདྷ པཉྙཏྟི ཨདྷིཔྤེཏཱ. ‘‘མེཐུནསཾཝརསྶེཏཾ ཨདྷིཝཙན’’ནྟི སམནྟཔཱསཱདིཀཱཡཾ ཝུཏྟཾ, ཏཾ པནཏྠཾ སནྡྷཱཡཱཏི ལིཁིཏཾ. སིཀྑཱཏི ཏཾ ཏཾ སིཀྑཱཔདཾ, སིཀྑནབྷཱཝེན པཝཏྟཙིཏྟུཔྤཱདོ. སཱཛཱིཝནྟི པཉྙཏྟི. ཏདཏྠདསྶནཏྠཾ པུབྦེ ‘‘མེཐུནསཾཝརསྶེཏཾ ཨདྷིཝཙན’’ནྟི ཝུཏྟཾ. ཡསྨཱ སིཀྑཱཡ གུཎསམྨཏཱཡ པུཉྙསམྨཏཱཡ ཏནྟིཡཱ ཨབྷཱཝཏོ ལོཀསྶ དུབྦལྱཱཝིཀམྨཾ ཏཏྠ ན སམྦྷཝཏི. པཏྠནཱིཡཱ ཧི སཱ, ཏསྨཱ ‘‘ཡཉྩ སཱཛཱིཝཾ ¶ སམཱཔནྣོ, ཏསྨིཾ དུབྦལབྷཱཝཾ ཨཔྤཀཱསེཏྭཱ’’ཏི ཝུཏྟཾ. ཨཱཎཱཡ ཧི དུབྦལྱཾ སམྦྷཝཏཱིཏི ཨུཔཏིསྶོ. དུབྦལྱཱཝིཀམྨཔདཾ སིཀྑཱཔཙྩཀྑཱནཔདསྶ བྱཉྫནསིལིཊྛཏཱཡ ཝཱ པརིཝཱརཀབྷཱཝེན ཝཱ ཝེདིཏབྦཾ. ཨཐ ཝཱ ཡསྨཱ སིཀྑཱཔཙྩཀྑཱནསྶ ཨེཀཙྩཾ དུབྦལྱཱཝིཀམྨཾ ཨཀཏཾ ཧོཏི, ཏསྨཱ ཏཾ སནྡྷཱཡ ‘‘སིཀྑཾ ཨཔཙྩཀྑཱཡཱ’’ཏི པདསྶ ཨཏྠཾ ཝིཝརནྟོ ‘‘དུབྦལྱཾ ཨནཱཝིཀཏྭཱ’’ཏི ཨཱཧ. ཏཏྠ སིཡཱ ཡསྨཱ ན སབྦཾ དུབྦལྱཱཝིཀམྨཾ སིཀྑཱཔཙྩཀྑཱནཾ, ཏསྨཱ ‘‘དུབྦལྱཾ ཨནཱཝིཀཏྭཱ’’ཏི པཋམཾ ཝཏྭཱ ཏསྶ ཨཏྠནིཡམཏྠཾ ‘‘སིཀྑཾ ཨཔཙྩཀྑཱཡཱ’’ཏི ཝཏྟབྦནྟི? ཏཾ ན, ཀསྨཱ? ཨཏྠཱནུཀྐམཱབྷཱཝཏོ. ‘‘སིཀྑཱསཱཛཱིཝསམཱཔནྣོ’’ཏི ཧི ཝུཏྟཏྟཱ ‘‘ཡཾ སིཀྑཾ སམཱཔནྣོ, ཏཾ ཨཔཙྩཀྑཱཡ, ཡཉྩ སཱཛཱིཝཾ སམཱཔནྣོ, ཏཏྠ དུབྦལྱཾ ཨནཱཝིཀཏྭཱ’’ཏི ཝུཙྩམཱནེ ཨནུཀྐམེནེཝ ཨཏྠོ ཝུཏྟོ ཧོཏི, ན ཨཉྙཐཱ, ཏསྨཱ ཨིདམེཝ པཋམཾ ཝུཏྟནྟི. ཏེསཾཡེཝཱཏི ཙུདྡསནྣཾ.

‘‘སིཀྑཾ ཨཔཙྩཀྑཱཡཱ’’ཏི སབྦསིཀྑཱཔདཱནཾ སཱདྷཱརཎཏྠཾ ‘‘ཨཡམེཏྠ ཨནུཔཉྙཏྟཱི’’ཏི ཝུཏྟཾ.

པཝེསནཾ ནཱམ ཨངྒཛཱཏཾ པཝེསེནྟསྶ ཨངྒཛཱཏེན སམྥུསནཾ. པཝིཊྛཾ ནཱམ ཡཱཝ མཱུལཾ པཝེསེནྟསྶ ཝིཔྤཀཏཀཱལོ ཝཱཡཱམཀཱལོ. སུཀྐཝིསཊྛིསམཡེ ཨངྒཛཱཏཾ ཋིཏཾ ནཱམ. ཨུདྡྷརཎཾ ནཱམ ནཱིཧརཎཀཱལོ. ཝིནཡགཎྛིཔདེ པན ‘‘ཝཱཡཱམཏོ ཨོརམིཏྭཱ ཋཱནཾ ཋིཏཾ ནཱམཱ’’ཏི ཝུཏྟཾ, ཏཾ ¶ ཨསངྐརཏོ དསྶནཏྠཾ ཝུཏྟཾ. པཝེསནཔཝིཊྛཨུདྡྷརཎཀཱལེསུཔི སུཀྐཝིསཊྛི ཧོཏིཡེཝ. སཱདིཡནཾ ནཱམ སེཝནཙིཏྟསྶ ཨདྷིཝཱསནཙིཏྟསྶ ཨུཔྤཱདནཾ.

ཨུབྷཏོཝིབྷངྒེ ཨེཝ པཉྙཏྟཱནི སནྡྷཱཡ ‘‘ཨིདཉྷི སབྦསིཀྑཱཔདཱནཾ ནིདཱན’’ནྟི ཝུཏྟཾ. ‘‘ཝིནཡདྷརཔཉྩམེན གཎེན ཨུཔསམྤདཱ’’ཏི (མཧཱཝ. ༢༥༩) ཝུཏྟཏྟཱ ཨིདྷ ཏཏིཡཱ སཧཡོགེན ཝུཏྟཱ. ཏསྨཱ ཝཱིསཏིཔི བྷིཀྑཱུ ཙེ ནིསིནྣཱ, པཉྩམོ ཝིནཡདྷརོཝ ཨིཙྪིཏབྦོ, ཨེཝཾ སཏི པཱརཱཛིཀོ ཙེ ཝིནཡདྷརོ, ཨུཔསམྤདཱཀམྨཾ ཀོཔེཏཱིཏི ཙེ? ན, པརིཝཱརཱཝསཱནེ ཀམྨཝགྒེ (པརི. ༤༨༢ ཨཱདཡོ) ཡཾ ཀམྨཝིཔཏྟིལཀྑཎཾ ཝུཏྟཾ, ཏསྶ ཏསྨིཾ ནཏྠིཏཱཡ. ‘‘ཀཐཾ ཝཏྠུཏོ ཝཱ ཉཏྟིཏོ ཝཱ ཨནུསྶཱཝནཏོ ཝཱ སཱིམཏོ ཝཱ པརིསཏོ ཝཱ’’ཏི ཨེཏྟཀཾ ཝུཏྟཾ, ནནུ ཨཡཾ ‘‘པརིསཏོ ཝཱ’’ཏི ཝཙནེན སངྒཧིཏོཏི ཙེ? ན, ‘‘དྭཱདསཧི ཨཱཀཱརེཧི པརིསཏོ ཀམྨཱནི ཝིཔཛྫནྟཱི’’ཏི (པརི. ༤༨༧) སུཏྟསྶ ¶ ཧི ཝིབྷངྒེ ཏསྶ ཨནཱམཊྛཏྟཱཏི ཨཡམཏྠོ ཡསྨཱ ཏཏྠ ཏཏྠ སརཱུཔེན ཝུཏྟཔཱལི༹ཝསེནེཝ སཀྐཱ ཛཱནིཏུཾ, ཏསྨཱ ནཡམུཁཾ དསྶེཏྭཱ སཾཁིཏྟོཏི ལིཁིཏཾ. ‘‘ཨངྒ’’ནྟི པདཾ ཨུདྡྷརིཏྭཱ ‘‘སབྦསིཀྑཱཔདེསུ ཨཱཔཏྟཱིནཾ ཨངྒཱནངྒཾ ཝེདིཏབྦ’’ནྟི ཝུཏྟཾ, ཨིདྷ པན ‘‘ཨངྒ’’ནྟི ཝུཏྟཾ, ཀསྨཱ? སམུཊྛནཱདཱིནཾ པརིཝཱརཱདཱིསུ སངྑེཔེན ཨཱགཏཏྟཱ ཏཏྠ གཧེཏྭཱ ཨིདྷཱཔི ནིདྡིཊྛཱནཾ ཨནངྒཱནཾ ཝཝཏྠཱནཱབྷཱཝཏོ, སབྦཏྠ སངྑེཔཏོ ཙ ཝིཏྠཱརཏོ ཙ ཨནངྒཏྟེ ཝུཙྩམཱནེ ཨཏིཝིཏྠཱརཏཱཡ ཏསྨིཾ ཏསྨིཾ སིཀྑཱཔདེ ཨནཱུནཾ ཝཏྟབྦཏོ ཙཱཏི ཝེདིཏབྦོ, སབྦཱཔཏྟཱིནཾ སངྒཱཧཀཝསེནཱཏི ཨཏྠོ.

ཡཱནི སིཀྑཱཔདཱནི ‘‘ཀིརིཡཱནཱི’’ཏི ཝུཙྩནྟི, ཏེསཾ ཝསེན ཀཱཡཝཱཙཱ སཧ ཝིཉྙཏྟིཡཱ ཝེདིཏབྦཱ, ཨཀིརིཡཱནཾ ཝསེན ཝིནཱ ཝིཉྙཏྟིཡཱ ཝེདིཏབྦཱ. ཙིཏྟཾ པནེཏྠ ཨཔྤམཱཎཾ བྷཱུཏཱརོཙནསམུཊྛཱནསྶ ཀིརིཡཏྟཱ, ཨཙིཏྟཀཏྟཱ ཙ. ཏཏྠ ཀིརིཡཱ ཨཱཔཏྟིཡཱ ཨནངྒནྟརཙིཏྟསམུཊྛཱནཱ ཝེདིཏབྦཱ. ཨཝིཉྙཏྟིཛནཀམྤི ཨེཀཙྩཾ བཱཧུལླནཡེན ‘‘ཀིརིཡ’’ནྟི ཝུཙྩཏི ཡཐེཝ པཋམཔཱརཱཛིཀཾ. ཝིཉྙཏྟིཡཱ ཨབྷཱཝེཔི ‘‘སོ ཙེ སཱདིཡཏི, ཨཱཔཏྟི པཱརཱཛིཀསྶ, ན སཱདིཡཏི, ཨནཱཔཏྟཱི’’ཏི ཧི ཝུཏྟཾ, ཝིཉྙཏྟིསངྑཱཏཱཔི ཀིརིཡཱ ཝིནཱ སེཝནཙིཏྟེན ན ཧོཏི ཝུཏྟཙིཏྟཛཏྟཱ, ཝིཀཱརརཱུཔཏྟཱ, ཙིཏྟཱནུཔརིཝཏྟིཀཏྟཱ ཙ. ཏསྨཱ ཀིརིཡཱསངྑཱཏམིདཾ ཝིཉྙཏྟིརཱུཔཾ, ཨིཏརཾ ཙིཏྟཛརཱུཔཾ ཝིཡ ཛནཀཙིཏྟེན ཝིནཱ ན ཏིཊྛཏི, ཨིཏརཾ སདྡཱཡཏནཾ ཏིཊྛཏི, ཏསྨཱ ཀིརིཡཱཡ སཏི ཨེཀནྟཏོ ཏཛྫནཀཾ སེཝནཙིཏྟཾ ཨཏྠི ཨེཝཱཏི ཀཏྭཱ ན སཱདིཡཏི, ཨནཱཔཏྟཱིཏི ན ཡུཛྫཏཱིཏི. ཡསྨཱ ཝིཉྙཏྟིཛནཀམྤི སམཱནཾ སེཝནཙིཏྟཾ ན སབྦཀཱལཾ ཝིཉྙཏྟིཾ ཛནེཏི, ཏསྨཱ ཝིནཱཔི ཝིཉྙཏྟིཡཱ སཡཾ ཨུཔྤཛྫཏཱིཏི ཀཏྭཱ ‘‘སཱདིཡཏི, ཨཱཔཏྟི པཱརཱཛིཀསྶཱ’’ཏི ཝུཏྟཾ. ནུཔྤཛྫཏི ཙེ, ན སཱདིཡཏི ནཱམ, ཏསྶ ¶ ཨནཱཔཏྟི. ཏེནེཝ བྷགཝཱ ‘‘ཀིཾཙིཏྟོ ཏྭཾ བྷིཀྑཱུ’’ཏི (པཱརཱ. ༡༣༥) ཙིཏྟེནེཝ ཨཱཔཏྟིཾ པརིཙྪིནྡཏི, ན ཀིརིཡཱཡཱཏི ཝེདིཏབྦཾ.

ཨེཏྠ སམུཊྛཱནགྒཧཎཾ ཀཏྟབྦཏོ ཝཱ ཨཀཏྟབྦཏོ ཝཱ ཀཱཡཱདིབྷེདཱཔེཀྑམེཝ ཨཱཔཏྟིཾ ཨཱཔཛྫཏི, ན ཨཉྙཐཱཏི དསྶནཔྤཡོཛནཾ. ཏེསུ ཀིརིཡཱགྒཧཎཾ ཀཱཡཱདཱིནཾ སཝིཉྙཏྟིཀཱཝིཉྙཏྟིཀབྷེདདསྶནཔྤཡོཛནཾ. སཉྙཱགྒཧཎཾ ཨཱཔཏྟིཡཱ ཨངྒཱནངྒཙིཏྟཝིསེསདསྶནཔྤཡོཛནཾ. ཏེན ¶ ཡཾ ཙིཏྟཾ ཀིརིཡལཀྑཎེ ཝཱ ཨཀིརིཡལཀྑཎེ ཝཱ སནྣིཧིཏཾ, ཡཏོ ཝཱ ཀིརིཡཱ ཝཱ ཨཀིརིཡཱ ཝཱ ཧོཏི, ན ཏཾ ཨཝིསེསེན ཨཱཔཏྟིཡཱ ཨངྒཾ ཝཱ ཨནངྒཾ ཝཱ ཧོཏི. ཀིནྟུ ཡཱཡ སཉྙཱཡ ‘‘སཉྙཱཝིམོཀྑ’’ནྟི ཝུཙྩཏི, ཏཱཡ སམྤཡུཏྟཾ ཙིཏྟཾ ཨངྒཾ, ཨིཏརཾ ཨནངྒནྟི དསྶིཏཾ ཧོཏི. ཨིདཱནི ཡེན ཙིཏྟེན སིཀྑཱཔདཾ སཙིཏྟཀཾ ཧོཏི, ཏདབྷཱཝཱ ཨཙིཏྟཀཾ, ཏེན ཏསྶ ཨཝིསེསེན སཱཝཛྫཏཱཡ ‘‘ལོཀཝཛྫམེཝཱ’’ཏི ཝུཏྟཾ. ཀིནྟུ སཱཝཛྫཾཡེཝ སམཱནཾ ཨེཀཙྩཾ ལོཀཝཛྫཾ, ཨེཀཙྩཾ པཎྞཏྟིཝཛྫནྟི དསྶནཔྤཡོཛནཾ ཙིཏྟལོཀཝཛྫགྒཧཎཾ. ཙིཏྟམེཝ ཡསྨཱ ‘‘ལོཀཝཛྫ’’ནྟི ཝུཙྩཏི, ཏསྨཱ མནོཀམྨམྤི སིཡཱ ཨཱཔཏྟཱིཏི ཨནིཊྛཔྤསངྒནིཝཱརཎཔྤཡོཛནཾ ཀམྨགྒཧཎཾ.

ཡཾ པནེཏྠ ཨཀིརིཡལཀྑཎཾ ཀམྨཾ, ཏཾ ཀུསལཏྟིཀཝིནིམུཏྟཾ སིཡཱཏི ཨནིཊྛཔྤསངྒནིཝཱརཎཔྤཡོཛནཾ ཀུསལཏྟིཀགྒཧཎཾ. ཡཱ པནེཏྠ ཨབྱཱཀཏཱཔཏྟི, ཏཾ ཨེཀཙྩཾ ཨཝེདནམྤི ནིརོདྷཾ སམཱཔནྣོ ཨཱཔཛྫཏཱིཏི ཝེདནཱཏྟིཀཾ ཨེཏྠ ན ལབྦྷཏཱིཏི ཨནིཊྛཔྤསངྒནིཝཱརཎཏྠཾ ཝེདནཱཏྟིཀགྒཧཎཾ. སིཀྑཱཔདཉྷི སཙིཏྟཀཔུགྒལཝསེན ‘‘ཏིཙིཏྟཾ ཏིཝེདན’’ནྟི ལདྡྷཝོཧཱརཾ ཨཙིཏྟཀེནཱཔནྣམྤི ‘‘ཏིཙིཏྟཾ ཏིཝེདན’’མིཙེཝ ཝུཙྩཏི. ཏཏྲིདཾ སཱདྷཀསུཏྟཾ – ‘‘ཨཏྠཱཔཏྟི ཨཙིཏྟཀོ ཨཱཔཛྫཏི ཨཙིཏྟཀོ ཝུཊྛཱཏི (པརི. ༣༢༤), ཨཏྠཱཔཏྟི ཀུསལཙིཏྟོ ཨཱཔཛྫཏི ཀུསལཙིཏྟོ ཝུཊྛཱཏཱི’’ཏིཨཱདི (པརི. ༤༧༠). ‘‘སཙིཏྟཀཾ ཨཱཔཏྟིདཱིཔནཾ, སཉྙཱཝིམོཀྑཾ ཨནཱཔཏྟིདཱིཔནཾ, ཨཙིཏྟཀཾ ཝཏྠུཨཛཱནནཾ, ནོསཉྙཱཝིམོཀྑཾ ཝཱིཏིཀྐམནཱཛཱནནཾ. ཨིདམེཝ ཏེསཾ ནཱནཱཏྟ’’ནྟི (ཝཛིར. ཊཱི. པཱརཱཛིཀ ༦༡-༦༦ པཀིཎྞཀཀཐཱཝཎྞནཱ) ལིཁིཏཾ.

སཙིཏྟཀཔཀྑེཏི ཨེཏྠ ཨཡཾ ཏཱཝ གཎྛིཔདནཡོ – སཙིཏྟཀཔཀྑེཏི སུརཱཔཱནཱདིཨཙིཏྟཀེ སནྡྷཱཡ ཝུཏྟཾ. སཙིཏྟཀེསུ པན ཡཾ ཨེཀནྟམཀུསལེནེཝ སམུཊྛཱཏི, ཏཉྩ ཨུབྷཡཾ ལོཀཝཛྫཾ ནཱམ. སུརཱཔཱནསྨིཉྷི ‘‘སུརཱ’’ཏི ཝཱ ‘‘པཱཏུཾ ན ཝཊྚཏཱི’’ཏི ཝཱ ཛཱནིཏྭཱ པིཝནེ ཨཀུསལམེཝཱཏི. ཏཏྠ ‘‘ན ཝཊྚཏཱིཏི ཛཱནིཏྭཱ’’ཏི ཝུཏྟཝཙནཾ ན ཡུཛྫཏི པཎྞཏྟིཝཛྫསྶཔི ¶ ལོཀཝཛྫཏཱཔསངྒཏོ. ཨིམཾ ཨནིཊྛཔྤསངྒཾ པརིཧརིཏུཀཱམཏཱཡ ཙ ཝཛིརབུདྡྷིཏྠེརེན ལིཁིཏཾ – ‘‘ཨིདྷ ‘སཙིཏྟཀ’ནྟི ཙ ‘ཨཙིཏྟཀ’ནྟི ཙ ཝིཙཱརཎཱ ཝཏྠུཝིཛཱནནེ ཨེཝ ཧོཏི, ན པཉྙཏྟིཝིཛཱནནེ. ཡདི པཉྙཏྟིཝིཛཱནནེ ཧོཏི ¶ , སབྦསིཀྑཱཔདཱནི ལོཀཝཛྫཱནེཝ སིཡུཾ, ན ཙ སབྦསིཀྑཱཔདཱནི ལོཀཝཛྫཱནི. ཏསྨཱ ཝཏྠུཝིཛཱནནེ ཨེཝ ཧོཏཱིཏི ཨིདཾ ཡུཛྫཏི. ཀསྨཱ? ཡསྨཱ སེཁིཡེསུ པཉྙཏྟིཝིཛཱནནམེཝ པམཱཎཾ, ན ཝཏྠུམཏྟཝིཛཱནན’’ནྟི. ཨཡཾ པནེཏྠ ཨཏྠོ སིཀྑཱཔདསཱིསེན ཨཱཔཏྟིཾ གཧེཏྭཱ ཡསྶ སིཀྑཱཔདསྶ སཙིཏྟཀསྶ ཙིཏྟཾ ཨཀུསལམེཝ ཧོཏི, ཏཾ ལོཀཝཛྫཾ, སཙིཏྟཀཱཙིཏྟཀསངྑཱཏསྶ ཨཙིཏྟཀསྶ ཙ སཙིཏྟཀཔཀྑེ ཙིཏྟཾ ཨཀུསལམེཝ ཧོཏི, ཏམྤི སུརཱཔཱནཱདིལོཀཝཛྫནྟི ཨིམམཏྠཾ སནྡྷཱཡ ‘‘ཡསྶཱ སཙིཏྟཀཔཀྑེ ཙིཏྟཾ ཨཀུསལམེཝ ཧོཏི, ཨཡཾ ལོཀཝཛྫཱ ནཱམཱ’’ཏི ཝུཏྟཾ. ‘‘སཙིཏྟཀཔཀྑེ’’ཏི ཧི ཨིདཾ ཝཙནཾ ཨཙིཏྟཀཾ སནྡྷཱཡཱཧ. ན ཧི ཨེཀཾསཏོ སཙིཏྟཀཱཡ ‘‘སཙིཏྟཀཔཀྑེ’’ཏི ཝིསེསནེ པཡོཛནཾ ཨཏྠཱིཏི, ཨེཝཾ སནྟེཔི ཨནིཡམེན ཝུཏྟཉྩ ནིཡམཝསེན ཨེཝ གཧེཏབྦནྟི ཨཏྠོ.

ཏིརཙྪཱནཱནཾ པནཱཏི པན-སདྡེན ཐུལླཙྩཡཱདིཀཱརཾ ནིཝཏྟེཏི. ཀིརིཡཱཏི ཨེཏྠ ‘‘ཋིཏཾ སཱདིཡཏཱི’’ཏི (པཱརཱ. ༥༨) ཝུཏྟཏྟཱ ཏཾ ཀཐནྟི ཙེ? ‘‘སཱདིཡཏཱི’’ཏི ཝུཏྟཏྟཱ ཀིརིཡཱ ཨེཝ. ཨེཝཾ སནྟེ ‘‘ཀཱཡཀམྨཾ མནོཀམྨ’’ནྟི ཝཏྟབྦནྟི ཙེ? ན, པཙུརཝོཧཱརཝསེན ‘‘ཀཱཡཀམྨ’’ནྟི ཝུཏྟཏྟཱ. ཨུབྦྷཛཱཎུམཎྜལིཀཱཡ ལབྦྷཏི ཨེཝཱཏི ལིཁིཏཾ. པུབྦེ ཝུཏྟནཡེན སཾསནྡེཏྭཱ གཧེཏབྦཾ. ‘‘དུནྣིཀྑིཏྟསྶ, བྷིཀྑཝེ, པདབྱཉྫནསྶ ཨཏྠོཔི དུནྣཡོ ཧོཏཱི’’ཏི (ཨ. ནི. ༢.༢༠) ཝདནྟེནཱཔི ཨཏྠསྶ སུཁགྒཧཎཏྠམེཝ པདབྱཉྫནསྶ སུནིཀྑིཏྟབྷཱཝོ ཨིཙྪིཏོ, ན ཨཀྑརཝཙནཱཡ, ཏསྨཱ ཨཱཧ ‘‘ཨཏྠཉྷི ནཱཐོ སརཎཾ ཨཝོཙཱ’’ཏིཨཱདི.

པཋམཔཱརཱཛིཀཝཎྞནཱ ནིཊྛིཏཱ.

༢. དུཏིཡཔཱརཱཛིཀཝཎྞནཱ

གཱམཱ ཝཱ ཨརཉྙཱ ཝཱཏི ལཀྑཎཱནུཔཉྙཏྟིཀཏྟཱ ཨཱདིམྷི ཝུཏྟཱ. སབྦསྨིཉྷི ཝིནཡཔིཊཀེ གཱམོ, གཱམཱུཔཙཱརོ, གཱམཀྑེཏྟཾ, གཱམསཱིམཱ, གཱམསཱིམཱུཔཙཱརོཏི པཉྩཝིདྷོ གཱམབྷེདོ ཝེདིཏབྦོ. ཏཐཱ ཨཱརཉྙཀསཱིམཱཡ ཨེཀཾ ཨགཱམཀཾ ཨརཉྙཾ, སཾཝིདྷཱནསིཀྑཱཔདཱནཾ (པཱཙི. ༡༨༠ ཨཱདཡོ) ཨེཀཾ, སགཱམཀཾ ཨེཀཾ ¶ , ཨཝིཔྤཝཱསསཱིམཱཡ ཨེཀཾ, གཎམྷཱཨོཧཱིཡནཀསྶ (པཱཙི. ༦༩༡) ཨེཀནྟི པཉྩཝིདྷོ ཨརཉྙབྷེདོ ཝེདིཏབྦོ. ཏཏྠ ཨཏྠི ¶ གཱམོ ན གཱམཔརིཧཱརཾ ཀཏྠཙི ལབྷཏི, ཨཏྠི གཱམོ ན གཱམཀིཙྩཾ ཀརོཏི, ཏཐཱ ཨཏྠི ཨརཉྙཾ ན ཨརཉྙཔརིཧཱརཾ ཀཏྠཙི ལབྷཏི, ཨཏྠི ཨརཉྙཾ ན ཨརཉྙཀིཙྩཾ ཀརོཏཱིཏི ཨཡམྤི བྷེདོ ཝེདིཏབྦོ.

ཏཏྠ ཨཝིཔྤཝཱསསཱིམཱསམྨནྣནཀམྨཝཱཙཱཡ ཋཔེཏྭཱ ‘‘གཱམཉྩ གཱམཱུཔཙཱརཉྩཱ’’ཏི (མཧཱཝ. ༡༤༤) ཨེཏྠ གཱམོ ནཱམ པརིཀྑིཏྟོ ཙེ, པརིཀྑེཔསྶ ཨནྟོ, ཨཔརིཀྑིཏྟོ ཙེ, པརིཀྑེཔོཀཱསཏོ ཨནྟོ ཝེདིཏབྦོ. ཨཡཾ ཨུདོསིཏསིཀྑཱཔདེ ‘‘ཨནྟོགཱམོ’’ཏི (པཱརཱ. ༤༧༨) ཨཱགཏོ. སཱསངྐསིཀྑཱཔདེ ‘‘ཨནྟརགྷར’’ནྟི (པཱརཱ. ༦༥༤) ཨཱགཏོ ཨནཱསངྐཏོ. ཡཐཱཧ ‘‘ཨནྟརགྷརེ ནིཀྑིཔེཡྻཱཏི སམནྟཱ གོཙརགཱམེ ནིཀྑིཔེཡྻཱ’’ཏི (པཱརཱ. ༦༥༤). ཏཐཱ ཨནྟརགྷརཔྤཊིསཾཡུཏྟཱནཾ སེཁིཡཱནཾ ཨཡམེཝ པརིཙྪེདོ ཝེདིཏབྦོ. ‘‘ཡཱ པན བྷིཀྑུནཱི ཨེཀཱ གཱམནྟརཾ གཙྪེཡྻཱ’’ཏི (པཱཙི. ༦༨༧) ཨེཏྠཱཔི ཨཡམེཝ པརིཙྪེདོ ཨདྷིཔྤེཏོ ‘‘པརིཀྑིཏྟསྶ གཱམསྶ པརིཀྑེཔཾ ཨཏིཀྐམནྟིཡཱ, ཨཔརིཀྑིཏྟསྶ གཱམསྶ ཨུཔཙཱརཾ ཨཏིཀྐམནྟིཡཱ’’ཏི ཝུཏྟཏྟཱ.

ཡེསུ པུརཱཎཔོཏྠཀེསུ ‘‘ཨུཔཙཱརཾ ཨོཀྐམནྟིཡཱ’’ཏི ལིཁིཏཾ, ཏཾ ཝིཀཱལེ གཱམཔྤཝེསནསིཀྑཱཔདེསུ ཨཱཙིཎྞཾ ནཡཾ གཧེཏྭཱ པམཱདེན ལིཁཱིཡཏི, ན པམཱཎཾ. ཡེསུ ཙ པོཏྠཀེསུ ཝིཀཱལེ གཱམཔྤཝེསནསིཀྑཱཔདསྶ ཝིབྷངྒེ (པཱཙི. ༥༡༣) ‘‘གཱམཾ པཝིསེཡྻཱཏི པརིཀྑིཏྟསྶ གཱམསྶ པརིཀྑེཔཾ ཨཏིཀྐམནྟསྶ, ཨཔརིཀྑིཏྟསྶ གཱམསྶ ཨུཔཙཱརཾ ཨཏིཀྐམནྟསྶཱ’’ཏི ལིཁཱིཡཏི, སཱ པམཱདལེཁཱ. ཨུཔཙཱརཾ ཨོཀྐམནྟསྶཱཏི ཏཏྠ པཱཋོ. ཝུཏྟཉྷི སམནྟཔཱསཱདིཀཱཡཾ ‘‘ཨཔརིཀྑིཏྟསྶ གཱམསྶ ཨུཔཙཱརོ ཨདིནྣཱདཱནེ ཝུཏྟནཡེནེཝ ཝེདིཏབྦོ’’ཏི (པཱཙི. ཨཊྛ. ༥༡༢). ཨིདྷ ཀངྑཱཝིཏརཎིཡམྤི ཝུཏྟཾ ‘‘སནྟཾ བྷིཀྑུཾ ཨནཱཔུཙྪིཏྭཱཏི…པེ… ཨུཔཙཱརཾ ཨོཀྐམནྟསྶཱ’’ཏིཨཱདི (ཀངྑཱ. ཨཊྛ. ཝིཀཱལགཱམཔྤཝེསནསིཀྑཱཔདཝཎྞནཱ).

ཡཾ པན ཀཏྠཙི པོཏྠཀེ ‘‘བྷིཀྑུནིཡཱ གཱམནྟརཱདྷིཀཱརེ ཨེཀེན པཱདེན ཨིཏརསྶ གཱམསྶ པརིཀྑེཔཾ ཝཱ ཨཏིཀྐམནྟེ, ཨུཔཙཱརཾ ཝཱ ཨོཀྐནྟེ ཐུལླཙྩཡཾ, དུཏིཡེན ཨཏིཀྐནྟམཏྟེ, ཨོཀྐནྟམཏྟེ ཙ སངྒྷཱདིསེསོ’’ཏི པཱཋོ དིསྶཏི. ཏཏྠ ‘‘ཨོཀྐནྟེ, ཨོཀྐནྟམཏྟེ’’ཏི ཨེཏཱནི པདཱནི ཨདྷིཀཱནི ¶ , ཀེཝལཾ ལིཁིཏཀེཧི ཨཉྙེཧི ལིཁིཏཱནི. ཀཏྠཙི པོཏྠཀེ ‘‘ཨོཀྐནྟམཏྟེ ཙཱ’’ཏི པདཾ ན དིསྶཏི, ཨིཏརཾ དིསྶཏི. ཏཱནི དྭེ པདཱནི པཱལི༹ཡཱ ཝིརུཛ྄ཛྷནྟི. ‘‘ཨཔརིཀྑིཏྟསྶ གཱམསྶ ཨུཔཙཱརཾ ཨཏིཀྐཱམེནྟིཡཱ’’ཏི (པཱཙི. ༦༩༢) ཧི པཱལི༹ ¶ . ཏཐཱ སམནྟཔཱསཱདིཀཱཡ (པཱཙི. ཨཊྛ. ༦༩༢) ཝིརུཛ྄ཛྷནྟི. ‘‘པརིཀྑེཔཱརཧཊྛཱནཾ ཨེཀེན པཱདེན ཨཏིཀྐམཏི, ཐུལླཙྩཡཾ, དུཏིཡེན ཨཏིཀྐམཏི, སངྒྷཱདིསེསོ. ཨཔིཙེཏྠ སཀགཱམཏོ…པེ… ཨེཀེན པཱདེན ཨིཏརསྶ གཱམསྶ པརིཀྑེཔེ ཝཱ ཨུཔཙཱརེ ཝཱ ཨཏིཀྐནྟེ ཐུལླཙྩཡཾ, དུཏིཡེན ཨཏིཀྐནྟམཏྟེ སངྒྷཱདིསེསོ’’ཏི (པཱཙི. ཨཊྛ. ༦༩༢) ཧི ཝུཏྟཾ.

གཎྛིཔདེ ཙསྶ ‘‘པརིཀྑེཔཾ ཨཏིཀྐཱམེནྟིཡཱ’’ཏི ཝཏྭཱ ‘‘ཨུཔཙཱརེཔི ཨེསེཝ ནཡོ’’ཏི ཝུཏྟཾ. ཨནུགཎྛིཔདེ ཙ ‘‘ཨཔརིཀྑིཏྟསྶ གཱམསྶ ཨུཔཙཱརཾ ‘ཨོཀྐམནྟིཡཱ’ཏིཔི པོཏྠཀེསུ ཨེཀཙྩེསུ དིསྶཏི, ཏཾ ན གཧེཏབྦ’’ནྟི ཝུཏྟཾ. ཨཔརམྤི ཝུཏྟཾ ‘‘ཨཔརིཀྑིཏྟསྶ གཱམསྶ ཨུཔཙཱརཾ ‘ཨཏིཀྐཱམེནྟིཡཱ’ཏི ཝཙནེནཱཔི ཨེཝཾ ཝེདིཏབྦཾ – ཝིཀཱལེ གཱམཔྤཝེསནེ དྭིནྣཾ ལེཌྜུཔཱཏཱནཾ ཨེཝ ཝསེན ཨུཔཙཱརོ པརིཙྪིནྡིཏབྦོ, ཨིཏརཐཱ ཡཐཱ ཨེཏྠ པརིཀྑེཔཱརཧཊྛཱནཾ པརིཀྑེཔཾ ཝིཡ ཀཏྭཱ ‘ཨཏིཀྐཱམེནྟིཡཱ’ཏི ཝུཏྟཾ, ཨེཝཾ ཏཏྠཱཔི ‘ཨཔརིཀྑིཏྟསྶ གཱམསྶ ཨུཔཙཱརཾ ཨཏིཀྐཱམེནྟསྶཱ’ཏི ཝདེཡྻ. ཡསྨཱ པན ཏཏྠ པརིཀྑེཔཱརཧཊྛཱནཏོ ཨུཏྟརིམེཀོ ལེཌྜུཔཱཏོ ཨུཔཙཱརོཏི ཨདྷིཔྤེཏོ. ཏསྨཱ ཏདཏྠདཱིཔནཏྠཾ ‘ཨཔརིཀྑིཏྟསྶ གཱམསྶ ཨུཔཙཱརཾ ཨོཀྐམནྟསྶཱ’ཏི ཝུཏྟ’’ནྟི.

ཡཾ པན ཨནྡྷཀཊྛཀཐཱཡཾ པརིཀྑེཔཱརཧཊྛཱནཾཡེཝ ཨུཔཙཱརནྟི སལླཀྑེཏྭཱ ‘‘པརིཀྑེཔཔཨཀྑེཔཱརཧཊྛཱནཱནཾ ནིནྣཱནཱཀརཎདཱིཔནཏྠཾ ཨུཔཙཱརཾ ཨོཀྐམནྟསྶཱ’’ཏི ཝུཏྟཾ, པཱལི༹ཝིསེསམསལླཀྑེཏྭཱ ‘‘ཨཔརིཀྑིཏྟསྶ གཱམསྶ ཨུཔཙཱརཾ ཨཏིཀྐམནྟསྶ ཨིདྷ ཨུཔཙཱརོ པརིཀྑེཔོ ཡཐཱ བྷཝེཡྻ, ཏཾ ཨུཔཙཱརཾ པཋམཾ པཱདཾ ཨཏིཀྐཱམེནྟསྶ ཨཱཔཏྟི དུཀྐཊསྶ, དུཏིཡཾ པཱདཾ ཨཏིཀྐཱམེནྟསྶ ཨཱཔཏྟི པཱཙིཏྟིཡསྶཱ’’ཏི ཝུཏྟཾ, ཏཾ ན གཧེཏབྦམེཝ པཱལི༹ཡཱ ཝིསེསསམྦྷཝཏོཏི. པོརཱཎགཎྛིཔདེ ‘‘ཨུཔཙཱརཾ ཨཏིཀྐཱམེནྟིཡཱ བྷིཀྑུནིཡཱ གཱམནྟརཱཔཏྟཱི’’ཏི ཝུཏྟཾ. ཏསྨཱ ཨིདྷ ཀངྑཱཝིཏརཎིཡཱ ‘‘ཨེཀེན པཱདེན ཨིཏརསྶ…པེ… ཨཏིཀྐནྟམཏྟེ སངྒྷཱདིསེསོ’’ཏི ཨཡམེཝ པཱཋོ ཝེདིཏབྦོ. ཨེཏྟཱཝཏཱ ཨིམེསུ ཡཐཱཝུཏྟེསུ ཋཱནེསུ ཡཐཱཝུཏྟཔརིཙྪེདོཝ གཱམོཏི ཝེདིཏབྦོ. ཨིམསྶ ¶ ཨཏྠསྶ དཱིཔནཏྠཾ ‘‘གཱམོ ནཱམ ཨེཀཀུཊིཀོཔཱི’’ཏིཨཱདི (པཱརཱ. ༩༢) ཝུཏྟཾ. ཨིམསྶ ཝསེན ཨསཏིཔི པརིཀྑེཔཱཏིཀྐམེ, ཨུཔཙཱརོཀྐམནེ ཝཱ ཨནྟརཱརཱམཏོ ཝཱ བྷིཀྑུནུཔསྶཡཏོ ཝཱ ཏིཏྠིཡསེཡྻཏོ ཝཱ པཊིཀྐམནཏོ ཝཱ ཏཾ གཱམཾ པཝིསནྟསྶ ཨནྟརཱརཱམཔརིཀྑེཔསྶ, ཨུཔཙཱརསྶ ཝཱ ཨཏིཀྐམནཝསེན གཱམཔཙྩཡཱ ཨཱཔཏྟིཡོ ཝེདིཏབྦཱ.

གཱམཱུཔཙཱརོ པན ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི (མཧཱཝ. ༡༤༤) ཨེཏྠ པརིཀྑིཏྟསྶ ¶ གཱམསྶ པརིཀྑེཔོཝ, ཨཔརིཀྑིཏྟསྶ གཱམསྶ པརིཀྑེཔོཀཱསོཝ. ཝུཏྟཉྷེཏཾ ཨཊྛཀཐཱཡཾ ‘‘གཱམཱུཔཙཱརོཏི པརིཀྑིཏྟསྶ གཱམསྶ པརིཀྑེཔོ, ཨཔརིཀྑིཏྟསྶ གཱམསྶ པརིཀྑེཔོཀཱསོ. ཏེསུ ཨདྷིཊྛིཏཏེཙཱིཝརིཀོ བྷིཀྑུ པརིཧཱརཾ ན ལབྷཏཱི’’ཏི (མཧཱཝ. ཨཊྛ. ༡༤༤). ཀིཾ པནེཏྠ ཀཱརཎཾ, ཡེན ཨཡཾ གཱམོ, གཱམཱུཔཙཱརོ ཙ ཨིདྷ ཨཉྙཐཱ, ཨཉྙཏྠ ཏཐཱཏི? ཨཊྛུཔྤཏྟིཏོ ‘‘ཏེན ཁོ པན སམཡེན བྷིཀྑཱུ ‘བྷགཝཏཱ ཏིཙཱིཝརེན ཨཝིཔྤཝཱསསམྨུཏི ཨནུཉྙཱཏཱ’ཏི ཨནྟརགྷརེ ཙཱིཝརཱནི ནིཀྑིཔནྟཱི’’ཏི (མཧཱཝ. ༡༤༣) ཨིམིསྶཱ ཧི ཨཊྛུཔྤཏྟིཡཱ ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི (མཧཱཝ. ༡༤༤) ཝུཏྟཾ. ཏསྨཱ ཡཏྠ ཨནྟརགྷརསཉྙཱ, ཏཏྠ ཨཝིཔྤཝཱསསཱིམཱ ན གཙྪཏཱིཏི ཝེདིཏབྦཱ. ཏེན ཙ ཨུདོསིཏསིཀྑཱཔདེ ‘‘ཨནྟོགཱམེ ཙཱིཝརཾ ནིཀྑིཔིཏྭཱ ཨནྟོགཱམེ ཝཏྠབྦ’’ནྟི (པཱརཱ. ༤༧༨) ཙ ‘‘སབྷཱཡེ ཝཱ དྭཱརམཱུལེ ཝཱ, ཧཏྠཔཱསཱ ཝཱ ན ཝིཛཧིཏབྦ’’ནྟི ཙ ཝུཏྟཾ. ཀཔྤིཡབྷཱུམིཡཾ ཝསནྟོཡེཝ ཧི ཀཔྤིཡབྷཱུམིཡཾ ནིཀྑིཏྟཙཱིཝརཾ རཀྑཏི. སཱསངྐསིཀྑཱཔདེ པན ‘‘ཡསྨཱ ཡཏྠ གཱམེ ཙཱིཝརཾ ནིཀྑིཏྟཾ, ཏེན གཱམེན ཝིཔྤཝསནྟོ ཙཱིཝརེན ཝིཔྤཝསཏཱིཏི ཝུཙྩཏི, ཏསྨཱ པུན གཱམསཱིམཾ ཨོཀྐམིཏྭཱ ཝསིཏྭཱ པཀྐམཏཱི’’ཏི ཝུཏྟཾ. ཏསྨིཉྷི སིཀྑཱཔདེ གཱམསཱིམཱ གཱམོ ནཱམཱཏི ཨདྷིཔྤེཏོ. ཏཏྠ ཝིཀཱལེ གཱམཔྤཝེསནསིཀྑཱཔདཝིབྷངྒེ ‘‘པརིཀྑིཏྟསྶ གཱམསྶ པརིཀྑེཔཾ ཨཏིཀྐམནྟསྶ ཨཱཔཏྟི པཱཙིཏྟིཡསྶཱ’’ཏི (པཱཙི. ༥༡༣) ཝཙནཏོ པརིཀྑེཔོ ན གཱམོ. ཀིནྟུ གཱམཱུཔཙཱརོཏི ལེསེན དསྶིཏཾ ཧོཏི. ཨིམསྨིཾ པན སིཀྑཱཔདཝིབྷངྒེ ‘‘གཱམཱུཔཙཱརོ ནཱམཱ’’ཏི ཨཱརབྷིཏྭཱ ‘‘ཨཔརིཀྑིཏྟསྶ གཱམསྶ གྷརཱུཔཙཱརེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ’’ཏི ཨིམིནཱ ཨཔརིཀྑིཏྟསྶ པརིཀྑེཔོཀཱསོ གཱམཱུཔཙཱརོཏི སིདྡྷཾ. ཏདཏྠསམྦྷཝཏོ ཏསྨིཾ གྷརཱུཔཙཱརེ ཋིཏསྶ ལེཌྜུཔཱཏོ གཱམཱུཔཙཱརོཏི ཀུརུནྡཊྛཀཐཱཡཾ, མཧཱཔཙྩརིཡམྤི ཝུཏྟཾ ¶ . ཨུཔཙཱརོ ཧི ‘‘གཱམོ ཨེཀཱུཔཙཱརོ ནཱནཱུཔཙཱརོ’’ཏིཨཱདཱིསུ དྭཱརཾ, ‘‘ཨཛ྄ཛྷོཀཱསོ ཨེཀཱུཔཙཱརོ’’ཏི ཨེཏྠ སམནྟཱ སཏྟབྦྷནྟརསངྑཱཏཾ པམཱཎཾ, ཏསྨཱ ‘‘གཱམཱུཔཙཱརོཏི པརིཀྑིཏྟསྶ གཱམསྶ པརིཀྑེཔོ, ཨཔརིཀྑིཏྟསྶ གཱམསྶ པརིཀྑེཔོཀཱསོ’’ཏི ཨནྡྷཀཊྛཀཐཱཡཾ ཝུཏྟནྟི ཝེདིཏབྦཾ. ཏཐཱ ཀུརུནྡིཡཾ, མཧཱཔཙྩརིཡཉྩ. ཏཐཱ པཱལི༹ཡམྤི ‘‘ཨཛ྄ཛྷཱརཱམོ ནཱམ པརིཀྑིཏྟསྶ ཨཱརཱམསྶ ཨནྟོ ཨཱརཱམོ, ཨཔརིཀྑིཏྟསྶ ཨུཔཙཱརོ. ཨཛ྄ཛྷཱཝསཐོ ནཱམ པརིཀྑིཏྟསྶ ཨཱཝསཐསྶ ཨནྟོ ཨཱཝསཐོ, ཨཔརིཀྑིཏྟསྶ ཨུཔཙཱརོ’’ཏིཨཱདཱིསུ དིསྶཏི. མཧཱཨཊྛཀཐཱཡཾ པན ‘‘གཱམཱུཔཙཱརོ’’ཏིཨཱདཱིསུ དིསྶཏི. ཏསྨཱ དུཏིཡོ ལེཌྜུཔཱཏོ ཨུཔཙཱརོཏི ཨདྷིཔྤེཏོ.

‘‘ཨཔརིཀྑིཏྟསྶ གཱམསྶ ཨུཔཙཱརཾ ཨོཀྐམནྟསྶ ཨཱཔཏྟི པཱཙིཏྟིཡསྶཱ’’ཏི པཱལི༹ཝིསེསསམྦྷཝཏོ ཙ པཋམོ ལེཌྜུཔཱཏོ གཱམོ ཨེཝ, དུཏིཡོ གཱམཱུཔཙཱརོཏི ཝུཏྟཾ. པརིཀྑིཏྟསྶ ¶ པན གཱམསྶ ཨིནྡཁཱིལེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ གཱམཱུཔཙཱརོཏི ཝུཏྟནྟི ཨེཏྠ བྷེདོ ནཏྠི. ཨེཏྟཱཝཏཱ པརིཀྑིཏྟསྶ དུཝིདྷོ ཨུཔཙཱརོ, ཨཔརིཀྑིཏྟསྶ ཙཏུབྦིདྷོ ཨུཔཙཱརོ ཡཏྠ སམྦྷཝཏི, ཡཏྠ ཙ ན སམྦྷཝཏི, ཏཾ སབྦཾ དསྶིཏཾ ཧོཏི.

གཱམཁེཏྟསྶ ཙ གཱམསཱིམཱཡ ཙ ལཀྑཎཾ ཨཊྛཀཐཱཡམེཝ ཝུཏྟཾ. ཨུབྷཡཉྷི ཨཏྠཏོ ཨེཀཾ. ཏཏྠ གཱམསཱིམཱཡ གཱམབྷཱཝོ སཱསངྐསིཀྑཱཔདཝསེན ཝེདིཏབྦོ.

གཱམསཱིམཱུཔཙཱརོ ནཱམ མནུསྶཱནཾ ཀཊྛཏིཎཔུཔྥཕལཱདིཨཏྠིཀཱནཾ ཝནཙརཀཱནཾ ཝལཉྫནཊྛཱནཾ. ཨིམསྶ གཱམསཱིམཱུཔཙཱརབྷཱཝོ ཨུདོསིཏསིཀྑཱཔདེ, ‘‘ཨགཱམཀེ ཨརཉྙེ སམནྟཱ སཏྟབྦྷནྟརཱ’’ཏི (པཱརཱ. ༤༩༤) ཨཱགཏཊྛཱནེ ཁནྡྷཀེ (མཧཱཝ. ༡༤༧) ཙ ཝེདིཏབྦོ. ཨེཏྠ ཧི བྷགཝཱ གཱམནྟཝཱསཱིནཾ བྷིཀྑཱུནཾ སཱིམཾ དསྶེནྟོ ‘‘ཡཾ གཱམཾ ཝཱ ནིགམཾ ཝཱ ཨུཔནིསྶཱཡ ཝིཧརཏཱི’’ཏི (མཧཱཝ. ༡༤༧) ཝཏྭཱ དསྶེཏི. ཏདནནྟརམེཝ ‘‘ཨགཱམཀེ’’ཏིཨཱདིནཱ སཏྟབྦྷནྟརསཱིམཾ དསྶེཏི. ཏསྨཱ ཡོ བྷིཀྑུ གཱམཾ ཝཱ ནིགམཾ ཝཱ ཨུཔནིསྶཱཡ ན ཝིཧརཏི, ཀེཝལཾ ནཱཝཱཡཾ ཝཱ ཐལམགྒེན ཝཱ ཨདྡྷཱནམགྒཔྤཊིཔནྣོ ཧོཏི, ཏསྶ ཏཏྠ ཏཏྠ སཏྟབྦྷནྟརསཱིམཱ ལབྦྷཏཱིཏི ཝེདིཏབྦོ. ཝུཏྟཉྷི ‘‘ཨེཀཀུལསྶ སཏྠོ ཧོཏི ¶ , སཏྠེ ཙཱིཝརཾ ནིཀྑིཔིཏྭཱ པུརཏོ ཝཱ པཙྪཏོ ཝཱ སཏྟབྦྷནྟརཱ ན ཝིཛཧིཏབྦ’’ནྟིཨཱདི (པཱརཱ. ༤༨༩). ཨིདམེཝ ཨརཉྙཾ སནྡྷཱཡ ‘‘ཨཱརཉྙཀསཱིམཱཡ ཨེཀཾ ཨགཱམཀཾ ཨརཉྙ’’ནྟི ཝུཏྟཾ.

ཡཾ སནྡྷཱཡ ‘‘ཨགཱམཀེ ཨརཉྙེ ཨདྡྷཡོཛནེ ཨདྡྷཡོཛནེ ཨཱཔཏྟི པཱཙིཏྟིཡསྶཱ’’ཏི (པཱཙི. ༤༡༤) པཱལི༹ཡཾ ཝུཏྟཾ. ཨིདཾ སཾཝིདྷཱནསིཀྑཱཔདཱནཾ ཨེཀཾ ཨགཱམཀཾ ཨརཉྙཾ ནཱམ.

པུརིམེན པན སགྷརཾ སངྒཧིཏཾ, ཨིམིནཱ ཏམསངྒཧིཏནྟི. ཡཾ སནྡྷཱཡ གཎམྷཱ ཨོཧཱིཡནཱདྷིཀཱརེ ཨཊྛཀཐཱཡཾ (པཱཙི. ཨཊྛ. ༦༩༢) ‘‘ཨགཱམཀེ ཨརཉྙེཏི ཨེཏྠ ‘ནིཀྑམིཏྭཱ བཧི ཨིནྡཁཱིལཱ སབྦམེཏཾ ཨརཉྙ’ནྟི ཨེཝཾ ཝུཏྟཾ ལཀྑཎཾ ཨརཉྙཾ. ཏཾ པནེཏ ཀེཝལཾ གཱམཱབྷཱཝེན ‘ཨགཱམཀ’ནྟི ཝུཏྟཾ, ན ཝིཉྫྷཱཊཝིསདིསཏཱཡཱ’’ཏི ཝུཏྟཾ. ཡཾ སནྡྷཱཡ ‘‘ཨཱརཉྙཀཾ ནཱམ སེནཱསནཾ པཉྩདྷནུསཏིཀཾ པཙྪིམ’’ནྟི (པཱརཱ. ༦༥༤; པཱཙི. ༥༧༣) ཝུཏྟཾ. ཨིདཾ ཨཱརཉྙཀསེནཱསནཾ ནཱམ པརིཀྑིཏྟསྶ པརིཀྑེཔཏོ བཧི, ཨཔརིཀྑིཏྟསྶ པན པརིཀྑེཔོཀཱསཏོ བཧི སརུཀྑཾ ཝཱ ཨརུཀྑཾ ཝཱ ཝིཧཱརེ ཀུནྣདིསམཱཀིཎྞམྤི ཨརཉྙཾ ནཱམ. ཏཐཱ ‘‘གཎམྷཱ ཨོཧཱིཡནཀསྶ ཨེཀ’’ནྟི ཝུཏྟཾ. ཨིདཾ ཨརཉྙཾཝ. ཨིདཾ པན པུབྦེ ཨགཱམཀབྷཱཝེན ཨཱགཏཊྛཱནེ ཝུཏྟལཀྑཎམེཝ ཧུཏྭཱ ནིཀྑམིཏྭཱ བཧི ཨིནྡཁཱིལཱ དསྶནཱུཔཙཱརཝིཛཧནེ ¶ ཨེཀམེཝ ཨཱཔཏྟིཾ ཀརོཏི, ཏཏོ ཨུདྡྷཾ ཨནཱཔཏྟི. ‘‘སཾཝིདྷཱནསིཀྑཱཔདཱནཾ ཨེཀ’’ནྟི ཝུཏྟཾ པན ཨདྡྷཡོཛནེ ཨདྡྷཡོཛནེ ཨེཀེཀཾ ཨཱཔཏྟིཾ ཀརོཏི, ན ཏཏོ ཨོརཾ. ཨིཏརཱནི ཏཱིཎི ཡཐཱཝུཏྟཔརིཙྪེདཏོ ཨོརམེཝ ཏཏྠ ཝུཏྟཝིདྷིཾ ན སམྤཱདེནྟི, པརཾ སམྤཱདེནྟི. ཨེཝམེཏེསཾ ཨཉྙམཉྙནཱནཏྟཾ ཝེདིཏབྦཾ.

ཏཏྠ པཉྩཝིདྷེ གཱམེ ཡོ ‘‘པརིཀྑིཏྟསྶ གཱམསྶ ཨིནྡཁཱིལེ ཋིཏསྶ ལེཌྜུཔཱཏོ’’ཏི (པཱརཱ. ༩༢) ཝུཏྟོ, སོ ན ཀཏྠཙི ཝིནཡཔིཊཀེ ཨུཔཡོགཾ གཏོ, ཀེཝལཾ ཨཔརིཀྑིཏྟསྶ པརིཀྑེཔོཀཱསཏོ ཨཔརོ ཨེཀོ ལེཌྜུཔཱཏོ གཱམཱུཔཙཱརོ ནཱམཱཏི དཱིཔནཏྠཾ ཝུཏྟོ. པརིཀྑིཏྟསྶཔི ཙེ གཱམསྶ ཨེཀོ ལེཌྜུཔཱཏོ ཀཔྤིཡབྷཱུམིསམཱནོ ཨུཔཙཱརོཏི ཝུཏྟོ, པགེཝ ཨཔརིཀྑིཏྟསྶ པརིཀྑེཔོཀཱསཏོ ཨེཀོ. སོ པན པཱཀཊཏྟཱ ཙ ཨཛ྄ཛྷོཀཱསཏྟཱ ཙ ཨོཀྐམནྟསྶ ཨཱཔཏྟིཾ ཀརོཏི ཋཔེཏྭཱ ¶ བྷིཀྑུནིཡཱ གཱམནྟརཱཔཏྟིཾ. བྷིཀྑུནིཡོ ཧི ཏསྨིཾ དུཏིཡལེཌྜུཔཱཏསངྑཱཏེ གཱམཱུཔཙཱརེ ཝསནྟཱི ཨཱཔཏྟིཉྩ ཨཱཔཛྫནྟི, གཱམཾ པཝིསནྟཱི གཱམནྟརཱཔཏྟིཉྩ. ཏཱསཉྷི ཋིཏཊྛཱནཾ ཨརཉྙསངྑྱཾ གཙྪཏི ‘‘ཏཱཝདེཝ ཚཱཡཱ མེཏབྦཱ…པེ… ཏསྶཱ ཏཡོ ཙ ནིསྶཡེ, ཨཊྛ ཙ ཨཀརཎཱིཡཱནི ཨཱཙིཀྑེཡྻཱཐཱ’’ཏི (ཙཱུལ༹ཝ. ༤༣༠) ཝཙནཏོ. ཨརཉྙཔྤཊིསཾཡུཏྟཱནཾ སིཀྑཱཔདཱནཾ, ཝིཀཱལེགཱམཔྤཝེསནསིཀྑཱཔདསྶ (པཱཙི. ༥༠༨) ཙ བྷིཀྑུནཱིནཾ ཨསཱདྷཱརཎཏྟཱ ཙ ཨནྟརཱརཱམབྷིཀྑུནུཔསྶཡཔྤཊིཀྐམནཱདཱིནཾ ཀཔྤིཡབྷཱུམིབྷཱཝཝཙནཏོ ཙ ‘‘ཨེཀཱ གཎམྷཱ ཨོཧཱིཡེཡྻཱཏི ཨགཱམཀེ ཨརཉྙེ དུཏིཡིཀཱཡ བྷིཀྑུནིཡཱ དསྶནཱུཔཙཱརཾ ཝཱ སཝནཱུཔཙཱརཾ ཝཱ ཝིཛཧནྟིཡཱ ཨཱཔཏྟི ཐུལླཙྩཡསྶཱ’’ཏིཨཱདིསིཀྑཱཔདཔཉྙཏྟིཏོ (པཱཙི. ༦༩༢) ཙ བྷིཀྑུནིཀྑནྡྷཀནཡཨེན ཝཱ ཡསྨཱ པརིཀྑིཏྟསྶ གཱམསྶ ཨིནྡཁཱིལཏོ པཊྛཱཡ ཨཔརིཀྑིཏྟསྶ ཨུཔཙཱརཏོ པཊྛཱཡ ནཱིཡཏི, ཏཏྠ ཨནྟརགྷརེ ནིཀྑིཏྟཙཱིཝརེ སཏི ཙཏུརངྒསམོདྷཱནེན བྷིཀྑཱུ ཝསནྟི, ཏསྨཱ སགཱམཀཾ ནཱམ ཧོཏི.

ཨཝིཔྤཝཱསསཱིམཱཡ ཨེཀཾ ནཱམ ‘‘ན, བྷིཀྑཝེ, བྷིཀྑུནིཡཱ ཨརཉྙེ ཝཏྠབྦཾ, ཡཱ ཝསེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༤༣༡) ཝཙནཏོ བྷིཀྑུནཱིནཾ ཨརཉྙཝཱསོ ནཱམ ནཏྠཱིཏི སིདྡྷཾ. ཏཱཡ ཧི ཨརཉྙེ བྷིཀྑུནུཔསྶཡེ སཏི ཨནྟོཨཱཝཱསེཔི དུཏིཡིཀཱཡ དསྶནསཝནཱུཔཙཱརཾ ཝིཛཧནྟིཡཱ ཨཱཔཏྟི. ཏསྨཱ ཨཝིཔྤཝཱསསཱིམཱདྷིཀཱརེ ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི (མཧཱཝ. ༡༤༤) ཨེཏྠ ཡཾ ཋཱནཾ ཋཔིཏཾ, ཏཏྠེཝ བྷིཀྑུནུཔསྶཡོཔི ཀཔྤཏི, ན ཏཏོ པརཾ.

ཏཱསཉྩ ¶ ཨཝིཔྤཝཱསསཱིམཱཀམྨཝཱཙཱཡཾ ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི ཝཙནཾ ནཏྠཱིཏི ཀཏྭཱ ཏེསྭེཝ གཱམགཱམཱུཔཙཱརེསུ ཕརཏི. ཏཏོ པརཾ དུཏིཡེསུ ལེཌྜུཔཱཏཱདཱིསུ ཏཱསཾ ཨཀཔྤིཡབྷཱུམིཀཏྟཱ ན སམཱནསཾཝཱསཀསཱིམཱ ཨརཉྙེ ཕརཏི བྷིཀྑཱུནཾ གཱམགཱམཱུཔཙཱརཾ ཝིཡ. ཏསྨཱ ཝུཏྟཾ ‘‘བྷིཀྑུནིཡཱ ཋཔེཏྭཱ གཱམནྟརཱཔཏྟི’’ནྟི.

ཨེཝཾ ཏཱཝ པཉྩཝིདྷཾ གཱམབྷེདཾ, ཨརཉྙབྷེདཉྩ ཉཏྭཱ ཨིདཱནི ‘‘ཨཏྠི གཱམོ ན གཱམཔརིཧཱརཾ ཀཏྠཙི ལབྷཏཱི’’ཏིཨཱདིབྷེདོ ཝེདིཏབྦོ. ཏཏྠ ཡོ ཨཊྛཀཐཱཡཾ ‘‘ཨམནུསྶོ ནཱམ ཡོ སབྦསོ ཝཱ མནུསྶཱནཾ ཨབྷཱཝེན ཡཀྑཔརིགྒཧབྷཱུཏོ’’ཏི ཝུཏྟོ, སོ གཱམོ ན གཱམཔརིཧཱརཾ ཀཏྠཙི སིཀྑཱཔདེ ལབྷཏི. ཡཉྷི སནྡྷཱཡ ཨཊྛཀཐཱཡཾ ‘‘ཏཾ པནེཏཾ བུདྡྷཀཱལེ, ཙཀྐཝཏྟིཀཱལེ ¶ ཙ ནགརཾ ཧོཏི, སེསཀཱལེ སུཉྙཾ ཧོཏི ཡཀྑཔརིགྒཧིཏ’’ནྟི (པཱརཱ. ཨཊྛ. ༡.༨༤; དཱི. ནི. ཨཊྛ. ༡.༡༥༠) ཝུཏྟཾ. ཡོ པན པཊིརཱཛཙོརཱདཱིཧི ཝིལུཏྟཏྟཱ, ཀེཝལཾ བྷཡེན ཝཱ ཚཌྜིཏོ སགྷརོཝ ཨནྟརཧིཏགཱམབྷཱུཏོ, སོ ‘‘གཱམནྟརེ གཱམནྟརེ ཨཱཔཏྟི པཱཙིཏྟིཡསྶཱ’’ཏི (པཱཙི. ༡༨༣) ཝུཏྟཔཱཙིཏྟིཡཾ ཛནེཏི, ཝིཀཱལེ གཱམཔྤཝེསནཾ, སེཁིཡེ ཙཏྟཱརི ཛནེཏཱིཏི ཝེདིཏབྦཱ. ཡོ པན གཱམོ ཡཏོ ཝཱ མནུསྶཱ ཀེནཙིདེཝ ཀརཎཱིཡེན པུནཔི ཨཱགནྟུཀཱམཱ ཨེཝ ཨཔཀྐནྟཱཏི ཝུཏྟོ, ཨམནུསྶོ སོ པཀཏིགཱམསདིསོཝ.

ཨཏྠི ཨརཉྙཾ ན ཨརཉྙཔརིཧཱརཾ ཀཏྠཙི ལབྷཏཱིཏི ཨེཏྠ ‘‘ཨཛ྄ཛྷོཀཱསོ ཨེཀཱུཔཙཱརོ ནཱམ ཨགཱམཀེ ཨརཉྙེ སམནྟཱ སཏྟབྦྷནྟརཱ ཨེཀཱུཔཙཱརོ, ཏཏོ པརཾ ནཱནཱུཔཙཱརོ’’ཏི (པཱརཱ. ༤༩༤) ཨེཏྠ ཡྭཱཡཾ ནཱནཱུཔཙཱརོཏི ཝུཏྟོ, ཏཾ ཝེདིཏབྦཾ. ཡོ པན པརིཀྑིཏྟསྶ ཨེཀལེཌྜུཔཱཏསངྑཱཏོ གཱམཱུཔཙཱརནཱམཀོ གཱམོ, ཡོ ཝཱ སཏྠོ ནཱཏིརེཀཙཱཏུམཱསནིཝིཊྛོ, སོ ཨཏྠི གཱམོ ན གཱམཀིཙྩཾ ཀརོཏི. ན ཧི ཏཾ ཋཱནཾ ཨོཀྐམནྟོ གཱམཔྤཝེསནཱཔཏྟིཾ ཨཱཔཛྫཏི. ཡཾ པན གཱམསཱིམཱཡ པརིཡཱཔནྣཾ མནུསྶཱནཾ ཝལཉྫནཊྛཱནབྷཱུཏཾ ཨརཉྙཾ, ཏཾ ཨཏྠི ཨརཉྙཾ ན ཨརཉྙཀིཙྩཾ ཀརོཏི ནཱམ. ན ཧི ཏཏྠ ཨཱརཉྙཀསཱིམཱ ལབྦྷཏཱིཏི. ཨེཏྟཱཝཏཱ ‘‘གཱམཱ ཝཱ ཨརཉྙཱ ཝཱ’’ཏི ཨིམིསྶཱ ཨནུཔཉྙཏྟིཡཱ ལཀྑཎཱནུཔཉྙཏྟིབྷཱཝོ དསྶིཏོ ཧོཏི.

‘‘གོནིསཱདིནིཝིཊྛོཔི གཱམོ’’ཏི ཨེཏྠ སཙེ ཏསྶ གཱམསྶ གཱམཁེཏྟཔརིཙྪེདོ ཨཏྠི, སབྦོཔི ཨེཀོ གཱམོ. ནོ ཙེ, ཨུཔཙཱརེན ཝཱ པརིཀྑེཔེན ཝཱ པརིཙྪིནྡིཏབྦོ. སཙེ གཱམཁེཏྟེ སཏི ཀཱནིཙི ཏཱནི གྷརཱནི ཨཉྙམཉྙཨུཔཙཱརཔྤཧོནཀཾ ཋཱནཾ ཨཏིཀྐམིཏྭཱ དཱུརེ དཱུརེ ཀཏཱནི ཧོནྟི, ཝིཀཱལེ གཱམཔྤཝེསེ ཨུཔཙཱརོཝ པམཱཎཾ. ཨནྟརགྷརཔྤཊིསཾཡུཏྟེསུ སེཁིཡེསུ, ¶ བྷིཀྑུནིཡཱ གཱམནྟརཱཔཏྟཱིསུ ཙ གྷརཱནཾ པརིཀྑེཔཱརཧཊྛཱནཾ པམཱཎཾ, ཨུཔོསཐཱདིཀམྨཱནཾ གཱམཁེཏྟཾ པམཱཎཾ, ཨཱརཉྙཀསེནཱསནསྶ ཨཱསནྣགྷརསྶ དུཏིཡལེཌྜུཔཱཏཏོ པཊྛཱཡ པཉྩདྷནུསཏནྟརཏཱ པམཱཎནྟི ཨེཝཾ ནོ པཊིབྷཱནནྟི ཨཱཙརིཡཱ.

‘‘ཡམྤི ཨེཀསྨིཾཡེཝ གཱམཁེཏྟེ ཨེཀཾ པདེསཾ ‘ཨཡམྤི ཝིསུཾགཱམོ ཧོཏཱུ’ཏི པརིཙྪིནྡིཏྭཱ རཱཛཱ ཀསྶཙི དེཏི, སོཔི ཝིསུཾགཱམསཱིམཱ ཧོཏིཡེཝཱ’’ཏི ¶ (མཧཱཝ. ཨཊྛ. ༡༤༧) ཨཊྛཀཐཱཝཙནཏོ ཏཾ པཝིསནྟིཡཱ བྷིཀྑུནིཡཱ གཱམནྟརཱཔཏྟི ཧོཏི ཨེཝ. སཙེ ཏཏྠ ཝིཧཱརོ ཝཱ དེཝཀུལཾ ཝཱ སབྷཱ ཝཱ གེཧཾ ཝཱ ནཏྠི, ཀེཝལཾ ཝཏྠུམཏྟཀམེཝ ཧོཏི, གཱམོཏི ཝིནཡཀམྨཾ སབྦཾ ཏཏྠ ཀཔྤཏི. ‘‘ཨམནུསྶོ གཱམོ’’ཏི ཧི ཝུཏྟཾ. ཏཉྩ ཋཱནཾ ཨིཏརསྶ གཱམསྶ པརིཀྑེཔབྦྷནྟརེ ཝཱ ཨུཔཙཱརབྦྷནྟརེ ཝཱ ཧོཏི, ཝིཀཱལེ གཱམཔྤཝེསནཾ ཨཱཔུཙྪིཏྭཱཝ གནྟབྦཾ. ནོ ཙེ, ཨརཉྙཾ ཝིཡ ཡཐཱསུཁཾ གནྟབྦཾ. ཏཏྠ ཙེ ཨཱརཱམོ ཝཱ ཏིཏྠིཡསེཡྻཱདཱིསུ ཨཉྙཏརོཝཱ ཧོཏི, ལདྡྷཀཔྤམེཝ. བྷིཀྑུནུཔསྶཡོ ཙེ ཧོཏི, གཱམཾ པིཎྜཱཡ པཝིསནྟིཡཱ བྷིཀྑུནིཡཱ གཱམནྟརཱཔཏྟི པརིཧརིཏབྦཱ. ‘‘ཨརཉྙཾ ནཱམ ཋཔེཏྭཱ གཱམཉྩ གཱམཱུཔཙཱརཉྩ ཨཝསེསཾ ཨརཉྙཾ ནཱམཱ’’ཏི (པཱརཱ. ༩༢) ཨེཏྠ པརིཀྑེཔེ སཏི ཡཐཱཝུཏྟཔརིཙྪེདཾ གཱམམེཝ ཋཔེཏྭཱ ཨཝསེསཾ ཏསྶ ཨུཔཙཱརཾ, ཏཏོ པརཉྩ ཨརཉྙཾ ནཱམ, པརིཀྑེཔེ ཨསཏི ཡཐཱཝུཏྟཔརིཙྪེདཾ གཱམཱུཔཙཱརམེཝ ཋཔེཏྭཱ ཏཏོ པརཾ ཨཝསེསཾ ཨརཉྙཾ ནཱམཱཏི ཨདྷིཔྤཱཡོ. ཨེཝཾ སཏི ‘‘ནིཀྑམིཏྭཱ བཧི ཨིནྡཁཱིལཱ སབྦམེཏཾ ཨརཉྙ’’ནྟི (ཝིབྷ. ༥༢༩) ཝུཏྟལཀྑཎེ ཨགཱམཀེ ཨརཉྙེ གཎམྷཱཨོཧཱིཡནཱཔཏྟི, ཏཏྠ ཨཝིཔྤཝཱསསཱིམཱཡ ཕརཎཾ ཝིཀཱལེ གཱམཔྤཝེསནཱཔཏྟིཡཱ ཨནཱཔཏྟཱིཏི ཨེཝམཱདིཝིནཡཝིདྷི སམེཏི, ཨཉྙཐཱ ན སམེཏི.

‘‘ཋཔེཏྭཱ གཱམཱུཔཙཱརཾ ཨཝསེསཾ ཨརཉྙཾ ནཱམཱ’’ཏི (མཧཱཝ. ༡༤༤) ཝུཏྟེ གཱམཱུཔཙཱརཏོ པརོ ཨརཉྙནྟི སིདྡྷེ ‘‘ཋཔེཏྭཱ གཱམ’’ནྟི ཝིསེསཏྠོ ན དིསྶཏི, གཱམསྶ པན ཨརཉྙབྷཱཝཔྤསངྒབྷཡཱ ཝུཏྟནྟི ཙེ? ན, གཱམཱུཔཙཱརསྶ ཨབྷཱཝཔྤསངྒཏོ. སཏི ཧི གཱམེ གཱམཱུཔཙཱརོ ཧོཏི, སོ ཙ ཏཝ མཏེན ཨརཉྙབྷཱུཏོ. ཀུཏོ དཱནི གཱམཱུཔཙཱརོ. གཱམཱུཔཙཱརོཔི ཙེ ཨརཉྙསངྑྱཾ གཙྪཏི, པརོཝ གཱམོཏི ཀཏྭཱ ན ཡུཏྟཾ གཱམསྶ ཨརཉྙབྷཱཝཔྤསངྒཏོ ཙ. ཏསྨཱ ‘‘གཱམཱ ཝཱ ཨརཉྙཱ ཝཱ’’ཏི ཨེཏྠ གཱམཱུཔཙཱརོཔི ‘‘གཱམོ’’ ཏྭེཝ སངྒཧིཏོ. ཏསྨཱ གཱམསྶ ཨརཉྙབྷཱཝཔྤསངྒོ ན ཡུཛྫཏི. ཡདི ཨེཝཾ ‘‘ཋཔེཏྭཱ གཱམཾ ཨཝསེསཾ ཨརཉྙཾ ནཱམཱ’’ཏི ཨེཏྟཀཾ ཝཏྟབྦནྟི ཙེ? ན, ཨརཉྙསྶ པརིཙྪེདཛཱནནཔྤསངྒཏོ. ཏཐཱ ཧི ཝུཏྟོ ‘‘ཨརཉྙཔརིཙྪེདོ ན པཉྙཱཡཏཱི’’ཏི ནོ ལདྡྷི. གཱམཱུཔཙཱརཔརིཡནྟོ ཧི ཨིདྷ གཱམོ ནཱམ. ཡདི ཨེཝཾ ‘‘གཱམསྶ ཙ ཨརཉྙསྶ ཙ པརིཙྪེདདསྶནཏྠཾ ཝུཏྟ’’ནྟི ཨཊྛཀཐཱཡཾ ཝཏྟབྦཾ, ‘‘ཨརཉྙསྶ ¶ པརིཙྪེདདསྶནཏྠཾ ཝུཏྟ’’ནྟི ཀིམཏྠཾ ¶ ཝུཏྟནྟི ཙེ? ཝུཙྩཏེ – ཨཊྛཀཐཱཙརིཡེན པཋམགཱམཱུཔཙཱརཾཡེཝ སནྡྷཱཡ ཝུཏྟཾ ‘‘ཨརཉྙཔརིཙྪེདདསྶནཏྠ’’ནྟི སབྦསིཀྑཱཔདེ ཧི བཱཧིརཨིནྡཁཱིལཏོ པཊྛཱཡ གཱམཱུཔཙཱརཾ ཨརཉྙཾ ནཱམ. གཱམཔརིཙྪེདཝཙནེ པཡོཛནཾ པནེཏྠ ནཏྠི པརིཀྑེཔེནེཝ པཱཀཊབྷཱུཏཏྟཱ. དུཏིཡགཱམཱུཔཙཱརོཝ གཱམསྶ པརིཙྪེདདསྶནཏྠཾ ཝུཏྟོ པརིཀྑེཔབྷཱཝེན ཨཔཱཀཊཏྟཱ. ཏཏྠ པཋམགཱམཱུཔཙཱརོ ཙེ ཨརཉྙཔརིཙྪེདདསྶནཏྠཾ ཝུཏྟོ, ཏཏྠ ན ཝཏྟབྦོ. ‘‘ནིཀྑམིཏྭཱ ཨིནྡཁཱིལཱ སབྦམེཏཾ ཨརཉྙ’’ནྟི ཝཏྟབྦཾ. ཨེཝཾ སནྟེ སུབྱཏྟཏརཾ ཨརཉྙཔརིཙྪེདོ དསྶིཏོ ཧོཏི, མིཙྪཱགཱཧོ ཙ ན ཧོཏི.

‘‘མཛ྄ཛྷིམསྶ པུརིསསྶ ལེཌྜུཔཱཏོ’’ཏི ཧི ཝུཏྟེ ཨཡཾ གཱམཱུཔཙཱརོཝ ཨརཉྙཾ གཱམཱུཔཙཱརསྶ ཝིབྷངྒཏྟཱ. ཡདི ཨརཉྙཔརིཙྪེདདསྶནཏྠཾ ཝུཏྟཾ, ཨཝུཏྟཀམེཝ, ཨརཉྙཏོ པརནྟི ཙ མིཙྪཱགཱཧོ ཧོཏཱིཏི ཙེ, ནནུ ཝུཏྟཾ ‘‘པཋམམེཝ ཨིདཾ པརིཀྑིཏྟསྶ གཱམསྶ ཨུཔཙཱརནིཡམནཏྠཾ ཝུཏྟ’’ནྟི? ཨརཉྙཔརིཙྪེདདསྶནཏྠཾ ཀིཉྩཱཔི ‘‘གཱམཱུཔཙཱརོ’’ཏིཨཱདི ཨཱརདྡྷཾ, ཨིནྡཁཱིལེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོཏི པན ཨེཝཾ ཝཙནཔྤཡོཛནཾ. ཨཔརིཀྑིཏྟསྶ ཙ གཱམསྶ ཡྭཱཡཾ ལེཌྜུཔཱཏོ ཨུཔཙཱརོ’’ཏི མཧཱཨཊྛཀཐཱཡཾ ཝུཏྟོ, ཏསྶ ནིཡམནནྟི ཝུཏྟཾ ཧོཏི. ཀཐཾ པཉྙཱཡཏཱིཏི ཙེ? ‘‘ཨརཉྙཾ ནཱམཱ’’ཏི པདཾ ཨནུདྡྷརིཏྭཱ ‘‘གཱམཱུཔཙཱརོ ནཱམཱ’’ཏི ཨུདྡྷརཎསྶ ཀཏཏྟཱ. ཏཏྠ ‘‘གཱམཱུཔཙཱརོ ནཱམཱ’’ཏི མཱཏིཀཱཡཾ ཨཝིཛྫམཱནཾ པདཾ ཨུདྡྷརནྟོ ཏཡོ ཨཏྠཝསེ དསྶེཏི. སེཡྻཐིདཾ – ཨརཉྙཔརིཙྪེདདསྶནམེཀོ ཨཏྠོ, ཨཔརིཀྑིཏྟསྶ གཱམསྶ ཨུཔཙཱརེན སདྡྷིཾ པརིཙྪེདདསྶནམེཀོ, ན ཀེཝལཾ ཨཔརིཀྑིཏྟསྶཡེཝ ཨུཔཙཱརོ ཝིནཡཱདྷིཀཱརེ སཔྤཡོཛནོ དསྶིཏབྦོ, ནིཔྤཡོཛནོཔི པརིཀྑིཏྟསྶ ཨུཔཙཱརོ ཨིམིནཱ པརིཡཱཡེན ལབྦྷཏཱིཏི ཨནུསངྒཔྤཡོཛནམེཀོ ཨཏྠོཔི ཝེདིཏབྦོ.

‘‘ཨཔརིཀྑིཏྟསྶ གཱམསྶ གྷརཱུཔཙཱརེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ’’ཏི ཨིདཾ བྷགཝཱ ཏཡོ ཨཏྠཝསེ པཊིཙྩ ཨབྷཱསི. སེཡྻཐིདཾ – ཨཔརིཀྑིཏྟསྶ གཱམསྶ པརིཙྪེདདསྶནམེཀོ, ཨཝིཔྤཝཱསསཱིམཱདྷིཀཱརེ ཨཡམེཝ གཱམཱུཔཙཱརོཏི དསྶནམེཀོ, ཏཏྠ ཋིཏསྶ དུཏིཡོ ལེཌྜུཔཱཏོ སབྦཏྠ གཱམཔྤཊིསཾཡུཏྟེསུ སིཀྑཱཔདེསུ སཀིཙྩཀོ ཨུཔཙཱརོཏི དསྶནམེཀོཏི ཨེཝཾ བྷགཝཱ ཨཏྟནོ དེསནཱཝིལཱསཔྤཏྟིཡཱ ཨེཀེཀཔདུདྡྷཱརཎེན ཏཡོ ཨཏྠཝསེ དསྶེཏཱིཏི ཝེདིཏབྦཾ.

ཏཐཱ ¶ ཨཝིཔྤཝཱསསཱིམཱཀམྨཝཱཙཱཡ ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི (མཧཱཝ. ༡༤༤) ཨེཏྠཱཔི ¶ པརིཀྑེཔེ སཏི གཱམཾ ཋཔེཏྭཱ, ཨསཏི གཱམཱུཔཙཱརཾ ཋཔེཏྭཱཏི ཨཏྠོ. པརིཀྑིཏྟསྶ, ཨཔརིཀྑིཏྟསྶ ཙ མཛ྄ཛྷེ ཨཱརཱམེ ཨཝིཔྤཝཱསསཱིམཱསམྨནྣནཀཱལེ ཨཡཾ ནཡོ ཨཏིཝིཡ ཡུཛྫཏི. ཨུབྷཡཔརིཝཛྫནཏོ པུབྦེ ཝུཏྟནཡེན ཝཱ ཨུབྷཡཏྠ ཨུབྷཡཾ ལབྦྷཏེཝ. ‘‘ཨནྟརཱརཱམེསུ པན ཨཱཙིཎྞཀཔྤཱ བྷིཀྑཱུ ཨཝིཔྤཝཱསསཱིམཾ སམྨནྣནྟཱི’’ཏི གཎྛིཔདེ ཝུཏྟཾ. ‘‘ཨནྟརགྷརཔྤཊིསཾཡུཏྟཱནཾ སེཁིཡཱནཾ ཨནྟརཱརཱམེསུ ཨསམྦྷཝཏོ ཨནྟརཱརཱམོ ན གཱམསངྑཾ གཙྪཏི, ཏསྨཱ ཏཏྠཔི ཨཝིཔྤཝཱསསཱིམཱ རུཧཏེཝཱ’’ཏི ཨེཀེ. ཏེ བྷིཀྑཱུ དུཏིཡསྶ གཱམཱུཔཙཱརསྶ གཱམསངྑཱསབྷཱཝཏོ ཏཱསཾ ཨིམཱཡ དུཏིཡཱཡ ཨཝིཔྤཝཱསཀམྨཝཱཙཱཡ ཨབྷཱཝཾ དསྶེཏྭཱ པཊིཀྑིཔིཏབྦཱ. ཨཛ྄ཛྷཱརཱམོ པན གཱམོཔི སམཱནོ ཏིཏྠིཡསེཡྻཱདི ཝིཡ ཀཔྤིཡབྷཱུམཱིཏི ཝེདིཏབྦོ.

ཨཱཔཏྟིཡཱ པརིཙྪེདཾ, ཏཐཱནཱཔཏྟིཡཱཔི ཙ;

དསྶེཏུཾ གཱམསམྦནྡྷ-སིཀྑཱཔདཝིབྷཱཝནེ.

གཱམགཱམཱུཔཙཱརཱ དྭེ, དསྶིཏཱ ཨིདྷ ཏཱདིནཱ;

སཱིམཱ སཱིམཱུཔཙཱརཱ ཏུ, ཨནེཀནྟཱཏི ནུདྡྷཊཱ.

ཨུཔཙཱརཱ ཙ དྭེ ཧོནྟི, བཱཧིརབྦྷནྟརབྦསཱ;

པརིཀྑིཏྟཱཔརིཀྑིཏྟ-བྷེདཱ ཙེ ཙཏུརོ སིཡུཾ.

ཨཡཉྷི ཨུཔཙཱརསདྡོ ཝིནཡཔིཊཀེ ‘‘ཨནུཛཱནཱམི, བྷིཀྑཝེ, ཨགིལཱནེནཔི ཨཱརཱམེ ཨཱརཱམཱུཔཙཱརེ ཚཏྟཾ དྷཱརེཏུ’’ནྟི (ཙཱུལ༹ཝ. ༢༧༠) ཨེཝམཱདཱིསུ བཱཧིརེ ཨུཔཙཱརེ དིསྶཏི. བཱཧིརོ ཨུཔཙཱརོ ནཱམ པརིཀྑེཔཏོ, པརིཀྑེཔཱརཧཊྛཱནཏོ ཝཱ ཨེཀོ ལེཌྜུཔཱཏོ. ‘‘ཨཛ྄ཛྷཱརཱམོ ནཱམ པརིཀྑིཏྟསྶ ཨཱརཱམསྶ ཨནྟོཨཱརཱམོ, ཨཔརིཀྑིཏྟསྶ ཨུཔཙཱརོ. ཨཛ྄ཛྷཱཝསཐོ ནཱམ པརིཀྑིཏྟསྶ ཨཱཝསཐསྶ ཨནྟོཨཱཝསཐོ, ཨཔརིཀྑིཏྟསྶ ཨུཔཙཱརོ’’ཏིཨཱདཱིསུ (པཱཙི. ༥༠༦) པན ཨུཔཙཱརསདྡོ ཨབྦྷནྟརེ ཨུཔཙཱརེ དིསྶཏི. ཨབྦྷནྟརོ ཨུཔཙཱརོ ཙ ནཱམ པརིཀྑེཔོ, པརིཀྑེཔཱརཧཊྛཱནཉྩ ཧོཏི. ཨིདྷ པན པརིཀྑེཔོ ‘‘ཨཛ྄ཛྷཱརཱམོ, ཨཛ྄ཛྷཱཝསཐོ’’ཏི ཝཱ ན ཝུཙྩཏི, ཨནྟོ ཨེཝ ཨཱརཱམོ, ཨཱཝསཐོཏི ཝཱ. ཏེསུ བཱཧིརབྦྷནྟརབྷེདབྷིནྣེསུ དྭཱིསུ ཨུཔཙཱརེསུ ཨཝིཔྤཝཱསསཱིམཱདྷིཀཱརེ ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི (མཧཱཝ. ༡༤༤) ཨེཏྠ གཱམཱུཔཙཱརོ ནཱམ ཨབྦྷནྟརཱུཔཙཱརོ ¶ ཨདྷིཔྤེཏོ, ན བཱཧིརོ. བྷིཀྑུནིཡཱ ཨརཉྙསཉྙིཏཏཱཡ ཏསྶ བཱཧིརསྶ, ཏསྶཱ གཱམནྟརཱཔཏྟིཡཱ ཋཱནབྷཱུཏཏྟཱ ཙ ཨབྦྷནྟརཨུཔཙཱརསྶཱཏི ¶ ཨིདམེཏྠ ཀཱརཎདྭཡཾ ཝེདིཏབྦཾ. ཏཏྠ ཨིདྷ ཨདིནྣཱདཱནཔཱརཱཛིཀཝིབྷངྒེཡེཝ པཋམོ གཱམཱུཔཙཱརོ དསྶིཏོ, སོ བཱཧིརོ, དུཏིཡོ ཨབྦྷནྟརོཏི ཝེདིཏབྦོ. པཋམེན ཙ ཨཔརིཀྑིཏྟསྶ གཱམསྶ དུཏིཡལེཌྜུཔཱཏསངྑཱཏོ བཱཧིརོ ཨུཔཙཱརོ, དུཏིཡེན ཙ པརིཀྑིཏྟསྶ གཱམསྶ པརིཀྑེཔཏོ བཱཧིརསངྑཱཏོ ཨབྦྷནྟརོ ཨུཔཙཱརོ ལེསེན དསྶིཏོཏི ཝེདིཏབྦོ. ཨེཝཾ ཙཏྟཱརོཔི ཨུཔཙཱརཱ ཨིདྷ བྷགཝཏཱ དེསནཱཝིལཱསཔྤཏྟེན དེསནཱལཱིལཱཡ དསྶིཏཱ ཧོནྟཱིཏི ཨཡཾ ནཡོ སུཊྛུ ལཀྑེཏྭཱ ཨཱཙརིཡེཧི སམྨནྟཡིཏྭཱ ཡཐཱནུརཱུཔཾ ཏཏྠ ཡོཛེཏབྦོ. ཨིཏརཐཱ –

ཨསམྦུདྷཾ བུདྡྷམཧཱནུབྷཱཝཾ;

དྷམྨསྶ གམྦྷཱིརནཡཏྟཏཉྩ;

ཡོ ཝཎྞཡེ ནཾ ཝིནཡཾ ཨཝིཉྙཱུ;

སོ དུདྡསོ སཱསནནཱསཧེཏུ.

པཱལི༹ཾ ཏདཏྠཉྩ ཨསམྦུདྷཉྷི;

ནཱསེཏི ཡོ ཨཊྛཀཐཱནཡཉྩ;

ཨནིཙྪཡཾ ནིཙྪཡཏོ པརེཧི;

གཱམོཏི ཏེཡེཝ པུརཀྑཏོ སོ.

ཨནུཀྐམེནེཝ མཧཱཛནེན;

པུརཀྑཏོ པཎྜིཏམཱནི བྷིཀྑུ;

ཨཔཎྜིཏཱནཾ ཝིམཏིཾ ཨཀཏྭཱ;

ཨཱཙརིཡལཱིལཾ པུརཏོ ཀརོཏི.

ཏཏྠ ཧི པཱལི༹ཡཾ ‘‘གཱམསྶ ཨུཔཙཱརོ གཱམཱུཔཙཱརོ, གཱམསངྑཱཏོ ཨུཔཙཱརོ གཱམཱུཔཙཱརོ ནཱམཱ’’ཏི ཨུདྡྷརིཏྭཱ གཱམསྶ ཨུཔཙཱརཾ དསྶེནྟོ ‘‘ཨིནྡཁཱིལེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ’’ཏི (པཱརཱ. ༩༢) ཝཏྭཱ པུན གཱམསངྑཱཏཾ ཨུཔཙཱརཾ དསྶེནྟོ ‘‘གྷརཱུཔཙཱརེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ’’ཏི ཝུཏྟཾ. ཨིམམཏྠཾ སནྡྷཱཡ ཝིཀཱལེ གཱམཔྤཝེསནགཱམནྟརཨཨཔྤཝཱསསམྨུཏིཨཱདཱིསུ པརིཀྑེཔཱརཧཊྛཱནམེཝ གཱམཱུཔཙཱརནྟི ཝུཏྟནྟི ལིཁིཏཾ.

ཨཏྠཏོ ¶ ཨེཀནྟི ཨེཏྠ སངྑཱསདྡཾ སངྑཱཏསདྡེན སམཱནཡཏི. ‘‘ཨཱདིཡེཡྻཱ’’ཏི ཨིདཾ པཉྩཝཱིསཏིཡཱ ཨཝཧཱརཱནཾ སཱདྷཱརཎཔདཾ. ཋཱནཱཙཱཝནཝསེན ཙ ཁཱིལཱདཱིནི སངྐཱམེཏྭཱ ཁེཏྟཱདིགྒཧཎཝསེན ¶ ཙཱཏི ཨཏྠོ. ཋཱནཱཙཱཝནེ ཡཐཱ སཱམིཀསྶ དྷུརནིཀྑེཔཱདིཾ ཨནོལོཀེཏྭཱཝ ཨཱཔཏྟི, ཏཐཱ ཨིཧཱཔཱིཏི གཧེཏབྦཱ.

‘‘ཨསུཀཾ ནཱམ བྷཎྜཾ ཨཝཧརིསྶཱམཱི’’ཏི སབྦེསཾ ཨེཀཱསཡཏྟཱ ‘‘ཨེཀེནཱཔཱི’’ཏི ཝུཏྟཾ. ཡདི ཨཱཎཏྟི ཨིཙྪིཏབྦཱ, སཾཝིདྷཱཝཧཱརོ ནཱམ ཨེཀོ ཨཝཧཱརོ པརིཧཱཡིཏབྦོ.

ཨོཀཱསཔརིཀཔྤེ ཋཱནཱཙཱཝནཱཡ གཧིཏམྤི ཨོཀཱསཔརིཀཔྤིཏཏྟཱ རཀྑཏི. ཨོཀཱསཱཏིཀྐམོཝ པམཱཎཾ པུབྦེ ཨསུདྡྷཙིཏྟེན གཧིཏཏྟཱ. ཨིདཱནི སུདྡྷཙིཏྟེན གཧིཏེཔི ཧོཏི ཨེཝཱཏི ཝདནྟི, ཏཾ ན སུནྡརཾ. ཨེཏྠ པན ཝིནིཙྪཡོ སམནྟཔཱསཱདིཀཾ ཨོལོཀེཏྭཱ གཧེཏབྦོ.

ཨུདྡྷཱརོ ནཏྠཱིཏི ཋཱནཱཙཱཝནཾ ནཏྠཱིཏི ཨཏྠོ.

ཨུདྡྷཏམཏྟེ ཨཝཧཱརོ སཀལསྶ པཡོགསྶ ནིཊྛཱཔིཏཏྟཱ, ན ཨཏྠསཱདྷཀཝསེན. ཨུདྡྷཱརེཡེཝ རཀྑཏཱིཏི ཨེཏྠ ཨེཝ-སདྡེན པཱཏནེ ན རཀྑཏཱིཏི ཨཏྠེ སིདྡྷེཔི ཨཏྠསཱདྷཀཝསེན ཨཏྠཾ དསྶེཏུཾ ‘‘ཏཾ ཨུདྡྷརིཏྭཱ’’ཏིཨཱདི ཝུཏྟཾ.

‘‘པཐབྱཱརཱཛཔདེསརཱཛཱདཡོ བཧཱུ, ཏེསཾ སངྒཎྷནཏྠཾ ‘རཱཛཱནོ’ཏི བཧུཝཙནཾ ཝུཏྟ’’ནྟི ལིཁིཏཾ. ཀིཉྩཱཔི བཧུཝཙནཾ ཀཏཾ, ཨིདཾ པན ཨེཀཾ བིམྦིསཱརམེཝཱཏི དཊྛབྦཾ. རཱཛཱནོཏི ཀིཉྩི ཨནིདྡིསིཏྭཱ སཱདྷཱརཎཝསེན ཀིཉྩཱཔི ཝུཏྟཾ, ཨིདཾ པན བིམྦིསཱརམེཝཱཏི.

པུབྦཔྤཡོགེཏི ཨེཏྠ གམནཀཱལེ མགྒསོདྷནཱདྷིཀརཎེ ཨཔཱཙིཏྟིཡཁེཏྟེ དུཀྐཊཾ, ལཏཱཙྪེདནཱདཱིསུ པཱཙིཏྟིཡམེཝ. གནྟྭཱ པན ཀུམྦྷིམཏྠཀེ ཛཱཏལཏཱདིཙྪེདནེ སཧཔཡོགཏྟཱ དུཀྐཊཾ. ‘‘ཨེཀབྷཎྜེ ཨེཝཾ བྷཱརིཡམིདཾ, ‘ཏྭམྤི ཨེཀཔསྶཾ གཎྷ, ཨཧམྤི ཨེཀཔསྶཾ གཎྷཱམཱི’ཏི སཾཝིདཧིཏྭཱ ཨུབྷཡེསཾ པཡོགེན ཋཱནཱཙཱཝནེ ཀཏེ ཀཱཡཝཱཙཱཙིཏྟེཧི སམུཊྛཱཏི. ཨཉྙཐཱ སཱཧཏྠིཀཾ ཝཱ ཨཱཎཏྟིཀསྶ ཨངྒཾ ན ཧོཏི ¶ , ཨཱཎཏྟིཀཾ ཝཱ སཱཧཏྠིཀསྶཱཏི ཝུཏྟལཀྑཎེན ཝིརུཛ྄ཛྷཏཱི’’ཏི ཝིནཡགཎྛིཔདེ ལིཁིཏཾ. པི-སདྡོ པནེཏྠ ཏཏྠེཝ ལིཁིཏོ.

ཀཱཡཝཱཙཱསམུཊྛཱནཾ, ཡསྶཱ ཨཱཔཏྟིཡཱ སིཡཱ;

ཏཏྲ ཝཱཙངྒཾ ཙིཏྟཾཝ, ཀམྨཾ ནསྶཱ ཝིདྷཱིཡཏི.

ཀིརིཡཱཀིརིཡཱདིཀཾ ¶ ཡཉྩེ, ཡམྤི ཀམྨཏྟཡཾ བྷཝེ;

ན ཡུཏྟཾ ཏཾ ཝིརུདྡྷཏྟཱ, ཀམྨམེཀཾཝ ཡུཛྫཏཱིཏི. (ཝཛིར. ཊཱི. པཱརཱཛིཀ ༡༣༡ པཀིཎྞཀཀཐཱཝཎྞནཱ);

དུཏིཡཔཱརཱཛིཀཝཎྞནཱ ནིཊྛིཏཱ.

༣. ཏཏིཡཔཱརཱཛིཀཝཎྞནཱ

ཡཐཱ ཉཱཏཔརིཉྙཱ དྷམྨཱནཾ སབྷཱཝཛཱནནམེཝ ‘‘ཨིདཾ རཱུཔཾ, ཨཡཾ ཝེདནཱ’’ཏི, ཏཱིརཎཔརིཉྙཱ པན དྷམྨསབྷཱཝེན སདྡྷིཾ ཨནིཙྩཱདིཝསེན པཝཏྟམཱནཾ ‘‘རཱུཔཾ ཨནིཙྩནྟི ཝཱ’’ཏིཨཱདི, ཨེཝམིདྷ སདྡྷིཾ ཙེཏེཏྭཱ ཨེཀཏྟེནཱཔི པཱཎཱཏིཔཱཏཱབྷཱཝཱ ‘‘ཛཱིཝིཏཱ ཝོརོཔེཡྻཱ’’ཏི ཝུཏྟཾ. ‘‘མནུསྶཝིགྒཧ’’ནྟི ཝུཏྟཏྟཱ གབྦྷསེཡྻཀཱནཾ ཝསེན སབྦསུཁུམཨཏྟབྷཱཝཏོ པཊྛཱཡ དསྶེཏུཾ ‘‘ཀལལཏོ པཊྛཱཡཱ’’ཏི ཨཱཧ. ཨེཏྠ ཛཱིཝིཏཱ ཝོརོཔེནྟོ པཙྩུཔྤནྣཏོ ཝིཡོཛེཏི. ཏཏྠ ཁཎཔཙྩུཔྤནྣཾ ན སཀྐཱ ཝོརོཔེཏུཾ, སནྟཏིཔཙྩུཔྤནྣཾ ཝཱ ཨདྡྷཱཔཙྩུཔྤནྣཾ ཝཱ སཀྐཱ. ཀཐཾ? ཏསྨིཉྷི ཨུཔཀྐམེ ཀཏེ ལདྡྷཱུཔཀྐམཾ ཛཱིཝིཏདསཀཾ ནིརུཛ྄ཛྷམཱནཾ དུབྦལསྶ པརིཧཱིནཝེགསྶ པཙྩཡོ ཧོཏི. སནྟཏིཔཙྩུཔྤནྣཾ ཡཐཱ དྭེ ཏཡོ ཛཝནཝཱརེ ཛཝིཏྭཱ ནིརུཛ྄ཛྷཏི, ཨདྡྷཱཔཙྩུཔྤནྣཉྩ ཏདནུརཱུཔཾ ཀཏྭཱ ནིརུཛ྄ཛྷཏི, ཏཐཱ པཙྩཡོ ཧོཏི. ཏཏོ སནྟཏིཔཙྩུཔྤནྣཾ ཝཱ ཨདྡྷཱཔཙྩུཔྤནྣཾ ཝཱ ཡཐཱཔརིཙྪིནྣཀཱལཾ ཨཔཏྭཱ ཨནྟརཱཝ ནིརུཛ྄ཛྷཏི. ཨེཝཾ ཏདུབྷཡམྤི ཝོརོཔེཏུཾ སཀྐཱ. ཏསྨཱ པཙྩུཔྤནྣཾ ཝིཡོཛེཏི.

‘‘ཨིམསྶ པནཏྠསྶཱ’’ཏི ཝོཧཱརཝསེན ཝུཏྟམཏྠཾ པརམཏྠཝསེན ཨཱཝིབྷཱཝཏྠཾ ‘‘པཱཎོ ཝེདིཏབྦོ’’ཏིཨཱདི ཝུཏྟཾ. ཀཱཡཝིཉྙཏྟིསཧིཏཱཡ ཙེཏནཱཡ པཡུཛྫཏཱིཏི པཡོགོ, ཀོ སོ? སརཱིརེ སཏྠཱདཱིནཾ གམནཾ པཧརཎནྟི ཀཱཡཝཙཱིཝིཉྙཏྟིསཧིཏཱཡ ཙེཏནཱཡ པརསརཱིརེ སཏྠཔཱཏནཾ. དཱུརེ ཋིཏནྟི དཱུརེ ཝཱ ཏིཊྛཏུ, སམཱིཔེ ཝཱ. ཧཏྠཏོ ¶ མུཏྟེན པཧཱརོ ནིསྶགྒིཡོ. ཏཏྠཱཏི ནིསྶགྒིཡཔྤཡོགེ. ཡོ ཀོཙི མརཏཱུཏི ཨེཏྠ མཧཱཛནསམཱུཧེ ན སཀྐཱ. ཡསྶཱུཔརི སརོ པཏཏི, ཏསྶེཝ ཛཱིཝིཏམརཎཾ ཀཱཏུཾ, ན ཡསྶ ཀསྶཙི ཛཱིཝིཏམརཎཾ. ཨཱཎཱཔནནྟི ཝཙཱིཝིཉྙཏྟིསཧིཏཱཡ ཙེཏནཱཡ ཨདྷིཔྤེཏཏྠསཱདྷནཾ. ཏེནེཝ ‘‘སཱཝེཏུཀཱམོ ན སཱཝེཏཱི’’ཏི (པཱརཱ. ༥༤) ཝུཏྟཾ. ཨཱཎཏྟིནིཡཱམཀཱཏི ཨཱཎཏྟིཀཔྤཡོགསཱདྷིཀཱ. ཨེཏེསུ ཧི ཨཝིརཛ྄ཛྷིཏེསུ ཨེཝ ཨཱཎཏྟིཔཡོགོ ཧོཏི, ན ཨཉྙཐཱ.

རཱུཔཱུཔཧཱརོཏི ¶ ཨེཏྠ –

‘‘མམཱལཱབྷེན ཨེསིཏྠཱི, མརཏཱུ’’ཏི སམཱིཔགོ;

དུཊྛཙིཏྟོ སཙེ ཡཱཏི, ཧོཏི སོ ཨིཏྠིམཱརཀོ.

བྷིཀྑཏྠཱཡ སཙེ ཡཱཏི, ཛཱནནྟོཔི ན མཱརཀོ;

ཨནཏྠིཀོ ཧི སོ ཏསྶཱ, མརཎེན ཨུཔེཀྑཀོ.

ཝིཡོགེན ཙ མེ ཛཱཡཱ, ཛནནཱི ཙ ན ཛཱིཝཏི;

ཨིཏི ཛཱནཾ ཝིཡུཉྫནྟོ, ཏདཏྠིཀོ ཧོཏི མཱརཀོ.

པབྦཛྫཱདིནིམིཏྟཉྩེ, ཡཱཏི ཛཱནཾ ན མཱརཀོ;

ཨནཏྠིཀོ ཧི སོ ཏསྶཱ, མརཎེན ཨུཔེཀྑཀོ.

ཧཱརཀསདྡསྶ བྷེདཏོ ཨཏྠཾ ཝིཏྠཱརེཏྭཱ ཨུབྷཡམྤི ཨེཀམེཝཱཏི དསྶེཏུཾ ‘‘སཏྠཉྩ ཏཾ ཧཱརཀཉྩཱ’’ཏིཨཱདི ཝུཏྟཾ. ཨེཏེན ཐཱཝརཔྤཡོགཾ དསྶེཏི སཱཧཏྠིཀཱདཱིསུ པཡོགེསུ. ‘‘ཨིཏི ཙིཏྟམནོ’’ཏི ཨུདྡྷརིཏྭཱཔི ཨིཏིསདྡསྶ ཨཏྠོ ན ཏཱཝ ཝུཏྟོ. ཀིཉྩཱཔི ན ཝུཏྟོ, ཨདྷིཀཱརཝསེན པན ཨཱགཏཾ ཨིཏིསདྡཾ ཡོཛེཏྭཱ ཨིཏི ཙིཏྟསངྐཔྤོཏི ཨེཏྠ ‘‘མརཎསཉྙཱི མརཎཙེཏནོ མརཎཱདྷིཔྤཱཡོ’’ཏི ཝུཏྟཏྟཱ མརཎཾཡེཝ ཝཀྑཏཱིཏི ཝེདིཏབྦོ. ཝུཏྟནཡེནཱཏི ཚཔྤཡོགཝསེན. སཱཧཏྠིཀནིསྶགྒིཡཔྤཡོགེསུ སནྣིཊྛཱཔཀཙེཏནཱཡ སཏྟམཱཡ སཧ ཨུཔྤནྣཀཱཡཝིཉྙཏྟིཡཱ སཱཧཏྠིཀཏཱ ཝེདིཏབྦཱ. ཨཱཎཏྟིཀེ པན སཏྟཧིཔི ཙེཏནཱཧི སཧ ཝཙཱིཝིཉྙཏྟིསམྦྷཝཏོ སཏྟ སཏྟ སདྡཱ ཨེཀཏོ ཧུཏྭཱ ཨེཀེཀཀྑརབྷཱཝཾ གནྟྭཱ ཡཏྟཀེཧི ཨཀྑརེཧི ¶ ཨཏྟནོ ཨདྷིཔྤཱཡཾ ཝིཉྙཱཔེནྟི, ཏདཝསཱནཀྑརསམུཊྛཱཔིཀཱཡ སཏྟམཙེཏནཱཡ སཧཛཱཏཝཙཱིཝིཉྙཏྟིཡཱ ཨཱཎཏྟིཀཏཱ ཝེདིཏབྦཱ.

ཏཏིཡཔཱརཱཛིཀཝཎྞནཱ ནིཊྛིཏཱ.

༤. ཙཏུཏྠཔཱརཱཛིཀཝཎྞནཱ

ཨིདྷེཝ སངྒཧནྟི ‘‘ཨིཏི ཛཱནཱམི, ཨིཏི པསྶཱམཱི’’ཏི པདེ ཀཐནྟི ཙེ, ‘‘ཨིཏི ཛཱནཱམཱི’’ཏིཨཱདིམཱཧ ¶ . ཀེཝལཾ ‘‘པཱཔིཙྪཏཱཡཱ’’ཏི (ཀངྑཱ. ཨཊྛ. ཙཏུཏྠཔཱརཱཛིཀཝཎྞནཱ) ཝཙནཏོ མནྡཏྟཱ མོམཱུཧཏྟཱ སམུདཱཙརནྟསྶ ཨནཱཔཏྟཱིཏི དཱིཔིཏཾ. ‘‘ཨཏཱིཏཀཱལེ སོཏཱཔནྣོམྷཱི’’ཏི ཝདནྟོ པརིཡཱཡེན ཝདཏི, ‘‘ཡོ ཏེ ཝིཧཱརེ ཝསཏི, སོ བྷིཀྑུ ཨརཧཱ’’ཏིཨཱདཱིསུ (པརི. ༡༦༥) ཝིཡ སིཀྑཱཔདེཔི ‘‘ཨིཏི ཛཱནཱམཱི’’ཏི (པཱརཱ. ༡༩༥, ༡༩༧) པཙྩུཔྤནྣམེཝ ཝུཏྟཾ.

ཙཏུཏྠཔཱརཱཛིཀཝཎྞནཱ ནིཊྛིཏཱ.

མཱཏུགྷཱཏཀཔིཏུགྷཱཏཀཨརཧནྟགྷཱཏཀཱ ཏཏིཡཔཱརཱཛིཀཾ ཨཱཔནྣཱ, བྷིཀྑུནིདཱུསཀོ, ལམྦཱིཨཱདཡོ ཙ ཙཏྟཱརོ པཋམཔཱརཱཛིཀཾ ཨཱཔནྣཱ ཨེཝཱཏི ཀཏྭཱ ཀུཏོ ཙཏུཝཱིསཏཱིཏི ཙེ? ན, ཨདྷིཔྤཱཡཱཛཱནནཏོ. མཱཏུགྷཱཏཀཱདཡོ ཧི ཙཏྟཱརོ ཨིདྷཱནུཔསམྤནྣཱ ཨེཝ ཨདྷིཔྤེཏཱ, ལམྦཱིཨཱདཡོ ཙཏྟཱརོ ཀིཉྩཱཔི པཋམཔཱརཱཛིཀེན སངྒཧིཏཱ, ཡསྨཱ པན ཨེཀེན པརིཡཱཡེན མེཐུནདྷམྨཾ པཊིསེཝིནོ ཧོནྟི, ཏསྨཱ ཝིསུཾ ཝུཏྟཱ. ན ལབྷཏི བྷིཀྑཱུཧཱིཏི ཨེཏྠ ‘‘ཨུཔོསཐཱདིབྷེདཾ སཾཝཱས’’ནྟི ཨེཏྟཀཾ ཝུཏྟཾ. ཝིནཡཊྛཀཐཱཡཾ ‘‘ཨུཔོསཐཔྤཝཱརཎཱཔཱཏིམོཀྑུདྡེསསངྒྷཀམྨཔྤབྷེད’’ནྟི ཝུཏྟཾ. པཱལི༹ཡཾ ‘‘སཾཝཱསོ ནཱམ ཨེཀཀམྨཾ ཨེཀུདྡེསོ སམསིཀྑཏཱ’’ཏི (པཱརཱ. ༥༥, ༩༢, ༡༧༢, ༡༩༨) ཝུཏྟཾ. ཏིཝིདྷེནཱཔི སངྒྷཀམྨཾ ཀཱཏུཾ ན ཝཊྚཏཱིཏི པཊིཀྑིཏྟཾ. ‘‘ན, བྷིཀྑཝེ, གཧཊྛེན ནིསིནྣཔརིསཱཡ པཱཏིམོཀྑཾ ཨུདྡིསིཏབྦ’’ནྟིཨཱདི (མཧཱཝ. ༡༥༤) པཱཏིམོཀྑཔྤཝཱརཎཱསུ ཨེཝ ཨཱགཏཾ, ཨཉྙེསུ ཙ ཨེཝརཱུཔེསུ ཋཱནེསུ སེསཾ ཀམྨཾ ཀཱཏུཾ ནཏྠི པཊིཀྑེཔོ. ཨཱཙརིཡཱཔི ‘‘སེསཾ ཀམྨཾ ཀཱཏུཾ ཝཊྚཏི, ནཏྠི ཨཱཔཏྟཱི’’ཏི ཝདནྟི. ‘‘ཨནྟིམཝཏྠུ ཨཛ྄ཛྷཱཔནྣཾ ཨམཱུལཀེན པཱརཱཛིཀེན ཙོདེནྟསྶ སངྒྷཱདིསེསོ, སངྒྷཱདིསེསེན ¶ ཙོདེནྟསྶ པཱཙིཏྟིཡནྟི བྷིཀྑུནོ ཝིཡ ཝུཏྟཾ, ན ཨནུཔསམྤནྣསྶ ཝིཡ དུཀྐཊཾ. ཏསྨཱ ཏེན སཧསེཡྻཱ, ཏསྶ པཊིགྒཧཎཉྩ བྷིཀྑུསྶ ཝཊྚཏཱིཏི ཨཱཙརིཡཱ ཝདནྟཱི’’ཏི ལིཁིཏཾ. ‘‘ཡཐཱ པུརེ ཏཐཱ པཙྪཱཏི ‘ཨེཀཀམྨཾ ཨེཀུདྡེསོ སམསིཀྑཏཱ’ཏི ཨེཝཾ ཝུཏྟསཾཝཱསསྶ ཨབྷབྦཏཱམཏྟཾ སནྡྷཱཡ ཝུཏྟ’’ནྟི ཝདནྟི, ཝཱིམཾསིཏབྦཾ.

ཨིདཱནི ཙཏུནྣམྤི སཱདྷཱརཎཾ པཀིཎྞཀཾ – མེཐུནདྷམྨཾ པཊིསེཝནྟོ ཨཏྠི ཀོཙི པཱརཱཛིཀོ ཧོཏི ཨསཾཝཱསོ, ཨཏྠི ཀོཙི ན པཱརཱཛིཀོ ཧོཏི ཨསཾཝཱསོ, ཨཏྠི ཀོཙི ན པཱརཱཛིཀོ སཾཝཱསོ དུཀྐཊཝཏྠུསྨིཾ ཝཱ ཐུལླཙྩཡཝཏྠུསྨིཾ ཝཱ པཊིསེཝནྟོ, ཨཏྠི ཀོཙི ན པཱརཱཛིཀོ པཀྑཔཎྜཀོ ཨཔཎྜཀཔཀྑེ ཨུཔསམྤནྣོ པཎྜཀཔཀྑེ མེཐུནདྷམྨཾ པཊིསེཝནྟོ. སོ ཨཱཔཏྟིཾ ནཱཔཛྫཏཱིཏི ན པཱརཱཛིཀོ ནཱམ. ན ཧི ཨབྷིཀྑུསྶ ཨཱཔཏྟི ནཱམ ཨཏྠི. སོ ¶ ཨནཱཔཏྟིཀཏྟཱ ཨཔཎྜཀཔཀྑེ ཨཱགཏོ ཀིཾ ཨསཾཝཱསོ ཧོཏི, ན ཧོཏཱིཏི? ཧོཏི. ‘‘ཨབྷབྦོ ཏེན སརཱིརབནྡྷནེནཱ’’ཏི (མཧཱཝ. ༡༢༩) ཧི ཝུཏྟཾ. ‘‘ཡོ པན བྷིཀྑུ བྷིཀྑཱུནཾ སིཀྑཱསཱཛཱིཝསམཱཔནྣོ…པེ… ཨསཾཝཱསོ’’ཏི (པཱརཱ. ༤༤) ཝུཏྟཏྟཱ ཡོ བྷིཀྑུབྷཱཝེན མེཐུནཾ དྷམྨཾ པཊིསེཝཏི, སོ ཨེཝ ཨབྷབྦོ. ནཱཡཾ ཨཔཱརཱཛིཀཏྟཱཏི ཙེ? ན, ‘‘བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ’’ཏི (མཧཱཝ. ༡༢༦) ཝུཏྟཊྛཱནེ ཡཐཱ ཨབྷིཀྑུནཱ ཀམྨཝཱཙཱཡ སཱཝིཏཱཡཔི ཀམྨཾ རུཧཏི ཀམྨཝིཔཏྟིཡཱ ཨསམྦྷཝཏོ, ཨེཝཾསམྤདམིདཾ དཊྛབྦཾ. ཏཏྲཱཡཾ ཝིསེསོ – ཨུཔསམྤནྣཔུབྦོ ཨེཝཾ ཙེ ཀམྨཝཱཙཾ སཱཝེཏི, སངྒྷོ ཙ ཏསྨིཾ ཨུཔསམྤནྣསཉྙཱི ཨེཝ ཙེ, ཀམྨཾ རུཧཏི, ནཱཉྙཐཱཏི ནོ ཁནྟཱིཏི ཨཱཙརིཡོ.

གཧཊྛོ ཝཱ ཏིཏྠིཡོ ཝཱ པཎྜཀོ ཝཱ ཀམྨཝཱཙཾ སཱཝེཏི, སངྒྷེན ཀམྨཝཱཙཱ ན ཝུཏྟཱ ཧོཏི. ‘‘སངྒྷོ ཨུཔསམྤཱདེཡྻ སངྒྷོ ཨུཔསམྤཱདེཏི, ཨུཔསམྤནྣོ སངྒྷེནཱ’’ཏི (མཧཱཝ. ༡༢༧) ཧི ཝཙནཏོ སངྒྷེན ཀམྨཝཱཙཱཡ ཝཏྟབྦཏཱཡ སངྒྷཔརིཡཱཔནྣེན, སངྒྷཔརིཡཱཔནྣསཉྙིཏེན ཝཱ ཨེཀེན ཝུཏྟཱཡ སངྒྷེན ཝུཏྟཱ ཧོཏཱིཏི ཝེདིཏབྦོ, ན གཧཊྛཏིཏྠིཡཔཎྜཀཱདཱིསུ ཨཉྙཏརེན. ཨཡམེཝ སབྦཀམྨེསུ ཡུཏྟི དཊྛབྦཱ.

ཏཐཱ ཨཏྠི མེཐུནཾ དྷམྨཾ པཊིསེཝནྟོ ཀོཙི ནཱསེཏབྦོ, ‘‘ཡོ བྷིཀྑུནིདཱུསཀོ, ཨཡཾ ནཱསེཏབྦོ’’ཏི (མཧཱཝ. ༡༡༤-༡༡༥ ཨཏྠཏོ སམཱནཾ) ཝུཏྟཏྟཱ ཏེན ཨེཝ སོ ཨནུཔསམྤནྣོཝ ¶ སཧསེཡྻཱཔཏྟིཾ ཝཱ ཨཉྙཾ ཝཱ ཏཱདིསཾ ཛནེཏི, ཏསྶ ཨོམསནེ ཙ དུཀྐཊཾ ཧོཏི. ཨབྷིཀྑུནིཡཱ མེཐུནདྷམྨཾ པཊིསེཝནྟོ ན ནཱསེཏབྦོ, ‘‘ཨནྟིམཝཏྠུཾ ཨཛ྄ཛྷཱཔནྣོ, བྷིཀྑཝེ, ཨནུཔསམྤནྣོ ན ཨུཔསམྤཱདེཏབྦོ’’ཏི པཱལི༹ཡཱ ཨབྷཱཝཏོ, ཏེནེཝ སོ ཨུཔསམྤནྣསངྑཾ གཙྪཏི, སཧསེཡྻཱཔཏྟིཨཱདིཾ ན ཛནེཏི, ཀེཝལཾ ཨསཾཝཱསོཏི ཀཏྭཱ གཎཔཱུརཀོ ན ཧོཏི. ཨེཀཀམྨཨེཀུདྡེསོ ཧི སཾཝཱསོཏི ཝུཏྟོ, སམསིཀྑཏཱཔི སཾཝཱསོཏི ཀཏྭཱ སོ ཏེན སདྡྷིཾ ནཏྠཱིཏི. པདསོདྷམྨཱཔཏྟིཾ པན ཛནེཏཱིཏི ཀཱརཎཙྪཱཡཱ དིསྶཏཱིཏི. ཡཐཱ བྷིཀྑུནིཡཱ སདྡྷིཾ བྷིཀྑུསངྒྷསྶ ཨེཀཀམྨཱདིནོ སཾཝཱསསྶ ཨབྷཱཝཱ བྷིཀྑུནཱི ཨསཾཝཱསཱ བྷིཀྑུསྶ, ཏཐཱ བྷིཀྑུ ཙ བྷིཀྑུནིཡཱ, པདསོདྷམྨཱཔཏྟིཾ པན ན ཛནེཏི. ཏཐཱ ཨནྟིམཝཏྠུཾ ཨཛ྄ཛྷཱཔནྣོཔི ཨེཀེཙྩོ ‘‘ཡོ ནཱསེཏབྦོཏི ཝུཏྟོ’’ཏི ཨིམིནཱ ནིདསྶནེན སཀཱརཎཙྪཱཡཱ ཨཛ྄ཛྷུཔེཀྑིཏཱ ཧོཏཱིཏི ན གཧཎཾ གཙྪཏི. ཨཔིཙ ‘‘ཨུབྷོ ནཱསེཏབྦཱ, དཱུསཀོ ནཱསེཏབྦོ’’ཏི (པཱརཱ. ༦༦) ཝཙནཏོ, ‘‘མེཏྟིཡཾ བྷིཀྑུནིཾ ནཱསེཐཱ’’ཏི (པཱརཱ. ༣༨༤) ཝཙནཏོ ཙ ཡོ སངྒྷམཛ྄ཛྷཾ པཝིསིཏྭཱ ཨནུཝིཛྫཀེན ཨནུཝིཛྫིཡམཱནོ པརཱཛིཏོ, སོཔི ཨནུཔསམྤནྣོཝ, ན ཨོམསཝཱདཔཱཙིཏྟིཡཾ ཛནེཏཱིཏི ཝེདིཏབྦོ.

ཨཔིཙེཏྠ ¶ སིཀྑཱཔཙྩཀྑཱཏཀཙཏུཀྐཾ ཝེདིཏབྦཾ. ཨཏྠི ཧི པུགྒལོ སིཀྑཱཔཙྩཀྑཱཏཀོ ན སིཀྑཱསཱཛཱིཝསམཱཔནྣོ, ཨཏྠི པུགྒལོ ན སིཀྑཱཔཙྩཀྑཱཏཀོ སིཀྑཱསཱཛཱིཝསམཱཔནྣོ, ཨཏྠི པུགྒལོ སིཀྑཱཔཙྩཀྑཱཏཀོ ཙེཝ སིཀྑཱསཱཛཱིཝསམཱཔནྣོ ཙ, ཨཏྠི པུགྒལོ ནེཝ སིཀྑཱཔཙྩཀྑཱཏཀོ ན སིཀྑཱསཱཛཱིཝསམཱཔནྣོ. ཏཏྠ ཏཏིཡོ བྷིཀྑུནཱི སིཀྑཱཔཙྩཀྑཱཏཀཱ ཝེདིཏབྦཱ. སཱ ཧི ཡཱཝ ན ལིངྒཾ པརིཙྩཛཏི, ཀཱསཱཝེསུ སཨུསྶཱཧཱཝ སམཱནཱ སཱམཉྙཱ ཙཝིཏུཀཱམཱ སིཀྑཾ པཙྩཀྑནྟཱིཔི བྷིཀྑུནཱི ཨེཝ སིཀྑཱསཱཛཱིཝསམཱཔནྣཱཝ. ཝུཏྟཉྷི བྷགཝཏཱ ‘‘ནཏྠི, བྷིཀྑཝེ, བྷིཀྑུནིཡཱ སིཀྑཱཔཙྩཀྑཱན’’ནྟི. ཀདཱ པན སཱ ཨབྷིཀྑུནཱི ཧོཏཱིཏི? ཡདཱ སཱ ཝིབྦྷནྟཱཏི སངྑཾ གཙྪཏི. ཝུཏྟཉྷི བྷགཝཏཱ ‘‘ཡདེཝ སཱ ཝིབྦྷནྟཱ, ཏདེཝ སཱ ཨབྷིཀྑུནཱི’’ཏི (ཙཱུལ༹ཝ. ༤༣༤). ཀིཏྟཱཝཏཱ པན ཝིབྦྷནྟཱ ཧོཏཱིཏི? སཱམཉྙཱ ཙཝིཏུཀཱམཱ ཀཱསཱཝེསུ ཨནཱལཡཱ ཀཱསཱཝཾ ཝཱ ཨཔནེཏི, ནགྒཱ ཝཱ གཙྪཏི, ཏིཎཔཎྞཱདིནཱ ཝཱ པཊིཙྪཱདེཏྭཱ གཙྪཏི, ཀཱསཱཝཾཡེཝ ¶ ཝཱ གིཧིནིཝཱསནཱཀཱརེན ནིཝཱསེཏི, ཨོདཱཏཾ ཝཱ ཝཏྠཾ ནིཝཱསེཏི, ལིངྒེནེཝ ཝཱ སདྡྷིཾ ཏིཏྠིཡེསུ པཝིསིཏྭཱ ཀེསལུཉྩནཱདིཝཏཾ སམཱདིཡཏི, ཏིཏྠིཡལིངྒཾ ཝཱ སམཱདིཡཏི, ཏདཱ ཝིབྦྷནྟཱ ནཱམ ཧོཏི. ཏཏྠ ཡཱ སལིངྒེ ཋིཏཱཝ ཏིཏྠིཡཝཏཾ སམཱདིཡཏི, སཱ ཏིཏྠིཡཔཀྐནྟབྷིཀྑུ ཝིཡ པཙྪཱ པབྦཛྫམྤི ན ལབྷཏི. སེསཱ པབྦཛྫམེཝ ལབྷཏི, ན ཨུཔསམྤདཾ. པཱལི༹ཡཾ ཀིཉྩཱཔི ‘‘ཡཱ, བྷིཀྑཝེ, བྷིཀྑུནཱི སཀཱཝཱསཱ ཏིཏྠཱཡཏནཾ སངྐནྟཱ, སཱ ཨཱགཏཱ ན ཨུཔསམྤཱདེཏབྦཱ’’ཏི (ཙཱུལ༹ཝ. ༤༣༤) ཝཙནཏོ ཡཱ པཋམཾ ཝིབྦྷམིཏྭཱ པཙྪཱ ཏིཏྠཱཡཏནཾ སངྐནྟཱ, སཱ ཨཱགཏཱ ཨུཔསམྤཱདེཏབྦཱཏི ཨནུཉྙཱཏཾ ཝིཡ དིསྶཏི. སངྒཱིཏིཨཱཙརིཡེཧི པན ‘‘ཙཏུཝཱིསཏི པཱརཱཛིཀཱནཱི’’ཏི (པཱརཱ. ཨཊྛ. ༢.༢༣༣) ཝུཏྟཏྟཱ ན པུན སཱ ཨུཔསམྤཱདེཏབྦཱ. ཏསྨཱ ཨེཝ སིཀྑཱཔཙྩཀྑཱནཾ ནཱནུཉྙཱཏཾ བྷགཝཏཱ. ཨནྟིམཝཏྠུཾ ཨཛ྄ཛྷཱཔནྣཱ པན བྷིཀྑུནཱི ཨེཝ. པཀྑཔཎྜཀཱིཔི བྷིཀྑུནཱི ཨེཝ. ཨིམཾ ནཡཾ ཙཏཱུསུཔི ཡོཛེཏྭཱ ཡཐཱརཧཾ ཀཐེཏབྦཾ.

པཱརཱཛིཀཝཎྞནཱ ནིཊྛིཏཱ.

སངྒྷཱདིསེསཀཎྜཾ

༡. སུཀྐཝིསྶཊྛིསིཀྑཱཔདཝཎྞནཱ

ཨཉྙཏྲ ¶ ¶ སུཔིནནྟཱཏི སྭཱཡཾ དུབྦལཝཏྠུཀཏྟཱ ཙེཏནཱཡ པཊིསནྡྷིཾ ཨཱཀཌྜྷིཏུཾ ཨསམཏྠཱ, སུཔིནེ ཨུཔཊྛིཏཾ ནིམིཏྟཉྷི དུབྦལཾ. པཝཏྟེ པན ཨཉྙེཧི ཀུསལཱཀུསལེཧི ཨུཔཏྠམྦྷིཏཱ ཝིཔཱཀཾ དེཏི. ཀིཉྩཱཔི ཝིཔཱཀཾ དེཏི, ཨཐ ཁོ ཨཝིསཡེ ཨུཔྤནྣཏྟཱ ཨབྦོཧཱརིཀཱཝ སུཔིནནྟཙེཏནཱཏི ལིཁིཏཾ. ཡཾ པནེཏྠ ‘‘སུཔིནེ ཨུཔཊྛིཏཾ ནིམིཏྟཉྷི དུབྦལ’’ནྟི ཝུཏྟཾ, ཏཾ ཨནེཀནྟཾ, ན ཙ ཨཱརམྨཎདུབྦལཏཱཡ ཙིཏྟཔྤཝཏྟི དུབྦལཱ ཨཏཱིཏཱནཱགཏཱརམྨཎཱཡ, པཉྙཏྟཱརམྨཎཱཡ ཝཱ ཨདུབྦལཏྟཱ. ཏསྨཱ དུབྦལཝཏྠུཀཏྟཱཏི དུབྦལཧདཡཝཏྠུཀཏྟཱཏི ནོ ཏཀྐོཏི (ཝཛིར. ཊཱི. པཱརཱཛིཀ ༢༣༦-༢༣༧) ཨཱཙརིཡོ. ཨཝཏྠུཀཏཱཡ དུབྦལབྷཱཝོ ཡུཛྫཏཱིཏི ཙེ? ན, ཨཝཏྠུཀཱཡ བྷཱཝནཱཔབྷཝཱཡ ཨཏིརེཀབལཝསམྦྷཝཏོ. བྷཱཝནཱབལསམཔྤིཏཉྷི ཙིཏྟཾ ཨརཱུཔམྤི སམཱནཾ ཨཏིབྷཱརམྤི ཀརཛཀཱཡཾ གཧེཏྭཱ ཨེཀཙིཏྟཀྑཎེནེཝ བྲཧྨལོཀམྤི པཱཔེཏྭཱ ཋཔེཏི, ཏཔྤཊིབྷཱགཾ ཨནཔྤིཏམྤི ཀཱམཱཝཙརཙིཏྟཾ ཀརཛཀཱཡཾ ཨཱཀཱསེ ལངྒྷནསམཏྠཾ ཀརོཏི. ཀིཾ པནེཏྠ ཏཾ ཨནུམཱནཀརཎཾ? ཡེན ཙིཏྟསྶེཝ ཨཱནུབྷཱཝོཏི པཉྙཱཡེཡྻ ཙིཏྟཱནུབྷཱཝེན ཋཔནལངྒྷནཱདིཀིརིཡཱཝིསེསནིབྦཏྟིདསྶནཏོ. པཀཏིཙིཏྟསམུཊྛཱནརཱུཔཾ ཝིཡ ཨསཾསཊྛཏྟཱ, ནིཀྑམནཏྟཱ ཙ ཝཏྠིསཱིསཾ, ཀཊི, ཀཱཡོཏི ཏིདྷཱ སུཀྐསྶ ཋཱནཾ པཀཔྤེནྟི ཨཱཙརིཡཱ. སཔྤཝིསཾ ཝིཡ ཏཾ དཊྛབྦཾ, ན ཙ ཝིསེ ཋཱནནིཡམོ, ཀོདྷཝསེན པསྶནྟསྶ ཧོཏི. ཨེཝམསྶ ན ཋཱནནིཡམོ, རཱགཝསེན ཨུཔཀྐམནྟསྶ ཧོཏཱིཏི ནོ ཏཀྐོཏི ཨཱཙརིཡོ.

‘‘དཀསོཏཾ ཨནོཏིཎྞེཔཱི’’ཏི ཨིདཾ ‘‘ཨོཏིཎྞམཏྟེ’’ཏི ཨིམིནཱ ཝིརུཛ྄ཛྷཏཱིཏི ཙེ, ཏཾ དསྶེཏུཾ ‘‘ཋཱནཏོ པན ཙུཏ’’ནྟིཨཱདིམཱཧ. ཏསྶཏྠོ – ནིམིཏྟེ ཨུཔཀྐམཾ ཀཏྭཱ སུཀྐཾ ཋཱནཱ ཙཱཝེཏྭཱ པུན ཝིཔྤཊིསཱརཝསེན དཀསོཏོརོཧཎཾ ནིཝཱརེཏུཾ ན སཀྐཱ, ཏཐཱཔི ཨདྷིཝཱསཱདྷིཔྤཱཡེན ¶ ཨདྷིཝཱསེཏྭཱ ཨནྟརཱ དཀསོཏཏོ ཨུདྡྷཾ ནིཝཱརེཏུཾ ཨསཀྐུཎེཡྻཏཱཡ ‘‘བཧི ནིཀྑནྟེ ཝཱ’’ཏི ཝུཏྟཾ, ཏསྨཱ ཋཱནཱ ཙུཏཉྷི ཨཝསྶཾ ¶ དཀསོཏཾ ཨོཏརཏཱིཏི ཨཊྛཀཐཱཡ ཨདྷིཔྤཱཡོ. ཏསྨཱ ཨུབྷཡཾ སམེཏཱིཏི གཧེཏབྦོ.

ཨེཏྠཱཧ – ཀསྨཱ ཨིམསྨིཾ སིཀྑཱཔདེ ‘‘ཡོ པན བྷིཀྑཱུ’’ཏིཨཱདིནཱ ཀཱརཀོ ན ནིདྡིཊྛོཏི? ཝུཙྩཏེ – ཨདྷིཔྤཱཡཱཔེཀྑཱཡ བྷཱཝཏོ ཀཱརཀོ ན ནིདྡིཊྛོ ཏསྶ སཱཔེཀྑབྷཱཝདསྶནཏྠཾ. ཀཐཾ? ཀཎྜུཝནཱདིཨདྷིཔྤཱཡཙེཏནཱཝསེན ཙེཏེནྟསྶ ཀཎྜུཝནཱདིཨུཔཀྐམེན ཨུཔཀྐམནྟསྶ མེཐུནརཱགཝསེན ཨཱུརུཨཱདཱིསུ དུཀྐཊཝཏྠཱུསུ, ཝཎཱདཱིསུ ཐུལླཙྩཡཝཏྠཱུསུ ཙ ཨུཔཀྐམནྟསྶ སུཀྐཝིསཊྛིཡཱ སཏིཔི ན སངྒྷཱདིསེསོ ‘‘ཨནཱཔཏྟི བྷིཀྑུ ན མོཙནཱདྷིཔྤཱཡསྶཱ’’ཏི (པཱརཱ. ༢༦༣) ཝཙནཏོ. ཏསྨཱ ཏདཏྠདསྶནཏྠཾ ཨིདྷ ཀཱརཀོ ན ནིདྡིཊྛོ. ཨཉྙཐཱ ‘‘ཡོ པན བྷིཀྑུ སཉྩེཏནིཀཾ སུཀྐཝིསཊྛིཾ ཨཱཔཛྫེཡྻ, སངྒྷཱདིསེསོ’’ཏི ནིདྡིཊྛེ ཀཱརཀེ ‘‘ཙེཏེཏི ན ཨུཔཀྐམཏི མུཙྩཏི, ཨནཱཔཏྟཱི’’ཏི (པཱརཱ. ༢༦༢) ཝུཏྟཝཙནཝིརོདྷོ. ཏཐཱ ‘‘སཉྩེཏནིཀཱཡ སུཀྐཝིསཊྛིཡཱ ཨཉྙཏྲ སུཔིནནྟཱ སངྒྷཱདིསེསོ’’ཏི བྷུམྨེ ནིདྡིཊྛེཔི སོ ཨེཝ ཝིརོདྷོ ཧེཏྭཏྠནིཡམསིདྡྷིཏོ. ཏསྨཱ ཏདུབྷཡམྤི ཝཙནཀྐམཾ ཨཝཏྭཱ ‘‘སཉྩེཏནིཀཱ སུཀྐཝིསཊྛི ཨཉྙཏྲ སུཔིནནྟཱ སངྒྷཱདིསེསོ’’ཏི ཝུཏྟཾ. ཏཏྠ ནིམིཏྟཏྠེ བྷུམྨཝཙནཱབྷཱཝཏོ ཧེཏྭཏྠནིཡམོ ན ཀཏོ ཧོཏི. ཏསྨིཾ ཨཀཏེ སཉྩེཏནིཀཱ སུཀྐཝིསཊྛི ཨཉྙཏྲ སུཔིནནྟཱ སངྒྷཱདིསེསོཏི, ཨུཔཀྐམེ ཨསཏི ཨནཱཔཏྟཱིཏི ཨཡམཏྠོ དཱིཔིཏོ ཧོཏཱིཏི ཝེདིཏབྦཾ.

ཨིམསྨིཾ སིཀྑཱཔདེ དྭེ ཨཱཔཏྟིསཧསྶཱནི ཧོནྟི. ཀཐཾ? ཨཏྟནོ ཧཏྠཱདིབྷེདེ ཨཛ྄ཛྷཏྟརཱུཔེ རཱགཱུཔཏྠམྦྷནཝསེན ཨངྒཛཱཏེ ཀམྨནིཡཔྤཏྟེ ཨཱརོགྱཏྠཱཡ ནཱིལཾ མོཙེནྟསྶ ཨེཀཱ ཨཱཔཏྟི, ཨཛ྄ཛྷཏྟརཱུཔེ ཨེཝ རཱགཱུཔཏྠམྦྷེ པཱིཏཀཱདཱིནཾ མོཙནཝསེན ནཝཱཏི དས. ཨེཝཾ ‘‘སུཁཏྠཱཡཱ’’ཏིཨཱདཱིནཾ ནཝནྣཾ ཝསེནཱཏི རཱགཱུཔཏྠམྦྷེ ཨཛ྄ཛྷཏྟརཱུཔཝསེན སཏཾ. ཨེཝམེཝཾ ཝཙྩཔྤསྶཱཝཝཱཏཨུཙྩཱལིངྒཔཱཎཀདཊྛཱུཔཏྠམྦྷེསུ ཙ སཏཾ སཏཾ ཀཏྭཱ སབྦཾ པཉྩསཏཾ. ཡཐཱ ཨཛ྄ཛྷཏྟརཱུཔེ པཉྩསཏཾ, ཨེཝཾ བཧིདྡྷཱརཱུཔེ ཝཱ ཨཛ྄ཛྷཏྟབཧིདྡྷཱརཱུཔེ ཝཱ ཨཱཀཱསེ ཝཱ ཀཊིཾ ཀམྤེནྟོཏི དྭེ སཧསྶཱནི ཨཱཔཏྟིཡོ ཧོནྟཱིཏི.

སུཀྐཝིསྶཊྛིསིཀྑཱཔདཝཎྞནཱ ནིཊྛིཏཱ.

༢. ཀཱཡསཾསགྒསིཀྑཱཔདཝཎྞནཱ

‘‘ཨོཏིཎྞོ’’ཏི ¶ ¶ ཨིམིནཱསྶ སེཝནཱདྷིཔྤཱཡཏཱ དསྶིཏཱ. ཏེནེཝ ‘‘ཀཱཡསཾསགྒརཱགསམངྒིསྶེཏཾ ཨདྷིཝཙན’’ནྟི ཝུཏྟཾ. ‘‘ཝིཔརིཎཏེན…པེ… སདྡྷི’’ནྟི ཨིམིནཱསྶ ཝཱཡཱམོ དསྶིཏོ. ‘‘སདྡྷི’’ནྟི ཧི པདཾ སཾཡོགཾ དཱིཔེཏི, སོ ཙ སཾཡོགོ སམཱགམོ. ཀེན ཙིཏྟེན? ཝིཔརིཎཏེན ཙིཏྟེན, ན པཏྟཔྤཊིགྒཧཎཱདྷིཔྤཱཡཱདིནཱཏི ཨདྷིཔྤཱཡོ. ‘‘ཀཱཡསཾསགྒཾ སམཱཔཛྫེཡྻཱ’’ཏི ཨིམིནཱསྶ ཝཱཡམཏོ ཕསྶཔྤཊིཝིཛཱནནཱ དསྶིཏཱ ཧོཏི. ཝཱཡམིཏྭཱ ཕསྶཾ པཊིཝིཛཱནནྟོ ཧི སམཱཔཛྫཏི ནཱམ. ཨེཝམསྶ ཏིཝངྒསམྤཏྟི དསྶིཏཱ ཧོཏི. ཨཐ ཝཱ ཨོཏིཎྞོ ཝིཔརིཎཏེན ཙིཏྟེན ཡཀྑཱདིནཱ སཏྟོ ཝིཡ. ཨུཔཡོགཏྠེ ཝཱ ཨེཏཾ ཀརཎཝཙནཾ, ཨོཏིཎྞོ ཝིཔརིཎཏཾ ཙིཏྟཾ ཀཱུཔཱདིཾ ཝིཡ སཏྟོ. ཨཐ ཝཱ ‘‘རཱགཏོ ཨུཏྟིཎྞོ བྷཝིསྶཱམཱི’’ཏི བྷིཀྑུབྷཱཝཾ ཨུཔགཏོཔི ཡོ པན བྷིཀྑུ ཏཏོ ཨུཏྟིཎྞཱདྷིཔྤཱཡཏོ ཝིཔརིཎཏེན ཙིཏྟེན ཧེཏུབྷཱུཏེན ཏམེཝ རཱགཾ ཨོཏིཎྞོ. མཱཏུགཱམེན ཨཏྟནོ སམཱིཔཾ ཝཱ ཨཱགཏེན, ཨཏྟནཱ ཨུཔགཏེན ཝཱ. ཨེཏེན མཱཏུགཱམསྶ སཱརཏྟཏཱ ཝཱ ཧོཏུ, ཝིརཏྟཏཱ ཝཱ, སཱ ཨིདྷ ཨཔྤམཱཎཾ.

ཧཏྠགྒཱཧཾ ཝཱཏི ཨེཏྠ ཧཏྠེན སབྦོཔི ཨུཔཱདིནྣཀོ ཀཱཡོ སངྒཧིཏོ, ན བྷིནྣསནྟཱནོ ཏཔྤཊིབདྡྷོ ཝཏྠཱལངྐཱརཱདི. ཝེཎིགྒཧཎེན ཨནུཔཱདིནྣཀོ ཨབྷིནྣསནྟཱནོ ཀེསལོམནཁགྒདནྟགྒཱདིཀོ ཀམྨཔཙྩཡཨུཏུསམུཊྛཱནོ གཧིཏོཏི ཝེདིཏབྦཾ. ཏེནེཝཱཧ ‘‘ཨནྟམསོ ལོམེན ལོམཾ ཕུསནྟསྶཱཔཱི’’ཏི. ཏེན ཨཉྙཏརསྶ ཝཱ…པེ… པརཱམསནནྟི ཨེཏྠ ཨནུཔཱདིནྣཀཱནམྤི སེསལོམཱདཱིནཾ ཨངྒབྷཱཝོ ཝེདིཏབྦོ. ཨེཝཾ སནྟེ ‘‘ཕསྶཾ པཊིཛཱནནྟསྶ སངྒྷཱདིསེསོ’’ཏི ཨིམིནཱ ཝིརུཛ྄ཛྷཏཱིཏི ཙེ? ན, ཏདཏྠཛཱནནཏོ. ཕུཊྛབྷཱཝཾ པཊིཝིཛཱནནྟོཔི ཕསྶཾ པཊིཛཱནཱཏི ནཱམ, ན ཀཱཡཝིཉྙཱཎུཔྤཏྟིཡཱ ཨེཝ. ཨནེཀནྟིཀཉྷེཏྠ ཀཱཡཝིཉྙཱཎཾ. ཏསྨཱ ཨེཝ ཨིདྷ ཕསྶཔྤཊིཝིཛཱནནཾ ཨངྒནྟྭེཝ ན ཝུཏྟཾ. ཏསྨིཉྷི ཝུཏྟེ ཋཱནམེཏཾ ཝིཛྫཏི ‘‘ན ཙ མེ ལོམགྷཊྚནེན ཀཱཡཝིཉྙཱཎཾ ཨུཔྤནྣཾ, ཏསྨིཾ ‘ན ཕསྶཾ པཊིཛཱནཱམཱི’ཏི ཨནཱཔནྣསཉྙཱི སིཡཱ’’ཏི. ‘‘ཝེཎཱི ནཱམ ཀཧཱཔཎམཱལཱདིསམྤཡུཏྟཾ, ཏཏྠ ‘ཝེཎིཾ གཎྷིསྶཱམཱི’ཏི ཀཧཱཔཎམཱལཱདིཾ ཨེཝ གཎྷཱཏི, ན ལོམཾ, ནཏྠི སངྒྷཱདིསེསོ’’ཏི ཝདནྟི. ཝཱིམཾསིཏབྦཾ.

ཀཱཡསཾསགྒསིཀྑཱཔདཝཎྞནཱ ནིཊྛིཏཱ.

༣. དུཊྛུལླཝཱཙཱསིཀྑཱཔདཝཎྞནཱ

‘‘ཀདཱ ¶ ¶ ཏེ མཱཏཱ པསཱིདིསྶཏཱི’’ཏི ཨཱཡཱཙནཾ དུཊྛུལླཝཱཙཱཡ སིཁཱཔཏྟལཀྑཎདསྶནཏྠཾ ཝུཏྟཾ, ན མེཐུནུཔསཾཧིཏེཡེཝ དུཊྛུལླཝཱཙཱཏི དསྶནཏྠཾ. ‘‘ཨུབྷཏོབྱཉྫནཀཱསཱི’’ཏི ཝཙནཾ པན པུརིསནིམིཏྟེན ཨསངྒྷཱདིསེསཝཏྠུནཱ མིསྶཝཙནཾ, པུརིསཨུབྷཏོབྱཉྫནཀསྶ ཙ ཨིཏྠིནིམིཏྟཾ པཊིཙྪནྣཾ, ཨིཏརཾ པཱཀཊཾ. ཡདི ཏམྤི ཛནེཏི, ཀཐཾ ‘ཨནིམིཏྟཱསཱི’ཏིཨཱདཱིནི པདཱནི ན སངྒྷཱདིསེསཾ ཛནེནྟཱི’’ཏི ཨེཀེ, ཏཾ ན ཡུཏྟཾ པུརིསསྶཱཔི ནིམིཏྟཱདྷིཝཙནཏྟཱ. ‘‘མེཐུནུཔསཾཧིཏཱཧི སངྒྷཱདིསེསོ’’ཏི (པཱརཱ. ༢༤༨) མཱཏིཀཱཡཾ ལཀྑཎསྶ ཝུཏྟཏྟཱ ཙ མེཐུནུཔསཾཧིཏཱཧི ཨོབྷཱསནེ པཊིཝིཛཱནནྟིཡཱ སངྒྷཱདིསེསོ, ཨཔྤཊིཝིཛཱནནྟིཡཱ ཐུལླཙྩཡཾ, ཨིཏརེཧི ཨོབྷཱསནེ པཊིཝིཛཱནནྟིཡཱ ཐུལླཙྩཡཾ, ཨཔྤཊིཝིཛཱནནྟིཡཱ དུཀྐཊནྟི ཨེཀེ, ཝིཙཱརེཏྭཱ གཧེཏབྦཾ. ཨེཏྠཱཧ – ‘‘སིཁརཎཱི’’ཏིཨཱདཱིཧི ཨཀྐོསནྟསྶ པཊིགྷཙིཏྟཾ ཨུཔྤཛྫཏི, ཀསྨཱ ‘‘ཏིཝེདན’’ནྟི ཨཝཏྭཱ ‘‘དྭིཝེདན’’ནྟི ཝུཏྟནྟི? རཱགཝསེན ཨཡཾ ཨཱཔཏྟི, ན པཊིགྷཝསེན. ཏསྨཱ རཱགཝསེནེཝ པཝཏྟོ ཨཀྐོསོ ཨིདྷ ཨདྷིཔྤེཏོ. ཏསྨཱ ‘‘དྭིཝེདན’’ནྟི ཝཙནཾ སུཝུཏྟམེཝ.

དུཊྛུལླཝཱཙཱསིཀྑཱཔདཝཎྞནཱ ནིཊྛིཏཱ.

༤. ཨཏྟཀཱམསིཀྑཱཔདཝཎྞནཱ

དུཊྛུལློབྷཱསནེ ཝུཏྟཔྤཀཱརཱཡཱཏི དུཊྛུལླཱདུཊྛུལླཛཱནནསམཏྠཱཡ. པརསྶ བྷིཀྑུནོ ཨཏྟཀཱམཔཱརིཙརིཡཱཡ ཝཎྞབྷཎནེ དུཀྐཊཾ, ‘‘ཡོ ཏེ ཝིཧཱརེ ཝསཏི, ཏསྶ ཨགྒདཱནཾ མེཐུནཾ དྷམྨཾ དེཧཱི’’ཏི པརིཡཱཡཝཙནེཔི དུཀྐཊཾ, ‘‘ཨཏྟཀཱམཔཱརིཙརིཡཱཡ ཝཎྞཾ བྷཱསེཡྻ, ཡཱ མཱདིསཾ སཱིལཝནྟ’’ནྟི ཙ ཝུཏྟཏྟཱཏི ཨེཀེ. པཉྩསུ ཨངྒེསུ སབྦྷཱཝཱ སངྒྷཱདིསེསོཝཱཏི ཨེཀེ, ཝིཙཱརེཏྭཱ གཧེཏབྦཾ. ‘‘ཨིམསྨིཾ སིཀྑཱཔདདྭཡེ ཀཱཡསཾསགྒེ ཝིཡ ཡཀྑིཔེཏཱིསུཔི དུཊྛུལླཏྟཀཨཱམཝཙནེ ཐུལླཙྩཡནྟི ཝདནྟི. ཨཊྛཀཐཱསུ པན ནཱགཏ’’ནྟི (ཝཛིར. ཊཱི. པཱརཱཛིཀ ༢༩༥) ལིཁིཏཾ. ཨུབྷཏོབྱཉྫནཀོ པན པཎྜཀགཏིཀོཝ.

ཨཏྟཀཱམསིཀྑཱཔདཝཎྞནཱ ནིཊྛིཏཱ.

༥. སཉྩརིཏྟསིཀྑཱཔདཝཎྞནཱ

ཨལཾཝཙནཱིཡཱཏི ¶ ¶ ན ཝཙནཱིཡཱ, ནིཝཱརཎེ ཨལཾ-སདྡོ, ན ཨལཾཝཙནཱིཡཱ ནཱལཾཝཙནཱིཡཱ. ‘‘པཊིགྒཎྷཱཏི ཝཱིམཾསཏི པཙྩཱཧརཏི, ཨཱཔཏྟི སངྒྷཱདིསེསསྶཱ’’ཏི (པཱརཱ. ༣༠༥) ཝུཏྟཏྟཱ ཡསྶ ཨེཀནྟེན སངྒྷཱདིསེསོ ཧོཏི, ཏསྶ པཊིགྒཎྷནཝཱིམཾསནཔཡོགཱ ཨེཏེ དུཀྐཊཐུལླཙྩཡཱ ནཏྠཱིཏི ཝདནྟཱིཏི ལིཁིཏཾ. ཀིཉྩཱཔི ཨེཏྠ ‘‘ཨིཏྠཱི ནཱམ མནུསྶིཏྠཱི, ན ཡཀྑཱི ན པེཏཱི ན ཏིརཙྪཱནགཏཱ. པུརིསོ ནཱམ མནུསྶཔུརིསོ, ན ཡཀྑོ ན པེཏོ ན ཏིརཙྪཱནགཏོ’’ཏི པཱལི༹ ནཏྠི, ཏཐཱཔི ཀཱཡསཾསགྒཱདཱིསུ ‘‘མཱཏུགཱམོ ནཱམ མནུསྶིཏྠཱི’’ཏི (པཱརཱ. ༢༨༥) ཨིཏྠིཝཝཏྠཱནསྶ ཀཏཏྟཱ ཨིདྷཱཔི མནུསྶིཏྠཱི ཨེཝཱཏི པཉྙཱཡཏི. མེཐུནཔུབྦབྷཱགསཱམཉྙཏོ ཨིཏྠིཝཝཏྠཱནེན པུརིསཝཝཏྠཱནཾ ཀཏམེཝ ཧོཏི. ཏེནེཝཱཧ ‘‘ཡེསུ སཉྩརིཏྟཾ སམཱཔཛྫཏི, ཏེསཾ མནུསྶཛཱཏིཀཏཱ’’ཏི (ཀངྑཱ. ཨཊྛ. སཉྩརིཏྟསིཀྑཱཔདཝཎྞནཱ). ཀཱཡསཾསགྒཱདཱིསུ ཙ པཎྜཀཡཀྑིཔེཏིཡོ ཐུལླཙྩཡཝཏྠུཀཱཝ ཝུཏྟཱ, ཏཐཱ ཨིདྷཱཔི, པཎྜཀསབྷཱཝཏྟཱ མནུསྶཨུབྷཏོབྱཉྫནཀོ ཙ ཐུལླཙྩཡཝཏྠུཀོཝ ཧོཏི. སེསཱ མནུསྶཔུརིསཨམནུསྶཔཎྜཀཨུབྷཏོབྱཉྫནཀཏིརཙྪཱནགཏཔུརིསཱདཡོ དུཀྐཊཝཏྠུཀཱཝ མིཙྪཱཙཱརདསྶནསབྷཱཝཏོཏི ཝེདིཏབྦཾ.

སཉྩརིཏྟསིཀྑཱཔདཝཎྞནཱ ནིཊྛིཏཱ.

༦. ཀུཊིཀཱརསིཀྑཱཔདཝཎྞནཱ

ཀིཾ བྷནྟེཏི ཨེཏྟཀེཔི ཝུཏྟེ. པུཙྪིཏོ ཡདཏྠཱཡ པཝིཊྛོ, ཏཾ ཀཐེཏུཾ ལབྷཏི པུཙྪིཏཔཉྙཏྟཱ བྷིཀྑཱཙཱརཝཏྟེཏི ལིཁིཏཾ. ཧཏྠཀམྨཾ ཡཱཙིཏོ ‘‘ཨུཔཀརཎཾ, མཱུལཾ ཝཱ དསྶཏཱི’’ཏི ཡཱཙཏི, ཝཊྚཏི, ན ཝཊྚཏཱིཏི? ཝཊྚཏི སེནཱསནེ ཨོབྷཱསཔརིཀཐཱདཱིནཾ ལདྡྷཏྟཱཏི ཨེཀེ. ཏིཧཏྠཱ ཝཱཏི ཨེཏྠ ཝཌྜྷཀིཧཏྠེན ཏིཧཏྠཱ. ‘‘པམཱཎཡུཏྟོ མཉྩོཏི པཀཏིཝིདཏྠིཡཱ ནཝཝིདཏྠིཔྤམཱཎམཉྩོ, སོ ཏཏྠ ཨིཏོ ཙ ན སཉྩརཏི, ཏསྨཱ ཙཏུཧཏྠཝིཏྠཱརཱ ན ཧོཏཱི’’ཏིཨཱདི ལིཁིཏཾ. ཨཀུཊིཡཱ པན ཝཏྠུདེསནཱཀིཙྩཾ ནཏྠི ཨུལླིཏྟཱཝལིཏྟཾ ཀཱཏུཾ ཝུཏྟཏྟཱ. ‘‘ཨུལླིཏྟཱདིབྷཱཝོ…པེ… ‘ཚདནམེཝ སནྡྷཱཡ ཝུཏྟོ’ཏི ཡུཏྟམིདཾ. ཀསྨཱཏི ཙེ? ཡསྨཱ མཏྟིཀཱམཡབྷིཏྟིཾ ¶ ཨུཊྛཱཔེཏྭཱ ཨུཔརི ཨུལླིཏྟཾ ཝཱ ཨཝལིཏྟཾ ཝཱ ཨུབྷཡཾ ཝཱ བྷིཏྟིཡཱ གྷཊིཏཾ ཀརོནྟསྶ ཨཱཔཏྟི ཨེཝ ཝིནཱཔི བྷིཏྟིལེཔེནཱ’’ཏི ལིཁིཏཾ. ཨེཝམེཏྠ ཐམྦྷཏུལཱཔིཊྛསངྒྷཱཊཱདི ནིརཏྠཀཾ སིཡཱ. ཏསྨཱ ཝིཙཱརེཏྭཱཝ གཧེཏབྦཾ. ‘‘ཨུཔོསཐཱགཱརམྤི བྷཝིསྶཏི, ཨཧམྤི ཝསིསྶཱམཱི’’ཏི ཝཱ ‘‘བྷིཀྑཱུཧི ཝཱ སཱམཎེརེཧི ཝཱ ཨེཀཏོ ཝསིསྶཱམཱི’’ཏི ཝཱ ཀརོནྟསྶ ཝཊྚཏི ཨེཝ. ཀསྨཱ? ‘‘ཨཏྟུདྡེས’’ནྟི ཝུཏྟཏྟཱཏི ལིཁིཏཾ.

ཨིདཾ ¶ པན སིཀྑཱཔདཾ ཙཏུཏྠཔཱརཱཛིཀཾ ཝིཡ ནིདཱནཱཔེཀྑཾ. ན ཧི ཝགྒུམུདཱཏཱིརིཡཱ བྷིཀྑཱུ སཡམེཝ ཨཏྟནོ ཨསནྟཾ ཨུཏྟརིམནུསྶདྷམྨཾ མུསཱཝཱདལཀྑཎཾ པཱཔེཏྭཱ བྷཱསིཾསུ. ཨཉྙམཉྙཉྷི ཏེ ཨུཏྟརིམནུསྶདྷམྨཝཎྞཾ བྷཱསིཾསུ. ན ཙ ཏཱཝཏཱ པཱརཱཛིཀཝཏྠུ ཧོཏི, ཏཏྟཀེན པན ལེསེན བྷགཝཱ ཏཾ ཝཏྠུཾ ནིདཱནཾ ཀཏྭཱ པཱརཱཛིཀཾ པཉྙཔེསི, ཏཐཱ ཨིདྷཱཔི. ན ཧི ནིདཱནེ ‘‘ཨདེསིཏཝཏྠུཀཱཡོ སཱརམྦྷཱཡོ ཨཔརིཀྐམནཱཡོ’’ཏི ཝུཏྟཾ. ‘‘ཨཔྤམཱཎིཀཱཡོ’’ཏི པན ཝུཏྟཏྟཱ པམཱཎམཏིཀྐམནྟསྶ སངྒྷཱདིསེསོཝ ནིདཱནཱཔེཀྑོ. ཏཏྠ སཱརམྦྷེ ཨཔརིཀྐམནེ སངྒྷཱདིསེསཔྤསངྒཾ ཝིཡ དིསྶམཱནཾ ‘‘ཝིབྷངྒོ ཏཾནིཡམཀོ’’ཏི ཝུཏྟཏྟཱ ཝིབྷངྒེ ན ནིཝཱརེཏི. ཏཐཱ མཧལླཀེ.

ཨེཏྠཱཧ – ཀིམཏྠཾ མཱཏིཀཱཡཾ དུཀྐཊཝཏྠུ ཝུཏྟཾ, ནནུ ཝིབྷངྒེ ཨེཝ ཝཏྟབྦཾ སིཡཱཏི? ཨེཝམེཏཾ. ཀིཾ ནུ བྷིཀྑཱུ ཨབྷིནེཏབྦཱ ཝཏྠུདེསནཱཡ, ཏེཧི བྷིཀྑཱུཧི ཝཏྠུ དེསེཏབྦཾ, ཀཱིདིསཾ? ཨནཱརམྦྷཾ སཔརིཀྐམནནྟི. ཨིཏརཉྷི ‘‘སཱརམྦྷེ ཙེ བྷིཀྑུ ཝཏྠུསྨིཾ ཨཔརིཀྐམནེ’’ཏི ཨེཝཾ ཨནུཔྤསངྒཝསེན ཨཱགཏཏྟཱ ཝུཏྟཾ. ཡསྨཱ ཝཏྠུ ནཱམ ཨཏྠི སཱརམྦྷཾ ཨཔརིཀྐམནཾ, ཨཏྠི ཨནཱརམྦྷཾ སཔརིཀྐམནཾ, ཨཏྠི སཱརམྦྷཾ སཔརིཀྐམནཾ, ཨཏྠི ཨནཱརམྦྷཾ ཨཔརིཀྐམནནྟི བཧུཝིདྷཾ, ཏསྨཱ བཧུཝིདྷཏྟཱ ཝཏྠུ དེསེཏབྦཾ ཨནཱརམྦྷཾ སཔརིཀྐམནཾ, ནེཏརནྟི ཝུཏྟཾ ཧོཏི. ཀིམཏྠིཀཱ པནེཏྠ ཝཏྠུདེསནཱཏི ཙེ? གརུཀཱཔཏྟིཔཉྙཱཔནཧེཏུཔརིཝཛྫནུཔཱཡཏྟཱ. ཝཏྠུཨདེསནཱ ཧི གརུཀཱཔཏྟིཔཉྙཱཔནཧེཏུབྷཱུཏཱ. གརུཀཱཔཏྟིཔཉྙཱཔནཾ ཨཀཏཝིཉྙཏྟིགིཧིཔཱིལཱ༹ཛནནཾ, ཨཏྟདུཀྑཔརདུཀྑཧེཏུབྷཱུཏོ ཙ སཱརམྦྷབྷཱཝོཏི ཨེཏེ ཝཏྠུདེསནཱཔདེསེན ཨུཔཱཡེན པརིཝཛྫིཏཱ ཧོནྟི. ན ཧི བྷིཀྑཱུ ཨཀཔྤིཡཀུཊིཀརཎཏྠཾ གིཧཱིནཾ ཝཱ པཱིལཱ༹ནིམིཏྟཾ, སཱརམྦྷཝཏྠུཀུཊིཀརཎཏྠཾ ཝཱ ཝཏྠུཾ དེསེནྟཱིཏི. ཧོནྟི ཙེཏྠ –

‘‘དུཀྐཊསྶ ¶ ཧི ཝཏྠཱུནཾ, མཱཏིཀཱཡ པཀཱསནཱ;

གརུཀཱཔཏྟིཧེཏཱུནཾ, ཏེསཾ ཨེཝཾ པཀཱསིཏཱ.

‘‘ཝཏྠུསྶ དེསནུཔཱཡེན, གརུཀཱཔཏྟིཧེཏུཡོ;

ཝཛྫིཏཱ ཧོནྟི ཡཾ ཏསྨཱ, སཱརམྦྷཱདི ཛཧཱཔིཏ’’ནྟི.

ཀུཊིཀཱརསིཀྑཱཔདཝཎྞནཱ ནིཊྛིཏཱ.

༧. ཝིཧཱརཀཱརསིཀྑཱཔདཝཎྞནཱ

ཀིརིཡཱམཏྟཏོ ¶ སམུཊྛཱནབྷཱཝཏོ ཨཀིརིཡམེཝེཏཾ. ཏཾ དེསནཱཨཀརཎཝསེན. བྷིཀྑཱུ ཝཱ ཨནབྷིནེཡྻཱཏི ཨེཏྠ ཝཱ-སདྡོ ཨཝདྷཱརཎཏྠོཏི ཝེདིཏབྦོ. ‘‘ཨཱཡསྨཱ ཚནྣོ ཙེཏིཡརུཀྑཾ ཚེདཱཔེསཱི’’ཏི (པཱརཱ. ༣༦༥) ཨཱགཏཏྟཱ ཨིདམྤི ནིདཱནཱཔེཀྑནྟི ཝེདིཏབྦཾ.

ཝིཧཱརཀཱརསིཀྑཱཔདཝཎྞནཱ ནིཊྛིཏཱ.

༨. དུཊྛདོསསིཀྑཱཔདཝཎྞནཱ

‘‘ཀསྨཱ མམ ཝནྡནཱདཱིནི…པེ… ‘གྷཊིཏེཡེཝ སཱིསཾ ཨེཏཱི’ཏི ཝུཏྟཏྟཱ ཨནྟིམཝཏྠུཨཛ྄ཛྷཱཔནྣཀཾ ཝནྡིཏུཾ ན ཝཊྚཏཱི’’ཏི ཝདནྟི, ཏཾ ན གཧེཏབྦཾ. པརིཝཱརཱཝསཱནེ ཨུཔཱལིཔཉྩཀེ ‘‘ཀཏི ནུ ཁོ, བྷནྟེ, ཨཝནྡིཡཱ’’ཏིཨཱདིནཱ (པརི. ༤༦༧) ཝུཏྟཔཱལི༹ཡཾ ཨཝུཏྟཏྟཱ, ‘‘པཙྪཱ ཨུཔསམྤནྣེན པུརེ ཨུཔསམྤནྣོ ཝནྡིཡོ’’ཏི (པརི. ༤༦༨) ཝུཏྟཏྟཱ ཙ, ཏསྨཱ ཨེཝ ཨིམིསྶཾ ཀངྑཱཝིཏརཎིཡཾ ‘‘ཨུཔསམྤནྣོཏི སངྑྱུཔགམན’’ནྟི ཝུཏྟཾ. སུཏྟཱདྷིཔྤཱཡོ པན ཨེཝཾ གཧེཏབྦོ – ཨཝནྡནྟོ སཱམཱིཙིཔྤཊིཀྑེཔསངྑཱཏཱཡ ཙོདནཱཡ ཙོདེཏི ནཱམཱཏི དསྶནཏྠཾ ཝུཏྟནྟི. ཏསྨཱ ཨེཝ ‘‘ཨེཏྟཱཝཏཱ ཙ ཙོདནཱ ནཱམ ཧོཏཱི’’ཏི ཝུཏྟཾ. ཨིདྷ ཨདྷིཔྤེཏཾ ཨཱཔཏྟིཨཱཔཛྫནཱཀཱརཾ དསྶེཏུཾ ‘‘‘ཀསྨཱ མམ ཝནྡནཱདཱིནི ན ཀརོསཱི’ཏིཨཱདི ཝུཏྟ’’ནྟི ལིཁིཏཾ.

ཀཏཱུཔསམྤདནྟི ཡསྶ ཨུཔསམྤདཱ རུཧཏི, ཏཾ, པཎྜཀཱདཡོ. ཋཔནཀྑེཏྟནྟི ཨེཏྠ སབྦསངྒཱཧིཀཾ, པུགྒལིཀཉྩཱཏི དུཝིདྷཾ པཝཱརཎཱཋཔནཾ. ཏཏྠ ¶ སབྦསངྒཱཧིཀེ ‘‘སུཎཱཏུ མེ, བྷནྟེ, སངྒྷོ…པེ… ཏེཝཱཙིཀཾ པཝཱརེ’’ཏི སུ-ཀཱརཏོ ཡཱཝ རེ-ཀཱརོ. པུགྒལིཀཋཔནེ པན ‘‘སངྒྷཾ, བྷནྟེ, པཝཱརེམི…པེ… པསྶནྟོ པཊཱི’’ཏི སཾ-ཀཱརཏོ ཡཱཝ ཨཡཾ སབྦཔཙྪིམོ ཊི-ཀཱརོ, ཨེཏྠནྟརེ ཨེཀཔདེཔི ཋཔེནྟེན ཋཔིཏཱ ཧོཏི. ཨུཔོསཐེ པན ཨིམིནཱནུསཱརེན ཝིསེསོ ཝེདིཏབྦོ ‘‘ཀརེཡྻཱ’’ཏི རེ-ཀཱརེ ཨནཏིཀྐམནྟེ.

དུཊྛདོསསིཀྑཱཔདཝཎྞནཱ ནིཊྛིཏཱ.

༩. ཨཉྙབྷཱགིཡསིཀྑཱཔདཝཎྞནཱ

ཨཉྙབྷཱགོ ¶ ཝཱ ཨསྶ ཨཏྠཱིཏི ཡཐཱ སུཝཎྞསྶེདཾ སོཝཎྞམིཏྱཏྲ སུཝཎྞཝཱ ཨནེན སུཝཎྞོ ཨིཏྱུཙྩཏེ. ཏཾ པཊིམཱཡ སརཱིརཾ, སིལཱཔུཏྟཀསྶ སརཱིརནྟི ཙ ནིདསྶནཾ. ཚགལཀསྶ ‘‘དབྦོ’’ཏི དིནྣཾ ནཱམཾ ‘‘དེསོ’’ཏི ཝུཙྩཏི. ཀསྨཱ? ཐེརཾ ཨནུདྡྷཾསེཏུཾ ཐེརསྶཱཔི ཨཔདིསིཏབྦཏྟཱ. ཨཉྙམྤི ཝཏྠུཾ ན ཐེརཾཡེཝ. ལིསྶཏི སིལིསྶཏི ཝོཧཱརམཏྟེནེཝན ཨཏྠཏོ. ཨཱིསཀཾ ཨལླཱིཡཏཱིཏི ལེསོཏི ཨདྷིཔྤཱཡོ. ལིསསེལཚཀོལཨལླཱིབྷཱཝེ. ཏེན ཝུཏྟཾ ‘‘ཨཱིསཀཾ ཨལླཱིཡཏཱིཏི ལེསོ’’ཏི. ཡསྨཱ དེསལེསཱ ཨཏྠཏོ ནིནྣཱནཱཀརཎཾ, ཏསྨཱ ‘‘ཀིཉྩིདེསཾ ལེསམཏྟཾ ཨུཔཱདཱཡཱ’’ཏི པདཾ ཨུདྡྷརིཏྭཱ ‘‘དས ལེསཱ ཛཱཏིལེསོ’’ཏིཨཱདི (པཱརཱ. ༣༩༤) པདབྷཱཛནེ ཝུཏྟཾ.

ཨཊྛུཔྤཏྟིཝསེནེཝ ཨཱཝིབྷཱུཏནྟི ཨེཏྠ ཀིཉྩ བྷིཡྻོ ཨནིཡམཏྟཱ. ན ཧི མེཏྟིཡབྷཱུམཛཀཱནཾ ཝིཡ ཨཉྙེསཾ སབྦེསམྤི ‘‘ཚགལཀམེཝེཏྠ ཨཉྙབྷཱགིཡཾ ཨདྷིཀརཎཾ ཧོཏི, ཨཉྙཾ གོམཧིཾསཱདིཀམྤི ཧོཏི, ན ཙ མེཏྟིཡབྷཱུམཛཀཱ ཝིཡ སབྦེཔི ནཱམལེསམཏྟམེཝ ཨུཔཱདིཡནྟི, ཨཉྙམྤི ཛཱཏིལེསཱདིཾ ཨུཔཱདིཡནྟི, ཏསྨཱ ཨནིཡམཏྟཱ ན ཝིབྷཏྟཾ. ཀིཉྩ བྷིཡྻོ ཏཐཱཝུཏྟེ ཚགལཀསྶེཝ ཨཉྙབྷཱགིཡཏཱ སམྦྷཝཏི, ན ཨཉྙསྶ, ཡེན སོཝ དསྶིཏོ. ལེསོ ཙ ནཱམ ལེསོཝ, ན ཛཱཏིཨཱདི, ཡེན སོཝ དསྶིཏོཏི ཨེཝཾ མིཙྪཱགཱཧཔྤསངྒཏོཏི ཝེདིཏབྦཾ. ཨིདྷ ཙ…པེ… སཉྙིནོཔཱིཏི ཨིམསྨིཾ སིཀྑཱཔདེ ཙ ཨམཱུལཀསིཀྑཱཔདེ ཙཱཏི ཨཏྠོ.

ཨཉྙབྷཱགིཡསིཀྑཾ ¶ ཡོ, ནེཝ སིཀྑཏི ཡུཏྟིཏོ;

གཙྪེ ཝིནཡཝིཉྙཱུཧི, ཨཉྙབྷཱགིཡཏཾཝ སོ. (ཝཛིར. ཊཱི. པཱརཱཛིཀ ༤༠༨);

ཨཉྙབྷཱགིཡསིཀྑཱཔདཝཎྞནཱ ནིཊྛིཏཱ.

༡༡. བྷེདཱནུཝཏྟཀསིཀྑཱཔདཝཎྞནཱ

ཏིཎྞཾ ཨུདྡྷཾ ཀམྨཱརཧཱ…པེ… ཀརོཏཱིཏི ཨེཏྠ ‘‘ཨིམེ ཙཏྟཱརོ’’ཏི ཝཱ ‘‘ཨིམཉྩ ཨིམཉྩཱ’’ཏི ཝཱ ཝཏྭཱ ཀཱཏུཾ ན ཝཊྚཏཱིཏི ལིཁིཏཾ.

བྷེདཱནུཝཏྟཀསིཀྑཱཔདཝཎྞནཱ ནིཊྛིཏཱ.

༡༢. དུབྦཙསིཀྑཱཔདཝཎྞནཱ

དུཀྑེན ¶ ཝཏྟབྦོ དུབྦཙོ. ཝུཙྩམཱནོ ན སཧཏི.

དུབྦཙསིཀྑཱཔདཝཎྞནཱ ནིཊྛིཏཱ.

ནིགམནཝཎྞནཱ

‘‘ནཱམམཏྟཝསེནཱ’’ཏི པཱཋོ. ‘‘ནཱམགོཏྟཝསེནཱ’’ཏི ལིཁིཏཾ. ཨིདཾ ཝུཏྟཾ ཧོཏི – ‘‘ཨཡཾ ཀིརིཡཱ བྷིཀྑཱུནཾ ཀཱཏུཾ ན ཝཊྚཏཱི’’ཏི ཛཱནིཏྭཱ སཙེ ཚཱདེཏི, ཚནྣཱཝ ཧོཏཱིཏི ཨཏྠོ. སབྷཱགམཏྟམེཝཱཏི ཨཝེརིསབྷཱགམཏྟམེཝཱཏི ཨདྷིཔྤཱཡོ.

ཝཏྠུ ཙེཝ གོཏྟཉྩཱཏི ཨེཏྠ ཝཏྠཱུཏི ཝཱིཏིཀྐམནཾ ཨསུཙིམུཙྩནཾ. གོཏྟནྟི གཾ ཏཱཡཏཱིཏི གོཏྟཾ, སཛཱཏིཏོ ཨཉྙཏྠ གནྟུཾ ཨདཏྭཱ གཾ བུདྡྷིཾ, ཝཙནཉྩ ཏཱཡཏཱིཏི ཨཏྠོ. ཝཏྠུ ཙ སཛཱཏིམེཝ གཙྪཏི. སཛཱཏི ནཱམེཏྠ ཨཉྙེཧི ཝིསིཊྛཱཝིསིཊྛབྷཱུཏཱ ཀིརིཡཱ, ན ཀཱཡསཾསགྒཱདི. ནཱམཉྩེཝ ཨཱཔཏྟི ཙཱཏི ཨེཏྠ ཨཱཔཏྟཱིཏི ཝཱིཏིཀྐམེནཱཔནྣཱཔཏྟིཡཱ ནཱམཾ.

པུན ¶ ཨཱགཏཱགཏཱནཾ བྷིཀྑཱུནཾ ཨཱརོཙེནྟེནཱཏི ཨེཏྠ དྭིནྣཾ ཨཱརོཙེནྟེན ‘‘ཨཱཡསྨནྟཱ དྷཱརེནྟུ’’ཏིཎྞཾ ཝཱ ཨཏིརེཀཱནཾ ཝཱ ཨཱརོཙེནྟེན ‘‘ཨཱཡསྨནྟོ དྷཱརེནྟཱུ’’ཏི ཨེཝཾ ཨཱརོཙནཝིདྷཱནཾ ཝེདིཏབྦཾ. ཝཏྟབྷེདཉྩ རཏྟིཙྪེདཉྩ ཨཀཏྭཱཏི ཨེཏྠ ཋཔེཏྭཱ ནཝཀཏརཾ པཱརིཝཱསིཀཾ ཨཝསེསཱནཾ ཨནྟམསོ མཱུལཱཡཔཊིཀསྶནཱརཧཱདཱིནམྤི ཨབྷིཝཱདནཱདིསཱདིཡནེ, པཊིཔཱཊིཡཱ ནིསཱིདནེ, ཨོཝདནེ, ཀམྨིཀཱནཾ གརཧཎེ ཙཱཏིཨཱདཱིསུ ཝཏྟབྷེདོ ཧོཏི. དསྶནསཝནཝིསཡེསུ ཨནཱརོཙནེ ཙ བྷིཀྑཱུཧི ཨེཀཙྪནྣེ ཝསནེ ཙ ཨཛཱནནྟསྶེཝ ཝིཧཱརེ བྷིཀྑཱུནཾ ཨཱགནྟྭཱ གམནེ ཙཱཏིཨཱདཱིསུ རཏྟིཙྪེདོ ཧོཏི. ནཱནཱསཾཝཱསཀེཧི ཝིནཡཀམྨཱབྷཱཝཏོ ཏེསཾ ཨནཱརོཙནེ རཏྟིཙྪེདོ ན ཧོཏི. ‘‘དྭེ ལེཌྜུཔཱཏེ ཨཏིཀྐམིཏྭཱ’’ཏི ཝཙནཏོ ཨནྟོ ན ཝཊྚཏི. ནིཀྑིཏྟཝཏྟེནེཝ ཧུཏྭཱ ཝིཙརནྟེན ཡསྶ སནྟིཀེ པུབྦེ སམཱདིཡིཏྭཱ ཨཱརོཙིཏཾ, ཏསྶཱཔི སནྟིཀེ པཙྪཱ ནིཀྑིཔནཀཱལེ ཨཱརོཙེཏྭཱཝ ནིཀྑིཔིཏབྦཾ. ཏསྨཱ པུན སམཱདཱནཀཱལེཔི སོ ཙེ ཏཏོ གཙྪཏི, ཏཾ དིཝསཾ ཨགནྟྭཱ དིཝཱ ཨཱརོཙེཏྭཱཔི ཡདི ཨེཝཾ ཨཏཱིཏདིཝསཾ ཧོཏི, ‘‘ཨརུཎེ ཨུཊྛིཏེ ཏསྶ སནྟིཀེ ཨཱརོཙེཏྭཱ ཝཏྟཾ ནིཀྑིཔིཏྭཱ ཝིཧཱརཾ གནྟབྦནྟི ཏསྶ སནྟིཀེ ཨཱརོཙེཏྭཱ ཝཏྟཾ ནིཀྑིཔིཏབྦ’’ནྟི ཝུཏྟཾ. ཨཔིཙ ‘‘ཝིཧཱརཾ གནྟྭཱ ཡཾ སབྦཔཋམཾ ¶ བྷིཀྑུཾ པསྶཏི, ཏསྶ ཨཱརོཙེཏྭཱ ནིཀྑིཔིཏབྦ’’ནྟི ཝུཏྟཾ. སཙེ རཏྟིཙྪེདོ ཧོཏི, ཝིཧཱརསཱིམཱཔརིཡཱཔནྣཱནཾ སབྦེསཾ ཨཱརོཙེཏབྦཾ སིཡཱ. ‘‘ཏསྶ ཨཱརོཙེཏྭཱ’’ཏི ཨིདཾ པན པུབྦེ ཨནཱརོཙིཏཾ སནྡྷཱཡ ཝཏྟབྷེདརཀྑཎཏྠཾ ཝུཏྟཾ. ཏསྨཱ ཨེཝ སམནྟཔཱསཱདིཀཱཡཾ (ཙཱུལ༹ཝ. ཨཊྛ. ༩༧) ཨེཝཾ ཝུཏྟཾ ‘‘ཨཉྙཾ ཝིཧཱརཏོ ནིཀྑནྟཾ ཝཱ ཨཱགནྟུཀཾ ཝཱ’’ཏི.

སུདྡྷནྟཔརིཝཱསེ པན སཙེ ‘‘མཱསམཏྟཾ ཨསུདྡྷོམྷཱི’’ཏི ཨགྒཧེསི, པརིཝསནྟོ པུན ཨཱུནཾ ཝཱ ཨདྷིཀཾ ཝཱ སནྣིཊྛཱནཾ ཀརོཏི, ཏཏྟཀམྤི པརིཝསིཏབྦམེཝ, པརིཝཱསདཱནཀིཙྩཾ ནཏྠི. ཨཡཉྷི སུདྡྷནྟཔརིཝཱསོ ནཱམ ཨུདྡྷམྤི ཨཱརོཧཏི, ཧེཊྛཱཔི ཨོརོཧཏི. ཨིདམསྶ ལཀྑཎཾ.

སམོདཧིཏྭཱཏི མཱུལཱཔཏྟིཊྛཱནེ ཋཔེཏྭཱ, པཀྑིཔིཏྭཱཏི ཨཏྠོ. ཨཔྤཊིཙྪནྣཱ ཙེ ཨནྟརཱཔཏྟི, མཱུལཱཡ པཊིཀསྶནཾ ཨཀཏྭཱ པུབྦེ གཧིཏཔརིཝཱསེནེཝ པརིཝསིཏབྦཾ. ཡོ པན ཨཱཔཏྟིཾ ཨཱཔཛྫིཏྭཱ ཝིབྦྷམིཏྭཱ པུན ཨུཔསམྤནྣོ ¶ ཧུཏྭཱཔི པཊིཙྪཱདེཏི, ཡོ ཙ པུབྦེ པཊིཙྪཱདེཏྭཱ པཙྪཱ ན པཊིཙྪཱདེཏི, ཡོ ཙ ཨུབྷཡཏྠ པཊིཙྪཱདེཏི, སབྦེསཾ པཊིཙྪནྣདིཝསཝསེན པརིཝཱསོ དཱཏབྦོ. ‘‘པུརིམསྨིཾ ཨཱཔཏྟིཀྑནྡྷེ ཝཱ’’ཏི ཙ ‘‘པཙྪིམསྨིཾ ཨཱཔཏྟིཀྑནྡྷེ ཝཱ’’ཏི (ཙཱུལ༹ཝ. ༡༦༦ ཨཱདཡོ) ཙ པཱལི༹ཡཾ ཝུཏྟཏྟཱ དྭེ བྷིཀྑཱུ ཝིསུདྡྷིཀཾ ཨཱཔནྣཱ ཧོནྟི, ཏེ སུདྡྷིཀདིཊྛིནོ ཧོནྟི. ཨེཀོ ཚཱདེཏི, ཨེཀོ ན ཚཱདེཏི. ཡོ ཚཱདེཏི, སོ དུཀྐཊཾ དེསཱཔེཏབྦོ. ‘‘ཨུབྷོཔི ཡཐཱདྷམྨཾ ཀཱརཱཔེཏབྦཱ’’ཏི (ཙཱུལ༹ཝ. ༡༨༡) ཝཙནཏོ ཡཾ ཀཉྩི ཨཱཔཏྟིཾ ཚཱདེཏྭཱ དུཀྐཊཾ ཨཱཔཛྫཏཱིཏི ཝེདིཏབྦོ.

ཏེསུ གཏེསུ ཝཱ ཨགཏེསུ ཝཱ པུརིམནཡེནེཝ པཊིཔཛྫིཏབྦནྟི ཨེཏྠ ཨཱུནེ གཎེ ཙརཎཾ, ཨནུཊྛཧནཾ ཨེཀརཏྟམྤི གཎེན ཝིཔྤཝཱསཾ, སཙེ རཏྟིཡཱ ཨེཀཀྑཎེན སངྒྷོ ཝསཏི, སཙེ སོ པུརེ ཨརུཎམེཝ ཀེནཙི ཀརཎཱིཡེན གཏོཏི ཨེཏྠཔི མཱནཏྟེཔི ཨེཝཾ ཛཱཏེ. ‘‘ཨཡཉྩ ཡསྨཱ གཎསྶ ཨཱརོཙེཏྭཱ, བྷིཀྑཱུནཉྩ ཨཏྠིབྷཱཝཾ སལླཀྑེཏྭཱཝ ཝསི, ཏེནསྶ ཨཱུནེ གཎེ ཙརཎདོསོ ཝཱ ཝིཔྤཝཱསོ ཝཱ ན ཧོཏཱི’’ཏི (ཙཱུལ༹ཝ. ཨཊྛ. ༩༧) སམནྟཔཱསཱདིཀཱཡཾ ཝུཏྟཾ. ཏསྨཱ ཏེན ཨཱརོཙིཏེ མུཧུཏྟམྤི ནིསཱིདིཏྭཱ གཏེཔི ཝིཔྤཝཱསོ ནཏྠི. པཱརིཝཱསིཀསྶ, ཨུཀྑིཏྟཀསྶ ཙ པཀཏཏྟེན ཏསྨིཾ ཝསནཾ ཨུདཀཔཱཏེན ཝཱརིཏཾ, ཏསྨཱ ནཱནཱུཔཙཱརེཔི ཨེཀཙྪནྣེ ན ཝཊྚཏི.

ཨིདཱནི པཱཋཝིཙཱརཎཱ ཝེདིཏབྦཱ – ‘‘ནཝ པཋམཱཔཏྟིཀཱ ཙཏྟཱརོ ཡཱཝཏཏིཡཀཱ’’ཏི ཨིདཾ སབྷཱཝནིཡམཝཙནཾ. ཏེན ཝུཊྛཱནཾ ཨནིཡམནྟི དསྶེཏི. ཨེཀཙྩཱཔཏྟིཝུཊྛཱནཉྷི ཀམྨཏོཔི ¶ ཧོཏི ཨཀམྨཏོཔི, ན ཨེཝཾ ཨཱཔཛྫནནྟི ཝུཏྟཾ ཧོཏི. ཨཉྙཏརཾ ཝཱ ཨཉྙཏརཾ ཝཱཏི ཏེསཾ དྭིདྷཱ བྷིནྣཱནམྤི ཝུཊྛཱནཀྐམབྷེདཱབྷཱཝདཱིཔཀཝཙནཾ. ཡཱཝཏཱིཧཾ, ཏཱཝཏཱིཧནྟི ཨེཏྠ ཨཧཔརིཙྪེདོ ཨརུཎཝསེན. ‘‘ཛཱན’’ནྟི ཨིམིནཱ ཛཱནནཔྤཊིཙྪནྣསྶ ཨཀཱམཱ པརིཝཏྠབྦནྟི དསྶེཏི. ཏེན བྷིཀྑུནཱ ཨཀཱམཱ པརིཝཏྠབྦནྟི ཏེན བྷིཀྑུནཱ ཝསཏཱ ཨཀཱམཱ པརིཝཏྠབྦཾ, ན པརིཝཏྟིཏལིངྒེནཱཏི དསྶནཏྠཾ ཝུཏྟཾ. པརིཝུཏྠཔརིཝཱསེནཱཏི ཨཱདིམྷི པརིཝུཏྠཔརིཝཱསེནེཝ པརིཝཱསཏོ ཨུཏྟརི ཨིཏིཝཱརེན ཨཱདིཏོ བྷིཀྑུནཱཝ ཚཱརཏྟཾ, པརིཝཏྟིཏལིངྒེན ཨུདྡྷམྤི བྷིཀྑུམཱནཏྟཱཡ པཊིཔཛྫིཏབྦཾ, ན པརིཝཱསེ ཝིཡ ཏཔྤཙྩཡཱ ཨཙིཎྞམཱནཏྟོ. ཙིཎྞམཱནཏྟོཝ ཨབྦྷེཏབྦོ, ན ཨིཏརོ, ན པརིཝཱསེ ཝིཡ མཱནཏྟཱརཧེ, པཀྑམཱནཏྟཉྩ ¶ ཙརནྟིཡཱ བྷིཀྑུནིཡཱ ལིངྒཾ པརིཝཏྟཱཏིཀྐམེ སཏི ཙིཎྞམཱནཏྟོ བྷིཀྑུ ཧོཏི, པུན བྷིཀྑུམཱནཏྟཾ གཧེཏྭཱ ཙིཎྞམཱནཏྟོཝ བྷིཀྑུ ཨབྦྷེཏབྦོཏི དསྶེཏི.

ཡཏྠ སིཡཱཏི ཡསྶཾ སམཱནསཾཝཱསཀསཱིམཱཡམྤི ཝཱིསཏིགཎོ བྷིཀྑུསངྒྷོ ཨཏྠི. ཨེཀེནཔི ཙེ ཨཱུནོ ཝཱིསཏིགཎོཏི ན ཡུཛྫཏི, ཨཱུནོ ཙེ. ན ཧི ཝཱིསཏིགཎོ, སངྒྷོ ཙེ ཨཱུནོ. ཏསྨཱ ‘‘ཨེཀེནཔི ཙེ ཨཱུནོ སངྒྷོ’’ཏི ཨེཏྟཀམེཝ ཝཏྟབྦནྟི ཙེ? ན, ཙཏུཝགྒཔཉྩཝགྒདསཝགྒཔྤསངྒནིཝཱརཎཔྤཡོཛནཏོ. ཏསྨཱ ཝཱིསཏིཝགྒོ བྷིཀྑུསངྒྷོ ཙེ བྷིཀྑུནཱ ཨེཀེནཔི ཨཱུནོ, ནཊྛོ དཊྛབྦོ. ཀེཙི པན ཝིནཡེ ཨཔྤཀཏཉྙུནོ ‘‘ཡཐཱ ཨཏིརེཀཙཏུཝགྒོཔི སངྒྷོ ཙཏུཝགྒཀརཎཱིཡེ ཀམྨེ ‘ཙཏུཝགྒོ’ཏི ཝུཙྩཏི, ཏཐཱ པཉྩཝགྒདསཝགྒཀརཎཱིཡེ ཀམྨེ ཨཏིརེཀཔཉྩཝགྒདསཝགྒོཔི ‘པཉྩཝགྒདསཝགྒོ’ཏི ཝུཙྩཏི. ཏསྨཱ ཨཱུནོཔི ཙཏུཝགྒཔཉྩཝགྒདསཝགྒཝཱིསཏིཝགྒོཝཱ’’ཏི མཉྙེཡྻུཾ, ཏེསཾ མཉྙནཱནིཝཱརཎཏྠཾ ‘‘ཨེཀེནཔི ཙེ ཨཱུནོ’’ཏིཨཱདི ཝུཏྟཾ. ཨཐ ཝཱ ཝཱིསཏི བྷིཀྑུསངྒྷོ ཙེ, ཋཔེཏྭཱ ཨེཀེནཔི ཙེ ཨཱུནོ ཨཔྤཀཏཏྟོ, ཏཾ ཋཔེཏྭཱ ཨེཀེནཔི ཙེཏི ཨེཝམེཏྠ ཨཏྠོ དཊྛབྦོ. ཨཡཾ ཏཏྠ སཱམཱིཙཱིཏི ཝཙནཾ ཡཾ ཝུཏྟཾ སབྦཏྠ ‘‘ཏསྶ ཨཱཔཏྟིཡཱ པརིཝཱསཾ དེཏི, མཱུལཱཡ པཊིཀསྶཏི, མཱནཏྟཾ དེཏི, ཨབྦྷེཏཱི’’ཏི, ཏསྶ ཨཱཝིབྷཱཝཀརཎཏྠཾ ཝུཏྟནྟི ཝེདིཏབྦཾ. ཏེན ཏེསུ ཨཡཾ ཡཐཱཝུཏྟཱ སཱམཱིཙི ནིཡཏཱ ཨིཙྪིཏབྦཱ, ན རཱཛསིཀྑཱཔདཱདཱིསུ ཝིཡ ཨནིཡཏཱ. ཏཏྠ ཧི ཀེནཙི ཨནྟརཱཡེན ཏཾ སཱམཱིཙིམཀརོནྟེཔི ཨནཱཔཏྟཱིཏི དཱིཔིཏཾ ཧོཏི.

སངྒྷཱདིསེསཝཎྞནཱ ནིཊྛིཏཱ.

ཨནིཡཏཀཎྜཾ

༡. པཋམཱནིཡཏསིཀྑཱཔདཝཎྞནཱ

ཨནིཡཏེ ¶ ¶ ཨཱདིཏོཝ ཨིདཾ པཀིཎྞཀཾ. སེཡྻཐིདཾ – ཨིདཾ ཨནིཡཏཀཎྜཾ ནིཔྤཡོཛནཾ ཏཏྠ ཨཔུབྦཱབྷཱཝཏོཏི ཙེ? ན, གརུཀལཧུཀབྷེདབྷིནྣཱཔཏྟིརོཔནཱརོཔནཀྐམལཀྑཎདཱིཔནཔྤཡོཛནཏོ. ཨེཏྠ ཧི ‘‘སཱ ཙེ ཨེཝཾ ཝདེཡྻ ‘ཨཡྻོ མཡཱ…པེ… སོ ཙ ཏཾ པཊིཛཱནཱཏི, ཨཱཔཏྟིཡཱ ཀཱརེཏབྦོ’’’ཏིཨཱདིནཱ (པཱརཱ. ༤༤༦) ཨཱཔཏྟིཡཱ གརུཀཱཡ, ལཧུཀཱཡ ཙ ཨཱརོཔནཀྐམལཀྑཎཾ, ‘‘ན ཀཱརེཏབྦོ’’ཏི ཨིམིནཱ ཨནཱརོཔནཀྐམལཀྑཎཉྩ དསྶིཏཾ. ལཀྑཎདཱིཔནཏོ ཨཱདིམྷི, ཨནྟེ ཝཱ ཨུདྡིསིཏབྦནྟི ཙེ? ན, ཨསམྦྷཝཏོ. ཀཐཾ ན ཏཱཝ ཨཱདིམྷི སམྦྷཝཏི, ཡེསམིདཾ ལཀྑཎཾ, ཏེསཾ སིཀྑཱཔདཱནཾ ཨདསྶིཏཏྟཱ. ན ཨནྟེ གརུཀམིསྶཀཏྟཱ. ཏསྨཱ གརུཀལཧུཀཱནཾ མཛ྄ཛྷེ ཨེཝ ཨུདྡིསིཏབྦཏཾ ཨརཧཏི ཨུབྷཡམིསྶཀཏྟཱ. ཡཱ ཏཏྠ པཱཙིཏྟིཡསངྑཱཏཱ ལཧུཀཱཔཏྟི དསྶིཏཱ, སཱཔི གརུཀཱཏི ཀཐིཏཱ. ཏེནེཝཱཧ ‘‘མེཐུནདྷམྨསནྣིསྶིཏཀིལེསསངྑཱཏེན རཧསྶཱདེནཱ’’ཏིཨཱདི. ཏསྨཱ གརུཀཱནཾ ཨེཝ ཨནནྟརཾ ཨུདྡིཊྛནྟིཔི ཨེཀེ. ཨེཝཾ སཏི པཋམཱནིཡཏམེཝཱལཾ ཏཱཝཏཱ ལཀྑཎདཱིཔནསིདྡྷིཏོ, ཀིཾ དུཏིཡེནཱཏི ཙེ? ན, ཨོཀཱསནིཡམཔཙྩཡམིཙྪཱགཱཧནིཝཱརཎཔྤཡོཛནཏོ. ‘‘པཊིཙྪནྣེ ཨཱསནེ ཨལཾཀམྨནིཡེ’’ཏི ཨོཀཱསནིཡམཏོ ཧི ཏབྦིཔརཱིཏེ ཨོཀཱསེ ཨིདཾ ལཀྑཎཾ ན ཝིཀཔྤིཏནྟི མིཙྪཱགཱཧོ ཧོཏི. ཏཾནིཝཱརཎཏོ དུཏིཡཱནིཡཏམྤི སཱཏྠཀམེཝཱཏི ཨདྷིཔྤཱཡོ. ཀསྨཱ? ཨོཀཱསབྷེདཏོ, རཧོབྷེདདཱིཔནཏོ, རཧོནིསཛྫསྶཱདབྷེདདཱིཔནཏོ. ཨོཀཱསནིཡམབྷཱཝེ ཙ རཧོནིསཛྫསྶཱདབྷེདོ ཛཱཏོ. དྭིནྣཾ རཧོནིསཛྫསིཀྑཱཔདཱནཾ ནཱནཱཏྟཛཱནནཉྩ སིཡཱ ཏཐཱ ཀཱཡསཾསགྒབྷེདདཱིཔནཏོ. ནཱལཾ ཀམྨནིཡེཔི ཧི ཨོཀཱསེ ཨཔྤཊིཙྪནྣེ, པཊིཙྪནྣེཔི ཝཱ ནིསིནྣཱཡ ཝཱཏཔཱནཀཝཱཊཙྪིདྡཱདཱིཧི ནིཀྑནྟཀེསཱདིགྒཧཎེན ཀཱཡསཾསགྒོ ལབྦྷཏཱིཏི ཨེཝམཱདཡོཔི ནཡཱ ཝིཏྠཱརཏོ ཝེདིཏབྦཱ.

ཏཏྲིདཾ ¶ མུཁམཏྟནིདསྶནཾ – ཨོཀཱསབྷེདཏོཏི ཨལཾཀམྨནིཡནཱལཾཀམྨནིཡབྷེདཏོ. པཊིཙྪནྣམྤི ཧི ཨེཀཙྩཾ ནཱལཾཀམྨནིཡཾ ཝཱཏཔཱནཱདིནཱ ཨནྟརིཏཏྟཱ ¶ , ཨུབྷཡཔྤཊིཙྪནྣམྤི ཨེཀཙྩཾ ནཱལཾཀམྨནིཡཾ ཝིཛཱནཏཾ ཨཛ྄ཛྷོཀཱསཏྟཱ. རཧོབྷེདདཱིཔནཏོཏི ཨེཏྠ རཧབྷཱཝསཱམཉྙེཔི རཧོ དྭིདྷཱ པཊིཙྪནྣཱཔཊིཙྪནྣབྷེདཏོཏི ཨདྷིཔྤཱཡོ. རཧོནིསཛྫསྶཱདབྷེདདཱིཔནཏོཏི མེཐུནསྶཱདཝསེན ནིསཛྫཱ, དུཊྛུལླསྶཱདཝསེན ནིསཛྫཱཏི ཏཱདིསསྶ བྷེདསྶ དཱིཔནཏོཏི ཨཏྠོ. ‘‘ཨིདྷ ཨཱགཏནཡཏྟཱ བྷིཀྑུནིཔཱཏིམོཀྑེ ཨིདཾ ཀཎྜཾ པརིཧཱིནནྟི ཝེདིཏབྦ’’ནྟི ཝདནྟི. ‘‘ཨཊྛུཔྤཏྟིཡཱ ཏཏྠ ཨནུཔྤནྣཏྟཱ’’ཏི ཨེཀེ, ཏཾ ཨནེཀནྟབྷཱཝདཱིཔནཏོ ཨཡུཏྟཾ. སབྦབུདྡྷཀཱལེ ཧི བྷིཀྑཱུནཾ པཉྩ, བྷིཀྑུནཱིནཾ ཙཏྟཱརོ ཙ ཨུདྡེསཱ སནྟི. པཱཏིམོཀྑུདྡེསཔཉྙཏྟིཡཱ ཨསཱདྷཱརཎཏྟཱ ཏཏྠ ནིདྡིཊྛསངྒྷཱདིསེསཔཱཙིཏྟིཡཱནནྟི ཨེཀེ. ཏཱསཉྷི བྷིཀྑུནཱིནཾ ཨུབྦྷཛཱཎུམཎྜལིཀ (པཱཙི. ༦༥༨) -ཨཊྛཝཏྠུཀ (པཱཙི. ༦༧༥) -ཝསེན ཀཱཡསཾསགྒཝིསེསོ པཱརཱཛིཀཝཏྠུ, ‘‘ཧཏྠགྒཧཎཾ ཝཱ སཱདིཡེཡྻ, ཀཱཡཾ ཝཱ ཏདཏྠཱཡ ཨུཔསཾཧརེཡྻཱ’’ཏི (པཱཙི. ༦༧༥) ཝཙནཏོ སཱདིཡནམྤི, ‘‘སནྟིཊྛེཡྻ ཝཱ’’ཏི (པཱཙི. ༦༧༥) ཝཙནཏོ ཋཱནམྤི, ‘‘སངྐེཏཾ ཝཱ གཙྪེཡྻཱ’’ཏི (པཱཙི. ༦༧༥) ཝཙནཏོ གམནམྤི, ‘‘ཚནྣཾ ཝཱ ཨནུཔཝིསེཡྻཱ’’ཏི (པཱཙི. ༦༧༥) ཝཙནཏོ པཊིཙྪནྣཊྛཱནཔྤཝེསོཔི ཧོཏི, ཏཐཱ ‘‘རཏྟནྡྷཀཱརེ ཨཔྤདཱིཔེ, པཊིཙྪནྣེ ཨོཀཱསེ ཨཛ྄ཛྷོཀཱསེ ཨེཀེནེཀཱ སནྟིཊྛེཡྻ ཝཱ སལླཔེཡྻ ཝཱ’’ཏི (པཱཙི. ༨༣༩) ཝཙནཏོ དུཊྛུལླཝཱཙཱཔི པཱཙིཏྟིཡཝཏྠུཀནྟི ཀཏྭཱ ཏཱསཾ ཨཉྙཐཱ ཨནིཡཏཀཎྜསྶ ཨཝཏྟབྦཏཱཔཏྟིཏོ ན ཝུཏྟནྟི ཏེསཾ ཨདྷིཔྤཱཡོ. པཀིཎྞཀཾ.

‘‘དེསནཱཝུཊྛཱནགཱམིནཱིནཾ ཨཱཔཏྟཱིནཾ ཝསེན ཨལཛྫིཨཱདཡོ ལཛྫཱིནཾ ཙོདེསྶནྟཱི’’ཏི ཨཱགཏཏྟཱ ལཛྫིཔགྒཧཏྠཱཡ པཏིརཱུཔཱཡཔི ཨུཔཱསིཀཱཡ ཝཙནེན ཨཀཏྭཱ བྷིཀྑུསྶེཝ པཊིཉྙཱཡ ཀཱཏབྦནྟི ཨཱཔཏྟིཡོ པན ལཀྑཎདསྶནཏྠཾ པཉྙཏྟཾ ཝིཏྠཱརནཡམེཝ གཧེཏྭཱ ཝཏྟུཾ ཡུཏྟཾ ‘‘ཨིམེ ཁོ པནཱཡསྨནྟོ དྭེ ཨནིཡཏཱ དྷམྨཱ’’ཏི (པཱརཱ. ༤༤༣) ཨུདྡེསདསྶནཏྟཱཏི ལིཁིཏཾ. སོཏསྶ རཧོཏི ཨེཏྠ རཧོཏི ཝཙནསཱམཉྙཏོ ཝུཏྟཾ. དུཊྛུལླསཱམཉྙཏོ དུཊྛུལླཱརོཙནཔྤཊིཙྪཱདནསིཀྑཱཔདེསུ པཱརཱཛིཀཝཙནཾ ཝིཡ. ཏསྨཱ ‘‘ཙཀྑུསྶེཝ པན རཧོ ‘རཧོ’ཏི ཨིདྷ ཨདྷིཔྤེཏོ’’ཏི ཝུཏྟཾ. ཀཐཾ པཉྙཱཡཏཱིཏི ཙེ? ‘‘མཱཏུགཱམོ ནཱམ…པེ… ཨནྟམསོ ཏདཧུཛཱཏཱཔི དཱརིཀཱ’’ཏི (པཱརཱ. ༤༤༥) ཝུཏྟཏྟཱ དུཊྛུལློབྷཱསནཾ ཨིདྷ ནཱདྷིཔྤེཏནྟི དཱིཔིཏམེཝཱཏི. ཨནྟོདྭཱདསཧཏྠེཔཱིཏི ¶ པི-སདྡེན ཨཔིཧིཏཀཝཱཊསྶ གབྦྷསྶ དྭཱརེ ནིསིནྣོཔཱིཏི ཨཏྠོ. ཨཙེལཀཝགྒེ རཧོཔཊིཙྪནྣཱསནསིཀྑཱཔདེ (པཱཙི. ༢༨༨) ‘‘ཡོ ཀོཙི ཝིཉྙཱུ པུརིསོ དུཏིཡོ ཧོཏཱི’’ཏི ཨིམསྶ ཨནུརཱུཔཏོ ‘‘ཨིཏྠཱིནཾ པན སཏམྤི ཨནཱཔཏྟིཾ ན ཀརོཏིཡེཝཱ’’ཏི ཝུཏྟཾ. ‘‘ཨལཾཀམྨནིཡེཏི སཀྐཱ ཧོཏི མེཐུནཾ དྷམྨཾ པཊིསེཝིཏུ’’ནྟི (པཱརཱ. ༤༤༥) ཝིབྷངྒེ ¶ ཝཙནཏོ རཧོནིསཛྫསྶཱདོ ཙེཏྠ མེཐུནདྷམྨསནྣིསྶིཏཀིལེསོ, ན དུཏིཡེ ཝིཡ དུཊྛུལླཝཱཙསྶཱདཀིལེསོ. ཏསྨཱ ཙ པཉྙཱཡཏི སོཏསྶ རཧོ ནཱདྷིཔྤེཏོཏི.

ཏིཎྞཾ དྷམྨཱནཾ ཨཉྙཏརེན ཝདེཡྻཱཏི རཧོནིསཛྫསིཀྑཱཔདཝསེན ནིསིནྣསྶ ཏསྶཱནུསཱརེན པཱཙིཏྟིཡམེཝ ཨཝཏྭཱ པཱརཱཛིཀསངྒྷཱདིསེསཱཡཔི ཨཱཔཏྟིཡཱ བྷེདདསྶནཏྠཾ ཝུཏྟཾ. པུན ཨཱཔཏྟིཔྤཊིཛཱནནཾ ཨཝཏྭཱ ཀསྨཱ ‘‘ནིསཛྫཾ བྷིཀྑུ པཊིཛཱནམཱནོ’’ཏི ཝཏྠུཔྤཊིཛཱནནཾ ཝུཏྟནྟི? ཝུཙྩཏེ – ཨཱཔཏྟིཡཱ ཙོདིཏེ ཝིནཡདྷརེན ‘‘ཀིསྨིཾ ཝཏྠུསྨི’’ནྟི པུཙྪིཏེ ཙུདིཏཀེན ‘‘ཨིམསྨིཾ ཝཏྠུསྨི’’ནྟི ཝུཏྟེ ཝིནཡདྷརེན ‘‘ཨཱིདིསཾ ནཱམ ཨཀཱསཱི’’ཏི པུཙྪིཏེ སོ ཝཏྠུཾ པཊིཛཱནམཱནོཝ ཀཱརེཏབྦོཏི དསྶནཏྠཾ ‘‘ནིསཛྫཾ བྷིཀྑུ པཊིཛཱནམཱནོ’’ཏི ཝུཏྟཾ. ཡདི ཨེཝཾ ནིསཛྫཾ པཊིཛཱནམཱནོཔི ཨཱཔཏྟིཡཱཝ ཀཱརེཏབྦོཏི? ཨནུརཱུཔམེཝ. ཨེཝཾ པན གཧེཏབྦཾ – ཏིཎྞམྤི ཨཱཔཏྟཱིནཾ ཝཏྠཱུནི ཨགྒཧེཏྭཱ ཨིདྷ སིཀྑཱཔདཝསེན ནིསཛྫམེཝ ཝུཏྟཾ. ཏསྨིཾ གཧིཏེཔི ཧི ཨཱཔཏྟི གཧིཏཱཝ ཧོཏཱིཏི. ཡེན ཝཱ སཱཏི ཨེཏྠ ཝཱ-སདྡོ ‘‘ཏེན སོ བྷིཀྑུ ཀཱརེཏབྦོ ཝཱ’’ཏི ཡོཛེཏབྦོ. སོ ཙ ཝིཀཔྤཏྠོ. ཏསྨཱ ‘‘ཀཱརེཏབྦོ ཝཱ པཊིཛཱནམཱནོ, ན ཝཱ ཀཱརེཏབྦོ ཨཔྤཊིཛཱནམཱནོ’’ཏི ཨཏྠོ. ཏེན ཝུཏྟཾ ‘‘པཊིཛཱནམཱནོ ཝཱ’’ཏིཨཱདི. རཧོནིསཛྫསིཀྑཱཔདཝསེན ནིསཛྫཔཙྩཡཱ ཨཱཔཏྟིཡཱ ཝུཏྟཏྟཱ སེསེསུཔི སེསསིཀྑཱཔདཝསེན ཨཱཔཏྟི གཧེཏབྦཱ. ‘‘སམུཊྛཱནཱདཱིནི པཋམཔཱརཱཛིཀསདིསཱནེཝཱ’’ཏི ཝུཏྟཏྟཱ ཨིདྷ དུཊྛུལློབྷཱསནསྶ ཨནདྷིཔྤེཏབྷཱཝོ ཝེདིཏབྦོ.

པཋམཱནིཡཏསིཀྑཱཔདཝཎྞནཱ ནིཊྛིཏཱ.

༢. དུཏིཡཱནིཡཏསིཀྑཱཔདཝཎྞནཱ

སངྒྷཱདིསེསེན ¶ ཝཱཏི ཀཱཡསཾསགྒདུཊྛུལློབྷཱསནེན. ཏསྨཱ ཨེཝཾ ཀཱཡསཾསགྒཝཱརོ པཱལི༹ཡམྤི ཝུཏྟོ. ཨནནྡྷོ ཨབདྷིརོཏི ཨནནྡྷོ ཀཱཡསཾསགྒཾ པསྶཏི, ཨབདྷིརོ དུཊྛུལླཾ སུཎཱཏི, ཏསྨཱ ཨེཝ ཨདིནྣཱདཱནསདིསཱནེཝཱཏི ཝུཏྟ’’ནྟི ལིཁིཏཾ. ཨེཏྠ ཙ ཀཱཡཝཱཙཱཙིཏྟཏོ སམུཊྛཱནཾ ཀཐནྟི ཙེ? ཀཱཡསཾསགྒཉྷི སམཱཔཛྫནྟོ དུཊྛུལླམྤི བྷཎཏི, དུཊྛུལླཾ བྷཎནྟོ ནིསཱིདཏི ཙཱཏི སམྦྷཝཏི, དུཊྛུལླམེཝ ཝཱ སནྡྷཱཡ ཝུཏྟཾ. ཏཉྷི ཨདིནྣཱདཱནསམུཊྛཱནནྟི.

ཡོ ¶ དེསནཾ སབྦཝིདཱུཔམོཝ;

ནཱནཱནཡཱཀཱརཝིཙིཏྟབྷེདཾ;

ཉཱཏུཾ ཨུཔཱཡཱན མནོ སཏིམཱ;

ཏཾ ལཱབྷཧེཏུཾ ན ཀརོཏི པུཉྙནྟི.

དུཏིཡཱནིཡཏསིཀྑཱཔདཝཎྞནཱ ནིཊྛིཏཱ.

ཨནིཡཏཝཎྞནཱ ནིཊྛིཏཱ.

ནིསྶགྒིཡཀཎྜཾ

༡. ཙཱིཝརཝགྒོ

༡. ཀཐིནསིཀྑཱཔདཝཎྞནཱ

ནིསྶགྒིཡཀཎྜེ ¶ ¶ ཏིཎྞཾ ཀཐིནསིཀྑཱཔདཱནཾ, ཝསྶིཀསཱཊིཀཨཙྩེཀཙཱིཝརསཱསངྐསིཀྑཱཔདཱནཉྩ ཨེཀདེསནཱཡ ཏཐཱཀིཎྞཱཔཏྟིཀྑནྡྷཱཝ ཝེདིཏབྦཱ –

ཀཐིནཾ ཡསྶ ཙཏྟཱརོ, སཧཛཱ སམཡདྭཡཾ;

ཚནྣཾ སིཀྑཱཔདཱནཉྩ, ཨེཀདེསཝིནིཙྪཡོ.

ཏཏྠ ཀཐིནནྟི ‘‘སངྒྷསྶ ཨནུམོདནཱཡ, གཎསྶ ཨནུམོདནཱཡ, པུགྒལསྶ ཨཏྠཱརཱ སངྒྷསྶ ཨཏྠཏཾ ཧོཏི ཀཐིན’’ནྟི (པརི. ༤༡༤) ཝཙནཏོ ཏེསཾཡེཝ ཨནུམོདནཱདིདྷམྨཱནཾ སངྒཧོ ཀཐིནཾ ནཱམ. ཡཐཱཧ ‘‘ཀཐིནཾ ཛཱནིཏབྦནྟི ཏེསཉྙེཝ དྷམྨཱནཾ སངྒཧོ སམཝཱཡོ ནཱམཾ ནཱམཀམྨ’’ནྟིཨཱདི (པརི. ༤༡༢). ཏསྨཱ ཀཐིནནྟི ཨིདཾ བཧཱུསུ དྷམྨེསུ ནཱམམཏྟཾ, ན པརམཏྠཏོ ཨེཀོ དྷམྨོ. ཀོ པནསྶ ཨཏྠཱརོཏི? ཏདེཀདེསོཝ ཁཱིརསྶ དྷཱརཱ ཝིཡ. ཡཐཱ ཙཱཧ ‘‘ཨཏྠཱརོ ཨེཀེན དྷམྨེན སངྒཧིཏོ ཝཙཱིབྷེདེནཱ’’ཏི. སཧཛཱ ནཱམ ཨཊྛ མཱཏིཀཱ, དྭེ པལིབོདྷཱ, པཉྩཱནིསཾསཱཏི ཨིམེ པནྣརས དྷམྨཱ. སམཡདྭཡཾ ནཱམ ཀཐིནཏྠཱརསམཡོ, ཙཱིཝརསམཡོ ཙཱཏི. ཏཏྠ ཀཐིནཏྠཱརསམཡོ ཝསྶཱནསྶ པཙྪིམོ མཱསོ. ཙཱིཝརསམཡོ ནཱམ ཨནཏྠཏེ ཀཐིནེ ཨཡཾ ཀཏྟིཀམཱསོ, ཨཏྠཏེ ཙཏྟཱརོ ཧེམནྟིཀཱ ཙཱཏི པཉྩ མཱསཱ.

ཏཏྠ ཨཊྛ མཱཏིཀཱ ནཱམ པཀྐམནནྟིཀཱདཡོ. ཏཱ སབྦཱཔི ཨཏྠཱརེན ཨེཀཏོ ཨུཔྤཛྫནྟི ནཱམ. ཏབྦྷཱཝབྷཱཝིཏཱཡ ཨཏྠཱརེ སཏི ཨུདྡྷཱརོ སམྦྷཝཏི. ཏཏྠ ཀཐིནཏྠཱརེན ཨེཀུཔྤཱདཱ ¶ ཨེཀནིརོདྷཱ ཨནྟརུབྦྷཱརོ སཧུབྦྷཱརོ, ཨཝསེསཱ ཀཐིནུབྦྷཱརཱ ཨེཀུཔྤཱདཱ, ནཱནཱནིརོདྷཱ ཙ. ཏཏྠ ཨེཀནིརོདྷཱཏི ཨཏྠཱརེན སཧ ནིརོདྷཱ, ཨནྟརུབྦྷཱརསཧུབྦྷཱརཱནཾ ཨུདྡྷཱརཱབྷཱཝོ ཨེཀཀྑཎེ ཧོཏཱིཏི ཨཏྠོ. སེསཱ ནཱནཱ ནིརུཛ྄ཛྷནྟི ནཱམ. ཏེསུ ཧི ཨུདྡྷཱརབྷཱཝཾ པཏྟེསུཔི ཨཏྠཱརོ ཏིཊྛཏི ཨེཝཱཏི ཨཊྛཀཐཱཡཾ ཨཏྠཝིབྷཱཝནཱ. སཙེ ཨཏྠཏེ ཀཐིནེ བྷིཀྑུསྨིཾ སཱཔེཀྑེ ¶ ཏམྷཱ ཨཱཝཱསཱ པཀྐམནྟེ སངྒྷོ ཨནྟརུབྦྷཱརཾ ཀརོཏི, ཏསྶ བྷིཀྑུནོ པཋམམེཝ མཱུལཱཝཱསེ ནིཊྛིཏཙཱིཝརཔལིབོདྷཱབྷཱཝེཔི སཏི ཨནྟརུབྦྷཱརེ པལིབོདྷོ ཚིཛྫཏི སཏིཔི སཱཔེཀྑཏཱཡ སཨུསྶཱཧཏྟཱ. ཨིམིནཱ པརིཡཱཡེན པཀྐམནནྟིཀོ ཀཐིནུདྡྷཱརོ ཨཏྠཱརེན ཨེཀུཔྤཱདོ ནཱནཱནིརོདྷོ ཧོཏི. ཏཐཱ ཨནྟརུབྦྷཱརེ སཏི སུཎནྟསྶཱཔི ཡཱཝ ཙཱིཝརནིཊྛཱནཾ ན གཙྪཏི, ཏཱཝ པརིཧཱརསམྦྷཝཏོ ནིཊྛཱནནྟིཀོ. ཡཱཝ སནྣིཊྛཱནཾ ན གཙྪཏི, ཏཱཝ པརིཧཱརསམྦྷཝཏོ སནྣིཊྛཱནནྟིཀོ. ཡཱཝ ན ནསྶཏི, ཏཱཝ པརིཧཱརསམྦྷཝཏོ ནཱསནནྟིཀོ. ཡཱཝ ན སུཎཱཏི, ཏཱཝ པརིཧཱརསམྦྷཝཏོ སཝནནྟིཀོ. ཡཱཝ ཙཱིཝརཱསཱ ན ཚིཛྫཏི, ཏཱཝ པརིཧཱརསམྦྷཝཏོ ཨཱསཱཝཙྪེདིཀོ. ཡཱཝ སཱིམཾ ནཱཏིཀྐམཏི, ཏཱཝ པརིཧཱརསམྦྷཝཏོ སཱིམཱཏིཀྐནྟིཀོ. ཨཏྠཱརེན ཨེཀུཔྤཱདོ ནཱནཱནིརོདྷོ ཧོཏཱིཏི ཝེདིཏབྦོ.

ཏཏྠ ཨནྟརུབྦྷཱརསཧུབྦྷཱརཱ དྭེ ཨནྟོསཱིམཱཡཾ ཨེཝ སམྦྷཝནྟི, ན བཧིསཱིམཱཡཾ. པཀྐམནསཝནསཱིམཱཏིཀྐནྟིཀཱ བཧིསཱིམཱཡམེཝ སམྦྷཝནྟི, ན ཨནྟོསཱིམཱཡཾ. ནིཊྛཱནསཨཨཱཊྛཱནཱསཱཝཙྪེདིཀཱ ཨནྟོསཱིམཱཡཉྩེཝ བཧིསཱིམཱཡཉྩ. ཨནྟརུབྦྷཱརོ སངྒྷཱཡཏྟོ, པཀྐམནནིཊྛཱནསནྣིཊྛཱནསཱིམཱཏིཀྐནྟིཀཱ པུགྒལཱདྷཱིནཱ, སེསཱ ཏདུབྷཡཝིཔརཱིཏཱ.

ཏཏྠ ‘‘ནིཊྛིཏཙཱིཝརསྨི’’ནྟི ཨིམིནཱ ཙཱིཝརཔལིབོདྷཱབྷཱཝམེཝ དཱིཔེཏི. ན ཨཱཝཱསཔལིབོདྷཱབྷཱཝཾ. ‘‘ཨུབྦྷཏསྨིཾ ཀཐིནེ’’ཏི ཨིམིནཱ ཨུབྷཡཔལིབོདྷཱབྷཱཝཾ དཱིཔེཏི, ཏསྨཱ ཨུབྷཡཔལིབོདྷཱབྷཱཝདཱིཔནཏྠཾ ཏདེཝ ཝཏྟབྦནྟི ཙེ? ན, ཝིསེསཏྟཱ. ཀཐཾ? ཀཱམཉྩེཏཾ ཏསྨཱ ‘‘ཨུབྦྷཏསྨིཾ ཀཐིནེ’’ཏི ཀེསཉྩི ཀཐིནུདྡྷཱརཱནཾ ནཱནཱནིརོདྷཏྟཱ, སངྒྷཔུགྒལཱདྷཱིནཱནདྷཱིནཏྟཱ ཙ ཨནྟོབཧིཨུབྷཡསཱིམཱསུ ནིཡམཱནིཡམཏོ ཙ ཨུབྦྷཏསྨིཾ ཀཐིནེ སངྒྷསྶ, ན པུགྒལསྶ ཨུབྦྷཏཾ ཧོཏི, ཏཐཱཔི ‘‘ཨུབྦྷཏསྨིཾ ཀཐིནེ’’ཏི ཨིདཾ སཱམཉྙཝཙནཾ. ཏསྨཱ ‘‘ནིཊྛིཏཙཱིཝརསྨི’’ནྟི ཨིམིནཱ ནིཡམེཏི.

ཀིཾ ཝུཏྟཾ ཧོཏི – སངྒྷསྶ ཨནྟརུབྦྷཱརེན ཨུབྦྷཏསྨིཾ ཀཐིནེ ཨཙྪིནྣཙཱིཝརཔལིབོདྷོ བཧིསཱིམཱགཏོ པཙྪཱ གནྟྭཱ ཨཏྟནོ སཱིམཱགཏོ ཨནིཊྛིཏཙཱིཝརོ ཨཱནིསཾསཾ ལབྷཏི ཨེཝཱཏི ཀཏྭཱ ‘‘ནིཊྛིཏཙཱིཝརསྨི’’ནྟི ཝུཏྟནྟི ཝེདིཏབྦཾ. ཏཏྠ ཨཱཝཱསཔལིབོདྷོ ནཱམ ཝསཏི ཝཱ ཏསྨིཾ ¶ ཨཱཝཱསེ, སཱཔེཀྑོ ཝཱ པཀྐམཏི. ཙཱིཝརཔལིབོདྷོ ནཱམ ཙཱིཝརཾ ཨཀཏཾ ¶ ཝིཔྤཀཏཾ, ཙཱིཝརཱསཱནུཔཙྪིནྣཱ, ཏབྦིཔརཱིཏེན ཨཔལིབོདྷོ ཝེདིཏབྦོ. ཏཏྠ ཨནཏྠཏཀཐིནཱནཾ ཙཱིཝརཀཱལསམཡེ ནིཡམཏོ ཙཏྟཱརོ ཨཱནིསཾསཱ ལབྦྷནྟི, ཨསམཱདཱནཙཱརོ ཨནིཡམཏོ. ཏེན སཱསངྐསིཀྑཱཔདཾ ཝུཏྟཾ. ཀཐཾ ཙཏྟཱརོ ནིཡཏཱཏི ཙེ? ‘‘ཙཱིཝརཀཱལསམཡོ ནཱམ ཨནཏྠཏེ ཀཐིནེ ཝསྶཱནསྶ པཙྪིམོ མཱསོ’’ཏི (པཱརཱ. ༦༤༩) ཝཙནཏོ ཨནཏྠཏཀཐིནཱནཾ ཏསྨིཾ མཱསེ ཡཱཝདཏྠཙཱིཝརཾ སིདྡྷཾ, ཏཐཱ ཏཏིཡཀཐིནསིཀྑཱཔདེ (པཱརཱ. ༤༩༧ ཨཱདཡོ) ཨཀཱལཙཱིཝརཾ ནཱམ པིཊྛིསམཡཏོ པཊྛཱཡ ཏཾ པཊིགྒཧེཏྭཱ སངྒྷཏོ ལབྷིཏབྦཾ ཙེ, ཡཱཝ ཙཱིཝརཀཱལསམཡཾ ནིཀྑིཔིཏྭཱ བྷཱཛེཏྭཱ གཧེཏབྦཾ. པུགྒལིཀཾ ཙེ, ཝསྶཱནསྶ ཚཊྛཔཀྑསྶ པཉྩམིཏོ པཊྛཱཡ ཡཱཝ ཙཱིཝརཀཱལསམཡཾ ཨནདྷིཊྛིཏཾ ཨཝིཀཔྤིཏཾ ཝཊྚཏི ཨཙྩེཀཙཱིཝརསིཀྑཱཔདེན ཨནུཉྙཱཏཏྟཱ, ན ཏཏོ པརཾ. ཏདཱ ཨུཔྤནྣཙཱིཝརསྶ པཊིསིདྡྷཏྟཱ པཋམཀཐིནེན. ཏཏྠ ཨཊྛཀཐཱཡཾ ཝུཏྟནཡོ སངྒྷིཀཾ སནྡྷཱཡ, ཏཐཱ པོརཱཎགཎྛིཔདེ ཙཱཏི ཝེདིཏབྦཾ.

པཋམཀཐིནེ (པཱརཱ. ༤༥༩ ཨཱདཡོ) པཋམཔཉྙཏྟིཡཱ, ཨཝིསེསེན ཝཱ ཨེཀཱདསམེ དིཝསེ ཨཱཔཏྟི. ཝསྶཱནསྶ ཧི ཨནྟོནིཝཱརཎཏྠཾ ཨཊྛཀཐཱཡ ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ’’ཏི (པཱརཱ. ༤༦༢ ཨཱདཡོ) ཝུཏྟཾ. ཨེསེཝ ནཡོ དུཏིཡེ, ཏཏིཡེ ཙ. ཏེན ཙཱིཝརཀཱལཏོ པུརེ ཝཱ ཨནྟོ ཝཱ ཨུཔྤནྣཾ ཙཱིཝརཀཱལཏོ ཨུདྡྷཾ ཨེཀདིཝསམྤི པརིཧཱརཾ ན ལབྷཏི. ཡདི ལབྷེཡྻ, ཨཙྩེཀཙཱིཝརསིཀྑཱཔདཝིརོདྷོ. ‘‘ཡཱཝ ཙཱིཝརཀཱལསམཡཾ ནིཀྑིཔིཏབྦཾ, ཏཏོ ཙེ ཨུཏྟརི ནིཀྑིཔེཡྻ, ནིསྶགྒིཡ’’ནྟི (པཱརཱ. ༦༤༨) ཧི ཏཏྠ ཝུཏྟཾ. ཝསྶཱཝཱསིཀབྷཱཝེན སངྒྷཏོ ལདྡྷཾ ཝུཊྛཝསྶཏྟཱ ཨཏྟནོ སནྟཀབྷཱུཏཾ ཨཙྩེཀཙཱིཝརཾ ཙཱིཝརཀཱལསམཡཾ ཨཏིཀྐཱམཡཏོ ཨེཝ ཨཱཔཏྟི, ན ཨཙྩེཀཙཱིཝརཀཱལཾ ཨཏིཀྐཱམཡཏོ ཨཱཔཏྟཱིཏི. ‘‘ཨནཏྠཏེ ཀཐིནེ ཨེཀཱདསམཱསེ ཨུཔྤནྣ’’ནྟི (པཱརཱ. ༥༠༠) ཝཙནཏོ ཡོ ཙ ཏཏྠ ཙཱིཝརུཔྤཱདོ, སོ ཙ ནེསཾ བྷཝིསྶཏཱིཏི སིདྡྷཾ, ཨནཱམནྟཙཱརགཎབྷོཛནསིཀྑཱཔདེ ‘‘ཨཉྙཏྲ སམཡཱ’’ཏི (པཱཙི. ༢༢༢ ཨཱདཡོ) ཝུཏྟཏྟཱ སེསདྭཡཾ སིདྡྷམེཝ. ཏསྨཱ ‘‘ཀཱལེཔི ཨཱདིསྶ དིནྣཾ, ཨེཏཾ ཨཀཱལཙཱིཝར’’ནྟི (པཱརཱ. ༥༠༠) ཝཙནཏོ ཨཱདིསྶ དིནྣཙཱིཝརཾ པརིཧཱརཾ ན ལབྷཏི.

ཨཔརཀཏྟིཀཱཡམེཝ ཝཱ ཨུབྦྷཏསྨིཾ ཀཐིནེ ལབྷཏི, ཨེཝཾ ‘‘ཨུབྦྷཏསྨིཾ ཀཐིནེ’’ཏི ཝུཏྟཏྟཱཏི ཙེ? ན ཝཏྟབྦཾ. ཚ ཋཱནཱནི ཧི སཱཔེཀྑཏཱཡ ཝུཏྟཱནི ¶ . དུཊྛདོསདྭཡེ ཨདྷིཀརཎཙཏུཏྠཾ, པཋམཱནིཡཏེ སོཏསྶ རཧོ, ཏཏིཡཀཐིནེ ཨཱདིསྶ དིནྣཾ ཙཱིཝརཾ, ཨཙྩེཀཙཱིཝརསིཀྑཱཔདེ ¶ ‘‘སཉྙཱཎཾ ཀཏྭཱ ནིཀྑིཔིཏབྦ’’ནྟི པདཾ, དུཊྛུལླཱརོཙནཔྤཊིཙྪཱདནདྭཡེ ཨདྷིཀརཎཾ, པཱརཱཛིཀཝཙནཉྩ, ཏཱིསུ ཀཐིནསིཀྑཱཔདེསུ ‘‘ཨཊྛནྣཾ མཱཏིཀཱནཾ ཨཉྙཏརཱཡཱ’’ཏི ཝཙནནྟི. ཏཏྠ ཨཱདིསྶ དིནྣཾ ཙཱིཝརཾ སངྒྷིཀཾ བྷཱཛིཏབྦཙཱིཝརཾ སནྡྷཱཡ ཝུཏྟཾ, ན པུགྒལིཀཾ. སཉྙཱཎཾ ཀཏྭཱ ནིཀྑིཔིཏབྦནྟི ཝསྶཱཝཱསིཀཙཱིཝརཾ སནྡྷཱཡ ཝུཏྟཾ. ཨཝུཊྛཝསྶེན པཙྪཱ དཱཏབྦཏྟཱ སཉྙཱཎཾ ཀཱཏབྦཾ, ན ཉཱཏིཔྤཝཱརིཏཏོ ལདྡྷཾ པུགྒལིཀཾ སནྡྷཱཡ. ཏསྨཱ དུཝིདྷཾ ཨཙྩེཀཙཱིཝརཾ སངྒྷེ ནིནྣཾ, པུགྒལེ ནིནྣཉྩཱཏི སིདྡྷཾ. ཏཏྠ སངྒྷེ པརིཎཏཾ ཨཙྩེཀཙཱིཝརཾ ཝསྶཱུཔནཱཡིཀདིཝསཏོ པཊྛཱཡ, པིཊྛིསམཡཏོ པཊྛཱཡ ཝཱ ཡཱཝ པཝཱརཎཱ ནིཀྑིཔིཏུཾ ཝཊྚཏི ཨེཝ སངྒྷིཀཏྟཱ, པུགྒལིཀམྤི ‘‘ཝསྶཾཝུཊྛཀཱལེ གཎྷཐཱ’’ཏི དིནྣཏྟཱ. ཏཱདིསཉྷི ཡཱཝ ཝསྶཾཝུཊྛོ ན ཧོཏི, ཏཱཝ ཏསྶེཝ དཱཡཀསྶ སནྟཀཾ ཧོཏི. ཨེཏྟཀོ ཝིསེསཧེཏུ.

‘‘ཨནཙྩེཀཙཱིཝརེ ཨནཙྩེཀཙཱིཝརསཉྙཱི ཙཱིཝརཀཱལསམཡཾ ཨཏིཀྐཱམེཏི, ཨནཱཔཏྟཱི’’ཏི ཝཙནཏོ ཨཙྩེཀཙཱིཝརཀསྶེཝ སོ ཨཔརཱདྷོ. ཡེན ‘‘ཝིརོདྷོ’’ཏི ཝཙནཾ དསྶེཡྻཱཏི ན ཝིནཡེ ཝིསེསཧེཏུ པརིཡེསིཏབྦོ. བུདྡྷཝིསཡཏྟཱ པམཱཎནྟི ཙེ? ན, ཡདི ཨེཝཾ ཨེཏྠ ཨཏྟནོ སནྟཀབྷཱུཏམྤི ཨཙྩེཀཙཱིཝརཾ སཉྙཱཎཾ ཀཏྭཱ ནིཀྑིཔིཏབྦམེཝ, ན ཨདྷིཊྛཱཏབྦཾ ན ཝིཀཔྤེཏབྦཾ ན ཝིསྶཛྫེཏབྦཾ. ཏཏོ ‘‘ཨནཱཔཏྟི, ཨནྟོསམཡེ ཨདྷིཊྛེཏི ཝིཀཔྤེཏི ཝིསྶཛྫེཏཱི’’ཏིཨཱདིཝཙནཝིརོདྷོ (པཱརཱ. ༦༥༡) ཨདྷིཝཱསེཏབྦོ སིཡཱ. ཏཐཱ ‘‘ཝསྶཱནསྶ པཙྪིམེ མཱསེ ཀཐིནུདྡྷཱརེ ཀཏེ ཏསྨིཾ མཱསེ ཨཏྠཏེ ཀཐིནེ ཀཐིནུདྡྷཱརདིཝསཾ ཨཏིཀྐཱམེཏི, ནིསྶགྒིཡཾ ཧོཏཱི’’ཏི ཝཙནཏོ ནིསྶགྒིཡཾ ཧོཏཱིཏི ཨཡམྤི ཨཏྠཝིརོདྷོ ཨདྷིཝཱསེཏབྦོ སིཡཱ. ཏསྨིཉྩ ‘‘ཨནཙྩེཀཙཱིཝརེ ཨནཱཔཏྟཱི’’ཏི ཝུཏྟཾ, ཏཉྩ ཨནདྷིཊྛིཏཾ ཨཝིཀཔྤིཏམེཝཱཏི ཨེཏྟཀོ ཝིསེསཧེཏུ. ཨཏིརེཀཙཱིཝརཉྩེཏཾ པཋམསིཀྑཱཔདེནཱཔཏྟི, ཨིཏརཾ ཙེ ཨནཱཔཏྟིཡེཝཱཏི ཨིམསྶ ཨཏྠསྶ ཨཡཾ བྷགཝཏོ ཝིསེསཧེཏུ. ཏཐཱ ཨཏིརེཀདསཱཧཱནཱགཏཱཡེཝ ཀཏྟིཀཔུཎྞམཱཡ སངྒྷསྶ ཝསྶཱཝཱསིཀཏྠཾ ཨཙྩེཀཙཱིཝརཾ ཝིཡ དདམཱནཾ ན ¶ གཧེཏབྦཾ, དསཱཧཱནཱགཏཱཡ ཨེཝ གཧེཏབྦནྟི ཨེཏྟཀོ ཝིསེསཧེཏུ. ཏཏོ ཨཊྛཀཐཱནཡཝིརོདྷོ ཙ ཨདྷིཝཱསེཏབྦོ སིཡཱ. ཏཏྠ ‘‘ཨདྷིཊྛིཏཏོ པཊྛཱཡ ཨུཔྤནྣཾ ཨཙྩེཀཙཱིཝརཾ ན ཧོཏཱི’’ཏི ཝཏྭཱ ཨཉྙཐཱ ནཡོ དསྶིཏོ. པོརཱཎགཎྛིཔདེ སོ ཙ ནཡོ སངྒྷིཀཾ ཨུཔཱདཱཡ ཝུཏྟཏྟཱ ན ཝིརུཛ྄ཛྷཏཱིཏི ནེཝ སོ ཙ པཊིཀྑིཏྟོ. ཡཐཱ ཨནཙྩེཀཙཱིཝརཾ ཚཊྛིཏོ པཊྛཱཡ ཨུཔྤནྣཾ ཨཏིརེཀདསཱཧཱནཱགཏཱཡཔི པཊིགྒཧེཏབྦཾ, པཊིགྒཧེཏྭཱ ཙཱིཝརཀཱལསམཡཾ ཨཏིཀྐཱམཡཏོཔི ཨནཱཔཏྟཱིཏི ཨཡམྤི ནཡོ ཨདྷིཝཱསེཏབྦོ སིཡཱ. ཏཏོ པཋམཀཐིནཝིརོདྷོ. དསཱཧཱནཱགཏཱཡ ཨེཝ པཊིགྒཧེཏབྦཾ, པཊིགྒཧེཏྭཱ ¶ ཙཱིཝརཀཱལསམཡཾ ཨཏིཀྐཱམཡཏོ ཨནཱཔཏྟཱིཏི ཙེ, ཏཾ དྭེ དསཱཧེ ལབྷཏཱིཏི ཨེཏྟཀོ ཝིསེསཧེཏུ.

ཨནྟརཱ ཨནཱཔཏྟིཀྑེཏྟཙཱིཝརཀཱལཔྤཝིཊྛཏྟཱ ཨདྷིཊྛཧིཏྭཱ པཙྩུདྡྷཊཾ ཝིཡ ཏཾ པུནཔི དསཱཧེ ལབྷཏཱིཏི ཙེ? ན, ཀཱལཔྤཝེསོ ཨདྷིཊྛཱནཾ ཝིཡ ཧོཏཱིཏི ཙེ? ན, ‘‘ཝསྶིཀསཱཊིཀཾ ཝསྶཱནཾ ཙཱཏུམཱསཾ ཨདྷིཊྛཱཏུཾ, ཏཏོ པརཾ ཝིཀཔྤེཏུ’’ནྟི ཝཙནཝིརོདྷཾ ཀཏྭཱ, ཏཏོ པརཾ དསཱཧཾ ཨཝིཀཔྤེནྟསྶཱཔི ཨནཱཔཏྟི སིཡཱ. ཨཔིཙ ཡཾ ཝུཏྟཾ ཨཊྛཀཐཱཡཾ ‘‘ཝསྶིཀསཱཊིཀཱ ཨནྟོཝསྶེ ལདྡྷཱ ཙེཝ ནིཊྛིཏཱ ཙ, ཨནྟོདསཱཧེ ཨདྷིཊྛཱཏབྦཱ, དསཱཧཱཏིཀྐམེ ནིཊྛིཏཱ, ཏདཧེཝ ཨདྷིཊྛཱཏབྦཱ, དསཱཧེ ཨཔྤཧོནྟེ ཙཱིཝརཀཱལཾ ནཱཏིཀྐཱམེཏབྦཱ’’ཏི (པཱརཱ. ཨཊྛ. ༢.༦༣༠). ཏེན ཨཱཔཏྟིཏོ ན མུཙྩེཡྻ. ཀཱལཔྤཝེསོ ཧི ཨདྷིཊྛཱནཔརིཡཱཡོ ན ཛཱཏོཏི. ཨེཏྟཱཝཏཱ ཡཐཱཝུཏྟོ ཨཏྠཝིཀཔྤོ པཱལི༹ནཡེནེཝ པཏིཊྛཱཔིཏོ ཧོཏི.

ཨཔིཙེཏྠ ཡཾ ཝུཏྟཾ ཨཊྛཀཐཱཡཾ ‘‘དསཱཧེ ཨཔྤཧོནྟེ ཙཱིཝརཀཱལཾ ནཱཏིཀྐཱམེཏབྦཱ’’ཏི, ཏཏྠཔི ཙཱིཝརཀཱལེ ཨུཔྤནྣཾ, དསཱཧེ ཨཔྤཧོནྟེ ཙསྶ ཀརཎཾ ནཏྠི, ཏཾ ཨཙྩེཀཙཱིཝརཾ ཨཀཱལཙཱིཝརམིཝ ཙཱིཝརཀཱལཾ ནཱཏིཀྐཱམེཏབྦནྟི སིདྡྷམེཏཾ. པཱལི༹ཏོ ཙ ཏཉྩེ ཨནྟོཀཱལེ ཨུཔྤཛྫཏི, དསཱཧེ ཨཔྤཧོནྟེཔི ཨུཔྤཛྫཏི, ཨེཝཾ ཨུཔྤནྣཾ ཨཙྩེཀཙཱིཝརཾ ཨཙྩེཀཙཱིཝརམེཝ ན ཧོཏི. ན ཧི ཏཾ ཀཱལཝིསེསཝསེན ཨཙྩེཀཙཱིཝརསངྑཾ གཙྪཏི. ཝུཏྟཉྷེཏཾ ‘‘ཨཙྩེཀཙཱིཝརཾ ནཱམ སེནཱཡ ཝཱ གནྟུཀཱམོ ཧོཏི, པཝཱསཾ ཝཱ གནྟུཀཱམོ ཧོཏི, གིལཱནོ ཝཱ ཧོཏི, གབྦྷིནཱི ཝཱ ཧོཏི ¶ , ཨསྶདྡྷསྶ ཝཱ སདྡྷཱ ཨུཔྤནྣཱ ཧོཏི…པེ… ‘ཝསྶཱཝཱསིཀཾ དསྶཱམཱི’ཏི ཨེཝཾ ཨཱརོཙིཏཾ, ཨེཏཾ ཨཙྩེཀཙཱིཝརཾ ནཱམཱ’’ཏི (པཱརཱ. ༦༤༩). ཏསྨཱ ཡཐཱ ཏཾ ཙཱིཝརཾ ནཱཏིཀྐཱམེཏབྦཾ, ཏཐཱ ཨནཙྩེཀཙཱིཝརམྤཱིཏི སིདྡྷཾ ཧོཏི. ཏེན ཝུཏྟཾ ཨཊྛཀཐཱཡཾ ‘‘དསཱཧེ ཨཔྤཧོནྟེ ཙཱིཝརཀཱལཾ ནཱཏིཀྐཱམེཏབྦཱ’’ཏི. ཨཔིཙ ཡདི ཨེཝཾ ཏཾ ཨཙྩེཀཙཱིཝརསིཀྑཱཔདམེཝ ཨཙྩེཀཙཱིཝརཾ ཙཱིཝརཀཱལཾ ནཱཏིཀྐཱམེཏབྦནྟི ཨིམསྶ པན ཨཏྠཝིསེསསྶ དསྶནཏྠཾ བྷགཝཏཱ པཉྙཏྟཾ.

མཧཱཨཊྛཀཐཱཡཾ པན ཏཾ ཨེཝཾ ཝུཏྟཾ – ཀཱམཉྩེདཾ ‘‘དསཱཧཔརམཾ ཨཏིརེཀཙཱིཝརཾ དྷཱརེཏབྦ’’ནྟི ཨིམིནཱ སིདྡྷཾ, ཨཊྛུཔྤཏྟིཝསེན པན ཨཔུབྦཾ ཝིཡ ཨཏྠཾ དསྶེཏྭཱ སིཀྑཱཔདཾ ཋཔིཏནྟི ཨཏྠཝིསེསདཱིཔནཔཡོཛནཏོ. ཏསྨཱ ཏཾ ཏསྶ ཨཏྠཝིསེསདསྶནཏྠཾ ཝུཏྟནྟི སིདྡྷམེཝ. ཏསྨཱཔི ཝེདིཏབྦམེཝ ཡཾ ཀིཉྩི ཙཱིཝརཾ ཙཱིཝརཀཱལསམཡཾ ནཱཏིཀྐཱམེཏབྦནྟི. ཨཔིཙ ཡཾ ཝུཏྟཾ ཨཊྛཀཐཱཡཾ ‘‘ཚཊྛིཏོ པཊྛཱཡ པན ཨུཔྤནྣཾ ཨནཙྩེཀཙཱིཝརམྤི པཙྩུདྡྷཱརེཏྭཱ ཋཔིཏཙཱིཝརམྤི ¶ ཨེཏཾ པརིཧཱརཾ ལབྷཏཱི’’ཏི (པཱརཱ. ཨཊྛ. ༢.༦༤༦-༦༤༩). ཏེན ‘‘ཨནཙྩེཀཙཱིཝརེ ཨནཙྩེཀཙཱིཝརསཉྙཱི ཙཱིཝརཀཱལསམཡཾ ཨཏིཀྐཱམེཏི, ཨནཱཔཏྟཱི’’ཏི (པཱརཱ. ༦༥༠) ཨིམིནཱཔི ཨནཙྩེཀཙཱིཝརསྶཱཔི ཨཙྩེཀཙཱིཝརཔརིཧཱརལཱབྷཾ དཱིཔེཏཱིཏི.

ཨེཏྟཱཝཏཱ ཡཐཱཝུཏྟོ དུཏིཡོ ཨཏྠཝིཀཔྤོ པཱལི༹ནཡེན, ཨཊྛཀཐཱནཡེན ཙ པཏིཊྛཱཔིཏོ ཧོཏི. ཨེཝཾ ཏཱཝ པཀིཎྞཀཱཡ ཨདྷིཀཐཱ པརཏོ པཱཋཏོ ཝིཏྠཱརིཏཱ ཧོཏཱིཏི ཨཔཀིཎྞཀཾ.

ཙཱིཝརཔལིབོདྷོ, ཨཱཝཱསཔལིབོདྷོ ཙཱཏི དྭེ པལིབོདྷཱ. ཏེསུ ཨེཀཔལིབོདྷེཔི སཏི ཨནཱམནྟཙཱརཱདིཨཱནིསཾསཾ ལབྷཏི, ཏཾ ཨིདྷ ནཏྠཱིཏི དསྶེཏུཾ ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ’’ཏི ཝུཏྟཾ. ཏསྨཱ ཨེཝ ‘‘ཨཏྠཏཀཐིནསྶ ཧི བྷིཀྑུནོ’’ཏིཨཱདི ཝུཏྟཾ. ཀཐིནཏྠཱརཱརཧསྶཱཏི ཨེཏྠ ‘‘ཨཊྛཧི ཨངྒེཧི སམནྣཱགཏོ པུགྒལོ བྷབྦོ ཀཐིནཾ ཨཏྠརིཏུཾ – པུབྦཀརཎཾ ཛཱནཱཏི, པཙྩུདྡྷཱརཾ ཛཱནཱཏི, ཨདྷིཊྛཱནཾ ཛཱནཱཏི, ཨཏྠཱརཾ ཛཱནཱཏི, མཱཏིཀཾ ཛཱནཱཏི, པལིབོདྷཾ ཛཱནཱཏི, ཨུདྡྷཱརཾ ཛཱནཱཏི, ཨཱནིསཾསཾ ཛཱནཱཏཱི’’ཏི (པརི. ༤༠༩) ཝཙནཏོ ཨིམེཧི ཨཊྛཧི ཨངྒེཧི སམནྣཱགཏོ པུགྒལོ ཀཐིནཏྠཱརཱརཧོ ནཱམ. པུབྦཀརཎཾ ནཱམ དྷོཝནཝིཙཱརཎཙྪེདནསིབྦནརཛནཀཔྤཀརཎཾ.

‘‘ཙཱིཝརཾ ¶ ནཱམ ཁོམ’’ནྟིཨཱདིནཱ པཱལི༹ཝསེན ཛཱཏིཉྩ པམཱཎཉྩ དསྶེཏྭཱ ཨིདཱནི ཨཏིརེཀཙཱིཝརཾ དསྶེཏུཾ ‘‘ཡཾ པན ཝུཏྟཾ ཨདྷིཊྛིཏཝིཀཔྤིཏེསཱུ’’ཏིཨཱདི ཝུཏྟཾ. ཋཔིཏཊྛཱནཾ སལླཀྑེཏྭཱ’’ཏི ཝུཏྟེཔི ཡསྨིཾ ཋཱནེ ཡཾ ཋཔིཏཾ, ཏསྨིཾ ཏཾ པཙྪཱ ཧོཏུ ཝཱ, མཱ ཝཱ, ཨདྷིཊྛཱནཾ རུཧཏེཝ. པུརེ པཙྪཱ ཋཔནཊྛཱནཾ ན པམཱཎཾ.

ཨནྟིམཝཏྠུཾ ཨཛ྄ཛྷཱཔནྣསྶ བྷིཀྑུབྷཱཝཔརིཙྩཱགཝསེན སེཏཝཏྠནིཝཱསནཾ ཝཱ ཀཱསཱཝཙཛནཾ ཝཱ ཧཱིནཱཡཱཝཏྟནཾ.

ཨེཀཱདསམེ ཨརུཎུགྒམནེཏི ཨནྟིམཾ ཋཔེཏྭཱ ཏཏོ པུརིམཏརསྨིནྟི ཨཏྠོ ཝེདིཏབྦོ. ཏཏྠ ཨནྟིམཾ ནཱམ ཨཔརཀཏྟིཀཱཡ པཋམཱརུཎུགྒམནཾ. ཏཉྷི ཀཱལཏྟཱ ནིསྶགྒིཡཾ ན ཀརོཏི. ཨིདྷ ‘‘ནིཊྛིཏཙཱིཝརསྨིཾ བྷིཀྑུནཱ’’ཏི ཀརཎཝཙནཾ ནིདཱནཱནཔེཀྑཾ ནིདཱནེ ཀརཎཱབྷཱཝཏོ. ཏསྨཱ ཨེཝ ‘‘དསཱཧཔརམ’’ནྟི ཨཡམེཏྠ ཨནུཔཉྙཏྟཱིཏི ཝུཏྟཾ. ‘‘ཨནུཛཱནཱམི, བྷིཀྑཝེ, ཏིཙཱིཝརཾ ཨདྷིཊྛཱཏུཾ ན ཝིཀཔྤེཏུ’’ནྟིཨཱདི (མཧཱཝ. ༣༥༨) ཝཙནཏོ ཙ ཨིདྷ ‘‘ཝིཀཔྤེཏཱི’’ཏི ཨཝིསེསེན ཝུཏྟཝཙནཾ ཝིརུདྡྷཾ ཝིཡ དིསྶཏི, ན ཙ ཝིརུདྡྷཾ ཏཐཱགཏཱ བྷཱསནྟི, ¶ ཏསྨཱ ཨེཝམསྶ ཨཏྠོ ཝེདིཏབྦོ – ཏིཙཱིཝརཾ ཏིཙཱིཝརསངྑེཔེན པརིཧཱརཏོ ཨདྷིཊྛཱཏུམེཝ ཨནུཛཱནཱམི, ན ཝིཀཔྤེཏུཾ. ཝསྶིཀསཱཊིཀཾ པན ཙཏུམཱསཏོ པརཾ ཝིཀཔྤེཏུམེཝ, ན ཨདྷིཊྛཱཏུནྟི. ཨེཝཉྩ པན སཏི ཡོ ཏིཙཱིཝརེ ཨེཀེན ཙཱིཝརེན ཝིཔྤཝསིཏུཀཱམོ ཧོཏི, ཏསྶ ཏིཙཱིཝརཱདྷིཊྛཱནཾ པཙྩུདྡྷརིཏྭཱ ཝིཔྤཝཱསསུཁཏྠཾ ཝིཀཔྤནཱཡ ཨོཀཱསོ དིནྣོ ཧོཏི, དསཱཧཱཏིཀྐམེ ཙ ཨནཱཔཏྟཱིཏི. ཨེཏེན ཨུཔཱཡེན སབྦཏྠ ཝིཀཔྤནཱཡ ཨཔཊིསིདྡྷབྷཱཝོ ཝེདིཏབྦོཏི ལིཁིཏཾ.

ཨིམསྶ པན སིཀྑཱཔདསྶ ཨཡཾ སངྑེཔཝིནིཙྪཡོ – ཨནཏྠཏེ ཀཐིནེ ཧེམནྟཱནཾ པཋམདིཝསཏོ པཊྛཱཡ, ཨཏྠཏེ ཀཐིནེ གིམྷཱནཾ པཋམདིཝསཏོ པཊྛཱཡ ཨུཔྤནྣཙཱིཝརཾ སནྡྷཱཡ ‘‘ནིཊྛིཏཙཱིཝརསྨི’’ནྟིཨཱདི ཝུཏྟཾ. ཨེཏྠཱཧ – ‘‘རཛཀེཧི དྷོཝཱཔེཏྭཱ སེཏཀཾ ཀཱརཱཔེནྟསྶཱཔི ཨདྷིཊྛཱནཾ ཨདྷིཊྛཱནམེཝཱ’’ཏི (པཱརཱ. ཨཊྛ. ༢.༤༦༥) ཝཙནཏོ ཨརཛིཏེཔི ཨདྷིཊྛཱནཾ རུཧཏཱིཏི. ཏེན སཱུཙིཀམྨཾ ཀཏྭཱ རཛིཏྭཱ ཀཔྤབིནྡུཾ དཏྭཱ ཨདྷིཊྛཱཏབྦནྟི ནིཡམོ ཀཱཏབྦོ, ན ཀཱཏབྦོཏི? ཀཏྟབྦོཝ. པཏྟོ ཝིཡ ཨདྷིཊྛིཏོ ཡཐཱ པུན སེཏབྷཱཝཾ ཝཱ ཏམྦབྷཱཝཾ ཝཱ པཏྟོ ཨདྷིཊྛཱནཾ ན ཝིཛཧཏི, ན ཙ པན ཏཱདིསོ ¶ ཡཾ ཨདྷིཊྛཱནཾ ཨུཔགཙྪཏི, ཨེཝམེཏཾ དཊྛབྦནྟི. ‘‘སྭེ ཀཐིནཾ ཨུདྡྷརིསྶཏཱི’’ཏི ལདྡྷཙཱིཝརཾ སཙེ ཨཛྫེཝ ན ཨདྷིཊྛཱཏི, ཨརུཎུགྒམནེ ཨེཝ ནིསྶགྒིཡཾ ཧོཏི. ཀསྨཱ? ‘‘ནིཊྛིཏཙཱིཝརསྨི’’ནྟིཨཱདིནཱ (པཱརཱ. ༤༦༢-༤༦༣;) སིཀྑཱཔདསྶ ཝུཏྟཏྟཱ. ཀཐིནབྦྷནྟརེ དསཱཧཏོ ཨུཏྟརིཔི པརིཧཱརཾ ལབྷཏི, ཀཐིནཏོ པན པཙྪཱ ཨེཀདིཝསམྤི ན ལབྷཏི. ཡཐཱ ཀིཾ – ཡཐཱ ཨཏྠཏཀཐིནོ སངྒྷོ ཏིཙཱིཝརཾ ཨཏྠཏདིཝསཏོ པཊྛཱཡ ཡཱཝ ཨུབྦྷཱརཱ ཨཱནིསཾསཾ ལབྷཏི, ན ཏཏོ པརཾ, ཨེཝཾ ཨཏྠཏདིཝསཏོ པཊྛཱཡ ཡཱཝ ཨུབྦྷཱརཱ ལབྷཏི, ཨུདྡྷཏེ པན ཀཐིནེ ཨེཀདིཝསམྤི ན ལབྷཏི. ཨེཏྠཱཧ – ཨུབྦྷཏདིཝསཏོ པཊྛཱཡ པུན དསཱཧཾ ལབྷཏཱིཏི? ན, ཀསྨཱ? ‘‘ཨནུཛཱནཱམི, བྷིཀྑཝེ, དསཱཧཔརམཾ ཨཏིརེཀཙཱིཝརཾ དྷཱརེཏུ’’ནྟི ཝཙནཏོ. ཀཐིནབྦྷནྟརེཔི ཨེཀཱདསེ ཨརུཎུགྒམནེ ནིསྶགྒིཡནྟི ཨཱཔནྣཾ. ཏཾ པན ཨཏིཔྤསངྒཾ ནིཝཱརེཏུཾ ‘‘ནིཊྛིཏཙཱིཝརསྨི’’ནྟིཨཱདི ཝུཏྟཾ, ན ཀཐིནདིཝསཱནི ཨདིཝསཱནཱིཏི དཱིཔནཏྠཾ. ཨཡམཏྠོ ཏཏྠ ཏཏྠ ཨཱཝིབྷཝིསྶཏི. ཨཐ ཝཱ ཝསྶིཀསཱཊིཀཱ ཨནཏིརིཏྟཔྤམཱཎཱ ནཱམཾ གཧེཏྭཱ ཝུཏྟནཡེནེཝ ཙཏྟཱརོ ཝསྶིཀེ མཱསེ ཨདྷིཊྛཱཏབྦཱ, ཏཏོ པརཾ པཙྩུདྡྷརིཏྭཱ ཝིཀཔྤེཏབྦཱཏི ཝུཏྟཾ. ཨེཏྠ ‘‘པཙྩུདྡྷརིཏྭཱ’’ཏི ཝཙནེ ཨུཔོསཐདིཝསེ ཨེཝ པཙྩུདྡྷརིཏྭཱ ཝིཀཔྤེཏྭཱ ཋཔིཏཾ ཧོཏི, ཏཏོ པརཾ ཧེམནྟསྶ པཋམདིཝསཏོ པཊྛཱཡ པཙྩུདྡྷརཎཱབྷཱཝཱ. ཨེཝཾ ཀཐིནབྦྷནྟརེ ཨུཔྤནྣཙཱིཝརམྤི ཝེདིཏབྦནྟི ལིཁིཏཾ.

