📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིནཡཝིནིཙྪཡཊཱིཀཱ

(པཋམོ བྷཱགོ)

གནྠཱརམྦྷཀཐཱ

(ཀ)

ཨཱདིཙྩཝཾསམྦརཔཱཏུབྷཱུཏཾ ¶ ¶ ;

བྱཱམཔྤབྷཱམཎྜལདེཝཙཱཔཾ;

དྷམྨམྦུནིཛ྄ཛྷཱཔིཏཔཱཔགྷམྨཾ;

ཝནྡཱམཧཾ བུདྡྷ མཧམྦུཝནྟཾ.

(ཁ)

པསནྣགམྦྷཱིརཔདཱལི༹སོཏཾ;

ནཱནཱནཡཱནནྟཏརངྒམཱལཾ;

སཱིལཱདིཁནྡྷཱམིཏམཙྪགུམྦཾ ¶ ;

ཝནྡཱམཧཾ དྷམྨ མཧཱསཝནྟིཾ.

(ག)

སཱིལོརུཝེལཾ དྷུཏསངྑམཱལཾ;

སནྟོསཏོཡཾ སམཐཱུམིཙིཏྟཾ;

པདྷཱནཀིཙྩཾ ཨདྷིཙིཏྟསཱརཾ;

ཝནྡཱམཧཾ སངྒྷ མཧཱསམུདྡཾ.

(གྷ)

ཡེ ཏནྟིདྷམྨཾ མུནིརཱཛཔུཏྟཱ;

ཡཱཝཛྫཀཱལཾ པརིཔཱལཡནྟཱ;

སཾཝཎྞནཾ ནིམྨལམཱནཡིཾསུ;

ཏེ པུབྦཀེ ཙཱཙརིཡེ ནམཱམི.

(ང)

ཡོ ¶ དྷམྨསེནཱཔཏིཏུལྱནཱམོ;

ཏཐཱུཔམོ སཱིཧལ༹དཱིཔདཱིཔོ;

མམཾ མཧཱསཱམིམཧཱཡཏིནྡོ;

པཱཔེསི ཝུཌྜྷིཾ ཛིནསཱསནམྷི.

(ཙ)

ཊཱིཀཱ ཀཏཱ ཨཊྛཀཐཱཡ ཡེན;

སམནྟཔཱསཱདིཀནཱམིཀཱཡ;

ཨངྒུཏྟརཱཡཊྛཀཐཱཡ ཙེཝ;

སཏྠནྟརསྶཱཔི ཙ ཛོཏིསཏྠཾ.

(ཚ)

ནིཀཱཡསཱམགྒིཝིདྷཱཡཀེན;

རཉྙཱ པརཀྐནྟིབྷུཛེན སམྨཱ;

ལངྐིསྶརེནཱཔི ཀཏོཔཧཱརཾ;

ཝནྡེ གརུཾ གཱརཝབྷཱཛནཾ ཏཾ.

(ཛ)

ནམསྶམཱནོཧམལཏྠམེཝཾ ¶ ;

ཝཏྠུཏྟཡཾ ཝནྡིཏཝནྡནེཡྻཾ;

ཡཾ པུཉྙསནྡོཧམམནྡབྷཱུཏཾ;

ཏསྶཱནུབྷཱཝེན ཧཏནྟརཱཡོ.

(ཛྷ)

ཡོ བུདྡྷགྷོསཱཙརིཡཱསབྷེན;

ཝིཉྙུཔྤསཏྠེནཔི སུཔྤསཏྠོ;

སོ བུདྡྷདཏྟཱཙརིཡཱབྷིདྷཱནོ;

མཧཱཀཝཱི ཐེརིཡཝཾསདཱིཔོ.

(ཉ)

ཨཀཱསི ཡཾ ཝིནཡཝིནིཙྪཡཝ྄ཧཡཾ;

སཨུཏྟརཾ པཀརཎམུཏྟམཾ ཧིཏཾ;

ཨཔེཀྑཏཾ ཝིནཡནཡེསུ པཱཊཝཾ;

པུརཱསི ཡཾ ཝིཝརཎམསྶ སཱིཧལ༹ཾ.

(ཊ)

ཡསྨཱ ¶ ན དཱིཔནྟརིཀཱནམཏྠཾ;

སཱདྷེཏི བྷིཀྑཱུནམསེསཏོ ཏཾ;

ཏསྨཱ ཧི སབྦཏྠ ཡཏཱིནམཏྠཾ;

ཨཱསཱིསམཱནེན དཡཱལཡེན.

(ཋ)

སུམངྒལཏྠེརཝརེན ཡསྨཱ;

སཀྐཙྩ ཀལྱཱཎམནོརཐེན;

ནཡཉྙུནཱརཉྙནིཝཱསིཀེན;

ཨཛ྄ཛྷེསིཏོ སཱདྷུགུཎཱཀརེན.

(ཌ)

ཨཱཀངྑམཱནེན ཙིརཔྤཝཏྟིཾ;

དྷམྨསྶ དྷམྨིསྶརདེསིཏསྶ;

ཙོལ༹པྤདཱིཔེན ¶ ཙ བུདྡྷམིཏྟ-

ཏྠེརེན སདྡྷཱདིགུཎོདིཏེན.

(ཌྷ)

ཏཐཱ མཧཱཀསྶཔཨཝ྄ཧཡེན;

ཐེརེན སིཀྑཱསུ སགཱརཝེན;

ཀུདིཊྛིམཏྟེབྷཝིདཱརཀེན;

སཱིཧེན ཙོལཱ༹ཝནིཔཱུཛིཏེན.

(ཎ)

ཡོ དྷམྨཀིཏྟཱིཏི པསཏྠནཱམོ;

ཏེནཱཔི སདྡྷེན ཨུཔཱསཀེན;

སཱིལཱདིནཱནཱགུཎམཎྜིཏེན;

སདྡྷམྨཀཱམེནིདྷ པཎྜིཏེན.

(ཏ)

སདྡྷེན པཉྙཱཎཝཏཱ ཝལ༹ཏྟཱ-;

མངྒལྱཝཾསེན མཧཱཡསེན;

ཨཱཡཱཙིཏོ ཝཱཎིཛབྷཱཎུནཱཔི;

ཝརཉྙུནཱ སཱདྷུགུཎོདཡེན.

(ཐ)

ཏསྨཱ ¶ ཏམཱརོཔིཡ པཱལི༹བྷཱསཾ;

ནིསྶཱཡ པུབྦཱཙརིཡོཔདེསཾ;

ཧིཏྭཱ ནིཀཱཡནྟརལདྡྷིདོསཾ;

ཀཏྭཱཏིཝིཏྠཱརནཡཾ སམཱསཾ.

(ད)

ཨཝུཏྟམཏྠཉྩ པཀཱསཡནྟོ;

པཱཋཀྐམཉྩཱཔི ཨཝོཀྐམནྟོ;

སཾཝཎྞཡིསྶཱམི ཏདཏྠསཱརཾ;

ཨཱདཱཡ གནྠནྟརཏོཔི སཱརཾ.

(དྷ)

ཙིརཊྛིཏིཾ ¶ པཏྠཡཏཱ ཛནཱནཾ;

ཧིཏཱཝཧསྶཱམལསཱསནསྶ;

མཡཱ སམཱསེན ཝིདྷཱིཡམཱནཾ;

སཾཝཎྞནཾ སཱདྷུ སུཎནྟུ སནྟོཏི.

གནྠཱརམྦྷཀཐཱཝཎྞནཱ

༡-༥

. སུཝིཔུལཱམལསདྡྷཱཔཉྙཱདིགུཎསམུདཡཱཝཧཾ སཀལཛནཧིཏེཀཧེཏུཛིནསཱསནཊྛིཏིམཱུལབྷཱུཏཾ ཝིནཡཔྤཀརཎམིདམཱརབྷནྟོཡམཱཙརིཡོ པཀརཎཱརམྦྷེ རཏནཏྟཡཔྤཎཱམཔཀརཎཱབྷིདྷཱནཱབྷིདྷེཡྻཀརཎཔྤཀཱརཔཡོཛནནིམིཏྟཀཏྟུཔརིམཱཎཱདཱིནི དསྶེཏུམཱཧ ‘‘ཝནྡིཏྭཱ’’ཏིཨཱདི. ཏཏྠ རཏནཏྟཡཾ ནཱམ.

‘‘ཙིཏྟཱིཀཏཾ མཧགྒྷཉྩ, ཨཏུལཾ དུལླབྷདསྶནཾ;

ཨནོམསཏྟཔརིབྷོགཾ, རཏནཾ ཏེན ཝུཙྩཏཱི’’ཏི. (དཱི. ནི. ཨཊྛ. ༢.༣༣; སཾ. ནི. ཨཊྛ. ༣.༥.༢༢༣; ཁུ. པཱ. ཨཊྛ. ༦.༣; སུ. ནི. ཨཊྛ. ༡.༢༢༦; མཧཱནི. ཨཊྛ. ༥༠) –

ནིདྡིཊྛསབྷཱཝཾ

‘‘བུདྡྷོ ¶ སབྦཉྙུཏཉྙཱཎཾ, དྷམྨོ ལོཀུཏྟརོ ནཝ;

སངྒྷོ མགྒཕལཊྛོ ཙ, ཨིཙྩེཏཾ རཏནཏྟཡ’’ནྟི. –

ཝིབྷཱཝིཏཔྤབྷེདཾ སཀལབྷཝདུཀྑཝིནིཝཱརཎཾ ཏིབྷཝེནེཀཔཊིསརཎཾ ཝཏྠུཏྟཡཾ.

ཏསྶ པཎཱམོ ནཱམ པཎཱམཀིརིཡཱནིཔྥཱདིཀཱ ཙེཏནཱ. སཱ ཏིཝིདྷཱ ཀཱཡཔཎཱམོ ཝཙཱིཔཎཱམོ མནོཔཎཱམོཏི. ཏཏྠ ཀཱཡཔཎཱམོ ནཱམ རཏནཏྟཡགུཎཱནུསྶརཎཔུབྦིཀཱ ཨཉྫལིཀམྨཱདིཀཱཡཀིརིཡཱཝསཔྤཝཏྟིཀཱ ཀཱཡཝིཉྙཏྟིསམུཊྛཱཔིཀཱ ཙེཏནཱ. ཝཙཱིཔཎཱམོ ནཱམ ཏཐེཝ པཝཏྟཱ ནཱནཱཝིདྷགུཎཝིསེསཝིབྷཱཝནསབྷཱཝཐོམནཱཀིརིཡཱཝསཔྤཝཏྟིཀཱ ཝཙཱིཝིཉྙཏྟིསམུཊྛཱཔིཀཱ ¶ ཙེཏནཱ. མནོཔཎཱམོ ནཱམ ཨུབྷཡཝིཉྙཏྟིཡོ ཨསམུཊྛཱཔེཏྭཱ ཀེཝལཾ གུཎཱནུསྶརཎེན ཙིཏྟསནྟཱནསྶ ཏནྣིནྣཏཔྤོཎཏཔྤབྦྷཱརཏཱཡ གཱརཝབཧུམཱནནཝསཔྤཝཏྟིསཱདྷིཀཱ ཙེཏནཱ.

ཨིམསྶ ཏཱཝ རཏནཏྟཡཔཎཱམསྶ དསྶནཾ ཡཐཱདྷིཔྤེཏཏྠསཱདྷནཏྠཾ. གུཎཱཏིསཡཡོགེན ཧི པཎཱམཱརཧེ རཏནཏྟཡེ ཀཏོ པཎཱམོ པུཉྙཝིསེསབྷཱཝཏོ ཨིཙྪིཏཏྠཱབྷིནིཔྥཏྟིཝིབནྡྷཀེན ཨུཔགྷཱཏཀེན, ཨུཔཔཱིལ༹ཀེན ཙ ཨཔུཉྙཀམྨེན ཨུཔནཱིཡམཱནསྶ ཨུཔདྡཝཛཱལསྶ ཝིནིཝཱརཎེན ཡཐཱལདྡྷསམྤཏྟིནིམིཏྟཀསྶ པུཉྙཀམྨསྶ ཨནུབལཔྤདཱནེན ཙ ཏབྦིཔཱཀསནྟཏིཡཱ ཨཱཡུསུཁབལཱདིཝཌྜྷནེན ཙ ཙིརཀཱལཔྤཝཏྟིཧེཏུཀོཏི ཡཐཱདྷིཔྤེཏཔཀརཎནིཔྥཏྟིནིབནྡྷནཀོ ཧོཏི. ཨཐཱཔི སོཏཱུནཉྩ ཝནྡནཱིཡཝནྡནཱཔུབྦཀེནཱརམྦྷེན ཨནནྟརཱཡེན ཨུགྒཧཎདྷཱརཎཱདིཀྐམེན པཀརཎཱཝབོདྷཔྤཡོཛནསཱདྷནཏྠཾ. ཨཔིཙ སོཏཱུནམེཝ ཝིཉྙཱཏསཏྠུཀཱནཾ བྷགཝཏོ ཡཐཱབྷཱུཏགུཎཝིསེསཱནུསྶཝནེན སམུཔཛཱཏཔྤསཱདཱནཾ པཀརཎེ གཱརཝུཔྤཱདནཏྠཾ, ཨཝིཉྙཱཏསཏྠུཀཱནཾ ¶ པན པཀརཎསྶ སྭཱཁྱཱཏཏཱཡ ཏཔྤབྷཝེ སཏྠརི གཱརཝུཔྤཱདནཏྠཉྩ སོཏུཛནཱནུགྒཧམེཝ པདྷཱནཾ ཀཏྭཱ ཨཱཙརིཡེཧི གནྠཱརམྦྷེ ཐུཏིཔྤཎཱམཔརིདཱིཔཀཱནཾ གཱཐཱཝཱཀྱཱནཾ ནིཀྑེཔོ ཝིདྷཱིཡཏི. ཨིཏརཐཱ ཝིནཱཔི ཏནྣིཀྑེཔཾ ཀཱཡམནོཔཎཱམེནཱཔི ཡཐཱདྷིཔྤེཏཔྤཡོཛནསིདྡྷིཏོ ཀིམེཏེན གནྠགཱརཝཀརེནཱཏི ཨཡམེཏྠ སངྑེཔོ. ཝིཏྠཱརཏོ པན པཎཱམཔྤཡོཛནཾ སཱརཏྠདཱིཔནིཡཱདཱིསུ (སཱརཏྠ. ཊཱི. ༡.གནྠཱརམྦྷཀཐཱཝཎྞནཱ; ཝི. ཝི. ཊཱི. ༢.གནྠཱརམྦྷཀཐཱཝཎྞནཱ) དསྶིཏནཡེནེཝ ཉཱཏབྦཾ.

ཨབྷིདྷཱནཀཐནཾ པན ཝོཧཱརསུཁཏྠཾ. ཨབྷིདྷེཡྻསྶ སམུདིཏེན པཀརཎེན པཊིཔཱདེཏབྦསྶ ཀཐནཾ པཀརཎསྶ ཨཱརབྷིཏབྦསབྷཱཝདསྶནཏྠཾ. ཝིདིཏཱནིནྡིཏསཱཏྠཀསུཀརཱནུཊྛཱནཱབྷི དྷེཡྻམེཝ ཧི པཀརཎཾ པརིཀྑཀཛནཱ ཨཱརབྷིཏབྦཾ མཉྙནྟཱིཏི. ཀརཎཔྤཀཱརསནྡསྶནཾ སོཏུཛནསམུསྶཱཧནཏྠཾ. ཨནཱཀུལམསཾཀིཎྞཏཱདིཔྤཀཱརེན ཧི ཝིརཙིཏཾ པཀརཎཾ སོཏཱརོ སོཏུམུསྶཧནྟཱིཏི. པཡོཛནཀཐནཾ པན པཀརཎཛ྄ཛྷཱཡནེ སོཏུཛནསམུཏྟེཛནཏྠཾ. ཨསཏི ཧི པཡོཛནཀཐནེ ཨཝིཉྙཱཏཔྤཡོཛནཱ ཨཛ྄ཛྷཱཡནེ བྱཱཝཊཱ ན ཧོནྟཱིཏི. ནིམིཏྟཀཐནཾ སརིཀྑཀཛནཱནཾ པཀརཎེ གཱརཝུཔྤཱདནཏྠཾ. པསཏྠཀཱརཎུཔྤནྣེཡེཝ ཧི པཀརཎེ སརིཀྑཀཱ གཱརཝཾ ཛནེནྟཱིཏི.

ཀཏྟུཀཐནཾ པུགྒལགརུཀསྶ པཀརཎེ གཱརཝོ པུགྒལགཱརཝེནཔི ཧོཏཱུཏི. པརིམཱཎཀཐནཾ ཨསཛ྄ཛྷཱཡནཱདིཔསུཏཱནཾ ¶ སམྤཧཾསནཏྠཾ. པཀརཎཔརིམཱཎསྶཝནེན ཧི ཏེ སམྤཧཊྛཱ ‘‘ཀིཏྟཀམིདམཔྤཀཾ ན ཙིརེནེཝ པརིསམཱཔེསྶཱམཱ’’ཏི སཛ྄ཛྷཱཡནཱདཱིསུ ཝཏྟནྟཱིཏི. ཨཱདི-སདྡེན སཀྐཙྩསཝནནིཡོཛནཾ སངྒཧིཏཾ, ཏཾ སབྦསམྤཏྟིནིདཱནསུཏམཡཉཱཎནིཔྥཱདནཏྠཾ. ཨསཀྐཙྩཾ སུཎམཱནསྶ ཙ སཝནཱབྷཱཝཏོ ཏཾཧེཏུཀསྶ ¶ སུཏམཡཉཱཎསྶཱཔི ཨབྷཱཝོཏི. ཏཐཱ ཧི ཝིཀྑིཏྟཙིཏྟོ པུགྒལོ སབྦསམྤཏྟིཡཱ ཝུཙྩམཱནོཔི ‘‘ན མཡཱ སུཏཾ, པུན བྷཎིཏབྦ’’ནྟི བྷཎཏི.

ཏཏྠ པཋམགཱཐཱཡཾ ཏཱཝ ‘‘ཝནྡིཏྭཱ’’ཏི ཨིམིནཱ ཏིཝིདྷོཔི པཎཱམོ ཨཝིསེསཏོ དསྶིཏོ. ཝིསེསཏོ པན ‘‘སེཊྛཾ, ཨཔྤཊིཔུགྒལཾ, བྷཝཱབྷཱཝཀརཾ, ནིརངྒཎ’’ནྟི ཨིམེཧི ཙཏཱུཧི པདེཧི ཝཙཱིཔཎཱམོ, ‘‘སིརསཱ’’ཏི ཨིམིནཱ ཀཱཡཔྤཎཱམོ, ‘‘བུདྡྷཾ, དྷམྨཾ, གཎཉྩཱ’’ཏི ཨིམེཧི པན ཏཱིཧི པདེཧི པཎཱམཀིརིཡཱཡ ཀམྨབྷཱུཏཾ རཏནཏྟཡཾ དསྶིཏནྟི དཊྛབྦཾ.

‘‘ཝིནཡསྶཝིནིཙྪཡ’’ནྟི ཨིམིནཱ ཨབྷིདྷཱནཾ དསྶིཏཾ ཨལུཏྟསམཱསེན ཝིནཡཝིནིཙྪཡནཱམསྶ དསྶནཏོ. ཏསྶ ཨནྭཏྠབྷཱཝེན སདྡཔྤཝཏྟིནིམིཏྟབྷཱུཏཾ སཀལེནཱནེན པཀརཎེན པཊིཔཱདེཏབྦམབྷིདྷེཡྻམྤི ཏེནེཝ དསྶིཏཾ. ‘‘སམཱསེནཱ’’ཏི ཙ ‘‘ཨནཱཀུལམསཾཀིཎྞཾ, མདྷུརཏྠཔདཀྐམ’’ནྟི ཙ ཨེཏེཧི ཀརཎཔྤཀཱརོ དསྶིཏོ. ‘‘ཧིཏཏྠཱཡཱ’’ཏི ཙ ‘‘པཊུབྷཱཝཀརཾ ཝིནཡཀྐམེ’’ཏི ཙ ‘‘ཨཔཱརཾ ཨོཏརནྟཱན’’ནྟིཨཱདིནཱ ཙ པཡོཛནཾ. ‘‘བྷིཀྑཱུནཾ བྷིཀྑུནཱིན’’ནྟི ཨིམིནཱ བཱཧིརནིམིཏྟཾ དསྶིཏཾ. ཨབྦྷནྟརནིམིཏྟཾ པན བཱཧིརནིམིཏྟབྷཱུཏབྷིཀྑུབྷིཀྑུནིཝིསཡཱ ཀརུཎཱ, སཱ ཨཱཙརིཡསྶ པཀརཎཱརམྦྷེནེཝ ཝིཉྙཱཡཏཱིཏི ཝིསུཾ ན ཝུཏྟཱ. ‘‘པཝཀྑཱམཱི’’ཏི ཨིམིནཱ སམཱནཱདྷིཀརཎབྷཱཝེན ལབྦྷམཱནོ ‘‘ཨཧ’’ནྟི སུདྡྷཀཏྟཱ སཱམཉྙེན དསྶིཏོ. ཝིསེསཏོ པན པཀརཎཱཝསཱནེ –

‘‘རཙིཏོ བུདྡྷདཏྟེན, སུདྡྷཙིཏྟེན དྷཱིམཏཱ;

སུཙིརཊྛིཏིཀཱམེན, སཱསནསྶ མཧེསིནོ’’ཏི. (ཨུ. ཝི. ༩༦༡) –

ཨིམཱཡ ¶ གཱཐཱཡ ཙེཝ ‘‘ཨིཏི ཏམྦཔཎྞིཡེན པརམཝེཡྻཱཀརཎེན ཏིཔིཊཀནཡཝིདྷིཀུསལེན པརམཀཝིཝརཛན ཧདཡཔདུམཝནཝིཀསནཀརེན ཀཝིཝརཱསབྷེན པརམརཏིཀརཝརམདྷུརཝཙནུགྒཱརེན ཨུརགཔུརེན བུདྡྷདཏྟེན རཙིཏོཡཾ ཝིནཡཝིནིཙྪཡོ’’ཏི (ཝི. ཝི. ༣༡༨༣) ཨིམིནཱ ཝཱཀྱེན ཙ ¶ དསྶིཏོ – ‘‘མཱདིསཱཔི ཀཝཱི ཧོནྟི, བུདྡྷདཏྟེ དིཝངྒཏེ’’ཏིཨཱདིནཱ པཙྪིམཀེཧི ཙ པསཏྠཏརེཧི ཀཝིཝརེཧི ཨབྷིཏྠུཏགུཎོ བྷདནྟབུདྡྷདཏྟཱཙརིཡོ ཝེདིཏབྦོ. ཧེཏུཀཏྟཱ ཙ ཏཏྠེཝ ཝཀྑམཱནོ པཀརཎཛ྄ཛྷེསནེ ཀཏཱདྷཱིནོ བུདྡྷསཱིཧམཧཱཐེརོ, སོ –

‘‘ཝུཏྟསྶ བུདྡྷསཱིཧེན;

ཝིནཡསྶ ཝིནིཙྪཡོ;

བུདྡྷསཱིཧཾ སམུདྡིསྶ;

མམ སདྡྷིཝིཧཱརིཀཾ;

ཀཏོཡཾ པན བྷིཀྑཱུནཾ;

ཧིཏཏྠཱཡ སམཱསཏོ’’ཏི. (ཝི. ཝི. ༣༡༧༧-༣༡༧༨) –

ཨེཝཾ དསྶིཏོ.

ཨུཏྟརཔྤཀརཎསྶ ཧེཏུཀཏྟཱ པན སངྒྷཔཱལམཧཱཐེརོ, སོཔི –

‘‘ཁནྟིསོརཙྩསོསིལྱ-བུདྡྷིསདྡྷཱདཡཱདཡོ;

པཏིཊྛིཏཱ གུཎཱ ཡསྨིཾ, རཏནཱནཱིཝ སཱགརེ.

‘‘ཝིནཡཱཙཱརཡུཏྟེན, ཏེན སཀྐཙྩ སཱདརཾ;

ཡཱཙིཏོ སངྒྷཔཱལེན, ཐེརེན ཐིརཙེཏསཱ.

‘‘སུཙིརཊྛིཏིཀཱམེན ¶ , ཝིནཡསྶ མཧེསིནོ;

བྷིཀྑཱུནཾ པཱཊཝཏྠཱཡ, ཝིནཡསྶཝིནིཙྪཡེ;

ཨཀཱསིཾ པརམཾ ཨེཏཾ, ཨུཏྟརཾ ནཱམ ནཱམཏོ’’ཏི. (ཨུ. ཝི. ༩༦༥-༩༦༨) –

ཨེཝཾ དསྶིཏོ. ན ཀེཝལམེཏེ དྭེཡེཝ མཧཱཐེརཱ ཧེཏུཀཏྟཱརོ, ཨཐ ཁོ མཧཱཝཾསཱདཱིསུ –

‘‘བུདྡྷསྶ ¶ ཝིཡ གམྦྷཱིར-

གྷོསཏྟཱ ཏཾ ཝིཡཱཀརུཾ;

‘བུདྡྷགྷོསོ’ཏི ཡོ སོ ཧི;

བུདྡྷོ ཝིཡ མཧཱིཏལེ’’ཏི. –

ཨཱདིནཱ ནཡེན ཨབྷིཏྠུཏགུཎོ ཏིཔིཊཀཔརིཡཏྟིཡཱ ཨཊྛཀཐཱཀཱརོ བྷདནྟབུདྡྷགྷོསཱཙརིཡོ ཙ ཨནུསྶུཏིཝསེན ‘‘ཧེཏུཀཏྟཱ’’ཏི ཝེདིཏབྦོ.

ཀཐཾ? ཨཡཾ ཀིར བྷདནྟབུདྡྷདཏྟཱཙརིཡོ ལངྐཱདཱིཔཏོ སཛཱཏིབྷཱུམིཾ ཛམྦུདཱིཔམཱགཙྪནྟོ བྷདནྟབུདྡྷགྷོསཱཙརིཡཾ ཛམྦུདཱིཔཝཱསིཀེཧི པཊིཔཏྟིཔརཱཡནེཧི ཡུཏྟབྱཏྟགུཎོཔེཏེཧི མཧཱཐེརཝརེཧི ཀཏཱརཱདྷནཾ སཱིཧལ༹ཊྛཀཐཾ པརིཝཏྟེཏྭཱ སཀལཛནསཱདྷཱརཎཱཡ མཱུལབྷཱསཱཡ ཏིཔིཊཀཔརིཡཏྟིཡཱ ཨཊྛཀཐཾ ལིཁིཏུཾ ལངྐཱདཱིཔཾ གཙྪནྟཾ ཨནྟརཱམགྒེ དིསྭཱ སཱཀཙྪཱཡ སམུཔཔརིཀྑིཏྭཱ སབྦལོཀཱཏཱིཏེན ཨསདིསེན པཎྜིཙྩགུཎེན རཏནནིདྷིདསྶནེ པརམདལིདྡོ ཝིཡ བལཝཔརིཏོསཾ པཏྭཱ ཨཊྛཀཐམསྶ ཀཱཏུཀཱམཏཾ ཉཏྭཱ ‘‘ཏུམྷེ ཡཐཱདྷིཔྤེཏཔརིཡནྟལིཁིཏམཊྛཀཐཾ ཨམྷཱཀཾ པེསེཐ, མཡམསྶཱ པཀརཎཾ ལིཁཱམཱ’’ཏི ཏསྶ སམྨུཁཱ པཊིཛཱནིཏྭཱ ཏེན ཙ ‘‘སཱདྷུ ཏཐཱ ཀཱཏབྦ’’ནྟི ཨཛ྄ཛྷེསིཏོ ཨབྷིདྷམྨཊྛཀཐཱཡ ཨབྷིདྷམྨཱཝཏཱརཾ, ཝིནཡཊྛཀཐཱཡ སཨུཏྟརཾ ཝིནཡཝིནིཙྪཡཔཀརཎཉྩ ཨཀཱསཱིཏི ཨནུསྶུཡྻཏེཏི.

‘‘སམཱསེནཱ’’ཏི ¶ ཨིམིནཱ ཙ པརིམཱཎམྤི སཱམཉྙེན དསྶིཏཾ ཝིཏྠཱརཔརིམཱཎེ ཏསྶ པརིམཱཎསཱམཉྙསྶ ཝིཉྙཱཡམཱནཏྟཱ. ཝིསེསཏོ པན པརིཙྪེདཔརིམཱཎཾ གནྠཔརིམཱཎནྟི དུཝིདྷཾ. ཏཏྠ པརིཙྪེདཔརིམཱཎཾ ཨིམསྨིཾ པཀརཎེ ཀཐཱཝོཧཱརེན ཝུཙྩཏི.

སེཡྻཐིདཾ? – པཱརཱཛིཀཀཐཱ སངྒྷཱདིསེསཀཐཱ ཨནིཡཏཀཐཱ ནིསྶགྒིཡཀཐཱ པཱཙིཏྟིཡཀཐཱ པཱཊིདེསནཱིཡཀཐཱ སེཁིཡཀཐཱཏི བྷིཀྑུཝིབྷངྒཀཐཱ སཏྟཝིདྷཱ, ཏཏོ ཨནིཡཏཀཐཾ ཝཛྫེཏྭཱ ཏཐེཝ བྷིཀྑུནིཝིབྷངྒཀཐཱ ཚབྦིདྷཱ, མཧཱཁནྡྷཀཀཐཱདིཀཱ བྷིཀྑུནིཀྑནྡྷཀཀཐཱཝསཱནཱ ཝཱིསཏིཝིདྷཱ ཁནྡྷཀཀཐཱ, ཀམྨཀཐཱ, ཀམྨཝིཔཏྟིཀཐཱ, པཀིཎྞཀཝིནིཙྪཡོ, ཀམྨཊྛཱནབྷཱཝནཱཝིདྷཱནནྟི ཝིནཡཝིནིཙྪཡེ ཀཐཱཔརིཙྪེདོ སཏྟཏིཾས.

ཨུཏྟརཔྤཀརཎེ ¶ ཙ ཝུཏྟནཡེན བྷིཀྑུཝིབྷངྒེ སཏྟཝིདྷཱ ཀཐཱ, བྷིཀྑུནིཝིབྷངྒེ ཚབྦིདྷཱ, ཏདནནྟརཱ ཝིཔཏྟིཀཐཱ, ཨདྷིཀརཎཔཙྩཡཀཐཱ, ཁནྡྷཀཔཉྷཱཀཐཱ, སམུཊྛཱནསཱིསཀཐཱ, ཨཱཔཏྟིསམུཊྛཱནཀཐཱ, ཨེཀུཏྟརནཡཀཐཱ, སེདམོཙནཀཐཱ, ཝིབྷངྒདྭཡནིདཱནཱདིཀཐཱ, སབྦངྒལཀྑཎཀཐཱ, པརིཝཱརསངྐལནཀཐཱཏི ཚཏྟིཾས ཀཐཱཔརིཙྪེདཱ.

ནིསྶནྡེཧེ པན ‘‘ཨཊྛཏིཾས ཀཐཱཔརིཙྪེདཱ’’ཏི ཝུཏྟཾ, ཏཾ ཨེཀུཏྟརནཡེ ཨདསྶིཏེཧིཔི དྭཱདསཀཔནྣརསཀནཡེཧི སཧ སོལ༹སཔརིཙྪེདེ གཧེཏྭཱ ཨཔྤཀཾ ཨཱུནམདྷིཀཾ གཎནཱུཔགཾ ན ཧོཏཱིཏི ཀཏྭཱ ཝུཏྟནྟི དཊྛབྦཾ. ཨུབྷཡཏྠ ཀཐཱཔརིཙྪེདཔརིམཱཎཾ ཏེསཏྟཏིཝིདྷཾ ཧོཏི. ནིསྶནྡེཧེ ‘‘པཉྩསཏྟཏིཝིདྷཱ’’ཏི ཝཙནེ པརིཧཱརོ ཝུཏྟནཡོཝ. གནྠཔརིམཱཎཾ པན ཝིནཡཝིནིཙྪཡེ ཨསཱིཏིགནྠཱདྷིཀཱནི ཙཏྟཱརི གནྠསཧསྶཱནི ¶ , ཨུཏྟརེ པཉྙཱསགནྠཱདྷིཀཱནི ནཝ གནྠསཏཱནི ཧོནྟི. ཏེན ཝུཏྟཾ ཨུཏྟརཱཝསཱནེ –

‘‘གཱཐཱ ཙཏུསཧསྶཱནི, སཏཉྩ ཨཱུནཝཱིསཏི;

པརིམཱཎཏོཏི ཝིཉྙེཡྻོ, ཝིནཡསྶཝིནིཙྪཡོ.

པཉྙཱསཱདྷིཀསངྑཱནི, ནཝ གཱཐཱསཏཱནི ཧི;

གཎནཱ ཨུཏྟརསྶཱཡཾ, ཚནྡསཱནུཊྛུབྷེན ཏཱུ’’ཏི. (ཨུ. ཝི. ༩༦༩-༩༧༠);

ཨིཙྩེཝཾ ཝིནཡཝིནིཙྪཡོ ཨུཏྟརོ ཙཱཏི དྭེ པཀརཎཱནི ཏིཾསཱདྷིཀཱནི པཉྩགཱཐཱསཧསྶཱནི. ཨེཏྠ ཙ ཝིནཡཝིནིཙྪཡོ ནཱམ ཨུབྷཏོཝིབྷངྒཁནྡྷཀཱགཏཝིནིཙྪཡསངྒཱཧཀཔཀརཎཾ. ཏཏོ པརཾ པརིཝཱརཏྠསངྒཱཧཀཔཀརཎཾ ཨུཏྟརོ ནཱམ. ཏེནེཝ ཝཀྑཏི –

‘‘ཡོ མཡཱ རཙིཏོ སཱརོ, ཝིནཡསྶཝིནིཙྪཡོ;

ཏསྶ དཱནི ཀརིསྶཱམི, སབྦཱནུཏྟརམུཏྟར’’ནྟི. (ཨུ. ཝི. ༢)

ཏཾ ཀསྨཱ ཨུཏྟརནཱམེན ཝོཧརིཡཏཱིཏི? པཉྷུཏྟརཝསེན ཋིཏེ པརིཝཱརེ ཏཐེཝ སངྒཧེཏབྦེཔི ཏེན པཀཱརེན པཱརཱཛིཀཀཐཱམཏྟཾ དསྶེཏྭཱ –

‘‘ཨིཏོ ¶ པཊྛཱཡ མུཉྩིཏྭཱ, པཉྷཱཔུཙྪནམཏྟཀཾ;

ཝིསྶཛྫནཝསེནེཝ, ཧོཏི ཨཏྠཝིནིཙྪཡོ’’ཏི. (ཨུ. ཝི. ༡༤) –

ཝཏྭཱ པཉྷཾ པཧཱཡ ཏཏོ པཊྛཱཡ ཨུཏྟརམཏྟསྶེཝ དསྶིཏཏྟཱ ཏཐཱ ཝོཧརཱིཡནྟི.

‘‘ཏསྨཱ ཝིནཡནཱུཔཱཡ’’ནྟིཨཱདིནཱ པན སོཏུཛནཾ སཀྐཙྩསཝནེ ནིཡོཛེཏི. སཀྐཙྩསཝནཔཊིབདྡྷཱ ཧི སབྦཱཔི ལོཀིཡལོཀུཏྟརསམྤཏྟཱིཏི ཨཡམེཏྠ སམུདཱཡཏྠོ. ཨཡཾ པན ཨཝཡཝཏྠོ – སོ ཡསྨཱ ཨཏྠཡོཛནཀྐམེན པདཡོཛནཾ ¶ ཀཏྭཱ ཝཎྞིཏེ སུཝིཉྙེཡྻོ ཧོཏི, ཏསྨཱ ཏཐཱ པདཡོཛནཾ ཀཏྭཱ ཨཏྠཝཎྞནཾ ཀརིསྶཱམ –

སེཊྛཾ ཨཔྤཊིཔུགྒལཾ བུདྡྷཉྩེཝ བྷཝཱབྷཱཝཀརཾ དྷམྨཉྩེཝ ནིརངྒཎཾ གཎཉྩེཝ སིརསཱ ཝནྡིཏྭཱ བྷིཀྑཱུནཾ བྷིཀྑུནཱིནཉྩ ཧིཏཏྠཱཡ སམཱསེན སམཱཧིཏོ ཝིནཡསྶཝིནིཙྪཡཾ ཝཀྑཱམཱིཏི ཡོཛནཱ.

ཏཏྠ སེཊྛནྟི སབྦེ ཨིམེ པསཏྠཱ ཨཡམེཏེསཾ ཨཏིསཡེན པསཏྠོཏི སེཊྛོ. ཏཐཱ ཧི སོ བྷགཝཱ ‘‘ཨཧཉྷི བྲཱཧྨཎ ཛེཊྛོ སེཊྛོ ལོཀསྶཱ’’ཏི (པཱརཱ. ༡༡) ཝེརཉྫབྲཱཧྨཎསྶ ཨཏྟནོ ཛེཊྛསེཊྛབྷཱཝསྶ པརིཛཱནནཝིནིཙྪཡཧེཏུབྷཱུཏཱཧི ཛྷཱནཱདཱིཧི ནིརཏིསཡགུཎསམྤཏྟཱིཧི སམནྣཱགཏཏྟཱ –

‘‘ཏྭམེཝ ཨསི སམྦུདྡྷོ, ཏུཝཾ སཏྠཱ ཨནུཏྟརོ;

སདེཝཀསྨིཾ ལོཀསྨིཾ, ནཏྠི ཏེ པཊིཔུགྒལོ. (དཱི. ནི. ༢.༣༧༠);

ཏུཝཾ བུདྡྷོ ཏུཝཾ སཏྠཱ, ཏུཝཾ མཱརཱབྷིབྷཱུ མུནི;

ཏུཝཾ ཨནུསཡེ ཚེཏྭཱ, ཏིཎྞོ ཏཱརེསིམཾ པཛཾ.

ཨུཔདྷཱི ཏེ སམཏིཀྐནྟཱ, ཨཱསཝཱ ཏེ པདཱལིཏཱ;

སཱིཧོསི ཨནུཔཱདཱནོ, པཧཱིནབྷཡབྷེརཝོ. (མ. ནི. ༢.༤༠༠; སུ. ནི. ༥༥༠-༥༥༡; ཐེརགཱ. ༨༣༩-༩༤༠);

མཧཱཝཱིར ¶ མཧཱཔཉྙ, ཨིདྡྷིཡཱ ཡསསཱ ཛལ;

སབྦཝེརབྷཡཱཏཱིཏ, པཱདེ ཝནྡཱམི ཙཀྑུམཱ’’ཏི. (སཾ. ནི. ༡.༡༥༩; དྷ. པ. ཨཊྛ. ༡.༥༦); –

ཨཱདཱིཧཱི ནཱནཱནཡེཧི སདེཝཀེན ལོཀེན ཨབྷིཏྠཝིཡཏཱཡ པསཏྠཏམོ, ཏམེཝ སེཊྛཾ པསཏྠཏམནྟི ཨཏྠོ.

ཨཔྤཊིཔུགྒལནྟི ¶ ནཏྠི ཨེཏསྶ པཊིཔུགྒལོ ཨདྷིཀོ, སདིསོ ཝཱཏི ཨཔྤཊིཔུགྒལོ. ཏཐཱ ཧི གུཎཝསེན ཨནནྟཱཔརིམཱཎཱསུ ལོཀདྷཱཏཱུསུ ཨཏྟནཱ ཨདྷིཀསྶ, སདིསསྶ ཝཱ པུགྒལསྶ ཨབྷཱཝཏོ –

‘‘ན མེ ཨཱཙརིཡོ ཨཏྠི, སདིསོ མེ ན ཝིཛྫཏི;

སདེཝཀསྨིཾ ལོཀསྨིཾ, ནཏྠི མེ པཊིཔུགྒལོ’’ཏི. (མཧཱཝ. ༡༡) –

ཨཏྟནཱཝ ཨཏྟནོ ཨཝིཔརཱིཏོ ཨཔྤཊིཔུགྒལབྷཱཝོ པཊིཉྙཱཏོ, ཏསྨཱ ཏཾ ཨཔྤཊིཔུགྒལཾ སབྦལོཀུཏྟམནྟི ཨཏྠོ.

བུདྡྷནྟི ཨནནྟམཔརིམེཡྻཾ ཉེཡྻམཎྜལམནཝསེསཾ བུདྡྷཝཱཏི བུདྡྷོ, ཨེཏེན ཨནེཀཀཔྤཀོཊིསཏསཧསྶཾ སམྦྷཏཔུཉྙཉཱཎསམྦྷཱརཱནུབྷཱཝསིདྡྷིདྷམྨརཱུཔཀཱཡསིརིཝིལཱསཔཊིམཎྜིཏོ སདྡྷམྨཝརཙཀྐཝཏྟཱི སམྨཱསམྦུདྡྷོ དསྶིཏོ. ཨཐ ཝཱ ཙཏྟཱརི སཙྩཱནི སཡཾ ཝིཙིཏོཔཙིཏཔཱརམིཏཱཔརིཔཱཙིཏེན སཝཱསནཱནཝསེསཀིལེསཔྤཧཱཡཀེན སཡམྦྷུཉཱཎེན བུཛ྄ཛྷཱིཏི བུདྡྷོ. ཡཐཱཧ –

‘‘ཨབྷིཉྙེཡྻཾ ཨབྷིཉྙཱཏཾ, བྷཱཝེཏབྦཉྩ བྷཱཝིཏཾ;

པཧཱཏབྦཾ པཧཱིནཾ མེ, ཏསྨཱ བུདྡྷོསྨི བྲཱཧྨཎཱ’’ཏི. (མ. ནི. ༢.༣༩༢, ༣༩༩; སུ. ནི. ༥༦༣; ཐེརགཱ. ༨༢༨);

ཝིཏྠཱརོ པནསྶ ‘‘བུཛ྄ཛྷིཏཱ སཙྩཱནཱིཏི བུདྡྷོ, བོདྷེཏཱ པཛཱཡཱཏི བུདྡྷོ’’ཏིཨཱདིནཱ (མཧཱནི. ༡༩༢; ཙཱུལ༹ནི. པཱརཱཡནཏྠུཏིགཱཐཱནིདྡེས ༩༧; པཊི. མ. ༡.༡༦༢) ནིདྡེསཱདཱིསུ ¶ ཝུཏྟནཡེན ཝེདིཏབྦོ. སདྡསིདྡྷི སཱསནིཀཱནཾ ཨཝགམནཏྠེ ཝཏྟམཱནཱ བུདྷ-དྷཱཏུཏོ ‘‘བྷཱཝཀམྨེསུ ཏ’’ ཨིཏི ཨིཏོ ཏཱཏིཝཏྟམཱནེ ‘‘བུདྷགམཱདིཏྠེ ཀཏྟརཱི’’ཏི ཨིམིནཱ ཀཙྩཱཡནསུཏྟེན ཀཏྟརི ཏཔྤཙྩཡཝིདྷཱནཏོ ཝེདིཏབྦཱ. ལོཀིཡཱནཾ པན བོདྷནཏྠདྷཱཏཱུནམྤི གམནཏྠཏཱཡ ཝུཏྟཏྟཱ གཏྱཏྠཱཀམྨཀཱདི ¶ སུཏྟཏོ ཀཏྟརི ཏ-པྤཙྩཡཀརཎེན ཝེདིཏབྦཱ.

ཨཐ ཝཱ དྷཱཏཱུནཾ ཨནེཀཏྠཏཱཡ བུདྷ-ཨིཙྩཡཾ དྷཱཏུ ཛཱགརཎཝིཀསནཏྠེསུ ཝཏྟམཱནོ ཨཀམྨཀོཏི ‘‘པབུདྡྷོ པུརིསོ, པབུདྡྷཾ པདུམ’’ནྟིཨཱདཱིསུ ཝིཡ བུདྡྷཝཱ ཨཉྙཱཎནིདྡཱཝིགམེན ཉཱཎཙཀྑཱུནི ཨུམྨཱིལནྟོ པབུདྡྷོ, གུཎེཧི ཝཱ ཝིཀསིཏོཏི ཀཏྟརི སིདྡྷེན བུདྡྷ-སདྡེན ‘‘བུདྡྷོ’’ཏི ཏིབྷཝནེཀཙཱུལཱ༹མཎིཔཱདཔངྐཛརཱགརཏནོ བྷགཝཱ ལོཀནཱཐོ ཝུཙྩཏི, ཨིམསྨིཾ པཀྑེཔི གཏྱཏྠཱདིསུཏྟེ ཨཀམྨཀགྒཧཎེན པཙྩཡཝིདྷཱནཾ དཊྛབྦཾ.

ཨཐ ཝཱ སཀམྨཀཱནཾ དྷཱཏཱུནཾ ཀམྨཝཙནིཙྪཱཡ ཨབྷཱཝེ ཨཀམྨཀབྷཱཝཏོ ‘‘ཕལཾ སཡམེཝ པཀྐ’’ནྟིཨཱདཱིསུ ཝིཡ བོདྷནཏྠེཡེཝ བུདྷ-དྷཱཏུཏོ ཀཏྟརི ཝིདྷཱནཾ སིཛ྄ཛྷཏི. ཨཐ ཝཱ ནཱིལགུཎཡོགེན པཊཱདཱིསུ ནཱིལཝོཧཱརོ ཝིཡ བྷཱཝསཱདྷནཾ བུདྡྷ-སདྡཾ གཧེཏྭཱ བུདྡྷགུཎཡོགཏོ ‘‘བུདྡྷོ’’ཏི ཝོཧརཱིཡཏི. ཨེཝམནེཀདྷཱ སིདྡྷེན བུདྡྷ-སདྡེན ཝུཙྩམཱནཾ ཏཾ བྷགཝནྟཾ ཏཾ དྷམྨརཱཛནྟི ཨཏྠོ.

‘‘སེཊྛཾ ཨཔྤཊིཔུགྒལ’’ནྟི པདདྭཡཾ ‘‘བུདྡྷ’’ནྟི ཨེཏསྶ ཝིསེསནཾ. ཨེཏྠ ཙ ‘‘བུདྡྷཾ, སེཊྛཾ, ཨཔྤཊིཔུགྒལ’’ནྟི ཨིམེཧི ཏཱིཧི པདེཧི ནཡཏོ ‘‘ཨིཏིཔི སོ བྷགཝཱ ཨརཧཾ སམྨཱསམྦུདྡྷོ’’ཏིཨཱདིནཱ (དཱི. ནི. ༡.༡༥༧; ༣.༦; མ. ནི. ༡.༡༤༧, ༡༤༤; ༣.༤༣༤; སཾ. ནི. ༡.༢༤༩; ༥.༤༧༩; ཨ. ནི. ༥.༡༤, ༣༠; ༦.༢༥, ༢༦; ནེཏྟི. ༩༣), ‘‘ཡོ ཝདཏཾ པཝརོ མནུཛེསུ, སཀྱམུནཱི བྷགཝཱ ཀཏཀིཙྩོ’’ཏིཨཱདཱིཧི (ཝི. ཝ. ༨༨༦) ཙ ཨནེཀེཧི སུཏྟཔདེཧི དསྶིཏདཱུརཱཝིདཱུརསནྟིཀནིདཱནཧེཏུཕལསཏྟོཔཀཱརཱཝཏྠཱདྷམྨཏྠ- ལོཀུདྡྷཱརཏྟིཀཏྟཡསངྒཧིཏཾ སུཔརིསུདྡྷཾ བུདྡྷགུཎསམུདཡཾ ¶ ནིརཝསེསཾ དསྶེཏི. ཨཡམེཝ ཧི བུདྡྷགུཎཱནཾ ནིརཝསེསཏོ དསྶནཱུཔཱཡོ, ཡདིདཾ ནཡདསྶནཾ. ཨིཏརཐཱ པཊིཔདཝཎྞནཱཡ ཨཔརིམིཏཱནཾ བུདྡྷགུཎཱནཾ ཀོ ཧི ནཱམ སམཏྠོ པརིཡནྟཾ གནྟུཾ. ཡཐཱཧ –

‘‘བུདྡྷོཔི ¶ བུདྡྷསྶ བྷཎེཡྻ ཝཎྞཾ;

ཀཔྤམྤི ཙེ ཨཉྙམབྷཱསམཱནོ;

ཁཱིཡེཐ ཀཔྤོ ཙིརདཱིགྷམནྟརེ;

ཝཎྞོ ན ཁཱིཡེཐ ཏཐཱགཏསྶཱ’’ཏི. (དཱི. ནི. ཨཊྛ. ༣.༡༤༡; མ. ནི. ཨཊྛ. ༢.༤༢༥; ཨུདཱ. ཨཊྛ. ༥༣; ཨཔ. ཨཊྛ. ༢.༧.༢༠; བུ. ཝཾ. ཨཊྛ. ༤.༤; ཙརིཡཱ. ཨཊྛ. ནིདཱནཀཐཱ, པཀིཎྞཀཀཐཱ; དཱི. ནི. ཊཱི. ༡.གནྠཱརམྦྷཀཐཱཝཎྞནཱ; མ. ནི. ཊཱི. ༡.གནྠཱརམྦྷཀཐཱཝཎྞནཱ; སཾ. ནི. ཊཱི. ༡.༡.གནྠཱརམྦྷཀཐཱཝཎྞནཱ; ཨ. ནི. ཊཱི. ༡.༡.གནྠཱརམྦྷཀཐཱཝཎྞནཱ; ཝཛིར. ཊཱི. གནྠཱརམྦྷཀཐཱཝཎྞནཱ; སཱརཏྠ. ཊཱི. ༡.གནྠཱརམྦྷཀཐཱཝཎྞནཱ; ནེཏྟི. ཊཱི. གནྠཱརམྦྷཀཐཱཝཎྞནཱ);

ཨེཝམེཏེཧི ཏཱིཧི པདེཧི ནིརཝསེསགུཎསཾཀིཏྟནཐུཏིཡཱ ཝསེན ‘‘ཝནྡིཏྭཱ’’ཏི ཨིམིནཱ པཎཱམསྶ ཙ ཝུཏྟཏྟཱ ཨིམཱཡ ཨཌྜྷགཱཐཱཡ བུདྡྷརཏནསངྑཱཏཔཋམཝནྡནཱིཡཝཏྠུཝིསཡཱ ཐུཏིཔཎཱམསབྷཱཝཱ ཝནྡནཱ དསྶིཏཱཏི དཊྛབྦཾ.

ཏདནནྟརཾ དྷམྨརཏནསྶ པཎཱམཾ དསྶེཏུམཱཧ ‘‘བྷཝཱབྷཱཝཀརཾ དྷམྨ’’ནྟི. ཨེཏྠ བྷཝ-སདྡེན དྭེ བྷཝཱ ཝུཏྟཱ ཀམྨབྷཝོ, ཨུཔཔཏྟིབྷཝོཏི. ཏཏྠ ཀམྨབྷཝོ བྷཝཏི ཨེཏསྨཱ ཕལནྟི ‘‘བྷཝོ’’ཏི ཝུཙྩཏི. ཝིཔཱཀཀྑནྡྷཀཊཏྟཱརཱུཔསངྑཱཏོ པན ཨུཔཔཏྟིབྷཝོ ཨཝིཛྫཱཏཎྷུཔཱདཱནསངྑཱརཱདིསཧཀཱརིཀཱརཎཡུཏྟེན ཀུསལཱཀུསལཙེཏནཱསངྑཱཏཀམྨབྷཝཔཙྩཡེན ཡཐཱརཧཾ བྷཝཏཱིཏི ‘‘བྷཝོ’’ཏི ཝུཙྩཏི. སོ པན ཀཱམབྷཝརཱུཔབྷཝཨརཱུཔབྷཝསཉྙཱིབྷཝཨསཉྙཱིབྷཝནེཝསཉྙཱིནཱསཉྙཱིབྷཝ- ཨེཀཝོཀཱརབྷཝཙཏུཝོཀཱརབྷཝཔཉྩཝོཀཱརབྷཝཝསེན ནཝཝིདྷོ. ཨེཝམེཏེསུ ནཝསུ བྷཝེསུ དསཝིདྷོཔི དྷམྨོ ཨཏྟཱནཾ དྷཱརེནྟསྶ པུགྒལསནྟཱནསྶ ཨནུཔཱདིསེསནིབྦཱནདྷཱཏུཡཱ པརཾ ཨཔྤཊིསནྡྷིཀཏཱསཱདྷནེན བྷཝེསུ ¶ , བྷཝསྶ ཝཱ ཨབྷཱཝཾ ཀརོཏཱིཏི བྷཝཱབྷཱཝཀརོ, ཏཾ, ཨཔརཱཔརཛཱཏིཔྤབནྡྷསྶ ཧེཏུསམུགྒྷཱཏེན ཨཔྤཝཏྟིདྷམྨཏཱཔཱདཀནྟི ཨཏྠོ.

དྷམྨནྟི ཨཏྟཱནཾ དྷཱརེནྟེ ཙཏཱུསུ ཨཔཱཡེསུ, སཾསཱརེ ཙ ཨཔཏམཱནེ དྷཱརེཏཱིཏི དྷམྨོ, སོ ཙཏུམགྒཕལནིབྦཱནསངྑཱཏནཝལོཀུཏྟརདྷམྨོ ཙ ཏཔྤཊིཔཱདཀོ ནཝངྒསཱསནཱཔརནཱམདྷེཡྻཙཏུརཱསཱིཏིསཧསྶདྷམྨཀྑནྡྷཔྤབྷེདབྷིནྣོ པརིཡཏྟིདྷམྨོ ཙཱཏི དསཝིདྷོ. སོཔི ནིཔྤརིཡཱཡདྷམྨོ, པརིཡཱཡདྷམྨོ ¶ ཙཱཏི དུཝིདྷོ. ཏཏྠ ནིཔྤརིཡཱཡདྷམྨོ ནཱམ ཨཔཱཡེ, སཾསཱརེ ཝཱ པདྷཱནཧེཏུབྷཱུཏཱནཾ ཨུདྡྷམྦྷཱགིཡཱནཾ, ཨོརམྦྷཱགིཡཱནཉྩ དསནྣཾ སཾཡོཛནཱནཾ སམུཙྪིནྡནེན མགྒདྷམྨོ, ཏསྶ ཏཾཀིཙྩནིཔྥཏྟིནིམིཏྟབྷཱཝེན ནིབྦཱནདྷམྨོ ཙཱཏི པཉྩཝིདྷོཔི ནིཔྤརིཡཱཡེན པུགྒལསནྟཱནཾ དྷཱརེཏཱིཏི ཀཏྭཱ ‘‘ནིཔྤརིཡཱཡདྷམྨོ’’ཏི ཝུཙྩཏི. ཙཏྟཱརི པན སཱམཉྙཕལཱནི པཊིཔྤསྶདྡྷིཔཧཱནེན མགྒཱནུགུཎཔྤཝཏྟིཡཱ, པརིཡཏྟི ཙ མགྒནིབྦཱནཱདྷིགམསྶ མཱུལཀཱརཎབྷཱཝཏོཏི པཉྩཝིདྷོཔི པརིཡཱཡདྷམྨོ ནཱམ.

ཨེཏྟཱཝཏཱ ‘‘སྭཱཀྑཱཏོ བྷགཝཏཱ དྷམྨོ’’ཏིཨཱདིནཱ (སཾ. ནི. ༡.༢༤༩; ཨ. ནི. ༣.༧༦; དཱི. ནི. ༣.༦; ཨ. ནི. ༦.༡༠, ༢༥, ༢༦), ‘‘རཱགཝིརཱགམནེཛམསོཀ’’ནྟིཨཱདཱིཧི (ཝི. ཝ. ༨༨༧) ཙ སུཏྟནྟེཧི ཝུཏྟསྶ, ཏདཊྛཀཐཱདཱིསུ ཙ ཝཎྞིཏསྶ སརཎཱནུསྶརཎཝསེནཱཔི སགྒམོཀྑསམྤཏྟིཔཊིལཱབྷཀཱརཎསྶ ཨནཝསེསསྶ དྷམྨརཏནགུཎསྶ ནཡཏོ ཨུདྡིཊྛཏྟཱ ཙ ‘‘ཝནྡིཏྭཱ’’ཏི ཨིམིནཱ པཎཱམསྶ དསྶིཏཏྟཱ ཙ དྷམྨརཏནསངྑཱཏསྶ དུཏིཡསྶ ཝནྡནཱིཡསྶ ཐུཏིཔཎཱམསབྷཱཝཱ ཝནྡནཱ དསྶིཏཱཏི དཊྛབྦཾ.

ཏདནནྟརཾ ¶ སངྒྷརཏནསྶ ཝནྡནཱསནྡསྶནཏྠཾ ཝུཏྟཾ ‘‘གཎཉྩེཝ ནིརངྒཎ’’ནྟི. ཨེཏྠ ‘‘རཱགོ ཨངྒཎཾ དོསོ ཨངྒཎཾ མོཧོ ཨངྒཎ’’ནྟི (ཝིབྷ. ༩༢༤) ཝུཏྟེཧི རཱགཱདིཨངྒཎེཧི ཏདངྒཝིཀྑམྦྷནསམུཙྪེདཔཊིཔྤསྶདྡྷིནིསྶརཎཝིམུཏྟིཝསེན ནིགྒཏོ ཝིམུཏྟོཏི ནིརངྒཎོ, ཏཾ ནིརངྒཎཾ. ཨརིཡཝཾསེ སཱིལསམཱདྷིཔཉྙཱཝིམུཏྟིཝིམུཏྟིཉཱཎདསྶནསངྑཱཏེཧི གུཎགཎེཧི གཎཱིཡཏཱིཏི གཎོ, ཏཾ.

ཨེཏྟཱཝཏཱ ‘‘སུཔྤཊིཔནྣོ བྷགཝཏོ སཱཝཀསངྒྷོ’’ཏིཨཱདིནཱ (སཾ. ནི. ༡.༢༤༩; ཨ. ནི. ༣.༧༦; དཱི. ནི. ༣.༦; ཨ. ནི. ༦.༡༠, ༢༥, ༢༦;), ‘‘ཡཏྠ ཙ དིནྣཾ མཧཔྥལམཱཧུ, ཙཏཱུསུ སུཙཱིསུ པུརིསཡུགེསཱུ’’ཏིཨཱདཱིཧི (ཝི. ཝ. ༨༨༨) ཙ ཏེཧི ཏེཧི སུཏྟཔདེཧི ཝུཏྟཱནཾ, ཏདཊྛཀཐཱདཱིསུ ཙ ཝཎྞིཏཱནཾ ཝིམལཱཏུལནིཁིལཝིསཱལཔེསལསཱིལཱདིནཱནཔྤཀཱརཱནགྒྷསངྒྷརཏནགུཎཱནཾ སཾཀིཏྟནསབྷཱཝཱཡ ཐུཏིཡཱ ཙ ‘‘ཝནྡིཏྭཱ’’ཏི ཨེཏེན ཡཐཱཝུཏྟསརཱུཔཔབྷེདཔཎཱམསྶ ཝུཏྟཏྟཱ ཙ སངྒྷརཏནསངྑཱཏཏཏིཡཝནྡནཱིཡཝཏྠུཝིསཡཱ ཐུཏིཔྤཎཱམསངྑཱཏཱ ཝནྡནཱ དསྶིཏཱཏི ཝེདིཏབྦཱ. སིརསཱཏི ཨཏྟཔྤསཱདགཱརཝཱཝཧནྟེན མུདྡྷནཱ. ཝནྡིཏྭཱཏི པཎམིཏྭཱ ཐོམིཏྭཱ ཝཱ.

ཨེཝཾ ¶ པཋམགཱཐཱཡ ཝནྡནཱིཡསྶ རཏནཏྟཡསྶ ཐུཏིཔྤཎཱམསངྑཱཏཾ ཝནྡནཾ དསྶེཏྭཱ ཏདནནྟརཱཡ སནྡསྶེཏབྦཔཡོཛནཱདིཔཊིཔཱདིཀཱཡ གཱཐཱཡ ‘‘བྷིཀྑཱུན’’ནྟི ཨིམིནཱ ཀིཉྩཱཔི སཾསཱརེ བྷཡཾ ཨིཀྑཏཱིཏི ‘‘བྷིཀྑཱུ’’ཏི ཀལྱཱཎཔུཐུཛྫནེན སདྡྷིཾ ཨཊྛ ཨརིཡཔུགྒལཱ ཝུཙྩནྟི, པཱལི༹ཡཾ (པཱརཱ. ༤༤-༤༥; ཝིབྷ. ༥༡༠) པན ‘‘བྷིནྣཔཊཾ དྷཱརེཏཱིཏི བྷིཀྑུ, བྷིཀྑནསཱིལོཏི བྷིཀྑཱུ’’ཏིཨཱདིནཱ བྷིཀྑུསདྡསྶ ཨཏྠུདྡྷཱརཝསེན ནིབྦཙནནྟརཱནི དསྶེཏྭཱ ¶ པཱཏིམོཀྑསཾཝརསཾཝརཎཱརཧསྶེཝ ཨདྷིཔྤེཏབྷཱཝཾ དསྶེཏུཾ ‘‘སམགྒེན སངྒྷེན ཉཏྟིཙཏུཏྠེན ཀམྨེན ཨཀུཔྤེན ཋཱནཱརཧེན ཨུཔསམྤནྣོ, ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུ’’ཏི དསྶིཏཱ སིཀྑཱཀཱམཱ སཱསནཱཝཙཱརཱ ཀུལཔུཏྟཱ ཨིདྷཱདྷིཔྤེཏཱ, ཏེསཾ བྷིཀྑཱུནཉྩ. བྷིཀྑུནཱིནཉྩཱཏི ཨཊྛཝཱཙིཀཨུཔསམྤདཱཀམྨེན ཨུབྷཏོསངྒྷེ ཨུཔསམྤནྣཱཏཱདིསཱཡེཝ ཀུལདྷཱིཏརོ དསྶིཏཱ. ཨེཀཏོཔསམྤནྣཱཔི སཱམཉྙེན གཡ྄ཧནྟི. ཨེཀཏོཔསམྤནྣཱཏི ཙ བྷིཀྑུནིསངྒྷེ ཨུཔསམྤཛྫིཏྭཱ ཡཱཝ བྷིཀྑུསངྒྷེ ན ཨུཔསམྤཛྫནྟི, ཏཱཝ, བྷིཀྑུནཱི ཙ ལིངྒཔརིཝཏྟནེན བྷིཀྑུནིབྷཱཝཔྤཏྟཱ ཨདྷིཔྤེཏཱ, ཏཱསཾ བྷིཀྑུནཱིནཉྩ.

ཧིཏཏྠཱཡཱཏི སབྦསམྤཏྟིནིཔྥཱདཀརཎཏྠཱཡ ཧིནོཏི གཙྪཏི ཡཐཱདྷིཔྤེཏཕལསཱདྷནེ པཝཏྟཏཱིཏི ཧིཏནྟི ཨརོགཏཱདིཀཱརཎཾ ཨམཏོསདྷཱདི ཝུཙྩཏི. ཨིདྷ པན སགྒམོཀྑསམྤཏྟིསིདྡྷིཀཱརཎཾ པཱཏིམོཀྑསཾཝརསཱིལརཀྑནཾ ཝུཙྩཏི, ཏདཏྠཱཡ.

སམཱཧིཏོ སམྨཱ ཨཱཧིཏོ པཝཏྟིཏོ ཝིནིཙྪཡམགྒོ ཨེཏེནཱཏི ‘‘སམཱཧིཏོ’’ཏི པཀརཎཀཱརཀོ དསྶིཏོ. ཨཐ ཝཱ སམྨཱ ཨཱཧིཏཾ ཝིནཡཝིནིཙྪཡེ ཋཔིཏཾ པཝཏྟིཏཾ ཙིཏྟམེཏསྶཱཏི ‘‘སམཱཧིཏཙིཏྟོ’’ཏི ཝཏྟབྦེ ཨུཏྟརཔདལོཔེན ‘‘སམཱཧིཏོ’’ཏི ཝུཏྟོ. པརམགམྦྷཱིརསུདུཏྟརཝིནཡཔིཊཀཏྠཝིནིཙྪཡེ པཝཏྟནཱརཧསྶ ཨིམིནཱ ཝིསེསནེན ཨཏྟནི སམཱཧིཏཙིཏྟཔྤཝཏྟིནིམིཏྟབྷཱུཏོ ཨཏྟནོ ཉཱཎསྶ པདཊྛཱནབྷཱུཏོ སམཱདྷི དསྶིཏོ ཏེན སམཱདྷིནཱ སམཱཧིཏོ ཧུཏྭཱཏི ཨཏྠོ.

པཝཀྑཱམཱིཏི པཀཱརེན ཝཀྑཱམི, ཡེན པཀཱརེན ཝིནཡཝིནིཙྪཡེ ཝུཏྟེ ཨཛྫཏནཱ མནྡསཏིམཏིཝཱིརིཡཱ པཊིཔཛྫནཀཱ གམྦྷཱིརཏརཾ ¶ ཝིནཡཔིཊཀཏྠཝིནིཙྪཡཾ སུཁེན ཨུགྒཎྷིཏུཾ, དྷཱརེཏུཉྩ སཀྐོནྟི, ཏཱདིསེན པཀཱརཝིསེསེན ཝཀྑཱམཱིཏི ཨཏྠོ. སམཱསེནཱཏི སམསནཾ སཾཁིཔནཾ སམཱསོ, ཏེན, སཾཁིཏྟརུཙིཀཱནམུགྒྷཱཊིཏཉྙཱུནཾ ཀཏཱདྷིཀཱརཱནཾ ཉཱཎུཏྟརཱནཾ པུགྒལཱནཉྩ ¶ པཔཉྩབྷཱིརུཀཱནཾ གཧཎདྷཱརཎེ མནྡཡནྟཱནཾ མནྡབུདྡྷཱིནཉྩ ཨུཔཀཱརཀེན ནཱཏིཝིཏྠཱརཀྐམེནཱཏི ཨཏྠོ. ཝིནཡསྶཱཏི ཝིནཡཔིཊཀསྶ. ཏཉྷི –

‘‘ཝིཝིདྷཝིསེསནཡཏྟཱ;

ཝིནཡནཏོ ཙེཝ ཀཱཡཝཱཙཱནཾ;

ཝིནཡཏྠཝིདཱུཧི ཨཡཾ;

ཝིནཡོ ‘ཝིནཡོ’ཏི ཨཀྑཱཏོ’’ཏི. (དཱི. ནི. ཨཊྛ. ༡.པཋམསངྒཱིཏིཀཐཱ; པཱརཱ. ཨཊྛ. ༡.པཋམམཧཱསངྒཱིཏིཀཐཱ; དྷ. ས. ཨཊྛ. ནིདཱནཀཐཱ) –

ཝུཏྟེཧི ཨཏྠཝིསེསེཧི ‘‘ཝིནཡོ’’ཏི ཝུཙྩཏི. ཏསྶ ཨེཝཾ སནྡསྶིཏསབྷཱཝསྶ ‘‘ཝིནཡོ ནཱམ སཱསནསྶ ཨཱཡཱུ’’ཏི (དཱི. ནི. ཨཊྛ. ༡.པཋམསངྒཱིཏིཀཐཱ; པཱརཱ. ཨཊྛ. ༡.པཋམསངྒཱིཏིཀཐཱ; ཁུ. པཱ. ཨཊྛ. ༥.པཋམམཧཱསངྒཱིཏིཀཐཱ) སངྒཱིཏིཀཱརཀེཧི མཧཱཀསྶཔཱདཱིཧི ཨབྷིཏྠུཏགུཎསྶ ཝིནཡཔིཊཀུཏྟམསྶ. ཝིནིཙྪཡནྟི ཝིསེསེན, ཝིཝིདྷེན ཝཱ ཨཱཀཱརེན ཝིཔྤཊིཔཏྟིནཱིཧརཎཝསེན ཙཱིཡཏི ཝིབྷཛཱིཡཏཱིཏི ‘‘ཝིནིཙྪཡོ’’ཏི ལདྡྷནཱམཾ ཝིབྷཛནཾ, ཝིནཡཝིནིཙྪཡཾ ནཱམ པཀརཎནྟི ཝུཏྟཾ ཧོཏི. ‘‘ཝིནཡསྶཝིནིཙྪཡ’’ནྟི ཙ ཨལུཏྟསམཱསོཡཾ ‘‘དེཝཱནཾཔིཡཏིསྶོ, ཀཎྛེཀཱལོ༹’’ཏིཨཱདཱིསུ ཝིཡ.

ཨེཝཾ དུཏིཡགཱཐཱཡ ཀཏྟུནིམིཏྟཔཡོཛནཱབྷིདྷཱནཱབྷིདྷེཡྻཔཀརཎཔྤཀཱརེཀདེསཾ དསྶེཏྭཱ སཀྐཙྩསཝནཀཱརཎནིདསྶནམུཁེནཱཔི པཀརཎཔྤཀཱརཱདིཾ དསྶེཏུམཱཧ ‘‘ཨནཱཀུལ’’མིཙྩཱདི. ཏཏྠ ཨནཱཀུལནྟི ནཏྠི ཨེཏྠ སདྡཏོ, ཨཏྠཏོ, ཝིནིཙྪཡཏོ ཝཱ ཨཱཀུལཾ པུབྦཱཔརཝིརོདྷོ, མིསྶཏཱ ¶ ཝཱཏི ཨནཱཀུལོ, ཝིནཡཝིནིཙྪཡོ, ཏཾ ཝདཏོ མེ ནིབོདྷཐཱཏི སམྦནྡྷོ. ཨསཾཀིཎྞནྟི ནིཀཱཡནྟརལདྡྷཱིཧི ཨསམྨིསྶཾ.

མདྷུརཏྠཔདཀྐམནྟི པདཱནཾ ཀམོ པདཀྐམོ, པདགཏི, སདྡཱནམུཙྩཱརཎནྟི ཨཏྠོ. མདྷུརོ ཨཏྠོ ཙ པདཀྐམོ ཙ ཡསྶ སོ མདྷུརཏྠཔདཀྐམོ, ཏཾ –

‘‘པདཱསཏྟཾ ¶ པདཏྠཱནཾ, མདྷུརཏྠམུདཱིརིཏཾ;

ཡེན མཛྫནྟི དྷཱིམནྟོ, མདྷུནེཝ མདྷུབྦཏཱ’’ཏི. –

ཨིམིནཱ ལཀྑཎེན སདྡཱནམཏྠཱནཉྩ ཝསེན པདཱསཏྟཱཔརནཱམདྷེཡྻམཱདྷུརིཡཱལངྐཱརེན སམལངྐཏཏྟཱ མདྷུརཏྠཔདཀྐམཾ.

པཊུབྷཱཝཀརནྟི པཊཏི གཙྪཏི པཛཱནཱཏཱིཏི པཊུ, པཉྙཝཱ, པཊུནོ བྷཱཝོ, སདྡཔྤཝཏྟིནིམིཏྟབྷཱུཏཱ པཉྙཱ, ཏཾ པཊུབྷཱཝཾ པཉྙཱཝིསེསཾ ཀརོཏི ཛནེཏཱིཏི པཊུབྷཱཝཀརོ, ཏཾ, པཉྙཱཝིསེསཛནཀནྟི ཨཏྠོ. ཨེཏཾ ཝིནཡསྶ ཝིནིཙྪཡནྟི ཡོཛནཱ. པརམནྟི ཨུཏྟམཾ. ཝིནཡཀྐམེཏི ཝིནཡཔིཊཀེ, ཏདཏྠེ ཙ, པཝཏྟིཀྐམེ པཊུབྷཱཝཀརནྟི ཨཏྠོ.

ཨེཝཾ ཏཏིཡགཱཐཱཡ པཀརཎགུཎཱཔདེསེན སོཏུཛནཾ སམུསྶཱཧེཏྭཱ ཨིདཱནི ‘‘ཨཔཱར’’ནྟིཨཱདིཙཏུཏྠགཱཐཱཡ པཀརཎཉྩ ཏནྣིསྶཡཾ ཝིནཡཔིཊཀཉྩ ནཱཝཱསཱགརབྷཱཝེན དསྶེཏྭཱ ཏིརོབྷཱུཏོཔམེཡྻོཔམཱནབྷེདེན རཱུཔཀཱལངྐཱརེན པཀརཎགུཎཾ པཀཱསེནྟོ སོཏུཛནཾ སམུཏྟེཛེཏི. ཏཏྠ ཨཔཱརནྟི ནཏྠི པཱརཾ ཨེཏསྶཱཏི ཨཔཱརོ, ཝིནཡསཱགརོ. སོ ཧི པུརིམབུདྡྷུཔྤཱདེསུ སཱསནཾ པསཱིདིཏྭཱ ཝིནཡཔིཊཀེ ཨུགྒཧཎདྷཱརཎཔཊིཔཱདནཔཊིཔཏྟིཝསེན ཨཀཏཱདྷིཀཱརེཧི པུགྒལེཧི དུརདྷིགམནཱིཡདྷམྨཏྠནིརུཏྟིཔཊིབྷཱནཔརིཡནྟཏཱཡ ‘‘ཨཔཱརོ’’ཏི ཝུཙྩཏི.

ཨོཏརནྟཱནནྟི ¶ སཛ྄ཛྷཱཡནསཝནདྷཱརཎཱདིཝསེན ཨཛ྄ཛྷོགཱཧནྟཱནཾ. སཱརནྟི ནིབྦཱནསམྤཱཔཀབྷཱཝེན སཱརབྷཱུཏཱཡ ཨརིཡམགྒསམྦྷཱརཱཡ པུབྦབྷཱགཔཊིཔཏྟིཡཱ མཱུལབྷཱུཏཔཱཏིམོཀྑསཾཝརསངྑཱཏསཱིལསཱརཔྤཀཱསཀཏཱཡ སཱརཾ. ཝིནཡསཱགརནྟི ཝིནཡཔིཊཀསངྑཱཏཾ སཱགརཾ. ཝིནཡོ ཧི སིཀྑཱཔདཔཉྙཏྟིཡཱ ཀཱལཔྤཏྟཛཱནནསྶཱཔི དྷམྨསེནཱཔཏིཨཱདཱིནམྤི ཨཝིསཡཏྟཱ ཨཏིགམྦྷཱིརཱཏིཝིཏྠིཎྞབྷཱཝེན སཱགརོ ཝིཡཱཏི སཱགརོ, ཝིནཡོ ཙ སོ སཱགརོ ཙཱཏི ཝིནཡསཱགརོ, ཏཾ, ཨགཱདྷཱཔཱརགུཎཡོགཏོ སཱགརོཔམཾ ཝིནཡཔིཊཀནྟི ཨཏྠོ.

དུཏིཡགཱཐཱཡ ‘‘བྷིཀྑཱུནཾ བྷིཀྑུནཱིན’’ནྟི ཝཏྭཱཔི ‘‘ཧིཏཏྠཱཡཱ’’ཏི ཨིམིནཱ སམྦནྡྷཏྟཱ ཙ ཝཱཀྱནྟརེཧི ཨནྟརིཏབྷཱཝེན དཱུརཏྟཱ ཙ ཏཾ ཨནཱདིཡིཏྭཱ ཨེཏྠ ཝིནཡསཱགརཛ྄ཛྷོགཱཧནཏདཏྠཔཊིཔཛྫནཱརཧཀཏྟུཝིསེསསནྡསྶནཏྠཱཡ ¶ ‘‘བྷིཀྑཱུནཾ བྷིཀྑུནཱིན’’ནྟི པུན ཝུཏྟནྟི དཊྛབྦཾ. ནཱཝཱ ཝིཡ བྷཱུཏོ ནཱཝཱབྷཱུཏོ, ཏཾ, ནཱཝཱཊྛཱནིཡཾ མཧཱནཱཝཱསདིསནྟི ཨཏྠོ. མནོརམནྟི མནོ རམཏི ཨེཏྠ, ཨེཏེནཱཏི ཝཱ མནོརམོ, ཏཾ, ཨཛ྄ཛྷཱཡནཝོཧཱརཔསུཏཱནཾ པཊིཔཏྟིཔརཱཡནཱནཉྩ སཱདྷཱུནཾ མནོརམནྟི ཨཏྠོ.

ཨེཏྟཱཝཏཱ པཀརཎགུཎསཾཀིཏྟནེན སོཏུཛནཾ སམུཏྟེཛེཏྭཱ ཨིདཱནི སཀྐཙྩསཝནེ ནིཡོཛེནྟོ ‘‘ཏསྨཱ ཝིནཡནཱུཔཱཡ’’ནྟིཨཱདིམཱཧ. ཏཏྠ ཏསྨཱཏི ཡསྨཱ ཡཐཱཝུཏྟཾ ཨནཱཀུལཏཱདིཝིཝིདྷཱནགྒྷགུཎཱལངྐཱརཔཊིམཎྜིཏཾ, ཏེན ཧེཏུནཱཏི ཨཏྠོ. ཝིནཡནཱུཔཱཡནྟི ཝིཝིདྷཱཀཱརེན, ཝིསེསནཡཏོ ཝཱ ཀཱཡཝཱཙཱནཾ ནཡནཾ དམནཾ ཨཀཏྟབྦཏོ ནིཝཏྟེཏྭཱ ཀཏྟབྦེསུ ནིཡོཛནཾ ཝིནཡནཾ, ཨུཔེཙྩ ཏཾ ཕལཾ ཨཱཡཏི ཨུཔྤཛྫཏཱིཏི ཨུཔཱཡོ, ཧེཏུ, ཝིནཡནསྶ ཨུཔཱཡོ ཝིནཡནཱུཔཱཡོ, ཏཾ, ཀཱཡཛཱིཝིཏཱནཔེཀྑཱནཾ སིཀྑཱཀཱམཱནཾ པེསལཱནཾ བྷིཀྑཱུནཾ བྷིཀྑུནཱིནཾ ཀཱཡཝཱཙཱནཾ ཨནནུལོམིཀཝིཔྥནྡིཏཱཔནཡནསངྑཱཏདམནསྶ ¶ ཀཱརཎབྷཱུཏནྟི ཝུཏྟཾ ཧོཏི.

ཨེཏྟཱཝཏཱ ཨཏྟནཱ ཀཏྟུམིཙྪིཏེ པཀརཎེ པཎྜིཏཱནཾ པཝཏྟིཧེཏུབྷཱུཏཱནཾ ཨནཱཀུལཏཱདིགུཎཱནཾ ཝིབྷཱཝནཝསེན ‘‘ཨནཱཀུལ’’ནྟིཨཱདིཝིསེསནཱནི ཝཏྭཱ ཨིདཱནི སཀྐཙྩསཝནཱཝབོདྷེ ཝིསཡཾ ཝིསེསིཏབྦཾ དསྶེཏུམཱཧ ‘‘ཝིནཡསྶཝིནིཙྪཡ’’ནྟི. ཨེཏྠ ཙ དུཏིཡགཱཐཱཡ ‘‘ཝིནཡསྶཝིནིཙྪཡ’’ནྟི ‘‘པཝཀྑཱམཱི’’ཏི ཀིརིཡཱཡ ཀམྨདསྶནཝསེན ཝུཏྟཾ, ཏཾ ཨིདྷ ཨཱནེཏྭཱ སམྦནྡྷིཡམཱནམྤི དཱུརསམྦནྡྷཾ ཧོཏཱིཏི ཏམནཱནེཏྭཱ ‘‘ནིབོདྷཐཱ’’ཏི ཨིམིསྶཱ ཀིརིཡཱཡ ཀམྨསནྡསྶནཏྠཾ ‘‘ཝིནཡསྶཝིནིཙྪཡ’’ནྟི ཝུཏྟཏྟཱ པུནརུཏྟིདོསཱབྷཱཝོཏི དཊྛབྦཾ.

ཨཝིཀྑིཏྟེན ཙིཏྟེནཱཏི ཨེཏྠ ཝིཝིདྷེ ཨཱརམྨཎེ ཁིཏྟཾ པེསིཏཾ ཝིཀྑིཏྟཾ, ཨུདྡྷཙྩཝིཙིཀིཙྪཱདིཔརེཏཾ ཨསམཱཧིཏཾ ཙིཏྟཾ, ན ཝིཀྑིཏྟཾ ཨཝིཀྑིཏྟཾ, ཏཔྤཊིཔཀྑཾ སམཱཧིཏཾ ཀུསལཙིཏྟཾ, ཏེན, ཨེཏསྶ པཀརཎུཏྟམསྶ སཝནཱདིབྱཱཔཱརཾ ཝིནཱ ནཱནཱརམྨཎེསུ པཝཏྟིཝསེན ཝིཀྑེཔམནཱཔནྣེན སམཱཧིཏེན ཙིཏྟེནཱཏི ཨཏྠོ. ‘‘ཨཝིཀྑིཏྟེན…པེ… ནིབོདྷཐཱ’’ཏི ཝདནྟེན ཙ ‘‘ཨཝིཀྑིཏྟསྶཱཡཾ དྷམྨོ, ནཱཡཾ དྷམྨོ ཝིཀྑིཏྟསྶཱ’’ཏི ཝཙནཏོ ཝིཀྑིཏྟསྶ དྷམྨེསུ དཱཡཱདཱབྷཱཝཏོ ཨཏྟནོ པཀརཎཏྠབྷཱུཏཱཡ ཨདྷིསཱིལསིཀྑཱཡ སམྨཱཔཊིཔཛྫནཱཔདེསོ ཀཏོ ཧོཏི.

ཝདཏོ ¶ མེཏི ཨེཏྠ ‘‘གཱརཝེན ཙཱ’’ཏི པཱཋསེསོ. ཏཏྠཱཡམཏྠོ – བྷཱསམཱནེ མཡི གཱརཝེན, ཡཐཱཝུཏྟེན ཀཱརཎེན ཙཱཏི སཱམིབྷུམྨཱནམཝིསེསཏཱཡ ‘‘མེ’’ཏི སཱམིཝཙནསྶ ‘‘མཡཱི’’ཏི ཨཏྠསམྦྷཝཏོ ཨཡམཏྠོ ཝུཏྟོ. པཀརཎསྶ ཨནཱཀུལཏཱདིགུཎསམནྣཱགཏཏྟཱ ཙ ཝཏྟརི མཡི གཱརཝེན ཙ སམཱཧིཏེན ཙེཏསཱཏི ཨདྷིཔྤཱཡོ. ནིབོདྷཐཱཏི ཝཱཀྱཏྠཔདཏྠཾ སནྡྷཱཡབྷཱསིཏཏྠབྷཱཝཏྠཱདིཝསེན ¶ ནིསེསཏོ བོདྷཐ, སཀྐཙྩཾ སུཏྭཱ ཝིནཡཝིནིཙྪཡཾ བུཛ྄ཛྷཐ ཝིཛཱནཱཐཱཏི ཨཏྠོ, ཙིནྟཱབྷཱཝནཱམཡཉཱཎཱནཾ མཱུལབྷཱུཏཔཀརཎཝིསཡཾ སུཏམཡཉཱཎཾ ནིཔྥཱདེཐཱཏི ཨདྷིཔྤཱཡོ.

གནྠཱརམྦྷཀཐཱཝཎྞནཱ ནིཊྛིཏཱ.

བྷིཀྑུཝིབྷངྒོ

པཱརཱཛིཀཀཐཱ

པཋམཔཱརཱཛིཀཀཐཱཝཎྞནཱ

༦. ཨེཝཾ ¶ པཉྩཧི གཱཐཱཧི རཏནཏྟཡཔཎཱམཱདིཾ དསྶེཏྭཱ ཨིདཱནི ཡཐཱཔཊིཉྙཱཏཝིནིཙྪཡཾ དསྶེཏུམཱཧ ‘‘ཏིཝིདྷེ’’ཏིཨཱདི. ཏཏྠ ‘‘ཏིཝིདྷེ’’ཏིཨཱདིནཱ པཋམཔཱརཱཛིཀསིཀྑཱཔདཝིནིཙྪཡཾ དསྶེཏི. ཏིཝིདྷེཏི ཝཙྩཔསྶཱཝམུཁམགྒཱནཾ ཝསེན ཏིཔྤཀཱརེ མགྒེཏི ཨིམིནཱ སམྦནྡྷོ. ཏིལམཏྟམྤཱིཏི ཏིལབཱིཛམཏྟམྤི ཨངྒཛཱཏནྟི སམྦནྡྷོ. མགྒེཏི ཝཙྩཔསྶཱཝཱནཾ ནིཀྑམནདྭཱརཏཱཡ, ཨནྣཔཱནཔིཏྟསེམྷཱདཱིནཾ པཝེསནནིཀྑམནདྭཱརཏཱཡ ཙ མགྒཝོཧཱརགཏེ སརཱིརཔྤདེསེ, ཨལློཀཱསེཏི སམྦནྡྷོ. ‘‘མགྒེསུ ཏིལམཏྟམྤི, ཏཱིསུ སེཝནཙེཏནོ’’ཏི ཝཏྟབྦེཔི ‘‘ཏིཝིདྷེ’’ཏི པཀཱརཝཱཙིཝིདྷསདྡོཔཱདཱནེན སཛཱཏིསངྒཧཝསེན ཏཱིཧི རཱསཱིཧི སངྒཧེཏྭཱ པབྷེདཝསེན ཏིཾསཝིདྷོ མགྒོ དསྶིཏོ ཧོཏི.

སེཡྻཐིདཾ? པཱརཱཛིཀཝཏྠུབྷཱུཏམུཁཱདིམགྒཱནཾ ནིསྶཡབྷཱུཏེ སཏྟེ དསྶེཏུཾ ‘‘ཏིསྶོ ཨིཏྠིཡོ མནུསྶིཏྠཱི ¶ ཨམནུསྶིཏྠཱི ཏིརཙྪཱནགཏིཏྠཱི’’ཏིཨཱདིནཱ (པཱརཱ. ༥༦) ནཡེན པཱལི༹ཡཾ དསྶིཏམནུསྶཱམནུསྶཏིརཙྪཱནགཏིཏྠཱིནཾ པཙྩེཀཾ ཏིཎྞཾ མགྒཱནཾ ཝསེན ནཝ མགྒཱ, ཏཐེཝ དསྶིཏཱནཾ ཏིཎྞཾ ཨུབྷཏོབྱཉྫནཀཱནཾ ཝསེན ནཝ མགྒཱ, ཏིཎྞཾ པན པཎྜཀཱནཾ མུཁམགྒཝཙྩམགྒཱནཾ ཝསེན པཙྩེཀཾ དྭེ དྭེ མགྒཱཏི ཚ མགྒཱ, ཏཐཱ ཏིཎྞཾ པན པུརིསཱནནྟི ཨེཝཾ ཏིཾསཝིདྷོ ཧོཏི.

སེཝནཙེཏནོཏི སེཝནེ མེཐུནཔཡོགེ ཙེཏནཱ ཨསྶཱཏི ཝིགྒཧོ, མེཐུནརཱགཱུཔསཾཧིཏཱཡ ཙེཏནཱཡ སམནྣཱགཏོཏི ¶ ཨཏྠོ. ཨལློཀཱསེཏི ཏིཾསམགྒཱནམཉྙཏརེ མགྒེ པཀཏིཝཱཏེན ཨསཾཕུཊྛེ ཨལླཔདེསེ, ཨིམིནཱ བཱཧིརཾ པཱརཱཛིཀཀྑེཏྟཾ ན ཧོཏཱིཏི དཱིཔེཏི. ཝིསེསནསྶ ཝིསེསཱཔེཀྑཏྟཱ དུཏིཡགཱཐཱཡ ‘‘སསིཀྑོ སོ’’ཏི པདདྭཡཾ ཨཱཧརིཏྭཱ ‘‘སེཝནཙེཏནོ སསིཀྑོ སོ བྷིཀྑཱུ’’ཏི ཡོཛེཏབྦཾ.

ཨངྒེ སརཱིརེ ཛཱཏནྟི ཨངྒཛཱཏཾ, པུརིསནིམིཏྟཾ. སཏིཔི ཨཝསེསསརཱིརཱཝཡཝཱནཾ ཏཐཱབྷཱཝེ རུལ༹ྷིཝསེན ཏདེཝ ཏཐཱ ཝུཏྟཾ. པཝེསེནྟོཏི དྭཡཾདྭཡསམཱཔཏྟིསངྑཱཏཀཱཡིཀཀིརིཡཾ ནིཔྥཱདེནྟོ. པརཱཛིཏོཏི དུལླབྷཱཡ ཁཎསམྤཏྟིཡཱ ལདྡྷབྦཏོ དུལླབྷཱ ལོཀིཡལོཀུཏྟརགུཎསམྤཏྟིསུཁཏོ པརིཧཱཔེཏྭཱ ཀིལེསསཔཏྟེཧི པརཱཛཡམཱཔཱདིཏོཏི ཨཏྠོ.

ཨཡམེཏྠ ཡོཛནཱ – སསིཀྑོ སེཝནཙེཏནོ ཏིཝིདྷེ མགྒེ ཨལློཀཱསེ ཨངྒཛཱཏཾ ཏིལམཏྟམྤི པཝེསེནྟོ སོ བྷིཀྑུ པརཱཛིཏོ ཧོཏཱིཏི. ཨེཏྟཱཝཏཱ –

‘‘ཡོ པན བྷིཀྑུ བྷིཀྑཱུནཾ སིཀྑཱསཱཛཱིཝསམཱཔནྣོ སིཀྑཾ ཨཔཙྩཀྑཱཡ དུབྦལྱཾ ཨནཱཝིཀཏྭཱ མེཐུནཾ དྷམྨཾ པཊིསེཝེཡྻ, ཨནྟམསོ ཏིརཙྪཱནགཏཱཡཔི, པཱརཱཛིཀོ ཧོཏི ཨསཾཝཱསོ’’ཏི (པཱརཱ. ༤༤) –

བྷགཝཏཱ པཉྙཏྟསིཀྑཱཔདཾ སངྒཧིཏནྟི དཊྛབྦཾ.

༧. ཨེཝཾ ཨིམིསྶཱ གཱཐཱཡ ཨཏྟཱུཔཀྐམམཱུལཀཾ པཱརཱཛིཀཾ དསྶེཏྭཱ ཨིདཱནི ‘‘བྷིཀྑུཔཙྩཏྠིཀཱ མནུསྶིཏྠིཾ བྷིཀྑུསྶ སནྟིཀེ ཨཱནེཏྭཱ ཝཙྩམགྒེན (པཱརཱ. ༥༨) ཨངྒཛཱཏེ ¶ ཨབྷིནིསཱིདེནྟཱི’’ཏིཨཱདིནཡཔྤཝཏྟཾ པརོཔཀྐམམཱུལཀཾ པཱརཱཛིཀཉྩ དསྶེཏུམཱཧ ‘‘པཝེསན’’ནྟིཨཱདི. ཏཏྠ པཝེསནནྟི བྷིཀྑུཔཙྩཏྠིཀེཧི སུཏྟཔམཏྟཱདིམནུསྶིཏྠིཨཱདཱིནམཉྙཏརཾ ཨཱནེཏྭཱ ཡཐཱཝུཏྟམགྒཱནམཉྙཏརཾ ¶ མགྒཾ ཡཐཱ པཝིསཏི, ཏཐཱ བྷིཀྑུནོ ཨངྒཛཱཏེ ཨབྷིནིསཱིདཱཔནེ སམྦྷཝནྟཾ མགྒཔྤཝེསནམཱཧ. པཝེསནཾ སཱདིཡནྟོ སསིཀྑོ སོཏི ཡོཛནཱ. ཨེཏྠ ‘‘པཝེསནཾ སཱདིཡཏི ཨདྷིཝཱསེཏི, ཏསྨིཾ ཁཎེ སེཝནཙིཏྟཾ ཨུཔཊྛཱཔེཏཱི’’ཏི (པཱརཱ. ཨཊྛ. ༡.༥༨) ཨཊྛཀཐཱཝཙནཏོ ཨགྒཏོ ཡཱཝ མཱུལཾ པཝེསེནྟེསུ ཨསྶཱདཙིཏྟཾ ཨུཔཊྛཱཔེནྟོ ཏངྑཎེཡེཝ སཱསནཏོ ཙུཏོཏི ཨཏྠོ. པཝིཊྛནྟིཨཱདཱིསུ པདེསུཔི ཨེཝམེཝ ཡོཛནཱ.

པཝིཊྛནྟི པཝིཊྛཀྑཎོ. ‘‘པཝིཊྛ’’ནྟིཨཱདིནཱ ཏཱཡ ཏཱཡ ཀིརིཡཱཡ ཨུཔལཀྑིཏོ ཁཎོ གཧེཏབྦོ. ཏེནེཝེཏྠ ཨཙྩནྟསཾཡོགེ ཨུཔཡོགཝཙནཾ ཀཏཾ. ཋིཏནྟི ཨེཏྠ ‘‘སུཀྐཝིསྶཊྛིསམཡེ’’ཏི ཨཊྛཀཐཱཝཙནསྶ སབྦཐཱ བྱཱཔཱརརཧིཏཾ ཀཱལཾ སནྡྷཱཡ ཝུཏྟཏྟཱ སུཀྐཝིསྶཊྛིསམཡོཔི གཧེཏབྦོ. ཏེནེཝ གཎྛིཔདེ ཝུཏྟནཡེན པཝིཊྛསྶ ཙ ཡཱཝ ཨུདྡྷརཎཱརམྦྷོ, ཏཱཝ སམྦྷཝནྟོ ཋིཏཀཱལོཔི གཧེཏབྦོ. ཨུདྡྷརཎནྟི ནཱིཧརཎཀཱལོ.

ཝཱཏི ཝིཀཔྤེ, ཨཔཱིཏི སམུཙྩཡེ, སོ ཝཱ-སདྡེན ཝིཀཔྤིཏཱནཾ པཀྑཱནཾ ཏུལྱབལཏཾ ཛོཏེཏི. ཨིཏི ཨིམེཧི དྭཱིཧིཔི ‘‘སོ ཙེ པཝེསནཾ སཱདིཡཏི, པཝིཊྛཾ སཱདིཡཏཱི’’ཏིཨཱདིནཱ (པཱརཱ. ༥༨) པཱལི༹ཡཾ ཨཱགཏནཡེན ལབྦྷམཱནཾ པཝེསནཱདིཨེཀཀྑཎམྤི སཱདིཡནཔཙྩཡཱ ཨཱཔཛྫམཱནཾ པཱརཱཛིཀཾ དསྶེཏི. སསིཀྑོཏི སིཀྑཱཡ སཧ ཝཏྟཏཱིཏི སསིཀྑོ, ཨཔཙྩཀྑཱཏསིཀྑོཏི ཨཏྠོ. སཱདིཡནྟོཏི སེཝནཙིཏྟཾ ཨུཔཊྛཱཔེནྟོ. སོ བྷིཀྑུ. ཋཔེཏྭཱ ཀིརིཡནྟི ཨཏྟཱུཔཀྐམནཾ ཝིནཱ. ཙུཏོཏི ‘‘བྷིཀྑུཔཙྩཏྠིཀེཧི ཀཏམིདཾ, ན མཡཱ’’ཏི ལེསེན ན མུཙྩཏི, སཱདིཡནཙིཏྟེ སཏི སཱསནཏོ ཙུཏོཡེཝ ཧོཏཱིཏི ཨདྷིཔྤཱཡོ.

ཨེཏྠ ¶ ཙ སསིཀྑོཏི ཨིདཾ ‘‘སིཀྑཾ ཨཔཙྩཀྑཱཡ དུབྦལྱཾ ཨནཱཝིཀཏྭཱ’’ཏི (པཱརཱ. ༤༤) སིཀྑཱཔདཔཱཋསྶ ཨཏྠདསྶནཝསེན ནིདྡིཊྛཾ. ཏསྶ པདབྷཱཛནེ (པཱརཱ. ༤༥), ཏདཊྛཀཐཱཡ ཙ ཝིབྷཏྟཾ སིཀྑཱཔཙྩཀྑཱནཾ སངྑེཔཏོ ཨེཝཾ ཝེདིཏབྦཾ – ཙིཏྟཁེཏྟཀཱལཔཡོགཔུགྒལཝིཛཱནནཝསེན སིཀྑཱཔཙྩཀྑཱནཾ ཧོཏི, ན ཏདབྷཱཝེན. ཨུཔསམྤནྣབྷཱཝཏོ ཙཝིཏུཀཱམཏཱཙིཏྟེནེཝ ཧི སིཀྑཱཔཙྩཀྑཱནཾ ཧོཏི, ན དཝཱ ཝཱ རཝཱ ཝཱ ཝདནྟསྶ. ཨེཝཾ ཙིཏྟཝསེན སིཀྑཱཔཙྩཀྑཱནཾ ཧོཏི, ན ཏདབྷཱཝེན.

ཏཐཱ ¶ ‘‘བུདྡྷཾ པཙྩཀྑཱམི, དྷམྨཾ པཙྩཀྑཱམི, སངྒྷཾ པཙྩཀྑཱམི, སིཀྑཾ, ཝིནཡཾ, པཱཏིམོཀྑཾ, ཨུདྡེསཾ, ཨུཔཛ྄ཛྷཱཡཾ, ཨཱཙརིཡཾ, སདྡྷིཝིཧཱརིཀཾ, ཨནྟེཝཱསིཀཾ, སམཱནུཔཛ྄ཛྷཱཡཀཾ, སམཱནཱཙརིཡཀཾ, སབྲཧྨཙཱརིཾ པཙྩཀྑཱམཱི’’ཏི ཨེཝཾ ཝུཏྟཱནཾ བུདྡྷཱདཱིནཾ ཙཏུདྡསནྣཾ, ‘‘གིཧཱིཏི མཾ དྷཱརེཧི, ཨུཔཱསཀོ, ཨཱརཱམིཀོ, སཱམཎེརོ, ཏིཏྠིཡོ, ཏིཏྠིཡསཱཝཀོ, ཨསྶམཎོ, ཨསཀྱཔུཏྟིཡོཏི མཾ དྷཱརེཧཱི’’ཏི ཨེཝཾ ཝུཏྟཱནཾ གིཧིཨཱདཱིནཾ ཨཊྛནྣཉྩཱཏི ཨིམེསཾ བཱཝཱིསཏིཡཱ ཁེཏྟཔདཱནཾ ཡསྶ ཀསྶཙི སཝེཝཙནསྶ ཝསེན ཏེསུ ཡཾ ཀིཉྩི ཝཏྟུཀཱམསྶ ཡཾ ཀིཉྩི ཝདཏོ སིཀྑཱཔཙྩཀྑཱནཾ ཧོཏི, ན རུཀྑཱདཱིནཾ ཨཉྙཏརསྶ ནཱམཾ གཧེཏྭཱ སིཀྑཾ པཙྩཀྑནྟསྶ. ཨེཝཾ ཁེཏྟཝསེན སིཀྑཱཔཙྩཀྑཱནཾ ཧོཏི, ན ཏདབྷཱཝེན.

ཏཏྠ ཡདེཏཾ ‘‘པཙྩཀྑཱམཱི’’ཏི ཙ ‘‘མཾ དྷཱརེཧཱི’’ཏི ཙཱཏི ཝུཏྟཾ ཝཏྟམཱནཀཱལཝཙནཾ, ཡཱནི ཙ ‘‘ཨལཾ མེ བུདྡྷེན, ཀིཾ ནུ མེ བུདྡྷེན, ན མམཏྠོ བུདྡྷེན, སུམུཏྟཱཧཾ བུདྡྷེནཱ’’ཏིཨཱདིནཱ ནཡེན ཨཱཁྱཱཏཝསེན ཀཱལཾ ཨནཱམསིཏྭཱ པུརིམེཧི ཙུདྡསཧི པདེཧི སདྡྷིཾ ཡོཛེཏྭཱ ཝུཏྟཱནི ‘‘ཨལཾ མེ’’ཏིཨཱདཱིནི ཙཏྟཱརི པདཱནི, ཏེསཾཡེཝ སཝེཝཙནཱནཾ ཝསེན པཙྩཀྑཱནཾ ཧོཏི, ན ‘‘པཙྩཀྑཱསི’’ནྟི ཝཱ ‘‘པཙྩཀྑིསྶ’’ནྟི ཝཱ ¶ ‘‘མཾ དྷཱརེསཱི’’ཏི ཝཱ ‘‘མཾ དྷཱརེསྶཏཱི’’ཏི ཝཱ ‘‘ཡཾ ནཱུནཱཧཾ པཙྩཀྑེཡྻ’’ནྟི ཝཱཏིཨཱདཱིནི ཨཏཱིཏཱནཱགཏཔརིཀཔྤཝཙནཱནི བྷཎནྟསྶ. ཨེཝཾ ཝཏྟམཱནཀཱལཝསེན ཙེཝ ཨནཱམཊྛཀཱལཝསེན ཙ པཙྩཀྑཱནཾ ཧོཏི, ན ཏདབྷཱཝེན.

པཡོགོ པན དུཝིདྷོ ཀཱཡིཀོ ཙ ཝཱཙསིཀོ ཙ. ཏཏྠ ‘‘བུདྡྷཾ པཙྩཀྑཱམཱི’’ཏིཨཱདིནཱ ནཡེན ཡཱཡ ཀཱཡཙི བྷཱསཱཡ ཝཙཱིབྷེདཾ ཀཏྭཱ ཝཱཙསིཀཔཡོགེནེཝ པཙྩཀྑཱནཾ ཧོཏི, ན ཨཀྑརལིཁནཾ ཝཱ ཧཏྠམུདྡཱདིདསྶནཾ ཝཱ ཀཱཡཔཡོགཾ ཀརོནྟསྶ. ཨེཝཾ ཝཱཙསིཀཔཡོགེནེཝ པཙྩཀྑཱནཾ ཧོཏི, ན ཏདབྷཱཝེན.

པུགྒལོ པན དུཝིདྷོ ཡོ ཙ པཙྩཀྑཱཏི, ཡསྶ ཙ པཙྩཀྑཱཏི. ཏཏྠ ཡོ པཙྩཀྑཱཏི, སོ སཙེ ཨུམྨཏྟཀཁིཏྟཙིཏྟཝེདནཊྚཱནཾ ཨཉྙཏརོ ན ཧོཏི. ཡསྶ པན པཙྩཀྑཱཏི, སོ སཙེ མནུསྶཛཱཏིཀོ ཧོཏི, ན ཙ ཨུམྨཏྟཀཱདཱིནཾ ཨཉྙཏརོ, སམྨུཁཱིབྷཱུཏོ ཙ སིཀྑཱཔཙྩཀྑཱནཾ ཧོཏི. ན ཧི ཨསམྨུཁཱིབྷཱུཏསྶ དཱུཏེན ཝཱ པཎྞེན ཝཱ ཨཱརོཙནཾ རུཧཏི. ཨེཝཾ ཡཐཱཝུཏྟསྶ པུགྒལསྶ ཝསེན པཙྩཀྑཱནཾ ཧོཏི, ན ཏདབྷཱཝེན.

ཝིཛཱནནམྤི ¶ ནིཡམིཏཱནིཡམིཏཝསེན དུཝིདྷཾ. ཏཏྠ ཡསྶ, ཡེསཾ ཝཱ ནིཡམེཏྭཱ ‘‘ཨིམསྶ, ཨིམེསཾ ཝཱ ཨཱརོཙེམཱི’’ཏི ཝདཏི. སཙེ ཏེ ཡཐཱ པཀཏིཡཱ ལོཀེ མནུསྶཱ ཝཙནཾ སུཏྭཱ ཨཱཝཛྫནསམཡེ ཛཱནནྟི, ཨེཝཾ ཏསྶ ཝཙནཱནནྟརམེཝ ཏསྶ ‘‘ཨཡཾ ཨུཀྐཎྛིཏོ’’ཏི ཝཱ ‘‘གིཧིབྷཱཝཾ པཏྠཡཏཱི’’ཏི ཝཱ ཡེན ཀེནཙི ཨཱཀཱརེན སིཀྑཱཔཙྩཀྑཱནབྷཱཝཾ ཛཱནནྟི, པཙྩཀྑཱཏཱཝ ཧོཏི སིཀྑཱ. ཨཐ ཨཔརབྷཱགེ ‘‘ཀིཾ ཨིམིནཱ ཝུཏྟ’’ནྟི ཙིནྟེཏྭཱ ཛཱནནྟི, ཨཉྙེ ཝཱ ཛཱནནྟི, ཨཔཙྩཀྑཱཏཱཝ ཧོཏི སིཀྑཱ. ཨནིཡམེཏྭཱ ཨཱརོཙེནྟསྶ པན སཙེ ཝུཏྟནཡེན ཡོ ཀོཙི མནུསྶཛཱཏིཀོ ཝཙནཏྠཾ ཛཱནཱཏི, པཙྩཀྑཱཏཱཝ ཧོཏི སིཀྑཱ. ཨེཝཾ ཝིཛཱནནཝསེན པཙྩཀྑཱནཾ ¶ ཧོཏི, ན ཏདབྷཱཝེན. ཡོ པན ཨནྟམསོ དཝཱཡཔི པཙྩཀྑཱཏི, ཏེན ཨཔཙྩཀྑཱཏཱཝ ཧོཏི སིཀྑཱ.

ཨིཏི ཨིམེསཾ ཝུཏྟཔྤཀཱརཱནཾ ཙིཏྟཱདཱིནཾ ཝསེན ཨཔཙྩཀྑཱཏསིཀྑོ ‘‘སསིཀྑོ’’ཏི ཝུཏྟོ.

༨-༡༠. ‘‘ཨིདཱནི སནྠཏེན སནྠཏསྶ གྷཊྚནེ ཨུཔཱདིནྣཀགྷཊྚནཱབྷཱཝཏོ དོསོ ནཏྠཱི’’ཏི པཱཔབྷིཀྑཱུནཾ ལེསཀཔྤནཾ པཊིཀྑིཔིཏུཾ ‘‘བྷིཀྑུཔཙྩཏྠིཀཱ མནུསྶིཏྠིཾ བྷིཀྑུསྶ སནྟིཀེ ཨཱནེཏྭཱ ཝཙྩམགྒེན, པསྶཱཝམགྒེན, མུཁེན ཨངྒཛཱཏཾ ཨབྷིནིསཱིདེནྟི སནྠཏཱཡ ཨསནྠཏསྶཱ’’ཏིཨཱདིནཱ (པཱརཱ. ༦༡) ནཡེན པཱལི༹ཡཾ ཝུཏྟསནྠཏཝཱརཱནམཏྠཾ སངྒཎྷནྟོ ཨཱཧ ‘‘སནྠཏེནཱ’’ཏིཨཱདི. ཏཏྠ སནྠཏེནཱཏི ཙམྨཙོལ༹ཏིཔུཔཊྚཱདཱིཧི པཊིཙྪཱདིཏེན. ‘‘པཝེསེནྟོ’’ཏི ཨིམིནཱ སནྠཏཝཱརསྶ པརོཔཀྐམཾ ནིསྶཱཡ དསྶནམུཔལཀྑཎནྟི ཨཏྟཱུཔཀྐམེཔི ཡོཛེཏབྦཏཾ དསྶེཏི, ཏསྶ ཝཀྑམཱནེན ‘‘པརཱཛིཏོ’’ཏི ཨིམིནཱ སམྦནྡྷོ. ‘‘ཏཐེཝཱ’’ཏི ཨིམིནཱ པཝེསེནྟོཏིཨཱདིཔྤཀཱརཾ པརཱམསཏི.

ཨེཝཾ པཝེསེནྟོ ཀདཱ པརཱཛིཏོ ཧོཏཱིཏི ཨཱཧ ‘‘ཨུཔཱདིནྣེནཱ’’ཏིཨཱདི. ཨེཏྠ ཨུཔཱདིནྣེནཱཏི ཏཎྷཱདིཊྛཱིཧི ཨུཔེཏེན ཀམྨུནཱ ཨཏྟནོ ཕལབྷཱཝེནེཝ ཨཱདིནྣཾ གཧིཏནྟི ཨུཔཱདིནྣཾ, ཨེཏེན ཨཏྟནོ ཨངྒཛཱཏསྶ, ཝཏྠུཔུགྒལཱནཾ མགྒསྶ ཙ གྷཊྚནཊྛཱནགཏཾ ཀཱཡཔྤསཱདཾ དསྶེཏི. ཨིམིནཱཝ ཨངྒཛཱཏགཏཾ ཨནཊྛཀཱཡཔྤསཱདཾ ཙམྨཁིལཾ, པིལ༹ཀཱདི ཙ གཧེཏབྦཾ. ‘‘ཨུཔཱདིནྣཀཾ ནཱམ ཀཱཡིནྡྲིཡ’’ནྟི གཎྛིཔདེ ཝུཏྟཾ. ཏབྦིཔརིཡཱཡེན ‘‘ཨནུཔཱདིནྣཀ’’ནྟི ཏཔྤཊིཙྪཱདཀཾ ཙོལཱ༹དི ཝུཏྟཾ. ཨུཔཱདིནྣེན ཨུཔཱདིནྣེ, ཨནུཔཱདིནྣེ ཝཱ པཱརཱཛིཀཀྑེཏྟེ གྷཊྚིཏེ, ཨནུཔཱདིནྣཀེན ¶ ཝཱ ཨུཔཱདིནྣེ ཨནུཔཱདིནྣེ ཝཱ པཱརཱཛིཀཀྑེཏྟེ ¶ གྷཊྚིཏེཏི ཡོཛནཱ. ཨེཏྠ ཙ ཀརཎཝཙནནྟཱནི པདཱནི ‘‘ཨངྒཛཱཏེནཱ’’ཏི ཨིམསྶ ཝིསེསནཱནི.

ཨེཏྟཱཝཏཱ སནྠཏཙཏུཀྐཝསེན ཨཏྟཱུཔཀྐམེ སཏི པཱརཱཛིཀཀྑེཏྟེ པཱརཱཛིཀཾ དསྶེཏྭཱ ཨིདཱནི པརཱུཔཀྐམེཔི དསྶེཏུམཱཧ ‘‘སཙེ’’ཏིཨཱདི. ཨེཏྠཱཏི ཨེཏེསུ ཙཏཱུསུ ཝིཀཔྤེསུ. པཱརཱཛིཀཀྑེཏྟེ པཝིཊྛེ ཏཱུཏི ཨེཏྠ ཏུ-སདྡེན པཝེསནཊྛིཏུདྡྷཱརཀྑཎཏྟཡཾ སམུཙྩིནོཏི. ཡཾཏཾ-སདྡཱནཾ ནིཙྩསམྦནྡྷཏྟཱ ཧི ‘‘སོ’’ཏི ཏཾ-སདྡོཔཱདཱནེ ‘‘ཡོ’’ཏི ཡཾ-སདྡོཔི ཨཛ྄ཛྷཱཧརིཏབྦོ, སཱམཏྠིཡེན སམྤིཎྜནཏྠོ ཨཔིསདྡོ ཙ. ཨཡམེཏྠ ཨཏྠཡོཛནཱ – བྷིཀྑུཔཙྩཏྠིཀེཧི ཨཱནེཏྭཱ བྷིཀྑུནོ ཨངྒཛཱཏེ ཨབྷིནིསཱིདཱཔིཏམནུསྶིཏྠིཨཱདཱིནཾ ཏཱིསུ མགྒེསུ ཨཉྙཏརམགྒསངྑཱཏཾ པཱརཱཛིཀཀྑེཏྟཾ པཝིཊྛེ ཝཱ ཏུ-སདྡེན སམྤིཎྜིཏཔཝེསནཊྛིཏུདྡྷཱརཱནམཉྙཏརཀྑཎེ ཝཱ སཙེ ཡོ སཱདིཡཏི, སཔྤམུཁཱདིཔྤཝེསནཀཱལེ ཝིཡ ཨནུཏྟསིཏྭཱ ཀཱམརཱགཔིཔཱསཱབྷིབྷཱུཏོ ཡདི སཱདིཡཏི, སོཔི བྷིཀྑུ པརཱཛིཏོ ཧོཏཱིཏི ཡོཛནཱ. ‘‘སཙེ སཱདིཡཏཱི’’ཏི ཨིམིནཱ སཱསངྐཝཙནེན ན སཱདིཡཏི, ཨནཱཔཏྟཱིཏི སཱུཙིཏཾ ཧོཏི.

‘‘པཱརཱཛིཀཀྑེཏྟེ’’ཏི ཨིམིནཱ བྱཝཙྪིནྣེ ཨཉྙསྨིཾ ཋཱནེ ཝཱིཏིཀྐམནྟསྶ ཨིམསྨིཾཡེཝ ཝིཀཔྤེ སམྦྷཝནྟིཡོ ཨིཏརཱཔཏྟིཡོ དསྶེཏུམཱཧ ‘‘ཁེཏྟེ’’ཏིཨཱདི. ‘‘ཨེཏྠཱ’’ཏི ཨཱནེཏྭཱ སམྦནྡྷནཱིཡཾ. ‘‘ཁེཏྟེ’’ཏི སཱམཉྙནིདྡེསེཔི ཧེཊྛཱ ‘‘པཱརཱཛིཀཀྑེཏྟེ’’ཏི ཝིསེསིཏཏྟཱ, ཨུཔརིཐུལླཙྩཡཱདཱིནཉྩ ཝིདྷཱིཡམཱནཏྟཱ ཨཉྙཐཱནུཔཔཏྟིལཀྑཎཱཡ སཱམཏྠིཡཱ ཐུལླཙྩཡདུཀྐཊཱནཾ ཁེཏྟེཏི ཨཡམཏྠོ ལབྦྷཏི. ‘‘ཀཎྞཙྪིདྡཀྑིནཱསཱསཱུ’’ཏིཨཱདིནཱ ནཡེན ཝཀྑམཱནེསུ ཛཱིཝམཱནཀསརཱིརགཏཐུལླཙྩཡདུཀྐཊཀྑེཏྟེསཱུཏི ཝུཏྟཾ ཧོཏི.

ཨིམེསུ ¶ དྭཱིསུ ཁེཏྟེསུ ‘‘སནྠཏཱདིནཱ སནྠཏཱདིཾ པཝེསེནྟསྶ ཨུཔཱདིནྣཱདཱིཧི ཨུཔཱདིནྣཱདཱིནཾ གྷཊྚནེ ཨདྷིཝཱསེནྟསྶ ཨནཱཔཏྟཱི’’ཏི ཝཏྟུམསཀྐུཎེཡྻཏཱཡ པཱརཱཛིཀཀྑེཏྟེ ཝུཏྟསབྦཝིཀཔྤེ ཨེཏྠ ཡོཛེནྟེཧི ཨེཝཾ ཡོཛེཏབྦཾ – ཐུལླཙྩཡཀྑེཏྟེ སནྠཏེ ཝཱ ཨསནྠཏེ ཝཱ སནྠཏེན ཝཱ ཨསནྠཏེན ཝཱ ཨངྒཛཱཏེན སེཝནྟསྶ ཨུཔཱདིནྣེ ཝཱ ཨནུཔཱདིནྣེ ཝཱ ཨུཔཱདིནྣེན, ཏཐཱ ཨནུཔཱདིནྣེན ཝཱ གྷཊྚིཏེ ཐུལླཙྩཡཾ ཏསྶ ཝིནིདྡིསེཏི. ཨེཝཾ དུཀྐཊཀྑེཏྟེ སནྠཏེ ཝཱ…པེ… གྷཊྚིཏེ དུཀྐཊཉྩ ཏསྶ ཝིནིདྡིསེཏི ཡོཛེཏབྦཾ.

ཨིཧ ¶ སབྦཏྠ ཏཱིསུཔི ཁེཏྟེསུ ཨུཔཱདིནྣ-སདྡེན ཨནཊྛཀཱཡཔྤསཱདཾ ཨངྒཛཱཏཉྩ ཏཏྠཛཱཏཙམྨཁིལཔིལ༹ཀཱ ཙ གཡ྄ཧནྟི, དུཀྐཊཀྑེཏྟེ པན ཨངྒུལིཨཱདིཨིཏརཱཝཡཝཱཔི. ཏཱིསུཔི ཁེཏྟེསུ ཨནུཔཱདིནྣ-སདྡེན ཨངྒཛཱཏཱདིཔཊིཙྪཱདིཏཝཏྠཱདཡོ ཙ གཡ྄ཧནྟི, དུཀྐཊཀྑེཏྟེ པན ནིམིཏྟེ ནཊྛཀཱཡཔྤསཱདཙམྨཁིལཔིལ༹ཀརོམཱདཱིནི. ཨིམཱནི ཙ ཨནུཔཱདིནྣཱནི. ཨངྒཛཱཏེཏརོཔཱདིནྣཱཝཡཝེ ཙ ཏཱིསུཔི ཁེཏྟེསུ པཝེསེནྟསྶ དུཀྐཊམེཝ.

༡༡. ཨེཏྟཱཝཏཱ ཛཱིཝམཱནསརཱིརེ སནྠཏཱསནྠཏཝསེན པཙྩེཀཾ ཏིཝིདྷེསུཔི པཱརཱཛིཀཐུལླཙྩཡདུཀྐཊཀྑེཏྟེསུ སནྠཏཱསནྠཏཝསེནེཝ དུཝིདྷེན ནིམིཏྟེན སེཝནྟསྶ པརོཔཀྐམེ སཏི སཱདིཡནྟསྶ ལབྦྷམཱནཔཱརཱཛིཀཐུལླཙྩཡདུཀྐཊཱཔཏྟིཡོ ཡཐཱསམྦྷཝཾ དསྶེཏྭཱ ཨིདཱནི ‘‘མཏསརཱིརེ པན ཏཐཱ ཏཐཱ སེཝནྟཱནཾ དོསོ ནཏྠཱི’’ཏི པཱཔབྷིཀྑཱུནཾ ལེསོཀཱསཔཊིབཱཧནཏྠཾ པཱལི༹ཡཾ དསྶིཏེསུ ཡཐཱཝུཏྟེསུ ཏཱིསུ ཁེཏྟེསུ ལབྦྷམཱནཱ ཏིསྶོ ཨཱཔཏྟིཡོ དསྶེཏུམཱཧ ‘‘མཏེ’’ཏིཨཱདི.

ཏཏྠ ¶ ‘‘མཏེ’’ཏི ཨེཏསྶ ‘‘མནུསྶིཏྠིཨཱདཱིནཾ སརཱིརེ’’ཏི ཨཛ྄ཛྷཱཧརིཏྭཱ ཨཏྠཡོཛནཱ ཀཱཏབྦཱ. ཨིམིནཱ ‘‘ཨཀྑཱཡིཏེ’’ཏིཨཱདིནཱ དསྶིཏཱནཾ ནིམིཏྟཱནཾ ནིསྶཡཾ དསྶིཏཾ ཧོཏི. ‘‘ནིམིཏྟམཏྟཾ སེསེཏྭཱ’’ཏིཨཱདིནཱ ནཡེན ཝཀྑམཱནགཱཐཱཡཾ ཝིཡ སཀལསརཱིརེ ཁཱདིཏེཔི ནིམིཏྟསྶ ཝིཛྫམཱནཱཝིཛྫམཱནབྷཱཝོཡེཝ ཨཱཔཏྟིཡཱབྷཱཝཱབྷཱཝསྶ པམཱཎནྟི ‘‘ཨཀྑཱཡིཏེ’’ཏི ཨེཏེན ‘‘མཏེ’’ཏི ཨེཏཾ ཨཝིསེསེཏྭཱ ‘‘ནིམིཏྟེ’’ཏི ཨཛ྄ཛྷཱཧརིཏྭཱ ཏཾ ཏེན ཝིསེསིཏབྦཾ. ཨཐ ཝཱ ‘‘ནིམིཏྟམཏྟ’’ནྟིཨཱདིནཱ ཝཀྑམཱནགཱཐཱཡ ‘‘ནིམིཏྟེ’’ཏི པདཾ ཨཱནེཏྭཱ ཡོཛེཏབྦཾ.

ཨཀྑཱཡིཏེཏི སབྦཐཱ ཨཀྑཱཡིཏེ པཱརཱཛིཀཝཏྠུབྷཱུཏེ ནིམིཏྟེ. ཡེབྷུཡྻཀྑཱཡིཏེཔི ཙཱཏི ཀིཉྩི ཀིཉྩི ཁཱདིཏྭཱ བཧུཀཱཝསིཊྛེ ནིམིཏྟེ. ‘‘ཡསྶ ཙཏཱུསུ བྷཱགེསུ ཏིབྷཱགམཏྟཾ ཁཱདིཏཾ, ཏཾ ནིམིཏྟཾ ཡེབྷུཡྻཀྑཱཡིཏཾ ནཱམཱ’’ཏི ཝདནྟི. མེཐུནནྟི རཱགཔརིཡུཊྛཱནེན སདིསབྷཱཝཱཔཏྟིཡཱ མིཐུནཱནཾ ཨིདཾ མེཐུནཾ, མཏིཏྠིཨཱདཱིནཾ རཱགཔརིཡུཊྛཱནེན སདིསཏྟཱབྷཱཝེཔི ཏཏྠ ཝཱིཏིཀྐམོ རུལ༹ྷིཡཱ ‘‘མེཐུན’’ནྟི ཝུཙྩཏི.

པཱརཱཛིཀོཏིཔརཱཛིཏོ, པརཱཛཡམཱཔནྣོཏི ཨཏྠོ. ཨཡཉྷི པཱརཱཛིཀ-སདྡོ སིཀྑཱཔདཱཔཏྟིཔུགྒལེསུ ཝཏྟཏི. ཏཏྠ ‘‘ཨཊྛཱནམེཏཾ ཨཱནནྡ ཨནཝཀཱསོ, ཡཾ ཏཐཱགཏོ ཝཛྫཱིནཾ ¶ ཝཱ ཝཛྫིཔུཏྟཀཱནཾ ཝཱ ཀཱརཎཱ སཱཝཀཱནཾ པཱརཱཛིཀཾ སིཀྑཱཔདཾ པཉྙཏྟཾ སམཱུཧནེཡྻཱ’’ཏི (པཱརཱ. ༤༣) ཨེཝཾ སིཀྑཱཔདེ ཝཏྟམཱནོ ཝེདིཏབྦོ. ‘‘ཨཱཔཏྟི ཏྭཾ བྷིཀྑུ ཨཱཔནྣོ པཱརཱཛིཀ’’ནྟི (པཱརཱ. ༦༧) ཨཱཔཏྟིཡཱ. ‘‘ན མཡཾ པཱརཱཛིཀཱ, ཡོ ཨཝཧཊོ, སོ པཱརཱཛིཀོ’’ཏི (པཱརཱ. ༡༥༥) ཨེཝཾ པུགྒལེ. ‘‘པཱརཱཛིཀེན དྷམྨེན ཨནུདྡྷཾསེཡྻཱ’’ཏིཨཱདཱིསུ (པཱརཱ. ༣༨༤) པན དྷམྨེ ཝཏྟཏཱིཏི ཝདནྟི. ཡསྨཱ པན ¶ ཏཏྠ དྷམྨོཏི ཀཏྠཙི ཨཱཔཏྟི, ཀཏྠཙི སིཀྑཱཔདམེཝ ཨདྷིཔྤེཏཾ, ཏསྨཱ སོ ཝིསུཾ ན ཝཏྟབྦོ.

ཏཏྠ སིཀྑཱཔདཾ ཡོ ཏཾ ཨཏིཀྐམཏི ཏཾ པརཱཛེཏི, ཏསྨཱ ‘‘པཱརཱཛིཀ’’ནྟི ཝུཙྩཏི. ཨཱཔཏྟི པན ཡོ ནཾ ཨཛ྄ཛྷཱཔཛྫཏི ཏཾ པརཱཛེཏི, ཏསྨཱ ‘‘པཱརཱཛིཀཱ’’ཏི ཝུཙྩཏི. པུགྒལོ ཡསྨཱ པརཱཛིཏོ པརཱཛཡམཱཔནྣོ, ཏསྨཱ ‘‘པཱརཱཛིཀོ’’ཏི ཝུཙྩཏི. སིཀྑཱཔདཱཔཏྟཱིསུ པཱརཱཛིཀ-སདྡོ པརཱཛེཏཱིཏི ‘‘པཱརཱཛིཀོ’’ཏི ཀཏྟུསཱདྷནོ, པུགྒལེ པན པརཱཛཱིཡཏཱིཏི ཀམྨསཱདྷནོཏི ཝེདིཏབྦོ. ‘‘ནརོ’’ཏི ཨིམིནཱ པུབྦེ ཝུཏྟབྷིཀྑུཡེཝ ཨདྷིཔྤེཏོ. སཱམཉྙཛོཏནཱ ཝིསེསེ ཨཝཏིཊྛཏཱིཏི.

༡༢. ཡེབྷུཡྻཀྑཱཡིཏེཏི ཙཏཱུསུ ཀོཊྛཱསེསུ ཨེཀཀོཊྛཱསཱཝསེསཾ ཀཏྭཱ ཁཱདིཏེ. ཨུཔཌྜྷཀྑཱཡིཏེཏི སམབྷཱགཱཝསེསཾ ཁཱདིཏེ. ཐཱུལོ ཨཙྩཡོ ཐུལླཙྩཡོ, སོཡེཝ ཨཱཔཛྫཱིཡཏཱིཏི ཨཱཔཏྟཱིཏི ཐུལླཙྩཡཱཔཏྟི. པཱཙིཏྟིཡཱདཡོ སནྡྷཱཡེཏྠ ཐུལླཙྩཡཝོཧཱརོ, ན པཱརཱཛིཀསངྒྷཱདིསེསེཏི དཊྛབྦཾ. སེསེཏི ཨཝསེསེ ཨུཔཀཙྪཀཱདཱིསུ. ཝུཏྟཉྷི ཨཊྛཀཐཱཡཾ ‘‘ཨཝསེསསརཱིརེ ཨུཔཀཙྪཀཱདཱིསུ དུཀྐཊ’’ནྟི (པཱརཱ. ཨཊྛ. ༡.༥༩-༦༠). དུཊྛུ ཀཏནྟི དུཀྐཊཾ, དུཀྐཊ-སདྡོ ནིཡཏནཔུཾསཀཏྟཱ ཨིཏྠིལིངྒསྶཱཔི ཨཱཔཏྟི-སདྡསྶ སལིངྒེན ཝིསེསནཾ ཧོཏི.

༡༣. ནིམིཏྟམཏྟཾ སེསེཏྭཱ ཁཱཡིཏེཔཱིཏི ཨེཏྠ ཏིཎྞམཉྙཏརཾ ནིམིཏྟཾ སེསེཏྭཱ སཀལསརཱིརེ ཁཱདིཏེཔི. པི-སདྡོ བྱཏིརེཀེ, པགེཝ ཨིཏརེཏི དཱིཔེཏི. ཏསྨིཾ ནིམིཏྟེ ཨཀྑཱཡིཏེ ཝཱ ཡེབྷུཡྻཀྑཱཡིཏེ ཝཱཏི དྭིདྷཱ ཝུཏྟེསུ ཏཱིསུ ནིམིཏྟེསུ ཨཉྙཏརསྨིཾ ནིམིཏྟེ མེཐུནཾ སེཝཏོཔི པརཱཛཡོ པཱརཱཛིཀཱཔཏྟི ཧོཏཱིཏི ཨདྷིཔྤཱཡོ ¶ . སེཝཏོཔཱིཏི ཨེཏྠ པི-སདྡོ ཨཔེཀྑཱཡཾ. ཏསྨཱ ན ཀེཝལཾ ཧེཊྛཱ ཝུཏྟཱནམེཝཱཏི ཨཔེཀྑཏི. སནྠཏཱདཡོ ཝིཀཔྤཱ ཡཐཱཝུཏྟནཡེན ཨེཏྠཱཔི ཡོཛེཏབྦཱ.

༡༤. ‘‘ཨུདྡྷུམཱཏཱདིསམྤཏྟེ’’ཏི ¶ ཨེཏྠ ‘‘ཡདཱ པན སརཱིརཾ ཨུདྡྷུམཱཏཀཾ ཧོཏི ཀུཐིཏཾ ནཱིལམཀྑིཀཱསམཱཀིཎྞཾ ཀིམིཀུལསམཱཀུལཾ ནཝཧི ཝཎམུཁེཧི པགྒྷརིཏཔུབྦཀུཎཔབྷཱཝེན ཨུཔགནྟུམྤི ཨསཀྐུཎེཡྻཾ, ཏདཱ པཱརཱཛིཀཝཏྠུཉྩ ཐུལླཙྩཡཝཏྠུཉྩ ཛཧཏི, ཏཱདིསེ སརཱིརེ ཡཏྠ ཀཏྠཙི ཨུཔཀྐམཏོ དུཀྐཊམེཝཱ’’ཏི (པཱརཱ. ཨཊྛ. ༡.༥༩-༦༠) ཨཊྛཀཐཱཝཙནཏོ སབྦཏྠཱཔི ཙཱཏི ཨཀྑཱཡིཏཱདིསབྦཝིཀཔྤོཔགཏཱནི པཱརཱཛིཀཐུལླཙྩཡདུཀྐཊཀྑེཏྟཱནི གཧིཏཱནཱིཏི དཊྛབྦཾ. ཏཏྠཱཔི ཝཱིཏིཀྐམོ ཨནཱཔཏྟི ན ཧོཏཱིཏི དསྶེཏུམཱཧ ‘‘དུཀྐཊ’’ནྟི. ‘‘ཁཱཡིཏཀྑཱཡིཏ’’ནྟིཨཱདཱིསུ ཁཱཡིཏཀྑཱཡིཏཉྩ ནཱམེཏཾ སབྦཾ མཏསརཱིརཀེཡེཝ ཝེདིཏབྦཾ, ན ཛཱིཝམཱནེཏི ཡོཛེཏབྦཾ.

༡༥. ཛཱིཝམཱནེ ཀཐནྟི ཨཱཧ ‘‘ཚིནྡིཏྭཱ པནཱ’’ཏིཨཱདི. ཏཏྠ ཝཎསངྑེཔཏོཏི ཝཎསངྒཧཏོ. ཏསྨིནྟི ཡཏྠ ཋིཏཾ ནིམིཏྟཾ ཨུཔྤཱཊིཏཾ, ཏསྨིཾ པདེསེ. ཨེཏྠ དུཏིཡོ པན-སདྡོ ཨིདྷ ཨདསྶིཏཾ ཨཊྛཀཐཱཡཾ ཨཱགཏནཡེན ཝིཉྙཱཡམཱནཾ ཨཏྠཝིསེསཾ ཛོཏེཏི. ཨཊྛཀཐཱཡཧི ‘‘ཡདིཔི ནིམིཏྟཾ སབྦསོ ཁཱཡིཏཾ, ཚཝིཙམྨམྤི ནཏྠི, ནིམིཏྟསཎྛཱནཾ པཉྙཱཡཏི, པཝེསནཾ ཛཱཡཏི, པཱརཱཛིཀམེཝཱ’’ཏི ཨེཝཾ ཨཛཱིཝམཱནེ ཝུཏྟཝིནིཙྪཡཱནུསཱརེན ཛཱིཝམཱནེཔི ཚཝིཙམྨམཏྟཾ ཙེ སབྦསོ ཨུཔྤཱཊིཏཾ, ནིམིཏྟསཎྛཱནཾ པཉྙཱཡཏི, པཝེསནཀྑམཾ ཧོཏི, ཏཏྠ སེཝནྟསྶ པཱརཱཛིཀམེཝཱཏི ཝིཉྙཱཡམཱནམཏྠཾ ཛོཏེཏཱིཏི ཝུཏྟཾ ཧོཏི.

༡༦. ཏཏོ ¶ ནིམིཏྟཏོཏི སམྦནྡྷོ. པཏིཏཱཡཱཏི པཏིཏཱཡཾ, ཨཡམེཝ ཝཱ པཱཋོ. ནིམིཏྟཏོཏི ནིམིཏྟཔྤདེསཏོ པཏིཏཱཡཾ མཾསཔེསིཡནྟི སམྦནྡྷོ. ཚིནྡིཏྭཱ ཝཱ ཏཙྪེཏྭཱ ཝཱ པཏིཏཱཡཾ ཏསྶཾ ནིམིཏྟམཾསཔེསིཡནྟི ཨཏྠོ. མེཐུནརཱགེན ཨུཔཀྐམནྟསྶ དུཀྐཊཾ ཝིནིདྡིསེཏི ཡོཛནཱ.

༡༧. ‘‘ནཁཔིཊྛིཔྤམཱཎེཔཱི’’ཏིཨཱདིགཱཐཱཡ ‘‘ཚིནྡིཏྭཱ’’ཏིཨཱདིཀཱ ཨཊྛཀཐཱ ཨཱནེཏྭཱ སམྦནྡྷིཏབྦཱ. སཏཱིཏི ཨེཏྠ ‘‘ཨཝསིཊྛེ’’ཏི པཱཋསེསོ. ཛཱིཝམཱནེཏི ཨེཏྠ ‘‘སརཱིརེ’’ཏི པཱཋསེསོ. ཛཱིཝམཱནསརཱིརེ པན ཚིནྡིཏྭཱ ཏཙྪེཏྭཱ ནིམིཏྟེ ཨུཔྤཱཊིཏེ ནཁཔིཊྛིཔྤམཱཎེཔི མཾསེ, ནྷཱརུམྷི ཝཱ ཨཝསིཊྛེ སཏི མེཐུནཾ པཊིསེཝནྟོ པརཱཛིཏོཏི ཡོཛནཱ.

༡༨. ‘‘ཀཎྞཙྪིདྡཀྑཱི’’ཏི གཱཐཱཡ ‘‘ཛཱིཝམཱནེ’’ཏི ཨཱནེཏྭཱ སམྦནྡྷིཏབྦཾ, ‘‘སརཱིརེ’’ཏི ¶ པཱཋསེསོ. ‘‘ཨསྶགོམཧིསཱདཱིན’’ནྟིཨཱདིནཱ ཨསྶཱདཱིནཾ ཝཀྑམཱནཏྟཱ པཱརིསེསཏོ ‘‘མནུསྶཱན’’ནྟི ལབྦྷཏི. མནུསྶཱནཾ ཛཱིཝམཱནསརཱིརེ ཀཎྞ…པེ… ཝཎེསུ ཝཱཏི ཡོཛནཱ. ཝཏྠིཀོསེཏི མུཏྟཔཐབྦྷནྟརེ. ཝཎེསུ ཝཱཏི སཏྠཀཱདཱིཧི ཀཏཝཎེསུ. ཨངྒཛཱཏནྟི ཏིལམཏྟམྤི ཨངྒཛཱཏེཀདེསཾ. རཱགཱཏི མེཐུནརཱགེན.

༡༩. ཨཝསེསསརཱིརསྨིནྟི ཀཎྞཙྪིདྡཱདིཡཐཱཝུཏྟསརཱིརཱཝཡཝཝཛྫིཏསརཱིརཔྤདེསེ. ཏེནཱཧ ‘‘ཨུཔཀཙྪཱུརུཀཱདིསཱུ’’ཏི ཨུཔཀཙྪཾ ནཱམ བཱཧུམཱུལནྟརཾ. ཨཱུརུཀཱདིསཱུཏི ཨཱུརུཝེམཛ྄ཛྷཱདཱིསུ. ཨཱདི-སདྡེན ཝུཏྟཱཝསེསཾ སརཱིརཔྤདེསཾ སངྒཎྷཱཏི. ‘‘ཨངྒཛཱཏ’’ནྟི ཨཱནེཏྭཱ སམྦནྡྷིཏབྦཾ. ‘‘པཝེསེཏྭཱ’’ཏི སཱམཏྠིཡཱ ལབྦྷཏི, ཨངྒཛཱཏཾ ཏིལབཱིཛམཏྟཾ པཝེསེཏྭཱཏི ¶ ཝུཏྟཾ ཧོཏི. ཝསཱ མེཐུནརཱགསྶ སེཝམཱནསྶཱཏི མེཐུནརཱགེན ཝཱིཏིཀྐམནྟསྶཱཏི ཨཏྠོ. ‘‘སནྠཏེནཱ’’ཏིཨཱདིནཱ ཝུཏྟཔྤཀཱརོ ཨེཏྠཱཔི ཡོཛེཏབྦོ.

༢༠. ཨསྶགོམཧིསཱདཱིནནྟི ཨཱདི-སདྡེན གོཀཎྞགཝཛཱདཡོ སངྒཧིཏཱ. ཨསྶཱདཡོ པཱཀཊཱཡེཝ. ‘‘མཏཱན’’ནྟི ཝཀྑམཱནཏྟཱ ‘‘ཛཱིཝམཱནཱན’’ནྟི སཱམཏྠིཡཱ ལབྦྷཏི. སེཝནྟི ‘‘ཝསཱ མེཐུནརཱགསྶཱ’’ཏི ཨནུཝཏྟམཱནཏྟཱ མེཐུནརཱགཝསེན ཏིལབཱིཛམཏྟམྤི ཨངྒཛཱཏཔྤདེསཾ པཝེསེནྟོ ཐུལླཙྩཡཾ ཕུསེཏི ཡོཛནཱ. ཨེཏྠ ཙ ‘‘ཨོཊྛགདྲབྷདནྟཱིནཾ, ཨསྶགོམཧིསཱདིན’’ནྟི པཱཋེན བྷཝིཏབྦཾ. ཨེཝཉྷི སཏི ཨཊྛཀཐཱཝསཱནེ ནིདྡིཊྛེན པཀཱརཏྠཝཱཙིནཱ ཨཱདི-སདྡེན ཐུལླཙྩཡཝཱིཏིཀྐམཱརཧནཱསཱཝཏྠིཀོསཝནྟོ ཨཝུཏྟཱ སབྦེཔི སཏྟཱ གཡ྄ཧནྟི. ‘‘ཨསྶགོམཧིསཱདཱིན’’ནྟི པཋམཔཱདཱཝསཱནེ ནིདྡིཊྛེན ཨཱདི-སདྡེན ཨོཊྛགདྲབྷདནྟཱིནམྤི སངྒཧོ ཧོཏཱིཏི ཏེསཾ པུནཝཙནཾ ནིརཏྠཀཾ སིཡཱཏི.

༢༡. ཏཐཱ སེཝམཱནསྶ དུཀྐཊནྟི སམྦནྡྷོ. སབྦཏིརཙྪཱནནྟི ཏིརིཡཾ ཨཉྩནྟི ཝཌྜྷནྟཱིཏི ཏིརཙྪཱ, སབྦེ ཙ ཏེ ཏིརཙྪཱཙཱཏི སབྦཏིརཙྪཱ, ཏེསཾ སབྦཏིརཙྪཱནཾ. ‘‘ཏཐཱ’’ཏི ཨིམིནཱ ‘‘ཝསཱ མེཐུནརཱགསྶཱ’’ཏིཨཱདཱིནཾ པརཱམཊྛཏྟཱ སབྦཏིརཙྪཱནཱནཾ ཨཀྑིཨཱདཱིསུ ཏིལབཱིཛམཏྟམྤི ཨངྒཛཱཏཔྤདེསཾ མེཐུནརཱགེན པཝེསེནྟསྶ དུཀྐཊནྟི ཝུཏྟཾ ཧོཏི. ཨེཏྠཱཔི སནྠཏཱདིཝིཀཔྤེ ནིདྡོསབྷཱཝོ ན སཀྐཱ ཝཏྟུནྟི ཏམྤི ཡོཛེཏབྦཾ.

༢༢. ཨེཝཾ ཏིརཙྪཱནཱནཾ ཛཱིཝམཱནཀསརཱིརེ ལབྦྷམཱནཱ ཨཱཔཏྟིཡོ དསྶེཏྭཱ ཏེསཾཡེཝ མཏསརཱིརེཔི ¶ སམྦྷཝནཀཨཱཔཏྟིཡོ དསྶེཏུམཱཧ ‘‘ཏེས’’ནྟིཨཱདི. ‘‘ཏེས’’ནྟི ¶ ཨིམིནཱ མནུསྶཏིརཙྪཱནགཏཱནཾ གཧཎནྟི ཝདནྟི. མནུསྶཱནཾ མཏཱམཏསརཱིརེ པཱརཱཛིཀཐུལླཙྩཡདུཀྐཊཀྑེཏྟེསུ ཏིསྶནྣཾ ཨཱཔཏྟཱིནཾ དསྶིཏཏྟཱ, པུན གཧཎེ པཡོཛནཱབྷཱཝཱ ཏེ ཝཛྫེཏྭཱ ཨནུཝཏྟམཱནསབྦཏིརཙྪཱནནྟི ཨིམིནཱ ཡོཛེཏབྦཾ, ཏེསཾ སབྦཏིརཙྪཱནགཏཱནནྟི ཨཏྠོ. ཨལླསརཱིརེསཱུཏི ཨུདྡྷུམཱཏཀཱདིབྷཱཝམསམྤཏྟེསུ ཨལླམཏསརཱིརེསུ ཏིཝིདྷེ ཁེཏྟསྨིཾ ཨསནྠཏེ, སནྠཏེ ཝཱ སཏི མེཐུནརཱགསྶ ཝསཱ སེཝཏོ ཏིཝིདྷཱཔི ཨཱཔཏྟི སིཡཱཏི ཨནུཝཏྟམཱནཔདེཧི སཧ ཡོཛནཱ.

ཏིཝིདྷེ ཁེཏྟསྨིནྟི མཏམནུསྶསརཱིརེ ཝུཏྟནཡེན ཨཀྑཱཡིཏཡེབྷུཡྻཀྑཱཡིཏབྷེདེ མགྒཏྟཡསངྑཱཏེ པཱརཱཛིཀཀྑེཏྟེ ཙ ཡེབྷུཡྻཀྑཱཡིཏཨུཔཌྜྷཀྑཱཡིཏབྷེདེ ཏསྨིཾཡེཝ མགྒཏྟཡསངྑཱཏེ ཙ, ཨཀྑཱཡིཏཡེབྷུཡྻཀྑཱཡིཏབྷེདེ ཀཎྞཙྪིདྡཀྑིནཱསཱཝཏྠིཀོསཝཎསངྑཱཏེ ཙ ཐུལླཙྩཡཀྑེཏྟེ ཨུཔཌྜྷཀྑཱཡིཏཡེབྷུཡྻཀྑཱཡིཏབྷེདེ ཏསྨིཾཡེཝ ཀཎྞཙྪིདྡཀྑིནཱསཱཝཏྠིཀོསཝཎསངྑཱཏེ ཙ, ཨཀྑཱཡིཏཡེབྷུཡྻཀྑཱཡིཏཨུཔཌྜྷཀྑཱཡིཏ ཡེབྷུཡྻཀྑཱཡིཏབྷེདེ ཨཝསེསསརཱིརསངྑཱཏེ དུཀྐཊཀྑེཏྟེ ཙཱཏི ཏིཝིདྷེཔི ཁེཏྟེ. སཏཱིཏི ཝིཛྫམཱནེ. སནྠཏེ ཝཱ ཨསནྠཏེ ཝཱ མེཐུནརཱགསྶ ཝསཱ སེཝཏོ ཡཐཱརཧཾ པཱརཱཛིཀཐུལླཙྩཡདུཀྐཊསངྑཱཏཱ ཏིཝིདྷཱ ཨཱཔཏྟི བྷཝེཡྻཱཏི ཨཏྠོ.

ཨེཏེསམེཝ ཙ ཨུདྡྷུམཱཏཱདིབྷཱཝཾ སམྤཏྟེ སརཱིརེ སནྠཏཱདིཝུཏྟཝིཀཔྤཡུཏྟེསུ ཏཱིསུ མགྒེསུ ཡཏྠ ཀཏྠཙི མེཐུནརཱགེན སེཝཏོ ཨཱཔཛྫིཏབྦདུཀྐཊཉྩ ཨུདྡྷུམཱཏཱདིསམྤཏྟེ སབྦཏྠཱཔི ཙ དུཀྐཊནྟི མནུསྶསརཱིརེ ཝུཏྟནཡེན ཝིཉྙཱཏུཾ སཀྐཱཏི ཨིམསྨིཾ ཏིརཙྪཱནགཏསརཱིརེ ཝིསེསམཏྟཾ དསྶེཏུཾ ‘‘ཏེསཾ ཨལླསརཱིརེསཱུ’’ཏིཨཱདཱིནཾ ཝུཏྟཏྟཱ དུཀྐཊཾ པུབྦེ ¶ ཝུཏྟནཡེན ཝེདིཏབྦཾ. ཡཐཱཧ ཨཊྛཀཐཱཡཾ ‘‘ཀུཐིཏཀུཎཔེ པན པུབྦེ ཝུཏྟནཡེནེཝ སབྦཏྠ དུཀྐཊ’’ནྟི.

༢༣. བཧི ཚུཔནྟསྶཱཏི ཡོཛནཱ. ནིམིཏྟཾ མུཏྟཀརཎཾ. ‘‘ཨིཏྠིཡཱ’’ཏི སཱམཉྙེན ཝུཏྟེཔི ཙཏུཏྠགཱཐཱཡ ‘‘ཏིརཙྪཱནགཏིཏྠིཡཱ’’ཏི ཝཀྑམཱནཏྟཱ པཱརིསེསཏོ ཨིམིནཱ མནུསྶཱམནུསྶིཏྠཱིནམེཝ གཧཎཾ, ཨིམིནཱ ཨམནུསྶིཏྠིཡཱཔི གཧཎསྶ. ཨིམིསྶཱནནྟརགཱཐཱཡ ཨིཏོ ‘‘ཨིཏྠིཡཱ’’ཏི ཨནུཝཏྟིཏེ ཏཏྲཱཔི ཨམནུསྶིཏྠིཡཱཔི གཧཎཾ སིཡཱཏི ཏམྤི ཝཛྫེཏྭཱ ཀཱཡསཾསགྒསངྒྷཱདིསེསསྶ ཝཏྠུབྷཱུཏཾ མནུསྶིཏྠིམེཝ དསྶེཏུཾ ཏཏྠ ཝུཏྟཾ ‘‘ཨིཏྠིཡཱ’’ཏིཨདྷིཀཝཙནམེཝ ཉཱཔཀནྟི ཝེདིཏབྦཾ.

མཧཱཨཊྛཀཐཱཡཾ ¶ (པཱརཱ. ཨཊྛ. ༡.༥༩-༦༠) ‘‘ཨིཏྠིནིམིཏྟཾ མེཐུནརཱགེན མུཁེན ཚུཔཏི, ཐུལླཙྩཡ’’ནྟི སཱམཉྙེན ཝུཏྟཏྟཱ ཙ དྷམྨཀྑནྡྷཀེ ‘‘ན ཙ བྷིཀྑཝེ རཏྟཙིཏྟེན ཨངྒཛཱཏཾ ཚུཔིཏབྦཾ, ཡོ ཚུཔེཡྻ, ཨཱཔཏྟི ཐུལླཙྩཡསྶཱ’’ཏི (མཧཱཝ. ༢༥༢) སཱམཉྙཝཙནཏོ ཙ ཨུདྡྷུམཱཏཱདིབྷཱཝམསམྤཏྟཱཡ ཨལླམཏམནུསྶིཏྠིཡཱ ཙ ཨཀྑཱཡིཏེ ཝཱ ཡེབྷུཡྻཀྑཱཡིཏེ ཝཱ ནིམིཏྟེ སཏི པཱརཱཛིཀཝཏྠུབྷཱཝཏོ ཏཏྠཱཔི བཧི ཚུཔནྟསྶ ཐུལླཙྩཡནྟི ཨཡམཏྠོཔི མཏཱམཏཝིསེསཾ ཨཀཏྭཱ ‘‘ཨིཏྠིཡཱ’’ཏི ཨིམིནཱཝ སཱམཉྙཝཙནེན གཧེཏབྦོ.

༢༤. ནིམིཏྟེནཱཏི ཨཏྟནོ ཨངྒཛཱཏེན. མུཁེནཱཏི པཀཏིམུཁེན. ནིམིཏྟཾ ཨིཏྠིཡཱཏི ཛཱིཝམཱནཀམནུསྶིཏྠིཡཱ ཨངྒཛཱཏཾ. ཡསྨཱ པན ཀཱཡསཾསགྒསིཀྑཱཔདཝིནཱིཏཝཏྠཱུསུ མཏིཏྠིཝཏྠུམྷི མཏིཏྠིཡཱ སརཱིརེ ཀཱཡསཾསགྒརཱགེན ཡོ ཚུཔཏི, ཏསྶ ‘‘ཨནཱཔཏྟི བྷིཀྑུ སངྒྷཱདིསེསསྶ, ཨཱཔཏྟི ¶ ཐུལླཙྩཡསྶཱ’’ཏི (པཱརཱ. ༢༨༡) ཝུཏྟཏྟཱ མཏམནུསྶིཏྠཱི ན གཧེཏབྦཱ. ཏཐེཝ ཡཀྑིཝཏྠུམྷི ཀཱཡསཾསགྒརཱགེན ཡཀྑིནིཡཱ སརཱིརཾ ཡེན ཕུཊྛཾ, ཏསྶ ‘‘ཨནཱཔཏྟི བྷིཀྑུ སངྒྷཱདིསེསསྶ, ཨཱཔཏྟི ཐུལླཙྩཡསྶཱ’’ཏི ཝུཏྟཏྟཱ, ཨིདྷེཝ ཨུཔརི དུཏིཡསངྒྷཱདིསེསེ ‘‘པཎྜཀེ ཡཀྑིཔེཏཱིསུ, ཏསྶ ཐུལླཙྩཡཾ སིཡཱ’’ཏི (ཝི. ཝི. ༣༤༡) ཝཀྑམཱནཏྟཱ ཙ ཨམནུསྶིཏྠཱིཔི ན གཧེཏབྦཱ. ཏེན ཝུཏྟཾ ‘‘ཛཱིཝམཱནཀམནུསྶིཏྠིཡཱ ཨངྒཛཱཏ’’ནྟི. ཨནྟོ པཝེསེཏུཀཱམཏཱཡ སཏི ཀཱཡསཾསགྒརཱགཱསམྦྷཝཏོ ‘‘ཀཱཡསཾསགྒརཱགེནཱ’’ཏི ཨིམིནཱ ཙ བཧི ཚུཔིཏུཀཱམཏཱ ཝིཉྙཱཡཏཱིཏི ‘‘བཧཱི’’ཏི ཨནུཝཏྟནཾ ཝིནཱཔི ཏདཏྠོ ལབྦྷཏི. གརུཀནྟི སངྒྷཱདིསེསོ.