ཀཐིནསིཀྑཱཔདཝཎྞནཱ ནིཊྛིཏཱ.

༢. ཨུདོསིཏསིཀྑཱཔདཝཎྞནཱ

‘‘ཨཏྠཏཀཐིནསྶ ¶ པཉྩ མཱསེ བདྡྷསཱིམཱཡཾ ཡཏྠ ཀཏྠཙི ཙཱིཝརཾ ནིཀྑིཔིཏྭཱ པཀྐམནྟསྶ ཨནཱཔཏྟཱི’’ཏི ཨཊྛཀཐཱཡཾ ཝུཏྟཾ. ‘‘ཨབདྡྷསཱིམཱཡཔི ཝཊྚཏཱི’’ཏི ཨིདཾ ཨབདྡྷསཱིམཱཡཾ ཀཐིནཏྠཱརཉྩ ཨཱརཉྙཀསིཀྑཱཔདཉྩ སཱདྷེཏཱིཏི ལིཁིཏཾ. ཨིདཱནི –

‘‘ཚིནྣཾ དྷུཏངྒཾ སཱསངྐ-སམྨཏོ སནྟརུཏྟརཾ;

ཨཙཱིཝརསྶཱནཱཔཏྟི, པཙྩུདྡྷཱརཱདིསིདྡྷིཏོ’’ཏི. (ཝཛིར. ཊཱི. པཱརཱཛིཀ ༤༧༩) –

ཨིདཾ པཀིཎྞཀཾ ཝེདིཏབྦཾ.

ཏཏྲཱཡཾ ¶ ཙོདནཱཔུབྦངྒམཝིནིཙྪཡོ – ཀེཙི ‘‘དིགུཎཾ སངྒྷཱཊི’’ནྟི (མཧཱཝ. ༣༤༨) ཝཙནཏོ ‘‘ཨེཀཙྩིཀཱ སངྒྷཱཊི ནཱདྷིཊྛཱཏབྦཱ. སཙེ ཨདྷིཊྛཱཏི, ན རུཧཏཱི’’ཏི ཝཏྭཱ ཨུཔསམྤདཱཔེཀྑཱནམྤི དིགུཎཾཡེཝ སངྒྷཱཊིཾ དཏྭཱ ཨུཔསམྤཱདེནྟི, ཏེ ཨིམིནཱ སུཏྟལེསེན སཉྙཱཔེཏབྦཱ. བྷགཝཏཱ ཧི ‘‘ཚིནྣཀཾ སངྒྷཱཊིཾ, ཚིནྣཀཾ ཨུཏྟརཱསངྒཾ, ཚིནྣཀཾ ཨནྟརཝཱསཀ’’ནྟི པཋམཾ ཨནུཉྙཱཏཾ. ཏཏོ ‘‘ཨཉྙཏརསྶ བྷིཀྑུནོ ཏིཙཱིཝརེ ཀརིཡམཱནེ སབྦཾ ཚིནྣཀཾ ནཔྤཧོཏི. དྭེ ཚིནྣཀཱནི ཨེཀཾ ཨཚིནྣཀཾ ནཔྤཧོཏི, དྭེ ཨཚིནྣཀཱནི ཨེཀཾ ཚིནྣཀཾ ནཔྤཧོཏཱི’’ཏི ཨིམསྨིཾ ཝཏྠུསྨིཾ ‘‘ཨནུཛཱནཱམི, བྷིཀྑཝེ, ཨནྭཱདྷིཀམྤི ཨཱརོཔེཏུ’’ནྟི (མཧཱཝ. ༣༦༠) ཨནུཉྙཱཏཾ, ཏསྨཱ ཨེཀཙྩིཀཱཔི སངྒྷཱཊི ཝཊྚཏཱིཏི སིདྡྷཾ. ཡཱ ཚིཛྫམཱནཱཔི ནཔྤཧོཏི, ཏསྶཱ ཀུཏོ དིགུཎཏཱཏི? ཨཊྛཀཐཱཡམྤིསྶ ཝུཏྟཾ ‘‘ཨནྭཱདྷིཀམྤི ཨཱརོཔེཏུནྟི ཨཱགནྟུཀཔཏྟམྤི དཱཏུཾ, ཨིདཾ པན ཨཔྤཧོནཀེ ཨཱརོཔེཏབྦཾ. སཙེ པཧོཏི, ཨཱགནྟུཀཔཏྟཾ ན ཝཊྚཏི, ཚིནྡིཏབྦམེཝཱ’’ཏི (མཧཱཝ. ཨཊྛ. ༣༦༠). ཀཐིནཾ པན ཚིནྣཀམེཝ ཝཊྚཏི, ཨཱཝེཎིཀལཀྑཎཏྟཱ, ‘‘ཚིནྣཀཾ དིགུཎཾ ནཔྤཧོཏཱི’’ཏི ཝཙནཱབྷཱཝཏོ ཙཱཏི སནྣིཊྛཱནམེཏྠ གནྟབྦནྟི.

དྷུཏངྒནྟི ཨནུཔསམྤནྣཱནཾ ཏེཙཱིཝརིཀདྷུཏངྒཱབྷཱཝཏོ ཏིཙཱིཝརེནེཝ ཏེཙཱིཝརིཀོཏི, ཏེསཾ ཨདྷིཊྛཱནཱབྷཱཝཏོ ‘‘ཨདྷིཊྛིཏེནེཝཱ’’ཏི ཝཏྟབྦཾ ཧོཏཱུཏི ཙེ? ན, དྷུཏངྒབྷེདེན ཝིརོདྷཔྤསངྒཏོ. ཙཏུཏྠཙཱིཝརསཱདིཡནེན ཧི དྷུཏངྒབྷེདོ, ན ཏིཙཱིཝརཝིཔྤཝཱསེན, ནཱཔི ཨཏིརེཀཙཱིཝརསཱདིཡནེན, ནཱཔི ཨཏིརེཀཙཱིཝརདྷཱརཎེན. ཡསྨཱ པན བྷིཀྑཱུནཾ ཨེཝ བྷགཝཏཱ ཨདྷིཊྛཱནཝསེན ནཝ ཙཱིཝརཱནི ¶ ཨནུཉྙཱཏཱནི, ཛཱཏིཝསེན ཙ ཝུཏྟཱནི, ན ཨེཝཾ ཨནུཔསམྤནྣཱནཾ, ཏསྨཱ ནེསཾ ཙཱིཝརནིཡམཱབྷཱཝཱ ན ཏཾ དྷུཏངྒཾ ཨནུཉྙཱཏཾ གཧཊྛཱནཾ ཝིཡ. ཏསྨཱ ཏསྶ སམཱདཱནཝིདྷཱནེ ཨཝཙནཏོ ཙ སནྣིཊྛཱནམེཏྠ གནྟབྦནྟི.

སཱསངྐསམྨཏོཏི ཀངྑཱཝིཏརཎིཡཾ (ཀངྑཱ. ཨཊྛ. སཱསངྐསིཀྑཱཔདཝཎྞནཱ) སཱསངྐསིཀྑཱཔདེ ཝིསུཾ ཨངྒཱནི ན ཝུཏྟཱནི, ‘‘སེསམེཏྠ ཙཱིཝརཝགྒསྶ དུཏིཡསིཀྑཱཔདེ ཝུཏྟནཡེནེཝ ཝེདིཏབྦ’’ནྟི ཝུཏྟཾ, ན ཙ པནེཏཾ ཝུཏྟཾ. ཏཏྠ རཏྟིཝིཔྤཝཱསོ ཙཏུཏྠམངྒཾ, ཨིདྷ ཚཱརཏྟཝིཔྤཝཱསོ, ཨཡམེཏྠ ཝིསེསོཏི. ཏསྨཱ ཨངྒསཱམཉྙཏོ ཙ སམྨུཏིསཱམཉྙཏོ ཙ སཱསངྐསིཀྑཱཔདམེཝིདནྟི ཨིདཾ ¶ ནིཔྤདེསཾ, ཏཾ སཔྤདེསཾ མཱསཔརམཏྟཱ. ཏཏྠ བཧིགཱམེཔི གཱམསཱིམཾ ཨོཀྐམིཏྭཱ ཝསིཏྭཱ པཀྐམནྟསྶ ཨནཱཔཏྟི, ཨིདྷ ན ཏཐཱ. ཨིདྷ ཨནནྟརེ ཨནནྟརེ ཨརུཎུགྒམནེ ནིསྶགྒིཡཾ, ཏཏྠ སཏྟམེཏི ཨཡཾ ཨིམེསཾ དྭིནྣཾ ཝིསེསོ. ཨངྒཱནི པན ཙཱིཝརནིཀྑེཔནངྒསམྤཏྟིཏོ ཝིཔརིཡཱཡེན, ཨིདྷ ཝུཏྟནཡེན ཙ སིདྡྷཏྟཱ ན ཝུཏྟཱནི. ཏཱནི ཀཱམཾ ན ཝུཏྟཱནི, ཏཐཱཔི ཙཏུཏྠམངྒཾ ཝིསེསིཏབྦཾ, ན པན ཝིསེསིཏཾ. ཀིཾ ཀཱརཎཾ? ཨིདྷ ཝུཏྟནིསྶཛྫནཀྐམེན ནིསྶཛྫིཏྭཱ ཨཱཔཏྟིདེསནཏོ, ཏཏྠཱཔནྣཱཔཏྟིཝིམོཀྑདཱིཔནཏྠཾ. སཾཝཙྪརཝིཔྤཝུཏྠམྤི རཏྟིཝིཔྤཝུཏྠམེཝ, པགེཝ ཚཱརཏྟཝིཔྤཝུཏྠཾ. ཨེཝཾ སནྟེཔི ཏཏྠ ཡཐཱཝུཏྟཨངྒསམྤཏྟིཡཱ སཏི ཏཏྠ ཝུཏྟནཡེནེཝ ནིསྶཛྫིཏབྦཾ. ཧེམནྟེ, གིམྷེ ཝཱ ནིསྶཛྫཏི ཙེ? ཨིདྷ ཝུཏྟནཡེནཱཔི ནིསྶཛྫིཏུཾ ཝཊྚཏཱིཏི ཉཱཔནཏྠཾ ཙཏུཏྠམངྒཾ ན ཝིསེསིཏནྟི ནོ ཏཀྐོཏི ཨཱཙརིཡོ. མཱསཱཏིཀྐནྟཾ, དསཱཧཱཏིཀྐནྟམྤི ཙཱིཝརཾ ‘‘དསཱཧཱཏིཀྐནྟ’’ནྟི ཝཏྭཱ ནིསྶཊྛམེཝ, ན ཨཱུནམཱསཾ ཧུཏྭཱ ‘‘དསཱཧཱཏིཀྐནྟ’’ནྟི ཝཏྭཱ, མཱསཱཏིཀྐནྟ’’ནྟི ཝཏྭཱཏི ཨེཀེ. ཏཐཱཔི སཙེ པཙྩཱསཱཙཱིཝརཾ ཧོཏི, ནིསྶགྒིཡཾ. ‘‘དསཱཧཱཏིཀྐནྟ’’ནྟི ཝཏྭཱ མཱུལཙཱིཝརཾ པན ‘‘མཱསཱཏིཀྐནྟ’’ནྟི ཝཏྭཱ ནིསྶཛྫིཏབྦཾ.

‘‘སནྟརུཏྟར’’ནྟི ཝཱ ‘‘སངྒྷཱཊི’’ནྟི ཝཱ ‘‘ཙཱིཝར’’ནྟི ཝཱ ཀིཾ ཏིཙཱིཝརཾ, ཨུདཱཧུ ཨཉྙམྤཱིཏི? ཀིཉྩེཏྠ – ཡདི ཏིཙཱིཝརམེཝ པཊིསིདྡྷཾ, པརིཡཱཔནྣཝསེན ཨཙྪིནྣཙཱིཝརཨཨཚནྡནདྷོཝཱཔནཝིཉྙཏྟིཨཱདིཝིརོདྷོ. ཨཐ ཨཉྙམྤི ‘‘ནིཊྛིཏཙཱིཝརསྨི’’ནྟི ཨེཝམཱདིནཱ ཝིརོདྷོཏི? ཝུཙྩཏེ – ན ནིཡམཏོ ཝེདིཏབྦཾ ཡཐཱསམྦྷཝཾ གཧེཏབྦཏོ. ཏཐཱ ཧི ‘‘ཙཱིཝརཾ ནིཀྑིཔིཏྭཱ སནྟརུཏྟརེན ཛནཔདཙཱརིཀཾ པཀྐམནྟཱི’’ཏི (པཱརཱ. ༤༧༡) ཨེཝམཱདཱིསུ ཏིཙཱིཝརམེཝ, ‘‘ན, བྷིཀྑཝེ, སནྟརུཏྟརེན གཱམོ པཝིསིཏབྦོ (མཧཱཝ. ༣༦༢), སནྟརུཏྟརཔརམཾ ཏཏོ ཙཱིཝརཾ སཱདིཏབྦ’’ནྟི (པཱརཱ. ༥༢༣-༥༢༤) ཨེཝམཱདཱིསུ ཡཾ ཀིཉྩི, ཏཐཱ ‘‘སགུཎཾ ཀཏྭཱ སངྒྷཱཊིཡོ དཱཏབྦཱ, ནིཝཱསནཾ དཱཏབྦཾ, སངྒྷཱཊི དཱཏབྦཱ, ཧནྡ ཏེ, ཨཱཝུསོ ¶ , སངྒྷཱཊི, དེཧི མེ པཊ’’ནྟི ཨེཝམཱདཱིསུ. ཝུཏྟཉྷེཏཾ ‘‘སབྦཉྷི ཙཱིཝརཾ སངྒྷཊིཏཊྛེན ‘སངྒྷཱཊཱི’ཏི ཝུཙྩཏཱི’’ཏི (པཱཙི. ཨཊྛ. ༨༩༨). ཏཐཱ ‘‘ནིཊྛིཏཙཱིཝརསྨི’’ནྟི ཨེཏྠཱཔཱིཏི ཨེཀེ. ཨནྟོསམཡེ ཡཱཝདཏྠཾ ཙཱིཝརཾ ཨནུཉྙཱཏཾ, ཏཾ སབྦཾ ཀརིཡམཱནཾ ཀདཱ ནིཊྛཱནཾ གཙྪིསྶཏི, ཏསྨཱ ཏིཙཱིཝརམེཝཱཏི ཨེཀེ.

ཨཙཱིཝརསྶཱནཱཔཏྟི ¶ པཙྩུདྡྷཱརཱདིསིདྡྷིཏོཏི ཀིཾ ཝུཏྟཾ ཧོཏི – ཨུདོསིཏསིཀྑཱཔདསྶ ནིཔྤཡོཛནབྷཱཝཔྤསངྒཏོ ཏིཙཱིཝརཝིཔྤཝཱསེ ཏེཙཱིཝརསྶ ཨཱཔཏྟཱིཏི ཨེཀེ. ཏཏྠེཏཾ ཝུཙྩཏི ན ཧོཏི ཨཱཔཏྟི པཙྩུདྡྷཱརཱདིསིདྡྷིཏོ. ‘‘ཨནཱཔཏྟི ཨནྟོཨརུཎེ པཙྩུདྡྷརཏི ཝིསྶཛྫེཏཱི’’ཏི (པཱརཱ. ༤༩༦) ཧི ཝུཏྟཾ. ཨཉྙཐཱ པཙྩུདྡྷརནྟསྶ, ཨནྟོཨརུཎེ ཝིསྶཛྫེནྟསྶ ཙ ཡཱཝ ཨཉྙོ ནཱདྷིཊྛཱཏི, ཏཱཝ ཨཱཔཏྟིཾ ཨཱཔཛྫཏི ཡཐཱཝུཏྟནཡེནེཝ. ཨཉྙཐཱ སཏྟབྦྷནྟརེན ཝིཔྤཝཱསསྶཱཏི ཝིཔྤཝཱསཏོ ཡཐཱརུཏཾཡེཝ སཏི ཝིཔྤཝཱསེ ཝིཔྤཝཱསཏོ, ཨཝིཔྤཝཱསེ སཏི ཨཝིཔྤཝཱསཏོཏི.

ཨུདོསིཏསིཀྑཱཔདཝཎྞནཱ ནིཊྛིཏཱ.

༣. ཨཀཱལཙཱིཝརསིཀྑཱཔདཝཎྞནཱ

ཨཔརིཀྑིཏྟསྶ པརིཀྑེཔཱརཧཊྛཱནསྶ དུབྦིཛཱནཏྟཱ ཏཾ དསྶེཏུཾ ‘‘ཨཔིཙ བྷིཀྑཱུན’’ནྟིཨཱདི ཝུཏྟཾ. ཝིཧཱརཔརིཡནྟེ ནིཝིཊྛདྷུཝསནྣིཔཱཏཊྛཱནཏོ ཝཱ པརིཡནྟེ ཋིཏབྷོཛནསཱལཏོ ཝཱ ནིབདྡྷཝསནཀཨཱཝཱསཏོ ཝཱཏི ཨེཝཾ གཧེཏབྦཾ. སཙེ ཝིཧཱརེ སནྣིཔཏིཏབྷིཀྑཱུཧི སདྡྷིཾ ཨེཀཱབདྡྷཱ ཧུཏྭཱ ཡོཛནསཏམྤི པཱུརེཏྭཱ ནིསཱིདནྟི, ཡོཛནསཏམྤི ཨུཔཙཱརསཱིམཱ ཧོཏཱིཏི ཨཏྠོ. ‘‘སམཱནསཾཝཱསཀསཱིམཱཡཱ’’ཏི ཝུཏྟེ ཁཎྜསཱིམཱདཱིསུ ཋིཏཱནཾ ན པཱཔུཎཱཏི, ཏཱསཾ ཝིསུཾ སམཱནསཾཝཱསཀསཱིམཏྟཱཏི ཙ སམཱནསཾཝཱསཀཨཝིཔྤཝཱསསཱིམཱནཾ ཨིདཾ ནཱནཏྟཾ. ‘‘ཨཝིཔྤཝཱསསཱིམཱཡ དམྨཱི’’ཏི དིནྣཾ པན གཱམེ ཋིཏཱནཾ ན པཱཔུཎཱཏི. ཀསྨཱ? ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི (མཧཱཝ. ༡༤༤) ཝཙནཏོ. ‘‘སམཱནསཾཝཱསཀསཱིམཱཡཱ’’ཏི དིནྣཾ པན ཡསྨིཾ ཋཱནེ ཨཝིཔྤཝཱསསཱིམཱ ཨཏྠི, ཏཏྠ ཋིཏཱནམྤི. ‘‘ཏཏྲ ཋིཏཱནཉྩ པཱཔུཎཱཏཱི’’ཏི ཙ, ‘‘ཁཎྜསཱིམཱཡཾ ཋཏྭཱ ‘སཱིམཊྛཀསངྒྷོ གཎྷཱཏཱུ’ཏི ཝུཏྟེ ཨུཔཙཱརསཱིམཱཡ ཨེཝ པརིཙྪིནྡིཏྭཱ དཱཏབྦ’’ནྟི ཙ, ‘‘ཏེསཾ བཧིསཱིམཊྛཱནམྤི པཱཔུཎཱཏི ཡཱཝ ཀཐིནསྶུབྦྷཱརཱཏི ཨཏྠོ’’ཏི ཙ, ‘‘ཨནཏྠཏེ པན ཀཐིནེ ཨནྟོཧེམནྟེ སཙེ ཝིཧཱརཾ པཝིསིཏྭཱ ‘ཝསྶཾཝུཊྛསངྒྷསྶ དམྨཱི’ཏི ཝདཏི, ཡེ ཏཏྠ ཝསྶཙྪེདཾ ཨཀཏྭཱ པཙྪིམཝསྶཾཝུཊྛཱ, ཏེསཾ བཧིསཱིམཊྛཱནམྤི པཱཔུཎཱཏཱི’’ཏི ཝིནཡདྷརཱ ¶ པརིཙྪིནྡནྟི, ཨཊྛཀཐཱཡཾ པན ཨནཱགཏཾ. ཏསྨཱ སམནྟཔཱསཱདིཀཱཡཾ ‘‘ལཀྑཎཉྙཱུ ཝདནྟཱི’’ཏི (མཧཱཝ. ཨཊྛ. ༣༧༩) ཝུཏྟནྟི ཙ, ‘‘‘ཙཱིཝརམཱསཏོ པཊྛཱཡ ཡཱཝ ¶ ཧེམནྟསྶ པཙྪིམོ དིཝསོ, ཏཱཝ ཝསྶཱཝཱསིཀཾ དེམཱ’ཏི ཝུཏྟེ ཀཐིནཾ ཨཏྠཏཾ ཝཱ ཧོཏུ, ཨནཏྠཏཾ ཝཱཏི ཡཾ སམནྟཔཱསཱདིཀཱཝཙནཾ (མཧཱཝ. ཨཊྛ. ༣༧༩), ཨེཏྠཱཔི ཡདི ཨཏྠཏཾ, པུརིམཝསྶཾཝུཊྛཱ པཉྩ མཱསེ. ཡདི ཨནཏྠཏཾ, པཙྪིམཝསྶཾཝུཊྛཱ ཙཏྟཱརོ མཱསེ ལབྷནྟཱིཏི ཝིནིཙྪཡོ’’ཏི ཙ ལིཁིཏཾ.

‘‘ཡེཧི མཡ྄ཧཾ ཡཱགུ པཱིཏཱཏི ཡེཧི ནིམནྟིཏེཧི མཡ྄ཧཾ ཡཱགུ པཱིཏཱཏི ཨདྷིཔྤཱཡོ. ཏསྨཱ ཡེཧི ནིམནྟིཏེཧི ཡཱགུ པཱིཏཱ, ཏེསཾཡེཝ པཱཔུཎཱཏཱིཏི ཝུཏྟཾ. ཨཉྙཐཱ ‘ཡེཧི མཡ྄ཧཾ ཡཱགུ པཱིཏཱ’ཏི ཝུཏྟེ ནིམནྟིཏཱ ཝཱ ཧོནྟུ, ཨནིམནྟིཏཱ ཝཱ, ཡེཧི པཱིཏཱ, ཏེསཾ པཱཔུཎིཏབྦཱནཱི’’ཏི ཝདནྟི. ཨེཏྠ ‘‘ནིཊྛིཏཙཱིཝརསྨིཾ བྷིཀྑུནཱ ཨུབྦྷཏསྨིཾ ཀཐིནེ’’ཏི ཝདནྟོ ཉཱཔེཏི ཨེཏྠནྟརེ ཏིཎྞམྤི ཨཀཱལཙཱིཝརཱནཾ ཨུཔྤཏྟིཨབྷཱཝནྟི. ཀསྨཱ པན པདབྷཱཛནེ ཝིཏྠཱརིཏཱནཱིཏི? ཝུཙྩཏེ – ཨིདཾ པན སིཀྑཱཔདཾ ཨདྷིཊྛཱནཾ སནྡྷཱཡ ན ཝུཏྟཾ ཀིནྟུ པཋམསིཀྑཱཔདེ དསཱཧཔརམཾ ཨནུཛཱནིཏྭཱ ཏསྨིཾ ཨཔྤཧོནྟེ སཙེ པཙྩཱསཱ ཨཏྠི, ཏམེཝ ཝཌྜྷེཏྭཱ མཱསམནུཛཱནནྟོ ཨིམམྤི ཨཏྠཝིསེསཾ དཱིཔེཏི. ཨཀཱལཙཱིཝརཾ ནཱམ སམྨུཁཱིབྷཱུཏེན བྷཱཛེཏབྦཾ. ཏཾ པན ‘‘ཨཱཀངྑམཱནེན བྷིཀྑུནཱ པཊིགྒཧེཏབྦ’’ནྟི ཨིམིནཱ སིཀྑཱཔདེན ཝཌྜྷེཏྭཱ ཝུཏྟནྟི. ཏསྨཱ ཏཱིཎིཔི པདབྷཱཛནེ ཝིཏྠཱརིཏཱནཱིཏི.

‘‘ཁིཔྤམེཝ ཀཱརེཏབྦནྟི སཱིགྷཾ ཨནྟོདསཱཧེཡེཝ ཀཱརེཏབྦ’’ནྟི ཨིདཾ པན པཧོནཀབྷཱཝེ པུརིམསིཀྑཱཔདལཀྑཎེནཱཏི དཱིཔེཏུཾ ཝུཏྟཾ. ཏསྨཱ ཨེཝཾ ‘‘སཱིགྷ’’ནྟི ཝཱ ‘‘ལཧུ’’ནྟི ཝཱ ཨཱདིནཱ ཨཝཏྭཱཔི ‘‘དསཱཧཱ’’ཏི ཝུཏྟནྟི. ཨཏྠཏཀཐིནསྶ ཨེཝཾ ཧོཏུ, ཨནཏྠཏེ པན ཀཐིནེ ཀཐནྟི ཝུཏྟེ ཨནཏྠཏསྶ པཊིཀྑེཔཏཾ དསྶེཏཱིཏི ཝུཏྟོ ཨཔསྶནྟོ ཝིགྷཱཏཾ ཨཱཔཛྫཏཱིཏི (ཝཛིར. ཊཱི. པཱརཱཛིཀ ༤༩༩-༥༠༠) ལིཁིཏཾ.

ཨཀཱལཙཱིཝརསིཀྑཱཔདཝཎྞནཱ ནིཊྛིཏཱ.

༤. པུརཱཎཙཱིཝརསིཀྑཱཔདཝཎྞནཱ

‘‘སཱཀིཡཱནིཡོ ཝིཡ སུདྡྷབྷིཀྑུསངྒྷེ ཝཱ’’ཏི ཨིདཾ ‘‘བྷིཀྑུནཱི ནཱམ ཨུབྷཏོསངྒྷེ ཨུཔསམྤནྣཱ’’ཏི ¶ (པཱརཱ. ༥༠༥) ཨིམིནཱ ཝིརུཛ྄ཛྷཏཱིཏི ཙེ? ན, ཨདྷིཔྤཱཡཱཛཱནནཏོ ¶ . བྷིཀྑཱུནཾ སནྟིཀེ ཨུཔསམྤདཱཡ པཊིཀྑིཏྟཏྟཱ ཏདནུཔྤསངྒབྷཡཱ ཨེཝཾ ཝུཏྟནྟི ཝེདིཏབྦཾ.

ཨེཀེན ཝཏྠུནཱཏི ཡེན ཀེནཙི པཋམེན. ཨཝུཏྟཱ ཝཱ དྷོཝཏཱིཏི ཨཝུཏྟཱ དྷོཝཏི, རཛཏི ཨཱཀོཊེཏཱིཏི ཨཏྠོ. ‘‘‘ཨཝུཏྟཱ’ཏི ཝཙནཏོ ཨཝཱདཱཔེཏྭཱ དྷོཝནཱདཱིསུ ཨནཱཔཏྟཱི’’ཏི ལིཁིཏཾ. ཨིདྷ ཙཱིཝརཾ ནཱམ ནིཝཱསནཔཱརུཔནཱུཔགམེཝ. ཡདི ཨེཝཾ ‘‘ནིཝཱསནཔཱརུཔནཱུཔགམེཝ ཝཏྟབྦ’’ནྟི ཙེ? ཏཾ ན ཝཏྟབྦཾ ‘‘པུརཱཎཙཱིཝར’’ནྟི ཨིམིནཱཝ སིདྡྷཏྟཱ. ཝུཏྟཉྷེཏཾ ‘‘པུརཱཎཙཱིཝརཾ ནཱམ སཀིཾ ནིཝཏྠམྤི སཀིཾ པཱརུཏམྤཱི’’ཏི (པཱརཱ. ༥༠༥).

པུརཱཎཙཱིཝརསིཀྑཱཔདཝཎྞནཱ ནིཊྛིཏཱ.

༥. ཙཱིཝརཔྤཊིགྒཧཎསིཀྑཱཔདཝཎྞནཱ

ཨུཔཙཱརོ དྭཱདསཧཏྠོ. ཨཙིཏྟཀཏྟཱ ཀཐཾ པཾསུཀཱུལཾ ཝཊྚཏཱིཏི ཙེ? ཏཱཡ ཏསྶ བྷིཀྑུནོ ཨདིནྣཏྟཱ, བྷིཀྑུནཱ ཙ ཏཏོ བྷིཀྑུནིཏོ ཨགྒཧིཏཏྟཱ ཙ.

ཙཱིཝརཔྤཊིགྒཧཎསིཀྑཱཔདཝཎྞནཱ ནིཊྛིཏཱ.

༦. ཨཉྙཱཏཀཝིཉྙཏྟིསིཀྑཱཔདཝཎྞནཱ

ཉཱཏཀཔྤཝཱརིཏེ ཝཱ ཝིཉྙཱཔེནྟསྶཱཏི ཨེཏྠ ཙ སངྒྷཝསེན པཝཱརིཏེསུ པམཱཎམེཝ ཝཊྚཏི. པུགྒལིཀཔྤཝཱརཎཱཡ ཡཾ ཡཾ པཝཱརེཏི, ཏཾ ཏཾཡེཝ ཝིཉྙཱཔེཏབྦནྟི ལིཁིཏཾ.

ཨཉྙཱཏཀཝིཉྙཏྟིསིཀྑཱཔདཝཎྞནཱ ནིཊྛིཏཱ.

༧. ཏཏུཏྟརིསིཀྑཱཔདཝཎྞནཱ

པཀཏིཡཱ སནྟརུཏྟརེན ཙརཏི ཀཐིནཔལིབོདྷཝསེན ཝཱ སཱསངྐསིཀྑཱཔདཝསེན ཝཱ. ཨེཏྠ སིཡཱ – ‘‘ན མཏྟཾ ཛཱནིཏྭཱ བཧུཾ ཙཱིཝརཾ ཝིཉྙཱཔེསྶནྟི, དུསྶཝཱཎིཛྫཾ ཝཱ’’ཏིཨཱདིནཱ (པཱརཱ. ༥༢༢) ཨུཛ྄ཛྷཱཡནྟཱནཾ སུཏྭཱ བྷགཝཱཔི ཚབྦགྒིཡེ བྷིཀྑཱུ ¶ ‘‘ཀཐཉྷི ནཱམ ཏུམྷེ མོགྷཔུརིསཱ ¶ ན མཏྟཾ ཛཱནིཏྭཱ བཧུཾ ཙཱིཝརཾ ཝིཉྙཱཔེསྶཐཱ’’ཏི (པཱརཱ. ༥༢༢) ཝཏྭཱ སིཀྑཱཔདསྶ པཉྙཏྟཏྟཱ ཙ ཨིམིསྶཾ ཀངྑཱཝིཏརཎིཡཾ ‘‘བཧུཙཱིཝརཝིཉྙཱཔནཝཏྠུསྨིཾ པཉྙཏྟ’’ནྟི ཝུཏྟཏྟཱ, སམནྟཔཱསཱདིཀཱཡཾ ‘‘ན ཧི ཨནཙྪིནྣཙཱིཝརཱ ཨཏྟནོ ཨཏྠཱཡ སཱཁཱཔལཱསཾ བྷཉྫིཏུཾ ལབྷནྟི, ཨཙྪིནྣཙཱིཝརཱནཾ པན ཨཏྠཱཡ ལབྷནྟཱི’’ཏི ཝུཏྟཏྟཱ ཙ ཨཉྙསྶཏྠཱཡ པམཱཎཾ ཝིཉྙཱཔེཏུཾ ཝཊྚཏཱིཏི ཙེ? ན, ཀསྨཱ? ཨཉྙཱཏཀཝིཉྙཏྟིསིཀྑཱཔདསྶ ཨཊྛུཔྤཏྟིཡཱ ཨེཝ ཨཉྙཱཏཀཝིཉྙཏྟི ཝཱརིཏཱ. ཏསྶ སིཀྑཱཔདསྶ ཨནཱཔཏྟི. པཱལི༹ཡཾ (པཱརཱ. ༥༢༡) ‘‘ཨཉྙསྶཏྠཱཡཱ’’ཏི ཨིམིསྶཱ ཨནཱཔཏྟིཔཱལི༹ཡཱ ཨཉྙསྶཏྠཱཡ ཝིཉྙཱཔེནྟོ ཏསྶ ཉཱཏཀཔྤཝཱརིཏེ ཨེཝ ཝིཉྙཱཔེཏི, ན ཨཉྙེཏི ཝཙནཏོ ཙ ཝཱརིཏཱ. ཏསྨཱ བྷགཝཱཔི ‘‘བཧུཾ ཙཱིཝརཾ ཝིཉྙཱཔེསྶཐཱ’’ཏི (པཱརཱ. ༥༢༢) ཝིགརཧིཏྭཱ སིཀྑཱཔདཾ པཉྙཱཔེནྟོ ‘‘ཨབྷིཧཊྛུཾ པཝཱརེཡྻཱ’’ཏི ཝུཏྟནཡེནེཝ པམཱཎཏོ གཧཎཾ ཨནུཛཱནི, ན ཨཉྙསྶཏྠཱཡ པམཱཎཏོ ཝིཉྙཱཔནཾ. ཡསྨཱ པནིམཾ སིཀྑཱཔདཾ ཨཉྙསྶཏྠཱཡ ཝིཉྙཱཔནཝཏྠུསྨིཾཡེཝ པཉྙཏྟཾ, ཏསྨཱ ཨིདྷ ‘‘ཨཉྙསྶཏྠཱཡཱ’’ཏི ན ཝུཏྟཾ, ན ན ལབྦྷཏཱིཏི ཀཏྭཱ.

ཨཊྛཀཐཱསུ ‘‘ཨཉྙཱཏཀཔྤཝཱརིཏཊྛཱནེ པཀཏིཡཱ བཧུམྤི ཝཊྚཏི, ཨཙྪིནྣཀཱརཎཱ པམཱཎམེཝ ཝཊྚཏཱི’’ཏི ཝུཏྟཾ. ཏཾ ‘‘ཨནཱཔཏྟི ཉཱཏཀཱནཾ པཝཱརིཏཱན’’ནྟི (པཱརཱ. ༥༢༦) ཝུཏྟཨནཱཔཏྟིཔཱལི༹ཡཱ ན སམེཏཱིཏི སམནྟཔཱསཱདིཀཱཡཾ (པཱརཱ. ཨཊྛ. ༢.༥༢༦) ཝུཏྟཏྟཱ ཨིདྷཱཔི ཝུཏྟནཡེནེཝ ཉཱཏཀཔྤཝཱརིཏེ ཝིཉྙཱཔེནྟསྶ ཨཏྟནོ དྷནེན གཎྷནྟསྶ ཨནཱཔཏྟཱིཏི ལིཁིཏཾ. ‘‘ཨཉྙསྶཏྠཱཡཱ’’ཏི ནིདཱནཝིརོདྷཏོ ན ཝུཏྟཾ, ཏཐཱཔི ཨནནྟརེ ཝུཏྟནཡེནེཝ ལབྦྷཏི ཨེཝཱཏི ཝདནྟི.

ཏཏུཏྟརིསིཀྑཱཔདཝཎྞནཱ ནིཊྛིཏཱ.

༨. ཨུཔཀྑཊསིཀྑཱཔདཝཎྞནཱ

པཋམཨུཔཀྑཊེ ‘‘པུབྦེ ཨཔྤཝཱརིཏོ’’ཏི (པཱརཱ. ༥༢༨) ཝཙནཏོ ཏསྨིཾ ཁཎེ པཝཱརིཏོཔི ཨཔྤཝཱརིཏོཝ ཧོཏཱིཏི ཝེདིཏབྦཾ.

ཨུཔཀྑཊསིཀྑཱཔདཝཎྞནཱ ནིཊྛིཏཱ.

༩. དུཏིཡཨུཔཀྑཊསིཀྑཱཔདཝཎྞནཱ

དུཏིཡཨུཔཀྑཊེན ¶ ¶ ཀིཾ པཡོཛནནྟི ཙེ? ནཏྠི པཡོཛནཾ, ཀེཝལཾ ཨཊྛུཔྤཏྟིཝསེན པན པཉྙཏྟཾ བྷིཀྑུནིཡཱ རཧོནིསཛྫསིཀྑཱཔདཾ ཝིཡ. ཨེཝཾ སནྟེ སངྒཱིཏིཀཱརཀེཧི སངྒཱིཏིཾ ཨནཱརོཔེཏབྦཾ བྷཝེཡྻ ཝིནཱཔི ཏེན ཏདཏྠསིདྡྷིཏོ, ཨནིསྶརཏྟཱ, ཨནཱརོཔེཏུཾ ཨནུཉྙཱཏཏྟཱ ཙ. ཝུཏྟཉྷེཏཾ ‘‘ཨཱཀངྑམཱནོ, ཨཱནནྡ, སངྒྷོ…པེ… སམཱུཧནེཡྻཱ’’ཏི (དཱི. ནི. ༢.༢༡༦; ཙཱུལ༹ཝ. ༤༤༡). ཨིདཾ སབྦམཀཱརཎཾ. ན ཧི བུདྡྷཱ ཨཔྤཡོཛནཾ ཝཙནཾ ནིཙྪཱརེནྟི, པགེཝ སིཀྑཱཔདཾ. ཏེནེཝཱཧ ཨཊྛཀཐཱཡཾ ‘‘ཨིམིནཱཝ ནཡེན ཨཏྠོ ཝེདིཏབྦོ. ཨིདཉྷི པུརིམསྶ ཨནུཔཉྙཏྟིསདིས’’ནྟིཨཱདི. ཨནུཔཉྙཏྟི ཙ ནིཔྤཡོཛནཾ ནཏྠི. ཏཾསདིསཉྩེཏཾ, ན ནིཔྤཡོཛནནྟི དསྶིཏཾ ཧོཏི. ཨེཝཾ སནྟེ ཀོ པནེཏྠ ཨཏྠཝིསེསོཏི? ཏཏོ ཨཱཧ ‘‘ཀེཝལཾ ཏཏྠ ཨེཀསྶ པཱིལཱ༹ ཀཏཱ, ཨིདྷ དྭིནྣཾ, ཨཡམེཏྠ ཝིསེསོ’’ཏི. ཨིམིནཱ ཨཏྠཝིསེསེན ཀོ པནཉྙོ ཨཏིརེཀཏྠོ དསྶིཏོཏི? པོརཱཎགཎྛིཔདེ ཏཱཝ ཝུཏྟཾ ‘‘ཨེཀསྨིམྤི ཝཏྠུསྨིཾ ཨུབྷིནྣམྤི པཱིལཱ༹ ཀཱཏུཾ ན ཝཊྚཏཱིཏི ཨཡམཏིརེཀཏྠོ དསྶིཏོ’’ཏི. ཏེནེཏཾ དཱིཔེཏི ‘‘ན ཀེཝལཾ པཊིལདྡྷཙཱིཝརགཎནཱཡ ཨེཝ ཨཱཔཏྟིགཎནཱ, པཱིལི༹ཏཔུགྒལསངྑཱཏཝཏྠུགཎནཱཡཔཱི’’ཏི.

ཧོནྟི ཙེཏྠ –

‘‘ཝཏྠུཏོ གཎནཱཡཔི, སིཡཱ ཨཱཔཏྟི ནེཀཏཱ;

ཨིཏི སནྡསྶནཏྠཉྩ, དུཏིཡཱུཔཀྑཊཾ ཨིདྷ.

‘‘ཀཱཡསཾསགྒསིཀྑཱཡ, ཝིབྷངྒེ ཝིཡ ཀིནྟེཏཾ;

ཨེཀིཏྠིཡཱཔི ནེཀཏཱ, ཨཱཔཏྟཱིནཾ པཡོགཏོ’’ཏི. (ཝཛིར. ཊཱི. པཱརཱཛིཀ ༥༣༢);

ཨཔིཙེཏཾ སིཀྑཱཔདཾ ཏཾཛཱཏིཀེསུ སིཀྑཱཔདེསུ སབྦེསུཔི གཧེཏབྦཝིནིཙྪཡསྶ དསྶནཔྤཡོཛནནྟི ཝེདིཏབྦཾ. ཨཱཧ ཙ –

‘‘ཨཉྙཱཏིཀཱཡ བཧུཏཱཡ ཝིམིསྶཏཱཡ;

ཨཱཔཏྟིཡཱཔི བཧུཏཱ ཙ ཝིམིསྶཏཱ ཙ;

ཨིཙྩེཝམཱདིཝིདྷིསམྦྷཝདསྶནཏྠཾ ¶ ;

སཏྠཱ ཨུཔཀྑཊམིདཾ དུཏིཡཾ ཨཝོཙཱ’’ཏི. (ཝཛིར. ཊཱི. པཱརཱཛིཀ ༥༣༢);

ཏསྶཱཡཾ ¶ སངྑེཔཏོ ཨདྷིཔྤཱཡཔུབྦངྒམཱ ཝིཙཱརཎཱ – པུརཱཎཙཱིཝརཾ ཨེཀམེཝ བྷིཀྑུ བྷིཀྑུནཱིཧི དྭཱིཧི, བཧཱུཧི ཝཱ དྷོཝཱཔེཏི, བྷིཀྑུནིགཎནཱཡ པཱཙིཏྟིཡགཎནཱ. ཏཐཱ དྭིནྣཾ, བཧཱུནཾ ཝཱ སཱདྷཱརཎཾ ཨེཀམེཝ ཙཱིཝརཾ ཨཉྙཏྲ པཱརིཝཏྟཀཱ པཊིགྒཎྷཱཏི, ཨིདྷཱཔི ཏཐཱ དྭིནྣཾ, བཧཱུནཾ ཝཱ སཱདྷཱརཎམེཀཾ ཝིཉྙཱཔེཏི, ཝིཉྙཏྟཔུགྒལགཎནཱཡ ཨཱཔཏྟིགཎནཱ. ཏཐཱ ཨཉྙེསུཔི ཨེཝརཱུཔེསུ སིཀྑཱཔདེསུ ནཡོ ནེཏབྦོ. ཨཡཾ ཏཱཝ བཧུཏཱཡ ནཡོ.

ཝིམིསྶཏཱཡ པན ཉཱཏིཀཱཡ, ཨཉྙཱཏིཀཱཡ ཙ ཨེཀཾ དྷོཝཱཔེཏི, ཨེཀཏོ ནིཊྛཱཔནེ ཨེཀཾ པཱཙིཏྟིཡཾ. ཨཐ ཉཱཏིཀཱ པཋམཾ ཐོཀཾ དྷོཝིཏྭཱ ཋིཏཱ, པུན ཨཉྙཱཏིཀཱ སུདྷོཏཾ ཀརོཏི, ནིསྶགྒིཡཾ པཱཙིཏྟིཡཾ. ཨཐ ཨཉྙཱཏིཀཱ པཋམཾ དྷོཝཏི, པཙྪཱ ཉཱཏིཀཱ སུདྷོཏཾ ཀརོཏི, ཨཉྙཱཏིཀཱཡ པཡོགཝསེན བྷིཀྑུནོ དུཀྐཊམེཝ. ཨཉྙཱཏིཀཱཡ, ཉཱཏིཀཱཡ ཙ ཨཉྙཱཏིཀསཉྙཱི, ཝེམཏིཀོ, ཉཱཏིཀསཉྙཱི ཝཱ དྷོཝཱཔེཏི, ཡཐཱཝུཏྟནཡེན ནིསྶགྒིཡདུཀྐཊཱདིཨཱཔཏྟིབྷེདགཎནཱ ཝེདིཏབྦཱ. ཏཐཱ ཨཉྙཱཏིཀཱཡ, ཉཱཏིཀཱཡ ཙ སནྟཀཾ ཙཱིཝརཾ ཨུབྷོཧི ཨེཀཏོ དིཡྻམཱནཾ པཊིགྒཎྷཱཏི, ནིསྶགྒིཡམེཝ. ཨཐ ཨཉྙཱཏིཀཱཡ ཨེཝ ཧཏྠཏོ པཊིགྒཎྷཱཏི, ནིསྶགྒིཡམེཝ. ཨཐ ཉཱཏིཀཱཡ ཧཏྠཏོ པཊིགྒཎྷཱཏི, ཨནཱཔཏྟི. ཨཐ ཨུབྷོསུ ཨཉྙཱཏིཀཱདིསཉྙཱི, ཝུཏྟནཡེནེཝ ནིསྶགྒིཡདུཀྐཊཱདིཨཱཔཏྟིབྷེདགཎནཱ ཝེདིཏབྦཱ. ཏཐཱ ཨཉྙཱཏིཀཝིཉྙཏྟིཨཱདཱིསུཔི ཡཐཱསམྦྷཝཾ ནཡོ ནེཏབྦོ. ཨཡཾ ཝིམིསྶཏཱཡ ནཡོ.

ཨཱདིསདྡེན པན ཨནེཀེ ཨཉྙཱཏིཀཱ ཝིཉྙཏྟཱ, ཝིཉྙཏྟཔུགྒལགཎནཱཡ དུཀྐཊཾ. ཨེཀོ དེཏི, ཨེཀོ ན དེཏི, ནིསྶགྒིཡཾ. ཨཐ ཨཝིཉྙཏྟོ དེཏི, ན ནིསགྒིཡཾ. ཨཐ ཝིཉྙཏྟཱཝིཉྙཏྟཱནཾ སཱདྷཱརཎཾ ཝིཉྙཏྟོ དེཏི, ནིསྶགྒིཡཾ. ཨུབྷོ དེནྟི, ནིསྶགྒིཡམེཝ. ཨཝིཉྙཏྟོ དེཏི, ནིསྶགྒིཡེན ཨནཱཔཏྟི. ཝིཉྙཏྟསྶ ཝཙནེན ཨཝིཉྙཏྟོ དེཏི, ཨནཱཔཏྟི ཨེཝ. ཏཐཱ ཨུཔཀྑཊཱདཱིསུཔི ཡཐཱསམྦྷཝཾ ནཡོ ནེཏབྦོ.

ཨེཏྟཱཝཏཱ སངྑེཔཏོ ཨཉྙཱཏིཀཱཡཱདིགཱཐཱ ཝུཏྟཱདྷིཔྤཱཡཱ ཧོཏི. ཡཾ པནེཏྠ བྷིཀྑུནིཡཱ རཧོནིསཛྫསིཀྑཱཔདཾ ནིཔྤཡོཛནཏཱཡ ནིདསྶནཾ ¶ ཝུཏྟཾ, ཏསྶ པཡོཛནཝིསེསོ ཏསྨིཾཡེཝ ཨཱཝིབྷཝིསྶཏཱིཏི ¶ . ཨེཝམེཝ ཨཉྙཏྠཔི ཝཙནེན, ཝིསེསཨཊྛུཔྤཏྟིཝསེན ཙ སིཀྑཱཔདེསུ ཉཱཏབྦཾ ཝིསེསཔྤཡོཛནནྟི.

དུཏིཡཨུཔཀྑཊསིཀྑཱཔདཝཎྞནཱ ནིཊྛིཏཱ.

༡༠. རཱཛསིཀྑཱཔདཝཎྞནཱ

‘‘ཋཱནཾ བྷཉྫཏི, ཨཱགཏཀཱརཎཾ ཝིནཱསེཏཱི’’ཏི ཝུཏྟཏྟཱ པུན ཙོདནཾ ན ལབྷཏཱིཏི ཨེཀེ. ཨཱགམནསྶ སཱཏྠཀཾ ན ཧོཏི, ཙཱིཝརཾ ན ལབྷིསྶཏི པཊིསནྠཱརསྶ ཀཏཏྟཱཏི ཨེཀེ. ཙོདནཱལཀྑཎཾ ན ཧོཏཱིཏི ཀཏྭཱ ཝུཏྟནྟི ཨེཀེ. ‘‘དྷམྨདེསནཱདྷིཔྤཱཡཱདིནཱ ན པཊིསནྠཱརོ ཀཱཏབྦོ’’ཏི ཨུཔཏིསྶཏྠེརོ ‘‘‘ཨཱགཏཀཱརཎཾ ཝིནཱསེཏཱི’ཏི ཙོདནཱཋཱནཱནི བྷཉྫཏི, ཙོདེཏུཀཱམོ ཨཀཏྟབྦམཀཱསི, ཏཔྤཙྩཡཱ ཝཏྟབྷེདེ དུཀྐཊ’’ནྟི ཙ ཝདཏི. དྷམྨསིརིཏྠེརོ པན ‘‘ཨཱསནེ ཙེ ནིསཱིདཏི, ཨེཀཱཡ ནིསཛྫཱཡ དྭེ ཋཱནཱནི བྷཉྫཏི. ཨཱམིསཾ ཙེ པཊིགྒཎྷཱཏི, ཨེཀེན པཊིགྒཧཎེན དྭེ ཋཱནཱནི བྷཉྫཏི. དྷམྨཾ ཙེ བྷཱསཏི, དྷམྨདེསནཱསིཀྑཱཔདེ ཝུཏྟཔརིཙྪེདཱཡ ཨེཀཱཡ ཝཱཙཱཡ དྭེ ཋཱནཱནི བྷཉྫཏི. ཏཾ སནྡྷཱཡ ‘ཨཱགཏཀཱརཎཾ ཝིནཱསེཏཱི’ཏི ཝུཏྟ’’ནྟི ཝདཏི. ‘‘ཨེསོ ཁོ’’ཏི ཝུཏྟེན སཉྙཏྟོ ཨེཀོ, ‘‘ཨཡཾ ཝེཡྻཱཝཙྩཀརོཏི…པེ… ཨཝུཏྟེཔི ཙོདེཏུཾ ཝཊྚཏཱི’’ཏི ཝུཏྟོ དུཏིཡོ, སཙེ པན དཱུཏོ གཙྪནྟོཝ ‘‘ཨཧཾ ཏསྶ ཧཏྠེ དསྶཱམཱི’’ཏིཨཱདིནཱ ཝུཏྟོ ཏཏིཡོ, ‘‘ཨཉྙཾ ཝཱ པེསེཏྭཱ ཨཱརོཙཱཔེཏཱི’’ཏི ཝུཏྟོ ཙཏུཏྠོཏི ཡཐཱ བྷིཀྑུནཱ ནིདྡིཊྛཱ ཙཏྟཱརོ, ཏཐེཝ དཱུཏེན ནིདྡིཊྛཱ ཙཏྟཱརོ. མུཁཝེཝཊིཀཀཔྤིཡཀཱརཀོ, པརམྨུཁཀཔྤིཡཀཱརཀོ ཙེཏི ཨེཏེསུ ཨཉྙཱཏཀཨཔྤཝཱརིཏེསུ ཝིཡ པཊིཔཛྫིཏབྦནྟི ལིཁིཏཾ.

རཱཛསིཀྑཱཔདཝཎྞནཱ ནིཊྛིཏཱ.

ཙཱིཝརཝགྒོ པཋམོ.

༢. ཨེལ༹ཀལོམཝགྒོ

༡. ཀོསིཡསིཀྑཱཔདཝཎྞནཱ

ཀཱརཱཔེཡྻཱཏི ¶ ¶ ཨཏྟནོ ཙ པརསྶ ཙ ཨུབྷིནྣཉྩ ཀོསིཡཾ ཨེཀཏོ གཎྷིཏྭཱ ཝུཏྟཾ, ཨུབྷོ ཝཱ ཨེཀཏོ ཀརོནྟཱིཏི ཨཏྠཏོ ཝེདིཏབྦཾ. ཏཏྠ ཨཏྟནཱ ཀཏཾ ཙེ, ‘‘ནིསྶཛྫནཀཱལེ སཡཾ ཀཏཾ ནིསྶགྒིཡ’’ནྟི ཝཏྟབྦཾ. ཨུབྷོཧི ཙེ ཀཏཾ, ཡཐཱཔཱལི༹མེཝ.

ཀོསིཡསིཀྑཱཔདཝཎྞནཱ ནིཊྛིཏཱ.

༢. སུདྡྷཀཱལ༹ཀསིཀྑཱཔདཝཎྞནཱ

ཡཐཱ པཋམེ ‘‘ཨེཀེནཔི ཀོསིཡཾསུནཱ’’ཏི (ཀངྑཱ. ཨཊྛ. ཀོསིཡསིཀྑཱཔདཝཎྞནཱ) ཝུཏྟཾ, ཏཐཱ ཨིདྷ ‘‘ཨེཀེནཔི ཨཉྙེན ཨམིསྶིཏཱན’’ནྟི ཝཙནཱབྷཱཝཏོ ཨཉྙེན མིསྶབྷཱཝེ སཏིཔི ཨཔཉྙཱཡམཱནརཱུཔཀཾ ཙེ, ‘‘སུདྡྷཀཱལ༹ཀ’’མིཙྩེཝ ཝུཙྩཏཱིཏི ཝདནྟི.

སུདྡྷཀཱལ༹ཀསིཀྑཱཔདཝཎྞནཱ ནིཊྛིཏཱ.

༣. དྭེབྷཱགསིཀྑཱཔདཝཎྞནཱ

‘‘ཏུལཡིཏྭཱ’’ཏི ཝཙནཏོ ཡཐཱ ཏུལཱདྷཱརཎཱཡ ཀཱལ༹ཀཱདྷིཀཱ ན ཧོནྟི, ཏཐཱ ཀཱལ༹ཀཱནཾ དྭེ བྷཱགཱ གཧེཏབྦཱ ཨུཀྐཊྛཔརིཙྪེདེན. ‘‘ཨེཀསྶཱཔི ཀཱལ༹ཀལོམསྶ ཨཏིརེཀབྷཱཝེ ནིསྶགྒིཡནྟི ཝཙནཾ ཏུལཱདྷཱརཎཱཡ ཀིཉྩཱཔི ན སམེཏི, ཨཙིཏྟཀཏྟཱ པན སིཀྑཱཔདསྶ པུབྦེ ཏུལཱཡ དྷཱརཡིཏྭཱ ཋཔིཏེསུ ཨེཀམྤི ལོམཾ ཏཏྠ པཏེཡྻ, ནིསྶགྒིཡནྟི ཨཡམདྷིཔྤཱཡོཏི ནོ ཏཀྐོ’’ཏི ཨཱཙརིཡོ. ཝུཏྟཔརིཙྪེདེན ཨགྒཧཎཾ ཨཀིརིཡཱ, སནྠཏཀརཎཾ ཀིརིཡཱ.

དྭེབྷཱགསིཀྑཱཔདཝཎྞནཱ ནིཊྛིཏཱ.

༤. ཚབྦསྶསིཀྑཱཔདཝཎྞནཱ

‘‘ཨོརེན ¶ ¶ ཙེ ཚནྣཾ ཝསྶཱན’’ནྟི ཝུཏྟཏྟཱ ཚབྦསྶེ པརིཔུཎྞེ ཀཱཏུཾ ཝཊྚཏཱིཏི ནིཊྛཱནདིཝསཏོ པཊྛཱཡ ཚནྣཾ ཝསྶཱནཾ པརིཙྪེདོ ཝེདིཏབྦོ. ཡཱནི པནེཏྠ ཨཏིརེཀཚབྦསྶཝསེན ཝཱ སམྨུཏིཝསེན ཝཱ ཀཏཱནི, སབྦཱནི ཏཱནི ཨེཀཏོ པརིབྷུཉྫིཏུཾ ཝཊྚནྟཱིཏི. གིལཱནསྶ ཙ ཨེཀཾ ནཔྤཧོཏཱིཏི ཨནེཀམྤི ཝཊྚཏི. ཡཏོ པཊྛཱཡ རོགསྶ མནྡཏཱཡ སནྠཏཾ ཨཱདཱཡ གནྟུཾ སཀྐོཏི, ཏཏོ པཊྛཱཡ སམྨུཏི ཝཱ རོགོ ཝཱ ན རཀྑཏཱིཏི ཨེཀེ. ཨཔིཙ ཚཝསྶབུདྡྷནིམྨལཾ སིཀྑཱཔདཾ ཝིཙཱརེཏུཾ གམྦྷཱིརཏྟཱ. ཏསྨཱ ཚཝསྶེ ཀམྨཾ ཀཏནྟི.

ཚབྦསྶསིཀྑཱཔདཝཎྞནཱ ནིཊྛིཏཱ.

༥. ནིསཱིདནསིཀྑཱཔདཝཎྞནཱ

ཀསྨཱ པནེཏྠ ‘‘སནྠཏཾ པན བྷིཀྑུནཱ’’ཏི སིཀྑཱཔདཾ ཨཔཉྙཔེཏྭཱ ‘‘ནིསཱིདནསནྠཏ’’ནྟི པཉྙཏྟཾ, ནནུ ཨེཏྠ ཀཱརཎེན བྷཝིཏབྦནྟི? ཨཏྠི ཀཱརཎཾ, ཙཱིཝརསཉྙིཏཱཡ སནྠཏཱནཾ ཨུཛ྄ཛྷིཏཏྟཱ ཏེསཾ ཨཙཱིཝརབྷཱཝདསྶནཏྠཾ ཏཐཱ པཉྙཏྟཾ བྷགཝཏཱཏི ཝུཏྟཾ ཧོཏི. ཏསྨཱ ཏེ བྷིཀྑཱུ ཏེཙཱིཝརིཀདྷུཏངྒབྷེདབྷཡཱ སནྠཏེ ཙཏུཏྠཙཱིཝརསཉྙིཏཱཡ སནྠཏཱནི ཨུཛ྄ཛྷིཏྭཱ ཏེརས དྷུཏངྒཱནི སམཱདཡིཾསུ, བྷགཝཱ ཙ ཏེསཾ སནྠཏཾ ཨནུཛཱནི. ཏཏོ ཏེསཾ བྷིཀྑཱུནཾ ཨེཝཾ ཧོཏི ‘‘ནིསཱིདནཙཱིཝརསཎྛཱནམྤེཏཾ ནིསཱིདནསནྠཏཾ ནོ བྷགཝཏཱ ཨནུཉྙཱཏཾ ཙཏུཏྠཙཱིཝརབྷཱཝེན, པགེཝ ཀཏསནྠཏཾ ཝཱ’’ཏི. ཏཏོ ‘‘སནྠཏེ ཏེསཾ ཙཱིཝརསཉྙིཏཱ ན བྷཝིསྶཏཱི’’ཏི ཏདཏྠཾ བྷགཝཏཱ ‘‘སནྠཏ’’ནྟི ཨཔཉྙཔེཏྭཱ ‘‘ནིསཱིདནསནྠཏ’’ནྟི པཉྙཏྟནྟི ཨདྷིཔྤཱཡོ. ཨིམེསུ པན པཉྩསུ སནྠཏེསུ པུརིམཱནི ཏཱིཎི ཝིནཡཀམྨཾ ཀཏྭཱ པཊིལབྷིཏྭཱཔི པརིབྷུཉྫིཏུཾ ན ཝཊྚནྟི ཨཀཔྤིཡཏྟཱ, པཙྪིམཱནི དྭེ ཝཊྚནྟཱིཏི (ཝཛིར. ཊཱི. པཱརཱཛིཀ ༥༦༦-༥༦༧) ལིཁིཏཾ. ཀཐཾ པཉྙཱཡཏཱིཏི ཙེ? ‘‘ཨནཱཔཏྟི ཨཉྙེན ཀཏཾ པཊིལབྷིཏྭཱ པརིབྷུཉྫཏཱི’’ཏི (པཱརཱ. ༥༧༠) ཝཙནཏོཏི ཝེདིཏབྦཾ.

ནིསཱིདནསིཀྑཱཔདཝཎྞནཱ ནིཊྛིཏཱ.

༦. ཨེལ༹ཀལོམསིཀྑཱཔདཝཎྞནཱ

‘‘ཨདྡྷཱནམགྒཔྤཊིཔནྣསྶཱ’’ཏི ¶ ¶ ཨིམིནཱ པཀཏིཡཱ དཱིགྷམགྒཾ པཊིཔནྣསྶ ཨུཔྤནྣཱནིཔི ཏིཡོཛནཔརམམེཝ ཧརིཏབྦཱནི, པགེཝ ཨཔྤཊིཔནྣསྶཱཏི དསྶེཏི. པཊིཔནྣསྶ ཙེ, ཨདྡྷཱནཾ ནཱམ པཊིཔནྣསྶ ཨཀཱམཱ ཝསྶཾཝུཊྛབྷིཀྑུནིཡཱ མགྒཔྤཊིཔཏྟི ཝིཡཱཏི དསྶེཏི. ཨདྡྷཱནམགྒཔྤཊིཔནྣསྶ ནིསྶགྒིཡནྟི ཝཱ སམྦནྡྷོ. ཏེནེཝ ཝཱསཱདྷིཔྤཱཡསྶ པཊིཔྤསྶདྡྷགམནུསྶཱཧཏྟཱ ‘‘ཨཔྤཊིཔནྣོ’’ཏི སངྑཾ གཏསྶ ཨནཱཔཏྟཱིཏི སིདྡྷཾ. ཨིམསྨིཾ པན ཨཏྠཝིཀཔྤེ ‘‘བྷིཀྑུནོ པནེཝ ཨེལ༹ཀལོམཱནི ཨུཔྤཛྫེཡྻུཾ…པེ… ཨསནྟེཔི ཧཱརཀེ ཨདྡྷཱནམགྒཔྤཊིཔནྣསྶ ནིསྶགྒིཡཾ པཱཙིཏྟིཡ’’ནྟི ཡོཛནཱ ཝེདིཏབྦཱ. ཡསྨཱ ཝཱ ཨེལ༹ཀལོམཱནཾ ཨུཔྤཏྟིཊྛཱནཏོ པཊྛཱཡ ཏིཡོཛནཔརམཏཱ ཨདྷིཔྤེཏཱ, མགྒཾ ཨཔྤཊིཔནྣསྶ ཙ ཏིཡོཛནཔརམཏཱ ནཏྠི, ཏསྨཱ ‘‘ཨདྡྷཱནམགྒཔྤཊིཔནྣསྶ ཨུཔྤཛྫེཡྻུ’’ནྟི ཝུཏྟཾ. ཏེན ཨཙྪིནྣཾ པཊིལབྷིཏྭཱ ཧརཏོ ཙ ཨནཱཔཏྟཱིཏི སིདྡྷཾ. པཊིལཱབྷོ ཧི ཏེསཾ ཨུཔྤཏྟི ནཱམཱཏི.

‘‘ཨཱཀངྑམཱནེན བྷིཀྑུནཱ པཊིགྒཧེཏབྦཱནཱི’’ཏི ཨིམིནཱ ཨཏྟནཱ པཊིགྒཧིཏཱནཾཡེཝ ཏིཡོཛནཱཏིཀྐམེ ཨཱཔཏྟཱིཏི དསྶེཏི. ཏེན ཨནཱཀངྑམཱནེན པརསནྟཀཱནི པཊིགྒཧིཏཱནི ཧརནྟསྶ ཨནཱཔཏྟཱིཏི སིདྡྷཾ.

ཨངྒེསུ ‘‘ཨཏྟནོ སནྟཀཏཱ’’ཏི ནཏྠི, ཨཡམཏྠོ ‘‘བྷིཀྑུནོ ཨུཔྤཛྫེཡྻུ’’ནྟི ཨིམིནཱ, ‘‘ཨཙྪིནྣཾ པཊིལབྷིཏྭཱ’’ཏི ཨིམིནཱ ཙ དཱིཔིཏོ ཧོཏཱིཏི ཝེདིཏབྦོ. པོརཱཎགཎྛིཔདེ ཙ ‘‘ཨཉྙཾ བྷིཀྑུཾ ཧརཱཔེནྟོ གཙྪཏི ཙེ, དྭིནྣམྤི ཨནཱཔཏྟཱི’’ཏི ཝུཏྟཾ. ཏསྨཱ དྭེ བྷིཀྑཱུ ཏིཡོཛནཔརམཾ པཏྭཱ ཨཉྙམཉྙསྶ བྷཎྜཾ པརིཝཏྟེཏྭཱ ཙེ ཧརནྟི, ཨནཱཔཏྟཱིཏི སིདྡྷཾ.

ཏིཡོཛནཔརམཾ སཧཏྠཱ ཧརིཏབྦཱནཱིཏི ཏིཡོཛནཔརམམེཝ ཨཏྟནཱ ཧརིཏབྦཱནི, ཏཾ ཀིམཏྠནྟི? སཱིམཱཡ ཨེཏཔརམཏོ. ཝུཏྟཉྷེཏཾ ‘‘ཨནུཛཱནཱམི, བྷིཀྑཝེ, ཏིཡོཛནཔརམཾ སཱིམཾ སམྨནྣིཏུ’’ནྟི (མཧཱཝ. ༡༤༠). ཝཱསཱདྷིཔྤཱཡེན, པཙྩཱགམནཱདྷིཔྤཱཡེན ཝཱ གཙྪཏོ ཨེཏཔརམཏཱ ཙ. ཝུཏྟཉྷེཏཾ ‘‘ཚབྦགྒིཡཱ བྷིཀྑཱུ ཨཏིམཧཏིཡོ སཱིམཱཡོ སམྨནྣནྟི…པེ… བྷིཀྑཱུ ཨུཔོསཐཾ ཨཱགཙྪནྟཱ ཨུདྡིསྶམཱནེཔི པཱཏིམོཀྑེ ཨཱགཙྪནྟི, ཨུདྡིཊྛམཏྟེཔི ཨཱགཙྪནྟི, ཨནྟརཱཔི པརིཝསནྟཱི’’ཏི (མཧཱཝ. ༡༤༠).

ཨསནྟེ ¶ ཧཱརཀེཏི ཨཱཎཏྟིཡཱ ཧཱརཀེ ཨསཏི. ཀམྦལསྶ ཨུཔརི ནིསཱིདིཏྭཱ གཙྪནྟསྶ ¶ སཙེ ཨེཀམྤི ལོམཾ ཙཱིཝརེ ལགྒཾ ཧོཏི, ཏིཡོཛནཱཏིཀྐམེ ཨཱཔཏྟི ཨེཝ ཀམྦལཏོ ཝིཛཊིཏཏྟཱཏི ལིཁིཏཾ. ཏཾ ཀམྦལསྶ པཊིགྒཧིཏཏྟཱ ཨཏྟནོ ཨཏྠཱཡ པཊིགྒཧིཏམེཝ ཧོཏཱིཏི ཡུཏྟཾ.

ཨེལ༹ཀལོམསིཀྑཱཔདཝཎྞནཱ ནིཊྛིཏཱ.

༨. ཛཱཏརཱུཔསིཀྑཱཔདཝཎྞནཱ

‘‘ནིབྦཏྟརུཀྑཙྪཱཡཱཔི རུཀྑཔརིཙྪེདཾ ཨནཏིཀྐནྟཱ’’ཏི ལིཁིཏཾ.

ཛཱཏརཱུཔསིཀྑཱཔདཝཎྞནཱ ནིཊྛིཏཱ.

༩. རཱུཔིཡསཾཝོཧཱརསིཀྑཱཔདཝཎྞནཱ

ཛཱཏརཱུཔརཛཏཔརིཝཏྟནནྟི ཨུཀྐཊྛཔརིཙྪེདེན ཝུཏྟཾ.

རཱུཔིཡསཾཝོཧཱརསིཀྑཱཔདཝཎྞནཱ ནིཊྛིཏཱ.

༡༠. ཀཡཝིཀྐཡསིཀྑཱཔདཝཎྞནཱ

ཨསནྟེ པཱཙིཏྟིཡཾ དེསེཏབྦམེཝཱཏི ཨེཏྠ ཀིཾ སུདྡྷིཀཾ པཱཙིཏྟིཡཾ, ཨུདཱཧུ ནིསྶགྒིཡནྟི? ནིསྶགྒིཡཾ པཱཙིཏྟིཡམེཝ.

ཀཡཝིཀྐཡསིཀྑཱཔདཝཎྞནཱ ནིཊྛིཏཱ.

ཏཏྲིདཾ པཀིཎྞཀཾ

ཨཊྛམསིཀྑཱཔདཾ པརེན ཨཏྟནོ ཨཏྠཱཡ དིཡྻམཱནསྶ ཝཱ པཱརིཝཏྟཀབྷཱཝེན དིཡྻམཱནསྶ ཝཱ པཾསུཀཱུལསྶ ཝཱ རཱུཔིཡསྶ ཨུགྒཎྷནཨུགྒཎྷཱཔནསཱདིཡནཱནི པཊིཀྑིཔཏི.

ནཝམཾ པརསྶ ཝཱ ཨཏྟནོ ཝཱ རཱུཔིཡཔརིཝཏྟནཾ པཊིཀྑིཔཏི.

དསམཾ ¶ ¶ ཨརཱུཔིཡཔརིཝཏྟནཾ. ‘‘ཨརཱུཔིཡེ ཨརཱུཔིཡསཉྙཱི པཉྩནྣཾ སཧ ཨནཱཔཏྟཱི’’ཏི (པཱརཱ. ༥༩༡; ཝི. ཝི. ཊཱི. ༡.༥༩༡; ཝཛིར. ཊཱི. པཱརཱཛིཀ ༥༨༧) ཙ ཝཙནཾ ཨིཏརེཧི སཧ ཨཱཔཏྟཱིཏི དཱིཔེཏི. ཨརཱུཔིཡཉྩ དུཀྐཊཝཏྠུ. ཏསྨཱ ཏསྶ པརིཝཏྟནེ སཏི ནིསྶགྒིཡནྟི ཨེཀནྟེན ཝུཏྟཾ. པཉྩནྣཾ སཧ དུཀྐཊཝཏྠཱུནཾ པརིཝཏྟནེ ཨནཱཔཏྟིཔྤསངྒཏོ ཨནཱཔཏྟི ཨེཝཱཏི པོརཱཎཱཏི ཙེ? ན, ཀཔྤིཡཝཏྠཱུནཾཡེཝ ཏཏྠ ཨཱགཏཏྟཱ. ཡདི ཀཔྤིཡཝཏྠུ ནིསྶགྒིཡཾ, པགེཝ དུཀྐཊཝཏྠཱུཏི ཙེ? ན, ཨཱཔཏྟིགརུཀལཧུཀབྷཱཝེན ཝཏྠུགརུཀལཧུཀནིཡམཱབྷཱཝཏོ.

ནིསྶགྒིཡཝཏྠུཏོ ཧི མུཏྟཱམཎིཝེལུ༹རིཡཱདི མཧགྒྷཔྤཧོནཀམྤི དུཀྐཊཝཏྠཱུཏི ཀཏྭཱ ནིསྶགྒིཡཝཏྠུཏོ མུཏྟཱདི ལཧུཀཾ ཧོཏི. ལཧུཀེཔི ཝཏྠུསྨིཾ ཡཐེཝ དུཀྐཊཝཏྠུནོ པཊིགྒཧཎེ དུཀྐཊཾ, ཏཐེཝ ཏསྶ ཝཱ ཏེན ཝཱ ཙེཏཱཔནེཔི དུཀྐཊཾ ཡུཏྟནྟི (པཱརཱ. ཨཊྛ. ༢.༥༨༩) ཨཊྛཀཐཱཙརིཡཱ.

ཨཐ ཝཱ ཡཾ ཝུཏྟཾ ‘‘ཀཔྤིཡཝཏྠཱུནཾཡེཝ ཏཏྠ ཨཱགཏཏྟཱ’’ཏི, ཏཏྠ ཀིཉྩཱཔི དུཀྐཊཝཏྠཱུནིཔི ཨདྷིཔྤེཏཱནི, ན པན པཱལི༹ཡཾ ཝུཏྟཱནི ཨནཱཔཏྟིཝཱརཔྤསངྒབྷཡཱཏི ཝུཏྟཾ ཧོཏི. མུཏྟཱདཱིསུཔི ཝུཏྟེསུ ཨནཱཔཏྟིཡཾ ཀཔྤིཡཀཱརཀསྶ ཨཱཙིཀྑཏི, ‘‘ཨིདཾ མུཏྟཱདི ཨམྷཱཀཾ ཨཏྠི, ཨམྷཱཀཉྩ ཨིམིནཱ ཙ ཨིམིནཱ ཙ ཝེལུ༹རིཡཱདིནཱ ཨཏྠོ’’ཏི བྷཎཏི, དསམེན ཨཱཔཛྫཏཱིཏི ཨདྷིཔྤཱཡོ སིཡཱ. ཡསྨཱ ཙ ཨིདཾ ཀཔྤིཡཀཱརཀསྶ ཨཱཙིཀྑནཱདིསཾཝོཧཱརོ ཙ, ཏསྨཱ ཏཾ ནཝམེན ཝུཏྟནྟི ཝེདིཏབྦཾ. ཀིཉྩཱཔི ཀཡཝིཀྐཡེཝ ཧོཏི ཀཔྤིཡཝཏྠཱུཧི ཨནུཉྙཱཏཾ, ཨིམིནཱཝ ནཡེན ཀིཉྩཱཔི དུཀྐཊཝཏྠུཔི དསམེ ཨདྷིཔྤེཏཾ ཨཱཔཛྫཏི, ཨཊྛཀཐཱཝིརོདྷཏོ པན ནཱདྷིཔྤེཏམིཙྩེཝ གཧེཏབྦོ.

ཀཱ པནེཏྠ ཀཱརཎཙྪཱཡཱཏི, པཉྩནྣཾ སཧ ཏཏྠ ཨནཱཔཏྟིཔྤསངྒཏོ ཨནཱཔཏྟི ཨེཝཱཏི ཙེ? ན, ཏཏྠ ཨནཱགཏཏྟཱ. ཨནཱགཏཀཱརཎཱ ཝུཏྟནྟི ཙེ? ན, པཉྩནྣཾ སཧ ཨཱཔཏྟིཝཏྠུཀསྶ ཨནཱཔཏྟིཝཱརལཱབྷེ ཝིསེསཀཱརཎཱབྷཱཝཱ, ཨཀཔྤིཡཏྟཱ པཉྩནྣཾ སཧཱཔི ཨཱཔཏྟིཡཱ བྷཝིཏབྦནྟི སིདྡྷོ ཨཊྛཀཐཱཝཱདོ.

ཨཔརོ ནཡོ – ཡདི དུཀྐཊཝཏྠུནཱ ཀཡཝིཀྐཡེ ནིསྶགྒིཡཾ, ཀཔྤིཡཝཏྠུམྷི ཝུཏྟཔརིཡཱཡོ ཏཏྠ ལབྦྷེཡྻ, ན པན ལབྦྷཏཱིཏི ནཝམེ ཨེཝ ཏཱནི ཝཏྟབྦཱནི. ཏསྨཱ སཾཝོཧཱརོ ནཱམ ཀཡཝིཀྐཡོཔི ཨཉྙཐཱ པརིཝཏྟནཾ ¶ པརིཡཱདིཡིཏྭཱ པཝཏྟོ, ཀཡཝིཀྐཡཉྩ མོཙེཏྭཱ ¶ ‘‘ཨིམིནཱ ཨིམཾ དེཧཱི’ཏི ཙེཏཱཔེཏི, ཝཊྚཏཱི’’ཏི ཨཝཏྭཱ དསམསྶ ཨནཱཔཏྟིཝཱརེ ཝུཏྟནཡེནེཝ ཏེསཾ པརིཝཏྟནེ ནིསྶགྒིཡཱནུམཏིཝིརོདྷཏོ ཨཊྛཀཐཱཡཾ ཝུཏྟནཡེནེཝ དུཀྐཊཝཏྠུནཱ ཙེཏཱཔནེ དུཀྐཊམེཝ. ནེསཾ ཀཡཝིཀྐཡེན ནིསྶགྒིཡནྟི ཙེ? ན, སབྦསྶཔི ཀཡཝིཀྐཡཏྟཱ. ཏེནེཝ ཝུཏྟཾ ‘‘ཨནྡྷཀཊྛཀཐཱཡཾ པན ‘སཙེ ཀཡཝིཀྐཡཾ སམཱཔཛྫེཡྻ, ནིསྶགྒིཡཾ པཱཙིཏྟིཡ’ནྟི བྷཱསིཏཾ, ཏཾ དུབྦྷཱསིཏཾ. ཀསྨཱ? ན ཧི དཱནགྒཧཎཏོ ཨཉྙོ ཀཡཝིཀྐཡོ ནཱམ ཨཏྠཱི’’ཏི (པཱརཱ. ཨཊྛ. ༢.༥༨༩), ཨཏྟནོ མཏིཡཱ ཀཡཝིཀྐཡལཀྑཎསམྨཏེ དསམསྶ ཨནཱཔཏྟིཝཱརེ ཝུཏྟནཡེནེཝ ཏེསཾ པརིཝཏྟནེ ནིསྶགྒིཡཱནུམཏིཝིརོདྷཏོ ཙ. བྷཝཏུ ཝཱ ཨཏྟནོ པཊིསིདྡྷམིདཾ ཀཱརཎཾ, དསམེ ཨཝསྶམེཝ ཛཱནིཏབྦཱནཱིཏི ཏཱནི ཀཡཝིཀྐཡཱནེཝཱཏི ཏེསཾ ནིསྶགྒིཡབྷཱཝཉྩ གཏཱནཱིཏི ཨེཝམྤི སིདྡྷོ ཨཊྛཀཐཱཝཱདོ.

ཨེཏྠཱཧུ པོརཱཎཱ – ‘‘ཨཏྟནོ སནྟཀཾ རཱུཔིཡཾ པརཧཏྠགཏཾ ཀརོཏི ཨཛ྄ཛྷཱཙརཏི, དུཀྐཊཾ. པརསྶ རཱུཔིཡཾ ཨཏྟནོ ཧཏྠགཏཾ ཀརོཏི, ཨཊྛམེན ནིསྶགྒིཡཾ. ཨུགྒཧིཏཝཏྠུཔརིཝཏྟནེ ཀཐཾ ཛཱཏཾ? ཨབྦོཧཱརིཀཾ ཛཱཏཾ. ཨཐ པརསྶ རཱུཔིཡཾ ཨཏྟནོ ཧཏྠགཏཾ པཋམཾ ཀརོཏི, རཱུཔིཡཔྤཊིགྒཧཎསྶ ཀཏཏྟཱ ཨཊྛམེན ནིསྶགྒིཡཾ. ཨཏྟནོ སནྟཀཾ རཱུཔིཡཾ པརསྶ ཧཏྠགཏཾ པཙྪཱ ཀརོཏི, སཾཝོཧཱརེན ནིསྶགྒིཡ’’ནྟི. ‘‘རཱུཔིཡསྶ གཧཎམཏྟེན ཨཊྛམེན ཨཱཔཏྟི, པཙྪཱ པརིཝཏྟནེ ནཝམེནཱ’’ཏི ཧི ཏཏྠ ཝུཏྟཾ, ཏཾ པན ཡུཏྟཾ. ‘‘ཨཛ྄ཛྷཱཙརཏི, དུཀྐཊ’’ནྟི དུཝུཏྟཾ. དུཀྐཊསྶ ཨནིཡམཔྤསངྒཏོ ནིསྶཛྫནཝིདྷཱནེསུ དསྶིཏོཝ. ཀིཾ ཝུཏྟཾ ཧོཏི – ཡདི དྭཱིཧི ནིསྶགྒིཡེཧི བྷཝིཏབྦཾ, ནིསྶཛྫནཝིདྷཱནེ ‘‘ཨཧཾ, བྷནྟེ, རཱུཔིཡཾ པཊིགྒཧེསིཾ, ནཱནཱཔྤཀཱརཀཉྩ རཱུཔིཡསཾཝོཧཱརཾ སམཱཔཛྫི’’ནྟི ཝཏྟབྦཾ བྷཝེཡྻ ‘‘རཱུཔིཡཾ ཙེཏཱཔེཏཱི’’ཏི སབྦཏྠ པཱལི༹ཡཾ རཱུཔིཡཔྤཊིགྒཧཎསྶ ཝུཏྟཏྟཱ.

ཨེཏྟཱཝཏཱ ཡཾ པོརཱཎགཎྛིཔདེ ཝུཏྟཾ ‘‘དུཀྐཊཝཏྠུནཱ ཀཡཝིཀྐཡཾ པརིཧརནྟེན ཙཏཱུསུ ནིསྶགྒིཡཝཏྠཱུསུ ཨེཀེཀསྨིཾ གཧིཏེ ཨཊྛམེན ནིསྶགྒིཡཾ ཧོཏི. དུཀྐཊཝཏྠུནཱ དུཀྐཊཝཏྠུནྟི ‘‘ཨིམིནཱ ཨིདཾ དེཧཱི’’ཏི གཧིཏེ ཏེནེཝ ནིསྶགྒིཡཾ ཧོཏི. ‘‘ཀཡཝིཀྐཡམྤི ནཱིཧརིཏྭཱ གཧིཏེ དུཀྐཊཾ, ཙེཏཱཔིཏརཱུཔིཡགྒཧཎེ ཨཊྛམེན, པརིཝཏྟནེ ནཝམེནཱཏིཨཱདིནཱ ཨཏྟནཱ ཨནུགྒཧེཏྭཱ ཀཔྤིཡཝསེན ནཱིཧརིཏྭཱ པཉྩཧི སཧདྷམྨིཀེཧི སདྡྷིཾ པརིཝཏྟེཏུཾ ¶ ཝཊྚཏཱི’’ཏི, ཏཾ ཝིསོདྷིཏཾ ཧོཏི. ཨཔརམྤི ཏཏྠ ཝུཏྟཾ ‘‘ནིསྶཛྫིཏབྦེ ཨསཏི ཀཐཾ པཱཙིཏྟིཡཾ, དུནྣིསྶཊྛརཱུཔིཡམྤི ‘ན ཚཌྜེཏཱི’ཏི ཝདནྟསྶ ཝིསྶཊྛོ ཨུཔཱསཀོ ཏཾ གཧེཏྭཱ ཨཉྙཾ ཙེ བྷིཀྑུནོ དེཏི, ཀཔྤཏཱི’’ཏི, ཏཉྩ དུཝུཏྟཾ. ན ཧི གཧིཏཏྟཱ ཏཏོ ཨཉྙཾ ཝཏྠུ ཧོཏི. པུན ཨཔརཉྩ ཏཏྠ ཝུཏྟཾ ‘‘ཨིམཾ ‘གཎྷཱཧཱི’ཏི ¶ ཝདནྟསྶ སདྡྷཱདེཡྻཝིནིཔཱཏདུཀྐཊཾ, ‘ཨེཏཾ དེཧཱི’ཏི ཝདནྟསྶ ཝིཉྙཏྟིདུཀྐཊ’’ནྟི, ཏཉྩ དུཝུཏྟཾ. ཏཏྠ ཧི པཡོགདུཀྐཊཾ ཡུཏྟཾ ཝིཡ པཉྙཱཡཏི.

པཀིཎྞཀཾ ནིཊྛིཏཾ.

ཨེལ༹ཀལོམཝགྒོ དུཏིཡོ.

༣. པཏྟཝགྒོ

༡. པཏྟསིཀྑཱཔདཝཎྞནཱ

དྭེ ཨཔཏྟཱ, ཏསྨཱ ཨེཏེ བྷཱཛནཔརིབྷོགེན པརིབྷུཉྫིཏབྦཱ, ནཨདྷིཊྛཱནཱུཔགཱནཝིཀཔྤནཱུཔགཏཱཏི ཨཏྠོཏི ཙ. སམཎསཱརུཔྤེན པཀྐནྟི ཨཡོཔཏྟོ པཉྩཧི པཱཀེཧི པཀྐོ ཧོཏི, མཏྟིཀཱཔཏྟོ དྭཱིཧི. ‘‘བྷིཀྑུནིཡཱ པཏྟསནྣིཙྩཡསྶ ཝཱརིཏཏྟཱ (ཝཛིར. ཊཱི. པཱརཱཛིཀ ༦༠༢) བྷིཀྑུསྶཔི ཏཾ ‘ཨནནུརཱུཔ’ནྟི ཀཏྭཱ ‘པུརཱཎཔཏྟཾ པཙྩུདྡྷརིཏྭཱ’ཏི ཝུཏྟ’’ནྟི ཙ ལིཁིཏཾ, ཏཾ ན ཡུཏྟཾ པཱལི༹ཡཾ ‘‘སནྣིཙྩཡཾ ཀརེཡྻཱཏི ཨནདྷིཊྛིཏོ ཨཝིཀཔྤིཏོ’’ཏི (པཱཙི. ༧༣༥) ཝུཏྟཏྟཱ. སོ ཧི ཀཐིནཀྑནྡྷཀེ (མཧཱཝ. ༣༠༦ ཨཱདཡོ) ནིཙྩཡསནྣིདྷི ཝིཡ ཨེཀོཔི པུནདིཝསེ ‘‘སནྣིཙྩཡོ’’ཏི ཝུཙྩཏི. ཨནནྟརསིཀྑཱཔདེ པན ‘‘དུཏིཡོ ཝཱརིཏོ’’ཏི ཨདྷིཊྛཱནཾ ནིཡཏཾ. ཏསྨཱ དྭེ པཏྟེ ཨདྷིཊྛཱཏུཾ ན ལབྷཏི. སཙེ ཨེཀཏོ ཨདྷིཊྛཱཏི, དྭེཔི ཨནདྷིཊྛིཏཱ ཧོནྟི. ཝིསུཾ ཝིསུཾ ཨདྷིཊྛཱཏི, དུཏིཡོ ཨནདྷིཊྛིཏོ. ཝིཀཔྤེཏུཾ པན བཧཱུཔི ལབྷཏི. ཀཱཀཎིཀམཏྟམྤཱིཏི ཨེཏྠ པི-ཀཱརོ ‘‘ཨེཀཔཱཀམྤི ཛནེཏཱི’’ཏི པཱཀཾ སམྤིཎྜེཏི. ཨཐ ཝཱ སཙེ ཨེཀཔཱཀེནེཝ སཱརུཔྤོ, ཝཊྚཏཱིཏི པཱཀཔརིམཱཎཾ ན ཝུཏྟནྟི གཧེཏབྦཾ. ཨཔཏྟཏྟཱ ཨདྷིཊྛཱནཱུཔགོ ¶ ན ཧོཏི. ཨཔཙྩུདྡྷརནྟེན ཝིཀཔྤེཏབྦོཏི པུརཱཎཔཏྟཾ ཨཔཙྩུདྡྷརནྟེན སོ པཏྟོ ཝིཀཔྤེཏབྦོཏི ཨཏྠོཏི ལིཁིཏཾ.

པཏྟསིཀྑཱཔདཝཎྞནཱ ནིཊྛིཏཱ.

༢. ཨཱུནཔཉྩབནྡྷནསིཀྑཱཔདཝཎྞནཱ

པཝཱརིཏེཏི ¶ ཨེཏྠ སངྒྷཝསེན པཝཱརིཏཊྛཱནེ པཉྩབནྡྷནེནེཝ ཝཊྚཏི, པུགྒལིཀཝསེན པཝཱརིཏཊྛཱནེ ཨཱུནཔཉྩབནྡྷནེནཱཔི ཝཊྚཏཱིཏི ལིཁིཏཾ.

ཡོ ཨཱུནཔཉྩབནྡྷནཏྠཾ, ཝུཏྟམྤི ཙེཏཾ ཀརོ སོ;

ཨཱུནཔཉྩབནྡྷནཏྠཾ, པཏྭཱན སནྟིཀེ.

ཨཱུནཔཉྩབནྡྷནསིཀྑཱཔདཝཎྞནཱ ནིཊྛིཏཱ.

༣. བྷེསཛྫསིཀྑཱཔདཝཎྞནཱ

‘‘པཊིསཱཡནཱིཡཱནི པཊིགྒཧེཏྭཱ’’ཏི ཝདནྟེན པཱདམཀྑནཱདཱིནཾ ཨཏྠཱཡ པཊིགྒཧེཏྭཱ ཋཔེཏུཾ ཝཊྚཏཱིཏི དཱིཔིཏནྟི ལིཁིཏཾ. ‘‘ཡེསཾ མཾསཾ ཀཔྤཏཱི’’ཏི ཝཙནེན ཡེསཾ མཾསཾ ན ཀཔྤཏི, ཏེསཾ སཔྤིཨཱདི ན ཀཔྤཏཱིཏི ཝདནྟཱ ཨཛཱནིཏྭཱ ཝདནྟི. ཡེསཉྷི མཾསཾ ཀཔྤཏི, ཏེསཾ སཔྤཱིཏིཨཱདི སཏྟཱཧཀཱལིཀནིསྶགྒིཡཝཏྠུཔརིཙྪེདདསྶནཏྠཾ ཝུཏྟཾ. ཏཐཱ པཎཱིཏབྷོཛནསིཀྑཱཔདེ ཡེསཾ མཾསཾ ཀཔྤཏི, ཏེསཾཡེཝ ཁཱིརཱདི པཎཱིཏབྷོཛནཾ, ནེཏརནྟི དསྶེཏུཾ ཝུཏྟནྟི. མདྷུ ནཱམ མདྷུཀརིབྷམརམཀྑིཀཱནཾ ཨཱསཡེསུ ནིཡྻཱསསདིསཾ མཧཱམདྷུ ཧོཏི, ཏཾ ཡཱཝཛཱིཝིཀནྟི ཙ ལིཁིཏཾ.

བྷེསཛྫསིཀྑཱཔདཝཎྞནཱ ནིཊྛིཏཱ.

པཏྟཝགྒོ ཏཏིཡོ.

ནིསྶགྒིཡཔཱཙིཏྟིཡཝཎྞནཱ ནིཊྛིཏཱ.

པཱཙིཏྟིཡཀཎྜཾ

༤. བྷོཛནཝགྒོ

༢. གཎབྷོཛནསིཀྑཱཔདཝཎྞནཱ

དེཝདཏྟོ ¶ ¶ ཀཱལེ ཝིཉྙཱཔེཏྭཱ བྷུཉྫཏི, ཏཔྤཙྩཡཱ བྷགཝཏཱ ‘‘གཎབྷོཛནེ པཱཙིཏྟིཡ’’ནྟི (པཱཙི. ༢༠༩) སིཀྑཱཔདཾ པཉྙཏྟཾ. པདབྷཱཛནེ པན ‘‘ནིམནྟིཏཱ བྷུཉྫནྟཱི’’ཏི (པཱཙི. ༢༡༨) ནིམནྟནམེཝ གཧེཏྭཱ ཝིབྷཏྟཾ. ཨནྡྷཀཊྛཀཐཱཡཾ པན ཝཏྠུཝསེན ཝིཉྙཏྟིཡཱ ཡཱཙནམྤི ཝུཏྟནྟི ལིཁིཏཾ. ཀསྨཱ? པརིཝཱརེ ཨེཝ ‘‘གཎབྷོཛནཾ དྭཱིཧཱཀཱརེཧི པསཝཏི ཝིཉྙཏྟིཏོ ཝཱ ནིམནྟནཏོ ཝཱ’’ཏི (པརི. ༣༢༢) ཝུཏྟཏྟཱ. ཏསྨཱ ཨཊྛུཔྤཏྟིཡཾཡེཝ པཱཀཊཏྟཱ པདབྷཱཛནེ ན ཝུཏྟནྟི ཝེདིཏབྦཾ. ‘‘‘ཨེཀཏོ གཎྷནྟཱི’ཏི ཙ གཧིཏབྷཏྟཱཔི ཨཉྙེ ཡཱཝ གཎྷནྟི, ཏཱཝ ཙེ ཏིཊྛནྟི, ཨེཀཏོ གཎྷནྟི ཨེཝ ནཱམཱ’’ཏི ཙ, ‘‘ཡོ ཀོཙི པབྦཛིཏོཏི སཧདྷམྨིཀེསུ, ཏིཏྠིཡེསུ ཝཱཏི ཨཏྠོ’’ཏི ཙ, ‘‘སམཡཱབྷཱཝོཏི སཏྟནྣཾ ཨནཱཔཏྟིསམཡཱནཾ ཨབྷཱཝོ’’ཏི ཙ, ‘‘སམཡལདྡྷཀེན སཧ ཙཏྟཱརོ ཧོནྟཱི’’ཏི ཙ, ‘‘སམཡལདྡྷཀོ སཡམེཝ མུཙྩཏི, སེསཱནཾ གཎཔཱུརཀཏྟཱ ཨཱཔཏྟིཀརོ ཧོཏཱི’’ཏི ཙ ལིཁིཏཾ.

ཨེཏྠཱཧ – ‘‘པཊིགྒཧཎམེཝ ཧེཏྠ པམཱཎ’’ནྟི ཝུཏྟཾ, ཨཐ ཀསྨཱ པཱལི༹ཡཾ ‘‘གཎབྷོཛནཾ ནཱམ ཡཏྠ ཙཏྟཱརོ…པེ… བྷུཉྫནྟཱི’’ཏི (པཱཙི. ༢༡༨) ཝུཏྟནྟི? ཝུཙྩཏེ – ཏཏྠ ‘‘བྷུཉྫནྟཱི’’ཏི པཊིགྒཧཎནིཡམཝཙནཾ. ན ཧི ཨཔྤཊིགྒཧིཏཀཾ བྷིཀྑཱུ བྷུཉྫནྟཱིཏི.

གཎབྷོཛནསིཀྑཱཔདཝཎྞནཱ ནིཊྛིཏཱ.

༣. པརམྤརབྷོཛནསིཀྑཱཔདཝཎྞནཱ

ཨཉྙཏྲ ¶ སམཡཱཏི པན ནིམནྟནཏོ པསཝནཏོ བྷོཛནཱཔེཀྑཾ པཱཙིཏྟིཡནྟི ཨེཀེ. ཨེཀོ བྷིཀྑུ པིཎྜཱཡ ཙརནྟོ བྷཏྟཾ ལབྷཏི, ཏམཉྙོ ཙཱུཔཱསཀོ ནིམནྟེཏྭཱ གྷརེ ནིསཱིདཱཔེསི, ན ཙ ཏཱཝ བྷཏྟཾ སམྤཛྫཏི ¶ . སཙེ སོ བྷིཀྑུ པིཎྜཱཡ ཙརིཏྭཱ ལདྡྷབྷཏྟཾ བྷུཉྫཏི, ཨཱཔཏྟི. ཀསྨཱཏི ཙེ? ‘‘པརམྤརབྷོཛནཾ ནཱམ པཉྩནྣཾ བྷོཛནཱནཾ ཨཉྙཏརེན བྷོཛནེན ནིམནྟིཏོ ཏཾ ཋཔེཏྭཱ ཨཉྙཾ པཉྩནྣཾ བྷོཛནཱནཾ ཨཉྙཏརཾ བྷོཛནཾ བྷུཉྫཏི, ཨེཏཾ པརམྤརབྷོཛནཾ ནཱམཱ’’ཏི (པཱཙི. ༢༢༧) ཝུཏྟཏྟཱ. པཋམཀཐིནསདིསཱནི, ཨིདཾ པན ཀིརིཡཱཀིརིཡ’’ནྟི པཱཋོ.

པརམྤརབྷོཛནསིཀྑཱཔདཝཎྞནཱ ནིཊྛིཏཱ.

༤. ཀཱཎམཱཏཱསིཀྑཱཔདཝཎྞནཱ

དྭཏྟིཔཏྟཔཱུརཱ པཊིགྒཧེཏབྦཱཏི ཏཐཱནཱིཏཔཱུཝེཧི ཨཏྠིཀེན ཨུཀྐཊྛཔཏྟཔྤམཱཎཝསེན གཧེཏབྦཱ. ‘‘མཱ ཁོ ཏྭཾ ཨེཏྠ པཊིགྒཎྷཱི’’ཏི ཨཔཱཐེཡྻཱདིཨཏྠཱཡ སཛྫིཏསཉྙཱཡ ཨཏིརེཀཔྤཊིགྒཧཎེན ཨཱརོཙནེ, ཨསཾཝིབྷཱགེ ཙ ན མུཙྩཏི ཨཙིཏྟཀཏྟཱ སིཀྑཱཔདསྶ. ཨཐ ཨུགྒཧིཏཀཾ གཎྷཱཏི, ན མུཙྩཏི ཨེཝ. ཨསཾཝིབྷཱགེ པན ཨནཱཔཏྟི ཨཀཔྤིཡཏྟཱ. ཨཙིཏྟཀཏཱ པཎྞཏྟིཛཱནནཱབྷཱཝེནེཝ, ན ཝཏྠུཛཱནནཱབྷཱཝེནཱཏི ཨེཀེ. ‘‘ན པཱཐེཡྻཱདིཨཏྠཱཡ སཛྫིཏབྷཱཝཛཱནན’’ནྟི ཨངྒེསུ ཨཝུཏྟཏྟཱ སཙེ སཉྩིཙྩ ན ཝདཏི, པཱཙིཏྟིཡནྟི པོརཱཎཱ ཝདནྟི. ཨཏིརེཀཔྤཊིགྒཧཎནྟི ཏཏྠ པཉྩམཾཝ ཨངྒཾ ཝུཏྟཾ, ཏསྨཱ ཨཔྤཊིགྒཧིཏཏྟཱ ན པཱཙིཏྟིཡཾ, ཀཏྟབྦཱཀརཎཏོ པན དུཀྐཊཾ. ཨཉྙཐཱ ཀིརིཡཱཀིརིཡཾ ཨིདཾ ཨཱཔཛྫཏི. ཨནིཝཱརཎཾ, ཨནཱརོཙནཾ ཝཱ ཚཊྛམངྒཾ ཝཏྟབྦཾ སིཡཱ.

ཀཱཎམཱཏཱསིཀྑཱཔདཝཎྞནཱ ནིཊྛིཏཱ.

༥. པཋམཔཝཱརཎཱསིཀྑཱཔདཝཎྞནཱ

བྷུཏྟཱཝཱི པཝཱརཎཾ ནཱམ པཉྩངྒིཀཾ. ཏེསུ ‘‘ཨསནཾ པཉྙཱཡཏྟཱི’’ཏི ཨེཏེནེཝ ‘‘བྷུཏྟཱཝཱི’’ཏི ཨེཏསྶ སིདྡྷཏྟཱ ཝིསུཾ ཨཏྠསིདྡྷི ན དིསྶཏི. དིསྶཏི ཙེ, ཨངྒཱནཾ ཚཀྐཏྟདསྶནནྟི ¶ (ཝཛིར. ཊཱི. པཱཙིཏྟིཡ ༢༣༨-༢༣༩) ལིཁིཏཾ. ‘‘བྷོཛནཾ པཉྙཱཡཏཱི’’ཏི ཨབྷིཧཊཾ སནྡྷཱཡ ཝུཏྟཾ.

ཀོཊྚེཏྭཱ ¶ ཀཏཙུཎྞམྤཱིཏི པི-ཀཱརེན ཀུཎྜཀཾ སམྤིཎྜེཏི. སམཔཱཀབྷཛྫིཏཱནཾ པན ཨཱཏཔསུཀྑཱནཾ ཝཱ ཀུཎྜཀཾ ཝཱ ཡེ ཀེཙི ཏཎྜུལཱ ཝཱཏི ཨེཏྟཀམེཝ ཝུཏྟཏྟཱ སམཔཱཀབྷཛྫིཏཱནཾ ཝཱིཧཱིནཾ, ཝཱིཧིཔལཱསཱནཾ ཝཱ ཏཎྜུལཙུཎྞཾ པཝཱརེཏི. ཏཐཱ ཁརཔཱཀབྷཛྫིཏཱནཾ ཀུཎྜཀམྤི པཝཱརེཏི. བྷཛྫིཏསཏྟུཡོ པིཎྜེཏྭཱ ཀཏོ ཨཔཀྐསཏྟུམོདཀོཔི པཝཱརེཏཱིཏི ལིཁིཏཾ. སཙེ ཨཝསིཊྛཾ ནཏྠི, ན པཝཱརེཏི. ཀསྨཱ? ཨསནསངྑཱཏསྶ ཝིཔྤཀཏབྷོཛནསྶ ཨབྷཱཝཏོ.

ཨཀཔྤིཡམཾསཾ པན ཀིཉྩཱཔི པཊིཀྑིཔིཏབྦཊྛཱནེ ཋིཏཾ, ཁཱདིཡམཱནཾ པན མཾསབྷཱཝཾ ན ཛཧཱཏི, ཏསྨཱ པཝཱརེཏི. བྷོཛནསཱལཱཡ བྷུཉྫནྟོ ཙེ ཨཏྟནོ ཨཔཱཔུཎནཀོཊྛཱསཾ ཨབྷིཧཊཾ པཊིཀྑིཔཏི, ན པཝཱརེཏི. ཀཱམཾ པཊིཀྑིཔཏི, པཏྟེ པན ཨཱརཱམིཀཱ ཨཱཀིརནྟི, ཏཾ བྷུཉྫིཏུཾ ན ཝཊྚཏི. ཨིདཉྷི བུདྡྷཔྤཊིཀུཊྛཱཡ ཨནེསནཱཡ ཨུཔྤནྣེཡེཝ སངྑཾ གཙྪཏི. ཡཐཱ ཧི སངྒྷཏོ ལདྡྷཾ པིཎྜཾ དུསྶཱིལོ དེཏི, ཏཉྩེ པཊིཀྑིཔཏི, ན པཝཱརེཏི, ཨེཝཾསམྤདམིདནྟི ཙ, ཝིབྷཱགོ ལཛྫཱི ཙེ དེཏི, ཏཾ སོ ན ཨཛ྄ཛྷོཧརིཏུཀཱམཏཱཡ པཊིཀྑིཔཏི, པཝཱརེཏཱིཏི ཙ, ‘‘སམཾསརསཾ སམཙྪརས’’ནྟི ཨཱཔཛྫནཏོ ‘‘མཾསརས’’ནྟི ཝུཏྟེ པན པཊིཀྑིཔཏོ ཧོཏི, ‘‘མཾསསྶ རསཾ མཾསརས’’ནྟི ཨཡཾ ཝིགྒཧོ ནཱདྷིཔྤེཏོཏི ཙ ཝུཏྟཾ. བྷཏྟམིསྶཀཾ ཡཱགུཾ ཨཱཧརིཏྭཱ ‘‘ཡཱགུཾ གཎྷཐཱ’’ཏི ཝདཏི, ན པཝཱརེཏི. ‘‘བྷཏྟཾ གཎྷཐཱ’’ཏི ཝུཏྟེ པཝཱརེཏི. ཀསྨཱ? ཡེནཱཔུཙྪིཏོ, ཏསྶ ཨཏྠིཏཱཡ. ཨེཏྠ པན ‘‘ཡཱགུམིསྶཀཾ གཎྷཐཱ’’ཏི ཝདཏི, ཏཏྲ ཙེ ཡཱགུ བཧུཏརཱ ཝཱ ཧོཏི, སམསམཱ ཝཱ. བྷཏྟཾ མནྡཾ, ན པཝཱརེཏི. ཡཱགུ ཙེ མནྡཱ, བྷཏྟཾ བཧུཏརཾ, པཝཱརེཏི. ཨིདཉྩ སབྦཨཊྛཀཐཱསུ ཝུཏྟཏྟཱ ན སཀྐཱ པཊིཀྑིཔིཏུཾ. ཀཱརཎཾ པནེཏྠ དུདྡསཾ. ‘‘བྷཏྟམིསྶཀཾ གཎྷཐཱ’’ཏི ཝདཏི. ཏཏྲ བྷཏྟཾ བཧུཏརཾ ཝཱ སམཀཾ ཝཱ ཨཔྤཏརཾ ཝཱ ཧོཏི, པཝཱརེཏི ཨེཝ. བྷཏྟཾ ཝཱ ཡཱགུཾ ཝཱ ཨནཱམསིཏྭཱ ‘‘མིསྶཀཾ གཎྷཐཱ’’ཏི ཝདཏི. ཏཏྲ ཙེ བྷཏྟཾ བཧུཏརཾ, སམཀཾ ཝཱ ཧོཏི, པཝཱརེཏི. ཨཔྤཏརཾ ན པཝཱརེཏི. ཏཾ སབྦཾ ཝཱིམཾསིཏབྦནྟི.

ཕལཾ ¶ ཝཱ ཀནྡམཱུལཱདི ཝཱ པཉྩཧི སམཎཀཔྤེཧི ཀཔྤིཡཾ ཨཀཏནྟི ཨེཏྠ ཀཔྤིཡཾ ཨཀཱརཱཔིཏེཧི ཀདལིཕལཱདཱིཧི སདྡྷིཾ ཨཏིརིཏྟཾ ཀཱརཱཔེཏྭཱཔི ཏཾ ཀདལིཕལཱདིཾ ཋཔེཏྭཱ ཨཝསེསཾ བྷུཉྫིཏུཾ ཝཊྚཏི. ཨམིསྶཀརསཏྟཱ པུན ཏཱནི ཀཔྤིཡཾ ཀཱརཱཔེཏྭཱ ཨཉྙསྨིཾ བྷཱཛནེ ཋཔེཏྭཱ ¶ ཀཱརེཏྭཱ བྷུཉྫིཏུཾ ཝཊྚཏི. ཀསྨཱ? པུབྦེ ཏེསུ ཝིནཡཀམྨསྶ ཨནཱརུལ༹ྷཏྟཱཏི ཝདནྟི.

པཏྟེ རཛཾ པཏིཏཾ ཨཔྤཊིགྒཧིཏམེཝ ཧོཏི. ཏསྨཱ པཊིགྒཧེཏྭཱཝ བྷིཀྑཱ གཎྷིཏབྦཱ. ‘‘ཨཔཊིགྒཧེཏྭཱ གཎྷཏོ ཝིནཡདུཀྐཊ’’ནྟི (པཱཙི. ཨཊྛ. ༢༦༥) ཝུཏྟཏྟཱ ཨེཏམཉྙེསམྤི ན ཝཊྚཏཱིཏི ཝདནྟི. ‘‘ཏཾ པན པུན པཊིགྒཧེཏྭཱ བྷུཉྫནྟསྶ ཨནཱཔཏྟཱི’’ཏི ཨེཏྠཱཔི ཨེཝམེཝ. ཨིམསྨིཾ པན ‘‘ཨཏིརིཏྟཾ ཀཏཾ ཨནཏིརིཏྟཀཏཾ ཧོཏཱི’’ཏི ཨེཏྠཱཔི ཨེཝམེཝ. ཨིམསྨིཾ པན ‘‘ཨཏིརིཏྟཾ ཀཏཾ, ཨནཏིརིཏྟཾ ཀཏཾ ཧོཏཱི’’ཏིཨཱདཱིཧི ཨུཔཔརིཀྑིཏྭཱ ཝིནིཙྪཡོ ཝེདིཏབྦོཏི དཱིཔིཏཾ. ཨལམེཏཾ སབྦནྟི ཨིདམྤི ཏེ ཨདྷིཀཾ, ཨིཏོ ཨཉྙཾ ན ལཙྪསཱིཏི ཨཏྠོ.

ཨཱཧཱརཏྠཱཡཱཏི ཝིཀཱལེ ཨེཝཱཏི ཨེཀེ. ‘‘པཋམཀཐིནསདིསཱནི. ཨིདཾ པན ཀིརིཡཱཀིརིཡ’’ནྟི པཱཋོ. ཀཱཡཀམྨཾ ཨཛ྄ཛྷོཧརཎཏོ. ཝཙཱིཀམྨཾ ཝཱཙཱཡ ‘‘ཨཏིརིཏྟཾ ཀརོཐ, བྷནྟེ’’ཏི ཨཀཱརཱཔནཏོཏི ཝེདིཏབྦཾ.

པཋམཔཝཱརཎཱསིཀྑཱཔདཝཎྞནཱ ནིཊྛིཏཱ.

༦. དུཏིཡཔཝཱརཎཱསིཀྑཱཔདཝཎྞནཱ

‘‘བྷུཏྟསྨིཾ པཱཙིཏྟིཡ’’ནྟི (པཱཙི. ༢༤༣) མཱཏིཀཱཡཾ ཝུཏྟཏྟཱ ‘‘བྷོཛནཔརིཡོསཱནེ པཱཙིཏྟིཡ’’ནྟི ཝུཏྟཾ, ན ཨཛ྄ཛྷོཧཱརེ ཨཛ྄ཛྷོཧཱརེ.

དུཏིཡཔཝཱརཎཱསིཀྑཱཔདཝཎྞནཱ ནིཊྛིཏཱ.

༧. ཝིཀཱལབྷོཛནསིཀྑཱཔདཝཎྞནཱ

ཛམྦུདཱིཔསྶ ¶ ཀཱལེན པརིཙྪེདོཏི ཨེཝཾ ཀིར.

ཝིཀཱལབྷོཛནསིཀྑཱཔདཝཎྞནཱ ནིཊྛིཏཱ.

༨. སནྣིདྷིཀཱརཀསིཀྑཱཔདཝཎྞནཱ

‘‘དུདྡྷོཏོ ¶ ཧོཏཱི’’ཏིཨཱདིནཱ ནཡེན ཨིདྷ ཝུཏྟཏྟཱ, ‘‘དུདྡྷོཏཾ པཏྟཾ དྷོཝིཏྭཱ པུན

ཏཏྠ ཨཙྪོདཀཾ ཝཱ ཨཱསིཉྩིཏྭཱ, ཨངྒུལིཡཱ ཝཱ གྷཾསིཏྭཱ ནིསྣེཧབྷཱཝོ ཛཱནིཏབྦོ’’ཏི (པཱཙི. ཨཊྛ. ༢༥༣) སམནྟཔཱསཱདིཀཱཡཾ ཝུཏྟཏྟཱ ཙ མཏྟིཀཱཔཏྟསྶ ཀཔཱལེན པཱིཏོ སྣེཧོ སནྣིདྷིཾ ཀརོཏཱིཏི སིདྡྷནྟི ལིཁིཏཾ. སཡཾ པཊིགྒཧེཏྭཱ ཨཔརིཙྩཏྟམེཝཱཏི ཨེཏྠ ཨཔརིཙྩཏྟཾ ནཱམ ཨནུཔསམྤནྣཱནཾ ནིརཔེཀྑཨཔརིཙྩཏྟཾ ཨཝིཛཧིཏཾ. ‘‘པཊིགྒཧཎནྟི ཨེཏྠ པཊིགྒཧིཏབྷཱཝམཝིཛཧིཏམེཝ སནྣིདྷིཾ ཛནེཏཱི’’ཏི དྷམྨསིརིཏྠེརོ, ཏཾ ‘‘པཊིགྒཎྷཱཏི, ཨཱཔཏྟི དུཀྐཊསྶཱ’’ཏི (པཱཙི. ༢༥༥) པཱལི༹ཡཱ ཝིརུཛ྄ཛྷཏི. ཏསྶ པན པུན པཊིགྒཎྷནཀིཙྩཱབྷཱཝཏོ ཝཱིམཾསིཏབྦཾ.

སནྣིདྷིཀཱརཀསིཀྑཱཔདཝཎྞནཱ ནིཊྛིཏཱ.

༩. པཎཱིཏབྷོཛནསིཀྑཱཔདཝཎྞནཱ

‘‘ཏེསཾ མཾསཉྩ ཁཱིརདདྷཱིནི ཙ ཨིདྷ ཨདྷིཔྤེཏཱནཱི’’ཏི ཨིདཾ པཱཙིཏྟིཡཝཏྠུཔརིཙྪེདོ, ན པན ཀཔྤིཡཁཱིརཱདིཔརིཙྪེདོ, ཏསྨཱ ཡསྶ ཀསྶཙི ཁཱིརཱདཱིནི ཝཊྚནྟཱིཏི ཙ, ‘‘མཧཱནཱམསིཀྑཱཔདེན ཀཱརེཏབྦོ’’ཏི སངྒྷཝསེན པཝཱརིཏེ བྷེསཛྫཏྠཱཡ སཔྤིཨཱདིབྷེསཛྫཔཉྩཀཾ ཝིཉྙཱཔེཏི ཙེ, ཏཏྠ ‘‘ན བྷེསཛྫཀརཎཱིཡེན བྷེསཛྫཾ ཝིཉྙཱཔེཏཱི’’ཏི ཨེཏྠ སངྒཧཾ གཙྪཏི, ཏསྨཱ ‘‘ཏེན པཱཙིཏྟིཡ’’ནྟི (ཝཛིར. ཊཱི. པཱཙིཏྟིཡ ༢༦༡) ཙ ལིཁིཏཾ.

པཎཱིཏབྷོཛནསིཀྑཱཔདཝཎྞནཱ ནིཊྛིཏཱ.

༡༠. དནྟཔོནསིཀྑཱཔདཝཎྞནཱ

‘‘སརཱིརཱཝཡཝེནཱ’’ཏི ¶ ཝུཏྟཏྟཱ མུཁེན པཊིགྒཧཎཾ ཨནུཉྙཱཏཾ. ‘‘ཙིཉྩཱདིཔཏྟེསུ བྷཱུམིཡཾ ཨཏྠཏེསུ ན ཝཊྚཏི, ཀལླཁེཏྟེ ཏཏྠ ཝཊྚཏཱི’’ཏི ཙ, ‘‘སཱམཾ གཧེཏྭཱ’’ཏི ཨིམིནཱ ན ཀེཝལཾ སཔྤདཊྛཾཡེཝ, ཨཉྙམྤི དཊྛཾ ཝིསེསེཏི. སཱམཾ གཧེཏྭཱ པརིབྷུཉྫིཏུཾ ཝཊྚཏཱི’’ཏི ཙ ལིཁིཏཾ.

དནྟཔོནསིཀྑཱཔདཝཎྞནཱ ནིཊྛིཏཱ.

བྷོཛནཝགྒོ ཙཏུཏྠོ.

༥. ཨཙེལཀཝགྒོ

༡. ཨཙེལཀསིཀྑཱཔདཝཎྞནཱ

ཨཙེལཀཱདཡོ ¶ ཡསྨཱ, ཏིཏྠིཡཱཝ མཏཱ ཨིདྷ;

ཏསྨཱ ཏིཏྠིཡནཱམེན, ཏིཀཙྪེདོ ཀཏོ ཏཏོ.

ཨཏིཏྠིཡསྶ ནགྒསྶ, ཏཐཱ ཏིཏྠིཡལིངྒིནོ;

གཧཊྛསྶཱཔི བྷིཀྑུསྶ, ཀཔྤཏཱིཏི ཝིནིཙྪཡོ.

ཨཏིཏྠིཡསྶ ཙིཏྟེན, ཏིཏྠིཡསྶ ཙ ལིངྒིནོ;

སོཏཱཔནྣཱདིནོ དཱཏུཾ, ཀཔྤཏཱིཏཱིདྷ ནོ མཏི.

ཨཙེལཀསིཀྑཱཔདཝཎྞནཱ ནིཊྛིཏཱ.

༣. སབྷོཛནསིཀྑཱཔདཝཎྞནཱ

ཨནུཔཝིསིཏྭཱ ནིསཱིདནཙིཏྟེན སཙིཏྟཀཏཱཏི ཝེདིཏབྦཱ.

སབྷོཛནསིཀྑཱཔདཝཎྞནཱ ནིཊྛིཏཱ.

༤-༥. རཧོཔཊིཙྪནྣརཧོནིསཛྫསིཀྑཱཔདཝཎྞནཱ

ཙཏུཏྠཾ པཋམཱནིཡཏེ, པཉྩམཾ དུཏིཡཱནིཡཏེ ཝུཏྟནཡམེཝ. ཨིདྷ པཉྩམཾ ཨུཔནནྡསྶ ཙཏུཏྠཾ ཧོཏི.

རཧོཔཊིཙྪནྣརཧོནིསཛྫསིཀྑཱཔདཝཎྞནཱ ནིཊྛིཏཱ.

༦. ཙཱརིཏྟསིཀྑཱཔདཝཎྞནཱ

སབྷཏྟོ ¶ ¶ སམཱནོཏི ནིམནྟནབྷཏྟོཏི པོརཱཎཱ. སནྟཾ བྷིཀྑུཾ, ཨནཱཔུཙྪཱ, པུརེབྷཏྟཾ པཙྪཱབྷཏྟཾ, ཨཉྙཏྲ སམཡཱཏི ཨཡམེཏྠ ཙཏུབྦིདྷཱ ཨནུཔཉྙཏྟི. ཏཏྠ སམཡཱ དྭེ སམཡཱ. བྷཏྟིཡགྷརནྟི ནིམནྟིཏསྶ གྷརཾ ཝཱ སལཱཀཱབྷཏྟཱདིདཱཡཀཱནཾ ཝཱ གྷརཾ. ‘‘སམུཊྛཱནཱདཱིནི པཋམཀཐིནསདིསཱནི, ཨིདཾ པན ཀིརིཡཱཀིརིཡ’’ནྟི པཱཋོ, ‘‘ཨིདྷ ནིམནྟནཱ ཨཀཔྤིཡནིམནྟནཱ’’ཏི ཨེཀེ.

པུརེབྷཏྟཉྩ པིཎྜཱཡ, ཙརིཏྭཱ ཡདི བྷུཉྫཏི;

སིཡཱ པརམྤརཱཔཏྟི, པཙྪཱབྷཏྟཾ ན སཱ སིཡཱ.

པཙྪཱབྷཏྟཉྩ གམིཀོ, པུབྦགེཧཾ ཡདི གཙྪེ;

ཨེཀེ ཨཱཔཏྟིཡེཝཱཏི, ཨནཱཔཏྟཱིཏི ཨེཀཙྩེ.

ཀུལནྟརསྶོཀྐམནེ, ཨཱཔཏྟིམཏཡོ ཧི ཏེ;

སམཱནབྷཏྟཔཙྩཱསཱ, ཨིཏི ཨཱཧུ ཨིདྷཱཔརེ.

མཏཱ གཎིཀབྷཏྟེན, སམེནྟི ནཾ ནིམནྟནེ;

ཝིསྶཛྫནཾ སམཱནནྟི, ཨེཀེ སམྨུཁཏཱཔརེ.

སནྣིཊྛཱནཏྠིཀེཧེཝ, ཝིཙཱརེཏབྦབྷེདཏོ;

ཝིཉྙཱུ ཙཱརིཏྟམིཙྩེཝ, སིཀྑཱཔདམིདཾ ཝིདཱུ. (ཝཛིར. ཊཱི. པཱཙིཏྟིཡ ༢༩༤);

ཙཱརིཏྟསིཀྑཱཔདཝཎྞནཱ ནིཊྛིཏཱ.

༧. མཧཱནཱམསིཀྑཱཔདཝཎྞནཱ

པཎཱིཏབྷོཛནསིཀྑཱཔདེ ‘‘མཧཱནཱམསིཀྑཱཔདེན ཀཱརེཏབྦོ’’ཏི (ཀངྑཱ. ཨཊྛ. པཎཱིཏབྷོཛནསིཀྑཱཔདཝཎྞནཱ) ཡཾ ཝུཏྟཾ, ཏསྶཏྠོ སངྒྷཝསེན པཝཱརིཏེ བྷེསཛྫཏྠཱཡ སཔྤིཨཱདིབྷེསཛྫཔཉྩཀཾ ¶ ཝིཉྙཱཔེཏི ཙེ, ‘‘ནབྷེསཛྫེན ཀརཎཱིཡེན བྷེསཛྫཾ ཝིཉྙཱཔེཏཱི’’ཏི (པཱཙི. ༣༠༩) ཝཙནེན པཱཙིཏྟིཡནྟི (ཝཛིར. ཊཱི. པཱཙིཏྟིཡ ༣༡༠) ལིཁིཏཾ. ‘‘ཏཡཱ ཨིམིནཱཝ པཝཱརིཏམྷཱ, ཨམྷཱཀཉྩ ཨིམིནཱ ཙ ཨིམིནཱ ཙ ཨཏྠོ’’ཏི ཡཐཱབྷཱུཏཾ ཨཱཙིཀྑིཏྭཱ ཝིཉྙཱཔེཏུཾ གིལཱནོཝ ལབྷཏི, ན ཨིཏརོཏི ཙ, ‘‘ཨཉྙསྶ ཨཏྠཱཡཱ’’ཏི ¶ ཨསྶ ཉཱཏཀཔྤཝཱརིཏེ, ཨཏྟནོ ཝཱ ཉཱཏཀཔྤཝཱརིཏེཏི ཨཏྠོཏི ཙ, ‘‘ཨཔརིཡནྟཔྤཝཱརཎཱཡ པཝཱརིཏེ’’ཏི སངྒྷཝསེན, པུགྒལཝསེན ཙ པཝཱརེཏྭཱ དཱཡཀཱ. ཏསྨཱ ‘‘སངྒྷཔྤཝཱརཎཏཱ’’ཏི ཝཏྭཱ ‘‘པུགྒལཔྤཝཱརཎཏཱ’’ཏི ན ཝུཏྟནྟི ཙ, ‘‘པརིཡནྟཱཏིཀྐམོ’’ཏི ཝཙནེན གིལཱནོ གཧིཏོ, ཏསྨཱ ‘‘གིལཱནཱགིལཱནཏཱ’’ཏི ན ཝུཏྟཾ. ཨེཝཾ སནྟེཔི ‘‘སངྒྷཔྤཝཱརཎཱཡ པཝཱརཎཏཱ’’ཏི པཱཋོཏི ཙ ལིཁིཏཾ, ཝཱིམཾསིཏབྦཾ.

མཧཱནཱམསིཀྑཱཔདཝཎྞནཱ ནིཊྛིཏཱ.

༨. ཨུཡྻུཏྟསེནཱསིཀྑཱཔདཝཎྞནཱ

ཧཏྠིཨཱདཱིསུ ཨེཀམེཀནྟི ཨནྟམསོ ཨེཀཔུརིསཱརུལ༹ྷཧཏྠིམྤི, ཨེཀཾ སརཧཏྠཾ པུརིསམྤི. སམུཊྛཱནཱདཱིནི ཨེལ༹ཀལོམསདིསཱནི, ཨིདཾ པན ལོཀཝཛྫཾ, ཨཀུསལཙིཏྟཾ ཏིཝེདན’’ནྟི པཱཋོ.

ཨུཡྻུཏྟསེནཱསིཀྑཱཔདཝཎྞནཱ ནིཊྛིཏཱ.

༩. སེནཱཝཱསསིཀྑཱཔདཝཎྞནཱ

ཀེནཙི པལིབུདྡྷསྶཱཏི ཝེརིཀེན ཝཱ ཨིསྶརེན ཝཱ ཀེནཙི རུདྡྷསྶ. སེནཱཔརིཀྑེཔེན ཝཱ པརིཀྑེཔཱརཧཊྛཱནེན ཝཱ སཉྩརཎཊྛཱནཔརིཡནྟེན ཝཱ པརིཙྪིནྡིཏབྦཱ.

སེནཱཝཱསསིཀྑཱཔདཝཎྞནཱ ནིཊྛིཏཱ.

ཨཙེལཀཝགྒོ པཉྩམོ.

༦. སུརཱཔཱནཝགྒོ

༡. སུརཱཔཱནསིཀྑཱཔདཝཎྞནཱ

‘‘སུརཱ’’ཏི ¶ ཝཱ ‘‘ན ཝཊྚཏཱི’’ཏི ཝཱ ཛཱནིཏྭཱ པིཝནེ ཨཀུསལམེཝཱཏི ལིཁིཏཾ. ཨཀུསལཙིཏྟནྟི ཡེབྷུཡྻེན ཏཾ སནྡྷཱཡ ཀིར ཝུཏྟཾ. ཨཐ ཀསྨཱ ¶ ཝིནཡཊྛཀཐཱཡཾ ‘‘ཨཀུསལེནེཝ པཱཏབྦཏཱཡཱ’’ཏི (པཱཙི. ཨཊྛ. ༣༢༩) ཝུཏྟནྟི ཙེ? སཙིཏྟཀཔཀྑེ ཨཀུསལེནེཝ པཱཏབྦཏཱཡཱཏི.

སུརཱཔཱནསིཀྑཱཔདཝཎྞནཱ ནིཊྛིཏཱ.

༢. ཨངྒུལིཔཏོདཀསིཀྑཱཔདཝཎྞནཱ

ཀཱཡསཾསགྒསངྒྷཱདིསེསཱཔཏྟིབྷཱཝེ སམཱནེཔི བྷིཀྑུནིཡཱཔི ཨནུཔསམྤནྣེཔི དུཀྐཊཾ, ཨུཔསམྤནྣེ ཨེཝ པཱཙིཏྟིཡནྟི ཨེཝཾ པུགྒལཱཔེཀྑཾ དསྶེཏུཾ ‘‘ཨངྒུལིཔཏོདཀེ པཱཙིཏྟིཡ’’ནྟི ཝུཏྟཾ. སཏི ཀརཎཱིཡེཏི ཨེཏྠ པུརིསཾ སཏི ཀརཎཱིཡེ ཨཱམསཏོཏི ཨདྷིཔྤཱཡོ, ན ཨིཏྠིཾ.

ཨངྒུལིཔཏོདཀསིཀྑཱཔདཝཎྞནཱ ནིཊྛིཏཱ.

༣. ཧསདྷམྨསིཀྑཱཔདཝཎྞནཱ

‘‘ཙིཀྑལླཾ ཝཱ’’ཏི ཝཙནཏོ སཀྑརམྤི ཁིཔནཀཱིལཱ༹ཡ ཀཱིལ༹ཏོ དུཀྐཊམེཝ. ཨུཔརིགོཔྥཀེ པཱཙིཏྟིཡཾ, ཨཉྙཏྠ དུཀྐཊནྟི པཱཙིཏྟིཡཝཏྠུཨཏྠཝསེན ‘‘ཨུདཀེ ཧསདྷམྨེ པཱཙིཏྟིཡ’’ནྟི ཝུཏྟཾ.

ཨིདཾ སཉྙཱཝིམོཀྑཾ ཙེ, ཏིཀཔཱཙིཏྟིཡཾ ཀཐཾ;

ཀཱིལི༹ཏཾཝ ཨཀཱིལཱ༹ཏི, མིཙྪཱགཱཧེན ཏཾ སིཡཱ.

ཨེཏྟཱཝཏཱ ¶ ཀཐཾ ཀཱིལཱ༹, ཨིཏི ཀཱིལཱ༹ཡཾ ཨེཝཱཡཾ;

ཨཀཱིལཱ༹སཉྙཱི ཧོཏེཏྠ, ཝིནཡཏྠཾ སམཱདཡེ.

ཨེཀནྟཱཀུསལོ ཡསྨཱ, ཀཱིལཱ༹ཡཱབྷིརཏམནོ;

ཏསྨཱ ཨཀུསལཾ ཙིཏྟཾ, ཨེཀམེཝེཏྠ ལབྦྷཏཱིཏི. (ཝཛིར. ཊཱི. པཱཙིཏྟིཡ ༣༣༦);

ཧསདྷམྨསིཀྑཱཔདཝཎྞནཱ ནིཊྛིཏཱ.

༤. ཨནཱདརིཡསིཀྑཱཔདཝཎྞནཱ

ཏསྶ ¶ ཝཙནནྟི ‘‘ཨཡཾ ཨུཀྑིཏྟཀོ ཝཱ ཝམྦྷིཏོ ཝཱ གརཧིཏོ ཝཱ ཨིམསྶ ཝཙནཾ ཨཀཏཾ བྷཝིསྶཏཱི’’ཏི ཨནཱདརིཡཾ ཀརོཏི. དྷམྨནྟི ཀཐཱཡཾ དྷམྨོ ནསྶེཡྻ ཝཱ ཝིནསྶེཡྻ ཝཱ ཨནྟརདྷཱཡེཡྻ ཝཱ, ཏཾ ཝཱ ཨསིཀྑིཏུཀཱམོ ཨནཱདརིཡཾ ཀརོཏི. ‘‘ལོཀཝཛྫཾ ཨཏིཀྐམིཏྭཱ ‘ཨིདཾ ཨམྷཱཀཾ ཨཱཙརིཡུགྒཧོ’ཏི ཝདནྟསྶ ན ཝཊྚཏཱི’’ཏི (ཝཛིར. ཊཱི. པཱཙིཏྟིཡ ༣༤༤) ལིཁིཏཾ.

ཨནཱདརིཡསིཀྑཱཔདཝཎྞནཱ ནིཊྛིཏཱ.

༦. ཛོཏིསིཀྑཱཔདཝཎྞནཱ

‘‘ཝིསིབྦནཱཔེཀྑོ’’ཏི ཝུཏྟཏྟཱ ཨཉྙསྶ ཝཊྚཏི, ཨཉྙེསཉྩ.

ཛོཏིནེཀམནེཀེ ཝཱ, ཛཱལེནྟི མུནཡོ སཧ;

ཨེཀོ སོཔེཏི ནཱནེཀོ, ཨདྷིཔྤཱཡཝིསེསཏོ.

ཛོཏིསིཀྑཱཔདཝཎྞནཱ ནིཊྛིཏཱ.

༨. དུབྦཎྞཀརཎསིཀྑཱཔདཝཎྞནཱ

མོརཀྑིམཎྜལམངྒུལཔིཊྛཱིནནྟི ¶ ན ཨེཀནྟཏོ, ཨདྷིཀཾ, ཨོརཉྩཱཏི ཝདནྟི. ཨེཀཀོཎེཔི ཝཊྚཏི, ཨེཝཾ ཡཏྠ ཀཏྠཙི ཨེཀབིནྡུཔི ཝཊྚཏཱིཏི.

དུབྦཎྞཀརཎསིཀྑཱཔདཝཎྞནཱ ནིཊྛིཏཱ.

༩. ཝིཀཔྤནསིཀྑཱཔདཝཎྞནཱ

‘‘སམུཊྛཱནཱདཱིནི པཋམཀཐིནསདིསཱནི, ཨིདཾ པན ཀིརིཡཱཀིརིཡ’’ནྟི པཱཋོ. ཨེཏྠ པརིབྷོགེན ཀཱཡཀམྨཾ. ཨཔཙྩུདྡྷརཎེན ཝཙཱིཀམྨཾ.

ཝིཀཔྤནསིཀྑཱཔདཝཎྞནཱ ནིཊྛིཏཱ.

༡༠. ཨཔནིདྷཱནསིཀྑཱཔདཝཎྞནཱ

སསཱུཙིཀེ ¶ སཱུཙིགྷརེ སཱུཙིགཎནཱཡ ཨཱཔཏྟིཡོཏི པོརཱཎཱ.

ཨཔནིདྷཱནསིཀྑཱཔདཝཎྞནཱ ནིཊྛིཏཱ.

སུརཱཔཱནཝགྒོ ཚཊྛོ.

༧. སཔྤཱཎཀཝགྒོ

༡. སཉྩིཙྩསིཀྑཱཔདཝཎྞནཱ

ཝཏྠུགཎནཱཡ ཀམྨབནྡྷགཎནཱཙེཏནཱམཱརཎཱནཾ, ན ཀམྨབནྡྷགཎནཱཡ ཙེཏནཱམཱརཎཱ. ཨེཏྠ ཨེཀཙེཏནཱཡ བཧུཔཱཎཀཱ མརནྟཱིཏི ཨཡཾ ཝིབྷཱགོ ཝེདིཏབྦོ.

སཉྩིཙྩསིཀྑཱཔདཝཎྞནཱ ནིཊྛིཏཱ.

༢. སཔྤཱཎཀསིཀྑཱཔདཝཎྞནཱ

སཔྤཱཎཀནྟི ¶ པཱཎཀཱནཾ མརཎཝསེན པཱཙིཏྟིཡཾ, ན སཔྤཱཎཀཨུདཀཔརིབྷོགཝསེན པཱཙིཏྟིཡཾ, ཏསྨཱ ཨེཝ ‘‘པཎྞཏྟིཝཛྫ’’ནྟི ཝུཏྟཾ. ཨསུདྡྷཙིཏྟཏྟཱ པཱཙིཏྟིཡཾ, སུདྡྷཙིཏྟེ ཨནཱཔཏྟི. པདཱིཔུཛྫལནེ ཝིཡ པཎྞཏྟིཝཛྫཏཱ ཝུཏྟཱཏི ལིཁིཏཾ.

ཛལེ པཀྑིཔནཾ པུབྦཾ, ཛལཔྤཝེསནཾ ཨིདཾ;

ཨེཝཾ ཨུབྷིནྣཾ ནཱནཱཏྟཾ, ཉེཡྻཾ ཉཱཎཝཏཱ སདཱཏི. (ཝཛིར. ཊཱི. པཱཙིཏྟིཡ ༣༨༧)

སཔྤཱཎཀསིཀྑཱཔདཝཎྞནཱ ནིཊྛིཏཱ.

༥. ཨཱུནཝཱིསཏིཝསྶསིཀྑཱཔདཝཎྞནཱ

ཨཉྙཾ ཨུཔསམྤཱདེཏཱིཏི –

ཨུཔཛ྄ཛྷཱཡོ སཙེ སཱམཾ, ཀམྨཝཱཙཉྩ སཱཝེཏི;

ཀམྨཾ རུཧཏི ཨིཙྩེཀེ, ནེཏི ཝིནཡཀོཝིདོ.

དུཀྐཊཾ ¶ ཝིཧིཏཾ ཡསྨཱ, ཨཱཙརིཡསྶ གཎསྶ ཙ;

ཏསྨཱ བྷིནྣཱཝ ཨཱཙརིཡ-ཨུཔཛ྄ཛྷཱཡཱ ཝིསུཾ ཨིདྷཱཏི.

ཨཱུནཝཱིསཏིཝསྶསིཀྑཱཔདཝཎྞནཱ ནིཊྛིཏཱ.

༧. སཾཝིདྷཱནསིཀྑཱཔདཝཎྞནཱ

ཨིདྷ ཨེཀཏོཨུཔསམྤནྣཱ, སིཀྑམཱནཱ, སཱམཎེརཱིཏི ཨིམཱ ཏིསྶོཔི སངྒཧཾ གཙྪནྟི, ཨིམཱསཾ པན ཏིསྶནྣཾ སམཡོ རཀྑཏི, ཨཡམིམཱསཾ, མཱཏུགཱམསྶ ཙ ཝིསེསོཏི ཝེདིཏབྦཾ.

སཾཝིདྷཱནསིཀྑཱཔདཝཎྞནཱ ནིཊྛིཏཱ.

༩. ཨུཀྑིཏྟསམྦྷོགསིཀྑཱཔདཝཎྞནཱ

‘‘ཏཾ ¶ དིཊྛིཾ ཨཔྤཊིནིསྶཊྛེནཱཏི ལདྡྷིནཱནཱསཾཝཱསཀཾ སནྡྷཱཡཱ’’ཏི ལིཁིཏཾ. ཏིཙིཏྟནྟི ཨེཏྠ ཝིཔཱཀཱབྱཱཀཏཙིཏྟེན སཧསེཡྻཾ ཀཔྤེཡྻཱཏི ཨེཝམཏྠོ དཊྛབྦོ. ཨཉྙཐཱ སཙིཏྟཀཏྟཱ སིཀྑཱཔདསྶ ཀིརིཡཱབྱཱཀཏཾ སནྡྷཱཡ ན ཡུཛྫཏི.

ཨུཀྑིཏྟསམྦྷོགསིཀྑཱཔདཝཎྞནཱ ནིཊྛིཏཱ.

༡༠. ཀཎྚཀསིཀྑཱཔདཝཎྞནཱ

‘‘ཨཡཾ སམཎུདྡེསོ པཱརཱཛིཀོ ཧོཏི. སཙེ ཏཾ དིཊྛིཾ པཊིནིསྶཛྫཏི, སངྒྷསྶ ཨཱརོཙེཏྭཱ སངྒྷཱནུམཏིཡཱ པབྦཱཛེཏབྦོ’’ཏི པོརཱཎགཎྛིཔདེ ཝུཏྟཾ, ཏཾ ན ཡུཏྟཾ. དཎྜཀམྨནཱསནཱ ཧི ཨིདྷཱདྷིཔྤེཏཱ. ཡདི སོ པཱརཱཛིཀོ ཧོཏི, ལིངྒནཱསནཱ ནཱམ སིཡཱ. ‘‘ཏེ པཊིསེཝཏོ ནཱལཾ ཨནྟརཱཡཱཡཱ’’ཏི ཙ དིཊྛི སཏྠརི ཨསཏྠཱདིདིཊྛི ན ཧོཏི. སཙེ སཱ ཡསྶ ཨུཔྤཛྫཏི, སོ པཱརཱཛིཀོ ཧོཏི, ཏསྨིམྤི ཨེཝམེཝ ¶ པཊིཔཛྫིཏབྦཾ, སཾཝརེ ཨཏིཊྛནྟོ ལིངྒནཱསནཱཡ ནཱསེཏབྦོཏི (ཝཛིར. ཊཱི. པཱཙིཏྟིཡ ༤༢༨) ཨཱཙརིཡསྶ ཏཀྐོ.

ཀཎྚཀསིཀྑཱཔདཝཎྞནཱ ནིཊྛིཏཱ.

སཔྤཱཎཀཝགྒོ སཏྟམོ.

༨. སཧདྷམྨིཀཝགྒོ

༤. པཧཱརསིཀྑཱཔདཝཎྞནཱ

ཨངྒེསུ ན མོཀྑཱདྷིཔྤཱཡཏཱ ཝིཡ ཨམརཎཱདྷིཔྤཱཡཏཱ ཝཏྟབྦཱཏི ཙེ? ན ཝཏྟབྦཱ. ཀསྨཱ? ཡོ བྷིཀྑུ སཡཾ པཧཱརཾ དཱཏུཀཱམོ, སོ ཨདྷིཔྤཱཡེན ཏསྶ མརཎེ པཡོགཝིརཧོཝཱཏི ཀཏྭཱ ¶ ཨམརཎཱདྷིཀཱརཏྟཱ ཀེཝལཾ ཨམརཎཱདྷིཔྤཱཡོ ཨེཝ སོཏི ཏཱ ཝིཡ ཏཱ ན ཝུཏྟཱ. མོཀྑཱདྷིཔྤཱཡསྶ པན ཀོཔོ ནཏྠི, ཏསྨཱ ཨནཱཔཏྟཱིཏི ཝུཏྟཾ.

པཧཱརསིཀྑཱཔདཝཎྞནཱ ནིཊྛིཏཱ.

༥. ཏལསཏྟིཀསིཀྑཱཔདཝཎྞནཱ

ཏལམེཝ ཏལསཏྟིཀཾ. ‘‘པོཐནསམཏྠཊྛེན སཏྟིཀ’’ནྟི ཨེཀེ. ཡསྨཱ པཧརིཏུཀཱམཏཱཡ པཧརཏོ པུརིམེན པཱཙིཏྟིཡཾ, ཀེཝལཾ ཨུཙྩཱརེཏུཀཱམཏཱཡ ཨུགྒིརཎམཏྟེ ཀཏེ ཨིམིནཱ པཱཙིཏྟིཡཾ. ཨིམིནཱ པན ཝིརཛ྄ཛྷིཏྭཱ པཧཱརོ དིནྣོ, ཏསྨཱ ནཔཧརིཏུཀཱམཏཱཡ དིནྣཏྟཱ དུཀྐཊཾ. ཀིམིདཾ དུཀྐཊཾ པཧཱརཔཙྩཡཱ, ཨུདཱཧུ ཨུགྒིརཎཔཙྩཡཱཏི? པཧཱརཔཙྩཡཱ ཨེཝ དུཀྐཊཾ, པུརིམཾ ཨུགྒིརཎཔཙྩཡཱ པཱཙིཏྟིཡནྟི སདུཀྐཊཾ པཱཙིཏྟིཡཾ ཡུཛྫཏི. པུརིམཉྷི ཨུགྒིརཎཾ, པཙྪཱ པཧཱརོ. ན ཙ པཙྪིམཾ པཧཱརཾ ནིསྶཱཡ པུརིམཾ ཨུགྒིརཎཾ ཨནཱཔཏྟིཝཏྠུཀཾ བྷཝིཏུམརཧཏཱིཏི ནོ ཏཀྐོཏི (ཝཛིར. ཊཱི. པཱཙིཏྟིཡ ༤༥༦) ཨཱཙརིཡོ.

ཏལསཏྟིཀསིཀྑཱཔདཝཎྞནཱ ནིཊྛིཏཱ.

༧. སཉྩིཙྩསིཀྑཱཔདཝཎྞནཱ

པརོ ¶ ཀུཀྐུཙྩཾ ཨུཔྤཱདེཏུ ཝཱ, མཱ ཝཱ, ཏཾ ཨཔྤམཱཎཾ. ‘‘ཀུཀྐུཙྩུཔཱདན’’ནྟི ཏཏིཡམངྒཾ ཏསྶ ཨདྷིཔྤཱཡཝསེན ཝུཏྟནྟི ཝེདིཏབྦཾ.

སཉྩིཙྩསིཀྑཱཔདཝཎྞནཱ ནིཊྛིཏཱ.

༨. ཨུཔསྶུཏིསིཀྑཱཔདཝཎྞནཱ

ཨུཔསྶུཏིནྟི ཡཐཱ ཨུཔཀུཛ྄ཛྷཾ ‘‘སམཱིཔཀུཛ྄ཛྷ’’ནྟི ཝུཙྩཏི, ཏཐཱ ཨུཔསྶུཏི ‘‘སམཱིཔསྶུཏཱི’’ཏི ཝེདིཏབྦཱ. ཡཏྠ ཋིཏོ སུཎཱཏི, ཏཾ ཋཱནནྟི ཨཏྠོ. སུཏཱིཏི པནེཏྠ པརེསཾ ཝཙནསདྡོ ཙ. སོ ཧི སུཡྻཏཱིཏི སུཏི ནཱམ. ཨུཔསུཡྻཏི ཝཱ ཨེཏྠཱཏི ཨུཔསྶུཏི. ཨོཀཱསོ ཧི སུཏི ནཱམ. ཨིམེསཾ སུཏྭཱཏི ཨེཏྠ ‘‘ཝཙན’’ནྟི པཱཋསེསོ.

སམུཊྛཱནཱདཱིནི ¶ ཨཏཱིཏདྭཡསདིསཱནཱིཏི ན གཧེཏབྦཱནི. ཐེཡྻསཏྠསམུཊྛཱནཾ. སིཡཱ ཀིརིཡཾ གནྟྭཱ སཝནེ. སིཡཱ ཨཀིརིཡཾ ཋིཏཊྛཱནཾ ཨཱགནྟྭཱ ཝདནྟཱནཾ ཨཛཱནཱཔནཝསེན སམུཊྛཱནཏོ. ‘‘སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདན’’ནྟི ལིཁིཏཾ.

ཨུཔསྶུཏིསིཀྑཱཔདཝཎྞནཱ ནིཊྛིཏཱ.

༩. ཀམྨཔྤཊིབཱཧནསིཀྑཱཔདཝཎྞནཱ

ཨཔྤམཏྟཀཝིསྶཛྫནཀེན པན ཙཱིཝརཾ ཀརོནྟསྶ སེནཱསནཀྑནྡྷཀཝཎྞནཱཡཾ (ཙཱུལ༹ཝ. ༣༢༨) ཝུཏྟཔྤབྷེདཱནི སཱུཙིཨཱདཱིནི ཨནཔལོཀེཏྭཱཔི དཱཏབྦཱནི. ཏཏོ ཨཏིརེཀཾ དེནྟེན ཨཔལོཀནཀམྨཾ ཀཱཏབྦཾ. ཨེཝཾ ཀཏཾ པན ཨཔལོཀནཾ ཀམྨལཀྑཎམེཝཱཏི ཨདྷིཔྤཱཡོ. ཨེཝཾ སབྦཏྠ ཀམྨལཀྑཎཾ ཝེདིཏབྦཾ. གཱམསཱིམཱཝིཧཱརེསུ ཨོསཱརཎཱདཱིནི སངྒྷཀམྨཱནིཡེཝ ན ཝཊྚནྟི. ཝིསྶཛྫིཡཝེབྷངྒིཡཱནི པན ཝཊྚནྟི. ‘‘སངྒྷསྶ སནྟཀ’’ནྟི སཱམཉྙཏོ ཨཝཏྭཱ ‘‘ཨིམསྨིཾ ཝིཧཱརེ སངྒྷསྶ སནྟཀ’’ནྟི ཨཔལོཀེཏབྦནྟི ཙ, ‘‘སམུཊྛཱནཱདཱིནི ཨདིནྣཱདཱནསདིསཱནི, ཨིདཾ པན དུཀྑཝེདན’’ནྟི པཱཋོཏི ཙ ལིཁིཏཾ.

ཀམྨཔྤཊིབཱཧནསིཀྑཱཔདཝཎྞནཱ ནིཊྛིཏཱ.

༡༠. ཚནྡཾཨདཏྭཱགམནསིཀྑཱཔདཝཎྞནཱ

སནྣིཔཱཏཾ ¶ ཨནཱགནྟྭཱ ཙེ ཚནྡཾ ན དེཏི, ཨནཱཔཏྟཱིཏི ཨེཀེ. དུཀྐཊནྟི ཨེཀེ དྷམྨཀམྨནྟརཱཡཀརཎཱདྷིཔྤཱཡཏྟཱ.

ཚནྡཾཨདཏྭཱགམནསིཀྑཱཔདཝཎྞནཱ ནིཊྛིཏཱ.

༡༡. དུབྦལསིཀྑཱཔདཝཎྞནཱ

ཨཀཔྤིཡེན ཝཱཏི སུཝཎྞརཛཏམཡམཉྩཱདིནཱ. ཀཔྤིཡམཉྩོ སམྤཊིཙྪིཏབྦོཏི ‘‘སངྒྷསྶ དེམཱ’’ཏི དིནྣཾ སནྡྷཱཡ ཝུཏྟཾ, ཏེཧི པན ‘‘ཝིཧཱརསྶ དེམཱ’’ཏི ཝུཏྟེ སུཝཎྞརཛཏམཡཱདིཨཀཔྤིཡམཉྩཱཔི ¶ སམྤཊིཙྪིཏབྦཱཏི ཙ, ‘‘ཨརཉྫརོ བཧུཨུདཀགཎྷནཀོ’’ཏི ཙ, ‘‘སངྒྷིཀཔཨབྷོགེན ཝཱཏི སཙེ ཨཱརཱམིཀཱདཡོ པཊིསཱམེཏྭཱ པཊིདེནྟི, པརིབྷུཉྫིཏུཾ ཝཊྚཏཱི’’ཏི ཙ, ‘‘ཀཾསལོཧཱདིབྷཱཛནཾ སངྒྷསྶ དིནྣམྤི པཱརིཧཱརིཡཾ ན ཝཊྚཏཱི’’ཏི (ཙཱུལ༹ཝ. ཨཊྛ. ༣༢༡) སམནྟཔཱསཱདིཀཱཡཾ ཝུཏྟཏྟཱ ཨཏྟནོ ཧཏྠེན གཧེཏྭཱ པཊིསཱམིཏུཾ ན ལབྷཏཱིཏི ཙ, ‘‘ཝེདྷཀོ ཀཱཡབནྡྷནསྶཱཏི ཝདནྟཱི’’ཏི ཙ, ‘‘ཧིངྒུ ཧིངྒུལིཧརིཏཱལམནོསིལཱ ཨཉྫནཱནཱི’’ཏི པཱཋོཏི ཙ, ‘‘དཱརུམཡོ ཝཱ…པེ… ཨཔཱདཀོཔི སམུགྒོ’’ཏི པཱཋོཏི ཙ, ‘‘དཱརུམཡོ ཏུམྦོཏི དཱརུམཡོ ཨུདཀཏུམྦོ’’ཏི ཙ, ‘‘ཐམྦྷཏུལཱསོཔཱནཕལཀཱདཱིསཱུ’’ཏི ཙ ལིཁིཏཾ.

དུབྦལསིཀྑཱཔདཝཎྞནཱ ནིཊྛིཏཱ.

༡༢. པརིཎཱམནསིཀྑཱཔདཝཎྞནཱ

ཨེཀོ བྷིཀྑུ ཨུཀྑིཏྟཀསྶ དཱཏུཀཱམོ ཧོཏི, ཏསྶ དཱནཾ ནིཝཱརེཏྭཱ ཨཉྙསྶ དཱཔེཏི, ཨནཱཔཏྟི. ཏཐཱ སདྡྷཱདེཡྻཝིནིཔཱཏནཾ ཀརོནྟསྶ དཱཔེཏི, ཨཏྟནོ ནིསྶིཏཀཱ ཨིཏྠནྣཱམསྶ པཏྟཾ དཱཏུཀཱམཱ ཨཱཔུཙྪནྟི, ‘‘ཝིསབྷཱགོ ཨེསོ, སབྷཱགསྶ དེཧཱི’’ཏི ཝདཏི. ཨནཱཔཏྟི ཨཏྟནོ བྷཱརབྷཱུཏཏྟཱ. ཏསྶ པན དཱཏུཀཱམཾ ཨཉྙསྶ དཱཔེཏི ¶ , ཨཱཔཏྟི ཨེཝ. སབྦཏྠ ཨཱཔུཙྪིཏྭཱ དཱཏུཀཱམཾ ཡཐཱསུཁཾ ཝིཙཱརེཏུཾ ལབྷཏི.

པརིཎཱམནསིཀྑཱཔདཝཎྞནཱ ནིཊྛིཏཱ.

སཧདྷམྨིཀཝགྒོ ཨཊྛམོ.

༩. རཏནཝགྒོ

༡. ཨནྟེཔུརསིཀྑཱཔདཝཎྞནཱ

ཨསཡནིགྷརེཏི པརིཀྑིཏྟསྶ བཧིབྷཱུཏེསུ རུཀྑམཱུལཱདཱིསུ. ‘‘སཙེ ཁཏྟིཡོཝ ཧོཏི, ནཱབྷིསིཏྟོ, ཨབྷིསིཏྟོཝ ཧོཏི, ན ཁཏྟིཡོ, རཀྑཏཱི’’ཏི ཨཱཙརིཡོ ‘‘ཁཏྟིཡཏཱ, ཨབྷིསིཏྟཏཱ’’ཏི ¶ ཨཱཔཏྟིཡཱ ཨངྒབྷཱཝེན ཝུཏྟཏྟཱ. སམུཊྛཱནཱདཱིནི པཋམཀཐིནསདིསཱནི, ཨིདཾ པན ཀིརིཡཱཀིརིཡ’’ནྟི པཱཋོ.

ཨནྟེཔུརསིཀྑཱཔདཝཎྞནཱ ནིཊྛིཏཱ.

༢. རཏནསིཀྑཱཔདཝཎྞནཱ

སབྦོཔི ཀཐཱམགྒོ བྷཎྜཱགཱརིཀསཱིསེན ནིཀྑིཔནཾ, གོཔནཉྩ པཊིཀྑིཔིཏྭཱ པཝཏྟོ.

རཏནསིཀྑཱཔདཝཎྞནཱ ནིཊྛིཏཱ.

༣. ཝིཀཱལགཱམཔྤཝེསནསིཀྑཱཔདཝཎྞནཱ

‘‘སནྟཾ བྷིཀྑུ’’ནྟི ཙ ‘‘ཨནཱཔུཙྪཱ’’ཏི ཙ ‘‘ཏཐཱརཱུཔཱ ཨཙྩཱཡིཀཱཏི ཙ ཨིམཱཏི ཨེཏྠ ཏིསྶོ’’ཏི པཱཋོ. ‘‘སམུཊྛཱནཱདཱིནི ཀཐིནསདིསཱནི, ཨིདཾ པན ཀིརིཡཱཀིརིཡ’’ནྟི པཱཋོ.

ཝིཀཱལགཱམཔྤཝེསནསིཀྑཱཔདཝཎྞནཱ ནིཊྛིཏཱ.

༤. སཱུཙིགྷརསིཀྑཱཔདཝཎྞནཱ

ཏཾ ¶ ཨསྶཱཏི ཏཾ བྷེདནཀཾ ཨསྶ པཱཙིཏྟིཡསྶ ཨཏྠི པཋམཾ བྷེདནཾ ཀཏྭཱ པཙྪཱ དེསེཏབྦཏྟཱ. ཨེས ནཡོ ཨིཏརེསུཔི. ཝཱསིཛཊེཏི ཝཱསིདཎྜཀེ.

སཱུཙིགྷརསིཀྑཱཔདཝཎྞནཱ ནིཊྛིཏཱ.

༥. མཉྩཔཱིཋསིཀྑཱཔདཝཎྞནཱ

ཨཊྛངྒུལཔཱདཀནྟི བྷཱཝནཔུཾསཀཾ. ཏུལཱསངྒྷཱཏེ ཋཔནམེཝ ཨཊྚཀརཎཾ.

མཉྩཔཱིཋསིཀྑཱཔདཝཎྞནཱ ནིཊྛིཏཱ.

༦. ཏཱུལོནདྡྷསིཀྑཱཔདཝཎྞནཱ

ཀིཉྩཱཔི ¶ པཊིལཱབྷེཡེཝ པཱཙིཏྟིཡཾ ཝིཡ དིསྶཏི, པརིབྷོགེ ཨེཝ པན ཨཱཔཏྟི དཊྛབྦཱ. ‘‘ཨཉྙེན ཀཏཾ པཊིལབྷིཏྭཱ པརིབྷུཉྫཏི, ཨཱཔཏྟི དུཀྐཊསྶཱ’’ཏི (པཱཙི. ༥༢༩) ཝཙནཾ ཨེཏྠ སཱདྷཀཾ.

ཏཱུལོནདྡྷསིཀྑཱཔདཝཎྞནཱ ནིཊྛིཏཱ.

༧. ནིསཱིདནསིཀྑཱཔདཝཎྞནཱ

ཀིཉྩཱཔི ནིསཱིདནསྶ ཛཱཏི ན དིསྶཏི ཨེཏྠ, ཏཐཱཔི ཙཱིཝརཀྑནྡྷཀེ ཨནུཉྙཱཏཏྟཱ, ‘‘ནཝ ཙཱིཝརཱནི ཨདྷིཊྛཱཏབྦཱནཱི’’ཏི ཨེཏྠ ཙ པརིཡཱཔནྣཏྟཱ ཙཱིཝརཛཱཏི ཨེཝསྶ ཛཱཏཱིཏི ཝེདིཏབྦཾ. ‘‘ལཱབྷེ སདསཾ, ཨལཱབྷེ ཨདསམྤི ཝཊྚཏཱི’’ཏི ཨེཀེ, ཏཾ ན ཡུཏྟཾ ‘‘ནིསཱིདནཾ ནཱམ སདསཾ ཝུཙྩཏཱི’’ཏི (པཱཙི. ༥༣༡-༥༣༢) ཏསྶ སཎྛཱནནིཡམནཏོ.

ནིསཱིདནསིཀྑཱཔདཝཎྞནཱ ནིཊྛིཏཱ.

རཏནཝགྒོ ནཝམོ.

སུདྡྷཔཱཙིཏྟིཡཝཎྞནཱ ནིཊྛིཏཱ.

པཱཊིདེསནཱིཡཀཎྜཾ

༡. པཋམཔཱཊིདེསནཱིཡསིཀྑཱཔདཝཎྞནཱ

ཡཱམཀཱལིཀཱདཱིསུ ¶ ¶ ཨཱཧཱརཏྠཱཡ ཨེཝ དུཀྐཊཾ. ཏམྤི ཨཱམིསེན ཨསམྦྷིནྣརསེ, སམྦྷིནྣེ པན ཨེཀརསེ པཱཊིདེསནཱིཡམེཝ.

པཋམཔཱཊིདེསནཱིཡསིཀྑཱཔདཝཎྞནཱ ནིཊྛིཏཱ.

༢. དུཏིཡཔཱཊིདེསནཱིཡསིཀྑཱཔདཝཎྞནཱ

‘‘སམུཊྛཱནཱདཱིནི ཀཐིནསདིསཱནི, ཨིདཾ པན ཀིརིཡཱཀིརིཡ’’ནྟི པཱཋོ.

དུཏིཡཔཱཊིདེསནཱིཡསིཀྑཱཔདཝཎྞནཱ ནིཊྛིཏཱ.

༤. ཙཏུཏྠཔཱཊིདེསནཱིཡསིཀྑཱཔདཝཎྞནཱ

ཨཱརཱམེ ཝཱ ཨཱརཱམཱུཔཙཱརེ ཝཱ པཊིགྒཧེཏྭཱ ཨཛ྄ཛྷོཧརནྟསྶཱཏི ཨཱརཱམེ ཝཱ ཨཱརཱམཱུཔཙཱརེ ཝཱ པཊིགྒཧེཏྭཱ ཨཱརཱམེ ཝཱ ཨཱརཱམཱུཔཙཱརེ ཝཱ ཨཛ྄ཛྷོཧརནྟསྶཱཏི ཨཏྠོ.

བཧཱརཱམེ པཊིགྒཧིཏཾ ཨཛ྄ཛྷཱརཱམེ བྷུཉྫནྟསྶ ཨནཱཔཏྟི. ཨངྒེསུ ཙ ‘‘ཨཛ྄ཛྷཱརཱམེ ཝཱ ཨཱརཱམཱུཔཙཱརེ ཝཱ པཊིགྒཧཎ’’ནྟི གཧེཏབྦཾ. ཨཛ྄ཛྷཱརཱམེ ཧི དསྶིཏེ ཨཱརཱམཱུཔཙཱརཾ དསྶིཏམེཝཱཏི. ‘‘སམུཊྛཱནཱདཱིནི ཀཐིནསདིསཱནི, ཨིདཾ པན ཀིརིཡཱཀིརིཡ’’ནྟི པཱཋོ.

ཙཏུཏྠཔཱཊིདེསནཱིཡསིཀྑཱཔདཝཎྞནཱ ནིཊྛིཏཱ.

པཱཊིདེསནཱིཡཝཎྞནཱ ནིཊྛིཏཱ.

སེཁིཡཀཎྜཾ

སེཁིཡེསུ ¶ ¶ སཏིཔི ཝཱིཏིཀྐམེ ཨནཱདརིཡཱཔེཀྑསྶེཝ ཨཱཔཏྟཱིཏི དསྶནཏྠཾ ཀཱརཀོ ན ཝུཏྟོ. ཨཡཉྷི ཝིནཡདྷམྨཏཱ, ཡདིདཾ སཱཔེཀྑེ ཀཱརཀནིདྡེསོ, སོ ཝུཏྟནིཡམེ ཝིདྷི, བྷུམྨཀརཎཉྩ. ཨཊྛངྒུལཱདྷིཀམྤི ཨོཏཱརེཏྭཱ ནིཝཱསེཏུཾ ཝཊྚཏི. ཏཏོ པརཾ ཨོཏཱརེནྟསྶ དུཀྐཊནྟི མཧཱཨཊྛཀཐཱཡཾ ཝུཏྟཾ. ཨཱརཱམེ ཝཱཏི བུདྡྷུཔཊྛཱནཱདིཀཱལེ. པཱརུཔིཏབྦནྟི ཨུཏྟརཱསངྒཀིཙྩཝསེན ཝུཏྟཾ.

ཋཏྭཱཏི ཨེཏྠ གཙྪནྟོཔི པརིསྶཡཱབྷཱཝཾ ཨོལོཀེཏུཾ ལབྷཏིཡེཝཱཏི (ཝཛིར. ཊཱི. པཱཙིཏྟིཡ ༥༨༢) ལིཁིཏཾ. ཡཐཱ ཝཱསཱུཔགཏསྶ ཨནྟརགྷརེ ཀཱཡཾ ཝིཝརིཏྭཱ ནིསཱིདིཏུཾ ཝཊྚཏི, ཏཐཱ ཏསྶ སནྟིཀེ གནྟུཀཱམསྶཔི ཀཱཡབནྡྷནཾ ཨབནྡྷིཏྭཱ སངྒྷཱཊིཾ ཨཔཱརུཔིཏྭཱ གཱམཔྤཝེསནམནཱརོཙེཏྭཱ ཡཐཱཀཱམཾ གནྟུཾ ཝཊྚཏི. ཏསྨཱ ཨདྡྷཱནམགྒགམནཀཱལེ ཨེཀོ བྷིཀྑུ གཱམཔྤཝེསནཝཏྟཾ པཱུརེཏྭཱ གཱམཾ པཝིསིཏྭཱ ཨེཀཾ ཨཱཝསཐཾ པུརཏོཝ ཋིཏཾ པཏྭཱ པརིཀྑཱརཾ ཋཔེཏྭཱ ཝཱསཱུཔགཏོ ཙེ ཧོཏི, ཨིཏརེཧི ཏསྶ སནྟིཀཾ ཡཐཱསུཁཾ གནྟུཾ ཝཊྚཏི. ཀོ པན ཝཱདོ ཙཏཱུཧཔཉྩཱཧཾ ཝཱསམདྷིཊྛཱཡ ཝསིཏབྷིཀྑཱུནཾ སནྟིཀཾ གནྟུཉྩ ཝཱསཱུཔགཏཱནཾ སནྟིཀཾ གནྟུཉྩ ཝཊྚཏཱིཏི. བུདྡྷཔཱུཛམྤི ཡཐཱསུཁཾ གནྟུཾ ཝཊྚཏི. ཝུཏྟམྤི ཙེཏཾ ཨཊྛཀཐཱཡཾ ‘‘ཨནཱཔཏྟི ཀཱརཎཾ པཊིཙྩ ཏཧཾ ཏཧཾ ཨོལོཀེཏཱི’’ཏི. ཏཏྠ ཀཱརཎཾ ནཱམ ཨཱམིསཔཱུཛཱཏི ཝེདིཏབྦཱཏི ལིཁིཏཾ.

ཚབྦཱིསཏིསཱརུཔྤཝཎྞནཱ ནིཊྛིཏཱ.

ཡསྨཱ ‘‘སམཏིཏྟིཀོ པིཎྜཔཱཏོ པཊིགྒཧེཏབྦོ’’ཏི (པཱཙི. ༦༠༢-༦༠༣) ཝཙནཾ པིཎྜཔཱཏོ སམཔུཎྞོ པཊིགྒཧེཏབྦོཏི དཱིཔེཏི, ཏསྨཱ ཨཏྟནོ ཧཏྠགཏེ པཏྟེ པིཎྜཔཱཏོ དིཡྻམཱནོ ཐཱུཔཱིཀཏོཔི ཙེ ཧོཏི, ཝཊྚཏཱིཏི དཱིཔིཏོ ཧོཏི. སཱུཔོདནཝིཉྙཏྟིཡཾ མུཁེ པཀྑིཔིཏྭཱ ཝིཔྤཊིསཱརེ ཨུཔྤནྣེ པུན ཨུགྒིརིཏུཀཱམསྶཱཔི སཧསཱ ཙེ པཝིསཏི, ཨེཏྠ ཨསཉྩིཙྩ ¶ བྷུཉྫཏི ནཱམ. ཝིཉྙཏྟིཀཏཉྩ ཨཀཏཉྩ ཨེཀསྨིཾ ཋཱནེ ཋིཏཾ སཧསཱ ཨནུཔདྷཱརེཏྭཱ གཧེཏྭཱ བྷུཉྫཏི, ཨསྶཏིཡཱ བྷུཉྫཏི ནཱམ.

སཡཾ ¶ ཡཱནགཏོ ཧུཏྭཱ, ཡཐཱ ཡཱནགཏསྶ ཙེ;

ཨལཾ ཝཏྠུཾ ཏཐཱ ནཱལཾ, སཚཏྟོ ཚཏྟཔཱཎིནོ.

‘‘སཱུཔོདནཝིཉྙཏྟིསིཀྑཱཔདཾ ཐེཡྻསཏྠསམུཊྛཱནཾ, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདན’’ནྟི པཱཋོ.

སེཁིཡཝཎྞནཱ ནིཊྛིཏཱ.

བྷིཀྑུཔཱཏིམོཀྑཝཎྞནཱ ནིཊྛིཏཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

བྷིཀྑུནཱིཔཱཏིམོཀྑཝཎྞནཱ

པཱརཱཛིཀཀཎྜཾ

ཨབྷིལཱཔམཏྟམེཝཱཏི ¶ ¶ ཨེཏྠ དཧརཝསེན ‘‘བྷནྟེ’’ཏི ཙ ཝུཌྜྷཝསེན ‘‘ཨཱཝུསོ’’ཏི ཙ ཏཏྠ དུཝིདྷོ ཨབྷིལཱཔོ, ཨིདྷ པན ཝུཌྜྷདཧརཱནཾ ‘‘ཨཡྻཱ’’ཏི ཨེཀམེཝ.

ཀཱཡསཾསགྒེ ཝུཏྟནཡེནཱཏི ཨེཏྠ ཏབྦཧུལནཡེན ཀིརིཡསམུཊྛཱནཏཱ ཝུཏྟཱ. ‘‘ཀཱཡསཾསགྒཾ སམཱཔཛྫེཡྻཱ’’ཏི ཨཝཏྭཱ པན ‘‘སཱདིཡེཡྻཱ’’ཏི ཝུཏྟཏྟཱ ཨཀིརིཡཏོཔི སམུཊྛཱཏཱིཏི ཝེདིཏབྦཾ. ཡཐཱ ཙེཏྠ, ཨེཝཾ ཧེཊྛཱ ‘‘མནུསྶིཏྠིཡཱ ཏཡོ མགྒེ མེཐུནཾ དྷམྨཾ པཊིསེཝནྟསྶ ཨཱཔཏྟི པཱརཱཛིཀསྶཱ’’ཏིཨཱདིནཱ (པཱརཱ. ༥༦) ནཡེན ཀིརིཡསམུཊྛཱནཏཾ ཝཏྭཱ ཏདནནྟརཾ ‘‘བྷིཀྑུཔཙྩཏྠིཀཱ མནུསྶིཏྠིཾ བྷིཀྑུསྶ སནྟིཀཾ ཨཱནེཏྭཱ ཝཙྩམགྒེན ཨངྒཛཱཏཾ ཨབྷིནིསཱིདེནྟི, སོ ཙེ པཝེསནཾ སཱདིཡཏཱི’’ཏིཨཱདིནཱ (པཱརཱ. ༥༨) ནཡེན ཨཀིརིཡསམུཊྛཱནསྶཔི ཝུཏྟཏྟཱ པཋམཔཱརཱཛིཀཱཡཔི ཏབྦཧུལནཡེནེཝ ཀིརིཡསམུཊྛཱནཏཱ ཝེདིཏབྦཱ. ན ཧི པཝེསནསཱདིཡནཱདིམྷི ཀིརིཡསམུཊྛཱནཏཱ དིསྶཏི.

ཨངྒཛཱཏཙལནཉྩེཏྠ ¶ ན སཱརཏོ དཊྛབྦཾ ‘‘སོ ཙེ པཝེསནཾ ན སཱདིཡཏི, པཝིཊྛཾ ན སཱདིཡཏི, ཋིཏཾ ན སཱདིཡཏི, ཨུདྡྷརཎཾ སཱདིཡཏི, ཨཱཔཏྟི པཱརཱཛིཀསྶཱ’’ཏི (པཱརཱ. ༥༨) ཨེཏྠ ཋིཏནསཱདིཡནེ པཀཏིཡཱཔི པརིཔུཎྞཙལནཏྟཱ. སཱདིཡནཔཙྩཡཱ པཊིསེཝནཙལནཉྩེཏྠ ན དིསྶཏེཝཱཏི ཏབྦཧུལནཡེནེཝ ཀིརིཡསམུཊྛཱནཏཱ གཧེཏབྦཱ.

ཨཔིཙ བྷིཀྑུནིཡཱཔི པཋམཔཱརཱཛིཀེ ཏསྶ སཱདིཡནསྶ སརཱུཔེན ཝུཏྟཏྟཱ ཏདནུརཱུཔཝསེན ཝིབྷངྒནཡམནོལོཀེཏྭཱ ‘‘ཀིརིཡསམུཊྛཱན’’མིཙྩེཝ ཝུཏྟཾ. ཡཐཱ ཙེཏེསུ ཏབྦཧུལནཡེན ཀིརིཡསམུཊྛཱནཏཱ ཝུཏྟཱ, ཏཐཱ སུརཱདཱིནཾ ཨཀུསལེནེཝ པཱཏབྦཏཱ. ཨིཏརཐཱ ‘‘ཡཾ ཨཀུསལེནེཝ ¶ ཨཱཔཛྫཏི, ཨཡཾ ལོཀཝཛྫཱ, སེསཱ པཎྞཏྟིཝཛྫཱ’’ཏི ཝུཏྟེ ལོཀཝཛྫཔཎྞཏྟིཝཛྫཱནཾ ནིཡམལཀྑཎསིདྡྷི ཧོཏི, ཏཐཱ ཏཾ ཨཝཏྭཱ ‘‘ཡསྶཱ སཙིཏྟཀཔཀྑེ ཙིཏྟཾ ཨཀུསལམེཝ ཧོཏི, ཨཡཾ ལོཀཝཛྫཱ, སེསཱ པཎྞཏྟིཝཛྫཱ’’ཏི (ཀངྑཱ. ཨཊྛ. པཋམཔཱརཱཛིཀཝཎྞནཱ) ཝུཏྟེ ལོཀཝཛྫཝཙནཾ ནིརཏྠཀཾ སིཡཱ ཝཏྠུཨཛཱནནཔཀྑེཔི ཨཀུསལེནེཝ པཱཏབྦཏྟཱ. ཡསྨཱ ཏཏྠ སུརཱཔཱནཝཱིཏིཀྐམསྶ ཨཀུསལཙིཏྟུཔྤཱདོ ནཏྠི, ཏསྨཱ ཁནྡྷཀཊྛཀཐཱཡཾ ‘‘མཛྫཔཱནེ པན བྷིཀྑུནོ ཨཛཱནིཏྭཱཔི བཱིཛཏོ པཊྛཱཡ མཛྫཾ པིཝནྟསྶ པཱཙིཏྟིཡཾ. སཱམཎེརོ ཛཱནིཏྭཱཝ པིཝནྟོ སཱིལབྷེདཾ ཨཱཔཛྫཏི, ན ཨཛཱནིཏྭཱ’’ཏི (མཧཱཝ. ཨཊྛ. ༡༠༨) ཝུཏྟཾ, ན ཝུཏྟཾ ‘‘ཝཏྠུཨཛཱནནཔཀྑེ པཱཎཱཏིཔཱཏཱདཱིནཾ སིདྡྷིཀརཨཀུསལཙིཏྟུཔྤཱདསདིསེ ཙིཏྟུཔྤཱདེ སཏིཔི སཱམཎེརོ སཱིལབྷེདཾ ནཱཔཛྫཏཱི’’ཏི. ཨབྷིནིཝེསཝཙནཾ པཱཎཱཏིཔཱཏཱདཱིཧི སམཱནགཏིཀཏྟཱ སཱམཎེརཱནཾ སུརཱཔཱནསྶ. ‘‘སུརཱམེརཡིམེ’’ཏི ཝཏྠུཾ ཛཱནིཏྭཱ པཱཏབྦཏཱདིཝསེན ཝཱིཏིཀྐམནྟསྶ ཨཀུསལསྶ ཨསམྦྷཝོ ནཏྠི. ཏེན ཝུཏྟཾ ‘‘ཡསྶཱ སཙིཏྟཀཔཀྑེ’’ཏིཨཱདི.

ཀིཉྩེཏྠ – ཡུཏྟིཝཙནེན ཨརཧནྟཱནཾ ཨཔྤཝིསནཏོ སཙིཏྟཀཱཙིཏྟཀཔཀྑེསུ ཨཀུསལནིཡམོཏི ཙེ? ན, དྷམྨཏཱཝསེན སེཀྑཱནམྤི ཨཔྤཝིསནཏོ. ཨཙིཏྟཀཔཀྑེ ཨཀུསལནིཡམཱབྷཱཝདསྶནཏྠཾ སུཔནྟསྶ མུཁེ པཀྑིཏྟཛལབིནྡུམིཝ སུརཱབིནྡུཨཱདཡོ ཨུདཱཧརིཏབྦཱ. ཏབྦཧུལནཡེན ཧི ཨཏྠེ གཧིཏེ པུབྦེནཱཔརཾ ཨཊྛཀཐཱཡ སམེཏི སདྡྷིཾ པཱལི༹ཡཱ ཙཱཏི. ཨཱཙརིཡཱཔི སུརཱཔཱནེ ཨཀུསལནིཡམཱབྷཱཝམེཝ ཝདནྟི. ཨེཀཙྩེ པན ཀིརིཡསམུཊྛཱནཏཱ པནསྶ ཏབྦཧུལནཡམེཝ, ན པཋམཔཱརཱཛིཀེ. ཀཐཾ? ཀཱཡསཾསགྒསིཀྑཱཔདཾ པཋམཔཱརཱཛིཀསམུཊྛཱནཾ. ཨེཏྠ བྷིཀྑུསྶ ཙ བྷིཀྑུནིཡཱ ཙ ཀཱཡསཾསགྒབྷཱཝེ སཏི བྷིཀྑུནཱི ཀཱཡངྒཾ ཨཙོཔཡམཱནཱཔི ཙིཏྟེནེཝ ཨདྷིཝཱསེཏི, ཨཱཔཛྫཏི, ན ཨེཝཾ བྷིཀྑུ. བྷིཀྑུ པན ཙོཔཡམཱནོཝ ཨཱཔཛྫཏི, ཨེཝམེཝ པཋམཔཱརཱཛིཀེཔི ཙོཔནེ སཏི ཨེཝ ཨཱཔཛྫཏི, ནཱསཏི. པཝེསནཾ ¶ སཱདིཡཏཱིཏི ཨེཏྠ པཝེསནསཱདིཡནཾ ནཱམ སེཝནཙིཏྟུཔྤཱདནཾ, མགྒེན ཝཱ མགྒཔྤཊིཔནྣམྤི ཨིཙྪནྟི. ཏསྶཱཔི ཀཱཡཙལནཾ ཨེཀནྟཾ ཨཏྠི ཨེཝ. ཨེཝཾ སནྟེཔི ཝཱིམཾསིཏྭཱ གཧེཏབྦནྟི ཝདནྟཱིཏི ལིཁིཏཾ

པཱརཱཛིཀཝཎྞནཱ ནིཊྛིཏཱ.

སངྒྷཱདིསེསཀཎྜཾ

༡. ཨུསྶཡཝཱདིཀཱསིཀྑཱཔདཝཎྞནཱ

བྷིཀྑུནཱིནཾ ¶ ¶ སངྒྷཱདིསེསཾ པཏྭཱ ཝུཊྛཱནཝིདྷཡོ སནྡསྶནཏྠཾ ‘‘ཨཡཾ བྷིཀྑུནཱི…པེ… ཨཱཔནྣཱ’’ཏི པུགྒལནིཡམཾ ཀཏྭཱ པཱརཱཛིཀཏོ ཨདྷིཔྤཱཡནྟི ‘‘ནིསྶཱརཎཱིཡཾ སངྒྷཱདིསེས’’ནྟི ཨཱཔཏྟིནཱམགྒཧཎཉྩ ཀཏཾ. ‘‘སམུཊྛཱནཱདཱིནི པཋམཀཐིནསདིསཱནི, ཨིདཾ པན ཀིརིཡམེཝཱ’’ཏི པཱཋོ.

ཨུསྶཡཝཱདིཀཱསིཀྑཱཔདཝཎྞནཱ ནིཊྛིཏཱ.

༢. ཙོརིཝུཊྛཱཔིཀཱསིཀྑཱཔདཝཎྞནཱ

ཀཏྠཙི ཨགནྟྭཱ ནིསིནྣཊྛཱནེ ཨེཝ ནིསཱིདིཏྭཱ ཀརོནྟིཡཱ ཝཱཙཱཙིཏྟཏོ, ཁཎྜསཱིམཱདིགཏཱཡ ཀཱཡཝཱཙཱཙིཏྟཏོ.

ཙོརིཝུཊྛཱཔིཀཱསིཀྑཱཔདཝཎྞནཱ ནིཊྛིཏཱ.

༣. ཨེཀགཱམནྟརགམནསིཀྑཱཔདཝཎྞནཱ

‘‘ཨཱབྷོགཾ ཝིནཱ’’ཏི ཝུཏྟཏྟཱ ཨཱབྷོགེ སཏི ཨནཱཔཏྟི, ཨིམསྨིཾ པན སིཀྑཱཔདེ སམནྟཔཱསཱདིཀཱཡཾ ཨུཔཙཱརཱཏིཀྐམེ ཨཱཔཏྟི ཝུཏྟཱ, ཨིདྷ ཨོཀྐམེ. དྭཱིསུཔི ཝུཏྟཾ ཨཏྠཏོ ཨེཀམེཝ གཱམནྟརགམནསངྒྷཱདིསེསཾ ཨུཔཙཱརསྶ སནྡྷཱཡ ཝུཏྟཏྟཱ. གཎམྷཱ ཨོཧཱིཡནསྶ ཝིརོདྷོ. ‘‘ཨརཉྙེ’’ཏི ཨིདཾ ཨཏྠཝསེན ཝུཏྟཾ, གཱམནྟརེཔི ཧོཏི ཨེཝ.

སིཀྑཱཔདཱ ¶ བུདྡྷཝརེན ཝཎྞིཏཱཏི གཱཐཱཡ ཝསེན, ཨཊྛཀཐཱཡམྤི གཱམནྟརཔརིཡཱཔནྣཾ ནདིཔཱརནྟི ཝུཏྟཾ.

ཨེཀགཱམནྟརགམནསིཀྑཱཔདཝཎྞནཱ ནིཊྛིཏཱ.

‘‘ཚཱདནཔཙྩཡཱ ¶ པན དུཀྐཊཾ ཨཱཔཛྫཏཱི’’ཏི ཨིདཾ –

‘‘ཨཱཔཛྫཏི གརུཀཾ སཱཝསེསཾ;

ཚཱདེཏི ཨནཱདརིཡཾ པཊིཙྩ;

ན བྷིཀྑུནཱི ནོ ཙ ཕུསེཡྻ ཝཛྫཾ;

པཉྷཱམེསཱ ཀུསལེཧི ཙིནྟིཏཱ’’ཏི. (པརི. ༤༨༡) –

ཨིམཱཡ ཝིརུཛ྄ཛྷཏི. ཏསྨཱ པམཱདལེཁཱ ཝིཡ དིསྶཏཱིཏི གཝེསིཏབྦོ ཨེཏྠ ཨཏྠོ. བྷིཀྑཱུནཾ མཱནཏྟཀཐཱཡཾ ‘‘པརིཀྑིཏྟསྶ ཝིཧཱརསྶ པརིཀྑེཔཏོ, ཨཔརིཀྑིཏྟསྶ པརིཀྑེཔཱརཧཊྛཱནཏོ དྭེ ལེཌྜུཔཱཏེ ཨཏིཀྐམིཏྭཱ’’ཏི (ཀངྑཱ. ཨཊྛ. ནིགམནཝཎྞནཱ) ཝུཏྟཾ, ཨིདྷ པན ‘‘གཱམཱུཔཙཱརཏོ ཙ བྷིཀྑཱུནཾ ཝིཧཱརཱུཔཙཱརཏོ ཙ དྭེ ལེཌྜུཔཱཏེ’’ཏིཨཱདི ཝུཏྟཾ. ཏཏྲ བྷིཀྑཱུནཾ ཝུཏྟཔྤཀཱརཔྤདེསཾ ཨཏིཀྐམིཏྭཱ གཱམེཔི ཏཾ ཀམྨཾ ཀཱཏུཾ ཝཊྚཏི, བྷིཀྑུནཱིནཾ པན གཱམེ ན ཝཊྚཏི. ཏསྨཱ ཨེཝཾ ཝུཏྟནྟི ཨེཀེ. ཨཔརེ པན བྷིཀྑཱུནམྤི གཱམེ ན ཝཊྚཏི. བྷིཀྑུཝིཧཱརོ ནཱམ པུབྦེ ཨེཝ གཱམཱུཔཙཱརཾ ཨཏིཀྐམིཏྭཱ ཋིཏོ, ཏསྨཱ གཱམཾ ཨཝཏྭཱ ཝིཧཱརཱུཔཙཱརམེཝ ཧེཊྛཱ ཝུཏྟཾ. བྷིཀྑུནཱིནཾ ཝིཧཱརོ གཱམེ ཨེཝ ཝཊྚཏི, ན བཧི, ཏསྨཱ གཱམཱུཔཙཱརཉྩ ཝིཧཱརཱུཔཙཱརཉྩ ཨུབྷཡམེཝེཏྠ དསྶིཏཾ. ཏསྨཱ ཨུབྷཡཏྠཱཔི ཨཏྠཏོ ནཱནཱཏྟཾ ནཏྠཱིཏི ཝདནྟི. ཡཾ ཡུཛྫཏི, ཏཾ གཧེཏབྦཾ.

སངྒྷཱདིསེསཝཎྞནཱ ནིཊྛིཏཱ.

ནིསྶགྒིཡཀཎྜཾ

དུཏིཡེ ¶ ¶ ཨིདྷ བྷཱཛཱཔིཏཱཡ ལདྡྷཙཱིཝརཾ ནིསྶགྒིཡཾ ཧོཏི, ཏཾ ཝིནཡཀམྨཾ ཀཏྭཱཔི ཨཏྟནཱ ན ལབྦྷཏི.

ཏཏིཡེ ‘‘སམུཊྛཱནཱདཱིནི ཨདིནྣཱདཱནསདིསཱནི, ཨིདཾ པན དུཀྑཝེདན’’ནྟི པཱཋོ.

ཙཏུཏྠེ པཋམཾ ཝིཉྙཏྟཾ ཨལབྷིཏྭཱ ཨཉྙཾ ཏཏོ ཨཱུནཏརམྤི ལབྷེཡྻ, ནིསྶགྒིཡམེཝ ཨངྒསམྤཏྟིཏོ.

ནིསྶགྒིཡཝཎྞནཱ ནིཊྛིཏཱ.

པཱཙིཏྟིཡཀཎྜཾ

༡. པཋམཝགྒཝཎྞནཱ

པཋམེ ¶ ¶ ཧརིཏཔཏྟཝཎྞོ ཧརིཏཀོ. ཙཱཔལསུཎཾ ཨམིཉྫཀོ. ཨངྐུརམཏྟམེཝ ཧི ཏསྶ ཧོཏི. པལཎྜུཀཱདཡོ སབྷཱཝེནེཝ ཝཊྚནྟི. སཱུཔསམྤཱཀཱདཱི ཝིནཱཔི ཨནྟམསོ ཡཱགུབྷཏྟེཔི པཀྑིཔིཏུཾ ཝཊྚཏཱིཏི ལིཁིཏཾ, ‘‘བྷིཀྑུནིཡཱཔི གིལཱནཱཡ པུརེབྷཏྟམེཝ ལསུཎཾ ཀཔྤཏི, ན ཨགིལཱནཱཡཱ’’ཏི ཨབྷཡགིརཱིནཾ ཨུགྒཧོཏི.

དུཏིཡེ ཨཱབཱདྷཔཙྩཡཱ བྷིཀྑུནིསངྒྷཾ ཨཱཔུཙྪིཏྭཱ སཾཧརཱཔེཏུཾ ཝཊྚཏི, བྷིཀྑུསྶ ཨེཏྠ ཙ ལསུཎེ ཙ དུཀྐཊཾ.

སཏྟམེ ‘‘སམུཊྛཱནཱདཱིནི ཨདྡྷཱནམགྒསིཀྑཱཔདསདིསཱནཱི’’ཏི པཱཋོ.

ནཝམེ ཀུཊྚོ ནཱམ གྷརཀུཊྚོ. པཱཀཱརོ ནཱམ པརིཀྑེཔཔཱཀཱརོ.

ཚཌྜིཏཁེཏྟེཏི པུརཱཎཁེཏྟེ. སངྒྷསནྟཀེ བྷིཀྑུསྶ ཚཌྜེཏུཾ ཝཊྚཏི སངྒྷཔརིཡཱཔནྣཏྟཱ. བྷིཀྑུནཱིནམྤི སངྒྷསནྟཀེ བྷིཀྑུསངྒྷསནྟཀེ ཝུཏྟནཡེནེཝ ཝཊྚཏི. ཨེཝཾ སནྟེཔི སཱརུཔྤཝསེན ཀཱཏབྦནྟི ལིཁིཏཾ.

དསམེ ‘‘སཡཾ ཏཱནི ཝཏྠཱུནི ཀརོནྟིཡཱ’’ཏིཨཱདི ཨིདྷ སིཀྑཱཔདེ ནཏྠི. ཀསྨཱ? ཨེལ༹ཀལོམསམུཊྛཱནཏྟཱ. ཡདི ཨེཝཾ ཀསྨཱ ཝུཏྟནྟི ཙེ? སུཏྟཱནུལོམམཧཱཔདེསཏོ. ཡདི ནཙྩཱདཱིནི པསྶིཏུཾ ཝཱ སུཎིཏུཾ ཝཱ ན ལབྷཏི, པགེཝ ཨཏྟནཱ ཀཱཏུནྟི ནཡཏོ ལབྦྷམཱནཏྟཱ ཝུཏྟཾ. ཨིཏརཐཱ མཧཱཔདེསཱ ནིརཏྠཀཱ སིཡུཾ. ‘‘ཨེཝཾ ཨཉྙཏྠཔི ནཡོ ནེཏབྦོ. སམུཊྛཱནམྤི ཨིདྷ ཝུཏྟམེཝ ¶ ཨགྒཧེཏྭཱ ཚསམུཊྛཱནཝསེན གཧེཏབྦ’’ནྟི ཨཱཙརིཡཱ. ཨིདྷ ཝུཏྟཾ སམུཊྛཱནཾ ནཱམ མཱུལབྷཱུཏསྶ ཨནྟརཱ ཝུཏྟཱཔཏྟིཡཱ, ཏསྨཱ ཨེལ༹ཀལོམསམུཊྛཱནམེཝཱཏི ཨཔརེ. ཨཱརཱམེ ཋཏྭཱཏི ན ཀེཝལཾ ཋཏྭཱ, ཏཏོ གནྟྭཱ པན སབྦིརིཡཱཔཐེཧིཔི ལབྷཏི. ཨཱརཱམེ ཋིཏཱཏི པན ཨཱརཱམཔརིཡཱཔནྣཱཏི ཨཏྠོ. ཨིཏརཐཱ ནིསིནྣཱཔི ན ལབྷེཡྻཱཏི.

པཋམཝགྒཝཎྞནཱ ནིཊྛིཏཱ.

༢. དུཏིཡཝགྒཝཎྞནཱ

པཉྩམེ ¶ ཨུཔཙཱརོ དྭཱདསཧཏྠོ. ‘‘སམུཊྛཱནཱདཱིནི ཀཐིནསདིསཱནི, ཨིདཾ པན ཀིརིཡཱཀིརིཡ’’ནྟི པཱཋོ.

སཏྟམེ དྷུཝཔཉྙཏྟེཏི བྷིཀྑུནཱིནཾ ཨཏྠཱཡ. ཀུལཱནཱིཏི ཀུལགྷརཱནི.

དུཏིཡཝགྒཝཎྞནཱ ནིཊྛིཏཱ.

༣. ཏཏིཡཝགྒཝཎྞནཱ

ཙཏུཏྠེ སངྒྷཱཊིཨཱདིཝསེན ཨདྷིཊྛིཏཱནཾ སངྒྷཱཊིཙཱརཾ.

པཉྩམེ ‘‘ཨིདཾ པན ཀིརིཡཱཀིརིཡ’’ནྟི པཱཋོ.

ཚཊྛེ ཨཉྙསྨིཾ པརིཀྑཱརེ དུཀྐཊནྟི ཐཱལཀཱདཱིནཾ ཝཱ སཔྤིཏེལཱདཱིནཾ ཝཱ ཨཉྙཏརསྨིཾ.

ཏཏིཡཝགྒཝཎྞནཱ ནིཊྛིཏཱ.

༤. ཙཏུཏྠཝགྒཝཎྞནཱ

ཚཊྛེ སཾསཊྛཝིཧཱརསིཀྑཱཔདེ ‘‘སེསམེཏྠ པཋམཨརིཊྛསིཀྑཱཔདེ ཝུཏྟཝིནིཙྪཡསདིསམེཝཱ’’ཏི པཱཋོ.

ཙཏུཏྠཝགྒཝཎྞནཱ ནིཊྛིཏཱ.

༥. པཉྩམཝགྒཝཎྞནཱ

‘‘ཙིཏྟཱགཱརཾ ¶ ནཱམ ཡཏྠ ཀཏྠཙི མནུསྶཱནཾ ཀཱིལི༹ཏུཾ རམིཏུཾ ཀཏཾ ཧོཏཱི’’ཏིཨཱདིནཱ (པཱཙི. ༩༧༩) པཱལི༹ཡཾ ཝུཏྟཏྟཱ ཙིཏྟཱགཱརཱདཱིནི སབྦེསཾ ཨཏྠཱཡ ཀཏཱནི, ན རཉྙོ ཨེཝ.

སཏྟམེ ཨེཏེན ནིསྶཛྫིཏུཾ ཀཔྤིཡཾ ཝུཏྟཾ. ‘‘ནིསྶཛྫིཏྭཱ པརིབྷུཉྫཏཱི’’ཏི (པཱཙི. ༡༠༠༧) པཱལི༹ ཙ ཨཏྠི. ‘‘སམུཊྛཱནཱདཱིནི ཀཐིནསདིསཱནི, ཨིདཾ པན ཀིརིཡཱཀིརིཡ’’ནྟི པཱཋོ. ཨཊྛམེཔི ཨེསོཝ པཱཋོ.

པཉྩམཝགྒཝཎྞནཱ ནིཊྛིཏཱ.

༦. ཚཊྛཝགྒཝཎྞནཱ

དསམེ ¶ ‘‘སམུཊྛཱནཱདཱིནི ཀཐིནསདིསཱནི, ཨིདཾ པན ཀིརིཡཱཀིརིཡ’’ནྟི པཱཋོ.

ཚཊྛཝགྒཝཎྞནཱ ནིཊྛིཏཱ.

༨. ཨཊྛམཝགྒཝཎྞནཱ

པཋམདུཏིཡཏཏིཡེསུ ‘‘གིཧིགཏཱ’’ཏི ཝཱ ‘‘ཀུམཱརིབྷཱུཏཱ’’ཏི ཝཱ ན ཝཏྟབྦཱ. ཝདནྟི ཙེ, ཀམྨཾ ཀུཔྤཏི.

ཨེཀཱདསམེ ཚནྡཾ ཨཝིསྶཛྫེཏྭཱཏི ‘‘ཡཐཱསུཁ’’ནྟི ཨཝཏྭཱ. ཨེཏྠ པན ཨཡཾ ཝིནིཙྪཡོ – ‘‘པཱརིཝཱསིཀཚནྡདཱནེནཱ’’ཏི ཨིདཾ ཨུདྡྷརིཏྭཱ ‘‘ཝུཊྛིཏཱཡ པརིསཱཡཱ’’ཏི (པཱཙི. ༡༡༦༨) པདབྷཱཛནཾ ཝུཏྟཾ. ཨེཏསྶ པན སམནྟཔཱསཱདིཀཱཡཾ ‘‘ཝུཊྛིཏཱཡ པརིསཱཡཱཏི ཚནྡཾ ཝིསྶཛྫེཏྭཱ ཀཱཡེན ཝཱ ཝཱཙཱཡ ཝཱ ཚནྡཝིསྶཛྫནམཏྟེན ཝཱ ཝུཊྛིཏཱཡཱ’’ཏི (པཱཙི. ཨཊྛ. ༡༡༦༧) ཝུཏྟཾ. ཨིདྷ ཚནྡསྶ པན ཨཝིསྶཊྛཏྟཱ ཀམྨཾ ཀཱཏུཾ ཝཊྚཏཱིཏི ཝུཏྟཾ. ཏསྨཱ ཚནྡཾ ཨཝིསྶཛྫེཏྭཱཝ དྭཱདསཧཏྠཔཱསེ ཝིཧརིཏྭཱ པུན སནྣིཔཱཏཀརཎཉྩ ཝཊྚཏཱིཏི ལིཁིཏཾ.

ཨཊྛམཝགྒཝཎྞནཱ ནིཊྛིཏཱ.

༩. ནཝམཝགྒཝཎྞནཱ

ཏཏིཡེ ¶ ‘‘སེསཾ ཝུཏྟནཡེན ཝེདིཏབྦཾ, ཨིདཾ པན ཨཀུསལཙིཏྟ’’ནྟི པཱཋོ.

ཙཏུཏྠེ ཝུཏྟནཡེནཱཏི ཏཏིཡེ ཝུཏྟནཡེན.

ཨེཀཱདསམེ ‘‘སམུཊྛཱནཱདཱིནི ཀཐིནསདིསཱནི, ཨིདཾ པན ཀིརིཡཱཀིརིཡ’’ནྟི པཱཋོ.

དྭཱདསམེ ‘‘སམུཊྛཱནཱདཱིནི པདསོདྷམྨསདིསཱནི, ཨིདཾ པན ཀིརིཡཱཀིརིཡ’’ནྟི པཱཋོ.

ཏེརསམེ ‘‘སཾཀཙྩིཀཾ ནཱམ ཨདྷཀྑཀཾ ཨུབྦྷནཱབྷི, ཏསྶཱ པཊིཙྪཱདནཏྠཱཡཱ’’ཏི (པཱཙི. ༡༢༢༦) པཱལི༹ཡཾ ཝུཏྟཏྟཱ ཨིདྷཱཔི ‘‘ཨདྷཀྑཀཨུབྦྷནཱབྷིསངྑཱཏསྶ སརཱིརསྶ པཊིཙྪཱདནཏྠ’’ནྟི ¶ པཱཋོ. ཨཔརིཀྑེཔེ ཨཱཔཏྟིཔརིཙྪེདཾ སམནྟཔཱསཱདིཀཝསེན ཨགྒཧེཏྭཱ ཨིདྷ ཝུཏྟནཡེན གཧེཏབྦནྟི ལིཁིཏཾ.

ནཝམཝགྒཝཎྞནཱ ནིཊྛིཏཱ.

སུདྡྷཔཱཙིཏྟིཡཝཎྞནཱ ནིཊྛིཏཱ.

སམུཊྛཱནཝིནིཙྪཡཝཎྞནཱ

སམུཊྛཱནཱནཾ ཝིནིཙྪཡེ པན གིརགྒསམཛྫཱདཱིནི ‘‘ཨཙིཏྟཀཱནི ལོཀཝཛྫཱནཱི’’ཏི ཝུཏྟཏྟཱ ‘‘ནཙྩ’’ནྟི ཝཱ ‘‘གནྡྷ’’ནྟི ཝཱ ཨཛཱནིཏྭཱཔི དསྶནེན, ཝིལིམྤནེན ཝཱ ཨཱཔཛྫནཏོ ཝཏྠུཨཛཱནནཙིཏྟེན ཨཙིཏྟཀཱནི. ‘‘ནཙྩ’’ནྟི ཝཱ ‘‘གནྡྷ’’ནྟི ཝཱ ཛཱནིཏྭཱ པསྶནྟིཡཱ, ཝིལིམྤནྟིཡཱ ཝཱ ཨཀུསལཏྟཱ ཨེཝ ལོཀཝཛྫཱནི. ཙོརིཝུཊྛཱཔནཱདཱིནི ‘‘ཙོརཱི’’ཏིཨཱདིནཱ ཝཏྠུཾ ཛཱནིཏྭཱ ཀརཎེཡེཝ ཨཱཔཛྫནཏྟཱ སཙིཏྟཀཱནི. ཨུཔསམྤདཱདཱིནཾ ཨེཀནྟཱཀུསལཙིཏྟེནེཝ ཨཀཏྟབྦཏྟཱ པཎྞཏྟིཝཛྫཱནི. ‘‘ཨིདྷ སཙིཏྟཀཱཙིཏྟཀཏཱ པཎྞཏྟིཛཱནནཱཛཱནནཏཱཡ ཨགྒཧེཏྭཱ ཝཏྠུཛཱནནཱཛཱནནཏཱཡ གཧེཏབྦ’’ནྟི ལིཁིཏཾ. ཨདྷིཔྤེཏཏྟཱ སངྑེཔཏོ དསྶནཱབྷཱཝཱ –

ཨཙིཏྟཀཏྟཾ ¶ དྭིདྷཱ མཏཾ, ཝཏྠུཔཎྞཏྟིཨཉྙཱཎཱ;

ཝུཏྟཾ ཉཱཎཾ དྭིདྷཱ ཨིདྷ, སཀནཱམེན ཨཉྙཱཏཾ.

པརནཱམཉྩ ཛཱནནཾ, ཝཏྠུསྶེཀཾ བལཀྐཱརེ;

ཨེཀདྷཱ སམཙཱརིཀེ, ཏསྨིཾ ཏཔྤཊིབནྡྷོཏི.

པརནཱམེན ཛཱནནཾ, དྭིདྷཱ མུཏྟཱདིཀེ ཨེཀཾ;

ཨེཀཾ ལོམཱདིཀེ མཏནྟི, ཨཡཾ བྷེདོ ཝེདིཏབྦོ.

སེསམེཏྠ ཨུཏྟཱནཾ, ཨནུཏྟཱནཏྠེ ཝུཏྟཝིནིཙྪཡཏྟཱ ན ཨུདྡྷཊནྟི;

སམུཊྛཱནཝིནིཙྪཡཝཎྞནཱ ནིཊྛིཏཱ.

བྷིཀྑུནཱིཔཱཏིམོཀྑཝཎྞནཱ ནིཊྛིཏཱ.

ཀངྑཱཝིཏརཎཱིཔུརཱཎཊཱིཀཱ ནིཊྛིཏཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཀངྑཱཝིཏརཎཱི-ཨབྷིནཝཊཱིཀཱ

གནྠཱརམྦྷཀཐཱ

ཏིལོཀཏིལཀཾ ¶ ¶ བུདྡྷཾ, ཝནྡེ སུདྡྷགུཎཱཀརཾ;

ཀརུཎཱསཱིཏལཱིབྷཱུཏ-ཧདཡཾ མཧིཏོདཡཾ.

ཏེནཱཔི དྷམྨརཱཛེན, ལོཀེཀཱཙརིཡེན ཡོ;

པཱུཛིཏོ ཏཉྩ སདྡྷམྨཾ, ཝནྡེ གམྦྷཱིརམུཏྟམཾ.

མུནིནྡཙནྡསདྡྷམྨ-རཾསཱིཧི ཝིམལེཧི ཡོ;

བོདྷིཏོཧཾ སདཱ ཝནྡེ, ཏཾ སངྒྷཾ ཀུམུདཱཀརཾ.

ཝིནཡེ ¶ ནཡགམྦྷཱིརེ, སབྦཐཱ པཱརདསྶིནཱ;

ཝཱདིནཱ དུཏྟརཱགཱདྷ-སབྦསཏྠམཧཎྞཝེ.

ཡཱ ཀཏཱ བུདྡྷགྷོསེན, ཐེརེན ཐིརཙེཏསཱ;

ཀངྑཱཝིཏརཎཱི ནཱམ, མཱཏིཀཊྛཀཐཱ སུབྷཱ.

ཐིརཱནེཀགུཎོགྷེན, ཐེརེན ཝིནཡཉྙུནཱ;

ཀལྱཱཎཱཙཱརཡུཏྟེན, དྷཱིམཏཱ མུནིསཱུནུནཱ;

ཝིནཡཊྛིཏིཀཱམེན, སུམེདྷེནཱབྷིཡཱཙིཏོ.

ཏམཧཾ ཝཎྞཡིསྶཱམི, སུཝིསུདྡྷམནཱཀུལཾ;

སཱདྷཝོ ཏཾ ནིསཱམེཐ, སཀྐཙྩཾ མམ བྷཱསཏོཏི.

གནྠཱརམྦྷཀཐཱཝཎྞནཱ

སབྦཀུསལདྷམྨཔྤམུཁསྶ ཝིཔུལོལཱ༹རགུཎཝིསེསཱཝཧསྶ པརམགམྦྷཱིརསྶ པཱཏིམོཀྑསྶ ཨཏྠསཾཝཎྞནཾ ཀཏྟུཀཱམོཡམཱཙརིཡོ པཋམཾ ཏཱཝ ‘‘བུདྡྷཾ དྷམྨ’’ནྟིཨཱདིནཱ རཏནཏྟཡཔྤཎཱམཀརཎེན ཨཏྟནོ ཙིཏྟསནྟཱནཾ པུནཱཏི. ཝིསུདྡྷཙིཏྟསནྟཱནནིསྶཡཱ ཧི པཉྙཱ ཏིཀྑཝིསདབྷཱཝཔྤཏྟིཡཱ ཡཐཱདྷིཔྤེཏསཾཝཎྞནཱཡ པརིཡོསཱནགམནསམཏྠཱ ཧོཏཱིཏི ¶ . ཨཔིཙ རཏནཏྟཡཔྤཎཱམེན ཝིདྷུཏསབྦཀིབྦིསེ ཙིཏྟསནྟཱནེ བྷཝནྟརཱུཔཙིཏཱནིཔི ཨནྟརཱཡིཀཀམྨཱནི པཙྩཡཝེཀལླཏོ ཡཐཱདྷིཔྤེཏཱཡ ཨཏྠསཾཝཎྞནཱཡ ནཱལམནྟརཱཡཀརཎཱཡཱཏིཔི ཨཱཙརིཡསྶ རཏནཏྟཡཝནྡནཱ.

ཏཏྠ བུདྡྷསདྡསྶ ཏཱཝ ‘‘བུཛ྄ཛྷིཏཱ སཙྩཱནཱིཏི བུདྡྷོ, བོདྷེཏཱ པཛཱཡཱཏི བུདྡྷོ’’ཏིཨཱདིནཱ (མཧཱནི. ༡༩༢; ཙཱུལ༹ནི. པཱརཱཡནཏྠུཏིགཱཐཱནིདྡེས ༩༧; པཊི. མ. ༡.༡༦༢) ནིདྡེསནཡེན ཨཏྠོ ཝེདིཏབྦོ. ཨཐ ཝཱ སཝཱསནཱཡ ཨཉྙཱཎནིདྡཱཡ ཨཙྩནྟཝིགམཏོ, བུདྡྷིཡཱ ཝཱ ཝིཀསིཏབྷཱཝཏོ བུདྡྷཝཱཏི བུདྡྷོ ཛཱགརཎཝིཀསནཏྠཝསེན. ཨཐ ཝཱ ཀསྶཙིཔི ཉེཡྻདྷམྨསྶ ཨནཝབུདྡྷསྶ ཨབྷཱཝེན, ཉེཡྻཝིསེསསྶ ཙ ཀམྨབྷཱཝེན ཨགྒཧཎཏོ ¶ ཀམྨཝཙནིཙྪཱཡ ཨབྷཱཝེན ཨཝགམནཏྠཝསེནེཝ ཀཏྟུནིདྡེསོ ལབྦྷཏཱིཏི བུདྡྷཝཱཏི བུདྡྷོ ཡཐཱ ‘‘དིཀྑིཏོ ན དདཱཏཱི’’ཏི. ཨཏྠཏོ པན པཱརམིཏཱཔརིབྷཱཝིཏེན སཡམྦྷུཉཱཎེན སཧཝཱསནཱཡ ཝིགཏཝིདྡྷསྟནིརཝསེསུཔཀྐིལེསོ མཧཱཀརུཎཱསབྦཉྙུཏཉྙཱཎཱདིཨཔརིམེཡྻགུཎགཎཱདྷཱརོཝ ཁནྡྷསནྟཱནོ བུདྡྷོ. ཡཐཱཧ –

‘‘བུདྡྷོཏི ཡོ སོ བྷགཝཱ སཡམྦྷཱུ ཨནཱཙརིཡཀོ པུབྦེ ཨནནུསྶུཏེསུ དྷམྨེསུ སཱམཾ སཙྩཱནི ཨབྷིསམྦུཛ྄ཛྷི, ཏཏྠ ཙ སབྦཉྙུཏཾ པཏྟོ, བལེསུ ཙ ཝསཱིབྷཱཝ’’ནྟི (མཧཱནི. ༡༩༢; ཙཱུལ༹ནི. པཱརཱཡནཏྠུཏིགཱཐཱནིདྡེས ༩༧; པཊི. མ. ༡.༡༦༡),

ཏཾ བུདྡྷཾ.

དྷཱརེཏཱིཏི དྷམྨོ. ཨཡཉྷི ཡཐཱནུསིཊྛཾ པཊིཔཛྫམཱནེ ཨཔཱཡདུཀྑེ, སཾསཱརདུཀྑེ ཙ ཨཔཏམཱནེ དྷཱརེཏཱིཏི, ཏནྣིབྦཏྟཀཀིལེསཝིདྡྷཾསནཉྩེཏྠ དྷཱརཎཾ. ཨེཝཉྩ ཀཏྭཱ ཨརིཡམགྒོ, ཏསྶ ཏདཏྠསིདྡྷིཧེཏུཏཱཡ ནིབྦཱནཉྩཱཏི ཨུབྷཡམེཝ ནིཔྤརིཡཱཡཏོ དྷཱརེཏི. ཨརིཡཕལཉྩ པན ཏཾསམུཙྪིནྣཀིལེསཔཊིཔྤསྶམྦྷནེན ཏདནུཀཱུལཏཱཡ, པརིཡཏྟིདྷམྨོ ཙ ཏདདྷིགམཧེཏུཏཱཡཱཏི ཨུབྷཡམྤི པརིཡཱཡཏོ དྷཱརེཏཱིཏི ཝེདིཏབྦཾ, ཏཾ དྷམྨཾ. ཙ-སདྡོ སམུཙྩཡཏྠོ. ཏེན ཡཐཱཝུཏྟཾ བུདྡྷཾ, ཨིམཉྩ དྷམྨཾ ཝནྡིཏྭཱཏི བུདྡྷརཏནེན སཧ ཝནྡནཀིརིཡཱཡ དྷམྨརཏནཾ སམུཙྩིནོཏི.

ན ཀེཝལཾ ཨིདཾ དྭཡམེཝཱཏི ཨཱཧ ‘‘སངྒྷཉྩཱ’’ཏི. ཨརིཡེན དིཊྛིསཱིལསཱམཉྙེན སཾཧཏོ གྷཊིཏོཏི སངྒྷོ, ཨཊྛཨརིཡཔུགྒལསམཱུཧོ. ཏེཧི ¶ ཏེཧི ཝཱ མགྒཕལེཧི ཀིལེསདརཐཱནཾ སམུཙྪེདཔཊིཔྤསྶམྦྷནཝསེན སམྨདེཝ གྷཱཏིཏཏྟཱ སངྒྷོ, པོཐུཛྫནིཀསངྒྷསྶཱཔི པུབྦབྷཱགཔྤཊིཔདཱཡ ཋིཏཏྟཱ པུརིམཙེཏནཱཡ ཝིཡ དཱནེ ཨེཏྠེཝ སངྒཧོ དཊྛབྦོ. སོཔི ཧི ཀིཉྩཱཔི ཨརིཡེན དིཊྛིསཱིལསཱམཉྙེན ཨསཾཧཏོ, ནིཡྻཱནིཀཔཀྑིཡེན པན པོཐུཛྫནིཀེན སཾཧཏཏྟཱ དཀྑིཎེཡྻཔཎིཔཱཏཱརཧོ སངྒྷོཡེཝཱཏི, ཏཾ སངྒྷཾ. ཙ-སདྡསྶཏྠོ ཨེཏྠཱཔི ཝུཏྟནཡེནེཝ ཝེདིཏབྦོ.

ཀིཾཝིསིཊྛཾ བུདྡྷཾ, དྷམྨཾ, སངྒྷཉྩཱཏི ཨཱཧ ‘‘ཝནྡནཱམཱནཔཱུཛཱསཀྐཱརབྷཱཛན’’ནྟི. ཨིདཉྩ ཝིསེསནཾ པཙྩེཀཾ ཡོཛེཏབྦཾ ‘‘ཝནྡནཱམཱནཔཱུཛཱསཀྐཱརབྷཱཛནཾ. བུདྡྷཾ…པེ… ཝནྡནཱམཱནཔཱུཛཱསཀྐཱརབྷཱཛནཾ སངྒྷཉྩཱ’’ཏི. ཏཏྠ སདེཝཀེན ལོཀེན ཨརཧཏཱདཱིཧི གུཎེཧི སེཊྛབྷཱཝེན ཀརིཡམཱནོ པཎཱམོ ཝནྡནཱ, སམྨཱནོ མཱནོ, གནྡྷཔུཔྥཱདཱིཧི ཨུཔཧཱརོ པཱུཛཱ, ཨབྷིསངྑཏཔཙྩཡདཱནཾ ¶ སཀྐཱརོ, ཝནྡནཱ ཙ མཱནོ ཙ པཱུཛཱ ཙ སཀྐཱརོ ཙ ཝནྡནཱམཱནཔཱུཛཱསཀྐཱརཱ, ཏེསཾ མཧཔྥལབྷཱཝཀརཎེན བྷཱཛནཏྟཱ ཨཱདྷཱརཏྟཱ ཝནྡནཱམཱནཔཱུཛཱསཀྐཱརབྷཱཛནཾ. ཨིམིནཱ རཏནཏྟཡསྶ ཨརཧཏཱདཱིཧི གུཎེཧི ཨསམབྷཱཝཾ དསྶེཏི. ཏནྡསྶནམྤི ཏཀྐཏསྶ ནིཔཙྩཀཱརསྶ སསནྟཱནཔཝནཱདིཝསེན ཡཐཱདྷིཔྤེཏཱཡ ཨཏྠསཾཝཎྞནཱཡ ནིཔྥཱདནསམཏྠབྷཱཝདཱིཔནཏྠནྟི ཝེདིཏབྦཾ.

ཝིཔྤསནྣེན ཙེཏསཱ ཝནྡིཏྭཱཏི ཨརཧཏཱདིཨནེཀཔྤཀཱརགུཎཝིསེསཱནུསྶརཎཝསེན ཝིཝིདྷེན, ཝིསེསེན ཝཱ པསནྣེན མནསཱ སདྡྷིཾ ཀཱཡཝཱཙཱཧི ཀརཎབྷཱུཏཱཧི ཨབྷིཝནྡིཡཱཏི ཨཏྠོ, ཏཱིཧི དྭཱརེཧི ནམསྶིཏྭཱཏི ཝུཏྟཾ ཧོཏི. ཏིཝིདྷཱ ཙཱཡཾ ཝནྡནཱ ཀཱཡཝཙཱིམནོཝནྡནཱནཾ ཝསེན. ཏཏྠ བུདྡྷཱདིགུཎཱརམྨཎཱ ཀཱམཱཝཙརཀུསལཀིརིཡཱནཾ ཨཉྙཏརཙེཏནཱ ཀཱཡཝཙཱིཝིཉྙཏྟིཡོ སམུཊྛཱཔེཏྭཱ ཀཱཡཝཙཱིདྭཱརཝསེན ཨུཔྤནྣཱ ཀཱཡཝཙཱིཝནྡནཱཏི ཝུཙྩཏི, ཨུབྷཡཝིཉྙཏྟིཡོ པན ཨསམུཊྛཱཔེཏྭཱ མནོདྭཱརཝསེན ཨུཔྤནྣཱ མནོཝནྡནཱཏི. ཨིམསྶ པདསྶ ‘‘ཝཎྞནཾ ཝཎྞཡིསྶཱམཱི’’ཏི ཨིམིནཱ སམྦནྡྷོ.

ཨེཝཾ རཏནཏྟཡསྶ པཎཱམཾ དསྶེཏྭཱ ཨིདཱནི ཨཏྟནོ ནིསྶཡབྷཱུཏཱནཾ ཨཊྛཀཐཱཙརིཡཱནཉྩ པཎཱམཾ དསྶེནྟོ ‘‘ཐེརཝཾསཔྤདཱིཔཱན’’ནྟིཨཱདིམཱཧ. ཏཏྠ ཀཏཉྫལཱི པུབྦཱཙརིཡསཱིཧཱནཾ ནམོ ཀཏྭཱཏི སམྦནྡྷོ. ཀཏོ ཨཉྫལི ཀརཔུཊོ ཨེཏེནཱཏི ཀཏཉྫལཱི. ཚནྡཱནུརཀྑཎཏྠཉྷེཏྠ དཱིགྷོ ¶ , ཀཏཉྫལཱི ཧུཏྭཱཏི ཝུཏྟཾ ཧོཏི. པུབྦཱཙརིཡཱ པོརཱཎཊྛཀཐཱཀཱརཱ ཏམྦཔཎྞིཡཱ མཧཱཐེརཱ, ཏེ ཨེཝ པརིསྶཡསཧནཏོ, པཊིཔཀྑབྷཱུཏཀིལེསཧནནཏོ, པརཝཱདིམིགེཧི ཨཔདྷཾསནཱིཡཏོ ཙ སཱིཧསདིསཏྟཱ སཱིཧཱཏི པུབྦཱཙརིཡསཱིཧཱ, ཏེསཾ པུབྦཱཙརིཡསཱིཧཱནཾ. ཀཱིདིསཱ ཏེ པུབྦཱཙརིཡསཱིཧཱ, ཡེསཾ ཏཡཱ ནམོ ཀརཱིཡཏཱིཏི ཨཱཧ ‘‘ཐེརཝཾསཔྤདཱིཔཱན’’ནྟིཨཱདི. ཏཏྠ ཐེརཝཾསཔྤདཱིཔཱནནྟི ཐིརེཧི སཱིལཀྑནྡྷཱདཱིཧི སམནྣཱགཏཱཏི ཐེརཱ, མཧཱཀསྶཔཱདཡོ, ཏེསཾ ཝཾསོ ཨནྭཡོཏི ཐེརཝཾསོ. ཨེཏེན བྷིནྣལདྡྷིཀཱནཾ སཏྟརསབྷེདཱནཾ མཧཱསངྒྷིཀཱདཱིནཾ ཝཾསཾ པཊིཀྑིཔཏི, ཐེརཝཾསཔརིཡཱཔནྣཱ ཧུཏྭཱ པན ཨཱགམཱདྷིགམསམྤནྣཏྟཱ པཉྙཱཔཛྫོཏེན ཏསྶ ཐེརཝཾསསྶ དཱིཔནཏོ ཐེརཝཾསཔྤདཱིཔཱ, པུབྦཱཙརིཡསཱིཧཱ, ཏེསཾ ཐེརཝཾསཔྤདཱིཔཱནཾ. ཨསཾཧཱིརཏྟཱ ཐིརཱནཾ. ཝིནཡཀྐམེཏི ཨཱརམྦྷཱནུརཱུཔཝཙནམེཏཾ, ཏེ པན སུཏྟཱབྷིདྷམྨེསུཔི ཐིརཱ ཨེཝ.

ཨེཝཾ ཨཊྛཀཐཱཙརིཡཱནམྤི པཎཱམཾ དསྶེཏྭཱ ཨིདཱནི སཾཝཎྞེཏབྦདྷམྨཝིསེསསྶ ཨབྷིདྷཱནཱནིསཾསཾ, དེསཀསམྤཏྟིཡོ ཙ དསྶེནྟོ ‘‘པཱམོཀྑ’’ནྟིཨཱདིམཱཧ. ཏཏྠ མཧེསིནཱ ཡཾ པཱཏིམོཀྑཾ པཀཱསིཏནྟི སམྦནྡྷོ. ཏཏྠ མཧེསིནཱཏི མཧནྟེ སཱིལཱདིཀེ པཉྩ དྷམྨཀྑནྡྷེ ཨེསཱི ¶ གཝེསཱིཏི མཧེསི. མཧནྟེཧི ཨེསིཏོཏི ཝཱ པུཐུཛྫནསེཁཱསེཁཨིསཱིཧི ཝིསིཊྛཏྟཱ མཧནྟོ ཨིསཱིཏི ཝཱ མཧེསི, སམྨཱསམྦུདྡྷོ, ཏེན མཧེསིནཱ. པཱཏིམོཀྑནྟི སཏྟཱཔཏྟིཀྑནྡྷསཾཝརབྷཱུཏཾ སིཀྑཱཔདསཱིལཾ, ཏདྡཱིཔནཏོ ཨུབྷཏོཝིབྷངྒསུཏྟསངྑཱཏཾ གནྠཔཱཏིམོཀྑམེཝ ཝཱ. ཀིམྦྷཱུཏནྟི ཨཱཧ ‘‘པཱམོཀྑ’’ནྟིཨཱདི. པམུཁེ སཱདྷཱུཏི པམོཀྑཾ, པམོཀྑམེཝ པཱམོཀྑཾ, ཝཛྫཔཊིཔཀྑཏྟཱ ཨནཝཛྫཱནཾ སམཱདྷིཔཉྙཱསངྑཱཏཱནཾ པརིཏྟམཧགྒཏལོཀུཏྟརཱནཾ ཀུསལཱནཾ དྷམྨཱནཾ ཨཱདི པཏིཊྛཱབྷཱུཏནྟི ཨཏྠོ. ‘‘སཱིལེ པཏིཊྛཱཡ ནརོ སཔཉྙོ, ཙིཏྟཾ པཉྙཉྩ བྷཱཝཡ’’ནྟི (སཾ. ནི. ༡.༢༣, ༡༩༢; པེཊཀོ. ༢༢; མི. པ. ༢.༡.༩) ཧི ཝུཏྟཾ. མུཁམིཝཱཏི མུཁཾ, དྭཱརཾ. ཡཐཱ ཧི སཏྟཱནཾ ཁཛྫབྷོཛྫལེཡྻཔེཡྻཝསེན ཙཏུབྦིདྷོཔི ཨཱཧཱརོ མུཁེན པཝིསིཏྭཱ ཨངྒཔཙྩངྒཱནི ཕརཏི, ཨེཝཾ ཡོགིནོཔི ཙཱཏུབྷཱུམཀཀུསལཾ སཱིལམུཁེན པཝིསིཏྭཱ ཨཏྠསིདྡྷིཾ སམྤཱདེཏི. ཏེན ཝུཏྟཾ ‘‘མུཁམིཝཱཏི མུཁ’’ནྟི. ཨཐ ཝཱ མུཁཾ དྭཱརཾ མོཀྑཔྤཝེསཱཡ ནིབྦཱནསཙྪིཀིརིཡཱཡཱཏི ཨཏྠོ. ཝུཏྟཉྷི –

‘‘ཨཝིཔྤཊིསཱརཏྠཱནི ¶ ཁོ, ཨཱནནྡ, ཀུསལཱནི སཱིལཱནཱི’’ཏི (ཨ. ནི. ༡༡.༡).

ཏཐཱ –

‘‘ཨཝིཔྤཊིསཱརོ པཱམོཛྫཏྠཱཡ, པཱམོཛྫཾ པཱིཏཏྠཱཡ, པཱིཏི པསྶདྡྷཏྠཱཡ, པསྶདྡྷི སུཁཏྠཱཡ, སུཁཾ སམཱདྷཏྠཱཡ, སམཱདྷི ཡཐཱབྷཱུཏཉཱཎདསྶནཏྠཱཡ, ཡཐཱབྷཱུཏཉཱཎདསྶནཾ ནིབྦིདཏྠཱཡ, ནིབྦིདཱ ཝིརཱགཏྠཱཡ, ཝིརཱགོ ཝིམུཏྟཏྠཱཡ, ཝིམུཏྟི ཝིམུཏྟིཉཱཎདསྶནཏྠཱཡ, ཝིམུཏྟིཉཱཎདསྶནཾ ཨནུཔཱདཱཔརིནིབྦཱནཏྠཱཡཱ’’ཏི (པརི. ༣༦༦) ཙ.

ཨེཝཾ སཾཝཎྞེཏབྦདྷམྨསྶ ཨབྷིདྷཱནཱདིཾ དསྶེཏྭཱ ཨིདཱནི སཾཝཎྞནཱཡ ནིམིཏྟཾ དསྶེཏུཾ ‘‘སཱུརཏེནཱ’’ཏིཨཱདིནཱ ཙཏུཏྠགཱཐམཱཧ. ཏཏྠ སཱུརཏེནཱཏི སོབྷནེ རཏོཏི སཱུརཏོ ཨུ-ཀཱརསྶ དཱིགྷཾ ཀཏྭཱ, ཏེན སཱུརཏེན, སོབྷནེ ཀཱཡིཀཝཱཙསིཀཀམྨེ རཏེནཱཏི ཨཏྠོ, ཝིནཱིཏེནཱཏི ཝུཏྟཾ ཧོཏི. ནིཝཱཏེནཱཏི ནཱིཙཝུཏྟིནཱ. སུཙིསལླེཁཝུཏྟིནཱཏི སུཙིབྷཱུཏཱ ཀིལེསསལླིཁནསམཏྠཱ ཝུཏྟི པཊིཔཏྟི ཨེཏསྶཱཏི སུཙིསལླེཁཝུཏྟི, ཏེན སུཙིསལླེཁཝུཏྟིནཱ, པརིསུདྡྷཱཡ ཨཔྤིཙྪཝུཏྟིཡཱ སམནྣཱགཏེནཱཏི ཨཏྠོ. ཝིནཡཱཙཱརཡུཏྟེནཱཏི ཝཱརིཏྟཙཱརིཏྟསཱིལསམྤནྣེན. ཨཐ ཝཱ ཝིནཡོཏི ཙེཏྠ པཱཏིམོཀྑསཾཝརཱདིབྷེདོ སཾཝརཝིནཡོ. ཨཱཙཱརོཏི ཨཱཙཱརགོཙརནིདྡེསེ ཨཱགཏསམཎསཱརུཔྤཱཙཱརོ ¶ . སོཎཏྠེརེནཱཏི ཨེཏྠ སོཎོཏི ཏསྶ ནཱམཾ. ཐིརེཧི སཱིལཀྑནྡྷཱདཱིཧི སམནྣཱགཏཏྟཱ ཐེརོ. ཡཱཙིཏོཏི ཨབྷིཡཱཙིཏོ. ཐེརོ ཧི པཱཏིམོཀྑསྶ གམྦྷཱིརཏཱཡ དུརཝགཱཧཏཾ, ཨཱཙརིཡསྶ ཙ ཏཾསཾཝཎྞནཱཡ སཱམཏྠིཡཾ ཉཏྭཱ ‘‘པཱཏིམོཀྑསྶ ཏཡཱ ཨཏྠསཾཝཎྞནཱ ཀཱཏབྦཱ. ཨེཝཉྷི སཱསནསྶ སུཙིརཊྛིཏིཀཏཱ ཧོཏཱི’’ཏི སཱནིསཾསགཱརཝེན ཡཱཙནཾ ཨཀཱསི. ཏདསྶ ཡཱཙནཾ ཨཏྟནོ སཾཝཎྞནཱཡ ནིདཱནབྷཱུཏཾ དསྶེནྟོ ‘‘ཡཱཙིཏོ’’ཏི ཨཱཧ.

ཨེཏྠ ཙ ‘‘སཱུརཏེནཱ’’ཏི ཨིམིནཱསྶ སོརཙྩཾ ཝུཙྩཏི. ‘‘ནིཝཱཏེནཱ’’ཏི ཨིམིནཱ ནཱིཙམནཏཱ ནིཝཱཏཝུཏྟིཏཱ, ཡཱཡ ནིཝཱཏཝུཏྟིཏཱཡ སམནྣཱགཏོ པུགྒལོ ནིཧཏམཱནོ, ནིཧཏདཔྤོ, པཱདཔུཉྪནཙོལ༹ཀསམོ, བྷིནྣཝིསཱཎཱུསབྷསམོ, ཨུདྡྷཊདཱཋསཔྤསམོ ཙ ཧུཏྭཱ སཎྷོ སཁིལོ སུཁསམྦྷཱསོ ¶ ཧོཏི. ‘‘སུཙིསལླེཁཝུཏྟིནཱ’’ཏི ཨིམིནཱ ཨིནྡྲིཡསཾཝརཔཙྩཡསནྣིསྶིཏཨཱཛཱིཝཔཱརིསུདྡྷིསཱིལཾ. ‘‘ཝིནཡཱཙཱརཡུཏྟེནཱ’’ཏི ཨིམིནཱ པཱཏིམོཀྑསཾཝརསཱིལཾ ཝུཏྟནྟི ཝེདིཏབྦཾ. ཨེཝམནེཀགུཎེཧི ཏསྶ ཨབྷིཏྠཝནཾ ཡཐཱཝུཏྟགུཎསམནྣཱགཏསྶ སབྲཧྨཙཱརིནོ ཨཛ྄ཛྷེསནཾ ན སཀྐཱ པཊིབཱཧིཏུནྟི པརམགམྦྷཱིརསྶཱཔི པཱཏིམོཀྑསྶ ཨཏྠསཾཝཎྞནཱཡཾ པཝཏྟཱཏི དསྶནཏྠཾ. ཀིཉྩ – ཏཱདིསསྶ ཨཛ྄ཛྷེསནཾ ནིསྶཱཡ ཀརིཡམཱནཱ ཨཏྠསཾཝཎྞནཱ ཏསྶ ཨཛ྄ཛྷེསནཱདྷིཔཙྩེན, མམཉྩ ཨུསྶཱཧསམྤཏྟིཡཱ ན ཙིརེན པརིཡོསཱནཾ གཙྪཏཱིཏི ཀཏནྟི ཝེདིཏབྦཾ.

ཨེཝཾ སཾཝཎྞནཱཡ ནིམིཏྟཾ དསྶེཏྭཱ ཨིདཱནི ཏསྶཝནེ སོཏུཛནསྶཱདརཾ ཛནེཏུཾ ཏཔྤཡོཛནཀརཎཔྤཀཱརནིསྶཡཱབྷིདྷཱནཱདིཾ དསྶེནྟོ ‘‘ཏཏྠཱ’’ཏིཨཱདིགཱཐཱདྭཡམཱཧ. ཏཏྠ ཏཏྠཱཏི ‘‘ཡཾ མཧེསིནཱ པཱཏིམོཀྑཾ པཀཱསིཏ’’ནྟི ཝུཏྟཾ, ཏསྨིཾ པཱཏིམོཀྑེ. སཉྫཱཏཀངྑཱནནྟི པདཔདཏྠཝིནིཙྪཡཝསེན སཉྫཱཏཀངྑཱནཾ, སམུཔྤནྣསཾསཡཱནནྟི ཨཏྠོ. ཀངྑཱཝིཏརཎཏྠཱཡཱཏི ཡཐཱཝུཏྟསཾསཡསྶ ཨཏིཀྐམནཏྠཱཡ. ཏསྶཱཏི པཱཏིམོཀྑསྶ. ཝཎྞཱིཡཏི ཨཏྠོ ཀཐཱིཡཏི ཨེཏཱཡཱཏི ཝཎྞནཱ, ཨཊྛཀཐཱ, ཏཾ ཝཎྞནཾ. ཨིམསྶ ཙ ‘‘ཝཎྞཡིསྶཱམཱི’’ཏི ཨིམིནཱ སམྦནྡྷོ. ཀིཾབྷཱུཏནྟི ཨཱཧ ‘‘པརིཔུཎྞཝིནིཙྪཡ’’ནྟིཨཱདི. པརིཔུཎྞཝིནིཙྪཡནྟི ཁནྡྷཀཔརིཝཱརཔདབྷཱཛནཱདིཝསེན ཨསཱདྷཱརཎཝིནིཙྪཡསྶ ཙ ནིདཱནཱདིཝསེན སཏྟརསཔྤབྷེདསྶ ཙ སབྦསིཀྑཱཔདསཱདྷཱརཎཝིནིཙྪཡསྶ པཀཱསནཏོ སམྤུཎྞཝིནིཙྪཡཾ.

མཧཱཝིཧཱརཝཱསཱིནནྟི མཧཱམེགྷཝནུཡྻཱནབྷཱུམིབྷཱགེ པཏིཊྛིཏོ ཝིཧཱརོ མཧཱཝིཧཱརོ, ཡོ སཏྠུནོ མཧཱབོདྷིནཱ ཝིབྷཱུསིཏོ, ཏཏྠ ཝསནྟི སཱིལེནཱཏི མཧཱཝིཧཱརཝཱསིནོ, ཏེསཾ མཧཱཝིཧཱརཝཱསཱིནཾ ¶ . ཝཱཙནཱམགྒནིསྶིཏནྟི ཀཐཱམགྒནིསྶིཏཾ, ཨཊྛཀཐཱནིསྶིཏནྟི ཨཏྠོ, མཧཱཝིཧཱརཝཱསཱིནཾ སཱིཧལ༹ཊྛཀཐཱནཡཾ ཨིདྷ ནིསྶཱཡཱཏི ཝུཏྟཾ ཧོཏི. ཝཎྞཡིསྶཱམཱིཏི པཝཏྟཡིསྶཱམི. ནཱམེནཱཏི ཨཏྟནོ གུཎནཱམེན. ཀངྑཱཝིཏརནྟི ཨེཏཱཡཱཏི ཀངྑཱཝིཏརཎཱི, ཏཾ ཀངྑཱཝིཏརཎིཾ. སུབྷནྟི ཨཏྠབྱཉྫནསམྤནྣཏྟཱ སུནྡརཾ, སདྡལཀྑཎསུབྷཏོ, ཝིནིཙྪཡསུབྷཏོ, ཝིཉྙེཡྻསུབྷཏོ ཙ སུབྷཾ པརིསུདྡྷཾ. ཨེཏྠ ཙ ‘‘ཀངྑཱཝིཏརཎཏྠཱཡཱ’’ཏི ཨིམིནཱ པཡོཛནཾ དསྶེཏི, པུརིཔུཎྞཝིནིཙྪཡ’’ནྟི ཨིམིནཱ ¶ སཾཝཎྞནཱཔྤཀཱརཾ, ‘‘མཧཱཝིཧཱརཝཱསཱིནཾ ཝཱཙནཱམགྒནིསྶིཏ’’ནྟི ཨིམིནཱ སཾཝཎྞནཱཡ ནིསྶཡཝིསུདྡྷིཾ ནིཀཱཡནྟརལདྡྷིསངྐརདོསཝིཝཛྫནཏོ, ‘‘ཝཎྞཡིསྶཱམཱི’’ཏི ཨིམིནཱ ཨཏྟནོ ཨཛ྄ཛྷཱསཡཾ དསྶེཏཱིཏི དཊྛབྦཾ. ‘‘ཝཏྟཡིསྶཱམཱི’’ཏིཔི པཱཋོ.

གནྠཱརམྦྷཀཐཱཝཎྞནཱ ནིཊྛིཏཱ.

ནིདཱནཝཎྞནཱ

ཨེཝཾ རཏནཏྟཡཔཎཱམཱདིསཧིཏཾ སཉྙཱདིཀཾ དསྶེཏྭཱ ཨིདཱནི ‘‘པཱཏིམོཀྑསྶ ཝཎྞནཾ ཝཎྞཡིསྶཱམཱི’’ཏི ཝུཏྟཏྟཱ པཱཏིམོཀྑཾ ཏཱཝ ཝཙནཏྠཏོ, སརཱུཔབྷེདཏོ, གནྠབྷེདཏོ, ཨུདྡེསཝིབྷཱགཏོ, ཨུདྡེསཔརིཙྪེདཏོ ཙ ཝཝཏྠཔེཏྭཱ ཏདུདྡེསཀྐམེནཱཡཾ ཝཎྞནཱ བྷཝིསྶཏཱིཏི དསྶེཏུཾ ‘‘ཏཏྠ པཱཏིམོཀྑ’’ནྟིཨཱདི ཨཱརདྡྷཾ.

ཏཏྠ ཏཏྠཱཏི ཏསྨིཾ གཱཐཱཔདེ. པཨཏིམོཀྑནྟི པཀཱརཏོ ཨཏིཝིཡ སཱིལེསུ མུཁབྷཱུཏཾ. ཨཏིཔམོཀྑནྟི ཏམེཝ པདཾ ཨུཔསགྒབྱཏྟཡེན ཝདཏི. ཨཐ ཝཱ པ ཨཏི མོཀྑནྟི པདཙྪེདོ, ཏསྶ ཨུཔསགྒབྱཏྟཡེནཏྠམཱཧ ‘‘ཨཏིཔམོཀྑ’’ནྟི. ཨེཝཾ པབྷེདཏོ པདཝཎྞནཾ ཀཏྭཱ སདྡཏྠཏོ ཝདཏི ‘‘ཨཏིསེཊྛཾ ཨཏིཨུཏྟམནྟི ཨཏྠོ’’ཏི. ཨེཏྠ ཙ སཱིལཔཱཏིམོཀྑཾ སབྦགུཎཱནཾ མཱུལབྷཱཝཏོ སེཊྛཾ, གནྠཔཱཏིམོཀྑཾ པན སེཊྛགུཎསཧཙརཎཏོ སེཊྛནྟི ཝེདིཏབྦཾ. ཨུཏྟམནྟི ཨེཏྠཱཔི ཨེསེཝ ནཡོ. ཨིཏཱིཏི ཨེཝཾ. ཨིམིནཱ ཡཐཱཝུཏྟཝཙནཏྠཾ ནིདསྶེཏི. ནིདསྶནཏྠོ ཧི ཨཡཾ ཨིཏི-སདྡོ ‘‘སབྦམཏྠཱིཏི ཁོ, ཀཙྩཱན, ཨཡམེཀོ ཨནྟོ, སབྦཾ ནཏྠཱིཏི ཁོ, ཀཙྩཱན, ཨཡཾ དུཏིཡོ ཨནྟོ’’ཏིཨཱདཱིསུ (སཾ. ནི. ༢.༡༥; ༣.༩༠) ཝིཡ. ཨིམིནཱཏི ཨཱསནྣཔཙྩཀྑཝཙནཾ ཨིཏི-སདྡེན ཨནནྟརནིདསྶིཏསྶ, པཊིགྒཱཧཀེཧི ཙ སོཏཝིཉྙཱཎཱདིཝཱིཐིཡཱ ¶ པཊིཔནྣསྶ ཝཙནཏྠསྶ ཝཙནཏོ. ཨཐ ཝཱ ཨིམིནཱཏི ཨཱསནྣཔཙྩཀྑབྷཱཝཀརཎཝཙནཾ ཡཐཱཝུཏྟསྶ ཝཙནཏྠསྶ ཨབྷིམུཁཱིཀརཎཏོ. ཝཙནཏྠེནཱཏི ‘‘ཨཏིསེཊྛ’’ནྟི སདྡཏྠེན. ཨེཀཝིདྷམྤཱིཏི ཨེཀཀོཊྛཱསམྤི. སཱིལགནྠབྷེདཏོ དུཝིདྷཾ ཧོཏཱིཏི པུན སཱིལགནྠསངྑཱཏེན པབྷེདེན དུཝིདྷཾ ཧོཏི, སཱིལཔཱཏིམོཀྑཾ, གནྠཔཱཏིམོཀྑཉྩཱཏི དུཝིདྷཾ ཧོཏཱིཏི ཨཏྠོ.

ཨིདཱནི ¶ ཏདུབྷཡསྶཱཔི སུཏྟེ ཨཱགཏབྷཱཝཾ དསྶེཏུཾ ‘‘ཏཐཱ ཧཱི’’ཏིཨཱདི ཝུཏྟཾ. ཏཏྠ པཱཏི རཀྑཏཱིཏི པཱཏི, ཏཾ མོཀྑེཏི མོཙེཏི ཨཱཔཱཡིཀཱདཱིཧི དུཀྑེཧཱིཏི པཱཏིམོཀྑཾ, སཾཝརཎཾ སཾཝརོ, ཀཱཡཝཱཙཱཧི ཨཝཱིཏིཀྐམོ, པཱཏིམོཀྑམེཝ སཾཝརོ པཱཏིམོཀྑསཾཝརོ, པཱཏིམོཀྑསཾཝརེན སཾཝུཏོ སམནྣཱགཏོ པཱཏིམོཀྑསཾཝརསཾཝུཏོ. ཝིཧརཏཱིཏི ཝཏྟཏི.

ཨཱདིམེཏནྟི ཨེཏཾ སིཀྑཱཔདསཱིལཾ པུབྦུཔྤཏྟིཨཏྠེན ཨཱདི. ཝུཏྟམྤི ཙེཏཾ –

‘‘ཏསྨཱཏིཧ ཏྭཾ, ཨུཏྟིཡ, ཨཱདིམེཝ ཝིསོདྷེཧི ཀུསལེསུ དྷམྨེསུ. ཀོ ཙཱདི ཀུསལཱནཾ དྷམྨཱནཾ? སཱིལཉྩ སུཝིསུདྡྷཾ, དིཊྛི ཙ ཨུཛུཀཱ’’ཏི (སཾ. ནི. ༥.༣༨༢).

ཡཐཱ ཧི ནགརཝཌྜྷཀཱི ནགརཾ མཱཔེཏུཀཱམོ པཋམཾ ནགརཊྛཱནཾ སོདྷེཏི, ཏཏོ ཨཔརབྷཱགེ ཝཱིཐིཙཏུཀྐསིངྒྷཱཊཀཱདིཔརིཙྪེདེན ཝིབྷཛིཏྭཱ ནགརཾ མཱཔེཏི, ཡཐཱ ཝཱ པན རཛཀོ པཋམཾ ཏཱིཧི ཁཱརེཧི ཝཏྠཾ དྷོཝིཏྭཱ པརིསུདྡྷེ ཝཏྠེ ཡདིཙྪཀཾ རངྒཛཱཏཾ ཨུཔནེཏི, ཡཐཱ ཝཱ པན ཚེཀོ ཙིཏྟཀཱརོ རཱུཔཾ ལིཁིཏུཀཱམོ ཨཱདིཏོཝ བྷིཏྟིཔརིཀམྨཾ ཀརོཏི, ཏཏོ ཨཔརབྷཱགེ རཱུཔཾ སམུཊྛཱཔེཏི, ཨེཝམེཝ ཡོགཱཝཙརོ ཨཱདིཏོཝ སཱིལཾ ཝིསོདྷེཏྭཱ ཨཔརབྷཱགེ སམཐཝིཔསྶནཱདཡོ དྷམྨེ སཙྪིཀརོཏི. ཏསྨཱ སཱིལཾ ‘‘ཨཱདཱི’’ཏི ཝུཏྟཾ. ‘‘མུཁམེཏ’’ནྟིཨཱདཱིནི ཝུཏྟཏྠཱནེཝ. ཨཱདིསདྡེན ‘‘པཱཏིམོཀྑེ ཙ སཾཝརོ’’ཏིཨཱདིཔཱལི༹ཾ (དཱི. ནི. ༢.༩༠; དྷ. པ. ༡༨༥) སངྒཎྷཱཏི.

སཱིལནྟི ཙཱརིཏྟཝཱརིཏྟཝསེན དུཝིདྷཾ ཝིནཡཔིཊཀཔརིཡཱཔནྣཾ སིཀྑཱཔདསཱིལཾ, དྷམྨཏོ པན སཱིལཾ ནཱམ པཱཎཱཏིཔཱཏཱདཱིཧི ཝཱ ཝིརམནྟསྶ, ཝཏྟཔཊིཔཏྟིཾ ཝཱ པཱུརེནྟསྶ ཙེཏནཱདཡོ དྷམྨཱ ཝེདིཏབྦཱ. ཝུཏྟཉྷེཏཾ པཊིསམྦྷིདཱཡཾ ‘‘ཀིཾ སཱིལནྟི ཙེཏནཱ སཱིལཾ ཙེཏསིཀཾ སཱིལཾ སཾཝརོ སཱིལཾ ཨཝཱིཏིཀྐམོ སཱིལ’’ནྟི (པཊི. མ. ༡.༣༩) ‘‘ཨུབྷཡཱནི ཁོ པནསྶ པཱཏིམོཀྑཱནཱི’’ཏི བྷིཀྑུབྷིཀྑུནཱིཔཱཏིམོཀྑཝསེན ཨུབྷཡཱནི པཱཏིམོཀྑཱནི, དྭེ མཱཏིཀཱཏི ཨཏྠོ. ཨསྶཱཏི བྷིཀྑུནོཝཱདཀསྶ ¶ . ཝིཏྠཱརེནཱཏི ཨུབྷཏོཝིབྷངྒེན སདྡྷིཾ. སྭཱགཏཱནཱིཏི སུཊྛུ ཨཱགཏཱནི. ཨཱདིསདྡེན ‘‘པཱཏིམོཀྑཾ ཨུདྡིསེཡྻཱ’’ཏིཨཱདིཔཱལི༹ཾ (མཧཱཝ. ༡༣༤) སངྒཎྷཱཏི. ཏཏྠཱཏི ཏེསུ སཱིལགནྠཔཱཏིམོཀྑེསུ. ཡོཏི ¶ ཨནིཡམནིདྡེསོ, ཡོ ཀོཙི པུགྒལོ. ནནྟི ཝིནཡཔརིཡཱཔནྣསཱིལཾ. རཀྑཏཱིཏི སམཱདིཡིཏྭཱ ཨཝིཀོཔེནྟོ པཱལེཏི. ཏཾ ‘‘པཱཏཱི’’ཏི ལདྡྷནཱམཾ པཱཏིམོཀྑསཱིལེ ཋིཏཾ. མོཙེཏཱིཏི སཧཀཱརིཀཱརཎབྷཱཝཏོ མོཀྑེཏི. ཨཔཱཡེ ཛཱཏཾ ཨཱཔཱཡིཀཾ, དུཀྑཾ, ཏཾ ཨཱདི ཡེསཾ ཏཱནི ཨཱཔཱཡིཀཱདཱིནི. ཨཱདིསདྡེན ཏདཉྙཾ སབྦཾ སཾསཱརདུཀྑཾ སངྒཎྷཱཏི. ཨཏྟཱནུཝཱདཱདཱིཧཱིཏི ཨཏྟཱནཾ ཨནུཝཱདོ ཨཏྟཱནུཝཱདོ, སོ ཨཱདི ཡེསཾ ཏཱནི ཨཏྟཱནུཝཱདཱདཱིནི, ཏེཧི ཨཏྟཱནུཝཱདཱདཱིཧི. ཨཱདིསདྡེན པརཱནུཝཱདདཎྜདུགྒཏིབྷཡཱནི སངྒཎྷཱཏི. ཏསྶ པཱཏིམོཀྑསྶ ཛོཏཀཏྟཱཏི ཏསྶ སཱིལཔཱཏིམོཀྑསྶ དཱིཔནཏྟཱ. ཨཱདིམྷི པན ཝུཏྟོ ཝཙནཏྠོཏི ‘‘ཨཏིསེཊྛ’’ནྟིཨཱདིནཱ ཨཱདིམྷི ཝུཏྟོ ཝཙནཏྠོ. ཨུབྷིནྣམྤི སཱདྷཱརཎོ ཧོཏི སཱིལཔཱཏིམོཀྑཾ སབྦགུཎཱནཾ མཱུལབྷཱཝཏོ སེཊྛཾ, གནྠཔཱཏིམོཀྑཾ སེཊྛགུཎསཧཙརཎཏོ སེཊྛནྟི.

ཏཏྠཱཏི ཏེསུ སཱིལཔཱཏིམོཀྑགནྠཔཱཏིམོཀྑེསུ. ‘‘ཨཡཾ ཝཎྞནཱ’’ཏི ཝཀྑམཱནཝཎྞནམཱཧ. གནྠཔཱཏིམོཀྑསྶ ཏཱཝ ཡུཛྫཏུ, ཀཐཾ སཱིལཔཱཏིམོཀྑསྶ ཡུཛྫཏཱིཏི ཨཱཧ ‘‘གནྠེ ཧཱི’’ཏིཨཱདི. ཧཱིཏི ཀཱརཎཏྠེ ནིཔཱཏོ. ཏསྶཱཏི གནྠསྶ. ཨཏྠོཏི སཱིལཾ. ཝཎྞིཏོཝ ཧོཏཱིཏི གནྠཝཎྞནཱམུཁེན ཨཏྠསྶེཝ ཝཎྞནཏོ. ཨིདཾ ཝུཏྟཾ ཧོཏི – ཡསྨཱ གནྠེ ཝཎྞིཏེ ཏདཝིནཱབྷཱཝཏོ ཏསྶཏྠོ ཝཎྞིཏོ ཧོཏི, ཏསྨཱ སཱིལཔཱཏིམོཀྑསྶཔི ཡུཛྫཏཱིཏི.

ཨེཝཾ སརཱུཔབྷེདཏོ ཝཝཏྠཔེཏྭཱ ཨིདཱནི གནྠབྷེདཏོ ཝཝཏྠཔེཏུཾ ‘‘ཏཾ པནེཏ’’ནྟིཨཱདིམཱཧ. ཏཏྠཱཏི ཏེསུ བྷིཀྑུཔཱཏིམོཀྑབྷིཀྑུནཱིཔཱཏིམོཀྑེསུ དྭཱིསུ. ཨུདྡེསཱ པརིཙྪིཛྫནྟི ཡེཧི ཝཀྑམཱནཝཙནཔྤབནྡྷེཧི, ཏེ ཨུདྡེསཔརིཙྪེདཱ, ཏེཧི. ཝཝཏྠིཏནྟི ཨསངྐརཏོ ཋིཏཾ.

ཨེཝཾ གནྠབྷེདཏོ ཝཝཏྠཔེཏྭཱ ཨིདཱནི ཨུདྡེསཝིབྷཱགཏོ ཝཝཏྠཔེཏུཾ ‘‘ཏཏྠཱ’’ཏིཨཱདིམཱཧ. ཨུདྡིསཱིཡཏི སརཱུཔེན ཀཐཱིཡཏི ཨེཏྠ, ཨེཏེནཱཏི ཝཱ ཨུདྡེསོ, ནིདཱནསྶ ཨུདྡེསོཏི ནིདཱནུདྡེསོ. ཨེཝཾ སེསེསུཔི. ཝིཏྠཱརོཝ ཨུདྡེསོ ཝིཏྠཱརུདྡེསོ.

ཨིདཱནི ནིདཱནུདྡེསཱདཱིནཾ པརིཙྪེདདསྶནཏྠཾ ‘‘ཏཏྠ ནིདཱནུདྡེསོ’’ཏིཨཱདི ཨཱརདྡྷཾ. ཏཏྠ ཏཏྠཱཏི ཏེསུ པཉྩསུ ཨུདྡེསེསུ. ནིདཱནུདྡེསོ ཨུདྡིཊྛོ ¶ ཧོཏཱིཏི སམྦནྡྷོ. ཡཾ པནེཏྠ ནིདཱནུདྡེསཔརིཙྪེདཾ དསྶེནྟེན ‘‘སུཎཱཏུ མེ, བྷནྟེ, སངྒྷོ…པེ… ཨཱཝིཀཏཱ ཧིསྶ ཕཱསུ ཧོཏཱི’’ཏི ¶ ཨིདྷཱགཏནིདཱནཔཱལི༹ཾ དསྶེཏྭཱ ཏདནནྟརཾ ཨུདྡེསཀཱལེ ཝཏྟབྦསྶཱཔི ‘‘ཨུདྡིཊྛཾ ཁོ ཨཱཡསྨནྟོ ནིདཱན’’ནྟི ཨིམསྶ པཱཋསྶ ཡོཛནཾ ཨཀཏྭཱ ‘‘ཏཏྠཱཡསྨནྟེ པུཙྪཱམཱི’’ཏིཨཱདིནཱ ཨནུསཱཝནཱདིཀམེཝ ཡོཛེཏྭཱ དསྶིཏཾ, ཏཾ པན ཨཔརིཔུཎྞནིདཱནཔཱལི༹དསྶནཔུབྦཀནིདཱནུདྡེསཔརིཙྪེདདསྶནཏྠཾ, ཁུདྡཀཔེཡྻཱལཝསེན ཝཱ པཱཀཊཏྟཱ ཏསྶ ཨཡོཛནཾ ཀཏནྟི ཝེདིཏབྦཾ, ཨུདྡེསཀཱལེ པན ཡོཛེཏྭཱཝ ཝཏྟབྦཾ. ཝཀྑཏི ཧི ‘‘ཏཾ པནེཏཾ པཱརཱཛིཀཱདཱིནཾ ཨཝསཱནེ དིསྶཏི, ན ནིདཱནཱཝསཱནེ. ཀིཉྩཱཔི ན དིསྶཏི, ཨཐ ཁོ ཨུདྡེསཀཱལེ ‘ཨཱཝིཀཏཱ ཧིསྶ ཕཱསུ ཧོཏཱི’ཏི ཝཏྭཱ ‘ཨུདྡིཊྛཾ ཁོ ཨཱཡསྨནྟོ ནིདཱནཾ, ཏཏྠཱཡསྨནྟེ པུཙྪཱམཱི’ཏིཨཱདིནཱ ནཡེན ཝཏྟབྦམེཝཱ’’ཏིཨཱདི. ཨཝསེསེ སུཏེན སཱཝིཏེཏི ཨཝསིཊྛཾ པཱརཱཛིཀུདྡེསཱདིཙཏུཀྐཾ ‘‘སུཏཱ ཁོ པནཱཡསྨནྟེཧི ཙཏྟཱརོ པཱརཱཛིཀཱ དྷམྨཱ…པེ… ཨཝིཝདམཱནེཧི སིཀྑིཏབྦ’’ནྟི ཨེཝཾ སུཏཝསེན སཱཝིཏེ.

ཨེཏེནེཝ ནཡེན སེསཱ ཏཡོ པཱཏིམོཀྑུདྡེསཔརིཙྪེདཱ ཝེདིཏབྦཱཏི དསྶེཏུཾ ‘‘པཱརཱཛིཀུདྡེསཱདཱིན’’ནྟིཨཱདིམཱཧ. པཱརཱཛིཀུདྡེསཱདཱིནཾ པརིཙྪེདཱ ཡོཛེཏབྦཱཏི སམྦནྡྷོ. ནིདཱནསྶ ཨཱདིཏོ པཊྛཱཡ པཱརཱཛིཀཱདཱིནི ཨོསཱཔེཏྭཱཏི ནིདཱནཾ, པཱརཱཛིཀཉྩ, ཏདུབྷཡཾ སངྒྷཱདིསེསཉྩ, ཏཾཏིཀཾ ཨནིཡཏཉྩཱཏི ཨེཝཾ ཡཐཱཀྐམཾ ཨུདྡིསིཏྭཱ པཱརཱཛིཀཱདཱིནི པརིཡོསཱཔེཏྭཱ. ཡོཛེཏབྦཱཏི ‘‘ཨཝསེསེ སུཏེན སཱཝིཏེ ཨུདྡིཊྛོ ཧོཏི པཱརཱཛིཀུདྡེསོ’’ཏིཨཱདིནཱ ཡོཛེཏབྦཱ. ཨཝསེསཾ སུཏེན སཱཝེཏབྦནྟི ཝཙནཏོཏི ཨུཔོསཐཀྑནྡྷཀེ –

‘‘པཉྩིམེ, བྷིཀྑཝེ, པཱཏིམོཀྑུདྡེསཱ ནིདཱནཾ ཨུདྡིསིཏྭཱ ཨཝསེསཾ སུཏེན སཱཝེཏབྦཾ, ཨཡཾ པཋམོ པཱཏིམོཀྑུདྡེསོ. ནིདཱནཾ ཨུདྡིསིཏྭཱ ཙཏྟཱརི པཱརཱཛིཀཱནི ཨུདྡིསིཏྭཱ ཨཝསེསཾ སུཏེན སཱཝེཏབྦཾ, ཨཡཾ དུཏིཡོ པཱཏིམོཀྑུདྡེསོ’’ཏིཨཱདཱིསུ (མཧཱཝ. ༡༥༠) –

ཨེཝཾ ཝུཏྟཏྟཱ. ཡསྨིཾ ཝིཔྤཀཏེཏི ཡསྨིཾ ཨུདྡེསེ ཨཔརིཡོསིཏེ. ཨནྟརཱཡོ ཨུཔྤཛྫཏཱིཏི དསསུ ཨནྟརཱཡེསུ ཡོ ཀོཙི ཨནྟརཱཡོ ཨུཔྤཛྫཏི ¶ . དས ཨནྟརཱཡཱ ནཱམ – རཱཛནྟརཱཡོ, ཙོརནྟརཱཡོ, ཨགྱནྟརཱཡོ, ཨུདཀནྟརཱཡོ, མནུསྶནྟརཱཡོ, ཨམནུསྶནྟརཱཡོ, ཝཱལ༹ནྟརཱཡོ, སརཱིསཔནྟརཱཡོ, ཛཱིཝིཏནྟརཱཡོ, བྲཧྨཙརིཡནྟརཱཡོཏི. ཏཏྠ སཙེ བྷིཀྑཱུསུ ‘‘ཨུཔོསཐཾ ཀརིསྶཱམཱ’’ཏི (མཧཱཝ. ཨཊྛ. ༡༥༠) ནིསིནྣེསུ རཱཛཱ ཨཱགཙྪཏི, ཨཡཾ རཱཛནྟརཱཡོ. ཙོརཱ ཨཱགཙྪནྟི, ཨཡཾ ཙོརནྟརཱཡོ. དཝདཱཧོ ཝཱ ཨཱགཙྪཏི, ཨཱཝཱསེ ཝཱ ཨགྒི ཨུཊྛཧཏི, ཨཡཾ ¶ ཨགྱནྟརཱཡོ. མེགྷོ ཝཱ ཨུཊྛཧཏི, ཨོགྷོ ཝཱ ཨཱགཙྪཏི, ཨཡཾ ཨུདཀནྟརཱཡོ. བཧཱུ མནུསྶཱ ཨཱགཙྪནྟི, ཨཡཾ མནུསྶནྟརཱཡོ. བྷིཀྑུཾ ཡཀྑོ གཎྷཱཏི, ཨཡཾ ཨམནུསྶནྟརཱཡོ. བྱགྒྷཱདཡོ ཙཎྜམིགཱ ཨཱགཙྪནྟི, ཨཡཾ ཝཱལ༹ནྟརཱཡོ. བྷིཀྑུཾ སཔྤཱདཡོ ཌཾསནྟི, ཨཡཾ སརཱིསཔནྟརཱཡོ. བྷིཀྑུ གིལཱནོ ཝཱ ཧོཏི, ཀཱལཾ ཝཱ ཀརོཏི, ཝེརིནོ ཝཱ ཏཾ མཱརེཏུཀཱམཱ གཎྷནྟི, ཨཡཾ ཛཱིཝིཏནྟརཱཡོ. མནུསྶཱ ཨེཀཾ ཝཱ བཧཱུ ཝཱ བྷིཀྑཱུ བྲཧྨཙརིཡཱ ཙཱཝེཏུཀཱམཱ གཎྷནྟི, ཨཡཾ བྲཧྨཙརིཡནྟརཱཡོ. ཨིཏི ཡཾ ཝུཏྟཾ ‘‘ཨནྟརཱཡོ ཨུཔྤཛྫཏཱིཏི དསསུ ཨནྟརཱཡེསུ ཡོ ཀོཙི ཨནྟརཱཡོ ཨུཔྤཛྫཏཱི’’ཏི, ཏསྶཏྠོ པཀཱསིཏོ ཧོཏཱིཏི.

ཏེན སདྡྷིནྟི ཝིཔྤཀཏུདྡེསེན སདྡྷིཾ. ཨཝསེསཾ སུཏེན སཱཝེཏབྦཾ ཨུདྡིཊྛཨུདྡེསཱཔེཀྑཏྟཱ ཨཝསེསཝཙནསྶ. ཡཐཱཧ ‘‘ནིདཱནཾ ཨུདྡིསིཏྭཱ’’ཏིཨཱདི (མཧཱཝ. ༡༥༠). ཏེནཱཧ ‘‘ནིདཱནུདྡེསེ པནཱ’’ཏིཨཱདི. སུཏེན སཱཝེཏབྦཾ ནཱམ ནཏྠི ཨུཔོསཐསྶ ཨནྟརཱཡོཝ ཧོཏཱིཏི ཨདྷིཔྤཱཡོ. ཨནིཡཏུདྡེསོ པརིཧཱཡཏཱིཏི བྷིཀྑུནཱིནཾ ཨནིཡཏསིཀྑཱཔདཔཉྙཏྟིཡཱ ཨབྷཱཝཏོ. ཏདབྷཱཝོ ཙ ‘‘ཨིདམེཝ ལཀྑཎཾ ཏཏྠཱཔི ཨནུགཏ’’ནྟི ཀཏྭཱཏི ཝེདིཏབྦཾ. སེསནྟི ཨཝསེསུདྡེསཔརིཙྪེདདསྶནཾ. ཨེཏེསཾ དྭིནྣཾ པཱཏིམོཀྑཱནནྟི སམྦནྡྷོ. ཏཱཝཱཏི པཋམཾ. ཨིདནྟི ཨིདཱནི ཝཏྟབྦཾ བུདྡྷིཡཾ ཝིཔརིཝཏྟམཱནཾ སཱམཉྙེན དསྶེཏི, ཨིདཾ ཨཀྑརཔདནིཡམིཏགནྠིཏཾ ཝཙནཾ ཝུཙྩཏི ཀཐཱིཡཏཱིཏི ཨཏྠོ. ཀིཾ ཏནྟི ཨཱཧ, ‘‘སུཎཱཏུ མེཏིཨཱདཱིན’’ནྟིཨཱདི.

ཏཏྠ སུཎཱཏུ མེཏིཨཱདཱིནནྟི ‘‘སུཎཱཏུ མེ, བྷནྟེ, སངྒྷོ ཨཛྫུཔོསཐོ’’ཏིཨཱདཱིནཾ བྷིཀྑུཔཱཏིམོཀྑེ ཨཱགཏཱནཾ སུཏྟཔདཱནཾ. ཨཏྠནིཙྪཡནྟི ¶ ཨབྷིདྷེཡྻཏྠསྶ ཙེཝ ཨདྷིཔྤཱཡཏྠསྶ ཙ ནིཙྪཡནཾ, ཝཝཏྠཱཔནནྟི ཨཏྠོ. ཨིམཱཡ ཧི ཨཊྛཀཐཱཡ ཏེསཾ ཨབྷིདྷེཡྻཏྠོ ཙེཝ ཨདྷིཔྤཱཡཏྠོ ཙ ཨནེཀདྷཱ ཝཝཏྠཱཔཱིཡཏི. ཨཐ ཝཱ ནིཙྪིནྣོཏི ནིཙྪཡོ. གཎྛིཊྛཱནེསུ ཁཱིལམདྡནཱཀཱརེན པཝཏྟཱ ཝིམཏིཙྪེདཀཐཱ, ཨཏྠོ ཙ ནིཙྪཡོ ཙ ཨཏྠནིཙྪཡོ, ཏཾ ཨཏྠནིཙྪཡཾ, མཡཱ ཝུཙྩམཱནཾ ཨཏྠཉྩ ཝིནིཙྪཡཉྩཱཏི ཝུཏྟཾ ཧོཏི. སཱིལསམྤནྣཱཏི སམནྟཏོ པནྣཾ པཏྟཾ པུཎྞནྟི སམྤནྣཾ, སཱིལཾ སམྤནྣམེཏེསནྟི སཱིལསམྤནྣཱ, པརིཔུཎྞསཱིལཱཏི ཨཏྠོ. ཨཐ ཝཱ སམྨདེཝ པནྣཱ གཏཱ ཨུཔཱགཏཱཏི སམྤནྣཱ, སཱིལེན སམྤནྣཱ སཱིལསམྤནྣཱ, པཱཏིམོཀྑསཾཝརེན ཨུཔེཏཱཏི ཨཏྠོ. ཨདྷིསཱིལཨདྷིཙིཏྟཨདྷིཔཉྙཱསངྑཱཏཱ ཏིསྶོཔི སིཀྑིཏབྦཊྛེན སིཀྑཱ, ཏཾ ཀཱམེནྟཱིཏི སིཀྑཱཀཱམཱ. སུཎནྟུ མེཏི ཏེ སབྦེཔི བྷིཀྑཝོ མམ སནྟིཀཱ ནིསཱམེནྟུ. ཨིམིནཱ ཨཏྟནོ སཾཝཎྞནཱཡ སཀྐཙྩཾ སཝནེ ནིཡོཛེཏི. སཀྐཙྩསཝནཔཊིབདྡྷཱ ཧི སབྦཱཔི སཱསནསམྤཏྟཱིཏི. ཨེཏྠ ཙ སཱིལསམྤནྣཱནཾ སིཀྑཱཀཱམཱནཾཡེཝ བྷིཀྑཱུནཾ གཧཎཾ ཏདཉྙེསཾ ¶ ཨིམིསྶཱ སཾཝཎྞནཱཡ ཨབྷཱཛནབྷཱཝཏོ. ན ཧི ཏེ ཝིནཡཾ སོཏབྦཾ, པཊིཔཛྫིཏབྦཉྩ མཉྙིསྶནྟི.

ཨེཏྠཱཏི ཨེཏསྨིཾ གཱཐཱཔདེ, ཨེཏེསཾ ཝཱ གཱཐཱཡ སངྒཧིཏཱནཾ ‘‘སུཎཱཏུ མེ’’ཏིཨཱདཱིནཾ པདཱནམནྟརེ. སཝནེ ཨཱཎཏྟིཝཙནཾ སཝནཱཎཏྟིཝཙནཾ. ཀིཉྩཱཔི སཝནཱཎཏྟིཝཙནཾ, ཏཐཱཔི པཱཏིམོཀྑུདྡེསཀེན ཨེཝཾ ཝཏྟབྦནྟི བྷགཝཏཱ ཝུཏྟཏྟཱ བྷགཝཏོ ཨཱཎཏྟི, ན ཨུདྡེསཀསྶཱཏི ནཝཀཏརེནཱཔི ཨིདཾ ཝཏྟུཾ ཝཊྚཏི སངྒྷགཱརཝེན, སངྒྷབཧུམཱནེན ཙ སཧིཏཏྟཱ སགཱརཝསཔྤཏིསྶཝཙནཾ. སངྒྷོ ཧི སུཔྤཊིཔནྣཏཱདིགུཎཝིསེསཡུཏྟཏྟཱ ཨུཏྟམཾ གཱརཝཔྤཏིསྶཝཊྛཱནཾ. ཨིདཉྩ སབྦཾ ཀེན ཀཏྠ ཀདཱ ཝུཏྟནྟི ཨཱཧ ‘‘སབྦམེཝ ཙེཏ’’ནྟིཨཱདི. པཱཏིམོཀྑུདྡེསཾ ཨནུཛཱནནྟེནཱཏི –

‘‘ཨནུཛཱནཱམི, བྷིཀྑཝེ, པཱཏིམོཀྑཾ ཨུདྡིསིཏུཾ, ཨེཝཉྩ པན, བྷིཀྑཝེ, ཨུདྡིསིཏབྦཾ, བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ ‘སུཎཱཏུ མེ, བྷནྟེ, སངྒྷོ’’’ཏི (མཧཱཝ. ༡༣༣-༡༣༤) –

ཨེཝམཱདིནཱ ¶ ཨནུཛཱནནྟེན. རཱཛགཧེཏི ཨེཝཾནཱམཀེ ནགརེ. ཏཉྷི མནྡྷཱཏུམཧཱགོཝིནྡཱདཱིཧི པརིགྒཧིཏཏྟཱ ‘‘རཱཛགཧ’’ནྟི ཝུཙྩཏི. ཏཾ པནེཏཾ བུདྡྷཀཱལེ, ཙཀྐཝཏྟིཀཱལེ ཙ ནགརཾ ཧོཏི, སེསཀཱལེ སུཉྙཾ ཧོཏི ཡཀྑཔརིགྒཧིཏཾ, ཏེསཾ ཝསནཊྛཱནཾ ཧུཏྭཱ ཏིཊྛཏི. ཏསྨཱཏི ཡསྨཱ ཨིདཾ པཱཏིམོཀྑུདྡེསཀེན ཝཏྟབྦཝཙནཾ, ཏསྨཱ. ཀིཾ ཏེ ཨུབྷོཔི པཱཏིམོཀྑཾ ཨུདྡིསནྟི, ཡེནེཝཾ ཝཏྟབྦནྟི ཨཱཧ ‘‘སངྒྷཏྠེརོ ཝཱ ཧཱི’’ཏིཨཱདི. ཐེརཱདྷིཀནྟི ཐེརཱདྷཱིནཾ, ཐེརཱཡཏྟཾ བྷཝིཏུནྟི ཨཏྠོ. ‘‘ཐེརཱདྷེཡྻ’’ནྟི ཝཱ པཱཋོ, སོཡེཝཏྠོ. ཏཏྠཱཏི ཏིསྶཾ པརིསཱཡཾ. བྱཏྟོཏི པཉྙཱཝེཡྻཏྟིཡེན སམནྣཱགཏོ, པགུཎམཱཏིཀོཏི ཨཏྠོ. པཊིབལོཏི ཝཏྟུཾ སམཏྠོ, ཨབྷཱིཏོཏི ཝུཏྟཾ ཧོཏི. ཨེཏྠ ཙ ཀིཉྩཱཔི དཧརསྶཱཔི བྱཏྟསྶ པཱཏིམོཀྑོ ཨནུཉྙཱཏོ, ཨཐ ཁོ ཨེཏྠཱཡཾ ཨདྷིཔྤཱཡོ – སཙེ ཐེརསྶ པཉྩ ཝཱ ཙཏྟཱརོ ཝཱ ཏཡོ ཝཱ པཱཏིམོཀྑུདྡེསཱ ནཱགཙྪནྟི, དྭེ པན ཨཀྑཎྜཱ སུཝིསདཱ ཝཱཙུགྒཏཱ ཧོནྟི, ཐེརཱཡཏྟོཝ པཱཏིམོཀྑོ. སཙེ པན ཨེཏྟཀམྤི ཝིསདཾ ཀཱཏུཾ ན སཀྐོཏི, བྱཏྟསྶ བྷིཀྑུནོ ཨཱཡཏྟོཏི.

ཨིདཱནི ‘‘སངྒྷོ’’ཏི ཨཝིསེསེན ཝུཏྟཏྟཱ ཨིདྷཱདྷིཔྤེཏསངྒྷཾ ཝིསེསེཏྭཱ དསྶེཏུཾ ‘‘སངྒྷོཏི ཨིམིནཱ པན པདེནཱ’’ཏིཨཱདིམཱཧ ཀིཉྩཱཔཱིཏི ཨནུགྒཧཏྠེ ནིཔཱཏོ, ཏསྶ ཡདི ནཱམཱཏི ཨཏྠོ ཝེདིཏབྦོ. དཀྑནྟི ཨེཏཱཡ སཏྟཱ ཡཐཱདྷིཔྤེཏཱཧི སམྤཏྟཱིཧི ཝཌྜྷནྟཱིཏི དཀྑིཎཱ, པརལོཀཾ སདྡཧིཏྭཱ ¶ དཱཏབྦཾ དཱནཾ, ཏཾ དཀྑིཎཾ ཨརཧཏི, དཀྑིཎཱཡ ཝཱ ཧིཏོ, ཡསྨཱ ནཾ མཧཔྥལཀཱརིཏཱཡ ཝིསོདྷེཏཱིཏི དཀྑིཎེཡྻོ, དིཊྛིསཱིལསངྒྷཱཏེན སཾཧཏོཏི སངྒྷོ, དཀྑིཎེཡྻོ ཙ སོ སངྒྷོ ཙཱཏི དཀྑིཎེཡྻསངྒྷོ. སམྨུཏིཡཱ ཙཏུཝགྒཱདིཝིནཡཔཉྙཏྟིཡཱ སིདྡྷོ སངྒྷོ སམྨུཏིསངྒྷོ. ཨཝིསེསེནཱཏི ‘‘ཨརིཡཱ’’ཏི ཝཱ ‘‘པུཐུཛྫནཱ’’ཏི ཝཱ ཨཝིསེསེཏྭཱ སཱམཉྙེན. སོཏི སམྨུཏིསངྒྷོ. ཨིདྷཱཏི ཨིམིསྶཾ ཨུཔོསཐཉཏྟིཡཾ. ཨདྷིཔྤེཏོ ཨུཔོསཐཉཏྟིཡཱ ཨཝིསེསཏྟཱ. ནནུ ཙ སོཔི པཉྩཝིདྷོ ཧོཏི, ཏཏྠ ཀཏམོ ཨིདྷཱདྷིཔྤེཏོཏི ཨནུཡོགཾ སནྡྷཱཡཱཧ ‘‘སོ པནེསཱ’’ཏིཨཱདི. ཀམྨཝསེནཱཏི ཝིནཡཀམྨཝསེན. པཉྩ ཝིདྷཱ པཀཱརཱ ཨསྶ སམྨུཏིསངྒྷསྶཱཏི པཉྩཝིདྷོ. ཏཐཱ ཧི ཝིདྷཡུཏྟགཏཔྤཀཱརསདྡེ སམཱནཏྠེ ཝཎྞཡནྟི. ཙཏུནྣཾ ¶ ཝགྒོ སམཱུཧོཏི ཙཏུཝགྒོ, ཙཏུཔརིམཱཎཡུཏྟོ ཝཱ ཝགྒོ ཙཏུཝགྒོ. ཨེཝཾ པཉྩཝགྒཱདི.

ཨིདཱནི ཡེསཾ ཀམྨཱནཾ ཝསེནཱཡཾ པཉྩཝིདྷོ ཧོཏི, ཏཾ ཝིསེསེཏྭཱ དསྶེཏུཾ ‘‘ཏཏྠཱ’’ཏིཨཱདིམཱཧ. ཏཏྠ ཏཏྠཱཏི པཉྩཝིདྷེ སངྒྷེ. མཛ྄ཛྷིམེསུ ཛནཔདེསུ ཨུཔསམྤདཀམྨསྶ དསཝགྒཀརཎཱིཡཏྟཱ ཝུཏྟཾ ‘‘ཋཔེཏྭཱ…པེ… ཨུཔསམྤདཉྩཱ’’ཏི. ‘‘ཏཐཱ’’ཏི ཨིམིནཱ ‘‘ན ཀིཉྩི སངྒྷཀམྨཾ ཀཱཏུཾ ན ཝཊྚཏཱི’’ཏི ཨིམམཏྠཾ ཨཏིདིསཏི. ཡདི ཨེཝཾ ཀིམཏྠཾ ཨཏིརེཀཝཱིསཏིཝགྒོ ཝུཏྟོཏི ཨཱཧ ‘‘སོ པནཱ’’ཏིཨཱདི. ཨཏིརེཀཏརེནཱཏི ཙཏུཝགྒཱདིཀརཎཱིཡཾ པཉྩཝགྒཱདིནཱ ཨཏིརེཀཏརེན, དསཝགྒཀརཎཱིཡཉྩ ཨེཀཱདསཝགྒཱདིནཱ ཨཏིརེཀཏརེན. དསྶནཏྠནྟི ཉཱཔནཏྠཾ. ཨིདམེཝ ཙཱནེན ཀཏྟབྦཾ ཀམྨནྟི ‘‘ཀམྨཝསེན པཉྩཝིདྷོ’’ཏི ཝུཏྟཾ. ཀམྨསྶཱནིཡམེ ཀཐམེཏཾ ཡུཛྫེཡྻཱཏི ཨཱིདིསཱི ཙོདནཱ ཨནཝཀཱསཱཏི དཊྛབྦཾ. ཨིམསྨིཾ པནཏྠེཏི ཨུཔོསཐེ.

ཨུཔོསཐསདྡོ པནཱཡཾ པཱཏིམོཀྑུདྡེསསཱིལཨུཔཝཱསཔཉྙཏྟིདིཝསེསུ ཝཏྟཏི. ཏཐཱ ཧེས ‘‘ཨཱཡཱམཱཝུསོ ཀཔྤིན, ཨུཔོསཐཾ གམིསྶཱམཱ’’ཏིཨཱདཱིསུ (དཱི. ནི. ཨཊྛ. ༡.༡༥༠; མ. ནི. ཨཊྛ. ༣.༨༥) ཏིམོཀྑུདྡེསེ ཨཱགཏོ, ‘‘ཨེཝཾ ཨཊྛངྒསམནྣཱགཏོ ཁོ, ཝིསཱཁེ, ཨུཔོསཐོ ཨུཔཝུཏྠོ’’ཏིཨཱདཱིསུ (ཨ. ནི. ༨.༤༣) སཱིལེ, ‘‘སུདྡྷསྶ ཝེ སདཱ ཕགྒུ, སུདྡྷསྶུཔོསཐོ སདཱ’’ཏིཨཱདཱིསུ (མ. ནི. ༡.༧༩) ཨུཔཝཱསེ, ‘‘ཨུཔོསཐོ ནཱམ ནཱགརཱཛཱ’’ཏིཨཱདཱིསུ (དཱི. ནི. ༢.༢༤༦) པཉྙཏྟིཡཾ, ‘‘ན, བྷིཀྑཝེ, ཏདཧུཔོསཐེ སབྷིཀྑུཀཱ ཨཱཝཱསཱ’’ཏིཨཱདཱིསུ (མཧཱཝ. ༡༨༡) དིཝསེ, ཨིདྷཱཔི དིཝསེཡེཝ ཝཏྟམཱནོ ཨདྷིཔྤེཏོཏི ཨཱཧ ‘‘ཨཛྫ ཨུཔོསཐདིཝསོ’’ཏིཨཱདི. ཨུཔཝསནྟི ཨེཏྠཱཏི ཨུཔོསཐོ. ཨུཔཝསནྟཱིཏི སཱིལེན ཝཱ སབྦསོ ཨཱཧཱརསྶ ཨབྷུཉྫནསངྑཱཏེན ཨནསནེན ཝཱ ཁཱིརཔཱནམདྷུཔཱནཱདིམཏྟེན ཝཱ ཨུཔེཏཱ ཧུཏྭཱ ཝསནྟཱིཏི ཨཏྠོ.

སབྦེསམྤི ¶ ཝཱཀྱཱནཾ ཨེཝ-ཀཱརཏྠསཧིཏཏྟཱ ‘‘ཨུཔོསཐོ’’ཏི ཨེཏསྶ ‘‘ཨུཔོསཐོ ཨེཝཱ’’ཏི ཨཡམཏྠོ ལབྦྷཏཱིཏི ཨཱཧ ‘‘ཨེཏེན ཨནུཔོསཐདིཝསཾ པཊིཀྑིཔཏཱི’’ཏི. ཨིམིནཱ ཨཝདྷཱརཎེན ནིརཱཀཏཾ དསྶེཏི, ཨཐ ཝཱ སདྡནྟརཏྠཱཔོཧནཝསེན སདྡོ ཨཏྠཾ ཝདཏཱིཏི ‘‘ཨུཔོསཐོ’’ཏི ཨེཏསྶ ‘‘ཨནུཔོསཐོ ན ཧོཏཱི’’ཏི ཨཡམཏྠོཏི ཝུཏྟཾ ‘‘ཨེཏེན ཨནུཔོསཐདིཝསཾ པཊིཀྑིཔཏཱི’’ཏི. ‘‘ཨེས ནཡོ པནྣརསོ’’ཏི ཨིམིནཱ ཨཉྙཾ ཨུཔོསཐདིཝསཾ ¶ པཊིཀྑིཔཏཱིཏི ཨེཏྠཱཔི. ཨེཏེནཱཏི ‘‘ཨུཔོསཐོ’’ཏི ཨེཏེན སདྡེན. པཉྩདསནྣཾ ཏིཐཱིནཾ པཱུརཎཝསེན པནྣརསོ. པནྣརསོཏི ཨིམིནཱ ཨཉྙཾ ཨུཔོསཐདིཝསཾ པཊིཀྑིཔཏཱི’’ཏི སཾཁིཏྟེན ཝུཏྟམཏྠཾ ཝིཏྠཱརཏོ དསྶེཏུཾ ‘‘དིཝསཝསེན ཧཱི’’ཏིཨཱདིམཱཧ. ཙཏུདྡསིཡཾ ནིཡུཏྟོ ཙཱཏུདྡསིཀོ. ཨེཝཾ པནྣརསིཀོ. སཱམགྒིཨུཔོསཐོ ནཱམ སངྒྷསཱམགྒིཀཏདིཝསེ ཀཱཏབྦཨུཔོསཐོ. ཧེམནྟགིམྷཝསྶཱནཱནཾ ཏིཎྞཾ ཨུཏཱུནནྟི ཨེཏྠ ཧེམནྟཨུཏུ ནཱམ ཨཔརཀཏྟིཀསྶ ཀཱལ༹པཀྑཔཱཊིཔདཏོ པཊྛཱཡ ཕགྒུནཔུཎྞམཔརིཡོསཱནཱ ཙཏྟཱརོ མཱསཱ, གིམྷཨུཏུ ནཱམ ཕགྒུནསྶ ཀཱལཔཀྑཔཱཊིཔདཏོ པཊྛཱཡ ཨཱསཱལ༹ྷཔུཎྞམཔརིཡོསཱནཱ ཙཏྟཱརོ མཱསཱ, ཝསྶཱནཨུཏུ ནཱམ ཨཱསཱལ༹ྷསྶ ཀཱལ༹པཀྑཔཱཊིཔདཏོ པཊྛཱཡ ཨཔརཀཏྟིཀཔུཎྞམཔརིཡོསཱནཱ ཙཏྟཱརོ མཱསཱ. ཏཏིཡསཏྟམཔཀྑེསུ དྭེ དྭེ ཀཏྭཱ ཚ ཙཱཏུདྡསིཀཱཏི ཧེམནྟསྶ ཨུཏུནོ ཏཏིཡེ ཙ སཏྟམེ ཙ པཀྑེ དྭེ ཙཱཏུདྡསིཀཱ, ཨེཝམིཏརེསཾ ཨུཏཱུནནྟི ཚ ཙཱཏུདྡསིཀཱ. སེསཱ པནྣརསིཀཱཏི སེསཱ ཨཊྛཱརས པནྣརསིཀཱ. ཧོནྟི ཙེཏྠ –

‘‘ཀཏྟིཀསྶ ཙ ཀཱལ༹མྷཱ, ཡཱཝ ཕགྒུནཔུཎྞམཱ;

‘ཧེམནྟཀཱལོ’ཏི ཝིཉྙེཡྻོ, ཨཊྛ ཧོནྟི ཨུཔོསཐཱ.

‘‘ཕགྒུནསྶ ཙ ཀཱལ༹མྷཱ, ཡཱཝ ཨཱསཱལ༹ྷཔུཎྞམཱ;

‘གིམྷཀཱལོ’ཏི ཝིཉྙེཡྻོ, ཨཊྛ ཧོནྟི ཨུཔོསཐཱ.

‘‘ཨཱསཱལ༹ྷསྶ ཙ ཀཱལ༹མྷཱ, ཡཱཝ ཀཏྟིཀཔུཎྞམཱ;

‘ཝསྶཀཱལོ’ཏི ཝིཉྙེཡྻོ, ཨཊྛ ཧོནྟི ཨུཔོསཐཱ.

‘‘ཨུཏཱུནཾ པན ཏིཎྞནྣཾ, པཀྑེ ཏཏིཡསཏྟམེ;

‘ཙཱཏུདྡསོ’ཏི པཱཏིམོཀྑཾ, ཨུདྡིསནྟི ནཡཉྙུནོ’’ཏི.

པཀཏིཡཱ ནབཧུཏརཱཝཱསིཀཱདིཔཙྩཡེན ཀཱཏབྦཾ པཀཏིཙཱརིཏྟཾ. བཧུཏརཱཝཱསིཀཱདིཔཙྩཡེ པན སཏི ཨཉྙསྨིཾ ཙཱཏུདྡསེཔི ཀཱཏུཾ ཝཊྚཏི. ཏེནཱཧ ‘‘སཀི’’ནྟིཨཱདི. སཀིནྟི ཨེཀསྨིཾ ཝཱརེ ¶ . ཨཱཝཱསིཀཱནཾ ཨནུཝཏྟིཏབྦནྟི ཨཱཝཱསིཀེཧི ‘‘ཨཛྫུཔོསཐོ ཙཱཏུདྡསོ’’ཏི པུབྦཀིཙྩེ ཀརིཡམཱནེ ཨནུཝཏྟིཏབྦཾ, ན པཊིཀྐོསིཏབྦཾ. ཨཱདིསདྡེན ‘‘ཨཱཝཱསིཀེཧི ཨཱགནྟུཀཱནཾ ཨནུཝཏྟིཏབྦ’’ནྟི (མཧཱཝ. ༡༧༨) ཝཙནཾ, ‘‘ཨནུཛཱནཱམི, བྷིཀྑཝེ, ཏེཧི ¶ བྷིཀྑཱུཧི དྭེ ཏཡོ ཨུཔོསཐེ ཙཱཏུདྡསིཀེ ཀཱཏུཾ, ཀཐཾ མཡཾ ཏེཧི བྷིཀྑཱུཧི པཋམཏརཾ པཝཱརེཡྻཱམཱ’’ཏི (མཧཱཝ. ༢༤༠) ཝཙནཉྩ སངྒཎྷཱཏི. ཨེཏྠ ཙ པཋམསུཏྟསྶ ཨེཀེཀསྶ ཨུཏུནོ ཏཏིཡསཏྟམཔཀྑསྶ ཙཱཏུདྡསེ ཝཱ ཨཝསེསསྶ པནྣརསེ ཝཱ སཀིཾ པཱཏིམོཀྑཾ ཨུདྡིསིཏབྦནྟི པཀཏིཙཱརིཏྟཝསེནཔི ཨཏྠསམྦྷཝཏོ ‘‘ཨཱགནྟུཀེཧཱི’’ཏིཨཱདཱིནི སུཏྟཱནི དསྶིཏཱནཱིཏི ཝེདིཏབྦཾ. ཏཐཱརཱུཔཔཙྩཡེ སཏཱིཏི ཨཉྙསྨིམྤི ཙཱཏུདྡསིཀེ ཨུཔོསཐཾ ཀཱཏུཾ ཨནུརཱུཔེ ‘‘ཨཱཝཱསིཀཱ བཧུཏརཱ ཧོནྟཱི’’ཏི ཨེཝམཱདིཀེ པཙྩཡེ སཏི. ཨཉྙསྨིམྤི ཙཱཏུདྡསེཏི ཏིཎྞཾ ཨུཏཱུནཾ ཏཏིཡསཏྟམཔཀྑཙཱཏུདྡསཏོ ཨཉྙསྨིཾ ཙཱཏུདྡསེ.

ན ཀེཝལཾ ཨུཔོསཐདིཝསཱཝ ཧོནྟཱིཏི ཨཱཧ ‘‘པུརིམཝསྶཾཝུཊྛཱནཾ པནཱ’’ཏིཨཱདི. མཱ ཨིཏི ཙནྡོ ཝུཙྩཏི ཏསྶ གཏིཡཱ དིཝསསྶ མིནིཏབྦཏོ, སོ ཨེཏྠ སབྦཀལཱཔཱརིཔཱུརིཡཱ པུཎྞོཏི པུཎྞམཱ, པུབྦཀཏྟིཀཱཡ པུཎྞམཱ པུབྦཀཏྟིཀཔུཎྞམཱ, ཨསྶཡུཛཔུཎྞམཱ. སཱ ཧི པཙྪིམཀཏྟིཀཾ ནིཝཏྟེཏུཾ ཨེཝཾ ཝུཏྟཱ. ཏེསཾཡེཝཱཏི པུརིམཝསྶཾཝུཊྛཱནཾཡེཝ. བྷཎྜནཀཱརཀེཧཱིཏི ཀལཧཀཱརཀེཧི. པཙྩུཀྐཌྜྷནྟཱིཏི ཨུཀྐཌྜྷནྟི. བྷཎྜནཀཱརཀེཧི ཨནུཝཱདཝསེན ཨསྶཡུཛཔུཎྞམཱདིཾ པརིཙྩཛནྟཱ པཝཱརཎཾ ཀཱལ༹པཀྑཾ, ཛུཎྷཔཀྑནྟི ཨུདྡྷཾ ཀཌྜྷནྟཱིཏི ཨཏྠོ. ‘‘སུཎནྟུ མེ ཨཱཡསྨནྟོ ཨཱཝཱསིཀཱ, ཡདཱཡསྨནྟཱནཾ པཏྟཀལླཾ, ཨིདཱནི ཨུཔོསཐཾ ཀརེཡྻཱམ, པཱཏིམོཀྑཾ ཨུདྡིསེཡྻཱམ, ཨཱགམེ ཀཱལེ༹ པཝཱརེཡྻཱམཱ’’ཏི (མཧཱཝ. ༢༤༠) ‘‘སུཎནྟུ མེ ཨཱཡསྨནྟོ ཨཱཝཱསིཀཱ, ཡདཱཡསྨནྟཱནཾ པཏྟཀལླཾ, ཨིདཱནི ཨུཔོསཐཾ ཀརེཡྻཱམ, པཱཏིམོཀྑཾ ཨུདྡིསེཡྻཱམ, ཨཱགམེ ཛུཎྷེ པཝཱརེཡྻཱམཱ’’ཏི ཙ ཨེཝཾ ཉཏྟིཡཱ པཝཱརཎཾ ཨུཀྐཌྜྷནྟཱིཏི ཝུཏྟཾ ཧོཏི.

ཨཐཱཏི ཨནནྟརཏྠེ ནིཔཱཏོ. ཙཏུདྡསནྣཾ པཱུརཎོ ཙཱཏུདྡསོ, དིཝསོ. ཡཾ སནྡྷཱཡ ‘‘ཨཱགམེ ཛུཎྷེ པཝཱརེཡྻཱམཱ’’ཏི ཉཏྟིཾ ཋཔཡིཾསུ, ཏསྨིཾ པན ཨཱགམེ ཛུཎྷེ ཀོམུདིཡཱ ཙཱཏུམཱསིནིཡཱ ཨཝསྶཾ པཝཱརེཏབྦཾ. ན ཧི ཏཾ ཨཏིཀྐམིཏྭཱ པཝཱརེཏུཾ ལབྦྷཏི. ཝུཏྟཉྷེཏཾ –

‘‘ཏེ ཙེ, བྷིཀྑཝེ, བྷིཀྑཱུ བྷཎྜནཀཱརཀཱ ཀལཧཀཱརཀཱ ཝིཝཱདཀཱརཀཱ བྷསྶཀཱརཀཱ སངྒྷེ ཨདྷིཀརཎཀཱརཀཱ ཏམྤི ཛུཎྷཾ ཨནུཝསེཡྻུཾ, ཏེཧི, བྷིཀྑཝེ, བྷིཀྑཱུཧི སབྦེཧེཝ ¶ ཨཱགམེ ¶ ཛུཎྷེ ཀོམུདིཡཱ ཙཱཏུམཱསིནིཡཱ ཨཀཱམཱ པཝཱརེཏབྦ’’ནྟི (མཧཱཝ. ༢༤༠).

ཏེནེཝཱཧ ‘‘པཙྪིམཝསྶཾཝུཊྛཱནཉྩ པཙྪིམཀཏྟིཀཔུཎྞམཱ ཨེཝཱ’’ཏི. ཡདི ཧི ཏཾ ཨཏིཀྐམིཏྭཱ པཝཱརེཡྻ, དུཀྐཊཱཔཏྟིཾ ཨཱཔཛྫེཡྻ. ཝུཏྟཉྷེཏཾ ‘‘ན ཙ, བྷིཀྑཝེ, ཨཔཝཱརཎཱཡ པཝཱརེཏབྦཾ ཨཉྙཏྲ སངྒྷསཱམགྒིཡཱ’’ཏི (མཧཱཝ. ༢༣༣). ཝིསུདྡྷིཔཝཱརཎཱཡོགཏོ པཝཱརཎཱདིཝསཱ. པིསདྡེན ན ཀེཝལཾ པཝཱརཎཱདིཝསཱཡེཝ, ཨཐ ཁོ ཨུཔོསཐདིཝསཱཔི ཧོནྟཱིཏི དསྶེཏི. ཨིདཱནི ཡོ སོ སཱམགྒིཨུཔོསཐདིཝསོ ཝུཏྟོ, ཏཉྩ ཏཔྤསངྒེན སཱམགྒིཔཝཱརཎཱདིཝསཉྩ དསྶེནྟོ ‘‘ཡདཱ པནཱ’’ཏིཨཱདིམཱཧ. ཨོསཱརིཏེ ཏསྨིཾ བྷིཀྑུསྨིནྟི ཨུཀྑིཏྟཀེ བྷིཀྑུསྨིཾ ཨོསཱརིཏེ, ཏཾ གཧེཏྭཱ སཱིམཾ གནྟྭཱ ཨཱཔཏྟིཾ དེསཱཔེཏྭཱ ཀམྨཝཱཙཱཡ ཀམྨཔྤཊིཔྤསྶདྡྷིཝསེན པཝེསིཏེཏི ཝུཏྟཾ ཧོཏི. ཏསྶ ཝཏྠུསྶཱཏི ཏསྶ ཨདྷིཀརཎསྶ. ཏདཱ ཋཔེཏྭཱ…པེ… ཨུཔོསཐདིཝསོ ནཱམ ཧོཏཱིཏི སམྦནྡྷོ. ཀིཾ ཀཱརཎནྟི ཨཱཧ ‘‘ཏཱཝདེཝཱ’’ཏིཨཱདི. ཏཏྠ ཏཱཝདེཝཱཏི ཏཾ དིཝསམེཝ. ཝཙནཏོཏི ཀོསམྦཀཀྑནྡྷཀེ (མཧཱཝ. ༤༧༥) ཝུཏྟཏྟཱ. ཡཏྠ པན པཏྟཙཱིཝརཱདཱིནཾ ཨཏྠཱཡ ཨཔྤམཏྟཀེན ཀཱརཎེན ཝིཝདནྟཱ ཨུཔོསཐཾ ཝཱ པཝཱརཎཾ ཝཱ ཋཔེནྟི, ཏཏྠ ཏསྨིཾ ཨདྷིཀརཎེ ཝིནིཙྪིཏེ ‘‘སམགྒཱ ཛཱཏམྷཱ’’ཏི ཨནྟརཱ སཱམགྒིཨུཔོསཐཾ ཀཱཏུཾ ན ལབྷནྟི. ཀརོནྟེཧི ཨནུཔོསཐེ ཨུཔོསཐོ ཀཏོ ནཱམ ཧོཏི. ཀཏྟིཀམཱསབྦྷནྟརེཏི ཨེཏྠ ཀཏྟིཀམཱསོ ནཱམ པུབྦཀཏྟིཀམཱསསྶ ཀཱལ༹པཀྑཔཱཊིཔདཏོ པཊྛཱཡ ཡཱཝ ཨཔརཀཏྟིཀཔུཎྞམཱ, ཏཱཝ ཨེཀཱུནཏིཾསརཏྟིདིཝོ, ཏསྶབྦྷནྟརེ, ཏཏོ པཙྪཱ ཝཱ པན པུརེ ཝཱ ན ཝཊྚཏི. ཨཡམེཝ ཡོ ཀོཙི དིཝསོཡེཝ. ཨིདྷཱཔི ཀོསམྦཀཀྑནྡྷཀེ སཱམགྒིཡཱ སདིསཱཝ སཱམགྒཱི ཝེདིཏབྦཱ. ཡེ པན ཀིསྨིཉྩིདེཝ ཨཔྤམཏྟཀེ པཝཱརཎཾ ཋཔེཏྭཱ སམགྒཱ ཧོནྟི, ཏེཧི པཝཱརཎཱཡམེཝ པཝཱརཎཱ ཀཱཏབྦཱ, ཏཱཝདེཝ ན ཀཱཏབྦཱ. ཀརོནྟེཧི ཨཔྤཝཱརཎཱཡ པཝཱརཎཱ ཀཏཱ ཧོཏི. ན ཀཱཏབྦོཡེཝཱཏི ནིཡམེན ཡདི ཀརོཏི, དུཀྐཊནྟི དསྶེཏི. ཏཏྠ ཧི ཨུཔོསཐཀརཎེ དུཀྐཊཾ. ཝུཏྟཉྷེཏཾ ‘‘ན, བྷིཀྑཝེ, ཨནུཔོསཐེ ཨུཔོསཐོ ཀཱཏབྦོ ཨཉྙཏྲ སངྒྷསཱམགྒིཡཱ’’ཏི (མཧཱཝ. ༡༨༣).

‘‘པཏྟཀཱལམེཝ ¶ པཏྟཀལླ’’ནྟི ཨིམིནཱ སཀཏྠེ བྷཱཝཔྤཙྩཡོཏི དསྶེཏི. ནཱསཏཱིཏི ཨནྭཡཏོ ཝུཏྟམེཝ བྱཏིརེཀཏོ དལ༹ྷཾ ཀརོཏི.

ཨནུརཱུཔཱཏི ཨརཧཱ ཨནུཙྪཝིཀཱ, སཱམིནོཏི ཝུཏྟཾ ཧོཏི. སབྦནྟིམེནཱཏི སབྦཧེཊྛིམེན ཙཏྟཱརོ, ན ཏེཧི ཝིནཱ ཏཾ ཨུཔོསཐཀམྨཾ ཀརཱིཡཏི, ན ཏེསཾ ཚནྡོ ཝཱ པཱརིསུདྡྷི ཝཱ ཨེཏི. ཨཝསེསཱ ¶ པན སཙེཔི སཧསྶམཏྟཱ ཧོནྟི, སཙེ སམཱནསཾཝཱསཀཱ, སབྦེ ཚནྡཱརཧཱཝ ཧོནྟི, ཚནྡཔཱརིསུདྡྷིཾ དཏྭཱ ཨཱགཙྪནྟུ ཝཱ, མཱ ཝཱ, ཀམྨཾ ན ཀུཔྤཏི. པཀཏཏྟཱཏི ཨནུཀྑིཏྟཱ, པཱརཱཛིཀཾ ཨནཛ྄ཛྷཱཔནྣཱ ཙ. ཧཏྠཔཱསོ ནཱམ དིཡཌྜྷཧཏྠཔྤམཱཎོ.

སཱིམཱ ཙ ནཱམེསཱ ཀཏམཱ, ཡཏྠ ཧཏྠཔཱསཾ ཨཝིཛཧིཏྭཱ ཋིཏཱ ཀམྨཔྤཏྟཱ ནཱམ ཧོནྟཱིཏི ཨནུཡོགཾ སནྡྷཱཡ སཱིམཾ དསྶེནྟོ ཝིབྷཱགཝནྟཱནཾ སབྷཱཝཝིབྷཱཝནཾ ཝིབྷཱགདསྶནམུཁེནེཝ ཧོཏཱིཏི ‘‘སཱིམཱ ཙ ནཱམེསཱ’’ཏིཨཱདིམཱཧ. སམྦྷིནྡནྟེནཱཏི མིསྶཱིཀརོནྟེན. ཨཛ྄ཛྷོཏྠརནྟེནཱཏི མདྡནྟེན, ཨནྟོ ཀརོནྟེནཱཏི ཝུཏྟཾ ཧོཏི. ཨིམཱ ཝིཔཏྟིསཱིམཱཡོ ནཱམཱཏི སམྦནྡྷོ. ཀསྨཱ ཝིཔཏྟིསཱིམཱཡོ ནཱམཱཏི ཨཱཧ ‘‘ཨེཀཱདསཧཱི’’ཏིཨཱདི. ཨཱཀཱརེཧཱིཏི ཀཱརཎེཧི. ཝཙནཏོཏི ཀམྨཝགྒེ (པརི. ༤༨༢ ཨཱདཡོ) ཀཐིཏཏྟཱ. སངྒྷཀམྨཾ ནཱམེཏཾ ཝཱིསཏིཝགྒཀརཎཱིཡཔརམནྟི ཨཱཧ ‘‘ཡཏྠ ཨེཀཝཱིསཏི བྷིཀྑཱུ ནིསཱིདིཏུཾ ན སཀྐོནྟཱི’’ཏི. ཡསྶཾ སཱིམཱཡཾ ཧེཊྛིམཔརིཙྪེདེན ཀམྨཱརཧེན སདྡྷིཾ ཨེཀཝཱིསཏི བྷིཀྑཱུ པརིམཎྜལཱཀཱརེན ནིསཱིདིཏུཾ ན སཀྐོནྟི, ཨཡཾ ཨཏིཁུདྡཀཱ ནཱམཱཏི ཨཏྠོ. ཨེཝརཱུཔཱ ཙ སཱིམཱ སམྨཏཱཔི ཨསམྨཏཱ, གཱམཁེཏྟསདིསཱཝ ཧོཏི, ཏཏྠ ཀཏཾ ཀམྨཾ ཀུཔྤཏི. ཨེས ནཡོ སེསསཱིམཱསུཔི.

སམྨཏཱཏི བདྡྷཱ, ཝཱཙིཏཀམྨཝཱཙཱཏི ཨཏྠོ. ཀམྨཝཱཙཱཡ ཝཱཙནམེཝ ཧི བནྡྷནཾ ནཱམ. ནིམིཏྟཾ ན ཨུཔགཙྪཏཱིཏི ཨནིམིཏྟུཔགོ, ཏཾ ཨནིམིཏྟུཔགཾ, ཨནིམིཏྟཱརཧནྟི ཝུཏྟཾ ཧོཏི. ཏཙསཱརརུཀྑོ ནཱམ ཏཱལནཱལི༹ཀེརཱདིཀཱ. པཾསུཔུཉྫཝཱལུཀཱཔུཉྫཱནནྟི པཾསུརཱསིཝཱལུཀཱརཱསཱིནཾ མཛ྄ཛྷེ. ནིདྡྷཱརཎེ ཙེཏཾ སཱམིཝཙནཾ. པོཏྠཀེསུ པན ཀཏྠཙི ‘‘པཾསུཔུཉྫཾ ཝཱ ཝཱལུཀཱཔུཉྫཾ ཝཱ ཨཉྙཏར’’ནྟི པཱཋོ དིསྶཏི, སོ པན ཨཔཱཋོ. ན ཧི སོ ‘‘ཨཉྙཏར’’ནྟི ཨིམིནཱ ཡུཛྫཏཱིཏི. ཨནྟརཱཏི ནིམིཏྟུཔགནིམིཏྟཱནམནྟརཱ. ཨེཏྠ ¶ ཙ ཡཱ ཏཱིཧི ནིམིཏྟེཧི བཛ྄ཛྷམཱནཱ ཨནིམིཏྟུཔགེསུ ཏཙསཱརརུཀྑཱདཱིསུ ཨཉྙཏརཾ ཨནྟརཱ ཨེཀཾ ནིམིཏྟཾ ཀཏྭཱ སམྨཏཱ, སཱ ཁཎྜནིམིཏྟཱ ནཱམ ཧོཏི. ཡཱ པན ཙཏུཔཉྩནིམིཏྟཱདཱིཧི བཛ྄ཛྷམཱནཱ ཨིམེསུ ཏཙསཱརརུཀྑཱདཱིསུ ཨཉྙཏརཾ ཨནྟརཱ ཨེཀཾ ནིམིཏྟཾ ཀཏྭཱ སམྨཏཱ, སཱ ཁཎྜནིམིཏྟཱ ནཱམ ན ཧོཏཱིཏི ཝིཉྙཱཡཏི ནིམིཏྟུཔགཱནཾ ནིམིཏྟཱནཾ ཏིཎྞཾ སབྦྷཱཝཏོ. ཨཊྛཀཐཱསུ པན ཨཝིསེསེན ཝུཏྟཾ, ཏསྨཱ ཨུཔཔརིཀྑིཏྭཱ གཧེཏབྦཾ. སབྦེན སབྦནྟི སབྦཔྤཀཱརེན. ནིམིཏྟཱནཾ བཧི ཋིཏེན སམྨཏཱཏི ཏེསཾ བཧི ཋིཏེན ཝཱཙིཏཀམྨཝཱཙཱ. ནིམིཏྟཱནི པན ཨནྟོ ཙ བཧི ཙ ཋཏྭཱ ཀིཏྟེཏུཾ ཝཊྚནྟི.

ཨེཝཾ སམྨཏཱཔཱིཏི ནིམིཏྟཱནི ཀིཏྟེཏྭཱ ཀམྨཝཱཙཱཡ སམྨཏཱཔི. ཨིམསྶ ‘‘ཨསམྨཏཱཝ ཧོཏཱི’’ཏི ¶ ཨིམིནཱ སམྦནྡྷོ. སབྦཱ, བྷིཀྑཝེ, ནདཱི ཨསཱིམཱཏི ཡཱ ཀཱཙི ནདཱིལཀྑཎཔྤཏྟཱ ནདཱི ནིམིཏྟཱནི ཀིཏྟེཏྭཱ ‘‘ཨེཏཾ བདྡྷསཱིམཾ ཀརོམཱ’’ཏི ཀཏཱཔི ཨསཱིམཱ, བདྡྷསཱིམཱ ན ཧོཏཱིཏི ཨཏྠོ. ཨཏྟནོ སབྷཱཝེན པན སཱ བདྡྷསཱིམཱསདིསཱ. སབྦཏྠ སངྒྷཀམྨཾ ཀཱཏུཾ ཝཊྚཏི. སམུདྡཛཱཏསྶརེསུཔི ཨེསེཝ ནཡོ. ‘‘སཾསཊྛཝིཊཔཱ’’ཏི ཨིམིནཱ ཨཉྙམཉྙསྶ ཨཱསནྣཏཾ དཱིཔེཏི. བདྡྷཱ ཧོཏཱིཏི པཙྪིམདིསཱབྷཱགེ སཱིམཾ སནྡྷཱཡ ཝུཏྟཾ. ཏསྶཱ པདེསནྟི ཏསྶཱ ཨེཀདེསཾ. ཡཏྠ ཋཏྭཱ བྷིཀྑཱུཧི ཀམྨཾ ཀཱཏུཾ སཀྐཱ ཧོཏི, ཏཱདིསཾ ཨེཀདེསནྟི ཝུཏྟཾ ཧོཏི. ཡཏྠ པན ཋིཏེཧི ཀམྨཾ ཀཱཏུཾ ན སཀྐཱ, ཏཱདིསཾ པདེསཾ ཨནྟོ ཀརིཏྭཱ བནྡྷནྟཱ སཱིམཱཡ སཱིམཾ སམྦྷིནྡནྟི ནཱམ, ན ཏུ ཨཛ྄ཛྷོཏྠརནྟི ནཱམཱཏི གཧེཏབྦཾ. གཎྛིཔདེསུ པན ‘‘སམྦྷིནྡནཾ པརེསཾ སཱིམཱཡ ཨེཀཾ ཝཱ དྭེ ཝཱ ནིམིཏྟེ ཀིཏྟེཏྭཱ ལེཁཱམཏྟཾ གཧེཏྭཱ བནྡྷནཾ. ཨཛ྄ཛྷོཏྠརཎཾ ནཱམ པརེསཾ སཱིམཱཡ ནིམིཏྟེ ཀིཏྟེཏྭཱ ཏཾ སཀལཾ ཝཱ ཏསྶེཀདེསཾ ཝཱ ཨནྟོ ཀརོནྟེན ཏསྶཱ བཧི ཨེཀིསྶཾ དྭཱིསུ ཝཱ དིསཱསུ ནིམིཏྟེ ཀིཏྟེཏྭཱ བནྡྷན’’ནྟི ཝུཏྟཾ.

པབྦཏཱདཱིནཾ ནིམིཏྟཱནཾ སམྤདཱ ནིམིཏྟསམྤཏྟི. པབྦཏོཝ ནིམིཏྟཾ པབྦཏནིམིཏྟཾ. ཨེཝཾ སེསེསུཔི. ཨེཝཾ ཝུཏྟེསཱུཏི ཨུཔོསཐཀྑནྡྷཀེ (མཧཱཝ. ༡༣༨ ཨཱདཡོ) སཱིམཱསམྨུཏིཡཾ ཝུཏྟེསུ. ཨིམེཧི ཙ པན ཨཊྛཧི ནིམིཏྟེཧི ཨསམྨིསྶེཧིཔི ཨཉྙམཉྙམིསྶེཧིཔི སཱིམཾ སམྨནྣིཏུཾ ཝཊྚཏི. ཏེནཱཧ ‘‘ཏསྨིཾ ཏསྨིཾ དིསཱབྷཱགེ ཡཐཱལདྡྷཱནི ནིམིཏྟུཔགཱནི ནིམིཏྟཱནཱི’’ཏི. ཨེཀེན, པན དྭཱིཧི ཝཱ ནིམིཏྟེཧི སམྨནྣིཏུཾ ¶ ན ཝཊྚཏི, ཏཱིཎི པན ཨཱདིཾ ཀཏྭཱ ཝུཏྟཔྤཀཱརཱནཾ ནིམིཏྟཱནཾ སཏེནཱཔི ཝཊྚཏི. ‘‘པུརཏྠིམཱཡ དིསཱཡ ཀིཾ ནིམིཏྟ’’ནྟི ཝིནཡདྷརེན པུཙྪིཏབྦཾ, ‘‘པབྦཏོ, བྷནྟེ’’ཏི ཝུཏྟེ པུན ཝིནཡདྷརེནེཝ ‘‘ཨེསོ པབྦཏོ ནིམིཏྟ’’ནྟི ཨེཝཾ ནིམིཏྟཾ ཀིཏྟེཏབྦཾ. ‘‘ཨེཏཾ པབྦཏཾ ནིམིཏྟཾ ཀརོམ, ནིམིཏྟཾ ཀརིསྶཱམ, ནིམིཏྟཾ ཀཏོ, ནིམིཏྟཾ ཧོཏུ, ཧོཏི བྷཝིསྶཏཱི’’ཏི ཨེཝཾ པན ཀིཏྟེཏུཾ ན ཝཊྚཏི. པཱསཱཎཱདཱིསུཔི ཨེསེཝ ནཡོ. ཏེནཱཧ ‘‘པུརཏྠིམཱཡ དིསཱཡ ཀིཾ ནིམིཏྟ’’ནྟིཨཱདི. ‘‘པབྦཏོ, བྷནྟེ, ཨུདཀཾ, བྷནྟེ’’ཏི ཨེཝཾ པན ཨུཔསམྤནྣོ ཝཱ ཨཱཙིཀྑཏུ, ཨནུཔསམྤནྣོ ཝཱ, ཝཊྚཏིཡེཝ. ཨཱདིསདྡེན ‘‘པུརཏྠིམཱཡ ཨནུདིསཱཡ ཀིཾ ནིམིཏྟཾ? པཱསཱཎོ, བྷནྟེ, ཨེསོ པཱསཱཎོ ནིམིཏྟཾ. དཀྑིཎཱཡ དིསཱཡ, དཀྑིཎཱཡ ཨནུདིསཱཡ, པཙྪིམཱཡ དིསཱཡ, པཙྪིམཱཡ ཨནུདིསཱཡ, ཨུཏྟརཱཡ དིསཱཡ, ཨུཏྟརཱཡ ཨནུདིསཱཡ ཀིཾ ནིམིཏྟཾ? ཨུདཀཾ, བྷནྟེ, ཨེཏཾ ཨུདཀཾ ནིམིཏྟ’’ནྟི ཨིདཾ སངྒཎྷཱཏི. ཨེཏྠ པན ཨཊྛཏྭཱ པུན ‘‘པུརཏྠིམཱཡ དིསཱཡ ཀིཾ ནིམིཏྟཾ? པབྦཏོ, བྷནྟེ, ཨེསོ པབྦཏོ ནིམིཏྟ’’ནྟི ཨེཝཾ པཋམཾ ཀིཏྟིཏནིམིཏྟཾ ཀིཏྟེཏྭཱཝ ཋཔེཏབྦཾ. ཨེཝཉྷི ནིམིཏྟེན ནིམིཏྟཾ གྷཊིཏཾ ཧོཏི. སམྨཱ ཀིཏྟེཏྭཱཏི ཨཉྙམཉྙནཱམཝིཔརིཡཱཡེན, ཨནིམིཏྟཱནཾ ནཱམེན ཙ ཨཀིཏྟེཏྭཱ ཡཐཱཝུཏྟེནེཝ ནཡེན ཀིཏྟེཏྭཱ. སམྨཏཱཏི ‘‘སུཎཱཏུ མེ, བྷནྟེ’’ཏིཨཱདིནཱ ནཡེན ཨུཔོསཐཀྑནྡྷཀེ (མཧཱཝ. ༡༣༩ ཨཱདཡོ) ¶ ཝུཏྟཱཡ པརིསུདྡྷཱཡ ཉཏྟིདུཏིཡཀམྨཝཱཙཱཡ བདྡྷཱ. ཏཏྠ ནིམིཏྟཱནི སཀིཾ ཀིཏྟིཏཱནིཔི ཀིཏྟིཏཱནེཝ ཧོནྟི. ཨནྡྷཀཊྛཀཐཱཡཾ པན ཏིཀྑཏྟུཾ སཱིམམཎྜལཾ སམྦནྡྷནྟེན ནིམིཏྟཾ ཀིཏྟེཏབྦ’’ནྟི (མཧཱཝ. ཨཊྛ. ༡༣༨) ཝུཏྟཾ.

ཏཏྲཱཏི ཏེསུ ཨཊྛསུ ནིམིཏྟེསུ. ནིམིཏྟུཔགཏཱཏི ནིམིཏྟཡོགྱཏཱ. ‘‘ཧཏྠིཔྤམཱཎཏོ པཊྛཱཡཱ’’ཏི ཝཙནཏོ ཧཏྠིཔྤམཱཎོཔི ནིམིཏྟུཔགོཡེཝ. ཧཏྠཱི པན སཏྟརཏནོ ཝཱ ཨཌྜྷཊྛརཏནོ (སཱརཏྠ. ཊཱི. མཧཱཝགྒ ༣.༡༣༨) ཝཱ. ཏཏོ ཨོམཀཏརོཏི ཏཏོ ཧཏྠིཔྤམཱཎཏོ ཁུདྡཀཏརོ. སཙེ ཙཏཱུསུ དིསཱསུ ཙཏྟཱརོ ཝཱ ཏཱིསུ ཝཱ ཏཡོ པབྦཏཱ ཧོནྟི, ཙཏཱུཧི, ཏཱིཧི ཝཱ པབྦཏནིམིཏྟེཧེཝ སམྨནྣིཏུམྤི ཝཊྚཏི, དྭཱིཧི པན ནིམིཏྟེཧི, ཨེཀེན ཝཱ སམྨནྣིཏུཾ ན ཝཊྚཏི. ཨིཏོ པརེསུ པཱསཱཎནིམིཏྟཱདཱིསུཔི ཨེསེཝ ནཡོ. ཏསྨཱ པབྦཏནིམིཏྟཾ ཀརོནྟེན པུཙྪིཏབྦཾ ‘‘ཨེཀཱབདྡྷོ, ན ཨེཀཱབདྡྷོ’’ཏི. སཙེ ¶ ཨེཀཱབདྡྷོ ཧོཏི, ན ཀཱཏབྦོ. ཏཉྷི ཙཏཱུསུ ཝཱ ཨཊྛསུ ཝཱ དིསཱསུ ཀིཏྟེནྟེནཱཔི ཨེཀམེཝ ནིམིཏྟཾ ཀིཏྟིཏཾ ཧོཏི. ཏསྨཱ ཡོ ཨེཝཾ ཙཀྐསཎྛཱནེན ཝིཧཱརཾ པརིཀྑིཔིཏྭཱ ཋིཏོ པབྦཏོ, ཏཾ ཨེཀདིསཱཡ ཀིཏྟེཏྭཱ ཨཉྙཱསུ དིསཱསུ ཏཾ བཧིདྡྷཱ ཀཏྭཱ ཨནྟོ ཨཉྙཱནི ནིམིཏྟཱནི ཀིཏྟེཏབྦཱནི. སཙེ པབྦཏསྶ ཏཏིཡབྷཱགཾ ཝཱ ཨུཔཌྜྷཾ ཝཱ ཨནྟོསཱིམཱཡ ཀཏྟུཀཱམཱ ཧོནྟི, པབྦཏཾ ཨཀིཏྟེཏྭཱ ཡཏྟཀཾ པདེསཾ ཨནྟོ ཀཏྟུཀཱམཱ, ཏསྶ པརཏོ ཏསྨིཾཡེཝ པབྦཏེ ཛཱཏརུཀྑཝམྨིཀཱདཱིསུ ཨཉྙཏརཾ ནིམིཏྟཾ ཀིཏྟེཏབྦཾ. སཙེ ཡོཛནདྭིཡོཛནཔྤམཱཎཾ སབྦཾ པབྦཏཾ ཨནྟོ ཀཏྟུཀཱམཱ ཧོནྟི, པབྦཏསྶ པརཏོ བྷཱུམིཡཾ ཛཱཏརུཀྑཝམྨིཀཱདཱིནི ནིམིཏྟཱནི ཀིཏྟེཏབྦཱནི (མཧཱཝ. ཨཊྛ. ༡༣༨; ཝི. སངྒ. ཨཊྛ. ༡༥༨).

སངྑཾ གཙྪཏཱིཏི གཎནཾ ཝོཧཱརཾ གཙྪཏཱིཏི ཨཏྠོ. དྭཏྟིཾསཔལགུལ༹པིཎྜཔརིམཱཎོཏི ཐཱུལཏཱཡ, ན ཏུལགཎནཱཡ. ཏཏྠ ‘‘ཨེཀཔལཾ ནཱམ དསཀལཉྫ’’ནྟི ཝདནྟི. ཨིཊྛཀཱ མཧནྟཱཔི ན ཝཊྚཏི. ཏཐཱ ཨནིམིཏྟུཔགཔཱསཱཎཱནཾ རཱསི, པགེཝ པཾསུཝཱལུཀཱརཱསི. བྷཱུམིསམོ ཁལམཎྜལསདིསོ པིཊྛིཔཱསཱཎོ ཝཱ བྷཱུམིཏོ ཁཱཎུཀོ ཝིཡ ཨུཊྛིཏཔཱསཱཎོ ཝཱ ཧོཏི, སོཔི པམཱཎཱུཔགོ ཙེ, ཝཊྚཏི. ‘‘པིཊྛིཔཱསཱཎོ པན ཨཏིམཧནྟོཔི པཱསཱཎསངྑམེཝ གཙྪཏཱིཏི ཨཱཧ ‘‘པིཊྛིཔཱསཱཎོ པནཱ’’ཏིཨཱདི. ཏསྨཱ སཙེ མཧཏོ པིཊྛིཔཱསཱཎསྶ ཨེཀཾ པདེསཾ ཨནྟོསཱིམཱཡཾ ཀཏྟུཀཱམཱ ཧོནྟི, ཏཾ ཨཀིཏྟེཏྭཱ ཏསྶུཔརི ཨཉྙོ པཱསཱཎོ ཀིཏྟེཏབྦོ. སཙེ པིཊྛིཔཱསཱཎུཔརི ཝིཧཱརཾ ཀརོནྟི, ཝིཧཱརམཛ྄ཛྷེན ཙ པིཊྛིཔཱསཱཎོ ཝིནིཝིཛ྄ཛྷིཏྭཱ གཙྪཏི, ཨེཝརཱུཔོ པིཊྛིཔཱསཱཎོ ན ཝཊྚཏི. སཙེ ཧི ཏཾ ཀིཏྟེནྟི, ནིམིཏྟསྶུཔརི ཝིཧཱརོ ཧོཏི, ནིམིཏྟཉྩ ¶ ནཱམ བཧིསཱིམཱཡཾ ཧོཏི, ཝིཧཱརོཔི བཧིསཱིམཱཡཾ ཨཱཔཛྫཏི. ཝིཧཱརཾ པརིཀྑིཔིཏྭཱ ཋིཏཔིཊྛིཔཱསཱཎོ པན ཨེཀཏྠ ཀིཏྟེཏྭཱ ཨཉྙཏྠ ན ཀིཏྟེཏབྦོ.

ཝནནིམིཏྟེ ཏིཎཝནཾ ཝཱ ཏཙསཱརརུཀྑཝནཾ ཝཱ ན ཝཊྚཏཱིཏི ཨཱཧ ‘‘ཨནྟོསཱརེཧཱི’’ཏིཨཱདི. ཨནྟོསཱརཱ ནཱམ ཨམྦཛམྦུཔནསཱདཡོ. ཨནྟོསཱརམིསྶཀེཧཱིཏི ཨནྟོ སཱརོ ཡེསཾ ཏེ ཨནྟོསཱརཱ, ཏེཧི མིསྶཀཱ ཨནྟོསཱརམིསྶཀཱ, ཏེཧི. ཙཏུཔཉྩརུཀྑམཏྟམྤཱིཏི ཧེཊྛིམཔརིཙྪེདནཱཧ ¶ . ཨུཀྐཾསཏོ པན ཡོཛནསཏིཀམྤི ཝནཾ ཝཊྚཏི. ཨེཏྠ པན ཙཏུརུཀྑམཏྟཉྩེ, ཏཡོ སཱརཏོ, ཨེཀོ ཨསཱརཏོ. པཉྩརུཀྑམཏྟཉྩེ, ཏཡོ སཱརཏོ, དྭེ ཨསཱརཏོཏི གཧེཏབྦཾ. སཙེ པན ཝནམཛ྄ཛྷེ ཝིཧཱརཾ ཀརོནྟི, ཏཾ ཝནཾ ན ཀིཏྟེཏབྦཾ. ཨེཀདེསཾ ཨནྟོསཱིམཱཡཾ ཀཏྟུཀཱམེཧིཔི ཝནཾ ཨཀིཏྟེཏྭཱ ཏཏྠ རུཀྑཔཱསཱཎཱདཡོ ཀིཏྟེཏབྦཱ, ཝིཧཱརཾ པརིཀྑིཔིཏྭཱ ཋིཏཝནཾ ཨེཀཏྠ ཀིཏྟེཏྭཱ ཨཉྙཏྠ ན ཀིཏྟེཏབྦཾ (མཧཱཝ. ཨཊྛ. ༡༣༨).

རུཀྑནིམིཏྟེཔི ཏཙསཱརརུཀྑོ ན ཝཊྚཏཱིཏི ཨཱཧ ‘‘ཨནྟོསཱརོ’’ཏི. ‘‘བྷཱུམིཡཾ པཏིཊྛིཏོ’’ཏི ཨིམིནཱ ཀུཊསརཱཝཱདཱིསུ ཋིཏཾ པཊིཀྑིཔཏི. ཏཏོ ཨཔནེཏྭཱ པན ཏངྑཎམྤི བྷཱུམིཡཾ རོཔེཏྭཱ ཀོཊྛཀཾ ཀཏྭཱ ཨུདཀཾ ཨཱསིཉྩིཏྭཱ ཀིཏྟེཏུཾ ཝཊྚཏི, ནཝམཱུལསཱཁཱནིགྒམནཾ ཨཀཱརཎཾ. ཁནྡྷཾ ཚིནྡིཏྭཱ རོཔིཏེ པན ཨེཏཾ ཡུཛྫཏི. སཱུཙིདཎྜཀཔྤམཱཎོཏི ‘‘སཱིཧལ༹དཱིཔེ ལེཁནདཎྜཔྤམཱཎོ’’ཏི ཝདནྟི (སཱརཏྠ. ཊཱི. མཧཱཝགྒ ༣.༡༣༨), སོ ཙ ཀནིཊྛངྒུལིཔརིམཱཎོཏི དཊྛབྦོ. ཨིདཾ པན རུཀྑནིམིཏྟཾ ཀིཏྟེནྟེན ‘‘རུཀྑོ’’ཏིཔི, ‘‘སཱཀརུཀྑོ, སཱལརུཀྑོ’’ཏིཔི ཝཏྟུཾ ཝཊྚཏི. ཨེཀཱབདྡྷཾ པན སུཔྤཏིཊྛིཏནིགྲོདྷསདིསཾ རུཀྑཾ ཨེཀཏྠ ཀིཏྟེཏྭཱ ཨཉྙཏྠ ཀིཏྟེཏུཾ ན ཝཊྚཏི.

མགྒནིམིཏྟེ ཨརཉྙཁེཏྟནདཱིཏལཱ༹ཀམགྒཱདཡོ ན ཝཊྚནྟཱིཏི ཨཱཧ ‘‘ཛངྒྷམགྒོ ཝཱ ཧོཏཱུ’’ཏིཨཱདི. ཡོ པན ཛངྒྷམགྒོ སཀཊམགྒཏོ ཨོཀྐམིཏྭཱ པུན སཀཊམགྒམེཝ ཨོཏརཏི, ཡེ ཝཱ ཛངྒྷམགྒསཀཊམགྒཱ ཨཝལཉྫིཏཱ, ཏེ ན ཝཊྚནྟི. ཏེནཱཧ ‘‘ཛངྒྷསཏྠསཀཊསཏྠེཧཱི’’ཏིཨཱདི. ཨེཏྠ ཙ སཙེ སཀཊམགྒསྶ ཨནྟིམཙཀྐམགྒཾ ནིམིཏྟཾ ཀརོནྟི, མགྒོ བཧིསཱིམཱཡ ཧོཏི. སཙེ བཱཧིརཙཀྐམགྒཾ ནིམིཏྟཾ ཀརོནྟི, བཱཧིརཙཀྐམགྒོཝ བཧིསཱིམཱཡ ཧོཏི, སེསཾ ཨནྟོསཱིམཾ བྷཛཏཱིཏི ཝེདིཏབྦཾ. སཙེཔི དྭེ མགྒཱ ནིཀྑམིཏྭཱ པཙྪཱ སཀཊདྷུརམིཝ ཨེཀཱིབྷཝནྟི, དྭིདྷཱ བྷིནྣཊྛཱནེ ཝཱ སམྦནྡྷཊྛཱནེ ཝཱ སཀིཾ ཀིཏྟེཏྭཱ པུན ན ཀིཏྟེཏབྦཱ. ཨེཀཱབདྡྷནིམིཏྟཉྷེཏཾ ཧོཏི.

སཙེ ¶ ཝིཧཱརཾ པརིཀྑིཔིཏྭཱ ཙཏྟཱརོ མགྒཱ ཙཏཱུསུ དིསཱསུ གཙྪནྟི, མཛ྄ཛྷེ ཨེཀཾ ཀིཏྟེཏྭཱ ཨཔརཾ ཀིཏྟེཏུཾ ན ཝཊྚཏི. ཨེཀཱབདྡྷནིམིཏྟཉྷེཏཾ. ཀོཎཾ ཝིནིཝིཛ྄ཛྷིཏྭཱ གཏཾ པན པརབྷཱགེ ཀིཏྟེཏུཾ ཝཊྚཏི. ཝིཧཱརམཛ྄ཛྷེན ¶ ཝིནིཝིཛ྄ཛྷིཏྭཱ གཏམགྒོ པན ན ཀིཏྟེཏབྦོ. ཀིཏྟིཏེ པན ནིམིཏྟསྶ ཨུཔརི ཝིཧཱརོ ཧོཏི. ཨིམཉྩ མགྒཾ ཀིཏྟེནྟེན ‘‘མགྒོ པཛྫོ པཐོ’’ཏིཨཱདིནཱ (ཙཱུལ༹ནི. པཱརཱཡནཏྠུཏིགཱཐཱནིདྡེས ༡༠༡) ཝུཏྟེསུ དསསུ ནཱམེསུ ཡེན ཀེནཙི ནཱམེན ཀིཏྟེཏུཾ ཝཊྚཏི. པརིཁཱསཎྛཱནེན ཝིཧཱརཾ པརིཀྑིཔིཏྭཱ གཏམགྒོ ཨེཀཏྠ ཀིཏྟེཏྭཱ ཨཉྙཏྠ ཀིཏྟེཏུཾ ན ཝཊྚཏི.

ཡཾ པན ཨབདྡྷསཱིམཱལཀྑཎེ ནདིཾ ཝཀྑཱམཱཏི ‘‘ཡསྶཱ དྷམྨིཀཱནཾ རཱཛཱུནཾ ཀཱལེ’’ཏིཨཱདིནཱ (ཀངྑཱ. ཨཊྛ. ནིདཱནཝཎྞནཱ) ཨུདཀུཀྑེཔསཱིམཱཡཾ ནདིཡཱ ཝཀྑམཱནཏྟཱ ཝུཏྟཾ. ཡཱ པན ནདཱི མགྒོ ཝིཡ སཀཊདྷུརསཎྛཱནེན ཝཱ པརིཁཱསཎྛཱནེན ཝཱ ཝིཧཱརཾ པརིཀྑིཔིཏྭཱ གཏཱ, ནཾ ཨེཀཏྠ ཀིཏྟེཏྭཱ ཨཉྙཏྠ ཀིཏྟེཏུཾ ན ཝཊྚཏི. ཝིཧཱརསྶ ཙཏཱུསུ དིསཱསུ ཨཉྙམཉྙཾ ཝིནིཝིཛ྄ཛྷིཏྭཱ གཏེ ནདཱིཙཏུཀྐེཔི ཨེསེཝ ནཡོ. ཨསམྨིསྶནདིཡོ པན ཙཏསྶོཔི ཀིཏྟེཏུཾ ཝཊྚཏི. སཙེ ཝཏིཾ ཀརོནྟོ ཝིཡ རུཀྑཔཱདེ ནིཁཎིཏྭཱ ཝལླིཔལཱལཱདཱིཧི ནདཱིསོཏཾ རུམྦྷནྟི, ཨུདཀམྤི ཨཛ྄ཛྷོཏྠརིཏྭཱ ཨཱཝརཎཾ པཝཏྟཏིཡེཝ, ནིམིཏྟཾ ཀཱཏུཾ ཝཊྚཏི. ཡཐཱ པན ཨུདཀཾ ནཔྤཝཏྟཏི, ཨེཝཾ སེཏུམྷི ཀཏེ ཨཔྤཝཏྟམཱནཱ ནདཱི ནིམིཏྟཾ ཀཱཏུཾ ན ཝཊྚཏི. པཝཏྟནཊྛཱནེ ནདཱིནིམིཏྟཾ, ཨཔྤཝཏྟནཊྛཱནེ ཨུདཀནིམིཏྟཾ ཀཱཏུཾ ཝཊྚཏི.

ཡཱ པན དུབྦུཊྛིཀཱལེ ཝཱ གིམྷེ ཝཱ ནིརུདཀབྷཱཝེན ནཔྤཝཏྟཏི, སཱ ཝཊྚཏི. མཧཱནདིཏོ ཨུདཀམཱཏིཀཾ ནཱིཧརནྟི, སཱ ཀུནྣདཱིསདིསཱ ཧུཏྭཱ ཏཱིཎི སསྶཱནི སམྤཱདེནྟཱི ནིཙྩཾ པཝཏྟཏི. ཀིཉྩཱཔི པཝཏྟཏི, ནིམིཏྟཾ ཀཱཏུཾ ན ཝཊྚཏི. ཡཱ པན མཱུལེ མཧཱནདིཏོ ནིགྒཏཱཔི ཀཱལནྟརེན ཏེནེཝ ནིགྒཏམགྒེན ནདིཾ བྷིནྡིཏྭཱ སཡམེཝ གཙྪཏི, གཙྪནྟཱི ཙ པརཏོ སུསུམཱརཱདིསམཱཀིཎྞཱ ནཱཝཱདཱིཧི སཉྩརིཏབྦཱ ནདཱི ཧོཏི, ཏཾ ནིམིཏྟཾ ཀཱཏུཾ ཝཊྚཏི.

ཨསནྡམཱནནྟི ཨཔྤཝཏྟམཱནཾ. སནྡམཱནཾ ནཱམ ཨོགྷནདཱིཨུདཀཝཱཧཀམཱཏིཀཱསུ ཨུདཀཾ. ཝུཏྟཔརིཙྪེདཀཱལཾ ཨཏིཊྛནྟནྟི ‘‘ཡཱཝ ཀམྨཝཱཙཱཔརིཡོསཱནཱ སཎྛམཱནཀ’’ནྟི ཝུཏྟཔརིཙྪེདཀཱལཾ ཨཏིཊྛནྟཾ. བྷཱཛནགཏནྟི ནཱཝཱཙཱཊིཨཱདཱིསུ བྷཱཛནེསུ གཏཾ. ཡཾ པན ཨནྡྷཀཊྛཀཐཱཡཾ ‘‘གམྦྷཱིརེསུ ཨཱཝཱཊཱདཱིསུ ཨུཀྑེཔིམཾ ཨུདཀཾ ནིམིཏྟཾ ན ཀཱཏབྦ’’ནྟི (མཧཱཝ. ཨཊྛ. ༡༣༨; ཝི. སངྒ. ཨཊྛ. ༡༥༨) ཝུཏྟཾ, ཏཾ དུཝུཏྟཾ ¶ , ཨཏྟནོ མཏིམཏྟམེཝ. ཋིཏཾ པན ཨནྟམསོ སཱུཀརཁཏཱཡཔི གཱམདཱརཀཱནཾ ཀཱིལ༹ནཝཱཔིཡམྤི སཙེ ཡཱཝ ཀམྨཝཱཙཱཔརིཡོསཱནཾ ཏིཊྛཏི, ཨཔྤཾ ཝཱ ¶ ཧོཏུ, བཧུ ཝཱ, ཝཊྚཏིཡེཝ. ཏསྨིཾ པན ཋཱནེ ནིམིཏྟསཉྙཱཀརཎཏྠཾ པཱསཱཎཝཱལིཀཱཔཾསུཨཱདིརཱསི ཝཱ པཱསཱཎཏྠམྦྷོ ཝཱ དཱརུཏྠམྦྷོ ཝཱ ཀཱཏབྦོ.

ཨེཝཾ ནིམིཏྟསམྤཏྟིཡུཏྟཏཾ དསྶེཏྭཱ ཨིདཱནི ཡེཧི ཨཱཀཱརེཧི བདྡྷཱ པརིསཱསམྤཏྟིཡུཏྟཱ ནཱམ ཧོཏི, ཏཾ དསྶེཏུཾ ‘‘པརིསཱསམྤཏྟིཡཱ ཡུཏྟཱ ནཱམཱ’’ཏིཨཱདིམཱཧ. ཨིམསྶ པན ཀམྨསྶ ཙཏུཝགྒཀརཎཱིཡཏྟཱ ‘‘ཙཏཱུཧི བྷིཀྑཱུཧཱི’’ཏི ཝུཏྟཾ. ཨིམཉྩ སཱིམཾ བནྡྷིཏུཀཱམེཧི སཱམནྟཝིཧཱརེསུ བྷིཀྑཱུ ཏསྶ ཏསྶ ཝིཧཱརསྶ སཱིམཱཔརིཙྪེདཾ པུཙྪིཏྭཱ བདྡྷསཱིམཝིཧཱརཱནཾ སཱིམཱཡ སཱིམནྟརིཀཾ, ཨབདྡྷསཱིམཝིཧཱརཱནཾ སཱིམཱཡ ཨུཔཙཱརཾ ཋཔེཏྭཱ དིསཱཙཱརིཀབྷིཀྑཱུནཾ ནིསྶཉྩཱརསམཡེ སཙེ ཨེཀསྨིཾ གཱམཁེཏྟེ སཱིམཾ བནྡྷིཏུཀཱམཱ, ཡེ ཏཏྠ བདྡྷསཱིམཝིཧཱརཱ, ཏེསུ བྷིཀྑཱུནཾ ‘‘མཡཾ ཨཛྫ སཱིམཾ བནྡྷིསྶཱམ, ཏུམྷེ སཀསཀསཱིམཱཔརིཙྪེདཏོ མཱ ནིཀྑམིཏྠཱ’’ཏི པེསེཏབྦཾ. ཡེ ཨབདྡྷསཱིམཝིཧཱརཱ, ཏེསུ བྷིཀྑཱུ ཨེཀཛ྄ཛྷཾ སནྣིཔཱཏཱཔེཏབྦཱ, ཚནྡཱརཧཱནཾ ཚནྡོ ཨཱཧརཱཔེཏབྦོ. ཏེན ཝུཏྟཾ ‘‘ཡཱཝཏིཀཱ ཏསྨིཾ གཱམཁེཏྟེ’’ཏིཨཱདི. ཏསྨིཾ གཱམཁེཏྟེཏི ཡསྨིཾ གཱམཁེཏྟེ ཋཏྭཱ ཀམྨཝཱཙཾ ཝཱཙེནྟི, ཏསྨིཾ གཱམཁེཏྟེ. ‘‘སཙེ ཨཉྙཱནིཔི གཱམཁེཏྟཱནི ཨནྟོ ཀཏྟུཀཱམཱ, ཏེསུ གཱམེསུ ཡེ བྷིཀྑཱུ ཝསནྟི, ཏེཧིཔི ཨཱགནྟབྦཾ, ཨནཱགཙྪནྟཱནཾ ཚནྡོ ཨཱཧརིཏབྦོ’’ཏི མཧཱསུམཏྠེརོ ཨཱཧ. མཧཱཔདུམཏྠེརོ པནཱཧ ‘‘ནཱནཱགཱམཁེཏྟཱནི ནཱམ པཱཊིཡེཀྐཾ བདྡྷསཱིམཱསདིསཱནི, ན ཏཏོ ཚནྡཔཱརིསུདྡྷི ཨཱགཙྪཏི. ཨནྟོནིམིཏྟགཏེཧི པན བྷིཀྑཱུཧི ཨཱགནྟབྦ’’ནྟི ཝཏྭཱ པུན ཨཱཧ ‘‘སམཱནསཾཝཱསཀསཱིམཱསམྨནྣནཀཱལེ ཨཱགམནམྤི ཨནཱགམནམྤི ཝཊྚཏི, ཨཝིཔྤཝཱསསཱིམཱསམྨནྣནཀཱལེ པན ཨནྟོནིམིཏྟགཏེཧི ཨཱགནྟབྦཾ. ཨནཱགཙྪནྟཱནཾ ཚནྡོ ཨཱཧརིཏབྦོ’’ཏི (མཧཱཝ. ཨཊྛ. ༡༣༨).

ཨིདཱནི ཡེཧི ཨཱཀཱརེཧི སམྨཏཱ ཀམྨཝཱཙཱསམྤཏྟིཡུཏྟཱ ནཱམ ཧོཏི, ཏཾ དསྶེཏུཾ ‘‘ཀམྨཝཱཙཱསམྤཏྟིཡཱ ཡུཏྟཱ ནཱམཱ’’ཏིཨཱདིམཱཧ. ཨཱདིསདྡེན. ‘‘ཡདི སངྒྷསྶ པཏྟཀལླཾ, སངྒྷོ ཨེཏེཧི ནིམིཏྟེཧི སཱིམཾ སམྨནྣེཡྻ སམཱནསཾཝཱསཾ ཨེཀཱུཔོསཐཾ, ཨེསཱ ཉཏྟི. སུཎཱཏུ ¶ མེ, བྷནྟེ, སངྒྷོ, ཡཱཝཏཱ སམནྟཱ ནིམིཏྟཱ ཀིཏྟིཏཱ, སངྒྷོ ཨེཏེཧི ནིམིཏྟེཧི སཱིམཾ སམྨནྣཏི སམཱནསཾཝཱསཾ ཨེཀཱུཔོསཐཾ, ཡསྶཱཡསྨཏོ ཁམཏི ཨེཏེཧི ནིམིཏྟེཧི སཱིམཱཡ སམྨུཏི སམཱནསཾཝཱསཱཡ ཨེཀཱུཔོསཐཱཡ, སོ ཏུཎྷསྶ. ཡསྶ ནཀྑམཏི, སོ བྷཱསེཡྻ. སམྨཏཱ སཱིམཱ སངྒྷེན ཨེཏེཧི ནིམིཏྟེཧི སམཱནསཾཝཱསཱ ཨེཀཱུཔོསཐཱ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི (མཧཱཝ. ༡༣༩) ཨིམཾ པཱལི༹སེསཾ སངྒཎྷཱཏི. ཝུཏྟཱཡཱཏི ཨུཔོསཐཀྑནྡྷཀེ ཝུཏྟཱཡ. ཉཏྟིདོསཨནུསྶཱཝནདོསེཧི ཝིརཧིཏཏྟཱ པརིསུདྡྷཱཡ.

ཁཎྜསཱིམཱ (མཧཱཝ. ཨཊྛ. ༡༣༨; སཱརཏྠ. ཊཱི. མཧཱཝགྒ ༣.༡༣༨; ཝཛིར. ཊཱི. མཧཱཝགྒ ༡༣༨) ¶ ནཱམ ཁུདྡཀསཱིམཱ. སམཱནསཾཝཱསཀཏྠཾ སམྨཏཱ སཱིམཱ སམཱནསཾཝཱསཀསཱིམཱ. ཨཝིཔྤཝཱསཏྠཾ སམྨཏཱ སཱིམཱ ཨཝིཔྤཝཱསསཱིམཱ. ཨིམཱསུ པན ཏཱིསུ སཱིམཾ སམྨནྣནྟེཧི པབྦཛྫུཔསམྤདཱདཱིནཾ སངྒྷཀམྨཱནཾ སུཁཀརཎཏྠཾ པཋམཾ ཁཎྜསཱིམཱ བནྡྷིཏབྦཱ. ཏཾ པན བནྡྷནྟེཧི ཝཏྟཾ ཛཱནིཏབྦཾ. སཙེ ཧི བོདྷིཙེཏིཡབྷཏྟསཱལཱདཱིནི སབྦཝཏྠཱུནི པཏིཊྛཱཔེཏྭཱ ཀཏཝིཧཱརེ བནྡྷནྟི, ཝིཧཱརམཛ྄ཛྷེ བཧཱུནཾ སམོསརཎཊྛཱནེ ཨབནྡྷིཏྭཱ ཝིཧཱརཔཙྩནྟེ ཝིཝིཏྟོཀཱསེ བནྡྷིཏབྦཱ. ཨཀཏཝིཧཱརེ བནྡྷནྟེཧི བོདྷིཙེཏིཡཱདཱིནཾ སབྦཝཏྠཱུནཾ ཋཱནཾ སལླཀྑེཏྭཱ ཡཐཱ པཏིཊྛིཏེསུ ཝཏྠཱུསུ ཝིཧཱརཔཙྩནྟེ ཝིཝིཏྟོཀཱསེ ཧོཏི, ཨེཝཾ བནྡྷིཏབྦཱ. སཱ ཧེཊྛིམཔརིཙྪེདེན སཙེ ཨེཀཝཱིསཏིབྷིཀྑཱུ གཎྷཱཏི, ཝཊྚཏི. ཏཏོ ཨོརཾ ན ཝཊྚཏི. པརཾ བྷིཀྑུསཧསྶཾ གཎྷནྟཱིཔི ཝཊྚཏི. ཏཾ བནྡྷནྟེཧི སཱིམཱམཱལ༹ཀསྶ སམནྟཱ ནིམིཏྟུཔགཱ པཱསཱཎཱ ཋཔེཏབྦཱ, ན ཁཎྜསཱིམཱཡ ཋིཏེཧི མཧཱསཱིམཱ བནྡྷིཏབྦཱ, ན མཧཱསཱིམཱཡ ཋིཏེཧི ཁཎྜསཱིམཱ. ཁཎྜསཱིམཱཡམེཝ པན ཋཏྭཱ ཁཎྜསཱིམཱ བནྡྷིཏབྦཱ, མཧཱསཱིམཱཡམེཝ ཋཏྭཱ མཧཱསཱིམཱ.

ཏཏྲཱཡཾ བནྡྷནཝིདྷི – སམནྟཱ ‘‘ཨེསོ པཱསཱཎོ ནིམིཏྟ’’ནྟི ཨེཝཾ ནིམིཏྟཱནི ཀིཏྟེཏྭཱ ཀམྨཝཱཙཱཡ སཱིམཱ སམྨནྣིཏབྦཱ. ཨཐ ཏསྶཱ ཨེཝ དལ༹ྷཱིཀམྨཏྠཾ ཨཝིཔྤཝཱསཀམྨཝཱཙཱ ཀཱཏབྦཱ. ཨེཝཉྷི ‘‘སཱིམཾ སམཱུཧནིསྶཱམཱ’’ཏི ཨཱགཏཱ སམཱུཧནིཏུཾ ན སཀྑིསྶནྟི. སཱིམཾ སམྨནྣིཏྭཱ བཧི སཱིམནྟརིཀཔཱསཱཎཱ ཋཔེཏབྦཱ, སཱིམནྟརིཀཱ པཙྪིམཀོཊིཡཱ ཙཏུརངྒུལཔྤམཱཎཱཔི (མཧཱཝ. ཨཊྛ. ༡༣༨; ཝི. སངྒ. ཨཊྛ. ༡༦༣) ཝཊྚཏི. སཙེ པན ཝིཧཱརོ མཧཱ ཧོཏི, དྭེཔི ཏིསྶོཔི ཏཏུཏྟརིཔི ཁཎྜསཱིམཱཡོ བནྡྷིཏབྦཱ.

ཨེཝཾ ¶ ཁཎྜསཱིམཾ སམྨནྣིཏྭཱ མཧཱསཱིམཱསམྨུཏིཀཱལེ ཁཎྜསཱིམཏོ ནིཀྑམིཏྭཱ མཧཱསཱིམཱཡཾ ཋཏྭཱ སམནྟཱ ཨནུཔརིཡཱཡནྟེཧི སཱིམནྟརིཀཔཱསཱཎཱ ཀིཏྟེཏབྦཱ. ཏཏོ ཨཝསེསནིམིཏྟེ ཀིཏྟེཏྭཱ ཧཏྠཔཱསཾ ཨཝིཛཧནྟེཧི ཀམྨཝཱཙཱཡ སམཱནསཾཝཱསཀསཱིམཾ སམྨནྣིཏྭཱ ཏསྶཱ དལ༹ྷཱིཀམྨཏྠཾ ཨཝིཔྤཝཱསཀམྨཝཱཙཱཔི ཀཱཏབྦཱ. ཨེཝཉྷི ‘‘སཱིམཾ སམཱུཧནིསྶཱམཱ’’ཏི ཨཱགཏཱ སམཱུཧནིཏུཾ ན སཀྑིསྶནྟི. སཙེ པན ཁཎྜསཱིམཱཡ ནིམིཏྟཱནི ཀིཏྟེཏྭཱ ཏཏོ སཱིམནྟརིཀཱཡ ནིམིཏྟཱནི ཀིཏྟེཏྭཱ མཧཱསཱིམཱཡ ནིམིཏྟཱནི ཀིཏྟེནྟི, ཨེཝཾ ཏཱིསུ ཋཱནེསུ ནིམིཏྟཱནི ཀིཏྟེཏྭཱ ཡཾ སཱིམཾ ཨིཙྪནྟི, ཏཾ པཋམཾ བནྡྷིཏུཾ ཝཊྚཏི. ཨེཝཾ སནྟེཔི ཡཐཱཝུཏྟནཡེན ཁཎྜསཱིམཏོཝ པཊྛཱཡ བནྡྷིཏབྦཱ. ཨེཝཾ བདྡྷཱསུ པན སཱིམཱསུ ཁཎྜསཱིམཱཡཾ ཋིཏཱ བྷིཀྑཱུ མཧཱསཱིམཱཡཾ ཀམྨཾ ཀརོནྟཱནཾ ན ཀོཔེནྟི, མཧཱསཱིམཱཡཾ ཝཱ ཋིཏཱ ཁཎྜསཱིམཱཡཾ ཀརོནྟཱནཾ. སཱིམནྟརིཀཱཡ པན ཋིཏཱ ཨུབྷིནྣམྤི ན ཀོཔནྟི. གཱམཁེཏྟེ ཋཏྭཱ ཀམྨཾ ཀརོནྟཱནཾ ¶ པན སཱིམནྟརིཀཱཡ ཋིཏཱ ཀོཔེནྟི. སཱིམནྟརིཀཱ ཧི གཱམཁེཏྟཾ བྷཛཏི. ཨཝིཔྤཝཱསསཱིམཱསམྨནྣནེ ཀཏེ སཏི སཱ ཙ ཨཝིཔྤཝཱསསཱིམཱ ནཱམ ཧོཏི. ཏེནཱཧ ‘‘ཏསྶཱཡེཝ པབྷེདོ’’ཏི. ཏསྶཱཡེཝཱཏི བདྡྷསཱིམཱཡ ཨེཝ.

ཨཡཾ པན ཝིསེསོ – ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི (མཧཱཝ. ༡༤༤) ཝཙནཏོ ཨཝིཔྤཝཱསསཱིམཱ གཱམཉྩ གཱམཱུཔཙཱརཉྩ ན ཨོཏརཏི, སམཱནསཾཝཱསཀསཱིམཱ པན ཏཏྠཱཔི ཨོཏརཏི. སམཱནསཾཝཱསཀསཱིམཱ ཙེཏྠ ཨཏྟནོ དྷམྨཏཱཡ གཙྪཏི, ཨཝིཔྤཝཱསསཱིམཱ པན ཡཏྠ སམཱནསཾཝཱསཀསཱིམཱ, ཏཏྠེཝ གཙྪཏི. ན ཧི ཏསྶཱ ཝིསུཾ ནིམིཏྟཀིཏྟནཾ ཨཏྠི. ཏཏྠ སཙེ ཨཝིཔྤཝཱསཱཡ སམྨུཏིཀཱལེ གཱམོ ཨཏྠི, ཏཾ སཱ ན ཨོཏརཏི. སཙེ པན སམྨཏཱཡ སཱིམཱཡ པཙྪཱ གཱམོ ནིཝིསཏི, སོཔི སཱིམཱསངྑམེཝ གཙྪཏི. ཡཐཱ ཙ པཙྪཱ ནིཝིཊྛོ, ཨེཝཾ པཋམཾ ནིཝིཊྛསྶ པཙྪཱ ཝཌྜྷིཏཔྤདེསོཔི སཱིམཱསངྑམེཝ གཙྪཏི. སཙེཔི སཱིམཱསམྨུཏིཀཱལེ གེཧཱནི ཀཏཱནི, ‘‘པཝིསིསྶཱམཱ’’ཏི ཨཱལཡོཔི ཨཏྠི, མནུསྶཱ པན ཨཔྤཝིཊྛཱ, པོརཱཎགཱམཾ ཝཱ སགེཧམེཝ ཚཌྜེཏྭཱ ཨཉྙཏྠ གཏཱ, ཨགཱམོཡེཝ ཨེས, སཱིམཱ ཨོཏརཏི. སཙེ པན ཨེཀམྤི ཀུལཾ པཝིཊྛཾ ཝཱ ཨགཏཾ ཝཱ ཨཏྠི, གཱམོཡེཝ, སཱིམཱ ན ཨོཏརཏི.

ཨེཝཾ ¶ བདྡྷསཱིམཾ དསྶེཏྭཱ ཨིདཱནི ཨབདྡྷསཱིམཾ དསྶེནྟོ ‘‘ཨབདྡྷསཱིམཱ པནཱ’’ཏིཨཱདིམཱཧ. གཱམོ ཨེཝ སཱིམཱ གཱམསཱིམཱ. གཱམགྒཧཎེན ཙེཏྠ ནིགམནགརཱནམྤི སངྒཧོ ཝེདིཏབྦོ. ཡཏྟཀེ པདེསེ ཏསྶ གཱམསྶ གཱམབྷོཛཀཱ བལིཾ ལབྷནྟི, སོ པདེསོ ཨཔྤོ ཝཱ ཧོཏུ, མཧནྟོ ཝཱ, ཨེཀཾ གཱམཁེཏྟཾ ནཱམ. ཡམྤི ཨེཀསྨིཾཡེཝ གཱམཁེཏྟེ ཨེཀཾ པདེསཾ ‘‘ཨཡཾ ཝིསུཾ གཱམོ ཧོཏཱུ’’ཏི པརིཙྪིནྡིཏྭཱ རཱཛཱ ཀསྶཙི དེཏི, སོཔི ཝིསུཾགཱམསཱིམཱ ཧོཏིཡེཝ. ཏསྨཱ སཱ ཙ ཨིཏརཱ ཙ པཀཏིགཱམསཱིམཱ བདྡྷསཱིམཱསདིསཱཝ ཧོཏི. ཀེཝལཾ པན ཏིཙཱིཝརཝིཔྤཝཱསཔརིཧཱརཾ ན ལབྷཏཱིཏི (མཧཱཝ. ཨཊྛ. ༡༤༧).

ཨགཱམཀེ ཨརཉྙེཏི ཝིཉྫྷཱཊཝིསདིསེ ཨརཉྙེ. ཏེནཱཧ ‘‘ཨགཱམཀཾ ནཱམཱ’’ཏིཨཱདི. ཨཡཾ པན སཱིམཱ ཏིཙཱིཝརཝིཔྤཝཱསཔརིཧཱརམྤི ལབྷཏི. མཙྪབནྡྷཱནནྟི ཀེཝཊྚཱནཾ. ཨགམནཔཐེསཱུཏི གནྟུཾ ཨསཀྐུཎེཡྻཔཐེསུ. ཡཏྠ ཏདཧེཝ གནྟྭཱ ཏདཧེཝ པཙྩཱགནྟུཾ ན སཀྐཱ ཧོཏི, ཏཱདིསེསཱུཏི ཝུཏྟཾ ཧོཏི. ཏེསཾ གམནཔརིཡནྟསྶ ཨོརཏོ པན གཱམསཱིམཱསངྑཾ གཙྪཏི. ཏཏྠ གཱམསཱིམཾ ཨསོདྷེཏྭཱ ཀམྨཾ ཀཱཏུཾ ན ཝཊྚཏི. མཛ྄ཛྷེ ཋིཏཱནཾ སབྦདིསཱསུ སཏྟབྦྷནྟརཱཏི མཛ྄ཛྷེ ཋིཏཱནཾ བྷིཀྑཱུནཾ ཋིཏོཀཱསཏོ སབྦདིསཱསུ སཏྟབྦྷནྟརཱ. ཏཏྠཱཏི ཏེསུ ཨབྦྷནྟརེསུ. ཏསྨཱཏི ཡསྨཱ པརིསཝསེན ཝཌྜྷཏི, ཏསྨཱ. ཨུཔཙཱརཏྠཱཡཱཏི སཱིམོཔཙཱརཏྠཱཡ. སཱིམཱབྷཱཝཾ པཊིཀྑིཔིཏྭཱཏི ¶ བདྡྷསཱིམཱབྷཱཝཾ པཊིཀྑིཔིཏྭཱ. སམཱནོ སཾཝཱསོ ཨེཏྠཱཏི སམཱནསཾཝཱསཱ. ཨེཀོ ཨུཔོསཐོ ཨེཏྠཱཏི ཨེཀཱུཔོསཐཱ. ཨེཏྠ ཙ ཨུཔོསཐསྶ ཝིསུཾ གཧིཏཏྟཱ ཨཝསེསཀམྨཝསེན སམཱནསཾཝཱསཏཱ ཝེདིཏབྦཱ. ཝུཏྟཱཏི ཨབདྡྷསཱིམཱཔརིཙྪེདཾ དསྶེཏུཾ ཨུཔོསཐཀྑནྡྷཀེ (མཧཱཝ. ༡༤༩) ཝུཏྟཱ. ཨནུ ཨནུ ཨཌྜྷམཱསཾ ཨནྭཌྜྷམཱསཾ, ཨཌྜྷམཱསེ ཨཌྜྷམཱསེཏི ཨཏྠོ. ཨེཝཾ ‘‘ཨནུདསཱཧ’’ནྟིཨཱདཱིསུཔི. དེཝེཏི མེགྷེ. ཝལཱཧཀེསུ ཝིགཏམཏྟེསཱུཏི བྷཱཝེནབྷཱཝལཀྑཎེ བྷུམྨཾ. སོཏནྟི ཨུདཀཔྤཝཱཧོ ཝུཙྩཏི. ཏིཏྠེན ཝཱ ཨཏིཏྠེན ཝཱ ཨོཏརིཏྭཱཏི པཱཋསེསོ. ཏིམཎྜལཾ པཊིཙྪཱདེཏྭཱཏི ཡཐཱ ཏིམཎྜལཔཊིཙྪཱདནཾ ཧོཏི, ཨེཝཾ ནིཝཱསེཏྭཱ. ཨུཏྟརནྟིཡཱཏི ཡཏྠ ཀཏྠཙི ཨུཏྟརནྟིཡཱ. བྷིཀྑུནཱིཝིབྷངྒེ (པཱཙི. ༦༩༢) བྷིཀྑུནིཡཱ ཝསེན ནདཱིལཀྑཎསྶ པཱལི༹ཡཾ ཨཱགཏཏྟཱ ‘‘བྷིཀྑུནིཡཱ’’ཏི ཝུཏྟཾ, ན པན ཝིསེསསབྦྷཱཝཏོ.

ཀེནཙི ¶ ཁཎིཏྭཱ ཨཀཏོཏི ཨནྟམསོ ཏིརཙྪཱནེནཔི ཁཎིཏྭཱ ཨཀཏོ. ནདིཾ ཝཱ སམུདྡཾ ཝཱ བྷིནྡིཏྭཱཏི ནདཱིཀཱུལཾ ཝཱ སམུདྡཝེལཾ ཝཱ བྷིནྡིཏྭཱ. ཨེཏཾ ལཀྑཎནྟི ‘‘ཡཏྠ ནདིཡཾ ཝུཏྟཔྤཀཱརེ ཝསྶཀཱལེ ཨུདཀཾ སནྟིཊྛཏཱི’’ཏི (ཀངྑཱ. ཨཊྛ. ནིདཱནཝཎྞནཱ) ཝུཏྟཔྤཀཱརལཀྑཎཾ. ལོཎཱིཔི ཛཱཏསྶརསངྑམེཝ གཙྪཏི. ཡཏྠ པན ཝུཏྟཔྤཀཱརེ ཝསྶཀཱལེ ཝསྶེ པཙྪིནྣམཏྟེ པིཝིཏུཾ ཝཱ ཧཏྠཔཱདེ དྷོཝིཏུཾ ཝཱ ཨུདཀཾ ན ཧོཏི སུཀྑཏི, ཨཡཾ ཛཱཏསྶརོ གཱམཁེཏྟསངྑམེཝ གཙྪཏི.

ཨུདཀུཀྑེཔཱཏི ཀརཎཏྠེ ནིསྶཀྐཝཙནནྟི ཨཱཧ ‘‘ཨུདཀུཀྑེཔེནཱ’’ཏི. ཀཐཾ པན ཨུདཀཾ ཁིཔིཏབྦནྟི ཨཱཧ ‘‘ཏཏྠཱ’’ཏིཨཱདི. མཛ྄ཛྷིམེན པུརིསེནཱཏི ཐཱམམཛ྄ཛྷིམེན པུརིསེན. ཨཡཾ ཨུདཀུཀྑེཔོ ནཱམཱཏི ཨཡཾ ཨུདཀུཀྑེཔེན པརིཙྪིནྣཱ སཱིམཱ ནཱམཱཏི ཨཏྠོ. ཡཱཝ པརིསཱ ཝཌྜྷཏི, ཏཱཝ ཨཡཾ སཱིམཱཔི ཝཌྜྷཏི, པརིསཔརིཡནྟཏོ ཨུདཀུཀྑེཔོཡེཝ པམཱཎཾ. སཙེ པན ནདཱི ནཱཏིདཱིགྷཱ ཧོཏི, པབྷཝཏོ པཊྛཱཡ ཡཱཝ མུཁདྭཱརཾ སབྦཏྠ སངྒྷོ ནིསཱིདཏི, ཨུདཀུཀྑེཔསཱིམཱཀམྨཾ ནཏྠི. སཀལཱཔི ནདཱི ཨེཏེསཾཡེཝ བྷིཀྑཱུནཾ པཧོཏི.

པཀཏིཝསྶཀཱལེཏི པུབྦེ ཝུཏྟཔྤཀཱརེ པཀཏིཝསྶཀཱལེ. ཙཏཱུསུ མཱསེསཱུཏི ཝསྶཱནསྶ ཙཏཱུསུ མཱསེསུ. ཨཏིཝུཊྛིཀཱལེ ཨོགྷེན ཨོཏྠཏོཀཱསོ ན གཧེཏབྦོ. སོ ཧི གཱམསཱིམཱསངྑམེཝ གཙྪཏི. ཨནྟོནདིཡཾ ཛཱཏསྶརེ ཛཱཏཔིཊྛིཔཱསཱཎདཱིཔཀེསུཔི ཨཡམེཝ ཝིནིཙྪཡོ ཝེདིཏབྦོ. སཙེ པན ནདཱི པརིཔུཎྞཱ ཧོཏི སམཏིཏྠིཀཱ, ཨུདཀསཱཊིཀཾ ནིཝཱསེཏྭཱཔི ཨནྟོནདིཡཾཡེཝ ཀམྨཾ ཀཱཏབྦཾ. སཙེ ན སཀྐོནྟི, ནཱཝཱཡཔི ཋཏྭཱ ཀཱཏབྦཾ. གཙྪནྟིཡཱ པན ནཱཝཱཡ ཀཱཏུཾ ན ཝཊྚཏི. ཀསྨཱ? ཨུདཀུཀྑེཔམཏྟམེཝ ཧི སཱིམཱ, ཏཾ ¶ ནཱཝཱ སཱིགྷམེཝ ཨཏིཀྐཱམེཏི. ཨེཝཾ སཏི ཨཉྙིསྶཱ སཱིམཱཡ ཉཏྟི, ཨཉྙིསྶཱ ཨནུསྶཱཝནཱ ཧོཏི, ཏསྨཱ ནཱཝཾ ཨརིཏྟེན ཝཱ ཋཔེཏྭཱ, པཱསཱཎེ ཝཱ ལམྦིཏྭཱ, ཨནྟོནདིཡཾ ཛཱཏརུཀྑེ ཝཱ བནྡྷིཏྭཱ ཀམྨཾ ཀཱཏབྦཾ. ཨནྟོནདིཡཾ བདྡྷཨཊྚཀེཔི ཨནྟོནདིཡཾ ཛཱཏརུཀྑེཔི ཋིཏེཧི ཀམྨཾ ཀཱཏུཾ ཝཊྚཏི.

སཙེ པན རུཀྑསྶ སཱཁཱ ཝཱ ཏཏོ ནིཀྑནྟཔཱརོཧོ ཝཱ བཧིནདཱིཏཱིརེ ཝིཧཱརསཱིམཱཡ ཝཱ གཱམསཱིམཱཡ ཝཱ པཏིཊྛིཏོ, སཱིམཾ ཝཱ སོདྷེཏྭཱ, སཱཁཾ ¶ ཝཱ ཚིནྡིཏྭཱ ཀམྨཾ ཀཱཏབྦཾ. བཧིནདཱིཏཱིརེ ཛཱཏརུཀྑསྶ ཨནྟོནདིཡཾ པཝིཊྛསཱཁཱཡ ཝཱ པཱརོཧེ ཝཱ ནཱཝཾ བནྡྷིཏྭཱ ཀམྨཾ ཀཱཏུཾ ན ཝཊྚཏི. ཀརོནྟེཧི སཱིམཱ ཝཱ སོདྷེཏབྦཱ, སཱཁཾ ཚིནྡིཏྭཱ ཝཱ ཏསྶ བཧིཔཏིཊྛིཏབྷཱགོ ནཱསེཏབྦོ. ནདཱིཏཱིརེ པན ཁཱཎུཀཾ ཀོཊྚེཏྭཱ ཏཏྠ བནྡྷནཱཝཱཡ ན ཝཊྚཏིཡེཝ.

ནདིཡཾ སེཏུཾ ཀརོནྟི, སཙེ ཨནྟོནདིཡཾཡེཝ སེཏུ ཝཱ སེཏུཔཱདཱ ཝཱ, སེཏུམྷི ཋིཏེཧི ཀམྨཾ ཀཱཏུཾ ཝཊྚཏི. སཙེ པན སེཏུ ཝཱ སེཏུཔཱདཱ ཝཱ བཧིཏཱིརེ པཏིཊྛིཏཱ, ཀམྨཾ ཀཱཏུཾ ན ཝཊྚཏི, སཱིམཾ སོདྷེཏྭཱ ཀམྨཾ ཀཱཏབྦཾ. ཨཐ སེཏུཔཱདཱ ཨནྟོ, སེཏུ པན ཨུབྷིནྣམྤི ཏཱིརཱནཾ ཨུཔརིཨཱཀཱསེ ཋིཏོ, ཝཊྚཏི. ཛཱཏསྶརེཔི ཨེསེཝ ནཡོ.

‘‘ཡསྨིཾ པདེསེ པཀཏིཝཱིཙིཡོ ཨོཏྠརིཏྭཱ སཎྛཧནྟཱི’’ཏི ཨེཏེན ཡཾ པདེསཾ ཨུདྡྷཾ ཝཌྜྷནཀཨུདཀཾ ཝཱ པཀཏིཝཱིཙིཡོ ཝཱ ཝེགེན ཨཱགནྟྭཱ ཨོཏྠརནྟི, ཏཏྠ ཀམྨཾ ཀཱཏུཾ ན ཝཊྚཏཱིཏི (མཧཱཝ. ཨཊྛ. ༡༤༧) དསྶེཏི. སཙེ ཨཱུམིཝེགོ བཱདྷཏི, ནཱཝཱཡ ཝཱ ཨཊྚཀེ ཝཱ ཋཏྭཱ ཀཱཏབྦཾ. ཏེསུ ཝིནིཙྪཡོ ནདིཡཾ ཝུཏྟནཡེནེཝ ཝེདིཏབྦོ. སཙེ པན སམུདྡོ གཱམསཱིམཾ ཝཱ ནིགམསཱིམཾ ཝཱ ཨོཏྠརིཏྭཱ ཏིཊྛཏི, སམུདྡོཝ ཧོཏི. ཏཏྠ ཀམྨཾ ཀཱཏུཾ ཝཊྚཏི. ཏཏོ པཊྛཱཡ ཀཔྤིཡབྷཱུམཱིཏི ཨོཏྠརིཏྭཱ སཎྛིཏཨུདཀནྟཏོ པཊྛཱཡ ཨནྟོ ནདཱིཛཱཏསྶརསམུདྡོ ནཱམཱཏི ཨཏྠོ. དུབྦུཊྛིཀཱལེཏི ཝསྶཱནཧེམནྟེ སནྡྷཱཡ ཝུཏྟཾ. སུཀྑེསུཔཱིཏི ནིརུདཀེསུཔི. ཡཐཱ ཙ ཝཱཔིཁཎནེ, ཨེཝཾ ཨཱཝཱཊཔོཀྑརཎཱིཨཱདཱིནཾ ཁཎནེཔི གཱམཁེཏྟཾ ཧོཏིཡེཝཱཏི དཊྛབྦཾ. ཝཔྤཾ ཝཱ ཀརོནྟཱིཏི ལཱབུཏིཔུསཀཱདིཝཔྤཾ ཝཱ ཀརོནྟི. ཏཾ ཋཱནནྟི ཡཏྠ ཝཱཔིཨཱདིཀཾ ཀཏཾ, ཏཾ ཋཱནཾ. ཨཉྙཾ པན ཀཔྤིཡབྷཱུམི. སཙེ པན ཛཱཏསྶརཾ པཱུརེཏྭཱ ཐལཾ ཀརོནྟི, ཨེཀསྨིཾ དིསཱབྷཱགེ པཱལི༹ཾ བནྡྷིཏྭཱ སབྦམེཝ ནཾ མཧཱཏལཱ༹ཀཾ ཝཱ ཀརོནྟི, སབྦོཔི ཨཛཱཏསྶརོ ཧོཏི. གཱམསཱིམཱསངྑམེཝ གཙྪཏི.

སཙེ ¶ ནདིམྤི ཝིནཱསེཏྭཱ ཏལཱ༹ཀཾ ཀརོནྟི, ཧེཊྛཱ པཱལི༹ བདྡྷཱ, ཨུདཀཾ ཨཱགནྟྭཱ ཏལཱ༹ཀཾ པཱུརེཏྭཱ ཏིཊྛཏི, ཨེཏྠ ཀམྨཾ ཀཱཏུཾ ན ཝཊྚཏི. ཨུཔརི པཝཏྟནཊྛཱནེ ཚཌྜིཏཾ ཨུདཀཾ ནདིཾ ཨོཏྠརིཏྭཱ སནྡནཊྛཱནཏོ པཊྛཱཡ ཝཊྚཏི. ཀཱཙི ནདཱི ཀཱལནྟརེན ཨུཔྤཏིཏྭཱ གཱམནིགམསཱིམཾ ཨོཏྠརིཏྭཱ པཝཏྟཏི, ནདཱིཡེཝ ¶ ཧོཏི, ཀམྨཾ ཀཱཏུཾ ཝཊྚཏི. སཙེ ཝིཧཱརསཱིམཾ ཨོཏྠརཏི ‘‘ཝིཧཱརསཱིམཱ’’ཏྭེཝ སངྑཾ གཙྪཏི. ཏསྨཱཏི ཡསྨཱ ཨནྟོ གཙྪཏི, ཏསྨཱ. སམནྟཱ ཨུདཀུཀྑེཔཔརིཙྪེདོ ཀཱཏབྦོཏི པཧོནཀཊྛཱནཾ སནྡྷཱཡ ཝུཏྟཾ. ཡཏྠ པན ཀུནྣདཱིཨཱདཱིསུ ནཔྤཧོཏི, ཏཏྠ པཧོནཀཊྛཱནཏོ ཨུདཀུཀྑེཔཔརིཙྪེདོ ཀཱཏབྦོ. ཨུཔཙཱརཏྠཱཡཱཏི སཱིམོཔཙཱརཏྠཱཡ.

ཀསྨཱ པན ཨཉྙམེཀཾ སཏྟབྦྷནྟརཾ, ཨཉྙོ ཨེཀོ ཨུདཀུཀྑེཔོ ཙ ཨུཔཙཱརཏྠཱཡ ཋཔེཏབྦོཏི ཨཱཧ ‘‘ཨཡཾ ཧཱི’’ཏིཨཱདི. ཨིདཾ ཝུཏྟཾ ཧོཏི (སཱརཏྠ. ཊཱི. མཧཱཝགྒ ༣.༡༤༧; ཝི. ཝི. ཊཱི. མཧཱཝགྒ ༢.༡༤༧) – ཡསྨཱ ཨཡཾ སཏྟབྦྷནྟརསཱིམཱ ཙ ཨུདཀུཀྑེཔསཱིམཱ ཙ བྷིཀྑཱུནཾ ཋིཏོཀཱསཏོ པཊྛཱཡ ལབྦྷཏི, ཏེ ཙ བྷིཀྑཱུ ན སབྦདཱ ཨེཀསདིསཱ, ཀདཱཙི ཝཌྜྷནྟི, ཀདཱཙི པརིཧཱཡནྟི. ཡདཱ ཙ ཝཌྜྷནྟི, ཏདཱ སཱིམཱསངྐརོ ཧོཏི. ཏསྨཱ ཨཉྙམེཀཾ སཏྟབྦྷནྟརཾ, ཨཉྙོ ཨེཀོ ཨུདཀུཀྑེཔོ ཙ ཨུཔཙཱརཏྠཱཡ ཋཔེཏབྦོཏི. ཡཾ པན མཧཱཨཊྛཀཐཱཡཾ ‘‘ཏཏོ ཨདྷིཀཾ ཝཊྚཏིཡེཝ, ཨཱུནཀཾ པན ན ཝཊྚཏཱི’’ཏི (མཧཱཝ. ཨཊྛ. ༡༤༧) ཝུཏྟཾ, ཏམྤི ཨེཏདཏྠམེཝ, ན པན ཏཏྠ ཀཏསྶ ཀམྨསྶ ཀུཔྤཏྟཱཏི གཧེཏབྦཾ. པརིཙྪེདཏོ བཧི ཨཉྙཾ ཏཏྟཀཾཡེཝ པརིཙྪེདཾ ཨནཏིཀྐམིཏྭཱ ཋིཏོཔཱིཏི ཨཏྟནོ སཏྟབྦྷནྟརེན, ཨུདཀུཀྑེཔེན ཝཱ ཡོ ཏེསཾ སཏྟབྦྷནྟརསྶ, ཨུདཀུཀྑེཔསྶ ཝཱ པརིཙྪེདོ, ཏཏོ བཧི ཨཉྙཾ ཏཏྟཀཾཡེཝ པརིཙྪེདཾ ཨནཏིཀྐམིཏྭཱ ཋིཏོཔཱིཏི ཨཏྠོ. ཀཐམེཏཾ ཝིཉྙཱཡཏཱིཏི ཨཱཧ ‘‘ཨིདཾ སབྦཨཊྛཀཐཱསུ སནྣིཊྛཱན’’ནྟི, ཨིདཾ ‘‘ཀམྨཾ ཀོཔེཏཱི’’ཏི མཧཱཨཊྛཀཐཱདཱིསུ ཝཝཏྠཱནནྟི ཨཏྠོ. ‘‘ཨིཏི ཨིམ’’ནྟིཨཱདི ཡཐཱཝུཏྟསྶ ནིགམནཾ. ཧོཏི ཙེཏྠ –

‘‘བདྡྷཱབདྡྷཝསེནེདྷ, སཱིམཱ ནཱམ དྭིདྷཱ ཏཧིཾ;

ཏིསམྤཏྟིཡུཏྟཱ ཝཛྫི-ཏེཀཱདས ཝིཔཏྟིཀཱ;

བདྡྷསཱིམཱ ཏིདྷཱ ཁཎྜཱ-དིཏོ གཱམཱདིཏོ པརཱ’’ཏི.

སབྷཱགཱཔཏྟི ཙ ནཱམེསཱ དུཝིདྷཱ ཝཏྠུསབྷཱགཱ, ཨཱཔཏྟིསབྷཱགཱཏི. ཏཏྠ ཨིདྷ ཝཏྠུསབྷཱགཱ ཨདྷིཔྤེཏཱ, ནེཏརཱཏི དསྶེཏུཾ ‘‘ཡཾ སབྦོ སངྒྷོ ཝིཀཱལབྷོཛནཱདིནཱ’’ཏིཨཱདིམཱཧ. ལཧུཀཱཔཏྟིནྟི ལཧུཀེན ཝིནཡཀམྨེན ཝིསུཛ྄ཛྷནཏོ ལཧུཀཱ ཐུལླཙྩཡཔཱཙིཏྟིཡཔཱཊིདེསནཱིཡདུཀྐཊདུབྦྷཱསིཏསངྑཱཏཱ པཉྩཱཔཏྟིཡོ. ཝཏྠུསབྷཱགཱཡ སངྒྷཱདིསེསཱཔཏྟིཡཱཔི སཏི ཨུཔོསཐཀམྨཾ པཏྟཀལླཾ ¶ ན ཧོཏིཡེཝ. ཡཐཱཧ ¶ ‘‘སབྷཱགསངྒྷཱདིསེསཾ ཨཱཔནྣསྶ པན སནྟིཀེ ཨཱཝི ཀཱཏུཾ ན ཝཊྚཏི. སཙེ ཨཱཝི ཀརོཏི, ཨཱཔཏྟི ཨཱཝིཀཏཱ ཧོཏི, དུཀྐཊཱ པན ན མུཙྩཏཱི’’ཏི (ཙཱུལ༹ཝ. ཨཊྛ. ༡༠༢). ཏསྶཱ པན ཨདེསནཱགཱམིནིཏོ ཨེཝཾ ཝུཏྟཾ. ཝཏྠུསབྷཱགཱཏི ཝཏྠུཝསེན སམཱནབྷཱགཱ, ཨེཀཀོཊྛཱསཱཏི ཝུཏྟཾ ཧོཏི. ཨིམམེཝ ཝཏྠུསབྷཱགཾ དེསེཏུཾ ན ཝཊྚཏི ‘‘ན, བྷིཀྑཝེ, སབྷཱགཱ ཨཱཔཏྟི དེསེཏབྦཱ, ཡོ དེསེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༦༩) ཝུཏྟཏྟཱ, ན པན ཨཱཔཏྟིསབྷཱགཾ. ཏེནཱཧ ‘‘ཝིཀཱལབྷོཛནཔཙྩཡཱ ཨཱཔནྣཾ པནཱ’’ཏིཨཱདི. ཨཱཔཏྟིསབྷཱགནྟི ཨཱཔཏྟིཡཱ སམཱནབྷཱགཾ.

སཱམནྟཱ ཨཱཝཱསཱཏི སཱམནྟཨཱཝཱསཾ, སམཱིཔཝིཧཱརནྟི ཨཏྠོ. སཛྫུཀནྟི ཏདཧེཝཱགམནཏྠཱཡ. པཱཧེཏབྦོཏི པེསེཏབྦོ. ཨིཙྩེཏཾ ཀུསལནྟི ཨིཏི ཨེཏཾ སུནྡརཾ བྷདྡཀཾ, ལདྡྷཀཔྤནྟི ཝུཏྟཾ ཧོཏི. ནོ ཙེ ལབྷེཐཱཏི ཝིཧཱརཱནཾ དཱུརཏཱཡ ཝཱ མགྒེ པརིཔནྠཱདིནཱ ཝཱ ཡདི ན ལབྷེཐ. ‘‘ཏསྶ སནྟིཀེ པཊིཀརིསྶཏཱི’’ཏི ཨིམིནཱ ཝཙནེན སབྷཱགཱཔཏྟི ཨཱཝི ཀཱཏུམྤི ན ལབྦྷཏཱིཏི དཱིཔིཏཾ ཧོཏི. ཡདི ལབྷེཡྻ, ཨཱཝི ཀཏྭཱཔི ཨུཔོསཐཾ ཀརེཡྻ. ཡདི པན སབྦོ སངྒྷོ སབྷཱགཾ སངྒྷཱདིསེསཾ ཨཱཔནྣོ ཧོཏི, ཉཏྟིཾ ཋཔེཏྭཱ ཨུཔོསཐཾ ཀཱཏུཾ ན ཝཊྚཏི, ཨུཔོསཐསྶ ཨནྟརཱཡོཝ ཧོཏི. ཨུབྷོཔི དུཀྐཊཾ ཨཱཔཛྫནྟི ‘‘ན, བྷིཀྑཝེ, སབྷཱགཱ ཨཱཔཏྟི དེསེཏབྦཱ, ཡོ དེསེཡྻ, ཨཱཔཏྟི དུཀྐཊསྶ. ན, བྷིཀྑཝེ, སབྷཱགཱ ཨཱཔཏྟི པཊིགྒཧེཏབྦཱ, ཡོ པཊིགྒཎྷེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༦༩) ཝུཏྟཏྟཱ. ཝིམཏི སཾསཡོ, ཏཏྠ ནིཡུཏྟོ ཝེམཏིཀོ. ‘‘པུན ནིབྦེམཏིཀོ ཧུཏྭཱ དེསེཏབྦམེཝཱ’’ཏི ནེཝ པཱལི༹ཡཾ, ན ཙ ཨཊྛཀཐཱཡཾ ཨཏྠི, དེསིཏེ པན དོསོ ནཏྠི. ཝུཏྟནཡེནེཝཱཏི ‘‘པཱརིསུདྡྷིཾ ཨཱཡསྨནྟོ ཨཱརོཙེཐཱ’’ཏིཨཱདིནཱ ནཡེན སཱཔཏྟིཀསྶ ཨུཔོསཐཀརཎེ པཉྙཏྟཾ དུཀྐཊཾ ཨཱཔཛྫནྟཱིཏི ཝུཏྟནཡེནེཝ. ཀསྨཱ སབྷཱགཱཔཏྟིཡེཝ ཝུཏྟཱཏི ཨཱཧ ‘‘ཨེཏཱསུ ཧཱི’’ཏིཨཱདི. ཝིསབྷཱགཱཔཏྟཱིསུ ཝིཛྫམཱནཱསུཔི པཏྟཀལླཾ ཧོཏིཡེཝཱཏི ཝིསབྷཱགཱསུ པན ཝིཛྫམཱནཱསུ ཏེསཾཡེཝ པུགྒལཱནཾ ཨཱཔཏྟི, ན སངྒྷསྶཱཏི སངྒྷསྶ པཏྟཀལླཾ ཧོཏིཡེཝ.

ཨནྟིམཝཏྠུཨཛ྄ཛྷཱཔནྣཀོ ནཱམ ཙཏུནྣཾ པཱརཱཛིཀཱནཾ ཨཉྙཏརཾ ཨཛ྄ཛྷཱཔནྣཀོ. པཎྜཀཱདཱིནཾ ཝིནིཙྪཡོ པརཏོ པཱརཱཛིཀུདྡེསེ ཨཱཝི བྷཝིསྶཏི ¶ . ཏིརཙྪཱནགཏོཏི ཨནྟམསོ སཀྐཾ དེཝརཱཛཱནཾ ཨུཔཱདཱཡ ཡོ ཀོཙི ནཱགམཱཎཝཀཱདིཀོ ཨམནུསྶཛཱཏིཀོ ཝེདིཏབྦོ, ན ཨསྶགོཎཱདཡོ. ཏེནཱཧ ‘‘ཨེཏྠ ཙཱ’’ཏིཨཱདི. ཏཏྠ ཨེཏྠཱཏི ཨེཏིསྶཾ ཝཛྫནཱིཡཔུགྒལཀཐཱཡཾ. ཡསྶ ཨུཔསམྤདཱ པཊིཀྑིཏྟཱཏི ‘‘ཏིརཙྪཱནགཏོ, བྷིཀྑཝེ, ཨནུཔསམྤནྣོ, ན ཨུཔསམྤཱདེཏབྦོ’’ཏི (མཧཱཝ. ༡༡༡) ཡསྶ ནཱགསུཔཎྞཱདིནོ ཏིརཙྪཱནགཏསྶ ཨུཔསམྤདཱ པཊིཀྑིཏྟཱ ¶ , སོ ཨིདྷཱཔི ཏིརཙྪཱནགཏོ ནཱམཱཏི ཨཏྠོ. ཏཏྠ ཧི ཨནྟམསོ དེཝེ ཨུཔཱདཱཡ ནཱགམཱཎཝཀཱདིཀོ ཡོ ཀོཙི ཨམནུསྶཛཱཏིཀོ ‘‘ཏིརཙྪཱནགཏོ’’ཏི ཨདྷིཔྤེཏོ. ཝུཏྟཉྷི སམནྟཔཱསཱདིཀཱཡཾ ‘‘ཏིརཙྪཱནགཏོ, བྷིཀྑཝེཏི ཨེཏྠ ནཱགོ ཝཱ ཧོཏུ སུཔཎྞམཱཎཝཀཱདཱིནཾ ཝཱ ཨཉྙཏརོ, ཨནྟམསོ སཀྐཾ དེཝརཱཛཱནཾ ཨུཔཱདཱཡ ཡོ ཀོཙི ཨམནུསྶཛཱཏིཡོ, སོ སབྦོཝ ཨིམསྨིཾ ཨཏྠེ ‘ཏིརཙྪཱནགཏོ’ཏི ཝེདིཏབྦོ’’ཏི (མཧཱཝ. ཨཊྛ. ༡༡༡). ཏིཏྠཾ ཝུཙྩཏི ལདྡྷི, ཏཾ ཨེཏེསཾ ཨཏྠཱིཏི ཏིཏྠིཀཱ, ཏིཏྠིཀཱ ཨེཝ ཏིཏྠིཡཱ, ཨིཏོ ཨཉྙལདྡྷིཀཱཏི ཨཏྠོ.

སུཏྟསྶ ཨུདྡེསོ སུཏྟུདྡེསོ. པཱརིསུདྡྷི ཨེཝ ཨུཔོསཐོ པཱརིསུདྡྷིཨུཔོསཐོ. ཨེསེཝ ནཡོ ཨདྷིཊྛཱནུཔོསཐོཏི ཨེཏྠཱཔི. སོཏི པཱཏིམོཀྑུདྡེསོ. ཨོཝཱདོཝ པཱཏིམོཀྑཾ, ཏསྶ ཨུདྡེསོ སརཱུཔེན ཀཐནཾ ཨོཝཱདཔཱཏིམོཀྑུདྡེསོ. ‘‘ཨིམསྨིཾ ཝཱིཏིཀྐམེ ཨཡཾ ནཱམ ཨཱཔཏྟཱི’’ཏི ཨེཝཾ ཨཱཔཏྟིཝསེན ཨཱཎཱཔནཾ པཉྙཱཔནཾ ཨཱཎཱ, སེསཾ ཨནནྟརསདིསམེཝ.

ཁནྟཱི པརམཾ ཏཔོ ཏིཏིཀྑཱ…པེ… ཝུཏྟཱ ཏིསྶོ གཱཐཱཡོ ནཱམ –

‘‘ཁནྟཱི པརམཾ ཏཔོ ཏིཏིཀྑཱ;

ནིབྦཱནཾ པརམཾ ཝདནྟི བུདྡྷཱ;

ན ཧི པབྦཛིཏོ པརཱུཔགྷཱཏཱི;

ན སམཎོ ཧོཏི པརཾ ཝིཧེཋཡནྟོ.

‘‘སབྦཔཱཔསྶ ཨཀརཎཾ, ཀུསལསྶ ཨུཔསམྤདཱ;

སཙིཏྟཔརིཡོདཔནཾ, ཨེཏཾ བུདྡྷཱན སཱསནཾ.

‘‘ཨནཱུཔཝཱདོ ¶ ཨནཱུཔགྷཱཏོ, པཱཏིམོཀྑེ ཙ སཾཝརོ;

མཏྟཉྙུཏཱ ཙ བྷཏྟསྨིཾ, པནྟཉྩ སཡནཱསནཾ;

ཨདྷིཙིཏྟེ ཙ ཨཱཡོགོ, ཨེཏཾ བུདྡྷཱན སཱསན’’ནྟི.(དཱི. ནི. ༢.༩༠; དྷ. པ. ༡༨༣-༡༨༥) –

ཨིམཱ ཏིསྶོ གཱཐཱཡོ.

ཏཏྠ ཁནྟཱི པརམཾ ཏཔོཏི (དཱི. ནི. ཨཊྛ. ༢.༩༠; དྷ. པ. ཨཊྛ. ༢.༡༨༥) ཨདྷིཝཱསནཁནྟི ¶ ནཱམ པརམཾ ཏཔོ. ཏིཏིཀྑཱཏི ཁནྟིཡཱ ཨེཝ ཝེཝཙནཾ, ཏིཏིཀྑཱསངྑཱཏཱ ཨདྷིཝཱསནཁནྟི ཨུཏྟམཾ ཏཔོཏི ཨཏྠོ. ནིབྦཱནཾ པརམཾ ཝདནྟཱིཏི སབྦཱཀཱརེན པན ནིབྦཱནཾ ‘‘པརམ’’ནྟི ཝདནྟི བུདྡྷཱ. ན ཧི པབྦཛིཏོ པརཱུཔགྷཱཏཱིཏི ཡོ ཨདྷིཝཱསནཁནྟིཝིརཧིཏཏྟཱ པརཾ ཨུཔགྷཱཏེཏི བཱདྷཏི ཝིཧིཾསཏི, སོ པབྦཛིཏོ ནཱམ ན ཧོཏི. ཙཏུཏྠཔཱདོ པན ཏསྶེཝ ཝེཝཙནཾ. ‘‘ན ཧི པབྦཛིཏོ’’ཏི ཨེཏསྶ ཧི ‘‘ནསམཎོ ཧོཏཱི’’ཏི ཝེཝཙནཾ. ‘‘པརཱུཔགྷཱཏཱི’’ཏི ཨེཏསྶ ‘‘པརཾ ཝིཧེཋཡནྟོ’’ཏི ཝེཝཙནཾ. ཨཐ ཝཱ པརཱུཔགྷཱཏཱིཏི སཱིལཱུཔགྷཱཏཱི. སཱིལཉྷི ཨུཏྟམཊྛེན ‘‘པར’’ནྟི ཝུཙྩཏི. ཡོ ཙ སམཎོ པརཾ ཡཾ ཀཉྩི སཏྟཾ ཝིཧེཋཡནྟོ པརཱུཔགྷཱཏཱི ཧོཏི, ཨཏྟནོ སཱིལཝིནཱསཀོ, སོ པབྦཛིཏོ ནཱམ ན ཧོཏཱིཏི ཨཏྠོ. ཨཐ ཝཱ ཡོ ཨདྷིཝཱསནཁནྟིཡཱ ཨབྷཱཝཱ པརཱུཔགྷཱཏཱི ཧོཏི, པརཾ ཨནྟམསོ ཌཾསམཀསམྤི སཉྩིཙྩ ཛཱིཝིཏཱ ཝོརོཔེཏི, སོ ན ཧི པབྦཛིཏོ. ཀིཾ ཀཱརཎཱ? མལསྶ ཨཔབྦཱཛིཏཏྟཱ. ‘‘པབྦཱཛཡམཏྟནོ མལཾ, ཏསྨཱ ‘པབྦཛིཏོ’ཏི ཝུཙྩཏཱི’’ཏི (དྷ. པ. ༣༨༨) ཨིདཉྷི པབྦཛིཏལཀྑཎཾ. ཡོཔི ན ཧེཝ ཁོ ཨུཔགྷཱཏེཏི ན མཱརེཏི, ཨཔིཙ དཎྜཱདཱིཧི ཝིཧེཋེཏི, སོ པརཾ ཝིཧེཋཡནྟོ སམཎོ ན ཧོཏི. ཀིཾ ཀཱརཎཱ? ཝིཧེསཱཡ ཨསམིཏཏྟཱ. ‘‘སམིཏཏྟཱ ཧི པཱཔཱནཾ, ‘སམཎོ’ཏི པཝུཙྩཏཱི’’ཏི (དྷ. པ. ༢༦༥) ཨིདཉྷི སམཎལཀྑཎཾ.

དུཏིཡགཱཐཱཡ སབྦཔཱཔསྶཱཏི སབྦཱཀུསལསྶ. ཨཀརཎནྟི ཨནུཔྤཱདནཾ. ཀུསལསྶཱཏི ཙཏུབྷཱུམཀཀུསལསྶ. ཨུཔསམྤདཱཏི ཨུཔསམྤཱདནཾ པཊིལཱབྷོ. སཙིཏྟཔརིཡོདཔནནྟི ཨཏྟནོ ཙིཏྟསྶ ཝོདཱཔནཾ པབྷསྶརབྷཱཝཀརཎཾ སབྦསོ པརིསོདྷནཾ, ཏཾ པན ཨརཧཏྟེན ཧོཏི. ཨིཏི སཱིལསཾཝརེན སབྦཔཱཔཾ པཧཱཡ ལོཀིཡལོཀུཏྟརཱཧི སམཐཝིཔསྶནཱཧི ཀུསལཾ སམྤཱདེཏྭཱ ཨརཧཏྟཕལེན ཙིཏྟཾ པརིཡོདཱཔེཏབྦནྟི ཨེཏཾ བུདྡྷཱནཾ སཱསནཾ ཨོཝཱདོ ཨནུསིཊྛི.

ཏཏིཡགཱཐཱཡ ¶ ཨནཱུཔཝཱདོཏི ཝཱཙཱཡ ཀསྶཙི ཨནུཔཝདནཾ. ཨནཱུཔགྷཱཏོཏི ཀཱཡེན ཀསྶཙི ཨུཔགྷཱཏསྶ ཨཀརཎཾ. པཱཏིམོཀྑེཏི ཡཾ ཏཾ པཱཏིམོཀྑཾ པཨཏིམོཀྑཾ ཨཏིཔམོཀྑཾ ཨུཏྟམཾ སཱིལཾ, པཱཏི ཝཱ ཨགཏིཝིསེསེཧི, མོཀྑེཏི དུགྒཏིབྷཡེཧི. ཡོ ཝཱ ནཾ པཱཏི, ཏཾ མོཀྑེཏཱིཏི ‘‘པཱཏིམོཀྑ’’ནྟི ཝུཙྩཏི, ཏསྨིཾ པཱཏིམོཀྑེ ཙ. སཾཝརོཏི སཏྟནྣཾ ཨཱཔཏྟིཀྑནྡྷཱནཾ ཨཝཱིཏིཀྐམལཀྑཎོ སཾཝརོ. མཏྟཉྙུཏཱཏི པཊིགྒཧཎཔརིབྷོགཝསེན པམཱཎཉྙུཏཱ. པནྟཉྩ སཡནཱསནནྟི ཛནསངྒྷཊྚནཝིརཧིཏཾ ནིཛྫནསམྦཱདྷཾ ཝིཝིཏྟཾ, སེནཱསནཉྩ. ཨེཏྠ ཙ དྭིཧིཡེཝ པཙྩཡེཧི ཙཏུཔཙྩཡསནྟོསོ དཱིཔིཏོཏི ཝེདིཏབྦོ པཙྩཡསནྟོསསཱམཉྙེན ཨིཏརདྭཡསྶཱཔི ལཀྑཎཧཱརནཡེན ཛོཏིཏཏྟཱ. ཨདྷིཙིཏྟེ ཙ ཨཱཡོགོཏི ཝིཔསྶནཱཔཱདཀཾ ¶ ཨཊྛསམཱཔཏྟིཙིཏྟཾ, ཏཏོཔི མགྒཕལཙིཏྟམེཝ ཨདྷིཙིཏྟཾ, ཏསྨིཾ ཡཐཱཝུཏྟེ ཨདྷིཙིཏྟེ ཨཱཡོགོ ཙ ཨནུཡོགོ ཙཱཏི ཨཏྠོ. ཨེཏཾ བུདྡྷཱན སཱསནནྟི ཨེཏཾ པརསྶ ཨནུཔཝདནཾ, ཨནུཔགྷཱཏནཾ, པཱཏིམོཀྑེ སཾཝརོ, པཊིགྒཧཎཔརིབྷོགེསུ མཏྟཉྙུཏཱ, ཨཊྛསམཱཔཏྟིཝསིབྷཱཝཱཡ ཝིཝིཏྟསེནཱསནསེཝནཉྩ བུདྡྷཱནཾ སཱསནཾ ཨོཝཱདོ ཨནུསིཊྛཱིཏི. ཨིམཱ པན ཏིསྶོ གཱཐཱ སབྦབུདྡྷཱནཾ པཱཏིམོཀྑུདྡེསགཱཐཱཡོ ཧོནྟཱིཏི ཝེདིཏབྦཱ. ཏཾ བུདྡྷཱ ཨེཝ ཨུདྡིསནྟི, ན སཱཝཀཱ.

‘‘སུཎཱཏུ མེ, བྷནྟེ, སངྒྷོ’’ཏིཨཱདིནཱ (མཧཱཝ. ༡༣༤) ནཡེན ཝུཏྟཾ ཨཱཎཱཔཱཏིམོཀྑཾ ནཱམ. ཏཾ སཱཝཀཱ ཨེཝ ཨུདྡིསནྟི, ན བུདྡྷཱ སངྒྷཀམྨཾ ཀརོནྟི, ན ཙ ཏཏྠ པརིཡཱཔནྣཱཏི ཨཱཧ ‘‘ཏཾ སཱཝཀཱ ཨེཝ ཨུདྡིསནྟི, ན བུདྡྷཱ’’ཏི. ཨིམསྨིཾ ཨཏྠེཏི ‘‘པཱཏིམོཀྑཾ ཨུདྡིསེཡྻཱ’’ཏི ཨེཏསྨིཾ ཨཏྠེ.

ཨནུཔགཏོ ནཱམ ཏཏྠེཝ ཨུཔསམྤནྣོ, ཨསཏིཡཱ པུརིམིཀཱཡ ཨནུཔགཏོ ཝཱ. ཙཱཏུམཱསིནིཡནྟི ཙཱཏུམཱསིཡཾ. སཱ ཧི ཙཏུནྣཾ མཱསཱནཾ པཱརིཔཱུརིབྷཱུཏཱཏི ཙཱཏུམཱསཱི, སཱ ཨེཝ ‘‘ཙཱཏུམཱསིནཱི’’ཏི ཝུཙྩཏི, ཏསྶཾ ཙཱཏུམཱསིནིཡཾ. པཙྪིམཀཏྟིཀཔུཎྞམཱསིནིཡནྟི ཨཏྠོ. ཀཱཡསཱམགྒིནྟི ཀཱཡེན སམགྒབྷཱཝཾ, ཧཏྠཔཱསཱུཔགམནནྟི ཝུཏྟཾ ཧོཏི.

ཨཡཾ པནེཏྠ ཝིནིཙྪཡོ – སཙེ པུརིམིཀཱཡ པཉྩ བྷིཀྑཱུ ཝསྶཾ ཨུཔགཏཱ, པཙྪིམིཀཱཡཔི པཉྩ, པུརིམེཧི ཉཏྟིཾ ཋཔེཏྭཱ པཝཱརིཏེ པཙྪིམེཧི ¶ ཏེསཾ སནྟིཀེ པཱརིསུདྡྷིཨུཔོསཐོ ཀཱཏབྦོ, ན ཨེཀསྨིཾ ཨུཔོསཐགྒེ དྭེ ཉཏྟིཡོ ཋཔེཏབྦཱ. སཙེཔི པཙྪིམིཀཱཡ ཨུཔགཏཱ ཙཏྟཱརོ, ཏཡོ, དྭེ, ཨེཀོ ཝཱ ཧོཏི, ཨེསེཝ ནཡོ. ཨཐ པུརིམིཀཱཡ ཙཏྟཱརོ, པཙྪིམིཀཱཡཔི ཙཏྟཱརོ, ཏཡོ, དྭེ, ཨེཀོ ཝཱ, ཨེསེཝ ནཡོ. ཨཐ པུརིམིཀཱཡ ཏཡོ, པཙྪིམིཀཱཡ ཏཡོ, དྭེ ཝཱ, ཨེསེཝ ནཡོ. ཨིདཉྷེཏྠ ལཀྑཎཾ – སཙེ པུརིམིཀཱཡ ཨུཔགཏེཧི པཙྪིམིཀཱཡ ཨུཔགཏཱ ཐོཀཏརཱ ཙེཝ ཧོནྟི སམསམཱ ཙ, སངྒྷཔྤཝཱརཎཱཡ ཙ གཎཾ པཱུརེནྟི, སངྒྷཔྤཝཱརཎཱཝསེན ཉཏྟིཾ ཋཔེཏྭཱ པུརིམེཧི པཝཱརེཏབྦཱ. སཙེ པན པུརིམིཀཱཡ ཏཡོ, པཙྪིམིཀཱཡ ཨེཀོ ཧོཏི, ཏེན སདྡྷིཾ ཏེ ཙཏྟཱརོ ཧོནྟི, ཙཏུནྣཾ སངྒྷཉཏྟིཾ ཋཔེཏྭཱ པཝཱརེཏུཾ ན ཝཊྚཏི. གཎཉཏྟིཡཱ པན སོ གཎཔཱུརཀོ ཧོཏི, ཏསྨཱ གཎཝསེན ཉཏྟིཾ ཋཔེཏྭཱ པུརིམེཧི པཝཱརེཏབྦཾ, ཨིཏརེན ཏེསཾ སནྟིཀེ པཱརིསུདྡྷིཨུཔོསཐོ ཀཱཏབྦོ. སཙེ པུརིམིཀཱཡ དྭེ, པཙྪིམིཀཱཡ དྭེ ཝཱ ཨེཀོ ཝཱ, ཨེཏྠཱཔི ཨེསེཝ ནཡོ. སཙེ པུརིམིཀཱཡ ཨེཀོ, པཙྪིམིཀཱཡཔི ཨེཀོ, ཨེཀེན ཨེཀསྶ སནྟིཀེ པཝཱརེཏབྦཾ, ཨེཀེན པཱརིསུདྡྷིཨུཔོསཐོ ཀཱཏབྦོ ¶ . སཙེ པུརིམཝསྶཱུཔགཏེཧི པཙྪིམཝསྶཱུཔགཏཱ ཨེཀེནཔི ཨདྷིཀཏརཱ ཧོནྟི, པཋམཾ པཱཏིམོཀྑཾ ཨུདྡིསིཏྭཱ པཙྪཱ ཐོཀཏརེཧི ཏེསཾ སནྟིཀེ པཝཱརེཏབྦཾ. ཀཏྟིཀཙཱཏུམཱསིནིཔཝཱརཎཱཡ པན སཙེ པཋམཾ ཝསྶཱུཔགཏེཧི མཧཱཔཝཱརཎཱཡ པཝཱརིཏེཧི པཙྪཱ ཨུཔགཏཱ ཨདྷིཀཏརཱ ཝཱ སམསམཱ ཝཱ ཧོནྟི, པཝཱརཎཱཉཏྟིཾ ཋཔེཏྭཱ པཝཱརེཏབྦཾ. ཏེཧི པཝཱརིཏེ པཙྪཱ ཨིཏརེཧི པཱརིསུདྡྷིཨུཔོསཐོ ཀཱཏབྦོ. ཨཐ མཧཱཔཝཱརཎཱཡ པཝཱརིཏཱ བཧཱུ ཧོནྟི, པཙྪཱ ཝསྶཱུཔགཏཱ ཐོཀཱ ཝཱ ཨེཀོ ཝཱ, པཱཏིམོཀྑེ ཨུདྡིཊྛེ པཙྪཱ ཏེསཾ སནྟིཀེ ཏེན པཝཱརེཏབྦནྟི.

ཨེཀཾསཾ ཨུཏྟརཱསངྒཾ ཀརིཏྭཱཏི ཨེཀསྨིཾ ཨཾསེ སཱདྷུཀཾ ཨུཏྟརཱསངྒཾ ཀརིཏྭཱཏི ཨཏྠོ. ཨཉྫལིཾ པགྒཧེཏྭཱཏི དསནཁསམོདྷཱནསམུཛྫལཾ ཨཉྫལིཾ ཨུཀྑིཔིཏྭཱ. སཙེ པན ཏཏྠ པཱརིཝཱསིཀོཔི ཨཏྠི, སངྒྷནཝཀཊྛཱནེ ནིསཱིདིཏྭཱ ཏཏྠེཝ ནིསིནྣེན ཨཏྟནོ པཱལི༹ཡཱ པཱརིསུདྡྷིཨུཔོསཐོ ཀཱཏབྦོ. པཱཏིམོཀྑེ ཨུདྡིསིཡམཱནེ པན པཱལི༹ཡཱ ཨནིསཱིདིཏྭཱ པཱལི༹ཾ ཝིཧཱཡ ཧཏྠཔཱསཾ ཨམུཉྩནྟེན ནིསཱིདིཏབྦཾ. པཝཱརཎཱཡཔི ཨེསེཝ ནཡོ.

སབྦཾ ¶ པུབྦཀརཎཱིཡནྟི སམྨཛྫནཱདིཾ ནཝཝིདྷཾ པུབྦཀིཙྩཾ. ཡཐཱ ཙ སབྦོ སངྒྷོ སབྷཱགཱཔཏྟིཾ ཨཱཔཛྫིཏྭཱ ‘‘སུཎཱཏུ མེ, བྷནྟེ, སངྒྷོ…པེ… པཊིཀརིསྶཏཱི’’ཏི (མཧཱཝ. ༡༧༡) ཉཏྟིཾ ཋཔེཏྭཱ ཨུཔོསཐཾ ཀཱཏུཾ ལབྷཏི, ཨེཝམེཏྠཱཔི ཏཱིཧི ‘‘སུཎནྟུ མེ ཨཱཡསྨནྟཱ ཨིམེ བྷིཀྑཱུ སབྷཱགཾ ཨཱཔཏྟིཾ ཨཱཔནྣཱ, ཡདཱ ཨཉྙཾ བྷིཀྑུཾ སུདྡྷཾ ཨནཱཔཏྟིཀཾ པསྶིསྶནྟི, ཏདཱ ཏསྶ སནྟིཀེ ཏཾ ཨཱཔཏྟིཾ པཊིཀརིསྶནྟཱི’’ཏི གཎཉཏྟིཾ ཋཔེཏྭཱ, དྭཱིཧིཔི ‘‘ཨཉྙཾ སུདྡྷཾ པསྶིཏྭཱ པཊིཀརིསྶཱམཱ’’ཏི ཝཏྭཱ ཨུཔོསཐཾ ཀཱཏུཾ ཝཊྚཏི. ཨེཀེནཱཔི ‘‘པརིསུདྡྷཾ ལབྷིཏྭཱ པཊིཀརིསྶཱམཱི’’ཏི ཨཱབྷོགཾ ཀཏྭཱ ཀཱཏུཾ ཝཊྚཏི. ཏདཧཱུཏི ཏསྨིཾ ཨཧུ, ཏསྨིཾ དིཝསེཏི ཨཏྠོ. ནཱནཱསཾཝཱསཀེཧཱིཏི ལདྡྷིནཱནཱསཾཝཱསཀེཧི. ཨནཱཝཱསོ ནཱམ ནཝཀམྨསཱལཱདིཀོ ཡོ ཀོཙི པདེསོ. ཨཉྙཏྲ སངྒྷེནཱཏི སངྒྷཔྤཧོནཀེཧི བྷིཀྑཱུཧི ཝིནཱ. ཨཉྙཏྲ ཨནྟརཱཡཱཏི པུབྦེ ཝུཏྟཾ དསཝིདྷམནྟརཱཡཾ ཝིནཱ. སབྦནྟིམེན པན པརིཙྪེདེན ཨཏྟཙཏུཏྠེན ཨནྟརཱཡེ ཝཱ སཏི གནྟུཾ ཝཊྚཏི. ཡཐཱ ཙ ཨཱཝཱསཱདཡོ ན གནྟབྦཱ, ཨེཝཾ སཙེ ཝིཧཱརེ ཨུཔོསཐཾ ཀརོནྟི, ཨུཔོསཐཱདྷིཊྛཱནཏྠཾ སཱིམཱཔི ནདཱིཔི ན གནྟབྦཱ. སཙེ པནེཏྠ ཀོཙི བྷིཀྑུ ཧོཏི, ཏསྶ སནྟིཀཾ གནྟུཾ ཝཊྚཏི. ཝིསྶཊྛཨུཔོསཐཱཔི ཨཱཝཱསཱ གནྟུཾ ཝཊྚཏི. ཨེཝཾ གཏོ ཨདྷིཊྛཱཏུམྤི ལབྷཏི. ཨཱརཉྙཀེནཱཔི བྷིཀྑུནཱ ཨུཔོསཐདིཝསེ གཱམེ པིཎྜཱཡ ཙརིཏྭཱ ཨཏྟནོ ཝིཧཱརམེཝ ཨཱགནྟབྦཾ. སཙེ ཨཉྙཾ ཝིཧཱརཾ ཨོཀྐམཏི, ཏཏྠ ཨུཔོསཐཾ ཀཏྭཱཝ ཨཱགནྟབྦཾ, ཨཀཏྭཱ ཨཱགནྟུཾ ན ཝཊྚཏི. ཡཾ ཛཉྙཱ ‘‘ཨཛྫེཝ ཏཏྠ གནྟུཾ སཀྐོམཱི’’ཏི (མཧཱཝ. ཨཊྛ. ༡༨༡) ¶ ཨེཝརཱུཔོ པན ཨཱཝཱསོ གནྟབྦོ. ཏཏྠ བྷིཀྑཱུཧི སདྡྷིཾ ཨུཔོསཐཾ ཀརོནྟེནཱཔི ཧི ཨིམིནཱ ནེཝ ཨུཔོསཐནྟརཱཡོ ཀཏོ བྷཝིསྶཏཱིཏི.

ཨུདཀཾ ཨཱསནེན ཙཱཏི ཨཱསནེན སཧ པཱནཱིཡཔརིབྷོཛནཱིཡཾ ཨུདཀཉྩཱཏི ཨཏྠོ. སངྒྷསནྣིཔཱཏཏོ པཋམཾ ཀཏྟབྦཾ པུབྦཀརཎཾ. པུབྦཀརཎཏོ པཙྪཱ ཀཏྟབྦམྤི ཨུཔོསཐཀམྨཏོ པཋམཾ ཀཏྟབྦཏྟཱ པུབྦཀིཙྩཾ. ཨུབྷཡམྤི ཙེཏཾ ཨུཔོསཐཀམྨཏོ པཋམཾ ཀཏྟབྦཏྟཱ ‘‘པུབྦཀིཙྩ’’མིཙྩེཝ ཨེཏྠ ཝུཏྟནྟི ཨཱཧ ‘‘ཨེཝཾ དྭཱིཧི ནཱམེཧི ནཝཝིདྷཾ པུབྦཀིཙྩཾ དསྶིཏ’’ནྟི. ཀིཾ ཏཾ ཀཏནྟི པུཙྪཏཱིཏི ཨཱཧ ‘‘ན ཧཱི’’ཏིཨཱདི. ཏཾ ཨཀཏྭཱ ཨུཔོསཐཾ ཀཱཏུཾ ན ཝཊྚཏི ‘‘ན, བྷིཀྑཝེ, ཐེརེན ཨཱཎཏྟེན ཨགིལཱནེན ན ¶ སམྨཛྫིཏབྦཾ, ཡོ ན སམྨཛྫེཡྻ, ཨཱཔཏྟི དུཀྐཊསྶཱ’’ཏིཨཱདི (མཧཱཝ. ༡༥༩) ཝཙནཏོ. ཏེནེཝཱཧ ‘‘ཏསྨཱ ཐེརེན ཨཱཎཏྟེནཱ’’ཏིཨཱདི.

སཙེ པན ཨཱཎཏྟོ སམྨཛྫནིཾ ཏཱཝཀཱལིཀམྤི ན ལབྷཏི, སཱཁཱབྷངྒཾ ཀཔྤིཡཾ ཀཱརེཏྭཱ སམྨཛྫིཏབྦཾ. ཏམྤི ཨལབྷནྟསྶ ལདྡྷཀཔྤིཡཾ ཧོཏི. པཱནཱིཡཾ པརིབྷོཛནཱིཡཾ ཨུཔཊྛཱཔེཏབྦནྟི ཨཱགནྟུཀཱནཾ ཨཏྠཱཡ པཱནཱིཡཔརིབྷོཛནཱིཡཾ ཨུཔཊྛཱཔེཏབྦཾ. ཨཱསནཾ པཉྙཱཔེཏབྦནྟི པཱིཋཕལཀཱདིཨཱསནཾ པཉྙཱཔེཏབྦཾ. སཙེ ཨུཔོསཐཱགཱརེ ཨཱསནཱནི ནཏྠི, སཾགྷིཀཱཝཱསཏོཔི ཨཱཧརིཏྭཱ པཉྙཱཔེཏྭཱ པུན ཧརིཏབྦཱནི. ཨཱསནེསུ ཨསཏི ཀཊསཱརཀེཔི ཏཊྚིཀཱཡོཔི པཉྙཱཔེཏུཾ ཝཊྚཏི. ཏཊྚིཀཱསུཔི ཨསཏི སཱཁཱབྷངྒཱནི ཀཔྤིཡཾ ཀཱརེཏྭཱ པཉྙཱཔེཏབྦཱནི. ཀཔྤིཡཀཱརཀཾ ཨལབྷནྟསྶ ལདྡྷཀཔྤིཡཾ ཧོཏི. པདཱིཔོ ཀཱཏབྦོཏི པདཱིཔེཏབྦོ, པདཱིཔུཛྫལནཾ ཀཱཏབྦནྟི ཝུཏྟཾ ཧོཏི. ཨཱཎཱཔེནྟེན པན ‘‘ཨསུཀསྨིཾ ནཱམ ཨོཀཱསེ ཏེལཾ ཝཱ ཝཊྚི ཝཱ ཀཔལླིཀཱ ཝཱ ཨཏྠི, ཏཾ གཧེཏྭཱ ཀརོཧཱི’’ཏི ཝཏྟབྦོ. སཙེ ཏེལཱདཱིནི ནཏྠི, པརིཡེསིཏབྦཱནི. པརིཡེསིཏྭཱ ཨལབྷནྟསྶ ལདྡྷཀཔྤིཡཾ ཧོཏི. ཨཔིཙ ཀཔཱལེ ཨགྒིཔི ཛཱལེཏབྦོ. ཨཱཎཱཔེནྟེན ཙ ཀིཉྩི ཀམྨཾ ཀརོནྟོ ཝཱ སདཱཀཱལམེཝ ཨེཀོ ཝཱ བྷཱརནིཏྠརཎཀོ ཝཱ སརབྷཱཎཀདྷམྨཀཐིཀཱདཱིསུ ཨཉྙཏརོ ཝཱ ན ཨཱཎཱཔེཏབྦོ, ཨཝསེསཱ པན ཝཱརེན ཨཱཎཱཔེཏབྦཱ. ཏེནཱཧ ‘‘ཐེརེནཱཔི པཏིརཱུཔཾ ཉཏྭཱ ཨཱཎཱཔེཏབྦ’’ནྟི.

བཧི ཨུཔོསཐཾ ཀཏྭཱ ཨཱགཏེནཱཏི ནདིཡཱ ཝཱ སཱིམཱཡ ཝཱ ཡཏྠ ཀཏྠཙི ཨུཔོསཐཾ ཀཏྭཱ ཨཱགཏེན ཚནྡོ དཱཏབྦོ, ‘‘ཀཏོ མཡཱ ཨུཔོསཐོ’’ཏི ཨཙྪིཏུཾ ན ལབྷཏཱིཏི ཨདྷིཔྤཱཡོ. ཀིཙྩཔྤསུཏོ ཝཱཏི གིལཱནུཔཊྛཱཀཱདིཀིཙྩཔྤསུཏོ ཝཱ. སཙེ གིལཱནོ ཚནྡཔཱརིསུདྡྷིཾ དཱཏུཾ ན སཀྐོཏི, མཉྩེན ཝཱ པཱིཋེན ཝཱ སངྒྷམཛ྄ཛྷཾ ཨཱནེཏྭཱ ཨུཔོསཐོ ཀཱཏབྦོ. སཙེ གིལཱནུཔཊྛཱཀཱནཾ ¶ བྷིཀྑཱུནཾ ཨེཝཾ ཧོཏི ‘‘སཙེ ཁོ མཡཾ ཨིམཾ གིལཱནཾ ཋཱནཱ ཙཱཝེསྶཱམ, ཨཱབཱདྷོ ཝཱ ཨབྷིཝཌྜྷིསྶཏི, ཀཱལཀིརིཡཱ ཝཱ བྷཝིསྶཏཱི’’ཏི, ན ཏྭེཝ སོ གིལཱནོ ཋཱནཱ ཙཱཝེཏབྦོ, སངྒྷེན ཏཏྠ གནྟྭཱ ཨུཔོསཐོ ཀཱཏབྦོ, ན ཏྭེཝ ཝགྒེན སངྒྷེན ཨུཔོསཐོ ཀཱཏབྦོ. ཀརེཡྻ ཙེ, ཨཱཔཏྟི དུཀྐཊསྶ. སཙེ བཧཱུ ཏཱདིསཱ གིལཱནཱ ཧོནྟི, སངྒྷེན པཊིཔཱཊིཡཱ ཋཏྭཱ ¶ སབྦེ ཧཏྠཔཱསེ ཀཱཏབྦཱ. སཙེ དཱུརེ དཱུརེ ཧོནྟི, སངྒྷོ ནཔྤཧོཏི, ཏཾ དིཝསཾ ཨུཔོསཐོ ན ཀཱཏབྦོ, ན ཏྭེཝ ཝགྒེན སངྒྷེན ཨུཔོསཐོ ཀཱཏབྦོ. ‘‘ཨནུཛཱནཱམི, བྷིཀྑཝེ, ཏདཧུཔོསཐེ པཱརིསུདྡྷིཾ དེནྟེན ཚནྡམྤི དཱཏུཾ, སནྟི སངྒྷསྶ ཀརཎཱིཡ’’ནྟི (མཧཱཝ. ༡༦༥) ཝུཏྟཏྟཱ བྷགཝཏོ ཨཱཎཾ ཀརོནྟེན ‘‘ཚནྡཾ དམྨཱི’’ཏི ཝུཏྟཾ. ‘‘ཚནྡཧཱརཀོ ཙེ, བྷིཀྑཝེ, དིནྣེ ཚནྡེ ཏཏྠེཝ པཀྐམཏི, ཨཉྙསྶ དཱཏབྦོ ཚནྡོ’’ཏིཨཱདིཝཙནཏོ (མཧཱཝ. ༡༦༥) པུན ཨཏྟནོ ཚནྡདཱནཔརིསྶམཝིནོདནཏྠཾ ‘‘ཚནྡཾ མེ ཧརཱ’’ཏི ཝུཏྟཾ. ‘‘ཚནྡཧཱརཀོ ཙེ, བྷིཀྑཝེ, དིནྣེ ཚནྡེ སངྒྷཔྤཏྟོ སཉྩིཙྩ ན ཨཱརོཙེཏི, ཨཱཧཊོ ཧོཏི ཚནྡོ, ཚནྡཧཱརཀསྶ ཨཱཔཏྟི དུཀྐཊསྶཱ’’ཏི (མཧཱཝ. ༡༦༥) ཝུཏྟཏྟཱ དུཀྐཊཏོ ཏཾ མོཙེཏུཾ ‘‘ཚནྡཾ མེ ཨཱརོཙེཧཱི’’ཏི ཝུཏྟཾ.

ཀཱཡེན ཝཱ ཝཱཙཱཡ ཝཱ ཨུབྷཡེན ཝཱ ཝིཉྙཱཔེཏབྦོཏི མནསཱ ཙིནྟེཏྭཱ ཀཱཡཔྤཡོགཾ ཀརོནྟེན ཡེན ཀེནཙི ཨངྒཔཙྩངྒེན ཝཱ, ཝཱཙཾ པན ནིཙྪཱརེཏུཾ སཀྐོནྟེན ཏཐེཝ ཝཱཙཱཡ ཝཱ, ཨུབྷཡཐཱཔི སཀྐོནྟེན ཀཱཡཝཱཙཱཧི ཝཱ ཝིཉྙཱཔེཏབྦོ, ཛཱནཱཔེཏབྦོཏི ཨཏྠོ. ‘‘ཨཡཾ ཨཏྠོ’’ཏི ཝཙནཏོ པན ཡཱཡ ཀཱཡཙིཔི བྷཱསཱཡ ཝིཉྙཱཔེཏུཾ ཝཊྚཏི, པཱརིསུདྡྷིདཱནེཔི ཚནྡདཱནེ ཝུཏྟསདིསོཝ ཝིནིཙྪཡོ. ཏཾ པན དེནྟེན པཋམཾ སནྟཱི ཨཱཔཏྟི དེསེཏབྦཱ. ན ཧི སཱཔཏྟིཀོ སམཱནོ ‘‘པཱརིསུདྡྷིཾ དམྨི, པཱརིསུདྡྷིཾ མེ ཧར, པཱརིསུདྡྷིཾ མེ ཨཱརོཙེཧཱི’’ཏི (མཧཱཝ. ༡༦༤) ཝཏྟུཾ ལབྷཏི. ‘‘སནྟི སངྒྷསྶ ཀརཎཱིཡཱནཱི’’ཏི ཝཏྟབྦེ ཝཙནཝིཔལླཱསེན ‘‘སནྟི སངྒྷསྶ ཀརཎཱིཡ’’ནྟི ཝུཏྟཾ. ཏེསཉྩ ཨཏྟནོ ཙ ཚནྡཔཱརིསུདྡྷིཾ དེཏཱིཏི ཨེཏྠ ཚནྡོ ཙ ཚནྡཔཱརིསུདྡྷི ཙ ཚནྡཔཱརིསུདྡྷི, ཏཾ དེཏཱིཏི སརཱུཔེཀསེསནཡེན ཨཏྠོ དཊྛབྦོ. ཨིཏརཱཏི ཨཉྙེསཾ ཚནྡཔཱརིསུདྡྷི. བིལཱ༹ལསངྑལིཀཱ ཚནྡཔཱརིསུདྡྷཱིཏི ཨེཏྠ བིལཱ༹ལསངྑལིཀཱ ནཱམ བིལཱ༹ལབནྡྷནཾ. ཏཏྠ ཧི སངྑལིཀཱཡ པཋམཝལཡཾ དུཏིཡཝལཡཾཡེཝ པཱཔུཎཱཏི, ན ཏཏིཡཾ, ཨེཝམཡམྤི ཚནྡཔཱརིསུདྡྷི དཱཡཀེན ཡསྶ དིནྣཱ, ཏཏོ ཨཉྙཏྠ ན གཙྪཏཱིཏི (སཱརཏྠ. ཊཱི. མཧཱཝགྒ ༣.༡༦༤; ཝི. ཝི. ཊཱི. མཧཱཝགྒ ༢.༡༦༤). ཏསྨཱ སཱ བིལཱ༹ལསངྑལིཀསདིསཏྟཱ ‘‘བིལཱ༹ལསངྑལིཀཱ’’ཏི ཝུཏྟཱ. བིལཱ༹ལསངྑལིཀགྒཧཎཉྩེཏྠ ཡཱསཾ ཀཱསཉྩི སངྑལིཀཱནཾ ཨུཔལཀྑཎམཏྟནྟི དཊྛབྦཾ.

ཨུཏུཀྑཱནནྟི ¶ ¶ ཏཾ ཏཾ ཀིརིཡཾ ཨརཏི ཝཏྟེཏཱིཏི ཨུཏུ, ཏསྶ ཨཀྑཱནཾ ཨུཏུཀྑཱནཾ, ཨུཏུཨཱཙིཀྑནནྟི ཨཏྠོ. ཡཐཱ ཙ ཏསྶ ཨཱཙིཀྑནཾ, ཏཾ སརཱུཔཏོ དསྶེཏུཾ ‘‘ཧེམནྟཱདཱིན’’ནྟིཨཱདི ཝུཏྟཾ. གཎནཱཏི ཀལནཱ. བྷིཀྑུནཱིནཾ ཨཊྛགརུདྷམྨེཧི ཨོཝདནཾ བྷིཀྑུནོཝཱདོ. སྭེ ཨུཔོསཐོཏི ཨཱགནྟྭཱཏི ‘‘སྭེ ཨུཔོསཐོ ཧོཏཱི’’ཏི ཝུཏྟེ ཨཛྫེཝ ཨཱགནྟྭཱ པནྣརསིཀེ ཨུཔོསཐེ པཀྑསྶ ཙཱཏུདྡསིཡཾ, ཙཱཏུདྡསིཀེ ཏེརསིཡཾ ཨཱགནྟྭཱཏི ཝུཏྟཾ ཧོཏི. མཧཱཔཙྩརིཡཾ པན ‘‘པཀྑསྶ ཏེརསིཡཾཡེཝ ཨཱགནྟྭཱ ‘ཨཡཾ ཨུཔོསཐོ ཙཱཏུདྡསིཀོ ཝཱ པནྣརསིཀོ ཝཱ’ཏི པུཙྪིཏབྦ’’ནྟི (པཱཙི. ཨཊྛ. ༡༤༩) ཝུཏྟཾ. ཨེཝཾ པུཙྪིཏེན ཙ བྷིཀྑུནཱ སཙེ ཙཱཏུདྡསིཡཾ ཨུཔོསཐཾ ཀརོནྟི, ‘‘ཙཱཏུདྡསིཀོ བྷགིནཱི’’ཏི ཝཏྟབྦཾ. སཙེ པནྣརསིཡཾ ཀརོནྟི, ‘‘པནྣརསིཀོ བྷགིནཱི’’ཏི ཝཏྟབྦཾ. ‘‘ཨནུཛཱནཱམི, བྷིཀྑཝེ, ཋཔེཏྭཱ བཱལཾ, ཋཔེཏྭཱ གིལཱནཾ, ཋཔེཏྭཱ གམིཀཾ ཨཝསེསེཧི ཨོཝཱདཾ གཧེཏུ’’ནྟི (ཙཱུལ༹ཝ. ༤༡༤) ཝུཏྟཏྟཱ ‘‘ཏཾ ཋཔེཏྭཱ’’ཏིཨཱདིམཱཧ. ཏཏྠ ཨཱརོཙནཝིདྷཱནཾ ཨཛཱནནྟོ བཱལོ. ཙཱཏུདྡསིཀཔནྣརསིཀེསུ ཨུཔོསཐེསུ ཝཱ པཱཊིཔདེ ཝཱ གནྟུཀཱམོ གམིཡོ, དུཏིཡཔཀྑདིཝསཏོ པན པཊྛཱཡ ཏཏོ ཨུདྡྷཾ གཙྪནྟོ ཨིདྷ གམིཡོ ནཱམ ན ཧོཏི. ཨརཉྙེ ནིཝཱསོ ཨསྶཱཏི ཨཱརཉྙིཀོ. སོཔི ‘‘ཨཧཾ ཨརཉྙཝཱསཱི, སྭེ ཨུཔོསཐོ, ཝིཧཱརེ ན ཝསཱམཱི’’ཏི ཨཔྤཊིགྒཧིཏུཾ ན ལབྷཏི. ཡདི ན གཎྷེཡྻ, དུཀྐཊཾ ཨཱཔཛྫེཡྻ. ཝུཏྟཉྷེཏཾ ‘‘ན, བྷིཀྑཝེ, ཨོཝཱདོ ན གཧེཏབྦོ, ཡོ ན གཎྷེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༤༡༤). ཏེན པན པཙྩཱཧརཎཏྠཱཡ སངྐེཏོ ཀཱཏབྦོ. ཝུཏྟཉྷེཏཾ ‘‘ཨནུཛཱནཱམི, བྷིཀྑཝེ, ཨཱརཉྙིཀེན བྷིཀྑུནཱ ཨོཝཱདཾ གཧེཏུཾ, སངྐེཏཉྩ ཀཱཏུཾ ཨཏྲ པཏིཧརིསྶཱམཱི’’ཏི (ཙཱུལ༹ཝ. ༤༡༥). ཏསྨཱ ཨཱརཉྙིཀེན བྷིཀྑུནཱ སཙེ བྷིཀྑུནཱིནཾ ཝསནགཱམེ བྷིཀྑཱ ལབྦྷཏི, ཏཏྠེཝ ཙརིཏྭཱ བྷིཀྑུནིཡོ དིསྭཱ ཨཱརོཙེཏྭཱ གནྟབྦཾ. ནོ ཙསྶ ཏཏྠ བྷིཀྑཱ སུལབྷཱ ཧོཏི, སཱམནྟགཱམེ ཙརིཏྭཱ བྷིཀྑུནཱིནཾ གཱམཾ ཨཱགམྨ ཏཐེཝ ཀཱཏབྦཾ. སཙེ དཱུརཾ གནྟབྦཾ ཧོཏི, སངྐེཏོ ཀཱཏབྦོ ‘‘ཨཧཾ ཨསུཀཾ ནཱམ ཏུམྷཱཀཾ གཱམདྭཱརེ སབྷཾ ཝཱ མཎྜཔཾ ཝཱ རུཀྑམཱུལཾ ཝཱ ཨུཔསངྐམིསྶཱམི, ཏཏྲ ཨཱགཙྪེཡྻཱཐཱ’’ཏི. བྷིཀྑུནཱིཧི ཏཏྲ གནྟབྦཾ, ཨགནྟུཾ ན ལབྦྷཏི. ཝུཏྟཉྷེཏཾ ‘‘ན, བྷིཀྑཝེ, བྷིཀྑུནིཡཱ སངྐེཏཾ ¶ ན གནྟབྦཾ, ཡཱ ན གཙྪེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༤༡༥). ཨུཔོསཐགྒེཏི ཨུཔོསཐཀརཎཊྛཱནེ. ཨཊྛཧི ཨངྒེཧཱིཏི –

‘‘སཱིལཝཱ ཧོཏི, པཱཏིམོཀྑསཾཝརསཾཝུཏོ ཝིཧརཏི ཨཱཙཱརགོཙརསམྤནྣོ, ཨཎུམཏྟེསུ ཝཛྫེསུ བྷཡདསྶཱཝཱི སམཱདཱཡ སིཀྑཏི སིཀྑཱཔདེསུ. བཧུསྶུཏོ ཧོཏི སུཏདྷརོ སུཏསནྣིཙཡོ, ཡེ ཏེ དྷམྨཱ ཨཱདིཀལྱཱཎཱ མཛ྄ཛྷེཀལྱཱཎཱ པརིཡོསཱནཀལྱཱཎཱ སཱཏྠཾ སབྱཉྫནཾ ཀེཝལཔརིཔུཎྞཾ པརིསུདྡྷཾ བྲཧྨཙརིཡཾ ཨབྷིཝདནྟི, ཏཐཱརཱུཔཱསྶ དྷམྨཱ བཧུསྶུཏཱ ¶ ཧོནྟི, དྷཱཏཱ ཝཙསཱ པརིཙིཏཱ, མནསཱ ཨནུཔེཀྑིཏཱ, དིཊྛིཡཱ སུཔྤཊིཝིདྡྷཱ. ཨུབྷཡཱནི ཁོ པནསྶ པཱཏིམོཀྑཱནི ཝིཏྠཱརེན སྭཱགཏཱནི ཧོནྟི སུཝིབྷཏྟཱནི སུཔྤཝཏྟཱིནི སུཝིནིཙྪིཏཱནི སུཏྟསོ ཨནུབྱཉྫནསོ. ཀལྱཱཎཝཱཙོ ཧོཏི ཀལྱཱཎཝཱཀྐརཎོ. ཡེབྷུཡྻེན བྷིཀྑུནཱིནཾ པིཡོ ཧོཏི མནཱཔོ. པཊིབལོ ཧོཏི བྷིཀྑུནིཡོ ཨོཝདིཏུཾ. ན ཁོ པནེཏཾ བྷགཝནྟཾ ཨུདྡིསྶ པབྦཛིཏཱཡ ཀཱསཱཡཝཏྠཝསནཱཡ གརུདྷམྨཾ ཨཛ྄ཛྷཱཔནྣཔུབྦོ ཧོཏི. ཝཱིསཏིཝསྶོ ཝཱ ཧོཏི ཨཏིརེཀཝཱིསཏིཝསྶོ ཝཱ’’ཏི (པཱཙི. ༡༤༧) –

ཨིམེཧི ཨཊྛཧི ཨངྒེཧི. པཱསཱདིཀེནཱཏི པསཱདཱཝཧེན ནིདྡོསེན ཀཱཡཝཙཱིམནོཀམྨེན. སམྤཱདེཏཱུཏི ཏིཝིདྷཾ སིཀྑཾ སམྤཱདེཏུ. ཡདཱ པན ཏཱཧི བྷིཀྑུནཱིཧི པཱཏིམོཀྑུདྡེསཀཾཡེཝ དིསྭཱ ཨོཝཱདོ ཡཱཙིཏོ, ཏདཱ ཨུཔོསཐགྒེ སནྣིཔཏིཏེཧི བྷིཀྑུསངྒྷེཧི པུབྦཀིཙྩཝསེན ‘‘ཨཏྠི ཀཱཙི བྷིཀྑུནིཡོ ཨོཝཱདཾ ཡཱཙམཱནཱ’’ཏི པུཙྪིཏེ ‘‘ཨེཝཾ ཝདེཧཱི’’ཏི ཨཏྟནཱ ཝཏྟབྦཝཙནཾ ཨཉྙེན ཀཐཱཔེཏྭཱ ‘‘ཨཏྠི ཀོཙི བྷིཀྑུ བྷིཀྑུནོཝཱདཀོ སམྨཏོ’’ཏིཨཱདིཾ སཡཾ ཝཏྭཱ པུན སཡམེཝ གནྟྭཱ བྷིཀྑུནཱིནཾ ཨཱརོཙེཏབྦཾ. ཨཉྙེན ཝཱ བྷིཀྑུནཱ ཏསྨིཾ དིཝསེ པཱཏིམོཀྑཾ ཨུདྡིསཱཔེཏབྦཾ. ཨིདནྟི ‘‘ཏཱཧཱི’’ཏི བཧུཝཙནཾ. ཨེཀཏོ སཧེཝ.

ཉཏྟིཊྛཔཀེན ཝཱཏི ཡཏྠ ཏིཎྞཾ ཝསནཊྛཱནེ པཱཏིམོཀྑུདྡེསོ ནཏྠི, ཏཏྠ ཉཏྟིཊྛཔནཀེན ཝཱ. ཨིཏརེན ཝཱཏི ཡཏྠ དྭེ བྷིཀྑཱུ ཝསནྟི, ཨེཀོ ཝཱ, ཏཏྠ ཨིཏརེན ཝཱ བྷིཀྑུནཱ སཙེ སཡམེཝ སམྨཏོ, ‘‘ཨཧ’’ནྟི ཝཏྟབྦཾ ¶ . ཏཐེཝཱཏི ཨུཔོསཐགྒེ ཝུཏྟསདིསམེཝ. ‘‘ཨཱརོཙེཏྭཱཝཱ’’ཏི ཨིམིནཱ ཨནཱརོཙནཾ པཊིཀྑིཔཏི. ‘‘ན, བྷིཀྑཝེ, ཨོཝཱདོ ན ཨཱརོཙེཏབྦོ, ཡོ ན ཨཱརོཙེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༤༡༥) ཝཙནཏོ ཨོཝཱདཾ གཧེཏྭཱ ཨུཔོསཐགྒེ ཨནཱརོཙེཏུཾ ན ཝཊྚཏི.

པརིསུདྡྷབྷཱཝནྟི ཨཱཔཏྟིཡཱ པརིསུདྡྷཏཾ. ཨཱརོཙེཐཱཏི ཨཱཝི ཀརོཐ. ཨེཏྠ སིཡཱཏི ‘‘པཱཏིམོཀྑཾ ཨུདྡིསིསྶཱམཱི’’ཏི ཨེཏསྨིཾ པདེ ཨཡམནུཡོགོ བྷཝེཡྻ. ཀིཾ ཏཾ, ཡཾ སིཡཱཏི ཨཱཧ ‘‘སངྒྷོ ཨུཔོསཐཾ ཀརེཡྻཱ’’ཏིཨཱདི. པུབྦེནཱཔརཾ སནྡྷིཡཏཱིཏི པུབྦཝཙནེན ཨཔརཾ ཝཙནཾ སནྡྷཱནཾ གཙྪཏི. སཱམགྒིཡཱཏི ཀཱཡཙིཏྟེཧི སཧིཏཏཱཡ. གཎསྶཱཏི ཨུདྡེསཀཾ ཋཔེཏྭཱ ཙཏུཝགྒེ སེསབྷིཀྑཱུནཾ. སངྒྷསྶ ཨུདྡིཊྛཾ ཧོཏཱིཏི སངྒྷེན ཨུདྡིཊྛཾ ཧོཏི. ཀརཎཏྠེ ཙེཏཾ སཱམིཝཙནཾ. ཨེཏྠཱཏི པཱཏིམོཀྑུདྡེསེ. ལཀྑཎནྟི སབྷཱཝོ.

ཐེརཱ ¶ ཙ ནཝཱ ཙ མཛ྄ཛྷིམཱ ཙཱཏི ཨེཏྠ དསཝསྶཱ, ཨཏིརེཀདསཝསྶཱ ཙ ཐེརཱ. ཨཱུནཔཉྩཝསྶཱ ནཝཱ. པཉྩཝསྶཱ, ཨཏིརེཀཔཉྩཝསྶཱ ཙ མཛ྄ཛྷིམཱ. ཨཊྛིཾ ཀཏྭཱཏི ཨཏྟཱནཾ ཏེན པཱཏིམོཀྑེན ཨཏྠིཀཾ ཀཏྭཱ, ཏཾ ཝཱ པཱཏིམོཀྑཾ ‘‘ཨིདཾ མཡ྄ཧཾ པཱཏིམོཀྑ’’ནྟི ཨཏྠིཾ ཀཏྭཱ. མནསི ཀརིཏྭཱཏི ཙིཏྟེ ཋཔེཏྭཱ. སོཏདྭཱརཝསེནཱཏི སོཏདྭཱརིཀཛཝནཝིཉྙཱཎཝསེན. སབྦཙེཏསཱ སམནྣཱཧརཱམཱཏི ཙིཏྟསྶ ཐོཀམྤི བཧི གནྟུཾ ཨདེནྟཱ སབྦེན ཙིཏྟེན ཨཱཝཛྫེམ, སལླཀྑེམཱཏི ཨཏྠོ. མནསི ཀརོམཱཏི ཨཱཝཛྫེམ, སམནྣཱཧརཱམཱཏི ཨཏྠོ. སོ ཙ ཁོ མནསིཀཱརོ ན ཨེཏྠ ཨཱརམྨཎཔྤཊིཔཱདནལཀྑཎོ, ཨཐ ཁོ ཝཱིཐིཔྤཊིཔཱདནཛཝནཔྤཊིཔཱདནམནསིཀཱརཔུབྦཀཙིཏྟེ ཋཔནལཀྑཎོཏི ཨཱཧ ‘‘ཨེཀགྒཙིཏྟཱ ཧུཏྭཱ ཙིཏྟེ ཋཔེཡྻཱམཱ’’ཏི. ན སམེཏཱིཏི ན སཾགཙྪཏི. ཀསྨཱ ན སཾགཙྪཏཱིཏི ཨཱཧ ‘‘སམགྒསྶ ཧཱི’’ཏིཨཱདི. ཀིཉྩ བྷིཡྻོཏི ཨཱཧ ‘‘པཱཏིམོཀྑུདྡེསཀོ ཙཱ’’ཏིཨཱདི. སངྒྷཔརིཡཱཔནྣོཏི སངྒྷེ པརིཡཱཔནྣོ ཨནྟོགདྷོ.

ཨིདཱནི ཏཾ དསྶེཏུནྟི སམྦནྡྷོ. ཨཱཡསྨནྟོཏི སནྣིཔཏིཏཱནཾ པིཡཝཙནེན ཨཱལཔནཾ.

ཨལཛྫིཏཱཏི ¶ ཨལཛྫིཏཱཡ, ཨལཛྫནབྷཱཝེནཱཏི ཨཏྠོ. ཏཏིཡཏྠེ ཧི ཨིདཾ པཙྩཏྟཝཙནཾ. ‘‘ཨཉྙཱཎཏཱ’’ཏིཨཱདཱིསུཔི ཨེསེཝ ནཡོ. ཀུཀྐུཙྩཔྤཀཏཏཱཏི ཀུཀྐུཙྩེན ཨབྷིབྷཱུཏཏཱཡ. སཏིསམྨོསཱཏི སཏིཝིཔྤཝཱསཏོ. ཝཱིཏིཀྐམནྟི སིཀྑཱཔདཝཱིཏིཀྐམནཾ.

སཉྩིཙྩཱཏི སཉྩེཏེཏྭཱ, ཨཀཔྤིཡབྷཱཝཾ ཛཱནནྟོཡེཝ ཝཱིཏིཀྐམཙིཏྟཾ པེསེཏྭཱཏི ཨཏྠོ. པརིགཱུཧཏཱིཏི ནིགཱུཧཏི ན དེསེཏི ན ཝུཊྛཱཏི. ལཛྫཱཡ པརིགཱུཧནྟོ ཨལཛྫཱི ན ཧོཏི, ‘‘ཀིཾ ཨིམིནཱ’’ཏི ཨནཱདརིཡེན པརིགཱུཧནྟོ ཨལཛྫཱི ཧོཏཱིཏི དསྶེཏི. ཨགཏིགམནཉྩ གཙྪཏཱིཏི བྷཎྜབྷཱཛནཱིཡཊྛཱནཱདཱིསུ ཚནྡཱགཏིཨཱདིབྷེདཾ ཨགཏིགམནཉྩ གཙྪཏི. ཨལཛྫིཔུགྒལོཏི ཨཛ྄ཛྷཏྟིཀསམུཊྛཱནལཛྫཱཝིརཧིཏོ པུགྒལོ. ཨེཏྠ ཙ ‘‘སཉྩིཙྩཱ’’ཏི ཨིམིནཱ ཨནཱདརིཡཝསེནེཝ ཨཱཔཏྟིཾ ཨཱཔཛྫནྟོ, ཨཱཔནྣཉྩ ཨཱཔཏྟིཾ པརིགཱུཧནྟོ, བྷཎྜབྷཱཛནཱིཡཊྛཱནཱདཱིསུ ཨགཏིགམནཾ གཙྪནྟོ ཙ ཨལཛྫཱི ཧོཏི, ན ཨིཏརོཏི དསྶེཏི.

མནྡོཏི མནྡཔཉྙོ, ཨཔཉྙསྶེཝེཏཾ ནཱམཾ. མོམཱུཧོཏི ཨཏིསཾམཱུལ༹ྷོ. ཝིརཱདྷེཏཱིཏི ན རཱདྷེཏི ན སཱདྷེཏི. ཀུཀྐུཙྩེཏི ཝིནཡསཾསཡེ. ཀཔྤིཡཾ ཙེ ཀཏྟབྦཾ སིཡཱཏི ཝིནཡདྷརཾ པུཙྪིཏྭཱ ཏེན ཝཏྠུཾ ཨོལོཀེཏྭཱ མཱཏིཀཾ, པདབྷཱཛནཾ, ཨནྟརཱཔཏྟིཾ, ཨནཱཔཏྟིཉྩ ཨོལོཀེཏྭཱ ‘‘ཀཔྤཏི, ཨཱཝུསོ, མཱ ཨེཏྠ ཀངྑཱི’’ཏི ཝུཏྟེ ཀཏྟབྦཾ བྷཝེཡྻ.

སཧསེཡྻཙཱིཝརཝིཔྤཝཱསཱདཱིནཱིཏི ¶ ཨེཏྠ སཧསེཡྻཱ ནཱམ ཨནུཔསམྤནྣེན ཨུཏྟརིདིརཏྟཏིརཏྟཾ སཧསེཡྻཱཔཏྟི, ཝིཔྤཝཱསོ ནཱམ ཨེཀརཏྟཚཱརཏྟཝསེན ཝིཔྤཝཱསོ. ཨཱདིསདྡེན སཏྟཱཧཱཏིཀྐམཱདཱིསུ ཨཱཔཏྟིཾ སངྒཎྷཱཏི. སཏྟནྣཾ ཨཱཔཏྟིཀྑནྡྷཱནནྟི པཱརཱཛིཀསངྒྷཱདིསེསཐུལླཙྩཡཔཱཙིཏྟིཡཔཱཊིདེསནཱིཡདུཀྐཊདུབྦྷཱསིཏསངྑཱཏཱནཾ སཏྟནྣཾ ཨཱཔཏྟིཀྑནྡྷཱནཾ.

དེསེཏུ ཝཱ པཀཱསེཏུ ཝཱཏི སངྒྷམཛ྄ཛྷེ ཝཱ གཎམཛ྄ཛྷེ ཝཱ ཨེཀཔུགྒལེ ཝཱ དེསེཏུ ཝཱ པཀཱསེཏུ ཝཱ. ཨེཏྠ ཙ པཱརཱཛིཀཱཔཏྟིདེསནཱ ནཱམ བྷིཀྑུབྷཱཝསྶ པརིཙྩཱགོ. ཝུཊྛཱནཾ པན དེསནཱཝིསེསཏྟཱ ‘‘དེསནཱ’’ཏི དཊྛབྦཾ. པཀཱསེཏུ ཝཱཏི ཨཱརོཙེཏུ ཝཱ.

ཨེཝཾ ཨནཱཔནྣཱ ཝཱཏི ཨེཝཾ ཚནྣཾ ཨཱཀཱརཱནཾ ཨཉྙཏརེན ཨནཱཔནྣཱ ཝཱ. ཝུཊྛིཏཱ ཝཱཏི པརིཝཱསཱདིནཱ ཝུཊྛིཏཱ ཝཱ. ཨཱརོཙིཏཱ ཝཱཏི ཨཱཝིཀཏཱ ¶ ཝཱ. ཨཱརོཙེནྟོ ཙ ‘‘ཏུཡ྄ཧཾ སནྟིཀེ ཨེཀཾ ཨཱཔཏྟིཾ ཨཱཝིཀརོམཱི’’ཏི ཝཱ ‘‘ཨཱཙིཀྑཱམཱི’’ཏི ཝཱ ‘‘ཨཱརོཙེམཱི’’ཏི ཝཱ ‘‘མམ ཨེཀཾ ཨཱཔཏྟིཾ ཨཱཔནྣབྷཱཝཾ ཛཱནཱཧཱི’’ཏི ཝཱ ཝདཏུ, ‘‘ཨེཀཾ གརུཀཾ ཨཱཔཏྟིཾ ཨཱཝིཀརོམཱི’’ཏི ཝཱ ཨཱདིནཱ ནཡེན ཝདཏུ, སབྦེཧིཔི ཨཱཀཱརེཧི ཨཱརོཙིཏཱཝ ཧོཏི. སཙེ པན གརུཀཱཔཏྟིཾ ཨཱཝིཀརོནྟོ ‘‘ལཧུཀཱཔཏྟིཾ ཨཱཝིཀརོམཱི’’ཏིཨཱདིནཱ ནཡེན ཝདཏི, ཨནཱཝིཀཏཱ ཧོཏི ཨཱཔཏྟི. ཝཏྠུཾ ཨཱརོཙེཏི, ཨཱཔཏྟིཾ ཨཱརོཙེཏི, ཨུབྷཡཾ ཨཱརོཙེཏི, ཏིཝིདྷེནཱཔི ཨཱརོཙིཏཱཝ ཧོཏི. ཨསནྟིཡཱ ཨཱཔཏྟིཡཱཏི བྷཱཝེནབྷཱཝལཀྑཎེ བྷུམྨཾ. ཏུཎྷཱིབྷཱཝེནཱཔི ཧཱིཏི ཨེཏྠ ན ཀེཝལཾ ‘‘ཨཱམ, མཡཾ པརིསུདྡྷཱ’’ཏི ཝུཏྟེཡེཝ, ཨཐ ཁོ ཏུཎྷཱིབྷཱཝེནཱཔཱིཏི ཨཔིསདྡསྶ ཨཏྠོ ཝེདིཏབྦོ.

ཀིཾ ཏཾ ཡཱཝཏཏིཡཱནུསཱཝིཏཾ ནཱམ, ཀཐཉྩེཏཾ ཡཱཝཏཏིཡཱནུསཱཝིཏཾ ཧོཏཱིཏི ཝིཙཱརཎཱཡཾ ཨཱཙརིཡཱནཾ མཏིབྷེདམུཁེན ཏམཏྠཾ དསྶེཏུཾ ‘‘ཡཱཝཏཏིཡཾ ཨནུསཱཝིཏཾ ཧོཏཱིཏི ཨེཏྠཱ’’ཏིཨཱདི ཝུཏྟཾ. ཏཏྠ ཡདེཏཾ ཏིཀྑཏྟུཾ ཨནུསཱཝིཏནྟི སམྦནྡྷོ. ཨཏྠབྱཉྫནབྷེདཏོཏི ཨརཱིཡཏི ཉཱཡཏཱིཏི ཨཏྠོ, ཨབྷིདྷེཡྻཾ, བྱཉྫཱིཡཏི ཨཏྠོ ཨནེནཱཏི བྱཉྫནཾ, ཨཀྑརཾ, ཨཏྠོ ཙ བྱཉྫནཉྩ ཨཏྠབྱཉྫནཱནི, ཏེསཾ བྷེདོ ཨཏྠབྱཉྫནབྷེདོ, ཏཏོ, ཨཏྠསྶ ཙ བྱཉྫནསྶ ཙ ཝིསདིསཏྟཱཏི ཨཏྠོ.

ཨིདཱནི ཏམེཝཏྠཾ ཝིབྷཱཝེཏུཾ ‘‘ཨནུསཱཝནཉྷི ནཱམཱ’’ཏིཨཱདིམཱཧ. ཧཱིཏི ཀཱརཎཏྠེ ནིཔཱཏོ. ཏསྶ པན ‘‘ཨབྷིནྣ’’ནྟི ཨིམིནཱ སམྦནྡྷོ ཝེདིཏབྦོ. ཏེནཱཏི བྷིནྣཏྟཱ. ཨསྶཱཏི ‘‘ཡསྶ སིཡཱ’’ཏིཨཱདིཝཙནཏྟཡསྶ. ཨཝསྶཉྩེཏམེཝཾ སམྤཊིཙྪིཏབྦཾ, ཨཉྙཐཱ ཨཏིཔྤསངྒོཔི ¶ སིཡཱཏི དསྶེཏུཾ ‘‘ཡདི ཙེཏ’’ནྟིཨཱདིམཱཧ. ཨེཏནྟི ‘‘ཡསྶ སིཡཱ’’ཏིཨཱདིཝཙནཏྟཡཾ. ཨཔརེ ‘‘ཨནུསཱཝིཏ’’ནྟི པདཾ ན ཨཏཱིཏཏྠཾ དཱིཔེཏི, ཨཐ ཁོ ཨནཱགཏཏྠཾ. དྷཱཏྭཏྠསམྦནྡྷོ ཀཱལནྟརཝིཧིཏོཔི པཙྩཡོ ཀཱལནྟརེ སཱདྷུ ཧོཏཱིཏི ཝིཀཔྤེསུཾ. ཏེནཱཧ ‘‘ཨཔརེ ‘ཨནུསཱཝིཏ’ནྟི པདསྶཱ’’ཏིཨཱདི. ཨུཔརི ཨུདྡེསཱཝསཱནེཏི པཱརཱཛིཀུདྡེསཱཝསཱནེ. ཨཏྠཡུཏྟཱིནཾ ཨབྷཱཝཏོཏི ཨནཱགཏཏྠསྶ ཙ ཀཱརཎསྶ ཙ ཨབྷཱཝཏོ. ཨིདཱནི ཏམེཝ ཝིབྷཱཝེཏུཾ ‘‘ཨིདཾ ཧཱི’’ཏིཨཱདིམཱཧ. ཀཐམེཏཾ ཝིཉྙཱཡཏཱིཏི ཨཱཧ ‘‘ཡདི ཙསྶཱ’’ཏིཨཱདི. ཨཡནྟི ¶ ཨནཱགཏཀཱལོ. ཨནུསཱཝིཏཾ ཧེསྶཏཱིཏི ཝདེཡྻཱཏི ཨནུཔྤཡོགཾ ཨནཱགཏཀཱལཾ ཀཏྭཱ ‘‘ཨནུསཱཝིཏཾ ཧེསྶཏཱི’’ཏི བུདྡྷོ ཝདེཡྻ. ཨཡཾ ཧེཏྠཱདྷིཔྤཱཡོ – ཡདི ཙེཏྠ དྷཱཏྭཏྠསམྦནྡྷོ ཏ-པཙྩཡོ སིཡཱ, ཏཐཱ སཏི དྷཱཏྭཏྠསམྦནྡྷོ ནཱམ ཝིསེསནཝིསེསྱབྷཱཝོ, སོ ཙ ཨནུཔྤཡོགསྶ སམཱནཏྠབྷཱཝེ སཏི ཨུཔྤཛྫཏི, ནཱསཏཱིཏི ‘‘ཧེསྶཏཱི’’ཏི ཨནུཔྤཡོགཾ ཝདེཡྻ, ན ཙ ཝུཏྟཾ. ཏསྨཱ ཨནཱགཏཾ ན དཱིཔེཏི, ཨཏཱིཏཀཱལམེཝ དཱིཔེཏཱིཏི. ཨནུསཱཝིཡམཱནེཏི ཝཙནཏོཏི ‘‘ཨནུསཱཝིཡམཱནེ’’ཏི ཝཏྟམཱནཀཱལཝཙནཏོ. ཡདི ཨེཝཾ ‘‘ཡཱཝཏཏིཡཾ ཨནུསཱཝིཏཾ ཧོཏཱི’’ཏི ཀིམིདནྟི ཨཱཧ ‘‘ཡཱཝཏཏིཡ’’ནྟིཨཱདི. ཀིཾ ཏེན ལཀྑཱིཡཏི, ཡེནེཏཾ ལཀྑཎཝཙནམཏྟཾ སིཡཱཏི ཨཱཧ ‘‘ཏེནཱ’’ཏིཨཱདི. ཏེནཱཏི ལཀྑཎཝཙནམཏྟེན ཧེཏུནཱ.

ཏདེཏནྟི པཱཏིམོཀྑཾ. ཏཾ པནེཏནྟི ‘‘ཏཏྠཱཡསྨནྟེ པུཙྪཱམཱི’’ཏིཨཱདིཀཾ ཡཱཝཏཏིཡཱནུསཱཝནཾ. ན དིསྶཏཱིཏི ནོཔལབྦྷཏི. ཨིམམེཝ ཙ ཨཏྠནྟི ཨིམཾ ཨམྷེཧི ཝུཏྟམེཝཏྠཾ. ཡདི ཧི ‘‘ཡསྶ སིཡཱ ཨཱཔཏྟཱི’’ཏིཨཱདིཝཙནཏྟཡཾ ཡཱཝཏཏིཡཱནུསཱཝནཾ སིཡཱ, ཏདེཝ ཨུཔོསཐཀྑནྡྷཀེ (མཧཱཝ. ༡༣༢ ཨཱདཡོ) ཝདེཡྻ, ན པན ‘‘སཀིམྤི ཨནུསཱཝིཏཾ ཧོཏཱི’’ཏིཨཱདིཀནྟི ཨདྷིཔྤཱཡོ. ནནུ ཙཱཡཾ ཝིནིཙྪཡོ ཨཊྛཀཐཱསུ ན ཨཱགཏོ, ཨཐ ཀུཏོ ལདྡྷོཏི ཨཱཧ ‘‘ཨཡམེཏྠཱ’’ཏིཨཱདི. ཝིནཡཊྛཱནེསུ ཀཏཔརིཙཡཱནཾ ཨཱཙརིཡཱནཾ ཏཾ ཏཾ ཨཏྠཾ ཉཱཔེནྟཱི པཝེཎི ཨཱཙརིཡཔརམྤརཱ, ཏཱཡ ཨཱབྷཏོ ཨཱནཱིཏོ ཨཱཙརིཡཔརམྤརཱབྷཏོ.

ནནུ སམྤཛཱནམུསཱཝཱདེ པཱཙིཏྟིཡེན བྷཝིཏབྦཾ, ཨཐ ཀཐཾ དུཀྐཊཱཔཏྟི ཧོཏཱིཏི ཨཱཧ ‘‘སཱ ཙ ཁོ ན མུསཱཝཱདལཀྑཎེནཱ’’ཏིཨཱདི. སམྤཛཱནམུསཱཝཱདེ ཀིཾ ཧོཏཱིཏི ཡྭཱཡཾ ‘‘སམྤཛཱནམུསཱཝཱདོ ཨསྶ ཧོཏཱི’’ཏི ཝུཏྟོ, སོ ཨཱཔཏྟིཏོ ཀིཾ ཧོཏི, ཀཏརཱ ཨཱཔཏྟི ཧོཏཱིཏི ཨཏྠོ. དུཀྐཊཾ ཧོཏཱིཏི དུཀྐཊཱཔཏྟི ཧོཏི. ཝཙཱིདྭཱརེ ཨཀིརིཡསམུཊྛཱནཱཔཏྟི ཧོཏཱིཏི ཨསྶ ཧི བྷིཀྑུནོ ཨདྷམྨིཀཱཡ པཊིཉྙཱཡ ཏུཎྷཱིབྷཱུཏསྶ ནིསིནྣསྶ མནོདྭཱརེ ཨཱཔཏྟི ནཱམ ནཏྠི. ཡསྨཱ པན ཨཱཝིཀཱཏབྦཾ ནཱཝིཀཱསི, ཏེནསྶ ཝཙཱིདྭཱརེ ཨཀིརིཡཏོ ཨཡཾ ¶ ཨཱཔཏྟི སམུཊྛཱཏཱིཏི ¶ ཝེདིཏབྦཱ. ཨིདཱནི ཝུཏྟམེཝཏྠཾ པཱལི༹ཡཱ སཱདྷེཏུཾ ‘‘ཝུཏྟམྤི ཙེཏ’’ནྟིཨཱདིམཱཧ. ཨེཏཾ ཨུཔཱལིཏྠེརེན པརིཝཱརེ སེདམོཙནགཱཐཱསུ (པརི. ༤༧༩) ཝུཏྟམྤི ཙཱཏི ཨཏྠོ.

ཨནཱལཔནྟོ མནུཛེན ཀེནཙི ཝཱཙཱཏི ཀེནཙི མནུཛེན ཝཱཙཱཡ ཨནཱལཔནྟོ. གིརཾ ནོ ཙ པརེ བྷཎེཡྻཱཏི ‘‘ཨིཏི ཨིམེ སོསྶནྟཱི’’ཏི པརཔུགྒལེ སནྡྷཱཡ སདྡམྤི ན ནིཙྪཱརེཡྻ. ཨཱཔཛྫེཡྻ ཝཱཙསིཀནྟི ཝཱཙཏོ སམུཊྛིཏཾ ཨཱཔཏྟིཾ ཨཱཔཛྫེཡྻ. པཉྷཱམེསཱ ཀུསལེཧི ཙིནྟིཏཱཏི ཨེཏྠ པཉྷཱམེསཱཏི ལིངྒབྱཏྟཡེན ཝུཏྟཾ, ཨེསོ པཉྷོ ཀུསལེཧི ཙིནྟིཏོཏི ཨཏྠོ. ཨཡཾ པཉྷོ ཨིམམེཝ མུསཱཝཱདཾ སནྡྷཱཡ ཝུཏྟོ.

ཏཾཏཾསམྤཏྟིཡཱ ཝིབནྡྷནཝསེན སཏྟསནྟཱནསྶ ཨནྟརེ ཝེམཛ྄ཛྷེ ཨེཏི ཨཱགཙྪཏཱིཏི ཨནྟརཱཡོ, དིཊྛདྷམྨིཀཱདིཨནཏྠོ, ཨཏིཀྐམནཊྛེན ཏསྨིཾ ཨནྟརཱཡེ ནིཡུཏྟོ, ཨནྟརཱཡཾ ཝཱ ཕལཾ ཨརཧཏི, ཨནྟརཱཡསྶ ཝཱ ཀརཎསཱིལོཏི ཨནྟརཱཡིཀོ. ཏེནཱཧ ‘‘ཝིཔྤཊིསཱརཝཏྠུཏཱཡཱ’’ཏིཨཱདི. ཏཏྠ ཝིཔྤཊིསཱརཝཏྠུཏཱཡཱཏི ཝིཔྤཊིསཱརོ ནཱམ པཙྪཱནུཏཱཔཝསེན ཙིཏྟཝིཔྤཊིསཱརོ, ཏསྶ ཀཱརཎཏཱཡཱཏི ཨཏྠོ. པཋམཛ྄ཛྷཱནཱདིཔཙྩཡབྷཱུཏཨཨཔྤཊིསཱརཝིརུདྡྷསྶ ཝིཔྤཊིསཱརསྶ པཙྩཡཏྟཱཏི ཝུཏྟཾ ཧོཏི. པཱམོཛྫཱདིསམྦྷཝནྟི དུབྦལཏརུཎཱ པཱིཏི པཱམོཛྫཾ, ཏཾ ཨཱདི ཡེསཾ ཏེ པཱམོཛྫཱདཡོ, ཏེསཾ སམྦྷཝོ པཊིལཱབྷོ པཱམོཛྫཱདིསམྦྷཝོ, ཏཾ. ཨཱདིསདྡེན པཱིཏིཔྤསྶདྡྷཱདཱིནཾ གཧཎཾ. པཋམཛ྄ཛྷཱནཱདཱིནནྟི ཨེཏྠཱདིསདྡེན པན ‘‘དུཏིཡསྶ ཛྷཱནསྶ ཨདྷིགམཱཡ ཨནྟརཱཡིཀོ, ཏཏིཡསྶ ཛྷཱནསྶ ཨདྷིགམཱཡ ཨནྟརཱཡིཀོ, ཙཏུཏྠསྶ ཛྷཱནསྶ ཨདྷིགམཱཡ ཨནྟརཱཡིཀོ, ཛྷཱནཱནཾ, ཝིམོཀྑཱནཾ, སམཱདྷཱིནཾ, སམཱཔཏྟཱིནཾ, ནེཀྑམྨཱནཾ, ནིསྶརཎཱནཾ, པཝིཝེཀཱནཾ, ཀུསལཱནཾ དྷམྨཱནཾ ཨདྷིགམཱཡ ཨནྟརཱཡིཀོ’’ཏི (མཧཱཝ. ༡༣༥) ཝུཏྟདུཏིཡཛ྄ཛྷཱནཱདཱིནཾ སངྒཧོ དཊྛབྦོ. ‘‘ཏསྨཱ’’ཏི ཝུཏྟེ ཡཾཏཾསདྡཱནཾ ཨབྱབྷིཙཱརིཏསམྦནྡྷཏཱཡ ‘‘ཡསྨཱ’’ཏི ཨཡམཏྠོ ཨུཔཊྛིཏོཡེཝ ཧོཏཱིཏི ཨཱཧ ‘‘ཏསྨཱཏི ཡསྨཱ’’ཏིཨཱདི. ཛཱནནྟེནཱཏི ཛཱནམཱནེན. ཨིམིནཱསྶ སམྤཛཱནམུསཱཝཱདསྶ སཙིཏྟཀཏཾ དསྶེཏི. ཝིསུདྡྷིཾ ཨཔེཀྑཏཱིཏི ཝིསུདྡྷཱཔེཀྑོ, ཏེན ¶ ཝིསུདྡྷཱཔེཀྑེན. སཱ ཙ ཝིསུདྡྷི ཨིདྷ ཝུཊྛཱནཱདཱིཏི ཨཱཧ ‘‘ཝུཊྛཱཏུཀཱམེན ཝིསུཛ྄ཛྷིཏུཀཱམེནཱ’’ཏི. ཝུཊྛཱནགཱམིནིཏོ སངྒྷཱདིསེསཏོ ཝུཊྛཱཏུཀཱམེན, དེསནཱགཱམིནིཏོ ཝིསུཛ྄ཛྷིཏུཀཱམེནཱཏི ཨཏྠོ. སངྒྷམཛ྄ཛྷེ ཝཱ གཎམཛ྄ཛྷེ ཝཱ ཨེཀཔུགྒལེ ཝཱཏི ཨུཔོསཐགྒེ སངྒྷསྶ ཨཱརོཙནཝསེན སངྒྷམཛ྄ཛྷེ ཝཱ ཏཏྠེཝ ཨུབྷཏོ ནིསིནྣཱནཾ ཨཱརོཙནཝསེན གཎམཛ྄ཛྷེ ཝཱ ཨནནྟརསྶ ཨཱརོཙནཝསེན ཨེཀཔུགྒལེ ཝཱ པཀཱསེཏབྦཱ. ཨིཏོ ཝུཊྛཧིཏྭཱཏི ཨིཏོ ཨུཔོསཐགྒཏོ ཝུཊྛཱཡ. ཨེཏྠ པན སབྷཱགོཡེཝ ཝཏྟབྦོ. ཝིསབྷཱགསྶ ཧི ཝུཙྩམཱནེ བྷཎྜནཀལཧསངྒྷབྷེདཱདཱིནིཔི ཧོནྟི. ཏསྨཱ ཏསྶ ཨཝཏྭཱ ‘‘ཨིཏོ ཝུཊྛཧིཏྭཱ ¶ པཊིཀརིསྶཱམཱི’’ཏི ཨཱབྷོགཾ ཀཏྭཱ ཨུཔོསཐོ ཀཱཏབྦོཏི ཨནྡྷཀཊྛཀཐཱཡཾ (མཧཱཝ. ཨཊྛ. ༡༧༠) ཝུཏྟཾ.

ཀརཎཏྠེཏི ཏཏིཡཱཝིབྷཏྟིཨཏྠེ. ཀཏྟརི ཧེཏཾ པཙྩཏྟཝཙནཾ ཧོཏི ཕཱསུསདྡཱཔེཀྑཱཡ. པཙྩཏྟཝཙནནྟི པཋམཱཝཙནཾ. པཋམཛ྄ཛྷཱནཱདཱིནཾ ཨདྷིགམཱཡ ཕཱསུ ཧོཏཱིཏི ཨདྷིགམཏྠཾ ཏསྶ བྷིཀྑུནོ ཕཱསུ ཧོཏི སུཁཾ ཧོཏི སཾཝརསྶ ཨཝིཔྤཊིསཱརཧེཏུཏྟཱ. ཏེནཱཧ ‘‘ཨཝིཔྤཊིསཱརམཱུལཀཱན’’ནྟིཨཱདི. པཱཔཔུཉྙཱནཾ ཀཏཱཀཏཝསེན ཙིཏྟཝིཔྤཊིསཱརཱབྷཱཝོ ཨཝིཔྤཊིསཱརོ, སོ མཱུལཾ ཀཱརཎཾ ཡེསཾ ཏེ ཨཝིཔྤཊིསཱརམཱུལཱ, ཨཝིཔྤཊིསཱརམཱུལཱཡེཝ ཨཝིཔྤཊིསཱརམཱུལཀཱ, ཏེསཾ ཨཝིཔྤཊིསཱརམཱུལཀཱནཾ. སུཁཔྤཊིཔདཱ སམྤཛྫཏཱིཏི སུཁཱ པཊིཔདཱ སམིཛ྄ཛྷཏི, པཋམཛ྄ཛྷཱནཱདཱིནཾ སུཁེན ཨདྷིགམོ ཧོཏཱིཏི ཨདྷིཔྤཱཡོ. ཧོཏི ཙེཏྠ –

‘‘ནིདཱནེ ཉཏྟིཊྛཔནཾ, པུབྦཀིཙྩསྶ པུཙྪནཾ;

ནིདཱནུདྡེསསཝནེ, ཝིསུདྡྷཱརོཙནེ ཝིདྷི;

ཨནཱརོཙནེ ཙཱཔཏྟི, ཉེཡྻཾ པིཎྜཏྠཔཉྩཀ’’ནྟི.

ཨིཏི ཀངྑཱཝིཏརཎིཡཱ པཱཏིམོཀྑཝཎྞནཱཡ

ཝིནཡཏྠམཉྫཱུསཱཡཾ ལཱིནཏྠཔྤཀཱསནིཡཾ

ནིདཱནཝཎྞནཱ ནིཊྛིཏཱ.

པཱརཱཛིཀཀཎྜཾ

ཨིདཱནི ¶ ¶ ནིདཱནུདྡེསཱནནྟརཾ ཝུཏྟསྶ པཱརཱཛིཀུདྡེསསྶ ཨཏྠཾ སཾཝཎྞེཏུཾ ‘‘ཨིདཱནཱི’’ཏིཨཱདི ཨཱརདྡྷཾ. ནིདཱནཱནནྟརནྟི བྷཱཝནཔུཾསཀནིདྡེསོ, ནིདཱནཾ ཨནནྟརཾ ཀཏྭཱཏི ཝུཏྟཾ ཧོཏི. ཏཏྠཱཏི པཱརཱཛིཀཀཎྜེ. པཱཏིམོཀྑེཏི བྷིཀྑུཔཱཏིམོཀྑེ. ཙཏྟཱརོཏི གཎནཔརིཙྪེདོ ཨཱུནཱཏིརེཀབྷཱཝནིཝཏྟནཏོ. པཱརཱཛིཀཱཏི སཛཱཏིནཱམཾ. ཨཱཔཏྟིཡོཏི སབྦསཱདྷཱརཎནཱམཾ. ཨུདྡིསཱིཡཏཱིཏི ཨུདྡེསོ. བྷཱཝཔྤདྷཱནོཡཾ ནིདྡེསོ. ཏེནཱཧ ‘‘ཨུདྡིསིཏབྦཏ’’ནྟི.

༡. པཋམཔཱརཱཛིཀཝཎྞནཱ

ཡོ པནཱཏི (པཱརཱ. ཨཊྛ. ༡.༤༥ བྷིཀྑུཔདབྷཱཛནཱིཡཝཎྞནཱ) ཨེཏྠ ཡསྨཱ པནཱཏི ནིཔཱཏམཏྟཾ, ཡོཏི ཨཏྠཔདཾ, ཏཉྩ ཨནིཡམེན པུགྒལཾ དཱིཔེཏི. ཏསྨཱ ཏསྶ ཨཏྠཾ དསྶེནྟོ ‘‘ཡོ ཀོཙཱི’’ཏི ཨཱཧ. ཡསྨཱ པན ཡོ ཡོཀོཙི ནཱམ, སོ ཨཝསྶཾ ལིངྒཡུཏྟཛཱཏིནཱམགོཏྟསཱིལཝིཧཱརགོཙརཝཡེསུ ཨེཀེནཱཀཱརེན པཉྙཱཡཏི, ཏསྨཱ ཏཾ ཏཐཱ ཉཱཔེཏུཾ ‘‘རསྶདཱིགྷཱདིནཱ’’ཏིཨཱདིམཱཧ. ཨཱདིསདྡེན ནཝཀམྨཱདཱིནཾ གཧཎཾ. ལིངྒཱདིབྷེདེནཱཏི ལིངྒཱིཡཏིཉཱཡཏི ཨེཏེནཱཏི ལིངྒཾ, ཏཾ ཨཱདི ཡེསཾ ཏེཏི ལིངྒཱདཡོ, ཏེསཾ བྷེདོ ལིངྒཱདིབྷེདོ, ཏེན ལིངྒཱདིབྷེདེན. ཨེཏྠཱདིསདྡེན པན ཡུཏྟཱདཱིནཾ གཧཎཾ. ཨིདཾ ཝུཏྟཾ ཧོཏི – ལིངྒཝསེན ཡཱདིསོ ཝཱ ཏཱདིསོ ཝཱ ཧོཏུ, དཱིགྷོ ཝཱ རསྶོ ཝཱ ཀཱལོ༹ ཝཱ ཨོདཱཏོ ཝཱ མངྒུརཙྪཝི ཝཱ ཀིསོ ཝཱ ཐཱུལོ ཝཱ. ཡོགཝསེན ཡེན ཝཱ ཏེན ཝཱ ཡུཏྟོ ཧོཏུ, ནཝཀམྨཡུཏྟོ ཝཱ ཨུདྡེསཡུཏྟོ ཝཱ ཝཱསདྷུརཡུཏྟོ ཝཱ. ཛཱཏིཝསེན ཡཾཛཙྩོ ཝཱ ཏཾཛཙྩོ ཝཱ ཧོཏུ, ཁཏྟིཡོ ཝཱ བྲཱཧྨཎོ ཝཱ ཝེསྶོ ཝཱ སུདྡྷོ ཝཱ. ནཱམཝསེན ཡཐཱནཱམོ ཝཱ ཏཐཱནཱམོ ཝཱ ཧོཏུ, བུདྡྷརཀྑིཏོ ཝཱ དྷམྨརཀྑིཏོ ཝཱ སངྒྷརཀྑིཏོ ཝཱ. གོཏྟཝསེན ཡཐཱགོཏྟོ ཝཱ ཏཐཱགོཏྟོ ཝཱ ཧོཏུ, ཀཙྩཱཡནོ ཝཱ ཝཱསིཊྛོ ཝཱ ཀོསིཡོ ཝཱ. སཱིལེསུ ཡཐཱསཱིལོ ཝཱ ཏཐཱསཱིལོ ཝཱ ཧོཏུ, ནཝཀམྨསཱིལོ ཝཱ ཨུདྡེསསཱིལོ ཝཱ ཝཱསདྷུརསཱིལོ ཝཱ. ཝིཧཱརེསུཔི ཡཐཱཝིཧཱརཱི ཝཱ ཏཐཱཝིཧཱརཱི ཝཱ ¶ ཧོཏུ, ནཝཀམྨཝིཧཱརཱི ཝཱ ཨུདྡེསཝིཧཱརཱི ཝཱ ཝཱསདྷུརཝིཧཱརཱི ཝཱ ¶ . གོཙརེསུཔི ཡཐཱགོཙརོ ཝཱ ཏཐཱགོཙརོ ཝཱ ཧོཏུ, ནཝཀམྨགོཙརོ ཝཱ ཨུདྡེསགོཙརོ ཝཱ ཝཱསདྷུརགོཙརོ ཝཱ. ཝཡེསུཔི ཡོ ཝཱ སོ ཝཱ ཧོཏུ ཐེརོ ཝཱ ནཝོ ཝཱ མཛ྄ཛྷིམོ ཝཱ, ཨཐ ཁོ སབྦོཝ ཨིམསྨིཾ ཨཏྠེ ‘‘ཡོ’’ཏི ཝུཙྩཏཱིཏི.

ཨིདཱནི ‘‘བྷིཀྑཱུ’’ཏི པདཾ སཾཝཎྞེཏུཾ ‘‘ཨེཧིབྷིཀྑཱུཔསམྤདཱ’’ཏིཨཱདིམཱཧ. ཏཏྠ ‘‘ཨེཧི བྷིཀྑཱུ’’ཏི བྷགཝཏོ ཝཙནམཏྟེན བྷིཀྑུབྷཱཝོ ཨེཧིབྷིཀྑཱུཔསམྤདཱ. ‘‘བུདྡྷཾ སརཎཾ གཙྪཱམཱི’’ཏིཨཱདིནཱ (མཧཱཝ. ༡༠༥) ནཡེན ཏིཀྑཏྟུཾ ཝཱཙཾ བྷིནྡིཏྭཱ ཝུཏྟེཧི ཏཱིཧི སརཎགམནེཧི ཨུཔསམྤདཱ སརཎགམནཱུཔསམྤདཱ. ཨོཝཱདཔྤཊིགྒཧཎཱུཔསམྤདཱ (པཱརཱ. ཨཊྛ. ༡.༤༥) ནཱམ –

‘‘ཏསྨཱཏིཧ ཏེ, ཀསྶཔ, ཨེཝཾ སིཀྑིཏབྦཾ ‘ཏིབྦཾ མེ ཧིརོཏྟཔྤཾ པཙྩུཔཊྛིཏཾ བྷཝིསྶཏི ཐེརེསུ ནཝེསུ མཛ྄ཛྷིམེསཱུ’ཏི, ཨེཝཉྷི ཏེ ཀསྶཔ སིཀྑིཏབྦཾ. ཏསྨཱཏིཧ ཏེ, ཀསྶཔ, ཨེཝཾ སིཀྑིཏབྦཾ ‘ཡཾ ཀིཉྩི དྷམྨཾ སུཎིསྶཱམི ཀུསལཱུཔསཾཧིཏཾ, སབྦཾ ཏཾ ཨཊྛིཾ ཀཏྭཱ མནསི ཀརིཏྭཱ སབྦཙེཏསཱ སམནྣཱཧརིཏྭཱ ཨོཧིཏསོཏོ དྷམྨཾ སུཎིསྶཱམཱི’ཏི, ཨེཝཉྷི ཏེ, ཀསྶཔ, སིཀྑིཏབྦཾ. ཏསྨཱཏིཧ ཏེ, ཀསྶཔ, ཨེཝཾ སིཀྑིཏབྦཾ ‘སཱཏསཧགཏཱ ཙ མེ ཀཱཡགཏཱསཏི ན ཝིཛཧིསྶཏཱི’ཏི, ཨེཝཉྷི ཏེ, ཀསྶཔ, སིཀྑིཏབྦ’’ནྟི (སཾ. ནི. ༢.༡༥༤) –

ཨིམིནཱ ཨོཝཱདཔྤཊིགྒཧཎེན མཧཱཀསྶཔཏྠེརསྶ ཨནུཉྙཱཏཨུཔསམྤདཱ.

པཉྷཱབྱཱཀརཎཱུཔསམྤདཱ ནཱམ སོཔཱཀསྶ ཨནུཉྙཱཏཨུཔསམྤདཱ. བྷགཝཱ ཀིར པུབྦཱརཱམེ ཨནུཙངྐམནྟཾ སོཔཱཀསཱམཎེརཾ ‘‘‘ཨུདྡྷུམཱཏཀསཉྙཱ’ཏི ཝཱ སོཔཱཀ ‘རཱུཔསཉྙཱ’ཏི ཝཱ ཨིམེ དྷམྨཱ ནཱནཏྠཱ ནཱནཱབྱཉྫནཱ, ཨུདཱཧུ ཨེཀཏྠཱ བྱཉྫནམེཝ ནཱན’’ནྟི (པཱརཱ. ཨཊྛ. ༡.༤༥) དས ཨསུབྷནིསྶིཏེ པཉྷེ པུཙྪི. སོ ཏེ བྱཱཀཱསི. བྷགཝཱ ཏསྶ སཱདྷུཀཱརཾ དཏྭཱ ‘‘ཀཏིཝསྶོ ཏྭཾ, སོཔཱཀཱ’’ཏི པུཙྪི. སཏྟཝསྶོཧཾ བྷགཝཱཏི. ‘‘སོཔཱཀ, ཏྭཾ མམ སབྦཉྙུཏཉྙཱཎེན སདྡྷིཾ སཾསནྡིཏྭཱ པཉྷེ བྱཱཀཱསཱི’’ཏི ཨཱརདྡྷཙིཏྟོ ཨུཔསམྤདཾ ཨནུཛཱནི, ཨཡཾ པཉྷཱབྱཱཀརཎཱུཔསམྤདཱ.

ཨཊྛགརུདྷམྨཔཊིགྒཧཎཱུཔསམྤདཱ ¶ ནཱམ མཧཱཔཛཱཔཏིཡཱ ཨཊྛགརུདྷམྨཔྤཊིགྒཧཎེན ཨནུཉྙཱཏཨུཔསམྤདཱ.

དཱུཏེནཱུཔསམྤདཱ ¶ ནཱམ ཨཌྜྷཀཱསིཡཱ གཎིཀཱཡ ཨནུཉྙཱཏཨུཔསམྤདཱ.

ཨཊྛཝཱཙིཀཱུཔསམྤདཱ ནཱམ བྷིཀྑུནིཡཱ བྷིཀྑུནིསངྒྷཏོ ཉཏྟིཙཏུཏྠེན, བྷིཀྑུསངྒྷཏོ ཉཏྟིཙཏུཏྠེནཱཏི ཨིམེཧི དྭཱིཧི ཀམྨེཧི ཨུཔསམྤདཱ.

ཉཏྟིཙཏུཏྠཀམྨཱུཔསམྤདཱ ནཱམ བྷིཀྑཱུནཾ ཨེཏརཧི ཨུཔསམྤདཱ. ཉཏྟིཙཏུཏྠེནཱཏི ཏཱིཧི ཨནུསྶཱཝནཱཧི, ཨེཀཱཡ ཙ ཉཏྟིཡཱཏི ཨེཝཾ ཉཏྟིཙཏུཏྠེན. ཀིཉྩཱཔི ཧི ཉཏྟི སབྦཔཋམཾ ཝུཙྩཏི, ཏིསྶནྣཾ པན ཨནུསྶཱཝནཱནཾ ཨཏྠབྱཉྫནབྷེདཱབྷཱཝཏོ ཨཏྠབྱཉྫནབྷིནྣཾ ཉཏྟིཾ ཏཱསཾ ཙཏུཏྠནྟི ཀཏྭཱ ‘‘ཉཏྟིཙཏུཏྠ’’ནྟི ཝུཙྩཏི. ཨཀུཔྤེནཱཏི ཨཀོཔེཏབྦཏཾ, ཨཔྤཊིཀྐོསིཏབྦཏཉྩ ཨུཔགཏེན. ཋཱནཱརཧེནཱཏི ཀཱརཎཱརཧེན སཏྠུ སཱསནཱརཧེན. ཨུཔསམྤནྣོ ནཱམ ཨུཔརིབྷཱཝཾ སམཱཔནྣོ, པཏྟོཏི ཨཏྠོ. བྷིཀྑུབྷཱཝོ ཧི ཨུཔརིབྷཱཝོ, ཏཉྩེས ཡཐཱཝུཏྟེན ཀམྨེན སམཱཔནྣཏྟཱ ‘‘ཨུཔསམྤནྣོ’’ཏི ཝུཙྩཏི. ཀསྨཱ པནེཏྠ ཨིམིནཱཝ ཨུཔསམྤནྣོ ཨིདྷ གཧིཏོ, ནཱཉྙེཧཱིཏི? ཝུཙྩཏེ – ཨེཧིབྷིཀྑཱུཔསམྤདཱ ཨནྟིམབྷཝིཀཱནམེཝ, སརཎགམནཱུཔསམྤདཱ པརིསུདྡྷཱནཾ, ཨོཝཱདཔྤཊིགྒཧཎཔཉྷཱབྱཱཀརཎཱུཔསམྤདཱ མཧཱཀསྶཔསོཔཱཀཱནཾ, ན ཙ ཏེ བྷབྦཱ པཱརཱཛིཀཱདིལོཀཝཛྫཾ ཨཱཔཛྫིཏུཾ, ཨཊྛགརུདྷམྨཔྤཊིགྒཧཎཱདཡོ ཙ བྷིཀྑུནཱིནཾཡེཝ ཨནུཉྙཱཏཱ. ཨཡཉྩ བྷིཀྑུ, ཏསྨཱ ཉཏྟིཙཏུཏྠེནེཝ ཨུཔསམྤདཱཀམྨེན ཨུཔསམྤནྣོ ཨིདྷ གཧིཏོ, ནཱཉྙེཧཱིཏི ཝེདིཏབྦོ. པཎྞཏྟིཝཛྫེསུ པན སིཀྑཱཔདེསུ ཨཉྙེཔི ཨེཧིབྷིཀྑཱུཔསམྤདཱཡ ཨུཔསམྤནྣཱདཡོ སངྒཡ྄ཧནྟི (སཱརཏྠ. ཊཱི. ༢.༤༥ བྷིཀྑུཔདབྷཱཛནཱིཡཝཎྞནཱ). ཝཀྑཏི ཧི ‘‘པཎྞཏྟིཝཛྫེསུ པན ཨཉྙེཔི སངྒཧཾ གཙྪནྟཱི’’ཏི. ཨིདཱནི ‘‘ཨཀུཔྤེན ཋཱནཱརཧེན ཨུཔསམྤནྣོ’’ཏི སཾཁིཏྟེན ཝུཏྟམཏྠཾ ཝིཏྠཱརེཏྭཱ དསྶེཏུཾ ‘‘ཏསྶ པནཱ’’ཏིཨཱདིམཱཧ.

ཏཏྠཱཏི ཏེསུ པཉྩསུ. ཝསཏི ཨེཏྠཱཏི ཝཏྠུ, ཨཱདྷཱརོ པཏིཊྛཱ. ཏེནཱཧ ‘‘ཨུཔསམྤདཱཔེཀྑོ པུགྒལོ’’ཏི. ཨཱུནཱནི ཨཔརིཔུཎྞཱནི ཝཱིསཏི ཝསྶཱནི ཨསྶཱཏི ཨཱུནཝཱིསཏིཝསྶོ. ཨེཏྠ ཡཾ ཝཏྟབྦཾ, ཏཾ ཨུཔརི སཔྤཱཎཀཝགྒེ ཨཱུནཝཱིསཏིསིཀྑཱཔདེ (ཀངྑཱ. ཨཊྛ. ཨཱུནཝཱིསཏིཝསྶསིཀྑཱཔདཝཎྞནཱ) ཝཎྞཡིསྶཱམ. ཏེསཱུཏི པཎྜཀཱདཱིསུ ཨེཀཱདསསུ ཨབྷབྦཔུགྒལེསུ. པཎྜཀོ (མཧཱཝ. ཨཊྛ. ༡༠༩) པནེཏྠ པཉྩཝིདྷོ ཧོཏི ཨཱསིཏྟཔཎྜཀོ, ཨུསཱུཡཔཎྜཀོ ¶ , ཨོཔཀྐམིཀཔཎྜཀོ, ནཔུཾསཀཔཎྜཀོ, པཀྑཔཎྜཀོཏི. ཏེསུ ཨཱསིཏྟཔཎྜཀསྶ ཙ ཨུསཱུཡཔཎྜཀསྶ ¶ ཙ པབྦཛྫཱ ན ཝཱརིཏཱ, ཨིཏརེསཾ ཏིཎྞཾ ཝཱརིཏཱ. ཏེསུཔི པཀྑཔཎྜཀསྶ ཡསྨིཾ པཀྑེ པཎྜཀོ ཧོཏི, ཏསྨིཾཡེཝསྶ པཀྑེ པབྦཛྫཱ ཝཱརིཏཱཏི. ཏཡོ ཙེཏྠ པབྦཛྫཱུཔསམྤདཱནཾ ཨབྷབྦཏཱཡ ཨཝཏྠཱུ. ཏེནཱཧ ‘‘ཨཱསིཏྟཔཎྜཀཉྩཱ’’ཏིཨཱདི. ཏཏྠ ཡསྶ པརེསཾ ཨངྒཛཱཏཾ མུཁེན གཧེཏྭཱ ཨསུཙིནཱ ཨཱསིཏྟསྶ པརིལཱ༹ཧོ ཝཱུཔསམྨཏི, ཨཡཾ ཨཱསིཏྟཔཎྜཀོ. ཡསྶ པརེསཾ ཨཛ྄ཛྷཱཙཱརཾ པསྶཏོ ཨུསཱུཡཱཡ ཨུཔྤནྣཱཡ པརིལཱ༹ཧོ ཝཱུཔསམྨཏི, ཨཡཾ ཨུསཱུཡཔཎྜཀོ. ཡསྶ ཨུཔཀྐམེན བཱིཛཱནི ཨཔནཱིཏཱནི, ཨཡཾ ཨོཔཀྐམིཀཔཎྜཀོ (ཝི. སངྒ. ཨཊྛ. ༡༣༥; ཝི. ཝི. ཊཱི. མཧཱཝགྒ ༢.༡༠༩). ཡོ པན པཊིསནྡྷིཡཾཡེཝ ཨབྷཱཝཀོ ཨུཔྤནྣོ, ཨཡཾ ནཔུཾསཀཔཎྜཀོ. ཨེཀཙྩོ པན ཨཀུསལཝིཔཱཀཱནུབྷཱཝེན ཀཱལ༹པཀྑེ པཎྜཀོ ཧོཏི, ཛུཎྷཔཀྑེ པནསྶ པརིལཱ༹ཧོ ཝཱུཔསམྨཏི, ཨཡཾ པཀྑཔཎྜཀོཏི ཝེདིཏབྦོ.

ཐེཡྻེན སཾཝཱསོ ཨེཏསྶཱཏི ཐེཡྻསཾཝཱསཀོ. སོ ཙ ན སཾཝཱསམཏྟསྶེཝ ཐེནཀོ ཨིདྷཱདྷིཔྤེཏོ, ཨཐ ཁོ ལིངྒསྶ, ཏདུབྷཡསྶ ཙ ཐེནཀོཔཱིཏི ཨཱཧ ‘‘ཐེཡྻསཾཝཱསཀོ པན ཏིཝིདྷོ’’ཏིཨཱདི. ན བྷིཀྑུཝསྶཱནི གཎེཏཱིཏི (མཧཱཝ. ཨཊྛ. ༡༡༠) ‘‘ཨཧཾ དསཝསྶོ ཝཱ ཝཱིསཏིཝསྶོ ཝཱ’’ཏི མུསཱ ཝཏྭཱ བྷིཀྑུཝསྶཱནི ན གཎེཏི. ན ཡཐཱཝུཌྜྷཾ བྷིཀྑཱུནཾ ཝཱ སཱམཎེརཱནཾ ཝཱ ཝནྡནཾ སཱདིཡཏཱིཏི ཨཏྟནཱ མུསཱཝཱདཾ ཀཏྭཱ དསྶིཏཝསྶཱནུརཱུཔེན ཡཐཱཝུཌྜྷཾ ཝནྡནཾ ནཱདྷིཝཱསེཏི. ན ཨཱསནེན པཊིབཱཧཏཱིཏི ‘‘ཨཔེཧི, མེ ཨེཏཾ པཱཔུཎཱཏཱི’’ཏི ཨཱསནེན ནཔྤཊིབཱཧཏི. ན ཨུཔོསཐཱདཱིསུ སནྡིསྶཏཱིཏི ཨུཔོསཐཔྤཝཱརཎཱདཱིསུ ན སནྡིསྶཏི. ལིངྒམཏྟསྶེཝཱཏི ཨེཝསདྡེན སཾཝཱསཾ ནིཝཏྟེཏི. སམཱནོཏི སནྟོ. ལིངྒཱནུརཱུཔསྶ སཾཝཱསསྶཱཏི སཱམཎེརལིངྒཱནུརཱུཔསྶ སཱམཎེརསཾཝཱསསྶ. སཙེ པན ཀཱསཱཡེ དྷུརཾ ནིཀྑིཔིཏྭཱ ནགྒོ ཝཱ ཨོདཱཏཝཏྠནིཝཏྠོ ཝཱ མེཐུནསེཝནཱདཱིཧི ཨསྶམཎོ ཧུཏྭཱ ཀཱསཱཡཱནི ནིཝཱསེཏི, ལིངྒཏྠེནཀོ ཧོཏི. སཙེ གིཧིབྷཱཝཾ པཏྠཡམཱནོ ཀཱསཱཡཾ ཨོཝཊྚིཀཾ ཀཏྭཱ, ཨཉྙེན ཝཱ ཨཱཀཱརེན གིཧིནིཝཱསནེན ནིཝཱསེཏི ‘‘སོབྷཏི ནུ ཁོ མེ གིཧིལིངྒཾ, ན སོབྷཏཱི’’ཏི ཝཱིམཾསནཏྠཾ, རཀྑཏི ཏཱཝ, ‘‘སོབྷཏཱི’’ཏི སམྤཊིཙྪིཏྭཱ པུན ལིངྒཾ སཱདིཡཏི, ལིངྒཏྠེནཀོ ཧོཏི. ཨོདཱཏཾ ནིཝཱསེཏྭཱ ཝཱིམཾསནསམྤཊིཙྪནེསུཔི ཨེསེཝ ནཡོ ¶ . སཙེཔི ནིཝཏྠཀཱསཱཝསྶ ཨུཔརི ཨོདཱཏཾ ནིཝཱསེཏྭཱ ཝཱིམཾསཏི ཝཱ སམྤཊིཙྪཏི ཝཱ, རཀྑཏི ཨེཝ.

ཨནྟིམཝཏྠུཨཛ྄ཛྷཱཔནྣཀེཔི ཨེསེཝ ནཡོཏི པཱརཱཛིཀཾ ཨཱཔནྣཀེ བྷིཀྑུམྷིཔི ཨེསེཝ ནཡོཏི ཨཏྠོ. ཨིདཾ ཝུཏྟཾ ཧོཏི – སཙེ ཀོཙི བྷིཀྑུ ཀཱསཱཡེ སཨུསྶཱཧོཝ ཨོདཱཏཾ ནིཝཱསེཏྭཱ ¶ མེཐུནཾ པཊིསེཝིཏྭཱ པུན ཀཱསཱཡཱནི ནིཝཱསེཏྭཱ ཝསྶགཎནཱདིབྷེདཾ སབྦཾ ཝིདྷིཾ ཨཱཔཛྫཏི, ཨཡཾ བྷིཀྑཱུཧི དིནྣལིངྒསྶ ཨཔརིཙྩཏྟཏྟཱ ན ལིངྒཏྠེནཀོ, ལིངྒཱནུརཱུཔསྶ སཾཝཱསསྶ སཱདིཏཏྟཱ ནཱཔི སཾཝཱསཏྠེནཀོཏི. ཝིདེསནྟི པརདེསཾ. ཨིདཉྩ ཝཉྩེཏུཾ སཀྐུཎེཡྻཊྛཱནཾ དསྶེཏུཾ ཝུཏྟཾ. ཡོ པན སདེསེཔི ཨེཝཾ ཀརོཏི, སོཔི སཾཝཱསཏྠེནཀོཝ. ‘‘སཾཝཱསམཏྟསྶེཝཱ’’ཏི ཨིམིནཱ ལིངྒཾ པཊིཀྑིཔཏི. སཙེ ཀོཙི ཝུཌྜྷཔབྦཛིཏོ (མཧཱཝ. ཨཊྛ. ༡༡༠) བྷིཀྑུཝསྶཱནི གཎེཏྭཱ མཧཱཔེལཱ༹དཱིསུ དིཡྻམཱནབྷཏྟཾ གཎྷཱཏི, སོཔི ཐེཡྻསཾཝཱསཀོ ཧོཏི. སཡཾ སཱམཎེརོཝ སཱམཎེརཔྤཊིཔཱཊིཡཱ ཀཱུཊཝསྶཱནི གཎེཏྭཱ གཎྷནྟོ ཐེཡྻསཾཝཱསཀོ ན ཧོཏི. བྷིཀྑུ པན བྷིཀྑུཔཊིཔཱཊིཡཱ ཀཱུཊཝསྶཱནི གཎེཏྭཱ གཎྷནྟོ བྷཎྜགྒྷེན ཀཱརེཏབྦོ.

ནནུ སཾཝཱསོ ནཱམ ཨེཀཀམྨཾ ཨེཀུདྡེསོ སམསིཀྑཏཱཏི ཨཱཧ ‘‘བྷིཀྑུཝསྶགཎནཱདིཀོ ཧཱི’’ཏིཨཱདི. ཨིམིནཱ ན ཀེཝལཾ ཨེཀཀམྨཱདིཀོཝ ཀིརིཡབྷེདོ སཾཝཱསོཏི ཨིདྷཱདྷིཔྤེཏོ, ཨཐ ཁོ ཏདཉྙོ བྷིཀྑུཝསྶགཎནཱདིཀོཔཱིཏི དསྶེཏི. ཨིམསྨིཾ ཨཏྠེཏི ཐེཡྻསཾཝཱསཀཱདྷིཀཱརེ. སིཀྑཾ པཙྩཀྑཱཡཱཏི སིཀྑཾ པརིཙྩཛིཏྭཱ. ཨིདཾ ཝུཏྟཾ ཧོཏི – སཙེ ཀོཙི བྷིཀྑུ སིཀྑཾ པཙྩཀྑཱཡ ལིངྒཾ ཨནཔནེཏྭཱ དུསྶཱིལཀམྨཾ ཀཏྭཱ ཝཱ ཨཀཏྭཱ ཝཱ ‘‘ན མཾ ཀོཙི ཛཱནཱཏཱི’’ཏི པུན སབྦཾ པུབྦེ ཝུཏྟཾ ཝསྶགཎནཱདིབྷེདཾ ཝིདྷིཾ པཊིཔཛྫཏི, སོ ཐེཡྻསཾཝཱསཀོ ཧོཏཱིཏི.

སཙེ པན ཀསྶཙི རཱཛཱ ཀུདྡྷོ ཧོཏི, སོ ‘‘ཨེཝཾ མེ སོཏྠི བྷཝིསྶཏཱི’’ཏི སཡམེཝ ལིངྒཾ གཧེཏྭཱ པལཱཡཏི. ཏཾ དིསྭཱ རཉྙོ ཨཱརོཙེནྟི. རཱཛཱ ‘‘སཙེ པབྦཛིཏོ, ན ཏཾ ལབྦྷཱ ཀིཉྩི ཀཱཏུ’’ནྟི ཏསྨིཾ ཀོདྷཾ པཊིཝིནེཏི. སོ ‘‘ཝཱུཔསནྟཾ མེ རཱཛབྷཡ’’ནྟི སངྒྷམཛ྄ཛྷཾ ཨནོསརིཏྭཱཝ ¶ གིཧིལིངྒཾ གཧེཏྭཱ ཨཱགཏོ པབྦཱཛེཏབྦོ. ཨཐཱཔི ‘‘སཱསནཾ ནིསྶཱཡ མཡཱ ཛཱིཝིཏཾ ལདྡྷཾ, ཧནྡ དཱནི ཨཧཾ པབྦཛཱམཱི’’ཏི ཨུཔྤནྣསཾཝེགོ ཏེནེཝ ལིངྒེན ཨཱགནྟྭཱ ཨཱགནྟུཀཝཏྟཾ ན སཱདིཡཏི, བྷིཀྑཱུཧི པུཊྛོ ཝཱ ཨཔུཊྛོ ཝཱ ཡཐཱབྷཱུཏམཏྟཱནཾ ཨཱཝིཀཏྭཱཝ པབྦཛྫཾ ཡཱཙཏི, ལིངྒཾ ཨཔནེཏྭཱ པབྦཱཛེཏབྦོ. སཙེ པན ཝཏྟཾ སཱདིཡཏི, པབྦཛིཏཱལཡཾ དསྶེཏི, སབྦཾ པུབྦེ ཝུཏྟཾ ཝསྶགཎནཱདིབྷེདཾ པཊིཔཛྫཏི, ཨཡཾ པན ན པབྦཱཛེཏབྦོ.

ཨིདྷ པནེཀཙྩོ དུབྦྷིཀྑེ ཛཱིཝིཏུཾ ཨསཀྐོནྟོ སཡམེཝ ལིངྒཾ གཧེཏྭཱ སབྦཔཱསཎྜིཡབྷཏྟཱནི ¶ བྷུཉྫནྟོ དུབྦྷིཀྑེ ཝཱིཏིཝཏྟེ སངྒྷམཛ྄ཛྷཾ ཨནོསརིཏྭཱཝ གིཧིལིངྒཾ གཧེཏྭཱ ཨཱགཏོཏི སབྦཾ པུརིམསདིསམེཝ.

ཨཔརོ མཧཱཀནྟཱརཾ ནིཏྠརིཏུཀཱམོ ཧོཏི, སཏྠཝཱཧོ ཙ པབྦཛིཏེ གཧེཏྭཱ གཙྪཏི. སོ ‘‘ཨེཝཾ མཾ སཏྠཝཱཧོ གཧེཏྭཱ གམིསྶཏཱི’’ཏི སཡམེཝ ལིངྒཾ གཧེཏྭཱ སཏྠཝཱཧེན སདྡྷིཾ ཀནྟཱརཾ ནིཏྠརིཏྭཱ ཁེམནྟཾ པཏྭཱ སངྒྷམཛ྄ཛྷཾ ཨནོསརིཏྭཱཝ གིཧིལིངྒཾ གཧེཏྭཱ ཨཱགཏོཏི སབྦཾ པུརིམསདིསམེཝ.

ཨཔརོ རོགབྷཡེ (མཧཱཝ. ཨཊྛ. ༡༡༠; ཝི. སངྒ. ཨཊྛ. ༡༣༨) ཨུཔྤནྣེ ཛཱིཝིཏུཾ ཨསཀྐོནྟོ སཡམེཝ ལིངྒཾ གཧེཏྭཱ སབྦཔཱསཎྜིཡབྷཏྟཱནི བྷུཉྫནྟོ རོགབྷཡེ ཝཱུཔསནྟེ སངྒྷམཛ྄ཛྷཾ ཨནོསརིཏྭཱཝ གིཧིལིངྒཾ གཧེཏྭཱ ཨཱགཏོཏི སབྦཾ པུརིམསདིསམེཝ.

ཨཔརསྶ ཨེཀོ ཝེརིཀོ ཀུདྡྷོ ཧོཏི, གྷཱཏེཏུཀཱམོ ནཾ ཝིཙརཏི. སོ ‘‘ཨེཝཾ མེ སོཏྠི བྷཝིསྶཏཱི’’ཏི སཡམེཝ ལིངྒཾ གཧེཏྭཱ པལཱཡཏི. ཝེརིཀོ ‘‘ཀུཧིཾ སོ’’ཏི པརིཡེསནྟོ ‘‘པབྦཛིཏྭཱ པལཱཏོ’’ཏི སུཏྭཱ ‘‘སཙེ པབྦཛིཏོ, ན ཏཾ ལབྦྷཱ ཀིཉྩི ཀཱཏུ’’ནྟི ཏསྨིཾ ཀོདྷཾ པཊིཝིནེཏི. སོ ‘‘ཝཱུཔསནྟཾ མེ ཝེརིབྷཡ’’ནྟི སངྒྷམཛ྄ཛྷཾ ཨནོསརིཏྭཱཝ གིཧིལིངྒཾ གཧེཏྭཱ ཨཱགཏོཏི སབྦཾ པུརིམསདིསམེཝ.

ཨཔརོ ཉཱཏིཀུལཾ གནྟྭཱ སིཀྑཾ པཙྩཀྑཱཡ གིཧཱི ཧུཏྭཱ ‘‘ཨིམཱནི ཙཱིཝརཱནི ཨིདྷ ཝིནསྶིསྶནྟི, སཙེཔི ཨིམཱནི གཧེཏྭཱ ཝིཧཱརཾ གམིསྶཱམི, ཨནྟརཱམགྒེ མཾ ‘ཙོརོ’ཏི གཧེསྶནྟི, ཡཾནཱུནཱཧཾ ཀཱཡཔརིཧཱརིཡཱནི ཀཏྭཱ གཙྪེཡྻ’’ནྟི ཙཱིཝརཱཧརཎཏྠཾ ནིཝཱསེཏྭཱ ཙ པཱརུཔིཏྭཱ ཙ ཝིཧཱརཾ གཙྪཏི. ཏཾ དཱུརཏོཝ ཨཱགཙྪནྟཾ དིསྭཱ སཱམཎེརཱ ཙ དཧརཱ ཙ ཨབྦྷུགྒཙྪནྟི, ཝཏྟཾ ¶ དསྶེནྟི. སོ ན སཱདིཡཏི, ཡཐཱབྷཱུཏམཏྟཱནཾ ཨཱཝིཀརོཏི. སཙེ བྷིཀྑཱུ ‘‘ན དཱནི མཡཾ ཏཾ མུཉྩིསྶཱམཱ’’ཏི བལཀྐཱརེན པབྦཱཛེཏུཀཱམཱ ཧོནྟི, ཀཱསཱཡཱནི ཨཔནེཏྭཱ པུན པབྦཱཛེཏབྦོ. སཙེ པན ‘‘ན ཨིམེ མམ ཧཱིནཱཡཱཝཏྟབྷཱཝཾ ཛཱནནྟཱི’’ཏི ཏཾཡེཝ བྷིཀྑུབྷཱཝཾ པཊིཛཱནིཏྭཱ སབྦཾ པུབྦེ ཝུཏྟཝསྶགཎནཱདིབྷེདཾ ཝིདྷིཾ པཊིཔཛྫཏི, ཨཡཾ ན པབྦཱཛེཏབྦོ. ཏེནཱཧ ‘‘རཱཛདུབྦྷིཀྑཀནྟཱར-རོགཝེརཱིབྷཡེན ཝཱ’’ཏིཨཱདི. བྷཡསདྡོ ཙེཏྠ པཙྩེཀཾ ཡོཛེཏབྦོ ‘‘རཱཛབྷཡེན, དུབྦྷིཀྑབྷཡེནཱ’’ཏིཨཱདིནཱ. ལིངྒཾ ཨཱདིཡཏཱིཏི ཝེསཾ གཎྷཱཏི. ཨིདྷཱཏི ཨིམསྨིཾ སཱསནེ. སཾཝཱསཾ ནཱདྷིཝཱསེཏི, ཡཱཝ སོ སུདྡྷམཱནསོཏི བྷིཀྑཱུནཾ ཝཉྩེཏུཀཱམཏཱཡ ཨབྷཱཝཏོ ཡོ སུདྡྷམཱནསོ ཡཱཝ སཾཝཱསཾ ནཱདྷིཝཱསེཏི, ཏཱཝ ཨེས ‘‘གིཧཱི མཾ ¶ ‘སམཎོ’ཏི ཛཱནནྟཱུ’’ཏི ཝཉྩནཙིཏྟེ སཏིཔི བྷིཀྑཱུནཾ ཝཉྩེཏུཀཱམཏཱཡ ཨབྷཱཝཏོ དོསོ ནཏྠཱིཏི ཐེཡྻསཾཝཱསཀོ ནཱམཱཏི ན ཝུཙྩཏཱིཏི ཨཏྠོ.

ཏིཏྠིཡེསུ པཀྐནྟཀོ པཝིཊྛོཏི ཏིཏྠིཡཔཀྐནྟཀོ. སོ ཙ ན ཀེཝལཾ ཏཏྠ པཝིཊྛམཏྟེནེཝ ཏིཏྠིཡཔཀྐནྟཀོ ཧོཏི, ཨཐ ཁོ ཏེསཾ ལདྡྷིགྒཧཎེན. ཏེནཱཧ ‘‘ཡོ པནཱ’’ཏིཨཱདི. ‘‘ཨུཔསམྤནྣོ’’ཏི ཨིམིནཱ ཨནུཔསམྤནྣོ ཏིཏྠིཡཔཀྐནྟཀོ ན ཧོཏཱིཏི དསྶེཏི. ཝུཏྟཉྷེཏཾ ཀུརུནྡིཨཊྛཀཐཱཡཾ ‘‘ཨཡཉྩ ཏིཏྠིཡཔཀྐནྟཀོ ནཱམ ཨུཔསམྤནྣབྷིཀྑུནཱ ཀཐིཏོ, ཏསྨཱ སཱམཎེརོ སལིངྒེན ཏིཏྠཱཡཏནཾ གཏོཔི པུན པབྦཛྫཉྩ ཨུཔསམྤདཉྩ ལབྷཏཱི’’ཏི (མཧཱཝ. ཨཊྛ. ༡༡༠). ཀུསཙཱིརཱདིཀནྟི ཨེཏྠཱདིསདྡེན ཕལཀཀྑཎྜཛཊཱདཱིནཾ གཧཎཾ. སཙེཔི ‘‘ཨཡཾ པབྦཛྫཱ སེཊྛཱ’’ཏི སེཊྛབྷཱཝཾ ཝཱ ཨུཔགཙྪཏི, ན མུཙྩཏི, ཏིཏྠིཡཔཀྐནྟཀོཝ ཧོཏི. ཝཏཱནཱིཏི ཨུཀྐུཊིཀཔྤདྷཱནཱདཱིནི ཝཏཱནི. སཙེ པན ‘‘སོབྷཏི ནུ ཁོ མེ ཏིཏྠིཡཔབྦཛྫཱ, ནནུ ཁོ སོབྷཏཱི’’ཏི ཝཱིམཾསནཏྠཾ ཀུསཙཱིརཱདཱིནི ནིཝཱསེཏི, ཛཊཾ ཝཱ བནྡྷཏི, ཁཱརིཀཱཛཾ ཝཱ ཨཱདིཡཏི, ཡཱཝ ན སམྤཊིཙྪཏི ཏཾ ལདྡྷིཾ, ཏཱཝ རཀྑཏི, སམྤཊིཙྪིཏམཏྟེ ཏིཏྠིཡཔཀྐནྟཀོ ཧོཏི. ཨཙྪིནྣཙཱིཝརོ པན ཀུསཙཱིརཱདཱིནི ནིཝཱསེནྟོ, རཱཛབྷཡཱདཱིཧི ཝཱ ཏིཏྠིཡལིངྒཾ གཎྷནྟོ ལདྡྷིཡཱ ཨབྷཱཝེན ནེཝ ཏིཏྠིཡཔཀྐནྟཀོ ཧོཏི.

ཨཝསེསོ སབྦོཔཱིཏི ནཱགསུཔཎྞཡཀྑགནྡྷབྦཱདིཀོ. ཡཉྷེཏྠ ཝཏྟབྦཾ, ཏཾ ཧེཊྛཱ ཝུཏྟམེཝ.

ཡཐཱ ¶ སམཱནཛཱཏིཀསྶ (སཱརཏྠ. ཊཱི. མཧཱཝགྒ ༣.༡༡༢) ཝིཀོཔནེ ཀམྨཾ གརུཏརཾ, ན ཏཐཱ ཝིཛཱཏིཀསྶཱཏི ཨཱཧ ‘‘མནུསྶཛཱཏིཀཱ’’ཏི. པུཏྟསམྦནྡྷེན མཱཏཱཔིཏུསམཉྙཱ, དཏྟཀིཏྟིམཱདིཝསེནཔི པུཏྟཝོཧཱརོ ལོཀེ དིསྶཏི, སོ ཙ ཁོ པརིཡཱཡཏོཏི ནིཔྤརིཡཱཡསིདྡྷཏཾ དསྶེཏུཾ ‘‘ཛནེཏྟཱི’’ཏི ཝུཏྟཾ. ཛནེཏྟཱིཏི ཛནིཀཱ, མཱཏཱཏི ཨཏྠོ. ཡཐཱ མནུསྶཏྟབྷཱཝེ ཋིཏསྶེཝ ཀུསལདྷམྨཱནཾ ཏིཀྑཝིསདསཱུརབྷཱཝཱཔཏྟི, ཡཐཱ ཏཾ ཏིཎྞམྤི བོདྷིསཏྟཱནཾ བོདྷིཏྟཡནིཔྥཏྟིཡཾ, ཨེཝཾ མནུསྶཏྟབྷཱཝེ ཋིཏསྶེཝ ཨཀུསལདྷམྨཱནམྤི ཏིཀྑཝིསདསཱུརབྷཱཝཱཔཏྟཱིཏི ཨཱཧ ‘‘མནུསྶབྷཱུཏེནེཝཱ’’ཏི. སཉྩིཙྩཱཏི ‘‘པཱཎོ’’ཏི སཉྙཱཡ སདྡྷིཾ ཝདྷཀཙེཏནཱཡ ཙེཏེཏྭཱ. ཨཡཾ མཱཏུགྷཱཏཀོ ནཱམཱཏི ཨཡཾ ཨཱནནྟརིཡེན མཱཏུགྷཱཏཀཀམྨེན མཱཏུགྷཱཏཀོ ནཱམ. ཡེན པན མནུསྶིཏྠིབྷཱུཏཱཔི ཨཛནིཀཱ པོསཱཝནིཀམཱཏཱ ཝཱ མཧཱམཱཏཱ ཝཱ ཙཱུལ༹མཱཏཱ ཝཱ ཛནིཀཱཔི ཝཱ ཨམནུསྶིཏྠིབྷཱུཏཱ མཱཏཱ གྷཱཏིཏཱ, ཏསྶ པབྦཛྫཱ ན ཝཱརིཏཱ, ན ཙ ཨཱནནྟརིཀོ ཧོཏི. ཡེན སཡཾ ཏིརཙྪཱནབྷཱུཏེན མནུསྶིཏྠིབྷཱུཏཱ ¶ མཱཏཱ གྷཱཏིཏཱ, སོཔི ཨཱནནྟརིཀོ ན ཧོཏི. ཏིརཙྪཱནགཏཏྟཱ པནསྶ པབྦཛྫཱ པཊིཀྑིཏྟཱ, ཀམྨཾ པནསྶ བྷཱརིཡཾ ཧོཏི, ཨཱནནྟརིཡཾ ཨཱཧཙྩེཝ ཏིཊྛཏི.