༢༥. ཏཐེཝ བཧི ཚུཔནྟསྶཱཏི ཡོཛནཱ, ཨནྟོ ཨཔྤཝེསེཏྭཱ བཧིཡེཝ ཚུཔནྟསྶཱཏི ཝུཏྟཾ ཧོཏི. ཨུབྷཡརཱགེནཱཏི ཀཱཡསཾསགྒརཱགེན, མེཐུནརཱགེན ཝཱ. པུརིསསྶཱཔཱིཏི ཛཱིཝམཱནཀཔུརིསསྶཔི. པི-སདྡོ ན ཀེཝལཾ ཝུཏྟནཡེན ཨིཏྠིཡཱ ནིམིཏྟཾ ཕུསནྟསྶེཝ ཨཱཔཏྟི, ཨཐ ཁོ པུརིསསྶཱཔཱིཏི དཱིཔེཏི. ‘‘ནིམིཏྟ’’ནྟི མུཏྟཀརཎམེཝ ཝུཙྩཏི. ‘‘ཛཱིཝམཱནཀཔུརིསསྶཱ’’ཏི ཨཡཾ ཝིསེསོ ཀུཏོ ལབྦྷཏཱིཏི ཙེ? ‘‘ཀཱཡསཾསགྒརཱགེན ཝཱ མེཐུནརཱགེན ཝཱ ཛཱིཝམཱནཀཔུརིསསྶ ཝཏྠིཀོསཾ ཨཔྤཝེསེནྟོ ནིམིཏྟེན ནིམིཏྟཾ ཚུཔཏི, དུཀྐཊ’’ནྟི ཨིཏོ ཨཊྛཀཐཱཝཙནཏོ (པཱརཱ. ཨཊྛ. ༡.༥༩-༦༠) ལབྦྷཏི.

༢༦. ཨཙིརཝཏིཏརནྟཱནཾ གུནྣཾ པིཊྛིཾ ཨབྷིརུཧནྟཱ ཚབྦགྒིཡཱ བྷིཀྑཱུ མེཐུནརཱགེན ཨངྒཛཱཏེན ¶ ཨངྒཛཱཏཾ ཚུཔིཾསཱུཏི ཨིམསྨིཾ ཝཏྠུམྷི ‘‘ན ཙ བྷིཀྑཝེ རཏྟཙིཏྟེན ཨངྒཛཱཏཾ ཚུཔིཏབྦཾ, ཡོ ཚུཔེཡྻ, ཨཱཔཏྟི ཐུལླཙྩཡསྶཱ’’ཏི (མཧཱཝ. ༢༥༢) ཨཱགཏནཡཾ དསྶེཏུམཱཧ ¶ ‘‘ནིམིཏྟེནཱ’’ཏིཨཱདི. ཨེཏྠཱཔི ‘‘ཏཐཱ’’ཏི ཨིམསྶཱནུཝཏྟནཏོ ‘‘བཧཱི’’ཏི ལབྦྷཏི. ཨཏྟནོ ནིམིཏྟེན ཏིརཙྪཱནགཏིཏྠིཡཱ ནིམིཏྟཾ མེཐུནརཱགཏོ བཧི ཚུཔནྟསྶ ཐུལླཙྩཡཾ ཧོཏཱིཏི ཡོཛནཱ.

༢༧. ‘‘མེཐུནརཱགཏོ’’ཏི ཨིམིནཱ བྱཝཙྪིནྣམཏྠཾ དསྶེཏུམཱཧ ‘‘ཀཱཡསཾསགྒརཱགེནཱ’’ཏིཨཱདི. ཨེཏྠཱཔི ‘‘ཀཱཡསཾསགྒརཱགེནཱ’’ཏིཝཙནསཱམཏྠིཡཱ བཧི ཚུཔནཾ ཝེདིཏབྦཾ. ནིམིཏྟསྶཱཏི པསྶཱཝམགྒསྶ. ཚུཔནེཏི ཕུསནེ.

༢༨. ཏམཱཝཊྚཀཏེཏི ཨེཏྠ ‘‘ཏཾ ཨཱཝཊྚཀཏེ’’ཏི པདཙྪེདོ. ཨཱཝཊྚཀཏེཏི ཝིཝཊེ. ‘‘མུཁེ’’ཏི སམྦནྡྷིསདྡཏྟཱ, ཨཉྙསྶ སམྦནྡྷིནོ ཙ ཨནིདྡིཊྛཏྟཱ སུཏཱནུལོམིཀཱནཾ སུཏསམྦནྡྷསྶེཝ བལཝཏྟཱ ཙ པུརིམཱནནྟརགཱཐཱཡ ‘‘ཏིརཙྪཱནགཏིཏྠིཡཱ མུཁེ’’ཏི ཀིཉྩཱཔི སུཏསྶེཝ སམྦནྡྷོ ཝིཉྙཱཡཏི, ཏཐཱཔི ཨིམཱཡ གཱཐཱཡ ཝིནཱིཏཝཏྠུམྷི (པཱརཱ. ༧༣) ‘‘ཨཉྙཏརོ བྷིཀྑུ སིཝཐིཀཾ གནྟྭཱ ཚིནྣསཱིསཾ པསྶིཏྭཱ ཝཊྚཀཏེ མུཁེ ཨཙྪུཔནྟཾ ཨངྒཛཱཏཾ པཝེསེསཱི’’ཏི དསྶིཏཚིནྣསཱིསཝཏྠུསྶ སངྒཧིཏཏྟཱ མནུསྶམུཁམེཝ གཧེཏབྦཾ སིཡཱ. ཏིརཙྪཱནགཏཱནཾ, པན ཨམནུསྶཱནཉྩ མུཁེ ཏཐཱ པཝེསོ ནིདྡོསོཏི ཝཏྟུམསཀྐུཎེཡྻཏྟཱ ཏཏྠཱཔི ཨིདམེཝ ཨུཔལཀྑཎནྟི པཱརཱཛིཀཔྤཧོནཀཱནཾ སབྦེསཾ མུཁེཏི དཊྛབྦཾ. ཏཾ ཨངྒཛཱཏཾ. ཏཏྠ ཨཱཝཊྚཀཏེ པཱརཱཛིཀཔྤཧོནཀཱནཾ མུཁེ ཨཱཀཱསགཏཾ ཀཏྭཱ ཀཏྠཙི ཨཕུསཱཔེཏྭཱ ནཱིཧརནྟསྶ ཨུཀྑིཔནྟསྶ དུཀྐཊནྟི ཡོཛནཱ. ཨཐ ཝཱ ཏིརཙྪཱནཱནཾ ཨཱཝཊྚཀཏེ མུཁེཏི ཡོཛེཏྭཱ ཏདཉྙསངྒཧོ ཨུཔལཀྑཎཝསེན ཀཱཏབྦོ.

༢༩. ཏཐཱཏི ¶ ‘‘ཨཱཀཱསགཏཾ ཀཏྭཱ’’ཏི ཡཐཱཝུཏྟཔྤཀཱརཾ པརཱམསཏི. ཙཏཱུཧི པསྶེཧཱིཏི སཧཏྠེ ཀརཎཝཙནཾ. ‘‘པསྶེཧཱི’’ཏི སམྦནྡྷིསདྡཏྟཱ ‘‘ནིམིཏྟསྶཱ’’ཏི སཱམཏྠིཡཱ ལབྦྷཏི. ‘‘ཨིཏྠིཡཱ’’ཏི སཱམཉྙསདྡཏྟཱ ‘‘སབྦསྶཱ’’ཏི པཱཋསེསོ. ཛཱཏིཝཱཙཀཏྟཱ ཨེཀཝཙནཾ. ‘‘ཙཏཱུཧི པསྶེཧི, ཧེཊྛིམཏྟལ’’ནྟི ཙ ཨིམེསཾ སམྦནྡྷིཔདསྶ ཨནིདྡེསེཔི མེཐུནཔཱརཱཛིཀཱདྷིཀཱརཏྟཱ ཙ སནྠཏཙཏུཀྐསྶ ཨཊྛཀཐཱཝསཱནེ ཨིམཱཡ གཱཐཱཡ སངྒཧིཏསྶ ཨིམསྶ ཝིནིཙྪཡསྶ པརིཡོསཱནེ ‘‘ཡཐཱ ཙ ཨིཏྠིནིམིཏྟེ ཝུཏྟཾ, ཨེཝཾ སབྦཏྠ ལཀྑཎཾ ཝེདིཏབྦ’’ནྟི (པཱརཱ. ཨཊྛ. ༡.༦༡-༦༢) ནིམིཏྟཝིནིཙྪཡསྶཱཏིདེསསྶ ¶ ཀཏཏྟཱ ཙ སཱམཏྠིཡེན ‘‘ནིམིཏྟསྶཱ’’ཏི ལབྦྷཏི. ཨིདམེཝ ‘‘པཝེསེཏྭཱ’’ཏི ཨེཏསྶ ཨཱདྷཱརཝསེན གཧེཏབྦཾ. ‘‘ཨངྒཛཱཏ’’ནྟི ཨནུཝཏྟཏི.

ཨེཝཾ ཝཱཀྱཾ པཱུརེཏྭཱ ‘‘ཡཐཱ ཨཱཝཊྚཀཏེ མུཁེ ཨངྒཛཱཏཾ པཝེསེཏྭཱ ཏམཱཀཱསགཏཾ ཀཏྭཱ ནཱིཧརནྟསྶ དུཀྐཊཾ, ཏཐཱ སབྦསྶཱ ཨིཏྠིཡཱ ནིམིཏྟེ པསྶཱཝམགྒསངྑཱཏེ ཨངྒཛཱཏཾ པཝེསེཏྭཱ ཏསྶ ཙཏཱུཧི པསྶེཧི སཧ ཧེཊྛིམཏྟལཾ ཙཏྟཱརོ པསྶེ, ཧེཊྛིམཏྟལཉྩ ཨཙྪུཔནྟཾ ཨཱཀཱསགཏཾ ཀཏྭཱ ནཱིཧརནྟསྶ དུཀྐཊ’’ནྟི ཡོཛེཏྭཱ ཨཏྠོ ཝཏྟབྦོ.

༣༠. ཨུཔྤཱཊིཏོཊྛམཾསེསཱུཏི ཨུཔྤཱཊིཏཾ ཨོཊྛམཾསཾ ཡེསནྟི ཝིགྒཧོ. ཏེསུ དནྟེསུ. བཧིནིཀྑནྟཀེསུ ཝཱཏི པཀཏིཡཱ ཨོཊྛམཾསཏོ བཧི ནིཀྑམིཏྭཱ ཋིཏེསུ ཝཱ དནྟེསུ. ཝཱཡམནྟསྶཱཏི ཨངྒཛཱཏེན ཚུཔནྟསྶ.

༣༡. ཨཊྛིསངྒྷཊྚནཾ ཀཏྭཱཏི ནིམིཏྟམཾསསནྣིསྶཡཱནི ཨཊྛཱིནི སངྒྷཊྚེཏྭཱ. མགྒེཏི ཨཊྛིསངྒྷཱཏམཡེ མགྒེ. དུཝིདྷརཱགཏོཏི ¶ མེཐུནརཱགེན ཝཱ ཀཱཡསཾསགྒརཱགེན ཝཱ. ཝཱཡམནྟསྶཱཏི ཨངྒཛཱཏཾ པཝེསེཏྭཱ ཙཱརེནྟསྶ.

༣༢. ཨཱལིངྒནྟསྶཱཏི པརིསྶཛནྟསྶ. ཧཏྠགཱཧཱདཱིསུ ཧཏྠོ ནཱམ ཀཔྤརཏོ པཊྛཱཡ ཡཱཝ ཨགྒནཁཱ. ཧཏྠསྶ, ཏཔྤཊིབནྡྷསྶ ཙ གཧཎཾ ཧཏྠགྒཱཧོ. ཨཝསེསསརཱིརསྶ, ཏཔྤཊིབནྡྷསྶ ཙ པརཱམསནཾ པརཱམཱསོ. ནིསྶནྡེཧེ པན ‘‘མཱཏུགཱམསྶ སརཱིརསྶ ཝཱ ཏཔྤཊིབནྡྷསྶ ཝཱ ཧཏྠེན གཧཎཾ ཧཏྠགྒཱཧོ’’ཏི ཝུཏྟཾ, ཏཾ ཨཊྛཀཐཱཡ ན སམེཏི. ཏསྨཱ ཡཐཱཝུཏྟནཡསྶེཝ ཨཊྛཀཐཱསུ ཨཱགཏཏྟཱ སོཡེཝ སཱརཏོ པཙྩེཏབྦོ. པརཱམསེཔི ‘‘ཧཏྠེན སརཱིརསྶ, ཏཔྤཊིབནྡྷསྶ ཙ པརཱམསན’’ནྟི ཡཾ ཏཏྠ ཝུཏྟཾ, ཏམྤི ན ཡུཛྫཏི. ཨཝསེསསརཱིརཱཝཡཝེནཱཔི པརཱམསཏོ དུཀྐཊམེཝ ཧོཏཱིཏི. ཙུམྦནཱདཱིསཱུཏི ཨཱདི-སདྡེན ཝེཎིགྒཱཧཱདིཾ སངྒཎྷཱཏི. ‘‘ཨཡཾ ནཡོ’’ཏི ཨེཏེན ‘‘ཨིཏྠིཡཱ མེཐུནརཱགེན ཧཏྠགྒཱཧཱདཱིསུ དུཀྐཊ’’ནྟི ཨིམམཏྠཾ ཨཏིདིསཏི.

༣༣. མནུསྶཱམནུསྶེཧི ཨཉྙེསུ ཏིརཙྪཱནགཏེསུ ཧེཊྛིམཔརིཙྪེདེན མེཐུནདྷམྨཔཱརཱཛིཀཝཏྠུབྷཱུཏེ ¶ སཏྟེ དསྶེཏུམཱཧ ‘‘ཨཔདེ’’ཏིཨཱདི. ‘‘ཨཔདེ, དྭིཔདེ, ཙཏུཔྤདེ’’ཏི ཨིམེཧི ཝིསེསནེཧི ཝིསེསིཏབྦཾ ‘‘སཏྟནིཀཱཡེ’’ཏི ཨིདཾ ཝཏྟབྦཾ. ཨཔདེ སཏྟནིཀཱཡེ. ཨཧཡོཏི ཐལཙརེསུ ཨུཀྐཊྛཔརིཙྪེདཏོ ཧཏྠིགིལནཀེ ཨཛགརེ ཨུཔཱདཱཡ ཧེཊྛིམཔརིཙྪེདེན ནཱགཱ ཙ. མཙྪཱཏི ཛལཛེསུ ཨུཔརིམཀོཊིཡཱ པཉྩསཏཡོཛནིཀཱནི ཏིམིརཔིངྒལཱདིམཙྪེ ཨུཔཱདཱཡ ཧེཊྛིམནྟཏོ པཱཋཱིནཔཱཝུསཱདཡོ མཙྪཱ ཙ. དྭིཔདེ སཏྟནིཀཱཡེ. ཀཔོཏཱཏི ཨུཔརིམཀོཊིཡཱ གརུལེ༹ ཨུཔཱདཱཡ ཧེཊྛིམནྟཏོ ཀཔོཏཱཀཔོཏཔཀྑཱི ཙ. པཱརཱཝཏཱཏི ཀེཙི. ཙཏུཔྤདེ སཏྟནིཀཱཡེ. གོདྷཱཏི ཨུཔརིམཀོཊིཡཱ ཧཏྠིཾ ¶ ཨུཔཱདཱཡ ཧེཊྛིམནྟཏོ གོདྷཱ ཙཱཏི ཨིམེ སཏྟཱ. ཧེཊྛཱཏི ཧེཊྛིམཔརིཙྪེདཏོ. པཱརཱཛིཀསྶཝཏྠཱུཏི མེཐུནདྷམྨཔཱརཱཛིཀསྶ ཝཏྠཱུནཱིཏི པཱཋསེསོ.

༣༤. སེཝེཏུཀཱམཏཱ མེཐུནསེཝཱཡ ཏཎྷཱ, ཏཱཡ མེཐུནརཱགསངྑཱཏཱཡ སམྤཡུཏྟཾ ཙིཏྟཾ སེཝེཏུཀཱམཏཱཙིཏྟཾ. མགྒེཏི ཝཙྩམགྒཱདཱིནཾ ཨཉྙཏརེ མགྒེ. མགྒསྶ ཨཏྟནོ མུཏྟཀརཎསྶ པཝེསནཾ. པབྦཛྫཱཡ, པཱཏིམོཀྑསཾཝརསཱིལསྶ ཝཱ ཨནྟེ ཝིནཱསེ བྷཝོཏི ཨནྟིམོ, པཱརཱཛིཀཱཔནྣོ པུགྒལོ, ཏསྶ ཝཏྠུ ཨནྟིམབྷཱཝསྶ ཀཱརཎཏྟཱ པཱརཱཛིཀཱཔཏྟི ཨནྟིམཝཏྠཱུཏི ཝུཙྩཏི, ཏདེཝ པཋམཾ ཙཏུནྣཾ པཱརཱཛིཀཱནཾ ཨཱདིམྷི དེསིཏཏྟཱ པཋམནྟིམཝཏྠུ, ཏསྶ པཋམནྟིམཝཏྠུནོ, པཋམཔཱརཱཛིཀསྶཱཏི ཝུཏྟཾ ཧོཏི.

༣༥. སཱམནྟཱ ཨཱཔཏྟིསམཱིཔེ བྷཝཾ སཱམནྟཾ, པཱརཱཛིཀཱཔཏྟིཡཱ སམཱིཔེ པུབྦབྷཱགེ བྷཝནྟི ཨཏྠོ. སེསཱནཾ པན ཏིཎྞམྤཱིཏི ཨཝསེསཱནཾ ཨདིནྣཱདཱནཱདཱིནཾ ཏིཎྞཾ པཱརཱཛིཀདྷམྨཱནཾ. ཐུལླཙྩཡཾ སཱམནྟམིཏི ཨུདཱིརིཏནྟི སམྦནྡྷོ. ཀཐམུདཱིརིཏཾ? ‘‘ཕནྡཱཔེཏི, ཨཱཔཏྟི ཐུལླཙྩཡསྶཱ’’ཏི (པཱརཱ. ༩༤) དུཏིཡེ, ‘‘མནུསྶཾ ཨུདྡིསྶ ཨོཔཱཏཾ ཁཎཏི, པཏིཏྭཱ དུཀྑཝེདནཾ ཨུཔྤཱདེཏི, ཨཱཔཏྟི ཐུལླཙྩཡསྶཱ’’ཏི, ཏཏིཡེ, ‘‘པཊིཝིཛཱནནྟསྶ ཨཱཔཏྟི པཱརཱཛིཀསྶ, ཨཔྤཊིཝིཛཱནནྟསྶ ཨཱཔཏྟི ཐུལླཙྩཡསྶཱ’’ཏི (པཱརཱ. ༢༡༥) ཙཏུཏྠེ སམུདཱིརིཏཾ.

ཨེཏྠ ཙ ཙཏུཏྠཔཱརཱཛིཀསྶ ཐུལླཙྩཡཱཔཏྟིཡཱ སཱམནྟཱཔཏྟིབྷཱཝོ ཡསྶ ཨུཏྟརིམནུསྶདྷམྨཾ སམུལླཔཏི, སོ ཡཱཝ ན པཊིཝིཛཱནཱཏི, ཏཱཝ སམུལླཔནཔཙྩཡཱ ཐུལླཙྩཡཱཔཏྟིསམྦྷཱཝེ, སམུལླཔིཏེ ཏསྨིཾ སམུལླཔིཏམཏྠེ པཊིཝིཛཱནནྟེ པཱརཱཛིཀཱཔཏྟིསམྦྷཱཝེ ཙ ཡུཛྫཏི. སོ ¶ ཙ ‘‘ཨཔྤཊིཝིཛཱནནྟསྶ ཝུཏྟེ ཐུལླཙྩཡ’’ནྟི ཨིམིནཱཝ སངྒཧིཏོཏི དཊྛབྦཾ.

༣༦. ཨཛཱནནྟསྶ ¶ ཝཱཏཱུཔཏྠདྡྷཾ ཨངྒཛཱཏཾ དིསྭཱ ཨཏྟནོ རུཙིཡཱ ཝཱིཏིཀྐམཾ ཀཏྭཱ མཱཏུགཱམེསུ གཙྪནྟེསུ ཨཛཱནམཱནསྶ, མཧཱཝནེ དིཝཱ ནིདྡུཔགཏབྷིཀྑུནོ ཝིཡ པརེཧི ཀིརིཡམཱནཾ ཨཛཱནནྟསྶཱཏི ཝུཏྟཾ ཧོཏི. ཏཐེཝཱཏི ཨིམིནཱ ‘‘ཨནཱཔཏྟཱིཏི ཉཱཏབྦ’’ནྟི ཨིདམཱཀཌྜྷཏི. ཨསྶཱདིཡནྟསྶཱཏི བྷིཀྑུཔཙྩཏྠིཀེསུ ཨབྷིབྷཝིཏྭཱ ཝཱིཏིཀྐམཾ ཀརོནྟེསུ ཙ ཀཱརཱཔེནྟེསུ ཙ, སཔྤམུཁཾ པཝིཊྛཀཱལེ ཝིཡ ཨུཏྟསིཏྭཱ ཨནདྷིཝཱསེནྟསྶ ཙ, མཧཱཝནེ དིཝཱཝིཧཱརོཔགཏབྷིཀྑུནོ ཝིཡ པརོཔཀྐམཾ ཉཏྭཱཔི ཀཱཡེ ཨཱདིཏྟཨགྒིནཱ ཝིཡ ཨུཏྟསིཏྭཱ ཨནདྷིཝཱསེནྟསྶཱཏི ཨཏྠོ. ‘‘ཨཛཱནནྟསྶཱ’’ཏི ཨེཏྠ ཨཔི-སདྡོ ཡོཛེཏབྦོ. བུདྡྷསཱསནེ ཁཱིརསཱགརསལིལནིམྨལེ སབྦཔཋམཾ པཱཏུབྷཱུཏཏྟཱ ཨཱདི ཙ ཏཾ ཝཱིཏིཀྐམསངྑཱཏཾ ཀམྨཉྩཱཏི ཨཱདིཀམྨཾ, ཏཾ ཨེཏསྶ ཨཏྠཱིཏི ཨཱདིཀམྨཱི, ཨེཏྠ སུདིནྣོ བྷིཀྑུ, ཏསྶ ཨཱདིཀམྨིནོཏི གཧེཏབྦོ. ཨུཔརིཔི ཨིམེསཾ པདཱནཾ ཨཱགཏཱགཏཊྛཱནེ ཨིམིནཱཝ ནཡེན ཨཏྠོ ཝེདིཏབྦོ. ཨིདྷ ཙ ཨུཔརི སབྦསིཀྑཱཔདེསུ ཙ ནིདཱནཱདིཝསེན སཏྟརསཝིདྷོ སཱདྷཱརཎཝིནིཙྪཡོ པཀིཎྞཀེ སངྑེཔཏོ, ཨུཏྟརེ ཝིཏྠཱརཏོ ཙ ཨཱཝི བྷཝིསྶཏི. ཏསྨཱ ཨེཏྠ ན དསྶིཏོཏི ཝེདིཏབྦཾ.

༣༧-༣༨. ཝིནཡེཏི ཝིནཡཔིཊཀེ. ཨནཡཱུཔརམེཏི ནེཏི པཱཔེཏི སཱིལསམྤདཾ སམཱདྷིསམྤདཾ པཉྙཱསམྤདཉྩཱཏི ནཡོ, ཀཱཡཝཙཱིདྭཱརེཧི ཨཝཱིཏིཀྐམསངྑཱཏོ སཾཝརོ, ཏཔྤཊིཔཀྑོ ཨསཾཝརོ ཨནཡོ ནཱམ, ཏསྶ ཨུཔརམོ ནིཝཏྟི ཨེཏྠཱཏི ཨནཡཱུཔརམོ, ཝིནཡོ, ཏཏྠ ཨནཡཱུཔརམེ ཝིནཡེ.

ཏཏོ ¶ ཨེཝ པརམེ ཨུཀྐཊྛེ. ཨནཡསྶ ཝཱ ཨུཔརམེ ནིཝཏྟནེ པརམེ ཨུཀྐཊྛེཏི གཧེཏབྦཾ. པརཱ ཨུཏྟམཱ མཱ སཱསནསིརཱི ཨེཏྠཱཏི པརམོ, ཝིནཡོཏི ཨེཝམྤི གཧེཏབྦཾ. ‘‘ཝིནཡོ ནཱམ སཱསནསྶ ཨཱཡཱུ’’ཏི (དཱི. ནི. ཨཊྛ. ༡.པཋམསངྒཱིཏིཀཐཱ; པཱརཱ. ཨཊྛ. ༡.པཋམསངྒཱིཏིཀཐཱ; ཁུ. པཱ. ཨཊྛ. ༥.མཧཱསངྒཱིཏིཀཐཱ; ཐེརགཱ. ཨཊྛ. ༡.༢༥༡) ཝཙནཏོ ཨུཏྟམསཱསནསམྤཏྟིཡུཏྟེཏི ཨཏྠོ.

སུཛནསྶཱཏི སོབྷཎོ ཛནོ སུཛནོ, སིཀྑཱཀཱམོ ཨདྷིསཱིལསིཀྑཱཡ སོབྷམཱནོ པིཡསཱིལོ ཀུལཔུཏྟོ, ཏསྶ ནཡནེ ནཡནཱུཔམེ ཝིནཡེཏི སམྦནྡྷོ. ཨནཡཱུཔརམཏྟཱ, པརམཏྟཱ ཙ སུཛནསྶ ཀུལཔུཏྟསྶ ནཡནེ ནཡནཱུཔམེ. སུཁཱནཡནེཏི ལོཀིཡལོཀུཏྟརབྷེདཾ སུཁཾ ཨཱནེཏཱིཏི སུཁཱནཡནཾ, ཏསྨིཾ. ཨིདཉྩ ‘‘ནཡནེ’’ཏི ཨེཏསྶ ཝིསེསནཾ.

ཨེཏཾ ¶ ཝིསེསནཾ ཀིམཏྠནྟི ཙེ? ཨུཔམཱབྷཱཝེན གཧིཏཔཀཏིནཡནཏོ ཨིདྷ སམྦྷཝནྟཾ ཝིསེསཾ དསྶེཏུནྟི ཝེདིཏབྦཾ. ཀཏརོ སོ ཝིསེསོཏི ཙེ? པཀཏིནཡནཾ རཱགདོསཱདིཀིལེསཱུཔནིསྶཡོ ཧུཏྭཱ དིཊྛདྷམྨིཀསམྤརཱཡིཀདུཀྑསྶ ཙ པཙྩཡོ ཧོཏི. ཨིདཾ པན ཝིནཡནཡནཾ ཨིམསྶ ཀུལཔུཏྟསྶ ཨེཝཾ ཨཧུཏྭཱ ཨེཀཾསེན མོཀྑཱཝཧནསུཁསྶེཝ པཙྩཡོ ཧོཏཱིཏི ཨིམསྶ ཝིསེསསྶ དསྶནཏྠཾ. ཡཐཱ ཝིནཡམཝིརཱདྷེཏྭཱ པཊིཔཛྫནེན སིཛ྄ཛྷནཀསཱིལསཾཝརམཱུལཀཨཝིཔྤཊིསཱརཱདིཨནུཔཱདིསེསཔརིནིབྦཱནཱཝསཱ- ནཕལསམྤཏྟིཝསེན ཨུཔྤཛྫནཀལོཀིཡལོཀུཏྟརསུཁཱཝཧནེ ཝིནཡེཏི ཝུཏྟཾ ཧོཏི.

པདྷཱནརཏོཏི ཨེཏྠ ‘‘ཨཔཱི’’ཏི པཱཋསེསོ. པདྷཱནེ ཝིནཡཱབྷིཡོགེ རཏོཔི, ཝིནཡེ ཨཛ྄ཛྷཱཡནསཝནཙིནྟནཱདིཝསེན ཝཱཡམནྟོཔཱིཏི ཨཏྠོ. ཨཐ ཝཱ ‘‘ཝིརཱགོ སེཊྛོ དྷམྨཱན’’ནྟི (དྷ. པ. ༢༧༣; ནེཏྟི. ༡༧༠; ཀཐཱ. ༨༧༢) ཝཙནཏོ པདྷཱནཾ ནིབྦཱནཾ, ཏསྨིཾ རཏོཏི ཨཏྠོ ¶ . སཱརམཏེཏི ‘‘སཱར’’ནྟི ཨདྷིམཏེ. ཨཐ ཝཱ སཱརཾ ཨཕེགྒུམཏཾ མཧཱཝིཧཱརཝཱསཱིནཾ ཨཱཙརིཡམཏཾ ཨེཏྠཱཏི ‘‘སཱརམཏོ’’ཏི ཝིནཡཝིནིཙྪཡོ ཝུཏྟོ, ཏསྨིཾ. ཨིདྷཱཏི ཨིམསྨིཾ ཝིནཡཝིནིཙྪཡེ. རཏོཏི ཨཙྩནྟཱབྷིརཏོ. ‘‘ན རཏོ’’ཏི ཨེཏྠ ན-ཀཱརཾ ‘‘རམཏེ’’ཏི ཨོསཱནཔདེན ཡོཛེཏྭཱ ཡོ པན ན རམཏེཏི སམྦནྡྷོ.

ཐེརནཝམཛ྄ཛྷིམབྷིཀྑུབྷིཀྑུནཱིནཾ ཨནྟརེ ཡོ པན པུགྒལོ ནིཙྩཔརིཝཏྟནསཝནཱནུསྶརཎཙིནྟནཝསེན ན རམཏེ ན ཀཱིལ༹ཏི, སོ པུགྒལོ ཝིནཡེ པདྷཱནརཏོཔི ཝིནཡཔིཊཀེ ཨཛ྄ཛྷཡནསཝནཱདིཝསེན ཡུཏྟཔཡུཏྟོཔི པཊུ ཧོཏི ཀིཾ, ན ཧོཏེཝཱཏི དསྶེཏི. ཝིནཡཔིཊཀེ པཱཊཝམཱཀངྑནྟེཧི པཋམཾ ཏཱཝེཏྠ སཀྐཙྩཾ ཨབྷིཡོགོ ཀཱཏབྦོཏི ཨདྷིཔྤཱཡོ.

ཨིམམེཝཏྠཾ ཨཱནིསཾསཔཱརཾཔརིཡཔཡོཛནེན སཧ དསྶེཏུམཱཧ ‘‘ཨིམ’’ནྟིཨཱདི. ཨིམནྟི ཝུཙྩམཱནཾ ཝིནཡཝིནིཙྪཡཾ, ‘‘ཨཝེདཱི’’ཏི ཨིམིནཱ སམྦནྡྷོ. ‘‘ཡོ’’ཏི པཱཋསེསོ. ཡོ ཀུལཔུཏྟོ སཏིསམྤཛཉྙསདྡྷཱསམྤནྣོ ཨིམཾ ཝིནཡཝིནིཙྪཡཾ སམྨཱ ཨཝེདི ཨཉྙཱསི. ཀིཾ བྷཱུཏནྟི ཨཱཧ ‘‘ཧིཏཝིབྷཱཝན’’ནྟི. ལོཀིཡལོཀུཏྟརསམྤཏྟིཡཱ མཱུལསཱདྷནཏྟཱ སཱིལམིདྷ ཧིཏཾ ནཱམ, ཏཾ ཝིབྷཱཝེཏི པཀཱསེཏཱིཏི ཧིཏཝིབྷཱཝནོཏི ཝིགྒཧོ. ‘‘སཱིལེ པཏིཊྛཱཡ…པེ… ཝིཛཊཡེ ཛཊ’’ནྟི (སཾ. ནི. ༡.༢༣, ༡༩༢; མི. པ. ༢.༡.༩) ཝུཏྟཏྟཱ སབྦཀིལེསཛཊཱཝིཛཊནལོཀུཏྟརཉཱཎསྶ པདཊྛཱནསོཔཙཱརསཱབྷིཉྙཱརཱུཔཱརཱུཔཨཊྛསམཱདྷཱིནཾ པདཊྛཱནཏཱཡ སབྦལོཀིཡལོཀུཏྟརགུཎསམྤདཱནཾ ¶ མཱུལབྷཱུཏེསུ ཙཏུཔཱརིསུདྡྷིསཱིལེསུ པདྷཱནཾ པཱཏིམོཀྑསཾཝརསཱིལཾ, ཏཔྤཀཱསཀཏྟཱ ཨཡཾ ཝིནཡཝིནིཙྪཡོ ‘‘ཧིཏཝིབྷཱཝནོ’’ཏི ཝུཏྟོ.

བྷཱཝནནྟི ¶ བྷཱཝཱིཡཏི པུནཔྤུནཾ ཙེཏསི ནིཝེསཱིཡཏཱིཏི བྷཱཝནོ, བྷཱཝནཱིཡོཏི ཝུཏྟཾ ཧོཏི. ཧིཏཝིབྷཱཝཀཏྟཱཡེཝ ཧིཏཏྠཱིཧི པུནཔྤུནཾ ཙིཏྟེ ཝཱསེཏབྦོཏི ཝུཏྟཾ ཧོཏི, ཏཾ ཨེཝཾཝིདྷཾ ཝིནཡཝིནིཙྪཡཾ. སུརསམྦྷཝནྟི རསཱིཡཏི ཨསྶཱདཱིཡཏཱིཏི རསོ, སདྡརསོ ཨཏྠརསོ ཀརུཎཱདིརསོ ཝིམུཏྟིརསོ ཙ, སོབྷཎོ རསོ ཨེཏསྶཱཏི སུརསོ, ཝིནཡཝིནིཙྪཡོ, ཏཾ སུརསཾ. བྷཝཾ བྷཝནྟཾ, སནྟནྟི ཝུཏྟཾ ཧོཏི, སུརསཾ སམཱནཾ, སུརསཾ བྷཱུཏནྟི ཨཏྠོ. ཀིཾ ཝུཏྟཾ ཧོཏི? ‘‘སིལེསོ པསཱདོ སམཏཱ མདྷུརཏཱ སུཁུམཱལཏཱ ཨཏྠབྱཏྟི ཨུདཱརཏཱ ཨོཛོ ཀནྟི སམཱདྷཱི’’ཏི ཨེཝཾ ཝུཏྟེཧི ཀཝིཛནེཧི ཨསྶཱདེཏབྦསིལེསཱདིདསཝིདྷསདྡཛཱིཝིཏགུཎསངྑཱཏསདྡརསསམྤཏྟཱིཧི ཙ སབྷཱཝཱཁྱཱནཾ ཨུཔམཱ རཱུཔཀཾ དཱིཔཀཾ ཨཱཝུཏྟཱིཏི ཨེཝམཱདིཀྐམནིདྡིཊྛཔཉྩཏིཾསཨཏྠཱལངྐཱརེསུ ཨནུརཱུཔསབྷཱཝཱཁྱཱནཱདིཔྤདྷཱནཨཏྠཱལངྐཱརསངྑཱཏཨཏྠརསསམྤཏྟཱིཧི ཙ ཡཐཱསམྦྷཝཾ པཀཱསིཏབྦཀརུཎཱརསཨབྦྷུཏརསསནྟརསཱདཱིཧི ཙ ཡུཏྟཏྟཱ སུརསཾ ཨིམཾ ཝིནཡཝིནིཙྪཡནྟི ཝུཏྟཾ ཧོཏི.

ཨཐ ཝཱ ཨིམིནཱ པཀརཎེན པདྷཱནཏོ ཝིདྷཱིཡམཱནཔཱཏིམོཀྑསཾཝརསཱིལསྶ ཨེཀནྟེན སམཱདྷིསཾཝཏྟནིཀཏྟཱ སམཱདྷིསྶ ཙ པཉྙཱཡ པདཊྛཱནཏྟཱ པཉྙཱཡ ཙ ནིབྦཱནཔཱཔནཏོ མཱུལཀཱརཎཾ ཧུཏྭཱ ཀམེན ནིབྦཱནཱམཏཕལརསསམྤདཱཡཀཾ ཨིམཾ ཝིནཡཝིནིཙྪཡཾ པརམསྶཱདནཱིཡརཱུཔེན དྷིཏིཝིམུཏྟིརསེན སུརསབྷཱུཏནྟི ཝུཏྟཾ ཧོཏཱིཏི ཙ ཝེདིཏབྦཾ. སམྦྷཝནྟི ཨེཏྠ སཾ ཝུཙྩཏི སུཁཾ ཀཱཡིཀཾ ཙེཏསིཀཉྩ, ཏཾ བྷཝཏི ཨེཏསྨཱཏི སམྦྷཝོ, ཝིནཡཝིནིཙྪཡོ, ཏཾ, ཀཱཡཙིཏྟསུཁཱནཾ མཱུལཀཱརཎབྷཱུཏཾ, ཝུཏྟནཡེན སུརསཏྟཱ ཙ ཡཐཱཝུཏྟརསསམྤདསཱརམཧུསྶཝེན སམྦྷཱུཏམཱནསིཀསུཁསྶ, ཏཾསམུཊྛཱནརཱུཔནིསྶཡཀཱཡིཀསུཁསྶ ཙ པབྷཝབྷཱུཏནྟི ཨཏྠོ. ཨེཏྟཱཝཏཱ ¶ ཨིམསྶ ཝིནཡཝིནིཙྪཡསྶ སམྨཱ ཝིཉྙཱཏབྦཏཱཡ ཀཱརཎཾ དསྶིཏཾ ཧོཏི.

ཨེཝཾ ནཱནཱགུཎརཏནཱཀརཾ ཨིམཾ ཝིནཡཝིནིཙྪཡཾ སམྤཛཱནནྟོ སོ ཀུལཔུཏྟོ ཀིཾ ཧོཏཱིཏི ཙེ? པཱལིནཱ ཨུཔཱལིནཱ སམོ བྷཝཏི. པཱལིནཱཏི སཱསནཾ པཱལེཏཱིཏི ‘‘པཱལོ’’ཏི ཝིནཡོ ཝུཙྩཏི, ཝུཏྟཉྷི ‘‘ཝིནཡོ ནཱམ སཱསནསྶ ཨཱཡཱུ’’ཏི (དཱི. ནི. ཨཊྛ. ༡.པཋམསངྒཱིཏིཀཐཱ; པཱརཱ. ཨཊྛ. ༡.པཋམསངྒཱིཏིཀཐཱ; ཁུ. པཱ. ཨཊྛ. ༥.མཧཱསངྒཱིཏིཀཐཱ; ཐེརགཱ. ཨཊྛ. ༡.༢༥༡) སོ ¶ ཨསྶ ཨཏྠཱིཏི པཱལཱི, པརིཡཏྟིཔཊིཔཏྟིཔཊིཝེདྷཝསེན ཏིཝིདྷསཱསནསྶ ཛཱིཝིཏབྷཱུཏཝིནཡཔཉྙཏྟིསངྑཱཏསཱསནདྷརཏྟཱ ‘‘པཱལཱི’’ཏི ལདྡྷནཱམེན ཨུཔཱལིནཱ, ‘‘ཨེཏདགྒཾ བྷིཀྑཝེ མམ སཱཝཀཱནཾ བྷིཀྑཱུནཾ ཝིནཡདྷརཱནཾ ཡདིདཾ ཨུཔཱལཱི’’ཏི (ཨ. ནི. ༡.༢༡༩, ༢༢༨) ཙཏུཔརིསམཛ྄ཛྷེ ནིསིནྣེན སདྡྷམྨཝརཙཀྐཝཏྟིནཱ སམྨཱསམྦུདྡྷེན མུཁཔདུམཾ ཝིཀཱསེཏྭཱ པཀཱསིཏཨེཏདགྒཊྛཱནེན ཝིསེསཏོ སཱཡནརཀྑནཀབྷཱཝེན པཊིལདྡྷཔཱལཱིཏིནཱམདྷེཡྻེན ཨུཔཱལིམཧཱཐེརེན སམོ ཧོཏཱིཏི ཝུཏྟཾ ཧོཏི.

ཀསྨིཾ ཝིསཡེ སམོ བྷཝཏཱིཏི ཙེ? སཱསནེ. སཱསནེཏི ཡཐཱཝུཏྟེ ཏིཝིདྷེ སཱསནེ, ཏཏྲཱཔི ཐཱཝརཛངྒམསཀལཝཏྠུཝིཏྠཱརཱདྷརམཎྜལསདིསེ པཊིཔཏྟིཔཊིཝེདྷདྭཡདྷཱརེ པརིཡཏྟིསཱསནེ, ཏཏྠཱཔི ཝིནཡཀཐཱདྷིཀཱརཏྟཱ ལབྦྷམཱནེ ཝིནཡཔིཊཀསངྑཱཏཔརིཡཏྟིསཱསནེཀདེསེ སམོ བྷཝཏཱིཏི ཨཏྠོ.

ཀིཾབྷཱུཏེ སཱསནེ? མཱརབལིསཱསནེ. མཱརསྶ བལི མཱརབལི, མཱརགོཙརོ, ཏསྶ སཱསནཾ ཧིཾསཀཾ མཱརབལིསཱསནཾ, ཏསྨིཾ. ཁནྡྷཱདཱིསུ པཉྩསུ མཱརེསུ པདྷཱནབྷཱུཏཀཱམརཱགཱདིཔབྷཝཀིལེསམཱརསྶ གོཙརབྷཱཝེན བལིསངྑཱཏཨིཏྠིསརཱིརཱདིནིསྶཡཕོཊྛབྦཱདིཝིསཡསྶ པརིཙྩཛཱཔནཏྠཾ ‘‘ཡོ པན བྷིཀྑུ…པེ… ཨསཾཝཱསོ’’ཏིཨཱདིནཱ (པཱརཱ. ༤༤) ནཡེན ཝུཏྟཏྟཱ ཏསྶ ¶ མཱརབལིསྶ ཧིཾསཀཾ ཧོཏཱིཏི མཱརབལིསཱསནནཱམདྷེཡྻཝིནཡཔཉྙཏྟིསངྑཱཏསཱསནེཏི ཨཏྠོ.

ཨཐ ཝཱ ‘‘བལི༹སེནཔི ཛཱལེན, ཧཏྠེན ཀུམིནེན ཝཱ’’ཏི ཨུདཀཊྛཀཐཱཡ ཝཀྑམཱནཏྟཱ བལི༹ས-སདྡེན མཙྪམཱརཎཀཎྚཀམཱཧ, ཏཾ མཱརསྶ བལི༹སཾ ཨསཏི ཁིཔཏི ཝཛྫེཏཱིཏི མཱརབལི༹སཱསནཾ, ཏསྨིཾ, ‘‘སམནྟཔཱསོ མཱརསྶཱ’’ཏི ཝུཏྟཏྟཱ སཾསཱརསཱགརེ པརིཝཏྟམཱནཀསཾཀིལེསདཱསཔུཐུཛྫནསངྑཱཏམཙྪེ གཎྷིཏུཾ མཱརམཧཱཀེཝཊྚེན པཀྑིཏྟབལི༹སསངྑཱཏཨིཏྠིརཱུཔསདྡཱདིཔཉྩཀཱམགུཎཱ- མིསཱཝུཏཀཱམརཱགཱདིཀིལེསམཧཱབལི༹སཾ ཏདངྒཔྤཧཱནཝཱིཏིཀྐམཔྤཧཱནཱདིཝསེན པཛཧནྟེ ཝིནཡཔཉྙཏྟིསངྑཱཏེ སཱསནེཏི ཨདྷིཔྤཱཡོ.

ཨེཏྠ ཙ སཱརམཏེ ཨིདྷ ཨིམསྨིཾ ཝིནཡཝིནིཙྪཡེ ཡོ པན ན རམཏེ, སོ པུགྒལོ ཨནཡཱུཔརམེ ¶ ཏཏོ ཨེཝ པརམེ ཨུཏྟམེ སུཛནསྶ སུཁཱནཡནེ ནཡནེ ནཡནུཔམེ ཝིནཡེ རཏོ ཨབྷིརཏོ པདྷཱནརཏོཔི ཝིནཡེ ཨཛ྄ཛྷཱཡནཱདཱིསུ ཡོགམཱཔཛྫནྟོཔི པཊུ ཧོཏི པཊུཏརོ ཧོཏི ཀིཾ, ན ཧོཏེཝ. ཏསྨཱ ཝིནཡེ པཱཊཝཏྠིནཱ ཨེཏྠེཝ སཀྐཙྩཱབྷིཡོགོ ཀཱཏབྦོཏི སངྑེཔཏོ སཱདྷིཔྤཱཡཱ ཨཏྠཡོཛནཱ ཝེདིཏབྦཱ. ཨཐ ཝཱ པདྷཱནེ ཙཏུབྦིདྷེ སམྨཔྤདྷཱནེ ཝཱིརིཡེ རཏོ ཨབྷིརཏོ ཡོ པན ནརོ སཱརམཏེ ཨིདྷ ཨིམསྨིཾ ཝིནཡཝིནིཙྪཡེ ཡཏོ རམཏེ, ཨཏོ ཏསྨཱ སོ ཨནཡཱུཔརམེ སུཛནསྶ སུཁཱནཡནེ ཝིནཡེ པཊུ ཧོཏི ཀུསལོ ཧོཏཱིཏི ཡོཛནཱཏི ནོ ཁནྟི.

ཧིཏཝིབྷཱཝནཾ ཧིཏཔྤཀཱསཀཾ བྷཱཝནཾ བྷཱཝནཱིཡཾ ཨཱསེཝིཏབྦཾ སུརསམྦྷཝཾ སུརསཾ སམཱནཾ སུརསཾ བྷཱུཏཾ སམྦྷཝཾ སུཁཧེཏུཀཾ ཨིམཾ ཝིནཡཝིནིཙྪཡཾ ཡོ ཨཝེདི ཨཉྙཱསི, སོ པུགྒལོ མཱརབལི༹སཱསནེ མཱརཝིསཡཔྤཧཱནཀརེ, ཨཐ ཝཱ མཱརབལི༹སསྶ ¶ མཱརསྶ ཝཏྠུཀཱམཱམིསཱཝུཏཀིལེསཀཱམབལི༹སསྶ ཨསནེ ཝཛྫམཱནེ སཱསནེ ཏིཝིདྷེཔི ཛིནསཱསནེ, ཏཏྠཱཔི པཊིཔཏྟིཔཊིཝེདྷཱནཾ པཏིཊྛཱནབྷཱུཏེ པརིཡཏྟིསཱསནེ, ཏཏྲཱཔི སཀལསཱསནསྶ ཛཱིཝིཏསམཱནེ ཝིནཡཔཉྙཏྟིསངྑཱཏཔརིཡཏྟིསཱསནེཀདེསེ པཱལིནཱ ཝིནཡཔརིཡཏྟིཡཾ ཨེཏདགྒེ ཋཔནེན སཱསནཔཱལནེ ཏཾམཱུལབྷཱཝཏོ པཱལསངྑཱཏཝིནཡཔརིཡཏྟིཡཱ པསཏྠཏརེན ཨུཔཱལིནཱ ཨུཔཱལིམཧཱཐེརེན སམོ བྷཝཏཱིཏི ཡོཛནཱ.

ཨིཏི ཝིནཡཏྠསཱརསནྡཱིཔནིཡཱ

ཝིནཡཝིནིཙྪཡཝཎྞནཱཡ

པཋམཔཱརཱཛིཀཀཐཱཝཎྞནཱ ནིཊྛིཏཱ.

དུཏིཡཔཱརཱཛིཀཀཐཱཝཎྞནཱ

༣༩. ཨིདཱནི དུཏིཡཾ པཱརཱཛིཀཝིནིཙྪཡཾ དསྶེཏུམཱཧ ‘‘ཨཱདིཡནྟོ’’ཏིཨཱདི. ཏཏྠ ‘‘ཐེཡྻཙིཏྟེནཱ’’ཏི པཱཋསེསོ. སོ ཙ པཙྩཏྟེཀཝཙནནྟེཧི སབྦཔདེཧི ཡོཛེཏབྦོ, ཐེཡྻཙིཏྟེན ཨཱདིཡནྟོ པརཱཛིཏོཏི སམྦནྡྷོ. པརསནྟཀཾ ཨཱརཱམཱདིཾ ཨབྷིཡུཉྫིཏྭཱ སཱམིཀཾ པརཱཛེཏྭཱ ཐེཡྻཙིཏྟེན གཎྷནྟོ ཏདཏྠཱཡ ཀཏེ པུབྦཔཡོགེ དུཀྐཊཾ, སཱམིཀསྶ ཝིམཏུཔྤཱདནེ ཐུལླཙྩཡཉྩ ¶ ཨཱཔཛྫིཏྭཱ ཏསྶ ཙ ཨཏྟནོ ཙ དྷུརནིཀྑེཔེན པཱཏིམོཀྑསཾཝརསཱིལསམྤཏྟིཡཱ ཨདཱཡཱདོ ཧུཏྭཱ པརཱཛིཏོ ཧོཏཱིཏི ཝུཏྟཾ ཧོཏི.

‘‘ཏཐཱ’’ཏི ཙ ‘‘ཨཔཱི’’ཏི ཙ ‘‘པརཱཛིཏོ’’ཏི ཙ ‘‘ཐེཡྻཙིཏྟེནཱ’’ཏི ཨིམིནཱ སཧ ཨེཀཏོ ཀཏྭཱ ‘‘ཧརནྟོ’’ཏིཨཱདཱིཧི ཙཏཱུཧིཔི པདེཧི ཡོཛེཏབྦཾ. ཐེཡྻཙིཏྟེན ཧརནྟོཔི ཏཐཱ པརཱཛིཏོཏི ཡོཛནཱ སཱིསཱདཱིཧི པརསནྟཀཾ བྷཎྜཾ ཧརནྟོ ཐེཡྻཙིཏྟེན བྷཎྜསྶ ཨཱམསནེ ¶ དུཀྐཊཉྩ ཕནྡཱཔནེ ཐུལླཙྩཡཉྩ ཨཱཔཛྫིཏྭཱ སཱིསཏོ ཁནྡྷོཧརཎཱདིཔཡོགཾ ཀརོནྟོཔི ཏཐཱ པརཱཛིཏོ ཧོཏཱིཏི ཨཏྠོ.

ཐེཡྻཙིཏྟེན ཨཝཧརནྟོཔི ཏཐཱ པརཱཛིཏོཏི ཡོཛནཱ. ཨཡཾ པནེཏྠ ཨཏྠོ – ཨཉྙེཧི སངྒོཔནཱདིཾ སནྡྷཱཡ ཨཏྟནི ཨུཔནིཀྑིཏྟབྷཎྜཾ ‘‘དེཧི མེ བྷཎྜ’’ནྟི ཙོདིཡམཱནོ ‘‘ན མཡཱ གཧིཏ’’ནྟིཨཱདིནཱ མུསཱ ཝཏྭཱ ཐེཡྻཙིཏྟེན གཎྷནྟོཔི ཏསྶ ཝིམཏུཔྤཱདནེ ཐུལླཙྩཡམཱཔཛྫིཏྭཱ ཏཐེཝ དྷུརནིཀྑེཔེན པརཱཛིཏོ ཧོཏཱིཏི. ‘‘ནཱཧཾ ཨགྒཧེསི’’ནྟིཨཱདིནཱ ཨཝཛཱནིཏྭཱ པཊིཀྑིཔིཏྭཱ ཧརནྟོ ‘‘ཨཝཧརནྟོ’’ཏི ཝུཏྟོ.

ཐེཡྻཙིཏྟེན ཨིརིཡཱཔཐཾ ཝིཀོཔེནྟོཔི ཏཐཱ པརཱཛིཏོཏི ཡོཛནཱ. ཡཾ པན ཨཉྙེསཾ བྷཎྜཧརཎཀམནུསྶཱདཱིནམཉྙཏརཾ ‘‘ཏེན བྷཎྜེན སཧ གཎྷཱམཱི’’ཏི བྷཎྜཾ ཧརནྟཾ ཐེཡྻཙིཏྟེན ནིཝཱརེཏྭཱ ཨཏྟནཱ ཨིཙྪིཏདིསཱབྷིམུཁཾ ཀཏྭཱ ཏསྶ པཀཏིཨིརིཡཱཔཐཾ ཝིཀོཔེནྟོཔི པཋམཔཱདུདྡྷཱརེན ཐུལླཙྩཡམཱཔཛྫིཏྭཱ དུཏིཡཔདཝཱརཱཏིཀྐམེན ཏཐེཝ པརཱཛིཏོ ཧོཏཱིཏི ཨཏྠོ.

ཐེཡྻཙིཏྟེན ཋཱནཱ ཙཱཝེནྟོཔི ཏཐཱ པརཱཛིཏོཏི ཡོཛནཱ. ཐལཱདཱིསུ ཋིཏཾ བྷཎྜཾ ཐེཡྻཙིཏྟེན ཨཝཧརིཏུཀཱམཏཱཡ ཋིཏཊྛཱནཏོ ཨཔནེནྟོཔི དུཏིཡཔརིཡེསནཱདཱིསུ ཨཱམསནཱཝསཱནེསུ སབྦེསུཔི པཡོགེསུ དུཀྐཊཱནི ཙ ཕནྡཱཔནེ ཐུལླཙྩཡཉྩ ཨཱཔཛྫིཏྭཱ ཨུཔརི ཝཀྑམཱནཔྤཀཱརེསུ ཝིཡ ཋིཏཊྛཱནཏོ ཀེསགྒམཏྟམྤི ཨཔནེནྟོ ཏཐེཝ པརཱཛིཏོ ཧོཏཱིཏི ཨཏྠོ.

ཨེཝམེཏཱཡ གཱཐཱཡ ‘‘ཨཱདིཡེཡྻ ཧརེཡྻ ཨཝཧརེཡྻ ཨིརིཡཱཔཐཾ ཝིཀོཔེཡྻ ཋཱནཱཙཱཝེཡྻ སངྐེཏཾ ཝཱིཏིནཱམེཡྻཱ’’ཏི ¶ (པཱརཱ. ༩༢) པདབྷཱཛནཱགཏེསུ ཚསུ པདེསུ ཨཱདོ པཉྩ པདཱནི སངྒཧེཏྭཱ ¶ ཚཊྛཾ པདཾ ཀསྨཱ ན སངྒཧིཏནྟི ཙེ? ཨཡཾ གཱཐཱ ན ཏཾཔདབྷཱཛནཾ དསྶེཏུཾ ཝུཏྟཱ, ཨཐ ཁོ ཏེསཾ པདཱནཾ ཝིནིཙྪཡཾ སནྡྷཱཡ ཨཊྛཀཐཱསུ (པཱརཱ. ཨཊྛ. ༡.༩༢) ཝུཏྟཔཉྩཝཱིསཏིཨཝཧཱརེ དསྶེཏུཾ ཏདཝཡཝབྷཱུཏཔཉྩཔཉྩཀཱནི དསྶེཏུཀཱམེན ཝུཏྟཱ, ཏསྨཱ ཨེཏྠ ཚཊྛཾ པདཾ ན ཝུཏྟནྟི དཊྛབྦཾ. ཨཐ ཝཱ ཝཀྑམཱནེ ཏཏིཡཔཉྩཀེ ནིསྶགྒིཡཱཝཧཱརཔདེན, པཉྩམཔཉྩཀེ པརིཀཔྤཱཝཧཱརཔདེན ཙ སངྒཡ྄ཧམཱནཏྟཱ ཨེཏྠ ནཱནེཀབྷཎྜཔཉྩཀདྭཡཾ ཨསངྐརཏོ དསྶེཏུཾ ཚཊྛཾ པདཾ ན གཧིཏནྟི ཝེདིཏབྦཾ.

༤༠. ཨིམསྨིཾ ཨདིནྣཱདཱནཔཱརཱཛིཀེ ཝཏྠུམྷི ཨོཏིཎྞེ ཀཏྟབྦཝིནིཙྪཡསྶ པཉྩཝཱིསཏིཨཝཧཱརཱནཾ ཨངྒཱནི ཧོནྟི, ཏེ ཙ ནཱནཱབྷཎྜཔཉྩཀཾ ཨེཀབྷཎྜཔཉྩཀཾ སཱཧཏྠིཀཔཉྩཀཾ པུབྦཔཡོགཔཉྩཀཾ ཐེཡྻཱཝཧཱརཔཉྩཀནྟི ནིདྡིཊྛཱ པཉྩཔཉྩཀབྷེདཱ, ཏཏྠ ཨིམཱཡ གཱཐཱཡ ནཱནེཀབྷཎྜཔཉྩཀདྭཡཔྤབྷེདེ དས ཨཝཧཱརེ སངྒཧེཏྭཱ ཨཝསེསཔཉྩཀཏྟཡཾ དསྶེཏུཾ ‘‘ཏཏྠཱ’’ཏི ཨཱརདྡྷཾ. ཏཏྠ ཏཏྠཱཏི ཏིསྶཾ གཱཐཱཡཾ. ནཱནེཀབྷཎྜཱནནྟི ནཱནཱ, ཨེཀོ ཙ བྷཎྜོ ཡེསནྟི ཝིགྒཧོ. སཝིཉྙཱཎཀཨཝིཉྙཱཎཀབྷཎྜཝསེན ནཱནཱབྷཎྜཔཉྩཀཉྩ སཝིཉྙཱཎཀབྷཎྜཝསེནེཝ ཨེཀབྷཎྜཔཉྩཀཉྩ ཝེདིཏབྦཾ. པཉྩ པརིམཱཎཱ ཡེསནྟེ པཉྩཀཱ, ཏེསཾ. ཨཝཧཱརཱཏི ཨཝཧརཎཱནི, ཙོརཀམྨཱནཱིཏི ཝུཏྟཾ ཧོཏི. ཨེཏེཏི ཨནནྟརགཱཐཱཡ ‘‘ཨཱདིཡནྟོ’’ཏིཨཱདིནཱ ནིདྡིཊྛཱ ཨཱདིཡནྟཱདཡོ. པཊིཔཏྟིསནྟཱནེ ཝིསེསཾ ཝིནིཙྪཡཾ བྷཱཝེཏི ཨུཔྤཱདེཏཱིཏི ཝིབྷཱཝཱི, ཝིནཡདྷརོ, ཏེན ཝིབྷཱཝིནཱ. ཝིཉྙཱཏབྦཱཏི པརེསཾ ཨཱརཱམཱདིསཝིཉྙཱཎཀཝཏྠཱུནི ཝཱ དཱསམཡཱུརཱདིཾ ཀེཝལཾ སཝིཉྙཱཎཀཝཏྠུམཏྟཾ ཝཱ ཨཝཧརིཏུཾ ཀཏཱ ཡཐཱཝུཏྟསརཱུཔཱ ཨཱདིཡནཱདཡོ ཋཱནཱཙཱཝནཔརིཡོསཱནཱ ¶ པཉྩ ཨཝཧཱརཱ ཡཐཱཝུཏྟནཱནཱབྷཎྜཨེཀབྷཎྜཝིསཡཱ ཧུཏྭཱ པཝཏྟནྟཱིཏི ནཱནཱབྷཎྜཔཉྩཀཾ ཨེཀབྷཎྜཔཉྩཀནྟི དས ཨཝཧཱརཱ བྷཝནྟཱིཏི ཝིནཡདྷརེན ཨོཏིཎྞསྶ ཝཏྠུནོ ཝིནིཙྪཡོཔཀཱརཀཏྟཱ ཏཐཏོ ཉཱཏབྦཱཏི ཨཏྠོ.

༤༡. ཨེཝཾ པཉྩཝཱིསཏི ཨཝཧཱརེ དསྶེཏུཾ ཝཏྟབྦེསུ པཉྩསུ པཉྩཀེསུ ནཱནེཀབྷཎྜཔཉྩཀཱནི དྭེ དསྶེཏྭཱ ཨིདཱནི ཨཝསེསཔཉྩཀཏྟཡཾ དསྶེཏུམཱཧ ‘‘སཱཧཏྠཱ’’ཏིཨཱདི. ཏཏྠ སཱཧཏྠོཏི སཀོ ཧཏྠོ, ཏེན ནིབྦཏྟོ, ཏསྶ ཝཱ སམྦནྡྷཱིཏི སཱཧཏྠོ, ཨཝཧཱརོ, ཙོརེན སཧཏྠཱ ཀཏོ ཨཝཧཱརོཏི ཨཏྠོ. ཨཱཎཏྟིཀོ ཙེཝཱཏི ཨཱཎཏྟིཡཱ ནིབྦཏྟོ ཨཱཎཏྟིཀོ, ཨཝཧཱརོ, ཙོརསྶ ‘‘ཨིམཾ ནཱམ བྷཎྜཾ གཎྷཱ’’ཏི ཡསྶ ཀསྶཙི ཨཱཎཱཔནེན ¶ སིདྡྷོ ཨཝཧཱརོ ཙ. ནིསྶགྒོཏི ནིསྶཛྫནཾ ནིསྶགྒོ, ཨཝཧཱརོ, སུངྐགྷཱཏཊྛཱནེ, པརིཀཔྤིཏོཀཱསེ ཝཱ ཋཏྭཱ བྷཎྜསྶ བཧི པཱཏནནྟི ཝུཏྟཾ ཧོཏི.

ཨཏྠསཱདྷཀོཏི པཱརཱཛིཀཱཔཏྟིསངྑཱཏཾ ཨཏྠཾ སཱདྷེཏཱིཏི ཨཏྠསཱདྷཀོ, སོ ཨཝཧཱརོ ཙ ཡཐཱཎཏྟིཀཾ ཨཝིརཱདྷེཏྭཱ ཨེཀཾསེན ཨཝཧརནྟསྶ ‘‘ཨསུཀསྶ བྷཎྜཾ ཨཝཧརཱ’’ཏི ཨཝིསེསེན ཝཱ ཨཝཧརིཏབྦཝཏྠུཝིསེསོ གཧཎཀཱལོ གཧཎདེསོ གཧཎཱཀཱརོ ཙཱཏི ཨེཝམཱདིཝིསེསཱནམཉྙཏརེན ཝིསེསེཏྭཱ ཝཱ ཨཱཎཱཔནཉྩ ཨེཀཾསེན པཱདགྒྷནཀཏེལཔིཝནཀཾ ཨུཔཱཧནཱདིཀིཉྩིཝཏྠུཾ ཏེལབྷཱཛནཱདཱིསུ པཱཏནཱདིཔྤཡོགོ ཙཱཏི ཨེཝམཱདིཔྤཡོགོ ཙ ཀིརིཡཱསིདྡྷིཡཱ པུརེཏརམེཝ པཱརཱཛིཀསངྑཱཏསྶ ཨཏྠསྶ སཱདྷནཏོ ཨཏྠསཱདྷཀོ ཨཝཧཱརོ ཙཱཏི ཝུཏྟཾ ཧོཏི.

དྷུརནིཀྑེཔནཉྩཱཏི ¶ དྷུརསྶ ནིཀྑེཔནཾ དྷུརནིཀྑེཔནཾ, ཏཉྩ ཨཝཧཱརོ, པརསནྟཀཱནཾ ཨཱརཱམཱདཱིནཾ ཨབྷིཡོགཝིསཡེ ཙ ཨུཔནིཀྑིཏྟསྶ བྷཎྜཱདིནོ ཝིསཡེ ཙ ཙོརསྶ སཱམིནོ ཝིསྶཛྫནེ ཙ སཱམིནོ ཙ, ཡདཱ ཀདཱཙི ཡཐཱཀཐཉྩི གཎྷིསྶཱམཱིཏི གཧཎེ ནིརུསྶཱཧབྷཱཝསངྑཱཏོ དྷུརནིཀྑེཔཱཝཧཱརོ ཙཱཏི ཝུཏྟཾ ཧོཏི. ཨིཏི ཨིདཾ དྷུརནིཀྑེཔནཉྩ ཡཐཱཝུཏྟཔྤཀཱརཾ སཱཧཏྠཱདིཙཏུཀྐཉྩ པཉྩནྣཾ ཨཝཧཱརཱནཾ སམཱུཧོ པཉྩཀཾ, སཱཧཏྠཱདིཔཉྩཀཾ ‘‘སཱཧཏྠཔཉྩཀ’’ནྟི ཝུཙྩཏི. ཨཱདི-སདྡོ ལུཏྟནིདྡིཊྛོཏི ཝེདིཏབྦཾ.

༤༢. པུབྦསཧཔཡོགཱ ཙཱཏི ཨེཏྠ ‘‘པུབྦཔཡོགོ སཧཔཡོགོ’’ཏི པཡོག-སདྡོ པཙྩེཀཾ ཡོཛེཏབྦོ. ‘‘ཨཱཎཏྟིཝསེན པུབྦཔཡོགོ ཝེདིཏབྦོ’’ཏི ཨཊྛཀཐཱཝཙནཏོ (པཱརཱ. ཨཊྛ. ༡.༩༢) ཡཐཱཎཏྟིཀམཝིརཱདྷེཏྭཱ གཎྷཏོ ‘‘ཨསུཀསྶ ཨིཏྠནྣཱམཾ བྷཎྜཾ ཨཝཧརཱ’’ཏི ཨཱཎཱཔནཾ པུབྦཔཡོགོ ནཱམ ཨཝཧཱརོ. ཀཱཡེན, ཝཱཙཱཡ ཝཱ པཡུཛྫནཾ ཨཱཎཱཔནཾ པཡོགོ, ཨཱཎཏྟསྶ བྷཎྜགྒཧཎཏོ པུབྦཏྟཱ པུབྦོ ཙ སོ པཡོགོ ཙཱཏི པུབྦཔཡོགོ ཨཝཧཱརོཏི དཊྛབྦཾ. ‘‘ཋཱནཱཙཱཝནཝསེན སཧཔཡོགོ ཝེདིཏབྦོ’’ཏི ཨཊྛཀཐཱཝཙནསྶ ཨུཔལཀྑཎཔདཏྟཱ ཋཱནཱཙཱཝནཉྩ པརཱཡཏྟབྷཱུམིགཧཎེ ཁཱིལསངྐམནཱདིཀཉྩ སཧཔཡོགོ ཨཝཧཱརོཏི ཝེདིཏབྦོ.

སཾཝིདཱཧརཎནྟི བཧཱུཧི ཨེཀཏོ ཧུཏྭཱ ‘‘ཨིདཾ ནཱམ བྷཎྜཾ ཨཝཧརིསྶཱམཱ’’ཏི སཾཝིདཧིཏྭཱ སབྦེཧི, ཨེཀཏོ ཝཱ སབྦེསཾ ཨནུམཏིཡཱ ཨེཀེན ཝཱ གནྟྭཱ པརསནྟཀསྶ ཐེཡྻཙིཏྟེན ཧརཎསངྑཱཏོ སཾཝིདཱཝཧཱརོ ཙ. སམཾ ཨེཀཱི ཧུཏྭཱ ཝིསུཾ ཨེཀེནཱཔི ཐེཡྻཙིཏྟེན པཱདེ ཝཱ པཱདཱརཧེ ¶ ཝཱ གཧིཏེ ཀཏམནྟནཱནཾ སབྦེསམྤི པཱརཱཛིཀཾ ཧོཏཱིཏི དཊྛབྦཾ ¶ . སཾཝིདཧིཏྭཱ མནྟེཏྭཱ ཨཝཧརཎཾ སཾཝིདཱཧརཎཾ. ནིརུཏྟིནཡེན སདྡསིདྡྷི ཝེདིཏབྦཱ. ‘‘སཾཝིདཱཧརཎ’’ནྟི ‘‘སཾཝིདཱཝཧཱརོ’’ཏི ཨིམསྶ ཝེཝཙནཾ. ‘‘སམྦཧུལཱ སཾཝིདཧིཏྭཱ ཨེཀོ བྷཎྜཾ ཨཝཧརཏི, ཨཱཔཏྟི སབྦེསཾ པཱརཱཛིཀསྶཱ’’ཏི (པཱརཱ. ༡༡༨) ཝཙནཏོ ཨེཝཾ སཧཀཏམནྟནེསུ ཨེཀེནཱཔི ཐེཡྻཙིཏྟེན པཱདེ ཝཱ པཱདཱརཧེ ཝཱ གཧིཏེ ཀཏམནྟནཱནཾ སབྦེསཾ པཱརཱཛིཀཾ ཧོཏཱིཏི དཊྛབྦཾ.

སངྐེཏཀམྨནྟི པུབྦཎྷཱདིཀཱལཔརིཙྪེདེན སཉྫཱནནཾ སངྐེཏོ, ཏེན ཀཏཾ ཀམྨཾ ཨཝཧརཎཾ སངྐེཏཀམྨཾ ནཱམ. ཏཾ པན པུརེབྷཏྟཱདཱིསུ ཀཉྩི ཀཱལཾ པརིཙྪིནྡིཏྭཱ ‘‘ཨིམསྨིཾ ཀཱལེ ཨིཏྠནྣཱམཾ བྷཎྜཾ ཨཝཧརཱ’’ཏི ཝུཏྟེ ཏསྨིཾཡེཝ ཀཱལེ ཏཾཡེཝ ཡཐཱཝུཏྟཾ བྷཎྜཾ ཨཝཧརཏི ཙེ, སངྐེཏཀཱརཀསྶ སངྐེཏཀྑཎེཡེཝ པཱརཱཛིཀནྟི སངྑེཔཏོ ཝེདིཏབྦཾ.

ནེམིཏྟནྟི པརབྷཎྜཱཝཧཱརསྶ ཧེཏུཏྟཱ ཨཀྑིནིཁཎནཱདི ནིམིཏྟཾ ནཱམ, ཏེན ནིབྦཏྟཾ ནེམིཏྟཾ, ཨཝཧརཎསངྑཱཏཀམྨཾ ཨཝཧཱརོ. ‘‘མཡཱ ཨཀྑིམྷི ནིཁཎིཏེ ཝཱ བྷམུམྷི ཨུཀྑིཏྟེ ཝཱ ཨིཏྠནྣཱམཾ བྷཎྜཾ ཨཝཧརཱ’’ཏི ཨཱཎཏྟེན ཏཾ ནིམིཏྟཾ དིསྭཱ ཝུཏྟམེཝ བྷཎྜཾ ཝུཏྟནིཡཱམམཝིརཱདྷེཏྭཱ གཧིཏཾ ཙེ, ནིམིཏྟཀཱརཀསྶ ནིམིཏྟཀརཎཀྑཎེཡེཝ པཱརཱཛིཀཾ ཧོཏི. ཝུཏྟནིཡཱམཾ ཝིརཱདྷེཏྭཱ གཧིཏཾ ཙེ, ནིམིཏྟཀཱརཀོ མུཙྩཏི, ཨཝཧཱརཀསྶེཝ པཱརཱཛིཀཾ. པུབྦཔཡོགོ ཨཱདི ཡསྶ ཏཾ པུབྦཔཡོགཱདི, པུབྦཔཡོགཱདི ཙ ཏཾ པཉྩཀཉྩཱཏི ཝིགྒཧོ.

༤༣. ཐེཡྻཉྩ པསཡ྄ཧཉྩ པརིཀཔྤོ ཙ པཊིཙྪནྣོ ཙ ཀུསོ ཙ ཐེཡྻཔསཡ྄ཧཔརིཀཔྤཔཊིཙྪནྣཀུསཱ, ཏེ ཨཱདཱི ཨུཔཔདབྷཱུཏཱ ཡེསཾ ཨཝཧཱརཱནཾ ཏེ ཐེཡྻ…པེ… ཀུསཱདིཀཱ ¶ , ཨཝཧཱརཱ, ཨིམིནཱ ཐེཡྻཱཝཧཱརོ ཙ…པེ… ཀུསཱཝཧཱརོ ཙཱཏི ཝུཏྟཾ ཧོཏི. ཏཏྠ ཐེཡྻཱཝཧཱརོཏི ཐེནོ ཝུཙྩཏི ཙོརོ, ཏསྶ བྷཱཝོ ཐེཡྻཾ, ཨེཏྠ ན-ཀཱརལོཔོ ནིརུཏྟིནཡེན དཊྛབྦོ, ཏེན ཨཝཧརཎཾ ཐེཡྻཱཝཧཱརོ, སནྡྷིཙྪེདཱདིཝསེན ཨདིསྶམཱནེན གཧཎཉྩ ཀཱུཊམཱནཀཱུཊཀཧཱཔཎཱདཱིཧི ཝཉྩེཏྭཱ གཧཎཉྩ ཐེཡྻཱཝཧཱརོ.

པསཡ྄ཧ ཨབྷིབྷཝིཏྭཱ ཨཝཧརཎཾ པསཡ྄ཧཱཝཧཱརོ, གཱམཝིལོཔཀཱ ཝིཡ སཱམིཀེ ཨབྷིབྷཝིཏྭཱ གཧཎཉྩ རཱཛབྷཊཱདཡོ ཝིཡ ཨབྷིབྷཝིཏྭཱ ནིབདྡྷཀརགྒཧཎེ ཨདྷིཀགྒཧཎཉྩ པསཡ྄ཧཱཝཧཱརོ.

ཝཏྠསུཏྟཱདིཀཾ ¶ པརིཙྪིཛྫ ཀཔྤེཏྭཱ ཨཝཧརཎཾ པརིཀཔྤཱཝཧཱརོ, སོ ཙ བྷཎྜོཀཱསཔརིཀཔྤཝསེན དུཝིདྷོ ཧོཏི. ཏཏྠ ནིཀྑིཏྟབྷཎྜཾ ཨནྡྷཀཱརཔྤདེསཾ པཝིསིཏྭཱ སུཏྟཱདིབྷཎྜཱནི ཏཏྠ ནིཀྑིཏྟཱནི, ཏེ པེལཱ༹དཡོ གཎྷནྟསྶ ‘‘ཝཏྠཱནི ཙེ གཎྷིསྶཱམི, སུཏྟཱནི ཙེ ན གཎྷིསྶཱམཱི’’ཏིཨཱདིནཱ ནཡེན པརིཀཔྤེཏྭཱ ཨུཀྑིཔནཾ བྷཎྜཔརིཀཔྤཔུབྦཀཏྟཱ བྷཎྜཔརིཀཔྤཱཝཧཱརོ ནཱམ. ཨཱརཱམཔརིཝེཎཱདཱིནི པཝིསིཏྭཱ ལོབྷནཱིཡཾ བྷཎྜཾ དིསྭཱ གབྦྷཔཱསཱདཏལཔམུཁམཱལ༹ཀཔཱཀཱརདྭཱརཀོཊྛཀཱདིཾ ཡཾ ཀིཉྩི ཋཱནཾ པརིཀཔྤེཏྭཱ ‘‘ཨེཏྠནྟརེ དིཊྛོ ཙེ, ཨོལོཀེཏུཾ གཧིཏཾ ཝིཡ དསྶཱམི, ནོ ཙེ, ཧརིསྶཱམཱི’’ཏི པརིཀཔྤེཏྭཱ ཨཱདཱཡ གནྟྭཱ པརིཀཔྤིཏཊྛཱནཱཏིཀྐམོ ཨོཀཱསཔརིཀཔྤཔུབྦཀཏྟཱ ཨོཀཱསཔརིཀཔྤཱཝཧཱརོ ནཱམཱཏི སངྑེཔཏོ ཝེདིཏབྦོ.

ཏིཎཔཎྞཱདཱིཧི ¶ པཊིཙྪནྣསྶ བྷཎྜསྶ ཨཝཧརཎཾ པཊིཙྪནྣཱཝཧཱརོ, ཨུཡྻཱནཱདཱིསུ ཀཱིལ༹མཱནེཧི ཝཱ སངྒྷཔརིཝིསནྟེཧི ཝཱ མནུསྶེཧི ཨོམུཉྩིཏྭཱ ཋཔིཏཾ ཨལངྐཱརཱདིཀཾ ཡཾ ཀིཉྩི བྷཎྜཾ དིསྭཱ ‘‘ཨོཎམིཏྭཱ གཎྷནྟེ ཨཱསངྐནྟཱི’’ཏི ཋཏྭཱ ཏིཎཔཎྞཔཾསུཝཱལུཀཱདཱིཧི པཊིཙྪཱདེཏྭཱ སཱམིཀེསུ པརིཡེསིཏྭཱ ཨདིསྭཱ སཱལཡེསུ གཏེསུ པཙྪཱ ཐེཡྻཙིཏྟེན གཧཎཉྩ ཏདེཝ བྷཎྜཾ ཀདྡམཱདཱིསུ ཐེཡྻཙིཏྟེན ཨངྒུཊྛཱདཱིཧི པཱིལེ༹ཏྭཱ ཨོསཱིདཱཔེཏྭཱ ཧེཊྛཱབྷཱགེན ཕུཊྛཊྛཱནཾ ཨུཔརིབྷཱགེན ཨཏིཀྐམནཉྩ པཊིཙྪནྣཱཝཧཱརོཏི ཝུཏྟཾ ཧོཏི.

ཀུསེན ཨཝཧཱརོ ཀུསཱཝཧཱརོ, ཐེཡྻཙིཏྟེན ཀུསཾ སངྐཱམེཏྭཱ པརཀོཊྛཱསསྶ ཨགྒྷེན མཧནྟསྶ ཝཱ སམསམསྶ ཝཱ གཧཎནྟི ཨཏྠོ. ཡོ པན བྷིཀྑུ ཀུསཔཱཏནེན སངྒྷསྶ ཙཱིཝརེསུ བྷཱཛིཡམཱནེསུ ཨཏྟནོ ཀོཊྛཱསེན སམཾ ཝཱ ཨདྷིཀཾ ཝཱ ཨཱུནཀཾ ཝཱ ཨགྒྷེན པཉྩམཱསཀཾ ཝཱ ཨཏིརེཀཔཉྩམཱསཀཾ ཝཱ ཨགྒྷནཀཾ ཨཉྙསྶ ཀོཊྛཱསཾ ཨཝཧརིཏུཀཱམོ ཨཏྟནོ ཀོཊྛཱསེ པཏིཏཾ ཀུསཾ པརཀོཊྛཱསེ པཱཏེཏུཀཱམོ ཨུདྡྷརཏི, ཏངྑཎེ ཙ པརསྶ ཀོཊྛཱསེ པཱཏིཏཀྑཎེ ཙ ན པཱརཱཛིཀཾ ཨནཱཔཛྫིཏྭཱ པརཀོཊྛཱསཏོ པརནཱམལིཁིཏཾ ཀུསཾ ཨུཀྑིཔེནྟོ ཏཏོ ཀེསགྒམཏྟམྤི ཨཔནཱམེཏི, པཱརཱཛིཀོ ཧོཏི. ཡདི པཋམཾ པརཀོཊྛཱསཏོ ཀུསཾ ཨུདྡྷརཏི, ཨུདྡྷཊཀྑཎེ ཙ ཨཏྟནོ ཀོཊྛཱསེ པཱཏིཏཀྑཎེ ཙ སཀནཱམལིཁིཏཾ ཀུསཾ ཨུདྡྷརཎཀྑཎེ ཙ པཱརཱཛིཀཾ ཨནཱཔཛྫིཏྭཱ པརཀོཊྛཱསེ པཱཏནཀྑཎེ ཧཏྠཏོ ཀེསགྒམཏྟམྤི མུཏྟེ པཱརཱཛིཀོ ཧོཏི.

ཡདི ¶ དྭེཔི ཀུསེ པཊིཙྪཱདེཏྭཱ སབྦེསུ བྷིཀྑཱུསུ སཀསཀཀོཊྛཱསཾ ཨཱདཱཡ གཏེསུ ཡསྨིཾ ཀུསཾ པཊིཙྪཱདེསི, ཏསྶ སཱམིཀེན ཨཱགནྟྭཱ ‘‘མཡ྄ཧཾ ཀུསོ ཀསྨཱ ན ¶ དིསྶཏཱི’’ཏི ཝུཏྟེ ཙོརོ ‘‘མཡ྄ཧམྤི ཀུསོ ན དིསྶཏཱི’’ཏི ཝཏྭཱ ཨཏྟནོ ཀོཊྛཱསཾ ཏསྶ སནྟཀཾ ཝིཡ དསྶེཏྭཱ ཏསྨིཾ ཝིཝདིཏྭཱ ཝཱ ཨཝིཝདིཏྭཱ ཝཱ གཧེཏྭཱ གཏེ ཨིཏརཾ ཀོཊྛཱསཾ ཨུདྡྷརཏི ཙེ, ཨུདྡྷཊཀྑཎེཡེཝ པཱརཱཛིཀོ ཧོཏི. ཡདི པརོ ‘‘མཡ྄ཧཾ ཀོཊྛཱསཾ ཏུཡ྄ཧཾ ན དེམི, ཏྭཾ ཏུཡ྄ཧཾ ཀོཊྛཱསཾ ཝིཙིནིཏྭཱ གཎྷཱཧཱི’’ཏི ཝདཏི, ཨེཝཾ ཝུཏྟེ སོ ཨཏྟནོ ཨསྶཱམིཀབྷཱཝཾ ཛཱནནྟོཔི པརསྶ ཀོཊྛཱསཾ ཨུདྡྷརཏི, ཨུདྡྷཊཀྑཎེ པཱརཱཛིཀོ ཧོཏི. ཡདི པརོ ཝིཝཱདབྷཱིརུཀཏྟཱ ‘‘ཀིཾ ཝིཝཱདེནཱ’’ཏི ཙིནྟེཏྭཱ ‘‘མཡ྄ཧཾ ཝཱ པཏྟཾ ཧོཏུ ཏུཡ྄ཧཾ ཝཱ, ཝརཀོཊྛཱསཾ ཏྭཾ གཎྷཱཧཱི’’ཏི ཝདེཡྻ, དིནྣཀཾ ནཱམ གཧིཏཾ ཧོཏཱིཏི པཱརཱཛིཀཾ ན ཧོཏཱིཏི. ཡདི ‘‘ཏཝ རུཙྩནཀཾ གཎྷཱཧཱི’’ཏི ཝུཏྟོ ཝིཝཱདབྷཡེན ཨཏྟནོ པཏྟཾ ཝརབྷཱགཾ ཋཔེཏྭཱ ལཱམཀབྷཱགཾ གཧེཏྭཱ གཏོ, ཙོརོ པཙྪཱ གཎྷནྟོ ཝིཙིཏཱཝསེསཾ ནཱམ ཨགྒཧེསཱིཏི པཱརཱཛིཀོ ན ཧོཏི. ཨེཝཾ ཀུསཱཝཧཱརཝིནིཙྪཡོ ཝེདིཏབྦོ. ཨཡམེཏྠ པཉྩཝཱིསཏིཡཱ ཨཝཧཱརེསུ སངྑེཔོ, ཝིཏྠཱརོ པན སམནྟཔཱསཱདིཀཱཡ ཝིནཡསཾཝཎྞནཱཡ ཝུཏྟནཡེནེཝ ཝེདིཏབྦོ.

༤༤. ཨེཏྟཱཝཏཱ ཨདིནྣཱདཱནཔཱརཱཛིཀསྶ ཝིནིཙྪཡཱཝཡཝརཱུཔེན ཨུགྒཧེཏབྦེ པཉྩཝཱིསཏི ཨཝཧཱརེ དསྶེཏྭཱ ཨིདཱནི ཨདིནྣཱདཱནཝིནིཙྪཡེ སམྤཏྟེ སཧསཱ ཨཱཔཏྟིཾ ཨནཱརོཔེཏྭཱ པཋམཾ ཨོལོཀེཏབྦཱནི པཉྩ ཋཱནཱནི དསྶེཏུཾ ‘‘ཝཏྠུཀཱལགྒྷདེསེ ཙཱ’’ཏིཨཱདི ཨཱརདྡྷཾ.

ཏཏྠ ཝཏྠུ ནཱམ ཨཝཧཊབྷཎྜཾ. ཀིཾ ཝུཏྟཾ ཧོཏི? ཨཝཧཱརཀེན ‘‘མཡཱ ཨིཏྠནྣཱམཾ བྷཎྜཾ ཨཝཧཊ’’ནྟི ཝུཏྟེཔི ཏསྶ བྷཎྜསྶ སསྶཱམིཀཨསྶཱམིཀབྷཱཝཾ ཨུཔཔརིཀྑིཏྭཱ སསྶཱམིཀཾ ¶ ཙེ, ཨཝཧཱརཀཱལེ ཏེསཾ སཱལཡབྷཱཝཾ ཝཱ ནིརཱལཡབྷཱཝཾ ཝཱ ནིཡམེཏྭཱ སཱལཡཀཱལེ ཙེ གཧིཏཾ, བྷཎྜཾ ཨགྒྷཱཔེཏྭཱ མཱསཀཾ ཝཱ ཨཱུནམཱསཀཾ ཝཱ ཧོཏི, དུཀྐཊེན, ཨཏིརེཀམཱསཀཾ ཝཱ ཨཱུནཔཉྩམཱསཀཾ ཝཱ ཧོཏི, ཐུལླཙྩཡེན, པཉྩམཱསཀཾ ཝཱ ཨཏིརེཀཔཉྩམཱསཀཾ ཝཱ ཧོཏི, པཱརཱཛིཀེན ཀཱཏབྦོ. སཱམིཀཱནཾ ནིརཱལཡཀཱལེ ཙེ གཧིཏཾ, ནཏྠི པཱརཱཛིཀཾ. བྷཎྜསཱམིཀེ པན བྷཎྜཾ ཨཱཧརཱཔེནྟེ ཏཾ ཝཱ བྷཎྜཾ ཏདགྒྷནཀཾ ཝཱ དཱཏབྦནྟི.

ཀཱལོ ནཱམ ཨཝཧཱརཀཱལོ. བྷཎྜཾ ནཱམེཏཾ ཀདཱཙི མཧགྒྷཾ ཧོཏི, ཀདཱཙི སམགྒྷཾ. ཏསྨཱ ¶ ཨཝཧཊབྷཎྜསྶ ཨགྒྷཾ པརིཙྪིནྡནྟེཧི ཨཝཧཊཀཱལཱནུརཱུཔཾ ཀཏྭཱ པརིཙྪིནྡནཏྠཾ ཀཱལཝིནིཙྪཡོ ཀཱཏབྦོཏི ཝུཏྟཾ ཧོཏི.

ཨགྒྷོ ནཱམ ཨཝཧཊབྷཎྜསྶ ཨགྒྷོ. ཨེཏྠ ཙ སབྦདཱ བྷཎྜཱནཾ ཨགྒྷོ སམཱནརཱུཔོ ན ཧོཏི, ནཝབྷཎྜཾ མཧགྒྷཾ ཧོཏི, པུརཱཎཾ ཙེ སམགྒྷཾ. ཏསྨཱ ཨཝཧཱརཀཱལེ བྷཎྜསྶ ནཝབྷཱཝཾ ཝཱ པུརཱཎབྷཱཝཾ ཝཱ ནིཡམེཏྭཱ ཨགྒྷོ པརིཙྪིནྡིཏབྦོཏི ཨདྷིཔྤཱཡོ.

དེསོ ཙཱཏི བྷཎྜཱཝཧཱརདེསོ. ཨེཏྠ ཙ སབྦསྶཱཔི བྷཎྜསྶ ཨུཊྛཱནདེསེ སམགྒྷཾ ཧུཏྭཱ ཨཉྙཏྠ མཧགྒྷཏྟཱ ཨཝཧཊབྷཎྜེ ཨགྒྷཾ པརིཙྪིནྡིཏྭཱ ཏདནུརཱུཔཱ ཨཱཔཏྟིཡོ ནིཡམནྟེཧི ཨགྒྷཾ པརིཙྪིནྡནཏྠཱཡ ཨཝཧཱརདེསཾ ནིཡམེཏྭཱ ཏསྨིཾ དེསེ ཨགྒྷཝསེན ཏདནུརཱུཔཱ ཨཱཔཏྟིཡོ ཀཱརེཏབྦཱཏི ཨདྷིཔྤཱཡོ.

པརིབྷོགོ ནཱམ ཨཝཧཊབྷཎྜེ ཨཝཧཱརཏོ པུབྦེ པརེཧི ཀཏཔརིབྷོགོ. ཨེཏྠ ཙ ཡསྶ ཀསྶཙི བྷཎྜསྶ པརིབྷོགེན ཨགྒྷོ པརིཧཱཡཏཱིཏི བྷཎྜསཱམིཀཾ པུཙྪིཏྭཱ ཏསྨིཾ ¶ བྷཎྜེ ནཝེཔི ཨེཀཝཱརམྤི ཡེན ཀེནཙི པཀཱརེན པརིབྷུཏྟེ པརིཧཱཔེཏྭཱ ཨགྒྷོ པརིཙྪིནྡིཏབྦོཏི ཝུཏྟཾ ཧོཏི.

ཨེཝམཱདིནཱ ནཡེན ཨེཏཱནི པཉྩ ཋཱནཱནི ཨུཔཔརིཀྑིཏྭཱཝ ཝིནིཙྪཡོ ཀཱཏབྦོཏི དསྶེཏུམཱཧ ‘‘པཉྩཔི ཉཏྭཱ ཨེཏཱནི ཀཏྟབྦོ པཎྜིཏེན ཝིནིཙྪཡོ’’ཏི.

༤༥. ཨེཏྟཱཝཏཱ ཨདིནྣཱདཱནཝིནིཙྪཡཱཝཡཝབྷཱུཏེ པཉྩཝཱིསཏི ཨཝཧཱརེ ཙ པཉྩཊྛཱནཱཝལོཀནཉྩ དསྶེཏྭཱ ཨིདཱནི ཨནཱགཏེ པཱཔབྷིཀྑཱུནཾ ལེསོཀཱསཔིདཧནཏྠཾ པརསནྟཀཾ ཡཾ ཀིཉྩི ཝཏྠུཾ ཡཏྠ ཀཏྠཙི ཋིཏཾ ཡེན ཀེནཙི པཀཱརེན གཎྷཏོ མོཀྑཱབྷཱཝཾ དསྶེཏུཀཱམེན ཏཐཱགཏེན ཡཱ པནེཏཱ –

བྷཱུམཊྛཉྩ ཐལཊྛཉྩ;

ཨཱཀཱསཊྛ མཐཱཔརཾ;

ཝེཧཱསཊྛོ ¶ དཀཊྛཉྩ;

ནཱཝཱ ཡཱནཊྛམེཝ ཙ.

བྷཱརཱ རཱམ ཝིཧཱརཊྛཾ;

ཁེཏྟ ཝཏྠུཊྛམེཝ ཙ;

གཱམཱ རཉྙཊྛ མུདཀཾ;

དནྟཔོནོ ཝནཔྤཏི.

ཧརཎཀོ པནིདྷི ཙེཝ;

སུངྐགྷཱཏཀཾ པཱཎཀཱ;

ཨཔདཾ དྭིཔདཉྩེཝ;

ཙཏུཔྤདཾ བཧུཔྤདཾ.

ཨོཙརཀོཎིརཀྑོ ཙ;

སཾཝིདཱཧརཎམྤི ཙ;

སངྐེཏཀམྨཾ ནིམིཏྟ-

མིཏི ཏིཾ སེཏྠ མཱཏིཀཱ. –

ནིཀྑིཏྟཱ ¶ , ཏཱསཾ ཡཐཱཀྐམཾ པདབྷཱཛནེ, ཏདཊྛཀཐཱཡ ཙ ཨཱགཏནཡེན ཝིནིཙྪཡཾ དསྶེཏུཀཱམོ པཋམཾ ཏཱཝ བྷཱུམཊྛེ ཝིནིཙྪཡཾ དསྶེཏུམཱཧ ‘‘དུཏིཡཾ ཝཱཔཱི’’ཏིཨཱདི.

ཏཏྠ དུཏིཡཾ ཐེཡྻཙིཏྟེན པརིཡེསཏོ དུཀྐཊནྟི སམྦནྡྷོ. ཨེཝཾ སབྦཔདེསུ. ཨུཔརི སཉྫཱཏཱཧི རུཀྑལཏཱཧི, ཨིཊྛཀཔཱསཱཎཱདཱིཧི ཙ སཉྪནྣཾ མཧཱནིདྷིཾ ཨུདྡྷརིཏུཀཱམེན ‘‘མཡཱ ཨེཀེནེཝ ན སཀྐཱ’’ཏི ཨཏྟནོ ཨཉྙཾ སཧཱཡཾ པརིཡེསིཏུཾ ཐེཡྻཙིཏྟེན སཡིཏཊྛཱནཱ ཨུཊྛཱནཱདཱིསུ སབྦཔཡོགེསུ དུཀྐཊཾ ཧོཏཱིཏི ཨཏྠོ. ཀུདཱལཾ བྷཱུམིཁཎནཏྠཱཡ པིཊཀཾ ཝཱཔི པཾསུཨུདྡྷརཎཏྠཱཡ ཡཾ ཀིཉྩི བྷཱཛནཾ. ཨིམེསུ དྭཱིསུ ཀུདཱལསྶ ཙེ དཎྜོ ནཏྠི, དཎྜཏྠཱཡ རུཀྑཏོ དཎྜཾ ཚིནྡཏོ ཙ ཀུདཱལོ ཙེ ན ཧོཏི, ཀུདཱལཀརཎཏྠཱཡ ཨཡོབཱིཛཾ ཨུདྡྷརཎཏྠཱཡ ཨཀཔྤིཡཔཐཝིཾ ཁཎནྟསྶཔི པཙྪིཀརཎཏྠཱཡ པཎྞཱནི ཚིནྡཏོཔི པིཊཀཝཱཡནཏྠཱཡ ཝལླིཾ ཚིནྡཏོཔི ¶ ཨུབྷཡཏྠཱཔི པརིཡེསནེ མུསཱ བྷཎཏོཔི དུཀྐཊཉྩེཝ པཱཙིཏྟིཡཉྩ, ཨིཏརཔཡོགེསུ དུཀྐཊམེཝཱཏི ཝེདིཏབྦཾ.

གཙྪཏོཏི དུཏིཡཱདིཾ པརིཡེསིཏྭཱ ལདྡྷཱ ཝཱ ཨལདྡྷཱ ཝཱ ནིདྷིཊྛཱནཾ གཙྪནྟསྶ པདེ པདེ དུཀྐཊནྟི ཨཏྠོ. ཨེཏྠ ཙ ‘‘ཐེཡྻཙིཏྟོ དུཏིཡཾ ཝཱ པརིཡེསཏཱི’’ཏིཨཱདི པཱལི༹ཡཾ (པཱརཱ. ༩༤) ‘‘ཐེཡྻཙིཏྟོ’’ཏི ཝུཏྟཏྟཱ, ཨིདྷ ‘‘ཐེཡྻཙིཏྟེནཱ’’ཏི ཝཙནཏོ ‘‘ཨིམཾ ནིདྷིཾ ལབྷིཏྭཱ བུདྡྷཔཱུཛཾ ཝཱ ཀརིསྶཱམི, སངྒྷབྷཏྟཾ ཝཱ ཀརིསྶཱམཱི’’ཏི ཨེཝམཱདིནཱ ནཡེན ཀུསལཙིཏྟཔྤཝཏྟིཡཱ སཏི ཨནཱཔཏྟཱིཏི དཊྛབྦཾ. པུབྦཡོགཏོཏི ཨདིནྣཱདཱནསྶ པུབྦཔཡོགབྷཱཝཏོ, དུཏིཡཔརིཡེསནཱདཱིསུ པུབྦཔཡོགེསུ དུཀྐཊནྟི ཨཏྠོ.

དུཀྐཊཉྩ ¶ ཨཊྛཝིདྷཾ ཧོཏི པུབྦཔཡོགདུཀྐཊཾ སཧཔཡོགདུཀྐཊཾ ཨནཱམཱསདུཀྐཊཾ དུརུཔཙིཎྞདུཀྐཊཾ ཝིནཡདུཀྐཊཾ ཉཱཏདུཀྐཊཾ ཉཏྟིདུཀྐཊཾ པཊིསྶཝདུཀྐཊནྟི. ཏཏྠ ‘‘ཐེཡྻཙིཏྟོ དུཏིཡཾ ཝཱ ཀུདཱལཾ ཝཱ པིཊཀཾ ཝཱ པརིཡེསཏི གཙྪཏི ཝཱ, ཨཱཔཏྟི དུཀྐཊསྶཱ’’ཏི ཝུཏྟཾ པུབྦཔཡོགདུཀྐཊཾ ནཱམ. ཨིདྷ པཱཙིཏྟིཡཊྛཱནེ པཱཙིཏྟིཡཾ, ཨིཏརེསུ པུབྦཔཡོགེསུ དུཀྐཊཾ. ‘‘ཏཏྠཛཱཏཀཾ ཀཊྛཾ ཝཱ ལཏཾ ཝཱ ཚིནྡཏི, ཨཱཔཏྟི དུཀྐཊསྶཱ’’ཏི ཝུཏྟཾ སཧཔཡོགདུཀྐཊཾ. ཨིདྷ ཨདིནྣཱདཱནསཧིཏཔཡོགཏྟཱ པཱཙིཏྟིཡཝཏྠུམྷི, ཨིཏརཏྲ ཙ དུཀྐཊམེཝཱཏི ཨཡམེཏྠ ཝིསེསོ. མུཏྟཱམཎིཨཱདཱིསུ དསསུ རཏནེསུ, སཱལིཨཱདཱིསུ སཏྟསུ དྷཉྙེསུ, སབྦེསུ ཙ ཨཱཝུདྷབྷཎྜཱདཱིསུ ཨཱམསནཔཙྩཡཱ དུཀྐཊཾ ཨནཱམཱསདུཀྐཊཾ. ཀདལིནཱལི༹ཀེརཔནསཱདིརུཀྑཊྛམེཝ ཕལཾ ཨཱམསནྟསྶ ཝུཏྟཾ དུཀྐཊཾ དུརུཔཙིཎྞདུཀྐཊཾ. ཨུཔཙརཎཾ ཨུཔཙིཎྞཾ, པརཱམསནནྟི ཨཏྠོ. དུཊྛུ ཨུཔཙིཎྞཾ དུརུཔཙིཎྞཾ, དུརུཔཙིཎྞེ དུཀྐཊཾ དུརུཔཙིཎྞདུཀྐཊཾ. བྷིཀྑཱཙཱརཀཱལེ པཏྟེ རཛསྨིཾ པཏིཏེ པཏྟཾ ཨཔྤཊིགྒཧེཏྭཱ ཝཱ ཨདྷོཝིཏྭཱ ཝཱ བྷིཀྑཱཔཊིགྒཧཎེན དུཀྐཊཾ ཝིནཡདུཀྐཊཾ, ཝིནཡེ པཉྙཏྟཾ དུཀྐཊཾ ཝིནཡདུཀྐཊཾ. ཀིཉྩཱཔི ཨཝསེསདུཀྐཊཱནིཔི ཝིནཡེ པཉྙཏྟཱནེཝ, ཏཐཱཔི རུལ༹ྷིཡཱ མཡཱུརཱདིསདྡེཧི མོརཱདཡོ ཝིཡ ཨིདམེཝ ཏཐཱ ཝུཙྩཏི. ‘‘སུཏྭཱ ན ཝདནྟི, ཨཱཔཏྟི དུཀྐཊསྶཱ’’ཏི ཝུཏྟཾ ཉཱཏདུཀྐཊཾ ནཱམ. ཨེཀཱདསསུ སམནུབྷཱསནཱསུ ‘‘ཉཏྟིཡཱ དུཀྐཊ’’ནྟི ཝུཏྟཾ ཉཏྟིདུཀྐཊཾ. ‘‘ཏསྶ བྷིཀྑཝེ བྷིཀྑུནོ པུརིམིཀཱ ཙ ན པཉྙཱཡཏི, པཊིསྶཝེ ཙ ཨཱཔཏྟི དུཀྐཊསྶཱ’’ཏི (མཧཱཝ. ༢༠༧) ཝུཏྟཾ པཊིསྶཝདུཀྐཊཾ ནཱམ. ཨིམེསུ ཨཊྛསུ དུཀྐཊེསུ ཨིདྷ ཨཱཔཛྫིཏབྦཾ དུཀྐཊཾ པུབྦཔཡོགདུཀྐཊཾ ནཱམ. ཏེནཱཧ ‘‘པུབྦཡོགཏོ’’ཏི. གཱཐཱབནྡྷསུཁཏྠཾ ¶ ཨུཔསགྒཾ ཨནཱདིཡིཏྭཱ ‘‘པུབྦཔཡོགཏོ’’ཏི ཝཏྟབྦེ ‘‘པུབྦཡོགཏོ’’ཏི ཝུཏྟནྟི གཧེཏབྦཾ.

ཨེཏྠ ¶ ཙ ཀིཉྩཱཔི ཨིམེསུ དུཀྐཊེསུ ཨསངྒཧིཏཱནི ཨུབྷཏོཝིབྷངྒཱགཏཱནི དིཝཱསེཡྻཱདིདུཀྐཊཱནི ཙེཝ ཁནྡྷཀཱགཏཱནི ཙ བཧཱུནི དུཀྐཊཱནི སནྟི, ཏཱནི པནེཏྠ ཝིནཡདུཀྐཊེཡེཝ སངྒཧིཏབྦཱནི. ‘‘ཝིནཡེ པཉྙཏྟཾ དུཀྐཊཾ ཝིནཡདུཀྐཊ’’ནྟི ཧི སཱརཏྠདཱིཔནིཡཾ (སཱརཏྠ. ཊཱི. ༢.༩༤) ཝུཏྟནྟི. ཨཊྛཀཐཱཡཾ (པཱརཱ. ཨཊྛ. ༡.༩༤) པན རཛོཀིཎྞདུཀྐཊསྶེཝ ‘‘ཝིནཡདུཀྐཊ’’ནྟི གཧཎཾ ཨུཔལཀྑཎམཏྟཾ. ཨིཏརཐཱ ཨཊྛ དུཀྐཊཱནཱིཏི གཎནཱཔརིཙྪེདོཡེཝ ནིརཏྠཀོ སིཡཱཏི པུབྦཔཡོགེ དུཀྐཊཱདཱིནམྤི ཝིནཡདུཀྐཊེཡེཝ སངྒཧེཏབྦབྷཱཝེཔི ཀཏིཔཡཱནི དསྶེཏྭཱ ཨིཏརེསམེཀཏོ དསྶནཏྠཾ ཏེསཾ ཝིསུཾ གཧཎཾ སུཏྟངྒསངྒཧིཏཏྟེཔི གེཡྻགཱཐཱདཱིནཾ ཨཊྛནྣཾ ཝིསུཾ དསྶནཾ ཝིཡཱཏི ཝེདིཏབྦཾ.

༤༦. ཏཏྠཛཱཏཀཾ ཀཊྛཾ ཝཱཏི ཏསྨིཾ ཙིརནིཧིཏནིདྷཱུཔརི ཛཱཏཾ ཨལླཾ སུཀྑཾ ཀཊྛཾ ཝཱ. ལཏཾ ཝཱཏི ཏཱདིསཾ ཝལླིཾ ཝཱ. ཨིདཾ ཨུཔལཀྑཎཾ ཏིཎཱདཱིནཾ ཁུདྡཀགཙྪཱནཉྩ གཧེཏབྦཏྟཱ. ཨུབྷཡཏྠཱཔཱིཏི ཨལླེ ཙ སུཀྑེ ཙཱཏི ཝུཏྟཾ ཧོཏི. ཨལླརུཀྑཱདཱིནི ཚིནྡཏོ པཱཙིཏྟིཡཾ ཨཧུཏྭཱ དུཀྐཊམཏྟསྶ བྷཝནེ ཀཱརཎཾ དསྶེཏི ‘‘སཧཔཡོགཏོ’’ཏི. ཨཝཧཱརེན སཧིཏཔཡོགཏྟཱ པཱཙིཏྟིཡཊྛཱནེཔི དུཀྐཊམེཝཱཏི ཝུཏྟཾ ཧོཏི. ‘‘སཧཔཡོགཏོ ཨུབྷཡཏྠཱཔི དུཀྐཊ’’ནྟི ཝདནྟོ པཋམགཱཐཱཡ དསྶིཏཔུབྦཔཡོགཏོ ཨིམཱཡ དསྶིཏསཧཔཡོགསྶ ཝིསེསཾ དསྶེཏི.

༤༧. པཐཝིནྟི ཀཔྤིཡཾ ཝཱ ཨཀཔྤིཡཾ ཝཱ པཐཝིཾ. ཨཀཔྤིཡཔཐཝིཾ ཁཎཏོ སཧཔཡོགཏྟཱ དུཀྐཊམེཝ. བྱཱུཧཏོཏི པཾསུཾ ཨེཀཏོ རཱསིཾ ཀརོནྟསྶ. ‘‘ཝིཡཱུཧཏི ཨེཀཔསྶེ རཱསིཾ ཀརོཏཱི’’ཏི ཨཊྛཀཐཱཝཙནཏོ ཨཱུཧ-ཨིཙྩེཏསྶ དྷཱཏུནོ ཝིཏཀྐེ ཨུཔྤནྣཏྟེཔི དྷཱཏཱུནམནེཀཏྠཏྟཱ ཝི-ཨུཔསགྒཝསེན ¶ ཨིདྷ རཱསིཀརཎེ ཝཏྟཏཱིཏི གཧེཏབྦཾ. རཱསིབྷཱུཏཾ པཾསུཾ ཀུདཱལེན ཝཱ ཧཏྠེན ཝཱ པཙྪིཡཱ ཝཱ ཨུདྡྷརནྟསྶ ཙ ཨཔནེནྟསྶ ཙ པཡོགགཎནཱཡ དུཀྐཊཾ པཾསུམེཝ ཝཱཏི ཨེཏྠ ཨཝུཏྟསམུཙྩཡཏྠེན ཝཱ-སདྡེན སངྒཧིཏནྟི དཊྛབྦཾ. ཨཱམསནྟསྶཱཏི ནིདྷིཀུམྦྷིཾ ཧཏྠེན པརཱམསནྟསྶ. ཝཱཏི སམུཙྩཡེ. དུཀྐཊནྟི དུཊྛུ ཀཏཾ ཀིརིཡཾ སཏྠཱརཱ ཝུཏྟཾ ཝིརཱདྷེཏྭཱ ཁལིཏྭཱ ཀཏཏྟཱཏི དུཀྐཊཾ. ཝུཏྟཉྩེཏཾ པརིཝཱརེ (པརི. ༣༣༩) –

‘‘དུཀྐཊནྟི ¶ ཧི ཡཾ ཝུཏྟཾ, ཏཾ སུཎོཧི ཡཐཱཏཐཾ;

ཨཔརདྡྷཾ ཝིརདྡྷཉྩ, ཁལིཏཾ ཡཉྩ དུཀྐཊ’’ནྟི.

དུཊྛུ ཝཱ ཝིརཱུཔཾ ཀཏཾ ཀིརིཡཱཏི དུཀྐཊཾ. ཝུཏྟམྤི ཙེཏཾ པརིཝཱརེ (པརི. ༣༣༩) –

‘‘ཡཾ མནུསྶོ ཀརེ པཱཔཾ, ཨཱཝི ཝཱ ཡདི ཝཱ རཧོ;

‘དུཀྐཊ’ནྟི པཝེདེནྟི, ཏེནེཏཾ ཨིཏི ཝུཙྩཏཱི’’ཏི.

ཨེཝཾ ‘‘ཏཏྠཛཱཏཀ’’ནྟིཨཱདིགཱཐཱདྭཡཱགཏཾ ཚེདནདུཀྐཊཾ ཁཎནདུཀྐཊཾ བྱཱུཧནདུཀྐཊཾ ཨུདྡྷརཎདུཀྐཊཾ ཨཱམསནདུཀྐཊནྟི པཉྩསུ སཧཔཡོགདུཀྐཊེསུ པུརིམཔུརིམཔཡོགེཧི ཨཱཔནྣཱ དུཀྐཊཱཔཏྟིཡོ པཙྪིམཾ པཙྪིམཾ དུཀྐཊཾ པཏྭཱ པཊིཔསྶམྦྷནྟི, ཏཾཏཾཔཡོགཱཝསཱནེ ལཛྫིདྷམྨཾ ཨོཀྐམིཏྭཱ ཨོརམཏི ཙེ, ཏཾཏཾདུཀྐཊམཏྟཾ དེསེཏྭཱ པརིསུདྡྷོ ཧོཏི. དྷུརནིཀྑེཔམཀཏྭཱ ཕནྡཱཔེནྟསྶ ཐུལླཙྩཡཾ པཏྭཱ ཨཱམསནདུཀྐཊཾ པཊིཔསྶམྦྷཏཱིཏི མཧཱཨཊྛཀཐཱཡཾ (པཱརཱ. ཨཊྛ. ༡.༩༤) ཝུཏྟཾ. ཡཐཱཔཱལི༹ཡཱ གཡ྄ཧམཱནེ པུརིམཔུརིམཱཔཏྟཱིནཾ པཊིཔསྶདྡྷི ‘‘ཉཏྟིཡཱ དུཀྐཊཾ, དྭཱིཧི ¶ ཀམྨཝཱཙཱཧི ཐུལླཙྩཡཱ པཊིཔསྶམྦྷནྟཱི’’ཏི པཱལི༹ཡཾ (པཱརཱ. ༤༡༤, ༤༢༡, ༤༢༨, ༤༣༩) ཨཱགཏཏྟཱ ཨནུསྶཱཝནཱཡ ཨེཝ ལབྦྷཏཱིཏི དཊྛབྦཾ. ཨིམསྶ པན སུཏྟསྶ ཨནུལོམཝསེན མཧཱཨཊྛཀཐཱཡཾ ཝུཏྟཱ ཨིམསྨིཾ ཨདིནྣཱདཱནསིཀྑཱཔདེཔི ཨཱཔཏྟིཔཊིཔསྶདྡྷི པམཱཎནྟི ནིཊྛམེཏྠ གནྟབྦཾ.

༤༨. ‘‘ཕནྡཱཔེཏི, ཨཱཔཏྟི ཐུལླཙྩཡསྶ. ཋཱནཱ ཙཱཝེཏི, ཨཱཔཏྟི པཱརཱཛིཀསྶཱ’’ཏི (པཱརཱ. ༩༤) ཝུཏྟཾ ཋཱནཱཙཱཝནེ པཱརཱཛིཀཉྩ ཏསྶ སཱམནྟཱཔཏྟིབྷཱུཏཾ ཐུལླཙྩཡཉྩ ཋཱནབྷེདཝིཉྙཱཔནམུཁེན ཝཏྟབྦནྟི ཨིདཱནི ཏཾ དསྶེཏུམཱཧ ‘‘མུཁེཔཱས’’ནྟིཨཱདི. ཏཏྠ མུཁེ ཀུམྦྷིམུཁཝཊྚིཡཾ. པཱསཾ པཝེསེཏྭཱཏི བནྡྷནཾ པཱསཾ པཀྑིཔིཏྭཱ. ཁཱཎུཀེཏི ཨཡོཁཱཎུམྷི, ཁདིརཁཱཎུཀེ ཝཱ. བདྡྷཀུམྦྷིཡཱ ཋཱནབྷེདོ བནྡྷནཱནཾ ཝསཱ ཉེཡྻོཏི སམྦནྡྷོ.

༤༩. ཨིདཱནི ཋཱནབྷེདཾ དསྶེཏི ‘‘དྭེ’’ཏིཨཱདིནཱ. ‘‘ཨེཀསྨིཾ ཁཱཎུཀེ’’ཏི ཨིམིནཱ དྭཱིསུ དིསཱསུ ཝཱ ཏཱིསུ ཙཏཱུསུ ཝཱ དིསཱསུ ཁཱཎུཀེ ཁཎིཏྭཱ བདྡྷཁཱཎུགཎནཱཡ སམྦྷཝནྟོ ཋཱནབྷེདོ ¶ ཨུཔལཀྑིཏོ ཧོཏི. ཝལཡཾ…པེ… ཀཏཱཡ ཝཱ དྭེ ཋཱནཱནཱིཏི ཡོཛནཱ. ཝཱཏི སམུཙྩཡེ ཨུཔལཀྑིཏོ ཧོཏི.

༥༠. ཨེཝཾ ཋཱནབྷེདཾ དསྶེཏྭཱ ཨིདཱནི ཋཱནཝསེན ཨཱཔཛྫིཏབྦཱ ཨཱཔཏྟིཡོ དསྶེཏུམཱཧ ‘‘ཨུདྡྷརནྟསྶཱ’’ཏིཨཱདི. སངྑལིནྟི དཱམཾ. ཐུལླཙྩཡནྟི ཨེཀསྶ སནྟིཀེ དེསེཏབྦཱསུ ཨཱཔཏྟཱིསུ ཐཱུལཏྟཱ, ཨཙྩཡཏྟཱ ཙ ཐུལླཙྩཡཾ ནཱམ. ཝུཏྟཉྷེཏཾ པརིཝཱརེ –

‘‘ཐུལླཙྩཡནྟི ¶ ཡཾ ཝུཏྟཾ;

ཏཾ སུཎོཧི ཡཐཱཏཐཾ;

ཨེཀསྶ མཱུལེ ཡོ དེསེཏི;

ཡོ ཙ ཏཾ པཊིགཎྷཏི;

ཨཙྩཡོ ཏེན སམོ ནཏྠི;

ཏེནེཏཾ ཨིཏི ཝུཙྩཏཱི’’ཏི. (པརི. ༣༣༩);

ཨེཏྠ ཙ ཐཱུལཙྩཡནྟི ཝཏྟབྦེ ‘‘སམྤརཱཡེ ཙ (སཾ. ནི. ༡.༤༩) སུགྒཏི, ཏཾ ཧོཏི ཀཊུཀཔྥལ’’ནྟིཨཱདཱིསུ (དྷ. པ. ༦༦) ཝིཡ ལཀཱརསྶ དྭིཏྟཾ, སཾཡོགེ ཨཱུཀཱརསྶ རསྶོ ཙ ཝེདིཏབྦོ. ཏཏོ སངྑལིཀབྷེདཏོ པརཾ. ཋཱནཱ ཙཱཝེཏཱིཏི ཋིཏཊྛཱནཏོ ཀེསགྒམཏྟམྤི ཨཔནེཏི. ཨེཏྠ ཙ ནཱཝཊྛཀཐཱཡཾ ‘‘ཨུདྡྷཾ ཝཱ ཨདྷོ ཝཱ ཏིརིཡཾ ཝཱ ཨནྟམསོ ཀེསགྒམཏྟམྤི སངྐཱམེཏི, ཨཱཔཏྟི པཱརཱཛིཀསྶཱ’’ཏི (པཱརཱ. ༩༩) ཝུཏྟནཡེན ‘‘ཏིརིཡ’’ནྟི ཝུཏྟཱ ཙཏསྶོ དིསཱ, ཨུདྡྷམདྷོ ཙཱཏི ཚཊྛཱནཱནི. ཏཱསུ ཨེཀཾ དིསཾ ཨཔནཱིཡམཱནཱཡ ཀུམྦྷིཡཱ ཏཾདིསཱབྷིམུཁཾ ཨིཏརདིསཱཡཾ ཋིཏཔསྶེ ཨོརིམདིསཱཡ ཋིཏཔསྶེན ཕུཊྛོཀཱསསྶ ཀེསགྒམཏྟམྤི ཨནཏིཀྐནྟེ ཕནྡཱཔནཝསེན ཐུལླཙྩཡཾ ཧོཏི, ཨཏིཀྐནྟེ ཋཱནཱ ཙཱཝིཏཏྟཱ པཱརཱཛིཀཾ ཧོཏཱིཏི ཝེདིཏབྦོ. ཨིམམེཝ སནྡྷཱཡཱཧ ‘‘ཋཱནཱ ཙཱཝེཏི ཙེ ཙུཏོ’’ཏི. ཨེསེཝ ནཡོ ཕནྡནརཧིཏཱཡ ནིདྷིཀུམྦྷིཡཱ ཋཱནཱཙཱཝནེཔི.

༥༡. ཨེཝཾ པཋམཾ བནྡྷནཾ ཚིནྡིཏྭཱ པཙྪཱ ཀུམྦྷིགྒཧཎེ ནཡཾ དསྶེཏྭཱ ཨིདཱནི པཋམཾ ཀུམྦྷིཾ ཨཔནེཏྭཱ པཙྪཱ བནྡྷནཱཔནཡནེ ནཡཾ དསྶེཏུམཱཧ ‘‘པཋམ’’ནྟིཨཱདི. སོ ནཡོཏི ‘‘པཋམུདྡྷཱརེ ཐུལླཙྩཡཾ, དུཏིཡུདྡྷཱརེ པཱརཱཛིཀ’’ནྟི ཏམེཝཏྠམཏིདིསཏི.

༥༢. ཝལཡནྟི ¶ ¶ ཀུམྦྷིཡཱ བདྡྷསངྑལིཀཱཡ མཱུལེ པཝེསིཏཾ ཝལཡཾ. མཱུལེ གྷཾསནྟོ ཨིཏོ ཙིཏོ ཙ སཱརེཏཱིཏི ཡོཛནཱ. གྷཾསནྟོཏི ཕུསཱཔེནྟོ. ཨིཏོ ཙིཏོ ཙ སཱརེཏཱིཏི ཨོརཏོ ཙ པཱརཏོ ཙ སཉྩཱལེཏི. རཀྑཏཱིཏི ཨེཏྠ ‘‘སཱིལཾ བྷིཀྑུ’’ནྟི པཱཋསེསོ, པཱརཱཛིཀཾ ནཱཔཛྫཏཱིཏི ཝུཏྟཾ ཧོཏི. ཏཏྠཱཏི ཏསྨིཾ མཱུལེ. ཁེགཏཾ ཀརོནྟོཝཱཏི སབྦཔསྶཏོ མཱུལཾ ཨཕུསཱཔེཏྭཱ ཨཱཀཱསགཏཾ ཀརོནྟོཝ. པརཱཛིཏོཏི ཋཱནཱཙཱཝནསྶ ཀཏཏྟཱ པརཱཛཡམཱཔནྣོ ཧོཏི.

༥༣. ཀུམྦྷིམཏྠཀེ ཛཱཏནྟི ཡོཛནཱ. ཙིརཀཱལཾ ནིཧིཏཏྟཱ མཱུལེཧི ཀུམྦྷིཾ ཝིནནྡྷིཏྭཱ ཋིཏནྟི ཨཏྠོ. སམཱིཔེ ཛཱཏཾ རུཀྑཾ ཚིནྡཏོཏི ཡོཛནཱ. ཨེཏྠ ཙ ‘‘ཏཏྠཛཱཏཀཾ ཀཊྛཾ ཝཱ’’ཏིཨཱདིཀཱཡ གཱཐཱཡ ནིདྷིམཏྠཀེ བྷཱུམིཡཾ ཋིཏརུཀྑལཏཱདིཾ ཚིནྡནྟསྶ ཨཱཔཏྟི ཝུཏྟཱ, ཨིམཱཡ པན གཱཐཱཡ བྷཱུམིཾ ནིཁཎིཏྭཱ ཨོཏིཎྞཀཱལེ ནིདྷིཾ ཝིནནྡྷིཏྭཱ ཋིཏམཱུལཾ ཨལླརུཀྑཾ, ཁཱཎུཀཾ ཝཱ གཧེཏྭཱ ཨཱཧཱཏི པུནརུཏྟིདོསཱབྷཱཝོ ཝེདིཏབྦོ. ‘‘ཨཏཏྠཛ’’ནྟི ཨིམིནཱ སཧཔཡོགཱབྷཱཝམཱཧ. ཨིམིནཱཝ པུརིམགཱཐཱཡ ཝུཏྟཾ ཀཊྛལཏཱདཱིནི ནིདྷིསམྦནྡྷཱནི ཙེ, ཡཐཱཝུཏྟདུཀྐཊསྶ ཝཏྠཱུནི, སམཱིཔཱནི ཙེ, པཱཙིཏྟིཡསྶེཝ ཝཏྠཱུནཱིཏི དཱིཔེཏི.

༥༤. ཨིདཱནི ཨེཝཾ པརིཡེསིཏྭཱ དིཊྛནིདྷིབྷཱཛནཾ ཋིཏཊྛཱནཏོ ཨཙཱལེཏྭཱ ཨནྟོཋིཏཾ བྷཎྜམཏྟཾ གཎྷཏོ ཝིནིཙྪཡཾ དསྶེཏུམཱཧ ‘‘ཨནྟོཀུམྦྷིགཏ’’ནྟིཨཱདི. ཏཏྠ ཕནྡཱཔེཏཱིཏི ཨནྟོཙཱཊིཡཱ པཀྑིཏྟེ ཨཏྟནོ བྷཱཛནེ པཀྑིཔིཏུཾ རཱསིཀརཎཱདིཝསེན ཕནྡཱཔེཏི. ཨཔབྱཱུཧཏི ཝཱཏི ཧེཊྛཱ ཋིཏཾ གཎྷིཏུཾ ཨུཔརི ཋིཏཱནི ཨཔནེནྟོ ཝིཡཱུཧཏི ཝཱ. ཨཐ ཝཱ ཨཔབྱཱུཧནྟོཏི (པཱརཱ. ཨཊྛ. ༡.༩༤) ཨཊྛཀཐཱཝཙནསྶ དྭིདྷཱ ཀརོནྟོཏི ¶ གཎྛིཔདེ ཨཏྠོ ཝུཏྟོཏི ཨཏྟནོ བྷཱཛནེ པཀྑིཔིཏུཾ ཨིཏོ ཙིཏོ ཙ རཱསིཾ ཀརོནྟོཏི ཨཏྠོ ཝེདིཏབྦོ. ཏཏྠེཝཱཏི ཨནྟོཀུམྦྷིཡམེཝ.

༥༥. ཧརནྟོཏི ཨཝཧརནྟོ. མུཊྛིཾ ཚིནྡཏཱིཏི ཨཏྟནོ བྷཱཛནཾ པཀྑིཔིཏྭཱ གཎྷིཏུཾ ཨསཀྐུཎེཡྻོ ཨནྟོཀུམྦྷིམྷི ཧཏྠཾ ཨོཏཱརེཏྭཱ ཀུམྦྷིགཏབྷཎྜེན ཡཐཱ ཨབདྡྷཾ ཧོཏི, ཏཐཱ མུཊྛིཡཱ པརིཙྪིནྡཏི, ཀུམྦྷིགཏཾ མུཊྛིཡཱ གཎྷནྟོ ཀུམྦྷིགཏེན མུཊྛིགཏཾ ཡཐཱ ཨསམྨིསྶཾ ཧོཏི, ཏཐཱ པརིཙྪིནྡིཏྭཱ པཱདགྒྷནཀཾ ཝཱ ཨཏིརེཀཔཱདགྒྷནཀཾ ཝཱ གཎྷཱཏཱིཏི ཝུཏྟཾ ཧོཏི. ཨཏྟནོ བྷཱཛནེ གཏཾ ཀཏྭཱ ཝཱ ཚིནྡཏཱིཏི ཡོཛནཱ. ཨཏྟནོ བྷཱཛནགཏཾ ཀཏྭཱ ཀུམྦྷིགཏེན ཡཐཱ ¶ ཨསམྨིསྶཾ ཧོཏི, ཏཐཱ པརིཙྪིནྡཏཱིཏི ཨཏྠོ, སཙེ ཨཏྟནོ བྷཱཛནགཏཾ ཧུཏྭཱ ཀུམྦྷིགཏེན ཨསམྨིསྶཾ བྷཎྜཾ པཉྩམཱསཀཾ ཝཱ ཨཏིརེཀཔཉྩམཱསཀཾ ཝཱ ཨགྒྷཏི, པཱརཱཛིཀོཏི ཝུཏྟཾ ཧོཏི.

༥༦. ཧཱརཾ ཝཱཏི མུཏྟཱཧཱརཾ ཝཱ. པཱམངྒཾ ཝཱཏི སུཝཎྞམཡཾ, རཛཏམཡཾ ཝཱ པཱམངྒཾ དཱམཾ. སུཏྟཱརུལ༹ྷནྟི སུཏྟེ ཨཱརུལ༹ྷཾ སུཏྟཱརུལ༹ྷཾ, སུཏྟཉྩ སུཏྟཱརུལ༹ྷཉྩ སུཏྟཱརུལ༹ྷནྟི ཨེཀདེསསརཱུཔེཀསེསོ དཊྛབྦོ. ‘‘སུཏྟེན ཨཱཝུཏསྶཱཔི སུཏྟམཡསྶཱཔི ཨེཏཾ ཨདྷིཝཙན’’ནྟི ཨཊྛཀཐཱཝཙནཏོ (པཱརཱ. ཨཊྛ. ༡.༩༤) པཋམམུཏྟཱཧཱརཾ ཝིནཱ སུཝཎྞརཛཏཔཝཱལཱ༹དིམཎིཀཾ ཝཱ སུཏྟེསུ ཨཱཝུཎིཏྭཱ ཀཏཱ ནཱནཱཝལིཡོ ཙེཝ སུཏྟམཡཱནི ཙ བྷཎྜཱནི གཧེཏབྦཱནི. ཀུམྦྷིཡཱ ཋིཏནྟི པཱཋསེསོ. ཕནྡཱཔེཏཱིཏི ཐེཡྻཙིཏྟེན གཎྷིཏུཀཱམཏཱཡ ཙཱལེཏི. ཡཐཱཝཏྠུནྟི ཝཱིཏིཀྐམཱནུརཱུཔཾ ཐུལླཙྩཡཾ ཧོཏཱིཏི ཨདྷིཔྤཱཡོ. ཋཱནཱ ཙཱཝེཏཱིཏི ཋིཏཊྛཱནཏོ ཀེསགྒམཏྟམྤི ཨཏིཀྐཱམེཏི ¶ . ཙུཏོཏི པཱཏིམོཀྑསཾཝརསཱིལཱ པརིཧཱིནོཏི ཨཏྠོ.

ཨཔརིཔུཎྞཱཡ ཀུམྦྷིཡཱཨེཀདེསཊྛཾ བྷཎྜཾ ཏཏོ ཏཏོ ཀེསགྒམཏྟམྤི ཋཱནཾ ཨཔནེཏྭཱ ཏཏྠེཝ ཨནྟོཀུམྦྷིཡཱ ཨཉྙཾ ཋཱནཾ ནེནྟསྶ ཙ ཏཏྠེཝ ཨཱཀཱསགཏཾ ཀརོནྟསྶ ཙ ‘‘ཨཏྟནོ བྷཱཛནགཏཾ ཝཱ ཀརོཏི, མུཊྛིཾ ཝཱ ཚིནྡཏཱི’’ཏི (པཱརཱ. ༩༤) ཨེཏེཧི སདིསཏྟཱ ཝཏྠུམྷི པཱདཾ ཨགྒྷནྟེ པཱརཱཛིཀཱ ཧོཏཱིཏི མཧཱཨཊྛཀཐཱཡཾ (པཱརཱ. ཨཊྛ. ༡.༩༤) ཨིདཾ སནྣིཊྛཱནཾ. བྷཱཛནཏལེ ཀོཊིཾ ཋཔེཏྭཱ ཀམེན སཀལབྷཱཛནཀུཙྪིཾ ཏེནེཝ པཱུརེཏྭཱ མུཁཝཊྚིཡཱ ཨེཀཱ ཀོཊི ནིཀྑིཏྟཱ ཙེ, ཏཐཱཋཔིཏསྶ ཧཱརཱདིནོ སཀལབྷཱཛནཾ ཨཊྛཱནནྟི ཀོཊིཾ གཧེཏྭཱ ཨུཛུཀཾ ཨུཀྑིཔནྟསྶ ཨོསཱནཀོཊི བྷཱཛནཏལཏོ ཀེསགྒམཏྟམྤི ཨཱཀཱསགཏཾ ཀརོཏོ ཙ མུཁཝཊྚིཡཾ གྷཾསིཏྭཱ ཨཱཀཌྜྷནྟསྶ སཀལབྷཱཛནོདརཾ ཁེཔེཏྭཱ མུཁཝཊྚིཡཱ ཋཔིཏཀོཊིཡཱ ཕུཊྛཊྛཱནཾ ཨཔརཱཡ ཀོཊིཡཱ ཀེསགྒམཏྟམྤི ཨཏིཀྐཱམཡཏོ ཙ བྷཱཛནཀུཙྪིཡཱ ཨུཔཌྜྷཾ ཝཏྠཱདིནཱ ཀེནཙི པཱུརེཏྭཱ ཏསྶོཔརི ཋཔིཏཧཱརཱདིསུཏྟཱརུལ༹ྷསྶ ཋིཏོཀཱསམེཝ ཋཱནནྟི ཏཏོ ཀེསགྒམཏྟཾ ཨཔནེནྟསྶཔི པཱརཱཛིཀཾ ཧོཏཱིཏི ཝུཏྟཾ ཧོཏི.

༥༧. སཔྤིཨཱདཱིསཱུཏི བྷཱཛནགཏེསུ སཔྤིཨཱདིདྲཝཝཏྠཱུསུ ཡཾ ཀིཉྩི. པཱདཔཱུརཎནྟི པཱདཾ པཱུརེཏཱིཏི པཱདཔཱུརཎཾ, པཱདགྒྷནཀནྟི ཨཏྠོ. པིཝཏོ པརཱཛཡོཏི སམྦནྡྷོ. ཀདཱཏི ཙེ? ཨེཀེནེཝ ¶ པཡོགེན པཱིཏམཏྟེ པཱདཔཱུརཎེཏི ཡོཛནཱ. ‘‘མུཁགཏཾ ཝིནཱ’’ཏི པཱཋསེསོ. ཏཏྠ ཨེཀེནེཝ པཡོགེནཱཏི དྷུརནིཀྑེཔམཀཏྭཱ ཨེཀཱབདྡྷཾ ཀཏྭཱ ཨཱཀཌྜྷེཏྭཱ ¶ པིཝནཔཡོགེན. ‘‘མུཁགཏཾ ཝིནཱ’’ཏི ཨིམིནཱ སཙེ གལགཏེནེཝ པཱདོ པཱུརཏི, ཨནྟོགལཾ པཝིཊྛེཏི ཝུཏྟཾ ཧོཏི. མུཁགཏེན པཱུརཏི, མུཁགཏཾ བྷཱཛནགཏེན ཝིཡོཛེཏྭཱ ཨོཊྛེསུ པིཧིཏེསཱུཏི ཝུཏྟཾ ཧོཏི. ཝེལུ༹ནལཱ༹དཱིཧི ཨཱཀཌྜྷེཏྭཱ པིཝནྟསྶ ནཱལ༹གཏེན པཱུརཏི, ནཱལ༹གཏཾ བྷཱཛནགཏེན ཝིཡོཛེཏྭཱ ནཱལི༹ཀོཊིཡཾ ཨངྒུལིཡཱ པིཧིཏཱཡནྟི ཝུཏྟཾ ཧོཏི. ཨིདཾ ‘‘ཨཏྟནོ བྷཱཛནགཏཾ ཝཱ ཀརོཏི, མུཊྛིཾ ཝཱ ཚིནྡཏཱི’’ཏི (པཱརཱ. ༩༤) ཝུཏྟནཡསྶ ཨནུལོམཝསེན མཧཱཔཙྩརིཡཱདཱིསུ (པཱརཱ. ཨཊྛ. ༡.༩༤) ཨཊྛཀཐཱསུ ཝུཏྟནཡེན གཧེཏབྦནྟི ཨདྷིཔྤཱཡོ.

‘‘ཨེཀེནེཝ པཡོགེན པཱིཏམཏྟེ པརཱཛཡོ’’ཏི ཨིམིནཱ སཔྤིཨཱདཱིསུ མཧགྒྷེསུ ཏཏྟཀེནེཝ པཱདཔཱུརཎཉྩེ ཧོཏི, ཨེཀཝཱརམེཝ མུཁེན ཝཱ སཔྤིཨཱདིནཱ ཝཱ བྷཱཛནགཏེན ཨེཀཱབདྡྷབྷཱཝེ ཚིནྣམཏྟེཔི ཨཏྟནོ བྷཱཛནེ ཀུམྦྷིཾ པཎཱམེཏྭཱ པཀྑིཏྟེན ཀུམྦྷིགཏེ ཚིནྣམཏྟེཔི པཱརཱཛིཀོ ཧོཏཱིཏི གཧེཏབྦཾ.

༥༨. ‘‘དྷུརནིཀྑེཔཾ ཀཏྭཱ པུནཔྤུནཾ པིཝནྟསྶ ན པརཱཛཡོ’’ཏི ཨིམིནཱ དྷུརནིཀྑེཔམཀཏྭཱ པུནཔྤུནཾ པིཝཏོ པརཱཛཡོཏི སཱམཏྠིཡཱ ཝུཏྟཾ ཧོཏི. དྷུརནིཀྑེཔཾ ཨཀཏྭཱ པུནཔྤུནཾ མུཁེན གཧེཏྭཱ ཝཱ པུཊཱདཱིཧི ཝཱ གཧེཏྭཱ པཱདཔཱུརཎམཏྟཾ པིཝནྟསྶ པརཱཛཡོ ཧོཏཱིཏི གཧེཏབྦཾ.

༥༩-༦༠. སཙེ ཁིཔཏི ཐེཡྻཙིཏྟོཏི སམྦནྡྷོ. ཡཾ ཀིཉྩི བྷཎྜཀནྟི ཏེལཔིཝནཱརཧཾ དུཀཱུལསཱཊཀཙམྨཁཎྜཱདིཀཾ བྷཎྜཾ. ཏེལཀུམྦྷིཡཾ པརསྶཱཏི ལབྦྷཏི. ཏཾ ནིཀྑིཏྟབྷཎྜཾ. དྷུཝནྟི ཨེཀཾསེན. ཏཱཝདེ ཝིནསྶཏཱིཏི སམྦནྡྷོ. ཏཱཝདེཏི ཏསྨིཾ ཁཎེཡེཝ. ཀཏརསྨིཾ ཁཎེཏི ཨཱཧ ‘‘ཧཏྠཏོ མུཏྟམཏྟེ’’ཏི, ཏེལསྶ པཱིཏཀཱལཾ ཨནཱགམྨ པུབྦཔཡོགཏྟཱ ¶ པཋམམེཝ ཧོཏཱིཏི ཨདྷིཔྤཱཡོ. ཝིནསྶཏཱིཏི སཱིལཝིནཱསཾ པཱཔུཎཱཏི. ཨཱཝིཉྫེཏྭཱཏི པཎཱམེཏྭཱ. གཱལེ༹ཏཱིཏི པགྒྷརཱཔེཏི. ‘‘སཱལེ༹ཏཱི’’ཏིཔི པཋནྟི, སོཡེཝ ཨཏྠོ. སཱལ༹ སཝནེཏི དྷཱཏུ. ཏཐཱཏི ‘‘ཐེཡྻཙིཏྟོ ཝིནསྶཏཱི’’ཏི ཨཱཀཌྜྷཏི, ཐེཡྻཙིཏྟེན ཨེཝཾ ཀརོནྟསྶ པཱརཱཛིཀོ ཧོཏཱིཏི ཝུཏྟཾ ཧོཏི.

༦༡. ཏནྟི ཏེལསྶ ཨོཀིརཎབྷཱཝཾ ཉཏྭཱ པཋམམེཝ ཏུཙྪབྷཱཛནེ ཐེཡྻཙིཏྟེན ནིཀྑིཏྟཾ པཱདགྒྷནཀཏེལཔིཝནཀཾ ¶ ཏཾ ཝཏྠཱདིབྷཎྜཾ. ‘‘ཨུདྡྷརནྟོཝཱ’’ཏི སཱཝདྷཱརཎཝཙནེན ‘‘པཱིཏམཏྟེ པརཱཛཡོ’’ཏི དསྶིཏཾ མཧཱཨཊྛཀཐཱམཏཾ པཊིཀྑིཏྟཾ ཧོཏི. དྷཾསིཏོཏི ‘‘སཱསནཀཔྤརུཀྑཱ པཱཏིཏོ, པཱརཱཛིཀཱཔནྣོཏི ཨདྷིཔྤཱཡོ. ‘‘ཐེཡྻཙིཏྟོ’’ཏི ཨཱཀཌྜྷནཏྠཾ ‘‘ཏཐཱ’’ཏི ཨཱནེཏྭཱ སམྦནྡྷནཱིཡཾ. ཨིམིནཱ སུདྡྷཙིཏྟེན གོཔནཏྠཱཡ ཏུཙྪབྷཱཛནེ ཝཏྠཱདིཾ ནིཀྑིཔིཏྭཱ ཨཉྙེན ཏཾ ཨནོལོཀེཏྭཱ ཏེལེ ཨཱསིཏྟེ པཙྪཱ སུདྡྷཙིཏྟེནེཝ ཨུདྡྷརཏོ ན དོསོཏི དཱིཔིཏཾ ཧོཏི.

༦༢. ཏཏྠེཝཱཏི ཋིཏཊྛཱནེཡེཝ. བྷིནྡཏོཏི ཋཱནཱ ཨཙཱཝེཏྭཱ ཏིཎཛ྄ཛྷཱཔཀསྶ ཝིཡ བྷིཀྑུནོ ཋཱནཱཙཱཝནཱདྷིཔྤཱཡཾ ཝིནཱ པཱསཱཎཱདིནཱ ཀེནཙི པཧརིཏྭཱ བྷིནྡཏོ. ‘‘མནྟོསདྷཱནུབྷཱཝེན བྷིནྡཏོ’’ཏི ཙ ཝདནྟི. ཚཌྜེནྟསྶཱཏི ཨཚཌྜེཏུཀཱམསྶཱཔི སཏོ པརིཔུཎྞཏེལགྷཊཱདཱིསུ ཙཱཔལླེན ཝཱལུཀཾ ཝཱ ཨུདཀཾ ཝཱ ཨོཀིརིཏྭཱ ཨུཏྟརཱཔེནྟསྶཱཏི ཨཏྠོ. ‘‘ཨུདཀམཱཏིཀཾ གྷཊཱབྷིམུཁཾ ཀཏྭཱ ཨོཔིལཱཔེནྟསྶཱ’’ཏི ཝདནྟི. ཋཱནཱཙཱཝནཱདྷིཔྤཱཡེ སཏིཔི ཐེཡྻཙིཏྟཱབྷཱཝེན པཱརཱཛིཀཱ ན ཝིཛྫཏི, བྷཎྜདེཡྻཾ ¶ པན ཧོཏཱིཏི སནྣིཊྛཱནཾ. ཛྷཱཔེནྟསྶཱཏི ཀཊྛཱནི པཀྑིཔིཏྭཱ ཛྷཱཔེནྟསྶ. ཨཔརིབྷོགཾ ཀརོནྟསྶཱཏི ཨུཙྩཱརཔསྶཱཝཱདིམོཀིརིཏྭཱ ཨཔརིབྷོགཾ ཀརོནྟསྶ. དུཀྐཊནྟི ཨེཏེསུ བྷིནྡནཱདཱིསུ ཙཏཱུསུཔི ཋཱནེསུ པདབྷཱཛནིཡཾ དུཀྐཊམེཝ ཨཱགཏཏྟཱ ཝུཏྟཾ.

བྷཱུམཊྛཀཐཱཝཎྞནཱ.

༦༣. ཨིདཱནི ཐལཊྛེ ཝིནིཙྪཡཾ དསྶེཏུམཱཧ ‘‘ཋཔིཏ’’ནྟིཨཱདི. ཏཏྠ པཏྠརིཏྭཱཏི ཨཏྠརིཏྭཱ. ཨེཏྠ ཙ-སདྡོ ཨཝུཏྟསམྤིཎྜནཏྠོ, ཏེན ཐལེ རཱསིཀཏདྷཉྙཱདཱིསུ ཝིནིཙྪཡོ ནིམིཀུམྦྷིཡཱ ཝུཏྟཝིནིཙྪཡཱནུསཱརེན ཝིཉྙཱཏུཾ སཀྐཱཏི ཏཾ སརཱུཔཏོ ཨཝུཏྟཾ སམུཙྩིནོཏི. ཨཏྠརཎཱདིཀནྟི པཙྩཏྠརཎཱདིཀཾ. ཝེཋེཏྭཱ ཨུདྡྷརནྟསྶཱཏི ཀིལཉྫསཾཧརཎནིཡཱམེན ཝཊྚེཏྭཱ སཾཧརིཏྭཱ ཨུདྡྷརནྟསྶ. མུཏྟེ ཋཱནཱཏི ཀམེན སཾཧརིཏྭཱ ཋིཏཊྛཱནཏོ ཀེསགྒམཏྟམྤི མུཏྟེ སཏི. པརཱབྷཝོཏི སཱསནཏོ པརིཧཱིནོ.

༦༤. ཨེཝཾ ཨཏྠརིཏྭཱ ཋཔིཏཝཏྠཱདཱིནཾ སཾཧརིཏྭཱ གཧཎེ ཝིནིཙྪཡཾ དསྶེཏྭཱ ཏིརིཡཏོ ཨཱཀཌྜྷནེ ཝིནིཙྪཡཾ དསྶེཏུམཱཧ ‘‘ཨོརིམནྟེནཱ’’ཏིཨཱདི. པི, ཝཱཏི པཀཱརནྟརམེཝ སམུཙྩིནོཏི. ཨུཛུཀཾ ཀཌྜྷཏོཔི ཝཱཏི ཨཏྠརིཏྭཱ ཋཔིཏཝཏྠཱདིཀཾ ཙཏཱུསུ དིསཱསུ ཨེཀཾ དིསཾ ཨུཛུཀམཱཀཌྜྷཏོ ¶ ཙ པཱརཱཛིཀཾ ཧོཏི. ཀདཱཏི ཙེ? ཨེཏྠཱཔི ཨོརིམནྟེན ཕུཊྛམོཀཱསཾ པཱརིམནྟཏོ ཨཏིཀྐནྟེ པཱརཱཛིཀནྟི ཡོཛནཱ. ཨོརིམནྟེན ཕུཊྛམོཀཱསནྟི གཧེཏྭཱ ཨཱཀཌྜྷནྟསྶ ཨཏྟནོ ཋིཏདིསཱགཏཔརིཡནྟེན ཕུསིཏྭཱ ཋིཏཊྛཱནཾ. པཱརིམནྟཏོཏི པཱརིམནྟེན, ཀརཎཏྠེ ཏོ-པཙྩཡོ.

ཐལཾ ¶ ནཱམ པཊིཙྪནྣཱཔཊིཙྪནྣབྷཱུམིཔཱསཱདཔབྦཏཏལཱདཱིནི, ཏཏྲཊྛཾ དྷཉྙཱདིབྷཎྜཾ ཐལཊྛཾ ནཱམ ཧོཏི. ཏཏྠ སབྦཏྠ ཝིནིཙྪཡོ ཝུཏྟནཡེན ཝེདིཏབྦོ.

ཐལཊྛཀཐཱཝཎྞནཱ.

༦༥-༦. པརིཙྪེདཱཏི ཋཱནཔརིཙྪེདཱ. སེསཾ སུཝིཉྙེཡྻམེཝ.

༦༧-༨. ཁེགཏནྟི ཨཱཀཱསགཏཾ. ཨསྶཱཏི མོརསྶ. ཏནྟི མོརཾ.

༦༩. ཋཱནཱཏི ཡཐཱཔརིཙྪིནྣཱ ཚབྦིདྷཱ ཋཱནཱ. ཏསྶཱཏི མོརསྶ ཕནྡཱཔནེཏི ཡོཛནཱ. ཏསྶཱཏི ཝཱ བྷིཀྑུསྶ ཐུལླཙྩཡམུདཱིརིཏཾ.

༧༠. ཨགྒཧེཏྭཱ ཧཏྠེན ལེཌྜུཁིཔནཱདིཔཡོགེན མོརཾ ཏཱསེཏྭཱ ཋིཏཊྛཱནཏོ ཨཔནེཏི. ཨཏྟནོ ཋཱནཱཏི མོརསྶ ཨཏྟནོ ཚཔྤཀཱརཊྛཱནཱ. སཡཾ ཋཱནཱཏི བྷིཀྑུ སཀཊྛཱནཱ, སམཎབྷཱཝཏོཏི ཝུཏྟཾ ཧོཏི.

༧༡-༢. ཨིདཱནི ‘‘ཋཱནཱ ཙཱཝེཏི ཙེ མོར’’ནྟི དསྶིཏཾ ཋཱནཱཙཱཝནཾ ཝིབྷཱཝེཏུམཱཧ ‘‘ཕུཊྛོཀཱས’’ནྟིཨཱདི.

༧༣. ཀརེ ནིལཱིཡཏཱིཏི པསཱརིཏཧཏྠཏལེ ནིསཱིདཏི.

༧༥. ཨུཌྜེཏྭཱཏི ཨཱཀཱསཾ ཨུཔྤཏིཏྭཱ.

༧༦. ཨངྒེ ¶ ནིལཱིནནྟི ཨཾསཀཱུཊཱདིསརཱིརཱཝཡཝེ ནིལཱིནཾ. པཱདེཏི ཨཏྟནོ པཋམུདྡྷཱརཔཱདེ. དུཏིཡེ པཱདེ.

༧༧. པཱདཱནནྟི ¶ དྭིནྣཾ པཱདཱནཾ. ཀལཱཔསྶཱཏི བྷཱུམིཡཾ ཕུསིཡམཱནསྶ ཀལཱཔགྒསྶ.

༧༨. ཏཏོ པཐཝིཏོཏི ཏཱིཧི ཨཝཡཝེཧི པཏིཊྛིཏཔཐཝིཔྤདེསཏོ, ན པཋམཏོ ཏཏྠ དུཀྐཊཏྟཱ, ན དུཏིཡཏོ ཏཏྠ ཐུལླཙྩཡཏྟཱ, ཏཏིཡཱ པན ཋཱནཱ ཀེསགྒམཏྟམྤི ཙཱཝཡཏོ པཱརཱཛིཀནྟི ཝུཏྟཾ ཧོཏི.

ཨེཏྟཱཝཏཱ –

‘‘པཉྫརེ ཋིཏཾ མོརཾ སཧ པཉྫརེན ཨུདྡྷརཏི, པཱརཱཛིཀཾ. ཡདི པན པཱདཾ ནགྒྷཏི, སབྦཏྠ ཨགྒྷཝསེན ཀཏྟབྦཾ. ཨནྟོཝཏྠུམྷི ཙརནྟཾ མོརཾ ཐེཡྻཙིཏྟོ པདསཱ བཧིཝཏྠུཾ ནཱིཧརནྟོ དྭཱརཔརིཙྪེདཾ ཨཏིཀྐཱམེཏི, པཱརཱཛིཀཾ. ཝཛེ ཋིཏབལིབདྡསྶ ཧི ཝཛོ ཝིཡ ཨནྟོཝཏྠུ ཏསྶ ཋཱནཾ. ཧཏྠེན པན གཧེཏྭཱ ཨནྟོཝཏྠུསྨིམྤི ཨཱཀཱསགཏཾ ཀརོནྟསྶ པཱརཱཛིཀམེཝ. ཨནྟོགཱམེ ཙརནྟམྤི གཱམཔརིཙྪེདཾ ཨཏིཀྐཱམེནྟསྶ པཱརཱཛིཀཾ. སཡམེཝ ནིཀྑམིཏྭཱ གཱམཱུཔཙཱརེ ཝཱ ཝཏྠཱུཔཙཱརེ ཝཱ ཙརནྟཾ པན ཐེཡྻཙིཏྟོ ཀཊྛེན ཝཱ ཀཐལཱཡ ཝཱ ཨུཏྲཱསེཏྭཱ ཨཊཝཱིབྷིམུཁཾ ཀརོཏི, མོརོ ཨུཌྜེཏྭཱ ཨནྟོགཱམེ ཝཱ ཨནྟོཝཏྠུམྷི ཝཱ ཚདནཔིཊྛེ ཝཱ ནིལཱིཡཏི, རཀྑཏི. སཙེ པན ཨཊཝཱིབྷིམུཁོ ཨུཌྜེཏི ཝཱ གཙྪཏི ཝཱ, ‘ཨཊཝིཾ པཝེསེཏྭཱ གཧེསྶཱམཱི’ཏི པརིཀཔྤེ ཨསཏི པཐཝིཏོ ཀེསགྒམཏྟམྤི ཨུཔྤཏིཏམཏྟེ ཝཱ དུཏིཡཔདཝཱརེ ཝཱ པཱརཱཛིཀཾ. ཀསྨཱ? ཡསྨཱ གཱམཏོ ནིཀྑམནྟསྶ ཋིཏཊྛཱནམེཝ ཋཱནཾ ཧོཏཱི’’ཏི (པཱརཱ. ཨཊྛ. ༡.༩༦) –

ཨཊྛཀཐཱགཏོ ¶ ཝིནིཙྪཡོ ཨུཔལཀྑིཏོཏི ཝེདིཏབྦཾ. ཀཔིཉྫརཱདིཔརསནྟཀསཀུཎེསུ ཙ ཨེསེཝ ཝིནིཙྪཡོ དཊྛབྦོ.

༧༩. པཏྟེཏི དྭཱརེ བྷིཀྑཱཡ ཋིཏཾ བྷིཀྑུནོ ཧཏྠགཏེ པཏྟེ. ཏསྶ ཐེཡྻཙིཏྟསྶ.

༨༠. ཨནུདྡྷརིཏྭཱཝཱཏི ¶ པཏྟེ པཏིཏཾ སུཝཎྞཱདིཾ ཧཏྠེན ཨནུཀྑིཔིཏྭཱཝ པཋམཔདཝཱརེ ཐུལླཙྩཡཾ གམྨམཱནཏྟཱ ན ཝུཏྟཾ.

༨༡. ཧཏྠེཏི ཧཏྠཏལེ. ཝཏྠེཏི ཙཱིཝརེ. མཏྠཀེཏི སིརསི. གཱཐཱཚནྡཝསེན ཝཱ-སདྡེ ཨཱཀཱརསྶ རསྶཏྟཾ. པཏིཊྛིཏནྟི པཏིཏཾ. ཏནྟི ཚིཛྫམཱནཾ ཏཾ སུཝཎྞཁཎྜཱདི. ཡདི ཨཱཀཱསེ གཙྪནྟཾ, པཏནྟཾ ཝཱ ཧཏྠེན གཎྷཱཏི. གཧིཏཧཏྠེ ཋིཏཊྛཱནམེཝ ཋཱནཾ, ཏཏོ ཀེསགྒམཏྟམྤི ཨཔནེནྟསྶ པཱརཱཛིཀཾ. ཏཐཱ གཧེཏྭཱ ཐེཡྻཙིཏྟེན གཙྪཏོ དུཏིཡཔཱདུདྡྷཱརེ. ཝཏྠཱདཱིསུ པཏིཏེཔི ཨེསེཝ ནཡོ.

ཨཱཀཱསཊྛཀཐཱཝཎྞནཱ.