ཡེན མནུསྶབྷཱུཏོ ཛནཀོ པིཏཱ སཡམྤི མནུསྶཛཱཏིཀེནེཝ སཏཱ སཉྩིཙྩ ཛཱིཝིཏཱ ཝོརོཔིཏོ, ཨཡཾ ཨཱནནྟརིཡེན པིཏུགྷཱཏཀཀམྨེན པིཏུགྷཱཏཀོ ནཱམཱཏི ཨིམམཏྠཾ ཨཏིདིསནྟོ ‘‘པིཏུགྷཱཏཀེཔི ཨེསེཝ ནཡོ’’ཏི ཨཱཧ. སཙེཔི ཧི ཝེསིཡཱ པུཏྟོ ཧོཏི, ‘‘ཨཡཾ མེ པིཏཱ’’ཏི ན ཛཱནཱཏི, ཡསྶ སམྦྷཝེན ནིབྦཏྟོ, སོ ཙ ཏེན གྷཱཏིཏོ, ‘‘པིཏུགྷཱཏཀོ’’ཏྭེཝ སངྑཾ གཙྪཏི, ཨཱནནྟརིཡཉྩ ཕུསཏི (མཧཱཝ. ཨཊྛ. ༡༡༤).

ཨེལ༹ཀཙཏུཀྐཾ (མ. ནི. ཨཊྛ. ༣.༡༢༨; ཨ. ནི. ཨཊྛ. ༡.༡.༢༧༥; ཝིབྷ. ཨཊྛ. ༨༠༩; སཱརཏྠ. ཊཱི. མཧཱཝགྒ ༣.༡༡༢), སངྒཱམཙཏུཀྐཾ, ཙོརཙཏུཀྐཉྩེཏྠ ཀཐེཏབྦཾ. ‘‘ཨེལ༹ཀཾ མཱརེམཱི’’ཏི ཨབྷིསནྡྷིནཱཔི ཧི ཨེལ༹ཀཊྛཱནེ ཋིཏཾ མནུསྶབྷཱུཏཾ མཱཏརཾ ཝཱ པིཏརཾ ཝཱ མཱརེནྟོ ཨཱནནྟརིཡཾ ཕུསཏི མཱརཎཱདྷིཔྤཱཡེནེཝ ཨཱནནྟརིཡཝཏྠུནོ ཝིཀོཔིཏཏྟཱ. ཨེལ༹ཀཱབྷིསནྡྷིནཱ, པན མཱཏཱཔིཏིཨབྷིསནྡྷིནཱ ཝཱ ཨེལ༹ཀཾ མཱརེནྟོ ཨཱནནྟརིཡཾ ན ཕུསཏི ཨཱནནྟརིཡཝཏྠུཨབྷཱཝཏོ. མཱཏཱཔིཏིཨབྷིསནྡྷིནཱ མཱཏཱཔིཏརོ མཱརེནྟོ ཕུསཏེཝ ¶ . ཨེསེཝ ནཡོ ཨིཏརསྨིམྤི ཙཏུཀྐདྭཡེ. སབྦཏྠ ཧི པུརིམཾ ཨབྷིསནྡྷིཙིཏྟཾ ཨཔྤམཱཎཾ, ཝདྷཀཙིཏྟཾ, པན ཏདཱརམྨཎཛཱིཝིཏིནྡྲིཡཉྩ ཨཱནནྟརིཡཱནཱནནྟརིཡབྷཱཝེ པམཱཎཾ.

ཨརཧནྟགྷཱཏཀོཔི མནུསྶཨརཧནྟཝསེནེཝ ཝེདིཏབྦོཏི ཨཱཧ ‘‘ཡེན ཨནྟམསོ གིཧིལིངྒེ ཋིཏོཔཱི’’ཏིཨཱདི. ཨམནུསྶཛཱཏིཀཾ པན ཨརཧནྟཾ, མནུསྶཛཱཏིཀཾ ཝཱ ཨཝསེསཾ ཨརིཡཔུགྒལཾ གྷཱཏེཏྭཱ ཨཱནནྟརིཀོ ན ཧོཏི, པབྦཛྫཱཔིསྶ ན ཝཱརིཏཱ, ཀམྨཾ པན བལཝཾ ཧོཏི. ཏིརཙྪཱནོ མནུསྶཨརཧནྟམྤི གྷཱཏེཏྭཱ ཨཱནནྟརིཀོ ན ཧོཏི, ཀམྨཾ པན བྷཱརིཡནྟི ཨཡམེཏྠ ཝིནིཙྪཡོ. ཡཐཱ མཱཏཱཔིཏཱུསུ, ཨེཝཾ ཨརཧནྟེཔི ཨེལ༹ཀཙཏུཀྐཱདཱིནི ཝེདིཏབྦཱནི.

པཀཏཏྟཾ བྷིཀྑུནིནྟི པརིསུདྡྷསཱིལཾ ཨུབྷཏོསངྒྷེ ཨུཔསམྤནྣཾ བྷིཀྑུནིཾ. ཡོ (མཧཱཝ. ཨཊྛ. ༡༡༥) པན ཀཱཡསཾསགྒེན སཱིལཝིནཱསཾ པཱཔེཏི, ཏསྶ པབྦཛྫཱ ཙ ཨུཔསམྤདཱ ཙ ན ཝཱརིཏཱ. བལཀྐཱརེན ཨོདཱཏཝཏྠཝསནཾ ཀཏྭཱ ཨནིཙྪམཱནཾཡེཝ དཱུསེནྟོཔི བྷིཀྑུནིདཱུསཀོཡེཝ, བལཀྐཱརེན པན ཨོདཱཏཝཏྠཝསནཾ ཀཏྭཱ ཨིཙྪམཱནཾ དཱུསེནྟོ བྷིཀྑུནིདཱུསཀོ ན ཧོཏི. ཀསྨཱ? ཡསྨཱ གིཧིབྷཱཝེ སམྤཊིཙྪིཏམཏྟེཡེཝ སཱ ཨབྷིཀྑུནཱི ཧོཏི ¶ . སཀིཾ སཱིལཝིཔནྣཾ པན པཙྪཱ དཱུསེནྟོ སིཀྑམཱནསཱམཎེརཱིསུ ཙ ཝིཔྤཊིཔཛྫནྟོ ནེཝ བྷིཀྑུནིདཱུསཀོ ཧོཏི, པབྦཛྫཾ, ཨུཔསམྤདཉྩ ལབྷཏཱིཏི.

དྷམྨཏོ ཨུགྒཏཾ ཨཔགཏཾ ཨུདྡྷམྨཾ. ཨུབྦིནཡནྟི ཨེཏྠཱཔི ཨེསེཝ ནཡོ. ཙཏུནྣཾ ཀམྨཱནནྟི ཨཔལོཀནཉཏྟིཉཏྟིདུཏིཡཉཏྟིཙཏུཏྠསངྑཱཏཱནཾ ཙཏུནྣཾ ཀམྨཱནཾ. ཨིམེསཉྷི ཨཉྙཏརཾ སངྒྷཀམྨཾ ཨེཀསཱིམཱཡཾ ཝིསུཾ ཝིསུཾ ཀརོནྟེན སངྒྷོ བྷིནྣོ ནཱམ ཧོཏི. ཏེན ཝུཏྟཾ ‘‘ཙཏུནྣཾ ཀམྨཱནཾ ཨཉྙཏརཝསེན སངྒྷཾ བྷིནྡཏཱི’’ཏི.

‘‘དུཊྛཙིཏྟེནཱ’’ཏི ཝུཏྟམེཝཏྠཾ ཝིབྷཱཝེཏུཾ ‘‘ཝདྷཀཙིཏྟེནཱ’’ཏི ཝུཏྟཾ. ཝདྷཀཙེཏནཱཡ ཧི དཱུསིཏཾ ཙིཏྟཾ ཨིདྷ དུཊྛཙིཏྟཾ ནཱམ. ལོཧིཏཾ ཨུཔྤཱདེཏཱིཏི ཨནྟོསརཱིརེཡེཝ ལོཧིཏཾ ཨུཔྤཱདེཏི, སཉྩིཏཾ ཀརོཏཱིཏི ཨདྷིཔྤཱཡོ. ན ཧི ཏཐཱགཏསྶ ཨབྷེཛྫཀཱཡཏཱཡ པརཱུཔཀྐམེན དྷམྨཾ བྷིནྡིཏྭཱ ལོཧིཏཾ པགྒྷརཏི, སརཱིརསྶ པན ཨནྟོཡེཝ ཨེཀསྨིཾ ཋཱནེ ལོཧིཏཾ སམོསརཏི, ཨཱགྷཱཏེན པཀུཔྤམཱནཾ སཉྩིཏཾ ཧོཏི, ཏཾ སནྡྷཱཡེཏཾ ¶ ཝུཏྟཾ. ཡོ པན རོགཝཱུཔསམནཏྠཾ ཛཱིཝཀོ ཝིཡ སཏྠེན ཕཱལེཏྭཱ པཱུཏིམཾསཉྩ ལོཧིཏཉྩ ནཱིཧརིཏྭཱ ཕཱསུཀཾ ཀརོཏི, ཨཡཾ ལོཧིཏུཔྤཱདཀོ ན ཧོཏི, བཧུཾ པན སོ པུཉྙཾ པསཝཏི (མཧཱཝ. ཨཊྛ. ༡༡༥).

དུཝིདྷམྤི བྱཉྫནནྟི ཡཐཱཝུཏྟཀམྨདྭཡཏོ སམུཊྛིཏཾ ཨིཏྠིནིམིཏྟཾ, པུརིསནིམིཏྟཉྩཱཏི དུཝིདྷམྤི བྱཉྫནཾ. ཨིམིནཱ ཙ ཝིགྒཧེན ‘‘ཨུབྷཏོབྱཉྫནཀོ’’ཏི ཨསམཱནཱདྷིཀརཎཝིསཡོ བཱཧིརཏྠསམཱསོཡཾ, པུརིམཔདེ ཙ ཝིབྷཏྟིཨལོཔོཏི དསྶེཏི. སོ དུཝིདྷོ ཧོཏི ཨིཏྠིཨུབྷཏོབྱཉྫནཀོ, པུརིསཨུབྷཏོབྱཉྫནཀོ ཙཱཏི. ཏཏྠ ཨིཏྠིཨུབྷཏོབྱཉྫནཀསྶ ཨིཏྠིནིམིཏྟཾ པཱཀཊཾ ཧོཏི, པུརིསནིམིཏྟཾ པཊིཙྪནྣཾ. པུརིསཨུབྷཏོབྱཉྫནཀསྶ པུརིསནིམིཏྟཾ པཱཀཊཾ, ཨིཏྠིནིམིཏྟཾ པཊིཙྪནྣཾ. ཨིཏྠིཨུབྷཏོབྱཉྫནཀསྶ ཨིཏྠཱིསུ པུརིསཏྟཾ ཀརོནྟསྶ ཨིཏྠིནིམིཏྟཾ པཊིཙྪནྣཾ ཧོཏི, པུརིསནིམིཏྟཾ པཱཀཊཾ ཧོཏི. པུརིསཨུབྷཏོབྱཉྫནཀསྶ པུརིསཱནཾ ཨིཏྠིབྷཱཝཾ ཨུཔགཙྪནྟསྶ པུརིསནིམིཏྟཾ པཊིཙྪནྣཾ ཧོཏི, ཨིཏྠིནིམིཏྟཾ པཱཀཊཾ ཧོཏི. ཨིཏྠིཨུབྷཏོབྱཉྫནཀོ སཡཉྩ གབྦྷཾ གཎྷཱཏི, པརཉྩ གཎྷཱཔེཏི. པུརིསཨུབྷཏོབྱཉྫནཀོ པན སཡཾ ན གཎྷཱཏི, པརཾ གཎྷཱཔེཏཱིཏི ཨིདམེཏེསཾ ནཱནཱཀརཎཾ.

ཨཔརཱམསནཱནཱིཏི ཨགྒཧཎཱནི ཨཝཙནཱནི. ‘‘ཨཡཾ ཨིཏྠནྣཱམོ’’ཏི ཨུཔསམྤདཱཔེཀྑསྶ ཨཀིཏྟནནྟི ཡསྶ ཨུཔསམྤདཱ ཀརཱིཡཏི, ཏསྶ ཨཀིཏྟནཾ, ‘‘སུཎཱཏུ མེ, བྷནྟེ, སངྒྷོ, ཨཡཾ དྷམྨརཀྑིཏོ ཨཱཡསྨཏོ བུདྡྷརཀྑིཏསྶ ཨུཔསམྤདཱཔེཀྑོ’’ཏི ཝཏྟབྦེ ‘‘ཨཡཾ དྷམྨརཀྑིཏོ’’ཏི (པརི. ཨཊྛ. ༤༨༤) ¶ ཨཝཙནནྟི ཝུཏྟཾ ཧོཏི. ‘‘ཨིཏྠནྣཱམསྶ ཨུཔསམྤདཱཔེཀྑོ’’ཏི ཨུཔཛ྄ཛྷཱཡསྶ ཨཀིཏྟནནྟི ‘‘སུཎཱཏུ མེ, བྷནྟེ, སངྒྷོ, ཨཡཾ དྷམྨརཀྑིཏོ ཨཱཡསྨཏོ བུདྡྷརཀྑིཏསྶ ཨུཔསམྤདཱཔེཀྑོ’’ཏི ཝཏྟབྦེ ‘‘སུཎཱཏུ མེ, བྷནྟེ, སངྒྷོ, ཨཡཾ དྷམྨརཀྑིཏོ ཨུཔསམྤདཱཔེཀྑོ’’ཏི ཝཏྭཱ ‘‘ཨཱཡསྨཏོ བུདྡྷརཀྑིཏསྶཱ’’ཏི ཨཝཙནཾ. སབྦེན སབྦཾ ཉཏྟིཡཱ ཨནུཙྩཱརཎནྟི ཉཏྟིཾ ཨཊྛཔེཏྭཱ ཙཏུཀྑཏྟུཾ ཀམྨཝཱཙཱཡ ཨེཝ ཨནུསྶཱཝནཀམྨསྶ ཀརཎཾ. སམྤནྣནྟི ཨུཔེཏཾ.

ཧཱཔནཾ པརིཙྩཛནཾ. ཡོཔི ཨེཀཾ ཉཏྟིཾ ཋཔེཏྭཱ སཀིཾཡེཝ ཝཱ དྭིཀྑཏྟུཾ ཝཱ ཨནུསྶཱཝནཾ ཀརོཏི, ཨཡམྤི སཱཝནཾ ཧཱཔེཏིཡེཝ. དུརུཙྩཱརཎཾ ནཱམ ཨཉྙསྨིཾ ¶ ཨཀྑརེ ཝཏྟབྦེ ཨཉྙསྶ ཝཙནཾ. ཏསྨཱ ཀམྨཝཱཙཾ ཀརོནྟེན བྷིཀྑུནཱ ཡྭཱཡཾ –

‘‘སིཐིལཾ དྷནིཏཉྩ དཱིགྷརསྶཾ;

གརུཀཾ ལཧུཀཉྩེཝ ནིགྒཧཱིཏཾ;

སམྦནྡྷཝཝཏྠིཏཾ ཝིམུཏྟཾ;

དསདྷཱ བྱཉྫནབུདྡྷིཡཱ པབྷེདོ’’ཏི. (དཱི. ནི. ཨཊྛ. ༡.༡༩༠; མ. ནི. ཨཊྛ. ༡.༢༩༡; ཨ. ནི. ཨཊྛ. ༢.༣.༦༤, པརི. ཨཊྛ. ༤༨༥; ཝི. སངྒ. ཨཊྛ. ༢༥༢) –

ཝུཏྟོ, ཨཡཾ སུཊྛུ ཨུཔལཀྑེཏབྦོ. ཨེཏྠ ཧི སིཐིལཾ ནཱམ པཉྩསུ ཝགྒེསུ པཋམཏཏིཡཾ. དྷནིཏཾ ནཱམ ཏེསྭེཝ དུཏིཡཙཏུཏྠཾ. དཱིགྷནྟི དཱིགྷེན ཀཱལེན ཝཏྟབྦཾ ཨཱ-ཀཱརཱདི. རསྶནྟི ཏཏོ ཨུཔཌྜྷཀཱལེན ཝཏྟབྦཾ ཨ-ཀཱརཱདི. གརུཀནྟི དཱིགྷམེཝ, ཡཾ ཝཱ ‘‘ཨཱཡསྨཏོ བུདྡྷརཀྑིཏཏྠེརསྶ ཡསྶ ནཀྑམཏཱི’’ཏི ཨེཝཾ སཾཡོགཔརཾ ཀཏྭཱ ཝུཙྩཏི. ལཧུཀནྟི རསྶམེཝ, ཡཾ ཝཱ ‘‘ཨཱཡསྨཏོ བུདྡྷརཀྑིཏཏྠེརསྶ ཡསྶ ན ཁམཏཱི’’ཏི ཨེཝཾ ཨསཾཡོགཔརཾ ཀཏྭཱ ཝུཙྩཏི. ནིགྒཧཱིཏནྟི ཡཾ ཀརཎཱནི ནིགྒཧེཏྭཱ ཨཝིསྶཛྫེཏྭཱ ཨཝིཝཊེན མུཁེན སཱནུནཱསིཀཾ ཀཏྭཱ ཝཏྟབྦཾ. སམྦནྡྷནྟི ཡཾ པརཔདེན སམྦནྡྷིཏྭཱ ‘‘ཏུཎྷིསྶཱ’’ཏི ཝཱ ‘‘ཏུཎྷསྶཱ’’ཏི ཝཱ ཝུཙྩཏི. ཝཝཏྠིཏནྟི ཡཾ པརཔདེན སམྦནྡྷཾ ཨཀཏྭཱ ཝིཙྪིནྡིཏྭཱ ‘‘ཏུཎྷཱི ཨསྶཱ’’ཏི ཝཱ ‘‘ཏུཎྷ ཨསྶཱ’’ཏི ཝཱ ཝུཙྩཏི. ཝིམུཏྟནྟི ཡཾ ཀརཎཱནི ཨནིགྒཧེཏྭཱ ཝིསྶཛྫེཏྭཱ ཝིཝཊེན མུཁེན ཨནུནཱསིཀཾ ཨཀཏྭཱ ཝུཙྩཏི.

ཏཏྠ ‘‘སུཎཱཏུ མེ’’ཏི ཝཏྟབྦེ ཏ-ཀཱརསྶ ཐ-ཀཱརཾ ཀཏྭཱ ‘‘སུཎཱཐུ མེ’’ཏི ཝཙནཾ སིཐིལསྶ ¶ དྷནིཏཀརཎཾ ནཱམ, ཏཐཱ ‘‘པཏྟཀལླཾ ཨེསཱ ཉཏྟཱི’’ཏི ཝཏྟབྦེ ‘‘པཏྠཀལླཾ ཨེསཱ ཉཏྟཱི’’ཏིཨཱདིཝཙནཉྩ. ‘‘བྷནྟེ, སངྒྷོ’’ཏི ཝཏྟབྦེ བྷ-ཀཱར གྷ-ཀཱརཱནཾ བ-ཀཱར ག-ཀཱརེ ཀཏྭཱ ‘‘བནྟེ སཾགོ’’ཏི ཝཙནཾ དྷནིཏསྶ སིཐིལཀརཎཾ ནཱམ. ‘‘སུཎཱཏུ མེ’’ཏི ཝིཝཊེན མུཁེན ཝཏྟབྦེ ‘‘སུཎཾཏུ མེ’’ཏི ཝཱ ‘‘ཨེསཱ ཉཏྟཱི’’ཏི ཝཏྟབྦེ ‘‘ཨེསཾ ཉཏྟཱི’’ཏི ཝཱ ཨཝིཝཊེན མུཁེན ཨནུནཱསིཀཾ ཀཏྭཱ ཝཙནཾ ཝིམུཏྟསྶ ནིགྒཧིཏཝཙནཾ ནཱམ. ‘‘པཏྟཀལླ’’ནྟི ཨཝིཝཊེན མུཁེན ཨནུནཱསིཀཾ ཀཏྭཱ ཝཏྟབྦེ ‘‘པཏྟཀལླཱ’’ཏི ཝིཝཊེན མུཁེན ཨནུནཱསིཀཾ ཨཀཏྭཱ ཝཙནཾ ནིགྒཧིཏསྶ ཝིམུཏྟཝཙནཾ ནཱམ. ཨིཏི སིཐིལེ ཀཏྟབྦེ དྷནིཏཾ, དྷནིཏེ ཀཏྟབྦེ སིཐིལཾ, ཝིམུཏྟེ ཀཏྟབྦེ ནིགྒཧིཏཾ, ནིགྒཧིཏེ ཀཏྟབྦེ ཝིམུཏྟནྟི ཨིམཱནི ཙཏྟཱརི བྱཉྫནཱནི ¶ ཨནྟོཀམྨཝཱཙཱཡ ཀམྨཾ དཱུསེནྟི. ཨེཝཾ ཝདནྟོ ཧི ཨཉྙསྨིཾ ཨཀྑརེ ཝཏྟབྦེ ཨཉྙཾ ཝདཏི, དུརུཏྟཾ ཀརོཏཱིཏི ཝུཙྩཏི.

ཨིཏརེསུ པན དཱིགྷརསྶཱདཱིསུ ཚསུ བྱཉྫནེསུ དཱིགྷཊྛཱནེ དཱིགྷམེཝ. རསྶཊྛཱནེ ཙ རསྶམེཝཱཏི ཨེཝཾ ཡཐཱཋཱནེ ཏཾ ཏདེཝ ཨཀྑརཾ བྷཱསནྟེན ཨནུཀྐམཱགཏཾ པཝེཎིཾ ཨཝིནཱསེནྟེན ཀམྨཝཱཙཱ ཀཱཏབྦཱ. སཙེ པན ཨེཝཾ ཨཀཏྭཱ དཱིགྷེ ཝཏྟབྦེ རསྶཾ, རསྶེ ཝཱ ཝཏྟབྦེ དཱིགྷཾ ཝདཏི, ཏཐཱ གརུཀེ ཝཏྟབྦེ ལཧུཀཾ, ལཧུཀེ ཝཱ ཝཏྟབྦེ གརུཀཾ ཝདཏི, སམྦནྡྷེ ཝཱ པན ཝཏྟབྦེ ཝཝཏྠིཏཾ, ཝཝཏྠིཏེ ཝཱ ཝཏྟབྦེ སམྦནྡྷཾ ཝདཏི, ཨེཝཾ ཝུཏྟེཔི ཀམྨཝཱཙཱ ན ཀུཔྤཏི. ཨིམཱནི ཧི ཚ བྱཉྫནཱནི ཀམྨཾ ན ཀོཔེནྟི.

ཡཾ པན སུཏྟནྟིཀཏྠེརཱ ‘‘ད-ཀཱརོ ཏ-ཀཱརམཱཔཛྫཏི, ཏ-ཀཱརོ ད-ཀཱརམཱཔཛྫཏི, ཙ-ཀཱརོ ཛ-ཀཱརམཱཔཛྫཏི, ཛ-ཀཱརོ ཙ-ཀཱརམཱཔཛྫཏི, ཡ-ཀཱརོ ཀ-ཀཱརམཱཔཛྫཏི, ཀ-ཀཱརོ ཡ-ཀཱརམཱཔཛྫཏི, ཏསྨཱ ད-ཀཱརཱདཱིསུ ཝཏྟབྦེསུ ཏ-ཀཱརཱདཱིནཾ ཝཙནཾ ན ཝིརུཛ྄ཛྷཏཱི’’ཏི ཝདནྟི, ཏཾ ཀམྨཝཱཙཾ པཏྭཱ ན ཝཊྚཏི. ཏསྨཱ ཝིནཡདྷརེན ནེཝ ད-ཀཱརོ ཏ-ཀཱརོ ཀཱཏབྦོ…པེ… ན ཀ-ཀཱརོ ཡ-ཀཱརོ. ཡཐཱཔཱལི༹ཡཱ ནིརུཏྟིཾ སོདྷེཏྭཱ དསཝིདྷཱཡ བྱཉྫནནིརུཏྟིཡཱ ཝུཏྟདོསེ པརིཧརནྟེན ཀམྨཝཱཙཱ ཀཱཏབྦཱ. ཨིཏརཐཱ ཧི སཱཝནཾ ཧཱཔེཏི ནཱམ. ཉཏྟིཾ ཨཊྛཔེཏྭཱ པཋམཾ ཨནུསྶཱཝནཀརཎནྟི སམྦནྡྷོ.

ཡཱཝཏིཀཱ བྷིཀྑཱུ ཀམྨཔྤཏྟཱཏི ཡཏྟཀཱ བྷིཀྑཱུ ཏསྶ ཨུཔསམྤདཱཀམྨསྶ པཏྟཱ ཡུཏྟཱ ཨནུརཱུཔཱ. ཏེ ཙ ཁོ སབྦནྟིམེན པརིཡཱཡེན ཧཏྠཔཱསཾ ཨཝིཛཧིཏྭཱ ཨེཀསཱིམཊྛཱ པཉྩ པཀཏཏྟཱ བྷིཀྑཱུ. ན ཧི ཏེཧི ཝིནཱ ཏཾ ཀམྨཾ ཀརཱིཡཏི, ན ཏེསཾ ཚནྡོ ཨེཏི. ཨཝསེསཱ པན སཙེཔི སཧསྶམཏྟཱ ཧོནྟི, སཙེ ཨེཀསཱིམཊྛཱ ཨེཀསྨིཾ ཋཱནེ སམཱནསཾཝཱསཀཱ, སབྦེ ཚནྡཱརཧཱཝ ¶ ཧོནྟི, ཚནྡཾ དཏྭཱ ཨཱགཙྪནྟུ ཝཱ, མཱ ཝཱ, ཀམྨཾ ན ཀུཔྤཏི. པཊིཀྐོསནནྟི ནིཝཱརཎཾ. ཏིཊྛཏི ཨེཏྠ ཕལཾ ཏདཱཡཏྟཝུཏྟིཏཱཡཱཏི ཋཱནཾ, ཀཱརཎཾ. ཨིདྷ པན ཨུཔསམྤདཱཀམྨཀརཎསྶ ཀཱརཎཏྟཱ ཨུཔསམྤདཱཀམྨཝཱཙཱསངྑཱཏཾ བྷགཝཏོ ཝཙནཾ ཝུཙྩཏི. ཏེནཱཧ ‘‘ཀཱརཎཱརཧཏྟཱ པན སཏྠུ སཱསནཱརཧཏྟཱ’’ཏི. ཡཐཱ ཙ ‘‘ཏཾ ཀཏྟབྦ’’ནྟི བྷགཝཏཱ ཨནུསིཊྛཾ, ཏཐཱཀརཎཾ ཨུཔསམྤདཱཀམྨསྶ ཀཱརཎཾ ཧོཏཱིཏི ¶ ཋཱནཱརཧཾ ནཱམ. ཀེཙི (སཱརཏྠ. ཊཱི. ༢.༤༥) པན ‘‘ཋཱནཱརཧེནཱཏི ཨེཏྠ ‘ན, བྷིཀྑཝེ, ཧཏྠཙྪིནྣོ པབྦཱཛེཏབྦོ’ཏིཨཱདི (མཧཱཝ. ༡༡༩) སཏྠུསཱསནཾ ཋཱན’’ནྟི ཝདནྟི. ཨིདྷཱཏི ཨིམསྨིཾ པཱརཱཛིཀེ. ཡཐཱ ཙ ཨིདྷ, ཨེཝཾ སབྦཏྠཱཔི ལོཀཝཛྫསིཀྑཱཔདེསུ ཨཡམེཝ ཨདྷིཔྤེཏོཏི ཝེདིཏབྦཾ. ཏེནཱཧ ‘‘པཎྞཏྟིཝཛྫེསུ པནཱ’’ཏིཨཱདི. ཨཉྙེཔཱིཏི ཨེཧིབྷིཀྑཱུཔསམྤནྣཱདཡོཔི. ཀཐམེཏཾ ཝིཉྙཱཡཏི པཎྞཏྟིཝཛྫེསུ སིཀྑཱཔདེསུ ཨཉྙེཔི སངྒཧཾ གཙྪནྟཱིཏི? ཨཏྠཏོ ཨཱཔནྣཏྟཱ. ཏཐཱ ཧི ‘‘དྭེ པུགྒལཱ ཨབྷབྦཱ ཨཱཔཏྟིཾ ཨཱཔཛྫིཏུཾ བུདྡྷཱ ཙ པཙྩེཀབུདྡྷཱ ཙ, དྭེ པུགྒལཱ བྷབྦཱ ཨཱཔཏྟིཾ ཨཱཔཛྫིཏུཾ བྷིཀྑཱུ ཙ བྷིཀྑུནིཡོ ཙཱ’’ཏི (པརི. ༣༢༢) སཱམཉྙཏོ ཝུཏྟཏྟཱ. ཨེཧིབྷིཀྑཱུཔསམྤནྣཱདཡོཔི ཨསཉྩིཙྩ ཨསྶཏིཡཱ ཨཙིཏྟཀཾ སཧསེཡྻཱཔཏྟིཨཱདིབྷེདཾ པཎྞཏྟིཝཛྫཾ ཨཱཔཛྫནྟཱིཏི (སཱརཏྠ. ཊཱི. ༢.༤༥) ཨཏྠཏོ ཨཱཔནྣཾ.

ཨིདཱནི ‘‘བྷིཀྑཱུན’’ནྟི ཨིམཾ པདཾ ཝིསེསཏྠཱབྷཱཝཏོ ཝིསུཾ ཨཝཎྞེཏྭཱཝ ཡཾ སིཀྑཉྩ སཱཛཱིཝཉྩ སམཱཔནྣཏྟཱ བྷིཀྑཱུནཾ སིཀྑཱསཱཛཱིཝསམཱཔནྣོ ཧོཏི, ཏཾ དསྶེནྟོ ‘‘བྷིཀྑཱུནཾ སིཀྑཱསཱཛཱིཝསམཱཔནྣོ’’ཏིཨཱདིམཱཧ. སིཀྑིཏབྦཱཏི སིཀྑཱ, པཱཏིམོཀྑསཾཝརསཱིལཾ, སཧ ཛཱིཝནྟི ཨེཏྠཱཏི སཱཛཱིཝཾ, མཱཏིཀཱདིབྷེདཱ པཎྞཏྟི, སིཀྑཱ ཙ སཱཛཱིཝཉྩ སིཀྑཱསཱཛཱིཝཾ, ཏདུབྷཡཾ སམཱཔནྣོ ཨུཔགཏོཏི སིཀྑཱསཱཛཱིཝསམཱཔནྣོ. ཏེནཱཧ ‘‘ཡཱ བྷིཀྑཱུན’’ནྟིཨཱདི. ཨེཏྠ ཙ ‘‘སིཀྑཱ’’ཏི སཱཛཱིཝསཧཙརིཡཏོ ཨདྷིསཱིལསིཀྑཱཝ ཨདྷིཔྤེཏཱཏི ཨཱཧ ‘‘ཨདྷིསཱིལསངྑཱཏཱ’’ཏི. ཨདྷིཀཾ ཨུཏྟམཾ སཱིལནྟི ཨདྷིསཱིལཾ, ‘‘ཨདྷིསཱིལ’’ནྟི སངྑཱཏཱ ཨདྷིསཱིལསངྑཱཏཱ.

ཀཏམཾ པནེཏྠ སཱིལཾ, ཀཏམཾ ཨདྷིསཱིལནྟི? ཝུཙྩཏེ – པཉྩངྒདསངྒསཱིལཾ ཏཱཝ སཱིལམེཝ, ན ཏཾ ཨདྷིསཱིལཾ. པཱཏིམོཀྑསཾཝརསཱིལཾ པན ཨདྷིསཱིལ’’ནྟི ཝུཙྩཏི. ཏཉྷི སཱུརིཡོ ཝིཡ པཛྫོཏཱནཾ, སིནེརུ ཝིཡ ཙ པབྦཏཱནཾ སབྦལོཀིཡསཱིལཱནཾ ཨདྷིཀཉྩེཝ ཨུཏྟམཉྩ, བུདྡྷུཔྤཱདེཡེཝ ཙ པཝཏྟཏི, ན ཝིནཱ བུདྡྷུཔྤཱདཱ. ན ཧི ཏཾ པཉྙཏྟིཾ ཨུདྡྷརིཏྭཱ ཨཉྙོ སཏྟོ པཉྙཱཔེཏུཾ སཀྐོཏི, བུདྡྷཱཡེཝ པནསྶ སབྦསོ ཀཱཡཝཙཱིདྭཱརཛ྄ཛྷཱཙཱརསོཏཾ ཚིནྡིཏྭཱ ཏསྶ ཏསྶ ཝཱིཏིཀྐམསྶ ཨནུཙྪཝིཀཾ ཏཾ ཏཾ སཱིལསཾཝརཾ པཉྙཱཔེནྟི. པཱཏིམོཀྑསཾཝརསཱིལཏོཔི ¶ ཙ མགྒཕལསམྤཡུཏྟམེཝ སཱིལཾ ཨདྷིསཱིལཾ, ཏཾ པན ཨིདྷ ན ཨདྷིཔྤེཏཾ. ན ཧི ཏཾ སམཱཔནྣོ མེཐུནདྷམྨཾ པཊིསེཝཏི.

ཨེཏེཏི ¶ ནཱནཱདེསཛཱཏིགོཏྟཱདིབྷེདབྷིནྣཱ བྷིཀྑཱུ. སཧ ཛཱིཝནྟཱིཏི ཨེཀུདྡེསཱདིཝསེན སཧ པཝཏྟནྟི. ཏེནཱཧ ‘‘ཨེཀཛཱིཝིཀཱ སབྷཱགཝུཏྟིནོ’’ཏི. སིཀྑཱཔདསངྑཱཏནྟི པཎྞཏྟིསངྑཱཏཾ. སཱཔི ཧི ཝིརཏིཨཱདཱིནཾ དཱིཔནཏོ ‘‘སིཀྑཱཔད’’ནྟི ཝུཙྩཏི. ཝུཏྟམྤི ཙེཏཾ ‘‘སིཀྑཱཔདནྟི ཡོ ཏཏྠ ནཱམཀཱཡོ པདཀཱཡོ ནིརུཏྟིཀཱཡོ བྱཉྫནཀཱཡོ’’ཏི. ཏཏྠཱཏི ཏེསུ. སིཀྑཾ པརིཔཱུརེནྟོཏི ཨཀཏྟབྦཔརིཝཛྫནཀཏྟབྦཀརཎཝསེན ཝཱརིཏྟཙཱརིཏྟསངྑཱཏཾ དུཝིདྷཾ སཱིལཾ པརིཔཱུརེནྟོཏི ཨཏྠོ, ཝཱརིཏྟསཱིལཝསེན ཝིརཏིསམྤཡུཏྟཙེཏནཾ, ཙཱརིཏྟསཱིལཝསེན ཝིརཏིཝིཔྤཡུཏྟཙེཏནཉྩ ཨཏྟནི པཝཏྟེནྟོཏི ཝུཏྟཾ ཧོཏི. སཱཛཱིཝཉྩ ཨཝཱིཏིཀྐམནྟོཏི སིཀྑཱཔདཉྩ ཨམདྡནྟོ, སཱིལསཾཝརཎཾ, སཱཛཱིཝཱནཏིཀྐམནཉྩཱཏི ཨིདམེཝ དྭཡཾ ཨིདྷ སམཱཔཛྫནཾ ནཱམཱཏི ཨདྷིཔྤཱཡོ. ཏཏྠ སཱཛཱིཝཱནཏིཀྐམོ སིཀྑཱཔཱརིཔཱུརིཡཱ པཙྩཡོ. ཏསྶཱནཏིཀྐམནཏོ ཧི ཡཱཝ མགྒཱ སིཀྑཱ པརིཔཱུརཏི. ཨཔིཙེཏྠ ‘‘སིཀྑཾ པརིཔཱུརེནྟོ’’ཏི ཨིམིནཱ ཝིརཏིཙེཏནཱསངྑཱཏསྶ སཱིལསཾཝརསྶ ཝིསེསཏོ སནྟཱནེ པཝཏྟནཀཱལོཝ གཧིཏོ, ‘‘ཨཝཱིཏིཀྐམནྟོ’’ཏི ཨིམིནཱ པན ཨཔྤཝཏྟནཀཱལོཔི. སིཀྑཉྷི པརིཔཱུརཎཝསེན ཨཏྟནི པཝཏྟེནྟོཔི ནིདྡཱདིཝསེན ཨཔྤཝཏྟེནྟོཔི ཝཱིཏིཀྐམཱབྷཱཝཱ སིཀྑནཝསེན སམཱཔནྣོཏི ཝུཙྩཏི.

ཡསྨཱ སིཀྑཱཔཙྩཀྑཱནསྶ ཨེཀཙྩཾ དུབྦལྱཱཝིཀམྨཾ ཨཏྠོ ཧོཏི, ཏསྨཱ ཏཾ སནྡྷཱཡ ‘‘སིཀྑཾ ཨཔཙྩཀྑཱཡཱ’’ཏི པདསྶ ཨཏྠཾ ཝིཝརནྟོ ‘‘དུབྦལྱཾ ཨནཱཝིཀཏྭཱ’’ཏི ཨཱཧཱཏི དསྶེཏུཾ ‘‘སིཀྑཾ ཨཔཙྩཀྑཱཡ དུབྦལྱཾ ཨནཱཝིཀཏྭཱ’’ཏིཨཱདིམཱཧ. ཏཏྠ སིཡཱ (པཱརཱ. ཨཊྛ. ༡.༤༥ སིཀྑཱཔཙྩཀྑཱནཝིབྷངྒཝཎྞནཱ), ཡསྨཱ ན སབྦཾ དུབྦལྱཱཝིཀམྨཾ སིཀྑཱཔཙྩཀྑཱནཾ, ཏསྨཱ ‘‘དུབྦལྱཾ ཨནཱཝིཀཏྭཱ’’ཏི པཋམཾ ཝཏྭཱ ཏསྶ ཨཏྠནིཡམནཏྠཾ ‘‘སིཀྑཾ ཨཔཙྩཀྑཱཡཱ’’ཏི ཝཏྟབྦནྟི? ཏཾ ན, ཀསྨཱ? ཨཏྠཱནུཀྐམཱབྷཱཝཏོ. ‘‘སིཀྑཱསཱཛཱིཝསམཱཔནྣོ’’ཏི ཧི ཝུཏྟཏྟཱ ཡཾ སིཀྑཾ སམཱཔནྣོ, ཏཾ ཨཔཙྩཀྑཱཡ, ཡཉྩ སཱཛཱིཝཾ སམཱཔནྣོ, ཏཏྠ དུབྦལྱཾ ཨནཱཝིཀཏྭཱཏི ཝུཙྩམཱནེ ཨནུཀྐམེནེཝ ཨཏྠོ ཝུཏྟོ ཧོཏི, ན ཨཉྙཐཱ. ཏསྨཱ ཨིདམེཝ པཋམཾ ཝུཏྟནྟི.

ཨིདཱནི ཏདུབྷཡམེཝ པཱཀཊཾ ཀཏྭཱ དསྶེཏུཾ ‘‘ཏཏྠཱ’’ཏིཨཱདིམཱཧ. ཏདབྷཱཝེནཱཏི ཏེསཾ ཙིཏྟཱདཱིནཾ ཨབྷཱཝེན. ཙཝིཏུཀཱམཏཱཙིཏྟེནཱཏི ཨཔགནྟུཀཱམཏཱཙིཏྟེན ¶ . དཝཱཏི སཧསཱ. ཡོ ཧི ¶ ཨཉྙཾ བྷཎིཏུཀཱམོ སཧསཱ ‘‘བུདྡྷཾ པཙྩཀྑཱམཱི’’ཏི བྷཎཏི, ཨཡཾ དཝཱ ཝདཏི ནཱམ. རཝཱཏི ཝིརཛ྄ཛྷིཏྭཱ. ཡོ ཧི ཨཉྙཾ བྷཎིཏུཀཱམོ ཝིརུཛ྄ཛྷིཏྭཱ ‘‘བུདྡྷཾ པཙྩཀྑཱམཱི’’ཏི བྷཎཏི, ཨཡཾ རཝཱ བྷཎཏི ནཱམ. པུརིམེན ཀོ ཝིསེསོཏི ཙེ? པུརིམཾ པཎྜིཏསྶཱཔི སཧསཱཝསེན ཨཉྙབྷཎནཾ, ཨིདཾ པན མནྡཏྟཱ མོམཱུཧཏྟཱ པཀྑལནྟསྶ ‘‘ཨཉྙཾ བྷཎིསྶཱམཱི’’ཏི ཨཉྙབྷཎནཾ. ‘‘ཨཀྑརསམཡཱནབྷིཉྙཱཏཏཱཡ ཝཱ ཀརཎསམྤཏྟིཡཱ ཨབྷཱཝཏོ ཝཱ ཀཐེཏབྦཾ ཀཐེཏུམསཀྐོནྟོ ཧུཏྭཱ ཨཉྙཾ ཀཐེནྟོ རཝཱ བྷཎཏི ནཱམཱ’’ཏི (སཱརཏྠ. ཊཱི. ༢.༥༤) ཨེཀེ.

ཝཛྫཱཝཛྫཾ ཨུཔནིཛ྄ཛྷཱཡཏཱིཏི ཨུཔཛ྄ཛྷཱཡོ, ཏཾ ཨུཔཛ྄ཛྷཱཡཾ. ‘‘ཨེཝཾ སཛ྄ཛྷཱཡིཏབྦཾ, ཨེཝཾ ཨབྷིཀྐམིཏབྦ’’ནྟིཨཱདིནཱ ཨཱཙཱརསིཀྑཱཔནཀོ ཨཱཙརིཡོ. ཨནྟེ སམཱིཔེ ཝསཏི སཱིལེནཱཏི ཨནྟེཝཱསཱི, ཝིབྷཏྟིཨལོཔེན ཡཐཱ ‘‘ཝནེཀསེརུཀཱ’’ཏི. སམཱནོ ཨུཔཛ྄ཛྷཱཡོ ཨསྶཱཏི སམཱནུཔཛ྄ཛྷཱཡཀོ. ཨེཝཾ སམཱནཱཙརིཡཀོ. སབྲཧྨཙཱརིནྟི བྷིཀྑུཾ. སོ ཧི ‘‘ཨེཀཀམྨཾ, ཨེཀུདྡེསོ, སམསིཀྑཏཱ’’ཏི ཨིམཾ བྲཧྨཾ སམཱནཾ ཙརཏི, ཏསྨཱ ‘‘སབྲཧྨཙཱརཱི’’ཏི ཝུཙྩཏི. ཨེཝཾ ཝུཏྟཱནནྟི ཨེཝཾ པདབྷཱཛནཱིཡེ ཝུཏྟཱནཾ. ཡཐཱ ཧི ལོཀེ སསྶཱནཾ ཝིརུཧནཊྛཱནཾ ‘‘ཁེཏྟ’’ནྟི ཝུཙྩཏི, ཨེཝམིམཱནིཔི བུདྡྷཱདཱིནི པདཱནི སིཀྑཱཔཙྩཀྑཱནསྶ ཝིརུཧནཊྛཱནཏྠཱ ‘‘ཁེཏྟ’’ནྟི ཝུཙྩནྟཱིཏི ཨཱཧ ‘‘ཨིམེསཾ དྭཱཝཱིསཏིཡཱ ཁེཏྟཔདཱན’’ནྟི. ཡསྨཱ པནེཏེསཾ ཝེཝཙནེཧིཔི སིཀྑཱཔཙྩཀྑཱནཾ ཧོཏི, ཏསྨཱ ‘‘སཝེཝཙནསྶཱ’’ཏི ཝུཏྟཾ. ཝིཝིདྷཾ ཨེཀསྨིཾཡེཝ ཨཏྠེ ཝཙནཾ ཝིཝཙནཾ, ཝིཝཙནམེཝ ཝེཝཙནཾ, པརིཡཱཡནཱམཾ, སཧ ཝེཝཙནེཧཱིཏི སཝེཝཙནཾ, ཏསྶ སཝེཝཙནསྶ. ཨེཏྠ ཙ ཝཎྞཔཊྛཱནེ (སཱརཏྠ. ཊཱི. ༢.༥༢; ཝི. ཝི. ཊཱི. ༡.༥༣; ཝཛིར. ཊཱི. ༥༣) ཨཱགཏཾ ནཱམསཧསྶཾ, ཨུཔཱལིགཱཐཱསུ (མ. ནི. ༢.༧༦) ནཱམསཏཾ, ཨཉྙཱནི ཙ གུཎཏོ ལབྦྷམཱནཱནི ནཱམཱནི ‘‘བུདྡྷཝེཝཙནཱནཱི’’ཏི ཝེདིཏབྦཱནི. སབྦཱནིཔི དྷམྨསྶ ནཱམཱནི ‘‘དྷམྨཝེཝཙནཱནཱི’’ཏི ཝེདིཏབྦཱནི. ཨེས ནཡོ སབྦཏྠ.

ཏེསུ ཡཾ ཀིཉྩི ཝཏྟུཀཱམསྶ ཡཾ ཀིཉྩི ཝདཏོ སིཀྑཱཔཙྩཀྑཱནཾ ཧོཏཱིཏི ཏེསུ དྭཱཝཱིསཏིཡཱ ཁེཏྟཔདེསུ ཡཾ ཀིཉྩི ཨེཀཾ པདཾ ཝཏྟུཀཱམསྶ ཏཏོ ཨཉྙཾ ཡཾ ཀིཉྩི པདམྤི ཝཙཱིབྷེདཾ ཀཏྭཱ ཝདཏོ ཁེཏྟཔདནྟོགདྷཏྟཱ སིཀྑཱཔཙྩཀྑཱནཾ ¶ ཧོཏཱིཏི ཨཏྠོ. ཨིདཾ ཝུཏྟཾ ཧོཏི – སཙེ པནཱཡཾ ‘‘བུདྡྷཾ པཙྩཀྑཱམཱི’’ཏི ཝཏྟུཀཱམོ པདཔཙྩཱབྷཊྛཾ ཀཏྭཱ ‘‘པཙྩཀྑཱམི བུདྡྷ’’ནྟི ཝཱ ཝདེཡྻ, མིལཀྑབྷཱསཱདཱིསུ ཝཱ ཨཉྙཏརབྷཱསཱཡ ཏམཏྠཾ ཝདེཡྻ, ‘‘བུདྡྷཾ པཙྩཀྑཱམཱི’’ཏི ཝཏྟུཀཱམོ ཨུཔྤཊིཔཱཊིཡཱ ‘‘དྷམྨཾ པཙྩཀྑཱམཱི’’ཏི ཝཱ ‘‘སབྲཧྨཙཱརིཾ པཙྩཀྑཱམཱི’’ཏི ཝཱ ཝདེཡྻ, སེཡྻཐཱཔི ཨུཏྟརིམནུསྶདྷམྨཝིབྷངྒེ ‘‘པཋམཾ ཛྷཱནཾ སམཱཔཛྫཱམཱི’’ཏི ¶ ཝཏྟུཀཱམོ ‘‘དུཏིཡཾ ཛྷཱན’’ནྟི ཝདཏི. སཙེ ‘‘ཡསྶ ཝདཏི, སོ ཨཡཾ བྷིཀྑུབྷཱཝཾ ཙཛིཏུཀཱམོ ཨེཏམཏྠཾ ཝདཏཱི’’ཏི ཨེཏྟཀམཏྟམྤི ཛཱནཱཏི, ཝིརདྡྷཾ ནཱམ ནཏྠི, ཁེཏྟམེཝ ཨོཏིཎྞཾ, པཙྩཀྑཱཏཱཝ ཧོཏི སིཀྑཱ. སཀྐཏྟཱ ཝཱ བྲཧྨཏྟཱ ཝཱ ཙུཏསཏྟོ ཝིཡ ཙུཏོཝ ཧོཏི སཱསནཱཏི.

ཨལནྟི (པཱརཱ. ཨཊྛ. ༡.༥༢) ཧོཏུ, པརིཡཏྟནྟི ཨཏྠོ. ཀིཾ ནུ མེཏི ཀིཾ མཡ྄ཧཾ ཀིཙྩཾ, ཀིཾ ཀརཎཱིཡཾ, ཀིཾ སཱདྷེཏབྦནྟི ཨཏྠོ. ན མམཏྠོཏི ནཏྠི མམ ཨཏྠོ. སུམུཏྟཱཧནྟི སུཊྛུ མུཏྟོ ཨཧཾ. པུརིམེཧི ཙུདྡསཧི པདེཧཱིཏི བུདྡྷཱདཱིཧི སབྲཧྨཙཱརིཔརིཡནྟེཧི པུརིམེཧི ཙུདྡསཧི པདེཧི. ཡནྣཱུནཱཧཾ པཙྩཀྑེཡྻནྟི ཨེཏྠ ‘‘ཡནྣཱུནཱ’’ཏི པརིཝིཏཀྐདསྶནེ ནིཔཱཏོ. ཨིདཾ ཝུཏྟཾ ཧོཏི – ‘‘སཙཱཧཾ བུདྡྷཾ པཙྩཀྑེཡྻཾ, སཱདྷུ ཝཏ མེ སིཡཱ’’ཏི. ཨཱདིསདྡེན ‘‘པཙྩཀྑི’’ནྟི ཝཱ ‘‘པཙྩཀྑིསྶཱམཱི’’ཏི ཝཱ ‘‘བྷཝིསྶཱམཱི’’ཏི ཝཱ ‘‘ཧོམཱི’’ཏི ཝཱ ‘‘ཛཱཏོམྷཱི’’ཏི ཝཱ ‘‘ཨམྷཱི’’ཏི ཝཱ ཨེཝཾབྷཱུཏཱནཾ གཧཎཾ. སཙེ པན ‘‘ཨཛྫ པཊྛཱཡ ‘གིཧཱི’ཏི མཾ དྷཱརེཧཱི’’ཏི ཝཱ ‘‘ཛཱནཱཧཱི’’ཏི ཝཱ ‘‘སཉྫཱནཱཧཱི’’ཏི ཝཱ ‘‘མནསི ཀརོཧཱི’’ཏི ཝཱ ཝདཏི, ཨརིཡཀེན ཝཱ ཝདཏི, མིལཀྑཀེན ཝཱ. ཨེཝམེཏསྨིཾ ཨཏྠེ ཝུཏྟེ ཡསྶ ཝདཏི, སཙེ སོ ཛཱནཱཏི, པཙྩཀྑཱཏཱ ཧོཏི སིཀྑཱ. ཨེས ནཡོ སེསེསུཔི ‘‘ཨུཔཱསཀོ’’ཏིཨཱདཱིསུ སཏྟསུ པདེསུ. ཨེཏྠ ཙ ཨརིཡཀཾ ནཱམ མཱགདྷཝོཧཱརོ. མིལཀྑཀཾ ནཱམ ཨནརིཡཀོ ཨནྡྷདམིལཱ༹དི.

ཨཀྑརལིཁནནྟི ‘‘བུདྡྷཾ པཙྩཀྑཱམཱི’’ཏིཨཱདིནཱ ཨཉྙེསཾ དསྶནཏྠཾ ཨཀྑརལིཁནཾ. ཨདྷིཔྤཱཡཝིཉྙཱཔཀོ ཨངྒུལིསངྐོཙནཱདིཀོ ཧཏྠཝིཀཱརོ ཧཏྠམུདྡཱ, ཧཏྠསདྡོ ཙེཏྠ ཏདེཀདེསེསུ ཨངྒུལཱིསུ དཊྛབྦོ ‘‘ན བྷུཉྫམཱནོ སབྦཾ ཧཏྠཾ མུཁེ པཀྑིཔིསྶཱམཱི’’ཏིཨཱདཱིསུ (པཱཙི. ༦༡༨) ཝིཡ. ཏསྨཱ ཨདྷིཔྤཱཡཝིཉྙཱཔཀསྶ ཨངྒུལིསངྐོཙནཱདིནོ ཧཏྠཝིཀཱརསྶ དསྶནཾ ཧཏྠམུདྡཱདིདསྶནནྟི ¶ (སཱརཏྠ. ཊཱི. ༢.༥༡) ཨེཝམེཏྠ ཨཏྠོ དཊྛབྦོ. ཨཱདིསདྡེན སཱིསཀམྤནདསྶནཱདིཾ སངྒཎྷཱཏི.

ཨུམྨཏྟཀཁིཏྟཙིཏྟཝེདནཱཊྚཱནནྟི ཨེཏྠ ཨུམྨཏྟཀོཏི པིཏྟུམྨཏྟཀོ. ཁིཏྟཙིཏྟོཏི ཡཀྑེཧི ཀཏཙིཏྟཝིཀྑེཔོ, ཡཀྑུམྨཏྟཀོཏི ཝུཏྟཾ ཧོཏི. ཨུབྷིནྣཾ པན ཝིསེསོ ཨནཱཔཏྟིཝཱརེ ཨཱཝིབྷཝིསྶཏི. ཝེདནཱཊྚོཏི བལཝཏིཡཱ དུཀྑཝེདནཱཡ ཕུཊྛོ མུཙྪཱཔརེཏོ, ཏེན ཝིཔྤལཔནྟེན པཙྩཀྑཱཏཱཔི ཨཔཙྩཀྑཱཏཱཝ ཧོཏི. མནུསྶཛཱཏིཀོ ཧོཏཱིཏི སབྷཱགོ ཝཱ ཝིསབྷཱགོ ཝཱ གཧཊྛོ ཝཱ པབྦཛིཏོ ཝཱ ཝིཉྙཱུ ཡོཀོཙི མནུསྶོ ཧོཏི. ཨུམྨཏྟཀཱདཱིནནྟི ཨེཏྠཱདིསདྡེན ཁིཏྟཙིཏྟཝེདནཱཊྚདེཝཏཱཏིརཙྪཱནགཏཱནཾ གཧཎཾ. ཏཏྲ ཨུམྨཏྟཀཁིཏྟཙིཏྟཝེདནཱཊྚཏིརཙྪཱནགཏཱནཾ སནྟིཀེ པཙྩཀྑཱཏཱཔི ཨཛཱནནབྷཱཝེན ཨཔཙྩཀྑཱཏཱཝ ཧོཏི. དེཝཏཱཡ པན སནྟིཀེ ཨཏིཁིཔྤཾ ཛཱནནབྷཱཝེན. དེཝཏཱ ནཱམ མཧཱཔཉྙཱ ཏིཧེཏུཀཔྤཊིསནྡྷིཀཱ ཨཏིཁིཔྤཾ ཛཱནནྟི, ཙིཏྟཉྩ ནཱམེཏཾ ལཧུཔརིཝཏྟཾ, ཏསྨཱ ‘‘ཙིཏྟལཧུཀསྶ པུགྒལསྶ ཙིཏྟཝསེནེཝ མཱ ཨཏིཁིཔྤཾ ཝིནཱསོ ཨཧོསཱི’’ཏི དེཝཏཱཡ སནྟིཀེ ¶ སིཀྑཱཔཙྩཀྑཱནཾ པཊིཀྑིཔི. ཏེན ཝུཏྟཾ ‘‘ན ཙ ཨུམྨཏྟཀཱདཱིནཾ ཨཉྙཏརོ’’ཏི. དཱུཏེན ཝཱཏི ‘‘མམ སིཀྑཱཔཙྩཀྑཱནབྷཱཝཾ ཀཐེཧཱི’’ཏི མུཁསཱསནཝསེན དཱུཏེན ཝཱ. པཎྞེན ཝཱཏི པཎྞེ ལིཁིཏྭཱ པཧིཎཝསེན པཎྞེན ཝཱ.

སཙེ ཏེ སིཀྑཱཔཙྩཀྑཱནབྷཱཝཾ ཛཱནནྟཱིཏི སམྦནྡྷོ. ཨཱཝཛྫནསམཡེཏི ཨཏྠཱབྷོགསམཡེ. ཨིམིནཱ ཏཾ ཁཎཾཡེཝ པན ཨཔུབྦཾ ཨཙརིམཾ དུཛྫཱནནྟི དསྶེཏི. ཝཙནཱནནྟརམེཝཱཏི ཝཙནསྶ ཨནནྟརམེཝ, ཨཱཝཛྫནསམཡེཝཱཏི ཨཏྠོ. ཨེཝ-སདྡེན པན ཙིརེན ཛཱནནཾ པཊིཀྑིཔཏི. ཨུཀྐཎྛིཏོཏི ཨནབྷིརཏིཡཱ ཨིམསྨིཾ སཱསནེ ཀིཙྪཛཱིཝིཀཾ པཏྟོ. ཨཐ ཝཱ ‘‘ཨཛྫ ཡཱམི, སྭེ ཡཱམི, ཨིཏོ ཡཱམི, ཨེཏྠ ཡཱམཱི’’ཏི ཨུདྡྷཾ ཀཎྛཾ ཀཏྭཱ ཝིཧརམཱནོ ཝིཀྑིཏྟོ, ཨནེཀགྒོཏི ཝུཏྟཾ ཧོཏི. ཨིདཉྩ ‘‘ཨནབྷིརཏོ སཱམཉྙཱ ཙཝིཏུཀཱམོ’’ཏིཨཱདཱིནཾ (པཱརཱ. ༤༥) ཨུཔལཀྑཎཾ. ཡེན ཀེནཙི…པེ… ཛཱནནྟཱིཏི སཙེ ཏེ‘‘ཨུཀྐཎྛིཏོ’’ཏི ཝཱ ‘‘གིཧིབྷཱཝཾ པཏྠེཏཱི’’ཏི ཝཱ ‘‘ཨནབྷིརཏོ’’ཏི ཝཱ ‘‘སཱམཉྙཱ ཙཝིཏུཀཱམོ’’ཏི ཝཱ ཡེན ཀེནཙི ཨཱཀཱརེན སིཀྑཱཔཙྩཀྑཱནབྷཱཝཾ ཛཱནནྟི. ཨིདཉྷི སིཀྑཱཔཙྩཀྑཱནཉྩ ཨུཔརི ¶ ཨབྷཱུཏཱརོཙནདུཊྛུལླཝཱཙཱཨཏྟཀཱམདུཊྛདོསབྷཱུཏཱརོཙནསིཀྑཱཔདཱནི ཙ ཨེཀཔརིཙྪེདཱནི, ཨཱཝཛྫནསམཡེ ཉཱཏེ ཨེཝ སཱིསཾ ཨེནྟི. ‘‘ཀིཾ ཨཡཾ བྷཎཏཱི’’ཏི ཀངྑཏཱ ཙིརེན ཉཱཏེ སཱིསཾ ན ཨེནྟི. ཏེནཱཧ ‘‘ཨཐ ཨཔརབྷཱགེ’’ཏིཨཱདི. ཨཐ དྭིནྣཾ ཋིཏཊྛཱནེ དྭིནྣམྤི ནིཡམེཏྭཱ ‘‘ཨེཏེསཾ ཨཱརོཙེམཱི’’ཏི ཝདཏི, ཏེསུ ཨེཀསྨིཾ ཛཱནནྟེཔི དྭཱིསུ ཛཱནནྟེསུཔི པཙྩཀྑཱཏཱཝ ཧོཏི སིཀྑཱ. ཨེཝཾ སམྦཧུལེསུཔི ཝེདིཏབྦཾ. ཝུཏྟནཡེནཱཏི ‘‘ཏསྶ ཝཙནཱནནྟར’’ནྟིཨཱདིནཱ ཝུཏྟེན ནཡེན. ཡོ ཀོཙི མནུསྶཛཱཏིཀོཏི ཨནྟམསོ ནཝཀམྨིཀཾ ཨུཔཱདཱཡ ཡོ ཀོཙི མནུསྶོ. ཝུཏྟཉྷེཏཾ སམནྟཔཱསཱདིཀཱཡཾ –

‘‘སཙེ པན ཨནབྷིརཏིཡཱ པཱིལི༹ཏོ སབྷཱགེ བྷིཀྑཱུ པརིསངྐམཱནོ ‘ཡོ ཀོཙི ཛཱནཱཏཱུ’ཏི ཨུཙྩཱསདྡཾ ཀརོནྟོ ‘བུདྡྷཾ པཙྩཀྑཱམཱི’ཏི ཝདཏི, ཏཉྩ ཨཝིདཱུརེ ཋིཏོ ནཝཀམྨིཀོ ཝཱ ཨཉྙོ ཝཱ སམཡཉྙཱུ པུརིསོ སུཏྭཱ ‘ཨུཀྐཎྛིཏོ ཨཡཾ སམཎོ གིཧིབྷཱཝཾ པཏྠེཏི, སཱསནཏོ ཙུཏོ’ཏི ཛཱནཱཏི, པཙྩཀྑཱཏཱཝ ཧོཏི སིཀྑཱ’’ཏི (པཱརཱ. ཨཊྛ. ༡.༥༡).

སཙེ ¶ ཝཙནཏྠཾ ཉཏྭཱཔི ‘‘ཨཡཾ ཨུཀྐཎྛིཏོ’’ཏི ཝཱ ‘‘གིཧིབྷཱཝཾ པཏྠེཏཱི’’ཏི ཝཱ ན ཛཱནཱཏི, ཨཔཙྩཀྑཱཏཱཝ ཧོཏི སིཀྑཱ. སཙེ པན ཝཙནཏྠཾ ཨཛཱནིཏྭཱཔི ‘‘ཨུཀྐཎྛིཏོ’’ཏི ཝཱ ‘‘གིཧིབྷཱཝཾ པཏྠེཏཱི’’ཏི ཝཱ ཛཱནཱཏི, པཙྩཀྑཱཏཱཝ ཧོཏི སིཀྑཱ. དཝཱཡཔཱིཏི ཀཱིལཱ༹དྷིཔྤཱཡེནཔི. ཙིཏྟཱདཱིནཾ ཝཱ ཝསེནཱཏི ཙིཏྟཱདཱིནཾ ཝཱ ཚལ༹ངྒཱནཾ ཝསེན. ཧོཏི ཙེཏྠ –

‘‘ཙིཏྟཾ ཁེཏྟཉྩ ཀཱལོ ཙ, པཡོགོ པུགྒལོ ཏཐཱ;

ཝིཛཱནནནྟི སིཀྑཱཡ, པཙྩཀྑཱནཾ ཚལ༹ངྒིཀ’’ནྟི.

སབྦསོ ཝཱ པན ཨཔཙྩཀྑཱནེནཱཏི ‘‘བུདྡྷཾ པཙྩཀྑཱམཱི’’ཏིཨཱདཱིསུ ཡེན ཡེན པརིཡཱཡེན སིཀྑཱཔཙྩཀྑཱནཾ ཧོཏི, ཏཏོ ཨེཀསྶཔི པཙྩཀྑཱནསྶ ཨབྷཱཝེན. ཨིམིནཱ པན ‘‘ཨིདཾ པདཾ སཱཝེསྶཱམི, སིཀྑཾ པཙྩཀྑཱམཱི’’ཏི ཨེཝཾ པཝཏྟཙིཏྟུཔྤཱདསྶ ཨབྷཱཝཾ དསྶེཏི. ཡསྶ ཧི ཨེཝརཱུཔོ ཙིཏྟུཔྤཱདོ ནཏྠི, སོ སབྦསོ ན པཙྩཀྑཱཏི ནཱམཱཏི. སིཀྑཱཔཙྩཀྑཱནསྶཱཏི ‘‘བུདྡྷཾ པཙྩཀྑཱམཱི’’ཏིཨཱདིསིཀྑཱཔཙྩཀྑཱནསྶ. ཨཏྠབྷཱུཏཾ ཨེཀཙྩཾ དུབྦལྱནྟི ‘‘བུདྡྷཾ པཙྩཀྑཱམཱི’’ཏི ཝདཏི ཝིཉྙཱཔེཏི, ཨེཝམྤི, བྷིཀྑཝེ, དུབྦལྱཱཝིཀམྨཉྩེཝ ཧོཏི, སིཀྑཱ ¶ ཙ པཙྩཀྑཱཏཱ’’ཏིཨཱདིནཱ (པཱརཱ. ༥༣) ཝུཏྟེཧི ཡེཧི ཝཙནེཧི སིཀྑཱཔཙྩཀྑཱནཉྩེཝ ཧོཏི དུབྦལྱཱཝིཀམྨཉྩ, ཏཾ ‘‘བུདྡྷཾ པཙྩཀྑཱམཱི’’ཏིཨཱདིཀཾ ཨཏྠབྷཱུཏཾ དུབྦལྱཾ ཨནཱཝིཀཏྭཱ. ‘‘བུདྡྷཾ པཙྩཀྑཱམཱི’’ཏིཨཱདིམྷི པན ཝུཏྟེ སིཀྑཱཔརིཔཱུརཎེ དུབྦལབྷཱཝསྶཱཔི གམྱམཱནཏྟཱ སིཀྑཱཔཙྩཀྑཱནསྶ ཨིདཾ དུབྦལྱཱཝིཀམྨཾ ཨཏྠོཏི དཊྛབྦཾ. ཨེཏྠ ཙ ‘‘ཨཏྠབྷཱུཏ’’ནྟི ཨིམིནཱ ‘‘ཡནྣཱུནཱཧཾ བུདྡྷཾ པཙྩཀྑེཡྻ’’ནྟིཨཱདིཀཾ དུབྦལྱཱཝིཀམྨཾ པཊིཀྑིཔཏི. ཡེན ཧི སིཀྑཱཔཙྩཀྑཱནཉྩེཝ ཧོཏི དུབྦལྱཱཝིཀམྨཉྩ, ཏདེཝ སིཀྑཱཔཙྩཀྑཱནསྶ ཨཏྠབྷཱུཏཾ. ཡེན པན དུབྦལྱཱཝིཀམྨམེཝ ཧོཏི, ན སིཀྑཱཔཙྩཀྑཱནཾ, ན ཏཾ ཏསྶ ཨཏྠབྷཱུཏནྟི.

རཱགཔརིཡུཊྛཱནེན སདིསབྷཱཝཱཔཏྟིཡཱ མིཐུནཱནཾ ཨཡནྟི ‘‘མེཐུནོ’’ཏི དྷམྨོཝ ཝུཙྩཏཱིཏི ཨཱཧ ‘‘རཱགཔརིཡུཊྛཱནེནཱ’’ཏིཨཱདི. ཏཏྠ རཱགཔརིཡུཊྛཱནེནཱཏི རཱགསྶ པརིཡུཊྛཱནེན, མེཐུནརཱགསྶ པཝཏྟིཡཱ པརིཡོནདྡྷཙིཏྟཏཱཡཱཏི ཨཏྠོ. དྷམྨོཏི ཨཛ྄ཛྷཱཙཱརོ. ‘‘པལམྦཏེ ཝིལམྦཏེ’’ཏིཨཱདཱིསུ ཝིཡ ཨུཔསགྒསྶ ཀོཙི ཨཏྠཝིསེསོ ནཏྠཱིཏི ཨཱཧ ‘‘སེཝེཡྻཱ’’ཏི. ཨཛ྄ཛྷཱཔཛྫེཡྻཱཏི ཨབྷིབྷུཡྻ པཛྫེཡྻ. སབྦནྟིམེནཱཏི པརནིམྨིཏཝསཝཏྟི…པེ… ཙཱཏུམཧཱརཱཛིཀམནུསྶིཏྠིནཱགགརུལ༹མཱཎཝིཀཱདཱིནཾ སབྦཱསཾ ཨནྟིམེན. ཏིརཙྪཱནགཏཱཡཱཏི ཏིརཙྪཱནེསུ ¶ ཨུཔྤནྣཱཡ. ཏེནཱཧ ‘‘པཊིསནྡྷིཝསེནཱ’’ཏི. པཱརཱཛིཀཱཡ ཝཏྠུབྷཱུཏཱ ཨེཝ ཙེཏྠ ཏིརཙྪཱནགཏིཏྠཱི ‘‘ཏིརཙྪཱནགཏཱ’’ཏི གཧེཏབྦཱ, ན སབྦཱ. ཏཏྲཱཡཾ པརིཙྪེདོ –

‘‘ཨཔདཱནཾ ཨཧིམཙྪཱ, དྭིཔདཱནཉྩ ཀུཀྐུཊཱི;

ཙཏུཔྤདཱནཾ མཛྫཱརཱི, ཝཏྠུ པཱརཱཛིཀསྶིམཱ’’ཏི. (པཱརཱ. ཨཊྛ. ༡.༥༥)

ཏཏྠ ཨཧིགྒཧཎེན སབྦཱཔི ཨཛགརགོནསཱདིབྷེདཱ དཱིགྷཛཱཏི སངྒཧིཏཱ. ཏསྨཱ དཱིགྷཛཱཏཱིསུ ཡཏྠ ཏིཎྞཾ མགྒཱནཾ ཨཉྙཏརསྨིཾ སཀྐཱ ཏིལཕལམཏྟམྤི པཝེསེཏུཾ, སཱ པཱརཱཛིཀཝཏྠུ, ཨཝསེསཱ དུཀྐཊཝཏྠཱུཏི ཝེདིཏབྦཱ. མཙྪགྒཧཎེན སབྦཱཔི མཙྪཀཙྪཔམཎྜཱུཀཱདིབྷེདཱ ཨོདཀཛཱཏི སངྒཧིཏཱ. ཏཏྲཱཔི དཱིགྷཛཱཏིཡཾ ཝུཏྟནཡེནེཝ པཱརཱཛིཀཝཏྠུ ཙ དུཀྐཊཝཏྠུ ཙ ཝེདིཏབྦཾ. ཨཡཾ པན ཝིསེསོ – པཏངྒམུཁམཎྜཱུཀཱ ནཱམ ཧོནྟི, ཏེསཾ མུཁསཎྛཱནཾ མཧནྟཾ, ཚིདྡཾ ཨཔྤཀཾ, ཏཏྠ པཝེསནཾ ནཔྤཧོཏི, མུཁསཎྛཱནཾ པན ཝཎསངྑེཔཾ གཙྪཏི, ཏསྨཱ ཏཾ ཐུལླཙྩཡཝཏྠཱུཏི ཝེདིཏབྦཾ ¶ . ཀུཀྐུཊིགྒཧཎེན སབྦཱཔི ཀཱཀཀཔོཏཱདིབྷེདཱ པཀྑིཛཱཏི སངྒཧིཏཱ. ཏཏྲཱཔི ཝུཏྟནཡེནེཝ པཱརཱཛིཀཝཏྠུ ཙ དུཀྐཊཝཏྠུ ཙ ཝེདིཏབྦཾ. མཛྫཱརིགྒཧཎེན སབྦཱཔི རུཀྑསུནཁམངྒུསགོདྷཱདིབྷེདཱ ཙཏུཔྤདཛཱཏི སངྒཧིཏཱ. ཏཏྲཱཔི ཝུཏྟནཡེནེཝ པཱརཱཛིཀཝཏྠུ ཙ དུཀྐཊཝཏྠུ ཙ ཝེདིཏབྦཾ.

པཱརཱཛིཀོ ཧོཏཱིཏི (པཱརཱ. ཨཊྛ. ༡.༥༥) པརཱཛིཏོ ཧོཏི པརཱཛཡཾ ཨཔནྣོ. ཨཡཉྷི པཱརཱཛིཀསདྡོ སིཀྑཱཔདཱཔཏྟིཔུགྒལེསུ ཝཏྟཏི. ཏཏྠ ‘‘ཨཊྛཱནམེཏཾ, ཨཱནནྡ, ཨནཝཀཱསོ, ཡཾ ཏཐཱགཏོ ཝཛྫཱིནཾ ཝཱ ཝཛྫིཔུཏྟཀཱནཾ ཝཱ ཀཱརཎཱ སཱཝཀཱནཾ པཱརཱཛིཀཾ སིཀྑཱཔདཾ པཉྙཏྟཾ སམཱུཧནེཡྻཱ’’ཏི (པཱརཱ. ༤༣) ཨེཝཾ སིཀྑཱཔདེ ཝཏྟམཱནོ ཝེདིཏབྦོ. ‘‘ཨཱཔཏྟིཾ ཏྭཾ བྷིཀྑུ ཨཱཔནྣོ པཱརཱཛིཀ’’ནྟི (པཱརཱ. ༦༧) ཨེཝཾ ཨཱཔཏྟིཡཾ. ‘‘ན མཡཾ པཱརཱཛིཀཱ, ཡོ ཨཝཧཊོ, སོ པཱརཱཛིཀོ’’ཏི (པཱརཱ. ༡༥༥) ཨེཝཾ པུགྒལེ ཝཏྟམཱནོ ཝེདིཏབྦོ. ‘‘པཱརཱཛིཀེན དྷམྨེན ཨནུདྡྷཾསེཡྻཱ’’ཏིཨཱདཱིསུ (པཱརཱ. ༣༨༤) པན དྷམྨེ ཝཏྟཏཱིཏི ཝདནྟི. ཡསྨཱ པན ཏཏྠ ‘‘དྷམྨོ’’ཏི ཀཏྠཙི ཨཱཔཏྟི, ཀཏྠཙི སིཀྑཱཔདམེཝ ཨདྷིཔྤེཏཾ, ཏསྨཱ སོ ཝིསུཾ ན ཝཏྟབྦོ. ཏཏྠ སིཀྑཱཔདཾ ཡོ ཏཾ ཨཏིཀྐམཏི, ཏཾ པརཱཛེཏི, ཏསྨཱ ‘‘པཱརཱཛིཀ’’ནྟི ཝུཙྩཏི. ཨཱཔཏྟི པན ཡོ ནཾ ཨཛ྄ཛྷཱཔཛྫཏི, ཏཾ པརཱཛེཏི, ཏསྨཱ ‘‘པཱརཱཛིཀཱ’’ཏི ཝུཙྩཏི. པུགྒལོ ཡསྨཱ པརཱཛིཏོ པརཱཛཡམཱཔནྣོ, ཏསྨཱ ‘‘པཱརཱཛིཀོ’’ཏི ཝུཙྩཏི. ཨིདྷ པན པུགྒལོ ཝེདིཏབྦོཏི ཨཱཧ ‘‘པཱརཱཛིཀོ ཧོཏཱི’’ཏིཨཱདི. ཨིམིནཱཔི ¶ ཨིདཾ དསྶེཏི – ‘‘པརཱཛིཏསདྡེ ཨུཔསགྒསྶ ཝུདྡྷིཾ ཀཏྭཱ, ཏ-ཀཱརསྶ ཙ ཀ-ཀཱརཾ ཀཏྭཱ པཱརཱཛིཀོ ཧོཏཱིཏི ནིདྡིཊྛོ’’ཏི.

ཨཔལོཀནཱདི ཙཏུབྦིདྷམྤི སངྒྷཀམྨཾ སཱིམཱཔརིཙྪིནྣེཧི པཀཏཏྟེཧི བྷིཀྑཱུཧི ཨེཀཏོ ཀཏྟབྦཏྟཱ ཨེཀཀམྨཾ ནཱམ. ཨཱདིསདྡེན ཨེཀུདྡེསསམསིཀྑཏཱནཾ གཧཎཾ. ཏཏྠ པཉྩཝིདྷོཔི པཱཏིམོཀྑུདྡེསོ ཨེཀཏོ ཨུདྡིསིཏབྦཏྟཱ ཨེཀུདྡེསོ ནཱམ. ནཧཱཔིཏཔུབྦཀཱདཱིནཾ ཝིཡ ཨོདིསྶ ཨནུཉྙཱཏཾ ཋཔེཏྭཱ ཨཝསེསཾ སབྦམྤི སིཀྑཱཔདཾ སབྦེཧིཔི ལཛྫིཔུགྒལེཧི སམཾ སིཀྑིཏབྦབྷཱཝཏོ སམསིཀྑཏཱ ནཱམ. ཡསྨཱ སབྦེཔི ལཛྫིནོ ཨེཏེསུ ¶ ཨེཀཀམྨཱདཱིསུ སཧ ཝསནྟི, ན ཨེཀོཔི ཏཏོ བཧིདྡྷཱ སནྡིསྶཏི, ཏསྨཱ ཏཱནི སབྦཱནིཔི གཧེཏྭཱ ཨེཀཀམྨཱདིཀོ ཏིཝིདྷོཔི སཾཝཱསོ ནཱམཱཏི ཨཱཧ ‘‘སོ ཙ ཝུཏྟཔྤཀཱརོ སཾཝཱསོ ཏེན པུགྒལེན སདྡྷིཾ ནཏྠི, ཏེན ཀཱརཎེན སོ པཱརཱཛིཀོ པུགྒལོ ‘ཨསཾཝཱསོ’ཏི ཝུཙྩཏཱི’’ཏི (པཱརཱ. ཨཊྛ. ༡.༥༥).

ཨིདཱནི ཡསྨཱ ན ཀེཝལཾ མནུསྶིཏྠིཡཱ ཨེཝ ནིམིཏྟཾ པཱརཱཛིཀཝཏྠུ, ཨཐ ཁོ ཨམནུསྶིཏྠིཏིརཙྪཱནགཏིཏྠཱིནམྤི. ན ཙ ཨིཏྠིཡཱ ཨེཝ. ཨཐ ཁོ ཨུབྷཏོབྱཉྫནཀཔཎྜཀཔུརིསཱནམྤི, ཏསྨཱ ཏེ སཏྟེ, ཏེསཉྩ ཡཾ ཡཾ ནིམིཏྟཾ ཝཏྠུ ཧོཏི, ཏཾ ཏཾ ནིམིཏྟཾ, ཏཏྠ ཙ ཡཐཱ པཊིསེཝནྟོ པཱརཱཛིཀོ ཧོཏི, ཏཉྩ སབྦཾ ཝིཏྠཱརེཏྭཱ དསྶེཏུཾ ‘‘ཨཡཾ པནེཏྠ ཝིནིཙྪཡོ’’ཏིཨཱདིམཱཧ. ཨེཏྠཱཏི ཨིམསྨིཾ སིཀྑཱཔདེ. ཏེསཱུཏི ཡེ ཏིཾསམགྒཱ ཝུཏྟཱ, ཏེསུ. ཨཏྟནོ ཝཱཏི ལམྦིམུདུཔིཊྛིཀེ སནྡྷཱཡ ཝུཏྟཾ. སནྠཏསྶ ཝཱཏི ཡེན ཀེནཙི ཝཏྠེན ཝཱ པཎྞེན ཝཱ ཝཱཀཔཊྚེན ཝཱ ཙམྨེན ཝཱ ཏིཔུསཱིསཱདཱིནཾ པཊྚེན ཝཱ པལིཝེཋེཏྭཱ, ཨནྟོ ཝཱ པཝེསེཏྭཱ པཊིཙྪནྣསྶ. ཨཀྑཱཡིཏསྶ ཝཱཏི སོཎསིངྒཱལཱདཱིཧི ཨཀྑཱདིཏསྶ. ཡེབྷུཡྻེན ཨཀྑཱཡིཏསྶཱཏི ཡཱཝ ཨུཔཌྜྷཀྑཱཡིཏོ ནཱམ ན ཧོཏི, ཨེཝཾ ཨཀྑཱཡིཏསྶ. ཨལློཀཱསེཏི ཏིནྟོཀཱསེ. སནྠཏནྟི ཏེསཾཡེཝ ཝཏྠཱདཱིནཾ ཡེན ཀེནཙི པཊིཙྪནྣཾ. ཨཡཉྷེཏྠ སངྑེཔཏྠོ – ན ཧེཏྠ ཨནུཔཱདིནྣཀཾ ཨནུཔཱདིནྣཀེན ཚུཔཏི, མུཏྟི ཨཏྠི, ཨཐ ཁོ ཨུཔཱདིནྣཀེན ཝཱ ཨནུཔཱདིནྣཀཾ གྷཊྚིཡཏུ, ཨནུཔཱདིནྣཀེན ཝཱ ཨུཔཱདིནྣཀཾ, ཨནུཔཱདིནྣཀེན ཝཱ ཨནུཔཱདིནྣཀཾ, ཨུཔཱདིནྣཀེན ཝཱ ཨུཔཱདིནྣཀཾ. སཙེ ཡཏྟཀེ པཝིཊྛེ པཱརཱཛིཀཾ ཧོཏཱིཏི ཝུཏྟཾ, ཏཏྟཀཾ སེཝནཙིཏྟེན པཝེསེཏི, སབྦཏྠཱཡཾ པཱརཱཛིཀཱཔཏྟིཾ ཨཱཔནྣོ ནཱམ ཧོཏཱིཏི.

ཨེཝཾ སེཝནཙིཏྟེནེཝ པཝེསེནྟསྶ ཨཱཔཏྟིཾ དསྶེཏྭཱ ཨིདཱནི ཡསྨཱ ཏཾ པཝེསནཾ ནཱམ ན ཀེཝལཾ ཨཏྟཱུཔཀྐམེནེཝ, པརཱུཔཀྐམེནཱཔི ཧོཏི. ཏཏྲཱཔི སཱདིཡནྟསྶེཝ ཨཱཔཏྟི པཊིསེཝནཙིཏྟསམངྒིསྶ ¶ , ན ཨིཏརསྶཱཏི དསྶེཏུཾ ‘‘པརེན ཝཱ’’ཏིཨཱདིམཱཧ. ཏཏྠ པརེནཱཏི བྷིཀྑུཔཙྩཏྠིཀཱདིནཱ ཡེན ཀེནཙི ཨཉྙེན. པཝེསནཔཝིཊྛཊྛིཏཨུདྡྷརཎེསཱུཏི ཨེཏྠ ཨགྒཏོ (སཱརཏྠ. ཊཱི. ༢.༥༨) ཡཱཝ མཱུལཱ པཝེསནཾ པཝེསནཾ ནཱམ. ཨངྒཛཱཏསྶ ཡཏྟཀཾ ཋཱནཾ པཝེསནཱརཧཾ, ཏཏྟཀཾ ཨནཝསེསཏོ པཝིཊྛཾ པཝིཊྛཾ ནཱམ. ཨེཝཾ ¶ པཝིཊྛསྶ ཨུདྡྷརཎཱརམྦྷཏོ ཨནྟརཱ ཋིཏཀཱལོ ཋིཏཾ ནཱམ. སམནྟཔཱསཱདིཀཱཡཾ པན མཱཏུགཱམསྶ སུཀྐཝིསཊྛིཾ པཏྭཱ སབྦཐཱ ཝཱཡཱམཏོ ཨོརམིཏྭཱ ཋིཏཀཱལཾ སནྡྷཱཡ ‘‘སུཀྐཝིསཊྛིསམཡེ’’ཏི ཝུཏྟཾ. ཨུདྡྷརཎཾ ནཱམ ཡཱཝ ཨགྒཱ ནཱིཧརཎཀཱལོ. སཱདིཡཏཱིཏི སེཝནཙིཏྟཾ ཨུཔཊྛཔེཏི. ཨསཱདྷཱརཎཝིནིཙྪཡོཏི ཨདིནྣཱདཱནཱདཱིཧི སབྦེཧི སིཀྑཱཔདེཧི ཨསཱདྷཱརཎོ ཝིནིཙྪཡོ.

སཱདྷཱརཎཝིནིཙྪཡཏྠནྟི པརིཝཱརཝསེན སཱདྷཱརཎཝིནིཙྪཡཏྠཾ. མཱཏིཀཱཏི མཱཏཱ, ཛནེཏྟཱིཏི ཨཏྠོ. ནིདདཱཏི དེསནཾ དེསཝསེན ཨཝིདིཏཾ ཝིདིཏཾ ཀཏྭཱ ནིདསྶེཏཱིཏི ནིདཱནཾ. པཉྙཱཔཱིཡཏཱིཏི པཉྙཏྟི, ཏསྶཱ པཀཱརོ པཉྙཏྟིཝིདྷི ཨངྒེཏི གམེཏི ཉཱཔེཏཱིཏི ཨངྒཾ, ཀཱརཎཾ. སམུཊྛཧནྟི ཨཱཔཏྟིཡོ ཨེཏེནཱཏི སམུཊྛཱནཾ, ཨུཔྤཏྟིཀཱརཎཾ, ཏསྶ ཝིདྷི སམུཊྛཱནཝིདྷི. ཝཛྫཀམྨཔྤབྷེདཉྩཱཏི ཨེཏྠ པབྷེདསདྡོ པཙྩེཀཾ ཡོཛེཏབྦོ ‘‘ཝཛྫཔྤབྷེདཾ, ཀམྨཔྤབྷེདཉྩཱ’’ཏི. ཏཏྠ ཏཏྠཱཏི ཏསྨིཾ ཏསྨིཾ སིཀྑཱཔདེ.

པཉྙཏྟིཊྛཱནནྟི པཉྙཏྟིཊྛཔནསྶ ཋཱནཾ, སིཀྑཱཔདཱནཾ པཉྙཏྟིདེསོཏི ཨཏྠོ. པུགྒལོཏི ཨེཏྠ ཨཱདིཀམྨིཀོཡེཝ ཨདྷིཔྤེཏོཏི ཨཱཧ ‘‘པུགྒལོ ནཱམ ཡཾ ཡཾ ཨཱརབྦྷ ཏཾ ཏཾ སིཀྑཱཔདཾ པཉྙཏྟ’’ནྟི, སོ སོ པུགྒལོཏི ཨདྷིཔྤཱཡོ. ཧོནྟི ཙེཏྠ –

‘‘སུདིནྣོ དྷནིཡོ སམྦཧུལཱ ཝགྒུམུདནྟིཀཱ;

སེཡྻསཀོ ཨུདཱཡི ཙཱ-ལ༹ཝཀཱ ཚནྣམེཏྟིཡཱ.

‘‘དེཝདཏྟསྶཛིཔུནབྦསུ-ཚབྦགྒིཡོཔནནྡཉྙཏརོཔི ཙ;

ཧཏྠཀོ ཙཱནུརུདྡྷོ ཙ, སཏྟརས ཙཱུལ༹པནྠཀོ.

‘‘བེལཊྛསཱིསོ ཙཱནནྡོ, སཱགཏོརིཊྛནཱམཀོ;

ནནྡཏྠེརེན ཏེཝཱིས, བྷིཀྑཱུནཾ ཨཱདིཀམྨིཀཱ.

‘‘སུནྡརཱིནནྡཱ ¶ ཐུལླནནྡཱ, ཚབྦགྒིཡཉྙཏརཱཔི ཙ;

ཙཎྜཀཱལཱི༹ སམྦཧུལཱ, དྭེ ཙ བྷིཀྑུནིཡོ པརཱ;

བྷིཀྑུནཱིནཾ ཏུ སཏྟེཝ, ཧོནྟི ཏཱ ཨཱདིཀམྨིཀཱ’’ཏི.

ཏསྶ ཏསྶ པུགྒལསྶཱཏི ཡཾ ཡཾ སུདིནྣཱདིཀཾ པུགྒལཾ ཨཱརབྦྷ སིཀྑཱཔདཾ པཉྙཏྟཾ, ཏསྶ ཏསྶ པུགྒལསྶ. པཉྙཏྟཱིཏི པཋམཔཉྙཏྟི. པཋམཔཉྙཏྟིཡཱ པཙྪཱ ¶ ཋཔིཏཱ པཉྙཏྟི ཨནུཔཉྙཏྟི. ཨནུཔྤནྣེ དོསེ ཋཔིཏཱ པཉྙཏྟི ཨནུཔྤནྣཔཉྙཏྟི. སབྦཏྠ མཛ྄ཛྷིམདེསེ ཙེཝ པཙྩནྟིམེསུ ཛནཔདེསུ ཙཱཏི སབྦེསུ པདེསེསུ ཋཔིཏཱ པཉྙཏྟི སབྦཏྠཔཉྙཏྟི. མཛ྄ཛྷིམདེསེཡེཝ ཋཔིཏཱ པཉྙཏྟི པདེསཔཉྙཏྟི. བྷིཀྑཱུནཉྩེཝ བྷིཀྑུནཱིནཉྩ སཱདྷཱརཎབྷཱུཏཱ པཉྙཏྟི སཱདྷཱརཎཔཉྙཏྟི. སུདྡྷབྷིཀྑཱུནམེཝ, སུདྡྷབྷིཀྑུནཱིནཾ ཝཱ པཉྙཏྟཾ སིཀྑཱཔདཾ ཨསཱདྷཱརཎཔཉྙཏྟི. ཨུབྷིནྣམྤི པཉྙཏྟི ཨུབྷཏོཔཉྙཏྟི. ཝིནཡདྷརཔཉྩམེནཱཏི ཨནུསྶཱཝནཀཱཙརིཡཔཉྩམེན. གུཎངྒུཎཱུཔཱཧནཱཏི ཙཏུཔྤཊལཏོ པཊྛཱཡ ཀཏཱ ཨུཔཱཧནཱ, ན ཨེཀདྭིཏིཔཊལཱ. ཙམྨཏྠརཎནྟི ཨཏྠརིཏབྦཾ ཙམྨཾ. ཨེཏེསཾ ཝསེན ཙཏུབྦིདྷཱ པདེསཔཉྙཏྟི ནཱམཱཏི ཨེཏེསཾ ཝསེན ཙཏུབྦིདྷཱ པཉྙཏྟི མཛ྄ཛྷིམདེསེཡེཝ པཉྙཏྟཱཏི པདེསཔཉྙཏྟི ནཱམ. ཏེནེཝཱཧ ‘‘མཛ྄ཛྷིམདེསེཡེཝ ཧཱི’’ཏིཨཱདི. ཡསྨཱ མཛ྄ཛྷིམདེསེཡེཝ ཡཐཱཝུཏྟཝཏྠུཝཱིཏིཀྐམེ ཨཱཔཏྟི ཧོཏི, ན པཙྩནྟིམཛནཔདེ, ཏསྨཱ པདེསཔཉྙཏྟཱིཏི ཨཏྠོ. དྷུཝནྷཱནཾ པཊིཀྑེཔམཏྟནྟི ནིཙྩནཧཱནཔྤཊིསེདྷནམེཝ. ཨེཏྠ ཙ མཏྟསདྡེན ཨཉྙཱནི ཏཱིཎི སིཀྑཱཔདཱནི པཊིཀྑིཔཏི. ཏཱནི ཧི ‘‘ཨནུཛཱནཱམི, བྷིཀྑཝེ, སབྦཔཙྩནྟིམེསུ ཛནཔདེསུ ཝིནཡདྷརཔཉྩམེན གཎེན ཨུཔསམྤད’’ནྟིཨཱདིནཱ (མཧཱཝ. ༢༥༩) ཙམྨཀྑནྡྷཀེ ཨཱགཏཱནི. ཏེནེཝཱཧ ‘‘ཏཏོ ཨཉྙཱ པདེསཔཉྙཏྟི ནཱམ ནཏྠཱི’’ཏི. སབྦཱནཱིཏི ཏཏོ ཨཝསེསཱནི སབྦཱནི སིཀྑཱཔདཱནི. ཏསྨཱཏི ཡསྨཱ ཨནུཔྤནྣཔཉྙཏྟི ཨཊྛགརུདྷམྨཝསེན བྷིཀྑུནཱིནཾཡེཝ ཨཱགཏཱ, ཡསྨཱ ཙ དྷུཝནྷཱནཾ པཊིཀྑེཔམཏྟཾ ཋཔེཏྭཱ པཱཏིམོཀྑེ སབྦཱནི སིཀྑཱཔདཱནི སབྦཏྠཔཉྙཏྟིཡེཝ ཧོནྟི, ཡསྨཱ ཙ སཱདྷཱརཎཔཉྙཏྟིདུཀཉྩ ཨེཀཏོཔཉྙཏྟིདུཀཉྩ བྱཉྫནམཏྟཾ ནཱནཾ, ཨཏྠཏོ ཨེཀཾ, ཏསྨཱ. སབྦཏྠཱཏི སབྦེསུ སིཀྑཱཔདེསུ. ཨཱཔཏྟིབྷེདོ ཧེཏྠ ཨུཏྟརཔདལོཔེན ‘‘ཨཱཔཏྟཱི’’ཏི ཝུཏྟོཏི ཨཱཧ ‘‘ཨཱཔཏྟཱིཏི པུབྦཔྤཡོགཱདིཝསེན ཨཱཔཏྟིབྷེདོ’’ཏི. སཱིལཨཱཙཱརདིཊྛིཨཱཛཱིཝཝིཔཏྟཱིནནྟི ཨེཏྠ པཋམཱ དྭེ ཨཱཔཏྟིཀྑནྡྷཱ སཱིལཝིཔཏྟི ནཱམ, ཨཝསེསཱ པཉྩ ཨཱཙཱརཝིཔཏྟི ནཱམ, མིཙྪཱདིཊྛི ཙ ཨནྟགྒཱཧིཀཱདིཊྛི ཙ དིཊྛིཝིཔཏྟི ནཱམ, ཨཱཛཱིཝཧེཏུ པཉྙཏྟཱནི ཚ སིཀྑཱཔདཱནི ཨཱཛཱིཝཝིཔཏྟི ནཱམ, ཨིཏི ཨིམཱསཾ སཱིལཨཱཙཱརདིཊྛིཨཱཛཱིཝཝིཔཏྟཱིནཾ ཨཉྙཏརཱཏི ཨཏྠོ.

ན ¶ ཀེཝལཾ ཡཐཱཝུཏྟནཡེནེཝ ཝུཙྩནྟཱིཏི ཨཱཧ ‘‘ཡཱནི སིཀྑཱཔདསམུཊྛཱནཱནཱིཏིཔི ཝུཙྩནྟཱི’’ཏི. ཨེཏཱནི ཧི ཀིཉྩཱཔི ཨཱཔཏྟིཡཱ སམུཊྛཱནཱནི, ན ¶ སིཀྑཱཔདསྶ, ཝོཧཱརསུཁཏྠཾ པནེཝཾ ཝུཙྩནྟཱིཏི. ཏཏྠཱཏི ཏེསུ ཚསུ སམུཊྛཱནེསུ. ཏེསཱུཏི སཙིཏྟཀཱཙིཏྟཀེསུ. ཨེཀཾ སམུཊྛཱནཾ ཨུཔྤཏྟིཀཱརཎཾ ཨེཏིསྶཱཏི ཨེཀསམུཊྛཱནཱ, ཨེཀེན ཝཱ སམུཊྛཱནཾ ཨེཏིསྶཱཏི ཨེཀསམུཊྛཱནཱ. ‘‘དྭིསམུཊྛཱནཱ’’ཏིཨཱདཱིསུཔི ཨེསེཝ ནཡོ.

སམུཊྛཱནཝསེནཱཏི སམུཊྛཱནསཱིསཝསེན. པཋམཔཱརཱཛིཀཾ སམུཊྛཱནཾ ཨེཏིསྶཱཏི པཋམཔཱརཱཛིཀསམུཊྛཱནཱ. ཏཐཱ ཨདིནྣཱདཱནསམུཊྛཱནཱ’’ཏིཨཱདཱིསུཔི.

སཡཾ པཐཝིཁཎནེ ཀཱཡེན, པརེ ཨཱཎཱཔེཏྭཱ ཁཎཱཔནེ ཝཱཙཱཡ ཙ ཨཱཔཏྟིསམྦྷཝཏོ ‘‘པཐཝིཁཎནཱདཱིསུ ཝིཡཱ’’ཏི ཝུཏྟཾ. ཨཱདིསདྡེན ཨདིནྣཱདཱནཱདཱིནཾ པརིགྒཧོ. པཋམཀཐིནཱཔཏྟི ཀཱཡཝཱཙཏོ ཀཏྟབྦཾ ཨདྷིཊྛཱནཾ ཝཱ ཝིཀཔྤནཾ ཝཱ ཨཀརོནྟསྶ ཧོཏི, ནོ ཀརོནྟསྶཱཏི ཨཱཧ ‘‘པཋམཀཐིནཱཔཏྟི ཝིཡཱ’’ཏི. ཨཉྙཱཏིཀཱཡ བྷིཀྑུནིཡཱ ཧཏྠཏོ ཙཱིཝརཔྤཊིགྒཧཎཱཔཏྟི ཏསྶཱ ཧཏྠཏོ ཙཱིཝརཾ པཊིགྒཎྷནྟསྶ, པརིཝཏྟཀཾ ཨདེནྟསྶ ཙ ཧོཏཱིཏི ཀིརིཡཱཀིརིཡཏོ སམུཊྛཱཏི. ‘‘སིཡཱ ཀརོནྟསྶཱ’’ཏིཨཱདཱིསུ སིཡཱཏི ‘‘སིཡཱ ཁོ པན ཏེ བྲཱཧྨཎ ཨེཝམསྶཱ’’ཏིཨཱདཱིསུ ཝིཡ ‘‘ཀདཱཙཱི’’ཏི ཨིམིནཱ སམཱནཏྠོ ནིཔཱཏོ. རཱུཔིཡཔྤཊིགྒཧཎཱཔཏྟི སིཡཱ ཀིརིཡཱ གཧཎེན ཨཱཔཛྫནཏོ, སིཡཱ ཨཀིརིཡཱ པཊིཀྑེཔསྶ ཨཀརཎཏོཏི ཨཱཧ ‘‘རཱུཔིཡཔྤཊིགྒཧཎཱཔཏྟི ཝིཡཱ’’ཏི. ཀུཊིཀཱརཱཔཏྟི ཝཏྠུཾ དེསཱཔེཏྭཱ པམཱཎཱཏིཀྐནྟཀརཎེ ཀརོནྟསྶ སིཡཱ, ཨདེསཱཔེཏྭཱ པན པམཱཎཱཏིཀྐནྟཀརཎེ པམཱཎཡུཏྟཾ ཝཱ ཀརོནྟསྶ ཙ ཨཀརོནྟསྶ ཙ སིཡཱཏི ཨཱཧ ‘‘ཀུཊིཀཱརཱཔཏྟི ཝིཡཱ’’ཏི.

སཉྙཱཡ ཨབྷཱཝེན ཝིམོཀྑོ ཨསྶཱཏི སཉྙཱཝིམོཀྑོཏི མཛ྄ཛྷེཔདལོཔསམཱསོ དཊྛབྦོཏི ཨཱཧ ‘‘ཡཏོ ཝཱིཏིཀྐམསཉྙཱཡཱ’’ཏིཨཱདི. ཨིཏརཱ ནཱམ ཡཏོ ཝཱིཏིཀྐམསཉྙཱཡ ཨབྷཱཝེན ན མུཙྩཏི, སཱ ཨིཏརསདྡསྶ ཝུཏྟཔྤཊིཡོགིཝིསཡཏྟཱ. ཡཱ ཨཙིཏྟཀེན ཝཱ སཙིཏྟཀམིསྶཀེན ཝཱ སམུཊྛཱཏཱིཏི ཡཱ ཨཱཔཏྟི ཀདཱཙི ཨཙིཏྟཀེན ཝཱ ཀདཱཙི སཙིཏྟཀམིསྶཀེན ཝཱ སམུཊྛཱནེན སམུཊྛཱཏི. ཨེཏྠ ཙ སཉྙཱདུཀཾ ཨནཱཔཏྟིམུཁེན ཝུཏྟཾ, སཙིཏྟཀདུཀཾ ཨཱཔཏྟིམུཁེནཱཏི དཊྛབྦཾ.

ཡསྶཱ ¶ སཙིཏྟཀཔཀྑེ ཙིཏྟཾ ཨཀུསལམེཝ ཧོཏཱིཏི ཡསྶཱ སཙིཏྟཀཱཡ ཨཱཔཏྟིཡཱ ཙིཏྟཾ ཨཀུསལམེཝ ཧོཏི, ཡསྶཱ ཙ སཙིཏྟཀཱཙིཏྟཀསངྑཱཏཱཡ སུརཱཔཱནཱདིཨཙིཏྟཀཱཡ ཨཱཔཏྟིཡཱ ཝཏྠུཝིཛཱནནཙིཏྟེན ¶ སཙིཏྟཀཔཀྑེ ཙིཏྟཾ ཨཀུསལམེཝ ཧོཏི, ཨཡཾ ལོཀཝཛྫཱ. ‘‘སཙིཏྟཀཔཀྑེ’’ཏི ཧི ཨིདཾ ཝཙནཾ སཙིཏྟཀཱཙིཏྟཀཾ སནྡྷཱཡ ཝུཏྟཾ. ན ཧི ཨེཀཾསཏོ སཙིཏྟཀསྶ ‘‘སཙིཏྟཀཔཀྑེ’’ཏི ཝིསེསནེ པཡོཛནཾ ཨཏྠཱིཏི. ཡཾ པནེཏྠ གཎྛིཔདེ ‘‘སུརཱཔཱནསྨིཉྷི ‘སུརཱ’ཏི ཝཱ ‘ན ཝཊྚཏཱི’ཏི ཝཱ ཛཱནིཏྭཱ པིཝནེ ཨཀུསལམེཝཱ’’ཏི ཝུཏྟཾ. ཏཏྠ ‘‘ན ཝཊྚཏཱིཏི ཝཱ ཛཱནིཏྭཱ’’ཏི ཝུཏྟཝཙནཾ ན ཡུཛྫཏི པཎྞཏྟིཝཛྫསྶཱཔི ལོཀཝཛྫབྷཱཝཔྤསངྒཏོ. ཡསྶཱ པན ‘‘སཙིཏྟཀཔཀྑེ ཙིཏྟཾ ཨཀུསལམེཝཱ’’ཏི ནིཡམོ ནཏྠི, སཱ པཎྞཏྟིཝཛྫཱཏི ཨིམམཏྠཾ དསྶེནྟོ ཨཱཧ ‘‘སེསཱ པཎྞཏྟིཝཛྫཱ’’ཏི. ཏཐཱ ཧི ཏསྶཱ ཝཏྠུཝིཛཱནནཙིཏྟེན སཙིཏྟཀཔཀྑེ ཙིཏྟཾ སིཡཱ ཀུསལཾ, སིཡཱ ཨཀུསལཾ, སིཡཱ ཨབྱཱཀཏནྟི ‘‘ཨཀུསལམེཝཱ’’ཏི ནིཡམོ ནཏྠི. ཨུབྷཡཏྠ ཨཱཔཛྫིཏབྦཱཏི ཀཱཡདྭཱརེ, ཝཙཱིདྭཱརེ ཙཱཏི ཨུབྷཡཏྠ ཨཱཔཛྫིཏབྦཱ ཨཱཔཏྟི, ཏཱ པན ཨདིནྣཱདཱནཱདཡོ. ‘‘མནོདྭཱརེ ཨཱཔཏྟི ནཱམ ནཏྠཱི’’ཏི ཨིདཾ ཡེབྷུཡྻཝསེན ཝུཏྟཾ ཨུཔནིཀྑིཏྟསཱདིཡནཱདཱིསུ ཨཱཔཏྟིསམྦྷཝཏོཏི དཊྛབྦཾ.

ཨཀུསལཙིཏྟོ ཝཱ ཨཱཔཛྫཏཱིཏི པཱརཱཛིཀསུཀྐཝིསཊྛིཀཱཡསཾསགྒདུཊྛུལླཨཏྟཀཱམཔཱརིཙརིཡདུཊྛདོསསངྒྷབྷེདཔྤཧཱརདཱནཏལསཏྟིཀཱདིབྷེདཾ ཨཱཔཏྟིཾ ཨཀུསལཙིཏྟོ ཨཱཔཛྫཏི. ཨནུཔསམྤནྣཾ པདསོདྷམྨཾ ཝཱཙེནྟོ, མཱཏུགཱམསྶ དྷམྨཾ དེསེནྟོཏི ཨེཝརཱུཔཾ ཨཱཔཏྟིཾ ཀུསལཙིཏྟོ ཨཱཔཛྫཏི. ཨསཉྩིཙྩསཧསེཡྻཱདིཾ ཨབྱཱཀཏཙིཏྟོ ཨཱཔཛྫཏི. ཡཾ ཨརཧཱ ཨཱཔཛྫཏི, སབྦཾ ཨབྱཱཀཏཙིཏྟོཝ ཨཱཔཛྫཏི. ཏེནཱཧ ‘‘ཀུསལཱབྱཱཀཏཙིཏྟོ ཝཱ’’ཏི.

དུཀྑཝེདནཱསམངྒཱི ཝཱཏི དུཊྛདོསཱདིབྷེདཾ ཨཱཔཏྟིཾ ཨཱཔཛྫནྟོ དུཀྑཝེདནཱསམངྒཱི ཨཱཔཛྫཏི. མེཐུནདྷམྨཱདིབྷེདཾ པན སུཁཝེདནཱསམངྒཱི ཨཱཔཛྫཏི. ཡཾ སུཁཝེདནཱསམངྒཱི ཨཱཔཛྫཏི, ཏཾཡེཝ མཛ྄ཛྷཏྟོ ཧུཏྭཱ ཨཱཔཛྫནྟོ ཨདུཀྑམསུཁཝེདནཱསམངྒཱི ཨཱཔཛྫཏི. ཏེནཱཧ ‘‘ཨིཏརཝེདནཱདྭཡསམངྒཱི ཝཱ’’ཏི. ཨིདམྤི ཙ ཏིཀདྭཡཾ ཡེབྷུཡྻཝསེནེཝ ཝུཏྟཾ. ནིཔཛྫིཏྭཱ ¶ ནིརོདྷསམཱཔནྣོ ཧི ཨཙིཏྟཀོ ཨཝེདནོ སཧསེཡྻཱཔཏྟིཾ ཨཱཔཛྫཏཱིཏི. ཀིཉྩཱཔི ཨེཝཾ ཨནིཡམེན ཝུཏྟཾ, ཝིསེསོ པནེཏྠ ཨཏྠཱིཏི དསྶེཏུཾ ‘‘ཨེཝཾ སནྟེཔཱི’’ཏིཨཱདི ཝུཏྟཾ. ཨེཝཾ སནྟེཔཱིཏི ཧི ཝིསེསཱབྷིདྷཱནནིམིཏྟཱབྷྱཱུཔགམེཝ ཡུཛྫཏི. སབྦེསཾ ཝསེན ཏཱིཎི ཙིཏྟཱནཱིཏི ཀུསལཱཀུསལཱབྱཱཀཏཱནཾ ཝསེན པདསོདྷམྨཱདཱིསུ ཏཱིཎི ཙིཏྟཱནི.

ཨིདཱནི ཏཾ ཡཐཱཝུཏྟནིདཱནཱདིཝེདནཱཏྟིཀཔརིཡོསཱནཾ སཏྟརསཔྤཀཱརཾ ཨིམསྨིཾ སིཀྑཱཔདེ ཡོཛེཏུཾ ‘‘ཨིདྷ པནཱ’’ཏིཨཱདིམཱཧ. ཨིདྷཱཏི ཨིམསྨིཾ པཋམཔཱརཱཛིཀསིཀྑཱཔདེ. ཝེསཱལིཡནྟི ཨེཝཾནཱམཀེ ¶ ཨིཏྠིལིངྒཝསེན པཝཏྟཝོཧཱརེ ནགརེ. ཏཉྷི ནགརཾ ཏིཀྑཏྟུཾ པཱཀཱརཔརིཀྑེཔཝཌྜྷནེན ཝིསཱལཱིབྷཱུཏཏྟཱ ‘‘ཝེསཱལཱི’’ཏི ཝུཙྩཏི. ཨིདམྤི ཙ ནགརཾ སབྦཉྙུཏཾ སམྤཏྟེཡེཝ སམྨཱསམྦུདྡྷེ སབྦཱཀཱརཝེཔུལླཏྟཾ པཏྟནྟི ཝེདིཏབྦཾ. ‘‘སིཀྑཾ ཨཔཙྩཀྑཱཡཱ’’ཏི ཙ ‘‘ཨནྟམསོ ཏིརཙྪཱནགཏཱཡཔཱི’’ཏི ཙ དྭེ ཨནུཔཉྙཏྟིཡོཏི མཀྐཊིཝཛྫིཔུཏྟཀཝཏྠཱུནཾ ཝསེན ཝུཏྟཱ. ‘‘ཨནྟམསོ ཏིརཙྪཱནགཏཱཡཱ’’ཏི ཙ ‘‘སིཀྑཾ ཨཔཙྩཀྑཱཡཱ’’ཏི ཙ ཨིམཱ དྭེ ཨནུཔཉྙཏྟིཡོ. ཨཱཔཏྟིཀརཱ ཙ ཧོཏཱིཏི པཋམཔཉྙཏྟིཏོ ཝིསུཾཡེཝཱཔཏྟིཀརཱ ཙ ཧོཏི. ཨཉྙཝཱདཀསིཀྑཱཔདཱདཱིསུ ཝིཡཱཏི ཨཉྙཝཱདཀསིཀྑཱཔདཱདཱིསུ ‘‘ཝིཧེསཀེ’’ཏིཨཱདིཀཱ (པཱཙི. ༩༨) ཝིཡཱཏི ཨཏྠོ. ཨཱདིསདྡེན ཨུཛ྄ཛྷཱཔནཀསྶ པརིགྒཧོ. ཨེཏྠ ཧི ཨཉྙཝཱདཀཱདིཏོ ཝིསུཾཡེཝ ཝིཧེསཀཱདཱིསུཔི པཱཙིཏྟིཡཾ ཧོཏི. ཡཐཱཧ ‘‘རོཔིཏེ ཝིཧེསཀེ སངྒྷམཛ྄ཛྷེ ཝཏྠུསྨིཾ ཝཱ ཨཱཔཏྟིཡཱ ཝཱ ཨནཡུཉྫིཡམཱནོ ཏཾ ནཀཐེཏུཀཱམོ ཏཾ ནཨུགྒྷཱཊེཏུཀཱམོ ཏུཎྷཱིབྷཱུཏོ སངྒྷཾ ཝིཧེསེཏི, ཨཱཔཏྟི པཱཙིཏྟིཡསྶཱ’’ཏིཨཱདི (པཱརཱ. ༡༠༠). སུཔིནནྟེ ཝིཛྫམཱནཱཔི མོཙནསྶཱདཙེཏནཱ ཨབྦོཧཱརིཀཏྟཱ ཨནཱཔཏྟིཀརཱཏི ཨཱཧ ‘‘ཨཉྙཏྲ སུཔིནནྟཱཏིཨཱདིཀཱ ཝིཡཱ’’ཏི. ཏཐཱ ཧི ཐིནམིདྡྷེན ཨབྷིབྷཱུཏཏྟཱ སུཔིནེ ཙིཏྟཾ ཨབྦོཧཱརིཀཾ, ཙིཏྟསྶ ཨབྦོཧཱརིཀཏྟཱ ཨོཔཀྐམནཀིརིཡཱཔཝཏྟནིཀཱཔི ཙེཏནཱ ཨབྦོཧཱརིཀཱ. ཝུཏྟཉྷེཏཾ ‘‘ཨཏྠེསཱ, བྷིཀྑཝེ, ཙེཏནཱ, སཱ ཙ ཁོ ཨབྦོཧཱརིཀཱ’’ཏི (པཱརཱ. ༢༣༥), ཏསྨཱ ‘‘ཨཉྙཏྲ སུཔིནནྟཱ’’ཏི ཨཡཾ ཨནུཔཉྙཏྟི ཨནཱཔཏྟིཀརཱ ཛཱཏཱ. ཨཱདིསདྡེན ‘‘ཨཉྙཏྲ ཨདྷིམཱནཱ’’ཏིཨཱདིཀཾ (པཱརཱ. ༡༩༧) སངྒཎྷཱཏི. ཨདིནྣཱདཱནཱདཱིསུ ཝིཡཱཏི ཨདིནྣཱདཱནཱདཱིསུ ¶ ‘‘ཨརཉྙཱ ཝཱ’’ཏིཨཱདིཀཱ (པཱརཱ. ༩༡) ཝིཡཱཏི ཨཏྠོ. ཨེཏྠ པན ཨཱདིསདྡེན པཋམཔཱརཱཛིཀཱདཱིནཾ སངྒཧོ. ཨེཏྠ ཧི ‘‘ཏཉྩ ཁོ གཱམེ, ནོ ཨརཉྙེ’’ཏིཨཱདིནཱ (པཱརཱ. ༩༠) ནཡེན ལེསཾ ཨོཌྜེནྟཱནཾ ལེསཔིདཧནཏྠཾ ‘‘ཨརཉྙཱ ཝཱ’’ཏིཨཱདིཀཱ ཨནུཔཉྙཏྟི ཝུཏྟཱཏི ཨུཔཏྠམྦྷཀརཱཝ ཧོཏི. ཏེནེཝ ཧི ‘‘ནནུ, ཨཱཝུསོ, ཏཐེཝེཏཾ ཧོཏཱི’’ཏི (པཱརཱ. ༩༠) བྷིཀྑཱུཧི ཝུཏྟཾ.

ཝུཏྟཔྤཀཱརེ མགྒེཏི ‘‘མནུསྶཱམནུསྶཏིརཙྪཱནགཏཝསེནཱ’’ཏིཨཱདིནཱ (ཀངྑཱ. ཨཊྛ. པཋམཔཱརཱཛིཀཝཎྞནཱ) ཝུཏྟཔྤཀཱརེ ཏིཾསམགྒེ. ཨིམསྶ པན ‘‘ཚིནྣེ’’ཏི ཨིམིནཱ སམྦནྡྷོ. ཏཙཱདཱིནི ཨནཝསེསེཏྭཱཏི ནིམིཏྟཔྤདེསེ བཧི ཋིཏཱནི ཚཝིཙམྨཱནི ཨནཝསེསེཏྭཱ. ནིམིཏྟསཎྛཱནམཏྟཾ པཉྙཱཡཏཱིཏི ནིམིཏྟམཾསསྶ པན ཨབྦྷནྟརེ ཚཝིཙམྨསྶ ཙ ཝིཛྫམཱནཏྟཱ ཝུཏྟཾ. ཙམྨཁིལནྟི ཙམྨཀྑཎྜཾ. ‘‘ཨུཎྞིགཎྜོ’’ཏིཔི (སཱརཏྠ. ཊཱི. ༢.༥༥; ཝི. ཝི. ཊཱི. ༡.༥༥) ཝདནྟི. ཏཉྷི ནིམིཏྟེ ཛཱཏཏྟཱ ནིམིཏྟམེཝ. ཏེནཱཧ ‘‘སེཝནཙིཏྟེ སཏི པཱརཱཛིཀ’’ནྟི. སེཝནཙིཏྟེཏི མེཐུནསེཝནཙིཏྟེ. ཀཱཡསཾསགྒསེཝནཙིཏྟེ པན སཏི སངྒྷཱདིསེསོཝ ¶ . ནཊྛོ ཀཱཡཔྤསཱདོ ཨེཏྠཱཏི ནཊྛཀཱཡཔྤསཱདཾ, སུཀྑཔཱིལ༹ཀཾ ཝཱ མཏཙམྨཾ ཝཱཏི ཨཏྠོ. མཏེ ཨཀྑཱཡིཏེ, ཡེབྷུཡྻེན ཨཀྑཱཡིཏེ ཙ པཱརཱཛིཀཱཔཏྟིཝཙནཏོ (པཱརཱ. ༦༡) པན ནཊྛཀཱཡཔྤསཱདེཔི ཨིཏྠིནིམིཏྟེ པཝེསེནྟསྶ པཱརཱཛིཀཱཔཏྟིཡེཝ. ནིམིཏྟསཎྛཱནམཏྟམྤི ཨནཝསེསེཏྭཱཏི ནིམིཏྟཱཀཱརེན ཋིཏཾ ཡཐཱཝུཏྟནིམིཏྟམཾསཱདིམྤི ཨནཝསེསེཏྭཱ. ཝཎསངྑེཔཝསེནཱཏི ཝཎསངྒཧཝསེན. ཝཎེ ཐུལླཙྩཡཉྩ ‘‘ཨམགྒེན ཨམགྒཾ པཝེསེཏི, ཨཱཔཏྟི ཐུལླཙྩཡསྶཱ’’ཏི (པཱརཱ. ༦༦) ཨིམསྶ སུཏྟསྶ ཝསེན ཝེདིཏབྦཾ. ཏསྨིཉྷི སུཏྟེ དྭཱིསུ སམྦྷིནྣཝཎེསུ ཨེཀེན ཝཎེན པཝེསེཏྭཱ དུཏིཡེན ནཱིཧརནྟསྶ ཐུལླཙྩཡཾ ཝུཏྟཾ. ཝུཏྟཉྷི སམནྟཔཱསཱདིཀཱཡཾ ‘‘ཨིམསྶ སཏྟསྶ ཨནུལོམཝསེན སབྦཏྠ ཝཎསངྑེཔེ ཐུལླཙྩཡཾ ཝེདིཏབྦ’’ནྟི (པཱརཱ. ཨཊྛ. ༡.༦༦). མནུསྶཱནཾ པན ཨཀྑིཨཱདཡོཔི ཝཎསངྒཧཾ གཙྪནྟཱིཏི ཝཎེན ཨེཀཔརིཙྪེདཾ ཀཏྭཱ དསྶེནྟོ ‘‘ཏཐཱ’’ཏིཨཱདིམཱཧ. ཏེསཾ ཝཎསངྒཧོ ‘‘ནཝདྭཱརོ མཧཱཝཎོ’’ཏི (མི. པ. ༢.༦.༡) ཨེཝམཱདིསུཏྟཱནུསཱརེན ཝེདིཏབྦོ. ཏཏྠ མནུསྶཱནནྟི ཨིཏྠིཔུརིསཔཎྜཀཨུབྷཏོབྱཉྫནཀཝསེན ཙཏུབྦིདྷཱནཾ མནུསྶཱནཾ. ཝཏྠིཀོསེསཱུཏི ¶ ཝཏྠིཔུཊེསུ པུརིསཱནཾ ཨངྒཛཱཏཀོསེསུ. ཧཏྠིཨསྶཱདཱིནཉྩ ཏིརཙྪཱནཱནནྟི ཧཏྠིཨསྶགོཎགདྲབྷཨོཊྛམཧིཾསཱདཱིནཾ ཏིརཙྪཱནགཏཱནཾ. ཏིརཙྪཱནཱནཾ པནཱཏི སབྦེསམྤི ཏིརཙྪཱནགཏཱནཾ. སབྦེསནྟི ཡཐཱཝུཏྟམནུསྶཱདཱིནཾ སབྦེསཾ.

ཨེཝཾ ཛཱིཝམཱནཀསརཱིརེ ལབྦྷམཱནཾ ཨཱཔཏྟིཝིསེསཾ དསྶེཏྭཱ ཨིདཱནི མཏསརཱིརེ ལབྦྷམཱནཾ ཨཱཔཏྟིཝིསེསཾ དསྶེཏུཾ ‘‘མཏསརཱིརེ’’ཏིཨཱདིམཱཧ. ཝཙྩམགྒཔསྶཱཝམགྒམུཁམགྒཱནཾ ཙཏཱུསུ ཀོཊྛཱསེསུ དྭེ ཀོཊྛཱསེ ཋཔེཏྭཱ ཡདཱ ཨཔརེ དྭེ ཀོཊྛཱསཱ ཁཱདིཏཱ, ཏདཱ ཨུཔཌྜྷཀྑཱཡིཏཾ ནཱམ ཧོཏི. ན ཀུཐིཏཾ ཧོཏཱིཏི ཨུདྡྷུམཱཏཀཱདིབྷཱཝེན ཀུཐིཏཾ ན ཧོཏི, ཨལླནྟི ཨཏྠོ. ཡདཱ པན སརཱིརཾ ཨུདྡྷུམཱཏཀཾ ཧོཏི ཀུཐིཏཾ ནཱིལམཀྑིཀསམཱཀིཎྞཾ ཀིམིཀུལསམཱཀུལཾ ནཝཧི ཝཎམུཁེཧི པགྒལི༹ཏཔུབྦཀུཎཔབྷཱཝེན ཨུཔགནྟུམྤི ཨསཀྐུཎེཡྻཾ (པཱརཱ. ཨཊྛ. ༡.༥༩-༦༠), ཏདཱ པཱརཱཛིཀཝཏྠུཉྩ ཐུལླཙྩཡཝཏྠུཉྩ ཝིཛཧཏི, དུཀྐཊཝཏྠུམེཝ ཧོཏཱིཏི ཨཱཧ ‘‘ཀུཐིཏེ དུཀྐཊ’’ནྟི. ཀུཐིཏེཏི ཨུདྡྷུམཱཏཀབྷཱཝཔྤཏྟེ. ཨཱིདིསེ ཧི སརཱིརེ ཡཏྠ ཀཏྠཙི ཨུཔཀྐམཏོ དུཀྐཊཾ. ཏཐཱ ཝཊྚཀཏེ མུཁེ ཨཙྪུཔནྟཾ ཨངྒཛཱཏཾ པཝེསེནྟསྶཱཏི (པཱརཱ. ཨཊྛ. ༡.༧༣) ཝིཝཊྚེ མུཁེ ཙཏྟཱརི པསྶཱནི, ཏཱལུཀཉྩ ཨཔྥུསནྟཾ ཨངྒཛཱཏཾ པཝེསེནྟསྶ དུཀྐཊནྟི ཨཏྠོ. སཙེ པན ཧེཊྛཱ ཝཱ ཨུཔརི ཝཱ ཨུབྷཡཔསྶེཧི ཝཱ ཚུཔནྟཾ པཝེསེཏི, པཱརཱཛིཀཾ. ཙཏཱུཧི པསྶེཧི ཨཙྪུཔནྟཾ པཝེསེཏྭཱ ཨབྦྷནྟརེ ཏཱལུཀཾ ཚུཔཏི, པཱརཱཛིཀམེཝ. བཧི ནིཀྑནྟཛིཝ྄ཧཱཡ ཝཱ དནྟེསུ ཝཱ ཨངྒཛཱཏཾ པཝེསེནྟསྶ ཐུལླཙྩཡནྟི སམྦནྡྷོ. ཛཱིཝམཱནཀསརཱིརེཔི བཧི ནིཀྑནྟཛིཝ྄ཧཱཡ ཐུལླཙྩཡམེཝ. ཡདི པན བཧི ཛིཝ྄ཧཱཡ པལིཝེཋེཏྭཱ ཨནྟོམུཁཾ པཝེསེཏི, པཱརཱཛིཀམེཝ. ཡདི པན དནྟཱ སུཕུསིཏཱ, ཨནྟོམུཁེ ཨོཀཱསོ ¶ ནཏྠི, དནྟཱ ཙ བཧི ཨོཊྛམཾསེན པཊིཙྪནྣཱ, ཏཏྠ ཝཱཏེན ཨསམྥུཊྛཾ ཨལློཀཱསཾ ཏིལཕལམཏྟམྤི པཝེསེནྟསྶ པཱརཱཛིཀམེཝ. ཨུཔྤཱཊིཏེ པན ཨོཊྛམཾསེ དནྟེསུཡེཝ ཨུཔཀྐམནྟསྶ ཐུལླཙྩཡཾ. ཡོཔི དནྟོ བཧི ནིཀྑམནྟོ ཏིཊྛཏི, ན སཀྐཱ ཨོཊྛེཧི པིདཧིཏུཾ, ཏཏྠཱཔི ཨེསེཝ ནཡོ.

ཝེདནཱཡ ཨཊྚོ པཱིལི༹ཏོ ཝེདནཱཊྚོ. ཨུམྨཏྟཀོཏི ཙེཏྠ པིཏྟུམྨཏྟཀོ ཨདྷིཔྤེཏོཏི ཨཱཧ ‘‘ཡོ པིཏྟཝསེནཱ’’ཏིཨཱདི. པིཏྟཝསེནཱཏི ¶ བདྡྷཔིཏྟཝསེན. ཏསྨིཉྷི བདྡྷཔིཏྟེ པིཏྟཀོསཏོ ཙལིཏྭཱ བཧི ནིཀྑམནྟེ སཏྟཱ ཨུམྨཏྟཀཱ ཧོནྟི, ཝིཔལླཏྠསཉྙཱ ཧིརོཏྟཔྤཾ ཚཌྜེཏྭཱ ཨསཱརུཔྤཙརིཡཾ ཙརནྟི, ལཧུཀགརུཀཱནི སིཀྑཱཔདཱནི མདྡནྟཱཔི ན ཛཱནནྟི, བྷེསཛྫཀིརིཡཱཡཔི ཨཏེཀིཙྪཱ ཧོནྟི, ཨེཝརཱུཔསྶ ཨུམྨཏྟཀསྶ ཨནཱཔཏྟི. ཨབདྡྷཔིཏྟཾ པན ལོཧིཏཾ ཝིཡ སབྦངྒགཏཾ, ཏམྷི ཀུཔིཏེ སཏྟཱནཾ ཀཎྜུཀཙྪུསརཱིརཀམྤཱདཱིནི ཧོནྟི, ཏཱནི བྷེསཛྫཀིརིཡཱཡ ཝཱུཔསམནྟི. ཏེན ཝུཏྟཾ ‘‘བདྡྷཔིཏྟཝསེནཱ’’ཏི. ཁིཏྟཙིཏྟོ ནཱམ ཝིསྶཊྛཙིཏྟོ ཡཀྑུམྨཏྟཀོ ཝུཙྩཏཱིཏི ཨཱཧ ‘‘ཡཀྑེཧི ཀཏཙིཏྟཝིཀྑེཔོ ཁིཏྟཙིཏྟོ’’ཏི. ཡཀྑཱ ཀིར བྷེརཝཱནི ཨཱརམྨཎཱནི དསྶེཏྭཱ མུཁེན ཧཏྠཾ པཝེསེཏྭཱ, ཧདཡརཱུཔཾ ཝཱ མདྡནྟཱ སཏྟེ ཝིཀྑིཏྟཙིཏྟེ ཝིཔལླཏྠསཉྙེ ཀརོནྟི, ཨེཝརཱུཔསྶ ཁིཏྟཙིཏྟསྶ ཨནཱཔཏྟི. ཏེསཾ པན ཨུབྷིནྣཾ ཨཡཾ ཝིསེསོ – པིཏྟུམྨཏྟཀོ ནིཙྩམེཝ ཨུམྨཏྟཀོ ཧོཏི, པཀཏིསཉྙཾ ན ལབྷཏི. ཡཀྑུམྨཏྟཀོ ཨནྟརནྟརཱ པཀཏིསཉྙཾ པཊིལབྷཏི. ཨིདྷ པན པིཏྟུམྨཏྟཀོ ཝཱ ཧོཏུ, ཡཀྑུམྨཏྟཀོ ཝཱ, ཡོ སབྦསོ མུཊྛསྶཏི ཀིཉྩི ན ཛཱནཱཏི, ཨགྒིམྤི སུཝཎྞམྤི གཱུཐམྤི ཙནྡནམྤི ཨེཀསདིསཾ མདྡནྟོཝ ཝིཙརཏི, ཨེཝརཱུཔསྶ ཨནཱཔཏྟི. ཨནྟརནྟརཱ པཀཏིསཉྙཾ པཊིལབྷིཏྭཱ ཉཏྭཱ ཀརོནྟསྶ པན ཨཱཔཏྟིཡེཝ. ཏེནཱཧ ‘‘དྭིནྣམྤི ཙ ཨེཏེས’’ནྟིཨཱདི.

ཨདྷིམཏྟཝེདནཱཡཱཏི ཨདྷིཀཔྤམཱཎཱཡ དུཀྑཝེདནཱཡ. ཨཱདིཀམྨེ ནིཡུཏྟོ ཨཱདིཀམྨིཀོ, ཡོ ཙ ཨཱདིཀམྨེ ནིཡུཏྟོ, སོ ཏསྨིཾ ཀམྨེ ཨཱདིབྷཱུཏོ ཧོཏཱིཏི ཨཱཧ ‘‘ཡོ’’ཏིཨཱདི. ཨིདྷ པན སུདིནྣཏྠེརོ ཨཱདིཀམྨིཀོ, ཏསྶ ཨནཱཔཏྟི. ཨཝསེསཱནཾ མཀྐཊིསམཎཝཛྫིཔུཏྟཀཱདཱིནཾ ཨཱཔཏྟིཡེཝ. པཊིཔཱདནཾ སམྤཱདནཾ. ཀརོནྟོཡེཝ ཧི ཏཾ ཨཱཔཛྫཏཱིཏི ཀིརིཡཾ. ཨིདཾ (སཱརཏྠ. ཊཱི. ༢.༦༦) པན ཡེབྷུཡྻཝསེན ཝུཏྟཾ མེཐུནདྷམྨེ པརཱུཔཀྐམེ སཏི སཱདིཡནྟསྶ ཨཀིརིཡསམུཊྛཱནབྷཱཝཏོ. མེཐུནཔྤཊིསཾཡུཏྟཱཡ ཧི ཀཱམསཉྙཱཡ ཨབྷཱཝེན མུཙྩནཏོ སཉྙཱཝིམོཀྑཾ. ‘‘ཨནཱཔཏྟི ཨཛཱནནྟསྶ, ཨསཱདིཡནྟསྶཱ’’ཏི (པཱརཱ. ༦༦) ཧི ཝུཏྟཾ. མེཐུནཙིཏྟེནེཝ ནཾ ཨཱཔཛྫཏི, ན ཝིནཱ ཙིཏྟེནཱཏི སཙིཏྟཀཾ. རཱགཝསེནེཝ ཨཱཔཛྫིཏབྦཏོ ལོཀཝཛྫཾ. ཀཱཡདྭཱརེནེཝ སམུཊྛཱནཏོ ཀཱཡཀམྨཾ. ཙིཏྟཾ པནེཏྠ ཨངྒམཏྟཾ ཧོཏི ¶ , ན ཏསྶ ཝསེན ཀམྨབྷཱཝོ ལབྦྷཏི. ལོབྷཙིཏྟེནེཝ ¶ ཨཱཔཛྫིཏབྦཏོ ཨཀུསལཙིཏྟཾ. སུཁསམངྒཱི ཝཱ ཨུཔེཀྑཱསམངྒཱི ཝཱ ཨཱཔཛྫཏཱིཏི དྭིཝེདནཾ. ནནུ སམུཊྛཱནཱདཱིནི ཨཱཔཏྟིཡཱ ཧོནྟི, ན སིཀྑཱཔདསྶ, ཨཐ ཀསྨཱ སིཀྑཱཔདསྶ སམུཊྛཱནཱདཱིནི ཝུཏྟཱནཱིཏི ཨཱཧ ‘‘ཨིམཱནི ཙ སམུཊྛཱནཱདཱིནི ནཱམཱ’’ཏིཨཱདི. ཨཱཔཏྟིཡཱ ཧོནྟཱིཏི ཨཛ྄ཛྷཱཙཱརསྶ ཧོནྟི.

མུནནཏོ ཨནུམུནནཏོ མུཏི, ཉཱཎཾ, ཏཾ ཨེཏསྶ ཨཏྠཱིཏི མུཏིམཱ, ཉཱཎཝཱཏི ཨཏྠོ.

པཋམཔཱརཱཛིཀཝཎྞནཱ ནིཊྛིཏཱ.

༢. དུཏིཡཔཱརཱཛིཀཝཎྞནཱ

ཨེཏྠཱཏི ཨེཏེསུ དྭཱིསུ. ཨེཀཀུཊིཀཱདིབྷེདོ སབྦོཔི གཱམོཏི ཝེདིཏབྦོཏི སམྦནྡྷོ. ཏཏྠ ཨེཀཀུཊིཀཱདིབྷེདོཏི ཡསྨིཾ གཱམེ ཨེཀཱ ཨེཝ ཀུཊི ཨེཀཾ གེཧཾ སེཡྻཐཱཔི མལཡཛནཔདེ, ཨཡཾ ཨེཀཀུཊིཀོ གཱམོ ནཱམ. ཨཱདིསདྡེན ‘‘དྭིཀུཊིཀོཔི གཱམོ, ཏིཀུཊིཀོཔི གཱམོ, ཙཏུཀྐུཊིཀོཔི གཱམོ’’ཏི (པཱརཱ. ༩༢) ཝུཏྟཔྤབྷེདཾ སངྒཎྷཱཏི. ཨབྷིནཝནིཝིཊྛོ ཨེཀཀུཊིཀཱདིགཱམོ པན ཡཱཝ མནུསྶཱ པཝིསིཏྭཱ ཝཱསཾ ན ཀཔྤེནྟི, ཏཱཝ གཱམསངྑཾ ན གཙྪཏི. ཀིཾབྷཱུཏོཏི ཨཱཧ ‘‘པརིཀྑིཏྟོ ཝཱ’’ཏིཨཱདི. ཏཏྠ པརིཀྑིཏྟོ ནཱམ ཨིཊྛཀཔཱཀཱརཾ ཨཱདིཾ ཀཏྭཱ ཨནྟམསོ ཀཎྚཀསཱཁཱཧིཔི པརིཀྑིཏྟོ. ཏབྦིཔརཱིཏོ ཨཔརིཀྑིཏྟོ. ཨམནུསྶོ ནཱམ ཡོ སབྦསོ ཝཱ མནུསྶཱནཾ ཨབྷཱཝེན ཡཀྑཔརིགྒཧབྷཱུཏོ, ཡཏོ ཝཱ མནུསྶཱ ཀེནཙི ཀརཎཱིཡེན པུནཔི ཨཱགནྟུཀཱམཱ ཨེཝ ཨཔཀྐནྟཱ, ཡཏོ པན ནིརཔེཀྑཱ ཧུཏྭཱ པཀྐམནྟི, སོ གཱམསངྑཾ ན གཙྪཏི. ན ཀེཝལཾ ཨེཀཀུཊིཀཱདིབྷེདོཝཱཏི ཨཱཧ ‘‘ཨནྟམསོ’’ཏིཨཱདི. ཡོ ཀོཙི སཏྠོཔཱིཏི ཛངྒྷསཏྠསཀཊསཏྠཱདཱིསུ ཡོ ཀོཙི སཏྠོཔི. ཨིམསྨིཾ སིཀྑཱཔདེ ནིགམནགརཱནི ཝིཡ གཱམགྒཧཎེནེཝ གཱམཱུཔཙཱརོཔི སངྒཧིཏོཏི ཨཱཧ ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི. ཨཉྙཐཱ པན མཱཏིཀཱཡ ཨནཝསེསཏོ ཨཝཧཱརཊྛཱནཔརིགྒཧོ ཀཏོ ནཱམ ན ཧོཏི, ན ཙ བུདྡྷཱ སཱཝསེསཾ པཱརཱཛིཀཾ པཉྙཱཔེནྟི.

ཏཏྠཱཏི ཏེསུ གཱམགཱམཱུཔཙཱརེསུ. དྭཱརེཏི ནིབྦཀོསསྶ ཨུདཀཔཏནཊྛཱནཏོ ཨབྦྷནྟརེ. ཨནྟོགེཧེཏི པམུཁསྶ ཨབྦྷནྟརེ. ཀཏཔརིཀྑེཔོཏི ¶ པཱཀཱརཝཏིཨཱདཱིཧི ཀཏཔརིཀྑེཔོ. སུཔྤཔཏནཱདིཔརིཙྪེདོ པནེཏྠ ཨཔརིཀྑིཏྟགྷརཾ སནྡྷཱཡ ཝུཏྟོ. ན ཀེཝལཾ གྷརསྶ པུརཏོ, ཨཐ ཁོ སམནྟཏོ ཏཏྟཀོཝ པརིཙྪེདོ གྷརཱུཔཙཱརོ ནཱམཱཏི གཧེཏབྦཾ. ‘‘པུརཏོ’’ཏིཨཱདིཀཾ པན ལོཀིཡེཧི ¶ ཏཐཱཀརཎཏོ ཝུཏྟཾ. ཐཱམམཛ྄ཛྷིམསྶཱཏི མཛ྄ཛྷིམཐཱམསྶ, ནེཝ ཨཔྤཐཱམསྶ, ན མཧཱཐཱམསྶཱཏི ཝུཏྟཾ ཧོཏི. ‘‘ཡཐཱ ཏརུཎམནུསྶཱ’’ཏིཨཱདིནཱ ཡཐཱ མཱཏུགཱམོ ཀཱཀེ ཨུཌྜཱཔེནྟོ ཨུཛུཀམེཝ ཧཏྠཾ ཨུཀྑིཔིཏྭཱ ལེཌྜུཾ ཁིཔཏི, ཡཐཱ ཙ ཨུདཀུཀྑེཔེ ཨུདཀཾ ཁིཔནྟི, ཨེཝཾ ཁིཏྟསྶ ལེཌྜུསྶ པཏིཏཊྛཱནཾ པཊིཀྑིཔཏི. པཝཏྟིཏྭཱཏི ལུཋིཏྭཱ, པརིཝཏྟིཏྭཱཏི ཝུཏྟཾ ཧོཏི. ཏསྶ སཙེ དྭེ ཨིནྡཁཱིལཱ ཧོནྟཱིཏི (པཱརཱ. ཨཊྛ. ༡.༩༢) ཏསྶ པརིཀྑིཏྟསྶ གཱམསྶ སཙེ ཨནུརཱདྷཔུརསྶེཝ དྭེ ཨུམྨཱརཱ ཧོནྟི. ཡསྶ པན ཨེཀོ, ཏསྶ གཱམདྭཱརབཱཧཱནཾ ཝེམཛ྄ཛྷེ ཋིཏསྶ ལེཌྜུཔཱཏབྦྷནྟརཾ གཱམཱུཔཙཱརོ ནཱམ. ཡཏྲ པན ཨིནྡཁཱིལོ ནཏྠི, ཏཏྲ གཱམདྭཱརབཱཧཱནཾ ཝེམཛ྄ཛྷཾ. ཡཏྲ དྭཱརབཱཧཱཔི ནཏྠི, ཏཏྠ ཨུབྷོསུ པསྶེསུ ཝཏིཡཱ ཝཱ པཱཀཱརསྶ ཝཱ ཀོཊིཝེམཛ྄ཛྷཾཝ ཨིནྡཁཱིལཊྛཱནིཡཏྟཱ ཨིནྡཁཱིལོཏི གཧེཏབྦཾ. ཡོ པན གཱམོ པུབྦེ མཧཱ ཧུཏྭཱ པཙྪཱ ཀུལེསུ ནཊྛེསུ ཨཔྤཀོ ཧོཏི, སོ གྷརཱུཔཙཱརཏོ ལེཌྜུཔཱཏེནེཝ པརིཙྪིནྡིཏབྦོ. པུརིམཔརིཙྪེདོ པནསྶ པརིཀྑིཏྟསྶཱཔི ཨཔརིཀྑིཏྟསྶཱཔི ཨཔྤམཱཎམེཝཱཏི. ནནུ ཙེཏཾ ཨཔརིཀྑིཏྟསྶ ཨུཔཙཱརདསྶནཾ པདབྷཱཛནེན ཝིརུདྡྷམིཝ དིསྶཏི. ཏཏྠ ཧི ‘‘གཱམཱུཔཙཱརོ ནཱམ པརིཀྑིཏྟསྶ གཱམསྶ ཨིནྡཁཱིལེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ’’ཏི (པཱརཱ. ༩༢) ཝཏྭཱ ‘‘ཨཔརིཀྑིཏྟསྶ གཱམསྶ གྷརཱུཔཙཱརེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ’’ཏི (པཱརཱ. ༩༢) ཨེཏྟཀམེཝ ཝུཏྟཾ, ན པན ཏཾ ལེཌྜུཔཱཏཾ གཱམསངྑེཔཾ ཀཏྭཱ ཏཏོ པརཾ གཱམཱུཔཙཱརོཏི ཝུཏྟོཏི ཨཱཧ ‘‘པདབྷཱཛནེཔི ཧི ཨིམིནཱཝ ནཡེན ཨཏྠོ ཝེདིཏབྦོ’’ཏི.

ཨཡམེཏྠ ཨདྷིཔྤཱཡོ – ཨིདྷ གཱམོ ནཱམ དུཝིདྷོ ཧོཏི པརིཀྑིཏྟོ ཙ ཨཔརིཀྑིཏྟོ ཙ (པཱརཱ. ཨཊྛ. ༡.༩༢). ཏཏྲ པརིཀྑིཏྟསྶ པརིཀྑེཔོཡེཝ པརིཙྪེདོ. ཏསྨཱ ཏསྶ ཝིསུཾ པརིཙྪེདཾ ཨཝཏྭཱ ‘‘གཱམཱུཔཙཱརོ ནཱམ པརིཀྑིཏྟསྶ གཱམསྶ ཨིནྡཁཱིལེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ’’ཏི པཱལི༹ཡཾ ཝུཏྟཾ. ཨཔརིཀྑིཏྟསྶ པན གཱམསྶ གཱམཔརིཙྪེདོ ཝཏྟབྦོ. ཏསྨཱ ཏསྶ ¶ གཱམསྶ གཱམཔརིཙྪེདདསྶནཏྠཾ ‘‘ཨཔརིཀྑིཏྟསྶ གཱམསྶ གྷརཱུཔཙཱརེ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ’’ཏི (པཱརཱ. ༩༢) ཝུཏྟཾ. གཱམཔརིཙྪེདེ ཙ དསྶིཏེ གཱམཱུཔཙཱརལཀྑཎཾ པུབྦེ ཝུཏྟནཡེནེཝ སཀྐཱ ཉཱཏུནྟི པུན ‘‘ཏཏྠ ཋིཏསྶ མཛ྄ཛྷིམསྶ པུརིསསྶ ལེཌྜུཔཱཏོ’’ཏི ན ཝུཏྟཾ, ཨཏྠོ པན ཏཏྠཱཔི ཨཡམེཝ ཡཐཱཝུཏྟོཏི. ཡོ པན གྷརཱུཔཙཱརེ ཋིཏསྶ ལེཌྜུཔཱཏཾཡེཝ ‘‘གཱམཱུཔཙཱརོ’’ཏི ཝདཏི, ཏསྶ གྷརཱུཔཙཱརོ ‘‘གཱམོ’’ཏི ཨཱཔཛྫཏི. ཏཏོ གྷརཾ གྷརཱུཔཙཱརོ, གཱམོ གཱམཱུཔཙཱརོཏི ཨེས ཝིབྷཱགོ སངྐརཱིཡཏི. ཨསཾཀརཏོ ཙེཏྠ ཝིནིཙྪཡོ ཝེདིཏབྦོ. ཏསྨཱ པཱལི༹ཉྩ ཨཊྛཀཐཉྩ སཾསནྡིཏྭཱ ཝུཏྟནཡེནེཝེཏྠ གཱམོ, གཱམཱུཔཙཱརོ ཙ ཝེདིཏབྦོཏི.

ཏཏྠཱཏི ¶ ཏེསུ དྭཱིསུ ཨུཔཙཱརེསུ. ཡྭཱཡཾ ཨུཔཙཱརོ དསྶིཏོཏི སམྦནྡྷོ. ཝིཀཱལེ གཱམཔྤཝེསནཱདཱིསཱུཏི ཨེཏྠ ཨཱདིསདྡེན ཨསཾཀཙྩིཀཱགཱམཔྤཝེསནཾ (པཱཙི. ༡༢༢༥) སངྒཎྷཱཏི. ཡོ པན པརིཀྑིཏྟསྶ གཱམསྶ ཨུཔཙཱརོ ཝུཏྟོ, སོ ན ཀཏྠཙི ཝིནཡཔིཊཀེ ཨུཔཡོགཾ གཏོ. ཀེཝལཾ ཨཔརིཀྑིཏྟསྶ པརིཀྑེཔོཀཱསཏོ ཨཔརོ ཨེཀོ ལེཌྜུཔཱཏོ གཱམཱུཔཙཱརོ ནཱམཱཏི ཉཱཔནཏྠཾ ཝུཏྟོ. ཨེཝཾ ཝུཏྟེ ཧི ཉཱཡཏི ‘‘པརིཀྑིཏྟསྶཱཔི ཙེ གཱམསྶ ཨེཀོ ལེཌྜུཔཱཏོ ཀཔྤིཡབྷཱུམི སམཱནོ ཨུཔཙཱརོཏི ཝུཏྟོ, པགེཝ ཨཔརིཀྑིཏྟསྶ པརིཀྑེཔོཀཱསཏོ ཨེཀོ’’ཏི. ཨིམེསཾ པརིཙྪེདདསྶནཏྠནྟི ཨིམེསཾ གཱམཱརཉྙཱནཾ པརིཙྪེདདསྶནཏྠཾ ཝུཏྟཱ ཨཊྛཀཐཱཡཾ. པཱརཱཛིཀཝཏྠུནྟི པཱདགྒྷནཀཾ. ཨཝཧརནྟསྶཱཏི གཎྷནྟསྶ.

ཨདིནྣནྟི (པཱརཱ. ཨཊྛ. ༩༢) དནྟཔོནསིཀྑཱཔདེ ཨཏྟནོ སནྟཀམྤི ཨཔྤཊིགྒཧིཏཀཾ ཀཔྤིཡཾ ཨཛ྄ཛྷོཧརཎཱིཡཾ ཝུཙྩཏི, ཨིདྷ པན ཡཾ ཀིཉྩི པརཔརིགྒཧིཏཾ སསཱམིཀཾ བྷཎྜཾ, ཏདེཏཾ ཏེཧི སཱམིཀེཧི ཀཱཡེན ཝཱ ཝཱཙཱཡ ཝཱ ན དིནྣནྟི ཨདིནྣཾ. ཨཝཧཱརཔྤཧོནཀམེཝ པན དསྶེཏུཾ ‘‘ཨཉྙསྶ མནུསྶཛཱཏིཀསྶ སནྟཀ’’ནྟི ཝུཏྟཾ. སངྑཱསདྡསྶེཝ ཏ-ཀཱརེན ཝཌྜྷེཏྭཱ ཝུཏྟཏྟཱ ‘‘སངྑཱ སངྑཱཏནྟི ཨཏྠཏོ ཨེཀ’’ནྟི ཝུཏྟཾ. ཏཏྠ ཨཏྠཏོ ཨེཀནྟི པདཏྠཏོ ཨེཀཾ, ཨནཏྠནྟརནྟི ཝུཏྟཾ ཧོཏི. ཀོཊྛཱསསྶེཏཾ ནཱམཾ བྷཱགཏོ ¶ སངྑཱཡཏི ཨུཔཊྛཱཏཱིཏི ཀཏྭཱ. པཔཉྩསངྑཱཏི སཏྟཱནཾ སཾསཱརེ པཔཉྩེནྟི ཙིརཱཡནྟཱིཏི པཔཉྩཱ, ཏཎྷཱམཱནདིཊྛིཡོ, ཡསྶ ཝཱ ཨུཔྤནྣཱ, ཏཾ ‘‘རཏྟོ’’ཏི ཝཱ ‘‘མཏྟོ’’ཏི ཝཱ ‘‘མིཙྪཱདིཊྛིནིཝིཊྛོ’’ཏི ཝཱ པཔཉྩེནྟི བྱཉྫེནྟཱིཏི པཔཉྩཱ, སངྑཱ ཝུཙྩཏི ཀོཊྛཱསོ, པཔཉྩཱཝ སངྑཱ པཔཉྩསངྑཱ, པཔཉྩཀོཊྛཱསཱཏི ཨཏྠོ, ཏཎྷཱམཱནདིཊྛིཡོཏི ཝུཏྟཾ ཧོཏི. ཐེཡྻཙིཏྟསངྑཱཏོཏི ‘‘ཐེཡྻཙིཏྟོ’’ཏི ཀཐིཏོ. ཨེཀོ ཙིཏྟཀོཊྛཱསོཏི ཝིསྶཱསཏཱཝཀཱལིཀཱདིགྒཱཧཝསཔྤཝཏྟཨཐེཡྻཙིཏྟཀོཊྛཱསཏོ ཨཉྙོ ཙིཏྟཀོཊྛཱསོ. ཐེཡྻསངྑཱཏེནཱཏི ཐེཡྻབྷཱུཏཙིཏྟཀོཊྛཱསེན. ཡདི ཨེཝཾ ཨཐ ཀསྨཱ ཨེཏསྶ ཝིབྷངྒེ ‘‘ཐེཡྻཙིཏྟོ ཨཝཧརཎཙིཏྟོ’’ཏི (པཱརཱ. ༩༢) ཝུཏྟནྟི ཨཱཧ ‘‘ཡོ ཙཱ’’ཏིཨཱདི. བྱཉྫནཾ ཨནཱདིཡིཏྭཱཏི བྱཉྫནེ ཨཱདརཾ ཨཀཏྭཱཏི ཨཏྠོ, སདྡཏྠམནཔེཀྑིཏྭཱཏི ཝུཏྟཾ ཧོཏི. ཨཏྠམེཝཱཏི བྷཱཝཏྠམེཝ.

ཏེ པན ཨཝཧཱརཱཏི ཏེ པཉྩཝཱིསཏི ཨཝཧཱརཱ. སཝིཉྙཱཎཀཱཝིཉྙཱཎཀཝསེན ནཱནཱཝིདྷོ བྷཎྜོ ཨེཏསྶ པཉྩཀསྶཱཏི ནཱནཱབྷཎྜཾ, པཉྩནྣཾ ཨཝཧཱརཱནཾ སམཱུཧོ པཉྩཀཾ, པཉྩཔརིམཱཎམསྶཱཏི ཝཱ པཉྩཀཾ, ནཱནཱབྷཎྜམེཝ པཉྩཀཾ ནཱནཱབྷཎྜཔཉྩཀཾ. སཝིཉྙཱཎཀཝསེན ཨེཀོ བྷཎྜོ ཨེཏསྶཱཏི ཨེཀབྷཎྜཾ. སེསཾ ཝུཏྟནཡམེཝ. སཱཧཏྠིཀོཝ པཉྩཀཾ ¶ སཱཧཏྠིཀཔཉྩཀཾ. ཨཱདིཔདཝསེན ཙེཏཾ ནཱམཾ ཀུསལཱདིཏྟིཀསྶ ཀུསལཏྟིཀཝོཧཱརོ ཝིཡ. ཏསྨཱ སཱཧཏྠིཀཱདིཔཉྩཀནྟི ཨཏྠཏོ དཊྛབྦཾ. ཨེས ནཡོ སེསེསུ པཉྩཀདྭཡེསུ. ཨེཏསྶེཝཱཏི ‘‘ཨཱདིཡེཡྻཱ’’ཏི ཨེཏསྶེཝ མཱཏིཀཱཔདསྶ. ཨིམེསཾ པདཱནཾ ཝསེནཱཏི ཨིམེསཾ པཉྩནྣཾ པདཱནཾ ཝསེན. ཨེཏྠ ཙ པཋམཔདཾ ཨབྷིཡོགཝསེན ཝུཏྟཾ, དུཏིཡཔདཾ ཨཉྙེསཾ བྷཎྜཾ ཧརནྟསྶ གཙྪཏོ ཝསེན, ཏཏིཡཔདཾ ཨུཔནིཀྑིཏྟབྷཎྜཝསེན, ཙཏུཏྠཾ སཝིཉྙཱཎཀཝསེན, པཉྩམཾ ཐལེ ནིཀྑིཏྟཱདིཝསེན ཝུཏྟནྟི ཝེདིཏབྦཾ.

ཨིདཱནི ནེསཾ ཨཏྠཡོཛནཾ དསྶེཏུཾ ‘‘ཏཏྠཱ’’ཏིཨཱདིམཱཧ. ཏཏྠ ཏཏྠཱཏི ཏེསུ དྭཱིསུ པཉྩཀེསུ. ཨིཏརནྟི ཨེཀབྷཎྜཔཉྩཀཾ. ཨཱརཱམནྟི པུཔྥཱརཱམཕལཱརཱམཾ. ཨབྷིཡུཉྫཏཱིཏི (པཱརཱ. ཨཊྛ. ༡.༡༠༢) པརསནྟཀཾ ‘‘མམ སནྟཀོཝ ཨཡ’’ནྟི མུསཱ བྷཎིཏྭཱ ཨབྷིཡུཉྫཏི ཙོདེཏི, ཨཊྚཾ ཀརོཏཱིཏི ཨཏྠོ. སམྤཛཱནམུསཱཝཱདེཔི ཨདིནྣཱདཱནསྶ པུབྦཔཡོགཏྟཱ དུཀྐཊནྟི ཨཱཧ ‘‘ཨཱཔཏྟི ¶ དུཀྐཊསྶཱ’’ཏི, དུཀྐཊསངྑཱཏཱ ཨཱཔཏྟི བྷཝེཡྻཱཏི ཨཏྠོ. ཨཐ ཝཱ དུཀྐཊསཉྙིཏསྶ ཝཱིཏིཀྐམསྶ ཨཱཔཛྫནནྟི ཨཏྠོ. ཨེས ནཡོ ‘‘ཨཱཔཏྟི ཐུལླཙྩཡསྶཱ’’ཏིཨཱདཱིསུ. སཱམིཀསྶ ཝིམཏིཾ ཨུཔྤཱདེཏཱིཏི ཝིནིཙྪཡཀུསལཏཱཡ, བལཝནིསྶིཏཱདིབྷཱཝེན ཝཱ ཨཱརཱམསཱམིཀསྶ སཾསཡཾ ཛནེཏི. ཀཐཾ? ཏཉྷི ཏཐཱ ཝིནིཙྪཡཔྤསུཏཾ དིསྭཱ སཱམིཀོ ཙིནྟེཏི ‘‘སཀྑིསྶཱམི ནུ ཁོ ཨཧཾ ཨིམཾ ཨཱརཱམཾ ཨཏྟནོ ཀཱཏུཾ, ན སཀྑིསྶཱམི ནུ ཁོ’’ཏི. ཨེཝཾ ཏསྶ ཝིམཏི ཨུཔྤཛྫམཱནཱ ཏེན ཨུཔྤཱདིཏཱ ཧོཏི. དྷུརཾ ནིཀྑིཔཏཱིཏི ཡདཱ པན སཱམིཀོ ‘‘ཨཡཾ ཐདྡྷོ ཀཀྑལོ༹ ཛཱིཝིཏབྲཧྨཙརིཡནྟརཱཡམྤི མེ ཀརེཡྻ, ཨལཾ དཱནི མཡ྄ཧཾ ཨིམིནཱ ཨཱརཱམེནཱ’’ཏི དྷུརཾ ནིཀྑིཔཏི, ཨུསྶཱཧཾ ཋཔེཏི, ཨཏྟནོ སནྟཀཀརཎེ ནིརུསྶཱཧོ ཧོཏཱིཏི ཨཏྠོ. ཨཱཔཏྟི པཱརཱཛིཀསྶ སཙེ སཡམྤི ཀཏདྷུརནིཀྑེཔོ ཙཱཏི ཨདྷིཔྤཱཡོ. ཨཐ པན སཱམིཀེན དྷུརེ ནིཀྑིཏྟེཔི ཨབྷིཡུཉྫཀོ དྷུརཾ ཨནིཀྑིཔིཏྭཱཝ ‘‘ཨིམཾ སུཊྛུ པཱིལེ༹ཏྭཱ མམ ཨཱཎཱཔཝཏྟིཾ དསྶེཏྭཱ ཀིངྐཱརཔྤཊིསྶཱཝིབྷཱཝེ ཋཔེཏྭཱ དསྶཱམཱི’’ཏི དཱཏབྦབྷཱཝེ སཨུསྶཱཧོ, རཀྑཏི ཏཱཝ. ཨཐཱཔི ཨབྷིཡུཉྫཀོ ཨཙྪིནྡིཏྭཱ ‘‘ན དཱནི ཨིམཾ ཨིམསྶ དསྶཱམཱི’’ཏི དྷུརཾ ནིཀྑིཔཏི, སཱམིཀོ པན དྷུརཾ ན ནིཀྑིཔཏི, པཀྑཾ པརིཡེསཏི, ཀཱལཾ ཨཱགམེཏི, ‘‘ལཛྫིཔརིསཾ ཏཱཝ ལབྷཱམི, པཙྪཱ ཛཱནིསྶཱམཱི’’ཏི གཧཎེཡེཝ སཨུསྶཱཧོ ཧོཏི, རཀྑཏིཡེཝ. ཡདཱ པན ‘‘སོཔི ན དསྶཱམཱི’’ཏི, ‘‘སཱམིཀོཔི ན ལཙྪཱམཱི’’ཏི ཨེཝཾ ཨུབྷོ དྷུརཾ ནིཀྑིཔནྟི, ཏདཱ ཨབྷིཡུཉྫཀསྶ པཱརཱཛིཀཾ.

ཨཉྙསྶ བྷཎྜཾ ཧརནྟོཏི ཝེཏནེན ཝཱ མིཏྟབྷཱཝེན ཝཱ ཨཉྙསྶ བྷཎྜཾ ཧརནྟོ. སཱིསེ བྷཱརནྟི ¶ སཱིསེ ཋིཏབྷཱརཾ. སཱིསསྶ ཏཱཝ པུརིམགལེ གལཝཱཊཀོ, པིཊྛིགལེ ཀེསཉྩི ཀེསནྟེ ཨཱཝཊྚོ ཧོཏི, གལསྶེཝ ཨུབྷོསུ པསྶེསུ ཀེསཉྩི ཀེསཱ ཨོརུཡ྄ཧ ཛཱཡནྟི, ཡེ ‘‘ཀཎྞཙཱུལི༹ཀཱ’’ཏི ཝུཙྩནྟི, ཏེསཾ ཨདྷོབྷཱགོ ཙཱཏི ཨཡཾ ཧེཊྛིམཀོ པརིཙྪེདོ, ཏཏོ ཨུཔརི སཱིསཾ, ཨེཏྠནྟརེ ཋིཏབྷཱརནྟི ཝུཏྟཾ ཧོཏི. ཁནྡྷཾ ཨོརོཔེཏཱིཏི ཨུབྷོསུ པསྶེསུ ཀཎྞཙཱུལི༹ཀཱཧི པཊྛཱཡ ཧེཊྛཱ, ཀཔྤརེཧི པཊྛཱཡ ཨུཔརི, པིཊྛིགལཱཝཊྚཏོ ཙ གལཝཱཊཀཏོ ཙ པཊྛཱཡ ཧེཊྛཱ, པིཊྛིཝེམཛ྄ཛྷཱཝཊྚཏོ ཙ ཨུརཔརིཙྪེདམཛ྄ཛྷེ, ཧདཡཱཝཱཊཀཏོ ཙ པཊྛཱཡ ཨུཔརི ཁནྡྷོ, ཏཾ ཨོརོཔེཏི.

ཨཡཾ ¶ པནེཏྠ ཝིནིཙྪཡོ – ཡོ བྷིཀྑུ ‘‘ཨིདཾ གཧེཏྭཱ ཨེཏྠ ཡཱཧཱི’’ཏི (པཱརཱ. ཨཊྛ. ༡.༡༠༡) སཱམིཀེཧི ཨནཱཎཏྟོ སཡམེཝ ‘‘མཡ྄ཧཾ ཨིདཾ ནཱམ དེཐ, ཨཧཾ ཝོ བྷཎྜཾ ཝཧཱམཱི’’ཏི ཏེསཾ བྷཎྜཾ སཱིསེན ཨཱདཱཡ གཙྪནྟོ ཐེཡྻཙིཏྟེན ཏཾ བྷཎྜཾ ཨཱམསཏི, དུཀྐཊཾ. ཡཐཱཝུཏྟསཱིསཔརིཙྪེདཾ ཨནཏིཀྐམནྟོཝ ཨིཏོ ཙིཏོ ཙ གྷཾསནྟོ སཱརེཏིཔི པཙྩཱསཱརེཏིཔི, ཐུལླཙྩཡཾ. ཁནྡྷཾ ཨོརོཔིཏམཏྟེ ཀིཉྩཱཔི སཱམིཀཱནཾ ‘‘ཝཧཏཱུ’’ཏི ཙིཏྟཾ ཨཏྠི, ཏེཧི པན ཨནཱཎཏྟཏྟཱ པཱརཱཛིཀཾ. ཁནྡྷཾ པན ཨནོརོཔེཏྭཱཔི སཱིསཏོ ཀེསགྒམཏྟམྤི ཙཱཝེནྟསྶ པཱརཱཛིཀཾ. ཡམཀབྷཱརསྶ པན ཨེཀོ བྷཱགོ སཱིསེ པཏིཊྛཱཏི, ཨེཀོ པིཊྛིཡཾ, ཏཏྠ དྭིནྣཾ ཋཱནཱནཾ ཝསེན ཝིནིཙྪཡོ ཝེདིཏབྦོ. ཨཡཾ པན སུདྡྷསཱིསབྷཱརསྶེཝ ཝསེན ཝུཏྟོ. ཡོ ཙཱཡཾ སཱིསབྷཱརེ ཝུཏྟོ, ཁནྡྷབྷཱརཱདཱིསུཔི ཨཡམེཝ ཝིནིཙྪཡོ ཝེདིཏབྦོ.

ཨུཔནིཀྑིཏྟཾ བྷཎྜནྟི སངྒོཔནཏྠཱཡ ཨཏྟནོ ཧཏྠེ པརེཧི ཋཔིཏབྷཎྜཾ. ཨཧཾ ན གཎྷཱམཱིཏི སམྦནྡྷོ. ཨཏཱིཏཏྠེ ཙེཏཾ ཝཏྟམཱནཝཙནཾ, ནཱཧཾ གཧེསིནྟི ཨཏྠོ. དུཀྐཊཾ (པཱརཱ. ཨཊྛ. ༡.༡༡༡) སམྤཛཱནམུསཱཝཱདེཔི ཨདིནྣཱདཱནསྶ པུབྦཔཡོགཏྟཱ. ‘‘ཀིཾ ཏུམྷེ བྷཎཐ, ནེཝིདཾ མཡ྄ཧཾ ཨནུརཱུཔཾ, ན ཏུམྷཱཀ’’ནྟིཨཱདཱིནི ཝདནྟསྶཱཔི དུཀྐཊམེཝ. སཱམིཀསྶ ཝིམཏིཾ ཨུཔྤཱདེཏཱིཏི ‘‘རཧོ མཡཱ ཨེཏསྶ ཧཏྠེ ཋཔིཏཾ, ན ཨཉྙོ ཀོཙི ཛཱནཱཏི, དསྶཏི ནུ ཁོ མེ, ནོ’’ཏི སཱམིཀསྶ ཝིམཏིཾ ཨུཔྤཱདེཏི. དྷུརཾ ནིཀྑིཔཏཱིཏི ཏསྶ ཕརུསཱདིབྷཱཝཾ དིསྭཱ ཨུསྶཱཧཾ ཋཔེཏི. ཏཏྲ སཙཱཡཾ བྷིཀྑུ ‘‘ཀིལམེཏྭཱ ནཾ དསྶཱམཱི’’ཏི དཱནེ སཨུསྶཱཧོ, རཀྑཏི ཏཱཝ. སཙེ སོ དཱནེ ནིརུསྶཱཧོ, བྷཎྜསཱམིཀོ པན གཧཎེ སཨུསྶཱཧོ, རཀྑཏེཝ. ཡདི པན སོ ཏསྨིཾ དཱནེ ནིརུསྶཱཧོ, བྷཎྜསཱམིཀོཔི ‘‘ན མཡ྄ཧཾ དསྶཏཱི’’ཏི དྷུརཾ ནིཀྑིཔཏི, ཨེཝཾ ཨུབྷིནྣཾ དྷུརནིཀྑེཔེན བྷིཀྑུནོ པཱརཱཛིཀཾ. ཡདིཔི མུཁེན ‘‘དསྶཱམཱི’’ཏི ཝདཏི, ཙིཏྟེན པན ཨདཱཏུཀཱམོ, ཨེཝམྤི སཱམིཀསྶ དྷུརནིཀྑེཔེན བྷིཀྑུནོ པཱརཱཛིཀཾ.

སཧབྷཎྜཧཱརཀཾ ¶ ནེསྶཱམཱིཏི ‘‘སཧབྷཎྜཧཱརཀཾ བྷཎྜཾ ནེསྶཱམཱི’’ཏི ཙིནྟེཏྭཱ. པཋམཾ པཱདཾ ཨཏིཀྐཱམེཏཱིཏི བྷཎྜཧཱརཀཾ ཏཛྫེཏྭཱ ཏསྶ གམནཔཐཾ ཝཱརེཏྭཱ ཨཏྟནཱ རུཙིཏམགྒཾ ཨེཀཔཱདཾ ཨཏིཀྐཱམེཏི. ཐལཊྛནྟི (པཱརཱ. ཨཊྛ. ༡.༩༥) ཐལེ ནིཀྑིཏྟཾ, བྷཱུམིཏལེ ཝཱ པཱསཱཎཔབྦཏཏལཱདཱིསུ ཝཱ ཡཏྠ ཀཏྠཙི པཊིཙྪནྣེ ཝཱ ཨཔྤཊིཙྪནྣེ ཝཱ ཋཔིཏནྟི ཨཏྠོ. ཕནྡཱཔེཏི, ཐུལླཙྩཡནྟི ཡོ ཕནྡཱཔེཏི ¶ , ཏསྶ པཡོགེ པཡོགེ ཐུལླཙྩཡཾ, ཨཱམསནེ དུཀྐཊཾ, ཕནྡཱཔནེ ཐུལླཙྩཡཉྩ ཝིསུཾ ཝིསུཾ ཐེཡྻཙིཏྟེན ཨཱམསནཕནྡཱཔནཔཡོགེ ཀརོནྟསྶེཝ ཧོཏི. ‘‘ཨེཀཔཡོགེན གཎྷནྟསྶ པན ཨུདྡྷཱརེ པཱརཱཛིཀམེཝ, ན དུཀྐཊཐུལླཙྩཡཱནཱི’’ཏི ཝདནྟི. ཋཱནཱཏི ཋིཏཊྛཱནཏོ. སཙེ ཏཾ ཐལཊྛཾ རཱསིཀཏཾ ཧོཏི, ཨནྟོཀུམྦྷིཡཾ བྷཱཛནགཏཀརཎམུཊྛིཙྪེདནཝིནིཙྪཡེན ཝིནིཙྪིནིཏབྦཾ. སཙེ ཨེཀཱབདྡྷཾ སིལེསནིཡྻཱསཱདི, པཀྐམདྷུཕཱཎིཏཝིནིཙྪཡེན ཝིནིཙྪིནིཏབྦཾ. སཙེ གརུཀཾ ཧོཏི བྷཱརབདྡྷཾ ལོཧཔིཎྜིཏེལམདྷུགྷཊཱདི ཝཱ, ཀུམྦྷིཡཾ ཋཱནཱཙཱཝནཝིནིཙྪཡེན ཝིནིཙྪིནིཏབྦཾ. སངྑལིཀཱབདྡྷསྶ ཙ ཋཱནབྷེདོ སལླཀྑེཏབྦོ. པཏྠརིཏྭཱ ཋཔིཏཾ པན པཱཝཱརཏྠརཎཀཊསཱརཀཱདིཾ ཨུཛུཀཾ གཧེཏྭཱ ཨཱཀཌྜྷཏི, པཱརིམནྟེ ཨོརིམནྟེན ཕུཊྛོཀཱསཾ ཨཏིཀྐནྟེ པཱརཱཛིཀཾ. ཏཐེཝ གཧེཏྭཱ པརཏོ པེལླཏི, པཱརིམནྟེ ཕུཊྛོཀཱསཾ ཨོརིམནྟེ ཨཏིཀྐནྟེ པཱརཱཛིཀཾ. ཝཱམཏོ ཝཱ དཀྑིཎཏོ ཝཱ ཨཔནཱམེནྟསྶ ཝཱམནྟེན ཝཱ དཀྑིཎནྟེན ཝཱ ཕུཊྛོཀཱསཾ དཀྑིཎནྟེ ཝཱ ཝཱམནྟེ ཝཱ ཨཏིཀྐནྟེ པཱརཱཛིཀཾ. ཝེཋེཏྭཱ ཨུདྡྷརཏི, ཀེསགྒམཏྟཾ ཨཱཀཱསགཏཾ ཀརོནྟསྶ པཱརཱཛིཀཾ.

སཀོ ཧཏྠོ སཧཏྠོ, ཏེན ནིབྦཏྟོ, ཏསྶ ཝཱ སམྦནྡྷཱིཏི སཱཧཏྠིཀོ, ཨཝཧཱརོ. ཨཱཎཱཔནཾ ཨཱཎཏྟི, ཏཱཡ ཨཱཎཏྟིཡཱ ནིབྦཏྟོ ཨཝཧཱརོ ཨཱཎཏྟིཀོ. ནིསྶཛྫནཾ ནིསྶགྒོ, སུངྐགྷཱཏཊྛཱནེ, པརིཀཔྤིཏོཀཱསེ ཙ ཋཏྭཱ བྷཎྜསྶ བཧི ནིཔཱཏནཾ, ནིསྶགྒོཝ ནིསྶགྒིཡོ. ཀིརིཡཱསིདྡྷིཏོ པུརེཏརམེཝ པཱརཱཛིཀཱཔཏྟིསངྑཱཏཾ ཨཏྠཾ སཱདྷེཏཱིཏི ཨཏྠསཱདྷཀོ. དྷུརསྶ ཨཱལཡསངྑཱཏསྶ བྷཱརསྶ ནིཀྑིཔནཾ པརིཙྩཛནཾ ནིརུསྶཱཧབྷཱཝཱཔཛྫནཾ དྷུརནིཀྑེཔོ. ཨིདཱནི བྱཉྫནེ ཨཱདརཾ ཨཀཏྭཱ ཏེསཾ ཨཏྠམཏྟམེཝ དསྶེནྟོ ‘‘ཏཏྠ སཱཧཏྠིཀོ ནཱམཱ’’ཏིཨཱདིམཱཧ. སཧཏྠཱཏི སཧཏྠེན. ཀརཎཏྠེ ཧི ཨིདཾ ནིསྶཀྐཝཙནཾ. ‘‘ཨསུཀསྶ བྷཎྜཾ ཨཝཧརཱ’’ཏི ཨཉྙཾ ཨཱཎཱཔེཏཱིཏི ཨེཏྠཱཔི ཨཱཎཏྟིཀྑཎེ ཨེཝ ཨཱཔཏྟི དཊྛབྦཱ. ཡདི ཨེཝཾ ཨིམསྶ, ཨཏྠསཱདྷཀསྶ ཙ ཀོ ཝིསེསོཏི? ཏཾ ཁཎཾ ཨེཝ གཧཎེ ནིཡུཉྫནཾ ཨཱཎཏྟིཀཔཡོགོ, ཀཱལནྟརེན གཧཎཏྠཾ ནིཡོགོ ཨཏྠསཱདྷཀོཏི (སཱརཏྠ. ཊཱི. ༢.༩༢; ཝི. ཝི. ཊཱི. ༡.༩༢) ཨཡམེཏེསཾ ཝིསེསོཏི. ཏེནེཝཱཧ ‘‘ཨསུཀསྶ བྷཎྜཾ ཡདཱ སཀྐོསི, ཏདཱ ཏཾ ཨཝཧརཱཏི ཨཱཎཱཔེཏཱི’’ཏི.

སུངྐགྷཱཏཔརིཀཔྤིཏོཀཱསཱནནྟི ¶ སུངྐགྷཱཏཉྩ པརིཀཔྤིཏོཀཱསོ ཙ སུངྐགྷཱཏཔརིཀཔྤིཏོཀཱསཱ, ¶ ཏེསཾ. ཏཏྠ སུངྐགྷཱཏནྟི (པཱརཱ. ཨཊྛ. ༡.༡༡༣) རུཀྑཔབྦཏཱདིསཉྙཱཎེན ནིཡམིཏསྶ སུངྐཊྛཱནསྶེཏཾ ཨདྷིཝཙནཾ. ཏཉྷི ཡསྨཱ ཏཏོ རཱཛདེཡྻབྷཱགཾ སུངྐཾ ཨདཏྭཱ ནཱིཧརནྟཱ རཉྙོ སུངྐཾ ཧནནྟི ཝིནཱསེནྟི, ཏསྨཱ ‘‘སུངྐགྷཱཏ’’ནྟི ཝུཏྟཾ.

ཀོཙི པརཔརིཝེཎཱདཱིནི པཝིཊྛོ ཀིཉྩི ལོབྷནེཡྻབྷཎྜཾ དིསྭཱ དྭཱརཔྤམུཁཱདིཝསེན ཡཾ ཋཱནཾ ‘‘སཙེ མཾ ཨེཏྠནྟརེ པསྶིསྶནྟི, དཊྛུཀཱམཏཱཡ གཧེཏྭཱ ཝིཙརནྟོ ཝིཡ དསྶཱམི, ནོ ཙེ པསྶིསྶནྟི, ཧརིསྶཱམཱི’’ཏི པརིཀཔྤེཏི, ཨཡཾ པརིཀཔྤིཏོཀཱསོ. ཨཱཎཏྟིཀྑཎེཡེཝ པཱརཱཛིཀནྟི (པཱརཱ. ཨཊྛ. ༡.༡༢༡) ཨཏྠསཱདྷཀཙེཏནཱཀྑཎེཡེཝ པཱརཱཛིཀཾ. སཙེཔི ཨཝཧཱརཀོ སཊྛིཝསྶཱཏིཀྐམེནཔི ཏཾ བྷཎྜཾ ཨཝཧརཏི, ཨཱཎཱཔཀོ ཙ ཨནྟརཱཡེཝ ཀཱལཾ ཀརོཏི, ཧཱིནཱཡ ཝཱ ཨཱཝཏྟཏི, ཨསྶམཎོཝ ཧུཏྭཱ ཀཱལཾ ཝཱ ཀརིསྶཏི, ཧཱིནཱཡ ཝཱ ཨཱཝཏྟིསྶཏི, ཨཝཧཱརཀསྶ པན ཨཝཧཱརཀྑཎེཡེཝ པཱརཱཛིཀཾ. པཱདགྒྷནཀཏེལནྟི (པཱརཱ. ཨཊྛ. ༡.༩༤) ཨེཏྠ པཱདོ ནཱམ ཀཧཱཔཎསྶ ཙཏུཏྠོ བྷཱགོ, ཏཾ ཨགྒྷཏཱིཏི པཱདགྒྷནཀཾ, པཱདགྒྷནཀཉྩ ཏཾ ཏེལཉྩཱཏི པཱདགྒྷནཀཏེལཾ. ཨུཔཱཧནཱ ཨཱདི ཡེསཾ ཝཏྠཱུནཾ ཏཱནི ཨུཔཱཧནཱདཱིནི. ཨཱདིསདྡེན དུཀཱུལསཱཊཀཙམྨཀྑཎྜཱདཱིནཾ གཧཎཾ. པཀྑིཔཏཱིཏི ཐེཡྻཙིཏྟེན པཀྑིཔཏི. ཏེནཱཧ ‘‘ཧཏྠཏོ མུཏྟམཏྟེཡེཝ པཱརཱཛིཀ’’ནྟི སཙེ པན ཨཏྟནོཔི ཀུམྦྷིཡཾ ཨཉྙོ སཔྤིཾ ཝཱ ཏེལཾ ཝཱ ཨཱཀིརཏི, ཏཏྲ ཙཱཡཾ ཐེཡྻཙིཏྟེན ཏེལཔིཝནཀཾ བྷཎྜཾ པཀྑིཔཏི, ཝུཏྟནཡེནེཝ པཱརཱཛིཀཾ.

ཀཱཡེན ཝཱ ཝཱཙཱཡ ཝཱ པཡུཉྫནཾ ཨཱཎཱཔནཾ པཡོགོ, ཨཱཎཏྟསྶ བྷཎྜགྒཧཎཏོ པུབྦཏྟཱ པུབྦོ, ཨིཏི པུབྦོ ཙ སོ པཡོགོ ཙཱཏི པུབྦཔཡོགོ. པཡོགེན སཧ ཝཏྟམཱནོ ཨཝཧཱརོ སཧཔཡོགོ. སམཾ ཨེཀཱི ཧུཏྭཱ ཝིདཧིཏྭཱ མནྟེཏྭཱ ཨཝཧརཎཾ སཾཝིདྷཱཝཧཱརོ, ཨཉྙམཉྙཾ སཉྙུཔྤཏྟིཡཱ ཀཏཱཝཧཱརོཏི ཝུཏྟཾ ཧོཏི. པུབྦཎྷཱདིཀཱལཔརིཙྪེདེན སཉྫཱནནཾ སངྐེཏོ, ཏསྶ ཀམྨཾ སངྐེཏཀམྨཾ. ནིམིཏྟསྶ ཀམྨཾ ནིམིཏྟཀམྨཾ, སཉྙུཔྤཱདནཏྠཾ ཀསྶཙི ནིམིཏྟསྶ ཀརཎནྟི ཨཏྠོ. ཏཏྠཱཏི ཡཐཱཝུཏྟེསུ པུབྦཔཡོགཱདཱིསུ པཉྩསུ. ཁིལཱདཱིནི སངྐཱམེཏྭཱ ཁེཏྟཱདིགྒཧཎཝསེནཱཏི ཁིལཾ, རཛྫུཾ, ཝཏིཾ, མརིཡཱདཾ ཝཱ པཱཀཱརཾ ¶ ཝཱ སངྐཱམེཏྭཱ ཁེཏྟགྒཧཎཝསེན, ཁིལཾ, རཛྫུཾ, ཝཏིཾ, མརིཡཱདཾ ཝཱ པཱཀཱརཾ ཝཱ སངྐཱམེཏྭཱ ཝཏྠུགྒཧཎཝསེན. སཙེ པན དྭཱིཧི ཁིལེཧི གཧེཏབྦཾ ཧོཏི, པཋམེ ཁིལེ ཐུལླཙྩཡཾ, དུཏིཡེ པཱརཱཛིཀཾ (པཱརཱ. ཨཊྛ. ༡.༡༠༤). སཙེ ཏཱིཧི གཧེཏབྦཾ ཧོཏི, པཋམེ དུཀྐཊཾ, དུཏིཡེ ཐུལླཙྩཡཾ, ཏཏིཡེ པཱརཱཛིཀཾ. ཨེཝཾ བཧུཀེསུཔི ཨཝསཱནེ དྭེ ཋཔེཏྭཱ པུརིམེཧི དུཀྐཊཾ, ཨཝསཱནེ དྭིནྣཾ ཨེཀེན ཐུལླཙྩཡཾ ¶ , ཨིཏརེན པཱརཱཛིཀཾ. རཛྫུཔསཱརཎཱདཱིསུཔི ཨེསེཝ ནཡོ. ཡཾ པན སམནྟཔཱསཱདིཀཱཡཾ ‘‘ཏཉྩ ཁོ སཱམིཀཱནཾ དྷུརནིཀྑེཔེནཱ’’ཏི (པཱརཱ. ཨཊྛ. ༡.༡༠༤) ཝུཏྟཾ, ཏཾ ‘‘ཁེཏྟཾ ཨབྷིཡུཉྫཏི, ཨཱཔཏྟི དུཀྐཊསྶཱ’’ཏིཨཱདི (པཱརཱ. ༡༠༤) -ཨདྷིཀཱརེ ཝུཏྟཏྟཱ ཨབྷིཡོགཝསེན གཧཎཾ སནྡྷཱཡཱཏི དཊྛབྦཾ. སཾཝིདཧིཏྭཱཏི ཨེཏསྶེཝ ཝེཝཙནཾ. སཾམནྟཡིཏྭཱཏི ཨེཀཙྪནྡཏཱཡ ཨེཀཛ྄ཛྷཱསཡཏཱཡ བྷཎིཏྭཱཏི ཨཏྠོ. ཨིམསྨིཾ ཨཝཧཱརེ ཨསམྨོཧཏྠཾ ‘‘ཨེཝཾ སཾཝིདཧིཏྭཱ གཏེསུ ཧཱི’’ཏིཨཱདིམཱཧ. སཉྫཱནནཀམྨནྟི པུབྦཎྷཱདིཀཱལཔརིཙྪེདཝསེན སཉྙཱཎཀརཎཾ. ཏེནཱཧ ‘‘སཙེ ཧཱི’’ཏིཨཱདི.

ཨེཏྠ ཙ ‘‘པུརེབྷཏྟཾ ཨཝཧརཱ’’ཏི ཝུཏྟེ (པཱརཱ. ཨཊྛ. ༡.༡༡༩) ཨཛྫ ཝཱ པུརེབྷཏྟཾ ཨཝཧརཏུ, སྭེ ཝཱ, ཨནཱགཏེ ཝཱ སཾཝཙྪརེ, ནཏྠི ཝིསངྐེཏོ, ཨུབྷིནྣམྤི པཱརཱཛིཀཾ. སཙེ པན ‘‘ཨཛྫ པུརེབྷཏྟཾ ཨཝཧརཱ’’ཏི ཝུཏྟེ སྭེ ཨཝཧརཏི. ‘‘ཨཛྫཱ’’ཏི ནིཡམིཏཾ སངྐེཏཾ ཨཏིཀྐམྨ པཙྪཱ ཨཝཧཊཾ ཧོཏི. སཙེ ‘‘སྭེ པུརེབྷཏྟཾ ཨཝཧརཱ’’ཏི ཝུཏྟེ ཨཛྫ པུརེབྷཏྟཾ ཨཝཧརཏི, ‘‘སྭེ’’ཏི ནིཡམིཏཾ ཏཾ སངྐེཏཾ ཨཔཏྭཱ པུརེ ཨཝཧཊཾ ཧོཏི, ཨེཝཾ ཨཝཧརནྟསྶ ཨཝཧཱརཀསྶེཝ པཱརཱཛིཀཾ, མཱུལཊྛསྶ ཨནཱཔཏྟི. ‘‘སྭེཝ པུརེབྷཏྟ’’ནྟི ཝུཏྟེ ཏདཧེཝ ཝཱ, སྭེ པཙྪཱབྷཏྟཾ ཝཱ ཨཝཧརནྟོཔི ཏཾསངྐེཏཏོ པུརེ ཙ པཙྪཱ ཙ ཨཝཧརཏི. ཡོ པན ཨེཝཾཨཀཏྭཱ ཡཐཱཔརིཙྪིནྣཀཱལམེཝ ཨཝཧརཏི, ཨཡཾ སངྐེཏཏོ ཨཔུརེ ཨཔཙྪཱ ཏཾ ཨཝཧརཏཱིཏི ཝེདིཏབྦོ. ཨེས ནཡོ པཙྪཱབྷཏྟརཏྟིནྡིཝེསུཔི, པུརིམཡཱམམཛ྄ཛྷིམཡཱམཔཙྪིམཡཱམཀཱལ༹ཛུཎྷམཱསཨུཏུསཾཝཙྪརཱདིཝསེནཱཔི ཨེཏྠ སངྐེཏཝིསངྐེཏཏཱ ཝེདིཏབྦཱ. པརབྷཎྜཱཝཧཱརསཉྙུཔྤཱདསྶ ཧེཏུཏྟཱ ཨཀྑིནིཁཎཱདཱིནེཝ ནིམིཏྟནྟི ཨཀྑིནིཁཎཱདིནིམིཏྟཾ, ཏསྶ ཀརཎཾ ཨཀྑིནིཁཎཱདིནིམིཏྟཀརཎཾ. ཨཱདིསདྡེན བྷམུཀུཀྑེཔསཱིསཀམྤནཧཏྠལངྒྷནཔཱཎིཔྤཧཱརཨངྒུལིཕོཊནགཱིཝུནྣཱམནཨུཀྐཱསནཱདིཨནེཀཔྤཀཱརཾ སངྒཎྷཱཏི. སེསམེཏྠ སངྐེཏཀམྨེ ཝུཏྟནཡམེཝ.

ཐེནོ ¶ ཝུཙྩཏི ཙོརོ, ཏསྶ བྷཱཝོ ཐེཡྻཾ, ཏེན ཨཝཧརཎཾ ཐེཡྻཱཝཧཱརོ. པསཡ྄ཧ ཨབྷིབྷཝིཏྭཱ ཨཝཧརཎཾ པསཡ྄ཧཱཝཧཱརོ. ཝཏྠསུཏྟཱདིཀཾ པརིཙྪིཛྫ ཀཔྤནཾ པརིཀཔྤོ, ཏེན ཨཝཧརཎཾ པརིཀཔྤཱཝཧཱརོ. ཏིཎཔཎྞཱདཱིཧི པཊིཙྪནྣསྶ ཨཝཧཱརོ པཊིཙྪནྣཱཝཧཱརོ. ཀུསེན ཨཝཧཱརོ ཀུསཱཝཧཱརོ. ཀཱུཊམཱནཀཱུཊཀཧཱཔཎཱདཱིཧཱིཏི ཨེཏྠ ཀཱུཊམཱནཾ (དཱི. ནི. ཨཊྛ. ༡.༡༠; མ. ནི. ཨཊྛ. ༡.༢༩༣; པུ. པ. ཨཊྛ. ༡༧༩) ནཱམ ཧདཡབྷེདསིཁཱབྷེདརཛྫུབྷེདཝསེན ཏིཝིདྷཾ མཱནཀཱུཊཾ. ཏཏྠ ཧདཡནྟི ནཱལི༹ཨཱདིམཱནབྷཱཛནཱནཾ ཨབྦྷནྟརཾ, ཏསྶ བྷེདོ ཚིདྡཀརཎཾ ཧདཡབྷེདོ, སོ སཔྤིཏེལཱདིམིནནཀཱལེ ལབྦྷཏི. ཏཱནི ཧི གཎྷནྟོ ཧེཊྛཱཚིདྡེན མཱནེན ‘‘སཎིཀཾ ¶ ཨཱསིཉྩཱ’’ཏི ཝཏྭཱ ཨནྟོབྷཱཛནེ བཧུཾ པགྒྷརཱཔེཏྭཱ གཎྷཱཏི, དདནྟོ ཙ ཚིདྡཾ པིདྷཱཡ སཱིགྷཾ པཱུརེཏྭཱ དེཏི.

སིཁཱབྷེདོ པན ཏིལཏཎྜུལཱདིམིནནཀཱལེ ལབྦྷཏི. ཏཱནི ཧི གཎྷནྟོ སཎིཀཾ སིཁཾ ཨུསྶཱཔེཏྭཱ གཎྷཱཏི, དདནྟོ ཝེགེན པཱུརེཏྭཱ སིཁཾ ཚིནྡནྟོ དེཏི.

རཛྫུབྷེདོ ཁེཏྟཝཏྠུམིནནཀཱལེ ལབྦྷཏི. ཁེཏྟཱདིཾ མིནནྟཱ ཧི ཨམཧནྟམྤི མཧནྟཾ ཀཏྭཱ མིནནྟི, མཧནྟམྤི ཨམཧནྟཾ.

ཏམྦཀཾསཱདིམཡོ ཀཱུཊོ ཀཧཱཔཎོ ཀཱུཊཀཧཱཔཎོ. ཨཱདིསདྡེན ཏུལཱཀཱུཊཀཾསཀཱུཊཝཉྩནཱདིཾ སངྒཎྷཱཏི. ཏཏྠ ཏུལཱཀཱུཊཾ རཱུཔཀཱུཊཾ, ཨངྒཀཱུཊཾ, གཧཎཀཱུཊཾ, པཊིཙྪནྣཀཱུཊནྟི ཙཏུབྦིདྷཾ ཧོཏི. ཏཏྠ རཱུཔཀཱུཊཾ ནཱམ དྭེ ཏུལཱ སམརཱུཔཱ ཀཏྭཱ གཎྷནྟོ མཧཏིཡཱ གཎྷཱཏི, དདནྟོ ཁུདྡིཀཱཡ དེཏི. ཨངྒཀཱུཊཾ ནཱམ གཎྷནྟོ པཙྪཱབྷཱགེ ཧཏྠེན ཏུལཾ ཨཀྐམཏི, དདནྟོ པུབྦབྷཱགེ ཨཀྐམཏི. གཧཎཀཱུཊཾ ནཱམ གཎྷནྟོ མཱུལེ རཛྫུཾ གཎྷཱཏི, དདནྟོ ཨགྒེ. པཊིཙྪནྣཀཱུཊཾ ནཱམ ཏུལཾ སུསིརཾ ཀཏྭཱ ཨནྟོ ཨཡཙུཎྞཾ པཀྑིཔིཏྭཱ གཎྷནྟོ ཏཾ པཙྪཱབྷཱགེ ཀརོཏི, དདནྟོ ཨགྒབྷཱགེ.

ཀཾསོ ཝུཙྩཏི སུཝཎྞཔཱཏི, ཏཱཡ ཝཉྩནཾ ཀཾསཀཱུཊཾ. ཀཐཾ? ཨེཀཾ སུཝཎྞཔཱཏིཾ ཀཏྭཱ ཨཉྙཱ དྭེ ཏིསྶོ ལོཧཔཱཏིཡོ སུཝཎྞཝཎྞཱ ཀརོནྟི. ཏཏོ ཛནཔདཾ གནྟྭཱ ཀིཉྩིདེཝ ཨཌྜྷཾ ཀུལཾ པཝིསིཏྭཱ ‘‘སུཝཎྞབྷཱཛནཱནི ཀིཎཱཐཱ’’ཏི ཝཏྭཱ ཨགྒྷེ པུཙྪིཏེ སམགྒྷཏརཾ དཱཏུཀཱམཱ ཧོནྟི ¶ . ཏཏོ ཏེཧི ‘‘ཀཐཾ ཨིམེསཾ སུཝཎྞབྷཱཝོ ཛཱནིཏབྦོ’’ཏི ཝུཏྟེ ‘‘ཝཱིམཾསིཏྭཱ གཎྷཐཱ’’ཏི སུཝཎྞཔཱཏིཾ པཱསཱཎེ གྷཾསིཏྭཱ སབྦཱ པཱཏིཡོ དཏྭཱ གཙྪཏི.

ཝཉྩནཾ ནཱམ ཏེཧི ཏེཧི ཨུཔཱཡེཧི པརེསཾ ཝཉྩནཾ. ཏཏྲིདམེཀཾ ཝཏྠུ – ཨེཀོ ཀིར ལུདྡཀོ མིགཉྩ མིགཔོཏཀཉྩ གཧེཏྭཱ ཨཱགཙྪཏི, ཏམེཀོ དྷུཏྟོ ‘‘ཀིཾ བྷོ མིགོ ཨགྒྷཏི, ཀིཾ མིགཔོཏཀོ’’ཏི ཨཱཧ. ‘‘མིགོ དྭེ ཀཧཱཔཎེ, མིགཔོཏཀོ ཨེཀ’’ནྟི ཝུཏྟེ ཨེཀཾ ཀཧཱཔཎཾ དཏྭཱ མིགཔོཏཀཾ གཧེཏྭཱ ཐོཀཾ གནྟྭཱ ནིཝཏྟེནྟོ ‘‘ན མེ བྷོ མིགཔོཏཀེན ཨཏྠོ, མིགཾ མེ དེཧཱི’’ཏི ཨཱཧ. ‘‘ཏེན ཧི དྭེ ཀཧཱཔཎེ དེཧཱི’’ཏི ཨཱཧ. སོ ཨཱཧ ‘‘ནནུ བྷོ མཡཱ པཋམཾ ཨེཀོ ཀཧཱཔཎོ དིནྣོ’’ཏི. ཨཱམ དིནྣོ, ཨིམཾ མིགཔོཏཀཾ གཎྷ, ཨེཝཾ སོ ཙ ཀཧཱཔཎོ ¶ , ཨཡཉྩ ཀཧཱཔཎགྒྷནཀོ མིགཔོཏཀོཏི དྭེ ཀཧཱཔཎཱ བྷཝིསྶནྟཱིཏི. སོ ‘‘ཀཱརཎཾ ཝདཏཱི’’ཏི སལླཀྑེཏྭཱ མིགཔོཏཀཾ གཧེཏྭཱ མིགཾ ཨདཱསཱིཏི.

པསཡ྄ཧཱཏི (པཱརཱ. ཨཊྛ. ༡.༡༣༨) པརེ ཨབྷིབྷུཡྻ. གཱམཾ གྷཱཏེནྟཱིཏི གཱམགྷཱཏཀཱ, གཱམཾ པཧརནྟཱ ཙོརཱ, ཏེ ཨཱདི ཡེསཾ ཏེ གཱམགྷཱཏཀཱདཡོ. ཨཱདིསདྡེན ཙེཏྠ པནྠགྷཱཏཀཱདཱིནཾ གཧཎཾ. ཨུདྡྷཱརེཡེཝ པཱརཱཛིཀནྟི ‘‘སཙེ སཱཊཀོ བྷཝིསྶཏི, གཎྷིསྶཱམཱི’’ཏི པརིཀཔྤསྶ པཝཏྟཏྟཱ, སཱཊཀསྶ ཙ ཏཏྠ སབྦྷཱཝཏོ. པདཝཱརེན ཀཱརེཏབྦོཏི བྷཱུམིཡཾ ཨནིཀྑིཔིཏྭཱཝ ཝཱིམཾསིཏཏྟཱ ཝུཏྟཾ. བྷཎྜདེཡྻནྟི ཡཾ པརསྶ ནཊྛཾ, ཏསྶ མཱུལཾ ཝཱ ཏདེཝ ཝཱ བྷཎྜཾ དཱཏབྦནྟི ཨཏྠོ.

ཏསྶཱཏི ཡོ ཨེཝཾ པརིཀཔྤེཏི, ཏསྶ. ཨིམསྶ ‘‘ཨཝཧཱརོ ཧོཏཱི’’ཏི ཨིམིནཱ སམྦནྡྷོ.

པརེསནྟི ཀཱིལ༹ནྟཱནཾ, པཝིསནྟཱནཾ ཝཱ པརེསཾ མནུསྶཱནཾ. ‘‘པཙྪཱ གཎྷིསྶཱམཱི’’ཏི པཾསུནཱ ཝཱ པཎྞེན ཝཱ པཊིཙྪཱདེཏཱིཏི ‘‘སཙེ ཨིདཱནེཝ ཨོནམིཏྭཱ གཎྷིསྶཱམི, ‘ཀིཾ སམཎོ གཎྷཱཏཱི’ཏི མཾ ཛཱནིཏྭཱ ཝིཧེཋེཡྻུཾ པཙྪཱ གཎྷིསྶཱམཱི’’ཏི པཾསུནཱ ཝཱ པཎྞེན ཝཱ པཊིཙྪཱདེཏི. ཨུདྡྷཱརོ ནཏྠཱིཏི ཋཱནཱཙཱཝནཾ ནཏྠཱིཏི ཨཏྠོ. སཱམིཀཱཏི ཨནྟཱགཱམཾ པཝིསིཏུཀཱམཱ བྷཎྜསཱམིཀཱ མནུསྶཱ. ཨུདྡྷཱརེཏི ཨུདྡྷརཎེ, ཋཱནཱཙཱཝནེཏི ཨཏྠོ ¶ . ཋཱནཱཙཱཝནཉྩེཏྠ ཧེཊྛཱ ཝུཏྟནཡཱནུསཱརེན ཝེདིཏབྦཾ. པཝེསེཏཱིཏི ཋཱནཱཙཱཝནཝསེན པཝེསེཏི, ཧེཊྛིམནྟེན ཕུཊྛོཀཱསཾ ཀེསགྒམཏྟམྤི ཨུཔརིམནྟེན ཨཏིཀྐཱམེནྟོ པཝེསེཏཱིཏི ཨཏྠོ.

སམགྒྷཏརནྟི ཨཔྤགྒྷཏརཾ. ཨུདྡྷཊམཏྟེ ཨཝཧཱརོཏི སཀབྷཱཝཔྤཡོགསྶ ནིཊྛཱཔིཏཏྟཱ, ན ཨཏྠསཱདྷཀཝསེན. ཨུདྡྷཱརེ རཀྑཏི ཨཏྟནོ ཀོཊྛཱསེ པཱཏེཏུཀཱམཏཱཡ ཨུདྡྷཊཏྟཱ. ཨེསེཝ ནཡོ པཱཏནེཔི རཀྑཏཱིཏི ཨེཏྠཱཔི. ‘‘ཨུདྡྷཱརེཡེཝ རཀྑཏཱི’’ཏི ཨིམིནཱཝ པཱཏནེ ན རཀྑཏཱིཏི ཨཏྠེ སིདྡྷེཔི ཨཏྠསཱདྷཀཝསེན ཨཏྠཾ དསྶེཏུཾ ‘‘ཏཾ ཨུདྡྷརིཏྭཱ’’ཏིཨཱདི ཝུཏྟཾ. སཙེ པན དྭཱིསུཔི ཀོཊྛཱསེསུ པཏིཏདཎྜཀེ ཨདསྶནཾ གམེཏི (པཱརཱ. ཨཊྛ. ༡.༡༣༨), ཏཏོ ཨཝསེསབྷིཀྑཱུསུ གཏེསུ ཨིཏརོ ‘‘མཡ྄ཧཾ, བྷནྟེ, དཎྜཀོ ན པཉྙཱཡཏཱི’’ཏི, ‘‘མཡ྄ཧམྤི, ཨཱཝུསོ, ན པཉྙཱཡཏཱི’’ཏི, ‘‘ཀཏམོ པན, བྷནྟེ, མཡ྄ཧཾ བྷཱགོ’’ཏི. ‘‘ཨཡཾ ཏུཡ྄ཧཾ བྷཱགོ’’ཏི ཨཏྟནོ བྷཱགཾ དསྶེཏི. ཏསྨིཾ ཝིཝདིཏྭཱ ཝཱ ཨཝིཝདིཏྭཱ ཝཱ ཏཾ གཎྷིཏྭཱ གཏེ ཨིཏརོ ཏསྶ བྷཱགཾ ཨུདྡྷརཏི, ཨུདྡྷཱརེ ¶ པཱརཱཛིཀཾ. སཙེཔི ཏེན ‘‘ཨཧཾ མམ བྷཱགཾ ཏུཡ྄ཧཾ ན དེམི, ཏྭཾ པན ཨཏྟནོ བྷཱགཾ ཉཏྭཱ གཎྷཱ’’ཏི ཝུཏྟེཔི ‘‘ནཱཡཾ མམཱ’’ཏི ཛཱནནྟོཔི ཏསྶེཝ བྷཱགཾ གཎྷཱཏི, ཨུདྡྷཱརེ པཱརཱཛིཀཾ. སཙེ པན ཨིཏརོ ‘‘ཨཡཾ ཏུཡ྄ཧཾ བྷཱགོ, ཨཡཾ མཡ྄ཧཾ བྷཱགོཏི ཀིཾ ཨིམིནཱ ཝིཝཱདེནཱ’’ཏི ཙིནྟེཏྭཱ ‘‘མཡ྄ཧཾ ཝཱ པཏྟོ ཧོཏུ, ཏུམྷཱཀཾ ཝཱ, ཡོ ཝརབྷཱགོ, ཏཾ ཏུམྷེ གཎྷཐཱ’’ཏི ཝདཏི, དིནྣཀཾ ནཱམ གཧིཏཾ ཧོཏི, ནཏྠེཏྠ ཨཝཧཱརོ. སཙེ སོ ཝིཝཱདབྷཱིརུཀོ བྷིཀྑུ ‘‘ཡཾ ཏུཡ྄ཧཾ རུཙྩཏི, ཏཾ གཎྷཱ’’ཏི ཝུཏྟོ ཨཏྟནོ པཏྟཾ ཝརབྷཱགཾ ཋཔེཏྭཱ ལཱམཀཾཡེཝ གཧེཏྭཱ གཙྪཏི, ཏཏོ ཨིཏརསྶ ཝིཙིནིཏཱཝསེསཾ གཎྷནྟསྶཱཔི ཨཝཧཱརོ ནཏྠེཝ. ཨེཝམིམཱནི པཉྩ པཉྩཀཱནི སམོདྷཱནེཏྭཱ ཨིམེ པཉྩཝཱིསཏི ཨཝཧཱརཱ ཝེདིཏབྦཱ. ནིཊྛིཏོ ‘‘ཨཱདིཡེཡྻཱ’’ཏི ཨིམསྶ པདསྶ ཝིནིཙྪཡོ. ཏེནཱཧ ‘‘ཨིཏི ཡཾ ཝུཏྟཾ…པེ… ཡསྶཏྠོ པཀཱསིཏོ ཧོཏཱི’’ཏི.

རཱཛཱནོཏི ཀིཉྩཱཔི ཨཝིསེསེན ཝུཏྟཾ, ཨཔརཱདྷཱནུརཱུཔཾ པན ཚེཛྫབྷེཛྫཱནུསཱསཀོ པམཱཎབྷཱུཏོཝ ཨིདྷཱདྷིཔྤེཏོཏི ཨཱཧ ‘‘རཱཛཱནོཏི ཨིདཾ བིམྦིསཱརཾཡེཝ སནྡྷཱཡ ཝུཏྟ’’ནྟི. སོ ཧི དྷམྨིཀརཱཛཏྟཱ ཡཐཱཔཝེཎིཡཱཝ ཀརོཏི. ཨཉྙེ པན ཀཱཀཎིཀམཏྟསྶཔི སཱིསཾ ཚིནྡེཡྻུཾ ¶ , བཧུཀསྶཱཔི ན ཝཱ ཀིཉྩི ཀརེཡྻུཾ. ཏེནཱཧ ‘‘ཨཉྙེ པནཱ’’ཏིཨཱདི. ཧནནཾ ནཱམ པོཐནཉྩེཝ ཚེདནཉྩཱཏི ཨཱཧ ‘‘ཧཏྠཱདཱིཧི ཝཱ’’ཏིཨཱདི. ཨཱདིསདྡེན པཱདཀསཱཝེཏྟཨཌྜྷདཎྜཀཱནཾ གཧཎཾ. རཛྫུབནྡྷནཱདཱིཧཱིཏི ཨཱདིསདྡེན ཨནྡུབནྡྷནསངྑལིཀཱབནྡྷནགྷརབནྡྷནནགརབནྡྷནཔུརིསགུཏྟཱིནཾ གཧཎཾ. ནཱིཧརེཡྻུནྟི རཊྛཏོ ནིཀྑཱམེཡྻུཾ. ཙོརོསི…པེ… ཐེནོསཱིཏི ཨེཏྠ ‘‘པརིབྷཱསེཡྻུ’’ནྟི པདཾ ཨཛ྄ཛྷཱཧརིཏབྦཾ ཨཱུནཏྟཱ པདཔྤཡོགསྶ. ཏེནཱཧ ‘‘ཨིམེཧི ཝཙནེཧི པརིབྷཱསེཡྻུ’’ནྟི. ཡཐཱརཱུཔཾ པན ཡསྨཱ པཱདཏོ པཊྛཱཡ ཧོཏི, ཏསྨཱ ‘‘པཱདསྶ ཝཱ པཱདཱརཧསྶ ཝཱ’’ཏི ཨཱཧ. པོརཱཎཀསྶ ཀཧཱཔཎསྶ ཙཏུཏྠོ བྷཱགོ པཱདོ, པཱདཾ ཨརཧཏཱིཏི པཱདཱརཧོ, ཏསྶ པཱདསྶ ཝཱ པཱདཱརཧསྶ ཝཱ. ཨེཏྠ ཙ པཱདེན ཀཧཱཔཎསྶ ཙཏུཏྠབྷཱགཾ ཨཀཔྤིཡབྷཎྜམེཝ དསྶེཏི, པཱདཱརཧེན པཱདགྒྷནཀཾ ཀཔྤིཡབྷཎྜཾ. ཨེཏྟཱཝཏཱ ཧེཊྛིམནྟདསྶནེན སབྦཱཀཱརེན དུཏིཡཔཱརཱཛིཀཔྤཧོནཀཝཏྠུ དསྶིཏཾ ཧོཏཱིཏི དཊྛབྦཾ. པོརཱཎཀསྶཱཏི (སཱརཏྠ. ཊཱི. ༢.༨༨; ཝི. ཝི. ཊཱི. ༡.༨༨) པོརཱཎསཏྠཱནུརཱུཔཾ ཨུཔྤཱདིཏསྶ ལཀྑཎསམྤནྣསྶ ནཱིལཀཧཱཔཎསདིསསྶ ཀཧཱཔཎསྶ. ཨེཏེན རུདྲདཱམཀཱདཱིནི པཊིཀྑིཔཏི.

ཨེཝཾ ཨསཱདྷཱརཎཝིནིཙྪཡཾ དསྶེཏྭཱ ཨིདཱནི སཱདྷཱརཎཝིནིཙྪཡཾ དསྶེཏུཾ ‘‘རཱཛགཧེ’’ཏིཨཱདིམཱཧ. རཉྙོཏི བིམྦིསཱརརཉྙོ. མཱསཀོ ནཱམ པོརཱཎཀསྶ ཀཧཱཔཎསྶ ཝཱིསཏིམོ བྷཱགོ. ཡོ ལོཀེ ‘‘མཉྫེཊྛཱི’’ཏིཔི ཝུཙྩཏི. ཨིདཱནི ཨིམསྨིཾ ཨདིནྣཱདཱནེ ཝིནིཙྪཡཾ དསྶེཏུཾ ‘‘སབྦཏྠཱ’’ཏིཨཱདི ཝུཏྟཾ. སབྦཏྠཱཏི ཨཱུནམཱསཀཱཏིརེཀམཱསཀཔཉྩམཱསཀེསུ. པརིཧཱིནཱཔརིཧཱིནཝསེནཱཏི ཨགྒྷསྶ པརིཧཱིནཱཔརིཧཱིནཝསེན. ཨཡམེཏྠ སངྑེཔོ ¶ , ཝིཏྠཱརོ པན ཨེཝཾ ཝེདིཏབྦོ – ཨིདཉྷི ཨདིནྣཱདཱནཾ ཝིནིཙྪིནནྟེན ཨོཏིཎྞེ ཝཏྠུསྨིཾ སཧསཱ ཨཝིནིཙྪིནིཏྭཱ པཉྩ ཋཱནཱནི ཨོལོཀེཏབྦཱནི. ཡཱནི སནྡྷཱཡ པོརཱཎཱ ཨཱཧུ –

‘‘ཝཏྠུཾ ཀཱལཉྩ དེསཉྩ, ཨགྒྷཾ པརིབྷོགཔཉྩམཾ;

ཏུལཡིཏྭཱ པཉྩཋཱནཱནི, དྷཱརེཡྻཏྠཾ ཝིཙཀྑཎོ’’ཏི. (པཱརཱ. ཨཊྛ. ༡.༩༢);

ཏཏྠ ཙ ཝཏྠཱུཏི བྷཎྜཾ. ཨཝཧཱརཀེན ཧི ‘‘མཡཱ ཨིདཾ ནཱམ ཨཝཧཊ’’ནྟི ཝུཏྟེཔི ཨཱཔཏྟིཾ ཨནཱརོཔེཏྭཱཝ ཏཾ བྷཎྜཾ སསཱམིཀཾ ཝཱ ཨསཱམིཀཾ ཝཱཏི ¶ ཨུཔཔརིཀྑིཏབྦཾ. སསཱམིཀེཔི སཱམིཀཱནཾ སཱལཡབྷཱཝོ ཝཱ ནིརཱལཡབྷཱཝོ ཝཱ ཨུཔཔརིཀྑིཏབྦོ. སཙེ ཏེསཾ སཱལཡཀཱལེ ཨཝཧཊཾ, བྷཎྜཾ ཨགྒྷཱཔེཏྭཱ ཨཱཔཏྟི ཀཱརེཏབྦཱ. སཙེ ནིརཱལཡཀཱལེ, ན པཱརཱཛིཀེན ཀཱརེཏབྦོ. བྷཎྜསཱམིཀེསུ པན བྷཎྜཾ ཨཱཧརཱཔེནྟེསུ བྷཎྜཾ དཱཏབྦཾ. ཨཡམེཏྠ སཱམཱིཙི. ཨེཝཾ ཝཏྠུ ཨོལོཀེཏབྦཾ.

ཀཱལོཏི ཨཝཧཱརཀཱལོ. ཏདེཝ ཧི བྷཎྜཾ ཀདཱཙི སམགྒྷཾ ཧོཏི, ཀདཱཙི མཧགྒྷཾ. ཏསྨཱ ཏཾ བྷཎྜཾ ཡསྨིཾ ཀཱལེ ཨཝཧཊཾ, ཏསྨིཾཡེཝ ཀཱལེ ཡོ ཏསྶ ཨགྒྷོ, ཏེན ཨགྒྷེན ཨཱཔཏྟི ཀཱརེཏབྦཱ. ཨེཝཾ ཀཱལོ ཨོལོཀེཏབྦོ.

དེསོཏི ཨཝཧཱརདེསོ. ཏཉྷི བྷཎྜཾ ཡསྨིཾ དེསེ ཨཝཧཊཾ, ཏསྨིཾཡེཝ དེསེ ཡོ ཏསྶ ཨགྒྷོ, ཏེན ཨགྒྷེན ཨཱཔཏྟི ཀཱརེཏབྦཱ. བྷཎྜུཊྛཱནདེསེ ཧི བྷཎྜཾ སམགྒྷཾ ཧོཏི, ཨཉྙཏྠ མཧགྒྷཾ. ཨེཝཾ དེསོ ཨོལོཀེཏབྦོ.

ཨགྒྷོཏི (པཱརཱ. ཨཊྛ. ༡.༩༢) བྷཎྜགྒྷོ. ནཝབྷཎྜསྶ ཧི ཡོ ཨགྒྷོ, སོ པཙྪཱ པརིཧཱཡཏི. ཡཐཱ ནཝདྷོཏོ པཏྟོ ཨཊྛ ཝཱ དས ཝཱ ཨགྒྷཏི, སོ པཙྪཱ བྷིནྣོ ཝཱ ཚིདྡོ ཝཱ ཨཱཎིགཎྛིཀཱཧཏོ ཝཱ ཨཔྤགྒྷོ ཧོཏི, ཏསྨཱ ན སབྦདཱ བྷཎྜཾ པཀཏིཨགྒྷེནེཝ ཀཱཏབྦནྟི. ཨེཝཾ ཨགྒྷོ ཨོལོཀེཏབྦོ.

པརིབྷོགོཏི བྷཎྜསྶ པརིབྷོགོ. པརིབྷོགེནཱཔི ཧི ཝཱསིཨཱདིབྷཎྜསྶ ཨགྒྷོ པརིཧཱཡཏི, ཏསྨཱ ཨེཝཾ ཨུཔཔརིཀྑིཏབྦཾ – སཙེ ཀོཙི ཀསྶཙི པཱདགྒྷནཀཾ ཝཱསིཾ ཧརཏི, ཏཏྲ ¶ ཝཱསིསཱམིཀོ པུཙྪིཏབྦོ ‘‘ཏཡཱ ཨཡཾ ཝཱསི ཀིཏྟཀེན ཀཱིཏཱ’’ཏི. ‘‘པཱདེན, བྷནྟེ’’ཏི. ‘‘ཀིཾ པན ཏེ ཀིཎིཏྭཱཝ ཋཔིཏཱ, ཨུདཱཧུ ཏཾ ཝལཉྫེསཱི’’ཏི? སཙེ ཝདཏི ‘‘ཨེཀདིཝསཾ མེ དནྟཀཊྛཾ ཝཱ རཛནཚལླི ཝཱ པཏྟཔཙནདཱརུ ཝཱ ཚིནྣཾ, གྷཾསིཏྭཱ ཝཱ ནིསིཏཱ’’ཏི. ཨཐསྶ པོརཱཎོ ཨགྒྷོ བྷཊྛོཏི ཝེདིཏབྦོ. ཡཐཱ ཙ ཝཱསིཡཱ, ཨེཝཾ ཨཉྫནིཡཱ ཝཱ ཨཉྫནིསལཱཀཱཡ ཝཱ ཀུཉྩིཀཱཡ ཝཱ པལཱལེན ཝཱ ཐུསེཧི ཝཱ ཨིཊྛཀཙུཎྞེན ཝཱ ཨེཀཝཱརཾ གྷཾསིཏྭཱ དྷོཝནམཏྟེནཱཔི ཨགྒྷོ བྷསྶཏི. ཏིཔུམཎྜལསྶ མཀརདནྟཙྪེདནེནཱཔི པརིམདྡནམཏྟེནཱཔི, ཨུདཀསཱཊིཀཱཡ སཀིཾ ནིཝཱསནཔཱརུཔནེནཱཔི, པརིབྷོགསཱིསེན ¶ ཨཾསེ ཝཱ སཱིསེ ཝཱ ཋཔནམཏྟེནཱཔི, ཏཎྜུལཱདཱིནཾ པཔྥོཊནེནཱཔི ཏཏོ ཨེཀཾ ཝཱ དྭེ ཝཱ ཨཔནཡནེནཔི, ཨནྟམསོ ཨེཀཾ པཱསཱཎསཀྑརཾ ཨུདྡྷརིཏྭཱ ཚཌྜིཏམཏྟེནཱཔི, སཔྤིཏེལཱདཱིནཾ བྷཱཛནནྟརཔརིཝཏྟནེནཔི, ཨནྟམསོ ཏཏོ མཀྑིཀཾ ཝཱ ཀིཔིལླིཀཾ ཝཱ ཨུདྡྷརིཏྭཱ ཚཌྜིཏམཏྟེནཔི, གུལ༹པིཎྜཀསྶ མདྷུརབྷཱཝཛཱནནཏྠཾ ནཁེན ཝིཛ྄ཛྷིཏྭཱ ཨཎུམཏྟཾ གཧིཏམཏྟེནཔི ཨགྒྷོ བྷསྶཏི. ཏསྨཱ ཡཾ ཀིཉྩི པཱདགྒྷནཀཾ ཝུཏྟནཡེནེཝ སཱམིཀེན པརིབྷོགེན ཨཱུནཾ ཀཏཾ ཧོཏི, ན ཏཾ ཨཝཧཱརཀོ བྷིཀྑུ པཱརཱཛིཀེན ཀཱརེཏབྦོཏི. ཨེཝཾ པརིབྷོགོ ཨོལོཀེཏབྦོ.

ཨེཝཾ ཨིམཱནི ཏུལཡིཏྭཱ པཉྩ ཋཱནཱནི དྷཱརེཡྻ ཨཏྠཾ ཝིཙཀྑཎོ ཨཱཔཏྟིཾ ཝཱ ཨནཱཔཏྟིཾ ཝཱ གརུཀཾ ཝཱ ལཧུཀཾ ཝཱ ཨཱཔཏྟིཾ ཡཐཱཋཱནེ ཋཔེཡྻཱཏི.

ཨེཝཾ ཏཏྠ ཝིནིཙྪཡཾ དསྶེཏྭཱ ཨིདཱནི ཨནཱཔཏྟིཾ དསྶེནྟོ ‘‘སཀསཉྙིསྶཱ’’ཏིཨཱདིམཱཧ. ཏཏྠ སཀསཉྙིསྶཱཏི ‘‘མཡ྄ཧཾ སནྟཀཾ ཨིདཾ བྷཎྜ’’ནྟི ཨེཝཾ སཀསཉྙིསྶ པརབྷཎྜམྤི གཎྷཏོ གཧཎེ ཨནཱཔཏྟི, གཧིཏཾ པན པུན དཱཏབྦཾ. སཙེ སཱམིཀེཧི ‘‘དེཧཱི’’ཏི ཝུཏྟོ ན དེཏི, ཏེསཾ དྷུརནིཀྑེཔེ པཱརཱཛིཀཾ. ཝིསྶཱསགྒཱཧེཏི (པཱརཱ. ཨཊྛ. ༡.༡༣༡) ཝིསྶཱསགྒཧཎེཔི ཨནཱཔཏྟི. ཝིསྶཱསགྒཱཧལཀྑཎཾ པན ཨིམིནཱ སུཏྟེན ཛཱནིཏབྦཾ –

‘‘ཨནུཛཱནཱམི, བྷིཀྑཝེ, པཉྩཧངྒེཧི སམནྣཱགཏསྶ ཝིསྶཱསཾ གཧེཏུཾ, སནྡིཊྛོ ཙ ཧོཏི, སམྦྷཏྟོ ཙ ཨཱལཔིཏོ ཙ ཛཱིཝཏི ཙ ཛཱནཱཏི ཙ ‘གཧིཏེ མེ ཨཏྟམནོ’’’ཏི (མཧཱཝ. ༣༥༦).

ཏཏྠ སནྡིཊྛོཏི དིཊྛམཏྟཀམིཏྟོ. སམྦྷཏྟོཏི དལ༹ྷམིཏྟོ. ཨཱལཔིཏོཏི ‘‘མམ སནྟཀཾ ཡཾ ཨིཙྪསི, ཏཾ གཎྷེཡྻཱསི, ཨཱཔུཙྪིཏྭཱ གཧཎེ ཀཱརཎཾ ནཏྠཱི’’ཏི ཝུཏྟོ. ཛཱིཝཏཱིཏི ཨནུཊྛཱནསེཡྻཱཡ ¶ སཡིཏོཔི ཡཱཝ ཛཱིཝིཏིནྡྲིཡུཔཙྪེདཾ ན པཱཔུཎཱཏི. གཧིཏེ ཙ ཨཏྟམནོཏི གཧིཏེ ཏུཊྛཙིཏྟོ. ཨེཝརཱུཔསྶ སནྟཀཾ ‘‘གཧིཏེ མེ ཨཏྟམནོ བྷཝིསྶཏཱི’’ཏི ཛཱནནྟེན གཧེཏུཾ ཝཊྚཏི. ཨནཝསེསཔརིཡཱདཱནཝསེན ཙེཏཱནི པཉྩངྒཱནི ཝུཏྟཱནི. ཝིསྶཱསགྒཱཧོ པན ཏཱིཧི ཨངྒེཧི རུཧཏི. ཀཐཾ? སནྡིཊྛོ, ཛཱིཝཏི, གཧིཏེ ཨཏྟམནོ, སམྦྷཏྟོ, ཛཱིཝཏི, གཧིཏེ ཨཏྟམནོ, ཨཱལཔིཏོ, ཛཱིཝཏི, གཧིཏེ ཨཏྟམནོཏི ཨེཝཾ.

ཡོ ¶ པན ཛཱིཝཏི, ན ཙ གཧིཏེ ཨཏྟམནོ ཧོཏི, ཏསྶ སནྟཀཾ ཝིསྶཱསབྷཱཝེན གཧིཏམྤི པུན དཱཏབྦཾ. དདནྟེན ཙ མཏཀདྷནཾ ཏཱཝ ཡེ ཏསྶ དྷནེ ཨིསྶརཱ གཧཊྛཱ ཝཱ པབྦཛིཏཱ ཝཱ, ཏེསཾ དཱཏབྦཾ. ཨནཏྟམནསྶ སནྟཀཾ ཏསྶེཝ དཱཏབྦཾ. ཡོ པན པཋམཾཡེཝ ‘‘སུཊྛུ ཀཏཾ ཏཡཱ མམ སནྟཀཾ གཎྷནྟེནཱ’’ཏི ཝཙཱིབྷེདེན ཝཱ ཙིཏྟུཔྤཱདམཏྟེན ཝཱ ཨནུམོདིཏྭཱ པཙྪཱ ཀེནཙི ཀཱརཎེན ཀུཔིཏོ, སོ པཙྩཱཧརཱཔེཏུཾ ན ལབྷཏི. ཡོ ཙ ཨདཱཏུཀཱམོ, ཙིཏྟེན པན ཨདྷིཝཱསེཏི, ན ཀིཉྩི ཝདཏི, སོཔི པུན པཙྩཱཧརཱཔེཏུཾ ན ལབྷཏི. ཡོ པན ‘‘མཡཱ ཏུམྷཱཀཾ སནྟཀཾ གཧིཏ’’ནྟི ཝཱ ‘‘པརིབྷུཏྟ’’ནྟི ཝཱ ཝུཏྟོ གཧིཏཾ ཝཱ ཧོཏུ, པརིབྷུཏྟཾ ཝཱ, ‘‘མཡཱ པན ཏཾ ཀེནཙིདེཝ ཀརཎཱིཡེན ཋཔིཏཾ, པཱཀཏིཀཾ ཀཱཏུཾ ཝཊྚཏཱི’’ཏི ཝདཏི, ཨཡཾ པཙྩཱཧརཱཔེཏུཾ ལབྷཏི.

ཏཱཝཀཱལིཀེཏི ‘‘པཊིདསྶཱམི པཊིཀརིསྶཱམཱི’’ཏི ཨེཝཾ གཎྷནྟསྶ ཏཱཝཀཱལིཀེཔི གཧཎེ ཨནཱཔཏྟི. གཧིཏཾ པན སཙེ བྷཎྜསཱམིཀོ པུགྒལོ ཝཱ གཎོ ཝཱ ‘‘ཏུཡ྄ཧེཝེཏཾ ཧོཏཱུ’’ཏི ཨནུཛཱནཱཏི, ཨིཙྩེཏཾ ཀུསལཾ. ནོ ཙེ ཨནུཛཱནཱཏི, ཨཱཧརཱཔེནྟེ དཱཏབྦཾ. སངྒྷསནྟཀཾ པན པཊིདཱཏུམེཝ ཝཊྚཏི.

པེཏཔརིགྒཧེཏི ཨེཏྠ པན པེཏྟིཝིསཡེ ཨུཔཔནྣཱཔི, ཀཱལཾ ཀཏྭཱ ཏསྨིཾཡེཝ ཨཏྟབྷཱཝེ ནིབྦཏྟཱཔི, ཙཱཏུམཧཱརཱཛིཀཱདཡོ དེཝཱཔི སབྦེ ‘‘པེཏཱ’’ཏྭེཝ སངྑྱཾ གཏཱ, ཏེསཾ པརིགྒཧེ ཨནཱཔཏྟི. དེཝཏཱཡ པན ཨུདྡིསྶ བལིཀམྨཾ ཀརོནྟེཧི རུཀྑཱདཱིསུ ལགྒིཏསཱཊཀེ ཝཏྟབྦམེཝ ནཏྠི. ཏཉྩ ཁོ ཨཱརཀྑཀེཧི ཨཔརིགྒཧིཏེ, པརིགྒཧིཏཾ པན གཧེཏུཾ ན ཝཊྚཏི (སཱརཏྠ. ཊཱི. ༢.༡༣༡).

ཏིརཙྪཱནགཏཔརིགྒཧེཏི ནཱགསུཔཎྞཱདཱིནཾ ཏིརཙྪཱནགཏཱནཾ པརིགྒཧེ. སཙེཔི ཧི དེཝོ ཝཱ ནཱགསུཔཎྞོ ཝཱ མནུསྶརཱུཔེན ཨཱཔཎཾ པསཱརེཏི, ཏཏོ ཙསྶ སནྟཀཾ ཀོཙི དིབྦཙཀྑུཀོ བྷིཀྑུ ཏཾ ཉཏྭཱ གཧེཏྭཱ གཙྪཏི, ཝཊྚཏི.

པཾསུཀཱུལསཉྙིསྶཱཏི ¶ ‘‘ཨསཱམིཀཾ ཨིདཾ པཾསུཀཱུལ’’ནྟི ཨེཝསཉྙིསྶཱཔི གཧཎེ ཨནཱཔཏྟི. སཙེ པན ཏཾ སསཱམིཀཾ ཧོཏི, ཨཱཧརཱཔེནྟེ དཱཏབྦཾ. ཨུམྨཏྟཀཱདཱིནི པུབྦེ ཝུཏྟཔྤཀཱརཱནེཝ. ཨཱདིཀམྨིཀོ པནེཏྠ དྷནིཡོ ¶ . ཨཝསེསཱནཾ པན རཛཀབྷཎྜིཀཱདིཙོརཱནཾ ཚབྦགྒིཡཱདཱིནཾ ཨཱཔཏྟིཡེཝ.

སཙིཏྟཀེཧི ཏཱིཧི སམུཊྛཱནེཧི ཨིདཾ སམུཊྛཱཏཱིཏི ཨཱཧ ‘‘ཨདིནྣཱདཱནསམུཊྛཱན’’ནྟི. ཏཐཱ ཧི སཱཧཏྠིཀཾ ཀཱཡཙིཏྟཏོ སམུཊྛཱཏི. ཨཱཎཏྟིཀཾ ཝཱཙཱཙིཏྟཏོ སམུཊྛཱཏི. སཱཧཏྟིཀཱཎཏྟིཀཾ ཀཱཡཝཱཙཱཙིཏྟཏོ སམུཊྛཱཏི, ཏཉྩ ཁོ ‘‘བྷཱརིཡམིདཾ, ཏྭཾ ཨེཀཔསྶཾ གཎྷ, ཨཧཾ ཨེཀཔསྶ’’ནྟི སཾཝིདྷཱཡ ཨུབྷཡེསཾ པཡོགེན ཨེཀསྶ ཝཏྠུནོ ཋཱནཱཙཱཝནེ ལབྦྷཏི. ‘‘ཀཱཡཝཙཱིཀམྨ’’ནྟི ཨཝཙནཾ པན ཀཱཡཝཱཙཱནཾ ཨཱིདིསེ ཋཱནེ ཨངྒམཏྟཏྟཱ. ཡཱཡ པན ཙེཏནཱཡ སམུཊྛཱཔིཏོ པཡོགོ སཱཧཏྠིཀོ ཝཱ ཨཱཎཏྟིཀོ ཝཱ པདྷཱནབྷཱཝེན ཋཱནཱཙཱཝནཾ སཱདྷེཏི, ཏསྶཱ ཝསེན ཨཱཔཏྟི ཀཱརེཏབྦཱ. ཨཉྙཐཱ སཱཧཏྠིཀཾ ཝཱ ཨཱཎཏྟིཀསྶ ཨངྒཾ ན ཧོཏི, ཨཱཎཏྟིཀཾ ཝཱ སཱཧཏྠིཀསྶཱཏི ཨིདཾ ཝིརུཛ྄ཛྷཏི. ‘‘ཨདིནྣཾ ཨཱདིཡཱམཱི’’ཏི སཉྙཱཡ ཨབྷཱཝེན མུཙྩནཏོ སཉྙཱཝིམོཀྑཾ. ཀཱཡེན ཀཏཾ ཀམྨཾ ཀཱཡཀམྨཾ, ཀཱཡདྭཱརེན ཀཏནྟི ཨཏྠོ. ཝཙཱིཀམྨནྟི ཨེཏྠཱཔི ཨེསེཝ ནཡོ. ཏུཊྛོ ཝཱ བྷཱིཏོ ཝཱ མཛ྄ཛྷཏྟོ ཝཱ ནཾ ཨཱཔཛྫཏཱིཏི ཏིཝེདནཾ. སེསཾ པཋམསིཀྑཱཔདེ ཝུཏྟནཡེནེཝ ཝེདིཏབྦཾ.

དུཏིཡཔཱརཱཛིཀཝཎྞནཱ ནིཊྛིཏཱ.

༣. ཏཏིཡཔཱརཱཛིཀཝཎྞནཱ

སནྟི སཧཏྠེ ཨུཔསགྒོ. ཏེན སདྡྷིཾ ཨུསྶུཀྐཝཙནམེཏཾ ‘‘སཉྩིཙྩཱ’’ཏི ཨཱཧ ‘‘སཉྩེཏེཏྭཱ’’ཏིཨཱདི. ཨུསྶུཀྐཝཙནནྟི ཨེཏྠ ཨུསྶུཀྐཝཙནཾ (སཱརཏྠ. ཊཱི. ༢.༡༧༢) ནཱམ པུབྦཀཱལཀིརིཡཱཝཙནཾ. ཨཡཉྷི སམཱནཀཏྟུཀེསུ པུབྦཱཔརཀཱལཀིརིཡཱཝཙནེསུ པུབྦཀཱལཀིརིཡཱཝཙནསྶ ནིརུཏྟིཝོཧཱརོ. ཨིདཱནི ‘‘སདྡྷིཾ ཙེཏེཏྭཱ’’ཏི ཨིམིནཱ སངྑེཔེན ཝུཏྟམེཝཏྠཾ པཱཀཊཾ ཀཏྭཱ དསྶེཏུཾ ‘‘པཱཎོ’’ཏིཨཱདིམཱཧ. ཏཏྠ ‘‘པཱཎོ’’ཏི སཉྙཱཡ སདྡྷིཾཡེཝཱཏི ‘‘པཱཎོ’’ཏི སཉྙཾ ཨཝིཛཧིཏྭཱ ཨེཝ, ‘‘པཱཎོ’’ཏི སཉྙུཔྤཏྟིཡཱ ཨནནྟརནྟི ཝུཏྟཾ ཧོཏི. ཨེཝཉྩ ཀཏྭཱ ཀཐཾ ཨེཀཀྑཎེ ཨེཀསྶ ཙིཏྟསྶ ཨུབྷཡཱརམྨཎབྷཱཝོཏི ཨེདིསཱི ཙོདནཱ ཨནཝཀཱསཱཏི དཊྛབྦཾ. ཀེཙི པན ‘‘ཉཱཏཔརིཉྙཱཡ ¶ དིཊྛསབྷཱཝེསུ དྷམྨེསུ ཏཱིརཎཔརིཉྙཱཡ ཏིལཀྑཎཾ ཨཱརོཔེཏྭཱ (སཱརཏྠ. ཊཱི. ༢.༡༧༢) ‘རཱུཔཾ ཨནིཙྩ’ནྟིཨཱདིནཱ སབྷཱཝེན ¶ སདྡྷིཾ ཨེཀཀྑཎེ ཨནིཙྩཱདིལཀྑཎཛཱནནཾ ཝིཡ ‘པཱཎོ’ཏི སཉྙཱཡ སདྡྷིཾཡེཝ ‘ཝདྷཱམི ན’ནྟི ཛཱནཱཏཱི’’ཏི ཝདནྟི. ཨཔརེ པན ཨཱཙརིཡཱ ཏཏྠཱཔི ཨེཝཾ ན ཀཐེནྟི. ཨེཏྠ ཙ མནུསྶཝིགྒཧོ’’ཏི ཨཝཏྭཱ ‘‘པཱཎོ’’ཏི ཝཙནཾ ‘‘མནུསྶོ ཨཡ’’ནྟི ཨཛཱནིཏྭཱ ཀེཝལཾ སཏྟསཉྙཱཡ གྷཱཏེནྟསྶཱཔི པཱརཱཛིཀབྷཱཝདསྶནཏྠཾ ཝུཏྟཾ. ཙེཏེཏྭཱཏི ཙིནྟེཏྭཱ. པཀཔྤེཏྭཱཏི ཨབྷིཝིཙཱརེཏྭཱ, སནྣིཊྛཱནཾ ཀརིཏྭཱཏི ཨཏྠོ.

ཨིདཱནི མནུསྶཨཏྟབྷཱཝཾ ཨཱདིཏོ པཊྛཱཡ དསྶེཏུཾ ‘‘མནུསྶཝིགྒཧ’’ནྟིཨཱདིམཱཧ. ཏཏྠ ཀལལཏོ པཊྛཱཡཱཏི པཊིསནྡྷིཝིཉྙཱཎེན སདྡྷིཾ ཨུཔྤནྣཀལལརཱུཔཏོ པཊྛཱཡ. ཀལལརཱུཔཾ ནཱམ ཨིཏྠིཔུརིསཱནཾ ཀཱཡཝཏྠུབྷཱཝདསཀཝསེན སམཏིཾས རཱུཔཱནི, ནཔུཾསཀཱནཾ ཀཱཡཝཏྠུདསཀཝསེན ཝཱིསཏི. ཏཏྠ ཨིཏྠིཔུརིསཱནཾ ཀལལརཱུཔཾ ཛཱཏིཨུཎྞཱཡ ཨེཀེན ཨཾསུནཱ ཨུདྡྷཊཏེལབིནྡུམཏྟཾ ཧོཏི ཨཙྪཾ ཝིཔྤསནྣཾ. ཝུཏྟཉྷེཏཾ ཨཊྛཀཐཱཡཾ –

‘‘ཏིལཏེལསྶ ཡཐཱ བིནྡུ, སཔྤིམཎྜོ ཨནཱཝིལོ;

ཨེཝཾཝཎྞཔྤཊིབྷཱགཾ, ‘ཀལལ’ནྟི པཝུཙྩཏཱི’’ཏི. (སཾ. ནི. ཨཊྛ. ༡.༡.༢༣༥; ཝིབྷ. ཨཊྛ. ༢༦; པཱརཱ. ཨཊྛ. ༢.༡༧༢);

ཨེཝཾ པརིཏྟཀཾ ཝཏྠུཾ ཨཱདིཾ ཀཏྭཱ ཡཱཝ མརཎཀཱལཱ ཨེཏྠནྟརེ ཨནུཔུབྦེན ཝུཌྜྷིཔྤཏྟོ ཨཏྟབྷཱཝོ མནུསྶཝིགྒཧོ ནཱམཱཏི ཝུཏྟཾ ཧོཏི. ཨིདཉྩ ཡེབྷུཡྻཝསེནེཝ ཝུཏྟཾ. ཨོཔཔཱཏིཀསཾསེདཛཱཔི ཧི མནུསྶཱ པཱརཱཛིཀཝཏྠུཡེཝ. ཀལལཀཱལེཔཱིཏི པཋམསཏྟཱཧེཔི. ཏཏྠ ཧི སནྟཏིཝསེན པཝཏྟམཱནཾ ཀལལསངྑཱཏཾ ཨཏྟབྷཱཝཾ ཛཱིཝིཏཱ ཝོརོཔེཏུཾ སཀྐཱ, ན པན སབྦཔཋམཾ ཀལལརཱུཔཾ. པཊིསནྡྷིཙིཏྟེན ཧི སདྡྷིཾ ཏིཾས ཀམྨཛརཱུཔཱནི ནིབྦཏྟནྟི. ཏེསུ པན ཋིཏེསུཡེཝ སོལ༹ས བྷཝངྒཙིཏྟཱནི ཨུཔྤཛྫིཏྭཱ ནིརུཛ྄ཛྷནྟི. ཨེཏསྨིཾ ཨནྟརེ གཧིཏཔཊིསནྡྷིཀསྶ དཱརཀསྶ ཝཱ མཱཏུཡཱ ཝཱ པནསྶ ཨནྟརཱཡོ ནཏྠི. ཨཡཉྷི མརཎསྶ ཨནོཀཱསོ ནཱམ. བྷེསཛྫསམྤདཱནེནཱཏི གབྦྷཔཱཏནབྷེསཛྫདཱནེན. ཏཏོ ཝཱ ཨུདྡྷམྤཱིཏི ཨབྦུདཔེསིཀཱལཱདཱིསུཔི. ཛཱིཝིཏཱ ཝིཡོཛེཡྻཱཏི སནྟཏིཝིཀོཔནཝསེན ཛཱིཝིཏིནྡྲིཡཏོ ཨཔནེཡྻ.

ཨིམསྶ ¶ པནཏྠསྶཱཏི ‘‘སཉྩིཙྩ མནུསྶཝིགྒཧཾ ཛཱིཝིཏཱ ཝོརོཔེཡྻཱ’’ཏི (པཱརཱ. ༡༧༡) ཨིམསྶ ཨཏྠསྶ. ཨཱཝིབྷཱཝཏྠནྟི པཀཱསནཏྠཾ. པཱཎསྶ ཨཏིཔཱཏོ པཱཎཱཏིཔཱཏོ, པཱཎཝདྷོ པཱཎགྷཱཏོཏི ཝུཏྟཾ ཧོཏི. སཏྟོཏི ཁནྡྷསནྟཱནོ. ཏཏྠ ཧི སཏྟཔཉྙཏྟི. ཛཱིཝིཏིནྡྲིཡནྟི ¶ རཱུཔཱརཱུཔཛཱིཝིཏིནྡྲིཡཾ. རཱུཔཛཱིཝིཏིནྡྲིཡེ ཧི ཝིཀོཔིཏེ ཨིཏརམྤི ཏཾསམྦནྡྷཏཱཡ ཝིནསྶཏཱིཏི. ཡཱཡ ཙེཏནཱཡཱཏི ཏསྨིཾ པཱཎེ པཱཎསཉྙིནོ ཀཱཡཝཙཱིདྭཱརཱནཾ ཨཉྙཏརདྭཱརཔྤཝཏྟཱཡ ཡཱཡ ཙེཏནཱཡ. མནོདྭཱརེ པན པཝཏྟཱཡ ཝདྷཀཙེཏནཱཡ པཱཎཱཏིཔཱཏབྷཱཝོ ནཏྠི. སཱ ཙེཏནཱཏི སཱ ཛཱིཝིཏིནྡྲིཡུཔཙྪེདཀཨུཔཀྐམསམུཊྛཱཔིཀཱ ཀཱཡཝཙཱིདྭཱརཱནཾ ཨཉྙཏརདྭཱརཔྤཝཏྟཱ ཝདྷཀཙེཏནཱ. ཨིདཾ ཝུཏྟཾ ཧོཏི – ཡཱཡ ཙེཏནཱཡ པཝཏྟམཱནསྶ ཛཱིཝིཏིནྡྲིཡསྶ ནིསྶཡབྷཱུཏེསུ མཧཱབྷཱུཏེསུ ཨུཔཀྐམཀརཎཧེཏུ ཏཾམཧཱབྷཱུཏཔཙྩཡཱ ཨུཔྤཛྫནཀམཧཱབྷཱུཏཱ ནུཔྤཛྫིསྶནྟི (སཱརཏྠ. ཊཱི. ༢.༡༧༢), སཱ ཏཱདིསཔཡོགསམུཊྛཱཔིཀཱ ཙེཏནཱ པཱཎཱཏིཔཱཏོ. ལདྡྷཱུཔཀྐམཱནི ཧི མཧཱབྷཱུཏཱནི ཨིཏརབྷཱུཏཱནི ཝིཡ ན ཝིསདཱནཱིཏི སམཱནཛཱཏིཀཱནཾ ཀཱརཎཾ ན ཧོནྟཱིཏི.

པཱཎཱཏིཔཱཏོ ཨསྶ ཨཏྠཱིཏི པཱཎཱཏིཔཱཏཱི. སཾསགྒེ ཨཡམཱིཀཱརོ. ཏེནཱཧ ‘‘ཝུཏྟཙེཏནཱཡ སམངྒིཔུགྒལོ’’ཏི. སཀོ ཧཏྠོ སཧཏྠོ, ཏེན ནིབྦཏྟོ པཡོགོ སཱཧཏྠིཀོ. ནིསྶཛྫནཾ ནིསྶགྒོ, སོཝ ནིསྶགྒིཡོ. ཨེཝཾ ཨཱཎཏྟིཀོ. ཝིཛྫཱམཡོ མནྟཔརིཛཔྤནཡོགོ. ཨིདྡྷིམཡོ ཀམྨཝིཔཱཀཛིདྡྷིམཡོ.

ཨིདཱནི ཡཐཱཝུཏྟེཡེཝ ཚ པཡོགེ ཝིབྷཛིཏྭཱ དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ཚསུ པཡོགེསུ. སཱཧཏྠིཀོཏི ཨེཏྠ ཧཏྠོ ཨུཔལཀྑཎབྷཱཝེན གཧིཏོཏི ཨཱཧ ‘‘ཀཱཡེན ཝཱ’’ཏིཨཱདི. ཏཏྠ ཀཱཡེནཱཏི ཧཏྠེན ཝཱ པཱདེན ཝཱ མུཊྛིནཱ ཝཱ ཛཱཎུནཱ ཝཱ ཡེན ཀེནཙི ཨངྒཔཙྩངྒེན. ཀཱཡེཀདེསོ ཧེཏྠ ཧཏྠཱདིཀཱཡོ ཨཝཡཝེ སམུདཱཡོཔཙཱརོ ཡཐཱ ‘‘གཱམོ དཌྜྷོ’’ཏི. ཀཱཡཔྤཊིབདྡྷེནཱཏི ཀཱཡཏོ ཨམོཙིཏེན ཨསིཨཱདིནཱ པཧརཎེན. པཧརཎནྟི ཀཱཡཝིཉྙཏྟིསཧིཏཱཡ ཝདྷཀཙེཏནཱཡ ཨདྷིཔྤེཏཏྠསཱདྷནཾ. ཀཱཡེན ཝཱ སཏྟིཨཱདཱིནཾ, ཀཱཡཔྤཊིབདྡྷེན ཝཱ ཨུསུཡནྟཔཱསཱཎཱདཱིནཾ ནིསྶཛྫནནྟི ཡཐཱསམྦྷཝཾ ཡོཛེཏབྦཾ. ཏཏྠཱཏི ཏེསུ སཱཧཏྠིཀནིསྶགྒིཡེསུ ¶ . ཨུདྡིསྶཱནུདྡིསྶབྷེདཏོཏི ཨུདྡིསིཏྭཱ ཙ ཨནུདྡིསིཏྭཱ ཙ པཝཏྟིབྷེདེན. ཨུདྡིསནཾ ཨུདྡིསོ, སོ ཨེཏསྶ ཨཏྠཱིཏི ཨུདྡིསཀོ, པཡོགོ, ཏསྨིཾ. བཛ྄ཛྷཏི ཨེཏེནཱཏི བདྡྷོ, ཀམྨམེཝ བདྡྷོ ཀམྨབདྡྷོ, པཱཎཱཏིཔཱཏོཏི ཨཏྠོ. ཨཐ ཝཱ བནྡྷནཾ བདྡྷོ, ཀམྨུནཱ བདྡྷོ ཀམྨབདྡྷོ, སོ ཨསྶ ཧོཏི, པཱཎཱཏིཔཱཏཀམྨམསྶ སིདྡྷནྟི ཝུཏྟཾ ཧོཏི. ཨུབྷཡཏྠཱཔཱིཏི ཨུདྡིསཀེ, ཨནུདྡིསཀེ ཙཱཏི དྭཱིསུཔི. པཙྪཱ ཝཱ ཏེནེཝ རོགེན མརཏཱུཏི ཡོཛནཱ. པཧརིཏཀྑཎེཡེཝཱཏི མརཎཱཡ པཧོནཀཔྤཧཱརསྶ ལདྡྷཀྑཎེཡེཝ ཀམྨབདྡྷོ. ཡདི ཨཝསྶཾ ཏེན མརཏཱིཏི ཨདྷིཔྤཱཡོ. སཙེ པན མརཎཱདྷིཔྤཱཡེན པཧཱརཾ དཏྭཱ ཏེན ཨམཏསྶ པུན ཨཉྙེན ཙིཏྟེན པཧཱརེ དིནྣེ པཙྪཱཔི པཋམཔྤཧཱརེནེཝ མརཏི, ཏདཱཝ ཀམྨབདྡྷོ. ཨཐ དུཏིཡཔཧཱརེན མརཏི ¶ , ནཏྠི པཱཎཱཏིཔཱཏོ. ཨུབྷཡེཧི མཏེཔི པཋམཔྤཧཱརེནེཝ ཀམྨབདྡྷོ, ཨུབྷཡེཧིཔི ཨམཏེ ནེཝཏྟི པཱཎཱཏིཔཱཏོ. ཨེས ནཡོ བཧཱུཧིཔི ཨེཀསྶ པཧཱརེ དིནྣེ. ཏཏྲཱཔི ཧི ཡསྶ པཧཱརེན མརཏི, ཏསྶེཝ ཀམྨབདྡྷོཏི. ཨཱཎཱཔནཾ ནཱམ ཝཙཱིཝིཉྙཏྟིསཧིཏཱཡ ཝདྷཀཙེཏནཱཡ ཨདྷིཔྤེཏཏྠསཱདྷནཾ.

ཨིདཱནི ཨིམསྨིཾ ཨཱཎཏྟིཀཔཡོགེ སངྐེཏཝིསངྐེཏབྷཱཝཛཱནནཏྠཾ ཚབྦིདྷཾ ནིཡམཾ དསྶེནྟོ ‘‘ཏཏྠཱ’’ཏིཨཱདིམཱཧ. ཏཏྠ ཏཏྠཱཏི ཏསྨིཾ ཨཱཎཏྟིཀཔཡོགེ. ཨཱཎཏྟིནིཡཱམཀཱཏི ཨཱཎཏྟིཀཔཡོགསཱདྷིཀཱ. ཨེཏེསུ ཧི ཨཝིརཛ྄ཛྷིཏེསུཡེཝ ཨཱཎཏྟིཀཔཡོགོ ཧོཏི, ན ཨཉྙཐཱཏི.

པུགྒལོཏི མཱརེཏབྦོ པུགྒལོ. ཏེནཱཧ ‘‘ཡཾ ཧཱི’’ཏིཨཱདི. ཨཱཎཱཔཀསྶ ཨཱཔཏྟཱིཏི ཨཱཎཱཔཀསྶ ཨཱཎཏྟིཀྑཎེ ཨཱཔཏྟི, ཨཱཎཏྟསྶ མཱརཎཀྑཎེ. ཨཱཎཱཔཀོ མུཙྩཏཱིཏི ཨཱཎཏྟསྶེཝ ཀམྨབདྡྷོ, ཝཏྠུཝིསེསེན པནེཏྠ ཀམྨཝིསེསོ ཙ ཨཱཔཏྟིཝིསེསོ ཙ ཧོཏཱིཏི. ‘‘པུརེབྷཏྟཾ མཱརེཧཱི’’ཏི ཨཱཎཏྟོ པུརེབྷཏྟམེཝ མཱརེཏཱིཏི ‘‘ཨཛྫ སྭེ’’ཏི ཨནིཡམེཏྭཱ ‘‘པུརེབྷཏྟཾ མཱརེཧཱི’’ཏི ཨཱཎཏྟོ ཡདཱ ཀདཱཙི པུརེབྷཏྟཾ མཱརེཏི. ཡོ པན ‘‘ཨཛྫ པུབྦཎྷེ’’ཏི ཝུཏྟོ མཛ྄ཛྷནྷེ ཝཱ སཱཡནྷེ ཝཱ སྭེ ཝཱ པུབྦཎྷེ མཱརེཏི, ཝིསངྐེཏོ ཧོཏི, ཨཱཎཱཔཀསྶ ནཏྠི ཀམྨབདྡྷོ. པུབྦཎྷེ མཱརེཏུཾ ཝཱཡམནྟསྶ མཛ྄ཛྷནྷེ ¶ ཛཱཏེཔི ཨེསེཝ ནཡོ. ཨེཏེན ནཡེན སབྦཀཱལཔྤབྷེདེསུ སངྐེཏཝིསངྐེཏཏཱ ཝེདིཏབྦཱ.

ཨེཝཾ ཝཏྠུཀཱལེསུ སངྐེཏཝིསངྐེཏཏཾ དསྶེཏྭཱ ཨིདཱནི ཨོཀཱསཱདཱིསུ སངྐེཏཝིསངྐེཏཏཾ ཨཏིདིསནྟོ ‘‘ཨིམིནཱ ནཡེནཱ’’ཏིཨཱདིམཱཧ. ཏཏྠ ཨོཀཱསོཏི (པཱརཱ. ཨཊྛ. ༢.༡༧༤) གཱམོ ཝཱ ཝནཾ ཝཱ གེཧདྭཱརཾ ཝཱཏི ཨེཝམཱདིཀོ. ཨཱཝུདྷནྟི ཨསི ཝཱ ཨུསུ ཝཱ སཏྟི ཝཱཏི ཨེཝམཱདི. ཨིརིཡཱཔཐོཏི མཱརེཏབྦསྶ གམནཾ ཝཱ ནིསཛྫཱ ཝཱཏི ཨེཝམཱདི. ཀིརིཡཱཝིསེསོཏི ཝིཛ྄ཛྷནཾ ཝཱ ཚེདནཾ ཝཱ བྷེདནཾ ཝཱ སངྑམུཎྜཀཾ ཝཱཏི ཨེཝམཱདི. ཨིམེསུ ཡཐཱ ཡཐཱ ཝདྷཀོ ཨཱཎཏྟོ, ཏཐཱ ཏཐཱ ཀཏེ ཨཱཎཱཔཀསྶ ཨཱཔཏྟི, ཨཉྙཐཱ ཀཏེ ཝིསངྐེཏོ ཧོཏི. ཏེནཱཧ ‘‘ཨིམིནཱ ནཡེནཱ’’ཏིཨཱདི. ཏཏྠ སབྦཏྠཱཏི ཨོཀཱསཱདཱིསུ ཙཏཱུསུ. ཧོཏི ཙེཏྠ –

‘‘ཡཐཱཎཏྟིཝསེནེཝ, ཨཱཎཏྟེན ཀཏེ སཏི;

ཨཱཎཱཔཀསྶ ཨཱཔཏྟི, ཝིསངྐེཏོཉྙཐཱ ཀཏེ’’ཏི.

ཨཱཎཏྟིཡཾ ¶ པན ཨཡཾ ཝིསེསོ – ཨདྷིཊྛཱཡཱཏི ཨདྷིཊྛཧིཏྭཱ ཨཱཎཱཔེཏི ‘‘ཨེཝཾ ཝིཛ྄ཛྷ, ཨེཝཾ པཧར, ཨེཝཾ གྷཱཏེཧཱི’’ཏི (པཱརཱ. ༡༧༤) ཝུཏྟཱཡ པཱལི༹ཡཱ ལབྦྷཏཱིཏི ཉཱཏབྦོ.

ཨོཔཏནྟི ཨེཏྠཱཏི ཨོཔཱཏོ, ཨཱཝཱཊོ, ཏསྶ ཁཎནཾ ཨོཔཱཏཀྑཎནཾ. ཨཔསྶེནསཾཝིདྷཱནནྟི (པཱརཱ. ཨཊྛ. ༢.༡༧༧) ཨཔསྶེནསྶ སཾཝིདྷཱནཾ. ནིཙྩཔརིབྷོགོ མཉྩོ ཝཱ པཱིཋཾ ཝཱ ཨཔསྶེནཕལཀཾ ཝཱ དིཝཱཊྛཱནེ ནིསཱིདནྟསྶ ཨཔསྶེནཀཏྠམྦྷོ ཝཱ ཏཏྠཛཱཏཀརུཀྑོ ཝཱ ཙངྐམེ ཨཔསྶཱཡ ཏིཊྛནྟསྶ ཨཱལམྦནརུཀྑོ ཝཱ ཨཱལམྦནཕལཀཾ ཝཱ, སབྦམྤེཏཾ ཨཔསྶནཱིཡཊྛེན ཨཔསྶེནཾ ནཱམ, ཏསྨིཾ ཨཔསྶེནེ ཡཐཱ ཨཔསྶཡནྟཾ ཝིཛ྄ཛྷཏི ཝཱ ཚིནྡཏི ཝཱ, ཏཐཱ ཀཏྭཱ ཝཱསིཕརསུསཏྟིཨཱརཀཎྚཀཱདཱིསུ ཨཉྙཏརསྶ སཏྠསྶ ཋཔནནྟི ཨཏྠོ.

ཨུཔནིཀྑིཔནཾ ནཱམ སམཱིཔེ ནིཀྑིཔནཾ. མནཱཔསྶ ཝཱ ཨམནཱཔསྶ ཝཱ རཱུཔསྶ ཨུཔཧརཎཾ སམཱིཔེ ཋཔནཾ རཱུཔཱུཔཧཱརོ, ཨཏྟནཱ ཝཱ ཡཀྑཔེཏཱདིཝེསཾ གཧེཏྭཱ ཏིཊྛནཾ. ཨཱདིསདྡེན སདྡཱུཔཧཱརཱདཱིནཾ གཧཎཾ. ཨེཏྠཱཔཱིཏི ཐཱཝརཔཡོགེཔི ¶ . ཨུདྡིསྶཱནུདྡིསྶབྷེདོ ཝེདིཏབྦོ, ཡཏོ ཏཏྠཔི པུབྦེ ཝུཏྟནཡེནེཝ ཀམྨབདྡྷོ ཧོཏི. ཨཡཾ པན ཝིསེསོ – མཱུལཊྛེན ཨོཔཱཏཱདཱིསུ པརེསཾ མཱུལེན ཝཱ མུདྷཱ ཝཱ དིནྣེསུཔི ཡདི ཏཔྤཙྩཡཱ ཀོཙི མརཏི, མཱུལཊྛསྶེཝ ཀམྨབདྡྷོ. ཡདིཔི ཏེན, ཨཉྙེན ཝཱ ཏཏྲ ཨོཔཱཏེ ཝིནཱསེཏྭཱ བྷཱུམིསམེ ཀཏེཔི པཾསུཧཱརཀཱ ཝཱ པཾསུཾ གཎྷནྟཱ, མཱུལཁཎཀཱ ཝཱ མཱུལཱནི ཁཎནྟཱ ཨཱཝཱཊཾ ཀརོནྟི, དེཝེ ཝཱ ཝསྶནྟེ ཀདྡམོ ཛཱཡཏི, ཏཏྠ ཙ ཀོཙི ཨོཏརིཏྭཱ ཝཱ ལགྒིཏྭཱ ཝཱ མརཏི, མཱུལཊྛསྶེཝ ཀམྨབདྡྷོ. ཡདི པན ཡེན ལདྡྷཾ, སོ ཝཱ ཨཉྙོ ཝཱ ཝིཏྠཏཏརཾ ཝཱ གམྦྷཱིརཏརཾ ཝཱ ཀརོཏི, ཏཔྤཙྩཡཱ ཙ ཀོཙི མརཏི, ཨུབྷཡེསམྤི ཀམྨབདྡྷོ. ཡཐཱ ཏུ མཱུལཱནི མཱུལེཧི སཾསནྡནྟི, ཏཐཱ ཏཏྠ ཐལེ ཀཏེ མུཙྩཏི. ཨེཝཾ ཨཔསྶེནསཾཝིདྷཱནཱདཱིསུཔི ཡཱཝ ཏེསཾ པཝཏྟི, ཏཱཝ ཡཐཱསམྦྷཝཾ ཀམྨབདྡྷོ ཝེདིཏབྦོ.