༨༢. མཉྩཔཱིཋཱདཱིསཱུཏི ཨེཏྠ ཨཱདི-སདྡེན མཉྩཔཱིཋསདིསེ ཝེཧཱསབྷཱུཏེ ཨཊྚཝིཏཱནཱདཡོ སངྒཎྷཱཏི. ཨཱམཱསམྤཱིཏི ཧཏྠེན ཝཱ ཀཱཡེན ཝཱ ཨཱམསིཏབྦཾ ཝཏྠཱདིཉྩ. ཨནཱམཱསམྤཱིཏི ཏཐཱ ཨཔརཱམསིཏབྦཾ སུཝཎྞཱདིཾ. ཨཱམསནྟསྶཱཏི ཧཏྠཱདཱིཧི པརཱམསནྟསྶ. ‘‘དུཀྐཊ’’ནྟི ཨིམིནཱ ཕནྡཱཔནེ ཐུལླཙྩཡཉྩ ཋཱནཱཙཱཝནེ པཱརཱཛིཀཉྩ ཧེཊྛཱ ཐལཊྛེ ཝུཏྟནཡེན ཝིཉྙཱཏུཾ སཀྐཱཏི ཨཏིདིསཏི. ཋཱནཔརིཙྪེདོ པན མཉྩཱདཱིཧི ཨེཝ ཨུཀྑིཔནྟསྶ ཙཏུནྣཾ པཱདཱནཾ ཝསེན, ཏཏྲཊྛམེཝ གཎྷནྟསྶ མཉྩསྶ ཙཏཱུསུ པཱདསཱིསེསུ ཕུསིཏྭཱ ¶ མཛ྄ཛྷེ ཨཕུསིཏྭཱ ཋིཏསྶ ཁལིམཀྑིཏཐདྡྷསཱཊཀསྶ ཙཏུནྣཾ པཱདསཱིསཱནཾ ཝསེན, ཨཊནཱིསུ ཕུསིཏྭཱ ཋིཏསྶ ཨཊནཱིནཾ ཝསེན ཝཱ ཝེདིཏབྦོ.

༨༣. ཝཾསེཏི ཙཱིཝརཝཾསེ, ཨིམིནཱ ཙཱིཝརནིཀྑེཔནཏྠཱཡ ཋཔིཏརུཀྑདཎྜསལཱཀཱརཛྫུཨཱདཡོ ཨུཔལཀྑིཏཱ. ཨོརཏོཏི ཨཏྟནོ ཋིཏདིསཱབྷིམུཁཏོ. བྷོགནྟི སཾཧརིཏྭཱ ཙཱིཝརཾ ཏསྶ ནཱམེཏྭཱ ཋཔིཏམཛ྄ཛྷཊྛཱནཾ. ཨནྟནྟི ནཱམེཏྭཱ ཨེཀཏོ ཀཏཾ, ཨུབྷཡཱནཾ ཝཱ ཨནྟཾ. པཱརཏོ ཀཏྭཱཏི ཝཾསཏོ པརབྷཱགེ ཀཏྭཱ.

༨༤. ཙཱིཝརེན ཕུཊྛོཀཱསོཏི ཙཱིཝརེན ཕུཊྛཊྛཱནཾ. ཏསྶཱཏི ཏཐཱ ཋཔིཏསྶ ཙཱིཝརསྶ. སོ སཀལོ ཙཱིཝརཝཾསོ ཋཱནཾ ན ཏུ ཧོཏཱིཏི མཏོཏི སམྦནྡྷོ.

༨༥-༦. ཨོརིམནྟེན ¶ ཕུཊྛཾ ཝཱ ཏཾ ཨོཀཱསནྟི སམྦནྡྷོ. ཙཱིཝརབྷོགཾ གཧེཏྭཱ ཐེཡྻཙིཏྟེན ཨཏྟནོ ཨབྷིམུཁཾ ཨཱཀཌྜྷཏོ ཨཏྟནོ ཋིཏདིསཱཡ ཙཱིཝརཝཾསེ ཙཱིཝརེན ཕུསིཏྭཱ ཋིཏཊྛཱནཔརིཡནྟཾ ཨིཏརེན ཨཏིཀྐཱམཡཏོ ཙུཏཱིཏི སམྦནྡྷོ. ཨིཏརེན པཱརིམནྟེན བྷིཏྟིདིསཱཡ ཙཱིཝརསྶ ཕུཊྛོཀཱསཔརིཡནྟཾ ཨིཏརེན ཕུཊྛཾ ཏཾ ཨོཀཱསཾ ཨོརིམནྟེན ཨཏིཀྐཱམཡཏོ ཝཱ ཙུཏཱིཏི ཡོཛནཱ. ཨིཏརེནཱཏི པཱརིམནྟེན བྷིཏྟིཔསྶེ ཙཱིཝརཝཾསེ ཕུསིཏྭཱ ཋིཏཙཱིཝརཔརིཡནྟེན. ཕུཊྛཾ ཙཱིཝརཝཾསོཀཱསཾ. ཨོརིམནྟེནཱཏི ཨཏྟནོ ཋིཏདིསཱཡ ཙཱིཝརཝཾསེ ཕུསིཏྭཱ ཋཔིཏཙཱིཝརཔྤདེསེན. ཨཏིཀྐཱམཡཏོཏི ཀེསགྒམཏྟམྤི ཨཏིཀྐཱམེནྟསྶ.

ཨེཝཾ དཱིགྷནྟཱཀཌྜྷནེ སམྦྷཝནྟཾ ཝིཀཔྤཾ དསྶེཏྭཱ ཨིདཱནི ཏིརིཡནྟེན ཨཏིཀྐམནཝིདྷིཾ དསྶེཏུམཱཧ ‘‘དཀྑིཎནྟེནཱ’’ཏིཨཱདི. པུནཱཏི ཨཐ ཝཱ. དཀྑིཎནྟེན ཕུཊྛཊྛཱནཾ ཝཱམནྟེན ¶ ཨཏིཀྐཱམཡཏོ ཙུཏཱིཏི ཡོཛནཱ. ཙཱིཝརཾ ཧརིཏུཾ ཙཱིཝརཱབྷིམུཁཾ ཋིཏསྶ ཨཏྟནོ དཀྑིཎཔསྶེ ཙཱིཝརཀོཊིཡཱ ཕུཊྛཾ ཙཱིཝརཊྛིཏཔྤདེསཾ ཝཱམཔསྶེ ཙཱིཝརནྟེན ཨཏིཀྐཱམཡཏོ པཱརཱཛིཀམེཝཱཏི ཨཏྠོ. ཝཱམནྟེན ཕུཊྛཊྛཱནཾ ཨིཏརེན ཨཏིཀྐཱམཡཏོ ཝཱ ཙུཏཱིཏི ཡོཛནཱ. ཝཱམནྟེན ཕུཊྛཊྛཱནནྟི ཙཱིཝརཱབྷིམུཁཾ ཋིཏསྶ ཝཱམཔསྶེ ཙཱིཝརནྟེན ཕུཊྛཾ ཙཱིཝརཊྛིཏཔྤདེསཾ. ཨིཏརེན དཀྑིཎཔསྶེ ཙཱིཝརནྟེན ཨཏིཀྐཱམཡཏོ ཝཱ ཙུཏི པཱརཱཛིཀཱ ཧོཏཱིཏི ཨཏྠོ.

༨༧. ཝཾསཏོཏི ཙཱིཝརེན ཕུསིཏྭཱ ཋིཏཙཱིཝརཝཾསཔྤདེསཏོ. ‘‘ཀེསགྒམཏྟ’’ནྟི ཀཏྠཙི པོཏྠཀེ ལིཁནྟི, ཏཾ ན གཧེཏབྦཾ. ‘‘ཨུཀྑིཏྟེ’’ཏི བྷུམྨེཀཝཙནནྟེན སམཱནཱདྷིཀརཎཏྟཱ པཙྩཏྟེཀཝཙནནྟཏཱ ན ཡུཛྫཏཱིཏི. ‘‘ཀེསགྒམཏྟེ ཨུཀྑིཏྟེ’’ཏི ཀཏྠཙི པཱཋོ དིསྶཏི, སོ ཙ པམཱཎཾ.

༨༨. ཝིམོཙེནྟོ ཐུལླཙྩཡཾ ཕུསེཏི ཡོཛནཱ. ཙཱིཝརཝཾསེ ཕུསཱཔེཏྭཱ, ཨཕུསཱཔེཏྭཱ ཝཱ རཛྫུཡཱ བནྡྷིཏྭཱ ཋཔིཏཙཱིཝརཾ གཎྷིཏུཀཱམོ ཐེཡྻཙིཏྟེན བནྡྷནཾ མོཙེནྟོ ཐུལླཙྩཡཾ ཨཱཔཛྫཏཱིཏི ཨཏྠོ. མུཏྟེཏི མུཏྟམཏྟེ. པཱརཱཛིཀོ ཧོཏི ཋཱནཱ ཙུཏབྷཱཝཏོཏི ཨདྷིཔྤཱཡོ.

༨༩. ཝེཋེཏྭཱཏི ཨེཏྠ ‘‘ཝཾསམེཝཱ’’ཏི སཱམཏྠིཡཏོ ལབྦྷཏི. ཙཱིཝརཝཾསཾ པལིཝེཋེཏྭཱ ཏཏྠེཝ ཋཔིཏཙཱིཝརཾ ནིབྦེཋེནྟསྶ བྷིཀྑུནོཔི ཨཡཾ ནཡོཏི སམྦནྡྷོ. ནིབྦེཋེནྟསྶཱཏི ཝིནིཝེཋེནྟསྶ. ཨཡཾ ནཡོཏི ‘‘ནིབྦེཋེནྟསྶ ཐུལླཙྩཡཾ, ནིབྦེཋིཏེ པཱརཱཛིཀ’’ནྟི ཡཐཱཝུཏྟནཡམཏིདིསཏི ¶ . ཝལཡཾ ཚིནྡཏོ ཝཱཔི ཨཡཾ ནཡོཏི སམྦནྡྷོ. ‘‘བྷིཀྑུནོ, ཝཾསེ, ཋཔིཏཾ, ཙཱིཝར’’ནྟི ཙ ཨཱནེཏྭཱ ཡོཛེཏབྦཾ. ཙཱིཝརཝཾསེ པཝེསེཏྭཱ ¶ ཋཔིཏཾ ཙཱིཝརཝལཡཾ ཡཐཱ ཚིནྣམཏྟེ ཋཱནཱ ཙཝཏི, ཏཐཱ ཚིནྡནྟསྶ བྷིཀྑུནོ ཚེདནེ ཐུལླཙྩཡཾ, ཚིནྣེ པཱརཱཛིཀནྟི ཨཏྠོ. མོཙེནྟསྶཱཔྱཡཾ ནཡོཏི ཨེཏྠཱཔི ‘‘ཝལཡ’’ནྟི ཨིམིནཱ སདྡྷིཾ ‘‘བྷིཀྑུནོ’’ཏིཨཱདིཔདཱནི ཡོཛེཏབྦཱནི. ཙཱིཝརཝཾསེ ཋཔིཏཾ ཙཱིཝརཾ ཝལཡཾ མོཙེནྟསྶཱཔི ཐུལླཙྩཡཔཱརཱཛིཀཱནི པུབྦེ ཝུཏྟནཡཱནེཝ.

ཨིཧ པུརིམེན ཨཔི-སདྡེན ཡཐཱཝུཏྟཔཀཱརདྭཡེ སམྤིཎྜིཏེ ཨིཏརེན ཨཔི-སདྡེན ཨཝུཏྟསམྤིཎྜནམནྟརེན ཨཏྠཝིསེསཱབྷཱཝཏོ ཨཝུཏྟམཏྠཾ སམྤིཎྜེཏི, ཏེན ‘‘ཨཱཀཱསགཏཾ ཝཱ ཀརོཏི, ནཱིཧརཏི ཝཱ’’ཏི པཀཱརདྭཡཾ སངྒཎྷཱཏི. ཏེན རུཀྑམཱུལེ པཝེསེཏྭཱ ཋཔིཏནིདྷིསངྑལིཀཝལཡམིཝ ཙཱིཝརཝཾསེ སབྦཊྛཱནེཧིཔི ཨཕུསཱཔེཏྭཱ ཙཱིཝརཝལཡཾ ཨཱཀཱསགཏཾ ཀརོནྟསྶཱཔི ཙཱིཝརཝཾསཀོཊིཡཱ བཧི ནཱིཧརནྟསྶཱཔི ཐུལླཙྩཡཔཱརཱཛིཀཱནི ཝུཏྟནཡེནེཝ ཉཱཏབྦཱནཱིཏི ཨེཏེཡེཝ སངྒཎྷཱཏི. ‘‘ཝལཡཾ ཚིནྡཏོ ཝཱཔི, མོཙེནྟསྶ ཝཱཔི, ཝལཡཾ ཨཱཀཱསགཏཾ ཝཱ ཀརོཏི, ནཱིཧརཏི ཝཱ’’ཏི ཨིམེསུ ཙཏཱུསུ ཝིཀཔྤེསུ ཨེཀམྤི ཏཐཱ ཨཀཏྭཱ ཙཱིཝརཝལཡཾ ཙཱིཝརཝཾསེ གྷཾསེཏྭཱ ཨིཏོ ཙིཏོ ཙ སཉྩཱརེནྟསྶ ཙཱིཝརཝལཡསྶ སབྦོཔི ཙཱིཝརཝཾསོ ཋཱནནྟི ‘‘ཋཱནཱཙཱཝནཾ ནཏྠཱི’’ཏི ཝུཏྟབྱཏིརེཀཝསེན དསྶིཏབྦནྟི གཧེཏབྦཾ.

༩༠. ཋཔིཏསྶ ཧཱིཏི ཨེཏྠ པསིདྡྷིསཱུཙཀཾ ཧི-སདྡཾ ཨཱནེཏྭཱ ‘‘ཙཱིཝརེ ཝིཡ ཧཱི’’ཏི ཡོཛེཏྭཱ ཝིསེསཏྠཛོཏཀཾ ཏུ-སདྡཾ ཨཱནེཏྭཱ ‘‘ཋཔིཏསྶ ཏཱུ’’ཏི ཡོཛེཏབྦཾ. ཨཐ ཝཱ ནིཔཱཏཱནམནེཀཏྠཏྟཱ ཡཐཱཋཱནེ ཋིཏཱནམེཝ ཝིསེསཏྠེ ཧི-སདྡོ, པསིདྡྷིཡཾ ཏུ-སདྡོ ཙ ཡོཛེཏབྦོ. ཝིནིཙྪཡོ ཝེདིཏབྦོཏི ཡོཛནཱ. དཱིགྷཏོ ཝཱ ཏིརིཡཏོ ཝཱ པསཱརེཏྭཱ ¶ ཙཱིཝརཝཾསེ ནིཀྑིཏྟསྶ ཙཱིཝརསྶ ཝིནིཙྪཡོ པན སཾཧརིཏྭཱ ཙཱིཝརཝཾསེ ཋཔིཏཙཱིཝརཝིནིཙྪཡོ ཝིཡ ཝུཏྟོ, ‘‘ཨོརིམནྟེན…པེ… པཱརཱཛིཀཾ བྷཝེ’’ཏི གཱཐཱཏྟཡེ ཝུཏྟནཡེན ཝེདིཏབྦོཏི ཨཏྠོ.

༩༡. སིཀྐཱཡཱཏི ཨོལམྦིཀཱདྷཱརེ. ཡཾ བྷཎྜཀནྟི སམྦནྡྷོ. པཀྑིཔིཏྭཱཏི ནིཝེསེཏྭཱ. ལགྒིཏཾ ཧོཏཱིཏི ཨོལམྦིཏཾ ཧོཏི. ‘‘སིཀྐཱཏོ ཏཾ ཧརནྟོ ཝཱ ཙུཏོ’’ཏི ཨེཏསྨིཾ ཝིཀཔྤེ ¶ སིཀྐཱཡ ཕུཊྛཊྛཱནཝསེན ཋཱནཱཙཱཝནཾ ཝེདིཏབྦཾ. དུཏིཡཝིཀཔྤེ སིཀྐཱཡ, བནྡྷནཊྛཱནསྶ ཙ བྷིཏྟིཔསྶེ ཕུཊྛཊྛཱནཾ ཡདི སིཡཱ, ཏསྶ ཙ ཝསེན ཋཱནཱཙཱཝནཾ ཝེདིཏབྦཾ.

༩༢-༣. ཀུནྟཱདཱིཏི ཨཱདི-སདྡེན བྷིནྡིཝཱལཱདི དཱིགྷཝཏྠུ གཧེཏབྦཾ. ཏཊྚིཀཱཁཱཎུཀཱ ཝིཡ བྷིཏྟིཡཾ པཊིཔཱཊིཡཱ ནིཝེསིཏཱནི མིགསིངྒཱནི ཝཱ སཱུལཱནི ཝཱ ནཱགདནྟཱ ནཱམ. ཨགྒེ ཝཱཏི ཀུནྟཕལཀོཊིཡཾ ཝཱ. བུནྡེ ཝཱཏི ཀུནྟདནྟམཱུལེ ཝཱ. པརིཀཌྜྷཏོཏི ཨུཛུཀཾ ཨཱཀཌྜྷཏོ.

ཕུཊྛོཀཱསནྟི ཏསྨིཾ ཏསྨིཾ ནཱགདནྟེ ཕུཊྛཊྛཱནཾ ཨཏིཀྐཱམཡཏོ ཀེསགྒམཏྟེན པརཱཛཡོ སིཡཱཏི སམྦནྡྷོ, ཋཔིཏཊྛཔིཏཊྛཱནཾ ཝིཧཱཡ ཀེསགྒམཏྟམྤི ཨཏིཀྐཱམཡཏོ པཱརཱཛིཀནྟི ཨཏྠོ. ཀེསགྒེན ཨནྟརེན ཧེཏུནཱ པརཱཛཡོཏི གཧེཏབྦཾ, ཀེསགྒམཏྟམྤི ཨཔནཡནཧེཏུ པཱརཱཛིཀཾ ཧོཏཱིཏི ཨཏྠོ.

༩༤-༥. ཨེཝཾ དཱིགྷཏོ ཨཱཀཌྜྷནེ, ཨུཀྑིཔནེ ཙ ཝིནིཙྪཡཾ དསྶེཏྭཱ ཏིརིཡཾ ཨཱཀཌྜྷནེ, པརཏོ ནཡནེ ཙ ཝིནིཙྪཡཾ དསྶེཏུམཱཧ ‘‘པཱཀཱརཱབྷིམུཁོ’’ཏིཨཱདི. ཨཱཀཌྜྷཏཱིཏི ཨཏྟནོ ¶ ཋིཏཊྛཱནཱབྷིམུཁཾ ཨཱཝིཉྪཏི. ཨོརིམནྟཕུཊྛོཀཱསནྟི ཨོརིམནྟེན ཕུཊྛོཀཱསཾ, ཨཏྟནོ དིསཱཡ ཀུནྟདཎྜེན ཕུཊྛོཀཱསནྟི ཨཏྠོ. ཨེཏྠ ཨཙྩཡནཀིརིཡཱསམྦནྡྷེ སཱམིཝཙནཔྤསངྒེ ཨུཔཡོགཝཙནཾ. ‘‘སཀམྨཀདྷཱཏུཔྤཡོགེ ཨུཔཡོགཝཙནསྶ མཱགདྷིཀཝོཧཱརེ དསྶནཏོ ཀམྨཏྠེཡེཝ ཨུཔཡོགཝཙན’’ནྟི ཨེཀེ ཝདནྟི, ཨེཏཾ ཀཙྩཱཡནལཀྑཎེན སམཱནཾ. ཨིཏརནྟཙྩཡེཏི ཨིཏརནྟེན ཀཏོ ཨཙྩཡོཏི ཨིཏརནྟཙྩཡོ, མཛ྄ཛྷེཔདལོཔསམཱསོ, པཱརིམནྟེན ཀཏྟབྦཱཏིཀྐམེ ཀཏེཏི ཨཏྠོ. ཀེསགྒེན ཙུཏོཏི ཡོཛནཱ. ཡཐཱཝུཏྟོཡེཝ ཨཏྠོ.

པརཏོ པེལླནྟསྶཱཏི པརཏོ ཀཏྭཱ པེལླནྟསྶ, བྷིཏྟིཔསྶཱབྷིམུཁཾ ཀཏྭཱ ནིཔྤཱིལེ༹ནྟསྶཱཏི ཨཏྠོ. ཏཐེཝཱཏི ‘‘ཀེསགྒེན ཙུཏོ’’ཏི ཨཱཀཌྜྷཏི. ཋཔིཏེཔི ཙ ཀུནྟཱདིམྷི ཨཡཾ ནཡོཏི ཡོཛནཱ. ‘‘ཀེསགྒེནཱ’’ཏིཨཱདིནཱ ཨཡམེཝ ཝིནིཙྪཡནཡོ ཝཏྟབྦོཏི ཨཏྠོ.

༩༦. ཏཱལསྶ ཕལཾ ཙཱལེནྟསྶ ཨསྶ བྷིཀྑུནོ ཡེན ཕལེན ཝཏྠུ པཉྩམཱསཀཾ པཱུརཏི, ཏསྨིཾ ཕལེ བནྡྷནཱ མུཏྟེ པཱརཱཛིཀཾ བྷཝེཏི ཡོཛནཱ.

༩༧. ཏཱལསྶ ¶ པིཎྜིཾ ཚིནྡཏཱིཏི ཏཱལཕལཀཎྞིཀཾ ཚིནྡཏི. ཡཱཡ ཝཏྠུ པཱུརཏི, ཏསྶཱ ཚིནྣམཏྟཱཡ ‘‘ཨསྶ པཱརཱཛིཀཾ སིཡཱ’’ཏི ཧེཊྛཱ ཝུཏྟནཡོ ཨིདྷཱཔི ཡོཛེཏབྦོ. ཏཱལཔིཎྜི སཙེ ཨཱཀཱསགཏཱ ཧོཏི, པིཎྜིམཱུལམེཝ ཋཱནཾ. པཎྞདཎྜེ ཝཱ པཎྞེ ཝཱ ཨཔསྶཱཡ ཋིཏཱ ཙེ, ཋིཏཊྛཱནེཧི སཧ པིཎྜིམཱུལཾ གཧེཏྭཱ ཋཱནབྷེདཾ ཉཏྭཱ ཋཱནཱཙཱཝནེན པཱརཱཛིཀམྤི དཊྛབྦཾ. ཨེསེཝ ནཡོཏི ‘‘ཡེན ཝཏྠུ པཱུརཏི, ཏསྨིཾ བནྡྷནཱ མུཏྟེ ཨསྶ པཱརཱཛིཀཾ སིཡཱ’’ཏི ཡཐཱཝུཏྟོ ཨེཝ ནཡོ. ཨེཏེསུ སབྦེསུ ¶ ཋཱནེསུ པཱརཱཛིཀཝཱིཏིཀྐམཏོ པུབྦབྷཱགཱནནྟརཔྤཡོགེ ཐུལླཙྩཡཉྩ སཧཔཡོགེ པཱཙིཏྟིཡཊྛཱནེ དུཀྐཊཉྩ ཏཏོཔི པུབྦཔཡོགེ པཱཙིཏྟིཡཊྛཱནེ པཱཙིཏྟིཡཉྩ དུཀྐཊཉྩ གམནདུཏིཡཔརིཡེསནཱདིཨཝསེསཔཡོགེསུ ཨདིནྣཱདཱནཔུབྦཀཏྟཱ དུཀྐཊཉྩ ཨསམྨུཡ྄ཧནྟེཧི ཝེདིཏབྦཾ.

ཝེཧཱསཊྛཀཐཱཝཎྞནཱ.

༩༨. ཨུདཀེ ནིདྷིཊྛཱནཾ གཙྪཏོཏི སམྦནྡྷོ. ཨགམྦྷཱིརོདཀེ ནིདྷིཊྛཱནཾ པདཝཱརེན གཙྪཏོ པདེ པདེ པུབྦཔཡོགེ དུཀྐཊཾ ཧོཏཱིཏི ཡོཛནཱ. གམྦྷཱིརེ པན ཏཐཱཏི ‘‘པདཝཱརེན གཙྪཏོ དུཀྐཊ’’ནྟི ཡཐཱཝུཏྟམཏིདིསཏི. གཙྪཏོཏི ཏརཏོ, ཧཏྠཾ ཨཙཱལེཏྭཱ ཏརནྟསྶ པདཝཱརགཎནཱཡ, ཧཏྠེན ཙ ཝཱཡམནྟསྶ ‘‘པདཝཱརེནཱ’’ཏི ཨིདཾ ཨུཔལཀྑཎནྟི ཀཏྭཱ ཧཏྠཝཱརགཎནཱཡ པདཝཱརགཎནཱཡ དུཀྐཊཱནི ཝེདིཏབྦཱནི. ཏེན ཝུཏྟཾ ཨཊྛཀཐཱཡཾ ‘‘གམྦྷཱིརེ ཧཏྠེཧི ཝཱ པཱདེཧི ཝཱ པཡོགཾ ཀརོནྟསྶ ཧཏྠཝཱརེཧི ཝཱ པདཝཱརེཧི ཝཱ པཡོགེ པཡོགེ དུཀྐཊ’’ནྟི (པཱརཱ. ཨཊྛ. ༡.༩༨).

ཨུམྨུཛྫནཱདིསཱུཏི ཨེཏྠ ཨཱདི-སདྡེན ནིམུཛྫནཾ སངྒཎྷཱཏི. ཨེཏྠཱཔི ‘‘ཏཐཱ’’ཏི ཨནུཝཏྟམཱནཏྟཱ པཡོགེ པཡོགེ དུཀྐཊནྟི ཨཡམཏྠོ ཝེདིཏབྦོ. ནིཧིཏཀུམྦྷིཡཱ གཧཎཏྠཾ ནིམུཛྫནུམྨུཛྫནེསུཔི ཧཏྠཝཱརེན, པདཝཱརེན, ཧཏྠཔདཝཱརེཧི ཙ དུཀྐཊམེཝཱཏི ཝུཏྟཾ ཧོཏི. ཏེནཱཧ ཨཊྛཀཐཱཡཾ ‘‘ཨེསེཝ ནཡོ ཀུམྦྷིགཧཎཏྠཾ ནིམུཛྫནུམྨུཛྫནེསཱུ’’ཏི (པཱརཱ. ཨཊྛ. ༡.༩༨).

ཨིམིསྶཱ གཱཐཱཡ ‘‘ནིདྷིཊྛཱནཾ གཙྪཏོ དུཀྐཊ’’ནྟི ཝཙནཏོ ཏཐཱ གཙྪནྟསྶ ཨུདཀསཔྤཙཎྜམཙྪདསྶནེན བྷཱཡིཏྭཱ པལཱཡནྟསྶ གམནསྶ ཨཏདཏྠཏྟཱ ཨནཱཔཏྟཱིཏི བྱཏིརེཀེན ¶ ཝིཉྙཱཡཏི. ཨེཏྠ དུཏིཡཔརིཡེསནཱདིསབྦཔཡོགེསུ པཱཙིཏྟིཡཊྛཱནེ ¶ པཱཙིཏྟིཡཉྩ པཱཙིཏྟིཡེན སཧ དུཀྐཊཉྩ ཨཝསེསཔཡོགེསུ སུདྡྷདུཀྐཊཉྩ སཧཔཡོགེ བྷཱཛནཱམསནེ ཨནཱམཱསདུཀྐཊཉྩ ཕནྡཱཔནེ ཐུལླཙྩཡཉྩ ཋཱནཱཙཱཝནེ པཱརཱཛིཀཉྩ ནིདྷིཀུམྦྷིཡཱ ཝུཏྟནཡེན ཝིཉྙཱཏུཾ སཀྐཱཏི ན ཝུཏྟནྟི དཊྛབྦཾ. ཏཏྠ ཋཱནབྷེདོ པཉྩདྷཱ ཧོཏི, ཨིདྷ པཱིལེ༹ཏྭཱ ཨོསཱརེཏུཾ སཀྐུཎེཡྻཏྟཱ ཨདྷོདིསཱཡ སཧ ཚབྦིདྷཾ ཧོཏཱིཏི ཨཡམེཏེསཾ ཝིསེསོ.

༩༩. ཏཏྠ ཛཱཏཀཔུཔྥེསཱུཏི ཏསྨིཾ ཛལེ རུལ༹ྷེསུ ཨུཔྤལཱདིཀུསུམེསུ, ནིདྡྷཱརཎེ བྷུམྨཾ. ཡེན པུཔྥེནཱཏི ནིདྡྷཱརིཏབྦཾ. ཚིནྡཏོཏི ཨེཏྠ ཝཏྟམཱནཀཱལཝསེན ཨཏྠཾ ཨགྒཧེཏྭཱ ‘‘ཚིནྣཝཏོ’’ཏི བྷཱུཏཝསེན ཨཏྠོ གཧེཏབྦོ. ཨེཝཾ ཨགྒཧིཏེ ཨནྟིམསྶ པཡོགསྶ ཡཱཝ ཨནུཔརམོ, ཐུལླཙྩཡཱརཧཏྟཱ པཱརཱཛིཀཝཙནསྶ ཝཏྠུཝིརོདྷིཏཱཡ ཙ ཨིམསྶེཝ པཙྪིམཀུསུམསྶ ཀནྟནཀཱལེ པུཔྥནཱལ༹པསྶེ ཏཙམཏྟེཔི ཨཙྪིནྣེ པཱརཱཛིཀཾ ནཏྠཱིཏི དསྶེཏུཾ ‘‘ཨེཀནཱལ༹…པེ… པརིརཀྑཏཱི’’ཏི ཨེཏྠེཝ ཨནནྟརེ ཝུཙྩམཱནནཡསྶ ཝིརུདྡྷཏྟཱ ཙ ཨིམཾ ཝིནིཙྪཡཾ དསྶེཏུཾ ལིཁིཏསྶ ‘‘ཡསྨིཾ པུཔྥེ ཝཏྠུ པཱུརཏི, ཏསྨིཾ ཚིནྣམཏྟེ པཱརཱཛིཀ’’ནྟི (པཱརཱ. ཨཊྛ. ༡.༩༨) ཨཊྛཀཐཱཝཙནསྶ ཝིརུདྡྷཏྟཱ ཙ ཝཏྟམཱནཀཱལམགཧེཏྭཱ བྷཱུཏཀཱལསྶེཝ གཧེཏབྦཏྟཱ ‘‘ཀདཱ དེཝདཏྟ ཨཱགཏོསཱི’’ཏི པཉྷསྶ ‘‘ཨེསོཧམཱགཙྪཱམི, ཨཱགཙྪནྟཾ མཱ མཾ ཝིཛ྄ཛྷཱ’’ཏི ཨུཏྟརེ ཝིཡ ཝཏྟམཱནསམཱིཔེ ཝཏྟམཱནེཝཱཏི བྷཱུཏེ ཝཏྟམཱནབྱཔདེསཏོ ཝུཏྟནྟི དཊྛབྦཾ.

༡༠༠. ‘‘ཨུཔྤལཛཱཏིཡཱ’’ཏི ཨིམིནཱ ‘‘པདུམཛཱཏིཡཱ’’ཏི བྱཏིརེཀཏོ ཝུཏྟཏྟཱ ‘‘པདུམཛཱཏིཀཱནཾ པན དཎྜེ ཚིནྣེ ཨབྦྷནྟརེ སུཏྟཾ ཨཙྪིནྣམྤི རཀྑཏཱི’’ཏི (པཱརཱ. ཨཊྛ. ༡.༩༨) ཨཊྛཀཐཱནཡོ སངྒཧིཏོཏི ¶ དཊྛབྦཾ. ཨེཀནཱལ༹སྶ ཝཱ པསྶེཏི ‘‘ནཱལ༹སྶ ཨེཀཔསྶེ’’ཏི ཝཏྟབྦེ གཱཐཱབནྡྷསུཁཏྠཾ ཝུཏྟནྟི ཝེདིཏབྦཾ. ཏཏོཏི ནཱལ༹ཏོ.

༡༠༡. བྷཱརབདྡྷཀུསུམེསུ ཝིནིཙྪཡསྶ ཝཀྑམཱནཏྟཱ ཚིནྡིཏྭཱ ཋཔིཏེསཱུཏི ཨབདྡྷཀུསུམཝསེན གཧེཏབྦཾ. པུབྦེ ཝུཏྟནཡེནཱཏི ཏཏྲཛཱཏཀཀུསུམེསུ ཝུཏྟཝིནིཙྪཡཱནུསཱརེན. ‘‘ཡེན པུཔྥེན པཱུརཏི, ཏསྨིཾ ཚིནྣམཏྟེ’’ཏི ཨཝཏྭཱ གཧིཏམཏྟེ པཱརཱཛིཀནྟི ཡོཛནཱ ཙེཏྠ ཝིསེསོ.

༡༠༢. བྷཱརཾ ཀཏྭཱ བདྡྷཱནི བྷཱརབདྡྷཱནཱིཏི མཛ྄ཛྷཔདལོཔཱིསམཱསོ. པུཔྥཱནཱིཏི པཱདགྒྷནཀཱནི ¶ ཨུཔྤལཱདིཀུསུམཱནི. ཚསྭཱཀཱརེསཱུཏི ཨུདཀེ ཨོསཱིདཱཔེཏུཾ སཀྐུཎེཡྻཏྟཱ ཨདྷོདིསཱཡ སཧ ཙཏསྶོ དིསཱ, ཨུདྡྷནྟི ཨིམཱསུ ཚསུ དིསཱསུ, ནིདྡྷཱརཎེ བྷུམྨཾ. ཀེནཙི ཨཱཀཱརེནཱཏི ནིདྡྷཱརེཏབྦདསྶནཾ. ཋཱནཱཙཱཝནསྶ སཱདྷཀཏམཏྟཱ ཀརཎེཡེཝ ཀརཎཝཙནཾ. ནསྶཏཱིཏི པཱདགྒྷནཀཔུཔྥཱནཾ ཋཱནཱཙཱཝནེན པཱརཱཛིཀམཱཔཛྫིཏྭཱ ལོཀིཡལོཀུཏྟརཱནཾ ཨནཝསེསགུཎཱནཾ པཏིཊྛཱནབྷཱུཏཾ པཱཏིམོཀྑསཾཝརསཱིལཾ ནཱསེཏྭཱ སཡཾ གུཎམརཎེན མཱིཡཏཱིཏི ཨཏྠོ.

༡༠༣. པུཔྥཱནཾ ཀལཱཔནྟི པཱདགྒྷནཀཨུཔྤལཱདིཀུསུམཀལཱཔཾ. ཨུདཀཾ ཙཱལེཏྭཱཏི ཡཐཱ ཝཱིཙི ཨུཊྛཱཏི, ཏཐཱ ཙཱལེཏྭཱ. པུཔྥཊྛཱནཱཏི པུཔྥཱནཾ ཋིཏཊྛཱནཱ. ཙཱཝེཏཱིཏི ཀལཱཔཾ ཀེསགྒམཏྟམྤི ཨཔནེཏི. ‘‘པུཔྥཾ ཋཱནཱ ཙཱཝེཏཱི’’ཏི ཀཏྠཙི པོཏྠཀེསུ པཱཋོ དིསྶཏི. པུཔྥཀལཱཔསྶེཝ གཧིཏཏྟཱ པུརིམོཡེཝ གཧེཏབྦོ.

༡༠༤. ‘‘ཨེཏྠ གཏཾ གཧེསྶཱམཱི’’ཏི སཧ པཱཋསེསེན ཡོཛནཱ. པརིཀཔྤེཏཱིཏི ‘‘ཨེཏྠ གཏཾ གཧེསྶཱམཱི’’ཏི ཋཱནཾ པརིཙྪིནྡིཏྭཱ ¶ ཏཀྐེཏི. རཀྑཏཱིཏི ཋཱནཱཙཱཝནེཔི སཏི སོ པརིཀཔྤོ པཱརཱཛིཀཱཔཏྟིཏོ ཏཾ བྷིཀྑུཾ རཀྑཏི. གཏཊྛཱནཱཏི པུཔྥཀལཱཔེན གཏཾ སམྤཏྟཉྩ ཏཾ ཋཱནཉྩཱཏི ཝིགྒཧོ. ‘‘ཨུདྡྷརནྟོ’’ཏི ཨེཏེན ‘‘པུཔྥཱནཾ ཀལཱཔ’’ནྟི ཨཱནེཏྭཱ སམྦནྡྷིཏབྦཾ. ‘‘ཀཏཊྛཱནཱ’’ཏིཔི པཱཋོ, ཀཏཱ པུཔྥཱནཾ ཋཱནཱ ཨུདྡྷརནྟོཏི སམྦནྡྷོ. ཨུདཀཾ ཙཱལེཏྭཱ ཝཱིཙིཡོ ཨུཊྛཱཔེཏྭཱ ཝཱིཙིཔྤཧཱརེན ཨུདཀཔིཊྛེན པརིཀཔྤིཏཊྛཱནཾ སམྤཏྟཾ པུཔྥཀལཱཔཾ ཋིཏཊྛཱནཱ ཨུདྡྷརནྟོ ཀེསགྒམཏྟམྤི ཋཱནཱ ཙཱཝེནྟོཏི ཨཏྠོ. ‘‘ཋཱནཱ’’ཏི ཨིདཾ ‘‘བྷཊྛོ’’ཏི ཨིམིནཱ སམྦནྡྷནཱིཡཾ. བྷཊྛོ ནཱམ པཝུཙྩཏཱིཏི ཨཏྟནཱ སམཱདཱཡ རཀྑིཡམཱནཱ པཱཏིམོཀྑསཾཝརསཱིལསངྑཱཏསབྦགུཎརཏནངྐུརཱབྷིནིབྦཏྟཊྛཱནཱ པཏིཏོ ནཱམ ཧོཏཱིཏི པཝུཙྩཏི.

༡༠༥. ཛལཏོ ཨཙྩུགྒཏསྶཱཏི ཨེཏྠ ‘‘པུཔྥསྶཱ’’ཏི སཱམཏྠིཡཱ ལབྦྷཏི. ཛལཔིཊྛིཏོ ཨཙྩུགྒཏསྶ པུཔྥསྶ སཀལཛལཾ ཋཱནཾ, ཀདྡམཔིཊྛིཏོ པཊྛཱཡ ཨུདཀཔིཊྛིཔརིཡནྟཾ པུཔྥདཎྜེན ཕརིཏྭཱ ཋིཏཾ སབྦམུདཀཾ ཋཱནནྟི ཝུཏྟཾ ཧོཏི. ཨུཔྤཱཊེཏྭཱཏི པུཔྥགྒཾ ཨཱཀཌྜྷིཏྭཱ ཨུཔྤཱིལེ༹ཏྭཱ. ཏཏོཏི ཏསྨཱ པུཔྥཊྛཱནབྷཱུཏསཀལཛལརཱསིཏོ. ཨུཛུནྟི ཨུཛུཾ ཀཏྭཱ. ཨུདྡྷརཏོཏི ཨུཔྤཱཊེནྟསྶ.

༡༠༦. ནཱལ༹ནྟེཏི ཨུཔྤཱཊིཏཔུཔྥནཱལ༹སྶ མཱུལཀོཊིཡཱ. ཛལཏོཏི ཨུདཀཔིཊྛིཏོ. མུཏྟམཏྟེ ¶ ཀེསགྒམཏྟཾ དཱུརཾ ཀཏྭཱཏི པཱཋསེསཡོཛནཱ ཀཱཏབྦཱ. ‘‘ཛལཏོ’’ཏི པཋམཏཏིཡཔཱདེསུ དྭིཀྑཏྟུཾ ཝཙནཾ ཨཏྠཱཝིསེསེཔི པདཱཝུཏྟིཨལངྐཱརེ ཨཌྜྷཡམཀཝསེན ཝུཏྟཏྟཱ པུནརུཏྟིདོསོ ན ཧོཏཱིཏི ཝེདིཏབྦཾ. ‘‘མུཏྟམཏྟེ, ཨམུཏྟེ’’ཏི ཙ སམྦནྡྷིཏབྦཾ, ཨཏྠཱནཾ ཝཱ ཝིསེསཏོ ཨུབྷཡཏྠ ཝུཏྟནྟི ཝེདིཏབྦཾ. ཏསྨིཾ ནཱལ༹ནྟེཏི སམྦནྡྷོ.

༡༠༧. ཏསྶ ¶ ནཱམེཏྭཱ ཨུཔྤཱཊིཏསྶ. སཧ གཙྪེན ཨུཔྤཱཊིཏསྶཱཔི ཨཡམེཝ ཝིནིཙྪཡོ. ཨིདྷ པན སབྦཔུཔྥཔཎྞནཱལཱ༹ནི མཱུལཏོ པབྷུཏི པཋམཾ ཋིཏཊྛཱནཏོ ཨཔནཱམནཝསེན ཋཱནཱཙཱཝནཾ ཝེདིཏབྦཾ. ཨེཝཾ པུཔྥཱདཱིནི ཨུཔྤཱཊེནྟསྶ བྷཱུཏགཱམཝིཀོཔནཱཔཏྟིཡཱ ཋཱནེ སཧཔཡོགདུཀྐཊཾ ཧོཏཱིཏི ཝེདིཏབྦཾ.

༡༠༨-༩. བལི༹སཱདིམཙྪགྒཧཎོཔཀརཎཱནཾ ཝཙནཏོ, ཛལེ ཋིཏམཏམཙྪཱནཾ ཝིནིཙྪཡསྶ ཙ ཝཀྑམཱནཏྟཱ མཙྪེཏི ཛཱིཝམཱནཀམཙྪཱནཾ གཧཎཾ. ཨུཔལཀྑཎཝསེན ཝཱ ཨཝུཏྟསམུཙྩཡཏྠ ཝཱ-སདྡེན ཝཱ ཁིཔཀཱདཱིནི མཙྪཝདྷོཔཀརཎཱནི ཝུཏྟཱནེཝཱཏི དཊྛབྦཾ. ཝཏྠཱུཏི པཱདོ. ཏསྨིཾ མཙྪེ. ཨུདྡྷཊོཡེཝ ཨུདྡྷཊམཏྟོ, མཙྪོ, ཏསྨིཾ. ཛལཱཏི ཨུདཀཏོ ཀེསགྒམཏྟམྤི ཨཔནེཏྭཱ ཨུཀྑིཏྟམཏྟེཏི ཝུཏྟཾ ཧོཏི.

༡༡༠. པུཔྥཱནཾ ཝིཡ མཙྪཱནམྤི ཋིཏཊྛཱནམེཝ ཋཱནནྟི ཨགྒཧེཏྭཱ སཀལཛལཾ ཋཱནཾ ཀཏྭཱ ཀསྨཱ ཝུཏྟནྟི ཨཱཧ ‘‘ཋཱནཾ སལིལཛཱནཾ ཧཱི’’ཏིཨཱདི. སལིལེ ཛཱཏཱ སལིལཛཱ, ཨིཏི པཀརཎཏོ མཙྪཱཡེཝ ཝུཙྩནྟི. ཨཏྠཔྤཀརཎསདྡནྟརསནྣིདྷཱནཱདཱིཧི སདྡཱ ཝིསེསཏྠཾ ཝདནྟཱིཏི. ཧཱིཏི པསིདྡྷིཡཾ. ཀེཝལནྟི ཨཝདྷཱརཎེ, ཛལམེཝཱཏི ཝུཏྟཾ ཧོཏི. ཨིམིནཱ བཧིཨུདཀཾ ནིཝཏྟིཏཾ ཧོཏི. སཀལཾ ཛལམེཝ ཋཱནཾ ཡསྨཱ, ཏསྨཱ སལིལཊྛཾ ཛལཱ ཝིམོཙེནྟོ པཱརཱཛིཀོ ཧོཏཱིཏི ཧེཏུཧེཏུམནྟབྷཱཝེན ཡོཛནཱ ཝེདིཏབྦཱ. ཨཱཔནྣཾ པརཱཛེཏཱིཏི པཱརཱཛིཀཱ, ཨཱཔཏྟི, སཱ ཨེཏསྶ ཨཏྠཱིཏི པཱརཱཛིཀོ, པུགྒལོ.

༡༡༡. ནཱིརཾ ཨུདཀཾ. ཝཱརིམྷི ཛལེ ཛཱཏོ ཝཱརིཛོ, ཨིཏི པཀརཎཏོ མཙྪོཝ གཡ྄ཧཏི. ཨེཏེནེཝ ཨཱཀཱསེ ཨུཔྤཏིཏམཙྪོ ¶ , གོཙརཏྠཱཡ ཙ ཐལམུགྒཏཀུམྨཱདཡོ ཨུཔལཀྑིཏཱཏི ཝེདིཏབྦཾ. ཏེསཾ གཧཎེ ཝིནིཙྪཡོ ཨཱཀཱསཊྛཐལཊྛཀཐཱཡ ཝུཏྟནཡེན ཝེདིཏབྦོ. བྷཎྜགྒྷེན ཝིནིདྡིསེཏི དུཀྐཊཱདིཝཏྠུནོ ¶ བྷཎྜསྶ ཨགྒྷཝསེན དུཀྐཊཐུལླཙྩཡཔཱརཱཛིཀཱཔཏྟིཡོ ཝདེཡྻཱཏི ཨཏྠོ.

༡༡༢. ཏལཱ༹ཀེཏི སརསྨིཾ, ཨིམིནཱ ཙ ཝཱཔིཔོཀྑརཎིསོབྦྷཱདིཛལཱསཡཱ སངྒཡ྄ཧནྟི. ནདིཡཱཏི ནིནྣགཱཡ, ཨིམིནཱ ཙ ཀནྡརཱདཡོ སངྒཡ྄ཧནྟི. ནིནྣེཏི ཨཱཝཱཊེ. མཙྪཝིསཾ ནཱམཱཏི ཨེཏྠ ནཱམ-སདྡོ སཉྙཱཡཾ. མཙྪཝིསནཱམཀཾ མདནཕལཱདིཀཾ དཊྛབྦཾ. གཏེཏི ཝིསཔཀྑིཔཀེ མཙྪགྷཱཏཀེ གཏེ.

༡༡༤. སཱམིཀེསཱུཏི ཝིསཾ ཡོཛེཏྭཱ གཏེསུ མཙྪསཱམིཀེསུ. ཨཱཧརནྟེསཱུཏི ཨཱཧརཱཔེནྟེསུ. བྷཎྜདེཡྻནྟི བྷཎྜཉྩ ཏཾ དེཡྻཉྩཱཏི ཝིགྒཧོ, ཨཏྟནཱ གཧིཏཝཏྠུཾ ཝཱ ཏདགྒྷནཀཾ ཝཱ བྷཎྜཾ དཱཏབྦནྟི ཨཏྠོ.

༡༡༥. མཙྪེཏི མཏམཙྪེ. སེསེཏི ནམཏམཙྪེ.

༡༡༦. ཨམཏེསུ གཧིཏེསཱུཏི པཀརཎཏོ ལབྦྷཏི, ནིམིཏྟཏྠེ ཙེཏཾ བྷུམྨཾ. ཨནཱཔཏྟིཾ ཝདནྟཱིཏི ཨདིནྣཱདཱནཱཔཏྟིཡཱ ཨནཱཔཏྟིཾ ཝདནྟི, མཱརཎཔྤཏྟིཡཱ པཱཙིཏྟིཡཾ ཧོཏེཝ. ཨཡཉྩ ཝིནིཙྪཡོ ཨརཀྑིཏཨགོཔིཏེསུ ཨསྶཱམིཀཏལཱ༹ཀཱདཱིསུ ཝེདིཏབྦོ.

ཨུདཀཊྛཀཐཱཝཎྞནཱ.

༡༡༧. ནཱཝནྟི ཨེཏྠ ‘‘ནཱཝཱ ནཱམ ཡཱཡ ཏརཏཱི’’ཏི (པཱརཱ. ༩༩) ཝཙནཏོ ཛལཏཱརཎཱརཧཾ ཨནྟམསོ ཨེཀམྤི ཝཧནྟཾ རཛནདོཎིཝེཎུཀལཱཔཱདིཀཾ ¶ ཝེདིཏབྦཾ. ནཱཝཊྛཾ ནཱམ བྷཎྜཾ ཡཾ ཀིཉྩི ཨིནྡྲིཡབདྡྷཾ ཝཱ ཨནིནྡྲིཡབདྡྷཾ ཝཱ. ‘‘ཐེནེཏྭཱ གཎྷིསྶཱམཱི’’ཏི ཨིམིནཱ ‘‘ཐེཡྻཙིཏྟསྶཱ’’ཏི ཨིམམཏྠཾ ཝིཉྙཱཔེཏི. པཱདུདྡྷཱརེཏི དུཏིཡཔརིཡེསནཱདིཨཏྠཾ གཙྪནྟསྶ པདེ པདེ. དོསཱཏི དུཀྐཊཱཔཏྟིཡོ. ཝུཏྟཱཏི ‘‘ནཱཝཊྛཾ བྷཎྜཾ ཨཝཧརིསྶཱམཱི’ཏི ཐེཡྻཙིཏྟོ དུཏིཡཾ ཝཱ པརིཡེསཏི གཙྪཏི ཝཱ, ཨཱཔཏྟི དུཀྐཊསྶཱ’’ཏི (པཱརཱ. ༩༩) པདབྷཱཛནིཡཾ བྷགཝཏཱ ཝུཏྟཱ, ཨིམིནཱ པུབྦཔཡོགསཧཔཡོགདུཀྐཊཱནི, ཕནྡཱཔནེ ཐུལླཙྩཡཾ, ཋཱནཱཙཱཝནེ པཱརཱཛིཀཉྩ ཨུཔལཀྑཎཝསེན དསྶིཏནྟི ཝེདིཏབྦཾ.

༡༡༨. ཙཎྜསོཏེཏི ¶ ཝེགེན གཙྪནྟེ ཨུདཀཔྤཝཱཧེ, ‘‘ཙཎྜསོཏེ’’ཏི ཨིམིནཱ བནྡྷནཾ ཝིནཱ སབྷཱཝེན ཨཊྛིཏབྷཱཝསྶ སཱུཙནཏོ ‘‘བནྡྷནམེཝ ཋཱན’’ནྟི ཝུཏྟཊྛཱནཔརིཙྪེདསྶ ཀཱརཎཾ དསྶིཏནྟི ཝེདིཏབྦཾ. ཡསྨཱ ཙཎྜསོཏེ བདྡྷཱ, ཏསྨཱ བནྡྷནམེཀམེཝ ཋཱནཾ མཏནྟི ཝུཏྟཾ ཧོཏི. ཏསྨིནྟི བནྡྷནེ. དྷཱིརཱ ཝིནཡདྷརཱ.

༡༡༩-༡༢༠. ‘‘ནིཙྩལེ ཨུདཀེ ནཱཝ-མབནྡྷནམཝཊྛིཏ’’ནྟི ཨིམིནཱ ཚདྷཱ ཋཱནཔརིཙྪེདསྶ ལབྦྷམཱནཏྟེ ཀཱརཎཾ དསྶེཏི. ནཱཝཾ ཀཌྜྷཏོ ཏསྶ པཱརཱཛིཀནྟི སམྦནྡྷོ. པུནཔི ཀིཾ ཀརོནྟོཏི ཨཱཧ ‘‘ཨེཀེནནྟེན སམྥུཊྛ’’ནྟིཨཱདི. ཏཾ ནཱཝཾ ཨཏིཀྐཱམཡཏོཏི སམྦནྡྷོ. ཨེཏྠཱཔི ‘‘ཀཌྜྷིཏཝཏོ ཨཏིཀྐམིཏཝཏོ’’ཏི བྷཱུཏཝསེན ཨཏྠོ ཡོཛེཏབྦོ. ཡམེཏྠ ཝཏྟབྦཾ, ཏཾ ཧེཊྛཱ ཝུཏྟནཡམེཝ.

༡༢༡. ཨེཝཾ ཙཏུཔསྶཱཀཌྜྷནེ ཝིནིཙྪཡཾ དསྶེཏྭཱ ཨིདཱནི ཨུདྡྷཾ, ཨདྷོ ཙ ཨུཀྑིཔནཨོསཱིདཱཔནེསུ ཝིནིཙྪཡཾ དསྶེཏུམཱཧ ‘‘ཏཐཱ’’ཏིཨཱདི. ཏཐཱཏི ‘‘ཏསྶ པཱརཱཛིཀ’’ནྟི ཨཱཀཌྜྷཏི. ཀསྨིཾ ¶ ཀཱལེཏི ཨཱཧ ‘‘ཨུདྡྷཾ ཀེསགྒམཏྟམྤཱི’’ཏིཨཱདི. ཨདྷོནཱཝཱཏལནྟི ནཱཝཱཏལསྶ ཨདྷོ ཨདྷོནཱཝཱཏལཾ, ཏསྨིཾ ཨུདྡྷཾ ཀེསགྒམཏྟམྤི ཨུདཀམྷཱ ཝིམོཙིཏེཏི ཨིམིནཱ སམྦནྡྷོ. ཏེན ཕུཊྛཾ ཀེསགྒམཏྟམྤི མུཁཝཊྚིཡཱ ཝིམོཙིཏེཏི ཡོཛནཱ. ཏེནཱཏི ཨདྷོནཱཝཱཏལེན ཕུཊྛེ ཨུདཀེ མུཁཝཊྚིཡཱ ཀརཎབྷཱུཏཱཡ ཀེསགྒམཏྟམྤི ཝིམོཙིཏེཏི གཧེཏབྦཾ.

༡༢༢. ཏཱིརེ བནྡྷིཏྭཱ པན ནིཙྩལེ ཛལེ ཋཔིཏཱ ཡཱ ནཱཝཱ, ཏསྶཱ ནཱཝཱཡ ཋཱནཾ བནྡྷནཉྩ ཋིཏོཀཱསོ ཙཱཏི དྭིདྷཱ མཏནྟི ཡོཛནཱ.

༡༢༣. པུབྦཾ པཋམཾ བནྡྷནསྶ ཝིམོཙནེ ཐུལླཙྩཡཾ ཧོཏཱིཏི ཡོཛནཱ. ཀེནཙུཔཱཡེནཱཏི ‘‘པུརཏོ པཙྪཏོ ཝཱཔཱི’’ཏིཨཱདིཀྐམེན ཡཐཱཝུཏྟོཔཱཡཚཀྐེསུ ཡེན ཀེནཙི ཨུཔཱཡེནཱཏི ཨཏྠོ. ཋཱནཱ ཙཱཝེཏི ནཱཝཾ.

༡༢༤. པཋམཾ ཋཱནཱ ཙཱཝེཏྭཱཏི ‘‘པུརཏོ པཙྪཏོ ཝཱ’’ཏིཨཱདིནཱ ཡཐཱཝུཏྟེསུ ཚསུ ཨཱཀཱརེསུ ཨཉྙཏརེན ཨཱཀཱརེན ནཱཝཾ ཋཔིཏཊྛཱནཏོ པཋམཾ ཙཱཝེཏྭཱ. ཨེསེཝ ཙ ནཡོཏི ནཱཝཱཡ ¶ པཋམཾ ཋིཏཊྛཱནཏོ ཙཱཝནེ ཐུལླཙྩཡཾ, པཙྪཱ བནྡྷནམོཙནེ པཱརཱཛིཀནྟི ཨེསེཝ ནཡོ ནེཏབྦོཏི ཨཏྠོ. ཨེཏྠ ཙ ‘‘ཏཱིརེ བནྡྷིཏྭཱ ནིཙྩལེ ཨུདཀེ ཋཔིཏནཱཝཱཡ བནྡྷནཉྩ ཋིཏོཀཱསོ ཙཱཏི དྭེ ཋཱནཱནི, ཏཾ པཋམཾ བནྡྷནཱ མོཙེཏི, ཐུལླཙྩཡཾ. པཙྪཱ ཚནྣཾ ཨཱཀཱརཱནཾ ཨཉྙཏརེན ཋཱནཱ ཙཱཝེཏི, པཱརཱཛིཀཾ. པཋམཾ ཋཱནཱ ཙཱཝེཏྭཱ པཙྪཱ བནྡྷནམོཙནེཔི ཨེསེཝ ནཡོ’’ཏི (པཱརཱ. ༩༩) ཨཊྛཀཐཱཡཾ ཝུཏྟཝིནིཙྪཡོ སངྒཧིཏོ. ཨཱམསནཕནྡཱཔནེསུ དུཀྐཊཐུལླཙྩཡཱནི ཧེཊྛཱ ཀུམྦྷིཡཾ ཝུཏྟནཡེནེཝ ཉཱཏུཾ སཀྐུཎེཡྻཏྟཱ ན ཝུཏྟཱནཱིཏི ཝེདིཏབྦཾ. ཨེཝམུཔརིཔི.

༡༢༥. ཨུསྶཱརེཏྭཱཏི ¶ ཨུདཀཏོ ཐལཾ ཨཱརོཔེཏྭཱ. ནིཀུཛྫིཏྭཱཏི ཨདྷོམུཁཾ ཀཏྭཱ. ཐལེ ཋཔིཏཱཡ ནཱཝཱཡ མུཁཝཊྚིཡཱ ཕུཊྛོཀཱསོ ཨེཝ ཋཱནནྟི ཡོཛནཱ. ཧཱིཏི ཝིསེསོ, ཏེན ཛལཊྛཏོ ཐལཊྛཱཡ ནཱཝཱཡ ཝུཏྟཾ ཝིསེསཾ ཛོཏེཏི.

༡༢༦. ཨེཏྠ ཨདྷོ ཨོསཱིདཱཔནསྶ ཨལབྦྷམཱནཏཱཡ ཏཾ ཝིནཱ ཨིཏརེསཾ པཉྩནྣཾ ཨཱཀཱརཱནཾ ཝསེན ཋཱནཱཙཱཝནཾ དསྶེཏུམཱཧ ‘‘ཉེཡྻོ’’ཏིཨཱདི. ཡཏོ ཀུཏོཙཱིཏི ཏིརིཡཾ ཙཏསྶནྣཾ, ཨུཔརིདིསཱཡ ཙ ཝསེན ཡཾ ཀིཉྩི དིསཱབྷིམུཁཾ ཀེསགྒམཏྟམྤི ཨཏིཀྐམེནྟོ.

༡༢༧. ཨུཀྐུཛྫིཏཱཡཔཱིཏི ཨུདྡྷཾམུཁཾ ཋཔིཏཱཡཔི. གྷཊིཀཱནནྟི དཱརུཁཎྜཱནཾ. ‘‘ཏཐཱ’’ཏི ཨིམིནཱ ‘‘ཉེཡྻོ ཋཱནཔརིཙྪེདོ’’ཏིཨཱདིནཱ ཝུཏྟནཡཾ ཨཏིདིསཏི. སོ པན ཨུཀྐུཛྫིཏྭཱ བྷཱུམིཡཾ ཋཔིཏནཱཝཱཡ ཡུཛྫཏི. གྷཊིཀཱནཾ ཨུཔརི ཋཔིཏཱཡ པན ནཱགདནྟེསུ ཋཔིཏཀུནྟེ ཝུཏྟཝིནིཙྪཡོ ཡུཛྫཏི.

༡༢༨. ‘‘ཐེཡྻཱ’’ཏི ཨིདཾ ‘‘པཱཛེནྟསྶཱ’’ཏི ཝིསེསནཾ. ཏིཏྠེཏི ཏིཏྠཱསནྣཛལེ. ཨརིཏྟེནཱཏི ཀེནིཔཱཏེན. ཕིཡེནཱཏི པཱཛནཕལཀེན. པཱཛེནྟསྶཱཏི པེསེནྟསྶ. ‘‘ཏཾ པཱཛེཏཱི’’ཏིཔི པཱཋོ དིསྶཏི, ཏཾ ནཱཝཾ ཡོ པཱཛེཏི, ཏསྶ པརཱཛཡོཏི ཨཏྠོ.

༡༢༩-༣༠. ཚཏྟནྟི ཨཱཏཔཝཱརཎཾ. པཎཱམེཏྭཱཏི ཡཐཱ ཝཱཏཾ གཎྷཱཏི, ཏཐཱ པཎཱམེཏྭཱ. ཨུསྶཱཔེཏྭཱཝ ཙཱིཝརནྟི ཙཱིཝརཾ ཨུདྡྷཾ ཨུཙྩཱརེཏྭཱ ཝཱ. གཱཐཱཚནྡཝསེན ‘ཝ’ཨིཏི རསྶཏྟཾ. ལངྐཱརསདིསནྟི པསཱརིཏཔཊསརིཀྑཀཾ. སམཱིརཎནྟི མཱལུཏཾ. ན དོསོ ཏསྶ ཝིཛྫཏཱིཏི ཨིདཾ ཝཱཏསྶ ¶ ¶ ཨཝིཛྫམཱནཀྑཎེ ཨེཝཾ ཀརོཏོ པཙྪཱ ཨཱགཏེན ཝཱཏེན ནཱིཏནཱཝཱཡ ཝསེན ཝུཏྟཾ. ཝཱཡམཱནེ པན ཝཱཏེ ཨེཝཾ ཀརོནྟསྶ ཨཱཔཏྟིཡེཝཱཏི དཊྛབྦཾ.

༡༣༡-༢. སཡམེཝ ཨུཔཱགཏནྟི སམྦནྡྷོ. གཱམསམཱིཔེ ཏིཏྠཾ གཱམཏིཏྠཾ. ཏནྟི ནཱཝཾ. ཋཱནཱཏི ཚཏྟེན ཝཱ ཙཱིཝརེན ཝཱ གཧིཏཝཱཏེན གནྟྭཱ གཱམཏིཏྠེ ཋིཏཊྛཱནཱ. ཨཙཱལེནྟོཏི ཕནྡཱཔནམྤི ཨཀརོནྟོ, ཨིམིནཱ ཐུལླཙྩཡསྶཱཔི ཨབྷཱཝཾ དསྶེཏི. ‘‘ཨཙཱཝེནྟོ’’ཏིཔི པཱཋོ, ཋིཏཊྛཱནཏོ ཀེསགྒམཏྟམྤི ཨནཔནེནྟོཏི ཨཏྠོ, ཨིམིནཱ པཱརཱཛིཀཱབྷཱཝཾ དསྶེཏི. ཀིཎིཏྭཱཏི མཱུལེན ཝིཀྐིཎིཏྭཱ. སཡམེཝ ཙ གཙྪནྟིནྟི ཨེཏྠ ཙ-ཀཱརོ ཝཏྟབྦནྟརསམུཙྩཡེ. ཏཐཱ པཎཱམིཏཚཏྟེན ཝཱ ཨུསྶཱཔིཏཙཱིཝརེན ཝཱ གཧིཏཝཱཏེན ཨཏྟནཱ གཙྪནྟིཾ. ཋཱནཱ ཙཱཝེཏཱིཏི ཨཏྟནཱ ཨིཙྪིཏདིསཱབྷིམུཁཾ ཀཏྭཱ པཱཛནཝསེན གམནཊྛཱནཱ ཙཱཝེཏི.

ནཱཝཊྛཀཐཱཝཎྞནཱ.

༡༣༣-༤. ཡནྟི ཨེཏེནཱཏི ཡཱནཾ. རམཡཏཱིཏི རཐོ. ཝཧཏི, ཝུཡ྄ཧཏི, ཝཧནྟི ཨེཏེནཱཏི ཝཱ ཝཡ྄ཧཾ. ‘‘ཨུཔརི མཎྜཔསདིསཾ པདརཙྪནྣཾ, སབྦཔཱལིགུཎྛིམཾ ཝཱ ཚཱདེཏྭཱ’’ཏི (པཱརཱ. ཨཊྛ. ༡.༡༠༠) ཨཊྛཀཐཱཡཾ ཝུཏྟནཡེན ཀཏཾ སཀཊཾ ཝཡ྄ཧཾ ནཱམ. སནྡམཱནིཀཱཏི ‘‘ཨུབྷོསུ པསྶེསུ སུཝཎྞརཛཏཱདིམཡཱ གོཔཱནསིཡོ དཏྭཱ གརུལ༹པཀྑཀནཡེན ཀཏཱ སནྡམཱནིཀཱ’’ཏི (པཱརཱ. ཨཊྛ. ༡.༡༠༠) ཨཊྛཀཐཱཡཾ ཝུཏྟནཡེན ཀཏཡཱནཝིསེསོ. ཋཱནཱ ཙཱཝནཡོགསྨིནྟི ཋཱནཱ ཙཱཝནཔྤཡོགེ.

༡༣༥-༦. དསཊྛཱནཱཙཱཝནཝསེན པཱརཱཛིཀཾ ཝདནྟེཧི པཋམཾ ཋཱནབྷེདསྶ ཉཱཏབྦཏྟཱ ཏཾ དསྶེཏྭཱ ཨཱཔཏྟིབྷེདཾ དསྶེཏུམཱཧ ¶ ‘‘ཡཱནསྶ དུཀཡུཏྟསྶཱ’’ཏིཨཱདི. དུཀཡུཏྟསྶཱཏི དུཀཾ གོཡུགཾ ཡུཏྟསྶ ཡསྶཱཏི, ཡུཏྟེ ཡསྨིནྟི ཝཱ ཝིགྒཧོ. དས ཋཱནཱནཱིཏི དྭིནྣཾ གོཎཱནཾ ཨཊྛ པཱདཱ, དྭེ ཙ ཙཀྐཱནཱིཏི ཨེཏེསཾ དསནྣཾ པཏིཊྛིཏཊྛཱནཱནཾ ཝསེན དས ཋཱནཱནི ཝདེཡྻཱཏི ཨཏྠོ. ཨེཏེནེཝ ནཡེན ཙཏུཡུཏྟཱདིཡཱནེ ཨཊྛཱརསཱཏི ཋཱནབྷེདསྶ ནཡོ དསྶིཏོ ཧོཏི. ཡཱནཾ པཱཛཡཏོཏི སཀཊཱདིཡཱནཾ པེསཡཏོ. ‘‘དྷུརེཏི ཡུགཱསནྣེ’’ཏི ཨཊྛཀཐཱཡ གཎྛིཔདེ ཝུཏྟཾ. རཐཱིསཱཡ ཡུགེན སདྡྷིཾ བནྡྷནཊྛཱནཱསནྣེཏི ཝུཏྟཾ ཧོཏི. ‘‘དྷུར’’ནྟི ཙ ཡུགསྶེཝ ནཱམཾ. ‘‘དྷུརཾ ཚཌྜེཏྭཱ, དྷུརཾ ཨཱརོཔེཏྭཱ’’ཏི (པཱརཱ. ཨཊྛ. ༡.༡༠༠) ཨཊྛཀཐཱཝཙནཏོ ཏཾསཧཙརིཡཱཡ སམྦནྡྷནཊྛཱནམྤི ¶ དྷུརཾ ནཱམ. ཨིདྷ པན གངྒཱ-སདྡོ ཝིཡ གངྒཱསམཱིཔེ དྷུརསམཱིཔེ པཱཛཀསྶ ནིསཛྫཱརཧཊྛཱནེ དྷུརསྶ ཝཏྟམཱནཏཱ ལབྦྷཏི.

གོཎཱནཾ པཱདུདྡྷཱརེ ཏསྶ ཐུལླཙྩཡཾ ཝིནིདྡིསེཏི ཡོཛནཱ. ཨིདཉྩ གོཎཱནཾ ཨཝིལོམཀཱལཾ སནྡྷཱཡ ཝུཏྟཾ. ཝིལོམཀཱལེ སམྦྷཝནྟཾ ཝིསེསཾ ཛོཏེཏུཾ ‘‘ཐུལླཙྩཡཾ ཏུ’’ ཨིཙྩཏྲ ཏུ-སདྡེན ཨཊྛཀཐཱཡཾ ‘‘སཙེ པན གོཎཱ ‘ནཱཡཾ ཨམྷཱཀཾ སཱམིཀོ’ཏི ཉཏྭཱ དྷུརཾ ཚཌྜེཏྭཱ ཨཱཀཌྜྷནྟཱ ཏིཊྛནྟི ཝཱ ཕནྡནྟི ཝཱ, རཀྑཏི ཏཱཝ. གོཎེ པུན ཨུཛུཀཾ པཊིཔཱདེཏྭཱ དྷུརཾ ཨཱརོཔེཏྭཱ དལ༹ྷཾ ཡོཛེཏྭཱ པཱཙནེན ཝིཛ྄ཛྷིཏྭཱ པཱཛེནྟསྶ ཝུཏྟནཡེནེཝ ཏེསཾ པཱདུདྡྷཱརེན ཐུལླཙྩཡ’’ནྟི ཝུཏྟཝིསེསོ སངྒཧིཏོཏི དཊྛབྦོ. ཙཀྐཱནཾ ཧཱིཏི ཨེཏྠ ཨདྷིཀེན ཧི-སདྡེན ‘‘སཙེཔི སཀདྡམེ མགྒེ ཨེཀཾ ཙཀྐཾ ཀདྡམེ ལགྒཾ ཧོཏི, དུཏིཡཾ ཙཀྐཾ གོཎཱ པརིཝཏྟེནྟཱ པཝཏྟེནྟི, ཨེཀསྶ པན ཋིཏཏྟཱ ན ཏཱཝ ཨཝཧཱརོ ཧོཏི. གོཎེ པན པུན ཨུཛུཀཾ པཊིཔཱདེཏྭཱ པཱཛེནྟསྶ ¶ ཋིཏཙཀྐེ ཀེསགྒམཏྟཾ ཕུཊྛོཀཱསཾ ཨཏིཀྐནྟེ པཱརཱཛིཀ’’ནྟི (པཱརཱ. ཨཊྛ. ༡.༡༠༠) ཨཊྛཀཐཱཡཾ ཝུཏྟཝིསེསོ དསྶིཏོ ཧོཏཱིཏི དཊྛབྦཾ.

༡༣༧-༩. ཨེཏྟཱཝཏཱ ཡུཏྟཡཱནཝིནིཙྪཡཾ དསྶེཏྭཱ ཨིདཱནི ཨཡུཏྟཡཱནཝིནིཙྪཡཾ དསྶེཏུམཱཧ ‘‘ཨཡུཏྟཀསྶཱ’’ཏིཨཱདི. དྷུརེན ཨུཔཏྠམྦྷནིཡཾ ཋིཏསྶ ཏསྶ ཨཡུཏྟཀསྶཱཔི ཙ ཡཱནཀསྶ ཨུཔཏྠམྦྷནིཙཀྐཀཱནཾ ཝསེན ཏཱིཎེཝ ཋཱནཱནི བྷཝནྟཱིཏི ཡོཛནཱ. ཏཏྠ ཨཡུཏྟཀསྶཱཏི གོཎེཧི ཨཡུཏྟཀསྶ. དྷུརེནཱཏི ཡཐཱཝུཏྟནཡེན དྷུརཡུཏྟཊྛཱནསམཱིཔདེསེན, སཀཊསཱིསེནཱཏི ཝུཏྟཾ ཧོཏི. ཨུཔཏྠམྦྷནིཡནྟི སཀཊསཱིསོཔཏྠམྦྷནིཡཱ ཨུཔརི ཋིཏསྶ. ཨུཔཏྠམྦྷཡཏི དྷུརནྟི ཨུཔཏྠམྦྷནཱི. སཀཊསྶ པཙྪིམབྷཱགོཔཏྠམྦྷནཏྠཾ དཱིཡམཱནཾ དཎྜདྭཡཾ པཙྪིམོཔཏྠམྦྷནཱི ནཱམ, པུརིམབྷཱགསྶ དཱིཡམཱནསྶ ཨུཔཏྠམྦྷནཱི པུརིམོཔཏྠམྦྷནཱི ནཱམཱཏི ཨཡམུཔཏྠམྦྷནཱིནཾ ཝིསེསོ. ཨིདྷ པུརིམོཔཏྠམྦྷནཱི ཨདྷིཔྤེཏཱ. ‘‘ཨུཔཏྠམྦྷནིཙཀྐཀཱནཾ ཝསེན ཏཱིཎེཝ ཋཱནཱནཱི’’ཏི ཨིདཾ ཧེཊྛཱ ཨཀཔྤཀཏཱཡ ཨུཔཏྠམྦྷནིཡཱ ཝསེན ཝུཏྟཾ, ཀཔྤཀཏཱཡ པན ཝསེན ‘‘ཙཏྟཱརཱི’’ཏི ཝཏྟབྦཾ.

‘‘ཏཐཱ’’ཏི ཨིམིནཱ ‘‘ཋཱནཱནི ཏཱིཎེཝཱ’’ཏི ཨཱཀཌྜྷཏི, དཱརུཙཀྐདྭཡཝསེན ཏཱིཎི ཋཱནཱནཱིཏི ཨཏྠོ. ‘‘དཱརཱུན’’ནྟི ཨིམིནཱ བཧུཝཙནནིདྡེསེན རཱསིཀཏདཱརཱུནཾ དཱརུཀསྶ ཨེཀསྶཱཔི ཕལཀསྶཱཔི གཧཎཾ ཝེདིཏབྦཾ. ‘‘བྷཱུམིཡམྤི དྷུརེནེཝ, ཏཐེཝ ཋཔིཏསྶ ཙཱ’’ཏི ཨིམིནཱ ¶ ཏཱིཎིཡེཝ ཋཱནཱནཱིཏི ཨཏིདིསཏི. ཨེཏྠ དྷུརཙཀྐཱནཾ པཏིཊྛིཏོཀཱསཝསེན ཏཱིཎི ཋཱནཱནི. ཨེཏྠ ཙ ཨུཔརིཊྛཔིཏསྶ ཙཱཏི ཙ-ཀཱརཾ ‘‘བྷཱུམིཡཾ ཋཔིཏསྶཱ’’ཏི ཨེཏྠཱཔི ཡོཛེཏྭཱ སམུཙྩཡཾ ཀཱཏུཾ སཀྐཱཏི. ཏཏྠ ཨདྷིཀཝཙནེན ཙ-ཀཱརེན ཨཊྛཀཐཱཡཾ ‘‘ཡཾ པན ཨཡུཏྟཀཾ དྷུརེ ཨེཀཱཡ, པཙྪཏོ ¶ ཙ དྭཱིཧི ཨུཔཏྠམྦྷནཱིཧི ཨུཔཏྠམྦྷེཏྭཱ ཋཔིཏཾ, ཏསྶ ཏིཎྞཾ ཨུཔཏྠམྦྷནཱིནཾ, ཙཀྐཱནཉྩ ཝསེན པཉྩ ཋཱནཱནི. སཙེ དྷུརེ ཨུཔཏྠམྦྷནཱི ཧེཊྛཱབྷཱགེ ཀཔྤཀཏཱ ཧོཏི, ཚ ཋཱནཱནཱི’’ཏི (པཱརཱ. ཨཊྛ. ༡.༡༠༠) ཝུཏྟཝིནིཙྪཡཾ སངྒཎྷཱཏི.

པུརཏོ པཙྪཏོ ཝཱཔཱིཏི ཨེཏྠ ‘‘ཀཌྜྷིཏྭཱ’’ཏི པཱཋསེསོ. ཨཔི-སདྡེན ‘‘ཨུཀྑིཔིཏྭཱཔཱི’’ཏི ཨཝུཏྟཾ སམུཙྩིནོཏི. ཡོ པན པུརཏོ ཀཌྜྷིཏྭཱ ཋཱནཱ ཙཱཝེཏི, ཡོ ཝཱ པན པཙྪཏོ ཀཌྜྷིཏྭཱ ཋཱནཱ ཙཱཝེཏི, ཡོ ཝཱ པན ཨུཀྑིཔིཏྭཱ ཋཱནཱ ཙཱཝེཏཱིཏི ཡོཛནཱ. ཏིཎྞནྟི ཨིམེ ཏཡོ གཧིཏཱ, ‘‘ཏེས’’ནྟི སཱམཏྠིཡཱ ལབྦྷཏི, ཏེསཾ ཏིཎྞཾ པུགྒལཱནནྟི ཝུཏྟཾ ཧོཏི. ཀདཱ ཀིཾ ཧོཏཱིཏི ཨཱཧ ‘‘ཐུལླཙྩཡཾ ཏུ…པེ… པརཱཛཡོ’’ཏི. ‘‘ཋཱནཱ ཙཱཝེ’’ཏི ཨིདཾ ‘‘ཐུལླཙྩཡ’’ནྟི ཨིམིནཱཔི སམྦནྡྷནཱིཡཾ. ཏུ-སདྡསྶ ཝིསེསཛོཏནཏྠཾ ཨུཔཱཏྟཏྟཱ སཱཝསེསཊྛཱནཱཙཱཝནེ ཕནྡཱཔནཐུལླཙྩཡཾ, ནིརཝསེསཊྛཱནཱཙཱཝནེ པན ཀཏེ ཋཱནཱཙཱཝནཔཱརཱཛིཀཱ ཝུཏྟཱ ཧོཏཱིཏི དཊྛབྦཾ.

༡༤༠. ཨཀྑཱནཾ སཱིསཀེཧཱིཏི ཨཀྑསྶ ཨུབྷཡཀོཊཱིཧི. ‘‘ཛཱཏྱཱཁྱཱཡམེཀསྨིཾ བཧུཝཙནམཉྙཏརཱཡ’’མིཏི ཝཙནཏོ ཨེཀསྨིཾ ཨཏྠེ བཧུཝཙནཾ ཡུཛྫཏི. ‘‘ཋིཏསྶཱ’’ཏི ཨེཏསྶ ཝིསེསནསྶ ‘‘ཡཱནསྶཱ’’ཏི ཝིསེསིཏབྦཾ སཱམཏྠིཡཱ ལབྦྷཏི. ‘‘ཋཱནཱནི དྭེ’’ཏི ཝུཏྟཏྟཱ ཡཐཱ སཀཊདྷུརཾ བྷཱུམིཾ ན ཕུསཏི, ཨེཝཾ ཨུཙྩཏརེསུ དྭཱིསུ ཏུལཱདིདཱརཱུསུ དྭེ ཨཀྑསཱིསེ ཨཱརོཔེཏྭཱ ཋཔིཏཾ ཡཱནམེཝ གཡ྄ཧཏི.

༡༤༡. ཀཌྜྷནྟོཏི དྭིནྣཾ ཨཀྑསཱིསཱནཾ ཨཱདྷཱརབྷཱུཏེསུ དཱརཱུསུ གྷཾསིཏྭཱ ཨིཏོ ཙིཏོ ཙ ཀཌྜྷནྟོ. ཨུཀྑིཔནྟོཏི ཨུཛུཾ ཋིཏཊྛཱནཏོ ཨུཙྩཱརེནྟོ. ཕུཊྛོཀཱསཙྩཡེཏི ཕུཊྛོཀཱསཏོ ¶ ཀེསགྒམཏྟཱཏིཀྐམེ. ཨཉྙསྶཱཏི ཡཐཱཝུཏྟཔྤཀཱརཏོ ཨིཏརསྶ. ཡསྶ ཀསྶཙི རཐཱདིཀསྶ ཡཱནསྶ.

༡༤༢. ཨཀྑུདྡྷཱིནནྟི ཙཏུནྣཾ ཨཀྑརུདྡྷནཀཨཱཎཱིནཾ. ཨཀྑསྶ ཨུབྷཡཀོཊཱིསུ ཙཀྐཱཝུཎནཊྛཱནཏོ ¶ ཨནྟོ དྭཱིསུ སཀཊབཱཧཱསུ ཨཀྑརུདྡྷནཏྠཱཡ དྭེ ཨངྒུལིཡོ ཝིཡ ཨཱཀོཊིཏཱ ཙཏསྶོ ཨཱཎིཡོ ཨཀྑུདྡྷི ནཱམ. དྷུརསྶཱཏི དྷུརབནྡྷནཊྛཱནཱསནྣསྶ རཐསཱིསགྒསྶ. ཏཾ ཡཱནཾ. ཝཱ-སདྡེན པསྶེ ཝཱ གཧེཏྭཱ ཀཌྜྷནྟོ, མཛ྄ཛྷེ ཝཱ གཧེཏྭཱ ཨུཀྑིཔེནྟོཏི ཀིརིཡནྟརཾ ཝིཀཔྤེཏི. གཧེཏྭཱཏི ཨེཏྠ ‘‘ཀཌྜྷནྟོ’’ཏི པཱཋསེསོ. ཋཱནཱ ཙཱཝེཏཱིཏི ཨུདྡྷཱིསུ གཧེཏྭཱ ཀཌྜྷནྟོ ཨཏྟནོ དིསཱཡ ཨུདྡྷིཨནྟེན ཕུཊྛཊྛཱནཾ ཨིཏརེན ཨུདྡྷིཔརིཡནྟེན ཀེསགྒམཏྟམྤི ཨཏིཀྐཱམེཏི.

‘‘ཨུདྡྷཱིསུ ཝཱ’’ཏི སཱསངྐཝཙནེན ཨནུདྡྷིཀཡཱནསྶཱཔི ཝིཛྫམཱནཏྟཾ སཱུཙིཏཾ ཧོཏི. ཨཊྛཀཐཱཡཾ ‘‘ཨཐ ཨུདྡྷིཁཱཎུཀཱ ན ཧོནྟི, སམམེཝ བཱཧཾ ཀཏྭཱ མཛ྄ཛྷེ ཝིཛ྄ཛྷིཏྭཱ ཨཀྑསཱིསཱནི པཝེསིཏཱནི ཧོནྟི, ཏཾ ཧེཊྛིམཏལསྶ སམནྟཱ སབྦཾ པཐཝིཾ ཕུསིཏྭཱ ཏིཊྛཏི, ཏཏྠ ཙཏཱུསུ དིསཱསུ, ཨུདྡྷཉྩ ཕུཊྛཊྛཱནཱཏིཀྐམཝསེན པཱརཱཛིཀཾ ཝེདིཏབྦ’’ནྟི (པཱརཱ. ཨཊྛ. ༡.༡༠༠) ཝུཏྟཝིནིཙྪཡཉྩ བྱཏིརེཀཝསེན སངྒཎྷཱཏི.

༡༤༣. ནཱབྷིཡཱཏི ནཱབྷིམུཁེན. ཨེཀམེཝ སིཡཱ ཋཱནནྟི ཨེཀཾ ནཱབྷིཡཱ ཕུཊྛཊྛཱནམེཝ ཋཱནཾ བྷཝཏཱིཏི ཨཏྠོ. ‘‘ཨེཀམསྶ སིཡཱ ཋཱན’’ནྟི པོཏྠཀེསུ དིསྶཏི, ཏཏོ པུརིམཔཱཋོཝ སུནྡརཏརོ. པརིཙྪེདོཔཱིཏི ཨེཏྠ པི-སདྡོ ཝིསེསཏྠཛོཏཀོ, པརིཙྪེདོ པནཱཏི ཨཏྠོ. པཉྩདྷཱཏི ནཱབྷིཡཱ ཙཏུཔསྶཔརིཡནྟཾ, ཨུདྡྷཉྩ པཉྩདྷཱ, ཋཱནཱཙཱཝནཱཀཱརོ ཧོཏཱིཏི ཨཏྠོ.

༡༤༤. ཋཱནཱནི ¶ དྭེཏི ནེམིཡཱ, ནཱབྷིཡཱ ཙ ཕུཊྛཊྛཱནཝསེན དྭེ ཋཱནཱནི. ཨསྶཱཏི ཙཀྐསྶ. ཏེསཾ དྭིནྣཾ ཋཱནཱནཾ. བྷིཏྟིཨཱདིཾ ཨཔསྶཱཡ ཋཔིཏཙཀྐསྶཱཔི ཧི ཨཊྛཀཐཱཡཾ ཝུཏྟོ ཨཡམྤི ཝིནིཙྪཡོ ཝུཏྟོ, ཡོཔི ཨིམིནཱ ཙ པཱཋེན དསྶིཏོ ཧོཏི.

༡༤༥. ཨནཱརཀྑནྟི སཱམིཀེན ཨསཾཝིཧིཏཱརཀྑཾ. ཨདྷོདེཏྭཱཏི གོཎེ ཨཔེསེཏྭཱ. ཝཊྚཏི, པཱརཱཛིཀཾ ན ཧོཏཱིཏི ཨདྷིཔྤཱཡོ. སཱམིཀེ ཨཱཧརཱཔེནྟེ པན བྷཎྜདེཡྻཾ ཧོཏི.

ཡཱནཊྛཀཐཱཝཎྞནཱ.

༡༤༦. བྷཱརཊྛཀཐཱཡ སཱིསཀྑནྡྷཀཊོལམྦཝསཱཏི ཨེཝཾནཱམཀཱནཾ སརཱིརཱཝཡཝཱནཾ ཝསེན བྷཱརོ ¶ ཙཏུབྦིདྷོ ཧོཏི. ཏཏྠ སཱིསབྷཱརཱདཱིསུ ཨསམྨོཧཏྠཾ སཱིསཱདཱིནཾ པརིཙྪེདོ ཝེདིཏབྦོ – སཱིསསྶ ཏཱཝ པུརིམགལེ གལཝཱཊཀོ པིཊྛིགལེ ཀེསཉྩི ཀེསནྟེ ཨཱཝཊྚོ ཧོཏི, གལསྶེཝ ཨུབྷོསུ པསྶེསུ ཀེསཉྩི ཀེསཱཝཊྚཱ ཨོརུཡ྄ཧ ཛཱཡནྟི, ཡེ ‘‘ཀཎྞཙཱུལི༹ཀཱ’’ཏི ཝུཙྩནྟི, ཏེསཾ ཨདྷོབྷཱགོ ཙཱཏི ཨཡཾ ཧེཊྛིམཔརིཙྪེདོ, ཏཏོ ཨུཔརི སཱིསཾ, ཨེཏྠནྟརེ ཋིཏབྷཱརོ སཱིསབྷཱརོ ནཱམ.

ཨུབྷོསུ པསྶེསུ ཀཎྞཙཱུལི༹ཀཱཧི པཊྛཱཡ ཧེཊྛཱ, ཀཔྤརེཧི པཊྛཱཡ ཨུཔརི, པིཊྛིགལཱཝཊྚཏོ ཙ གལཝཱཊཀཏོ ཙ པཊྛཱཡ ཧེཊྛཱ, པིཊྛིཝེམཛ྄ཛྷཱཝཊྚཏོ ཙ ཨུརཔརིཙྪེདམཛ྄ཛྷེ ཧདཡཨཱཝཱཊཏོ ཙ པཊྛཱཡ ཨུཔརི ཁནྡྷོ, ཨེཏྠནྟརེ ཋིཏབྷཱརོ ཁནྡྷབྷཱརོ ནཱམ.

པིཊྛིཝེམཛ྄ཛྷཱཝཊྚཏོ ¶ , པན ཧདཡཨཱཝཱཊཏོ ཙ པཊྛཱཡ ཧེཊྛཱ ཡཱཝ པཱདནཁསིཁཱ, ཨཡཾ ཀཊིཔརིཙྪེདོ, ཨེཏྠནྟརེ སམནྟཏོ སརཱིརེ ཋིཏབྷཱརོ ཀཊིབྷཱརོ ནཱམ.

ཀཔྤརཏོ པཊྛཱཡ པན ཧེཊྛཱ ཡཱཝ ཧཏྠནཁསིཁཱ, ཨཡཾ ཨོལམྦཀཔརིཙྪེདོ, ཨེཏྠནྟརེ ཋིཏབྷཱརོ ཨོལམྦཀོ ནཱམ.

བྷརཏཱིཏི བྷཱརོ, བྷརཏི ཨེཏེན, ཨེཏསྨིནྟི ཝཱ བྷཱརོ, ཨིཏི ཡཐཱཝུཏྟསཱིསཱདཡོ ཨཝཡཝཱ ཝུཙྩནྟི. བྷཱརེ ཏིཊྛཏཱིཏི བྷཱརཊྛཾ. ཨིཏི སཱིསཱདཱིསུ ཋིཏཾ བྷཎྜཾ ཝུཙྩཏི. ‘‘བྷཱརོཡེཝ བྷཱརཊྛ’’ནྟི (པཱརཱ. ཨཊྛ. ༡.༡༠༡) ཨཊྛཀཐཱཝཙནཏོ བྷརཱིཡཏཱིཏི བྷཱརོ, ཀམྨནི སིདྡྷེན བྷཱར-སདྡེན བྷཎྜམེཝ ཝུཙྩཏི.

༡༤༧. སིརསྨིཾཡེཝཱཏི ཡཐཱཔརིཙྪིནྣེ སིརསི ཨེཝ. སཱརེཏཱིཏི ཨནུཀྑིཔནྟོ ཨིཏོ ཙིཏོ ཙ སཱརེཏི. ཐུལླཙྩཡཾ སིཡཱཏི ཕནྡཱཔནཐུལླཙྩཡཾ བྷཝེཡྻ.

༡༤༨. ཁནྡྷནྟི ཡཐཱཔརིཙྪིནྣམེཝ ཁནྡྷཾ. ཨོརོཔིཏེཏི ཨོཧཱརིཏེ. སཱིསཏོཏི ཨེཏྠ ‘‘ཨུདྡྷ’’ནྟི པཱཋསེསོ, ཡཐཱཔརིཙྪིནྣསཱིསཏོ ཨུཔརཱིཏི ཨཏྠོ. ཀེསགྒམཏྟམྤཱིཏི ཀེསགྒམཏྟཾ དཱུརཾ ཀཏྭཱ. པི-སདྡོ པགེཝ ཏཏོ ཨདྷིཀནྟི དཱིཔེཏི. མོཙེནྟོཔཱིཏི ཀེསགྒེན ཨཕུསནྟཾ ཨཔནེནྟོ. ཨེཏྠཱཔི པི-སདྡེན ན ཀེཝལཾ ཁནྡྷཾ ཨོརོཔེནྟསྶེཝ པཱརཱཛིཀཾ, ཨཔིཙ ཁོ མོཙེནྟོཔི ¶ པརཱཛིཏོཏི ཧེཊྛཱ ཝུཏྟམཔེཀྑཏི. པསིབྦཀཱདིཡམཀབྷཱརཾ པན སཱིསེ ཙ པིཊྛིཡཉྩཱཏི དྭཱིསུ ཋཱནེསུ ཋིཏཏྟཱ དྭཱིཧི ཋཱནེཧི ཨཔནཡནེན པཱརཱཛིཀཾ ཧོཏི, ཏཉྩ ‘‘སཱིསཏོ མོཙེནྟོ’’ཏི ཨིམིནཱཝ ཨེཀདེསཝསེན སངྒཧིཏནྟི དཊྛབྦཾ.

༡༤༩-༥༠. ཨེཝཾ ¶ སཱིསབྷཱརེ ཝིནིཙྪཡཾ དསྶེཏྭཱ ཏདནནྟརཾ ཨུདྡེསཀྐམེསུ ཁནྡྷབྷཱརཱདཱིསུ ཝིནིཙྪཡེ དསྶེཏབྦེཔི ཨཝསཱནེ ཝུཏྟཨོལམྦཀབྷཱརེ ཝིནིཙྪཡཾ དསྶེཏྭཱ ཨཱདྱནྟབྷཱརཱནཾ ཝུཏྟནཡཱནུསཱརེན སེསེསུཔི ཝིནིཙྪཡཾ ཨཏིདིསིཏུམཱཧ ‘‘བྷཱར’’ནྟིཨཱདི. སུདྡྷམཱནསོཏི པཱཏརཱསཱདིཀཱརཎེན ཨཐེཡྻཙིཏྟོ, ཧཏྠགཏབྷཱརཾ ཐེཡྻཙིཏྟེན བྷཱུམིཡཾ ཋཔནནིསྶཛྫནཱདིཾ ཀརོནྟསྶ ཧཏྠཏོ མུཏྟམཏྟེ པཱརཱཛིཀནྟི ཨིདམེཏེན ཨུཔལཀྑིཏནྟི དཊྛབྦཾ.

ཨེཏྠ ཝུཏྟནཡེནེཝཱཏི སཱིསབྷཱརཨོལམྦཀབྷཱརེསུ ཝུཏྟཱནུསཱརེན. སེསེསུཔི བྷཱརེསཱུཏི ཁནྡྷབྷཱརཱདིཀེསུཔི. མཏིསཱརེན སཱརམཏིནཱ. ཝེདིཏབྦོ ཝིནིཙྪཡོཏི ཡཐཱཔརིཙྪིནྣེསུ ཋཱནེསུ ཋིཏཾ པཱདགྒྷནཀཾ ཡཾ ཀིཉྩི ཝཏྠུཾ ཐེཡྻཙིཏྟེན ‘‘གཎྷིསྶཱམཱི’’ཏི ཨཱམསནྟསྶ དུཀྐཊཾ, ཋཱནཱ ཨཙཱཝེཏྭཱ ཕནྡཱཔེནྟསྶ ཐུལླཙྩཡཾ, ཡཐཱཔརིཙྪིནྣཊྛཱནཱཏིཀྐམནཝསེན ཝཱ ཨུདྡྷཾཨུཀྑིཔནཝསེན ཝཱ ཋཱནཱ ཙཱཝེནྟསྶ པཱརཱཛིཀཾ ཧོཏཱིཏི ཨཡཾ ཝིནིཙྪཡོ ཝེདིཏབྦོཏི ཨཏྠོ.

བྷཱརཊྛཀཐཱཝཎྞནཱ.

༡༥༡-༣. ཨིདཱནི ཨཱརཱམཊྛཝིནིཙྪཡཾ དསྶེཏུམཱཧ ‘‘དུཀྐཊ’’ནྟིཨཱདི. ཨཱརཱམནྟི ཙམྤཀཱདིཔུཔྥཱརཱམཉྩ ཨམྦཱདིཕལཱརཱམཉྩཱཏི དྭཱིསུ ཨཱརཱམེསུ ཡཾ ཀཉྩི ཨཱརཱམཾ. ཨཱརམནྟི ཨེཏྠ པུཔྥཱདིཀཱམིནོཏི ཝིགྒཧོ, ཏཾ ཨཱརཱམཾ, ཨབྷི-སདྡཡོགེ ཨུཔཡོགཝཙནཾ. ཨབྷིཡུཉྫཏོཏི པརཱཡཏྟབྷཱཝཾ ཛཱནནྟོ ‘‘མམ སནྟཀ’’ནྟི ཨཊྚཾ ཀཏྭཱ གཎྷིཏུཾ ཐེཡྻཙིཏྟེན སཧཱཡཱདིབྷཱཝཏྠཾ དུཏིཡཀཔརིཡེསནཱདིཝསེན ཨབྷིཡུཉྫནྟསྶ དུཀྐཊཾ མུནིནཱ ཝུཏྟནྟི ཨིམིནཱ སམྦནྡྷནཱིཡཾ, ཨདིནྣཱདཱནསྶ པུབྦཔཡོགཏྟཱ སཧཔཡོགགཎནཱཡ དུཀྐཊནྟི བྷགཝཏཱ ¶ ཝུཏྟནྟི ཨཏྠོ. དྷམྨཾ ཙརནྟོཏི ཨཊྚཾ ཀརོནྟོ. པརཾ སཱམིཀཾ པརཱཛེཏི ཙེ, སཡཾ སཱསནཏོ པརཱཛིཏོཏི ཡོཛནཱ.

ཏསྶཱཏི བྷཎྜསཱམིནོ. ཝིམཏིཾ ཛནཡནྟསྶཱཏི ‘‘ཨིམིནཱ སཧ ཨཊྚཾ ཀཏྭཱ མམ སནྟཀཾ ལབྷིསྶཱམི ¶ ཝཱ, ན ཝཱ’’ཏི སཾསཡཾ ཨུཔྤཱདེནྟསྶ ཙོརསྶ. ཡོཔི དྷམྨཾ ཙརནྟོ སཡཾ པརཛྫཏི, ཏསྶ ཙ ཐུལླཙྩཡནྟི ཡོཛནཱ.

སཱམིནོ དྷུརནིཀྑེཔེཏི ‘‘ཨཡཾ ཐདྡྷོ ཀཀྑལོ༹ ཛཱིཝིཏབྲཧྨཙརིཡནྟརཱཡམྤི མེ ཀརེཡྻ, ཨལཾ དཱནི མཡ྄ཧཾ ཨིམིནཱ ཨཱརཱམེནཱ’’ཏི སཱམིནོ དྷུརནིཀྑེཔེ སཏི, ཨཏྟནོ ‘‘ན དསྶཱམཱི’’ཏི དྷུརནིཀྑེཔེ ཙཱཏི ཡོཛནཱ. ཨེཝཾ ཨུབྷིནྣཾ དྷུརནིཀྑེཔེ པཱརཱཛིཀཾ. ཏསྶཱཏི ཨབྷིཡུཉྫནྟསྶ. སབྦེསཾ ཀཱུཊསཀྑཱིནཉྩཱཏི ཙ-ཀཱརོ ལུཏྟནིདྡིཊྛོཏི ཝེདིཏབྦོ. ཙོརསྶ ཨསྶཱམིཀབྷཱཝཾ ཉཏྭཱཔི ཏདཱཡཏྟཀརཎཏྠཾ ཡཾ ཀིཉྩི ཝདནྟཱ ཀཱུཊསཀྑིནོ, ཏེསཾ སབྦེསམྤི བྷིཀྑཱུནཾ པཱརཱཛིཀཾ ཧོཏཱིཏི ཨཏྠོ.

ཨཱརཱམཊྛཀཐཱཝཎྞནཱ.

༡༥༤. ཝིཧཱརཊྛཀཐཱཡཾ ཝིཧཱརནྟི ཨུཔལཀྑཎཏྟཱ ‘‘པརིཝེཎཾ ཝཱ, ཨཱཝཱསཾ ཝཱ’’ཏི ཙ གཧེཏབྦཾ. སངྒྷིཀནྟི ཙཱཏུདྡིསཾ སངྒྷཾ ཨུདྡིསྶ བྷིཀྑཱུནཾ དིནྣཏྟཱ སངྒྷསནྟཀཾ. ཀཉྩཱིཏི ཁུདྡཀཾ, མཧནྟཾ ཝཱཏི ཨཏྠོ. ཨཙྪིནྡིཏྭཱན གཎྷིཏུཾ ཨབྷིཡུཉྫནྟསྶ པཱརཱཛིཀཱ ན སིཛ྄ཛྷཏཱིཏིཔི པཱཋསེསཡོཛནཱ. ཧེཏུཾ དསྶེཏི ‘‘སབྦེསཾ དྷུརནིཀྑེཔཱབྷཱཝཏོ’’ཏི, སབྦསྶེཝ ཙཱཏུདྡིསིཀསངྒྷསྶ དྷུརནིཀྑེཔསྶ ཨསམྦྷཝཏོཏི ཨཏྠོ. ‘‘ཝིཧཱར’’ནྟི ཨེཏྟཀམེཝ ཨཝཏྭཱ ‘‘སངྒྷིཀ’’ནྟི ཝིསེསནེན དཱིགྷབྷཱཎཀཱདིབྷེདསྶ གཎསྶ, ཨེཀཔུགྒལསྶ ཝཱ དིནྣཝིཧཱརཱདིཾ ཨཙྪིནྡིཏྭཱ གཎྷནྟེ དྷུརནིཀྑེཔསམྦྷཝཱ པཱརཱཛིཀནྟི ཝུཏྟཾ ཧོཏི. ཨེཏྠ ཝིནིཙྪཡོ ཨཱརཱམེ ཝིཡ ¶ ཝེདིཏབྦོ. ཨིམེསུ ཏཏྲཊྛབྷཎྜེ ཝིནིཙྪཡོ བྷཱུམཊྛཐལཊྛཨཱཀཱསཊྛཝེཧཱསཊྛེསུ ཝུཏྟནཡེན ཉཱཏུཾ སཀྐཱཏི ན ཝུཏྟོཏི ཝེདིཏབྦོ.

ཝིཧཱརཊྛཀཐཱཝཎྞནཱ.

༡༥༥-༦. ཁེཏྟཊྛེ སཱིསཱནཱིཏི ཝལླིཡོ. ནིདམྤིཏྭཱནཱཏི ཡཐཱ དྷཉྙམཏྟཾ ཧཏྠགཏཾ ཧོཏི, ཏཐཱ ཀཏྭཱ. ཨསིཏེནཱཏི དཱཏྟེན. ལཱཡིཏྭཱཏི དཱཡིཏྭཱ. སབྦཀིརིཡཱཔདེསུ ‘‘སཱལིཨཱདཱིནཾ སཱིསཱནཱི’’ཏི སམྦནྡྷནཱིཡཾ. སཱལིཨཱདཱིནཾ སཱིསཱནི ནིདམྤིཏྭཱ གཎྷཏོ ཡསྨིཾ བཱིཛེ གཧིཏེ ཝཏྠུ པཱུརཏི, ཏསྨིཾ བནྡྷནཱ མོཙིཏེ ཏསྶ པཱརཱཛིཀཾ བྷཝེཏི ཡོཛནཱ. ཨསིཏེན ལཱཡིཏྭཱ གཎྷཏོ ¶ ཡསྨིཾ སཱིསེ གཧིཏེ…པེ… བྷཝེ, ཀརེན ཚིནྡིཏྭཱ གཎྷཏོ ཡསྶཾ མུཊྛིཡཾ གཧིཏཱཡཾ…པེ… བྷཝེཏི ཡོཛནཱ. བཱིཛེཏི ཝཱིཧཱདིཕལེ. ཝཏྠུ པཱུརཏཱིཏི པཱདགྒྷནཀཾ ཧོཏཱིཏི. མུཊྛིཡནྟི སཱིསམུཊྛིཡཾ, བཱིཛམུཊྛིཡཾ ཝཱ. བནྡྷནཱ མོཙིཏེཏི བནྡྷནཊྛཱནཏོ མོཙིཏེ.

༡༥༧. དཎྜོ ཝཱཏི ཝཏྠུཔཱུརཀཝཱིཧིདཎྜོ ཝཱ. ཨཙྪིནྣོ རཀྑཏཱིཏི སམྦནྡྷོ. ཏཙོ ཝཱཏི ཏསྶ དཎྜསྶ ཨེཀཔསྶེ ཚལླི ཝཱ ཨཙྪིནྣོ རཀྑཏིཙྩེཝ སམྦནྡྷོ. ཝཱ-གྒཧཎེན ཨིདྷཱཝུཏྟཾ ཨཊྛཀཐཱགཏཾ (པཱརཱ. ཨཊྛ. ༡.༡༠༤) ‘‘ཝཱཀོ’’ཏི ཨིདཾ སངྒཎྷཱཏི. ཝཱཀོ ནཱམ དཎྜེ ཝཱ ཏཙེ ཝཱ བཱཧིརཾ. ཨིདྷཱཔི ཏཙོ ཝཱ ཨཙྪིནྣོ རཀྑཏཱིཏི ཡོཛནཱ. ཝཱིཧིནཱལ༹མྤི ཝཱཏི གཧིཏདྷཉྙསཱལིསཱིསེན པཏིཊྛིཏཾ ཝཱིཧིཀུདྲཱུསཱདིགཙྪཱནཾ ནཱལ༹ཾ, ཏཙགབྦྷོཏི ཝུཏྟཾ ཧོཏི. དཱིགྷནྟི དཱིགྷཾ ཙེ ཧོཏི. ‘‘ཨནིཀྑནྟོཝཱ’’ཏི ཨིམིནཱ ‘‘དཎྜོ’’ཏི སམྦནྡྷོ. ‘‘ཏཏོ’’ཏི པཱཋསེསོ. ཏཏོ ¶ དཱིགྷཝཱིཧིནཱལ༹ཏོ སབཱིཛཝཱིཧིསཱིསདཎྜོ སབྦསོ ཚིནྣོ ཚིནྣཀོཊིཡཱ ཀེསགྒམཏྟམྤི བཧི ཨནིཀྑནྟོཏི ཨཏྠོ. རཀྑཏཱིཏི ཏཾ བྷིཀྑུཾ དུཀྐཊཐུལླཙྩཡཔཱརཱཛིཀཝཏྠཱུནཾ ཨནུརཱུཔཱཔཏྟིཏོ པཱལེཏི. མུཏྟོ ཙེ, ན རཀྑཏཱིཏི ཨཏྠོ.

ཝུཏྟཉྩེཏཾ ཨཊྛཀཐཱཡཾ ‘‘ཝཱིཧིནཱལ༹ཾ དཱིགྷམྤི ཧོཏི, ཡཱཝ ཨནྟོནཱལ༹ཏོ ཝཱིཧིསཱིསདཎྜཀོ ན ནིཀྑམཏི, ཏཱཝ རཀྑཏི. ཀེསགྒམཏྟམྤི ནཱལ༹ཏོ དཎྜཀསྶ ཧེཊྛིམཏལེ ནིཀྑནྟམཏྟེ བྷཎྜགྒྷཝསེན ཀཱརེཏབྦོ’’ཏི (པཱརཱ. ༡.༡༠༤). ཏཐཱ ཨིམིནཱཝ ཝིནིཙྪཡེན ཨཊྛཀཐཱཡཾ ‘‘ལཱཡིཏབྦཝཏྠུཔཱུརཀཝཱིཧིསཱིསམུཊྛིཡཱ མཱུལེ ཚིནྣེཔི སཱིསེསུ ཨཙྪིནྣཝཱིཧིསཱིསགྒེཧི སདྡྷིཾ ཛཊེཏྭཱ ཋིཏེསུ རཀྑཏི, ཛཊཾ ཝིཛཊེཏྭཱ ཝིཡོཛིཏེསུ ཡཐཱཝུཏྟཔཱརཱཛིཀཱདིཨཱཔཏྟིཡོ ཧོནྟཱི’’ཏི ཨེཝམཱདིཀོ ཝིནིཙྪཡོ ཙ སཱུཙིཏོཏི གཧེཏབྦོ.

༡༥༨. མདྡིཏྭཱཏི ཝཱིཧིསཱིསཱནི མདྡིཏྭཱ. པཔྥོཊེཏྭཱཏི བྷུསཱདཱིནི ཨོཕུནིཏྭཱ. ཨིཏོ སཱརཾ གཎྷིསྶཱམཱིཏི པརིཀཔྤེཏཱིཏི ཡོཛནཱ. ཨིཏོཏི ཝཱིཧིསཱིསཏོ. སཱརཾ གཎྷིསྶཱམཱིཏི སཱརབྷཱགཾ ཨཱདིཡིསྶཱམི. སཙེ པརིཀཔྤེཏཱིཏི ཡོཛནཱ. རཀྑཏཱིཏི ཝཏྠུཔཧོནཀཔྤམཱཎཾ དཱཏྟེན ལཱཡིཏྭཱ ཝཱ ཧཏྠེན ཚིནྡིཏྭཱ ཝཱ ཋཱནཱ ཙཱཝེཏྭཱ གཧིཏམྤི ཡཱཝ པརིཀཔྤོ ན ནིཊྛཱཏི, ཏཱཝ ཨཱཔཏྟིཏོ རཀྑཏཱིཏི ཨཏྠོ.

༡༥༩. མདྡནེཔཱིཏི ཝཱིཧིསཱིསམདྡནེཔི. ཨུདྡྷརཎེཔཱིཏི པལཱལཱཔནཡནེཔི. པཔྥོཊནེཔཱིཏི བྷུསཱདིཀཙཝརཱཔནཡནེཔི ¶ . དོསོ ནཏྠཱིཏི ཨགྒྷཝསེན པཱརཱཛིཀཱདིཨཱཔཏྟིཡོ ན བྷཝནྟི, སཧཔཡོགདུཀྐཊཾ པན ཧོཏེཝ. ཨཏྟནོ…པེ… པརཱཛཡོཏི ¶ ཨཏྟནོ པཋམཾ པརིཀཔྤིཏཱཀཱརེན སབྦཾ ཀཏྭཱ སཱརབྷཱགཾ གཎྷིཏུཾ ཨཏྟནོ བྷཱཛནེ པཀྑིཏྟམཏྟེ ཡཐཱཝུཏྟཔཱརཱཛིཀཱདཡོ ཧོནྟཱིཏི ཨཏྠོ.

༡༦༠. ཨེཏྟཱཝཏཱ ‘‘ཁེཏྟཊྛཾ ནཱམ བྷཎྜཾ ཁེཏྟེ ཙཏཱུཧི ཋཱནེཧི ནིཀྑིཏྟཾ ཧོཏི བྷཱུམཊྛཾ ཐལཊྛཾ ཨཱཀཱསཊྛཾ ཝེཧཱསཊྛ’’ནྟི (པཱརཱ. ༡༠༤) ཝུཏྟཱནི ཁེཏྟཊྛཱནི ཙཏྟཱརི ཡཐཱཝུཏྟསདིསཱནཱིཏི ཏཱནི པཧཱཡ ‘‘ཏཏྠཛཱཏཀ’’ནྟིཨཱདི པཱལི༹ཡཾ ཨཱགཏེ ཏཏྲཛཱཏེ ཝིནིཙྪཡཾ དསྶེཏྭཱ ཨིདཱནི ‘‘ཁེཏྟཾ ནཱམ ཡཏྠ པུབྦཎྞཾ ཝཱ ཨཔརཎྞཾ ཝཱ ཛཱཡཏཱི’’ཏི (པཱརཱ. ༡༠༤) ཨེཝམཱགཏེ ཁེཏྟེཔི ཝིནིཙྪཡཾ དསྶེཏུམཱཧ ‘‘ཛཱན’’ནྟིཨཱདི. ཛཱནནྟི པརསནྟཀབྷཱཝཾ ཛཱནནྟོ. ཁཱིལནྟི ཨཔྤིཏཀྑརཾ ཝཱ ཨིཏརཾ ཝཱ པཱསཱཎཱདིཁཱིལཾ. སངྐཱམེཏཱིཏི པརཱཡཏྟབྷཱུམིཾ སཱམིཀཱ ཡཐཱ པསྶནྟི, ཏཐཱ ཝཱ ཨཉྙཐཱ ཝཱ ཨཏྟནོ སནྟཀཾ ཀཱཏུཀཱམཏཱཡ ཀེསགྒམཏྟམྤི ཋཱནཾ ཡཐཱ སསནྟཀཾ ཧོཏི, ཏཐཱ ཐེཡྻཙིཏྟེན ནིཁཎཏཱིཏི ཨཏྠོ.

༡༦༡. ཏཾ པཱརཱཛིཀཏྟཾ ཏསྶ ཀདཱ ཧོཏཱིཏི ཨཱཧ ‘‘སཱམིཀཱནཾ ཏུ དྷུརནིཀྑེཔནེ སཏཱི’’ཏི. ‘‘ཧོཏཱི’’ཏི པཱཋསེསོ. ཏུ-སདྡེན ‘‘ཨཏྟནོ ཝཱ’’ཏི ཝིསེསསྶ སངྒཧིཏཏྟཱ སཱམིནོ ནིརཱལཡབྷཱཝསངྑཱཏདྷུརནིཀྑེཔེ ཙ ‘‘སཱམིཀསྶ ན དསྶཱམཱི’’ཏི ཨཏྟནོ དྷུརནིཀྑེཔེ ཙ ཏསྶ པཱརཱཛིཀཏྟཾ ཧོཏཱིཏི ཨཏྠོ. ཨེཝམུདཱིརིཏནྟི ‘‘ཀེསགྒམཏྟམྤཱི’’ཏི ཨེཝཾ ནིཡམིཏཾ ཀཐིཏཾ.

༡༦༢. ཡཱ པནཱཏི ཡཱ བྷཱུམི པན. ཏེསུ དྭཱིསུ ཁཱིལེསུ. ཨཱདོ ཐུལླཙྩཡནྟི པཋམེ ཁཱིལེ སངྐཱམིཏེ སོ བྷིཀྑུ ཐུལླཙྩཡཾ ཨཱཔཛྫཏི. དུཏིཡེཏི དུཏིཡེ ཁཱིལེ སངྐཱམིཏེ པརཱཛཡོ ¶ ཧོཏཱིཏི ཡོཛནཱ. བཧཱུཧི ཁཱིལེཧི གཧེཏབྦཊྛཱནེ པརིཡནྟཁཱིལེསུ དྭཱིསུ ཝིནིཙྪཡོ ཙ ཨེཏེནེཝ ཝུཏྟོ ཧོཏི. ཨེཏྠ པན ཨནྟེ ཁཱིལདྭཡཾ ཝིནཱ ཨཝསེསཁཱིལནིཁཎནེ ཙ ཨིཏརེསུ ཏདཏྠེསུ སབྦཔཡོགེསུ ཙ དུཀྐཊཾ ཧོཏཱིཏི ཝིསེསོ.

༡༦༣-༤. ‘‘མམེདཾ སནྟཀ’’ནྟི ཉཱཔེཏུཀཱམོཏི སམྦནྡྷོ. པརསནྟཀཱཡ བྷཱུམིཡཱ པརཱཡཏྟབྷཱཝཾ ཉཏྭཱཝ ཐེཡྻཙིཏྟེན ཀེསགྒམཏྟམྤི ཋཱནཾ གཎྷིཏུཀཱམཏཱཡ ‘‘ཨེཏྟཀཾ ཋཱནཾ མམ སནྟཀ’’ནྟི ¶ རཛྫུཡཱ ཝཱ ཡཊྛིཡཱ ཝཱ མིནིཏྭཱ པརསྶ ཉཱཔེཏུཀཱམོཏི ཨཏྠོ. ཡེཧི དྭཱིཧི པཡོགེཧཱིཏི སབྦཔཙྪིམཀེཧི རཛྫུཔསཱརཎཡཊྛིཔཱཏནཱནམཉྙཏརེཧི དྭཱིཧི པཡོགེཧི. ཏེསཱུཏི ནིདྡྷཱརཎེ བྷུམྨཾ.

ཨིདྷ རཛྫུཾ ཝཱཔཱིཏི ཝིཀཔྤཏྠཝཱ-སདྡེན ‘‘ཡཊྛིཾ ཝཱ’’ཏི ཡོཛེཏབྦེཔི ཨཝུཏྟསམུཙྩཡཏྠཾ ཨདྷིཀཝཙནབྷཱཝེན ཝུཏྟཔི-སདྡེན ཨིདྷཱཝུཏྟམརིཡཱདཝཏཱིནཾ ཝིནིཙྪཡསྶ ཉཱཔིཏཏྟཱ ཡཐཱཝུཏྟརཛྫུཡཊྛིཝིནིཙྪཡེསུ ཝིཡ པརསནྟཀཱཡ བྷཱུམིཡཱ ཀེསགྒམཏྟམྤི ཋཱནཾ ཐེཡྻཙིཏྟེན གཎྷིཏུཀཱམཏཱཡ ཝཏིཔཱདེ ནིཁཎིཏྭཱ ཝཱ སཱཁཱམཏྟེན ཝཱ ཝཏིཾ ཀརོནྟསྶ མརིཡཱདཾ ཝཱ བནྡྷནྟསྶ པཱཀཱརཾ ཝཱ ཙིནནྟསྶ པཾསུམཏྟིཀཱ ཝཱ ཝཌྜྷེནྟསྶ པུབྦཔཡོགེ པཱཙིཏྟིཡཊྛཱནེ པཱཙིཏྟིཡཉྩ དུཀྐཊཉྩ སཧཔཡོགེ ཀེཝལདུཀྐཊཉྩ པཙྪིམཔཡོགེསུ དྭཱིསུ པཋམཔཡོགེ ཐུལླཙྩཡཉྩ ཨཝསཱནཔཡོགེ པཱརཱཛིཀཉྩ ཧོཏཱིཏི ཝིནིཙྪཡོཔི སངྒཧིཏོཏི དཊྛབྦཾ.

ཁེཏྟཊྛཀཐཱཝཎྞནཱ.

༡༦༥. ཝཏྠཊྛཱདཱིསུ ཝཏྠཊྛསྶཱཏི ཨེཏྠ ‘‘ཝཏྠུ ནཱམ ཨཱརཱམཝཏྠུ ཝིཧཱརཝཏྠཱུ’’ཏི (པཱརཱ. ༡༠༥) པདབྷཱཛནེ ཝུཏྟཏྟཱ པུཔྥཱདིཨཱརཱམེ ¶ ཀཱཏུཾ སངྑརིཏྭཱ ཋཔིཏབྷཱུམི ཙ པུབྦཀཏཱརཱམཱནཾ ཝིནཱསེ ཏུཙྪབྷཱུམི ཙ ཝིཧཱརཾ ཀཱཏུཾ ཨབྷིསངྑཏཱ བྷཱུམི ཙ ནཊྛཝིཧཱརབྷཱུམི ཙཱཏི ཨེཝཾ ཝིབྷཱགཝཏི ཝསཏི ཨེཏྠ ཨུཔརོཔོ ཝཱ ཝིཧཱརོ ཝཱཏི ‘‘ཝཏྠཱུ’’ཏི ཝུཙྩཏི ཨིཙྩེཝཾ དུཝིདྷཾ ཝཏྠུཉྩ ‘‘ཝཏྠུཊྛཾ ནཱམ བྷཎྜཾ ཝཏྠུསྨིཾ ཙཏཱུཧི ཋཱནེཧི ནིཀྑིཏྟཾ ཧོཏི བྷཱུམཊྛཾ ཐལཊྛཾ ཨཱཀཱསཊྛཾ ཝེཧཱསཊྛ’’ནྟི (པཱརཱ. ༡༠༥) ཝཙནཏོ ཨེཝཾ ཙཏུབྦིདྷཾ བྷཎྜཉྩཱཏི ཨིདཾ དྭཡཾ ཝཏྠུ ཙ ཝཏྠུཊྛཉྩ ཝཏྠུཝཏྠུཊྛནྟི ཝཏྟབྦེ ཨེཀདེསསརཱུཔེཀསེསཝསེན སམཱསེཏྭཱ, ཨུ-ཀཱརསྶ ཙ ཨཀཱརཾ ཀཏྭཱ ‘‘ཝཏྠཊྛསྶཱ’’ཏི དསྶིཏནྟི གཧེཏབྦཾ. ཡཐཱཝུཏྟདུཝིདྷཝཏྠུནོ, ཝཏྠཊྛསྶ ཙ བྷཎྜསྶཱཏི ཨཏྠོ. ཁེཏྟཊྛེཏི ཨེཏྠཱཔི ཨཡམེཝ སམཱསོཏི ཁེཏྟེ ཙ ཁེཏྟཊྛེ ཙཱཏི གཧེཏབྦཾ. ནཱཝཊྛཱདིཝོཧཱརེཔི ཨེསེཝ ནཡོ. གཱམཊྛེཔི ཙཱཏི ‘‘གཱམཊྛཾ ནཱམ བྷཎྜཾ གཱམེ ཙཏཱུཧི ཋཱནེཧི ནིཀྑིཏྟཾ ཧོཏི བྷཱུམཊྛཾ…པེ… ཝེཧཱསཊྛ’’ནྟི (པཱརཱ. ༡༠༦) ཝུཏྟེ ཙཏུབྦིདྷེ གཱམཊྛབྷཎྜེཔཱིཏི ཨཏྠོ.

ཝཏྠཊྛགཱམཊྛཀཐཱཝཎྞནཱ.

༡༦༦. ཨརཉྙཊྛཀཐཱཡཾ ¶ ‘‘ཏིཎཾ ཝཱ’’ཏིཨཱདིཔདཱནཾ ‘‘ཏཏྠཛཱཏཀ’’ནྟི པདེན སམྦནྡྷོ. ཏཏྠཛཱཏཀནྟི ‘‘ཨརཉྙཾ ནཱམ ཡཾ མནུསྶཱནཾ པརིགྒཧིཏཾ ཧོཏཱི’’ཏི (པཱརཱ. ཨཊྛ. ༡.༡༠༧) ཝཙནཏོ ཏཏྠཛཱཏཾ ཡཾ ཀིཉྩི མནུསྶསནྟཀཾ སཱམིཀཱནཾ ཨཀཱམཱ ཨགཧེཏབྦཏོ སཱརཀྑེ ཨརཉྙེ ཨུཔྤནྣནྟི ཨཏྠོ. ཏིཎཾ ཝཱཏི པརེཧི ལཱཡིཏྭཱ ཋཔིཏཾ ཝཱ ཨཏྟནཱ ལཱཡིཏབྦཾ ཝཱ གེཧཙྪཱདནཱརཧཾ ཏིཎཾ ཝཱ. པཎྞཾ ཝཱཏི ཨེཝརཱུཔམེཝ གེཧཙྪཱདནཱརཧཾ ཏཱལཔཎྞཱདིཔཎྞཾ ཝཱ. ལཏཾ ཝཱཏི ཏཐཱརཱུཔམེཝ ཝེཏྟལཏཱདིཀཾ ཝལླིཾ ཝཱ. ཡཱ པན དཱིགྷཱ ཧོཏི ¶ , མཧཱརུཀྑེ ཙ གཙྪེ ཙ ཝིནིཝིཛ྄ཛྷིཏྭཱ ཝཱ ཝེཋེཏྭཱ ཝཱ གཏཱ, སཱ མཱུལེ ཚིནྣཱཔི ཨཝཧཱརཾ ན ཛནེཏི, ཨགྒེ ཚིནྣཱཔི. ཡདཱ པན ཨགྒེཔི མཱུལེཔི ཚིནྣཱ ཧོཏི, ཏདཱ ཨཝཧཱརཾ ཛནེཏི. སཙེ པན ཝེཋེཏྭཱ ཋིཏཱ ཧོཏི, ཝེཋེཏྭཱ ཋིཏཱ པན རུཀྑཏོ མོཙིཏམཏྟཱ ཨཝཧཱརཾ ཛནེཏཱིཏི ཨཡམེཏྠ ཝིསེསོ. སཱམིཀེན ཨཝིསྶཛྫིཏཱལཡཾ ཚལླིཝཱཀཱདིཨཝསེསབྷཎྜཉྩ ཨིམིནཱཝ ཨུཔལཀྑིཏྭཱ སངྒཧིཏནྟི ཝེདིཏབྦཾ. ཀཊྛམེཝ ཝཱཏི དཱརུཾ ཝཱ. བྷཎྜགྒྷེནེཝ ཀཱཏབྦོཏི ཨེཏྠ ཨནྟོབྷཱུཏཧེཏུཏྠཝསེན ཀཱརེཏབྦོཏི ཨཏྠོ གཧེཏབྦོ. ཏེནཱཧ ཨཊྛཀཐཱཡཾ ‘‘བྷཎྜགྒྷེན ཀཱརེཏབྦོ’’ཏི. ཨཝཧཊཏིཎཱདིབྷཎྜེསུ ཨགྒྷཝསེན མཱསཀཾ ཝཱ ཨཱུནམཱསཀཾ ཝཱ ཧོཏི, དུཀྐཊཾ. ཨཏིརེཀམཱསཀཾ ཝཱ ཨཱུནཔཉྩམཱསཀཾ ཝཱ ཧོཏི, ཐུལླཙྩཡཾ. པཉྩམཱསཀཾ ཝཱ ཨཏིརེཀཔཉྩམཱསཀཾ ཝཱ ཧོཏི, པཱརཱཛིཀཾ. པཱརཱཛིཀཾ ཙེ ཨནཱཔནྣོ, ཨཱམསནདུཀྐཊཾ, ཕནྡཱཔནཐུལླཙྩཡཉྩ ཀཱརེཏབྦོཏི ཨཏྠོ. གཎྷནྟོཏི ཨཝཧརནྟོ.

༡༦༧-༧༤. ཨིདཱནི ‘‘ཀཊྛམེཝ ཝཱ’’ཏི ཝུཏྟརུཀྑདཱརཱུསུ ཝིནིཙྪཡཾ དསྶེཏུམཱཧ ‘‘མཧགྒྷེ’’ཏིཨཱདི. མཧགྒྷེཏི པཉྩམཱསཀཾ ཝཱ ཨཏིརེཀཔཉྩམཱསཀཾ ཝཱ ཨགྒྷཀཾ ཧུཏྭཱ མཧགྒྷེ. ནསྶཏཱིཏི ཐེཡྻཙིཏྟསམངྒཱི ཧུཏྭཱ ཚིནྣམཏྟེཔི པཱརཱཛིཀཾ ཨཱཔཛྫཏི. པི-སདྡོ ཨཝདྷཱརཎེ. ‘‘ཀོཙིཔཱི’’ཏི ཨིམིནཱ ཨདྡྷགཏོཔི ཨལླཾ ཝཱ ཧོཏུ པུརཱཎཾ ཝཱ, ཏཙྪེཏྭཱ ཋཔིཏཾ ན གཧེཏབྦམེཝཱཏི ཨཏྠོ.

མཱུལེཏི ཨུཔལཀྑཎམཏྟཾ. ‘‘ཨགྒེ ཙ མཱུལེ ཙ ཚིནྣོ ཧོཏཱི’’ཏི (པཱརཱ. ཨཊྛ. ༡.༡༠༧) ཨཊྛཀཐཱཝཙནཏོ མཱུལཉྩ ཨགྒཉྩ ཚིནྡིཏྭཱཏི གཧེཏབྦོ. ཨདྡྷགཏནྟི ཛིཎྞགལི༹ཏཔཏིཏཏཙཾ, ཙིརཀཱལཾ ཋིཏནྟི ཝུཏྟཾ ཧོཏི.

ལཀྑཎེཏི ¶ ཨཏྟནོ སནྟཀཾ ཉཱཔེཏུཾ རུཀྑཀྑནྡྷེ ཏཙཾ ཚིནྡིཏྭཱ ཀཏསལླཀྑཎེ. ཚལླིཡོནདྡྷེཏི ¶ སམནྟཏོ ཨབྷིནཝུཔྤནྣཱཧི ཚལླཱིཧི པརིཡོནནྡྷིཏྭཱ ཨདསྶནཾ གམིཏེ. ཨཛ྄ཛྷཱཝུཏྠཉྩཱཏི ཨེཏྠ ‘‘གེཧ’’ནྟི པཱཋསེསོ. གེཧཾ ཀཏཉྩ ཨཛ྄ཛྷཱཝུཏྠཉྩཱཏི ཡོཛནཱ. གེཧཾ ཀཱཏུཾ ཨརཉྙསཱམིཀཱནཾ མཱུལཾ དཏྭཱ རུཀྑེ ཀིཎིཏྭཱ ཚིནྣདཱརཱུཧི ཏཾ གེཧཾ ཀཏཉྩ པརིབྷུཏྟཉྩཱཏི ཨཏྠོ. ཝིནསྶནྟཉྩཱཏི ཨེཏྠཱཔི ‘‘ཨཝསིཊྛཾ དཱརུ’’ནྟི པཱཋསེསོ. ཏཾ གེཧཾ ཀཏྭཱ ཨཝསིཊྛཾ ཝསྶཱཏཔཱདཱིཧི ཝིཝིདྷཱ ཛཱིརིཏྭཱ ཝིནསྶམཱནཾ, ཝིཔནྣདཱརུནྟི ཝུཏྟཾ ཧོཏི. གཎྷཏོ ན དོསོ ཀོཙཱིཏི སམྦནྡྷོ. ‘‘སཱམིཀཱ ནིརཱལཡཱ’’ཏི གཎྷཏོ ཀཱཙིཔི ཨཱཔཏྟི ནཏྠཱིཏི ཨཏྠོ. ཀིཾཀཱརཎནྟི ཙེ? ཨརཉྙསཱམིཀེཧི མཱུལཾ གཧེཏྭཱ ཨཉྙེསཾ དིནྣཏྟཱ, ཏེསཉྩ ནིརཱལཡཾ ཚཌྜིཏཏྟཱཏི ཨིདམེཏྠ ཀཱརཎཾ.

ཝུཏྟཉྷེཏཾ ཨཊྛཀཐཱཡཾ ‘‘གེཧཱདཱིནཾ ཨཏྠཱཡ རུཀྑེ ཚིནྡིཏྭཱ ཡདཱ ཏཱནི ཀཏཱནི, ཨཛ྄ཛྷཱཝུཏྠཱནི ཙ ཧོནྟི, དཱརཱུནིཔི ཨརཉྙེ ཝསྶེན ཙ ཨཱཏཔེན ཙ ཝིནསྶནྟི, ཨཱིདིསཱནིཔི དིསྭཱ ‘ཚཌྜིཏཱནཱི’ཏི གཧེཏུཾ ཝཊྚཏི. ཀསྨཱ? ཡསྨཱ ཨརཉྙསཱམིཀཱ ཨེཏེསཾ ཨནིསྶརཱ. ཡེཧི ཨརཉྙསཱམིཀཱནཾ དེཡྻདྷམྨཾ དཏྭཱ ཚིནྣཱནི, ཏེ ཨེཝ ཨིསྶརཱ, ཏེཧི ཙ ཏཱནི ཚཌྜིཏཱནི, ནིརཱལཡཱ ཏཏྠ ཛཱཏཱ’’ཏི (པཱརཱ. ཨཊྛ. ༡.༡༠༧). ཨེཝམྤི སཏི པཙྪཱ སཱམིཀེསུ ཨཱཧརཱཔེནྟེསུ བྷཎྜདེཡྻཾ ཧོཏཱིཏི དཊྛབྦཾ.

ཡོ ཙཱཏི ཨརཉྙསཱམིཀཱནཾ དེཡྻདྷམྨཾ པཝིསནྟོ ཨདཏྭཱ ‘‘ནིཀྑམནྟོ དསྶཱམཱི’’ཏི རུཀྑེ གཱཧཱཔེཏྭཱ ནིཀྑམནྟོ ཡོ ཙ བྷིཀྑུ. ཨཱརཀྑཊྛཱནཾ པཏྭཱཏི ཨརཉྙཔཱལཀཱ ཡཏྠ ནིསིནྣཱ ཨརཉྙཾ རཀྑནྟི, ཏཾ ཋཱནཾ པཏྭཱ. ‘‘ཙིནྟེནྟོ’’ཏི ཀིརིཡནྟརསཱཔེཀྑཏྟཱ ‘‘ཨཏིཀྐམེཡྻཱ’’ཏི སཱམཏྠིཡཏོ ¶ ལབྦྷཏི. ཏསྨཱ ཙིཏྟེ ཀམྨཊྛཱནཱདཱིནི ཀཏྭཱཏི ཨེཏྠ ཨཱདི-སདྡེན པཀཱརཏྠེན ཀུསལཔཀྑིཡཱ ཝིཏཀྐཱ སངྒཡ྄ཧནྟི. ཨཉྙཾ ཙིནྟེནྟོ ཝཱ ཨཱརཀྑནཊྛཱནཾ པཏྭཱཡེཝ ཨཏིཀྐཱམེཡྻཱཏི ཡོཛེཏྭཱ ཨཏྠོ ཝཏྟབྦོ. ཏཏྠ ཨཉྙཾ ཙིནྟེནྟོ ཝཱཏི ཨཉྙཾ ཝིཧིཏོ ཝཱ, ཨིམིནཱ ཡཐཱཝུཏྟཝིཏཀྐཱནཾ སངྒཧོ. ཨསྶཱཏི ཨེཏྠ ‘‘དེཡྻ’’ནྟི ཀིཏཡོགེ ཀཏྟརི སཱམིཝཙནཏྟཱ ཨནེནཱཏི ཨཏྠོ.

‘‘ཡོཙཱ’’ཏི ཨེཏྠ ཨཝུཏྟསམུཙྩཡཏྠེན ཙ-སདྡེན ཨརཉྙཔཝིསནཀཱལེ ཡཐཱཝུཏྟནཡེན མཱུལཾ ཨདཏྭཱ ཨརཉྙཾ པཝིསིཏྭཱ དཱརཱུནི གཧེཏྭཱ གམནཀཱལེ ‘‘ཨརཉྙཔཱལཀཱ སཙེ ཡཱཙནྟི, དསྶཱམཱི’’ཏི པརིཀཔྤེཏྭཱ གནྟྭཱ ཏེཧི ཨཡཱཙིཏཏྟཱ ཨདཏྭཱ གཙྪནྟོཔི ཏཐེཝ ཨཱགནྟྭཱ ཨཱརཀྑཀེསུ ¶ ཀཱིལཱ༹པསུཏེསུ ཝཱ ནིདྡཱཡནྟེསུ ཝཱ བཧི ནིཀྑནྟེསུ ཝཱ ཏཏྠ ཋཏྭཱ ཨཱརཀྑཀེ པརིཡེསིཏྭཱ ཨདིསྭཱ གཙྪནྟོཔི ཏཐེཝ ཨཱགནྟྭཱ ཏཏྠ ནིཡུཏྟཨིསྶརཛནེཧི ཨཏྟནོ ཧཏྠཏོ དཱཏབྦཾ དཏྭཱ ཝཱ ཨཏྟཱནཾ སམྨཱནཾ ཀཏྭཱ ཝཱ པཱལཀེ སཉྙཱཔེཏྭཱ ཝཱ པཱལཀེ ཨོཀཱསཾ ཡཱཙིཏྭཱ ཏེཧི དིནྣོཀཱསོ ཝཱ གཙྪནྟོཔཱིཏི ཨེཏྟཀཱ ཝུཏྟེན སདིསཏྟཱ སངྒཧིཏཱཏི དཊྛབྦཱ.

ཝརཱཧཱཏི སཱུཀརཱ. ཝགྒྷཱཏི བྱགྒྷཱ. ཨཙྪཱཏི ཨིསྶཱ. ཏརཙྪཱཏི ཀཱལ༹སཱིཧཱ. ཨཱདི-སདྡེན དཱིཔིམཏྟཧཏྠིསཱིཧཱདཡོ ཝཱལ༹མིགཱ སངྒཡ྄ཧནྟི. ཨེཏེཡེཝ ཝརཱཧཱདཡོ སམཱགམཝསེན མརཎཱདིཨནིཊྛསམཱིཔཙཱརིཏཱཡ ཨུཔ ཨནིཊྛསམཱིཔེ དཝནྟི པཝཏྟནྟཱིཏི ‘‘ཨུཔདྡཝཱ’’ཏི ཝུཙྩནྟི. ཨཱརཀྑཊྛཱནཾ ཨཱགཏཀཱལེ དིཊྛཝརཱཧཱདིཨུཔདྡཝཏོཏི ཝུཏྟཾ ཧོཏི. མུཙྩིཏུཀཱམཏཱཡཱཏི མོཀྑཱདྷིཔྤཱཡེན. ‘‘ཏཐེཝཱ’’ཏི ཨིམིནཱ པཝིསནཀཱལེ དེཡྻདྷམྨཾ ཨདཏྭཱ ‘‘ནིཀྑམནཀཱལེ དསྶཱམཱི’’ཏི ¶ པཝིསིཏྭཱ དཱརུཾ གཧེཏྭཱ ཨཱརཀྑཊྛཱནཾ པཏྟོཏི པུརིམགཱཐཱཡ སཱམཏྠིཡཏོ ལབྦྷམཱནོཡེཝཏྠོ དསྶིཏོ. ཏཾ ཋཱནནྟི ཏཾ ཨཱརཀྑཊྛཱནཾ. ཨཏིཀྐཱམེཏཱིཏི ‘‘ཨིདཾ ཏཾ ཋཱན’’ནྟིཔི ཨསལླཀྑཎམཏྟབྷཡུཔདྡཝོ ཧུཏྭཱ པལཱཡནྟོ ཨཏིཀྐམཏི, བྷཎྜདེཡྻཾ པན ཧོཏཱིཏི ཡོཛནཱ.

སུངྐགྷཱཏཏོཏི ཨེཏྠཱཔི པི-སདྡོ ལུཏྟནིདྡིཊྛོཏི ཝེདིཏབྦོ, སུངྐགཧཎཊྛཱནཏོཔཱིཏི ཨཏྠོ. སུངྐསྶ རཉྙོ དཱཏབྦབྷཱགསྶ གྷཱཏོ མུསིཏྭཱ གཧཎམཏྟོ, སུངྐོ ཧཉྙཏི ཨེཏྠཱཏི ཝཱ སུངྐགྷཱཏོཏི ཝིགྒཧོ. སུངྐགྷཱཏསརཱུཔཾ པརཏོ ཨཱཝི བྷཝིསྶཏི. ཏསྨཱཏི སུངྐགྷཱཏཏོ ཏསྶ གརུཀཏྟཱ ཨེཝ. ཏནྟི ཏཾ སུངྐགྷཱཏཊྛཱནཾ. ཨནོཀྐམྨ གཙྪཏོཏི ཨཔཝིསིཏྭཱ གཙྪནྟསྶ. དུཀྐཊཾ ཨུདྡིཊྛཾ ‘‘སུངྐཾ པརིཧརཏི, ཨཱཔཏྟི དུཀྐཊསྶཱ’’ཏི (པཱརཱ. ༡༡༣).

ཨེཏནྟི ཡཐཱཝུཏྟཨཱརཀྑཊྛཱནཾ. ཐེཡྻཙིཏྟེན པརིཧརནྟསྶཱཏི ཐེཡྻཙིཏྟེན པརིཧརིཏྭཱ དཱུརཏོ གཙྪནྟསྶ. ཨཱཀཱསེནཔི གཙྪཏོ པཱརཱཛིཀམནུདྡིཊྛཾ སཏྠུནཱཏི སམྦནྡྷོ.

ནནུ ཙ ‘‘ཨིདཾ པན ཐེཡྻཙིཏྟེན པརིཧརནྟསྶ ཨཱཀཱསེན གཙྪཏོཔི པཱརཱཛིཀམེཝཱ’’ཏི (པཱརཱ. ཨཊྛ. ༡.༡༠༧) ཨཊྛཀཐཱཡཾ ཝུཏྟཝཙནཾ ཝིནཱ པཱལི༹ཡཾ ‘‘ཨརཉྙཊྛ’’ནྟི མཱཏིཀཱཔདསྶ ཝིབྷངྒེ ‘‘ཏཏྠཛཱཏཀཾ ཀཊྛཾ ཝཱ ལཏཾ ཝཱ ཏིཎཾ ཝཱ པཉྩམཱསཀཾ ཝཱ ཨཏིརེཀཔཉྩམཱསཀཾ ཝཱ ཨགྒྷནཀཾ ཐེཡྻཙིཏྟོ ཨཱམསཏི, ཨཱཔཏྟི དུཀྐཊསྶ. ཕནྡཱཔེཏི, ཨཱཔཏྟི ¶ ཐུལླཙྩཡསྶ. ཋཱནཱ ཙཱཝེཏི, ཨཱཔཏྟི པཱརཱཛིཀསྶཱ’’ཏི (པཱརཱ. ༡༠༦) སཱམཉྙཝཙནཏོ སུངྐགྷཱཏེ ‘‘སུངྐཾ པརིཧརཏི, ཨཱཔཏྟི དུཀྐཊསྶཱ’’ཏི ཝཙནཾ ཝིཡ ཨེཏྠ ཨཱརཀྑཊྛཱནཾ ¶ པརིཧརནྟསྶ ཝིསུཾ ཝུཏྟཔཱརཱཛིཀཱཔཏྟིཝཙནེ ཨསཏིཔི ‘‘ཨཊྛཀཐཱཡ’’ནྟི ཨཝཏྭཱ ‘‘སཏྠུནཱ’’ཏི ཀསྨཱ ཨཱཧཱཏི? ཝུཙྩཏེ – ཨཊྛཀཐཱཙརིཡེན ཏཐེཝ ཝུཏྟཏྟཱ ཨཱཧ. ཀསྨཱ པན ཨཊྛཀཐཱཙརིཡེན ‘‘ཨཔཉྙཏྟཾ ན པཉྙཔེསྶཱམ, པཉྙཏྟཾ ན སམུཙྪིནྡིསྶཱམཱ’’ཏི (པཱརཱ. ༥༦༥) པཱལི༹པཱཋཾ ཛཱནནྟེནཔི པཱལི༹ཡཾ ཨཝུཏྟཔཱརཱཛིཀཾ ནིདྡིཊྛནྟི? ཨེཏྠ ཝིནིཙྪཡཾ བྷིཀྑཱུཧི པུཊྛེན བྷགཝཏཱ ཝུཏྟནཡསྶ མཧཱཨཊྛཀཐཱཡ ཨཱགཏཏྟཱ ཏསྶེཝ ནཡསྶ སམནྟཔཱསཱདིཀཱཡཾ ནིདྡིཊྛབྷཱཝཾ ཛཱནནྟེན ཨིམིནཱཔི ཨཱཙརིཡེན ཨིདྷ ‘‘སཏྠུནཱ’’ཏི ཝུཏྟནྟི གཧེཏབྦཾ.

ཨཐ ཝཱ ‘‘སུངྐཾ པརིཧརཏི, ཨཱཔཏྟི དུཀྐཊསྶཱ’’ཏི ཝཏྭཱ ཨཱརཀྑཊྛཱནཝིནིཙྪཡེ ཨཝཙནཾ ཡཐཱཝུཏྟཝིསཡསྶ ཨདིཊྛབྷཱཝེན ཝཱ སིཡཱ, ཨིམསྶ ཏཐཱ ཨནཝཛྫཏཱ ཝཱ སིཡཱ, ཝུཏྟཱནུསཱརེན སུཝིཉྙེཡྻཏཱ ཝཱ སིཡཱཏི ཏཡོ ཝིཀཔྤཱ. ཏེསུ པཋམཝིཀཔྤོ སབྦཉྙུབྷཱཝབཱདྷནཏོ དུབྦིཀཔྤམཏྟཾ ཧོཏི. དུཏིཡཝིཀཔྤོ ལོཀཝཛྫསྶ ཨིམསྶ ཨནཝཛྫབྷཱཝོ ནཱམ ཨནུཔཔནྣོཏི ཨནཱདཱཏབྦོ. པཱརིསེསཏོ ཏཏིཡཝིཀཔྤོ ཡུཛྫཏི.

ཏཏྠ ‘‘ཝུཏྟཱནུསཱརེནཱ’’ཏི ཀིམེཏྠ ཝུཏྟཾ ནཱམ, ཏདནུསཱརེན ཨིམསྶཱཔི སུཝིཉྙེཡྻཏཱ ཀཐནྟི ཙེ? པཋམནིདྡིཊྛེ ཨརཉྙཊྛནིདྡེསེ སཱམཉྙེན ‘‘ཋཱནཱ ཙཱཝེཏི, ཨཱཔཏྟི པཱརཱཛིཀསྶཱ’’ཏི (པཱརཱ. ༡༠༦) ཨིདཾ ཝུཏྟཾ, ན པན ཐེཡྻཙིཏྟེན ཨཱརཀྑཊྛཱནཔརིཧརཎཉྩ. ‘‘གམནཀཱལེ ‘མཱུལཾ དཏྭཱ གམིསྶཱམཱི’ཏི པུབྦཔརིཀཔྤིཏནིཡཱམེན ཨདཏྭཱ གཙྪཏོ པརིཀཔྤཱཝཧཱརོཝ ཧོཏཱི’’ཏི ཙ ‘‘ཏཾ པན ཡེན ཀེནཙི ཨཱཀཱརེན པརིཀཔྤིཏཊྛཱནཾ པཧཱཡ གམནཾ ཋཱནཱཙཱཝནཾ ནཱམ ཧོཏེཝཱཏི ཏེན ཝཏྠུནཱ པཱརཱཛིཀམེཝ ཧོཏཱི’’ཏི ¶ ཙ ‘‘ཋཱནཱ ཙཱཝེཏི, ཨཱཔཏྟི པཱརཱཛིཀསྶཱ’ཏི ཨིམིནཱ ཙ ཝིཉྙཱཏཏྠམེཝ ཧོཏཱི’’ཏི ཙ ཝིསུཾ ན ཝུཏྟཾ. སུངྐཊྛཱནཔརིཧརཎཾ པན ཋཱནཔརིཧརཎསབྷཱཝཏྟཱ སབྷཱཝཏོ ཨཱིདིསཾཝ སནྟམྤི ཨིདཾ ཝིཡ པརིཀཔྤིཏཊྛཱནཾ ན ཧོཏཱིཏི ཝཀྑམཱནརཱཛསམྨཏཊྛཱནཏོ ཨཉྙཾ པརིཀཔྤིཏཊྛཱནཾ སམཱནམྤི ཐེཡྻཙིཏྟུཔྤཏྟིམཏྟེན ཏཾ པརིཧརིཏྭཱ གཙྪནྟསྶ ཐེཡྻཙིཏྟེན ཨཏྟནོ པཏྟཾ གཎྷནྟསྶ ཝིཡ པཱརཱཛིཀཱཡ ཨཝཏྠུཏཉྩ དུཀྐཊསྶེཝ ཝཏྠུབྷཱཝཉྩ ཝིཉྙཱཔེཏུཾ ‘‘སུངྐཾ པརིཧརཏི, ཨཱཔཏྟི དུཀྐཊསྶཱ’’ཏི ཝུཏྟནྟི བྷགཝཏོ ཨདྷིཔྤཱཡཉྙུནཱ ཨཊྛཀཐཱཙརིཡེན ‘‘པཱརཱཛིཀམེཝཱ’’ཏི (པཱརཱ. ཨཊྛ. ༡.༡༠༧) ཝུཏྟཏྟཱ ¶ ཏེན ཨཊྛཀཐཱཡཾ ཝུཏྟནཱིཧཱརམེཝ དསྶེཏུཾ ཨཡམཱཙརིཡོཔི ‘‘སཏྠུནཱ པཱརཱཛིཀམནུདྡིཊྛ’’ནྟི ཨཱཧཱཏི ནིཊྛམེཏྠ གནྟབྦཾ.

ཏསྨཱཏི ཡསྨཱ ཨེཝཾ པརིཧརིཏྭཱ ཐེཡྻཙིཏྟེན དཱུརཏོ ཝཛྫེཏྭཱ གཙྪནྟསྶཱཔི པཱརཱཛིཀཔྤཧོནཀཏཱཡ ཨཙྩནྟབྷཱརིཡཾ ཧོཏི, ཏསྨཱ. ཨེཏྠཱཏི ཨིམསྨིཾ ཨརཉྙཱརཀྑཊྛཱནེ. ‘‘ཝིསེསེནཱ’’ཏི ཨིདཾ ‘‘ཨཔྤམཏྟེན ཧོཏབྦ’’ནྟི ཨིམིནཱ ཧེཏུབྷཱཝེན སམྦནྡྷནཱིཡཾ. སཏིསམྤནྣཙེཏསཱཏི ཙ པིཡསཱིལེནཱཏི ཙ ‘‘བྷིཀྑུནཱ’’ཏི ཨེཏསྶ ཝིསེསནཾ. ཨསིཀྑཱཀཱམསྶ བྷིཀྑུནོ ཨིམསྶ ཨོཝཱདསྶ ཨབྷཱཛནཏཱཡ ཏཾ པརིཝཛྫེཏུམཱཧ ‘‘པིཡསཱིལེནཱ’’ཏི. པིཡསཱིལསྶཱཔི སཏིཝིརཧིཏསྶ པམཏྟཊྛཱནེ སརཎཱསམྦྷཝཱ ཨིམསྶ ཨབྷཱཛནཏཱཡ ཏཾ ཝཛྫེཏུམཱཧ ‘‘སཏིསམྤནྣཙེཏསཱ’’ཏི.

ཨརཉྙཊྛཀཐཱཝཎྞནཱ.

༡༧༥-༦. ཏོཡདུལླབྷཀཱལསྨིནྟི ཏོཡཾ དུལླབྷཾ ཡསྨིཾ སོ ཏོཡདུལླབྷོ, ཏོཡདུལླབྷོ ཙ སོ ཀཱལོ ཙཱཏི ཏོཡདུལླབྷཀཱལོ, ཏསྨིཾ. ཨཱཝཛྫེཏྭཱ ཝཱཏི ཨུདཀབྷཱཛནཾ ནཱམེཏྭཱ ཝཱ. པཝེསེཏྭཱ ཝཱཏི ཨཏྟནོ ¶ བྷཱཛནཾ ཏསྨིཾ པཀྑིཔིཏྭཱ ཝཱ. ཚིདྡཾ ཀཏྭཱཔི ཝཱཏི ཨུདཀབྷཱཛནེ ཨོམཊྛཱདིབྷེདཾ ཚིདྡཾ ཀཏྭཱ ཝཱ གཎྷནྟསྶ བྷཎྜགྒྷེན ཝིནིདྡིསེཏི ཝཀྑམཱནེན སམྦནྡྷནཱིཡཾ.

ཏཐཱཏི ཡཐཱ ཏོཡདུལླབྷཀཱལསྨིཾ བྷཱཛནེ རཀྑིཏགོཔིཏཾ ཨུདཀཾ ཨཝཧརནྟསྶ པཱརཱཛིཀཾ ཝུཏྟཾ, ཏེནེཝ ནཱིཧཱརེན. ཝཱཔིཡཾ ཝཱཏི པརསནྟཀཱཡ སཱརཀྑཱཡ ཝཱཔིཡཾ ཝཱ. ཏལཱ༹ཀེ ཝཱཏི ཏཱདིསེ ཛཱཏསྶརེ ཝཱ. ཨེཝཾ སཱརཀྑཱནཾ པོཀྑརཎིཨཱདཱིནཾ ཨེཏེཧི ཝཱ ཨཝུཏྟསམུཙྩཡེན ཝཱ-སདྡེན ཝཱ གཧཎཾ ཝེདིཏབྦཾ. ཨཏྟནོ བྷཱཛནཾ པཝེསེཏྭཱ གཎྷནྟསྶཱཏི ཨུཔལཀྑཎཔདནྟི བྷཱཛནགཏཛལེ ཙ ཨིདྷ ཙ ཏེལབྷཱཛནེ ཝིཡ མུཁེན ཝཱ ཝཾསཱདཱིཧི ཝཱ ཨཱཀཌྜྷིཏྭཱ ཐེཡྻཙིཏྟེན པིཝནྟསྶ ཡཐཱཝཏྠུཀམཱཔཏྟིཝིདྷཱནཾ ཝེདིཏབྦཾ.

༡༧༧. མརིཡཱདནྟི ཝཱཔིཨཱདཱིནཾ པཱལི༹ཝཊྚབནྡྷཾ. ཚིནྡཏོཏི ཀུདཱལཱདཱིཧི པཾསུཨཱདཱིནི ཨུདྡྷརིཏྭཱ དྭིདྷཱ ཀརོནྟསྶ. ཝིསེསཏྠཱཝཛོཏཀེན ཏུ-སདྡེན ‘‘མརིཡཱདཾ ཚིནྡིཏྭཱ དུབྦལཾ ཀཏྭཱ ཏསྶ ¶ ཚིནྡནཏྠཱཡ ཝཱིཙིཡོ ཨུཊྛཱཔེཏུཾ ཨུདཀཾ སཡཾ ཨོཏརིཏྭཱ ཝཱ གོམཧིཾསེ ཝཱ ཨཉྙེ མནུསྶེ ཝཱ ཀཱིལ༹ནྟེ དཱརཀེ ཝཱ ཨོཏཱརེཏྭཱ ཝཱ ཨཏྟནོ དྷམྨཏཱཡ ཨོཏིཎྞེ ཏཱསེཏྭཱ ཝཱ ཨུདཀེ ཋིཏཾ རུཀྑཾ ཚིནྡིཏྭཱ ཝཱ ཚེདཱཔེཏྭཱ ཝཱ པཱཏེཏྭཱ ཝཱ པཱཏཱཔེཏྭཱ ཝཱ ཛལཾ ཁོབྷེཏི, ཏཏོ ཨུཊྛིཏཱཧི ཝཱིཙཱིཧི མརིཡཱདེ ཚིནྣེཔི ཏེནེཝ ཚིནྣོ ཧོཏི. ཨེཝམེཝ གོམཧིཾསཱདཡོ མརིཡཱདཾ ཨཱརོཧནྟེནཱཔི ཨཉྙེཧི ཨཱརོཧཱཔེནྟེནཱཔི ཏེསཾ ཁུརེཧི མརིཡཱདེ ཚིནྣེཔི, ཨུདཀནིདྡྷམནཱདིཾ པིདཧིཏྭཱ ཝཱ པིདཧཱཔེཏྭཱ ཝཱ ཝཱཔིམརིཡཱདཱཡ ནཱིཙཊྛཱནཾ བནྡྷིཏྭཱ ཝཱ བནྡྷཱཔེཏྭཱ ཝཱ ཨཏིརེཀཛལཱཔགམནམགྒཏོ ནཱིཧརིཏབྦོདཀཾ ཝཱརེཏྭཱ ཝཱ བཱཧིརཏོ ཨུདཀཾ པཝེསེཏྭཱ ཝཱ པཱུརེཏི, ཨོགྷེན མརིཡཱདེ ¶ ཚིནྣེཔི ཏེནེཝ ཚིནྣཾ ཧོཏཱི’’ཏི (པཱརཱ. ཨཊྛ. ༡.༡༠༨ ཨཏྠཏོ སམཱནཾ) ཨེཝམཱདིཀཾ ཨཊྛཀཐཱགཏཝིསེསཾ སངྒཎྷཱཏི. ཨདིནྣཱདཱནཔུབྦཏོཏི ཨདིནྣཱདཱནསྶ པུབྦཔཡོགཏྟཱ. བྷཱུཏགཱམེན སདྡྷིམྤཱིཏི བྷཱུཏགཱམེནཔི སདྡྷིཾ. ཨཔི-སདྡེན པཐཝིཁཎནཾ སམྤིཎྜེཏི. མརིཡཱདཾ ཚིནྡནྟོ ཏཏྠཛཱཏཾ ཏིཎཱདིཾ ཚིནྡཏི, བྷཱུཏགཱམཔཱཙིཏྟིཡེན སདྡྷིཾ དུཀྐཊཾ. ཛཱཏཔཐཝིཾ ཚིནྡཏི, པཐཝིཁཎནཔཱཙིཏྟིཡེན སདྡྷིཾ དུཀྐཊཾ ཨཱཔཛྫཏཱིཏི ཨདྷིཔྤཱཡོ.

༡༧༨. ཀཱཏབྦོཏི ཨེཏྠ ‘‘བྷཎྜགྒྷེན ཨཱཔཏྟིཡཱ’’ཏི པཱཋསེསོ. ཨནྟོབྷཱུཏཧེཏྭཏྠཝསེན ཀཱརེཏབྦོཏི གཧེཏབྦོ. ཨནྟོ ཋཏྭཱ ཚིནྡནྟོ བཧིཨནྟེན, བཧི ཋཏྭཱ ཚིནྡནྟོ ཨནྟོཨནྟེན, ཨུབྷཡཏྠཱཔི ཋཏྭཱ ཚིནྡནྟོ མཛ྄ཛྷཏོ བྷཎྜགྒྷེན ཨཱཔཏྟིཡཱ ཀཱརེཏབྦོཏི ཡོཛནཱ. ཨཡཾ པནེཏྠ ཨཏྠོ – ཨནྟོཝཱཔིཡཾ ཋཏྭཱ མརིཡཱདཾ ཚིནྡིཏྭཱ ཨུདཀེ བཧི ནིཀྑམིཏེ ནིཀྑནྟཨུདཀགྒྷེན དུཀྐཊཐུལླཙྩཡཔཱརཱཛིཀཱསུ ཡཐཱཔནྣཱཡ ཨཱཔཏྟིཡཱ ཀཱརེཏབྦོ. བཧི ཋཏྭཱ མརིཡཱདཾ ཚིནྡིཏྭཱ ཨནྟོཝཱཔིཡཾ པཝིསནྟོདཀསྶ ཋིཏཊྛཱནཏོ ཙཱཝིཏཀྑཎེ ནིཀྑནྟཨུདཀགྒྷེན ཨཱཔཏྟིཡཱ ཀཱརེཏབྦོ. ཀདཱཙི ཨནྟོ ཀདཱཙི བཧི ཋཏྭཱ མརིཡཱདཾ མཛ྄ཛྷེ ཋཔེཏྭཱ ཚིནྡནྟོ མཛ྄ཛྷེ ཋིཏཊྛཱནཾ ཚིནྡིཏྭཱ ཨུདཀསྶ ནཱིཧཊཀྑཎེ ནཱིཧཊཨུདཀསྶ ཨགྒྷེན ཨཱཔཏྟིཡཱ ཀཱརེཏབྦོཏི.

ཨུདཀཊྛཀཐཱཝཎྞནཱ.

༡༧༩-༨༠. ཝཱརེནཱཏི ཝཱརེན ཝཱརེན སཱམཎེརཱ ཨརཉྙཏོ ཡཾ དནྟཀཊྛཾ སངྒྷསྶཏྠཱཡ ཨཱནེཏྭཱ སཙེ ཨཱཙརིཡཱནམྤི ཨཱཧརནྟི, ཡཱཝ ཏེ དནྟཀཊྛཾ པམཱཎེན ཚིནྡིཏྭཱ སངྒྷསྶ ཙ ཨཱཙརིཡཱནཉྩ ¶ ན ནིཡྻཱདེནྟི, ཏཱཝ ཨརཉྙཏོ ¶ ཨཱབྷཏཏྟཱ ཏཾ སབྦཾ སངྒྷསྶ ཙ སཀསཀཨཱཙརིཡཱནཉྩ ཨཱབྷཏཾ དནྟཀཊྛཾ ཏེསམེཝ ཙ དནྟཀཊྛཧཱརཀཱནཾ སཱམཎེརཱནཾ སནྟཀཾ ཧོཏཱིཏི ཨཏྠཡོཛནཱ.

༡༨༡. ཏསྨཱཏི ཡསྨཱ ཏེསམེཝ སཱམཎེརཱནཾ སནྟཀཾ ཧོཏི, ཏསྨཱ. ཏཾ ཨརཉྙཏོ ཨཱབྷཏཾ དནྟཀཊྛཉྩ སངྒྷསྶ གརུབྷཎྜཉྩ དནྟཀཊྛནྟི སམྦནྡྷོ. སངྒྷིཀཱཡ བྷཱུམིཡཾ ཨུཔྤནྣཾ སངྒྷེན རཀྑིཏགོཔིཏཏྟཱ གརུབྷཎྜབྷཱུཏཾ དནྟཀཊྛཉྩཱཏི ཝུཏྟཾ ཧོཏི. གཎྷནྟསྶ ཙཱཏི ཨདྷིཀཙ-ཀཱརེན ཨིཧཱཝུཏྟསྶ ཨཊྛཀཐཱགཏསྶ གཎཔུགྒལགིཧིཔརིབདྡྷ ཨཱརཱམུཡྻཱནསཉྫཱཏཚིནྣཱཚིནྣརཀྑིཏགོཔིཏདནྟཀཊྛསྶ སམུཙྩིཏཏྟཱ ཏཉྩ ཐེཡྻཙིཏྟེན གཎྷནྟསྶ ཨཝཧཊདནྟཀཊྛསྶ ཨགྒྷཝསེན ཨཱཔཏྟིཡོ ཝཏྟབྦཱཏི ཨཡམཏྠོ དཱིཔིཏོ ཧོཏི.

༡༨༢. ཏེཧི དནྟཀཊྛཧཱརཀེཧི སཱམཎེརེཧི. ནིཡྻཱདིཏནྟི མཧཱསངྒྷསྶ པཊིཔཱདིཏཾ.

༡༨༣. སངྒྷིཀཀཱལཏོ པཊྛཱཡ ཐེཡྻཙིཏྟེན གཎྷཏོཔི ཨཝཧཱརཱབྷཱཝེ ཀཱརཎཾ དསྶེཏུམཱཧ ‘‘ཨརཀྑཏྟཱ’’ཏིཨཱདི. ཏཏྠ ཨརཀྑཏྟཱཏི སངྒྷིཀབྷཱཝེན ལདྡྷེཔི རཀྑིཏགོཔིཏདནྟཀཊྛེ ཝིཡ སངྒྷེན ཀཏཱརཀྑཱཡཱབྷཱཝཱ. ཡཐཱཝུཌྜྷམབྷཱཛེཏབྦཏོཏི སངྒྷིཀཏྟསྶཱཔི སཏོ ཡཐཱཝུཌྜྷཾ པཊིཔཱཊིམནཏིཀྐམྨ བྷཱཛེཏབྦཕལཔུཔྥཱདཱིནཾ ཝིཡ བྷཱཛེཏབྦཏཱབྷཱཝཏོ. སབྦསཱདྷཱརཎཏྟཱ ཙཱཏི སངྒྷཔརིཡཱཔནྣཱནཾ སབྦེསམེཝ སཱདྷཱརཎཏྟཱ.

ཨིདནྟི སངྒྷསྶ ནིཡྻཱདིཏདནྟཀཊྛཾ. ཨཉྙཾ ཝིཡཱཏི ཨཉྙཾ གཎཔུགྒལཱདིསནྟཀཾ རཀྑིཏགོཔིཏདནྟཀཊྛཾ ཝིཡ. ཨེཝཾ ཙོརིཀཱཡ གཎྷཏོ ཨཝཧཱརཱབྷཱཝེ ཀཱརཎེན སཱདྷིཏེཔི ཐེཡྻཙིཏྟེན ¶ སཀཔརིཀྑཱརམྤི གཎྷཏོ དུཀྐཊསྶ ཝུཏྟཏྟཱ ཏཐཱ གཎྷནྟོ དུཀྐཊཱ ན མུཙྩཏཱིཏི དཊྛབྦཾ. ཝཏྟཾ པན ཛཱནིཏབྦཾ – སངྒྷིཀདནྟཀཊྛཾ གཎྷནྟེན པདྷཱནགྷརཱདཱིསུ པཝིསིཏྭཱ ཙིརེན ཨོསརནྟེན བཧི ཝཱིཏིནཱམེཏབྦདིཝསེ གཎེཏྭཱ ཏཾཔམཱཎེན གཧེཏབྦཾ, མགྒཾ གཙྪནྟེན ཨེཀཾ དྭེ དནྟཀཊྛཱནི ཐཝིཀཱཡ པཀྑིཔིཏྭཱ གནྟབྦཾ, ཏཏྠེཝ ཝསནྟེན དིཝསེ ཁཱདིཏབྦདནྟཀཊྛཾ གཧེཏབྦནྟི.

དནྟཀཊྛཀཐཱཝཎྞནཱ.

༡༨༤. ‘‘ཨགྒིཾ ¶ ཝཱ དེཏཱི’’ཏིཨཱདཱིསུ ‘‘རུཀྑེ’’ཏི པཀརཎཏོ ལབྦྷཏི ‘‘རུཀྑོ ཝིནསྶཏཱི’’ཏི ཝཀྑམཱནཏྟཱ, རུཀྑོ ཙ ‘‘ཝནཔྤཏི ནཱམ ཡོ མནུསྶཱནཾ པརིགྒཧིཏོ ཧོཏི རུཀྑོ པརིབྷོགོ’’ཏི (པཱརཱ. ༡༡༠) པཱལི༹ཡཾ ཨཱགཏཏྟཱ ཙ ཨཊྛཀཐཱཡ (པཱརཱ. ཨཊྛ. ༡.༡༡༠) ཙ ཝུཏྟནཡེན ཨམྦལབུཛཔནསཱདིཀོ མནུསྶཱནཾ པརིབྷོགཱརཧོ མནུསྶཱཡཏྟོ རཀྑིཏགོཔིཏོཡེཝ གཧེཏབྦོ. ཨགྒིཾ ཝཱ དེཏཱིཏི ཙོརིཀཱཡ ཨགྒིཾ ཨཱལིམྤེཏི ཝཱ. སཏྠེན རུཀྑེ སམནྟཏོ ཨཱཀོཊེཏཱིཏི ཝཱསིཕརསུཨཱདིསཏྠེན རུཀྑཏཙཾ ཚིནྡནྟོ སམནྟཏོ ཨཱཝཱཊཾ དསྶེཏི. མཎྜཱུཀཀཎྚཀནཱམཀཾ ཝིསཾ ཝཱ རུཀྑེ ཨཱཀོཊེཏཱིཏི ཙོརིཀཱཡ རུཀྑཾ ནཱསེཏུཀཱམོ རུཀྑེ མཎྜཱུཀཀཎྚཀནཱམཀཾ ཝིསཾ པཝེསེཏི.

༡༨༥. ཡེན ཝཱ ཏེན ཝཱཏི ཡཐཱཝུཏྟེན ཝཱ ཨཝུཏྟེན ཝཱ ཡེན ཀེནཙི ཨུཔཱཡེན. རུཀྑོ ཝིནསྶཏཱིཏི ཨགྒིཾ དཏྭཱ ཛྷཱཔིཏོ དྷཉྙཀལཱཔོ ཝིཡ, ཏེལཀུམྦྷཱི ཝིཡ ཙ ཝིནཱཝ ཋཱནཱཙཱཝནེན ཡཐཱཊྛིཏམེཝནསྶཏི. ‘‘ཌཡ྄ཧཏཱི’’ཏི ཨིདཾ ‘‘ཨགྒིཾ དེཏཱི’’ཏི ཨིདཾ སནྡྷཱཡ ཝུཏྟཾ. ཝིནསྶཏཱིཏི མཎྜཱུཀཀཎྚཀཱཀོཊནཱདིཨཝསེསཔཡོགཾ སནྡྷཱཡ ཝུཏྟནྟི དཊྛབྦཾ ‘‘ཐེཡྻཙིཏྟོ ཚིནྡཏི, པཧཱརེ པཧཱརེ ཨཱཔཏྟི དུཀྐཊསྶ, ཨེཀཾ པཧཱརཾ ¶ ཨནཱགཏེ ཨཱཔཏྟི ཐུལླཙྩཡསྶ, ཏསྨིཾ པཧཱརེ ཨཱགཏེ ཨཱཔཏྟི པཱརཱཛིཀསྶཱ’’ཏི (པཱརཱ. ༡༡༠) ཋཱནཱཙཱཝནེན པཱརཱཛིཀསྶ ཨཱགཏཏྟཱ. པཀཱསིཏནྟི ཨེཏྠ ‘‘ཨཊྛཀཐཱཡ’’ནྟི ལབྦྷཏི. པཱཋཱགཏཾ པཱརཱཛིཀཾ པན པཱརིསེསཏོ ཙ སཱུཙཱིཡཏཱིཏི ཏབྦཱཙཀསྶ ཝཱ སངྒཱཧཀསྶ ཝཱ ཝཙནསྶ ཨིཧཱཝིཛྫམཱནཏྟཱ ཏཏྠ ཝིནིཙྪཡོ པཱསཾསིཀོཔི ཨིཧཱཝུཏྟོ.

ཝནཔྤཏིཀཐཱཝཎྞནཱ.

༡༨༦-༧. ‘‘ཧརཎཀཾ ནཱམ ཨཉྙསྶ ཧརཎཀཾ བྷཎྜཾ. ཐེཡྻཙིཏྟོ ཨཱམསཏི, ཨཱཔཏྟི དུཀྐཊསྶ. ཕནྡཱཔེཏི, ཨཱཔཏྟི ཐུལླཙྩཡསྶ. ཋཱནཱ ཙཱཝེཏི, ཨཱཔཏྟི པཱརཱཛིཀསྶཱ’’ཏི (པཱརཱ. ༡༡༡) ཝུཏྟཧརཎཀནིདྡེསེ ‘‘ཋཱནཱ ཙཱཝེཏི, ཨཱཔཏྟི པཱརཱཛིཀསྶཱ’’ཏི (པཱརཱ. ༡༡༡) པཱཋེ ‘‘ཋཱན’’ནྟི གཧིཏསཱིསཱདིཊྛཱནཔྤབྷེདཝསེན ཨཊྛཀཐཱཡ (པཱརཱ. ཨཊྛ. ༡.༡༡༠) ཨཱགཏཝིནིཙྪཡཾ དསྶེཏུམཱཧ ‘‘ཚིནྡིཏྭཱ མོཙེཏྭཱ གཎྷཏོ’’ཏི. ཀིརིཡཱནཾ སཀམྨཀཏྟཱ ‘‘ཨལངྐཱར’’ནྟི པཱཋསེསོ. ཚིནྡིཏྭཱཏི གཱིཝེཡྻཀཱདིཾ. མོཙེཏྭཱཏི ཀཎྞཔིལ༹ནྡྷནཱདིཾ.

སཱིསཱདཱིཧི ¶ མོཙིཏམཏྟསྨིནྟི ཨེཏྠཱཔི ཝིསེསིཏབྦདསྶནཏྠཾ ‘‘ཨལངྐཱརསྨི’’ནྟི ཏམེཝ བྷུམྨེཀཝཙནནྟཝསེན གཧེཏབྦཾ. ཨཱཀཌྜྷནཝིཀཌྜྷནནྟི ཨེཏྠ ཨབྷིམུཁཾ ཀཌྜྷནཾ ཨཱཀཌྜྷནནྟི ཀཏྭཱ ཨཏྟནོ སམཱིཔམཱཝིཉྪནཾ ཨཱཀཌྜྷནཾ, ཝིཔརཱིཏཾ ཀཌྜྷནཾ ཝིཀཌྜྷནནྟི ཀཏྭཱ ཏབྦིཔརཱིཏཾ ཝིཀཌྜྷནཾ.

༡༨༨-༩. ཝལཡནྟི ཨཝངྐཾ མཊྛཧཏྠཱུཔགཾ. ཀཊཀམྤི ཝཱཏི ཨནེཀཝངྐེ ཡོཛེཏྭཱ བུབྦུལཱ༹དཱིནི དསྶེཏྭཱ ཝཱ ཨདསྶེཏྭཱ ¶ ཝཱ ཀཏཾ ཧཏྠཱུཔགཾ. ཨགྒབཱཧུནྟི ཀཔྤརཏོ པཊྛཱཡ ཨགྒཧཏྠཾ. ཨཔརཱཔརཾ ཙཱརེཏཱིཏི ཨིཏོ ཙིཏོ ཙ སཉྩཱརེཏི. ‘‘སཱརེཏཱི’’ཏི ཝཱ པཱཋོ, སོཡེཝ ཨཏྠོ. ཏཾ ཝལཡཾ ཝཱ ཀཊཀཾ ཝཱ. ཨཱཀཱསགཏཾ ཀརོཏཱིཏི སབྦདིསཱཧི ཡཐཱ ཧཏྠཾ ན ཕུསཏི, ཏཐཱ ཨཱཀཱསགཏཾ ཀརོཏི. ནིདྷིཝལཡསྶ པཝེསིཏརུཀྑམཱུལེ སབྦདིསཱཧི ཨཕུསནྟཾ ཨཱཀཱསགཏཀརཎེ པཱརཱཛིཀཾ ཧོཏི, ཨིདྷ ‘‘རཀྑཏཱི’’ཏི ཀསྨཱ ཝུཏྟནྟི ཨཱཧ ‘‘སཝིཉྙཱཎཀཏོ’’ཏིཨཱདི. ཨིདནྟི ཝལཡཾ ཀཊཀཉྩ.

༡༩༠. ‘‘ནིཝཏྠཾ ཝཏྠ’’ནྟི ཨིམིནཱ ཙཱིཝརམྤི གཡ྄ཧཏི. པརསྶ ཝཏྠསཱམིཀསྶ. པརོཔཱིཏི ཝཏྠསཱམིཀོཔི. ཏནྟི ཙོརེན ཨཙྪིཛྫམཱནཾ ཨཏྟནཱ ནིཝཏྠཝཏྠཾ. ལཛྫཱཡ སཧསཱ ན མུཉྩཏཱིཏི ལཛྫཱཡ སཱིགྷཏརཾ ན པརིཙྩཛཏི.

༡༩༡. ཙོརོཔི ཨཱཀཌྜྷཏི, སོ པརོཔི ཨཱཀཌྜྷཏཱིཏི ཡོཛནཱ. སོ པརོ ཙོརཏོ ཨཉྙོ, ཝཏྠསཱམིཀོཏི ཨཏྠོ. པརསྶཱཏི ཝཏྠསཱམིཀསྶ.

༡༩༢. ‘‘ཋཱནཱ ཙཱཝེཡྻཱ’’ཏི པཱཋེ ཋཱན-སདྡེན སངྒཧིཏསཱིསཱདིཊྛཱནཏོ ཧརཱིཡཏེཏི ཧརཎཀནྟི ཝུཏྟཱལངྐཱརཱདིབྷཎྜསྶ ཙཱཝནེན པཱརཱཛིཀཾ དསྶེཏྭཱ ཨིདཱནི ཏདེཝ ཧརཎཀཾ ཧཱརཀེན སཧ ཧརནྟསྶ ཧཱརཀསྶ ཋིཏཊྛཱནཏོ ཨཔནཡནེན ཋཱནཱཙཱཝནཉྩ ‘‘ཋཱནཱ ཙཱཝེཡྻཱ’’ཏི ཨིམིནཱཝ སངྒཡ྄ཧཏཱིཏི ཏཏྠཱཔི ཝིནིཙྪཡཾ དསྶེཏུམཱཧ ‘‘སབྷཎྜཧཱརཀ’’ནྟིཨཱདི. བྷཎྜཾ ཧརཏི ནེཏཱིཏི བྷཎྜཧཱརཀོ, པུརིསཱདིཀོ, ཏེན སཧཱཏི སབྷཎྜཧཱརཀཾ, ཨལངྐཱརཝཏྠཱདཱིནི ཨཱདཱཡ གཙྪནྟེཧི ཨིཏྠིཔུརིསཱདིཔཱཎེཧི སཧེཝ. བྷཎྜནྟི ཏེཧི ཧརིཡམཱནཏྟཱ ཧརཎཀསངྑཱཏཝཏྠཱབྷརཎཱདིབྷཎྜཾ ¶ . ནེནྟསྶཱཏི ‘‘ནེནྟོ ཨསྶཱ’’ཏི པདཙྪེདོ. ནེནྟོཏི ཋིཏཊྛཱནཏོ ཙཱཝེཏྭཱ ཨཏྟནཱ ཨིཙྪིཏདིསཱབྷིམུཁཾ པཱཔེནྟོ. ཨསྶ པཋམེ པཱདེ ཨཏིཀྐནྟེ ཐུལླཙྩཡཾ ཨཱཔཛྫིཏྭཱཏི ¶ པཱཋསེསཡོཛནཱ. ཨསྶཱཏི ཨིམསྶ བྷཎྜཧཱརཀསྶ. པཋམཔཱདེ ཨཏིཀྐནྟེ ཨཏྟནཱ པཋམཾ གནྟབྦདིསཏོ ཙོརསྶཱབྷིམཏདིསཾ གཏེ ཐུལླཙྩཡཾ ཨཱཔཛྫིཏྭཱ དུཏིཡེ ཨཏིཀྐནྟེ ཙུཏོ སིཡཱཏི ཡོཛནཱ.

༡༩༣. ཐེཡྻཙེཏནོ སཙེ ཏཛྫེཏྭཱ པརསྶ ཧཏྠཏོ བྷཎྜཾ པཱཏཱཔེཏི, པརསྶ ཧཏྠཏོ བྷཎྜེ མུཏྟམཏྟེ ཏཛྫེཏྭཱ པཱཏཱཔཀསྶ པརཱཛཡོཏི ཡོཛནཱ. བྷཎྜེ མུཏྟམཏྟེཏི བྷཎྜེ ཧཏྠཏོ ཀེསགྒམཏྟམྤི མུཏྟཀྑཎེ.

༡༩༤. ཨཐཱཔཱིཏི ཨཐ ཝཱ. པརིཀཔྤེཏྭཱ པཱཏཱཔེཏི ཝཱཏི ཨེཏྠ ‘‘ཡཾ མཡ྄ཧཾ རུཙྩཏི, ཏཾ གཎྷིསྶཱམཱི’’ཏི ཝཱ ‘‘ཨེཝརཱུཔཾ ཙེ ཧོཏི, གཎྷིསྶཱམཱི’’ཏི ཝིསེསེཏྭཱ ཝཱ པརིཀཔྤེཏྭཱ ཏཛྫེཏྭཱ པཱཏེཏི, དུཀྐཊཾ. ཨེཝཾ པཱཏིཏཾ བྷཎྜཾ ཏསྶ ཙོརསྶ ཨཱམསནེ དུཀྐཊཾ ཝུཏྟནྟི ཡོཛནཱ.

༡༩༥. ཡཐཱཝཏྠུནྟི བྷཎྜསྶ ཨགྒྷཱནུརཱུཔཾ, ཐུལླཙྩཡཾ ཧོཏཱིཏི ཨདྷིཔྤཱཡོ. ཚཌྜིཏེཔཱིཏི ཏསྶ ཙོརབྷཱཝཾ ཛཱནིཏྭཱ བྷཱིཏཏསིཏེན ཨཏྟནཱ ནཱིཡམཱནེ བྷཎྜེ ཚཌྜིཏེཔི སཏི. ཏེནེཝ ཋཱནཱཙཱཝནཾ ཀཱརཱཔིཏནྟི པཱརཱཛིཀནྟི ན གཧེཏབྦནྟི ཨཱཧ ‘‘ན དོསོ’’ཏི. ‘‘ཏིཊྛ ཏིཊྛཱ’’ཏི ཝུཏྟེ པན ཨུཏྟསིཏྭཱ ཚཌྜནཾ ཏསྶ ཨཱཎཏྟིཡཱ ཝིནཱ ཧོཏཱིཏི ཏཏྠ ཏསྶ ཨནཱཔཏྟཱིཏི ཨདྷིཔྤཱཡོ. ཏཐཱ ཝདཏོ པན ཨདིནྣཱདཱནཔུབྦཔཡོགཏྟཱ དུཀྐཊམེཝ.

༡༩༦. ཏནྟི ཏཾ ཚཌྜིཏཾ བྷཎྜཾ. ཏདུདྡྷཱརེཏི ཏསྶ ཚཌྜིཏསྶ བྷཎྜསྶ ཨུདྡྷཱརེ པཱརཱཛིཀཾ. པཱརཱཛིཀཾ ཀདཱ སིཡཱཏི ¶ ཨཱཧ ‘‘སཱམིཀེ སཱལཡེ གཏེ’’ཏི. ནིརཱལཡཾ ཚཌྜིཏཾ པན གཎྷཏོ ཨསཏི ཐེཡྻཙིཏྟེ ན དོསོཏི བྱཏིརེཀཏོ དསྶེཏི.

༡༩༧. སཱམིཀསྶ སཱལཡཀཱལེ གཎྷནྟསྶཱཔི པཱརཱཛིཀཱབྷཱཝཔྤཀཱརཾ དསྶེཏུམཱཧ ‘‘གཎྷཏོ’’ཏི. པུབྦགཱཐཱཡ ‘‘ཏ’’ནྟི ཨིདྷཱནུཝཏྟཏེ. སཀསཉྙཱཡགཎྷཏོཏི ‘‘ཏིཊྛ ཏིཊྛཱ’’ཏི ཝཙནཏོ ཨུཏྟསིཏྭཱ སཱལཡཾ ཚཌྜིཏཾ ཏཾ ཝཏྠུཾ སཀསཉྙཱཡ གཎྷནྟསྶ. གཧཎེཏི སཀསཉྙཱཡ གཧཎཧེཏུ, སཀསཉྙཱཡ གཧིཏབྷཎྜཾ ཨཏྟནོ གཧཎཀཱརཎཱ བྷིཀྑུཾ ཨཝཧཱརཱཔཏྟིཏོ རཀྑཏཱིཏི ཨདྷིཔྤཱཡོ ¶ . ཏེནཱཧ ‘‘གཧཎེ པན རཀྑཏཱི’’ཏི. བྷཎྜདེཡྻཾ པན ཧོཏཱིཏི ཡོཛནཱ. ‘‘ཏཐཱ’’ཏི ཨིམིནཱ གཧཎེ རཀྑཏཱིཏི ཨཏིདིསཏི.

༡༩༨-༩. དྷུརནིཀྑེཔཾ ཀཏྭཱཏི ‘‘མཡ྄ཧཾ ཀིམེཏེན བྷཎྜེན, ཛཱིཝིཏརཀྑནམེཝ ཝརཏར’’ནྟི ནིརཱལཡོ ཧུཏྭཱ. ཏེནཱཧ ‘‘བྷཱིཏོ ཙོརཱ པལཱཡཏཱི’’ཏི. ཙོརཱཏི ཨེཏྠ ཙ ཧེཏུམྷི ནིསྶཀྐཾ. གཎྷཏོཏི ཨེཏྠ ‘‘ཏ’’ནྟི པཱཋསེསོ, ཏཐཱ ཚཌྜིཏཾ ཏཾ བྷཎྜནྟི ཨཏྠོ. ཨུདྡྷཱརེ དུཀྐཊནྟི ཝཏྠུམྷི ཨནཝཛྫེཔི ཐེཡྻཙིཏྟཝསེན དུཀྐཊཾ ཧོཏི, ཨསཏི ཐེཡྻཙིཏྟེ དུཀྐཊམྤི ན ཧོཏཱིཏི ཝུཏྟཾ ཧོཏི. ཨཱཧརཱཔེནྟེཏི ཨེཏྠ བྷཱཝལཀྑཎེ བྷུམྨཾ, ཏསྨིཾ བྷཎྜསཱམིནི ཨཱཧརཱཔེནྟེ སཏཱིཏི ཨཏྠོ.

༢༠༠. ནིརཱལཡེན ཚཌྜིཏཝཏྠུནོ གཧཎེ བྷཎྜདེཡྻཉྩ ཨདེནྟསྶ པརཱཛཡོ ཙ ཀསྨཱཏི ཨཱཧ ‘‘ཏསྶཱ’’ཏིཨཱདི. ཨཉྙཱསཱུཏི མཧཱཔཙྩརིཡཱདཱིསུ ཨིཏརཱསུ ཨཊྛཀཐཱསུ.

ཧརཎཀཀཐཱཝཎྞནཱ.

༢༠༡. ཨུཔནིདྷིཀཐཱཡ ¶ ‘‘ན གཎྷཱམཱི’’ཏི སམྤཛཱནམུསཱཝཱདཾ བྷཱསཏོཏི ཡོཛནཱ. ཡེན ཀེནཙི རཧསི ‘‘ཨིདཾ མཡ྄ཧཾ བྷཎྜཾ པཊིསཱམེཏྭཱ དེཧཱི’’ཏི ནིཡྻཱདིཏཾ བྷཎྜཾ པཙྪཱ སཱམིཀེན ‘‘དེཧི མེ ཏཾ བྷཎྜ’’ནྟི ཝུཏྟེ ཨཙྩནྟམུཔགནྟུཾ ‘‘ནཱཧཾ གཎྷཱམཱི’’ཏི སམྤཛཱནམུསཱཝཱདཾ བྷཱསཏོཏི ཨཏྠོ. གཎྷཱམཱིཏི ཨགྒཧེསིཾ. ཨཙྩནྟཱ ཧེསོ ཨཏཱིཏེ ཝཏྟམཱནཔྤཡོགོཡཾ. ‘‘སམྤཛཱནམུསཱཝཱདེ པཱཙིཏྟིཡ’’ནྟི (པཱཙི. ༢) ཨིམསྶ སིཀྑཱཔདསྶ ཝིསཡེ ཀསྨཱ དུཀྐཊཾ ཝུཏྟནྟི ཨཱཧ ‘‘ཨདིནྣཱདཱནཔུབྦཀཏྟཱ’’ཏིཨཱདི. ཏཏྠ ཨདིནྣཱདཱནཔུབྦཀཏྟཱཏི ཨདིནྣཱདཱནསྶ སཧཔཡོགཝསེན པུབྦངྒམཏྟཱ, ན པུབྦཔཡོགཏྟཱ. ན ཧི ཨདིནྣཱདཱནསྶ པུབྦཔཡོགེ པཱཙིཏྟིཡཊྛཱནེ དུཀྐཊམཏྠཱིཏི. ཏེནེཝཱཧ ཨཊྛཀཐཱཡཾ ‘‘ཨདིནྣཱདཱནསྶ པཡོགཏྟཱ’’ཏི.

༢༠༢. ཨེཏསྶཱཏི ཨེཏསྶ སམཱིཔེ. ཀིཾ ནུ དསྶཏཱིཏི དསྶཏི ཀིཾ ནུ. ཝིམཏུཔྤཱདེཏི ཧེཏུམྷི བྷུམྨཾ. ཏསྶཱཏི ཡསྶ བྷིཀྑུནོ སནྟིཀེ ཨུཔནིཀྑིཏྟཾ, ཏསྶ.

༢༠༣. ཏསྨིནྟི ¶ ཡསྨིཾ ཨུཔནིཀྑིཏྟཾ, ཏསྨིཾ བྷིཀྑུམྷི. དཱནེ ནིརུསྶཱཧེཏི ཨཏྟནི ནིཀྑིཏྟསྶ བྷཎྜསྶ སཱམིཀསྶ དཱནཝིསཡེ ཨུསྶཱཧརཧིཏེ སཏི, ‘‘ན དཱནི ཏཾ དསྶཱམཱི’’ཏི དྷུརནིཀྑེཔེ ཀཏེཏི ཨདྷིཔྤཱཡོ. ཏེནེཝཱཧ ‘‘ཨུབྷིནྣཾ དྷུརནིཀྑེཔེ’’ཏི. པརོཏི བྷཎྜསཱམིཀོ. དྷུརནྟི ‘‘ཡེན ཀེནཙི ཨཱཀཱརེན གཎྷིསྶཱམཱི’’ཏི ཨུསྶཱཧཾ. ནིཀྑིཔེཏི ནིཀྑིཔེཡྻ.

༢༠༤. ཙིཏྟེནཱདཱཏུཀཱམོཝཱཏི ཨེཏྠ ‘‘ཡོ ཏསྶཱ’’ཏི པཱཋསེསོ. ཙེཏི ཨཔི-སདྡཏྠེ. ཡོ ཙོརོ ཙིཏྟེན ཨདཱཏུཀཱམོཝ, ཏསྶ ཙོརསྶ ‘‘དསྶཱམཱི’’ཏི མུཁེན ¶ ཝདཏོཔཱིཏི ཡོཛནཱ. ཨཐ ཝཱ ཨདཱཏུཀཱམོཏི ཨེཏྠ ‘‘ཧུཏྭཱ’’ཏི པཱཋསེསོ. ཙེཏི ཝུཏྟཏྠོ. ཨེཝཱཏི ‘‘པརཱཛཡོ’’ཏི ཨིམིནཱ ཡུཛྫཏི. ཙིཏྟེན ཨདཱཏུཀཱམོ ཧུཏྭཱ མུཁེན ‘‘དསྶཱམཱི’’ཏི ཝདཏོཔི སཱམིནོ དྷུརནིཀྑེཔེ སཏི པརཱཛཡོ ཧོཏེཝཱཏི ཡོཛནཱ.

ཨུཔནིདྷིཀཐཱཝཎྞནཱ.

༢༠༥. སུངྐགྷཱཏསྶཱཏི ‘‘སུངྐགྷཱཏཾ ནཱམ རཉྙཱ ཋཔིཏཾ ཧོཏི པབྦཏཁཎྜེ ཝཱ ནདཱིཏིཏྠེ ཝཱ གཱམདྭཱརེ ཝཱ’’ཏི (པཱརཱ. ༡༡༣) པཱལི༹ཡཾ ཨཱགཏསྶ ‘‘སུངྐཾ ཏཏོ ཧནནྟི…པེ… ཝིནཱསེནྟཱི’’ཏི (པཱརཱ. ཨཊྛ. ༡.༡༡༣) ཨཊྛཀཐཱཡཾ ནིརུཏྟསྶ ‘‘ཨིཏོ པཊྛཱཡ ནཱིཡམཱནེ བྷཎྜེ ཨེཏྟཀཏོ ཨེཏྟཀཾ རཱཛབྷཱགཾ གཧེཏབྦ’’ནྟི རཱཛཱདཱིཧི ཏཾཏཾཔདེསསཱམིཀེཧི ནིཡམིཏསྶ པབྦཏཁཎྜཱདིཊྛཱནསྶ. བཧཱིཏི སུངྐགཧཎཏྠཱཡ པརིཀཔྤིཏསཱིམཏོ བཧི. པཱཏེཏཱིཏི ཨེཏྠ ‘‘ཐེཡྻཙིཏྟོ’’ཏི པཀརཎཏོ ལབྦྷཏི. ‘‘རཱཛཱརཧཾ བྷཎྜ’’ནྟི པཱཋསེསོ. ཡཏོ ཀུཏོཙི བྷཎྜཏོ པཉྩམཱསཀཾ ཝཱ ཨཏིརེཀཔཉྩམཱསཀཾ ཝཱ ཨགྒྷནཀོ བྷཱགོ རཱཛཱདིདེསསཱམིཀསྶ དཱཏབྦོ ཧོཏི, ཏཱདིསཾ བྷཎྜཾ ཐེཡྻཙིཏྟོ ཡཐཱ བཧི པཏཏི, ཨེཝཾ ཁིཔཏཱིཏི ཨཏྠོ. དྷུཝཾ པཏཏཱིཏི ཨེཏྠཱཔི ‘‘ཏ’’ནྟི པཱཋསེསོ, ‘‘བྷཎྜ’’ནྟི པཀརཎཏོ ལབྦྷཏི. ཡཐཱ ཁིཏྟཾ ཏཾ བྷཎྜཾ ཨེཀནྟེན བཧི པཏཏཱིཏི. ཧཏྠཏོ མུཏྟམཏྟེ ཏསྨིཾ བྷཎྜེ.

༢༠༦. ‘‘དྷུཝཾ པཏཏཱི’’ཏི ཨེཏྠ བྱཏིརེཀཾ དསྶེཏུམཱཧ ‘‘ཏཾ རུཀྑེ’’ཏིཨཱདི. ཏནྟི ཐེཡྻཱཡ བཧི པཱཏེཏུཾ ཁིཏྟཾ བྷཎྜཾ པཊིཧཏཾ ཧུཏྭཱཏི ཡོཛནཱ. ཝཱཏཀྑིཏྟམྤི ཝཱཏི པཱཋོ ¶ གཧེཏབྦོ. ‘‘ཝཱཏཀྑིཏྟོ’’ཏི ལིངྒཝིཔལླཱསོ ཝཱ དཊྛབྦོ.

༢༠༧. པཙྪཱཏི ¶ པཏིཏཊྛཱནེ ཐོཀཾ ཙིརཱཡིཏྭཱ, ཨིམིནཱ ཐོཀམྤི ཙིརཱཡིཏམཏྟེ པཡོགསཱདྷིཡཾ ཀཱརིཡཾ སིདྡྷམེཝཱཏི པཱརཱཛིཀསྶ ཀཱརཎཾ སམྤནྣམེཝཱཏི དསྶེཏི. ཏེནཱཧ ‘‘པཱརཱཛིཀཾ སིཡཱ’’ཏི.

༢༠༨. ‘‘ཋཏྭཱ’’ཏིཨཱདིནཱ པཏིཏཊྛཱནེ ཨཙིརཱཡིཏྭཱ གཏེཔི ཏསྨིཾ བཧི པཏིཏཊྛཱནཏོ ཨིཏརཏྲཱཔི ཙིརཱཡིཏེན བཧི པཱཏནཔྤཡོགེན སཱདྷིཡཾ ཀཱརིཡཾ སིདྡྷམེཝཱཏི པཱརཱཛིཀཀཱརཎསྶ སིདྡྷཏཾ དསྶེཏི. ཏེནེཝཱཧ ‘‘པརཱཛཡོ’’ཏི. ‘‘ཨཏིཊྛམཱན’’ནྟིཨཱདིནཱ ཡཏྠ ཀཏྠཙི ཨཙིརཱཡནེན པཡོགསྶ ནིརཏྠཀཏཾ དསྶེཏི. ཏེནེཝཱཧ ‘‘རཀྑཏཱི’’ཏི.

༢༠༩. ཏནྟི ཨཊྛཀཐཱཝཙནཾ.

༢༡༠. སཡཾ ཝཱ ཝཊྚེཏཱིཏི ཨནྟོ ཋིཏོ སཡཾ ཝཱ ཧཏྠེན ཝཱ པཱདེན ཝཱ ཡཊྛིཡཱ ཝཱ བཧིསཱིམཱཡ ནིནྣཊྛཱནཾ པརིཝཊྚེཏི. ཨཊྛཏྭཱཏི པཝཊྚིཏམཏྟེ ཨནྟོ ཀཏྠཙིཔི ཨཊྛཏྭཱ. ཝཊྚམཱནནྟི པཝཊྚནྟཾ. གཏནྟི བཧིསཱིམཾ ཀེསགྒམཏྟཊྛཱནམྤི ཨནྟོསཱིམམཏིཀྐམམཏྟཾ.

༢༡༡. ཏཾ བྷཎྜཾ སཙེ ཨནྟོ ཋཏྭཱ ཋཏྭཱ བཧི གཙྪཏཱིཏི ཡོཛནཱ. ཡདི ཨནྟོསཱིམཱཡ ཋཏྭཱ ཋཏྭཱ བཧིསཱིམཾ གཙྪཏཱིཏི ཨཏྠོ. རཀྑཏཱིཏི ཨནྟོསཱིམཱཡ པཋམགཏིནིཝཏྟནེནེཝ ཨེཏསྶ བྷིཀྑུནོ པཡོགཝེགསྶ ནིཝཏྟཏྟཱ, ཏཏོ ཨུཔརི ནིཝཏྟནཱརཧཀཱརཎསྶ ཨལདྡྷབྷཱཝེན ཨཏྟནཱ ཙ གཏཏྟཱ ཏཐཱ བཧིསཱིམཔྤཏྟཾ ཏཾ བྷཎྜཾ ཏཾམཱུལཀཔཡོཛཀཾ ¶ བྷིཀྑུཾ ཨཱཔཏྟིཡཱ རཀྑཏཱིཏི ཨདྷིཔྤཱཡོ. སུདྡྷཙིཏྟེན ཋཔིཏེཏི ‘‘ཨེཝཾ ཋཔིཏེ ཝཊྚིཏྭཱ གམིསྶཏཱི’’ཏི ཐེཡྻཙིཏྟེན ཝིནཱ ‘‘ཀེཝལཾ ཋཔེསྶཱམཱི’’ཏི ཙིཏྟེན བཧིསཱིམཱབྷིམུཁཾ ནིནྣཊྛཱནཾ ཨོཏཱརེཏྭཱ ཋཔིཏེ. སཡཾ ཝཊྚཏཱིཏི བྷཎྜཾ སཡམེཝ ནིནྣཊྛཱནཾ ནིནྣཾ ཧུཏྭཱ བཧིསཱིམཾ ཙེ པཝཊྚནྟཾ གཙྪཏི. ཝཊྚཏཱིཏི ཨཱཔཏྟིཡཱ ཨཀརཎཏོ ཝཊྚཏི.

༢༡༢. གཙྪནྟེཏི ཙོརསྶ པཡོགཾ ཝིནཱ ཨཏྟནཱཝ གཙྪནྟེ. ཏནྟི རཱཛདེཡྻཔཉྩམཱསཀཨཏིརེཀཔཉྩམཱསཀམཏྟཾ སུངྐཝནྟཾ བྷཎྜཾ. ནཱིཧཊེཔི ནཱཝཧཱརོཏི ཡོཛནཱ. ཀེཝལཾ ཐེཡྻཙིཏྟསྶ ཨཱཔཏྟིཡཱ ཨནངྒབྷཱཝཏོ, ཡཱནཱདིཔཡོཛཀཀཱཡཝཙཱིཔཡོགསྶ ཨབྷཱཝཏོ, བྷཎྜཊྛཔིཏཡཱནཱདིནོ ¶ ཨཏྟནཱཝ བཧིསཱིམཔྤཏྟཏྟཱ, ཏེནེཝ བྷཎྜསྶཱཔི གཏཏྟཱ ཙ བྷིཀྑུནོ ཨཝཧཱརོ ནཏྠཱིཏི ཨཏྠོ.

༢༡༣. པཡོགེན ཝིནཱཏི ཙོརསྶ སཀཔཡོགམནྟརེན. ཨཝཧཱརོ ན ཝིཛྫཏཱིཏི ཨེཏྠ ཡུཏྟི ཝུཏྟནཡཱཝ.

༢༡༤. མཎིནྟི པཱདཱརཧཾ སུངྐདཱཏབྦམཎིརཏནཾ, ཨེཏེནེཝ ཨུཔལཀྑཎཔདཏྟཱ ཡཾཀིཉྩི བྷཎྜཾ སངྒཧིཏམེཝ. པཱརཱཛིཀཾ སིཡཱཏི ཡཱནསྶ ཨཏྟནཱ པཱཛིཏཏྟཱཏི ཨདྷིཔྤཱཡོ. སཱིམཱཏིཀྐམནེཏི སུངྐགྒཧཎསྶ ནིཡམིཏཊྛཱནཱཏིཀྐམནེ.

༢༡༥. མཏནྟི ‘‘ཨེཏྟཀབྷཎྜཏོ ཨེཏྟཀཾ གཧེཏབྦ’’ནྟི རཱཛཱུཧི ཨནུམཏཾ. སེསོ ཀཐཱམགྒོཏི ‘‘སུངྐཊྛཱནཾ པཏྭཱ སུངྐིཀེསུ ནིདྡཱཡམཱནེསུ, ཀཱིལ༹ནྟེསུ, བཧིགཏེསུ ཝཱ པརིཡེསིཏྭཱ ཨདིསྭཱ གཙྪཏོ ན དོསོ, བྷཎྜདེཡྻཾ ¶ ཧོཏཱི’’ཏི ཨེཝམཱདིཀོ ཝིནིཙྪཡཀཐཱམགྒོ. ཨརཉྙཊྛཀཐཱསམོཏི ‘‘ཡོ ཙཱརཀྑཊྛཱནཾ པཏྭཱ’’ཏིཨཱདིནཱ (ཝི. ཝི. ༡༧༠) ཡཐཱཝུཏྟཨརཉྙཊྛཀཐཱཡ སདིསོ,

‘‘ཀམྨཊྛཱནཾ ཙིཏྟེ ཀཏྭཱ;

ཙིནྟེནྟོ ཨཉྙཝིཧིཏོ;

སུངྐཊྛཱནཾ པཏྭཱ གཙྪེ;

བྷཎྜདེཡྻཾ ཧོཏེཝསྶཱ’’ཏི. –

ཨཱདིནཱ ནཡེན ཝུཙྩམཱནསདིསོཡེཝ. ཏེནེཝ གཏཏྠཏཱཡ ཨིདཱནི ན ཝིཙཱརཱིཡཏཱིཏི ཨདྷིཔྤཱཡོ.

སུངྐགྷཱཏཀཐཱཝཎྞནཱ.

༢༡༦. ‘‘པཱཎོ ¶ ནཱམ མནུསྶཔཱཎོ ཝུཙྩཏཱི’’ཏི (པཱརཱ. ༡༡༤) པཱལི༹ཏོ ཙ ‘‘ཏམྤི བྷུཛིསྶཾ ཧརནྟསྶ ཨཝཧཱརོ ནཏྠཱི’’ཏི (པཱརཱ. ཨཊྛ. ༡.༡༡༤) ཨཊྛཀཐཱཝཙནཏོ ཙ པརདཱསམནུསྶོཡེཝ ཨདྷིཔྤེཏོཏི ཏམེཝ དསྶེཏུམཱཧ ‘‘ཨནྟོཛཱཏ’’ནྟིཨཱདི. གེཧདཱསིཡཱ ཀུཙྪིམྷི དཱསསྶ ཛཱཏོ ཨནྟོཛཱཏོ ནཱམ, ཏཾ ཝཱ. དྷནེན ཀཱིཏོ དྷནཀྐཱིཏོ, ཏཾ ཝཱ. དིནྣཾ ཝཱ པན ཀེནཙཱིཏི མཱཏུལཨཡྻཀཱདཱིསུ ཡེན ཀེནཙི དཱསཾ ཀཏྭཱ དིནྣཾ ཝཱ. དཱསནྟི པཙྩེཀཾ སམྦནྡྷནཱིཡཾ. ཀརམརཱནཱིཏཾ ཝཱ དཱསནྟི པརཝིསཡཾ ཝིལུམྤིཏྭཱ ཨཱནེཏྭཱ དཱསབྷཱཝཱཡ གཧིཏསངྑཱཏཾ ཀརམརཱནཱིཏདཱསཾ ཝཱ. ཧརནྟསྶ པརཱཛཡོཏི ཨེཏྠ ‘‘ཙོརིཀཱཡ ཧརིསྶཱམཱི’’ཏི ཨཱམསནེ དུཀྐཊཾ, ཕནྡཱཔནེ ཐུལླཙྩཡཾ ཨཱཔཛྫིཏྭཱ ཋིཏཊྛཱནཏོ ཀེསགྒམཏྟམྤི ཨཏིཀྐཱམཡཏོ པཱརཱཛིཀཾ ཧོཏཱིཏི ཨདྷིཔྤཱཡོ.

༢༡༧. བྷུཛིསྶཾ ཝཱཏི ཡསྶ ཀསྶཙི མནུསྶསྶ ཨདཱསབྷཱུཏཾ. མཱནུསནྟི མནུསྶཛཱཏིཀཾ སཏྟཾ. ཨཱཋཔིཏནྟི ཨུཔནིཀྑིཏྟཾ.

༢༡༨. ཏནྟི ¶ ཨནྟོཛཱཏཱདཱིསུ དཱསེསུ ཡཾ ཀཉྩི དཱསཾ. པལཱཡིཏུཀཱམོཝཱཏི པལཱཔེཏུཀཱམོ ནཱིཧརིཏུཀཱམོ. ཨཐ ཝཱ ཏཾ དཱསཾ བྷུཛེཧི ཨུཀྑིཔིཏྭཱ ཨཡཾ པལཱཡིཏུཀཱམོཏིཔི ཨཏྠོ གཧེཏབྦོ. བྷུཛེཧཱིཏི ཨུབྷོཧི ཧཏྠེཧི. ཏཾ ཋིཏཊྛཱནཏོཏི ཏསྶ ཋིཏཊྛཱནཾ ཏཾཋིཏཊྛཱནཾ, ཏཏོ ཏཾཋིཏཊྛཱནཏོ, ཙོརེན ཨཏྟནཱ ཋིཏཊྛཱནཏོཏི ཨཏྠོ ན གཧེཏབྦོཏི དསྶེཏུམེཝཾ ཝུཏྟཾ. ཀིཉྩི སངྐཱམེཏཱིཏི ཀེསགྒམཏྟམྤི ཏཏོ ཨཉྙཾ ཋཱནཾ པཱཔེཏི. བྷུཛེཧི ཝཱཏི ཨེཏྠ ཝཱ-སདྡོ ཝཀྑམཱནཔཀཱརནྟརཱཔེཀྑོ, ‘‘སངྐཱམེཏི ཝཱ’’ཏི ཡོཛེཏབྦཾ.

༢༡༩. ཏཛྫེཏྭཱཏི བྷཡཀརེན ཝཙནེན ལེསེན, ཨིངྒིཏེན ཝཱ ཏཱསེཏྭཱ ནེནྟསྶ ཏསྶཱཏི སམྦནྡྷོ. པདཝཱརཏོཏི པདཝཱརེན ཡུཏྟཱ ཐུལླཙྩཡཱདཡོ ཨཱཔཏྟིཡོ ཧོནྟཱིཏི ཡོཛནཱ. པཋམཔདཝཱརཡུཏྟཱ ཐུལླཙྩཡཱཔཏྟི, དུཏིཡཔདཝཱརཡུཏྟཱ པཱརཱཛིཀཱཔཏྟི ཧོཏཱིཏི ཨཏྠོ.

༢༢༠. ཧཏྠཱདཱིསཱུཏི ཨཱདི-སདྡེན ཀེསཝཏྠཱདིཾ སངྒཎྷཱཏི. ཏནྟི དཱསཾ. ཀཌྜྷཏོཔཱིཏི ཨཱཀཌྜྷཏོཔི. པརཱཛཡོཏི ‘‘པདཝཱརཏོ’’ཏི ཨནུཝཏྟམཱནཏྟཱ པཋམཔདཝཱརེ ཐུལླཙྩཡཾ, དུཏིཡཔདཝཱརེ ཨཏིཀྐནྟེ པཱརཱཛིཀནྟི ཨཏྠོ. ཨཡཾ ནཡོཏི ‘‘པདཝཱརཏོ ཡུཏྟཱ ཐུལླཙྩཡཱདཡོ ཨཱཔཏྟིཡོ ཧོནྟཱི’’ཏི ཝུཏྟནཡོ.

༢༢༡. ཝེགསཱཝཱཏི ¶ ཝེགེནེཝ, ཙོརསྶ ཝཙནེན ཀཱཏབྦཝིསེསརཧིཏེན བལཝགམནཝེགེནཱཏི ཝུཏྟཾ ཧོཏི. ཨིམིནཱ ཨནཱཔཏྟིབྷཱཝསྶ ཀཱརཎཾ དསྶེཏི.

༢༢༢. སཎིཀནྟི ¶ མནྡགཏིཡཱ. ཝདཏཱིཏི ‘‘གཙྪ, ཡཱཧི, པལཱཡཱ’’ཏིཨཱདིཀཾ ཝཙནཾ ཀཐེཏི. སོཔི ཙཱཏི ཡོ མནྡགཏིཡཱ གཙྪནྟོ ཨེཝཾ ཝུཏྟོ, སོཔི ཙ.

༢༢༣. པལཱཡིཏྭཱཏི སཱམིཀཾ པཧཱཡ གནྟྭཱ. ཨཉྙནྟི སཱམིཀཱཡཏྟཊྛཱནཏོ ཨཉྙཾ ཋཱནཾ. སཱཔཎཾ ཝཱིཐིསནྣིཝེསཡུཏྟཾ ནིགམམྤི ཝཱ. ཏཏོཏི པལཱཡིཏྭཱ པཝིཊྛགཱམཱདིཏོ. ཏནྟི པལཱཡིཏྭཱ པཝིཊྛཾ ཏཾ དཱསཾ.

པཱཎཀཐཱཝཎྞནཱ.

༢༢༤. ཐེཡྻཱཏི ཐེཡྻཙིཏྟེན. སཔྤཀརཎྜནྟི སཔྤསཡནཔེལ༹ཾ. ཡཐཱཝཏྠུནྟི ཐུལླཙྩཡམཱཧ. ཋཱནཏོཏི སཔྤཔེལཱ༹ཡ ཋིཏཊྛཱནཏོ. ཙཱཝནེཏི ཀེསགྒམཏྟཱཏིཀྐམེ.

༢༢༥. ཀརཎྜནྟི སཔྤཔེལ༹ཾ. ཨུགྒྷཱཊེཏྭཱཏི ཝིཝརིཏྭཱ. ཀརཎྜཏལཏོཏི ཨནྟོཔེལཱ༹ཡ ཏལཏོ. ནངྒུཊྛེཏི ནངྒུཊྛཔརིཡནྟེ.

༢༢༦. གྷཾསིཏྭཱཏི པེལཱ༹པསྶེ ཕུསཱཔེཏྭཱ. སཔྤཀརཎྜསྶ མུཁཝཊྚིཏོཏི ཀརཎྜཔུཊམུཁཝཊྚིཏོ. ཏསྶ ནངྒུཊྛེ མུཏྟམཏྟེཏི ཡོཛནཱ.

༢༢༧. ནཱམཏོཏི ནཱམེན, ནཱམཾ ཝཏྭཱཏི ཝུཏྟཾ ཧོཏི. པཀྐོསནྟསྶཱཏི ཨཝ྄ཧཱཡནྟསྶ. ཏསྶཱཏི པཀྐོསཀསྶ.

༢༢༨. ཏཐཱཏི ཀརཎྜཾ ཝིཝརིཏྭཱ. མཎྜཱུཀམཱུསིཀཱནཾ རཝཾ ཀཏྭཱ ནཱམེན པཀྐོསནྟསྶཱཏི ཡོཛནཱ. ཝཱ-སདྡེན ལཱཛཱཝིཀིརཎཨཙྪརཔཧཱརཱདིཀཾ སངྒཎྷཱཏི.

༢༢༩. མུཁནྟི ¶ སཔྤཀརཎྜསྶ མུཁཾ. ཨེཝམེཝ ཙ ཀརོནྟསྶཱཏི མཎྜཱུཀསཉྙཾ, མཱུསིཀསཉྙཾ ཀཏྭཱ ཝཱ ལཱཛཱ ཝིཀིརིཏྭཱ ¶ ཝཱ ཨཙྪརཾ པཧརིཏྭཱ ཝཱ ནཱམཾ ཝཏྭཱ པཀྐོསནྟསྶ. ཡེན ཀེནཙཱིཏི ཝུཏྟནཱིཧཱརཏོ ཡེན ཝཱ ཏེན ཝཱ.

༢༣༠. ན པཀྐོསཏི ཙེཏི ཡཐཱཝུཏྟནཡེན ཡོཛེཏྭཱ ནཱམཾ ཝཏྭཱ ན པཀྐོསཏི. ཏསྶཱཏི ཀརཎྜམུཁཝིཝརཀསྶ བྷིཀྑུསྶ.

ཨཔདཀཐཱཝཎྞནཱ.

༢༣༡. ཧཏྠིནྟི ཧཏྠིམྷི, བྷུམྨཏྠེ ཨེཝ ཨུཔཡོགཝཙནཾ.

༢༣༢. སཱལཱཡནྟི ཧཏྠིསཱལཱཡཾ. ཝསཏི ཨེཏྠཱཏི ཝཏྠུ, རཱཛཱགཱརཾ, ཏསྶ ཨནྟོ ཨནྟོཝཏྠུ, ཨནྟོརཱཛགེཧནྟི ཨཏྠོ. ཨངྒཎེཏི ཨནྟོརཱཛངྒཎེ. པི-སདྡོ ‘‘ཨནྟོནགརེ’’ཏི ཨཝུཏྟམྤི སམྤིཎྜེཏི. ཝཏྠུ ཙཱཏི ཙ-སདྡེན ཨངྒཎཾ སམུཙྩིནོཏི. སཀལཾ ཨངྒཎཾ ཋཱནནྟི ཧཏྠིནོ ཝིཙརཎཡོགྒཾ ཨངྒཎཊྛཱནཾ སནྡྷཱཡཱཧ, སཀལསཱལཱཏི གཧེཏབྦཾ.

༢༣༣. ཨབདྡྷསྶཱཏི ཡཐཱཝུཏྟསཱལཱརཱཛཝཏྠངྒཎཱཔེཀྑཱཡ ཝུཏྟཾ. ཨབདྡྷསྶ ཧི ཧཏྠིནོ སཀལསཱལཱདཡོ ཋཱནཾ, ཏདཏིཀྐམེ ཋཱནཱཙཱཝནཾ ཧོཏཱིཏི ཨཏྠོ. ཧཱིཏི ཨཝདྷཱརཎེ ཝཱ. ‘‘བདྡྷསྶ ཧཱི’’ཏི ཡོཛནཱཡ ཝིསེསཏྠོཝ དཊྛབྦོ, བདྡྷསྶ པནཱཏི ཝུཏྟཾ ཧོཏི. བདྡྷསྶ པནཱཏི སཱལཱདཱིསུ སནྣིཧིཏསྶ པན. ཋིཏཊྛཱནཉྩཱཏི སཱལཱདཱིསུ ཋིཏཊྛཱནཉྩ, ཙཏཱུཧི པཱདེཧི ཨཀྐནྟཊྛཱནནྟི ཝུཏྟཾ ཧོཏི. བནྡྷནཉྩཱཏི གཱིཝཱཡ ཝཱ པཙྪཱ པཱདདྭཡབནྡྷནཝལཡེ ཝཱ ཨུབྷཡཏྠ ཝཱ བནྡྷནཊྛཱནཉྩ. ཏསྨཱཏི ཡསྨཱ ཋིཏཊྛཱནཉྩ བནྡྷནཉྩ ཋཱནནྟི ཚ ཝཱ པཉྩ ཝཱ ཋཱནཱནི ལབྦྷནྟི, ཏསྨཱ. ཏེསཾ ཋཱནཱནཾ. ཀཱརཡེཏི ཨེཏྠ ‘‘ཨཱཔཏྟི’’ནྟི སཱམཏྠིཡཱ ལབྦྷཏཱིཏི. ཧརཏོཏི ཧཏྠིསཱལཱདིཏོ ཙོརིཀཱཡ ཧརནྟསྶ ¶ . ཀཱརཡེཏི ཨཱམསནེ དུཀྐཊཾ, ཋཱནབྷེདགཎནཱཡ ཡཱཝ པཙྪིམཊྛཱནཱ པུརིམེསུ ཐུལླཙྩཡཱནི, ཨནྟིམཊྛཱནཱ ཀེསགྒམཏྟམྤི ཙཱཝནེ པཱརཱཛིཀཾ ཀཱརེཡྻཱཏི ཨཏྠོ.

༢༣༤. ཋིཏཊྛཱནནྟི ¶ ཙཏཱུཧི པཱདེཧི ཨཀྐནྟཊྛཱནཾ, ཨིདཉྩ ཨབདྡྷཧཏྠིཾ སནྡྷཱཡ ཝུཏྟཾ. བདྡྷསྶ ཝིནིཙྪཡོ སཱལཱདཱིསུ བདྡྷསྶ ཝུཏྟཝིནིཙྪཡསདིསོཏི གཏཏྠཏཱཡ ན ཝུཏྟོ.

༢༣༥. ཨེཀཾ ཋཱནནྟི སཡིཏཊྛཱནམཏྟཾ. ཏསྨིནྟི གཛེ. ཏསྶཱཏི བྷིཀྑུསྶ. ཏུརངྒམཧིསཱདཱིསུ དྭིཔདེ ཙ བཧུཔྤདེ ཙ.

༢༣༦. ཨེསེཝ ནཡོ ཉེཡྻོ, ཝཏྟབྦཾ ཀིཉྩིཔི ནཏྠཱིཏི ཡོཛནཱ. ཏཏྠ ཏུརངྒཱ ཨསྶཱ. མཧིསཱ ལུལཱཡཱ. ཨཱདི-སདྡེན གོགདྲབྷཨོཊྛཱདིཙཏུཔྤདཱནཾ སངྒཧོ. ནཏྠི ཀིཉྩིཔི ཝཏྟབྦནྟི ཨསྶསཱལཱརཱཛཱགཱརངྒཎབཧིནགརཱདཱིསུ ཨབནྡྷིཏསཡནཨསྶཱདཱིནཾ ཋཱནབྷེདོ ཡཐཱཝུཏྟསདིསཏྟཱ ན ཝུཏྟོ.

བནྡྷིཏྭཱ ཋཔིཏཨསྶསྶ པན སཙེ སོ ཙཏཱུསུ པཱདེསུ བདྡྷོ ཧོཏི, བནྡྷནཱནཾ, ཁུརཱནཉྩ གཎནཱཡ ཨཊྛ ཋཱནཱནི, སཙེ མུཁེ ཙ བདྡྷོ ཧོཏི, ནཝ ཋཱནཱནི, མུཁེཡེཝ བདྡྷོ, པཉྩ ཋཱནཱནཱིཏི ཋཱནབྷེདོ ཙ ཏཐེཝ སསམིགསཱུཀརཱདིཙཏུཔྤདེསུ བནྡྷིཏྭཱ ཋཔིཏེསུ བདྡྷབདྡྷཊྛཱནེཧི སཧ ཙཏཱུཧི པཱདེཧི ཨཀྐནྟཊྛཱནཝསེན ལབྦྷམཱནོ ཋཱནབྷེདོ ཙ གོམཧིསེསུ བདྡྷེསུ ཨེཝམེཝ ལབྦྷམཱནོ ཋཱནབྷེདོ ཙ ཝཛཱདཱིསུ པདེསེསུ པཝེསིཏེསུ དྭཱརེསུ རུཀྑསཱུཙིཡོ ཨཔནེཏྭཱ ཝཱ ཨནཔནེཏྭཱ ཝཱ ནཱམཾ ཝཏྭཱ ཝཱ ཨཝཏྭཱ ཝཱ པཀྐོསནྟསྶ, སཱཁཱབྷངྒཏིཎཱདཱིནི དསྶེཏྭཱ པཀྐོསིཏྭཱ ཝཱ ཨཔཀྐོསིཏྭཱ ཝཱ པལོབྷེནྟསྶ ཏཱསེཏྭཱ ནིཀྑམནྟསྶ ¶ སཔྤཀརཎྜཀེ སཔྤསྶ ཝུཏྟནཡེན ལབྦྷམཱནོ ཝིསེསོ ཙ ནེཏབྦོ. ཨིཧ སབྦཏྠ ཋཱནབྷེདེསུ བཧུཀེསུཔི ཨུཔནྟཊྛཱནེསུ ཐུལླཙྩཡཾ, ཨནྟཊྛཱནེ པཱརཱཛིཀཾ ཝུཏྟསདིསནྟི ཨིམསྶ སབྦསྶ ཝིནིཙྪཡསྶ ‘‘ཨེསེཝ ནཡོ’’ཏི ཨིམིནཱཝ གཏཏྟཱ, ཨཱཧཊཏོ ཨཝིཉྙཱཡམཱནསྶ ཀསྶཙི ཝིསེསསྶཱབྷཱཝཱ ཙ ཝུཏྟཾ ‘‘ནཏྠི ཀིཉྩིཔི ཝཏྟབྦ’’ནྟི.

དྭིཔདེཔཱིཏི ‘‘དྭིཔདཾ ནཱམ མནུསྶཱ པཀྑཛཱཏཱ’’ཏི (པཱརཱ. ༡༡༥) པཱལི༹ཡཾ ཝུཏྟཱ མནུསྶཱ ཙ མཡཱུརཱདིལོམཔཀྑཱ ཙ ཝགྒུལིཨཱདིཙམྨཔཀྑཱ ཙ བྷམརཱདིཨཊྛིཔཀྑཱ ཙཱཏི ཨེཝམཱདིཀེ སཏྟེ ཙ. བཧུཔྤདེཏི ‘‘བཧུཔྤདཾ ནཱམ ཝིཙྪིཀཱ སཏཔདཱི ཨུཙྩཱལིངྒཔཱཎཀཱ’’ཏི (པཱརཱ. ༡༡༧) པཱལི༹ཡཾ ཝུཏྟབཧུཔྤདསཏྟེ ཙཱཏི ཨཏྠོ.

ཨེཏྟཱཝཏཱ ¶ པཱཔབྷིཀྑཱུནཾ ལེསོཀཱསཔིདཧནཏྠཾ པདབྷཱཛནེ ཝུཏྟབྷཱུམཊྛཱདིཏིཾསཝིནིཙྪཡམཱཏིཀཱཀཐཱསུ པཉྩཝཱིསཏི མཱཏིཀཱཀཐཱ དསྶེཏྭཱ ཨཝསིཊྛཱསུ པཉྩམཱཏིཀཱཀཐཱསུ སཾཝིདཱཝཧཱརོ, སངྐེཏཀམྨཾ, ནིམིཏྟཀམྨནྟི མཱཏིཀཏྟཡཀཐཱ པཋམམེཝ ཨདིནྣཱདཱནཝིནིཙྪཡསམྦྷཱརབྷཱུཏཱནཾ པཉྩཝཱིསཏིཡཱ ཨཝཧཱརཱནཾ དསྶནཊྛཱནེ ཋཏྭཱ –

‘‘པུབྦསཧཔཡོགོ ཙ, སཾཝིདཱཧརཎམྤི ཙ;

སངྐེཏཀམྨཾ ནེམིཏྟཾ, པུབྦཡོགཱདིཔཉྩཀ’’ནྟི. (ཝི. ཝི. ༤༢) –

ཨིམིནཱ སངྒཧིཏཱཏི ཏཾ པཧཱཡ ཨཝསེསེ ཨོཙརཀོ, ཨོཎིརཀྑཀོཏི ཀཐཱདྭཡེ ཨོཙརཎཀཀཐཱཡ ཨཱཎཏྟིཀཔྤཡོགཏྟཱ, ཏཉྩ ཨོཎིརཀྑཀེན ཀརིཡམཱནཾ ཋཱནཱཙཱཝནཾ སཱཧཏྠིཀེན ཝཱ ཨཱཎཏྟིཀེན ཝཱ པཡོགེན ཧོཏཱིཏི ཏསྶཱཔི ‘‘སཱཧཏྠཱཎཏྟིཀོ ཙེཝཱ’’ཏི སཱཧཏྠིཀཔཉྩཀེ པཋམམེཝ སངྒཧིཏཏྟཱ ཙ ཐལཊྛཝེཧཱསཊྛཀཐཱདཱིསུ ¶ སངྒཧིཏཏྟཱ ཙ ཏཉྩ དྭཡཾ ན ཝུཏྟནྟི ཝེདིཏབྦཾ.

ཏཏྠ ‘‘ཨོཙརཀོ ནཱམ བྷཎྜཾ ཨོཙརིཏྭཱ ཨཱཙིཀྑཏཱི’’ཏི (པཱརཱ. ༡༡༨) པཱལི༹ཡཾ ཝུཏྟོ ཙོརཱཔནཔུརིསོ ‘‘ཨོཙརཀོ’’ཏི ཝེདིཏབྦོ. ཨོཙརཏཱིཏི ཨོཙརཀོ, ཏཏྠ ཏཏྠ གནྟྭཱ ཨནྟོ ཨནུཔཝིསཏཱིཏི ཝུཏྟཾ ཧོཏཱིཏི. ‘‘ཨོཎིརཀྑོ ནཱམ ཨཱཧཊཾ བྷཎྜཾ གོཔེནྟོ’’ཏི (པཱརཱ. ༡༡༨) པཱལི༹ཡཾ ཝུཏྟོ མུཧུཏྟཾ ཨཏྟནི ཋཔིཏསྶ པརབྷཎྜསྶ རཀྑཀོ ‘‘ཨོཎིརཀྑོ’’ཏི ཝེདིཏབྦོ. ཨོཎིཏཾ རཀྑཏཱིཏི ཨོཎིརཀྑོ, ཡོ པརེན ཨཏྟནོ ཝསནཊྛཱནེ ཨཱབྷཏཾ བྷཎྜཾ ‘‘ཨིདཾ ཏཱཝ བྷནྟེ མུཧུཏྟཾ ཨོལོཀེཐ, ཡཱཝཱཧཾ ཨིདཾ ནཱམ ཀིཙྩཾ ཀཏྭཱ ཨཱགཙྪཱམཱི’’ཏི ཝུཏྟོ རཀྑཏི, ཏསྶེཏཾ ཨདྷིཝཙནཾ.

དྭིཙཏུབཧུཔྤདཀཐཱཝཎྞནཱ.

༢༣༧. ‘‘པཉྩཧི ཨཱཀཱརེཧི ཨདིནྣཾ ཨཱདིཡནྟསྶ ཨཱཔཏྟི པཱརཱཛིཀསྶཱ’’ཏིཨཱདིནཱ (པཱརཱ. ༡༢༢) ནཡེན པཱལི༹ཡཾ ཨཱགཏཱནི པཉྩངྒཱནི སངྒཧེཏུམཱཧ ‘‘པརེས’’ནྟིཨཱདི. ཏཏྠ ‘‘པརེསཾ སནྟཀཾ དྷན’’ནྟི ཨིམིནཱ པརམནུསྶསནྟཀཏཱ, ‘‘པརེསནྟི ཝིཛཱནིཏྭཱ’’ཏི ཨིམིནཱ པརཱཡཏྟབྷཱཝསྶ ཛཱནནཾ, ‘‘གརུཀ’’ནྟི ཨིམིནཱ པཱདཾ ཝཱ ཨཏིརེཀཔཱདཾ ཝཱ ཨགྒྷནཀཏཱ, ‘‘ཐེཡྻཙིཏྟེནཱ’’ཏི ¶ ཨིམིནཱ ཐེཡྻཙིཏྟཏཱ, ‘‘ཋཱནཱ ཙཱཝེཏཱི’’ཏི ཨིམིནཱ པཉྩཝཱིསཏིཡཱ ཨཝཧཱརཱནཾ ཨཉྙཏརསྶ སམངྒིཏཱཏི ཨེཝམེཏྠ པཉྩངྒསངྒཧོ ཝེདིཏབྦོ.

༢༣༨. ཨེཏྟཱཝཏཱ ཏིཾསམཱཏིཀཱཀཐཱཝིནིཙྪཡཾ སངྒཧེཏྭཱ ཨིདཱནི ‘‘ཨནཱཔཏྟི སསཉྙིསྶ ཝིསྶཱསགྒཱཧེ ཏཱཝཀཱལིཀེ པེཏཔརིགྒཧེ ཏིརཙྪཱནགཏཔརིགྒཧེ པཾསུཀཱུལསཉྙིསྶཱ’’ཏིཨཱདིནཱ ¶ (པཱརཱ. ༡༣༡) ནཡེན པཱལི༹ཡཾ ཨཱགཏཾ ཨནཱཔཏྟིཝཱརཾ སངྒཧེཏུམཱཧ ‘‘ཨནཱཔཏྟཱི’’ཏིཨཱདི. ཏཏྠ སསཉྙིསྶཱཏི པརསནྟཀམྤི ‘‘སསནྟཀ’’ནྟི སུདྡྷསཉྙཱཡ གཎྷནྟསྶ ཨནཱཔཏྟཱིཏི སབྦཏྠ ཡོཛེཏབྦཾ. ཨེཝཾ གཧིཏཾ སཱམིཀེཧི དིསྭཱ ཡཱཙིཏེ ཨདེནྟསྶ ཨུབྷིནྣཾ དྷུརནིཀྑེཔེན པཱརཱཛིཀཾ.

ཏིརཙྪཱནཔརིགྒཧེཏི ཏིརཙྪཱནེཧི པརིགྒཧིཏཝཏྠུམྷི. སཙེཔི ཧི ནཱགགརུལ༹མཱཎཝཀམཱཎཝིཀཱཔི མནུསྶཝེསེན ཨཱཔཎཾ པསཱརེཏྭཱ ནིསིནྣཱ ཧོནྟི, བྷིཀྑུ ཙ ཐེཡྻཙིཏྟེན ཏེསཾ སནྟཀཾ གཎྷཱཏི, ཨནཱཔཏྟཱིཏི ཝུཏྟཾ ཧོཏི. སཱིཧབྱགྒྷདཱིཔིཔབྷུཏཱིཧི ཝཱལ༹མིགེཧི གཧིཏགོཙརཾ པཋམཾ མོཙཱཔེནྟསྶ ཏཾ མུཉྩིཏྭཱ ཨཏྟནོཔི ཧིཾསནཏོ ཐོཀཾ ཁཱཡིཏེ ཝཱརེནྟསྶ དོསོ ནཏྠི. སེནཱདཱིསུ ཏིརཙྪཱནེསུ ཡེན ཀེནཙི གཧིཏཾ གོཙརཾ མོཙཱཔེཏུཾ ཝཊྚཏི. ཝུཏྟཉྷེཏཾ ཨཊྛཀཐཱཡཾ ‘‘སེནཱདཡོཔི ཨཱམིསཾ གཧེཏྭཱ གཙྪནྟེ པཱཏཱཔེཏྭཱ གཎྷིཏུཾ ཝཊྚཏཱི’’ཏི (པཱརཱ. ཨཊྛ. ༡.༡༣༡). ཨེཝམེཝ དྷམྨནིདེཌྜུབྷཱདཱིཧི གཧིཏམཎྜཱུཀཱདཡོ ཛཱིཝིཏརཀྑནཏྠཱཡ མོཙཱཔེཏུཾ ཝཊྚཏཱིཏི ཝེདིཏབྦཾ.

ཏཱཝཀཱལིཀགྒཱཧེཏི ‘‘པཊིཀརིསྶཱམཱི’’ཏི ཏཱཝཀཱལིཀཾ གཎྷནྟསྶ ཨེཝཾ གཧིཏཾ སཙེ བྷཎྜསཱམིཀོ པུགྒལོ ཝཱ གཎོ ཝཱ ‘‘ཏུམྷེཝ གཎྷཐཱ’’ཏི ཨནུཛཱནེཡྻ, ཝཊྚཏི. ནཱནུཛཱནེཡྻ, ན གཎྷེཡྻ, དཱཏབྦཾ. ཨདེནྟསྶ ཨུབྷིནྣཾ དྷུརནིཀྑེཔེན པཱརཱཛིཀཾ. ‘‘སངྒྷསནྟཀཾ པན པཊིདཱཏུམེཝ ཝཊྚཏཱི’’ཏི ཨཊྛཀཐཱཡཾ ཝུཏྟཾ.

ཝིསྶཱསགྒཱཧེཏི ‘‘ཨནུཛཱནཱམི བྷིཀྑཝེ པཉྩཧངྒེཧི སམནྣཱགཏསྶ ཝིསྶཱསཾ གཧེཏུཾ, སནྡིཊྛོ ཙ ཧོཏི, སམྦྷཏྟོ ཙ, ཨཱལཔིཏོ ཙ, ཛཱིཝཏི ཙ, གཧིཏེ ཙ ཨཏྟམནོ ¶ ཧོཏཱི’’ཏི (མཧཱཝ. ༣༥༦) པཱལི༹ཡཾ ཨཱགཏཾ པཉྩཧངྒེཧི སམནྣཱགཏསྶ སནྟཀཾ ཝིསྶཱསེན གཎྷནྟསྶ གཧཎེ ཝིནིཙྪཡོ ཡཐཱཝུཏྟསུཏྟཝཎྞནཱཡཾ ཝེདིཏབྦོ. ཡཐཱཧ སམནྟཔཱསཱདིཀཱཡཾ –

ཏཏྠ ¶ སནྡིཊྛོཏི དིཊྛམཏྟཀམིཏྟོ. སམྦྷཏྟོཏི དལ༹ྷམིཏྟོ. ཨཱལཔིཏོཏི ‘‘མམ སནྟཀཾ ཡཾ ཨིཙྪསི, ཏཾ གཎྷེཡྻཱསི, ཨཱཔུཙྪིཏྭཱ གཧཎེ ཀཱརཎཾ ནཏྠཱི’’ཏི ཝུཏྟོ. ཛཱིཝཏཱིཏི ཨནུཊྛཱནསེཡྻཱཡ སཡིཏོཔི ཡཱཝ ཛཱིཝིཏིནྡྲིཡུཔཙྪེདཾ ན པཱཔུཎཱཏི. གཧིཏེ ཙ ཨཏྟམནོཏི གཧིཏེ ཏུཊྛཙིཏྟོ ཧོཏི, ཨེཝརཱུཔསྶ སནྟཀཾ ‘‘གཧིཏེ མེ ཨཏྟམནོ བྷཝིསྶཏཱི’’ཏི ཛཱནནྟེན གཧེཏུཾ ཝཊྚཏི. ཨནཝསེསཔརིཡཱདཱནཝསེན ཙེཏཱནི པཉྩངྒཱནི ཝུཏྟཱནི, ཝིསྶཱསགྒཱཧོ པན ཏཱིཧངྒེཧི རུཧཏི – སནྡིཊྛོ, ཛཱིཝཏི, གཧིཏེ ཨཏྟམནོ, སམྦྷཏྟོ, ཛཱིཝཏི, གཧིཏེ ཨཏྟམནོ, ཨཱལཔིཏོ, ཛཱིཝཏི, གཧིཏེ ཨཏྟམནོཏི.

ཡོ པན ཛཱིཝཏི, ན ཙ གཧིཏེ ཨཏྟམནོ ཧོཏི, ཏསྶ སནྟཀཾ ཝིསྶཱསགྒཱཧེན གཧིཏམྤི པུན དཱཏབྦཾ. དདམཱནེན ཙ མཏཀདྷནཾ ཏཱཝ ཡེ ཏསྶ དྷནེ ཨིསྶརཱ གཧཊྛཱ ཝཱ པབྦཛིཏཱ ཝཱ, ཏེསཾ དཱཏབྦཾ. ཨནཏྟམནསྶ སནྟཀཾ ཏསྶེཝ དཱཏབྦཾ. ཡོ པན པཋམཾཡེཝ ‘‘སུཊྛུ ཀཏཾ ཏཡཱ མམ སནྟཀཾ གཎྷནྟེནཱ’’ཏི ཝཙཱིབྷེདེན ཝཱ ཙིཏྟུཔྤཱདམཏྟེན ཝཱ ཨནུམོདིཏྭཱ པཙྪཱ ཀེནཙི ཀཱརཎེན ཀུཔིཏོ པཙྩཱཧརཱཔེཏུཾ ན ལབྷཏི. ཡོཔི ཨདཱཏུཀཱམོཝ, ཙིཏྟེན པན ཨདྷིཝཱསེཏི, ན ཀིཉྩི ཝདཏི, སོཔི པུན པཙྩཱཧརཱཔེཏུཾ ན ལབྷཏི. ཡོ པན ‘‘མཡཱ ཏུམྷཱཀཾ ¶ སནྟཀཾ གཧིཏཾ ཝཱ པརིབྷུཏྟཾ ཝཱ’’ཏི ཝུཏྟེ ‘‘གཧིཏཾ ཝཱ ཧོཏུ པརིབྷུཏྟཾ ཝཱ, མཡཱ པན ཏཾ ཀེནཙིདེཝ ཀརཎཱིཡེན ཋཔིཏཾ, ཏཾ པཱཀཏིཀཾ ཀཱཏུཾ ཝཊྚཏཱི’’ཏི ཝདཏི, ཨཡཾ པཙྩཱཧརཱཔེཏུཾ ལབྷཏཱིཏི (པཱརཱ. ཨཊྛ. ༡.༡༣༡).

པེཏཔརིགྒཧེཏི པེཏྟིཝིསཡུཔྤནྣཱ ཙ མརིཏྭཱ ཏསྨིཾཡེཝ ཨཏྟབྷཱཝེ ནིབྦཏྟཱ ཙ ཙཱཏུམཧཱརཱཛིཀཱདཡོ དེཝཱ ཙ ཨིམསྨིཾ ཨཏྠེ པེཏཱ ནཱམ, ཏེསཾ སནྟཀཾ གཎྷནྟསྶ ཙ ཨནཱཔཏྟཱིཏི ཨཏྠོ. སཙེཔི ཧི སཀྐོ དེཝརཱཛཱ ཨཱཔཎཾ པསཱརེཏྭཱ ནིསིནྣོ ཧོཏི, དིབྦཙཀྑུཀོ ཙ བྷིཀྑུ ཏཾ ཉཏྭཱ སཏསཧསྶགྒྷནཀམྤི ཝཏྠཾ ཏསྶ ཝིརཝནྟསྶེཝ ཨཙྪིནྡིཏྭཱ གཎྷིཏུཾ ཝཊྚཏི. དེཝཔཱུཛཏྠཾ རུཀྑཱདཱིསུ མཊྛཝཏྠཱདཱིནི གཎྷཏོ ནིདྡོསཏཱཡ ཀིམེཝ ཝཏྟབྦཾ. པཾསུཀཱུལསཉྙཱཡ གཎྷཏོཔི ཨནཱཔཏྟི. ཏཐཱ གཧིཏམྤི སཙེ སསྶཱམིཀཾ ཧོཏི, སཱམིཀེ ཨཱཧརཱཔེནྟེ དཱཏབྦནྟི ཨུཔལཀྑཎཏོ ཝེདིཏབྦཾ.

༢༣༩. ཨེཏྠཱཏི ¶ དུཏིཡཔཱརཱཛིཀཝིནིཙྪཡེ. ཙ-སདྡེན ཨཝུཏྟསམུཙྩཡཏྠེན ཨཝསེསསིཀྑཱཔདཝིནིཙྪཡེ སངྒཎྷཱཏི. ཝཏྟབྦོཏི མཱཏིཀཊྛཀཐཱདཱིསུ ཝིཡ ཨཝསཱནེ ཀཐེཏབྦོ. པཱལི༹མུཏྟཝིནིཙྪཡོཏི སམུཊྛཱནཱདིཀོ ཏཾཏཾསིཀྑཱཔདཔཱལི༹ཡཾ ཨནཱགཏོ ཨུཔཱལིཏྠེརཱདཱིཧི ཋཔིཏོ ཝིནིཙྪཡོ.

༢༤༠. པརཱཛིཏཱནེཀམལེནཱཏི ཨཔརིམེཡྻཀཔྤཀོཊིསཏསཧསྶོཔཙིཏཔཱརམིཏཱསམྦྷཱུཏེན སབྦཉྙུཏཉྙཱཎཔདཊྛཱནེན ཨཱསཝཀྑཡཉཱཎེན སཧ ཝཱསནཱཡ སམུཙྪེདཔྤཧཱནེན པརཱཛིཏཱ རཱགཱདཡོ ཨནེཀཀིལེསམལཱ ཡེན སོ པརཱཛིཏཱནེཀམལོ, ཏེན པརཱཛིཏཱནེཀམལེན ¶ . ཛིནེན ཡཾ དུཏིཡཾ པཱརཱཛིཀཾ ཝུཏྟཾ, ཨསྶ དུཏིཡཔཱརཱཛིཀསྶ ཙ ཨཏྠོ མཡཱ སམཱསེན ཝུཏྟོ. ཨསེསེན ཨཏིཝིཏྠཱརནཡེན ཝཏྟུཾ ཏསྶ ཨཏྠཾ ཀཐེཏུཾ ཀོ ཧི སམཏྠོཏི ཡོཛནཱ. ཨེཏྠ ཙ-སདྡོ པཋམཔཱརཱཛིཀསམུཙྩཡཏྠོ. ཧི-སདྡོ ཨཝདྷཱརཎེ, ཏེན ཨསེསེན ཏདཏྠཾ ཝཏྟུཾ སམཏྠོ ནཏྠེཝ ཨཉྙཏྲ ཏཐཱགཏཱཏི དཱིཔེཏི.

ཨིཏི ཝིནཡཏྠསཱརསནྡཱིཔནིཡཱ

ཝིནཡཝིནིཙྪཡཝཎྞནཱཡ

དུཏིཡཔཱརཱཛིཀཀཐཱཝཎྞནཱ ནིཊྛིཏཱ.

ཏཏིཡཔཱརཱཛིཀཀཐཱཝཎྞནཱ

༢༤༡-༢. ཨེཝམཏིསུཁུམནཡསམཱཀུལཾ དུཏིཡཔཱརཱཛིཀཾ དསྶེཏྭཱ ཨིདཱནི ཏཏིཡཔཱརཱཛིཀཾ དསྶེཏུམཱཧ ‘‘མནུསྶཛཱཏི’’ནྟིཨཱདི. ཏཏྠ མནུསྶཛཱཏིནྟི ཛཱཡཏཱིཏི ཛཱཏི, རཱུཔཱརཱུཔཔཊིསནྡྷི, མནུསྶེསུ ཛཱཏི ཡསྶ སོ མནུསྶཛཱཏི, མནུསྶཛཱཏིཀོ མནུསྶཝིགྒཧོཏི ཝུཏྟཾ ཧོཏི, ཏཾ མནུསྶཛཱཏིཾ.

ཨེཏྠ ཙ མནུསྶེསཱུཏི ཀུསལཱཀུསལམནསྶ ཨུསྶནྣཏྟཱ མནུསྶསངྑཱཏེསུ ནརེསུ. ‘‘ཡཾ མཱཏུཀུཙྪིསྨིཾ པཋམཾ ¶ ཙིཏྟཾ ཨུཔྤནྣ’’ནྟི (པཱརཱ. ༡༧༢) པདབྷཱཛནེ ཝུཏྟནཡེན མཱཏུཀུཙྪིམྷི པཋམཾ ཨུཔྤཛྫམཱནཔཊིསནྡྷིཙིཏྟཉྩ ཏཾསམྤཡུཏྟཝེདནཱསཉྙཱསངྑཱརསངྑཱཏཁནྡྷཏྟཡཉྩ ཏཾསཧཛཱཏཱནི –

‘‘ཏིལཏེལསྶ ཡཐཱ བིནྡུ, སཔྤིམཎྜོ ཨནཱཝིལོ;

ཨེཝཾ ཝཎྞཔྤཊིབྷཱགཾ, ‘ཀལལ’ནྟི པཝུཙྩཏཱི’’ཏི. (པཱརཱ. ཨཊྛ. ༢.༡༧༢; ཝིབྷ. ཨཊྛ. ༢༦) –

ཝུཏྟཱནི ¶ ཛཱཏིཨུཎྞཾསུམྷི པསནྣཏིལཏེལེ ཝཱ སཔྤིམཎྜེ ཝཱ ཨོཏཱརེཏྭཱ ཨུཀྑིཔིཏྭཱ ཝིདྷུནིཏེ ཨགྒེ ལམྦམཱནབིནྡུཔྤམཱཎཀལལསངྑཱཏཱནི སབྷཱཝཀཱནཾ ཀཱཡབྷཱཝཝཏྠུདསཀཝསེན ཏིཾས རཱུཔཱནི ཙ ཨབྷཱཝཀཱནཾ ཀཱཡཝཏྠུདསཀཝསེན ཝཱིསཏི རཱུཔཱནི ཙཱཏི ཨཡཾ ནཱམརཱུཔཔཊིསནྡྷི ཨིདྷ ‘‘ཛཱཏཱི’’ཏི གཧིཏཱ. ‘‘ཡསྶཱ’’ཏི ཨིམིནཱ ཨཉྙཔདེན ‘‘ཡཱཝ མརཎཀཱལཱ ཨེཏྠནྟརེ ཨེསོ མནུསྶཝིགྒཧོ ནཱམཱ’’ཏི (པཱརཱ. ༡༧༢) པདབྷཱཛནེ ཝུཏྟནཡེན པཋམབྷཝངྒཏོ པཊྛཱཡ ཙུཏིཙིཏྟཱསནྣབྷཝངྒཔརིཡནྟསནྟཱནསངྑཱཏསཏྟོ གཧིཏོ. ཨིམིནཱ མནུསྶཝིགྒཧསྶ པཊིསནྡྷིཏོ པཊྛཱཡ པཱརཱཛིཀཝཏྠུབྷཱཝཾ དསྶེཏི.

ཛཱནནྟོཏི ‘‘སཏྟོ ཨཡ’’ནྟི ཛཱནནྟོ. ཛཱིཝིཏཱ ཡོ ཝིཡོཛཡེཏི ཡོ བྷིཀྑུ ཛཱིཝིཏིནྡྲིཡཱ ཝིཡོཛེཡྻ ཝོརོཔེཡྻ, ཏསྶ ཛཱིཝིཏིནྡྲིཡཾ ཨུཔཙྪིནྡེཡྻ ཨུཔརོདྷེཡྻཱཏི ཝུཏྟཾ ཧོཏི. ཏེནཱཧ པདབྷཱཛནེ ‘‘ཛཱིཝིཏཱ ཝོརོཔེཡྻཱཏི ཛཱིཝིཏིནྡྲིཡཾ ཨུཔཙྪིནྡཏི ཨུཔརོདྷེཏཱི’’ཏི (པཱརཱ. ༡༧༢).

ཏཉྩ ཛཱིཝིཏིནྡྲིཡཾ རཱུཔཱརཱུཔཝསེན དུཝིདྷཾ ཧོཏི. ཏཏྠ ཨརཱུཔཛཱིཝིཏིནྡྲིཡཾ ཨཝིགྒཧཏྟཱ ཨུཔཀྐམཝིསཡཾ ན ཧོཏི. རཱུཔཛཱིཝིཏིནྡྲིཡུཔཙྪེདེན པན ཏདཱཡཏྟཝུཏྟིཏཱཡ ཏཾསམཀཱལམེཝ ཨོཙྪིཛྫམཱནཏཱཡ ཨེཏྠ སཱམཉྙེན ཨུབྷཡམྤི གཧེཏབྦཾ. ཨིདཉྩ ཨཏཱིཏཱནཱགཏཾ ན གཧེཏབྦཾ ཏསྶ ཨཝིཛྫམཱནཏྟཱ. ཨུཔཀྐམཝིསཡཱརཧཾ པན པཙྩུཔྤནྣམེཝ གཧེཏབྦཾ. ཏཉྩ ཁཎསནྟཏིཨདྡྷཱཝསེན ཏིཝིདྷཾ ཧོཏི.

ཏཏྠ ཨུཔྤཱདཊྛིཏིབྷངྒཝསེན ཁཎཏྟཡཔརིཡཱཔནྣོ བྷཱཝོ ཁཎཔཙྩུཔྤནྣཾ ནཱམ. ཏཾ སརསབྷངྒབྷཱུཏཏྟཱ སཡཾ བྷིཛྫམཱནཾ ཨུཔཀྐམསཱདྷིཡཾ ཝིནཱསཝནྟཾ ན ཧོཏི. ཨཱཏཔེ ཋཏྭཱ གབྦྷཾ པཝིཊྛསྶ ¶ ཨནྡྷཀཱརཝིགམནྟརཉྩ སཱིཏེན ཨོཝརཀཾ པཝིཊྛསྶ ཝིསབྷཱགཨུཏུསམུཊྛཱནེན ¶ སཱིཏཔནཱུདནྟརཉྩ རཱུཔསནྟཏི སནྟཏིཔཙྩུཔྤནྣཾ ནཱམ. པཊིསནྡྷིཙུཏཱིནམནྟརཱལ༹པྤཝཏྟི ཁནྡྷསནྟཏི ཨདྡྷཱཔཙྩུཔྤནྣཾ ནཱམ. ཨིམསྨིཾ དྭཡེ ཨུཔཀྐམསམྦྷཝོ, ཏཾཝསེན ཨུཔཙྪིཛྫམཱནཾ ཛཱིཝིཏཾ སནྟཱནཔརིཧཱནིཔཙྩཡབྷཱཝཏོ སནྟཏིཨདྡྷཱཔཙྩུཔྤནྣདྭཡཾ ཡཐཱཔརིཙྪིནྣཀཱལམཔྤཏྭཱ ཨུཔཀྐམཝསེན ཨནྟརཱཡེཝ ནིརུཛ྄ཛྷཏི, ཏསྨཱ སནྟཏིཨདྡྷཱཔཙྩུཔྤནྣརཱུཔཛཱིཝིཏིནྡྲིཡཉྩ ཏཾནིརོདྷེན ནིརུཛ྄ཛྷམཱནཨརཱུཔཛཱིཝིཏིནྡྲིཡཉྩཱཏི ཨུབྷཡཾ ཨེཏྠ ‘‘ཛཱིཝིཏཱ’’ཏི གཧིཏནྟི ཝེདིཏབྦཾ. ཨིདམེཝ སནྡྷཱཡཱཧ པདབྷཱཛནེ ‘‘སནྟཏིཾ ཝིཀོཔེཏཱི’’ཏི (པཱརཱ. ༡༧༢).

ཨིམིསྶཱཝ པཱཎཱཏིཔཱཏབྷཱཝེ ཨཱཔཏྟིབྷཱཝཏོ ཨེཏྠ ཋཏྭཱ ཨཊྛཀཐཱཡཾ (པཱརཱ. ཨཊྛ. ༢.༡༧༢) པཱཎཔཱཎཱཏིཔཱཏཔཱཎཱཏིཔཱཏཱིཔཱཎཱཏིཔཱཏཔྤཡོགཱནཾ ཝིབྷཱགོ དསྶིཏོ. ཏཏྠ པཱཎོཏི ཝོཧཱརཏོ སཏྟོ, པརམཏྠཏོ ཨུཔཙྪིཛྫམཱནཾ ཛཱིཝིཏིནྡྲིཡཾ, ཏཾ ‘‘ཛཱིཝིཏཱ’’ཏི ཨིམིནཱ ཝུཏྟཾ. པཱཎཱཏིཔཱཏོ ནཱམ ཝདྷཀཙེཏནཱ, སོ ཙ ‘‘ཝིཡོཛཡེ’’ཏི ཨིམིནཱ སནྡསྶིཏོ. པཱཎཱཏིཔཱཏཱི ནཱམ པུགྒལོ, སོ ཙ ‘‘ཡོ’’ཏི ཨིམིནཱ སནྡསྶིཏོ. པཱཎཱཏིཔཱཏཔྤཡོགོ པན –

‘‘ཝུཏྟཱ པཱཎཱཏིཔཱཏསྶ;

པཡོགཱ ཚ མཧེསིནཱ’’ཏི –

ཨཱདིནཱ ནཡེན ཨིདྷེཝ ཝཀྑམཱནཝིབྷཱགཏྟཱ ཝཀྑམཱནནཡེནེཝ དཊྛབྦོ.

ཨསྶ སཏྠཾ ནིཀྑིཔེཡྻ ཝཱཏི ཡོཛནཱ. ཨསྶཱཏི མནུསྶཛཱཏིཀསྶ. ‘‘ཧཏྠཔཱསེ’’ཏི པཱཋསེསོ. ཧཏྠཔཱསོ ནཱམ སམཱིཔོཏི. ཨསྶཱཏི སམཱིཔསམྦནྡྷེ སཱམིཝཙནཾ. སཏྠནྟི ཨེཏྠ ཛཱིཝིཏཝིཧིཾ སནུཔཀརཎབྷཱཝེན སམྨཏཱ དྷཱརཱཝནྟཨསིཨཱདི ཙ དྷཱརཱརཧིཏཡཊྛིབྷིནྡིཝཱལལགུལཱ༹དི ཙ ¶ ཨུཔལཀྑཎཝསེན གཧེཏབྦཱ. སསཏི ཧིཾསཏཱིཏི སཏྠཾ. ཏེནེཝཱཧ པདབྷཱཛནེ ‘‘ཨསིཾ ཝཱ སཏྟིཾ ཝཱ བྷིནྡིཝཱལཾ ཝཱ ལགུལ༹ཾ ཝཱ པཱསཱཎཾ ཝཱ སཏྠཾ ཝཱ ཝིསཾ ཝཱ རཛྫུཾ ཝཱ’’ཏི. ཨིདྷཱཝུཏྟཾ ཀརཔཱལིཀཱཚུརིཀཱདི སམུཁཾ ‘‘སཏྠཾ ཝཱ’’ཏི ཨིམིནཱ སངྒཧིཏཾ. ནིཀྑིཔེཡྻཱཏི ཡཐཱ བྷོགཧེཏུཾ ལབྷཏི, ཏཐཱ ཨུཔནིཀྑིཔེཡྻ, ཨཏྟཝདྷཱཡ ཨིཙྪིཏཀྑཎེ ཡཐཱ གཎྷཱཏི, ཏཐཱ སམཱིཔེ ཏེནེཝ ཙིཏྟེན ཋཔེཡྻཱཏི ཝུཏྟཾ ཧོཏི. ཨིམིནཱ ཐཱཝརཔྤཡོགོ སནྡསྶིཏོ.

མརཎེ ¶ གུཎཾ ཝཱ ཝདེཡྻཱཏི ཡོཛནཱ, མརཎཏྠཱཡ མརཎེ གུཎཾ ཝཎྞེཏཱིཏི ཨཏྠོ. ‘‘ཛཱིཝིཏེ ཨཱདཱིནཝཾ དསྶེཏི, མརཎེ གུཎཾ བྷཎཏཱི’’ཏི (པཱརཱ. ༡༧༢) པདབྷཱཛནེ ཝུཏྟཏྟཱ ‘‘ཀིཾ ཏུཡ྄ཧིམིནཱ པཱཔཀེན དུཛྫཱིཝིཏེན, ཡོ ཏྭཾ ན ལབྷསི པཎཱིཏབྷོཛནཱནི བྷུཉྫིཏུ’’མིཙྩཱདིནཱ ནཡེན མརཎཏྠཱཡ ཛཱིཝིཏེ ཨཝཎྞཾ ཝདནྟོ ཙ ‘‘ཏྭཾ ཁོསི ཨུཔཱསཀ ཀཏཀལྱཱཎོ ཨཀཏཔཱཔོ, མཏཾ ཏེ ཛཱིཝིཏཱ སེཡྻོ, ཨིཏོ ཏྭཾ ཀཱལཀཏོ ཝིཝིདྷཝིཧངྒམཝིཀཱུཛིཏེ པརམསུརབྷིཀུསུམབྷཱུསིཏཏརུཝརནིཙིཏེ པརམརཏིཀརལལི༹ཏགཏིབྷཱསིཏཝིལཔིཏསུརཡུཝཏིགཎཝིཙརིཏེ ཝརནནྡནེ ཨཙྪརཱསངྒྷཔརིཝཱརིཏོ ཝིཙརིསྶསཱི’’ཏིཨཱདིནཱ ནཡེན མརཎཏྠཱཡ མརཎཱནིསཾསཾ དསྶེནྟོ ཙ ‘‘མརཎེ གུཎཾ ཝདེཡྻ’’ཨིཙྩེཝ ཝུཙྩཏི.

མརཎཱུཔཱཡཾ དེསེཡྻཱཏི ཡོཛནཱ. མརཎཱདྷིཔྤཱཡེནེཝ ‘‘སཏྠཾ ཝཱ ཨཱཧར, ཝིསཾ ཝཱ ཁཱད, རཛྫུཡཱ ཝཱ ཨུབྦནྡྷིཏྭཱ ཀཱལངྐརོཧཱི’’ཏི པདབྷཱཛནེ ཝུཏྟསཏྠཧརཎཱནི ཙ ཨཝུཏྟམྤི སོབྦྷནརཀཔཔཱཏཱདཱིསུ པཔཏནཉྩཱཏི ཨེཝམཱདིཀཾ མརཎཱུཔཱཡཾ ཨཱཙིཀྑེཡྻ. ‘‘ཧོཏི ཨཡམྤཱི’’ཏི པདཙྪེདོ, ཨཔཱིཏི པུབྦེ ཝུཏྟདྭཡཾ སམུཙྩིནོཏི. དྭེདྷཱ བྷིནྣསིལཱ ཝིཡ ཨསནྡྷེཡྻོཝ ¶ སོ ཉེཡྻོཏི དྭིདྷཱ བྷིནྣཔཱསཱཎོ ཝིཡ བྷགཝཏོ པཊིཔཏྟིཔཊིཝེདྷསཱསནདྭཡེན སོ པཙྩུཔྤནྣེ ཨཏྟབྷཱཝེ སནྡྷཱཏུམསཀྐུཎེཡྻོཝཱཏི ཉཱཏབྦོཏི ཨཏྠོ.

༢༤༣. ཐཱཝརཱདཡོཏི ཨཱདི-སདྡེན ཝིཛྫཱམཡཨིདྡྷིམཡཔཡོགདྭཡཾ སངྒཧིཏཾ.

༢༤༤. ཏཏྠཱཏི ཏེསུ ཚསུ པཡོགེསུ. སཀོ ཧཏྠོ སཧཏྠོ, ཏེན ནིབྦཏྟོ སཱཧཏྠིཀོ, པཡོགོ. ཨིདྷ ཧཏྠགྒཧཎཾ ཨུཔལཀྑཎཾ, ཏསྨཱ ཧཏྠཱདིནཱ ཨཏྟནོ ཨངྒཔཙྩངྒེན ནིཔྥཱདིཏོ ཝདྷཔྤཡོགོ སཱཧཏྠིཀོཏི ཝེདིཏབྦོ.

༢༤༥. ‘‘ཏྭཾ ཏཾ ཨེཝཾ པཧརིཏྭཱ མཱརེཧཱི’’ཏི བྷིཀྑུནོ པརསྶ ཡཾ ཨཱཎཱཔནཾ, ཨཡམཱཎཏྟིཀོ ནཡོཏི ཡོཛནཱ. ཨཱཎཏྟིཀོ ནཡོཏི ཨཱཎཏྟིཡེཝ ཨཱཎཏྟིཀོ. ནེཏི པཝཏྟེཏཱིཏི ནཡོ, པཡོགསྶེཏཾ ནཱམཾ.

༢༤༦. དཱུརནྟི དཱུརཊྛཾ. ཀཱཡེན པཊིབདྡྷེནཱཏི ཨེཏྠ ཀཱཡེཀདེསོ ཧཏྠཱདི ཀཱཡོ ཨཝཡཝེ སམུདཱཡོཔཙཱརཏོ ‘‘གཱམོ དཌྜྷོ’’ཏི ཡཐཱ. ཀཱཡཔཊིབདྡྷཾ ཙཱཔཱདིཀཾ པཊིབདྡྷཾ ནཱམ པུབྦཔདལོཔེན ¶ ‘‘དེཝདཏྟོ དཏྟོ’’ཏི ཡཐཱ. ཝཱ-སདྡོ ལུཏྟནིདྡིཊྛོ, ཀཱཡེན ཝཱ ཀཱཡཔཊིབདྡྷེན ཝཱཏི ཝུཏྟཾ ཧོཏི, ‘‘ཨུསུཨཱདིནིཔཱཏན’’ནྟི ཨིམིནཱ སམྦནྡྷོ. ཝིདྷཱནཾ ཝིདྷི, པཡོགོཏི ཨཏྠོ.

༢༤༧. ཨསཉྩཱརིམུཔཱཡེནཱཏི ཨསཉྩཱརིམེན ནིཙྩལེན ཨུཔཱཡེན. ཨོཔཏནྟི ཨེཏྠཱཏི ཨོཔཱཏོ, སོ ཨཱདི ཡེསཾ ཨཔསྶེནཝིསབྷེསཛྫསཾཝིདྷཱནཱདཱིནཾ ཏེ ཨོཔཱཏཱདཡོ, ཏེསཾ ¶ ཝིདྷཱནཾ ཨོཔཱཏཱདིཝིདྷཱནཾ, ཨོཔཱཏཀྑཎནཱདིཀིརིཡཱ.

༢༤༨. ཝིཛྫཱཡཱཏི ཨཱཐབྦནཝེདཱགཏམརཎམནྟསངྑཱཏཝིཛྫཱཡ. ཛཔྤནནྟི ཡཐཱ པརོ ན སུཎཱཏི, ཏཐཱ པུནཔྤུནཾ ཝཙནཾ.

༢༤༩. མཱརཎེ སམཏྠཱ ཡཱ ཀམྨཝིཔཱཀཛཱ ཨིདྡྷི, ཨཡཾ ཨིདྡྷིམཡོ པཡོགོ ནཱམཱཏི སམུདཱིརིཏོཏི ཡོཛནཱ. ཀམྨཝིཔཱཀེ ཛཱཏཱ ཀམྨཝིཔཱཀཛཱ, ཨིདྡྷི, ཡཱ ‘‘ནཱགཱནཾ ནཱགིདྡྷི སུཔཎྞཱནཾ སུཔཎྞིདྡྷི ཡཀྑཱནཾ ཡཀྑིདྡྷཱི’’ཏིཨཱདིནཱ (པཱརཱ. ཨཊྛ. ༢.༡༧༢) བཧུདྷཱ ཨཊྛཀཐཱཡཾ ཝུཏྟཱ. ཏཏྠ དིཊྛདཊྛཕུཊྛཝིསཱནཾ ནཱགཱནཾ དིསྭཱ, ཌཾསིཏྭཱ, ཕུསིཏྭཱ ཙ པརཱུཔགྷཱཏཀརཎེ ནཱགིདྡྷི ཝེདིཏབྦཱ. ཨེཝཾ སེསཱནམྤི. ཨིདྡྷིཡེཝ ཨིདྡྷིམཡོ, བྷཱཝནཱམཡོ ཨིདྡྷིཔྤཡོགོ པནེཏྠ ན གཧེཏབྦོ. ཝུཏྟཉྷེཏཾ ཨཊྛཀཐཱཡཾ –

‘‘ཀེཙི པན བྷཱཝནཱམཡིདྡྷིཡཱཔི པརཱུཔགྷཱཏཀརཎཾ ཝདནྟི. སཧ པརཱུཔགྷཱཏཀརཎེན ཙ ཨཱདིཏྟགྷརཱུཔརི ཁིཏྟསྶ ཨུདཀགྷཊསྶ བྷེདནཾ ཝིཡ ཨིདྡྷིཝིནཱསཉྩ ཨིཙྪནྟི, ཏཾ ཏེསཾ ཨིཙྪཱམཏྟམེཝ. ཀསྨཱ? ཡསྨཱ ཏཾ ཀུསལཝེདནཱཝིཏཀྐཔརིཏྟཏྟིཀཱདཱིཧི ན སམེཏི. ཀཐཾ? ཨཡཉྷི བྷཱཝནཱམཡིདྡྷི ནཱམ ཙཏུཏྠཛ྄ཛྷཱནམཡཱ ཀུསལཏྟིཀེ ཀུསལཱ ཙེཝ ཨབྱཱཀཏཱ ཙ, པཱཎཱཏིཔཱཏོ ཨཀུསལོ. ཝེདནཱཏྟིཀེ ཨདུཀྑམསུཁསམྤཡུཏྟཱ, པཱཎཱཏིཔཱཏོ དུཀྑསམྤཡུཏྟོ. ཝིཏཀྐཏྟིཀེ ཨཝིཏཀྐཨཝིཙཱརཱ, པཱཎཱཏིཔཱཏོ སཝིཏཀྐསཝིཙཱརོ. པརིཏྟཏྟིཀེ ¶ མཧགྒཏཱ, པཱཎཱཏིཔཱཏོ པརིཏྟོཡེཝཱ’’ཏི (པཱརཱ. ཨཊྛ. ༢.༡༧༢).

༢༥༠. ཏཏྠཱཏི ཏེསུ ཚབྦིདྷེསུ པཡོགེསུ. ཨུདྡེསོཔཱིཏི ཨུདྡིསནཾ ཨུདྡེསོ, ཏཾསཧིཏོ པཡོགོཔི ¶ ཨུདྡེསོཏི ཝུཏྟཾ ཧོཏི ‘‘ཀུནྟེ པཝེསེཧཱི’’ཏི ཡཐཱ. ཨེཝཾ ཝཏྟབྦཏཱཡ ཙ ཨནུདྡེསོཏི ཏབྦིཔརཱིཏཝཙནམེཝ ཉཱཔཀནྟི ཝེདིཏབྦཾ. ཨེཏྠ ཨེཀེཀོ ཨུདྡེསོཔི ཨནུདྡེསོཔི ཧོཏཱིཏི ཏེསམཡཾ བྷེདོ པན དུཝིདྷོ ཧོཏཱིཏི པརིདཱིཔིཏོཏི ཡོཛནཱ. ཨིམེསུ ཚསུ པཡོགེསྭེཝ ཨེཀེཀསྶེཝ ཨུདྡིསྶཱནུདྡིསྶཀིརིཡམཱནཏཱཡ དུཝིདྷབྷཱཝཏོ ཏེསཾ དྭཱདསཝིདྷོ བྷེདོ པདབྷཱཛནེ ཙ ཨཊྛཀཐཱཡ ཙ དཱིཔིཏོ, ཏཏྠ ཝིནིཙྪཡམིདཱནི དསྶཡིསྶཱམཱིཏི ཨདྷིཔྤཱཡོ.

༢༥༡. བཧཱུསུཔཱིཏི མནུསྶེསུ བཧཱུསུཔི. ཏེན ཀམྨེནཱཏི པཧཱརདཱནསངྑཱཏེན ཀམྨེན. བཛ྄ཛྷཏཱིཏི ཨཔཱཡཾ ནེཏུཾ ཀམྨཔཱསེན ཀམྨནྟརཾ ནིཝཱརེཏྭཱ བཛ྄ཛྷཏཱིཏི ཨཏྠོ.

༢༥༢. པཧཱརེཔཱིཏི པཧརཎེཔི. དེཧིནོཏི མནུསྶཝིགྒཧསྶ. ཏསྶཱཏི པཧཊསྶ.

༢༥༣. པཧཊམཏྟེ ཝཱཏི པཧཊཀྑཎེ ཝཱ. པཙྪཱཏི ཏཔྤཙྩཡཱ ཀཱལནྟརེ ཝཱ. ཨུབྷཡཐཱཔི ཙ མཏེཏི དྭིནྣཾ ཨཱཀཱརཱནམཉྙཏརེན མཏེཔི. ཧནྟཱ ཝདྷཀོ. པཧཊམཏྟསྨིནྟི ཏསྨིཾ མརཎཱརཧཔཧཱརསྶ ལདྡྷཀྑཎེཡེཝ, མརཎཏོ པུབྦབྷཱགེཡེཝཱཏི མཏྟསདྡེན དཱིཔེཏི. མརཎཏྠཱཡ ཙ ཨཉྙཏྠཱཡ ཙ དིནྣེསུ ཨནེཀེསུ པཧཱརེསུ མརཎཏྠཱཡ ¶ དིནྣཔྤཧཱརེནེཝ ཡདཱ ཀདཱཙི མརིསྶཏི, པཧཱརདཱནཀྑཎེཡེཝ པཱརཱཛིཀཾ ཧོཏི. ཨམརཎཱདྷིཔྤཱཡེན དིནྣཔྤཧཱརབལེན ཙེ མརེཡྻ, ན ཧོཏཱིཏི ཝུཏྟཾ ཧོཏཱིཏི.

༢༥༤. དྭེ པཡོགཱཏི ཨུདྡིསྶཱནུདྡིསྶཀིརིཡཱབྷེདབྷིནྣཱ སཱཧཏྠིཀཱཎཏྟིཀཱ དྭེ པཡོགཱ.

༢༥༥. ཀརཎསྶཱཏི ཀིརིཡཱཡ. ཝིསེསོཏི ནཱནཏྟཾ. ཨཱཎཏྟིནིཡཱམཀཱཏི ཨཱཎཏྟིཾ ནིཡཱམེནྟི ཝཝཏྠཱཔེནྟཱིཏི ཨཱཎཏྟིནིཡཱམཀཱ.

༢༥༦. ཏཏྠཱཏི ཏེསུ ཨཱཎཏྟིནིཡཱམཀེསུ ཚསུ ཨཱཀཱརེསུ. ཡོབྦནཱདི ཙཱཏི ཨཱདི-སདྡེན ཐཱཝརིཡམནྡཁིཌྜཝུདྡྷཱདིཨཝཏྠཱཝིསེསོ སངྒཧིཏོ.

༢༥༧. ཡཾ མཱཏིཀཱཡ ནིདྡིཊྛཾ སཏྠཾ, ཏཾ ཀཏམཾ?. སཏྟམཱརཎནྟི སཏྟེ མཱརེནྟི ཨེཏེནཱཏི སཏྟམཱརཎཾ, ཨསིཨཱདིཝདྷོཔཀརཎཾ.

༢༥༨. ཝིཛ྄ཛྷནནྟི ¶ ཨུསུཨཱདཱིཧི ཝིཛ྄ཛྷནཾ. བྷེདནནྟི ཀཀཙཱདཱིཧི དྭིདྷཱཀརཎཾ. ཚེདནནྟི ཁགྒཱདཱིཧི དྭིདྷཱཀརཎཾ. ཏཱལ༹ནནྟི མུགྒརཱདཱིཧི ཨཱགྷཱཏནཾ. ཨེཝམཱདིཝིདྷོཏི ཨེཝམཱདིཔྤཀཱརོ. ཨནེཀོཏི བཧུཀོ བྷེདོ. ཀརཎསྶ ཝིསེསོ ཀིརིཡཱཝིསེསོཏི ཨཏྠོ.

༢༥༩-༦༠. ‘‘པུརཏོ པཧརིཏྭཱན མཱརེཧཱི’’ཏི ཡོ བྷཱསིཏོ ཨཱཎཱཔཀེན, ཏེན ཨཱཎཏྟེན པཙྪཏོ…པེ… མཱརིཏེཏི ཡོཛནཱ. ཝཏྠཱཎཏྟི ཝིསངྐེཏཱཏི ཨེཏྠ ‘‘ཡཾ ‘མཱརེཧཱི’ཏི…པེ… ཏཏོ’’ཏི ཝཏྠུཝིསངྐེཏོ དསྶིཏོ. ‘‘པུརཏོ…པེ… མཱརིཏེ’’ཏི ཨཱཎཏྟིཝིསངྐེཏོ དསྶིཏོ. མཱུལཊྛོཏི ཨཱཎཱཔཀོ. མཱུལནྟི ཧི པུབྦཀིརིཡཱནུརཱུཔཾ ཨཱཎཱཔནཾ, ཏཏྠ ཋིཏོཏི མཱུལཊྛོ.

༢༦༡. ཨིམིནཱ ¶ ཝིསངྐེཏེ ཨཱཎཱཔཀསྶ ཨནཱཔཏྟིཾ དསྶེཏྭཱ སངྐེཏེ ཨཝིརཱདྷིཏེ ཨུབྷིནྣམྤི པཱརཱཛིཀཾ དསྶེཏུམཱཧ ‘‘ཝཏྠུ’’ནྟིཨཱདི. ཏཾ ཝཏྠུཾ ཨཝིརཛ྄ཛྷིཏྭཱ མཱརིཏེ ཨུབྷཡེསཾ…པེ… ཨུདཱིརིཏོ, ཡཐཱཎཏྟི ཙ མཱརིཏེ…པེ… ཨུདཱིརིཏོཏི ཡོཛནཱ. མཱརིཏེ ཝཏྠུསྨིནྟི སཱམཏྠིཡཱ ལབྦྷཏི. ཨུབྷཡེསནྟི ཨཱཎཱཔཀཨཱཎཏྟཱནཾ. ཡཐཱཀཱལནྟི ཨཱཎཱཔཀསྶ ཨཱཎཏྟིཀྑཎཾ, ཨཱཎཏྟསྶ མཱརཎཀྑཎཉྩ ཨནཏིཀྐམིཏྭཱ. བནྡྷནཾ བནྡྷོ, ཀམྨུནཱ བནྡྷོ ཀམྨབནྡྷོ. ཨཐ ཝཱ བཛ྄ཛྷཏི ཨེཏེནཱཏི བནྡྷོ, ཀམྨམེཝ བནྡྷོ ཀམྨབནྡྷོ.

༢༦༤. ཝིསངྐེཏོ ནཱཏི ཝིསངྐེཏོ ནཏྠི, དྭིནྣམྤི ཡཐཱཀཱལཔརིཙྪེདཾ ཀམྨབནྡྷོཡེཝཱཏི ཨཏྠོ.

༢༦༥. སབྦསོཏི སབྦེསུ ཀཱལབྷེདེསུ, སབྦསོ ཝེདིཏབྦོཏི ཝཱ སམྦནྡྷོ. སབྦསོཏི སབྦཔྤཀཱརེན. ཝིབྷཱཝིནཱཏི པཎྜིཏེན. སོ ཧི ཨཏྠཾ ཝིབྷཱཝེཏཱིཏི ཏཐཱ ཝུཏྟོ.

༢༦༦-༧-༨. ‘‘ཨིམཾ གཱམེ ཋིཏ’’ནྟི ཨིདཾ ཏཾ སཉྫཱནིཏུཾ ཝུཏྟཾ, ན མཱརཎཀྑཎཊྛཱནནིཡམཏྠཱཡཱཏི ‘‘ཡཏྠ ཀཏྠཙི ཋིཏ’’ནྟི ཝཏྭཱཔི ‘‘ནཏྠི ཏསྶ ཝིསངྐེཏོ’’ཏི ཨཱཧ. ཏསྶཱཏི ཨཱཎཱཔཀསྶ. ‘‘ཏཏྠཱ’’ཏི ཝཱ པཱཋོ, ཏསྶཾ ཨཱཎཏྟིཡནྟི ཨཏྠོ. ‘‘གཱམེཡེཝ ཋིཏཾ ཝེརིཾ མཱརེཧཱི’’ཏི སཱཝདྷཱརཎཾ ཨཱཎཏྟོ ཝནེ ཙེ ཋིཏཾ མཱརེཏི ཝཱ ‘‘ཝནེཡེཝ ཋིཏཾ ཝེརིཾ མཱརེཧཱི’’ཏི སཱཝདྷཱརཎཾ ཝུཏྟོ གཱམེ ཋིཏཾ ཙེ མཱརེཏི ཝཱཏི ཡོཛནཱ. ‘‘བྷིཀྑུནཱ སཱཝདྷཱརཎ’’ནྟི ¶ ཙ པོཏྠཀེསུ ལིཁནྟི, ཏཾ ཨགྒཧེཏྭཱ ‘‘ཝནེ ཝཱ ¶ སཱཝདྷཱརཎ’’ནྟི པཱཋོཡེཝ གཧེཏབྦོ. ཝིགཏོ སངྐེཏོ ཨཱཎཏྟིནིཡཱམོ ཨེཏྠཱཏི ཝིསངྐེཏོ.

༢༦༩. སབྦདེསེསཱུཏི གཱམཝནཨངྒཎགེཧཱདཱིསུ སབྦེསུ ཋཱནེསུ. བྷེདཏོཏི ནཱནཏྟཏོ.

༢༧༠. ‘‘སཏྠེན པན མཱརེཧཱི’’ཏི ཡེན ཀེནཙི ཡོ ཨཱཎཏྟོ, ཏེན ཡེན ཀེནཙི སཏྠེན མཱརིཏེ ཝིསངྐེཏོ ནཏྠཱིཏི ཡོཛནཱ.

༢༧༡-༢. ཨིམིནཱ ཝཱསིནཱ ཧཱིཏི ཨེཏྠ ཧཱིཏི པདཔཱུརཎེ. ‘‘ཨིམིནཱ ཨསིནཱ མཱརེཡྻཱ’’ཏི ཝུཏྟོ ཨཉྙེན ཨསིནཱ མཱརེཏི ཝཱ ‘‘ཏྭཾ ཨིམསྶ ཨསིསྶ ཨེཏཱཡ དྷཱརཱཡ མཱརཡ’’ ཨིཏི ཝུཏྟོ ཏཾ ཝེརིཾ སཙེ ཨིཏརཱཡ དྷཱརཱཡ མཱརེཏི ཝཱ ཐརུནཱ མཱརེཏི ཝཱ ཏུཎྜེན མཱརེཏི ཝཱ, ཏཐཱ མཱརིཏེ ཝིསངྐེཏོཡེཝ ཧོཏཱིཏི ཡོཛནཱ. ཐརུནཱཏི ཁགྒམུཊྛིནཱ. ཏུཎྜེནཱཏི ཁགྒཏུཎྜེན. ‘‘ཝིསངྐེཏོཝཱ’’ཏི སངྐེཏཝིརཱདྷེནེཝ པཱརཱཛིཀཾ ན ཧོཏཱིཏི དསྶནཔདམེཏཾ.

༢༧༣. སབྦཱཝུདྷཀཛཱཏིསཱུཏི ཨིདྷཱཝུཏྟཀརཔཱལིཀཱཚུརིཀཱདིསབྦཔཧརཎསཱམཉྙེསུ. ཝིསེསཏོཏི བྷེདཏོ.

༢༧༤. པརེནཱཏི བྷིཀྑུནཱ. སོཏི ཨཱཎཏྟོ. ནིསིནྣཾ ནཾ མཱརེཏི, ཝིསངྐེཏོ ན ཝིཛྫཏཱིཏི ‘‘གཙྪནྟམེཝ མཱརེཧཱི’’ཏི སཱཝདྷཱརཎཾ ཨཝུཏྟཏྟཱ ‘‘ནིསིནྣོཔི སོཡེཝཱ’’ཏི ཏཾ མཱརེནྟསྶ ཝིསངྐེཏོ ན ཧོཏི, ཨཝདྷཱརཎཾ ཨནྟརེན ཀཐནཾ ཏཾ སཉྫཱནཱཔེཏུཾ ཝུཙྩཏཱིཏི ཨིརིཡཱཔཐནིཡཱམཀཾ ན ཧོཏཱིཏི ཨདྷིཔྤཱཡོ.

༢༧༥-༦. ཨསཏི ¶ སཱཝདྷཱརཎེ ཝིསངྐེཏཱབྷཱཝཾ དསྶེཏྭཱ ཨིདཱནི སཱཝདྷཱརཎེ ཨིརིཡཱཔཐནྟརེསུ ཝིསངྐེཏཾ དསྶེཏུམཱཧ ‘‘ནིསིནྣཾཡེཝཱ’’ཏིཨཱདི. ‘‘ནིསིནྣཾཡེཝ མཱརེཧཱི’’ཏི ཝུཏྟོ གཙྪནྟཾ མཱརེཏི, ཝིསངྐེཏནྟི ཉཱཏབྦཾ. ‘‘གཙྪནྟཾཡེཝ མཱརེཧཱི’’ཏི ཝུཏྟོ ནིསིནྣཾ མཱརེཏི, ཝིསངྐེཏནྟི ཉཱཏབྦནྟི ཡོཛནཱ. ཨིམམེཝ ཡོཛནཱཀྐམཾ སནྡྷཱཡཱཧ ‘‘ཡཐཱཀྐམ’’ནྟི.

༢༧༧. ཝིཛ྄ཛྷིཏྭཱཏི སརཱདཱིཧི ཝིཛ྄ཛྷིཏྭཱ.

༢༧༨. ཚིནྡིཏྭཱཏི ¶ ཨསིཨཱདཱིཧི ཚིནྡིཏྭཱ. པུན སོཏི པཡོགོ.

༢༧༩. ཀརཎེསཱུཏི ཝིཛ྄ཛྷནཱདིཀིརིཡཱཝིསེསེསུ.

༢༨༠-༡. ཨེཏྟཱཝཏཱ ཨཱཎཏྟིནིཡཱམཀནིདྡེསཾ དསྶེཏྭཱ ཨིདཱནི དཱིགྷཱདིལིངྒཝསེནཱཔི སམྦྷཝནྟཾ ཝིསངྐེཏཾ དསྶེཏུམཱཧ ‘‘དཱིགྷ’’ནྟིཨཱདི. ‘‘དཱིགྷཾ…པེ… ཐཱུལཾ མཱརེཧཱིཏི ཨནིཡམེཏྭཱ ཨཱཎཱཔེཏཱི’’ཏི (པཱརཱ. ཨཊྛ. ༢.༡༧༤) ཨཊྛཀཐཱཝཙནཏོ ཨེཝ-ཀཱརཾ ཝིནཱ ‘‘དཱིགྷཾ མཱརེཧཱི’’ཏི ཨནིཡམེཏྭཱ ཀེནཙི ཡོ ཨཱཎཏྟོ ཧོཏི, སོཔི ཨཱཎཏྟོ ཡཾ ཀིཉྩི ཏཱདིསཾ སཙེ མཱརེཏི, ནཏྠི ཏཏྠ ཝིསངྐེཏོ, ཨུབྷིནྣམྤི པརཱཛཡོཏི ཡོཛནཱ. ཨེཝཾ ‘‘རསྶ’’ནྟིཨཱདིསབྦཔདེཧིཔི པཙྩེཀཾ ཡོཛནཱ ཀཱཏབྦཱ. ཨནིཡམེཏྭཱཏི ཝིསངྐེཏཱབྷཱཝསྶ ཧེཏུདསྶནཾ. ཨེཝཀཱརོ ཝཱཀྱཱལངྐཱརོ. ཏཏྠཱཏི ཨཱཎཏྟིཀཔྤཡོགེ. ‘‘ཨུབྷིནྣམྤི པརཱཛཡོ’’ཏི ཝུཏྟཏྟཱ ཨཱཎཱཔཀཾ ཝིནཱ ཨཉྙཾ ཡཐཱཝུཏྟཀྑཎཾ མནུསྶཝིགྒཧཾ ‘‘ཡཾ ཀིཉྩི ཏཱདིས’’ནྟི ཨིམིནཱ དསྶེཏི.

སཙེ ཨཱཎཱཔཀོ ཨཱཎཱཔེཏྭཱ ཨཏྟཱནམེཝ མཱརེཏི, ཨཱཎཱཔཀོ དུཀྐཊཾ ཨཱཔཛྫིཏྭཱ མརཏི, ཨཱཎཏྟསྶ ¶ པཱརཱཛིཀཾ. ཨཱཎཱཔཀེན ཨཏྟཱནམུདྡིསྶ ཨཱཎཏྟིཡཱ ཀཏཱཡ ཨཱཎཏྟོ ཨཛཱནིཏྭཱ ཏཱདིསཾ ཨཉྙཾ མཱརེཏི, ཨོཀཱསསྶ ཨནིཡམིཏཏྟཱ ཨཱཎཱཔཀོ མུཙྩཏི, ཨིཏརོ ཀམྨུནཱ བཛ྄ཛྷཏི. ཡདི ‘‘ཨམུཀསྨིཾ རཏྟིཊྛཱནེ ཝཱ དིཝཱཊྛཱནེ ཝཱ ནིསིནྣཾ ཨཱིདིསཾ མཱརེཧཱི’’ཏི ཨོཀཱསཾ ནིཡམེཏྭཱ ཨཱཎཱཔེཏི, ཏཏྠ ཨཱཎཱཔཀཏོ ཨཉྙསྨིཾ མཱརིཏེ ཨུབྷིནྣམྤི པཱརཱཛིཀཾ. ཏཏོ བཧི མཱརིཏེ ཝདྷཀསྶེཝ ཀམྨབནྡྷོ. ཨཱཎཱཔཀོ ཨཏྟཱནམེཝ ཨུདྡིསྶ ཨཱཎཱཔེཏི, ཨིཏརོ ཙ ཏམེཝ ཏཏྠ མཱརེཏི, ཨཱཎཱཔཀསྶ དུཀྐཊཾ, ཨཱཎཏྟསྶ པཱརཱཛིཀཾ. སཙེ ཨཉྙཏྠ མཱརེཏི, མཱུལཊྛོ མུཙྩཏི. ཨཛཱནིཏྭཱ ཨཉྙཾ ཏཏྠ ཝཱ ཨཉྙཏྠ ཝཱ མཱརེཏི, ཝདྷཀོ པཱརཱཛིཀཾ ཨཱཔཛྫཏི, མཱུལཊྛོ མུཙྩཏི. ཨཱནནྟརིཡཝཏྠུམྷི ཨཱནནྟརིཡེན སདྡྷིཾ ཡོཛེཏབྦཾ.

༢༨༢. ཡོ མནུསྶཾ ཀཉྩི ཨུདྡིསྶ སཙེ ཨོཔཱཏཾ ཁཎཏི, ཏཐཱ ཨོཔཱཏཾ ཁཎནྟསྶ ཏསྶ དུཀྐཊཾ ནཱམ ཨཱཔཏྟི ཧོཏཱིཏི ཨཛ྄ཛྷཱཧཱརཡོཛནཱ. ཡོཛནཱ ཙ ནཱམེསཱ ཡཐཱརུཏཡོཛནཱ, ཨཛ྄ཛྷཱཧཱརཡོཛནཱཏི དུཝིདྷཱ. ཏཏྠ པཱཋཱགཏཔདཱནམེཝ ཡོཛནཱ ཡཐཱརུཏཡོཛནཱ, ཨཱུནཔཱུརཎཏྠམཛ྄ཛྷཱཧཱརཔདེཧི སཧ པཱཋཱགཏཔདཱནཾ ཡོཛནཱ ཨཛ྄ཛྷཱཧཱརཡོཛནཱཏི ཝེདིཏབྦཱ. ‘‘ཁཎནྟསྶ ¶ ཙ ཨོཔཱཏ’’ནྟི པོཏྠཀེསུ པཱཋོ དིསྶཏི. ‘‘ཁཎནྟསྶ ཏཐོཔཱཏ’ནྟི པཱཋོ སུནྡརོ’’ཏི ནིསྶནྡེཧེ ཝུཏྟཾ. ‘‘ཨཱཝཱཊནྟི ཨེཏསྶ ‘ཨོཔཱཏ’ནྟི པརིཡཱཡོ’’ཏི ཙ ཝུཏྟཾ. ཏཏོཔི –

‘‘མནུསྶཾ ཀཉྩི ཨུདྡིསྶ;

ཡོ ཙེ ཁཎཏིཝཱཊཀཾ;

ཁཎཏོ ཏཾ ཏཐཱ ཏསྶ;

ཧོཏི ཨཱཔཏྟི དུཀྐཊ’’ནྟི. –

པཱཋོ ¶ སུནྡརཏརོ. ཛཱཏཔཐཝིཾ ཁཎནྟསྶ པཱརཱཛིཀཔཡོགཏྟཱ པཡོགགཎནཱཡ དུཀྐཊཾ.

༢༨༣. ཏཏྠཱཏི ཏསྨིཾ ཨཱཝཱཊེ. ཏསྶཱཏི པཏིཏསྶ མནུསྶཝིགྒཧསྶ. དུཀྑསྶུཔྤཏྟིཡཱཏི དུཀྑུཔྤཏྟིཧེཏུ. ཏསྶཱཏི ཡེན ཨཱཝཱཊོ ཁཏོ, ཏསྶ བྷིཀྑུནོ. པཏིཏྭཱ སོ ཙེ མརཏི, ཏསྨིཾ མཏེ ཏསྶ བྷིཀྑུནོ པཱརཱཛིཀཾ བྷཝེཏི ཡོཛནཱ.

༢༨༤. ཨཉྙསྨིནྟི ཡཾ སམུདྡིསྶ ཨཱཝཱཊོ ཁཏོ, ཏཏོ ཨཉྙསྨིཾ. ཨནུདྡིསྶཀནྟི ཀིརིཡཱཝིསེསནཾ, ཨནུདྡིསྶཀཾ ཀཏྭཱཏི ཨཏྠོ. ཨོཔཱཏཝིསེསནཾ ཙེ, ‘‘ཨནུདྡིསྶཀོ ཨོཔཱཏོ’’ཏི པདཙྪེདོ. ‘‘ཨགྒམཀྑཱཡཏཱི’’ཏིཨཱདཱིསུ (སཾ. ནི. ༥.༡༣༩; ཨ. ནི. ༤.༣༤; ༡༠.༡༥; ཨིཏིཝུ. ༩༠; ནེཏྟི. ༡༧༠) ཝིཡ ཨོ-ཀཱརཊྛཱནེ ཨ-ཀཱརོ, མ-ཀཱརཱགམོ ཙ དཊྛབྦོ, ཨནོདིསྶཀོ ཨོཔཱཏོ ཁཏོ ཧོཏཱིཏི ཨཏྠོ.

༢༨༥. ‘‘ཨེཏྠ པཏིཏྭཱ ཡོ ཀོཙི མརཏཱུ’’ཏི ཨནོདིསྶཀོ ཨོཔཱཏོ སཙེ ཁཏོ ཧོཏི, ཡཏྟཀཱ ནིཔཏིཏྭཱ མརནྟི ཙེ, ཨསྶ ཏཏྟཀཱ དོསཱ ཧོནྟཱིཏི ཡོཛནཱ. ‘‘ཡོ ཀོཙཱི’’ཏི ཨིམིནཱ ཨཏྟནོ མཱཏཱཔིཏརོ ཙ སངྒཧིཏཱ. དོསཱཏི ཀམྨབནྡྷདོསཱ, པཱརཱཛིཀཾ པན ཨེཀམེཝ. ཨསྶཱཏི ཡེན ཨནོདིསྶ ཨོཔཱཏོ ཁཏོ, ཏསྶ.

༢༨༦. ཨཱནནྟརིཡཝཏྠུསྨིཾ མཏེཏི པཱཋསེསོ, ‘‘ཏཏྠ པཏིཏྭཱ’’ཏི ཨདྷིཀཱརོ, ཨརཧནྟེ, མཱཏརི, པིཏརི ཙ ཏསྨིཾ པཏིཏྭཱ མཏེ ཀཱལཀཏེཏི ཨཏྠོ. ཨཱནནྟརིཡཀནྟི ཨེཏྠ སཀཏྠེ, ཀུཙྪིཏེ ¶ , སཉྙཱཡཾ ཝཱ ཀ-པཙྩཡོ དཊྛབྦོ. ‘‘ཏཐཱ’’ཏི ཨིམིནཱ ‘‘ཨཱནནྟརིཡཝཏྠུསྨི’’ནྟི ཨིམསྨིཾ སམཱསཔདེ ¶ ཨཝཡཝབྷཱུཏམྤི ‘‘ཝཏྠུསྨི’’ནྟི ཨིདཉྩ ‘‘ཏཏྠ པཏིཏྭཱ མཏེ’’ཏི ཨིདཉྩ ཨཱཀཌྜྷཏི. ཐུལླཙྩཡཱདཱིནཾ ཝཏྠུསྨིཾ ཏཏྠ པཏིཏྭཱ མཏེ ཐུལླཙྩཡཱདཡོ ཧོནྟཱིཏི ཡོཛནཱ. ཏསྨིཾ ཨཱཝཱཊེ པཏིཏྭཱ ཡཀྑཱདཱིསུ མཏེསུ, པཱརཱཛིཀཝཏྠུནོ དུཀྑུཔྤཏྟིཡཉྩ ཐུལླཙྩཡཾ, མནུསྶཝིགྒཧེ མཏེ པཱརཱཛིཀཾ, ཏིརཙྪཱནེ མཏེ པཱཙིཏྟིཡནྟི ཝུཏྟཾ ཧོཏི.

༢༨༧. པཱཎཱཏིཔཱཏཱ དྭེཏི དྭིནྣཾ མཏཏྟཱ དྭེ པཱཎཱཏིཔཱཏཱ, ཨེཀེན པཱརཱཛིཀཾ, ཨིཏརེན ཀམྨབནྡྷོཡེཝ. ཨེཀོཝེཀེཀདྷཾསནེཏི མཱཏུ ཝཱ དཱརཀསྶ ཝཱ མརཎེ ཨེཀོ པཱཎཱཏིཔཱཏོཝ.

༢༨༨. ཙོརེཧི ཨནུབདྡྷོ ཨེཏྠ ཨཱཝཱཊེ པཏིཏྭཱ མརིསྶཏི ཙེ, ཨོཔཱཏཁཎཀསྶེཝ པཱརཱཛིཀཾ ཧོཏི ཀིརཱཏི ཡོཛནཱ. ཀིརཱཏི ཨནུསྶཝནེ ཨརུཙིསཱུཙཀཾ.

༢༨༩-༩༠. ཝེརིནོ བྷིཀྑུཏོ ཨཉྙེ ཝེརིཔུགྒལཱ. ཏཏྠ ཏསྨིཾ ཨོཔཱཏེ སཙེ མནུསྶཾ པཱཏེཏྭཱ མཱརེནྟི, ཏཐཱ ཝེརིནོ ཏཏྠ སཡམེཝ པཏིཏཾ མནུསྶཾ བཧི ནཱིཧརིཏྭཱ སཙེ མཱརེནྟི, ཏཏྠ ཨོཔཔཱཏིཀཱ མནུསྶཱ ཨོཔཱཏེ ནིབྦཏྟིཏྭཱ ཏཏོ ནིཀྑནྟུཾ ཨསཀྐོནྟཱ མཏཱ ཙེ སིཡུཾ, སབྦཏྠ ཙ ཡཐཱཝུཏྟསབྦཝཱརེསུ ཨོཔཱཏཁཎཀསྶེཝ པརཱཛཡོཏི ཡོཛནཱ. ནིབྦཏྟིཏྭཱ ཧཱིཏི ཨེཏྠ ཧཱིཏི པདཔཱུརཎེ. ཡཏྠ ཡཏྠ ནིཔཱཏསདྡཱནཾ ཨཏྠོ ན དསྶིཏོ, ཏཏྠ ཏཏྠ པདཔཱུརཎམཏྟཏཱ ཝེདིཏབྦཱ.

༢༩༡. ཡཀྑཱདཡོཏི ཨཱདི-སདྡེན ཏིརཙྪཱནཱནཾ སངྒཧོ. ཝཏྠུཝསཱཏི ཐུལླཙྩཡཔཱཙིཏྟིཡཱནཾ ཝཏྠུབྷཱུཏཡཀྑཏིརཙྪཱནཱནཾ ཝསཱ. ཐུལླཙྩཡཱདཡོཏི ཨཱདི-སདྡེན པཱཙིཏྟིཡསངྒཧོ.

༢༩༣. ཨཡཾ ¶ ནཡོཏི ‘‘ཨནཱཔཏྟཱི’’ཏི ཡཐཱཝུཏྟོ ནཡོ.

༢༩༤-༥. བཛ྄ཛྷནྟཱིཏི སཙེ ཨཝསྶཾ བཛ྄ཛྷནྟི. ཏཏྠཱཏི ཏསྨིཾ པཱསེ. ‘‘ཧཏྠཏོ མུཏྟམཏྟསྨི’’ནྟི ཨིམིནཱ པཡོགསྶ ཨཏྠསཱདྷཀཏཾ དཱིཔེཏི.

༢༩༦. ཡཾ ¶ པན ཨུདྡིསྶ པཱསོ ཨོཌྜིཏོ, ཏཏོ ཨཉྙསྶ བནྡྷནེ ཏུ ཨནཱཔཏྟི པཀཱསིཏཱཏི ཡོཛནཱ.

༢༩༧. མུདྷཱ ཝཱཔཱིཏི ཨམཱུལེན ཝཱཔི. མཱུལཊྛསྶེཝཱཏི པཱསཀཱརཀསྶེཝ. ཀམྨབནྡྷོཏི པཱཎཱཏིཔཱཏོ. བཛ྄ཛྷཏི ཨེཏེནཱཏི བནྡྷོ, ཀམྨམེཝ བནྡྷོ ཀམྨབནྡྷོ. པཱརཱཛིཀམཏྟེ ཝཏྟབྦེཔི ཡཱཝ སོ ཝཏྟཏི, ཏཱཝ ཏཏྠ བཛ྄ཛྷིཏྭཱ མཏསཏྟེསུ པཋམམཏསྶ ཝསེན པཱརཱཛིཀཾ, ཨཝསེསཱནཾ པཱཎཱཏིཔཱཏསངྑཱཏསྶ ཨཀུསལརཱསིནོ སམྦྷཝཏོ ཏཾ སབྦཾ སངྒཧེཏྭཱ སཱམཉྙེན དྭཡམྤི དསྶེཏུམཱཧ ‘‘ཀམྨབནྡྷོ’’ཏི.

༢༩༨. ‘‘སཙེ ཡེན ལདྡྷོ, སོ ཨུགྒལི༹ཏཾ ཝཱ པཱསཾ སཎྛཔེཏི, ཏསྶ པསྶེན ཝཱ གཙྪནྟེ དིསྭཱ ཝཏིཾ ཀཏྭཱ སམྨུཁེ པཝེསེཏི, ཐདྡྷཏརཾ ཝཱ པཱསཡཊྛིཾ ཋཔེཏི, དལ༹ྷཏརཾ ཝཱ པཱསརཛྫུཾ བནྡྷཏི, ཐིརཏརཾ ཝཱ ཁཱཎུཀཾ ཨཱཀོཊེཏཱི’’ཏི (པཱརཱ. ཨཊྛ. ༢.༡༧༦) ཨཊྛཀཐཱགཏཾ ཝིནིཙྪཡཾ སངྒཧིཏུམཱཧ ‘‘པཱསམུགྒལི༹ཏམྤི ཝཱ’’ཏི. ཨེཏྠ ཨཝུཏྟསམུཙྩཡཏྠེན པི-སདྡེན ‘‘སཎྛཔེཏཱི’’ཏིཨཱདིཀཱ ‘‘བནྡྷཏཱི’’ཏི དསྶིཏཀིརིཡཱཝསཱནཱ པཡོགཱ དསྶིཏཱ. ཐིརཾ ཝཱཔཱིཏི ཨེཏྠ ཨཔི-སདྡོ ཨཊྛཀཐཱཡ ཨཝསིཊྛཾ ‘‘ཁཱཎུཀཾ ཨཱཀོཊེཏཱི’’ཏི ཀིརིཡཾ སམུཙྩིནོཏི ཨུབྷཡཏྠཔི པཀཱརནྟརཝིཀཔྤཏྠཏྟཱཏི གཧེཏབྦཱ. ཨེཝནྟི ¶ ཨེཝཾ སཏི. ཡེན པཱསོ ལདྡྷོ, ཏེནཱཔི ཨེཝཾ པཱསེ ཀཏཝིསེསེ སཏཱིཏི ཝུཏྟཾ ཧོཏི. ཨུབྷིནྣནྟི པཱསཀཱརཀསྶ ཙ ཨིདཱནི ལབྷིཏྭཱ པཊིཛགྒནྟསྶ ཙཱཏི ཨུབྷཡེསཾ.

༢༩༩-༣༠༠. ཡོཏི པཱསཀཱརཀོ, ལདྡྷཔཱསཀོཏི ཨིམེསཾ ཡོ ཀོཙི. ཨུགྒལཱ༹པེཏྭཱཏི ཝིགྷཱཊེཏྭཱ, ཡཐཱ ཏཏྠ པཱཎིནོ ན བཛ྄ཛྷནྟི, ཨེཝཾ ཀཏྭཱཏི ཨཏྠོ. ཏཏྠ ཙཱཏི པུན སཎྛཔིཏེ པཱསེ ཙ. ཀོ ཝིམུཙྩཏི? ཡེན ལདྡྷོ, སོ.

༣༠༡-༢. གོཔེཏྭཱཏི གོཔནཧེཏུ མོཀྑོ ན ཧོཏཱིཏི ཡོཛནཱ. ‘‘སཱིཧཾ དིསྭཱ བྷཡཾ ཧོཏཱི’’ཏིཨཱདཱིསུ ཝིཡ ཧེཏུམྷི ཏྭཱ-པཙྩཡོ དཊྛབྦོ. ཏམཉྙོ…པེ… ན ཙ མུཙྩཏཱིཏི ཨེཏྠ ན ཙཱཏི ནེཝ. ནཱསེཏྭཱ སབྦསོ ཝཱཏི སོ ཡཐཱ ཡསྶ ཀསྶཙི སཏྟསྶ ཝིནཱསོཔཀརཎཾ ན ཧོཏི, ཏཐཱ ཚིནྡནཱདཱིཧི ནཱསེཏྭཱ. ཏཾ པཱསཡཊྛིཾ. ཀོ ཝིམུཙྩཏི? པཱསཀཱརཀོ.

༣༠༣. སཱུལཾ ¶ རོཔེནྟསྶཱཏི སཱུལཾ ནིཁཎནྟསྶ. སཛྫེནྟསྶཱཏི སཎྛཔེནྟསྶ.

༣༠༤. ཨསཉྩིཙྩཱཏི ཨེཏྠ ‘‘ཀཏེན པཡོགེནཱ’’ཏི པཱཋསེསོ, ‘‘མཏེཔི ཨནཱཔཏྟཱི’’ཏི ཨེཏེཧི སམྦནྡྷོ. ‘‘ཨིམིནཱཧཾ ཨུཔཀྐམེན ཨིམཾ མཱརེསྶཱམཱི’’ཏི ཨཙེཏེཏྭཱ ཨཔཀཔྤེཏྭཱ ཨཝདྷཀཙེཏནོ ཧུཏྭཱ ཀཏེན ཨཉྙཏྠིཀེནཔི ཨུཔཀྐམེན པརེ མཏེཔི ཨཱཔཏྟི ནཏྠཱིཏི ཨཏྠོ, མུསལུསྶཱཔནཱདིཝཏྠཱུསུ (པཱརཱ. ༡༨༠) ཝིཡ ཨཡཾ སཏྟོཏིསཉྙཱི ཧུཏྭཱ ‘‘ཨིམིནཱ ཨུཔཀྐམེན ཨིམཾ མཱརེསྶཱམཱི’’ཏི ཝཱིཏིཀྐམསམུཊྛཱཔཀཙེཏནཱསམྤཡུཏྟཝིཀཔྤརཧིཏོ ཧུཏྭཱ ཨཉྙཏྠིཀེན པཡོགེན མནུསྶེ མཏེཔི པཱརཱཛིཀཾ ནཏྠཱིཏི ཝུཏྟཾ ཧོཏི.

ཨཛཱནནྟསྶཱཏི ¶ ‘‘ཨིམིནཱ ཨཡཾ མརིསྶཏཱི’’ཏི ཨཛཱནནྟསྶ ཨུཔཀྐམེན པརེ མཏེཔི ཨནཱཔཏྟི, ཝིསགཏཔིཎྜཔཱཏཝཏྠུམྷི (པཱརཱ. ༡༨༡) ཝིཡ ‘‘ཨིདཾ ཀཱརཎ’’ནྟི ཨཛཱནིཏྭཱ ཀཏེན མནུསྶེ མཏེཔི ཨནཱཔཏྟཱིཏི ཝུཏྟཾ ཧོཏི. ‘‘ཏཐཱ’’ཏི ཨིམིནཱ ‘‘ཨནཱཔཏྟཱི’’ཏི ཨཱཀཌྜྷཏི. ཨམརཎཙིཏྟསྶ ཨམརཎིཙྪཱསཧིཏཙིཏྟསྶ ཨུཔཀྐམེན པརེ མཏེཔི ཨནཱཔཏྟི ཝུདྡྷཔབྦཛིཏཱདིཝཏྠཱུསུ (པཱརཱ. ༡༨༠) ཝིཡཱཏི ཨཏྠོ. ཨུམྨཏྟཀཱདཡོ ཝུཏྟསརཱུཔཱཡེཝ.

༣༠༥. ‘‘མནུསྶཔཱཎིམྷཱི’’ཏི ཨིམིནཱ མནུསྶབྷཱཝོ ཨངྒབྷཱཝེན དསྶིཏོ. ‘‘སཙསྶ ཙིཏྟཾ མརཎཱུཔསཾཧིཏ’’ནྟི ཨིམིནཱ མརཎཱུཔསཾཧིཏཙིཏྟཏཱ དསྶིཏཱ.

ཨིཏི ཝིནཡཏྠསཱརསནྡཱིཔནིཡཱ

ཝིནཡཝིནིཙྪཡཝཎྞནཱཡ

ཏཏིཡཔཱརཱཛིཀཀཐཱཝཎྞནཱ ནིཊྛིཏཱ.