ཝིཛྫཱཔརིཛཔྤནནྟི ཨཱཐབྦཎིཀེཧི, ཝིཛྫཱདྷརེཧི ཙ མནྟཔརིཛཔྤནཾ. ཀམྨཝིཔཱཀཛཱཡ ཨིདྡྷིཡཱཏི སཱཏིསཡཀམྨནིབྦཏྟཱཡ ཀམྨཝིཔཱཀེན སཧཛཱཏཱཡ ཨིདྡྷིཡཱ, ཀམྨསྶ ཝཱ ཝིཔཱཀབྷཱཝེན ཛཱཏཱཡ ཨིདྡྷིཡཱ. པཡོཛནནྟི པཝཏྟནཾ, ཀརཎནྟི ཨཏྠོ, དཱཋཱཝུདྷཱདཱིནཾ དཱཋཱཀོཊནཱདཱིནམིཝ མཱརཎཏྠཾ ཀམྨཝིཔཱཀཛིདྡྷིཝིཀཱརཀརཎནྟི ཝུཏྟཾ ཧོཏི.

ཀམྨསཱདྷནོ ཝཱཡཾ ཧཱརཀསདྡོ བཧུལཾཝིདྷཱནེན ཏཏྠཱཔི ཎྭུཔཙྩཡསྶ སིཛ྄ཛྷནཏོཏི ཨཱཧ ‘‘ཨཐ ཝཱ’’ཏིཨཱདི. ཛཱིཝིཏཧརཎཀཾ, ཨུཔནིཀྑིཔིཏབྦཾ ཝཱ སཏྠམེཝ ཧཱརཀནྟི (སཱརཏྠ. ཊཱི. ༢.༡༧༢) ཝིཀཔྤདྭཡེན ¶ ཝུཏྟནྟི ཨཱཧ ‘‘སཏྠཉྩ ཏཾ ཧཱརཀཉྩཱཏི སཏྠཧཱརཀ’’ནྟི. ‘‘ཧཱརཀསཏྠ’’ནྟི ཝཏྟབྦེ ཝིསེསནསྶ པརནིཔཱཏཾ ཀཏྭཱ ཨེཝཾ ཝུཏྟནྟི དཊྛབྦཾ. པརིཡེསེཡྻཱཏི གཝེསེཡྻ. ‘‘ཡཐཱ ལབྷཏི, ཏཐཱ ཀརེཡྻཱ’’ཏི ཨིམིནཱ པན ཨདྷིཔྤཱཡཏྠམཱཧ, ‘‘ཨུཔནིཀྑིཔེཡྻཱ’’ཏི ཨིམིནཱ སིཁཱཔཏྟམཏྠཾ. ཨིཏརཐཱ ཧི ‘‘པརིཡེསེཡྻཱ’’ཏི ཨིམསྶ ‘‘ཨུཔནིཀྑིཔེཡྻཱ’’ཏི ཨཡམཏྠོ ཨདྷིཔྤེཏོ ན སིཡཱ. པརིཡིཊྛམཏྟེཡེཝཱཏི པརིཡེསིཏམཏྟེཡེཝ. ཡདི ཨེཝཾ ཨཐ ཀསྨཱ པཱལི༹ཡཾ ‘‘སཏྠཧཱརཀཾ ཝཱསྶ པརིཡེསེཡྻཱཏི ཨསིཾ ཝཱ སཏྟིཾ ཝཱ བྷེཎྜིཾ ཝཱ ལགུལ༹ཾ ཝཱ པཱསཱཎཾ ཝཱ སཏྠཾ ཝཱ ཝིསཾ ཝཱ རཛྫུཾ ཝཱ’’ཏི (པཱརཱ. ༡༧༢) ཝུཏྟནྟི ཨཱཧ ‘‘པདབྷཱཛནེ པནཱ’’ཏིཨཱདི. ཨསྶཱཏི ‘‘སཏྠཧཱརཀཾ ཝཱསྶ པརིཡེསེཡྻཱ’’ཏི ཨིམསྶ པདསྶ. བྱཉྫནཱནུརཱུཔཏོ པརིཔུཎྞཾ ཀཏྭཱ ཨཏྠསྶ ཨཝུཏྟཏྟཱ ¶ ‘‘བྱཉྫནཾ ཨནཱདིཡིཏྭཱ’’ཏི ཝུཏྟཾ. སསཏི ཧིཾསཏཱིཏི སཏྠཾ, སསནྟི ཧིཾསནྟི ཨེཏེནཱཏི ཝཱ སཏྠཾ. ཨཱདིསདྡེན ‘‘སཏྟིཾ ཝཱ’’ཏིཨཱདིཔཱལི༹སེསཾ སངྒཎྷཱཏི. ཏཏྠ ལགུལ༹ནྟི མུགྒརོ. སཏྠནྟི ཝུཏྟཱཝསེསཾ ཡཾ ཀིཉྩི སམུཁཾ ཝེདིཏབྦཾ.

ཡོ ཨེཝཾ མརཏཱིཏི ཡོ སཏྠཾ ཝཱ ཨཱཧརིཏྭཱ, ཝིསཾ ཝཱ ཁཱདིཏྭཱ, རཛྫུཡཱ ཝཱ ཨུབྦནྡྷིཏྭཱ, སོབྦྷཱདཱིསུ ཝཱ པཏིཏྭཱ, ཨཉྙེཧི ཝཱ ཨགྒིཔཝེསནཨུདཀཔཝེསནཱདཱིཧི ཨུཔཱཡེཧི མརཏི. ‘‘སོ དྷནཾ ཝཱ ལབྷཏཱི’’ཏིཨཱདིནཱ ནཡེནཱཏི སོ དྷནཾ ཝཱ ལབྷཏི, ཡསཾ ཝཱ ལབྷཏི, སགྒཾ ཝཱ གཙྪཏི, དྷམྨོ ཝཱསྶ ཧོཏཱིཏི ཨིམིནཱ ནཡེན. ཀིམནེན ཝེདིཏབྦནྟི ཨཱཧ ‘‘ཨེཏེནཱ’’ཏིཨཱདི. ཏཏྠ ཨེཏེནཱཏི ‘‘མརཎཝཎྞཾ ཝཱ སཾཝཎྞེཡྻཱ’’ཏི ཨེཏེན ཝཙནེན. ནཡིདྷ ཨེཝནྟི ཨིདྷ མནུསྶཝིགྒཧཔཱརཱཛིཀེ ན ཨེཝཾ, ན པརིཡཱཡཀཐཱཡ མུཙྩཏཱིཏི ཨཏྠོ. ཏེནཱཧ ‘‘སཾཝཎྞེཡྻཱ’’ཏིཨཱདི.

‘‘སཏྠཾ ཝཱ ཨཱཧརཱ’’ཏིཨཱདིནཱཏི ཨེཏྠ ཨཱདིསདྡེན ‘‘ཝིསཾ ཝཱ ཁཱད, རཛྫུཡཱ ཝཱ ཨུབྦནྡྷིཏྭཱ ཀཱལཾ ཀརོཧི, སོབྦྷེ ཝཱ ནརཀེ ཝཱ པཔཱཏེ ཝཱ པཔཏཱ’’ཏིཨཱདིཾ (པཱརཱ. ༡༧༢) སབྦཾ མརཎཱུཔཱཡཾ སངྒཎྷཱཏི. ཨེཏྠ ཙ ནརཀོ (པཱརཱ. ཨཊྛ. ༢.༡༧༢) ནཱམ ཏཏྠ ཏཏྠ ཕལནྟིཡཱ བྷཱུམིཡཱ སཡམེཝ ནིབྦཏྟཱ མཧཱདརཱི, ཡཏྠ ཧཏྠཱིཔི པཏནྟི, ཙོརཱཔི ནིལཱིཡིཏྭཱ ཏིཊྛནྟི. པཔཱཏོཏི པབྦཏནྟརེ ཝཱ ཐལནྟརེ ཝཱ ཨེཀཏོ ཚིནྣོ. པཱཔཀེནཱཏི ལཱམཀེན. དུཛྫཱིཝིཏེནཱཏི དུཀྑབཧུལཏྟཱ དུཀྑེན ཛཱིཝིཏེན. མཏཾ ཏེ ཛཱིཝིཏཱ སེཡྻཱཏི ཏཝ མརཎཾ ཛཱིཝིཏཱ སུནྡརཏརཾ. ཙིཏྟམསྶ ཨཏྠཱིཏི ཙིཏྟོ. ཏཐཱ མནོ. ཨིཏི-སདྡོ ‘‘སབྦམཏྠཱིཏི ཁོ, ཀཙྩཱན, ཨཡམེཀོ ཨནྟོ, སབྦཾ ནཏྠཱིཏི ཁོ, ཀཙྩཱན, ཨཡཾ དུཏིཡོ ཨནྟོ’’ཏིཨཱདཱིསུ (སཾ. ནི. ༢.༡༥; ༣.༩༠) ཝིཡ ¶ ནིདསྶནེ དཊྛབྦོ ཡཐཱཝུཏྟསྶ བུདྡྷིཡཾ ཝིཔརིཝཏྟམཱནསྶ མརཎསྶ ནིདསྶནཏོ. ཏེནེཝཱཧ ‘‘མཏཾ ཏེ ཛཱིཝིཏཱ སེཡྻོ’’ཏིཨཱདི.

ནནུ ཙེཏྠ ‘‘མནོ’’ཏི ཨིདམྤི ཨཏྠཏོ ཙིཏྟམེཝ, ཨཐ ཀསྨཱ ཝུཏྟནྟི ཨཱཧ ‘‘ཨེཏྠ ཙཱ’’ཏིཨཱདི. ཙིཏྟསྶ ཨཏྠདཱིཔནཏྠཾ ཝུཏྟནྟི ནཱཡཾ ཙིཏྟསདྡོ ‘‘ཙིཏྟསངྐཔྤོ’’ཏིཨཱདཱིསུ (པཱརཱ. ༡༧༡) ཝིཡ ཝིཙིཏྟཱདིཨཏྠོ, ཨཐ ཁོ ཝིཉྙཱཎཝཙནོཏི ཏསྶ ཨཏྠདཱིཔནཏྠཾ ཝུཏྟཾ. ཨིམིནཱ པུནརུཏྟིདོསཱབྷཱཝཾ དསྶེཏི. ཀཐམེཏཾ ཝིཉྙཱཡཏཱིཏི ཨཱཧ ‘‘ཏེནེཝསྶཱ’’ཏིཨཱདི. ཙིཏྟོ ¶ ནཱནཱཔྤཀཱརཀོ སངྐཔྤོ ཨསྶཱཏི ཙིཏྟསངྐཔྤོ. ཝིཙིཏྟཏྠོ ཧེཏྠ ཙིཏྟསདྡོ ‘‘ནཱཧཾ, བྷིཀྑཝེ, ཨཉྙཾ ཨེཀནིཀཱཡམྤི སམནུཔསྶཱམི ཨེཝཾ ཙིཏྟཾ, ཡཐཡིདཾ, བྷིཀྑཝེ, ཏིརཙྪཱནགཏཱ’’ཏིཨཱདཱིསུ (སཾ. ནི. ༣.༡༠༠) ཝིཡ. ཏེནཱཧ ‘‘ཝིཙིཏྟསངྐཔྤོ’’ཏི. ཨེཏྠཱཔི ཨིཏིསདྡོ ཨཱཧརིཏབྦོཏི ‘‘ཙིཏྟསངྐཔྤོ’’ཏི ཨིམསྨིཾ པདེཔི ཨདྷིཀཱརཝསེན ཨིཏིསདྡོ ཨཱཧརིཏབྦོ. ཨིདཉྷི ‘‘ཨིཏི ཙིཏྟསངྐཔྤོ’’ཏི ཨེཝཾ ཨཝུཏྟམྤི ཨདྷིཀཱརཏོ ཝུཏྟམེཝ ཧོཏཱིཏི. སངྐཔྤོཏི ཙེཏྠ ‘‘ཏཀྐོ ཝིཏཀྐོ སངྐཔྤོ’’ཏིཨཱདཱིསུ (དྷ. ས. ༧) ཝིཡ ན ཝིཏཀྐསྶེཝ ནཱམཾ, ཨཐ ཁོ ཏསྶ ཙ ཨཉྙེསཉྩཱཏི དསྶེཏུཾ ‘‘སངྐཔྤོཏི ཙཱ’’ཏིཨཱདི ཨཱརདྡྷཾ. སཾཝིདཧནམཏྟསྶཱཏི སཉྙཱཙེཏནཱཝིཏཀྐསངྑཱཏསྶ སབྦསྶ སཾཝིདཧནསྶ. སཱམཉྙཏྠོ ཧེཏྠ མཏྟསདྡོ ‘‘བྲཱཧྨཎམཏྟཾ བྷོཛེཏཱི’’ཏིཨཱདཱིསུ ཝིཡ. ཏེནཱཧ ‘‘ཏཉྩ སཾཝིདཧན’’ནྟིཨཱདི. ཨིམིནཱ སཾཝིདཧནཾ ནཱམེཏྠ ན ཝིདྷཱནནྟི དསྶེཏི. ཨདྷིཔྤཱཡོ ནཱམ ཝིཏཀྐོ.

ཨུཙྩཱཝཙེན ཀཱརཎེནཱཏི (པཱརཱ. ཨཊྛ. ༢.༡༧༢) མཧནྟཱམཧནྟེན ཨུཔཱཡེན. ཏཏྠ མརཎཝཎྞསཾཝཎྞནེ ཏཱཝ ཛཱིཝིཏེ ཨཱདཱིནཝདསྶནཝསེན ཨཝཙཱཀཱརཏཱ, མརཎེ ཝཎྞབྷཎནཝསེན ཨུཙྩཱཀཱརཏཱ ཝེདིཏབྦཱ. སམཱདཔནེ པན མུཊྛིཛཱཎུནིཔྤོཐནཱདཱིཧི མརཎསམཱདཔནཝསེན ཨུཙྩཱཀཱརཏཱ, ཨེཀཏོ བྷུཉྫནྟསྶ ནཁེ ཝིསཾ པཀྑིཔིཏྭཱ མརཎཱདིསམཱདཔནཝསེན ཨཝཙཱཀཱརཏཱ ཝེདིཏབྦཱ.

ཨེཝཾ ཨསཱདྷཱརཎཝིནིཙྪཡཾ ཝཏྭཱ ཨིདཱནི སཱདྷཱརཎཝིནིཙྪཡཾ དསྶེཏུཾ ‘‘ཝེསཱལིཡ’’ནྟིཨཱདིམཱཧ. ཨོཔཱཏཀྑཎནཱདཱིསུ དུཀྐཊནྟི ཨེཏྠ སཙེཔི ཛཱཏཔཐཝིཾ ཁཎཏི, པཱཎཱཏིཔཱཏསྶ པུབྦཔཡོགཏྟཱ པཡོགེ པཡོགེ དུཀྐཊཾ. མནུསྶཝིགྒཧོ ནཱགསུཔཎྞཱདིསདིསོ ཏིརཙྪཱནགཏོ ཏིརཙྪཱནགཏམནུསྶཝིགྒཧོ, ཡཀྑོ ཙ པེཏོ ཙ ཏིརཙྪཱནགཏམནུསྶཝིགྒཧོ ཙ ཡཀྑཔེཏཏིརཙྪཱནགཏམནུསྶཝིགྒཧཱ, ཏེསཾ. ‘‘ཏཐཱ’’ཏི ཨིམིནཱ ཐུལླཙྩཡཾ ཨཏིདིསཏི. ཨིདཱནི ‘‘ཨིམིནཱ ¶ ནཡེནཱ’’ཏིཨཱདིནཱ ཨཔསྶེནསཾཝིདྷཱནཱདཱིསུཔི ཡཐཱཝུཏྟཨཱཔཏྟིབྷེདཾ ཨཏིདིསཏི. སབྦཏྠཱཏི ཨཔསྶེནསཾཝིདྷཱནཱདཱིསུ སབྦེསུ པཡོགེསུ.

ཨིདཱནི ཨནཱཔཏྟིཾ དསྶེཏུཾ ‘‘ཨསཉྩིཙྩཱ’’ཏིཨཱདིམཱཧ. ཨེཏྠ ཙ ‘‘ཨསཉྩིཙྩཱ’’ཏི (སཱརཏྠ. ཊཱི. ༢.༡༧༩) ཨིདཾ མརཎསཾཝཏྟནིཀཨུཔཀྐམསྶ ཨསལླཀྑཎཾ སནྡྷཱཡ ཝུཏྟཾ ¶ , ‘‘ཨཛཱནནྟསྶཱ’’ཏི ཨིདཾ པན མརཎསཾཝཏྟནིཀཨུཔཀརཎསྶ ཨཛཱནནཾ སནྡྷཱཡ, ‘‘ནམརཎཱདྷིཔྤཱཡསྶཱ’’ཏི ཨིདཾ ཨུཔཀྐམཾ ཛཱནནྟསྶཱཔི མརཎཱདྷིཔྤཱཡསྶ ཨབྷཱཝཾ. ཏེནཱཧ ‘‘ཨསཉྩིཙྩཱ’’ཏིཨཱདི. ཨཙེཏེཏྭཱཏི ཨསལླཀྑེཏྭཱ, ཝིརཛ྄ཛྷིཏྭཱཏི ཝུཏྟཾ ཧོཏི.

མུསལུསྶཱཔནཝཏྠུསྨིཾ ཝིཡཱཏི ‘‘ཏེན ཁོ པན སམཡེན ཨཉྙཏརོ བྷིཀྑུ བྷཏྟགྒེ ཨནྟརགྷརེ ཨཱསནཾ པཉྙཔེནྟོ མུསལེ ཨུསྶིཏེ ཨེཀཾ མུསལཾ ཨགྒཧེསི. དུཏིཡོ མུསལོ པརིཔཏིཏྭཱ ཨཉྙཏརསྶ དཱརཀསྶ མཏྠཀེ ཨཝཏྠཱསི. སོ ཀཱལམཀཱསི. ཏསྶ ཀུཀྐུཙྩཾ ཨཧོསི…པེ… ཀིཾཙིཏྟོ ཏྭཾ བྷིཀྑཱུཏི. ཨསཉྩིཙྩ ཨཧཾ བྷགཝཱཏི. ཨནཱཔཏྟི བྷིཀྑུ ཨསཉྩིཙྩཱ’’ཏི (པཱརཱ. ༡༨༠) ཨིམསྨིཾ ཝཏྠུསྨིཾ ཝིཡ.

ཝིསགཏཔིཎྜཔཱཏཝཏྠུསྨིཾ ཝིཡཱཏི ‘‘ཏེན ཁོ པན སམཡེན ཨཉྙཏརོ པིཎྜཙཱརིཀོ བྷིཀྑུ ཝིསགཏཾ པིཎྜཔཱཏཾ ལབྷིཏྭཱ པཊིཀྐམནཾ ཧརིཏྭཱ བྷིཀྑཱུནཾ ཨགྒཀཱརིཀཾ ཨདཱསི. ཏེ བྷིཀྑཱུ ཀཱལམཀཾསུ. ཏསྶ ཀུཀྐུཙྩཾ ཨཧོསི…པེ… ཀིཾཙིཏྟོ ཏྭཾ བྷིཀྑཱུཏི. ནཱཧཾ བྷགཝཱ ཛཱནཱམཱིཏི. ཨནཱཔཏྟི བྷིཀྑུ ཨཛཱནནྟསྶཱ’’ཏི (པཱརཱ. ༡༨༡) ཨིམསྨིཾ ཝཏྠུསྨིཾ ཝིཡ.

བྷེསཛྫཝཏྠུསྨིཾ ཝིཡཱཏི ‘‘ཏེན ཁོ པན སམཡེན ཨཉྙཏརཱ ཝཉྫྷཱ ཨིཏྠཱི ཀུལཱུཔཀཾ བྷིཀྑུཾ ཨེཏདཝོཙ ‘‘ཨིངྒྷཱཡྻ བྷེསཛྫཾ ཛཱནཱཧི, ཡེནཱཧཾ ཝིཛཱཡེཡྻ’ནྟི. ‘སུཊྛུ བྷགིནཱི’ཏི ཏསྶཱ བྷེསཛྫཾ ཨདཱསི. སཱ ཀཱལམཀཱསི. ཏསྶ ཀུཀྐུཙྩཾ ཨཧོསི…པེ… ཨནཱཔཏྟི བྷིཀྑུ པཱརཱཛིཀསྶ, ཨཱཔཏྟི དུཀྐཊསྶཱ’’ཏི (པཱརཱ. ༡༨༧) ཨིམསྨིཾ ཝཏྠུསྨིཾ ཝིཡ. ཨིདྷ ཨཱདིཀམྨིཀཱ ཨཉྙམཉྙཾ ཛཱིཝིཏཱ ཝོརོཔིཏབྷིཀྑཱུ, ཏེསཾ ཨནཱཔཏྟི. ཨཝསེསཱནཾ མརཎཝཎྞསཾཝཎྞནཀཱདཱིནཾ ཨཱཔཏྟིཡེཝ.

ཨཐ ཀཐཾ དུཀྑཝེདནནྟི, ནནུ རཱཛཱནོ ཙོརཾ དིསྭཱ ཧསམཱནཱཔི ‘‘གཙྪཐ, ནཾ གྷཱཏེཐཱ’’ཏི ཝདནྟཱིཏི? སཙྩཾ ཧསམཱནཱ ཝདནྟི, སོ པན ཧཱསོ ཏེསཾ ཨཉྙཝིསཡོ, སནྣིཊྛཱཔཀཙེཏནཱ ¶ དུཀྑསམྤཡུཏྟཱཝ. ཝུཏྟཉྷེཏཾ སམནྟཔཱསཱདིཀཱཡཾ ‘‘སཙེཔི ཧི སིརིསཡནཾ ཨཱརུལ༹ྷོ རཛྫསམྤཏྟིསུཁམནུབྷཝནྟོ རཱཛཱ ‘ཙོརོ དེཝ ཨཱནཱིཏོ’ཏི ཝུཏྟེ ‘གཙྪཐ ནཾ མཱརེཐཱ’ཏི ཧསམཱནོ བྷཎཏི, དོམནསྶཙིཏྟེནེཝ བྷཎཏཱིཏི ¶ ཝེདིཏབྦོ. སུཁཝོཀིཎྞཏྟཱ, པན ཨནུཔྤབནྡྷཱབྷཱཝཱ ཙ དུཛྫཱནམེཏཾ པུཐུཛྫནེཧཱི’’ཏི (པཱརཱ. ཨཊྛ. ༢.༡༧༩).

ཏཏིཡཔཱརཱཛིཀཝཎྞནཱ ནིཊྛིཏཱ.

༤. ཙཏུཏྠཔཱརཱཛིཀཝཎྞནཱ

ཨནབྷིཛཱནནྟི ན ཨབྷིཛཱནཾ. ཡེན ཧི ཡོ དྷམྨོ ཨདྷིགཏོ, སོ ཏསྶ པཱཀཊོ ཧོཏཱིཏི ཨཱཧ ‘‘སཀསནྟཱནེ’’ཏིཨཱདི. ཨུཏྟརིམནུསྶཱནནྟི པཀཏིམནུསྶེཧི ཨུཏྟརིཏརཱནཾ མནུསྶཱནཾ, ཨུཀྐཊྛམནུསྶཱནནྟི ཨཏྠོ. དྷམྨནྟི མཧགྒཏལོཀུཏྟརབྷཱུཏཾ ཨདྷིགཏདྷམྨཾ. ཨཐ ཝཱ ཨུཏྟརིམནུསྶདྷམྨཱཏི ཨུཏྟརིམནུསྶདྷམྨོ. མནུསྶདྷམྨོ ནཱམ ཝིནཱ བྷཱཝནཱམནསིཀཱརེན པཀཏིཡཱ མནུསྶེཧི ནིབྦཏྟེཏབྦོ དསཀུསལཀམྨཔཐདྷམྨོ. སོ ཧི མནུསྶཱནཾ ཙིཏྟཱདྷིཊྛཱནམཏྟེན ཨིཛ྄ཛྷནཏོ ཏེསཾ སོ བྷཱཝིཏདྷམྨོ ཝིཡ ཋིཏོཏི ཏཐཱ ཝུཏྟོ, མནུསྶགྒཧཎཉྩེཏྠ ཏེསུ བཧུལཾ པཝཏྟནཏོ. ཛྷཱནཱདིཀཾ པན ཏབྦིདྷུརནྟི ཏཏུཏྟརི, ཨིཏི ཨུཏྟརི མནུསྶདྷམྨཱཏི ཨུཏྟརིམནུསྶདྷམྨོ, ཏཾ ཨུཏྟརིམནུསྶདྷམྨནྟི ཨེཝམྤེཏྠ ཨཏྠོ དཊྛབྦོ. སམུདཱཙརནྟོཏི ཨཱརོཙེནྟོ.

ཀིཉྩཱཔི ལོཀིཡལོཀུཏྟརཱ སབྦཱཝ པཉྙཱ ‘‘ཉཱཎ’’ནྟི ཝུཙྩཏི, ཨིདྷ པན མཧགྒཏལོཀུཏྟརཱཝ ཝེདིཏབྦཱཏི ཨཱཧ ‘‘མཧགྒཏལོཀུཏྟརཔཉྙཱ ཛཱནནཊྛེན ཉཱཎ’’ནྟི. ཀིལེསེཧི ཨཱརཀཏྟཱ པརིསུདྡྷཊྛེན ཨརིཡནྟི ཨཱཧ ‘‘ཨརིཡཾ ཝིསུདྡྷཾ ཨུཏྟམ’’ནྟི. ཨརིཡསདྡོ ཙེཏྠ ཝིསུདྡྷཔརིཡཱཡོ, ན ལོཀུཏྟརཔརིཡཱཡོ. ཛྷཱནཱདིབྷེདེཏི ཨཱདིསདྡེན ‘‘ཝིམོཀྑོ, སམཱདྷི, སམཱཔཏྟི, ཉཱཎདསྶནཾ, མགྒབྷཱཝནཱ, ཕལསཙྪིཀིརིཡཱ, ཀིལེསཔྤཧཱནཾ, ཝིནཱིཝརཎཏཱ ཙིཏྟསྶ, སུཉྙཱགཱརེ ཨབྷིརཏཱི’’ཏི (པཱརཱ. ༡༩༨) ཨིམེ སངྒཎྷཱཏི. ཝིཉྙུསྶ མནུསྶཛཱཏིཀསྶཱཏི ཨཱརོཙེཏབྦཔུགྒལནིདསྶནཾ. ཨེཏསྶ ཧི ཨཱརོཙིཏེ ཨཱརོཙིཏཾ ཧོཏི, ན དེཝབྲཧྨཱནཾ, ནཱཔི པེཏཡཀྑཏིརཙྪཱནགཏཱནནྟི. ཨཱརོཙེཡྻཱཏི ཝདེཡྻ, ཝིཉྙཱཔེཡྻཱཏི ཝུཏྟཾ ཧོཏི. ཝིནཱ ཨཉྙཱཔདེསེནཱཏི ‘‘ཡོ ཏེ ཝིཧཱརེ ཝསཏི, སོ བྷིཀྑུ པཋམསྶ ཛྷཱནསྶ ལཱབྷཱི’’ཏིཨཱདིནཱ (པཱརཱ. ༢༢༠) ནཡེན ཨཉྙཱཔདེསཾ ཝིནཱཏི ¶ ཨཏྠོ. ཨིདྷེཝཱཏི ‘‘ཨིཏི ཛཱནཱམི, ཨིཏི པསྶཱམཱི’’ཏི ཨིམསྨིཾཡེཝ པདེ. ‘‘ཏེན ཝུཏྟ’’ནྟིཨཱདི ནིགམནཾ.

སམནུགྒཱཧཱིཡམཱནོཏི ¶ ཙོདིཡམཱནོ, ཡཾ ཝཏྠུ ཨཱརོཙིཏཾ ཧོཏི, ཏསྨིཾ ཝཏྠུསྨིཾ ‘‘ཀིཾ ཏེ ཨདྷིགཏཾ, ཀིནྟི ཏེ ཨདྷིགཏཾ, ཀདཱ ཏེ ཨདྷིགཏཾ, ཀཏྠ ཏེ ཨདྷིགཏཾ, ཀཏམེ ཏེ ཀིལེསཱ པཧཱིནཱ, ཀཏམེསཾ ཏྭཾ དྷམྨཱནཾ ལཱབྷཱི’ཏི ཀེནཙི ཝུཙྩམཱནོ’’ཏི ཝུཏྟཾ ཧོཏི. ཨསམནུགྒཱཧཱིཡམཱནོཏི ན ཀེནཙི ཝུཙྩམཱནོ.

‘‘བྷིཀྑུབྷཱཝེ ཋཏྭཱ ཨབྷབྦོ ཛྷཱནཱདཱིནི ཨདྷིགནྟུ’’ནྟི སིཀྑཱཔདཱཏིཀྐམསྶ ཨནྟརཱཡཀརཏྟཱ ཝུཏྟཾ. བྷིཀྑུབྷཱཝོ ཧིསྶ སགྒནྟརཱཡོ ཙེཝ ཧོཏི མགྒནྟརཱཡོ ཙ (པཱརཱ. ཨཊྛ. ༢.༡༩༨). ཝུཏྟཉྷེཏཾ ‘‘སཱམཉྙཾ དུཔྤརཱམཊྛཾ, ནིརཡཱཡུཔཀཌྜྷཏཱི’’ཏི (སཾ. ནི. ༡.༨༩; དྷ. པ. ༣༡༡). ཨཔརམྤི ཝུཏྟཾ ‘‘སིཐིལོ ཧི པརིབྦཱཛོ, བྷིཡྻོ ཨཱཀིརཏེ རཛ’’ནྟི (སཾ. ནི. ༡.༨༩; དྷ. པ. ༣༡༣). བྷིཀྑུབྷཱཝོཏི པཱརཱཛིཀཾ ཨཱཔཛྫིཏྭཱ ‘‘སམཎོ ཨཧ’’ནྟི པཊིཛཱནནཏོ ཝོཧཱརམཏྟསིདྡྷོ བྷིཀྑུབྷཱཝོ. དཱནཱདཱིཧཱིཏི དཱནསརཎསཱིལསཾཝརཱདཱིཧི.

ཨཛཱནམེཝཱཏི ཨེཏྠ ཨེཝཱཏི ཨཝདྷཱརཎཏྠེ ནིཔཱཏོ. ‘‘ཨཛཱནམེཝ’’ནྟིཔི པཋནྟི. ཏཏྠ པན ‘‘ཨེཝཾ ཛཱནཱམི, ཨེཝཾ པསྶཱམཱི’’ཏི ཨཝཙནྟི ཡོཛེཏབྦཾ. ཝཙནཏྠཝིརཧཏོཏི ‘‘པཋམཾ ཛྷཱནཾ སམཱཔཛྫི’’ནྟི ཨཱདིཝཙནསྶ (པཱརཱ. ༢༠༩) ཨཏྠབྷཱུཏེན ཛྷཱནཱདིནཱ ཝཛྫིཏཏྟཱ ཏུཙྪཾ ཨུདཀཱདིསུཉྙཾ བྷཱཛནཾ ཝིཡ. མུསཱཏི ཝིསཾཝཱདནཔུརེཀྑཱརསྶ པརཝིསཾཝཱདཀོ ཝཙཱིཔཡོགོ, ཀཱཡཔཡོགོ ཝཱ. ཏེནཱཧ ‘‘ཝཉྩནཱདྷིཔྤཱཡཏོ མུསཱ’’ཏི. མུསཱ ཙ ཝཉྩནཱདྷིཔྤཱཡོ ཙ པུབྦབྷཱགཀྑཎེ, ཏངྑཎེ ཙ. ཝུཏྟཉྷི ‘‘པུབྦེ ཝཱསྶ ཧོཏི ‘མུསཱ བྷཎིསྶ’ནྟི, བྷཎནྟསྶ ཧོཏི ‘མུསཱ བྷཎཱམཱི’’’ཏི (པཱརཱ. ༢༠༠). ཨེཏཉྷི དྭཡཾ ཨངྒབྷཱུཏཾ, ཨིཏརཾ པན ཧོཏུ ཝཱ, མཱ ཝཱ, ཨཀཱརཎམེཏཾ. ཨབྷཎིནྟི ཝིཉྙཱཔནཾ ཨཀཱསིཾ.

ཨཉྙཏྲ ཨདྷིམཱནཱཏི ཨདྷིགཏོ མཱནོ, ཨདྷིཀོ ཝཱ མཱནོ ཨདྷིམཱནོ, ཐདྡྷམཱནོཏི ཨཏྠོ, ཏཾ ཝིནཱཏི ཨཏྠོ. ཀསྶ པནཱཡཾ ཨདྷིམཱནོ ཨུཔྤཛྫཏི, ཀསྶ ནུཔྤཛྫཏི? ཨརིཡསཱཝཀསྶ ཏཱཝ ནུཔྤཛྫཏི (པཱརཱ. ཨཊྛ. ༢.༡༩༦). སོ ཧི མགྒཕལནིབྦཱནཔཧཱིནཀིལེསཱཝསིཊྛཀིལེསཔཙྩཝེཀྑཎེན སཉྫཱཏསོམནསྶོ ¶ ཨརིཡགུཎཔྤཊིཝེདྷེ ནིཀྐངྑོ, ཏསྨཱ སོཏཱཔནྣཱདཱིནཾ ‘‘ཨཧཾ སཀདཱགཱམཱི’’ཏིཨཱདིཝསེན མཱནོ ནུཔྤཛྫཏི. དུསྶཱིལསྶ ནུཔྤཛྫཏི. སོ ཧི ཨརིཡགུཎཱདྷིགམེ ནིརཱསོཝ. སཱིལཝཏོཔི པརིཙྩཏྟཀམྨཊྛཱནསྶ ནིདྡཱརཱམཏཱདིམནུཡུཏྟསྶ ནུཔྤཛྫཏི, སུཔརིསུདྡྷསཱིལསྶ པན ཀམྨཊྛཱནེ ཨཔྤམཏྟསྶ ནཱམརཱུཔཾ ཝཝཏྠཔེཏྭཱ པཙྩཡཔརིགྒཧེན ཝིཏིཎྞཀངྑསྶ ཏིལཀྑཎཾ ཨཱརོཔེཏྭཱ སངྑཱརེ ¶ སམྨསནྟསྶ ཨཱརདྡྷཝིཔསྶཀསྶ ཨུཔྤཛྫཏི. ཏེནཱཧ ‘‘ཡྭཱཡ’’ནྟིཨཱདི. ཏཏྠ ཏིལཀྑཎཾ ཨཱརོཔེཏྭཱཏི (སཱརཏྠ. ཊཱི. ༢.༡༩༦) ཀལཱཔསམྨསནཝསེན ཨནིཙྩཱདིལཀྑཎཏྟཡཾ ཨཱརོཔེཏྭཱ. སམྨསནྟསྶཱཏི ཝིཔསྶནྟསྶ. ཨཱརདྡྷཝིཔསྶཀསྶཱཏི ཨུདཡབྦཡཱནུཔསྶནཱཡ ཨཱརདྡྷཝིཔསྶཀསྶ. ཨཔཏྟེཏི ཨཏྟནོ སནྟཱནེ ཨུཔྤཏྟིཝསེན ཨཔཏྟེ, ཨནདྷིགཏེཏི ཝུཏྟཾ ཧོཏི. པཏྟསཉྙིཏཱསངྑཱཏོཏི ‘‘པཏྟོ མཡཱ ཨུཏྟརིམནུསྶདྷམྨོ’’ཏི ཨེཝཾསཉྙིཏཱསངྑཱཏོ ཨདྷིམཱནོ ཨུཔྤཛྫཏི. ཨུཔྤནྣོ ཙ སུདྡྷསམཐལཱབྷིཾ ཝཱ སུདྡྷཝིཔསྶནཱལཱབྷིཾ ཝཱ ཨནྟརཱ ཋཔེཏི. སོ ཧི དསཔི ཝཱིསམྤི ཏིཾསམྤི ཝསྶཱནི ཀིལེསསམུདཱཙཱརཾ ཨཔསྶནྟོ ‘‘ཨཧཾ སོཏཱཔནྣོ’’ཏི ཝཱ ‘‘སཀདཱགཱམཱི’’ཏི ཝཱ ‘‘ཨནཱགཱམཱི’’ཏི ཝཱ མཉྙཏི. སམཐཝིཔསྶནཱལཱབྷིཾ པན ཨརཧཏྟེཡེཝ ཋཔེཏི. ཏསྶ ཧི སམཱདྷིབལེན ཀིལེསཱ ཝིཀྑམྦྷིཏཱ, ཝིཔསྶནཱབལེན སངྑཱརཱ སུཔརིགྒཧིཏཱ, ཏསྨཱ སཊྛིམྤི ཝསྶཱནི, ཨསཱིཏིམྤི ཝསྶཱནི, ཝསྶསཏམྤི ཀིལེསཱ ན སམུདཱཙརནྟི, ཁཱིཎཱསཝསྶེཝ ཙིཏྟཱཙཱརོ ཧོཏི. སོ ཨེཝཾ དཱིགྷརཏྟཾ ཀིལེསསམུདཱཙཱརཾ ཨཔསྶནྟོ ཨནྟརཱ ཨཊྛཏྭཱཝ ‘‘ཨརཧཱ ཨཧ’’ནྟི མཉྙཏཱིཏི. ‘‘ཏཾ ཨདྷིམཱནཾ ཋཔེཏྭཱ’’ཏི ཨིམིནཱ ‘‘ཨཉྙཏྲཱ’’ཏི པདཾ ཨཔེཀྑིཏྭཱ ‘‘ཨདྷིམཱནཱ’’ཏི ཨུཔཡོགཏྠེ ནིསྶཀྐཝཙནནྟི དསྶེཏི.

པཱཔིཙྪཏཱཡཱཏི པཱཔཱ ཨིཙྪཱ ཨེཏསྶཱཏི པཱཔིཙྪོ, ཏསྶ བྷཱཝོ པཱཔིཙྪཏཱ, ཏཱཡ, པཱཔིཀཱཡ ཨིཙྪཱཡཱཏི ཨཏྠོ. ཡཱ སཱ ‘‘ཨིདྷེཀཙྩོ དུསྶཱིལོཝ སམཱནོ ‘སཱིལཝཱ’ཏི མཾ ཛནོ ཛཱནཱཏཱུ’’ཏིཨཱདིནཱ (ཝིབྷ. ༨༥༡) ནཡེན ཝུཏྟཱ, ཏཱཡ ཨསནྟགུཎསམྦྷཱཝནིཙྪཱཡཱཏི ཝུཏྟཾ ཧོཏི. ཨིམིནཱ པན མནྡཏྟཱ མོམཱུཧཏྟཱ སམུདཱཙརནྟསྶ ཨནཱཔཏྟཱིཏི དསྶེཏི. ཨཡམྤཱིཏི པི-སདྡེན ན ཀེཝལཾ པུརིམཱ ཏཡོཝཱཏི དསྶེཏི.

ཨསནྟནྟི ¶ ཨབྷཱུཏཾ. ཛྷཱནཱདིདྷམྨནྟི ཛྷཱནཾ, ཝིམོཀྑོ, སམཱདྷི, སམཱཔཏྟི, ཉཱཎདསྶནཾ, མགྒབྷཱཝནཱ, ཕལསཙྪིཀིརིཡཱ, ཀིལེསཔྤཧཱནཾ, ཝིནཱིཝརཎཏཱ ཙིཏྟསྶ, སུཉྙཱགཱརེ ཨབྷིརཏཱི’’ཏི (པཱརཱ. ༡༩༨) ཨེཝཾ ཝུཏྟཾ ཨུཏྟརིམནུསྶདྷམྨཾ. ཡསྶ ཨཱརོཙེཏཱིཏི (པཱརཱ. ཨཊྛ. ༢.༢༡༥) ཝཱཙཱཡ ཝཱ ཧཏྠཝིཀཱརཱདཱིཧི ཝཱ ཨངྒཔཙྩངྒཙོཔནེཧི ཝིཉྙཏྟིཔཐེ ཋིཏསྶ ཡསྶ པུགྒལསྶ ཨཱརོཙེཏི. ཝིཉྙཏྟིཔཐཾ པན ཨཏིཀྐམིཏྭཱ ཋིཏོ ཀོཙི ཙེ དིབྦེན ཙཀྑུནཱ (སཱརཏྠ. ཊཱི. ༢.༢༡༥), དིབྦཱཡ ཙ སོཏདྷཱཏུཡཱ དིསྭཱ ཙ སུཏྭཱ ཙ ཛཱནཱཏི, ན པཱརཱཛིཀཾ. ཡོཔི ‘‘ཀིཾ ཨཡཾ བྷཎཏཱི’’ཏི སཾསཡཾ ཝཱ ཨཱཔཛྫཏི, ཙིརཾ ཝཱིམཾསིཏྭཱ ཝཱ པཙྪཱ ཛཱནཱཏི, ‘‘ཨཝིཛཱནནྟོ’’ཨིཙྩེཝ སངྑྱཾ གཙྪཏི. ཡོ པན ཛྷཱནཱདཱིནི ཨཏྟནོ ཨདྷིགམཝསེན ཝཱ ཨུགྒཧཔརིཔུཙྪཱདིཝསེན ཝཱ ན ཛཱནཱཏི, ཀེཝལཾ ‘‘ཛྷཱན’’ནྟི ཝཱ ‘‘ཝིམོཀྑོ’’ཏི ¶ ཝཱ ཝཙནམཏྟམེཝ སུཏཾ ཧོཏི, སོཔི ཏེན ཝུཏྟེ ‘‘ཛྷཱནཾ ཀིར སམཱཔཛྫཱི’’ཏི ཨེས ཝདཏཱིཏི ཡདི ཨེཏྟཀམཏྟམྤི ཛཱནཱཏི, ‘‘ཛཱནཱཏི’’ཙྩེཝ སངྑྱཾ གཙྪཏི, ཏསྶ ཝུཏྟེ པཱརཱཛིཀམེཝ. སེསོ པན ཨེཀསྶ ཝཱ དྭིནྣཾ ཝཱ བཧཱུནཾ ཝཱ ནིཡམིཏཱནིཡམིཏཝསེན ཝིསེསོ སབྦོ སིཀྑཱཔཙྩཀྑཱནཀཐཱཡཾ ཝུཏྟནཡེནེཝ ཝེདིཏབྦོ. པརིཡཱཡབྷཱསནེ པན ‘‘ཨཧ’’ནྟི ཨཝུཏྟཏྟཱ པཊིཝིཛཱནནྟསྶ ཝུཏྟེཔི ཐུལླཙྩཡཾ. ཝིསཾཝཱདནཱདྷིཔྤཱཡེན མུསཱཝཱདཔཡོགསྶ ཀཏཏྟཱ ཨཔྤཊིཝིཛཱནནྟསྶཱཔི དུཀྐཊནྟི ཨཱཧ ‘‘ཡོ ཏེ ཝིཧཱརེ ཝསཏི…པེ… དུཀྐཊ’’ནྟི. ཨནུལླཔནཱདྷིཔྤཱཡསྶཱཏི ཨུལླཔནཱདྷིཔྤཱཡཝིརཧིཏསྶ, ཨབྷཱུཏཱརོཙནཱདྷིཔྤཱཡཝིརཧིཏསྶཱཏི ཨཏྠོ. ཨུམྨཏྟཀཱདཡོ པུབྦེ ཝུཏྟནཡཱ ཨེཝ. ཨིདྷ པན ཨཱདིཀམྨིཀཱ ཝགྒུམུདཱཏཱིརིཡབྷིཀྑཱུ, ཏེསཾ ཨནཱཔཏྟི.

ཙཏུཏྠཔཱརཱཛིཀཝཎྞནཱ ནིཊྛིཏཱ.

པཱརཱཛིཀནིགམནཝཎྞནཱ

ཨིདྷཱཏི ཨིམསྨིཾ བྷིཀྑུཔཱཏིམོཀྑེ. ཨུདྡིཊྛཔཱརཱཛིཀཔརིདཱིཔནམེཝཱཏི ཨུདྡིཊྛཱནཾ ཙཏུནྣཾ པཱརཱཛིཀཱནཾ པརིདཱིཔནཝཙནམེཝ. ཨཝདྷཱརཎཾ པན ན ཨཉྙེསམྤཱིཏི དསྶནཏྠཾ. ཏེནཱཧ ‘‘སམོདྷཱནེཏྭཱ པནཱ’’ཏིཨཱདི. ཏཏྠ སམོདྷཱནེཏྭཱཏི ཏཏྠ ཏཏྠ ཨཱགཏཱནི ཨེཏྠེཝ སམོདཧིཏྭཱ, པཀྑིཔིཏྭཱ རཱསིཾ ཀཏྭཱཏི ཨཏྠོ. པཱལི༹ཡཾ ཨཱགཏཱནཱིཏི ཨུདྡེསཔཱལི༹ཡཾ ཨཱགཏཱནི ¶ . བྷིཀྑུནཱིནཾ ཨསཱདྷཱརཎཱནི ཙཏྟཱརཱིཏི ཨུབྦྷཛཱཎུམཎྜལིཀཱ, ཝཛྫཔྤཊིཙྪཱདིཀཱ, ཨུཀྑིཏྟཱནུཝཏྟིཀཱ, ཨཊྛཝཏྠུཀཱཏི ཨིམཱནི བྷིཀྑུནཱིནཾ བྷིཀྑཱུཧི ཨསཱདྷཱརཎཱནི ཙཏྟཱརི. པཎྜཀཱདཱིནཉྷི ཨེཀཱདསནྣཾ ཨབྷབྦབྷཱཝོ པཱརཱཛིཀཱཔཏྟིསདིསཏྟཱ པཱརཱཛིཀོཏི ཨཱཧ ‘‘ཨེཀཱདསནྣ’’ནྟིཨཱདི. ཨབྷབྦབྷཱཝསངྑཱཏེཧཱིཏི ཝཏྠུཝིཔནྣཏཱདིནཱ པབྦཛྫཱུཔསམྤདཱཡ ནཨརཧབྷཱཝསངྑཱཏེཧི. པཎྜཀཏིརཙྪཱནགཏཨུབྷཏོབྱཉྫནཀཱ (པཱརཱ. ཨཊྛ. ༢.༢༣༣) ཧི ཏཡོ ཝཏྠུཝིཔནྣཱ ཨཧེཏུཀཔྤཊིསནྡྷིཀཱ, ཏེསཾ སགྒོ ཨཝཱརིཏོ, མགྒོ པན ཝཱརིཏོ. ཨབྷབྦཱ ཧི ཏེ མགྒཔྤཊིལཱབྷཱཡ ཝཏྠུཝིཔནྣཏྟཱ. པབྦཛྫཱཔི ནེསཾ པཊིཀྑིཏྟཱ, ཏསྨཱ ཏེཔི པཱརཱཛིཀཱཝ. ཐེཡྻསཾཝཱསཀོ, ཏིཏྠིཡཔཀྐནྟཀོ, མཱཏུགྷཱཏཀོ, པིཏུགྷཱཏཀོ, ཨརཧནྟགྷཱཏཀོ, བྷིཀྑུནིདཱུསཀོ, ལོཧིཏུཔྤཱདཀོ, སངྒྷབྷེདཀོཏི ཨིམེ ཨཊྛ ཨཏྟནོ ཀིརིཡཱཡ ཝིཔནྣཏྟཱ ཨབྷབྦཊྛཱནཾ པཏྟཱཏི པཱརཱཛིཀཱཝ. ཏེསུ ཐེཡྻསཾཝཱསཀོ, ཏིཏྠིཡཔཀྐནྟཀོ, བྷིཀྑུནིདཱུསཀོཏི ཨིམེསཾ ཏིཎྞཾ སགྒོ ཨཝཱརིཏོ, མགྒོ པན ཝཱརིཏོཝ. ཨིཏརེསཾ པཉྩནྣཾ ཨུབྷཡམྤི ཝཱརིཏཾ. ཏེ ཧི ཨནནྟརཱཝ ནརཀེ ནིབྦཏྟནཀསཏྟཱ. ཡདཱ བྷིཀྑུནཱི ཝིབྦྷམིཏུཀཱམཱ ཧུཏྭཱ ཀཱསཱཝམེཝ ¶ ཝཱ གིཧིཝཏྠཾ ཝཱ གིཧིནིཝཱསནཱཀཱརེན ནིཝཱསེཏི, ཏདཱ པཱརཱཛིཀམཱཔནྣཱ ནཱམ ཧོཏཱིཏི ཨཱཧ ‘‘གིཧིབྷཱཝཾ པཏྠཡམཱནཱཡཱ’’ཏིཨཱདི. སཱ ཧི ཨཛ྄ཛྷཱཙཱརཝཱིཏིཀྐམཾ ཨཀཏྭཱཔི ཨེཏྟཱཝཏཱ ཨསྶམཎཱི ནཱམ ཧོཏི.

དཱིགྷཏཱཡ ལམྦམཱནཾ ཨངྒཛཱཏམེཏསྶཱཏི ལམྦཱི (སཱརཏྠ. ཊཱི. ༢.༢༣༣). ན སོ ཨེཏྟཱཝཏཱ པཱརཱཛིཀོ, ཨཐ ཁོ ཡདཱ ཨནབྷིརཏིཡཱ པཱིལི༹ཏོ ཨཏྟནོ ཨངྒཛཱཏཾ མུཁེ ཝཱ ཝཙྩམགྒེ ཝཱ པཝེསེཏི, ཏདཱ པཱརཱཛིཀོ ཧོཏི. མུདུཀཏཱ པིཊྛི ཨེཏསྶཱཏི མུདུཔིཊྛིཀོ, ཀཏཔརིཀམྨཱཡ མུདུཀཱཡ པིཊྛིཡཱ སམནྣཱགཏོ. སོཔི ཡདཱ ཨནབྷིརཏིཡཱ པཱིལི༹ཏོ ཨཏྟནོ ཨངྒཛཱཏཾ ཨཏྟནོ མུཁམགྒཝཙྩམགྒེསུ ཨཉྙཏརཾ པཝེསེཏི, ཏདཱ པཱརཱཛིཀོ ཧོཏི. པརསྶ ཨངྒཛཱཏཾ མུཁེན གཎྷཱཏཱིཏི ཡོ ཨནབྷིརཏིཡཱ པཱིལི༹ཏོ པརསྶ སུཏྟསྶ ཝཱ པམཏྟསྶ ཝཱ ཨངྒཛཱཏཾ མུཁེན གཎྷཱཏི. པརསྶ ཨངྒཛཱཏེ ཨབྷིནིསཱིདཏཱིཏི ཡོ ཨནབྷིརཏིཡཱ པཱིལི༹ཏོ པརསྶ ཨངྒཛཱཏཾ ཀམྨནིཡཾ དིསྭཱ ཨཏྟནོ ཝཙྩམགྒེན ཏསྶཱུཔརི ནིསཱིདཏི, ཏཾ ཨཏྟནོ ཝཙྩམགྒཾ པཝེསེཏཱིཏི ཨཏྠོ. ཨེཏཱནི ཧི ཙཏྟཱརི ཡསྨཱ ¶ ཨུབྷིནྣཾ རཱགཝསེན སདིསབྷཱཝཱུཔགཏཱནཾ དྷམྨོ ‘‘མེཐུནདྷམྨོ’’ཏི ཝུཙྩཏི, ཏསྨཱ ཨེཀེན པརིཡཱཡེན མེཐུནདྷམྨཾ ཨཔྤཊིསེཝིཏྭཱཡེཝ ཀེཝལཾ མགྒེན མགྒཔྤཝེསནཝསེན ཨཱཔཛྫིཏབྦཏྟཱ མེཐུནདྷམྨཔཱརཱཛིཀསྶ ཨནུལོམེནྟཱིཏི ‘‘ཨནུལོམཔཱརཱཛིཀཱནཱི’’ཏི ཝུཙྩནྟི.

ཨེཏྠཱཧ – མཱཏུགྷཱཏཀཔིཏུགྷཱཏཀཨརཧནྟགྷཱཏཀཱ ཏཏིཡཔཱརཱཛིཀཾ ཨཱཔནྣཱ, བྷིཀྑུནིདཱུསཀོ, ལམྦིཨཱདཡོ ཙཏྟཱརོ ཙ པཋམཔཱརཱཛིཀཾ ཨཱཔནྣཱ ཨེཝཱཏི ཀཏྭཱ ཀུཏོ ཙཏུཝཱིསཏཱིཏི (སཱརཏྠ. ཊཱི. ༢.༢༣༣)? ཝུཙྩཏེ – མཱཏུགྷཱཏཀཱདཡོ ཧི ཙཏྟཱརོ ཨིདྷ ཨནུཔསམྤནྣཱ ཨེཝ ཨདྷིཔྤེཏཱ, ལམྦིཨཱདཡོ ཙཏྟཱརོ ཀིཉྩཱཔི པཋམཔཱརཱཛིཀེན སངྒཧིཏཱ, ཡསྨཱ པན ཨེཀེན པརིཡཱཡེན མེཐུནདྷམྨཾ ཨཔྤཊིསེཝིནོ ཧོནྟི, ཏསྨཱ ཝིསུཾ ཝུཏྟཱཏི. དུཏིཡཝིཀཔྤེ ཀཙྩིཏྠཱཏི ཨེཏྠ ཀཙྩི ཨཏྠཱཏི པདཙྪེདོ ཀཱཏབྦོ.

ཨིཏི ཀངྑཱཝིཏརཎིཡཱ པཱཏིམོཀྑཝཎྞནཱཡ

ཝིནཡཏྠམཉྫཱུསཱཡཾ ལཱིནཏྠཔྤཀཱསནིཡཾ

པཱརཱཛིཀཝཎྞནཱ ནིཊྛིཏཱ.

སངྒྷཱདིསེསཀཎྜཾ

པིཡཝཙནེན ¶ ¶ ཨཱལཔནནྟི པིཡཱཡིཏབྦཝཙནེནཱལཔནཾ, སཱདྷཱུནཾ སམཱལཔནནྟི ཝུཏྟཾ ཧོཏི. སཱདྷཝོ ཧི པརེ ‘‘བྷོནྟོ’’ཏི ཝཱ ‘‘དེཝཱནཾཔིཡཱ’’ཏི ཝཱ ‘‘བྷདྲབྷཝ’’ནྟི ཝཱ ‘‘ཨཱཡསྨནྟོ’’ཏི ཝཱ སམཱལཔནྟི.

༡. སུཀྐཝིསྶཊྛིསིཀྑཱཔདཝཎྞནཱ

སཾ-སདྡོ ཝིཛྫམཱནཏྠོཏི ཨཱཧ ‘‘སཾཝིཛྫཏཱི’’ཏི. ཙེཏནཱཏི ཝཱིཏིཀྐམཝསཔྤཝཏྟཱ པུབྦབྷཱགཙེཏནཱ, མོཙནསྶཱདཙེཏནཱཏི ཨཏྠོ. ཨསྶཱཏི སུཀྐཝིསྶཊྛིཡཱ. ཨཉྙཔདཏྠསམཱསེནེཝ སུཀྐཝིསྶཊྛིཡཱ ཝུཏྟཏྟཱ ཨིཀ-སདྡསྶ ཝིསུཾ ཨཏྠོ ནཏྠཱིཏི ཨཱཧ ‘‘སཉྩེཏནཱཝ སཉྩེཏནིཀཱ’’ཏི. ཨིདཱནི ཨིཀ-སདྡོཝ ཨཏྠིཨཏྠཾ པཀཱསེཏཱིཏི དསྶེནྟོ ‘‘སཉྩེཏནཱ ཝཱ’’ཏིཨཱདིམཱཧ. སཾཝིཛྫམཱནཱ ཙེཏནཱ སཉྩེཏནཱ. སུཀྐསྶཱཏི སམྦྷཝསྶ. ཝིསཊྛཱིཏི ཝིསྶགྒོ.

ཨིདཱནི ཏཾ ཡསྨིཾ ཀཱལེ མོཙེཏི, ཡེནཱདྷིཔྤཱཡེན མོཙེཏི, ཡེན ཙོཔཱཡེན མོཙེཏི, ཡཉྩ ཏསྶ ཨདྷིཔྤཱཡསྶ ཝཏྠུ, ཏཾ སབྦཾ སངྑེཔཏོ ཝིབྷཱཝེཏྭཱ སརཱུཔཏོ ཏཾ ཝིསཊྛིཾ དསྶེཏུཾ ‘‘རཱགཱུཔཏྠམྦྷཱདཱིསཱུ’’ཏིཨཱདིམཱཧ. ཏཏྠ རཱགསྶ བལཝབྷཱཝོ, རཱགེན ཝཱ ཨངྒཛཱཏསྶཱུཔཏྠམྦྷོ ཐདྡྷབྷཱཝོ རཱགཱུཔཏྠམྦྷོ, སོ ཨཱདི ཡེསཾ ཏེ རཱགཱུཔཏྠམྦྷཱདཡོ, ཏེསུ རཱགཱུཔཏྠམྦྷཱདཱིསུ. ཨཱདིསདྡེན (པཱརཱ. ༢༣༨) ཝཙྩཱུཔཏྠམྦྷཔསྶཱཝཱུཔཏྠམྦྷཝཱཏཱུཔཏྠམྦྷཨུཙྩཱལིངྒཔཱཎཀདཊྛཱུཔཏྠམྦྷཱནཾ གཧཎཾ. ཀམྨཉྙཏཾ པཏྟེཏི མོཙནཀམྨཀྑམཏཱཡ ཀམྨནིཡཏཾ པཏྟེ, ཨཛ྄ཛྷཏྟརཱུཔཱདཱིསུ ཨུཔཀྐམཱརཧབྷཱཝཾ པཏྟེཏི ཨཏྠོ. ཨརོགསྶ བྷཱཝོ ཨཱརོགྱཾ, ཏཾ ཨཱདི ཡེསཾ ཏེ ཨཱརོགྱཱདཡོ, ཏེསུ ཨཱརོགྱཱདཱིསུ. ཨཱདིསདྡེན སུཁབྷེསཛྫདཱནཔུཉྙཡཉྙསགྒབཱིཛཝཱིམཾསདཝཱནཾ གཧཎཾ. ཨཛ྄ཛྷཏྟརཱུཔཾ ཨཛ྄ཛྷཏྟཾ ཨུཔཱདིནྣརཱུཔཾ, ཏཾ ཨཱདི ཡེསཾ ཏེ ཨཛ྄ཛྷཏྟརཱུཔཱདཡོ, ཏེསུ. ཨཱདིསདྡེན བཧིདྡྷཱརཱུཔཨཛ྄ཛྷཏྟབཧིདྡྷཱརཱུཔཨཱཀཱསེཀཊིཀམྤནཱནཾ ¶ གཧཎཾ. མོཙནེ ཨསྶཱདོ སུཁཝེདནཱ མོཙནསྶཱདོ, མོཙནཏྠཾ པུབྦབྷཱགེ པཝཏྟརཱགོ, སམྤཡུཏྟཨསྶཱདསཱིསེན ཙེཏྠ རཱགོ ཝུཏྟོ, ཏེན སམྤཡུཏྟཱ ཙེཏནཱ མོཙནསྶཱདཙེཏནཱ, ཏཱཡ ¶ . ཨིམིནཱ མུཙྩནསྶཱདོ (པཱརཱ. ཨཊྛ. ༢.༢༤༠) མུཏྟསྶཱདོ མེཐུནསྶཱདོ ཕསྶསྶཱདོ ཀཎྜུཝནསྶཱདོ དསྶནསྶཱདོ ནིསཛྫསྶཱདོ ཝཱཙསྶཱདོ གེཧསིཏཔེམཾ ཝནབྷངྒིཡནྟི ཨིམེཧི སམྤཡུཏྟཱ ཙེཏནཱཡོ པཊིཀྑིཔཏི, ཏཱཧི ནིམིཏྟེ ཨུཔཀྐམནྟསྶ མུཏྟེཔི ཨནཱཔཏྟི. ‘‘ནིམིཏྟེ ཨུཔཀྐམནྟསྶཱ’’ཏི ཨིམིནཱ པན ཨཱུརུམདྡཱཔནཱདཱིནི པཊིཀྑིཔཏི. ཏེན ཧི སཏིཔི མོཙནསྶཱདེ ནིམིཏྟེ ཨུཔཀྐམཱབྷཱཝཏོ མུཏྟེཔི ཨནཱཔཏྟི. ཝུཏྟཉྷེཏཾ སམནྟཔཱསཱདིཀཱཡཾ ‘‘སཱ ཙ ཁོ ནིམིཏྟེ ཨུཔཀྐམནྟསྶེཝ, ཧཏྠཔརིཀམྨཔཱདཔརིཀམྨགཏྟཔརིཀམྨཀརཎེན སཙེཔི ཨསུཙི མུཙྩཏི, ཨནཱཔཏྟཱི’’ཏི.

ཨཱསཡདྷཱཏུནཱནཱཏྟཏོཏི པིཏྟསེམྷཔུབྦལོཧིཏཱསཡཱནཉྩེཝ པཐཝཱིདྷཱཏུཨཱདཱིནཉྩ ཙཏུནྣཾ དྷཱཏཱུནཾ, རསསོཎིཏཱདཱིནཾ ཝཱ སཏྟནྣཾ དྷཱཏཱུནཾ ནཱནཱཏྟཏོ. ཋཱནཱ ཙཱཝནཱཏི སུཀྐསྶ ཡཾ ཋཱནཾ, ཏཏོ ཙུཏི. སུཀྐསྶ ཧི ཝཏྠིསཱིསཾ ཀཊི ཀཱཡོཏི (པཱརཱ. ཨཊྛ. ༢.༢༣༧) ཏིདྷཱ ཋཱནཾ པཀཔྤེནྟི. ཨེཀོ ཀིརཱཙརིཡོ ‘‘ཝཏྠིསཱིསཾ སུཀྐསྶ ཋཱན’’ནྟི ཨཱཧ, ཨེཀོ ‘‘ཀཊཱི’’ཏི, ཨེཀོ ‘‘སཀལོ ཀཱཡོ’’ཏི. ཏེསུ ཏཏིཡསྶ བྷཱསིཏཾ སུབྷཱསིཏཾ. ཀེསལོམནཁདནྟཱནཉྷི མཾསཝིནིམུཏྟཊྛཱནཾ, ཨུཙྩཱརཔསྶཱཝཁེལ༹སིངྒྷཱཎིཀཱ, ཐདྡྷསུཀྑཙམྨཱནི ཙ ཝཛྫེཏྭཱ ཨཝསེསོ ཚཝིམཾསལོཧིཏཱནུགཏོ སབྦོཔི ཀཱཡོ ཀཱཡཔྤསཱདབྷཱཝཛཱིཝིཏིནྡྲིཡཱབདྡྷཔིཏྟཱནཾ, སམྦྷཝསྶ ཙ ཋཱནམེཝ. ཏཐཱ ཧི རཱགཔརིཡུཊྛཱནེནཱབྷིབྷཱུཏཱནཾ ཧཏྠཱིནཾ ཨུབྷོཧི ཀཎྞཙཱུལི༹ཀཱཧི སམྦྷཝོ ནིཀྑམཏི.

ཨེཏྠ ཙ ‘‘རཱགཱུཔཏྠམྦྷཱདཱིསཱུ’’ཏིཨཱདིནཱ (པཱརཱ. ཨཊྛ. ༢.༢༣༧) ཀཱལོ དསྶིཏོ. རཱགཱུཔཏྠམྦྷཱདིཀཱལེསུ ཧི ཨངྒཛཱཏཾ ཀམྨནིཡཾ ཧོཏི. ཡསྶ ཀམྨནིཡཏྟེ སཏི མོཙེཏི, ཨིཏོ པརཾ ཨཉྙོ ཀཱལོ ནཏྠི. ན ཧི ཝིནཱ རཱགཱུཔཏྠམྦྷཱདཱིཧི པུབྦཎྷཱདཡོ ཀཱལབྷེདཱ མོཙནེ ནིམིཏྟཾ ཧོནྟི. ‘‘ཨཱརོགྱཱདཱིསཱུ’’ཏིཨཱདིནཱ པན ཨདྷིཔྤཱཡོ དསྶིཏོ. ཨེཝརཱུཔེན ཧི ཨདྷིཔྤཱཡབྷེདེན མོཙེཏི, ན ཨཉྙཐཱ. ‘‘ཨཛ྄ཛྷཏྟརཱུཔཱདཱིསཱུ’’ཏིཨཱདིནཱ ཨུཔཱཡོ དསྶིཏོ. ཨཛ྄ཛྷཏྟརཱུཔེ ཝཱ ཧི མོཙེཡྻ, བཧིདྡྷཱརཱུཔེ ཝཱ, ཨུབྷཡཏྠ ཝཱ, ཨཱཀཱསེ ཝཱ ཀཊིཾ ཀམྤེནྟོ, ཨིཏོ པརཾ ཨཉྙོ ཨུཔཱཡོ ནཏྠི. ནཱིལཱདིཝསེནཱ’’ཏིཨཱདཱིཧི པན དསཧི ནཝམསྶ ཨདྷིཔྤཱཡསྶ ཝཏྠུ དསྶིཏཾ. ཝཱིམཾསནྟོ ཧི ནཱིལཱདཱིསུ ཨཉྙཏརཝསེན ཝཱིམཾསཏི, ན ཏེཧི ཝིནིམུཏྟནྟི. ‘‘ཋཱནཱ ཙཱཝནཱ’’ཏི ཨིམིནཱ པན ཨཏྠཏོ ཝིསྶཊྛི དསྶིཏཱ ¶ . ཡཐཱཧ ‘‘ཝིསྶཊྛཱིཏི ཋཱནཏོ ཙཱཝནཱ ཝུཙྩཏཱི’’ཏི (པཱརཱ. ༢༣༧). སཱ ཙཱཡཾ ཏསྶ སུཀྐསྶ ཋཱནཱ ཙཱཝནཱ རཱགཝསེན. ཝུཏྟཉྷེཏཾ ¶ ཀཐཱཝཏྠུཨཊྛཀཐཱཡཾ ‘‘སུཀྐཝིསྶཊྛི ནཱམ རཱགསམུཊྛཱནཱ ཧོཏཱི’’ཏི (ཀཐཱ. ཨཊྛ. ༣༠༧). ཨཉྙཏྲ སུཔིནནྟཱཏི སུཔིནོ ཨེཝ སུཔིནནྟོ, ཏཾ ཋཔེཏྭཱཏི ཝུཏྟཾ ཧོཏི. ཏེནཱཧ ‘‘ཡཱ སུཔིནེ’’ཏིཨཱདི. སངྒྷཱདིསེསོཏི ཨིམསྶ ཨཱཔཏྟིནིཀཱཡསྶ ནཱམཾ. ཏེནཱཧ ‘‘ཡཱ ཨཉྙཏྲ སུཔིནནྟཱ’’ཏིཨཱདི. ཨཱཔཏྟིནིཀཱཡོཏི ཨཱཔཏྟིསམཱུཧོ. ཀིཉྩཱཔི ཨཡཾ ཨེཀཱཝ ཨཱཔཏྟི, རུལ༹ྷིསདྡེན, པན ཨཝཡཝེ སམཱུཧཝོཧཱརེན ཝཱ ‘‘ནིཀཱཡོ’’ཏི ཝུཏྟོ ‘‘ཨེཀོ ཝེདནཱཀྑནྡྷོ, ཨེཀོ ཝིཉྙཱཎཀྑནྡྷོ’’ཏིཨཱདཱིསུ ཝིཡ.

ཨསྶཱཏི (སཱརཏྠ. ཊཱི. ༢.༡༦ སཾགྷཱདིསེསཀཎྜ) ཨཱཔཏྟིནིཀཱཡསྶ. ནནུ ཙ ཨཡུཏྟོཡཾ ནིདྡེསོ ‘‘སངྒྷོ ཨཱདིམྷི ཙེཝ སེསེ ཙ ཨིཙྪིཏབྦོ ཨསྶཱ’’ཏི. ན ཧི ཨཱཔཏྟིནིཀཱཡསྶ ཨཱདིམྷི ཙེཝ སེསེ ཙ སངྒྷོ ཨིཙྪིཏོ, ཀིཉྩརཧི ཝུཊྛཱནསྶཱཏི ཨིམཾ ཙོདནཾ མནསི ནིདྷཱཡ ཡཐཱ ན ཝིརུཛ྄ཛྷཏི, ཏཐཱ ཨདྷིཔྤཱཡཾ ཝིཝརིཏུཾ ‘‘ཀིཾ ཝུཏྟཾ ཧོཏཱི’’ཏིཨཱདིམཱཧ. ཨཱཔཏྟིཏོ ཝུཊྛཱནསྶ ཨཱདིམྷི ཙེཝ སེསེ ཙ ཨིཙྪིཏོ སངྒྷོ ཨཱཔཏྟིཡཱཝ ཨིཙྪིཏོ ནཱམ ཧོཏཱིཏི ཨཡམེཏྠ ཨདྷིཔྤཱཡོ. ཨཱཔཏྟིཝུཊྛཱནནྟི ཨཱཔཏྟིཏོ ཝུཊྛཱནཾ, ཨནཱཔཏྟིཀབྷཱཝཱུཔགམནནྟི ཨཏྠོ.

དཀསོཏནྟི པསྶཱཝམགྒཾ, ཨངྒཛཱཏཔྤདེསནྟི ཝུཏྟཾ ཧོཏི. ཡདི ཨེཝཾ ཨཐ ཀསྨཱ ཨཊྛཀཐཱཡཾ ‘‘དཀསོཏཾ ཨོཏིཎྞམཏྟེ’’ཏི ཝུཏྟནྟི ཨཱཧ ‘‘ཋཱནཏོ པན ཙུཏ’’ནྟིཨཱདི. ཨཝསྶམེཝ དཀསོཏཾ ཨོཏརཏི ཨདྷིཝཱསེཏྭཱ ཨནྟརཱ ནིཝཱརེཏུཾ ཨསཀྐུཎེཡྻཏྟཱ. དཀསོཏོརོཧནཏོ (སཱརཏྠ. ཊཱི. ༢.༢༣༦-༢༣༧) པཊྛཱཡ པན ཨུཔཱདིནྣཏོ ཝིནིམུཏྟཏྟཱ སམྦྷཝརཱུཔཾ ཨུཏུསམུཊྛཱནམེཝ ཨཝསིསྶཏི, སེསཾ ཏིསམུཊྛཱནཾ ནཏྠཱིཏི ཝེདིཏབྦཾ. ཏསྨཱཏི ཡསྨཱ ཋཱནཏོ ཙུཏཾ དཀསོཏཾ ཨོཏརཏི, ཏསྨཱ.

ཨམོཙནཱདྷིཔྤཱཡསྶཱཏི བྷེསཛྫེན ནིམིཏྟཾ ཨཱལིམྤནྟསྶ ཨུཙྩཱརཱདཱིནི ཝཱ ཀརོནྟསྶ. སུཔིནཾ པསྶནྟསྶཱཏི (པཱརཱ. ཨཊྛ. ༢.༢༣༧) དྷཱཏུཀྑོབྷཏོ ཝཱ ཨནུབྷཱུཏཔུབྦཏོ ཝཱ དེཝཏོཔསཾཧཱརཏོ ཝཱ པུབྦནིམིཏྟཏོ ཝཱཏི ཨིམེཧི ཙཏཱུཧི ཀཱརཎེཧི སུཔིནཾ པསྶནྟསྶ. ཀིཾ པནེཏཾ པསྶནྟོ སུཏྟོ པསྶཏི, པཊིབུདྡྷོ, ཨུདཱཧུ ནེཝ སུཏྟོ, ན པཊིབུདྡྷོཏི? ཀིཉྩེཏྠ – ཡདི ¶ ཏཱཝ སུཏྟོ པསྶཏི, ཨབྷིདྷམྨཝིརོདྷོ ཨཱཔཛྫཏི. བྷཝངྒཙིཏྟེན ཧི སུཔཏི, ཏཾ རཱུཔནིམིཏྟཱདིཨཱརམྨཎཾ ཝཱ རཱགཱདིསམྤཡུཏྟཾ ཝཱ ན ཧོཏི. སུཔིནཾ པསྶནྟསྶ ཙ ཨཱིདིསཱནི ཙིཏྟཱནི ཨུཔྤཛྫནྟི. ཨཐ པཊིབུདྡྷོ པསྶཏི, ཝིནཡཝིརོདྷོ ཨཱཔཛྫཏི. ཡཉྷི པཊིབུདྡྷོ པསྶཏི, ཏཾ སབྦོཧཱརིཀཙིཏྟེན པསྶཏི. སབྦོཧཱརིཀཙིཏྟེན ཙ ཀཏེ ཝཱིཏིཀྐམེ ཨནཱཔཏྟི ནཱམ ¶ ནཏྠི. སུཔིནཾ པསྶནྟེན པན ཀཏེཔི ཝཱིཏིཀྐམེ ཨེཀནྟཾ ཨནཱཔཏྟི ཨེཝ. ཨཐ ནེཝ སུཏྟོ ན པཊིབུདྡྷོ པསྶཏི, ཀོ ནཱམ པསྶཏི, ཨེཝཉྩ སཏི སུཔིནསྶ ཨབྷཱཝོཝ ཨཱཔཛྫཏཱིཏི? ན ཨབྷཱཝོ, ཀསྨཱ? ཡསྨཱ ཀཔིམིདྡྷཔརེཏོ པསྶཏི. ཝུཏྟཉྷེཏཾ ‘‘ཀཔིམིདྡྷཔརེཏོ ཁོ མཧཱརཱཛ སུཔིནཾ པསྶཏཱི’’ཏི (མི. པ. ༥.༣.༥). ཀཔིམིདྡྷཔརེཏོཏི མཀྐཊནིདྡཱཡ ཡུཏྟོ. ཡཐཱ ཧི མཀྐཊསྶ ནིདྡཱ ལཧུཔརིཝཏྟཱ ཧོཏི, ཨེཝཾ ཡཱ ནིདྡཱ པུནཔྤུནཾ ཀུསལཱདིཙིཏྟཝོཀིཎྞཏྟཱ ལཧུཔརིཝཏྟཱ, ཡསྶཱ པཝཏྟིཡཾ པུནཔྤུནཾ བྷཝངྒཏོ ཨུཏྟརཎཾ ཧོཏི, ཏཱཡ ཡུཏྟོ སུཔིནཾ པསྶཏི. ཡསྶ ཙ ཨེཝཾ པསྶནྟསྶ སུཔིནེ མེཐུནཾ དྷམྨཾ པཊིསེཝནྟསྶ ཝིཡ, ཀཱཡསཾསགྒཱདཱིནི ཨཱཔཛྫནྟསྶ ཝིཡ ཙ སུཔིནནྟེནེཝ ཀཱརཎེན ཨསུཙི མུཙྩཏི, ཏསྶཔི ཨནཱཔཏྟི. སུཔིནེ (པཱརཱ. ཨཊྛ. ༢.༢༦༢) པན ཨུཔྤནྣཱཡ ཨསྶཱདཙེཏནཱཡ སཙསྶ ཝིསཡོ ཧོཏི, ནིཙྩལེན བྷཝིཏབྦཾ, ན ཧཏྠེན ནིམིཏྟཾ ཀཱིལཱ༹པེཏབྦཾ. ཀཱསཱཝཔཙྩཏྠརཎརཀྑཎཏྠཾ པན ཧཏྠཔུཊེན གཧེཏྭཱ ཛགྒནཏྠཱཡ ཨུདཀཊྛཱནཾ གནྟུཾ ཝཊྚཏི.

སུཀྐཝིསྶཊྛིསིཀྑཱཔདཝཎྞནཱ ནིཊྛིཏཱ.

༢. ཀཱཡསཾསགྒསིཀྑཱཔདཝཎྞནཱ

‘‘ཨོཏིཎྞོ’’ཏི (སཱརཏྠ. ཊཱི. ༢.༢༧༠) ཨིདཾ ཀམྨསཱདྷནཾ, ཀཏྟུསཱདྷནཾ ཝཱ ཧོཏཱིཏི ཏདུབྷཡཝསེན ཨཏྠཾ དསྶེནྟོ ‘‘ཡཀྑཱདཱིཧི ཝིཡ སཏྟཱ’’ཏིཨཱདིམཱཧ. ཨསམཔེཀྑིཏྭཱཏི ཡཐཱསབྷཱཝཾ ཨནུཔཔརིཀྑིཏྭཱ, ཡཐཱ ཏེ རཏིཛནཀཱ རཱུཔཱདཡོ ཝིསཡཱ ཨནིཙྩདུཀྑཱསུབྷཱནཏྟཱཀཱརེན ཨཝཊྛིཏཱ, ཏཐཱ ཨཔསྶིཏྭཱཏི ཝུཏྟཾ ཧོཏི. པརིཎཏེནཱཏི པརིཝཏྟེན. ཏེནཱཧ ‘‘ཡཐཱ པརིཝཏྟམཱན’’ནྟིཨཱདི. ཝུཏྟརཱགཝསེནཱཏི ཀཱཡསཾསགྒརཱགཝསེན. ཏདཧུཛཱཏཱཡཔཱིཏི ཏསྨིཾ ཨཧནི ཛཱཏཾ ཛནནཾ ཨེཏིསྶཱཏི ¶ ཏདཧུཛཱཏཱ, ཏསྨིཾ ཨཧནི ཛཱཏཱཏི ཝཱ ཏདཧུཛཱཏཱ, ཏཱཡ, ཏཾ དིཝསཾ ཛཱཏཱཡཔཱིཏི ཨཏྠོ, ཛཱཏམཏྟཱཡ ཨལླམཾསཔེསིཝཎྞཱཡཔཱིཏི ཝུཏྟཾ ཧོཏི.

ཨསྶཱཏི ‘‘ཀཱཡསཾསགྒཾ སམཱཔཛྫེཡྻཱ’’ཏི པདསྶ. ཨིདཱནི ཧཏྠཱདཱིནཾ ཝིབྷཱགདསྶནཏྠཾ ‘‘ཏཏྠ ཧཏྠོ ནཱམ ཀཔྤརཏོ པཊྛཱཡཱ’’ཏིཨཱདིམཱཧ. ཀཔྤརཏོ པཊྛཱཡཱཏི དུཏིཡམཧཱསནྡྷིཾ ཨུཔཱདཱཡ. ཨཉྙཏྠ པན མཎིབནྡྷཏོ པཊྛཱཡ ཡཱཝ ཨགྒནཁཱ ཧཏྠོ. ཝིནནྡྷིཏྭཱ ཝཱ ཨཝིནནྡྷིཏྭཱ ཝཱ ཀཏཀེསཀལཱཔསྶེཏཾ ཨདྷིཝཙནནྟི སམྦནྡྷོ. ཏཏྠ ཝིནནྡྷིཏྭཱཏི ཏཱིཧི ཀེསཝཊྚཱིཧི ¶ གནྠིཏྭཱ. སུཝཎྞཙཱིརཀནྟི སུཝཎྞཔཱལི༹ཾ. ཧཏྠཉྩ ཝེཎིཉྩ ཋཔེཏྭཱ ཨཝསེསསརཱིརཾ ཨངྒནྟི ཨཱཧ ‘‘ཨཝསེསསྶ སརཱིརསྶཱ’’ཏིཨཱདི.

ཡོ ཧི སེཝནཱདྷིཔྤཱཡོཔི ནིཙྩལེན ཀཱཡེན ཀེཝལཾ ཕསྶཾ པཊིཝིཛཱནཱཏི སཱདིཡཏི ཨནུབྷོཏི, ཏསྶ ཙིཏྟུཔྤཱདམཏྟེ ཨཱཔཏྟིཡཱ ཨབྷཱཝཏོ ཨནཱཔཏྟཱིཏི ཨཱཧ ‘‘ཀཱཡེན ཨཝཱཡམིཏྭཱ’’ཏིཨཱདི. མོཀྑཱདྷིཔྤཱཡེནཱཏི ཨིཏྠིཏོ མུཙྩིཏུཀཱམཏཱདྷིཔྤཱཡེན. ཨསཉྩིཙྩཱཏི ‘‘ཨིམིནཱ ཨུཔཱཡེན ཨིམཾ ཕུསིསྶཱམཱི’’ཏི ཨཙེཏེཏྭཱ. ཨེཝཉྷི ཨཙེཏེཏྭཱ པཏྟཔྤཊིགྒཧཎཱདཱིསུ མཱཏུགཱམསྶ ཨངྒེ ཕུཊྛེཔི ཨནཱཔཏྟི. ཨསཏིཡཱཏི ཨཉྙཝིཧིཏོ ཧོཏི, ‘‘མཱཏུགཱམཾ ཕུསིསྶཱམཱི’’ཏི སཏི ནཏྠི, ཨེཝཾ ཨསཏིཡཱ ཧཏྠཔཱདཔསཱརཎཱདིཀཱལེ ཕུསནྟསྶ ཨནཱཔཏྟི. ཨཛཱནནྟསྶཱཏི དཱརཀཝེསེན ཋིཏཾ དཱརིཀཾ ‘‘ཨིཏྠཱི’’ཏི ཨཛཱནནྟོ ཀེནཙིདེཝ ཀརཎཱིཡེན ཕུསཏི, ཨེཝཾ ‘‘ཨིཏྠཱི’’ཏི ཨཛཱནནྟསྶ ཕུསཏོ ཨནཱཔཏྟི. ཨསཱདིཡནྟསྶཱཏི ཀཱཡསཾསགྒཾ ཨསཱདིཡནྟསྶ བཱཧཱཔརམྤརཱཡ ནཱིཏབྷིཀྑུསྶ ཝིཡ ཨནཱཔཏྟི. ཨིདྷ པན ཨུདཱཡིཏྠེརོ ཨཱདིཀམྨིཀོ. ཏསྶ ཨནཱཔཏྟི ཨཱདིཀམྨིཀསྶཱཏི.

ཀཱཡསཾསགྒསིཀྑཱཔདཝཎྞནཱ ནིཊྛིཏཱ.

༣. དུཊྛུལླཝཱཙཱསིཀྑཱཔདཝཎྞནཱ

དུཊྛུལླཝཱཙསྶཱདརཱགཝསེནཱཏི དུཊྛུལླཱ ཝཱཙཱ དུཊྛུལླཝཱཙཱ, ཏཱཡ ཨསྶཱདཙེཏནཱ དུཊྛུལླཝཱཙསྶཱདོ, ཏེན སམྤཡུཏྟརཱགཝསེན. ཨེཏྠཱདྷིཔྤེཏཾ ¶ མཱཏུགཱམཾ དསྶེཏུཾ ‘‘མཱཏུགཱམ’’ནྟིཨཱདིམཱཧ. དུཊྛུལླཱདུཊྛུལླསཾལཀྑཎསམཏྠནྟི ཨསདྡྷམྨསདྡྷམྨཔྤཊིསཾཡུཏྟཾ ཀཐཾ ཛཱནིཏུཾ སམཏྠཾ. ཡཱ པན མཧལླིཀཱཔི བཱལཱ ཨེལ༹མཱུགཱ, ཨཡཾ ཨིདྷཱནདྷིཔྤེཏཱ. ཝཎྞོ ནཱམ དྭེ མགྒེ ཨུདྡིསྶ ‘‘ཨིཏྠིལཀྑཎེན སུབྷལཀྑཎེན སམནྣཱགཏཱསཱི’’ཏིཨཱདིནཱ (པཱརཱ. ཨཊྛ. ༢.༢༨༥) ཐོམནཱ. ཨཝཎྞོ ནཱམ དྭེ མགྒེ ཨུདྡིསྶ ཝུཏྟཝིཔརིཡཱཡེན གརཧནཱ, ‘‘ཨིཏྠིལཀྑཎེན སུབྷལཀྑཎེན ཨསམནྣཱགཏཱསཱི’’ཏིཨཱདཱིཧི ཁུཾསནཱཏི ཝུཏྟཾ ཧོཏི. ཡཱཙནཱ ནཱམ ‘‘དེཧི མེ, ཨརཧསི མེ དཱཏུ’’ནྟི (པཱརཱ. ༢༨༥) ཝཙནཾ. ཨཱཡཱཙནཱ ནཱམ ‘‘ཀདཱ ཏེ མཱཏཱ པསཱིདིསྶཏི, ཀདཱ ཏེ པིཏཱ པསཱིདིསྶཏི, ཀདཱ ཏེ དེཝཏཱཡོ པསཱིདིསྶནྟི, ཀདཱ ཏེ སུཁཎོ སུལཡོ སུམུཧུཏྟོ བྷཝིསྶཏི, ཀདཱ ཏེ མེཐུནཾ དྷམྨཾ ལབྷིསྶཱམཱི’’ཏི (པཱརཱ. ༢༨༥) ཝཙནཾ ¶ . པུཙྪནཾ ནཱམ ‘‘ཀཐཾ ཏྭཾ སཱམིཀསྶ དེསི, ཀཐཾ ཛཱརསྶ དེསཱི’’ཏི (པཱརཱ. ༢༨༥) ཝཙནཾ. པཊིཔུཙྪནཾ ནཱམ ‘‘ཨེཝཾ ཀིར ཏྭཾ སཱམིཀསྶ དེཏི, ཨེཝཾ ཛཱརསྶ དེསཱི’’ཏི (པཱརཱ. ༢༨༥) ཝཙནཾ. ཨཱཙིཀྑནཾ ནཱམ པུཊྛསྶ ‘‘ཨེཝཾ དེཧི, ཨེཝཾ དེནྟཱ སཱམིཀསྶ པིཡཱ བྷཝིསྶསི, མནཱཔཱ ཙཱ’’ཏི (པཱརཱ. ༢༨༥) བྷཎནཾ. ཨནུསཱསནཾ ནཱམ ཨཔུཊྛསྶ ‘‘ཨེཝཾ དེཧི, ཨེཝཾ དེནྟཱ སཱམིཀསྶ པིཡཱ བྷཝིསྶསི, མནཱཔཱ ཙཱ’’ཏི (པཱརཱ. ༢༨༥) བྷཝནཾ. ཨཀྐོསནཾ (པཱརཱ. ༢༨༥) ནཱམ ‘‘ཨནིམིཏྟཱསི, ནིམིཏྟམཏྟཱསི, ཨལོཧིཏཱསི, དྷུཝལོཧིཏཱསི, དྷུཝཙོལཱ༹སི, པགྒྷརནྟཱིསི, སིཁརཎཱིསི, ཨིཏྠིཔཎྜཀཱསི, ཝེཔུརིསིཀཱསི, སམྦྷིནྣཱསི, ཨུབྷཏོབྱཉྫནཀཱསཱི’’ཏི (པཱརཱ. ༢༨༥) ཝཙནཾ. ཡསྨཱ མེཐུནུཔསཾཧིཏཱཡ ཝཱཙཱཡ ཨདྷིཀཾ དུཊྛུལླཾ ནཱམ ནཏྠི, ཏསྨཱ ‘‘མེཐུནུཔསཾཧིཏཱཧཱི’’ཏི ཨིདཾ དུཊྛུལླཝཱཙཱཡ སིཁཱཔཏྟལཀྑཎདསྶནནྟི ཝུཏྟཾ, ན པན མེཐུནུཔསཾཧིཏཱཡེཝ དུཊྛུལླཝཱཙཏྟཱ. སིཁརཎཱིསཱིཏི (པཱརཱ. ཨཊྛ. ༢.༢༨༥) བཧིནིཀྑནྟཨཱཎིམཾསཱ. སམྦྷིནྣཱསཱིཏི སམྦྷིནྣཝཙྩམགྒཔསྶཱཝམགྒཱ. ཨུབྷཏོབྱཉྫནཀཱསཱིཏི པུརིསནིམིཏྟེན, ཨིཏྠིནིམིཏྟེན ཙཱཏི ཨུབྷཏོབྱཉྫནེཧི སམནྣཱགཏཱ.

ཨེཏྠ ཙ ཝཎྞབྷཎནེ ཏཱཝ ‘‘ཨིཏྠིལཀྑཎེན སུབྷལཀྑཎེན སམནྣཱགཏཱསཱི’’ཏི ཝདཏི, ན ཏཱཝ སཱིསཾ ཨེཏི. ‘‘ཏཝ ཝཙྩམགྒོ ཙ པསྶཱཝམགྒོ ཙ སུབྷོ སུབྷསཎྛཱནོ དསྶནཱིཡོ, ཨཱིདིསེན ནཱམ ཨིཏྠིལཀྑཎེན སུབྷལཀྑཎེན སམནྣཱགཏཱསཱི’’ཏི ཝདཏི, སཱིསཾ ཨེཏི, སངྒྷཱདིསེསོ ཧོཏཱིཏི ཨཏྠོ.

ཨཝཎྞབྷཎནེ ¶ པན ‘‘ཨནིམིཏྟཱསཱི’’ཏིཨཱདཱིཧི ཨེཀཱདསཧི པདེཧི ཨཝཎྞེ ཨགྷཊིཏེ སཱིསཾ ན ཨེཏི, གྷཊིཏེཔི ཏེསུ ‘‘སིཁརཎཱིསི སམྦྷིནྣཱསི ཨུབྷཏོབྱཉྫནཀཱསཱི’’ཏི ཨིམེཧི ཏཱིཧི གྷཊིཏེཡེཝ སངྒྷཱདིསེསོ.

ཡཱཙནཱཡཔི ‘‘དེཧི མེ’’ཏི ཨེཏྟཀེནེཝ སཱིསཾ ན ཨེཏི, ‘‘མེཐུནཾ དྷམྨཾ དེཧཱི’’ཏི ཨེཝཾ མེཐུནདྷམྨེན གྷཊིཏེ ཨེཝ སངྒྷཱདིསེསོ.

‘‘ཀདཱ ཏེ མཱཏཱ པསཱིདིསྶཏཱི’’ཏིཨཱདཱིསུ ཨཱཡཱཙནཝཙནེསུཔི ཨེཏྟཀེནེཝ སཱིསཾ ན ཨེཏི, ‘‘ཀདཱ ཏེ མཱཏཱ པསཱིདིསྶཏི, ཀདཱ ཏེ མེཐུནཾ དྷམྨཾ ལབྷིསྶཱམཱི’’ཏི ཝཱ ‘‘ཏཝ མཱཏརི པསནྣཱཡ ཝཱ མེཐུནཾ དྷམྨཾ ལབྷིསྶཱམཱི’’ཏིཨཱདིནཱ པན ནཡེན མེཐུནདྷམྨེན གྷཊིཏེཡེཝ སངྒྷཱདིསེསོ.

‘‘ཀཐཾ ཏྭཾ སཱམིཀསྶ དེསཱི’’ཏིཨཱདཱིསུ (པཱརཱ. ༢༨༥) པུཙྪཱཝཙནེསུཔི ‘‘མེཐུནཾ དྷམྨ’’ནྟི ¶ ཝུཏྟེཡེཝ སངྒྷཱདིསེསོ. ‘‘ཨེཝཾ ཀིར ཏྭཾ སཱམིཀསྶ དེསཱི’’ཏི (པཱརཱ. ༢༨༥) པཊིཔུཙྪཱཝཙནེསུཔི ཨེསེཝ ནཡོ.

ཨཱཙིཀྑནཱཡ ཙ ‘‘ཨེཝཾ དེཧཱི’’ཏི, ‘‘ཨེཝཾ དདམཱནཱ’’ཏི ཝུཏྟེཔི སཱིསཾ ན ཨེཏི, ‘‘མེཐུནཾ དྷམྨཾ ཨེཝཾ དེཧི, ཨེཝཾ ཨུཔནེཧི, ཨེཝཾ མེཐུནཾ དྷམྨཾ དདམཱནཱ ཨུཔནཡམཱནཱ སཱམིཀསྶ པིཡཱ ཧོཏཱི’’ཏིཨཱདིནཱ པན ནཡེན མེཐུནདྷམྨེན གྷཊིཏེཡེཝ སངྒྷཱདིསེསོ. ཨནུསཱསནིཝཙནེསུཔི ཨེསེཝ ནཡོ.

ཨཀྐོསཝཙནེསུ པན ཨེཀཱདསསུ ‘‘སིཁརཎཱིསི སམྦྷིནྣཱསི ཨུབྷཏོབྱཉྫནཀཱསཱི’’ཏི ཨིམཱནི ཏཱིཎིཡེཝ པདཱནི སུདྡྷཱནི སཱིསཾ ཨེནྟི, ཨིཏི ཨིམཱནི ཙ ཏཱིཎི, པུརིམཱནི ཙ ཝཙྩམགྒཔསྶཱཝམགྒམེཐུནདྷམྨཔདཱནི ཏཱིཎཱིཏི ཚ པདཱནི སུདྡྷཱནི ཨཱཔཏྟིཀརཱནི, སེསཱནི ‘‘ཨནིམིཏྟཱསཱི’’ཏིཨཱདཱིནི ཨནིམིཏྟེ ‘‘མེཐུནཾ དྷམྨཾ མེ དེཧཱི’’ཏི ཝཱ ‘‘ཨནིམིཏྟཱསི, མེཐུནཾ དྷམྨཾ མེ དེཧཱི’’ཏི ཝཱ ཨཱདིནཱ ནཡེན མེཐུནདྷམྨེན གྷཊིཏཱནེཝ ཨཱཔཏྟིཀརཱནི ཧོནྟཱིཏི ཝེདིཏབྦཱནི.

ཨདྷཀྑཀནྟི ཨཀྑཀཏོ པཊྛཱཡ ཨདྷོ. ཨུབྦྷཛཱཎུམཎྜལནྟི ཛཱཎུམཎྜལཏོ པཊྛཱཡ ཨུདྡྷཾ. ཨུབྦྷཀྑཀནྟི ཨཀྑཀཏོ པཊྛཱཡ ཨུདྡྷཾ. ཨདྷོཛཱཎུམཎྜལནྟི ཛཱཎུམཎྜལཏོ པཊྛཱཡ ཨདྷོ. ཨཀྑཀཾ, པན ཛཱཎུམཎྜལཉྩ ཨེཏྠེཝ དུཀྐཊཁེཏྟེ སངྒཧཾ གཙྪཏི བྷིཀྑུནིཡཱ ཀཱཡསཾསགྒེ ཝིཡ ¶ . ན ཧི བུདྡྷཱ གརུཀཱཔཏྟིཾ སཱཝསེསཾ པཉྙཱཔེནྟཱིཏི. ཀཱཡཔྤཊིབདྡྷནྟི ཝཏྠཾ ཝཱ པུཔྥཾ ཝཱ ཨཱབྷརཎཾ ཝཱ.

ཨཏྠདྷམྨཨནུསཱསནིཔུརེཀྑཱརཱནནྟི (པཱརཱ. ཨཊྛ. ༢.༢༨༧) ཨེཏྠ ‘‘ཨནིམིཏྟཱ’’ཏིཨཱདཱིནཾ པདཱནཾ ཨཏྠཾ ཀཐེནྟོ, ཨཊྛཀཐཾ ཝཱ སཛ྄ཛྷཱཡཾ ཀརོནྟོ ཨཏྠཔུརེཀྑཱརོ ནཱམ, པཱལི༹ཾ ཝཱཙེནྟོ, སཛ྄ཛྷཱཡཾ ཝཱ ཀརོནྟོ དྷམྨཔུརེཀྑཱརོ ནཱམ, ‘‘ཨིདཱནིཔི ཨནིམིཏྟཱསི, ཨུབྷཏོབྱཉྫནཀཱསི, ཨཔྤམཱདཾ དཱནི ཀརེཡྻཱསི, ཡཐཱ ཨཱཡཏིམྤི ཨེཝརཱུཔཱ མཱ ཧོཧིསཱི’’ཏི བྷཎནྟོ ཨནུསཱསནིཔུརེཀྑཱརོ ནཱམ. ཨིཏི ཨཏྠཉྩ དྷམྨཉྩ ཨནུསཱསནིཉྩ པུརཀྑིཏྭཱ བྷཎནྟཱནཾ ཨནཱཔཏྟི. ཡོ པན བྷིཀྑུནཱིནཾ པཱལི༹ཾ ཝཱཙེནྟོ པཀཏིཝཱཙནཱམགྒཾ པཧཱཡ ཧསནྟོ ཧསནྟོ ‘‘སིཁརཎཱིསི, སམྦྷིནྣཱསི, ཨུབྷཏོབྱཉྫནཀཱསཱི’’ཏི པུནཔྤུནཾ བྷཎཏི, ཏསྶ ཨཱཔཏྟིཡེཝ. ཨིདྷ ཨཱདིཀམྨིཀོ ཨུདཱཡིཏྠེརོ, ཏསྶ ཨནཱཔཏྟི ཨཱདིཀམྨིཀསྶ. ནནུ ‘‘སིཁརཎཱི’’ཏིཨཱདཱིཧི ཨཀྐོསནྟསྶ པཊིགྷཙིཏྟཾ ཨུཔྤཛྫཏཱིཏི དུཀྑཝེདནཱཡཔི བྷཝིཏབྦཾ, ཨཐ ¶ ཀསྨཱ དྭིཝེདནནྟི? ནཱཡཾ དོསོ. རཱགཝསེན ཧི ཨཡཾ ཨཱཔཏྟི, ན པཊིགྷཝསེན, ཏསྨཱ རཱགཝསེནེཝ པཝཏྟོ ཨཀྐོསོ ཨིདྷཱདྷིཔྤེཏོ, ན པཊིགྷཝསེནཱཔཱིཏི.

དུཊྛུལླཝཱཙཱསིཀྑཱཔདཝཎྞནཱ ནིཊྛིཏཱ.

༤. ཨཏྟཀཱམསིཀྑཱཔདཝཎྞནཱ

ཨཏྟཀཱམཔཱརིཙརིཡཱཝསེནཱཏི ཨཏྟཀཱམཔཱརིཙརིཡཱཡ རཱགཝསེན. ཨིདྷཱཔི དུཊྛུལླཱདུཊྛུལླཛཱནནསམཏྠཱཝ ཨིཏྠཱི ཨདྷིཔྤེཏཱཏི ཨཱཧ ‘‘དུཊྛུལློབྷཱསེན ཝུཏྟཔྤཀཱརཱཡ ཨིཏྠིཡཱ’’ཏི. སམཱིཔེཏི སཝནཱུཔཙཱརེ. ‘‘ཋཏྭཱ’’ཏི པཱཋསེསོ. ཨཏྟཀཱམཔཱརིཙརིཡཱཏི ཀཱམཱིཡཏཱིཏི ཀཱམོ, མེཐུནདྷམྨོ, པརིཙརཎཾ ཨུཔཊྛཱནཾ པརིཙརིཡཱ, སཱཝ པཱརིཙརིཡཱ, ཀཱམེན པཱརིཙརིཡཱ ཀཱམཔཱརིཙརིཡཱ, ཨཏྟནོ ཀཱམཔཱརིཙརིཡཱ ཨཏྟཀཱམཔཱརིཙརིཡཱ, ཨཏྟནོ ཨཏྠཱཡ མེཐུནདྷམྨེན ཨུཔཊྛཱནནྟི ཨཏྠོ. ཨཐ ཝཱ ཀཱམིཏཱཏི ཀཱམཱ, པཱརིཙརིཡཱ, ཨཏྟནོ ཀཱམཱ ཨཏྟཀཱམཱ, ཨཏྟཀཱམཱ ཙ སཱ པཱརིཙརིཡཱ ཙཱཏི ཨཏྟཀཱམཔཱརིཙརིཡཱ, སཡཾ མེཐུནརཱགཝསེན ¶ པཏྠིཏཨུཔཊྛཱནནྟི ཨཏྠོ. ཏེནཱཧ ‘‘མེཐུནདྷམྨསངྑཱཏེནཱ’’ཏིཨཱདི. ཨེཏྠ ཙ པཋམེན ཨཏྠཝིཀཔྤེན ཀཱམཧེཏུཔཱརིཙརིཡཱསངྑཱཏཾ ཨཏྠཏྟཡཾ དསྶེཏི, དུཏིཡེན ཨདྷིཔྤཱཡཔཱརིཙརིཡཱསངྑཱཏཾ ཨཏྠདྭཡཾ. བྱཉྫནེ (པཱརཱ. ཨཊྛ. ༢.༢༩༡) པན ཨཱདརཾ ཨཀཏྭཱ ཨཏྠམཏྟམེཝ དསྶེཏུཾ ‘‘ཨཏྟནོ ཀཱམཾ ཨཏྟནོ ཧེཏུཾ ཨཏྟནོ ཨདྷིཔྤཱཡཾ ཨཏྟནོ པཱརིཙརིཡ’’ནྟི (པཱརཱ. ༢༩༢) པདབྷཱཛནཾ ཝུཏྟཾ. ‘‘ཨཏྟནོ ཀཱམཾ ཨཏྟནོ ཧེཏུཾ ཨཏྟནོ པཱརིཙརིཡ’’ནྟི ཧི ཝུཏྟེ ཛཱནིསྶནྟི པཎྜིཏཱ ‘‘ཨེཏྟཱཝཏཱ ཨཏྟནོ ཨཏྠཱཡ ཀཱམཔཱརིཙརིཡཱ ཝུཏྟཱ’’ཏི, ‘‘ཨཏྟནོ ཨདྷིཔྤཱཡཾ ཨཏྟནོ པཱརིཙརིཡ’’ནྟི (པཱརཱ. ༢༩༢) ཝུཏྟེཔི ཛཱནིསྶནྟི ‘‘ཨེཏྟཱཝཏཱ ཨཏྟནཱ ཨིཙྪིཏཀཱམིཏཊྛེན ཨཏྟཀཱམཔཱརིཙརིཡཱ ཝུཏྟཱ’’ཏི.

ཀལྱཱཎེན བྷདྡཀེན གུཎེན སམནྣཱགཏཏྟཱ ཀལྱཱཎདྷམྨཾ. ཏེནཱཧ ‘‘ཏདུབྷཡེནཱཔཱི’’ཏིཨཱདི. ཨབྷིརམེཡྻཱཏི ཏོསེཡྻ. ཨེཏདགྒནྟི ཨེསཱ ཨགྒཱ. པཱརིཙརིཡཱནནྟི པཱརིཙརིཡཱནཾ མཛ྄ཛྷེ, ནིདྡྷཱརཎེ ཙེཏཾ སཱམིཝཙནཾ. ནནུ དུཊྛལླཝཱཙཱསིཀྑཱཔདེ (པཱརཱ. ༢༨༥) མེཐུནཡཱཙནཾ ཨཱགཏཾ, ཨཐ ཀསྨཱ ཨིདཾ ཝུཏྟཾ? ནཱཡཾ དོསོ. ཏཏྠ (སཱརཏྠ. ཊཱི. ༢.༢༩༡) ཧི དུཊྛུལླཝཱཙསྶཱདརཱགཝསེན ཝུཏྟཾ, ཨིདྷ པན ཨཏྟནོ མེཐུནསྶཱདརཱགཝསེནཱཏི.

ཏསྨིཾཡེཝ ཁཎེཏི བྷཎིཏཀྑཎེ. ཨུབྷཏོབྱཉྫནཀོ པན པཎྜཀགཏིཀཏྟཱ ཝིསུཾ ན ཝུཏྟོ ¶ . ‘‘ཨིམསྨིཾ སིཀྑཱཔདདྭཡེ ཀཱཡསཾསགྒེ ཝིཡ ཡཀྑིཔེཏཱིསུཔི དུཊྛུལླཏྟཀཱམཝཙནེ ཐུལླཙྩཡ’’ནྟི (ཝཛིར. ཊཱི. པཱརཱཛིཀ ༢༩༥) ཝདནྟི. ཏསྨིཾཡེཝཱཏི པཎྜཀེཡེཝ ཨིཏྠིསཉྙིནོ ཨཏྟཀཱམཔཱརིཙརིཡཱཡ ཝཎྞབྷཎནེཔི དུཀྐཊཾ. ‘‘ཡོ ཏེ ཝིཧཱརེ ཝསཏི, ཏསྶ ཨགྒདཱནཾ མེཐུནཾ དྷམྨཾ དེཧཱི’’ཏི པརིཡཱཡཝཙནེཔི དུཀྐཊཾ. ‘‘ཨཏྟཀཱམཔཱརིཙརིཡཱཡ ཝཎྞཾ བྷཱསེཡྻ ཡཱ མཱདིསཾ ‘སཱིལཝནྟ’ནྟི ཝུཏྟཏྟཱ’’ཏི (ཝཛིར. ཊཱི. པཱརཱཛིཀ ༢༩༥) ཨེཀེ. ‘‘པཉྩསུ ཨངྒེསུ སབྦྷཱཝཱ སངྒྷཱདིསེསོཝཱ’’ཏི ཨཔརེ. ‘‘མེཐུནུཔསཾཧིཏེནཱ’’ཏི ཝུཏྟཏྟཱ ‘‘ཙཱིཝརཱདཱིཧི…པེ… བྷཱསནྟསྶ ཨནཱཔཏྟཱི’’ཏི ཝུཏྟཾ.

ཨཏྟཀཱམསིཀྑཱཔདཝཎྞནཱ ནིཊྛིཏཱ.

༥. སཉྩརིཏྟསིཀྑཱཔདཝཎྞནཱ

སཉྩརཎཾ ¶ སཉྩརོ, སོ ཨེཏསྶ ཨཏྠཱིཏི སཉྩརཱི, སཉྩརཎསཱིལོཏི ཝཱ སཉྩརཱི, ཏསྶ བྷཱཝོ སཉྩརིཏྟཾ, སཉྩརཎནྟི ཨཏྠོ. ཏཉྩ པརཏོ ‘‘ཨིཏྠིཡཱ ཝཱ པུརིསམཏི’’ནྟིཨཱདིཝཙནཏོ ཨིཏྠིཔུརིསཱནཾ ཝེམཛ྄ཛྷེཏི ཨཱཧ ‘‘ཨིཏྠིཔུརིསཱནཾ ཨནྟརེ སཉྩརཎབྷཱཝ’’ནྟི. པཊིགྒཎྷནཝཱིམཾསནཔཙྩཱཧརཎཱནཱིཏི ཨེཏྠ པཊིགྒཎྷནཾ ནཱམ པུརིསེན ཝཱ ཨིཏྠིཡཱ ཝཱ ཨུབྷིནྣཾ མཱཏཱདཱིཧི ཝཱ ‘‘བྷནྟེ, ཨིཏྠནྣཱམཾ ཨིཏྠིཾ ཝཱ པུརིསཾ ཝཱ ཨེཝཾ བྷཎཱཧཱི’’ཏི ཝུཏྟེ ཏེསཾ ཝཙནཾ ‘‘སཱདྷཱུ’’ཏི ཝཱ ‘‘ཧོཏཱུ’’ཏི ཝཱ ‘‘བྷཎཱམཱི’’ཏི ཝཱ ཡེན ཀེནཙི ཨཱཀཱརེན ཝཙཱིབྷེདཾ ཀཏྭཱ, སཱིསཀམྤནཱདཱིཧི ཝཱ སམྤཊིཙྪནཾ. ཝཱིམཾསནཾ ནཱམ ཝུཏྟཔྤཀཱརེན སཱསནཾ གཧེཏྭཱ ཏསྶཱ ཨིཏྠིཡཱ ཝཱ པུརིསསྶ ཝཱ ཏེསཾ ཨཝསྶཾ ཨཱརོཙནཀཱནཾ མཱཏཱཔིཏུབྷཱཏཱབྷགིནིཨཱདཱིནཾ ཝཱ སནྟིཀཾ གནྟྭཱ ཏསྶ སཱསནསྶ ཨཱརོཙནཾ. པཙྩཱཧརཎཾ ནཱམ ཏེན གནྟྭཱ ཨཱརོཙིཏེ སཱ ཨིཏྠཱི ཝཱ པུརིསོ ཝཱ ‘‘སཱདྷཱུ’’ཏི སམྤཊིཙྪཏུ ཝཱ, མཱ ཝཱ, ལཛྫཱཡ ཝཱ ཏུཎྷཱི ཧོཏུ, པུན ཨཱགནྟྭཱ ཏསྶཱ ཨིཏྠིཡཱ ཝཱ པུརིསསྶ ཝཱ ཏསྶཱ པཝཏྟིཡཱ ཨཱརོཙནཾ. ཨཱཔཛྫེཡྻཱཏི པཊིཔཛྫེཡྻ.

ཨིཏྠིཡཱ ཝཱ པུརིསམཏིཾ པུརིསསྶ ཝཱ ཨིཏྠིམཏིནྟི ཨེཏྠ ‘‘ཨཱརོཙེཡྻཱ’’ཏི པཱཋསེསོ དཊྛབྦོ. ཏེནེཝཱཧ ‘‘ཏཏྠཱ’’ཏིཨཱདི. ཛཱཡཱབྷཱཝེཏི བྷརིཡཱབྷཱཝེ. ཛཱརབྷཱཝེཏི པཏིབྷཱཝེ, ནིམིཏྟཏྠེ ཙེཏཾ བྷུམྨཝཙནཾ. ཏསྨཱ བྷརིཡཱབྷཱཝནིམིཏྟཾ པཏིབྷཱཝནིམིཏྟཾ, བྷརིཡཱབྷཱཝཧེཏུ པཏིབྷཱཝཧེཏུ, བྷརིཡཱབྷཱཝཔཙྩཡཱ པཏིབྷཱཝཔཙྩཡཱ ཨཱརོཙེཏཱིཏི ཨཏྠོ. ཨེས ནཡོ ‘‘ཛཱཡཏྟནེ ཨཱརོཙེཏཱི’’ཏིཨཱདཱིསུཔི. ‘‘ཛཱཡཏྟནེ ཝཱ ཛཱརཏྟནེ ཝཱ’’ཏི ཧི ཨིདཾ ཡདཏྠཾ ཏཾ ཏེསཾ མཏིཾ ཨཱརོཙེཏི ¶ , ཏཾ དསྶནཏྠཾ ཝུཏྟཾ. ཨིདཱནི པན པདབྷཱཛནིཡཾ (པཱརཱ. ༣༠༢) ཝུཏྟནཡེནཱཔི ཨཏྠཾ དསྶེཏུཾ ‘‘ཨཔིཙཱ’’ཏིཨཱདིམཱཧ. ཀིཉྩཱཔི ཨིཏྠིལིངྒཝསེན པདབྷཱཛནིཡཾ ཝུཏྟཾ, ‘‘ཛཱཡཏྟནེ ཝཱ ཛཱརཏྟནེ ཝཱ’’ཏི པན ནིདྡེསསྶ ཨུབྷཡལིངྒསཱདྷཱརཎཏྟཱ པུརིསལིངྒཝསེནཱཔི ཡོཛེཏྭཱ ཝཏྟབྦནྟི ཨཱཧ ‘‘ཨེཏེནེཝ ཨུཔཱཡེནཱ’’ཏིཨཱདི. མུཧུཏྟིཀཱཏི གཎིཀཱ. ‘‘ཨནྟམསོ ཏངྑཎིཀཱཡཔཱི’’ཏི ཨིདཾ ནིདསྶནམཏྟནྟི ཨཱཧ ‘‘ཨེཏེནེཝ ཨུཔཱཡེནཱ’’ཏིཨཱདི.

ཨཉྙཏྲ ¶ ནཱལཾཝཙནཱིཡཱཡཱཏི (སཱརཏྠ. ཊཱི. ༢.༣༣༩-༣༤༠) དེསཙཱརིཏྟཝསེན པཎྞདཱནཱདིནཱ ཨཔརིཙྩཏྟཾ ཋཔེཏྭཱ. སཉྩརིཏྟཝསེན བྷིཀྑུནཱ ཝཙནཱིཡཱ ན ཧོཏཱིཏི ནཱལཾཝཙནཱིཡཱ, ཏཾ ཋཔེཏྭཱཏི ཀེཙི. ཨཔྤེན ཝཱ བཧུནཱ ཝཱ དྷནེན ཀཱིཏཱ དྷནཀྐཱིཏཱ. ཡསྨཱ པན སཱ ན ཀཱིཏམཏྟཱཡེཝ བྷརིཡཱ, སཾཝཱསཏྠཱཡ པན ཀཱིཏཏྟཱ བྷརིཡཱ, ཏསྨཱསྶ ནིདྡེསེ ‘‘དྷནེན ཀིཎིཏྭཱ ཝཱསེཏཱི’’ཏི (པཱརཱ. ༣༠༤) ཝུཏྟཾ. ཚནྡཝཱསིནཱིཏི ཚནྡེན ཨཏྟནོ རུཙིཡཱ ཝསཏཱིཏི ཚནྡཝཱསིནཱི. ཡསྨཱ པན སཱ ན ཨཏྟནོ ཚནྡམཏྟེནེཝ བྷརིཡཱ ཧོཏི, པུརིསེན པན སམྤཊིཙྪིཏཏྟཱ, ཏསྨཱསྶ ནིདྡེསེ ‘‘པིཡོ པིཡཾ ཝཱསེཏཱི’’ཏི (པཱརཱ. ༣༠༤) ཝུཏྟཾ. ཨཱདིསདྡེན ‘‘བྷོགཝཱསིནཱི, པཊཝཱསིནཱི, ཨོདཔཏྟཀིནཱི, ཨོབྷཊཙུམྦཊཱ, དཱསཱི ཙ བྷརིཡཱ ཙ, ཀམྨཀཱརཱི ཙ བྷརིཡཱ ཙ, དྷཛཱཧཊཱ, མུཧུཏྟིཀཱ’’ཏི (པཱརཱ. ༣༠༤) ཨིམེསཾ ཨཊྛནྣཾ ཨཱཀཱརཱནཾ གཧཎཾ. ཡཐཱ ཙ ‘‘ཚནྡཝཱསིནཱི’’ཏིཨཱདཱིསུ ཨཉྙཏརཝསེན ཝདཏོ ཝིསངྐེཏོ ནཏྠི, ཨེཝཾ པཱལི༹ཡཾ ཨཝུཏྟེསུཔི ‘‘ཧོཧི ཀིར ཨིཏྠནྣཱམསྶ བྷརིཡཱ, ཛཱཡཱ, པཛཱཔཏི, པུཏྟམཱཏཱ, གྷརཎཱི, གྷརསཱམིནཱི, བྷཏྟརནྡྷིཀཱ, སུསྶཱུསིཀཱ, པརིཙཱརིཀཱ’’ཏི (པཱརཱ. ཨཊྛ. ༢.༣༠༥) ཨེཝམཱདཱིསུ སཾཝཱསཔརིདཱིཔཀེསུ ཝཙནེསུ ཨཉྙཏརཝསེན ཝདནྟསྶཱཔི ཝིསངྐེཏོ ནཏྠི, ཏིཝངྒསམྤཏྟིཡཱ ཨཱཔཏྟིཡེཝ.

མཱཏུརཀྑིཏཾ བྲཱུཧཱིཏི ཨེཏྠ མཱཏུརཀྑིཏཱ ནཱམ མཱཏརཱ རཀྑིཏཱ, ཡཐཱ པུརིསེན སཧ སཾཝཱསཾ ན ཀཔྤེཏི, ཨེཝཾ མཱཏརཱ རཀྑིཏཱཏི ཨཏྠོ. ཏེནེཝསྶ པདབྷཱཛནེཔི ‘‘མཱཏཱ རཀྑཏི གོཔེཏི, ཨིསྶརིཡཾ ཀཱརེཏི, ཝསཾ ཝཏྟེཏཱི’’ཏི (པཱརཱ. ༣༠༤) ཝུཏྟཾ. པིཏུརཀྑིཏཱདཱིསཱུཏི ‘‘པིཏུརཀྑིཏཱ, མཱཏཱཔིཏུརཀྑིཏཱ, བྷཱཏུརཀྑིཏཱ, བྷགིནིརཀྑིཏཱ, ཉཱཏིརཀྑིཏཱ, གོཏྟརཀྑིཏཱ, དྷམྨརཀྑིཏཱ, སཱརཀྑཱ, སཔརིདཎྜཱ’’ཏི (པཱརཱ. ༣༠༣) ཨེཝཾ ཝུཏྟེསུ པིཏུརཀྑིཏཱདཱིསུ. ཡཐཱ ཙ ཨེཏྠ, ཨེཝཾ ‘‘པིཏུརཀྑིཏཾ བྲཱུཧཱི’’ཏིཨཱདཱིསུཔི ནཡོ ཝེདིཏབྦོ.

སངྒྷསྶ ཝཱ ཙེཏིཡསྶ ཝཱ གིལཱནསྶ ཝཱ ཀིཙྩེན གཙྪནྟསྶཱཏི (པཱརཱ. ཨཊྛ. ༢.༣༤༠) ཨེཏྠ བྷིཀྑུསངྒྷསྶ ཨུཔོསཐཱགཱརཾ ཝཱ ཀིཉྩི ཝཱ ཝིཔྤཀཏཾ ཧོཏི. ཏཏྠ ཀཱརུཀཱནཾ བྷཏྟཝེཏནཏྠཱཡ ¶ ཨུཔཱསཀོ ཝཱ ཨུཔཱསིཀཱཡ སནྟིཀཾ བྷིཀྑུཾ པཧིཎེཡྻ, ཨུཔཱསིཀཱ ཝཱ ཨུཔཱསཀསྶ, ཨེཝརཱུཔེན སངྒྷཀིཙྩེན གཙྪནྟསྶ ཨནཱཔཏྟི. ཙེཏིཡཀམྨེ ཀརིཡམཱནེཔི ཨེསེཝ ནཡོ. གིལཱནསྶ ¶ བྷེསཛྫཏྠཱཡཔི ཨུཔཱསཀེན ཝཱ ཨུཔཱསིཀཱཡ སནྟིཀཾ, ཨུཔཱསིཀཱཡ ཝཱ ཨུཔཱསཀསྶ སནྟིཀཾ པཧིཏསྶ གཙྪཏོ ཨནཱཔཏྟི.

ཀིཉྩཱཔི ཨེཏྠ ‘‘ཨིཏྠཱི ནཱམ མནུསྶིཏྠཱི, ན ཡཀྑཱི ན པེཏཱི ན ཏིརཙྪཱནགཏཱ. པུརིསོ ནཱམ མནུསྶཔུརིསོ, ན ཡཀྑོ’’ཏིཨཱདི (སཱརཏྠ. ཊཱི. ༢.༣༤༡) ནཏྠི, ཏཐཱཔི མནུསྶཛཱཏིཀཱཝ ཨིཏྠིཔུརིསཱ ཨིདྷ ཨདྷིཔྤེཏཱཏི ཨཱཧ ‘‘ཏེསཾ མནུསྶཛཱཏིཀཏཱ’’ཏི. ནནཱལཾཝཙནཱིཡཏཱཏི ཡཐཱཝུཏྟནཡེན པརིཙྩཏྟཱ ཨལཾཝཙནཱིཡཱ. ནིཝཱརཎཏྠོ ཧི ཨེཏྠ ཨལཾ-སདྡོ. ན ཨལཾཝཙནཱིཡཱ ནཱལཾཝཙནཱིཡཱ, ན ནཱལཾཝཙནཱིཡཱ, ཏསྶཱ བྷཱཝོ ནནཱལཾཝཙནཱིཡཏཱ, ‘‘ཨལཾཝཙནཱིཡཏཱ’’ཨིཙྩེཝ ཝུཏྟཾ ཧོཏི.

པཎྞཏྟིནྟི, ཨིམཾ སིཀྑཱཔདཾ. ཀཱཡཝིཀཱརེནཱཏི སཱིསུཀྑིཔནཱདིཀཱཡཝིཀཱརེན. ཏཐེཝ ཝཱིམཾསིཏྭཱ ཏཐེཝ པཙྩཱཧརནྟསྶཱཏི ཧཏྠམུདྡཱདིནཱ ཀཱཡཝིཀཱརེན ཝཱིམཾསིཏྭཱ པུན ཨཱགནྟྭཱ ཏཐེཝ ཨཱརོཙེནྟསྶ. ཨཱགམིསྶཏཱིཏི ཏཝ སནྟིཀེ དྷམྨསྶཝནཱདིཨཏྠཾ ཨཱགམིསྶཏི. ཀེནཙི ཝུཏྟེཏི ཨཱསནསཱལཱདཱིསུ ནིསིནྣསྶ ཀེནཙི པུརིསེན ཝུཏྟེ. སཙེ ཧི ཁཱིཎཱསཝསྶ མཱཏཱཔིཏརོ ཀུཛ྄ཛྷིཏྭཱ ཨལཾཝཙནཱིཡཱ ཧོནྟི, ཏཉྩ བྷིཀྑུཾ གྷརཾ ཨུཔགཏཾ པིཏཱ ཝདཏི ‘‘མཱཏཱ ཏེ, ཏཱཏ, མཾ མཧལླཀཾ ཚཌྜེཏྭཱ ཉཱཏིཀུལཾ གཏཱ, གཙྪ ནཾ མཾ ཨུཔཊྛཱཏུཾ པེསེཧཱི’’ཏི. སོ ཙེ གནྟྭཱ ཏཾ ཝཏྭཱ པུན པིཏུནོ ཏསྶཱ ཨཱགམནཾ ཝཱ ཨནཱགམནཾ ཝཱ ཨཱརོཙེཏི, ཨེཝཾ ཨཱརོཙེནྟསྶ ཏསྶཔི ཀཱཡཝཱཙཏོ སམུཊྛཱཏི. ཏེནཱཧ ‘‘པཎྞཏྟིཾ ཨཛཱནནྟསྶ པནཱ’’ཏིཨཱདི. ཁཱིཎཱསཝསྶཔཱིཏི ཨེཏྠ པི-སདྡེན སེཀྑཔུཐུཛྫནཱནཾ ཝཏྟབྦམེཝ ནཏྠཱིཏི དཱིཔེཏི. པིཏུཝཙནེནཱཏི ཨཏྟནོ པིཏུཝཙནེན. གནྟྭཱཏི ཏསྶཱ སམཱིཔཾ གནྟྭཱ. པཎྞཏྟིཾ, ཨལཾཝཙནཱིཡབྷཱཝཉྩཱཏི ཨུབྷཡཾ ཨཛཱནནྟསྶཔི ཀཱཡཝཱཙཏོ སམུཊྛཱཏི. ཏདུབྷཡནྟི པཎྞཏྟིཾ, ཨལཾཝཙནཱིཡབྷཱཝཉྩ. ཡཾ པན པཎྞཏྟིཾ ཛཱནིཏྭཱ ཨེཏེཧེཝ ཏཱིཧི ནཡེཧི སཉྩརིཏྟཾ སམཱཔཛྫཏོ ཀཱཡཙིཏྟཏོ, ཝཱཙཱཙིཏྟཏོ, ཀཱཡཝཱཙཱཙིཏྟཏོ ཙ སམུཊྛཱཏི. ཨིམཱནི ཏཱིཎི པཎྞཏྟིཛཱནནཙིཏྟེན ‘‘སཙིཏྟཀསམུཊྛཱནཱནཱི’’ཏི ཝུཏྟཾ, ཏཾ ཨཡུཏྟཾ. ན ཧི པཎྞཏྟིཾ ཛཱནིཏྭཱཔི ‘‘ནཱལཾཝཙནཱིཡཱ’’ཏི མཉྙམཱནསྶ སཙིཏྟཀེཧི སམུཊྛཱནེཧི ཨཱཔཏྟི སམུཊྛཱཏཱིཏི ཝཏྟུཾ ཡུཛྫཏི ཝཱིཏིཀྐམཙེཏནཱཡ ཨསམྦྷཝཏོ.

སཉྩརིཏྟསིཀྑཱཔདཝཎྞནཱ ནིཊྛིཏཱ.

༦. ཀུཊིཀཱརསིཀྑཱཔདཝཎྞནཱ

སཉྙཱཙིཀཱཡ ¶ ¶ པནཱཏི ཨེཏྠ སནྟི ཨཏྟཝཱཙཀོ ཏཏིཡཏྠེ ནིཔཱཏོ, ཡཱཙིཀཱཏི བྷཱཝསཱདྷནོ, ཏེསཉྩ མཛ྄ཛྷེཔདལོཔསམཱསོ. པནཱཏི ནིཔཱཏམཏྟམེཝ. ཏེནཱཧ ‘‘སཡཾ པཝཏྟིཏཡཱཙནཱ ཝུཙྩཏཱི’’ཏི. ཡཱ ཧི ཨཏྟནཱ པཝཏྟིཏཱ, སཱ ཨཏྟནོ ནཱམ ཧོཏཱིཏི ཨཱཧ ‘‘ཏསྨཱ’’ཏིཨཱདི. ནནུ ན སཀྐཱ ཡཱཙནཱཡེཝ ཀུཊིཾ ཀཱཏུནྟི ཨནུཡོགཾ སནྡྷཱཡ ཏསྶཱདྷིཔྤཱཡཏྠཾ དསྶེཏུཾ ‘‘སཡཾ ཡཱཙིཏཀེཧཱི’’ཏིཨཱདིམཱཧ. ཏཏྠ སཡཾ ཡཱཙིཏཀེཧཱིཏི ‘‘ཝཱསིཾ དེཐ, ཕརསུཾ དེཐཱ’’ཏིཨཱདིནཱ (པཱརཱ. ༣༤༢) སཡཾ ཡཱཙིཏཀེཧི. ཨུཔཀརཎེཧཱིཏི ཝཱསིཡཱདཱིཧི. པརེན བྷཎྜསཱམིཀེན ‘‘མམ ཨིད’’ནྟི ཨཔརིཙྩཱགཱརཀྑཎགོཔནཝསེན པརིགྒཧིཏཾ པརཔརིགྒཧིཏཀཾ, པརསནྟཀནྟི ཝུཏྟཾ ཧོཏི. མཱུལཙྪེདཝསེནཱཏི མཱུལསྶ ཚིནྡནཝསེན, པརསནྟཀབྷཱཝཏོ མོཙེཏྭཱ ཨཏྟནོ སནྟཀཾ ཀཏྭཱཏི ཝུཏྟཾ ཧོཏི. ཨེཝཉྷི ཨཉྙཱཏཀཨཔྤཝཱརིཏཊྛཱནཏོ ཡཱཙནྟསྶ ཨཉྙཱཏཀཝིཉྙཏྟིཡཱ དུཀྐཊཾ. ཏཱཝཀཱལིཀཾ པན ཝཊྚཏཱིཏི ཏཱཝཀཱལིཀཾ ཀཏྭཱ ཡཱཙིཏུཾ ཝཊྚཏི. སཀཀམྨཾ ན ཡཱཙིཏབྦཱཏི པཱཎཱཏིཔཱཏསིཀྑཱཔདརཀྑཎཏྠཾ ཝུཏྟཾ. ‘‘ཧཏྠཀམྨཾ དེཐཱ’’ཏི ཨནིཡམེཏྭཱཔི ན ཡཱཙིཏབྦཱ. ཨེཝཾ ཡཱཙིཏཱ ཧི ཏེ ‘‘སཱདྷུ, བྷནྟེ’’ཏི བྷིཀྑུཾ ཨུཡྻོཛེཏྭཱ མིགེཔི མཱརེཏྭཱ ཨཱཧརེཡྻུཾ. ནིཡམེཏྭཱ པན ‘‘ཝིཧཱརེ ཀིཉྩི ཀཏྟབྦཾ ཨཏྠི, ཏཏྠ ཧཏྠཀམྨཾ དེཐཱ’’ཏི ཡཱཙིཏབྦཱ. ‘‘ཀུཊི ནཱམ ཨུལླིཏྟཱ ཝཱ ཧོཏི, ཨཝལིཏྟཱ ཝཱ ཨུལླིཏྟཱཝལིཏྟཱ ཝཱ’’ཏི (པཱརཱ. ༣༤༥) པདབྷཱཛནེ ཝུཏྟཏྟཱ ‘‘ཀུཊིནྟི ཨུལླིཏྟཱདཱིསུ ཨཉྙཏར’’ནྟི ཝུཏྟཾ. ཏཏྠ ཨུདྡྷཾ མུཁཾ ལིཏྟཱ ཨུལླིཏྟཱ. ཨནྟོ ལིམྤནྟཱ ཧི ཨེཝཾ ལིམྤནྟི. ཨདྷོ མུཁཾ ལིཏྟཱ ཨཝལིཏྟཱ. བཧི ལིམྤནྟཱ ཧི ཨེཝཾ ལིམྤནྟི. ཏེནཱཧ ‘‘ཏཏྠ ཨུལླིཏྟཱ ནཱམཱ’’ཏིཨཱདི. པིཊྛསངྒྷཱཊོཏི དྭཱརབཱཧཱ. ‘‘སུདྷཱཡ ཝཱ མཏྟིཀཱཡ ཝཱ’’ཏི ཨེཏེན ཋཔེཏྭཱ ཨིམེ དྭེ ལེཔེ ཨཝསེསོ བྷསྨཱགོམཡཱདིབྷེདོ ཨལེཔོཏི དསྶེཏི.

ཡསྨཱ པན སཉྙཱཙིཀཱཡ ཀུཊིཾ ཀརོནྟེནཱཔི ཨིདྷ ཝུཏྟནཡེནེཝ པཊིཔཛྫིཏབྦཾ, ཏསྨཱ ‘‘སཡཾ ཝཱ ཀརོནྟེན ཨཱཎཏྟིཡཱ ཝཱ ཀཱརཱཔེནྟེནཱ’’ཏི ཝུཏྟཾ. ཨེཏྠ ཙ ‘‘སཡཾ ཝཱ ཀརོནྟེནཱ’’ཏི ཨིམིནཱ སཱམཏྠིཡཏོ ལབྦྷམཱནམཏྠམཱཧ, ན ཏུ པདཏྠཏོ. ‘‘ཨཱཎཏྟིཡཱ ཝཱ ཀཱརཱཔེནྟེནཱ’’ཏི ¶ (པཱརཱ. ཨཊྛ. ༢.༣༤༨-༣༤༩) པན པདཏྠཏོ. ཨེཝཉྩ ཀཏྭཱ ཡདི པན ‘‘ཀརོནྟེན ཝཱ ཀཱརཱཔེནྟེན ཝཱ’’ཏི ཝདེཡྻ, བྱཉྫནཾ ཝིལོམིཏཾ བྷཝེཡྻ. ན ཧི ཀཱརཱཔེནྟོ ཀརོནྟོ ནཱམ ཧོཏཱིཏི ཨེདིསཱི ཙོདནཱ ཨནཝཀཱསཱཏི དཊྛབྦཾ. ནཏྠི སཱམཱི པཏི ཨེཏིསྶཱཏི ཨསཱམིཀཱ, ཏཾ ¶ ཨསཱམིཀཾ, ཨནིསྶརནྟི ཨཏྠོ. ཨནིསྶརཏཱ ཙེཏྠ ཀཱརཱཔནེནཱཏི ཨཱཧ ‘‘ཀཱརེཏཱ དཱཡཀེན ཝིརཧིཏ’’ནྟི. ཨུདྡེསོཏི ཨུདྡིསིཏབྦོ.

ཏཏྲཱཏི སཱམིསྨིཾ བྷུམྨཝཙནནྟི ཨཱཧ ‘‘ཏསྶཱ ཀུཊིཡཱ’’ཏི. དཱིགྷསོཏི ནིསྶཀྐཝཙནནྟི ཨཱཧ ‘‘དཱིགྷཏོ’’ཏི. བཧིཀུཊྚེཏི ཀུཊྚསྶ བཧི, ཐུསེན མིསྶཀོ པིཎྜོ ཐུསཔིཎྜོ, ཏསྶ པརིཡནྟོ ཐུསཔིཎྜཔརིཡནྟོ, ཏེན, ཐུསམིསྶཀམཏྟིཀཱཔིཎྜཔརིཡནྟེནཱཏི ཝུཏྟཾ ཧོཏི. ཐུསཔིཎྜསྶཱུཔརི སེཏཀམྨཾ པན ཨབྦོཧཱརིཀཾ. ཨབྦྷནྟརེ བྷཝོ ཨབྦྷནྟརིམོ, ཏེན. ཡཏྠཱཏི ཡསྶཾ ཀུཊིཡཾ. པམཱཎཡུཏྟོཏི པཀཏིཝིདཏྠིཡཱ ནཝཝིདཏྠིཔམཱཎོ. ‘‘ཏིརིཡཾ སཏྟནྟརཱ’’ཏི (པཱརཱ. ༣༤༨) ཨུཀྐཾསཏོ པམཱཎསྶ ཝུཏྟཏྟཱ ‘‘ཧེཊྛིམཀོཊིཡཱ ཙཏུཧཏྠཝིཏྠཱརཱ ན ཧོཏཱི’’ཏི ཝུཏྟཾ.

སོདྷེཏྭཱཏི སམཏལསཱིམམཎྜལསདིསཾ ཀཏྭཱ. པདབྷཱཛནེ ཝུཏྟནཡེན སངྒྷཾ ཏིཀྑཏྟུཾ ཡཱཙིཏྭཱཏི ‘‘སངྒྷཾ ཨུཔསངྐམིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཨེཝམསྶ ཝཙནཱིཡོ ‘ཨཧཾ, བྷནྟེ, སཉྙཱཙིཀཱཡ ཀུཊིཾ ཀཏྟུཀཱམོ ཨསཱམིཀཾ ཨཏྟུདྡེསཾ, སོཧཾ, བྷནྟེ, སངྒྷཾ ཀུཊིཝཏྠུཨོལོཀནཾ ཡཱཙཱམཱི’’’ཏི (པཱརཱ. ༣༤༩) པདབྷཱཛནེ ཝུཏྟནཡེན ཏིཀྑཏྟུཾ ཡཱཙིཏྭཱ. སངྒྷེན ཝཱ སམྨཏཱཏི པདབྷཱཛནིཡཾ (པཱརཱ. ༣༥༠) ཝུཏྟེན ཉཏྟིདུཏིཡཀམྨེན, ཨཔལོཀནཀམྨཝསེན ཝཱ སངྒྷེན སམྨཏཱ. ཝཏྠཱུཏི ཀུཊིཝཏྠུ. ཨནཱརམྦྷནྟི ཨནུཔདྡཝཾ. པརིཏོ ཀམཏི གཙྪཏི ཨེཏྠཱཏི པརིཀྐམནཾ, ཏེན སཧ ཝཏྟཏཱིཏི སཔརིཀྐམནཾ, སཨུཔཙཱརནྟི ཨཏྠོ. ཏེནཱཧ ‘‘ཏེཧི བྷིཀྑཱུཧཱི’’ཏིཨཱདི.

ཀིཔིལླིཀཱདཱིནནྟི ཨེཏྠ ཀིཔིལླིཀཱ (པཱརཱ. ཨཊྛ. ༢.༣༥༣) ནཱམ རཏྟཀཱལ༹པིངྒལཱདིབྷེདཱ ཡཱ ཀཱཙི, ཏཱ ཨཱདི ཡེསཾ ཏཱནི ཀིཔིལླིཀཱདཱིནི, ཏེསཾ. ཨཱདིསདྡེན ཨུཔཙིཀཱདཱིནཾ སངྒཧཎཾ. ཨཱསཡོཏི ནིབདྡྷཝསནཊྛཱནཾ, སོ ཨཱདི ¶ ཡེསཾ ཏེ ཨཱསཡཱདཡོ, ཏེཧི. ཨཱདིསདྡེན ཙེཏྠ ནིསྶིཏསྶ གཧཎཾ. སོལ༹སཧི ཨུཔདྡཝེཧཱིཏི ‘‘ཀིཔིལླིཀཱནཾ ཝཱ ཨཱསཡོ ཧོཏི, ཨུཔཙིཀཱནཾ ཝཱ ཨུནྡཱུརཱནཾ ཝཱ ཨཧཱིནཾ ཝཱ ཝིཙྪིཀཱནཾ ཝཱ སཏཔདཱིནཾ ཝཱ ཧཏྠཱིནཾ ཝཱ ཨསྶཱནཾ ཝཱ སཱིཧཱནཾ ཝཱ བྱགྒྷཱནཾ ཝཱ དཱིཔཱིནཾ ཝཱ ཨཙྪཱནཾ ཝཱ ཏརཙྪཱནཾ ཝཱ ཡེསཾ ཀེསཉྩི ཏིརཙྪཱནགཏཱནཾ པཱཎཱནཾ ཝཱ ཨཱསཡོ ཧོཏི, པུབྦཎྞནིསྶིཏཾ ཝཱ ཧོཏི, ཨཔརཎྞཨབྦྷཱགྷཱཏཨཱགྷཱཏནསུསཱནཨུཡྻཱནརཱཛཝཏྠུཧཏྠིསཱལཱཨསྶསཱལཱབནྡྷནཱགཱརཔཱནཱགཱརསཱུནརཙྪཱཙཙྩརསབྷཱསཾསརཎནིསྶིཏཾ ཝཱ ཧོཏཱི’’ཏི (པཱརཱ. ༣༥༣) ཨེཝཾ ཝུཏྟེཧི སོལ༹སཧི ཨུཔདྡཝེཧི. ཏཏྠ ¶ ཙ ཨབྦྷཱགྷཱཏཾ (པཱརཱ. ཨཊྛ. ༢.༣༥༣) ནཱམ ཀཱརཎཱགྷརཾ. ཨཱགྷཱཏནཾ ནཱམ དྷམྨགནྡྷིཀཱ. སུསཱནནྟི མཧཱསུསཱནཾ. སཾསརཎཾ ནཱམ ཨནིབྦིཛ྄ཛྷགམནཱིཡོ གཏཔཙྩཱགཏམགྒོ.

ཨཱཝིཛ྄ཛྷིཏུཾ སཀྐུཎེཡྻཏཱཡཱཏི ཚིནྣཏཊཱདཱིནམབྷཱཝཏོ ཨནུཔརིཡཱཡིཏུཾ སཀྐུཎེཡྻཏཱཡ. ཏེན བྷིཀྑུནཱཏི ཀུཊིཀཱརཀེན བྷིཀྑུནཱ. ཡཱཙིཏེཧཱིཏི ‘‘ཨེཀཾསཾ ཨུཏྟརཱསངྒཾ ཀརིཏྭཱ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཨེཝམསྶ ཝཙནཱིཡོ ‘ཨཧཾ, བྷནྟེ, སཉྙཱཙིཀཱཡ ཀུཊིཾ ཀཏྟུཀཱམོ ཨསཱམིཀཾ ཨཏྟུདྡེསཾ, སོཧཾ, བྷནྟེ, སངྒྷཾ ཀུཊིཝཏྠུདེསནཾ ཡཱཙཱམཱི’’’ཏི (པཱརཱ. ༣༥༡) ཏིཀྑཏྟུཾ ཡཱཙིཏེཧི. ཉཏྟིདུཏིཡེན ཀམྨེནཱཏི –

‘‘སུཎཱཏུ མེ, བྷནྟེ, སངྒྷོ, ཨཡཾ ཨིཏྠནྣཱམོ བྷིཀྑུ སཉྙཱཙིཀཱཡ ཀུཊིཾ ཀཏྟུཀཱམོ ཨསཱམིཀཾ ཨཏྟུདྡེསཾ, སོ སངྒྷཾ ཀུཊིཝཏྠུདེསནཾ ཡཱཙཏི. ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམསྶ བྷིཀྑུནོ ཀུཊིཝཏྠུཾ དེསེཡྻ. ཨེསཱ ཉཏྟི. སུཎཱཏུ མེ, བྷནྟེ, སངྒྷོ, ཨཡཾ ཨིཏྠནྣཱམོ བྷིཀྑུ སཉྙཱཙིཀཱཡ ཀུཊིཾ ཀཏྟུཀཱམོ ཨསཱམིཀཾ ཨཏྟུདྡེསཾ, སོ སངྒྷཾ ཀུཊིཝཏྠུདེསནཾ ཡཱཙཏི. སངྒྷོ ཨིཏྠནྣཱམསྶ བྷིཀྑུནོ ཀུཊིཝཏྠུཾ དེསེཏི, ཡསྶཱཡསྨཏོ ཁམཏི ཨིཏྠནྣཱམསྶ བྷིཀྑུནོ ཀུཊིཝཏྠུསྶ དེསནཱ, སོ ཏུཎྷསྶ. ཡསྶ ནཀྑམཏི, སོ བྷཱསེཡྻ. དེསིཏཾ སངྒྷེན ཨིཏྠནྣཱམསྶ བྷིཀྑུནོ ཀུཊིཝཏྠུ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི –

ཨེཝཾ ¶ པདབྷཱཛནེ ཝུཏྟེན ཉཏྟིདུཏིཡེན ཀམྨེན. ཨཱལ༹ཝིཀཱ ནཱམ ཨཱལ༹ཝིརཊྛེ ཛཱཏཱ དཱརཀཱ, ཏེ པབྦཛིཏཀཱལེཔི ‘‘ཨཱལ༹ཝིཀཱ’’ཏྭེཝ པཉྙཱཡིཾསུ. ཏེ སནྡྷཱཡ ཝུཏྟཾ ཨཱལ༹ཝིཀེ བྷིཀྑཱུ’’ཏི. ལེཔེ གྷཊིཏེཏི (པཱརཱ. ཨཊྛ. ༢.༣༥༣) ཨནྟོལེཔེ ཝཱ ཨནྟོལེཔེན སདྡྷིཾ བྷིཏྟིཉྩ ཚདནཉྩ ཨེཀཱབདྡྷཾ ཀཏྭཱ གྷཊིཏེ, བཧིལེཔེ ཝཱ བཧིལེཔེན སདྡྷིཾ གྷཊིཏེ. དྭེ ཙ དུཀྐཊཱནི སཱརམྦྷཨཔརིཀྐམནཝསེན. ཨུབྷཡཝིཔནྣཱཏི ཨུབྷཡེཧི དེསནཱཔམཱཎེཧི ཝིཔནྣཱ ཝིརཧིཏཱ ཨུབྷཡཝིཔནྣཱ, ཨདེསིཏཝཏྠུཀཱ པམཱཎཱཏིཀྐནྟཱཏི ཨཏྠོ. ཏསྨིནྟི དྭཱརབནྡྷེ ཝཱ ཝཱཏཔཱནེ ཝཱ. ལེཔོ ན གྷཊིཡཏཱིཏི པུབྦེ དིནྣལེཔོ དྭཱརབནྡྷེན ཝཱ ཝཱཏཔཱནེན ཝཱ སདྡྷིཾ ན གྷཊིཡཏི, ཨེཀཱབདྡྷཾ ཧུཏྭཱ ན ཏིཊྛཏཱིཏི ཝུཏྟཾ ཧོཏི. ཏནྟི དྭཱརབནྡྷཾ ཝཱ ཝཱཏཔཱནཾ ཝཱ པརཱམསཏི. པཋམམེཝཱཏི ལེཔཀིཙྩསྶ ནིཊྛིཏཏྟཱ དྭཱརབནྡྷཝཱཏཔཱནཱནཾ ཋཔནཏོ པུབྦེཡེཝ, ལེཔསྶ ནིཊྛིཏཀྑཎེཡེཝཱཏི ཨདྷིཔྤཱཡོ. ‘‘བྷིཀྑུ ཀུཊིཾ ཀརོཏི དེསིཏཝཏྠུཀཾ པམཱཎིཀཾ སཱརམྦྷཾ སཔརིཀྐམནཾ, ཨཱཔཏྟི དུཀྐཊསྶ. བྷིཀྑུ ཀུཊིཾ ཀརོཏི དེསིཏཝཏྠུཀཾ པམཱཎིཀཾ ཨནཱརམྦྷཾ ཨཔརིཀྐམནཾ, ཨཱཔཏྟི དུཀྐཊསྶཱ’’ཏི (པཱརཱ. ༣༥༥) པདབྷཱཛནིཡཾ ཝུཏྟཏྟཱ ‘‘ཀེཝལཾ སཱརམྦྷཱཡཱ’’ཏིཨཱདི ཝུཏྟཾ. ཝིཔྤཀཏནྟི ¶ ཨནིཊྛིཏཾ. ཨཉྙསྶ དདཏོ ཙཱཏི ཨཉྙསྶ པུགྒལསྶ ཝཱ སངྒྷསྶ ཝཱ དདཏོ ཙ. གུཧཱ ནཱམ ཨིཊྛཀགུཧཱ ཝཱ སིལཱགུཧཱ ཝཱ དཱརུགུཧཱ ཝཱ བྷཱུམིགུཧཱ ཝཱ. ཏིཎཀུཊི ནཱམ སཏྟབྷཱུམིཀོཔི པཱསཱདོ ཏིཎཙྪདནོ ‘‘ཏིཎཀུཊིཀཱ’’ཏི ཝུཙྩཏི. ཨཉྙསྶཱཏི ཨཱཙརིཡསྶ ཝཱ ཨུཔཛ྄ཛྷཱཡསྶ ཝཱ སངྒྷསྶ ཝཱ. ཝཱསཱགཱརཾ ཋཔེཏྭཱཏི (པཱརཱ. ཨཊྛ. ༢.༣༦༤) ཨཏྟནོ ཝསནཏྠཱཡ ཝཱསཱགཱརཾ ཋཔེཏྭཱ. ཨུཔོསཐཱགཱརཱདཱིསཱུཏི ཨེཏྠ ཨཱདིསདྡེན ཛནྟཱགྷརབྷོཛནསཱལཱཨགྒིསཱལཱནཾ གཧཎཾ. ཧེཊྛིམཔམཱཎསམྦྷཝོཏི ཙཏུཧཏྠཝིཏྠིཎྞཏཱ. ཨདེསཱཔེཏྭཱ ཀརོཏོཏི ཝཏྠུཾ ཨདེསཱཔེཏྭཱ པམཱཎཱཏིཀྐནྟཾ, པམཱཎཡུཏྟཾ ཝཱ ཀརོཏོ. ཨེཏྠ ཙ ཝཏྠུནོ ཨདེསཱཔནཾ ཨཀིརིཡཱ. ཀུཊིཀརཎཾ ཀིརིཡཱ.

ཀུཊིཀཱརསིཀྑཱཔདཝཎྞནཱ ནིཊྛིཏཱ.

༧. ཝིཧཱརཀཱརསིཀྑཱཔདཝཎྞནཱ

མཧནྟཾ ¶ ལཱཏི གཎྷཱཏཱིཏི མཧལླཀོ, ཏཾ མཧལླཀཾ. ཡོ ཙ ཡཾ གཎྷཱཏི, སོ ཏསྶ ཨཏྠཱིཏི ཨཱཧ ‘‘མཧནྟབྷཱཝོ ཨེཏསྶ ཨཏྠཱིཏི མཧལླཀོ’’ཏི. སོ ཙ མཧནྟབྷཱཝོ ཀེན, ཀུཏོ ཙཱཏི ཨཱཧ ‘‘སསཱམིཀབྷཱཝེནཱ’’ཏིཨཱདི. ན ཀེཝལཾ སསཱམིཀབྷཱཝེནེཝཱཏི ཨཱཧ ‘‘ཡསྨཱ ཝཱ’’ཏིཨཱདི. ཡདི ཨེཝཾ ཨཐ ཀསྨཱ ‘‘མཧལླཀོ ནཱམ ཝིཧཱརོ སསཱམིཀོ ཝུཙྩཏཱི’’ཏི (པཱརཱ. ༣༦༧) ཨེཏྟཀམེཝ པདབྷཱཛནེ ཝུཏྟནྟི ཨཱཧ ‘‘ཡསྨཱ པནཱ’’ཏིཨཱདི. ཝིཧརནྟི ཨེཏྠཱཏི ཝིཧཱརོ, ཨཱཝཱསོ. མཱཏིཀཱཡཾ བྷིཀྑཱུ ཝཱ ཨནབྷིནེཡྻཱཏི ཨེཏྠ ཝཱ-སདྡོ ‘‘ཨཡཾ ཝཱ སོ མཧཱནཱགོ’’ཏིཨཱདཱིསུ ཝིཡ ཨཝདྷཱརཎཏྠོ.

ཀོསམྦིཡནྟི (སཱརཏྠ. ཊཱི. ༢.༣༦༥) ཨེཝཾནཱམཀེ ནགརེ. ཏསྶ ཀིར ནགརསྶ ཨཱརཱམཔོཀྑརཎིཨཱདཱིསུ ཏེསུ ཏེསུ ཋཱནེསུ ཀོསམྦརུཀྑཱཝ ཨུསྶནྣཱ ཨཧེསུཾ, ཏསྨཱ ཏཾ ‘‘ཀོསམྦཱི’’ཏི སངྑཾ གཙྪཏི. ‘‘ཀུསུམྦསྶ ནཱམ ཨིསིནོ ཨསྶམཏོ ཨཝིདཱུརེ མཱཔིཏཏྟཱ’’ཏི ཨེཀེ. ཚནྣཏྠེརཾ ཨཱརབྦྷཱཏི ཡོ ཨབྷིནིཀྑམནཀཱལེ སདྡྷིཾ ནིཀྑནྟོ, ཡསྶ ཙ སཏྠཱརཱ པརིནིབྦཱནཀཱལེ བྲཧྨདཎྜོ (ཙཱུལ༹ཝ. ༤༤༥) ཨཱཎཏྟོ, ཏཾ ཚནྣཏྠེརཾ ཨཱརབྦྷ. ཙེཏིཡརུཀྑནྟི ཙིཏྟཱིཀཏཊྛེན ཙེཏིཡཾ, པཱུཛཱརཧཱནཾ དེཝཊྛཱནཱནམེཏཾ ཨདྷིཝཙནཾ, ‘‘ཙེཏིཡ’’ནྟི སམྨཏཾ རུཀྑཾ ཙེཏིཡརུཀྑཾ. ཝཏྠུནོ ཨདེསནཱཡ ཨཱཔཛྫནཏོ ‘‘ཨཀིརིཡམཏྟཏོ སམུཊྛཱནབྷཱཝོ’’ཏི ཝུཏྟཾ. མཏྟ-སདྡེན ཀིརིཡཏོ སམུཊྛཱནཏཾ པཊིཀྑིཔཏི. ཀེཙི པན ‘‘ཝཏྠུཨདེསནཱཡ, ཀུཊིཀརཎེན ཙ སམུཊྛཱནཏོ ཀིརིཡཱཀིརིཡཏོ སམུཊྛཱཏཱི’’ཏི ཝདནྟི. པམཱཎནིཡམཱབྷཱཝོཝ ཝིསེསོ.

ཝིཧཱརཀཱརསིཀྑཱཔདཝཎྞནཱ ནིཊྛིཏཱ.

༨. དུཊྛདོསསིཀྑཱཔདཝཎྞནཱ

དཱུསཱིཡཏཱིཏི ¶ དུཊྛོ, དཱུསེཏི པརཾ ཝིནཱསེཏཱིཏི དོསོ. ཏེནཱཧ ‘‘དཱུསིཏོ ཙེཝཱ’’ཏིཨཱདི. ཨིདཱནི ‘‘དཱུསིཏོ ཙེཝ དཱུསཀོ ཙཱ’’ཏི ཨིམིནཱ ¶ སངྑེཔེན ཝུཏྟམེཝཏྠཾ ཝིཏྠཱརེཏྭཱ དསྶེཏུཾ ‘‘ཨུཔྤནྣེ ཧི དོསེ’’ཏིཨཱདིམཱཧ. པཀཏིབྷཱཝཾ ཛཧཱཔིཏོཏི (སཱརཏྠ. ཊཱི. ༢.༣༨༥-༣༨༦) སོམྨབྷཱཝཾ ཛཧཱཔིཏོཏི ཨཏྠོ, ཝིཀཱརམཱཔཱདིཏོཏི ཝུཏྟཾ ཧོཏི. ཨཱཀཱརནཱནཱཏྟེནཱཏི དཱུསིཏཱཀཱརསྶ ཙེཝ དཱུསཀཱཀཱརསྶ ཙཱཏི ཨིམེསཾ དྭིནྣཾ ཨཱཀཱརཱནཾ ནཱནཱབྷཱཝེན. ནཔྤཏིཏོཏི པཱིཏིསུཁཱདཱིཧི ན ཨབྷིགཏོ ཨནུཔགཏོ, ན ཨུཔགཏོཏི ཨཏྠོ. ཡོ ཙ པཱིཏིསུཁཱདཱིཧི ཨནུཔགཏོ, སོ ཏེཧི ཝཛྫིཏོ ནཱམ ཧོཏཱིཏི ཨཱཧ ‘‘པཱིཏིསུཁཱདཱིཧི ཝིཝཛྫིཏོ’’ཏི. ཡོ ཙ ཏེཧི ཝཛྫིཏོ, ན སོ ཏེཧི ཨབྷིསཊོ ནཱམ ཧོཏཱིཏི ཨཱཧ ‘‘ན ཨབྷིསཊོ’’ཏི, པཱིཏིསུཁཱདཱིཧི ན པཏྠཊོཏི ཨཏྠོ. ནཱསྶ མཱུལནྟི ཨམཱུལཀཾ. ཏཾ པན ཨམཱུལཀཏྟཾ ཡསྨཱ ཙོདཀཝསེན ཨདྷིཔྤེཏཾ, ན ཙུདིཏཀཝསེན, ཏསྨཱ ཏདཏྠཾ དསྶེཏུཾ ‘‘ཡཾ ཙོདཀེནཱ’’ཏིཨཱདི ཝུཏྟཾ. ཏཏྠ ཡནྟི པཱརཱཛིཀཾ. ཨེཏནྟི ཙུདིཏཀསྶ ཨཱཔནྣཱནཱཔནྣཏྟཾ. ཨིདྷཱཏི ཨིམསྨིཾ སིཀྑཱཔདེ.

ཨིདཱནི ཨཏྟནཱ ཝུཏྟམེཝ དིཊྛཱདིཾ ཝིཝརིཏུཾ ‘‘ཨེཏྠ ཙཱ’’ཏིཨཱདི ཝུཏྟཾ. ཏཐེཝཱཏི ‘‘པསཱདསོཏེན ཝཱ དིབྦསོཏེན ཝཱ’’ཏི ཨིམམཏྠཾ ཨཏིདིསཏི. པརིསངྐིཏཾ (པཱརཱ. ཨཊྛ. ༢.༣༨༥-༣༨༦) པན ཏིཝིདྷཾ དིཊྛཔརིསངྐིཏཾ, སུཏཔརིསངྐིཏཾ, མུཏཔརིསངྐིཏནྟི. ཏཏྠ བྷིཀྑུཉྩ མཱཏུགཱམཉྩ ཏཐཱརཱུཔེ ཋཱནེ དིསྭཱ ‘‘ཨདྡྷཱ ཨིམེཧི ཀཏ’’ནྟི ཝཱ ‘‘ཀརིསྶནྟཱི’’ཏི ཝཱ པརིསངྐིཏཾ, ཨིདཾ དིཊྛཔརིསངྐིཏཾ ནཱམ. ཨནྡྷཀཱརེ ཝཱ པཊིཙྪནྣོཀཱསེ ཝཱ བྷིཀྑུསྶ ཙ མཱཏུགཱམསྶ ཙ ཝཙནཾ སུཏྭཱ དུཏིཡསྶ ཨཏྠིབྷཱཝཾ ཨཛཱནཏོ པུབྦེ ཝུཏྟནཡེན པརིསངྐིཏཾ, ཨིདཾ སུཏཔརིསངྐིཏཾ ནཱམ. དྷུཏྟེཧི ཨིཏྠཱིཧི སདྡྷིཾ པཙྩནྟཝིཧཱརེ མཎྜཔེ ཝཱ སཱལཱདཱིསུ ཝཱ པུཔྥགནྡྷམཾསསུརཱདཱིནི ཨནུབྷཝིཏྭཱ གཏཊྛཱནཾ དིསྭཱ ‘‘ཀེན ནུ ཁོ ཨིདཾ ཀཏ’’ནྟི ཝཱིམཾསནྟེན ཏཏྲ ཀེནཙི བྷིཀྑུནཱ གནྡྷཱདཱིཧི པཱུཛཱ ཀཏཱ ཧོཏི, བྷེསཛྫཏྠཱཡ ཨརིཊྛཾ ཝཱ པཱིཏཾ, སོ ཏསྶ གནྡྷཾ གྷཱཡིཏྭཱ ‘‘ཨཡཾ སོ བྷཝིསྶཏཱི’’ཏི པརིསངྐིཏཾ, ཨིདཾ མུཏཔརིསངྐིཏཾ ནཱམ. ཨེཝཾ ཏིཝིདྷསྶ པརིསངྐིཏསྶ ཨབྷཱཝོ ཨཔརིསངྐིཏཾ. ཏེནཱཧ ‘‘དིཊྛསུཏམུཏཝསེན ཙེཏསཱ ཨཔརིསངྐིཏ’’ནྟི. ཏཉྩ པནེཏཾ དིཊྛཱདིཀཾ ན ཀེཝལཾ ཨཏྟནོ ཝཱཏི ཨཱཧ ‘‘ཨཏྟནོ ཝཱ པརསྶ ཝཱ’’ཏི. ཡསྨཱ ‘‘ཏྭཾ པཎྜཀོ’’ཏིཨཱདིཝཙནེནཱཔི ཙོདཡཏོ ཨཱཔཏྟིཡེཝ, ཏསྨཱ ‘‘བྷིཀྑུནོ ཨནུརཱུཔེསུ ཨེཀཱུནཝཱིསཏིཡཱ ཨཉྙཏརེནཱ’’ཏི ཝུཏྟཾ. ཡདི ཨེཝཾ ཨཐ ཀསྨཱ པདབྷཱཛནེ ¶ ‘‘པཱརཱཛིཀེན དྷམྨེནཱཏི ཙཏུནྣཾ ཨཉྙཏརེནཱ’’ཏི (པཱརཱ. ༣༨༦) ཝུཏྟནྟི ཨཱཧ ‘‘པདབྷཱཛནེ ¶ པནཱ’’ཏིཨཱདི. ཨུཔསགྒནིཔཱཏཱནཾ ཝཱཙཀསདྡསནྣིཊྛཱནེ ཏདཏྠཛོཏནབྷཱཝེན པཝཏྟནཏོ ‘‘དྷཾསེཡྻཱ’’ཏི ཝུཏྟཾ. དྷཾསནཉྩེཏྠ ཨབྷིབྷཝནཾ. ཏེནཱཧ ‘‘ཨབྷིབྷཝེཡྻཱ’’ཏི. ‘‘ཏྭཾ མེཐུནཾ དྷམྨཾ པཊིསེཝཱི’’ཏིཨཱདིནཱ ནཡེན པཝཏྟཱཏི ‘‘ཏྭཾ མེཐུནཾ དྷམྨཾ པཊིསེཝི, ཨདིནྣཾ ཨཱདིཡི, མནུསྶཾ གྷཱཏཡིཏྠ, ཨབྷཱུཏཾ ཨཱརོཙཡིཏྠཱ’’ཏི ཨེཝཾ པཝཏྟཱ. ཨེཏྠ ཙ ‘‘ཨསྶམཎོསཱི’ཏི ཨཝནྡནཀཱརཎསྶ ཨཝུཏྟཏྟཱ ཨནྟིམཝཏྠུཾ ཨཛ྄ཛྷཱཔནྣོ ན ཝནྡིཏབྦོ’’ཏི ཝདནྟི, ཏཾ ན གཧེཏབྦཾ ཨཝནྡིཡེསུ ཨནྟིམཝཏྠུཾ ཨཛ྄ཛྷཱཔནྣསྶ ཨཝུཏྟཏྟཱ, ‘‘པཙྪཱ ཨུཔསམྤནྣེན པུརེ ཨུཔསམྤནྣོ ཝནྡིཡོ’’ཏི (པརི. ༤༦༨) ཝུཏྟཏྟཱ ཙ. ཨིདཾ པན ཨཏྟནཱ ཝཏྟབྦཾ དསྶེཏུཾ ཝུཏྟཾ.

སམཱིཔེཏི དྭཱདསཧཏྠཔམཱཎེ པདེསེ. སིཀྑཱཔཙྩཀྑཱནམེཝ ཧི ཧཏྠམུདྡཱཡ སཱིསཾ ན ཨེཏི, ཨིདཾ པན ཨནུདྡྷཾསནཾ, ཨབྷཱུཏརོཙནཉྩ ཨེཏིཡེཝ. ཏེནཱཧ ‘‘ཧཏྠམུདྡཱཡ ཨེཝ ཝཱ’’ཏི. བྲཧྨཙརིཡཱཏི བྲཧྨཾ སེཊྛཾ པསཏྠཾ ཙརིཡནྟི བྲཧྨཙརིཡཾ, བྲཧྨཱུནཾ ཝཱ སེཊྛཱནཾ བུདྡྷཔཙྩེཀབུདྡྷཨརིཡསཱཝཀཱནཾ, བྲཧྨཱནཉྩ ཙརིཡནྟི བྲཧྨཙརིཡཾ, ཏམྷཱ བྲཧྨཙརིཡཱ. ཏེནཱཧ ‘‘སེཊྛཙརིཡཱ’’ཏི. སཱདྷུ ཝཏསྶ ཨེཀནྟེན བྷདྡཀཾ བྷཝེཡྻ. ‘‘ཏཛྫནཱིཡཀམྨཱདིསཏྟཝིདྷམྤི ཀམྨཾ ཀརིསྶཱམཱ’’ཏི ཨཱཔཏྟིཡཱ ཙོདེནྟསྶ ཨདྷིཔྤཱཡོ ཀམྨཱདྷིཔྤཱཡོ. ‘‘ཨཱཔཏྟིཏོ ཝུཊྛཱཔེསྶཱམཱ’’ཏི ཨདྷིཔྤཱཡོ ཝུཊྛཱནཱདྷིཔྤཱཡོ. ཨནུཝིཛྫནཱདྷིཔྤཱཡོཏི ཝཱིམཾསནཱདྷིཔྤཱཡོ, ཨུཔཔརིཀྑཱདྷིཔྤཱཡོ. ཨནུཝིཛྫཀེནཱཏི སངྒྷམཛ྄ཛྷེ ཨོཏིཎྞཾ ཨདྷིཀརཎཾ ཝིནིཙྪིནིཏུཾ ནིསིནྣེན ཝིནཡདྷརེན. ཀིཾ ཏེ དིཊྛནྟི ཏཡཱ ཀིཾ དིཊྛཾ, པཋམཾ པཱརཱཛིཀཾ ཨཛ྄ཛྷཱཔཛྫནྟོ དིཊྛོ, དུཏིཡཾ ཏཏིཡཾ ཙཏུཏྠཾ པཱརཱཛིཀཾ ཨཱཔཛྫནྟོ དིཊྛོཏི ཝུཏྟཾ ཧོཏི. ཨཱདིསདྡེན ‘‘ཀིནྟི ཏེ དིཊྛཾ, ཀདཱ ཏེ དིཊྛཾ, ཀཏྠ ཏེ དིཊྛ’’ནྟི ཨིམཾ ནཡཾ སངྒཎྷཱཏི.

སམནཏྠཱཡ པཝཏྟམཱནེཧི སམཐེཧི ཨདྷིཀཱཏབྦནྟི ཨདྷིཀརཎཾ. ཡཐཱ ཧི སམནཝསེན སམཐཱནཾ ཝིཝཱདཱདཱིསུ ཨདྷིཀཏབྷཱཝོ, ཨེཝཾ ཝིཝཱདཱདཱིནཾ ཏེཧི ཨདྷིཀཏྟབྦཏཱཏི. ཏེནཱཧ ‘‘སམཐེཧི ཨདྷིཀརཎཱིཡབྷཱཝེནཱ’’ཏིཨཱདི. ཨིམིནཱ ཧི ཨདྷིཀརཎསདྡསྶ ཀམྨསཱདྷནཏཱ ཝུཏྟཱ. ཨདྷིཀརཎནྟི ཝིཝཱདཱདྷིཀརཎཾ ཨནུཝཱདཱདྷིཀརཎཾ ཨཱཔཏྟཱདྷིཀརཎཾ ཀིཙྩཱདྷིཀརཎནྟི ཙཏུབྦིདྷཾ ཨདྷིཀརཎཾ. ཝིཝཱདཱདཱིནི ཨདྷིཀརཎཱནི སམེནྟི ཝཱུཔསམེནྟཱིཏི ¶ སམཐཱ, སམྨུཁཱཝིནཡཱདཡོ. ཨཐ ཝཱ ཨདྷིཀརཱིཡནྟི ཨེཏྠཱཏི ཨདྷིཀརཎཾ. ཀེ ཨདྷིཀརཱིཡནྟི? སམཐཱ. ཀཐཾ ཨདྷིཀརཱིཡནྟི? སམནཝསེན. ཨདྷིཀརཎཾ སམེནྟི ཝཱུཔསམེནྟཱིཏིཔི སམཐཱཏི ཨེཝམྤེཏྠ ཨཏྠོ དཊྛབྦོ. ཨཱཔཏྟཱདྷིཀརཎཾ ཋཔེཏྭཱ སེསཱདྷིཀརཎེཧི ཙོདནཱཡ ཨབྷཱཝཏོ ‘‘ཨིདཾ པན པཱརཱཛིཀསངྑཱཏཾ ¶ ཨཱཔཏྟཱདྷིཀརཎམེཝ ཨདྷིཔྤེཏ’’ནྟི ཝུཏྟཾ. ཨཱཔཏྟིཡེཝ ཨདྷིཀརཎཾ ཨཱཔཏྟཱདྷིཀརཎཾ. ཨནུདྡྷཾསིཏཀྑཎེཡེཝ སངྒྷཱདིསེསོ, སོ ཙེ ཏངྑཎེཡེཝ ཛཱནཱཏཱིཏི ཨདྷིཔྤཱཡོ.

མེཏྟིཡབྷཱུམཛཀེཏི མེཏྟིཡཉྩ བྷཱུམཛཀཉྩ. ཚབྦགྒིཡཱནཾ ཨགྒཔུརིསཱ ཨེཏེ. སུདྡྷཾ ཝཱཏི པཱརཱཛིཀམནཱཔནྣཾ ཝཱ. ‘‘སཙེ སོ ཏངྑཎེཡེཝ ཛཱནཱཏཱི’’ཏི ཨིམིནཱ ཨཱཝཛྫནསམཡམཱཧ. ཏངྑཎེཡེཝ ཛཱནནཾ ནཱམ དུཀྐརཾ, སམཡེན ཨཱཝཛྫིཏྭཱ ཉཱཏེ པན ཉཱཏམེཝ ཧོཏི. པཙྪཱ ཙེ ཛཱནཱཏི, སཱིསཾ ན ཨེཏི. སིཀྑཱཔཙྩཀྑཱནཨབྷཱུཏཱརོཙནདུཊྛུལླཝཱཙཱཨཏྟཀཱམདུཊྛདོསབྷཱུཏཱརོཙནསིཀྑཱཔདཱནཱིཏི སབྦཱནེཝ ཧི ཨིམཱནི ཨེཀཔརིཙྪེདཱནི. ཡསྨཱ པན པརམྨུཁཱ སཏྟཧིཔི ཨཱཔཏྟིཀྑནྡྷེཧི ཝདཏོ དུཀྐཊམེཝ, ཏསྨཱ ‘‘པརམྨུཁཱ ཙོདེནྟསྶ པན སཱིསཾ ན ཨེཏཱི’’ཏི ཝུཏྟཾ. ཝུཏྟནཡཱཔཏྟིཡོཏི ‘‘ཝཱཙཱཡ ཝཱཙཱཡཱ’’ཏིཨཱདིནཱ ཝུཏྟནཡཱ སངྒྷཱདིསེསདུཀྐཊཱཔཏྟིཡོ. ཏཐེཝཱཏི ཝཱཙཱཡ ཝཱཙཱཡེཝ. ཝདནྟསྶཱཏི སཏྟཧིཔི ཨཱཔཏྟིཀྑནྡྷེཧི ཨུཔསམྤནྣཾ སམྨུཁཱ ཝདནྟསྶ. ཝུཏྟནཡེནེཝཱཏི ཝཱཙཱཡ ཝཱཙཱཡེཝ. ཨོཀཱསཾ ཀཱརེཏྭཱ ཨུཔསམྤནྣཾ སམྨུཁཱ ཝདནྟསྶ ཝཱཙཱཡ ཝཱཙཱཡ པཱཙིཏྟིཡནྟི ཨཱཧ ‘‘ཨོཀཱསཾ ཀཱརེཏྭཱ ཝདནྟསྶ པཱཙིཏྟིཡམེཝཱ’’ཏི. ཨེཝསདྡེན དུཀྐཊཾ ནིཝཏྟཱིཡཏི. ཨསམྨུཁཱ སཏྟཧིཔི ཨཱཔཏྟིཀྑནྡྷེཧི ཝདནྟསྶ དུཀྐཊཾ. སཏྟཝིདྷམྤི ཀམྨནྟི ཏཛྫནཱིཡཾ, ནིཡསཾ, པབྦཱཛནཱིཡཾ, པཊིསཱརཎཱིཡཾ, ཏིཝིདྷཉྩ ཨུཀྑེཔནཱིཡནྟི སཏྟཝིདྷམྤི ཀམྨཾ.

ཨུཔོསཐཾ ཝཱ པཝཱརཎཾ ཝཱ ཋཔེནྟསྶ ཙ ཨོཀཱསཀམྨཾ ནཏྠཱིཏི ཨེཏྠ ཨུཔོསཐཏོ པུརེ ཝཱ པཙྪཱ ཝཱ ཋཔིཏོཔི ཨཊྛཔིཏོ ཧོཏི. ཁེཏྟེ ཋཔིཏོ པན ཋཔིཏོ ཧོཏི, ཏསྨཱ ‘‘སུཎཱཏུ མེ, བྷནྟེ, སངྒྷོ, ཨཛྫུཔོསཐོ པནྣརསོ, ཡདི སངྒྷསྶ པཏྟཀལླཾ, སངྒྷོ ཨུཔོསཐཾ ཀརེཡྻཱ’’ཏི ཨེཏྠ ཡཱཝ རེ-ཀཱརཾ བྷཎཏི, ཏཱཝ ཋཔེཏབྦོ, ཨིདཾ ཁེཏྟཾ. ཡྻ-ཀཱརེ པན ཝུཏྟེ ཋཔེནྟེན པཙྪཱ ཋཔིཏོ ནཱམ ཧོཏི ¶ . ‘‘སུཎཱཏུ མེ’’ཏི ཨནཱརདྡྷེ ཋཔེནྟེན པུརེ ཋཔིཏོ ཧོཏི. པཝཱརཎཱཊྛཔནཾ པན སབྦསངྒཱཧིཀཾ, པུགྒལིཀཉྩཱཏི དུཝིདྷཾ. ཏཏྠ སབྦསངྒཱཧིཀེ ‘‘སུཎཱཏུ མེ, བྷནྟེ, སངྒྷོ…པེ… སངྒྷོ ཏེཝཱཙིཀཾ པཝཱརེཡྻཱ’’ཏི སུ-ཀཱརཏོ ཡཱཝ རེ-ཀཱརོ, ཏཱཝ ཨཔརིཡོསིཏཱཝ ཧོཏི པཝཱརཎཱ, ཨེཏྠནྟརེ ཨེཀཔདེཔི ཋཔེནྟེན ཋཔིཏཱ ཧོཏི པཝཱརཎཱ. ཡྻ-ཀཱརེ པན པཏྟེ པརིཡོསིཏཱཝ ཧོཏི, ཏསྨཱ ཏཏོ པཊྛཱཡ ཋཔེནྟེན ཨཊྛཔིཏཱ ཧོཏི. པུགྒལིཀཊྛཔནེ པན ‘‘སངྒྷཾ, བྷནྟེ, པཝཱརེམི…པེ… ཏཏིཡམྤི བྷནྟེ སངྒྷཾ པཝཱརེམི དིཊྛེན ཝཱ…པེ… པསྶནྟོ པཊཱི’’ཏི (མཧཱཝ. ༢༡༠) སཾ-ཀཱརཏོ ཡཱཝ ཨཡཾ སབྦཔཙྪིམོ ཊི-ཀཱརོ, ཏཱཝ ཨཔརིཡོསིཏཱཝ ཧོཏི པཝཱརཎཱ, ཨེཏྠནྟརེ ཨེཀཔདེཔི ཋཔེནྟེན ཋཔིཏཱ ཧོཏི པཝཱརཎཱ. ‘‘ཀརིསྶཱམཱི’’ཏི ཝུཏྟེ པན པརིཡོསིཏཱ ཧོཏི, ཏསྨཱ ‘‘ཀརིསྶཱམཱི’’ཏི ཨེཏསྨིཾ པདེ སམྤཏྟེ ཋཔིཏཱཔི ¶ ཨཊྛཔིཏཱ ཧོཏི. ཨེསེཝ ནཡོ དྭེཝཱཙིཀཨེཀཝཱཙིཀསམཱནཝསྶིཀཱསུ. ཨེཏཱསུཔི ཧི ཊི-ཀཱརཱཝསཱནཾཡེཝ ཋཔནཀྑེཏྟནྟི. ཏེནཱཧ ‘‘ཋཔནཀྑེཏྟཾ པན ཛཱནིཏབྦ’’ནྟི. ཨོསཊེ ཝཏྠུསྨིནྟི ཙོདཀེན ཨཏྟནཱ ཝཏྟབྦེ སངྒྷམཛ྄ཛྷེ ཨུདཱཧཊེ. ཨིདཉྩ ཨིདཉྩ ཀརོཏཱིཏི པཱཎཱཏིཔཱཏཾ, ཨདིནྣཱདཱནཉྩ ཀརོཏི, ཛཱཏརཱུཔརཛཏཉྩ པཊིགྒཎྷཱཏི. ཨསུཀོ ཙ ཨསུཀོ ཙ ཨསྶམཎོ, ཨནུཔཱསཀོཏི ཨཀྐོསཱདྷིཔྤཱཡེན པརམྨུཁཱ ཝདནྟསྶ དུཀྐཊཾ, སམྨུཁཱ ཝདནྟསྶ པན པཱཙིཏྟིཡམེཝ. ཏེནཱཧ ‘‘སཙེ པན ཨོདིསྶ ནིཡམེཏྭཱ’’ཏིཨཱདི. སངྑྱུཔགམནནྟི ཝོཧཱརཱུཔགམནཾ.

དུཊྛདོསསིཀྑཱཔདཝཎྞནཱ ནིཊྛིཏཱ.

༩. ཨཉྙབྷཱགིཡསིཀྑཱཔདཝཎྞནཱ

ཨཉྙབྷཱགསྶཱཏི ཨཉྙཀོཊྛཱསསྶ, ཡཾ ཙོདེཏུཀཱམོ, ཏསྶ ཛཱཏིཨཱདིཏོ ཨཉྙསྶ ཏིརཙྪཱནཛཱཏིཨཱདིཀོཊྛཱསསྶཱཏི ཝུཏྟཾ ཧོཏི. ཨིདནྟི ནཔུཾསཀནིདྡེསེན ཚགལཀཱདིཾ ནིདྡིསཏི, ཨཡཾ ཚགལཀཱདིཀོཏི ཨཏྠོ, ཨདྷིཀརཎསདྡཱཔེཀྑཱཡ ཝཱ ནཔུཾསཀནིདྡེསོ, ཨིདཾ ཚགལཀཱདིསངྑཱཏཾ ཨདྷིཀརཎནྟི ཝུཏྟཾ ཧོཏི. ཨཉྙབྷཱགོ ཝཱཏི ཏིརཙྪཱནཛཱཏིཨཱདིབྷེདོ ཨཉྙོ ཀོཊྛཱསོ ཝཱ. ཨསྶཱཏི ཚགལཀཱདིཀསྶ ¶ . ཨཉྙབྷཱགིཡཾ ཚགལཀཱདི. ཨེཏྠ ཙ ‘‘ཨཉྙབྷཱགསམྦནྡྷི ཨཉྙབྷཱགིཡ’’ནྟི པཋམཝིགྒཧསྶ ཨཏྠོ, ‘‘ཨཉྙབྷཱགཝནྟཾ ཨཉྙབྷཱགིཡ’’ནྟི དུཏིཡཝིགྒཧསྶ. ཋཔེཏྭཱ པན ཏིརཙྪཱནཛཱཏིཨཱདིཀཾ པརམཏྠཏོ ཝིསུཾ ཚགལཀཱདིཀེ ཨསཏིཔི ‘‘པཊིམཱཡ སརཱིར’’ནྟིཨཱདཱིསུ ཝིཡ ཨབྷེདེཔི བྷེདཀཔྤནཱཡ པཝཏྟལོཀཝོཧཱརཝསེན ‘‘ཨཉྙབྷཱགསྶ ཨིདཾ, ཨཉྙབྷཱགོ ཝཱ ཨསྶ ཨཏྠཱི’’ཏི ཝུཏྟནྟི དཊྛབྦཾ. ཨདྷིཀརཱིཡཏི ཨེཏྠཱཏི ཨདྷིཀརཎཾ. ཏེནཱཧ ‘‘ཨཱདྷཱརོ ཝེདིཏབྦོ’’ཏི. ཨཱདྷརཱིཡཏི ཨསྨིནྟི ཨཱདྷཱརོ, པཏིཊྛཱནཾ. ཏེནཱཧ ‘‘ཝཏྠུ ཨདྷིཊྛཱནནྟི ཝུཏྟཾ ཧོཏཱི’’ཏི.

ཨིདཱནི ‘‘ཨཉྙབྷཱགསྶ ཨིད’’ནྟིཨཱདིནཱ སངྑེཔེན ཝུཏྟམེཝཏྠཾ ཀེཝལཾ ནཡདསྶནཏྠཾ ཨཊྛུཔྤཏྟིཡཾ ཨཱགཏམེཝ གཧེཏྭཱ ཝིབྷཛནྟོ ‘‘ཡོ ཧི སོ’’ཏིཨཱདིམཱཧ. ཏེན ནནུ ཨནཱགཏེ ཨེཝཾ ཙོདེནྟཱནཾ པཱཔབྷིཀྑཱུནཾ ལེསོཀཱསཔིདཧནཏྠཾ ཨིདཾ སིཀྑཱཔདཾ པཉྙཏྟཾ, ན པན མེཏྟིཡབྷཱུམཛཀཱནཾ. ཏེསཉྷི ཨཱདིཀམྨིཀཏྟཱ ཨནཱཔཏྟི, ཏསྨཱ སཱམཉྙེན ཨཏྠོ ཝིབྷཛིཏབྦོ. ན པན ‘‘ཡོ ཧི སོ ཨཊྛུཔྤཏྟིཡཾ དབྦོ མལླཔུཏྟོ’’ཏིཨཱདིནཱ ཝིསེསེནཱཏི ཨེདིསཱི ཙོདནཱ ཨནཝཀཱསཱཏི དཊྛབྦཾ. ཧཱིཏི ཀཱརཎཏྠེ ནིཔཱཏོ, ཡསྨཱཏི ཝུཏྟཾ ཧོཏི. ཨཊྛུཔྤཏྟིཡནྟི ¶ ཨཏྠསྶ ཨུཔྤཏྟི ཨཏྠུཔྤཏྟི, ཨཏྠུཔྤཏྟིཡེཝ ཨཊྛུཔྤཏྟི, ཏསྶཾ ཨཊྛུཔྤཏྟིཡཾ, སིཀྑཱཔདསྶ ནིདཱནེཏི ཝུཏྟཾ ཧོཏི. ཚགལཀོཏི སེཏཚགལཀོ. སོཏི ཚགལཀོ. ཨིམསྶ པན ‘‘ཧོཏཱི’’ཏི ཨིམིནཱ སམྦནྡྷོ. ཨཉྙསྶ…པེ… ཚགལཀབྷཱཝསྶ ཙཱཏི ‘‘ཏིརཙྪཱནཛཱཏིཡཱ ཙེཝ ཚགལཀབྷཱཝསྶ ཙཱ’’ཏི སངྑཱཏསྶ ཨཉྙསྶ བྷཱགསྶ ཀོཊྛཱསསྶ, པཀྑསྶཱཏི ཨཏྠོ.

ཀུཏོཡམཉྙོ, ཡཏོ ‘‘ཨཉྙསྶ བྷཱགསྶཱ’’ཏི ཝུཏྟནྟི ཨཱཧ ‘‘ཡྭཱཡཾ…པེ… ཏཏོ’’ཏི. ཏཏྠ མནུསྶཛཱཏི ཙེཝ བྷིཀྑུབྷཱཝོ ཙཱཏི ཡོ ཨཡཾ བྷཱགོ ཀོཊྛཱསོ པཀྑོཏི སམྦནྡྷོ, ‘‘མནུསྶཛཱཏི ཙེཝ བྷིཀྑུབྷཱཝོ ཙཱ’’ཏི སངྑཱཏོ ཡོ ཨཡཾ བྷཱགོ ཀོཊྛཱསོ པཀྑོཏི ཨཏྠོ. ཏཏོཏི ‘‘མནུསྶཛཱཏི ཙེཝ བྷིཀྑུབྷཱཝོ ཙཱ’’ཏི བྷཱགཏོ. སོ ཝཱ ཨཉྙབྷཱགོཏི ཡཐཱཝུཏྟཏིརཙྪཱནཛཱཏིཚགལཀབྷཱཝསངྑཱཏོ སོ ཨཉྙབྷཱགོ ཝཱ. ཨསྶཱཏི ཚགལཀསྶ. ཨཏྠཱིཏི ཨུཔལབྦྷཏི. ཏསྨཱཏི ཡསྨཱ ཨཉྙབྷཱགསྶ ཚགལཀོ ཧོཏི, ཡསྨཱ ཙ སོ ཝཱ ཨཉྙབྷཱགོ ཨསྶ ¶ ཨཏྠི, ཏསྨཱ. ཨཉྙབྷཱགིཡསངྑྱཾ ལབྷཏཱིཏི ཨེཏྠ ‘‘སོ ཡྭཱཡ’’ནྟི ཨིདྷ སོ-སདྡམེཝ ཨཱནེཏྭཱ སོ ཨཉྙབྷཱགིཡསངྑཾ ལབྷཏཱིཏི ཡོཛེཏབྦཾ, ‘‘སོ’’ཏི ཝཱ པཱཋསེསོ དཊྛབྦོ. ཙ-སདྡོ སམུཙྩཡཏྠོ. སོ པན ཨདྷིཀརཎསདྡཏོ པརཾ དཊྛབྦོ, ‘‘ཨདྷིཀརཎ’’ནྟི ཙ ཝེདིཏབྦོཏི. ཏེསནྟི མེཏྟིཡབྷཱུམཛཀཱནཾ. ཨིམཾ མཡཾ དབྦཾ མལླཔུཏྟཾ ནཱམ ཀརོམཱཏི ཚགལཀཾ ཨཛིཀཱཡ ཝིཔྤཊིཔཛྫནྟཾ དིསྭཱ ‘‘མཡཾ, ཨཱཝུསོ, ཨིམཾ ཚགལཀཾ དབྦཾ མལླཔུཏྟཾ ནཱམ ཀརོམཱ’’ཏི ཝདནྟཱནཾ. ནཱམཀརཎསཉྙཱཡཱཏི ནཱམཀརཎསངྑཱཏཱཡ སཉྙཱཡ. ཨེཏྠཱཔི ‘‘ཡོ སོ’’ཏིཨཱདིཀཾ ཨཱནེཏྭཱ ཏསྶཱ ནཱམཀརཎསཉྙཱཡ ཡོ སོ ཨཊྛུཔྤཏྟིཡཾ ‘‘དབྦོ མལླཔུཏྟོ ནཱམཱ’’ཏི ཚགལཀོ ཝུཏྟོ, སོ ཡསྨཱ ཨཱདྷཱརོ ཝཏྠུ ཨདྷིཊྛཱནནྟི ཡོཛེཏབྦཾ.

ཨིདཱནི ཀཐམེཏཾ ཝིཉྙཱཡཏི ‘‘ཨདྷིཀརཎ’’ནྟི ཙེཏྠ ཨཱདྷཱརོ ཝེདིཏབྦོ, ན ཝིཝཱདཱདྷིཀརཎཱདཱིསུ ཨཉྙཏརནྟི ཨནུཡོགཾ སནྡྷཱཡཱཧ ‘‘ཏཉྷི སནྡྷཱཡཱ’’ཏིཨཱདི. ཏཏྠ ཏནྟི ཏསྶཱ ནཱམཀརཎསཉྙཱཡ ཨདྷིཊྛཱནབྷཱུཏཾ ཚགལཀཾ པཙྩཱམསཏི. ཝིཝཱདཱདྷིཀརཎཱདཱིསུ ཨཉྙཏརཾ སནྡྷཱཡ ན ཝུཏྟནྟི སམྦནྡྷོ. ཏཏྠ ཀཱརཎཾ པུཙྪཏི ‘‘ཀསྨཱ’’ཏི. ཀཱརཎམཱཧ ‘‘ཨསམྦྷཝཏོ’’ཏི. ཨིདཱནི ཏམེཝ ཨསམྦྷཝཾ པཱཀཊཾ ཀཏྭཱ དསྶེཏུཾ ‘‘ན ཧཱི’’ཏིཨཱདི ཝུཏྟཾ. ན ཧི ཨུཔཱདིཡིཾསཱུཏི སམྦནྡྷོ. ཨུཔཱདིཡིཾསཱུཏི གཎྷིཾསུ. ཀིཾ ཙཏུནྣཾ ཨདྷིཀརཎཱནམྤི ལེསོ ཨཏྠི, ཡེནེཝཾ ཝུཏྟནྟི ཨཱཧ ‘‘ན ཙ ཙཏུནྣཾ ཨདྷིཀརཎཱན’’ནྟིཨཱདི. ཨིདཱནི ཏམེཝ སམཏྠེཏུཾ ‘‘ཛཱཏིལེསཱདཡོ ཧཱི’’ཏིཨཱདི ཝུཏྟཾ. ཏཏྠ ཛཱཏིཡེཝ ལེསོ ཛཱཏིལེསོ. ཨཱདིསདྡེན ནཱམལེསཱདཱིནཾ གཧཎཾ. ཧོཏི ཙེཏྠ –

‘‘ལེསཱ ¶ ཛཱཏིནཱམགོཏྟ-ལིངྒཱཔཏྟིཝསཱཔི ཙ;

པཏྟཙཱིཝརུཔཛ྄ཛྷཱཡཱ-ཙརིཡཱཝཱསཝསཱ དསཱ’’ཏི.

ཨཱཔཏྟིལེསོ ནཱམ ལཧུཀཾ ཨཱཔཏྟིཾ ཨཱཔཛྫནྟོ དིཊྛོ ཧོཏི. ཏཉྩེ པཱརཱཛིཀེན ཙོདེཏི ‘‘ཨསྶམཎོསི, ཨསཀྱཔུཏྟིཡོསཱི’’ཏི, ཨཱཔཏྟི ཝཱཙཱཡ ཝཱཙཱཡ སངྒྷཱདིསེསསྶཱཏི (པཱརཱ. ༣༩༦) ཨེཝཾ ཨཱཔཏྟིལེསམྤི པུགྒལསྨིཾཡེཝ ཨཱརོཔེཏྭཱ ཝུཏྟཏྟཱ ‘‘པུགྒལཱནཾཡེཝ ལེསཱ ཝུཏྟཱ’’ཏི ཝུཏྟཾ ¶ . ཏཉྩ ‘‘དབྦོ མལླཔུཏྟོ’’ཏི ནཱམནྟི མེཏྟིཡབྷཱུམཛཀེཧི ཚགལཀསྶ ཀཏཾ ཏཾ ‘‘དབྦོ མལླཔུཏྟོ’’ཏི ནཱམཉྩ. ཨེཝཾ ཨསམྦྷཝཾ དསྶེཏྭཱ ཨིདཱནི ཨིམིནཱཝ པསངྒེན དེསལེསསདྡཱནཾ ཨཏྠཾ སཾཝཎྞེཏུཾ ‘‘ཨེཏྠ ཙཱ’’ཏིཨཱདིམཱཧ. ཨེཏྠཱཏི ཨེཏེསུ དྭཱིསུ དེསལེསེསུ. དེསོ ནཱམ ཛཱཏིཨཱདིབྷེདོ ཝོཧཱརོ. ཏེནཱཧ ‘‘ཛཱཏིཨཱདཱིསཱུ’’ཏིཨཱདི. ཨཉྙམྤི ཝཏྠུནྟི ཡསྨིཾ ཝཏྠུསྨིཾ པཏིཊྛིཏཾ, ཏཾ མུཉྩིཏྭཱ ཨཉྙམྤི ཝཏྠུཾ. ཀཐཾ སིལིསྶཏཱིཏི ཨཱཧ ‘‘ཝོཧཱརམཏྟེནེཝཱ’’ཏིཨཱདི, ཝོཧཱརམཏྟེནེཝ, ན ཏུ ཨཏྠཏོཏི ཨདྷིཔྤཱཡོ. ‘‘ཨཱིསཀཾ ཨལླཱིཡཏཱི’’ཏི ཨིམིནཱ ‘‘ལེསོ’’ཏི ལིས ཨལླཱིབྷཱཝེཏི ཨིམསྶ རཱུཔནྟི དསྶེཏི. ཀིཉྩཱཔི དེསལེསཱནཾ ཝུཏྟནཡེན བྱཉྫནཏོ ནཱནཱཀརཎཾ ཨཏྠི, ཨཏྠཏོ པན ནཏྠཱིཏི ཨཱཧ ‘‘ཛཱཏིཨཱདཱིནཾཡེཝ ཨཉྙཏརཀོཊྛཱསསྶེཏཾ ཨདྷིཝཙན’’ནྟི.

ཡདི པན ནཱམཀརཎསཉྙཱཡ ཨཱདྷཱརབྷཱུཏཾ ཚགལཀཾ སནྡྷཱཡ ‘‘ཨཉྙབྷཱགིཡསྶ ཨདྷིཀརཎསྶཱ’’ཏི ཝུཏྟཾ, ཨཐ ཀསྨཱ པདབྷཱཛནེ ཏཾ ཨཝིབྷཛིཏྭཱ ‘‘ཨཉྙབྷཱགིཡསྶ ཨདྷིཀརཎསྶཱཏི ཨཱཔཏྟཉྙབྷཱགིཡཾ ཝཱ ཧོཏི ཨདྷིཀརཎཉྙབྷཱགིཡཾ ཝཱ’’ཏིཨཱདི (པཱརཱ. ༣༩༣) ཝུཏྟནྟི ཨཱཧ ‘‘པདབྷཱཛནེ པནཱ’’ཏིཨཱདི. ཏནྟི ཨཱདྷཱརསངྑཱཏཾ ཨདྷིཀརཎཾ. ཨཱཝིབྷཱུཏཾ པཱཀཊཾ. ཨཏྠུདྡྷཱརཝསེནཱཏི ཏེན ཝཏྟབྦཨཏྠཱནཾ ཨུདྡྷརཎཝསེན. ནནུ ཙ ‘‘ཨཏྠམཏྟཾ པཏི སདྡཱ ཨབྷིནིཝིསནྟཱི’’ཏི ན ཨེཀེན སདྡེན ཨནེཀཏྠཱ ཨབྷིདྷཱིཡནྟཱིཏི? སཙྩམེཏཾ སདྡཝིསེསེ ཨཔེཀྑིཏེ, ཏེསཾ ཏེསཾ པན ཨཏྠཱནཾ ཨདྷིཀརཎསདྡཝཙནཱིཡཏཱསཱམཉྙཾ ཨུཔཱདཱཡ ཝུཙྩམཱནོ ཨཡཾ ཝིཙཱརོ ཨདྷིཀརཎསདྡསྶ ཨཏྠུདྡྷཱརོཏི ཝུཏྟོ. ཏེནེཝཱཧ ‘‘ཨདྷིཀརཎནྟི ཝཙནསཱམཉྙཏོ ཨཏྠུདྡྷཱརཝསེན པཝཏྟཱནི ཙཏྟཱརི ཨདྷིཀརཎཱནཱི’’ཏི. ཨཉྙབྷཱགིཡཏཱཏི ཨཉྙཔཀྑིཡཏཱ. ཏབྦྷཱགིཡཏཱཏི ཏཔྤཀྑིཡཏཱ. ཨཔཱཀཊཱ པདབྷཱཛནཏོ ཨཉྙཏྲ དསྶིཏཊྛཱནཱབྷཱཝཏོ. ཨཝསཱནེ ཨཱཔཏྟཉྙབྷཱགིཡེན ཙོདནཉྩཱཏི ‘‘བྷིཀྑུ སངྒྷཱདིསེསཾ ཨཛ྄ཛྷཱཔཛྫནྟོ དིཊྛོ ཧོཏི, སངྒྷཱདིསེསེ སངྒྷཱདིསེསདིཊྛི ཧོཏི, ཏཉྩེ པཱརཱཛིཀེན ཙོདེཏཱི’’ཏིཨཱདིཙོདནཾ སནྡྷཱཡ ཝུཏྟཾ ‘‘ཨདྷིཀརཎཉྙབྷཱགིཡ’’ནྟི. ཨེཀམེཀཉྷི ཨདྷིཀརཎཾ ཨིཏརེསཾ ཏིཎྞཾ ཏིཎྞཾ ཨཉྙབྷཱགིཡཾ ཨཉྙཔཀྑིཡཾ ¶ ཨཉྙཀོཊྛཱསིཡཾ ཧོཏི ཝཏྠུཝིསབྷཱགཏྟཱ. ཨཱདིསདྡེན ¶ ‘‘ཀཐཾ ཨདྷིཀརཎཾ ཨདྷིཀརཎསྶ ཨཉྙབྷཱགིཡ’’ནྟིཨཱདིཀོ པདཝིབྷཱགོ སངྒཧིཏོ.

ཀིཉྩི དེསཾ ལེསམཏྟཾ ཨུཔཱདཱཡཱཏི ཨེཏྠ ཡཾ ཝཏྟབྦཾ, ཏསྶཱཔི ཨསམྦྷཝདསྶནཔྤསངྒེན ཧེཊྛཱ ཝུཏྟཏྟཱ ‘‘སེསཱ ཝིནིཙྪཡཀཐཱ ཨཊྛམེ ཝུཏྟསདིསཱཡེཝཱ’’ཏི ཝུཏྟཾ. ཏཏྠ སེསཱ ཝིནིཙྪཡཀཐཱཏི ‘‘པཱརཱཛིཀེནཱཏི བྷིཀྑུནོ ཨནུརཱུཔེསུ ཨེཀཱུནཝིསཏིཡཱ ཨཉྙཏརེནཱ’’ཏིཨཱདིཀཱ (ཀངྑཱ. ཨཊྛ. དུཊྛདོསསིཀྑཱཔདཝཎྞནཱ) ཝིནིཙྪཡཀཐཱ. ཝུཏྟསདིསཱཡེཝཱཏི ཨེཏྠ ཨིམསྨིཾ སིཀྑཱཔདེ ཡཱ ཝཏྟབྦཱ, ཏེན སིཀྑཱཔདེན སཱདྷཱརཎབྷཱུཏཱ སཱ ཝུཏྟསདིསཱཡེཝཱཏི ཨདྷིཔྤེཏཱ, ན ཨསཱདྷཱརཎབྷཱུཏཱ ཨཔུབྦཝཎྞནཱཡ ཨདྷིཔྤེཏཏྟཱ. ཏེནེཝཱཧ ‘‘ཨཡཾ པནཱ’’ཏིཨཱདི. པུརིམསྨིཾ སིཀྑཱཔདེཔི ཏཐཱསཉྙིནོ ཨནཱཔཏྟིཀཏྟཱ ‘‘ཨིདྷ ཙཱ’’ཏི ཝུཏྟཾ. ཏཐཱསཉྙིནོཔཱིཏི ‘‘པཱརཱཛིཀཾཡེཝ ཨཡཾ ཨཱཔནྣོ’’ཏི ཨེཝཾསཉྙིནོཔི. ཨིཏིསདྡོ ཨཱདིཨཏྠོ ཝཱ པཀཱརཏྠོ ཝཱ. ཏེན ཀེནཙི བྷིཀྑུནཱ ཨཉྙོ ཀོཙི ཁཏྟིཡཛཱཏིཀོ པཱརཱཛིཀཾ དྷམྨཾ ཨཛ྄ཛྷཱཔཛྫནྟོ དིཊྛོ ཧོཏི, ཨཐ སོ ཨཉྙཾ ཨཏྟནོ ཝེརིཾ ཁཏྟིཡཛཱཏིཀཾ བྷིཀྑུཾ པསྶིཏྭཱ ཏཾ ཁཏྟིཡཛཱཏིལེསཾ གཧེཏྭཱ ཨེཝཾ ཙོདེཏི ‘‘ཁཏྟིཡོ མཡཱ དིཊྛོ པཱརཱཛིཀཾ དྷམྨཾ ཨཛ྄ཛྷཱཔཛྫནྟོ, ཏྭཾ ཁཏྟིཡོ པཱརཱཛིཀཾ དྷམྨཾ ཨཛ྄ཛྷཱཔནྣོསི, ཨཐ ཝཱ ཏྭཾ ཁོ ཁཏྟིཡོ, ན ཨཉྙོ, པཱརཱཛིཀཾ དྷམྨཾ ཨཛ྄ཛྷཱཔནྣོསི, ཨསྶམཎོསི, ཨསཀྱཔུཏྟིཡོསི, ནཏྠི ཏཡཱ སདྡྷིཾ ཨུཔོསཐོ ཝཱ པཝཱརཎཱ ཝཱ སངྒྷཀམྨཾ ཝཱ’’ཏི, ཨཱཔཏྟི ཝཱཙཱཡ ཝཱཙཱཡ སངྒྷཱདིསེསསྶ. ཨེཏྠ ཙ ཏེསཾ ཁཏྟིཡཱནཾ ཨཉྙམཉྙཾ ཨསདིསསྶ ཏསྶ ཏསྶ དཱིགྷཱདིནོ ཝཱ དིཊྛཱདིནོ ཝཱ ཝསེན ཨཉྙབྷཱགིཡཏཱ, ཁཏྟིཡཛཱཏིཔཉྙཏྟིཡཱ ཨཱདྷཱརཝསེན ཨདྷིཀརཎཏཱ ཙ ཝེདིཏབྦཱ. ཨེས ནཡོ ནཱམལེསཱདཱིསུཔི.

ཨཱཔཏྟིལེསེ པན ཀེནཙི བྷིཀྑུནཱ ཀོཙི བྷིཀྑུ ལཧུཀཾ ཨཱཔཏྟིཾ ཨཱཔཛྫནྟོ དིཊྛོ ཧོཏི, སོ ཙེཏཾ བྷིཀྑུཾ པཱརཱཛིཀེན ཙོདེཏི, ཨཱཔཏྟི ཝཱཙཱཡ ཝཱཙཱཡ སངྒྷཱདིསེསསྶ. ཡདི ཨེཝཾ ཀཐཾ ཨཉྙབྷཱགིཡཾ ཨདྷིཀརཎཾ ཧོཏཱིཏི? ཡཉྷི སོ ལཧུཀཾ ཨཱཔཏྟིཾ ཨཱཔནྣོ, ཏཾ པཱརཱཛིཀསྶ ཨཉྙབྷཱགིཡཾ ཨདྷིཀརཎཾ, ཏསྶ པན ཨཉྙབྷཱགིཡསྶ ཨདྷིཀརཎསྶ ལེསོ ནཱམ. ཡོ སོ སབྦཁཏྟིཡཱནཾ སཱདྷཱརཎོ ཁཏྟིཡབྷཱཝོ ཝིཡ སབྦཱཔཏྟཱིནཾ སཱདྷཱརཎོ ཨཱཔཏྟིབྷཱཝོ. ཨེཏེནེཝ ཨུཔཱཡེན ¶ ‘‘ཀེནཙི བྷིཀྑུནཱ ཀོཙི བྷིཀྑུ སངྒྷཱདིསེསཾ ཨཛ྄ཛྷཱཔཛྫནྟོ དིཊྛོ ཧོཏཱི’’ཏིཨཱདིཀཾ ཝིསེསཾ སངྒཎྷཱཏི.

ཨཉྙབྷཱགིཡསིཀྑཾ ¶ ཡོ, ནེཝ སིཀྑཏི ཡུཏྟིཏོ;

གཙྪེ ཝིནཡཝིཉྙཱུཧི, ཨཉྙབྷཱགིཡཏཾཝ སོ. (ཝཛིར. ཊཱི. པཱརཱཛིཀ ༤༠༨);

ཨཉྙབྷཱགིཡསིཀྑཱཔདཝཎྞནཱ ནིཊྛིཏཱ.

༡༠. སངྒྷབྷེདསིཀྑཱཔདཝཎྞནཱ

སཧིཏསྶཱཏི ཀཱཡཙིཏྟེཧི ཨེཀཱིབྷཱུཏསྶ. ཏེནཱཧ ‘‘ཙིཏྟེན ཙ སརཱིརེན ཙ ཨཝིཡུཏྟསྶཱཏི ཨཏྠོ’’ཏི. ཨསྶཱཏི ‘‘སམགྒསྶཱ’’ཏི པདསྶ. སམཱནསཾཝཱསཀོཏི སམཱནོ ཨེཀཱུཔོསཐཱདིབྷེདོ སཾཝཱསོ ཨསྶཱཏི སམཱནསཾཝཱསཀོ, ལདྡྷིནཱནཱསཾཝཱསཀེན ཝཱ ཀམྨནཱནཱསཾཝཱསཀེན ཝཱ ཝིརཧིཏོ. ཀཱཡསཱམགྒིདཱནཏོཏི ཀཱཡེན, ཀཱཡསྶ ཝཱ སཱམགྒིཡཱ སཧིཏབྷཱཝསྶ དཱནཏོ, ཏེསུ ཏེསུ སངྒྷཀམྨེསུ ཧཏྠཔཱསཱུཔགམནཏོཏི ཝུཏྟཾ ཧོཏི. ཀཐཾ ནཱམཱཡཾ བྷིཛྫེཡྻཱཏི ཨཡཾ སངྒྷོ ཀེན ནུ ཁོ ཨུཔཱཡེན ཝགྒོ བྷཝེཡྻ. ཝཱཡཱམེཡྻཱཏི ཨུསྶཱཧཾ ཀརེཡྻ, པཀྑཾ པརིཡེསེཡྻ, གཎཾ བནྡྷེཡྻཱཏི ཝུཏྟཾ ཧོཏི. ཨཏྟནོ ཕལཾ ཀརོཏཱིཏི ཀརཎཾ, ཡཾ ཀིཉྩི ཀཱརཎཾ, ཨདྷིཀཾ ཀརཎནྟི ཨདྷིཀརཎཾ, ཝིསེསཀཱརཎཾ, ཝིསེསཀཱརཎཉྩ སངྒྷབྷེདསྶཱཏི ཝུཏྟཾ ‘‘བྷེདནསྶཱ’’ཏིཨཱདི. བྷེདཀརཝཏྠུཝསེན ཨཊྛཱརསཝིདྷནྟི –

‘‘ཨིདྷུཔཱལི བྷིཀྑཱུ ཨདྷམྨཾ ‘དྷམྨོ’ཏི དཱིཔེནྟི, དྷམྨཾ ‘ཨདྷམྨོ’ཏི དཱིཔེནྟི. ཨཝིནཡཾ ‘ཝིནཡོ’ཏི དཱིཔེནྟི, ཝིནཡཾ ‘ཨཝིནཡོ’ཏི དཱིཔེནྟི. ཨབྷཱསིཏཾ ཨལཔིཏཾ ཏཐཱགཏེན ‘བྷཱསིཏཾ ལཔིཏཾ ཏཐཱགཏེནཱ’ཏི དཱིཔེནྟི, བྷཱསིཏཾ ལཔིཏཾ ཏཐཱགཏེན ‘ཨབྷཱསིཏཾ ཨལཔིཏཾ ཏཐཱགཏེནཱ’ཏི དཱིཔེནྟི. ཨནཱཙིཎྞཾ ཏཐཱགཏེན ‘ཨཱཙིཎྞཾ ཏཐཱགཏེནཱ’ཏི དཱིཔེནྟི, ཨཱཙིཎྞཾ ཏཐཱགཏེན ‘ཨནཱཙིཎྞཾ ཏཐཱགཏེནཱ’ཏི དཱིཔེནྟི. ཨཔཉྙཏྟཾ ཏཐཱགཏེན ‘པཉྙཏྟཾ ཏཐཱགཏེནཱ’ཏི དཱིཔེནྟི, པཉྙཏྟཾ ཏཐཱགཏེན ¶ ‘ཨཔཉྙཏྟཾ ཏཐཱགཏེནཱ’ཏི དཱིཔེནྟི. ཨནཱཔཏྟིཾ ‘ཨཱཔཏྟཱི’ཏི དཱིཔེནྟི, ཨཱཔཏྟིཾ ‘ཨནཱཔཏྟཱི’ཏི དཱིཔེནྟི. ལཧུཀཾ ཨཱཔཏྟིཾ ‘གརུཀཱ ཨཱཔཏྟཱི’ཏི དཱིཔེནྟི, གརུཀཾ ཨཱཔཏྟིཾ ‘ལཧུཀཱ ཨཱཔཏྟཱི’ཏི དཱིཔེནྟི. སཱཝསེསཾ ཨཱཔཏྟིཾ ‘ཨནཝསེསཱ ཨཱཔཏྟཱི’ཏི དཱིཔེནྟི, ཨནཝསེསཾ ཨཱཔཏྟིཾ ‘སཱཝསེསཱ ཨཱཔཏྟཱི’ཏི དཱིཔེནྟི. དུཊྛུལླཾ ཨཱཔཏྟིཾ ‘ཨདུཊྛུལླཱ ཨཱཔཏྟཱི’ཏི དཱིཔེནྟི, ཨདུཊྛུལླཾ ཨཱཔཏྟིཾ ‘དུཊྛུལླཱ ཨཱཔཏྟཱི’ཏི དཱིཔེནྟཱི’’ཏི (ཙཱུལ༹ཝ. ༣༥༢) –

ཨེཝཾ ¶ ཀམྨཀྑནྡྷཀེ ཝུཏྟཱནཾ ཨཊྛཱརསནྣཾ བྷེདཀརཎཱནཾ ཝསེན ཨཊྛཱརསཝིདྷཾ. ཀཱརཎཉྷི ཏདཱཡཏྟཝུཏྟིཏཱཡ ཕལཾ ཨེཏྠ ཝསཏཱིཏི ‘‘ཝཏྠཱུ’’ཏི ཝུཙྩཏི. ཧོནྟི ཙེཏྠ –

‘‘དྷམྨཝིནཡབྷཱསིཏཱ-ཙིཎྞཔཉྙཏྟིཀཱ དུཀཱ;

ཨཱཔཏྟིལཧུདུཊྛུལླ-སཱཝསེསདུཀཱནི ཙ.

‘‘ཨེཏཱནཊྛཱརས ‘བྷེད-ཀརཝཏྠཱུ’ཏི ཝུཙྩརེ;

ཝིཔལླཱསགཧིཏཱནི, ཝཱདམཱུལཱུཔནིསྶཡཱ’’ཏི.

པགྒཡ྄ཧཱཏི པགྒཧིཏཾ ཨབྦྷུསྶིཏཾ པཱཀཊཾ ཀཏྭཱ. ཏིཊྛེཡྻཱཏི ཡཐཱསམཱདིནྣཾ, ཡཐཱཔགྒཧིཏམེཝ ཙ ཀཏྭཱ ཨཙྪེཡྻ. ཡསྨཱ པན ཨེཝཾ པགྒཎྷཏཱ, ཏིཊྛཏཱ ཙ ཏཾ དཱིཔིཏཉྩེཝ ཨཝིནིསྶཊྛཉྩ ཧོཏི, ཏསྨཱ ‘‘དཱིཔེཡྻ ཙེཝ ནཔྤཊིནིསྶཛྫེཡྻ ཙཱ’’ཏི ཝུཏྟཾ. ཀཱིཝ དཱུརེ སུཏྭཱ གནྟྭཱ ཨཝདནྟཱནཾ དུཀྐཊནྟི ཨཱཧ ‘‘སབྦནྟིམེན པརིཙྪེདེནཱ’’ཏིཨཱདི. པི-སདྡོ ཙེཏྠ ཨཊྛཱནཔྤཡུཏྟོ, ཏསྶ ‘‘ཨཌྜྷཡོཛནམཏྟ’’ནྟི ཨིམིནཱ སམྦནྡྷོ ཝེདིཏབྦོ. ཏཏྠ ‘‘ཨཌྜྷཡོཛནམཏྟ’’ནྟི ཨིམིནཱ ཨེཀཝིཧཱརེ ཝཏྟབྦམེཝ ནཏྠཱིཏི དཱིཔེཏི. ‘‘གནྟྭཱ’’ཏི ཨིམིནཱ དཱུཏཾ ཝཱ པཎྞཾ ཝཱ པེསེཏྭཱ ཝདཏོཔི ཨཱཔཏྟིམོཀྑོ ནཏྠི, སཡམེཝ པན གནྟྭཱ ‘‘གརུཀོ ཁོ, ཨཱཝུསོ, སངྒྷབྷེདོ, མཱ སངྒྷབྷེདཱཡ པརཀྐམཱི’’ཏི (པཱརཱ. ཨཊྛ. ༢.༤༡༡) ནིཝཱརེཏབྦོཏི དཱིཔེཏི.

སམཱགཙྪཏཱུཏི ཨེཀཱིབྷཝཏུ. ཨེཀཱིབྷཱཝོ ཙ སམཱནལདྡྷིཝསེན ཧོཏཱིཏི ཨཱཧ ‘‘ཨེཀལདྡྷིཀོ ཧོཏཱུ’’ཏི. ཨེཀཱ ལདྡྷི གཧཎཾ ཨསྶཱཏི ཨེཀལདྡྷིཀོ, ཨེཀདིཊྛིཀོཏི ཨཏྠོ. ཨཉྙམཉྙསམྤཏྟིཡཱཏི ཨཉྙམཉྙསྶ སམཱནདིཊྛིཙིཏྟཏཱསངྑཱཏཱཡ སམྤཏྟིཡཱ. ‘‘ཨཉྙམཉྙསྶ གུཎལཱབྷཱདིཀཱཡ སམྤཏྟིཡཱ’’ཏི ¶ ཀེཙི. ཨསམགྒོ ཧི ཝིསུཾ པཱཏིམོཀྑཾ ཨུདྡིསཏི, བཧིསཱིམཱཡཾ ཝཱ ཨནུཔརིཝེཎིཡཾ ཝཱཏི ན ཨེཀུདྡེསོ. ཏེནཱཧ ‘‘ཨེཀཏོ པཝཏྟཔཱཏིམོཀྑུདྡེསོཏི ཨཏྠོ’’ཏི. ཨཔྤཊིནིསྶཛྫཏོ དུཀྐཊནྟི ཝིསུཾ ཝིསུཾ ཝདནྟཱནཾ གཎནཱཡ དུཀྐཊཾ. སམནུབྷཱསནཀམྨཾ ཀཱཏབྦནྟི ཡཱཝཏཏིཡཾ སམནུབྷཱསནཀམྨཾ ཀཱཏབྦཾ, ‘‘སུཎཱཏུ མེ, བྷནྟེ, སངྒྷོ, ཨཡཾ ཨིཏྠནྣཱམོ བྷིཀྑུ སམགྒསྶ སངྒྷསྶ བྷེདཱཡ པརཀྐམཏཱི’’ཏིཨཱདིནཱ (པཱརཱ. ༤༡༣) པདབྷཱཛནེ ཝུཏྟཱཧི ཉཏྟིཙཏུཏྠཱཧི ཏཱིཧི སམནུབྷཱསནཀམྨཝཱཙཱཧི ཀམྨཾ ཀཱཏབྦནྟི ཝུཏྟཾ ཧོཏི. ‘‘བྷེདཱཡ པརཀྐམེཡྻཱ’’ཏི ཝིསུཾ ཝུཏྟཏྟཱ བྷེདནསཾཝཏྟནིཀསྶ ཨདྷིཀརཎསྶ སམཱདཱཡ པགྒཎྷནཏོ པུབྦེཔི པཀྑཔརིཡེསནཱདིཝསེན སངྒྷབྷེདཱཡ པརཀྐམནྟསྶ སམནུབྷཱསནཀམྨཾ ཀཱཏབྦནྟི ¶ ཝེདིཏབྦཾ. པཊིནིསྶཛྫནྟསྶ ཨནཱཔཏྟིབྷཱཝཏོ ‘‘སོཏྠིབྷཱཝོ ཏསྶ བྷིཀྑུནོ’’ཏི ཝུཏྟཾ.

ཀིཉྩཱཔི བྷིཀྑུནཱི སངྒྷཾ ན བྷིནྡཏི, ཨཔིཙ ཁོ བྷེདཱཡ པརཀྐམཏཱིཏི ‘‘སཱདྷཱརཎཔཉྙཏྟཱི’’ཏི ཝུཏྟཾ. སངྒྷཱདིསེསཾ ཨཛ྄ཛྷཱཔཛྫནྟསྶ ཉཏྟིཡཱ དུཀྐཊཾ, དྭཱིཧི ཀམྨཝཱཙཱཧི ཐུལླཙྩཡཱ ཙ པཊིཔྤསྶམྦྷནྟཱིཏི ཨཱཧ ‘‘སམནུབྷཱསནཀམྨེ’’ཏིཨཱདི. ཏཉྩ དུཀྐཊཾ ཏེ ཙ ཐུལླཙྩཡཱ པཊིཔྤསྶམྦྷནྟཱིཏི ཡཉྩ ཉཏྟིཔརིཡོསཱནེ དུཀྐཊཾ ཨཱཔནྣོ, ཡེ ཙ དྭཱིཧི ཀམྨཝཱཙཱཧི ཐུལླཙྩཡེ, ཏཱ ཏིསྶོཔི ཨཱཔཏྟིཡོ ལིངྒཔརིཝཏྟེན ཨསཱདྷཱརཎཱཔཏྟིཡོ ཝིཡ པཊིཔྤསྶམྦྷནྟི. སཙེ པནསྶ ཉཏྟིཔརིཡོསཱནེ ལཛྫིདྷམྨོ ཨོཀྐམཏི, སཾཝརོ ཨུཔྤཛྫཏི, ཏཾ པཊིནིསྶཛྫཏི, ཉཏྟིཡཱ དུཀྐཊཾ དེསེཏྭཱ མུཙྩཏི. ཨཐ ཏཾ ན པཊིནིསྶཛྫཏི, བྷེདཱཡ པརཀྐམཏི ཙེཝ བྷེདནསཾཝཏྟནིཀཾ ཨདྷིཀརཎཾ སམཱདཱཡ པགྒཡ྄ཧ ཏིཊྛཏི ཙ, ཉཏྟིདུཀྐཊཾ པཊིཔྤསྶམྦྷཏི, པཋམཀམྨཝཱཙཱཡ ཐུལླཙྩཡེ པཏིཊྛཱཏི. ཨེས ནཡོ ཨིཏརཀམྨཝཱཙཱཡམྤི. ཨསམནུབྷཱསིཡམཱནསྶ ཨཔྤཊིནིསྶཛྫནྟསྶཱཔི སངྒྷཱདིསེསེན ཨནཱཔཏྟི. པཊིནིསྶཛྫནྟསྶཱཔི ཉཏྟིཏོ པུབྦེ ཝཱ ཉཏྟིཀྑཎེ ཝཱ ཉཏྟིཔརིཡོསཱནེ ཝཱ པཋམཱཡ ཝཱ ཨནུསྶཱཝནཱཡ དུཏིཡཱཡ ཝཱ ཏཏིཡཱཡ ཝཱ ཡཱཝ ཡྻ-ཀཱརཾ ན སམྤཱཔུཎཱཏི, ཏཱཝ པཊིནིསྶཛྫནྟསྶ སངྒྷཱདིསེསེན ཨནཱཔཏྟི. ཏེནཱཧ ‘‘ཨསམནུབྷཱསིཡམཱནསྶ ཙཱ’’ཏིཨཱདི.

ཨེཏྠ པན (པཱརཱ. ཨཊྛ. ༢.༤༡༦) ‘‘དེཝདཏྟོ སམགྒསྶ སངྒྷསྶ བྷེདཱཡ པརཀྐམི, ཏསྨིཾ ཝཏྠུསྨི’’ནྟི (པརི. ༡༧) པརིཝཱརེ ཨཱགཏཏྟཱ དེཝདཏྟོ ཨཱདིཀམྨིཀོ, སོ ཙ ཁོ ¶ སངྒྷབྷེདཱཡ པརཀྐམནསྶེཝ, ན ཨཔྤཊིནིསྶཛྫནསྶ. ན ཧི ཏསྶ ཏཾ ཀམྨཾ ཀཏཾ. ཀཐམིདཾ ཛཱནིཏབྦནྟི ཙེ? སུཏྟཏོ. ཏཐཱ ཧི ‘‘ཨརིཊྛོ བྷིཀྑུ གདྡྷབཱདྷིཔུབྦོ པཱཔིཀཱཡ དིཊྛིཡཱ ཡཱཝཏཏིཡཾ སམནུབྷཱསནཱཡ ན པཊིནིསྶཛྫི, ཏསྨིཾ ཝཏྠུསྨི’’ནྟི པརིཝཱརེ ཨཱགཏཏྟཱ ཨརིཊྛསྶ ཀམྨཾ ཀཏནྟི པཉྙཱཡཏི, ན ཏཐཱ དེཝདཏྟསྶ. ཨཐཱཔིསྶ ཀཏེན བྷཝིཏབྦནྟི ཀོཙི ཨཏྟནོ རུཙིམཏྟེན ཝདེཡྻ, ཏཐཱཔི ཨཔྤཊིནིསྶཛྫནེ ཨཱདིཀམྨིཀསྶ ཨནཱཔཏྟི ནཱམ ནཏྠི. ན ཧི པཉྙཏྟཾ སིཀྑཱཔདཾ ཝཱིཏིཀྐམནྟསྶ ཨཉྙཏྲ ཨོདིསྶ ཨནུཉྙཱཏཏོ ཨནཱཔཏྟི ནཱམ དིསྶཏི. ཡམྤི ཨརིཊྛསིཀྑཱཔདསྶ པདབྷཱཛནེ ཨནཱཔཏྟིཡཾ ‘‘ཨཱདིཀམྨིཀསྶཱ’’ཏི པོཏྠཀེསུ ལིཁིཏཾ, ཏཾ པམཱདལིཁིཏཾ, པམཱདལིཁིཏབྷཱཝོ ཙ ཏསྶ ‘‘པཋམཾ ཨརིཊྛོ བྷིཀྑུ ཙོདེཏབྦོ, ཙོདེཏྭཱ སཱརེཏབྦོ, སཱརེཏྭཱ ཨཱཔཏྟིཾ ཨཱརོཔེཏབྦོ’’ཏི (ཙཱུལ༹ཝ. ༦༥) ཨེཝཾ ཀམྨཀྑནྡྷཀེ ཨཱཔཏྟིརོཔནཏོ ཝེདིཏབྦོ.

ཨིདྷ ¶ བྷེདཱཡ པརཀྐམནེ ཨཱདིཀམྨིཀསྶ དེཝདཏྟསྶ ཡསྨཱ ཏཾ ཀམྨཾ ན ཀཏཾ (པཱརཱ. ཨཊྛ. ༢.༤༡༦), ཏསྨཱསྶ ཨཱཔཏྟིཡེཝ ན ཛཱཏཱ. སིཀྑཱཔདཾ པན ཏཾ ཨཱརབྦྷ པཉྙཏྟནྟི ཀཏྭཱ ‘‘ཨཱདིཀམྨིཀོ’’ཏི ཝུཏྟོ. ཨིཏི ཨཱཔཏྟིཡཱ ཨབྷཱཝཏོཡེཝསྶ ཨནཱཔཏྟི ཝུཏྟཱ. སཱ པནེསཱ ཀིཉྩཱཔི ‘‘ཨསམནུབྷཱསིཡམཱནསྶཱ’’ཏི ཨིམིནཱཝ སིདྡྷཱ. ཡསྨཱ པན ཨསམནུབྷཱསིཡམཱནོ ནཱམ ཡསྶ ཀེཝལཾ སམནུབྷཱསནཾ ན ཀརོནྟི, སོ ཝུཙྩཏི, ན ཨཱདིཀམྨིཀོ. ཨཡཉྩ དེཝདཏྟོ ཨཱདིཀམྨིཀོཡེཝ. ཏསྨཱ ‘‘ཨཱདིཀམྨིཀསྶཱ’’ཏི (པཱརཱ. ༤༡༦) ཝུཏྟཾ. ཨེཏེནེཝ ཨུཔཱཡེན ཋཔེཏྭཱ ཨརིཊྛསིཀྑཱཔདཾ སབྦསམནུབྷཱསནཱསུ ཝིནིཙྪཡོ ཝེདིཏབྦོ. ཀཱཡཝཱཙཱཙིཏྟཏོ སམུཊྛཱནཏོ སམནུབྷཱསནསམུཊྛཱནཾ. ‘‘པཊིནིསྶཛྫཱམཱི’’ཏི ཀཱཡཝིཀཱརཾ ཝཱ ཝཙཱིབྷེདཾ ཝཱ ཨཀརོནྟསྶེཝ པན ཨཱཔཛྫནཏོ ཨཀིརིཡཾ. ‘‘ནཔྤཊིནིསྶཛྫཱམཱི’’ཏི སཉྙཱཡ ཨབྷཱཝེན མུཙྩནཏོ སཉྙཱཝིམོཀྑཾ. ‘‘ནཔྤཊིནིསྶཛྫཱམཱི’’ཏི ཛཱནནཙིཏྟེནེཝ སཙིཏྟཀཾ.

སངྒྷབྷེདསིཀྑཱཔདཝཎྞནཱ ནིཊྛིཏཱ.

༡༡. བྷེདཱནུཝཏྟཀསིཀྑཱཔདཝཎྞནཱ

ཏསྶེཝཱཏི ¶ བྷེདཱཡ པརཀྐམནྟསྶེཝ. ཁོཏི ནིཔཱཏམཏྟཾ. པནཱཏི ཝིསེསེ ནིཔཱཏོ. ཡཾ ཝཙནཾ སམགྒེཔི ཝགྒེ ཨཝཡཝབྷཱུཏེ ཀརོཏི བྷིནྡཏི, ཏཾ ཀལཧཀཱརཀཝཙནཾ ཨིདྷ ‘‘ཝགྒ’’ནྟི ཝུཙྩཏཱིཏི ཨཱཧ ‘‘ཝགྒཾ ཨསཱམགྒིཔཀྑིཡཝཙནཾ ཝདནྟཱི’’ཏི. ཨསཱམགྒིཔཀྑེ བྷཝཱ ཨསཱམགྒིཔཀྑིཡཱ, ཀལཧཀཱརཀཱ, ཏེསཾ ཝཙནཾ ཨསཱམགྒིཔཀྑིཡཝཙནཾ, ཨསཱམགྒིཔཀྑེ ཝཱ བྷཝཾ ཝཙནཾ ཨསཱམགྒིཔཀྑིཡཝཙནཾ. ‘‘ན ཧི སངྒྷོ སངྒྷསྶ ཀམྨཾ ཀརོཏཱི’’ཏི ཨིདཾ ནིགྒཧཝསེན ཀཏྟབྦཾ ཀམྨཾ སནྡྷཱཡ ཝུཏྟཾ, ཨུབྦཱཧིཀཱདིཀམྨཾ པན བཧཱུནམྤི ཀཱཏུཾ ཝཊྚཏིཡེཝ. དྷམྨཝཱདཱིཏི བྷཱུཏཝཱདཱི. ཝིནཡཝཱདཱིཏི ཝཱུཔསམཝཱདཱི. ཛཱནཱཏི ནོཏི ཨེཏྠཱཔི ‘‘ཚནྡཉྩ རུཙིཉྩཱ’’ཏི ཨིདཾ ཨཱནེཏྭཱ སམྦནྡྷིཏབྦཾ. ཏེནཱཧ ‘‘ཨམྷཱཀཾ ཚནྡཱདཱིནི ཛཱནཱཏཱི’’ཏི. བྷཱསཏཱིཏི ཨེཏྠ ‘‘ནོ’’ཏི ཨིདཾ ཝིབྷཏྟིཝིཔརིཎཱམེན ཡུཛྫཏི. ཏེནཱཧ ‘‘ཨེཝཾ ཀརོམཱཏི ཨམྷེཧི སདྡྷིཾ བྷཱསཏཱི’’ཏི. ‘‘ཨེཏ’’ནྟི ཨིམིནཱ ཏསྶ ཀམྨཾ པཙྩཱམཊྛནྟི ཨཱཧ ‘‘ཡཾ སོ ཀརོཏཱི’’ཏིཨཱདི. སོཏི སངྒྷབྷེདཱཡ པརཀྐམནྟོ. སམེཏཱཡསྨནྟཱནནྟི ཨེཏྠ ‘‘ཙིཏྟ’’ནྟི ཨཛ྄ཛྷཱཧརིཏབྦནྟི ཨཱཧ ‘‘ཨཱཡསྨནྟཱནཾ ཙིཏྟ’’ནྟི. ཝུཏྟསདིསཱཡེཝཱཏི ཨེཏྠ ཡཾ ཝཏྟབྦཾ, ཏཾ ཧེཊྛཱ ཨཉྙབྷཱགིཡསིཀྑཱཔདཊྛཀཐཱཡ ཝཎྞནཱཡཾ (ཀངྑཱ. ཨཊྛ. ཨཉྙབྷཱགིཡསིཀྑཱཔདཝཎྞནཱ) ཝུཏྟམེཝ.

བྷེདཱནུཝཏྟཀསིཀྑཱཔདཝཎྞནཱ ནིཊྛིཏཱ.

༡༢. དུབྦཙསིཀྑཱཔདཝཎྞནཱ

དུཀྑེན ¶ ཝཏྟབྦོ ཨནུསཱསིཏུཾ ཨསཀྐུཎེཡྻོ སབྷཱཝོ ཨསྶཱཏི དུབྦཙཛཱཏིཀོ, ཝིལོམབྷཱཝཱི. ཏེནཱཧ ‘‘དུབྦཙསབྷཱཝོ’’ཏིཨཱདི. ཝཏྟུཾ ཨསཀྐུཎེཡྻོཏི ཀིསྨིཉྩི ཝུཙྩམཱནེ ཨསཧནཏོ ཨོཝདིཏུཾ ཨསཀྐུཎེཡྻོ. ཨུདྡིསཱིཡཏཱིཏི ཨུདྡེསོ, པཱཏིམོཀྑོ, ཏསྨིཾ པརིཡཱཔནྣཱ ཨནྟོགདྷཱ ཨུདྡེསཔརིཡཱཔནྣཱ, ཏེསུ ཨུདྡེསཔརིཡཱཔནྣེསུ. ཏེནཱཧ ‘‘ཨུདྡེསེ’’ཏིཨཱདི. ཨཐ སབྦཱནེཝ སིཀྑཱཔདཱནི ཀཐཾ པཱཏིམོཀྑུདྡེསཔརིཡཱཔནྣཱནཱིཏི ཨཱཧ ‘‘ཡསྶ སིཡཱ ཨཱཔཏྟི, སོ ‘ཨཱཝིཀརེཡྻཱ’ཏི ཨེཝཾ སངྒཧིཏཏྟཱ’’ཏི. ‘‘ཡསྶ སིཡཱ ཨཱཔཏྟཱི’’ཏི ཨིམིནཱ ¶ སབྦཱཔི ཨཱཔཏྟིཡོ ནིདཱནུདྡེསེ སངྒཧིཏཱ ཨེཝ ཧོནྟི. སིཀྑཱཔདེསཱུཏི ཨདྷིསཱིལསིཀྑཱཡ ཨདྷིགམཱུཔཱཡབྷཱུཏེསུ ཝིནཡཔཉྙཏྟཱིསཱུཏི ཨཏྠོ. སོ པན པཱཀཊོཡེཝཱཏི ཨཊྛཀཐཱཡཾ ན ཝུཏྟོ. པཉྩཧི སཧདྷམྨིཀེཧཱིཏི བྷིཀྑུབྷིཀྑུནིསཱམཎེརསཱམཎེརིསིཀྑམཱནཱཧི. སིཀྑིཏབྦཏྟཱཏི ལབྦྷམཱནཝསེན སིཀྑིཏབྦཏྟཱ. ཏཐཱ ཧི ཏེཧི ཡཐཱསཀཾ སིཀྑཱ སིཀྑཱིཡཏི, ན སབྦཱ. བུདྡྷཔཉྙཏྟེནཱཏི བུདྡྷེན ཋཔིཏེན, ཝིཧིཏེནཱཏི ཨཏྠོ. ཨཐ ཝཱ སཧདྷམྨིཀེན སཀཱརཎེན ཝུཙྩམཱནོཏི ཨེཝམེཏྠ ཨཏྠོ དཊྛབྦོ. ཝཙནཱཡཱཏི ནིསྶཀྐེ སམྤདཱནཝཙནནྟི ཨཱཧ ‘‘ཏཏོ མམ ཝཙནཏོ’’ཏི.

དུབྦཙསིཀྑཱཔདཝཎྞནཱ ནིཊྛིཏཱ.

༡༣. ཀུལདཱུསཀསིཀྑཱཔདཝཎྞནཱ

ནགརསྶཱཔི གཱམཝིསེསཏྟཱ ཨིདྷ གཱམགྒཧཎེནེཝ ནགརམྤི གཧིཏནྟི ཨཱཧ ‘‘ནགརམྤི གཱམེ ཨནྟོགདྷམེཝཱ’’ཏི, ཝཱ-སདྡེན ཝཱ ཨནུཏྟཝིཀཔྤཏྠེན གཧཎནྟི ཨེཝཾ ཝུཏྟཾ. ཨེཏྠ ཙ ཨཔཱཀཱརཔརིཀྑེཔོ སཱཔཎོ ནིགམོ, སཔཱཀཱརཱཔཎཾ ནགརཾ, ཏཾཏཾཝིཔརཱིཏོ གཱམོཏི ཨིམེསཾ ཏིཎྞཾ ཝིསེསོ དཊྛབྦོ. ཀུལཱནི དཱུསེཏཱིཏི ཁཏྟིཡབྲཱཧྨཎཝེསྶསུདྡཝསེན ཙཏྟཱརི ཀུལཱནི ཝིཀཱརཾ ཨཱཔཱདེཏི. དཱུསེནྟོ ཙ ན ཨསུཙིཀདྡམཱདཱིཧི དཱུསེཏི, ཨཐ ཁོ ཨཏྟནོ དུཔྤཊིཔཏྟིཡཱ ཏེསཾ པསཱདཾ ཝིནཱསེཏི. ཏེནཱཧ ‘‘པུཔྥདཱནཱདཱིཧཱི’’ཏིཨཱདི. ཏཏྠ ཧརིཏྭཱ ཝཱ ཧརཱཔེཏྭཱ ཝཱ པཀྐོསིཏྭཱ ཝཱ པཀྐོསཱཔེཏྭཱ ཝཱ སཡཾ ཝཱ ཨུཔགཏཱནཾ (པཱརཱ. ཨཊྛ. ༢.༤༣༦-༤༣༧) ཡསྶ ཀསྶཙི ཨཏྟནོ སནྟཀསྶ པུཔྥསྶ ཀུལསངྒཧཏྠཱཡ དཱནཾ པུཔྥདཱནཾ, ཏཾ ཨཱདི ཡེསཾ ཏེ པུཔྥདཱནཱདཡོ, ཏེཧི པུཔྥདཱནཱདཱིཧི. ཨཱདིསདྡེན (པཱརཱ. ༤༣༧) ཕལདཱནཙུཎྞམཏྟིཀཱདནྟཀཊྛཝེལུ༹ཝེཛྫིཀཱཛངྒྷཔེསནིཀཱནཾ གཧཎཾ. སདྡྷཾ ཝིནཱསེནྟོཏི ཏཐཱ ཨཀརོནྟེསུ ¶ ཨཉྙེསུ པེསལེསུ བྷིཀྑཱུསུ ཨཔྤསཱདཾ ཨདསྶནཾ གམེནྟོ. པུཔྥདཱནཱདཱིཧི ཙ ཏེཧི ཀཏསངྒཧེཧི ཨཉྙེ པེསལེ ཏཐཱ ཨཀརོནྟེ ཏེ མནུསྶཱ ཨིསྶནྟི ན ཨལླཱིཡནྟཱིཏི སོ ཏེསཾ པསཱདཾ ཝིནཱསེཏི ནཱམཱཏི དཊྛབྦཾ. པཱཔཀཱ སམཱཙཱརཱཏི བུདྡྷཔྤཊིཀུཊྛཏྟཱ ལཱམཀཱ སམཱཙཱརཱ ¶ . ཏེ པན ཡསྨཱ ཀུལསངྒཧཏྠཾ མཱལཱཝཙྪརོཔནཱདཡོ ཨིདྷ ཨདྷིཔྤེཏཱ, ཏསྨཱ ‘‘མཱལཱཝཙྪརོཔནཱདཡོ’’ཏི ཝུཏྟཾ. ཨཱརཱམཱདཱིནམཏྠཱཡ པན ཀཔྤིཡཝོཧཱརཱདཱིཧི རོཔཱཔནཱདིཀཾ ཝཊྚཏི. ཏཏྠ མཱལཱཝཙྪནྟི ཏརུཎཔུཔྥརུཀྑཾ. ཏརུཎཀཱ ཧི པུཔྥརུཀྑཱཔི པུཔྥགཙྪཱཔི ‘‘མཱལཱཝཙྪཱ’’ཏྭེཝ ཝུཙྩནྟི, ཏསྶ རོཔནཾ མཱལཱཝཙྪརོཔནཾ, ཏཾ ཨཱདི ཡེསཾ ཏེ མཱལཱཝཙྪརོཔནཱདཡོ. ཨཱདིསདྡེན ཙེཏྠ རོཔཱཔནསིཉྩནསིཉྩཱཔནཨོཙིནནཨོཙིནཱཔནགནྠནགནྠཱཔནཱནཾ གཧཎཾ.

མཱཏིཀཱཡཾ དིསྶནྟཱིཏི ཡེ པཙྩཀྑཏོ པསྶནྟི, ཏེཧི དིསྶནྟི. སུཡྻནྟཱིཏི ཡེ པརཏོ སུཎནྟི, ཏེཧི སོཏདྭཱརེན སུཏྭཱ ཨུཔདྷཱརཱིཡནྟི. དུཊྛཱནཱིཏི དཱུསིཏཱནི. ཨལཾ ཏེ ཨིདྷ ཝཱསེནཱཏི ཏཝ ཨིདྷ ཝཱསེན ཨལཾ, མཱ ཨིདྷ ཏཝ ཝཱསོ ཧོཏཱུཏི ཨཏྠོ. ཝཱརཎཏྠོ ཧི ཨིདྷ ཨལཾ-སདྡོ. པབྦཱཛནཱིཡཀམྨཀཏོཏི ཙོདེཏྭཱ སཱརེཏྭཱ ཨཱཔཏྟིཾ ཨཱརོཔེཏྭཱ ‘‘སུཎཱཏུ མེ, བྷནྟེ, སངྒྷོ, ཨིམེ ཨསྶཛིཔུནབྦསུཀཱ’’ཏིཨཱདིནཱ (པཱརཱ. ༤༣༤) པདབྷཱཛནེ ཝུཏྟཱཡ ཉཏྟིཙཏུཏྠཀམྨཝཱཙཱཡ ཀཏཔབྦཱཛནཱིཡཀམྨོ. ཡསྨིཉྩ ཝིཧཱརེ ཝསཏཱིཏི གཱམཏོ བཧིཝིཧཱརམཱཧ. ནེཝ ཏསྨིཾ གཱམེ…པེ… ཙརིཏུཾ ལབྷཏཱིཏི སཙེཔི གཱམོ ཝཱ ནིགམོ ཝཱ དྭཱདསཡོཛནཔརམོ ཧོཏི, ཏིཡོཛནཔརམོ ཙ ཝིཧཱརོ ཧོཏི, ནེཝ ཏསྨིཾ གཱམེ ཝཱ ནིགམེ ཝཱ པིཎྜཱཡ ཙརིཏུཾ ལབྷཏི, ན ཝིཧཱརེ ཝསིཏུཾ. ཏསྨིཾ ཝིཧཱརེ ཝསནྟེན སཱམནྟགཱམེཔི པིཎྜཱཡ ན ཙརིཏབྦཾ, སཱམནྟཝིཧཱརེཔི ཝསནྟེན ཏསྨིཾ གཱམེ པིཎྜཱཡ ན ཙརིཏབྦཾ. སཱམནྟཝིཧཱརེ ཝསནྟེན པན སཱམནྟགཱམེ ཙརིཏུཾ ཝཊྚཏི. ཨཱཔཛྫིཏབྦཱ ཨཱཔཏྟིཡོཏི ཀུལསངྒཧཏྠཾ ཨཏྟནོ སནྟཀདཱནེ དུཀྐཊཾ, ཨིསྶརཝཏཱཡ སངྒྷསནྟཀདཱནེ ཐུལླཙྩཡཾ, པསཡ྄ཧ དཱནེ པཱརཱཛིཀནྟི ཨིམཱ ཨཱཔཏྟིཡོ. མཱཏིཀཱཡཾ ‘‘པཀྐམཏཱ ཡསྨཱ’’ཏི པབྦཱཛནཱིཡཀམྨཀཏསྶ ཝཏྟཝསེན ཝུཏྟཾ. ཨཱདིམྷི པན པབྦཱཛནཱིཡཀམྨཝསེན དཊྛབྦཾ. ཨསྶཛིཔུནབྦསུཀེཏི ཨསྶཛིཉྩེཝ པུནབྦསུཀཉྩ.

ཀུལདཱུསཀསིཀྑཱཔདཝཎྞནཱ ནིཊྛིཏཱ.

སངྒྷཱདིསེསནིགམནཝཎྞནཱ

པཋམཱཔཏྟིཀཱཏི ¶ ¶ ཨཝཡཝེན ཝིགྒཧོ སམུདཱཡོ སམཱསཏྠོཏི ཨཱཧ ‘‘པཋམཾ ཨཱཔཏྟི ཨེཏེསནྟི པཋམཱཔཏྟིཀཱ’’ཏི. ཝཱིཏིཀྐམནཀྑཎེཡེཝཱཏི ཝཏྠུཝཱིཏིཀྐམནཀྑཎེཡེཝ. ཨེཝ-ཀཱརེན སམནུབྷཱསནཀམྨཀྑཎཾ པཊིཀྑིཔཏི. ཨཧསྶ ཡཏྟཀོ པརིཙྪེདོ ཡཱཝཏཱིཧཾ. ཏེནཱཧ ‘‘ཡཏྟཀཱནི ཨཧཱནཱི’’ཏི. ཨཧཱནཱིཏི ཙ དིཝསཱནཱིཏི ཨཏྠོ.

ཝཏྠུཝསེན ཝཱཏི ཨསུཙིམོཙནཱདིཝཱིཏིཀྐམམཏྟཝསེན ཝཱ. ཨིདནྟི ཨིདཾ ཝཱིཏིཀྐམཾ. ནཱམམཏྟཝསེན ཝཱ ཨཡཾ ཨིཏྠནྣཱམཱ ཨཱཔཏྟཱིཏི ‘‘ཨཡཾ སངྒྷཱདིསེསོ ནཱམ ཨཱཔཏྟཱི’’ཏི ཨེཝཾ ཝིནཱ ཝཏྠུཾ ནཱམཝསེན ཝཱ. མཏྟསདྡེན ཙེཏྠ ཝཏྠུཾ པཊིཀྑིཔཏི. པོཏྠཀེསུ པན ཀཏྠཙི ‘‘ནཱམགོཏྟཝསེན ཝཱ’’ཏི ལིཁནྟི, ཏཾ ན སུནྡརཾ ‘‘ཨཡཾ ཨིཏྠནྣཱམཱ ཨཱཔཏྟཱི’’ཏི ཝུཏྟཏྟཱ. ཨིདཱནི ནཾ ཀསྶཙི ན ཨཱརོཙེསྶཱམཱིཏི སམྦནྡྷོ. དྷུརཾ ནིཀྑིཔིཏྭཱཏི ཨཱརོཙནེ ཨུསྶཱཧཾ ཋཔེཏྭཱ. ན ཀེཝལཾ ཝཏྠུནཱམཝསེནེཝ ཨཱཔཏྟིསཉྙཱི ཧུཏྭཱ ཚཱདེནྟསྶེཝ, ཨཐ ཁོ ཡོཔི ཨེཝཾ ཨཛཱནནྟོ ཀེཝལཾ ‘‘ཨཱཔཏྟིཾ ཚཱདེམཱི’’ཏི ཨཱཔཏྟིསཉྙཱཡ ཚཱདེཏི, ཏསྶཔི ཚནྣཱ ཧོཏཱིཏི ཝེདིཏབྦཾ. སཙེ པནེཏྠ ཨནཱཔཏྟིསཉྙཱི ཝཱ ཧོཏི, ཨཉྙཱཔཏྟིཀྑནྡྷསཉྙཱི ཝཱ ཝེམཏིཀོ ཝཱ ཧུཏྭཱ ‘‘ན དཱནི ནཾ ཀསྶཙི ཨཱརོཙེསྶཱམཱི’’ཏི ཨེཝཾ ཚཱདེཏུཀཱམོཝ དྷུརཾ ནིཀྑིཔིཏྭཱ ཨརུཎཾ ཨུཊྛཱཔེཏི, ཨཙྪནྣཱཝ ཧོཏཱིཏི ཨཱནེཏྭཱ ཡོཛེཏབྦཾ. ཨནཱཔཏྟི པན ཨཱཔཏྟིསཉྙཱཡཔི ཨནཱཔཏྟིསཉྙཱཡཔི ཚཱདེནྟེན ཨཙྪཱདིཏཱཝ ཧོཏི. ལཧུཀཾ ཝཱ ‘‘གརུཀཱ’’ཏི གརུཀཾ ཝཱ ‘‘ལཧུཀཱ’’ཏི ཚཱདེཏི, ཨལཛྫིཔཀྑེ ཏིཊྛཏི, ཨཱཔཏྟི པན ཨཙྪནྣཱ ཧོཏི. གརུཀཾ ‘‘ལཧུཀཱ’’ཏི མཉྙམཱནོ དེསེཏི, ནེཝ དེསིཏཱ ཧོཏི ནཙྪནྣཱ.

པཀཏོ སབྷཱཝབྷཱུཏོ ཨཏྟཱ ཨསྶཱཏི པཀཏཏྟོ, ན ཀམྨེཧི ཝིཀཏཏྟོཏི ཨཏྠོ. ཏེནཱཧ ‘‘ཨནུཀྑིཏྟོ སམཱནསཾཝཱསཀོ’’ཏི. ཝུཏྟནཡེནེཝཱཏི ‘‘ན དཱནི ནཾ ཀསྶཙི ཨཱརོཙེསྶཱམཱི’’ཏིཨཱདིནཱ ཝུཏྟནེཝ ནཡེན. ཨཐ ‘‘མཡ྄ཧཾ སངྒྷེན ཀམྨཾ ཀཏ’’ནྟི (ཙཱུལ༹ཝ. ཨཊྛ. ༡༠༢) ཨཔཀཏཏྟསཉྙཱི ཧུཏྭཱ ཚཱདེཏི, ཨཙྪནྣཱཝ ཧོཏི. ཨཔཀཏཏྟེན པན པཀཏཏྟསཉྙིནཱ ཝཱ པཀཏཏྟེན ཨཔཀཏཏྟསཉྙིནཱ ཝཱ ཚཱདིཏཱཔི ཨཙྪནྣཱཝ ཧོཏི. ཝུཏྟམྤི ཙེཏཾ –

‘‘ཨཱཔཛྫཏི ¶ གརུཀཾ སཱཝསེསཾ;

ཚཱདེཏི ཨནཱདརིཡཾ པཊིཙྩ;

ན ¶ བྷིཀྑུནཱི ནོ ཙ ཕུསེཡྻ ཝཛྫཾ;

པཉྷཱམེསཱ ཀུསལེཧི ཙིནྟིཏཱ’’ཏི. (པརི. ༤༨༡);

ཨཡཉྷི པཉྷོ ཨུཀྑིཏྟཀེན ཀཐིཏོ.

དསསུ ཨནྟརཱཡེསུ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝ. སཙེ པན ཡོ བྷཱིརུཀཛཱཏིཀཏཱཡ ཨནྡྷཀཱརེ ཨམནུསྶཙཎྜམིགབྷཡེན ཨནྟརཱཡིཀསཉྙཱི ཧུཏྭཱ ཚཱདེཏི, ཨཙྪནྣཱཝ ཧོཏི. ཡསྶཔི པབྦཏཝིཧཱརེ ཝསནྟསྶ ཀནྡརཾ ཝཱ ནདིཾ ཝཱ ཨཏིཀྐམིཏྭཱ ཨཱརོཙེཏབྦཾ ཧོཏི, ཨནྟརཱམགྒེ ཙ ཙཎྜཝཱལ༹ཨམནུསྶཱདིབྷཡཾ ཨཏྠི, མགྒེ ཨཛགརཱ ནིཔཛྫནྟི, ནདཱི པཱུརཱ ཧོཏི, ཨེཏསྨིཾ སཏིཡེཝ ཨནྟརཱཡེ ཨནྟརཱཡིཀསཉྙཱི ཧུཏྭཱ ཚཱདེཏི, ཨཙྪནྣཱཝ ཧོཏི. ཨནྟརཱཡིཀསྶ པན ཨནྟརཱཡིཀསཉྙཱཡ ཝཱ ཨནནྟརཱཡིཀསཉྙཱཡ ཝཱ ཚཱདཡཏོ ཨཙྪནྣཱཝ.

བྷིཀྑུནོཏི སབྷཱགསྶ བྷིཀྑུནོ. སཙསྶ མུཁེ ཨཔྤམཏྟཀོ གཎྜོ ཝཱ ཧོཏི, ཧནུཀཝཱཏོ ཝཱ ཝིཛ྄ཛྷཏི, དནྟོ ཝཱ རུཛྫཏི, བྷིཀྑཱ ཝཱ མནྡཱ ལདྡྷཱ ཧོཏི, ཏཱཝཏཀེན པན ནེཝ ཝཏྟུཾ ན སཀྐོཏི, ན གནྟུཾ. ཨཔིཙ ཁོ ‘‘ན སཀྐོམཱི’’ཏི སཉྙཱི ཧོཏི, ཨཡཾ པཧུ ཧུཏྭཱ ཨཔྤཧུསཉྙཱི ནཱམ. ཨིམིནཱ ཚཱདིཏཱཔི ཨཙྪཱདིཏཱ. ཨཔྤཧུནཱ པན ཝཏྟུཾ ཝཱ གནྟུཾ ཝཱ ཨསམཏྠེན པཧུསཉྙིནཱ ཝཱ ཨཔྤཧུསཉྙིནཱ ཝཱ ཚཱདིཏཱཔི ཨཙྪཱདིཏཱཝ.

ཨིདཾ ཨུཏྟཱནམེཝཱཏི ཨིདཾ ཨངྒདྭཡཾ ཨུཏྟཱནཏྠམེཝ. སཙེ པན ‘‘ཚཱདེསྶཱམཱི’’ཏི དྷུརནིཀྑེཔཾ ཀཏྭཱ པུརེབྷཏྟེ ཝཱ པཙྪཱབྷཏྟེ ཝཱ པཋམཡཱམཱདཱིསུ ཝཱ ལཛྫིདྷམྨཾ ཨོཀྐམཏི, ཨནྟོཨརུཎེཡེཝ ཨཱརོཙེཏི, ཨཡཾ ཚཱདེཏུཀཱམོ ན ཚཱདེཏི ནཱམ.

ཡསྶ པན ཨབྷིཀྑུཀེ ཋཱནེ ཝསནྟསྶ ཨཱཔཏྟིཾ ཨཱཔཛྫིཏྭཱ སབྷཱགསྶ བྷིཀྑུནོ ཨཱགམནཾ ཨཱགམེནྟསྶ ཝཱ, སབྷཱགསྶ སནྟིཀཾ ཝཱ གཙྪནྟསྶ ཨཌྜྷམཱསོཔི མཱསོཔི ཨཏིཀྐམཏི, ཨཡཾ ནཙྪཱདེཏུཀཱམོ ཚཱདེཏི ནཱམ. ཨཡམྤི ཨཙྪནྣཱཝ ཧོཏི.

ཡོ ¶ པན ཨཱཔནྣམཏྟོཝ ཨགྒིཾ ཨཀྐནྟཔུརིསོ ཝིཡ སཧསཱ ཨཔཀྐམིཏྭཱ སབྷཱགཊྛཱནཾ གནྟྭཱ ཨཱཝི ཀརོཏི, ཨཡཾ ནཙྪཱདེཏུཀཱམོཝ ན ཚཱདེཏི ནཱམ. སབྷཱགམཏྟམེཝ པམཱཎནྟི ཨཝེརིསབྷཱགམཏྟམེཝ པམཱཎཾ. ཨཝེརིསབྷཱགསྶ ཧི སནྟིཀེ ཨཱརོཙེཏབྦཾ. ཡོ པན ཝིསབྷཱགོ ཧོཏི སུཏྭཱ པཀཱསེཏུཀཱམོ, ཨེཝརཱུཔསྶ ཨུཔཛ྄ཛྷཱཡསྶཔི སནྟིཀེ ན ཨཱརོཙེཏབྦཱ. ཏཏྠ པུརེབྷཏྟཾ ¶ ཨཱཔཏྟིཾ ཨཱཔནྣོ ཧོཏུ, པཙྪཱབྷཏྟཾ ཝཱ དིཝཱ ཝཱ རཏྟིཾ ཝཱ, ཡཱཝ ཨརུཎཾ ན ཨུགྒཙྪཏི, ཏཱཝ ཨཱརོཙེཏབྦཾ. ཨུདྡྷསྟེ ཨརུཎེ པཊིཙྪནྣཱ ཧོཏི, པཊིཙྪཱདནཔཙྩཡཱ ཙ དུཀྐཊཾ ཨཱཔཛྫཏི. སངྑེཔཏོཏི སམཱསཏོ. ཝིཏྠཱརཏོ པན སམནྟཔཱསཱདིཀཱཡཾ ཝུཏྟོཏི ཨདྷིཔྤཱཡོ.

ཨཀཱམཱ པརིཝཏྠབྦནྟི ཨཔྤཊིཀམྨཀཏཱཡ ཨཱཔཏྟིཡཱ སགྒམོཀྑཱཝརཎབྷཱཝཏོ ཨནིཙྪནྟེནཱཔི པརིཝསིཏབྦནྟི ཨཏྠོ. ཏེནཱཧ ‘‘ན ཀཱམེནཱ’’ཏིཨཱདི. པརིཝཱསཾ སམཱདཱཡཱཏི པརིཝཱསཝཏྟཾ སངྒྷམཛ྄ཛྷེ སམཱདིཡིཏྭཱ. ཡདིཔི ཙཏུབྦིདྷོ པརིཝཱསོ ཨཔྤཊིཙྪནྣཔརིཝཱསོ, པཊིཙྪནྣཔརིཝཱསོ, སུདྡྷནྟཔརིཝཱསོ, སམོདྷཱནཔརིཝཱསོཏི, ཏཐཱཔི ཨཔྤཊིཙྪནྣཔརིཝཱསོ ཨིདྷ ན ཨདྷིཔྤེཏོཏི ཨཱཧ ‘‘ཏཏྠ པཊིཙྪནྣ…པེ… ཏིཝིདྷོ པརིཝཱསོ’’ཏི. ཏཏྠཱཏི ཏསྨིཾ ཝཱཀྱེ. པཊིཙྪནྣཱཡ ཨཱཔཏྟིཡཱ སཏི དཱཏབྦོ པརིཝཱསོ པཊིཙྪནྣཝིསཡཏཱཡ པཊིཙྪནྣཔརིཝཱསོ. སུདྡྷནྟཏོ པཊྛཱཡ དཱཏབྦོ པརིཝཱསོ སུདྡྷནྟཔརིཝཱསོ. སམོདཧིཏྭཱ དཱཏབྦོ པརིཝཱསོ སམོདྷཱནཔརིཝཱསོ.