ཙཏུཏྠཔཱརཱཛིཀཀཐཱཝཎྞནཱ

༣༠༦-༧. ཨེཝཾ ནཱཏིསངྑེཔཝིཏྠཱརནཡེན ཏཏིཡཔཱརཱཛིཀཝིནིཙྪཡཾ དསྶེཏྭཱ ཨིདཱནི ཙཏུཏྠཔཱརཱཛིཀཝིནིཙྪཡཾ དསྶེཏུམཱཧ ‘‘ཨསནྟ’’ནྟིཨཱདི. ཏཏྠ ‘‘ཨསནྟ’’ནྟི ཨཔེཀྑིཏྭཱ ‘‘ཨཏྟནཱི’’ཏི ཙ ‘‘ཛྷཱནཱདིབྷེད’’ནྟི ཨཔེཀྑིཏྭཱ ‘‘ཨུཏྟརིམནུསྶདྷམྨ’’ནྟི ཙ ‘‘སམུདཱཙརེཡྻཱ’’ཏི ཨཔེཀྑིཏྭཱ ‘‘ཡོ བྷིཀྑཱུ’’ཏི ཙ སཱམཏྠིཡཱ ལབྦྷཏཱིཏི ཨཛ྄ཛྷཱཧརིཏྭཱ ‘‘ཨཏྟནི ཨསནྟ’’ནྟིཨཱདིནཱ ནཡེན ཡོཛེཏབྦཾ.

ཨཏྟནི ¶ ཨསནྟནྟི ཏསྨིཾ ཨཏྟབྷཱཝེ ཨཏྟནོ སནྟཱནེ ཨནུཔྤཱདིཏཏཱཡ ཨཝིཛྫམཱནཾ. ཨཏྟསྶིཏམེཝ ཀཏྭཱཏི ཨཏྟུཔནཱཡིཀཾ ཀཏྭཱ ཨཏྟནི ཝིཛྫམཱནཾ ཝིཡ ཀཏྭཱ ཏཾ ཨུཔནེཏྭཱ ¶ . བྷཝཾ ཨདྷིཊྛཱཡ ཙ ཝཏྟམཱནནྟི པཊིསནྡྷིཏོ པཊྛཱཡ ཙ ཝཏྟནྟཾ བྷཝཾ ཙིཏྟེན ཨདྷིཊྛཧིཏྭཱ ཏཀྐེཏྭཱ, ཙིཏྟེ ཋཔེཏྭཱཏི ཝུཏྟཾ ཧོཏི. ཨཉྙཱཔདེསཉྩ ཝིནཱཏི ‘‘ཡོ ཏེ ཝིཧཱརེ ཝསཏཱིདྷ བྷིཀྑཱུ’’ཏིཨཱདིནཱ ནཡེན ཝཀྑམཱནཾ པརིཡཱཡཀཐཾ ཋཔེཏྭཱ. ཨདྷིམཱནཉྩ ཝིནཱཏི ཨདིཊྛེ དིཊྛསཉྙིཏཱདིསབྷཱཝཾ ཨདྷིགཏམཱནསངྑཱཏཾ ‘‘ཨདྷིགཏཨུཏྟརིམནུསྶདྷམྨོ ཨཧམྷཱི’’ཏི ཨདྷིམཱནཉྩ ཋཔེཏྭཱ. ཛྷཱནཱདིབྷེདནྟི ཛྷཱནཱདཡོ བྷེདཱ ཝིསེསཱ ཡསྶ ཏཾ ཛྷཱནཱདིབྷེདཾ, ‘‘ཨུཏྟརིམནུསྶདྷམྨོ ནཱམ ཛྷཱནཾ ཝིམོཀྑོ སམཱདྷི སམཱཔཏྟི ཉཱཎདསྶནཾ མགྒབྷཱཝནཱ ཕལསཙྪི ཀིརིཡཱ ཀིལེསཔྤཧཱནཾ ཝིནཱིཝརཎཏཱ ཙིཏྟསྶ སུཉྙཱགཱརེ ཨབྷིརཏཱི’’ཏི (པཱརཱ. ༡༩༨, ༡༩༩) པདབྷཱཛནེ ཝུཏྟཾ ཛྷཱནཱདིདྷམྨཝིསེསནྟི ཨཏྠོ. ‘‘ཨུཏྟརིམནུསྶདྷམྨནྟི ཨུཏྟརིམནུསྶཱནཾ ཛྷཱཡཱིནཉྩེཝ ཨརིཡཱནཉྩ དྷམྨ’’ནྟི (པཱརཱ. ཨཊྛ. ༢.༡༩༧) ཨཊྛཀཐཱཡ ཝུཏྟཾ ཛྷཱནལཱབྷཱིཧི ཙེཝ ཨཊྛཧི ཨརིཡཔུགྒལེཧི ཙ ཨདྷིགཏཏྟཱ ཏེསཾ སནྟཀནྟི སངྑྱཾ གཏཾ ཨུཏྟརིམནུསྶདྷམྨཾ.

ཝིཉྙཏྟིཔཐེ ཋིཏསྶ ཀཱཡེན ཝཱ ཝཱཙཱཡ ཝཱ ཡོ བྷིཀྑུ སམུདཱཙརེཡྻཱཏི ཨཛ྄ཛྷཱཧརིཏྭཱ ཡོཛེཏབྦཾ. ཝིཉྙཏྟིཔཐེ ཋིཏསྶཱཏི དྭཱདསཧཏྠབྦྷནྟརེ པདེསེ ཋིཏསྶ ‘‘ཨིཏྠིཡཱ ཝཱ པུརིསསྶ ཝཱ གཧཊྛསྶ ཝཱ པབྦཛིཏསྶ ཝཱ’’ཏི (པཱརཱ. ༡༩༨) པདབྷཱཛནེ ཝུཏྟསྶ ཡསྶ ཀསྶཙི. ཀཱཡེན ཝཱཏི ཧཏྠམུདྡཱདིཝསེན ཀཱཡེན ཝཱ. ‘‘སིཀྑཱཔཙྩཀྑཱནཾ ཧཏྠམུདྡཱཡ སཱིསཾ ན ཨོཏརཏི, ཨིདཾ ཨབྷཱུཏཱརོཙནཾ ཧཏྠམུདྡཱཡཔི ཨོཏརཏཱི’’ཏི (པཱརཱ. ཨཊྛ. ༢.༢༡༥) ཨཊྛཀཐཱཡཾ ཝུཏྟཏྟཱ ཨིདྷ ཧཏྠམུདྡཱདིཧཏྠཝིཀཱརོ ཙ ཨངྒཔཙྩངྒཙོཔནཉྩ ‘‘ཀཱཡེནཱ’’ཏི ཨིམིནཱ གཧེཏབྦཾ. ཝཱཙཱཡ ཝཱཏི ཡོ སཝནཱུཔཙཱརེ ཋིཏོ ཏེན ཝིཉྙཱཏུཾ སཀྐུཎེཡྻེན ཡེན ཀེནཙི ཝོཧཱརེན ཝཱ. ཡོ བྷིཀྑཱུཏི ཡོ ཨུཔསམྤནྣོ ཐེརོ ཝཱ ནཝོ ¶ ཝཱ མཛ྄ཛྷིམོ ཝཱ. སམུདཱཙརེཡྻཱཏི ‘‘པཋམཾ ཛྷཱནཾ སམཱཔཛྫཱམཱི’’ཏིཨཱདིཝཙནཔྤཀཱརེསུ ཡཾ ཀཉྩི པཀཱརཾ ཝདེཡྻ. ཏདཏྠེཏི ཏེན ཝུཏྟཝཱཀྱསྶ ཨཏྠེ. ཉཱཏེཝཱཏི ཉཱཏེ ཨེཝ. མཱཏུགཱམཾ ཝཱ པུརིསཾ ཝཱ ཡཾ ཀིཉྩི ཨུདྡིསྶ ཝུཏྟེ, ཏེནེཝ ཝཱ ཨནུདྡིསྶ ཝུཏྟེ སཝནཱུཔཙཱརེ ཋིཏེན ཡེན ཀེནཙི མནུསྶབྷཱུཏེན ཝཙནསམནནྟརམེཝ ‘‘ཨཡཾ པཋམཛ྄ཛྷཱནལཱབྷཱི’’ཏིཨཱདིཀེ ཡཐཱཝུཏྟེ ཨཏྠཔྤཀཱརེ ཉཱཏེཡེཝ. ‘‘སོ’’ཏི ཨཛ྄ཛྷཱཧརིཏྭཱ ‘‘སོ པུན རུལ༹ྷིབྷཱཝེ ཨབྷབྦོ’’ཏི ཡོཛེཏབྦཾ, ཨཏྟནི ཨཝིཛྫམཱནགུཎཾ སནྟཾ ཝིཡ ཀཏྭཱ ཨིཙྪཱཙཱརེ ཋཏྭཱ ཨེཝཾ ཀཐིཏཔུགྒལོ སཱིལེ པཏིཊྛཱཡ ཨུཔརཱུཔརི ལབྦྷམཱནལོཀིཡལོཀུཏྟརགུཎེཧི བུདྡྷིསངྑཱཏཾ སཱསནེ བུདྡྷིམདྷིགནྟུཾ ཨནརཧོཏི ཨཏྠོ ¶ . ཀིཾ ཝིཡཱཏི ཨཱཧ ‘‘ཡཐེཝ…པེ… རུལི༹བྷཱཝེ’’ཏི. ‘‘ཡཐཱ’’ཏི ཨེཏེན སམྦནྡྷོ ‘‘ཏཐཱ’’ཏི, ཡཐཱ ཏཱལོ མཏྠཀཙྪིནྣོ ཨབྷབྦོ པུན ཝིརུལ༹ྷིཡཱ, སོཔི པཱརཱཛིཀཾ ཨཱཔནྣོ ཏཐེཝ དཊྛབྦོཏི ཨཏྠོ.

༣༠༨-༩. ཨིདཱནི ‘‘ཉཱཏེཝ ཨབྷབྦོ’’ཏི ཙ ‘‘ཨཉྙཱཔདེསཉྩ ཝིནཱ’’ཏི ཙ ཨེཏསྨིཾ ཝཱཀྱདྭཡེ བྱཏིརེཀཏྠཝསེན སམྦྷཝནྟཾ ཨཱཔཏྟིབྷེདཾ དསྶེཏུམཱཧ ‘‘ཨསནྟམེཝཱ’’ཏིཨཱདི.

ཨནནྟརནྟི ‘‘པཋམཾ ཛྷཱནཾ སམཱཔཛྫཱམཱི’’ཏིཨཱདིཝཙནསམནནྟརམེཝ. སོཏི དྭཱདསཧཏྠབྦྷནྟརེ ཋཏྭཱ ཡེན ཏཾ ཝཙནཾ སུཏཾ, སོ པརོ པུགྒལོ. ཛཱནཱཏི ཙེཏི ‘‘ཨཡཾ པཋམཛ྄ཛྷཱནལཱབྷཱི’’ཏིཨཱདིཝསེན ཏེན ཝུཏྟཝཙནཔྤཀཱརེན ཨཏྠཾ ཨཝིརཱདྷེཏྭཱ ཨཙིརེནེཝ སཙེ ཛཱནཱཏཱིཏི ཨཏྠོ. ཡོ པན ཛྷཱནཱདཱིནཾ ཨཏྟནཱ ཨལདྡྷབྷཱཝེན ཝཱ ཨཱགམེ ཨུགྒཧཔརིཔུཙྪཱདིཝསེན ཨཔརིཙིཏཏྟཱ ཝཱ ཛྷཱནཱདིསརཱུཔཾ ཨཛཱནནྟོཔི ¶ ཀེཝལཾ ‘‘ཛྷཱནཾ ཝིམོཀྑོ སམཱདྷི སམཱཔཏྟཱི’’ཏིཨཱདིཝཙནཱནཾ སུཏཔུབྦཏྟཱ ཏེན ‘‘པཋམཾ ཛྷཱནཾ སམཱཔཛྫཱམཱི’’ཏིཨཱདིཝཙནེ ཝུཏྟེ ‘‘ཛྷཱནཾ ཀིར ཨེས སམཱཔཛྫཏཱི’’ཏི ཡདི ཨེཏྟཀམཏྠམྤི ཛཱནཱཏི, སོཔི ‘‘ཛཱནཱཏི’’ཙྩེཝ ཨཊྛཀཐཱཡཾ (པཱརཱ. ཨཊྛ. ༢.༢༡༥) ཝུཏྟོཏི གཧེཏབྦོ. ཙུཏོ ཧཱིཏི ཧི-སདྡོ ཨཝདྷཱརཎེ, ཨཏྟནཱ ཝུཏྟེ ཏེན ཏཏྟཀེཡེཝ ཉཱཏེ སོ ཨསནྟགུཎདཱིཔཀོ པཱཔཔུགྒལོ ཕལསམྤཏྟིསམྤནྣཾ ཨིམཾ སཱསནཱམཏམཧཱཔཱདཔཾ ཨཱརུཡ྄ཧཱཔི ཕལཾ ཨཔརིབྷུཉྫིཏྭཱ ཝིརཱདྷེཏྭཱ པཏིཏྭཱ མཏོ ནཱམ ཧོཏཱིཏི ཝུཏྟཾ ཧོཏི. ཨིམསྶེཝཏྠསྶ ‘‘ཨསནྟ’’མིཙྩཱདིནཱ པཋམཾ ཝུཏྟསྶཔི བྱཏིརེཀཏྠཾ དསྶེཏུཾ ཨནུཝཱདཝསེན ཝུཏྟཏྟཱ པུནརུཏྟིདོསོ ན ཧོཏཱིཏི དཊྛབྦཾ.

ཨིདཱནི ཏཾ བྱཏིརེཀཏྠཾ དསྶེཏུམཱཧ ‘‘ནོ ཙེ…པེ… ཧོཏཱི’’ཏི. ཡསྶ སོ ཨཱརོཙེཏི, སོ ཙེ ན ཛཱནཱཏི, ཨསྶ ཨསནྟགུཎདཱིཔཀསྶ མུསཱཝཱདིནོ.

‘‘ཨཉྙཱཔདེསཉྩ ཝིནཱ’’ཏི ཨིམིནཱ དསྶིཏབྱཏིརེཀཏྠསྶ བྷཱཝཱབྷཱཝེ སམྦྷཝནྟཾ ཨཱཔཏྟིབྷེདཾ དསྶེཏུམཱཧ ‘‘ཡོ ཏེ’’ཏིཨཱདི. ཡོ བྷིཀྑུ ཏེ ཏཝ ཨིདྷ ཨིམསྨིཾ ཝིཧཱརེ ཝསཏཱིཏི ཡོཛནཱ. དཱིཔིཏེཏི ཨཏྟནོ ཨདྷིཔྤཱཡེ པཀཱསིཏེ. ཛཱནཱཏི ཙེཏི ཡོ ཏཐཱ ཝུཏྟཝཙནཾ ཨསྶོསི, སོ ‘‘ཨེས ཨཉྙཱཔདེསེན ཨཏྟནོ ཛྷཱནལཱབྷིཏཾ དཱིཔེཏཱི’’ཏི ཝཱ ‘‘ཨེསོ ཛྷཱནལཱབྷཱི’’ཏི ¶ ཝཱ ཝཙནསམནནྟརམེཝ སཙེ ཛཱནཱཏི. ཨསྶཱཏི ཨེཝཾ ཀཐིཏཝཙནཝཏོ ཏསྶ བྷིཀྑུནོ. ཏཾ ཏེན ཝུཏྟཝཙནཾ. དུཀྐཊམེཝ ཧོཏི, ན ཐུལླཙྩཡནྟི ཨཏྠོ. ཨཏྟནོ ཨཱཝཱསཀཱརཱནཾ དཱཡཀཱནཾ ཨཉྙསྶ པཝཏྟིཾ ཀཐེནྟསྶ ཝིཡ ཨཏྟནོཡེཝ ཨསནྟགུཎཾ སནྟམིཝ ¶ ཀཏྭཱ ཀཐནཱཀཱརོ ཨིམཱཡ གཱཐཱཡ ཨཏྠཏོ ཝུཏྟོཏི དཊྛབྦོ.

ཨེཏྠ ཙ ཛྷཱནལཱབྷཱིཏི ཙཱཏི ཨཝུཏྟསམུཙྩཡཏྠེན ཙ-སདྡེན པཱལི༹ཡཾ (པཱརཱ. ༢༢༠) ཨཱགཏཱ ཨཝསེསཔརིཡཱཡཝཱརཱ ཙ སངྒཧིཏཱཏི དཊྛབྦཾ. ཏཐཱ ཛྷཱནལཱབྷཱིཏི ཨེཏྠ ཛྷཱནགྒཧཎེན ཝིམོཀྑཱདཱིནཉྩ ཨུཔལཀྑིཏཏྟཱ ཛྷཱནཱདིདསཝིདྷཨུཏྟརིམནུསྶདྷམྨཝིསཡཔརིཡཱཡཀཐཾ སུཏཝཏཱ ཏངྑཎེ ཏདཏྠེ ཉཱཏེ པརིཡཱཡསམུལླཱཔཀེན ཨཱཔཛྫིཏབྦཾ ཐུལླཙྩཡཉྩ ཨཝིཉྙཱཏེ ཝཱ ཙིརེན ཝིཉྙཱཏེ ཝཱ ཨཱཔཛྫིཏབྦཾ དུཀྐཊཉྩ ཨིམཱཡ གཱཐཱཡ ཨཏྠཏོ དསྶིཏམེཝཱཏི དཊྛབྦཾ.

༣༡༠. ཨེཏནྟི ཡཐཱཝུཏྟཔྤཀཱརཾ ཛྷཱནཱདིབྷེདཾ ཨུཏྟརིམནུསྶདྷམྨཾ. ཨདྷིམཱནཱཏི ‘‘ཨདྷིགཏོཧ’’ནྟི ཨེཝཾ ཨུཔྤནྣམཱནཱ, ཨདྷིཀམཱནཱཏི ཨཏྠོ, ‘‘ཨཡཾ དྷམྨོ མཡཱ ཨདྷིགཏོ’’ཏི དལ༹ྷམུཔྤནྣེན མཱནེན ཀཐེནྟསྶཱཏི ཝུཏྟཾ ཧོཏི. ཝུཏྟོ ཨནཱཔཏྟིནཡོཏི ཨཱཔཏྟིཡཱ ཨབྷཱཝོ ཨནཱཔཏྟི, སཱ ཨེཝ ནཡོ ནེཏབྦོ བུཛ྄ཛྷིཏབྦོཏི ཀཏྭཱ, ཨནཱཔཏྟཱིཏི ཝུཏྟཾ ཧོཏི. ‘‘ཨདྷིམཱནེནཱ’’ཏི ཨེཝཾ ཝུཏྟོ བྷགཝཏཱཏི ཨཏྠོ, ‘‘ཨདྷིགཏདྷམྨོཧ’’ནྟི ཨདྷིམཱནེན ‘‘ཨཧཾ པཋམཛ྄ཛྷཱནལཱབྷཱི’’ཏིཨཱདཱིནི ཝདནྟསྶ ཨནཱཔཏྟཱིཏི ཝུཏྟཾ ཧོཏི.

ཨཡམདྷིམཱནོ ཀསྶ ཧོཏི, ཀསྶ ན ཧོཏཱིཏི ཙེ? ཨརིཡཱནཾ ན ཧོཏི མགྒཔཙྩཝེཀྑཎཱདཱིཧི པཉྩཧི པཙྩཝེཀྑཎཱཧི སཉྫཱཏསོམནསྶཱནཾ ཝིཏིཎྞཀངྑཏྟཱ. དུསྶཱིལསྶཱཔི ན ཧོཏི ཏསྶ ཨརིཡགུཎཱདྷིགམེ ནིརུསྶཱཧཏྟཱ. སུསཱིལསྶཱཔི ཀམྨཊྛཱནཱནུཡོགརཧིཏསྶ ནིདྡཱརཱམཏཱདིམནུཡུཏྟསྶ ན ཧོཏི ཝིསྶཊྛབྷཱཝནཱབྷིཡོགཏྟཱ. སུཔརིསུདྡྷཱཡ སཱིལསམྤཏྟིཡཱ པཏིཊྛཱཡ སམཐབྷཱཝནཱམནུཡུཏྟསྶ རཱུཔཱརཱུཔསམཱཔཏྟིཡཾ པཏྟཱསིནོ ཝཱ ཝིཔསྶནཱབྷིཡུཏྟསྶ ¶ སོཔཀྐིལེསོདཡབྦཡཉཱཎལཱབྷིནོ ཝཱ ཨུཔྤཛྫཏི. སོ སམཐཝིཔསྶནཱབྷཱཝནཱཧི ཀིལེསསམུདཱཙཱརསྶ ཨབྷཱཝེ ཨུཔྤནྣེ ཏེ ཝིསེསབྷཱགིནོ བྷཝིཏུཾ ཨདཏྭཱ ཋིཏིབྷཱགིནོ ཀཏྭཱ ཋཔེཏཱིཏི ཝེདིཏབྦོ.

པནཱཏི ཨཔི-སདྡཏྠོ. ‘‘ཨེཝ’’ནྟི ཨིམིནཱ ‘‘ཨནཱཔཏྟིནཡོ ཝུཏྟོ’’ཏི པཙྩཱམསཏི. ‘‘ཨཝཏྟུཀཱམསྶཱ’’ཏི ཨིདཉྩ པཱལི༹ཡཾ ཨཱགཏཾ ‘‘ཨནུལླཔནཱདྷིཔྤཱཡསྶཱ’’ཏི ¶ (པཱརཱ. ༢༢༢, ༢༢༥) ཨིདཉྩ ཨནཏྠནྟརཾ. ཨཝཏྟུཀཱམསྶཱཏི ཨེཝཾ ཝུཏྟོཏི ཡོཛནཱ. ཀོཧཉྙེན པཱཔིཙྪཱཔཀཏསྶ ‘‘ཛྷཱནཱདཱིནཾ ལཱབྷིམྷཱི’’ཏི ཝདནྟསྶ ཨཛ྄ཛྷཱསཡོ ཨུལླཔནཱདྷིཔྤཱཡོ ནཱམ, ཏཐཱ ཨཧུཏྭཱ སབྲཧྨཙཱརཱིསུ ཨཉྙཾ བྱཱཀརོནྟསྶ ཨེཝམེཝ ཨནཱཔཏྟིབྷཱཝོ ཝུཏྟོ བྷགཝཏཱཏི ཨཏྠོ. ཨཱདིཀསྶཱཔི ཨེཝཾ ཝུཏྟོཏི ཡོཛནཱ. ‘‘ཨནཱཔཏྟི ཨཱདིཀམྨིཀསྶཱ’’ཏི (པཱརཱ. ༢༢༢) ཨཱདིཀམྨིཀསྶཱཔི ཨནཱཔཏྟིབྷཱཝོ ཝུཏྟོ བྷགཝཏཱཏི ཨཏྠོ. ཨིམསྨིཾ སིཀྑཱཔདེ ཝགྒུམུདཱཏཱིརིཡཱ བྷིཀྑཱུ ཨཱདིཀམྨིཀཱ. ཨཝུཏྟསམུཙྩཡཏྠེན ཏཐཱ-སདྡེན ཨིདྷ ཨཝུཏྟཨུམྨཏྟཀཁིཏྟཙིཏྟཝེདནཊྚཱ གཧིཏཱ.

༣༡༡. པཱཔིཙྪཏཱཏི ‘‘ཨེཝཾ མཾ ཛནོ སམྦྷཱཝེསྶཏཱི’’ཏི ཛྷཱནལཱབྷིཏཱདིཧེཏུཀཱཡ སམྦྷཱཝནཱཡ སམྦྷཱཝནཱནིམིཏྟསྶ པཙྩཡཔཊིལཱབྷསྶ པཏྠནཱསངྑཱཏཱཡ པཱཔིཀཱཡ ལཱམིཀཱཡ ཨིཙྪཱཡ སམནྣཱགཏབྷཱཝོ ཙ. ཏསྶཱཏི ཡཾ ཛྷཱནཱདིབྷེདབྷིནྣཾ ཨུཏྟརིམནུསྶདྷམྨཾ སམུལླཔི, ཏསྶ དྷམྨསྶ. ཨསནྟབྷཱཝོཏི ཨཏྟསནྟཱནེ པཙྩུཔྤནྣཛཱཏིཡཾ ཨནུཔྤཱདིཏབྷཱཝེན ཨཝིཛྫམཱནབྷཱཝོ. མནུསྶཀསྶ ཨཱརོཙནཉྩེཝཱཏི ཝུཏྟཝཙནསྶ ཨཏྠཾ ཏངྑཎེ ཛཱནནཀསྶ མནུསྶཛཱཏིཀསྶ ‘‘པཋམཾ ཛྷཱནཾ སམཱཔཛྫི’’ནྟིཨཱདིནཱ ནཡེན སཝནཱུཔཙཱརེ ¶ ཋཏྭཱ ཨཱརོཙནཉྩ. ནཉྙཱཔདེསེན ཨཱརོཙནཉྩཱཏི སམྦནྡྷོ. ‘‘ཡོ ཏེ ཝིཧཱརེ ཝསཏི, སོ བྷིཀྑུ པཋམཾ ཛྷཱནཾ སམཱཔཛྫཱི’’ཏིཨཱདིནཱ (པཱརཱ. ༢༢༠) ནཡེན པཝཏྟཨཉྙཱཔདེསཾ ཝིནཱ ཨུཛུཀམེཝ ཨཱརོཙནཉྩ. ཏདེཝ ཉཱཎནྟི ཏདཱ ཨེཝ ཉཱཎཾ, ཨཙིརཱཡིཏྭཱ ཝུཏྟཀྑཎེཡེཝ ཛཱནནནྟི ཨཏྠོ. ཨེཏྠཱཏི ཨིམསྨིཾ ཙཏུཏྠཔཱརཱཛིཀཱཔཏྟིཡཾ. དྷཱིརཱ ཝིནཡདྷརཱ.

༣༡༢. པཋམེ དུཏིཡེ ཙནྟེཏི མནུསྶཝིགྒཧཔཱརཱཛིཀཝཛྫིཏེ ཡཐཱཝུཏྟཔཱརཱཛིཀཏྟཡེ. པརིཡཱཡོ ན ཝིཛྫཏཱིཏི པཱརཱཛིཀཱཔཏྟིཔཐཾ པརིཡཱཡཝཙནཾ ན ལབྷཏི. ‘‘ན པནེཏརེ’’ཏི ཨིདཾ ཨེཏྠཱཔི ཡོཛེཏབྦཾ, ཨིཏརེ པན ཏཏིཡཔཱརཱཛིཀེ པརིཡཱཡོ ན ཝིཛྫཏཱིཏི ཨཏྠོ. ‘‘མརཎཝཎྞཾ ཝཱ སཾཝཎྞེཡྻཱ’’ཏི (པཱརཱ. ༡༧༢) ཙ ‘‘ཨམྦྷོ པུརིས ཀིཾ ཏུཡ྄ཧིམིནཱ’’ཏིཨཱདིནཱ (པཱརཱ. ༡༧༡) ཙ ‘‘ཡོ ཨེཝཾ མརཏི, སོ དྷནཾ ཝཱ ལབྷཏཱི’’ཏིཨཱདིནཱ (པཱརཱ. ༡༧༥) ཙ པརིཡཱཡེན ཝདནྟསྶ པཱརཱཛིཀམེཝཱཏི ཝུཏྟཾ ཧོཏི. ཨཱཎཏྟི པཱརཱཛིཀཧེཏུཨཱཎཏྟིཀཔྤཡོགོ. ན པནེཏརེཏི པཋམཙཏུཏྠཔཱརཱཛིཀདྭཡེ པན པཱརཱཛིཀཧེཏུབྷཱུཏཱ ཨཱཎཏྟི ན ལབྷཏཱིཏི ཨཏྠོ.

༣༡༣. ཨཱདཱིཏི ¶ པཋམཔཱརཱཛིཀཾ. ཨེཀསམུཊྛཱནནྟི ཨེཀཀཱརཎཾ. སམུཊྛཱཏི ཨཱཔཏྟི ཨེཏསྨཱཏི སམུཊྛཱནཾ, ཀཱརཎཾ ཀཱཡཱདི. ཏཾ པན ཚབྦིདྷཾ ཀཱཡོ, ཝཱཙཱ, ཀཱཡཝཱཙཱ, ཀཱཡཙིཏྟཾ, ཝཱཙཱཙིཏྟཾ, ཀཱཡཝཱཙཱཙིཏྟནྟི. ཏེསཾ ཝིནིཙྪཡཾ ཨུཏྟརེ (ཨུ. ཝི. ༣༢༥ ཨཱདཡོ) ཡཐཱགཏཊྛཱནེཡེཝ ཙ ཝཎྞཡིསྶཱམ. ཏཏྲིདཾ ཨེཀསམུཊྛཱནཾ ཨེཀཾ ཀཱཡཙིཏྟཾ སམུཊྛཱནཾ ཨེཏསྶཱཏི ཀཏྭཱ. ཏེནཱཧ ‘‘དུཝངྒཾ ཀཱཡཙིཏྟཏོ’’ཏི. ‘‘ཏཾ སམུཊྛཱན’’ནྟི ཨཛ྄ཛྷཱཧཱརོ. ཡེན སམུཊྛཱནེན པཋམཔཱརཱཛིཀཱཔཏྟི ཨུཔྤཛྫཏི, ཏཾསམུཊྛཱནསངྑཱཏཾ ¶ ཀཱརཎཾ. ཨངྒཛཱཏསངྑཱཏཾ ཀཱཡཉྩ སེཝནཙིཏྟཉྩཱཏི དྭཡཾ ཨངྒཾ ཨཝཡཝཾ ཨེཏསྶཱཏི དུཝངྒཾ, ཏདུབྷཡསབྷཱཝནྟི ཨཏྠོ ཡཐཱ ‘‘དུཝངྒཾ ཙཏུཏྠཛ྄ཛྷཱན’’ནྟི. སེསཱཏི ཨཝསིཊྛཱནི ཏཱིཎི པཱརཱཛིཀཱནི. ཏིསམུཊྛཱནཱཏི ཀཱཡཙིཏྟཾ, ཝཱཙཱཙིཏྟཾ, ཀཱཡཝཱཙཱཙིཏྟནྟི ཏིསམུཊྛཱནཱ ཏཱིཎི སམུཊྛཱནཱནི ཨེཏེསནྟི ཀཏྭཱ. ཏེསནྟི ཏེསཾ ཏིཎྞཾ སམུཊྛཱནཱནཾ. ཨངྒཱནཱིཏི ཨཝཡཝཱནི. སཏྟ ཀཱཡོ, ཙིཏྟཾ, ཝཱཙཱ, ཙིཏྟཾ, ཀཱཡོ, ཝཱཙཱ, ཙིཏྟནྟི, ཏཾསབྷཱཝཱཏི ཝུཏྟཾ ཧོཏི.

༣༡༤. ཨཱདཱིཏི མེཐུནདྷམྨཔཊིསེཝནཙིཏྟསམྤཡུཏྟཙེཏནཱསབྷཱཝཾ པཋམཔཱརཱཛིཀཾ. སུཁོཔེཀྑཱཡུཏཾ ཨུདཱིརིཏནྟི ཡོཛནཱ. ཨིཊྛཱལམྦཎཔཊིལཱབྷཱདིསོམནསྶཧེཏུམྷི སཏི སུཁཝེདནཱསམྤཡུཏྟཾ ཧོཏི, ཏསྨིཾ ཨསཏི ཨུཔེཀྑཱཝེདནཱཡ སམྤཡུཏྟཾ ཧོཏཱིཏི ཝུཏྟནྟི ཨཏྠོ.

ཏཏིཡཾ དུཀྑཝེདནནྟི ཏཏིཡཾ མནུསྶཝིགྒཧཔཱརཱཛིཀཾ དོསཙིཏྟསམྤཡུཏྟཙེཏནཱསབྷཱཝཏྟཱ དུཀྑཝེདནཱཡ སམྤཡུཏྟནྟི ཨཏྠོ.

དུཏིཡནྟི ཨདིནྣཱདཱནཙེཏནཱལཀྑཎཾ དུཏིཡཔཱརཱཛིཀཾ. ལོབྷེན པརསནྟཀཾ ཙོརིཀཱཡ གཎྷནྟསྶ སོམནསྶསམྤཡུཏྟཾ ཧོཏི, ཀོདྷེན ཨབྷིབྷཱུཏསྶ ཝིལུམྤིཏྭཱ ཝཱ ཝིལུམྤཱཔེཏྭཱ ཝཱ གཎྷཏོ དོམནསྶསམྤཡུཏྟཾ ཧོཏི, སོམནསྶཾ, དོམནསྶཉྩ ཝིནཱ ཨགྒཧེཏུཀཱམོ ཝིཡ ཧུཏྭཱ ཨུདཱསཱིནསྶ གཎྷཏོ ཨུཔེཀྑཱསམྤཡུཏྟཾ ཧོཏཱིཏི ‘‘ཏིཝེདནམུདཱིརིཏ’’ནྟི ཨཱཧ.

ཙཏུཏྠཉྩཱཏི ཨུཏྟརིམནུསྶདྷམྨསམུལླཔནཙེཏནཱལཀྑཎཾ ཙཏུཏྠཔཱརཱཛིཀཉྩ. སམྦྷཱཝནིཙྪཱཡ པཙྩཡཱསཱཡ ཝཱ ཏུཊྛཏུཊྛསྶེཝ ‘‘ཨཧཾ པཋམཾ ཛྷཱནཾ སམཱཔཛྫཱམཱི’’ཏིཨཱདིནཱ ནཡེན ¶ ཨཏྟནོ ཨུཏྟརིམནུསྶདྷམྨལཱབྷིཏཾ ཝདནྟསྶ སོམནསྶསམྤཡུཏྟཾ ཧོཏི, ཨཉྙཔུགྒལེསུ པཊིཧཏཙིཏྟསྶ ཀལཧཔུརེཀྑཱརཏཱཡ ཝདཏོ དོམནསྶསམྤཡུཏྟཾ ཧོཏི, པཙྩཡཱལཱབྷེན ཛིགྷཙྪཱདིདུཀྑཾ ¶ སཧིཏུམསཀྐུཎེཡྻཏཱཡ ཨུདཱསཱིནསྶ ཝདཏོ ཨུཔེཀྑཱསམྤཡུཏྟཾ ཧོཏཱིཏི ‘‘ཏིཝེདནམུདཱིརིཏ’’ནྟི ཨཱཧ.

༣༡༥. ཨཊྛ ཙིཏྟཱནཱིཏི ལོབྷསཧགཏཱནི ཨཊྛ ཙིཏྟཱནི ལབྦྷརེཏི ཡོཛནཱ, ལབྦྷནྟཱིཏི ཨཏྠོ, ཙེཏནཱསབྷཱཝེན པཋམཔཱརཱཛིཀེན སམྤཡུཏྟཱནཱིཏི ཝུཏྟཾ ཧོཏི. ཨེཝམུཔརིཔི. དུཝེཏི པཊིགྷསམྤཡུཏྟཱནི དྭེ ཙིཏྟཱནི. དས ཙིཏྟཱནཱིཏི ལོབྷསཧགཏཱནི ཨཊྛ, དྭེ པཊིགྷསམྤཡུཏྟཱནཱིཏི. ལབྦྷརེཏི སམྤཡུཏྟབྷཱཝེན ལབྦྷནྟི.

༣༡༦. ཏསྨཱཏི ཡསྨཱ ཡཐཱཝུཏྟཙིཏྟེཧི སམྤཡུཏྟཾ, ཏེན ཧེཏུནཱ. ཀྲིཡཱཏི ཀརཎེན ཨཱཔཛྫིཏབྦཏྟཱ ཀིརིཡཱ. ཝཱིཏིཀྐམསཉྙཱཡ ཨབྷཱཝེན མུཙྩནཏོ སཉྙཱཡ ཝིམོཀྑོ ཨེཏསྶཱཏི སཉྙཱཝིམོཀྑཾ. ལོཀཝཛྫནྟི ལོཀེན ཨཀུསལབྷཱཝཏོ ཝཛྫནཱིཡནྟི དཱིཔིཏཾ པཀཱསིཏཾ.

༣༡༧. ཨཱཔཏྟིཡཾཡེཝཱཏི ཨེཝཀཱརེན ན སིཀྑཱཔདེཏི དསྶེཏི. ཨིདཾ ཝིདྷཱནནྟི སམུཊྛཱནཱདིཀཾ ཨིདཾ ཡཐཱཝུཏྟཾ ཝིདྷཱནཾ. ཝིབྷཱཝིནཱཏི པཉྙཝཏཱ ཝིནཡདྷརེན.

༣༡༨-༩. མུདུཔིཊྛི ཙཱཏི ལཏཱ ཝིཡ ནམིཏྭཱ ཀརཎཾ དསྶེཏྭཱ ནཙྩིཏུཾ སམཝཱཧིཏྭཱ མུདུཀཏཔིཊྛིཀོ ཙ. ལམྦཱི ཙཱཏི པལམྦམཱནེན དཱིགྷེན ཨངྒཛཱཏེན ཡུཏྟོ. ལམྦཏཱིཏི ལམྦཾ, ཨངྒཛཱཏཾ, ཏཾ ཡསྶ ཨཏྠི སོ ལམྦཱི. ཨིམེ དྭེཔི ཀཱམཔརིལཱ༹ཧཱཏུརབྷཱཝེ སཏི ཨཏྟནོ ཨངྒཛཱཏཾ ཨཏྟནོ ¶ མུཁཾ, ཝཙྩམགྒཉྩ པཝེསེཏྭཱ ཝཱིཏིཀྐམིཏུམརཧཏྟཱ པཱརཱཛིཀཱཔནྣསདིསཏྟཱ པརིཝཛྫིཏཱ. མུཁགྒཱཧཱིཏི མུཁེན གཧཎཾ མུཁགྒཱཧོ, སོ ཨེཏསྶ ཨཏྠཱིཏི མུཁགྒཱཧཱི, པརསྶ ཨངྒཛཱཏཾ མུཁེན གཎྷནྟོཏི ཨཏྠོ. ནིསཱིདཀོཏི པརསྶ ཨངྒཛཱཏེ ཨཏྟནོ ཝཙྩམགྒེན ནིསཱིདནྟོ. ཨིམེ དྭེ སཧཝཱསིཀཱནཾ སཱིལཝིནཱསནཏོ ཨཉྙེཧི སཾཝསིཏུཾ ཨནརཧཱཏི པཱརཱཛིཀཱཔནྣསདིསཏྟཱ ཝིཝཛྫིཏཱ. ཏེསནྟི ཨསཾཝཱསཏཱསཱམཉྙེན ཙཏྟཱརོ པཱརཱཛིཀཱཔནྣེ སངྒཎྷཱཏི. ‘‘ཏེསཉྩ མགྒེནམགྒཔཊིཔཏྟིསཱམཉྙེན པཋམཔཱརཱཛིཀཱཔནྣསྶེཝ ཨནུལོམིཀཱཏི གཧེཏབྦཱ’’ ཨིཙྩེཝཾ ནིསྶནྡེཧེ ཝུཏྟཾ. ཨིམིནཱ ཙ ཨཀཏཝཱིཏིཀྐམཱནམྤི མུདུཔིཊྛིཨཱདཱིནཾ ཙཏུནྣཾ ཨནུལོམཔཱརཱཛིཀབྷཱཝོ ཝུཏྟོཏི ཝིཉྙཱཡཏི.

སམནྟཔཱསཱདིཀཱཡཾ ¶ པན –

‘‘ཨཔརཱནིཔི ལམྦཱི, མུདུཔིཊྛིཀོ, པརསྶ ཨངྒཛཱཏཾ མུཁེན གཎྷཱཏི, པརསྶ ཨངྒཛཱཏེ ཨབྷིནིསཱིདཏཱིཏི ཨིམེསཾ ཙཏུནྣཾ ཝསེན ཙཏྟཱརི ཨནུལོམཔཱརཱཛིཀཱནཱིཏི ཝདནྟི. ཨེཏཱནི ཧི ཡསྨཱ ཨུབྷིནྣཾ རཱགཝསེན སདིསབྷཱཝཱུཔགཏཱནཾ དྷམྨོ ‘མེཐུནདྷམྨོ’ཏི ཝུཙྩཏི, ཏསྨཱ ཨེཏེན པརིཡཱཡེན མེཐུནཾ དྷམྨཾ ཨཔྤཊིསེཝིཏྭཱཡེཝ ཀེཝལཾ མགྒེན མགྒཔྤཝེསནཝསེན ཨཱཔཛྫིཏབྦཏྟཱ མེཐུནདྷམྨཔཱརཱཛིཀསྶ ཨནུལོམེནྟཱིཏི ‘ཨནུལོམཔཱརཱཛིཀཱནཱི’ཏི ཝུཙྩནྟཱི’’ཏི (པཱརཱ. ཨཊྛ. ༢.༢༣༣) –

ཝུཏྟཏྟཱ ཙ ཏབྦཎྞནཱཡ ཙ སཱརཏྠདཱིཔནིཡཾ –

‘‘ལམྦཾདཱིགྷཏཱཡ པལམྦམཱནཾ ཨངྒཛཱཏམེཏསྶཱཏི ལམྦཱི. སོ ཨེཏྟཱཝཏཱ ན པཱརཱཛིཀོ, ཨཐ ཁོ ཡདཱ ཨནབྷིརཏིཡཱ པཱིལི༹ཏོ ཨཏྟནོ ཨངྒཛཱཏཾ མུཁེ ¶ ཝཱ ཝཙྩམགྒེ ཝཱ པཝེསེཏི, ཏདཱ པཱརཱཛིཀོ ཧོཏི. མུདུཀཱ པིཊྛི ཨེཏསྶཱཏི མུདུཔིཊྛིཀོ, ཀཏཔརིཀམྨཱཡ མུདུཀཱཡ པིཊྛིཡཱ སམནྣཱགཏོ. སོཔི ཡདཱ ཨནབྷིརཏིཡཱ པཱིལི༹ཏོ ཨཏྟནོ ཨངྒཛཱཏཾ ཨཏྟནོ མུཁེ པཝེསེཏི ཏདཱ པཱརཱཛིཀོ ཧོཏི. པརསྶ ཨངྒཛཱཏཾ མུཁེན གཎྷཱཏཱིཏི ཡོ ཨནབྷིརཏིཡཱ པཱིལི༹ཏོ པརསྶ སུཏྟསྶ ཝཱ པམཏྟསྶ ཝཱ ཨངྒཛཱཏཾ ཨཏྟནོ མུཁེན གཎྷཱཏི. པརསྶ ཨངྒཛཱཏེ ཨབྷིནིསཱིདཏཱིཏི ཡོ ཨནབྷིརཏིཡཱ པཱིལི༹ཏོ པརསྶ ཨངྒཛཱཏཾ ཀམྨནིཡཾ དིསྭཱ ཨཏྟནོ ཝཙྩམགྒེན ཏསྶཱུཔརི ཨབྷིནིསཱིདཏི, ཏཾ ཨཏྟནོ ཝཙྩམགྒཾ པཝེསེཏཱིཏི ཨཏྠོ. ལམྦཱིཨཱདཡོ ཙཏྟཱརོ ཀིཉྩཱཔི པཋམཔཱརཱཛིཀེན སངྒཧིཏཱ, ཡསྨཱ པན ཨུབྷིནྣཾ རཱགཔརིཡུཊྛཱནསངྑཱཏེན པརིཡཱཡེན མེཐུནཾ དྷམྨཾ ཨཔྤཊིསེཝིནོ ཧོནྟི, ཏསྨཱ ཝིསུཾ ཝུཏྟཱ’’ཏི (སཱརཏྠ. ཊཱི. ༢.༢༣༣) –

ཝུཏྟཏྟཱ ཙ ཀཏཝཱིཏིཀྐམཱཡེཝེཏེ ‘‘པཱརཱཛིཀཱ’’ཏི གཧེཏབྦཱ.

བྷིཀྑུནཱིནཉྩ ཙཏྟཱརཱིཏི ཨེཏྠ ‘‘ཨསཱདྷཱརཎཱནཱི’’ཏི པཱཋསེསོ, བྷིཀྑཱུཧི ཨསཱདྷཱརཎཱནི བྷིཀྑུནཱིནམེཝ ནིཡཏཱནི ཨུབྦྷཛཱཎུམཎྜལིཀཱ, ཝཛྫཔཊིཙྪཱདིཀཱ, ཨུཀྑིཏྟཱནུཝཏྟིཀཱ, ཨཊྛཝཏྠུཀཱཏི ¶ ཙཏྟཱརི པཱརཱཛིཀཱནི ཙ. ཝིབྦྷནྟཱ བྷིཀྑུནཱི སཡནྟི ཨེཏྠ ‘‘ཏེསཾ ཨནུལོམིཀཱ’’ཏི ཨཱནེཏྭཱ སམྦནྡྷིཏབྦཾ. ཏེསཾ ཙཏུནྣཾ པཱརཱཛིཀཱནཾ ཨནུལོམིཀཱ སཡཾ ཝིབྦྷནྟཱ བྷིཀྑུནཱི ཙཱཏི ཡོཛནཱ. ཙིཏྟཝསིཀཱ ཧུཏྭཱ ཨཏྟནཱ ¶ ནིཝཏྠཙཱིཝརམྤི ཧི མཱཏུགཱམཱནཾ ནིཝཱསནནཱིཧཱརེན སཡམེཝ ནིཝཱསེཏྭཱ གིཧིཝེསཾ རོཙེཏྭཱ གཧིཏམཏྟེ སཱསནཏོ ཙུཏཱ བྷིཀྑུནཱི ཙཱཏི ཝུཏྟཾ ཧོཏི. ཨེཝཾཀརཎེན གིཧིབྷཱཝཱཔནྣཏཱསཱམཉྙེན སཾཝཱསཱརཧཱ ན ཧོནྟཱིཏི ཨིམེསཾ ཙཏུནྣཾ པཱརཱཛིཀཱནཾ ཨནུལོམིཀཱ ཛཱཏཱ.

ཏཐཱཏི ཡཐཱ ཨིམེ དསྶིཏཱ ཏེན ཨསཾཝཱསཱརཧཏཱཡ, བྷིཀྑུབྷཱཝཱཡ ཨབྷབྦཏཱཡ ཙ པཱརཱཛིཀཱཝ, ཏཐཱ ཨེཀཱདས ཨབྷབྦཔུགྒལཱཔི ཧོནྟཱིཏི ཨཏྠོ. ཨེཀཱདསཱབྷབྦཱཏི མཱཏུགྷཱཏཀོ, པིཏུགྷཱཏཀོ, ཨརཧནྟགྷཱཏཀོ, སངྒྷབྷེདཀོ, ལོཧིཏུཔྤཱདཀོ, པཎྜཀོ, ཏིརཙྪཱནགཏོ, ཨུབྷཏོབྱཉྫནཀོ, ཐེཡྻསཾཝཱསཀོ, བྷིཀྑུནིདཱུསཀོ, ཏིཏྠིཡཔཀྐནྟཀོཏི ཨེཀཱདས. སབྦེཏེ ཙཏུཝཱིསཏི ཨེཏེ སབྦེ ཙཏུཝཱིསཏི པུགྒལཱ སམོདྷཱནཏོ ཝེདིཏབྦཱཏི ཨདྷིཔྤཱཡོ.

༣༢༠. ཨིམེ ཙཏུཝཱིསཏི པཱརཱཛིཀཱ པུགྒལཱ སཱིསཙྪིནྣོཝ ཛཱིཝིཏུཾ ཨིདྷ བྷིཀྑུབྷཱཝཱཡ ཨབྷབྦཱཏི ཝུཏྟཱཏི ཡོཛནཱ.

༣༢༡. ཨིམེསཾ ཨེཀཱདསནྣཾ ཨབྷབྦཏཱཡ ཧེཏུདསྶནཏྠམཱཧ ‘‘པཎྜཀོ ཙཱ’’ཏིཨཱདི. པཎྜཀོ ཙཱཏི ཨཱསིཏྟཔཎྜཀོ, ཨུསཱུཡཔཎྜཀོ, པཀྑཔཎྜཀོ, ཨོཔཀྐམིཀཔཎྜཀོ, ནཔུཾསཀཔཎྜཀོཏི ཝུཏྟོ པཉྩཝིདྷོ པཎྜཀོ ཙ. ཏིརཙྪཱནོཏི ཏིརིཡཾ ཨཉྪཏི གཙྪཏཱིཏི ‘‘ཏིརཙྪཱནོ’’ཏི གཧིཏོ ནཱགསུཔཎྞཱདིཀོ སབྦཏིརཙྪཱནཡོནིཀོ ཙ. ཡཀྑཱདཡོ སབྦེ ཨམནུསྶཱཔི ཨིདྷ ཏིརཙྪཱནེཡེཝ སངྒཧིཏཱཏི ཝེདིཏབྦཱ. ཨུབྷཏོབྱཉྫནོཔི ཙཱཏི ཨིཏྠིཔུརིསབྱཉྫནསཱདྷཀེཧི ཨུབྷཏོ ཀམྨཏོ ཛཱཏཱནི ཐནཱདིཀཱནི བྱཉྫནཱནི ཡསྶཱཏི ནིརུཏྟོ ཨིཏྠིཨུབྷཏོབྱཉྫནོ ¶ , པུརིསཨུབྷཏོབྱཉྫནོཏི དུཝིདྷོ ཨུབྷཏོབྱཉྫནོ ཙ. ཝཏྠུཝིཔནྣཱཏི ཏབྦྷཱཝབྷཱཝིཏཱཡ བྷིཀྑུབྷཱཝོ ཝསཏི ཨེཏྠཱཏི ཝཏྠུ, པུགྒལཱནཾ བྷིཀྑུབྷཱཝཱརཧཏཱ, སཱ པན པབྦཛྫཱཀྑནྡྷཀཱགཏསབྦདོསཝིརཧིཏགུཎསམྤཡུཏྟཏཱ, ཏཾ ཝིཔནྣཾ པཎྜཀབྷཱཝཱདིཡོགེན ཡེསཾ ཏེ ‘‘ཝཏྠུཝིཔནྣཱ’’ཏི གཧེཏབྦཱ. ཧི-སདྡོ ཧེཏུམྷི. ཡསྨཱ ཝཏྠུཝིཔནྣཱ, ཏསྨཱ ཨིདྷ ཨཏྟབྷཱཝེ པབྦཛྫཱཡ ཨབྷབྦཱཏི ཝུཏྟཾ ཧོཏི. ‘‘ཨཧེཏུཔཊིསནྡྷིཀཱ’’ཏི ཝཙནེན ¶ ཨིམེསཾ ཝིཔཱཀཱཝརཎཡུཏྟབྷཱཝམཱཧ, ཨིམིནཱ ཨེཏེསཾ མགྒཱདྷིགམསྶ ཝཱརིཏབྷཱཝོ དསྶིཏོཏི ཝེདིཏབྦཾ.

༣༢༢. པཉྩཱནནྟརིཀཱཏི ཀམྨཱཝརཎེན ཡུཏྟཏཱཡ སགྒམོཀྑསམྤཏྟིཏོ པརིཧཱཡིཏྭཱ མརཎཱནནྟརཾ ཨཔཱཡཔཊིསནྡྷིཡཾ ནིཡཏཱ མཱཏུགྷཱཏཀཱདཡོ པཉྩཱནནྟརིཀཱ ཙ. ཐེཡྻསཾཝཱསོཔི ཙཱཏི ལིངྒཏྠེནཀོ, སཾཝཱསཏྠེནཀོ, ཨུབྷཡཏྠེནཀོཏི ཏིཝིདྷོ ཐེཡྻསཾཝཱསཀོ ཙ. དཱུསཀོཏི པཀཏཏྟཱཡ བྷིཀྑུནིཡཱ མེཐུནཾ པཊིསེཝིཏྭཱ ཏསྶཱ དཱུསིཏཏྟཱ བྷིཀྑུནིཾ དཱུསེཏཱིཏི ‘‘བྷིཀྑུནིདཱུསཀོ’’ཏི ཝུཏྟོ ཙ. ཏིཏྠིཔཀྐནྟཀོ ཙཱཏི ཏིཏྠིཡཱནཾ ལདྡྷིཾ, ཝེསཉྩ རོཙེཏྭཱ ཏཾ གཧེཏྭཱ ཏེསམནྟརཾ པཝིཊྛོ ཙ. ཨིཏི ཨཊྛ པན ཀིརིཡཱནཊྛཱཏི ཡོཛནཱ. ཨིཏཱིཏི ཨིདམཏྠཏྟཱ ཨིམེཏི ཝུཏྟཾ ཧོཏི. ཏེ ཨིམེཏི སམྦནྡྷོ. ཏེ ཨིམེ ཨཊྛ པན མཱཏུཝདྷཱདིཀིརིཡཱཡ ཨིཧཏྟབྷཱཝེ བྷིཀྑུབྷཱཝཱཡ ཨནརཧཱ ཧུཏྭཱ ནཊྛཱཏི ཨཏྠོ. ཨེཏྟཱཝཏཱ ཨེཀཱདསཨབྷབྦཱནཾ ཨབྷབྦཏཱཡ ཀཱརཎཾ དསྶིཏཾ ཧོཏི.

༣༢༣. མཡཱ པཱརཱཛིཀཱནཾ སཱརབྷཱུཏོ ཡོ ཨཡཾ ཝིནིཙྪཡོ ཝུཏྟོ, ཏསྶ ཝིནིཙྪཡསྶ ཨནུསཱརེན ཨནུགམནེན སེསོཔི ཝིནིཙྪཡོ བུདྷེན པཎྜིཏེན ཨསེསཏོཝ ཝིཉྙཱཏུཾ སཀྐཱཏི ཡོཛནཱ.

༣༢༤. པཊུབྷཱཝཀརེ ¶ པརམེ ཝིཝིདྷེཧི ནཡེཧི ཡུཏྟེ ཝིནཡཔིཊཀེ པརམཏྠནཡཾ ཨབྷིཔཏྠཡཏཱ ཨཡཾ སཏཏཾ པརིཡཱཔུཎིཏབྦོཏི ཡོཛནཱ. ཏཏྠ ཝིཝིདྷེཧི ནཱནཔྤཀཱརེཧི. ནཡེཧཱིཏི ནཱིཡནྟི ཝུཏྟཱནུསཱརེན ཨུདཱིརིཡནྟཱིཏི ‘‘ནཡཱ’’ཏི ཝུཏྟེཧི ཙཀྐཔེཡྻཱལཱདཱིཧི ནཡེཧི. པརམཏྠནཡནྟི པརམོ ཙ སོ ཨཏྠོ ཙཱཏི པརམཏྠོ, པརམོ ཝཱ ཝིསེསེན ནིཙྪིཏབྦོ ཨཏྠོ པརམཏྠོ, སོཡེཝ ཝིནིཙྪཡཏྠིཀཱནཾ བུདྡྷིཡཱ ནེཏབྦོཏི པརམཏྠནཡོ, ཝིནིཙྪཡཱུཔཱཡོ ནཱིཡཏི ཨེཏེནཱཏི ཀཏྭཱ ‘‘པརམཏྠནཡོ’’ཏི ཝུཙྩཏི, ཏཾ པརམཏྠནཡཾ. ཨབྷིཔཏྠཡཏཱཏི ཝིནཡཔིཊཀེ ཝིནིཙྪཡཾ ཝཱ ཏདུཔཱཡཾ ཝཱ པཏྠཡཏཱ, ཨིཙྪནྟེནཱཏི ཨཏྠོ. ‘‘པརིཡཱཔུཎིཏབྦོ ཨཡ’’ནྟི པདཙྪེདོ. མ-ཀཱརོ ཨཱགམསནྡྷིཛོ, ཨོ-ཀཱརསྶ ཨ-ཀཱརཱདེསོ. པརིཡཱཔུཎིཏབྦོཏི པཋིཏབྦོ, སོཏབྦོ ཙིནྟེཏབྦོ དྷཱརེཏབྦོཏི ཝུཏྟཾ ཧོཏི. ཨཡནྟི ཝིནཡཝིནིཙྪཡོ.

ཨིཏི ཝིནཡཏྠསཱརསནྡཱིཔནིཡཱ

ཝིནཡཝིནིཙྪཡཝཎྞནཱཡ

ཙཏུཏྠཔཱརཱཛིཀཀཐཱཝཎྞནཱ ནིཊྛིཏཱ.

སངྒྷཱདིསེསཀཐཱཝཎྞནཱ

༣༢༥. ཨེཝཾ ¶ ནཱནཱནཡཔཊིམཎྜིཏསྶ པཱརཱཛིཀཀཎྜསྶ ཝིནིཙྪཡཾ དསྶེཏྭཱ ཨིདཱནི ཏདནནྟརམུདྡིཊྛསྶ ཏེརསཀཎྜསྶ ཝིནིཙྪཡཾ དསྶེཏུམཱཧ ‘‘མོཙེཏུཀཱམཏཱ’’ཏིཨཱདི. མོཙེཏུཾ ཀཱམེཏཱིཏི མོཙེཏུཀཱམོ, ཏསྶ བྷཱཝོ མོཙེཏུཀཱམཏཱ, ཏཱཡ སམྤཡུཏྟཾ ཙིཏྟཾ མོཙེཏུཀཱམཏཱཙིཏྟཾ. ཨེཏྠ ‘‘མོཙེཏུཀཱམཏཱ’’ཏི ཨིམིནཱ ཨེཀཱདསསུ རཱགེསུ ‘‘མོཙནསྶཱདོ’’ཏི ཝུཏྟཾ ཨིམསྶ སངྒྷཱདིསེསསྶ མཱུལཀཱརཎཾ སུཀྐམོཙནཝིསཡཾ རཱགམཱཧ.

ཨེཀཱདས ¶ རཱགཱ ནཱམ ‘‘མོཙནསྶཱདོ, མུཙྩནསྶཱདོ, མུཏྟསྶཱདོ, མེཐུནསྶཱདོ, ཕསྶསྶཱདོ, ཀཎྜུཝནསྶཱདོ, དསྶནསྶཱདོ, ནིསཛྫསྶཱདོ, ཝཱཙསྶཱདོ, གེཧསྶིཏཔེམཾ, ཝནབྷངྒིཡ’’ནྟི ཨེཝམཱགཏཱ. ཨིདྷ མོཙནཾ ནཱམ སམྦྷཝདྷཱཏུམོཙནཾ, ཏདཏྠཱཡ ཏབྦིསཡརཱགསམྤཡུཏྟཝེདནཱ མོཙནསྶཱདོ ནཱམ. ཏེནཱཧ ཨཊྛཀཐཱཡཾ ‘‘མོཙེཏུཾ ཨསྶཱདོ མོཙནསྶཱདོ’’ཏི. མུཙྩམཱནེ ཨསྶཱདོ མུཙྩནསྶཱདོ, སམྦྷཝདྷཱཏུམྷི མུཙྩམཱནེ ཏཾརཱགསམྤཡུཏྟཱ ཝེདནཱ མུཙྩནསྶཱདོ ནཱམ. ཨེཏེནེཝ ནཡེན མུཏྟསྶཱདཱདིཝཱཙསྶཱདཱཝསཱནེསུ པདེསུ ཨཏྠཀྐམོ ཝེདིཏབྦོ. ཨིམེཧི ནཝཧི པདེཧི ཨསྶཱདསཱིསེན ཀུནྟཡཊྛིཉཱཡེན ཏཾསཧཙརིཏོ རཱགོ དསྶིཏོ. ཡཐཱཧ ཨཊྛཀཐཱཡཾ ‘‘ནཝཧི པདེཧི སམྤཡུཏྟཨསྶཱདསཱིསེན རཱགོ ཝུཏྟོ’’ཏི.

གེཧསྶིཏཔེམནྟི ཨེཏྠ གེཧཊྛཱ མཱཏུཨཱདཡོ ཨཱདྷེཡྻཨཱདྷཱརཝོཧཱརེན ‘‘གེཧཱ’’ཏི ཝུཙྩནྟི. ‘‘མཉྩཱ ཨུཀྐུཊྛིཾ ཀརོནྟཱི’’ཏིཨཱདཱིསུ ཝིཡ ཏནྣིསྶིཏོ སིནེཧཔརིཡཱཡོ རཱགོ ‘‘གེཧསྶིཏཔེམ’’ནྟི ཝུཏྟོ. ཨིམིནཱ པདེན རཱགསྶ སབྷཱཝོ སནྡསྶིཏོ. ཝནཏོ བྷཉྫིཏྭཱ ཨཱབྷཏཾ ཡཾ ཀིཉྩི ཕལཔུཔྥཱདི ཝནབྷངྒིཡཾ ནཱམ. ཨིདྷ པན རཱགཝསེན པཊིབདྡྷཙིཏྟཾ མཱཏུགཱམེཧི ཝིརཧདུཀྑཱཔནཡནཏྠཾ (པཱརཱ. ཨཊྛ. ༢.༢༤༠) ཏེསཾ ཋཱནེ ཋཔེཏྭཱ དསྶནཕུསནཝསེན ཝིནྡིཏུཾ རཱགཱིཧི གཧེཏབྦཏོ ཏེཧི པིལ༹ནྡྷིཏམཱལསཧིཏཾ ཏམྦཱུལནྟི ཨེཝམཱདི ‘‘ཝནབྷངྒིཡ’’ནྟི ཨདྷིཔྤེཏཾ. ཨིམིནཱ པཏྠིཏཝིསཡགོཙརོ རཱགོ ཏདཱཡཏྟཝཏྠུཝསེན སནྡསྶིཏོ. ཡཐཱཧ ཨཊྛཀཐཱཡཾ ‘‘ཨེཀེན པདེན སརཱུཔེནེཝ རཱགོ, ཨེཀེན ¶ པདེན ཝཏྠུནཱ ཝུཏྟོ. ཝནབྷངྒོ ཧི རཱགསྶ ཝཏྠུ, ན རཱགོཡེཝཱ’’ཏི (པཱརཱ. ཨཊྛ. ༢.༢༤༠).

‘‘མོཙེཏུཀཱམཏཱ’’ཏི ¶ ཨིདམེཝ ཨཝཏྭཱ ‘‘ཙིཏྟ’’ནྟི ཝཙནེན ཝཱིཏིཀྐམསཱདྷིཀཱཡ ཀཱཡཝིཉྙཏྟིཡཱ སམུཊྛཱཔཀཾ རཱགསམྤཡུཏྟཾ ཙིཏྟཝིསེསཾ དསྶེཏི. ཏེན ཙིཏྟེན སམུཊྛཱཔིཡམཱནཾ ཝིཉྙཏྟིསངྑཱཏཾ ཝཱིཏིཀྐམཾ ‘‘ཝཱཡཱམོ’’ཏི ཨིམིནཱ དསྶེཏི. ཝཱཡཱམོ ནཱམ ཏཾཙིཏྟསམྤཡུཏྟཝཱིརིཡཾ. ཨེཏྠ པན ‘‘སེམྷོ གུལོ༹’’ཏིཨཱདཱིསུ ཝིཡ ཕལེ ཧེཏཱུཔཙཱརཉཱཡེན ཝཱིཏིཀྐམསྶ ཝིསེསཧེཏུབྷཱུཏཝཱིརིཡཝཱཙཀེན ཙ པདེན ཝཱིཏིཀྐམོཝ ཝུཏྟོཏི དཊྛབྦཾ. ཨཛ྄ཛྷཏྟབཱཧིརཝཏྠུགྷཊྚནཾ, ཨཱཀཱསེ ཀཊིཀམྤནནྟི སུཀྐམོཙནཏྠོ ཝཱཡཱམོཏི ཨཏྠོ. སུཀྐསྶ མོཙནཾ སུཀྐམོཙནཾ.

ཨེཏྠ ཙ སུཀྐསྶཱཏི ‘‘སུཀྐནྟི དས སུཀྐཱནི ནཱིལཾ པཱིཏཀཾ ལོཧིཏཀཾ ཨོདཱཏཾ ཏཀྐཝཎྞཾ དཀཝཎྞཾ ཏེལཝཎྞཾ ཁཱིརཝཎྞཾ དདྷིཝཎྞཾ སཔྤིཝཎྞ’’ནྟི (པཱརཱ. ༢༣༧) པདབྷཱཛནེ ཝུཏྟཱནི སཏྟཱནཾ པིཏྟཱདིཨཱསཡབྷེདེན, པཐཝིདྷཱཏུཨཱདཱིནཾ ཙཏུནྣཾ ཝཱ རསསོཎིཏམཾསམེདཨཊྛིཨཊྛིམིཉྫཱནཾ ཚནྣཾ དེཧདྷཱཏཱུནཾ ཝཱ བྷེདེན ཨནེཀདྷཱ བྷིནྣེ དསཝིདྷེ སུཀྐེ ཨཉྙཏརསྶ སུཀྐསྶཱཏི ཨཏྠོ. མོཙནཾ ཝིསྶཊྛཱིཏི པརིཡཱཡཾ, པཀཏིཡཱ ཋིཏསཀཊྛཱནཏོ མོཙནནྟི ཨཏྠོ. ཡཐཱཧ པདབྷཱཛནེ ‘‘ཝིསྶཊྛཱིཏི ཋཱནཏོ ཙཱཝནཱ ཝུཙྩཏཱི’’ཏི (པཱརཱ. ༢༣༧). ཨིཧ ‘‘ཋཱནཾ ནཱམ ཝཏྠིསཱིསསངྑཱཏཾ མུཏྟཀརཎམཱུལ’’ནྟི ཀེཙི. ‘‘ཀཊཱི’’ཏི ཨཔརེ. ‘‘སཀལཀཱཡོ’’ཏི ཨཉྙེ. ཨིམེསཾ ཏིཎྞཾ ཝཙནེསུ ‘‘ཏཏིཡསྶ བྷཱསིཏཾ སུབྷཱསིཏ’’ནྟི (པཱརཱ. ཨཊྛ. ༢.༢༣༧) ཨཊྛཀཐཱཡཾ ཏཏིཡཝཱདསྶ ཀཏཔཱསཾསཏྟཱ ཀེསལོམནཁདནྟཱནཾ མཾསཝིནིམུཏྟཊྛཱནཉྩ མུཏྟཀརཱིསཁེལ༹སིངྒྷཱཎིཀཱཐདྡྷསུཀྑཙམྨཉྩ ཝཛྫེཏྭཱ ཨཝསེསཾ སཀལསརཱིརཾ ཀཱཡཔྤསཱདབྷཱཝཛཱིཝིཏིནྡྲིཡཨབདྡྷཔིཏྟཱནཾ ¶ ཝིཡ སམྦྷཝདྷཱཏུཡཱ ཙ ཋཱནནྟི ཝེདིཏབྦཾ.

‘‘སུཀྐམོཙན’’ནྟི ཨིམིནཱཀིཾ ཝུཏྟཾ ཧོཏཱིཏི? ‘‘ཨཱརོགྱཏྠཱཡ, སུཁཏྠཱཡ, བྷེསཛྫཏྠཱཡ, དཱནཏྠཱཡ, པུཉྙཏྠཱཡ, ཡཉྙཏྠཱཡ, སགྒཏྠཱཡ, བཱིཛཏྠཱཡ, ཝཱིམཾསཏྠཱཡ, དཝཏྠཱཡ མོཙེཏཱི’’ཏི (པཱརཱ. ༢༣༧) ཝུཏྟདསཝིདྷཨདྷིཔྤཱཡནྟོགདྷཨཉྙཏརཨདྷིཔྤཱཡོ ཧུཏྭཱ ‘‘རཱགཱུཔཏྠམྦྷེ, ཝཙྩཱུཔཏྠམྦྷེ, པསྶཱཝཱུཔཏྠམྦྷེ, ཝཱཏཱུཔཏྠམྦྷེ, ཨུཙྩཱལིངྒཔཱཎཀདཊྛཱུཔཏྠམྦྷེ མོཙེཏཱི’’ཏི (པཱརཱ. ༢༣༧) ཝུཏྟཔཉྩཝིདྷཀཱལཱནམཉྙཏརཀཱལེ ‘‘ཨཛ྄ཛྷཏྟརཱུཔེ, བཧིདྡྷཱརཱུཔེ, ཨཛ྄ཛྷཏྟབཧིདྡྷཱརཱུཔེ, ཨཱཀཱསེ ཀཊིཾ ཀམྤེནྟོ མོཙེཏཱི’’ཏི (པཱརཱ. ༢༣༧) ཝུཏྟཙཏུརུཔཱཡཱནམཉྙཏརེན ཨུཔཱཡེན ཡཐཱཝུཏྟརཱགཔིསཱཙཝསེན ཝིཝསོ ཧུཏྭཱ ཡཐཱཝུཏྟནཱིལཱདིདསཝིདྷསམྦྷཝདྷཱཏཱུནམཉྙཏརཾ ཡཐཱཝུཏྟཊྛཱནཏོ ཁུདྡཀམཀྑིཀཱཡ པིཝནམཏྟམྤི སཙེ མོཙེཏཱིཏི སངྑེཔཏོ ¶ གཧེཏབྦཾ. ཨེཏྠ ཙ ཨུཙྩཱལིངྒཔཱཎཀཱ ནཱམ ལོམསཔཱཎཱ, ཡེསཾ ལོམེ ཨལླིནེ ཨངྒཛཱཏཾ ཀམྨནིཡཾ ཧོཏི.

ཨཉྙཏྲ སུཔིནནྟེནཱཏི སུཔིནོ ཨེཝ སུཔིནནྟོ, ནིསྶཀྐཝཙནཔྤསངྒེ ཀརཎཝཙནཏོ སུཔིནནྟཱཏི ཨཏྠོ. སུཔིནཱ ནཱམ ‘‘ཝཱཏཱདིདྷཱཏུཀྑོབྷཝསེན ཝཱ པུབྦཱནུབྷཱུཏཨིཏྠིརཱུཔཱདིཝིསཡཝསེན ཝཱ ཨིཊྛཱནིཊྛདེཝཏཱནུབྷཱཝེན ཝཱ པུཉྙེན པཊིལབྷིཏབྦཨཏྠསྶ, ཨཔུཉྙེན པཏྟབྦཱནཏྠསྶ ཙ པུབྦནིམིཏྟཝསེན ཝཱ ཧོཏཱི’’ཏི (པཱརཱ. ཨཊྛ. ༢.༢༣༧) ཝུཏྟེསུ ཙཏཱུསུ ཀཱརཎེསུ ཨེཀེན ཀཱརཎེན ཀཔིནིདྡཱཡ སུཔིནེ དིསྶམཱནཱརམྨཎཏོ ཡཾ སུཀྐམོཙནཾ ཧོཏི, ཏཾ ཨཝིསཡཾ སུཀྐམོཙནཾ ཝིནཱཏི ཝུཏྟཾ ཧོཏི.

སངྒྷཱདིསེསོཝ སངྒྷཱདིསེསཏཱ. སངྒྷཱདིསེསཾ ཨཱཔཛྫིཏྭཱ ཏཏོ ཝུཊྛཱཏུཀཱམསྶ ཀུལཔུཏྟསྶ ཨཱདིམྷི པརིཝཱསདཱནཏྠཾ ¶ , མཛ྄ཛྷེ ཙ མཱུལཱཡཔཊིཀསྶནེན ཝིནཱ ཝཱ སཧ ཝཱ མཱནཏྟདཱནཏྠཾ, ཨཝསཱནེ ཨབྦྷཱནཏྠཉྩ སངྒྷོ ཨེསིཏབྦོཏི ‘‘སངྒྷོ ཨཱདིམྷི ཙེཝ སེསེ ཙ ཨིཙྪིཏབྦོ ཨསྶཱཏི སངྒྷཱདིསེསོ’’ཏི (པཱརཱ. ཨཊྛ. ༢.༢༣༧; ཀངྑཱ. ཨཊྛ. སུཀྐཝིསྶཊྛིསིཀྑཱཔདཝཎྞནཱ) ཝུཏྟཏྟཱ སངྒྷཱདིསེསཱ ནཱམ, སུཀྐཝིསྶཊྛིསངྒྷཱདིསེསཱཔཏྟི ཧོཏཱིཏི ཨཏྠོ. ཡཐཱཧ པདབྷཱཛནེ ‘‘སངྒྷོཝ ཏསྶཱ ཨཱཔཏྟིཡཱ པརིཝཱསཾ དེཏི, མཱུལཱཡ པཊིཀསྶཏི, མཱནཏྟཾ དེཏི, ཨབྦྷེཏི, ན སམྦཧུལཱ, ན ཨེཀཔུགྒལོ, ཏེན ཝུཙྩཏི ‘སངྒྷཱདིསེསོ’ཏི. ཏསྶེཝ ཨཱཔཏྟིནིཀཱཡསྶ ནཱམཾ ནཱམཀམྨཾ ཨདྷིཝཙནཾ, ཏེནཔི ཝུཙྩཏི ‘སངྒྷཱདིསེསོ’’ཏི (པཱརཱ. ༢༣༧). ཨེཏྠ ཙ པརིཝཱསཱདིཀཐཱ སངྒྷཱདིསེསཱཝསཱནེ ཨཱགཏཊྛཱནེཡེཝ ཨཱཝི བྷཝིསྶཏི.

༣༢༦. ཨེཏྟཱཝཏཱ མཱུལསིཀྑཱཔདཱགཏཾ ཨཏྟཱུཔཀྐམམཱུལཀཾ ཨཱཔཏྟིཾ དསྶེཏྭཱ ཨིདཱནི ཨིམིསྶཱ སངྒྷཱདིསེསཱཔཏྟིཡཱ པརཱུཔཀྐམེནཔི ཨཱཔཛྫནཾ དསྶེཏུམཱཧ ‘‘པརེནཱ’’ཏིཨཱདི. ཨུཔཀྐམཱཔེཏྭཱཏི ཨངྒཛཱཏསྶ གཧཎཾ ཝཱ གྷཊྚནཾ ཝཱ ཀཱརེཏྭཱ.

༣༢༧. སཉྩིཙྩཱཏི ‘‘ཨུཔཀྐམཱམི མོཙེསྶཱམཱི’’ཏི ཙེཏེཏྭཱ པཀཔྤེཏྭཱ. ཨུཔཀྐམནྟསྶཱཏི ཨཛ྄ཛྷཏྟརཱུཔཱདཱིསུ ཏཱིསུ ཡཏྠ ཀཏྠཙི གྷཊྚེནྟསྶ. སམུདྡིཊྛནྟི ‘‘ཙེཏེཏི ཨུཔཀྐམཏི ན མུཙྩཏི, ཨཱཔཏྟི ཐུལླཙྩཡསྶཱ’’ཏི (པཱརཱ. ༢༦༢) པདབྷཱཛནེ བྷགཝཏཱ ཝུཏྟནྟི ཨདྷིཔྤཱཡོ.

༣༢༨. ཨིམིསྶཾ ¶ གཱཐཱཡཾ ‘‘ཨཏྟནོ ཨངྒཛཱཏཾ ཨུཔཀྐམནྟསྶཱ’’ཏི ཨིམིནཱ ཨཛ྄ཛྷཏྟརཱུཔེ ཝཱ བཧིདྡྷཱརཱུཔེ ཝཱ ཨཛ྄ཛྷཏྟབཧིདྡྷཱརཱུཔེ ཝཱ ཨཏྟནོ ཨངྒཛཱཏཾ གྷཊྚེནྟསྶཱཏི ཨིམསྶ ཨཏྠསྶ ཝུཏྟཏྟཱ ¶ ཨངྒཛཱཏགྷཊྚནེན ཝིནཱབྷཱཝཏོ ཨིམིནཱ ཨསངྒཡ྄ཧམཱནསྶཱཔི ཨཱཀཱསེ ཀཊིཀམྤནེན སུཀྐམོཙནེ སངྒྷཱདིསེསསྶ པཋམགཱཐཱཡཾ ‘‘ཝཱཡཱམོ’’ཏི སཱམཉྙཝཙནེན སངྒཧིཏཏྟཱ ཏཾ ཋཔེཏྭཱ ‘‘ཏེན ཁོ པན སམཡེན ཨཉྙཏརསྶ བྷིཀྑུནོ མོཙནཱདྷིཔྤཱཡསྶ ཨཱཀཱསེ ཀཊིཾ ཀམྤེནྟསྶ ཨསུཙི མུཙྩི…པེ… ཨསུཙི ན མུཙྩི. ཏསྶ ཀུཀྐུཙྩཾ ཨཧོསི…པེ… ཨནཱཔཏྟི བྷིཀྑུ སངྒྷཱདིསེསསྶ, ཨཱཔཏྟི ཐུལླཙྩཡསྶཱ’’ཏི ཨཱཀཱསེཀཊིཀམྤནཝཏྠུམྷི ཝུཏྟཏྟཱ ཨམུཏྟེ ཐུལླཙྩཡཾ སངྒཧེཏུམཱཧ ‘‘སཉྩིཙྩཱ’’ཏིཨཱདི.

ཏཏྠ སཉྩིཙྩཱཏི ‘‘ཨུཔཀྐམཱམི མོཙེསྶཱམཱི’’ཏི ཛཱནིཏྭཱ སཉྫཱནིཏྭཱཏི ཨཏྠོ. ‘‘ཨུཔཀྐམནྟསྶཱ’’ཏི སཱམཉྙཏོ ཏཾ ཝིསེསེཏུཾ ‘‘ཨཱཀཱསེ ཀམྤནེནཔཱི’’ཏི ཨཱཧ, ཀཊིཀམྤནེནཱཏི གཧེཏབྦཾ. ཀཐམིདཾ ལབྦྷཏཱིཏི ཙེ? ཨིམཱཡ ཀཐཱཡ སངྒཧེཏབྦཝཏྠུམྷི ‘‘ཨཱཀཱསེ ཀཊིཾ ཀམྤེནྟསྶཱ’’ཏི (པཱརཱ. ༢༦༦) པཱཋེ ‘‘ཀཊིཾ ཀམྤེནྟསྶཱ’’ཏི ཝཙནསཧཙརསྶ ‘‘ཨཱཀཱསེ’’ཏི ཝཙནསྶ སནྣིདྷཱནབལེན ལབྦྷཏི ཨཏྠཔྤཀརཎསདྡནྟརསནྣིདྷཱནཱ སདྡཱནཾ ཝིསེསཏྠདཱིཔནཏོ.

༣༢༩. ཝཏྠིནྟི མུཏྟཝཏྠིཾ, མུཏྟཀརཎསྶ ཝཏྠིནྟི ཨཏྠོ. ཀཱིལཱ༹ཡ པཱུརེཏྭཱཏི གཱམདཱརཀོ ཝིཡ ཀཱིལི༹ཏུཀཱམཏཱཡ མུཏྟཝཏྠིཾ དལ༹ྷཾ གཧེཏྭཱ པཱུརེཏྭཱཏི ཨཏྠོ. ཡཐཱཧ ཝཏྠིཝཏྠུམྷི ཨཊྛཀཐཱཡཾ ‘‘ཏེ བྷིཀྑཱུ ཝཏྠིཾ དལ༹ྷཾ གཧེཏྭཱ པཱུརེཏྭཱ པཱུརེཏྭཱ ཝིསྶཛྫེནྟཱ གཱམདཱརཀཱཝིཡ པསྶཱཝམཀཾསཱུ’’ཏི (པཱརཱ. ཨཊྛ. ༢.༢༦༤). ‘‘ན ཝཊྚཏཱི’’ཏི སཱམཉྙེན ཀསྨཱ ཝུཏྟནྟི? ཏསྨིཾ ཝཏྠུསྨིཾ ཝུཏྟནཡེན མོཙནཱདྷིཔྤཱཡེན དལ༹ྷཾ གཧེཏྭཱ པཱུརེཏྭཱ པཱུརེཏྭཱ ཝིསྶཛྫེནྟསྶ སུཀྐེ མུཏྟེ མོཙནཱདྷིཔྤཱཡོ ཙེཏེཏི, ཨུཔཀྐམཏི, མུཙྩཏཱིཏི ཨངྒཱནཾ སམྤནྣཏྟཱ སངྒྷཱདིསེསསྶ ¶ , ཨམུཏྟེ ཐུལླཙྩཡསྶ སམྦྷཝཏོ ཨུབྷཡསངྒཧཏྠམཱཧ.

༣༣༠. ཨུཔནིཛ྄ཛྷཱཡནཝཏྠུམྷི ‘‘ན ཙ བྷིཀྑཝེ སཱརཏྟེན མཱཏུགཱམསྶ ཨངྒཛཱཏཾ ཨུཔནིཛ྄ཛྷཱཡིཏབྦཾ, ཡོ ཨུཔནིཛ྄ཛྷཱཡེཡྻ, ཨཱཔཏྟི དུཀྐཊསྶཱ’’ཏི (པཱརཱ. ༢༦༦) པཱལི༹ཡཾ ‘‘མཱཏུགཱམསྶཱ’’ཏི སཱམཉྙེན ཝུཏྟཏྟཱ ‘‘ཏིསྶནྣ’’ནྟི ཝདཏི. ཏིསྶནྣཾ པན ཨིཏྠཱིནནྟི མནུསྶཱམནུསྶཏིརཙྪཱནགཏཝསེན ཏིསྶནྣཾ ཨིཏྠཱིནཾ. ‘‘ཨངྒཛཱཏ’’ནྟི ཝིསེསེཏྭཱ ཝུཏྟཏྟཱ ‘‘ནིམིཏྟ’’ནྟི ¶ མུཏྟཀརཎམེཝ ཝུཙྩཏི, པཊསཏེནཱཔི པཊིཙྪཱདིཏཾ ཝཱ ཨཔྤཊིཙྪཱདིཏཾ ཝཱ ཡོནིམགྒནྟི ཨཏྠོ. ཏེནཱཧ ཨཊྛཀཐཱཡཾ ‘‘སཙེཔི པཊསཏཾ ནིཝཏྠཱ ཧོཏི, པུརཏོ ཝཱ པཙྪཏོ ཝཱ ཋཏྭཱ ‘ཨིམསྨིཾ ནཱམ ཨོཀཱསེ ནིམིཏྟ’ནྟི ཨུཔནིཛ྄ཛྷཱཡནྟསྶ དུཀྐཊམེཝ. ཨནིཝཏྠཱནཾ གཱམདཱརིཀཱནཾ ནིམིཏྟཾ ཨུཔནིཛ྄ཛྷཱཡནྟསྶ པན ཀིམེཝ ཝཏྟབྦ’’ནྟི (པཱརཱ. ཨཊྛ. ༢.༢༦༦). པུརཏོ ཝཱཏི ཨེཏྠ ‘‘ཋཏྭཱ’’ཏི པཱཋསེསོ.

༣༣༡. ཨེཀེན…པེ… པསྶཏོ ཨེཀཾ དུཀྐཊནྟི སམྦནྡྷོ. ‘‘ཨེཀེན པཡོགེན ཨེཀཾ དུཀྐཊ’’ནྟི ཝཙནཏོ ཨནེཀེཧི པཡོགེཧི ཨནེཀཱནི དུཀྐཊཱནཱིཏི བྱཏིརེཀཏོ ལབྦྷཏི. ཡཐཱཧ ཨཊྛཀཐཱཡཾ ‘‘ཨིཏོ ཙིཏོ ཙ ཝིལོཀེཏྭཱ པུནཔྤུནཾ ཨུཔནིཛ྄ཛྷཱཡནྟསྶ པཡོགེ པཡོགེ དུཀྐཊ’’ནྟི (པཱརཱ. ཨཊྛ. ༢.༢༦༦). ཨིམིསྶཱ ཨཊྛཀཐཱཡ ‘‘ཨིཏོ ཙིཏོ ཙཱ’’ཏི ཝུཏྟཏྟཱ ཨུམྨཱིལནནིམཱིལནནྟི ཨེཏྠ ‘‘ཝིཝིདྷཱ ཏཾ ཨནོལོཀེཏྭཱ ཏམེཝ ཨོལོཀེནྟསྶཱ’’ཏི ལབྦྷཏི.

༣༣༢. ཨམོཙནཱདྷིཔྤཱཡསྶ མུཏྟསྨིཾ ཨནཱཔཏྟི པཀཱསིཏཱཏི ཡོཛནཱ. མོཙནཱདྷིཔྤཱཡཾ ཝིནཱ བྷེསཛྫཀརཎཏྠཾ སུདྡྷཙིཏྟེན ཨངྒཛཱཏེ བྷེསཛྫལེཔཾ ཀརོནྟསྶ ཝཱ སུདྡྷཙིཏྟེནེཝ ཨུཙྩཱརཔསྶཱཝཱདིཾ ཀརོནྟསྶ ཝཱ མུཏྟེཔི ཨནཱཔཏྟཱིཏི ¶ ཨིདཾ ‘‘ཨནཱཔཏྟི སུཔིནནྟེན ནམོཙནཱདྷིཔྤཱཡསྶཱ’’ཏིཨཱདིནཱ (པཱརཱ. ༢༦༣) ནཡེན ཨནཱཔཏྟིཝཱརེ ཝུཏྟམེཝཱཏི ཨཏྠོ.

ཨིམསྨིཾ པཱཋེ ‘‘ཨནུཔཀྐམནྟསྶཱ’’ཏི ཨཝུཏྟེཔི ཨིམསྶ པཱཋསྶ པུརཏོ ‘‘ཙེཏེཏི ན ཨུཔཀྐམཏི མུཙྩཏི, ཨནཱཔཏྟཱི’’ཏི (པཱརཱ. ༢༦༢) ཙ ‘‘ན ཙེཏེཏི ན ཨུཔཀྐམཏི མུཙྩཏི, ཨནཱཔཏྟཱི’’ཏི (པཱརཱ. ༢༦༢) ཙ ཝཙནཏོ ཏཾ སངྒཧེཏུམཱཧ ‘‘ཨནུཔཀྐམཏོཔི ཙ མུཏྟསྨིཾ ཨནཱཔཏྟི པཀཱསིཏཱ’’ཏི. མོཙནསྶཱདརཱགེན པཱིལི༹ཏོ ཧུཏྭཱ ‘‘ཨཧོ ཝཏ མེ མུཙྩེཡྻཱ’’ཏི ཙིནྟེཏྭཱ ཝཱ ཨེཝརཱུཔམོཙནསྶཱདརཱགཔཱིལཱ༹པུབྦངྒམཙིཏྟེ ཨསཏིཔི ཀེཝལཾ ཀཱམཝིཏཀྐམཏྟེན ཨུཔཧཏོ ཧུཏྭཱ ཏཱདིསཨཛ྄ཛྷཏྟིཀབཱཧིརཝཏྠཱུསུ གྷཊྚནཝསེན ཝཱ ཨཱཀཱསེ ཀཊིཀམྤནཝསེན ཝཱ ཨུཔཀྐམཾ ཨཀརོནྟསྶ ཏཱདིསཙིནྟཱབལེན ཝཱ ཀཱམཝིཏཀྐབལེན ཝཱ སུཀྐེ མུཏྟེཔི ཨནཱཔཏྟཱིཏི ཨིདཾ ཡཐཱཝུཏྟཔཱཋཝསེན པཀཱསིཏནྟི ཨཏྠོ.

སུཔིནནྟེན མུཏྟསྨིཾ, ཨནཱཔཏྟི པཀཱསིཏཱཏི ཨེཏྠ ཨནྟསདྡཏྠཱབྷཱཝཏོ སུཔིནེཏི ཨཏྠོ. སུཔིནེ མེཐུནཾ དྷམྨཾ པཊིསེཝནྟསྶ ཝཱ མཱཏུགཱམེཧི ཀཱཡསཾསགྒཾ ཨཱཔཛྫནྟསྶ ཝཱ སུཀྐེ མུཏྟེཔི ¶ ཨཝིསཡཏྟཱ ཨནཱཔཏྟི པཱལི༹ཡཾ ‘‘ཨནཱཔཏྟི བྷིཀྑུ སུཔིནནྟེནཱ’’ཏི (པཱརཱ. ༢༦༣) ཨིམིནཱ པཀཱསིཏཱཏི ཨཏྠོ.

ཨེཏྠ ཋཏྭཱ ཨཊྛཀཐཱཡཾ ‘‘སུཔིནེ པན ཨུཔྤནྣཱཡ ཨསྶཱདཙེཏནཱཡ སཙསྶ ཝིསཡོ ཧོཏི, ནིཙྩལེན བྷཝིཏབྦཾ. ན ཧཏྠེན ནིམིཏྟཾ ཀཱིལཱ༹པེཏབྦཾ. ཀཱསཱཝཔཙྩཏྠརཎརཀྑནཏྠཾ པན ཧཏྠཔུཊེན གཧེཏྭཱ ཛགྒནཏྠཱཡ ཨུདཀཊྛཱནཾ གནྟུཾ ཝཊྚཏཱི’’ཏི (པཱརཱ. ཨཊྛ. ༢.༢༦༢) ཝུཏྟཏྟཱ ཨཎྜཔཱལིཀཱ ཀིཀཱིསཀུཎཱ ཝིཡ, ཝཱལཔཱལིཀཱ ཙམརཱི ཝིཡ, ཨེཀནེཏྟཔཱལཀོ པུརིསོ ཝིཡ ཙ ཀཱཡཛཱིཝིཏེཔི ཨཔེཀྑཾ པཧཱཡ སཱིལཾ ¶ རཀྑིཏུཀཱམེན སིཀྑཱཀཱམེན ནིབྦཱནགཱམིནིཔཊིཔཏྟིཾ པཱུརེཏུཀཱམེན ཀུལཔུཏྟེན ‘‘ཨཉྙཏྲ སུཔིནནྟཱ’’ཏི (པཱརཱ. ༢༣༧) ཝདཏོ ཏཐཱགཏསྶ ཨདྷིཔྤཱཡཱནུཀཱུལཾ ཨཊྛཀཐཱཏོ ཉཏྭཱ ཨཔྤམཏྟེན པཊིཔཛྫིཏབྦནྟི ཨཡམཏྲཱནུསཱསནཱི.

སུཀྐཝིསྶཊྛིཀཐཱཝཎྞནཱ.

༣༣༣. མནུསྶིཏྠིནྟི མནུསྶཛཱཏིཀཾ ཨིཏྠིཾ, ‘‘མཱཏུགཱམོ ནཱམ མནུསྶིཏྠཱི, ན ཡཀྑཱི, ན པེཏཱི, ན ཏིརཙྪཱནགཏཱ, ཨནྟམསོ ཏདཧུཛཱཏཱཔི དཱརིཀཱ, པགེཝ མཧཏྟརཱི’’ཏི (པཱརཱ. ༢༧༡) པདབྷཱཛནེ ཝུཏྟཏྟཱ ཏདཧུཛཱཏཀུམཱརིཀཱབྷཱཝེནཔི ཋིཏཾ ཛཱིཝམཱནཀམནུསྶམཱཏུགཱམནྟི ཝུཏྟཾ ཧོཏི. ‘‘མནུསྶིཏྠི’’ནྟི སཱམཉྙཝཙནེན ཛཱིཝམཱནཀམནུསྶིཏྠིནྟི ཨཡཾ ཝིསེསོ ཀུཏོ ལབྦྷཏཱིཏི? ཝིནཱིཏཝཏྠུམྷི (པཱརཱ. ༢༨༡ ཨཱདཡོ) མཏིཏྠིཡཱ ཀཱཡཾ ཕུསནྟསྶ ཐུལླཙྩཡཝཙནཏོ པཱརིསེསཏོ ལབྦྷཏི. ཨཱམསནྟོཏི ‘‘ཧཏྠགྒཱཧཾ ཝཱ ཝེཎིགྒཱཧཾ ཝཱ ཨཉྙཏརསྶ ཝཱ ཨཉྙཏརསྶ ཝཱ ཨངྒསྶ པརཱམསན’’ནྟི (པཱརཱ. ༢༧༠) ཝུཏྟཏྟཱ ཧཏྠཱདིཨངྒཔཙྩངྒཕུསནཱདིནཱནཔྤཀཱརཱནཾ ཨཉྙཏརེན པཀཱརེན ཨཱམསནྟོཏི ཨཏྠོ. ཨཏྟནོ ཀཱཡེན ཨིཏྠིཡཱ ཀཱཡསྶ སཾསགྒེ མིསྶཱིབྷཱཝེ རཱགོ ཀཱཡསཾསགྒརཱགོ. སངྒྷཱདིསེསོ ཨེཏསྶ ཨཏྠཱིཏི སངྒྷཱདིསེསིཀོ, ཀཱཡསཾསགྒསངྒྷཱདིསེསོ ཨཱཔནྣོ ཧོཏཱིཏི ཝུཏྟཾ ཧོཏི.

༣༣༤. ཀཱཡསཾསགྒརཱགེན ཨིཏྠིཡཱ ཨནྟམསོ ལོམམྤི ཨཏྟནོ སརཱིརེ ལོམེན ཕུསནྟསྶ བྷིཀྑུནོ སངྒྷཱདིསེསཱཔཏྟི ཧོཏཱིཏི ཡོཛནཱ. ཨེཏྠ (པཱརཱ. ཨཊྛ. ༢.༢༧༤) ‘‘ལོམགཎནཱཡ སངྒྷཱདིསེསཱ ཧོནྟཱི’’ཏི ཀུརུནྡཊྛཀཐཱམཏསྶ ཨཊྛིཏཏྟཱ ¶ , ‘‘ཀོཊྛཱསགཎནཱཡ ན ཧོཏི, ཨིཏྠིགཎནཱཡ ཧོཏཱི’’ཏི མཧཱཨཊྛཀཐཱམཏསྶ ཋིཏཏྟཱ སངྒྷསནྟཀེ མཉྩཔཱིཋེ པཙྩཏྠརཎཱདིནཱ ཀེནཙི ¶ ཨཔྤཊིཙྪཱདིཏེ ཕུསནྟསྶ ཝིཡ ལོམགཎནཱཡ ཨཧུཏྭཱ ཕུཊྛལོམཱནཾ བཧུཏྟེཔི ཨེཀསྨིཾ པཡོགེ ཨེཀཱ ཨེཝ ཨཱཔཏྟི, བཧཱུསུ པཡོགེསུ པཡོགགཎནཱཡ ཨཱཔཏྟིཡོ ཧོནྟཱིཏི སནྣིཊྛཱནཾ.

༣༣༥. ཨིཏྠིཡཱཏི མནུསྶིཏྠིཡཱ. སམྥུཊྛོཏི ཧཏྠཱདིསརཱིརཱཝཡཝེ སཾསགྒཾ སམཱཔནྣོ. སེཝནཙེཏནོ ཝཱཡམིཏྭཱ ཀཱཡསཾསགྒརཱགེན ཨཏྟནོ ཀཱཡཾ ཙཱལེཏྭཱཏི ཨཏྠོ. སངྒྷཱདིསེསཏཱཏི ཨེཏྠ སཀཏྠེ ཏདྡྷིཏཔྤཙྩཡོ. ‘‘སངྒྷཱདིསེསིཏཱ’’ཏི པན པཱཋོ སུནྡརོ, སངྒྷཱདིསེསསྶ ཨཏྠིཏཱ ཝིཛྫམཱནབྷཱཝོཏི ཨཏྠོ. སངྒྷཱདིསེསཱཔཏྟིཡཱ སབྦྷཱཝསངྑཱཏཱ ཨཏྠིཏཱ ཨཱིཔཙྩཡཏྠེ པུགྒལེ སངྒྷཱདིསེསཱིསདྡཔཝཏྟིནིམིཏྟཾ ཧོཏཱིཏི བྷཱཝཔཙྩཡོ ཏཾཨཏྠཝསེན ལབྦྷཏི. ཡཐཱཧུ ‘‘ཡསྶ གུཎསྶ ཧི བྷཱཝཱ དབྦེ སདྡསནྣིཝེསོ, ཏདབྷིདྷཱནེ ཏྟཏཱདཡོ’’ཏི.

༣༣༦. ཨེཀེན ཧཏྠེན གཧེཏྭཱཏི (ཀངྑཱ. ཨཊྛ. ཀཱཡསཾསགྒསིཀྑཱཔདཝཎྞནཱ) ཨེཏྠ ‘‘ཀཱཡསཾསགྒརཱགེནཱ’’ཏི ཨཱནེཏྭཱ སམྦནྡྷིཏབྦཾ. ‘‘མནུསྶིཏྠི’’ནྟི ཨཛ྄ཛྷཱཧཱརོ. ཏཾ མནུསྶིཏྠིཾ. ཏཏྠ ཏཏྠཱཏི ཨིཏྠིཡཱ ཏསྨིཾ ཏསྨིཾ སརཱིརཱཝཡཝེ. ‘‘ཨེཀཱཝཱཔཏྟཱི’’ཏི པཋམཾ གཧིཏཧཏྠསྶ ཨནཔནཱིཏཏྟཱ ཝུཏྟཾ. གཧིཏཧཏྠཾ པན མོཙེཏྭཱ པུནཔྤུནཾ ཕུསནྟསྶ པཡོགགཎནཱཡ ཨཱཔཏྟི ཧོཏཱིཏི བྱཏིརེཀཏོ ལབྦྷཏི.

༣༣༧. ཨེཀེན ཧཏྠེན ཨགྒཧེཏྭཱ སཱིསཏོ ཡཱཝ པཱདཾ, པཱདཏོ ཡཱཝ སཱིསཉྩ ཀཱཡཱ ཧཏྠཾ ཨམོཙེཏྭཱ དིཝསམྤི ཏཾ ཨིཏྠིཾ ཕུསནྟསྶ ཨེཀཱཝཱཔཏྟཱིཏི ཡོཛནཱ. ཨེཏྠཱཔི ‘‘ཨམོཙེཏྭཱ’’ཏི ¶ བྱཏིརེཀཏོ མོཙེཏྭཱ ཕུསནྟསྶ པཡོགགཎནཱཡ ཨནེཀཱཔཏྟིཡོཏི ལབྦྷཏི.

༣༣༨. ཨེཀཏོ གཧིཏཔཉྩངྒུལཱིནཾ གཎནཱཡ སཙེ ཨཱཔཏྟི སིཡཱ, ཨེཀསྶ མཱཏུགཱམསྶ སརཱིརཾ རཱགཙིཏྟེན ཕུསནྟསྶ དྭཏྟིཾསཀལཱཔཀོཊྛཱསཏོ བྱཏིརེཀསྶ སརཱིརསྶཱབྷཱཝཱ དྭཏྟིཾསཀལཱཔཀོཊྛཱསགཎནཱཡ ཨཱཔཏྟིཡཱ བྷཝིཏབྦཾ, ཏཐཱ ཨབྷཱཝཏོ ཨིདམྤི ན ཧོཏཱིཏི དསྶནཏྠཾ ‘‘ན ཧི ཀོཊྛཱསཏོ སིཡཱ’’ཏི ཨཱཧ.

༣༤༠-༡. ཨིཏྠིཡཱ ཝིམཏིསྶཱཔི ཨཏྟནོ ཀཱཡེན ཨིཏྠིཡཱ ཀཱཡཾ ཕུསཏོ ཏསྶ ཐུལླཙྩཡཾ སིཡཱ, ཨིཏྠིཡཱ པཎྜཀཱདིསཉྙིནོཔི ཨཏྟནོཔི ཀཱཡེན ¶ ཨིཏྠིཡཱ ཀཱཡཾ ཕུསཏོ ཏསྶ ཐུལླཙྩཡཾ སིཡཱ. ཨཱདི-སདྡེན པུརིསཏིརཙྪཱནགཏཱནཾ སངྒཧོ. ཨིཏྠིཡཱ ཨིཏྠིསཉྙིནོ ཨཏྟནོ ཀཱཡེན ཨིཏྠིཡཱ ཀཱཡསམྦདྡྷཾ ཕུསཏོ ཏསྶ ཐུལླཙྩཡཾ སིཡཱ. པཎྜཀེ པཎྜཀསཉྙིནོ ཨཏྟནོ ཀཱཡེན པཎྜཀསྶ ཀཱཡཾ ཕུསཏོ ཏསྶ ཐུལླཙྩཡཾ སིཡཱ. ཡཀྑིཔེཏཱིསུ ཡཀྑིཔེཏིསཉྙིནོ ཨཏྟནོ ཀཱཡེན ཏཱསཾ ཀཱཡཾ ཕུསཏོ ཏསྶ ཐུལླཙྩཡཾ སིཡཱཏི ཡོཛནཱ. ཨེཏྠ ‘‘པཎྜཀགྒཧཎེན ཨུབྷཏོབྱཉྫནཀོཔི གཡ྄ཧཏཱི’’ཏི ཝཛིརབུདྡྷིཊཱིཀཱཡཾ ཝུཏྟཾ. ‘‘ཨིཏྠིཡཱ ཝེམཏིཀསྶཱཔི པཎྜཀཱདིསཉྙིནོཔི ཨཏྟནོ ཀཱཡེན ཨིཏྠིཡཱ ཀཱཡསམྦདྡྷཾ ཕུསཏོ ཏསྶ ཐུལླཙྩཡཾ སིཡཱ’’ཏི ན ཡོཛེཏབྦཾ. ཀསྨཱ? ཏཐཱ ཡོཛནཱཡཾ པཱལི༹ཡཾ དུཀྐཊཾ ཝུཏྟཾ, ན ཐུལླཙྩཡནྟི ཨནིཊྛཔྤསངྒཏོ.

‘‘དུཀྐཊཾ ཀཱཡསཾསགྒེ, ཏིརཙྪཱནགཏིཏྠིཡཱ’’ཏི ཨིམིནཱ ཝིནཱིཏཝཏྠུམྷི ཨཱགཏནཡེ སངྒཧིཏེཔི ཏེནེཝ ནཡེན པཎྜཀེ ¶ ཝིམཏིཨིཏྠིསཉྙིཏཱདིཨཉྙམཏིཔཀྑེ ཙ པུརིསཏིརཙྪཱནགཏེསུ པུརིསཏིརཙྪཱནགཏསཉྙིཝིམཏིཔཎྜཀཱདིཨཉྙམཏིཔཀྑེ ཙ ཨིཏི ཨིམེསཾ ཏིཎྞཾ ཀཱཡཔཊིབདྡྷཱམསནཱདཱིསུ ཙ པདབྷཱཛནེ ཝུཏྟསབྦདུཀྐཊཱཔཏྟིཡོ ཨུཔལཀྑིཏཱཏི དཊྛབྦཾ.

༣༤༢. ཨཏྟནོ ཀཱཡེན པཊིབདྡྷེན ཨིཏྠིཡཱ ཀཱཡེན པཊིབདྡྷཾ ཕུསནྟསྶ བྷིཀྑུནོ པན དུཀྐཊནྟི ཡོཛནཱ. ཨེཏྠ པི-སདྡོ ཝུཏྟདུཀྐཊཱནཾ སམུཙྩཡཏྠོ. ཙ-སདྡེན པན ཨཝུཏྟསམུཙྩཡཏྠེན ‘‘ནིསྶགྒིཡེན ཀཱཡཾ ཨཱམསཏི. ནིསྶགྒིཡེན ཀཱཡཔཊིབདྡྷཾ ཨཱམསཏི. ནིསྶགྒིཡེན ནིསྶགྒིཡཾ ཨཱམསཏི, ཨཱཔཏྟི དུཀྐཊསྶཱ’’ཏི (པཱརཱ. ༢༧༦) པཱལི༹ཡཾ ཨཱགཏདུཀྐཊཱནཾ སངྒཧོ ཝེདིཏབྦོ.

༣༤༣-༤. ན ཀེཝལཾ པདབྷཱཛནཱགཏཨིཏྠིསརཱིརཱདིཀམེཝ ཨནཱམཱསཾ, ཝིནཱིཏཝཏྠཱུསུ དཱརུདྷཱིཏལིཀཝཏྠུཨནུལོམཏོ པོཏྠལིཀཱདིཨིཏྠིརཱུཔཀཉྩ ནིསྶགྒིཡཝཱརཱནུལོམཏོ ཨསརཱིརཊྛཾ མཱཏུགཱམེཧི པརིབྷུཏྟཝཏྠཱབྷརཎཱདིཉྩ ཝིབྷངྒཀྑནྡྷཀཱདཱིསུ ཝུཏྟནཡཱནུསཱརེན ཨཊྛཀཐཱགཏཾ ཨཝསེསཾ ཨནཱམཱསཝཏྠུཉྩ ཨཱམསནྟསྶ ཨཱཔཏྟིཾ སངྒཧེཏུམཱཧ ‘‘ཨིཏྠཱིན’’ནྟིཨཱདི.

‘‘ཨིཏྠཱིནཾ ཨིཏྠིརཱུཔཉྩཱ’’ཏི ཨིདཾ ‘‘ཨིཏྠིཀཱཡ ཨིཏྠིདྷནཾ (པཱརཱ. ༣༤), སདྡྷཱནཾ སདྡྷཱཔརཱཡན’’ནྟིཨཱདཱིསུ ཝིཡ ལོཀཝོཧཱརཝསེན ཝུཏྟཾ. ཨིཏྠཱིནཾ དཱརུལོཧམཡཱདིཀཾ ཨིཏྠིརཱུཔཉྩཱཏི ཡོཛནཱ. ཨཱདི-སདྡེན ཧེཊྛིམཔརིཙྪེདཏོ མཏྟིཀཱཡ, པིཊྛེན ཝཱ ཀཏཾ མཱཏུགཱམརཱུཔཾ སངྒཎྷཱཏི. མཱཏུགཱམརཱུཔཾ ཡེན ཀེནཙི དིནྣཾ སབྦརཏནམཡཾ ཝིནཱ ཨཝསེསཾ སཱདིཡིཏྭཱ ¶ བྷིནྡིཏྭཱ ¶ སམཎསཱརུཔྤཔརིཀྑཱརཾ ཀཱརཱཔེཏུཾ, ཨཕུསིཏྭཱ པརིབྷུཉྫིཏབྦེ ཝཱ ཡོཛེཏུཾ ཝཊྚཏི.

‘‘ཝཏྠ’’ནྟི ཨིམིནཱ ནིཝཱསནཔཱརུཔནདྭཡམྤི སཱམཉྙེན གཧིཏཾ. ཨིདཉྩ མཱཏུགཱམེན པརིབྷུཉྫིཏུཾ ཋཔིཏམྤི ཨནཱམཱསམེཝ, ཙཱིཝརཏྠཱཡ དིནྣཾ སམྤཊིཙྪིཏྭཱ གཎྷིཏུཾ ཝཊྚཏི. ཧེཊྛིམཔརིཙྪེདེན ཏིཎཙུམྦཊཀཾ, ཨངྒུལིཡཱ པཎྞམུདྡིཀཾ ཨུཔཱདཱཡ ཨལངྐཱརམེཝ. ཨེཏྠ ཙ ཝཱལཀེསཝཊྚཀེསེསུ པཝེསནཀདནྟསཱུཙིཨཱདི ཀཔྤིཡབྷཎྜཾ དིཡྻམཱནཾ སམཎསཱརུཔྤཔརིཀྑཱརཏྠཱཡ གཧེཏབྦཾ.

ཏཏྠཛཱཏཕལཾ ཁཛྫནྟི རུཀྑེ ཋིཏཾ ཁཱདིཏབྦཾ པནསནཱལི༹ཀེརཱདིཕལཉྩ མནུསྶེཧི རཱསིཀཏཾ པརིབྷུཉྫིཏབྦཕལཉྩ ‘‘མནུསྶེཧི རཱསིཀཏེསུཔི ཨེསེཝ ནཡོ’’ཏི (པཱརཱ. ཨཊྛ. ༢.༢༨༡) ཨཊྛཀཐཱཡཾ ཝུཏྟཏྟཱ ཨནཱམཱསནྟི ཨུཔལཀྑཎཏོ ཨིམིནཱཝ གཧེཏབྦཾ. ཨརཉྙེ རུཀྑཏོ པཏིཏཾ ཕལཾ ‘‘ཨནུཔསམྤནྣསྶ དསྶཱམཱི’’ཏི གཧེཏུཾ ཝཊྚཏི. ‘‘མུགྒཱདིཾ ཏཏྠཛཱཏཀ’’ནྟི ཨུཔལཀྑཎཔདཏྟཱ གཙྪཏོ ཝིཡུཏྟམྤི གཧེཏབྦཾ. མུགྒཱདིནྟི ཨེཏྠ ‘‘ཨཔརཎྞ’’ནྟི པཱཋསེསོ.

སབྦཱནི དྷཉྙཱནཱིཏི ‘‘སཱལི ཝཱིཧི ཡཝོ ཀངྒུ, ཀུདྲཱུསཝརཀགོདྷུམཱ’’ཏི ཝུཏྟཱནི སཏྟ དྷཉྙཱནི. ཁེཏྟམགྒེན གཙྪཏཱ སཱལིསཱིསེ ཧཏྠེན ཨཕུསནྟེན གནྟབྦཾ. སཙེ མགྒོ སམྦཱདྷོ ཧོཏི, སརཱིརེ དྷཉྙཾ ཕུསནྟེཔི མགྒཏྟཱ ན དོསོ. ཝཱིཐིཡཾ, གེཧངྒཎེ ཝཱ དྷཉྙེསུ པསཱརིཏེསུ ཨཔསཀྐིཏྭཱ ཙེ གནྟུཾ ན སཀྐཱ, ‘‘མགྒཾ ཨདྷིཊྛཱཡ གནྟབྦ’’ནྟི (པཱརཱ. ཨཊྛ. ༢.༢༨༡) ཨཊྛཀཐཱཝཙནཏོ ‘‘ཨིམཾ མགྒཾ གམིསྶཱམཱི’’ཏི གནྟུཾ ཝཊྚཏི. ‘‘ཀུལགེཧེ དྷཉྙམཏྠཀེ ཙེ ཨཱསནཾ པཉྙཱཔེཏྭཱ དིནྣཾ ཧོཏི, ནིསཱིདིཏུཾ ཝཊྚཏཱི’’ཏི (པཱརཱ. ཨཊྛ. ༢.༢༨༡ ཨཏྠཏོ སམཱནཾ) ཨཊྛཀཐཱཡཾ ཝུཏྟཾ. ‘‘ཨཱསནསཱལཱཡཾ དྷཉྙེ ཝིཔྤཀིཎྞེ ཨནུཀྐམིཏྭཱ ཨེཀམནྟེ པཱིཋཀཾ པཉྙཱཔེཏྭཱ ¶ ནིསཱིདིཏབྦཾ. སཙེ མནུསྶཱ ཏསྨིཾ དྷཉྙམཏྠཀེ ཨཱསནཾ པཉྙཱཔེཏྭཱ དེནྟི, ནིསཱིདིཏུཾ ཝཊྚཏཱི’’ཏི (པཱརཱ. ཨཊྛ. ༢.༢༨༡ ཨཏྠཏོ སམཱནཾ) ཨཊྛཀཐཱཡཾ ཝུཏྟཏྟཱ ཨཏྟནཱ ཏཏྠ ཨཱསནཾ པཉྙཱཔེཏྭཱ ནིསཱིདིཏུཾ ན ཝཊྚཏི.

༣༤༥. དྷམནསངྑཱདིཾ སབྦཾ པཉྩངྒཏུརིཡམྤི ཙཱཏི སམྦནྡྷོ. དྷམནསངྑོ ནཱམ སདྡཀརཎསངྑོ ¶ . ཨཱདི-སདྡེན ཝཾསསིངྒཏཱལཱ༹དཱིནཾ སངྒཧོ. པཉྩངྒཏུརིཡནྟི ཨཱཏཏཾ, ཝིཏཏཾ, ཨཱཏཏཝིཏཏཾ, གྷནཾ, སུསིརནྟི པཉྩངྒསངྑཱཏཾ ཏུརིཡཾ. ཏཏྠ ཨཱཏཏཾ ནཱམ ཙམྨཔརིཡོནདྡྷེསུ བྷེརིཨཱདཱིསུ ཨེཀཏོ ཨཱཀཌྜྷིཏྭཱ ཨོནདྡྷཾ ཨེཀཏལཏུརིཡཾ. ཝིཏཏཾ ནཱམ ཨུབྷཏོ ཨཱཀཌྜྷིཏྭཱ ཨོནདྡྷཾ ཨུབྷཡཏལཏུརིཡཾ. ཨཱཏཏཝིཏཏཾ ནཱམ ཨུབྷཡཏོ ཙ མཛ྄ཛྷཏོ ཙ སབྦཏོ པརིཡོནནྡྷིཏཾ. གྷནཾ སམྨཱདི. སམྨནྟི ཏཱལ༹ཾ, གྷཎྚཱཀིངྐཎིཨཱདཱིནམྤི ཨེཏྠེཝ སངྒཧོ. སུསིརནྟི ཝཾསཱདི.

ཨིདྷ (པཱརཱ. ཨཊྛ. ༢.༢༨༡) ཀུརུནྡཊྛཀཐཱཡཾ ཝུཏྟནཡེན བྷེརིཔོཀྑརཉྩ བྷེརིཏལཙམྨཉྩ ཝཱིཎཱ ཙ ཝཱིཎཱཔོཀྑརཙམྨཉྩ དཎྜོ ཙ ཨནཱམཱསཾ. ‘‘པཱུཛཾ ཀཏྭཱ ཙེཏིཡངྒཎཱདཱིསུ ཋཔིཏབྷེརིཡོ ཨཙཱལེནྟེན ཨཝསེསཊྛཱནཾ སམྨཛྫིཏབྦཾ. ཀཙཝརཚཌྜནཀཱལེ ཀཙཝརཾ ཝིཡ གཧེཏྭཱ ཨེཀསྨིཾ ཋཱནེ ཋཔེཏབྦ’’ནྟི མཧཱཔཙྩརིཡཾ ཝུཏྟཾ. ཏུརིཡབྷཎྜེསུ ཡཾ ཀིཉྩི ཨཏྟནོ དཱིཡམཱནཾ ཏཾ པརིཝཏྟེཏྭཱ ཀཔྤིཡཔརིཀྑཱརཾ གཧེཏུཾ ཨདྷིཝཱསེཏབྦཾ. དོཎི ཝཱ པོཀྑརཾ ཝཱ དནྟཀཊྛནིཀྑིཔནཏྠཱཡ, ཙམྨཉྩ སཏྠཀོསཀརཎཏྠཱཡ གཧེཏབྦཾ.

རཏནཱནི ཙ སབྦཱནཱིཏི མུཏྟཱ མཎི ཝེལུ༹རིཡོ སངྑོ སིལཱ པཝཱལ༹ཾ རཛཏཾ ཛཱཏརཱུཔཾ ལོཧིཏངྐོ མསཱརགལླནྟི (པཱརཱ. ཨཊྛ. ༢.༢༨༡) ཝུཏྟཱནི སབྦཱནི རཏནཱནི ཙ. ཨེཏྠ ཙ ཝིདྡྷཱ, ཨཝིདྡྷཱ ཝཱ སཱམུདྡིཀཱདཱི སབྦཱཔི མུཏྟཱ ཨནཱམཱསཱ. བྷཎྜམཱུལཏྠཉྩ གཎྷིཏུཾ ¶ ན ཝཊྚཏི. ཨནྟམསོ ཛཱཏིཕལིཀཾ ཨུཔཱདཱཡ ནཱིལཔཱིཏཱདིབྷེདོ སབྦོཔི མཎི དྷོཏཝིདྡྷོ ཨནཱམཱསོ. ཨཱཧཏཱཀཱརེནེཝ ཋིཏོ ཨཝིདྡྷཱདྷོཏོ མཎི པཏྟཱདི བྷཎྜམཱུལཏྠཾ ཨདྷིཝཱསེཏུཾ ཝཊྚཏཱིཏི ཝུཏྟཾ. མཧཱཔཙྩརིཡཾ པན པཊིཀྑིཏྟཾ. པཙིཏྭཱ ཀཏོ ཀཱཙམཎིཡེཝེཀོ ཝཊྚཏི. ཝེལུ༹རིཡེ ཙ མཎིསདིསོཡེཝ ཝིནིཙྪཡོ.

དྷམནསངྑོ ‘‘སབྦཾ དྷམནསངྑཱདི’’ནྟིཨཱདིགཱཐཱཡ ཏུརིཡེསུ གཧིཏོ. རཏནཁཙིཏོ སངྑོ ཨནཱམཱསོ. པཱནཱིཡསངྑོ དྷོཏོཔི ཨདྷོཏོཔི ཨཱམཱསོ. ཨཝསེསསངྑོ པན ཨཉྫནཱདིབྷེསཛྫཏྠཾ, པཏྟཱདིབྷཎྜམཱུལབྷཱཝེན ཙ ཨདྷིཝཱསེཏུཾ ཝཊྚཏི. སུཝཎྞེན ཨེཀཏོ ཝིལིཡཱཔེཏྭཱ ཀཏཱ མུགྒཝཎྞཱ སིལཱ ཨནཱམཱསཱ. སེསཱ སིལཱ ཁུདྡཀནིསཱནཱདིཀམྨཏྠཾ ཨདྷིཝཱསེཏུཾ ཝཊྚཏི. ‘‘པཝཱལ༹ཾ དྷོཏམདྷོཏཉྩ ཝིདྡྷམཝིདྡྷཉྩ སབྦཐཱ ཨནཱམཱསཾ, ནཱཔི ཨདྷིཝཱསེཏབྦ’’ནྟི མཧཱཔཙྩརིཡཾ ཝུཏྟཏྟཱ པཝཱལ༹པཊིམཱཙེཏིཡཱནི ཙེཝ པོཏྠཀེསུ པཝེསེཏབྦཨཱཎིཡཱ ¶ མཱུལེ, ཨགྒེཙ པཝེསེཏབྦཾ པདུམཱདིཨཱཀཱརེན ཀཏཾ ཝཊྚཉྩ ན གཧེཏབྦཾ ན ཕུསིཏབྦཾ.

བཱིཛཏོ པཊྛཱཡ རཛཏཾ, ཛཱཏརཱུཔཉྩ ཀཏཾ ཝཱ ཧོཏུ ཨཀཏཾ ཝཱ, སབྦསོ ཨནཱམཱསཾ, ན ཙ སཱདིཏབྦཾ. ཨིམིནཱ ཀཏཾ པཊིམཱདིཀཉྩ ཨཱརཀཱུཊལོཧཉྩ ཨནཱམཱསནྟི ཝཀྑཏི. ཀཏཱཀཏསུཝཎྞརཛཏཱནཾ ཨསཱདིཡིཏབྦཏཱཡ ཨིདྷ ཨཊྛཀཐཱཡ ཨཱགཏཏྟཱ ཨུཏྟརེན རཱཛཔུཏྟེན ཀཱརེཏྭཱ ཨཱཧཊཾ སུཝཎྞཙེཏིཡཾ ན ཝཊྚཏཱིཏི མཧཱཔདུམཏྠེརེན པཊིཀྑིཏྟནྟི སུཝཎྞཔཊིམཱཙེཏིཡཔོཏྠཀཱཝཙྪཱདཀམཎིཔདུམཝཊྚཱདི ཡཾ ཀིཉྩི ན སཱདིཏབྦམེཝ, ན ཙ ཨཱམསིཏབྦཾ. ཨེཏེན ཀཏཾ སེནཱསནོཔཀརཎཾ པན པརིབྷུཉྫིཏུཾ ཝཊྚཏི. དྷམྨམཎྜཔེ ཀཏམྤི ¶ པཊིཛགྒིཏུཾ ཝཊྚཏི. ལོཧིཏཝཎྞོ མཎི, མསཱརགལླམཎི ཙ སབྦཐཱ ཨནཱམཱསོ, ན ཙ ཨདྷིཝཱསེཏབྦོཏི མཧཱཔཙྩརིཡཾ ཝུཏྟཾ.

༣༤༦. སབྦམཱཝུདྷབྷཎྜནྟི ཁགྒཱདི སབྦཾ ཨཱཝུདྷོཔཀརཎཾ པཏྟཱདིཀཔྤིཡཔརིཀྑཱརམཱུལཏྠཱཡ དཱིཡམཱནཾ སཏྠཝཱཎིཛཱཡ ཨཀཱཏབྦཏྟཱ ན གཧེཏབྦཾ, ‘‘ཨིམཾ གཎྷཐཱ’’ཏི དིནྣཾ བྷིནྡིཏྭཱ ཁཎྜཱཁཎྜིཀཾ ཀཏྭཱ ‘‘ཁུརཱདིཀཔྤིཡཔརིཀྑཱརཾ ཀཱརེསྶཱམཱི’’ཏི སཱདིཏུཾ ཝཊྚཏི. སངྒཱམབྷཱུམིཡཾ མགྒེ པཏིཏཁགྒཱདིཾ དིསྭཱ པཱསཱཎེན བྷིནྡིཏྭཱ ‘‘ཁུརཱདིཀཔྤིཡབྷཎྜཱནི ཀཱརེསྶཱམཱི’’ཏི གཎྷིཏུཾ ཝཊྚཏི. ཨུསུསཏྟིཨཱདིཀཾ ཕལཏོ དཎྜཾ ཨཔནེཏྭཱ ཀཔྤིཡཔརིཀྑཱརཀཱརཱཔནཏྠཱཡ གཧེཏབྦཾ.

ཛིཡཱཏི དྷནུགུཎོ. ཙ-ཀཱརེན ཨིམིསྶཱ གཱཐཱཡ ཨཝུཏྟཾ ཨངྐུསཏོམརཱདིཾ པརཧིཾ སོཔཀརཎཾ སངྒཎྷཱཏི. དྷནུདཎྜཀོཏི ཛིཡཱཝིརཧིཏོ དྷནུདཎྜཀོ. ཨིདཾ པརཧིཾསོཔཀརཎབྷཎྜཱདིཀཾ ཝིཧཱརེ སམྨཛྫིཏབྦཊྛཱནེ ཋཔིཏཾ ཙེ, སཱམིཀཱནཾ ཝཏྭཱ ཏེཧི ཨགྒཧིཏཾ ཙེ, ཨཙཱལེནྟེན སམྨཛྫིཏབྦཾ.

ཛཱལཉྩཱཏི མཙྪཛཱལཔཀྑིཛཱལཱདིཛཱལཉྩ. ཛཱལཾ དཱིཡམཱནཾ ཚཏྟཝེཋནཏྠཾ, ཨཱསནཙེཏིཡཱདིམཏྠཀེ བནྡྷནཱདིཔཡོཛནེ སཏི ཏདཏྠཉྩ གཧེཏབྦཾ. སརཝཱརཎཾ ནཱམ ཕལཀཱདིཀཾ ཨཉྙེཧི ཨཏྟནོ ཝིཛ྄ཛྷནཏྠཱཡ ཝིསྶཊྛསརནིཝཱརཎཾ ཝིནཱསནོཔརོདྷཀཱརཎཾ ཧོཏཱིཏི བྷཎྜམཱུལཏྠཾ སཱདིཏུཾ ¶ ཝཊྚཏི. ‘‘དནྟཀཊྛཱདྷཱརཕལཀཱདི ཡདིཙྪིཏཾ ཀརོམཱི’’ཏི མུཊྛིཾ ཨཔནེཏྭཱ གཧེཏུཾ ཝཊྚཏི.

༣༤༧. ཙེཏིཡནྟི ཨེཏྠ ‘‘སུཝཎྞཙེཏིཡ’’ནྟི ཨིདཾ ‘‘སུཝཎྞཔཊིབིམྦཱདཱི’’ཏི ཨནནྟརཾ ཝུཏྟཏྟཱ ལབྦྷཏི. སུཝཎྞགྒཧཎཉྩུཔལཀྑཎནྟི རཛཏམཡཉྩ གཧེཏབྦཾ. ཨཱརཀཱུཊཀནྟི སུཝཎྞཝཎྞཾ ལོཧཝིསེསམཱཧ ¶ . ‘‘ཨནཱམཱས’’ནྟི ཨིདཾ ‘‘ཨསམྤཊིཙྪིཡཾ ཝཱ’’ཏི ཨེཏསྶ ཨུཔལཀྑཎཾ.

༣༤༨. སབྦཾ ཝཱདིཏམིཏི སམྦནྡྷོ. ཨོནཧིཏུནྟི ཙམྨཝརཏྟཏནྟཱིཧི བནྡྷིཏུཾ. ཨོནཧཱཔེཏུནྟི ཏཐེཝ ཨཉྙེཧི ཀཱརཱཔེཏུཾ. ཝཱདཱཔེཏུནྟི ཨཉྙེཧི ཝཱདཱཔེཏུཾ. ཝཱདེཏུནྟི ཨཏྟནཱ ཝཱདེཏུཾ. ཝཱདིཏནྟི ཝཱདནཱིཡཾ ཡཐཱ ‘‘ཀརཎཱིཡཾ ཀཱརིཏ’’ནྟི, ཝཱདནཱརཧཾ ཏུརིཡབྷཎྜནྟི ཨཏྠོ. ཨིདཉྩ ཨོནཧནཱདིཀིརིཡཱཡ ཀམྨཾ.

༣༤༩. ཨུཔཧཱརཾ ཀརིསྶཱམཱཏི པཱུཛཾ ཀརིསྶཱམ. ཨིཏི ཨནུམཏིགྒཧཎཏྠཱཡ. ཝཏྟབྦཱཏི ཏེ ཝཏྟཱརོ ཝཏྟབྦཱཏི ཡོཛནཱ.

༣༥༠-༡. དྷུཏྟིཡཱ ཨིཏྠིཡཱཏི ཝིཔནྣཱཙཱརཱཡ ལོལི༹ཏྠིཡཱ. སཡཾ ཕུསིཡམཱནསྶཱཏི བྷིཀྑུནོ པཡོགཾ ཝིནཱ ཨིཏྠིཡཱ ཨཏྟནཱཝ ཕུསིཡམཱནསྶ. ཀཱཡེན ཨཝཱཡམིཏྭཱཏི ཏསྶཱ སརཱིརསམྥསྶཱནུབྷཝནཏྠཾ ཨཏྟནོ ཀཱཡཾ ཨཙཱལེཏྭཱ. ཕསྶཾ པཊིཝིཛཱནཏོཏི ཕསྶཾ ཨནུབྷཝནྟསྶ.

ཨསཉྩིཙྩཱཏི ཨེཏྠ ‘‘ཕུསནེ’’ཏི པཱཋསེསོ, ‘‘ཨིམིནཱ ཨུཔཱཡེན ཨིམཾ ཕུསཱམཱི’’ཏི ཨཙེཏེཏྭཱ. ཀིཾ ཝུཏྟཾ ཧོཏི? ‘‘ཨིམིནཱ པཏྟཔཊིགྒཧཎཱདིནཱ ཨུཔཱཡེན ཨེཏིསྶཱ སརཱིརསམྥསྶཾ ཨནུབྷཝིསྶཱམཱི’’ཏི ཨཙིནྟེཏྭཱ པཏྟཐཱལཀཏཊྚཀཔཎྞཔུཊབྷེསཛྫཱདིཾ པཊིགྒཎྷཱཔེནྟིཡཱ ཧཏྠེ ཨཏྟནོ ཧཏྠེན ཕུསནཱདཱིསུ ཨནཱཔཏྟཱིཏི ཝུཏྟཾ ཧོཏི. ‘‘ཨསྶཏིཡཱ’’ཏི ཨིདཾ པན ཨིམིནཱཝ སངྒཧིཏཏྟཱ ཨིདྷ ཝིསུཾ ན ཝུཏྟཾ, མཱཏུགཱམསྶ སརཱིརེ ཕུསནབྷཱཝཾ ཨཛཱནིཏྭཱ ཨཉྙཝིཧིཏོ ཧུཏྭཱ སཏིཾ ཨནུཔཊྛཔེཏྭཱ ཧཏྠཔཱདཔསཱརཎཱདཱིསུ ཕུསནྟསྶཱཏི ཨཏྠོ.

ཨཛཱནནྟསྶཱཏི ¶ དཱརཀཱཀཱརཾ དཱརིཀཾ ‘‘མཱཏུགཱམོ’’ཏི ཨཛཱནིཏྭཱ ཀེནཙི ཀརཎཱིཡེན ཕུསནྟསྶ ¶ . མོཀྑཱདྷིཔྤཱཡིནོ ཙཱཏི ‘‘མོཀྑཱདྷིཔྤཱཡོ ཀཱཡེན ཝཱཡམཏི, ཕསྶཾ པཊིཝིཛཱནཱཏི, ཨནཱཔཏྟི. མོཀྑཱདྷིཔྤཱཡོ ཀཱཡེན ཝཱཡམཏི, ན ཙ ཕསྶཾ པཊིཝིཛཱནཱཏི, ཨནཱཔཏྟི. མོཀྑཱདྷིཔྤཱཡོ ན ཙ ཀཱཡེན ཝཱཡམཏི, ཕསྶཾ པཊིཝིཛཱནཱཏི, ཨནཱཔཏྟི. མོཀྑཱདྷིཔྤཱཡོ ན ཙ ཀཱཡེན ཝཱཡམཏི, ན ཙ ཕསྶཾ པཊིཝིཛཱནཱཏི, ཨནཱཔཏྟཱི’’ཏི (པཱརཱ. ༢༧༩) ཝུཏྟམོཀྑཱདྷིཔྤཱཡཝཏོ ཙཏུབྦིདྷསྶ པུགྒལསྶཱཏི ཝུཏྟཾ ཧོཏི. ‘‘ཨནཱཔཏྟཱི’’ཏི ཨིམིནཱ སམྦནྡྷོ.

ཨིམེསུ ཡོ མཱཏུགཱམེན ཨཱལིངྒནཱདིཔཡོགེན ཨཛ྄ཛྷོཏྠརཡམཱནོ ཏཾ ཨཏྟནོ སརཱིརཏོ ཨཔནེཏྭཱ མུཉྩིཏུཀཱམོ ཧཏྠཙཱལེན, མུཊྛིཨཱདཱིཧི ཝཱ པཊིཔཎཱམནཾ, པཧརཎཱདིཀཉྩ པཡོགཾ ཀརོཏི, ཨཡཾ པཋམོ པུགྒལོ. ཨཏྟཱནམཛ྄ཛྷོཏྠརིཏུཾ ཨཱགཙྪནྟིཾ ཨིཏྠིཾ དིསྭཱ པཧརཎཱཀཱརཱདིསབྦཔཡོགཾ དསྶེཏྭཱ ཏཱསེཏྭཱ ཨཏྟནོ སརཱིརཾ ཕུསིཏུཾ ཨདེནྟོ དུཏིཡོ. ཨིཏྠིཡཱ ཨཛ྄ཛྷོཏྠརིཏྭཱ ཨཱལིངྒིཏོ ཙོཔནརཧིཏཾ མཾ ‘‘ཨནཏྠིཀོ’’ཏི མནྟྭཱ ‘‘སཡམེཝ པལཱཡིསྶཏཱི’’ཏི, ‘‘ཨཙོཔནམེཝ མོཀྑོཔཱཡོ’’ཏི ཉཏྭཱ ནིཙྩལོཝ ཧུཏྭཱ ཕསྶཾ པཊིཝིཛཱནནྟོ ཏཏིཡོ. ཨཏྟཱནཾ ཨཛ྄ཛྷོཏྠརིཏུམཱགཙྪནྟིཾ ཨིཏྠིཾ དིསྭཱ དུཏིཡོ ཝིཡ ཏཱསེཏུཾ ཀཱཡཔྤཡོགཾ ཨཀཏྭཱ ‘‘ཨགཏེ པཱཏེསྶཱམི, པཧརིཏྭཱ ཏཱསེསྶཱམཱི’’ཏི ཝཱ ཙིནྟེཏྭཱ ནིཙྩལོཝ ཧུཏྭཱ ཏིཊྛནྟོ ཙཏུཏྠོཏི ཝེདིཏབྦོ.

༣༥༢. པཋམེནཱཏི ཨེཏྠ ‘‘པཱརཱཛིཀེནཱ’’ཏི པཱཋསེསོ, ཀཱཡཙིཏྟསམུཊྛཱནནྟི ཝུཏྟཾ ཧོཏི. ཨིདྷ ཙིཏྟཾ ནཱམ ¶ ཀཱཡསཾསགྒརཱགསམྤཡུཏྟཾ ཙིཏྟཾ, སུཀྐཝིསྶཊྛིམྷི མོཙེཏུཀཱམཏཱཡ སམྤཡུཏྟཾ ཙིཏྟཾ.

ཀཱཡསཾསགྒཀཐཱཝཎྞནཱ.

༣༥༣-༤. དུཊྛུལླཝཱཙསྶཱདེནཱཏི དུཊྛུ ཀུཙྪིཏབྷཱཝཾ ཨུལཏི གཙྪཏཱིཏི དུཊྛུལླཱ, དུཊྛུལླཱ ཙ སཱ ཝཱཙཱ ཙཱཏི དུཊྛུལླཝཱཙཱ, ཝཙྩམགྒཔསྶཱཝམགྒེ མེཐུནདྷམྨཔཊིསཾཡུཏྟཱ ཝཱཙཱ, ཡཐཱཧ ‘‘དུཊྛུལླཱ ནཱམ ཝཱཙཱ ཝཙྩམགྒཔསྶཱཝམགྒམེཐུནདྷམྨཔཊིསཾཡུཏྟཱ ཝཱཙཱ’’ཏི (པཱརཱ. ༢༨༥), དུཊྛུལླཝཱཙཱཡ ཨསྶཱདོ དུཊྛུལླཝཱཙསྶཱདོ, ཏཐཱཔཝཏྟཝཙཱིཝིཉྙཏྟིསམུཊྛཱཔཀཙིཏྟསམྤཡུཏྟཱ ཙེཏནཱ, ཏེན སམྤཡུཏྟོ རཱགོ ཨིདྷ སཧཙརིཡེན ‘‘དུཊྛུལླཝཱཙསྶཱདོ’’ཏི ཝུཏྟོ, ཏེན, དུཊྛུལླཝཱཙསྶཱདསམྤཡུཏྟེན ¶ རཱགེནཱཏི ཨཏྠོ. ཨིམིནཱ ‘‘ཨོབྷཱསནྟསྶཱ’’ཏི ཝཀྑམཱནཨོབྷཱསནསྶ ཧེཏུ དསྶིཏོ.

ཨིཏྠིཡཱ ཨིཏྠིསཉྙིནོ བྷིཀྑུནོཏི ཡོཛནཱ. ཨིཏྠིཡཱ ཨིཏྠིསཉྙིནོཏི ‘‘མཱཏུགཱམོ ནཱམ མནུསྶིཏྠཱི, ན ཡཀྑཱི, ན པེཏཱི, ན ཏིརཙྪཱནགཏཱ, ཝིཉྙཱུ པཊིབལཱ སུབྷཱསིཏདུབྦྷཱསིཏཾ དུཊྛུལླཱདུཊྛུལླཾ ཨཱཛཱནིཏུ’’ནྟི པདབྷཱཛནེ ནིདྡིཊྛསརཱུཔཱཡ སུབྷཱསིཏདུབྦྷཱསིཏཾ ཛཱནནྟིཡཱ མནུསྶིཏྠིཡཱ ཨིཏྠིསཉྙིནོ བྷིཀྑུནོཏི ཨཏྠོ. ‘‘དྭིནྣཾ མགྒཱན’’ནྟི ཨེཏསྶ སམྦནྡྷཱིཝསེན ‘‘ཨིཏྠིཡཱ’’ཏི ཨིདཾ སཱམིཝསེན ཡོཛེཏབྦཾ, ཡཐཱཝུཏྟསརཱུཔསྶ མཱཏུགཱམསྶ ཝཙྩམགྒཔསྶཱཝམགྒནྟི ཨཏྠོ. ཝཎྞཱཝཎྞཝསེན ཙཱཏི ‘‘ཝཎྞཾ བྷཎཏི ནཱམ དྭེ མགྒེ ཐོམེཏི ཝཎྞེཏི པསཾསཏི. ཨཝཎྞཾ བྷཎཏི ནཱམ དྭེ མགྒེ ཁུཾསེཏི ཝམྦྷེཏི གརཧཏཱི’’ཏི ནིདྡེསེ ཝུཏྟནཡེན ཨུབྷོ མགྒེ ཨུདྡིསྶ ཐོམནགརཧཎཝསེནཱཏི ཝུཏྟཾ ཧོཏི.

མེཐུནསྶ ¶ ཡཱཙནཱདཡོ མེཐུནཡཱཙནཱདཡོ, ཏེཧི མེཐུནཡཱཙནཱདཱིཧི, ‘‘ཡཱཙཏིཔི ཨཱཡཱཙཏིཔི པུཙྪཏིཔི པཊིཔུཙྪཏིཔི ཨཱཙིཀྑཏིཔི ཨནུསཱསཏིཔི ཨཀྐོསཏིཔཱི’’ཏི (པཱརཱ. ༢༨༥) ཨུདྡེསེ ཝུཏྟམེཐུནཡཱཙནཱདིཝསེནཱཏི ཝུཏྟཾ ཧོཏི. ཨིམེཧི དྭཱིཧི ‘‘ཨོབྷཱསནྟསྶཱ’’ཏི ཝུཏྟཨོབྷཱསནཱ དསྶིཏཱ. ཨོབྷཱསནྟསྶཱཏི ཨུདྡེསཡནྟསྶ, པཀཱསེནྟསྶཱཏི ཨཏྠོ. ‘‘ཝིཉྙུ’’ནྟི ཨིམིནཱ ཨོབྷཱསནཀིརིཡཱཡ ཀམྨམཱཧ, ཨིམིནཱ ཝིསེསིཏབྦཾ ‘‘མནུསྶིཏྠི’’ནྟི ཨིདཾ པཀརཎཏོ ལབྦྷཏི, ཡཐཱདསྶིཏཔདབྷཱཛནཱགཏསརཱུཔཾ ཝིཉྙུཾ པཊིབལཾ མནུསྶིཏྠིནྟི ཝུཏྟཾ ཧོཏི. ཨནྟམསོ ཧཏྠམུདྡཱཡཔཱིཏི ཨོབྷཱསནེ ཨནྟིམཔརིཙྪེདདསྶནཾ. དུཊྛུལླཝཙནསྶཱདབྷཱཝེ སཏི ཡོ ཝཙྩམགྒཔསྶཱཝམགྒཔཊིབདྡྷཾ གུཎདོསཾ ཝཱ མེཐུནདྷམྨཡཱཙནཱདིཝསེན ཝཱ དུཊྛུལླཱདུཊྛུལླཾ ཛཱནནྟིཾ མནུསྶིཏྠིཾ ཧེཊྛིམཔརིཙྪེདེན ཧཏྠམུདྡཱཡཔི ཝདེཡྻཱཏི ཨཏྠོ.

ཨིམསྨིཾ གཱཐཱདྭཡེ དུཊྛུལླཝཱཙསྶཱདེན ཨིཏྠིཡཱ ཨིཏྠིསཉྙིནོ ཝིཉྙུཾ ཏཾ ཨིཏྠིཾ དྭིནྣཾ མགྒཱནཾ ཝཎྞཝསེན ཨནྟམསོ ཧཏྠམུདྡཱཡཔི ཨོབྷཱསནྟསྶ བྷིཀྑུནོ གརུཀཾ སིཡཱཏི ཨེཀཾ ཝཱཀྱཾ, ཏཐཱ ‘‘དྭིནྣཾ མགྒཱནཾ ཨཝཎྞཝསེནཱ’’ཏི ཨིམིནཱ ཙ ‘‘མེཐུནཡཱཙནཱདཱིཧཱི’’ཏི ཨིམིནཱ ཙ ཡོཛནཱཡ ཝཱཀྱདྭཡནྟི ཨེཝཾ ཡོཛནཱཝསེན ཏཱིཎི ཝཱཀྱཱནི ཧོནྟི.

ཏཏྠ ¶ པཋམཝཱཀྱེ ཝཎྞཝཙནེན སངྒཧིཏཾ ཐོམནཱདིཀཐཾ ཀཐེནྟསྶ སངྒྷཱདིསེསོ ཧོཏི. ‘‘ཨིཏྠིལཀྑཎེན སུབྷལཀྑཎེན སམནྣཱགཏཱསཱི’’ཏི ཨེཏྟཀམེཝ ཐོམནཏྠཾ ཝདཏོ སངྒྷཱདིསེསོ ན ཧོཏི, ‘‘ཏཝ ཝཙྩམགྒོ ཙ པསྶཱཝམགྒོ ཙ ཨཱིདིསོ སུབྷོ སུསཎྛཱནོ, ཏེན ནཱམ ¶ ཨཱིདིསེན ཨིཏྠིལཀྑཎེན སུབྷལཀྑཎེན སམནྣཱགཏཱསཱི’’ཏི ཝདནྟསྶ ཧོཏི. ‘‘ཝཎྞེཏི, པསཾསཏཱི’’ཏི པདདྭཡཉྩ ‘‘ཐོམེཏཱི’’ཏི པདསྶ པརིཡཱཡོ.

དུཏིཡཝཱཀྱེ ཨཝཎྞཔདསངྒཧིཏཾ ཁུཾསནཱདིཏྟཡེ ཁུཾསནཾ ནཱམ པཏོདོཔམེཧི ཕརུསཝཙནེཧི ཏུདནཾ. ཡཐཱཧ ཨཊྛཀཐཱཡཾ ‘‘ཁུཾསེཏཱིཏི ཝཱཙཱཔཏོདེན གྷཊྚེཏཱི’’ཏི (པཱརཱ. ཨཊྛ. ༢.༢༨༥). པཏུཛྫཏེནེནཱཏི ‘‘པཏོདོ’’ཏིཨགཙྪནྟེ ཨསྶཱདཡོ པཝཏྟེཏུཾ ཝིཛ྄ཛྷནཀཔཱཙནདཎྜོ ཝུཙྩཏི. ཝམྦྷནཾ ནཱམ ཨཔསཱདནཾ. ཨཔསཱདནཾ ནཱམ གུཎཏོ པརིཧཱཔནཾ. ཡཐཱཧ ‘‘ཝམྦྷེཏཱིཏི ཨཔསཱདེཏཱི’’ཏི (པཱརཱ. ཨཊྛ. ༢.༢༨༥). གརཧཱ ནཱམ དོསཱརོཔནཾ. ཡཐཱཧ ‘‘གརཧཏཱིཏི དོསཾ དེཏཱི’’ཏི (པཱརཱ. ཨཊྛ. ༢.༢༨༥). ཨིམཾ ཁུཾསནཱདིཔཊིསཾཡུཏྟཝཙནཾ ཝཀྑམཱནེསུ ‘‘སིཁརཎཱིསི, སམྦྷིནྣཱསི, ཨུབྷཏོབྱཉྫནཱསཱི’’ཏི ཨིམེསུ ཏཱིསུ པདེསུ ཨཉྙཏརེན ཡོཛེཏྭཱ ཀཐེནྟསྶེཝ སངྒྷཱདིསེསོ, ན ཨིཏརསྶ.

ཏཏིཡཝཱཀྱེ མེཐུནཡཱཙནཱདིཝཙནེཧི སངྒཧིཏཾ ཨཱཡཱཙནཱདིཾ ཀརོནྟསྶཱཔི སངྒྷཱདིསེསོ. ‘‘ཡཱཙཏི ནཱམ དེཧི མེ ཨརཧསི མེ དཱཏུ’’ནྟིཨཱདིནཱ (པཱརཱ. ༢༨༥) ནཡེན ཨེཀེཀཾ པདཾ ‘‘དེཧི མེ མེཐུནཾ དྷམྨ’’ནྟིཨཱདིཝསེན མེཐུནདྷམྨཔདེན སཧ གྷཊེཏྭཱ མེཐུནདྷམྨཾ ཡཱཙནྟསྶེཝ ཧོཏི.

‘‘ཀདཱ ཏེ མཱཏཱ པསཱིདིསྶཏི, ཀདཱ ཏེ པིཏཱ པསཱིདིསྶཏི, ཀདཱ ཏེ དེཝཏཱཡོ པསཱིདིསྶནྟི, ཀདཱ ཏེ སུཁཎོ སུལཡོ སུམུཧུཏྟོ བྷཝིསྶཏཱི’’ཏིཨཱདིཨཱཡཱཙནཔདནིདྡེསེ ཨེཀེཀཾ པདཾ ཏཏྠེཝ ཨོསཱནེ ཝུཏྟེན ‘‘ཀདཱ ཏེ མེཐུནཾ དྷམྨཾ ལབྷིསྶཱམཱི’’ཏི པདེན གྷཊེཏྭཱ མེཐུནཾ ཡཱཙནྟསྶེཝ ཧོཏི.

‘‘ཀཐཾ ¶ ཏྭཾ སཱམིཀསྶ དེསི, ཀཐཾ ཛཱརསྶ དེསཱི’’ཏི (པཱརཱ. ༢༨༥) པུཙྪཱནིདྡེསཝཙནེསུ ཙ ཨཉྙཏརཾ མེཐུནདྷམྨཔདེན གྷཊེཏྭཱ པུཙྪནྟསྶེཝ ཧོཏི.

‘‘ཨེཝཾ ¶ ཀིར ཏྭཾ སཱམིཀསྶ དེསི, ཨེཝཾ ཛཱརསྶ དེསཱི’’ཏི (པཱརཱ. ༢༨༥) པཊིཔུཙྪཱནིདྡེསཝཙནེསུ ཨཉྙཏརཾ མེཐུནདྷམྨཔདེན གྷཊེཏྭཱ ཝིསེསེཏྭཱ པཊིཔུཙྪནྟསྶེཝ ཧོཏི.

‘‘ཀཐཾ དདམཱནཱ སཱམིཀསྶ པིཡཱ ཧོཏཱི’’ཏི པུཙྪཏོ མཱཏུགཱམསྶ ‘‘ཨེཝཾ དེཧི, ཨེཝཾ དེནྟཱི སཱམིཀསྶ པིཡཱ བྷཝིསྶཏི མནཱཔཱ ཙཱ’’ཏི ཨཱཎཏྟིཝཙནེ, ཨནུསཱསནིཝཙནེ ཙ ཨེསེཝ ནཡོ.

༣༥༥. ཨཀྐོསནིདྡེསཱགཏེསུ ‘‘ཨནིམིཏྟཱསི ནིམིཏྟམཏྟཱསི ཨལོཧིཏཱསི དྷུཝལོཧིཏཱསི དྷུཝཙོལཱ༹སི པགྒྷརནྟཱིསི སིཁརཎཱིསི ཨིཏྠིཔཎྜཀཱསི ཝེཔུརིསིཀཱསི སམྦྷིནྣཱསི ཨུབྷཏོབྱཉྫནཱསཱི’’ཏི ཨེཀཱདསསུ པདེསུ ‘‘སིཁརཎཱིསི སམྦྷིནྣཱསི ཨུབྷཏོབྱཉྫནཱསཱི’’ཏི པདཏྟཡཾ པཙྩེཀཾ ཨཱཔཏྟིཀརཾ, ཨིམིནཱ པདཏྟཡེན སཧ པུབྦེ ཝུཏྟཱནི ཝཙྩམགྒཔསྶཱཝམགྒམེཐུནདྷམྨཔདཱནི ཏཱིཎི ཙཱཏི ཚཔྤདཱནཾ པཙྩེཀཾ ཨཱཔཏྟིཀརཏྟཱ ཨིཏོ པརཱནི ཨནིམིཏྟཱདཱིནི ཨཊྛ པདཱནི ‘‘ཨནིམིཏྟཱསི མེཐུནདྷམྨཾ དེཧཱི’’ཏིཨཱདིནཱ ནཡེན མེཐུནདྷམྨཔདེན སཧ གྷཊེཏྭཱ ཝུཏྟཱནེཝ ཨཱཔཏྟིཀརཱནཱིཏི ཝེདིཏབྦཱནི, ‘‘མེཐུནཡཱཙནཱདཱིཧཱི’’ཏི ཨེཏྠ ཨཱདི-སདྡསངྒཧིཏེསུ ‘‘ཨནིམིཏྟཱསཱི’’ཏིཨཱདཱིསུ ཨེཀཱདསསུ ཨཀྐོསཔདེསུ ཨནྟོགདྷཏྟེཔི ཀེཝལཾ ཨཱཔཏྟིཀརཏྟཱ གརུཏརཾ པདཏྟཡཾ ཝིསུཾ སངྒཧེཏབྦནྟི ཉཱཔེཏུམཱཧ ‘‘སིཁརཎཱིསཱི’’ཏིཨཱདི.

སིཁརཎཱིསཱིཏི ཨེཏྠ ‘‘སིཁརཎཱི ཨསཱི’’ཏི པདཙྪེདོ. ‘‘ཨསཱི’’ཏི པཙྩེཀཾ ཡོཛེཏབྦཾ. ཏུ-སདྡོ ཀེཝལཡུཏྟམྤི ཨཱཔཏྟིཀརཾ ¶ ཧོཏཱིཏི ཝིསེསཾ ཛོཏེཏི. ཀེཝལེནཱཔི ཨཀྐོསཝཙནེནཱཏི ཡོཛནཱ. སིཁརཎཱིསཱིཏི བཧི ནིཀྑནྟཨཱཎིམཾསཱ བྷཝསི. སམྦྷིནྣཱསཱིཏི མིསྶཱིབྷཱུཏཝཙྩམགྒཔསྶཱཝམགྒཱ. ཨུབྷཏོབྱཉྫནཱསཱིཏི ཨིཏྠིནིམིཏྟེན, པུརིསནིམིཏྟེན ཙཱཏི ཨུབྷཏོབྱཉྫནེཧི སམནྣཱགཏཱ. ‘‘ཨཡཾ ཨིཏྠཱི, ཨཡཾ པུརིསོ’’ཏི བྱཉྫཡཏཱིཏི བྱཉྫནཾ, མུཏྟཀརཎཱནི. སུཎནྟིཡཱཏི ཨེཏྠ ‘‘ཝིཉྙུམནུསྶིཏྠིཡཱ’’ཏི ཨདྷིཀཱརཏོ ལབྦྷཏི, ཨིམིནཱ ཨཀྐོསིཏབྦཝཏྠུ དསྶིཏཾ ཧོཏི. བྷཱསིཏཾ སུཎནྟིཡཱ སུབྷཱསིཏདུབྦྷཱསིཏཾ ཛཱནནྟིཡཱ མནུསྶིཏྠིཡཱ ཝིསཡེ པཝཏྟཨཀྐོསཝཙནེན སངྒྷཱདིསེསོ ཧོཏཱིཏི ཨཏྠོ.

༣༥༦. པུནཔྤུནཾ ཨོབྷཱསནྟསྶ ཝཱཙཱནཾ གཎནཱཡ གརུཀཱ སིཡུནྟི ཡོཛནཱ. ཨེཏྠ ‘‘ཨེཀཾ ¶ ཨིཏྠི’’ནྟི ཨཛ྄ཛྷཱཧརིཏབྦཾ. ཨེཀཝཱཙཱཡ བཧཱུ ཨོབྷཱསནྟསྶ ཙ ཨིཏྠཱིནཾ གཎནཱཡ གརུཀཱ སིཡུནྟི ཡོཛནཱ. ཨེཏྠཱཔི ‘‘ཨིཏྠིཡོཔཱི’’ཏི ལབྦྷཏི.

༣༥༧. སཱ ཙེ ནཔྤཊིཛཱནཱཏཱིཏི ཨེཏྠ ‘‘ཡཾ སུཎནྟིཾ མནུསྶིཏྠིཾ དྭིནྣཾ མགྒཱནཾ ཝཎྞཱཝཎྞཝསེན ཨོབྷཱསཏི, སཱ ཙེ ན པཊིཛཱནཱཏཱི’’ཏི སཱམཏྠིཡཱ ལབྦྷམཱནཾ ཨཱདཱཡ ཡོཛེཏབྦཾ. ཨཏྟནོ བྷཱསིཏཾ དུཊྛུལླཾ ཝུཏྟསམནནྟརམེཝ ཨཏྠཝསེན སཙེ ན ཛཱནཱཏཱིཏི ཨཏྠོ. ཏསྶཱཏི ཏསྶ དུཊྛུལླབྷཱསིཏབྷིཀྑུསྶ. ཨུབྦྷཛཱཎུཾ, ཨདྷཀྑཀཾ ཝཱ ཨཱདིསྶ བྷཎནེ ཙཱཔི ཏསྶ ཐུལླཙྩཡཾ སིཡཱཏི ཡོཛནཱ. བྷཎནེཏི དྭིནྣཾ མགྒཱནཾ ཝཎྞཱདིཀཐནེ, ‘‘བྷཎཏོ’’ཏིཔི ལིཁནྟི, བྷཎནྟསྶ, བྷཎནཧེཏཱུཏི ཨཏྠོ. ཧེཏུམྷི ཨཡམནྟཔཙྩཡོ ‘‘ཨསམྦུདྷ’’ནྟིཨཱདཱིསུ (པཱརཱ. ཨཊྛ. ༡.གནྠཱརམྦྷཀཐཱ) ཝིཡ. ཨུབྦྷཛཱཎུནྟི ཛཱཎུཏོ ཨུདྡྷཾ. ཨཀྑེཀནྟི ཨཀྑཀཏོ ཧེཊྛཱ.

༣༥༨. ཨུབྦྷཀྑཀནྟི ¶ ཨཀྑཀཏོ ཨུདྡྷཾ. ཨདྷོཛཱཎུམཎྜལནྟི ཛཱཎུམཎྜལཏོ ཨདྷོ. ཨུདྡིསནྟི ཨུདྡིསྶ. ‘‘ཨུདྡིསྶུབྦྷཀྑཾ ཝཱ ཏཐཱ, ཨདྷོཛཱཎུམཎྜལ’’ནྟི ཙ ལིཁནྟི, སོ པཱཋོ སུནྡརོ. ཝཎྞཱདིབྷཎནེ དུཀྐཊནྟི སམྦནྡྷོ. ‘‘ཝིཉྙུམནུསྶིཏྠིཡཱ’’ཏི ཨདྷིཀཱརཏོ ལབྦྷཏི. ཀཱཡཔཊིབདྡྷེ ཝཎྞཱདིབྷཎནེ དུཀྐཊནྟི ཨེཏྠཱཔི ཨེསེཝ ནཡོ. ཝཙྩམགྒཔསྶཱཝམགྒཱ སངྒྷཱདིསེསཀྑེཏྟཾ, ཨདྷཀྑཀཾ ཨུབྦྷཛཱཎུམཎྜལཾ ཐུལླཙྩཡཀྑེཏྟཾ, ཨུདྡྷཀྑཀཾ ཨདྷོཛཱཎུམཎྜལཾ དུཀྐཊཀྑེཏྟནྟི ཨིམེསུ ཏཱིསུ ཁེཏྟེསུ ཨཀྑཀཉྩེཝ ཛཱཎུམཎྜལཉྩ ཐུལླཙྩཡདུཀྐཊཱནཾ དྭིནྣཾ ཨཝདྷིབྷཱུཏཾ ཀཏྠ སངྒཡ྄ཧཏཱིཏི? དུཀྐཊཀྑེཏྟེཡེཝ སངྒཡ྄ཧཏི. ཡཐཱཧ ཨཊྛཀཐཱཡཾ ‘‘ཨཀྑཀཾ, པན ཛཱཎུམཎྜལཉྩ ཨེཏྠེཝ དུཀྐཊཀྑེཏྟེ སངྒཧཾ གཙྪཏཱི’’ཏི (པཱརཱ. ཨཊྛ. ༢.༢༨༦).

༣༥༩. པཎྜཀེ ཡཀྑིཔེཏཱིསུ དྭིནྣཾ མགྒཱནཾ ཝཎྞཱདིབྷཎནེ ཏསྶ བྷཎནྟསྶ ཐུལླཙྩཡཾ བྷཝེཏི ཨདྷིཀཱརཝསེན ཨཱགཏཔདེཧི སཧ ཡོཛེཏབྦཾ. པཎྜཀཱདཱིསཱུཏི ཨཱདི-སདྡེན ཡཀྑིཔེཏཱིནཾ གཧཎཾ.

༣༦༠. ཨུབྦྷཀྑཀ…པེ… ཨཡཾ ནཡོཏི ‘‘པཎྜཀཱདཱིསཱུ’’ཏི ཨིམིནཱ ཡོཛེཏབྦཾ. ཨཡཾ ནཡོཏི ‘‘དུཀྐཊམེཝ ཧོཏཱི’’ཏི ཝུཏྟོ ནཡོ. སབྦཏྠཱཏི སངྒྷཱདིསེསཐུལླཙྩཡདུཀྐཊཀྑེཏྟཝསེན སབྦེསུ ཁེཏྟེསུ.

༣༦༡. ཨཏྠཔུརེཀྑཱརོ ¶ ཧུཏྭཱ ཨོབྷཱསཏོཔི ཨནཱཔཏྟཱིཏི ཡོཛནཱ. མཱཏུགཱམཱནཾ ‘‘ཨནིམིཏྟཱསཱི’’ཏིཨཱདཱིསུ པདེསུ ཨཏྠཀཐནཾ པུརེཀྑཏྭཱ ‘‘ཨནིམིཏྟཱསཱི’’ཏིཨཱདིཔདཾ བྷཎནྟསྶ ཝཱ མཱཏུགཱམེཧི སཧ ཨཊྛཀཐཾ སཛ྄ཛྷཱཡནྟཱནཾ ཝཱ ཨནཱཔཏྟཱིཏི ཨཏྠོ. དྷམྨཔུརེཀྑཱརོ ཧུཏྭཱ ཨོབྷཱསཏོ ཨནཱཔཏྟཱིཏི ཡོཛནཱ. པཱལི༹དྷམྨཾ ཝཱཙེནྟསྶ ཝཱ ཏཱསཾ ¶ སུཎནྟཱིནཾ སཛ྄ཛྷཱཡནཾ ཝཱ པུརེཀྑཏྭཱ ‘‘ཨནིམིཏྟཱསཱི’’ཏིཨཱདཱིསུ པདེསུ ཡཾ ཀིཉྩི པབྦཛིཏསྶ ཝཱ ཨིཏརསྶ ཝཱ མཱཏུགཱམསྶ ཀཐེནྟསྶ ཨནཱཔཏྟཱིཏི. པུརེཀྑཏྭཱནུསཱསནིནྟི ‘‘ཨིདཱནི ཨནིམིཏྟཱསི…པེ… ཨུབྷཏོབྱཉྫནཱསི, ཨཔྤམཱདཾ དཱནི ཀརེཡྻཱསི, ཡཐཱ ཨཱཡཏིམྤི ཨེཝརཱུཔཱ ནཱཧོསཱི’’ཏི ཨནུསཱསནིཾ པུརེཀྑཏྭཱ.

༣༦༢. ཨུམྨཏྟཀཱདཱིནནྟི པིཏྟུམྨཏྟཀཡཀྑུམྨཏྟཀཝསེན དྭིནྣཾ ཨུམྨཏྟཀཱནཉྩ ཨཱདི-སདྡསངྒཧིཏསྶ ཨིམསྨིཾ ཨཱདིཀམྨིཀསྶ ཨུདཱཡིཏྠེརསྶ ཙ ཨནཱཔཏྟཱིཏི ཝུཏྟཾ ཧོཏི. ‘‘ཨིདཾ སིཀྑཱཔདཾ ཏིསམུཊྛཱནཾ ཀཱཡཙིཏྟཏོ ཙ ཝཱཙཱཙིཏྟཏོ ཙ ཀཱཡཝཱཙཱཙིཏྟཏོ ཙ སམུཊྛཱཏི. ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟ’’ནྟི (པཱརཱ. ཨཊྛ. ༢.༢༨༧) ཨཊྛཀཐཱཡཾ ཝུཏྟཔཀིཎྞཀཝིནིཙྪཡཾ དསྶེཏི ‘‘སམུཊྛཱནཱདཡོ…པེ… ཏུལྱཱཝཱ’’ཏི. ཝེདནཱཡ ཨདིནྣཱདཱནེན ཨསམཏྟཱ ‘‘ཝེདནེཏྠ དྭིདྷཱ མཏཱ’’ཏི ཨཱཧ, སུཁོཔེཀྑཱཝེདནཱཝསེན དྭིདྷཱ མཏཱཏི ཨཏྠོ.

དུཊྛུལླཝཱཙཱཀཐཱཝཎྞནཱ.

༣༦༣. ཀཱམཔཱརིཙརིཡཱཡཱཏི མེཐུནདྷམྨསངྑཱཏེན ཀཱམེན པཱརིཙརིཡཱཡ, མེཐུནདྷམྨེན པཱརིཙརིཡཱཡཱཏི ཨཏྠོ. ཨཐ ཝཱ ཀཱམིཏཱ པཏྠིཏཱཏི ཀཱམཱ, མེཐུནརཱགཝསེན པཏྠིཏཱཏི ཨཏྠོ, ཀཱམཱ ཙ སཱ པཱརིཙརིཡཱ ཙཱཏི ཀཱམཔཱརིཙརིཡཱ, ཏསྶཱ ཀཱམཔཱརིཙརིཡཱཡཱཏིཔི གཧེཏབྦཾ, མེཐུནརཱགཙིཏྟེན ཨབྷིཔཏྠིཏཔཱརིཙརིཡཱཡཱཏིཨཏྠོ. ‘‘ཝཎྞཾ བྷཱསཏོ’’ཏི ཨིམིནཱ སམྦནྡྷོ, ‘‘ཨེཏདགྒཾ བྷགིནི པཱརིཙརིཡཱནཾ ཡཱ མཱདིསཾ སཱིལཝནྟཾ ཀལྱཱཎདྷམྨཾ བྲཧྨཙཱརིཾ ཨེཏེན དྷམྨེན པརིཙརེཡྻཱ’’ཏི ཨཏྟནོ མེཐུནདྷམྨེན པཱརིཙརིཡཱཡ ¶ གུཎཾ ཨཱནིསཾསཾ ཀཐེནྟསྶཱཏི ཝུཏྟཾ ཧོཏི. ཏསྨིཾཡེཝ ཁཎེཏི ཏསྨིཾ བྷཎིཏཀྑཎེཡེཝ. སཱ ཙེ ཛཱནཱཏཱིཏི ཡཾ ཨུདྡིསྶ ཨབྷཱསི, སཙེ སཱ ཝཙནསམནནྟརམེཝ ཛཱནཱཏི.

༣༦༤. སཱ ¶ མནུསྶིཏྠཱི ནོ ཛཱནཱཏི ཙེ, ཏསྶ ཐུལླཙྩཡནྟི སམྦནྡྷོ. ཡཀྑིཔེཏིདེཝཱིསུ ཛཱནནྟཱིསུ, པཎྜཀེ ཙ ཛཱནནྟེ ཨཏྟཀཱམཔཱརིཙརིཡཱཡ ཝཎྞཾ བྷཱསཏོ ཏསྶ བྷིཀྑུནོ ཐུལླཙྩཡཾ ཧོཏཱིཏི ཡོཛནཱ. སེསེཏི པུརིསཏིརཙྪཱནགཏཝིསཡེ, ཡཀྑིཨཱདཱིནཾ ཨཛཱནནཝིསཡེ ཙ ཨཏྟཀཱམཔཱརིཙརིཡཱཡ ཝཎྞཾ བྷཱསཏོ ཏསྶ ཨཱཔཏྟི དུཀྐཊཾ ཧོཏཱིཏི ཡོཛནཱ.

༣༦༥. ཙཱིཝརཱདཱིཧཱིཏི ཙཱིཝརཔིཎྜཔཱཏཱདཱིཧི. ཝཏྠུཀཱམེཧཱིཏི ཏཎྷཱཡ ཝཏྠུབྷཱཝེན ཝཏྠཱུ ཙ ཀཱམིཏཏྟཱ ཀཱམཱཏི ཙ སངྑཱཏེཧི པཙྩཡེཧི.

༣༦༦. རཱགོ ཨེཝ རཱགཏཱ. ‘‘རཱགིཏཱ’’ཏི ཝཱ པཱཋོ, རཱགོ ཨསྶ ཨཏྠཱིཏི རཱགཱི, ཏསྶ བྷཱཝོ རཱགིཏཱ, ཨཏྟཀཱམཔཱརིཙརིཡཱཡ རཱགོཏི ཨཏྠོ. ཨོབྷཱསོཏི ཨཏྟཀཱམཔཱརིཙརིཡཱཡ གུཎབྷཎནཾ. ཏེན རཱགེནཱཏི ཀཱམཔཱརིཙརིཡཱཡ རཱགེན. ཁཎེ ཏསྨིནྟི བྷཎིཏཀྑཎེ. ཝིཛཱནནནྟི ཡཾ མནུསྶིཏྠིཾ ཨུདྡིསྶ ཨཏྟཀཱམཔཱརིཙརིཡཱཡ ཝཎྞཾ བྷཎཏི, ཏཱཡ ཏསྶ ཝཙནཏྠསྶ ཝིཛཱནནནྟི ཝུཏྟཾ ཧོཏི.

༣༦༧. པཉྩངྒཱནཱིཏི མནུསྶིཏྠིཏཱ, ཏཾསཉྙིཏཱ, པཱརིཙརིཡཱཡ རཱགིཏཱ, ཏེན རཱགེན ཨོབྷཱསནཾ, ཁཎེ ཏསྨིཾ ཝིཛཱནནནྟི ཨིམཱནི ཨེཏྠ ཨཏྟཀཱམཔཱརིཙརིཡསིཀྑཱཔདེ པཉྩ ཨངྒཱནི ¶ , པཉྩ ཨཱཔཏྟིཀཱརཎཱནཱིཏི ཨཏྠོ. ཨསྶཱཏི ཨཏྟཀཱམཔཱརིཙརིཡསིཀྑཱཔདསྶ.

ཨཏྟཀཱམཔཱརིཙརིཡཀཐཱཝཎྞནཱ.

༣༦༨. ‘‘པཊིགྒཎྷཱཏཱི’’ཏིཨཱདིཀིརིཡཱཏྟཡོཔཱདཱནསཱམཏྠིཡེན ཏིཀྑཏྟུཾ པཊིཔཱདནཀཾ ‘‘ཡོ བྷིཀྑཱུ’’ཏི ཙ ‘‘གརུ ཧོཏཱི’’ཏི པདསཱམཏྠིཡེན ‘‘ཏསྶཱ’’ཏི ཙ ལབྦྷམཱནཏྟཱ ཏིཝིདྷེཧི སཧ ‘‘ཡོ བྷིཀྑུ པུརིསསྶ སནྡེསཾ པཊིགྒཎྷཱཏི, ཝཱིམཾསཏི པཙྩཱཧརཏི ཙེ, ཏསྶ གརུ ཧོཏཱི’’ཏི ཨེཀཾ ཝཱཀྱཾ ཧོཏི. ཨེཝཾ ‘‘ཨིཏྠིཡཱཔི ཝཱ’’ཏི ཨིམིནཱ ཡོཛནཱཡཔི ཨེཀཾ ཝཱཀྱཾ ཧོཏཱིཏི ཨིམིསྶཱ གཱཐཱཡ ཝཱཀྱདྭཡཾ ཡུཛྫཏི.

ཨིདྷ སནྡེསཀྐམཉྩ ཡོཛནཱཀྐམཉྩ ཛཱནནཏྠཾ པཋམཾ ཏཱཝ ཨིཏྠཱིནཉྩ བྷརིཡཱནཉྩ པབྷེདོ ཙ སརཱུཔཉྩ ཝིབྷཱཝཱིཡཏི – ཏེསུ ཨིཏྠིཡོ དསཝིདྷཱ ཧོནྟི. ཡཐཱཧ པདབྷཱཛནེ ‘‘དས ཨིཏྠིཡོ ¶ མཱཏུརཀྑིཏཱ པིཏུརཀྑིཏཱ མཱཏཱཔིཏུརཀྑིཏཱ བྷཱཏུརཀྑིཏཱ བྷགིནིརཀྑིཏཱ ཉཱཏིརཀྑིཏཱ གོཏྟརཀྑིཏཱ དྷམྨརཀྑིཏཱ སཱརཀྑཱ སཔརིདཎྜཱ’’ཏི. བྷརིཡཱ ཙ དསཝིདྷཱ ཧོནྟི. ཡཐཱཧ པདབྷཱཛནེ ‘‘དས བྷརིཡཱཡོ དྷནཀྐཱིཏཱ ཚནྡཝཱསིནཱི བྷོགཝཱསིནཱི ཨོདཔཏྟཀིནཱི ཨོབྷཊཙུམྦཊཱ དཱསཱི ཙ བྷརིཡཱ ཙ ཀམྨཀཱརཱི ཙ བྷརིཡཱ ཙ དྷཛཱཧཊཱ མུཧུཏྟིཀཱ’’ཏི (པཱརཱ. ༣༠༣). ཨིམཱསཾ པབྷེདོ ཙ སརཱུཔཱནི ཙ སངྑེཔཏོ ཨེཝཾ ཝེདིཏབྦཱནི –

པུརིསེཧི སཧ ཡཐཱ སཾཝཱསཾ ན ཀརོཏི, ཨེཝཾ མཱཏརཱ རཀྑིཏཱ མཱཏུརཀྑིཏཱ. ཡཐཱཧ ‘‘མཱཏུརཀྑིཏཱ ནཱམ མཱཏཱ རཀྑཏི གོཔེཏི ཨིསྶརིཡཾ ཀཱརེཏི ཝསཾ ཝཏྟེཏཱི’’ཏི. པིཏུརཀྑིཏཱདཱིསུཔི ཨེསེཝ ནཡོ. ཏཏྠ ཡསྨིཾ ཀོཎྜཉྙཱདིགོཏྟེ ཛཱཏཱ, ཏསྨིཾཡེཝ གོཏྟེ ཛཱཏེཧི ¶ རཀྑིཏཱ གོཏྟརཀྑིཏཱ. ཡཐཱཧ ‘‘གོཏྟརཀྑིཏཱ ནཱམ སགོཏྟཱ རཀྑནྟཱི’’ཏིཨཱདི. ཨེཀཾ སཏྠཱརཾ ཨུདྡིསྶ པབྦཛིཏེཧི ཝཱ ཨེཀགཎཔརིཡཱཔནྣེཧི ཝཱ རཀྑིཏཱ དྷམྨརཀྑིཏཱ ནཱམ. ཡཐཱཧ ‘‘དྷམྨརཀྑིཏཱ ནཱམ སཧདྷམྨིཀཱ རཀྑནྟཱི’’ཏིཨཱདི (པཱརཱ. ༣༠༤). སཱརཀྑཱ ནཱམ ‘‘གབྦྷེཔི པརིགྒཧིཏཱ ཧོཏི ‘མཡ྄ཧཾ ཨེསཱ’ཏི ཨནྟམསོ མཱལཱགུལ༹པརིཀྑིཏྟཱཔཱི’’ཏི པཱལི༹ཡཾ ཝུཏྟསརཱུཔཱ. སཔརིདཎྜཱ ནཱམ ‘‘ཀེཧིཙི དཎྜོ ཋཔིཏོ ཧོཏི ‘ཡོ ཨིཏྠནྣཱམཾ ཨིཏྠིཾ གཙྪཏི, ཏསྶ ཨེཏྟཀོ དཎྜོ’’ཏི ཝུཏྟསརཱུཔཱཏི ཨཡཾ དསནྣཾ ཨིཏྠཱིནཾ སརཱུཔསངྑེཔོ. ཨིམཱསུ དསསུ སཱརཀྑསཔརིདཎྜཱནཾ དྭིནྣཾ པརཔུརིསསེཝཱཡཾ མིཙྪཱཙཱརོ ཧོཏི, ཨིཏརཱསཾ ན ཧོཏི. ཨིམཱ དསཔི པཉྩསཱིལཾ རཀྑནྟེཧི ཨགམནཱིཡཱ.

དསསུ བྷརིཡཱསུ ‘‘དྷནཀྐཱིཏཱ ནཱམ དྷནེན ཀིཎིཏྭཱ ཝཱསེཏཱི’’ཏི ཝུཏྟཏྟཱ བྷརིཡབྷཱཝཱཡ ཨཔྤཀཾ ཝཱ བཧུཾ ཝཱ དྷནཾ དཏྭཱ གཧིཏཱ དྷནཀྐཱིཏཱ ནཱམ. ‘‘ཚནྡཝཱསིནཱི ནཱམ པིཡོ པིཡཾ ཝཱསེཏཱི’’ཏི ཝུཏྟཏྟཱ ཨཏྟརུཙིཡཱ སཾཝསིཏེན པུརིསེན སམྤཊིཙྪིཏཱ ཚནྡཝཱསིནཱི ནཱམ. ‘‘བྷོགཝཱསིནཱི ནཱམ བྷོགཾ དཏྭཱ ཝཱསེཏཱི’’ཏི ཝུཏྟཏྟཱ ཨུདུཀྑལམུསལཱདིགེཧོཔཀརཎཾ ལབྷིཏྭཱ བྷརིཡབྷཱཝཾ གཙྪནྟཱི ཛནཔདིཏྠཱི བྷོགཝཱསིནཱི ནཱམ. ‘‘པཊཝཱསིནཱི ནཱམ པཊཾ དཏྭཱ ཝཱསེཏཱི’’ཏི ཝུཏྟཏྟཱ ནིཝཱསནམཏྟཾ ཝཱ པཱརུཔནམཏྟཾ ཝཱ ལདྡྷཱ བྷརིཡབྷཱཝཾ གཙྪནྟཱི དལིདྡིཏྠཱི པཊཝཱསིནཱི ནཱམ. ཨོདཔཏྟཀིནཱི ནཱམ ‘‘ཨུདཀཔཏྟཾ ཨཱམསིཏྭཱ ཝཱསེཏཱི’’ཏི (པཱརཱ. ༣༠༤) ཝུཏྟཏྟཱ ‘‘ཨིདཾ ཨུདཀཾ ཝིཡ སཾསཊྛཱ ཨབྷེཛྫཱ ཧོཐཱ’’ཏི ཝཏྭཱ ཨེཀསྨིཾ ཨུདཀཔཏྟེ པུརིསེན སདྡྷིཾ ཧཏྠཾ ཨོཏཱརེཏྭཱ བྷརིཡབྷཱཝཾ ནཱིཏོ མཱཏུགཱམོ ཝུཙྩཏི. ‘‘ཨོབྷཊཙུམྦཊཱ ནཱམ ཙུམྦཊཾ ཨོརོཔེཏྭཱ ¶ ཝཱསེཏཱི’’ཏི (པཱརཱ. ༣༠༤) ཝུཏྟཏྟཱ སཱིསཏོ ཙུམྦཊཾ ཨོརོཔེཏྭཱ བྷརིཡབྷཱཝམུཔནཱིཏཱ ཀཊྛཧཱརིཀཱདིཨིཏྠཱི ཨོབྷཊཙུམྦཊཱ ནཱམ. དཱསཱི ¶ ཙ བྷརིཡཱ ཙ ནཱམ ‘‘དཱསཱི ཙེཝ ཧོཏི བྷརིཡཱ ཙཱ’’ཏི (པཱརཱ. ༣༠༤) ཝུཏྟཏྟཱ བྷརིཡཾ ཀཏྭཱ ཝཱསིཏཱ ‘‘ཏསྶེཝ དཱསཱི ཙ བྷརིཡཱ ཙཱ’’ཏི ཝུཏྟཱ. ཀམྨཀཱརཱི ཙ བྷརིཡཱ ཙ ནཱམ ‘‘ཀམྨཀཱརཱི ཙེཝ ཧོཏི བྷརིཡཱ ཙཱ’’ཏི (པཱརཱ. ༣༠༤) ཝུཏྟཏྟཱ པདྷཱནིཏྠིནིརཔེཀྑེན ཀུཊུམྦཀིཙྩཾ ཀཱརེཏྭཱ བྷརིཡབྷཱཝཾ ནཱིཏཱ བྷརིཡཱ ཀཏཀམྨཱ ‘‘ཀམྨཀཱརཱི ཙ བྷརིཡཱ ཙཱ’’ཏི ཝུཏྟཱ. ‘‘དྷཛཱཧཊཱ ནཱམ ཀརམརཱནཱིཏཱ ཝུཙྩཏཱི’’ཏི (པཱརཱ. ༣༠༤) ཝུཏྟཏྟཱ དྷཛཾ ཨུསྶཱཔེཏྭཱ གཙྪནྟིཡཱ མཧཱསེནཱཡ སདྡྷིཾ གནྟྭཱ པརཝིསཡཾ ཝིལུམྤནྟེན པཙྪིནྡིཏྭཱ ཨཱནེཏྭཱ བྷརིཡབྷཱཝམུཔནཱིཏཱ ཨིཏྠཱི དྷཛཱཧཊཱ ནཱམ. ‘‘མུཧུཏྟིཀཱ ནཱམ ཏངྑཎིཀཱ ཝུཙྩཏཱི’’ཏི (པཱརཱ. ༣༠༤) ཝུཏྟཏྟཱ ཨཙིརཀཱལཾ སཾཝཱསཏྠཱཡ གཧིཏཱ ཨིཏྠཱི མུཧུཏྟིཀཱ ནཱམཱཏི ཨཡཾ དསནྣཾ བྷརིཡཱནཾ སརཱུཔསངྑེཔོ. ཡཐཱཝུཏྟཱསུ དསསུ ཨིཏྠཱིསུ ཨཉྙཏརཾ དསནྣཾ བྷརིཡཱནཾ ཨཉྙཏརཊྛཱནེ ཋཔནཏྠམདྷིཔྤེཏབྷཱཝཾ ཝཏྟུཾ པུརིསེན ‘‘གཙྪ བྷནྟེ ཨིཏྠནྣཱམཾ མཱཏུརཀྑིཏཾ བྲཱུཧི ‘ཧོཧི ཀིར ཨིཏྠནྣཱམསྶ བྷརིཡཱ དྷནཀྐཱིཏཱ’ཏི’’ཨཱདིནཱ ནཡེན དིནྣསནྡེསཾ ‘‘སཱདྷུ ཨུཔཱསཀཱ’’ཏིཨཱདིནཱ ནཡེན ཝཙཱིབྷེདཾ ཀཏྭཱ ཝཱ སཱིསཀམྤནཱདིཝསེན ཝཱ པཊིགྒཎྷཱཏཱིཏི ཨཱཧ ‘‘པཊིགྒཎྷཱཏི སནྡེསཾ པུརིསསྶཱ’’ཏི.

ཨེཏྠ པུརིསསྶཱཏི ཨུཔལཀྑཎཏྟཱ ‘‘པུརིསསྶ མཱཏཱ བྷིཀྑུཾ པཧིཎཏཱི’’ཏིཨཱདིནཱ (པཱརཱ. ༣༢༡) ནཡེན པཱལི༹ཡཾ ཝུཏྟཔུརིསསྶ མཱཏཱཔིཏུཨཱདཡོ ཙ གཧེཏབྦཱ. ཝཱིམཾསཏཱིཏི ཨེཝཾ པཊིགྒཧིཏསཱསནཾ ཏསྶཱཡེཝ ཨེཀཾསེན ཨཝིརཱདྷེཏྭཱ ཝདནྟསྶ མཱཏཱཔིཏུཨཱདཱིནམཉྙཏརསྶ ཝཱ ཨཱརོཙེཏཱིཏི ཨཏྠོ. ཨེཏྠཱཔི ཝཱིམཾསཏཱིཏི ཨུཔལཀྑཎཏྟཱ ‘‘པཊིགྒཎྷཱཏི ཨནྟེཝཱསིཾ ཝཱིམཾསཱཔེཏྭཱ ཨཏྟནཱ པཙྩཱཧརཏི, ཨཱཔཏྟི སངྒྷཱདིསེསསྶཱ’’ཏི (པཱརཱ. ༣༣༨) ཝུཏྟཏྟཱ ཝཱིམཾསཱཔེཏཱིཏིཔི གཧེཏབྦཾ. པཙྩཱཧརཏཱིཏི ཏཐཱ ཨཱཧཊཾ སཱསནཾ སུཏྭཱ ཏསྶཱ ཨིཏྠིཡཱ ¶ སམྤཊིཙྪིཏེ ཙ ཨསམྤཊིཙྪིཏེ ཙ ལཛྫཱཡ ཏུཎྷཱིབྷཱུཏཱཡ ཙ ཏཾ པཝཏྟིཾ པཙྩཱཧརིཏྭཱ ཨཱཙིཀྑཏཱིཏི ཝུཏྟཾ ཧོཏི. ཨིདྷཱཔི པཙྩཱཧརཏཱིཏི ཨུཔལཀྑཎཏྟཱ ‘‘པཊིགྒཎྷཱཏི ཝཱིམཾསཏི ཨནྟེཝཱསིཾ པཙྩཱཧརཱཔེཏི, ཨཱཔཏྟི སངྒྷཱདིསེསསྶཱ’’ཏི (པཱརཱ. ༣༣༨) ཝུཏྟཏྟཱ པཙྩཱཧརཱཔེཏཱིཏི ཙ གཧེཏབྦཾ.

‘‘ཨིཏྠིཡཱཔི ཝཱ’’ཏི ཨིམིནཱ ཡོཛེཏྭཱ གཧིཏདུཏིཡཝཱཀྱེ ཙ ཨེཝམེཝ ཨཏྠོ ཝཏྟབྦོ. ཏཏྠ སནྡེསཀྐམོ པན ‘‘མཱཏུརཀྑིཏཱ བྷིཀྑུཾ པཧིཎཏི ‘གཙྪ བྷནྟེ ཨིཏྠནྣཱམཾ བྲཱུཧི ‘ཧོམི ཨིཏྠནྣཱམསྶ ¶ བྷརིཡཱ དྷནཀྐཱིཏཱ’ཏི’’ཨཱདིཔཱལི༹ནཡེན (པཱརཱ. ༣༣༠) དཊྛབྦོ. ཨེཏྠཱཔི ‘‘ཝཱིམཾསཱཔེཏི པཙྩཱཧརཱཔེཏཱི’’ཏི ཨིདཉྩ ཝུཏྟནཡེནེཝ གཧེཏབྦཾ. ཨིམིནཱ ནིཡཱམེན དསནྣཾ ཨིཏྠཱིནཾ ནཱམཾ ཝིསུཾ ཝིསུཾ ཝཏྭཱ དསནྣཾ བྷརིཡཱནཾ ཨཉྙཏརཏྠཱཡ དཱིཡམཱནསནྡེསཀྐམོ ཡོཛེཏབྦོ. ཨིདྷཱཔི ཨིཏྠིཡཱཔི ཝཱཏི ཨུཔལཀྑཎཏྟཱ ‘‘མཱཏུརཀྑིཏཱཡ མཱཏཱ བྷིཀྑུཾ པཧིཎཏི ‘གཙྪ བྷནྟེ ཨིཏྠནྣཱམཾ བྲཱུཧི ‘ཧོཏུ ཨིཏྠནྣཱམསྶ བྷརིཡཱ དྷནཀྐཱིཏཱ’’ཏིཨཱདིཔཱལི༹ཝསེན (པཱརཱ. ༣༢༤) ཨིཏྠིཡཱ མཱཏུཔིཏུཨཱདཱིནཉྩ སནྡེསཀྐམོ ཡོཛེཏབྦོ.

༣༧༠. ཏཾ པཝཏྟིཾ. སཉྩརིཏྟཱ སཉྩརཎཧེཏུ. ན མུཙྩཏཱིཏི ཨིཏྠིཔུརིསཱནཾ ཨནྟརེ སཱསནཾ པཊིགྒཧེཏྭཱ སཉྩརཎཧེཏུ ཨཱཔཛྫིཏབྦསངྒྷཱདིསེསཏོ ན མུཙྩཏཱིཏི ཨཏྠོ.

༣༧༡. ཨཉྙཾ ཝཱཏི མཱཏཱཔིཏུརཀྑིཏཱདཱིསུ ཨཉྙཏརཾ ཝཱ. ‘‘བྷཱསཏོ’’ཏི ལིཁནྟི. ‘‘པེསིཏོ’’ཏི ཨིམིནཱ ཝིརུདྡྷཏྟཱ ཏཾ པཧཱཡ ‘‘བྷཱསཏཱི’’ཏི པཱཋོ གཧེཏབྦོ. པཱཋསེསོ ཝཱ ཀཱཏབྦོ. ‘‘ཡོ ཨཉྙཾ བྷཱསཏི ཙེ, ཏསྶ བྷཱསཏོཏི ཡོཛནཱ’’ཏི ནིསྶནྡེཧེ ཝུཏྟཾ. ‘‘མཱཏརཱ རཀྑིཏཾ ཨིཏྠིཾ ‘གཙྪ བྲཱུཧཱི’ཏི ཡོ པེསིཏོ ཧོཏི, ཏསྶ པིཏུརཀྑིཏཾ ¶ ཝཱ ཨཉྙཾ ཝཱ བྷཱསཏོ ཝིསངྐེཏོཝཱ’’ཏི, ‘‘མཱཏརཱ…པེ… བྲཱུཧཱི’ཏི པེསིཏོ ཧུཏྭཱ པིཏུརཀྑིཏཾ ཝཱ ཨཉྙཾ ཝཱ བྷཱསཏོ ཝིསངྐེཏོཝཱ’’ཏི ཡོཛནཱ ཡུཏྟཏརཱཏི ཨམྷཱཀཾ ཁནྟི.

༣༧༢. པཊིགྒཎྷནཏཱདཱིཧཱིཏི པཊིགྒཎྷནམེཝ པཊིགྒཎྷནཏཱ. ཨཱདི-སདྡེན ཝཱིམཾསནཔཙྩཱཧརཎཱནི གཧིཏཱནི. སཉྩརིཏྟེཏི སཉྩརཎེ. སམཱཔནྣེཏི གཏེ སཏི. གརུཀཱཔཏྟིམཱདིསེཏི ཨེཏྠ ‘‘ཏསྶཱ’’ཏི སེསོ. ཨཱདིསེཏི ཀཐེཡྻ.

༣༧༣. དྭཱིཧི ཐུལླཙྩཡཾ ཝུཏྟནྟི ཨེཏྠ དྭཱིཧི དྭཱིཧི ཨངྒེཧི སཉྩརིཏྟེ སམཱཔནྣེ ཐུལླཙྩཡཾ ཝུཏྟནྟི གཧེཏབྦཾ. ‘‘པཊིགྒཎྷཱཏི ཝཱིམཾསཏི ན པཙྩཱཧརཏི, ཨཱཔཏྟི ཐུལླཙྩཡསྶ. པཊིགྒཎྷཱཏི ན ཝཱིམཾསཏི པཙྩཱཧརཏི, ཨཱཔཏྟི ཐུལླཙྩཡསྶ. ན པཊིགྒཎྷཱཏི ཝཱིམཾསཏི པཙྩཱཧརཏི, ཨཱཔཏྟི ཐུལླཙྩཡསྶཱ’’ཏི (པཱརཱ. ༣༣༨) དྭཱིཧི དྭཱིཧི ཨངྒེཧི ཐུལླཙྩཡཾ ཝུཏྟནྟི ཨཏྠོ. པཎྜཀཱདཱིསཱུཏི པཎྜཀཡཀྑིཔེཏཱིསུ. ཏཱིཧིཔི ཨངྒེཧི སཉྩརིཏྟེ སམཱཔནྣེ ཐུལླཙྩཡཾ ཝུཏྟནྟི ཡོཛནཱ.

ཨེཀེནེཝཱཏི ¶ ཨེཀེནེཝ ཨངྒེན. སབྦཏྠཱཏི མཱཏུརཀྑིཏཱདཱིསུ སབྦམཱཏུགཱམེསུ ཙ ཝིནཱིཏཝཏྠུམྷི ‘‘ཏེན ཁོ པན སམཡེན ཨཉྙཏརོ པུརིསོ ཨཉྙཏརཾ བྷིཀྑུཾ ཨཱཎཱཔེསི ‘གཙྪ བྷནྟེ ཨིཏྠནྣཱམཾ ཨིཏྠིཾ ཝཱིམཾསཱ’ཏི. སོ གནྟྭཱ མནུསྶེ པུཙྪི ‘ཀཧཾ ཨིཏྠནྣཱམཱ’ཏི. སུཏྟཱ བྷནྟེཏི…པེ… མཏཱ བྷནྟེཏི. ནིཀྑནྟཱ བྷནྟེཏི. ཨནིཏྠཱི བྷནྟེཏི. ཨིཏྠིཔཎྜཀཱ བྷནྟེཏི. ཏསྶ ཀུཀྐུཙྩཾ ཨཧོསི. ཨནཱཔཏྟི བྷིཀྑུ སངྒྷཱདིསེསསྶ, ཨཱཔཏྟི དུཀྐཊསྶཱ’’ཏི (པཱརཱ. ༣༤༡) ཨཱགཏཱསུ སུཏྟཱདཱིསུ པཉྩསུ ཙ.

༣༧༤. ཨནཱཔཏྟི པཀཱསིཏཱཏི ཙེཏིཡཱདཱིསུ ཀཏྟབྦཾ ནིསྶཱཡ ཨིཏྠིཡཱ པུརིསསྶ, པུརིསེན ཙ ཨིཏྠིཡཱ དིནྣསཱསནཾ པཊིགྒཧེཏྭཱ ¶ ཝཱིམཾསིཏྭཱ པཙྩཱཧརིཏྭཱ ཨཱརོཙེནྟསྶ ཨནཱཔཏྟིབྷཱཝོ ‘‘ཨནཱཔཏྟི སངྒྷསྶ ཝཱ ཙེཏིཡསྶ ཝཱ གིལཱནསྶ ཝཱ ཀརཎཱིཡེན གཙྪཏི, ཨུམྨཏྟཀསྶ ཨཱདིཀམྨིཀསྶཱ’’ཏི (པཱརཱ. ༣༤༠) པཱལི༹ཡཾ ཝུཏྟཱཏི ཨཏྠོ.

༣༧༥. ཏཐཱ ཏསྶཱཏི མནུསྶཛཱཏིཀཱཡ ཏསྶཱ. ནནཱལཾཝཙནཱིཡཏཱཏི ‘‘མམཱཡ’’ནྟི ཝཱ ནིགྒཧཔགྒཧེ ཝཱ ནིརཱསངྐཾ ཝཏྟུཾ ནཱཧརཏཱིཏི ཨལཾཝཙནཱིཡཱ, ཨསྶཱམིཀཱ, སཱ ཧི ཀེནཙི ‘‘མཡ྄ཧཾ ཨེསཱ’’ཏི ཝཏྟུཾ ཝཱ ནིརཱསངྐེན ནིགྒཧཔགྒཧཝཙནཾ ཝཱ ཝཏྟུཾ ཨསཀྐུཎེཡྻཱ, ཨལཾཝཙནཱིཡཱ ན བྷཝཏཱིཏི ནཱལཾཝཙནཱིཡཱ, སསྶཱམིཀཱ, སཱ ཧི སཱམིཀེན ཏཐཱ ཀཱཏུཾ སཀྐུཎེཡྻཱཏི ནཱལཾཝཙནཱིཡཱ, ནཱལཾཝཙནཱིཡཱ ན བྷཝཏཱིཏི ནནཱལཾཝཙནཱིཡཱ, ཨལཾཝཙནཱིཡཔདེན ཝུཏྟཱ ཨསྶཱམིཀཱ ཨེཝ, པཊིསེདྷཱ དྭེ པཀཏིམཏྠཾ གམཡནྟཱིཏི, ནནཱལཾཝཙནཱིཡཱཡ བྷཱཝོ ནནཱལཾཝཙནཱིཡཏཱ, ནིརཱསངྐེན ཨཝཙནཱིཡཏཱ ཨསྶཱམིཀབྷཱཝོཏི ཝུཏྟཾ ཧོཏི. སཉྩརིཏྟཝསེན བྷིཀྑུནཱ ཝཙནཱིཡཱ ན ཧོཏཱིཏི ཝཱ ‘‘ཨལཾཝཙནཱིཡཱ’’ཏིཔི གཧེཏབྦམེཝ. པཊིགྒཎྷནཏཱདཱིནཾ ཝསཱཏི ཨེཏྠ ཙཀཱརོ ལུཏྟནིདྡིཊྛོ. ཏཏོ པཊིགྒཎྷནཝཱིམཾསནཔཙྩཱཧརཎསངྑཱཏཱནཾ ཏིཎྞཾ ཨངྒཱནཾ ཝསེན ཙ པུབྦེ ཝུཏྟམནུསྶིཏྠིཏཱ ནནཱལཾཝཙནཱིཡཏཱཏི ཝུཏྟཱནཾ དྭིནྣཾ ཨངྒཱནཾ ཝསེན ཙ ཨིདཾ སིཀྑཱཔདཾ ཨཱཔཏྟིཀཱརཎེཧི པཉྩཧི ཨངྒེཧི ཡུཏྟནྟི ཨཏྠོ.

༣༧༦. ཨིདཾ སཉྩརིཏྟསིཀྑཱཔདཾ. ཨཐ ཝཱ ལིངྒཝིཔལླཱསེན ཙ ཨཡཾ སངྒྷཱདིསེསོཏི གཧེཏབྦོ. ཀཱཡཏོ, ཝཱཙཏོ, ཀཱཡཝཱཙཏོ, ཀཱཡཙིཏྟཏོ, ཝཱཙཱཙིཏྟཏོ, ཀཱཡཝཱཙཱཙིཏྟཏོ ཝཱ ཨུཔྤཛྫནཏོ ཚསམུཊྛཱནཾ. ཏཏོ ཨེཝ ཨཙིཏྟཀམུདཱིརིཏཾ. མིསྶཀསམུཊྛཱནཉྷི ཨཙིཏྟཀཾ. ཨཝསེསཙིཏྟེསུཔི ¶ ཡསྨིཾ ཙིཏྟེ ཨསཏི ཨཙིཏྟཀཾ ནཱམ ཧོཏི, ཏཾ དསྶེཏུམཱཧ ‘‘ཨལཾཝཙནིཡཏྟཾ ¶ ཝཱ’’ཏིཨཱདི. གཱཐཱབནྡྷཝསེན རསྶོ, ‘‘ཨལཾཝཙནཱིཡཏྟ’’ནྟི གཧེཏབྦཾ. ཡོ སནྡེསཾ པེསེཏི, ཏསྨིཾ པཊིབདྡྷབྷཱཝནྟི ཨཏྠོ. པཎྞཏྟིཾ ཝཱཏི སཉྩརིཏྟསིཀྑཱཔདསངྑཱཏཾ པཎྞཏྟིཾ ཝཱ ཨཛཱནཏོ ཨཙིཏྟཀམུདཱིརིཏནྟི སམྦནྡྷོ.

༣༧༧. སཱསནནྟི མཱཏུགཱམསྶ, པུརིསསྶ ཝཱ སཱསནཾ. ཀཱཡཝིཀཱརེནཱཏི སཱིསཀམྤནཱདིནཱ ཀཱཡཝིཀཱརེན. གཧེཏྭཱཏི པཊིགྒཧེཏྭཱ. ཏཾ ཨུཔགམྨཱཏི པཊིགྒཧིཏསཱསནཾ ཡསྶ ཝཏྟབྦཾ ཧོཏི, ཏཾ མཱཏུགཱམཾ, པུརིསཾ ཝཱ ཨུཔགམྨ. ཝཱིམཾསིཏྭཱཏི ཏཾ ཀིཙྩཾ ཏཱིརེཏྭཱ. ཧརནྟསྶཱཏི པཙྩཱཧརནྟསྶ. ཀཱཡཏོ སིཡཱཏི ཝཙཱིབྷེདཾ ཝིནཱ པཊིགྒཧཎཱདཱིནཾ ཀཱཡེནེཝ ཀཏཏྟཱ ཀཱཡསམུཊྛཱནཏོཝ སངྒྷཱདིསེསོ ཧོཏཱིཏི ཨཏྠོ.

༣༧༨. ཨིཏྠིཡཱ ཝཙནཾ སུཏྭཱཏི ཡོཛནཱ. ཡཐཱ ནིསིནྣོཝཱཏི པཀཏིཡཱ ནིསིནྣཊྛཱནེཡེཝ ནིསིནྣོ. ཏཾ ཝཙནཾ. ཏཏྠེཝཱགཏསྶེཝཱཏི ཡཏྠ ནིསིནྣོ ཨིཏྠིཡཱ སཱསནཾ པཊིགྒཎྷི, ཏམེཝ ཨཱསནཾ ཨཝིཛཧིཏྭཱ ཨཏྟནཱ ནིསིནྣཊྛཱནམེཝ ཨཱགཏསྶ སནྣིསིཏབྦཔུརིསསྶེཝ, ཨེཏྠ ‘‘ཨཱརོཙེཏྭཱ’’ཏི པཱཋསེསོ. པུན ‘‘ཨཱརོཙེནྟསྶཱ’’ཏི ཨིདཾ ཏཏྠེཝཱགཏཱཡ ཏསྶཱ ཨེཝ ཨིཏྠིཡཱ ཨེཝཾ ཡོཛེཏབྦཾ. སཱསནཾ དཏྭཱ གནྟྭཱ པུན ཏཏྠེཝ ཨཱགཏསྶ མཱཏུགཱམསྶེཝ ཉཱཏམནནྟརཾ ཀཱཡིཀཀིརིཡཾ ཝིནཱ ཝཙནེནེཝ ཨཱརོཙེནྟསྶཱཏི ཨཏྠོ. ཨིདཾ ཨིཏྠིཡཱ སཱསནཾ པཊིགྒཧཎཱདིཝསེན ཝུཏྟཾ.

ཨཐ ཝཱ པུརིསསྶ ཝཙནཾ སུཏྭཱ ཡཐཱནིསིནྣོཝ ཏཾ ཝཙནཾ ཨིཏྠིཡཱ ཨཱརོཙེཏྭཱ པུན ཏཏྠེཝཱགཏསྶེཝ པུརིསསྶ ¶ ཨཱརོཙེནྟསྶཱཏི ཨེཝཾ པུརིསསནྡེསཾ པཊིགྒཧཎཱདིཝསེནཱཔི ཡོཛནཱ ཀཱཏབྦཱ. ཨེཏྠ ཙ ཏཏྠེཝཱགཏསྶཱཏི ཨུཔལཀྑཎཾ. སཱསནཝཙནམཏྟེནེཝ པཊིགྒཧེཏྭཱ, ཀིཙྩནྟརེན གནྟྭཱ ཝཱ ཡདིཙྪཱཝསེན དིཊྛཊྛཱནེ ཝཱ ཝཏྭཱ པུནཔི ཏཏྠེཝ དིཊྛཊྛཱནེ པུན ཨཱརོཙེནྟསྶ ཙ ཝཙནེནེཝ སམུཊྛཱནབྷཱཝོ ཝེདིཏབྦོ.

༣༧༩. ‘‘ཨལཾ…པེ… ཨཛཱནཏོ’’ཏི ཨཙིཏྟཀཏྟཀཱརཎཾ ཝུཏྟམེཝ, ཀསྨཱ པུན ‘‘ཨཛཱནནྟསྶ པཎྞཏྟི’’ནྟི ཝུཏྟནྟི ཙེ? ཏདུབྷཡསྶཱཔི ཝིསུཾ ཀཱརཎཱབྷཱཝཾ ཝིཉྙཱཔེཏུཾ ཝུཏྟནྟི ཝེདིཏབྦཾ. ནཾ ཝིདྷིནྟི སཱསནཾ པཊིགྒཧེཏྭཱ ཨཱཧརིཏྭཱ ཨཱརོཙེཏྭཱ པཙྩཱཧརིཏྭཱ ཨཱརོཙནསངྑཱཏཾ ¶ ཝིདྷཱནཾ. ཨརཧཏོཔཱིཏི ཁཱིཎཱསཝསྶཔི, སེཁཔུཐུཛྫནཱནཾ པགེཝཱཏི ཨཡམཏྠོ སམྦྷཱཝནཏྠེན ཨཔི-སདྡེན ཛོཏིཏོ.

༣༨༠. ཛཱནིཏྭཱཏི ཨལཾཝཙནཱིཡབྷཱཝཾ ཝཱ པཎྞཏྟིཾ ཝཱ ཨུབྷཡམེཝ ཝཱ ཛཱནིཏྭཱ. ཏཐཱཏི ཀཱཡཝཱཙཏོ ཀརོནྟསྶཱཏི ཨིམིནཱ ཡོཛེཏབྦཾ. སཙིཏྟཀེཧཱིཏི ཡཐཱཝུཏྟཙིཏྟེན སཙིཏྟཀེཧི. ཏེཧེཝཱཏི ཀཱཡཱདཱིཧི ཏེཧི ཨེཝ, ‘‘ཏཱིཧེཝཱ’’ཏིཔི པཱཋོ.

སཉྩརིཏྟཀཐཱཝཎྞནཱ.

༣༨༡-༢. སཡཾཡཱཙིཏཀེཧེཝཱཏི ཨེཏྠ ‘‘ཨུཔཀརཎེཧཱི’’ཏི པཱཋསེསོ, ‘‘པུརིསཾ དེཐཱ’’ཏིཨཱདིནཱ ནཡེན ཨཏྟནཱཝ ཡཱཙིཏྭཱ གཧིཏེཧི ཨུཔཀརཎེཧེཝཱཏི ཨཏྠོ. ཡཐཱཧ ‘‘སཉྙཱཙིཀཱ ནཱམ སཡཾ ཡཱཙིཏྭཱ པུརིསམྤི པུརིསཏྟཀརམྤི གོཎམྤི སཀཊམྤི ཝཱསིམྤི པརསུམྤི ཀུཋཱརིམྤི ཀུདཱལམྤི ནིཁཱདནམྤཱི’’ཏི ¶ . ཨེཏྠ ཨེཝ-ཀཱརེན ཨཡཱཙིཏཾ ནིཝཏྟེཏི. ཏེན ཨསྶཱམིཀནྟི དཱིཔིཏཾ ཧོཏི. ‘‘ཀུཊིཀ’’ནྟི ཨིམིནཱ ‘‘ཀུཊི ནཱམ ཨུལླིཏྟཱ ཝཱ ཧོཏི ཨཝལིཏྟཱ ཝཱ ཨུལླིཏྟཱཝལིཏྟཱ ཝཱ’’ཏི (པཱརཱ. ༣༤༩) ཝུཏྟཏྟཱ བྷཱུམིཏོ པཊྛཱཡ བྷིཏྟིཙྪདནཱནི པཊིཙྪཱདེཏྭཱ མཏྟིཀཱཡ ཝཱ སུདྷཱཡ ཝཱ དྭཱརཝཱཏཔཱནཱདིཨལེཔོཀཱསཾ ཋཔེཏྭཱ ཨནྟོ ལིཏྟབྷཱཝེན ཨུལླིཏྟཱནཱམཀཾ ཝཱ ཏཐཱ བཧི ལིཏྟབྷཱཝེན ཨཝལིཏྟཱནཱམཀཾ ཝཱ ཨནྟོ ཙ བཧི ཙ ལིཏྟབྷཱཝེན ཨུལླིཏྟཱཝལིཏྟཱནཱམཀཾ ཝཱ ཀུཊིནྟི ཝུཏྟཾ ཧོཏི.

ཨཔྤམཱཎིཀནྟི ‘‘ཏཏྲིདཾ པམཱཎཾ, དཱིགྷསོ དྭཱདསཝིདཏྠིཡོ སུགཏཝིདཏྠིཡཱ, ཏིརིཡཾ སཏྟནྟརཱ’’ཏི (པཱརཱ. ༣༤༨) དཱིགྷཔུཐུལཱནཾ ཝུཏྟཔྤམཱཎེན ཨཏིརེཀཏྟཱ ཨཔྤམཱཎིཀནྟི ཨཏྠོ.

ཨེཏྠ ཙ ཏིལཀྑཎཾ པཊིཝིཛ྄ཛྷིཏྭཱ ཏཱིཎི ཀིལེསམཱུལཱནི ཨུཔྤཱཊེཏྭཱ ཀཱལཏྟཡཝཏྟ སབྦདྷམྨེ པཊིཝིཛ྄ཛྷིཏྭཱ ཏིབྷུཝནེཀཔཊིསརཎབྷཱུཏསྶ བྷགཝཏོ དྷམྨརཱཛསྶ ཨངྒུལཾ པམཱཎམཛ྄ཛྷིམཔུརིསསྶ ཨངྒུལཏོ ཏིཝངྒུལཾ ཧོཏི, ཨེཀཱ ཝིདཏྠི ཏིསྶོ ཝིདཏྠིཡོ ཧོནྟི, ཨེཀཾ རཏནཾ ཏཱིཎི རཏནཱནི ཧོནྟཱིཏི ཨེཝཾ ནིཡམིཏཱ སུགཏཝིདཏྠི ཙ ཝཌྜྷཀིརཏནེན དིཡཌྜྷརཏནཔྤམཱཎཱ ཧོཏི. ཡཐཱཧ ཨཊྛཀཐཱཡཾ ‘‘སུགཏཝིདཏྠི ནཱམ ཨིདཱནི མཛ྄ཛྷིམསྶ པུརིསསྶ ཏིསྶོ ཝིདཏྠིཡོ ཝཌྜྷཀིཧཏྠེན དིཡཌྜྷོ ཧཏྠོ ཧོཏཱི’’ཏི (པཱརཱ. ཨཊྛ. ༢.༣༤༨-༣༤༩). ཏསྨཱ ¶ སུགཏཝིདཏྠིཡཱ དྭཱདས ཝཌྜྷཀིཧཏྠེན ཨཊྛཱརས ཧཏྠཱ ཧོནྟི. ‘‘དཱིགྷསོ དྭཱདས ཝིདཏྠིཡོ སུགཏཝིདཏྠིཡཱཏི བཱཧིརིམེན མཱནེནཱ’’ཏི (པཱརཱ. ༣༤༩) པདབྷཱཛནེ ཝུཏྟཏྟཱ ཨནྟིམཾ སུདྷཱལེཔཾ ཨགྒཧེཏྭཱ ཐུསམཏྟིཀཔརིཡནྟེན ཝཱ མཧཱམཏྟིཀཔརིཡནྟེན ཝཱ བཱཧིརནྟཏོ ཨཊྛཱརསཧཏྠཔྤམཱཎཾ, ‘‘ཏིརིཡཾ སཏྟནྟརཱཏི ཨབྦྷནྟརིམེན མཱནེནཱ’’ཏི (པཱརཱ. ༣༤༩) ¶ པདབྷཱཛནེ ཝུཏྟཏྟཱ ཨབྦྷནྟརིམེན པུཐུལཏོ དྭཱདསངྒུལཱདྷིཀདསཧཏྠཔྤམཱཎཉྩ ཀུཊིཡཱ པམཱཎནྟི གཧེཏབྦཾ. ཨེཝཾ ཋིཏཔམཱཎཏོ དཱིགྷཏོ པུཐུལཏོ ཝཱ ཨུབྷཏོ ཝཱ ཀེསགྒམཏྟཱདྷིཀཱཔི ཀུཊི ཨཱཔཏྟིཡཱ ཨངྒཾ ཧོཏཱིཏི དསྶེཏུཾ ‘‘ཨཔྤམཱཎིཀ’’ནྟི ཨཱཧཱཏི སངྑེཔཏོ ཝེདིཏབྦཾ.

ཨཏྟུདྡེསནྟི ཨུདྡིསིཏབྦོཏི ཨུདྡེསོ, ཨཏྟཱ ཨུདྡེསོ ཨེཏིསྶཱཏི ཨཏྟུདྡེསཱ, ཀུཊི, ཏཾ ཨཏྟུདྡེསཾ. ‘‘ཨཏྟུདྡེསནྟི ཨཏྟནོ ཨཏྠཱཡཱ’’ཏི པདབྷཱཛནེ ཝུཏྟཏྟཱ ‘‘མཡ྄ཧཾ ཨེསཱ ཝཱསཏྠཱཡ བྷཝིསྶཏཱི’’ཏི ཨཏྟཱནཾ ཨུདྡིསིཏྭཱཏི ཨཏྠོ. ‘‘ཀརོནྟསྶཱ’’ཏི ཨིདཾ ‘‘ཀཱརཡམཱནེནཱཏི ཀརོནྟོ ཝཱ ཀཱརཱཔེནྟོ ཝཱ’’ཏི པདབྷཱཛནེ ཝུཏྟནཡེན པཡོཛཀཀཏྟུནོ ཙ གཧེཏབྦཏྟཱ ཨུཔལཀྑཎནྟི གཧེཏབྦཾ. ཏཐཱཏི ཏེནེཝ པཀཱརེན, ཡེཧི ཨསྶཱམིཀཏཱདཱིཧི པཀཱརེཧི ཡུཏྟཾ པམཱཎཱཏིཀྐནྟཾ ཀུཊིཾ ཀརོནྟསྶ ཨཱཔཏྟི, ཏེཧེཝ པཀཱརེཧི ཡུཏྟཾ ཨདེསིཏཝཏྠུཀམྤི ཀུཊིཾ ཀརོནྟསྶཱཏི. ཨིམིནཱ ཨཔྤམཱཎིཀཾ ཝིཡ ཨདེསིཏཝཏྠུཀམྤི ཝིསུཾཡེཝ ཨཱཔཏྟིཡཱ པདྷཱནངྒནྟི. ཝསཏི ཨེཏྠཱཏི ཝཏྠུ, བྷཱུམི, སཱ ཨདེསིཏཱ ཨེཏིསྶཱཏི ཨདེསིཏཝཏྠུཀཱ, ཀུཊི, ཏཾ ཨདེསིཏཝཏྠུཀཾ.

ཀིཾ ཝུཏྟཾ ཧོཏི? ཏེན ཀུཊིཀཱརེན བྷིཀྑུནཱ ཀུཊིཝཏྠུཾ སོདྷེཏྭཱ སམཏལཾ ཀཱརེཏྭཱ སངྒྷཾ ཨུཔསངྐམིཏྭཱ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ‘‘ཨཧཾ བྷནྟེ སཉྙཱཙིཀཱཡ ཀུཊིཾ ཀཏྟུཀཱམོ ཨསྶཱམིཀཾ ཨཏྟུདྡེསཾ, སོཧཾ བྷནྟེ སངྒྷཾ ཀུཊིཝཏྠུཨོལོཀནཾ ཡཱཙཱམཱི’’ཏི ཏིཀྑཏྟུཾ ཝཏྭཱ ཡཱཙིཏེན སངྒྷེན ཝཱ སངྒྷེན ཉཏྟིདུཏིཡཱཡ ཀམྨཝཱཙཱཡ སམྨཏེཧི བྱཏྟེཧི ¶ པཊིབལེཧི དྭཱིཧི བྷིཀྑཱུཧི ཝཱ ཏེན སདྡྷིཾ གནྟྭཱ ཀུཊིཝཏྠུཾ ཨོལོཀེཏྭཱ སཱརམྦྷབྷཱཝཾ ཝཱ ཨཔརིཀྐམནབྷཱཝཾ ཝཱ ཨུབྷཡམེཝ ཝཱ པསྶནྟེཧི ‘‘མཱཡིདྷ ཀརཱི’’ཏི ནིཝཱརེཏྭཱ ཨནཱརམྦྷཾ ཙེ ཧོཏི སཔརིཀྐམནཾ, ཨཱགནྟྭཱ སངྒྷསྶ ཨཱརོཙིཏེ ཀུཊིཀཱརཀེནེཝ བྷིཀྑུནཱ པུབྦེ ཝུཏྟནཡེན སངྒྷཾ ཨུཔསངྐམིཏྭཱ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ‘‘ཨཧཾ བྷནྟེ སཉྙཱཙིཀཱཡ ཀུཊིཾ ཀཏྟུཀཱམོ ཨསྶཱམིཀཾ ཨཏྟུདྡེསཾ, སོཧཾ བྷནྟེ སངྒྷཾ ཀུཊིཝཏྠུདེསནཾ ཡཱཙཱམཱི’’ཏི ཏིཀྑཏྟུཾ ཝཏྭཱ ཡཱཙིཏེ ཝུཌྜྷཱནུམཏེན བྱཏྟེན བྷིཀྑུནཱ པཊིབལེན ཉཏྟིདུཏིཡཱཡ ཀམྨཝཱཙཱཡ དེསེཏྭཱ ནིཡྻཱདིཏཀུཊིཝཏྠུསྶ ¶ ཨབྷཱཝཱ ཨདེསིཏཝཏྠུཀཾ, ཏེནེཝ ཨསྶཱམིཀཏཱདིཔཀཱརེན ཡུཏྟཾ ཡཐཱཝུཏྟཔྤཀཱརཾ ཀུཊིཀཾ ཨཏྟནཱ ཡཱཙིཏེཧི ཨུཔཀརཎེཧི ཀརོནྟསྶ, ཀཱརཱཔེནྟསྶ ཙཱཏི ཝུཏྟཾ ཧོཏི.

དྭེ སངྒྷཱདིསེསཱ ཧོནྟཱིཏི ‘‘བྷིཀྑཱུ ཝཱ ཨནབྷིནེཡྻ ཝཏྠུདེསནཱཡ, པམཱཎཾ ཝཱ ཨཏིཀྐཱམེཡྻ, སངྒྷཱདིསེསོ’’ཏི (པཱརཱ. ༣༤༨) ཏུལྱབལཏཱསཱུཙཀེན ཝཱ-སདྡེན སམྤིཎྜིཏྭཱ ཝུཏྟཨངྒདྭཡསཧིཏཏྟཱ དྭེ སངྒྷཱདིསེསཱ ཧོནྟཱིཏི ཨཏྠོ. ཡཐཱཧ ‘‘བྷིཀྑུ ཀུཊིཾ ཀརོཏི ཨདེསིཏཝཏྠུཀཾ པམཱཎཱཏིཀྐནྟཾ ཨནཱརམྦྷཾ སཔརིཀྐམནཾ, ཨཱཔཏྟི དྭིནྣཾ སངྒྷཱདིསེསཱན’’ནྟི (པཱརཱ. ༣༥༥) ཙ ‘‘བྷིཀྑུཀུཊིཾ ཀརོཏི ཨདེསིཏཝཏྠུཀཾ ཨནཱརམྦྷཾ སཔརིཀྐམནཾ, ཨཱཔཏྟི སངྒྷཱདིསེསསྶཱ’’ཏི (པཱརཱ. ༣༥༤) ཙ ‘‘བྷིཀྑུ ཀུཊིཾ ཀརོཏི པམཱཎཱཏིཀྐནྟཾ ཨནཱརམྦྷཾ སཔརིཀྐམནཾ, ཨཱཔཏྟི སངྒྷཱདིསེསསྶཱ’’ཏི (པཱརཱ. ༣༥༥) ཙ ཝུཏྟཏྟཱ དྭཱིསུ ཨངྒེསུ ཨེཀཾ ཙེ, ཨེཀོཝ སངྒྷཱདིསེསོ ¶ ཧོཏཱིཏི. ཏཾ པན ‘‘སཙེ ཨེཀཝིཔནྣཱ སཱ, གརུཀཾ ཨེཀཀཾ སིཡཱ’’ཏི ཝཀྑཏི.

སཱརམྦྷཱདཱིསཱུཏི ཨེཏྠ སཱརམྦྷ-སདྡོ སོཔདྡཝཔརིཡཱཡོ. ཡཐཱཧ ཨཊྛཀཐཱཡཾ ‘‘སཱརམྦྷཾ ཨནཱརམྦྷནྟི སཨུཔདྡཝཾ ཨནུཔདྡཝ’’ནྟི (པཱརཱ. ཨཊྛ. ༢.༣༤༨-༣༤༩). ཨེཏྠ ‘‘སེཏཾ ཚཱགམཱརབྷེཐ ཡཛམཱནོ’’ཏི པཡོགེ ཝིཡ ཨཱ-པུབྦསྶ རབྷསྶ ཧིཾསཏྠེཔི དིསྶམཱནཏྟཱ ཀཏྟུསཱདྷནོ ཨཱརམྦྷ-སདྡོ ཧིཾསཀཱནཾ ཀིཔིལླིཀཱདིསཏྟཱནཾ ཝཱཙཀོ བྷཝཏཱིཏི ཏཾསཧིཏཊྛཱནཾ སཱརམྦྷཾ ནཱམ ཧོཏི. ཏེནེཝ པདབྷཱཛནེཔི ཝུཏྟཾ ‘‘སཱརམྦྷཾ ནཱམ ཀིཔིལླིཀཱནཾ ཝཱ ཨཱསཡོ ཧོཏི, ཨུཔཙིཀཱནཾ ཝཱ, ཨུནྡཱུརཱནཾ ཝཱ, ཨཧཱིནཾ ཝཱ, ཝིཙྪིཀཱནཾ ཝཱ, སཏཔདཱིནཾ ཝཱ, ཧཏྠཱིནཾ ཝཱ, ཨསྶཱནཾ ཝཱ, སཱིཧཱནཾ ཝཱ, བྱགྒྷཱནཾ ཝཱ…པེ… ཨཱསཡོ ཧོཏཱི’’ཏི (པཱརཱ. ༣༥༣).

ཨཱདི-སདྡེན ཨཔརིཀྐམནཾ སངྒཎྷཱཏི. ‘‘སཔརིཀྐམནཾ ནཱམ སཀྐཱ ཧོཏི ཡཐཱཡུཏྟེན སཀཊེན ཨནུཔརིགནྟུཾ, སམནྟཱ ནིསྶེཎིཡཱ ཨནུཔརིགནྟུཾ, ཨེཏཾ སཔརིཀྐམནཾ ནཱམཱ’’ཏི (པཱརཱ. ༣༥༣) ཝུཏྟལཀྑཎཝིཔརིཡཱཡཏོ ནིབྦཀོསསྶ ཨུདཀཔཱཏཊྛཱནེ ཨེཀཾ ཙཀྐཾ ཋཔེཏྭཱ ཨིཏརཾ ཙཀྐཾ བཧི ཋཔེཏྭཱ ཀུཊིཾ པརིཀྑིཔིཏྭཱ ཨཱཝཛྫིཡམཱནསྶ གོཡུཏྟསཀཊསྶ ཝཱ ནིསྶེཎིཡཾ ཋཏྭཱ ཀུཊིཾ ཚཱདཡམཱནཱནཾ ནིསྶེཎིཡཱ ཝཱ པརཏོ གམིཏུམསཀྐུཎེཡྻཏྟཱ ཨཔརིཀྐམནནྟི ཝེདིཏབྦཾ.

ཨེཝཾ ¶ ཝུཏྟསཱརམྦྷཨཔརིཀྐམནསངྑཱཏཨངྒདྭཡེན ཡུཏྟཾ ཙེ, དྭེ དུཀྐཊཱནི ཧོནྟི. ཡཐཱཧ ‘‘བྷིཀྑུ ཀུཊིཾ ཀརོཏི དེསིཏཝཏྠུཀཾ པམཱཎིཀཾ སཱརམྦྷཾ ཨཔརིཀྐམནཾ, ཨཱཔཏྟི དྭིནྣཾ དུཀྐཊཱན’’ནྟི (པཱརཱ. ༣༥༥). ཨེཀཾ ཙེ, ཨེཀམེཝ ཧོཏི. ཡཐཱཧ ‘‘བྷིཀྑུ ཀུཊིཾ ཀརོཏི དེསིཏཝཏྠུཀཾ པམཱཎིཀཾ སཱརམྦྷཾ སཔརིཀྐམནཾ, ཨཱཔཏྟི ¶ དུཀྐཊསྶ. བྷིཀྑུ ཀུཊིཾ ཀརོཏི དེསིཏཝཏྠུཀཾ པམཱཎིཀཾ ཨནཱརམྦྷཾ ཨཔརིཀྐམནཾ, ཨཱཔཏྟི དུཀྐཊསྶཱ’’ཏི (པཱརཱ. ༣༥༥) ཨེཏཾ ཏཡམྤི ‘‘སཱརམྦྷཱདཱིསུ དུཀྐཊ’’ནྟི སཱམཉྙེན སངྒཧིཏནྟི དཊྛབྦཾ.

ཨེཀཾ ཨངྒཾ པམཱཎིཀཏྟཾ ཝཱ དེསིཏཝཏྠུཀཏྟཾ ཝཱ ཝིཔནྣཾ ཨེཏིསྶཱཏི ཨེཀཝིཔནྣཱ. པུབྦེ ཝུཏྟཏྠཱནཾ སངྒྷཱདིསེསཱདིཔདཱནམཏྠོ ཝུཏྟནཡེནེཝ ཝེདིཏབྦོ. སཱཏི ཡཐཱཝུཏྟལཀྑཎཀུཊི.

༣༨༣. ཨིདཱནི ཨིམསྨིཾ སིཀྑཱཔདེ ཨཊྛུཔྤཏྟིཡཾ ‘‘ཏེ ཡཱཙནབཧུལཱ ཝིཉྙཏྟིབཧུལཱ ཝིཧརནྟི ‘པུརིསཾ དེཐ པུརིསཏྟཀརཾ དེཐཱ’’ཏིཨཱདིཔཱལི༹ཡཱ (པཱརཱ. ༣༤༢) ཨཊྛཀཐཱཡཾ (པཱརཱ. ཨཊྛ. ༢.༣༤༢) ཨཱགཏཾ ཀཔྤིཡཱཀཔྤིཡཝིནིཙྪཡཾ སངྑེཔཏོ དསྶེཏུམཱཧ ‘‘པུརིས’’ནྟིཨཱདི. ཀམྨསཧཱཡཏྠཱཡཱཏི ཀིསྨིཉྩི ཀམྨེ སཧཱཡབྷཱཝཱཡ, ཀམྨཀརཎཏྠཱཡཱཏི ཝུཏྟཾ ཧོཏི. ‘‘ཨིཏྠནྣཱམཾ ཀམྨཾ ཀཱཏུཾ པུརིསཾ ལདྡྷུཾ ཝཊྚཏཱི’’ཏི ཡཱཙིཏུཾ ཝཊྚཏཱིཏི ཨཏྠོ. ཡཐཱཧ ཨཊྛཀཐཱཡཾ ‘‘ཀམྨཀརཎཏྠཱཡ ‘པུརིསཾ དེཐཱ’ཏི ཡཱཙིཏུཾ ཝཊྚཏཱི’’ཏི (པཱརཱ. ཨཊྛ. ༢.༣༤༢). མཱུལཙྪེཛྫཝསེནཱཏི སཱམིཀཱནཾ ཨཱཡཏྟབྷཱཝསངྑཱཏམཱུལསྶ ཚིནྡནཝསེན, ཨཏྟནོ ཨཱཡཏྟབྷཱཝཀརཎཝསེནཱཏི ཝུཏྟཾ ཧོཏི.

༣༨༤. ཨཝཛྫནྟི ཝཛྫརཧིཏཾ, ནིདྡོསནྟི ཨཏྠོ. མིགལུདྡཀམཙྪབནྡྷཀཱདཱིནཾ སཀཀམྨཾ ཝཛྫཀམྨཾ ནཱམ. ཏསྨཱ མིགལུདྡཀཱདཡོ ཧཏྠཀམྨཾ ཡཱཙནྟེན པན ‘‘ཏུམྷཱཀཾ ཧཏྠཀམྨཾ དེཐཱ’’ཏི, ‘‘ཧཏྠཀམྨཾ དཱཏབྦ’’ནྟི སཱམཉྙེན ཨཝཏྭཱ ‘‘ཨིཏྠནྣཱམཾ ཀམྨཾ དཱཏབྦ’’ནྟི ཝིསེསེཏྭཱཡེཝ ཡཱཙིཏབྦཾ. ལུདྡཀེ ཝཱ ཨིཏརེ ཝཱ ནིཀྐམྨེ ཨཡཱཙིཏྭཱཔི ཡཐཱརུཙི ཀམྨཾ ཀཱརཱཔེཏུཾ ཝཊྚཏི. ཧཏྠཀམྨཡཱཙནཱཡ སབྦཐཱཔི ཀཔྤིཡབྷཱཝཾ དཱིཔེཏུཾ ཏཾཏཾསིཔྤིཀེ ཡཱཙིཏྭཱ མཧནྟམྤི པཱསཱདཾ ཀཱརཱཔེནྟེན ¶ ཧཏྠཀམྨེ ཡཱཙིཏེ ཨཏྟནོ ཨནོཀཱསབྷཱཝཾ ཉཏྭཱ ཨཉྙེསཾ ཀརོནྟཱནཾ དཱཏབྦཾ མཱུལཾ དིཡྻམཱནཾ ཨདྷིཝཱསེཏུཾ ཝཊྚཏཱིཏི ཝིཏྠཱརཏོ ཨཊྛཀཐཱཡཾ (པཱརཱ. ཨཊྛ. ༢.༣༤༢ ཨཏྠཏོསམཱནཾ) ཝུཏྟཏྟཱ ཀུསལཱནཾ ཨཏྠཾ ཨཔརིཧཱཔེནྟེན ཀཔྤིཡེན སཱརུཔྤེན པཡོགེན ཡཱཙིཏབྦཾ. ཡཱཙིཏཀམྨཾ ཀཱཏུཾ ཨསམཏྠེཧི ཀརོནྟཱནཾ དིཡྻམཱནཾ ཧཏྠཀམྨམཱུལཾ ཀམྨཾ ཀཱརཱཔེཏྭཱ ¶ ཀམྨཀཱརཀེ དསྶེཏྭཱ དཱཔེཏབྦཾ. ཨེཝཾ ཡཱཙནཱཡ ཨནཝཛྫབྷཱཝེ ཨཊྛཀཐཱགཏཾ ཀཱརཎཾ དསྶེཏུམཱཧ ‘‘ཧཏྠཀམྨམྤཱི’’ཏིཨཱདི. པི-སདྡོ ཨཝདྷཱརཎེ, པདཔཱུརཎེ ཝཱ. ཧི-སདྡོ ཧེཏུམྷི. ཡསྨཱ ཨིདཾ ཧཏྠཀམྨཾ ཀིཉྩི ཝཏྠུ ན ཧོཏི, ཏསྨཱ ཨནཝཛྫམེཝ ཧཏྠཀམྨཾ ཡཱཙིཏུཾ པན ཝཊྚཏཱིཏི.

༣༨༥. ཉཱཏཀཱདིཀེཏི ཉཱཏཀཔཝཱརིཏེ. ཋཔེཏྭཱཏི ཝཛྫེཏྭཱ. གོཎམཱཡཱཙམཱནསྶཱཏི ཨཉྙཱཏཀཨཔྤཝཱརིཏེ ཏཱཝཀཱལིཀཾ ཝིནཱ ཀེཝལཾ ཀམྨཀརཎཏྠཱཡ གོཎཾ ཡཱཙནྟསྶ. ཏེསུཔཱིཏི ཉཱཏཀཱདཱིསུཔི མཱུལཙྪེཛྫེན གོཎམཱཡཱཙནསྶ དུཀྐཊནྟི ཡོཛནཱ. ‘‘ཏཱཝཀཱལིཀནཡེན སབྦཏྠ ཝཊྚཏཱི’’ཏི (པཱརཱ. ཨཊྛ. ༢.༣༤༢) ཨཊྛཀཐཱཝཙནཏོ ཡཱཝ ཀམྨཀརཎཀཱལཾ, ཏཱཝ ནིཡམེཏྭཱ ཉཱཏཀཨཉྙཱཏཀཔཝཱརིཏཨཔྤཝཱརིཏེ སབྦེཔི ཡཱཙིཏུཾ ཝཊྚཏི. ཏཐཱ ཡཱཙིཏྭཱ ཝཱ ཨཡཱཙིཏྭཱ ཝཱ གཧིཏོ ཙེ, རཀྑིཏྭཱ པཊིཛགྒིཏྭཱ སཱམིཀཱནཾ ནིཡྻཱདེཏབྦོ, གོཎེ ཝཱ ནཊྛེ ཝིསཱཎེ ཝཱ བྷིནྣེ སཱམིཀེསུ ཨསམྤཊིཙྪནྟེསུ བྷཎྜདེཡྻཾ.

༣༨༦. དེམཱཏི ཨེཏྠ ‘‘ཏུམྷཱཀ’’ནྟི པཱཋསེསོ. ‘‘ཝིཧཱརསྶ དེམཱ’ཏི ཝུཏྟེ པན ‘ཨཱརཱམིཀཱནཾ ཨཱཙིཀྑཐ པཊིཛགྒནཏྠཱཡཱ’ཏི ཝཏྟབྦ’’ནྟི (པཱརཱ. ཨཊྛ. ༢.༣༤༢) ཨཊྛཀཐཱཡཾ ཝུཏྟཾ. སཀཊཝིནིཙྪཡསྶཱཔི ¶ གོཎཝིནིཙྪཡེན སམཱནཏྟཱ ཏཾ ཨཝཏྭཱ ཝིསེསམཏྟམེཝ དསྶེཏུམཱཧ ‘‘སཀཊཾ…པེ… ཝཊྚཏཱི’’ཏི. ‘‘ཏུམྷཱཀཾ དེམཱཏི ཝུཏྟེ’’ཏི ཨཱནེཏྭཱ སམྦནྡྷིཏབྦཾ. ཡཐཱཧ ཨཊྛཀཐཱཡཾ ‘‘ཏུམྷཱཀམེཝ དེམཱཏི ཝུཏྟེ དཱརུབྷཎྜཾ ནཱམ སམྤཊིཙྪིཏུཾ ཝཊྚཏཱི’’ཏི (པཱརཱ. ཨཊྛ. ༢.༣༤༢).

༣༨༧. ཀུཋཱརཱདཱིསཱུཏི ཨེཏྠ ཨཱདི-སདྡེན ནིཁཱདནཾ སངྒཎྷཱཏི. ཨཡཾ ནཡོ ཝེདིཏབྦོཏི པཱཋསེསོ. ‘‘སཀཊཾ གོཎོ ཝིཡ ཏཱཝཀཱལིཀཾ ཨཀཏྭཱ ཨཉྙཱཏཀཨཔྤཝཱརིཏེ ན ཡཱཙིཏབྦཾ, མཱུལཙྪེཛྫཝསེན ཨཉྙཱཏཀཨཔྤཝཱརིཏེ ན ཡཱཙིཏབྦཾ, ཏཱཝཀཱལིཀཾ ཡཱཙིཏབྦ’’ནྟི ཝིནིཙྪཡོ ཙ ‘‘སཀཊཾ…པེ… ཝཊྚཏཱི’’ཏི ཝིསེསཝིནིཙྪཡོ ཙཱཏི ཨཡཾ ནཡོ ཝཱསིཨཱདཱིསུ ཙ ཝེདིཏབྦོཏི ཨཏྠོ. ཨནཛ྄ཛྷཱཝུཏྠཀནྟི ཀེནཙི ‘‘མམེཏ’’ནྟི ཨཔརིགྒཧིཏཾ, ‘‘རཀྑིཏགོཔིཏཊྛཱནེཡེཝ ཧི ཝིཉྙཏྟི ནཱམ ཝུཙྩཏཱི’’ཏི ཨཊྛཀཐཱཝཙནཏོ ཨརཀྑིཏཱགོཔིཏཀནྟི ཝུཏྟཾ ཧོཏི. ཨཊྛཀཐཱཡ ཝལླིཨཱདིཝིནིཙྪཡམྤི ཝཏྭཱ ‘‘ཨནཛ྄ཛྷཱཝུཏྠཀཾ པན ཡཾ ཀིཉྩི ཨཱཧརཱཔེཏུཾ ཝཊྚཏཱི’’ཏི (པཱརཱ. ཨཊྛ. ༢.༣༤༢) ཝུཏྟཏྟཱ སབྦནྟི ¶ ཨིདྷ ཝུཏྟགོཎཱདིཀཉྩ ཝཀྑམཱནཝལླིཨཱདིཀཉྩ གཧེཏབྦཾ. ཨིམིནཱ པུབྦེ ཝུཏྟཝིནིཙྪཡསྶ རཀྑིཏགོཔིཏཝིསཡཏྟཾ དཱིཔིཏཾ ཧོཏི. ཧརཱཔེཏུམྤི ཝཊྚཏཱིཏི ཨེཏྠ ཨཔི-སདྡེན པགེཝ ཀེནཙི ཧརིཏྭཱ དིནྣནྟི དཱིཔེཏི.

༣༨༨. ཝལླིཨཱདིམྷཱིཏི ཨཱདི-སདྡེན ཝེཏྟམུཉྫཏིཎམཏྟིཀཱ སངྒཎྷཱཏི. ཨེཏྠ མུཉྫཔབྦཛཏིཎཾ ཝིནཱ གེཧཙྪཱདནཏིཎཾ ཏིཎཾ ནཱམ. གརུབྷཎྜཔྤཧོནཀེཏི ‘‘ཝལླི ཨཌྜྷབཱཧུམཏྟཱཔཱི’’ཏིཨཱདིནཱ ནཡེན ཝུཏྟལཀྑཎེ གརུབྷཎྜཔྤཧོནཀེ. པརེསཾ སནྟཀེཡེཝཱཏི ཨཝདྷཱརཎེན ན ཨནཛ྄ཛྷཱཝུཏྠཀེ དུཀྐཊནྟི བྱཏིརེཀཏོ དཱིཔེཏི.

༣༨༩. པཙྩཡེསཱུཏི ¶ ཙཱིཝརཔིཎྜཔཱཏསེནཱསནསངྑཱཏེསུ ཏཱིསུ པཙྩཡེསུ. ཨེཝ-ཀཱརེན གིལཱནཔཙྩཡསངྑཱཏེ ཙཏུཏྠཔཙྩཡེ ཝིཉྙཏྟི ཝཊྚཏཱིཏི དཱིཔེཏི. ཝིཉྙཏྟི ནཱམ ‘‘ཨཱཧར, དེཧཱི’’ཏི ཨིཙྪིཏཔཙྩཡེ ནཱམཾ ཝཏྭཱ ཡཱཙནཱ. ཨཊྛཀཐཱཡཾ ཝུཏྟཾ ‘‘སབྦེན སབྦཾ ན ཝཊྚཏཱི’’ཏི (པཱརཱ. ཨཊྛ. ༢.༣༤༢) སཱཝདྷཱརཎཏྠཾ དསྶེཏུཾ ‘‘ན ཙ ཝཊྚཏཱི’’ཏི ཝུཏྟཏྟཱ ནེཝ ཝཊྚཏཱིཏི ཨཏྠོ གཧེཏབྦོ.

ཝིཉྙཏྟིཡཱ ཨལབྦྷམཱནབྷཱཝེན སམཏྟཱ པཙྩཡེསུ ཏཱིསུ ཨནནྟརཾ སཧནིདྡིཊྛཔཙྩཡཏྟཡཏོ ཏཏིཡཔཙྩཡེཡེཝ ལབྦྷམཱནཝིསེསཾ དསྶེཏུཾ ‘‘ཏཏིཡེ པརིཀཐོབྷཱསནིམིཏྟཱནི ཙ ལབྦྷརེ’’ཏི ཝུཏྟཏྟཱ ཨཝསིཊྛདྭཡེ པན པརིཀཐཱདཡོ ན ལབྦྷནྟཱིཏི ཝུཏྟཾ ཧོཏི. ཨཝུཏྟེ ཙཏུཏྠཔཙྩཡེཔི སམུཙྩཡཏྠེན ཙ-ཀཱརེན པརིཀཐཱདིཏྟཡཾ ལབྦྷཏཱིཏི སིདྡྷཏྟཱ ‘‘ཏཱིསྭེཝཱ’’ཏི ཨེཝ-ཀཱརེན བྱཏིརེཀམུཁེན ཝིཉྙཏྟིཡཱ ཙ ཨནུཉྙཱཏཏྟཱ ཙཏུཏྠེ གིལཱནཔཙྩཡེ པརིཀཐོབྷཱསནིམིཏྟཀམྨཝིཉྙཏྟིཡོ ཝཊྚནྟཱིཏི སིདྡྷཾ. ཨེཏྟཱཝཏཱ ཙཏུཏྠེ པཙྩཡེ པརིཀཐཱདཡོ ཙཏྟཱརོཔི ཝཊྚནྟི, ཏཏིཡཔཙྩཡེ ཝིཉྙཏྟིཾ ཝིནཱ སེསཏྟཡཾ ཝཊྚཏི, པུརིམཔཙྩཡདྭཡེ སབྦམྤི ན ཝཊྚཏཱིཏི ཝུཏྟནྟི དཊྛབྦཾ.

སེནཱསནཔཙྩཡེ པརིཀཐཱདིཀནྟི ཨུཔོསཐཱགཱརཱདིཀརཎཱརཧཊྛཱནཾ ཨོལོཀེཏྭཱ ཨུཔཱསཀཱནཾ སུཎནྟཱནཾ ‘‘ཨིམསྨིཾ ཝཏ ཨོཀཱསེ ཨེཝརཱུཔཾ སེནཱསནཾ ཀཱཏུཾ ཝཊྚཏཱི’’ཏི ཝཱ ‘‘ཡུཏྟ’’ནྟི ཝཱ ‘‘ཨནུརཱུཔ’’ནྟི ཝཱ པཝཏྟཱ ཀཐཱ པརིཀཐཱ ནཱམ. ‘‘ཨུཔཱསཀཱ ཏུམྷེ ཀཏྠ ཝསཐཱ’’ཏི པུཙྪིཏྭཱ ‘‘པཱསཱདེ བྷནྟེ’’ཏི ཝུཏྟེ ‘‘བྷིཀྑཱུནཾ པན ཨུཔཱསཀཱ པཱསཱདོ ན ཝཊྚཏཱི’’ཏིཨཱདིནཱ ནཡེན པཝཏྟཱ ¶ ཀཐཱ ཨོབྷཱསོ ནཱམ. ཨུཔཱསཀེསུ པསྶམཱནེསུ བྷཱུམིཡཾ རཛྫུཾ པསཱརེཏྭཱ བྷཱུམིཾ བྷཱཛེཏྭཱ ཁཱཎུཀེ ཨཱཀོཊེཏྭཱ ‘‘ཀིམིདཾ བྷནྟེ’’ཏི ཝུཏྟེ ¶ ‘‘ཨེཏྠ ཨཱཝཱསཾ ཀརོམ ཨུཔཱསཀཱ’’ཏིཨཱདིཀཱ ཀཐཱ ནིམིཏྟཀཐཱ ནཱམ. གིལཱནཔཙྩཡེ ཙ ཨིམིནཱ ནཡེན ཡཐཱརཧཾ ཝེདིཏབྦཾ. སབྦམེཏཾ ཨཊྛཀཐཱཡ (པཱརཱ. ཨཊྛ. ༢.༣༤༢) ཝུཏྟཾ.

༣༩༠-༣. ཨིདཱནི ཀུཊིཀཱརསྶ བྷིཀྑུནོ ཨཱཔཏྟིདསྶནཏྠམཱཧ ‘‘ཨདེསིཏེ’’ཏིཨཱདི. ཏཾ ཨུཏྟཱནཏྠམེཝ. ནིསེནྟསྶཱཏི པཱསཱཎེ གྷཾསིཏྭཱ ཏིཁིཎཾ ཀརོནྟསྶ. པཱཙིཏྟིཡཱ སཧཱཏི ‘‘བྷཱུཏགཱམཔཱཏབྱཏཱཡ པཱཙིཏྟིཡ’’ནྟི (པཱཙི. ༩༠) ཝུཏྟཔཱཙིཏྟིཡེན སདྡྷིཾ.

ཨཱཔཏྟིནྟི པཱཙིཏྟིཡཊྛཱནེ པཱཙིཏྟིཡཉྩེཝ དུཀྐཊཉྩ ཨིཏརཏྲ སུདྡྷཔཡོགདུཀྐཊཉྩཱཏི ཨཱཔཏྟིཾ.

ཡཱ པནཱཏི ཡཱ ཀུཊི. པཋམེ དུཏིཡེཏི ཨེཏྠ ‘‘པིཎྜེཧཱི’’ཏི ཀརཎབཧུཝཙནཾ ཝིབྷཏྟིཝཙནཝིཔརིཎཱམཝསེན ‘‘པིཎྜེ’’ཏི བྷུམྨེཀཝཙནནྟཾ ཀཏྭཱ ཡོཛེཏབྦཾ, ‘‘ནིཀྑིཏྟེ’’ཏི ཨཛ྄ཛྷཱཧརིཏབྦཾ, བྷཱཝལཀྑཎེ བྷུམྨཾ, ནིཀྑིཏྟེ སཏཱིཏི ཨཏྠོ.

༣༩༤. ‘‘སཙེ ཨཉྙསྶཱ’’ཏི པདཙྪེདོ. ཝིཔྤཀཏནྟི ཨཱརདྡྷམནིཊྛིཏཾ. ‘‘ཨནཱཔཏྟཱི’’ཏི ཨིདཾ ནིཊྛིཏེ ཨཱཔཛྫིཏབྦསངྒྷཱདིསེསཱབྷཱཝཾ སནྡྷཱཡཱཧ. པུབྦཔཡོགམཏྟེན ཧི པཱཙིཏྟིཡདུཀྐཊཱནིཔི ཧོནྟི, ཏཱནི པན དེསེཏབྦཱནི. ‘‘ཏཐཱ’’ཏི ཨིམིནཱ ‘‘ཨནཱཔཏྟཱི’’ཏི ཨཱཀཌྜྷཏི, ཏེན སངྒྷཱདིསེསཱཔཏྟིཡཱ ཨབྷཱཝཏོ པུབྦབྷཱགེ ཨཱཔནྣཱནཾ པཱཙིཏྟིཡདུཀྐཊཱནཾ དེསེཏབྦཏཱ ཙ དཱིཔིཏཱ ཧོཏི. ཏཾ ཀུཊིནྟི ཏཾ ཝིཔྤཀཏཀུཊིཾ.

༣༩༥. ཨཉྙཾ བྷོཛནསཱལཱདིཾ. ཏཐཱཏི ཨནཱཔཏྟིམཱཧ.

༣༩༦. ‘‘ཀརོཏོ’’ཏི ¶ ཨིམིནཱ ‘‘ཀཱརཱཔཡཏོ’’ཏིཔི ལབྦྷཏི. ཨུབྷཡེནཱཔི ‘‘ཀྲིཡཏོ’’ཏི ཨིམསྶ ཀཱརཎཾ དསྶེཏི. ‘‘ཨཔྤམཱཎིཀ’’ནྟི ཨིམིནཱ སངྒྷཱདིསེསསྶ ཨངྒཾ དསྶེཏི.

༣༩༧. ཏནྟི ¶ ‘‘ཨཔྤམཱཎིཀ’’ནྟི ཨེཝཾ པཙྩཱམསཏི. ‘‘ཀྲིཡཱཀྲིཡཏོ’’ཏི ཨིདཾ ཀུཊིཡཱ ཀརཎཉྩ ཝཏྠུདེསནཱཡ ཨཀརཎཉྩ ཨུཔཱདཱཡ ཝུཏྟཾ.

ཀུཊིཀཱརསིཀྑཱཔདཝཎྞནཱ.

༣༩༨. ཝཏྠུཾ ཨདེསེཏྭཱཏི སམྦནྡྷོ, ‘‘ཏེན ཝིཧཱརཀཱརཀེན བྷིཀྑུནཱ ཝིཧཱརཝཏྠུཾ སོདྷེཏྭཱ སངྒྷཾ ཨུཔསངྐམིཏྭཱ’’ཏིཨཱདིནཱ (པཱརཱ. ༣༦༧) པདབྷཱཛནེ ཨཱགཏནཡེན ཝིཧཱརཾ ཀཱརཱཔེནྟེན བྷིཀྑུནཱ ཝིཧཱརཝཏྠུཾ སོདྷེཏྭཱ སམཏལཾ ཀཱརེཏྭཱ སངྒྷཾ ཨུཔསངྐམྨ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ‘‘ཨཧཾ བྷནྟེ མཧལླཀཾ ཝིཧཱརཾ ཀཏྟུཀཱམོ སསྶཱམིཀཾ ཨཏྟུདྡེསཾ, སོཧཾ བྷནྟེ སངྒྷཾ ཝིཧཱརཝཏྠུཨོལོཀནཾ ཡཱཙཱམཱི’’ཏི ཏིཀྑཏྟུཾ ཡཱཙིཏྭཱ ལདྡྷེ ཝུཌྜྷེ ཝཱ བྷིཀྑཱུ ཉཏྟིདུཏིཡཱཡ ཀམྨཝཱཙཱཡ སངྒྷེན སམྨཏེ ཝཱ བྷིཀྑཱུ ནེཏྭཱ ཀཏཔརིཀམྨཾ ཝིཧཱརཝཏྠུཾ དསྶེཏྭཱ ཀུཊིཝཏྠུཨོལོཀནེ ཝིཡ གཏབྷིཀྑཱུཧི ཨོལོཀེཏྭཱ སཱརམྦྷཱདིབྷཱཝཾ ཨུཔཔརིཀྑིཏྭཱ ཨནཱརམྦྷསཔརིཀྐམནབྷཱཝཾ ཉཏྭཱ ཨཱགནྟྭཱ སངྒྷསྶ ཨཱརོཙིཏེ པུན ཏེན སངྒྷཾ ཨུཔསངྐམིཏྭཱ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ‘‘ཨཧཾ བྷནྟེ མཧལླཀཾ ཝིཧཱརཾ ཀཏྟུཀཱམོ སསྶཱམིཀཾ ཨཏྟུདྡེསཾ, སོཧཾ བྷནྟེ སངྒྷཾ ཝིཧཱརཝཏྠུདེསནཾ ཡཱཙཱམཱི’’ཏི ཏིཀྑཏྟུཾ ཡཱཙིཏྭཱ སངྒྷེན ཉཏྟིདུཏིཡཱཡ ཀམྨཝཱཙཱཡ ཝིཧཱརཝཏྠུ དེསེཏབྦཾ ¶ , ཏཐཱ ཨཀཏྭཱཏི ཝུཏྟཾ ཧོཏི. ཨིཧ སཱརམྦྷཱདི པཋམསིཀྑཱཔདེ ཝུཏྟནཡེནེཝ ཝེདིཏབྦཾ.

མཧལླཀནྟི ‘‘སསྶཱམིཀབྷཱཝེན སཉྙཱཙིཀཀུཊིཏོ མཧནྟབྷཱཝོ ཨེཏསྶ ཨཏྠཱིཏི མཧལླཀོ. ཡསྨཱ ཝཱ ཝཏྠུཾ དེསཱཔེཏྭཱ པམཱཎཱཏིཀྐམེནཱཔི ཀཱཏུཾ ཝཊྚཏི, ཏསྨཱ པམཱཎམཧནྟཏཱཡཔི མཧལླཀོ’’ཏི (པཱརཱ. ཨཊྛ. ༢.༣༦༦) ཨཊྛཀཐཱཡཾ ཝུཏྟནཡེན མཧནྟབྷཱཝེན ཡུཏྟནྟི ཨཏྠོ. ཝིཧཱརནྟི ‘‘ཝིཧཱརོ ནཱམ ཨུལླིཏྟོ ཝཱ ཧོཏི ཨཝལིཏྟོ ཝཱ ཨུལླིཏྟཱཝལིཏྟོ ཝཱ’’ཏི (པཱརཱ. ༣༧༡) པདབྷཱཛནེ ཝུཏྟཔྤཀཱརཾ སེནཱསནནྟི ཨཏྠོ. ཝིཧརནྟི ཨསྨིནྟི ཝིགྒཧོ. ཨུལླིཏྟཱདིསརཱུཔཾ པུརིམསིཀྑཱཔདེ ཝུཏྟནཡམེཝ. ཏཾ ཝིཧཱརཾ ཡོ ཀརེཡྻཱཏི ཡོཛནཱ. ཀརེཡྻ ཝཱ ཀཱརཱཔེཡྻ ཝཱཏི པུབྦེ ཝུཏྟནཡམེཝ. ཨཏྟཝཱསཏྠནྟི ཨཏྟནོ ཝཱསཾ པཊིཙྩ, ཨིམིནཱ པརསྶ ཝཱསཏྠཱཡ ཀརོཏི, ཨནཱཔཏྟཱིཏི བྱཏིརེཀཏོ ཝིཉྙཱཡཏི. ‘‘གརུཀ’’ནྟི ཨེཏྠ ཝཏྠུདེསནཱཡ ཨཀཱརཱཔནེན ‘‘ཨེཀོཝ སངྒྷཱདིསེསོ ཧོཏཱི’’ཏི པུབྦེ ཝུཏྟཝིཀཔྤཏྟཡཾ ¶ ན གཧེཏབྦཾ. ཨིདཉྩ ཝཀྑཏི ‘‘པམཱཎཱ…པེ… སངྒྷཱདིསེསཏཱ’’ཏི (ཝི. ཝི. ༣༩༩ ཨཱདཡོ).

༣༩༩. ཀྲིཡཱསམུཊྛཱནཱབྷཱཝནྟི པམཱཎཱཏིཀྐམེཔི ཨཱཔཏྟིཡཱ ཨསམྦྷཝཏོ ཀིརིཡཱསམུཊྛཱནསྶ ཨིདྷ ཨབྷཱཝོ ཉཱཏབྦོ. ཀྲིཡ…པེ… ལཀྑཡེཏི ཨེཏྠ བྱཏིརེཀཏོ ཨདེསིཏཝཏྠུཀཏཱཡ ཨཀིརིཡཱསམུཊྛཱནཏཱ ཨནུཉྙཱཏཱ.

མཧལླཀཝིཧཱརཀཐཱཝཎྞནཱ.

༤༠༡-༣. ཏེསཱུཏི ཙཏུཝཱིསཏིཡཱ པཱརཱཛིཀེསུ. བྷིཀྑུནོ ཨནུརཱུཔཱནི ཨེཀཱུནཝཱིསཏཱིཏི བྷིཀྑུནཱིནཾ པཊིནིཡཏཱ ཨུབྦྷཛཱཎུམཎྜལིཀཱདཡོ ¶ ཙཏྟཱརོ ཏདནུལོམཱཡ ཝིབྦྷནྟབྷིཀྑུནིཡཱ སཧ པཉྩ པཱརཱཛིཀེ ཝིནཱ བྷིཀྑུནོ ཨནུརཱུཔཱ སེསཱ ཨེཀཱུནཝཱིསཏི པཱརཱཛིཀཱ.

ཨིམསྨིཾ སིཀྑཱཔདེ པདབྷཱཛནེ ‘‘པཱརཱཛིཀེན དྷམྨེནཱཏི ཙཏུནྣཾ ཨཉྙཏརེནཱ’’ཏི (པཱརཱ. ༣༨༦) ཝུཏྟནཡསྶ ཨིདྷ ‘‘ཨེཀཱུནཝཱིསཏཱི’’ཏི ཝཙནཾ ཝིརུཛ྄ཛྷཏཱིཏི ཙེ? ན ཝིརུཛ྄ཛྷཏི. ཀསྨཱ? ཡསྨཱ པདབྷཱཛནཾ པཱཏིམོཀྑུདྡེསཱགཏམཏྟཾ གཧེཏྭཱ པཝཏྟཾ, ཨིདཾ པན བུདྡྷཱནུམཏིཾ གཧེཏྭཱ ཝིནཡཔརིཡཏྟིཔཝཏྟཀཱནཾ ཨཱཙརིཡཱནཾ མཏཾ གཧེཏྭཱ པཝཏྟཾ, ཏསྨཱ ན ཝིརུཛ྄ཛྷཏཱིཏི གཧེཏབྦཾ. ཨཱཙརིཡོ སབྦཔཱརཱཛིཀཱནཾ ‘‘བྲཧྨཙརིཡཱ ཙཱཝེཡྻ’’ནྟི (པཱརཱ. ༣༨༥) ཝུཏྟཨནུདྡྷཾསནསྶ ཨེཀནྟསཱདྷནཏྟཱ བྷིཀྑུནཱིནཾ པཊིནིཡཏསཱནུལོམཔཱརཱཛིཀཔཉྩཀཾ ཝིནཱ ཨཝསེསཾ སབྦཾ སངྒཎྷི, ཏེནེཝ ཝིནཡཊྛཀཐཱཡ གཎྛིཔདཝིཝརཎེ ‘‘ཙཏུནྣཾ ཨཉྙཏརེནཱཏི པཱཏིམོཀྑུདྡེསེ ཨེཝ ཨཱགཏེ གཧེཏྭཱ ཝུཏྟཾ, ཨིཏརེསཾ ཨཉྙཏརེནཱཔི ཨནུདྡྷཾསེནྟསྶ སངྒྷཱདིསེསོཝཱ’’ཏི ཝུཏྟཾ. ཏསྨཱ ‘‘ཨནུདྡྷཾསེཡྻཱ’’ཏི (པཱརཱ. ༣༨༤) པཱཋེ ཨདྷིཔྤཱཡཾ གཧེཏྭཱ པཝཏྟཏྟཱ ཨིམེསཾ ཨཱཙརིཡཱནཾ མཏཾ པམཱཎནྟི གཧེཏབྦཾ. ‘‘ཏེསུ ཨཉྙཏརེནཱ’’ཏི ཝཀྑམཱནཏྟཱ ‘‘ཨེཀཱུནཝཱིསཏཱི’’ཏི ཨེཏྠ ‘‘ཡཱནཱི’’ཏི སཱམཏྠིཡཱ ལབྦྷཏི.

ཨཉྙཏརེན ཨམཱུལཀེནཱཏི ཡོཛནཱ. ཨམཱུལཀེནཱཏི ཙོདཀསྶ དསྶནཱདཱིཧི ཙོདནཱམཱུལེཧི ཝིརཧིཏཏྟཱ ཨམཱུལཀཾ, པཱརཱཛིཀཾ, ཏེན. ཡཐཱཧ ཨཊྛཀཐཱཡཾ ‘‘ཡཾ པཱརཱཛིཀཾ ཙོདཀེན ཙུདིཏཀམྷི པུགྒལེ ནེཝ དིཊྛཾ ན སུཏཾ ན པརིསངྐིཏཾ, ཨིདཾ ཨེཏེསཾ དསྶནསཝནཔརིསངྐཱསངྑཱཏཱནཾ ¶ མཱུལཱནཾ ཨབྷཱཝེན ཨམཱུལཀཾ ནཱམཱ’’ཏི (པཱརཱ. ཨཊྛ. ༢.༣༨༥-༣༨༦). ཨེཏྠ ཙ མཾསཙཀྑུནཱ ཝཱ དིབྦཙཀྑུནཱ ཝཱ དིཊྛཾ དིཊྛཾ ནཱམ ¶ . པཀཏིསོཏེན ཝཱ དིབྦསོཏེན ཝཱ སུཏཾ སུཏཾ ནཱམ. ཙིཏྟེན པརིསངྐིཏཾ པརིསངྐིཏཾ ནཱམ. ཏཾ ཏིཝིདྷཾ དིཊྛསུཏམུཏཔརིསངྐིཏཝསེན.

ཏཏྠ ཏཱདིསེ ཀམྨནིཡེ ཨོཀཱསེ མཱཏུགཱམེན སདྡྷིཾ བྷིཀྑུནོ ཨཉྙཐིཡཾ པཡོགཾ དིསྭཱ ཨཉྙཐཱ གཧེཏྭཱ ‘‘ཝཱིཏིཀྐམནཾ ནུ ཁོཡམཀཱསཱི’’ཏི གཧཎཾ དིཊྛཔརིསངྐིཏཾ ནཱམ. ཀུཊྚཏིརོཧིཏེ བྷིཀྑུམྷི མཱཏུགཱམསྶ སདྡཾ སུཏྭཱ ཏཏྠ ཨཉྙསྶ ཝིཉྙུཔུརིསསྶ སབྦྷཱཝཾ ཨཛཱནིཏྭཱ ‘‘ཝཱིཏིཀྐམནཾ ནུ ཁོཡམཀཱསཱི’’ཏི ཨེཝཾ གཧཎཾ སུཏཔརིསངྐིཏཾ ནཱམ. ཝིཧཱརཔརིཡནྟེ ཏརུཎམཱཏུགཱམཔུརིསཱནཾ དིཝསཾ ཝཱིཏིནཱམེཏྭཱ གཏཊྛཱནེ ཝིཔྤཀིཎྞཔུཔྥཱནི ཨོལོཀེཏྭཱ, མཾསསུརགནྡྷཉྩ གྷཱཡིཏྭཱ ‘‘ཨིདཾ ཀསྶ ཀམྨ’’ནྟི ཨུཔཔརིཀྑནྟེན བྷིཀྑུནོ ཙེཏིཡཔཱུཛིཏམཱལཱགནྡྷསྶ པཱིཏཱརིཊྛསྶ བྷིཀྑུནོ སརཱིརགནྡྷཾ གྷཱཡིཏྭཱ ‘‘ཏཾ ཨེཏསྶ ཀམྨཾ ནུ ཁོ’’ཏི ཀིརིཡམཱནསཾསཡོ མུཏཔརིསངྐིཏཾ ནཱམ. ཨེཝརཱུཔསྶ དིཊྛསུཏཔརིསངྐིཏམཱུལཀསྶ ཨབྷཱཝཏོ ཨམཱུལཀེན པཱརཱཛིཀེནཱཏི ཨཡམེཏྠ སངྑེཔོ, ཝིཏྠཱརོ པན སམནྟཔཱསཱདིཀཱཡ (པཱརཱ. ཨཊྛ. ༢.༣༨༥-༣༨༦) ཝུཏྟནཡེན དཊྛབྦོ.

ཙོདེཏཱིཏི ‘‘པཱརཱཛིཀཾ དྷམྨཾ ཨཱཔནྣོསཱི’’ཏིཨཱདིཝཙནེན སཡཾ ཙོདེཏི. ཙོདཱཔནཾ པན ཝཀྑཏི. ཙཱཝནཙེཏནོ ཧུཏྭཱཏི ‘‘ཨཔྤེཝ ནཱམ ནཾ ཨིམམྷཱ བྲཧྨཙརིཡཱ ཙཱཝེཡྻ’’ནྟི ཨུཔྤནྣེན པརཾ སཱསནཱ ཙཱཝེཏུཀཱམེན ཙིཏྟེན སམནྣཱགཏོ ཧུཏྭཱ. ‘‘སུདྡྷཾ ཝཱ ཨསུདྡྷཾ ཝཱ’’ཏི ཨིདཾ ‘‘ཙོདེཏཱི’’ཏི ཨིམིནཱ ཝུཏྟཙོདནཱཀིརིཡཱཡ ཀམྨནིདྡེསོ, ‘‘ཨཉྙཾ བྷིཀྑུ’’ནྟི སེསོ, པཱརཱཛིཀམནཱཔནྣཾ ཝཱ ཨཱཔནྣཾ ཝཱ ཨཉྙཾ བྷིཀྑུནྟི ཨཏྠོ. ཡོཏི མཱཏིཀཱགཏབྷིཀྑུ, ‘‘དུཊྛོ དོསོ ཨཔྤཏཱིཏོ’’ཏི ཨིདཾ ཨཛ྄ཛྷཱཧརིཏབྦཾ, ཨུཔྤནྣེན དོསལེསེན ¶ སཡཾ དཱུསིཏོ, པརཉྩ དཱུསེནྟོ པཱིཏིསུཁཱདཱིཧི ཨཔགཏོ ཡོ བྷིཀྑཱུཏི ཨཏྠོ. ཝཀྑམཱནེན ‘‘ཏསྶཱ’’ཏི ཨིམིནཱ སམྦནྡྷོ.

‘‘ཀཏེ ཨོཀཱསམྷཱི’’ཏི པདཙྪེདོ, ཨོཀཱསཾ ‘‘ཀཱརཱཔེཏྭཱ’’ཏི (པཱརཱ. ༣༨༩) པཱཋཏོ ཨནྟོནཱིཏཧེཏྭཏྠཏཱཡ ‘‘ཀཏེ’’ཏི ‘‘ཀཱརིཏེ’’ཏི ཨེཏསྶ པརིཡཱཡོ ཧོཏི, ‘‘ཨོཀཱསཾ མེ ཀརོཧི, ཨཧཾ ཏཾ ཝཏྟུཀཱམོ’’ཏི ཨོཀཱསེ ཀཱརཱཔིཏེཏི ཨཏྠོ. ‘‘ཨཀཏེ ཨོཀཱསེ’’ཏི པདཙྪེདོ ¶ , པུབྦེ ཝུཏྟོཡེཝཏྠོ. དུཀྐཊཱཔཏྟིཡཱ སཧཱཏི ཨོཀཱསསྶ ཨཀཱརཱཔིཏཏྟཱ དུཀྐཊཱཔཏྟིཡཱ སདྡྷིཾ.

༤༠༤-༥. ཀོཎྛོསཱིཏི དྷུཏྟོསི. ཛེཊྛབྦཏིཀོསཱིཏི ཀཱལཱིདེཝཱིཝཏནིཡུཏྟོསི. ཀཱལཱིདེཝཱི ཀིར སིརིདེཝིཡཱ ཛེཊྛཱ, ཏསྨཱ ཏསྶཱ ཝཏདྷརོ ཛེཊྛབྦཏིཀོ ཝུཙྩཏི. ཏཾ པན ཝཏཾ སམཱདིཡིཏྭཱ པཱུརེནྟོ སཀལསརཱིརེ མསིཾ མཀྑེཏྭཱ ཀཱཀཔཏྟཱནི མུཊྛིཡཾ ཀཏྭཱ ཀཱལཱིདེཝིཾ ཕལཀེ ལིཁཱཔེཏྭཱ ཏཾ ཀཱཛཀོཊིཡཾ བནྡྷིཏྭཱ ཨུཙྪིཊྛོདཀཱདིཨསུཙིསནྣིཙིཏཨོལིགལླཾ པཝིསིཏྭཱ ‘‘དུསྶཱིལོསི ནིསྶཱིལོསི སཱིལཝིརཧིཏོསཱི’’ཏི ཐོམེནྟོ ཝིཙརཏཱིཏི.

དུསྶཱིལཏྟཱ ཨེཝ ཧཱིནཛ྄ཛྷཱསཡཏཱཡ པཱཔདྷམྨོ ལཱམཀསབྷཱཝོསི. པཱུཏིནཱ ཀམྨེན སཱིལཝིཔཏྟིཡཱ ཨནྟོ པཝིཊྛཏྟཱ ཨནྟོཔཱུཏི. ཚཧི དྭཱརེཧི རཱགཱདིཀིལེསཱནུསྶཝནེན ཏིནྟཏྟཱ ཨཝསྶུཏོ. སེསམེཏྠ ཨུཏྟཱནཏྠམེཝ. གརུཀཾ ནིདྡིསེཏི ཨེཏྠ ‘‘ཀཏོཀཱསམྷཱི’’ཏི ཙ ‘‘ཏཐེཝ ཨཀཏོཀཱསེ, དུཀྐཊཱཔཏྟིཡཱ སཧཱ’’ཏི ཙ ཨཱནེཏྭཱ སམྦནྡྷིཏབྦཾ. ཨེཝམུཏྟརཏྲཱཔི.

༤༠༦. སམྨུཁཱཏི ¶ ཙུདིཏཀསྶ སམྨུཁཱ, ཨཝིདཱུརེཏི ཨཏྠོ. ཧཏྠམུདྡཱཡཱཏི མུཏྟཔཱཎཱདིཝསེན. ཏཾ ཧཏྠམུདྡཱཡ ཀཐིཏཾ. པརོཏི ཡཾ ཙོདེསི, སོ ཙུདིཏཀོ པརོ. བྷིཀྑུནོཏི ཙོདཀསྶ བྷིཀྑུནོ.

༤༠༧. སམྨུཁེ ཋཏྭཱཏི ཙུདིཏཀསྶ ཨཱསནྣེ ཋཏྭཱ. ‘‘ཙོདཱཔེནྟསྶཱ’’ཏི ཨེཏསྶ ཀམྨབྷཱཝཏོ པརོཏི ཨིདཾ ཨུཔཡོགནྟཝསེན སམྦནྡྷིཏབྦཾ. ཨེཝམུཏྟརཏྲ. ཀེནཙཱིཏི ཨཉྙེན ཀེནཙི པུགྒལེན. ཏསྶ ཙོདཀསྶ. ‘‘ཙོདཱཔེནྟསྶཱ’’ཏི པུན ཝཙནཾ ནིཡམཏྠཾ.

༤༠༨. སོཔཱིཏི ཨུགྒཧཱཔིཏཏྟཱ ཙོདནཾ ཀརོནྟོ ཨིཏརོ པཡོཛྫཀཔུགྒལོཔི. ཏེསཾ དྭིནྣམྤཱིཏི པཡོཛཀཔཡོཛྫཀཱནཾ དྭིནྣམྤི.

༤༠༩. ཝུཏྟཊྛཱནཾ པཎྞཾ ཝཱ སནྡེསཾ ཝཱ ཧརནྟོ དཱུཏོ ནཱམ, སོ ‘‘པཎྞཾ ཝཱ སཱསནཾ ཝཱ པེསེཏྭཱ’’ཏི ཨིམིནཱ སངྒཡ྄ཧཏཱིཏི ཏསྨིཾ ཝིསུཾ ཨཝཏྟབྦེཔི ‘‘དུཏ’’ནྟི ཝཙནེན ནིསྶཊྛདཱུཏམཱཧ ¶ . པཎྞཾ ཝཱ ཨདཏྭཱ ‘‘ཨེཝཉྩ ཨེཝཉྩ ཝདཱ’’ཏི སཱསནཉྩ ཨདཏྭཱ ‘‘ཏཾ ཙོདེཧཱི’’ཏི ཨཏྠམཏྟམེཝ དཏྭཱ ནིསྶཊྛོ བྷིཀྑུ ཨིདྷ ‘‘ནིསྶཊྛདཱུཏོ’’ཏི གཧེཏབྦོ.

ཨཐ ཝཱ ‘‘དཱུཏ’’ནྟི ཨིམིནཱ ཙོདེཏུཾ ཨུགྒཧཱཔེཏྭཱ, ཏམནུགྒཧཱཔེཏྭཱ ཝཱ ནིསྶཊྛོ བྷིཀྑུ དཱུཏོཡེཝ གཧེཏབྦོ. ‘‘པཎྞ’’ནྟི ཨིམིནཱ པབྦཛིཏསྶ ཝཱ ཨཔབྦཛིཏསྶ ཝཱ ཀསྶཙི ཧཏྠེ ཙོདནཾ ལིཁིཏྭཱ དིནྣཔཎྞཾ གཧེཏབྦཾ. སཱསནནྟི ‘‘པཱརཱཛིཀཾ ཨཱཔནྣོ’’ཏིཨཱདིནཱ ནཡེན ཝཏྭཱ པེསིཡམཱནཾ སཱསནཾ གཧེཏབྦཾ. ཨིདཾ ཏཡམྤི དཱུརེ ནིསཱིདིཏྭཱ ཨཉྙེཧི ཀཱརཱཔནཏོ ‘‘ཙོདཱཔེནྟསྶཱ’’ཏི ཨཱཧ. ‘‘པར’’ནྟི ཨཱནེཏྭཱ སམྦནྡྷིཏབྦཾ. ཨེཏྠ ཨོཀཱསཀཱརཱཔནཾ ནཏྠི.

༤༡༠. ཏཐཱཏི ¶ ཡཐཱ ཨམཱུལཀེན པཱརཱཛིཀེན སམྨུཁཱ ཨོཀཱསེ ཀཱརིཏེ, ཨཀཱརིཏེ ཙ, ཏཐཱ ཨམཱུལཀེཧི སངྒྷཱདིསེསེཧཱིཏི ཝུཏྟཾ ཧོཏི. ‘‘ཝུཏྟེ སམྨུཁཱ པརེ’’ཏི བྷུམྨཝསེན ཨདྷིཀཏེན ཡོཛེཏབྦཾ, ཙོདེཏི ཙོདཱཔེཏཱིཏི ཝུཏྟཾ ཧོཏཱིཏི. པཱཙིཏྟིཡཱཔཏྟཱིཏི ཨོཀཱསེ ཀཱརིཏེ ཀེཝལཱ, ཨཀཱརིཏེ དུཀྐཊེན སཧཱཏི གཧེཏབྦཾ. སམྨུཁཱ སེསཱཔཏྟཱིཧི པརེ ཝུཏྟེ ཙཱཝནསཉྙིནོ དུཀྐཊཾ ཧོཏཱིཏི ཡོཛནཱ. ཨོཀཱསཱཀཱརཱཔནེནཔི དུཀྐཊམེཝ ཧོཏི.

༤༡༡. ཨཀྐོསནཱདྷིཔྤཱཡསྶཱཏི ཁུཾསནཱདྷིཔྤཱཡསྶ. ཨཀཏོཀཱསནྟི ཨཀཱརིཏོཀཱསཾ, ‘‘པར’’ནྟི ཨིམིནཱ ཡོཛེཏབྦཾ. ཨཏྟནཱཏི ཙོདཀེན, ‘‘སཡཾ ཨཀཱརིཏོཀཱས’’ནྟི ཨིམིནཱ ཡོཛེཏབྦཾ. སཧ པཱཙིཏྟིཡེནཱཏི ‘‘ཨོམསཝཱདེ པཱཙིཏྟིཡ’’ནྟི (པཱརཱ. ༡༤) ཝུཏྟཔཱཙིཏྟིཡེན སཧ. ཝདནྟསྶཱཏི ཙོདེནྟསྶ ཝཱ ཙོདཱཔེནྟསྶ ཝཱ, ཨེཏྠ ‘‘སམྨུཁཱ’’ཏི ཨིདཾ ཝཀྑམཱནསྶ ‘‘ཨསམྨུཁཱ’’ཏི ཨེཏསྶ ཝིཔརིཡཱཡཏོ ལབྦྷཏི, ཙ-ཀཱརེན ཀཱརིཏོཀཱསཔཀྑེ དུཀྐཊེན པཱཙིཏྟིཡསམྦནྡྷཱི.

༤༡༢. ཨསམྨུཁཱ ཝདནྟསྶཱཏི ཨེཏྠ ‘‘ཨཀྐོསནཱདྷིཔྤཱཡསྶཱ’’ཏི ཨཱནེཏྭཱ སམྦནྡྷིཏབྦཾ. ‘‘ཨཀཏོཀཱསམཏྟནཱ’’ཏི ནཱནུཝཏྟཏི. སཏྟཧི ཨཱཔཏྟཱིཧཱིཏི པཱརཱཛིཀསངྒྷཱདིསེསཐུལླཙྩཡཔཱཙིཏྟིཡཔཱཊིདེསནཱིཡདུཀྐཊདུབྦྷཱསིཏསངྑཱཏེསུ སཏྟསུ ཨཱཔཏྟིཀྑནྡྷེསུ ཡེན ཀེནཙཱིཏི ཝུཏྟཾ ཧོཏི. ‘‘ཏཐཱ’’ཏི ཨིམིནཱ ‘‘ཨསམྨུཁཱ’’ཏི ཨིདཾ སངྒཎྷཱཏི. ཀམྨནྟི ཏཛྫནཱིཡཱདིསཏྟཝིདྷཾ ཀམྨཾ.

༤༡༣. ཨུམྨཏྟཀཱདཱིནནྟི ¶ ཨཱདི-སདྡེན ‘‘ཨནཱཔཏྟི སུདྡྷེ ཨསུདྡྷདིཊྛིསྶ ཨསུདྡྷེ ཨསུདྡྷདིཊྛིསྶ ཨུམྨཏྟཀསྶ ཨཱདིཀམྨིཀསྶཱ’’ཏི ¶ (པཱརཱ. ༣༩༠) ཝུཏྟེ སངྒཎྷཱཏི. པཉྩངྒསཾཡུཏནྟི ཡཾ ཙོདེཏི, ཏསྶ ‘‘ཨུཔསམྤནྣོ’’ཏི སངྑྱཱུཔགམནཾ, ཏསྨིཾ སུདྡྷསཉྙིཏཱ, ཡེན པཱརཱཛིཀེན ཙོདེཏི, ཏསྶ དིཊྛཱདིཝསེན ཨམཱུལཀཏཱ, ཙཱཝནཱདྷིཔྤཱཡེན སམྨུཁཱ ཙོདནཱ, ཏསྶ ཏངྑཎཝིཛཱནནནྟི ཨིམེཧི པཉྩཧི ཨངྒེཧི ཡུཏྟཾ ཧོཏི.

༤༡༥. ཨིདནྟི ‘‘སིཀྑཱཔད’’ནྟི སེསོ, ‘‘སིཀྑཱཔད’’ནྟི ཙ ཨིམིནཱ ཏཔྤཊིཔཱདནཱིཡཱ ཨཱཔཏྟིཡེཝ གཡ྄ཧཏི. ཏིསམུཊྛཱནནྟི ཀཱཡཙིཏྟཏོ, ཝཱཙཱཙིཏྟཏོ, ཀཱཡཝཱཙཱཙིཏྟཏོཏི སཙིཏྟཀེཧི ཏཱིཧི སམུཊྛཱནཏོ ཏིསམུཊྛཱནཾ. ཏེནེཝཱཧ ‘‘སཙིཏྟ’’ནྟི. པཊིགྷཙིཏྟཱནཾ དྭིནྣཾ ཨཉྙཏརེན སཧིཏཏྟཱ སཙིཏྟཀཾ. ཏཾསམྤཡུཏྟཱཡ དོམནསྶཝེདནཱཡ ཝསེན དུཀྑཝེདནཾ.

དུཊྛདོསཀཐཱཝཎྞནཱ.

༤༡༦. ལེསམཏྟནྟི ‘‘ཨཉྙམྤི ཝཏྠུཾ ལིསྶཏི སིལིསྶཏི ཝོཧཱརམཏྟེནེཝ ཨཱིསཀཾ ཨལླཱིཡཏཱིཏི ལེསོ, ཛཱཏིཨཱདཱིནཾཡེཝ ཨཉྙཏརཀོཊྛཱསསྶེཏཾ ཨདྷིཝཙན’’ནྟི (པཱརཱ. ཨཊྛ. ༢.༣༩༡) ཨཊྛཀཐཱཡ དསྶིཏནིབྦཙནེསུ ‘‘ལེསོ ནཱམ དས ལེསཱ ཛཱཏིལེསོ ནཱམལེསོ’’ཏིཨཱདིནཱ (པཱརཱ. ཨཊྛ. ༣༩༤) ནཡེན པདབྷཱཛནེ ཝུཏྟེསུ ཛཱཏིནཱམགོཏྟཱདཱིསུ དསསུ ལེསེསུ ཨཉྙཏརལེསམཏྟནྟི ཝུཏྟཾ ཧོཏི.

ཏཏྠ ཛཱཏི ནཱམ ཁཏྟིཡབྲཱཧྨཎཱདིཛཱཏི. ནཱམཾ ནཱམ ཨིམསྨིཾ སིཀྑཱཔདེ ‘‘ཚགལཀོ དབྦོ མལླཔུཏྟོ ནཱམ, ཚགལིཀཱ མེཏྟིཡཱ བྷིཀྑུནཱི ནཱམཱ’’ཏི ཋཔིཏཾ ནཱམཾ ཝིཡ ཙོདཀེཧི ཋཔིཏནཱམཉྩ བུདྡྷརཀྑིཏཱདིསཀནཱམཉྩཱཏི དུཝིདྷཾ ནཱམཾ. གོཏྟཾ ནཱམ གོཏམམོགྒལླཱནཱདིགོཏྟཾ. ལིངྒཾ ནཱམ ¶ དཱིགྷཏཱདིསཎྛཱནནཱནཏྟཉྩ ཀཎྷཏཱདིཝཎྞནཱནཏྟཉྩཱཏི ཨིདཾ དུཝིདྷལིངྒཾ. ཨཱཔཏྟིལེསོ ནཱམ ལཧུཀཱདིརཱུཔེན ཋིཏཔཱཙིཏྟིཡཱདིཨཱཔཏྟི. པཏྟོ ནཱམ ལོཧཔཏྟཱདི. ཙཱིཝརཾ ནཱམ པཾསུཀཱུལཱདི. ཨུཔཛ྄ཛྷཱཡོ ནཱམ ཙུདིཏཀསྶ ཨུཔཛ྄ཛྷཱཡོ. ཨཱཙརིཡོ ནཱམ ཙུདིཏཀསྶ པབྦཛྫཱཙརིཡཱདིཀོ. སེནཱསནཾ ནཱམ ཙུདིཏཀསྶེཝ ནིཝཱསཔཱསཱདཱདིཀཾ.

ཙོདེཡྻཱཏི ཨཉྙཁཏྟིཡཛཱཏིཀཾ པུགྒལཾ པཱརཱཛིཀཾ ཨཛ྄ཛྷཱཔཛྫནྟཾ དིསྭཱ ཨཏྟནོ ཝེརིཁཏྟིཡཛཱཏིཀཾ ¶ པུགྒལཾ ‘‘ཁཏྟིཡོ མཡཱ དིཊྛོ, པཱརཱཛིཀཾ དྷམྨཾ ཨཛ྄ཛྷཱཔནྣོསཱི’’ཏིཨཱདིནཱ ནཡེན ཙོདེཏི. གརུཀཱཔཏྟི ནཱམ སངྒྷཱདིསེསོ. སཙེ ཙཱཝནཙེཏནོཏི ‘‘ཨཔྤེཝ ནཱམ ནཾ ཨིམམྷཱ བྲཧྨཙརིཡཱ ཙཱཝེཡྻ’’ནྟི (པཱརཱ. ༣༩༢) ཝུཏྟཏྟཱ སཙེ ཨིམཾ སཱསནཱ ཙཱཝེཡྻཱམཱིཏི ཨདྷིཔྤཱཡོ ཧུཏྭཱ ཙོདེཏཱིཏི ཝུཏྟཾ ཧོཏི, ཨིམིནཱ བྱཏིརེཀཝསེན ན ཨཉྙཱདྷིཔྤཱཡོཏི ཝུཏྟམེཝ ཧོཏཱིཏི པུརིམསིཀྑཱཔདཊྛཀཐཱཡཾ དསྶིཏེསུ ‘‘ཙཱཝནཱདྷིཔྤཱཡོ ཨཀྐོསཱདྷིཔྤཱཡོ’’ཏི (པཱརཱ. ཨཊྛ. ༢.༣༨༩) ཨེཝམཱདིནཱནཔྤཀཱརཱདྷིཔྤཱཡེསུ ཨཱཔཏྟིཡཱ ཨངྒབྷཱུཏཾ ཙཱཝནཱདྷིཔྤཱཡཾ དསྶེཏྭཱ སེསཱདྷིཔྤཱཡེ པཊིཀྑིཔཏི.

༤༡༧. ཏཐཱསཉྙཱིཏི ཨཡཾ པཱརཱཛིཀམཛ྄ཛྷཱཔནྣོཡེཝཱཏི ཏཐཱསཉྙཱི. ‘‘ཙོདེཏི ཝཱ ཙོདཱཔེཏི ཝཱ’’ཏི ཝུཏྟཏྟཱ ‘‘ཏཐཱསཉྙཱི’’ཏི ཨིདཾ ‘‘ཙོདཱཔེཏཱི’’ཏི ཨིམིནཱཔི ཡོཛེཏབྦཾ. སེསོཏི ཨེཏྠ ‘‘པཱརཱཛིཀཱནི ཝུཏྟཱནཱི’’ཏིཨཱདིཾ ཀཏྭཱ ‘‘སཙིཏྟཾ དུཀྑཝེདན’’ནྟི པརིཡནྟཾ ཀཏྭཱ དསྶིཏཔཋམསིཀྑཱཔདཝིནིཙྪཡསངྒཱཧཀཀཐཱཔབནྡྷེན ཝུཏྟསབྦཝིནིཙྪཡེསུ ཏཾསིཀྑཱཔདནིཡཏཾ ‘‘ཨམཱུལཀེནཱ’’ཏི ཨིདཉྩ ཨིམསྨིཾ སིཀྑཱཔདེ ‘‘བྷིཀྑུམནྟིམཝཏྠུནཱ…པེ… ཨནཱཔཏྟི སིཡཱ’’ཏི ཝུཏྟམཏྠཉྩ ¶ ཋཔེཏྭཱ ཨཝསིཊྛསབྦཝིནིཙྪཡོཏི ཨཏྠོ. ཨནནྟརསམོ མཏོ ཧེཊྛཱ ཨནནྟརཾ ཝུཏྟསིཀྑཱཔདེནེཝ སདིསོཏི ཝེདིཏབྦོ.

དུཏིཡདུཊྛདོསཀཐཱཝཎྞནཱ.

༤༡༨. སམགྒསྶ སངྒྷསྶཱཏི ‘‘སམགྒོ ནཱམ སངྒྷོ སམཱནསཾཝཱསཀོ སམཱནསཱིམཱཡཾ ཋིཏོ’’ཏི པདབྷཱཛནེ ཝུཏྟཏྟཱ ཙིཏྟེན ཙ ཀཱཡེན ཙ ཨེཀཱིབྷཱུཏསྶ སངྒྷསྶཱཏི ཝུཏྟཾ ཧོཏི. ཙ-ཀཱརོ པདཔཱུརཎོ, ཨེཝ-ཀཱརཏྠོ ཝཱ, ནསམགྒསྶཱཏི བྱཏིརེཀཏྠོ ཝེདིཏབྦོ. བྷེདཏྠཾ ཝཱཡམེཡྻཱཏི ‘‘ཨིམེ ཀཐཾ ཀདཱ བྷིཛྫིསྶནྟཱི’’ཏི རཏྟིནྡིཝཾ ཙིནྟེཏྭཱ ཨུཔཱཡཾ གཝེསིཏྭཱ པཀྑཔརིཡེསནཱདིཾ ཀརེཡྻཱཏི ཨཏྠོ. ཝུཏྟཉྷི པཱལི༹ཡཾ ‘‘བྷེདཱཡ པརཀྐམེཡྻཱཏི ཀཐཾ ཨིམེ ནཱནཱ ཨསྶུ ཝིནཱ ཨསྶུ ཝགྒཱ ཨསྶཱུཏི པཀྑཾ པརིཡེསཏི གཎཾ བནྡྷཏཱི’’ཏི (པཱརཱ. ༤༡༢).

བྷེདཧེཏུནྟི ‘‘ཨིདྷུཔཱལི བྷིཀྑུ ཨདྷམྨཾ ‘དྷམྨོ’ཏི དཱིཔེཏི, དྷམྨཾ ‘ཨདྷམྨོ’ཏི དཱིཔེཏཱི’’ཏིཨཱདིནཱ (པརི. ༤༥༩) ནཡེན ཁནྡྷཀེ ཝུཏྟཾ ཨཊྛཱརསབྷེདཀརཝཏྠུསངྑཱཏཾ སངྒྷབྷེདཀཱརཎམཱཧ ¶ . ཨིདམེཝ ཧི པདབྷཱཛནེ ཝུཏྟཾ ‘‘བྷེདནསཾཝཏྟནིཀཾ ཝཱ ཨདྷིཀརཎནྟི ཨཊྛཱརསབྷེདཀརཝཏྠཱུནཱི’’ཏི. གཧེཏྭཱཏི པགྒཡ྄ཧ. ཏིཊྛེཡྻཱཏི ནཔྤཊིནིསྶཛྫེཡྻ. པརིདཱིཔཡནྟི ཨེཏྠ པརིདཱིཔེནྟོ, ན པཊིནིསྶཛྫནྟོཏི ཨཏྠོ. ཡཐཱཧ ‘‘ཏིཊྛེཡྻཱཏི ན པཊིནིསྶཛྫེཡྻཱ’’ཏི.

༤༡༩. བྷིཀྑཱུཧཱིཏི ཏསྶ སངྒྷབྷེདཀསྶ པརཀྐམནཾ པསྶནྟེཧི ཝཱ དཱུརེ ཙེ, ཋིཏཾ པཝཏྟིཾ སུཎནྟེཧི ཝཱ ལཛྫཱིཧི སུཔེསལེཧི སེསབྷིཀྑཱུཧི. ཝུཏྟཉྷེཏཾ ‘‘བྷིཀྑཱུཧཱིཏི ཨཉྙེཧི བྷིཀྑཱུཧི. ཡེ པསྶནྟི ཡེ སུཎནྟི, ཏེཧི ཝཏྟབྦོ’’ཏི ¶ (པཱརཱ. ༤༡༢). ཏསྶ ཝདནྟེཧི ཨེཝཾ ཝཏྟབྦནྟི ཝཙནཱཀཱརདསྶནཏྠམཱཧ ‘‘མཱཡསྨཱ སམགྒསྶ སངྒྷསྶ བྷེདཱཡ པརཀྐམི, བྷེདནསཾཝཏྟནིཀཾ ཝཱ ཨདྷིཀརཎཾ སམཱདཱཡ པགྒཡ྄ཧ ཨཊྛཱསི, སམེཏཱཡསྨཱ སངྒྷེན, སམགྒོ ཧི སངྒྷོ སམྨོདམཱནོ ཨཝིཝདམཱནོ ཨེཀུདྡེསོ ཕཱསུ ཝིཧརཏཱི’’ཏི (པཱརཱ. ༤༡༡) པཱཋཾ, ཏཾ ཨེཀདེསསངྒཧཝསེན ཨུཔལཀྑེཏུམཱཧ ‘‘བྷེདཏྠཾ…པེ… བྷེདཀཱརཎ’’ནྟི. ཨིཏི ཝཏྟབྦོཏི ཡོཛནཱ.

༤༢༠. ཝུཙྩམཱནོ ཧཱིཏི ཨེཏྠ ཧི-སདྡོ ཨཔི-སདྡཏྠོ. ‘‘པཱི’’ཏི ཝཱ པཱཋོ, ཏེཧི ལཛྫིབྷིཀྑཱུཧི ‘‘མཱཡསྨཱ’’ཏིཨཱདིནཱ ནཡེན ཝིསུཾ ཏིཀྑཏྟུཾ ཝུཏྟོཔཱིཏི ཨཏྠོ. ནིསྶཛྫེཡྻ ན ཙེཝ ནནྟི ཏཾ བྷེདཱཡ པརཀྐམནཾ ཨཔྤཊིནིསྶཛྫནཔཙྩཡཱ དུཀྐཊཱཔཏྟིཾ ཨཱཔཛྫིཏྭཱཔི ན ཝིསྶཛྫེཡྻཱཏི ཨཏྠོ. ཝུཏྟཉྷེཏཾ ‘‘ནོ ཙེ པཊིནིསྶཛྫཏི, ཨཱཔཏྟི དུཀྐཊསྶཱ’’ཏི (པཱརཱ. ༤༡༢). ཏཐཱ ཧི ཨཔྤཊིནིསྶཛྫནྟོ ཧཏྠེསུ, པཱདེསུ ཙ གཧེཏྭཱ སངྒྷམཛ྄ཛྷེ ཨཱནེཏྭཱ ཏཐེཝ ཏིཀྑཏྟུཾ ཝུཏྟོཔི ཏཾ ཨཝིསྶཛྫེཏྭཱ དུཀྐཊཱཔཏྟིཾ ཨཱཔནྣོཏི ཨིམིནཱ ཙ སངྒཧིཏོ. ཝུཏྟཉྷེཏཾ བྷགཝཏཱ ‘‘སོ བྷིཀྑུ སངྒྷམཛ྄ཛྷམྤི ཨཱཀཌྜྷིཏྭཱ ཝཏྟབྦོ ‘མཱཡསྨཱ…པེ… ཕཱསུ ཝིཧརཏཱི’ཏི. དུཏིཡམྤི ཝཏྟབྦོ. ཏཏིཡམྤི ཝཏྟབྦོ. སཙེ པཊིནིསྶཛྫཏི, ཨིཙྩེཏཾཀུསལཾ. ནོ ཙེ པཊིནིསྶཛྫཏི, ཨཱཔཏྟི དུཀྐཊསྶཱ’’ཏི. ཨིདཾ ཨུབྷཡཏྠ དུཀྐཊཾ སཱམཉྙེན ཝཀྑཏི ‘‘ཏིཀྑཏྟུཾ པན ཝུཏྟསྶ, ཨཔརིཙྩཛཏོཔི ཏ’’ནྟི.

སམནུབྷཱསིཏབྦོཏི ཨེཏྠ ‘‘སོ བྷིཀྑཱུ’’ཏི ཨཱནེཏྭཱ སམྦནྡྷིཏབྦཾ, ‘‘ཡཱཝཏཏིཡ’’ནྟི སེསོ, ཡཐཱཧ ‘‘སོ བྷིཀྑུ ¶ བྷིཀྑཱུཧི ཡཱཝཏཏིཡཾ སམནུབྷཱསིཏབྦོ’’ཏི (པཱརཱ. ༤༡༡), ཏཐཱ སངྒྷམཛ྄ཛྷེཔི ཏིཀྑཏྟུཾ ཝུཙྩམཱནོཔི ནོ ཝིསྶཛྫེཏྭཱ དུཀྐཊཾ ཨཱཔནྣོ སོ ཨཱདྷཱནགྒཱཧཱི བྷིཀྑུ ¶ སངྒྷེན ཏིཀྑཏྟུཾ ཝུཏྟཾ ཀམྨཝཱཙཾ ཝཏྭཱ སམནུབྷཱསིཏབྦོཏི ཨཏྠོ. ཡཐཱཧ ཨཊྛཀཐཱཡཾ ‘‘ཡཱཝཏཏིཡཾ སམནུབྷཱསིཏབྦོཏི ཡཱཝ ཏཏིཡཾ སམནུབྷཱསནཾ, ཏཱཝ སམནུབྷཱསིཏབྦོ, ཏཱིཧི སམནུབྷཱསནཀམྨཝཱཙཱཧི ཀམྨཾ ཀཱཏབྦ’’ནྟི (པཱརཱ. ཨཊྛ. ༢.༤༡༡). ཏནྟི བྷེདཱཡ པརཀྐམནཾ, བྷེདནསཾཝཏྟནིཀཾ ཨདྷིཀརཎཾ པགྒཧེཏྭཱ ཋཱནཉྩ. ཨཙྩཛནྟི, ཉཏྟིཙཏུཏྠཱཡ ཀམྨཝཱཙཱཡ ཝུཙྩམཱནཱཡཔི ཨཙྩཛནྟོ. གརུཀཾ ཕུསེཏི ཏཏིཡཱཡ ཀམྨཝཱཙཱཡ ‘‘སོ བྷཱསེཡྻཱ’’ཏི ཡྻཀཱརཔྤཏྟཱཡ སངྒྷཱདིསེསཾ ཨཱཔཛྫཏི.

༤༢༡. སངྒྷསྶ བྷེདཱཡ པརཀྐམནྟཾ བྷིཀྑུཾ དིསྭཱ, སུཏྭཱ, ཉཏྭཱ ཙ ཨཝདནྟསྶ བྷིཀྑུནོ དུཀྐཊནྟི ཡོཛནཱ.

༤༢༢. ཀཱིཝདཱུརེ ཝསནྟེཧི སུཏྭཱ གནྟྭཱ ཝཏྟབྦནྟི ཨཱཧ ‘‘གནྟྭཱ’’ཏིཨཱདི. ཨདྡྷཡོཛནམེཝ ཨདྡྷཡོཛནཏཱ, ཏཏོ ཨདྷིཀཾ ཝཱ. གིལཱནཾ པཊིཙྩ ཨདྡྷཡོཛནཾ ཝུཏྟཾ, ཨིཏརཾ པཊིཙྩ ‘‘ཨདྷིཀཾ དཱུརམྤི པན གནྟབྦ’’ནྟི ཝུཏྟཾ. ཏེནེཝཱཧ ‘‘སཙེ སཀྐོཏཱི’’ཏི. ཏཱཝདེཏི ཏདཱ ཨེཝ, ཨཙིརཱཡིཏྭཱཏི ཨཏྠོ.

༤༢༣. ཏིཀྑཏྟུཾ པན ཝུཏྟསྶཱཏི ‘‘མཱཡསྨཱ’’ཏིཨཱདིནཱ ནཡེན ཝིསུཉྩ སངྒྷམཛ྄ཛྷེ ཙ ཏིཀྑཏྟུཾ ཝུཏྟསྶཱཔི ཨཔརིཙྩཛནྟསྶ. ཏཾ བྷེདཱཡ པརཀྐམཱདིཀཾ. བྷེདཔྤཝཏྟིཡཱ སུཏཀྑཎེ སཡཾ ཨགནྟྭཱ པཎྞཾ ཝཱ སཱསནཾ ཝཱ པེསེནྟསྶ ཨཱཔཏྟིཾ དསྶེཏུམཱཧ ‘‘དཱུཏཾ ཝཱ’’ཏིཨཱདི. ཡཐཱཧ ཨཊྛཀཐཱཡཾ ¶ (པཱརཱ. ཨཊྛ. ༢.༤༡༡) ‘‘དཱུཏཾ ཝཱ པཎྞཾ ཝཱ པེསེཏྭཱ ཝདཏོཔི ཨཱཔཏྟིམོཀྑོ ནཏྠཱི’’ཏིཨཱདི.

༤༢༥. ཡྻཀཱརེ པན སམྤཏྟེཏི ‘‘ཡསྶ ནཀྑམཏི, སོ བྷཱསེཡྻཱ’’ཏི (པཱརཱ. ༤༡༣) ཏཏིཡཀམྨཝཱཙཱཡ ཨནྟེ ཡྻཀཱརེ ཨུཙྩཱརིཏེ. པསྶམྦྷནྟཱིཏི པཊིཔྤསྶམྦྷནྟི, ཝཱུཔསམནྟཱིཏི ཨཏྠོ. དུཀྐཊཱདཡོཏི ཉཏྟིཡཱ དུཀྐཊཾ, དྭཱིཧི ཀམྨཝཱཙཱཧི དྭེ ཙ ཐུལླཙྩཡཱ. ཡཐཱཧ ‘‘སངྒྷཱདིསེསཾ ཨཛ྄ཛྷཱཔཛྫནྟསྶ ཉཏྟིཡཱ དུཀྐཊཾ, དྭཱིཧི ཀམྨཝཱཙཱཧི ཐུལླཙྩཡཱ པཊིཔྤསྶམྦྷནྟཱི’’ཏི (པཱརཱ. ༤༡༤). ཏསྨཱ ཉཏྟིཡཱ པུབྦེ བཧི ཙ སངྒྷམཛ྄ཛྷེ ཙ ཏིཀྑཏྟུཾ ཝུཏྟེཔི ཨཔྤཊིནིསྶཛྫནེན ཨཱཔནྣཱནི དྭེ དུཀྐཊཱནི དེསེཏབྦཱནཱིཏི ཝིཉྙཱཡཏི.

ཨིམིསྶཱ ¶ ཀམྨཝཱཙཱཡ ཀིཾ ཨཱཔནྣཱཔཏྟིཡོ པཊིཔྤསྶམྦྷནྟི, ཨུདཱཧུ ཨནཱཔནྣཱཏི ཝིཙཱརཎཱཡ ‘‘ཡོ ཨཝསཱནེ པཊིནིསྶཛྫིསྶཏི, སོ ཏཱ ཨཱཔཏྟིཡོ ན ཨཱཔཛྫཏི, ཏསྨཱ ཨནཱཔནྣཱ པཊིཔྤསྶམྦྷནྟཱི’’ཏི (པཱརཱ. ཨཊྛ. ༢.༤༡༤) མཧཱསུམཏྠེརསྶ ཝཱདཾ ‘‘ཀིམནཱཔནྣཱནཾ པཊིཔྤསྶདྡྷིཡཱ’’ཏི པཊིབཱཧིཏྭཱ ‘‘ལིངྒཔརིཝཏྟནེ ཨསཱདྷཱརཎཱཔཏྟིཡོ ཝིཡ ཨཱཔནྣཱ པཊིཔྤསྶམྦྷནྟཱི’’ཏི མཧཱཔདུམཏྠེརསྶ ཝཱདོ ཋིཏོ.

༤༢༦. ཨཀཏེ པན ཀམྨསྨིནྟི ཡཐཱཝུཏྟསམནུབྷཱསནཀམྨེ ཨཀཏེ. ཨཔརིཙྩཛཏོཔི ཙཱཏི ཏཾ སངྒྷབྷེདཱཡ པརཀྐམནཾ ཨཔརིཙྩཛནྟསྶཱཔི. ‘‘སངྒྷཱདིསེསེནཱ’’ཏི ཨིམིནཱ ཀམྨཾ ཨཀཏྭཱ སངྒྷམཛ྄ཛྷེ ཙ བཧི ཙ ཏིཀྑཏྟུཾ ཝུཙྩམཱནསྶ ཨཔྤཊིནིསྶཛྫནེན དུཀྐཊཾ པན ཧོཏཱིཏི བྱཏིརེཀཏོཝ དསྶེཏི.

༤༢༧. པུབྦེ ཝཱཏི ཉཏྟིཡཱ པུབྦེ ཝིསུཾ, སངྒྷམཛ྄ཛྷེ ཝཱ ཏིཀྑཏྟུཾ ཝུཙྩམཱནེཔི. ཏངྑཎེཔཱིཏི ཉཏྟིཀྑཎེ ཝཱ. ཉཏྟིཡཱ ¶ ཨནིཊྛིཏཱཡཔི པཙྪཱཔི, ཨིམསྶ ཨཝདྷིཾ དསྶེཏི ‘‘ཨསམྤཏྟེ ཡྻཀཱརསྨི’’ནྟི. པཊིནིསྶཛྫཏོཔི ཙ ཏསྶ སངྒྷཱདིསེསེན ཨནཱཔཏྟི པཀཱསིཏཱཏི པཋམགཱཐཱཡ པཙྪིམཌྜྷཾ ཨིདྷཱནེཏྭཱ ཡོཛེཏབྦཾ.

༤༢༨. ཨེཏྟཱཝཏཱ ‘‘ཨནཱཔཏྟི ཨསམནུབྷཱསནྟསྶ པཊིནིསྶཛྫནྟསྶ ཨུམྨཏྟཀསྶ ཁིཏྟཙིཏྟསྶ ཝེདནཱཊྚསྶ ཨཱདིཀམྨིཀསྶཱ’’ཏི (པཱརཱ. ༤༡༦) པཱཋེ ‘‘པཊིནིསྶཛྫནྟསྶཱ’’ཏི པདེན གཧིཏེསུ ‘‘ཉཏྟིཏོ’’ཏིཨཱདཱིསུ ཝིནིཙྪཡཾ དསྶེཏྭཱ ཏཾ ནིགམེཏུཾ ‘‘པཊིནིསྶཛྫཏོ ཝཱཔི ཏ’’ནྟི ཨཱཧ. ནིགམནཏྠཛོཏཀོ ཨེཝཾ-སདྡོ སཱམཏྠིཡཱ ལབྦྷཏི, ཨེཝཾ ‘‘ཉཏྟིཏོ’’ཏིཨཱདིནཱ ཡཐཱཝུཏྟནཡེན པཊིནིསྶཛྫནྟསྶ ཝཱཏི ཨཏྠོ. ཏནྟི སངྒྷབྷེདཔྤཡོགཾ. ཨསམནུབྷཱསཏོ ཝཱཏི ཨསམནུབྷཱསིཡམཱནསྶ. ‘‘ཨསམནུབྷཱསིཡཏོ’’ཏི ཝཏྟབྦེ ཝིཀརཎཔཙྩཡལོཔེན ‘‘ཨསམནུབྷཱསཏོ’’ཏི ཝུཏྟནྟི དཊྛབྦཾ. ཡཐཱཧ ཨཊྛཀཐཱཡཾ ‘‘ཨསམནུབྷཱསནྟསྶཱཏི ཨསམནུབྷཱསིཡམཱནསྶཱ’’ཏི (པཱརཱ. ཨཊྛ. ༢.༤༡༦). ‘‘སངྒྷཱདིསེསེན ཨནཱཔཏྟི པཀཱསིཏཱ’’ཏི ཨནུཝཏྟམཱནཏྟཱ ཨིཙྪིཏཏྠེ སིདྡྷེཔི པུན ‘‘ཨནཱཔཏྟི པཀཱསིཏཱ’’ཏི ཝཙནེ པུནརུཏྟཏཱ ཨཱཔཛྫཏཱིཏི? ནཱཔཛྫཏི, པདཱཝུཏྟི ནཱམ ཨལཾཀཱརོ ཧོཏཱིཏི.

༤༢༩. ཨིམསྶ ¶ སིཀྑཱཔདསྶ ཨཏྠུཔྤཏྟིཡཾ སངྒྷབྷེདཏྠཾ པཉྩ ཝཏྠཱུནི ཡཱཙནྟེན དེཝདཏྟེན ‘‘སཱདྷུ བྷནྟེ བྷིཀྑཱུ ཡཱཝཛཱིཝཾ མཙྪམཾསཾ ན ཁཱདེཡྻུཾ, ཡོ མཙྪམཾསཾ ཁཱདེཡྻ, ཝཛྫཾ ནཾ ཕུསེཡྻཱ’’ཏི (པཱརཱ. ༤༠༩) ཝུཏྟེ ‘‘ཨལཾ དེཝདཏྟ མཡཱ ཏིཀོཊིཔརིསུདྡྷཾ མཙྪམཾསཾ ཨནུཉྙཱཏཾ ཨདིཊྛཾ ཨསུཏཾ ཨཔརིསངྐིཏ’’ནྟི (པཱརཱ. ༤༠༩) ཨནུཉྙཱཏེསུ མཙྪམཾསེསུ ཀཔྤིཡཱཀཔྤིཡཝིནིཙྪཡཾ པུབྦེ ཨནོཀཱསཱབྷཱཝེན ཨཝཏྭཱ པཀཏཾ སིཀྑཱཔདཝིནིཙྪཡཾ ནིཊྛཱཔེཏྭཱ ཨིདཱནི པཏྟཱཝསེསཾ ཏཾ དསྶེཏུཾ ‘‘ཡཉྷཱི’’ཏིཨཱདི ཨཱརདྡྷཾ ¶ . ‘‘ཏཾ ཏསྶཱ’’ཏི ཝཀྑམཱནཏྟཱ ‘‘ཡ’’ནྟི ཨིདཾ ‘‘བྷིཀྑུ’’ནྟི ཨིམིནཱ ཙ ‘‘མཙྪམཾས’’ནྟི ཨེཏེན ཙ ཡོཛེཏབྦཾ. མཙྪནྟི ཨོདཀཾ. མཾསནྟི ཐལཛཱནཾ མཾསཾ. ནིབྦེམཏིཀོཏི ‘‘མཾ ཨུདྡིསྶ ཀཏ’’ནྟི ཝཱ ‘‘སངྒྷཾ ཨུདྡིསྶ ཀཏ’’ནྟི ཝཱ ཨུཔྤནྣཱཡ ཝིམཏིཡཱ ཝིརཧིཏོ.