ཨིདཱནི ཏེ ཏིཝིདྷེཡེཝ པརིཝཱསེ སརཱུཔཏོ དསྶེཏུཾ ‘‘ཏཏྠཱ’’ཏིཨཱདིམཱཧ. ཧཱིཏི ཡསྨཱ. ཨེཀཱཧཾ པཊིཙྪནྣཱ ཨེཀཱཧཔྤཊིཙྪནྣཱ. ཝུཏྟནཡེནཱཏི ‘‘ཨཱཔཏྟི ཙ ཧོཏཱི’’ཏིཨཱདིནཱ ཝུཏྟེན ནཡེན. ཨེཀཱཧཔྤཊིཙྪནྣནྟི ཨེཏྠ ཨིཏིསདྡོ ‘‘ཨིཏི ཝཱ, ཨིཏི ཨེཝརཱུཔཱ ཝིསཱུཀདསྶནཱ པཊིཝིརཏོ’’ཏིཨཱདཱིསུ (དཱི. ནི. ༡.༡༣, ༡༩༧) ཝིཡ ཨཱདིཨཏྠོ. ཏེན ‘‘སོཧཾ, བྷནྟེ, སངྒྷཾ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསཊྛིཡཱ ཨེཀཱཧཔྤཊིཙྪནྣཱཡ ཨེཀཱཧཔརིཝཱསཾ ཡཱཙཱམཱི’’ཏི ཨིམཾ པཱལི༹སེསཾ (ཙཱུལ༹ཝ. ༡༠༢) སངྒཎྷཱཏི. ཨེཝཾ པརིཝཱསཾ ཡཱཙཱཔེཏྭཱཏི ཨེཝཾ ཡཱཝཏཏིཡཾ ཡཱཙཱཔེཏྭཱ. ཁནྡྷཀེ ཨཱགཏནཡེནཱཏི སམུཙྩཡཀྑནྡྷཀེ (ཙཱུལ༹ཝ. ༩༧ ཨཱདཡོ) ཨཱགཏནཡེན. ཏཏོཏི པཀྑཏོ ¶ པཊྛཱཡ. ཨཏིརེཀཔཀྑཔྤཊིཙྪནྣནྟི པཀྑསྶ ཨཏིརེཀོ ཨཏིརེཀཔཀྑོ, ཏཾ པཊིཙྪནྣནྟི ཨཏྠོ. ཏཏོཏི ཏིཾསཏིམདིཝསཏོ པཊྛཱཡ. མཱསཔྤཊིཙྪནྣནྟི སཏྟཱནཾ ཨཱཡུཾ མིནནྟོ ཝིཡ སིཡཏི ཨནྟཾ ཀརོཏཱིཏི མཱསོ, ཏིཾསརཏྟིནྡིཝོ, ཏཾ པཊིཙྪནྣནྟི ཨཏྠོ. སཾཝཙྪརེ པུཎྞེཏི ཏཾ ཏཾ སཏྟཾ, དྷམྨཔྤཝཏྟིཉྩ སངྒམྨ ཝདནྟོ ཝིཡ སརཏི པཝཏྟཏཱིཏི སཾཝཙྪརོ, དྭཱདས མཱསཱ, ཏསྨིཾ པརིཔུཎྞེ.

ཝཏྠུཀིཏྟནཝསེན ཝཱཏི ནཱམེན སཧ ཝཏྠུཀིཏྟནཝསེན ཝཱཏི ཨཏྠོ. ཏེནེཝ ཧི ཨུཔརི ‘‘ནཱམམཏྟཝསེན ཝཱ’’ཏི མཏྟགྒཧཎཾ ཀཏནྟི དཊྛབྦཾ. ནཱམམཏྟཝསེནཱཏི ཝཏྠུཀིཏྟནཾ ཝིནཱ ཀེཝལཾ ནཱམསྶེཝ ཝསེན. ཏསྨཱཏི ཡསྨཱ དུཝིདྷེ ནཱམེ ‘‘ཨཱཔཏྟཱི’’ཏི སབྦསཱདྷཱརཎཾ ནཱམཾ, ཏསྨཱ ¶ . སུཀྐཝིསྶཊྛཱིཏི སུཀྐཝིསྶཊྛི ནཱམཱཡཾ. ཨིཏིསདྡོ ཧེཏྠ ཝཙནཱིཡཏྠཾ ནིདསྶེཏི. ནིདསྶནམཏྟཉྩེཏཾ ‘‘སུཀྐཝིསྶཊྛཱི’’ཏི ཀཱཡསཾསགྒཱདཱིནམྤི ཝཏྠུཨཱདིབྷཱཝེན ཨིཙྪིཏབྦཏྟཱ. ཝཏྠུ ཙེཝ གོཏྟཉྩཱཏི ཝཱིཏིཀྐམཏྟཱ ཝཏྠུ ཙེཝ ཨནཉྙསཱདྷཱརཎཏྟཱ གོཏྟཉྩ. གཾ ཏཱཡཏཱིཏི གོཏྟཾ, སཛཱཏིཏོ ཨཉྙཏྠ ཀཱཡསཾསགྒཱདཱིསུ གནྟུཾ ཨདཏྭཱ བུདྡྷིཾ, ཝཙནཉྩ རཀྑཏཱིཏི ཨཏྠོ. སངྒྷཱདིསེསོཏི སངྒྷཱདིསེསོ ནཱམཱཡཾ. ཨེཏྠ པན ཨིཏིསདྡོ ཝཙནཝཙནཱིཡསམུདཱཡཾ ནིདསྶེཏི. ཏེནཱཧ ‘‘ནཱམཉྩེཝ ཨཱཔཏྟི ཙཱ’’ཏི, སཛཱཏིསཱདྷཱརཎནཱམཏྟཱ ནཱམཉྩེཝ ཏེན ཏེན ཝཱིཏིཀྐམེནཱཔཛྫིཏབྦཏྟཱ ཨཱཔཏྟི ཙཱཏི ཨཏྠོ. ཨིདམྤི ནིདསྶནམཏྟམེཝ ‘‘ཨཱཔཏྟིཡོ’’ཏི ཨིམསྶཱཔི ནཱམཱདིབྷཱཝེན ཨིཙྪིཏབྦཏྟཱ. ཨིཏིསདྡོ ཝཱ ཨཱདིཨཏྠོ. ཨེཝཉྩ ཀཏྭཱ ‘‘ཀཱཡསཾསགྒནྟིཨཱདིཝཙནེནཱཔཱི’’ཏིཨཱདིཀམྤི སམཏྠིཏཾ ཧོཏི.

ཏཡིདཾ ཀམྨཝཱཙཱཡ ཀེན ཝཙནེན གཧིཏནྟི ཨནུཡོགཾ སནྡྷཱཡ ‘‘ཏཏྠཱ’’ཏིཨཱདིམཱཧ. ‘‘ཨཱཔཏྟཱི’’ཏི སབྦསཱདྷཱརཎནཱམཏྟཱ, ཝཱིཏིཀྐམེན ཨཱཔཛྫིཏབྦཏྟཱ ཙ ནཱམཉྩེཝ ཨཱཔཏྟི ཙ ཧོཏཱིཏི ཨཱཧ ‘‘ཨཱཔཏྟིཡོཏི ཝཙནེནཱཔཱི’’ཏི. ཏསྨཱཏི ཡསྨཱ ཨིདཾ པརིཝཱསཱདིཝིནཡཀམྨཾ ཝཏྠུཝསེན, གོཏྟཝསེན, ནཱམཝསེན, ཨཱཔཏྟིཝསེན ཙ ཀཱཏུཾ ཝཊྚཏིཡེཝ, ཏསྨཱ. ཨེཏེསཱུཏི ཝཏྠུཨཱདཱིསུ, སུཀྐཝིསྶཊྛིཨཱདཱིསུ ཝཱ. ཝཏྟཾ སམཱདཱཏབྦནྟི ཡཐཱཝུཏྟེསུ དྭཱིསུ པདེསུ ཨེཀེནཔི སམཱདཱཏབྦཾ. དྭཱིཧི པན སུསམཱདིནྣཾཡེཝ. ཏེནེཝ ཝཀྑཏི ‘‘སམཱདཱནེཔི ཨེསེཝ ནཡོ’’ཏི (ཀངྑཱ. ཨཊྛ. ནིདཱནཝཎྞནཱ).

ཨཱརོཙེཏྭཱཏི ¶ –

‘‘ཨཧཾ, བྷནྟེ, ཨེཀཾ ཨཱཔཏྟིཾ ཨཱཔཛྫིཾ སཉྩེཏནིཀཾ སུཀྐཝིསྶཊྛིཾ ཨེཀཱཧཔྤཊིཙྪནྣཾ, སོཧཾ སངྒྷཾ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ ཨེཀཱཧཔྤཊིཙྪནྣཱཡ ཨེཀཱཧཔརིཝཱསཾ ཡཱཙིཾ, ཏསྶ མེ སངྒྷོ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ ཨེཀཱཧཔྤཊིཙྪནྣཱཡ ཨེཀཱཧཔརིཝཱསཾ ཨདཱསི, སོཧཾ པརིཝསཱམི, ཝེདཡཱམཧཾ, བྷནྟེ, ‘ཝེདཡཏཱི’ཏི མཾ སངྒྷོ དྷཱརེཏཱུ’’ཏི (ཙཱུལ༹ཝ. ཨཊྛ. ༡༠༢) –

ཨེཝམཱདིནཱ ཏཾ ཏཾ ཡོཛནཱནུརཱུཔཾ ཨཱརོཙེཏྭཱ. ཨིམཉྩ པནཏྠཾ གཧེཏྭཱ ཡཱཡ ཀཱཡཙི བྷཱསཱཡ ཨཱརོཙེཏུཾ ཝཊྚཏིཡེཝ (ཙཱུལ༹ཝ. ཨཊྛ. ༡༠༢). ‘‘པུན ཨཱགཏཱགཏཱནཾ བྷིཀྑཱུནཾ ཨཱརོཙེནྟེནཱ’’ཏི ཨིདཾ ཨཱགནྟུཀཾ བྷིཀྑུཾ སནྡྷཱཡ ཝུཏྟཾ. ཨེཏྠ ཙ ཨེཀསྶ ཨཱརོཙེནྟེན ཨཝསཱནེ ¶ ‘‘ཝེདཡཏཱིཏི མཾ ཨཱཡསྨཱ དྷཱརེཏུ’’, དྭིནྣཾ ‘‘ཨཱཡསྨནྟཱ དྷཱརེནྟུ’’, ཏིཎྞཾ ‘‘ཨཱཡསྨནྟོ དྷཱརེནྟཱུ’’ཏི ཝཏྟབྦཾ. ཝཏྟབྷེདཉྩ རཏྟིཙྪེདཉྩ ཨཀཏྭཱཏི ‘‘ན, བྷིཀྑཝེ, པཱརིཝཱསིཀེན བྷིཀྑུནཱ སཱདིཏབྦཾ པཀཏཏྟཱནཾ བྷིཀྑཱུནཾ ཨབྷིཝཱདནཾ པཙྩུཔཊྛཱན’’ནྟིཨཱདིནཱ (ཙཱུལ༹ཝ. ༧༥) པཱརིཝཱསིཀཀྑནྡྷཀེ ཡཱནི ཙཏུནཝུཏི ཝཏྟཱནི ཝུཏྟཱནི, ཏེསཾ བྷེདཉྩ, ཡོ ཙ ‘‘ཏཡོ ཁོ, ཨུཔཱལི, པཱརིཝཱསིཀསྶ བྷིཀྑུནོ རཏྟིཙྪེདཱ སཧཝཱསོ ཝིཔྤཝཱསོ ཨནཱརོཙནཱ’’ཏི (ཙཱུལ༹ཝ. ༨༣) རཏྟིཙྪེདོ ཝུཏྟོ, ཏཉྩ ཨཀཏྭཱ.

ཨཡཾ ཧེཏྠ ཝིནིཙྪཡོ – སཙེ (ཙཱུལ༹ཝ. ཨཊྛ. ༧༦) ཨཱགནྟུཀཱ མུཧུཏྟཾ ཝིསྶམིཏྭཱ ཝཱ ཨཝིསྶམིཏྭཱ ཨེཝ ཝཱ ཝིཧཱརམཛ྄ཛྷེན གཙྪནྟི, ཏེསམྤི ཨཱརོཙེཏབྦཾ. སཙེ ཏསྶ ཨཛཱནནྟསྶེཝ གཙྪནྟི, ཨཡཉྩ གཏཀཱལེ ཛཱནཱཏི, གནྟྭཱ ཨཱརོཙེཏབྦཾ. སམྤཱཔུཎིཏུཾ ཨསཀྐོནྟསྶ རཏྟིཙྪེདོཝ ཧོཏི, ན ཝཏྟབྷེདདུཀྐཊཾ. ཡེཔི ཨནྟོཝིཧཱརཾ ཨཔྤཝིསིཏྭཱ ཨུཔཙཱརསཱིམཾ ཨོཀྐམིཏྭཱ གཙྪནྟི, ཨཡཉྩ ནེསཾ ཚཏྟསདྡཾ ཝཱ ཨུཀྐཱསིཏསདྡཾ ཝཱ ཁིཔིཏསདྡཾ ཝཱ སུཏྭཱཝ ཨཱགནྟུཀབྷཱཝཾ ཛཱནཱཏི, གནྟྭཱ ཨཱརོཙེཏབྦཾ. གཏཀཱལེ ཛཱནནྟེནཱཔི ཨནུབནྡྷིཏྭཱ ཨཱརོཙེཏབྦམེཝ. སམྤཱཔུཎིཏུཾ ཨསཀྐོནྟསྶ རཏྟིཙྪེདོཝ ཧོཏི, ན ཝཏྟབྷེདདུཀྐཊཾ. ཡོཔི རཏྟིཾཡེཝ ཨཱགནྟྭཱ རཏྟིཾཡེཝ གཙྪཏི, སོཔིསྶ རཏྟིཙྪེདཾ ཀརོཏི. ཨཉྙཱཏཏྟཱ ¶ པན ཝཏྟབྷེདདུཀྐཊཾ ནཏྠི. སཙེ ཨཛཱནིཏྭཱཝ ཨབྦྷཱནཾ ཀརོཏི, ཨཀཏམེཝ ཧོཏཱིཏི ཀུརུནྡིཡཾ (ཙཱུལ༹ཝ. ཨཊྛ. ༧༦) ཝུཏྟཾ. ཏསྨཱ ཨདྷིཀཱ རཏྟིཡོ གཧེཏྭཱ ཀཱཏབྦཾ. ཨཡཾ ཨཔཎྞཀཔྤཊིཔདཱ.

ནདིཨཱདཱིསུ ནཱཝཱཡ གཙྪནྟམྤི པརཏཱིརེ ཋིཏམྤི ཨཱཀཱསེ གཙྪནྟམྤི པབྦཏཏལཨརཉྙཱདཱིསུ དཱུརེ ཋིཏམྤི བྷིཀྑུཾ དིསྭཱ སཙེ ‘‘བྷིཀྑཱུ’’ཏི ཝཝཏྠཱནཾ ཨཏྠི, ནཱཝཱདཱིཧི ཝཱ གནྟྭཱ, མཧཱསདྡཾ ཀཏྭཱ ཝཱ ཝེགེན ཨནུབནྡྷིཏྭཱ ཝཱ ཨཱརོཙེཏབྦཾ, ཨནཱརོཙེནྟསྶ རཏྟིཙྪེདོ ཙེཝ ཝཏྟབྷེདདུཀྐཊཉྩ. སཙེ ཝཱཡམནྟོཔི སམྤཱཔུཎིཏུཾ ཝཱ སཱཝེཏུཾ ཝཱ ན སཀྐོཏི, རཏྟིཙྪེདོཝ ཧོཏི, ན ཝཏྟབྷེདདུཀྐཊཾ.

ཨཉྙཾ ཀཉྩི ཝིཧཱརཾ གཏེནཔི བྷིཀྑཱུནཾ ཨཱརོཙེཏབྦམེཝ (ཙཱུལ༹ཝ. ཨཊྛ. ༧༦). སཙེ སབྦེ ཨེཀཊྛཱནེ ཋིཏེ པསྶཏི, ཨེཀཊྛཱནེ ཋིཏེནེཝ ཨཱརོཙེཏབྦཾ. ཨཐ རུཀྑམཱུལཱདཱིསུ ཝིསུཾ ཝིསུཾ ཋིཏཱ ཧོནྟི, ཏཏྠ ཏཏྠ གནྟྭཱ ཨཱརོཙེཏབྦཾ. སཉྩིཙྩ ཨནཱརོཙེནྟསྶ རཏྟིཙྪེདོ ཙ ཧོཏི, ཝཏྟབྷེདེ ཙ དུཀྐཊཾ. ཨཐ ཝིཙིནནྟོ ཨེཀཙྩེ ན པསྶཏི, རཏྟིཙྪེདོཝ ཧོཏི ¶ , ན ཙ ཝཏྟབྷེདདུཀྐཊཾ. སཉྩིཙྩ ཨནཱརོཙེནྟསྶ པན རཏྟིཙྪེདོ ཙེཝ ཧོཏི, ཝཏྟབྷེདེ ཙ དུཀྐཊཾ.

ཏཏྠེཝཱཏི མཱལ༹ཀསཱིམཱཡམེཝ. མཱལ༹ཀཏོ པན བྷིཀྑཱུསུ ནིཀྑནྟེསུ ཨེཀསྶཔི སནྟིཀེ ནིཀྑིཔིཏུཾ ཝཊྚཏི (ཙཱུལ༹ཝ. ཨཊྛ. ༩༧). མཱལ༹ཀཏོ ནིཀྑམིཏྭཱ སཏིཾ པཊིལབྷནྟེན སཧ གཙྪནྟསྶ སནྟིཀེ ནིཀྑིཔིཏབྦཾ. ཏེནཱཧ ‘‘ཨེཀཔུགྒལསྶ ཝཱ སནྟིཀེ’’ཏི. སཙེ སོཔི པཀྐནྟོ, ཨཉྙསྶ ཡསྶ མཱལ༹ཀེ ནཱརོཙིཏཾ, ཏསྶ ཨཱརོཙེཏྭཱ ནིཀྑིཔིཏབྦཾ. པཀཏཏྟཊྛཱནེཏི སངྒྷཀམྨཱནཾ ཨརཧཊྛཱནེ. དྭེ ལེཌྜུཔཱཏེ ཨཏིཀྐམིཏྭཱཏི (སཱརཏྠ. ཊཱི. ཙཱུལ༹ཝགྒ ༣.༩༧) བྷིཀྑཱུནཾ སཛ྄ཛྷཱཡནསདྡསཝནཱུཔཙཱརཝིཛཧནཏྠཾ ཝུཏྟཾ. མཧཱམགྒཏོ ཨོཀྐམྨཱཏི མགྒཔྤཊིཔནྣབྷིཀྑཱུནཾ ཨུཔཙཱརཝིཛཧནཏྠཾ ཝུཏྟཾ. གུམྦེན ཝཱ ཝཏིཡཱ ཝཱ པཊིཙྪནྣཊྛཱནེཏི དསྶནཱུཔཙཱརཝིཛཧནཏྠཾ ཝུཏྟཾ. ཝཏྟཾ སམཱདིཡིཏྭཱ ཨཱརོཙེཏབྦནྟི ཝུཏྟནཡེནེཝ ཝཏྟཾ སམཱདིཡིཏྭཱ པརིཝཱསོ ཨཱརོཙེཏབྦོ. ‘‘ཨཱརོཙེཏབྦ’’ནྟི པན སཱམཉྙེན ཝུཏྟཾ. ཨཱརོཙེནྟེན ཙ སཙེ ནཝཀཏརོ ཧོཏི, ‘‘ཨཱཝུསོ’’ཏི ཝཏྟབྦཾ. སཙེ ཝུཌྜྷཏརོ, ‘‘བྷནྟེ’’ཏི ཝཏྟབྦཾ. སཙེ ཨཉྙོ ཀོཙི བྷིཀྑུ ཀེནཙིདེཝ ཀརཎཱིཡེན ཏཾ ཋཱནཾ ཨཱགཙྪཏི. སཙེ ¶ ཨེས ནཾ པསྶཏི, སདྡཾ ཝཱ ཏསྶ སུཎཱཏི, ཨཱརོཙེཏབྦཾ. ཨནཱརོཙེནྟསྶ རཏྟིཙྪེདོ ཙེཝ ཝཏྟབྷེདོ ཙ. ཏེནཱཧ ‘‘ཡམྤི ཨཉྙཾ བྷིཀྑུཾ པསྶཏི, ཏསྶཱཔི ཨཱརོཙེཏབྦམེཝཱ’’ཏི. ཨཐ དྭཱདསཧཏྠཾ ཨུཔཙཱརཾ ཨོཀྐམིཏྭཱ ཨཛཱནནྟསྶེཝ གཙྪཏི, རཏྟིཙྪེདོ ཧོཏིཡེཝ, ཝཏྟབྷེདོ པན ནཏྠི. ཨུཊྛིཏེཏི ཨུགྒཏེ. ཡཾ སབྦཔཋམཾ བྷིཀྑུནྟི ཝིཧཱརཏོ ནིཀྑམནྟཾ ཝཱ ཨཱགནྟུཀཾ ཝཱ སབྦཔཋམཾ ཡཾ ཨཉྙཾ བྷིཀྑུཾ པསྶཏི. ཏསྶ ཨཱརོཙེཏྭཱ ནིཀྑིཔིཏབྦནྟི ཨནཱརོཙེནྟསྶ དུཀྐཊཾ སིཡཱ, ཏཾ སནྡྷཱཡ ཝུཏྟཾ, ན ཏུ རཏྟིཙྪེདཾ སནྡྷཱཡ. ཨིཏརཐཱ ཧི ‘‘ཝིཧཱརསཱིམཱཔརིཡཱཔནྣཱནཾ སབྦེསཾ ཨཱརོཙེཏྭཱ’’ཏི ཝདེཡྻ. ཡཱཝ རཏྟིཡོ པཱུརེནྟཱིཏི ཡཏྟཀཱ རཏྟིཡོ ཨཱཔཏྟི པཊིཙྪནྣཱ ཧོཏི, ཏཏྟཀཱ རཏྟིཡོ ཡཱཝ པཱུརེནྟི, ཏཱཝ པརིཝཏྠབྦཾ. སམནྟཔཱསཱདིཀཱཡཾ པན ‘‘ཨེཝཾ ཡཏྟཀཱནི དིཝསཱནི ཨཱཔཏྟི པཊིཙྪནྣཱ ཧོཏི, ཏཏྟཀཱནི, ཏཏོ ཨདྷིཀཏརཱནི ཝཱ ཀུཀྐུཙྩཝིནོདནཏྠཱཡ པརིཝསིཏྭཱ’’ཏི ཝུཏྟཾ. ཝིཏྠཱརོཏི པཔཉྩོ.

ཨིཏརེསུ པན དྭཱིསཱུཏི སུདྡྷནྟཔརིཝཱསོ, སམོདྷཱནཔརིཝཱསོཏི དྭིནྣཾ མཛ྄ཛྷེ. ཁནྡྷཀེཏི སམུཙྩཡཀྑནྡྷཀེ (ཙཱུལ༹ཝ. ༡༥༦ ཨཱདཡོ). ཙཱུལ༹སུདྡྷནྟོ མཧཱསུདྡྷནྟོཏི ཨེཏྠ ཡོ ཨུཔསམྤདཏོ (ཙཱུལ༹ཝ. ཨཊྛ. ༡༠༢; ཝི. སངྒ. ཨཊྛ. ༢༤༢) པཊྛཱཡ ཨནུལོམཀྐམེན ཝཱ ཨཱརོཙིཏདིཝསཏོ པཊྛཱཡ པཊིལོམཀྐམེན ཝཱ ‘‘ཨསུཀཉྩ ཨསུཀཉྩ དིཝསཾ ཝཱ པཀྑཾ ཝཱ མཱསཾ ཝཱ སཾཝཙྪརཾ ཝཱ ཏཝ སུདྡྷབྷཱཝཾ ཛཱནཱསཱི’’ཏི པུཙྪིཡམཱནོ ‘‘ཨཱམ, བྷནྟེ, ཛཱནཱམི ¶ , ཨེཏྟཀཾ ནཱམ ཀཱལཾ ཨཧཾ སུདྡྷོ’’ཏི ཝདཏི, ཏསྶ དིནྣོ སུདྡྷནྟཔརིཝཱསོ ‘‘ཙཱུལ༹སུདྡྷནྟོ’’ཏི ཝུཙྩཏི.

ཏཾ གཧེཏྭཱ པརིཝསནྟེན ཡཏྟཀཾ ཀཱལཾ ཨཏྟནོ སུདྡྷབྷཱཝཾ ཛཱནཱཏི, ཏཏྟཀཾ ཨཔནེཏྭཱ ཨཝསེསཾ མཱསཾ ཝཱ དྭེམཱསཾ ཝཱ པརིཝསིཏབྦཾ. སཙེ ‘‘མཱསམཏྟཾ ཨསུདྡྷོམྷཱི’’ཏི སལླཀྑེཏྭཱ པརིཝཱསཾ ཨགྒཧེསི, པརིཝསནྟོ ཙ པུན ཨཉྙཾ མཱསཾ སརཏི, ཏམྤི མཱསཾ པརིཝསིཏབྦམེཝ, པུན པརིཝཱསདཱནཀིཙྩཾ ནཏྠི. ཨཐ ‘‘དྭེམཱསཾ ཨསུདྡྷོམྷཱི’’ཏི སལླཀྑེཏྭཱ ཨགྒཧེསི, པརིཝསནྟོ ཙ ‘‘མཱསམཏྟམེཝཱཧཾ ཨསུདྡྷོམྷཱི’’ཏི སནྣིཊྛཱནཾ ཀརོཏི, མཱསམེཝ པརིཝསིཏབྦཾ, པུན པརིཝཱསདཱནཀིཙྩཾ ནཏྠི. ཨཡཉྷི སུདྡྷནྟཔརིཝཱསོ ཨུདྡྷམྤི ཨཱརོཧཏི, ཧེཊྛཱཔི ཨོརོཧཏི, ཨིདམསྶ ལཀྑཎཾ.

ཡོ ¶ པན ཡཐཱཝུཏྟེན ཨནུལོམཔྤཊིལོམཝསེན པུཙྪིཡམཱནོཔི རཏྟིཔརིཡནྟཾ (ཙཱུལ༹ཝ. ཨཊྛ. ༡༠༢) ན ཛཱནཱཏི ནསྶརཏི, རཏྟིཔརིཡནྟེ ཝེམཏིཀོ ཝཱ ཧོཏི, ཏསྶ དིནྣོ སུདྡྷནྟཔརིཝཱསོ ‘‘མཧཱསུདྡྷནྟོ’’ཏི ཝུཙྩཏི. ཏཾ གཧེཏྭཱ གཧིཏདིཝསཏོ ཡཱཝ ཨུཔསམྤདདིཝསོ, ཏཱཝ རཏྟིཡོ གཎེཏྭཱ པརིཝསིཏབྦཾ. ཨཡཾ ཨུདྡྷཾ ནཱརོཧཏི, ཧེཊྛཱ པན ཨོརོཧཏི. ཏསྨཱ སཙེ པརིཝསནྟོ རཏྟིཔརིཙྪེདེ སནྣིཊྛཱནཾ ཀརོཏི ‘‘མཱསོ ཝཱ སཾཝཙྪརོ ཝཱ མཡ྄ཧཾ ཨཱཔནྣསྶཱ’’ཏི, མཱསཾ ཝཱ སཾཝཙྪརཾ ཝཱ པརིཝསིཏབྦཾ. ཨེཏྠ ཙ ཀིཉྩཱཔི ‘‘ཨེཏྟཀཾ ཀཱལཾ ཨཧཾ སུདྡྷོ’’ཏི ཝདནྟསྶ ཙཱུལ༹སུདྡྷནྟོ དཱིཡཏི, ཏཐཱཔི ནིཡམེནེཝ ཛཱནནཱབྷཱཝཱ ‘‘དུཝིདྷོཔི ཙེས…པེ… དཱཏབྦོ’’ཏི ཝུཏྟཾ. ཏསྶ དཱནཝིདྷི ཁནྡྷཀེ ཨཱགཏོཏི ཏསྶ དུཝིདྷསྶཱཔི སུདྡྷནྟསྶ དཱནཝིདྷི ‘‘ཏེན, བྷིཀྑཝེ, བྷིཀྑུནཱ སངྒྷཾ ཨུཔསངྐམིཏྭཱ…པེ… ཨེཝམསྶ ཝཙནཱིཡོ’’ཏིཨཱདིནཱ སམུཙྩཡཀྑནྡྷཀེ (ཙཱུལ༹ཝ. ༡༥༦) ཨཱགཏོ. ཏསྨཱ ཏཏྠ ཝུཏྟནཡེནེཝ ཝེདིཏབྦོཏི ཨདྷིཔྤཱཡོ. ཨེས ནཡོ ཝིནིཙྪཡཀཐཱ པན ཝིཏྠཱརཏོ སམནྟཔཱསཱདིཀཱཡཾ ཝུཏྟཱཏི ཨེཏྠཱཔི.

ཨོདྷུནིཏྭཱ ཨཝདྷུཡ པཧཱཡ སམོདྷཱནོ ཨོདྷཱནསམོདྷཱནོ. ཙིརཔྤཊིཙྪནྣཱནཾ ཨགྒྷེན སམོདྷཱནོ ཨགྒྷསམོདྷཱནོ. མིསྶཀཱནཾ སམོདྷཱནོ མིསྶཀསམོདྷཱནོ. ཨིདཱནི ཏཾ ཏིཝིདྷམྤི སམོདྷཱནཔརིཝཱསཾ སངྑེཔཏོ དསྶེཏུཾ ‘‘ཏཏྠཱ’’ཏིཨཱདིམཱཧ. ཨནྟརཱཔཏྟིཾ ཨཱཔཛྫིཏྭཱ པཊིཙྪཱདེནྟསྶཱཏི ཡོ པརིཝཱསཾ གཧེཏྭཱ ཨནིཀྑིཏྟཝཏྟོ ཧུཏྭཱ པརིཝསནྟོ ཨཔརིནིཊྛིཏེཡེཝ པརིཝཱསེ ཨནྟརཱ ཝེམཛ྄ཛྷེ སངྒྷཱདིསེསཱཔཏྟིཾ ཨཱཔཛྫིཏྭཱ པཊིཙྪཱདེཏི, ཏསྶ. པརིཝུཏྠདིཝསེཏི ལཀྑཎཝཙནམེཏཾ, ཏེན ‘‘མཱནཏྟཙིཎྞདིཝསེ ཙཱ’’ཏིཔི ཝུཏྟམེཝ ཧོཏི. མཀྑེཏྭཱཏི ཉཏྟིཙཏུཏྠེན ¶ ཀམྨེན མཱུལཱཡ པཊིཀསྶནཝསེན མཀྑེཏྭཱ. སམོདཧིཏྭཱཏི མཱུལཱཔཏྟིཊྛཱནེ ཋཔེཏྭཱ, པཀྑིཔིཏྭཱཏི ཨཏྠོ. དཱཏབྦཔརིཝཱསོཏི ‘‘སུཎཱཏུ མེ, བྷནྟེ, སངྒྷོ’’ཏིཨཱདིནཱ ཉཏྟིཙཏུཏྠེན ཀམྨེན དཱཏབྦཔརིཝཱསོ. ཨིདཾ ཝུཏྟཾ ཧོཏི – ཡོ པཊིཙྪནྣཱཡ ཨཱཔཏྟིཡཱ པརིཝཱསཾ གཧེཏྭཱ པརིཝསནྟོ (ཙཱུལ༹ཝ. ཨཊྛ. ༡༠༢; ཝི. སངྒ. ཨཊྛ. ༢༤༣) ཝཱ མཱནཏྟཱརཧོ ཝཱ མཱནཏྟཾ ཙརནྟོ ཝཱ ཨབྦྷཱནཱརཧོ ཝཱ ཨནིཀྑིཏྟཝཏྟོ ཨཉྙཾ ཨཱཔཏྟིཾ ཨཱཔཛྫིཏྭཱ པུརིམཱཔཏྟིཡཱ སམཱ ཝཱ ཨཱུནཏརཱ ཝཱ རཏྟིཡོ ¶ པཊིཙྪཱདེཏི, ཏསྶ མཱུལཱཡ པཊིཀསྶནེན ཏེ པརིཝུཏྠདིཝསེ ཙ མཱནཏྟཙིཎྞདིཝསེ ཙ སབྦེ ཨོདྷུནིཏྭཱ ཨདིཝསེ ཀཏྭཱ པཙྪཱ ཨཱཔནྣཱཔཏྟིཾ མཱུལཱཔཏྟིཡཾ སམོདྷཱཡ པརིཝཱསོ དཱཏབྦོཏི.

སཙེ པན ཨནྟརཱཔཏྟི མཱུལཱཔཏྟིཏོ ཨཏིརེཀཔྤཊིཙྪནྣཱ ཧོཏི (ཙཱུལ༹ཝ. ཨཊྛ. ༡༠༢), ཏཾ མཱུལཱཔཏྟིཾ ཀཏྭཱ ཏཏྠ ཨིཏརཾ སམོདྷཱཡ པརིཝཱསོ དཱཏབྦོ. སཙེ པན ཨནྟརཱཔཏྟི ཨཔྤཊིཙྪནྣཱ ཧོཏི, མཱུལཱཡ པཊིཀསྶནཾ ཨཀཏྭཱ པུབྦེ གཧིཏཔརིཝཱསེནེཝ པརིཝསིཏབྦཾ.

ཡཱ ཨེཀཱ ཝཱ…པེ… སབྦཙིརཔྤཊིཙྪནྣཱཡོཏི ཡཱ ཨེཀཱ ཝཱ ཨཱཔཏྟི སབྦཙིརཔྤཊིཙྪནྣཱ, ཡཱ དྭེ ཝཱ ཏིསྶོ ཝཱ སམྦཧུལཱ ཝཱ ཨཱཔཏྟིཡོ སབྦཙིརཔྤཊིཙྪནྣཱཡོཏི ཨཏྠོ. ཏཱསནྟི སབྦཙིརཔྤཊིཙྪནྣཱནཾ ཨཱཔཏྟཱིནཾ. དཱནཝིདྷི པནསྶ ཁནྡྷཀེ ཝུཏྟནཡེནེཝ ཝེདིཏབྦོ.

ཡསྶ པན སཏཾ ཨཱཔཏྟིཡོ དསཱཧཔཊིཙྪནྣཱ, ཨཔརམྤི སཏཾ ཨཱཔཏྟིཡོ དསཱཧཔཊིཙྪནྣཱ, ཨཔརམྤི སཏཾ ཨཱཔཏྟིཡོ དསཱཧཔཊིཙྪནྣཱཏི ཨེཝཾ དསཀྑཏྟུཾ ཀཏྭཱ ཨཱཔཏྟིསཧསྶཾ དིཝསསཏཔཊིཙྪནྣཾ ཧོཏི, ཏེན ཀིཾ ཀཱཏབྦནྟི? སབྦཾ སམོདཧིཏྭཱ དས དིཝསེ པརིཝསིཏབྦཾ. ཨེཝཾ ཨེཀེནེཝ དསཱཧེན དིཝསསཏམྤི པརིཝསིཏམེཝ ཧོཏི. ཝུཏྟམྤི ཙེཏཾ –

‘‘དསསཏཾ རཏྟིསཏཾ, ཨཱཔཏྟིཡོ ཚཱདཡིཏྭཱན;

དས རཏྟིཡོ ཝསིཏྭཱན, མུཙྩེཡྻ པཱརིཝཱསིཀོ’’ཏི. (པརི. ༤༧༧);

ཨཡཾ ཨགྒྷསམོདྷཱནོ ནཱམ.

ཨིདཱནི ¶ མིསྶཀསམོདྷཱནཾ ནིདྡིསིཏུཾ ‘‘མིསྶཀསམོདྷཱནོ ནཱམཱ’’ཏིཨཱདིམཱཧ. ཏཏྲཱཡཾ ནཡོ –

‘‘ཨཧཾ, བྷནྟེ, སམྦཧུལཱ སངྒྷཱདིསེསཱ ཨཱཔཏྟིཡོ ཨཱཔཛྫིཾ ཨེཀཾ སུཀྐཝིསྶཊྛིཾ, ཨེཀཾ ཀཱཡསཾསགྒཾ, ཨེཀཾ དུཊྛུལླཝཱཙཾ, ཨེཀཾ ཨཏྟཀཱམཾ, ཨེཀཾ སཉྩརིཏྟཾ, ཨེཀཾ ཀུཊིཀཱརཀཾ, ཨེཀཾ ཝིཧཱརཀཱརཀཾ, ཨེཀཾ དུཊྛདོསཾ, ཨེཀཾ ཨཉྙབྷཱགིཡཾ, ཨེཀཾ སངྒྷབྷེདཾ, ཨེཀཾ བྷེདཱནུཝཏྟཀཾ, ཨེཀཾ དུབྦཙཾ, ཨེཀཾ ཀུལདཱུསཀཾ, སོཧཾ, བྷནྟེ, སངྒྷཾ ཏཱསཾ ཨཱཔཏྟཱིནཾ སམོདྷཱནཔརིཝཱསཾ ཡཱཙཱམཱི’’ཏི –

ཏིཀྑཏྟུཾ ¶ ཡཱཙཱཔེཏྭཱ ཏདནུརཱུཔཱཡ ཀམྨཝཱཙཱཡ པརིཝཱསོ དཱཏབྦོ. ཨེཏྠ ཙ ‘‘སངྒྷཱདིསེསཱ ཨཱཔཏྟིཡོ ཨཱཔཛྫིཾ ནཱནཱཝཏྠུཀཱཡོ’’ཏིཔི ‘‘སངྒྷཱདིསེསཱ ཨཱཔཏྟིཡོ ཨཱཔཛྫི’’ནྟིཔི ཨེཝཾ པུབྦེ ཝུཏྟནཡེན ཝཏྠུཝསེནཔི གོཏྟཝསེནཔི ནཱམཝསེནཔི ཨཱཔཏྟིཝསེནཔི ཡོཛེཏྭཱ ཀམྨཝཱཙཾ ཀཱཏུཾ ཝཊྛཏིཡེཝཱཏི. ཨཡཾ མིསྶཀསམོདྷཱནོ. སབྦཔརིཝཱསཀམྨཝཱཙཱཝསཱནེ པན ནིཀྑིཏྟཱནིཀྑིཏྟཝཏྟཱདིཀཐཱ པུརིམནཡེནེཝ ཝེདིཏབྦཱ. ཏིཝིདྷེཔི སམོདྷཱནཔརིཝཱསེ ཨཏྠམཏྟསྶེཝ ཝུཏྟཏྟཱ, ཝིནིཙྪཡཱདཱིནཾ ཝཱ ཨནཱམཊྛཏྟཱ ‘‘ཨཡཾ ཏིཝིདྷེཔི སམོདྷཱནཔརིཝཱསེ སངྑེཔཀཐཱ’’ཏི ཝུཏྟཾ. མཧཱཝིསཡཏྟཱ སམོདྷཱནཝིཙཱརཎཱཡ སཱ ནིརཝསེསཱ ཀུཏོ ལདྡྷབྦཱཏི ཨཱཧ ‘‘ཝིཏྠཱརོ’’ཏིཨཱདི.

ཚཱརཏྟནྟི རཱ སདྡོ ཏཱིཡཏི ཚིཛྫཏི ཨེཏྠཱཏི རཏྟི, སཏྟཱནཾ སདྡསྶ ཝཱུཔསམནཀཱལོཏི ཨཏྠོ, ཚ རཏྟིཡོ སམཱཧཊཱ, ཚནྣཾ རཏྟཱིནཾ ཝཱ སམཱཧཱརོ ཚརཏྟཾ, ཚརཏྟམེཝ ཚཱརཏྟཾ, ཨཝཡཝབྱཏིརེཀེན སམུདཱཡསྶཱབྷཱཝཏོ ཚ རཏྟིཡོཏི ཨཏྠོ ཝུཏྟོ.

པརིཝཱསཾ ཨདཏྭཱ མཱནཏྟམེཝ དཱཏབྦནྟི ཡསྨཱ ཨཱཔཏྟི ཨཔྤཊིཙྪནྣཱ, ཡསྨཱ ཙ ཨཱཔནྣབྷཱཝེནེཝ མཱནཏྟཱརཧོ ཧོཏི, ཏསྨཱ པརིཝཱསཾ ཨདཏྭཱ ཀེཝལཾ མཱནཏྟམེཝ དཱཏབྦཾ. ཡཾ པཊིཙྪནྣཱཡ ཨཱཔཏྟིཡཱ པརིཝུཏྠཔརིཝཱསསྶ དཱིཡཏི, ཨིདཾ པཊིཙྪནྣམཱནཏྟཾ ནཱམཱཏི ཨཱཧ ‘‘ཡསྶ པཊིཙྪནྣཱ ཧོཏཱི’’ཏིཨཱདི. ཨིདནྟི པཊིཙྪནྣམཱནཏྟཾ. ཨིདྷཱཏི ཨིམསྨིཾ ཝཱཀྱེ. ཀཐཾ པན ཏེསཾ དྭིནྣཾ མཱནཏྟཱནཾ དཱནཝིདྷི ཙ ཝིནིཙྪཡཀཐཱ ཙ ཝེདིཏབྦཱཏི ཨཱཧ ‘‘ཨུབྷིནྣམྤི པནཱ’’ཏིཨཱདི.

ཨཡནྟི ཝཀྑམཱནཾ སནྡྷཱཡཱཧ. པརིཝཱསེ ཝུཏྟཔྤཀཱརཾ པདེསནྟི པརིཀྑིཏྟསྶ ཝིཧཱརསྶ པརིཀྑེཔཏོ ¶ , ཨཔརིཀྑིཏྟསྶ པརིཀྑེཔཱརཧཊྛཱནཏོ དྭེ ལེཌྜུཔཱཏེ ཨཏིཀྐམིཏྭཱ མཧཱམགྒཏོ ཨོཀྐམྨ གུམྦེན ཝཱ ཝཏིཡཱ ཝཱ པཊིཙྪནྣཊྛཱནཾ. སམཱདིཡིཏྭཱཏི ཨནྟོཨརུཎེཡེཝ སམཱདིཡིཏྭཱ. ཨཱརོཙེཏྭཱཏི –

‘‘ཨཧཾ, བྷནྟེ, ཨེཀཾ ཨཱཔཏྟིཾ ཨཱཔཛྫིཾ སཉྩེཏནིཀཾ སུཀྐཝིསྶཊྛིཾ ཨཔྤཊིཙྪནྣཾ, སོཧཾ, བྷནྟེ, སངྒྷཾ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ ཨཔྤཊིཙྪནྣཱཡ ཚཱརཏྟཾ མཱནཏྟཾ ཡཱཙིཾ ¶ , ཏསྶ མེ སངྒྷོ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ ཨཔྤཊིཙྪནྣཱཡ ཚཱརཏྟཾ མཱནཏྟཾ ཨདཱསི, སོཧཾ མཱནཏྟཾ ཙརཱམི, ཝེདཡཱམཧཾ, བྷནྟེ, ཝེདཡཏཱི’ཏི མཾ སངྒྷོ དྷཱརེཏཱུ’’ཏིཨཱདིནཱ (ཙཱུལ༹ཝ. ཨཊྛ. ༩༧) –

ཨཱཔཏྟིདིཝསཱནུརཱུཔཾ ཨཱརོཙེཏྭཱ. ཨིམཉྩ པན ཨཏྠཾ གཧེཏྭཱ (ཙཱུལ༹ཝ. ཨཊྛ. ༩༧) ཡཱཡ ཀཱཡཙི བྷཱསཱཡ ཨཱརོཙེཏུཾ ཝཊྚཏིཡེཝ. ཨཱརོཙིཏཀཱལཏོ པཊྛཱཡ ཙ ཨེཀཾ བྷིཀྑུཾ ཋཔེཏྭཱ སེསེཧི སཏི ཀརཎཱིཡེ གནྟུམྤི ཝཊྚཏི. ཨརུཎེ ཨུཊྛིཏེ ཏསྶ བྷིཀྑུསྶ སནྟིཀེ ཝཏྟཾ ནིཀྑིཔིཏབྦཾ. སཙེ སོཔི ཀེནཙི ཀམྨེན པུརེ ཨརུཎེཡེཝ གཙྪཏི, ཨཉྙཾ ཝིཧཱརཏོ ནིཀྑནྟཾ ཝཱ ཨཱགནྟུཀཾ ཝཱ ཡཾ པཋམཾ པསྶཏི, ཏསྶ སནྟིཀེ ཨཱརོཙེཏྭཱ ནིཀྑིཔིཏབྦཾ. ཨཡཉྩ ཡསྨཱ གཎསྶ ཨཱརོཙེཏྭཱ, བྷིཀྑཱུནཉྩ ཨཏྠིབྷཱཝཾ སལླཀྑེཏྭཱཝ ཝསི, ཏེནསྶ ཨཱུནེ གཎེ ཙརཎདོསོ ཝཱ ཝིཔྤཝཱསོ ཝཱ ན ཧོཏི. སཙེ པན ཀཉྩི ན པསྶཏི, ཝིཧཱརཾ གནྟྭཱ ཡཾ པཋམཾ པསྶཏི, ཏསྶ ཨཱརོཙེཏྭཱ ནིཀྑིཔིཏབྦཾ. ཏེནཱཧ ‘‘ཏཏོ ཏེསུ གཏེསུ ཝཱ ཨགཏེསུ ཝཱ པུརིམནཡེན པཊིཔཛྫིཏབྦ’’ནྟི.

ཡཏྠ སིཡཱཏི ཡསྶཾ སམཱནསཾཝཱསཀསཱིམཱཡཾ ཝཱིསཏིགཎོ བྷིཀྑུསངྒྷོ ཨཏྠི. ཨཝ྄ཧཱཏབྦོཏི ཨབྦྷཱནཀམྨཝསེན པཀྐོསིཏབྦོ. ཨབྦྷཱནཀམྨཾ པན ཀཐནྟི ཨཱཧ ‘‘ཨབྦྷཱནཀམྨཾ པནཱ’’ཏིཨཱདི. པཱལི༹ཝསེནཱཏི ‘‘སུཎཱཏུ མེ, བྷནྟེ, སངྒྷོ’’ཏིཨཱདིནཱ (ཙཱུལ༹ཝ. ༡༠༡) པཱལི༹ཝསེན. ཝིནིཙྪཡཝསེནཱཏི ‘‘ཨབྦྷནྟེཧི ཙ པཋམཾ ཨབྦྷཱནཱརཧོ ཀཱཏབྦོ. ཨཡཉྷི ནིཀྑིཏྟཝཏྟཏྟཱ པཀཏཏྟཊྛཱནེ ཋིཏོ, པཀཏཏྟསྶ ཙ ཨབྦྷཱནཾ ཀཱཏུཾ ན ཝཊྚཏི, ཏསྨཱ ཝཏྟཾ སམཱདཔེཏབྦོ. ཝཏྟེ སམཱདིནྣེ ཨབྦྷཱནཱརཧོ ཧོཏི. ཏེནཱཔི ཝཏྟཾ སམཱདིཡིཏྭཱ ཨཱརོཙེཏྭཱ ཨབྦྷཱནཾ ཡཱཙིཏབྦཾ. ཨནིཀྑིཏྟཝཏྟསྶ པན ཝཏྟསམཱནཀིཙྩཾ ནཏྠི. སོ ཧི ཚཱརཏྟཱཏིཀྐམེནེཝ ཨབྦྷཱནཱརཧོ ཧོཏཱི’’ཏིཨཱདིནཱ (ཙཱུལ༹ཝ. ཨཊྛ. ༩༧) ཝིནིཙྪཡཝསེན. ཏཾ པནེཏཾ སབྦཾ པརིཝཱསཱདིཀམྨཾ པཱལི༹ཝསེན (ཙཱུལ༹ཝ. ༧༥) ཙ ཨཊྛཀཐཱཝསེན (ཙཱུལ༹ཝ. ཨཊྛ. ༧༥, ༩༧) ཙ ¶ སུཝིཉྙེཡྻཏྟཱ ཨཏིཝིཏྠཱརབྷཡེན ན ཝིཏྠཱརཡིམྷ, ཨཏྠིཀེཧི པན ཏཏོཝ གཧེཏབྦཾ. ཨིམསྶ ¶ པན ཀམྨསྶ ཝཱིསཏིཝགྒཀརཎཱིཡཏྟཱ ཏཏོ ཨཱུནཏརེན ཀཏཾ ཀུཔྤཏི. ཏེནཱཧ ‘‘ཨེཀེནཱཔི ཙེ…པེ… ཨནབྦྷིཏོ’’ཏི. ཨཡནྟི ཨཡཾ ཡཐཱཝུཏྟཱ. སཱམཱིཙཱིཏི ཝཏྟཾ.

ཨིཏི ཀངྑཱཝིཏརཎིཡཱ པཱཏིམོཀྑཝཎྞནཱཡ

ཝིནཡཏྠམཉྫཱུསཱཡཾ ལཱིནཏྠཔྤཀཱསནིཡཾ

སངྒྷཱདིསེསཝཎྞནཱ ནིཊྛིཏཱ.

ཨནིཡཏཀཎྜཾ

༡. པཋམཨནིཡཏསིཀྑཱཔདཝཎྞནཱ

‘‘མཱཏུགཱམེནཱ’’ཏི ¶ ¶ ཝཏྭཱ པུན ‘‘ཨེཀཱཡཱ’’ཏི ཝུཏྟཏྟཱ ‘‘མཱཏུགཱམསངྑཱཏཱཡ ཨེཀཱཡ ཨིཏྠིཡཱ’’ཏི ཝུཏྟཾ. རཧོཏི ཨཔྤཀཱསཾ. ཨཔྤཀཱསཏཱ ཙ ཡོ ཨནཱཔཏྟིཾ ཀརོཏི, ཏསྶ ཨཔཙྩཀྑབྷཱཝཏོཏི ཨཱཧ ‘‘ཙཀྑུསྶ རཧོ’’ཏི. ནནུ ‘‘རཧོ ནཱམ ཙཀྑུསྶ རཧོ, སོཏསྶ རཧོ. ཙཀྑུསྶ རཧོ ནཱམ ན སཀྐཱ ཧོཏི ཨཀྑིཾ ཝཱ ནིཁཎིཡམཱནེ, བྷམུཀཾ ཝཱ ཨུཀྑིཔིཡམཱནེ, སཱིསཾ ཝཱ ཨུཀྑིཔིཡམཱནེ པསྶིཏུཾ. སོཏསྶ རཧོ ནཱམ ན སཀྐཱ ཧོཏི པཀཏིཀཐཱ སོཏུ’’ནྟི པདབྷཱཛནཔཱལི༹ཡཾ སོཏསྶ རཧོཏི ཨཱགཏཾ, ཨཐ ཀསྨཱ ཏཾ ཨཝཏྭཱ ‘‘ཙཀྑུསྶ རཧོ’’ཏི ཨེཏྟཀམེཝ ཝུཏྟནྟི ཨཱཧ ‘‘ཀིཉྩཱཔཱི’’ཏིཨཱདི. ཨིམིནཱ པཱལི༹ཡཾ ‘‘སོཏསྶ རཧོ’’ཏི ཨིདཾ ཨཏྠུདྡྷཱརཝསེན ཝུཏྟནྟི དསྶེཏི. ཨཐ ཀཐམེཏཾ ཝིཉྙཱཡཏི ‘‘ཙཀྑུསྶེཝ རཧོ ཨིདྷ ཨདྷིཔྤེཏོ’’ཏི? ‘‘པཊིཙྪནྣེ ཨཱསནེ’’ཏི ཝཙནཏོ ‘‘སཀྐཱ ཧོཏི མེཐུནཾ དྷམྨཾ པཊིསེཝིཏུ’’ནྟི (པཱརཱ. ༤༤༥) ཙ ཝུཏྟཏྟཱ. ཏེནེཝཱཧ ‘‘སཙེཔཱི’’ཏིཨཱདི. ‘‘པིཧིཏཀཝཱཊསྶཱ’’ཏི (སཱརཏྠ. ཊཱི. ༢.༤༤༤-༤༤༥) ཨིམིནཱ པཊིཙྪནྣབྷཱཝཏོ ཙཀྑུསྶ རཧོསབྦྷཱཝཾ དསྶེཏི. ཨཔིཧིཏཀཝཱཊསྶ (པཱརཱ. ཨཊྛ. ༢.༤༤༤-༤༤༥) པན དྭཱརེ ནིསིནྣོ ཨནཱཔཏྟིཾ ཀརོཏི, ན ཀེཝལཾ ཨཔིཧིཏཀཝཱཊསྶ གབྦྷསྶ དྭཱརེ ནིསིནྣོཝ ཨནཱཔཏྟིཾ ཀརོཏི, ཨནྟོདྭཱདསཧཏྠེ ཨོཀཱསེ ནིསིནྣོཔཱིཏི ཝེདིཏབྦོ. ཏེནཱཧ ‘‘ཡཏྠ པན སཀྐཱ དཊྛུ’’ནྟིཨཱདི. ཡསྨཱ ནིསཱིདིཏྭཱ ནིདྡཱཡནྟོ ཀཔིམིདྡྷཔརེཏོ ཀཉྩི ཀཱལཾ ཙཀྑཱུནི ཨུམྨཱིལེཏི, ཀཉྩི ཀཱལཾ ནིམཱིལེཏི, ན ཙ མཧཱནིདྡཾ ཨོཀྐམཏི, ཏསྨཱ ‘‘ནིདྡཱཡནྟོཔི ཨནཱཔཏྟིཾ ཀརོཏཱི’’ཏི ཝུཏྟཾ. ནིཔཛྫིཏྭཱ ནིདྡཱཡནྟོ པན ཏཱདིསོ ན ཧོཏཱིཏི ཨཱཧ ‘‘ནིཔཛྫིཏྭཱ ནིདྡཱཡནྟོཔི ན ཀརོཏཱི’’ཏི, ཨནཱཔཏྟིཾ ན ཀརོཏཱིཏི ཨཏྠོ. མེཐུནསྶ མཱཏུགཱམོ དུཏིཡོ ན ཧོཏི. ཨིཏྠིཡོ ཧི ཨཉྙམཉྙིསྶཱ ཝཛྫཾ པཊིཙྪཱདེནྟི. ཏེནེཝ ཝེསཱལིཡཾ (པཱརཱ. ༧༦-༧༧) མཧཱཝནེ དྭཱརཾ ཝིཝརིཏྭཱ ནིཔནྣེ བྷིཀྑུམྷི སམྦཧུལཱ ཨིཏྠིཡོ ཡཱཝདཏྠཾ ¶ ཀཏྭཱ པཀྐམིཾསུ. ཏེནཱཧ ‘‘ཨིཏྠཱིནཾ པན སཏམྤི ན ཀརོཏཱི’’ཏི. ཏཾ ཀམྨནྟི ཨཛ྄ཛྷཱཙཱརཀམྨཾ. ཡསྨཱ ནིསཱིདིཏྭཱཝ ནིཔཛྫཏི, ཏསྨཱ ¶ ནིཔཛྫནམྤི ཨནྟོཀཏྭཱ ‘‘ནིསཛྫཾ ཀཔྤེཡྻཱ’’ཏི ཝུཏྟནྟི དསྶེཏུཾ ‘‘ཨེཏྠ ཙཱ’’ཏིཨཱདིམཱཧ. ཏིཎྞཾ དྷམྨཱནཾ ཨཉྙཏརེན ཀཱརེཏབྦོཏི ནིསཛྫཾ པཊིཛཱནམཱནསྶ ཏིཎྞཾ དྷམྨཱནཾ ཨཉྙཏརསམཱཡོགོ ཧོཏིཡེཝཱཏི ཝུཏྟཾ. པཱརཱཛིཀེན, པན སངྒྷཱདིསེསེན ཙ པཱཙིཏྟིཡེན ཙ ཏེནཱཀཱརེན ནིསཛྫཾ པཊིཛཱནམཱནོཝ ཀཱརེཏབྦོ. ན ཨཔྤཊིཛཱནམཱནོཏི ནིསཛྫཾ ཨཔྤཊིཛཱནམཱནོ ཏིཎྞཾ དྷམྨཱནཾ ཨཉྙཏརེན ན ཀཱརེཏབྦོཏི. ཨལཛྫཱིཔི ཧི པཊིཛཱནམཱནོཝ ཨཱཔཏྟིཡཱ ཀཱརེཏབྦོ. ཡཱཝ ན པཊིཛཱནཱཏི, ཏཱཝ ‘‘ནེཝ སུདྡྷོ’’ཏི ཝཱ ‘‘ན ཨསུདྡྷོ’’ཏི ཝཱ ཝཏྟབྦོ, ཝཏྟཱནུསནྡྷིནཱ པན ཀཱརེཏབྦོཏི. ཝུཏྟཉྷེཏཾ –

‘‘པཊིཉྙཱ ལཛྫཱིསུ ཀཏཱ, ཨལཛྫཱིསུ ཨེཝཾ ན ཝིཛྫཏི;

བཧུམྤི ཨལཛྫཱི བྷཱསེཡྻ, ཝཏྟཱནུསནྡྷིཏེན ཀཱརཡེ’’ཏི. (པརི. ༣༥༩);

ན ཀེཝལཾ ཏིཎྞཾ དྷམྨཱནཾ ཨཉྙཏརེན ཙོདནཱཡམེཝ ཨེཝཾ པཊིཉྙཱཡ ཀཱརེཏབྦོ, ཨཐ ཁོ ནིསཛྫཱདིནཱ ཨཱཀཱརེན སདྡྷིཾ ཙོདནཱཡཔཱིཏི དསྶེཏུཾ ‘‘ཡེན ཝཱ སཱ སདྡྷེཡྻཝཙསཱ ཨུཔཱསིཀཱ ཝདེཡྻ, ཏེན སོ བྷིཀྑུ ཀཱརེཏབྦོ’’ཏི ཝུཏྟཾ. ཏེནེཝཱཧ ‘‘ནིསཛྫཱདཱིསུ ཨཱཀཱརེསཱུ’’ཏིཨཱདི. ཨེཏྠ ཙ ‘‘པཊིཛཱནམཱནོ’’ཏི ཨཝུཏྟེཔི ཨདྷིཀཱརཏྟཱ ‘‘པཊིཛཱནམཱནོཝ ཏེན སོ བྷིཀྑུ ཀཱརེཏབྦོ’’ཏི ཝུཏྟཾ. ཏཐཱརཱུཔཱཡ (སཱརཏྠ. ཊཱི. ༢.༤༤༤-༤༤༥) ཨུཔཱསིཀཱཡ ཝཙནེ ཨཉྙཐཏྟཱབྷཱཝཏོ དིཊྛཾ ནཱམ ཏཐཱཔི ཧོཏི, ཨཉྙཐཱཔི ཧོཏཱིཏི དསྶནེ ཨཉྙཐཏྟསམྦྷཝཾ དསྶེཏི. ཨནེཀཾསིཀཏཱཡ ན ནིཡཏོཏི ཨནིཡཏོ. ཏེནཱཧ ‘‘ཏིཎྞཾ ཨཱཔཏྟཱིན’’ནྟིཨཱདི.

རཧོནིསཛྫསྶཱདེན མཱཏུགཱམསྶ སནྟིཀཾ གནྟུཀཱམོ ཨཀྑིཾ ཨཉྫེཏི, དུཀྐཊཾ. ནིཝཱསནཾ ནིཝཱསེཏི, ཀཱཡབནྡྷནཾ བནྡྷཏི, ཙཱིཝརཾ པཱརུཔཏི, སབྦཏྠ པཡོགེ པཡོགེ དུཀྐཊཾ. གཙྪཏི, པདཝཱརེ པདཝཱརེ དུཀྐཊཾ. གནྟྭཱན ནིསཱིདཏི, དུཀྐཊམེཝ. ཏེནཱཧ ‘‘མེཐུནདྷམྨསནྣིསྶིཏཀིལེསསངྑཱཏེནཱ’’ཏིཨཱདི. ཨེཏྠ ཙ རཧོནིསཛྫསྶཱདསྶ ཨསཏིཔི མེཐུནརཱགབྷཱཝེ ཏཔྤཊིབདྡྷཀིལེསཏྟཱ ཝུཏྟཾ ‘‘མེཐུནདྷམྨསནྣིསྶིཏཀིལེསསངྑཱཏེནཱ’’ཏི. ཏེནེཝ སནྣིསྶིཏགྒཧཎཾ ཀཏཾ. རཧསྶཱདེནཱཏི ‘‘ཨིཏྠནྣཱམཱཡ སདྡྷིཾ རཧོ ནིསཱིདིཏྭཱ ཧསིཏལཔིཏཱདིཀཾ ཀརེཡྻ’’ནྟི ཨུཔྤནྣཨསྶཱདཧེཏུ ¶ . ནིསཛྫཱཡ པཱཙིཏྟིཡཾ ཨསཏི ཨུཔཙཱརགཏེ ནིཔཛྫིཏྭཱ ཨནིདྡཱཡནྟེ ཨནནྡྷེ ཝིཉྙུཔུརིསེཏི ཨདྷིཔྤཱཡོ. སཙེ སཱ ཨིཏྠཱི ཀེནཙི ཀརཎཱིཡེན ཨུཊྛཱཡུཊྛཱཡ པུནཔྤུནཾ ¶ ནིསཱིདཏི, ནིསཛྫཱཡ ནིསཛྫཱཡ པཱཙིཏྟིཡཾ. ཡཾ སནྡྷཱཡ གཏོ, སཱ ན དིཊྛཱ, ཨཉྙཱ ཨཱགནྟྭཱ ནིསཱིདཏི, ཨསྶཱདེ ཨུཔྤནྣེ པཱཙིཏྟིཡཾ. སཙེ སམྦཧུལཱ ཨཱགཙྪནྟི, མཱཏུགཱམགཎནཱཡ པཱཙིཏྟིཡཾ. སཙེ ཨུཊྛཱཡུཊྛཱཡ པུནཔྤུནཾ ནིསཱིདནྟི, ནིསཛྫཱགཎནཱཡཔི པཱཙིཏྟིཡཱནི. ཨནིཡམེཏྭཱ ‘‘དིཊྛདིཊྛཱཡ སདྡྷིཾ རཧསྶཱདཾ ཀཔྤིསྶཱམཱི’’ཏི གནྟྭཱ ནིསིནྣསྶཱཔི ཨཱགཏཱགཏཱནཾ ཝསེན, པུནཔྤུནཾ ནིསཛྫཱཡ ཝསེན ཙ ཝུཏྟནཡེནེཝ ཨཱཔཏྟིཡོ ཝེདིཏབྦཱ. ཝུཏྟཔྤཀཱརེ པུརིསེཏི ཨནནྡྷེ ཝིཉྙུཔུརིསེ. ཨུཔཙཱརགཏེ སཏཱིཏི དྭཱདསཧཏྠབྦྷནྟརགཏེ སཏི. སཙེ སུདྡྷཙིཏྟེན གནྟྭཱ ནིསིནྣསྶ སནྟིཀཾ ཨཱགནྟྭཱ ནིསིནྣཱཡ ཨིཏྠིཡཱ རཧསྶཱདོ ཨུཔྤཛྫཏི, ཨེཝམྤི ཨནཱཔཏྟི.

པཋམཨནིཡཏསིཀྑཱཔདཝཎྞནཱ ནིཊྛིཏཱ.

༢. དུཏིཡཨནིཡཏསིཀྑཱཔདཝཎྞནཱ

ནཧེཝ ཁོ པན པཊིཙྪནྣནྟི ཨེཏྠ པན ཡམྤི བཧི པརིཀྑིཏྟཾ ཨནྟོ ཝིཝཊཾ པརིཝེཎངྒཎཱདི, ཏམྤི ཨནྟོགདྷནྟི ཝེདིཏབྦཾ. ‘‘ཨེཝརཱུཔཉྷི ཋཱནཾ ཨཔྤཊིཙྪནྣེཡེཝ གཧིཏ’’ནྟི མཧཱཔཙྩརིཡཾ (པཱརཱ. ཨཊྛ. ༢.༤༥༣) ཝུཏྟཾ. སངྒྷཱདིསེསེན ཝཱཏི ཀཱཡསཾསགྒདུཊྛུལློབྷཱསནསངྑཱཏེན སངྒྷཱདིསེསེན ཝཱ. ཏེནེཝ ཧི པདབྷཱཛནེ ‘‘སཱ ཙེ ཨེཝཾ ཝདེཡྻ ‘ཨཡྻོ, མཡཱ དིཊྛོ ནིསིནྣོ མཱཏུགཱམེན སདྡྷིཾ ཀཱཡསཾསགྒཾ སམཱཔཛྫནྟོ’’’ཏིཨཱདི (པཱརཱ. ༤༥༥) ཝུཏྟཾ. ཨིདཾ སིཀྑཱཔདཾ དུཊྛུལླཝཱཙཱཝསེན ཨཱགཏཾ. དུཊྛུལླཝཱཙཉྩ སུཏྭཱ ཏཾ མཱཏུགཱམོཔི ན པཊིཙྪཱདེཏི. ཏཐཱ ཧི དུཊྛུལླཝཱཙཱསིཀྑཱཔདེ (པཱརཱ. ༢༨༣ ཨཱདཡོ) ཡཱ པན ཏཱ ཨིཏྠིཡོ ཧིརིམནཱ, ཏཱ ནིཀྑམིཏྭཱ བྷིཀྑཱུ ཨུཛ྄ཛྷཱཔེསུཾ, ཏསྨཱ ཨིདྷ ཨིཏྠཱིཔི ཨནཱཔཏྟིཾ ཀརོཏཱིཏི ཨཱཧ ‘‘ཨིཏྠཱིཔཱི’’ཏི. ཨཐ ཝཱ ཨིདྷ ཨཔྤཊིཙྪནྣཏྟཱ ཨིཏྠཱིཔི ཨནཱཔཏྟིཾ ཀརོཏི, པཋམེ པན པཊིཙྪནྣཏྟཱ ཨིཏྠིསཏམྤི ཨནཱཔཏྟིཾ ན ཀརོཏཱིཏི ཨེཝམེཏྠ ཨཏྠོ དཊྛབྦོ. ཨནནྡྷོ ཨབདྷིརོཏི ཨེཏྠ ཀཱཡསཾསགྒཝསེན ཨནནྡྷོ ཝུཏྟོ, དུཊྛུལླཝཱཙཱཝསེན ཨབདྷིརོ.

སམུཊྛཱནཱདཱིསུ ¶ ཨིདཾ སིཀྑཱཔདཾ ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, སུཁམཛ྄ཛྷཏྟཝེདནཱཧི དྭིཝེདནཾ. ཏེནཱཧ ‘‘སམུཊྛཱནཱདཱིནི པནེཏྠ ཨདིནྣཱདཱནསདིསཱནེཝཱ’’ཏི. ཨེཏྠ ཙ ཀཱཡསཾསགྒཾ སམཱཔཛྫནྟོ དུཊྛུལླམྤི བྷཎཏི, དུཊྛུལླཾ བྷཎནྟོ ¶ ནིསཱིདཏི ཙཱཏི ‘‘ཀཱཡཝཱཙཱཙིཏྟཏོ ཙ སམུཊྛཱཏཱི’’ཏི ཝུཏྟཾ, དུཊྛུལླམེཝ ཝཱ སནྡྷཱཡ ཝུཏྟནྟི གཧེཏབྦཾ.

དུཏིཡཨནིཡཏསིཀྑཱཔདཝཎྞནཱ ནིཊྛིཏཱ.

‘‘ཨནིཡཏུདྡེསོ ཙཱཡཾ དིཊྛཱདིསམཱུལཀཙོདནཱཡ ཝཏྠུཾ པཊིཛཱནམཱནོཝ ཨཱཔཏྟིཡཱ ཀཱརེཏབྦོ, ན ཨིཏརོཏི ཨཱཔཏྟིརོཔནཱརོཔནལཀྑཎདསྶནཏྠཾ ཝུཏྟོ’’ཏི ཝདནྟི.

ཨིཏི ཀངྑཱཝིཏརཎིཡཱ པཱཏིམོཀྑཝཎྞནཱཡ

ཝིནཡཏྠམཉྫཱུསཱཡཾ ལཱིནཏྠཔྤཀཱསནིཡཾ

ཨནིཡཏཝཎྞནཱ ནིཊྛིཏཱ.

ནིསྶགྒིཡཀཎྜཾ

༡. ཙཱིཝརཝགྒོ

༡. ཀཐིནསིཀྑཱཔདཝཎྞནཱ

ནིཊྛིཏཙཱིཝརསྨིནྟི ¶ (པཱརཱ. ཨཊྛ. ༢.༤༦༢-༤༦༣) ¶ ནིཊྛིཏཉྩ ཏཾ ཙཱིཝརཉྩཱཏི ནིཊྛིཏཙཱིཝརཾ, ནིཊྛིཏེ ཨཱནིསཾསམཱུལཀེ ཙཱིཝརེ, པཙྩཱསཱཙཱིཝརེ ཙཱཏི ཨཏྠོ. ཡསྨཱ པན ཏཾ ཙཱིཝརཾ ཀརཎེནཔི ནིཊྛིཏཾ ཧོཏི ནཱསནཱདཱིཧིཔི, ཏསྨཱ ‘‘སཱུཙིཀམྨཔརིཡོསཱནེན ཝཱ’’ཏིཨཱདི ཝུཏྟཾ. ཏཏྠ ཡཾ ཀིཉྩི སཱུཙིཡཱ ཀཏྟབྦཾ པཱསཀཔཊྚགཎྛིཀཔཊྚཔརིཡོསཱནཀམྨཾ, ཏཾ སཱུཙིཀམྨཔརིཡོསཱནཾ ནཱམ, ཏེན. ནཊྛནྟི ཙོརཱདཱིཧི ཧཊཾ. ཨེཏམྤི ཧི ཀརཎཔལིབོདྷསྶ ནིཊྛིཏཏྟཱ ‘‘ནིཊྛིཏ’’ནྟི ཝུཙྩཏི. ཝིནཊྛནྟི ཨུཔཙིཀཱདཱིཧི ཁཱདིཏཾ. དཌྜྷནྟི ཨགྒིནཱ དཌྜྷཾ. ཙཱིཝརཱསཱ ཝཱ ཨུཔཙྪིནྣཱཏི ‘‘ཨསུཀསྨིཾ ནཱམ ཀུལེ ཙཱིཝརཾ ལབྷིསྶཱམཱི’’ཏི ཡཱ ཙཱིཝརཱསཱ ཨུཔྤནྣཱ ཧོཏི, སཱ ཨུཔཙྪིནྣཱ. ཨེཏེསམྤི ཀརཎཔལིབོདྷསྶེཝ ནིཊྛིཏཏྟཱ ནིཊྛིཏབྷཱཝོ ཝེདིཏབྦོ. ཏེནཱཧ ‘‘ཨིམེསུ ཝཱ’’ཏིཨཱདི. ཨེཏེན ཙཱིཝརཔལིབོདྷཱབྷཱཝོ ཝུཏྟོ. ཏེནཱཧ ‘‘ཙཱིཝརསྶ ཀརཎཔལིབོདྷེ ཨུཔཙྪིནྣེཏི ཨཏྠོ’’ཏི. ཀཐམེཏཾ ཝིཉྙཱཡཏཱིཏི ཨཱཧ ‘‘ཨཏྠཏཀཐིནསྶ ཧཱི’’ཏིཨཱདི. པཉྩཱནིསཾསེ ཨཉྙཏྠ གནྟུཾ ཨདཏྭཱ སངྒཎྷནཊྛེན ཀཐིནཾ, ཐིརནྟི ཨཏྠོ, ཨཏྠཏཾ ཀཐིནཾ ཡེན སོ ཨཏྠཏཀཐིནོ, ཏསྶ ཨཏྠཏཀཐིནསྶ. ཧཱིཏི ཀཱརཎཏྠེ ནིཔཱཏོ. ཏཱཝ ཀཐིནཱནིསཾསཾ ལབྷཏཱིཏི ཨེཏྠ ཡོ ཨཏྠཏཀཐིནོ བྷིཀྑཱུཏི ཨཛ྄ཛྷཱཧརིཏབྦཾ, ཏཱཝ སོ ཨཏྠཏཀཐིནོ བྷིཀྑཱུཏི ཝེདིཏབྦོ, ཨནཱམནྟཙཱརཱདིཀཾ ཀཐིནཱནིསཾསཾ ལབྷཏཱིཏི ཨཏྠོ. ‘‘ཨཏྠཏཀཐིནསྶ བྷིཀྑུནོ’’ཏི ཨིདཾ ཝཱ ‘‘ཨཏྠཏཀཐིནོ བྷིཀྑཱུ’’ཏི ཝིབྷཏྟིཝིཔརིཎཱམཾ ཀཏྭཱ ཡོཛེཏབྦཾ. ཨིདཾ ཝུཏྟཾ ཧོཏི – ཙཱིཝརཔལིབོདྷོ ཨཱཝཱསཔལིབོདྷོཏི དྭེ པལིབོདྷཱ. ཏེསུ ཨེཀཔལིབོདྷེཔི སཏི ཡསྨཱ ཨནཱམནྟཙཱརཱདིཀཾ ཨཱནིསཾསཾ ལབྷཏི, ནཱསཏི. ཀསྨཱ? ‘‘ནིཊྛིཏཙཱིཝརསྨི’’ནྟི ཨེཏསྶ ཙཱིཝརསྶ ཀརཎཔལིབོདྷེ ཨུཔཙྪིནྣེཏི ཨཡམཏྠོ ¶ ཝིཉྙཱཡཏཱིཏི. སངྒྷསྶཱཏི སངྒྷེན. ཀཏྟརི ཙེཏཾ སཱམིཝཙནཾ. ཨུབྦྷཏེཏི ཨཊྛནྣཾ མཱཏིཀཱནམཉྙཏརེན, ཨནྟརུབྦྷཱརེན ཝཱ ཨུདྡྷཊེ.

ཏཏྲཱཏི ¶ ཏསྨིཾ ཀཐིནེ. ཨུབྦྷཱརོ ཨུདྡྷརཎཾ. པུརིམཝསྶཾཝུཊྛེ ཏིཾསམཏྟེ པཱཝེཡྻཀེ བྷིཀྑཱུ ཨུདྡིསྶ ‘‘ཨནུཛཱནཱམི, བྷིཀྑཝེ, ཝསྶཾཝུཊྛཱནཾ བྷིཀྑཱུནཾ ཀཐིནཾ ཨཏྠརིཏུ’’ནྟི ཀཐིནཀྑནྡྷཀེ (མཧཱཝ. ༣༠༦) བྷགཝཏཱ ཀཐིནསྶ ཨནུཉྙཱཏཏྟཱ ‘‘ཨཡཉྷི ཀཐིནཏྠཱརོ ནཱམ…པེ… ཨནུཉྙཱཏོ’’ཏི ཝུཏྟཾ. ཏཏྠ པུརིམཝསྶཾཝུཊྛཱནནྟི ཝསྶཙྪེདཾ ཨཀཏྭཱ པུརིམཝསྶཾཝུཊྛཱནནྟི ཨཏྠོ. ཨེཏེན ཝུཊྛཝསྶཝསེན ཏཱཝ པུརིམིཀཱཡ ཝསྶཾ ཨུཔགཏཱཡེཝ ཀཐིནཏྠཱརཾ ལབྷནྟི, ན པཙྪིམིཀཱཡ ཨུཔགཏཱཏི དསྶེཏི. ཝུཊྛཝསྶཝསེན ཏཱཝ ཨེཝཾ ཧོཏུ, གཎནཝསེན ཏཾ ཀིཏྟཀཱ ལབྷནྟཱིཏི ཨཱཧ ‘‘སོ’’ཏིཨཱདི. སོཏི ཀཐིནཏྠཱརོ. སབྦནྟིམེན པརིཙྪེདེནཱཏི གཎནཝསེན པཙྪིམཀོཊིཡཱ. པཉྩནྣཾ ཛནཱནཾ ཝཊྚཏཱིཏི པཙྪིམཀོཊིཡཱ ཙཏྟཱརོ ཀཐིནདུསྶསྶ དཱཡཀཱ, ཨེཀོ པཊིགྒཱཧཀོཏི པཉྩནྣཾ ཛནཱནཾ ཝཊྚཏི. ཀེཙི པན ‘‘པཉྩཝགྒཀརཎཱིཡཏྟཱ ‘པཉྩནྣཾ ཛནཱནཾ ཝཊྚཏཱི’ཏི ཝུཏྟ’’ནྟི ཝདནྟི, ཏཾ ཏེསཾ མཏིམཏྟཾ ‘‘ཏཏྲ, བྷིཀྑཝེ, ཡྭཱཡཾ ཙཏུཝགྒོ བྷིཀྑུསངྒྷོ ཋཔེཏྭཱ ཏཱིཎི ཀམྨཱནི ཨུཔསམྤདཾ པཝཱརཎཾ ཨབྦྷཱན’’ནྟི ཙམྤེཡྻཀྑནྡྷཀེ (མཧཱཝ. ༣༨༨) ཝུཏྟཏྟཱ. ཏསྨཱཏི ཡསྨཱ ཝུཊྛཝསྶཝསེན པུརིམཝསྶཾཝུཊྛཱནཾ ཨནཉྙཱཏོ, ཡསྨཱ ཙ སབྦནྟིམེན པརིཙྪེདེན པཉྩནྣཾ ཛནཱནཾ ཝཊྚཏི, ཏསྨཱ. ཡཏྠཱཏི ཡསྨིཾ ཝིཧཱརེ. ཨཱནིསཾསེཏི ཨནཱམནྟཙཱརཱདིཀེ ཀཐིནཱནིསཾསེ. ཨཐ པན ཙཏྟཱརོ བྷིཀྑཱུ ཝསྶཾ ཨུཔགཏཱ, ཨེཀོ པརིཔུཎྞཝསྶོ སཱམཎེརོ སཙེ པཙྪིམིཀཱཡ ཨུཔསམྤཛྫཏི, གཎཔཱུརཀོ ཙེཝ ཧོཏི, ཨཱནིསཾསཉྩ ལབྷཏི. ཏཡོ བྷིཀྑཱུ, དྭེ སཱམཎེརཱ, དྭེ བྷིཀྑཱུ, ཏཡོ སཱམཎེརཱ, ཨེཀོ བྷིཀྑུ, ཙཏྟཱརོ སཱམཎེརཱཏི ཨེཏྠཱཔི ཨེསེཝ ནཡོ.

ཁནྡྷཀེ ཝུཏྟཱཡ ཉཏྟིདུཏིཡཀམྨཝཱཙཱཡཱཏི –

‘‘སུཎཱཏུ མེ, བྷནྟེ, སངྒྷོ, ཨིདཾ སངྒྷསྶ ཀཐིནདུསྶཾ ཨུཔྤནྣཾ. ཡདི སངྒྷསྶ པཏྟཀལླཾ, སངྒྷོ ཨིམཾ ཀཐིནདུསྶཾ ཨིཏྠནྣཱམསྶ བྷིཀྑུནོ དདེཡྻ ཀཐིནཾ ཨཏྠརིཏུཾ, ཨེསཱ ཉཏྟི. སུཎཱཏུ མེ, བྷནྟེ, སངྒྷོ, ཨིདཾ སངྒྷསྶ ཀཐིནདུསྶཾ ཨུཔྤནྣཾ, སངྒྷོ ཨིམཾ ཀཐིནདུསྶཾ ཨིཏྠནྣཱམསྶ བྷིཀྑུནོ དེཏི ཀཐིནཾ ཨཏྠརིཏུཾ. ཡསྶཱཡསྨཏོ ཁམཏི ཨིམསྶ ཀཐིནདུསྶསྶ ཨིཏྠནྣཱམསྶ བྷིཀྑུནོ དཱནཾ ཀཐིནཾ ཨཏྠརིཏུཾ, སོ ཏུཎྷསྶ. ཡསྶ ནཀྑམཏི, སོ བྷཱསེཡྻ. དིནྣཾ ཨིདཾ སངྒྷེན ཀཐིནདུསྶཾ ཨིཏྠནྣཱམསྶ ¶ བྷིཀྑུནོ ཀཐིནཾ ཨཏྠརིཏུཾ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི (མཧཱཝ. ༣༠༧) –

ཨེཝཾ ¶ ཀཐིནཀྑནྡྷཀེ ཝུཏྟཱཡ ཉཏྟིདུཏིཡཀམྨཝཱཙཱཡ. ཀཐིནཏྠཱརཱརཧསྶཱཏི ཀཐིནཾ ཨཏྠརིཏུཾ བྷབྦསྶ. སོ ཙ ཁོ པུབྦཀརཎཛཱནནཱདཱིཧི ཨཊྛཧི ཨངྒེཧི སམནྣཱགཏོཏི ཝེདིཏབྦོ. ཝུཏྟཉྷེཏཾ ཝིནཡཝིནིཙྪཡེ ‘‘ཨཊྛདྷམྨཀོཝིདོ བྷིཀྑུ, ཀཐིནཏྠཱརམརཧཏཱི’’ཏི. པརིཝཱརེཔི (པརི. ༤༠༩) ཝུཏྟཾ –

‘‘ཨཊྛཧངྒེཧི སམནྣཱགཏོ པུགྒལོ བྷབྦོ ཀཐིནཾ ཨཏྠརིཏུཾ. ཀཏམེཧི ཨཊྛཧངྒེཧི སམནྣཱགཏོ པུགྒལོ བྷབྦོ ཀཐིནཾ ཨཏྠརིཏུཾ? པུབྦཀརཎཾ ཛཱནཱཏི, པཙྩུདྡྷཱརཾ ཛཱནཱཏི, ཨདྷིཊྛཱནཾ ཛཱནཱཏི, ཨཏྠཱརཾ ཛཱནཱཏི, མཱཏིཀཾ ཛཱནཱཏི, པལིབོདྷཾ ཛཱནཱཏི, ཨུདྡྷཱརཾ ཛཱནཱཏི, ཨཱནིསཾསཾ ཛཱནཱཏི, ཨིམེཧི ཨཊྛཧངྒེཧི སམནྣཱགཏོ པུགྒལོ བྷབྦོ ཀཐིནཾ ཨཏྠརིཏུ’’ནྟི.

ཨེཏྠ ཙ པུབྦཀརཎཾ ནཱམ དྷོཝནཝིཙཱརཎཙྪེདནབནྡྷནསིབྦནརཛནཀཔྤཀརཎཾ. པཙྩུདྡྷཱརོ ནཱམ པུརཱཎསངྒྷཱཊིཨཱདཱིནཾ པཙྩུདྡྷརཎཾ. ཨདྷིཊྛཱནཾ ནཱམ ཀཐིནཙཱིཝརཱདྷིཊྛཱནཾ. ཨཏྠཱརོ ནཱམ ཀཐིནཏྠཱརོ. མཱཏིཀཱ ནཱམ ཨཊྛ མཱཏིཀཱ. པལིབོདྷོ ནཱམ ཨཱཝཱསཔལིབོདྷོ ཙཱིཝརཔལིབོདྷོཏི དྭེ པལིབོདྷཱ. ཨུདྡྷཱརོ ནཱམ པཀྐམནནྟིཀཱདཡོ. ཨཱནིསཾསོ ནཱམ པཉྩཱནིསཾསཱ.

ཡཾ པན སམནྟཔཱསཱདིཀཱཡཾ (མཧཱཝ. ཨཊྛ. ༣༠༦) ཝུཏྟཾ ‘‘ཀཐིནཾ པན ཀེན ཨཏྠརིཏབྦཾ? ཡསྶ སངྒྷོ ཀཐིནཙཱིཝརཾ དེཏི, སངྒྷེན པན ཀསྶ དཱཏབྦཾ? ཡོ ཛིཎྞཙཱིཝརོ ཧོཏི, སཙེ བཧཱུ ཛིཎྞཙཱིཝརཱ ཧོནྟི, ཝུཌྜྷསྶ དཱཏབྦཾ. ཝུཌྜྷེསུཔི ཡོ མཧཱཔརིསོ ཏདཧེཝ ཙཱིཝརཾ ཀཏྭཱ ཨཏྠརིཏུཾ སཀྐོཏི, ཏསྶ དཱཏབྦཾ. སཙེ ཝུཌྜྷོ ན སཀྐོཏི, ནཝཀཏརོ སཀྐོཏི, ཏསྶ དཱཏབྦཾ. ཨཔིཙ སངྒྷེན མཧཱཐེརསྶ སངྒཧཾ ཀཱཏུཾ ཝཊྚཏི, ཏསྨཱ ‘ཏུམྷེ, བྷནྟེ, གཎྷཐ, མཡཾ ཀཏྭཱ དསྶཱམཱ’ཏི ཝཏྟབྦ’’ནྟི, ཏམྤི ཀཐིནཏྠཱརཱརཧཾཡེཝ གཧེཏྭཱཝ དཱཏབྦཾ. དེནྟེན པན ཏཱིསུ ཙཱིཝརེསུ ཡཾ ཡཾ ཛིཎྞཾ ¶ ཧོཏི, ཏཾ ཏདཏྠཱཡ དཱཏབྦཾ. པཀཏིཡཱ དུཔཊྚཙཱིཝརསྶ དུཔཊྚཏྠཱཡེཝ དཱཏབྦཾ. སཙེཔིསྶ ཨེཀཔཊྚཙཱིཝརཾ གྷནཾ ཧོཏི, ཀཐིནསཱཊཀོ ཙ པེལཝོ, སཱརུཔྤཏྠཱཡ དུཔཊྚཔྤཧོནཀམེཝ དཱཏབྦཾ. ‘‘ཨཧཾ ཨལབྷནྟོ ཨེཀཔཊྚཾ པཱརུཔཱམཱི’’ཏི ཝདནྟསྶཱཔི དུཔཊྚཾ དཱཏུཾ ཝཊྚཏི. ཡོ པན ལོབྷཔཀཏིཀོ ཧོཏི, ཏསྶ ན དཱཏབྦཾ. ཏེནཱཔི ཀཐིནཾ ཨཏྠརིཏྭཱ པཙྪཱ སིབྦེཏྭཱ ‘‘དྭེ ཙཱིཝརཱནི ཀརིསྶཱམཱི’’ཏི ན གཧེཏབྦཾ.

ཏེནཱཏི ཀཐིནཏྠཱརཀེན བྷིཀྑུནཱ. ཏདཧེཝཱཏི ཏསྨིཾཡེཝ དིཝསེ. པཉྩ ཝཱ ཨཏིརེཀཱནི ཝཱ ¶ ཁཎྜཱནི ཚིནྡིཏྭཱཏི ཡཐཱ པཉྩཁཎྜིཀཱདཱིནཾ སངྒྷཱཊིཨཱདཱིནཾ ཏིཎྞཾ ཙཱིཝརཱནཾ ཨཉྙཏརཔྤཧོནཀཱནི མཧཱམཎྜལཨཌྜྷམཎྜལཱདིཝསེན པཉྩ ཁཎྜཱནི ཝཱ ཨཏིརེཀཱནི ཝཱ སཏྟཱདིཁཎྜཱནི ཧོནྟི, ཨེཝཾ ཚིནྡིཏྭཱ. ཏསྨིཉྩ ཀཐིནཙཱིཝརེ ཀརིཡམཱནེ ‘‘ཨཧཾ ཐེརོ’’ཏི ཝཱ ‘‘བཧུསྶུཏོ’’ཏི ཝཱ ཨེཀེནཱཔི ཨཀཱཏུཾ ན ལབྦྷཏི. ཨནཱདརིཡེན ཨཀརོནྟསྶ དུཀྐཊཾ. ཏསྨཱ སབྦེཧེཝ སནྣིཔཏིཏྭཱ དྷོཝནཚེདནསིབྦནརཛནཱནི ནིཊྛཱཔེཏབྦཱནི. ཏེནཱཧ ‘‘སེསབྷིཀྑཱུཧིཔི ཏསྶ སཧཱཡེཧི བྷཝིཏབྦ’’ནྟི. ཀཏཙཱིཝརམེཝཱཏི ནིཊྛིཏཔརིཀམྨམེཝ ཀཐིནདུསྶཾ. སབྦནྟིམེན པརིཙྪེདེན ཨནྟརཝཱསཀོཔི ཚིནྡིཏྭཱཝ ཀཱཏབྦོ ཨཉྙཐཱ ཨཏྠཱརཝིཔཏྟིཏོ. ཡཐཱཧ –

‘‘ཀཐཉྩ པན, བྷིཀྑཝེ, ཨནཏྠཏཾ ཧོཏི ཀཐིནཾ? ན ཨུལླིཁིཏམཏྟེན ཨཏྠཏཾ ཧོཏི ཀཐིནཾ…པེ… ན ཨཉྙཏྲ པཉྩཀེན ཝཱ ཨཏིརེཀཔཉྩཀེན ཝཱ ཏདཧེཝ སཉྪིནྣེནཱ’’ཏི (མཧཱཝ. ༣༠༨).

ཏེནེཝཱཧ ‘‘ཨཙྪིནྣཱསིབྦིཏཾ པན ན ཝཊྚཏཱི’’ཏི. ཏེན བྷིཀྑུནཱཏི ཨཏྠཱརཀེན བྷིཀྑུནཱ. ཨཏྠརིཏབྦནྟི ཨཏྠརཎཾ ཀཱཏབྦཾ. ཏཉྩ ཁོ ཏཐཱཝཙཱིབྷེདཀརཎམེཝཱཏི དཊྛབྦཾ. ཡཐཱཧ –

‘‘སཙེ སངྒྷཱཊིཡཱ ཀཐིནཾ ཨཏྠརིཏུཀཱམོ ཧོཏི, པོརཱཎིཀཱ སངྒྷཱཊི པཙྩུདྡྷརིཏབྦཱ, ནཝཱ སངྒྷཱཊི ཨདྷིཊྛཱཏབྦཱ, ‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’ཏི ཝཱཙཱ བྷིནྡིཏབྦཱ’’ཏི (པརི. ༤༡༣) –

ཝིཏྠཱརོ. ‘‘བྷནྟེ, ཨཱཝུསོ’’ཏི ཙ ‘‘ཨནུམོདཐ, ཨནུམོདཱཧཱི’’ཏི ཙ ཝཙནབྷེདཾ སནྡྷཱཡ ‘‘ཐེརཱནཉྩཱ’’ཏིཨཱདི ཝུཏྟཾ.

ཨེཝཾ ¶ ཨཏྠཱརཀེན པཊིཔཛྫིཏབྦཝིདྷིཾ དསྶེཏྭཱ ཨིདཱནི ཨནུམོདཀེཧི པཊིཔཛྫིཏབྦཝིདྷིཾ དསྶེཏུཾ ‘‘ཏེཧིཔཱི’’ཏིཨཱདི ཝུཏྟཾ. ‘‘ཨནུམོདཱམཱ’’ཏི ཨཏྟནཱཝ ཨཏྟནི གཱརཝཝསེན ཝུཏྟཾ. ཀིཉྩཱཔི ཨེཝཾ ཝུཏྟཾ, ཏཐཱཔི ཨེཀཀེན ‘‘ཨནུམོདཱམཱ’’ཏི ཝཏྟུཾ ན ཝཊྚཏི, ‘‘ཨནུམོདཱམི’’ཙྩེཝ ཝཏྟབྦནྟི ཝདནྟི, ཝཱིམཾསིཏྭཱ གཧེཏབྦཾ. ཨིདཱནི ཀཐིནཱནིསཾསེ དསྶེཏུཾ བྷཱུམིཾ ཝིཙཱརཡནྟོ ‘‘པུརིམཝསྶཾཝུཊྛེསུཔཱི’’ཏིཨཱདིམཱཧ. ཏཏྠ ཏེསཾཡེཝཱཏི ཨཏྠཱརཀཨནུམོདཀཱནཾཡེཝ. ཝུཏྟཉྷེཏཾ པརིཝཱརེ ‘‘དྭིནྣཾ པུགྒལཱནཾ ཨཏྠཏཾ ཧོཏི ཀཐིནཾ ཨཏྠཱརཀསྶ ¶ ཙ ཨནུམོདཀསྶ ཙཱ’’ཏི (པརི. ༤༠༣). ཏེཏི ཨཏྠཱརཀཨནུམོདཀཱ. ཏཏོ པཊྛཱཡཱཏི ཨཏྠཱརཱནུམོདནཏོ པཊྛཱཡ. ཡཱཝ ཀཐིནསྶུབྦྷཱརཱཏི ན ཀེཝལཾ ཙཱིཝརམཱསེཡེཝ, ཨཐ ཁོ ཨཊྛནྣཾ མཱཏིཀཱནཾ ཨཉྙཏརེན ཝཱ ཨནྟརུབྦྷཱརེན ཝཱ ཡཱཝ ཀཐིནསྶུབྦྷཱརཱ པཉྩཱནིསཾསེ ལབྷནྟི, ཨུདྡྷཊེ པན ན ལབྷནྟཱིཏི ཨཏྠོ.

ཨིདཱནི ཏེ པཉྩཱནིསཾསེ སརཱུཔཏོ དསྶེཏུཾ ‘‘ཨནཱམནྟཙཱརོ’’ཏིཨཱདིམཱཧ. ཏཏྠ ཨནཱམནྟཙཱརོ ནཱམ པཉྩནྣཾ བྷོཛནཱནཾ ཨཉྙཏརེན ནིམནྟིཏསྶ སནྟཾ བྷིཀྑུཾ ཨནཱཔུཙྪཱ ཀུལེསུ ཙཱརིཏྟཱཔཛྫནཾ. ཨསམཱདཱནཙཱརོ ནཱམ ནཱམེནཱདྷིཊྛིཏསྶ ཙཱིཝརསྶ ཨསམཱདཱནཙརཎཾ, ནཱམེནཱདྷིཊྛིཏཱནཾ ཏིཎྞཾ ཙཱིཝརཱནམཉྙཏརཾ ཙཱིཝརཾ ཡཏྠ ཀཏྠཙི ནིཀྑིཔིཏྭཱ ཨཉྙཏྠ ཨརུཎུཊྛཱཔནནྟི ཨཏྠོ, ཙཱིཝརཝིཔྤཝཱསོཏི ཝུཏྟཾ ཧོཏི. ཡཱཝདཏྠཙཱིཝརནྟི ཡཱཝཏཱ ཙཱིཝརེན ཨཏྠོ ཧོཏི, ཏཱཝཏཀཾ ཨནདྷིཊྛིཏཾ ཨཝིཀཔྤིཏཾ ཙཱིཝརདྷཱརཎཾ, དསཱཧམཏིཀྐམིཏྭཱ ཙཱིཝརསྶ ཋཔནནྟི ཨཏྠོ. གཎསྶ བྷོཛནཾ གཎབྷོཛནཾ. གཎོཏི ཙེཏྠ ཙཏྟཱརོ ཝཱ ཏཏུཏྟརི ཝཱ བྷིཀྑཱུ. ཏེསཾ ཝིཉྙཏྟིཏོ ཝཱ ནིམནྟནཏོ ཝཱ ལདྡྷསྶ ཨོདནཱདཱིནཾ པཉྩནྣཾ ཨཉྙཏརབྷོཛནསྶ སཧ གཧཎནྟི ཨཏྠོ. ཡོ ཙ ཏཏྠ ཙཱིཝརུཔྤཱདོཏི ཏཏྠ ཀཐིནཏྠཏསཱིམཱཡ མཏཀཙཱིཝརཾ ཝཱ ཧོཏུ, སངྒྷཾ ཨུདྡིསྶ དིནྣཾ ཝཱ སངྒྷིཀེན ཏཏྲུཔྤཱདེན ཨཱབྷཏཾ ཝཱ ཡེན ཀེནཙི ཨཱཀཱརེན ཡཾ སངྒྷིཀཾ ཙཱིཝརཾ ཨུཔྤཛྫཏི, ཏཾ ཏེསཾ བྷཝིསྶཏཱིཏི ཨཏྠོ. ཏེནཱཧ ‘‘ཏསྨིཾ ཨཱཝཱསེ སངྒྷསྶ ཨུཔྤནྣཙཱིཝརཉྩཱ’’ཏི.

‘‘ཡཾ པན ཏཏྠ སངྒྷསྶ ཨུཔྤནྣཾ པཏྟཱདི ཝཱ ཨཉྙཾ བྷཎྜཾ ཝཱ, ཏཾ སབྦེསཾ པཱཔུཎཱཏི. ཡཾ པན ཏཏྲུཔྤཱདེན ཏཎྜུལཱདིནཱ ཝཏྠཾ ཙེཏཱཔིཏཾ, ཨཏྠཏཀཐིནཱནམེཝ ཏཱནི ཝཏྠཱནི པཱཔུཎནྟི. ཝཏྠེཧི པན ཏཎྜུལཱདཱིསུ ཙེཏཱཔིཏེསུ ¶ སབྦེསཾ ཏཱནི པཱཔུཎནྟཱི’’ཏི གཎྛིཔདེ ཝུཏྟཾ, ཏམྤི ཙེཏཱཔིཏཀཱལཏོ པཊྛཱཡ ཙཱིཝརུཔྤཱདོ ན ཧོཏཱིཏི སུཝུཏྟནྟི དཊྛབྦཾ. ཨནཏྠཏཀཐིནཱ པན ཨིམེསུ པཉྩསུ ཨཱནིསཾསེསུ ཙཱིཝརམཱསེ ཨསམཱདཱནཙཱརཾ ཋཔེཏྭཱ སེསཱནིསཾསེ ལབྷནྟི. ཡདི ཨསམཱདཱནཙཱརོཔི ལབྦྷེཡྻ, པཱཝེཡྻཀཱ བྷིཀྑཱུ ཝསྶཾཝུཊྛཱ ཨོཀཔུཎྞེཧི ཙཱིཝརེཧི ན བྷགཝནྟཾ ཨུཔསངྐམེཡྻུཾ. ཡསྨཱ ཏཾ ན ལབྦྷཏི, ཏསྨཱ ཙཱིཝརམཱསེཔི ཙཱིཝརཾ སམཱདཱཡ ཨེཝ བྷགཝནྟཾ ཨུཔསངྐམིཾསུ.

ཨེཝཾ ཀཐིནཏྠཱརཾ དསྶེཏྭཱ ཨིདཱནི ཨུབྦྷཱརཾ དསྶེནྟོ ‘‘ཏཾ པནེཏཾ ཀཐིན’’ནྟིཨཱདིམཱཧ. ཏཏྠ མཱཏིཀཱཏི མཱཏརོ, ཛནེཏྟིཡོཏི ཨཏྠོ. ཀཐིནུབྦྷཱརཉྷི ཨེཏཱ ཨཊྛ ཛནེནྟི. ཏཱསུ པཀྐམནཾ ཨནྟོ ཨེཏིསྶཱཏི པཀྐམནནྟིཀཱ. ཨེཝཾ སེསཱཔི ཝེདིཏབྦཱ. ཏཏྠ ཡོ བྷིཀྑུ ཨཏྠཏཀཐིནོ ¶ ཀཐིནཙཱིཝརཾ ཨཱདཱཡ ཏསྨིཾ ཨཱཝཱསེ ནིརཔེཀྑོ ‘‘ན པཙྩེསྶ’’ནྟི པཀྐམཏི, ཏསྶེཝཾ པཀྐམཏོ ཀཐིནུདྡྷཱརོ ཨཏིཀྐནྟམཏྟཱཡ སཱིམཱཡ ཧོཏཱིཏི པཀྐམནནྟིཀོ ཀཐིནུདྡྷཱརོཏི ཝེདིཏབྦོ.

ཡོ པན ཨཱནིསཾསཙཱིཝརཾ ཨཱདཱཡ པཀྐམཏི, ཏསྶ བཧིསཱིམཱགཏསྶ ཨེཝཾ ཧོཏི ‘‘ཨིདྷེཝིམཾ ཀརིསྶཱམི, ན པུན ཏཾ ཝིཧཱརཾ གཙྪིསྶཱམཱི’’ཏི ཏསྨིཾ ཨཱཝཱསེ ནིརཔེཀྑོ ཧུཏྭཱ ཏཾ ཙཱིཝརཾ ཀཱརེཏི, ཏསྶ བྷིཀྑུནོ ནིཊྛཱནནྟིཀོ ཀཐིནུདྡྷཱརོ.

ཡདི པན ཨཱནིསཾསམཱུལཙཱིཝརཾ ཨཱདཱཡ བཧིསཱིམཱགཏོ ‘‘ནེཝིམཾ ཙཱིཝརཾ ཀརིསྶཱམི, ན ཙ ཏཾ ཨཱཝཱསཾ གཙྪིསྶཱམཱི’’ཏི སནྣིཊྛཱནཾ ཀརོཏི, ཏདཱ སནྣིཊྛཱནནྟིཀོ ཀཐིནུདྡྷཱརོ.

ཏདེཝ ཨཱནིསཾསཙཱིཝརཾ ལདྡྷཱ ཏཾ ཨཱདཱཡ བཧིསཱིམཾ གནྟྭཱ ‘‘ཨིདྷེཝིམཾ ཙཱིཝརཾ ཀརིསྶཱམི, ན གཙྪིསྶཱམཱི’’ཏི ཀརོནྟསྶ སཙེ ཏཾ ཙཱིཝརཾ ནསྶཏི ཝིནསྶཏི ཌཡ྄ཧཏི, ནཱསནནྟིཀོ ཀཐིནུདྡྷཱརོ ཧོཏི.

སཙེ པན ཨཱནིསཾསཙཱིཝརཾ ལདྡྷཱ ཏསྨིཾ ཝིཧཱརེ སཱཔེཀྑོཝ བཧིསཱིམཱགཏོ ‘‘ཝིཧཱརེ བྷིཀྑཱུཧི ཨནྟརུབྦྷཱརཾ ཀཏ’’ནྟི སུཎཱཏི, ཏསྶ སཝནནྟིཀོ ཀཐིནུདྡྷཱརོ ཧོཏི.

ཨཱསཱཡ ཨཝཙྪེདོ ཨེཏིསྶཱཏི ཨཱསཱཝཙྪེདིཀཱ. ཡོ པན ཡེན ཀེནཙི ‘‘ཏུཡ྄ཧཾ ཙཱིཝརཾ དསྶཱམཱི’’ཏི ཝུཏྟོ ཏསྨིཾ ཙཱིཝརེ ཨཱསཱཡ ཝིཧཱརེ ཨཔེཀྑཾ པཧཱཡ བཧིསཱིམཱགཏོ པུན ཏེན ‘‘ན སཀྐོམི དཱཏུ’’ནྟི ¶ ཝུཏྟེ ཨཱསཾ ཚིནྡཏི, ཏསྶ ཨཱསཱཝཙྪེདིཀོ ཀཐིནུདྡྷཱརོ ཧོཏི.

ཡོ པན ཝསྶཾཝུཊྛཝིཧཱརཏོ ཨཉྙཾ ཝིཧཱརཾ སཱཔེཀྑོཝ གནྟྭཱ ཨཱགཙྪནྟོ ཨནྟརཱམགྒེཡེཝ ཀཐིནུདྡྷཱརཾ ཝཱིཏིནཱམེཏི, ཏསྶ སཱིམཱཏིཀྐམནནྟིཀོ ཀཐིནུདྡྷཱརོ.

སཧ ཨུབྦྷཱརེནཱཏི སཧུབྦྷཱརཱ. ཨཱནིསཾསཙཱིཝརཾ ཨཱདཱཡ སཱཔེཀྑོཝ བཧི གནྟྭཱ ཀཐིནུདྡྷཱརཾ སམྦྷུཎནྟསྶ ཀཐིནུདྡྷཱརོ སཧུབྦྷཱརོཏི ཝེདིཏབྦོ.

‘‘ཨེཏསྨིཾ པན པཀྐམནནྟིཀེ ཀཐིནུདྡྷཱརེ པཋམཾ ཙཱིཝརཔལིབོདྷོ ཚིཛྫཏཱི’’ཏིཨཱདིནཱ ཙཱིཝརཔལིབོདྷུཔཙྪེདཱདིཀསྶ ཝིནིཙྪཡསྶ ཝིཏྠཱརཏོ སམནྟཔཱསཱདིཀཱཡཾ (མཧཱཝ. ཨཊྛ. ༣༡༡) ཝུཏྟཏྟཱ ¶ ༨ ‘‘ཏཏྠ ཝིཏྠཱརཝིནིཙྪཡོ’’ཏིཨཱདིམཱཧ. ཨཏྠཱརུབྦྷཱརཱནཾཡེཝ ཝཱ ཝིཏྠཱརཝིནིཙྪཡསྶ ཏཏྠཱགཏཏྟཱ ཨེཝཾ ཝུཏྟནྟི དཊྛབྦཾ. སེསཔལིབོདྷཱབྷཱཝནྟི ཨཝསེསསྶ པལིབོདྷསྶ ཨབྷཱཝཾ, ཨཱཝཱསཔལིབོདྷཱབྷཱཝནྟི ཨཏྠོ.

ཨསྶཱཏི ཀཱལསྶ. དསཱཧཔརམནྟི ཨཙྩནྟསཾཡོགེ ཨུཔཡོགཝཙནནྟི ཨཱཧ ‘‘ཏཾ དསཱཧཔརམཾ ཀཱལ’’ནྟི. ཨཏིརེཀནྟི ཨདྷིཀཾ, སོ ཙ ཨདྷིཀབྷཱཝོ ཨདྷིཊྛིཏཝིཀཔྤིཏཙཱིཝརཏོཏི ཨཱཧ ‘‘ཨདྷིཊྛིཏཝིཀཔྤིཏེསཱུ’’ཏིཨཱདི. ཁོམནྟི (པཱརཱ. ཨཊྛ. ༢.༦༣༦-༦༣༨) ཁོམསུཏྟེཧི ཝཱཡིཏཾ ཁོམཔཊྚཙཱིཝརཾ. ཏཐཱ སེསཱནི. ཀམྦལཾ ནཱམ མནུསྶལོམཝཱལ༹ལོམེ ཋཔེཏྭཱ སེསལོམེཧི ཝཱཡིཏྭཱ ཀཏཝཏྠཾ. སཱཎཾ ནཱམ སཱཎཝཱཀེཧི ཀཏཝཏྠཾ. བྷངྒཾ ནཱམ ཁོམསུཏྟཱདཱིཧི པཉྩཧི མིསྶེཏྭཱ ཀཏཝཏྠཾ. ‘‘པཱཊེཀྐཾ ཝཱཀམཡམེཝཱ’’ཏིཔི ཝདནྟི. ཏདནུལོམཱནཾ ཝཱཏི དུཀཱུལཾ པཏྟུཎྞཾ སོམཱརཔཊྚཾ ཙཱིནཔཊྚཾ ཨིདྡྷིཛཾ དེཝདིནྣནྟི ཏེསཾ ཁོམཱདཱིནཾཡེཝ ཨནུལོམཱནཾ ཚནྣཾ ཙཱིཝརཱནཾ ཝཱ, ཏཏྠ དུཀཱུལཾ སཱཎསྶ ཨནུལོམཾ ཝཱཀམཡཏྟཱ. པཏྟུཎྞདེསེ པཱཎཀེཧི སཉྫཱཏཝཏྠཾ པཏྟུཎྞཾ. སོམཱརདེསེ ཛཱཏཾ ཝཏྠཾ སོམཱརཔཊྚཾ. ཏཐཱ ཙཱིནཔཊྚཾ. ཨིམཱནི ཏཱིཎིཔི ཀོསེཡྻསྶ ཨནུལོམཱནི པཱཎཀེཧི ཀཏསུཏྟམཡཏྟཱ. ཨིདྡྷིཛཾ ཨེཧིབྷིཀྑཱུནཾ པུཉྙིདྡྷིཡཱ ནིབྦཏྟཙཱིཝརཾ. ཏཾ པན ཁོམཱདཱིནམཉྙཏརཾ ཧོཏཱིཏི ཏེསཾཡེཝ ཨནུལོམཾ. དེཝེཧི དིནྣཾ ཙཱིཝརཾ དེཝདིནྣཾ, ཏཾ ཀཔྤརུཀྑེ ནིབྦཏྟཾ ཛཱལིནིཡཱ དེཝཀཉྙཱཡ ཨནུརུདྡྷཏྠེརསྶ ¶ དིནྣཝཏྠསདིསཾ, ཏམྤི ཁོམཱདཱིནཾཡེཝ ཨནུལོམཾ ཧོཏི ཏེསུ ཨཉྙཏརབྷཱཝཏོ.

དཱིགྷཏོ ཝཌྜྷཀིཧཏྠཔྤམཱཎཾ, ཝིཏྠཱརཏོ ཏཏོ ཨུཔཌྜྷཔྤམཱཎཾ ཝིཀཔྤནུཔགཾ པཙྪིམཾ. ཨཊྛངྒུལཾ སུགཏངྒུལེནཱཏི ཨེཏྠ སུགཏངྒུལཾ ནཱམ ཨིདཱནི མཛ྄ཛྷིམསྶ པུརིམསྶ ཏཱིཎི ཨངྒུལཱནི, ཏེན སུགཏངྒུལེན ཨཊྛངྒུལཾ ཝཌྜྷཀིཧཏྠཔྤམཱཎནྟི ཨཏྠོ. ཙཏུརངྒུལཝིཏྠཏནྟི ཨེཏྠཱཔི ཡཐཱཝུཏྟཱནུསཱརེནེཝ ཨཏྠོ ཝེདིཏབྦོ. ཡེསཾ པན ཨདྷིཊྛཱནཝིཀཔྤནཱནཾ ཨབྷཱཝཏོ ཨདྷིཊྛིཏཝིཀཔྤིཏེསུ ཨཔརིཡཱཔནྣཏྟཱ ཨིདཾ ཨཏིརེཀཙཱིཝརཾ ནཱམ ཧོཏི.

ཏཾ ཨདྷིཊྛཱནཝིཀཔྤནཾ ཀེནཱཀཱརེན ཛཱནིཏབྦནྟི ཨནུཡོགཾ སནྡྷཱཡ ཏཾ དསྶེཏུཾ ‘‘ཡཾ པན ཝུཏྟ’’ནྟིཨཱདི ཨཱརདྡྷཾ. ཏཏྠ ཡཾ པན ཝུཏྟནྟི ཨཏིརེཀཙཱིཝརཾ དསྶེཏུཾ ‘‘ཨདྷིཊྛིཏཝིཀཔྤིཏེསུ ཨཔརིཡཱཔནྣཏྟཱ’’ཏི ཨམྷེཧི ཡཾ ཝུཏྟནྟི ཨཏྠོ. ཏིཙཱིཝརཾ ཨདྷིཊྛཱཏུནྟི ནཱམཾ ཝཏྭཱ ཨདྷིཊྛཱཏུཾ. ན ཝིཀཔྤེཏུནྟི སངྒྷཱཊིཨཱདིནཱམེན ཝིཀཔྤེཏུཾ ན ཨནུཛཱནཱམཱིཏི ཨཏྠོ. ‘‘ཨིམཾ ཙཱིཝརཾ ཝིཀཔྤེམཱི’’ཏི པན ཝིཀཔྤེཏུཾ ཝཊྚཏིཡེཝ. སཱམཉྙཝཙནཾ པན ཏིཙཱིཝརསྶ ཀཎྜུཔཊིཙྪཱདིཝསྶིཀསཱཊིཀཱནཾ ཝིཡ ཀཱལཝསེན ཝིསེསཱབྷཱཝཱ ཙསྶ ཝིཀཔྤེཏབྦཏཱཏི དསྶནཏྠཾ ¶ , ན པན སབྦཐཱ ཝིཀཔྤནཔཊིསེདྷནཏྠནྟི དཊྛབྦཾ. ཏཐཱ ཧི པུརཱཎཙཱིཝརཾ པཙྩུདྡྷརིཏྭཱ ནཝསྶ ཨདྷིཊྛཱནཝཙནཏོ, ‘‘ཨནཱཔཏྟི ཨདྷིཊྛེཏི ཝིཀཔྤེཏཱི’’ཏིཨཱདིཝཙནཏོ (པཱརཱ. ༤༦༩) ཙ ཏིཙཱིཝརསྶཔི ཝིཀཔྤནཱཡ ཨོཀཱསོ དིནྣོ. ཨེས ནཡོ སབྦཏྠ. ཏིཙཱིཝརཱདཱིནི ཧི ཨདྷིཊྛཧནྟེན ‘‘ཨིམཾ སངྒྷཱཊིཾ ཨདྷིཊྛཱམཱི’’ཏིཨཱདིནཱ ཏཾ ཏཾ ནཱམཾ ཝཏྭཱ ཨདྷིཊྛཱཏབྦཾ. ཝིཀཔྤེནྟེན པན ‘‘ཨིམཾ སངྒྷཱཊི’’ནྟིཨཱདིནཱ ཏསྶ ཏསྶ ཙཱིཝརསྶ ནཱམཾ ཨགྒཧེཏྭཱ ‘‘ཨིམཾ ཙཱིཝརཾ ཏུཡ྄ཧཾ ཝིཀཔྤེམཱི’’ཏི ཝིཀཔྤེཏབྦཾ. ཏིཙཱིཝརཾ ཝཱ ཧོཏུ, ཨཉྙཾ ཝཱ, ཡདི ཏཾ ཏཾ ནཱམཾ གཧེཏྭཱ ཝིཀཔྤེཏི, ཨཝིཀཔྤིཏཾ ཧོཏི, ཨཏིརེཀཙཱིཝརཊྛཱནེཡེཝ ཏིཊྛཏི. ཏཏོ པརཾ ཝིཀཔྤེཏུནྟི ཙཏུམཱསཏོ པརཾ ‘‘ཨིམཾ ཙཱིཝརཾ ཝིཀཔྤེམཱི’’ཏི ཝིཀཔྤེཏུཾ. ཨིདཉྩ པརིབྷུཉྫིཏུཾ ཨནུཉྙཱཏཾ. ཀེཙི པན (སཱརཏྠ. ཊཱི. ༢.༤༦༩) ‘‘ཏཏོ པརཾ ཝིཀཔྤེཏྭཱ ཡཱཝ ཨཱགཱམིསཾཝཙྪརེ ཝསྶཱནཾ ཙཏུམཱསཾ, ཏཱཝ ཋཔེཏུཾ ཨནུཉྙཱཏ’’ནྟི ཝདནྟི. ཏཏོ པརནྟི ཨཱབཱདྷཏོ པརཾ. ‘‘ཨིམཱསཉྩ པན ཝསྶིཀསཱཊིཀཀཎྜུཔཊིཙྪཱདཱིནཾ ཏཏོ པརཾ ཝིཀཔྤེཏྭཱ པརིབྷོགསྶ ཨནུཉྙཱཏཏྟཱ ཏཐཱཝིཀཔྤིཏཾ ¶ ཨཉྙནཱམེན ཨདྷིཊྛཧིཏྭཱ པརིབྷུཉྫིཏབྦ’’ནྟི གཎྛིཔདེསུ ཝུཏྟཾ. ཨདྷིཊྛཱཏབྦཝིཀཔྤེཏབྦཏཱ ཛཱནིཏབྦཱཏི ཨདྷིཊྛཱཏབྦཾ ཝིཀཔྤེཏབྦནྟི ཨེཝཾ ཨདྷིཊྛཱནཝིཀཔྤནཱ ཛཱནིཏབྦཱཏི ཨཏྠོ.

པཉྩཔརིམཱཎཾ ཨསྶཱཏི པཉྩཀཾ, མུཊྛིསྶ མུཊྛིཧཏྠསྶ སམྦནྡྷཾ པཉྩཀཾ མུཊྛིཔཉྩཀཾ. ཨེས ན ཡོ མུཊྛིཏྟིཀནྟི ཨེཏྠཱཔི. པཱརུཔནེནཔི སཀྐཱ ནཱབྷིཾ པཊིཙྪཱདེཏུནྟི ཨཱཧ ‘‘དྭིཧཏྠོཔི ཝཊྚཏཱི’’ཏི. ན ཀེཝལཾ ཨཌྜྷཏེཡྻོཝ ཝཊྚཏི, ཨཐ ཁོ དྭིཧཏྠོཔི ཝཊྚཏཱིཏི པི-སདྡསྶ ཨཏྠོ དཊྛབྦོ. ཨཏིརེཀཉྩཱཏི སུགཏཙཱིཝརཔྤམཱཎམྤི ཏཏོ ཨདྷིཀམྤི. པཙྩུདྡྷརཱམཱིཏི ཋཔེམི, པརིཙྩཛཱམཱིཏི ཝཱ ཨཏྠོ. ‘‘ཨིམཾ ཙཱིཝརཾ སངྒྷཱཊིཾ ཨདྷིཊྛཱམཱི’’ཏི (སཱརཏྠ. ཊཱི. ༢.༤༦༩) ཨེཝམྤི ཝཏྟུཾ ཝཊྚཏི. ཀཱཡཝིཀཱརཾ ཀརོནྟེནཱཏི ཧཏྠཱདིནཱ ཙཱིཝརཾ པརཱམསནྟེན, ཙཱལེནྟེན ཝཱ. ཨིདཉྷི ཨདྷིཊྛཱནཾ ཡེན ཀེནཙི སརཱིརཱཝཡཝེན ཨཕུསནྟསྶ ན ཝཊྚཏི. དུཝིདྷནྟི སམྨུཁཱཔརམྨུཁབྷེདེན དུཝིདྷཾ. ཝཱཙཱ བྷིནྡིཏབྦཱཏི ཝཙནཾ ནིཙྪཱརེཏབྦཾ. ཨནྟོགབྦྷཱདཱིསཱུཏི ཨནྟོགབྦྷཨུཔརིཔཱསཱདེསུ. སཱམནྟཝིཧཱརེཏི ཡཏྠ ཏདཧེཝ གནྟྭཱ ནིཝཏྟེཏུཾ སཀྐཱ, ཨེཝརཱུཔེ སམཱིཔཝིཧཱརེ. ཨིདཉྩ དེསནཱསཱིསམཏྟཾ, ཏསྨཱ དཱུརེ ཋིཏམྤི ཨདྷིཊྛཱཏབྦནྟི ཝདནྟི. ‘‘ཋཔིཏཊྛཱནཾ སལླཀྑེཏྭཱ’’ཏི ཨིམིནཱ ཙཱིཝརསཾལཀྑཎཾ ཝུཏྟཾ. ན ཧི ཋཔིཏཊྛཱནམཏྟསལླཀྑཎེན ཀིཉྩི པཡོཛནཾ ཨཏྠི.

ཨདྷིཊྛཧིཏྭཱ ཋཔིཏཝཏྠེཧཱིཏི པཙྩཏྠརཎམུཁཔུཉྪནཙོལ༹པརིཀྑཱརཙོལ༹ཝསེན ཨདྷིཊྛཧིཏྭཱ ཋཔིཏཝཏྠེཧི. ཨདྷིཊྛཱནཏོ པུབྦེ སངྒྷཱཊིཨཱདིཝོཧཱརསྶ ཨབྷཱཝཏོ ‘‘ཨིམཾ པཙྩུདྡྷརཱམཱི’’ཏི པཙྩཏྠརཎཱདཱིནཾ ¶ ཝིསུཾ པཙྩུདྡྷརཎཝིདྷིཾ དསྶེཏི. པཙྩཏྠརཎཱདིནཱམེན པན ཨདྷིཊྛཱཏབྦཏྟཱ ‘‘ཨིམཾ པཙྩཏྠརཎཾ པཙྩུདྡྷརཱམཱི’’ཏིཨཱདིནཱ ཝུཏྟེཔི ནེཝཏྠི དོསོ. པུན ཨདྷིཊྛཱཏབྦཱནཱིཏི སངྒྷཱཊིཨཱདིནཱམེན ཨདྷིཊྛཱཏབྦཱནི. པརིཀྑཱརཙོལ༹ཀསྶ པན པརིཀྑཱརཙོལ༹ཝསེན ཨདྷིཊྛཧིཏྭཱ ཋཔིཏཝཏྠེཧིཔི སངྒྷཱཊིཨཱདིམྷི ཀཏེ པཙྩུདྡྷརིཏྭཱ པུན ཨདྷིཊྛཱཏབྦནྟི ནཏྠི. པུབྦེ ཀཏཱདྷིཊྛཱནམེཝ ཨདྷིཊྛཱནཾ. ཨདྷིཊྛིཏེན པན ཏེན སདྡྷིཾ མཧནྟཏརམེཝ དུཏིཡཾ པཊྚཾ ཝཱ ཁཎྜཾ ཝཱ སཾསིབྦནྟེན ཨདྷིཊྛཱཏབྦཾ, སམེ ཝཱ ཁུདྡཀེ ཝཱ ཨདྷིཊྛཱནཀིཙྩཾ ནཏྠི. སུཁཔརིབྷོགཏྠནྟི ཝིཔྤཝཱསདོསཱབྷཱཝཏོ ཡཏྠ ཀཏྠཙི ཋཔེཏྭཱ དྷམྨསྶཝནཱདིནཱ ཀིཙྩེན ཨཉྙཏྠ ཨརུཎཾ ཨུཊྛཱཔེཏྭཱ ཨཱགནྟྭཱ ནིསྶཛྫནཾ ཝིནཱཝ ¶ པརིབྷུཉྫིཏུཾ སཀྐུཎེཡྻཏཱཡ སུཁཔརིབྷོགཏྠཾ. པརིཀྑཱརཙོལ༹ཾ ཨདྷིཊྛཱཏུནྟི པརིཀྑཱརཙོལ༹ཾ ཀཏྭཱ ཨདྷིཊྛཱཏུཾ.

ཨནཏིརིཏྟཔམཱཎཱཏི ‘‘དཱིགྷསོ ཚ ཝིདཏྠིཡོ སུགཏཝིདཏྠིཡཱ, ཏིརིཡཾ ཨཌྜྷཏེཡྻཱ’’ཏི (པཱཙི. ༥༤༣) ཝུཏྟཔྤམཱཎཏོ ཨནདྷིཀཔམཱཎཱ. པཙྩུདྡྷརིཏྭཱ ཝིཀཔྤེཏབྦཱཏི ཝསྶིཀསཱཊིཀབྷཱཝཏོ ཨཔནེཏྭཱ ཝིཀཔྤེཏབྦཱ, ཧེམནྟསྶ པཋམདིཝསཏོ པཊྛཱཡ ཨནྟོདསཱཧེ ཝསྶིཀསཱཊིཀཱཝསྶིཀསཱཊིཀབྷཱཝཏོ ཨཔནེཏྭཱ ‘‘ཨིམཾ ཙཱིཝརཾ ཏུཡ྄ཧཾ ཝིཀཔྤེམཱི’’ཏིཨཱདིནཱ ནཡེན ཝིཀཔྤེཏབྦཱཏི ཝུཏྟཾ ཧོཏི. ཨཉྙཐཱ ཧི ‘‘ཝསྶིཀསཱཊིཀཱ ཝསྶཱནམཱསཱཏིཀྐམེནཱཔི, ཀཎྜུཔཊིཙྪཱདི ཨཱབཱདྷཝཱུཔསམེནཱཔི ཨདྷིཊྛཱནཾ ཝིཛཧཏཱི’’ཏི (ཀངྑཱ. ཨཊྛ. ཀཐིནསིཀྑཱཔདཝཎྞནཱ) ཝཀྑམཱནཏྟཱ ཝསྶཱནམཱསཏོ པརཾ ཨསཏི ཨདྷིཊྛཱནེ ཀིཾ པཙྩུདྡྷརེཡྻཱཏི ‘‘པཙྩུདྡྷརིཏྭཱ’’ཏི ཝཙནམེཝ ནོཔཔཛྫེཡྻ.

ཀེཙི པན (སཱརཏྠ. ཊཱི. ༢.༤༦༩) ‘‘ཡཐཱ ཀཐིནམཱསབྦྷནྟརེ ཨུཔྤནྣཙཱིཝརཾ ཀཐིནམཱསཱཏིཀྐམེ ནིསྶགྒིཡཾ ཧོཏི, ཨེཝམཡཾ ཝསྶིཀསཱཊིཀཱཔི ཝསྶཱནམཱསཱཏིཀྐམེ ནིསྶགྒིཡཱ ཧོཏི. ཏསྨཱ ཀཏྟིཀཔུཎྞམདིཝསེ པཙྩུདྡྷརིཏྭཱ ཏཏོ པརཾ ཧེམནྟསྶ པཋམདིཝསེ ཝིཀཔྤེཏབྦཱཏི ཨེཝམཏྠོ གཧེཏབྦོ, པཙྩུདྡྷརིཏྭཱ ཏཏོ པརཾ ཝིཀཔྤེཏབྦཱཏི པདཡོཛནཱ ཝེདིཏབྦཱ’’ཏི ཙ ཝདནྟི, ཏཾ ན ཡུཏྟཾ. ཀཐིནམཱསེ ཨུཔྤནྣཉྷི ཙཱིཝརཾ ཨཏིརེཀཙཱིཝརཊྛཱནེ ཋིཏཏྟཱ ཨཝསཱནདིཝསེ ཨནདྷིཊྛིཏཾ ཀཐིནམཱསཱཏིཀྐམེ ནིསྶགྒིཡཾ ཧོཏི. ཨཡཾ པན ཝསྶིཀསཱཊིཀཱ ཨདྷིཊྛཧིཏྭཱ ཋཔིཏཏྟཱ ན ཏེན སདིསཱཏི ཝསྶཱནཱཏིཀྐམེ ཀཐཾ ནིསྶགྒིཡཾ ཧོཏི ཨནདྷིཊྛིཏཨཝིཀཔྤིཏམེཝ ཧི ཏཾ ཀཱལཱཏིཀྐམེ ནིསྶགྒིཡཾ ཧོཏི, ཏསྨཱ ཧེམནྟེཔི ཝསྶིཀསཱཊིཀཱ དསཱཧཔརིཧཱརཾ ལབྷཏི. ཨེཝཾ ཀཎྜུཔཊིཙྪཱདིཔི ཨདྷིཊྛཱནཝིཛཧནཏོ པརཾ དསཱཧཔརིཧཱརཾ ལབྷཏི. དསཱཧཾ པན ཨནཏིཀྐཱམེཏྭཱ ཝིཀཔྤེཏབྦཱ. ནཧཱནཏྠཱཡ ཨནུཉྙཱཏཏྟཱ ཝཎྞབྷེདམཏྟརཏྟཱཔི ཙེསཱ ཝཊྚཏཱིཏི ཝུཏྟཾ. ‘‘དྭེ པན ན ཝཊྚནྟཱི’’ཏི དྭིནྣཾ ཨདྷིཊྛཱནཱབྷཱཝཏོ ཝུཏྟཾ ¶ . ‘‘སཙེ ཝསྶཱནེ ཨཔརཱ ཝསྶིཀསཱཊིཀཱ ཨུཔྤནྣཱ ཧོཏི, པུརིམཝསྶིཀསཱཊིཀཾ པཙྩུདྡྷརིཏྭཱ, ཝིཀཔྤེཏྭཱ ཙ ཨདྷིཊྛཱཏབྦཱ’’ཏི ཝདནྟི.

པམཱཎཡུཏྟནྟི ‘‘དཱིགྷསོ སུགཏཝིདཏྠིཡཱ དྭེ ཝིདཏྠིཡོ, ཝིཏྠཱརཏོ དིཡཌྜྷཾ དསཱ ཝིདཏྠཱི’’ཏི (པཱཙི. ༥༣༡ ཨཱདཡོ) ཨིམིནཱ པམཱཎེན ཡུཏྟཾ. པམཱཎིཀཱཏི ‘‘སུགཏཝིདཏྠིཡཱ ¶ དཱིགྷསོ ཙཏསྶོ ཝིདཏྠིཡོ, ཏིརིཡཾ དྭེ ཝིདཏྠིཡོ’’ཏི ཨེཝཾ ཝུཏྟཔྤམཱཎཡུཏྟཱ. པཙྩུདྡྷརིཏྭཱ ཝིཀཔྤེཏབྦཱཏི ཨེཏྠ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝ. ཡསྨཱ བྷིཀྑཱུནཾ ཏིཙཱིཝརེ པརིཔུཎྞེ, ཨཏྠེ ཙ སཏི པརིསྶཱཝནཱདཱིཧི ‘‘ཨནུཛཱནཱམི, བྷིཀྑཝེ, པརིཀྑཱརཙོལ༹ཀ’’ནྟི (མཧཱཝ. ༣༥༧) བཧཱུནཾ པཏྟཏྠཝིཀཔརིསྶཱཝནཱདཱིནཾ སངྒཧཝསེན པརིཀྑཱརཙོལཱ༹དྷིཊྛཱནམནུཉྙཱཏཾ, ཏསྨཱ ‘‘པརིཀྑཱརཙོལེ༹ གཎནཱ ནཏྠཱི’’ཏིཨཱདི ཝུཏྟཾ. བྷགཝཏཱ ཧི ཡཾ ཡཾ བྷིཀྑཱུ ལབྷནྟི, ཏཾ ཏཾ ཨིམིནཱ ཝིདྷཱནེན ཨདྷིཊྛཧིཏྭཱ པུན ‘‘ཡེན ཡེན པརིསྶཱཝནཱདིནཱ ཨཏྠོ ཧོཏི, ཏཾ ཏཾ ཀཏྭཱ གཎྷནྟཱུ’’ཏི ཨནུཀམྤཱཡ ཨནུཉྙཱཏཾ. ཏེནེཝཱཧ ‘‘ཐཝིཀཱཔཱི’’ཏིཨཱདི. ཨཱདིསདྡེན ‘‘ཨེཏཱནི ཙཱིཝརཱནི པརིཀྑཱརཙོལཱ༹ནི ཨདྷིཊྛཱམཱི’’ཏི ཨསམྨུཁཱདྷིཊྛཱནཾ སངྒཎྷཱཏི. ‘‘སེནཱསནཔརིཀྑཱརཏྠཱཡ དིནྣཔཙྩཏྠརཎེ ཙཱ’’ཏི ཨིམིནཱ ཨཏྟནོ སནྟཀཾ པཊིཀྑིཔཏི. ཀེཙི པན (སཱརཏྠ. ཊཱི. ༢.༤༦༩) ‘‘ཨནིཝཱསེཏྭཱ, ཨཔཱརུཔིཏྭཱ ཙ ཀེཝལཾ པཉྩཔཱིཋེསུཡེཝ ཨཏྠརིཏྭཱ པརིབྷུཉྫིཡམཱནཾ པཙྩཏྠརཎཾ ཨཏྟནོ སནྟཀམྤི ཨནདྷིཊྛིཏཾ ཝཊྚཏཱི’’ཏི ཝདནྟི, ཏཾ ཨཡུཏྟཾ སེནཱསནཔརིཀྑཱརཏྠཱཡ དིནྣ’’ནྟི པཙྩཏྠརཎསྶ ཝིསེསིཏཏྟཱ. བྷིསིབིབྦོཧནཔཱཝཱརཀོཛཝཱནམྤི སེནཱསནཔརིཀྑཱརཏོཡེཝ ཨདྷིཊྛཱནཀིཙྩཾ ནཏྠཱིཏི ཝེདིཏབྦཾ.

ཨདྷིཊྛིཏཉྩ པནེཏཾ ཙཱིཝརཾ པརིབྷུཉྫཏོ ཀཐཾ ཨདྷིཊྛཱནཾ ཝིཛཧཏཱིཏི ཨཱཧ ‘‘སབྦཉྩ པནེཏ’’ནྟིཨཱདི. ཏཏྠ ཨཙྪིནྡིཏྭཱ གཧཎེནཱཏི ཙོརཱདཱིཧི ཨཙྪིནྡིཏྭཱ གཧཎེན. ཧཱིནཱཡཱཝཏྟནེནཱཏི གིཧིབྷཱཝཱཡ ཨཱཝཏྟནེན, ཝིབྦྷམེནཱཏི ཨཏྠོ, ‘‘སཱིལཝནྟོཝ ཧུཏྭཱ གིཧཱི བྷཝིསྶཱམཱི’’ཏི སེཏཝཏྠནིཝཱསནེནཱཏི ཝུཏྟཾ ཧོཏི. ‘‘ཨནྟིམཝཏྠུཾ ཨཛ྄ཛྷཱཔནྣསྶ སེཏཝཏྠནིཝཱསོ ཝཱ ཀཱསཱཡཙཛནཾ ཝཱ ཧཱིནཱཡཱཝཏྟན’’ནྟི ཀེཙི. ‘‘‘ཧཱིནཱཡཱཝཏྟནེནཱ’ཏི ཨིམིནཱ བྷིཀྑུནིཡཱ ཨེཝ ཨདྷིཊྛཱནཝིཛཧནཾ གཧིཏཾ ཧོཏི. སཱ ཧི ཡདཱ ཝིབྦྷམཏི, ཏདཱ ཨསྶམཎཱི ཧོཏི. བྷིཀྑུ པན ཝིབྦྷམནྟོཔི ཡཱཝ སིཀྑཾ ན པཙྩཀྑཱཏི, ཏཱཝ བྷིཀྑུཡེཝཱཏི ཨདྷིཊྛཱནཾ ན ཝིཛཧཏཱི’’ཏི ཨཔརེ. སིཀྑཱཔཙྩཀྑཱནེནཱཏི ལིངྒེ ཋིཏསྶེཝ སིཀྑཱཡ པཙྩཀྑཱནེན. ཡོ ཧི བྷིཀྑུལིངྒེ ཋིཏོཝ སིཀྑཾ པཙྩཀྑཱཏི, ཏསྶ ཀཱཡལགྒམྤི ཙཱིཝརཾ ཨདྷིཊྛཱནཾ ཝིཛཧཏཱིཏི. ཀཱལངྐིརིཡཱཡཱཏི མརཎེན. ལིངྒཔརིཝཏྟནེནཱཏི པུརིསལིངྒསྶ ¶ , ཨིཏྠིལིངྒསྶ ཝཱ པརིཝཏྟནེན, པུརིསསྶ ཨིཏྠིལིངྒཔཱཏུབྷཱཝེན, ཨིཏྠིཡཱ ཝཱ པུརིསལིངྒཔཱཏུབྷཱཝེནཱཏི ཝུཏྟཾ ཧོཏི.

ཀནིཊྛངྒུལིནཁཔིཊྛིཔྤམཱཎེནཱཏི ¶ ཧེཊྛིམཔརིཙྪེདཾ དསྶེཏི. ཨོརཏོཏི ཨབྦྷནྟརཏོ. ཡོ པན དུབྦལཊྛཱནེ པཋམཾ ཨགྒལ༹ཾ དཏྭཱ པཙྪཱ དུབྦལཊྛཱནཾ ཚིནྡིཏྭཱ ཨཔནེཏི, ཨདྷིཊྛཱནཾ ན བྷིཛྫཏི. མཎྜལཔརིཝཏྟནེཔི ཨེསེཝ ནཡོ. དུཔཊྚསྶ པན ཨེཀསྨིཾ པཊལེ ཚིདྡེ ཝཱ ཛཱཏེ, གལིཏེ ཝཱ ཨདྷིཊྛཱནཾ ན བྷིཛྫཏི. ཁུདྡཀཾ ཙཱིཝརཾ མཧནྟཾ ཀརོཏི, མཧནྟཾ ཝཱ ཁུདྡཀཾ ཀརོཏི, ཨདྷིཊྛཱནཾ ན བྷིཛྫཏི. ཨུབྷོ ཀོཊིཡོ མཛ྄ཛྷེ ཀརོནྟོ སཙེ པན པཋམཾ ཚིནྡིཏྭཱ པཙྪཱ གྷཊེཏི, ཨདྷིཊྛཱནཾ བྷིཛྫཏི. ཨཐ གྷཊེཏྭཱ ཚིནྡཏི, ན བྷིཛྫཏི. རཛཀེཧི དྷོཝཱཔེཏྭཱ སེཏཾ ཀརོནྟསྶཱཔི ཨདྷིཊྛཱནཾ ཨདྷིཊྛཱནམེཝ. ཝསྶཱནམཱསཱཏིཀྐམེནཱཔཱིཏི ཨེཏྠ པི-སདྡོ སམྤིཎྜནཏྠོ. ཏེན ན ཀེཝལཾ པུབྦེ ཝུཏྟེན དཱནཱདིནཱ ཨཊྛཝིདྷེནེཝ ཀཱརཎེན ཝསྶིཀསཱཊིཀཱ ཨདྷིཊྛཱནཾ ཝིཛཧཏི, ཨཐ ཁོ ཝསྶཱནམཱསཱཏིཀྐམེནཔཱིཏི ཨེཝམེཏྠ ཨཏྠོ དཊྛབྦོ. ཨེས ནཡོ ཨཱབཱདྷཝཱུཔསམེནཱཔཱིཏི ཨེཏྠཱཔི. ཝིཀཔྤནསིཀྑཱཔདེཏི (པཱཙི. ༣༧༢ ཨཱདཡོ) པཱཙིཏྟིཡེ སུརཱཔཱནཝགྒསྶ ནཝམསིཀྑཱཔདེ.

ཏཾ ཨཏིཀྐཱམཡཏོཏི ཨེཏྠ ཏནྟི ཙཱིཝརཾ, ཀཱལཾ ཝཱ པརཱམསཏཱིཏི ཨཱཧ ‘‘ཏཾ ཡཐཱཝུཏྟཛཱཏིཔྤམཱཎ’’ནྟིཨཱདི. ཨསྶཱཏི བྷིཀྑུསྶ. ཏསྶ ཡོ ཨརུཎོཏི ཏསྶ ཙཱིཝརུཔྤཱདདིཝསསྶ ཡོ ཨཏིཀྐནྟོ ཨརུཎོ. ཙཱིཝརུཔྤཱདདིཝསེན སདྡྷིནྟི ཙཱིཝརུཔྤཱདདིཝསསྶ ཨརུཎེན སདྡྷིཾ. དིཝསསདྡེན ཙེཏྠ ཏཾདིཝསནིསྶིཏོ ཨརུཎོ ཝུཏྟོ. ཨིདཱནི ཡསྶ ཙ ནིསྶཛྫིཏབྦཾ, ཡཐཱ ཙ ནིསྶཛྫིཏབྦཾ, ཏཾ དསྶེཏུཾ ‘‘ཏཾ གཧེཏྭཱ’’ཏིཨཱདི ཝུཏྟཾ. ཏཏྲཱཡཾ ནཡོཏི ཏསྨིཾ ནིསྶཛྫནེ ཨཡཾ ཝིདྷི. ཨཉྙཐཱཔཱིཏི བྷཱསནྟརེནཱཔི, ཡཱཡ ཀཱཡཙི བྷཱསཱཡཔཱིཏི ཨཏྠོ. པཊིབལེནཱཏི ཝཏྟུཾ སམཏྠེན. ཨཱཡཏིཾ སཾཝརེཡྻཱསཱིཏི ཨུཔརི སཾཝརམཱཔཛྫེཡྻཱསི, སཾཝུཏཀཱཡཝཙཱིདྭཱརོ བྷཝེཡྻཱསཱིཏི ཨཏྠོ. ཨིམཱནི ཙ ‘‘པསྶསཱི’’ཏིཨཱདཱིནི ཡཐཱཀྐམཾ པཊིགྒཱཧཀདེསཀེཧི ཝཏྟབྦཝཙནཱནི. ཏཐཱ ཧི ‘‘པསྶསཱི’’ཏི པཊིགྒཱཧཀེན ཝཏྟབྦཝཙནཾ, ‘‘ཨཱམ པསྶཱམཱི’’ཏི ཏདནུདེསཀེན ཝཏྟབྦཝཙནཾ. ‘‘ཨཱཡཏིཾ སཾཝརེཡྻཱསཱི’’ཏི ཏདནུཔྤཊིགྒཱཧཀེན ཝཏྟབྦཝཙནཾ, ‘‘སཱདྷུ སུཊྛུ སཾཝརིསྶཱམཱི’’ཏི ཏདནུདེསཀེན ཝཏྟབྦཝཙནཾ. ཨིམིནཱ ཙ ཨཏྟནོ ཨཱཡཏིཾ སཾཝརེ པཏིཊྛིཏབྷཱཝཾ དསྶེཏི. དྭཱིསུ, པན སམྦཧུལཱསུ ཝཱཏི དྭཱིསུ ཝཱ སམྦཧུལཱསུ ཝཱ ཨཱཔཏྟཱིསུ པུརིམནཡེནེཝ ཝཙནབྷེདོ ཀཱཏབྦོ. ཉཏྟིཡཾ ཨཱཔཏྟིཾ སརཏི ཝིཝརཏཱིཏི ཨེཏྠ ‘‘དྭེ ¶ ཨཱཔཏྟིཡོ’’ཏི ཝཱ ‘‘སམྦཧུལཱ ཨཱཔཏྟིཡོ’’ཏི ཝཱ ¶ ཝཙནབྷེདོ ཀཱཏབྦོ. དྭཱིསུ, བཧཱུསུ ཝཱ ཝཙནབྷེདོ ཀཱཏབྦོཏི ‘‘སངྒྷོ ཨིམཱནི ཙཱིཝརཱནཱི’’ཏི ཝཏྠུཝསེན ཝཙནབྷེདོ ཀཱཏབྦོ.

ཨེཝཾ སངྒྷསྶ ནིསྶཛྫནཝིདྷིཾ དསྶེཏྭཱ གཎསྶ ནིསྶཛྫནཝིདྷིཾ དསྶེཏུཾ ‘‘གཎསྶ པན ནིསྶཛྫནྟེནཱ’’ཏིཨཱདིམཱཧ. ཏཏྠ སེསཾ པུརིམསདིསམེཝཱཏི ནིསྶཛྫནཱཔཏྟིཔྤཊིགྒཧཎནིསྶཊྛཙཱིཝརདཱནེསུ ‘‘ཨཱཡསྨནྟཱན’’ནྟིཨཱདིནཱ ཝུཏྟཝཙནབྷེདཾ ཝིནཱ ཨཝསེསཾ སངྒྷསྶ ནིསྶཛྫནཱདཱིསུ ཝུཏྟསདིསམེཝཱཏི ཨཏྠོ.

ཨིདཱནི པུགྒལསྶ ནིསྶཛྫནཝིདྷིཾ དསྶེཏུཾ ‘‘པུགྒལསྶ པནཱ’’ཏིཨཱདི ཝུཏྟཾ. ཏཏྠ དྭཱིསུ, ཏཱིསུ ཝཱཏི དྭཱིསུ, ཏཱིསུ ཝཱ ཨཱཔཏྟཱིསུ ཙེཝ དཱཏབྦཙཱིཝརེསུ ཙ. ཡཐཱ ཙ གཎསྶ ནིསྶཛྫནེ, ཨེཝཾ དྭིནྣཾ ནིསྶཛྫནེཔི པཱལི༹ ཝེདིཏབྦཱ. ཡདི ཧི ཝིསེསོ བྷཝེཡྻ, ཡཐེཝ ‘‘ཨནུཛཱནཱམི, བྷིཀྑཝེ, ཏིཎྞཾ པཱརིསུདྡྷིཨུཔོསཐཾ ཀཱཏུཾ, ཨེཝཉྩ པན, བྷིཀྑཝེ, ཀཱཏབྦོ – བྱཏྟེན བྷིཀྑུནཱ པཊིབལེན ཏེ བྷིཀྑཱུ ཉཱཔེཏབྦཱ’’ཏིཨཱདིནཱ (མཧཱཝ. ༡༦༨) ནཡེན ཏིཎྞཾ པཱརིསུདྡྷིཨུཔོསཐཾ ཝཏྭཱ ‘‘ཨནུཛཱནཱམི, བྷིཀྑཝེ, དྭིནྣཾ པཱརིསུདྡྷིཨུཔོསཐཾ ཀཱཏུཾ, ཨེཝཉྩ པན, བྷིཀྑཝེ, ཀཏྟབྦོ – ཐེརེན བྷིཀྑུནཱ ཨེཀཾསཾ ཨུཏྟརཱསངྒ’’ནྟིཨཱདིནཱ ནཡེན ཝིསུཾཡེཝ དྭིནྣཾ པཱརིསུདྡྷིཨུཔོསཐོ ཝུཏྟོ, ཨེཝཾ ཨིདྷཱཔི ཝིསུཾ པཱལི༹ཾ ཝདེཡྻ. ཡསྨཱ པན ནཏྠི, ཏསྨཱ ཨཝཏྭཱཝ གཏོཏི གཎསྶ ཝུཏྟཱ པཱལི༹ཡེཝེཏྠ པཱལི༹. ཨཱཔཏྟིཔྤཊིགྒཧཎེ པན ཨཡཾ ཝིསེསོ – ཡཐཱ གཎསྶ ནིསྶཛྫིཏྭཱ ཨཱཔཏྟིཡཱ དེསིཡམཱནཱཡ ཨཱཔཏྟིཔྤཊིགྒཱཧཀོ བྷིཀྑུ ཉཏྟིཾ ཋཔེཏི, ཨེཝཾ ཨཊྛཔེཏྭཱ དྭཱིསུ ཨཉྙཏརེན ཡཐཱ ཨེཀཔུགྒལོ པཊིགྒཎྷཱཏི, ཨེཝཾ ཨཱཔཏྟི པཊིགྒཧེཏབྦཱ. དྭིནྣཉྷི ཉཏྟིཊྛཔནཾ ནཱམ ནཏྠི. ཡདི སིཡཱ, དྭིནྣཾ པཱརིསུདྡྷིཨུཔོསཐཾ ཝིསུཾ ན ཝདེཡྻ. ནིསྶཊྛཙཱིཝརདཱནེཔི ཡཐཱ ‘‘ཨིམཾ ཙཱིཝརཾ ཨཱཡསྨཏོ དམྨཱི’’ཏི ཨེཀོ ཝདཏི, ཨེཝཾ ‘‘མཡཾ ཨིམཾ ཙཱིཝརཾ ཨཱཡསྨཏོ དེམཱ’’ཏི ཝཏྟུཾ ཝཊྚཏི. ཨིཏོ གརུཀཏརཱནིཔི ཧི ཉཏྟིདུཏིཡཀམྨཱནི ཨཔལོཀེཏྭཱ ཀཱཏབྦཱནཱིཏི ཝུཏྟཱནི ཨཏྠི, ཏེསཾ ཨེཏཾ ཨནུལོམཾ. ཏེནེཝཱཧ ‘‘དྭིནྣཾ པནཱ’’ཏིཨཱདི. ནིསྶཊྛཙཱིཝརཾ པན དཱཏབྦམེཝ, ཨདཱཏུཾ ན ལབྦྷཏི. ཝིནཡཀམྨམཏྟམེཝ ཧེཏཾ. ན ཏཾ ཏེན སངྒྷསྶ ཝཱ གཎསྶ ཝཱ པུགྒལསྶ ཝཱ དིནྣམེཝ ཧོཏི. ཏེནཱཧ ‘‘ནིསྶཊྛཝཏྠུ’’ནྟིཨཱདི.

ཨནིསྶཛྫིཏྭཱ ¶ པརིབྷུཉྫནྟསྶ དུཀྐཊནྟི སཀིཾ ནིཝཏྠཾ ཝཱ སཀིཾ པཱརུཏཾ ཝཱ ཀཱཡཏོ ཨམོཙེཏྭཱ དིཝསམྤི ཙརཏི, ཨེཀམེཝ དུཀྐཊཾ. མོཙེཏྭཱ ནིཝཱསེཏི ཝཱ པཱརུཔཏི ཝཱ, པཡོགེ པཡོགེ དུཀྐཊཾ. དུནྣིཝཏྠཾ ཝཱ དུཔྤཱརུཏཾ ཝཱ སཎྛཱཔེནྟསྶ ཨནཱཔཏྟི. ཨཉྙསྶ ཏཾ པརིབྷུཉྫཏོཔི ¶ ཨནཱཔཏྟི. ‘‘ཨཉྙེན ཀཏཾ པཊིལབྷིཏྭཱ པརིབྷུཉྫཏཱི’’ཏིཨཱདིཝཙནཉྩེཏྠ (པཱརཱ. ༥༧༠) སཱདྷཀཾ. དསཱཧཾ ཨནཏིཀྐནྟེཔི ཨཏིཀྐནྟསཉྙིནོ, ཝེམཏིཀསྶ ཙ དུཀྐཊནྟི ཨེཏྠཱཔི ‘‘པརིབྷུཉྫནྟསྶཱ’’ཏི ཨཱནེཏྭཱ སམྦནྡྷིཏབྦཾ. ཨཏིཀྐནྟེ ཨནཏིཀྐནྟསཉྙིནོཔཱིཏི དསཱཧཾ ཨཏིཀྐནྟེ ཙཱིཝརེ ‘‘ཨནཏིཀྐནྟཾ ཨིད’’ནྟི ཨེཝཾ སཉྙིནོ, དསཱཧེ ཝཱ ཨཏིཀྐནྟེ ‘‘ཨནཏིཀྐནྟོ དསཱཧོ’’ཏི ཨེཝཾ སཉྙིནོ.

ཨིདཱནི ‘‘ཨནདྷིཊྛིཏེ ཨདྷིཊྛིཏསཉྙིནོ ནིསྶགྒིཡ’’ནྟིཨཱདིཨཱཔཏྟིཝཱརཾ སངྒཧེཏྭཱ དསྶེནྟོ ‘‘ཏཐཱ’’ཏིཨཱདིམཱཧ. ཏཐཱཏི ཡཐཱ དསཱཧཾ ཨཏིཀྐནྟེ སཉྙཱབྷེདེན ཏིཀཔཱཙིཏྟིཡཾ, ཏཐཱ ཨནདྷིཊྛིཏཱདཱིསུ སཏྟསུ ཝིཀཔྤེསུ ཨདྷིཊྛིཏཱདིསཉྙཱབྷེདཏོཏི ཨཏྠོ. ཏཏྠ ཨཝིསྶཛྫིཏེ ཝིསྶཛྫིཏསཉྙིནོཏི ཀསྶཙི ཨདིནྣེ ཨཔརིཙྩཏྟེ ‘‘དིནྣཾ པརིཙྩཏྟཾ མཡཱ’’ཏི ཨེཝཾ སཉྙིནོ. ཨནཊྛེ ནཊྛསཉྙིནོཏི ཨཏྟནོ ཙཱིཝརེན སདྡྷིཾ བཧཱུནི ཨཉྙེསཾ ཙཱིཝརཱནི ཨེཀཏོ ཋཔིཏཱནི, ཏཱནི ཙེ ཙོརཱ ཧརནྟི, ཏཏྲེས ཨཏྟནོ ཙཱིཝརེ ཨནཊྛེ ནཊྛསཉྙཱི ཧོཏི, ཏསྶ ནཊྛསཉྙིནོ. ཨེས ནཡོ ཨཝིནཊྛཱདཱིསུཔི. ཨཝིལུཏྟེཏི ཨེཏྠ པན གབྦྷཾ བྷིནྡིཏྭཱ པསཡ྄ཧཱཝཧཱརཝསེན ཨཝིལུཏྟེཏི ཝེདིཏབྦཾ.

ཝིསྶཛྫིཏེཏི (པཱརཱ. ཨཊྛ. ༢.༤༦༩) ཨཉྙསྶ དིནྣེ. ཀཐཾ པན དིནྣཾ ཧོཏི, ཀཐཾ གཧིཏཾ? ‘‘ཨིམཾ ཏུཡ྄ཧཾ དེམི, དདཱམི, དཛྫཱམི, ཨོཎོཛེམི, པརིཙྩཛཱམི, ཝིསྶཛྫཱམི, ནིསྶཛྫཱམཱི’’ཏི ཝཱ ཝདཏི, ‘‘ཨིཏྠནྣཱམསྶ དེམི…པེ… ནིསྶཛྫཱམཱི’’ཏི ཝཱ ཝདཏི, སམྨུཁཱཔི པརམྨུཁཱཔི དིནྣཾཡེཝ ཧོཏི. ‘‘ཏུཡ྄ཧཾ གཎྷཱཧཱི’’ཏི ཝུཏྟེ ‘‘མཡ྄ཧཾ གཎྷཱམཱི’’ཏི ཝདཏི, སུདིནྣཾ, སུགྒཧིཏཉྩ. ‘‘ཏཝ སནྟཀཾ ཀརོཧི, ཏཝ སནྟཀཾ ཧོཏུ, ཏཝ སནྟཀཾ ཀརིསྶསཱི’’ཏི ཝུཏྟེ ‘‘མམ སནྟཀཾ ཀརོམི, མམ སནྟཀཾ ཧོཏུ, མམ སནྟཀཾ ཀརིསྶཱམཱི’’ཏི ཝདཏི, དུདྡིནྣཾ, དུགྒཧིཏཉྩ. ནེཝ དཱཏཱ དཱཏུཾ ཛཱནཱཏི, ན ཨིཏརོ གཧེཏུཾ. སཙེ པན ‘‘ཏཝ སནྟཀཾ ཀརོཧཱི’’ཏི ཝུཏྟེ ‘‘སཱདྷུ, བྷནྟེ, མཡ྄ཧཾ གཎྷཱམཱི’’ཏི གཎྷཱཏི, སུགྒཧིཏཾ, སཙེ པན ཨེཀོ ‘‘གཎྷཱཧཱི’’ཏི ཝདཏི, ཨིཏརོ ‘‘ན གཎྷཱམཱི’’ཏི ཝདཏི, པུན སོ ‘‘དིནྣཾ མཡཱ ¶ ཏུཡ྄ཧཾ, གཎྷཱཧཱི’’ཏི ཝདཏི, ཨིཏརོཔི ‘‘ན མཡ྄ཧཾ ཨིམིནཱ ཨཏྠོ’’ཏི ཝདཏི. ཏཏོ པུརིམོཔི ‘‘མཡཱ དིནྣ’’ནྟི དསཱཧཾ ཨཏིཀྐཱམེཏི, པཙྪིམོཔི ‘‘མཡཱ པཊིཀྑིཏྟ’’ནྟི, ཀསྶཱཔཏྟཱིཏི? ན ཀསྶཙི. ཡསྶ པན རུཙྩཏི, ཏེན ཨདྷིཊྛཧིཏྭཱ པརིབྷུཉྫིཏབྦཾ. ཡོ པན ཨདྷིཊྛཱནེ ཝེམཏིཀོ, ཏེན ཀིཾ ཀཱཏབྦཾ? ཝེམཏིཀབྷཱཝཾ ཨཱརོཙེཏྭཱ ‘‘སཙེ ཨནདྷིཊྛིཏཾ བྷཝིསྶཏི, ཨེཝཾ མེ ཀཔྤིཡཾ ཧོཏཱི’’ཏི ཝཏྭཱ ཝུཏྟནཡེནེཝ ནིསྶཛྫིཏབྦཾ. ན ཧི ཨེཝཾ ཛཱནཱཔེཏྭཱ ཝིནཡཀམྨཾ ཀརོནྟསྶ མུསཱཝཱདོ ཧོཏི.

ཡཐཱ ¶ ཙ ཨིདཾ, ཨེཝཾ ཨིཏོ པརཱནིཔཱིཏི ཡཐཱ ཨིདཾ ཨཏིརེཀཙཱིཝརདྷཱརཎསིཀྑཱཔདཾ ཨཱཙཱརཝིཔཏྟི, ཨེཝཾ ཨིཏོ པརཱནིཔི སིཀྑཱཔདཱནི ཨཱཙཱརཝིཔཏྟིཡེཝཱཏི ཨཏྠོ. ཏེནཱཧ ‘‘ཨུབྷཏོཔཱཏིམོཀྑེསཱུ’’ཏིཨཱདི. ཨཱཛཱིཝཝིཔཏྟིཔཙྩཡཱ པན ཋཔེཏྭཱ དུབྦྷཱསིཏཾ ཚ ཨཱཔཏྟིཀྑནྡྷཱ པཉྙཏྟཱཏི –

‘‘ཨཱཛཱིཝཧེཏུ ཨཱཛཱིཝཀཱརཎཱ པཱཔིཙྪོ ཨིཙྪཱཔཀཏོ ཨསནྟཾ ཨབྷཱུཏཾ ཨུཏྟརིམནུསྶདྷམྨཾ ཨུལླཔཏི, ཨཱཔཏྟི པཱརཱཛིཀསྶ. ཨཱཛཱིཝཧེཏུ ཨཱཛཱིཝཀཱརཎཱ སཉྩརིཏྟཾ སམཱཔཛྫཏི, ཨཱཔཏྟི སངྒྷཱདིསེསསྶ. ཨཱཛཱིཝཧེཏུ ཨཱཛཱིཝཀཱརཎཱ ‘ཡོ ཏེ ཝིཧཱརེ ཝསཏི, སོ བྷིཀྑུ ཨརཧཱ’ཏི བྷཎཏི, པཊིཝིཛཱནནྟསྶ ཨཱཔཏྟི ཐུལླཙྩཡསྶ. ཨཱཛཱིཝཧེཏུ ཨཱཛཱིཝཀཱརཎཱ བྷིཀྑུ པཎཱིཏབྷོཛནཱནི ཨགིལཱནོ ཨཏྟནོ ཨཏྠཱཡ ཝིཉྙཱཔེཏྭཱ བྷུཉྫཏི, ཨཱཔཏྟི པཱཙིཏྟིཡསྶ. ཨཱཛཱིཝཧེཏུ ཨཱཛཱིཝཀཱརཎཱ བྷིཀྑུནཱི པཎཱིཏབྷོཛནཱནི ཨགིལཱནཱ ཨཏྟནོ ཨཏྠཱཡ ཝིཉྙཱཔེཏྭཱ བྷུཉྫཏི, ཨཱཔཏྟི པཱཊིདེསནཱིཡསྶ. ཨཱཛཱིཝཧེཏུ ཨཱཛཱིཝཀཱརཎཱ བྷིཀྑུ སཱུཔཾ ཝཱ ཨོདནཾ ཝཱ ཨགིལཱནོ ཨཏྟནོ ཨཏྠཱཡ ཝིཉྙཱཔེཏྭཱ བྷུཉྫཏི, ཨཱཔཏྟི དུཀྐཊསྶཱ’’ཏི (པརི. ༢༨༧) –

ཨེཝཾ པཱརཱཛིཀཱདིཝསེན ཋཔེཏྭཱ དུབྦྷཱསིཏཾ ཨཱཛཱིཝཝིཔཏྟིཔཙྩཡཱ ཚ ཨཱཔཏྟིཀྑནྡྷཱ པཉྙཏྟཱ. དིཊྛིཝིཔཏྟིཔཙྩཡཱ པཱཙིཏྟིཡདུཀྐཊཝསེན དྭེ ཨཱཔཏྟིཀྑནྡྷཱ པཉྙཏྟཱཏི སམནུབྷཱསནཱཡ པཱཔིཀཱཡ དིཊྛིཡཱ ཨཔྤཊིནིསྶཛྫནེ ཉཏྟིཡཱ དུཀྐཊཾ, ཀམྨཝཱཙཱཔརིཡོསཱནེ པཱཙིཏྟིཡནྟི ཨེཝཾ དིཊྛིཝིཔཏྟིཔཙྩཡཱ ¶ པཱཙིཏྟིཡདུཀྐཊཝསེན དྭེ ཨཱཔཏྟིཀྑནྡྷཱ པཉྙཏྟཱ. ཨེཏྠཱཏི ཝིཔཏྟིཀཐཱསུ.

གཎནུཔགཏཱཏི དིཝསགཎནཾ ཨུཔགཏབྷཱཝོ. ཨཉྙེཧི ‘‘ཨིམཾ ཙཱིཝརཾ ཨིཏྠནྣཱམསྶ དེམཱ’’ཏི པརཧཏྠེ དིནྣམྤི ‘‘ན ཏཱཝ ཏཾ གཎནུཔགཾ, ཡཱཝ ན ཧཏྠཾ གཙྪཏཱི’’ཏི (མཧཱཝ. ༢༥༩) ཙམྨཀྑནྡྷཀེ ཝུཏྟཏྟཱ ཡཱཝ ཨཱཧརིཏྭཱ ཝཱ ན དིནྣཾ, ‘‘ཏུམྷཱཀཾ, བྷནྟེ, ཙཱིཝརཾ ཨུཔྤནྣ’’ནྟི པཧིཎིཏྭཱ ཝཱ ཨནཱརོཙིཏཾ, ཏཱཝ དིཝསགཎནཾ ན ཨུཔེཏི, ཨནདྷིཊྛིཏཾ ཝཊྚཏི. ཡདཱ པན ཨཱནེཏྭཱ དིནྣཾ ཧོཏི, ‘‘ཨུཔྤནྣ’’ནྟི ཝཱ སུཏཾ, ཏཏོ པཊྛཱཡ གཎནུཔགཾ ཧོཏི, ཨནྟོདསཱཧེ ཨདྷིཊྛཱཏབྦཾ. ཀཐིནསཉྙིཏཾ སམུཊྛཱནམསྶཱཏི ཀཐིནསམུཊྛཱནཾ, ཏཏིཡཚཊྛསམུཊྛཱནཝསེན དྭིསམུཊྛཱནནྟི ཨཏྠོ. ཀཱཡཝཱཙཱཧི ཀཏྟབྦཨདྷིཊྛཱནཝིཀཔྤནཱནཾ ཨཀརཎེན ཀཱཡཝཱཙཏོ, ཙིཏྟེ པན སཏི ཀཱཡཝཱཙཱཙིཏྟཏོ ཙ སམུཊྛཱཏཱིཏི ཝུཏྟཾ ཧོཏི. ཨནདྷིཊྛཱནཱཝིཀཔྤནཝསེན ཨཱཔཛྫནཏོ ¶ ཨཀིརིཡཾ. ཨཛཱནནྟོཔི ཨཱཔཛྫཏཱིཏི ནོསཉྙཱཝིམོཀྑཾ. ཀཱཡདྭཱརེ ཙ ཝཙཱིདྭཱརེ ཙ ཀཏྟབྦཱཀརཎཏོ ཀཱཡཀམྨཾ ཝཙཱིཀམྨཾ.

ཀཐིནསིཀྑཱཔདཝཎྞནཱ ནིཊྛིཏཱ.

༢. ཨུདོསིཏསིཀྑཱཔདཝཎྞནཱ

བྷིཀྑུནཱཏི བྷིཀྑུསྶཱཏི ཨཏྠོ, སཱམིཨཏྠེ ཙེཏཾ ཀརཎཝཙནཾ. ཏེནཱཧ ‘‘པུརིམསིཀྑཱཔདེ ཝིཡཱ’’ཏིཨཱདི. ཨཐ ཀསྨཱ ཀརཎཝསེནེཝ ཀརཎཝཙནསྶ ཨཏྠཾ ཨགྒཧེཏྭཱ སཱམིཝསེན ཨཏྠོ ཝེདིཏབྦོཏི ཨཱཧ ‘‘ཀརཎཝསེན ཧཱི’’ཏིཨཱདི. ཧཱིཏི ཀཱརཎཏྠེ ནིཔཱཏོ. ཚིནྣཔལིབོདྷོཏི ཚིནྣཙཱིཝརཱཝཱསཔལིབོདྷོ. ཨེཀཱཝ རཏྟི ཨེཀརཏྟཾ, སམཱསནྟགཏསྶ ཨཏྠཾ. ཏིཎྞཾ ཙཱིཝརཱནཾ སམཱཧཱརོཏི ཏིཙཱིཝརཾ. ཏེན ཏིཙཱིཝརེན, ཏཱིཧི ཙཱིཝརེཧཱིཏི ཨཏྠོ. ཨེཀེན ཝིཔྤཝུཏྠོཔི (པཱརཱ. ཨཊྛ. ༢.༤༧༥-༤༧༦) ཧི ཏིཙཱིཝརེན ཝིཔྤཝུཏྠོ ནཱམ ཧོཏི པཊིསིདྡྷཔརིཡཱཔནྣེན ཝིཔྤཝུཏྠཏྟཱ, ཨཝཡཝེཔི ཝཱ སམུདཱཡཝོཧཱརཏོ. ཏེནཱཧ ‘‘ཏིཙཱིཝརཱདྷིཊྛཱནནཡེནཱ’’ཏིཨཱདི.

ཨིདཱནི ¶ ཝིཔྤཝཱསལཀྑཎཝཝཏྠཱཔནཏྠཾ ‘‘གཱམོ ཨེཀཱུཔཙཱརོ’’ཏིཨཱདིམཱཧ. ཏཏྠ ནིཝེསནནྟི ཨུདོསིཏཱདཱིནཾ ཝསེན ཨཀཏཱཡ པཏིསྶཡཝིཀཏིཡཱ ཨདྷིཝཙནཾ. ཨུདོསིཏོཏི (པཱརཱ. ཨཊྛ. ༢.༤༨༢-༤༨༧) ཡཱནཱདཱིནཾ བྷཎྜཱནཾ སཱལཱ. ཡོ ‘‘ཨུདཝསིཏོ’’ཏིཔི ཝུཙྩཏི. ཨཊྚོཏི པཊིརཱཛཱདིཔཊིབཱཧནཏྠཾ ཨིཊྛཀཱཧི ཀཏོ བཧལབྷིཏྟིཀོ ཙཏུཔཉྩབྷཱུམིཀོ པཏིསྶཡཝིསེསོ. ‘‘ཨཊྚོཏི བཧལབྷིཏྟིཀགེཧཾ, ཡསྶ གོཔཱནསིཡོ ཨགྒཧེཏྭཱ ཨིཊྛཀཱཧི ཨེཝ ཚདནཾ ཧོཏཱི’’ཏི ཨཔརེ. ‘‘ཨཊྚཱཀཱརེན ཀརཱིཡཏཱི’’ཏིཔི ཝདནྟི. མཱལོ༹ཏི ཨེཀཀཱུཊསངྒཧིཏོ ཙཏུརསྶཔཱསཱདོ, ཨེཀཀཱུཊསངྒཧིཏོ ཝཱ ཨནེཀཀོཎཝནྟོ པཏིསྶཡཝིསེསོ. ‘‘མཱལོ༹ཏི ཝཊྚཱཀཱརེན ཀཏསེནཱསན’’ནྟི ཨཔརེ. པཱསཱདོཏི དཱིགྷཔཱསཱདོ, ཨཌྜྷཡོགཱདིབྷེདོ ཨཊྚམཱལ༹ཧམྨིཡཝཛྫིཏོ སབྦོ ཝཱ པཱསཱདོ. ཧམྨིཡནྟི མུཎྜཙྪདནཔཱསཱདོ. ‘‘ཙནྡིཡངྒཎཡུཏྟ’’ནྟི ཨཔརེ. ནཱཝཱཏི ཐལཊྛཨུདཀཊྛཝསེན དྭིདྷཱ ནཱཝཱ. སཏྠོཏི ཛངྒྷསཏྠོ, སཀཊསཏྠོ ཝཱ. དྷཉྙཀརཎནྟི (པཱརཱ. ཨཊྛ. ༢.༤༩༡-༤༩༤) ཁལཾ ཝུཙྩཏི. ཨཱརཱམོཏི པུཔྥཱརཱམོ, ཕལཱརཱམོ ཝཱ. ཝིཧཱརོཏི སཔརིཀྑིཏྟོ ཝཱ ཨཔརིཀྑིཏྟོ ཝཱ སཀལོ ཨཱཝཱསོ. ‘‘གེཧམྤཱི’’ཏི ཀེཙི. ནིཝེསནཱདཱིནི ཙེཏྠ གཱམཏོ བཧི ནིཝིཊྛཱནི གཧིཏཱནི. ཨནྟོགཱམེ ཋིཏཱནཾ པན གཱམགྒཧཎེནེཝ གཧིཏཏྟཱ གཱམཔརིཧཱརོཡེཝཱཏི. ‘‘ནིཝེསནཱདཡོ ཧམྨིཡཔརིཡོསཱནཱ ¶ གཱམཔརིཀྑེཔཏོ བཧི ནིཝིཊྛཱ’’ཏི ཨཔརེ. ཧཏྠཔཱསཱཏིཀྐམེཏི ཨེཏྠ ཧཏྠཔཱསོ ནཱམ ཨཌྜྷཏེཡྻརཏནཔྤམཱཎོ པདེསོ, ཏསྶ ཨཏིཀྐམོ ཧཏྠཔཱསཱཏིཀྐམོ, ཏསྨིཾ ཧཏྠཔཱསཱཏིཀྐམེ. ཧཏྠཔཱསབྦྷནྟརེ པན ཝཏྠུཾ ཝཊྚཏི. ཏཾ པམཱཎཾ ཨཏིཀྐམིཏྭཱ སཙེཔི ཨིདྡྷིམཱ བྷིཀྑུ ཨཱཀཱསེ ཨརུཎཾ ཨུཊྛཱཔེཏི, ནིསྶགྒིཡམེཝ ཧོཏི.

ཨཡཾ པནེཏྠ ཝིནིཙྪཡོ – སཙེ (པཱརཱ. ཨཊྛ. ༢.༤༧༧-༤༧༨) གཱམོ ཨེཀསྶ རཉྙོ ཝཱ བྷོཛཀསྶ ཝཱ ཝསེན ཨེཀཀུལསྶ ཧོཏི, པཱཀཱརཱདིནཱ པརིཀྑིཏྟཏྟཱ ཨེཀཱུཔཙཱརོ ཙ, ཨེཝརཱུཔེ གཱམེ ཙཱིཝརཾ ནིཀྑིཔིཏྭཱ ཏསྨིཾ གཱམབྦྷནྟརེ ཡཐཱརུཙིཏཊྛཱནེ ཝསིཏབྦཾ, སཙེ ཨཔརིཀྑིཏྟོ, ཡསྨིཾ གྷརེ ཙཱིཝརཾ ནིཀྑིཏྟཾ ཧོཏི, ཏསྨིཾ གྷརེ ཝསིཏབྦཾ, ཏསྶ གྷརསྶ སམནྟཏོ ཧཏྠཔཱསཱ ཝཱ ན ཝིཛཧིཏབྦཾ.

སཙེ ¶ གཱམོ ཝེསཱལིཀུསིནཱརཱདཡོ ཝིཡ ནཱནཱརཱཛཱུནཾ ཝཱ བྷོཛཀཱནཾ ཝཱ ཧོཏི, ཝུཏྟཔྤཀཱརེན པརིཀྑིཏྟོ ཙ, ཨེཝརཱུཔེ གཱམེ ཡསྨིཾ གྷརེ ཙཱིཝརཾ ནིཀྑིཏྟཾ ཧོཏི, ཏསྨིཾ གྷརེ ཝཱ ཝཏྠབྦཾ, ཏསྶ གྷརསྶ ཧཏྠཔཱསཱ ཝཱ ན ཝིཛཧིཏབྦཾ. ཡསྶཱ ཝཱིཐིཡཱ གྷརཾ ཧོཏི, ཏསྶཱ ཝཱིཐིཡཱ ཏསྶ གྷརསྶ སམྨུཁཱཊྛཱནེ སབྷཱཡཾ ཝཱ གྷརདྭཱརེ ཝཱ ཝཏྠབྦཾ, ཏེསཾ སབྷཱདྭཱརཱནཾ ཧཏྠཔཱསཱ ཝཱ ན ཝིཛཧིཏབྦཾ.

སཙེ སོ གཱམོ ཨཔརིཀྑིཏྟོ, ཡསྨིཾ གྷརེ ཙཱིཝརཾ ནིཀྑིཏྟཾ, ཏཏྠ ཝཱ ཏསྶ ཧཏྠཔཱསེ ཝཱ ཝཏྠབྦཾ. ནིཝེསནེ པན སཙེ ཨེཀཀུལསྶ ནིཝེསནཾ ཧོཏི, པརིཀྑིཏྟཉྩ, ཨནྟོནིཝེསནེ ཙཱིཝརཾ ནིཀྑིཔིཏྭཱ ཨནྟོནིཝེསནེ ཝཏྠབྦཾ. ཨཔརིཀྑིཏྟཾ ཙེ ཧོཏི, ཡསྨིཾ གབྦྷེ ཙཱིཝརཾ ནིཀྑིཏྟཾ, ཏསྨིཾ ཝཏྠབྦཾ, ཏསྶ གབྦྷསྶ ཧཏྠཔཱསཱ ཝཱ ན ཝིཛཧིཏབྦཾ.

སཙེ ནཱནཱཀུལསྶ ནིཝེསནཾ ཧོཏི, པརིཀྑིཏྟཉྩ, ཡསྨིཾ གབྦྷེ ཙཱིཝརཾ ནིཀྑིཏྟཾ, ཏསྨིཾ གབྦྷེ ཝཏྠབྦཾ, སབྦེསཾ སཱདྷཱརཎདྭཱརམཱུལེ ཝཱ ཏེསཾ གབྦྷདྭཱརམཱུལཱནཾ ཧཏྠཔཱསཱ ཝཱ ན ཝིཛཧིཏབྦཾ. ཨཔརིཀྑིཏྟཾ ཙེ, ཡསྨིཾ གབྦྷེ ཙཱིཝརཾ ནིཀྑིཏྟཾ, ཏསྨིཾ གབྦྷེ ཝཏྠབྦཾ, ཏསྶ གབྦྷསྶ ཧཏྠཔཱསཱ ཝཱ ན ཝིཛཧིཏབྦཾ. ཨེས ནཡོ ཨུདོསིཏཱདཱིསུཔི.

སཏྠོ པན ཛངྒྷསཏྠོ ཝཱ ཧོཏུ, སཀཊསཏྠོ ཝཱ. སཙེ ཨེཀཀུལསྶ སཏྠོ ཧོཏི, སཏྠེ ཙཱིཝརཾ ནིཀྑིཔིཏྭཱ པུརཏོ ཝཱ པཙྪཏོ ཝཱ སཏྟབྦྷནྟརཱ ན ཝིཛཧིཏབྦཱ, པསྶཏོ ཨབྦྷནྟརཾ ན ཝིཛཧིཏབྦཾ. སཙེ (པཱརཱ. ཨཊྛ. ༢.༤༨༩) སཏྠོ གཙྪནྟོ གཱམཾ ཝཱ ནདིཾ ཝཱ པརིཡཱདིཡིཏྭཱ ¶ ཏིཊྛཏི, ཨནྟོཔཝིཊྛེན སདྡྷིཾ ཨེཀཱབདྡྷོ ཧུཏྭཱ ཨོརཉྩ པཱརཉྩ ཕརིཏྭཱ ཋིཏོ ཧོཏི, སཏྠཔརིཧཱརོཝ ལབྦྷཏི. ཨཐ གཱམེ ཝཱ ནདིཡཱ ཝཱ པརིཡཱཔནྣོ ཧོཏི ཨནྟོཔཝིཊྛོ, གཱམཔརིཧཱརོ ཙེཝ ནདིཔརིཧཱརོ ཙ ལབྦྷཏི. སཙེ ཝིཧཱརསཱིམཾ ཨཏིཀྐམིཏྭཱ ཏིཊྛཏི, ཨནྟོསཱིམཱཡ ཙ ཙཱིཝརཾ ཧོཏི, ཝིཧཱརཾ གནྟྭཱ ཝསིཏབྦཾ. སཙེ བཧིསཱིམཱཡ ཙཱིཝརཾ ཧོཏི, སཏྠསམཱིཔེཡེཝ ཝསིཏབྦཾ. སཙེ གཙྪནྟོ སཀཊེ ཝཱ བྷགྒེ, གོཎེ ཝཱ ནཊྛེ ཨནྟརཱ ཚིཛྫཏི, ཡསྨིཾ ཀོཊྛཱསེ ཙཱིཝརཾ ནིཀྑིཏྟཾ, ཏཏྠ ཝསིཏབྦཾ.

ཁེཏྟེཔི (པཱརཱ. ཨཊྛ. ༢.༤༩༠) སཙེ ཨེཀཀུལསྶ ཁེཏྟཾ ཧོཏི, པརིཀྑིཏྟཉྩ, ཨནྟོཁེཏྟེ ཙཱིཝརཾ ནིཀྑིཔིཏྭཱ ཨནྟོཁེཏྟེ ཝཏྠབྦཾ. སཙེ ཨཔརིཀྑིཏྟཾ, ཧཏྠཔཱསཱ ¶ ཙཱིཝརཾ ན ཝིཛཧིཏབྦཾ. སཙེ ནཱནཱཀུལསྶ ཁེཏྟཾ ཧོཏི, པརིཀྑིཏྟཉྩ, ཨནྟོཁེཏྟེ ཙཱིཝརཾ ནིཀྑིཔིཏྭཱ ཁེཏྟདྭཱརམཱུལེ ཝཱ ཝཏྠབྦཾ, ཏསྶ ཧཏྠཔཱསཱ ཝཱ ན ཝིཛཧིཏབྦཾ. སཙེ ཨཔརིཀྑིཏྟཾ, ཙཱིཝརཾ ཧཏྠཔཱསཱ ན ཝིཛཧིཏབྦཾ. ཨེས ནཡོ དྷཉྙཀརཎཱརཱམེསུ དྭཱིསུཔི. ཝིཧཱརེ པན ནིཝེསནེ ཝུཏྟསདིསོཝ ཝིནིཙྪཡོ.

རུཀྑམཱུལེ པན ཡཾ མཛ྄ཛྷནྷིཀེ ཀཱལེ སམནྟཱ ཚཱཡཱ ཕརཏི, ཏསྨིཾ ཋཱནེ ཨཝིརལེ༹ པདེསེ ཏསྶ ཚཱཡཱཡ ཕུཊྛོཀཱསསྶ ཨནྟོཡེཝ ནིཀྑིཔིཏབྦཾ. སཙེ ཝིརལ༹སཱཁསྶ རུཀྑསྶ ཨཱཏཔེན ཕུཊྛོཀཱསེ ཋཔེཏི, ཨརུཎུགྒམནེ ཙ སོ བྷིཀྑུ ཏསྶ ཧཏྠཔཱསེ ན ཧོཏི, ཨཉྙསྨིཾ ཋཱནེ ཏསྶ ཚཱཡཱཡཔི ཧོཏི, ནིསྶགྒིཡཾ ཧོཏི. སཙེ ནཱནཱཀུལསྶ རུཀྑོ ཧོཏི, ཙཱིཝརསྶ ཧཏྠཔཱསཱ ན ཝིཛཧིཏབྦཾ.

ཨཛ྄ཛྷོཀཱསེ པན ཝིཉྫྷཱཊཝིཨཱདཱིསུ ཨརཉྙེསུཔི སམུདྡམཛ྄ཛྷེ མཙྪབནྡྷཱནཾ ཨགམནཔཐདཱིཔཀེསུཔི ཙཱིཝརཾ ཋཔེཏྭཱ ཏཏོ སམནྟཱ སཏྟབྦྷནྟརེ པདེསེ ཡཏྠ ཀཏྠཙི ཝསིཏབྦཾ, ཨིཏོ ཨཉྙཏྠ ཝསནྟོ ཝིཔྤཝུཏྠོ ནཱམ ཧོཏཱིཏི དཊྛབྦཾ.

ཨིམསྶ པན ཝིཏྠཱརསྶ ཨིདྷ ཨཝུཏྟཏྟཱ, སམནྟཔཱསཱདིཀཱཡཉྩ ཝུཏྟཏྟཱ ‘‘ཨཡམེཏྠ སངྑེཔོ’’ཏིཨཱདི ཝུཏྟཾ. ཨེཏྠཱཏི ‘‘ཏིཙཱིཝརེན ཝིཔྤཝསེཡྻཱ’’ཏི ཨེཏསྨིཾ པདེ. སངྑེཔོཏི སངྑེཔཝཎྞནཱ. ཨེཏྠ པན པཱལི༹ཡཾ (པཱརཱ. ༤༧༧) ‘‘གཱམོ ཨེཀཱུཔཙཱརོ ནཱནཱུཔཙཱརོ’’ཏིཨཱདིནཱ ཨཝིསེསེན མཱཏིཀཾ ནིཀྑིཔིཏྭཱཔི གཱམནིཝེསནཨུདོསིཏཁེཏྟདྷཉྙཀརཎཨཱརཱམཝིཧཱརཱནཾ ཨེཀཱུཔཙཱརནཱནཱུཔཙཱརཏཱ ‘‘གཱམོ ཨེཀཱུཔཙཱརོ ནཱམ ཨེཀཀུལསྶ གཱམོ ཧོཏི པརིཀྑིཏྟོ ཙ ཨཔརིཀྑིཏྟོ ཙཱ’’ཏིཨཱདིནཱ (པཱརཱ. ༤༧༨) པརིཀྑིཏྟཱཔརིཀྑིཏྟཝསེན ¶ ཝིབྷཏྟཱ. ཨཊྚམཱལ༹པཱསཱདཧམྨིཡནཱཝཱསཏྠརུཀྑམཱུལཨཛ྄ཛྷོཀཱསཱནཾ པན ཨེཝཾ ཨཝཏྭཱ ‘‘ཨེཀཀུལསྶ ཨཊྚོ ཧོཏི, ནཱནཱཀུལསྶ ཨཊྚོ ཧོཏཱི’’ཏིཨཱདིནཱ (པཱརཱ. ༤༨༤) ནཡེན ཨེཀཀུལནཱནཱཀུལཝསེན ཙ ཨནྟེ ‘‘ཨཛ྄ཛྷོཀཱསོ ཨེཀཱུཔཙཱརོ ནཱམ ཨགཱམཀེ ཨརཉྙེ སམནྟཱ སཏྟབྦྷནྟརཱ ཨེཀཱུཔཙཱརོ, ཏཏོ པརཾ ནཱནཱུཔཙཱརོཏི (པཱརཱ. ༤༩༤) ཙ ཨེཝཾ ཨེཀཱུཔཙཱརནཱནཱུཔཙཱརཏཱ ཝིབྷཏྟཱ. ཏསྨཱ གཱམཱདཱིསུ པརིཀྑིཏྟཾ ཨེཀཱུཔཙཱརཾ, ཨཔརིཀྑིཏྟཾ ¶ ནཱནཱུཔཙཱརནྟི ཙ, ཨཊྚཱདིསུ ཡཾ ཨེཀཀུལསྶ, ཏཾ ཨེཀཱུཔཙཱརཾ, ཡཾ ནཱནཱཀུལསྶ, ཏཾ ནཱནཱུཔཙཱརནྟི ཙ གཧེཏབྦཾ. ཨཛ྄ཛྷོཀཱསེ ཝུཏྟནཡེན གཧེཏབྦཾ. ཨུཔཙཱརོཏི ཧི ‘‘གཱམོ ཨེཀཱུཔཙཱརོ ནཱནཱུཔཙཱརོ’’ཏིཨཱདཱིསུ དྭཱརཾ, ‘‘ཨཛ྄ཛྷོཀཱསོ ཨེཀཱུཔཙཱརོ’’ཏི ཨེཏྠ སམནྟཱ སཏྟབྦྷནྟརསངྑཱཏཾ པམཱཎནྟི ཨཔརེ.

ཨཉྙཏྲ བྷིཀྑུསམྨུཏིཡཱཏི བྷིཀྑུནོ སངྒྷེན དིནྣཱ སམྨུཏི བྷིཀྑུསམྨུཏི, ཏཾ ཝིནཱཏི ཨཏྠོ. ཏེནཱཧ ‘‘ཡཾ སངྒྷོ’’ཏིཨཱདི. ཨཝིཔྤཝཱསསམྨུཏིཾ དེཏཱིཏི ཨཝིཔྤཝཱསཱ སམྨུཏི, ཨཝིཔྤཝཱསཱཡ ཝཱ སམྨུཏི ཨཝིཔྤཝཱསསམྨུཏི, ཏཾ ཉཏྟིདུཏིཡེན ཀམྨེན དེཏཱིཏི ཨཏྠོ.

སནྟརུཏྟརེནཱཏི ‘‘ཨནྟར’’ནྟི ཨནྟརཝཱསཀོ ཝུཙྩཏི, ‘‘ཨུཏྟར’’ནྟི ཨུཏྟརཱསངྒོ, སཧ ཨནྟརེན ཨུཏྟརཾ སནྟརུཏྟརཾ, ཏེན སནྟརུཏྟརེན, སཧ ཨནྟརཝཱསཀེན ཨུཏྟརཱསངྒེནཱཏི ཨཏྠོ. ཨནྟོཨརུཎེ པཙྩུདྡྷཊེཏི ནིཝཏྟིཏྭཱ སམྤཱཔུཎིཏུམསཀྐོནྟེན ཏཏྠེཝ ཋཏྭཱ ཨནྟོ ཨརུཎེ པཙྩུདྡྷཊེ. པཙྩཱགནྟབྦནྟི ཡཐཱ རོགོ ན ཀུཔྤཏི, ཏཐཱ པུན ཙཱིཝརསྶ ཋཔིཏཊྛཱནཾ ཨཱགནྟབྦཾ. ཡཏོ པཊྛཱཡ ཧི སཏྠཾ ཝཱ པརིཡེསཏི, ‘‘གཙྪཱམཱི’’ཏི ཨཱབྷོགཾ ཝཱ ཀརོཏི, ཏཏོ པཊྛཱཡ ཝཊྚཏི. ‘‘ན དཱནི གམིསྶཱམཱི’’ཏི ཨེཝཾ པན དྷུརནིཀྑེཔཾ ཀརོནྟེན པཙྩུདྡྷརིཏབྦཾ ‘‘ཨཏིརེཀཙཱིཝརཊྛཱནེ ཋསྶཏཱི’’ཏི. ཏེནཱཧ ‘‘ཏཏྠེཝ ཝཱ ཋིཏེན པཙྩུདྡྷརིཏབྦ’’ནྟི. སོཏི ཡསྶ སམྨུཏི དིནྣཱ, སོ རོགོ. ལདྡྷཀཔྤིཡམེཝ པུན སམྨུཏིདཱནཀིཙྩཾ ནཏྠཱིཏི ཨདྷིཔྤཱཡོ.

ཨདྷིཊྛིཏཙཱིཝརཏཱཏི ཏིཙཱིཝརཱདྷིཊྛཱནནཡེན ཨདྷིཊྛིཏཙཱིཝརཏཱ. ཝིཔྤཝཱསོ ནཱམ ཡདི བདྡྷསཱིམཱཡཾ ཙཱིཝརཾ ཧོཏི, ཏཏོ བཧི ཨརུཎུཊྛཱཔནཾ. ཨཐ ཨབདྡྷསཱིམཱཡཾ, ཡཐཱཝུཏྟགཱམཱདཱིནཾ བཧི ཧཏྠཔཱསཱཏིཀྐམེ ཨརུཎུཊྛཱཔནཾ. བདྡྷསཱིམཱཡཾ པན ཡཏྠ ཀཏྠཙི ཙཱིཝརཾ ཋཔེཏྭཱ ཨནྟོསཱིམཱཡམེཝ ཡཏྠ ཀཏྠཙི ཝསིཏུཾ ཝཊྚཏི. ཨིདྷ ཨཔཙྩུདྡྷརཎཾ ཨཀིརིཡཱཏི སམྦནྡྷོ.

ཨུདོསིཏསིཀྑཱཔདཝཎྞནཱ ནིཊྛིཏཱ.

༣. ཨཀཱལཙཱིཝརསིཀྑཱཔདཝཎྞནཱ

པུརིམསིཀྑཱཔདེ ¶ ¶ ཝིཡ ཨེཏྠཱཔི བྷིཀྑུནཱཏི སཱམིཨཏྠེ ཀརཎཝཙནནྟི ཨཱཧ ‘‘ནིཊྛིཏཙཱིཝརསྨིཾ བྷིཀྑུནཱ’’ཏིཨཱདི. ‘‘ཨཀཱལཙཱིཝརཾ ནཱམ ཨནཏྠཏེ ཀཐིནེ ཨེཀཱདསམཱསེ ཨུཔྤནྣཾ, ཨཏྠཏེ ཀཐིནེ སཏྟམཱསེ ཨུཔྤནྣཾ, ཀཱལེཔི ཨཱདིསྶ དིནྣཾ, ཨེཏཾ ཨཀཱལཙཱིཝརཾ ནཱམཱ’’ཏི (པཱརཱ. ༥༠༠) པདབྷཱཛནིཡཾ ཝུཏྟཏྟཱ ‘‘ཡྭཱཡཾ ཨནཏྠཏེ ཀཐིནེ’’ཏིཨཱདིམཱཧ. ཡྭཱཡཾ ཙཱིཝརཀཱལོ ཝུཏྟོཏི སམྦནྡྷོ. ཝསྶཱནསྶཱཏི ཝསྶཱནསངྑཱཏསྶ ཨུཏུནོ. པཙྪིམོ མཱསོ ནཱམ ཙཱིཝརམཱསོ. ཏསྨིཉྷི ཨནཏྠཏེཔི ཀཐིནེ ཨུཔྤནྣཾ ཙཱིཝརཾ ཨནདྷིཊྛིཏཾ, ཨཝིཀཔྤིཏཾ ཋཔེཏུཾ ཝཊྚཏི. པཉྩ མཱསཱཏི པཙྪིམཀཏྟིཀམཱསོ, ཧེམནྟིཀཱ ཙཏྟཱརོ ཙཱཏི པཉྩ མཱསཱ. ཨཉྙདཱཏི ཨནཏྠཏེ ཀཐིནེ ཨེཀཱདསམཱསེ, ཨཏྠཏེ ཀཐིནེ སཏྟམཱསེ. ཀཱལེཔཱིཏི ‘‘ཨནཏྠཏེ ཀཐིནེ ཙཱིཝརམཱསོ, ཨཏྠཏེ ཀཐིནེ པཉྩ མཱསཱ’’ཏི ཡཐཱཝུཏྟཙཱིཝརཀཱལེཔི. ‘‘ཨཱདིནཱ ནཡེནཱ’’ཏི ཨིམིནཱ ‘‘དདཱམི དཛྫཱམཱི’’ཏིཨཱདཱིནཾ (པཱརཱ. ཨཊྛ. ༢.༤༦༩) སངྒཧོ. ཀིཉྩཱཔི ཙེཏཱནི སབྦཱནི ‘‘ཨཀཱལཙཱིཝར’’ནྟི ཝུཏྟཱནི, ཏཐཱཔི པིཊྛིསམཡེཡེཝ ཨུཔྤནྣཱནི ‘‘ཨཀཱལཙཱིཝར’’ནྟི ཨིདྷཱདྷིཔྤེཏཱནི.

‘‘ཀཱལེ སངྒྷསྶ ཨིདཾ ཨཀཱལཙཱིཝར’’ནྟི དིནྣཾ པན ཨཀཱལཙཱིཝརསཱམཉྙཏོ ཨཏྠུདྡྷཱརཝསེན ཝུཏྟཾ. ཡཐཱ པིཊྛིསམཡེ ཨུཔྤནྣཾ ཙཱིཝརཾ ཝུཊྛཝསྶེཧི, སེསེཧི ཙ སམྨུཁཱིབྷཱུཏེཧི བྷཱཛེཏུཾ ལབྦྷཏཱིཏི ཨཀཱལཙཱིཝརཾ ནཱམ ཛཱཏཾ, ཏཐེཝིདམྤཱིཏི ཏདིདཾ ཨཀཱལཙཱིཝརསཱམཉྙཾ. ཡདི ཨེཝཾ ‘‘པུགྒལསྶ ཝཱ ཨིདཾ ཏུཡ྄ཧཾ ‘དམྨཱི’ཏིཨཱདིནཱ ནཡེན དིནྣ’’ནྟི ཀསྨཱ ཝུཏྟཾ, ན ཧི པུགྒལསྶ ཨཱདིསྶ དིནྣཾ ཀེནཙི བྷཱཛནཱིཡཾ ཧོཏཱིཏི? ནཱཡཾ ཝིརོདྷོ, ཨཱདིསྶ དཱནསཱམཉྙཏོ ལབྦྷམཱནམཏྠཾ དསྶེཏུཾ ཏཐཱ ཝུཏྟནྟི. ཨཏྟནོ ཝཱ དྷནེནཱཏི ཨཏྟནོ ཀཔྤཱསསུཏྟཱདིནཱ དྷནེན. ཨིམསྶ ‘‘ཨུཔྤཛྫེཡྻཱ’’ཏི ཨིམིནཱ སམྦནྡྷོ ཝེདིཏབྦོ. ‘‘སཱིམཱཡ དེཏཱི’’ཏིཨཱདི པུགྒལཱདྷིཊྛཱནནཡེན ཝུཏྟཾ. ཨེཏྠ པན སཱིམཱཡ དཱནཾ ཨེཀཱ མཱཏིཀཱ, ཀཏིཀཱཡ དཱནཾ དུཏིཡཱ…པེ… པུགྒལསྶ དཱནཾ ཨཊྛམཱ.

‘‘པརིཀྑེཔཱརཧཊྛཱནེནཱ’’ཏི ཨིམིནཱ ཨཔརིཀྑིཏྟསྶ ཝིཧཱརསྶ དྷུཝསནྣིཔཱཏཊྛཱནཱདིཏོ པཋམལེཌྜུཔཱཏསྶ ཨནྟོ ཨུཔཙཱརསཱིམཱཏི དསྶེཏི. ཨིདཱནི ¶ དུཏིཡལེཌྜུཔཱཏསྶཔི ཨནྟོ ཨུཔཙཱརསཱིམཱཡེཝཱཏི དསྶེཏུཾ ‘‘ཨཔིཙཱ’’ཏིཨཱདི ཨཱརདྡྷཾ. དྷུཝསནྣིཔཱཏཊྛཱནམྤི སཱིམཱཔརིཡནྟགཏམེཝ ཝེདིཏབྦཾ. ཨཱཝཱསེ ཝཌྜྷནྟེ ཝཌྜྷཏཱིཏི སཙེ ཨུཔཙཱརཏོ ཨབཧིབྷཱུཏོ ཧུཏྭཱ ཨཱཝཱསོ ཝཌྜྷཏཱིཏི ཨདྷིཔྤཱཡོ. མཧཱཔཙྩརིཡཾ པན ‘‘བྷིཀྑཱུསུཔི ཝཌྜྷནྟེསུ ཝཌྜྷཏཱི’’ཏི ཝུཏྟཾ. ‘‘སཙེ ¶ ཝིཧཱརེ སནྣིཔཏིཏབྷིཀྑཱུཧི སདྡྷིཾ ཨེཀཱབདྡྷཱ ཧུཏྭཱ ཡོཛནསཏམྤི པཱུརེཏྭཱ ནིསཱིདནྟི, ཡོཛནསཏམྤི ཨུཔཙཱརསཱིམཱཝ ཧོཏི, སབྦེསཾ ལཱབྷོ པཱཔུཎཱཏཱི’’ཏི (མཧཱཝ. ཨཊྛ. ༣༧༩) སམནྟཔཱསཱདིཀཱཡཾ ཝུཏྟཾ. བྷིཀྑུནཱིནཾ ཨཱརཱམཔཝེསནསེནཱསནཱཔུཙྪནཱནཱིཏི ཨཱགནྟུཀགམིཀཱནཾ བྷིཀྑུནཱིནཾ ཨཱརཱམཔཝེསནཱཔུཙྪནཾ, སེནཱསནཱཔུཙྪནཉྩཱཏི ཨཏྠོ. ཏཐཱ ཧི ཨཱགནྟུཀཱཡ བྷིཀྑུནིཡཱ ཨཱརཱམཔཝེསནཾ ཨཱཔུཙྪིཏབྦཾ, གམིཀཱཡ སངྒྷིཀཾ དསཝིདྷཾ སེནཱསནཾ. ཨེཏྠ ཙ ཀིཉྩཱཔི ‘‘བྷིཀྑུནཱིན’’ནྟི ཝུཏྟཾ, གམིཀསྶ པན བྷིཀྑུསྶཱཔི ཨིམིསྶཱཡེཝ སཱིམཱཡ ཝསེན སེནཱསནཱཔུཙྪནཾ ཝེདིཏབྦཾ.

པརིཝཱསམཱནཏྟཱརོཙནནྟི པཱརིཝཱསིཀམཱནཏྟཙཱརཱིནཾ པརིཝཱསཱརོཙནཾ, མཱནཏྟཱརོཙནཉྩ. ཝསྶཙྪེདནིསྶཡསེནཱསནགྒཱཧཱདིཝིདྷཱནནྟི ཝསྶཙྪེདཝིདྷཱནཾ, ནིསྶཡགྒཱཧཝིདྷཱནཾ, སེནཱསནགྒཱཧཝིདྷཱནནྟི ཨཏྠོ. ཨཱདིསདྡེན ནིསྶཡཔཊིཔྤསྶདྡྷི, ལཱབྷགྒཱཧོ ཨཱགནྟུཀཝཏྟཾ པཱུརེཏྭཱ ཨཱརཱམཔཝེསནནྟི ཨེཝམཱདིཀཾ སངྒཎྷཱཏི. ཨིམིསྶཱཝ སཱིམཱཡ ཝསེནཱཏི ཨུཔཙཱརསཱིམཱཡེཝཱཏི ཡཐཱསམྦྷཝཾ ཨནྟོ, བཧི ཙ ཨིམསྶ སབྦསྶ ལབྦྷནཏོ ཝུཏྟཾ.

ལཱབྷཏྠཱཡ ཋཔིཏཱ སཱིམཱ ལཱབྷསཱིམཱ (མཧཱཝ. ༣༧༩), སཱ ཙ ཁོ ནེཝ སམྨཱསམྦུདྡྷེན ཨནུཉྙཱཏཱ, ན དྷམྨསངྒཱཧཀཏྠེརེཧི ཋཔིཏཱ, ཨཔིཙ ཁོ ལཱབྷདཱཡཀེཧི. ཏེནཱཧ ‘‘ཡཾ རཱཛརཱཛམཧཱམཏྟཱདཡོ’’ཏིཨཱདི. སམནྟཱཏི ཝིཧཱརསྶ སམནྟཱ. ཡནྟི སུངྐསསྶཱདི. ‘‘སཱིམཾ ཋཔེནྟཱི’’ཏི པཱཋསེསོ. ཨེཀསྶ རཉྙོ ཨཱཎཱཔཝཏྟིཊྛཱནནྟི ཙོལ༹བྷོགོ ཀེརལ༹བྷོགོཏི ཨེཝཾ ཨེཀེཀསྶ རཉྙོ ཨཱཎཱཔཝཏྟིཊྛཱནཾ. དྭིདྷཱ ཨཱཔོ གཏོ ཨེཏྠཱཏི དཱིཔོ, ཨོགྷེན ཨནཛ྄ཛྷོཏྠཏོ བྷཱུམིབྷཱགོ, སོཝ སཱིམཱ དཱིཔསཱིམཱ. ཏེནཱཧ སམུདྡནྟེནཱ’’ཏིཨཱདི. ཙཀྐཝཱལ༹སཱིམཱ ཙཀྐཝཱལ༹པབྦཏེནེཝ པརིཙྪིནྣཱཏི ཨཱཧ ‘‘ཨེཀཙཀྐཝཱལ༹པབྦཏཔརིཀྑེཔབྦྷནྟརཾ ཙཀྐཝཱལ༹སཱིམཱ’’ཏི.

སེསཱཏི ¶ ཁཎྜསཱིམཱདཡོ. ཁཎྜསཱིམཱཡ དེམཱཏི དིནྣནྟི ཁཎྜསཱིམཱཡ ཀེནཙི ཀམྨེན སནྣིཔཏིཏཾ སངྒྷཾ དིསྭཱ ‘‘ཁཎྜསཱིམཱཡཾ སངྒྷསྶ དེམཱ’’ཏི དིནྣཾ. ཁཎྜསཱིམཱཡ ཋིཏེ རུཀྑེ ཝཱ པབྦཏེ ཝཱ ཋིཏོཔི ཧེཊྛཱ ཝཱ པཐཝིཝེམཛ྄ཛྷགཏོཔི ཁཎྜསཱིམཱཡེཝ ཋིཏོཏི ཝེདིཏབྦོ. སམཱནསཾཝཱསསཱིམཱཡ དིནྣནྟི ‘‘སམཱནསཾཝཱསསཱིམཱཡ དམྨཱི’’ཏི དིནྣཾ. ཨེས ནཡོ སེསེསུཔི. ཁཎྜསཱིམཱ སཱིམནྟརིཀཊྛཱནཾ ན པཱཔུཎཱཏི ཏཏྠ སམཱནསཾཝཱསསཱིམཱཡ ཨབྷཱཝཏོཏི ཨདྷིཔྤཱཡོ. སམཱནསཾཝཱསཨཝིཔྤཝཱསསཱིམཱསུ དིནྣསྶ ཨིདཾ ནཱནཱཏྟཾ – ‘‘ཨཝིཔྤཝཱསསཱིམཱཡ དམྨཱི’’ཏི དིནྣཾ གཱམཊྛཱནཾ ན པཱཔུཎཱཏི. ཀསྨཱ? ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི (མཧཱཝ. ༡༤༤) ཝུཏྟཏྟཱ ¶ . ‘‘སམཱནསཾཝཱསསཱིམཱཡ དམྨཱི’’ཏི དིནྣཾ པན གཱམེ ཋིཏཱནམྤི པཱཔུཎཱཏཱིཏི. ཨབྦྷནྟརསཱིམཱཨུདཀུཀྑེཔསཱིམཱསུ དིནྣནྟི ཏཏྠ ཨུཔོསཐཱདིཨཏྠཱཡ སནྣིཔཏིཏེ དིསྭཱ ‘‘ཨིམིསྶཱ ཨབྦྷནྟརསཱིམཱཡ དེམཱ’’ཏིཨཱདིནཱ དིནྣཾ. ཛནཔདརཊྛརཛྫདཱིཔཙཀྐཝཱལ༹སཱིམཱསུཔི གཱམསཱིམཱདཱིསུ ཝུཏྟསདིསོཝ ཝིནིཙྪཡོཏི ཨཱཧ ‘‘ཛནཔདསཱིམཱདཱིསཱུ’’ཏིཨཱདི. ཨེཀོཔི གནྟྭཱ སབྦེསཾ སངྒཎྷིཏུཾ ལབྷཏཱིཏི ཨེཀོཔི གནྟྭཱ ཨིདྷ ཝསྶགྒེན བྷཱཛེཏྭཱ གཧེཏྭཱ ཨཱགནྟུཾ ལབྷཏཱིཏི ཨཏྠོ. ཨེཀོཏི སབྷཱགོ ཨེཀོ བྷིཀྑུ, ཨཡམྤི བྷཱགམེཝ གཧེཏུཾ ལབྷཏི. ཏེནཱཧ ‘‘སབྷཱགཱནཾ བྷཱགཾ གཎྷཱཏཱི’’ཏི.

ཨེཝཾ ཏཱཝ ཡོ སཱིམཾ པརཱམསིཏྭཱ དེཏི, ཏསྶ དཱནེ ཝིནིཙྪཡཾ ཝཏྭཱ ཨིདཱནི ཡོ ‘‘ཨསུཀསཱིམཱཡཱ’’ཏི ཝཏྟུཾ ན ཛཱནཱཏི, ཀེཝལཾ ‘‘སཱིམཱ’’ཏི ཝཙནམཏྟམེཝ ཛཱནནྟོ ཝིཧཱརཾ ཨཱགནྟྭཱ ‘‘སཱིམཱཡ དམྨཱི’’ཏི ཝཱ ‘‘སཱིམཊྛཀསངྒྷསྶ དམྨཱི’’ཏི ཝཱ བྷཎཏི, ཏཏྠ ཝིནིཙྪཡཾ དསྶེཏུཾ ‘‘ཡོ པན ཝིཧཱརཾ པཝིསིཏྭཱ’’ཏིཨཱདིམཱཧ. ཀཏརནྟི ཀཏརསཱིམཾ. ཨཧམེཏཾ བྷེདཾ ན ཛཱནཱམཱིཏི ཨཧཾ ‘‘ཨསུཀཱ སཱིམཱ’’ཏི ཨེཏཾ ཝིབྷཱགཾ ན ཛཱནཱམི. ཨུཔཙཱརསཱིམཊྛེཧི བྷཱཛེཏབྦཾ ལཱབྷསྶ ཨུཔཙཱརསཱིམཱཡ པརིཙྪིནྣཏྟཱཏི ཨདྷིཔྤཱཡོ. སཱཏི སམཱནལཱབྷཀཏིཀཱ.

ཡཏྠ མཡ྄ཧཾ དྷུཝཀཱརཱ ཀརཱིཡནྟཱིཏི (མཧཱཝ. ཨཊྛ. ༣༧༩) ཨེཏྠ ཡསྨིཾ ཝིཧཱརེ ཏསྶ ཙཱིཝརདཱཡཀསྶ སནྟཀཾ སངྒྷསྶ པཱཀཝཏྟཾ ཝཱ ཝཏྟཏི. ཡསྨིཾ ཝིཧཱརེ བྷིཀྑཱུ ཨཏྟནོ བྷཱརཾ ཀཏྭཱ སདཱ གེཧེ བྷོཛེཏི, ཡཏྠ ཝཱ ཨནེན ཨཱཝཱསོ ཝཱ ཀཱརིཏོ, སལཱཀབྷཏྟཱདཱིནི ཝཱ ནིབདྡྷཱནི, ཨིམེ དྷུཝཀཱརཱ ¶ ནཱམ. ཡེན པན སཀལོཔི ཝིཧཱརོ པཏིཊྛཱཔིཏོ, ཏཏྠ ཝཏྟབྦམེཝ ནཏྠི. ཏེནཱཧ ‘‘ཡཏྠ ཏསྶ པཱཀཝཏྟཾ ཝཱ ཝཏྟཏཱི’’ཏིཨཱདི. ཏཏྠ པཱཀཝཏྟནྟི དཱནཝཏྟཾ. ཝཏྟཏཱིཏི པཝཏྟཏི. ཡཏོཏི ཡསྨཱ ཝིཧཱརཱ. ཡཏྠཱཏི ཡསྨིཾ ཝིཧཱརེ. སབྦཏྠཱཏི སབྦེསུ ཝིཧཱརེསུ. མཱཏིཀཾ ཨཱརོཔེཏྭཱཏི ཨེཀསྨིཾ ཝིཧཱརེ བྷིཀྑཱུ བཧུཏརཱ, ཨེཀསྨིཾ ཐོཀཏརཱ, ཨེཀཉྩ ཝཏྠཾ, དྷུཝཀཱརཊྛཱནཉྩ བཧུཀཾ, ཀཏྠ དེམཱཏི པུཙྪིཏྭཱ, ཡདི པན མཉྩོ ཝཱ པཱིཋཾ ཝཱ ཨེཀམེཝ ཧོཏི, ཏཾ པུཙྪིཏྭཱ ཡསྶ ཝཱ ཝིཧཱརསྶ, ཨེཀཝིཧཱརེཔི ཝཱ ཡསྶ སེནཱསནསྶ སོ ཝིཙཱརེཏི, ཏཏྠ དཱཏབྦཾ. སཙེཔི ‘‘ཨསུཀབྷིཀྑུ གཎྷཏཱུ’’ཏི ཝདཏི, ཝཊྚཏི. ཨཐ ‘‘མཡ྄ཧཾ དྷུཝཀཱརེ དེཐཱ’’ཏི ཝཏྭཱ ཨཝིཙཱརེཏྭཱཝ གཙྪཏི, སངྒྷསྶཔི ཝིཙཱརེཏུཾ ཝཊྚཏི. ཨེཝཾ པན ཝིཙཱརེཏབྦཾ – ‘‘སངྒྷཏྠེརསྶ ཝསནཊྛཱནེ དེཐཱ’’ཏི ཝཏྟབྦཾ. སཙེ ཏཏྠ སེནཱསནཾ པརིཔུཎྞཾ ཧོཏི, ཡཏྠ ནཔྤཧོཏི, ཏཏྠ དཱཏབྦཾ. སཙེ ཨེཀོ བྷིཀྑུ ‘‘མཡ྄ཧཾ ཝསནཊྛཱནེ སེནཱསནཔརིབྷོགབྷཎྜཾ ནཏྠཱི’’ཏི ཝདཏི, ཏཏྠ དཱཏབྦཾ.

སངྒྷསྶ ¶ དམྨཱིཏི དིནྣནྟི ‘‘ཨིམཱནི ཙཱིཝརཱནི སངྒྷསྶ དམྨཱི’’ཏི ཨེཝཾ དིནྣཾ. ཏཏོ བཧིདྡྷཱཔཱིཏི ཨུཔཙཱརསཱིམཱཏོ བཧིདྡྷཱཔི. ཏེཧི སདྡྷིནྟི ཨུཔཙཱརསཱིམཱགཏེཧི སདྡྷིཾ. ཨེཀཱབདྡྷཱནཉྩ པཱཔུཎཱཏི པརིསཱཝསེན ཝཌྜྷིཏཱ སཱིམཱ ཧོཏཱིཏི ཀཏྭཱཏི ཨདྷིཔྤཱཡོ. ཏསྨཱཏི ཡསྨཱ ཨུཔཙཱརསཱིམཱགཏཱནཾ པཱཔུཎཱཏི, ཡསྨཱ ཙ ཏཏོ བཧིདྡྷཱཔི ཨུཔཙཱརསཱིམོཀྐནྟེཧི ཨེཀཱབདྡྷཱནཾ པཱཔུཎཱཏི, ཏསྨཱ. ཏེསནྟི ཨུཔཙཱརསཱིམཱགཏཱནཾ, ཏཏོ བཧིདྡྷཱ ཏེཧི སདྡྷིཾ ཨེཀཱབདྡྷཱནཉྩ. གཱཧཏེ སཏཱིཏི ཨནྟེཝཱསིཀཱདིཀེ གཎྷནྟེ སཏི. ཨསམྤཏྟཱནམྤཱིཏི ཨུཔཙཱརསཱིམཱཡཾ ཋིཏེཧི གྷཎྚིཾ པཧརིཏྭཱ ཀཱལཾ གྷོསེཏྭཱ ལཱབྷབྷཱཛནཊྛཱནཾ ཨསམྤཏྟཱནམྤི ཨུཔཙཱརསཱིམཱཡ པཝིཊྛཱནཾ, ཏེཧི ཝཱ སདྡྷིཾ ཨེཀཱབདྡྷཱནཾ ཧུཏྭཱ ཨཏྟནོ ཝིཧཱརདྭཱརེ ཝཱ ཨནྟོཝིཧཱརེཡེཝ ཝཱ ཋིཏཱནཉྩཱཏི ཨཏྠོ. བྷཱགོ དཱཏབྦོཏི སངྒྷནཝཀསྶ དིནྣེཔཱིཏི ཨདྷིཔྤཱཡོ. དུཏིཡབྷཱགེ པན ཐེརཱསནཾ ཨཱརུལ༹ྷེ ཨཱགཏཱནཾ པཋམབྷཱགོ ན པཱཔུཎཱཏི. དུཏིཡབྷཱགཏོ ཝསྶགྒེན དཱཏབྦཾ.

སཙེ པན ‘‘བཧིཨུཔཙཱརསཱིམཱཡཾ ཋིཏཱནཾ དེཐཱ’’ཏི ཝདནྟི, ན དཱཏབྦཾ. ཡདི པན ཝིཧཱརོ མཧཱ ཧོཏི, ཐེརཱསནཏོ པཊྛཱཡ ཝཏྠེསུ དཱིཡམཱནེསུ ¶ ཨལསཛཱཏིཀཱ མཧཱཐེརཱ པཙྪཱ ཨཱགཙྪནྟི, ‘‘བྷནྟེ, ཝཱིསཏིཝསྶཱནཾ དཱིཡཏི, ཏུམྷཱཀཾ ཋིཏིཀཱ ཨཏིཀྐནྟཱ’’ཏི ན ཝཏྟབྦཱ. ཋིཏིཀཾ ཋཔེཏྭཱ ཏེསཾ དཏྭཱ པཙྪཱ ཋིཏིཀཱཡ དཱཏབྦཾ.

‘‘ཨསུཀཝིཧཱརེ ཀིར བཧུཙཱིཝརཾ ཨུཔྤནྣ’’ནྟི སུཏྭཱ ཡོཛནནྟརིཀཝིཧཱརཏོཔི བྷིཀྑཱུ ཨཱགཙྪནྟི, སམྤཏྟསམྤཏྟཱནཾ ཋིཏཊྛཱནཏོ པཊྛཱཡ དཱཏབྦཾ, ཨཡམེཏྠ སངྑེཔོ. ཝིཏྠཱརོ པན སམནྟཔཱསཱདིཀཱཡ ཙཱིཝརཀྑནྡྷཀཝཎྞནཱཡཾ (མཧཱཝ. ཨཊྛ. ༣༧༩) ཝུཏྟནཡེན ཝེདིཏབྦོ.

ཨེཝཾ ཝིཧཱརཾ པཝིསིཏྭཱ ‘‘ཨིམཱནི ཙཱིཝརཱནི སངྒྷསྶ དམྨཱི’’ཏི དིནྣེསུ ཝིནིཙྪཡཾ ཝཏྭཱ ཨིདཱནི བཧིཨུཔཙཱརསཱིམཱཡཾ བྷིཀྑུཾ དིསྭཱ ‘‘སངྒྷསྶ དམྨཱི’’ཏི དིནྣེསུ ཝིནིཙྪཡཾ དསྶེཏུཾ ‘‘ཡཾ པནཱ’’ཏིཨཱདི ཝུཏྟཾ. ཨེཀཱབདྡྷཔརིསཱཡ པཱཔུཎཱཏཱིཏི སཙེ ཡོཛནཾ ཕརིཏྭཱ པརིསཱ ཋིཏཱ ཧོཏི, ཨེཀཱབདྡྷཱ ཙེ, སབྦེསཾ པཱཔུཎཱཏཱིཏི ཨཏྠོ. ཨེཀཱབདྡྷཏཱ ཙེཏྠ དྭཱདསཧཏྠབྦྷནྟརཏོ པརིཙྪིནྡིཏབྦཱ. ཏེནཱཧ ‘‘ཡེ པནཱ’’ཏིཨཱདི.

ཨུབྷཏོསངྒྷསྶ དིནྣནྟི (མཧཱཝ. ཨཊྛ. ༣༧༩) ‘‘ཨུབྷཏོསངྒྷསྶ དམྨཱི’’ཏི དིནྣཾ. ‘‘དྭེདྷཱསངྒྷསྶ དམྨི, དྭིནྣཾ སངྒྷཱནཾ དམྨི, བྷིཀྑུསངྒྷསྶ ཙ བྷིཀྑུནིསངྒྷསྶ ཙ དམྨཱི’’ཏི ཝུཏྟེཔི ཨུབྷཏོསངྒྷསྶ དིནྣམེཝ ཧོཏི. ཨུཔཌྜྷཾ བྷིཀྑཱུནཾ, ཨུཔཌྜྷཾ བྷིཀྑུནཱིནཾ དཱཏབྦནྟི དྭེ བྷཱགེ སམེ ¶ ཀཏྭཱ ཨེཀོ བྷཱགོ བྷིཀྑཱུནཾ, ཨེཀོ བྷཱགོ བྷིཀྑུནཱིནཾ དཱཏབྦོ. གཧེཏུཾ ལབྷཏི ཨུབྷཏོསངྒྷགྒཧཎེན གཧིཏཏྟཱཏི ཨདྷིཔྤཱཡོ. ཙེཏིཡསྶཱཏི ཐཱུཔཱདིནོ. ཏཉྷི དྷཱཏཱཡཏནཱདིབྷཱཝེན ཙིཏཏྟཱ, ལོཀསྶ ཙིཏྟཱིཀཱརཊྛཱནཏཱཡ ཙ ‘‘ཙེཏིཡ’’ནྟི ཝུཙྩཏི. ན ཀོཙི ཝིསེསོཏི ཨཱཧ ‘‘ཨིདྷ པན ཙེཏིཡསྶཱ’’ཏིཨཱདི.

‘‘ཨུབྷཏོསངྒྷསྶ ཙ ཏུཡ྄ཧཉྩ ཙེཏིཡསྶ ཙཱ’’ཏི ཝུཏྟེ པན དྭཱཝཱིསཏིཀོཊྛཱསེ ཀཏྭཱ དས བྷིཀྑཱུནཾ, དས བྷིཀྑུནཱིནཾ, ཨེཀོ པུགྒལསྶ, ཨེཀོ ཙེཏིཡསྶ དཱཏབྦོ. ཏཏྠ པུགྒལོ སངྒྷཏོཔི ཨཏྟནོ ཝསྶགྒེན པུན གཧེཏུཾ ལབྷཏི, ཙེཏིཡསྶ ཨེཀོཡེཝ. ཨཡཾ པན ཝཱརོ ཡཐཱཝུཏྟེནེཝ ནཡེན ཉཱཡཏཱིཏི ཀཏྭཱ ཨིདྷ ན ཝུཏྟོ. སམནྟཔཱསཱདིཀཱཡཾ (མཧཱཝ. ཨཊྛ. ༣༧༩) པན ཝུཏྟོཡེཝ.

ན ¶ མཛ྄ཛྷེ བྷིནྡིཏྭཱ དཱཏབྦཾ ‘‘བྷིཀྑུནཱིན’’ནྟི པུགྒལིཀཝསེན ཝུཏྟཏྟཱ. པུགྒལོ ཝིསུཾ ན ལབྷཏཱིཏི པུབྦེ ཝིཡ ཝིསུཾ པུགྒལིཀཀོཊྛཱསཾ ན ལབྷཏི. པཱཔུཎནཊྛཱནཏོ ཨེཀམེཝ ལབྷཏཱིཏི ཨཏྟནོ ཝསྶགྒེན པཏྟབྦཊྛཱནཏོ ཨེཀམེཝ ཀོཊྛཱསཾ ལབྷཏི. ཀསྨཱ? བྷིཀྑུསངྒྷགྒཧཎེན གཧིཏཏྟཱ. ‘‘བྷིཀྑུསངྒྷསྶ ཙ བྷིཀྑུནཱིནཉྩ ཏུཡ྄ཧཉྩ ཙེཏིཡསྶ ཙཱ’’ཏི ཝུཏྟེཔི ཙེཏིཡསྶ ཨེཀཔུགྒལཔཊིཝཱིསོ ལབྦྷཏི, པུགྒལསྶ ཝིསུཾ ན ལབྦྷཏི. ཏསྨཱ ཨེཀཾ ཙེཏིཡསྶ དཏྭཱ ཨཝསེསཾ བྷིཀྑཱུ ཙ བྷིཀྑུནིཡོ ཙ གཎེཏྭཱ བྷཱཛེཏབྦཾ. ཏེནཱཧ ‘‘ཙེཏིཡསྶ ཙཱཏི ཝུཏྟེ པནཱ’’ཏིཨཱདི.

ཏེཧི སདྡྷིཾ པུགྒལཙེཏིཡཔརཱམསནཾ ཨནནྟརནཡསདིསམེཝཱཏི ཏེཧི བྷིཀྑཱུཧི བྷིཀྑུནཱིཧི སདྡྷིཾ པུགྒལསྶ ཙ ཙེཏིཡསྶ ཙ གཧཎཾ ཨནནྟརནཡསདིསམེཝཱཏི ཨཏྠོ. ‘‘བྷིཀྑཱུནཉྩ བྷིཀྑུནཱིནཉྩ ཏུཡ྄ཧཉྩ, བྷིཀྑཱུནཉྩ བྷིཀྑུནཱིནཉྩ ཙེཏིཡསྶ ཙ, བྷིཀྑཱུནཉྩ བྷིཀྑུནཱིནཉྩ ཏུཡ྄ཧཉྩ ཙེཏིཡསྶ ཙཱ’’ཏི ཝུཏྟེཔི ཙེཏིཡསྶ ཨེཀཔཊིཝཱིསོ ལབྦྷཏི, པུགྒལསྶ ཝིསུཾ ནཏྠི, བྷིཀྑཱུ ཙ བྷིཀྑུནིཡོ ཙ གཎེཏྭཱཝ བྷཱཛེཏབྦནྟི ཝུཏྟཾ ཧོཏི. པུགྒལསྶ ཝིསུཾ ན ལབྦྷཏཱིཏི པུགྒལསྶ ཝིསུཾ པཊིཝཱིསོ ན ལབྦྷཏི, ཝསྶགྒེན ཨེཀོཝ ལབྦྷཏཱིཏི ཨཏྠོ. ‘‘བྷིཀྑུསངྒྷསྶ ཙ ཙེཏིཡསྶ ཙཱ’’ཏི ཝུཏྟེ པན ཙེཏིཡསྶ ཝིསུཾ པཊིཝཱིསོ ལབྦྷཏཱིཏི ཨཱཧ ‘‘ཙེཏིཡསྶ པན ལབྦྷཏཱི’’ཏི. ‘‘བྷིཀྑུསངྒྷསྶ ཙ ཏུཡ྄ཧཉྩ ཙེཏིཡསྶ ཙཱ’’ཏི ཝུཏྟེཔི ཙེཏིཡསྶེཝ ཝིསུཾ ལབྦྷཏི, ན པུགྒལསྶ. ཙེཏིཡསྶ པན ལབྦྷཏིཡེཝཱཏི ‘‘བྷིཀྑཱུནཉྩ ཙེཏིཡསྶ ཙཱ’’ཏི ཝུཏྟེ པན ཙེཏིཡསྶ ཝིསུཾ པཊིཝཱིསོ ལབྦྷཏཱིཏི ¶ ཨཏྠོ. ‘‘བྷིཀྑཱུནཉྩ ཏུཡ྄ཧཉྩ ཙེཏིཡསྶ ཙཱ’’ཏི ཝུཏྟེཔི ཙེཏིཡསྶེཝ ཝིསུཾ ལབྦྷཏི, ན པུགྒལསྶ. བྷིཀྑུནིསངྒྷཾ ཨཱདིཾ ཀཏྭཱཔི ཨེཝམེཝ ཡོཛེཏབྦཾ.

ཨེཏྠཱཧ – ཡཾ པནེཏརཧི (མཧཱཝ. ཨཊྛ. ༣༧༩) པཎྜིཏམནུསྶཱ སདྷཱཏུཀཾ པཊིམཾ ཝཱ ཙེཏིཡཾ ཝཱ ཋཔེཏྭཱ བུདྡྷཔྤམུཁསྶ ཨུབྷཏོསངྒྷསྶ དཱནཾ དེནྟི, པཊིམཱཡ ཝཱ ཙེཏིཡསྶ ཝཱ པུརཏོ ཨཱདྷཱརཀེ པཏྟཾ ཋཔེཏྭཱ དཀྑིཎོདཀཾ དཏྭཱ ‘‘བུདྡྷཱནཾ དེམཱ’’ཏི, ཏཏྠ ཡཾ པཋམཾ ཁཱདནཱིཡཾ བྷོཛནཱིཡཾ དེནྟི, ཝིཧཱརཾ ཝཱ ཨཱཧརིཏྭཱ ‘‘ཨིདཾ ཙེཏིཡསྶ དེམཱ’’ཏི པིཎྜཔཱཏཉྩ མཱལཱགནྡྷཱདཱིནི ཙ དེནྟི, ཏཏྠ ཀཐཾ པཊིཔཛྫིཏབྦནྟི? ཝུཙྩཏེ – མཱལཱགནྡྷཱདཱིནི ཏཱཝ ཙེཏིཡེ ཨཱརོཔེཏབྦཱནི, ཝཏྠེཧི པཊཱཀཱ, ཏེལེན ¶ པདཱིཔཱ ཀཱཏབྦཱ, པིཎྜཔཱཏམདྷུཕཱཎིཏཱདཱིནི པན ཡོ ནིབདྡྷཙེཏིཡཛགྒཀོ ཧོཏི པབྦཛིཏོ ཝཱ གཧཊྛོ ཝཱ, ཏསྶ དཱཏབྦཱནི. ནིབདྡྷཛགྒཀེ ཨསཏི ཨཱཧཊབྷཏྟཾ ཋཔེཏྭཱ ཝཏྟཾ ཀཏྭཱ པརིབྷུཉྫིཏུཾ ཝཊྚཏི. ཨུཔཀཊྛེ ཀཱལེ བྷུཉྫིཏྭཱ པཙྪཱཔི ཝཏྟཾ ཀཱཏུཾ ཝཊྚཏིཡེཝ.

མཱལཱགནྡྷཱདཱིསུ ཙ ཡཾ ཀིཉྩི ‘‘ཨིདཾ ཧརིཏྭཱ ཙེཏིཡཔཱུཛཾ ཀརོཐཱ’’ཏི ཝུཏྟེ དཱུརམྤི ཧརིཏྭཱ པཱུཛེཏབྦཾ. ‘‘བྷིཀྑུསངྒྷསྶ ཧརཱ’’ཏི ཝུཏྟེཔི ཧརིཏབྦཾ. སཙེ པན ‘‘ཨཧཾ པིཎྜཱཡ ཙརཱམི, ཨཱསནསཱལཱཡཾ བྷིཀྑཱུ ཨཏྠི, ཏེ ཧརིསྶནྟཱི’’ཏི ཝུཏྟེ ‘‘བྷནྟེ, ཏུཡ྄ཧཾཡེཝ དམྨཱི’’ཏི ཝདཏི, བྷུཉྫིཏུཾ ཝཊྚཏི. ཨཐ པན ‘‘བྷིཀྑུསངྒྷསྶ དསྶཱམཱི’’ཏི ཧརནྟསྶ གཙྪཏོ ཨནྟརཱཝ ཀཱལོ ཨུཔཀཊྛོ ཧོཏི, ཨཏྟནོ པཱཔེཏྭཱ བྷུཉྫིཏུཾ ཝཊྚཏི.

ཝསྶཾཝུཊྛསངྒྷསྶ དམྨཱིཏི ཝདཏཱིཏི (མཧཱཝ. ཨཊྛ. ༣༧༩) ‘‘ཝསྶཾཝུཊྛསངྒྷསྶ ཨིམཱནི ཙཱིཝརཱནི དམྨཱི’’ཏི ཝདཏི. ཏེསཾ བཧིསཱིམཊྛཱནམྤི པཱཔུཎཱཏཱིཏི ཨཏྠཏེ ཀཐིནེ བཧིསཱིམཊྛཱནམྤི ཡཱཝ ཀཐིནསྶ ཨུབྦྷཱརཱ པཱཔུཎཱཏི, ཏསྨཱ དིསཱཔཀྐནྟསྶཱཔི སཏི པཊིགྒཱཧཀེ དཱཏབྦཾ. ཨནཏྠཏེ པན ཀཐིནེ ཨནྟོཧེམནྟེ, ཨེཝཉྩ པན ཝཏྭཱ དིནྣཾ པཙྪིམཝསྶཾཝུཊྛཱནམྤི པཱཔུཎཱཏི. ཡཏྠ ཀཏྠཙཱིཏི ཡེསུ ཀེསུཙི ཝིཧཱརེསུ. ཨེཝཾ ཝདཏཱིཏི ‘‘ཝསྶཾཝུཊྛསངྒྷསྶ དམྨཱི’’ཏི ཝདཏི. ཏཏྲ སམྨུཁཱིབྷཱུཏཱནཾ སབྦེསཾ པཱཔུཎཱཏི པིཊྛིསམཡེ ཨུཔྤནྣཏྟཱ. སཙེ པན ‘‘ཝསྶཾ ཝསནྟཱནཾ དམྨཱི’’ཏི ཝདཏི, ཨནྟོཝསྶེཡེཝ ཝསྶཾ ཝསནྟཱཝ ལབྷནྟི, ཚིནྣཝསྶཱ ན ལབྷནྟི. ཙཱིཝརམཱསེ པན ‘‘ཝསྶཾ ཝསནྟཱནཾ དམྨཱི’’ཏི ཝུཏྟེ པཙྪིམིཀཱཡ ཝསྶཱུཔགཏཱནཾཡེཝ པཱཔུཎཱཏི, པུརིམིཀཱཡ ཝསྶཱུཔགཏཱནཉྩ ཚིནྣཝསྶཱནཉྩ ན པཱཔུཎཱཏི.

ཙཱིཝརམཱསཏོ པཊྛཱཡ ཡཱཝ ཧེམནྟསྶ པཙྪིམོ དིཝསོ, ཏཱཝ ‘‘ཝསྶཱཝཱསིཀཾ དེམཱ’’ཏི ཝུཏྟེ ¶ ཀཐིནཾ ཨཏྠཏཾ ཝཱ ཧོཏུ, ཨནཏྠཏཾ ཝཱ, ཨཏཱིཏཝསྶཾཝུཊྛཱནཾཡེཝ པཱཔུཎཱཏི. གིམྷཱནཾ པཋམདིཝསཏོ པཊྛཱཡ ཝུཏྟེ པན མཱཏིཀཱ ཨཱརོཔེཏབྦཱ ‘‘ཨཏཱིཏཝསྶཱཝཱསསྶ པཉྩ མཱསཱ ཨཏིཀྐནྟཱ, ཨནཱགཏོ ཙཏུམཱསཙྩཡེན བྷཝིསྶཏི, ཀཏརཝསྶཱཝཱསསྶ དེསཱི’’ཏི. སཙེ ‘‘ཨཏཱིཏཝསྶཾཝུཊྛཱནཾ དམྨཱི’’ཏི ཝདཏི, ཏཾཨནྟོཝསྶཾཝུཊྛཱནམེཝ པཱཔུཎཱཏི, དིསཱ པཀྐནྟཱནམྤི སབྷཱགཱ གཎྷིཏུཾ ལབྷནྟི.

སཙེ ¶ ‘‘ཨནཱགཏེ ཝསྶཱཝཱསིཀཾ དམྨཱི’’ཏི ཝདཏི, ཏཾ ཋཔེཏྭཱ ཝསྶཱུཔནཱཡིཀདིཝསེ གཧེཏབྦཾ. ཨཐ ‘‘ཨགུཏྟོ ཝིཧཱརོ, ཙོརབྷཡཾ ཨཏྠི, ན སཀྐཱ ཋཔེཏུཾ, གཎྷིཏྭཱ ཝཱ ཨཱཧིཎྜིཏུ’’ནྟི ཝུཏྟེ ‘‘སམྤཏྟཱནཾ དམྨཱི’’ཏི ཝདཏི, བྷཱཛེཏྭཱ གཧེཏབྦཾ. སཙེ ཝདཏི ‘‘ཨིཏོ མེ, བྷནྟེ, ཏཏིཡེ ཝསྶེ ཝསྶཱཝཱསིཀཾ ན དིནྣཾ, ཏཾ དམྨཱི’’ཏི, ཏསྨིཾ ཨནྟོཝསྶེ ཝུཊྛབྷིཀྑཱུནཾ པཱཔུཎཱཏི. སཙེ ཏེ དིསཱ པཀྐནྟཱ, ཨཉྙོ ཝིསྶཱསིཀོ གཎྷཱཏི, དཱཏབྦཾ. ཨཐ ཨེཀོཡེཝ ཨཝསིཊྛོ, སེསཱ ཀཱལངྐཏཱ, སབྦཾ ཨེཀསྶེཝ པཱཔུཎཱཏི. སཙེ ཨེཀོཔི ནཏྠི, སངྒྷིཀཾ ཧོཏི, སམྨུཁཱིབྷཱུཏེཧི བྷཱཛིཏབྦཾ.

ཡེཧི ནིམནྟིཏེཧི ཡཱགུ པཱིཏཱཏི (མཧཱཝ. ཨཊྛ. ༣༧༩) ནིམནྟིཏེཧི ཡེཧི བྷིཀྑཱུཧི ཡཱགུ པཱིཏཱ, ཡེཧི པན བྷིཀྑཱཙཱརཝཏྟེན གྷརདྭཱརེན གཙྪནྟེཧི ཝཱ གྷརཾ པཝིཊྛེཧི ཝཱ ཡཱགུ ལདྡྷཱ, ཡེསཾ ཝཱ ཨཱསནསཱལཏོ པཏྟཾ ཨཱཧརིཏྭཱ མནུསྶེཧི ནཱིཏཱ, ཡེསཾ ཝཱ ཐེརེཧི པེསིཏཱ, ཏེསཾ ན པཱཔུཎཱཏི. སཙེ པན ནིམནྟིཏབྷིཀྑཱུཧི སདྡྷིཾ ཨཉྙེཔི བཧཱུ ཨཱགནྟྭཱ ཨནྟོགེཧཉྩ བཧིགེཧཉྩ པཱུརེཏྭཱ ནིསིནྣཱ, དཱཡཀོ ཙ ཨེཝཾ ཝདཏི ‘‘ནིམནྟིཏཱ ཝཱ ཧོནྟུ, ཨནིམནྟིཏཱ ཝཱ, ཡེསཾ མཡཱ ཡཱགུ དིནྣཱ, སབྦེསཾ ཨིམཱནི ཝཏྠཱནི ཧོནྟཱུ’’ཏི, སབྦེསཾ པཱཔུཎཱཏི. ཡེཧི པན ཐེརཱནཾ ཧཏྠཏོ ཡཱགུ ལདྡྷཱ, ཏེསཾ ན པཱཔུཎཱཏི. ཨཐ སོ ‘‘ཡེཧི མཡ྄ཧཾ ཡཱགུ པཱིཏཱ, སབྦེསཾ ཧོཏཱུ’’ཏི ཝདཏི, སབྦེསཾ པཱཔུཎཱཏི. བྷཏྟཁཛྫཀཱདཱིཧཱིཏི ཨེཏྠ ཨཱདིསདྡེནཔི ཙཱིཝརསེནཱསནབྷེསཛྫཱནཾ གཧཎཾ.

པུགྒལསྶཱཏི (མཧཱཝ. ཨཊྛ. ༣༧༩) སམྨུཁཱསམྨུཁབྷཱུཏསྶ པུགྒལསྶ. ཏེནཱཧ ‘‘ཨིདཾ ཙཱིཝར’’ནྟིཨཱདི. སཙེ པན ‘‘ཨིདཾ ཏུམྷཱཀཉྩེཝ ཏུམྷཱཀཾ ཨནྟེཝཱསིཀཱནཉྩ དམྨཱི’’ཏི ཨེཝཾ ཝདཏི, ཐེརསྶ ཙ ཨནྟེཝཱསིཀཱནཉྩ པཱཔུཎཱཏི. ཨུདྡེསཾ གཧེཏུཾ ཨཱགཏོ, གཧེཏྭཱ གཙྪནྟོ ཙ ཨཏྠི, ཏསྶཱཔི པཱཔུཎཱཏི. ཏུམྷེཧི སདྡྷིཾ ནིབདྡྷཙཱརིཀབྷིཀྑཱུནཾ དམྨཱི’’ཏི ཝུཏྟེ ཨུདྡེསནྟེཝཱསིཀཱནཾ ཝཏྟཾ ཀཏྭཱ ཨུདྡེསཔརིཔུཙྪཱདཱིནི གཧེཏྭཱ ཝིཙརནྟཱནཾ སབྦེསཾ པཱཔུཎཱཏི. ཨེཏྠཱཏི ཨཊྛསུ མཱཏིཀཱསུ. ཡདི པན ཨཡམེཏྠ སངྑེཔཀཐཱ, ཝིཏྠཱརོ པན ཀཐཾ ཉཱཏབྦོཏི ཨཱཧ ¶ ‘‘སམནྟཔཱསཱདིཀཱཡཾ ཝུཏྟོ’’ཏི. སམནྟཔཱསཱདིཀཱཡཾ ཙཱིཝརཀྑནྡྷཀཝཎྞནཱཡཾ (མཧཱཝ. ཨཊྛ. ༣༧༩) ཝུཏྟོཏི ཨཏྠོ.

‘‘ཉཱཏཀེཧི ¶ ཝཱ མེ ཙཱིཝརཏྠཱཡ པེསིཏཾ, མིཏྟེཧི ཝཱ པེསིཏཾ, ཏེ ཨཱབྷཏེ ཙཱིཝརེ དསྶནྟཱི’’ཏི ཨེཝཾ ཉཱཏིཏོ ཝཱ མིཏྟཏོ ཝཱ པཙྩཱསཱ ཧོཏཱིཏི ཝེདིཏབྦཾ. ཀཔྤིཡབྷཎྜེནཱཏི ཀཔྤཱསསུཏྟཱདིནཱ ཨཏྟནོ དྷནེན. སཎྷནྟི སུཁུམཾ. ཨཉྙཾ པཙྩཱསཱཙཱིཝརཾ ལབྷིཏྭཱ ཨེཝ ཀཱལབྦྷནྟརེ ཀཱརེཏབྦནྟི ཨཉྙཾ མཱུལཙཱིཝརསདིསཾ པཙྩཱསཱཙཱིཝརཾ ལབྷིཏྭཱཡེཝ མཱསབྦྷནྟརེ ཀཱརེཏབྦཾ. ཏཉྩ ཁོ སཏིཡཱཡེཝ པཙྩཱསཱཡ, ཨསཏིཡཱ པན པཙྩཱསཱཡ མཱུལཙཱིཝརཾ དསཱཧཾ ཙེ སམྤཏྟཾ, ཏདཧེཝ ཨདྷིཊྛཱཏབྦཾ. ཏེནཱཧ ‘‘སཙེ ན ལབྷཏཱི’’ཏིཨཱདི. པཙྩཱསཱཙཱིཝརམྤི པརིཀྑཱརཙོལ༹ཾ ཨདྷིཊྛཱཏབྦནྟི པཋམཏརཾ ཨུཔྤནྣཾ ཐཱུལཔཙྩཱསཱཙཱིཝརམྤི སནྡྷཱཡ ཝུཏྟཾ. པི-སདྡེན ན ཀེཝལཾ མཱུལཙཱིཝརམེཝཱཏི དསྶེཏི.

ཨཀཱལཙཱིཝརསིཀྑཱཔདཝཎྞནཱ ནིཊྛིཏཱ.

༤. པུརཱཎཙཱིཝརསིཀྑཱཔདཝཎྞནཱ

‘‘ཨམྷཱཀམེཝ ཉཱཏཱི’’ཏི ཉཱཡཏཱིཏི ཉཱཏི, སཱཝ ཉཱཏིཀཱ, ན ཉཱཏིཀཱ ཨཉྙཱཏིཀཱ, ཏཱཡ ཨཉྙཱཏིཀཱཡ. ཏེནཱཧ ‘‘ན ཉཱཏིཀཱཡཱ’’ཏི. མཱཏིཏོ ཝཱ པིཏིཏོ ཝཱཏི མཱཏིཔཀྑཏོ ཝཱ པིཏིཔཀྑཏོ ཝཱ. ཡཱཝ སཏྟམཾ ཡུགནྟི (པཱརཱ. ཨཊྛ. ༢.༥༠༣-༥༠༥) ཡཱཝ སཏྟམསྶ པུརིསསྶ, སཏྟམཱཡ ཝཱ ཨིཏྠིཡཱ ཨཱཡུཔྤམཱཎཾ, ཡཱཝ པིཏཱམཧཡུགཾ པིཏཱམཧིཡུགཾ མཱཏཱམཧཡུགཾ མཱཏཱམཧིཡུགནྟི ཝུཏྟཾ ཧོཏི. ཨཐ ཝཱ ཡཱཝ སཏྟམཾ ཡུགནྟི ཡཱཝ སཏྟམདྭནྡནྟི ཨཏྠོ. ཡུགསདྡོ ཙེཏྠ ཨེཀསེསནཡེན དཊྛབྦོ ‘‘ཡུགོ ཙ ཡུགོ ཙ ཡུགཱ’’ཏི. ཨེཝཉྷི ཏཏྠ ཏཏྠ དྭནྡཾ གཧིཏཾ ཧོཏི. ཀེནཙི ཨཱཀཱརེན ཨསམྦདྡྷཱཡཱཏི བྷཱཏུབྷགིནིབྷཱགིནེཡྻཔུཏྟཔཔུཏྟཱདཱིསུ ཡེན ཀེནཙི ཨཱཀཱརེན ཨསམྦདྡྷཱཡ. པིཏཱ, པིཏུཔིཏཱ, ཏསྶ པིཏཱ, ཏསྶཱཔི པིཏཱཏི ཨེཝཾ ཡཱཝ སཏྟམཱ ཡུགཱ, པིཏཱ, པིཏུམཱཏཱ, ཏསྶཱ པིཏཱ ཙ མཱཏཱ ཙ བྷཱཏཱ ཙ བྷགིནཱི ཙ, པུཏྟཱ ཙ, དྷཱིཏརོ ཙཱཏི ཨེཝམྤི ཨུདྡྷཉྩ ཨདྷོ ཙ ཡཱཝ སཏྟམཱ ཡུགཱ, པིཏཱ, པིཏུབྷཱཏཱ, པིཏུབྷགིནཱི, པིཏུཔུཏྟཱ, པིཏུདྷཱིཏརོ, ཏེསམྤི པུཏྟདྷཱིཏུཔརམྤརཱཏི ཨེཝམྤི ཡཱཝ སཏྟམཱ ཡུགཱ, མཱཏཱ, མཱཏུམཱཏཱ, ཏསྶཱ མཱཏཱ, ཏསྶཱཔི མཱཏཱཏི ཨེཝཾ ཡཱཝ སཏྟམཱ ཡུགཱ, མཱཏཱ, མཱཏུཔིཏཱ, ཏསྶ པིཏཱ ཙ མཱཏཱ ཙ བྷཱཏཱ ཙ བྷགིནཱི ཙ པུཏྟཱ ཙ དྷཱིཏརོ ཙཱཏི ཨེཝམྤི ཨུདྡྷཉྩ ཨདྷོ ¶ ཙ ཡཱཝ སཏྟམཱ ཡུགཱ, མཱཏཱ, མཱཏུབྷཱཏཱ, མཱཏུབྷགིནཱི, མཱཏུཔུཏྟཱ, མཱཏུདྷཱིཏརོ ¶ , ཏེསམྤི པུཏྟདྷཱིཏུཔརམྤརཱཏི ཨེཝམྤི ཡཱཝ སཏྟམཱ ཡུགཱ, ཏཱཝ ནེཝ མཱཏུསམྦནྡྷེན, ན པིཏུསམྦནྡྷེན ཡཱ སམྦདྡྷཱ, སཱ ‘‘ཨཉྙཱཏིཀཱ ནཱམཱ’’ཏི ཝུཏྟཾ ཧོཏི.

སཱཀིཡཱནིཡོ ཝིཡཱཏི པཉྩསཏམཏྟཱ སཱཀིཡཱནིཡོ ཝིཡ. ནིདསྶནམཏྟཉྩེཏཾ, ཏསྨཱ བྷིཀྑུབྷཱཝེ ཋཏྭཱ པརིཝཏྟལིངྒཱ བྷིཀྑུནིཡོཔི ཨིདྷ སུདྡྷབྷིཀྑུསངྒྷེ ‘‘ཨུཔསམྤནྣཱ’’ ཨིཙྩེཝ ཝེདིཏབྦཱ. ཨུབྷཏོསངྒྷེ ཝཱཏི བྷིཀྑུནིསངྒྷེ ཉཏྟིཙཏུཏྠེན, བྷིཀྑུསངྒྷེ ཉཏྟིཙཏུཏྠེནཱཏི ཨེཝཾ ཨུབྷཏོསངྒྷེ ཝཱ. པུརཱཎཙཱིཝརནྟི ཨེཏྠ ཙཱིཝརནྟི ནིཝཱསནཔཱརུཔནུཔགམེཝ ཨདྷིཔྤེཏནྟི ཨཱཧ ‘‘རཛིཏྭཱ’’ཏིཨཱདི. ཀཔྤཾ ཀཏྭཱཏི ཀཔྤབིནྡུཾ དཏྭཱ. ‘‘ཨིམིནཱ ཨདིནྣཀཔྤཾ པཱཙིཏྟིཡཝཏྠུ ན ཧོཏཱིཏི དསྶེཏཱི’’ཏི (སཱརཏྠ. ཊཱི. ༢.༥༠༥) ཝདནྟི. པརིབྷོགསཱིསེནཱཏི ཀཱཡེན ཕུསིཏྭཱ པརིབྷོགསཱིསེན. ཨཾསེཏི ཛཏྟུམྷི. མཏྠཀེཏི སཱིསམཏྠཀེ. སཙེ པན པཙྩཏྠརཎསྶ ཧེཊྛཱ ཀཏྭཱ ནིཔཛྫཏི, ཧཏྠེཧི ཝཱ ཨུཀྑིཔིཏྭཱ ཨཱཀཱསེ ཝིཏཱནཾ ཀཏྭཱ སཱིསེན ཨསམྥུསནྟོ གཙྪཏི, ཨཡཾ པརིབྷོགོ ནཱམ ན ཧོཏི.

ཀཱཡཝིཀཱརཾ ཝཱ ཀརོཏཱིཏི ཡཐཱ སཱ ‘‘དྷོཝཱཔེཏུཀཱམོ ཨཡ’’ནྟི ཛཱནཱཏི, ཨེཝཾ ཀཱཡཝིཀཱརཾ ཀརོཏི. ‘‘ཨནྟོདྭཱདསཧཏྠེ ཨོཀཱསེ ཋཏྭཱ ཨུཔརི ཝཱ ཁིཔཏཱི’’ཏི ཨིམིནཱ ཨུཔཙཱརཾ མུཉྩིཏྭཱ ཨོརཏོ ཁིཔནྟསྶ ཨནཱཔཏྟཱིཏི དསྶེཏི. ཨཉྙསྶ ཝཱ ཧཏྠེ པེསེཏཱིཏི ཨནྟོདྭཱདསཧཏྠེ ཨོཀཱསེ ཋཏྭཱ སིཀྑམཱནསཱམཎེརསཱམཎེརིཨུཔཱསཀཨིཏྠིཡཱདཱིསུ ཡསྶ ཀསྶཙི ཨཉྙསྶ ཧཏྠེ ཝཱ པེསེཏི. སོཏི ཨུཔཱསཀོ ཙ སཱམཎེརོ ཙ. ཨུཔསམྤཛྫིཏྭཱ དྷོཝཏཱིཏི ཨེཏྠ ཨུཔཱསཀོ ལིངྒེ པརིཝཏྟེ བྷིཀྑུནཱིསུ པབྦཛིཏྭཱ ཨུཔསམྤཛྫིཏྭཱ དྷོཝཏི, སཱམཎེརོ ལིངྒེ པརིཝཏྟེ བྷིཀྑུནཱིསུ ཨུཔསམྤཛྫིཏྭཱ དྷོཝཏཱིཏི ཡཐཱཡོགཾ ཨཏྠོ གཧེཏབྦོ. སཙེ པན བྷིཀྑུནིཡཱ ཧཏྠེ དིནྣཾ ཧོཏི, སཙེ ལིངྒེ པརིཝཏྟེ དྷོཝཏི, ཝཊྚཏི.

ཨེཏྠ ཙ ཨེཀསྶ ཏིཀྑཏྟུཾ ནིསྶཛྫནཱབྷཱཝཏོ ཏཱིཎིཔི ཀཱརེནྟསྶ ཨེཀེན ནིསྶགྒིཡཾ, དྭཱིཧི དྭེ དུཀྐཊཱནི. དྭེ ཀཱརེནྟསྶ ཨེཀེན ནིསྶགྒིཡཾ, དུཏིཡེན དུཀྐཊཾ. ཏེནཱཧ ‘‘དྷོཝནཱདཱིནི ཏཱིཎཱི’’ཏིཨཱདི. ‘‘ཨེཀེན ཝཏྠུནཱ’’ཏི ¶ པཋམཾ ཀཏྭཱ ནིཊྛཱཔིཏཾ སནྡྷཱཡ ཝུཏྟཾ. སཙེ པན ‘‘ཨིམཾ ཙཱིཝརཾ རཛིཏྭཱ དྷོཝིཏྭཱ ཨཱནེཧཱི’’ཏི ཝུཏྟེ སཱ བྷིཀྑུནཱི པཋམཾ དྷོཝིཏྭཱ པཙྪཱ རཛཏི, ནིསྶགྒིཡེན དུཀྐཊམེཝ, ཨེཝཾ སབྦེསུ ཝིཔརཱིཏཝཙནེསུ ནཡོ ནེཏབྦོ. སཙེ པན ‘‘དྷོཝིཏྭཱ ཨཱནེཧཱི’’ཏི ཝུཏྟཱ དྷོཝཏི ཙེཝ རཛཏི ཙ, དྷོཝཱཔནཔཙྩཡཱ ཨེཝ ཨཱཔཏྟི, རཛནེ ཨནཱཔཏྟི. ཨེཝཾ སབྦཏྠ. ཏེནཱཧ ‘‘སཙེ པན‘དྷོཝཱ’ཏི ཝུཏྟཱ’’ཏིཨཱདི. བྷིཀྑཱུནཾ ཝསེན ཨེཀཏོ ཨུཔསམྤནྣཱཡ དྷོཝཱཔེནྟསྶ ཡཐཱཝཏྠུཀམེཝཱཏི ཨཱཧ ‘‘བྷིཀྑུནིསངྒྷཝསེནཱ’’ཏིཨཱདི.

ཨཉྙསྶ ¶ ཝཱ སནྟཀནྟི ཨཉྙསྶ སནྟཀཾ པུརཱཎཙཱིཝརཾ དྷོཝཱཔེནྟསྶཱཏི ཨཏྠོ. ནིསཱིདནཔཙྩཏྠརཎནྟི ཨཉྙསྶ ཝཱ ཨཏྟནོ ཝཱ སནྟཀཾ ནིསཱིདནཉྩེཝ པཙྩཏྠརཎཉྩ. ནིཝཱསནཔཱརུཔནུཔགསྶེཝ ཙ ཨིདྷ ‘‘པུརཱཎཙཱིཝར’’ནྟི ཨདྷིཔྤེཏཏྟཱ ཨཏྟནོ སནྟཀམྤི ནིསཱིདནཔཙྩཏྠརཎཾ དྷོཝཱཔེནྟསྶ དུཀྐཊམེཝ ཧོཏི, ན ནིསྶགྒིཡཾ. ཨཝུཏྟཱ ཝཱ དྷོཝཏཱིཏི ཨུདྡེསཱཡ ཝཱ ཨོཝཱདཱཡ ཝཱ ཨཱགཏཱ ཀིལིཊྛཙཱིཝརཾ དིསྭཱ ཋཔིཏཊྛཱནཏོ ཝཱ གཧེཏྭཱ, ‘‘དེཐ ཨཡྻ, དྷོཝིསྶཱམཱི’’ཏི ཨཱཧརཱཔེཏྭཱ ཝཱ དྷོཝཏི ཙེཝ རཛཏི ཙ ཨཱཀོཊེཏི ཙ, ཨཡཾ ཨཝུཏྟཱ དྷོཝཏི ནཱམ. ཡཱཔི ‘‘ཨིམཾ ཙཱིཝརཾ དྷོཝཱ’’ཏི དཧརཾ ཝཱ སཱམཎེརཾ ཝཱ ཨཱཎཱཔེནྟསྶ བྷིཀྑུནོ ཝཙནཾ སུཏྭཱ ‘‘ཨཱཧརཐཡྻ, ཨཧཾ དྷོཝིསྶཱམཱི’’ཏི དྷོཝཏི, ཏཱཝཀཱལིཀཾ ཝཱ གཧེཏྭཱ དྷོཝིཏྭཱ རཛིཏྭཱ དེཏི, ཨཡམྤི ཨཝུཏྟཱ དྷོཝཏི ནཱམ.

ཨཉྙཾ ཝཱ པརིཀྑཱརནྟི ཨུཔཱཧནཏྠཝིཀཔཏྟཏྠཝིཀཨཾསབདྡྷཀཀཱཡབནྡྷནམཉྩཔཱིཋཏཊྚིཀཱདིཾ ཡཾ ཀིཉྩི. ‘‘ཨུཔཙཱརེ ཋཏྭཱ’’ཏི ཝཙནཏོ པེསིཏྭཱ དྷོཝནེཔི ཨནཱཔཏྟི. ཨུཔཙཱརེཏི ཨནྟོདྭཱདསཧཏྠེ ཨོཀཱསེ.

པུརཱཎཙཱིཝརསིཀྑཱཔདཝཎྞནཱ ནིཊྛིཏཱ.

༥. ཙཱིཝརཔྤཊིགྒཧཎསིཀྑཱཔདཝཎྞནཱ

ཚནྣནྟི ཁོམཱདཱིནཾ ཚནྣཾ ཙཱིཝརཱནཾ མཛ྄ཛྷེ. ཨུཔཙཱརཾ མུཉྩིཏྭཱཏི དྭཱདསཧཏྠཱུཔཙཱརཾ མུཉྩིཏྭཱ. པི-སདྡེན དྷམྨཀཐཾ ཀཐེནྟསྶ ཙཏསྶོ པརིསཱ ཙཱིཝརཱནི ཙ ནཱནཱཝིརཱགཝཏྠཱནི ཙ ཨཱཧརིཏྭཱ པཱདམཱུལེ ཋཔེནྟི, ཨུཔཙཱརེ ཝཱ ཋཏྭཱ ཨུཔརི ཁིཔནྟི, ‘‘སཙེ སཱདིཡཏི, པཊིགྒཧིཏམེཝཱ’’ཏི ཨེཏྠ ཝཏྟབྦམེཝ ¶ ནཏྠཱིཏི དསྶེཏི. ཁིཔཏཱུཏི དིཝཱ ཝཱ རཏྟིབྷཱགེ ཝཱ ཁིཔཏུ. པཊིགྒཧིཏམེཝ ཧོཏཱིཏི ཀིཉྩཱཔི ‘‘ཨིདཾ བྷིཀྑུནིཡཱ, ཨིདཾ ཨཉྙེས’’ནྟི ཉཱཏུཾ ན སཀྐཱ, ཏཐཱཔི ཨཙིཏྟཀབྷཱཝེན གཧིཏམེཝ ཧོཏི. ཡསྶ ཀསྶཙི པན ཨནུཔསམྤནྣསྶཱཏི སིཀྑམཱནསཱམཎེརསཱམཎེརིཨུཔཱསཀཨུཔཱསིཀཱདཱིསུ ཡསྶ ཀསྶཙི ཨནུཔསམྤནྣསྶ. ཋཔིཏནྟི བྷིཀྑུནིཡཱ ཋཔིཏཾ. པཾསུཀཱུལཾ ཨདྷིཊྛཧིཏྭཱཏི ‘‘ཨསྶཱམིཀཾ ཨིད’’ནྟི སཉྙཾ ཨུཔྤཱདེཏྭཱ. ཨསྶཱམིཀཉྷི ‘‘པཾསུཀཱུལ’’ནྟི ཝུཙྩཏི. ཨིམིནཱ ‘‘ཨམྷཱཀམཏྠཱཡ ཋཔིཏ’’ནྟིཨཱདིཀཱཡ སཉྙཱཡ གཧེཏུཾ ན ཝཊྚཏཱིཏི དསྶེཏི. ཨཉྙཏྲ པཱརིཝཏྟཀཱཏི པརིཝཏྟེཏབྦཾ པརིཝཏྟཾ, པརིཝཏྟམེཝ པཱརིཝཏྟཀཾ, པརིཝཏྟེཏྭཱ དིཡྻམཱནཾ, ཏཾ ཝིནཱཏི ཨཏྠོ. ཏེནཱཧ ‘‘ཡཾ ཨནྟམསོ ཧརཱིཊཀཀྑཎྜམྤཱི’’ཏིཨཱདི. ¶ ཨཱབྷོགཾ ཀཏྭཱཏི ཙིཏྟེན སམནྣཱཧརིཏྭཱ. སཙེ བྷིཀྑུནཱི ཝསྶཱཝཱསིཀམྤི དེཏི, ཏམྤི ཡཐཱཝུཏྟཝིདྷཱནཾ ཨཀཏྭཱ གཧེཏུཾ ན ཝཊྚཏཱིཏི ཝེདིཏབྦཾ.

པཊིལཱབྷེནཱཏི གཧཎེན. ཏིཀཔཱཙིཏྟིཡནྟི ཏཱིཎི པརིམཱཎཱནི ཨསྶཱཏི ཏིཀཾ,ཏིཀཉྩ ཏཾ པཱཙིཏྟིཡཉྩཱཏི ཏིཀཔཱཙིཏྟིཡཾ, ཨཉྙཱཏིཀཱཡ ཉཱཏིཀསཉྙིཝེམཏིཀཨཉྙཱཏིཀསཉྙཱིནཾ ཝསེན ཏཱིཎི པཱཙིཏྟིཡཱནཱིཏི ཨཏྠོ. ཨེཀཏོཨུཔསམྤནྣཱཡཱཏི བྷིཀྑུནཱིནཾ སནྟིཀེ ཨུཔསམྤནྣཱཡ. ཏཱཡ ཧི ཧཏྠཏོ ཨཉྙཏྲ པཱརིཝཏྟཀཱ ཙཱིཝརཾ པཊིགྒཎྷནྟསྶ དུཀྐཊཾ, བྷིཀྑཱུནཾ སནྟིཀེ ཨུཔསམྤནྣཱཡ པན པཱཙིཏྟིཡམེཝ. ‘‘པཏྟཏྠཝིཀཱདིམྷི ཙ ཨནདྷིཊྛཱཏབྦཔརིཀྑཱརེ’’ཏི ཨིམིནཱ བྷིསིཙྪཝིམྤི སངྒཎྷཱཏི. སཱ ཧི མཧནྟཱཔི སེནཱསནསངྒཧིཏཏྟཱ ཙཱིཝརསངྑཾ ན གཙྪཏཱིཏི ནེཝ ཨདྷིཊྛཱནུཔགཱ, ན ཝིཀཔྤནུཔགཱ ཙ. ཝུཏྟཉྷི སམནྟཔཱསཱདིཀཱཡཾ ‘‘སཙེཔི མཉྩཔྤམཱཎཱ བྷིསིཙྪཝི ཧོཏི, ཝཊྚཏིཡེཝཱ’’ཏི (པཱརཱ. ཨཊྛ. ༢.༥༡༤). ‘‘ཧཏྠཏོ ཙཱིཝརཾ པཊིགྒཎྷཱཏཱི’’ཏི ཝཙནཏོ པན ཨཉྙཱཏིཀཱཡ བྷིཀྑུནིཡཱ པེསིཏགྒཧཎེཔི ཨནཱཔཏྟི. པཊིགྒཧཎཏོ, པརིཝཏྟནཱཀརཎཏོ ཙ ཀིརིཡཱཀིརིཡཾ.

ཙཱིཝརཔྤཊིགྒཧཎསིཀྑཱཔདཝཎྞནཱ ནིཊྛིཏཱ.

༦. ཨཉྙཱཏཀཝིཉྙཏྟིསིཀྑཱཔདཝཎྞནཱ

གེཧསྶ ¶ པཏི ཛེཊྛོཏི གཧཔཏི, ཏཾ གཧཔཏིཾ, ཨིདྷ པན ཨཔབྦཛིཏོ ཡོ ཀོཙི མནུསྶོ ཨདྷིཔྤེཏོ. ཏེནཱཧ ‘‘བྷིཀྑཱུསུ ཨཔབྦཛིཏམནུསྶ’’ནྟི. ཨེསེཝ ནཡོ གཧཔཏཱནིནྟི ཨེཏྠཱཔི. ‘‘ཝིཉྙཱཔེཡྻཱ’’ཏི ཨིདཾ སུདྡྷཀཏྟུཨཏྠེ ཙ ཧེཏུཀཏྟུཨཏྠེ ཙ ཝཏྟཏཱིཏི ཨཱཧ ‘‘ཡཱཙེཡྻ ཝཱ ཡཱཙཱཔེཡྻ ཝཱ’’ཏི. ཡཱཙཱཔནཉྩེཏྠ ཨཏྟནོ ཨཏྠཱཡེཝཱཏི དཊྛབྦཾ. ཨེཝཉྩ པན ཀཏྭཱ ‘‘ཨནཱཎཏྟིཀ’’ནྟི ཨིདཾ སམཏྠིཏཾ ཧོཏི. ཨཉྙཏྲ སམཡཱཏི སམེཏི ཨེཏྠ, ཨེཏེན ཝཱ སཾགཙྪཏི སཏྟོ, སབྷཱཝདྷམྨོ ཝཱ སཧཛཱཏཱདཱིཧི, ཨུཔྤཱདཱདཱིཧི ཝཱཏི སམཡོ, ཀཱལོ, དྷམྨཔྤཝཏྟིམཏྟཏཱཡ ཨཏྠཏོ ཨབྷཱུཏོཔི ཧི ཀཱལོ དྷམྨཔྤཝཏྟིཡཱ ཨདྷིཀརཎཾ, ཀརཎཾ ཝིཡ ཙ ཀཔྤནཱམཏྟསིདྡྷེན རཱུཔེན ཝོཧརཱིཡཏི, ཏཾ སམཡཾ ཋཔེཏྭཱཏི ཨཏྠོ. ཏེནཱཧ ‘‘ཡོ ཨཙྪིནྣཙཱིཝརོ ཝཱ ཧོཏཱི’’ཏིཨཱདི. ཏཏྠ རཱཛཱདཱིསུ ཡེཧི ཀེཧིཙི ཨཙྪིནྣཾ ཙཱིཝརཾ ཨེཏསྶཱཏི ཨཙྪིནྣཙཱིཝརོ. ཡཐཱཧ ‘‘ཨཙྪིནྣཙཱིཝརོ ནཱམ བྷིཀྑུསྶ ཙཱིཝརཾ ཨཙྪིནྣཾ ཧོཏི, རཱཛཱུཧི ཝཱ ཙོརེཧི ཝཱ དྷུཏྟེཧི ཝཱ ཡེཧི ཀེཧིཙི ཝཱ ཨཙྪིནྣཾ ཧོཏཱི’’ཏི. ཨགྒིཨཱདཱིསུ ཡེན ཀེནཙི ནཊྛཾ ཙཱིཝརམེཏསྶཱཏི ནཊྛཙཱིཝརོ. ཡཐཱཧ ‘‘ནཊྛཙཱིཝརོ ནཱམ བྷིཀྑུསྶ ཙཱིཝརཾ ཨགྒིནཱ ཝཱ དཌྜྷཾ ཧོཏི, ཨུདཀེན ཝཱ ཝཱུལ༹ྷཾ ཧོཏི, ཨུནྡཱུརེཧི ཝཱ ཨུཔཙིཀཱཧི ཝཱ ཁཱཡིཏཾ ཧོཏི ¶ , པརིབྷོགཛིཎྞཾ ཝཱ ཧོཏཱི’’ཏི (པཱརཱ. ༥༡༩). སམཡཱཏི ཨཉྙཏྲསདྡཱཔེཀྑཱཡ ཨུཔཡོགཏྠེ ནིསྶཀྐཝཙནནྟི ཨཱཧ ‘‘ཏཾ སམཡ’’ནྟི. ཨཉྙསྨིནྟི ཨཉྙསྨིཾ སམཡེ.

ཏིཀཔཱཙིཏྟིཡནྟི ཨཉྙཱཏཀེ ཨཉྙཱཏཀསཉྙིཝེམཏིཀཉྙཱཏཀསཉྙཱིནཾ ཝསེན ཏཱིཎི པཱཙིཏྟིཡཱནི. སམཡེཏི ཡཐཱཝུཏྟེ ཨཙྪིནྣཙཱིཝརཀཱལེ ཙ ནཊྛཙཱིཝརཀཱལེ ཙ. ཉཱཏཀཔྤཝཱརིཏེ ཝཱ ཝིཉྙཱཔེནྟསྶཱཏི ཉཱཏཀེ, པཝཱརིཏེ ཙ ‘‘ཏུམྷཱཀཾ སནྠཏཾ དེཐཱ’’ཏི ཡཱཙནྟསྶ. ཨེཏྠ (པཱརཱ. ཨཊྛ. ༢.༥༢༡) ཙ སངྒྷཝསེན པཝཱརིཏེ པམཱཎམེཝ ཡཱཙིཏུཾ ཝཊྚཏི, པུགྒལིཀཝསེན པཝཱརིཏེ པན ཡཾ ཡཾ པཝཱརེནྟི, ཏཾ ཏམེཝ ཝིཉྙཱཔེཏབྦཾ. ཡོ ཧི ཙཏཱུཧི པཙྩཡེཧི པཝཱརེཏྭཱ སཡམེཝ སལླཀྑེཏྭཱ ཀཱལཱནུཀཱལཾ ཙཱིཝརཱདཱིནི དིཝསེ དིཝསེ ཡཱགུབྷཏྟཱདཱིནི དེཏི, ཨེཝཾ ཡེན ཡེན ཨཏྠོ, ཏཾ ཏཾ དེཏི, ཏསྶ ཝིཉྙཱཔནཀིཙྩཾ ནཏྠི. ཡོ པན པཝཱརེཏྭཱ བཱལཏཱཡ ¶ ཝཱ སཏིསམྨོསེན ཝཱ ན དེཏི, སོ ཝིཉྙཱཔེཏབྦོ. ཡོ ‘‘མཡ྄ཧཾ གེཧཾ པཝཱརེམཱི’’ཏི ཝདཏི, ཏསྶ གེཧཾ གནྟྭཱ ཡཐཱསུཁཾ ནིསཱིདིཏབྦཾ ནིཔཛྫིཏབྦཾ, ན ཀིཉྩི གཧེཏབྦཾ. ཡོ པན ‘‘ཡཾ མཡ྄ཧཾ གེཧེ ཨཏྠི, ཏཾ པཝཱརེམཱི’’ཏི ཝདཏི, ཡཾ ཏཏྠ ཀཔྤིཡཾ, ཏཾ ཝིཉྙཱཔེཏབྦཾ. གེཧེ པན ནིསཱིདིཏུཾ ཝཱ ནིཔཛྫིཏུཾ ཝཱ ན ལབྦྷཏི. ཏསྶེཝཏྠཱཡཱཏི ‘‘ཨཉྙསྶཱ’’ཏི ལདྡྷཝོཧཱརསྶ ཏསྶེཝ བུདྡྷརཀྑིཏསྶ ཝཱ དྷམྨརཀྑིཏསྶ ཝཱ ཨཏྠཱཡ. ཨཏྟནོ དྷནེན གཎྷནྟསྶཱཏི ཨཏྟནོ ཀཔྤིཡབྷཎྜེན ཀཔྤིཡཝོཧཱརེནེཝ གཎྷནྟསྶ ཙེཏཱཔེནྟསྶ, པརིཝཏྟཱཔེནྟསྶཱཏི ཨཏྠོ.

ཨཉྙཱཏཀཝིཉྙཏྟིསིཀྑཱཔདཝཎྞནཱ ནིཊྛིཏཱ.

༧. ཏཏུཏྟརིསིཀྑཱཔདཝཎྞནཱ

ཏཾ-སདྡོ ཙེཏྠ པཀཏཏྠཝཙནོ. ཙེཏི ནིཔཱཏམཏྟཾ. ཙེཏི ཝཱ ཡདཱིཏི ཨཏྠོ, ཏསྶ ‘‘པཝཱརེཡྻཱ’’ཏི ཨིམིནཱ སམྦནྡྷོ ཝེདིཏབྦོ. པཝཱརེཡྻ ཙེཏི ཡདི པཝཱརེཡྻཱཏི ཨཏྠོ. ‘‘ཨབྷཱིཏི ཨུཔསགྒོ’’ཏི (སཱརཏྠ. ཊཱི. ༢.༥༢༣-༥༢༤) ཨིམིནཱ ཏསྶ ཨཏྠཝིསེསཱབྷཱཝཾ དསྶེཏི. ཏེནཱཧ ‘‘ཧརིཏུནྟི ཨཏྠོ’’ཏི. པཝཱརསདྡསྶ ཨིཙྪཱཡཾ ཝཏྟམཱནཏྟཱ ‘‘ཨིཙྪཱཔེཡྻཱ’’ཏི ཝུཏྟཾ. ཨིཙྪཾ ཨུཔྤཱདེཡྻཱཏི པཙྩཡེ ཨིཙྪཾ ཨུཔྤཱདེཡྻ. ཨུཔནིམནྟནཱཡེཏཾ ཨདྷིཝཙནཾ. ཏེནཱཧ ‘‘ཡཱཝཏྟཀ’’ནྟིཨཱདི. ནེཀྑམྨནྟི པབྦཛྫཾ. དཊྛཱུཏི དཊྛུཾ. ཚནྡཱནུརཀྑཎཏྠཉྷེཏྠ ཨནུནཱསིཀལོཔོ. ཁེམཏོཏི ནིབྦྷཡཏོ. ཀཱཡེན ཝཱ ཝཱཙཱཡ ཝཱ ཨབྷིཧརིཏྭཱ ནིམནྟེཡྻཱཏི སམྦནྡྷོ. ཡཐཱ ཙ ཀཱཡེན ཨབྷིཧརེཡྻ, ཝཱཙཱཡ ཙ, ཏཾ ཝིདྷིཾ དསྶེཏུཾ ‘‘ཨུཔནེཏྭཱ’’ཏིཨཱདི ¶ ཝུཏྟཾ སཨནྟརནྟི ཨནྟརཝཱསཀསཧིཏཾ. ཨུཏྟརནྟི ཨུཏྟརཱསངྒཾ. པརམནྟི ཨཝསཱནཾ. ཨསྶ ཙཱིཝརསྶཱཏི ཨསྶ སམུདཱཡབྷཱུཏསྶ ཧརིཏབྦསྶ ཙཱིཝརསྶ. ཏགྒུཎསཾཝིཉྙཱཎོ ཧི ཨཡཾ བཱཧིརཏྠསམཱསོ ཡཐཱ ‘‘ལམྦཀཎྞོ’’ཏི དཊྛབྦཾ. ཏེནཱཧ ‘‘ནིཝཱསནེནཱ’’ཏིཨཱདི. ཨུཀྐཊྛཔརིཙྪེདེན ཧི སབྦེ ཏཾཔརམཾཡེཝ གཧེཏུཾ ལབྷནྟི.

ཡསྨཱ ¶ ཨཙྪིནྣསབྦཙཱིཝརེན ཏིཙཱིཝརམཏྟཀེནེཝ བྷིཀྑུནཱ ཨེཝཾ པཊིཔཛྫིཏབྦཾ, ཨཉྙེན པན ཨཉྙཐཱཔི, ཏསྨཱ ཏཾ ཝིབྷཱགཾ དསྶེཏུཾ ‘‘ཏཏྲཱཡཾ ཝིནིཙྪཡོ’’ཏིཨཱདི ཝུཏྟཾ. ཨདྷིཊྛིཏཙཱིཝརསྶཱཏི ཏིཙཱིཝརཱདྷིཊྛཱནནཡེན ཝཱ པརིཀྑཱརཙོལ༹ཝསེན ཝཱ ཡེན ཀེནཙི ཨདྷིཊྛིཏཙཱིཝརསྶ, ཨིདཉྩ ཡེབྷུཡྻེན ཨདྷིཊྛཧིཏྭཱ ཙཱིཝརཾ པརིབྷུཉྫཏོ ཝུཏྟཾ, ན པན ཨནདྷིཊྛིཏཙཱིཝརསྶ ཙཱིཝརེ ཨཙྪིནྣེ ཨཡཾ ཝིདྷི ན སམྦྷཝཏཱིཏི. ཡསྶ ཝཱ ཏིཙཱིཝརཏོ ཨདྷིཀམྤི ཙཱིཝརཾ ཨཉྙཏྠ ཨཏྠི, ཏཏྠ ནཏྠི, ཏེནཱཔི ཏདཱ ཏཏྠ ཨབྷཱཝཏོ དྭེ སཱདིཏུཾ ཝཊྚཏི. པཀཏིཡཱཝ སནྟརུཏྟརེན ཙརཏཱིཏི (སཱརཏྠ. ཊཱི. ༢.༥༢༣-༥༢༤) ཨཏྠཏཀཐིནཏྟཱ ཝཱ སཱསངྐསིཀྑཱཔདཝསེན ཝཱ ཨཝིཔྤཝཱསསམྨུཏིཝསེན ཝཱ ཏཏིཡསྶ ཨལཱབྷེན ཝཱ ཙརཏི. ‘‘དྭེ ནཊྛཱནཱི’’ཏི ཨདྷིཀཱརཏྟཱ ཝུཏྟཾ ‘‘དྭེ སཱདིཏབྦཱནཱི’’ཏི. ཨེཀཾ སཱདིཡནྟེནེཝ སམོ བྷཝིསྶཏཱིཏི ཏིཎྞཾ ཙཱིཝརཱནཾ དྭཱིསུ ནཊྛེན ཨེཀཾ སཱདིཡནྟེན སམོ བྷཝིསྶཏི ཨུབྷིནྣམྤི སནྟརུཏྟརཔརམཏཱཡ ཨཝཊྛཱནཏོ. ཡསྶ ཨེཀཾཡེཝ ཧོཏི ཨཉྙེན ཀེནཙི ཀཱརཎེན ཝིནཊྛསེསཙཱིཝརཏྟཱ.

པཉྩསུ ནཊྛེསཱུཏི ཏིཙཱིཝརཾ ཨུདཀསཱཊིཀཱ སཾཀཙྩིཀཱཏི ཨིམེསུ པཉྩསུ ཙཱིཝརེསུ ནཊྛེསུ. ‘‘ཨེཀསྨིཾ ཝཱ ནཊྛེ’’ཏི ཝཙནཝིཔརིཎཱམཾ ཀཏྭཱ ཡོཛེཏབྦཾ. ཏཏོ ཨུཏྟརཱིཏི སནྟརུཏྟརཔརམཏོ ཨུཏྟརི.

སེསཀཾ ཨཱཧརིསྶཱམཱིཏི དྭེ ཙཱིཝརཱནི ཀཏྭཱ ‘‘སེསཀཾ པུན ཨཱཧརིསྶཱམཱི’’ཏི ཨཏྠོ. སེསཀཾ ཏུཡ྄ཧཾཡེཝ ཧོཏཱུཏི ཝུཏྟསྶཱཏི དཱནསམཡེ ཨེཝཾ ཝུཏྟསྶ. སཙེ པན ‘‘སེསཀཾ ཨཱཧརིསྶཱམཱི’’ཏི ཝཏྭཱ གཧེཏྭཱ གམནསམཡེཔི ‘‘སེསཀཾ ཏུཡ྄ཧཾཡེཝ ཧོཏཱུ’’ཏི ཝདནྟི, ལདྡྷཀཔྤིཡམེཝ. ན ཨཙྪིནྣནཊྛཀཱརཎཱ དིནྣནྟི བཱཧུསཙྩཱདིགུཎཝསེན དིནྣཾ. ཝུཏྟནཡེནཱཏི ‘‘ཉཱཏཀཔྤཝཱརིཏེ ཝཱ ཝིཉྙཱཔེནྟསྶ, སམཡེ ཙ ཨཉྙསྶ ཝཱ ཉཱཏཀཔྤཝཱརིཏེ ཏསྶེཝཏྠཱཡ ཝིཉྙཱཔེནྟསྶ’’ཏི ཝུཏྟནཡེན.

ཏཏུཏྟརིསིཀྑཱཔདཝཎྞནཱ ནིཊྛིཏཱ.

༨. པཋམཨུཔཀྑཊསིཀྑཱཔདཝཎྞནཱ

བྷིཀྑུཾ ¶ ¶ པནེཝ ཨུདྡིསྶཱཏི ཨེཏྠ པནཱཏི ནིཔཱཏམཏྟཾ, ཏཐཱ ཨེཝ-སདྡོཔི. ཏེནཱཧ ‘‘ཨིཏྠནྣཱམསྶཱ’’ཏིཨཱདི. ཨཔདིསིཏྭཱཏི ཀཐེཏྭཱ, ཨཱརབྦྷཱཏི ཝཱ ཨཏྠོ. ཨཉྙཱཏཀསྶ གཧཔཏིསྶཱཏི ཨཉྙཱཏཀགཧཔཏིནཱཏི ཨཏྠོ. ཀརཎཏྠེ ཧི ཨིདཾ སཱམིཝཙནཾ. ཨཊྛཀཐཱཡཾ པན ཨིདཾ སུཝིཉྙེཡྻནྟི ན ཝིཙཱརིཏཾ. ཙཱིཝརཾ ཙེཏཱཔེནྟི པརིཝཏྟེནྟི ཨེཏེནཱཏི ཙཱིཝརཙེཏཱཔནྣཾ (སཱརཏྠ. ཊཱི. ༢.༥༢༨-༥༢༩), ཙཱིཝརམཱུལཾ, ན-ཀཱརོ པནེཏྠ ཨཱགམོ, ‘‘ཙཱིཝརཙེཏཱཔན’’ནྟིཔི པཋནྟི. ཏཾ པན ཡསྨཱ ཧིརཉྙཱདཱིསུ ཨཉྙཏརཾ ཧོཏི, ཏསྨཱ ‘‘ཧིརཉྙཱདིཀ’’ནྟི ཝུཏྟཾ. ཏཏྠ ཧིརཉྙནྟི ཀཧཱཔཎོ ཝུཙྩཏི. ཨཱདིསདྡེན སུཝཎྞཱདཱིནཾ གཧཎཾ. ཨུཔཀྑཊནྟི ཨུཔཊྛཱཔིཏཾ. ཏཾ ཨུཔཀྑརཎཾ ཏེསཾ ཏཐཱ སཛྫིཏནྟི ཨཱཧ ‘‘ཨུཔཀྑཊཾ ཧོཏཱིཏི སཛྫིཏཾ ཧོཏཱི’’ཏི. སཾཧརིཏྭཱ ཋཔིཏནྟི རཱསིཾ ཀཏྭཱ ཋཔིཏཾ. པརིཝཏྟནཉྩ ཨཀཏསྶ ཀཱརཱཔནཾ, ཀཏསྶ ཀིཎནནྟི ཨཱཧ ‘‘ཀཱརེཏྭཱ ཝཱ ཀིཎིཏྭཱ ཝཱཏི ཨཏྠོ’’ཏི. ཨཙྪཱདེསྶཱམཱིཏི པཱརུཔེསྶཱམཱིཏི ཝུཏྟཾ ཧོཏི. ཏེནཱཧ ‘‘ཝོཧཱརཝཙནམེཏ’’ནྟི. ཝོཧཱརཝཙནནྟི ཙ ཨུཔཙཱརཝཙནནྟི ཨཏྠོ.

‘‘ཏཏྲ ཙེ སོ བྷིཀྑཱུ’’ཏིཨཱདཱིསུ ཀོ པདསམྦནྡྷོཏི ཨཱཧ ‘‘ཡཏྲ སོ གཧཔཏི ཝཱ’’ཏིཨཱདི. པུབྦེ ཨཔྤཝཱརིཏོཏི ‘‘དསྶཱམི, ཀཱིདིསེན ཏེ, བྷནྟེ, ཙཱིཝརེན ཨཏྠོ, ཀཱིདིསཾ ཏེ ཙཱིཝརཾ ཙེཏཱཔེམཱི’’ཏི པུབྦེ ཨཝུཏྟོ. ཨུཔསངྐམིཏྭཱཏི གནྟྭཱ. པདབྷཱཛནེ པཙུརཝོཧཱརཝསེན ‘‘གྷརཾ གནྟྭཱ’’ཏི (པཱརཱ. ༥༢༩) ཝུཏྟཾ. ཨེཏྠ ཙ པཙུརཝོཧཱརཝསེནཱཏི ཡེབྷུཡྻཝོཧཱརཝསེན. ཡེབྷུཡྻེན ཧི གྷརསཱམིཀཾ དཊྛུཀཱམཱ ཏསྶ གྷརཾ གཙྪནྟཱིཏི ཏཐེཝ བཧུལཝོཧཱརོ. ཝིཀཔྤནྟི ཝིསིཊྛོ ཀཔྤོ ཝིཀཔྤོ, ཝི-སདྡོ ཙེཏྠ ཝིསིཊྛཏྠོ. ཏེནཱཧ ‘‘ཝིསིཊྛཀཔྤ’’ནྟི. ཨིམིནཱ ཝཙནཏྠམཱཧ. ‘‘ཨདྷིཀཝིདྷཱན’’ནྟི ཨིམིནཱ པན ཨདྷིཔྤཱཡཏྠཾ. ཡཐཱ པན ཏམཱཔཛྫཏཱིཏི ཡེནཱཀཱརེན ཏཾ ཝིཀཔྤཾ ཨཱཔཛྫཏི. ཏཾ དསྶེཏུནྟི ཏཾ ཨཱཀཱརཾ དསྶེཏུཾ.

‘‘སཱདྷཱུ’’ཏི ཨཡཾ སདྡོ སམྤཊིཙྪནསམྤཧཾསནསུནྡརཱཡཱཙནཱདཱིསུ དིསྶཏི. ཏཐཱ ཧེས ‘‘སཱདྷུ, བྷནྟེཏི ཁོ སོ བྷིཀྑུ བྷགཝཏོ བྷཱསིཏཾ ¶ ཨབྷིནནྡིཏྭཱ ཨནུམོདིཏྭཱ’’ཏིཨཱདཱིསུ (མ. ནི. ༣.༨༦) སམྤཊིཙྪནེ དིསྶཏི, ‘‘སཱདྷུ སཱདྷུ སཱརིཔུཏྟཱ’’ཏིཨཱདཱིསུ (དཱི. ནི. ༣.༣༤༩; མ. ནི. ༡.༣༤༠) སམྤཧཾསནེ.

‘‘སཱདྷུ ¶ དྷམྨརུཙི རཱཛཱ, སཱདྷུ པཉྙཱཎཝཱ ནརོ;

སཱདྷུ མིཏྟཱནམདྡུབྦྷོ, པཱཔསྶཱཀརཎཾ སུཁ’’ནྟིཨཱདཱིསུ. (ཛཱ. ༢.༡༨.༡༠༡) –

སུནྡརེ, ‘‘སཱདྷུ མེ, བྷནྟེ བྷགཝཱ, སཾཁིཏྟེན དྷམྨཾ དེསེཏཱུ’’ཏིཨཱདཱིསུ (སཾ. ནི. ༣.༦༤-༦༨) ཨཱཡཱཙནེ, ཨིདྷཱཔི ཨཱཡཱཙནེཡེཝ དཊྛབྦོཏི (དཱི. ནི. ཨཊྛ. ༡.༡༨༩; མ. ནི. ཨཊྛ. ༡.༡ མཱུལཔརིཡཱཡསུཏྟཝཎྞནཱ; སུ. ནི. ཨཊྛ. ༡.༡༡༥ ཨགྒིཀབྷཱརདྭཱཛསུཏྟཝཎྞནཱ; བུ. ཝཾ. ཨཊྛ. ༡.༤༩) ཨཱཧ ‘‘སཱདྷཱུཏི ཨཱཡཱཙནེ ནིཔཱཏོ’’ཏི. ཏཏྠ ཨཱཡཱཙནེཏི ཨབྷིམུཁཾ ཡཱཙནེ, ཨབྷིཔཏྠནཱཡནྟི ཨཏྠོ. པརིཝིཏཀྐེ ནིཔཱཏོཏི སམྦནྡྷོ. ཨཱལཔཏཱིཏི ཨཱམནྟེཏི. ཨཱཡཏཱདཱིསཱུཏི ཨེཏྠ ཨཱདིསདྡེན ཝིཏྠཏཨཔྤིཏསཎྷཱནཾ གཧཎཾ. ཡསྨཱ པན ན ཨིམསྶ ཨཱཔཛྫནམཏྟེནེཝ ཨཱཔཏྟི སཱིསཾ ཨེཏི, ཏསྨཱ ‘‘ཏསྶ ཝཙནེནཱ’’ཏིཨཱདི ཝུཏྟཾ. པཡོགེཏི སུཏྟཔརིཡེསནཱདིཔཡོགེ.

མཧགྒྷཾ ཙེཏཱཔེཏུཀཱམཾ ཨཔྤགྒྷནྟི ཝཱིསཏིཨགྒྷནཀཾ ཙཱིཝརཾ ཙེཏཱཔེཏུཀཱམཾ ‘‘ཨལཾ མཡ྄ཧཾ ཏེན, དསཨགྒྷནཀཾ ཝཱ ཨཊྛགྒྷནཀཾ ཝཱ དེཧཱི’’ཏི ཝདནྟསྶཱཏི ཨཏྠོ. ཨེཝརཱུཔནྟི ཨེཝཾ སམབྷཱགཾ, ཨིམིནཱ སམཀནྟི ཝུཏྟཾ ཧོཏི. ཏཉྩ ཁོ ཨགྒྷཝསེནེཝ, ན པམཱཎཝསེན. ཨགྒྷཝཌྜྷནཀཉྷི ཨིདཾ སིཀྑཱཔདཾ.

པཋམཨུཔཀྑཊསིཀྑཱཔདཝཎྞནཱ ནིཊྛིཏཱ.

༩. དུཏིཡཨུཔཀྑཊསིཀྑཱཔདཝཎྞནཱ

ཀསྨཱ ཨིམིནཱ ནཡེན ཨཏྠོ ཝེདིཏབྦོཏི ཨཱཧ ‘‘ཨིདཉྷཱི’’ཏིཨཱདི. ཧཱིཏི ཀཱརཎཏྠེ ནིཔཱཏོ. ན ཀོཙི ཝིསེསོཏི ཨཱཧ ‘‘ཀེཝལ’’ནྟིཨཱདི.

དུཏིཡཨུཔཀྑཊསིཀྑཱཔདཝཎྞནཱ ནིཊྛིཏཱ.

༡༠. རཱཛསིཀྑཱཔདཝཎྞནཱ

རཱཛཏོ ¶ བྷོགྒནྟི རཱཛཏོ ལདྡྷབྷོགྒཾ. རཱཛབྷོགྒོཏི རཱཛཱམཏྟོ. རཱཛཏོ བྷོགོཏི རཉྙཱ ¶ དིནྣཾ ཨིསྶརིཡཾ. ཨིམིནཱཏིཨཱདཱིཏི ‘‘ཨིམིནཱ ཙཱིཝརཙེཏཱཔནྣེན ཙཱིཝརཾ ཙེཏཱཔེཏྭཱ ཨིཏྠནྣཱམཾ བྷིཀྑུཾ ཙཱིཝརེན ཨཙྪཱདེཧཱི’’ཏི ཨིདཾ. ཨཱགམནསུདྡྷིནྟི མཱུལསུདྡྷིཾ. ཡདི ཧི ཨིམིནཱ ཀཔྤིཡནཱིཧཱརེན ཨཔེསེཏྭཱ ‘‘ཨིདཾ ཨིཏྠནྣཱམསྶ བྷིཀྑུནོ དེཧཱི’’ཏི པེསེཡྻ, སོཔི དཱུཏོ ཏཾ བྷིཀྑུཾ ཨུཔསངྐམིཏྭཱ ཨེཝཾ ཝདེཡྻ ‘‘ཨིདཾ ཁོ, བྷནྟེ, ཨཱཡསྨནྟཾ ཨུདྡིསྶ ཙཱིཝརཙེཏཱཔནྣཾ ཨཱབྷཏཾ, པཊིགྒཎྷཱཏུ ཨཱཡསྨཱ ཙཱིཝརཙེཏཱཔནྣ’’ནྟི (པཱརཱ. ༥༣༨), ཏདཱ པཊིཀྑིཔིཏྭཱཔི ཀཔྤིཡཀཱརཀཾ པུཊྛེན ཏཾ ནིདྡིསིཏུཾ ན ཝཊྚཏི. ཏེནཱཧ ‘‘སཙེ ཧཱི’’ཏིཨཱདི. ཨཀཔྤིཡཝཏྠུཾ ཨཱརབྦྷཱཏི ཧིརཉྙཱདིཾ ཨཱརབྦྷ. ཨཱིདིསེན དཱུཏཝཙནེནཱཏི ‘‘པཊིགྒཎྷཱཏུ ཨཱཡསྨཱ ཙཱིཝརཙེཏཱཔནྣ’’ནྟི ཨེཝརཱུཔེན དཱུཏཝཙནེན. ཏསྨཱཏི ཡསྨཱ སམྤཊིཙྪིཏུཾ ཨཀཔྤིཡཾ ཧོཏི, ཏསྨཱ. སུཝཎྞནྟི ཛཱཏརཱུཔཾ. རཛཏནྟི རཱུཔིཡཾ. ཀཧཱཔཎེནཱཏི སུཝཎྞམཡོ ཝཱ རཱུཔིཡམཡོ ཝཱ པཱཀཏིཀོ ཝཱ ཀཧཱཔཎོ. མཱསཀོཏི ལོཧམཱསཀོ ཝཱ ཧོཏུ, དཱརུམཱསཀོ ཝཱ ཧོཏུ, ཛཏུམཱསཀོ ཝཱ ཧོཏུ, ཡོ ཡོ ཡཏྠ ཡཏྠ ཛནཔདེ ཡདཱ ཡདཱ ཝོཧཱརཾ གཙྪཏི, ཨནྟམསོ ཨཊྛིམཡོཔི ཙམྨམཡོཔི རུཀྑཕལབཱིཛམཡོཔི སམུཊྛཱཔིཏརཱུཔོཔི ཨསམུཊྛཱཔིཏརཱུཔོཔི སབྦོ ཨིདྷ མཱསཀོཏི ཝེདིཏབྦོ. ཨེཏྠ ཙ ཡཾ ཝཏྟབྦཾ, ཏཾ རཱུཔིཡསིཀྑཱཔདེ ཝཀྑཱམ.

མུཏྟཱཏི ཧཏྠིཀུམྦྷཛཱདིཀཱ ཨཊྛཝིདྷཱ མུཏྟཱ. ཏཐཱ ཧི ཧཏྠིཀུམྦྷཾ ཝརཱཧདཱཋཾ, བྷུཛངྒསཱིསཾ, ཝལཱཧཀཾ, ཝེལུ༹, མཙྪསིརོ, སངྑོ, སིཔྤཱིཏི ཨཊྛ མུཏྟཱཡོནིཡོ. ཏཏྠ ཡཱ མཙྪསངྑསིཔྤིཛཱཏཱ, སཱ སཱམུདྡིཀཱ, བྷུཛངྒཛཱཔི ཀཱཙི སཱམུདྡིཀཱ ཧོཏི. ཨིཏརཱ ཨསཱམུདྡིཀཱ. ཡསྨཱ པན བཧུལཾ སཱམུདྡིཀཱཝ མུཏྟཱ ལོཀེ དིསྶནྟི, ཏཏྠཱཔི སིཔྤིཛཱཝ, ཨིཏརཱ ཀདཱཙི. ཏསྨཱ སམྨོཧཝིནོདནིཡཾ ‘‘མུཏྟཱཏི སཱམུདྡིཀམུཏྟཱ’’ཏི (ཝིབྷ. ཨཊྛ. ༡༧༢) ཝུཏྟཾ. མཎཱིཏི ཋཔེཏྭཱ ཝེལུ༹རིཡཱདིཀེ ཨནྟམསོ ཛཱཏིཕལིཀཾ ཨུཔཱདཱཡ སབྦོཔི ནཱིལཔཱིཏཱདིཝཎྞབྷེདོ མཎཱིཏི ཝེདིཏབྦོ, པཙིཏྭཱ ཀཏོ པན ཀཱཙམཎིཡེཝེཀོ པཏྟཱདིབྷཎྜམཱུལཏྠཾ སམྤཊིཙྪིཏུཾ ཝཊྚཏི. ཝེལུ༹རིཡོ ནཱམ ཝཾསཝཎྞམཎི. སངྑོཏི དྷམནསངྑོ དྷོཏཝིདྡྷོ རཏནམིསྶོ, པཱནཱིཡསངྑོ ¶ པན རཏནཱམིསྶཀཏོ, སོ ཙ ཨཉྫནཱདིབྷེསཛྫཏྠཱཡ, བྷཎྜམཱུལཏྠཱཡ ཙ སམྤཊིཙྪིཏུཾ ཝཊྚཏི. སིལཱཏི དྷོཏཝིདྡྷཱ རཏནསཾཡུཏྟཱ མུགྒཝཎྞཱ སིལཱ. རཏནེན པན ཨམིསྶཱ སཏྠཀནིསཱནཱདིཨཏྠཱཡ པཊིགྒཎྷིཏུཾ ཝཊྚཏི. ཨེཏྠ ཙ ‘‘རཏནསཾཡུཏྟཱཏི སུཝཎྞེན སདྡྷིཾ ཡོཛེཏྭཱ པཙིཏྭཱ ཀཏཱ’’ཏི ཝདནྟི. པཝཱལ༹ནྟི དྷོཏམྤི ཨདྷོཏམྤི སབྦཾ པཝཱལ༹ཾ. ལོཧིཏངྐོཏི རཏྟམཎི. མསཱརགལླནྟི ཀབརམཎི. ཡཾ ‘‘མརཀཏ’’ནྟིཔི ཝུཙྩཏི.

སཏྟ དྷཉྙཱནཱིཏི སཱནུལོམཱནི སཱལིཨཱདཱིནི སཏྟ དྷཉྙཱནི. ནཱིཝཱརཱདིཨུཔདྷཉྙསྶ པན སཱལིཨཱདིམཱུལདྷཉྙནྟོགདྷཏྟཱ ‘‘སཏྟ དྷཉྙཱནཱི’’ཏི ཝུཏྟཾ. དཱསིདཱསཁེཏྟཝཏྠུཔུཔྥཱརཱམཕལཱརཱམཱདཡོཏི ¶ ཨེཏྠ དཱསཱི ནཱམ ཨནྟོཛཱཏདྷནཀྐཱིཏཀརམརཱནཱིཏཔྤབྷེདཱ. ཏཐཱ དཱསོ. ཁེཏྟཾ ནཱམ ཡསྨིཾ པུབྦཎྞཾ རུཧཏི. ཝཏྠུ ནཱམ ཡསྨིཾ ཨཔརཎྞཾ རུཧཏི. ཡཏྠ ཝཱ ཨུབྷཡམྤི རུཧཏི, ཏཾ ཁེཏྟཾ. ཏདཏྠཱཡ ཨཀཏབྷཱུམིབྷཱགོ ཝཏྠུ. ཁེཏྟཝཏྠུསཱིསེན ཙེཏྠ ཝཱཔིཏལཱ༹ཀཱདཱིནིཔི སངྒཧིཏཱནེཝ. ཝསྶིཀཱདཱིནཾ པུཔྥནཀོ པུཔྥཱརཱམོ. ཨམྦཕལཱདཱིནཾ ཕལནཀོ ཕལཱརཱམོ. ན ཀེཝལཉྩ ཨཏྟནོཡེཝཏྠཱཡ སམྤཊིཙྪིཏུཾ ན ཝཊྚཏི, སཙེཔི ཀོཙི ཛཱཏརཱུཔརཛཏཾ ཨཱནེཏྭཱ ‘‘ཨིདཾ སངྒྷསྶ དམྨི, ཨཱརཱམཾ ཝཱ ཀརོཐ, ཙེཏིཡཾ ཝཱ བྷོཛནསཱལཱདཱིནཾ ཝཱ ཨཉྙཏར’’ནྟི ཝདཏི, ཨིདམྤི སམྤཊིཙྪིཏུཾ ན ཝཊྚཏི. ‘‘ཡསྶ ཀསྶཙི ཧི ཨཉྙསྶ ཨཏྠཱཡ སམྤཊིཙྪནྟསྶ དུཀྐཊཾ ཧོཏཱི’’ཏི (པཱརཱ. ཨཊྛ. ༢.༥༣༨-༥༣༩) མཧཱཔཙྩརིཡཾ ཝུཏྟཾ. ཏེནཱཧ ‘‘ཙེཏིཡསངྒྷགཎཔུགྒལཱནཾ ཝཱ ཨཏྠཱཡ སམྤཊིཙྪིཏུཾ ན ཝཊྚནྟཱི’’ཏི.

སཙེ པན སངྒྷཾ ཝཱ གཎཾ ཝཱ པུགྒལཾ ཝཱ ཨནཱམསིཏྭཱ ‘‘ཨིདཾ ཧིརཉྙསུཝཎྞཾ ཙེཏིཡསྶ དེམ, ཝིཧཱརསྶ དེམ, ནཝཀམྨསྶ དེམཱ’’ཏི ཝདནྟི, པཊིཀྑིཔིཏུཾ ན ཝཊྚཏི. ‘‘ཨིམེ ཨིདཾ བྷཎནྟཱི’’ཏི ཀཔྤིཡཀཱརཀཱནཾ ཨཱཙིཀྑིཏབྦཾ. ‘‘ཙེཏིཡཱདཱིནཾ ཨཏྠཱཡ ཏུམྷེ གཧེཏྭཱ ཋཔེཐཱ’’ཏི ཝུཏྟེ པན ‘‘ཨམྷཱཀཾ གཧེཏུཾ ན ཝཊྚཏཱི’’ཏི པཊིཀྑིཔིཏབྦཾ.

ཝེཡྻཱཝཙྩཀརོཏི ཀིཙྩཀརོ. ཨིདྷ པན སབྦོ ཀིཙྩཀརོཝ ‘‘ཝེཡྻཱཝཙྩཀརོ’’ཏི ཨདྷིཔྤེཏོཏི ཨཱཧ ‘‘ཀཔྤིཡཀཱརཀོ’’ཏི. ཨེསོ ཁོཏི ‘‘ཨསུཀཝཱིཐིཡཾ ཨསུཀགྷརེ ཨསུཀནཱམོ’’ཏི པརམྨུཁཾ ཝདཏི. ཨིཏརམྤཱིཏི པརམྨུཁཱནིདྡིཊྛམྤི. ‘‘ཨཏྠོ མེ, ཨཱཝུསོ, ཙཱིཝརེནཱ’’ཏི ཨེཏཾ ཙོདནཱལཀྑཎནིདསྶནནྟི སམྦནྡྷོ. ཏཏྠ ཙོདནཱལཀྑཎནིདསྶནནྟི ཝཱཙཱཡ ¶ ཙོདནཱལཀྑཎནིདསྶནཾ. ཏེནཱཧ ‘‘སཙེ ཧཱི’’ཏིཨཱདི. ཨིདཾ ཝཱ ཝཙནཾ ཝཏྟབྦནྟི སམྦནྡྷོ. ཨེཏསྶ ཝཱ ཨཏྠོ ཡཱཡ ཀཱཡཙི བྷཱསཱཡ ཝཏྟབྦོཏི སམྦནྡྷོ. ‘‘དེཧི མེ ཙཱིཝརཾ, ཨཱཧར མེ ཙཱིཝརཾ, པརིཝཏྟེཧི མེ ཙཱིཝརཾ, ཙེཏཱཔེཧི མེ ཙཱིཝར’’ནྟི ཨེཏཱནི པན ཝཙནཱནི ཨེཏེསཾ ཝཱ ཨཏྠོ ཡཱཡ ཀཱཡཙི བྷཱསཱཡ ན ཝཏྟབྦོ. ཏེནཱཧ ‘‘དེཧི མེ’’ཏིཨཱདི. སཱདྷེཡྻཱཏི ནིཔྥཱདེཡྻ. ཨིཙྩེཏཾ ཀུསལནྟི ཨེཝཾ ཡཱཝཏཏིཡཾ ཙོདནེན ཏསྶ ཙཱིཝརསྶ ཡདེཏཾ ཨབྷིནིཔྥཱདནཾ, ཨེཏཾ ཀུསལཾ སཱདྷུ སུཊྛཱུཏི ཨཏྠོ. ཏེནཱཧ ‘‘ཨེཏཾ སུནྡར’’ནྟི.

ཚཀྑཏྟུཾ པརམོ པརིཙྪེདོ ཨསྶཱཏི ཚཀྑཏྟུཔརམཾ. ཨིདཉྷི ‘‘ཋཱཏབྦ’’ནྟི ཨིམིསྶཱ ཀིརིཡཱཡ ཝིསེསནཾ, ཚཀྑཏྟུཔརམཾ ཋཱནཾ ཀཱཏབྦནྟི ཨཏྠོ. ཏེནཱཧ ‘‘བྷཱཝནཔུཾསཀཝཙནམེཏ’’ནྟི, ཨེཏཾ བྷཱཝེ ཋཱཏབྦནྟི ཝུཏྟདྷཱཏྭཏྠམཏྟེ སཱདྷེཏབྦེ ནཔུཾསཀལིངྒཝཙནནྟི ཨཏྠོ. ན ནིསཱིདིཏབྦནྟི ‘‘ཨིདྷ, བྷནྟེ, ནིསཱིདཐཱ’’ཏི ཝུཏྟེཔི ན ནིསཱིདིཏབྦཾ ¶ . ན ཨཱམིསཾ པཊིགྒཧེཏབྦནྟི ཡཱགུཁཛྫཀཱདིབྷེདཾ ཀིཉྩི ཨཱམིསཾ ‘‘གཎྷཐ, བྷནྟེ’’ཏི ཡཱཙིཡམཱནེནཱཔི ན གཎྷིཏབྦཾ. ན དྷམྨོ བྷཱསིཏབྦོཏི (པཱརཱ. ཨཊྛ. ༢.༥༣༨-༥༣༩) ‘‘མངྒལཾ ཝཱ ཨནུམོདནཾ ཝཱ བྷཱསཐཱ’’ཏི ཡཱཙིཡམཱནེནཱཔི ན ཀིཉྩི བྷཱསིཏབྦཾ. ཋཱནཾ བྷཉྫཏཱིཏི ཋིཏིཾ ཝིནཱསེཏི. ཋཏྭཱ ཙཱིཝརཾ གཧེཏུཾ ཨཱགཏེན ཧི ཏཾ ཨུདྡིསྶ ཏུཎྷཱིབྷཱུཏེན ཋཱཏབྦམེཝ, ན ནིསཛྫཱདིཀཾ ཀཱཏབྦཾ. ཨིམིནཱ པན ཏཾ ཀཏནྟི ཋཱནཾ ཝིནཱསིཏཾ ཧོཏི. ཏེནཱཧ ‘‘ཨཱགཏཀཱརཎཾ ཝིནཱསེཏཱི’’ཏི. ‘‘ཨཱགཏཀཱརཎཾ ནཱམ ཋཱནམེཝ, ཏསྨཱ ‘ན ཀཱཏབྦ’ནྟི ཝཱརིཏསྶ ཀཏཏྟཱ ནིསཛྫཱདཱིསུ ཀཏེསུ ཚསུ ཋཱནེསུ ཨེཀཾ ཋཱནཾ བྷཉྫཏཱི’’ཏི (སཱརཏྠ. ཊཱི. ༢.༥༣༧-༥༣༩) ཨཡམེཏྠ ཨདྷིཔྤཱཡོ. ཚཀྑཏྟུཔརམཾ ཏུཎྷཱིབྷཱུཏེན ཨུདྡིསྶ ཋཱཏབྦཾ. ‘‘ན ཨཉྙཾ ཀིཉྩི ཀཱཏབྦ’’ནྟི ཧི ཨིདཾ ཋཱནལཀྑཎཾ. ཏེནེཝཱཧ ‘‘ཨིད’’ནྟིཨཱདི. ཏཏྠ ཨིདནྟི ‘‘ཙཏུཀྑཏྟུཾ པཉྩཀྑཏྟུཾ, ཚཀྑཏྟུཔརམཾ ཏུཎྷཱིབྷཱུཏེན ཨུདྡིསྶ ཋཱཏབྦ’’ནྟི ཝཙནཾ. ཨེཏྠ ཙ ‘‘ནིསཱིདནཱདིམྷི ཀཏེ པུན ཙཱིཝརཾ གཧེཏུཾ ན ལབྷཏཱི’’ཏི ཀེཙི. ‘‘དྭེ ཋཱནཱནི པརིཧཱཡནྟཱི’’ཏི ཨཉྙེ. ‘‘ཨེཀཾ ཋཱནཾ པརིཧཱཡཏཱི’’ཏི ཨཔརེ. ཨུབྷཡཾ ཀརོཏཱིཏི ཙོདེཏིཔི ཏིཊྛཏིཔི.

‘‘ཏཏྲ ཏཏྲ ཋཱནེ ཏིཊྛཏཱི’’ཏི ཨིདཾ ཙོདཀསྶ ཋིཏཊྛིཏཊྛཱནཏོ ཨཔཀྐམྨ ཏཏྲ ཏཏྲ ཙཱིཝརཾ ཨུདྡིསྶ ཋཱནཾཡེཝ སནྡྷཱཡ ཝུཏྟཾ. ཨེཏྠཱཏི ཨེཏེསུ དྭཱིསུ ཙོདནཱཊྛཱནེསུ.

ཀིཾ ¶ པན སབྦཀཔྤིཡཀཱརཀེསུ (པཱརཱ. ཨཊྛ. ༢.༥༣༨-༥༣༩; ཝི. སངྒ. ཨཊྛ. ༦༥) ཨེཝཾ པཊིཔཛྫིཏབྦནྟི? ན པཊིཔཛྫིཏབྦཾ. ཨཡཉྷི ཀཔྤིཡཀཱརཀོ ནཱམ སངྑེཔཏོ དུཝིདྷོ ནིདྡིཊྛོ ཙ ཨནིདྡིཊྛོ ཙ. ཏཏྠ ཙ ནིདྡིཊྛོ དུཝིདྷོ བྷིཀྑུནཱ ནིདྡིཊྛོ, དཱུཏེན ནིདྡིཊྛོཏི. ཨནིདྡིཊྛོཔི དུཝིདྷོ མུཁཝེཝཊིཀཀཔྤིཡཀཱརཀོ, པརམྨུཁཀཔྤིཡཀཱརཀོཏི. ཏེསུ བྷིཀྑུནཱ ནིདྡིཊྛོ སམྨུཁཱསམྨུཁཝསེན ཙཏུབྦིདྷོ ཧོཏི, ཏཐཱ དཱུཏེན ནིདྡིཊྛོཔི.

ཀཐཾ? ཨིདྷེཀཙྩོ བྷིཀྑུསྶ ཙཱིཝརཏྠཱཡ དཱུཏེན ཨཀཔྤིཡཝཏྠུཾ པཧིཎཏི, དཱུཏོ ཙ ཏཾ བྷིཀྑུཾ ཨུཔསངྐམིཏྭཱ ‘‘ཨིདཾ, བྷནྟེ, ཨིཏྠནྣཱམེན ཏུམྷཱཀཾ ཙཱིཝརཏྠཱཡ པཧིཏཾ, གཎྷཐ ན’’ནྟི ཝདཏི. བྷིཀྑུ ‘‘ཨིདཾ ན ཀཔྤཏཱི’’ཏི པཊིཀྑིཔཏི. དཱུཏོ ‘‘ཨཏྠི པན ཏེ, བྷནྟེ, ཝེཡྻཱཝཙྩཀརོ’’ཏི པུཙྪཏི, པུཉྙཏྠིཀེཧི ཙ ཨུཔཱསཀེཧི ‘‘བྷིཀྑཱུནཾ ཝེཡྻཱཝཙྩཾ ཀརོཐཱ’’ཏི ཨཱཎཏྟཱ ཝཱ བྷིཀྑཱུནཾ ཝཱ སནྡིཊྛཱ སམྦྷཏྟཱ ཀེཙི ཝེཡྻཱཝཙྩཀརཱ ཧོནྟི, ཏེསཾ ཨཉྙཏརོ ཏསྨིཾ ཁཎེ བྷིཀྑུསྶ སནྟིཀེ ནིསིནྣོ ཧོཏི, བྷིཀྑུ ཏཾ ནིདྡིསཏི ‘‘ཨཡཾ བྷིཀྑཱུནཾ ཝེཡྻཱཝཙྩཀརོ’’ཏི ¶ . དཱུཏོ ཏསྶ ཧཏྠེ ཨཀཔྤིཡཝཏྠུཾ དཏྭཱ ‘‘ཐེརསྶ ཙཱིཝརཾ ཀིཎིཏྭཱ དེཧཱི’’ཏི གཙྪཏི, ཨཡཾ བྷིཀྑུནཱ སམྨུཁཱནིདྡིཊྛོ.

ནོ ཙེ བྷིཀྑུསྶ (པཱརཱ. ཨཊྛ. ༢.༥༣༧; ཝི. སངྒ. ཨཊྛ. ༦༥) སནྟིཀེ ནིསིནྣོ ཧོཏི, ཨཔིཙ ཁོ བྷིཀྑུ ནིདྡིསཏི ‘‘ཨསུཀསྨིཾ ནཱམ གཱམེ ཨིཏྠནྣཱམོ བྷིཀྑཱུནཾ ཝེཡྻཱཝཙྩཀརོ’’ཏི. སོ གནྟྭཱ ཏསྶ ཧཏྠེ ཨཀཔྤིཡཝཏྠུཾ དཏྭཱ ‘‘ཐེརསྶ ཙཱིཝརཾ ཀིཎིཏྭཱ དདེཡྻཱསཱི’’ཏི ཨཱགནྟྭཱ བྷིཀྑུསྶ ཨཱརོཙེཏྭཱ གཙྪཏི, ཨཡམེཀོ བྷིཀྑུནཱ ཨསམྨུཁཱནིདྡིཊྛོ.

ན ཧེཝ ཁོ སོ དཱུཏོ ཨཏྟནཱ ཨཱགནྟྭཱ ཨཱརོཙེཏི, ཨཔིཙ ཁོ ཨཉྙཾ པཧིཎཏི ‘‘དིནྣཾ མཡཱ, བྷནྟེ, ཏསྶ ཧཏྠེ ཙཱིཝརཙེཏཱཔནྣཾ, ཙཱིཝརཾ གཎྷེཡྻཱཐཱ’’ཏི, ཨཡཾ དུཏིཡོ བྷིཀྑུནཱ ཨསམྨུཁཱནིདྡིཊྛོ.

ན ཧེཝ ཁོ ཨཉྙཾ པཧིཎཏི, ཨཔིཙ ཁོ གཙྪནྟོཝ བྷིཀྑུཾ ཝདཏི ‘‘ཨཧཾ ཏསྶ ཧཏྠེ ཙཱིཝརཙེཏཱཔནྣཾ དསྶཱམི, ཏུམྷེ ཙཱིཝརཾ གཎྷེཡྻཱཐཱ’’ཏི, ཨཡཾ ཏཏིཡོ བྷིཀྑུནཱ ཨསམྨུཁཱནིདྡིཊྛོཏི ཨེཝཾ ཨེཀོ སམྨུཁཱནིདྡིཊྛོ ཏཡོ ཨསམྨུཁཱནིདྡིཊྛཱཏི ཨིམེ ཙཏྟཱརོ བྷིཀྑུནཱ ནིདྡིཊྛཝེཡྻཱཝཙྩཀརཱ ནཱམ. ཨེཏེསུ ཨིམསྨིཾ རཱཛསིཀྑཱཔདེ ཝུཏྟནཡེནེཝ པཊིཔཛྫིཏབྦཾ.

ཨཔརོ ¶ བྷིཀྑུ པུརིམནཡེནེཝ དཱུཏེན པུཙྪིཏོ ནཏྠིཏཱཡ ཝཱ ཨཝིཙཱརེཏུཀཱམཏཱཡ ཝཱ ‘‘ནཏྠམྷཱཀཾ ཀཔྤིཡཀཱརཀོ’’ཏི ཝདཏི, ཏསྨིཉྩ ཁཎེ ཀོཙི མནུསྶོ ཨཱགཙྪཏི, དཱུཏོ ཏསྶ ཧཏྠེ ཨཀཔྤིཡཝཏྠུཾ དཏྭཱ ‘‘ཨིམསྶ ཧཏྠཏོ ཙཱིཝརཾ གཎྷེཡྻཱཐཱ’’ཏི ཝཏྭཱ གཙྪཏི, ཨཡཾ དཱུཏེན སམྨུཁཱནིདྡིཊྛོ.

ཨཔརོ དཱུཏོ གཱམཾ པཝིསིཏྭཱ ཨཏྟནཱ ཨབྷིརུཙིཏསྶ ཀསྶཙི ཧཏྠེ ཨཀཔྤིཡཝཏྠུཾ དཏྭཱ པུརིམནཡེནེཝ ཨཱགནྟྭཱ ཝཱ ཨཱརོཙེཏི, ཨཉྙཾ ཝཱ པཧིཎཏི, ‘‘ཨཧཾ ཨསུཀསྶ ནཱམ ཧཏྠེ ཙཱིཝརཙེཏཱཔནྣཾ དསྶཱམི, ཏུམྷེ ཙཱིཝརཾ གཎྷེཡྻཱཐཱ’’ཏི ཝཏྭཱ ཝཱ གཙྪཏི, ཨཡཾ ཏཏིཡོ དཱུཏེན ཨསམྨུཁཱནིདྡིཊྛོཏི ཨེཝཾ ཨེཀོ སམྨུཁཱནིདྡིཊྛོ, ཏཡོ ཨསམྨུཁཱནིདྡིཊྛཱཏི ཨིམེ ཙཏྟཱརོ དཱུཏེན ནིདྡིཊྛཝེཡྻཱཝཙྩཀརཱ ནཱམ. ཨེཏེསུ མེཎྜཀསིཀྑཱཔདེ ཝུཏྟནཡེནེཝ པཊིཔཛྫིཏབྦཾ.

ཝུཏྟཉྷེཏཾ ¶ –

‘‘སནྟི, བྷིཀྑཝེ, མནུསྶཱ སདྡྷཱ པསནྣཱ, ཏེ ཀཔྤིཡཀཱརཀཱནཾ ཧཏྠེ ཧིརཉྙཾ ཨུཔནིཀྑིཔནྟི ‘ཨིམིནཱ ཨཡྻསྶ ཡཾ ཀཔྤིཡཾ, ཏཾ དེཐཱ’ཏི. ཨནུཛཱནཱམི, བྷིཀྑཝེ, ཡཾ ཏཏོ ཀཔྤིཡཾ, ཏཾ སཱདིཏུཾ, ན ཏྭེཝཱཧཾ, བྷིཀྑཝེ, ཀེནཙི པརིཡཱཡེན ཛཱཏརཱུཔརཛཏཾ སཱདིཏབྦཾ པརིཡེསིཏབྦནྟི ཝདཱམཱི’’ཏི (མཧཱཝ. ༢༩༩).

ཨེཏྠ ཙ ཙོདནཱཡ པརིམཱཎཾ ནཏྠི. མཱུལཾ ཨསཱདིཡནྟེན སཧསྶཀྑཏྟུམྤི ཙོདནཱཡ ཝཱ ཋཱནེན ཝཱ ཀཔྤིཡབྷཎྜཾ སཱདིཏུཾ ཝཊྚཏི. ནོ ཙེ དེཏི, ཨཉྙཾ ཀཔྤིཡཀཱརཀཾ ཋཔེཏྭཱཔི ཨཱཧརཱཔེཏབྦཾ. སཙེ ཨིཙྪཏི, མཱུལསཱམིཀཱནམྤི ཀཐེཏབྦཾ. ནོ ཙེ ཨིཙྪཏི, ན ཀཐེཏབྦཾ.

ཨཔརོ བྷིཀྑུ པུརིམནཡེནེཝ དཱུཏེན པུཙྪིཏོ ‘‘ནཏྠམྷཱཀཾ ཀཔྤིཡཀཱརཀོ’’ཏི ཝདཏི, ཏདཉྙོ སམཱིཔེ ཋིཏོ སུཏྭཱ ‘‘ཨཱཧར, བྷོ, ཨཧཾ ཨཡྻསྶ ཙཱིཝརཾ ཙེཏཱཔེཏྭཱ དསྶཱམཱི’’ཏི ཝདཏི. དཱུཏོ ‘‘ཧནྡ, བྷོ, དདེཡྻཱསཱི’’ཏི ཏསྶ ཧཏྠེ དཏྭཱ བྷིཀྑུསྶ ཨནཱརོཙེཏྭཱཝ གཙྪཏི, ཨཡཾ མུཁཝེཝཊིཀཀཔྤིཡཀཱརཀོ.

ཨཔརོ (པཱརཱ. ཨཊྛ. ༢.༥༣༨-༥༣༩; ཝི. སངྒ. ཨཊྛ. ༦༥) བྷིཀྑུནོ ཨུཔཊྛཱཀསྶ ཝཱ ཨཉྙསྶ ཝཱ ཧཏྠེ ཨཀཔྤིཡཝཏྠུཾ དཏྭཱ ‘‘ཐེརསྶ ཙཱིཝརཾ དདེཡྻཱསཱི’’ཏི ཨེཏྟོཝ པཀྐམཏི, ཨཡཾ པརམྨུཁཀཔྤིཡཀཱརཀོཏི ¶ ཨིམེ དྭེ ཨནིདྡིཊྛཀཔྤིཡཀཱརཀཱ ནཱམ. ཨེཏེསུ ཨཉྙཱཏཀཨཔྤཝཱརིཏེསུ ཝིཡ པཊིཔཛྫིཏབྦཾ.

སཙེ སཡམེཝ ཙཱིཝརཾ ཨཱནེཏྭཱ དེནྟི, གཧེཏབྦཾ. ནོ ཙེ, ན ཀིཉྩི ཝཏྟབྦཱ. ཏེནཱཧ ‘‘སཙེ’’ཏིཨཱདི. ཀཔྤིཡཀཱརཀེཏི སམྨུཁཱསམྨུཁཝསེན ཙཏྟཱརོ ཀཔྤིཡཀཱརཀེཏི ཨཏྠོ. ‘‘དཱཡཀོ སཡམེཝཱ’’ཏི ཨིམིནཱ བྷིཀྑུཾ པཊིཀྑིཔཏི, ན དཱུཏཾ. ཏསྨཱ དཱུཏེན ནིདྡིཊྛོཔི ཡཐཱརུཙི ཙོདེཏུཾ ཝཊྚཏི. མུཁཾ ཝིཝརིཏྭཱ སཡམེཝ ཀཔྤིཡཀཱརཀཏྟཾ ཨུཔགཏོཏི མུཁཝེཝཊིཀཀཔྤིཡཀཱརཀོ. ཨེཝནྟི ‘‘ཨེསོ ཁོ’’ཏིཨཱདིནཱ ཡཐཱཝུཏྟེན ཨཱཀཱརེན. དསྶིཏཱ ཧོནྟི སངྑེཔཏོཏི ཨདྷིཔྤཱཡོ.

ཝུཏྟཙོདནཱཊྛཱནཔརིམཱཎཏོཏི ཝུཏྟཙོདནཱཔརིམཱཎཏོ ཙ ཝུཏྟཊྛཱནཔརིམཱཎཏོ ཙ. སནྟིཀནྟི སམཱིཔཾ. ཏཏྠཱཏི ཨེཏྠ ཀཐམཡམཏྠོ ལབྦྷཏཱིཏི ཨཱཧ ‘‘སམཱིཔཏྠེ ཧི ཨིདཾ བྷུམྨཝཙན’’ནྟི ¶ . ཨིདཾ ཝུཏྟཾ ཧོཏི – ‘‘གངྒཱཡཾ གོཡཱུཐཱནི ཙརནྟི, ཀཱུཔེ གགྒཀཱུལ’’ནྟིཨཱདཱིསུ ཝིཡ ཡསྨཱ སམཱིཔཱདྷཱརེ ཨིདཾ སཏྟམཱིཝིབྷཏྟིཝཙནཾ, ཏསྨཱ ཨཡམཏྠོ ལབྦྷཏཱིཏི. ཨེཝཾ ཨཀརོནྟོཏི སཱམཾ ཝཱ ཨགཙྪནྟོ, དཱུཏཾ ཝཱ ཨཔཱཧེནྟོ.

ཨཛྫཎྷོ, བྷནྟེ, ཨཱགམེཧཱིཏི, བྷནྟེ, ཨཛྫ ཨེཀདིཝསཾ ཨམྷཱཀཾ ཏིཊྛ, ཨདྷིཝཱསེཧཱིཏི ཨཏྠོ. ཏིཀཔཱཙིཏྟིཡནྟི ཨཏིརེཀེསུ ཙོདནཱཊྛཱནེསུ ཨཏིརེཀསཉྙིཝེམཏིཀཨཱུནཀསཉྙཱིནཾ ཝསེན ཏཱིཎི པཱཙིཏྟིཡཱནི. ཏིཀྑཏྟུཾ ཙོདནཱཡ ཚཀྑཏྟུཾ ཋཱནེན, ཨཱུནཀཏིཀྑཏྟུཾ ཙོདནཱཡ ཨཱུནཀཙྪཀྑཏྟུཾ ཋཱནེན ལདྡྷེཔི ཨནཱཔཏྟི. ཨཔྤིཏཏཱཏི པཏིཊྛཱཔིཏཏཱ, ‘‘སཉྙཏྟོ སོ མཡཱ’’ཏིཨཱདིནཱ (པཱརཱ. ༥༣༨) ཀཐིཏཏཱཏི ཝུཏྟཾ ཧོཏི.

རཱཛསིཀྑཱཔདཝཎྞནཱ ནིཊྛིཏཱ.

ཙཱིཝརཝགྒོ པཋམོ.

༢. ཨེལ༹ཀལོམཝགྒོ

༡. ཀོསིཡསིཀྑཱཔདཝཎྞནཱ

ཀོསིཡམིསྶཀནྟི ¶ ‘‘ཀོསཀཱརཀཱ’’ཏི ལདྡྷཝོཧཱརཱནཾ པཱཎཀཱནཾ ཀོསཏོ ནིབྦཏྟཾ ཨཾསུ ཀོསིཡཾ, ཏེན མིསྶཾ ཀོསིཡམིསྶཀཾ. ཏེན པན ཀོསིཡེན ཨཔྤཀེནཱཔི མིསྶིཏཾ ཀོསིཡམིསྶཀམེཝ, ན ཨིདཾ ཨབྦོཧཱརིཀནྟི ཝཏྟུཾ ལབྦྷཱ. ཏེནཱཧ ‘‘ཨེཀེནཱཔཱི’’ཏིཨཱདི. ཀོསིཡཾསུནཱཏི ཀིམིཀོསསམྦྷཝེན ཨཾསུནཱ. ‘‘ཨནྟམསོ’’ཏིཨཱདིཀཾ པན ཨིམསྶ སིཀྑཱཔདསྶ ཨཙིཏྟཀཏྟཱ ཝུཏྟཾ. སནྠཏཾ ནཱམ སནྠརིཏྭཱ ཀཏཾ ཨཝཱཡིམཾ. ཏེནཱཧ ‘‘སམེ བྷཱུམིབྷཱགེ’’ཏིཨཱདི. ཨིམསྶེཝ ཝཙནསྶ ཨནུསཱརེནཱཏི ཨིམསྶེཝ པཋམསནྠཏསྶ ནིསྶཛྫནཝིདྷཱནཝཙནཱནུསཱརེན. སབྦསནྠཏནྟི སབྦསནྠཏནིསྶཛྫནཝིདྷཱནཾ.

ཨཉྙསྶཏྠཱཡ ཀཱརཱཔནེ དུཀྐཊཏྟཱ ཨཏྟནོ ཨཏྠཱཡ ཀཱརཱཔནཝསེན ‘‘སཱཎཏྟིཀ’’ནྟི ཝུཏྟཾ. ཨཏྟནཱ ཝིཔྤཀཏཔརིཡོསཱཔནནཡེནཱཏི ‘‘ཨཏྟནཱ ཝིཔྤཀཏཾ ཨཏྟནཱ པརིཡོསཱཔེཏི, ནིསྶགྒིཡཾ ¶ པཱཙིཏྟིཡཾ. ཨཏྟནཱ ཝིཔྤཀཏཾ པརེཧི པརིཡོསཱཔེཏི, ནིསྶགྒིཡཾ པཱཙིཏྟིཡཾ. པརེཧི ཝིཔྤཀཏཾ ཨཏྟནཱ པརིཡོསཱཔེཏི, ནིསྶགྒིཡཾ པཱཙིཏྟིཡཾ. པརེཧི ཝིཔྤཀཏཾ པརེཧི པརིཡོསཱཔེཏི, ནིསྶགྒིཡཾ པཱཙིཏྟིཡ’’ནྟི (པཱརཱ. ༥༤༥) ཨིམིནཱ ནཡེན. ཝིཏཱནཱདིཀརཎེཏི ཝིཏཱནབྷཱུམཏྠརཎསཱཎིཔཱཀཱརབྷིསིབིབྦོཧནཀརཎེ. ཡཐཱ ཙ ཝིཏཱནཱདིཀརཎེ, ཨེཝཾ ཏེནཱཀཱརེན པརིབྷོགེཔི ཨནཱཔཏྟི. ‘‘ཨཝཱཡིམ’’ནྟི (པཱརཱ. ༥༤༤) ཝུཏྟཏྟཱ ཝཱཡིཏྭཱ ཀརོནྟསྶཱཔི ཨནཱཔཏྟི.

ཀོསིཡསིཀྑཱཔདཝཎྞནཱ ནིཊྛིཏཱ.

༢. སུདྡྷཀཱལ༹ཀསིཀྑཱཔདཝཎྞནཱ

ཀཱལ༹ཀཱནནྟི སབྷཱཝེན ཝཱ རཛནེན ཝཱ ཀཱལ༹ཀཱནཾ. ཡཐཱཧ ‘‘ཀཱལ༹ཀཾ ནཱམ དྭེ ཀཱལ༹ཀཱནི ཛཱཏིཡཱ ཀཱལ༹ཀཾ ཝཱ རཛནཀཱལ༹ཀཾ ཝཱ’’ཏི. ཨཉྙེཧི ཨམིསྶིཏཱནནྟི ཨཉྙེཧི ཨམིསྶིཏཀཱལ༹ཀཱནནྟི ཨཏྠོ. ‘‘ཡཐཱ པཋམེ ‘ཨེཀེནཱཔི ཀོསིཡཾསུནཱ’ཏི (ཀངྑཱ. ཨཊྛ. ཀོསིཡསིཀྑཱཔདཝཎྞནཱ) ཝུཏྟཾ, ཏཐཱ ཨིདྷཱཔི ¶ ‘ཨེཀེནཱཔི ཨཉྙེན ཨམིསྶེཏྭཱ’ཏི ཨཝུཏྟཏྟཱ ཨཉྙེན པན མིསྶཀབྷོགེཔི ཨཔཉྙཱཡམཱནརཱུཔཀཾ ཙེ ‘སུདྡྷཀཱལ༹ཀ’མིཙྩེཝ ཝུཙྩཏཱི’’ཏི (ཝཛིར. ཊཱི. པཱརཱཛིཀ ༥༤༧) ཝདནྟི.

ཨེཏྠ ཙ ‘‘ཨིདཾ མེ, བྷནྟེ, སུདྡྷཀཱལ༹ཀཱནཾ ཨེལ༹ཀལོམཱནཾ སནྠཏ’’ནྟིཨཱདིནཱ (པཱརཱ. ༥༤༩) ནིསྶཛྫནཝིདྷཱནཾ ཝེདིཏབྦཾ. སེསནྟི པུབྦཔཡོགདུཀྐཊཙཏུཀྐཔཱཙིཏྟིཡཱདིཀཾ. ཨངྒེསུ པན ‘‘སུདྡྷཀཱལ༹ཀབྷཱཝོ’’ཏི ཨཡཾ ཝིསེསོ.

སུདྡྷཀཱལ༹ཀསིཀྑཱཔདཝཎྞནཱ ནིཊྛིཏཱ.

༣. དྭེབྷཱགསིཀྑཱཔདཝཎྞནཱ

གཧེཏབྦཱཏི ཡཐཱ ཀཱལ༹ཀཱ ཨདྷིཀཱ ན ཧོནྟི, ཏཐཱ གཧེཏབྦཱ. ཋཔེཏྭཱ ཙེཏྠ ཀཱལ༹ཀཨོདཱཏེ ཨཝསེསཱ གོཙརིཡེསུཡེཝ སངྒཧཾ གཙྪནྟཱིཏི (སཱརཏྠ. ཊཱི. ༢.༥༥༢) དཊྛབྦཾ. ཨེཏྠ ཙ དྭེ བྷཱགཱཏི ཨུཀྐཊྛཔརིཙྪེདོ ཀཱལ༹ཀཱནཾ ཨདྷིཀགྒཧཎསྶ པཊིཀྑེཔཝསེན སིཀྑཱཔདསྶ པཉྙཏྟཏྟཱ. ཏསྨཱ ཀཱལ༹ཀཱནཾ བྷཱགདྭཡཏོ ཨདྷིཀཾ ན ཝཊྚཏི, ཨཱུནཀཾ ཝཊྚཏི. ཏེནཱཧ ¶ ‘‘ཨེཀསྶཱཔཱི’’ཏིཨཱདི. ཨེཀསྶཱཔི ཀཱལ༹ཀལོམསྶ ཨཏིརེཀབྷཱཝེཏི ཏུལཱཡ དྷཱརཡིཏྭཱ ཋཔིཏེསུ ཨནྟམསོ ཝཱཏཝེགེནཔི པཧིཏསྶ ཨེཀསྶཱཔི ཀཱལ༹ཀལོམསྶ ཨདྷིཀབྷཱཝེ སཏཱིཏི ཨཏྠོ. ‘‘ཏཏིཡཾ ཨོདཱཏཱནཾ, ཙཏུཏྠཾ གོཙརིཡཱན’’ནྟི ཨིདཾ པན ཧེཊྛིམཔརིཙྪེདོ ཏེསཾ ཨདྷིཀགྒཧཎེ པཊིཀྑེཔཱབྷཱཝཏོ. ཏསྨཱ ཏེསཾ ཝུཏྟཔྤམཱཎཏོ ཨདྷིཀམྤི ཝཊྚཏི.

ཨེཏྠ ཙ ‘‘ཨིདཾ མེ, བྷནྟེ, སནྠཏཾ ཨནཱདིཡིཏྭཱ དྭེ ཏུལེ སུདྡྷཀཱལ༹ཀཱནཾ ཨེལ༹ཀལོམཱནཾ, ཏུལཾ ཨོདཱཏཱནཾ, ཏུལཾ གོཙརིཡཱནཾ སནྠཏཾ ཀཱརཱཔིཏཾ ནིསྶགྒིཡ’’ནྟི (པཱརཱ. ༥༥༤) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ. ཨཱདཱཡ ཙ ཝུཏྟཔརིཙྪེདེན ཨནཱདཱཡ ཙ ཀརཎཏོ ཀིརིཡཱཀིརིཡཾ. སེསནྟི པུབྦཔཡོགདུཀྐཊཙཏུཀྐཔཱཙིཏྟིཡཱདིཀཾ. ཨཡཾ པན ཝིསེསོ – ཏུལཾ ཨོདཱཏཱནཾ ཏུལཾ གོཙརིཡཱནཾ ཨཱདིཡིཏྭཱ ཀརཎེ, བཧུཏརཾ ཨོདཱཏཱནཾ བཧུཏརཾ གོཙརིཡཱནཾ ཨཱདིཡིཏྭཱ ཀརཎེ ¶ , སུདྡྷཾ ཨོདཱཏཱནཾ སུདྡྷཾ གོཙརིཡཱནཾ ཨཱདིཡིཏྭཱ ཀརཎེ ཙ ཨནཱཔཏྟཱིཏི.

ཨངྒེསུ པན པཋམངྒཾ ཀཱལ༹ཀཱནཾ དྭེབྷཱགཏོ ཨཏིརེཀབྷཱཝོཏི དཊྛབྦཾ. ཨིམཱནི ཏཱིཎི ན ཀེཝལཾ ཨནིསྶཊྛཱནེཝ པརིབྷུཉྫིཏུཾ ན ཝཊྚནྟཱིཏི ཨཱཧ ‘‘ཨིམཱནི པནཱ’’ཏིཨཱདི. ‘‘པརིབྷུཉྫིཏུཾ ན ཝཊྚནྟཱི’’ཏི ཨིམིནཱ ཡདི པརིབྷུཉྫཏི, དུཀྐཊནྟི དསྶེཏི.

དྭེབྷཱགསིཀྑཱཔདཝཎྞནཱ ནིཊྛིཏཱ.

༤. ཚབྦསྶསིཀྑཱཔདཝཎྞནཱ

ཡཾ སནྠཏསམྨུཏིཾ དེཏཱིཏི སམྦནྡྷོ. གིལཱནསྶ བྷིཀྑུནོཏི ཡསྶ ཝིནཱ སནྠཏཱ ན ཕཱསུ ཧོཏི, ན སཀྐོཏི ཙ སནྠཏཾ ཨཱདཱཡ པཀྐམིཏུཾ, ཨེཝཾབྷཱུཏསྶ གིལཱནསྶ བྷིཀྑུནོ. སནྠཏསམྨུཏིཾ དེཏཱིཏི ‘‘སུཎཱཏུ མེ, བྷནྟེ, སངྒྷོ, ཨཡཾ ཨིཏྠནྣཱམོ བྷིཀྑུ གིལཱནོ ན སཀྐོཏི སནྠཏཾ ཨཱདཱཡ པཀྐམིཏུ’’ནྟིཨཱདིནཱ (པཱརཱ. ༥༦༠) པདབྷཱཛནེ ཝུཏྟཱཡ ཉཏྟིདུཏིཡཀམྨཝཱཙཱཡ སནྠཏསམྨུཏིཾ དེཏི.

སཱཏི སནྠཏསམྨུཏི. ཝཱུཔསནྟོ ཝཱ པུན ཀུཔྤཏཱིཏི ཝཱུཔསནྟོ ཝཱ སོ ཨཱབཱདྷོ པུན ཀུཔྤཏི, ཨནུཝསྶམྤི ཀཱཏུཾ ཝཊྚཏི, པུན སམྨུཏིདཱནཀིཙྩཾ ནཏྠཱིཏི ཨདྷིཔྤཱཡོ. ན ཀེཝལཾ ཏསྨིཾཡེཝ རོགེ ཀུཔྤིཏེ, ཨཐ ཁོ ཨཉྙསྨིཾ རོགེ ཀུཔྤིཏེཔི གཏགཏཊྛཱནེ ཨནུཝསྶཾ ཀཱཏུཾ ལབྷཏི. ཏེནེཝ ཧི སམནྟཔཱསཱདིཀཱཡཾ ‘‘སཙེ ཨརོགོ ཧུཏྭཱ པུན མཱུལབྱཱདྷིནཱཝ གིལཱནོ ཧོཏི ¶ , སོཡེཝ པརིཧཱརོ, ནཏྠཉྙཾ ‘སམྨུཏིཀིཙྩ’ནྟི ཕུསྶདེཝཏྠེརོ ཨཱཧ. ཨུཔཏིསྶཏྠེརོ པན སོ ཝཱ བྱཱདྷི པཊིཀུཔྤཏུ, ཨཉྙོ ཝཱ, སཀིཾ ‘གིལཱནོ’ཏི ནཱམཾ ལདྡྷཾ ལདྡྷམེཝ, པུན ‘སམྨུཏིཀིཙྩཾ ནཏྠཱི’ཏི ཨཱཧཱ’’ཏི (པཱརཱ. ཨཊྛ. ༢.༥༥༧) ཨུཔཏིསྶཏྠེརཝཱདོ པཙྪཱ ཝུཏྟོ.

ཨེཏྠ ཙ ‘‘ཨིདཾ མེ, བྷནྟེ, སནྠཏཾ ཨཱུནཀཚབྦསྶཱནི ཀཱརཱཔིཏཾ ཨཉྙཏྲ བྷིཀྑུསམྨུཏིཡཱ ནིསྶགྒིཡ’’ནྟི (པཱརཱ. ༥༦༢) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ. ‘‘སེསཾ པཋམསདིསམེཝཱ’’ཏི ཨིམིནཱ ‘‘ཨཏྟནཱ ཀཏཾ པརེཧི པརིཡོསཱཔེཏཱི’’ཏིཨཱདིཀཾ ཨཏིདིཊྛཾ. ཨཡཾ པན ཝིསེསོ – པརིཔུཎྞེ ཚབྦསྶེ ཝཱ ཨཏིརེཀཚབྦསྶེ ¶ ཝཱ ཨནཱཔཏྟི. ཨངྒེསུ ཙ ཚབྦསྶཱནཾ ཨནྟོབྷཱཝོ ནཱནཱཏྟཾ.

ཚབྦསྶསིཀྑཱཔདཝཎྞནཱ ནིཊྛིཏཱ.

༥. ནིསཱིདནསིཀྑཱཔདཝཎྞནཱ

ནིསཱིདནསནྠཏནྟི ‘‘ནིསཱིདནཾ ནཱམ སདསཾ ཝུཙྩཏཱི’’ཏི ཨེཏྠ པདབྷཱཛནིཡཾ (པཱརཱ. ༥༦༨) ཝུཏྟཏྟཱ སདསཾ སནྠཏཾ, ཨེཏྠ ཙ ནིསཱིདནགྒཧཎཾ སནྠཏེ ཙཱིཝརསཉྙཱནིཝཱརཎཏྠཾ, ཡཏོ ཏེ བྷིཀྑཱུ ཀམྦལཙཱིཝརསཉྙཱཡ སནྠཏཾ ཚཌྜེཏྭཱ དྷུཏངྒཱནི སམཱདིཡིཾསུ. སཡནཱསནཔྤཡོཛནཏྟཱ སནྠཏསྶ ‘‘པུརཱཎསནྠཏཾ ནཱམཱ’’ཏིཨཱདི ཝུཏྟཾ. ཡཏྠཱཏི ཡསྨིཾ སནྠཏེ. ཝིདཏྠིམཏྟནྟི སུགཏཝིདཏྠིམཏྟཾ. ཨུཀྐཊྛཔརིཙྪེདོ ཙཱཡཾ ‘‘ཨནཱཔཏྟི ཨལབྷནྟོ ཐོཀཏརཾ ཨཱདིཡིཏྭཱ ཀརོཏཱི’’ཏི (པཱརཱ. ༥༧༠) པདབྷཱཛནེ ཝུཏྟཏྟཱ. ཨེཀདེསེཏི ཨིདཱནི ཀཏྟབྦནཝསནྠཏསྶ ཨེཀཔྤདེསེ. ཝིཛཊེཏྭཱཏི ཝིདྡྷཾསེཏྭཱ. ཨནཱདཱཏི ཡ-ཀཱརལོཔེནཱཡཾ ནིདྡེསོཏི ཨཱཧ ‘‘སཏི པུརཱཎསནྠཏེ ཨགྒཧེཏྭཱ’’ཏི.

ཨེཏྠ ཙ ‘‘ཨིདཾ མེ, བྷནྟེ, ནིསཱིདནསནྠཏཾ ཨནཱདིཡིཏྭཱ པུརཱཎསནྠཏསྶ སཱམནྟཱ སུགཏཝིདཏྠིཾ ཀཱརཱཔིཏཾ ནིསྶགྒིཡ’’ནྟི (པཱརཱ. ༥༦༨) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ. སནྠཏཝིསྶཛྫནཝཏྠུསྨིཾ པཉྙཏྟནྟི བྷགཝཏཱ སནྠཏཱནི ཝིཔྤཀིཎྞཱནི དིསྭཱ ‘‘སདྡྷཱདེཡྻཝིནིཔཱཏནེ ཀཱརཎཾ ནཏྠི, པརིབྷོགུཔཱཡཾ ནེསཾ དསྶེསྶཱམཱི’’ཏི (པཱརཱ. ཨཊྛ. ༢.༥༦༦) སནྠཏཝིསྶཛྫནཝཏྠུསྨིཾ པཉྙཏྟཾ. ཀིརིཡཱཀིརིཡཏྟཱ ཨིམསྶ སིཀྑཱཔདསྶ ‘‘སེསཾ ཏཏིཡསདིསམེཝཱ’’ཏི ཝུཏྟཾ, དྭེབྷཱགསིཀྑཱཔདསདིསམེཝཱཏི ཨཏྠོ. ཨཡཾ པན ཝིསེསོ – པུརཱཎསནྠཏསྶ ¶ སཱམནྟཱ སུགཏཝིདཏྠིཡཱ ཨཱདཱཡ ཀརཎེ, ཨལབྷནྟསྶ ཐོཀཏརཾ ཨཱདཱཡ ཀརཎེ, སབྦཐཱ ཨལབྷནྟསྶ ཨནཱདཱཡ ཀརཎེ ཙ ཨནཱཔཏྟཱིཏི. ཨངྒེསུ པནེཏྠ པཋམངྒཔུརཱཎསནྠཏསྶ སཱམནྟཱ སུགཏཝིདཏྠིཨནཱདིཡནཱཏི དཊྛབྦཾ.

ནིསཱིདནསིཀྑཱཔདཝཎྞནཱ ནིཊྛིཏཱ.

༦. ཨེལ༹ཀལོམསིཀྑཱཔདཝཎྞནཱ

ཨདྡྷཱནམགྒཔྤཊིཔནྣསྶཱཏི ¶ ཨདྡྷཱནམེཝ མགྒོ ཨདྡྷཱནམགྒོ, ཏཾ པཊིཔནྣསྶཱཏི ཨཏྠོ. ཏེནཱཧ ‘‘ཨདྡྷཱནསངྑཱཏ’’ནྟིཨཱདི. ཨདྡྷཱནསདྡེན ཝིསེསིཏཏྟཱ པན ‘‘དཱིགྷམགྒ’’ནྟི ཝུཏྟཾ. ཨདྡྷཱནགམནསམཡསྶ ཝིབྷངྒེ ‘‘ཨདྡྷཡོཛནཾ གཙྪིསྶཱམཱིཏི བྷུཉྫིཏབྦ’’ནྟིཨཱདིཝཙནཏོ (པཱཙི. ༢༡༨) ཨདྡྷཡོཛནམྤི ཨདྡྷཱནམགྒོ ཧོཏི. ཨེལ༹ཀལོམཱནི ཙེཏཱནི ཨདྡྷཱནམགྒཏོ ཨཉྙཏྠ ཨུཔྤནྣཱནི པཊིགྒཧེཏུཾ ན ཝཊྚནྟི, ཡཏོ ‘‘ཨདྡྷཱནམགྒཔྤཊིཔནྣསྶཱ’’ཏིཨཱདིཀཾ ཝུཏྟནྟི ཨནུཡོགཾ སནྡྷཱཡཱཧ ‘‘སབྦཉྩེཏ’’ནྟིཨཱདི. ཏཏྠ སབྦཉྩེཏནྟི ‘‘བྷིཀྑུནོ པནེཝ ཨདྡྷཱནམགྒཔྤཊིཔནྣསྶ ཨེལ༹ཀལོམཱནི ཨུཔྤཛྫེཡྻུ’’ནྟིཨཱདིཀཾ ཨེཏཾ སབྦཾ. ཝཏྠུམཏྟདཱིཔནམེཝཱཏི ‘‘ཏེན ཁོ པན སམཡེན ཨཉྙཏརསྶ བྷིཀྑུནོ ཀོསལེསུ ཛནཔདེ སཱཝཏྠིཾ གཙྪནྟསྶ ཨནྟརཱམགྒེ ཨེལ༹ཀལོམཱནི ཨུཔྤཛྫིཾསཱུ’’ཏིཨཱདིཀསྶ (པཱརཱ. ༥༧༡) ཝཏྠུམཏྟསྶ དཱིཔནམེཝ. ཡཏྠ ཀཏྠཙཱིཏི ཨདྡྷཱནཏོ ཨཉྙཏྠཱཔི ཡཏྠ ཀཏྠཙི ཋཱནེསུ. སཧཏྠཱཏི ཀརཎཏྠེ ནིསྶཀྐཝཙནནྟི ཨཱཧ ‘‘སཧཏྠེནཱ’’ཏི. ལཀྑཎཝཙནཉྩེཏཾ, ཏསྨཱ ཡེན ཀེནཙི སརཱིརཱཝཡཝེནཱཏི ཨཏྠོ དཊྛབྦོ. ཏེནཱཧ ‘‘ཨཏྟནཱ ཧརིཏབྦཱནཱིཏི ཨཏྠོ’’ཏི. ཨསནྟེ ཧཱརཀེཏི ཨེཏྠ པདཱནཾ ཨནྟོགདྷཱཝདྷཱརཎཏོ ཨཝདྷཱརཎཏྠོ ལབྦྷཏཱིཏི ཨཱཧ ‘‘ཨསནྟེཡེཝཱ’’ཏིཨཱདི.

ཨེཏྠ ཙ ‘‘ཨིམཱནི མེ, བྷནྟེ, ཨེལ༹ཀལོམཱནི ཏིཡོཛནཾ ཨཏིཀྐཱམིཏཱནི ནིསྶགྒིཡཱནཱི’’ཏིཨཱདིནཱ (པཱརཱ. ༥༧༣) ནིསྶཛྫནཝིདྷཱནཾ ཝེདིཏབྦཾ. ཏིཀཔཱཙིཏྟིཡནྟི ཨཏིརེཀཏིཡོཛནེ ཨཏིརེཀཏིཡོཛནསཉྙིཝེམཏིཀཨཱུནཀསཉྙཱིནཾ ཝསེན ཏཱིཎི པཱཙིཏྟིཡཱནི. ཝཱསཱདྷིཔྤཱཡེན གནྟྭཱ ཏཏོ པརཾ ཧརཎེཏི ཡཏྠ གཏོ, ཏཏྠ ཨུདྡེསཔརིཔུཙྪཱདཱིནཾ ཝཱ པཙྩཡཱདཱིནཾ ཝཱ ཨལཱབྷེན ཏཏོ པརཾ ཨཉྙཏྠ ཧརཎེ, ཏཏོཔི ཨཉྙཏྠཱཏི ཨེཝཾ ཡོཛནསཏམྤི ཧརཎེ ཨནཱཔཏྟི. ཨཙྪིནྣཾ ཝཱ ནིསྶཊྛཾ ཝཱཏི ཙོརེཧི ཨཙྪིནྣཾ ཝཱ ཝིནཡཀམྨཀཏཾ ཝཱ. ཀཏབྷཎྜནྟི ཀཏཾ བྷཎྜཾ ཀམྦལཀོཛཝསནྠཏཱདི ཡཾ ཀིཉྩི ཨནྟམསོ སུཏྟཀེན བདྡྷམཏྟམྤི. ཏེནཱཧ ‘‘ཨནྟམསོ’’ཏིཨཱདི. ཡོ པན ཏནུཀཔཏྟཏྠཝིཀནྟརེ (པཱརཱ. ཨཊྛ. ༢.༥༧༥) ཝཱ ཨཱཡོགཨཾསབདྡྷཀཀཱཡབནྡྷནཱདཱིནཾ ¶ ཨནྟརེསུ ཝཱ པིཔྥལིཀཱདཱིནཾ མལརཀྑཎཏྠཾ སིཔཱཊིཀཱཡཾ ཝཱ ཨནྟམསོ ཝཱཏཱབཱདྷིཀོ ཀཎྞཙྪིདྡེཔི ལོམཱནི པཀྑིཔིཏྭཱ གཙྪཏི ¶ , ཨཱཔཏྟིཡེཝ. སུཏྟཀེན པན བནྡྷིཏྭཱ པཀྑིཏྟཾ ཀཏབྷཎྜཊྛཱནེ ཏིཊྛཏི, ཝེཎིཾ ཀཏྭཱ ཧརཏི, ཨིདཾ ནིདྷཱནམུཁཾ ནཱམ, ཨཱཔཏྟིཡེཝ.

པཋམཔྤཊིལཱབྷོཏི ཨཏྟནོ ཨཏྠཱཡ ཨེལ༹ཀལོམཱནཾ པཋམུཔྤཏྟི. ཨེཏེན ཨཙྪིནྣནིསྶཊྛཔྤཊིལདྡྷཱནཾ པཊིཀྑེཔོ. ཨཉྙསྶ ཨཛཱནནྟསྶ ཡཱནེ པཀྑིཔིཏྭཱཏི (པཱརཱ. ཨཊྛ. ༢.༥༧༢) གཙྪནྟེ རཐཱདིཀེ ཝཱ ཧཏྠིཔིཊྛིཨཱདཱིསུ ཝཱ སཱམིཀསྶ ཨཛཱནནྟསྶེཝ ‘‘ཧརིསྶཏཱི’’ཏི པཀྑིཔིཏྭཱ. ཨགཙྪནྟེཔི ཨེསེཝ ནཡོ. སཙེ པན ཨགཙྪནྟེ རཐཱདིམྷི ཝཱ ཧཏྠིཔིཊྛིཨཱདཱིསུ ཝཱ ཋཔེཏྭཱ ཨཱརོཧིཏྭཱ སཱརེཏི, ཧེཊྛཱ ཝཱ གཙྪནྟོ ཙོདེཏི, པཀྐོསནྟོ ཝཱ ཨནུབནྡྷཱཔེཏི, ‘‘ཨཉྙཾ ཧརཱཔེཏཱི’’ཏི (པཱརཱ. ༥༧༥) ཝཙནཏོ ཨནཱཔཏྟི. ཨེཏྠ ཙ ‘‘ཨཛཱནནྟསྶ ཡཱནེ’’ཏི ཨིམིནཱ ཛཱནནྟསྶ ཙེ ཡཱནེ པཀྑིཔཏི, ཨཉྙཾ ཧརཱཔེཏི ནཱམཱཏི དསྶེཏི. ཨཧརཎཔཙྩཱཧརཎནྟི ཧརཎཔཙྩཱཧརཎཱནམབྷཱཝོ.

ཨེལ༹ཀལོམསིཀྑཱཔདཝཎྞནཱ ནིཊྛིཏཱ.

༧. ཨེལ༹ཀལོམདྷོཝཱཔནསིཀྑཱཔདཝཎྞནཱ

སཀྐེསཱུཏི ‘‘སཀྱཱ ཝཏ, བྷོ ཀུམཱརཱ’’ཏི (དཱི. ནི. ༡.༢༦༧) ཨུདཱནཾ པཊིཙྩ ‘‘སཀྱཱ’’ཏི ལདྡྷནཱམཱནཾ ནིཝཱསོ ཨེཀོཔི ཛནཔདོ རུལ༹ྷིསདྡེན ‘‘སཀྐཱ’’ཏི ཝུཙྩཏི, ཏསྨིཾ སཀྐེསུ ཛནཔདེ. ཚབྦགྒིཡཱ ནཱམ པཎྜུཀལོཧིཏཀཱདཡོ ཚམཱུལཀཱ, ཏེསཾ སིསྶཱ ཙ.

ཨེལ༹ཀལོམདྷོཝཱཔནསིཀྑཱཔདཝཎྞནཱ ནིཊྛིཏཱ.

༨. ཛཱཏརཱུཔསིཀྑཱཔདཝཎྞནཱ

རཛཏནྟི ན ཀེཝལཾ རཱུཔིཡམེཝ ཨིདྷཱདྷིཔྤེཏཾ, ཨཐ ཁོ ཡཾ ཀིཉྩི ཝོཧཱརགམནཱིཡཾ ཀཧཱཔཎཱདི ཙ ཨེཏཾ ཨདྷིཔྤེཏནྟི ཨཱཧ ‘‘ཨཔིཙཱ’’ཏིཨཱདི. ཏཏྠ ཀཧཱཔཎོཏི (པཱརཱ. ཨཊྛ. ༢.༥༨༣-༥༨༤) སུཝཎྞམཡོ ཝཱ རཱུཔིཡམཡོ ཝཱ པཱཀཏིཀོ ཝཱ. ལོཧམཱསཀོ ནཱམ ཏམྦལོཧཱདཱིཧི ཀཏམཱསཀོ. དཱརུམཱསཀོ ནཱམ སཱརདཱརུནཱ ཝཱ ཝེལུ༹པེསིཀཱཡ ཝཱ ¶ ཨནྟམསོ ཏཱལཔཎྞེནཔི ¶ རཱུཔཾ ཚིནྡིཏྭཱ ཀཏམཱསཀོ. ཛཏུམཱསཀོ ནཱམ ལཱཁཱཡ ཝཱ ནིཡྻཱསེན ཝཱ རཱུཔཾ སམུཊྛཱཔེཏྭཱ ཀཏམཱསཀོ. ‘‘ཡེ ཝོཧཱརཾ གཙྪནྟཱི’’ཏི ཨིམིནཱ པན པདེན ཡོ ཡོ ཡཏྠ ཡཏྠ ཛནཔདེ ཡདཱ ཡདཱ ཝོཧཱརཾ གཙྪཏི, ཨནྟམསོ ཨཊྛིམཡོཔི ཙམྨམཡོཔི རུཀྑཕལབཱིཛམཡོཔི སམུཊྛཱཔིཏརཱུཔོཔི ཨསམུཊྛཱཔིཏརཱུཔོཔི སབྦོ སངྒཧིཏོ. ཏདེཝཱཏི ཛཱཏརཱུཔརཛཏམེཝ. ཧིརཉྙཾ ནཱམ ཀཧཱཔཎོ.

‘‘སཱདིཡཏཱི’’ཏི ཝུཏྟམེཝཏྠཾ ཝིབྷཱཝེཏི ‘‘གཎྷིཏུཀཱམོ ཧོཏཱི’’ཏི. ན ཀེཝལཾ ཀཱཡཝཱཙཱཧི པཊིཀྑིཏྟམེཝ པཊིཀྑིཏྟཾ ཧོཏི, ཨཐ ཁོ མནསཱཔི པཊིཀྑིཏྟཾ པཊིཀྑིཏྟམེཝ ཧོཏཱིཏི ཨཱཧ ‘‘ཀཱཡཝཱཙཱཧཱི’’ཏིཨཱདི. སཙེ པན ཀཱཡཝཱཙཱཧི ཨཔྤཊིཀྑིཔིཏྭཱ ཙིཏྟེན ཨདྷིཝཱསེཏི, ཀཱཡཝཱཙཱཧི ཀཏྟབྦསྶ པཊིཀྑེཔསྶ ཨཀརཎཏོ ཨཀིརིཡསམུཊྛཱནཾ ཀཱཡཝཙཱིདྭཱརེ ཨཱཔཏྟིཾ ཨཱཔཛྫཏི. མནོདྭཱརེ པན ཨཱཔཏྟི ནཱམ ནཏྠི.

ཨེཀོ སཏཾ (པཱརཱ. ཨཊྛ. ༢.༥༨༣-༥༨༤) ཝཱ སཧསྶཾ ཝཱ པཱདམཱུལེ ཋཔེཏི ‘‘ཏུཡ྄ཧིདཾ ཧོཏཱུ’’ཏི, བྷིཀྑུ ‘‘ནཡིདཾ ཀཔྤཏཱི’’ཏི པཊིཀྑིཔཏི. ཨུཔཱསཀོ ‘‘པརིཙྩཏྟཾ མཡཱ ཏུམྷཱཀ’’ནྟི གཏོ, ཨཉྙོ ཏཏྠ ཨཱགནྟྭཱ པུཙྪཏི ‘‘ཀིཾ, བྷནྟེ, ཨིད’’ནྟི. ཡཾ ཏེན ཙ ཨཏྟནཱ ཙ ཝུཏྟཾ, ཏཾ ཨཱཙིཀྑིཏབྦཾ. སོ ཙེ ཝདཏི ‘‘གོཔེསྶཱམི, བྷནྟེ, གུཏྟཊྛཱནཾ དསྶེཐཱ’’ཏི, སཏྟབྷཱུམིཀམྤི པཱསཱདཾ ཨབྷིརུཧིཏྭཱ ‘‘ཨིདཾ གུཏྟཊྛཱན’’ནྟི ཨཱཙིཀྑིཏབྦཾ, ‘‘ཨིདྷ ནིཀྑིཔཱཧཱི’’ཏི ན ཝཏྟབྦཾ. ཨེཏྟཱཝཏཱ ཀཔྤིཡཉྩ ཨཀཔྤིཡཉྩ ནིསྶཱཡ ཋིཏཾ ཧོཏི, དྭཱརཾ པིདཧིཏྭཱ རཀྑནྟེན ཝསིཏབྦཾ. སཙེ ཀིཉྩི ཝིཀྐཱཡིཀབྷཎྜཾ པཏྟཾ ཝཱ ཙཱིཝརཾ ཝཱ ཨཱགཙྪཏི, ‘‘ཨིདཾ གཧེསྶཐ, བྷནྟེ’’ཏི ཝུཏྟེ ‘‘ཨུཔཱསཀ, ཨཏྠི ཨམྷཱཀཾ ཨིམིནཱ ཨཏྠོ, ཝཏྠུ ཙ ཨེཝརཱུཔཾ ནཱམ སཾཝིཛྫཏི, ཀཔྤིཡཀཱརཀོ ནཏྠཱི’’ཏི ཝཏྟབྦཾ. སཙེ སོ ཝདཏི ‘‘ཨཧཾ ཀཔྤིཡཀཱརཀོ བྷཝིསྶཱམི, དྭཱརཾ ཝིཝརིཏྭཱ དེཐཱ’’ཏི, དྭཱརཾ ཝིཝརིཏྭཱ ‘‘ཨིམསྨིཾ ཨོཀཱསེ ཋཔིཏ’’ནྟི ཝཏྟབྦཾ, ‘‘ཨིམཾ གཎྷཱ’’ཏི ན ཝཏྟབྦཾ. ཨེཝཉྩ ཀཔྤིཡཉྩ ཨཀཔྤིཡཉྩ ནིསྶཱཡ ཋིཏམེཝ ཧོཏི. སོ ཙེཏཾ གཧེཏྭཱ ཏསྶ ཀཔྤིཡབྷཎྜཾ དེཏི, ཝཊྚཏི. སཙེ ཨདྷིཀཾ གཎྷཱཏི, ‘‘ན མཡཾ ཏཝ བྷཎྜཾ གཎྷཱམ, ནིཀྑམཱཧཱི’’ཏི ཝཏྟབྦོ.

སངྒྷམཛ྄ཛྷེཡེཝ ¶ ནིསྶཛྫིཏབྦནྟི ཨེཏྠ ཡསྨཱ རཱུཔིཡཾ ནཱམ ཨཀཔྤིཡཾ, ཏསྨཱ ‘‘ནིསྶཛྫིཏབྦཾ སངྒྷསྶ ཝཱ གཎསྶ ཝཱ པུགྒལསྶ ཝཱ’’ཏི ན ཝུཏྟཾ. ཡསྨཱ པན ཏཾ པཊིགྒཧིཏམཏྟམེཝ, ན ཏེན ཀིཉྩི ཀཔྤིཡབྷཎྜཾ ཙེཏཱཔིཏཾ, ཏསྨཱ ཨུཔཱཡེན པརིབྷོགདསྶནཏྠཾ ‘‘སངྒྷམཛ྄ཛྷེཡེཝ ནིསྶཛྫིཏབྦ’’ནྟི ཝུཏྟཾ. ཨཱདི-སདྡེན ཏེལཱདཱིནཾ གཧཎཾ. སོཏི ཡོ གཧཊྛོ ‘‘སཔྤི ¶ ཝཱ ཏེལཾ ཝཱ ཝཊྚཏི ཨུཔཱསཀཱ’’ཏིཨཱདིནཱ ནཡེན ཝུཏྟོ, སོ. ཨཉྙེན ལབྷིཏྭཱཏི བྷིཀྑུནཱ ཝཱ ཨཱརཱམིཀེན ཝཱ ཨཏྟནོ ཝསྶགྒེན ལབྷིཏྭཱ. ཏཏོ ནིབྦཏྟརུཀྑཙྪཱཡཱཔཱིཏི ནིསྶགྒིཡཝཏྠུནཱ ཨཱཧཊབཱིཛཏོ ནིབྦཏྟརུཀྑཔརིཙྪེདེན ཋིཏཙྪཱཡཱཔི, པརིཙྪེདཱཏིཀྐནྟཱ པན ཨཱགནྟུཀཏྟཱ ཝཊྚཏི. ནོ ཙེ ཚཌྜེཏཱིཏི ཨཐ ནེཝ གཧེཏྭཱ གཙྪཏི, ན ཚཌྜེཏི, ‘‘ཀིཾ མཡ྄ཧཾ ཨིམིནཱ བྱཱཔཱརེནཱ’’ཏི ཡེནཀཱམཾ པཀྐམཏི. པཉྩངྒསམནྣཱགཏོ ‘‘ཡོ ན ཚནྡཱགཏིཾ གཙྪེཡྻ, ན དོསཱགཏིཾ གཙྪེཡྻ, ན མོཧཱགཏིཾ གཙྪེཡྻ, ན བྷཡཱགཏིཾ གཙྪེཡྻ, ཚཌྜིཏཱཚཌྜིཏཉྩ ཛཱནེཡྻཱ’’ཏི (པཱརཱ. ༥༨༤) ཨེཝཾ ཝུཏྟཔཉྩངྒེཧི སམནྣཱགཏོ. སམྨནྣིཏབྦོཏི ‘‘སུཎཱཏུ མེ, བྷནྟེ, སངྒྷོ, ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཾ བྷིཀྑུཾ རཱུཔིཡཚཌྜཀཾ སམྨནྣེཡྻཱ’’ཏིཨཱདིནཱ པདབྷཱཛནེ ཝུཏྟཱཡ ཉཏྟིདུཏིཡཀམྨཝཱཙཱཡ སམྨནྣིཏབྦོ.

ཨནིམིཏྟཾ ཀཏྭཱ གཱུཐཾ ཝིཡ ཚཌྜེཏབྦནྟི པཏིཏཊྛཱནཾ སལླཀྑཎཝསེན ནིམིཏྟཾ ཨཀཏྭཱ གཱུཐཾ ཝིཡ ཚཌྜེཏབྦཾ, ཨཀྑཱིནི ནིམཱིལེཏྭཱཝ ནདིཡཱ ཝཱ པཔཱཏེ ཝཱ ཝནགཧནེ ཝཱ གཱུཐཾ ཝིཡ ཨནཔེཀྑེན པཏིཏོཀཱསཾ ཨསམནྣཱཧརནྟེན པཱཏེཏབྦནྟི ཝུཏྟཾ ཧོཏི. ཏེནཱཧ ‘‘གཱུཐཾ ཝིཡ ཚཌྜེཏབྦ’’ནྟི. ཏིཀཔཱཙིཏྟིཡནྟི རཱུཔིཡསཉྙིཝེམཏིཀཨརཱུཔིཡསཉྙཱིནཾ ཝསེན ཏཱིཎི པཱཙིཏྟིཡཱནི. ཨརཱུཔིཡེ རཱུཔིཡསཉྙིནོཏི ཁརཔཏྟཱདཱིསུ སུཝཎྞཱདིསཉྙིནོ. རཏནསིཀྑཱཔདནཡེནཱཏི ‘‘ཨཛ྄ཛྷཱརཱམེ ཝཱ ཨཛ྄ཛྷཱཝསཐེ ཝཱ’’ཏི (པཱཙི. ༥༠༥) ཨེཏྠ ཝུཏྟཝིདྷིནཱ.

ཛཱཏརཱུཔསིཀྑཱཔདཝཎྞནཱ ནིཊྛིཏཱ.

༩. རཱུཔིཡསཾཝོཧཱརསིཀྑཱཔདཝཎྞནཱ

ཀཏཱདིཝསེནཱཏི ¶ ཀཏཨཀཏཀཏཱཀཏཝསེན. སུཝཎྞཱདིཙཏུབྦིདྷམྤི ནིསྶགྒིཡཝཏྠུ ཨིདྷ རཱུཔིཡགྒཧཎེན གཧིཏནྟི ཨཱཧ ‘‘ཛཱཏརཱུཔརཛཏཔརིཝཏྟན’’ནྟི. ཨིདཉྩ ཨུཀྐཊྛཔརིཙྪེདེན ཝུཏྟནྟི དཊྛབྦཾ. ཏེནཱཧ ‘‘པུརིམསིཀྑཱཔདེན ཧཱི’’ཏིཨཱདི. པརིཝཏྟནནྟི སཱདིཏརཱུཔིཡསྶ པརིཝཏྟནཾ. པུརིམནཡཱནུསཱརེནཱཏི ‘‘ཨཧཾ, བྷནྟེ, ནཱནཔྤཀཱརཀཾ རཱུཔིཡསཾཝོཧཱརཾ སམཱཔཛྫིཾ, ཨིདཾ མེ ནིསྶགྒིཡ’’ནྟིཨཱདིནཱ (པཱརཱ. ༥༨༩).

རཱུཔིཡསཾཝོཧཱརཝཏྠུསྨིནྟི པཊིགྒཧཎསྶེཝ པཊིཀྑིཏྟཏྟཱ པཊིགྒཧིཏཔརིཝཏྟནེ དོསཾ ཨདིསྭཱ རཱུཔིཡཔརིཝཏྟནེ. ཏསྶ ཝཱཏི པརིཝཏྟིཏསྶ ཝཱ. དྷནསྶ ཝཱཏི ཨཏྟནོ མཱུལདྷནསྶ ཝཱ ¶ . ཨཏྟནོ ཝཱ ཧི ཨརཱུཔིཡེན པརསྶ རཱུཔིཡཾ ཙེཏཱཔེཡྻ, ཨཏྟནོ ཝཱ རཱུཔིཡེན པརསྶ ཨརཱུཔིཡཾ, ཨུབྷཡཐཱཔི རཱུཔིཡསཾཝོཧཱརོ ཀཏོཝ ཧོཏཱིཏི.

རཱུཔིཡསཾཝོཧཱརསིཀྑཱཔདཝཎྞནཱ ནིཊྛིཏཱ.

༡༠. ཀཡཝིཀྐཡསིཀྑཱཔདཝཎྞནཱ

རཱུཔིཡསཾཝོཧཱརསྶ པན ཧེཊྛཱསིཀྑཱཔདེན གཧིཏཏྟཱ ཀཔྤིཡབྷཎྜཱནམེཝེཏྠ གཧཎནྟི ཨཱཧ ‘‘ཙཱིཝརཱདཱིན’’ནྟིཨཱདི. ཏཏྠ ཙཱིཝརཱདཱིནཾ ཀཔྤིཡབྷཎྜཱནནྟི ཨནྟམསོ དསིཀསུཏྟཾ ཨུཔཱདཱཡ ཙཱིཝརཔིཎྜཔཱཏསེནཱསནགིལཱནཔཙྩཡཱནཾ ཡེསཾ ཀེསཉྩི ཀཔྤིཡབྷཎྜཱནཾ. ཀཡཾ ནཱམ པརབྷཎྜསྶ གཧཎཾ. ཝིཀྐཡཾ ནཱམ ཨཏྟནོ བྷཎྜསྶ དཱནཾ. ཏེནཱཧ ‘‘ཨིམིནཱ ཨིམཾ དེཧཱི’’ཏིཨཱདི. པརསྶཱཏི ཋཔེཏྭཱ པཉྩ སཧདྷམྨིཀེ ཨཉྙསྶ. ཨེཏྠ ཙ ‘‘ཨཧཾ, བྷནྟེ, ནཱནཔྤཀཱརཀཾ ཀཡཝིཀྐཡཾ སམཱཔཛྫིཾ, ཨིདཾ མེ ནིསྶགྒིཡཾ, ཨིམཱཧཾ སངྒྷསྶ ནིསྶཛྫཱམཱི’’ཏིཨཱདིནཱ (པཱརཱ. ༥༩༥) ནཡེན ནིསྶཛྫིཏབྦཾ. ཏེནཱཧ ‘‘ཝུཏྟལཀྑཎཝསེནཱ’’ཏིཨཱདི. ནནུ ཙེཏྠ ཙཱིཝརདྷོཝནེ ཝཱ ཀེསཙྪེདནེ ཝཱ བྷཱུམིསོདྷནཱདིནཝཀམྨེ ཝཱ པརབྷཎྜཾ ཨཏྟནོ ཧཏྠགཏཾ ནིསྶཛྫིཏབྦཾ ནཱམ ནཏྠི, ཏཏྠ ཀིཾ ཀཱཏབྦནྟི ཨཱཧ ‘‘ཨསནྟེ པཱཙིཏྟིཡཾ དེསེཏབྦམེཝཱ’’ཏི. ཡཐཱ ནིསྶགྒིཡཝཏྠུམྷི པརིབྷུཏྟེ ཝཱ ནཊྛེ ཝཱ པཱཙིཏྟིཡཾ དེསེཏི, ཨེཝཾ ཨིདྷཱཔི དེསེཏབྦམེཝཱཏི ཨདྷིཔྤཱཡོ.

ཨིདཾ ¶ ཨམྷཱཀཾ ཨཏྠཱིཏི ཨིདཾ པཊིགྒཧིཏཾ ཏེལཾ ཝཱ སཔྤི ཝཱ ཨམྷཱཀཾ སཾཝིཛྫཏི. ཨམྷཱཀཉྩ ཨིམིནཱ ཙ ཨིམིནཱ ཙ ཨཏྠོཏི ཨམྷཱཀཉྩ ཏདཉྙེན ཨིམིནཱ ཙ ཨིམིནཱ ཙ ཨཔྤཊིགྒཧིཏཀེན ཨཏྠོ. ‘‘རཱུཔིཡསཾཝོཧཱརེ ཝུཏྟནཡམེཝཱ’’ཏི ཨིམིནཱ ‘‘ཏིཀཔཱཙིཏྟིཡཾ ཨཀཡཝིཀྐཡེ ཀཡཝིཀྐཡསཉྙིནོ ཙ ཝེམཏིཀསྶ ཙ དུཀྐཊ’’ནྟི ཨིམཾ ནཡམཏིདིསཏི.

ཀཡཝིཀྐཡསིཀྑཱཔདཝཎྞནཱ ནིཊྛིཏཱ.

ཨེལ༹ཀལོམཝགྒོ དུཏིཡོ.

༣. པཏྟཝགྒོ

༡. པཏྟསིཀྑཱཔདཝཎྞནཱ

ཨཝིཀཔྤིཏོཏི ¶ ‘‘ཨིམཾ པཏྟཾ ཏུཡ྄ཧཾ ཝིཀཔྤེམཱི’’ཏིཨཱདིནཱ ནཡེན ཨཝིཀཔྤིཏོ. ཨཌྜྷཱལ༹ྷཀོདནཾ གཎྷཱཏཱིཏི མགདྷནཱལི༹ཡཱ དྭིནྣཾ ཏཎྜུལནཱལཱི༹ནཾ ཨོདནཾ གཎྷཱཏི. ‘‘མགདྷནཱལི༹ ནཱམ ཨཌྜྷཏེརསཔལཱ ཧོཏཱི’’ཏི ཨནྡྷཀཊྛཀཐཱཡཾ ཝུཏྟཾ. ‘‘སཱིཧལ༹དཱིཔེ པཀཏིནཱལི༹ མཧནྟཱ, དམིལ༹ནཱལི༹ ཁུདྡཀཱ, མགདྷནཱལི༹ པམཱཎཡུཏྟཱ, ཏཱཡ མགདྷནཱལི༹ཡཱ དིཡཌྜྷནཱལི༹ ཨེཀཱ སཱིཧལ༹ནཱལི༹ ཧོཏཱི’’ཏི (པཱརཱ. ཨཊྛ. ༢.༦༠༢) མཧཱཨཊྛཀཐཱཡཾ ཝུཏྟཾ. ཨནུཏྟཎྜུལནྟི པཱཀཏོ ཨུཀྐནྟཾ ཏཎྜུལཾ ཨུཏྟཎྜུལཾ, ན ཨུཏྟཎྜུལཾ ཨནུཏྟཎྜུལཾ. སབྦསམྦྷཱརསངྑཏོཏི ཛཱིརཀཱདིསབྦསམྦྷཱརེཧི སངྑཏོ. ཨཱལོཔསྶ ཙཏུཏྠབྷཱགཔྤམཱཎཾ བྱཉྫནཾ ཨཱལོཔསྶ ཨནུརཱུཔབྱཉྫནཾ.

ཨེཝཾ ཨུཀྐཊྛཔཏྟཾ དསྶེཏྭཱ ཨིདཱནི མཛ྄ཛྷིམོམཀཱནི དསྶེཏུཾ ‘‘ཨུཀྐཊྛཏོ’’ཏིཨཱདིམཱཧ. ཏཏྲཱཡཾ ནཡོ – སཙེ ནཱལི༹ཀོདནཱདི སབྦམྤི པཀྑིཏྟཾ ཝུཏྟནཡེནེཝ ཧེཊྛིམརཱཛིསམཾ ཏིཊྛཏི, ཨཡཾ མཛ྄ཛྷིམོ ནཱམ པཏྟོ. སཙེ ཏཾ རཱཛིཾ ཨཏིཀྐམྨ ཐཱུཔཱིཀཏཾ ཏིཊྛཏི, ཨཡཾ མཛ྄ཛྷིམོམཀོ ནཱམ པཏྟོ. སཙེ ཏཾ རཱཛིཾ ན སམྤཱཔུཎཱཏི, ཨནྟོགདྷམེཝ ཧོཏི, ཨཡཾ མཛ྄ཛྷིམུཀྐཊྛོ ནཱམ པཏྟོ. སཙེ པཏྟོདནཱདི སབྦམྤི པཀྑིཏྟཾ ཧེཊྛིམརཱཛིསམཾ ཏིཊྛཏི, ཨཡཾ ཨོམཀོ ནཱམ པཏྟོ. སཙེ ཏཾ རཱཛིཾ ཨཏིཀྐམྨ ཐཱུཔཱིཀཏཾ ཏིཊྛཏི, ཨཡཾ ཨོམཀོམཀོ ནཱམ པཏྟོ. སཙེ ཏཾ རཱཛིཾ ¶ ན སམྤཱཔུཎཱཏི, ཨནྟོགདྷམེཝ ཧོཏི, ཨཡཾ ཨོམཀུཀྐཊྛོ ནཱམ པཏྟོཏི. ཏེནཱཧ ‘‘ཏེསམྤི ཝུཏྟནཡེནེཝ བྷེདོ ཝེདིཏབྦོ’’ཏི.

ཨིདཱནི ཏེསུ ཨདྷིཊྛཱནཝིཀཔྤནཱནདྷིཊྛཱནཱཝིཀཔྤནུཔགེ དསྶེཏུཾ ‘‘ཨིཙྩེཏེསཱུ’’ཏིཨཱདིམཱཧ. ཏཏྠ ཨུཀྐཊྛུཀྐཊྛོཏི ཨུཀྐཊྛཏོ ཨུཀྐཊྛོ. ཏཏོ ཧི སོ ‘‘ཨཔཏྟོ’’ཏི ཝུཏྟོ. ཨོམཀོམཀོཏི ཨོམཀཏོ ཨོམཀོ. ཏཏོ ཧི སོ ‘‘ཨཔཏྟོ’’ཏི ཝུཏྟོ. ཨེཏེ པན བྷཱཛནཔརིབྷོགེན པརིབྷུཉྫིཏབྦཱ, ན ཨདྷིཊྛཱནུཔགཱ ན ཝིཀཔྤནུཔགཱ, ཨིཏརེ པན སཏྟ ཨདྷིཊྛཧིཏྭཱ ཝཱ ཝིཀཔྤེཏྭཱ ཝཱ པརིབྷུཉྫིཏབྦཱ. ཏེནཱཧ ‘‘སེསཱ སཏྟ པཏྟཱ པམཱཎཡུཏྟཱ ནཱམཱ’’ཏི.

ཏསྨཱཏི ¶ ཡསྨཱ སཏྟ པཏྟཱ པམཱཎཡུཏྟཱ, ཏསྨཱ. སམཎསཱརུཔྤེན པཀྐནྟི ཨེཏྠ ཨཡོཔཏྟོ པཉྩཧི པཱཀེཧི (པཱརཱ. ཨཊྛ. ༢.༦༠༨) པཀྐོ སམཎསཱརུཔྤེན པཀྐོ ཧོཏི, མཏྟིཀཱཔཏྟོ དྭཱིཧི པཱཀེཧི. སཙེ ཨེཀོ པཱཀོ ཨཱུནོ ཧོཏི, ན ཨདྷིཊྛཱནུཔགོ. ཡཐཱ ཙ སམཎསཱརུཔྤེན པཀྐོཡེཝ ཨདྷིཊྛཱནུཔགོ, ཏཐཱ ཨུབྷོཔི ཡཾ མཱུལཾ དཱཏབྦཾ, ཏསྨིཾ དིནྣེཡེཝ ཨདྷིཊྛཱནུཔགཱ. ཡདི པན ཨཔྤཀམྤི ཨདིནྣཾ ཧོཏི, ན ཨདྷིཊྛཱནུཔགཱ. ཏེནཱཧ ‘‘སཙེ པནཱ’’ཏིཨཱདི. ‘‘ཀཱཀཎིཀམཏྟཾ ནཱམ དིཡཌྜྷཝཱིཧཱི’’ཏི ཝདནྟི. སཙེཔི པཏྟསཱམིཀོ ཝདཏི ‘‘ཡདཱ ཏུམྷཱཀཾ མཱུལཾ བྷཝིསྶཏི, ཏདཱ དསྶཐ, ཨདྷིཊྛཧིཏྭཱ པརིབྷུཉྫཐཱ’’ཏི, ནེཝ ཨདྷིཊྛཱནུཔགོ ཧོཏི. པཱཀསྶ ཧི ཨཱུནཏྟཱ པཏྟསངྑཾ ན གཙྪཏི. མཱུལསྶ སཀལསྶ ཝཱ ཨེཀདེསསྶ ཝཱ ཨདིནྣཏྟཱ སཀབྷཱཝཾ ན ཨུཔེཏི, ཨཉྙསྶེཝ སནྟཀོ ཧོཏི. ཏསྨཱ པཱཀེ ཙ མཱུལེ ཙ ནིཊྛིཏེཡེཝ ཨདྷིཊྛཱནུཔགོ ཧོཏི. ཡོ ཨདྷིཊྛཱནུཔགོ, སྭེཝ ཝིཀཔྤནུཔགོ ཙ. ཏེནཱཧ ‘‘ཨཔཙྩུདྡྷརནྟེནཱ’’ཏིཨཱདི. ཨཔཙྩུདྡྷརནྟེན ཝིཀཔྤེཏབྦོཏི པུརཱཎཔཏྟཾ ཨཔཙྩུདྡྷརནྟེན ནཝོ པཏྟོ ཝིཀཔྤེཏབྦོཏི ཨཏྠོ, ཋཔེཏབྦོཏི ཨདྷིཔྤཱཡོ. ཀངྒུསིཏྠནྟི སཏྟནྣཾ དྷཉྙཱནཾ ལཱམཀདྷཉྙསིཏྠནྟི ཨཱཧ ‘‘ཀངྒུསིཏྠནིཀྑམནམཏྟེན ཚིདྡེནཱ’’ཏི.

པཏྟསིཀྑཱཔདཝཎྞནཱ ནིཊྛིཏཱ.

༢. ཨཱུནཔཉྩབནྡྷནསིཀྑཱཔདཝཎྞནཱ

ཨསྶཱཏི ¶ ཨིམསྶ པཏྟསྶ. ཏེན ཨཱུནཔཉྩབནྡྷནེནཱཏི ཏེན ཨཱུནཔཉྩབནྡྷནེན པཏྟེན ཨུཔལཀྑིཏོ ཧུཏྭཱཏི ཨཏྠོ. ཨཱུནཔཉྩབནྡྷནོ ཧི པཏྟོ ཨེཏྠ ལཀྑཎབྷཱཝེན གཧིཏོ. ཏེནེཝཱཧ ‘‘ཨིཏྠམྦྷཱུཏསྶ ལཀྑཎེ ཀརཎཝཙན’’ནྟི. ཏཏྠ ཨིཏྠམྦྷཱུཏསྶཱཏི ཀཉྩི པཀཱརཾ པཏྟསྶ. ལཀྑཱིཡཏེ ཨནེནཱཏི ལཀྑཎཾ, ཏསྨིཾ ཀརཎཝཙནཾ, ཏཏིཡཱཝིབྷཏྟཱིཏི ཨཏྠོ. ‘‘པཀཱརོ’’ཏི ཙ སཱམཉྙསྶ བྷེདཀོ ཝིསེསོ ཝུཙྩཏི. ཏཐཱ ཧི ཨཱུནཔཉྩབནྡྷནེན པཏྟེནཱཏི ཨེཏྠ བྷིཀྑུབྷཱཝསཱམཉྙསྶ ཨཱུནཔཉྩབནྡྷནཔཏྟབྷཱཝོ པཀཱརོ, ཏཾ བྷིཀྑུ ཨཱཔནྣོ, ཏསྶ པཏྟོ ལཀྑཎཾ. ཡདི ཨཔརིཔུཎྞཔཉྩབནྡྷནོ པཏྟོ ཨཱུནཔཉྩབནྡྷནོ ནཱམ ཧོཏི, ཨཐ ཀསྨཱ ཨིམསྶ པདབྷཱཛནིཡཾ ཨབནྡྷནོཔི ཝུཏྟོཏི ཨཱཧ ‘‘ཏཏྠཱ’’ཏིཨཱདི. ཏཏྠ ཏཏྠཱཏི ཝཱཀྱོཔཉྙཱསེ. བནྡྷནོཀཱསེ སཏི ཝཱ ཨསཏི ཝཱ བནྡྷནཝིརཧིཏོ པཏྟོ ཨབནྡྷནོ, པཉྩབནྡྷནཱནཾ ཨོཀཱསོ ཨསྶཱཏི པཉྩབནྡྷནོཀཱསོ. ཨཔཏྟོཏི པཏྟོ ནཱམ ན ཧོཏཱིཏི ཨཏྠོ, པཱཀཏིཀཾ ཀཱཏུཾ ཨསམཏྠོཏི ཝུཏྟཾ ཧོཏི. ཨིདཉྩ ཨཉྙསྶ ཝིཉྙཱཔནེ ཀཱརཎཝཙནཾ. ཏེནཱཧ ‘‘ཏསྨཱ ཨཉྙཾ ཝིཉྙཱཔེཏུཾ ཝཊྚཏཱི’’ཏི.

བནྡྷནཉྩ ¶ ནཱམེཏཾ ཡསྨཱ བནྡྷནོཀཱསེ སཏི ཧོཏི, ཨསཏི ན ཧོཏི, ཏསྨཱ ཏསྶ ལཀྑཎཾ, བནྡྷནཝིདྷིཉྩ དསྶེཏུཾ ‘‘ཡསྨིཾ པནཱ’’ཏིཨཱདི ཝུཏྟཾ. མུཁཝཊྚིསམཱིཔེ པན པཏྟཝེདྷཀེན ཝིཛ྄ཛྷིཡམཱནེ ཀཔཱལསྶ བཧལཏྟཱ བྷིཛྫཏི, ཏསྨཱ ཧེཊྛཱ ཝིཛ྄ཛྷིཏབྦོ. ཏེནཱཧ ‘‘ཧེཊྛིམཔརིཡནྟེ’’ཏིཨཱདི. སུཁུམཾ ཝཱ ཚིདྡཾ ཀཏྭཱ བནྡྷིཏབྦོཏི སུཁུམེ ཚིདྡེ ཏིཔུཔཊྚཱདཱིཧི པཡོཛནཾ ནཏྠི, སུཏྟཾ པཀྑིཔིཏྭཱཝ ཨདྷིཊྛཱཏབྦོཏི ཨདྷིཔྤཱཡོ. ན ཀེཝལཾ ཏིཔུསུཏྟཀཱདིནཱཝ བནྡྷིཏབྦོཏི ཨཱཧ ‘‘ཕཱཎིཏ’’ནྟིཨཱདི. ཕཱཎིཏཾ ཛྷཱཔེཏྭཱ པཱསཱཎཙུཎྞེནཱཏི པཱསཱཎཙུཎྞེན སདྡྷིཾ ཕཱཎིཏཾ པཙིཏྭཱ ཏཐཱཔཀྐེན པཱསཱཎཙུཎྞེནཱཏི ཨཏྠོ. ནིསྶཛྫིཏབྦོཏི ‘‘ཨཡཾ མེ, བྷནྟེ, པཏྟོ ཨཱུནཔཉྩབནྡྷནེན པཏྟེན ཙེཏཱཔིཏོ ནིསྶགྒིཡོ, ཨིམཱཧཾ སངྒྷསྶ ནིསྶཛྫཱམཱི’’ཏི (པཱརཱ. ༦༡༣) ནིསྶཛྫིཏབྦོ. ཏེནཱཧ ‘‘ནིསྶཛྫནྟེནཱ’’ཏིཨཱདི. སམྨཏེནཱཏི –

‘‘སུཎཱཏུ མེ, བྷནྟེ, སངྒྷོ, ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཾ བྷིཀྑུཾ པཏྟགྒཱཧཱཔཀཾ སམྨནྣེཡྻ, ཨེསཱ ཉཏྟི ¶ . སུཎཱཏུ མེ, བྷནྟེ, སངྒྷོ, སངྒྷོ ཨིཏྠནྣཱམཾ བྷིཀྑུཾ པཏྟགྒཱཧཱཔཀཾ སམྨནྣཏི, ཡསྶཱཡསྨཏོ ཁམཏི ཨིཏྠནྣཱམསྶ བྷིཀྑུནོ པཏྟགྒཱཧཱཔཀསྶ སམྨུཏི, སོ ཏུཎྷསྶ. ཡསྶ ནཀྑམཏི, སོ བྷཱསེཡྻ. སམྨཏོ སངྒྷེན ཨིཏྠནྣཱམོ བྷིཀྑུ པཏྟགྒཱཧཱཔཀོ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི (པཱརཱ. ༦༡༤) –

ཨེཝཾ པདབྷཱཛནེ ཝུཏྟཱཡ ཉཏྟིདུཏིཡཀམྨཝཱཙཱཡ སམྨཏེན. པཏྟསྶ ཝིཛྫམཱནགུཎཾ ཝཏྭཱཏི ‘‘ཨཡཾ, བྷནྟེ, པཏྟོ པམཱཎཡུཏྟོ སུནྡརོ ཐེརཱནུརཱུཔོ’’ཏིཨཱདིནཱ (པཱརཱ. ཨཊྛ. ༢.༦༡༥) ཝིཛྫམཱནཱནིསཾསཾ ཝཏྭཱ. པཏྟཔརིཡནྟོཏི པརིཡནྟེ ཋིཏཔཏྟོ. ཨདེསེཏི མཉྩཔཱིཋཙྪཏྟནཱགདནྟཀཱདིཀེ ཨདེསེ. པཏྟསྶ ཧི ནིཀྑིཔནདེསོ ‘‘ཨནུཛཱནཱམི, བྷིཀྑཝེ, ཨཱདྷཱརཀ’’ནྟིཨཱདིནཱ ནཡེན ཁནྡྷཀེ ཝུཏྟོཡེཝ. ཨཔརིབྷོགེནཱཏི ཡཱགུརནྡྷནརཛནཔཙནཱདིནཱ ཨཡུཏྟཔརིབྷོགེན. ཨནྟརཱམགྒེ པན བྱཱདྷིམྷི ཨུཔྤནྣེ ཨཉྙསྨིཾ བྷཱཛནེ ཨསཏི མཏྟིཀཱཡ ལིམྤིཏྭཱ ཡཱགུཾ པཙིཏུཾ, ཨུདཀཾ ཝཱ ཏཱཔེཏུཾ ཝཊྚཏི. ཝིསྶཛྫེཏཱིཏི ཨཉྙསྶ དེཏི. སཙེ པན སདྡྷིཝིཧཱརིཀོ ཝཱ ཨནྟེཝཱསིཀོ ཝཱ ཨཉྙཾ ཝརཔཏྟཾ ཋཔེཏྭཱ ‘‘ཨཡཾ མཡ྄ཧཾ སཱརུཔྤོ, ཨཡཾ ཐེརསྶཱ’’ཏི གཎྷཱཏི, ཝཊྚཏི. ཨཉྙོ ཝཱ ཏཾ གཧེཏྭཱ ཨཏྟནོ པཏྟཾ དེཏི, ཝཊྚཏི. ‘‘མཡ྄ཧམེཝ པཏྟཾ ཨཱཧརཱ’’ཏི ཝཏྟབྦཀིཙྩཾ ནཏྠི.

ཉཱཏཀཔྤཝཱརིཏེཏི ཨེཏྠ སངྒྷཝསེན པཝཱརིཏཊྛཱནེ པཉྩབནྡྷནེནེཝ ཝཊྚཏི, པུགྒལཝསེན པན པཝཱརིཏཊྛཱནེ ¶ ཨཱུནཔཉྩབནྡྷནེནཱཔི. ཨཀཏཝིཉྙཏྟི ནཱམ ‘‘ཝད, བྷནྟེ, པཙྩཡེནཱ’’ཏི ཨེཝཾ ཨཀཏཊྛཱནེ ཝིཉྙཏྟི.

ཨཱུནཔཉྩབནྡྷནསིཀྑཱཔདཝཎྞནཱ ནིཊྛིཏཱ.

༣. བྷེསཛྫསིཀྑཱཔདཝཎྞནཱ

ཨུགྒཧེཏྭཱཏི ཨུགྒཧིཏཀཾ ཀཏྭཱ, ཨཔྤཊིགྒཧིཏཾ སཡམེཝ གཧེཏྭཱཏི ཨཏྠོ. སཏྟཱཧཱཏིཀྐམེཔི ཨནཱཔཏྟིཀཏཱ ཙེཏྠ ཨནཛ྄ཛྷོཧརཎཱིཡཏཾ ཨཱཔནྣཏྟཱཏི ཝེདིཏབྦཾ. ཀསྨཱ ཨེཏེན ཨིདཾ དསྶིཏཾ ཧོཏཱིཏི ཨཱཧ ‘‘ཏཱནི ཧཱི’’ཏིཨཱདི. བྷིསཀྐསྶ ཨིམཱནི ཏེན ཨནུཉྙཱཏཏྟཱཏི བྷེསཛྫཱནི, ཡེསཾ ¶ ཀེསཉྩི སཔྤཱཡཱནམེཏཾ ཨདྷིཝཙནཾ. ཏེནཱཧ ‘‘བྷེསཛྫཀིཙྩཾ ཀརོནྟུ ཝཱ, མཱ ཝཱ, ཨེཝཾ ལདྡྷཝོཧཱརཱནཱི’’ཏི. ཨིདཱནི སཏྟཱཧཀཱལིཀཾ ནིསྶགྒིཡཝཏྠུབྷཱུཏཾ སཔྤིནཝནཱིཏཾ དསྶེཏུཾ ‘‘སཔྤི ནཱམ གཝཱདཱིན’’ནྟིཨཱདི ཝུཏྟཾ. ཨཱདིསདྡེན ཨཛིཀཱདཱིནཾ གཧཎཾ. ‘‘ཡེསཾ མཾསཾ ཀཔྤཏཱི’’ཏི ཨིམིནཱ པཱཀཊེཧི གོཨཛིཀཱདཱིཧི ཨཉྙཱནིཔི མིགརོཧིཏཱདཱིནི སངྒཎྷཱཏི. ཡེསཉྷི ཁཱིརཾ ཨཏྠི, སཔྤིཔི ཏེསཾ ཨཏྠིཡེཝ. ཏཾ པན སུལབྷཾ ཝཱ ཧོཏུ, དུལླབྷཾ ཝཱ, ཨསཾམོཧཏྠཾ ཝུཏྟཾ. མཀྑིཀཱམདྷུམེཝཱཏི ཁུདྡཀབྷམརམདྷུཀརཱིཧི ཏཱིཧི མཀྑིཀཱཧི ཀཏཾ མདྷུམེཝ. ཨུཙྪུརསནྟི སུདྡྷོདཀསམྦྷིནྣཱནཾ ཝསེན དུཝིདྷམྤི ཨུཙྪུརསཾ. ‘‘ཨགིལཱནསྶ གུལོ༹དཀ’’ནྟི (མཧཱཝ. ༢༨༤) པན ཨུདྡིསྶ ཨནུཉྙཱཏཏྟཱ ཨུདཀསམྦྷིནྣོ ཨགིལཱནསྶ ཝཊྚཏི. ‘‘ཨཝཏྠུཀཔཀྐཱ ཝཱ’’ཏི ཨིམིནཱ སཝཏྠུཀཔཀྐཱ ན ཝཊྚཏཱིཏི དསྶེཏི. མཧཱཔཙྩརིཡཾ པན ‘‘ཨེཏཾ སཝཏྠུཀཔཀྐཾ ཝཊྚཏི, ནོ ཝཊྚཏཱིཏི པུཙྪཾ ཀཏྭཱ ཨུཙྪུཕཱཎིཏཾ པཙྪཱབྷཏྟཾ ནོཝཊྚནཀཾ ནཱམ ནཏྠཱི’’ཏི ཝུཏྟཾ, ཏཾ ཡུཏྟནྟི སམནྟཔཱསཱདིཀཱཡཾ (པཱརཱ. ཨཊྛ. ༢.༦༢༣) ཝུཏྟཾ. ཨུཙྪུཝིཀཏཱིཏི ཨུཙྪུམྷཱ ནིབྦཏྟཱ རསལསིཀཱདིཀཱ. པཀཏཏྟཱནཾ པཊིནིདྡེསཏྟཱ ཏཾ-སདྡསྶ ཏེན པཀཏཱནཾ བྷེསཛྫཱནཾ ཨེཝ གཧཎཾ, ན ཏེསཾ ཝཏྠཱུནནྟི ཨཱཧ ‘‘ཏཱནི བྷེསཛྫཱནཱི’’ཏིཨཱདི. ན ཏེསཾ ཝཏྠཱུནཱིཏི ཏེསཾ སཔྤིཨཱདཱིནཾ ཀཱརཎཱནི ཁཱིརཱདཱིནི ཨཔྤཊིགྒཧེཏྭཱཏི ཨཏྠོ.

ཝསཱཏེལནྟི (པཱརཱ. ཨཊྛ. ༢.༦༢༣) ‘‘ཨནུཛཱནཱམི, བྷིཀྑཝེ, ཝསཱནི བྷེསཛྫཱནི ཨཙྪཝསཾ མཙྪཝསཾ སུསུཀཱཝསཾ སཱུཀརཝསཾ གདྲབྷཝས’’ནྟི (མཧཱཝ. ༢༦༢) ཨེཝཾ ཨནུཉྙཱཏཝསཱནཾ ཏེལཾ. ཡཱནཱིཏི ཡཱནི བྷེསཛྫཱནི. ‘‘ཨནུཛཱནཱམི, བྷིཀྑཝེ, ཝསཱནི བྷེསཛྫཱནི ཨཙྪཝསཾ མཙྪཝསཾ སུསུཀཱཝསཾ སཱུཀརཝསཾ གདྲབྷཝསཾ ཀཱལེ པཊིགྒཧིཏཾ ཀཱལེ ནིཔྤཀྐཾ ¶ ཀཱལེ སཾསཊྛཾ ཏེལཔརིབྷོགེན པརིབྷུཉྫིཏུ’’ནྟི ཨེཝཾ ཏེལཏྠཾ ཝསཱཔཊིགྒཧཎསྶ ཨནུཉྙཱཏཏྟཱ ‘‘ཝསཱཏེལཾ པནཱ’’ཏིཨཱདི ཝུཏྟཾ. ཀཱལེཏི པུརེབྷཏྟཾ. སཾསཊྛནྟི པརིསྶཱཝིཏཾ. ཏསྨཱཏི ཡསྨཱ ཨནུཉྙཱཏཾ, ཏསྨཱ. ‘‘ཨཙྪཝས’’ནྟི ཝཙནེན ཋཔེཏྭཱ མནུསྶཝསཾ སབྦེསཾ ཨཀཔྤིཡམཾསཱནཾ ཝསཱཡ ཨནུཉྙཱཏཏྟཱ ‘‘ཋཔེཏྭཱ མནུསྶཝས’’ནྟི ཝུཏྟཾ.

སཱམཾ པཙིཏྭཱཏི ཀཱལེཡེཝ སཱམཾ པཙིཏྭཱ. ནིབྦཏྟིཏཏེལམྤཱིཏི ཀཱལེཡེཝ ཨཏྟནཱ ཝིཝེཙིཏཏེལམྤི. ཏིཝིདྷམྤི ཙེཏཾ ཀཱལེཡེཝ ཝཊྚཏི. ཝུཏྟམྤི ཙེཏཾ ‘‘ཀཱལེ ཙེ, བྷིཀྑཝེ, པཊིགྒཧིཏཾ ཀཱལེ ནིཔྤཀྐཾ ཀཱལེ ¶ སཾསཊྛཾ, ཏཾ ཙེ པརིབྷུཉྫེཡྻ, ཨནཱཔཏྟཱི’’ཏི. པཙྪཱབྷཏྟཾ པན པཊིགྒཧེཏུཾ ཝཱ ཀཱཏུཾ ཝཱ ན ཝཊྚཏིཡེཝ. ཝུཏྟམྤི ཙེཏཾ ‘‘ཝིཀཱལེ ཙེ, བྷིཀྑཝེ, པཊིགྒཧིཏཾ ཝིཀཱལེ ནིཔྤཀྐཾ ཝིཀཱལེ སཾསཊྛཾ, ཏཾ ཙེ པརིབྷུཉྫེཡྻ, ཨཱཔཏྟི ཏིཎྞཾ དུཀྐཊཱནཾ. ཀཱལེ ཙེ, བྷིཀྑཝེ, པཊིགྒཧིཏཾ ཝིཀཱལེ ནིཔྤཀྐཾ ཝིཀཱལེ སཾསཊྛཾ, ཏཾ ཙེ པརིབྷུཉྫེཡྻ, ཨཱཔཏྟི དྭིནྣཾ དུཀྐཊཱནཾ. ཀཱལེ ཙེ, བྷིཀྑཝེ, པཊིགྒཧིཏཾ ཀཱལེ ནིཔྤཀྐཾ ཝིཀཱལེ སཾསཊྛཾ, ཏཾ ཙེ པརིབྷུཉྫེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༢༦༢). ‘‘སཏྟཱཧཾ ནིརཱམིསཔརིབྷོགེན ཝཊྚཏཱི’’ཏི ཨིམིནཱ པན ‘‘ཀཱལེ པཊིགྒཧིཏཾ ཀཱལེ ནིཔྤཀྐཾ ཀཱལེ སཾསཊྛཾ ཏེལཔརིབྷོགེན པརིབྷུཉྫིཏུ’’ནྟི ཨིདཾ ནིརཱམིསཔརིབྷོགཾ སནྡྷཱཡ ཝུཏྟནྟི དསྶེཏི.

ཡཾ པནེཏྠ (པཱརཱ. ཨཊྛ. ༢.༦༢༣) སུཁུམརཛསདིསཾ མཾསཾ ཝཱ ནྷཱརུ ཝཱ ཨཊྛི ཝཱ ལོཧིཏཾ ཝཱ ཧོཏི, ཏཾ ཨབྦོཧཱརིཀཾ. སཙེ པན ཨནུཔསམྤནྣོ ཏཱཡ པཊིགྒཧིཏཝསཱཡ ཏེལཾ ཀཏྭཱ དེཏི, ཏཾ ཀཐནྟི ཨཱཧ ‘‘ཨནུཔསམྤནྣེནཱ’’ཏིཨཱདི. ཏདཧཱུཏི ཡསྨིཾ ཨཧནི པཊིགྒཧིཏཾ, ཏདཧུ. པཙྪཱབྷཏྟཏོ པཊྛཱཡ པན སཏྟཱཧཾ ནིརཱམིསམེཝ ཝཊྚཏི. ཏཏྲཱཔི ཨབྦོཧཱརིཀཾ ཨབྦོཧཱརིཀམེཝ. ཡཱཝཀཱལིཀཝཏྠཱུནཾ ཨཉྙེསཾ ཝཏྠུཾ པཙིཏུཾ ན ཝཊྚཏཱིཏི སམྦནྡྷོ. ཏཏྠ ཡཱཝཀཱལིཀཝཏྠཱུནནྟི ཡཱཝཀཱལིཀཾ ཝཏྠུ ཨེཏེསནྟི ཡཱཝཀཱལིཀཝཏྠཱུནི, ཏེསཾ, ཡཱཝཀཱལིཀཝཏྠུམནྟཱནནྟི ཨཏྠོ. ཨཉྙེསནྟི ཝསཱཏེལཏོ ཨཉྙེསཾ སཔྤིཨཱདཱིནཾ. ཝཏྠུནྟི ཁཱིརཱདིཀཾ ཡཱཝཀཱལིཀབྷཱུཏཾ ཝཏྠུཾ, པཙིཏུཾ ན ཝཊྚཏིཡེཝ, སཱམཾཔཱཀཏྟཱཏི ཨདྷིཔྤཱཡོ.

ནིབྦཏྟིཏསཔྤིཾ ཝཱཏི ཡཱཝཀཱལིཀཝཏྠུཏོ ཝིཝེཙིཏསཔྤིཾ ཝཱ. ཡཐཱ ཏཏྠ དདྷིགཏཾ ཝཱ ཏཀྐགཏཾ ཝཱ ཁཡཾ གམིསྶཏི, ཨེཝཾ ཛྷཱཔིཏཾ ཝཱཏི ཨཏྠོ. ནཝནཱིཏཾ ཝཱཏི ཏཀྐབིནྡཱུནིཔི དདྷིགུལི༹ཀཱཡོཔི ཨཔནེཏྭཱ སུདྷོཏནཝནཱིཏཾ པཙིཏུཾ ཝཊྚཏི སཱམཾཔཀྐཱབྷཱཝཏོཏི ཨདྷིཔྤཱཡོ. ཡདི སཡཾཔཙིཏསཏྟཱཧཀཱལིཀེན སདྡྷིཾ ཨཱམིསཾ བྷུཉྫཏི, ཏཾ ཨཱམིསཾ སཡཾཔཙིཏསཏྟཱཧཀཱལིཀེན མིསྶིཏཾ ཨཏྟནོ ཡཱཝཀཱལིཀབྷཱཝཾ སཏྟཱཧཀཱལིཀེན གཎྷཱཔེཏི. ཏཐཱ ¶ ཙ ཡཱཝཀཱལིཀཾ ཨཔཀྐམྤི སཡཾཔཀྐབྷཱཝཾ ཨུཔགཙྪཏཱིཏི ‘‘ཏཾ པན ཏདཧུཔུརེབྷཏྟམྤི སཱམིསཾ པརིབྷུཉྫིཏུཾ ན ཝཊྚཏཱི’’ཏི ཝུཏྟཾ. ཡཐཱ སཡཾཔཀྐསཏྟཱཧཀཱལིཀཾ ཝསཱཏེལཾ, སཡཾབྷཛྫིཏསཱསཔཱདིཡཱཝཛཱིཝིཀཝཏྠཱུནཾ ཏེལཉྩ སཱམིསཾ ཏདཧུཔུརེབྷཏྟམྤི ན ཝཊྚཏི, ཏཐཱ ནཝནཱིཏསཔྤཱིཏི ཝེདིཏབྦཾ. ཝུཏྟཉྩ –

‘‘ཡཱཝཀཱལིཀཨཱདཱིནི ¶ , སཾསཊྛཱནི སཧཏྟནཱ;

གཱཧཱཔཡནྟི སབྦྷཱཝ’’ནྟི ཙ;

‘‘ཏེཧེཝ བྷིཀྑུནཱ པཏྟཾ, ཀཔྤཏེ ཡཱཝཛཱིཝིཀཾ;

ནིརཱམིསཾཝ སཏྟཱཧཾ, སཱམིསེ སཱམཔཱཀཏཱ’’ཏི ཙ.

ཁཱིརཱདིཏོཏི ཨེཏྠ ཨཱདིསདྡེན ཏིལཱདཱིནཾ གཧཎཾ. སཱམིསཱནིཔཱིཏི ན ཀེཝལཾ ནིརཱམིསཱནེཝཱཏི ཨཏྠོ. པཙྪཱབྷཏྟཏོ པན པཊྛཱཡ ན ཝཊྚནྟིཡེཝ. སཏྟཱཧཱཏིཀྐམེཔི ཨནཱཔཏྟི སཝཏྠུཀཱནཾ པཊིགྒཧིཏཏྟཱ. ‘‘ཏཱནི པཊིགྒཧེཏྭཱ’’ཏི (པཱརཱ. ༦༢༢) ཧི ཝུཏྟཾ. ཏེནཱཧ ‘‘པཙྪཱབྷཏྟཏོ པཊྛཱཡཱ’’ཏིཨཱདི. པཙྪཱབྷཏྟཾ པཊིགྒཧིཏཀེཧི ཀཏཾ པན ཨབྦྷཉྫནཱདཱིསུ ཨུཔནེཏབྦཾ, པུརེབྷཏྟམྤི ཙ ཨུགྒཧིཏཀེཧི ཀཏཾ. ཨུབྷཡེསམྤི སཏྟཱཧཱཏིཀྐམེཔི ཨནཱཔཏྟི. ཨནྟོསཏྟཱཧེཏི སཏྟཱཧབྦྷནྟརེ. ཨབྦྷཉྫནཱདཱིནནྟི ཨེཏྠ ཨཱདིསདྡེན མུདྡྷནིཏེལཨརུམཀྑནགྷརདྷཱུཔནཱདཱིནཾ གཧཎཾ. ཨདྷིཊྛཧིཏྭཱཏི ‘‘ཨིདཱནི ན མཡ྄ཧཾ ཨཛ྄ཛྷོཧརཎཏྠཱཡ བྷཝིསྶཏི, ཨིདཾ སཔྤི ཙ ཏེལཉྩ ཝསཱ ཙ མུདྡྷནིཏེལཏྠཾ ཝཱ ཨབྦྷཉྫནཏྠཾ ཝཱ བྷཝིསྶཏི, མདྷུ ཨརུམཀྑནཏྠཾ ཝཱ ཕཱཎིཏཾ གྷརདྷཱུཔནཏྠཾ ཝཱ བྷཝིསྶཏཱི’’ཏི ཨེཝཾ ཙིཏྟཾ ཨུཔྤཱདེཏྭཱ.

ཀོ པནེཏྠ ཡཱཝཀཱལིཀཡཱཝཛཱིཝིཀཝཏྠཱུསུ ཝིསེསོཏི ཨཱཧ ‘‘ཡཱཝཛཱིཝིཀཱནཱི’’ཏིཨཱདི. ཡཱཝ ཨརུཎསྶ ཨུགྒམནཱ ཏིཊྛཏཱིཏི སཏྟམདིཝསེ ཀཏཏེལཾ སཙེ ཡཱཝ ཨརུཎུགྒམནཱ ཏིཊྛཏཱིཏི ཨཏྠོ. པཱལི༹ཡཾ ཨནཱགཏསཔྤིཨཱདཱིནནྟི ཨེཏྠ ཏཱཝ མིགརོཧིཏཱདཱིནཾ སཔྤི པཱལི༹ཡཾ ཨནཱགཏསཔྤི, ཏཐཱ ནཝནཱིཏཾ, ནཱལི༹ཀེརནིམྦཀོསམྦཀརམནྡསཱསཔཨཱདཱིནཾ ཏེལཾ པན པཱལི༹ཡཾ ཨནཱགཏཏེལཾ, ཏཐཱ མདྷུཀཔུཔྥཕཱཎིཏཾ པཱལི༹ཡཾ ཨནཱགཏཕཱཎིཏནྟི ཝེདིཏབྦཾ. ན སབྦཾ མདྷུཀཔུཔྥཕཱཎིཏཾ ཕཱཎིཏགཏིཀནྟི ཨཱཧ ‘‘སཱིཏུདཀེནཱ’’ཏིཨཱདི. སཱིཏུདཀེན ཀཏནྟི མདྷུཀཔུཔྥཱནི སཱིཏུདཀེ པཀྑིཔིཏྭཱ ཨམདྡིཏྭཱ པུཔྥརསེ ཨུདཀགཏེ སཏི ཏཾ ཨུདཀཾ གཧེཏྭཱ པཙིཏྭཱ ཀཏཾ. ‘‘ཕཱཎིཏགཏིཀམེཝཱ’’ཏི ཨིམིནཱ སཏྟཱཧཀཱལིཀནྟི དསྶེཏི, ན པན ནིསྶགྒིཡཝཏྠུནྟི. ཏསྨཱ སཏྟཱཧཾ ཨཏིཀྐཱམཡཏོ དུཀྐཊནྟི ཝེདིཏབྦཾ. ཝུཏྟམྤི ཙེཏཾ སམནྟཔཱསཱདིཀཱཡཾ སཱིཏུདཀེན ཀཏཾ མདྷུཀཔུཔྥཕཱཎིཏཾ པུརེབྷཏྟཾ སཱམིསཾ ཝཊྚཏི ¶ , པཙྪཱབྷཏྟཏོ པཊྛཱཡ ¶ སཏྟཱཧཾ ནིརཱམིསམེཝ, སཏྟཱཧཱཏིཀྐམེ ཝཏྠུགཎནཱཡ དུཀྐཊ’’ནྟི. སཙེ པན ཁཱིརཾ པཀྑིཔིཏྭཱ ཀཏཾ, ཡཱཝཀཱལིཀཾ. ཁཎྜསཀྑརཾ པན ཁཱིརཛལླིཀཾ ཨཔནེཏྭཱ སོདྷེནྟི, ཏསྨཱ ཝཊྚཏི, ཨམྦཛམྦུཔནསཀདལིཁཛྫུརིཙིཉྩཱདཱིནཾ སབྦེསཾ ཡཱཝཀཱལིཀཕལཱནཾ ཕཱཎིཏཾ ཡཱཝཀཱལིཀམེཝཱཏི ཨཱཧ ‘‘ཨམྦཕཱཎིཏཱདཱིནི ཡཱཝཀཱལིཀཱནཱི’’ཏི.

ཀཱཡིཀཔརིབྷོགཾ ཝཊྚཏཱིཏི ཀཱཡསྶ ཝཱ ཀཱཡེ ཨརུནོ ཝཱ མཀྑནཾ ཝཊྚཏི, ཨཛ྄ཛྷོཧརིཏུཾ པན ན ཝཊྚཏི. ཡནྟི སཏྟཱཧཱཏིཀྐནྟཾ བྷེསཛྫཾ. ནིརཔེཀྑོ པརིཙྩཛིཏྭཱཏི ཨནཔེཀྑོ སཱམཎེརསྶ དཏྭཱ. ཏནྟི ཨེཝཾ པརིཙྩཛིཏྭཱ པུན ལདྡྷབྷེསཛྫཾ. ཨེཝཉྷི དིནྣཾ བྷེསཛྫཾ སཙེ སོ སཱམཎེརོ ཨབྷིསངྑརིཏྭཱ ཝཱ ཨནབྷིསངྑརིཏྭཱ ཝཱ ཏསྶ བྷིཀྑུནོ དདེཡྻ, གཧེཏྭཱ ནཏྠུཀམྨཾ ཝཱ ཀཱཏབྦཾ, ཨཉྙཾ ཝཱ ཀཉྩི པརིབྷོགཾ. ཏེནཱཧ ‘‘ཨཛ྄ཛྷོཧརིཏུམྤི ཝཊྚཏཱི’’ཏི. སཙེ སོ བཱལོ ཧོཏི, དཱཏུཾ ན ཛཱནཱཏི, ཨཉྙེན བྷིཀྑུནཱ ཝཏྟབྦོ ‘‘ཨཏྠི ཏེ, སཱམཎེར, བྷེསཛྫ’’ནྟི, ‘‘ཨཱམ, བྷནྟེ, ཨཏྠཱི’’ཏི. ‘‘ཨཱཧར, ཐེརསྶ བྷེསཛྫཾ ཀརིསྶཱམཱ’’ཏི, ཨེཝམྤི ཝཊྚཏི. ཝཏྠུགཎནཱཡཱཏི སཔྤིཨཱདིཝཏྠུགཎནཱཡ ཙེཝ སཔྤིཔིཎྜཱདིཝཏྠུགཎནཱཡ ཙ. མིསྶིཏེསུ པན ཨེཀཾ ནིསྶགྒིཡཾ པཱཙིཏྟིཡཾ. ཨེཏྠ ཙ ‘‘ཨིདཾ མེ, བྷནྟེ, བྷེསཛྫཾ སཏྟཱཧཱཏིཀྐནྟཾ ནིསྶགྒིཡཾ, ཨིམཱཧཾ སངྒྷསྶ ནིསྶཛྫཱམཱི’’ཏི (པཱརཱ. ༦༢༣) ནིསྶཛྫནཝིདྷཱནཾ ཝེདིཏབྦཾ.

སཱདྷཱརཎཔཉྙཏྟི. སཏྟཱཧཾ ཨནཏིཀྐནྟེཔི ཨཏིཀྐནྟསཉྙིནོ ཙེཝ ཝེམཏིཀསྶ ཙ དུཀྐཊཾ. ཨཏིཀྐནྟེ ཨནཏིཀྐནྟསཉྙིནོཔི ཝེམཏིཀསྶཔི ནིསྶགྒིཡཾ པཱཙིཏྟིཡམེཝ, ཏཐཱ ཨནདྷིཊྛིཏཱཝིསྶཛྫིཏཱནཊྛཱཝིནཊྛཱདཌྜྷཱཝིལུཏྟེསུ ཨདྷིཊྛིཏཱདིསཉྙིནོ. ཨནྟོསཏྟཱཧཾ ཨདྷིཊྛིཏེ, ཝིསྶཛྫིཏེ, ནཊྛེ, ཝིནཊྛེ, དཌྜྷེ, ཨཙྪིནྣེ, ཝིསྶཱསེན གཧིཏེ ཨུམྨཏྟཀཱདཱིནཉྩ ཨནཱཔཏྟི. ཨཱཙཱརཝིཔཏྟི. སཔྤིཨཱདཱིནཾ ཨཏྟནོ སནྟཀཏཱ, གཎནུཔགཏཱ, སཏྟཱཧཱཏིཀྐམོཏི ཨིམཱནེཏྠ ཏཱིཎི ཨངྒཱནི. ཀཐིནསམུཊྛཱནཾ, ཨཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནཾ. ཏེནཱཧ ‘‘སེསཾ ཙཱིཝརཝགྒསྶ པཋམསིཀྑཱཔདེ ཝུཏྟནཡེནེཝ ཝེདིཏབྦ’’ནྟི (ཀངྑཱ. ཨཊྛ. ཀཐིནསིཀྑཱཔདཝཎྞནཱ).

བྷེསཛྫསིཀྑཱཔདཝཎྞནཱ ནིཊྛིཏཱ.

༤. ཝསྶིཀསཱཊིཀསིཀྑཱཔདཝཎྞནཱ

པཙྪིམམཱསསྶ ¶ ¶ པཋམདིཝསཏོ པཊྛཱཡཱཏི ཛེཊྛམཱུལཔུཎྞམཱསིཡཱ པཙྪིམཔཱཊིཔདདིཝསཏོ པཊྛཱཡ. ཏཱཝཱཏི ཏཱཝ པརིམཱཎེ ཀཱལེ. ཛེཊྛམཱུལཔུཎྞམཱསིཡཱ པཙྪིམཔཱཊིཔདདིཝསཏོ པཊྛཱཡ ཡཱཝ ཀཏྟིཀཔུཎྞམཱ, ཨིམསྨིཾ པཉྩམཱསེཏི ཨཏྠོ. ཀཱལོ ཝསྶིཀསཱཊིཀཱཡཱཏིཨཱདིནཱཏི ཨེཏྠ ཨཱདིསདྡེན ‘‘སམཡོ ཝསྶིཀསཱཊིཀཱཡ, ཨཉྙེཔི མནུསྶཱ ཝསྶིཀསཱཊིཀཙཱིཝརཾ དེནྟཱི’’ཏི (པཱརཱ. ༦༢༨) ཨིམེསཾ གཧཎཾ. དེཐ མེ ཝསྶིཀསཱཊིཀཙཱིཝརནྟིཨཱདིཀཱཡཱཏི ཨེཏྠ ཨཱདིསདྡེན པན ‘‘ཨཱཧརཐ མེ ཝསྶིཀསཱཊིཀཙཱིཝརཾ, པརིཝཏྟེཐ མེ ཝསྶིཀསཱཊིཀཙཱིཝརཾ, ཙེཏཱཔེཐ མེ ཝསྶིཀསཱཊིཀཙཱིཝར’’ནྟི ཨིམེསཾ གཧཎཾ. ཨཏྟནོ ཨཉྙཱཏཀཨཔྤཝཱརིཏེསུ ཏདུབྷཡཾ ཀརོནྟསྶ ཀིཾ ཧོཏཱིཏི ཨཱཧ ‘‘ཨཉྙཱཏཀཨཔྤཝཱརིཏཊྛཱནེ’’ཏིཨཱདི. ‘‘ཝཏྟབྷེདེ དུཀྐཊ’’ནྟི ཨིདཾ ཝསྶིཀསཱཊིཀཾ པུབྦེ ཨདེནྟེ སནྡྷཱཡ ཝུཏྟཾ. ཡེ པན པུབྦེཔི དེནྟི, ཏེསུ ཝཏྟབྷེདོ ནཏྠི. ཝུཏྟཉྷི སམནྟཔཱསཱདིཀཱཡཾ ‘‘ཡེ མནུསྶཱ པུབྦེཔི ཝསྶིཀསཱཊིཀཙཱིཝརཾ དེནྟི, ཨིམེ པན སཙེཔི ཨཏྟནོ ཨཉྙཱཏཀཨཔྤཝཱརིཏཱ ཧོནྟི, ཝཏྟབྷེདོ ནཏྠི ཏེསུ སཏུཔྤཱདཀརཎསྶ ཨནུཉྙཱཏཏྟཱ’’ཏི (པཱརཱ. ཨཊྛ. ༢.༦༢༨). ཨཉྙཱཏཀཝིཉྙཏྟིསིཀྑཱཔདེན ནིསྶགྒིཡཾ པཱཙིཏྟིཡནྟི ‘‘ཡོ པན བྷིཀྑུ ཨཉྙཱཏཀཾ གཧཔཏིཾ ཝཱ གཧཔཏཱནིཾ ཝཱ ཙཱིཝརཾ ཝིཉྙཱཔེཡྻ ཨཉྙཏྲ སམཡཱ, ནིསྶགྒིཡཾ པཱཙིཏྟིཡ’’ནྟི (པཱརཱ. ༥༡༨) ཨིམིནཱ སིཀྑཱཔདེན ནིསྶགྒིཡཾ པཱཙིཏྟིཡཾ. ཨིདཾ པན པཀཏིཡཱ ཝསྶིཀསཱཊིཀདཱཡཀེསུཔི ཧོཏིཡེཝ.

གིམྷཱནཾ པཙྪིམདྡྷམཱསསྶ པཋམདིཝསཏོ པཊྛཱཡཱཏི ཨེཏྠ ཛེཊྛམཱུལཀཱལ༹པཀྑཱུཔོསཐསྶ པཙྪིམཔཱཊིཔདདིཝསཏོ པཊྛཱཡ ཡཱཝ ཨཱསཱལ༹ྷིཔུཎྞམཱ, ཨཡམདྡྷམཱསོ གིམྷཱནཾ པཙྪིམདྡྷམཱསོ ནཱམ, ཏསྶ པཋམདིཝསཏོ པཊྛཱཡཱཏི ཨཏྠོ, ཨདྡྷམཱསསྶ པཋམཔཱཊིཔདདིཝསཏོ པཊྛཱཡཱཏི ཝུཏྟཾ ཧོཏི. ཀཏྟིཀམཱསསྶ པཙྪིམདིཝསོ ནཱམ པཙྪིམཀཏྟིཀམཱསསྶ པུཎྞམཱ. ཨེཏྟཱཝཏཱཏི ‘‘མཱསོ སེསོ གིམྷཱནནྟི བྷིཀྑུནཱ ཝསྶིཀསཱཊིཀཙཱིཝརཾ པརིཡེསིཏབྦཾ, ཨདྡྷམཱསོ སེསོ གིམྷཱནནྟི ཀཏྭཱ ནིཝཱསེཏབྦ’’ནྟི ཨེཏྟཀེན གཎནེན. པརིཡེསནཀྑེཏྟནྟི པརིཡེསནསྶ ཁེཏྟཾ. ཨེཏསྨིཉྷི མཱསེ ཝསྶིཀསཱཊིཀཾ ཨལདྡྷཾ པརིཡེསིཏུཾ ཝཊྚཏི. ཀརཎནིཝཱསནཀྑེཏྟམྤཱིཏི ཀརཎཀྑེཏྟཉྩེཝ ནིཝཱསནཀྑེཏྟཉྩ. པི-སདྡེན པརིཡེསནཀྑེཏྟཾ ¶ སམྤིཎྜེཏི. ཨེཏསྨིཉྷི ཨདྡྷམཱསེ པརིཡེསིཏུཾ, ཀཱཏུཾ, ནིཝཱསེཏུཉྩ ཝཊྚཏི, ཨདྷིཊྛཱཏུཾཡེཝ ན ཝཊྚཏི. ཡཾ པན སམནྟཔཱསཱདིཀཱཡཾ ཀཏྠཙི པོཏྠཀེ ‘‘ཛེཊྛམཱུལཔུཎྞམཱསིཡཱ པཙྪིམཔཱཊིཔདདིཝསཏོ པཊྛཱཡ ཡཱཝ ཀཱལཔཀྑུཔོསཐོ, ཨཡམེཀོ ཨདྡྷམཱསོ པརིཡེསནཀྑེཏྟཉྩེཝ ཀརཎཀྑེཏྟཉྩ. ཨེཏསྨིཉྷི ཨནྟརེ ཝསྶིཀསཱཊིཀཾ ཨལདྡྷཾ པརིཡེསིཏུཾ ¶ , ལདྡྷཾ ཀཱཏུཉྩ ཝཊྚཏི, ནིཝཱསེཏུཾ, ཨདྷིཊྛཱཏུཉྩ ན ཝཊྚཏཱི’’ཏི (པཱརཱ. ཨཊྛ. ༢.༦༢༨) ཝཙནཾ དིསྶཏི, ཏཾ པམཱདལིཁིཏཾ མཱཏིཀཱཡ ཝིརོདྷཏོཏི དཊྛབྦཾ. ‘‘ཨདྡྷམཱསོ སེསོ གིམྷཱནནྟི ཀཏྭཱ ནིཝཱསེཏབྦ’’ནྟི (པཱརཱ. ༦༢༧) ཧི པཱལི༹. སབྦམྤཱིཏི པརིཡེསནཾ, ཀརཎཾ, ནིཝཱསནཾ, ཨདྷིཊྛཱནཉྩཱཏི སབྦམྤི. ཨིམིནཱ ཨིམེ ཙཏྟཱརོ མཱསཱ པརིཡེསནཀརཎནིཝཱསནཱདྷིཊྛཱནཱནཾ ཙཏུནྣམྤི ཁེཏྟནྟི དསྶེཏི. ཨེཏེསུ ཧི ཙཏཱུསུ མཱསེསུ ཨལདྡྷཾ པརིཡེསིཏུཾ, ལདྡྷཾ ཀཱཏུཾ, ནིཝཱསེཏུཾ, ཨདྷིཊྛཱཏུཉྩ ཝཊྚཏི.

ཝསྶཾ ཨུཀྐཌྜྷཱིཡཏཱིཏི སཾཝཙྪརཾ ཨུདྡྷཾ ཀཌྜྷཱིཡཏི ཝཌྜྷཱིཡཏི, ཨཱརུཡ྄ཧཏཱིཏི ཨཏྠོ, ཝསྶཱནསྶ པཋམམཱསཾ ཨུཀྐཌྜྷིཏྭཱ གིམྷཱནཾ པཙྪིམམཱསམེཝ ཀརོནྟཱིཏི ཝུཏྟཾ ཧོཏི. ཝསྶཱུཔནཱཡིཀདིཝསེ ཨདྷིཊྛཱཏབྦཱཏི ཝསྶཱནཏོ པུབྦེཡེཝ དསཱཧསྶ ཨཏིཀྐནྟཏྟཱ ཝསྶཱུཔནཱཡིཀདིཝསེཡེཝ ཨདྷིཊྛཱཏབྦཱ. ཏཉྷི དིཝསཾ ཨཏིཀྐཱམེཏུཾ ན ཝཊྚཏི. ཨནྟོཝསྶེ པན ལདྡྷཱ ཙེཝ ནིཊྛིཏཱ ཙ ཏསྨིཾཡེཝ ཨནྟོཝསྶེ ལདྡྷདིཝསཏོ པཊྛཱཡ དསཱཧཾ ནཱཏིཀྐཱམེཏབྦཱ, དསཱཧཱཏིཀྐམེ ནིཊྛིཏཱ པན ཏདཧེཝ ཨདྷིཊྛཱཏབྦཱ. དསཱཧེ ཨཔྤཧོནྟེ ཙཱིཝརཀཱལཾ ནཱཏིཀྐཱམེཏབྦཱ. ཨཡཾ ཏཱཝ ཀཏཱཡ པརིཧཱརོ. ཨཀཏཱཡ པན ཀོ པརིཧཱརོཏི ཨཱཧ ‘‘སཙེ’’ཏིཨཱདི. ཨེཀཱཧམྤི ན ལབྷཏི ཨིཏོ ཨཉྙསྶ པརིཧཱརསྶཱབྷཱཝཏོཏི ཨདྷིཔྤཱཡོ.

སོ ཀུཏོ ཧོཏཱིཏི ཨཱཧ ‘‘ཡཱཝ ཧེམནྟསྶ པཋམདིཝསོ’’ཏི, ཛེཊྛམཱུལཔུཎྞམཱསིཏོ པཊྛཱཡ ཡཱཝ ཀཏྟིཀཔུཎྞམཱསིཡཱ པཙྪིམཔཱཊིཔདདིཝསོ, ཏཱཝཱཏི ཨཏྠོ. ཨེཏེསུ སཏྟསུ པིཊྛིསམཡམཱསེསཱུཏི པཊིལོམཀྐམེན ཝུཏྟེསུ ཀཏྟིཀཔུཎྞམཱསིཡཱ པཙྪིམཔཱཊིཔདཱདཱིསུ ཛེཊྛམཱུལཔུཎྞམཱསཱཝསཱནེསུ ཨེཏེསུ སཏྟསུ པིཊྛིསམཡནཱམཀེསུ མཱསེསུ. སཏུཔྤཱདཀརཎེནཱཏི ‘‘ཀཱལོ ཝསྶིཀསཱཊིཀཱཡཱ’’ཏིཨཱདིནཱ ནཡེན སཏུཔྤཱདཀརཎེན. ཝིཉྙཱཔེནྟསྶཱཏི ‘‘དེཐ ¶ མེ ཝསྶིཀསཱཊིཀཙཱིཝར’’ནྟིཨཱདིནཱ (པཱརཱ. ༦༢༨) ནཡེན ཝིཉྙཏྟིཾ ཀརོནྟསྶ. ཏེན སིཀྑཱཔདེན ཨནཱཔཏྟཱིཏི ཨཉྙཱཏཀཝིཉྙཏྟིསིཀྑཱཔདེན ཨནཱཔཏྟི, ཨིམིནཱ པན སིཀྑཱཔདེན ཨཱཔཏྟིཡེཝ ཨསམཡཏྟཱ. ཝུཏྟཉྷེཏཾ བྷདནྟབུདྡྷདཏྟཱཙརིཡེན –

‘‘ཀཏྭཱ པན སཏུཔྤཱདཾ, ཝསྶསཱཊིཀཙཱིཝརཾ;

ནིཔྥཱདེནྟསྶ བྷིཀྑུསྶ, སམཡེ པིཊྛིསམྨཏེ.

‘‘ཧོཏི ¶ ནིསྶགྒིཡཱཔཏྟི, ཉཱཏཀཱཉྙཱཏཀཱདིནོ;

ཏེསུཡེཝ ཙ ཝིཉྙཏྟིཾ, ཀཏྭཱ ནིཔྥཱདནེ ཏཐཱ’’ཏི.

ཨེཏྠ ཙ ‘‘ཨིདཾ མེ, བྷནྟེ, ཝསྶིཀསཱཊིཀཙཱིཝརཾ ཨཏིརེཀམཱསེ སེསེ གིམྷཱནེ པརིཡིཊྛཾ ཨཏིརེཀདྡྷམཱསེ སེསེ གིམྷཱནེ ཀཏྭཱ པརིདཧིཏཾ ནིསྶགྒིཡ’’ནྟི ཨིམིནཱ (པཱརཱ. ༦༢༨) ནཡེན ནིསྶཛྫནཝིདྷཱནཾ ཝེདིཏབྦཾ.

ཝསྶིཀསཱཊིཀཔརིཡེསནཝཏྠུསྨིནྟི པཊིཀཙྩེཝ ཝསྶིཀསཱཊིཀཔརིཡེསནཝཏྠུསྨིཾ. ཏིཀཔཱཙིཏྟིཡནྟི ཨཏིརེཀམཱསདྡྷམཱསེསུ ཨཏིརེཀསཉྙིཝེམཏིཀཨཱུནཀསཉྙཱིནཾ པརིཡེསནནིཝཱསནཝསེན ཏཱིཎི པཱཙིཏྟིཡཱནི, ཨེཀསེསནིདྡེསོ ཙཱཡཾ, སཱམཉྙནིདྡེསོ ཝཱ. ཨཱུནཀམཱསདྡྷམཱསེསཱུཏི ཨཱུནཀམཱསེ ཙེཝ ཨཱུནཀདྡྷམཱསེ ཙ. ཨཏིརེཀསཉྙིནོ, ཝེམཏིཀསྶ ཝཱ དུཀྐཊནྟི ཨེཏྠ ‘‘པརིཡེསནནིཝཱསནཾ ཀརོནྟསྶཱ’’ཏི པཱཋསེསོ. ཨིདཾ ཝུཏྟཾ ཧོཏི – ‘‘ཨཱུནཀམཱསེ སེསེ གིམྷཱནེ ཨཏིརེཀསཉྙིནོ, ཝེམཏིཀསྶ ཝཱ པརིཡེསནྟསྶ དུཀྐཊཾ, ཨཱུནཀདྡྷམཱསེ སེསེ གིམྷཱནེ ཙ ཨཏིརེཀསཉྙིནོ, ཝེམཏིཀསྶ ཝཱ ནིཝཱསེནྟསྶ དུཀྐཊ’’ནྟི. ‘‘ཏཐཱ’’ཏི ཨིམིནཱ དུཀྐཊཾ ཨཏིདིསཏི, ཏཉྩ དུཀྐཊཾ ཨུདཀཕུསིཏགཎནཱཡ ཨཀཏྭཱ ནྷཱནཔརིཡོསཱནཝསེན པཡོགེ པཡོགེ ཀཱརེཏབྦཾ, ཏཉྩ ཁོ ཝིཝཊངྒཎེ ཨཱཀཱསཏོ པཏིཏཨུདཀེནེཝ ནྷཱཡནྟསྶ, ན ནྷཱནཀོཊྛཀཝཱཔིཨཱདཱིསུ གྷཊེཧི ཨཱསིཏྟཱུདཀེན ནྷཱཡནྟསྶ. ཏེནེཝཱཧ ‘‘སཏིཡཱ ཝསྶིཀསཱཊིཀཱཡཱ’’ཏིཨཱདི. པོཀྑརཎིཡཱདཱིསུ པན ནགྒསྶ ནྷཱཡནྟསྶ ཨནཱཔཏྟཱིཏི སམྦནྡྷོ, པོཀྑརཎིཡཱདཱིསུ པན སཏིཡཱཔི ཝསྶིཀསཱཊིཀཱཡ ནགྒསྶ ནྷཱཡནྟསྶ ནཏྠི དུཀྐཊཱཔཏྟཱིཏི ཨཏྠོ.

ཨེཝཾ ¶ ཨནྟརཱཔཏྟིཡཱ ཨནཱཔཏྟིཾ དསྶེཏྭཱ ཨིདཱནི ནིསྶགྒིཡེན ཨནཱཔཏྟིཾ དསྶེཏུཾ ‘‘ཨཙྪིནྣཙཱིཝརསྶཱ’’ཏིཨཱདི ཝུཏྟཾ. ཏཏྠ ཨཙྪིནྣཙཱིཝརསྶཱཏི ཨཙྪིནྣསེསཙཱིཝརསྶ. ཏསྶཱཔི ཨསམཡེ ནིཝཱསཏོ ཨནཱཔཏྟི. ཨེས ནཡོ ནཊྛཙཱིཝརསྶ ཝཱཏི ཨེཏྠཱཔི. ཡཐཱ ཙེཏྠ ནིཝཱསེནྟཱནཾ ཏེསཾ ཨནཱཔཏྟི, ཨེཝཾ ཏཏྠ པརིཡེསནྟཱནམྤཱིཏི དཊྛབྦཾ. ཨེཏྠ པན མཧགྒྷཝསྶིཀསཱཊིཀཾ ཋཔེཏྭཱ ནྷཱཡནྟསྶ ཙོརཱུཔདྡཝོ ཨཱཔདཱ ནཱམཱཏི ཨཱཧ ‘‘ཨནིཝཏྠ’’ནྟིཨཱདི. ཨཱཔདཱསུ ཝཱ ནིཝཱསཡཏོཏི ཨཱཔདཱསུ ཝིཛྫམཱནཱསུ ཨསམཡེ ནིཝཱསེནྟསྶ. ཡཾ པན སམནྟཔཱསཱདིཀཱཡཾ ‘‘ཨཙྪིནྣཙཱིཝརསྶཱཏི ཨེཏཾ ཝསྶིཀསཱཊིཀཾཡེཝ སནྡྷཱཡ ཝུཏྟཾ. ཏེསཉྷི ནགྒཱནཾ ཀཱཡོཝསྶཱཔནེ ཨནཱཔཏྟི. ཨེཏྠ ཙ མཧགྒྷཝསྶིཀསཱཊིཀཾ ནིཝཱསེཏྭཱ ནྷཱཡནྟསྶ ཙོརཱུཔདྡཝོ ཨཱཔདཱ ནཱམཱ’’ཏི ཨཙྪིནྣཙཱིཝརཱདིནོ ནིསྶགྒིཡེན ཨནཱཔཏྟིཾ ¶ ཨདསྶེཏྭཱ ནགྒསྶ ནྷཱཡཏོ དུཀྐཊེནེཝ ཨནཱཔཏྟིདསྶནཾ, ཏཾ ཡུཏྟཾ ཝིཡ ན དིསྶཏི. སབྦསིཀྑཱཔདེསུ ཧི མཱུལཱཔཏྟིཡཱ ཨེཝ ཨཱཔཏྟིཔྤསངྒེ ཨནཱཔཏྟིདསྶནཏྠཾ ཨནཱཔཏྟིཝཱརོ ཨཱརབྷཱིཡཏི, ན ཨནྟརཱཔཏྟིཡཱཏི, ཏསྨཱ ཨུཔཔརིཀྑིཏབྦཾ. སཙཱིཝརཏཱཏི ཨནྟརཝཱསཀཨུཏྟརཱསངྒེཧི སཙཱིཝརཏཱ.

ཝསྶིཀསཱཊིཀསིཀྑཱཔདཝཎྞནཱ ནིཊྛིཏཱ.

༥. ཙཱིཝརཨཙྪིནྡནསིཀྑཱཔདཝཎྞནཱ

‘‘དཏྭཱ’’ཏི ཡཾ ཀིཉྩི པཙྩཱསཱིསམཱནསྶེཝ དཱནམིཧ ཨདྷིཔྤེཏཾ, ན ནིསྶཊྛདཱནནྟི ཨཱཧ ‘‘ཝེཡྻཱཝཙྩཱདཱིནཱི’’ཏིཨཱདི. སཀསཉྙཱཡཱཏི ‘‘སཀ’’ནྟི སཉྙཱཡ. ཨིམིནཱ པཱརཱཛིཀཱབྷཱཝཾ དསྶེཏི. ཙཛིཏྭཱ དིནྣམྤི ཧི སཀསཉྙཱཡ གཎྷཏོ ནཏྠི པཱརཱཛིཀཾ. ཨཙྪིནྡནྟསྶཱཏི ཨེཀཏོ ཨབདྡྷཱནི, ཝིསུཾ ཋཔིཏཱནི ཙ བཧཱུནི ཨཙྪིནྡཏོ, ‘‘སངྒྷཱཊིཾ ཨཱཧར, ཨུཏྟརཱསངྒཾ ཨཱཧརཱ’’ཏི ཨེཝཾ ཨཱཧརཱཔཡཏོ ཙ. ཏེནཱཧ ‘‘ཝཏྠུགཎནཱཡ ཨཱཔཏྟིཡོ’’ཏི. ‘‘མཡཱ དིནྣཱནི སབྦཱནི ཨཱཧརཱ’’ཏི ཝདཏོཔི ཨེཀཝཙནེནེཝ སམྦཧུལཱ ཨཱཔཏྟིཡོ. ཨེཀཾ ཙཱིཝརཾ པན ཨེཀཱབདྡྷཱནི ཙ བཧཱུནི ཨཙྪིནྡཏོ ཨེཀཱ ཨཱཔཏྟི. ‘‘ཨཙྪིནྡཱ’’ཏི ཨཱཎཏྟིཡཱ དུཀྐཊནྟི ‘‘མཡཱ དིནྣཱནི སབྦཱནི གཎྷཱ’’ཏི ཨཱཎཏྟིཡཱ ཨེཀཾ དུཀྐཊཾ, ཨཙྪིནྣེསུ པན ¶ ཨེཀཝཙནེནེཝ སམྦཧུལཱ པཱཙིཏྟིཡོ. ཏེནཱཧ ‘‘ཨཙྪིནྣེསུ ཝཏྠུགཎནཱཡ ཨཱཔཏྟིཡོ’’ཏི. ཨཙྪིནྣེསཱུཏི ཏེནཱཎཏྟེན ཨཙྪིནྣེསུ ཙཱིཝརེསུ. ཡཏྠ པན པོཏྠཀེསུ ‘‘ཨཙྪིནྣེསུ ཡཏྟཀཱནི ཨཱཎཏྟཱནི, ཏེསཾ གཎནཱཡ ཨཱཔཏྟིཡོ’’ཏི པཱཋོ, ཏཏྠ ཡཏྟཀཱནི ཨཱཎཏྟཱནཱིཏི ཡཏྟཀཱནི ཙཱིཝརཱནི གཎྷིཏུཾ ཨཱཎཏྟཱནཱིཏི ཨཏྠོ. ཡཾ པན སམནྟཔཱསཱདིཀཱཡཾ ‘‘ཙཱིཝརཾ ‘གཎྷཱ’ཏི ཨཱཎཱཔེཏི, ཨེཀཾ དུཀྐཊཾ. ཨཱཎཏྟོ བཧཱུནི གཎྷཱཏི, ཨེཀཾ པཱཙིཏྟིཡ’’ནྟི (པཱརཱ. ཨཊྛ. ༢.༦༣༣) ཝུཏྟཾ, ཏཾ ཨེཀཱབདྡྷཾ སནྡྷཱཡ. ཨེཝཉྩ ཀཏྭཱ སམནྟཔཱསཱདིཀཱཡ སདྡྷིཾ ཨིམཱཡ ཨཊྛཀཐཱཡ ན ཀོཙི ཝིརོདྷོ. སཙེ པན ‘‘སངྒྷཱཊིཾ གཎྷ, ཨུཏྟརཱསངྒཾ གཎྷཱ’’ཏི ཨཱཎཱཔེཏི, ཝཱཙཱཡ ཝཱཙཱཡ དུཀྐཊཾ. ཨཙྪིནྣེསུ ཝཏྠུགཎནཱཡ ཨཱཔཏྟིཡོ. ཨེཏྠ ཙ ‘‘ཨིདཾ མེ, བྷནྟེ, ཙཱིཝརཾ བྷིཀྑུསྶ སཱམཾ དཏྭཱ ཨཙྪིནྣཾ ནིསྶགྒིཡ’’ནྟི (པཱརཱ. ༦༣༣) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ.

ཏིཀཔཱཙིཏྟིཡནྟི ཨུཔསམྤནྣེ ཨུཔསམྤནྣསཉྙིཝེམཏིཀཨནུཔསམྤནྣསཉྙཱིནཾ ཝསེན ཏཱིཎི པཱཙིཏྟིཡཱནི. ཨཉྙཾ པརིཀྑཱརནྟི པཏྟཱདིཾ ཨཉྙཾ པརིཀྑཱརཾ, ཨནྟམསོ སཱུཙིམྤཱིཏི ཨཏྠོ. ན ¶ ཀེཝལཾ ཨནུཔསམྤནྣསྶ ཙཱིཝརཾཡེཝ ཨཙྪིནྡཏོ དུཀྐཊནྟི ཨཱཧ ‘‘ཨནུཔསམྤནྣསྶ ཙཱ’’ཏིཨཱདི. ཏཏྠ ཡཾ ཀིཉྩཱིཏི ཙཱིཝརཾ ཝཱ ཧོཏུ, པཏྟཱདི, ཡཾ ཀིཉྩི པརིཀྑཱརཾ ཝཱ. ཏསྶ ཝིསྶཱསཾ གཎྷནྟསྶཱཏི ཡསྶ དིནྣཾ, ཏསྶ ཝིསྶཱསེན གཎྷནྟསྶ, ཏཏིཡཏྠེ ཙེཏཾ ཨུཔཡོགཝཙནཾ. ཨུཔསམྤནྣཏཱཏི ཨཙྪིནྡནསམཡེ ཨུཔསམྤནྣབྷཱཝོ. ཀིཉྩཱཔི ཨུཔསམྤནྣབྷཱཝོ པཱལི༹ཡཾ, མཱཏིཀཊྛཀཐཱཡཉྩ དཱནགྒཧཎེསུ དིསྶཏི, ཏཐཱཔི ཨནུཔསམྤནྣཀཱལེ ཙཱིཝརཾ དཏྭཱ ཨུཔསམྤནྣཀཱལེ ཨཙྪིནྡནྟསྶ ཨཱཔཏྟིཏོ ཨཙྪིནྡནཀཱལེཡེཝ ཨུཔསམྤནྣཏཱ ཨངྒནྟི ཝེདིཏབྦཾ.

ཙཱིཝརཨཙྪིནྡནསིཀྑཱཔདཝཎྞནཱ ནིཊྛིཏཱ.

༦. སུཏྟཝིཉྙཏྟིསིཀྑཱཔདཝཎྞནཱ

ཚབྦིདྷཾ ཁོམསུཏྟཱདིནྟི ‘‘སུཏྟཾ ནཱམ ཚ སུཏྟཱནི ཁོམཾ ཀཔྤཱསིཀཾ ཀོསེཡྻཾ ཀམྦལཾ སཱཎཾ བྷངྒ’’ནྟི (པཱརཱ. ༦༣༨) ཨེཝཾ ཝུཏྟཾ ཚབྦིདྷཾ ཁོམསུཏྟཱདིཾ. ཏཏྠ ¶ ཁོམནྟི (པཱརཱ. ཨཊྛ. ༢.༦༣༦-༣༨) ཁོམཝཱཀེཧི ཀཏསུཏྟཾ. ཀཔྤཱསིཀནྟི ཀཔྤཱསཏོ ནིབྦཏྟཾ. ཀོསེཡྻནྟི ཀོསིཡཾསཱུཧི ཀནྟིཏྭཱ ཀཏསུཏྟཾ. ཀམྦལནྟི ཨེལ༹ཀལོམསུཏྟཾ. སཱཎནྟི སཱཎཝཱཀེན ཀཏསུཏྟཾ. བྷངྒནྟི པཱཊེཀྐཾ ཝཱཀསུཏྟམེཝཱཏི ཨེཀེ. པཉྩཧིཔི མིསྶེཏྭཱ ཀཏསུཏྟཾ པན ‘‘བྷངྒ’’ནྟི ཝེདིཏབྦཾ. ཏེསཾ ཨནུལོམནྟི ཏེསཾ ཁོམཱདཱིནཾ ཨནུལོམཾ དུཀཱུལཾ པཏྟུཎྞཾ སོམཱརཔཊྚཾ ཙཱིནཔཊྚཾ ཨིདྡྷིཛཾ དེཝདིནྣནྟི ཚབྦིདྷཾ སུཏྟཾ.

ཏུརཱིཏི ཝཱཡནཱུཔཀརཎོ ཨེཀོ དཎྜོ, ཝཱིཏཝཱིཏཊྛཱནཾ ཡཏྠ སཾཧརིཏྭཱ ཋཔེནྟི. ཝེམནྟི ཝཱཡནཱུཔཀརཎོ ཨེཀོ དཎྜོ, སུཏྟཾ པཝེསེཏྭཱ ཡེན ཨཱཀོཊེནྟོ གྷནབྷཱཝཾ སམྤཱདེནྟི. ཏསྶ སབྦཔྤཡོགེསུ དུཀྐཊནྟི ཏནྟཝཱཡསྶ ཡེ ཏེ ཏུརིཝེམསཛྫནཱདིཀཱ པཡོགཱ, ཏེསུ སབྦེསུ པཡོགེསུ བྷིཀྑུསྶ དུཀྐཊཾ, ཏསྶ ཏནྟཝཱཡསྶ པཡོགེ པཡོགེ བྷིཀྑུསྶ དུཀྐཊནྟི ཝུཏྟཾ ཧོཏི. ཏུརིཨཱདཱིནཾ ཨབྷཱཝེ ཏེསཾ ཀརཎཏྠཾ ཝཱསིཕརསུཨཱདཱིནཾ མགྒནནིསཱནརུཀྑཙྪེདནཱདིསབྦཔྤཡོགེཔི ཨེསེཝ ནཡོ. ཏནྟཱུནཾ ཨཏྟནོ སནྟཀཏྟཱ ཝཱིཏཝཱིཏཊྛཱནཾ པཊིལདྡྷམེཝ ཧོཏཱིཏི ཨཱཧ ‘‘པཊིལཱབྷེན ནིསྶགྒིཡཾ ཧོཏཱི’’ཏི, ཝིཀཔྤནུཔགཔཙྪིམཙཱིཝརཔྤམཱཎེ ཝཱིཏེ ནིསྶགྒིཡཾ ཧོཏཱིཏི ཝུཏྟཾ ཧོཏི. ཏེནེཝ ཝཀྑཏི ‘‘དཱིགྷཏོ ཝིདཏྠིམཏྟེ, ཏིརིཡཉྩ ཧཏྠམཏྟེ ཝཱིཏེ ནིསྶགྒིཡཾ པཱཙིཏྟིཡ’’ནྟི. ཨེཏྠ ཙ ‘‘ཨིདཾ མེ, བྷནྟེ, ཙཱིཝརཾ སཱམཾ སུཏྟཾ ཝིཉྙཱཔེཏྭཱ ཏནྟཝཱཡེཧི ཝཱཡཱཔིཏཾ ནིསྶགྒིཡ’’ནྟི ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ.

ཏེནེཝཱཏི ¶ ཝིཉྙཱཔིཏཏནྟཝཱཡེནེཝ. ཨེཝཾ ཨིདྷ དུཀྐཊནྟི ཨིདྷཱཔི ཏནྟཝཱཡེནེཝ དཱིགྷཏོ ཝིདཏྠིམཏྟེ, ཏིརིཡཾ ཧཏྠམཏྟེ ཝཱིཏེ དུཀྐཊནྟི ཨཏྠོ. ཨཀཔྤིཡསུཏྟམཡེཏི ཝིཉྙཱཔིཏསུཏྟམཡེ. ཨིཏརསྨིནྟི ཨཝིཉྙཏྟིསུཏྟམཡེ པརིཙྪེདེ. ཏཏོ ཙེ ཨཱུནཏརཱཏི ཝུཏྟཔྤམཱཎཏོ ཙེ ཨཱུནཏརཱ, ཨནྟམསོ (པཱརཱ. ཨཊྛ. ༢.༦༣༦-༦༣༨) ཨཙྪིམཎྜལཔྤམཱཎཱཔཱིཏི ཨདྷིཔྤཱཡོ. ཀཔྤིཡཏནྟཝཱཡེནཔི ཨཀཔྤིཡསུཏྟཾ ཝཱཡཱཔེནྟསྶ ཡཐཱ པུབྦེ ནིསྶགྒིཡཾ, ཨེཝམིདྷ དུཀྐཊཾ. ཏེནེཝ ཀཔྤིཡཉྩ ཨཀཔྤིཡཉྩ སུཏྟཾ ཝཱཡཱཔེནྟསྶ སཙེ པཙྪིམཙཱིཝརཔྤམཱཎཱ ཝཱ ཨཱུནཀཱ ཝཱ ཨཀཔྤིཡསུཏྟཔརིཙྪེདཱ ཧོནྟི, ཏེསུ པརིཙྪེདགཎནཱཡ དུཀྐཊཾ. ཀཔྤིཡསུཏྟཔརིཙྪེདེསུ ཨནཱཔཏྟི. ཨཐ ཨེཀནྟརིཀེན ཝཱ སུཏྟེན, དཱིགྷཏོ ཝཱ ཀཔྤིཡཾ ཏིརིཡཾ ཨཀཔྤིཡཾ ཀཏྭཱ ཝཱིཏཾ ཧོཏི, པམཱཎཡུཏྟེ པརིཙྪེདེ པརིཙྪེདེ དུཀྐཊཾ.

ཡདི ¶ པན (པཱརཱ. ཨཊྛ. ༢.༦༣༦-༦༣༨) དྭེ ཏནྟཝཱཡཱ ཧོནྟི ཨེཀོ ཀཔྤིཡོ ཨེཀོ ཨཀཔྤིཡོ, སུཏྟཉྩ ཨཀཔྤིཡཾ, ཏེ ཙེ ཝཱརེན ཝིནནྟི, ཨཀཔྤིཡཏནྟཝཱཡེན ཝཱིཏེ པམཱཎཡུཏྟེ པརིཙྪེདེ པརིཙྪེདེ པཱཙིཏྟིཡཾ, ཨཱུནཏརེ དུཀྐཊཾ. ཨིཏརེན ཝཱིཏེ ཨུབྷཡཏྠ དུཀྐཊཾ. སཙེ དྭེཔི ཝེམཾ གཧེཏྭཱ ཨེཀཏོ ཝིནནྟི, པམཱཎཡུཏྟེ པརིཙྪེདེ པརིཙྪེདེ པཱཙིཏྟིཡཾ. ཨཐ སུཏྟཾ ཀཔྤིཡཾ, ཙཱིཝརཉྩ ཀེདཱརབདྡྷཱདཱིཧི སཔརིཙྪེདཾ, ཨཀཔྤིཡཏནྟཝཱཡེན ཝཱིཏེ པརིཙྪེདེ པརིཙྪེདེ དུཀྐཊཾ, ཨིཏརེན ཝཱིཏེ ཨནཱཔཏྟི. སཙེ དྭེཔི ཨེཀཏོ ཝིནནྟི, པམཱཎཡུཏྟེ པརིཙྪེདེ པརིཙྪེདེ དུཀྐཊཾ. ཨཐ སུཏྟམྤི ཀཔྤིཡཉྩ ཨཀཔྤིཡཉྩ, ཏེ ཙེ ཝཱརེན ཝིནནྟི, ཨཀཔྤིཡཏནྟཝཱཡེན ཨཀཔྤིཡསུཏྟམཡེསུ པཙྪིམཙཱིཝརཔྤམཱཎེསུ པརིཙྪེདེསུ ཝཱིཏེསུ པརིཙྪེདགཎནཱཡ པཱཙིཏྟིཡཾ, ཨཱུནཏརེསུ ཀཔྤིཡསུཏྟམཡེསུ ཙ དུཀྐཊཾ. ཀཔྤིཡཏནྟཝཱཡེན ཨཀཔྤིཡསུཏྟམཡེསུ པམཱཎཡུཏྟེསུ ཝཱ ཨཱུནཀེསུ ཝཱ དུཀྐཊམེཝ, ཀཔྤིཡསུཏྟམཡེསུ ཨནཱཔཏྟི.

ཨཐ ཨེཀནྟརིཀེན ཝཱ སུཏྟེན, དཱིགྷཏོ ཝཱ ཨཀཔྤིཡཾ ཏིརིཡཾ ཨཀཔྤིཡཾ ཀཏྭཱ ཝིནནྟི, ཨུབྷོཔི ཝཱ ཏེ ཝེམཾ གཧེཏྭཱ ཨེཀཏོ ཝིནནྟི, ཨཔརིཙྪེདེ ཙཱིཝརེ པམཱཎཡུཏྟེ པརིཙྪེདེ པརིཙྪེདེ དུཀྐཊཾ, སཔརིཙྪེདེ པརིཙྪེདཝསེན དུཀྐཊཱནི. ཏེནཱཧ ‘‘ཨེཏེནེཝ ཨུཔཱཡེནཱ’’ཏིཨཱདི.

ཨེཏྠ ཙ ཏནྟཝཱཡོ ཏཱཝ ཨཉྙཱཏཀཨཔྤཝཱརིཏཏོ ཝིཉྙཏྟིཡཱ ལདྡྷོ ཨཀཔྤིཡོ, སེསོ ཀཔྤིཡོ. སུཏྟམྤི སཱམཾ ཝིཉྙཱཔིཏཾ ཨཀཔྤིཡཾ, སེསཾ, ཉཱཏཀཱདིཝསེན ཨུཔྤནྣཉྩ ཀཔྤིཡནྟི ཝེདིཏབྦཾ. ཏིཀཔཱཙིཏྟིཡནྟི ཝཱཡཱཔིཏེ ཝཱཡཱཔིཏསཉྙིཝེམཏིཀཨཝཱཡཱཔིཏསཉྙཱིནཾ ཝསེན ཏཱིཎི པཱཙིཏྟིཡཱནི. ཙཱིཝརཏྠཱཡ ཝིཉྙཱཔིཏསུཏྟནྟི སཱམཾ ཝཱ ཨཉྙེན ཝཱ ཙཱིཝརཏྠཱཡ ཝིཉྙཱཔིཏསུཏྟཾ ¶ . ཀིཉྩཱཔི པཱལི༹ཡཾ ‘‘སཱམཾ སུཏྟཾ ཝིཉྙཱཔེཏྭཱ’’ཏི ཝུཏྟཾ, ཏཐཱཔི ཨིདྷ ‘‘ཙཱིཝརཏྠཱཡ སཱམཾ ཝིཉྙཱཔིཏསུཏྟ’’ནྟི ཨཝཏྭཱ ཀེཝལཾ ‘‘ཙཱིཝརཏྠཱཡ ཝིཉྙཱཔིཏསུཏྟ’’ནྟི ཨངྒེསུ ཝུཏྟཏྟཱ ཨཉྙེན ཙཱིཝརཏྠཱཡ ཝིཉྙཱཔིཏསུཏྟམྤི སངྒཧཾ གཙྪཏཱིཏི ཝེདིཏབྦཾ. ཨཀཔྤིཡཝིཉྙཏྟིཡཱཏི ‘‘ཙཱིཝརཾ མེ, ཨཱཝུསོ, ཝཱཡཐཱ’’ཏི ཨེཝཾབྷཱུཏཱཡ ཨཀཔྤིཡཝིཉྙཏྟིཡཱ.

སུཏྟཝིཉྙཏྟིསིཀྑཱཔདཝཎྞནཱ ནིཊྛིཏཱ.

༧. མཧཱཔེསཀཱརསིཀྑཱཔདཝཎྞནཱ

ཙཱིཝརསཱམིཀེཧི ¶ པུབྦེ ཨཔྤཝཱརིཏོ ཧུཏྭཱཏི ‘‘ཀཱིདིསེན ཏེ, བྷནྟེ, ཙཱིཝརེན ཨཏྠོ, ཀཱིདིསཾ ཏེ ཙཱིཝརཾ ཝཱཡཱཔེམི, ཝད, བྷནྟེ, ཡདིཙྪསཱི’’ཏི ཙཱིཝརསཱམིཀེཧི པུབྦེ ཨཝུཏྟོ ཧུཏྭཱ. ཨེཏྠ ཙ ཨཱཡཏཱདཱིཧི ཏཱིཧི སུཏྟཝཌྜྷནཱཀཱརེན སཧ ཝཱཡནཱཀཱརཾ དསྶེཏི, སུཝཱིཏཱདཱིཧི ཙཏཱུཧི ཝཱཡནཱཀཱརམེཝ. ‘‘ཀིཉྩིམཏྟཾ ཨནུཔདཛྫེཡྻཱམཱ’’ཏིཨཱདི ཏསྶ ཀཏྟབྦཱཀཱརམཏྟདསྶནཾ, ན པན ཨངྒདསྶནཾ སུཏྟཝཌྜྷནཝསེནེཝ ཨཱཔཛྫིཏབྦཏྟཱཏི ཨཱཧ ‘‘ན བྷིཀྑུནོ པིཎྜཔཱཏདཱནམཏྟེནཱ’’ཏིཨཱདི. ཨེཏྠ ཙ ‘‘ཨིདཾ མེ, བྷནྟེ, ཙཱིཝརཾ པུབྦེ ཨཔྤཝཱརིཏེན ཨཉྙཱཏཀསྶ གཧཔཏིཀསྶ ཏནྟཝཱཡེ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔནྣཾ ནིསྶགྒིཡ’’ནྟི (པཱརཱ. ༦༤༣) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ. ཏིཀཔཱཙིཏྟིཡནྟི ཨཉྙཱཏཀེ ཨཉྙཱཏཀསཉྙིཝེམཏིཀཉཱཏཀསཉྙཱིནཾ ཝསེན ཏཱིཎི པཱཙིཏྟིཡཱནི.

མཧཱཔེསཀཱརསིཀྑཱཔདཝཎྞནཱ ནིཊྛིཏཱ.

༨. ཨཙྩེཀཙཱིཝརསིཀྑཱཔདཝཎྞནཱ

པཋམཔདསྶཱཏི ‘‘དསཱཧཱནཱགཏ’’ནྟི པདསྶ. པུརིམནཡེནེཝཱཏི ཨཙྩནྟསཾཡོགཝསེནེཝ. ཏཱནི དིཝསཱནཱིཏི ཏེསུ དིཝསེསུ. ཨཙྩནྟམེཝཱཏི ནིརནྟརམེཝ, ཏེསུ དསཱཧེསུ ཡཏྠ ཀཏྠཙི དིཝསེཏི ཝུཏྟཾ ཧོཏི. པཝཱརཎཱམཱསསྶཱཏི པུབྦཀཏྟིཀམཱསསྶ. སོ ཧི ཨིདྷ པཋམཔཝཱརཎཱཡོགཏོ ‘‘པཝཱརཎཱམཱསོ’’ཏི ཝུཏྟོ. ཛུཎྷཔཀྑཔཉྩམིཏོ པཊྛཱཡཱཏི སུཀྐཔཀྑཔཉྩམིཾ ཨཱདིཾ ཀཏྭཱ. པཝཱརཎཱམཱསསྶ ཛུཎྷཔཀྑཔཉྩམིཏོཏི ཝཱ པཝཱརཎཱམཱསསྶ པཀཱསནཏོ པུརིམསྶ ཛུཎྷཔཀྑསྶ པཉྩམིཏོ པཊྛཱཡཱཏི ཨཏྠོ. ཡོ པནེཏྠ ‘‘ཀཱམཉྩེས (སཱརཏྠ. ཊཱི. ༢.༦༥༠) ‘དསཱཧཔརམཾ ཨཏིརེཀཙཱིཝརཾ དྷཱརེཏབྦ’ནྟི (པཱརཱ. ༤༦༣) ཨིམིནཱཝ ¶ སིདྡྷོ, ཨཊྛུཔྤཏྟིཝསེན པན ཨཔུབྦཾ ཝིཡ ཨཏྠཾ དསྶེཏྭཱ སིཀྑཱཔདཾ ཋཔིཏ’’ནྟི པཱཋོ དིསྶཏི, སོ པམཱདཔཱཋོ ‘‘དསཱཧཱནཱགཏ’’ནྟི ཨིམིནཱ ཝིརོདྷཏོཏི དཊྛབྦཾ. ཀིཉྩ ‘‘ཛུཎྷཔཀྑཔཉྩམིཏོ པཊྛཱཡཱ’’ཏི ཝུཏྟཏྟཱ ཨཊྛཀཐཱཡེཝ པུབྦཱཔརཝིརོདྷོཔི སིཡཱ.

ཨཙྩེཀཙཱིཝརནྟི ¶ ཨཙྩཱཡིཀཙཱིཝརཾ ཝུཙྩཏི, སོ ཙ ཨཙྩཱཡིཀབྷཱཝོ དཱཡཀསྶ གམིཀཱདིབྷཱཝེནཱཏི དསྶེཏུཾ ‘‘གམིཀགིལཱནགབྦྷིནིཨབྷིནཝུཔྤནྣསདྡྷཱནཾ པུགྒལཱན’’ནྟིཨཱདི ཝུཏྟཾ. ཏཏྠ གམིཀོ ནཱམ ‘‘སེནཱཡ ཝཱ གནྟུཀཱམོ ཧོཏི, པཝཱསཾ ཝཱ གནྟུཀཱམོ ཧོཏཱི’’ཏི (པཱརཱ. ༦༤༩) ཝུཏྟོ. ཨཉྙཏརེན ‘‘ཝསྶཱཝཱསིཀཾ དསྶཱམཱི’’ཏི ཨེཝཾ ཨཱརོཙེཏྭཱ དིནྣནྟི གམིཀཱདཱིནཾ ཨཉྙཏརེན གམནཱདཱིཧི ཀཱརཎེཧི དཱཏུཀཱམེན དཱུཏཾ ཝཱ པེསེཏྭཱ, སཡཾ ཝཱ ཨཱགནྟྭཱ ‘‘ཝསྶཱཝཱསིཀཾ དསྶཱམཱི’’ཏི ཨེཝཾ ཨཱརོཙེཏྭཱ དིནྣཾ ཙཱིཝརཾ. ཨེཏྠ ཙ ‘‘ཨིདཾ མེ, བྷནྟེ, ཨཙྩེཀཙཱིཝརཾ ཙཱིཝརཀཱལསམཡཾ ཨཏིཀྐཱམིཏཾ ནིསྶགྒིཡ’’ནྟི (པཱརཱ. ༦༤༩) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ.

སེསནྟི ‘‘སཱདྷཱརཎཔཉྙཏྟཱི’’ཏིཨཱདིཀཾ. ཨཡཾ པན ཝིསེསོ – ཏཏྠ ཨཏིརེཀཙཱིཝརེ ཨཏིརེཀཙཱིཝརསཉྙིཨཱདིནོ དསཱཧཱཏིཀྐམོ, ཨིདྷ ཨཙྩེཀཙཱིཝརེ ཨཙྩེཀཙཱིཝརསཉྙིཨཱདིནོ ཙཱིཝརཀཱལཱཏིཀྐམོ. ཏཐཱ ཨནཙྩེཀཙཱིཝརེ ཨཙྩེཀཙཱིཝརསཉྙིནོ, ཝེམཏིཀསྶ ཙ དུཀྐཊཾ. ཛཱཏིཔྤམཱཎསམྤནྣསྶ ཨཙྩེཀཙཱིཝརསྶ ཨཏྟནོ སནྟཀཏཱ, དསཱཧཱནཱགཏཱཡ ཀཏྟིཀཏེམཱསིཀཔུཎྞམཱཡ ཨུཔྤནྣབྷཱཝོ, ཨནདྷིཊྛིཏཨཝིཀཔྤིཏཏཱ, ཙཱིཝརཀཱལཱཏིཀྐམོཏི ཙཏུརངྒབྷཱཝོཝ ཨེཏྠ ཝིསེསོ.

ཨཙྩེཀཙཱིཝརསིཀྑཱཔདཝཎྞནཱ ནིཊྛིཏཱ.

༩. སཱསངྐསིཀྑཱཔདཝཎྞནཱ

ཨུཔསམྤཛྫནྟིཨཱདཱིསུ ཝིཡཱཏི ‘‘པཋམཾ ཛྷཱནཾ ཨུཔསམྤཛྫ ཝིཧརཏཱི’’ཏི (ཝིབྷ. ༥༠༨) ཨིམསྶ ཝིབྷངྒེ ‘‘ཨུཔསམྤཛྫཱ’’ཏི ཨུདྡྷརིཏབྦེ ‘‘ཨུཔསམྤཛྫ’’ནྟི ཨུདྡྷཊཾ. ཏདིཧ ནིདསྶནཾ ཀཏཾ. ཨཱདིསདྡེན པན ‘‘ཨནཱཔུཙྪཾ ཝཱ གཙྪེཡྻཱ’’ཏིཨཱདཱིནཾ (པཱཙི. ༡༡༡, ༡༡༥) སངྒཧོ དཊྛབྦོ. ཨུཔགནྟྭཱཏི ཨུཔསདྡསྶཏྠམཱཧ. ཝསིཏྭཱཏི ཨཀྑཎྜཾ ཝསིཏྭཱ. ‘‘ཡེན ཡསྶ ཧི སམྦནྡྷོ, དཱུརཊྛམྤི ཙ ཏསྶ ཏ’’ནྟི ཝཙནཏོ ‘‘ཨིམསྶ…པེ… ཨིམིནཱ སམྦནྡྷོ’’ཏི ཝུཏྟཾ. ཏཏྠ ཨིམསྶཱཏི ‘‘ཨུཔཝསྶ’’ནྟི པདསྶ. ཝིནཡཔརིཡཱཡེན ཨརཉྙལཀྑཎཾ ཨདིནྣཱདཱནཔཱརཱཛིཀེ ¶ ཨཱགཏཾ. ཏཏྠ ཧི ‘‘གཱམཱ ཝཱ ཨརཉྙཱ ཝཱ’’ཏི ཨནཝསེསཏོ ཨཝཧཱརཊྛཱནཔརིགྒཧེན ¶ ཏདུབྷཡཾ ཨསངྐརཏོ དསྶེཏུཾ ‘‘ཋཔེཏྭཱ གཱམཉྩཱ’’ཏིཨཱདི ཝུཏྟཾ. གཱམཱུཔཙཱརོ ཧི ལོཀེ གཱམསངྑམེཝ གཙྪཏཱིཏི. ཨིདྷ པན སུཏྟནྟཔརིཡཱཡེན ‘‘པཉྩདྷནུསཏིཀཾ པཙྪིམ’’ནྟི (པཱརཱ. ༦༥༤) ཨཱགཏཾ ཨཱརཉྙཀཾ བྷིཀྑུཾ སནྡྷཱཡ. ན ཧི སོ ཝིནཡཔརིཡཱཡིཀེ ཨརཉྙེ ཝསནྟོ ‘‘ཨཱརཉྙཀོ པནྠསེནཱསནོ’’ཏི (མ. ནི. ༡.༦༡) སུཏྟེ ཝུཏྟོ, ཏསྨཱ ཏཏྠ ཨཱགཏམེཝ ལཀྑཎཾ གཧེཏབྦནྟི དསྶེནྟོ ‘‘སབྦཔཙྪིམཱནི ཨཱརོཔིཏེན ཨཱཙརིཡདྷནུནཱ’’ཏིཨཱདིམཱཧ. ཏཏྠ ‘‘ཨཱཙརིཡདྷནུ ནཱམ པཀཏིཧཏྠེན ནཝཝིདཏྠིཔམཱཎཾ. ཛིཡཱཡ པན ཨཱརོཔིཏཱཡ ཙཏུཧཏྠཔམཱཎ’’ནྟི ཝདནྟི. གཱམསྶཱཏི པརིཀྑིཏྟསྶ གཱམསྶ. ཨིནྡཁཱིལཏོཏི ཨུམྨཱརཏོ. པརིཀྑེཔཱརཧཊྛཱནཏོཏི པརིཡནྟེ ཋིཏགྷརསྶ ཨུཔཙཱརེ ཋིཏསྶ མཛ྄ཛྷིམསྶ པུརིསསྶ པཋམལེཌྜུཔཱཏཏོ. ཀིཏྟཀེན མགྒེན མིནིཏབྦནྟི ཨཱཧ ‘‘སཙེ’’ཏིཨཱདི. མཛ྄ཛྷིམཊྛཀཐཱཡཾ པན ‘‘ཝིཧཱརསྶཱཔི གཱམསྶེཝ ཨུཔཙཱརཾ ནཱིཧརིཏྭཱ ཨུབྷིནྣཾ ལེཌྜུཔཱཏཱནཾ ཨནྟརཱ མིནིཏབྦ’’ནྟི ཝུཏྟཾ. ཙོརཱནཾ ནིཝིཊྛོཀཱསཱདིདསྶནེནཱཏི ཨཱརཱམེ, ཨཱརཱམཱུཔཙཱརེ ཙ ཙོརཱནཾ ནིཝིཊྛོཀཱསཱདིདསྶནེན ཀཱརཎེན. ཨཱདིསདྡེན བྷུཏྟོཀཱསཊྛིཏོཀཱསནིསིནྣོཀཱསནིཔནྣོཀཱསཱནཾ གཧཎཾ. ཙོརེཧི མནུསྶཱནཾ ཧཏཝིལུཏྟཱཀོཊིཏབྷཱཝདསྶནཏོཏི ཨཱརཱམེ, ཨཱརཱམཱུཔཙཱརེ ཙ ཧཏཝིལུཏྟཱཀོཊིཏབྷཱཝདསྶནཏོ.

ཨནྟརགྷརེ ནིཀྑིཔེཡྻཱཏི ཨནྟརེ ཨནྟརེ གྷརཱནི ཨེཏྠ, ཨེཏསྶཱཏི ཝཱ ཨནྟརགྷརཾ, གཱམོ, ཏསྨིཾ ཋཔེཡྻཱཏི ཨཏྠོ. ཏེནཱཧ ‘‘ཨཱརཉྙཀསྶཱ’’ཏིཨཱདི. ཏཉྩཱཏི ནིཀྑིཔནཉྩ. ‘‘མཧཱཔཝཱརཎཱཡ པཝཱརིཏོ ཧོཏཱི’’ཏི ཨིདཾ ཝསྶཙྪེདཾ ཨཀཏྭཱ ཝུཊྛབྷཱཝཾ དསྶེཏུཾ ཝུཏྟཾ, ན པན པཝཱརཎཱཡ ཨངྒབྷཱཝཾ. ཏེནེཝ ཧི བྱཏིརེཀཾ དསྶེནྟེན སམནྟཔཱསཱདིཀཱཡཾ (པཱརཱ. ཨཊྛ. ༢.༦༥༣-༦༥༤) ཝུཏྟཾ ‘‘སཙེ པཙྪིམིཀཱཡ ཝཱ ཨུཔགཏོ ཧོཏི ཚིནྣཝསྶོ ཝཱ, ནིཀྑིཔིཏུཾ ན ལབྷཏཱི’’ཏི. ཀཏྟིཀམཱསོ ནཱམ པུབྦཀཏྟིཀམཱསསྶ ཀཱལ༹པཀྑཔཱཊིཔདཏོ པཊྛཱཡ ཡཱཝ ཨཔརཀཏྟིཀཔུཎྞམཱ, ཏཱཝ ཨེཀཱུནཏྟིཾས རཏྟིནྡིཝཱ. ཨེཝ-སདྡེན ཀཏྟིཀམཱསཏོ པརཾ ན ལབྷཏཱིཏི དསྶེཏི. ཨཱུནཔྤམཱཎེ ཏཱཝ ཨརཉྙལཀྑཎཱཡོགཏོ ན ལབྷཏུ, ཀསྨཱ གཱཝུཏཏོ ཨཏིརེཀཔྤམཱཎེ ན ལབྷཏཱིཏི ཨཱཧ ‘‘ཡཏྲ ¶ ཧཱི’’ཏིཨཱདི. ནིམནྟིཏོ པན ཨདྡྷཡོཛནམྤི ཡོཛནམྤི གནྟྭཱ ཝསིཏུཾ པཙྩེཏི, ཨིདམཔྤམཱཎཾ. སཱསངྐསཔྤཊིབྷཡམེཝ ཧོཏཱིཏི སཱསངྐཉྩེཝ སཔྤཊིབྷཡཉྩ ཧོཏི. ཨེཝ-སདྡེན ཨནཱསངྐཨཔྤཊིབྷཡེཧི ཨངྒཡུཏྟེཔི སེནཱསནེ ཝསནྟོ ནིཀྑིཔིཏུཾ ན ལབྷཏཱིཏི དསྶེཏི. ཨེཏྟཱཝཏཱ པུརིམིཀཱཡ ཨུཔགནྟྭཱ ཨཀྑཎྜཾ ཀཏྭཱ ཝུཊྛཝསྶོ ཡཾ གཱམཾ གོཙརགཱམཾ ཀཏྭཱ པཉྩདྷནུསཏིཀཔཙྪིམེ ཨཱརཉྙཀསེནཱསནེ ཝིཧརཏི, ཏསྨིཾ གཱམེ ཙཱིཝརཾ ཋཔེཏྭཱ སཀལཀཏྟིཀམཱསཾ ཏསྨིཾཡེཝ སེནཱསནེ ཏེན ཙཱིཝརེན ཝིནཱ ཝཏྠུཾ ཨནུཛཱནིཏྭཱ ¶ ཨིདཱནི ཝིཧཱརཏོ ཨཉྙཏྠ ཝསནྟསྶ ཚཱརཏྟཾ ཝིཔྤཝཱསཾ ཨནུཛཱནནྟོ ‘‘སིཡཱ ཙ ཏསྶ བྷིཀྑུནོ’’ཏིཨཱདིམཱཧ. ཨསམཱདཱནཙཱརཉྷི ཨཏྠཏཀཐིནཱ ཨེཝ ལབྷནྟི, ནེཏརེཏི ཨེཏྠ ཨིདམྤི ཀཱརཎཾ དཊྛབྦཾ. ཏཏྠ ཚཱརཏྟཔརམཾ ཏེན བྷིཀྑུནཱ ཏེན ཙཱིཝརེན ཝིཔྤཝསིཏབྦནྟི ཡོ བྷིཀྑུ ཝིཧཱརེ ཝསནྟོ ཏཏོ ཨཉྙཏྠ གམནཀིཙྩེ སཏི ཨནྟརགྷརེ ཙཱིཝརཾ ནིཀྑིཔཏི, ཏེན བྷིཀྑུནཱ ཏེན ཙཱིཝརེན ཚཱརཏྟཔརམཾ ཝིཔྤཝསིཏབྦཾ, ཚ རཏྟིཡོ ཏམྷཱ ཝིཧཱརཱ ཨཉྙཏྠ ཝསིཏབྦཱཏི ཝུཏྟཾ ཧོཏི. ཝུཏྟཉྷི བྷདནྟེན བུདྡྷདཏྟཱཙརིཡེན –

‘‘ཡཾ གཱམཾ གོཙརཾ ཀཏྭཱ, བྷིཀྑུ ཨཱརཉྙཀེ ཝསེ;

ཏསྨིཾ གཱམེ ཋཔེཏུཾ ཏཾ, མཱསམེཀཾ ཏུ ཝཊྚཏི.

‘‘ཨཉྙཏྠེཝ ཝསནྟསྶ, ཚཱརཏྟཔརམཾ མཏཾ;

ཨཡམསྶ ཨདྷིཔྤཱཡོ, པཊིཙྪནྣོ པཀཱསིཏོ’’ཏི.

ཏེནེཝཱཧ ‘‘ཏཏོ ཙེ ཨུཏྟརི ཝིཔྤཝསེཡྻཱཏི ཚཱརཏྟཏོ ཨུཏྟརི ཏསྨིཾ སེནཱསནེ སཏྟམཾ ཨརུཎཾ ཨུཊྛཱཔེཡྻཱ’’ཏིཨཱདི. ཏཐཱ ཨསཀྐོནྟེནཱཏི གཏཊྛཱནསྶ དཱུརཏཱཡ སེནཱསནཾ ཨཱགནྟྭཱ སཏྟམཾ ཨརུཎཾ ཨུཊྛཱཔེཏུཾ ཨསཀྐོནྟེན. ཨེཝམྤི ཨསཀྐོནྟེན ཏཏྲེཝ ཋིཏེན པཙྩུདྡྷརིཏབྦཾ ‘‘ཨཏིརེཀཙཱིཝརཊྛཱནེ ཋསྶཏཱི’’ཏི. ཝསིཏྭཱཏི ཨརུཎཾ ཨུཊྛཱཔེཏྭཱ. བྷིཀྑུསམྨུཏི ཨུདོསིཏསིཀྑཱཔདེ ཝུཏྟཱཝ.

སེསནྟི ‘‘ཨཉྙཏྲ བྷིཀྑུསམྨུཏིཡཱཏི ཨཡམེཏྠ ཨནུཔཉྙཏྟཱི’’ཏིཨཱདིཀཾ. ཏཏྠ ཧི ཨངྒེསུ ཡཾ རཏྟིཝིཔྤཝཱསོ ཙཏུཏྠམངྒཾ, ཏཾ ཨིདྷ ཚཱརཏྟཏོ ཨུཏྟརི ཝིཔྤཝཱསོ ཧོཏཱིཏི ཨཡམེཝ ཝིསེསོ.

སཱསངྐསིཀྑཱཔདཝཎྞནཱ ནིཊྛིཏཱ.

༡༠. པརིཎཏསིཀྑཱཔདཝཎྞནཱ

ནནུ ¶ ཙཱཡཾ སངྒྷསྶ པརིཎཏོ, ན པརིཙྩཏྟོ, ཨཐ ཀཐཾ སངྒྷསནྟཀོ ཧོཏཱིཏི ཨཱཧ ‘‘སོ ཧཱི’’ཏིཨཱདི. ཏཏྠ སོཏི ལཱབྷོ. ཨེཀེན པརིཡཱཡེནཱཏི པརིཎཏབྷཱཝསངྑཱཏེན ཨེཀེན པརིཡཱཡེན. ‘‘ལབྷིཏབྦ’’ནྟི ཨིམིནཱ ལཱབྷསདྡསྶ ཀམྨསཱདྷནམཱཧ. ཙཱིཝརཱདིཝཏྠུནྟི ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཾ ¶ ཨནྟམསོ ཙུཎྞཔིཎྜམྤི དནྟཀཊྛམྤི དསིཀསུཏྟམྤི. པརིཎཏནྟི སངྒྷསྶ ནིནྣཾ སངྒྷསྶ པོཎཾ སངྒྷསྶ པབྦྷཱརཾ ཧུཏྭཱ ཋིཏནྟི ཨཏྠོ. ཡེན པན ཀཱརཎེན སོ པརིཎཏོ ཧོཏི, ཏཾ དསྶེཏྭཱ ཏསྶ ཨཏྠཾ དསྶེཏུཾ ‘‘དསྶཱམ ཀརིསྶཱམཱ’’ཏིཨཱདི ཝུཏྟཾ. ཨཏྟནོ པརིཎཱམེནྟསྶཱཏི ‘‘ཨིདཾ མཡ྄ཧཾ དེཧཱི’’ཏི སངྒྷསྶ པརིཎཏབྷཱཝཾ ཉཏྭཱ ཨཏྟནོ པརིཎཱམེཏྭཱ གཎྷནྟསྶ. པཡོགེཏི པརིཎཱམནཔྤཡོགེ. ཨེཏྠ ཙ ‘‘ཨིདཾ མེ, བྷནྟེ, ཛཱནཾ སངྒྷིཀཾ ལཱབྷཾ པརིཎཏཾ ཨཏྟནོ པརིཎཱམིཀཾ ནིསྶགྒིཡ’’ནྟི ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ.

སངྒྷཙེཏིཡཔུགྒལེསཱུཏི ཨེཏྠ ཙ ཨནྟམསོ སུནཁཾ ཨུཔཱདཱཡ ཡོ ཀོཙི སཏྟོ ‘‘པུགྒལོ’’ཏི ཝེདིཏབྦོ. ཨཉྙསངྒྷཱདཱིནནྟི ཨཉྙསངྒྷཙེཏིཡཔུགྒལཱནཾ. ཨིདཾ ཝུཏྟཾ ཧོཏི – ‘‘སངྒྷསྶ པརིཎཏཾ ཨཉྙསྶ སངྒྷསྶ ཝཱ ཙེཏིཡསྶ ཝཱ པུགྒལསྶ ཝཱ, ཙེཏིཡསྶ པརིཎཏཾ ཨཉྙསྶ ཙེཏིཡསྶ ཝཱ སངྒྷསྶ ཝཱ པུགྒལསྶ ཝཱ, པུགྒལསྶ པརིཎཏཾ ཨཉྙསྶ པུགྒལསྶ ཝཱ སངྒྷསྶ ཝཱ ཙེཏིཡསྶ ཝཱ པརིཎཱམེནྟསྶ དུཀྐཊ’’ནྟི.

ཨིདཱནི ཨནཱཔཏྟིཾ དསྶེཏུཾ ‘‘ཨཔརིཎཏསཉྙིནོ’’ཏིཨཱདིམཱཧ. པརིཎཏེ, ཨཔརིཎཏེ ཙ ཨཔརིཎཏསཉྙིནོ ཙཱཏི སམྦནྡྷོ, པརིཎཏེ, ཨཔརིཎཏེ ཙཱཏི ཨུབྷཡཏྠཱཔི ཨནཱཔཏྟཱིཏི ཨཏྠོ. ཝུཏྟཉྷེཏཾ ‘‘པརིཎཏེ ཨཔརིཎཏསཉྙཱི ཨཏྟནོ པརིཎཱམེཏི, ཨནཱཔཏྟི. ཨཔརིཎཏེ ཨཔརིཎཏསཉྙཱི ཨནཱཔཏྟཱི’’ཏི (པཱརཱ. ༦༦༠). དེཡྻདྷམྨོཏི ཙཏྟཱརོ པཙྩཡཱ. ཨཱདིསདྡེན ‘‘པཊིསངྑཱརཾ ཝཱ ལབྷེཡྻ, ཙིརཊྛིཏིཀོ ཝཱ ཨསྶ, ཡཏྠ ཝཱ པན ཏུམྷཱཀཾ ཙིཏྟཾ པསཱིདཏི, ཏཏྠ དེཐཱ’’ཏི (པཱརཱ. ༦༦༡) ཝཙནཱནཾ གཧཎཾ. སཙེ པན དཱཡཀཱ ‘‘མཡཾ ¶ སངྒྷབྷཏྟཾ ཀཏྟུཀཱམཱ, ཙེཏིཡཔཱུཛཾ ཀཏྟུཀཱམཱ, ཨེཀསྶ བྷིཀྑུནོ པརིཀྑཱརཾ དཱཏུཀཱམཱ, ཏུམྷཱཀཾ རུཙིཡཱ དསྶཱམ. བྷཎཐ, ཀཏྠ དེམཱ’’ཏི (པཱརཱ. ཨཊྛ. ༢.༦༦༠) ཝདནྟི, ཨེཝཾ ཝུཏྟེ ཏེན བྷིཀྑུནཱ ‘‘ཡཏྠ ཨིཙྪཐ, ཏཏྠ དེཐཱ’’ཏི ཝཏྟབྦཱ.

པརིཎཏསིཀྑཱཔདཝཎྞནཱ ནིཊྛིཏཱ.

པཏྟཝགྒོ ཏཏིཡོ.

ཨིཏི ཀངྑཱཝིཏརཎིཡཱ པཱཏིམོཀྑཝཎྞནཱཡ

ཝིནཡཏྠམཉྫཱུསཱཡཾ ལཱིནཏྠཔྤཀཱསནིཡཾ

ནིསྶགྒིཡཝཎྞནཱ ནིཊྛིཏཱ.

པཱཙིཏྟིཡཀཎྜཾ

༡. མུསཱཝཱདཝགྒོ

༡. མུསཱཝཱདསིཀྑཱཔདཝཎྞནཱ

སམྤཛཱནམུསཱཝཱདེཏི ¶ ¶ ཨེཏྠ མུསཱཏི ཨབྷཱུཏཾ ཨཏཙྪཾ ཝཏྠུ, ཝཱདོཏི ཏསྶ བྷཱུཏཏོ ཏཙྪཏོ ཝིཉྙཱཔནཾ, སམྤཛཱནསྶ མུསཱཝཱདོ སམྤཛཱནམུསཱཝཱདོ, ཏསྨིཾ སམྤཛཱནམུསཱཝཱདེཏི ཨཏྠོ. ཏེནཱཧ ‘‘པུབྦེ’’ཏིཨཱདི. སོ ཙ པན མུསཱཝཱདོ པུབྦབྷཱགཀྑཎེ, ཏངྑཎེ ཙ ཝིཛཱནནྟསྶ ཧོཏི ‘‘པུབྦེཝསྶ ཧོཏི ‘མུསཱ བྷཎིསྶ’ནྟི, བྷཎནྟསྶ ཧོཏི ‘མུསཱ བྷཎཱམཱི’’’ཏི (པཱཙི. ༤) ཝུཏྟཏྟཱཏི ཨཱཧ ‘‘པུབྦེཔི ཛཱནིཏྭཱ ཝཙནཀྑཎེཔི ཛཱནནྟསྶཱ’’ཏི. ཨེཏཉྷི དྭཡཾ ཨངྒབྷཱུཏཾ, ཨིཏརཾ པན ཧོཏུ ཝཱ, མཱ ཝཱ, ཨཀཱརཎམེཏཾ. ནནུ ཙེཏཾ བྷཎནམེཝ ཉཱཡཏཱིཏི ཨཱཧ ‘‘བྷཎནཉྩ ནཱམཱ’’ཏིཨཱདི. ཨབྷཱུཏསྶཱཏི ཨཏཙྪསྶ.

ཧཏྠཀཾ སཀྱཔུཏྟནྟི ཨེཏྠ ཧཏྠཀོཏི ཏསྶ ཐེརསྶ ནཱམཾ. སཀྱཱནཾ པུཏྟོཏི སཀྱཔུཏྟོ. བུདྡྷཀཱལེ ཀིར སཀྱཀུལཏོ ཨསཱིཏི པུརིསསཧསྶཱནི པབྦཛིཾསུ, ཏེསཾ སོ ཨཉྙཏརོ. ཨཝཛཱནིཏྭཱ པཊིཛཱནནཱདིཝཏྠུསྨིནྟི ཨེཏྠ ཨཝཛཱནིཏྭཱ པཊིཛཱནནཾ ནཱམ ཏིཏྠིཡེཧི སདྡྷིཾ ཀཐེནྟོ ཨཏྟནོ ཝཱདེ ཀཉྩི དོསཾ སལླཀྑེནྟོ ‘‘ནཱཡཾ མམ ཝཱདོ’’ཏི ཨཝཛཱནིཏྭཱ པུན ཀཐེནྟོ ཀཐེནྟོ ནིདྡོསཏཾ སལླཀྑེཏྭཱ ‘‘མམེཝ ཨཡཾ ཝཱདོ’’ཏི པཊིཛཱནཱཏི. ཨཱདིསདྡེན པཊིཛཱནིཏྭཱ ཨཝཛཱནནཾ, ཨཉྙེནཉྙཾ པཊིཙརཎཾ, སམྤཛཱནམུསཱབྷཱསནཾ, སངྐེཏཾ ཀཏྭཱ ཝིསཾཝཱདཀརཎཉྩ སངྒཎྷཱཏི. ཨིདཱནི ཨཱཔཏྟིབྷེདདསྶནཏྠཾ ‘‘ཨུཏྟརིམནུསྶདྷམྨཱརོཙནཏྠ’’ནྟིཨཱདི ཝུཏྟཾ.

ཨནུཔདྷཱརེཏྭཱ སཧསཱ བྷཎནྟསྶཱཏི ཨཝཱིམཾསིཏྭཱ ཝེགེན དིཊྛམྤི ‘‘ཨདིཊྛཾ མེ’’ཏིཨཱདིནཱ བྷཎནྟསྶ ¶ . ‘‘ཨཉྙཾ བྷཎིསྶཱམཱི’’ཏི ཨཉྙཾ བྷཎནྟསྶཱཏི ཡོ མནྡཏྟཱ མོམཱུཧཏྟཱ པཀྑལནྟོ ‘‘ཙཱིཝར’’ནྟི ཝཏྟབྦེ ‘‘ཙཱིར’’ནྟིཨཱདཱིནི བྷཎཏི, ཨཡཾ ‘‘ཨཉྙཾ བྷཎིསྶཱམཱི’’ཏི ཨཉྙཾ བྷཎཏི ནཱམ. ཡོ པན སཱམཎེརེན ‘‘ཨཔི, བྷནྟེ, མཡ྄ཧཾ ཨུཔཛ྄ཛྷཱཡཾ པསྶིཏྠཱ’’ཏི ¶ ཝུཏྟོ ཀེལི༹ཾ ཀུརུམཱནོ ‘‘ཏཝ ཨུཔཛ྄ཛྷཱཡོ དཱརུསཀཊཾ ཡོཛེཏྭཱ གཏོ བྷཝིསྶཏཱི’’ཏི ཝཱ སིངྒཱལསདྡཾ སུཏྭཱ ‘‘ཀསྶཱཡཾ སདྡོ’’ཏི ཝུཏྟོ ‘‘མཱཏུཡཱ ཏེ ཡཱནེན གཙྪནྟིཡཱ ཀདྡམེ ལགྒཙཀྐཾ ཨུདྡྷརནྟཱནཾ ཨཡཾ སདྡོ’’ཏི ཝཱ ཨེཝཾ ནེཝ དཝཱ, ན རཝཱ ཨཉྙཾ བྷཎཏི, སོ ཨཱཔཏྟིཾ ཨཱཔཛྫཏིཡེཝ. ཨཉྙཱ པཱུརཎཀཐཱ ནཱམ ཧོཏི – ཨེཀོ གཱམེ ཐོཀཾ ཏེལཾ ལབྷིཏྭཱ ཝིཧཱརཾ ཨཱགཏོ སཱམཎེརཾ བྷཎཏི ‘‘ཏྭཾ ཨཛྫ ཀུཧིཾ གཏོ, གཱམོ ཨེཀཏེལོ ཨཧོསཱི’’ཏི ཝཱ, པཙྪིཀཱཡ ཋཔིཏཾ པཱུཝཁཎྜཾ ལབྷིཏྭཱ ‘‘ཨཛྫ གཱམེ པཙྪིཀཱཧི པཱུཝེ ཙཱརེསུ’’ནྟི ཝཱ, ཨཡཾ མུསཱཝཱདོཝ ཧོཏི. ཝིསཾཝཱདནཔུརེཀྑཱརཏཱཏི ཝིསཾ ཝཱདེནྟི ཨེཏེནཱཏི ཝིསཾཝཱདནཾ, ཝཉྩནཱདྷིཔྤཱཡཝསཔྤཝཏྟཾ ཙིཏྟཾ, ཏསྶ པུརེཀྑཱརཏཱ ཝིསཾཝཱདནཔུརེཀྑཱརཏཱ, ཝིསཾཝཱདནཙིཏྟསྶ པུརཏོ ཀརཎནྟི ཨཏྠོ.

མུསཱཝཱདསིཀྑཱཔདཝཎྞནཱ ནིཊྛིཏཱ.

༢. ཨོམསཝཱདསིཀྑཱཔདཝཎྞནཱ

ཨོམསཝཱདེཏི ཁུཾསནགརཧཎཝཙནེ. ཡསྨཱ པན ཏཾ ནེཝ ཀཎྞསུཁཾ, ན ཧདཡསུཁཾ, ཏསྨཱ ཏེན ཀཎྞཉྩེཝ ཧདཡཉྩ ཝིཛ྄ཛྷཏཱིཏི ཨཱཧ ‘‘ཨོཝིཛ྄ཛྷནཝཙནེ’’ཏི, ཛཱཏིཨཱདཱིཧི གྷཊེཏྭཱ ཝཙནེཏི ཝུཏྟཾ ཧོཏི. ཏེནཱཧ ‘‘ཛཱཏིནཱམཱ’’ཏིཨཱདི. ཏཏྠ ཛཱཏི ནཱམ བྲཱཧྨཎཱདི ཨུཀྐཊྛཱ ཙེཝ ཙཎྜཱལཱདི ཧཱིནཱ ཙ ཛཱཏི. ནཱམཾ ནཱམ ཨཝཀཎྞཀཱདི ཧཱིནཉྩེཝ བུདྡྷརཀྑིཏཱདི ཨུཀྐཊྛཉྩ ནཱམཾ. གོཏྟཾ ནཱམ ཀོསིཡཱདི ཧཱིནཉྩེཝ གོཏམཱདི ཨུཀྐཊྛཉྩ གོཏྟཾ. ཀམྨཾ ནཱམ པུཔྥཚཌྜཀཱདི ཧཱིནཉྩེཝ ཀསིཝཎིཛྫཱདི ཨུཀྐཊྛཉྩ ཀམྨཾ. སིཔྤཾ ནཱམ ནལ༹ཀཱརཱདི ཧཱིནཉྩེཝ མུདྡཱགཎནཱདི ཨུཀྐཊྛཉྩ སིཔྤཾ. ཨཱབཱདྷོ ནཱམ སབྦོཔི རོགོ ཧཱིནོཡེཝ. ཨཐ ཝཱ མདྷུམེཧོ ཨུཀྐཊྛོ, སེསོ ཧཱིནོཏི ཝེདིཏབྦོ. ལིངྒཾ ནཱམ ཨཏིདཱིགྷཱདི ཧཱིནཉྩེཝ ནཱཏིདཱིགྷཱདི ཨུཀྐཊྛཉྩ ལིངྒཾ. ཀིལེསོ ནཱམ རཱགཱདིཀོ སབྦོཔི ཀིལེསོ. ཨཱཔཏྟི ནཱམ སོཏཱཔཏྟཱདིཀཱ ཨུཀྐཊྛཱ ཙེཝ པཱརཱཛིཀཱདི ཨནུཀྐཊྛཱ ཙ ཨཱཔཏྟི. ཨཀྐོསོ ནཱམ ‘‘ཨོཊྛོསཱི’’ཏིཨཱདིཀོ ཧཱིནོ ཙེཝ ‘‘པཎྜིཏོསཱི’’ཏིཨཱདིཀོ (པཱཙི. ༡༥) ཨུཀྐཊྛོ ཙ ཨཀྐོསོ.

ཡཐཱ ¶ ¶ ཏཐཱཏི པཱལི༹ཨཱགཏཱནཱགཏཔདཱནཾ ཡེན ཀེནཙི ཨཱཀཱརེན. ཨིམསྨིཾ སིཀྑཱཔདེ ཋཔེཏྭཱ བྷིཀྑུཾ བྷིཀྑུནིཨཱདཡོ སབྦེ སཏྟཱ ཨནུཔསམྤནྣཊྛཱནེ ཋིཏཱཏི ཨཱཧ ‘‘ཨིདྷ ཙཱ’’ཏིཨཱདི. དཝཀམྱཏཱ ནཱམ ཀེལི༹ཧསཱདྷིཔྤཱཡཏཱ. སབྦཏྠཱཏི ཨུཔསམྤནྣཱནུཔསམྤནྣེསུ ཙེཝ པཱལི༹ཨཱགཏཱནཱགཏཔདེསུ ཙཱཏི སབྦཏྠ. ཨཏྠདྷམྨཨནུསཱསནིཔུརེཀྑཱརཱནནྟི ཨེཏྠ ‘‘ཙཎྜཱལོསཱི’’ཏིཨཱདིཀཱཡ པཱལི༹ཡཱ ཨཏྠཾ ཝཎྞེནྟོ ཨཏྠཔུརེཀྑཱརོ ནཱམ. པཱལི༹ཾ ཝཱཙེནྟོ དྷམྨཔུརེཀྑཱརོ ནཱམ. ཨནུསིཊྛིཡཾ ཋཏྭཱ ‘‘ཨིདཱནིཔི ཙཎྜཱལོསི, པཱཔཾ མཱ ཨཀཱསི. མཱ ཏམོཏམཔརཱཡཎོ ཨཧོསཱི’’ཏིཨཱདིནཱ (པཱཙི. ཨཊྛ. ༣༥) ནཡེན ཀཐེནྟོ ཨནུསཱསནིཔུརེཀྑཱརོ ནཱམཱཏི ཝེདིཏབྦོ.

ཨོམསཝཱདསིཀྑཱཔདཝཎྞནཱ ནིཊྛིཏཱ.

༣. པེསུཉྙསིཀྑཱཔདཝཎྞནཱ

བྷིཀྑུཔེསུཉྙེཏི པིསཏཱིཏི པིསུཎཱ, ཡཱཡ ཝཱཙཱཡ སམགྒེ སཏྟེ ཨཝཡཝབྷཱུཏེ ཝགྒེ བྷིནྣེ ཀརོཏི, སཱ ཝཱཙཱ པིསུཎཱ, པིསུཎཱ ཨེཝ པེསུཉྙཾ, ཏཱཡ ཝཱཙཱཡ སམནྣཱགཏོ པིསུཎོ, ཏསྶ ཀམྨཾ པེསུཉྙཾ, བྷིཀྑུསྶ པེསུཉྙཾ བྷིཀྑུཔེསུཉྙཾ, ཏསྨིཾ བྷིཀྑུཔེསུཉྙེ, བྷིཀྑུཏོ སུཏྭཱ བྷིཀྑུནཱ, བྷིཀྑུསྶ ཝཱ ཨུཔསཾཧཊཔེསུཉྙེཏི ཨཏྠོ. ཏེནཱཧ ‘‘ཛཱཏིཨཱདཱིཧཱི’’ཏིཨཱདི. ཏཉྩ ཁོ དྭཱིཧི ཀཱརཎེཧི ཨུཔསཾཧརཏཱིཏི ཨཱཧ ‘‘བྷིཀྑུནོ པིཡཀམྱཏཱཡ ཝཱ’’ཏིཨཱདི. ཏཏྠ བྷིཀྑུནོ པིཡཀམྱཏཱཡཱཏི ཡསྶ ཏཾ བྷཱསཏི, ཏསྶ བྷིཀྑུནོ ‘‘ཨེཝམཧཾ ཨེཏསྶ པིཡོ བྷཝིསྶཱམཱི’’ཏི ཨཏྟནོ པིཡབྷཱཝཾ པཏྠཡམཱནཏཱཡ. བྷེདཱདྷིཔྤཱཡེནཱཏི ‘‘ཨེཝམཡཾ ཏེན སདྡྷིཾ བྷིཛྫིསྶཏཱི’’ཏི པརསྶ པརེན བྷེདཾ ཨིཙྪནྟེན. ཨཐ ཝཱ པིཡསུཉྙཀརཎཏོ པེསུཉྙཾ (སཱརཏྠ. ཊཱི. པཱཙིཏྟིཡ ༣.༣༦) ནིརུཏྟིནཡེན, ཡཱཡ ཝཱཙཱཡ ཡསྶ ཏཾ བྷཱསཏི, ཏསྶ ཧདཡེ ཨཏྟནོ པིཡབྷཱཝཾ, པརསྶ ཙ སུཉྙབྷཱཝཾ ཀརོཏི, སཱ ཝཱཙཱ, ‘‘བྷིཀྑུསྶ པེསུཉྙཾ བྷིཀྑུཔེསུཉྙ’’ནྟིཨཱདིནཱ ཨེཝམྤེཏྠ ཨཏྠོ དཊྛབྦོ. ‘‘ཝུཏྟནཡེནེཝཱཏི ‘‘ཛཱཏིཨཱདཱིཧི ཨཀྐོསཝཏྠཱུཧཱི’’ཏིཨཱདིནཱ ཝུཏྟནཡེན.

པཱལི༹མུཏྟཀཨཀྐོསཱུཔསཾཧཱརེཏི ¶ ‘‘ཙོརོསཱི’’ཏིཨཱདིནཱ ཨཀྐོསསྶ ཨུཔསཾཧཱརེ. ‘‘ཨནཀྐོསཝཏྠུབྷཱུཏཾ པན པེསུཉྙཀརཾ ཏསྶ ཀིརིཡཾ, ཝཙནཾ ཝཱ པིཡཀམྱཏཱཡ ཨུཔསཾཧརནྟསྶ ཀིཉྩཱཔི ཨིམིནཱ སིཀྑཱཔདེན ཨཱཔཏྟི ན དིསྶཏི, ཏཐཱཔི དུཀྐཊེན བྷཝིཏབྦ’’ནྟི (སཱརཏྠ. ཊཱི. པཱཙིཏྟིཡ ༣.༣༦) ཝདནྟི. པཱཔགརཧིཏཱཡ ཝདནྟསྶཱཏི ཨེཀཾ ཨཀྐོསནྟཾ, ཨེཀཉྩ ¶ ཁམནྟཾ དིསྭཱ ‘‘ཨཧོ ནིལླཛྫོ, ཨཱིདིསམྤི ནཱམ བྷཝནྟཾ པུན ཝཏྟབྦཾ མཉྙིསྶཏཱི’’ཏི ཨེཝཾ ཀེཝལཾ པཱཔགརཧིཏཱཡ བྷཎནྟསྶ.

པེསུཉྙསིཀྑཱཔདཝཎྞནཱ ནིཊྛིཏཱ.

༤. པདསོདྷམྨསིཀྑཱཔདཝཎྞནཱ

པདསོ དྷམྨཾ ཝཱཙེཡྻཱཏི ཨེཀཏོ པདཾ པདཾ དྷམྨཾ ཝཱཙེཡྻ, ཀོཊྛཱསཾ ཀོཊྛཱསཾ ཝཱཙེཡྻཱཏི ཨཏྠོ. ཡསྨཱ ན ཀེཝལཾ ཏིསྶོ སངྒཱིཏིཡོ ཨཱརུལ༹ྷདྷམྨཾཡེཝ པདསོ ཝཱཙེནྟསྶ ཨཱཔཏྟི, ཏསྨཱ ‘‘སངྒཱིཏིཏྟཡཾ ཨནཱརུལ༹ྷམྤཱི’’ཏིཨཱདི ཝུཏྟཾ. ཨཱདི-སདྡེན (པཱཙི. ཨཊྛ. ༤༥) སཱིལཱུཔདེས དྷུཏངྒཔཉྷཨཱརམྨཎཀཐཱ བུདྡྷིཀདཎྜཀཉྙཱཎཝཏྠུཨསུབྷཀཐཱདཱིནཾ གཧཎཾ. མེཎྜཀམིལིནྡཔཉྷེསུ ཐེརསྶ སཀཔྤཊིབྷཱནེ ཨནཱཔཏྟི. ཡཾ རཉྙོ སཉྙཱཔནཏྠཾ ཨཱཧརིཏྭཱ ཝུཏྟཾ, ཏཏྠ ཨཱཔཏྟི. ཝཎྞཔིཊཀཨངྒུལིམཱལཔིཊཀརཊྛཔཱལགཛྫིཏཨཱལ༹ཝཀགཛྫིཏགཱུལ༹ྷམགྒགཱུལ༹ྷཝེསྶནྟརགཱུལ༹ྷཝིནཡཝེདལླཔིཊཀཱདཱིནི པན ཨབུདྡྷཝཙནཱནིཡེཝ.

ཡསྨཱ པན ཏཾ པདཾ ཙཏུབྦིདྷཾ ཧོཏི, ཏསྨཱ ཏཾ དསྶེཏུཾ ‘‘པདཱནུཔདཨནྭཀྑརཱནུབྱཉྫནེསཱུ’’ཏི ཝུཏྟཾ. ཏཏྠ པདནྟི ཨེཀོ གཱཐཱཔཱདོ ཨདྷིཔྤེཏོ. ཨནུཔདནྟི དུཏིཡཔཱདོ. ཨནྭཀྑརནྟི ཨེཀེཀཾ ཨཀྑརཾ. ཨནུབྱཉྫནནྟི པུརིམབྱཉྫནེན སདིསཾ པཙྪཱབྱཉྫནཾ. ཡཾ ཀིཉྩི ཝཱ ཨེཀཾ ཨཀྑརཾ ཨནྭཀྑརཾ. ཨཀྑརསམཱུཧོ ཨནུབྱཉྫནཾ. ཨཀྑརཱནུབྱཉྫནསམཱུཧོ པདཾ. པཋམཾ པདཾ པདམེཝ, དུཏིཡཾ ཨནུཔདནྟི ཨེཝམེཏྠ ནཱནཱཀརཎཾ ཝེདིཏབྦཾ. ཨེཏེསུ པདཱདཱིསུ ཡཾ ཀཉྩི ཀོཊྛཱསཾ བྷིཀྑུཉྩ བྷིཀྑུནིཉྩ ཋཔེཏྭཱ ཨཝསེསཔུགྒལེཧི སདྡྷིཾ ཨེཀཏོ བྷཎནྟསྶ པདཱདིགཎནཱཡ པཱཙིཏྟིཡནྟི སམྦནྡྷོ.

ཨེཏྠ ¶ གཱཐཱབནྡྷེསུ (པཱཙི. ཨཊྛ. ༤༥) ཏཱཝ ‘‘མནོཔུབྦངྒམཱ དྷམྨཱ’’ཏི (དྷ. པ. ༡, ༢) ཨེཀམེཀཾ པདཾ སཱམཎེརེན སདྡྷིཾ ཨེཀཏོ ཨཱརབྷིཏྭཱ ཨེཀཏོཡེཝ ནིཊྛཱཔེནྟསྶ པདགཎནཱཡ པཱཙིཏྟིཡཾ. ཐེརེན ‘‘མནོཔུབྦངྒམཱ དྷམྨཱ’’ཏི ཝུཏྟེ ཏཾ པདཾ ཨཔཱཔུཎིཏྭཱ ‘‘མནོསེཊྛཱ མནོམཡཱ’’ཏི ཝཙནཀཱལེ པཏྟེན སཱམཎེརེན ཨེཀཏོ བྷཎནྟསྶ ཨནུཔདགཎནཱཡ. ‘‘རཱུཔཾ ཨནིཙྩ’’ནྟིཨཱདི (མ. ནི. ༡.༣༥༣, ༣༥༦) ཝཙནཀཱལེ ཏེན སདྡྷིཾ ‘‘རཱུ’’ ཀཱརམཏྟམེཝ ཝཱཙེནྟསྶ ཨནྭཀྑརགཎནཱཡ. ཨེས ནཡོ གཱཐཱབནྡྷེཔི. ‘‘རཱུཔཾ, བྷིཀྑཝེ, ཨནིཙྩཾ, ཝེདནཱ ཨནིཙྩཱ’’ཏི (མ. ནི. ༡.༣༥༣, ༣༥༦) ཨིམཾ སུཏྟཾ ཝཱཙཡམཱནོ ཐེརེན ‘‘རཱུཔཾ ¶ ཨནིཙྩ’’ནྟི ཝུཙྩམཱནེ སཱམཎེརོ སཱིགྷཔཉྙཏཱཡ ‘‘ཝེདནཱ ཨནིཙྩཱ’’ཏི ཨིམཾ ཨནིཙྩཔདཾ ཐེརསྶ ‘‘རཱུཔཾ ཨནིཙྩ’’ནྟི ཨེཏེན ཨནིཙྩཔདེན སདྡྷིཾ ཨེཀཏོ བྷཎནྟོ ཝཱཙཾ ནིཙྪཱརེཏི, ཨེཝཾ ཝཱཙེནྟསྶ ཨནུབྱཉྫནགཎནཱཡ པཱཙིཏྟིཡནྟི ཝེདིཏབྦཾ.