༤༣༠. སམུདྡིསྶ ཀཏནྟི སངྒྷཾ ཝཱ ཨཏྟཱནཾ ཝཱ ཨུདྡིསྶ ཀཏཾ. ‘‘ཉཏྭཱ’’ཏི ཨིམིནཱ ཨཛཱནིཏྭཱ བྷུཉྫནྟསྶ ཨནཱཔཏྟིབྷཱཝམཱཧ.

༤༣༡. ཧཏྠཱིནཾ ཨསྶཱནཾ ཨཙྪཱནཾ མནུསྶཱནཾ ཨཧཱིནཾ ཀུཀྐུརཱནཾ དཱིཔཱིནཾ སཱིཧཱནཾ བྱགྒྷཱནཾ ཏརཙྪཱནཾ མཾསཾ ཨཀཔྤིཡཾ ཧོཏཱིཏི ཡོཛནཱ.

༤༣༢. སཙིཏྟཀཏཱ ཨཱཔཏྟིཡཱཡེཝ ཡུཛྫཏི, ཨིདྷ པན ཏཾཧེཏུཀཾ མཾསམེཝ ཧེཏུམྷི ཕལཱུཔཙཱརེན སཙིཏྟཀནྟི གཧིཏཾ. ཨེཏྠ ཙིཏྟཾ ནཱམ ཨཏྟཱནཾ ཝཱ སངྒྷཾ ཝཱ ཨུདྡིསྶ ཀཏབྷཱཝཛཱནནཙིཏྟཾ. སེསནྟི ཨནུདྡིསྶཀཏཾ ཨཀཔྤིཡམཾསཾ. ཨཙིཏྟཀནྟི ཝུཏྟནཡམེཝ.

༤༣༣. པུཙྪིཏྭཱཡེཝཱཏི ཨཀཔྤིཡམཾསཔརིཧཱརཏྠཾ དསསུ མཾསེསུ ནཱམཉྩ ཨུདྡིསྶཀཏསྶ པརིཧཱརཏྠཾ ཨུབྷཡསྶཱཔི པཊིལདྡྷཱཀཱརཉྩ པུཙྪིཏྭཱཡེཝཱཏི ཨཏྠོ. ཨོདཀེསུ མཙྪེསུ ཨཀཔྤིཡཱབྷཱཝཏོ ལདྡྷཱཀཱརོཝ ཉཱཏབྦོ. མཾསེ དིཊྛམཏྟེཡེཝ ‘‘ཨིདཾ ཨསུཀམཾས’’ནྟི ཛཱནནྟི ཙེ, ཨཔུཙྪིཏེཔི དོསོ ནཏྠི. དཱཡཀེསུ མཾསསྶཱབྷཱཝེ ལདྡྷནིཡཱམེ ཨཔུཙྪིཏེཔི དོསོ ནཏྠི. ཡཐཱ ཝཱ ཏཐཱ ཝཱ ཝིམཏིཡཱ ཨུཔྤནྣཱཡ ཨཔྤཊིགྒཱཧེཏྭཱ ནིསིནྣེ ‘‘ཀསྨཱ ན པཊིགྒཎྷཐཱ’’ཏི པུཙྪིཏེ ཝིམཏིཡཱ ཨུཔྤནྣཱཀཱརཾ ཝཏྭཱ ‘‘མཡཾ ཏུམྷེ ཝཱ ཨིཏརེ བྷིཀྑཱུ ཝཱ ཨུདྡིསྶ ན ཀརིམྷཱ’’ཏི ¶ ཝཏྭཱ ‘‘ཨམྷཱཀམེཝ སནྡྷཱཡ ཀཏཾ, པཎྞཱཀཱརཏྠཱཡ ཀཏཾ, ཨཏིཐཱིནཾ ཝཱ ཨཏྠཱཡ ཀཏ’’ནྟིཨཱདིནཱ ¶ ཨཏྟནཱ ལདྡྷཔྤཀཱརཾ ཝཏྭཱ ‘‘སཾསཡཾ ཨཀཏྭཱ པཊིགྒཧེཏབྦ’’ནྟི ཝདེཡྻུཾ ཙེ, པཊིགྒཧེཏུཾ ཝཊྚཏཱིཏི སབྦམིདཾ ཨཊྛཀཐཱཡ ཝུཏྟཾ.

བྷིཀྑཱུནཾ ཨེཏཾ ཝཏྟནྟི ཡོཛནཱ. ཝཏྟཊྛཱཏི སམྨཱསམྦུདྡྷེན མཧཱཀརུཎཱཡ དེསིཏཾ པཱཏིམོཀྑསཾཝརསཱིལཾ ཝིསོདྷེཏྭཱ པཊིཔཛྫནེ པཏིཊྛིཏཱ. ‘‘ཝིནཡཉྙུནོ’’ཏི ཨིམིནཱ ཝིནཡཾ ཨཛཱནིཏྭཱ ཨུཔདེསཔྤམཱཎེནེཝ ཝཏྟཾ པཱུརེནྟེཧི ཝཏྟསྶ ཝིརོདྷོཔི སིཡཱཏི ཏེ ནིཝཏྟེཏི. ‘‘ཝཏྟཊྛཱ’’ཏི ཝིསེསནེན ཝིནཡཾ ཉཏྭཱཔི ཨཔཱུརཎེ ནིཝཏྟེཏི. ཨུབྷཡེནཔི ཨཏྟནཱ ཝུཏྟཝིནིཙྪཡསྶ པརིསུདྡྷབྷཱཝཾ དཱིཔེཏི.

༤༣༤. ཨིདཾ སམནུབྷཱསནནྟི ཡཐཱཝུཏྟསིཀྑཱཔདམཱཧ. སམནུབྷཱསནེན སཱདྷེཏབྦཱ ཨཱཔཏྟི སམནུབྷཱསནཱ ཀཱརཎཱུཔཙཱརེན. ཨཉྙཐཱ ཨེཀསམུཊྛཱནཱདིབྷཱཝོ ན ཡུཛྫཏི. ཨེཀསམུཊྛཱནཾ ཀཱཡཝཱཙཱཙིཏྟསངྑཱཏཾ ཨེཀཾ སམུཊྛཱནཾ ཨེཏསྶཱཏི ཀཏྭཱ. ཀཱཡཀམྨནྟི ཧཏྠམུདྡཱཝསེན ཀཱཡེན ཀཱཏབྦསྶ པཊིནིསྶཛྫནསྶ ཨཀཏཏྟཱ ཀཱཡཀམྨཾ. ཝཙཱིཀམྨནྟི ཝཙསཱ ཀཱཏབྦསྶ ཨཀཏཏྟཱ ཝཙཱིཀམྨཾ. ཨཀྲིཡནྟི ཡཐཱཝུཏྟནཡེན ‘‘སངྒྷབྷེདོཔཀྐམནིཝཱརཎཱཡ པརཀྐམནཾ པཊིནིསྶཛྫཱམཱི’’ཏི ཀཱཡཝིཀཱརེན ཝཱ ཝཙཱིབྷེདེན ཝཱ ཨཝིཉྙཱཔནཏོ ཨཀིརིཡཾ ནཱམ ཧོཏཱིཏི ཝུཏྟཾ ཧོཏི.

སངྒྷབྷེདཀཐཱཝཎྞནཱ.

༤༣༥. ཀིཉྩིཔི ཝཏྟབྦནྟི ‘‘ཨེཀོ ཝཱ དྭེ ཝཱ ཏཡོ ཝཱ’ཏི ཝུཏྟསངྒྷབྷེདཱནུཝཏྟཀབྷིཀྑུཾ པསྶནྟེཧི སུཎནྟེཧི ལཛྫིབྷིཀྑཱུཧི ¶ ཝིསུཉྩ སངྒྷམཛ྄ཛྷེ ཙ ནེཏྭཱ ཏིཀྑཏྟུཾཡེཝ སངྒྷབྷེདཱནུཝཏྟནསྶ ཨཀཏྟབྦཏཾ ཝཏྭཱ ཏཏོ ཨནོརམནྟཱནཾ ཉཏྟིཙཏུཏྠཱཡ ཀམྨཝཱཙཱཡ སམནུབྷཱསནཀམྨཾ ཀཱཏབྦ’’ནྟི ཨིདཉྩ ‘‘ཏཏིཡཱནུསྶཱཝནཱཡ ཡྻ-ཀཱརཔྤཏྟཱཡ ཨཱཔཛྫནཀསངྒྷཱདིསེསཏོ པུབྦེ ཨཱཔནྣཱ དུཀྐཊཐུལླཙྩཡཱ པཊིཔྤསྶམྦྷནྟཱི’’ཏི ཨིདཉྩ ཨནཱཔཏྟིཔཀཱརོ ཙཱཏི ཨིམཾ སཱདྷཱརཎཝིནིཙྪཡཾ སནྡྷཱཡཱཧ. ཝཙནཔྤཀཱརབྷེདོ པན ཨཏྠེཝ, སོ སངྑེཔཏོ མཱཏིཀཱཡ (པཱརཱ. ༤༡༨-༤༡༩) ཝིཏྠཱརཏོ པདབྷཱཛནེ (པཱརཱ. ༤༡༨-༤༡༩) ཨཱགཏནཡེན ཝཏྟབྦོ. ཨསྶཱཏི དུཏིཡསངྒྷབྷེདསིཀྑཱཔདསྶ. ‘‘སམུཊྛཱནཱ…པེ… མཏཱ’’ཏི ཨིམིནཱ སཱདྷཱརཎཝིནིཙྪཡོ ཨཏིདིཊྛོཏི དཊྛབྦཾ.

དུཏིཡསངྒྷབྷེདཀཐཱཝཎྞནཱ.

༤༣༦. ཨུདྡེསཔརིཡཱཔནྣེཏི ¶ ཨེཏྠ ‘‘སིཀྑཱཔདེ’’ཏི སེསོ, ནིདཱནཔཱརཱཛིཀསངྒྷཱདིསེསཨནིཡཏཝིཏྠཱརསངྑཱཏེ པཉྩཝིདྷཨུདྡེསལཀྑཎཔཱཏིམོཀྑེ ཨནྟོགདྷསིཀྑཱཔདཝིསཡེཏི ཨཏྠོ. ‘‘ཨུདྡེསཔརིཡཱཔནྣེ སིཀྑཱཔདེ’’ཏི ཨིམིནཱ ‘‘ཨཝཙནཱིཡམཏྟཱནཾ ཀརོཏཱི’’ཏི ཨིམསྶ ཝིསཡཾ དསྶེཏི. བྷིཀྑུ དུབྦཙཛཱཏིཀོཏི ཨེཏྠ ‘‘ཡོ’’ཏི ཨཛ྄ཛྷཱཧཱརོ. ‘‘དུབྦཙཛཱཏིཀོཏི དུབྦཙསབྷཱཝོ, ཝཏྟུཾ ཨསཀྐུཎེཡྻོཏི ཨཏྠོ’’ཏི (པཱརཱ. ཨཊྛ. ༢.༤༢༥-༤༢༦) ཨཊྛཀཐཱཡ ཝུཏྟདོཝཙསྶཏཱཡ ཧེཏུབྷཱུཏཔཱཔིཙྪཏཱདཱིཧི ཨེཀཱུནཝཱིསཏིཡཱ དྷམྨེཧི སམནྣཱགཏོ ཧུཏྭཱ ཨཏྟནི ཝུཏྟཾ ཨནུསིཊྛིཾ སཱདརམགྒཧཎེན ནཱསནཏཱ དོཝཙསྶསབྷཱཝོཏི ཨཏྠོ. ཝུཏྟཉྷེཏཾ པདབྷཱཛནེ ‘‘དུབྦཙཛཱཏིཀོ ཧོཏཱིཏི དུབྦཙོ ཧོཏི དོཝཙསྶཀརཎེཧི དྷམྨེཧི སམནྣཱགཏོ ཨཀྑམོ ཨཔྤདཀྑིཎགྒཱཧཱི ཨནུསཱསནི’’ནྟི (པཱརཱ. ༤༢༦).

ཨཝཙནཱིཡམཏྟཱནཾ ¶ ཀརོཏཱིཏི ‘‘མཱ མཾ ཨཱཡསྨནྟོ ཀིཉྩི ཨཝཙུཏྠ ཀལྱཱཎཾ ཝཱ པཱཔཀཾ ཝཱ, ཨཧམྤཱཡསྨནྟེ ན ཀིཉྩི ཝཀྑཱམི ཀལྱཱཎཾ ཝཱ པཱཔཀཾ ཝཱ, ཝིརམཐཱཡསྨནྟོ མམ ཝཙནཱཡཱ’’ཏི (པཱརཱ. ༤༢༥) ཝུཏྟནཡེན ཨཏྟཱནཾ ཨཝཙནཱིཡཾ ཀརོཏི. གརུཀཾ སིཡཱཏི ཨེཏྠ ‘‘ཏསྶཱ’’ཏི ཨིདཾ ཨཛ྄ཛྷཱཧཱརནཡསམྦནྡྷེན ལབྦྷཏི. ཏཏྲཱཡཾ ཡོཛནཱ – དུབྦཙཛཱཏིཀོ ཡོ བྷིཀྑུ ཨུདྡེསཔརིཡཱཔནྣེ སིཀྑཱཔདེ ཨཏྟཱནཾ ཨཝཙནཱིཡཾ ཀརོཏི, ཏསྶ གརུཀཾ སིཡཱཏི.

ཀིཾ ཝུཏྟཾ ཧོཏི? ཡོ བྷིཀྑུ ཨཏྟནོ དོཝཙསྶཏཾ པསྶནྟེཧི, སུཎནྟེཧི ཙ ལཛྫིབྷིཀྑཱུཧི ‘‘མཱ ཨཱཡསྨཱ ཨཏྟཱནཾ ཨཝཙནཱིཡཾ ཨཀཱསི…པེ… ཨཉྙམཉྙཝུཊྛཱཔནེནཱ’’ཏི (པཱརཱ. ༤༢༥) ཝུཏྟནཡེན ཏིཀྑཏྟུཾ ཝུཏྟོཔི དུཀྐཊཾ ཨཱཔཛྫིཏྭཱཔི ན ཝིསྶཛྫེཏི, ‘‘སོ བྷིཀྑུ སངྒྷམཛ྄ཛྷམྤི ཨཱཀཌྜྷིཏྭཱ ཝཏྟབྦོ’’ཏི (པཱརཱ. ༤༢༦) ཝུཏྟཏྟཱ ཧཏྠེ གཧེཏྭཱ ཨཱཀཌྜྷིཏྭཱཔི སངྒྷམཛ྄ཛྷཾ ནེཏྭཱ ཏཐེཝ ཏིཀྑཏྟུཾ ཝུཏྟེ དུཀྐཊཾ ཨཱཔཛྫིཏྭཱཔི ན ཝིསྶཛྫེཏི, ཏསྶ དུབྦཙཛཱཏིཀསྶ ཉཏྟིཙཏུཏྠཱཡ ཀམྨཝཱཙཱཡ ཀརིཡམཱནེ སམནུབྷཱསནཀམྨེ ཏཏིཡཱཡ ཀམྨཝཱཙཱཡ ཡྻཀཱརཔྤཏྟཱཡ པུབྦེ ཝུཏྟནཡེནེཝ ཉཏྟིཡཱ དུཀྐཊཾ, དྭཱིཧི ཀམྨཝཱཙཱཧི ཐུལླཙྩཡེ ཙ པཊིཔྤསྶམྦྷཡམཱནོ སངྒྷཱདིསེསོ ཧོཏཱིཏི ཝུཏྟཾ ཧོཏི.

༤༣༧. དུབྦཙེཏི ཨེཏྠ ‘‘སིཀྑཱཔདེ’’ཏི སེསོ, ཏཐཱ སངྒྷབྷེདཀཝཎྞནེཏི ཨེཏྠཱཔི. སངྒྷབྷེདོ ཨེཝ སངྒྷབྷེདཀོ, ཏཾ ཝཎྞེཏི ཀཐེཏཱིཏི སངྒྷབྷེདཀཝཎྞནཾ, ཀིཾ ཏཾ? སིཀྑཱཔདཾ, ཏཉྩ ¶ པཋམམེཝ སངྒྷབྷེདཀསིཀྑཱཔདཾ གཧེཏབྦཾ, ཏསྨིཾ ཝུཏྟནཡེནཱཏི ཡོཛནཱ. ཡཐཱཧ ཨཊྛཀཐཱཡཾ ‘‘སམུཊྛཱནཱདཱིནི པཋམསངྒྷབྷེདསདིསཱནེཝཱ’’ཏི (པཱརཱ. ཨཊྛ. ༢.༤༢༥-༤༢༦). ‘‘སབྦོ ཝིནིཙྪཡོ’’ཏི ཨེཏེན ཨིདྷ དསྶིཏེན ¶ ‘‘གརུཀཾ སིཡཱ’’ཏི ཨེཏེན སངྒཧིཏཾ སངྒྷཱདིསེསཱཝསཱནཝིནིཙྪཡཾ ཝཛྫེཏྭཱ ‘‘ཨཀཏེ པནཱ’’ཏིཨཱདིགཱཐཱཏྟཡེན ཝུཏྟཨནཱཔཏྟིཔྤཀཱརེ ཙ ‘‘ཨིདམེཀསམུཊྛཱན’’ནྟིཨཱདིགཱཐཱཡ ཝུཏྟསམུཊྛཱནཱདིཀེ ཙ ཨཏིདིསཏི.

དུབྦཙཀཐཱཝཎྞནཱ.

༤༣༨. ཡོ ཀུལདཱུསཀོ བྷིཀྑུ, སོ ཚནྡགཱམིཏཱདཱིཧི པཱཔེནྟོ བྷིཀྑུཧི ཀམྨེ ཀརིཡམཱནེ ཏཾ ཚནྡགཱམིཏཱདཱིཧི པཱཔནཾ ཨཙྩཛནྟོ གརུཀཾ ཕུསེ སངྒྷཱདིསེསཾ ཨཱཔཛྫཏཱིཏི ཡོཛནཱ. ‘‘ཀུལདཱུསཀོཏི ཀུལཱནི དཱུསེཏི པུཔྥེན ཝཱ ཕལེན ཝཱ ཙུཎྞེན ཝཱ མཏྟིཀཱཡ ཝཱ དནྟཀཊྛེན ཝཱ ཝེལུ༹ཡཱ ཝཱ ཝེཛྫིཀཱཡ ཝཱ ཛངྒྷཔེསནིཀེན ཝཱ’’ཏི (པཱརཱ. ༤༣༧) ཝཙནཏོ སདྡྷཱསམྤནྣཀུལཱནི ལཱབྷཾ ནིསྶཱཡ པུཔྥདཱནཱདཱིཧི སངྒཎྷིཏྭཱ ཏཐཱ ཨཀརོནྟེསུ ལཛྫིབྷིཀྑཱུསུ ཀུལཱནཾ སདྡྷཱདཱུསནཏོ ཀུལདཱུསཀོ, བྷིཀྑུ.

ཚནྡགཱམིཏཱདཱིཧི པཱཔེནྟོཏི ཀུལདཱུསནཀམྨཾ ཀརོནྟཾ དིསྭཱ ཝཱ སུཏྭཱ ཝཱ ཨཝཙནཏོ ཨཱཔཛྫིཏབྦདུཀྐཊཏོ མུཙྩནཏྠཱཡ ‘‘ཨཱཡསྨཱ ཁོ…པེ… ཨལནྟེ ཨིདྷ ཝཱསེནཱ’’ཏི ཝདནྟེ ལཛྫཱི པེསལེ བྷིཀྑཱུ ‘‘ཚནྡགཱམིནོ ཙ བྷིཀྑཱུ…པེ… ཨེཀཙྩཾ ན པབྦཱཛེནྟཱི’’ཏི ཚནྡགཱམིཏཱདཱིཧི ཙཏཱུཧི ཨགཏིགམནེཧི ཡོཛེནྟོཏི ཨཏྠོ. ཀམྨེ ཀརིཡམཱནེཏི ཡཐཱཝུཏྟནཡེན ཨཏྟཱནཾ གརཧནྟཱནཾ བྷིཀྑཱུནཾ ཀརིཡམཱནཾ ཨཀྐོསནཉྩ པརིབྷཱསནཉྩ ཡེ པསྶནྟི, ཡེ ཙ སུཎནྟི, ཏེཧི ‘‘མཱཡསྨཱ ཨེཝཾ ཨཝཙ, ན ཙ བྷིཀྑཱུ ཚནྡགཱམིནོ…པེ… ཨལནྟེ ཨིདྷ ཝཱསེནཱ’’ཏི ཏིཀྑཏྟུཾ ཝུཙྩམཱནོཔི དུཀྐཊཾ ཨཱཔཛྫིཏྭཱཔི ཨཔྤཊིནིསྶཛྫནྟཾ ཧཏྠེ གཧེཏྭཱ ཨཱཀཌྜྷིཏྭཱ སངྒྷམཛ྄ཛྷཾ ཨཱནེཏྭཱ ‘‘མཱཡསྨཱ ཨེཝཾ ཨཝཙཱ’’ཏིཨཱདིནཱ ནཡེནེཝ ¶ པུནཔི ཏིཀྑཏྟུཾ ཝུཏྟེ དུཀྐཊཾ ཨཱཔཛྫིཏྭཱཔི ཨཔྤཊིནིསྶཛྫནྟསྶ ཉཏྟིཙཏུཏྠཱཡ ཀམྨཝཱཙཱཡ སམནུབྷཱསནཀམྨེ ཀརིཡམཱནེཏི ཝུཏྟཾ ཧོཏི. གརུཀཾ ཕུསེཏི ཉཏྟིཡཱ དུཀྐཊཾ, དྭཱིཧི ཀམྨཝཱཙཱཧི ཐུལླཙྩཡེ ཙ པཊིཔྤསྶམྦྷེནྟོ ཏཏིཡཀམྨཝཱཙཱཡ ཨནྟེ ཡྻཀཱརེ སམྤཏྟེ སངྒྷཱདིསེསཾ ཨཱཔཛྫཏཱིཏི ཝུཏྟཾ ཧོཏི.

༤༣༩-༤༠. ‘‘ཀུལཱནི ¶ དཱུསེཏི པུཔྥེན ཝཱ’’ཏིཨཱདིནཱ (པཱརཱ. ༤༣༧) ནཡེན ཝུཏྟཀུལདཱུསནོཔཀརཎབྷཱུཏཙུཎྞཔཎྞཱདཱིསུ ཝིནིཙྪཡཾ དསྶེཏུམཱཧ ‘‘ཙུཎྞ’’ནྟིཨཱདི. ཙུཎྞནྟི སིརཱིསཔཎྞཱདིཙུཎྞཾ. པཎྞནྟི ཏམྦཱུལཔཎྞཏཱལཔཎྞཱདིཁཱདིཏབྦཱཁཱདིཏབྦཔཎྞཾ. ཕལནྟི ཏཱལཔནསཱདིཕལཾ. པུཔྥནྟི ཙམྤཀཱདིཔུཔྥཾ. ཝེལུ༹ནྟི ཨནྡོལི༹ཀཱཔཱཊཾ ཀིརཎྜཱདིཀཾ ཝེལུ༹ཾ. ཀཊྛནྟི གེཧདཱརུཾ, ཨིནྡྷནཉྩ. མཏྟིཀནྟི པཱཀཏིཀཾ, པཉྩཝཎྞཾ ཝཱ མཏྟིཀཾ.

ཨཏྟནོ སནྟཀཾ, ཏཱཝཀཱལིཀཱདིཝསེན གཧིཏཾ ཝཱ ཙུཎྞཾ…པེ… མཏྟིཀཾ ཀུལསངྒཧཎཏྠཱཡ དདཏོ ཀུལདཱུསནདུཀྐཊཾ ཧོཏཱིཏི སམྦནྡྷོ. ཐེཡྻཱཏི ཙོརིཀཱ. ‘‘དདཏོ’’ཏི ཨིདཾ སཱམིཝཙནཾ ‘‘ཀཱཏབྦོ’’ཏི པཙྩཏྟཝཙནནྟཾ ཝིསེསིཏབྦམཔེཀྑིཏྭཱ ‘‘དདནྟོ’’ཏི ཝིབྷཏྟིཝིཔརིཎཱམེན པཙྩཏྟཝཙནནྟཾ ཨནུཝཏྟེཏབྦཾ. ཀཱཏབྦོཏི ཨེཏྠ ཀཱརེཏབྦོཏི ཨཏྠོ. ཨིམིནཱ སངྒྷསནྟཀཾ, གཎསནྟཀཾ, ཨཉྙཔུགྒལསནྟཀཉྩ ཙུཎྞཱདིཾ ཀུལསངྒཧཏྠཾ ཙོརིཀཱཡ དེནྟོ བྷཎྜགྒྷེན ཀཱརེཏབྦོཏི ཨིམཾ ཝིནིཙྪཡཾ དསྶེཏི. སངྒྷཉྙསནྟཀེཏི སངྒྷཉྙསནྟཀཙུཎྞཱདིཀེཏི ཨཏྠོ. ཨེཏྠ ཨཉྙ-སདྡེན གཎཔུགྒལཱནཾ གཧཎཾ.

༤༤༡. སངྒྷིཀཾ གརུབྷཎྜཾ ཝཱཏི སངྒྷསནྟཀཾ གརུབྷཎྜཔཧོནཀཾ ཝཱ པཎྞཱདིཀཾ. སེནཱསནནིཡཱམིཏནྟི ‘‘ཨེཏྟཀཱ ཕལརུཀྑཱདཡོ སེནཱསནེ ནཝཀམྨཏྠཱཡཱ’’ཏི ཨེཝཾ ནིཡམིཏཾ ¶ ཝཱ. ཨིསྶརཝཏཱཡེ ཝཱཏི ཨེཝཀཱརེན ‘‘ཐེཡྻཱ’’ཏི ཨིདཾ ནིཝཏྟིཏཾ.

༤༤༢. ཧརིཏྭཱ ཝཱཏི ཨཏྟནཱཡེཝ ཧརིཏྭཱ ཝཱ. ‘‘པུཔྥཾ དེནྟསྶཱ’’ཏི ཨིམིནཱ སམྦནྡྷོ. ཨེས ནཡོ ཨུཔརིཔི. ཧརཱཔེཏྭཱ ཝཱཏི ཨཉྙསྶ ཧཏྠེ པེསེཏྭཱ ཝཱ. པཀྐོསིཏྭཱ ཝཱཏི ཨཱམནྟེཏྭཱ ཝཱ པཀྐོསཱཔེཏྭཱ ཝཱཏི ཨུཔལཀྑཎཏོ ལབྦྷཏི. ཨཱགཏསྶ ཝཱཏི ཨཏྟནཱ ཨེཝ ཨཱགཏསྶ ཝཱ. ‘‘ཀུལསངྒཧཎཏྠཱཡཱ’’ཏི ཝཙནེན ‘‘ཨེཝརཱུཔེ ཨདྷིཔྤཱཡེ ཨསཏི ཝཊྚཏཱི’’ཏི ཝུཏྟཏྟཱ ‘‘ཙེཏིཡཾ པཱུཛཾ ཀརོནྟཱཔི ‘པཱུཛེསྶཱམཱ’ཏི པུཔྥཱནི གཧེཏྭཱ གཙྪནྟཱཔི ཏཏྠ ཏཏྠ སམྤཏྟཱནཾ ཙེཏིཡཔཱུཛནཏྠཱཡ དེནྟི, ཨེཏམྤི པུཔྥདཱནཾ ནཱམ ན ཧོཏཱི’’ཏིཨཱདིཀཾ (པཱརཱ. ཨཊྛ. ༢.༤༣༦-༤༣༧) ཨཊྛཀཐཱགཏཾ སབྦཾ ཝིནིཙྪཡཾ དསྶིཏཾ ཧོཏི.

༤༤༣. ཨེཝཾ ཨུསྶགྒཾ དསྶེཏྭཱ ཨཔཝཱདཾ དསྶེཏུམཱཧ ‘‘ཧརིཏྭཱ ཝཱ’’ཏིཨཱདི. ‘‘ཧརཱཔེཏྭཱ’’ཏི ཨིམིནཱ ཡོཛེཏབྦསྶ ཝཱ-སདྡསྶ ཨཝུཏྟསམྤིཎྜནཏྠཏཱཡ ‘‘པཀྐོསིཏྭཱ ཝཱ པཀྐོསཱཔེཏྭཱ ¶ ཝཱ, ཨཱགཏཱནཾ ཝཱ’’ཏི ཙ སངྒཡ྄ཧཏི. ཨཱགཏསྶེཝཱཏི ཨེཝཀཱརེན ཧརིཏྭཱ དཱནཱདིཾ ནིཝཏྟེཏི.

༤༤༤. ཏཉྩཱཏི མཱཏཱཔིཏུཨཱདཱིནཾ ཏཾ པུཔྥདཱནཉྩ. ཝཏྠུཔཱུཛཏྠནྟི རཏནཏྟཡཔཱུཛནཏྠཾ. ན པནཉྙཐཱཏི ཨཉྙེན པཀཱརེན དཱཏུཾ ན ཝཊྚཏི. ཡེན པཀཱརེན དཱཏུཾ ན ཝཊྚཏི, ཀོཡཾ པཀཱརོཏི ཨཱཧ ‘‘སིཝཱདཱི’’ཏིཨཱདི. སིཝཱདིཔཱུཛནཏྠནྟི མཧིསྶརཱདིདེཝཏཱཔཱུཛནཏྠཉྩ. མཎྜནཏྠནྟི པིལ༹ནྡྷནཏྠཾ. ཨེཝཾ ཨདཱཏབྦཔྤཀཱརནིཡམནེན ‘‘ཨིམཾ ཝིཀྐིཎིཏྭཱ ཛཱིཝིཀཾ ཀཔྤེསྶནྟཱི’’ཏི མཱཏཱཔིཏུཨཱདཱིནཾ དཱཏུཾ ཝཊྚཏཱིཏི ཝདནྟི.

༤༤༥. ‘‘ཕལཱདཱིསུ ¶ …པེ… ཝིནིཙྪཡོ’’ཏི ཨིམིནཱ ‘‘ཧརིཏྭཱ ཝཱ ཧརཱཔེཏྭཱ ཝཱ’’ཏིཨཱདིནཱ པུབྦེ ཝུཏྟཝིནིཙྪཡོ ཕལཔཎྞཱདཱིསུ སབྦཏྠ སམཱནོཏི དསྶེཏི.

༤༤༦. ‘‘པུཔྥཱདིབྷཱཛནེ’’ཏི པུཔྥཕལཱདཱིནཾ བྷཱཛནཀཱལེ. སམྨཏེནཱཏི པུཔྥཱདིབྷཱཛནཏྠཾ ཁནྡྷཀེ ཝུཏྟནཡེན སངྒྷེན སམྨཏེན བྷིཀྑུནཱ. ཨསྶཱཏི བྷཱཛནཊྛཱནཾ ཨཱགཏསྶ. ཨིཏརེནཱཏི སངྒྷསམྨུཏིཾ ཝིནཱ པུཔྥཱདཱིནི བྷཱཛཱཔེནྟེན. ཉཱཔེཏྭཱ དཱཏབྦནྟི སབྦཾ སངྒྷཾ ཛཱནཱཔེཏྭཱ དཱཏབྦཾ.

༤༤༧. ཨུཔཌྜྷབྷཱཝནྟི ཨེཀེན བྷིཀྑུནཱ ལདྡྷབྦབྷཱགཏོ ཨུཔཌྜྷཾ. ‘‘ཐོཀཾ ཐོཀ’’ནྟི ཨིམིནཱ ཨུཔཌྜྷཏོཔི ཨཔྤཏརཾ གཧིཏཾ.

༤༤༨. པརིབྦཡཝིཧཱིནསྶཱཏི ཏཎྜུལཱདིཛཱིཝིཏཝུཏྟིཝཡམཱུལརཧིཏསྶ. སམྤཏྟིསྶརིཡསྶཱཔཱིཏི ཨཏྟནོ སམཱིཔམུཔགཏསྶ ཨིསྶརསྶ ཙ. ‘‘དཱཏབྦཾ ཏུ སཀཾ ཕལ’’ནྟི ཨིམིནཱ སམྦནྡྷོ. ‘‘པརིབྦཡཝིཧཱིནཱནཾ, དཱཏུཾ སཔརསནྟཀ’’ནྟི ཁུདྡསིཀྑཱཡ ཨཱགཏཾ, ཨིདྷ ‘‘སཀཾ ཕལ’’ནྟི ཝུཏྟཾ. ཏཏྠ པརཝཙནེན ཝིསྶཱསིཀཱནཾ གཧཎཾ, ཨིདྷ པན ཝིསྶཱསགྒཱཧེན གཧེཏྭཱ དཱིཡམཱནམྤི སསནྟཀམེཝཱཏི ‘‘སཀ’’ནྟི ཝུཏྟནྟི གཧེཏབྦཾ.

༤༤༩-༥༠. ཡཏྲ སངྒྷཱརཱམེ སངྒྷེན ཕལརུཀྑཔརིཙྪེདཾ ཀཏྭཱ ཀཏིཀཱ ཀཏཱཏི ཡོཛནཱ, ‘‘ཨཱགནྟུཀཱནཾ ཨེཏྟཀཾ ཕལཾ དཱཏབྦ’’ནྟི ཕལཔརིཙྪེདཾ ཀཏྭཱ ཝཱ ‘‘ཨེཏྟཀེསུ རུཀྑེསུ ཕལཾ དཱཏབྦ’’ནྟི ¶ རུཀྑཔརིཙྪེདཾ ཀཏྭཱ ཝཱ སངྒྷེན ཀཏིཀཱ ཡེན པཀཱརེན ཀཏཱཏི ཨཏྠོ. ཏཏྲཱགཏསྶཔཱིཏི ཨེཝཾ ཋཔིཏཀཏིཀཝཏྟཾ ཏཾ སངྒྷཱརཱམཾ ཕལཏྠཱཡ ཨཱགཏསྶཱཔི.

ཡཐཱཔརིཙྪེདནྟི ¶ སངྒྷེན ཏཐཱཀཏཕལརུཀྑཔརིཙྪེདམནཏིཀྐམྨ. དདཏོཏི ཨོཙིནིཏྭཱ ཋཔིཏཕལཾ, ཀཔྤིཡཀཱརཀེཧི ཨོཙིནཱཔེཏྭཱ ཝཱ དེནྟསྶ. ཨོཙིཏཕལེ ཙ ཀཔྤིཡཀཱརཀེ ཙ ཨསཏི ཕལཏྠཱཡ ཨཱགཏེསུ ཝཏྟིཏབྦཝིདྷིཾ དསྶེཏུམཱཧ ‘‘དསྶེཏབྦཱཔི ཝཱ’’ཏིཨཱདི. ‘‘ཝཏྭཱ’’ཏི སེསོ. ཙ-ཀཱརཾ ཨཔི-སདྡེན ཨེཀཏོ ཀཏྭཱ ‘‘ཨཔིཙཱ’’ཏི ཡོཛནཱ. ཨེཝཾ ཝཏྭཱ སངྒྷེན པརིཙྪིནྣརུཀྑཱ དསྶེཏབྦཱཏི ཨིམིནཱ ‘‘ཨིདྷ ཕལཱནི སུནྡརཱནི, ཨིཏོ གཎྷཐཱ’ཏི ཨེཝཾ པན ན ཝཏྟབྦ’’ནྟི (པཱརཱ. ཨཊྛ. ༢.༤༣༦-༤༣༧) ཨཊྛཀཐཱ བྱཏིརེཀཏོ དསྶིཏཱ ཧོཏི.

༤༥༡. ‘‘ཁཎིཏྭཱ’’ཏི ཨེཏེན ‘‘ཁཎཱཔེཏྭཱ’’ཏི ཨིདམྤི སངྒཧིཏཾ, ‘‘ཀཔྤིཡབྷཱུམི’’ནྟི ཝཀྑམཱནཏྟཱ པཐཝིནྟི ཨེཏྠ ‘‘ཨཀཔྤིཡ’’ནྟི ལབྦྷཏི. ཏེནེཝཱཧ ‘‘པཱཙིཏྟིཡེནཱ’’ཏི. ‘‘མཱལཱགཙྪ’’ནྟི ཨིམིནཱ པུཔྥཱུཔགེ ཏརུཎགཙྪེ ཙ མལླིཀཱསུམནཱདིགུམྦགཱགཙྪེ ཙ སངྒཎྷཱཏི. ཡཐཱཧ ཨཊྛཀཐཱཡ ‘‘ཏརུཎཀཱ ཧི པུཔྥརུཀྑཱཔི པུཔྥགཙྪཱཔི ‘མཱལཱཝཙྪཱ’ཏྭེཝ ཝུཙྩནྟཱི’’ཏི (པཱརཱ. ཨཊྛ. ༢.༤༣༡). ཨཱདི-སདྡེན ཕལཱུཔགརུཀྑེ ཙ བྷེསཛྫརསེ ཨོསདྷགཙྪེ ཙ སངྒཎྷཱཏི. ‘‘རོཔཱཔནེ’’ཏི ཝཀྑམཱནཏྟཱ ‘‘སཡ’’ནྟི ཨིདཾ ‘‘རོཔནེ’’ཏི ཨིམིནཱ ཡུཛྫཏི.

‘‘སཡཾ ཁཎིཏྭཱ’’ཏི ཀསྨཱ ན ཡུཛྫཏཱིཏི? ‘‘ཁཎཱཔེཏྭཱ’’ཏི ཝཀྑམཱནསྶ ཨབྷཱཝཱ ཙ ‘‘ཡོ པན བྷིཀྑུ པཐཝིཾ ཁཎེཡྻ ཝཱ ཁཎཱཔེཡྻ ཝཱ, པཱཙིཏྟིཡ’’ནྟི (པཱཙི. ༨༥) ཝཙནཏོ ཁཎཱཔནེ པཱཙིཏྟིཡེན བྷཝིཏབྦཏྟཱ ཙ ‘‘ཁཎིཏྭཱ’’ཏི ཨིམིནཱ ཙ ཁཎནཁཎཱཔནཱནཾ དྭིནྣམེཝ གཧེཏབྦཏྟཱ ན ཡུཛྫཏི. ཀུལདཱུསནེཏི ཀུལདཱུསནནིམིཏྟཾ. ཨཀཔྤིཡཔཐཝིཾ ཁཎིཏྭཱ, ཁཎཱཔེཏྭཱ ཙ སཡཾ མཱལཱགཙྪཱདིརོཔནེ ཀཏེ ཨསྶ མཱལཱགཙྪཱདིརོཔཀསྶ ¶ བྷིཀྑུནོ ཨཀཔྤིཡཔཐཝཱིཁཎནཔཙྩཡེན པཱཙིཏྟིཡེན སདྡྷིཾ ཀུལདཱུསནེ ཀུལདཱུསནནིམིཏྟཾ དུཀྐཊཾ ཧོཏཱིཏི ཡོཛནཱ.

༤༥༢. ‘‘ཏཐཱ’’ཏི ¶ ཨིམིནཱ ‘‘སཡཾ རོཔནེ’’ཏི ཨིདཾ ཝིནཱ ཨཝསེསཔྤཀཱརཾ སངྒཎྷཱཏི. ‘‘ཨཀཔྤིཡེན ཝཱཀྱེནཱ’’ཏི ཨིདཾ ‘‘ཨཀཔྤིཡཔཐཝིཾ ཁཎཱཔེཏྭཱ’’ཏི ཨིམིནཱ ཙ ‘‘རོཔཱཔནེ’’ཏི ཨིམིནཱ ཙ ཡུཛྫཏི. ‘‘ཨིམཾ བྷཱུམིཾ ཁཎ, ཨིམཾ གཙྪཾ རོཔེཧཱི’’ཏིཨཱདིཀཾ ཨཀཔྤིཡཾ ཝོཧཱརཾ ཝཏྭཱ ཨཀཔྤིཡཔཐཝིཾ ཁཎཱཔེཏྭཱ མཱལཱགཙྪཱདིརོཔནཾ ཀཱརཱཔེནྟསྶཱཔི ཏཐེཝ པཱཙིཏྟིཡཉྩ དུཀྐཊཉྩ ཧོཏཱིཏི ཨཏྠོ.

ཁཎནརོཔནེཧི དྭཱིཧི པཱཙིཏྟིཡདུཀྐཊཱནི ཨཝསིཊྛེཧི ཏདཏྠིཀེཧི སབྦཝོཧཱརཔཡོགབྷེདེཧི ཀིཾ ཧོཏཱིཏི ཨཱཧ ‘‘སབྦཏྠཱ’’ཏིཨཱདི. ཀུལདཱུསནེཏི ནིམིཏྟེ, ཝིསཡེ ཝཱ བྷུམྨཾ. ཨཀཔྤིཡེན ཝཱཀྱེན པན པཐཝིཾ ཁཎཱཔེཏྭཱ ཨཀཔྤིཡེན ཝཱཀྱེན རོཔཱཔནེཔི ཏཐཱ པཱཙིཏྟིཡེན སཧ ཀུལདཱུསནེ བྷིཀྑུནོ དུཀྐཊཾ ཝུཏྟཾ. སབྦཏྠ ཨིཏོ པརེསུཔི ཏདཏྠིཀེན སབྦཝོཧཱརབྱཱཔཱརེསུ ཀུལདཱུསནནིམིཏྟཾ བྷིཀྑུནོ དུཀྐཊཾ ཝུཏྟནྟི ཡོཛནཱ.

༤༥༣. ཀཔྤིཡབྷཱུམིཡཱ ཨཏྟནཱ ཁཎནེ, ཨཀཔྤིཡཝོཧཱརེན ཁཎཱཔནེ ཙ པཱཙིཏྟིཡཱབྷཱཝཏོ དུཀྐཊཾཡེཝ ཝུཏྟནྟི ཨཱཧ ‘‘ཨུབྷཡཏྠ ཙཱ’’ཏིཨཱདི. ཨེཏྠ ‘‘ཨེཝ’’ནྟི སེསོ, སོ ཡཐཱཝུཏྟམཏྠཾ ནིགམེཏི. ཨེཝཾ ཡཐཱཝུཏྟནཡེན ཀཔྤིཡབྷཱུམིཡམྤི མཱལཱགཙྪཱདིརོཔནརོཔཱཔནསངྑཱཏེསུ དྭཱིསུ ཋཱནེསུ ཙ བྷིཀྑུནོ དུཀྐཊཾ ཝུཏྟནྟི ཡོཛནཱ.

༤༥༤. སདུཀྐཊཱ ¶ པཱཙིཏྟཱིཏི ‘‘ཨཱཝཱཊཾ ཁཎ, གཙྪཾ རོཔེཧཱི’’ཏི ཨེཀཝཱརཾ ཨཱཎཏྟེ བཧཱུ ཨཱཝཱཊེ ཁཎིཏྭཱ བཧཱུསུ གཙྪེསུ རོཔིཏེསུཔི ཨཱཎཏྟིཡཱ ཨེཀཏྟཱ དུཀྐཊེན སཧ པཱཙིཏྟིཡཾ ཧོཏཱིཏི ཨཡམཏྠོ ཨཀཔྤིཡབྷཱུམིཾ སནྡྷཱཡ ཝུཏྟོ. ‘‘སུདྡྷཾ ཝཱ དུཀྐཊ’’ནྟི ཨིདཾ ཨཀཔྤིཡབྷཱུམིཡཾ ཀཔྤིཡེན ཝོཧཱརེན ཨཱཝཱཊཾ ཁཎཱཔཀསྶ ཙ ཀཔྤིཡབྷཱུམིཡཾ ཨཀཔྤིཡཝོཧཱརེན ཨཱཝཱཊཾ ཁཎཱཔཀསྶ ཙ ‘‘ཨིམཾ གཙྪཾ རོཔེཧཱི’’ཏི ཨེཀཝཱརཱཎཏྟཔཙྩཡཱ ཨཱཔཛྫིཏབྦཾ ཀུལདཱུསནདུཀྐཊཾ སནྡྷཱཡ ཝུཏྟཾ.

༤༥༥. ཀཔྤིཡེནེཝ ཝཱཀྱེནཱཏི ཨེཏྠ ཀཔྤིཡཝཱཀྱཾ ནཱམ ‘‘ཨེཏྠ ཨཱཝཱཊཾ ཛཱན, ཨེཏྠ ཨཱཝཱཊཾ ཛཱནིཏབྦཾ, ཨེཏྠ ཨཱཝཱཊེན བྷཝིཏབྦ’’ནྟི ཨེཝརཱུཔཾ ཝཱཀྱཉྩ ‘‘ཨིམཾ གཙྪཾ ཨེཏྠ ཛཱན, ཨཡཾ གཙྪོ ཨེཏྠ ཛཱནིཏབྦོ’’ཏིཨཱདིཝཱཀྱཉྩ. ཨེཝཀཱརེན ཨཀཔྤིཡཝོཧཱརཉྩ ཀཔྤིཡཱཀཔྤིཡམིསྶཀཝོཧཱརཉྩ ནིཝཏྟེཏི. པརིཡཱཡོབྷཱསནིམིཏྟཀམྨཾ པན ‘‘ཨིཏརཏྟཡཾ ཝཊྚཏཱི’’ཏི ¶ (པཱརཱ. ཨཊྛ. ༢.༤༣༡) ཨཊྛཀཐཱཝཙནཏོ ཝཊྚཏི. ཨུབྷཡཏྠ ཙ བྷཱུམིཡཱཏི ཀཔྤིཡཱཀཔྤིཡབྷཱུམཱིསུ དྭཱིསུ. རོཔནེཏི ཨེཏྠ སམྦནྡྷཏོ, པཀརཎཏོ ཙ ‘‘མཱལཱགཙྪཱདཱིན’’ནྟི ལབྦྷཏི.

‘‘ཝཱཀྱེནཱ’’ཏི ཝུཏྟཏྟཱ ‘‘རོཔཱཔནེ’’ཏི ཝཏྟབྦོ, ‘‘རོཔནེ’’ཏི ཀིམཏྠམཱཧཱཏི ཙེ? སུདྡྷཀཏྟུནིདྡེསེན པཡོཛཀསྶཱཔི སངྒཧེཏབྦཏོ གཱཐཱབནྡྷཝསེན ཝུཏྟཾ. ཨིམིནཱ ཨུཔརིགཱཐཱཡ ‘‘སཡཾ རོཔེཏུ’’ནྟི ཨེཏྠ ‘‘སཡ’’ནྟི ཨིམིནཱ ཝིསེསེཏྭཱ ‘‘རོཔཱཔེཏུ’’ནྟི ཨིདཾ ནིཝཏྟེཏི. ‘‘པརིབྷོགཏྠཱཡ ཧི ཀཔྤིཡབྷཱུམིཡཾ ཝཱ ཨཀཔྤིཡབྷཱུམིཡཾ ཝཱ ཀཔྤིཡཝོཧཱརེན རོཔཱཔནེ ཨནཱཔཏྟཱི’’ཏི (པཱརཱ. ཨཊྛ. ༢.༤༣༡) ཨཊྛཀཐཱཝིནིཙྪཡོ ཨིམཱཡ གཱཐཱཡ སངྒཧིཏོཏི ཝེདིཏབྦོ. ཀོཙི དོསོཏི པཱཙིཏྟིཡཉྩ དུཀྐཊཉྩཱཏི ཝུཏྟདོསེསུ ཨེཀོཔི དོསོ ན ཝིཛྫཏཱིཏི ཨཏྠོ.

༤༥༦-༧. ‘‘སཡཾ ¶ རོཔེཏུ’’ནྟི ཨིདཾ ‘‘ཨཱརཱམཱདཱིནམཏྠཱཡཱ’’ཏི ཨིམིནཱ སམྦནྡྷིཏབྦཾ.

ཨཱདི-སདྡེན ཝནཱདིཾ སངྒཎྷཱཏི. སཡཾ རོཔིཏསྶ ཝཱཏི ཨེཏྠ ཝཱ-སདྡེན ‘‘རོཔཱཔིཏསྶཱ’’ཏི ཨིདཾ སངྒཎྷཱཏི, ཨེཏསྶ ཝིསེསནཏྠཾ ‘‘ཀཔྤིཡེན ཝོཧཱརེནཱ’’ཏི པཱཋསེསོ. ཨཡཾ པན ཝིནིཙྪཡོ ‘‘ཨཱརཱམཏྠཱཡ པན ཝནཏྠཱཡ ཙ ཚཱཡཏྠཱཡ ཙ ཨཀཔྤིཡཝོཧཱརམཏྟམེཝ ན ཝཊྚཏི, སེསཾ ཝཊྚཏཱི’’ཏི (པཱརཱ. ཨཊྛ. ༢.༤༣༡) ཨཊྛཀཐཱགཏནཡེན ཝེདིཏབྦོ. ཨནྟོ ཨཱརཱམབྷཱུསནཏྠཱཡ, བཧི ཨརཉྙཏྠཱཡ ཝིཡ ཚཱཡཏྠཱཡ སུདྡྷཙིཏྟེན ‘‘ཨིམཾ ཛཱནཱ’’ཏིཨཱདིཀཔྤིཡཝོཧཱརེན རོཔཱཔིཏརུཀྑེ ཙ ཀཔྤིཡབྷཱུམིཡཉྩ ཨཏྟནཱ ཀཏེ ཝཱ ཨཀཔྤིཡཝོཧཱརེན ཀཱརཱཔིཏེ ཝཱ ཨཀཔྤིཡབྷཱུམིཡཉྩ ཀཔྤིཡཝོཧཱརེན ཨཏྟནཱ ཀཱརཱཔིཏེ ཝཱ ཨཉྙེཧི ཀཏེ ཝཱ ཨཱཝཱཊེ ཨཏྟནཱ རོཔིཏེ རུཀྑེ ཙ ཕལཾ པརིབྷུཉྫིཏུཾ ཨིཙྪཏི ཙེ, པརིབྷུཉྫིཏུཾ ཝཊྚཏཱིཏི ཨཏྠོ.

ཨཱརཱམཱདཱིནམཏྠཱཡ ཀཔྤིཡབྷཱུམིཡཾ སཡཾ རོཔིཏསྶ ཝཱ ཀཔྤིཡབྷཱུམིཡཾ ཝཱ ཨཀཔྤིཡབྷཱུམིཡཾ ཝཱ ཀཔྤིཡཝོཧཱརེན རོཔཱཔིཏསྶ ཝཱ རུཀྑསྶ ཡཉྩ ཕལཾ, ཏཾ ཕལཾ པརིབྷུཉྫིཏུཾ བྷིཀྑཱུནཾ ཝཊྚཏཱིཏི ཡོཛནཱ. ཀཏྠཙི པོཏྠཀེསུ ‘‘ཨཱརཱམཱདཱིནམཏྠཱཡཱ’’ཏི གཱཐཱཡ ལིཁིཏཊྛཱནེ ¶ ‘‘ཀུལསངྒཧཎཏྠཱཡཱ’’ཏིཨཱདིགཱཐཱ དིསྶཏི. སཱ པཱལི༹ཀྐམཝིརུདྡྷཏྟཱ ཨཊྛཱནཔྤཡུཏྟཱ, ‘‘པུཔྥཱན’’ནྟིཨཱདིགཱཐཱཡ པུརཏོ ཝུཙྩམཱནཱ པན ཋཱནཔྤཡུཏྟཱ ཧོཏི.

༤༥༨. སབྦཏྠཱཏི ཨཱརཱམཱདིཨཏྠཱཡ པུབྦེ ཝིཡ ཨཏྟནཱ རོཔིཏེསུ, རོཔཱཔིཏེསུ ཙ སབྦེསུ མཱལཱགཙྪཱདཱིསུ. ཨཀཔྤིཡོདཀེནེཝ པཱཙིཏྟཱིཏི ‘‘ཡོ པན བྷིཀྑུ ཛཱནཾ སཔྤཱཎཀཾ ¶ ཨུདཀཾ ཏིཎཾ ཝཱ མཏྟིཀཾ ཝཱ སིཉྩེཡྻ ཝཱ སིཉྩཱཔེཡྻ ཝཱ, པཱཙིཏྟིཡ’’ནྟི (པཱཙི. ༡༤༠) ཝུཏྟཱ པཱཙིཏྟི ཨེཝ, ན དུཀྐཊནྟི ཨཏྠོ.

༤༥༩. ཨིདཱནི དུཀྐཊེན སདྡྷིཾ པཱཙིཏྟིཡཝིསཡཾ དསྶེཏི ‘‘ཀུལ…པེ… དུཀྐཊ’’ནྟི. སིཉྩཏོཏི ཀཔྤིཡོདཀེནེཝ སིཉྩཏོ, སིཉྩཱཔཡཏོ ཙ.

༤༦༠. ཏེསཾཡེཝ དྭིནྣཾ པན ཨཏྠཱཡཱཏི ཀུལདཱུསནཔརིབྷོགཱནཾ དྭིནྣམཏྠཱཡ. སིཉྩནེ སིཉྩཱཔནེཏི ཨེཏྠ ‘‘མཱལཱགཙྪཱདཱིན’’ནྟི པཀརཎཏོ ལབྦྷཏི. དུཀྐཊནྟི ཨེཏྠ ‘‘ཀེཝལ’’ནྟི སེསོ.

༤༦༡. ཨོཙིནཱཔནེཏི ཨཉྙེཧི པུཔྥཱནཾ ཨོཙིནཱཔནེ. སཡམོཙིནནེ ཙཱཔཱིཏི ཨཏྟནཱཝ ཨོཙིནནེ ཙ. སཔཱཙིཏྟིཡདུཀྐཊནྟི ‘‘བྷཱུཏགཱམཔཱཏབྱཏཱཡ པཱཙིཏྟིཡ’’ནྟི (པཱཙི. ༩༠) ཝུཏྟཏྟཱ པུཔྥོཙིནནཧེཏུ པཱཙིཏྟིཡཉྩ ཀུལདཱུསནདུཀྐཊཉྩ ཧོཏཱིཏི ཝུཏྟཾ ཧོཏི.

༤༦༢. པཱུཛཱདིཨཏྠཱཡ, ཀུལསངྒཧཏྠཱཡ ཙ པུཔྥཱནཾ ཨོཙིནནཨོཙིནཱཔནཱནི ཀཱརཱཔེནྟསྶ ཨཱཔཏྟིཡཱ ཨཱཔཛྫནཔྤཀཱརཾ དསྶེཏུམཱཧ ‘‘པུཔྥཱན’’ནྟི. ‘‘པུཔྥཱནཾ གཎནཱཡ པཱཙིཏྟིཡཾ ཧོཏཱི’’ཏི ཝུཏྟཏྟཱ པུཔྥམོཙིནཏོཏི ཨེཏྠ ‘‘ཝིསུཾ ཝིསུ’’ནྟི སེསོ. ཨེཀེཀཔུཔྥཾ ཨོཙིནནྟསྶ པུཔྥགཎནཱཡ པཱཙིཏྟིཡཾ ཧོཏཱིཏི ཨཏྠོ. ‘‘ཨེཀེན པཡོགེན བཧཱུནི པུཔྥཱནི ཨོཙིནནྟསྶ པན པཡོགགཎནཱཡ ཧོཏཱི’’ཏི ཨཊྛཀཐཱཡཾ ཝུཏྟཾ ཨིདྷ བྱཏིརེཀཏོ ལབྦྷཏི. ‘‘ཨོཙིནཏོ’’ཏི ཨིམིནཱ ‘‘ཨོཙིནཱཔཡཏོ’’ཏི ཨིདཉྩ ཀིརིཡཱསཱམཉྙེ ཝིསེསསྶ ཨནྟོགདྷབྷཱཝཏོ ཝཱ ཨུཔལཀྑཎཏོ ཝཱ དསྶིཏནྟི.

ཏཏྠ ¶ ཙ པུཔྥཱནི ཝིསུཾ ཝིསུཾ ཝཏྭཱ ཨོཙིནཱཔེནྟསྶ པུཔྥཱནཾ གཎནཱཡ ཧོཏཱིཏི ཨིདམེཝ ¶ ཨཱཔཛྫཏི. ཨེཀཝཱརམཱཎཏྟེན བཧཱུནི པུཔྥཱནི བཧཱུསུ ཙ ཝཱརེསུ ཨོཙིཏེསུ ཨཱཎཏྟིགཎནཱཡ ཧོཏཱིཏི ཝིནིཙྪཡོ དཊྛབྦོ. ཨིདཾ སབྦཔྤཀཱརཾ ཨནནྟརཝུཏྟགཱཐཱཡ དསྶིཏཝིདྷིམྷི ཙ དཊྛབྦནྟི ཉཱཔེཏུམཱཧ ‘‘ཀུལཏྠཾ ཙེ སདུཀྐཊཱ’’ཏི. ཀུལཏྠནྟི ཀུལསངྒཧཏྠཾ. ‘‘སདུཀྐཊཱ’’ཏི ཝུཏྟཏྟཱ པཱཙིཏྟིཡཉྩ དུཀྐཊཉྩ པུཔྥགཎནཱཡ ཧོཏཱིཏི སིདྡྷཾ. ཡཐཱཧ ཨཊྛཀཐཱཡཾ ‘‘པུཔྥགཎནཱཡ དུཀྐཊཔཱཙིཏྟིཡཱནཱི’’ཏི (པཱརཱ. ཨཊྛ. ༢.༤༣༡).

༤༦༣. གནྠནཾ གནྠོ, ཏེན ནིབྦཏྟཾ གནྠིམཾ. ཨེས ནཡོ སབྦཏྠ. གནྠིམཱདིསརཱུཔཾ སཡམེཝ ཝཀྑཏི. སངྒཧཎཾ སངྒཧོ, པུཔྥཱནཾ སངྒཧོཏི ཝིགྒཧོ.

༤༦༤. ཨིམཱནི གནྠིམཱདཱིནི སརཱུཔཏོ དསྶེཏུམཱཧ ‘‘ཏཏྠ དཎྜེན དཎྜཾ ཝཱ’’ཏིཨཱདི. ཏཏྠ ཏཏྠཱཏི ཏེསུ ཚསུ པུཔྥསངྒཧེསུ. ‘‘དཎྜེན དཎྜཾ ཝཱ’’ཏི ཨིདཾ སདཎྜཨུཔྤལཱདིཀུསུམཾ སནྡྷཱཡཱཧ. ‘‘ཝཎྚེནཔི ཙ ཝཎྚཀ’’ནྟི ཨིདཾ སཝཎྚཀརཏྟཀུསུམཱདིཾ སནྡྷཱཡཱཧ. ཀརཎཾ སབྦནྟི ཀཏཾ སབྦཾ. ཨིདྷ སབྦཏྠ ཀཔྤིཡཝིདྷིཝིབྷཱགཾ ‘‘སབྦམེཏ’’མིཙྩཱདིགཱཐཱཡཾ ཝཀྑཏི.

༤༦༥. སུཏྟཱདཱིཧི གོཔྥེཏྭཱཏི ཨེཏྠ ‘‘ཝསྶིཀཔུཔྥཱདཱིནཱི’’ཏི སེསོ. སུཏྟེན ཝཱ ཀདལིཝཱཀཱདཱིཧི ཝཱ ཝསྶིཀཱདིཔུཔྥེ གནྠིཏྭཱ ཀཏཔུཔྥཝིཀཱརོ གོཔྥིམཾ ནཱམ. ཨེཀཏོ ཝཎྚཱནི ཡསྶཱཏི ཝིགྒཧོ. ཨུབྷཏོཝཎྚིཀཱཏི ཨེཏྠཱཔི ཨེསེཝ ནཡོ. ཨཔྤཏྠེ ཝཱ སཀཏྠེ ཝཱ ཀ-ཀཱརོ དཊྛབྦོ. ཨིཏྠིལིངྒཝིསཡེ ཀ-ཀཱརཏོ པུབྦཱཀཱརསྶ ཨི-ཀཱརཱདེསོ.

སབྦཔུཔྥཱནཾ ཝཎྚཱནི ཨེཀདིསཱཡ ཀཏྭཱ གནྠིཏཔུཔྥཱཝལི ཨེཀཏོཝཎྚིཀཱ ནཱམ, ཝཎྚཱནི ཨུབྷཡདིསཱཡ ཀཏྭཱ གནྠིཏཔུཔྥཱཝལི ¶ ཨུབྷཏོཝཎྚིཀཱ ནཱམཱཏི ཏཾ གོཔྥིམཾ ཨེཝཾ དུཝིདྷཾ ཧོཏཱིཏི ཨཏྠོ. ‘‘ཝཱཀཾ ཝཱ ཝལླིཾ ཝཱ རཛྫུཾ ཝཱ དིགུཎཾ ཀཏྭཱ ཏཏྠ ནཱིཔཀདམྦཱདིཝཎྚརཧིཏཱནི པུཔྥཱནི ཝེཋེཏྭཱ གཧཎཾ གོཔྥིམཾ ནཱམཱ’’ཏི (པཱརཱ. ཨཊྛ. ༢.༤༣༡ ཨཏྠཏོ སམཱནཾ) ཨཊྛཀཐཱཡ ཝུཏྟཾ.

༤༦༦. བུནྡེསཱུཏི མཱུལེསུ. མཀུལཱདིཀནྟི ཨེཏྠ ཨཱདི-སདྡེན ཝཎྚརཧིཏམདྷུཀཱདིཔུཔྥཉྩ ཝཎྚསཧིཏམལླིཀཱདིཔུཔྥཉྩ སངྒཧིཏཾ. སཱུཙིཨཱདཱིཧཱིཏི ཨེཏྠ ཨཱདི-སདྡེན ཏཱལཧཱིརཱདིཾ སངྒཎྷཱཏི ¶ . མཱལཱཝིཀཏཱིཏི པུཔྥམཱལཱཝིཀཏི. སཱུཙིཨཱདཱིཧི མཀུལཱདིཀཾ པུཔྥཾ བུནྡེསུ ཝིཛ྄ཛྷིཏྭཱ ཨཱཝུཏཱ མཱལཱཝིཀཏི ཝེདྷིམཾ ནཱམཱཏི ཝུཙྩཏཱིཏི ཡོཛནཱ.

༤༦༧. ‘‘ཝེཋིམཾ ནཱམ པུཔྥདཱམཔུཔྥཧཏྠཀེསུ དཊྛབྦ’’ནྟི (པཱརཱ. ཨཊྛ. ༢.༤༣༡) ཨཊྛཀཐཱཡ དསྶིཏཔྤཀཱརེསུ པཋམཔྤཀཱརཾ དསྶེཏི ‘‘ཝེཋེཏྭཱ ཀཏཾ མཱལཱགུཎེཧི ཝཱ’’ཏི. དྷམྨདེསནཱཡ ཝཱ པཊིམཱཡ ཝཱ དྷཱཏུཡཱ ཝཱ པཱུཛཾ ཀཏྟུཀཱམཱ མུདྡྷནི ཨུཛུཀཾ ཀཏྭཱ མཱལཱདཱམཀལཱཔཾ ཨོལམྦིཏྭཱ ཨགྒེ གྷཊིཀཱཀཱརདསྶནཏྠཾ མཱལཱཝལིཡོ ཨནེཀཀྑཏྟུཾ པརིཀྑིཔནྟཱ ཝེཋེནྟི, ཨིདཾ ཨེཝརཱུཔཾ མཱལཱགུཎཀརཎམྤི ཝེཋིམཾ ནཱམཱཏི ཝུཏྟཾ ཧོཏི.

ཨཉྙཔྤཀཱརཾ དསྶེཏི ‘‘ཝཱཀཱདཱིཧི ཙ བདྡྷཾ ཝཱ’’ཏི, ‘‘བནྡྷིཏྭཱ’’ཏིཔི པཱཋོ, ‘‘ཀཏ’’ནྟི ཨིམིནཱ སམྦནྡྷོ. ཨེཀཙྩེ ཨུཔྤལཱདིདཱིགྷདཎྜཀུསུམཱནི ཨཊྛ ཝཱ ནཝ ཝཱ དས ཝཱ ཀལཱཔཾ ཀཏྭཱ ཏེསམེཝ དཎྜཱནཾ ཝཱཀེཧི ཝཱ ཨཉྙེན ཡེན ཀེནཙི དཎྜཀགྒེ ཋཔེཏྭཱ ཝཱ ཝིསུཾ ཝཱ བནྡྷིཏྭཱ ཨུཔྤལཧཏྠཱདིཾ ཀརོནྟི, ཏཉྩ ཝེཋིམཾ ནཱམཱཏི ཝུཏྟཾ ཧོཏི. ཨེཏཾ དྭཡམྤི ན ཝཊྚཏི.

ཀཔྤིཡཀཱརཀེཧི ¶ ཨོཙིནིཏྭཱ ཋཔིཏཔུཔྥཱནི སཱཊཀེ པཀྑིཔིཏྭཱ བྷཎྜིཀཾ ཀཏྭཱ བནྡྷིཏུཾ ན ཝཊྚཏི. ཏེསུཡེཝ པུཔྥེསུ ཨཙྪིནྣེན དཎྜེན ཝཱ ཏསྨིཾཡེཝ དཎྜེ ཨཙྪིནྣཝཱཀེན ཝཱ ཀལཱཔཾ ཀཏྭཱ བནྡྷིཏུཾ, ཨཾསབྷཎྜིཀཱཡ པཀྑིཔིཏྭཱ གཧེཏུཉྩ ཝཊྚཏི. ཡཐཱཧ ཨཊྛཀཐཱཡཾ ‘‘ཏེསཾཡེཝ པན ཝཱཀེན ཝཱ དཎྜེན བནྡྷིཏུཾ ཨཾསབྷཎྜིཀཾ ཝཱ ཀཱཏུཾ ཝཊྚཏཱི’’ཏི. ‘‘ཝཱཀེན ཝཱ དཎྜེན ཝཱ’ཏི ཙ ཨིདཾ ཨཙྪིནྡིཏྭཱ པརིཀྑིཔིཏྭཱ བནྡྷནཾ སནྡྷཱཡ ཝདནྟཱི’’ཏི སཱིཧལ༹གཎྛིཔདེ ཝུཏྟཾ. པདུམཱདིཔུཔྥཱནི པདུམཱདིཔཎྞེསུ ནཱལེ༹ཧི པཝེསེཏྭཱ ནཱལེ༹ཧི བཧི ཀཏྭཱ པཎྞེན པུཔྥཱནི པཊིཙྪཱདེཏྭཱ པཎྞགྒེ བནྡྷིཏུཾ ཝཊྚཏི. ‘‘དཎྜེ པན བནྡྷིཏུཾ ན ཝཊྚཏཱི’’ཏི (པཱརཱ. ཨཊྛ. ༢.༤༣༡) ཙ ཨཊྛཀཐཱཡམེཝ ཝུཏྟཾ.

༤༦༨. པུཔྥམཱལཱཧི པཱུརཎེཏི པུཔྥཱཝལཱིཧི པཱུརཎེ. ཨིདཾ ཀཏྠ ལབྦྷཏཱིཏི ཨཱཧ ‘‘བོདྷི’’ནྟིཨཱདི. པུཔྥཔཊཾ ནཱམ མཱལཱཝལིཡོ ཏནྟཾ ཝིཡ པསཱརེཏྭཱ ཝཏྠཾ ཝཱཡནྟེཧི ཝིཡ ཏིརིཡཉྩ མཱལཱཝལཱིཧི ཝཱཡིཏཔཊཾ ཝུཙྩཏི. ཨིདཾ པུཔྥཔཊཾ མཱལཱཝལཱིཧི དཱིགྷསོ པཱུརཎཾ སནྡྷཱཡ ¶ པུརིམེ གཧིཏཾ, ཏིརིཡཏོ ཝཱཡནཾ སནྡྷཱཡ ཝཀྑམཱནེ ཝཱཡིམེཔི གཧིཏནྟི པུནརུཏྟཱབྷཱཝོ ཝེདིཏབྦོ. པཊཱདཱིནནྟི ཨཱདི-སདྡེན ཙེཏིཡདྷཱཏུཀརཎྜཀཝེདིཀཱདཱིནཾ གཧཎཾ.

པརིཀྑེཔེསུ ལབྦྷཏཱིཏི བོདྷིཀྑནྡྷཱདཱིནཾ པུནཔྤུནཾ པརིཀྑིཔནེསུ ལབྦྷཏི. བོདྷིཀྑནྡྷཱདཡོ པུཔྥཱཝལཱིཧི པརིཀྑིཔནྟེཧི པཋམཝདྡྷཊྛཱནེ པུཔྥཱཝལིཡཱ ཨནཏིཀྐཱམིཏེ པུརིམཾ ནཱམ ཋཱནཾ ཡཱཝ པཱཔུཎཱཏི, ཏཱཝ ཨཉྙེན གཧེཏྭཱ པརིཀྑིཔནྟེན ཨཱཧརིཏྭཱ པུནཔི ཏསྨིཾ ཋཱནེ པཏྟེ ཨཉྙསྶ དཱནཝསེན བོདྷིཀྑནྡྷཾ, ཙེཏིཡཾ, དྷཱཏུཀརཎྜཀཾ ཝཱ པུཔྥཀཉྩུཀེན ཚཱདེཏུཾ ¶ ཝཊྚཏཱིཏི ཨཊྛཀཐཱཡ ཝུཏྟཾ. སཙེཔི དྭེཡེཝ བྷིཀྑཱུ ཨུབྷོསུ པསྶེསུ ཋཏྭཱ པརིཡཱཡེན ཧརནྟི, ཝཊྚཏིཡེཝཱཏི ཝདནྟི. པུཔྥཔཊཝཱཡནཏྠཾ པསཱརིཡམཱནཔུཔྥཱཝལཱིསུ ཙ ཨེསེཝ ཝིནིཙྪཡོ.

དཱིགྷཔུཔྥཱཝལིཾ ནཱགདནྟེསུ པཀྑིཔིཏྭཱ པུན པཀྑིཔིཏུཾ ན ཝཊྚཏི. ‘‘ནཱགདནྟེསུ པན པུཔྥཝལཡཾ པཝེསེཏུཾ ཝཊྚཏཱི’’ཏི ཝུཏྟཏྟཱ ཨཉྙེཧི ཝལཡཾ ཀཏྭཱ དིནྣཔུཔྥཱཝལིཝལཡཾ དྷཱཏུཀརཎྜཐུཔིཀཱཡ པཝེསེཏུཾ ཝཊྚཏི. ‘‘མཱལཱགུཎེཧི པན བཧཱུཧིཔི ཀཏཾ པུཔྥདཱམཾ ལབྷིཏྭཱ ཨཱསནམཏྠཀཱདཱིསུ བནྡྷིཏུཾ ཝཊྚཏཱི’’ཏི ཝུཏྟཏྟཱ པུཔྥདཱམཔུཔྥཱཝལཱིནཾ པུཔྥརཧིཏཱཡ སུཏྟཀོཊིཡཱ རཛྫུདཎྜཱདཱིསུ བནྡྷིཏུཾ ཝཊྚཏི.

༤༦༩. པུཔྥརཱུཔཾ ནཱམ ‘‘གོཔྥིམཔུཔྥེཧེཝ ཧཏྠིཨསྶཱདིརཱུཔཀཱནི ཀརོནྟི, ཏཱནིཔི ཝཱཡིམཊྛཱནེ ཏིཊྛནྟཱི’’ཏི (པཱརཱ. ཨཊྛ. ༢.༤༣༡) ཝུཏྟཏྟཱ ཏཾཏཾརཱུཔསཎྛཱནཾ ཀཏྭཱ པུཔྥཱཝལིཡོ ནིཝེསེཏྭཱ ཀརིཡམཱནཾ ཧཏྠིཨསྶཱདིརཱུཔཾ. ཨིམསྨིཾ ཨཊྛཀཐཱཔཱཋེ ‘‘ཏཱནིཔི ཝཱཡིམཊྛཱནེ ཏིཊྛནྟཱི’’ཏི ཝུཏྟཏྟཱ ཙ ‘‘ཨཉྙེཧི ཀཏཔརིཙྪེདེ པན པུཔྥཱནི ཋཔེནྟེན ཧཏྠིཨསྶཱདིརཱུཔཀམྤི ཀཱཏུཾ ཝཊྚཏཱི’’ཏི (པཱརཱ. ཨཊྛ. ༢.༤༣༡) ཨཊྛཀཐཱཔཱཋསྶ སཱརཏྠདཱིཔནིཡཾ ‘‘པུཔྥཱནི ཋཔེནྟེནཱཏི ཨགནྠིཏཱནི པཱཀཏིཀཔུཔྥཱནི ཋཔེནྟེན. པུཔྥདཱམཾ པན པཱུཛནཏྠཱཡ བྷཱུམིཡཾ ཋཔེནྟེན ཕུསཱཔེཏྭཱ ཝཱ ཨཕུསཱཔེཏྭཱ ཝཱ དིགུཎཾ ཀཏྭཱ ཋཔེཏུཾ ན ཝཊྚཏཱི’’ཏི (སཱརཏྠ. ཊཱི. ༢.༤༣༡) ཝུཏྟཏྟཱ ཙ ཨིམཾ ཧཏྠིཨཱདིརཱུཔཾ པཱུརེནྟེན མཱལཱཝལིཾ ཨཉྙེཧི ཀཏཔརིཙྪེདེ སམྦནྡྷིཏྭཱ པཱསཱཎཨཱསནམཉྩཔཱིཋཧཏྠིརཱུཔཱདིམཏྠཀེ ཋཔེཏྭཱ པཱུཛནཔྤཀཱརོ ཝཱཡིམནྟི ཝིཉྙཱཡཏི.

པུཔྥཔཊནྟི ¶ ¶ པུབྦེ ཝུཏྟཔྤཀཱརཾ པུཔྥཔཊཾ པཱུརེནྟེན ཨེཀཱཔི པུཔྥཱཝལི པརིཝཏྟེཏྭཱ ན ཋཔེཏབྦཱ, ཝཱཡནྟེན ཨཉྙེཧི པཱུརིཏེཔི ཨེཀཱཔི པུཔྥཱཝལི ན པཱཏེཏབྦཱ, ཨིདཾ པཱུརིམཝཱཡིམཱནཾ ནཱནཱཀརཎཾ. ཨཱདིགྒཧཎེན པུཔྥཛཱལཾ སངྒཎྷཱཏི, ཏཾ ཀརོནྟསྶ ཛཱལཙྪིདྡགཎནཱཡ དུཀྐཊཾ ཧོཏི. ‘‘བྷིཏྟིཙྪཏྟབོདྷིཏྠམྦྷཱདཱིསུཔི ཨེསེཝ ནཡོ’’ཏི ཝུཏྟཏྟཱ ཚཏྟཱདཱིསུ ཙ པུཔྥཛཱལཾ ན དཱཏབྦཾ.

༤༧༠. ཨིམསྶ སིཀྑཱཔདསྶ སཱདྷཱརཎཏྟཱ ‘‘བྷིཀྑཱུནཾ བྷིཀྑུནཱིནཉྩཱ’’ཏི ཨཱཧ. བུདྡྷསྶཔཱིཏི ཨེཏྠ པི-སདྡོ སམྦྷཱཝནེ, ‘‘པཱུཛཏྠ’’ནྟི ཝཏྟབྦཾ, བུདྡྷསྶ པཱུཛཏྠཱཡཔི ཀཱཏུཾ ཝཱ ཀཱརཱཔེཏུཾ ཝཱ ན ཝཊྚཏཱིཏི ཨཏྠོ. དྷམྨསངྒྷརཏནཱནིཔི ཨུཔལཀྑཎཏོ སངྒཡ྄ཧནྟི. སེསེ ཀིམེཝ ཝཏྟབྦནྟི བྱཏིརེཀཏྠོ.

༤༧༡. ‘‘ཏཐཱ’’ཏི ཨིམིནཱ ‘‘སཡཾ པརེཧི ཝཱ ཀཱརཱཔེཏུཾ བྷིཀྑཱུནཉྩ བྷིཀྑུནཱིནཉྩ བུདྡྷསྶཔཱི’’ཏི ཨནནྟརགཱཐཱཡ ཝུཏྟམཏིདིསཏི. ཀལམྦཀནྟི དྭིནྣཾ དྷནུཀཱནམནྟརེ ཨོལམྦཀདཱམཾ. ཡཐཱཧ ཨཊྛཀཐཱཡཾ ‘‘ཀལམྦཀོཏི ཨཌྜྷཙནྡནཱགདནྟནྟརེ གྷཊིཀཱདཱམཨོལམྦཀོ ཝུཏྟོ’’ཏི (པཱརཱ. ཨཊྛ. ༢.༤༣༡). ཨེཏྠ ཙ གྷཊིཀཱདཱམཨོལམྦཀོ ནཱམ ཨནྟེ གྷཊིཀཱཀཱརཡུཏྟོ ཡམཀདཱམཨོལམྦཀོ. ཀཱཏུནྟི བནྡྷིཏུཾ ན ཝཊྚཏཱིཏི ཡོཛནཱ. ཨེཀེཀཔུཔྥདཱམཾ པན ནིཀྑནྟསུཏྟཀོཊིཡཱ པབནྡྷིཏྭཱ ཨོལམྦིཏུཾ ཝཊྚཏི. པུཔྥདཱམདྭཡཾ སངྒྷཊིཏུཀཱམེནཔི ནིཀྑནྟསུཏྟཀོཊིཡཱཝ སུཏྟཀོཊི སངྒྷཊིཏུཾ ཝཊྚཏི. ཨཌྜྷཙནྡཀམེཝ ཝཱཏི ‘‘ཨཌྜྷཙནྡཱཀཱརེན མཱལཱགུཎཔརིཀྑེཔོ’’ཏི ཨཊྛཀཐཱཡ ཝུཏྟསརཱུཔཾ ཝཱ.

ཨེཏྠ ཙ ཨཌྜྷཙནྡཱཀཱརེན མཱལཱགུཎཔརིཀྑེཔོ ནཱམ ཨཌྜྷཙནྡཱཀཱརེན མཱལཱགུཎསྶ པུནཔྤུནཾ ཧརཎཔཙྩཱཧརཎཝསེན པཱུརེཏྭཱ པརིཀྑིཔནཾ. ཏེནེཝ ཏཾ པཱུརིམེ པཝིཊྛཾ. ཏསྨཱ ཨེཏམྤི ¶ ཨཌྜྷཙནྡཱཀཱརཾ པུནཔྤུནཾ ཧརཎཔཙྩཱཧརཎཝསེན པཱུརིཏཾ ན ཝཊྚཏི, ཨེཀཝཱརཾ པན ཨཌྜྷཙནྡཱཀཱརེན མཱལཱགུཎཾ ཧརིཏུཾ ཝཊྚཏཱིཏི ཝདནྟི. ཀཱཏུཾ ན ཝཊྚཏཱིཏི སམྦནྡྷོ. ‘‘ཏདུབྷཡམྤི པཱུརིམེཡེཝ པཝིཊྛ’’ནྟི (པཱརཱ. ཨཊྛ. ༢.༤༣༡) ཨཊྛཀཐཱཡཾ ཝུཏྟཾ. ཨཉྙེཧི པཱུརིཏནྟི ཨཉྙེཧི ཨཱཡཏཾ པསཱརེཏྭཱ པཱུརིཏཾ པུཔྥཔཊཾ. ཝཱཡིཏུམྤི ཙཱཏི ཏིརིཡཾ ཨེཀཔུཔྥཱཝལིམྤི ཝཱཡིཏུཾ ‘‘ན ཝཊྚཏཱི’’ཏི ཨིམིནཱཝ སམྦནྡྷོ.

༤༧༢. པིཊྛཀཱཙམཡནྟི ¶ ཏཎྜུལཔིཊྛཱདཱིཧི ཀཏཉྩེཝ ཀཱཙམཏྟིཀཱཡ ཙ ཀཏཾ པུཔྥདཱམཾ. བྷེཎྜུཔུཔྥམཡམྤི ཙཱཏི བྷེཎྜུདཎྜཀེཧི མལླིཀཱསུམནཙམྤཀཱདིསདིསཾ ཀཏྭཱ ཚིདྡེཧི ཀཏདཱམཉྩ. ‘‘གེཎྜུཔུཔྥམཡ’’ནྟིཔི ལིཁནྟི. ཁརཔཏྟམཡནྟི ཨེཏྠ ཁརཔཏྟཾ ནཱམ ཀུངྐུཊྛཁཙིཏཾ པུཔྥཔཊནྟི ཝདནྟི. ཀཱཏུནྟི གནྠནགནྠཱཔནཱདཱིནི ཀཱཏུཾ. བྷེཎྜུཁརཔཏྟདཱམཱནཾ པཊིཀྑིཏྟཏྟཱ ཙེལཱདཱིཧི ཀཏདཱམམྤི ན ཝཊྚཏི ཨཀཔྤིཡཱནུལོམཏྟཱཏི ཝདནྟི.

༤༧༣. ཧཱིརཱདཱིཧཱིཏི ཏཱལནཱལི༹ཀེརཧཱིརཱདཱིཧི. ཨཱདི-སདྡེན ཏིཎསལཱཀཱདིཾ སངྒཎྷཱཏི. པཊཱཀཏྠནྟི པཊཱཀཱཀཱརེན པཱུཛནཏྠཾ. ‘‘ཝིཛ྄ཛྷནྟསྶཱ’’ཏི ཨིམིནཱ ཀཎྚཀེཧི ཝིཛ྄ཛྷནཾ, ཧཱིརཱདཱིཧི ཨཱཝུཎནཉྩ སངྒཧིཏཾ.

༤༧༥. ཨསོཀཔིཎྜིཨཱདཱིནནྟི ཨསོཀཔུཔྥམཉྫརིཀཱདཱིནཾ. ཨཱདི-སདྡེན ཨཊྛཀཐཱཡཾ (པཱརཱ. ཨཊྛ. ༢.༤༣༡) ཨེཏེཧེཝ སདྡྷིཾ དསྶིཏཾ ཛཱལཝིཏཱནཾ, ཚིདྡཱནི དསྶེཏྭཱ ཀཏཝེདིཀཱ, ནཱགདནྟཀཾ, པུཔྥཙངྐོཊཀཱཔིདྷཱནཾ, ཏཱལཔཎྞཝལཡཱདིཉྩ སངྒཎྷཱཏི. དྷམྨརཛྫུཡཱཏི ཨེཏྠ སཱརཏྠདཱིཔནིཡཾ ‘‘དྷམྨརཛྫུ ནཱམ ཙེཏིཡཾ ཝཱ བོདྷིཾ ཝཱ པུཔྥཔཝེསནཏྠ ཨཱཝཛྫིཏྭཱ བདྡྷརཛྫཱུ’ཏི མཧཱགཎྛིཔདེ, མཛ྄ཛྷིམགཎྛིཔདེ ཙ ཝུཏྟཾ, ཏསྨཱ ཏཐཱ བདྡྷཱཡ རཛྫུཡཱ ཙེཏིཡསྶ ཙ ཨནྟརེ པུཔྥཱནི པཝེསེཏུཾ ཝཊྚཏཱིཏི ¶ ཝིཉྙཱཡཏི. གཎྛིཔདེ པན ‘དྷམྨརཛྫུནྟི སིཐིལཝཊྚིཏཾ རཛྫུཾ ཀཏྭཱ བོདྷིཾ ཝཱ ཙེཏིཡཾ ཝཱ པརིཀྑིཔིཏྭཱ དྷམྨཱསནེ ཝཱ ལམྦིཏྭཱ ཏཏྠ པུཔྥཱནི པཝེསེནྟཱི’ཏི ཝུཏྟཾ, ཏསྨཱ སིཐིལཝཊྚིཏཱཡ རཛྫུཡཱ ཨནྟརེཔི པུཔྥཱནི པཝེསེཏུཾ ཝཊྚཏཱིཏི ཝིཉྙཱཡཏི, ཝཱིམཾསིཏྭཱ ཡུཏྟཏརཾ གཧེཏབྦཾ. ཨུབྷཡཏྠཱཔི པནེཏྠ ནེཝཏྠི ཝིརོདྷོཏི ཨམྷཱཀཾ ཁནྟཱི’’ཏི (སཱརཏྠ. ཊཱི. ༢.༤༣༡) ལིཁིཏཾ.

༤༧༦. ཝིཛ྄ཛྷནྟསྶཔཱིཏི པི-སདྡེན དྷམྨཱསནཝིཏཱནཱདཱིསུ པུཔྥཔཱུཛནཏྠཾ སཡཾ ཀཎྚཀཧཱིརཱདིཔྤཝེསནཾ སངྒཎྷཱཏི. ‘‘ཝིཏཱནཱདཱིསུ པུཔྥཔཱུཛནཏྠཾ ཀཎྚཀཧཱིརཱདིཔྤཝེསནཾ ན ཝཊྚཏཱི’ཏི ཨིདཾ ཨཊྛཀཐཱཙརིཡཔྤམཱཎཏོ གཧེཏབྦ’’ནྟི སཱརཏྠདཱིཔནིཡཾ ཝུཏྟཾ.

༤༧༧. ཀཔྤིཡཝཙནཾ ནཱམ ‘‘ཨེཝཾ ཛཱན, ཨེཝཾ ཀཏེ སོབྷེཡྻ, ཡཐཱ ཨེཏཱནི པུཔྥཱནི ན ཝིཀིརིཡནྟི, ཏཐཱ ཀརོཧཱི’’ཏིཨཱདི (པཱརཱ. ཨཊྛ. ༢.༤༣༡) ཨཊྛཀཐཱགཏཾ ཀཔྤིཡཝཙནཾ. ཝཏྠུཔཱུཛནེཏི རཏནཏྟཡཔཱུཛནེ. ནིམིཏྟཱདཱིསུ ནིམིཏྟཾ ནཱམ པུཔྥཱནི ཙ གནྠནཝཱཀེ ¶ ཙ གཧེཏྭཱ གནྠིཏུཾ ཛཱནནྟཱནཾ སམཱིཔེ ཋཔནཾ. ཨོབྷཱསོ ནཱམ ‘‘ཏུམྷེཧི པིལ༹ནྡྷིཏཀུསུམཱནི ཀསྨཱ ན ཝིཀིརནྟཱི’’ཏི ཝུཏྟེ ‘‘གནྠིཏཏྟཱ’’ཏི ཙེ ཝདཏི, ནནུ པཱུཛནཀཔུཔྥཱནི གནྠིཏུཾ ན ཝཊྚཏཱིཏིཨཱདིཝཙནཱནི. པརིཡཱཡོ ནཱམ པཎྜིཏེཧི པུཔྥཱནི ཡཐཱ ན ཝིཀིརིཡནྟི, ཏཐཱ གནྠིཏྭཱ པཱུཛེཏུཾ མནཱཔནྟིཨཱདིཝཙནཾ. པཀཱསིཏཱ ཨཊྛཀཐཱཡཾ.

༤༧༨. ‘‘ཀུལཱནི དཱུསེཏི པུཔྥེན ཝཱ’’ཏིཨཱདིཔཱཋེ (པཱརཱ. ༤༣༧) ‘‘ཝེཛྫིཀཱཡ ཝཱ ཛངྒྷཔེསནིཀེན ཝཱ’’ཏི (པཱརཱ. ༤༣༧) ཝུཏྟཾ ཝེཛྫཀམྨཱདིཾ ཀུལདཱུསནཏོ ཝིསུཾ ཀཏྭཱ ‘‘ན ཀེཝལཾ…པེ… ཀུདཱཙན’’ནྟི ཀསྨཱ ཝུཏྟནྟི? ཝིསུཾ ཀཱཏུཾ ན ཝུཏྟཾ. ཡོཛནཱ པནེཏྠ ཨེཝཾ ཝེདིཏབྦཱ ¶ ‘‘ན ཀེཝལམིདམེཝ ཝུཏྟཔྤཀཱརཾ པུཔྥདཱནཱདིཀུལདཱུསནཾ ཀུདཱཙནཾ ཨཀཏྟབྦཾ, ཨཐ ཁོ ཝེཛྫཀམྨཱདི ཀུལདཱུསནམྤི ཀུདཱཙནཾ ན ཀཏྟབྦ’’ནྟི. ཝེཛྫཀམྨཱདཱིཏི ཨེཏྠ ཨཱདི-སདྡེན ཝཀྑམཱནཔརིཏྟོདཀསུཏྟདཱནཨནཱམཊྛཔིཎྜདཱནདཱུཏེཡྻཛངྒྷཔེསནིཀེ སངྒཎྷཱཏི.

༤༧༩. ‘‘ཀུདཱཙནཾ ན ཀཏྟབྦ’’ནྟི སཱམཉྙེན ནིསེདྷེཏྭཱ ཨིདཱནི ‘‘ཀཏྟབྦ’’མིཙྩཱདིནཱ ཨཔཝཱདཝིདྷིཾ དསྶེཏི. པཉྩནྣཾ སཧདྷམྨིནནྟི བྷིཀྑུབྷིཀྑུནིསིཀྑམཱནསཱམཎེརསཱམཎེརཱིནཾ པཉྩནྣཾ སཧ སདྡྷིཾ ཙརིཏབྦོ པབྦཛྫཱསཱསནདྷམྨོ ཨེཏེསཾ ཨཏྠཱིཏི ‘‘སཧདྷམྨིཀཱ’’ཏི སངྑཾ གཏཱནཾ. ཨཀཏཝིཉྙཏྟིཾ ཀཏྭཱཔཱིཏི ཨཉྙཱཏཀཨཔྤཝཱརིཏེ བྷེསཛྫཾ ཡཱཙིཏྭཱཔི ‘‘ཝདེཡྻཱཐ བྷནྟེ ཡེནཏྠོ’’ཏི ཨེཝཾ ཨཀཏཊྛཱནེ ཝིཉྙཏྟི ཨཀཏཝིཉྙཏྟི. ཨཏྟནོ དྷནེཏི སསནྟཀཝིསཡེ.

༤༨༠. ‘‘ཏཐཱ’’ཏི སཧདྷམྨིཀཱནཾ ཝུཏྟམཏིདིསཏི. ཏདུཔཊྛཱཀཛནྟུནོཏི ཏེསཾ དྭིནྣཾ མཱཏཱཔིཏཱུནཾ ཝེཡྻཱཝཙྩཀརསྶ. བྷཎྜུཀསྶཱཏི གིཧིལིངྒེ ཋིཏསྶཱཔི པབྦཛྫཱཔེཀྑསྶ. ཨཏྟནོ ཝེཡྻཱཝཙྩཀརསྶཔཱིཏི ཨཏྟནོ ཀམྨཀརསྶཔི. ཨེཏྟཀཱནཉྩ ཛནཱནཾ པཉྩསཧདྷམྨིཀཱནཾ ཝིཡ ཨཀཏཝིཉྙཏྟིཡཱཔི བྷེསཛྫཾ ཀཱཏབྦནྟི ཝུཏྟཾ ཧོཏི.

༤༨༡. ཛེཊྛབྷཱཏཱཏི ཨཏྟནོ པུབྦཛོ བྷཱཏཱ. ཀནིཊྛོཏི ཨནུཛོ བྷཱཏཱ. ཏཐཱ བྷགིནིཡོ དུཝེཏི ཛེཊྛཀནིཊྛཱ དྭེ བྷགིནིཡོ. ཙཱུལ༹མཱཏཱཏི མཱཏུ ཀནིཊྛཱ. ཙཱུལ༹པིཏཱཏི པིཏུ ཀནིཊྛོ. མཧཱམཱཏཱཏི མཱཏུ ཛེཊྛཱ. མཧཱཔིཏཱ པིཏུ ཛེཊྛབྷཱཏཱ.

༤༨༢. པིཏུཙྪཱཏི པིཏུབྷགིནཱི ཛེཊྛཀནིཊྛཱ. མཱཏུལོཏི མཱཏུ བྷཱཏཱ. ཛེཊྛཀནིཊྛེ དྭེ པིཏུཙྪཱ ¶ , དྭེ མཱཏུལེ ¶ ཙ ཨེཀཏོ ཀཏྭཱ ‘‘དསཱ’’ཏི ཝུཏྟཾ. བྷེསཛྫཾ ཀཱཏུཾ ཝཊྚཏཱིཏི སམྦནྡྷོ.

༤༨༤. ‘‘དསྶནྟི མེ ཨིམེ’’ཏི ཨཱབྷོགཾ ཀཏྭཱ ཝཱ དཱཏབྦནྟི ཡོཛནཱ.

༤༨༥. ཨེཏེསཾ དསནྣཾ ཉཱཏཱིནཾ. ཡཱཝ སཏྟམཱ ཀུལཱཏི ཨེཏྠ ཀུལཔརིཙྪེདོ ཀཐཾ གཧེཏབྦོཏི? ‘‘སཔུཏྟདཱརཾ བྷཱཏུ ཀུཊུམྦཾ ཨེཀཾ ཀུལཾ, ཨེཝཾ ཏསྶ པུཏྟསྶ ཝཱ དྷཱིཏུ ཝཱ ཀུཊུམྦཾ ཨེཀཾ ཀུལ’’ནྟི ཨེཝམཱདིནཱ ནཡེན ཡཱཝ སཏྟམཱ ཀུལཔརིཝཊྚཱ གཧེཏབྦཱ. ‘‘སཔུཏྟཔཏིབྷགིནིཡཱ ཀུཊུམྦཾ ཨེཀཾ ཀུལཾ, ཏཐཱ ཏསྶ པུཏྟསྶ ཝཱ དྷཱིཏུ ཝཱ ཀུཊུམྦཾ ཨེཀཾ ཀུལ’’ནྟིཨཱདིནཱ ནཡེན ཡཱཝ སཏྟམཱ ཀུལཔརིཝཊྚཱ གཧེཏབྦཱ. ཙཱུལ༹མཱཏཱདཱིནམྤི ཀུལཔརམྤརཱ ཨིམིནཱ ནིཡཱམེན གཧེཏབྦཱཏི ཝདནྟི. ཀུལདཱུསནཾ ན རཱུཧཏཱིཏི ‘‘དཱཏུཾ པུཔྥཾ པནཉྙསྶ, ཨཱགཏསྶེཝ ཉཱཏིནོ’’ཏིཨཱདིནཱ (ཝི. ཝི. ༤༤༣) ནཡེན ཀཐིཏཝིདྷིནཱ ཨེཏེསུ པཝཏྟནྟསྶ ཀུལདཱུསནཾ ན རུཧཏཱིཏི ཝུཏྟཾ ཧོཏི.

༤༨༦. བྷཱཏུཛཱཡཱཏི ཨཏྟནོ ཛེཊྛསྶ ཝཱ ཀནིཊྛསྶ ཝཱ བྷཱཏུ བྷརིཡཱ. བྷགིནིསཱམིཀོཏི ཨཏྟནོ ཛེཊྛཱཡ ཝཱ ཀནིཊྛཱཡ ཝཱ བྷགིནིཡཱ སཱམིཀོ.

༤༨༧. བྷཱཏུནོཏི ཛེཊྛསྶ, ཀནིཊྛསྶ ཙ བྷཱཏུནོ. ཨནུ པཙྪཱ ཛཱཏཱཏི ཨནུཛཱ, ཀནིཊྛབྷགིནཱི. ‘‘ཨནུཛཱ’’ཏི ཨུཔལཀྑཎནྟི ཛེཊྛཱཡཔི སངྒཧོ. ཛེཊྛཀནིཊྛབྷཱཏཱུནཾ བྷརིཡཱ ཙ ཛེཊྛཀནིཊྛབྷགིནཱིནཾ སཱམིཀཱ ཙ སཙེ ཨཉྙཱཏཀཱ ཧོནྟཱིཏི ཡོཛནཱ. དེཐཱཏི ཨེཏྠ ‘‘ཨིམཾ བྷེསཛྫ’’ནྟི པཱཋསེསོ.

༤༨༨. ཏེསམྤི ¶ བྷཱཏུབྷགིནཱིནཾ. ‘‘པུཏྟཱན’’ནྟི ཨིམིནཱ དྷཱིཏཱུནམྤི སངྒཧོ. ཀཏྭཱཏི ཝཏྭཱ. ཏུམྷཱཀཾ མཱཏཱཔིཏཱུནཾ དེཐཱཏི ཨེཏྠཱཔི ‘‘ཨིམཾ བྷེསཛྫ’’ནྟི པཀརཎཏོ ལབྦྷཏི. མཱཏཱཔིཏཱུནནྟི ཨུབྷཡསངྒཱཧཀཝཙནཏོ ‘‘ཏུཡ྄ཧཾ མཱཏུ ཝཱ, ཏུཡ྄ཧཾ པིཏུ ཝཱ’’ཏི ཡཐཱསམྦྷཝཾ ཝིསུཾ ཝིསུཉྩ ཝཏྟབྦཾ. ཏེསནྟི ཙ ཏུམྷཱཀནྟི ཙ སཱམིཝཙནཾ. པུཏྟཱནནྟི ཙ མཱཏཱཔིཏཱུནནྟི ཙ སམྤདཱནཝཙནཾ.

༤༨༩. བྷེསཛྫཀརཎཱརཧཱནཾ ¶ ཝཏྟབྦཏཱཡ ‘‘ཨཀལླཀོ’’ཏི ཨིདཾ ཨིསྶརཱདིཔདེཧི པཙྩེཀཾ ཡོཛེཏབྦཾ. ཨཀལླཀོཏི ཨཱཏུརོ. ཀལླཾ ཝུཙྩཏི སུཁཾ, ཏཾ ཨེཏསྶ ཨཏྠཱིཏི ཀལླཀོ, ན ཀལླཀོ ཨཀལླཀོ. ཉཱཏིཛནུཛ྄ཛྷིཏོ ཝཱཏི ཉཱཏིཛནེན པརིཙྩཏྟོ ཝཱ.

༤༩༠. ཨེཏེསཾ སབྦེསནྟི ཨིསྶརཱདིཨཱཏུརཱནཾ སབྦེསམེཏེསཾ ཛནཱནཾ. ‘‘སཱདྷུནཱ’’ཏི ཝཀྑམཱནཏྟཱ ཨཔཙྩཱསཱིསཏཱ སཏཱཏི ཨེཏྠ སཏཱཏི ཀིརིཡཱཔདཾ. ‘‘ཨིམསྨིཾ ཀཏེ ཨིམེ མཡ྄ཧཾ ཨེཝརཱུཔཾ དསྶནྟཱི’’ཏི ཨཏྟནོ ཨཏྠཱཡ པཙྩཱསཱིསནཾ ཨཀརོནྟེནཱཏི ཨཏྠོ. བྷིཀྑུསངྒྷསྶ ཨུཔཀཱརཏཾ པཙྩཱསཱིསནྟེན ཀཱཏུཾ ཝཊྚཏི. པཊིསནྠཱརོཏི ཨཱམིསཔཊིསནྠཱརོ, དྷམྨཔཊིསནྠཱརོཏི དུཝིདྷོ པཊིསནྠཱརོ. ཨེཏྠ ཨཱམིསཔཊིསནྠཱརོ གཡ྄ཧཏི. བྷེསཛྫཾ ཨཱམིསེནཔི ཧོཏཱིཏི དྷམྨཀཐཱཡ སངྒཧོཔི ཡུཛྫཏེཝ. པཊིསནྠརཎཾ པཊིསནྠཱརོ. པཊིལདྡྷཱམིསསྶ ཙ དྷམྨསྶ ཙ ཏེསུ ཙ ཨཏྟནི ཙ པཏིརཱུཔེནཱཀཱརེན སམཾ ཨཏྠརཎཾ པཝཏྟནནྟི ཨཏྠོ.

ཨཔརོ ནཡོ – ཨཱམིསསྶ ཙ དྷམྨསྶ ཙ ཨལཱབྷེན ཨཏྟནོ, པརསྶ ཙ ཨནྟརེ སམྦྷཝནྟསྶ ཚིདྡསྶ ཝིཝརསྶ བྷེདསྶ པཊིསནྠརཎཾ པིདཧནཾ སངྒཧཎཾ པཊིསནྠཱརོ. ཨཡཉྷི ལོཀསནྣིཝཱསོ ཨལབྦྷམཱནེན ཨཱམིསེན ཙ དྷམྨེན ¶ ཙཱཏི དྭཱིཧི ཚིདྡོ, ཏསྶ ཏཾ ཚིདྡཾ ཡཐཱ ན པཉྙཱཡཏི, ཨེཝཾ པཱིཋསྶ ཝིཡ པཙྩཏྠརཎེན ཨཱམིསེན, དྷམྨེན ཙ པཊིསནྠརཎཾ ‘‘ཨཱམིསཔཊིསནྠཱརོ, དྷམྨཔཊིསནྠཱརོ’’ཏི ཝུཙྩཏཱིཏི. སཱདྷུནཱཏི སཱམཱིཙིཔྤཊིཔནྣཏཱདིཨརིཡདྷམྨེ པཏིཊྛིཏུཀཱམེན ཨརིཡཱཙཱརེན བྷིཀྑུནཱཏི ཨཏྠོ. ‘‘ཨདྷུནཱ’’ཏི ཨིདཾ ཨིམིསྶཱ པཊིཔཏྟིཡཱ སབྦཀཱལཾ པཊིཔཛྫིཏབྦཏཱཡཔི པཱཔཛནཀཎྷཀསཾགཱམེ ཨིམསྨིཾ ཝིཔནྣཀཱལེ ཝིསེསེན ཨཔྤམཏྟེན པཝཏྟེཏབྦནྟི ཨདྷིཔྤཱཡེན ཝུཏྟཾ.

༤༩༡-༢. ཀེནཙཱིཏི ཨུཔལཀྑཎཏྟཱ ཨུཔཱསཀེན ཝཱ ཨུཔཱསིཀཱཡ ཝཱཏི ཨཏྠོ. ཧཏྠེནཱཏི ཧཏྠཱཝཡཝཱ ཨངྒུལིཡོ ཝུཏྟཱ སམུདཱཡེ པཝཏྟསྶ ཝོཧཱརསྶ ཨཝཡཝེ པཝཏྟནཏོ. ཀཏྭཱཏི ཨེཏྠ ‘‘པརིཏྟ’’ནྟི པཱཋསེསོ, ཀརོཏིསྶ ཀིརིཡཱསཱམཉྙེ ཝཏྟནཏོ བྷཎིཏྭཱཏི ཨཏྠོ. ཏེསམེཝ ཙ སནྟཀནྟི པརིཏྟཾ བྷཎཱཔེནྟཱནམེཝ སནྟཀཾ སུཏྟོདཀཾ. ཨེཝཾ ཝུཏྟཏྟཱ ‘‘ཨཏྟནོ སུཏྟོདཀཾ ཨཱཧརིཏྭཱ པུཉྙཏྠཱཡ ཨིདཾ ཧཏྠེན ཙཱལེཏྭཱ, ཨཱམསིཏྭཱ ཝཱ པརིཏྟཾ བྷཎཐཱ’’ཏི ཝུཏྟེ ཀེནཙི པརིཏྟོདཀཾ སུཏྟཾ ཀཱཏབྦཾ. ཀེནཙི ‘‘པརིཏྟོདཀསུཏྟཱནི དེཐཱ’’ཏི ཝུཏྟེ ¶ བྷིཀྑུནཱ ཏེསམེཝ སནྟཀཾ ཛལཾ ཧཏྠེན ཙཱལེཏྭཱ སུཏྟཀཾ མདྡིཏྭཱ པརིཏྟཾ ཀཏྭཱ དཱཏབྦནྟི ཡོཛནཱ.

༤༩༣. ཨནཱམཊྛོཔཱིཏི ཧཏྠེན ཨནཱམསིཏོཔི, ཨཔབྦཛིཏསྶ ཧཏྠཏོ ལདྡྷཱ ཨཏྟནཱ ཝཱ ཨཉྙེན ཝཱ བྷིཀྑུནཱ ཨགཧིཏགྒོཏི ཝུཏྟཾ ཧོཏི.

༤༩༤. ཙོརདཱམརིཀསྶ ཙཱཏི གཱམཝིལོཔཀསྶ ཙོརསྶ ཙ.

༤༩༥. པཎྜུཔལཱསསྶཱཏི ¶ པབྦཛྫཱཔེཀྑསྶ བྷཎྜུཀསྶ, པཎྜུཝཎྞོ པལཱསོ པཎྜུཔལཱསོ, སོ ཝིཡཱཏི པཎྜུཔལཱསོ, ཏཾསདིསེ ཏབྦོཧཱརོ ‘‘སཱིཧོཡཾ མཱཎཝཀོ’’ཏིཨཱདཱིསུ ཝིཡ. ཡཐཱ པཎྜུཔལཱསོ རུཀྑཱ པཏནཱབྷིམུཁོ ཏིཊྛཏི ནིཡཏཔཱཏོ, ཨེཝམཡམྤི གིཧིལིངྒཏོ ཨཔགམཱབྷིམུཁོ པབྦཛྫཱུཔགམནེ ནིཡཏོཝ ཏིཊྛཏཱིཏི ‘‘པཎྜུཔལཱསསདིསོ’’ཏི ཝེདིཏབྦོ.

ཐཱལཀེཔི ཙཱཏི ཨཏྟནོ པརིབྷོགཐཱལཀེཔི. ཨིདཉྩ ནིདསྶནམཏྟཾ, པཏྟོཔི གཧིཏོཡེཝཱཏི དཊྛབྦཾ. ཋཔེཏྭཱཏི ཨེཏྠ ‘‘པིཎྜཔཱཏ’’ནྟི ཨུཔཡོགཝསེན སམྦནྡྷནཱིཡཾ. ཏཾ པནཱཏི ཨཏྟནོ པརིབྷོགཐཱལཀེ ཋཔེཏྭཱ དིཡྻམཱནཾ པིཎྜཔཱཏཾ. ‘‘མཱཏཱཔིཏཱུན’’ནྟི (པཱརཱ. ཨཊྛ. ༢.༤༣༦-༤༣༧) ཨཊྛཀཐཱཝཙནཏོ ཨེཏྠ ‘‘པིཏུནོ’’ཏི ཨུཔལཀྑཎནྟི མཱཏཱཔིཏཱུནམྤཱིཏི ཨཏྠོ. སཙེ ཨེཀསེསོ ཨིཙྪིཏོ, ‘‘པིཏཱུནམྤཱི’’ཏི པཱཋོ ཡུཛྫཏི.

༤༩༦. ཛངྒྷཔེསནིཡནྟི གིཧཱིནཾ དཱུཏེཡྻསཱསནཧརཎཀམྨཾ ‘‘ཛངྒྷཔེསནིཡ’’ནྟི ཝུཙྩཏི. ཨཔི ཙཱཏི ཝུཏྟསམུཙྩཡོ.

༤༩༧. ཨེཏྟཱཝཏཱ སཱམཉྙཝིདྷིཾ དསྶེཏྭཱ ཨིདཱནི ཨཔཝཱདཝིདྷིཾ དསྶེཏུཾ ‘‘བྷཎྜཱུ’’ཏིཨཱདི ཝུཏྟཾ. སཱསནནྟི སནྡེསཾ. ཧརིཏུནྟི ཝུཏྟཊྛཱནཾ ནེཏུཾ.

༤༩༨. ཨཊྛཝིདྷེནཔཱིཏི པུཔྥདཱནཱདིཛངྒྷཔེསནིཡཱཝསཱནེན ཨཊྛཔྤཀཱརེནཔི. ཀུལདཱུསནཀམྨེནཱཏི ཀུལཱནཾ སདྡྷཱཝིནཱསཀེན ཨནཱཙཱརཀམྨེན. ལདྡྷནྟི ཨེཏྠ ‘‘བྷོཛན’’ནྟི ཨིདཾ ‘‘བྷུཉྫིཏུ’’ནྟི ཙ ‘‘ཨཛ྄ཛྷོཧཱརེསཱུ’’ཏི ཙ ཝུཏྟཏྟཱ, ‘‘སེསེསུཔི ཨཡཾ ནཡོ’’ཏི ཝཀྑམཱནཏྟཱ ¶ ཙ ལབྦྷཏི. པཉྩསུ སཧདྷམྨིཀེསུ ཨེཀེནཱཔི ཀུལདཱུསནེན ཀམྨེན ཨུཔྤཱདིཏཔཙྩཡོ ¶ སབྦེསམྤི ན ཝཊྚཏཱིཏི ‘‘པཉྩནྣཾ སཧདྷམྨཱིནཾ ན ཙ ཝཊྚཏཱི’’ཏི སབྦཔཊིསེདྷོ ཀཏོ.

༤༩༩. སབྦཏྠཱཏི ‘‘ཨཛ྄ཛྷོཧཱརེསཱུ’’ཏི ཨེཏསྶ ཝིསེསནཾ, སབྦེསཱུཏི ཨཏྠོ. ‘‘ཨཛ྄ཛྷོཧཱརེ ཨཛ྄ཛྷོཧཱརེ’’ཏི ཨཊྛཀཐཱགཏཾ སངྒཎྷཱཏི. ‘‘ཨཛ྄ཛྷོཧཱརེསཱུ’’ཏི ཨིདཾ པརགལཾ ཀཱཏབྦཾ ཨཱམིསཾ སནྡྷཱཡཱཧ. སེསཔཙྩཡེ པཊིཙྩ པརིབྷོགཝསེནེཝ ‘‘སེསེསཱུ’’ཏི ཨཱཧ, ཨནཛ྄ཛྷོཧརཎཱིཡེསུ སེསཔཙྩཡེསཱུཏི ཨཏྠོ. ཀིཾ ཝུཏྟཾ ཧོཏི? ཙཱིཝརཔཙྩཡེ སརཱིརཏོ མོཙེཏྭཱ པརིབྷོགགཎནཱཡ, སེནཱསནཔཙྩཡེ ནིབྦཀོསེ ཨུདཀཔཏནཊྛཱནཏོ ཨབྦྷནྟརཾ པཝིཊྛཝཱརགཎནཱཡ, མཉྩཔཱིཋཱདིསེནཱསནེ ནིསཱིདནསཡནཱདིཔརིབྷོགགཎནཱཡ, ཨནཛ྄ཛྷོཧརིཏྭཱ ཨབྦྷཉྫནཱལེཔནཱདིཝསེན ཀཱཏབྦབྷེསཛྫེ སརཱིརཏོ མོཙེཏྭཱ ཝཱརགཎནཱཡཱཏི ཝུཏྟཾ ཧོཏི. ཨཡཾ ནཡོཏི ‘‘དུཀྐཊཾ པརིདཱིཔིཏ’’ནྟི ཝུཏྟོ ནཡོ.

༥༠༠. ‘‘ཨུཔྤནྣཔཙྩཡཱ’’ཏི ཨིདཾ ‘‘ཨབྷཱུཏཱརོཙནེནཱ’’ཏི ཨིདམཔེཀྑིཏྭཱ ཝུཏྟཾ. ‘‘ཀཏྭཱ རཱུཔིཡཝོཧཱར’’ནྟི ཨིདམཔེཀྑིཏྭཱ ‘‘ཨུཔྤཱདིཏཔཙྩཡཱ’’ཏི ཡོཛནཱ ཀཱཏབྦཱ. རཱུཔིཡཝོཧཱརཝིནིཙྪཡོ ནིསྶགྒིཡེ ཨཱཝི བྷཝིསྶཏི. ཨབྷཱུཏཱརོཙནཝིནིཙྪཡོ ཙཏུཏྠཔཱརཱཛིཀེ ཝུཏྟོ. སམཱནཱཏི པཀཱསིཏཱཏི ཀུལདཱུསནཀམྨེན ཨུཔྤཱདིཏཔཙྩཡེཧི སདིསཱཏི ཨཊྛཀཐཱཡཾ ཝུཏྟཱཏི ཨཏྠོ. ཨིམིནཱ ཏཏྠཱཔི ཝིནིཙྪཡོ ཨེཏྟཀོཡེཝཱཏི ཨཏིདིསཏི.

༥༠༡. ‘‘སཾསཱརཝཱསོ དུཀྑ’’ནྟི ཉཏྭཱ ནིབྦཱནཱདྷིགམེ མཱནསཾ བནྡྷིཏྭཱ ནིབྦཱནགཱམིནིཾ པཊིཔདཾ སནྡྷཱཡ སཱསནཱཝཏིཎྞེན སིཀྑཱཀཱམེན ཀུལཔུཏྟེན སེཝིཏཀྑཎེཡེཝ ཛཱིཝིཏཧརཎསམཏྠཝིསམིསྶཔཱུཏིམུཏྟཾ ¶ ཝིཡ ཝཛྫནཱིཡཾ ཨཀཔྤིཡཔཙྩཡཾ ཨུཔྤཱདེཏུཾ ཀརིཡམཱནཾ ཨཀཔྤིཡོཔཱཡཔྤཀཱརཾ ཨེཀཏོ དསྶེཏུམཱཧ ‘‘ཝིཉྙཏྟཱི’’ཏིཨཱདི. ཏཏྠ ཝིཉྙཏྟི ཡཱཙནཱ. ཨནུཔྤདཱནནྟི པིཎྜཔཊིཔིཎྜདཱནཾ. ཝེཛྫཀམྨཾ ཝུཏྟནཡམེཝ. ཨནེསནཾ ནཱམ ཨཔྤིཙྪཏཱཡ ཨནནུརཱུཔེན པཡོགེན པཙྩཡཔརིཡེསནཾ.

པཱརིབྷཊྱཏཱ ནཱམ ཨིསྶརེ སེཝིཏུཾ པརིཝཱརེཏྭཱ ཏེསཾ ཙིཏྟརུཙིཏཾ ཝིལཔནྟཱནཾ པརིབྷཊཱནཾ སེཝཀཛནཱནཾ ཝིཡ ལཱབྷཏྠིཀསྶ བྷིཀྑུནོ པཙྩཡདཱཡཀེསུ པཝཏྟཱིཏི ཝེདིཏབྦོ. པརི སམནྟཏོ བྷཊཏི སེཝཏཱིཏི པརིབྷཊོ, ཨིསྶརཛནཱནཾ སམཱིཔཱཝཙརོ སེཝཀཛནོ, པརིབྷཊོ ཝིཡཱཏི ¶ པརིབྷཊོ, བྷིཀྑུ, པརིབྷཊསྶ ཀམྨཾ པཱརིབྷཊྱཾ, ཏསྶ བྷཱཝོ པཱརིབྷཊྱཏཱ. ཨཐ ཝཱ པརིབྷཊཏི དྷཱཏི ཝིཡ ཀུལདཱརཀེ ཨངྐེ ཀརཎཱདིཝསེན དྷཱརེཏཱིཏི པརིབྷཊོ, པརིབྷཊསྶ ཀམྨཾ པཱརིབྷཊྱཾ, ཏསྶ བྷཱཝོ པཱརིབྷཊྱཏཱཏི ལཱབྷཱསཱཡ བྷིཀྑུནོ ཀུལདཱརཀེསུ ཨནནུལོམིཀཱ པཝཏྟི ཝུཙྩཏི.

མུགྒསཱུཔཏཱ ནཱམ པཀྐམུགྒཱ ཝིཡ པཀྐཱཔཀྐབཱིཛམིསྶཱ ལཱབྷཱསཱཡ དཱཡཀཱནཾ ཙིཏྟཱརཱདྷནཏྠཱཡ སཙྩཱལཱིཀམིསྶཀཏཱ. ཡཐཱ མུགྒེསུ པཙྩམཱནེསུ ཀོཙིདེཝ ན པཙྩཏི, བཧཝོ པཙྩནྟི, ཨེཝམེཝ ཡསྶ དཱཡཀེཧི སདྡྷིཾ ཀཐེནྟསྶ ཀིཉྩིདེཝ སཙྩཾ ཧོཏི, ཨསཙྩམེཝ བཧུཀཾ ཧོཏི, ཨཡཾ ཝུཙྩཏི མུགྒསཱུཔསདིསཏྟཱ ‘‘མུགྒསཱུཔོ’’ཏི, ཏསྶ ཀམྨཾ མུགྒསཱུཔཾ, ཏསྶ བྷཱཝོ མུགྒསཱུཔཏཱ. ཝཏྠུཝིཛྫཀཾ ནཱམ ཀཱུཔཝཏྠུགེཧཝཏྠུཨཱདཱིནཾ ཨཱཙིཀྑནཾ. ཝཏྠུཝིཛྫཱཡཀཱནཾ ཀཏཾ ཝཏྠུཝིཛྫཀཾ.

༥༠༢. ཛངྒྷཔེསནིཡཾ, དཱུཏཀམྨཉྩ ཝུཏྟནཡམེཝ. ཀུལདཱུསནནྟི ཝུཏྟཱཝསེསཾ. ཨབྷཱུཏཱརོཙནཉྩ ཝུཏྟནཡམེཝ. བུདྡྷཔཊིཀུཊྛནྟི ¶ བུདྡྷེཧི པཊིཀྐོསིཏཾ གརཧིཏཾ ཡཐཱཝུཏྟཾ མིཙྪཱཛཱིཝཉྩ ཨཝུཏྟཉྩ ཨངྒཝིཛྫཱནཀྑཏྟཝིཛྫཱཨུཀྐཱཔཱཏདིསཱཌཱཧབྷཱུམིཙཱལཱདིབྷེདཾ མིཙྪཱཛཱིཝནཱུཔཱཡཾ སབྦཾ. ཝིཝཛྫཡེཏི ཝིསམིཝ, གཱུཐམུཏྟཾ ཝིཡ ཙ ཨཱརཀཱ པརིཝཛྫེཡྻཱཏི ཨཏྠོ. ‘‘སིཀྑཱཀཱམོ ཀུལཔུཏྟོ’’ཏི སཱམཏྠིཡཱ ལབྦྷཏི.

༥༠༣. པཊིནིསྶཛྫཏོཔི ཏནྟི སམནུབྷཱསནཀམྨཏོ པུབྦེ ཝཱ ཉཏྟིཙཏུཏྠཱསུ ཀམྨཝཱཙཱསུ ཨནྟཀམྨཝཱཙཱཡ ཡྻ-ཀཱརཾ ཨཔྤཏྟཱཡ ཝཱ ཀུལདཱུསནཀམྨཾ པཛཧནྟསྶཱཏི ཝུཏྟཾ ཧོཏི. སངྒྷབྷེདསམནྟི པཋམསངྒྷབྷེདེན སམནྟི.

ཀུལདཱུསནཀཐཱཝཎྞནཱ.

༥༠༤. ‘‘ཛཱན’’ནྟི ཨིམསྶ ‘‘བྷིཀྑུནཱ’’ཏི ཨེཏསྶ ཝིསེསནཏྟཱ ཛཱནཏཱཏི གཧེཏབྦཾ. པཱལི༹ཡཱ ལིཁིཏེ སཱིཧལ༹གཎྛིཔདེ པན ཨེཝརཱུཔཾ ཨཱཔཏྟིཾ ཨཱཔནྣོསྨཱིཏི ཉཏྭཱཏི ཨཏྠོ ཝུཏྟོ. ཡཱཝཏཱིཧནྟི ཡཏྟཀཱནི ཨཧཱནི, ‘‘ཚཱདིཏཱ’’ཏི ཨིམིནཱ སམྦནྡྷོ, ཚཱདནཀིརིཡཱཨཙྩནྟསཾཡོགེ ཨུཔཡོགཝཙནཾ. ཚཱདིཏཱཏི ‘‘ཨཧཾ ཨིཏྠནྣཱམཾ ཨཱཔཏྟིཾ ཨཱཔནྣོ’’ཏི སབྲཧྨཙཱརཱིནཾ ཨནཱརོཙནདིཝསེན ¶ པཊིཙྪཱདིཏཱ. ཨཱཔཏྟཱིཏི སངྒྷཱདིསེསཱཔཏྟི. ཨཀཱམཱཏི ཨརུཙིཡཱཝ སངྒྷཱདིསེསཾ ཨཱཔཛྫིཏྭཱ ཨཀཏཔཊིཀམྨསྶ སགྒམོཀྑཱནཾ ཨནྟརཱཡཀརཏྟཱཏི ཨདྷིཔྤཱཡོ. པརིཝཏྠབྦནྟི པརིཝཱསཾ སམཱདཱཡ ཝཏྠབྦཾ. ཀིཏྟཀཾ ཀཱལནྟི ཨཱཧ ‘‘ཏཱཝཏཱིཧ’’ནྟི, ཏཏྟཀཱནི ཨཧཱནཱིཏི ཝུཏྟཾ ཧོཏི. ཨཱཔཛྫིཏྭཱ ཡཏྟཀཱནི ཨཧཱནི པཊིཙྪཱདེཏི, ཏཏྟཀཱནེཝ ཨཧཱནཱིཏི ཨཏྠོ.

༥༠༥-༦. ཨཱཔཏྟི ཀིཏྟཀེན པཊིཙྪནྣཱ ཧོཏཱིཏི ཨཱཧ ‘‘ཨཱཔཏྟི ཙཱ’’ཏིཨཱདི. ཏཏྠ ཨཱཔཏྟི ཙཱཏི སངྒྷཱདིསེསཱཔཏྟི ཙ. ཨནུཀྑིཏྟོ ཙཱཏི ཨུཀྑེཔནཱིཡཀམྨེན སཡཾ ཨནིསྶཱརིཏོ ¶ ཙ. པཧཱུ ཙཱཏི སཡཾ སབྲཧྨཙཱརཱིནཾ སནྟིཀཾ གནྟྭཱ ཨཱརོཙེཏུཾ པཧོཏི ཙ. ཨནནྟརཱཡིཀོ ཙཱཏི གམནཝིབནྡྷཀེན རཱཛཙོརཱདིཨནྟརཱཡེན ཝིརཧིཏོ ཙ. ཙཏུསྭ པཱིཏི ཨེཏྠ ‘‘ཨེཏེསཱུ’’ཏི སེསོ, ཨེཏེསུ ཙཏཱུསཱུཏི ཨཏྠོ. ཏཾསཉྙཱིཏི ཨཱཔཏྟིསཉྙཱི ཨནུཀྑིཏྟསཉྙཱི པཧུསཉྙཱི ཨནནྟརཱཡིཀསཉྙཱིཏི ཝུཏྟཾ ཧོཏི. ཏསྶ ཨེཝཾསཉྙིནོ ཨིམེསུ ཙཏཱུསུ ཏཐཱསཉྙིནོ པུགྒལསྶ. ཚཱདེཏུཀཱམཏཱཏི ཨཱཙརིཡཱདཱིསུ གཱརཝེན ཝཱ གརཧཱདིབྷཡཱ ཝཱ ‘‘ན ཨཱརོཙེསྶཱམཱི’’ཏི པཊིཙྪཱདེཏུཀཱམཏཱ ཙ. ཚཱདནནྟི ཏཐཱ ཙིནྟེཏྭཱ ‘‘ཨཧཾ ཨིཏྠནྣཱམཾ ཨཱཔནྣོ’’ཏི ཨཝཏྭཱ པཊིཙྪཱདནཉྩཱཏི ཨིམེཧི དསཧི ཨངྒེཧི. ‘‘བྷིཀྑུནཱ’’ཏི ཀཏྟུནིདྡེསཏྟཱ ཚནྣཱཏི ཨེཏྠ ཚཱདིཏཱཏི ཨཏྠོ. ཀཱལཝིདྷིཾ དསྶེཏི ‘‘ཨརུཎུགྒམནེནཱ’’ཏི, ཨཱཔཏྟིཨཱཔནྣདིཝསཾ ཁེཔེཏྭཱ ཨརུཎུཊྛཱནེན སདྡྷིཾ ཚནྣཱ ཧོཏཱིཏི ཨཏྠོ.

དྭེབྷཱཎཝཱརཝཎྞནཱ ནིཊྛིཏཱ.

༥༠༧. ཨེཝཾ པཊིཙྪནྣསངྒྷཱདིསེསཔཊིཀམྨཏྠཾ ‘‘ཨཀཱམཱ པརིཝཏྠབྦ’’ནྟི ཝིཧིཏསྶ པརིཝཱསསྶ ཀོ བྷེདོ, ཀོ པཝཏྟིཀྐམོཏི ཨཱཧ ‘‘ཏིཝིདྷོ’’ཏིཨཱདི. སོ པརིཝཱསོ ཏིཝིདྷོ དཱིཔིཏོཏི སམྦནྡྷོ. ཀེནཱཏི ཨཱཧ ‘‘ཏིཝིདྷཱཔེཏཙེཏསཱ’’ཏི. ‘‘ཏིསྶོ ཝིདྷཱ, སེཡྻོཧམསྨཱིཏི ཝིདྷཱ, སདིསོཧམསྨཱིཏི ཝིདྷཱ, ཧཱིནོཧམསྨཱིཏི ཝིདྷཱ’’ཏི (དཱི. ནི. ༣.༣༠༥) ཝུཏྟཝིདྷཱཡ མཱནནཱམདྷེཡྻཏོ ཏིཝིདྷམཱནཏོ ཨཔགཏཙིཏྟེན སམྨཱསམྦུདྡྷེནཱཏི ཨཏྠོ.

པཊིཙྪནྣཱ ཨཱཔཏྟི ཨེཏསྶཱཏི པཊིཙྪནྣོ. ཨརིསཱདཱིནཾ ཨཱགཏིགཎཏྟཱ ཏཏྠ པཀྑིཔནེན ཨ-ཀཱརཔཙྩཡོ དཊྛབྦོ. ཏེནེཝ ཝཀྑཏི ‘‘པཊིཙྪནྣཱཡ དཱཏབྦོ’’ཏིཨཱདི.

སུདྡྷནྟོཏི ¶ ¶ ‘‘ཨུབྷོ ཀོཊིཡོ སོདྷེཏྭཱ དཱཏབྦཔརིཝཱསོ སུདྡྷནྟོ ནཱམཱ’’ཏི པཱལི༹གཎྛིཔདེ ཝུཏྟཏྟཱ ཨུཔསམྤདཱཀཱལསངྑཱཏོ སུདྡྷོ པུབྦནྟོ, ཨཱརོཙིཏཀཱལསངྑཱཏོ སུདྡྷོ ཨཔརནྟོ ཙ པརིཝཱསསམཱདཱནཀཱལེ ཝཱ པརིཝསནཀཱལེ ཝཱ ཨུཔཔརིཀྑིཏྭཱ དིཊྛཱ སུདྡྷཱ ཨནྟཱ ཨནཱཔཏྟིཀཱལསངྑཱཏཱ ཨུབྷོ ཀོཊིཡོ ཨསྶཱཏི ཀཏྭཱ སུདྡྷནྟནཱམཀོ པརིཝཱསོ ཙ. ཨེཏྠ ཙ བྷེདཱདིཾ ཝཀྑཏི.

སམྨཱ དིཝསཱདཱིནཾ ཨོདྷཱནཾ པཀྑེཔོ ཡཏྠ སོ སམོདྷཱནོ, པརིཝཱསོ. དིཝསེསུ དིཝསེ ཝཱ ཨཱཔཏྟཱིསུ ཨཱཔཏྟིཡོ ཝཱ སབྦཱ ནཱནཱཝཏྠུཀཱ ཨཱཔཏྟིཡོ ཨེཀཏོ ཀཏྭཱ ཨོདྷཱཡ དཱཏབྦཔརིཝཱསོཏི ཨཏྠོ. ཨེཏྠཱཔི བྷེདཱདིཾ ཝཀྑཏི.

༥༠༨. ཏཏྲཱཏི ཏེསུ ཏཱིསུ པརིཝཱསེསུ. ‘‘ཡོ’’ཏི སེསོ. ཨིཏཱིཏི ཨེཝམཏྠོ དཊྛབྦོ. ཡོ པཊིཙྪནྣཔརིཝཱསོ, ཨཡནྟི ཨེཝཾ པཀཱསིཏོཏི ཡོཛནཱ.

༥༠༩-༡༠. པརིཝཱསདཱནཀཱལེ ཝུཙྩམཱནཱཡ ཀམྨཝཱཙཱཡ པདྷཱནལཀྑཎཾ དསྶེཏུམཱཧ ‘‘ཝཏྠུགོཏྟཝསེནཱ’’ཏིཨཱདི. ཏཏྠ ‘‘ཝཏྠཱུ’’ཏི སུཀྐམོཙནཱདིཀོ ཝཱིཏིཀྐམོ ཝུཙྩཏི. ཨཡམེཝ སུཀྐཝིསྶཊྛིཨཱདིཀཾ གཾ ཝཱཙཾ སཉྙཉྩ ཏཱཡཏི རཀྑཏཱིཏི ཀཏྭཱ ‘‘གོཏྟ’’ནྟི ཝུཙྩཏི. ཏཉྷི སཛཱཏིཡསཱདྷཱརཎཝིཛཱཏིཡཝིནིཝཏྟནཝསེན ཨཉྙཏྠ གནྟུཾ ཨདཏྭཱ ཝཱཙཾ སདྡཾ, ཏབྦིསཡཾ སཉྙཉྩ རཀྑཏི. ཨིདཾ ཝཏྠུགོཏྟདྭཡཝཱཙཀཾ སུཀྐཝིསྶཊྛིཀཱཡསཾསགྒཝིསེསཝཙནཉྩ ‘‘ནཱནཱཝཏྠུཀཱ’’ཏི སཱམཉྙཝཙནཉྩཱཏི ཨིམིནཱ ཝཙནདྭཡེནཱཏི ཝུཏྟཾ ཧོཏི. ཝུཏྟཉྷེཏཾ ཨཊྛཀཐཱཡཾ ‘‘སུཀྐཝིསྶཊྛིཾ ཀཱཡསཾསགྒ’ནྟིཨཱདིཝཙནེནཱཔི ‘ནཱནཱཝཏྠུཀཱཡོ’ཏིཨཱདིཝཙནེནཱཔི ཝཏྠུཙེཝ ¶ གོཏྟཉྩ སངྒཧིཏ’’ནྟི (ཙཱུལ༹ཝ. ཨཊྛ. ༡༠༢). ནཱམཱཔཏྟིཝསེན ཝཱཏི ཨེཏྠ སངྒྷཱདིསེསོཏི སཛཱཏིསཱདྷཱརཎནཱམཾ, ཨཱཔཏྟཱིཏི སབྦསཱདྷཱརཎནཱམནྟི དྭཱིཧི ནཱམེཧི ཏཾཏཾཝཱིཏིཀྐམཝསེན ཨཱཔཛྫིཏབྦཏོ ཏདེཝ ཨཱཔཏྟཱིཏི ཨེཝམུབྷིནྣཾ ནཱམཱཔཏྟཱིནཾ ཝསེན ཝཱཏི ཨཏྠོ.

ཀམྨཝཱཙཱ ཧི ཀཱཏབྦཱཏི ‘‘ཝཏྠུགོཏྟཝསེནཱཔཱི’’ཏི ཨེཏྠ ཨཔི-སདྡོ ‘‘ནཱམཱཔཏྟིཝསེན ཝཱ’’ཏི ཨེཏྠ སངྒྷཱདིསེསོཏི སཛཱཏིསཱདྷཱརཎནཱམཾ, ཨཱཔཏྟཱིཏི སབྦསཱདྷཱརཎནཱམནྟི དྭཱིཧི ནཱམེཧཱིཏི ཨིདཾ སམུཙྩིནོཏཱིཏི ཨུབྷཡཾ ཨེཀཏོ ཡོཛེཏྭཱ ཀམྨཝཱཙཱ ཀཱཏབྦཱཏི. ‘‘ནཱམཱཔཏྟིཝསེན ¶ ཝཱ’’ཏི ཨེཏྠ ཝིཀཔྤཏྠེན ཝཱ-སདྡེན, ‘‘ཨཧཾ བྷནྟེ སམྦཧུལཱ སངྒྷཱདིསེསཱ ཨཱཔཏྟིཡོ ཨཱཔཛྫིཾ ཨེཀཱཧཔཊིཙྪནྣཱཡོ’ཏི ཨེཝཾ ནཱམམཏྟཝསེན ཝཱ ཡོཛནཱ ཀཱཏབྦཱ’’ཏི ཨཊྛཀཐཱཡ ཝུཏྟཝིསེསནིཝཏྟནཏྠམཏྟསདྡཝསེན ཙ ཝཏྠུགོཏྟཝིརཧིཏེན ཀེཝལེན ནཱམཱཔཏྟིམཏྟེན པཡོཛེཏྭཱ ཀཱཏབྦཱཡེཝཱཏི ཝུཏྟཾ ཧོཏི. ཀམྨཝཱཙཱཡ ཀརཎཔྤཀཱརོ པན སམུཙྩཡཀྑནྡྷཀེ ཨཱགཏནཡེན ཨཱཔནྣཔུགྒལནཱམེན ཙ ཨེཀཱཧཔཊིཙྪནྣཱདིཝཙནེན ཙ ཡོཛེཏྭཱ དཊྛབྦོ. ཏསྶ དཱཏབྦོཏི ཡོཛནཱ. ‘‘པརིཝཱསོ’’ཏི པཀརཎཏོ ལབྦྷཏི, པཊིཙྪནྣཱཔཏྟིཀསྶ པུགྒལསྶ པརིཝཱསོ དཱཏབྦོཏི ཨཏྠོ.

ཏེན ཙཱཏི ལདྡྷཔརིཝཱསེན ཨནྟོསཱིམཱཡ ཨུཀྐུཊིཀཾ ནིསིནྣེན པགྒཧིཏཉྫལིནཱ བྷིཀྑུནཱ ཙ. སམཱདིཡིཏྭཱཏི ཨེཏྠཱཔི ‘‘ཝཏྟ’’ནྟི སཱམཏྠིཡཱ ལབྦྷཏི. ‘‘སམཱདཱནེཔྱཡཾ ནཡོ’’ཏི (ཝི. ཝི. ༥༡༤) ཝཀྑམཱནཏྟཱ ‘‘ཝཏྟཾ སམཱདིཡཱམི, པརིཝཱསཾ སམཱདིཡཱམཱི’’ཏི ཨིམེསཾ དྭིནྣཾ ཨཉྙཏརཾ ཝཱ དྭཡམེཝ ཝཱ ཏིཀྑཏྟུཾ ཝཏྭཱ པཱརིཝཱསིཀཀྑནྡྷཀེ ཝུཏྟཝཏྟཔཱུརཎཏྠཾ སམཱདིཡིཏྭཱཏི ཝུཏྟཾ ཧོཏི. ཨཱདིཏོ སངྒྷསྶ ཨཱརོཙེཏབྦནྟི ཡོཛནཱ. ཏཐཱ ¶ ཝཏྟཾ སམཱདིཡིཏྭཱ ནིསིནྣེན པཋམཾ སངྒྷསྶ ‘‘ཨཧཾ བྷནྟེ ཨེཀཾ ཨཱཔཏྟིཾ ཨཱཔཛྫིཾ སཉྩེཏནིཀཾ སུཀྐཝིསྶཊྛིཾ ཨེཀཱཧཔཊིཙྪནྣཾ, སོཧཾ སངྒྷཾ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ ཨེཀཱཧཔཊིཙྪནྣཱཡ ཨེཀཱཧཔརིཝཱསཾ ཡཱཙིཾ, ཏསྶ མེ སངྒྷོ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ ཨེཀཱཧཔཊིཙྪནྣཱཡ ཨེཀཱཧཔརིཝཱསཾ ཨདཱསི, སོཧཾ པརིཝསཱམི, ཝེདཡཱམཱཧཾ བྷནྟེ, ཝེདཡཏཱིཏི མཾ སངྒྷོ དྷཱརེཏཱུ’’ཏི ཨེཝཾ ཨཱརོཙེཏབྦཾ.

‘‘ཨིམཉྩ པནཏྠཾ གཧེཏྭཱ ཡཱཡ ཀཱཡཙི ཝཱཙཱཡ ཨཱརོཙེཏུཾ ཝཊྚཏིཡེཝཱ’’ཏི (ཙཱུལ༹ཝ. ཨཊྛ. ༡༠༢) ཨཊྛཀཐཱཝཙནཏོ ཡཱཡ ཀཱཡཙི བྷཱསཱཡཔི ཨཱརོཙེཏུཾ ཝཊྚཏི.

༥༡༡. པུནཔྤུནཱགཏཱནནྟི ཨེཏྠ ‘‘བྷིཀྑཱུན’’ནྟི སེསོ. པུབྦེ ཨཱརོཙནཊྛཱནཾ ཨསམྤཏྟཱནཾ ཨཱགནྟུཀཱནཾ བྷིཀྑཱུནམྤི. ཨཱརོཙེནྟོཝཱཏི ཨེཀསྶ ཨཱརོཙནེ སོ ཙེ ཝུཌྜྷཏརོ ཧོཏི, ‘‘བྷནྟེ’’ཏི ཝཏྭཱ པུབྦེ ཝུཏྟནཡེནེཝ ཝཏྭཱ, ནཝཀོ ཙེ, ‘‘ཨཱཝུསོ’’ཏི ཝཏྭཱ ཨཝསཱནེ ‘‘མཾ ཨཱཡསྨཱ དྷཱརེཏཱུ’’ཏི, དྭེ ཙེ ཧོནྟི, ‘‘མཾ ཨཱཡསྨནྟཱ དྷཱརེནྟཱུ’’ཏི, ཏཡོ ཙེ, ‘‘མཾ ཨཱཡསྨནྟོ དྷཱརེནྟཱུ’’ཏི ཝཏྭཱ ཨཱརོཙེནྟོཝ. རཏྟིཡཱ ཚེདཾ ཨཀཏྭཱཏི ‘‘པཀཏཏྟེན བྷིཀྑུནཱ སདྡྷིཾ ཨེཀཙྪནྣེ’’ཏིཨཱདིནཱ (ཙཱུལ༹ཝ. ༨༡) ནཡེན ཝུཏྟཨེཀསེནཱསནེ པཀཏཏྟེན བྷིཀྑུནཱ སདྡྷིཾ ཨརུཎུཊྛཱཔནཝསེན ¶ ཀརིཡམཱནེན སཧཝཱསེན ཝཱ ‘‘པཀཏཏྟབྷིཀྑཱུཧི ཝིནཱ ཨེཀཀེན ཝཱསོ’’ཏི ཝུཏྟཝིཔྤཝཱསེན ཝཱ ‘‘ཨཱགནྟུཀཱནཾ ཨཱརོཙནཱཡ ཨཀརཎ’’ནྟི ཝུཏྟཨནཱརོཙནེན ཝཱ སམྦྷཝནྟཾ རཏྟིཙྪེདམཀཏྭཱ. ཝཏྟབྷེདཾ ཨཀཏྭཱ ཝཱ པཱརིཝཱསིཀཀྑནྡྷཀེ པཱརིཝཱསིཀསྶ པཉྙཏྟཝཏྟཏོ ཨེཀམྤི ཨཧཱཔེཏྭཱ ཙ. སདཱ ཝསེཏི པརིཝཱསཾ ཝསིཏུཾ ¶ པརིཀཔྤིཏཱ སབྦདིཝསཱ ཡཱཝ ཁིཎནྟི, ཏཱཝ ཝསེཡྻཱཏི ཨཏྠོ.

༥༡༢. ཏཏྠ པརིཝཱསོ ཝིསོདྷེཏུཾ ན སཀྐཱ ཙེཏི ཏསྶ ཝིཧཱརསྶ མཧནྟཏྟཱ ཨཱགཏེ ཨཱགནྟུཀབྷིཀྑཱུ པརིཡེསིཏྭཱ ཨཱརོཙེནྟེན རཏྟིཙྪེདཾ ཨཀཏྭཱ པརིཝཱསཾ སོདྷེཏུཾ ན སཀྐཱ ཙེ ཧོཏི. ཏཾ ཝཏྟཾ ནིཀྑིཔིཏྭཱནཱཏི ཏཐཱ སམཱདིནྣཾ ཝཏྟཾ ཨུཔརི ཝཀྑམཱནནཡེན ནིཀྑིཔིཏྭཱ.

༥༡༣. ཀཏྠ ནིཀྑིཔེཡྻཱཏི ཨཱཧ ‘‘ཏཏྠཱ’’ཏིཨཱདི. ཏཏྠེཝ སངྒྷམཛ྄ཛྷེ ཝཱཏི ཨཏྟནོ ཡསྨིཾ ཝཏྟཾ སམཱདིནྣཾ, ཏསྨིཾཡེཝ སངྒྷམཛ྄ཛྷེ ཝཱ. པུགྒལེ ཝཱཏི བྷིཀྑཱུསུ ཨུཊྛཱཡ ཏཏྠ ཏཏྠ གཏེསུ ཨནྟོསཱིམཱཡཡེཝ ཨོཧཱིནེ ཨེཀབྷིཀྑུམྷི ཝཱ ཨསཏིཡཱ བཧིསཱིམཾ གཏེན སརིཏཀྑཎེ ཨཏྟནཱ སདྡྷིཾ གཙྪནྟེ ཏསྶཱཡེཝ པརིསཱཡ པརིཝཱསདཱནེ སམྨུཁཱིབྷཱུཏེ པུགྒལེ ཝཱ ཨཱགནྟུཀབྷིཀྑུ ཙེ, ཏསྶ ཝཱ སནྟིཀེ ཨཱརོཙེཏྭཱ ཝཏྟཾ ནིཀྑིཔིཏབྦནྟི ཝུཏྟཾ ཧོཏི. ཀཐཾ ནིཀྑིཔེ’ཏི ཨཱཧ ‘‘ནིཀྑིཔཱམཱི’’ཏིཨཱདི. ‘‘ཏཐཱ’’ཏི ཨིམིནཱ ‘‘ནིཀྑིཔཱམཱི’’ཏི ཨེཏཾ པཙྩཱམསཏི. ཏཾ ཝཏྟནྟི ཨཏྟནཱ སམཱདིནྣཾ ཏཾ ཝཏྟཾ.

༥༡༤. ཨཡཾ ནཡོཏི ‘‘ཨེཀཔདེནཱཔི དྭཱིཧི པདེཧི ཝཱ པནཱ’’ཏི ཨེཝཾ ཨནནྟརོདིཏནཡོ.

༥༡༥-༢༠. པཀཏཏྟོཏི ཝུཙྩཏཱིཏི སགྒམོཀྑཱཝརཎཱབྷཱཝེན པཀཏོ པུབྦསརཱུཔེནེཝ ཋིཏོ ཨཏྟཱ ཨེཏསྶཱཏི ‘‘པཀཏཏྟོ’’ཏི ཀཐཱིཡཏི. པཙྩཱུསཀཱལསྨིནྟི ཨརུཎཏོ པུརིམཀཱལེ.

པརིཀྑིཏྟཝིཧཱརསྶཱཏི ཨེཏྠ པཱཀཱརཱདཱིཧི པརིཀྑིཏྟཾ ཨེཀམྤི སེནཱསནཾ ཝིཧརནྟི ཨསྨིནྟི ཀཏྭཱ ཏཐཱ ཝུཙྩཏི. དྭེ ¶ ལེཌྜུཔཱཏེ ཨཏིཀྐམྨཱཏི ཡོཛནཱ. ལེཌྜུཔཱཏདྭཡསྶ ཨཝདྷིཾ དསྶེཏི ‘‘པརིཀྑེཔཏོ བཧཱི’’ཏི, ‘‘ཨཔརིཀྑིཏྟཏོ པརིཀྑེཔཱརཧཊྛཱནཱ བཧཱི’’ཏི ཙ.

པརིཀྑེཔཱརཧཊྛཱནཾ ¶ ནཱམ ཀཏམནྟི? ཝིསུདྡྷིམགྒེ (ཝིསུདྡྷི. ༡.༣༡) དྷུཏངྒནིདྡེསེ ‘‘མཛ྄ཛྷིམཊྛཀཐཱཡཾ པན ཝིཧཱརསྶཱཔི གཱམསྶེཝ ཨུཔཙཱརཾ ནཱིཧརིཏྭཱ ཨུབྷིནྣཾ ལེཌྜུཔཱཏཱནཾ ཨབྦྷནྟརཱ མིནིཏབྦ’ནྟི ཝུཏྟཾ. ཨིདམེཏྠཔམཱཎ’’ནྟི ཝུཏྟཏྟཱ ཨཔརིཀྑིཏྟསྶ པཋམལེཌྜུཔཱཏཾ ཧོཏི, གཱམེ ཝུཏྟེན ཝིདྷིནཱ ཝིཧཱརཔརིཡནྟེ ཋིཏབྷཏྟསཱལགིལཱནསཱལཱདིསེནཱསནེ ཙེ པརིཀྑེཔོ ཨཏྠི, ཏཏྠ ཝཱ, ནཏྠི ཙེ, ནིབྦཀོསསྶ ཨུདཀཔཱཏཊྛཱནེ ཋིཏེན མཱཏུགཱམེན ཚཌྜིཏབྷཱཛནདྷོཝནོདཀཔཏནཊྛཱནེ ཝཱ སེནཱསནཏོ དཱུརེ ཙེཏིཡངྒཎེ, བོདྷིཡངྒཎེ ཝཱ ཋཏྭཱ བལམཛ྄ཛྷིམསྶ པུརིསསྶ ཧཏྠཾ པསཱརེཏྭཱ ཨཏྟནོ བལཔྤམཱཎེན ཁིཏྟསྶ མུཊྛིཡཱ གཧིཏཔཱསཱཎསྶ པཏནཊྛཱནཾ ཝིཧཱརཱུཔཙཱརོ ནཱམ, ཏདེཝ པཱཀཱརཱདཱིཧི པརིཀྑེཔཱརཧཊྛཱནཾ ནཱམ. ཏཏྠ ཋཏྭཱ ཏཐེཝ ཁིཏྟསྶ པཱསཱཎསྶ པཏནཊྛཱནཾ ཨེཀོ ལེཌྜུཔཱཏོ, ཏཏྠཱཔི ཋཏྭཱ ཏཐེཝ ཁིཏྟསྶ པཱསཱཎསྶ པཏནཊྛཱནཾ ཨེཀོ ལེཌྜུཔཱཏོཏི ཨེཝཾ དྭེ ལེཌྜུཔཱཏཱ གཧེཏབྦཱ.

མགྒཏོ ཨོཀྐམིཏྭཱཏི མགྒཏོ ཨཔསཀྐིཏྭཱ. གུམྦེནཱཏི རུཀྑགཧནེན ཝཱ ལཏཱགཧནེན ཝཱ. ཝཏིཡཱཏི ཀཎྚཀསཱཁཱདཱིཧི ཀཏཱཡ ཝཏིཡཱ.

ཝཏྟམཱདཱཡཱཏི པུབྦེ ཝུཏྟནཡེན ཝཏྟཾ སམཱདིཡིཏྭཱ. ཨཱརོཙེཏྭཱཏི ཡཐཱཝུཏྟནཡེན ཨཱརོཙེཏྭཱ.

ནིཀྑིཔིཏྭཱཏི པུབྦེ ཝུཏྟནཡེན ཝཏྟཾ ནིཀྑིཔིཏྭཱ. བྷིཀྑཱུཏི ཨཏྟནཱ སདྡྷིཾ ཧཏྠཔཱསདཱནཏྠཱཡ ཨཱགཏོ བྷིཀྑུ. ཡསྶ ཀསྶཙཱིཏི ཨེཏྠ ‘‘སནྟིཀེ’’ཏི སེསོ.

ཨཱརོཙེཏྭཱ ¶ ཝཱཏི ཨཏྟནོ ནཝཀཏརོ ཙེ, ‘‘ཨཱཝུསོ’’ཏི, ཝུཌྜྷོ ཙེ, ‘‘བྷནྟེ’’ཏི ཝཏྭཱ ཡཐཱཝུཏྟནཡེནེཝ ཨཱརོཙེཏྭཱ. སེསནྟི ཨཝསེསཝིནིཙྪཡཾ. སམུཙྩཡསྶཱཏི ཙཱུལ༹ཝགྒཱགཏསྶ ཏཏིཡསམུཙྩཡཀྑནྡྷཀསྶ. ཨཊྛཀཐཱཡཙཱཏི ‘‘སཙེ ཨཉྙོ ཀོཙི བྷིཀྑུ ཀེནཙིདེཝ ཀརཎཱིཡེནཱ’’ཏིཨཱདིནཱ (ཙཱུལ༹ཝ. ཨཊྛ. ༡༠༢) ཨཊྛཀཐཱགཏཝིནིཙྪཡེནཱཔི.

ཝིབྷཱཝཡེཏི ‘‘སཙེ ཡཾ བྷིཀྑུཾ ཏཏྠ ཨཱགཏཾ པསྶཏི, བྷཱསམཱནསྶ སདྡཾ སུཎཱཏི, ཏསྶ ཨཱརོཙེཏབྦཾ. ཏཐཱ ཨཀརོནྟསྶ རཏྟིཙྪེདོ ཙ ཝཏྟབྷེདོ ཙ ཧོཏི དུཀྐཊཾ ཨཱཔཛྫཏི. སཙེ སོ དྭཱདསརཏནབྦྷནྟརཾ པཏྭཱ ཏསྶ ཨཛཱནནྟསྶེཝ པཀྐནྟོ ཧོཏི, རཏྟིཙྪེདོཝ ཧོཏི, ན ཝཏྟབྷེདོ ¶ . སཙེ ཨཏྟནཱ སདྡྷིཾ ཨཱགཏོ ཀེནཙིདེཝ ཀརཎཱིཡེན གཏོ ཧོཏི, ཝིཧཱརཾ གནྟྭཱ ཡཾ པཋམཾ པསྶཏི, ཏསྶ སནྟིཀེ ཨཱརོཙེཏྭཱ ཝཏྟཾ ནིཀྑིཔིཏབྦཾ. ཨེཝཾ པརིཀཔྤིཏདིཝསེ པུཎྞེ ཀུཀྐུཙྩཝིནོདནཏྠཾ ཨཏིརེཀེ ཙ དིཝསེ ཝཏྟཾ པཱུརེཏྭཱ པརིཡོསཱནེ ཝཏྟེ ཨསམཱདིནྣེ མཱནཏྟཱརཧོ ན ཧོཏཱིཏི སངྒྷཾ ཨུཔསངྐམྨ ཝཏྟཾ སམཱདིཡིཏྭཱ ཁནྡྷཀེ ཨཱགཏནཡེནེཝ མཱནཏྟཾ ཡཱཙིཏབྦཾ. ཨནིཀྑིཏྟཝཏྟེན ཙརིཏུཀཱམསྶ པུན ཝཏྟསམཱདཱནཾ ཀཱཏབྦཾ ན ཧོཏཱི’’ཏི ཨེཏྟཀོ ཝིསེསོ, ཨིམཾ ཨཊྛཀཐཱགཏཾ ཝིནིཙྪཡཾ པཀཱསེཡྻཱཏི ཝུཏྟཾ ཧོཏཱིཏི.