ཏིཀཔཱཙིཏྟིཡནྟི ཨནུཔསམྤནྣེ ཨནུཔསམྤནྣསཉྙིཝེམཏིཀཨུཔསམྤནྣསཉྙཱིནཾ ཝསེན ཏཱིཎི པཱཙིཏྟིཡཱནི. ཨནུཔསམྤནྣེན སདྡྷིཾ ཨེཀཏོ ཨུདྡེསགྒཧཎེ ཨེཀཏོ བྷཎནྟསྶ ཨནཱཔཏྟཱིཏི སམྦནྡྷོ. ཨེས ནཡོ ‘‘སཛ྄ཛྷཱཡཀརཎེ, ཏསྶ སནྟིཀེ ཨུདྡེསགྒཧཎེ’’ཏི ཨེཏྠཱཔི. ཏཏྲཱཡཾ ཝིནིཙྪཡོ – ཨུཔསམྤནྣོ ཙ ཨནུཔསམྤནྣོ ཙ ནིསཱིདིཏྭཱ ཨུདྡིསཱཔེནྟི. ཨཱཙརིཡོ ‘‘ནིསིནྣཱནཾ བྷཎཱམཱི’’ཏི ཏེཧི སདྡྷིཾ ཨེཀཏོ ཝདཏི, ཨཱཙརིཡསྶེཝ ཨཱཔཏྟི. ཨནུཔསམྤནྣེན སདྡྷིཾ གཎྷནྟསྶ ཨནཱཔཏྟི. དྭེཔི ཋིཏཱ གཎྷནྟི, ཨེསེཝ ནཡོ. དཧརབྷིཀྑུ ནིསིནྣོ, སཱམཎེརོ ཋིཏོ, ‘‘ནིསིནྣསྶ བྷཎཱམཱི’’ཏི བྷཎཏོ ཨནཱཔཏྟི. སཙེ དཧརོ ཏིཊྛཏི, ཨིཏརོ ནིསཱིདཏི, ‘‘ཋིཏསྶ བྷཎཱམཱི’’ཏི བྷཎཏོཔི ཨནཱཔཏྟི. སཙེ བཧཱུནཾ བྷིཀྑཱུནཾ ཨནྟརེ ཨེཀོ སཱམཎེརོ ནིསིནྣོ ཧོཏི, ཏསྨིཾ ནིསིནྣེ པདསོ དྷམྨཾ ཝཱཙེནྟསྶ ཨཙིཏྟཀཱ ཨཱཔཏྟི. སཙེ སཱམཎེརོ ཨུཔཙཱརཾ མུཉྩིཏྭཱ ཋིཏོ ཝཱ ནིསིནྣོ ཝཱ ཧོཏི, ཡེསཾ ཝཱཙེཏི, ཏེསུ ཨཔརིཡཱཔནྣཏྟཱ ཨེཀེན དིསཱབྷཱགེན པལཱཡནཀགནྠཾ ནཱམ གཎྷཱཏཱིཏི སངྑཾ གཙྪཏི, ཏསྨཱ ཨནཱཔཏྟི.

སཛ྄ཛྷཱཡཀརཎེཏི ཨནུཔསམྤནྣེན སདྡྷིཾ ཨེཀཏོ སཛ྄ཛྷཱཡཀརཎེ. ཏསྶ སནྟིཀེ ཨུདྡེསགྒཧཎེཏི ཨནུཔསམྤནྣསྶ སནྟིཀེ ཨུདྡེསགྒཧཎེ. ཡེབྷུཡྻེན པགུཎགནྠཾ བྷཎནྟསྶཱཏི སཙེ ཨེཀགཱཐཱཡ ཨེཀོ ¶ པཱདོ ནཱགཙྪཏི, ཨཝསེསཱ ཨཱགཙྪནྟི, ཨཡཾ ཡེབྷུཡྻེན པགུཎགནྠོ ནཱམ. ཨེཏེན ནཡེན སུཏྟེཔི ཝེདིཏབྦོ, ཏཾ བྷཎནྟསྶ. ཨོསཱརེནྟསྶ ཙཱཏི པརིསཱམཛ྄ཛྷེ སུཏྟཾ ཨུཙྩཱརེནྟསྶ ཙ.

པདསོདྷམྨསིཀྑཱཔདཝཎྞནཱ ནིཊྛིཏཱ.

༥. པཋམསཧསེཡྻསིཀྑཱཔདཝཎྞནཱ

ཨིདྷ ‘‘བྷིཀྑུཾ ཋཔེཏྭཱ ཨཝསེསོ ཨནུཔསམྤནྣོ ནཱམཱ’’ཏི (པཱཙི. ༥༢) ཝཙནཏོ ཏིརཙྪཱནགཏོཔི ཨནུཔསམྤནྣོཡེཝ, སོ ཙ ཁོ ན སབྦོ, མེཐུནདྷམྨཱཔཏྟིཡཱ ཝཏྠུབྷཱུཏོཝཱཏི ཨཱཧ ‘‘ཨནྟམསོ’’ཏིཨཱདི. ཏསྶ ཙ པརིཙྪེདོ མེཐུནདྷམྨཱཔཏྟིཡཱ ཝུཏྟནཡེནེཝ ཝེདིཏབྦོ. དིརཏྟཏིརཏྟནྟི ¶ ཨེཏྠ དིརཏྟཝཙནེན ན ཀོཙི ཝིསེསཏྠོ ལབྦྷཏི, ཀེཝལཾ ལོཀཝོཧཱརཝསེན བྱཉྫནསིལིཊྛཏཱཡ, མུཁཱརུལ༹ྷཏཱཡ ཨེཝཾ ཝུཏྟནྟི ཝེདིཏབྦཾ. དྭིནྣཾ ཝཱ ཏིཎྞཾ ཝཱ རཏྟཱིནནྟི པན ཝཙནཏྠམཏྟདསྶནཏྠཾ ཝུཏྟཾ, ནིརནྟརཏིརཏྟདསྶནཏྠཾ ཝཱ དིརཏྟགྒཧཎཾ ཀཏནྟི དཊྛབྦཾ. སཧསེཡྻནྟི ཨེཀཏོ སེཡྻཾ. སེཡྻཱཏི ཙ ཀཱཡཔྤསཱརཎསངྑཱཏཾ སཡནམྤི ཝུཙྩཏི ‘‘སཡནཾ སེཡྻཱ’’ཏི ཀཏྭཱ, ཡསྨིཾ སེནཱསནེ སཡནྟི, ཏམྤི ‘‘སཡནྟི ཨེཏྠཱཏི སེཡྻཱ’’ཏི ཀཏྭཱ. ཏདུབྷཡམྤི ཨིདྷ སཱམཉྙེན, ཨེཀསེསནཡེན ཝཱ གཧིཏནྟི ཨཱཧ ‘‘སབྦཙྪནྣཔརིཙྪནྣེ’’ཏིཨཱདི.

ཏཏྠ ཡཾ སེནཱསནཾ ཨུཔརི པཉྩཧི ཚདནེཧི (པཱཙི. ཨཊྛ. ༥༡), ཨཉྙེན ཝཱ ཀེནཙི ཨནྟམསོ ཝཏྠེནཱཔི སབྦམེཝ པརིཙྪནྣཾ, བྷཱུམིཏོ པཊྛཱཡ ཡཱཝ ཚདནཾ ཨཱཧཙྩ, ཨནཱཧཙྩཱཔི ཝཱ སབྦནྟིམེན པརིཡཱཡེན དིཡཌྜྷཧཏྠུབྦེདྷེན པཱཀཱརེན ཝཱ ཨཉྙེན ཝཱ ཀེནཙི ཨནྟམསོ ཝཏྠེནཱཔི པརིཀྑིཏྟཾ, ཨིདཾ སབྦཙྪནྣསབྦཔརིཙྪནྣཾ ནཱམ. ཡསྶ པན ཨུཔརི བཧུཏརཾ ཋཱནཾ ཚནྣཾ, ཨཔྤཾ ཨཙྪནྣཾ, སམནྟཏོ ཙ བཧུཏརཾ པརིཀྑིཏྟཾ, ཨཔྤཾ ཨཔརིཀྑིཏྟཾ, ཨིདཾ ཡེབྷུཡྻེན ཚནྣཾ ཡེབྷུཡྻེན པརིཙྪནྣཾ ནཱམ. ཏསྨིཾ སབྦཙྪནྣཔརིཙྪནྣེ, ཡེབྷུཡྻེན ཚནྣཔརིཙྪནྣེ ཝཱ.

ཝིདཧེཡྻཱཏི ཀརེཡྻ, ཏཉྩ ཁོ ཨཏྠཏོ སམྤཱདནནྟི ཨཱཧ ‘‘སམྤཱདེཡྻཱ’’ཏི. ཨཡཉྷེཏྠ སངྑེཔཏྠོ ‘‘སེནཱསནསངྑཱཏཾ སེཡྻཾ པཝིསིཏྭཱ ཀཱཡཔྤསཱརཎསངྑཱཏཾ ¶ སེཡྻཾ ཀཔྤེཡྻ ཝིདཧེཡྻ སམྤཱདེཡྻཱ’’ཏི. དིཡཌྜྷཧཏྠུབྦེདྷོ ཝཌྜྷཀིཧཏྠེན གཧེཏབྦོ. ཨེཀཱུཔཙཱརོཏི ཝལཉྫནདྭཱརསྶ ཨེཀཏྟཾ སནྡྷཱཡ ཝུཏྟཾ. སཏགབྦྷཾ ཝཱ ཙཏུསཱལཾ ཨེཀཱུཔཙཱརཾ ཧོཏཱིཏི སམྦནྡྷོ. ཏཏྠ ཝཱཏི པུརིམཔུརིམདིཝསེ ཡཏྠ ཝུཊྛཾ, ཏསྨིཾཡེཝ སེནཱསནེ ཝཱ. ཨཉྙཏྠ ཝཱ ཏཱདིསེཏི ཡཐཱཝུཏྟལཀྑཎེན སམནྣཱགཏེ ཨཉྙསྨིཾ པུབྦེ ཨཝུཊྛསེནཱསནེ ཝཱ. ཏེན ཝཱཏི ཡེན སཧ པུརིམཔུརིམདིཝསེ ཝུཊྛཾ, ཏེན ཝཱ. ཨཉྙེན ཝཱཏི ཡེན སཧ པུརིམཔུརིམསྨིཾ དིཝསེ ཝུཊྛཾ, ཏཏོ ཨཉྙེན ཝཱ. སངྑེཔོཏི སངྑེཔཝཎྞནཱ. ཡདི ཨེཝཾ ཝིཏྠཱརོ ཀཐཾ ཝེདིཏབྦོཏི ཨཱཧ ‘‘ཝིཏྠཱརོ པནཱ’’ཏིཨཱདི.

ཨུཔཌྜྷཙྪནྣཔརིཙྪནྣཱདཱིསཱུཏི ཨཱདིསདྡེན ‘‘སབྦཙྪནྣེ ཙཱུལ༹ཀཔརིཙྪནྣེ དུཀྐཊཾ, ཡེབྷུཡྻེན ཚནྣེ ཙཱུལ༹ཀཔརིཙྪནྣེ དུཀྐཊཾ, སབྦཔརིཙྪནྣེ ཙཱུལ༹ཀཙྪནྣེ དུཀྐཊཾ, ཡེབྷུཡྻེན པརིཙྪནྣེ ཙཱུལ༹ཀཙྪནྣེ དུཀྐཊ’’ནྟི (པཱཙི. ཨཊྛ. ༥༣) ཨཊྛཀཐཱཡཾ ཝུཏྟཱནཾ གཧཎཾ. ཏཏིཡཱཡ རཏྟིཡཱ པུརཱརུཎཱ ནིཀྑམིཏྭཱ པུན ཝསནྟསྶཱཏི ཏཏིཡཱཡ རཏྟིཡཱ ཨརུཎཏོ པུརེཏརམེཝ ནིཀྑམིཏྭཱ ཨརུཎཾ བཧི ཨུཊྛཱཔེཏྭཱ ཙཏུཏྠདིཝསེ ཨཏྠངྒཏེ སཱུརིཡེ པུན ཝསནྟསྶ. སབྦཙྪནྣསབྦཱཔརིཙྪནྣཱདཱིསཱུཏི ¶ ཨེཏྠ པན ཨཱདིསདྡེན ‘‘སབྦཔརིཙྪནྣེ སབྦཨཙྪནྣེ, ཡེབྷུཡྻེན ཨཙྪནྣེ ཡེབྷུཡྻེན ཨཔརིཙྪནྣེ’’ཏི (པཱཙི. ༥༤) པཱལི༹ཡཾ ཨཱགཏཱནཾ, ‘‘ཨུཔཌྜྷཙྪནྣེ ཙཱུལ༹ཀཔརིཙྪནྣེ ཨནཱཔཏྟི, ཨུཔཌྜྷཔརིཙྪནྣེ ཙཱུལ༹ཀཙྪནྣེ ཨནཱཔཏྟི, ཙཱུལ༹ཀཙྪནྣེ ཙཱུལ༹ཀཔརིཙྪནྣེ ཨནཱཔཏྟཱི’’ཏི (པཱཙི. ཨཊྛ. ༥༣) ཨཊྛཀཐཱཡཾ ཨཱགཏཱནཉྩ གཧཎཾ.

པཋམསཧསེཡྻསིཀྑཱཔདཝཎྞནཱ ནིཊྛིཏཱ.

༦. དུཏིཡསཧསེཡྻསིཀྑཱཔདཝཎྞནཱ

མནུསྶིཏྠིཡཱཏི ཛཱིཝམཱནཀམནུསྶིཏྠིཡཱ. ‘‘མཏིཏྠཱི པན ཀིཉྩཱཔི པཱརཱཛིཀཝཏྠུབྷཱུཏཱ, ཨནུཔཱདིནྣཔཀྑེ པན ཋིཏཏྟཱ སཧསེཡྻཱཔཏྟིཾ ན ཀརོཏཱི’’ཏི (ཝཛིར. ཊཱི. པཱཙིཏྟིཡ ༥༥) ཝདནྟི. ཨདིསྶམཱནརཱུཔཱཧི པན ཡཀྑིཔེཏཱིཧི, མེཐུནསྶ ཨཝཏྠུབྷཱུཏཱཡ ¶ ཙ ཏིརཙྪཱནགཏིཏྠིཡཱ ཨནཱཔཏྟི. པཋམདིཝསེཔཱིཏི པཋམསྨིཾ ཝིཡ སིཀྑཱཔདེ ན ཙཏུཏྠེཡེཝ དིཝསེ, ཨཐ ཁོ ཨིདྷ པཋམདིཝསེཔཱིཏི ཨཏྠོ. ཨིམིནཱ ཨིདྷ དིཝསཔརིཙྪེདོ ནཏྠཱིཏི དསྶེཏི. ཨངྒེསུ པན པཱཙིཏྟིཡཝཏྠུཀསེནཱསནཾ, ཏཏྠ མཱཏུགཱམེན སཧ ནིཔཛྫནཾ, སཱུརིཡཏྠངྒམནནྟི ཏཱིཎི ཨངྒཱནཱིཏི ཨཡམྤི ཝིསེསོ དཊྛབྦོ.

དུཏིཡསཧསེཡྻསིཀྑཱཔདཝཎྞནཱ ནིཊྛིཏཱ.

༧. དྷམྨདེསནཱསིཀྑཱཔདཝཎྞནཱ

ཚཔྤཉྩཝཱཙཱཧཱིཏི ཚཧི པཉྩཧི ཝཱཙཱཧི. ཝཱཙཱཔརིཙྪེདོ པནེཏྠ ཀཐཾ ཝེདིཏབྦོཏི ཨཱཧ ‘‘ཨུཏྟརི ཚཔྤཉྩཝཱཙཱཧཱི’’ཏིཨཱདི. སབྦཏྠཱཏི སུཏྟེ, ཨཊྛཀཐཱཡཉྩ. སཙེ ཨཊྛཀཐཾ, དྷམྨཔདཾ, ཛཱཏཀཱདིཝཏྠུཾ ཝཱ ཀཐེཏུཀཱམོ ཧོཏི, ཚཔྤདམཏྟམེཝ ཀཐེཏུཾ ཝཊྚཏི. པཱལི༹ཡཱ སདྡྷིཾ ཀཐེནྟེན ཨེཀཾ པདཾ པཱལི༹ཏོ, པཉྩ ཨཊྛཀཐཱཏོཏི ཨེཝཾ ཚ པདཱནི ཨནཏིཀྐམིཏྭཱཝ ཀཐེཏབྦོ. པུརིསེནཱཏི མནུསྶཔུརིསེན. ཏེནཱཧ ‘‘མནུསྶཝིགྒཧཾ གཧེཏྭཱ པནཱ’’ཏིཨཱདི.

ཏིཀཔཱཙིཏྟིཡནྟི མཱཏུགཱམེ མཱཏུགཱམསཉྙིཝེམཏིཀཨམཱཏུགཱམསཉྙཱིནཾ ཝསེན ཏཱིཎི པཱཙིཏྟིཡཱནི. ཨཉྙསྶ ཝཱ མཱཏུགཱམསྶཱཏི ཨེཀསྶ མཱཏུགཱམསྶ དེསེཏྭཱ ནིསིནྣེ པུན ཨཱགཏསྶ ཨཉྙསྶ མཱཏུགཱམསྶ, ཨེཝཾ པན ཨེཀཱསནེ ནིསིནྣེན མཱཏུགཱམསཏསྶཱཔི དེསེཏུཾ ཝཊྚཏི ¶ . ‘‘ཝིཉྙུམནུསྶིཏྠིཡཱ’’ཏི ཝཙནཏོ ཨཝིཉྙིཏྠིཡཱཔི དེསཡཏོ ཨནཱཔཏྟི. ཨིརིཡཱཔཐཔརིཝཏྟཱབྷཱཝོཏི ཨཏྟནོ ཝཱ མཱཏུགཱམསྶ ཝཱ ཨིརིཡཱཔཐཔརིཝཏྟཱབྷཱཝོ. ཀཔྤིཡཀཱརཀསྶཱབྷཱཝོཏི ཝིཉྙུསྶ ཀཔྤིཡཀཱརཀསྶཱབྷཱཝོ, དུཏིཡཱནིཡཏེ ཝུཏྟལཀྑཎསྶ མནུསྶསྶ ཨབྷཱཝོཏི ཝུཏྟཾ ཧོཏི. ཀིརིཡཱཀིརིཡནྟི ཨེཏྠ ཨུཏྟརི ཚཔྤཉྩཝཱཙཱཧི དྷམྨདེསནཱ ཀིརིཡཱ, ཀཔྤིཡཀཱརཀསྶ ཨགྒཧཎཾ ཨཀིརིཡཱཏི དཊྛབྦཾ.

དྷམྨདེསནཱསིཀྑཱཔདཝཎྞནཱ ནིཊྛིཏཱ.

༨. བྷཱུཏཱརོཙནསིཀྑཱཔདཝཎྞནཱ

ནིཔྤརིཡཱཡེནཱཏི ¶ ‘‘པཋམཾ ཛྷཱནཾ སམཱཔཛྫི’’ནྟིཨཱདིནཱ (པཱཙི. ༧༡) ཨུཛུཀམེཝ. པརིཡཱཡེན ཨཱརོཙིཏནྟི ‘‘ཡོ ཏེ ཝིཧཱརེ ཝསི, སོ བྷིཀྑུ པཋམཾ ཛྷཱནཾ སམཱཔཛྫི, སམཱཔཛྫཏི, སམཱཔནྣོ’’ཏིཨཱདིནཱ (པཱཙི. ༧༥) ཨཉྙཱཔདེསེན བྷཎིཏཾ. པརིནིབྦཱནཀཱལེ (པཱཙི. ཨཊྛ. ༧༧), པན ཨནྟརཱ ཝཱ ཨཏིཀཌྜྷིཡམཱནེན ཨུཔསམྤནྣསྶ བྷཱུཏཾ ཨཱརོཙེཏུཾ ཝཊྚཏི. ཨནཏིཀཌྜྷིཡམཱནེནཱཔི (སཱརཏྠ. ཊཱི. པཱཙིཏྟིཡ ༣.༧༧) ཏཐཱརཱུཔེ ཀཱརཎེ སཏི ཨཱརོཙེཏུཾ ཝཊྚཏིཡེཝ. ཏེནེཝ ཨཉྙཏརེན དཧརབྷིཀྑུནཱ ཨུཔཝདིཏོ ཨཉྙཏརོ ཐེརོ ‘‘ཨཱཝུསོ, ཨུཔརིམགྒཏྠཱཡ ཝཱཡཱམཾ མཱ ཨཀཱསི, ཁཱིཎཱསཝོ ཏཡཱ ཨུཔཝདིཏོ’’ཏི ཨཱཧ. ཐེརེན ཙ ‘‘ཨཏྠི ཏེ, ཨཱཝུསོ, ཨིམསྨིཾ སཱསནེ པཏིཊྛཱ’’ཏི པུཊྛོ དཧརབྷིཀྑུ ‘‘ཨཱམ, བྷནྟེ, སོཏཱཔནྣོ ཨཱཧ’’ནྟི ཨཝོཙ. ‘‘ཀཱརཀོ ཨཡ’’ནྟི ཉཏྭཱཔི པཊིཔཏྟིཡཱ ཨམོགྷབྷཱཝདསྶནེན སམུཏྟེཛནཱཡ, སམྤཧཾསནཱཡ ཙ ཨརིཡཱ ཨཏྟཱནཾ པཀཱསེནྟིཡེཝ. ཏེནཱཧ ‘‘ཏཐཱརཱུཔེ ཀཱརཎེ སཏི ཨུཔསམྤནྣསྶ ཨཱརོཙཡཏོ’’ཏི. སུཏཔརིཡཏྟིསཱིལགུཎཾ པན ཨནུཔསམྤནྣསྶཔི ཨཱརོཙེཏུཾ ཝཊྚཏི. ཀསྨཱ ན ཨིདྷ ཨུམྨཏྟཀཱདཡོ གཧིཏཱཏི ཨཱཧ ‘‘ཡསྨཱ པནཱ’’ཏིཨཱདི. ཨཱདིསདྡེན ཁིཏྟཙིཏྟཝེདནཱཊྚཱནཾ གཧཎཾ. ཏསྨིཾ སཏཱིཏི ཨུམྨཏྟཀཱདིབྷཱཝེ སཏི. ཨིདྷ ན གཧིཏཱཏི ཨིམསྨིཾ སིཀྑཱཔདེ པདབྷཱཛནིཡཾ ན གཧིཏཱ. ཨཙིཏྟཀནྟི པཎྞཏྟིཛཱནནཙིཏྟཱབྷཱཝེན ཨཙིཏྟཀཾ. ཀུསལཱབྱཱཀཏཙིཏྟེཧི དྭིཙིཏྟ’’ནྟི ཨིདཾ ཨུཀྐཊྛཔརིཙྪེདེན ཨརིཡཔུགྒལེཡེཝ སནྡྷཱཡ ཝུཏྟཾ. ན ཧི པཎྞཏྟིཾ ཨཛཱནནྟཱ ཛྷཱནལཱབྷིནོ པུཐུཛྫནཱ ཝཏྠུམྷི ལོབྷཝསེན ཨཀུསལཙིཏྟེནཱཔི ན ཨཱརོཙེནྟཱིཏི. དུཀྑཝེདནཱཡ ཝཱ ཨབྷཱཝཏོ ‘‘དྭིཝེདན’’ནྟི ཨིམསྶ ཨནུརཱུཔཾ ཀཏྭཱ ཨེཝཾ ཝུཏྟནྟི དཊྛབྦཾ.

བྷཱུཏཱརོཙནསིཀྑཱཔདཝཎྞནཱ ནིཊྛིཏཱ.

༩. དུཊྛུལླཱརོཙནསིཀྑཱཔདཝཎྞནཱ

དྭིནྣཾ ¶ ‘ཨཱཔཏྟིཀྑནྡྷཱནནྟི པཱརཱཛིཀསངྒྷཱདིསེསསངྑཱཏཱནཾ དྭིནྣཾ ཨཱཔཏྟིཀྑནྡྷཱནཾ. ཨཱཡཏིཾ སཾཝརཏྠཱཡཱཏི ‘‘ཨེཝམེས པརེསུ ཧིརོཏྟཔྤེནཱཔི ཨཱཡཏིཾ ¶ སཾཝརཾ ཨཱཔཛྫིསྶཏཱི’’ཏི ཨཱཡཏིཾ སཾཝརཏྠཱཡ. ཨཱཔཏྟཱིནཉྩ ཀུལཱནཉྩ པརིཡནྟཾ ཀཏྭཱ ཝཱ ཨཀཏྭཱ ཝཱཏི ‘‘ཨེཏྟཀཱ ཨཱཔཏྟིཡོ ཨཱརོཙེཏབྦཱ, ཨེཏྟཀེསུ ཀུལེསུ ཨཱརོཙེཏབྦཱ’’ཏི ཨེཝཾ ཨཱཔཏྟཱིནཉྩ ཀུལཱནཉྩ པརིཡནྟཾ ཀཏྭཱ ཝཱ ཨཀཏྭཱ ཝཱ.

ཨདུཊྛུལླཱཡཱཏི པཱརཱཛིཀསངྒྷཱདིསེསཾ ཋཔེཏྭཱ ཨཝསེསཔཉྩཱཔཏྟིཀྑནྡྷསངྑཱཏཱཡ ཨདུཊྛུལླཱཡ ཨཱཔཏྟིཡཱ. ཨཝསེསེ ཚ ཨཱཔཏྟིཀྑནྡྷེཏི སངྒྷཱདིསེསཝཛྫིཏེ སེསེ ཚ ཨཱཔཏྟིཀྑནྡྷེ. པུརིམཔཉྩསིཀྑཱཔདཝཱིཏིཀྐམསངྑཱཏཾ དུཊྛུལླནྟི པཱཎཱཏིཔཱཏཝེརམཎིཨཱདིཀསྶ ཨཱདིཏོ པཉྩསིཀྑཱཔདསྶ ཝཱིཏིཀྐམསངྑཱཏཾ དུཊྛུལླཾ. ཨིཏརཾ ཨདུཊྛུལླཾ ཝཱ ཨཛ྄ཛྷཱཙཱརནྟི ཏཏོ ཨཉྙཾ ཝིཀཱལབྷོཛནཱདིཀཔཉྩཀཾ, སུཀྐཝིསཊྛིཀཱཡསཾསགྒདུཊྛུལླཨཏྟཀཱམཉྩེཏི ཨདུཊྛུལླཾ ཝཱ ཨཛ྄ཛྷཱཙཱརཾ. ཝཏྠུམཏྟནྟི ‘‘ཨཡཾ སུཀྐཝིསྶཊྛིཾ ཨཱཔནྣོ, དུཊྛུལླཾ, ཨཏྟཀཱམཾ, ཀཱཡསཾསགྒཾ ཨཱཔནྣོ’’ཏི ཨེཝཾ ཝཏྠུམཏྟཾ ཝཱ ཨཱརོཙེནྟསྶ. ཨཱཔཏྟིམཏྟནྟི ‘‘ཨཡཾ པཱརཱཛིཀཾ ཨཱཔནྣོ, སངྒྷཱདིསེསཾ, ཐུལླཙྩཡཾ, པཱཙིཏྟིཡཾ, པཱཊིདེསནཱིཡཾ, དུཀྐཊཾ, དུབྦྷཱསིཏཾ ཨཱཔནྣོ’’ཏི ཨེཝཾ ཨཱཔཏྟིམཏྟཾ ཝཱ ཨཱརོཙེནྟསྶ. ཝུཏྟལཀྑཎསྶཱཏི ‘‘པཱརཱཛིཀཾ ཨནཛ྄ཛྷཱཔནྣསྶཱ’’ཏི ཀངྑཱ. ཨཊྛ. དུཊྛུལླཱརོཙནསིཀྑཱཔདཝཎྞནཱ) ཨེཝཾ ཝུཏྟལཀྑཎསྶ. སཝཏྠུཀོཏི ཝཏྠུནཱ སཧ གྷཊིཏོ.

དུཊྛུལླཱརོཙནསིཀྑཱཔདཝཎྞནཱ ནིཊྛིཏཱ.

༡༠. པཐཝཱིཁཎནསིཀྑཱཔདཝཎྞནཱ

པཱསཱཎསཀྑརཀཐལམརུམྦཝཱལུཀཱདཱིསཱུཏི ཨེཏྠ མུཊྛིཔྤམཱཎཏོ ཨུཔརི པཱསཱཎཱཏི ཝེདིཏབྦཱ. མུཊྛིཔྤམཱཎཱ སཀྑརཱ. ཀཐལཱཏི ཀཔཱལཁཎྜཱནི. མརུམྦཱཏི ཀཊསཀྑརཱ. ཝཱལུཀཱ ཝཱལིཀཱཡེཝ. ཨཉྙཏརསྶ ཏཏིཡབྷཱགོ ཧོཏཱིཏི ཏཏིཡོ བྷཱགོ ཧོཏི. ཨིདཾ ཝུཏྟཾ ཧོཏི – ཡཏོ པཾསུཾ ཝཱ མཏྟིཀཾ ཝཱ ཨཱཧརཱཔེཏྭཱ ཝིསུཾ ཝིསུཾ ཀཏེ དྭེ ཀོཊྛཱསཱ པཾསུ ཝཱ མཏྟིཀཱ ཝཱ ཨེཀོ པཱསཱཎཱདཱིསུ ཨཉྙཏརོ ཧོཏི, ཨཡཾ མིསྶཀཔཐཝཱི ནཱམཱཏི. ཨོཝཊྛོ ནཱམ དེཝེན ཨོཝཊྛོ (པཱཙི. ༨༦). ཝུཏྟནྟི པདབྷཱཛནིཡཾ, སཱིཧལ༹ཊྛཀཐཱཡམེཝ ཝཱ ཝུཏྟཾ ¶ . ཨདྷིཀཏརཔཱསཱཎཱདིམིསྶཱཏི ¶ ཨདྷིཀཏརཔཱསཱཎཱདཱིཧི མིསྶཱ, ཨདཌྜྷཱཔི ཝུཏྟཔྤམཱཎཏོ ཨདྷིཀཏརཔཱསཱཎཱདིམིསྶཱཏི ཨདྷིཔྤཱཡོ. ཝཱ-སདྡོ ཨཝུཏྟཝིཀཔྤཏྠོ, ཏེན ཨཱུནཀཙཏུམཱསོཝཊྛཔཐཝིཾ སངྒཎྷཱཏི. སུདྡྷཔཱསཱཎཱདིབྷེདཱཡཱཏི སུདྡྷཱ པཱསཱཎཱ ཨེཏྠཱཏི སུདྡྷཔཱསཱཎཱ, སཱ ཨཱདི ཡསྶ བྷེདསྶ སོ སུདྡྷཔཱསཱཎཱདི. ཨཱདི-སདྡེན སུདྡྷསཀྑརཱདཱིནཾ གཧཎཾ. སུདྡྷཔཱསཱཎཱདིབྷེདོ ཡསྶཱ སཱ སུདྡྷཔཱསཱཎཱདིབྷེདཱ, ཏཱཡ སུདྡྷཔཱསཱཎཱདིབྷེདཱཡ, སུདྡྷཔཱསཱཎཱདིཔྤཀཱརཱཡཱཏི ཨཏྠོ.

སཡཾ ཁཎཏཱིཏི ཨེཏྠ ཡོ ཨནྟམསོ པཱདངྒུཊྛཀེནཔི ཁཎཏི, ཨུདཀམྤི ཚཌྜེནྟོ བྷིནྡཏི, པཱདངྒུཊྛཀེནཔི ཝིལིཁཏི, པཏྟམྤི པཙནྟོ དཧཏི, སོ སབྦོ ཁཎཏིཡེཝཱཏི ཝེདིཏབྦོ. ཏེནཱཧ ‘‘ཁཎནབྷེདནཝིལེཁནཔཙནཱདཱིཧི ཝིཀོཔེཏཱིཏི. པཏྟཾ པཙནྟེན (པཱཙི. ཨཊྛ. ༨༧) ཧི པུབྦེ པཀྐཊྛཱནེཡེཝ པཙིཏབྦོ. ཨདཌྜྷཱཡ པཐཝིཡཱ ཨགྒིཾ ཋཔེཏུཾ ན ཝཊྚཏི. པཏྟཔཙནཀཔཱལསྶ པན ཨུཔརི ཨགྒིཾ ཋཔེཏུཾ ཝཊྚཏི. དཱརཱུནཾ ཨུཔརི ཋཔེཏི, སོ ཨགྒི ཏཱནི དཧནྟོ གནྟྭཱ པཐཝིཾ དཧཏི, ན ཝཊྚཏི. ཨིཊྛཀཔཱསཱཎཱདཱིསུཔི ཨེསེཝ ནཡོ. ཏཏྲཱཔི ཧི ཨིཊྛཀཱདཱིནཾཡེཝ ཨུཔརི ཋཔེཏུཾ ཝཊྚཏི. ཀསྨཱ? ཏེསཾ ཨནུཔཱདཱནཏྟཱ. ན ཧི ཏཱནི ཨགྒིསྶ ཨུཔཱདཱནསངྑཾ གཙྪནྟི. སུཀྑཁཱཎུརུཀྑཱདཱིསུཔི ཨགྒིཾ དཱཏུཾ ན ཝཊྚཏི. སཙེ པན ‘‘པཐཝིཾ ཨཔཏྟམེཝ ནིབྦཱཔེཏྭཱ གམིསྶཱམཱི’’ཏི དེཏི, ཝཊྚཏི. པཙྪཱ ནིབྦཱཔེཏུཾ ན སཀྐོཏི, ཨཝིསཡཏྟཱ ཨནཱཔཏྟི. ཝུཏྟནཡེནེཝཱཏི ‘‘ཁཎནབྷེདནཝིལིཁནཔཙནཱདཱིཧཱི’’ཏི ཝུཏྟེནེཝ ནཡེན. ནིཡམེཏྭཱཏི སནྣིཊྛཱནཾ ཀཏྭཱ. ཨིཏརོཏི ཨཱཎཱཔཀོ.

‘‘པོཀྑརཎིཾ ཁཎཱ’’ཏི (པཱཙི. ཨཊྛ. ༨༦) ཝདཏི, ཝཊྚཏི. ཁཏཱཡེཝ པོཀྑརཎཱི ནཱམ ཧོཏི, ཏསྨཱ ཨཡཾ ཀཔྤིཡཝོཧཱརོ. ཨེས ནཡོ ‘‘ཝཱཔིཾ, ཏལཱ༹ཀཾ, ཨཱཝཱཊཾ ཁཎཱ’’ཏིཨཱདཱིསུཔི. ‘‘ཨིམཾ ཨོཀཱསཾ ཁཎ, ཨིམསྨིཾ ཨོཀཱསེ པོཀྑརཎིཾ ཁཎཱ’’ཏི པན ཝཏྟུཾ ན ཝཊྚཏི. ‘‘ཀནྡཾ ཁཎ མཱུལཾ ཁཎཱ’’ཏི ཨནིཡམེཏྭཱ ཝཏྟུཾ ཝཊྚཏི. ‘‘ཨིམཾ ཝལླིཾ ཁཎ, ཨིམསྨིཾ ཨོཀཱསེ ཀནྡཾ ཝཱ མཱུལཾ ཝཱ ཁཎཱ’’ཏི ཝཏྟུཾ ན ཝཊྚཏི. ཏེནཱཧ ‘‘ཨོཀཱསཾ ཨནིཡམེཏྭཱ…པེ… བྷཎནྟསྶཱ’’ཏི. ཨཱཏཔེན སུཀྑཀདྡམོ ཙ ཕལཏི, ཏཏྲ ཡོ ཧེཊྛཱ པཐཝིཡཱ ཨསམྦདྡྷོ, ཏམེཝ ཨཔནེཏུཾ ཝཊྚཏི. ཨེས ནཡོ གོཀཎྚཀེཔི ¶ . ཏེནཱཧ ‘‘ཨཱཏཔེན…པེ… ཨསམྦདྡྷ’’ནྟི. ཏཏྠ གོཀཎྚཀོ (པཱཙི. ཨཊྛ. ༨༦) ནཱམ གཱཝཱིནཾ ཁུརཙྪིནྣཀདྡམོ ཝུཙྩཏི. སཙེ པན ཧེཊྛིམཏལེན བྷཱུམིསམྦནྡྷོ, ཝིཀོཔེཏུཾ ན ཝཊྚཏི. བྷིཛྫིཏྭཱ པཏིཏནདིཏཊནྟི བྷིཛྫིཏྭཱ ནདིསཱམནྟཱ པཏིཏཾ ཨོམཀཙཱཏུམཱསཾ ཨོཝཊྛཾ ནདིཏཊཾ. སཙེ པན བྷིཛྫིཏྭཱ ཨུདཀེཡེཝ པཀཏི, དེཝེ ཨཏིརེཀཙཱཏུམཱསཾ ཨོཝཊྛེཔི ཨུདཀེཡེཝ ཨུདཀསྶ པཏིཏཏྟཱ ¶ ཝཊྚཏི. མཧནྟམྤི ནངྒལཙྪིནྣམཏྟིཀཱཔིཎྜནྟི མཧནྟམྤི ཀསིཏཊྛཱནེ ཧེཊྛཱ པཐཝིཡཱ ཨསམྦདྡྷཾ ནངྒལཙྪིནྣམཏྟིཀཱཔིཎྜཾ. ཨེཝམཱདིསདྡེན ཀཱུཊཱསིཉྩནཡོགྒཏནུཀཀདྡམཱདཱིནཾ གཧཎཾ. ཨསཉྩིཙྩ རུཀྑཱདིཔཝཊྚནེན བྷིནྡནྟསྶཱཏི པཱསཱཎརུཀྑཱདཱིནི ཝཱ པཝཊྚེནྟསྶ, ཀཏྟརདཎྜེན ཝཱ ཨཱཧཙྩ ཨཱཧཙྩ གཙྪནྟསྶ པཐཝཱི བྷིཛྫཏི, སཱ ‘‘ཏེན བྷིནྡིསྶཱམཱི’’ཏི ཨེཝཾ སཉྩིཙྩ ཨབྷིནྣཏྟཱ ཨསཉྩིཙྩ བྷིནྣཱ ནཱམ ཧོཏི, ཨིཏི ཨསཉྩིཙྩ རུཀྑཱདིཔྤཝཊྚནེན བྷིནྡནྟསྶ ཨནཱཔཏྟི. ཨསཏིཡཱ པཱདངྒུཊྛཀཱདཱིཧི ཝིལིཁནྟསྶཱཏི ཡོ ཨཉྙཝིཧིཏོ ཀེནཙི སདྡྷིཾ ཀིཉྩི ཀཐེནྟོ པཱདངྒུཊྛཀེན ཝཱ ཀཏྟརཡཊྛིཡཱ ཝཱ པཐཝིཾ ཝིལིཁནྟོ ཏིཊྛཏི, ཏསྶ ཨེཝཾ ཨསཏིཡཱ པཱདངྒུཊྛཀཱདཱིཧི ཝིལིཁནྟསྶ ཨནཱཔཏྟི.

པཐཝཱིཁཎནསིཀྑཱཔདཝཎྞནཱ ནིཊྛིཏཱ.

མུསཱཝཱདཝགྒོ པཋམོ.

༢. བྷཱུཏགཱམཝགྒོ

༡. བྷཱུཏགཱམསིཀྑཱཔདཝཎྞནཱ

‘‘བྷཝནྟཱི’’ཏི (སཱརཏྠ. ཊཱི. པཱཙིཏྟིཡ ༣.༩༠) ཨིམིནཱ ཝིརུལ༹ྷམཱུལེ ནཱིལབྷཱཝཾ ཨཱཔཛྫིཏྭཱ ཝཌྜྷམཱནཀེ ཏརུཎགཙྪེ དསྶེཏི. ‘‘ཨཧེསུ’’ནྟི ཨིམིནཱ པན ཝཌྜྷིཏྭཱ ཋིཏེ མཧནྟེ རུཀྑགཙྪཱདིཀེ དསྶེཏི. ཏེནཱཧ ‘‘ཛཱཡནྟཱི’’ཏིཨཱདི. ཨེཏྠ ཙ ‘‘བྷཝནྟཱི’’ཏི ཨིམསྶ ཝིཝརཎཾ ‘‘ཛཱཡནྟི ཝཌྜྷནྟཱི’’ཏི, ‘‘ཨཧེསུ’’ནྟི ཨིམསྶ ‘‘ཛཱཏཱ ཝཌྜྷིཏཱ’’ཏི. གཱམོཏི སམཱུཧོ. པཏིཊྛིཏཧརིཏཏིཎརུཀྑཱདཱིནནྟི བྷཱུམིཡཾ པཏིཊྛིཏསྶ ཧརིཏཏིཎསྶ ཙེཝ ཧརིཏརུཀྑཱདཱིནཉྩ. ཨཱདིསདྡེན ཨོསདྷིགཙྪལཏཱདཡོ ཝེདིཏབྦཱ. ནིམིཏྟཏྠེ ཙ བྷུམྨཾ. ཡོ ཨཏྠོ སམྤཛྫཏི, ཏམཱཧ ‘‘བྷཱུཏགཱམཔཱཏབྱཏཱཡཱ’’ཏིཨཱདིནཱ.

ནནུ ¶ ཙ རུཀྑཱདཡོ ཙིཏྟརཧིཏཏཱཡ ན ཛཱིཝཱ, ཙིཏྟརཧིཏཏཱ ཙ པརིཕནྡཱབྷཱཝཏོ, ཚིནྣེཔི ཝིརུཧནཏོ, ཝིསདིསཛཱཏིཀབྷཱཝཏོ, ཙཏུཡོནིཡཾ ཨཔརིཡཱཔནྣཏོ ཙ ཝེདིཏབྦཱ, ཝུཌྜྷི པན པཝཱལ༹སིལཱལཝཎཱནམྤི ཝིཛྫཏཱིཏི ན ཏེསཾ ཛཱིཝབྷཱཝེ ཀཱརཎཾ, ཝིསཡགྒཧཎཉྩ ནེསཾ པརིཀཔྤནཱམཏྟཾ ¶ སུཔནཾ ཝིཡ ཙིཉྩཱདཱིནཾ, ཏཐཱ དོཧལཱ༹དཡོ, ཨཐ ཀསྨཱ བྷཱུཏགཱམསྶ པཱཏབྱཏཱཡ པཱཙིཏྟིཡཾ ཨིཙྪིཏནྟི? སམཎཨསཱརུཔྤཏོ, ཏནྣིསྶིཏསཏྟཱནུརཀྑཎཏོ ཙ. ཏེནེཝཱཧ ‘‘ཛཱིཝསཉྙིནོ ཧི མོགྷཔུརིསཱ མནུསྶཱ རུཀྑསྨི’’ནྟིཨཱདི (པཱཙི. ༨༩). སཱསཔབཱིཛཀསེཝཱལམྤཱིཏི སཱསཔབཱིཛཀསངྑཱཏཾ སེཝཱལམྤི, སཱསཔསེཝཱལཾ, བཱིཛཀསེཝཱལམྤཱིཏི ཨཏྠོ. ཏཏྠ སཱསཔསེཝཱལོ ནཱམ སཱསཔམཏྟོ ཁུདྡཀསེཝཱལོ. བཱིཛཀསེཝཱལོ ནཱམ ཨུཔརི ཁུདྡཀཔཏྟོ ཧེཊྛཱ ཁུདྡཀམཱུལོ སེཝཱལོ.

མཱུལབཱིཛཁནྡྷབཱིཛཕལུ༹བཱིཛཨགྒབཱིཛབཱིཛབཱིཛཱནནྟི ཨེཏྠ མཱུལམེཝ བཱིཛཾ མཱུལབཱིཛཾ. ཨེཝཾ སེསེསུཔི. ཏཏྠ མཱུལབཱིཛཾ ཧལིདྡིཨཱདིཀཾ. ཁནྡྷབཱིཛཾ ཨསྶཏྠཱདིཀཾ. ཕལུ༹བཱིཛཾ ཨུཙྪུཨཱདིཀཾ. ཨགྒབཱིཛཾ ཧིརིཝེརཱདིཀཾ. བཱིཛཾབཱིཛཾ པུབྦཎྞཱདིཀཾ. བྷཱཛནགཏནྟི སརཱཝཱདིབྷཱཛནགཏཾ. ནིཀྑནྟཾ མཱུལམཏྟཾ ཨེཏསྨཱཏི ནིཀྑནྟམཱུལམཏྟཾ. མཏྟ སདྡེན ཙེཏྠ པཎྞསྶ ནིཀྑམནཾ པཊིཀྑིཔཏི. ཨེས ནཡོ ནིཀྑནྟཨངྐུརམཏྟནྟི ཨེཏྠཱཔི. སཙེ པན མཱུལཉྩ པཎྞཉྩ ནིགྒཏཾ, བྷཱུཏགཱམསངྑཾ གཙྪཏི. ཝིདཏྠིམཏྟཱ པཏྟཝཊྚི ནིགྒཙྪཏཱིཏི ཝིདཏྠིམཏྟཱ ཨནཱིལཝཎྞཱ པཏྟཝཊྚི ནིཀྑམཏི. ཏེནཱཧ ‘‘ནིཀྑནྟེ’’ཏིཨཱདི. ཧརིཏོ ན ཧོཏཱིཏི ནཱིལཝཎྞོ ན ཧོཏི. མུགྒཱདཱིནཾ པན པཎྞེསུ ཨུཊྛིཏེསུ, ཝཱིཧིཨཱདཱིནཾ ཝཱ ཨངྐུརེ ཧརིཏེ བྷཱུཏགཱམསངྒཧཾ གཙྪནྟི. ཨེས ནཡོ ཨམྦཊྛིཨཱདཱིསུ.

བྷཱུཏགཱམབཱིཛགཱམེཏི ཨེཏྠ བྷཱུཏགཱམཏོ ཝིཡོཛིཏཾ ཝིརུཧནསམཏྠམེཝ མཱུལབཱིཛཱདིཀཾ བཱིཛགཱམོ ནཱམཱཏི ཝེདིཏབྦཾ. ཨུབྷཡཏྠཱཏི བྷཱུཏགཱམབཱིཛགཱམེསུ. ཨཏཐཱསཉྙིསྶཱཏི ཨབྷཱུཏགཱམཱབཱིཛགཱམསཉྙིསྶ. ཀོ པན ཝཱདོ ཨབྷཱུཏགཱམཱབཱིཛགཱམེསུ ཨབྷཱུཏགཱམཱབཱིཛགཱམསཉྙིསྶ. ཨསཉྩིཙྩཱཏི པཱསཱཎརུཀྑཱདཱིནི ཝཱ པཝཊྚེནྟསྶ, སཱཁཾ ཝཱ ཀཌྜྷནྟསྶ, ཀཏྟརདཎྜེན ཝཱ བྷཱུམིཾ པཧརིཏྭཱ གཙྪནྟསྶ ཏིཎཱནི ཀུཔྤནྟི. ཏཱནི ཏེན ‘‘ཝིཀོཔེསྶཱམཱི’’ཏི ཨེཝཾ སཉྩིཙྩ ཨཝིཀོཔིཏཏྟཱ ཨསཉྩིཙྩ ཝིཀོཔིཏཱནི ནཱམ ཧོནྟི. ཨིཏི ཨསཉྩིཙྩ ཝིཀོཔེནྟསྶ ཨནཱཔཏྟི.

ཨསཏིཡཱཏི ¶ ཨཉྙཝིཧིཏོ ཀེནཙི སདྡྷིཾ ཀིཉྩི ཀཐེནྟོ པཱདངྒུཊྛཀེན ཝཱ ཧཏྠེན ཝཱ ཏིཎཾ ཝཱ ལཏཾ ཝཱ ཝིཀོཔེནྟོ ཏིཊྛཏི, ཨེཝཾ ཨསཏིཡཱ ཝིཀོཔེནྟསྶ ཨནཱཔཏྟི.

ཨཛཱནིཏྭཱཏི ཨེཏྠ ཨབྦྷནྟརེ ‘‘བཱིཛགཱམོ’’ཏི ཝཱ ‘‘བྷཱུཏགཱམོ’’ཏི ཝཱ ན ཛཱནཱཏི, ‘‘ཝིཀོཔེམཱི’’ཏི པན ཛཱནཱཏི. ཨེཝཾ ཏིཎེ ཝཱ པལཱལཔུཉྫེ ཝཱ ཁཎིཏྟིཾ ཝཱ ཀུདཱལཾ ཝཱ སངྒོཔནཏྠཱཡ ¶ ཋཔེཏི, ཌཡ྄ཧམཱནཧཏྠོ ཝཱ ཨགྒིཾ པཱཏེཏི. ཏཏྲ ཙེ ཏིཎཱནི ཚིཛྫནྟི ཝཱ ཌཡ྄ཧནྟི ཝཱ, ཨེཝཾ ཨཛཱནིཏྭཱ ཝིཀོཔེནྟསྶ ཨནཱཔཏྟི.

ཡེན ཀེནཙི ཨགྒིནཱཏི ཀཊྛགྒིགོམཡགྒིཨཱདཱིསུ ཡེན ཀེནཙི ཨགྒིནཱ, ཨནྟམསོ ལོཧཁཎྜེནཔི ཨཱདིཏྟེན. ‘‘ཀཔྤིཡ’’ནྟི ཝཏྭཱཝཱཏི ཡཱཡ ཀཱཡཙི བྷཱསཱཡ ‘‘ཀཔྤིཡ’’ནྟི ཝཏྭཱཝ. ཨེཝ-སདྡེན པཋམཾ ཨགྒིནཱ ཕུསིཏྭཱ པཙྪཱ ‘‘ཀཔྤིཡ’’ནྟི ཝཏྟུཾ ན ཝཊྚཏཱི’’ཏི དསྶེཏི. ‘‘པཋམཾ ཨགྒིཾ ནིཀྑིཔིཏྭཱ ཏཾ ཨནུདྡྷརིཏྭཱཝ ‘ཀཔྤིཡ’ནྟི ཝུཏྟེ པན ཝཊྚཏཱི’’ཏི (སཱརཏྠ. ཊཱི. པཱཙིཏྟིཡ ༣.༩༣) ཝདནྟི. ཨེས ནཡོ སེསེསུཔི. ཏཐེཝཱཏི ‘ཀཔྤིཡ’ནྟི ཝཏྭཱཝ. ཨསྶམཧིཾསསཱུཀརམིགགོརཱུཔཱནཾ པན ཁུརཱ ཨཏིཁིཎཱ, ཏསྨཱ ཏེཧི ན ཀཱཏབྦཾ, ཀཏམྤི ཨཀཏཾ ཧོཏཱིཏི ཨཱཧ ‘‘ཋཔེཏྭཱ གོམཧིཾསཱདཱིནཾ ཁུརེ’’ཏི. ཧཏྠིནཁཱ པན ཁུརཱ ན ཧོནྟི, ཏསྨཱ ཏེཧི ཝཊྚཏི. ཏིརཙྪཱནཱནནྟི སཱིཧབྱགྒྷདཱིཔིམཀྐཊཱནཾ, སཀུནྟཱནཉྩ. ཏེསཉྷི ནཁཱ ཏིཁིཎཱ ཧོནྟི, ཏསྨཱ ཏེཧི ཀཱཏབྦཾ. ‘‘ཨནྟམསོ ཚིནྡིཏྭཱ ཨཱཧཊེནཔཱི’’ཏི ཨིམིནཱ ཡེཧི ཀཱཏུཾ ཝཊྚཏི, ཏེཧི ཏཏྠཛཱཏཀེཧི ཀཱཏབྦནྟི ཨེཏྠ ཝཏྟབྦམེཝ ནཏྠཱིཏི དསྶེཏི. ‘‘སཏྠེ ཝུཏྟནཡེནེཝཱ’’ཏི ཨིམིནཱ ཚེདཾ ཝཱ ཝེདྷཾ ཝཱ དསྶེནྟེན ‘‘ཀཔྤིཡནྟི ཝཏྭཱཝཱ’’ཏི ཝུཏྟམཏིདིསཏི. ཨེཏྠ ཙ ཀིཉྩཱཔི ‘‘ཀཔྤིཡནྟི ཝཏྭཱཝ ཀཱཏབྦ’’ནྟིཨཱདིནཱ ཀཔྤིཡཾ ཀརོནྟེན ཀཏྟབྦཱཀཱརམེཝ དསྶིཏཾ, ཏཐཱཔི བྷིཀྑུནཱ ‘‘ཀཔྤིཡཾ ཀརོཧཱི’’ཏི ཝུཏྟེཡེཝ ཨནུཔསམྤནྣེན ‘‘ཀཔྤིཡ’’ནྟི ཝཏྭཱ ཨགྒིཔརིཛིཏཱདི ཀཱཏབྦནྟི གཧེཏབྦཾ. ཨཝཙནཾ པན ‘‘པུནཔི ཀཔྤིཡཾ ཀརོཧཱིཏི ཀཱརེཏྭཱཝ པརིབྷུཉྫིཏབྦ’’ནྟི པཋམམེཝ ཝུཏྟཏྟཱ.

ཨེཀསྨིཾ…པེ… ཀཔྤིཡེ ཀཏེ སབྦཾ ཀཏཾ ཧོཏཱིཏི ཨེཀཾཡེཝ ‘‘ཀཔྤིཡཾ ཀརོམཱི’’ཏི ཨདྷིཔྤཱཡེནཔི ཀཔྤིཡེ ཀཏེ ཨེཀཱབདྡྷཏྟཱ སབྦཾ ཀཏཾ ¶ ཧོཏི. དཱརུཀཾ ཝིཛ྄ཛྷཏཱིཏི ཛཱནིཏྭཱ ཝཱ ཨཛཱནིཏྭཱ ཝཱ ཝིཛ྄ཛྷཏི ཝཱ ཝིཛ྄ཛྷཱཔེཏི ཝཱ, ཝཊྚཏིཡེཝ. བྷཏྟསིཏྠེ ཝིཛ྄ཛྷཏཱིཏི ཨེཏྠཱཔི ཨེསེཝ ནཡོ. ཏཾ ཝིཛ྄ཛྷཏི, ན ཝཊྚཏཱིཏི ཝལླིཨཱདཱིནཾ བྷཱཛནགཏིཀཏྟཱཏི ཨདྷིཔྤཱཡོ. བྷིནྡཱཔེཏྭཱ ཀཔྤིཡཾ ཀཱརེཏབྦནྟི བཱིཛཏོ མུཏྟསྶ ཀཊཱཧསྶ བྷཱཛནགཏིཀཏྟཱ ཝུཏྟཾ. ཨབཱིཛནྟི ཨངྐུརཛནནསམཏྠབཱིཛརཧིཏཏརུཎམྦཕལཱདི. ཏེནཱཧ ‘‘ཡཾ པན ཕལཾ ཏརུཎཾ ཧོཏི, ཨབཱིཛ’’ནྟི. ནིབྦཏྟབཱིཛཾ ནཱམ བཱིཛཾ ནིབྦཏྟེཏྭཱ ཝིསུཾ ཀཏྭཱ པརིབྷུཉྫིཏུཾ སཀྐུཎེཡྻཾ ཨམྦཔནསཱདིཕལཾ. ཏེནཱཧ ‘‘བཱིཛཾ ཨཔནེཏྭཱ པརིབྷུཉྫིཏབྦ’’ནྟི. ཏཏྠ ཀཔྤིཡཀརཎཀིཙྩཾ ནཏྠི, སཡམེཝ ཀཔྤིཡཱནཱིཏི ཨདྷིཔྤཱཡོ.

བྷཱུཏགཱམསིཀྑཱཔདཝཎྞནཱ ནིཊྛིཏཱ.

༢. ཨཉྙཝཱདཀསིཀྑཱཔདཝཎྞནཱ

ཡམཏྠནྟི ¶ ‘‘ཏྭཾ ཀིར དུཀྐཊཱཔཏྟིཾ ཨཱཔནྣོ’’ཏིཨཱདིཀཾ ཡཾ ཀིཉྩི ཨཏྠཾ. ཏཏོ ཨཉྙནྟི པུཙྪིཏཏྠཏོ ཨཉྙམཏྠཾ. ཨཉྙེནཉྙཾ པཊིཙརཎསྶཱཏི ཝིནཡདྷརེན ཡཾ ཝཙནཾ དོསཔུཙྪནཏྠཾ ཝུཏྟཾ, ཏཏོ ཨཉྙེན ཝཙནེན པཊིཙྪཱདནསྶ. པཊིཙྪཱདནཏྠོཔི ཧི ཙརསདྡོ ཧོཏི ཨནེཀཏྠཏྟཱ དྷཱཏཱུནཾ. ཝུཏྟནྟི པཱལི༹ཡཾ ཝུཏྟཾ.

སཱཝསེསཾ ཨཱཔཏྟིཾ ཨཱཔནྣོཏི ཨེཏྠ ཋཔེཏྭཱ པཱརཱཛིཀཾ སེསཱ སཱཝསེསཱཔཏྟི ནཱམ, ཏཾ ཨཱཔནྣོ. ཨནུཡུཉྫིཡམཱནོཏི ‘‘ཀིཾ, ཨཱཝུསོ, ཨིཏྠནྣཱམཾ ཨཱཔཏྟིཾ ཨཱཔནྣོསཱི’’ཏི པུཙྪིཡམཱནོ. ཨཉྙེན ཝཙནེནཱཏི ‘‘ཀོ ཨཱཔནྣོ? ཀིཾ ཨཱཔནྣོ? ཀིསྨིཾ ཨཱཔནྣོ? ཀཐཾ ཨཱཔནྣོ? ཀཾ བྷཎཐ? ཀིཾ བྷཎཐཱ’’ཏི ཨཉྙེན ཝཙནེན. ཨཉྙནྟི ‘‘ཀིཾ ཏྭཾ ཨིཏྠནྣཱམཾ ཨཱཔཏྟིཾ ཨཱཔནྣོསཱི’’ཏིཨཱདིཀཾ ཨནུཡུཉྫཀཝཙནཾ. ཏཐཱ ཏཐཱ ཝིཀྑིཔཏཱིཏི ཏེན ཏེན པཀཱརེན ཝིཀྑིཔཏི. ཀིཾ ཝུཏྟཾ ཧོཏི? སོ (པཱཙི. ཨཊྛ. ༩༤) ཀིཉྩི ཝཱིཏིཀྐམཾ དིསྭཱ ‘‘ཨཱཝུསོ, ཨཱཔཏྟིཾ ཨཱཔནྣོསཱི’’ཏི སངྒྷམཛ྄ཛྷེ ཨཱཔཏྟིཡཱ ཨནུཡུཉྫིཡམཱནོ ‘‘ཀོ ཨཱཔནྣོ’’ཏི ཝདཏི. ཏཏོ ‘‘ཏྭ’’ནྟི ཝུཏྟེ ‘‘ཨཧཾ ཀིཾ ཨཱཔནྣོ’’ཏི ཝདཏི. ཨཐ ‘‘པཱཙིཏྟིཡཾ ཝཱ དུཀྐཊཾ ཝཱ’’ཏི ཝུཏྟེ ‘‘ཨཧཾ ཀིསྨིཾ ཨཱཔནྣོ’’ཏི ¶ ཝདཏི. ཏཏོ ‘‘ཨམུཀསྨིཾ ནཱམ ཝཏྠུསྨི’’ནྟི ཝུཏྟེ ‘‘ཨཧཾ ཀཐཾ ཨཱཔནྣོ, ཀིཾ ཀརོནྟོ ཨཱཔནྣོམྷཱི’’ཏི པུཙྪཏི. ཨཐ ‘‘ཨིདཾ ནཱམ ཀརོནྟོ ཨཱཔནྣོ’’ཏི ཝུཏྟེ ‘‘ཀཾ བྷཎཐཱ’’ཏི ཝདཏི. ཏཏོ ‘‘ཏཾ བྷཎཱམཱ’’ཏི ཝུཏྟེ ‘‘ཀིཾ བྷཎཐཱ’’ཏི ཨེཝམནེཀེཧི པཀཱརེཧི ཝིཀྑིཔཏཱིཏི ཝུཏྟཾ ཧོཏི.

ཡོ པན བྷིཀྑུ སཱཝསེསཾ ཨཱཔཏྟིཾ ཨཱཔནྣོ, ཏཾ ན ཀཐེཏུཀཱམོ ཏུཎྷཱིབྷཱཝེན ཝིཧེསེཏཱིཏི སམྦནྡྷོ. ཝིཧེསེཏཱིཏི ཙིརནིསཛྫཱཙིརབྷཱསནེཧི པིཊྛིཨཱགིལཱཡནཏཱལུསོསཱདིཝསེན སངྒྷཾ ཝིཧེསེཏི, པརིསྶམཾ ཏེསཾ ཀརོཏཱིཏི ཨཏྠོ. པརིསྶམོ ཧི ཝིཧེསཱ ནཱམ. ཨཉྙཝཱདཀཀམྨནྟི ཨཉྙཝཱདཀསྶ བྷིཀྑུནོ ཨཉྙཝཱདཀཱརོཔནཏྠཾ ཀཱཏབྦཾ ཉཏྟིདུཏིཡཀམྨཾ. ཝིཧེསཀཀམྨནྟི ཨེཏྠཱཔི ཨེསེཝ ནཡོ. ཏསྨིཾ སངྒྷེན ཀཏེཏི ཏསྨིཾ ཨཉྙཝཱདཀཀམྨེ ཙ ཝིཧེསཀཀམྨེ ཙ སངྒྷེན ཉཏྟིདུཏིཡཀམྨཝཱཙཱཡ ཀཏེ. ཏཐཱ ཀརོནྟཱནནྟི ཏཾ པཀཱརཾ ཀརོནྟཱནཾ, ཨཉྙཝཱདཀཉྩ ཝིཧེསཀཉྩ ཀརོནྟཱནནྟི ཨཏྠོ.

‘‘ཝིཧེསཀེཏི ཨཡམེཏྠ ཨནུཔཉྙཏྟཱི’’ཏི ཨཝཙནཉྩེཏྠ ‘‘ཨཱཔཏྟིཀརཱ ཙ ཧོཏི ཨཉྙཝཱདཀསིཀྑཱཔདཱདཱིསུ ཝིཡཱ’’ཏི (ཀངྑཱ. ཨཊྛ. པཋམཔཱརཱཛིཀཝཎྞནཱ) ཝུཏྟཏྟཱཡེཝ པཉྙཱཡཏཱིཏི ¶ ཀཏྭཱ. ཨེས ནཡོ ཨུཔརི སིཀྑཱཔདེསུ. དྷམྨཀམྨེ ཏིཀཔཱཙིཏྟིཡནྟི དྷམྨཀམྨེ དྷམྨཀམྨསཉྙིཝེམཏིཀཨདྷམྨཀམྨསཉྙཱིནཾ ཝསེན ཏཱིཎི པཱཙིཏྟིཡཱནི. ཨདྷམྨཀམྨེ ཏིཀདུཀྐཊནྟི ཨེཏྠཱཔི ཨེསེཝ ནཡོ. ཨནཱརོཔིཏེཏི ཀམྨཝཱཙཱཡ ཨནཱརོཔིཏེ, ཨཔྤཏིཊྛཱཔིཏེཏི ཨཏྠོ. གེལཉྙེནཱཏི ཡེན ཀཐེཏུཾ ན སཀྐོཏི, མུཁེ ཏཱདིསེན བྱཱདྷིནཱ. སངྒྷསྶ བྷཎྜནཱདཱིནི བྷཝིསྶནྟཱིཏི སངྒྷམཛ྄ཛྷེ ཀཐིཏེ ཏཔྤཙྩཡཱ སངྒྷསྶ བྷཎྜནཾ ཝཱ ཀལཧོ ཝཱ ཝིགྒཧོ ཝཱ ཝིཝཱདོ ཝཱ སངྒྷབྷེདོ ཝཱ སངྒྷརཱཛི ཝཱ བྷཝིསྶནྟཱིཏི ཨིམིནཱ ཝཱ ཨདྷིཔྤཱཡེན ན ཀཐེནྟསྶ. ཨེཏྠ ཙ ཨདྷམྨེནཱཏི ཨབྷཱུཏེན ཝཏྠུནཱ.

‘‘སམུཊྛཱནཱདཱིནི ཨདིནྣཱདཱནསདིསཱནཱི’’ཏི ཨཝིསེསཾ ཨཏིདིསིཏྭཱ ཝིསེསཾ དསྶེཏུཾ ‘‘ཨིདཾ པནཱ’’ཏིཨཱདི ཝུཏྟཾ. སིཡཱ ཀིརིཡཾ ཨཉྙེནཉྙཾ པཊིཙརནྟསྶ. སིཡཱ ཨཀིརིཡཾ ཏུཎྷཱིབྷཱཝེན ཝིཧེསེནྟསྶ.

ཨཉྙཝཱདཀསིཀྑཱཔདཝཎྞནཱ ནིཊྛིཏཱ.

༣. ཨུཛ྄ཛྷཱཔནཀསིཀྑཱཔདཝཎྞནཱ

ཡེན ¶ ཝཙནེནཱཏི ‘‘ཚནྡཱཡ ཨིཏྠནྣཱམོ ཨིདཾ ནཱམ ཀརོཏཱི’’ཏིཨཱདིཀེན ཡེན ཝཙནེན. ཏེནཱཧ ‘‘ཚནྡཱཡཱ’’ཏིཨཱདི. ཏཏྠ ཚནྡཱཡཱཏི ཚནྡེན པཀྑཔཱཏེན. ‘‘ཨཀྑརཱཡ ཝཱཙེཏཱི’’ཏིཨཱདཱིསུ (པཱཙི. ༤༦) ཝིཡ ལིངྒཝིཔལླཱསོ ཨེས. ཨིདཾ ནཱམ ཀརོཏཱིཏི ཨཏྟནོ སནྡིཊྛསམྦྷཏྟཱནཾ པཎཱིཏཾ སེནཱསནཾ ཝཱ པཉྙཔེཏི, བྷཏྟཱདིཀཾ ཝཱཏི ཨདྷིཔྤཱཡོ. སེནཱསནཔཉྙཱཔཀཱདིབྷེདནྟི ཨེཏྠ ཨཱདིསདྡེན བྷཏྟུདྡེསཀཡཱགུབྷཱཛཀཕལབྷཱཛཀཱདཱིནཾ གཧཎཾ. ཨནེཀཏྠཏྟཱ དྷཱཏཱུནཾ ཛྷེ-སདྡོ ཨོལོཀནཏྠོཔི ཧོཏཱིཏི ཨཱཧ ‘‘ཨཝཉྙཱཡ ཨོལོཀཱཔེནྟཱི’’ཏི. ཙིནྟནཏྠོཡེཝ ཝཱ གཧེཏབྦོཏི ཨཱཧ ‘‘ལཱམཀཏོ ཝཱ ཙིནྟཱཔེནྟཱི’’ཏི. ཏཐེཝ ཝདནྟཱཏི ‘‘ཚནྡཱཡ ཨིཏྠནྣཱམོ ཨིདཾ ནཱམ ཀརོཏཱི’’ཏིཨཱདཱིནི ཝདནྟཱ. ཝུཏྟནྟི པཱལི༹ཡཾ ཝུཏྟཾ. ‘‘ཁིཡྻནཀེ’’ཏི (པཱཙི. ཨཊྛ. ༡༠༥) ཨཡམེཏྠ ཨནུཔཉྙཏྟི.

ཨསམྨཏསྶཱཏི སངྒྷེན ཀམྨཝཱཙཱཡ ཨསམྨཏསྶ. ཀེཝལཾ ‘‘ཏཝེསོ བྷཱརོ’’ཏི སངྒྷེན ཨཱརོཔིཏབྷཱརསྶ, བྷིཀྑཱུནཾ ཝཱ ཕཱསུཝིཧཱརཏྠཱཡ སཡམེཝ བྷཱརཾ ཝཧནྟསྶ, ཡཏྲ ཝཱ དྭེ ཏཡོ བྷིཀྑཱུ ཝིཧརནྟི, ཏཏྲ ཏཱདིསཾ ཀམྨཾ ཀརོནྟསྶཱཏི ཨདྷིཔྤཱཡོ. ཡསྶ ཀསྶཙཱིཏི ཨུཔསམྤནྣསྶ ཝཱ ཨནུཔསམྤནྣསྶ ཝཱ ཡསྶ ཀསྶཙི. ཨནུཔསམྤནྣསྶ པན སམྨཏསྶ ཝཱ ཨསམྨཏསྶ ¶ ཝཱཏི ཨེཏྠ པན (པཱཙི. ཨཊྛ. ༡༠༦) ཀིཉྩཱཔི ཨནུཔསམྤནྣསྶ ཏེརས སམྨཏིཡོ དཱཏུཾ ན ཝཊྚནྟི, ཏཐཱཔི ཡོ ཨུཔསམྤནྣཀཱལེ ལདྡྷསམྨུཏིཀོ པཙྪཱ ཨནུཔསམྤནྣབྷཱཝེ ཋིཏོ, ཏཾ སནྡྷཱཡ ‘‘སམྨཏསྶ ཝཱ’’ཏི ཝུཏྟཾ. ཡསྶ པན བྱཏྟསྶ སཱམཎེརསྶ ཀེཝལཾ སངྒྷེན ཝཱ སམྨཏེན ཝཱ བྷིཀྑུནཱ ‘‘ཏྭཾ ཨིདཾ ཀམྨཾ ཀརོཧཱི’’ཏི བྷཱརོ ཀཏོ, ཏཾ སནྡྷཱཡ ‘‘ཨསམྨཏསྶ ཝཱ’’ཏི ཝུཏྟཾ. ཡསྨཱ ཨུཛ྄ཛྷཱཔནཉྩ ཁིཡྻནཉྩ མུསཱཝཱདཝསེན པཝཏྟཾ, ཏསྨཱ ཨཱདིཀམྨིཀསྶ ཨིམིནཱཝ ཨནཱཔཏྟི, མུསཱཝཱདེན པན ཨཱཔཏྟིཡེཝཱཏི གཧེཏབྦཾ.

ཨུཛ྄ཛྷཱཔནཀསིཀྑཱཔདཝཎྞནཱ ནིཊྛིཏཱ.

༤. པཋམསེནཱསནསིཀྑཱཔདཝཎྞནཱ

མཉྩཾ ¶ ཝཱཏི མསཱརཀོ, བུནྡིཀཱབདྡྷོ, ཀུལཱི༹རཔཱདཀོ, ཨཱཧཙྩཔཱདཀོཏི ཨིམེསུ ཙཏཱུསུ ཡཾ ཀཉྩི མཉྩཾ ཝཱ. པཱིཋཾ ཝཱཏི ཨེཏྠཱཔི ཨེསེཝ ནཡོ. བྷིསིཾ ཝཱཏི ཨུཎྞབྷིསི, ཙོལ༹བྷིསི, ཝཱཀབྷིསི, ཏིཎབྷིསི, པཎྞབྷིསཱིཏི ཨིམཱསུ པཉྩསུ བྷིསཱིསུ ཡཾ ཀཉྩི བྷིསིཾ ཝཱ. ཏེནཱཧ ‘‘མཉྩཱདཱིསཱུ’’ཏིཨཱདི. ཏཏྠ ‘‘མཉྩསངྑེཔེནཱ’’ཏི ཨིམིནཱ པཱིཋསངྑེཔཾ པཊིཀྑིཔཏི. ཀཔྤིཡཙམྨེནཱཏི མིགཱཛེལ༹ཀཙམྨེན. ཨེཏྠ པན མིགཙམྨེ ཨེཎིམིགོ, ཝཱཏམིགོ, པསདམིགོ, ཀུརུངྒམིགོ, མིགམཱཏུཀོ, རོཧིཏམིགོཏི ཨེཏེསཾཡེཝ ཙམྨཱནི ཝཊྚནྟི, ཨཉྙེསཾ པན –

མཀྐཊོ ཀཱལ༹སཱིཧོ ཙ, སརབྷོ ཀདལཱིམིགོ;

ཡེ ཙ ཝཱལ༹མིགཱ ཀེཙི, ཏེསཾ ཙམྨཾ ན ཝཊྚཏཱིཏི. (མཧཱཝ. ཨཊྛ. ༢༥༩);

ཏཏྠ ཝཱལ༹མིགཱཏི སཱིཧབྱགྒྷཨཙྪཏརཙྪཱ. ན ཀེཝལཉྩ ཨེཏེཡེཝ, ཡེསཾ པན ཙམྨཾ ཝཊྚཏཱིཏི ཝུཏྟཾ, ཏེ ཋཔེཏྭཱ ཨཝསེསཱ ཨནྟམསོ གོམཧིཾསསསབིལཱ༹རཱདཡོཔི སབྦེ ཨིམསྨིཾ ཨཏྠེ ‘‘ཝཱལ༹མིགཱ’’ཏྭེཝ ཝེདིཏབྦཱ. ཨེཏེསཉྷི སབྦེསཾ ཙམྨཾ ན ཝཊྚཏི. ཏཱལཱིསཔཏྟནྟི སུདྡྷཾ ཏམཱལཔཏྟཾ, ཨཉྙེན མིསྶཾ པན ཝཊྚཏི. ཏིཎཝཱཀཙོལེ༹སུ ཨཀཔྤིཡཾ ནཱམ ནཏྠི. ཀིཾ པནེཏྠ བིབྦོཧནེ ཝིཡ ནིསཱིདིཏུཉྩ ནིཔཛྫིཏུཉྩ ན ཝཊྚཏཱིཏི ཨཱཧ ‘‘ཏཏྠཱ’’ཏིཨཱདི. ན ཀེཝལཉྩེདམེཝཱཏི ཨཱཧ ‘‘པམཱཎཔརིཙྪེདོཔི ཙེཏྠ ནཏྠཱི’’ཏི, ‘‘ཨེཏྟཀམེཝ ཀཱཏབྦ’’ནྟི བྷིསིཡཱ ¶ པམཱཎནིཡམོཔི ནཏྠཱིཏི ཨཏྠོ. མཉྩབྷིསིཔཱིཋབྷིསིབྷཱུམཏྠརཎབྷིསིཙངྐམནབྷིསིཔཱདཔུཉྪནབྷིསཱིཏི ཨེཏཱསཾ པན ཨནུརཱུཔཏོ སལླཀྑེཏྭཱ ཨཏྟནོ རུཙིཝསེན པམཱཎཾ ཀཱཏབྦཾ. ཨནྟོ སཾཝེལླིཏྭཱ བདྡྷནྟི ཡཐཱ ཝེམཛ྄ཛྷཾ སཾཁིཏྟཾ ཧོཏི, ཨེཝཾ མཛ྄ཛྷེ སུཊྛུ ཝེཋེཏྭཱ བདྡྷཾ.

ཡེ ཨཊྛ མཱསཱཏི སམྦནྡྷོ. ‘‘ཨཝསྶིཀསངྐེཏཱ’’ཏི ཨེཏསྶེཝ ཝིཝརཎཾ ‘‘ཝསྶཱནམཱསཱཏི ཨེཝཾ ཨཔཉྙཱཏཱ’’ཏི, ཨཔྤཏིཏཱ ཨཔྤསིདྡྷཱཏི ཨཏྠོ. ‘‘ཨསཉྙིཏཱ’’ཏིཔི པཱཋོ, ཏཏྠ ཨཝིཉྙཱཏཱཏི ཨཏྠོ. ཨཊྛ མཱསཱཏི ཙཏྟཱརོ ཧེམནྟིཀཱ, ཙཏྟཱརོ གིམྷིཀཱ མཱསཱཏི ཨཊྛ མཱསཱ. ཨོཝསྶཀམཎྜཔེཏི སཱཁཱམཎྜཔཔདརམཎྜཔཱནཾ ཡཏྠ ཀཏྠཙི ཨོཝསྶཀེ མཎྜཔེ. ཡཏྠཱཏི ཡེསུ ཛནཔདེསུ. སབྦཏྠཱཏི སབྦེསུ ཛནཔདེསུ ¶ . ཀཱཀཱདཱིནཾ ནིབདྡྷཝཱསརུཀྑམཱུལེཏི ཡཏྠ དྷུཝནིཝཱསེན ཀཱཀཱ ཝཱ ཀུལཱལཱ ཝཱ ཨཉྙེ ཝཱ སཀུནྟཱ ཀུལཱཝཀེ ཀཏྭཱ ཝསནྟི, ཏཱདིསསྶ ཀཱཀཱདཱིནཾ ནིབདྡྷཝཱསསྶ ཡསྶ ཀསྶཙི རུཀྑསྶ ཧེཊྛཱ. ཡཏྠ པན གོཙརཔྤསུཏཱ སཀུནྟཱ ཝིསྶམིཏྭཱ གཙྪནྟི, ཏསྶ རུཀྑསྶ མཱུལེ ནིཀྑིཔིཏུཾ ཝཊྚཏི. ‘‘ཀདཱཙིཔཱི’’ཏི ཨིམིནཱ ན ཀེཝལཾ ཝསྶིཀསངྐེཏེཡེཝཱཏི དསྶེཏི. ཡཏྠཱཏི ཡསྨིཾ པདེསེ. ཡདཱཏི ཡསྨིཾ ཀཱལེ.

སོཏི ཡསྶཏྠཱཡ སནྠཏོ, སོ. པཀཏིསནྠཏེཏི པཀཏིཡཱཝ སནྠཏེ, ཡཾ ནེཝཏྟནཱ སནྠཏཾ, ན པརེན སནྠརཱཔིཏཾ, ཏསྨིནྟི ཝུཏྟཾ ཧོཏི. ལཛྫཱི ཧོཏཱིཏི ལཛྫནསཱིལོ ཧོཏི, པརིཀྑཱརཝིནཱསནེ བྷཱིཏོཏི ཨཏྠོ. ཏེནཱཧ ‘‘ཨཏྟནོ པལིབོདྷཾ ཝིཡ མཉྙཏཱི’’ཏི, ཨིམིནཱ ཨལཛྫིཾ ཨཱཔུཙྪིཏྭཱ གནྟུཾ ན ཝཊྚཏཱིཏི དསྶེཏི. ནིརཔེཀྑོཏི ‘‘ཨཱགནྟྭཱ ཨུདྡྷརིསྶཱམཱི’’ཏི ཨཔེཀྑཱརཧིཏོ, ཨིམིནཱ སཱཔེཀྑོ ཙེ གཙྪཏི, ཨནཱཔཏྟཱིཏི དསྶེཏི. ཏེནེཝ ཧི ཨནཱཔཏྟིཝཱརེ ‘‘ཨོཏཱཔེནྟོ གཙྪཏཱི’’ཏི (པཱཙི. ༡༡༣) ཝུཏྟཾ. ཨཉྙཏྠ གཙྪནྟོཏི ཏཾ མགྒཾ ཨཏིཀྐམིཏྭཱ ཨཉྙཏྠ གཙྪནྟོ. ལེཌྜུཔཱཏཱུཔཙཱརཏོ བཧི ཋིཏཏྟཱ ‘‘པཱདུདྡྷཱརེན ཀཱརེཏབྦོ’’ཏི ཝུཏྟཾ, ཨཉྙཏྠ གཙྪནྟསྶ པཋམཔཱདུདྡྷཱརེ དུཀྐཊཾ, དུཏིཡཔཱདུདྡྷཱརེ པཱཙིཏྟིཡནྟི ཨཏྠོ.

ཏིཀཔཱཙིཏྟིཡཾ སངྒྷིཀེ སངྒྷིཀསཉྙིཝེམཏིཀཔུགྒལིཀསཉྙཱིནཾ ཝསེན. ཨིམིནཱཝ ནཡེན ཏིཀདུཀྐཊམྤི ཝེདིཏབྦཾ. ཙིམིལིཀཱདཱིནཾ ཨཏྠོ དུཏིཡསིཀྑཱཔདེ དསྶིཏོཝ. པཱདཔུཉྪནཱི (པཱཙི. ཨཊྛ. ༡༡༢) ནཱམ རཛྫུཀེཧི ཝཱ པིལོཏིཀཱཧི ཝཱ པཱདཔུཉྪནཏྠཾ ཀཏཱ. ཕལཀཔཱིཋཾ ནཱམ ཕལཀམཡཾ པཱིཋཾ. ན ཀེཝལཾ ཙིམིལིཀཱདཱིནིཡེཝ ཨཛ྄ཛྷོཀཱསེ ཋཔེཏྭཱ གཙྪནྟསྶ དུཀྐཊནྟི ཨཱཧ ‘‘ཡཾ ཝཱ པནཱ’’ཏིཨཱདི. ཡཾ ཀིཉྩི དཱརུབྷཎྜཾ, ཡཾ ཀིཉྩི མཏྟིཀཱབྷཎྜནྟི ¶ སམྦནྡྷོ. ‘‘ཨནྟམསོ པཏྟཱདྷཱརཀམྤཱི’’ཏི ཨིམིནཱ ཏཱལཝཎྚབཱིཛནིཔཏྟཔཱནཱིཡཨུལ༹ཨུངྐཔཱནཱིཡསངྑཱདཱིསུ ཝཏྟབྦམེཝ ནཏྠཱིཏི དསྶེཏི.

ཨརཉྙེ (པཱཙི. ཨཊྛ. ༡༡༠) པཎྞཀུཊཱིསུ ཝསནྟཱནཾ སཱིལསམྤདཱཡ པསནྣཙིཏྟཱ མནུསྶཱ མཉྩཔཱིཋཱདཱིནི དེནྟི ‘‘སངྒྷིཀཔརིབྷོགེན པརིབྷུཉྫཐཱ’’ཏི, ཏཏྠ ཀིཾ ཀཱཏབྦནྟི ཨཱཧ ‘‘ཨཱརཉྙཀེན པནཱ’’ཏིཨཱདི. ཏཏྠ ཨསཏི ཨནོཝསྶཀེཏི པབྦྷཱརཱདིཨནོཝསྶཀཊྛཱནེ ཨསཏི. ཨིདཉྩ ལཀྑཎཝཙནཾ ‘‘སབྷཱགཱནཾ ¶ ཨབྷཱཝེ’’ཏི ཙ ཨིཙྪིཏབྦཏྟཱ. ཨཱརཉྙཀེན ཧི བྷིཀྑུནཱ ཏཏྠ ཝསིཏྭཱ ཨཉྙཏྠ གཙྪནྟེན སཱམནྟཝིཧཱརེ བྷིཀྑཱུནཾ པེསེཏྭཱ གནྟབྦཾ. སབྷཱགཱནཾ ཨབྷཱཝེ ཨནོཝསྶཀེ ནིཀྑིཔིཏྭཱ གནྟབྦཾ. ཨནོཝསྶཀེ ཨསཏི རུཀྑེ ལགྒེཏྭཱ གནྟབྦཾ.

ན ཀེཝལཾ ཨིདཾཡེཝ ཀཏྭཱ གནྟུཾ ཝཊྚཏཱིཏི ཨཱཧ ‘‘ཡཐཱ ཝཱ’’ཏིཨཱདི. ཡཐཱ ཝཱ ཨུཔཙིཀཱཧི ན ཁཛྫཏཱིཏི ཡཐཱ ཋཔིཏེ ཨུཔཙིཀཱཧི སེནཱསནཾ ན ཁཛྫཏི, ཨེཝཾ ཏཐཱ པཱསཱཎཱནཾ ཨུཔརི ཋཔནཾ ཀཏྭཱཏི ཨཏྠོ. ཨིདཾ ཝུཏྟཾ ཧོཏི – ཙཏཱུསུ (པཱཙི. ཨཊྛ. ༡༡༦) པཱསཱཎེསུ མཉྩཾ ཋཔེཏྭཱ མཉྩེ ཨཝསེསམཉྩཔཱིཋཱནི ཨཱརོཔེཏྭཱ ཨུཔརི བྷིསིཨཱདིཀཾ རཱསིཾ ཀཏྭཱ དཱརུབྷཎྜཾ མཏྟིཀཱབྷཎྜཾ པཊིསཱམེཏྭཱ གམིཀཝཏྟཾ པཱུརེཏྭཱ གནྟབྦནྟི.

ཨབྦྷོཀཱསིཀེནཱཔི ‘‘ཨཧཾ ཨུཀྐཊྛཨབྦྷོཀཱསིཀོ’’ཏི ཙཱིཝརཀུཊིམྤི ཨཀཏྭཱ ཨསམཡེ ཨཛ྄ཛྷོཀཱསེ པཉྙཔེཏྭཱ ནིསཱིདིཏུཾ ཝཱ ནིཔཛྫིཏུཾ ཝཱ ན ཝཊྚཏཱིཏི དསྶེནྟོ ཨཱཧ ‘‘ཨབྦྷོཀཱསིཀེནཱ’’ཏིཨཱདི. སཙེ པན ཙཏུགྒུཎེནཔི ཙཱིཝརེན ཀཏཀུཊི ཨཏེམེནྟཾ རཀྑིཏུཾ ནེཝ སཀྐོཏི, སཏྟཱཧཝདྡལིཀཱདཱིནི བྷཝནྟི, བྷིཀྑུནོ ཀཱཡཱནུགཏིཀཏྟཱ ཝཊྚཏི. རུཀྑམཱུལིཀསྶཱཔི ཨེསེཝ ནཡོ.

ཡསྨིཾ ཝིསྶཱསགྒཱཧོ རུཧཏི, ཏསྶ སནྟཀཾ ཨཏྟནོ པུགྒལིཀམིཝ ཧོཏཱིཏི ཨཱཧ ‘‘ཝིསྶཱསིཀཔུགྒལིཀེ’’ཏི. ཡསྨིཾ པན ཝིསྶཱསོ ན རུཧཏི, ཏསྶ སནྟཀེ དུཀྐཊམེཝ. ཨམནུསྶོཏི ཡཀྑོ ཝཱ པེཏོ ཝཱ. པལིབུདྡྷཾ ཧོཏཱིཏི ཨུཔདྡུཏཾ ཧོཏི.

པཋམསེནཱསནསིཀྑཱཔདཝཎྞནཱ ནིཊྛིཏཱ.

༥. དུཏིཡསེནཱསནསིཀྑཱཔདཝཎྞནཱ

ཡཾ ¶ ཀིཉྩི ཙམྨནྟི ཀཔྤིཡཱཀཔྤིཡཾ ཡཾ ཀིཉྩི ཙམྨཾ. ནནུ ‘‘ན, བྷིཀྑཝེ, མཧཱཙམྨཱནི དྷཱརེཏབྦཱནི སཱིཧཙམྨཾ བྱགྒྷཙམྨཾ དཱིཔིཙམྨཾ, ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༢༥༥) ཁནྡྷཀེ སཱིཧཙམྨཱདཱིནཾ པཊིཀྑེཔོ ཀཏོཏི ཨཱཧ ‘‘སཱིཧཙམྨཱདཱིནཉྷཱི’’ཏིཨཱདི. པརིཧརཎེཡེཝ པཊིཀྑེཔོཏི ཨཏྟནོ སནྟཀཾ ¶ ཀཏྭཱ ཏཾ ཏཾ ཝིཧཱརཾ ཧརིཏྭཱ མཉྩཔཱིཋཱདཱིསུ ཨཏྠརིཏྭཱ པརིབྷོགེཡེཝ པཊིཀྑེཔོ, སེནཱསནསནྟཀཾ ཀཏྭཱ བྷཱུམཏྠརཎཝསེན པན པརིབྷོགེ ནེཝཏྠི དོསོ. ཏེནཱཧ ‘‘སེནཱསནཔརིབྷོགེ པན ཨཀཔྤིཡཙམྨཾ ནཱམ ནཏྠཱི’’ཏི. པཱཝཱརེནྟི སཉྪཱདེནྟི སརཱིརཾ ཨེཏེནཱཏི པཱཝཱརོ. ཀོཛཝོཏི ཨུདྡལོམིཨེཀནྟལོམིཨཱདིཀོཛཝཏྠརཎཾ. སེསནྟི བྷིསི ནིསཱིདནཾ ཏིཎསནྠཱརོ པཎྞསནྠཱརོཏི ཨཝསིཊྛཾ སེནཱསནཾ. ཏཏྠ བྷིསཱིཏི མཉྩཀབྷིསི ཝཱ པཱིཋཀབྷིསི ཝཱ. ནིསཱིདནནྟི སདསཾ ཝེདིཏབྦཾ. ཏིཎསནྠཱརོཏི ཡེསཾ ཀེསཉྩི ཏིཎཱནཾ སནྠཱརོ. ཨེས ནཡོ པཎྞསནྠཱརེ. ཨེཏྠ ཙ བྷིསི ཧེཊྛཱ ཝུཏྟཏྟཱ པཱཀཊཱ. ནིསཱིདནཾ ནིསཱིདནསིཀྑཱཔདེནེཝ (པཱཙི. ༥༣༡ ཨཱདཡོ) པཱཀཊཾ. ཏིཎསནྠཱརཔཎྞསནྠཱརཱནི པན ལོཀཔསིདྡྷཱནིཡེཝ. ཏེནེཝཱཧ ‘‘པཱཀཊམེཝཱ’’ཏི.

ནེཝ ཨུདྡྷརེཡྻ, ན ཨུདྡྷརཱཔེཡྻཱཏི ཨཏྟནཱ ཝཱ ཨུདྡྷརིཏྭཱ པཏིརཱུཔེ ཋཱནེ ན ཋཔེཡྻ, པརེན ཝཱ ཏཐཱ ན ཀཱརེཡྻ. ཏེནཱཧ ‘‘ཡཐཱ ཋཔིཏ’’ནྟིཨཱདི. ཏཾ ཋཔེནྟེན ཙ ‘‘ཙཏཱུསུ པཱསཱཎེསཱུ’’ཏིཨཱདིནཱ (པཱཙི. ཨཊྛ. ༡༡༦) པུབྦེ ཝུཏྟནཡེནེཝ ཨནྟོགེཧེ ཨནོཝསྶཀེ ནིཀྑིཔིཏབྦཾ. སཙེ པན སེནཱསནཾ ཨོཝསྶཏི, ཚདནཏྠཉྩ ཏིཎཾ ཝཱ ཨིཊྛཀཱ ཝཱ ཨཱནཱིཏཱ ཧོནྟི. སཙེ ཨུསྶཧཏི, ཚཱདེཏབྦཾ. ནོ ཙེ སཀྐོཏི, ཡོ ཨོཀཱསོ ཨནོཝསྶཀོ, ཏཏྠ ནིཀྑིཔིཏབྦཾ. སཙེ སབྦམྤི ཨོཝསྶཏི, ཨུསྶཧནྟེན ཨནྟོགཱམེ ཨུཔཱསཀཱནཾ གྷརེ ཋཔེཏབྦཾ. སཙེ ཏེཔི ‘‘སངྒྷིཀཾ ནཱམ, བྷནྟེ, བྷཱརིཡཾ, ཨགྒིདཱཧཱདཱིནཾ བྷཱཡཱམཱ’’ཏི ན སམྤཊིཙྪནྟི, ཨཛ྄ཛྷོཀཱསེ པཱསཱཎཱནཾ ཨུཔརི མཉྩཾ ཋཔེཏྭཱ སེསཾ པུབྦེ ཝུཏྟནཡེནེཝ ནིཀྑིཔིཏྭཱ ཏིཎེཧི ཙ པཎྞེཧི ཙ པཊིཙྪཱདེཏབྦཾ. ཡཉྷི ཏཏྠ ཨངྒམཏྟམྤི ཨཝསིསྶཏི, ཏཾ ཨཉྙེསཾ ཏཏྠ ཨཱགཏཱནཾ བྷིཀྑཱུནཾ ཨུཔཀཱརཾ བྷཝིསྶཏཱིཏི. ཨུཔཙཱརནྟི སབྦཔཙྪིམསེནཱསནཏོ དྭེ ལེཌྜུཔཱཏཱ.

ཨཡམེཏྠ ཨཱཔུཙྪིཏབྦཱནཱཔུཙྪིཏབྦཝིནིཙྪཡོ – (པཱཙི. ཨཊྛ. ༡༡༨) ཡཱ ཏཱཝ བྷཱུམིཡཾ དཱིགྷསཱལཱ ཝཱ པཎྞསཱལཱ ཝཱ ཧོཏི, ཡཾ ཝཱ རུཀྑཏྠམྦྷེསུ ཀཏགེཧཾ ཨུཔཙིཀཱནཾ ཨུཊྛཱནཊྛཱནཾ ཧོཏི, ཏཏོ པཀྐམནྟེན ཨཱཔུཙྪིཏྭཱཝ པཀྐམིཏབྦཾ. ཏསྨིཉྷི ཀཏིཔཡཱནི དིཝསཱནི ཨཛགྒིཡམཱནེ ཝམྨིཀཱཝ སནྟིཊྛནྟི. ཡཾ པན པཱསཱཎཔིཊྛིཡཾ ཝཱ པཱསཱཎཏྠམྦྷེསུ ཝཱ ¶ ཀཏསེནཱསནཾ སིལུཙྩཡལེཎཾ ཝཱ སུདྷཱལིཏྟསེནཱསནཾ ཝཱ, ཡཏྠ ཨུཔཙིཀཱསངྐཱ ནཏྠི, ཏཏོ ¶ པཀྐམནྟསྶ ཨཱཔུཙྪིཏྭཱཔི ཨནཱཔུཙྪིཏྭཱཔི གནྟུཾ ཝཊྚཏི. ཏེནཱཧ ‘‘ཡཏྠ པནཱ’’ཏིཨཱདི. སཙེ ཏཱདིསེཔི སེནཱསནེ ཨེཀེན པསྶེན ཨུཔཙིཀཱ ཨཱརོཧནྟི, ཨཱཔུཙྪིཏྭཱཝ གནྟབྦཾ. ཨཱཔུཙྪནཾ པན ཝཏྟནྟི ཨཱཔུཙྪནཾ གམིཀཝཏྟཾ. ཨིདཉྩ ཨིཏིཀཏྟབྦཏཱདསྶནཏྠཾ ཝུཏྟཾ, ན པན ཝཏྟབྷེདདུཀྐཊནྟི (སཱརཏྠ. ཊཱི. པཱཙིཏྟིཡ ༣.༡༡༨) དསྶནཏྠཾ. ཀེཙི པན ‘‘དུཀྐཊནྟི དསྶནཏྠ’’ནྟི ཝདནྟི, ཏཾ ན ཡུཛྫཏི ཝཏྟཀྑནྡྷཀཊྛཀཐཱཡ ‘‘ཡཾ པཱསཱཎཔིཊྛིཡཾ ཝཱ པཱསཱཎཏྠམྦྷེསུ ཝཱ ཀཏསེནཱསནཾ, ཡཏྠ ཨུཔཙིཀཱནཱརོཧནྟི, ཏཾ ཨནཱཔུཙྪནྟསྶཱཔི ཨནཱཔཏྟཱི’’ཏི (ཙཱུལ༹ཝ. ཨཊྛ. ༣༦༠) ཝུཏྟཏྟཱ. ཨཱཔུཙྪནྟེན པན བྷིཀྑུམྷི (པཱཙི. ཨཊྛ. ༡༡༦) སཏི བྷིཀྑུ ཨཱཔུཙྪིཏབྦོ, ཏསྨིཾ ཨསཏི སཱམཎེརོ, ཏསྨིཾ ཨསཏི ཨཱརཱམིཀོ, ཏསྨིམྤི ཨསཏི ཡེན ཝིཧཱརོ ཀཱརཱཔིཏོ, སོ ཝིཧཱརསཱམིཀོ, ཏསྶ ཝཱ ཀུལེ ཡོ ཀོཙི ཨཱཔུཙྪིཏབྦོ.

‘‘ཨུཔཙཱརེ’’ཏི ཨེཏསྶེཝ ཝིཝརཎཾ ‘‘བཧི ཨཱསནྣེ’’ཏི, ཝིཧཱརསྶ བཧི ཨཱསནྣཊྛཱནེཏི ཨཏྠོ. ཨུཔཊྛཱནསཱལཱཡ ཝཱཏི བྷོཛནསཱལཱཡཾ ཝཱ. དུཀྐཊམེཝཱཏི ཝུཏྟཔྤཀཱརཉྷི དསཝིདྷཾ སེཡྻཾ ཨནྟོགབྦྷཱདིམྷི གུཏྟཊྛཱནེ པཉྙཔེཏྭཱ གཙྪནྟསྶ ཡསྨཱ སེཡྻཱཔི སེནཱསནམྤི ཨུཔཙིཀཱཧི པལུཛྫཏི, ཝམྨིཀརཱསིཡེཝ ཧོཏི, ཏསྨཱ པཱཙིཏྟིཡཾ ཝུཏྟཾ. བཧི པན ཨུཔཊྛཱནསཱལཱདཱིསུ པཉྙཔེཏྭཱ གཙྪནྟསྶ སེཡྻཱམཏྟམེཝ ནསྶེཡྻ ཋཱནསྶ ཨགུཏྟཏཱཡ, ན སེནཱསནཾ, ཏསྨཱ ཨེཏྠ དུཀྐཊཾ ཝུཏྟཾ. མཉྩཔཱིཋཾ པན ཡསྨཱ ན སཀྐཱ སཧསཱ ཨུཔཙིཀཱཧི ཁཱཡིཏུཾ, ཏསྨཱ ཏཾ ཝིཧཱརེཔི སནྠརིཏྭཱ གཙྪནྟསྶ དུཀྐཊཾ ཝུཏྟཾ. ཝིཧཱརཱུཔཙཱརེ པན ཏཾ ཝིཧཱརཙཱརིཀཾ ཨཱཧིཎྜནྟཱ དིསྭཱཝ པཊིསཱམེནྟི.

ཨུདྡྷརཎཱནི ཀཏྭཱཏི ཨེཏྠ ཨུདྡྷརིཏྭཱ གཙྪནྟེན མཉྩཔཱིཋཀཝཱནཾ སབྦཾ ཨཔནེཏྭཱ (པཱཙི. ཨཊྛ. ༡༡༨) སཾཧརིཏྭཱ ཙཱིཝརཝཾསེ ལགྒེཏྭཱ གནྟབྦཾ. པཙྪཱ ཨཱགནྟྭཱ ཝསནཀབྷིཀྑུནཱཔི པུན མཉྩཔཱིཋཾ ཝཱ པཉྙཔེཏྭཱ སཡིཏྭཱ གཙྪནྟེན ཏཐེཝ ཀཱཏབྦཾ. ཨནྟོཀུཊྚཏོ སེཡྻཾ བཧིཀུཊྚེ པཉྙཔེཏྭཱ ཝསནྟེན གམནཀཱལེ པུན གཧིཏཊྛཱནེཡེཝ པཊིསཱམེཏབྦཾ. ཨུཔརིཔཱསཱདཏོ ཨོརོཔེཏྭཱ ཧེཊྛཱཔཱསཱདེ ཝསནྟསྶཱཔི ཨེསེཝ ནཡོ. རཏྟིཊྛཱནདིཝཱཊྛཱནེསུ མཉྩཔཱིཋཾ པཉྙཔེཏྭཱཔི གམནཀཱལེ པུན གཧིཏཊྛཱནེཡེཝ ཋཔེཏབྦཾ. ཨུདྡྷརཱཔེཏྭཱ གམནེཔི ཨེསེཝ ནཡོ. ཨཱཔུཙྪིཏྭཱ གཙྪནྟེན པན ¶ ‘‘བྷིཀྑུམྷི སཏི བྷིཀྑུ ཨཱཔུཙྪིཏབྦོ’’ཏིཨཱདིནཱ (པཱཙི. ཨཊྛ. ༡༡༦) ཧེཊྛཱ ཝུཏྟནཡེནེཝ ཨཱཔུཙྪིཏྭཱ གནྟབྦཾ.

དུཏིཡསེནཱསནསིཀྑཱཔདཝཎྞནཱ ནིཊྛིཏཱ.

༦. ཨནུཔཁཛྫསིཀྑཱཔདཝཎྞནཱ

‘‘ཛཱན’’ནྟི ¶ ཝུཏྟེ ‘‘ཨནུཊྛཱཔནཱིཡོ ‘ཨཡ’ནྟི ཛཱནནྟོ’’ཏི ཨཡཾ ཝིསེསོ ཀུཏོ ལབྦྷཏཱིཏི ཨཱཧ ‘‘ཏེནེཝསྶཱ’’ཏིཨཱདི. ནནུ པདབྷཱཛནེཔི ཝུཌྜྷབྷཱཝཱདིཛཱནནམེཝ ཝུཏྟཾ, ན ཏུ ཨནུཊྛཱཔནཱིཡབྷཱཝནྟི ཨནུཡོགཾ སནྡྷཱཡཱཧ ‘‘ཝུཌྜྷོ ཧཱི’’ཏིཨཱདི. བཧཱུཔཀཱརཏནྟི ‘‘བྷཎྜཱགཱརིཀཏྟཱདིབཧུཨུཔཀཱརབྷཱཝཾ’’. ན ཀེཝལཾ ཨིདམེཝཱཏི ཨཱཧ ‘‘གུཎཝིསིཊྛཏཉྩཱ’’ཏིཨཱདི, ཏེན བཧཱུཔཀཱརཏྟེཔི གུཎཝིསིཊྛཏྟཱབྷཱཝེ, གུཎཝིསིཊྛཏྟེཔི བཧཱུཔཀཱརཏྟཱབྷཱཝེ དཱཏུཾ ན ཝཊྚཏཱིཏི དསྶེཏི. ‘‘བྷཎྜཱགཱརིཀསྶ བཧཱུཔཀཱརཏཾ, དྷམྨཀཐིཀཱདཱིནཾ གུཎཝིསིཊྛཏཉྩ སལླཀྑེཏྭཱ’’ཏི (སཱརཏྠ. ཊཱི. པཱཙིཏྟིཡ ༣.༡༡༩-༡༢༡) ཀེཙི. དྷུཝཝཱསཏྠཱཡཱཏི ནིཙྩཝཱསཏྠཱཡ. སམྨནྣིཏྭཱཏི ཨཔལོཀནེན ཀམྨེན སམྨནྣིཏྭཱ. ཀཱམཉྩེཏྠ གིལཱནསྶཱཔི སངྒྷོཡེཝ ཨནུཙྪཝིཀཾ སེནཱསནཾ དེཏི, གིལཱནོ པན ཨཔལོཀེཏྭཱ སངྒྷེན ཨདིནྣསེནཱསནོཔི ན པཱིལེ༹ཏབྦོ ཨནུཀམྤིཏབྦོཏི དསྶེཏུཾ ཝིསུཾ ཝུཏྟོ.

སམནྟཱ དིཡཌྜྷོ ཧཏྠོཏི མཛ྄ཛྷེ པཉྙཏྟཾ མཉྩཔཱིཋཾ སནྡྷཱཡ ཝུཏྟཾ. ཨེཀཔསྶེན ཙེ པཧོནཀདིསཱ དིསྶཏི, ཏཏོ གཧེཏབྦཾ. པཱདདྷོཝནཔཱསཱཎཏོཏི དྭཱརེ ནིཀྑིཏྟཔཱདདྷོཝནཔཱསཱཎཏོ. ནིསཱིདནྟསྶ ཝཱ ནིཔཛྫནྟསྶ ཝཱ པཱཙིཏྟིཡནྟི ཨེཏྠ ནིསཱིདནམཏྟེན, ནིཔཛྫནམཏྟེནེཝ ཝཱ པཱཙིཏྟིཡཾ. པུནཔྤུནཾ ཀརོནྟསྶཱཏི ཨུཊྛཱཡུཊྛཱཡ ནིསཱིདཏོ ཝཱ ནིཔཛྫཏོ ཝཱ.

སངྒྷིཀེ སངྒྷིཀསཉྙིཝེམཏིཀཔུགྒལིཀསཉྙཱིནཾ ཝསེན ཏིཀཔཱཙིཏྟིཡཾ ཝེདིཏབྦཾ. ཏིཀདུཀྐཊཾ པན པུགྒལིཀེ སངྒྷིཀསཉྙིཝེམཏིཀཨཉྙཔུགྒལིཀསཉྙཱིནཾ ཝསེན. ཝིཧཱརསྶ ཨུཔཙཱརེཏི ཏསྶ བཧི ཨཱསནྣཔྤདེསེ.

ཨནུཔཁཛྫསིཀྑཱཔདཝཎྞནཱ ནིཊྛིཏཱ.

༧. ནིཀྐཌྜྷནསིཀྑཱཔདཝཎྞནཱ

ཨནེཀཀོཊྛཀཱནཱིཏི ¶ ཨནེཀདྭཱརཀོཊྛཀཱནི. ‘‘ནིཀྑམཱཏི ཝཙནཾ སུཏྭཱ ཨཏྟནོ རུཙིཡཱ ཙེ ནིཀྑམཏི, ཨནཱཔཏྟཱི’’ཏི (སཱརཏྠ. ཊཱི. པཱཙིཏྟིཡ ༡༢༦) ཝདནྟི.

ཏསྶ ¶ པརིཀྑཱརནིཀྐཌྜྷནེཏི ཏསྶ སནྟཀཾ ཡཾ ཀིཉྩི པཏྟཙཱིཝརཔརིསྶཱཝནདྷམྨཀརཎམཉྩཔཱིཋབྷིསིབིབྦོཧནཱདིབྷེདཾ ཨནྟམསོ རཛནཚལླིཔི ཨཏྠི, ཏསྶ པརིཀྑཱརསྶ ནིཀྐཌྜྷནེ. ཏཉྩཱཏི དུཀྐཊཾ པརཱམསཏི. ནིཀྐཌྜྷཱཔནེཔི ཨེསེཝ ནཡོ. གཱལ༹ྷཾ བནྡྷིཏྭཱ ཋཔིཏེསུ པན ཨེཀཱཝ ཨཱཔཏྟི.

བྷཎྜནཀཱརཀཀལཧཀཱརཀམེཝ སཀལསངྒྷཱརཱམཏོ ནིཀྐཌྜྷིཏུཾ ལབྷཏི. སོ ཧི པཀྑཾ ལབྷིཏྭཱ སངྒྷམྤི བྷིནྡེཡྻ. ཨལཛྫིཨཱདཡོ པན ཨཏྟནོ ཝསནཊྛཱནཏོཡེཝ ནིཀྐཌྜྷིཏབྦཱ. སཀལསངྒྷཱརཱམཏོ ནིཀྐཌྜྷིཏུཾ ན ཝཊྚཏི. ཏེནཱཧ ‘‘སཀལསངྒྷཱརཱམཏོཔཱི’’ཏིཨཱདི.

ནིཀྐཌྜྷནསིཀྑཱཔདཝཎྞནཱ ནིཊྛིཏཱ.

༨. ཝེཧཱསཀུཊིསིཀྑཱཔདཝཎྞནཱ

ཨུཔརིཝེཧཱསཀུཊིཡཱཏི ཨུཔརིམཏལེ ཨསནྠཏཔདརཱཡ ཀུཊིཡཱ. ཏེནཱཧ ‘‘ཨུཔརི ཨཙྪནྣཏལཱཡཱ’’ཏིཨཱདི. ཡཱ ཧི ཀཱཙི ཨུཔརི ཨཙྪནྣཏལཱ དྭིབྷཱུམིཀཀུཊིཀཱ ཝཱ ཏིབྷཱུམིཀཱདིཀུཊིཀཱ ཝཱ, སཱ ‘‘ཝེཧཱསཀུཊཱི’’ཏི ཝུཙྩཏི. ཨིདཉྷི ཝེཧཱསཀུཊིལཀྑཎཾ. ཡདི ཨེཝཾ ཀསྨཱ པདབྷཱཛནེ ‘‘མཛ྄ཛྷིམསྶ པུརིསསྶ ཨསཱིསགྷཊྚཱ’’ཏི (པཱཙི. ༡༣༡) ཝུཏྟནྟི ཨཱཧ ‘‘པདབྷཱཛནེ པནཱ’’ཏིཨཱདི. ཨིདྷ ཨདྷིཔྤེཏཾ ཀུཊིཾ དསྶེཏུནྟི ཨིམསྨིཾ སིཀྑཱཔདེ ཨདྷིཔྤེཏཾ ཝེཧཱསཀུཊིཾ དསྶེཏུཾ. མཛ྄ཛྷིམསྶ པུརིསསྶཱཏི པམཱཎམཛ྄ཛྷིམསྶ པུརིསསྶ. སབྦཧེཊྛིམཱཧི ཏུལཱཧི སཱིསཾ ན གྷཊྚེཏཱིཏི ཨསཱིསགྷཊྚཱ. ཨངྒེ ཝིཛ྄ཛྷིཏྭཱཏི ཨཊནིཡོ ཝིཛ྄ཛྷིཏྭཱ. པཝེསིཏཔཱདཀནྟི པཝེསིཏཔཱདསིཁཾ. ཏསྨཱཏི ‘‘བྷཱུམཏྠེ ཝཱ’’ཏིཨཱདིནཱ ཝུཏྟམེཝཏྠཾ ཀཱརཎབྷཱཝེན པཙྩཱམསཏི. ཡསྨཱ ཨཱཧཙྩཔཱདཀཱདཱིསུ ཡཐཱཝུཏྟོ ཨཏྠོ ཧོཏི, ཏསྨཱཏི ཝུཏྟཾ ཧོཏི.

སཧསཱཏི ཨབྷིབྷཝིཏྭཱ ཨཛ྄ཛྷོཏྠརིཏྭཱ. ཨཝེཧཱསཀུཊིཀཱཡཱཏི བྷཱུམིཡཾ ཀཏཔཎྞསཱལཱདཱིསུ, ཏཏྠ ཨནཱཔཏྟི. ན ཧི སཀྐཱ ཏཏྠ པརསྶ པཱིལཱ༹ ¶ ཀཱཏུཾ. སཱིསགྷཊྚཱཡཱཏི ཡཱ སཱིསཾ གྷཊྚཱ ཧོཏི, ཏཏྠཱཔི ཨནཱཔཏྟི. ན ཧི སཀྐཱ ཏཏྠ ཧེཊྛཱཔཱསཱདེ ཨནོཎཏེན ཝིཙརིཏུཾ, ཏསྨཱ ཨསཉྩརཎཊྛཱནཏྟཱ པརཔཱིལཱ༹ ན བྷཝིསྶཏི. ཨུཔརིཏལཾ ཝཱ པདརསཉྩིཏནྟི ཨུཔརིམཏལཾ དཱརུཕལཀེཧི གྷནསནྠཏཾ. ཀིཉྩི གཎྷཱཏི ཝཱཏི ཨུཔརི ནཱགདནྟཀཱདཱིསུ ལགྒིཏཾ ཙཱིཝརཱདིཾ ཡཾ ཀིཉྩི གཎྷཱཏི ཝཱ. ལགྒཏི ཝཱཏི ཨེཏྠཱཔི ཨེསེཝ ¶ ནཡོ. པཊིཔཀྑབྷཱུཏཱ ཨཱཎི པཊཱཎི. ཡསྶཱ དིནྣཱཡ ནིསཱིདནྟེཔི པཱདཱ ན ནིཔཏནྟི, ཨེཝཾབྷཱུཏཱ ཨཱཎི མཉྩཔཱིཋཱནཾ པཱདསིཁཱསུ དིནྣཱ ཧོཏཱིཏི ཨཏྠོ. ཏེནཱཧ ‘‘པཱདསཱིསཱན’’ནྟིཨཱདི.

ཝེཧཱསཀུཊིསིཀྑཱཔདཝཎྞནཱ ནིཊྛིཏཱ.

༩. མཧལླཀཝིཧཱརསིཀྑཱཔདཝཎྞནཱ

པིཊྛསངྒྷཱཊསྶཱཏི དྭཱརབནྡྷསྶ. སཱམནྟཱ ཨཌྜྷཏེཡྻཧཏྠོ པདེསོཏི ཡསྶ (པཱཙི. ཨཊྛ. ༡༣༥) ཝེམཛ྄ཛྷེ དྭཱརཾ ཧོཏི, ཨུཔརིབྷཱགེ ཙ ཨུཙྩཱ བྷིཏྟི, ཏསྶ ཏཱིསུ དིསཱསུ སཱམནྟཱ ཨཌྜྷཏེཡྻཧཏྠོ པདེསོ. ཁུདྡཀསྶ པན ཝིཧཱརསྶ དྭཱིསུ དིསཱསུ. ཏཏྲཱཔི ཡཾ བྷིཏྟིཾ ཝིཝརིཡམཱནཾ ཀཝཱཊཾ ཨཱཧནཏི, སཱ ཨཔརིཔུཎྞཱུཔཙཱརཱཔི ཧོཏི. སཙེ པན དྭཱརསྶ ཨདྷོབྷཱགེཔི ལེཔོཀཱསོ ཨཏྠི, ཏམྤི ལིམྤིཏུཾ ཝཊྚཏི. ཨགྒལ༹ཊྛཔནཱཡཱཏི ཨེཏྠ ཨགྒལ༹སདྡེན ཏཾསམྦནྡྷཏོ དྭཱརཕལཀསཧིཏཾ དྭཱརབནྡྷནཾ ཨདྷིཔྤེཏཾ. ཏེནཱཧ ‘‘སཀཝཱཊཀསྶཱ’’ཏིཨཱདི. ‘‘ནིཙྩལབྷཱཝཏྠཱཡཱ’’ཏི ཨིམིནཱ ཏཉྩ ཁོ ཋཔནཾ ཨིདྷ ནིཙྩལབྷཱཝེནཱཏི དསྶེཏི. ཀོ པནེཏྠ ཨདྷིཔྤཱཡོཏི ཨཱཧ ‘‘ཀཝཱཊཉྷཱི’’ཏིཨཱདི. ཀམྤཏཱིཏི ཙལཏི. ཡཱཝ དྭཱརཀོསཱ ཨགྒལ༹ཊྛཔནཱཡ པུནཔྤུནཾ ལིམྤིཏབྦོ ཝཱ ལེཔཱཔེཏབྦོ ཝཱཏི ཨགྒལ༹ཊྛཔནཏྠཱཡ ཡཱཝ དྭཱརཀོསཱ པུནཔྤུནཾ ཨཏྟནཱ ལིམྤིཏབྦོ ཝཱ, པརེཧི ལེཔཱཔེཏབྦོ ཝཱཏི ཨཏྠོ.

ནནུ ཙཱཡམཏྠོ ནེཝ མཱཏིཀཱཡཾ, ན པདབྷཱཛནེ ཝུཏྟོ, ཨཐ ཀུཏོ དཊྛབྦོཏི ཨཱཧ ‘‘ཏཏྠཱ’’ཏིཨཱདི. ཀིཉྩཱཔཱིཏི ཡདིཔི. ཨཊྛུཔྤཏྟིཡནྟི སིཀྑཱཔདསྶ ནིདཱནེ. ཨདྷིཀཱརཏོཏི ཨནུཝཏྟནཏོ. ཨཱལོཀཾ སནྡྷེཏི པིདྷེཏཱིཏི ཨཱལོཀསནྡྷི. ཏེནཱཧ ‘‘ཨཱལོཀསནྡྷཱིཏི ཝཱཏཔཱནཀཝཱཊཀཱ ཝུཙྩནྟཱི’’ཏི. ཏཏྠ ཝཱཏཔཱནཀཝཱཊཀཱཏི ཝཱཏཔཱནཕལཀཱ. ཨནུཉྙཱཏཔྤདེསཏོ ¶ པན ཨཉྙཏྠ པུནཔྤུནཾ ཝིལིམྤིཏུཾ ཝཱ ཝིལིམྤཱཔེཏུཾ ཝཱ ན ཝཊྚཏི. ‘‘མཏྟིཀཱཡ ཀཏྟབྦཀིཙྩཾ ནིཊྛཱཔེཏྭཱ པུན ཙཏུཏྠལེཔེ དིནྣེ པཱཙིཏྟིཡ’’ནྟི (སཱརཏྠ. ཊཱི. པཱཙིཏྟིཡ ༣.༡༣༥) ཀེཙི. ‘‘པུནཔྤུནཾ ལེཔདཱནསྶ ཝུཏྟཔྤམཱཎཏོ ཨཉྙཏྠ པཊིཀྑིཏྟམཏྟཾ ཋཔེཏྭཱ པཱཙིཏྟིཡསྶ ཨཝུཏྟཏྟཱ དུཀྐཊ’’ནྟི ཨཔརེ.

ཨདྷིཊྛཱཏབྦནྟི སཾཝིདྷཱཏབྦཾ. ཨཔྤཧརིཏེཏི ཨེཏྠ ཨཔྤསདྡོ ‘‘ཨཔྤིཙྪོ’’ཏིཨཱདཱིསུ (མ. ནི. ༡.༢༥༢, ༣༣༦; སཾ. ནི. ༢.༡༤༨) ཝིཡ ཨབྷཱཝཏྠོཏི ཨཱཧ ‘‘ཨཧརིཏེ’’ཏི. སཱལིཝཱིཧིཨཱདི ¶ (སཱརཏྠ. ཊཱི. ༢.༣༠) པུབྦཎྞཾ ‘‘པུརཀྑཏཾ སསྶཕལ’’ནྟི ཀཏྭཱ, ཏབྦིཔརིཡཱཡཏོ མུགྒམཱསཱདི ཨཔརཎྞཾ. ཝུཏྟནྟི ཝཔིཏཾ. ‘‘ཏསྨིཾ ཋཏྭཱ ཨདྷིཊྛཧནྟོ དུཀྐཊཾ ཨཱཔཛྫཏཱི’’ཏི ཨིམིནཱ ཡསྨིཾ པདེསེ སམནྟཱ ཝུཏྟཔྤམཱཎེ པརིཙྪེདེ པུབྦཎྞཱདཱིནི ན སནྟི, ཏཏྠ ཝིཧཱརོ ཀཱརེཏབྦོ. ཡཏྠ པན སནྟི, ཏཏྠ ཀཱརཱཔེཏུཾ ན ཝཊྚཏཱིཏི དསྶེཏི. ཏཐེཝཱཏི མུཁཝཊྚིཨནྟེན. ཏསྨིཾ ཋཱཏབྦཾ པཏནྟསྶ ཝིཧཱརསྶ ཨཔཏནོཀཱསཏྟཱ, ཏསྶ བྷིཀྑུནོ ཨུཔརི ན པཏེཡྻཱཏི ཨདྷིཔྤཱཡོ. ཡཐཱཔརིཙྪིནྣསྶ པན ཨོཀཱསསྶ ཨབྦྷནྟརཾ ཝིཧཱརསྶ པཏནྟསྶ ཨོཀཱསོ ཧོཏཱིཏི ཨཔྤཧརིཏེཔི ཏསྨིཾ ཋཏྭཱ ཨདྷིཊྛཱཏུཾ ན ལབྷཏི. ཏེནཱཧ ‘‘ཏསྶ ཨནྟོ ཨཧརིཏེཔི ཋཱཏུཾ ན ལབྷཏཱི’’ཏི.

ཏཏོ ཙེ ཨུཏྟརཱིཏི ཏིཎྞཾ མགྒཱནཾ ཝཱ པརིཡཱཡཱནཾ ཝཱ ཨུཔརི ཙཏུཏྠེ མགྒེ ཝཱ པརིཡཱཡེ ཝཱཏི ཨཏྠོ. ཏེནཱཧ ‘‘མགྒེན ཚཱདིཡམཱནེ’’ཏིཨཱདི. ཏཏྠ མགྒེན ཚཱདིཡམཱནེཏི ཨཔརིཀྑིཔིཏྭཱ ཨུཛུཀམེཝ ཚཱདིཡམཱནེ. པརིཡཱཡེནཱཏི པརིཀྑེཔེན. ཏཏྠ མགྒེན ཚཱདནཾ ཨིཊྛཀསིལཱསུདྷཱཧི ལབྦྷཏི, པརིཡཱཡེན ཚཱདནཾ ཏིཎཔཎྞེཧཱིཏི ཨཱཧ ‘‘ཨིཊྛཀསིལཱསུདྷཱཧཱི’’ཏིཨཱདི. ཏསྨཱ ཡཐཱ ཨིཙྪཏི, ཏཐཱ དྭེ མགྒེ ཝཱ དྭེ པརིཡཱཡེ ཝཱ ཨདྷིཊྛཧིཏྭཱ ཏཏིཡཾ མགྒཾ ཝཱ པརིཡཱཡཾ ཝཱ ‘‘ཨེཝཾ ཚཱདེཧཱི’’ཏི ཨཱཎཱཔེཏྭཱ པཀྐམིཏབྦཾ. སཙེ ན པཀྐམཏི, ཏུཎྷཱིབྷཱཝེན ཋཱཏབྦཾ. སབྦམྤི ཙེཏཾ ཚདནཾ ཚདནཱུཔརི ཝེདིཏབྦཾ. ཨུཔརཱུཔརིཚནྣོ ཧི ཝིཧཱརོ ཙིརཾ ཨནོཝསྶཀོ ཧོཏཱིཏི མཉྙམཱནཱ ཨེཝཾ ཚཱདེནྟི. ཏིཎམུཊྛིགཎནཱཡཱཏི ཏིཎཀརལ༹གཎནཱཡ.

ཏིཀཔཱཙིཏྟིཡནྟི ཨཏིརེཀདྭཏྟིཔརིཡཱཡེ ཨཏིརེཀསཉྙིཝེམཏིཀཨཱུནཀསཉྙཱིནཾ ཝསེན ཏཱིཎི པཱཙིཏྟིཡཱནི. སེཏཝཎྞཱདིཀརཎེཏི སེཏཝཎྞཀཱལ༹ཝཎྞགེརུཀཔརིཀམྨམཱལཱཀམྨལཏཱཀམྨམཀརདནྟཀཔཉྩཔཊིཀཱནཾ ¶ ཀརཎེ. ལེཎགུཧཱཏིཎཀུཊིཀཱདཱིསཱུཏི ཨེཏྠ ལེཎནྟི དྭཱརབདྡྷཾ. གུཧཱཏི ཀེཝལཱ པབྦཏགུཧཱ. ཏིཎཀུཊིཀཱ པཱཀཊཱ ཨེཝ.

མཧལླཀཝིཧཱརསིཀྑཱཔདཝཎྞནཱ ནིཊྛིཏཱ.

༡༠. སཔྤཱཎཀསིཀྑཱཔདཝཎྞནཱ

ཨེཀསྨིཾ གྷཊེ ཨེཀཱཝ ཨཱཔཏྟཱིཏི ཨེཀསྨིཾ ཨུདཀགྷཊེ ཨེཀཱཝ ཨཱཔཏྟི. ཨེས ནཡོ སབྦབྷཱཛནེསུ ¶ . ཝིཙྪིནྡནྟསྶཱཏི དྷཱརཾ ཝིཙྪིནྡནྟསྶ. ཨེཀེཀཾ པཀྑིཔནྟསྶཱཏི ཨེཀེཀཾ ཏིཎཾ ཝཱ པཎྞཾ ཝཱ མཏྟིཀཾ ཝཱ ཨཉྙཾ ཝཱ ཀཊྛགོམཡཱདིཾ པཀྑིཔནྟསྶ. པརིཡཱདཱནནྟི ཁཡཾ.

‘‘པདཱིཔེ (སཱརཏྠ. ཊཱི. པཱཙིཏྟིཡ ༣.༡༤༠) པཏིཏྭཱ པཊངྒཱདིཔཱཎཀཱ མརིསྶནྟཱི’’ཏི ཛཱནནྟསྶཱཔི ཀུསལཙིཏྟེན པདཱིཔུཛྫལནཾ ཝིཡ ‘‘སིཉྩནེན པཱཎཀཱ མརིསྶནྟཱི’’ཏི པུབྦབྷཱགེ ཛཱནནྟསྶཱཔི ‘‘ཨིདཾ ཛལཾ སིཉྩཱམཱི’’ཏི སིཉྩནྟསྶ ཝདྷཀཙིཏྟཾ ན ཧོཏཱིཏི ཨཱཧ ‘‘ཝིནཱ ཝདྷཀཙེཏནཱཡཱ’’ཏིཨཱདི. ཨེཝཉྩ ཀཏྭཱ ‘‘པཎྞཏྟིཝཛྫ’’ནྟི ཨིདམྤི སམཏྠིཏཾ ཧོཏི. ཏིཙིཏྟནྟི ཀུསལཱཀུསལཱབྱཱཀཏཝསེན ཏིཙིཏྟཾ. ཏཐཱ ཧི པཎྞཏྟིཾ མདྡིཏྭཱ སིཉྩནྟསྶ ཝཱ སིཉྩཱཔེནྟསྶ ཝཱ ཨཀུསལཙིཏྟེན ཧོཏི, ‘‘ཨཱསནཾ དྷོཝིསྶཱམཱི’’ཏི ཙིཏྟེན དྷོཝནཏྠཾ སིཉྩནྟསྶ ཝཱ སིཉྩཱཔེནྟསྶ ཝཱ ཀུསལཙིཏྟེན ཧོཏི, པཎྞཏྟིཾ ཨཛཱནཏཱ ཨརཧཏཱ སིཉྩནཱདིཀརཎེ ཨབྱཱཀཏཙིཏྟེན ཧོཏཱིཏི ཀུསལཱཀུསལཱབྱཱཀཏཙིཏྟཝསེན ཏིཙིཏྟཾ ཧོཏི.

སཔྤཱཎཀསིཀྑཱཔདཝཎྞནཱ ནིཊྛིཏཱ.

བྷཱུཏགཱམཝགྒོ དུཏིཡོ.

༣. ཨོཝཱདཝགྒོ

༡. ཨོཝཱདསིཀྑཱཔདཝཎྞནཱ

ཨཊྛངྒསམནྣཱགཏསྶཱཏི ‘‘སཱིལཝཱ ཧོཏཱི’’ཏིཨཱདཱིཧི (པཱཙི. ༡༤༧) ཨཊྛཧི ཨངྒེཧི སམནྣཱགཏསྶ. ཨནུཉྙཱཏཱཏི ཨིམསྶ སིཀྑཱཔདསྶ ནིདཱནེ ཨནུཉྙཱཏཱ ¶ . ‘‘ཝསྶསཏཱུཔསམྤནྣཱཡཱ’’ཏིཨཱདི ཝཀྑམཱནཨཊྛགརུདྷམྨདསྶནཾ. ཏཏྠ སཱམཱིཙིཀམྨནྟི མགྒསམྤདཱནབཱིཛནཔཱནཱིཡཱཔུཙྪནཱདིཀཾ ཨནུཙྪཝིཀཾ ཝཏྟཾ. ཨཱདིསདྡེན –

‘‘ན བྷིཀྑུནིཡཱ ཨབྷིཀྑུཀེ ཨཱཝཱསེ ཝསྶཾ ཝསིཏབྦཾ, ཨནྭདྡྷམཱསཾ བྷིཀྑུནིཡཱ བྷིཀྑུསངྒྷཏོ དྭེ དྷམྨཱ པཙྩཱསཱིསིཏབྦཱ ཨུཔོསཐཔུཙྪཀཉྩ ཨོཝཱདཱུཔསངྐམནཉྩ, ཝསྶཾཝུཊྛཱཡ བྷིཀྑུནིཡཱ ཨུབྷཏོསངྒྷེ ཏཱིཧི ཋཱནེཧི པཝཱརེཏབྦཾ དིཊྛེན ¶ ཝཱ སུཏེན ཝཱ པརིསངྐཱཡ ཝཱ, གརུདྷམྨཾ ཨཛ྄ཛྷཱཔནྣཱཡ བྷིཀྑུནིཡཱ ཨུབྷཏོསངྒྷེ པཀྑམཱནཏྟཾ ཙརིཏབྦཾ, དྭེ ཝསྶཱནི ཚསུ དྷམྨེསུ སིཀྑིཏསིཀྑཱཡ སིཀྑམཱནཱཡ ཨུབྷཏོསངྒྷེ ཨུཔསམྤདཱ པརིཡེསིཏབྦཱ, ན བྷིཀྑུནིཡཱ ཀེནཙི པརིཡཱཡེན བྷིཀྑུ ཨཀྐོསིཏབྦོ པརིབྷཱསིཏབྦོ, ཨཛྫཏགྒེ ཨོཝཊོ བྷིཀྑུནཱིནཾ བྷིཀྑཱུསུ ཝཙནཔཐོ, ཨནོཝཊོ བྷིཀྑཱུནཾ བྷིཀྑུནཱིསུ ཝཙནཔཐོ’’ཏི (ཙཱུལ༹ཝ. ༤༠༣; ཨ. ནི. ༨.༥༡) –

ཨིམེ སཏྟ དྷམྨེ སངྒཎྷཱཏི. གརུདྷམྨེཏི གརུཀེ དྷམྨེ. ཏེ ཧི གཱརཝཾ ཀཏྭཱ བྷིཀྑུནཱིཧི སམྤཊིཙྪིཏབྦཏྟཱ ‘‘གརུདྷམྨཱ’’ཏི ཝུཙྩནྟི.

ཨཉྙེན ཝཱ དྷམྨེནཱཏི ཋཔེཏྭཱ ཨཊྛ གརུདྷམྨེ ཨཉྙེན ཡེན ཀེནཙི དྷམྨེན. བྷིཀྑུནཱིསུ ཨུཔསམྤནྣམཏྟཾ ཝཱ ཨོཝདཏོཏི བྷིཀྑུནཱིསུ ཨུཔསམྤནྣམཏྟཾ གརུདྷམྨེན ཨོཝདཏོ ཝཱ. བྷིཀྑཱུནཾ སནྟིཀེ ཨུཔསམྤནྣཱཡ ཡཐཱཝཏྠུཀམེཝ. ‘‘ཨདྷམྨཀམྨེ’’ཏིཨཱདཱིསུ བྷིཀྑུནོཝཱདསམྨུཏིཀམྨཾ ‘‘ཀམྨ’’ནྟི ཝེདིཏབྦནྟི ཨཱཧ ‘‘སམྨཏསྶཱཔཱི’’ཏིཨཱདི. ཝགྒེ བྷིཀྑུནིསངྒྷེ ཨོཝདཏོ ཏིཀཔཱཙིཏྟིཡནྟི ཝགྒེ བྷིཀྑུནིསངྒྷེ ཨོཝདཏོ ཝགྒསཉྙིཝེམཏིཀསམགྒསཉྙཱིནཾ ཝསེན ཏཱིཎི པཱཙིཏྟིཡཱནི. ཏཐཱ ཝེམཏིཀསྶ ཙཱཏི ཨདྷམྨཀམྨེ ཝེམཏིཀསྶ ཙ ཝགྒེ བྷིཀྑུནིསངྒྷེ ཨོཝདཏོ ཏིཀཔཱཙིཏྟིཡནྟི ཨཏྠོ. ཨེས ནཡོ དྷམྨཀམྨསཉྙིནོ ཙཱཏི ཨེཏྠཱཔི. ཡཐཱ ཙ ཝགྒེ བྷིཀྑུནིསངྒྷེ ཨོཝདཏོ ནཝ པཱཙིཏྟིཡཱནི, ཨེཝཾ ཨདྷམྨཀམྨེ ཨདྷམྨཀམྨསཉྙིནོ སམགྒེ བྷིཀྑུནིསངྒྷེ ཨོཝདཏོ ཏསྨིཾ སངྒྷེ ཝགྒསཉྙིཝེམཏིཀསམགྒསཉྙཱིནཾ ཝསེན ཏིཀཔཱཙིཏྟིཡཾ, ཏཐཱ ཝེམཏིཀསྶ ཙ དྷམྨཀམྨསཉྙིནོ ཙཱཏི ནཝ པཱཙིཏྟིཡཱནི. ཏེནཱཧ ‘‘སམགྒེཔི བྷིཀྑུནིསངྒྷེ ནཝཱ’’ཏིཨཱདི. དྷམྨཀམྨེ པན ཨདྷམྨཀམྨསཉྙིནོ ཝགྒཾ བྷིཀྑུནིསངྒྷཾ ཨོཝདཏོ ¶ ཏིཀདུཀྐཊཾ, ཏཐཱ ཝེམཏིཀསྶ, དྷམྨཀམྨསཉྙིནོ ཙཱཏི ནཝ དུཀྐཊཱནི. སམགྒཾ པན བྷིཀྑུནིསངྒྷཾ ཨོཝདཏོ ཨཊྛཱཏི སཏྟརས དུཀྐཊཱནི. ཏེནཱཧ ‘‘སཙེ པནཱ’’ཏིཨཱདི. ཨཉྙཾ དྷམྨནྟི ཨཉྙཾ སུཏྟནྟཾ ཝཱ ཨབྷིདྷམྨཾ ཝཱ. ‘‘སམགྒཱམྷཱཡྻཱ’’ཏི ཝཙནེན ཧི ཨོཝཱདཾ པཙྩཱསཱིསནྟི. ཏསྨཱ ཋཔེཏྭཱ ཨོཝཱདཾ ཨཉྙཾ དྷམྨཾ བྷཎནྟསྶ དུཀྐཊཾ. ཨོཝཱདཉྩ ཨནིཡྻཱཏེཏྭཱཏི ‘‘ཨེསོ བྷགིནི ཨོཝཱདོ’’ཏི ཨཝཏྭཱ. པརིཔུཙྪཾ དེཏཱིཏི ཏསྶཱཡེཝ པགུཎཱཡ གརུདྷམྨཔཱལི༹ཡཱ ཨཏྠཾ བྷཎཏི. ཨོསཱརེཧཱིཏི ཨུཙྩཱརེཧི, ཀཐེཧཱིཏི ཨཏྠོ. ཨོསཱརེཏཱིཏི ཨཊྛགརུདྷམྨཔཱལི༹ཾ ཝདཏི. པཉྷཾ པུཊྛོཏི གརུདྷམྨནིསྶིཏཾ ཝཱ ཁནྡྷཱདིནིསྶིཏཾ ཝཱ པཉྷཾ བྷིཀྑུནིཡཱ པུཊྛོ.

ཨོཝཱདསིཀྑཱཔདཝཎྞནཱ ནིཊྛིཏཱ.

༢. ཨཏྠངྒཏསིཀྑཱཔདཝཎྞནཱ

ཨེཀཏོཨུཔསམྤནྣནྟི ¶ བྷིཀྑུནིསངྒྷེ ཨུཔསམྤནྣམཏྟཾ. ཨིཏོ པརམྤི ཙ ཡཏྠ ཡཏྠ ‘‘ཨེཀཏོཨུཔསམྤནྣ’’ནྟི ཝུཙྩཏི, སབྦཏྠ ཨཡམེཝ ཨཏྠོ དཊྛབྦོ.

ཨཏྠངྒཏསིཀྑཱཔདཝཎྞནཱ ནིཊྛིཏཱ.

༣. བྷིཀྑུནུཔསྶཡསིཀྑཱཔདཝཎྞནཱ

སཾཝཱསཱཡཱཏི ཨུཔོསཐཱདིཨཏྠཾ. ཨིཏརནྟི ཨུབྷཏོསངྒྷེ ཨུཔསམྤནྣཾ.

བྷིཀྑུནུཔསྶཡསིཀྑཱཔདཝཎྞནཱ ནིཊྛིཏཱ.

༤. ཨཱམིསསིཀྑཱཔདཝཎྞནཱ

ཏཎྷཱདིཊྛཱིཧི ཨཱམསིཏབྦཏོ ཨཱམིསཾ, ཙཱིཝརཱདི, ཨཱམིསམེཝ ཧེཏུ ཨཱམིསཧེཏུ. ཏེནཱཧ ‘‘ཙཱིཝརཱདཱིནཾ ཨཉྙཏརཧེཏཱུ’’ཏི. ཨཱདིསདྡེན པིཎྜཔཱཏསེནཱསནགིལཱནཔཙྩཡསཀྐཱརགརུཀཱརམཱནནཝནྡནཔཱུཛནཱནཾ གཧཎཾ. ཨཝཎྞཀཱམཏཱཡཱཏི ཨཡསཀཱམཏཱཡེཝ.

དྷམྨཀམྨེཏིཨཱདཱིསུ ¶ བྷིཀྑུནོཝཱདསམྨུཏིཀམྨཾ ‘‘ཀམྨ’’ནྟི ཝེདིཏབྦཾ. ཏཏྠ ཏིཀཔཱཙིཏྟིཡནྟི དྷམྨཀམྨེ དྷམྨཀམྨསཉྙིཝེམཏིཀཨདྷམྨཀམྨསཉྙཱིནཾ ཝསེན ཏཱིཎི པཱཙིཏྟིཡཱནི. ཏཐེཝ ཨདྷམྨཀམྨེ ཏིཀདུཀྐཊཾ ཝེདིཏབྦཾ. ཨསམྨཏནྟི སམྨཏེན ཝཱ སངྒྷེན ཝཱ བྷཱརཾ ཀཏྭཱ ཋཔིཏཾ ཨུཔསམྤནྣཾ. ནནུ ཨོཝཱདསམྨུཏི ཨུཔསམྤནྣསྶེཝ དཱིཡཏི, ན སཱམཎེརསྶཱཏི ཨཱཧ ‘‘ཏཏྠཱ’’ཏིཨཱདི. སམྨཏེན ཝཱ སངྒྷེན ཝཱ ཋཔིཏོ པན བཧུསྶུཏོ སཱམཎེརོ ‘‘ཨསམྨཏོ’’ཏི ཝེདིཏབྦོ. པཀཏིཡཱ ཙཱིཝརཱདིཧེཏུ ཨོཝདནྟཾ པན ཨེཝཾ བྷཎནྟསྶཱཏི པཀཏིཡཱ ཙཱིཝརཱདིཧེཏུ ཨོཝདནྟཾ ‘‘ཨེས ཙཱིཝརཱདིཧེཏུ ཨོཝདཏཱི’’ཏི སཉྙཱཡ ཨེཝཾ བྷཎནྟསྶ. ‘‘ན ཙཱིཝརཱདིཧེཏུ ཨོཝདཏཱི’’ཏི སཉྙཱཡ པན ཨེཝཾ བྷཎནྟསྶ དུཀྐཊཾ. ཨནཱམིསནྟརཏཱཏི ཨཱམིསཙིཏྟཱབྷཱཝོ, ‘‘ཨཱམིསཧེཏུ ཨོཝདིསྶཱམཱི’’ཏི ཨེཝཾ པཝཏྟཨཛ྄ཛྷཱསཡཱབྷཱཝོཏི ཨཏྠོ. ཙིཏྟཔརིཡཱཡོ ཧེཏྠ ཨནྟརསདྡོ ‘‘ཡསྶནྟརཏོ ན སནྟི ཀོཔཱ’’ཏིཨཱདཱིསུ (ཨུདཱ. ༢༠) ཝིཡ.

ཨཱམིསསིཀྑཱཔདཝཎྞནཱ ནིཊྛིཏཱ.

༥. ཙཱིཝརདཱནསིཀྑཱཔདཝཎྞནཱ

པཉྩམསིཀྑཱཔདཾ ¶ ཨུཏྟཱནཏྠམེཝ.

ཙཱིཝརདཱནསིཀྑཱཔདཝཎྞནཱ ནིཊྛིཏཱ.

༦. ཙཱིཝརསིབྦནསིཀྑཱཔདཝཎྞནཱ

སཱུཙིཾ པཝེསེཏྭཱ པཝེསེཏྭཱ ནཱིཧརཎེཏི ཨཱརཱཔཐེ ཨཱརཱཔཐེ པཱཙིཏྟིཡཾ. ‘‘སིབྦིསྶཱམཱི’’ཏི པན ཝིཙཱརེནྟསྶ, ཚིནྡནྟསྶཱཔི དུཀྐཊཾ. སཏཀྑཏྟུམྤི ཝིཛ྄ཛྷིཏྭཱ སཀིཾ ནཱིཧརནྟསྶཱཏི སཀལསཱུཙིཾ ཨནཱིཧརནྟོ དཱིགྷསུཏྟཔྤཝེསནཏྠཾ སཏཀྑཏྟུམྤི ཝིཛ྄ཛྷིཏྭཱ སཀིཾ ནཱིཧརནྟསྶ. ‘‘སིབྦཱ’’ཏི ཝུཏྟོཏི སཀིཾ ‘‘ཙཱིཝརཾ སིབྦཱ’’ཏི ཝུཏྟོ. ནིཊྛཱཔེཏཱིཏི སབྦཾ སཱུཙིཀམྨཾ པརིཡོསཱཔེཏི. ཏསྶ ཨཱརཱཔཐེ ཨཱརཱཔཐེ པཱཙིཏྟིཡནྟི ཨཱཎཏྟསྶ སཱུཙིཾ པཝེསེཏྭཱ པཝེསེཏྭཱ ནཱིཧརཎེ ཨེཀམེཀཾ པཱཙིཏྟིཡཾ.

ཨུདཱཡིཏྠེརནྟི ¶ ལཱལུ༹དཱཡིཏྠེརཾ. ཝུཏྟལཀྑཎཾ སིབྦནཾ ཝཱ སིབྦཱཔནཾ ཝཱཏི ‘‘སཱུཙིཾ པཝེསེཏྭཱ’’ཏིཨཱདིནཱ ཝུཏྟལཀྑཎཾ སིབྦནཾ ཝཱ སིབྦཱཔནཾ ཝཱ.

ཙཱིཝརསིབྦནསིཀྑཱཔདཝཎྞནཱ ནིཊྛིཏཱ.

༧. སཾཝིདྷཱནསིཀྑཱཔདཝཎྞནཱ

སཾཝིདཧིཏྭཱཏི ‘‘ཨེཧི, ཨསུཀགཱམཾ གཙྪཱམཱ’’ཏི ཝཱ ‘‘སྭེ ཨཧཾ གཙྪཱམི, ཏྭམྤི ཨཱགཙྪེཡྻཱསཱི’’ཏི ཝཱ ཝཏྭཱ. ཏཉྩ ཁོ སཾཝིདཧནཾ ཨཏྠཏོ སངྐེཏཀམྨནྟི ཨཱཧ ‘‘གམནཀཱལེ སངྐེཏཾ ཀཏྭཱཏི ཨཏྠོ’’ཏི. ཨཀཔྤིཡབྷཱུམིཡཾ སཾཝིདཧནྟསྶཱཏི ཨནྟོགཱམེ, བྷིཀྑུནིཨུཔསྶཡདྭཱརེ, རཐིཀཱཡ, ཨཉྙེསུ ཝཱ ཙཏུཀྐསིངྒྷཱཊཀཧཏྠིསཱལཱདཱིསུ ཋཏྭཱ སཾཝིདཧནྟསྶ. ཏེནཱཧ ‘‘ཏཏྠ ཋཔེཏྭཱ’’ཏིཨཱདི. ཨཱསནྣསྶཱཔཱིཏི ཨཙྩཱསནྣསྶཱཔི, རཏནམཏྟནྟརསྶཱཔཱིཏི ཨདྷིཔྤཱཡོ. ཨཉྙསྶ གཱམསྶཱཏི ཡཏོ ནིཀྑམཏི, ཏཏོ ཨཉྙསྶ གཱམསྶ. ཏཾ ཨོཀྐམནྟསྶཱཏི ཏཾ ཨནྟརགཱམསྶ ཨུཔཙཱརཾ ཨོཀྐམནྟསྶ. སཙེ དཱུརཾ གནྟུཀཱམོ ཧོཏི, གཱམཱུཔཙཱརགཎནཱཡ ཨོཀྐམནྟེ ཨོཀྐམནྟེ པུརིམནཡེནེཝ ཨཱཔཏྟི. ཏེནཱཧ ‘‘ཨིཏི གཱམཱུཔཙཱརོཀྐམནགཎནཱཡ པཱཙིཏྟིཡཱནཱི’’ཏི. ཏསྶ ཏསྶ པན གཱམསྶ ཨཏིཀྐམནེ ཨནཱཔཏྟི. གཱམེ ཨསཏཱིཏི ཨདྡྷཡོཛནབྦྷནྟརེ གཱམེ ཨསཏི. ཏསྨིཾ པན གཱམེ སཏི གཱམནྟརགཎནཱཡེཝ ¶ པཱཙིཏྟིཡཱནི. ཨདྡྷཡོཛནགཎནཱཡ པཱཙིཏྟིཡནྟི ཨདྡྷཡོཛནེ ཨདྡྷཡོཛནེ པཱཙིཏྟིཡཾ, ཨེཀམེཀཾ ཨདྡྷཡོཛནཾ ཨཏིཀྐམནྟསྶ ‘‘ཨིདཱནི ཨཏིཀྐམིསྶཱམཱི’’ཏི པཋམཔཱདེ དུཀྐཊཾ, དུཏིཡཔཱདེ པཱཙིཏྟིཡནྟི ཨཏྠོ. ཨིམསྨིཉྷི ནཡེ ཨཏིཀྐམནེ ཨཱཔཏྟི, ཨོཀྐམནེ ཨནཱཔཏྟི.

ཝིསངྐེཏེནཱཏི (པཱཙི. ཨཊྛ. ༡༨༥) ཨེཏྠ ‘‘པུརེབྷཏྟཾ གམིསྶཱམཱ’’ཏི ཝཏྭཱ པཙྪཱབྷཏྟཾ གཙྪནྟི, ‘‘ཨཛྫ ཝཱ གམིསྶཱམཱ’’ཏི སྭེ གཙྪནྟི, ཨེཝཾ ཀཱལཝིསངྐེཏེཡེཝ ཨནཱཔཏྟི. དྭཱརཝིསངྐེཏེ, པན མགྒཝིསངྐེཏེ, ཝཱ སཏིཔི ཨཱཔཏྟིཡེཝ. ཨཱཔདཱསཱུཏི རཊྛབྷེདེ ཙཀྐསམཱརུལ༹ྷཱ ཛཱནཔདཱ པརིཡཱཡནྟི, ཨེཝརཱུཔཱསུ ཨཱཔདཱསུ ཨནཱཔཏྟི. ཙཀྐསམཱརུལ༹ྷཱཏི ཙ ཨིརིཡཱཔཐཙཀྐཾ ཝཱ སཀཊཙཀྐཾ ཝཱ ¶ སམཱརུལ༹ྷཱཏི ཨཏྠོ. མཱཏུགཱམསིཀྑཱཔདེནཱཏི (པཱཙི. ༤༡༣ ཨཱདཡོ) སཔྤཱཎཀཝགྒེ སཏྟམསིཀྑཱཔདེན.

སཾཝིདྷཱནསིཀྑཱཔདཝཎྞནཱ ནིཊྛིཏཱ.

༨. ནཱཝཱབྷིརུཧནསིཀྑཱཔདཝཎྞནཱ

ཀཱིལཱ༹པུརེཀྑཱརོཏི ལོཀསྶཱདམིཏྟསནྠཝཝསེན ཀཱིལཱ༹པུརེཀྑཱརོ. ཏཐེཝཱཏི ཀཱིལཱ༹ཝསེནེཝ. ཨགཱམཀཏཱིརཔསྶེནཱཏི ཨདྡྷཡོཛནབྦྷནྟརེ གཱམཱནཾ ཨབྷཱཝཏོ ཨགཱམཀཏཱིརཔསྶེན. པཱལི༹ཡཾ ‘‘ཨུདྡྷཾགཱམིནིཾ ཝཱ ཨདྷོགཱམིནིཾ ཝཱ’’ཏི (པཱཙི. ༡༨༦) ཝཙནཏོ པན ཝཱཔིསམུདྡཱདཱིསུ ཀཱིལཱ༹པུརེཀྑཱརཏཱཡཔི གཙྪནྟསྶ ཨནཱཔཏྟི. ཏེནཱཧ ‘‘སམུདྡེ པན ཡཐཱསུཁཾ གནྟུཾ ཝཊྚཏཱི’’ཏི. ཝིསངྐེཏེནཱཏི ཨིདྷཱཔི ཀཱལཝིསངྐེཏེནེཝ ཨནཱཔཏྟི, ཏིཏྠཝིསངྐེཏེན, པན ནཱཝཱཝིསངྐེཏེན ཝཱ གཙྪནྟསྶ ཨཱཔཏྟིཡེཝ.

སེསནྟི སདྡྷིཾ སམུཊྛཱནཱདཱིཧི ཨཝསེསཾ, ཀེཙི པན ‘‘ཀཱིལཱ༹པུརེཀྑཱརོ ‘སཾཝིདཧིཏྭཱ’ཏི (སཱརཏྠ. ཊཱི. པཱཙིཏྟིཡ ༣.༡༨༨) ཝཙནཏོ ཨིམཾ སིཀྑཱཔདཾ ཨཀུསལཙིཏྟཾ ལོཀཝཛྫཾ, ཏསྨཱ སེསཾ ནཱམ ཋཔེཏྭཱ ‘པཎྞཏྟིཝཛྫཾ ཏིཙིཏྟ’ནྟི ཨིདཾ དྭཡཾ ཨཝསེས’’ནྟི ཝདནྟི, ཏཾ ན གཧེཏབྦཾ. ཀཱིལཱ༹པུརེཀྑཱརཏཱཡ ཧི ཨབྷིརུཧིཏྭཱཔི གཱམནྟརོཀྐམནེ, ཨདྡྷཡོཛནཱཏིཀྐམེ ཝཱ སཾཝེགཾ པཊིལབྷིཏྭཱ ཨརཧཏྟཾ ཝཱ སཙྪིཀརེཡྻ, ནིདྡཾ ཝཱ ཨོཀྐམེཡྻ, ཀམྨཊྛཱནཾ ཝཱ མནསི ཀརོནྟོ གཙྪེཡྻ, ཀུཏོ ཙསྶ ཨཀུསལཙིཏྟསམངྒིཏཱ, ཡེནིདཾ སིཀྑཱཔདཾ ཨཀུསལཙིཏྟཾ, ལོཀཝཛྫཉྩ སིཡཱཏི.

ནཱཝཱབྷིརུཧནསིཀྑཱཔདཝཎྞནཱ ནིཊྛིཏཱ.

༩. པརིཔཱཙིཏསིཀྑཱཔདཝཎྞནཱ

པརིཔཱཙིཏནྟི ¶ པརིཔཱཀམཱཔཱདིཏཾ, ཡཐཱ ལབྷཏི, ཏཐཱ ཀཏྭཱ ཋཔིཏནྟི ཝུཏྟཾ ཧོཏི. ཏེནཱཧ ‘‘ནེཝ ཏསྶཱ’’ཏིཨཱདི ཏསྶཱཏི ཡོ པརིབྷུཉྫེཡྻ, ཏསྶ བྷིཀྑུནོ. བྷིཀྑུསྶ གུཎཾ པཀཱསེཏྭཱཏི ‘‘ཨཡྻོ བྷཱཎཀོ, ཨཡྻོ བཧུསྶུཏོ’’ཏིཨཱདིནཱ (པཱཙི. ༡༩༥) གུཎཾ པཀཱསེཏྭཱ ¶ . པིཎྜཔཱཏནྟི པཉྩནྣཾ བྷོཛནཱནཾ ཨཉྙཏརཾ. ཀམྨསཱདྷནོཡཾ སམཱརམྦྷསདྡོཏི ཨཱཧ ‘‘སམཱརདྡྷ’’ནྟི. པཊིཡཱདིཏསྶཱཏི སམྤཱདིཏསྶ. ཡསྨཱ ཉཱཏཀཔྤཝཱརིཏེཧི བྷིཀྑུསྶ ཨཏྠཱཡ ཨསམཱརདྡྷོཔི པིཎྜཔཱཏོ ཨཏྠཏོ སམཱརདྡྷོཝ ཧོཏི ཡཐཱསུཁཾ ཧརཱཔེཏབྦཏོ, ཏསྨཱ ‘‘ཉཱཏཀཔྤཝཱརིཏཱནཾ ཝཱ སནྟཀ’’ནྟི ཝུཏྟཾ.

ཨུབྷཡཏྠཱཏི པརིཔཱཙིཏཱཔརིཔཱཙིཏེསུ. ཨཝསེསེཏི བྷིཀྑུནིཔརིཔཱཙིཏེཔི ཡཱགུཁཛྫཀཕལཱཕལཱདིཀེ སབྦཏྠ. ནིམིཏྟོབྷཱསཔརིཀཐཱཝིཉྙཏྟིཝསེན པན ཨཝསེསེཔི དུཀྐཊཏོ ན མུཙྩཏི.

པརིཔཱཙིཏསིཀྑཱཔདཝཎྞནཱ ནིཊྛིཏཱ.

༡༠. རཧོནིསཛྫསིཀྑཱཔདཝཎྞནཱ

ཨུཔརཱིཏི ཨཙེལཀཝགྒེ. ཨུཔནནྡསྶ ཙཏུཏྠསིཀྑཱཔདེནཱཏི ཨཔྤཊིཙྪནྣེ མཱཏུགཱམེན སདྡྷིཾ རཧོནིསཛྫསིཀྑཱཔདེན (པཱཙི. ༢༨༤ ཨཱདཡོ). ཏཉྷི ཨུཔནནྡཏྠེརཾ ཨཱརབྦྷ པཉྙཏྟེསུ ཙཏུཏྠབྷཱཝཏོ ‘‘ཨུཔནནྡསྶ ཙཏུཏྠསིཀྑཱཔད’’ནྟི ཝུཏྟཾ. ཡདི ཨེཀཔརིཙྪེདཾ, ཨཐ ཀསྨཱ ཝིསུཾ པཉྙཏྟནྟི ཨཱཧ ‘‘ཨཊྛུཔྤཏྟིཝསེན པན ཝིསུཾ པཉྙཏྟ’’ནྟི. ཏཏྠ ཨཊྛུཔྤཏྟིཝསེནཱཏི ཨཏྠསྶ ཨུཔྤཏྟིཝསེན, བྷིཀྑུནིཡཱ ཨེཝ རཧོནིསཛྫཱཡ ཨུཔྤཏྟིཝསེནཱཏི ཨཏྠོ. ཨཡཾ ཧེཏྠཱདྷིཔྤཱཡོ – ཙཏུཏྠསིཀྑཱཔདཝཏྠུཏོ ཨིམསྶ སིཀྑཱཔདསྶ ཝཏྠུནོ པཋམཾ ཨུཔྤནྣཏྟཱ ཨེཀཔརིཙྪེདེཔི ཨིདཾ པཋམཾ ཝིསུཾ པཉྙཏྟནྟི.

རཧོནིསཛྫསིཀྑཱཔདཝཎྞནཱ ནིཊྛིཏཱ.

ཨོཝཱདཝགྒོ ཏཏིཡོ.

༤. བྷོཛནཝགྒོ

༡. ཨཱཝསཐསིཀྑཱཔདཝཎྞནཱ

‘‘ཨགིལཱནོ’’ཏི ¶ ཨེཏྠ ཨནྟམསོ དྭིགཱཝུཏཾ གནྟུཾ སམཏྠོ ཨདྷིཔྤེཏོཏི ཨཱཧ ‘‘ཨདྡྷཡོཛནམྤི གནྟུཾ སམཏྠེནཱ’’ཏི. ཨཱཝསཐཔིཎྜོཏི ¶ ཨཱཝསཐེ པིཎྜོ, སཱལཱདཱིསུ ཨནོདིསྶ ཡཱཝདཏྠཾ པཉྙཏྟཾ པཉྩནྣཾ བྷོཛནཱནཾ ཨཉྙཏརཾ བྷོཛནནྟི ཨཏྠོ. ཏེནཱཧ ‘‘ཨིམེསཾ ཝཱ’’ཏིཨཱདི. ཏཏྠ ཨིམེསཾ ཝཱཏི ཨིམེསཾ པཱསཎྜཱནཾ ཝཱ. ཨེཏྟཀཱནཾ ཝཱཏི ཨིམསྨིཾ པཱསཎྜེ ཨེཏྟཀཱནཾ པཱསཎྜཱནཾ ཝཱ. པཱསཎྜནྟི ཚནྣཝུཏིཝིདྷཾ སམཎཔརིབྦཱཛཀཱདིཾ. ཏེ ཧི ཏཎྷཱཔཱསཉྩེཝ དིཊྛིཔཱསཉྩ ཌེནྟི ཨོཌྜེནྟཱིཏི པཱསཎྜཱཏི ཝུཙྩནྟི. ཨནོདིསྶཱཏི ཨནུདྡིསིཏྭཱ, ཨཔརིཙྪིནྡིཏྭཱཏི ཨཏྠོ. སཱལཱདཱིསུ ཡཏྠ ཀཏྠཙཱིཏི སཱལཱརུཀྑམཱུལཨབྦྷོཀཱསཱདཱིསུ ཡཏྠ ཀཏྠཙི ཋཱནེསུ. ཨེཀདིཝསམེཝ བྷུཉྫིཏབྦོཏི ཨེཀདིཝསཾ སཀིཾཡེཝ བྷུཉྫིཏབྦོ, ཨེཀསྨིཾ དིཝསེ པུནཔྤུནཾ བྷུཉྫིཏུཾ ན ཝཊྚཏི. དུཏིཡདིཝསཏོ པཊྛཱཡཱཏི བྷུཏྟདིཝསསྶ དུཏིཡདིཝསཏོ པཊྛཱཡ. ཨཛ྄ཛྷོཧཱརེ ཨཛ྄ཛྷོཧཱརེ པཱཙིཏྟིཡནྟི ཨཱལོཔེ ཨཱལོཔེ ཀབལེ༹ ཀབལེ༹ པཱཙིཏྟིཡཾ. ནཱནཱཀུལེཧི (པཱཙི. ཨཊྛ. ༢༠༦) པན ནཱནཱཊྛཱནེསུ པཉྙཏྟཾ, ཨེཀསྨིཾ ཋཱནེ ཨེཀདིཝསཾ བྷུཉྫིཏྭཱ དུཏིཡདིཝསེ ཨཉྙཏྠ བྷུཉྫིཏུཾ ཝཊྚཏི, པཊིཔཱཊིཾ པན ཁེཔེཏྭཱ པུན ཨཱདིཏོ པཊྛཱཡ བྷུཉྫིཏུཾ ན ཝཊྚཏི. ཨེཀཔཱུགནཱནཱཔཱུགཨེཀགཱམནཱནཱགཱམེསུཔི ཨེསེཝ ནཡོ. ཡོཔི ཨེཀཀུལསྶ ཝཱ ནཱནཱཀུལཱནཾ ཝཱ ཨེཀཏོ པཉྙཏྟོ ཏཎྜུལཱདཱིནཾ ཨབྷཱཝེན ཨནྟརནྟརཱ ཚིཛྫཏི, སོཔི ན བྷུཉྫིཏབྦོ. སཙེ པན ‘‘ན སཀྐོམ དཱཏུ’’ནྟི ཨུཔཙྪིནྡིཏྭཱ པུན ཀལྱཱཎཙིཏྟེ ཨུཔྤནྣེ དཱཏུཾ ཨཱརབྷནྟི, ཨེཏཾ པུན ཨེཀདིཝསཾ བྷུཉྫིཏུཾ ཝཊྚཏི.

ཏིཀཔཱཙིཏྟིཡནྟི ཨགིལཱནེ ཨགིལཱནསཉྙིཝེམཏིཀགིལཱནསཉྙཱིནཾ ཝསེན ཏཱིཎི པཱཙིཏྟིཡཱནི. གིལཱནསྶ གིལཱནསཉྙིནོཏི གིལཱནསྶ པན ‘‘གིལཱནོ ཨཧ’’ནྟི སཉྙིནོ ཨནུཝསིཏྭཱ བྷུཉྫནྟསྶ ཨནཱཔཏྟི. སཀིཾ བྷུཉྫཏཱིཏི ཨེཀདིཝསཾ བྷུཉྫཏི. ‘‘གཙྪནྟོ ཝཱ’’ཏི ཨིདཾ ཨདྡྷཡོཛནཝསེན གཧེཏབྦཾ, ཏཐཱ ‘‘པཙྩཱགཙྪནྟོ’’ཏི (སཱརཏྠ. ཊཱི. པཱཙིཏྟིཡ ༣.༢༠༨) ཨིདམྤཱིཏི ཝདནྟི. ཀེནཙི ཨུཔདྡཝེནཱཏི ནདིཔཱུརཙོརབྷཡཱདིནཱ ཀེནཙི ཨུཔདྡཝེན. ཨཉྙནྟི ཡཱགུཁཛྫཀཕལཱཕལཱདིབྷེདཾ ཡཾ ཀིཉྩི ཨཉྙཾ. ཨནུཝསིཏྭཱཏི པུན ཝསིཏྭཱ.

ཨཱཝསཐསིཀྑཱཔདཝཎྞནཱ ནིཊྛིཏཱ.

༢. གཎབྷོཛནསིཀྑཱཔདཝཎྞནཱ

གཎབྷོཛནེཏི ¶ ¶ གཎེན ལདྡྷཏྟཱ གཎསྶ སནྟཀེ བྷོཛནེ. ཏེནཱཧ ‘‘གཎསྶ བྷོཛནེ’’ཏི. ནནུ ཙེཏྠ ‘‘གཎསྶ བྷོཛནེ’’ཏི ཝུཙྩཏི, སོ ཙ ཁོ གཎོ ‘‘ཀཏྠཙི དྭཱིཧི, ཀཏྠཙི ཏཱིཧཱི’’ཏིཨཱདིནཱ ཨནེཀདྷཱ ཨདྷིཔྤེཏོ, ཨིདྷ ཀཏིཧཱིཏི ཨཱཧ ‘‘ཨིདྷ ཙཱ’’ཏིཨཱདི. ཏཾ པནེཏཾ གཎབྷོཛནཾ དྭཱིཧི པཀཱརེཧི པསཝཏི ནིམནྟནཏོ ཝཱ ཝིཉྙཏྟིཏོ ཝཱཏི ཨཱཧ ‘‘ཏེསཾ ནིམནྟནཏོ ཝཱ’’ཏིཨཱདི. ཏཏྠ ནིམནྟནཏོ ཝཱཏི ཨཀཔྤིཡནིམནྟནཏོ ཝཱ. ཨོདནཱདཱིནཾ པཉྩནྣནྟི ཨོདནསཏྟུཀུམྨཱསམཙྪམཾསཱནཾ པཉྩནྣཾ.

‘‘ཨོདནེན ནིམནྟེམི, ཨོདནཾ མེ གཎྷཐཱ’’ཏིཨཱདིནཱ ནཡེན ཡེན ཀེནཙི ཝེཝཙནེན ཝཱ བྷཱསནྟརེན ཝཱ པཉྩནྣཾ བྷོཛནཱནཾ ནཱམཾ གཧེཏྭཱ ནིམནྟེཏཱིཏི སམྦནྡྷོ. ཙཏྟཱརོཏི ཨེཀཊྛཱནེ ཝཱ ནཱནཱཊྛཱནེསུ ཝཱ ཋིཏེ ཙཏྟཱརོ བྷིཀྑཱུ. ལཀྑཎཝཙནཉྩེཏཾ, ཏསྨཱ ཙཏྟཱརོ ཝཱ ཏཏོ ཝཱ ཨདྷིཀེ བྷིཀྑཱུཏི ཨཏྠོ. ཝེཝཙནེན ཝཱཏི བྷཏྟཨནྣཱདིཔརིཡཱཡསདྡེན ཝཱ. བྷཱསནྟརེན ཝཱཏི ཨནྡྷདམིལཱ༹དིབྷཱསནྟརེན ཝཱ. པཉྩནྣཾ བྷོཛནཱནཾ ནཱམཾ གཧེཏྭཱཏི པཉྩནྣཾ བྷོཛནཱནཾ ཨཉྙཏརསྶ ནཱམཾ གཧེཏྭཱ. ཨོདནེན ནིམནྟེམཱིཏི ཏུམྷེ བྷནྟེ ཨོདནེན ནིམནྟེམི. ཨཱདིསདྡེན ‘‘ཨཱཀངྑཐ ཨོལོཀེཐ ཨདྷིཝཱསེཐ པཊིམཱནེཐ, སཏྟུནཱ ནིམནྟེམི, སཏྟུཾ མེ གཎྷཐ ཨཱཀངྑཐ ཨོལོཀེཐ ཨདྷིཝཱསེཐ པཊིམཱནེཐཱ’’ཏིཨཱདཱིནཾ (པཱཙི. ཨཊྛ. ༢༡༧-༢༡༨) གཧཎཾ. ཨེཀཏོ ཝཱཏི ཨེཀཏྠ ཋིཏེ ཝཱ ནིསིནྣེ ཝཱ བྷིཀྑཱུ དིསྭཱ ‘‘ཏུམྷེ, བྷནྟེ, ཨོདནེན ནིམནྟེམཱི’’ཏིཨཱདིནཱ ཨེཝཾ ཨེཀཏོ ནིམནྟིཏཱ. ནཱནཱཏོ ཝཱ ནིམནྟིཏཱཏི ཙཏྟཱརི པརིཝེཎཱནི ཝཱ ཝིཧཱརེ ཝཱ གནྟྭཱ ནཱནཱཏོ ཝཱ ནིམནྟིཏཱ. ཨེཀཊྛཱནེ ཋིཏེསུཡེཝ ཝཱ ཨེཀོ པུཏྟེན, ཨེཀོ པིཏརཱཏི ཨེཝམྤི ནིམནྟིཏཱ ནཱནཱཏོཡེཝ ནིམནྟིཏཱ ནཱམ ཧོནྟི. ཨེཀཏོ གཎྷནྟིཏི ཨཉྙམཉྙསྶ དྭཱདསཧཏྠཱུཔཙཱརེ ཋིཏཱ གཎྷནྟི.

ཀསྨཱ པན ནཱནཱཏོ བྷུཏྟེཔི གཎབྷོཛནཾ ཧོཏཱིཏི ཨཱཧ ‘‘པཊིགྒཧཎམེཝ ཧེཏྠ པམཱཎ’’ནྟི. ཡདི ཨེཝཾ ཨཐ ཀསྨཱ པཱལི༹ཡཾ ‘‘གཎབྷོཛནཾ ནཱམ ཡཏྠ ཙཏྟཱརོ བྷིཀྑཱུ པཉྩནྣཾ བྷོཛནཱནཾ ཨཉྙཏརེན བྷོཛནེན ནིམནྟིཏཱ བྷུཉྫནྟི, ཨེཏཾ གཎབྷོཛནཾ ནཱམཱ’’ཏི (པཱཙི. ༢༡༨) ཝུཏྟཾ? ཏཾ པཊིགྒཧཎནིཡམནཏྠམེཝ ¶ . ན ཧི ཨཔྤཊིགྒཧིཏཀཾ བྷིཀྑཱུ བྷུཉྫནྟཱིཏི ‘‘བྷུཉྫནྟཱི’’ཏི པདཾ པཊིགྒཧཎནིཡམཝཙནཾ ཧོཏི. ཨེཀཏོ ཝཱ ནཱནཱཏོ ཝཱ ཝིཉྙཱཔེཏྭཱཏི ཙཏྟཱརོ བྷིཀྑཱུ ཨེཀཏོ ཋིཏཱ ཝཱ ནིསིནྣཱ ཝཱ ཨུཔཱསཀཾ དིསྭཱ ‘‘ཨམྷཱཀཾ ཙཏུནྣམྤི བྷཏྟཾ དེཧཱི’’ཏི ཝཱ པཱཊེཀྐཾ པཝིསིཏྭཱ ‘‘མཡ྄ཧཾ བྷཏྟཾ དེཧི, མཡ྄ཧཾ བྷཏྟཾ དེཧཱི’’ཏི ཝཱ ཨེཀཏོ ཝཱ ནཱནཱཏོ ¶ ཝཱ ཝིཉྙཱཔེཏྭཱ. ཏསྶ དུཝིདྷསྶཱཔཱིཏི ཡཉྩ ནིམནྟནཏོ ལདྡྷཾ གཎབྷོཛནཾ, ཡཉྩ ཝིཉྙཏྟིཏོ ལདྡྷཾ, ཏསྶ དུཝིདྷསྶཱཔི གཎབྷོཛནསྶ. ཨེཝཾ པཊིགྒཧཎེཏི ཨེཀཏོ པཊིགྒཧཎེ.

པཱདཱནམྤི ཕལིཏཏྟཱཏི (པཱཙི. ཨཊྛ. ༢༡༧-༢༡༨) ཨནྟམསོ པཱདཱནམྤི ཡཐཱ མཧཱཙམྨསྶ པརཏོ མཾསཾ དིསྶཏི, ཨེཝཾ ཕལིཏཏྟཱ. ན སཀྐཱ པིཎྜཱཡ ཙརིཏུནྟི ཝཱལིཀཱཡ ཝཱ སཀྑརཱཡ ཝཱ ཕུཊྛམཏྟེ དུཀྑུཔྤཏྟིཏོ ཨནྟོགཱམེ པིཎྜཱཡ ཙརིཏུཾ ན སཀྐོཏི. ཙཱིཝརེ ཀརིཡམཱནེཏི སཱཊཀཉྩ སུཏྟཉྩ ལབྷིཏྭཱ ཙཱིཝརེ ཀརིཡམཱནེ. ཡཾ ཀིཉྩི ཙཱིཝརེ ཀཏྟབྦཀམྨནྟི ཙཱིཝརཝིཙཱརཎཚིནྡནམོགྷསུཏྟཱརོཔནཱདི ཡཾ ཀིཉྩི ཙཱིཝརེ ཀཏྟབྦཾ ཀམྨཾ, ཨནྟམསོ སཱུཙིཝེདྷནམྤཱིཏི ཨདྷིཔྤཱཡོ. ‘‘ཨདྡྷཡོཛནམྤཱི’’ཏིཨཱདི ཨཝཀཾསཏོ ཝུཏྟཾ. ཡོ པན དཱུརཾ གནྟུཀཱམོ, ཏཏྠ ཝཏྟབྦམེཝ ནཏྠི, གཙྪནྟོ ཨདྡྷཡོཛནབྦྷནྟརེ གཱཝུཏེཔི བྷུཉྫིཏུཾ ལབྷཏི, གཏོ པན ཨེཀདིཝསཾ. ཡདཱ ནཱཝཾ ཨབྷིརུཧིཏུཀཱམོ ཝཱ ཧོཏི ཨཱརུལ༹ྷོ ཝཱ ཨོརུལ༹ྷོ ཝཱ, ཨཡཾ ནཱཝཱབྷིརུཧནསམཡོ ནཱམཱཏི ཨཱཧ ‘‘ནཱཝཱབྷིརུཧནསམཡེཔི ཨེསེཝ ནཡོ’’ཏི. ཨཡཾ པན ཝིསེསོ – ཨབྷིརུལ༹ྷེན ཨིཙྪིཏཊྛཱནཾ གནྟྭཱཔི ཡཱཝ ན ཨོརོཧཏི, ཏཱཝ བྷུཉྫིཏབྦཾ. ཙཏྟཱརོ བྷིཀྑཱུཏི ཨནྟིམཔརིཙྪེདོ. ཡཏྠ པན སཏཾ ཝཱ སཧསྶཾ ཝཱ སནྣིཔཏིཏཾ, ཏཏྠ ཝཏྟབྦམེཝ ནཏྠི. ཏསྨཱ ཏཱདིསེ ཀཱལེ ‘‘མཧཱསམཡོ’’ཏི ཨདྷིཊྛཧིཏྭཱ བྷུཉྫིཏབྦཾ. ཡོ ཀོཙི པབྦཛིཏོཏི སཧདྷམྨིཀེསུ ཝཱ ཏིཏྠིཡེསུ ཝཱ ཨཉྙཏརོ.

ཡེ ཙ དྭེ ཏཡོ ཨེཀཏོ གཎྷནྟཱིཏི ཡེཔི ཨཀཔྤིཡནིམནྟནཾ སཱདིཡིཏྭཱ དྭེ ཝཱ ཏཡོ ཝཱ ཨེཀཏོ གཎྷནྟི, ཏེསམྤི ཨནཱཔཏྟི. པཎཱིཏབྷོཛནསཱུཔོདནཝིཉྙཏྟཱིཧི པན ཨཱཔཏྟིཡེཝཱཏི ཝདནྟི, ཨུཔཔརིཀྑིཏབྦཾ. ནིཙྩབྷཏྟཱདཱིསཱུཏི ནིཙྩབྷཏྟེ སལཱཀབྷཏྟེ པཀྑིཀེ ཨུཔོསཐིཀེ པཱཊིཔདིཀེ. ཏཏྠ ནིཙྩབྷཏྟནྟི དྷུཝབྷཏྟཾ ཝུཙྩཏི. ‘‘ནིཙྩབྷཏྟཾ གཎྷཐཱ’’ཏི ཝདནྟི ¶ , བཧཱུནམྤི ཨེཀཏོ གཎྷིཏུཾ ཝཊྚཏི. སལཱཀབྷཏྟཱདཱིསུཔི ཨེསེཝ ནཡོ.

གཎབྷོཛནསིཀྑཱཔདཝཎྞནཱ ནིཊྛིཏཱ.

༣. པརམྤརབྷོཛནསིཀྑཱཔདཝཎྞནཱ

གཎབྷོཛནེ ཝུཏྟནཡེནེཝཱཏི བྷིཀྑུཾ ཨུཔསངྐམིཏྭཱ ‘‘ཏུམྷེ, བྷནྟེ, ཨོདནེན ནིམནྟེམི, ཨོདནཾ མེ གཎྷཐཱ’’ཏིཨཱདིནཱ (པཱཙི. ཨཊྛ. ༢༡༧-༢༡༨) ནཡེན ཡེན ཀེནཙི ཝེཝཙནེན ཝཱ བྷཱསནྟརེན ཝཱ པཉྩནྣཾ བྷོཛནཱནཾ ཨཉྙཏརསྶ ནཱམཾ གཧེཏྭཱ ནིམནྟེཏཱིཏི ཝུཏྟེནེཝ ནཡེན ¶ . ནིམནྟིཏསྶཱཏི ཨཀཔྤིཡནིམནྟནེན ནིམནྟིཏསྶ. ཨཝིཀཔྤེཏྭཱཏི སམྨུཁཱསམྨུཁཝསེན ཨཝིཀཔྤེཏྭཱ, ཨཔརིཙྩཛིཏྭཱཏི ཨཏྠོ. ཨཡཉྷི བྷཏྟཝིཀཔྤནཱ ནཱམ སམྨུཁཱཔརམྨུཁཱཔི ཝཊྚཏི. ཏེནཱཧ ‘‘ཡོ བྷིཀྑུ པཉྩསུ སཧདྷམྨིཀེསཱུ’’ཏིཨཱདི.

ཨཉྙཏྲ ནིམནྟནབྷོཛནཝཏྠུསྨིནྟི ཨཉྙཏྲ པཋམཾ ནིམནྟིཏཱ ཧུཏྭཱ ཨཉྙསྨིཾ ནིམནྟནེ བྷུཉྫནཝཏྠུསྨིཾ. ཡདི ཏིཝིདྷཱ ཨནུཔཉྙཏྟི, ཨཐ ཀསྨཱ པརིཝཱརེ ‘‘ཙཏསྶོ ཨནུཔཉྙཏྟིཡོ’’ཏི ཝུཏྟནྟི ཨཱཧ ‘‘པརིཝཱརེ པནཱ’’ཏིཨཱདི. ཝིཀཔྤནམྤི གཧེཏྭཱཏི ཝིཀཔྤནཱནུཛཱནནམྤི ཨནུཔཉྙཏྟིསམཱནནྟི ཨནུཔཉྙཏྟིབྷཱཝེན གཧེཏྭཱ. ཨེཀསཾསཊྛཱནཱིཏི ཨེཀསྨིཾ མིསྶིཏཱནི. ཨིདཾ ཝུཏྟཾ ཧོཏི (པཱཙི. ཨཊྛ. ༢༢༩) – དྭེ ཏཱིཎི ཀུལཱནི ནིམནྟེཏྭཱ ཨེཀསྨིཾ ཋཱནེ ནིསཱིདཱཔེཏྭཱ ཨིཏོ ཙིཏོ ཙ ཨཱཧརིཏྭཱ བྷཏྟཾ ཨཱཀིརནྟི, སཱུཔབྱཉྫནཾ ཨཱཀིརནྟི, ཨེཀམིསྶཀཾ ཧོཏི, ཨེཏྠ ཨནཱཔཏྟཱིཏི. སཙེ པན མཱུལནིམནྟནཾ ཧེཊྛཱ ཧོཏི, པཙྪིམཾ པཙྪིམཾ ཨུཔརི, ཏཾ ཨུཔརིཏོ པཊྛཱཡ བྷུཉྫནྟསྶ ཨཱཔཏྟི. ཧཏྠཾ པན ཨནྟོ པཝེསེཏྭཱ པཋམནིམནྟནཏོ ཨེཀམྤི ཀབལ༹ཾ ཨུདྡྷརིཏྭཱ བྷུཏྟཀཱལཏོ པཊྛཱཡ ཡཐཱ ཏཐཱ ཝཱ བྷུཉྫནྟསྶ ཨནཱཔཏྟི. དྭེ ཏཱིཎི ནིམནྟནཱནི ཨེཀཏོ ཝཱ ཀཏྭཱ བྷུཉྫཏཱིཏི དྭེ ཏཱིཎི ནིམནྟནཱནི ཨེཀཏོ པཀྑིཔིཏྭཱ མིསྶེཏྭཱ ཨེཀཾ ཀཏྭཱ བྷུཉྫཏཱིཏི ཨཏྠོ. ‘‘སཀལེན གཱམེན ཝཱ’’ཏིཨཱདཱིསུ སཀལེན གཱམེན ཨེཀཏོ ཧུཏྭཱ ནིམནྟིཏསྶེཝ ཡཏྠ ཀཏྠཙི བྷུཉྫཏོ ཨནཱཔཏྟི. པཱུགེཔི ཨེསེཝ ནཡོ. ནིམནྟིཡམཱནོ ཝཱ ‘‘བྷིཀྑཾ གཧེསྶཱམཱི’’ཏི ཝདཏཱིཏི ‘‘བྷཏྟཾ གཎྷཱ’’ཏི ནིམནྟིཡམཱནོ ¶ ‘‘ན མཡ྄ཧཾ ཏཝ བྷཏྟེན ཨཏྠོ, བྷིཀྑཾ གཧེསྶཱམཱི’’ཏི བྷཎཏི. ཀིརིཡཱཀིརིཡནྟི ཨེཏྠ བྷོཛནཾ ཀིརིཡཾ, ཨཝིཀཔྤནཾ ཨཀིརིཡཾ.

པརམྤརབྷོཛནསིཀྑཱཔདཝཎྞནཱ ནིཊྛིཏཱ.

༤. ཀཱཎམཱཏཱསིཀྑཱཔདཝཎྞནཱ

པཧེཎཀཏྠཱཡཱཏི པཎྞཱཀཱརཏྠཱཡ. པཱཐེཡྻཏྠཱཡཱཏི མགྒཾ གཙྪནྟཱནཾ ཨནྟརཱམགྒཏྠཱཡ. སཏྟཱུཏི བདྡྷསཏྟུ, ཨབདྡྷསཏྟུ ཙ. དྭཏྟིཔཏྟཔཱུརེ པཊིགྒཧེཏྭཱཏི མུཁཝཊྚིཡཱ ཧེཊྛིམལེཁཱཡ སམཾ པཱུརེ དྭཏྟིཔཏྟཔཱུརེ གཧེཏྭཱཏི ཨཏྠོ. ཨིམསྶ ཙཏྠསྶ ཧེཊྛཱ ཝུཏྟནཡེནེཝ པཱཀཊཏྟཱ ཏཏྠ ཀཏྟབྦཔྤཀཱརམེཝ དསྶེཏུཾ ‘‘ཨེཏྠཱ’’ཏིཨཱདིམཱཧ. སེསནྟི ཏཏོ ཨེཀཔཏྟཏོ ཨཉྙཾ པཏྟཾ. སཙེ ཏཡོ པཏྟཔཱུརཱ གཧིཏཱ དྭེ, སཙེ དྭེ གཧིཏཱ, ཨེཀནྟི ཝུཏྟཾ ཧོཏི.

གམནེ ¶ ཝཱ པཊིཔྤསྶདྡྷེཏི ཨནྟརཱམགྒེ ཨུཔདྡཝཾ དིསྭཱ, ཨནཏྠིཀཏཱཡ ཝཱ ‘‘མཡཾ ཨིདཱནི ན པེསིསྶཱམ ན གམིསྶཱམཱ’’ཏི ཨེཝཾ གམནེ ཨུཔཙྪིནྣེ དེནྟཱནནྟི ཨཏྠོ.

ཀཱཎམཱཏཱསིཀྑཱཔདཝཎྞནཱ ནིཊྛིཏཱ.

༥. པཋམཔཝཱརཎཱསིཀྑཱཔདཝཎྞནཱ

བྷུཏྟཝཱཏི ཀཏབྷཏྟཀིཙྩོ. སཱསཔམཏྟམྤི ཨཛ྄ཛྷོཧརིཏནྟི ཨེཝཾ པརིཏྟམྤི བྷོཛནཾ སངྑཱདིཏྭཱ ཝཱ ཨསངྑཱདིཏྭཱ ཝཱ གིལིཏཾ. པཝཱརིཏོཏི པཊིཀྑེཔིཏོ. ཡོ ཧི བྷུཉྫནྟོ པརིཝེསཀེན ཨུཔནཱིཏཾ བྷོཛནཾ ཨནིཙྪནྟོ པཊིཀྑིཔཏི, སོ ཏེན པཝཱརིཏོ པཊིཀྑིཔིཏོ ནཱམ ཧོཏི. བྱཉྫནཾ པན ཨནཱདིཡིཏྭཱ ཨཏྠམཏྟམེཝ དསྶེཏུཾ ‘‘ཀཏཔྤཝཱརཎོ ཀཏཔྤཊིཀྑེཔོཏི ཨཏྠོ’’ཏི ཝུཏྟཾ. སོཔི ཙ པཊིཀྑེཔོ ཡསྨཱ ན པཊིཀྑེཔམཏྟེན, ཨཐ ཁོ པཉྩངྒཝསེན. ཏེནསྶ པདབྷཱཛནེ ‘‘ཨསནཾ པཉྙཱཡཏཱི’’ཏིཨཱདི (པཱཙི. ༢༣༩) ཝུཏྟཾ.

བྷོཛནཾ ¶ པཉྙཱཡཏཱིཏི པཉྩནྣཾ བྷོཛནཱནཾ ཨཉྙཏརཾ པཏྟཱདཱིསུ དིསྶཏི. ཏེནཱཧ ‘‘པཝཱརཎཔྤཧོནཀཾ ཙེ བྷོཛན’’ནྟིཨཱདི. སཱལཱིཏི (པཱཙི. ཨཊྛ. ༢༣༨-༢༣༩) ཨནྟམསོ ནཱིཝཱརཾ ཨུཔཱདཱཡ སབྦཱཔི སཱལིཛཱཏི. ཝཱིཧཱིཏི སབྦཱཔི ཝཱིཧིཛཱཏི. ཡཝགོདྷུམེསུ བྷེདོ ནཏྠི. ཀངྒཱུཏི སེཏརཏྟཀཱལ༹བྷེདཱ སབྦཱཔི ཀངྒུཛཱཏི. ཝརཀོཏི ཨནྟམསོ ཝརཀཙོརཀཾ ཨུཔཱདཱཡ སབྦཱཔི སེཏཝཎྞཱ ཝརཀཛཱཏི. ཀུདྲཱུསཀོཏི ཀཱལ༹ཀོདྲཝོ ཙེཝ སཱམཱཀཱདིབྷེདཱ ཙ སབྦཱཔི ཏིཎདྷཉྙཛཱཏི.

ནཱིཝཱརཝརཀཙོརཀཱ ཙེཏྠ ‘‘དྷཉྙཱནུལོམཱ’’ཏི ཝདནྟི. ཡཱགུནྟི ཨམྦིལཡཱགུཁཱིརཡཱགུཨཱདིབྷེདཾ ཡཾ ཀིཉྩི ཡཱགུཾ. ཨིམིནཱཝ པཱཡཱསསྶཱཔི གཧིཏཏྟཱ ‘‘ཨམྦིལཔཱཡཱསཱདཱིསུ ཨཉྙཏརཾ པཙཱམཱཏི ཝཱ’’ཏི ན ཝུཏྟཾ. པཝཱརཎཾ ཛནེཏཱིཏི ཨནཏིརིཏྟབྷོཛནཱཔཏྟིནིབནྡྷནཾ པཊིཀྑེཔཾ སཱདྷེཏི. སཙེ པན ཨོདྷི ན པཉྙཱཡཏི, ཡཱགུསངྒཧཾ གཙྪཏི, པཝཱརཎཾ ན ཛནེཏི. པུན པཝཱརཎཾ ཛནེཏི གྷནབྷཱཝགམནཏོ པཊྛཱཡ བྷོཛནསངྒཧིཏཏྟཱཏི ཨདྷིཔྤཱཡོ.

ཨུདཀཀཉྫིཀཁཱིརཱདཱིནི ཨཱཀིརིཏྭཱཏི ཨུདཀཉྩེཝ ཀཉྫིཀཉྩ ཁཱིརཱདཱིནི ཙ ཨཱཀིརིཏྭཱ ཏེཧི སདྡྷིཾ ཨམདྡིཏྭཱ བྷཏྟམིསྶཀེ ཀཏྭཱ. ཏེནཱཧ ‘‘ཡཱགུཾ གཎྷཐཱ’’ཏིཨཱདི. སཙེ པན བྷཏྟེ ཨུདཀཀཉྫིཀཁཱིརཱདཱིནི ཨཱཀིརིཏྭཱ མདྡིཏྭཱ ‘‘ཡཱགུཾ གཎྷཐཱ’’ཏི དེནྟི, པཝཱརཎཱ ¶ ན ཧོཏི. ཡཱགུཡཱཔཱིཏི ཨེཝཾ ཡཱགུསངྒཧཾ གཏཱཡ ཝཱ ཨཉྙཱཡ ཝཱ ཡཱགུཡཱཔི. སུདྡྷརསཀོ, པན རསཀཡཱགུ ཝཱ ན ཛནེཏི.

པཉྩནྣཾ བྷོཛནཱནཾ ཨཉྙཏརཝསེན ཝིཔྤཀཏབྷོཛནབྷཱཝསྶ ཨུཔཙྪིནྣཏྟཱ ‘‘དྭེཔི ཁཱདིཏཱནི ཧོནྟི…པེ… ན པཝཱརེཏཱི’’ཏི ཝུཏྟཾ. ཨཀཔྤིཡམཾསཾ (པཱཙི. ཨཊྛ. ༢༣༨-༢༣༩), ཨཀཔྤིཡབྷོཛནཉྩ བུདྡྷཔཊིཀུཊྛཾ པཊིཀྑིཔཏོ པཝཱརཎཱཡ ཨཝཏྠུཏཱཡ ན པཝཱརཎཱ ཧོཏཱིཏི ཨཱཧ ‘‘ཡོ པནཱ’’ཏིཨཱདི. ཡཉྷི བྷིཀྑུནོ ཁཱདིཏུཾ ཝཊྚཏི, ཏཾ ཨེཝ པཊིཀྑིཔཏོ པཝཱརཎཱ ཧོཏི. ཨིདཾ པན ཛཱནནྟོ ཨཀཔྤིཡཏྟཱ པཊིཀྑིཔཏི. ཨཛཱནནྟོཔི པཊིཀྑིཔིཏབྦཊྛཱནེ ཋིཏམེཝ པཊིཀྑིཔཏི ནཱམ, ཏསྨཱ ན པཝཱརེཏི. སཙེ པན ཨཀཔྤིཡམཾསཾ ཁཱདནྟོ ཀཔྤིཡམཾསཾ ཝཱ བྷོཛནཾ ཝཱ པཊིཀྑིཔཏི, པཝཱརེཏི. ཀསྨཱ? ཝཏྠུཏཱཡ. ཡཉྷི ཏེན པཊིཀྑིཏྟཾ, ཏཾ པཝཱརཎཱཡ ཝཏྠུ. ཡཾ པན ཁཱདཏི, ཏཾ ¶ ཀིཉྩཱཔི པཊིཀྑིཔིཏབྦཊྛཱནེ ཋིཏཾ, ཁཱདིཡམཱནཾ པན མཾསབྷཱཝཾ ན ཛཧཏི, ཏསྨཱ པཝཱརེཏི. ཀོ པན ཝཱདོ ཀཔྤིཡམཾསཾ ཁཱདཏོ ཀཔྤིཡམཾསབྷོཛནཔྤཊིཀྑེཔེ. ཨེས ནཡོ ཨཀཔྤིཡབྷོཛནཾ ཁཱདཏོ ཀཔྤིཡབྷོཛནཔྤཊིཀྑེཔེ.

བྷོཛནེ སཏཱིཏི པཉྩསུ བྷོཛནེསུ ཨེཀསྨིམྤི བྷོཛནེ སཏི. ཨཉྙཾ ཝུཏྟལཀྑཎཾ བྷོཛནནྟི པཏྟཱདིགཏཏོ ཨཉྙཾ ཝུཏྟལཀྑཎཾ པཉྩསུ བྷོཛནེསུ ཨེཀམྤི བྷོཛནཾ. ‘‘ནིརཔེཀྑོ ཧོཏཱི’’ཏི ཨེཏསྶེཝ ཝིཝརཎཾ ‘‘ཡཾ པཏྟཱདཱིསཱུ’’ཏིཨཱདི. ན ཀེཝལཾ ནིརཔེཀྑོ ཝཱཏི ཨཱཧ ‘‘ཨཉྙཏྲ ཝཱ’’ཏིཨཱདི. སོ པཊིཀྑིཔནྟོཔི ན པཝཱརེཏཱིཏི ཏསྨིཾ ཙེ ཨནྟརེ ཨཉྙཾ བྷོཛནཾ ཨབྷིཧཊཾ, ཏཾ སོ པཊིཀྑིཔནྟོཔི ན པཝཱརེཏི. ཀསྨཱ? ཝིཔྤཀཏབྷོཛནབྷཱཝསྶ ཨུཔཙྪིནྣཏྟཱ.

‘‘ཨུཔནཱམེཏཱི’’ཏི (པཱཙི. ཨཊྛ. ༢༣༨-༢༣༩) ཨིམིནཱ ཀཱཡཱབྷིཧཱརཾ དསྶེཏི. ཧཏྠེ ཝཱ ཨཱདྷཱརཀེ ཝཱཏི ཨེཏྠ ཝཱ-སདྡོ ཨཝུཏྟཝིཀཔྤཏྠོ, ཏེན ‘‘ཨཱུརཱུསུ ཝཱ’’ཏི ཝིཀཔྤེཏི. དཱུརེ ནིསིནྣསྶ དཧརབྷིཀྑུསྶ པཏྟཾ པེསེཏྭཱ ‘‘ཨིཏོ ཨོདནཾ གཎྷཱཧཱི’’ཏི ཝདཏི, གཎྷིཏྭཱ པན གཏོ ཏུཎྷཱི ཏིཊྛཏི, ཏམྤི པཊིཀྑིཔཏོ ཨེསེཝ ནཡོ. ཀསྨཱ? བྷིཀྑུསྶ དཱུརབྷཱཝཏོ, དཱུཏསྶ ཙ ཨནབྷིཧརཎཏོ. སཙེ པན གཧེཏྭཱ ཨཱགཏོ བྷིཀྑུ ‘‘ཨིམཾ བྷཏྟཾ གཎྷཱ’’ཏི ཝདཏི, ཏཾ པཊིཀྑིཔཏོ པཝཱརཎཱ ཧོཏི. ཨེཝཾ ཝུཏྟེཔཱིཏི ‘‘བྷཏྟཾ གཎྷཱ’’ཏི ཝུཏྟེཔི.

བྷཏྟཔཙྪིཾ གཧེཏྭཱ པརིཝིསནྟསྶཱཏི ཨེཀེན ཧཏྠེན བྷཏྟཔཙྪིཾ གཧེཏྭཱ ཨེཀེན ཧཏྠེན ཀཊཙྪུཾ ¶ གཧེཏྭཱ པརིཝིསནྟསྶ. ཨཉྙོ ‘‘ཨཧཾ དྷཱརེསྶཱམཱི’’ཏི གཧིཏམཏྟཀམེཝ ཀརོཏཱིཏི ཨཉྙོ ཨཱགནྟྭཱ ‘‘ཨཧཾ པཙྪིཾ དྷཱརེསྶཱམི, ཏྭཾ ཨོདནཾ དེཧཱི’’ཏི ཝཏྭཱ གཧིཏམཏྟཀམེཝ ཀརོཏི. ཨབྷིཧཊཱཝ ཧོཏཱིཏི པརིཝེསཀེནེཝ ཨབྷིཧཊཱཝ ཧོཏི. ཨིདཱནི ཨསཏི ཏསྶ དཱཏུཀཱམཱབྷིཧཱརེ གཧཎསམཡེཔི པཊིཀྑིཔཏོ ན ཧོཏཱིཏི དསྶེཏུཾ ‘‘སཙེ པནཱ’’ཏིཨཱདི ཝུཏྟཾ. ཨུདྡྷཊེཏི ཨུདྡྷཊེ བྷཏྟེ. ཀཊཙྪུཨབྷིཧཱརོཡེཝ ཧི ཏསྶ ཨབྷིཧཱརོཏི ཨདྷིཔྤཱཡོ. ཨནནྟརསྶ དིཡྻམཱནེཏི ཨནནྟརསྶ བྷིཀྑུནོ བྷཏྟེ དིཡྻམཱནེ. ཀཱཡཝིཀཱརེནཱཏི ‘‘ཨངྒུལིཾ ཝཱ ཧཏྠཾ ཝཱ མཙྪིཀབཱིཛནིཾ ཝཱ ཙཱིཝརཀཎྞཾ ཝཱ ¶ ཙཱལེཏི, བྷམུཀཱཡ ཝཱ ཨཱཀཱརཾ ཀརོཏི, ཀུདྡྷོ ཝཱ ཨོལོཀེཏཱི’’ཏི (པཱཙི. ཨཊྛ. ༢༣༨-༢༣༩) ཨེཝཾ ཝུཏྟེན ཨངྒུལིཙལནཱདིནཱ ཀཱཡཝིཀཱརེན. ‘‘ཨལཾ མཱ དེཧཱི’’ཏིཨཱདིནཱ ཝཙཱིཝིཀཱརེནཱཏི ‘‘ཨལ’’ནྟི ཝཱ ‘‘ན གཎྷཱམཱི’’ཏི ཝཱ ‘‘མཱ ཨཱཀིརཱ’’ཏི ཝཱ ‘‘ཨཔགཙྪཱ’’ཏི ཝཱ ཨེཝཾ ཡེན ཀེནཙི ཝཙཱིཝིཀཱརེན.

ཨབྷིཧཊེ པན བྷཏྟེ པཝཱརཎཱཡ བྷཱིཏོ ཧཏྠེ ཨཔནེཏྭཱ པུནཔྤུནཾ པཏྟེ ཨོདནཾ ཨཱཀིརནྟཾ ‘‘ཨཱཀིར ཨཱཀིར, ཀོཊྚེཏྭཱ པཱུརེཧཱི’’ཏི ཝདཏོ པཝཱརཎཱ ན ཧོཏི. ཨེས ནཡོ བྷཏྟཾ ཨབྷིཧརནྟཾ བྷིཀྑུཾ སལླཀྑེཏྭཱ ‘‘ཀིཾ, ཨཱཝུསོ, ཨིཏོཔི ཀིཉྩི གཎྷིསྶསི, དམྨི ཏེ ཀིཉྩཱི’’ཏི ཝདཏོཔི.

‘‘རསཾ པཊིགྒཎྷཐཱ’’ཏི ཨཔྤཝཱརཎཱཛནཀསྶ ནཱམཾ གཧེཏྭཱ ཝུཏྟཏྟཱ ‘‘ཏཾ སུཏྭཱ པཊིཀྑིཔཏོ པཝཱརཎཱ ནཏྠཱི’’ཏི ཝུཏྟཾ. མཾསརསནྟི ཨེཏྠ པན ན ཀེཝལཾ མཾསསྶ རསཾ ‘‘མཾསརས’’མིཙྩེཝ ཝིཉྙཱཡཏི, ཨཐ ཁོ མཾསཉྩ རསཉྩ མཾསརསནྟི ཨེཝཾ པཝཱརཎཱཛནཀནཱམཝསེནཱཔི. ཏསྨཱ ཏཾ པཊིཀྑིཔཏོ པཝཱརཎཱཝ ཧོཏཱིཏི ཨཱཧ ‘‘མཾསརསནྟི ཝུཏྟེ པན པཊིཀྑིཔཏོ པཝཱརཎཱ ཧོཏཱི’’ཏི. པརཏོ མཙྪམཾསཾ བྱཉྫནནྟི ཨེཏྠཱཔི ཨེསེཝ ནཡོ. ཡསྨིཾ ཨིརིཡཱཔཐེ པཝཱརེཏི, ཏཾ ཨཝིཀོཔེནྟེནེཝ བྷུཉྫིཏབྦནྟི ཡོ གཙྪནྟོ (པཱཙི. ཨཊྛ. ༢༣༨-༢༣༩) པཝཱརེཏི, ཏེན གཙྪནྟེནེཝ བྷུཉྫིཏབྦཾ. ཀདྡམཾ ཝཱ ཨུདཀཾ ཝཱ པཏྭཱ ཋིཏེན ཨཏིརིཏྟཾ ཀཱརེཏབྦཾ. སཙེ ཨནྟརཱ ནདཱི པཱུརཱ ཧོཏི, ནདིཏཱིརེ གུམྦཾ ཨནུཔརིཡཱཡནྟེན བྷུཉྫིཏབྦཾ. ཨཐ ནཱཝཱ ཝཱ སེཏུ ཝཱ ཨཏྠི, ཏཾ ཨབྷིརུཧིཏྭཱཔི ཙངྐམནྟེནེཝ བྷུཉྫིཏབྦཾ, གམནཾ ན ཨུཔཙྪིནྡིཏབྦཾ. ཨེས ནཡོ ཨིཏརཨིརིཡཱཔཐེསུཔི. ཏཾ ཏཾ ཨིརིཡཱཔཐཾ ཀོཔེནྟེན ཨཏིརིཏྟཾ ཀཱརེཏབྦཾ. ཡོ ཨུཀྐུཊིཀོཝ ནིསཱིདིཏྭཱ པཝཱརེཏི, ཏེན ཨུཀྐུཊིཀེནེཝ བྷུཉྫིཏབྦཾ. ཏསྶ པན ཧེཊྛཱ པལཱལཔཱིཋཾ ཝཱ ཀིཉྩི ཝཱ ནིསཱིདནཾ དཱཏབྦཾ. པཱིཋཀེ ནིསཱིདིཏྭཱ པཝཱརིཏེན པན ཨཱསནཾ ཨཙཱལེཏྭཱཝ ཙཏསྶོ དིསཱ པརིཝཏྟནྟེན བྷུཉྫིཏུཾ ལབྦྷཏི. མཉྩེ ནིསཱིདིཏྭཱ པཝཱརིཏེན ཨིཏོ ཝཱ ཨེཏྟོ ཝཱ སཾསརིཏུཾ ན ལབྦྷཏི. སཙེ པན སཧ ¶ མཉྩེན ཨུཀྑིཔིཏྭཱ ཨཉྙཏྲ ནེནྟི, ཝཊྚཏི. ནིཔཛྫིཏྭཱ པཝཱརིཏེནཱཔི ནིཔནྣེནེཝ བྷུཉྫིཏབྦཾ. པརིཝཏྟནྟེན ཡེན པསྶེན ནིཔནྣོ, ཏསྶ ཋཱནཾ ནཱཏིཀྐམེཏབྦཾ.

ཨལམེཏཾ སབྦནྟི ཨེཏཾ སབྦཾ ཨལཾ པརིཡཏྟཾ, ཨིདམྤི ཏེ ཨདྷིཀཾ, ཨིཏོ ཨཉྙཾ ན ལཙྪསཱིཏི ཨདྷིཔྤཱཡོ. ཡོ ཨཏིརིཏྟཾ ཀརོཏཱིཏི ཡོ ‘‘ཨལམེཏཾ ¶ སབྦ’’ནྟི ཨཏིརིཏྟཾ ཀརོཏི. པཊིཔཀྑནཡེནཱཏི ‘‘ཀཔྤིཡཀཏཾ, པཊིགྒཧིཏཀཏཾ, ཨུཙྩཱརིཏཀཏཾ, ཧཏྠཔཱསེ ཀཏཾ, བྷུཏྟཱཝིནཱ ཀཏཾ, བྷུཏྟཱཝིནཱ པཝཱརིཏེན ཨཱསནཱ ཨཝུཊྛིཏེན ཀཏཾ ‘ཨལམེཏཾ སབྦ’ནྟི ཝུཏྟ’’ནྟི (པཱཙི. ༢༣༩) ཨིམེཧི སཏྟཧི ཝིནཡཀམྨཱཀཱརེཧི ཡཾ ཨཏིརིཏྟཾ ཀཔྤིཡཾ ཀཏཾ, ཡཉྩ གིལཱནཱཏིརིཏྟཾ, ཏདུབྷཡམྤི ཨཏིརིཏྟནྟི ཨེཝཾ ཏསྶེཝ པཊིཔཀྑནཡེན. ཨེཏྠ ཙ ‘‘ཨལམེཏཾ སབྦ’’ནྟི ཏིཀྑཏྟུཾ ཝཏྟབྦཾ, ཨཡཾ ཀིར ཨཱཙིཎྞོ. ཝིནཡདྷརཱ པན ‘‘སཀིཾ ཨེཝ ཝཏྟབྦ’’ནྟི ཝདནྟི.

ཀསྨཱ ཏཾ སོ པུན ཀཱཏུཾ ན ལབྷཏཱིཏི ཨཱཧ ‘‘ཡཉྷཱི’’ཏིཨཱདི. ཏཏྠ ཡཉྷི ཨཀཏནྟི ཡེན པཋམཾ ཀཔྤིཡཾ ཀཏཾ, ཏེན ཡཾ ཨཀཏཾ, ཏཾ ཀཱཏབྦཾ. པཋམབྷཱཛནེ པན ཀཱཏུཾ ན ལབྦྷཏི. ཡེན ཙ ཨཀཏནྟི ཨཉྙེན བྷིཀྑུནཱ ཡེན པཋམཾ ན ཀཏཾ, ཏེན ཙ ཀཱཏབྦནྟི ཨཏྠོ. ཝུཏྟནྟི སཱིཧལ༹ཊྛཀཐཱསུ ཝུཏྟཾ. ཨཉྙསྨིཾ པན བྷཱཛནེཏི ཡསྨིཾ པན བྷཱཛནེ པཋམཾ ཀཏཾ, ཏཏོ ཨཉྙསྨིཾ པཏྟེ ཝཱ ཀུཎྜེ ཝཱ པཙྪིཡཾ ཝཱ ཡཏྠ ཀཏྠཙི པུརཏོ ཋཔེཏྭཱ ཨོནཱམིཏབྷཱཛནེ.

ཨཉྙཏྲ བྷུཉྫནཝཏྠུསྨིནྟི བྷུཏྟཱཝིནཱ པཝཱརིཏེན ཧུཏྭཱ ཨཉྙཏྲ བྷུཉྫནཝཏྠུསྨིཾ. ཏིཀཔཱཙིཏྟིཡནྟི ཨནཏིརིཏྟེ ཨནཏིརིཏྟསཉྙིཝེམཏིཀཨཏིརིཏྟསཉྙཱིནཾ ཝསེན ཏཱིཎི པཱཙིཏྟིཡཱནི. ཨཛ྄ཛྷོཧརཏོ ཙ དུཀྐཊནྟི ཨཛ྄ཛྷོཧརཏོ ཨཛ྄ཛྷོཧཱརེ ཨཛ྄ཛྷོཧཱརེ དུཀྐཊཾ. སཙེ པན ཨཱམིསསཾསཊྛཱནི ཧོནྟི, ཨཱཧཱརཏྠཱཡཔི ཨནཱཧཱརཏྠཱཡཔི པཊིགྒཧེཏྭཱ ཨཛ྄ཛྷོཧརནྟསྶ པཱཙིཏྟིཡམེཝ. ཏེསཾ ཨནུཉྙཱཏཔརིབྷོགཝསེནཱཏི ཡཱམཀཱལིཀཱདཱིནཾ ཨནུཉྙཱཏཔརིབྷོགཝསེན, ཡཱམཀཱལིཀཾ པིཔཱསཱཡ སཏི པིཔཱསཙྪེདནཏྠཾ, སཏྟཱཧཀཱལིཀཾ ཡཱཝཛཱིཝིཀཉྩ ཏེན ཏེན ཨུཔསམེཏབྦཀེ ཨཱབཱདྷེ སཏི ཏསྶ ཨུཔསམནཏྠནྟི ཝུཏྟཾ ཧོཏི. ཨིདམྤི ཨཛ྄ཛྷོཧརཎཏོ ཀཱཡཀམྨཾ, ཝཱཙཱཡ ‘‘ཨཏིརིཏྟཾ ཀརོཐ བྷནྟེ’’ཏི ཨཀཱརཱཔནེན ཝཙཱིཀམྨནྟི ཨཱཧ ‘‘སམུཊྛཱནཱདཱིནི པཋམཀཐིནསདིསཱནེཝཱ’’ཏི. ཀིརིཡཱཀིརིཡནྟི ཨེཏྠ པཊིཀྑིཔིཏྭཱ བྷུཉྫནཾ ཀིརིཡཾ. ཨཏིརིཏྟསྶ ཨཀརཎཾ ཨཀིརིཡནྟི ཝེདིཏབྦཾ.

པཋམཔཝཱརཎཱསིཀྑཱཔདཝཎྞནཱ ནིཊྛིཏཱ.

༦. དུཏིཡཔཝཱརཎཱསིཀྑཱཔདཝཎྞནཱ

སུཏྭཱ ¶ ¶ ཝཱཏི ཨཉྙེན ཝཱ ཏེནེཝ ཝཱ ཨཱརོཙིཏཾ སུཏྭཱ. ‘‘བྷུཏྟསྨིཾ པཱཙིཏྟིཡ’’ནྟི (པཱཙི. ༢༤༣) ཝུཏྟཏྟཱ བྷོཛནཔརིཡོསཱནེ པཱཙིཏྟིཡ’’ནྟི ཝུཏྟཾ.

དུཏིཡཔཝཱརཎཱསིཀྑཱཔདཝཎྞནཱ ནིཊྛིཏཱ.

༧. ཝིཀཱལབྷོཛནསིཀྑཱཔདཝཎྞནཱ

ཝིཀཱལེཏི ཨེཏྠ ཨརུཎུགྒམནཏོ པཊྛཱཡ ཡཱཝ མཛ྄ཛྷནྷིཀོ, ཨཡཾ བུདྡྷཱདཱིནཾ ཨརིཡཱནཾ ཨཱཙིཎྞསམཱཙིཎྞོ བྷོཛནསྶ ཀཱལོ ནཱམ. ཏདཉྙོ ཝིཀཱལོ ‘‘ཝིགཏོ ཀཱལོ’’ཏི ཀཏྭཱ. ཏེནཱཧ ‘‘ཝིགཏེ ཀཱལེ’’ཏིཨཱདི. ཋིཏམཛ྄ཛྷནྷིཀོཔི (པཱཙི. ཨཊྛ. ༢༤༨-༢༤༩) ཀཱལསངྒཧཾ གཙྪཏི. ཏཏོ པཊྛཱཡ པན ཁཱདིཏུཾ ཝཱ བྷུཉྫིཏུཾ ཝཱ ན སཀྐཱ. སཧསཱ པིཝིཏུཾ སཀྐཱ བྷཝེཡྻ, ཀུཀྐུཙྩཀེན པན ན ཀཱཏབྦཾ. ཀཱལཔརིཙྪེདཛཱནནཏྠཉྩ ཀཱལཏྠམྦྷོ ཡོཛེཏབྦོ. ཀཱལབྦྷནྟརེཝ བྷཏྟཀིཙྩཾ ཀཱཏབྦཾ. ‘‘ཡཾ ཀིཉྩི…པེ… ཁཱདནཱིཡཾ ཝཱ’’ཏི ཨིམིནཱ ཡཾ ཏཱཝ སཀྑལིམོདཀཱདི པུབྦཎྞཱཔརཎྞམཡཾ, ཏཏྠ ཝཏྟབྦམེཝ ནཏྠཱིཏི དསྶེཏི. བྷོཛནཱིཡཾ ནཱམ པཉྩ བྷོཛནཱནི.

སཏི པཙྩཡེཏི པིཔཱསཱདིཀཱརཎེ ཝིཛྫམཱནེ. རོམཊྛཀསྶཱཏི རོམཊྛཀསྶ བྷིཀྑུནོ ཨཛ྄ཛྷོཧརིཏྭཱ ཨུགྒིརིཏྭཱ མུཁེཝ ཋཔིཏོ བཧི མུཁདྭཱརཱ ཝིནིགྒཏོ བྷོཛནསྶ མགྒཱ བཧི ནིགྒཏོ ‘‘རོམཊྛོ’’ཏི པཝུཙྩཏི. ཨིདྷ པན ཨཛ྄ཛྷོཧརིཏྭཱ ཨུགྒིརིཏྭཱ མུཁེཝ ཋཔིཏོཏི ཨདྷིཔྤེཏོ. ཏེནཱཧ ‘‘ན ཙ, བྷིཀྑཝེ’’ཏིཨཱདི. ཋཔེཏྭཱ རོམཊྛཀཾ སེསཱནཾ ཨཱགཏཾ ཨུགྒཱརཾ མུཁེ སནྡྷཱརེཏྭཱ གིལནྟཱནཾ ཨཱཔཏྟི. སཙེ པན ཨསནྡྷཱརེནྟམེཝ པརགལཾ གཙྪཏི, ཝཊྚཏི.

ཝིཀཱལབྷོཛནསིཀྑཱཔདཝཎྞནཱ ནིཊྛིཏཱ.

༨. སནྣིདྷིཀཱརཀསིཀྑཱཔདཝཎྞནཱ

‘‘ཀཱརོ ཀརཎཾ ཀིརིཡཱཏི ཨཏྠཏོ ཨེཀ’’ནྟི ཨེཏེན ཀཱརསདྡསྶ བྷཱཝཏྠཏཾ དསྶེཏི. སམྨཱ ནིདྷཱནཾ ཋཔནཾ སནྣིདྷི. ‘‘པཊིགྒཧེཏྭཱ ཨེཀརཏྟཾ ཝཱིཏིནཱམིཏསྶེཏཾ ¶ ནཱམ’’ནྟི ཨིམིནཱ པཊིགྒཧེཏྭཱ ¶ ཨེཀརཏྟཾ ཝཱིཏིནཱམིཏེ ཨིམསྶ དུདྡྷོཏབྷཱཝཾ དསྶེཏི. ཀིཉྩཱཔི ཡཱམཀཱལིཀཾ ཁཱདནཱིཡཾ, བྷོཛནཱིཡཾ ཝཱ ན ཧོཏི, ‘‘ཨནཱཔཏྟི ཡཱམཀཱལིཀཾ ཡཱམེ ནིདཧིཏྭཱ བྷུཉྫཏཱི’’ཏིཨཱདི ཝཙནཏོ པན ཏཏྠཱཔི ཡཱམཱཏིཀྐམེ སནྣིདྷིཔཙྩཡཱ པཱཙིཏྟིཡེན བྷཝིཏབྦནྟི ‘‘ཡཾ ཀིཉྩི ཡཱཝཀཱལིཀཾ ཝཱ ཡཱམཀཱལིཀཾ ཝཱ’’ཏི ཝུཏྟཾ. ཨིདཱནི དུདྡྷོཏབྷཱཝམེཝ ཝིབྷཱཝེཏུཾ ‘‘ཡཾ ཨངྒུལིཡཱ’’ཏིཨཱདི ཝུཏྟཾ. ཏཏྠ ཡཾ ཨངྒུལིཡཱ གྷཾསནྟསྶ ལེཁཱ པཉྙཱཡཏཱིཏི ཡཾ པཏྟཾ དྷོཏཾ ཨངྒུལིཡཱ གྷཾསནྟསྶ པཏྟེ ཨངྒུལིལེཁཱ པཉྙཱཡཏི, སོ པཏྟོ དུདྡྷོཏོ ཧོཏཱིཏི ཨཏྠོ. ཏེལཝཎྞཔཏྟེ པན ཨངྒུལིལེཁཱ པཉྙཱཡཏི, སཱ ཨབྦོཧཱརིཀཱ. སྣེཧོཏི ཏེལཾ. སནྡིསྶཏཱིཏི ཡཱགུཡཱ ཨུཔརི སནྡིསྶཏི. ཏཱདིསེ པཏྟེཔཱིཏི པཊིགྒཧཎཾ ཨཝིསྶཛྫིཏྭཱ སཡཾ ཝཱ ཨཉྙེན ཝཱ བྷོཛནཾ ནཱིཧརིཏྭཱ ན སམྨཱ དྷོཏེ པཏྟེཔི. པུནདིཝསེ བྷུཉྫནྟསྶ པཱཙིཏྟིཡནྟི པཏྟེ ལགྒཾ ཨཝིཛཧིཏཔྤཊིགྒཧཎཾ ཧོཏཱིཏི དུཏིཡདིཝསེ བྷུཉྫནྟསྶ པཱཙིཏྟིཡཾ. པརིཙྩཏྟེ པན པཏྟེ པུནདིཝསེ བྷུཉྫནྟསྶ ཨནཱཔཏྟི.

ཡཾ པནཱཏི ཡཾ བྷོཛནཾ པན. ཨཔརིཙྩཏྟམེཝ ཧཱིཏི ཨནཔེཀྑཝིསྶཛྫནེན ཝཱ ཨནུཔསམྤནྣསྶ ནིརཔེཀྑདཱནེན ཝཱ ཨཔརིཙྩཏྟམེཝ. ཀཔྤིཡ བྷོཛནནྟི ཨནྟམསོ ཨེཀསིཏྠམཏྟམྤི ཀཔྤིཡབྷོཛནཾ. ཨཀཔྤིཡེསཱུཏི ཨཀཔྤིཡམཾསེསུ. སེསེསཱུཏི མནུསྶམཾསཏོ ཨཝསེསེསུ ཧཏྠིཨསྶསུནཁཨཧིསཱིཧབྱགྒྷདཱིཔིཨཙྪཏརཙྪམཾསེསུ ཙེཝ ཨཔྤཊིཝེཀྑིཏེ ཨུདྡིསྶཀཏམཾསེ ཙ. པཱལི༹ཡཾ ‘‘སཏྟཱཧཀཱལིཀཾ ཡཱཝཛཱིཝིཀཾ ཨཱཧཱརཏྠཱཡ པཊིགྒཎྷཱཏི, ཨཱཔཏྟི དུཀྐཊསྶཱ’’ཏིཨཱདིནཱ (པཱཙི. ༢༥༥) སནྣིཧིཏེསུ སཏྟཱཧཀཱལིཀཡཱཝཛཱིཝིཀེསུ པུརེབྷཏྟམྤི ཨཱཧཱརཏྠཱཡ ཨཛ྄ཛྷོཧརཎེཔི དུཀྐཊསྶ ཝུཏྟཏྟཱ ཡཱམཀཱལིཀེཔི ཨཱཧཱརཏྠཱཡ ཨཛ྄ཛྷོཧརཎེཔི ཝིསུཾ དུཀྐཊེནཱཔི བྷཝིཏབྦནྟི ཨཱཧ ‘‘ཨཱཧཱརཏྠཱཡ ཨཛ྄ཛྷོཧརཏོ དུཀྐཊེན སདྡྷིཾ པཱཙིཏྟིཡ’’ནྟི. སབྦཝིཀཔྤེསཱུཏི ‘‘ཀཔྤིཡབྷོཛནཾ བྷུཉྫནྟསྶཱ’’ཏིཨཱདིནཱ ཝུཏྟེསུ སབྦེསུ ཝིཀཔྤེསུ ཨཔརམྤི པཱཙིཏྟིཡཾ ཝཌྜྷཏི. ཨིདཾ ཝུཏྟཾ ཧོཏི (པཱཙི. ཨཊྛ. ༢༥༣) – ཀཔྤིཡབྷོཛནེ དྭེ པཱཙིཏྟིཡཱནི, མནུསྶམཾསེ ཐུལླཙྩཡེན སདྡྷིཾ དྭེ པཱཙིཏྟིཡཱནི, ཨཝསེསེསུ པན ཨཀཔྤིཡམཾསེསུ དུཀྐཊེན སདྡྷིཾ དྭེ པཱཙིཏྟིཡཱནི. ཡཱམཀཱལིཀཾ སཏི པཙྩཡེ སཱམིསེན མུཁེན ¶ ཨཛ྄ཛྷོཧརཏོ དྭེ པཱཙིཏྟིཡཱནི, ནིརཱམིསེན ཨེཀམེཝ. ཨཱཧཱརཏྠཱཡ ཨཛ྄ཛྷོཧརཏོ ཝིཀཔྤདྭཡེཔི དུཀྐཊེན སདྡྷིནྟི.

ཨཝསེསེསཱུཏི ཡཱམཀཱལིཀཱདིཏོ ཨཝསེསེསུ. པཱཙིཏྟིཡཾ ཝཌྜྷཏིཡེཝཱཏི ཨཔརམྤི པཱཙིཏྟིཡཾ ཝཌྜྷཏིཡེཝ. ཨིདཾ ཝུཏྟཾ ཧོཏི – སཙེ ཝིཀཱལེ ཨཛ྄ཛྷོཧརཏི, པཀཏིབྷོཛནེ སནྣིདྷིཔཙྩཡཱ ¶ ཙ ཝིཀཱལབྷོཛནཔཙྩཡཱ ཙ དྭེ པཱཙིཏྟིཡཱནི, ཨཀཔྤིཡམཾསེསུ མནུསྶམཾསེ ཐུལླཙྩཡེན སདྡྷིཾ དྭེ པཱཙིཏྟིཡཱནི, ཨཝསེསེསུ དུཀྐཊེན སདྡྷིཾ དྭེཏི.

བེལཊྛསཱིསོ ནཱམ ཛཊིལསཧསྶསྶ ཨབྦྷནྟརེ ཨེཀོ མཧཱཐེརོ. ཏིཀཔཱཙིཏྟིཡནྟི སནྣིདྷིཀཱརཀེ སནྣིདྷིཀཱརཀསཉྙིཝེམཏིཀཨསནྣིདྷིཀཱརཀསཉྙཱིནཾ ཝསེན ཏཱིཎི པཱཙིཏྟིཡཱནི. སཾསཊྛཱནཱིཏི སཾསཊྛརསཱནི. སམྦྷིནྣརསཾ སནྡྷཱཡེཝ ཧི ‘‘ཏདཧུཔཊིགྒཧིཏཾ ཀཱལེ ཀཔྤཏཱི’’ཏིཨཱདི ཝུཏྟཾ. ཏེནཱཧ ‘‘ཏསྨཱ’’ཏིཨཱདི. ཨེཏྠ ཙ ཨསམྦྷིནྣརསནྟི ཨམིསྶིཏརསཾ. ཨིདཉྩ སཱིཏལཔཱཡཱསཱདིནཱ སཧ ལདྡྷཾ སཔྤིཔིཎྜཱདིཀཾ སནྡྷཱཡ ཝུཏྟཾ. ‘‘སུདྷོཏཾ ཝཱ’’ཏི ཨིདཾ པན པིཎྜཔཱཏེན སདྡྷིཾ ལདྡྷཾ ཏཀྐོལཛཱཏིཕལཱདིཾ, ཡཱགུཨཱདཱིསུ པཀྑིཔིཏྭཱ དིནྣསིངྒཱིཝེརཱདིཀཉྩ སནྡྷཱཡ ཝུཏྟཾ.

ཏེནཱཏི སཏྟཱཧཀཱལིཀེན. ཏདཧུ པཊིགྒཧིཏཾ ཨསྶཱཏི ཏདཧུཔཊིགྒཧིཏཾ, ཏེན ཏདཧུཔཊིགྒཧིཏེན. ཨེས ནཡོ ‘‘དྭཱིཧཔཊིགྒཧིཏེནཱ’’ཏིཨཱདཱིསུཔི. ཏསྨཱཏི ཡསྨཱ པུརེབྷཏྟཾ པཊིགྒཧིཏམྤི ཝཊྚཏི, ཏསྨཱ. པཊིགྒཧིཏཾ སཏྟཱཧཾ ཀཔྤཏཱིཏི ཝུཏྟནྟི ‘‘སཏྟཱཧཀཱལིཀེན, བྷིཀྑཝེ, ཡཱཝཛཱིཝིཀཾ པཊིགྒཧིཏཾ སཏྟཱཧཾ ཀཔྤཏི, སཏྟཱཧཱཏིཀྐནྟེ ན ཀཔྤཏཱི’’ཏི (མཧཱཝ. ༣༠༥) བྷེསཛྫཀྑནྡྷཀེ ཝུཏྟཾ. ཀིཉྩཱཔི མུཁེ ཨེཀརཏྟཾ ན ཝུཏྟཾ, ཏཐཱཔི མུཁེ པཀྑིཏྟམེཝ ཡསྨཱ སནྣིདྷི ནཱམ ཧོཏི, ཏསྨཱ ‘‘མུཁསནྣིདྷཱི’’ཏི ཝུཏྟཾ.

ཙཏསྶོ ཀཔྤིཡབྷཱུམིཡོཏི ཨུསྶཱཝནནྟིཀཱ, གོནིསཱདིཀཱ, གཧཔཏི, སམྨུཏཱིཏི ཙཏསྶོ ཀཔྤིཡཀུཊིཡོ. ཏཏྠ ཨུསྶཱཝནནྟིཀཱ (མཧཱཝ. ཨཊྛ. ༢༩༥) ནཱམ གེཧེ ཀརིཡམཱནེ སམྤརིཝཱརེཏྭཱ ཋིཏེཧི ‘‘ཀཔྤིཡཀུཊིཾ ཀརོམ, ཀཔྤིཡཀུཊིཾ ཀརོམཱ’’ཏི ཝཱ ‘‘ཀཔྤིཡཀུཊི ཀཔྤིཡཀུཊཱི’’ཏི ཝཱ ཝདནྟེཧི ཋཔིཏཔཋམིཊྛཀཐམྦྷཱདིཀཱ སངྒྷསྶ ཝཱ ཨེཀསྶ བྷིཀྑུནོ ཝཱ ཀུཊི. ཡོ པན ཨཱརཱམོ ཡེབྷུཡྻེན ཝཱ ཨཔརིཀྑིཏྟོ ཧོཏི, སཀལོཔི ཝཱ ¶ , སོ ‘‘གོནིསཱདཱི’’ཏི ཝུཙྩཏི. གཧཔཏཱིཏི ཡཱ ཋཔེཏྭཱ བྷིཀྑུཾ སེསེཧི ‘‘ཀཔྤིཡཀུཊིཾ དེམཱ’’ཏི དིནྣཱ, ཏེསཾ ཝཱ སནྟཀཱ. སམྨུཏི ནཱམ ཀམྨཝཱཙཱཡ སཱཝེཏྭཱ ཀཏཱ. ཀཐཾ པནེཏཱསཾ ཝིནིཙྪཡོ ཛཱནིཏབྦོཏི ཨཱཧ ‘‘ཏཱསཾ ཝིནིཙྪཡོ སམནྟཔཱསཱདིཀཱཡཾ ཝུཏྟོ’’ཏི.

སནྣིདྷིཀཱརཀསིཀྑཱཔདཝཎྞནཱ ནིཊྛིཏཱ.

༩. པཎཱིཏབྷོཛནསིཀྑཱཔདཝཎྞནཱ

‘‘པཎཱིཏབྷོཛནཱནཱི’’ཏི ¶ ཨིདཾ མཛ྄ཛྷེ པདལོཔཾ ཀཏྭཱ ནིདྡིཊྛནྟི ཨཱཧ ‘‘པཎཱིཏསཾསཊྛཱནཱི’’ཏིཨཱདི. སབྦོཔི ‘‘ཨོདཀོ’’ཏི ཝུཏྟལཀྑཎོ མཙྪོཏི ‘‘མཙྪོ ནཱམ ཨོདཀོ ཝུཙྩཏཱི’’ཏི (པཱཙི. ༢༦༠) ཨེཝཾ ཝིབྷངྒེ ཝུཏྟལཀྑཎོ, སབྦོཔི མཙྪོ ཨེཝ. ཡོ ཀོཙི ཨུདཀེ ཛཱཏོ མཙྪོ ནཱམཱཏི ཝུཏྟཾ ཧོཏི. མཧཱནཱམསིཀྑཱཔདེནཱཏི –

‘‘ཨགིལཱནེན བྷིཀྑུནཱ ཙཏུམཱསཔཙྩཡཔཝཱརཎཱ སཱདིཏབྦཱ ཨཉྙཏྲ པུནཔཝཱརཎཱཡ ཨཉྙཏྲ ནིཙྩཔཝཱརཎཱཡ. ཏཏོ ཙེ ཨུཏྟརི སཱདིཡེཡྻ, པཱཙིཏྟིཡ’’ནྟི –

ཨིམིནཱ སིཀྑཱཔདེན (པཱཙི. ༣༠༦). ཨེཏྠ ཧི སངྒྷཝསེན གིལཱནཔཙྩཡཔཝཱརཎཱཡ པཝཱརིཏཊྛཱནེ སཙེ ཏཏྠ རཏྟཱིཧི ཝཱ བྷེསཛྫེཧི ཝཱ པརིཙྪེདོ ཀཏོ ཧོཏི ‘‘ཨེཏྟིཀཱཡེཝ རཏྟིཡོ, ཨེཏྟཀཱནི ཝཱ བྷེསཛྫཱནི ཝིཉྙཱཔེཏབྦཱནཱི’’ཏི, ཏཏོ རཏྟིཔརིཡནྟཏོ ཝཱ བྷེསཛྫཔརིཡནྟཏོ ཝཱ ཨུཏྟརི ནབྷེསཛྫཀརཎཱིཡེན ཝཱ བྷེསཛྫཾ, ཨཉྙབྷེསཛྫཀརཎཱིཡེན ཝཱ ཨཉྙཾ བྷེསཛྫཾ ཝིཉྙཱཔེནྟསྶ པཱཙིཏྟིཡཾ ཝུཏྟཾ. ཏསྨཱ ཨགིལཱནོ གིལཱནསཉྙཱིཔི ཧུཏྭཱ པཉྩ བྷེསཛྫཱནི ཝིཉྙཱཔེནྟོ ནབྷེསཛྫཀརཎཱིཡེན བྷེསཛྫཾ ཝིཉྙཱཔེནྟོ ནཱམ ཧོཏཱིཏི ‘‘མཧཱནཱམསིཀྑཱཔདེན ཀཱརེཏབྦོ’’ཏི ཝུཏྟཾ.

ཡོ པན ནབྷེསཛྫཏྠཱཡ ཝིཉྙཱཔེཏི, ཨཐ ཁོ ཀེཝལཾ ཨཏྟནོ བྷུཉྫནཏྠཱཡ, སོ སཱུཔོདནཝིཉྙཏྟིཡཱཡེཝ ཀཱརེཏབྦོ. ཝུཏྟཉྷེཏཾ སམནྟཔཱསཱདིཀཱཡཾ ‘‘སུདྡྷཱནི སཔྤིཨཱདཱིནི ཝིཉྙཱཔེཏྭཱ བྷུཉྫནྟོ པཱཙིཏྟིཡཾ ནཱཔཛྫཏི ¶ , སེཁིཡེསུ སཱུཔོདནཝིཉྙཏྟིདུཀྐཊཾ ཨཱཔཛྫཏཱི’’ཏི (པཱཙི. ཨཊྛ. ༢༥༩). སཱུཔོདནཝིཉྙཏྟིཡཱ ཀཱརེཏབྦོཏི ‘‘ན སཱུཔཾ ཝཱ ཨོདནཾ ཝཱ ཨགིལཱནོ’’ཏིཨཱདིནཱ (པཱཙི. ༦༡༣) སིཀྑཱཔདེན ཀཱརེཏབྦོ, དུཀྐཊེན ཀཱརེཏབྦོཏི ཝུཏྟཾ ཧོཏི. ཨིམིནཱཏི ཨིམིནཱ པཎཱིཏབྷོཛནསིཀྑཱཔདེན.

‘‘སཔྤིབྷཏྟཾ དེཧཱི’’ཏི ཝུཏྟེ ཀིཾ ཧོཏཱིཏི ཨཱཧ ‘‘སཔྤིབྷཏྟཾ ‘དེཧཱི’ཏི ཝུཏྟེ པནཱ’’ཏིཨཱདི. སཱུཔོདནཝིཉྙཏྟིཡཱ དུཀྐཊམེཝ ཧོཏཱིཏི སམྦནྡྷོ. ཀསྨཱཏི ཨཱཧ ‘‘ཡསྨཱ’’ཏིཨཱདི. ཨཐ ཡཐཱ ‘‘པཎཱིཏབྷོཛནཱནཱི’’ཏི, ཨེཝཾ ‘‘སཔྤིབྷཏྟ’’ནྟི ཨིདམྤི ཀསྨཱ ན ཝིཉྙཱཡཏཱིཏི ཙེ? ཨནེཀནྟིཀཏྟཱ. ཏཐཱ ཧི ‘‘པཎཱིཏབྷོཛནཱནཱི’’ཏི ཝུཏྟེ ‘‘པཎཱིཏསཾསཊྛཱནི བྷོཛནཱནི ¶ པཎཱིཏབྷོཛནཱནཱི’’ཏི ཨཡམཏྠོ ཨེཀནྟཏོ པཉྙཱཡཏི, ‘‘སཔྤིབྷཏྟ’’ནྟི ཝུཏྟེ པན ‘‘སཔྤིམཡཾ བྷཏྟཾ སཔྤིབྷཏྟ’’ནྟིཔི ཝིཉྙཱཡམཱནཏྟཱ ‘སཔྤིསཾསཊྛཾ བྷཏྟཾ སཔྤིབྷཏྟ’’ནྟི ཨཡམཏྠོ ན ཨེཀནྟཏོ པཉྙཱཡཏི. ཨེས ནཡོ ‘‘ནཝནཱིཏབྷཏྟཾ དེཧཱི’’ཏིཨཱདཱིསུཔི.

པུརིམནཡེནེཝཱཏི ‘‘བྷཏྟཾ དཏྭཱ སཔྤིཾ ཀཏྭཱ བྷུཉྫཱ’’ཏི པུརིམེནེཝ ནཡེན. སཙེ པན ‘‘སཔྤིནཱ’’ཏི ཝུཏྟེ ཀེཝལཾ སེསེསུ ནཝནཱིཏཱདཱིསུ ཨཉྙཏརེན དེཏི, ཝིསངྐེཏམེཝ ཧོཏི. ཨནཱཔཏྟཱིཏི ཝིསངྐེཏཏྟཱ སབྦཱཧིཡེཝ ཨཱཔཏྟཱིཧི ཨནཱཔཏྟི. ‘‘ཀིཉྩཱཔི ཨནཱཔཏྟི, ཨཏྟནོ པན པཡོགེན ནིབྦཏྟཏྟཱ ན བྷུཉྫིཏབྦ’’ནྟི ཝདནྟི. ཀཔྤིཡསཔྤིནཱཏི ཀཔྤིཡམཾསསཔྤིནཱ. ཨེས ནཡོ ཨཀཔྤིཡསཔྤིནཱཏི ཨེཏྠཱཔི. ཀཔྤིཡཱཀཔྤིཡཏཱ ཧི མཾསཱནཾཡེཝ, ན སཔྤིཨཱདཱིནཾ. ཋཔེཏྭཱ ཨེཀཾ མནུསྶཝསཱཏེལཾ སབྦེསཾ ཁཱིརདདྷིསཔྤིནཝནཱིཏཝསཱཏེལེསུ ཨཀཔྤིཡཾ ནཱམ ནཏྠི.

པརིབྷོགེཔི དུཀྐཊམེཝ ཨིདྷ ཨནདྷིཔྤེཏཏྟཱཏི ཨདྷིཔྤཱཡོ. སཙེ ཨསཏི ཨཀཔྤིཡསཔྤིམྷི པུརིམནཡེནེཝ ཨཀཔྤིཡནཝནཱིཏཱདཱིནི དེཏི ‘‘སཔྤིཾ ཀཏྭཱ བྷུཉྫཱ’’ཏི, ཨཀཔྤིཡསཔྤིནཱཝ དིནྣཾ ཧོཏི. ཡཐཱ ཙ ‘‘ཀཔྤིཡསཔྤིནཱ དེཧཱི’’ཏི ཝུཏྟེ ཨཀཔྤིཡསཔྤིནཱ དེཏི, ཝིསངྐེཏཾ, ཨེཝཾ ‘‘‘ཨཀཔྤིཡསཔྤིནཱ’ཏི ཝུཏྟེ ཀཔྤིཡསཔྤིནཱ དེཏཱི’’ཏི ཨེཏྠཱཔི པཊིཔཱཊིཡཱ ཨེཀམེཀཾ ཝིཏྠཱརེཏྭཱ ཝུཙྩམཱནེཔི ཨཡམེཝཏྠོ ཝཏྟབྦོ སིཡཱ, སོ ཙ སངྑེཔེནཔི སཀྐཱ ཝིཉྙཱཏུནྟི ཝིཏྠཱརནཡཾ ཧིཏྭཱ ཨིམིནཱཝ ¶ ནཡེན སབྦཔདེསུ ཝིནིཙྪཡོ ཝེདིཏབྦོཏི ཝུཏྟཾ. ཨཡཉྷེཏྠ སངྑེཔཏྠོ – ཡེན ཡེན ཝིཉྙཏྟི ཧོཏི, ཏསྨིཾ ཝཱ ཏསྶ མཱུལེ ཝཱ ལདྡྷེ ཏཾ ཏཾ ལདྡྷམེཝ ཧོཏི. སཙེ པན ཨཉྙཾ པཱལི༹ཡཱ ཨཱགཏཾ ཝཱ ཨནཱགཏཾ ཝཱ དེཏི, ཝིསངྐེཏནྟི. ནཱནཱཊྛཱནེ ཝཱཏི ཏསྨིཾཡེཝ གྷརེ སཔྤིཾ, ཨིཏརསྨིཾ ནཝནཱིཏནྟིཨཱདིནཱ ནཱནཱཊྛཱནེ ཝཱ.

པཎཱིཏབྷོཛནསིཀྑཱཔདཝཎྞནཱ ནིཊྛིཏཱ.

༡༠. དནྟཔོནསིཀྑཱཔདཝཎྞནཱ

ཀཱཡེནཱཏི ཧཏྠཱདཱིསུ ཡེན ཀེནཙི སརཱིརཱཝཡཝེན, ཨནྟམསོ པཱདངྒུལིཡཱཔི གཎྷནྟོ ཀཱཡེན གཎྷཱཏི ནཱམཱཏི ཝེདིཏབྦོ. དཱནེཔི ཨེསེཝ ནཡོ. ཀཱཡཔྤཊིབདྡྷེནཱཏི པཏྟཱདཱིསུ ཡེན ཀེནཙི སརཱིརསམྦདྡྷེན ཨུཔཀརཎེན. དཱནེཔི ཨེསེཝ ནཡོ. ཀཊཙྪུཨཱདཱིསུ ཡེན ཀེནཙི ཨུཔཀརཎེན དིནྣཾ ཀཱཡཔྤཊིབདྡྷེན དིནྣཾཡེཝ ཧོཏི. ཨཉྙཏརེནཱཏི ཀཱཡེན ཝཱ ཀཱཡཔྤཊིབདྡྷེན ཝཱ ནིསྶགྒིཡེན ཝཱཏི ཨཏྠོ. ཏཏྠ ནིསྶགྒིཡེནཱཏི (པཱཙི. ཨཊྛ. ༢༦༥) ཀཱཡཏོ ཙ ཀཱཡཔྤཊིབདྡྷཏོ ¶ ཙ མོཙེཏྭཱ ཧཏྠཔཱསེ ཋིཏསྶ ཀཱཡེ ཝཱ ཀཱཡཔྤཊིབདྡྷེ ཝཱ པཱཏིཡམཱནཉྷི ནིསྶགྒིཡེན པཡོགེན དིནྣཾ ནཱམ ཧོཏི. ཏསྶཱཏི པཊིགྒཧིཏཀསྶ. ཝུཏྟཝིཔལླཱསཝསེནཱཏི ཝུཏྟསྶ པཊིཔཀྑཝསེན. ཨིདཾ ཝུཏྟཾ ཧོཏི – ཡཾ ཀཱཡཀཱཡཔྤཊིབདྡྷནིསྶགྒིཡཱནཾ ཨཉྙཏརེན དིཡྻམཱནེ ཀཱཡེན ཝཱ ཀཱཡཔྤཊིབདྡྷེན ཝཱ གཎྷཱཏི, ཨེཏཾ པཊིགྒཧིཏཾ ནཱམཱཏི.

སཾཧཱརིམེནཱཏི ཐཱམམཛ྄ཛྷིམེན པུརིསེན སཾཧཱརིམེན, ཨིམིནཱ ཨསཾཧཱརིམེ ཕལཀེ ཝཱ པཱསཱཎེ ཝཱ པཊིགྒཧཎཾ ན རུཧཏཱིཏི དསྶེཏི. དྷཱརེཏུཾ སམཏྠེནཱཏི སནྡྷཱརེཏུཾ ཡོགྒེན, ཨིམིནཱ སུཁུམེསུ ཏིནྟིཎིཀཱདིཔཎྞེསུ པཊིགྒཧཎཾ ན རུཧཏཱིཏི དསྶེཏི. ཨཏཏྠཛཱཏཀརུཀྑཔཎྞེནཱཏི ཛཱཏཊྛཱནཏོ ཙུཏེན པདུམིནིཔཎྞཱདིནཱ, ཨིམིནཱ པན མཧནྟེཔི ཏཏྠཛཱཏཀེ པདུམིནིཔཎྞེ ཝཱ ཀིཾསུཀཔཎྞཱདིམྷི ཝཱ པཊིགྒཧེཏུཾ ན ཝཊྚཏི. ན ཧི ཏཾ ཀཱཡཔྤཊིབདྡྷསངྑཾ གཙྪཏཱིཏི དསྶེཏི. ཡཐཱ ཙ ¶ ཏཏྠཛཱཏཀེ, ཨེཝཾ ཁཱཎུཀེ བནྡྷིཏྭཱ ཋཔིཏམཉྩཱདིམྷིཔི. ནནུ པཊིབདྡྷཔྤཊིབདྡྷེནཱཔི པཏྟཱདྷཱརཱདིནཱ པཊིགྒཎྷནྟསྶ པཊིགྒཧཎཾ རུཧཏི, ཨཐ ཀསྨཱ ཀཱཡཀཱཡཔྤཊིབདྡྷེཧིཡེཝ པཊིགྒཧཎཾ ཨིདྷ ཝུཏྟཾ, ན པཊིབདྡྷཔྤཊིབདྡྷེནཱཔཱིཏི ཨཱཧ ‘‘པཊིབདྡྷཔྤཊིབདྡྷཾ ནཱམ ཨིདྷ ནཏྠཱི’’ཏི. ཀེཙི པན ‘‘ཨཱདྷཱརཀེན པཊིགྒཧཎཾ ཀཱཡཔྤཊིབདྡྷཔྤཊིབདྡྷེན པཊིགྒཧཎཾ ནཱམ ཧོཏི, ཏསྨཱ ན ཝཊྚཏཱི’’ཏི ཝདནྟི, ཏཾ ཝཙནམཏྟམེཝ. ཨཏྠཏོ པན སབྦམྤི ཏཾ ཀཱཡཔྤཊིབདྡྷམེཝ ཧོཏཱིཏི དསྶེཏི.

ཨཀལླཀོཏི གིལཱནོ. མུཁེན པཊིགྒཎྷཱཏཱིཏི སཧཏྠེན གཧེཏྭཱ པརིབྷུཉྫིཏུཾ ཨསཀྐོནྟོ མུཁེན པཊིགྒཎྷཱཏི. ཨབྷིཧཊབྷཱཛནཏོ པཏིཏརཛམྤི ཝཊྚཏི ཨབྷིཧཊཏྟཱཏི ཨདྷིཔྤཱཧོ.

ཏསྨིཾ ཋཏྭཱཏི ཏཱདིསེ ཧཏྠཔཱསེ ཋཏྭཱ. ཡནྟི ཡཾ བྷཱརཾ. མཛ྄ཛྷིམོ པུརིསོཏི ཐཱམམཛ྄ཛྷིམཔུརིསོ. ཝིནཡེ པཉྙཏྟཾ དུཀྐཊཾ ཝིནཡདུཀྐཊཾ. ཏཾ ཨནུཔསམྤནྣསྶ དཏྭཱཏི པིཎྜཱཡ ཙརིཏྭཱ ཝིཧཱརཾ ཝཱ ཨཱསནསཱལཾ ཝཱ གནྟྭཱ ཏཾ བྷིཀྑཾ ཨནུཔསམྤནྣསྶ དཏྭཱ, ཨིདཉྩ པུབྦཱབྷོགསྶ ཨནུརཱུཔཝསེན ཝུཏྟཾ. ཡསྨཱ པན ཏཾ ‘‘ཨནུཔསམྤནྣསྶ དསྶཱམཱི’’ཏི ཙིཏྟུཔྤཱདམཏྟེན ཏཾསནྟཀཾ ནཱམ ན ཧོཏི, ཏསྨཱ ཝིནཱཔི ཏསྶ དཱནཱདིཾ པཊིགྒཧེཏྭཱ པརིབྷུཉྫིཏུཾ ཝཊྚཏི.

ཨསྶུཁེལ༹སིངྒྷཱཎིཀཱདཱིསཱུཏི ཨེཏྠ ཨསྶུ ནཱམ ཨཀྑིཛལཾ. ཁེལོ༹ ནཱམ ལཱལཱ. སིངྒྷཱཎིཀཱཏི ཨནྟོསཱིསཏོ པཱུཏིསེམྷབྷཱཝཾ ཨཱཔནྣཾ མཏྠལུངྒཾ གལིཏྭཱ ཏཱལུམཏྠཀཝིཝརེན ཨོཏརིཏྭཱ ¶ ནཱསཱཔུཊེ པཱུརེཏྭཱ ཋིཏཾ ཝུཙྩཏི, ཨཱདིསདྡེན མུཏྟཀརཱིསསེམྷདནྟམལཨཀྑིགཱུཐཀཎྞགཱུཐཀཱནཾ, སརཱིརེ ཨུཊྛིཏལོཎསྶ ཙ གཧཎཾ. ཋཱནཏོཏི ཨཀྑིཀཱུཔཱདིཏོ. ཨནྟརཱ ཙེ གཎྷཱཏི, ཀིཾ ཧོཏཱིཏི ཨཱཧ ‘‘ཨུགྒཧིཏཀཾ ནཱམ ཧོཏཱི’’ཏི, དུཊྛུ གཧིཏཀཾ ནཱམ ཧོཏཱིཏི ཨཏྠོ. ཕལིནིནྟི ཕལཝནྟཾ. ཏཏྠཛཱཏཀཕལིནིསཱཁཱཡ ཝཱཏི ཏསྨིཾ རུཀྑེ ཛཱཏཱཡ ཕལིནིསཱཁཱཡ ཝཱ. དུརུཔཙིཎྞདུཀྐཊནྟི ‘‘ན ཀཏྟབྦ’’ནྟི ཝཱརིཏསྶ ཀཏཏྟཱ དུཊྛུ ཨཱཙིཎྞཾ ཙརིཏནྟི དུརུཔཙིཎྞཾ, ཏསྨིཾ དུཀྐཊཾ དུརུཔཙིཎྞདུཀྐཊཉྩ ཨཱཔཛྫཏཱིཏི ཨཏྠོ.

ཨཱཧརཱིཡཏཱིཏི ཨཱཧཱརོ, ཨཛ྄ཛྷོཧརིཏབྦཾ ཡཾ ཀིཉྩི, ཨིདྷ པན ཙཏྟཱརི ཀཱལིཀཱནི ཨདྷིཔྤེཏཱནཱིཏི ཨཱཧ ‘‘ཡཾ ཀིཉྩཱི’’ཏིཨཱདི. ཏཏྠ ཨརུཎུགྒམནཏོ ¶ ཡཱཝ ཋིཏམཛ྄ཛྷནྷིཀཱ བྷུཉྫིཏབྦཏོ ཡཱཝ ཀཱལོ ཨསྶཱཏི ཡཱཝཀཱལིཀཾ. ཨརུཎུགྒམནཏོ ཡཱཝ ཡཱམཱཝསཱནཱ པིཔཱསཱཡ སཏི པིཔཱསཙྪེདནཏྠཾ པཱཏབྦཏོ ཡཱམོ ཀཱལོ ཨསྶཱཏི ཡཱམཀཱལིཀཾ. ཡཱཝ སཏྟཱཧཾ ནིདཧིཏྭཱ པརིབྷུཉྫིཏབྦཏོ སཏྟཱཧཾ ཀཱལོ ཨསྶཱཏི སཏྟཱཧཀཱལིཀཾ. ཡཱཝཛཱིཝམྤི པརིཧརིཏྭཱ པརིབྷུཉྫིཏབྦཏོ ཡཱཝ ཛཱིཝཾ ཨེཏསྶཱཏི ཡཱཝཛཱིཝིཀཾ. ཏེནཱཧ ‘‘ཏཏྠཱ’’ཏིཨཱདི.

ཝནམཱུལཔཏྟཔུཔྥཕལཱདཱིཏི ཨེཏྠ ཏཱཝ མཱུལཾ ནཱམ མཱུལཀཁཱརཀཙཙྩུཏམྦཀཱདཱིནཾ ཏེསུ ཏེསུ ཛནཔདེསུ པཀཏིཨཱཧཱརཝསེན མནུསྶཱནཾ ཁཱདནཱིཡཏྠཉྩེཝ བྷོཛནཱིཡཏྠཉྩ ཕརཎཀཾ སཱུཔེཡྻཔཎྞམཱུལཾ. པཏྟཾ ནཱམ མཱུལཀཁཱརཀཙཙྩུཏམྦཀཱདཱིནཾ ཏཱདིསཾཡེཝ པཏྟཾ. པུཔྥཾ ནཱམ མཱུལཀཁཱརཀཱདཱིནཾ ཏཱདིསཾཡེཝ པུཔྥཾ. ཕལཾ ནཱམ པནསལབུཛཱདཱིནཾ ཏེསུ ཏེསུ ཛནཔདེསུ པཀཏིཨཱཧཱརཝསེན མནུསྶཱནཾ ཁཱདནཱིཡཏྠཉྩེཝ བྷོཛནཱིཡཏྠཉྩ ཕརཎཀཾ ཕལཾ. ཨཱདིསདྡེན ཀནྡམཱུལཱདཱིནཾ གཧཎཾ.

ཨམྦཔཱནནྟི (མཧཱཝ. ཨཊྛ. ༣༠༠) ཨཱམེཧི ཝཱ པཀྐེཧི ཝཱ ཨམྦེཧི ཀཏཔཱནཾ. ཏཏྠ ཨཱམེཧི ཀརོནྟེན ཨམྦཏརུཎཱདཱིནི བྷིནྡིཏྭཱ ཨུདཀེ པཀྑིཔིཏྭཱ ཨཱཏཔེ ཨཱདིཙྩཔཱཀེན པཙིཏྭཱ པརིསྶཱཝེཏྭཱ ཏདཧུཔཊིགྒཧིཏེཧི མདྷུསཀྐརཀཔྤཱུརཱདཱིཧི ཡོཛེཏྭཱ ཀཱཏབྦཾ. ཨེཝཾ ཀཏཾ པུརེབྷཏྟམེཝ ཀཔྤཏི. ཨནུཔསམྤནྣེན ཀཏཾ ལབྷིཏྭཱ པན པུརེབྷཏྟཾ པཊིགྒཧིཏཾ པུརེབྷཏྟཾ སཱམིསཔརིབྷོགེནཱཔི ཝཊྚཏི, པཙྪཱབྷཏྟཾ ནིརཱམིསཔརིབྷོགེན ཡཱཝ ཨརུཎུགྒམནཱ ཝཊྚཏི. ཨེས ནཡོ སབྦཔཱནེསུ.

ཏེསུ པན ཛམྦུཔཱནནྟི ཛམྦུཕལེཧི ཀཏཔཱནཾ. ཙོཙཔཱནནྟི ཨཊྛིཀེཧི ཀདལིཕལེཧི ཀཏཔཱནཾ. མོཙཔཱནནྟི ཨནཊྛིཀེཧི ཀདལིཕལེཧི ཀཏཔཱནཾ. མདྷུཀཔཱནནྟི མདྷུཀཱནཾ ཛཱཏིརསེན ཀཏཔཱནཾ. ཏཾ པན ཨུདཀསམྦྷིནྣཾ ཝཊྚཏི, སུདྡྷཾ ན ཝཊྚཏི. མུདྡིཀཱཔཱནནྟི མུདྡིཀཱ ཨུདཀེ མདྡིཏྭཱ ཨམྦཔཱནཾ ཝིཡ ཀཏཔཱནཾ ¶ . སཱལཱུཀཔཱནནྟི རཏྟུཔྤལནཱིལུཔྤལཱདཱིནཾ སཱལཱུཀེ མདྡིཏྭཱ ཀཏཔཱནཾ. ཕཱརུསཀཔཱནནྟི ཕཱརུསཀེཧི ཨམྦཔཱནཾ ཝིཡ ཀཏཔཱནཾ. ཨིམིནཱཝ ནཡེན ཝེཏྟཔཱནཱདཱིནི ཝེདིཏབྦཱནི. ཨེཏཱནི ཙ པན སབྦཱནི པཱནཱནི ཨགྒིཔཱཀཱནི ན ཝཊྚནྟི. ཏེནཱཧ ‘‘སཱིཏོདཀེནཱ’’ཏིཨཱདི. ཨཝསེསེསུཔི ¶ ཨནུཉྙཱཏཕལཔཏྟཔུཔྥརསེསཱུཏི དྷཉྙཕལཔཀྐསཱཀམདྷུཀཔུཔྥརསཏོ ཨཝསེསེསུ ‘‘ཨནུཛཱནཱམི, བྷིཀྑཝེ, སབྦཾ ཕལརསཾ ཋཔེཏྭཱ དྷཉྙཕལརས’’ནྟིཨཱདིནཱ (མཧཱཝ. ༣༠༠) ཨནུཉྙཱཏཀེསུ ཕལཔཏྟཔུཔྥརསེསུཔི.

ཁཱདནཱིཡཏྠནྟི ཁཱདནཱིཡེན ཀཏྟབྦཀིཙྩཾ. ནེཝ ཕརཏཱིཏི ན ནིཔྥཱདེཏི. ཨནཱཧཱརེཔི ཨུདཀེ ཨཱཧཱརསཉྙཱཡཱཏི ‘‘ཨཱཧཱརཾ ཨཱཧརེཡྻཱ’’ཏི པདསྶ པདབྷཱཛནེ (པཱཙི. ༢༦༥) ཝུཏྟམཏྠཾ སམྨཱ ཨསལླཀྑེཏྭཱ ‘‘ཨཱཧརཱིཡཏཱིཏི ཨཱཧཱརོ’’ཏི ཨནཱཧཱརེཔི ཨུདཀེ ཨཱཧཱརསཉྙཱཡ ཀུཀྐུཙྩཱཡནྟཱནཾ. དནྟཔོནེ ཙ ‘‘མུཁདྭཱརཾ ཨཱཧཊཾ ཨིད’’ནྟི སཉྙཱཡཱཏི མུཁདྭཱརཾ ཨནཱཧཊམྤི དནྟཔོནཾ ‘‘མུཁདྭཱརཾ ཨཱཧཊཾ ཨིདཾ དནྟཔོན’’ནྟི ཝིཔལླཏྠསཉྙཱཡ ཀུཀྐུཙྩཱཡནྟཱནཾ. ཡཐཱསུཁཾ པཱཏུནྟི པཊིགྒཧེཏྭཱ ཝཱ ཨཔྤཊིགྒཧེཏྭཱ ཝཱ ཡཐཱཀཱམཾ པཱཏུཾ. དནྟཔོནཔརིབྷོགེནཱཏི དནྟཀཊྛཔརིབྷོགེན, དནྟདྷོཝནཱདིནཱཏི ཨཏྠོ, ཨིམིནཱ ཏསྶ པན རསཾ གིལིཏུཾ ན ཝཊྚཏཱིཏི དསྶེཏི.

ཙཏྟཱརི མཧཱཝིཀཊཱནཱིཏི གཱུཐཾ, མུཏྟཾ, ཚཱརིཀཱ, མཏྟིཀཱ (མཧཱཝ. ༢༦༨) ཙ ‘‘ཨཱསཡཱདིཝསེན ཝིརཱུཔཱནི ཛཱཏཱནཱི’’ཏི ཀཏྭཱ ཝིཀཊཱནཱིཏི ཝཱ ཨཔཀཏིབྷོཛནཏྟཱ ཝིཀཊཱནི ‘‘ཝིརཱུཔཱནི ཛཱཏཱནཱི’’ཏི ཝཱ ཨཏྠོ. སཏི པཙྩཡེཏི ཀཱརཎེ སཏི, སཔྤདཊྛེཏི ཨཏྠོ. དྷཱུམཱདིཨབྦོཧཱརིཀཱབྷཱཝོཏི དྷཱུམཔུཔྥགནྡྷདནྟཁཡཱདིཨབྦོཧཱརིཀཱབྷཱཝོ.

དནྟཔོནསིཀྑཱཔདཝཎྞནཱ ནིཊྛིཏཱ.

བྷོཛནཝགྒོ ཙཏུཏྠོ.

༥. ཨཙེལཀཝགྒོ