པཊིཙྪནྣཔརིཝཱསཀཐཱཝཎྞནཱ.

༥༢༡. ན ཛཱནཏཱིཏི ཨེཏྠ ཚནྡཝསེན རསྶོ ཀཏོ. ཨཱཔཏྟཱིནཉྩ རཏྟཱིནཾ, པརིཙྪེདཾ ན ཛཱནཏཱིཏི བཧཱུ སངྒྷཱདིསེསེ ཨཱཔཛྫིཏྭཱཔི ‘‘ཨེཏྟཀཱཧཾ ཨཱཔཏྟིཡོ ཨཱཔནྣོ’’ཏི ཨཏྟནོ ཨཱཔནྣསངྒྷཱདིསེསཱཔཏྟཱིནཾ པརིཙྪེདཾ ¶ ན ཛཱནཱཏི, ‘‘མཡཱ ཨཱཔནྣཱཔཏྟི ཨེཏྟཀེ དིཝསེ པཊིཙྪནྣཱ’’ཏི དིཝསཔརིཙྪེདཾ ན ཛཱནཱཏི.

༥༢༢. ཨིདཱནི ཏསྶ པབྷེདཾ དསྶེཏུམཱཧ ‘‘ཨེསེཝཱ’’ཏིཨཱདི. པརིསུདྡྷེཧཱིཏི སཀལསཾཀིལེསཔྤཧཱནེན པརིསུདྡྷསནྟཱནེཧི ཨུཔཱལིཏྠེརཱདིཔུབྦཱཙརིཡེཧི. ཨེསོཝ སུདྡྷནྟོཏི ཨེསོ ཡཐཱཝུཏྟསརཱུཔོ སུདྡྷནྟཔརིཝཱསོ. ཙཱུལ༹སུདྡྷནྟནཱམོ ཙཱཏི ‘‘ཡོ ཨུཔསམྤདཏོ པཊྛཱཡ ཨནུལོམཀྐམེན ཝཱ’’ཏིཨཱདིནཱ (ཙཱུལ༹ཝ. ཨཊྛ. ༡༠༢) ཨཊྛཀཐཱཡཾ ཝུཏྟནཡེན ཨུཔསམྤདམཱལ༹ཀཏོ པཊྛཱཡ ཨནུལོམཝསེན ཝཱ ཨཱརོཙིཏདིཝསཏོ པཊྛཱཡ པཊིལོམཝསེན ཝཱ སརནྟེ ‘‘ཀིཏྟཀཱནི དིཝསཱནི པརིསུདྡྷོཏི སརསཱི’’ཏི ཝིནཡདྷརེཧི པུཙྪིཏེ ‘‘ཨེཏྟཀཾ ཀཱལཾ པརིསུདྡྷོསྨཱི’’ཏི ཝུཏྟཝཏོ ཏེན ཝུཏྟསུདྡྷདིནཱནི པརིཡནྟཾ ཀཏྭཱ དིནྣོ ཡཱཝ ཨུཔསམྤནྣདིཝསོ, ཏཱཝ བཧུདིཝསེསུ ནེཏབྦཾ མཧཱསུདྡྷནྟཾ སནྡྷཱཡ ཨིཏརདིནཱནཾ པཱུརེཏབྦཏྟཱ ཙཱུལ༹སུདྡྷནྟོ ནཱམཱཏི ཝུཏྟཾ ཧོཏི.

‘‘ཨཡཉྷི སུདྡྷནྟཔརིཝཱསོ ནཱམ ཨུདྡྷམྤི ཨཱརོཧཏི, ཧེཊྛཱཔི ཨོརོཧཏི, ཨིདམསྶ ལཀྑཎ’’ནྟི (ཙཱུལ༹ཝ. ཨཊྛ. ༡༠༢) ཝུཏྟཏྟཱ ཨིམཾ པརིཝཱསཾ པརིཝསནཏོ པཙྪཱ དིཝསཾ སརནྟོ པརིཀཔྤེཏྭཱ ཡོཛེཏྭཱ གཧིཏདིཝསཏོ ཝཌྜྷེཏི ཝཱ ཧཱཔེཏི ཝཱ, ཨུབྷཡཏྠཱཔི ‘‘པུན པརིཝཱསདཱནཀིཙྩཾ ནཏྠཱི’’ཏི (ཙཱུལ༹ཝ. ཨཊྛ. ༡༠༢) ཝཙནཏོ པུབྦེ དིནྣཔརིཝཱསོཡེཝ པམཱཎཾ ¶ . ‘‘ཨེཏསྶ ཨཔྤཊིཙྪནྣཾ ‘པཊིཙྪནྣཱ’ཏི ཝཱ ཨཙིརཔཊིཙྪནྣཾ ‘ཙིརཔཊིཙྪནྣཱ’ཏི ཝཱ ཨསམྦཧུལམྤི ‘སམྦཧུལཱ’ཏི ཝཱ ཝིཔརཱིཏཏོ གཧེཏྭཱ ཝིནཡཀམྨཾ ཀརོནྟསྶ ཨཱཔཏྟིཏོ ཝུཊྛཱནཾ ཧོཏི, པཊིཙྪནྣཾ ‘ཨཔྤཊིཙྪནྣཱ’ཏིཨཱདིཝིཔརིཡཱཡེན ན ཧོཏཱི’’ཏི (ཙཱུལ༹ཝ. ཨཊྛ. ༡༠༢ ཨཏྠཏོ སམཱནཾ) ཨཊྛཀཐཱགཏནཡོ ཝེདིཏབྦོ.

མཧཱསུདྡྷནྟནཱམཀོཏི ¶ ‘‘ཡོ པན ཡཐཱཝུཏྟེན ཨནུལོམཔཊིལོམནཡེན པུཙྪིཡམཱནོཔི རཏྟིཔརིཡནྟཾ ན ཛཱནཱཏི, ནེཝ སརཏི, ཝེམཏིཀོ ཝཱ ཧོཏི, ཏསྶ དིནྣོ སུདྡྷནྟཔརིཝཱསོ མཧཱསུདྡྷནྟོཏི ཝུཙྩཏཱི’’ཏི (ཙཱུལ༹ཝ. ཨཊྛ. ༡༠༢) ཨཊྛཀཐཱཡཾ ནིདྡིཊྛསརཱུཔོ མཧཱསུདྡྷནྟོ ནཱམ. ‘‘ཨཡཾ ཨུདྡྷཾ ནཱརོཧཏི, ཧེཊྛཱ པན ཨོརོཧཏཱི’’ཏི ཝུཏྟཏྟཱ ཨཡཾ པརིཝཱསོ ཡཱཝ ཨུཔསམྤནྣདིཝསོ, ཏཱཝ པཱུརེཏབྦཏོ ཏཏོ ཨུདྡྷཾ ནཱརོཧཏི. ཨནྟརཱལེ༹ ཨཏྟནོ སུདྡྷཀཱལཾ པརིཀཔྤེཏྭཱ སརཏི ཙེ, ཏཏོ པཊྛཱཡ ནིཝཏྟནཏོ དིཝསཧཱནཾ པན ཧོཏེཝ.

༥༢༣. ‘‘ཨཉྙཏརོ བྷིཀྑུ སམྦཧུལཱ སངྒྷཱདིསེསཱ ཨཱཔཏྟིཡོ ཨཱཔནྣོ ཧོཏི, སོ ཨཱཔཏྟིཔརིཡནྟཾ ན ཛཱནཱཏི, རཏྟིཔརིཡནྟཾ ན ཛཱནཱཏཱི’’ཏི (ཙཱུལ༹ཝ. ༡༥༦) ཨཱགཏཝཏྠུམྷི ཨིམསྶ པརིཝཱསསྶ ཨནུཉྙཱཏཏྟཱ ཏཾ ཝཏྠུཾ སངྒཧེཏུཾ ‘‘ཨཱཔཏྟཱིནཾ ཙཱ’’ཏིཨཱདིཾ ཝཏྭཱཔི ‘‘ཨཱཔཏྟིཔརིཡནྟཾ པན ‘ཨེཏྟཀཱ ཨཧཾ ཨཱཔཏྟིཡོ ཨཱཔནྣོ’ཏི ཛཱནཱཏུ ཝཱ མཱ ཝཱ, ཨཀཱརཎམེཏ’’ནྟི (ཙཱུལ༹ཝ. ཨཊྛ. ༡༠༢) པཊིསེདྷེཏྭཱ ཨཊྛཀཐཱཡཾ པདྷཱནབྷཱཝེན ཝུཏྟརཏྟིཔརིཡནྟསྶ ཨཔརིཛཱནནམཏྟམེཝ པམཱཎནྟི དསྶེཏུམཱཧ ‘‘དུཝིདྷོཔཱི’’ཏིཨཱདི. དུཝིདྷོཔི ཨཡཾ སུདྡྷནྟཔརིཝཱསོ ཨེཀཙྩཾ རཏྟིཔརིཙྪེདཾ, སཀལཾ ཝཱ རཏྟིཔརིཙྪེདཾ ཨཛཱནཏོ ཝཱ ཝིམཏིསྶ ཝཱ དཱཏབྦོཏི ཡོཛནཱ.

སུདྡྷནྟཔརིཝཱསཀཐཱཝཎྞནཱ.

༥༢༤. ཨིཏརོཔི སོ སམོདྷཱནཔརིཝཱསོ ཏིདྷཱ མཏོཏི ཡོཛནཱ. དྷཱཏུསདྡཱནཾ ཨནེཀཏྠཏྟཱ ‘‘ཨོདྷཱན’’ནྟི མཀྑནཾ ཝུཙྩཏི. ཏེནཱཧ ཨཊྛཀཐཱཡཾ ‘‘ཨོདྷུནིཏྭཱ ¶ མཀྑེཏྭཱ’’ཏི (ཙཱུལ༹ཝ. ཨཊྛ. ༡༠༢). ‘‘སམོདྷཱན’’ནྟི པཀྑེཔོ ཝུཙྩཏི. ཡཐཱཧ ཨཊྛཀཐཱཡཾ ‘‘སམོདཧིཏྭཱ’’ཏི. ཨོདྷཱནཉྩ སམོདྷཱནཉྩ ཨོདྷཱནསམོདྷཱནཾ, ཏཾ ཡཏྠ སོ པརིཝཱསོ ‘‘ཨོདྷཱནསམོདྷཱནོ’’ཏི ཝེདིཏབྦོ. ཨརིསཱདིགཎེ ཨནྟོགདྷཏྟཱ ཧེཏྠ, ཨུཔརི ཙ ཨེཝརཱུཔེ ཋཱནེ ཨ-ཀཱརཔཙྩཡོ དཊྛབྦོ ¶ . པརིཝུཏྠདིཝསཱནཾ མཀྑནཉྩ མཱུལཱཔཏྟིཡཾ ཨནྟརཱཔཏྟཱིནཾ པཀྑིཔནཉྩ ཡསྨིཾ སོ པརིཝཱསོཏི ཝུཏྟཾ ཧོཏི. ཏེནེཝེཏྠ ‘‘དིཝསེ པརིཝུཏྠེ ཏུ, ཨོདྷུནིཏྭཱ པདཱིཡཏེ’’ཏི ཝཀྑཏི. ཡཐཱཧ ཨཊྛཀཐཱཡཾ ‘‘པརིཝུཏྠདིཝསེ ཨོདྷུནིཏྭཱ མཀྑེཏྭཱ པུརིམཱཡ ཨཱཔཏྟིཡཱ མཱུལདིཝསཔརིཙྪེདེ པཙྪཱ ཨཱཔནྣཾ ཨཱཔཏྟིཾ སམོདཧིཏྭཱ’’ཏི (ཙཱུལ༹ཝ. ཨཊྛ. ༡༠༢).

ཨགྒྷཔུབྦཀོ མིསྶཀཔུབྦཀོ སམོདྷཱནཔརིཝཱསོཏི ཡོཛནཱ, ཨགྒྷསམོདྷཱནཔརིཝཱསོ མིསྶཀསམོདྷཱནཔརིཝཱསོཏི ཝུཏྟཾ ཧོཏི. ཨགྒྷོ ཙ མིསྶཀོ ཙ ཨགྒྷམིསྶཀཱ, ཏེ པུབྦཀཱ ཨེཏསྶཱཏི ཨགྒྷམིསྶཀཔུབྦཀོ, སམོདྷཱནོ. ཨགྒྷེན སམོདྷཱནཾ ཨགྒྷསམོདྷཱནཾ, ཏཾ ཡཏྠ སོ ཨགྒྷསམོདྷཱནོ, ཨཱཔནྣཱསུ བཧཱུསུ སབྦཙིརཔཊིཙྪནྣཱཔཏྟཱིནཾ དིཝསགཎནགྒྷེནེཝ པཙྪཱ ཨཱཔནྣཨཱཔཏྟཱིནཾ པཀྑེཔཡུཏྟཔརིཝཱསོཏི ཨཏྠོ. ཡཐཱཧ ཨཊྛཀཐཱཡཾ ‘‘ཨགྒྷསམོདྷཱནོ ནཱམ སམྦཧུལཱསུ ཨཱཔཏྟཱིསུ ཡཱ ཨེཀཱ ཝཱ དྭེ ཝཱ ཏིསྶོ ཝཱ སམྦཧུལཱ ཝཱ ཨཱཔཏྟིཡོ སབྦཙིརཔཊིཙྪནྣཱཡོ, ཏཱསཾ ཨགྒྷེན སམོདྷཱཡ ཏཱསཾ རཏྟིཔརིཙྪེདཝསེན ཨཝསེསཱནཾ ཨཱུནཏརཔཊིཙྪནྣཱནཾ ཨཱཔཏྟཱིནཾ པརིཝཱསོ དིཡྻཏི, ཨཡཾ ཝུཙྩཏི ཨགྒྷསམོདྷཱནོ’’ཏི (ཙཱུལ༹ཝ. ཨཊྛ. ༡༠༢). མིསྶཀཱནཾ ནཱནཱཝཏྠུཀཱནཾ ཨཱཔཏྟཱིནཾ སམོདྷཱནཾ མིསྶཀསམོདྷཱནཾ, ཏཾ ཡཏྠ སོ པརིཝཱསོ མིསྶཀསམོདྷཱནོ. མིསྶཀཱནཾ ནཱནཱཝཏྠུཀཱནཾ ཨཱཔཏྟཱིནཾ ཨེཀཏོ པཀྑེཔཡུཏྟོ པརིཝཱསོཏི ཨཏྠོ. ཡཐཱཧ ཨཊྛཀཐཱཡཾ ‘‘མིསྶཀསམོདྷཱནོ ¶ ནཱམ ཡོ ནཱནཱཝཏྠུཀཱ ཨཱཔཏྟིཡོ ཨེཀཏོ ཀཏྭཱ དིཡྻཏཱི’’ཏི (ཙཱུལ༹ཝ. ཨཊྛ. ༡༠༢).

༥༢༥-༧. ཨེཝཾ ཏིཝིདྷེ སམོདྷཱནཔརིཝཱསེ པཋམཔརིཝཱསསྶ ཝིསེསནབྷཱུཏཏཱཡ ཨཝཡཝཱནཾ དྭིནྣཾ ཨོདྷཱནསམོདྷཱནསདྡཱནཾ ཨཏྠཱནུཝཱདེན ཏདུབྷཡཨོདྷཱནསམོདྷཱནསརཱུཔཾ ཝིདྷཱཏུམཱཧ ‘‘ཨཱཔཛྫིཏྭཱ…པེ… པཀཱསིཏོ’’ཏི. ཏཏྠ པཋམསྶ ཨོདྷཱན-སདྡསངྑཱཏསྶ ཨཝཡཝསྶ ཨཏྠསརཱུཔཱནུཝཱདམཱཧ ‘‘ཨཱཔཛྫིཏྭཱ…པེ… པདཱིཡཏེ’’ཏི. དུཏིཡཱཝཡཝསངྑཱཏསམོདྷཱན-སདྡསྶ ཨཏྠསརཱུཔཱནུཝཱདམཱཧ ‘‘པུརིམཱཔཏྟིཡཱ…པེ… བྷིཀྑུནོ’’ཏི. ཏེནེཝ ཨུབྷཡཏྠཱནུཝཱདེ ‘‘བྷིཀྑུནོ’’ཏི པདདྭཡསྶ, ‘‘པདཱིཡཏེ དཱཏབྦོ’’ཏི ཀིརིཡཱཔདདྭཡསྶ ཙ ཝིསུཾ ཝིསུཾ གཧིཏཏྟཱ པུནརུཏྟིདོསཱབྷཱཝོ ཝེདིཏབྦོ. ཨེཝཾ ཨཝཡཝཏྠཱནུཝཱདེན ཝིདྷཱཏབྦསམུདཱཡཾ དསྶེཏུམཱཧ ‘‘ཨེསོདྷཱནསམོདྷཱནཔརིཝཱསོ པཀཱསིཏོ’’ཏི. ཨེཏྠ ཚཱདེནྟསྶ ཧཱིཏི ཧི-སདྡོ ཧེཏུམྷི. ཨེསོདྷཱནསམོདྷཱནོཏི ཨེཏྠ ཨེཏ-སདྡསམྦནྡྷེན ‘‘ཡོ’’ཏི ལབྦྷཏི.

ཏཏྲཱཡཾ ¶ ཡོཛནཱ – ཨཱཔཛྫིཏྭཱ…པེ… ཨོདྷུནིཏྭཱ ཡོ ཡསྨཱ པདཱིཡཏེ, པུརིམཱཔཏྟིཡཱ…པེ… ཡོ ཡསྨཱ དཱཏབྦོ, ཏསྨཱ ཨེསོདྷཱནསམོདྷཱནཔརིཝཱསོ པཀཱསིཏོཏི.

ཏཏྠ ཨནྟརཱཔཏྟིཾ ཨཱཔཛྫིཏྭཱཏི པཊིཙྪནྣཱཔཏྟིཡཱ པརིཝསནྟོ ཝཱ མཱནཏྟཱརཧོ ཝཱ མཱནཏྟཾ ཙརནྟོ ཝཱ ཨབྦྷཱནཱརཧོ ཝཱ ཧུཏྭཱ ཀདཱཙི ཨཉྙཾ སངྒྷཱདིསེསཱཔཏྟིཾ ཨཱཔཛྫིཏྭཱ. ཚཱདེནྟསྶཱཏི པཋམཾ ཨཱཔནྣཱཔཏྟིཡཱཔཊིཙྪཱདིཏཀཱལེན སམཾ ཝཱ ཨཱུནཾ ཝཱ ཀཱལཾ པཊིཙྪཱདེནྟསྶ. ‘‘མཱུལཱཡཔཊིཀསྶནེན ཏེ པརིཝུཏྠདིཝསེ ཙ མཱནཏྟཙིཎྞདིཝསེ ¶ ཙ སབྦེ ཨོདྷུནིཏྭཱ’’ཏི (ཙཱུལ༹ཝ. ཨཊྛ. ༡༠༢) ཨཊྛཀཐཱཝཙནཏོ ཨེཏྠ ‘‘པརིཝུཏྠེ’’ཏི ཨུཔལཀྑཎཏྟཱ ‘‘མཱནཏྟཙིཎྞེ ཙཱ’’ཏི གཧེཏབྦཾ. ཨོདྷུནིཏྭཱཏི ཙ མཱུལཱཡཔཊིཀསྶནཝསེན མཀྑེཏྭཱ, ཨདིཝསེ ཀཏྭཱཏི ཨདྷིཔྤཱཡོ.

ཡོ ཡསྨཱ པདཱིཡཏེ, སོ པརིཝཱསོ སཊྛིཝསྶཱནི པརིཝསིཏྭཱ མཱནཏྟཱརཧོ ཧུཏྭཱཔི ཨནྟརཱཔཏྟིཾ ཨཱཔཛྫིཏྭཱ ཨེཀཱཧམྤི པཊིཙྪཱདིཏེ མཱུལཱཡཔཊིཀསྶནེན ཏེ དིཝསེ སབྦེ མཀྑེཏྭཱ ཏཱནེཝ སཊྛིཝསྶཱནི པུནཔི ཡསྨཱ པདཱིཡཏེཏི ཨཏྠོ. ཡཐཱཧ ཨཊྛཀཐཱཡཾ ‘‘སཊྛིཝསྶཱནི པརིཝསིཏྭཱ མཱནཏྟཱརཧོ ཧུཏྭཱཔི ཧི ཨེཀདིཝསཾ ཨནྟརཱཔཏྟིཾ པཊིཙྪཱདེཏྭཱ པུནཔི སཊྛིཝསྶཱནི པརིཝཱསཱརཧོ ཧོཏཱི’’ཏི (ཙཱུལ༹ཝ. ཨཊྛ. ༡༠༢).

པུརིམཱཔཏྟིཡཱཏི ཏེན ཨཱཔནྣཱསུ སམྦཧུལཱསུ ཨཱཔཏྟཱིསུ སབྦཱཔཏྟཱིནཾ པུརེཏརམེཝ པཊིཙྪནྣཱཡ ཨཱཔཏྟིཡཱ. མཱུལདིཝསེཏི པཋམཾ ཝཱིཏིཀྐམདིཝསེ. ཝིནིཙྪིཏེཏི ‘‘ཨསུཀསཾཝཙྪརེ ཨསུཀམཱསེ ཨསུཀདིཝསེ’’ཏི ནིཡམིཏེ. སམོདྷཱཡ པཀྑིཔིཏྭཱ དཱཏབྦོཏི སམྦནྡྷོ. ཝིདྷཱནཏོ ཡཱཙམཱནསྶཱཏི ཝིདྷཱནཏོ སངྒྷེན དཱཏབྦོཏི ཡོཛེཏབྦཾ, སམུཙྩཡཀྑནྡྷཀེ ཝུཏྟེན ཝིདྷིནཱ ཡཱཙམཱནསྶ ཏཏྠེཝ ཝུཏྟཝིདྷིནཱ སངྒྷེན དཱཏབྦོཏི ཨཏྠོ. ‘‘ཨེསོ ཨོདྷཱནསམོདྷཱནཔརིཝཱསོ’’ཏི པདཙྪེདོ.

༥༢༨-༩. ཏཐཱ ཝུཙྩཏཱིཏི སམྦནྡྷོ. ཏཱསཾ ཨགྒྷཝསེན ཧཱིཏི ཧི-སདྡོ ཧེཏུམྷི. ‘‘སོཏི ཏཾསདྡསམྦནྡྷེན ‘‘ཡོ’’ཏི ལབྦྷཏི. ཏཏྲཱཡཾ ཡོཛནཱ – སམྦཧུལཱ…པེ… ཏཱསཾ ཨགྒྷཝསེན ཏཏོ ཨཱུནཔཊིཙྪནྣཱནཾ ཨཱཔཏྟཱིནཾ ¶ སམོདྷཱཡ ཡོ ཡསྨཱ པདཱཏབྦོ པརིཝཱསོ, ཏསྨཱ སོ ཡཐཱ ཨཝཡཝཏྠཝསེན ¶ ‘‘ཨོདྷཱནསམོདྷཱནོ’’ཏི པརིཝཱསོ ཝུཏྟོ, ཏཐཱ ‘‘ཨགྒྷསམོདྷཱནོ’’ཏི ཝུཙྩཏཱིཏི.

ཏཏྠ སམྦཧུལཱསཱུཏི ཡཱསཾ ཨཱཔཏྟཱིནཾ པརིཝསིཏུཀཱམོ, ཏཱསུ སམྦཧུལཱསུ ཨཱཔཏྟཱིསུ, ནིདྡྷཱརཎེ བྷུམྨཾ. ‘‘ཨེཀཱ ཝཱ’’ཏིཨཱདི ནིདྡྷཱརིཡནིདྡེསོ. ཏཱསཾ ཨཱཔཏྟཱིནཾ. ཨགྒྷཝསེནཱཏི གཎནཝསེན, རཏྟིཔརིཙྪེདཝསེནཱཏི ཝུཏྟཾ ཧོཏི. ཡཐཱཧ ཨཊྛཀཐཱཡཾ ‘‘ཏཱསཾ རཏྟིཔརིཙྪེདཝསེནཱ’’ཏི (ཙཱུལ༹ཝ. ཨཊྛ. ༡༠༢). ‘‘པདཱཏབྦོ’’ཏི ཨིམིནཱ སམྦནྡྷོ. ཏཏོཏི ཙིརཔཊིཙྪནྣཱཔཏྟིཏོ. ཨཱུནཔཊིཙྪནྣཱནཾ ཨཱཔཏྟཱིནནྟི ཨེཏྠ ཨུཔཡོགཏྠེ སཱམིཝཙནཾ, ཨཱུནཔཊིཙྪནྣཱཡོ ཨཱཔཏྟིཡོ སམོདྷཱཡཱཏི ཝུཏྟཾ ཧོཏི.

༥༣༠. ནཱནཱ སུཀྐཝིསྶཊྛིཨཱདཱིནི ཝཏྠཱུནི ཡཱསཾ ཏཱ ནཱནཱཝཏྠུཀཱ, ནཱནཱཝཏྠུཀཱ སཉྙཱ ཡཱསཾ ཨཱཔཏྟཱིནཾ ཏཱ ནཱནཱཝཏྠུཀསཉྙཱཡོ. སབྦཱཏི ཨེཏྠ ‘‘ཡཱ’’ཏི སེསོ, སུཀྐཝིསྶཊྛིཨཱདིཀུལདཱུསནཱཝསཱནཱ ཡཱ སབྦཱ ཏེརས སངྒྷཱདིསེསཱ ཨཱཔཏྟིཡོཏི ཨཏྠོ. ཏཱ སབྦཱཏི ཨེཏྠ པི-སདྡོ ཝཏྟབྦོ. དཱཏབྦོཏི ཨེཏྠ ‘‘པརིཝཱསོ’’ཏི ཨཱནེཏྭཱ སམྦནྡྷིཏབྦཾ. ཏཱ སབྦཱཔི ཨེཀཏོ ཀཏྭཱ དཱཏབྦོ པརིཝཱསོཏི ཡོཛནཱ. ཏསྶ ཏེརས སངྒྷཱདིསེསཱཔཏྟིཡོཔི ཨེཀཏོ ཀཏྭཱཏི ཨཏྠོ. ‘‘ཨཧཾ བྷནྟེ སམྦཧུལཱ སངྒྷཱདིསེསཱ ཨཱཔཏྟིཡོ ཨཱཔཛྫིཾ ཨེཀཾ སུཀྐཝིསྶཊྛིཾ…པེ… ཨེཀཾ ཀུལདཱུསཀཾ, སོཧཾ བྷནྟེ སངྒྷཾ ཏཱསཾ ཨཱཔཏྟཱིནཾ སམོདྷཱནཔརིཝཱསཾ ཡཱཙཱམཱི’’ཏི ཏིཀྑཏྟུཾ ཡཱཙནཱཡ ཙ ཏདནུརཱུཔཱཡ ཉཏྟིཡཱ ཙ ཀམྨཝཱཙཱསུ ཙ ནཱམཾ ¶ ཝཏྭཱ དཱཏབྦཔརིཝཱསོ མིསྶཀོ མཏོ ‘‘མིསྶཀསམོདྷཱནཔརིཝཱསོ’’ཏི ཉཱཏོ. དྭེ, ཏིསྶོ, ཙཏསྶོ, ཨཏིརེཀཱ ཙ ཨཱཔནྣསྶཱཔི པརིཝཱསཾ དེནྟེན ཨིམིནཱ ནིཡཱམེན ཝཏྠུཾ, ནཱམཾ ཝིསེསེཏྭཱ གཧེཏབྦཾ.

སམོདྷཱནཔརིཝཱསཀཐཱཝཎྞནཱ.

༥༣༡. པརིཝུཏྠཔརིཝཱསསྶཱཏི ཏིཝིདྷེ པརིཝཱསེ ཨཉྙཏརསྶ ཝསེན པརིཝུཏྠཔརིཝཱསསྶ. ཨུཏྟརི ཚ རཏྟིཡོཏི པརིཝཱསཏོ ཨུཏྟརི ཚ རཏྟིཡོ, ཚ དིཝསེཏི ཝུཏྟཾ ཧོཏི, ‘‘ཙརིཏུ’’ནྟི སེསོ, ཙརཎཀིརིཡཱཡ ཨཙྩནྟསཾཡོགེ ཨུཔཡོགཝཙནཾ. མཱནཏྟཾ དེཡྻནྟི ཡོཛནཱ, ‘‘སངྒྷེནཱ’’ཏི སཱམཏྠིཡཱ ¶ ལབྦྷཏི. སམུཙྩཡཀྑནྡྷཀེ ཝུཏྟནཡེན ཡོཛེཏྭཱ ཚཱརཏྟཉྩ དཱཏབྦོ, བྷིཀྑུམཱནནཝིདྷི བྷིཀྑུསྶ དཱཏབྦོཏི ཨཏྠོ.

‘‘པརིཝུཏྠཔརིཝཱསསྶཱ’’ཏི ཨིམིནཱ པཊིཙྪནྣམཱནཏྟཾ པཀཏཾ, ཏཏྠ པབྷེདེ ཨསཏི ཀསྨཱ ‘‘པཊིཙྪནྣཱཔཊིཙྪནྣཝསཱ དུཝེ’’ཏི ཝུཏྟནྟི? པཀཏབྷེདམནཔེཀྑིཏྭཱ ཚཱརཏྟམཱནཏྟེ ལབྦྷམཱནཝིསཡབྷེདཾ དསྶེཏུཾ ཝུཏྟཾ. ཨེཝཉྷི སཏི སམོདྷཱནམཱནཏྟེ ཙ ‘‘ཚཱརཏྟཾ མཱནཏྟཾ དེཏཱུ’’ཏི (ཙཱུལ༹ཝ. ༡༢༨) པཱལི༹ཡཾ ཝུཏྟཏྟཱ ཏམྤི གཧེཏྭཱ ‘‘ཏིདྷཱ’’ཏི ཀསྨཱ ན ཝུཏྟནྟི? ཏམྤི པཊིཙྪནྣཱཔཏྟིཡཱ པརིཝུཏྠཔརིཝཱསསྶེཝ དཱཏབྦམཱནཏྟནྟི པཊིཙྪནྣམཱནཏྟཝཙནེནེཝ སངྒཧིཏཏྟཱ ཝིསུཾ ན ཝུཏྟཾ. ཏེནེཝ ཙཏུབྦིདྷེ མཱནཏྟེ ཨིམེཧི དྭཱིཧི ཝིནཱ དསྶེཏབྦེསུ དྭཱིསུ མཱནཏྟེསུ པཀྑམཱནཏྟམཏྟཾ ‘‘ཚཱདེནྟིཡཱ’’ཏིཨཱདིགཱཐཱཡ དསྶེཏྭཱ སམོདྷཱནམཱནཏྟཾ ཝིསུཾ ན དསྶིཏནྟི དཊྛབྦཾ.

༥༣༤-༦. ཝིནིདྡིཊྛཔྤཀཱརནྟི ‘‘པརིཀྑིཏྟཝིཧཱརསྶཱ’’ཏིཨཱདིནཱ ཡཐཱཝུཏྟགཱཐཱདྭཡེན ནིདྡིཊྛཔྤཀཱརཾ. ཨཱདིཡིཏྭཱན ཏཾ ¶ ཏེསནྟི ཨེཏྠ ‘‘སནྟིཀེ’’ཏི ཝཀྑམཱནཏོ ལབྦྷཏི. ཏེསཾ ཙཏུནྣཾ སམྨུཁཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཏཾ ཝཏྟཾ སམཱདིཡིཏྭཱཏི ཨཏྠོ. ‘‘ཏཾ ཏེསཾ སནྟིཀེ’’ཏི ཨིདཾ ‘‘ཨཱརོཙེཏྭཱ’’ཏི ཨིམིནཱཔི ཡུཛྫཏི. ཏེསམེཝ སམྨུཁཱ ནིསིནྣེན ‘‘ཨཧཾ བྷནྟེ ཨེཀཾ ཨཱཔཏྟིཾ ཨཱཔཛྫིཾ སཉྩེཏནིཀཾ སུཀྐཝིསྶཊྛི’’ནྟིཨཱདིནཱ ནཡེན སམུཙྩཡཀྑནྡྷཀཱགཏཾ ཨཱརོཙནཾ ཀཏྭཱ. ཨིམིནཱ ཨནྟོཨརུཎེ དིཊྛཱནཾ ཨཉྙེསམྤི ཨཱརོཙནཾ ཨུཔལཀྑིཏཾ.

ནིཀྑིཔེ སནྟིཀེ ཏེསཾ ཝཏྟནྟི ཨེཏྠ ‘‘ཨརུཎེ ཨུཊྛིཏེ’’ཏི ཨཛ྄ཛྷཱཧརིཏབྦཾ. ཨརུཎེ ཨུགྒཏེ ཏེསཾ བྷིཀྑཱུནཾ སམྨུཁཱ ཡཐཱཝུཏྟནཡེནེཝ ནིསཱིདིཏྭཱ ‘‘ཝཏྟཾ ནིཀྑིཔཱམི, མཱནཏྟཾ ནིཀྑིཔཱམཱི’’ཏི ཨིམེསུ དྭཱིསུ ཨེཀཾ ཝཱ དྭཡམེཝ ཝཱ ཝཏྭཱ ཝཏྟཾ ནིཀྑིཔེ.

༥༣༧. ཏསྶ མཱནཏྟསྶ. རཏྟིཙྪེདཱདིཀོཏི ཨེཏྠ ཨཱདི-སདྡེན ཝཏྟབྷེདོ གཧིཏོ. ཨཊྛཀཐཱཝསེན པཱལི༹ཝསེནཱཏི ཡོཛནཱ.

༥༣༨. ཝཱིསཏིཡཱ ¶ བྷིཀྑཱུནཾ ཝགྒོ སམཱུཧོ ཝཱིསཏིཝགྒོ, སོ ཨེཝ ཝཱིསཏིཝགྒིཀོ. ཨབྦྷེཡྻཱཏི ཨོསཱརེཡྻ, ཨབྦྷནྟརཾ ཀརེཡྻཱཏི ཨཏྠོ. ཝིདྷིནཱཏི སམུཙྩཡཀྑནྡྷཀཱགཏཀྐམེན. ཨབྦྷིཏོཏི སཾཝཱསེན ཨནྟོ ཀཏོ, པཀཏཏྟོཏི པཀཏིསབྷཱཝོ, ཨཱཔཏྟིཾ ཨནཱཔནྣཀཱལསདིསོ ཧོཏཱིཏི ཨཏྠོ.

༥༣༩. ཨཱཔཏྟིཾ ཚཱདེནྟིཡཱ བྷིཀྑུནིཡཱཏི ཡོཛནཱ, ‘‘ཨཱཔཛྫིཏྭཱ’’ཏི སེསོ, ཨཱཔཏྟིཾ ཨཱཔཛྫིཏྭཱ ‘‘ཨཱཔཏྟི ཙཱ’’ཏིཨཱདིནཱ (ཝི. ཝི. ༥༠༥) ནཡེན པུབྦེ དསྶིཏེཧི དསཧི ཨངྒེཧི པཊིཙྪཱདེནྟིཡཱ བྷིཀྑུནིཡཱ ཨཏྟནོ ཨཱཔཏྟིཾ ཚཱདེནྟིཡཱ བྷིཀྑུནིཡཱ. ན ཙ ཨཱཔཏྟཱིཏི ཨེཏྠ ‘‘ཨཏྟནོ’’ཏི ཨིམིནཱ ཨཉྙིསྶཱ ¶ ཨཱཔཏྟིཾ པཊིཙྪཱདེནྟིཡཱ ཝཛྫཔཊིཙྪཱདིཀཱསངྑཱཏཔཱརཱཛིཀཱཔཏྟཱིཏི དཱིཔིཏཾ ཧོཏི. ‘‘བྷིཀྑུནིཡཱ’’ཏི ཨིམིནཱ བྷིཀྑུསྶ དུཀྐཊཱཔཏྟིབྷཱཝཾ དཱིཔེཏི.

༥༤༡. ཝིརུདྡྷམཏྠཾ ནཡཏི པཛཧཏཱིཏི ཝིནཡོ, ཝིནིཙྪཡོ, ཏཾ ཝིནཡཔིཊཀཏྠཝིནིཙྪཡཝིསེསཝིསཡཾ སམྨོཧསངྑཱཏཾ ཝིརུདྡྷཾ པཙྩཏྠིཀཾ ཏདངྒཝསེན པཛཧནཏོ ཝིནཡནཡསངྑཱཏཾ ཏཏོ ཨེཝ ཨཏིབུདྡྷིདཱིཔནཾ, ཨཏིསཡེན བུདྡྷིཾ དཱིཔེཏཱིཏི ཨཏིབུདྡྷིདཱིཔནཾ, ཏཾ ཝིནཡཏྠཝིནིཙྪཡཀཾ ཉཱཎཔདཱིཔཾ ཝིསེསེན ཛཱལེནྟཾ. ཝིཝིདྷེཧི ནཡེཧི ཡུཏྟཏཱཡ ཝིཝིདྷནཡཡུཏཾ. ཝིནཡནཡེཏི ཝིནཡཔིཊཀསྶ པརསནྟཱནཔཱཔནེ, ཝིནཡཝཎྞནཱཡནྟི ཝུཏྟཾ ཧོཏི.

ཨིཏི ཝིནཡཏྠསཱརསནྡཱིཔནིཡཱ

ཝིནཡཝིནིཙྪཡཝཎྞནཱཡ

སངྒྷཱདིསེསཀཐཱཝཎྞནཱ ནིཊྛིཏཱ.

ཨནིཡཏཀཐཱཝཎྞནཱ

༥༤༢-༣. ཨིདཱནི ¶ སངྒྷཱདིསེསཀཐཱནནྟརཾ ཨནིཡཏཀཐཾ དསྶེཏུམཱཧ ‘‘རཧོནིསཛྫསྶཱདེནཱ’’ཏིཨཱདི. རཧསི ནིསཛྫཱ རཧོནིསཛྫཱ, ཏསྶཱ ཨསྶཱདོ རཧོནིསཛྫསྶཱདོ, ཏེན རཧོནིསཛྫསྶཱདེན, མེཐུནདྷམྨསནྣིསྶིཏེན ཀིལེསེནཱཏི ཨཏྠོ. ཝུཏྟཉྷི ཨཊྛཀཐཱཡཾ ‘‘རཧོནིསཛྫསྶཱདོཏི མེཐུནདྷམྨསནྣིསྶིཏཀིལེསོ ཝུཙྩཏཱི’’ཏི (པཱརཱ. ཨཊྛ. ༢.༤༥༡). ‘‘རཧོ ནཱམ ཙཀྑུསྶ རཧོ སོཏསྶ རཧོ. ཙཀྑུསྶ རཧོ ནཱམ ན སཀྐཱ ཧོཏི ཨཀྑིཾ ཝཱ ནིཁཎིཡམཱནེ བྷམུཀཾ ཝཱ ཨུཀྑིཔིཡམཱནེ སཱིསཾ ཝཱ ཨུཀྑིཔིཡམཱནེ པསྶིཏུཾ. སོཏསྶ རཧོ ནཱམ ན སཀྐཱ ཧོཏི པཀཏིཀཐཱ སོཏུ’’ནྟི (པཱརཱ. ༤༤༥) པདབྷཱཛནེ ཝུཏྟརཧེསུ ¶ ཙཀྑུསྶ རཧོ ཨེཝ ཨིདྷཱདྷིཔྤེཏོ. ཡཐཱཧ ཨཊྛཀཐཱཡཾ ‘‘ཀིཉྩཱཔི པཱལི༹ཡཾ ‘སོཏསྶ རཧོ’ཏི ཨཱགཏཾ, ཙཀྑུསྶ རཧེནེཝ པན པརིཙྪེདོ ཝེདིཏབྦོ’’ཏི (པཱརཱ. ཨཊྛ. ༢.༤༤༤-༤༤༥).

ཙཀྑུསྶ རཧཏྟཱ ‘‘པཊིཙྪནྣ’’ནྟི ཨིམམྤི པཊིཙྪནྣཏྟཱ ཨེཝ ‘‘ཨལཾཀམྨནིཡ’’ནྟི ཨིམམྤི སངྒཎྷཱཏི. ནིསཛྫསདྡོཔཱདཱནེན ‘‘ཨཱསནེ’’ཏི ཨིདམྤི གཧིཏམེཝ. ‘‘མཱཏུགཱམསྶ སནྟིཀཾ གནྟུཀཱམོ’’ཏི ཨིམིནཱ ‘‘མཱཏུགཱམེན སདྡྷི’’ནྟི ཨིདམྤི གཧིཏམེཝ. ཨེཝཾ སཱམཏྠིཡཱ ལབྦྷམཱནཔདོཔཱདཱནེན ཡོ པན བྷིཀྑུ མཱཏུགཱམེན སདྡྷིཾ ཨེཀོ ཨེཀཱཡ རཧོ པཊིཙྪནྣེ ཨཱསནེ ཨལཾཀམྨནིཡེ ནིསཛྫསྶཱདེནཱཏི ཝུཏྟཾ ཧོཏི. ཙཀྑུསྶ རཧབྷཱཝེན ཀུཊྚཱདིཔཊིཙྪནྣེ ཏེནེཝ མེཐུནསེཝནཀམྨསྶ ཨནུརཱུཔེ ཨཱསནེ ཏདཧུཛཱཏཱཡཔི མནུསྶིཏྠིཡཱ སཧ ནིསཛྫསྶཱདརཱགེན སམནྣཱགཏོ ཧུཏྭཱཏི ཨཏྠོ. ཨེཏྠ ‘‘མཱཏུགཱམསྶཱ’’ཏི ཏདཧུཛཱཏམྤི ཨིཏྠིཾ གཎྷཱཏཱིཏི ཀུཏོ ལབྦྷཏཱིཏི? ‘‘མཱཏུགཱམོ ནཱམ མནུསྶིཏྠཱི, ན ཡཀྑཱི, ན པེཏཱི, ན ཏིརཙྪཱནགཏཱ, ཨནྟམསོ ཏདཧུཛཱཏཱཔི དཱརིཀཱ, པགེཝ མཧཏྟརཱི’’ཏི (པཱརཱ. ༤༤༥) པདབྷཱཛནཏོ ལབྦྷཏི.

‘‘ནིཝཱསེཏཱི’’ཏི ཨིམིནཱ ‘‘ཀཱཡབནྡྷནཾ བནྡྷཏི, ཙཱིཝརཾ པཱརུཔཏཱི’’ཏི ཨིདཾ ལཀྑཱིཡཏི. སབྦཏྠཱཏི ཡཐཱཝུཏྟཾ པཡོགཏོ པུབྦཱཔརཔཡོགེ སངྒཎྷཱཏི. ཏེནེཝ ‘‘པཡོགེ ཙ པཡོགེ ཙཱ’’ཏི ཝིཙྪཱཔཡོགོ ཀཏོ. ནིསཱིདཏོ ཙསྶ དུཀྐཊནྟི ཡོཛནཱ. ‘‘ཨུབྷིནྣམྤི ནིསཛྫཱཡ པཱཙིཏྟིཡ’’ནྟི ཝཀྑམཱནཏྟཱ དུཀྐཊཾ སནྡྷཱཡ ཨེཀཀསྶ ནིསཱིདཏོཏི གཧེཏབྦཾ.

༥༤༤. ནིསཛྫཱཡ ¶ ཨུབྷིནྣམྤཱིཏི ཨེཏྠ ‘‘སཀི’’ནྟི སེསོ, ཨུབྷིནྣཾ ནིསཛྫཱཔཱུརཎཝསེན ཨཉྙམཉྙསྶ པུརེ ཝཱ པཙྪཱ ཝཱ ཨེཀཀྑཎེ ¶ ཝཱ མཱཏུགཱམསྶ ཝཱ བྷིཀྑུསྶ ཝཱ ཨེཀཝཱརཾ ནིསཛྫཱཡཱཏི ཝུཏྟཾ ཧོཏི. ཝུཏྟཉྷེཏཾ པཱལི༹ཡཾ ‘‘མཱཏུགཱམེ ནིསིནྣེ བྷིཀྑུ ཨུཔནིསིནྣོ ཝཱ ཧོཏཱི’’ཏིཨཱདི (པཱརཱ. ༤༤༥). ཧོཏི པཱཙིཏྟིཡནྟི ཡོཛནཱ. པཡོགགཎནཱཡ ཙ ཧོནྟི པཱཙིཏྟིཡཱནཱིཏི གཧེཏབྦཾ, མཱཏུགཱམསྶ ཝཱ བྷིཀྑུནོ ཝཱ ཨུབྷིནྣཾ ཝཱ ཨུཊྛཱཡུཊྛཱཡ པུནཔྤུནཾ ཨུཔནིསཱིདནཔཡོགགཎནཱཡ ཙཱཏི ཨཏྠོ. ‘‘ཨཱཔཏྟཱིཧིཔི ཏཱིཧིཔཱི’’ཏི ཝཀྑམཱནཏྟཱ པཱཙིཏྟིཡགྒཧཎཾ པཱརཱཛིཀསངྒྷཱདིསེསཱནཾ ཨུཔལཀྑཎཾ ཧོཏི, ཏཱིསུ ཨེཀཾ ཧོཏཱིཏི ཝུཏྟཾ ཧོཏི. ཨེཏྠ ‘‘པཡོགགཎནཱཡཱ’’ཏི ཨིདཾ པཱརཱཛིཀཱཡ ན ལབྦྷཏི ཨེཀཔཡོགེནེཝ སིཛ྄ཛྷནཏོ. ཀཱཡསཾསགྒསངྒྷཱདིསེསོ, པན སརཱིརཏོ པུནཔྤུནཾ ཝིཡུཛྫིཏྭཱ ཕུསནེན པཱཙིཏྟིཡཉྩ ཡཐཱཝུཏྟནཡེནེཝ ལབྦྷཏི.

བཧཱུསུཔི མཱཏུགཱམེསུ བཧུཀཱནི པཱཙིཏྟིཡཱནི ཧོནྟཱིཏི ཡོཛནཱ. བཧཱུསུ མཱཏུགཱམེསུ ནིསིནྣེསུ ནིསིནྣཱནཾ གཎནཱཡ ཨེཀེནེཝ པཡོགེན བཧཱུནི པཱཙིཏྟིཡཱནི ཙ སངྒྷཱདིསེསཱ ཙ ཧོནྟི. ‘‘པཡོགགཎནཱཡ ཙཱ’’ཏི ཨིམསྶ ཨེཏྠཱཔི ཡུཛྫམཱནཏྟཱ ཏཱསུ ཝིསུཾ ཝིསུཾ ཨུཊྛཱཡུཊྛཱཡ པུནཔྤུནཾ ནིསཱིདནྟཱིསུ, སཡཉྩ ཨུཊྛཱཡུཊྛཱཡ པུནཔྤུནཾ ནིསཱིདཏོ ཏཱསཾ གཎནཱཡ ཨཱཔཛྫིཏབྦཱཔཏྟིཡོ པཡོགགཎནཱཡ ཙ བཧཱུ ཧོནྟཱིཏི ཨིདཾ ལབྦྷཏི. ཨེཏྠཱཔི པན པཱརཱཛིཀཾ ན ལབྦྷཏི, སངྒྷཱདིསེསོ, པཱཙིཏྟིཡཉྩ ལབྦྷཏི.

༥༤༥. སམཱིཔེ ཋིཏོཔི ཨནྡྷོ ཨནཱཔཏྟིཾ ན ཀརོཏཱིཏི སོཏསྶ རཧབྷཱཝེ ཨསཏིཔི པདྷཱནབྷཱུཏསྶ ‘‘ཙཀྑུསྶ རཧོ’’ཏི ཨིམསྶ ཨངྒསྶ ཝིཛྫམཱནཏྟཱ ཝུཏྟཾ ‘‘ཨནྟོདྭཱདསཧཏྠཀེ’’ཏི, ཨིམིནཱ སཝནཱུཔཙཱརེ ཝིཛྫམཱནེཔཱིཏི ཝུཏྟཾ ཧོཏི. ཨིཏྠཱིནཾ ཏུ སཏམྤི ཙ ན ཀརོཏི ཨནཱཔཏྟིནྟི ¶ ཡོཛནཱ, ཝིཉྙུནོ པུརིསསྶ ཨསནྣིཧིཏབྷཱཝེནཱཏི ཨདྷིཔྤཱཡོ. ‘‘ཨིཏྠཱིནམྤི སཏམྤི ཙཱ’’ཏི ལིཁནྟི, ཏཏོཔི ཨཡམེཝ པཱཋོ སུནྡརོ. པི-སདྡོ ཝཱ ཏུ-སདྡཏྠེ དཊྛབྦོ.

༥༤༦. ནིཔཛྫིཏྭཱཏི ཨེཏྠ ‘‘སམཱིཔེ’’ཏི སེསོ, ‘‘ནིདྡཱཡནྟོཔཱི’’ཏི ཨེཏསྶ ཝིསེསཀེན ‘‘ནིཔཛྫིཏྭཱ’’ཏི ཨིམིནཱ ནིསཱིདིཏྭཱ ནིདྡཱཡནྟོཏི ཨིམསྶ ནིཝཏྟིཏཏྟཱ སམཱིཔེ ནིསཱིདིཏྭཱ ནིདྡཱཡནྟོཔི ཨནནྡྷོ མནུསྶཔུརིསོ ཨནཱཔཏྟིཾ ཀརོཏཱིཏི ལབྦྷཏི. ‘‘ཀེཝལ’’ནྟི ཝིསེསནེན བལཝནིདྡཱུཔགཏོ ¶ གཧིཏོཏི ཏཐཱ ཨཧུཏྭཱ ཨནྟརནྟརཱ ཨཱཔནྣཱཔནྣེ ཝིནིཙྪིནིཏྭཱ པཝཏྟམཱནཱཡ ཀཔིནིདྡཱཡ ནིདྡཱཡནྟོཔི ཨནཱཔཏྟིཾ ཀརོཏཱིཏི ཨཡམཏྠོ ལབྦྷཏི. ‘‘པིཧིཏདྭཱརགབྦྷསྶཱ’’ཏི ཝཏྟབྦེ མཛ྄ཛྷཔདལོཔཱིསམཱསཝསེན ‘‘པིཧིཏགབྦྷསྶཱ’’ཏི ཝུཏྟཾ. ‘‘དྭཱརེ’’ཏི ཨིམིནཱ དྭཱརེཀདེསབྷཱུཏཾ ཨུམྨཱརཾ ཝཱ ཏཾསམཱིཔཾ ཝཱ ཨུཔཙཱརེན ཝུཏྟནྟི དཊྛབྦཾ. སཙེ གབྦྷོ པིཧིཏདྭཱརོ ན ཧོཏི, ཨནཱཔཏྟཱིཏི བྱཏིརེཀཏོ དསྶིཏཾ.

༥༤༧. ཨིམསྨིཾ ཨནིཡཏསིཀྑཱཔདེ པཱལི༹ཡཾ ཨནཱཔཏྟིཝཱརེ ཨསཏིཔི ‘‘ཡོ པན བྷིཀྑུ མཱཏུགཱམེན སདྡྷིཾ རཧོ པཊིཙྪནྣེ ཨཱསནེ ནིསཛྫཾ ཀཔྤེཡྻ, པཱཙིཏྟིཡ’’ནྟི (པཱཙི. ༢༨༥) པཉྩམསྶ ཨཙེལཀཝགྒསྶ ཙཏུཏྠསིཀྑཱཔདེ ཨནཱཔཏྟིཝཱརེ ‘‘ཨནཱཔཏྟི ཡོ ཀོཙི ཝིཉྙཱུ པུརིསོ དུཏིཡོ ཧོཏི, ཏིཊྛཏི ན ནིསཱིདཏི, ཨརཧོཔེཀྑོ, ཨཉྙཝིཧིཏོ ནིསཱིདཏི, ཨུམྨཏྟཀསྶ ཨཱདིཀམྨིཀསྶཱ’’ཏི (པཱཙི. ༢༨༨) ཝུཏྟེ ཨནཱཔཏྟིཝཱརེ སངྒཧེཏུམཱཧ ‘‘ཨནནྡྷེ སཏཱི’’ཏིཨཱདི. ‘‘ཨེཏསྶ སམཱིཔེ’’ཏི པཀརཎཏོ ལབྦྷཏི. ཨིདྷ པུལླིངྒནིདྡེསེན པུརིསོ ལབྦྷཏི, ‘‘ཏེནཱཔི ཨབཱལེན བྷཝིཏབྦཾ, མནུསྶཛཱཏིཀེན བྷཝིཏབྦ’’ནྟི ཨིདཉྩ ¶ ‘‘ཝིཉྙུསྨི’’ནྟི ཨིམིནཱ ལབྦྷཏི. ཨནྡྷསདིསནིདྡཱུཔགཏཔཊིཔཀྑཝཱཙིཨནནྡྷཔདེན ‘‘ཨནིདྡཱཡནྟེ’’ཏི ལབྦྷཏི, མནཱཔཱམནཱཔཾ ཛཱནནྟེ ཨནིདྡཱཡནྟེ མནུསྶཔུརིསེ དསྶནཱུཔཙཱརསྶ ཨནྟོ ཝིཛྫམཱནེཏི ཨཏྠོ.

‘‘ནིསཛྫཔཙྩཡཱ དོསོ ནཏྠཱི’’ཏི ཨིམིནཱ སམྦནྡྷོ, ཨེཝརཱུཔེ རཧོ ཨཱསནེ མཱཏུགཱམེན སདྡྷིཾ ནིསིནྣཔཙྩཡཱ ཨཱཔཏྟི ནཏྠཱིཏི ཨཏྠོ. ‘‘ཋིཏསྶཱ’’ཏི ཨིམིནཱཔི ཏདེཝ པདཾ ཡོཛེཏབྦཾ. ཝིཉྙུམྷི པཊིབལེ མནུསྶཔུརིསེ ཨསནྣིཧིཏེཔི ཏཐཱཝིདྷེ རཧོ ཨཱསནེ མཱཏུགཱམེ ཨཱསནེ ནིསིནྣེཔི སཡཱནེཔི ཋིཏེཔི སཡཾ ཋིཏསྶ ནིསཛྫཱཡ ཨབྷཱཝཱ ཏཔྤཙྩཡཱ ཨཱཔཏྟི ན ཧོཏཱིཏི ཨཏྠོ. ཨརཧསཉྙིནོ ནིསཛྫཔཙྩཡཱ དོསོ ནཏྠཱིཏི རཧོ ཨཱསནེ མཱཏུགཱམེན སདྡྷིཾ ནིསཛྫནྟསྶཱཔི ‘‘རཧོ’’ཏི སཉྙཱརཧིཏསྶ ནིསཱིདཏོ ནིསཛྫཔཙྩཡཱ ཨནཱཔཏྟཱིཏི ཨཏྠོ. ཝིཀྑིཏྟཙེཏསོ ནིསཛྫཔཙྩཡཱ དོསོ ནཏྠཱིཏི ཡོཛནཱ.

༥༤༨. ཨེཏྟཱཝཏཱ པཱཙིཏྟིཡཱཔཏྟིམཏྟཏོ ཨནཱཔཏྟིཔྤཀཱརཾ དསྶེཏྭཱ ཨིདཱནི ཨིམསྶ སིཀྑཱཔདསྶ ཨནིཡཏཝོཧཱརཧེཏུབྷཱུཏཱཧི ཏཱིཧི ཨཱཔཏྟཱིཧི ཨནཱཔཏྟིཔཀཱརཾ དསྶེཏུམཱཧ ‘‘ན དོསོ’’ཏིཨཱདི. ཨཱཔཏྟཱིཧིཔི ཏཱིཧིཔཱིཏི ‘‘ནིསཛྫཾ བྷིཀྑུ པཊིཛཱནམཱནོ ཏིཎྞཾ དྷམྨཱནཾ ཨཉྙཏརེན ¶ ཀཱརེཏབྦོ པཱརཱཛིཀེན ཝཱ སངྒྷཱདིསེསེན ཝཱ པཱཙིཏྟིཡེན ཝཱ’’ཏི (པཱརཱ. ༤༤༤) པཱལི༹ཡཾ ཝུཏྟཱཧི ‘‘པཋམཔཱརཱཛིཀཱཔཏྟིཀཱཡསཾསགྒསངྒྷཱདིསེསཱཔཏྟིཔཱཙིཏྟིཡཱཔཏྟཱི’’ཏི ཨིམཱཧི ཏཱིཧིཔི ཨཱཔཏྟཱིཧཱིཏི ཝུཏྟཾ ཧོཏཱིཏི.

པཋམཱནིཡཏཀཐཱཝཎྞནཱ.

༥༤༩. ཝཏྟབྦབྷཱཝེནཱདྷིཀཏདུཏིཡཱནིཡཏཝིནིཙྪཡཏོ པཋམཱནིཡཏེ ཝུཏྟཝིནིཙྪཡེཧི སམཾ ཝིནིཙྪཡཾ པཧཱཡ ཏཏྠ ¶ ཨཝུཏྟཾ ཨིམསྶེཝ ཝིནིཙྪཡཝིསེསཾ དསྶེཏུམཱཧ ‘‘ཨནནྡྷཱ’’ཏིཨཱདི. ཨིདྷ དུཊྛུལླཝཱཙཱསངྒྷཱདིསེསསྶཱཔི གཧིཏཏྟཱ ཏཏོ ཨནཱཔཏྟིཀརཾ དསྶེཏུཾ ‘‘ཨབདྷིརོ’’ཏི ཝུཏྟཾ. ཨནནྡྷོ ཨབདྷིརོཏི ‘‘པུརིསོ’’ཏི ཨིདཾ སནྡྷཱཡ ཝུཏྟཾ. ‘‘ཨིཏྠཱི’’ཏི ཨིདཾ སནྡྷཱཡ ‘‘ཨནནྡྷཱབདྷིརཱ’’ཏི གཧེཏབྦཾ. ཨེཝམུཔརིཔི. ཏེནཱཔི སཝནཱུཔཙཱརནྟོགདྷེན བྷཝིཏབྦནྟི དསྶེཏུཾ ‘‘ཨནྟོདྭཱདསཧཏྠཊྛོ’’ཏི ཝུཏྟཾ.

༥༥༠. ‘‘ཨནྡྷོ ཨབདྷིརོ ཨནཱཔཏྟིཾ ན ཀརོཏཱི’’ཏི ཨིདཾ ཀཱཡསཾསགྒསངྒྷཱདིསེསཾ སནྡྷཱཡ ཝུཏྟཾ. ‘‘བདྷིརོ ཝཱཔི ཙཀྑུམཱ, ན ཀརོཏི ཨནཱཔཏྟི’’ནྟི ཨིདཾ པན དུཊྛུལླཝཱཙཱསངྒྷཱདིསེསཾ སནྡྷཱཡ ཝུཏྟནྟི ཨེཝམེཏྠ སནྡྷཱཡ བྷཱསིཏཏྠོ ཝེདིཏབྦོ.

པུརིམཱནིཡཏཀཐཱཡ ཨཝུཏྟཝིསེསསྶ དུཏིཡཱནིཡཏཀཐཱཡ ཝཏྟུམིཙྪིཏཏྟཱ ཨཡམྤི ཝིསེསོ ཨིདྷ ཝཏྟབྦོ. ཀོཡཾ ཝིསེསོ, ཡོ ཨིདྷ ཝཏྟབྦོཏི ཙེ? ཏཏྠ ‘‘པཊིཙྪནྣེ ཨཱསནེ ཨལཾཀམྨནིཡེ’’ཏི (པཱརཱ. ༤༤༤) ཝུཏྟཾ ཨཱསནངྒདྭཡཾ ཨིདྷ ‘‘ན ཧེཝ ཁོ པན པཊིཙྪནྣཾ ཨཱསནཾ ཧོཏི ནཱལཾཀམྨནིཡ’’ནྟི (པཱརཱ. ༤༥༣) ནིསེདྷེཏྭཱ ‘‘ཨལཉྩ ཁོ ཧོཏི མཱཏུགཱམཾ དུཊྛུལླཱཧི ཝཱཙཱཧི ཨོབྷཱསིཏུ’’ནྟི (པཱརཱ. ༤༥༣) ཨིདཾ ཨཔུབྦངྒཾ ཝུཏྟཾ. ཏཏྲ མཱཏུགཱམོཏི ཨནྟམསོ ཏདཧུཛཱཏཱཔི དཱརིཀཱ གཧིཏཱ, ཨིདྷ ‘‘མཱཏུགཱམོ ནཱམ མནུསྶིཏྠཱི, ན ཡཀྑཱི, ན པེཏཱི, ན ཏིརཙྪཱནགཏཱ, ཝིཉྙཱུ པཊིབལཱ སུབྷཱསིཏདུབྦྷཱསིཏཾ དུཊྛུལླཱདུཊྛུལླཾ ཨཱཛཱནིཏུ’’ནྟི (པཱརཱ. ༤༥༤) ཝིཉྙཱུ པཊིབལོ མཱཏུགཱམོཝ ཝུཏྟོ. ཏཏྠ ‘‘པཱརཱཛིཀེན ཝཱ སངྒྷཱདིསེསེན ཝཱ པཱཙིཏྟིཡེན ཝཱ’’ཏི (པཱརཱ. ༤༤༤) ཏིསྶོ ཨཱཔཏྟིཡོ ཝུཏྟཱ, ཨིདྷ ‘‘ནིསཛྫཾ བྷིཀྑུ པཊིཛཱནམཱནོ དྭིནྣཾ དྷམྨཱནཾ ཨཉྙཏརེན ¶ ཀཱརེཏབྦོ སངྒྷཱདིསེསེན ཝཱ པཱཙིཏྟིཡེན ཝཱ’’ཏི (པཱརཱ. ༤༥༣) དྭེཡེཝ ཨཱཔཏྟིཡོ ཝུཏྟཱ. སངྒྷཱདིསེསེསུ ཙ ཏཏྠ ‘‘སཱ ཙེ ཨེཝཾ ཝདེཡྻ ‘ཨཡྻོ ¶ མཡཱ དིཊྛོ ནིསིནྣོ མཱཏུགཱམེན སདྡྷིཾ ཀཱཡསཾསགྒཾ སམཱཔཛྫནྟོ’ཏི, སོ ཙ ཏཾ པཊིཛཱནཱཏི, ཨཱཔཏྟིཡཱ ཀཱརེཏབྦོ’’ཏི (པཱརཱ. ༤༤༨) ཀཱཡསཾསགྒསངྒྷཱདིསེསོཝ ཝུཏྟོ, ཨིདྷ སོ ཙ ཝུཏྟོ, ‘‘སཱ ཙེ ཨེཝཾ ཝདེཡྻ ‘ཨཡྻསྶ མཡཱ སུཏཾ ནིསིནྣསྶ མཱཏུགཱམཾ དུཊྛུལླཱཧི ཝཱཙཱཧི ཨོབྷཱསེནྟསྶཱ’ཏི, སོ ཙ ཏཾ པཊིཛཱནཱཏི, ཨཱཔཏྟིཡཱ ཀཱརེཏབྦོ’’ཏི (པཱརཱ. ༤༥༥) དུཊྛུལླཝཱཙཱསངྒྷཱདིསེསོ ཙ ཝུཏྟོ. ཨེཏྟཀོ ཨུབྷིནྣམནིཡཏཱནཾ ཝིསེསོ.

ཨཡཾ ཀསྨཱ ན ཝུཏྟོཏི? ཨཡཾ སམྦོདྷཝཏྠུཝིསེསོ ཝཏྟུམིཙྪིཏོ པན ཨཊྛཀཐཱགཏཝིནིཙྪཡཝིསེསཏོཏི ཏསྨཱ ན ཝུཏྟོཏི དཊྛབྦོ. ཏིསམུཊྛཱནམེཝིདཾ ཀཱཡཙིཏྟཝཱཙཱཙིཏྟཀཱཡཝཱཙཱཙིཏྟཝསེན ཏཱིཎི སམུཊྛཱནཱནི ཨེཏསྶཱཏི ཀཏྭཱ.

ཨིམེཧིཔི དྭཱིཧི ཨནིཡཏསིཀྑཱཔདེཧི སིཀྑཱཔདནྟརེསུ པཉྙཏྟཱཡེཝ ཨཱཔཏྟིཡོ, ཨནཱཔཏྟིཡོ ཙ དསྶིཏཱ, ན ཀོཙི ཨཱཔཏྟིཝིསེསོ ཝུཏྟོ, ཏསྨཱ ཀིམེཏེསཾ ཝཙནེནཱཏི? ཝུཙྩཏེ – ཝིནཡཝིནིཙྪཡལཀྑཎཾ ཋཔེཏུཾ བྷགཝཏཱ ཨུཔྤནྣེ ཝཏྠུམྷི དྭེ ཨནིཡཏཱ པཉྙཏྟཱ. ཀཐཾ? ཨེཝརཱུཔཱཡཔི སདྡྷེཡྻཝཙནཱཡ ཨུཔཱསིཀཱཡ ཝུཙྩམཱནོ པཊིཛཱནམཱནོཝ ཨཱཔཏྟིཡཱ ཀཱརེཏབྦོ, ན ཨཔྤཊིཛཱནམཱནོ, ཏསྨཱ ‘‘ཡཱཡ ཀཱཡཙི ཨཱཔཏྟིཡཱ ཡེན ཀེནཙི ཙོདིཏེ པཊིཉྙཱཏཀརཎཾཡེཝངྒཾ ཀཱཏབྦ’’ནྟི ཨིམེཧི སིཀྑཱཔདེཧི ཝིནིཙྪཡལཀྑཎཾ ཋཔིཏནྟི ཝེདིཏབྦཾ. ཨཐ ཀསྨཱ བྷིཀྑུནཱིནཾ ཨནིཡཏཾ ¶ ན ཝུཏྟནྟི? ཨིདམེཝ ལཀྑཎཾ སབྦཏྠ ཨནུགཏནྟི ན ཝུཏྟཾ.

དུཏིཡཱནིཡཏཀཐཱཝཎྞནཱ.

ཨིཏི ཝིནཡཏྠསཱརསནྡཱིཔནིཡཱ

ཝིནཡཝིནིཙྪཡཝཎྞནཱཡ

ཨནིཡཏཀཐཱཝཎྞནཱ ནིཊྛིཏཱ.

ནིསྶགྒིཡཀཐཱཝཎྞནཱ

༥༥༡. ཨེཝཾ ཨནིཡཏཀཐཾ དསྶེཏྭཱ ཨིདཱནི ནིསྶགྒིཡཀཐཾ དསྶེཏུམཱཧ ‘‘ཁོམ’’ནྟིཨཱདི ¶ . ཁོམནྟི ཨེཝཾནཱམཀཾ ཙཱིཝརཾ. ཁོམནྟི གཙྪཝིསེསསྶ ནཱམཾ, ཏསྶ ཝཱཀེཧི ཀཏཙཱིཝརཾ ཀཱརཎོཔཙཱརཝོཧཱརཝསེན ‘‘ཁོམ’’ནྟི ཝུཏྟཾ. ཀཔྤཱསནྟི ཀཔྤཱསསུཏྟམཡཾ ཙཱིཝརཾ, ཨིདམྤི ཝུཏྟནཡེནེཝ ‘‘ཀཔྤཱས’’ནྟི ཝུཙྩཏི. ཀོསེཡྻཾ ནཱམ ཀོསཀཱརཀིམིཀོསཾ, ཀོསེན ནིབྦཏྟཾ སུཏྟཾ ཀོསེཡྻཾ. ཨིདྷ པན ཏེན ཀོསེཡྻསུཏྟེན ནིབྦཏྟཾ ཙཱིཝརཾ ‘‘ཀོསེཡྻ’’ནྟི ཝུཏྟཾ. སཱཎནྟི སཱཎཝཱཀསུཏྟེཧི ཝཱཡིཏྭཱ ཀཏཙཱིཝརཾ. ཨིདཉྩ ཁོམཾ ཝིཡ དཊྛབྦཾ. བྷངྒནྟི ཁོམསུཏྟཱདཱིནི སབྦཱནི, ཨེཀཙྩཱནི ཝཱ མིསྶེཏྭཱ ཀཏཙཱིཝརཾ. ཨིདམྤི ཀརཎཔྤཀཱརེན ལདྡྷནཱམཀཾ. ‘‘བྷངྒཾ ནཱམ ཨེཀཱ གཙྪཛཱཏི, ཏསྶཱ ཝཱཀམཡསུཏྟེཧི ཝཱཡིཏྭཱ ཀཏཙཱིཝར’’ནྟི ཀེཙི. ཨིམསྨིཾ པཀྑེ ཁོམཾ ཝིཡ གཧེཏབྦཾ. ཀམྦལནྟི མནུསྶལོམཝཱལ༹ལོམཾ ཝིནཱ སེསལོམེཧི ཝཱཡིཏྭཱ ཀཏཙཱིཝརཾ ཝུཏྟནྟི. ཨིདཾ ‘‘ཙཱིཝརཾ ནཱམ ཚནྣཾ ཙཱིཝརཱནཾ ཨཉྙཏརཾ ཙཱིཝར’’ནྟི (པཱརཱ. ༤༦༣) པདབྷཱཛནེ ཙ ‘‘ཁོམཾ ཀཔྤཱསིཀཾ ཀོསེཡྻཾ ཀམྦལཾ སཱཎཾ བྷངྒ’’ནྟི (པཱརཱ. ཨཊྛ. ༢.༤༦༢-༤༦༣) ཨཊྛཀཐཱཡ ཙ ཝུཏྟཾ སནྡྷཱཡཱཧ. ‘‘ཛཱཏིཏོ’’ཏི ¶ ཨིདཾ པམཱཎཱདིབྷེདསྶ ཝཀྑམཱནཏྟཱ ཝུཏྟཾ. ཛཱཏིཏོཏི ཁོམཱདིསཱམཉྙཏོ. སཱམཉྙཉྷི ‘‘ཛཱཏཱི’’ཏི ཝུཙྩཏི. དཱིགྷརསྶཐཱུལསུཁུམནཱིལཔཱིཏཱདིབྷེདབྷིནྣཱནཾ སབྦེསཾ ཝཏྠཱཝཡཝཱནཾ སངྒཱཧིཀཁོམསུཏྟམཡཏཱསཱམཉྙཾ ཛཱཏཱིཏི ཝུཏྟཾ ཧོཏི. ཨེཝཾ སེསེསུཔི.

༥༥༢. དུཀཱུལནྟི ཨེཝཾནཱམཀཾ རུཀྑཝཱཀམཡཙཱིཝརཾ. པཏྟུཎྞནྟི པཏྟུཎྞདེསེ སཉྫཱཏཝཏྠཾ. ‘‘པཏྟུཎྞཾ ཀོསེཡྻཝིསེསོ’’ཏི ཨབྷིདྷཱནཀོསེ ཝུཏྟཾ. ཙིནནྟི ཙིནདེསེ ཨུཔྤནྣཝཏྠཾ. སོམཱརཔཊྚཀནྟི སོམཱརདེསེ ཨུཔྤནྣཝཏྠཾ. ‘‘སོམཱརཙིནཔཊཀ’’ནྟིཔི ལིཁནྟི, སོཡེཝཏྠོ. ཨིདྡྷིཛནྟི ཨེཧིབྷིཀྑཱུནཾ པུཉྙིདྡྷིཡཱ ནིབྦཏྟཾ ཙཱིཝརཾ. དེཝདིནྣནྟི དེཝཏཱཧི དིནྣཾ ཙཱིཝརཾ. ཏཉྷི ཀཔྤརུཀྑེ ནིབྦཏྟཾ, ཛཱལིནིཡཱ དེཝཀཉྙཱཡ ཨནུརུདྡྷཏྠེརསྶ དིནྣཝཏྠསདིསཾ. ཏསྶཱཏི ཛཱཏིཏོ ཚབྦིདྷསྶ ཀཔྤིཡཙཱིཝརསྶ. ཨིདཾ ཚབྦིདྷཙཱིཝརཾ ཡཐཱརཧཾ ཨནུལོམིཀཾ ཝུཏྟནྟི ཨཏྠོ. དུཀཱུལཉྷི སཱཎསྶ ཨནུལོམཾ ཝཱཀམཡཏྟཱ, པཏྟུཎྞཱདཱིནི ཀོསེཡྻསྶ ཨནུལོམཱནི པཱཎཀེཧི ཀཏསུཏྟམཡཏྟཱ, ཨིདྡྷིཛམྤི ཁོམཱདཱིནཾཡེཝ ཨཉྙཏརཾ ཧོཏཱིཏི ཏེསཾ ཨནུལོམཾ, དེཝདིནྣམྤི ཁོམཱདཱིནཾཡེཝ ཨནུལོམཾ ཧོཏི ཏེསཾ ཨཉྙཏརབྷཱཝཏོ. ཡཐཱཧ –

‘‘སཱཎསྶ ཏུ དུཀཱུལཉྷི, ཨིདྡྷིཛཾ དེཝདིནྣཀཾ;

ཁོམཱདཱིནཾཝསིཊྛཾཏུ, ཀོསེཡྻསྶཱནུལོམིཀ’’ནྟི.

༥༥༣. ཏིཎྞཾ ¶ ཙཱིཝརཱནཾ སམཱཧཱརོ ཏིཙཱིཝརནྟི པམཱཎཡུཏྟཾ སངྒྷཱཊིཨཱདིནཱམེན ཨདྷིཊྛིཏཙཱིཝརསྶེཝ ནཱམཏྟཱ ཏདེཝ ཝུཙྩཏི. གཎནཝསེན ཡཾ ཀིཉྩི ཙཱིཝརཏྟཡཾ ན ཝཏྟབྦཾ. སམུདྡེཀདེསོཔི ཡཐཱ ‘‘སམུདྡོ’’ཏི ཝུཙྩཏི, ཨེཝཾ ཨདྷིཊྛིཏེསུ ཏཱིསུ ཙཱིཝརེསུ ཨཉྙཏརཾ ‘‘ཏིཙཱིཝར’’ནྟི ཝུཙྩཏི. པརིཀྑཱརཙོལ༹ནྟི ¶ སངྒྷཱཊིཨཱདིཝིསིཊྛནཱམེཧི ཨནདྷིཊྛིཏཾ ‘‘ཨནུཛཱནཱམི བྷིཀྑཝེ ཨཱཡཱམེན ཨཊྛངྒུལཾ སུགཏངྒུལེན ཙཏུརངྒུལཝིཏྠཏཾ པཙྪིམཾ ཙཱིཝར’’ནྟི (པཱརཱ. ༣༥༨) ཨནུཉྙཱཏཾ པཙྪིམཙཱིཝརཔརིཡནྟཾ ཀཏྭཱ ཀཏཱཀཏསྶ ཡསྶ ཀསྶཙི ཙཱིཝརསྶ རུལ༹ྷིསཉྙཱ.

མུཁཾ སནྡམཱནལཱལཾ པུཉྪཏི ཨེཏེནཱཏི མུཁཔུཉྪནནྟི ཀཔོལཏོ ནིཙྩཾ སནྡམཱནལཱལཱནཾ པུཉྪནཏྠཱཡ ཨནུཉྙཱཏསྶ ཙཱིཝརཝིསེསསྶ ནཱམཾ. ནིསཱིདནྟི ཨེཏྠཱཏི ནིསཱིདནནྟི ཙ བྷིཀྑཱུནཾ ཨཏྠརིཏྭཱ ནིསཱིདིཏུཾ ཨནུཉྙཱཏསྶ ཙཱིཝརསྶ ནཱམཾ. ཨདྷིཊྛེཡྻཱཏི ‘‘ཨིམཾ ཀཎྜུཔྤཊིཙྪཱདི’’ནྟིཨཱདིནཱ (ཝི. ཝི. ༥༨༥) ཝཀྑམཱནནཡེན ནཱམཾ གཧེཏྭཱ ཨདྷིཊྛེཡྻཱཏི ཨཏྠོ. པཙྩཏྠརཎམེཝ ཙཱཏི སངྒྷིཀེ མཉྩཔཱིཋེ སརཱིརསམྥུསནེན ཨཱཔཛྫིཏབྦཱཡ ཨཱཔཏྟིཡཱ མོཙནཏྠཱཡ ཏཏྠ ཨཏྠརིཏྭཱ པརིབྷོགཏྠཱཡ ཨནུཉྙཱཏཾ པཙྩཏྠརཎཙཱིཝརཉྩ.

༥༥༤. ཨེཀཱཧནྟི ཝསནཀིརིཡཱཡ ཨཙྩནྟསཾཡོགེ ཨུཔཡོགཝཙནཾ. ཏིཙཱིཝརནྟི ཏིཙཱིཝརེན. ཝིཔྤཝསེཡྻཱཏི ‘‘སངྒྷཱཊིཡཱ ཝཱ ཨུཏྟརཱསངྒེན ཝཱ ཨནྟརཝཱསཀེན ཝཱ’’ཏི (པཱརཱ. ༤༧༦) ཝུཏྟཏྟཱ ཨེཀདེསེ སམུདཱཡོཔཙཱརཝསེན ཨཝཡཝསྶ ཝཙནཏོ ཏིཎྞཾ ཙཱིཝརཱནཾ ཨཉྙཏརེནཱཏིཔི ཝུཏྟཾ ཧོཏི. ‘‘ཏཐཱ’’ཏི ཨིམིནཱ ‘‘ཝིནཱ’’ཏི ཨིདཾ པཙྩཱམསཏི. ཨདྷིཊྛཱཏི ཨདྷིཊྛཱཡཱཏི གཧེཏབྦཾ ‘‘པཊིསངྑཱ ཡོནིསོ’’ཏི (མ. ནི. ༡.༢༢, ༢༣; ཨ. ནི. ༦.༥༨) ཡཐཱ, ཨེཏྠ ‘‘ཝལ༹ཉྫིཡམཱན’’ནྟི སེསོ, ཨདྷིཊྛཱཡ ཝལ༹ཉྫིཡམཱནཾ ནིསཱིདནཾ ཏཐཱ ཝིནཱ ཙཏུམཱསཾ ན ཝསེཡྻཱཏི ཡོཛནཱ.

༥༥༥. ཀཔྤིཡནྟི ཀཔྤིཡཀཱརཎཾ ནཱིལཱདིཝཎྞབྷེདཀརཎཾ. ཀཔྤིཡནྟི ཙ ཀཱརཎེ ཀཱརིཡཱུཔཙཱརེན གཧེཏབྦཾ. བིནྡུཾ དཏྭཱཏི ‘‘ནཱིལཾ ཝཱ ཀདྡམཾ ཝཱ ཀཱལ༹སཱམཾ ཝཱ’’ཏི (པཱཙི. ༣༦༨) ཝུཏྟལོཧམལཱདིནཱ ¶ ཡེན ཀེནཙིཔི མངྒུལཔིཊྛིཔྤམཱཎཱདིཀཾ བིནྡུཾ དཏྭཱ. ཏཏྠཱཏི ཏེསུ ཨདྷིཊྛཱཏབྦེསུ ཏིཙཱིཝརཱདཱིསུ, ནིདྡྷཱརཎེ བྷུམྨཾ. ཏིཙཱིཝརནྟི ནིདྡྷཱརིཏབྦཾ. ཨུཔཔནྣནྟི ཡུཏྟཾ. པམཱཎེནཱཏི ཨནནྟརཾ ཝཀྑམཱནེན པམཱཎེན. ཨདྷིཊྛཱཏབྦནྟི ‘‘ཨིམཾ སངྒྷཱཊིཾ ཨདྷིཊྛཱམཱི’’ཏིཨཱདིནཱ ¶ ཝཀྑམཱནནཡེན ནཱམཾ ཝཏྭཱ ཨདྷིཊྛཱཏབྦཾ. ཨེཝཀཱརེན པན ནཱམཾ ཝཏྭཱ ན ཝིཀཔྤེཏབྦནྟི དསྶེཏི. ཨེས ནཡོ སེསཙཱིཝརེསུཔི. ཝུཏྟཉྷེཏཾ བྷགཝཏཱ ‘‘ཨནུཛཱནཱམི བྷིཀྑཝེ ཏིཙཱིཝརཾ ཨདྷིཊྛཱཏུཾ, ན ཝིཀཔྤེཏུ’’ནྟིཨཱདི (མཧཱཝ. ༣༥༨). ཏསྨཱ ཏིཙཱིཝརཱདཱིནི ཨདྷིཊྛཧནྟེན ‘‘ཨིམཾ སངྒྷཱཊིཾ ཨདྷིཊྛཱམཱི’’ཏིཨཱདིནཱ ནཱམཾ ཝཏྭཱ ཨདྷིཊྛཱཏབྦཾ. ཝིཀཔྤེནྟེན པན ‘‘ཨིམཾ སངྒྷཱཊི’’ནྟིཨཱདིནཱ ཏསྶ ཙཱིཝརསྶ ནཱམཾ ཨགྒཧེཏྭཱ ‘‘ཨིམཾ ཙཱིཝརཾ ཏུཡ྄ཧཾ ཝིཀཔྤེམཱི’’ཏི ཝིཀཔྤེཏབྦཾ. ཏིཙཱིཝརཾ ཝཱ ཧོཏུ ཨཉྙཾ ཝཱ, ཡདི ཏཾ ཏཾ ནཱམཾ གཧེཏྭཱ ཝིཀཔྤེཏི, ཨཝིཀཔྤིཏཾ ཧོཏི ཨཏིརེཀཙཱིཝརཊྛཱནེ ཏིཊྛཏི. ཏཾ ཙཱིཝརནྟི སམྦནྡྷོ.

༥༥༦-༧. ‘‘ཨུཔཔནྣཾ པམཱཎེནཱ’’ཏི ཨེཏྠ ཝུཏྟཔྤམཱཎཾ དསྶེཏུམཱཧ ‘‘པཙྪིམནྟེནཱ’’ཏིཨཱདི. སངྒྷཊིཏཊྛེན སངྒྷཱཊི. ཝཏྠཁཎྜཱནི སིབྦནཀམྨེན སངྒྷཊེཏྭཱ ཀཏཏྟཱ ‘‘སངྒྷཱཊཱི’’ཏི ཙཱིཝརཱནཾ སཱམཉྙནཱམཾ. ཨིདྷ པན རུལ༹ྷིཡཱ ཨནྟརཝཱསཀཱདིཝིསེསནཱམབྱཏིརིཏྟེ ཙཱིཝརཝིསེསེ ཝཏྟཏི. མུཊྛིཔཉྩཀཱཏི ཨེཏྠ ཨེཀཱདཱིནམཊྛཱརསནྟཱནཾ སངྑྱཱསདྡཱནཾ སངྑྱེཡྻེ ཝཏྟམཱནཏྟཱ པཉྩསདྡོ ཙཱིཝརཔྤམཱཎཔྤཀརཎཏོ ལབྦྷམཱནཧཏྠསངྑཱཏརཏནེཡེཝ པཝཏྟཏི, ཏེནེཝ མུཊྛིསདྡོཔི ཨུཏྟརཔདལོཔེན མུཊྛིརཏནེ ཝཏྟཏི. པཉྩནྣཾ པཱུརཎོ པཉྩམོ, མུཊྛིཡཱ པཉྩམོ མུཊྛིཔཉྩམོ. མུཊྛིཔཉྩམོ པརིམཱཎམེཏིསྶཱཏི ‘‘མུཊྛིཔཉྩམཀཱ’’ཏི ཝཏྟབྦེ མ-ཀཱརལོཔེན ‘‘མུཊྛིཔཉྩཀཱ’’ཏི སངྒྷཱཊི ཝུཏྟཱ.

མུཊྛིཏྟིཀཱཏི ¶ ཨེཏྠ ཝུཏྟནཡེན སངྑྱེཡྻེ ཝཏྟམཱནོ ཏི-སདྡོ ཙཱིཝརཔྤམཱཎཔྤཀརཎཏོ ལབྦྷམཱནཧཏྠསངྑཱཏརཏནེཡེཝ ཝཏྟཏི, ཏེནེཝ མུཊྛིསདྡོཔི ཨུཏྟརཔདལོཔེན མུཊྛིརཏནེ ཝཏྟཏི. ཏིཎྞཾ པཱུརཎོ ཏཏིཡོ, མུཊྛིཡཱ ཏཏིཡོ མུཊྛིཏཏིཡོ, མུཊྛིཏཏིཡོ པརིམཱཎམེཏིསྶཱཏི ‘‘མུཊྛིཏཏིཡཀཱ’’ཏི ཝཏྟབྦེ ཏིཡ-པཙྩཡལོཔེན ‘‘མུཊྛིཏྟིཀཱ’’ཏི སངྒྷཱཊིཡེཝ ཝུཙྩཏི. ཨེཝམུཔརིཔི. ཏིརིཡནྟི ཏིརིཡཏོ.

ཨུཏྟམནྟེནཱཏི ཨུཀྐཊྛཔརིམཱཎནྟེན. སཏྠུནོ ཙཱིཝརཱུནཱཔཱིཏི ‘‘ཏཏྲིདཾ སུགཏསྶ སུགཏཙཱིཝརཔྤམཱཎཾ, དཱིགྷསོ ནཝ ཝིདཏྠིཡོ སུགཏཝིདཏྠིཡཱ, ཏིརིཡཾ ཚ ཝིདཏྠིཡོ’’ཏི (པཱཙི. ༥༤༨) ཝུཏྟཔྤམཱཎསུགཏཙཱིཝརཏོ ཨཱུནཱཔི. པི-སདྡོ སམྦྷཱཝནེ, ཨུཀྐཊྛཔརིཙྪེདེན ཏཏྟཀམྤི ཝཊྚཏི, ཏཏོ ཙེ ཨཱུནཾ ཝཏྟབྦམེཝ ནཏྠཱིཏི ཨཏྠོ. ཨནྟདྭཡསནྡསྶནེན ཨུབྷཡམཛ྄ཛྷེ ཡཾ པཧོནཀརུཙྩནཀཔྤམཱཎཾ, ཏཾ གཧེཏབྦནྟི དསྶེཏི.

༥༥༨. མུཊྛིཔཉྩཀསདྡོ ¶ པུབྦེ ཝུཏྟནཡེནིདྷ དཱིགྷནྟེ ཝཏྟཏི. མུཊྛིཔཉྩཀོ དཱིགྷནྟོ ཡསྶ, ཡསྨིཾ ཝཱ པམཱཎེཏི ཝིགྒཧོ, དཱིགྷནྟཏོ མུཊྛིཔཉྩཀཔྤམཱཎེནཱཏི ཝུཏྟཾ ཧོཏི. ‘‘མུཊྛིཔཉྩམ’’ནྟིཔི ལིཁནྟི. ཏིརིཡནྟཏོཏི ཝིཏྠཱརནྟཏོ. ཨཌྜྷཧཏྠོ ཨཌྜྷོ ཨུཏྟརཔདལོཔེན, སོ ཏེཡྻོ ཏཏིཡོ ཡསྶ པམཱཎསྶཱཏི གཧེཏབྦཾ, ཏཾ, ཨཌྜྷཏེཡྻརཏནཔྤམཱཎཾ ཧོཏཱིཏི ཨཏྠོ. དྭིཧཏྠཾ ཝཱཏི དྭེ ཧཏྠཱ ཡསྶ པམཱཎསྶཱཏི ཝིགྒཧོ, དྭིརཏནཔྤམཱཎཾ ཝཱ ཧོཏཱིཏི ཨཏྠོ. ཨིདཉྩ ‘‘ཏིརིཡཾ དྭིཧཏྠོཔི ཝཊྚཏི. པཱརུཔནེནཔི ཧི སཀྐཱ ནཱབྷིཾ པཊིཙྪཱདེཏུ’’ནྟི (པཱརཱ. ཨཊྛ. ༢.༤༦༩) ཨཊྛཀཐཱགཏཏྟཱ ཝུཏྟཾ. ‘‘སེསེ ཨནྟརཝཱསཀེ’’ཏི ཨིདཾ ཡཐཱཝུཏྟཔརིམཱཎེན པརིམིཏཙཱིཝརནིདསྶནཾ.

༥༥༩. ཨཧཏཱཧཏཀཔྤཱནནྟི ¶ ཨེཏྠ ‘‘ཝཏྠཱན’’ནྟི སེསོ. ཨཧཏཱནཾ ཝཏྠཱནནྟི ནཝཝཏྠཱནཾ. ཨཧཏཏོ ཀིཉྩི ཨཱུནཱནི ཨཧཏཀཔྤཱནི, ཏེསཾ ནཝཝོཧཱརཱུཔགཱནཾ ཀཏིཔཡདྷོཏཱནཾ ཝཏྠཱནནྟི ཝུཏྟཾ ཧོཏི. སངྒྷཱཊཱིཏི སངྒྷཱཊིནཱམཀཙཱིཝརཾ. དིགུཎཱཏི དུཔཊྚཀཏཱ.

༥༦༠. ཨུཏུདྡྷཊཱནནྟི ཨཏིཀྐནྟདིཝསཱནཾ, བཧུཀཱལཾ ནིཝཱསེཏྭཱ པརིཙྩཏྟཱནནྟི ཝུཏྟཾ ཧོཏི. ཨཐ ཝཱ ཡཱནི ཨུཏུཏོ ཨུདྡྷཊཱནི, ཏེསཾ ཝཏྠཱནནྟི གཧེཏབྦཾ, ཏིཎྞཾ ཨུཏཱུནམཉྙཏརཾ ཨཏིཀྐམིཏྭཱ ཋིཏཱནཾ པུརཱཎཝཏྠཱནནྟི ཝུཏྟཾ ཧོཏི. ཙཱིཝརཱནནྟི ཙཱིཝརཏྠཱནི ཝཏྠཱནེཝ གཧིཏཱནི. ཙཏུགྒུཎཱཏི ཙཏུཔཊྚཱ. སེསཱ དུཝེཏི ཨནྟརཝཱསཀཨུཏྟརཱསངྒཱ དྭེ. ཡཐཱསུཁནྟི ཡཐཱརུཙི. པཾསུཀཱུལནྟི སུསཱནཱདཱིསུ པཏིཏཔིལོཏིཀཙཱིཝརཾ.

༥༦༡. ‘‘ཏཱིཎིཔཱི’’ཏིཨཱདཱིསུ ‘‘ཏིཙཱིཝརེ ཀཡིརམཱནེ སབྦཾ ཚིནྣཀཾ ནཔྤཧོཏཱི’’ཏི པཱལི༹ཡཾ ཨཱགཏཝཏྠུམྷི ‘‘ཨནུཛཱནཱམི བྷིཀྑཝེ དྭེ ཚིནྣཀཱནི ཨེཀཾ ཨཚིནྣཀ’’ནྟི (མཧཱཝ. ༣༦༠) ཨཱདིཝཙནཏོ ‘‘ཙཱིཝར’’ནྟི སེསོ. ཚིནྡིཏབྦནྟི ཝཏྠཱནི ཚིནྡིཏྭཱ སིབྦེཏྭཱ ཀཱཏབྦཾ. པཧོཏི ཙེཏི ཝཏྠཱནི ཚིནྡིཏྭཱ ཀརཎེ ཡདི ཙཱིཝརསྶ པཧོཏི. སབྦེསཱུཏི ཏཱིསུ ཙཱིཝརེསུ. ཨཔྤཧོནྟེསཱུཏི ཝཏྠཱནཾ ཚིནྡིཏྭཱ སིབྦནེན ཨཔྤཧོནྟེསུ. ཨནྭཱདྷིཀནྟི ཝཏྠེ ཨཱུནཱཏིརེཀཾ ཨཔནེཏྭཱ ཨཱགནྟུཀཔཏྟསངྑཱཏཾ ཨནུཝཱཏཾ ཙཱིཝརསྶ པརིཡནྟེ, མཛ྄ཛྷེ ཙ ཡཐཱརཧཾ དཱིགྷརསྶཔརིམཱཎཡུཏྟཾ ཨལླིཡཱཔེཏབྦནྟི ཝུཏྟཾ ཧོཏི.

༥༦༢. ཨཙྪིནྣཾ ཝཱཏི ཡཐཱཝུཏྟནཡེན ཨཙྪིནྣཾ ཝཱ. ཨནཱདིནྣནྟི ཨནཱདིནྣཨཱགནྟུཀཔཏྟཾ ¶ . ཏིཙཱིཝརནྟི ཏཱིསུ ཙཱིཝརེསུ ཨེཀེཀནྟི ཝུཏྟཾ ཧོཏི. དུབྦྷོགེནཱཏི དུཊྛུ པརིབྷོགེན ¶ . ཡཐཱ པརིབྷུཏྟཾ ནསྶཏི, ཏཐཱ ཀིལིཊྛཱནཾ དྷོཝནཱདིམཀཏྭཱ ནིཝཱསནཱདིནཱ པརིབྷོགེན.

༥༦༣-༤. ཀུསིནྟི ཨཱཡཱམཏོ ཙ ཝིཏྠཱརཏོ ཙ ཨནུཝཱཏཾ ཙཱིཝརམཛ྄ཛྷེ ཏཱདིསམེཝ དཱིགྷཔཏྟཉྩ. ཝུཏྟཉྷེཏཾ ཙཱིཝརཀྑནྡྷཨཊྛཀཐཱཡཾ ‘‘ཀུསཱིཏི ཨཱཡཱམཏོ ཙ ཝིཏྠཱརཏོ ཙ ཨནུཝཱཏཱདཱིནཾ དཱིགྷཔཏྟཱནམེཏཾ ཨདྷིཝཙན’’ནྟི (མཧཱཝ. ཨཊྛ. ༣༤༥). ཨཌྜྷཀུསིནྟི ཨནུཝཱཏསདིསཾ ཙཱིཝརམཛ྄ཛྷེ ཏཏྠ ཏཏྠ རསྶཔཏྟཾ. ཝུཏྟམྤི ཙེཏཾ ‘‘ཨཌྜྷཀུསཱིཏི ཨནྟརནྟརཱ རསྶཔཏྟཱནཾ ནཱམ’’ནྟི (མཧཱཝ. ཨཊྛ. ༣༤༥). མཎྜལནྟི ཨེཀེཀསྨིཾ ཁཎྜེ མཧཱམཎྜལཾ. ཝུཏྟམྤི ཙེཏཾ ‘‘མཎྜལནྟི པཉྩཁཎྜིཀཙཱིཝརསྶ ཨེཀེཀསྨིཾ ཁཎྜེ མཧཱམཎྜལ’’ནྟི (མཧཱཝ. ཨཊྛ. ༣༤༥). ཨཌྜྷམཎྜལནྟི མཎྜལསྶ ཨནྟོ ནིཝེསིཡམཱནཾ ཁུདྡཀམཎྜལཾ. ཝུཏྟམྤི ཙེཏཾ ‘‘ཨཌྜྷམཎྜལནྟི ཁུདྡཀམཎྜལ’’ནྟི (མཧཱཝ. ཨཊྛ. ༣༤༥). ཝིཝཊྚནྟི མཎྜལཾ, ཨཌྜྷམཎྜལཉྩཱཏི དྭེ ཨེཀཏོ ཀཏྭཱ སིབྦིཏཾ ཝེམཛ྄ཛྷེ ཁཎྜཾ. ཝུཏྟམྤི ཙེཏཾ ‘‘ཝིཝཊྚནྟི མཎྜལཉྩ ཨཌྜྷམཎྜལཉྩ ཨེཀཏོ ཀཏྭཱ སིབྦིཏཾ མཛ྄ཛྷིམཁཎྜ’’ནྟི (མཧཱཝ. ཨཊྛ. ༣༤༥). ཨནུཝིཝཊྚནྟི མཛ྄ཛྷིམཁཎྜསྶ ཨུབྷོསུ པསྶེསུ སིབྦིཏཾ ཏཐེཝ དྭིམཎྜལཔཏྟཾ ཁཎྜདྭཡཾ. ཝུཏྟམྤི ཙེཏཾ ‘‘ཨནུཝིཝཊྚནྟི ཏསྶ ཨུབྷོསུ པསྶེསུ དྭེ ཁཎྜཱནཱི’’ཏི (མཧཱཝ. ཨཊྛ. ༣༤༥). བཱཧནྟནྟི ཏེསཾ ཨནུཝིཝཊྚཱནཾ བཱཧིརཔསྶེ སིབྦིཏཾ བཱཧིརཁཎྜདྭཡཾ. ཝུཏྟམྤི ཙེཏཾ ‘‘བཱཧནྟནྟི ཏེསཾ ཨནུཝིཝཊྚཱནཾ བཧི ཨེཀེཀཾ ཁཎྜ’’ནྟི (མཧཱཝ. ཨཊྛ. ༣༤༥).

པཉྩནྣཾ སམཱཧཱརོ པཉྩཀཾ, དསྶིཏཔྤཀཱརཔཉྩཁཎྜེཧི སིབྦིཏཙཱིཝརཾ པཉྩཀཾ ནཱམ. ཨཱདི-སདྡེན སཏྟཁཎྜཱདཱིཧི སིབྦིཏཙཱིཝརཱནཾ གཧཎཾ. ཏེནེཝེཏྠཱཧ ‘‘ཀཏྟབྦཾ ཏུ ཏིཙཱིཝར’’ནྟི. སཏྟཁཎྜསྶ ཙཱིཝརསྶ ཨེཀཾ མཛ྄ཛྷིམཁཎྜཾ ཝིཝཊྚནཱམམེཝ ཧོཏི, ཏསྶ ཨུབྷོསུ པསྶེསུ དྭེ དྭེ ཁཎྜཱནི ¶ ཙཱུལཱ༹ནུཝིཝཊྚམཧཱནུཝིཝཊྚསངྑཱཏཱནི ཨནུཝིཝཊྚནཱམཱནེཝ ཧོནྟི. ཝུཏྟཉྩེཏཾ ཨཊྛཀཐཱཡཾ ‘‘ཨཐ ཝཱ ཨནུཝིཝཊྚནྟི ཝིཝཊྚསྶ ཨེཀཔསྶཏོ དྭིནྣཾ, ཨེཀཔསྶཏོ དྭིནྣནྟི ཙཏུནྣམྤི ཁཎྜཱནམེཏཾ ནཱམ’’ནྟི (མཧཱཝ. ཨཊྛ. ༣༤༥). བཱཧནྟནྟི དྭཱིསུ པརིཡནྟེསུ སིབྦནཱིཡཾ བཱཧིརཁཎྜདྭཡཾ, ཏཉྩ སངྒྷཊེཏྭཱ བཱཧམཏྠཀེ ཋཔིཡམཱནཏྟཱ ‘‘མཉྩཱ ཨུཀྐུཊྛིཾ ཀརོནྟཱི’’ཏིཨཱདཱིསུ ཝིཡ ཨཱདྷེཡྻེ ཨཱདྷཱརོཔཙཱརཝསེན བཱཧཱཏི ཙ ཙཱིཝརསྶ པརིཡནྟཱཝཡཝཏྟཱ ‘‘ཨནྟ’’ནྟི ཙ ཝུཙྩཏི. ཝུཏྟམྤི ཙེཏཾ ‘‘བཱཧནྟནྟི སུཔྤམཱཎཾ ཙཱིཝརཾ པཱརུཔནྟེན སཾཧརིཏྭཱ བཱཧཱཡ ¶ ཨུཔརི ཋཔིཏཱ ཨུབྷོ ཨནྟཱ བཧིམུཁཱ ཏིཊྛནྟི, ཏེསཾ ཨེཏཾ ནཱམ’’ནྟི (མཧཱཝ. ཨཊྛ. ༣༤༥). ཨིདཾ སཏྟཁཎྜཙཱིཝརམེཝ མཧཱཨཊྛཀཐཱཡཾ ཝིཧིཏནྟི ཨིདཱནིཔི ཏདེཝ ཝཊྚཏི. ཝུཏྟམྤི ཙེཏཾ ‘‘ཨཡམེཝ ཧི ནཡོ མཧཱཨཊྛཀཐཱཡཾ ཝུཏྟོ’’ཏི. བྷིཀྑུནཱ ཀུསིཾ…པེ… བཱཧནྟམྤིཙཱཏི སབྦཾ ཝིདྷིཾ དསྶེཏྭཱཝ ཚིནྣཾ པཉྩཀཱདིཔྤབྷེདཀཾ སམཎསཱརུཔྤཾ ཏིཙཱིཝརཾ ཀཏྟབྦནྟི ཡོཛནཱ.

༥༦༥-༦. ཡཐཱཝུཏྟཝིདྷིཾ ཨཝིརཱདྷེཏྭཱ ཙཱིཝརཾ ཀཔྤབིནྡུཾ དཏྭཱ སངྒྷཱཊིཨཱདིནཱམེན ཨདྷིཊྛཱཡ པརིབྷུཉྫནྟསྶ ཨདྷིཊྛཱནཾ ཀཐཾ བྷིཛྫཏཱིཏི ཨཱཧ ‘‘དཱནེནཱ’’ཏིཨཱདི. དཱནེནཱཏི ཨཉྙསྶ དཱནེན. ཨཙྪིཛྫགཱཧེནཱཏི ཨཉྙེན ཨཙྪིནྡིཏྭཱ གཧཎེན. ཝིསྶཱསགྒཧཎེན ཙཱཏི ཨཏྟནི ཝིསྶཱསེན ཨཉྙསྶ གཧཎེན. ཧཱིནཱཡཱཝཏྟནེནཱཏི སིཀྑཾ ཨཔྤཙྩཀྑཱཡ གིཧིབྷཱཝཱུཔགམནེན ཨཉྙསྶ དཱནེ ཝིཡ ཙཱིཝརེ ནིརཱལཡབྷཱཝེནེཝ པརིཙྩཏྟཱ.

ཀེཙི པན ‘‘ཧཱིནཱཡཱཝཏྟནེནཱཏི བྷིཀྑུནིཡཱ གིཧིབྷཱཝཱུཔགམནེནཱཏི ཨེཝམཏྠཾ གཧེཏྭཱ བྷིཀྑུ པན ཝིབྦྷནྟོཔི ཡཱཝ སིཀྑཾ ན པཙྩཀྑཱཏི, ཏཱཝ བྷིཀྑུཡེཝཱཏི ཨདྷིཊྛཱནཾ ན ཝིཛཧཏཱི’’ཏི ¶ ཝདནྟི, ཏཾ ན གཧེཏབྦཾ ‘‘བྷིཀྑུནིཡཱ ཧཱིནཱཡཱཝཏྟནེནཱ’’ཏི ཝིསེསེཏྭཱ ཨཝུཏྟཏྟཱ, བྷིཀྑུནིཡཱ ཙ གིཧིབྷཱཝཱུཔགམནེ ཨདྷིཊྛཱནཝིཛཧནཾ ཝིསུཾ ཝཏྟབྦནྟི ནཏྠི ཏསྶཱ ཝིབྦྷམནེནེཝ ཨསྶམཎིབྷཱཝཏོ.

སིཀྑཱཡཱཏི བྷིཀྑུསིཀྑཱཡ. པཧཱནེནཱཏི པཙྩཀྑཱནེན. སིཀྑཱཔཙྩཀྑཱནཾ པནེཏྠ སཙེ བྷིཀྑུལིངྒེ ཋིཏོ སིཀྑཾ པཙྩཀྑཱཏི, ཏསྶ ཀཱཡལགྒམྤིཙཱིཝརཾ ཨདྷིཊྛཱནཾ ཝིཛཧཏཱིཏི དསྶནཏྠཾ གཧིཏཾ. ‘‘སིཀྑཱཡ ཙ པཧཱནཏོ’’ཏི ཙ ལིཁནྟི, ཏཾ ‘‘ཧཱིནཱཡཱཝཏྟནེནཱཔི, སིཀྑཱཡ ཙ པཧཱནཏོ’’ཏི པཱཋཀྐམེ སཏི ཡུཛྫཏི. ཡཐཱཝུཏྟོ པན པཱཋོ ‘‘སིཀྑཱཡ ཙ པཧཱནེན, ཧཱིནཱཡཱཝཏྟནེནཔཱི’’ཏི པཱཋཀྐམེ ཡུཛྫཏི. ཡཐཱ ཏཐཱ ཝཱ ཧོཏུ, ན ཀོཙི ཝིརོདྷོ.

པཙྩུདྡྷཱརེནཱཏི ཙཱིཝརསྶ པཙྩུདྡྷརཎེན. ‘‘ཀཱལཀིརིཡཱཡཱ’’ཏི ཨཊྛཀཐཱཝཙནཏོ ཝིནཱསེནཱཏི ཙཱིཝརསཱམིཀསྶ ཛཱིཝིཏཝིནཱསོཝ ཝུཙྩཏཱིཏི. ལིངྒསྶ པརིཝཏྟནཱཏི བྷིཀྑུསྶ ཨིཏྠིལིངྒཔརིཝཏྟནཱ, བྷིཀྑུནིཡཱ པུརིསལིངྒཔརིཝཏྟནཱཏི ཨེཝཾ ཨུབྷཡཐཱ ལིངྒསྶ པརིཝཏྟནེན. སབྦཾ ¶ ནཝཝིདྷམྤི ཙཱིཝརཾ. ཨདྷིཊྛཱནནྟི ཨེཏྠ ‘‘ཨིམེཧི ཨཊྛཧཱི’’ཏི སེསོ. ཝུཏྟོཝཱཡམཏྠོ ཨཊྛཀཐཱཡཾ ‘‘ཏཏྠ པུརིམེཧི ཨཊྛཧི སབྦཙཱིཝརཱནི ཨདྷིཊྛཱནཾ ཝིཛཧནྟཱི’’ཏི (པཱརཱ. ཨཊྛ. ༢.༤༦༩). བྷིཛྫཏཱིཏི པཛཧཏི. ཚིདྡསྶ བྷཱཝོ ཚིདྡབྷཱཝོ, ཏསྨིཾ, ཚིདྡེ སཏི ཚིདྡེ ཛཱཏེཏི ཝུཏྟཾ ཧོཏི. ཏིཙཱིཝརནྟི ཏཱིསུ ཙཱིཝརེསུ ཨཉྙཏརནྟི ཝུཏྟཾ ཧོཏི. ཏིཙཱིཝརམེཝ ཝཱཏི གཧེཏབྦཾ. ཝུཏྟཉྩ ‘‘ཚིདྡབྷཱཝེན པན ཏིཙཱིཝརསྶེཝཱ’’ཏི.

༥༦༧. ཀཱིཝཔྤམཱཎེ ཚིདྡེ ཛཱཏེཏི ཨཱཧ ‘‘ཀནིཊྛསྶཱ’’ཏིཨཱདི. ‘‘ཀནིཊྛ…པེ… མཱཎཀ’’ནྟི ཨིམིནཱ ཧེཊྛིམཔརིཙྪེདཾ དསྶེཏི.

༥༦༨. ཨེཀོ ¶ ཏནྟུཔཱིཏི དཱིགྷཏོ ཝཱ ཏིརིཡཏོ ཝཱ ཨེཀམྤི སུཏྟཾ.

༥༦༩. ཛིཎྞཊྛཱནེ ཨགྒལ༹ཾ དེནྟེན ཏེཙཱིཝརིཀེན ཝཏྟིཏབྦཝིདྷིཾ དསྶེཏུམཱཧ ‘‘པཋམ’’ནྟིཨཱདི. པཋམནྟི ཚིནྣཊྛཱནསྶ ཚིནྡནཏོ པུབྦེཡེཝ. ཨགྒལ༹ཾ དཏྭཱཏི ཝཏྠཁཎྜཾ ཨལླིཡཱཔེཏྭཱ. རཀྑཏཱིཏི ཨེཏྠ ‘‘ཨདྷིཊྛཱན’’ནྟི ཨནུཝཏྟཏེ, ‘‘ཏེཙཱིཝརིཀོ བྷིཀྑཱུ’’ཏི ལབྦྷཏི, ཨེཝཾ ཝཏྠཁཎྜཾ ཨལླིཡཱཔེནྟོ ཏེཙཱིཝརིཀོ བྷིཀྑུ ཨདྷིཊྛཱནཾ རཀྑཏཱིཏི ཝུཏྟཾ ཧོཏི. ཝིཔརིཡཱཡེན ཨདྷིཊྛཱནཾ བྷིནྡཏཱིཏི ལབྦྷཏི. པཋམཾ དྭེ ཀོཊིཡོ གྷཊེཏྭཱཏི ཡོཛནཱ. མཛ྄ཛྷེ ཛིཎྞཾ ཨདྷིཊྛིཏཙཱིཝརཾ མཛ྄ཛྷེ ཚིནྡནྟོ ཏཏོ པུབྦེཡེཝ དྭེ ཀོཊིཡོ ཨེཀཏོ གྷཊེཏྭཱ སིབྦིཏྭཱ. པཙྪཱཏི ཀོཊིགྷཊནཏོ པཙྪཱ. ཚིནྡཏཱིཏི མཛ྄ཛྷཾ ཨུབྷཡཀོཊིཾ ཀཱཏུཾ ཚིནྡཏི. རཀྑཏཱིཏི ཝུཏྟཔྤཀཱརམེཝ.

༥༧༠. ཏིཙཱིཝརེ ཀཏྠ ཛཱཏཾ ཚིདྡམདྷིཊྛཱནཾ བྷིནྡཏཱིཏི ཨཱཧ ‘‘ཙཏུརངྒུལཱ’’ཏིཨཱདི. ཙཏྟཱརི ཙ ཨཊྛ ཙ ཙཏུརཊྛཾ, ཙཏུནྣཾ ཨཊྛནྣཾ ཝཱ ཨངྒུལཱནཾ སམཱཧཱརོ ཙཏུརཊྛངྒུལཾ, ཏསྨཱཏི གཧེཏབྦཾ. ཙཏུརངྒུལཱ ཨཊྛངྒུལཱཏི ཡོཛནཱ. ཨོརནྟི ཨབྦྷནྟརཾ. ཨེཀཉྩ དྭེ ཙ ཨེཀདྭེ, ཏེསཾ ཨེཀདྭིནྣཾ, ‘‘ཙཱིཝརཱན’’ནྟི པཀརཎཏོ ལབྦྷཏི, ཨེཀསྶ ཙཱིཝརསྶ, དྭིནྣཉྩ ཙཱིཝརཱནནྟི ཡོཛནཱ. ཡཐཱསངྑྱཱནུདྡེསཝསེན ཨེཀསྶ ཏིརིཡཏོ ཙཏུརངྒུལཏོ ཨོརཾ, དྭིནྣཾ ཏིརིཡཏོ ཨཊྛངྒུལཏོ ཨོརནྟི ཡོཛནཱ. ཝཱཀྱདྭཡེཔི ‘‘ཚིདྡཾ བྷིནྡཏེཝཱ’’ཏི ཡོཛེཏབྦཾ.

ཨེཀསྶ ཙཱིཝརསྶཱཏི ཨནྟརཝཱསཀཙཱིཝརསྶ. ཏིརིཡཏོཏི ཝིཏྠཱརཏོ. ཙཏུརངྒུལཾ ཨོརནྟི ཙཏུརངྒུལཏོ ¶ ཨབྦྷནྟརེ ཚིདྡཾ ཨདྷིཊྛཱནཾ བྷིནྡཏི. དྭིནྣནྟི ཨུཏྟརཱསངྒསངྒྷཱཊཱིནཾ. ཏིརིཡཏོཏི ¶ ཝིཏྠཱརཏོ. ཨཊྛངྒུལཏོ ཨོརནྟི ཨཊྛངྒུལཏོ ཨབྦྷནྟརེ. ཏིཎྞམྤི དཱིགྷཏོ ཝིདཏྠིཡཱ ཨོརཾ ཚིདྡཾ ཨདྷིཊྛཱནཾ བྷིནྡཏེཝཱཏི ཡོཛནཱ. ཨེཏྠ ཝིདཏྠི ཝཌྜྷཀིཝིདཏྠི གཧེཏབྦཱ. ཨེཝཾ ཝུཏྟཔརིཙྪེདབྦྷནྟརེ ཚིདྡེ ཛཱཏེ ཏསྶ ཙཱིཝརསྶ ཨཏིརེཀཙཱིཝརཏྟཱ དསཱཧམནཏིཀྐམིཏྭཱ སཱུཙིཀམྨཾ ཀཏྭཱ ཨདྷིཊྛཱཏབྦཾ. ཏཐཱ ཨཀརོནྟེན པན པརིཀྑཱརཙོལ༹ཾ ཨདྷིཊྛཱཏབྦཾ.

༥༧༡. ‘‘ནིསཱིདནསྶཱ’’ཏི ‘‘ནིསཱིདནཙཱིཝརསྶཱ’’ཏི ཝཏྟབྦེ ཨུཏྟརཔདལོཔེན ཝུཏྟནྟི དཊྛབྦཾ. དིཡཌྜྷཱཏི ཨེཏྠ ཝིསེསིཏབྦཱ ཝིདཏྠི ‘‘དྭེ ཝིདཏྠིཡོ’’ཏི ཙ ‘‘སུགཏསྶ ཝིདཏྠིཡཱ’’ཏི ཙ ཝུཏྟསཱམཏྠིཡཱ ལབྦྷཏི. ཨཌྜྷེན དུཏིཡཱ དིཡཌྜྷཱ, དུཏིཡཾ ཨཌྜྷམེཏསྶཱཏི ‘‘དུཏིཡཌྜྷཱ’’ཏི ཝཏྟབྦེ ཏིཡ-པཙྩཡལོཔེན ‘‘དིཡཌྜྷཱ’’ཏི ཝུཏྟཾ, ཨཌྜྷདུཏིཡཱཏི ཝུཏྟཾ ཧོཏི. ‘‘སུགཏསྶ ཝིདཏྠིཡཱ’’ཏི པམཱཎནིཡམསྶ ཀཏཏྟཱ ཝཌྜྷཀིཝིདཏྠིཡཱ ཏིསྶོ ཝིདཏྠིཡོ ཨེཀཱ སུགཏཝིདཏྠི ཧོཏི. ཨིདཾ ནིསཱིདནཙཱིཝརཾ དཱིགྷཏོ ཝཌྜྷཀིཧཏྠེན ཏིཧཏྠཾ, ཝིཏྠཱརཏོ ཚལ༹ངྒུལཱདྷིཀདྭིཧཏྠཔྤམཱཎཾ ཧོཏི. ‘‘དསཱ ཝིདཏྠཱི’’ཏི (པཱཙི. ༥༣༣) ཝུཏྟཏྟཱ དིཡཌྜྷཧཏྠཱ དསཱཏི ཝེདིཏབྦཱ.

༥༧༢. ཙཏསྶོཏི ཨེཏྠཱཔི ‘‘ཝིདཏྠིཡོ’’ཏི སཱམཏྠིཡཱཝ ལབྦྷཏི. ‘‘ཀཎྜུཔྤཊིཙྪཱདིཡཱ’’ཏི ཝིབྷཏྟིཔརིཎཱམེན དཱིགྷཏོཏི ཡོཛནཱ.

༥༧༣. ཨཌྜྷཾ ཏེཡྻཾ ཏཏིཡཾ ཡསྶཱ སཱ ཨཌྜྷཏེཡྻཱ, ཨཌྜྷཏཏིཡཱཏི ཝུཏྟཾ ཧོཏི.

༥༧༤. ཏཏོ ཨུཏྟརིཾ ཏདུཏྟརིཾ, ཏསྶ ཏསྶ ཝུཏྟཔྤམཱཎཏོ ཨཏིརེཀཾ. ཨདྷིཀཙྪེདནནྟི ཨདྷིཀསྶ པམཱཎཱཏིརིཏྟཊྛཱནསྶ ཚེདནཾ ཨསྶ པཱཙིཏྟིཡསྶ དེསནཱཡཱཏི ¶ ཨདྷིཀཙྪེདནཾ, ཝུཏྟཔྤམཱཎཏོ ཨདྷིཀཊྛཱནཾ ཚིནྡིཏྭཱ དེསེཏབྦཾ པཱཙིཏྟིཡཾ. ཨུདཱིརིཏཾ ཝུཏྟཾ པཱལི༹ཡཱཏི ཨཏྠོ.

༥༧༥. ཨཔྤམཱཎེནཱཏི གུཎཝསེན ཨཔྤམཱཎེན སམྨཱསམྦུདྡྷེན.

༥༧༦. སབྦཾ ཝཊྚཏཱིཏི སམྦནྡྷོ. ‘‘སབྦ’’ནྟི ཨིམིནཱ ཨཊྛཀཐཱཡ ཨཱགཏཾ ནཱིལཱདིཾ སངྒཎྷཱཏི. མཧནྟཱདིབྷེདཾ སབྦཾ པཙྩཏྠརཎཙཱིཝརཾ ཝཊྚཏི.

༥༧༧. ‘‘མུཁཔུཉྪནཙོལ༹ཾ ¶ ཨེཀ’’ནྟི པདཙྪེདོ. ཨེཀཾ དྷོཝིཏྭཱ ཡཱཝ སུཀྑཱཔཱིཡཏི, ཏཱཝ ཨཉྙེན མུཁཔུཉྪནེན བྷཝིཏབྦཏྟཱ ཨཱཧ ‘‘དྭེཔི ཝཊྚནྟི སབྦཐཱ’’ཏི.

༥༧༩. པམཱཎཏོ, གཎནཏོ ཙ ཨཏཱིཏཱཏི པམཱཎགཎནཱཏཱིཏཱ. ‘‘པམཱཎཱཏཱིཏཱ’’ཏི ཝཙནེན ཝིནཡདྷརཱནཾ ཨཔྤམཱཎགུཎཏཾ དསྶེཏི, ‘‘གཎནཱཏཱིཏཱ’’ཏི ཨིམིནཱ ཨཏིཀྐནྟགཎནཏཾ. པཀཏཾ ཝིནཡེ པཋམཾ ཀཏཾ བུདྡྷེན བྷགཝཏཱ པཉྙཏྟཾ ཛཱནནྟཱིཏི པཀཏཉྙཱུ, ཝིནཡདྷརཱ, ཏེ པཀཏཉྙུནོ. ཨཔརིམཱཎགུཎམཎིགཎབྷཱུསིཏཨུཔཱལིདཱསཀཱདིམཧཱཐེརཱཙརིཡཔརམྤརཱགཏཱ སངྑྱཱཔཐཱཏཱིཏཱ ཝིནཡདྷརཱཏི ཝུཏྟཾ ཧོཏི.

༥༨༠. སུགཏཊྛངྒུལཱཡཱམནྟི ཝཌྜྷཀིརཏནཔྤམཱཎདཱིགྷཾ. ཙཏུརངྒུལཝིཏྠཏནྟི ཝཌྜྷཀིཝིདཏྠིཔྤམཱཎཝིཏྠཱརཾ. ཝིཀཔྤནུཔགཾ པཙྪིམཾ ཙཱིཝརཾ ནཱམ ཧོཏི. པཙྪིམཾ ཙཱིཝརནྟི པརིསྶཱཝནཔཊཱདཱིནཾ ཝིསེསནཾ, པཙྪིམཙཱིཝརཔྤམཱཎནྟི ཝུཏྟཾ ཧོཏི.

༥༨༡. པརིསྶཱཝཔཊནྟི ཨུདཀཔརིསྶཱཝནཏྠཾ པཊཾ. པཏྟཏྠཝིཀནྟི པཏྟཀཉྩུཀཾ. པོཏྠཀཏྠཝིཀནྟི པོཏྠཀཀཉྩུཀཾ ¶ . ཨཱདིགྒཧཎེན པཙྪིམཔྤམཱཎཱདིཾ ཡཾ ཀིཉྩི པཊཾ, དཎྜཔཊཉྩ སངྒཎྷཱཏི.

༥༨༢. ཨདྷིཊྛཱཏུནྟི པརིཀྑཱརཙོལ༹ཾ ཨདྷིཊྛཱཏུཾ. ཋཔིཏེཏི ཨནདྷིཊྛཱཡ ཋཔིཏེ. མཧཱཔཙྩརིཡཾ པན ‘‘ཨནཱཔཏྟཱི’’ཏི (པཱརཱ. ཨཊྛ. ༢.༤༦༩) ཨཱཧ. ནཏྠི དོསཏཱཏི དོསོ ཨེཝ དོསཏཱ. ‘‘ཨཏྟནོ སནྟཀབྷཱཝཏོ མོཙེཏྭཱ ཋཔིཏཾ སནྡྷཱཡ མཧཱཔཙྩརིཡཾ ཨནཱཔཏྟི ཝུཏྟཱ’’ཏི ཝདནྟི. ‘‘ཨིམིནཱ བྷེསཛྫཾ ཙེཏཱཔེསྶཱམི, ཨིདཾ མཱཏུཡཱ དསྶཱམཱི’’ཏི ཋཔེནྟེན ཨདྷིཊྛཱཏབྦཾ. ‘‘ཨིདཾ བྷེསཛྫསྶ, མཱཏུཡཱ’’ཏི ཝིབྷཛིཏྭཱ སསནྟཀབྷཱཝཏོ མོཙིཏེ ཨདྷིཊྛཱནཀིཙྩཾ ནཏྠཱིཏི ཨདྷིཔྤཱཡོ. ཧོཏི ཙེཏྠ –

‘‘ཡཾ ཝཏྠཾ བྷིཀྑུནཱ ལདྡྷཾ, ཀཏཾ མཱཏཱདིསནྟཀཾ;

ནིསྶགྒིཡཾ ན ཧོཏཱིཏི, ཏམཱཧུ ཝིནཡཉྙུནོ’’ཏི.

༥༨༣. ཝསྶམཱསེ ཙཏུརོཏི ཝསྶཱནེ ཙཏུརོ མཱསེ, ཨདྷིཊྛཱནཀིརིཡཱཡ ཙཏྟཱརོ མཱསེ ཨཝིཙྪེདོཏི ¶ ཨཙྩནྟསཾཡོགེ ཨུཔཡོགཝཙནཾ. ཝསྶིཀེ ཙཏྟཱརོ མཱསེ ནིཝཱསེཏབྦཱ སཱཊིཀཱ ཝསྶིཀསཱཊིཀཱ.

༥༨༤. ཀཎྜུཾ པཊིཙྪཱདེཏཱིཏི ཀཎྜུཔྤཊིཙྪཱདི, ཀཎྜུརོགཱཏུརསྶ བྷིཀྑུནོ ཏཔྤཊིཙྪཱདནཏྠམནུཉྙཱཏཙཱིཝརསྶེཏམདྷིཝཙནཾ. ཧོནྟི ཙེཏྠ –

‘‘མཱཏིཀཊྛཀཐཱཡསྶཱ, ཀཎྜུཙྪཱདིཀསཱཊིཡཱ;

ན ཀཱལཱཏིཀྐམེ ཝུཏྟཾ, ཨདྷིཊྛཱནཝིཝཊྚནཾ.

ཨདྷིཊྛཱནཔཧཱནངྒེ-སུ ཝུཏྟཏྟཱ ཝིསེསཏོ;

ཝཱིམཾསིཏབྦཾ ཝིཉྙཱུཧི, ཏཏྠ ཡཾ ཀཱརཎཾ སིཡཱ’’ཏི.

༥༨༦. ‘‘ཨསམྨུཁེ ¶ ཨེཏནྟི ཙཱ’’ཏི ཝཙནེནེཝ སམྨུཁེ ‘‘ཨིམ’’ནྟི ཝིཉྙཱཡཏི. ཝིཙཀྑཎོ པཙྩུདྡྷརེཡྻཱཏི ཡོཛནཱ.

༥༨༧. ཨདྷིཊྛིཏནྟི ཨདྷིཊྛཱནཾ.

༥༨༨. ཨིཏི སབྦམིདནྟི ཨེཝཾ ཝུཏྟཾ ཨིདཾ ཏིཙཱིཝརཱདཱིནཾ པམཱཎཱདིསབྦཝིདྷཱནཾ. ཏེཙཱིཝརིཀབྷིཀྑུནོཏི ཏིཙཱིཝརཱདྷིཊྛཱནེན ཨདྷིཊྛིཏཏེཙཱིཝརིཀསྶ ཝིནཡཏེཙཱིཝརིཀསྶ. ཏིཎྞཾ ཙཱིཝརཱནཾ སམཱཧཱརོ ཏིཙཱིཝརཾ, ཏིཎྞཾ ཏིཙཱིཝརཱནཾ སམཱཧཱརོཏི ‘‘ཏིཏིཙཱིཝར’’ནྟི ཝཏྟབྦེ ཨེཀདེསསརཱུཔེཀསེསནཡེན ‘‘ཏིཙཱིཝར’’ནྟི ནཝཙཱིཝརཱནི སངྒཧིཏཱནི, ཏིཙཱིཝརེ ནིཡུཏྟོ ཏེཙཱིཝརིཀོཏི ཝིནཡཏེཙཱིཝརིཀོ ཝུཙྩཏི. དྷུཏངྒཏེཙཱིཝརིཀསྶཱཔི ཏིཙཱིཝརེ ཨིདམེཝ ཝིདྷཱནནྟི སོཔི སངྒཡ྄ཧཏི. ཨཉྙེསུ ཝཱ པན ཚསུ ཙཱིཝརེསུ པརིཀྑཱརཙོལ༹ཾ ཨེཀཾ ཨཾསཀཱསཱཝམེཝ ཝཊྚཏི. ཏཐཱ ཝཏྭཱཝཱཏི ‘‘ཨིམཾ པརིཀྑཱརཙོལ༹ཾ ཨདྷིཊྛཱམཱི’’ཏིཨཱདིནཱ ནཡེན ཝཏྭཱ. ཏཾ པརིཀྑཱརཙོལ༹ཾ. པརིཀྑཱརཙོལ༹མསྶ ཨཏྠི, ཏཏྠ ཝཱ ནིཡུཏྟོཏི པརིཀྑཱརཙོལི༹ཀོ.

༥༨༩. ‘‘ཏིཙཱིཝརཾ པན པརིཀྑཱརཙོལ༹ཾ ཨདྷིཊྛཱཏུཾ ཝཊྚཏི, ན ཝཊྚཏཱི’’ཏི ཨནུཡོགཾ ཀཏྭཱ ‘‘ཝཊྚཏཱི’’ཏི ¶ (པཱརཱ. ཨཊྛ. ༢.༤༦༩) ཨཊྛཀཐཱཡ ཝུཏྟཏྟཱ ཨིདྷ ‘‘ཏིཙཱིཝར’’ནྟི ཙཱིཝརཏྟཡམེཝ ཝུཏྟཾ. ‘‘སུཁཔརིཧཱརཏྠཾ ཨེཀམྤི ཝིཀཔྤེཏབྦ’’ནྟི ཝཙནཏོ ཨེཀདེསེ སམུདཱཡོཔཙཱརཝསེན ཨེཀམྤི ཝིཀཔྤེཏབྦམེཝ ཧོཏི.

པརིཀྑཱརཙོལ༹ཾ ཀཱཏུམྤི ཝཊྚཏཱིཏི བདྡྷསཱིམཏོ བཧི ཝསནྟེན ཨེཀཀེན ཏེཙཱིཝརིཀེན ཨནྟོཨརུཎེ ཨསཏིཡཱ ཏཱིསུ ཙཱིཝརེསུ ཧཏྠཔཱསེ ཨཀཏེསུ ནིསྶགྒིཡཾ པཱཙིཏྟིཡཾ ཧོཏཱིཏི, ཝིནཡཀམྨཾ ཀཱཏུཾ སབྷཱགཔུགྒལཱནཾ དུལླབྷཏྟཱ ¶ ཙ སུཁཔརིཧཱརཏྠཾ ཏཱིསུ ཨེཀཾ ཝཱ སབྦཱནི ཨེཝ ཝཱ ཏིཙཱིཝརནཱམེན ཀཏཱདྷིཊྛཱནཱནི པཙྩུདྡྷརིཏྭཱ པརིཀྑཱརཙོལ༹ནཱམེན ཨདྷིཊྛཱཏུམྤི ཝཊྚཏཱིཏི ཝུཏྟཾ ཧོཏི.

ཨེཝཾ ཨགྒཧེཏྭཱ ‘‘སཙེ ཏིཙཱིཝརཾ པརིཀྑཱརཙོལཱ༹དྷིཊྛཱནཾ ལབྷེཡྻ, ཨུདོསིཏསིཀྑཱཔདེ པརིཧཱརོ ནིརཏྠཀོ བྷཝེཡྻཱ’’ཏི (པཱརཱ. ཨཊྛ. ༢.༤༦༩) ཝུཏྟཾ མཧཱཔདུམཏྠེརསྶ མཏཾ དསྶེཏུམཱཧ ‘‘ཨེཝཾ ཙུདོསིཏེ’’ཏིཨཱདི. ཨེཝཾ ཙེཏི ཨེཝཾ ཏིཙཱིཝརཾ པརིཀྑཱརཙོལ༹ཾ ཨདྷིཊྛཧིཏྭཱ པརིཧརིཏུཾ ཝཊྚཏི ཙེ. ཨུདོསིཏེཏི ཨིམསྶ སིཀྑཱཔདསྶ ཨནནྟརེ དུཏིཡཀཐིནསིཀྑཱཔདེ. ཝུཏྟོ པརིཧཱརོཏི ‘‘ཨེཀཀུལསྶ གཱམོ ཧོཏི པརིཀྑིཏྟོ ཙ. ཨནྟོགཱམེ ཙཱིཝརཾ ནིཀྑིཔིཏྭཱ ཨནྟོགཱམེ ཝཏྠབྦ’’ནྟིཨཱདིནཱ (པཱརཱ. ༤༧༨) ནཡེན པདབྷཱཛནཱཝསཱནེ ཝུཏྟོ, ཨིདྷ ཙ ‘‘གཱམཱདཱིསུ པདེསེསཱུ’’ཏིཨཱདིནཱ ནཡེན ཨནནྟརཾ ཝཀྑམཱནོ ཏིཙཱིཝརསྶ པརིཧརཎཝིདྷི. ནིརཏྠཀོཏི པརིཀྑཱརཙོལ༹ནཱམེན ཨདྷིཊྛིཏཙཱིཝརསྶ ཏེན ཝིདྷིནཱ ཏིཙཱིཝརཾ ཨཔརིཧརནྟསྶཱཔི བྷིཀྑུནོ ཨནཱཔཏྟིབྷཱཝཏོ ནིཔྤཡོཛནོཏི ཨཏྠོ.

༥༩༠. ཏཔྤརིཧརིཏུམཱཧ ‘‘ན’’ཨིཙྩཱདི. ན ནིརཏྠཀོཏི ཡོཛནཱ. ཧེཏུཾ དསྶེཏུམཱཧ ‘‘ཏེཙཱིཝརིཀསྶེཝཱ’’ཏིཨཱདི. ཡོ ཏིཙཱིཝརནཱམེན ཨདྷིཊྛཱནཾ ཨཔཙྩུདྡྷརིཏྭཱ སཏིཾ ཨུཔཊྛཔེཏྭཱ ཨནྟོཨརུཎེ ཙཱིཝརཾ ཧཏྠཔཱསཏོ ཨམོཙེཏྭཱ ཨརུཎཾ ཨུཊྛཱཔེཏི, ཏཱདིསསྶ ཏེཙཱིཝརིཀསྶེཝ ཏསྨིཾ སིཀྑཱཔདེ ཨུདོསིཏཔརིཧཱརསྶ བྷགཝཏཱ དེསིཏཏྟཱཏི ཨཏྠོ. ཡསྨཱ ཏཱདིསསྶེཝ ཏེཙཱིཝརིཀསྶ ཨུདོསིཏསིཀྑཱཔདེ པརིཧཱརོ ཝུཏྟོ, ཏསྨཱ. ཏཾ སབྦམྤཱིཏི ཏཾ ནཝཝིདྷཾ སབྦམྤི ཙཱིཝརཾ. པརིཀྑཱརཙོལ༹སྶཱཏི པརིཀྑཱརཙོལ༹ནཱམེན ཨདྷིཊྛཧིཏྭཱ ཙཱིཝརཾ པརིབྷུཉྫིཏུཀཱམསྶ པརིཀྑཱརཙོལ༹ནཱམེན ཨདྷིཊྛཱཏུཾ ཝཊྚཏི.

༥༩༡. ཨིམིནཱ ¶ ཨུདོསིཏཔརིཧཱརསྶ ཨནིརཏྠཀབྷཱཝཾ སཱདྷེཏྭཱ ཨིདཱནི ‘‘ཏིཙཱིཝརཾ པརིཀྑཱརཙོལ༹ནཱམེནཱཔི ¶ ཨདྷིཊྛཱཏུཾ ཝཊྚཏཱི’’ཏི ཨིམསྶ ཨདྷིཀཏྠསྶ མཧཱཀཱརུཎིཀེན ཨནུཉྙཱཏབྷཱཝེ ཀིརིཡནྟརཱནུཛཱནནསངྑཱཏཨདྷིཀཝཙནསྶ ཉཱཔཀཧེཏུབྷཱཝཾ དསྶེཏུམཱཧ ‘‘ཨདྷིཊྛེཏཱི’’ཏིཨཱདི. ཨིམསྨིཾཡེཝ སིཀྑཱཔདེ ཨནཱཔཏྟིཝཱརེ ‘‘ཨནཱཔཏྟི ཨནྟོདསཱཧཾ ཨདྷིཊྛེཏི, ཝིཀཔྤེཏཱི’’ཏི པཱཋེ ཨནཱཔཏྟིབྷཱཝེ ‘‘ཨདྷིཊྛེཏཱི’’ཏི ཨེཏྟཀེནེཝ པརིཡཏྟེ (པཱརཱ. ༤༦༩) ‘‘ཝིཀཔྤེཏཱི’’ཏི ཀིརིཡནྟརཱནུཛཱནནེན པཀཱརནྟརེནཱཔི དོསོ ནཏྠཱིཏི ཨདྷིཔྤཱཡསྶ ཝིཉྙཱཔིཏཏྟཱཏི ཨཏྠོ.

༥༩༢. ཨེཝཾ ཀརོནྟསྶཱཏི ཏིཙཱིཝརནཱམེན ཨདྷིཊྛཱནཾ པཙྩུདྡྷརིཏྭཱ པརིཀྑཱརཙོལ༹ནཱམེན ཨདྷིཊྛཧནྟསྶ. ཨིདཱནི ཨཏིཔྤསངྒཾ དསྶེཏུཀཱམསྶ ཙོདཀསྶ ཨདྷིཔྤཱཡཾ དསྶེཏུམཱཧ ‘‘ཨེཝ’’ནྟིཨཱདི. མཱུལཱདྷིཊྛཱནཾ པཧཱཡ ཀཱཏབྦཔྤཀཱརནྟརསྶཱཔི ཝིཛྫམཱནཏྟཱ ཏིཙཱིཝརཾ པཙྩུདྡྷརིཏྭཱ མུཁཔུཉྪནཱདིཀཾ ཀཏྭཱ ཨདྷིཊྛཧཏོཔི དོསོ ན སིཡཱཏི ཀསྨཱ ནཱཔཛྫཏཱིཏི ཨཏྠོ. ནཨིཏི ཨཏིཔྤསངྒནིཝཱརཎེ.

༥༩༣. ཀིཙྩཝིདྷཱནཏོཏི ཏེསཾ མུཁཔུཉྪནཱདཱིནཾ ཨཏྟནོ ཨཏྟནོ ཀིཙྩསྶ སཱདྷནཏོ, ཏཱདིསཾ ཀིཙྩཝིསེསཱཔེཀྑཾ ཝིནཱ ཏཾཏཾནཱམེན ཨདྷིཊྛཱཏུཾ ན ཡུཛྫཏཱིཏི ཨདྷིཔྤཱཡོ. ཨཀིཙྩསྶཱཏི མུཁཔུཉྪནཱདིཀིཙྩརཧིཏསྶ. ཨདྷིཀསྶཱཏི པཙྩུདྡྷརིཏྭཱ པཋམཾ ཨདྷིཊྛཱནསྶ ཝིཛཧིཏཏྟཱ ཨཏིརེཀསྶ. ཨསྶཱཏི ཏིཙཱིཝརསྶ. ཨདྷིཊྛཱནཾ ཏུ ཡུཛྫཏཱིཏི དསཱཧཾ ཨནཏིཀྐམིཏྭཱ པརིཀྑཱརཙོལ༹ནཱམེན ཨདྷིཊྛཱནཾ པན ཡུཛྫཏི.

༥༩༤. ནིདྷཱནསྶ ¶ མུཁཾ ཨུཔཱཡོཏི ནིདྷཱནམུཁཾ, ཨནྟརཝཱསཀཱདིཏཾཏཾཙཱིཝརནཱམེན ཨདྷིཊྛཱནཏོ ཨཏིརེཀཾ ཡཾ ཀིཉྩི ཙཱིཝརཾ ཡཐཱ ཋཔིཏཾ ཨཱཔཏྟིཾ ན ཀརོཏི, ཏཐཱ ནིདྷཱནསྶ ཨུཔཱཡོཏི ཨཏྠོ. ཨེཏཾ པརིཀྑཱརཙོལཱ༹དྷིཊྛཱནཾ. མཧཱཔཙྩརིཡནྟི བྲཱཧྨཎཏིསྶབྷཡེ བྷིཀྑུསངྒྷཾ ཛམྦུདཱིཔཾ ནེཏུཾ སཀྐསྶ དེཝཱནམིནྡསྶ ཨཱཎཏྟིཡཱ ཝིསུཀམྨེན ནིམྨིཏམཧཱཔཙྩརིཡཾ ནིསཱིདིཏྭཱ ལིཁིཏཏྟཱ ཏཾནཱམཀཱཡཾ ཝིནཡཊྛཀཐཱཡཾ, ‘‘མཧཱཔཙྩརིཡཱདིསཱུ’’ཏིཔི ལིཁནྟི.

༥༩༥. པརིཀྑཱརཙོལ༹ནཱམེན ཨདྷིཊྛཱནཝིདྷཱནསྶ ཝུཏྟཔྤམཱཎཾ ཀཏམནྟི ཨཱཧ ‘‘ཙཱིཝར’’ནྟིཨཱདི. ‘‘ནིདཱནེ ཨུཔྤཏྟིཏོ’’ཏི པདཙྪེདོ. ‘‘ཙཱིཝརཾ པརིཔུཎྞ’’ནྟི ནིདཱནེ ‘‘ཏིཙཱིཝརཾ སམྤུཎྞཾ ཝིཛྫཏི, ཨིདམཏིརེཀཙཱིཝརཾ ཀིཾ ཀཱཏབྦ’’ནྟི བྷིཀྑཱུཧི བྷགཝཏོ ཨཱརོཙིཏཝཏྠུམྷི ¶ . ཨུཔྤཏྟིཏོཏི པརིཀྑཱརཙོལཱ༹དྷིཊྛཱནསྶ ཨུཔྤནྣཏྟཱ, ཨནུཉྙཱཏཏྟཱཏི ཨཏྠོ. ‘‘ཏེན ཁོ པན སམཡེན བྷིཀྑཱུནཾ པརིཔུཎྞཾ ཧོཏི ཏིཙཱིཝརཾ, ཨཏྠོ ཙ ཧོཏི པརིསྶཱཝནེཧིཔི ཐཝིཀཱཧིཔི. བྷགཝཏོ ཨེཏམཏྠཾ ཨཱརོཙེསུཾ. ཨནུཛཱནཱམི བྷིཀྑཝེ པརིཀྑཱརཙོལ༹ཀ’’ནྟི (མཧཱཝ. ༣༥༧) ཨེཏྠ པཱལི༹ཡཾ ཨེཝཾ ཝིཔྤཝཱསསུཁཏྠཾ ནཱམེནཱདྷིཊྛིཏཏིཙཱིཝརཾ ཨདྷིཊྛཱནཾ པཙྩུདྡྷརིཏྭཱ པརིཀྑཱརཙོལ༹ནཱམེན ཨདྷིཊྛཱཏུཾ ཝཊྚཏཱིཏི སཱདྷནེན ཏདེཀསཱདྷནཏྟཱ ཨེཝ ཨེཀམྤི ཙཱིཝརཾ ཝིཀཔྤེཏུཾ ཝཊྚཏཱིཏི ཝུཏྟམེཝ ཧོཏི. ཏེནེཝཱཧ ཨཊྛཀཐཱཡཾ ‘‘ཨེཝཉྩ སཏི ཡོ ཏིཙཱིཝརེ ཨེཀེན ཙཱིཝརེན ཝིཔྤཝསིཏུཀཱམོ ཧོཏི, ཏསྶ ཏིཙཱིཝརཱདྷིཊྛཱནཾ པཙྩུདྡྷརིཏྭཱ ཝིཔྤཝཱསསུཁཏྠཾ ཝིཀཔྤནཱཡ ཨོཀཱསོ དིནྣོ ཧོཏཱི’’ཏི (པཱརཱ. ཨཊྛ. ༢.༤༦༩).

༥༩༦-༨. ཨེཏྟཱཝཏཱ ཀཔྤིཡཙཱིཝརཉྩ ཏཏྠ ཀཏྟབྦཉྩ དསྶེཏྭཱ ཨིདཱནི ཨཀཔྤིཡཙཱིཝརཾ དསྶེཏུམཱཧ ‘‘ཀུསཝཱཀཱདཱི’’ཏིཨཱདི. ཀུསནྟི དབྦཏིཎཾ. ཝཱཀནྟི རུཀྑཱདཱིནཾ ཝཱཀཾ. ཨཱདི-སདྡེན ¶ ཕལཀཾ གཧིཏཾ, ཙཱིར-སདྡོ ཙཱིཝརཔརིཡཱཡོ, ཨིམསྨིཾ ཀུསཱདཡོ གནྠེཏྭཱ ཀཏེ ཙཱིཝརེཡེཝ ཝཏྟཏི. ཀེསཛཾ ཀམྦལནྟི མནུསྶཀེསེཧི ཝཱིཏཀམྦལཉྩ. ཝཱལཛཾ ཀམྦལནྟི ཨསྶཝཱལཙམརཝཱལེཧི ཝཱིཏཀམྦལཉྩ. ཨུལཱུཀཔཀྑནྟི ཀོསིཡསཀུཎཔཏྟཾ. ཨིདྷ པན ཏཾ གནྠེཏྭཱ ཀཏཙཱིཝརམེཝ གཧེཏབྦཾ. ཨཛིནཀྑིཔེཏི ཨཛིནདཱིཔིཙམྨེ. ‘‘དྷཱརཡཏོ ཐུལླཙྩཡ’’ནྟི པཙྩེཀཾ སམྦནྡྷོ.

ཀདལིདུསྶེཏི ཀདལིཝཱཀམཡཝཏྠེ. ཨེརཀདུསྶེཏི ཨེརཀམཡཝཏྠེ. ཨཀྐདུསྶེཏི ཨཀྐདཎྜེ ཝཱ ཏེསཾ སུཏྟཱནི ཝཱ གཧེཏྭཱ ཀཏཝཏྠེ. པོཏྠཀེཏི མཀཙིཝཱཀམཡཝཏྠེ. ཏིརཱིཊེ ཝཱཏི ཨེཝཾནཱམཀེ རུཀྑཏཙེ. ཝེཋནེཏི སཱིསཝེཋནེ. ཀཉྩུཀེཏི ཀཝཙེ.

སབྦནཱིལཀེཏི ཀེཝལནཱིལཀེ. ཨེས ནཡོ མཉྫེཊྛཱདཱིསུ. མཧཱནཱམརཏྟེཏི ཏནུཔདུམདལཝཎྞརཏྟེ. མཧཱརངྒརཏྟེཏི སཏཔདིཝཎྞརཏྟེ.

༥༩༩. ཨཙྪིནྣདསཀེཏི ཨཙྪིནྣཱ དསཱ ཡསྶ, ཏསྨིཾ ཙཱིཝརེ. ཨེས ནཡོ དཱིགྷདསེཔི. ཕལདསེཏི ཕལསདིསགནྠིཏཱ དསཱ ཡསྶ, ཏསྨིཾ. པུཔྥདསེཏི ཀཎྞིཀཾ བནྡྷིཏྭཱ ཝིཀཱསེཏྭཱ ཀཏཱ དསཱ ཡསྶ, ཏསྨིཾ ཙཱིཝརེཏི ཨཏྠོ. ཨཙྪིནྣཙཱིཝརསྶཱཏི ནགྒཾ ཀཏྭཱ ཙོརེཧི ཝིལུཏྟཙཱིཝརསྶ ¶ . ཨེཏྠཱཏི ཀུསཝཱཀཱདཱིསུ, སབྦནཱིལཱདཱིསུ ཙ. ཀིཉྩཱིཏི ཨེཀམྤི ཨཀཔྤིཡཾ ནཏྠི ཨནནུལོམིཀཾ ནཏྠི. ‘‘ནགྒེན ཨེཏེསུ ཨཀཔྤིཡཙཱིཝརེསུ ཡཾཀིཉྩི ལདྡྷཾ, ཏེན ཧིརིཀོཔིནཾ པཊིཙྪཱདེཏྭཱ པཙྪཱ ཀཔྤིཡཙཱིཝརེ ལདྡྷེ ཏཾ ཨདྷིཝཱསེཏྭཱ ཨིདཾ ཨཀཔྤིཡཙཱིཝརཾ པརིཙྩཛིཏབྦཾ. སབྦནཱིལཀཱདིཝཏྠེསུ ལདྡྷེསུ ཀཔྤིཡརཛནེན རཛིཏྭཱ, ཏཾ ཝཎྞཾ ནཱསེཏྭཱ ཝཱ ཀཔྤིཡཝཏྠཱནི ཨུབྷཡཔསྶེསུ ¶ ཨལླིཡཱཔེཏྭཱ, པཊིཙྪཱདེཏྭཱ ཝཱ ནིཝཱསེཏུཾ ཝཊྚཏཱི’’ཏི ཨཊྛཀཐཱཡཾ ཝུཏྟཾ.

༦༠༠. ‘‘ཨནྟོདསཱཧ’’ནྟི ཨིདཾ ‘‘ཨདྷིཊྛེཏཱི’’ཏིཨཱདཱིཧི སབྦཔདེཧིཔི ཡོཛེཏབྦཾ. ཝིསྶཛྫེཏཱིཏི ཨཉྙསྶ དེཏི. ཨིདྷ དཱནཾ དུཝིདྷཾ སམྨུཁཱདཱནཾ, པརམྨུཁཱདཱནནྟི. པཊིགྒཱཧཀཾ དིསྭཱ ‘‘ཨིདཾ ཏུཡ྄ཧཾ དམྨཱི’’ཏི དཱནཾ སམྨུཁཱདཱནཾ ནཱམ. པརམྨུཁཱ ‘‘ཨིདཾ ཨིཏྠནྣཱམསྶ དམྨཱི’’ཏི དིནྣཾ པརམྨུཁཱདཱནཾ. ‘‘ཨིདཾ ཏྭཾ གཎྷཱཧཱི’’ཏི ཝཱ ‘‘ཏུཡ྄ཧཾ གཎྷཱཧཱི’’ཏི ཝཱ ཝུཏྟེ ‘‘མཡ྄ཧཾ གཎྷཱམཱི’’ཏི སཙེ ཝདཏི, དཱནགཧཎདྭཡམྤི སུདྡྷཾ. ‘‘ཨིདཾ ཏཝ སནྟཀཾ ཀརོཧི, ཏཝ སནྟཀཾ ཧོཏུ, ཏཝ སནྟཀཾ ཧོཏཱི’’ཏི དཱཡཀེན ཝུཏྟེ གཎྷནྟོཔི ‘‘མམ སནྟཀཾ ཀརོམི, མམ སནྟཀཾ ཧོཏུ, མམ སནྟཀཾ ཧོཏཱི’’ཏི ཝདཏི ཙེ, དཱནཾ, གཧཎཉྩ ཨསུདྡྷཾ ཧོཏི. ‘‘ཏཝ སནྟཀཾ ཀརོཧཱི’’ཏི ཝུཏྟེ པན ‘‘སཱདྷུ བྷནྟེ མཡ྄ཧཾ གཎྷཱམཱི’’ཏི ཝཏྭཱ གཎྷཱཏི, གཧཎཾ སུདྡྷཾ. ‘‘ཨིདཾ ཏུཡ྄ཧཾ གཎྷཱཧཱི’’ཏི ཝུཏྟེ ‘‘ཨཧཾ ན གཎྷཱམཱི’’ཏི ཝདཏི, པུན ‘‘དིནྣཾ མཡཱ, ཏུཡ྄ཧཾ གཎྷཱཧཱི’’ཏི ཝུཏྟེ ཨིཏརོཔི པུན པཊིཀྑིཔཏི, ཏཾ ཙཱིཝརཾ ཀསྶཙི ཨསནྟཀཏྟཱ དསཱཧཱཏིཀྐམེནཱཔི ནིསྶགྒིཡཾ ན ཧོཏཱིཏི པཙྪཱ ཏེསུ དྭཱིསུ ཡོ ཨིཙྪཏི, ཏེན ཨདྷིཊྛཱཡ པརིབྷུཉྫིཏབྦནྟི སབྦམིདཾ ཨཊྛཀཐཱཡ (པཱརཱ. ཨཊྛ. ༢.༤༦༩ ཨཏྠཏོ སམཱནཾ) ཝུཏྟཾ.

ཨདྷིཊྛིཏཙཱིཝརེ ཨདྷིཊྛཱནེ ཝེམཏིཀེན ཨཏྟནོ ཝིམཏིཾ པཋམཾ ཨཱཝི ཀཏྭཱ ‘‘སཙེ ཨནདྷིཊྛིཏཾ, ཨེཝཾ ཀཏེ ཀཔྤིཡཾ ཧོཏཱི’’ཏི ཙིནྟེཏྭཱ ནིསྶཛྫེཏྭཱ ཝིནཡཀམྨཾ ཀརོནྟསྶ མུསཱཝཱདདོསོ ནཱཔཛྫཏི. ཡཐཱཧ ཨཊྛཀཐཱཡཾ ‘‘ན ཧི ཨེཝཾ ཛཱནཱཔེཏྭཱ ཝིནཡཀམྨཾ ཀརོནྟསྶ མུསཱཝཱདོ ཧོཏཱི’’ཏི (པཱརཱ. ཨཊྛ. ༢.༤༦༩). ‘‘ཀེཙི ‘ཏཐཱ ཝེམཏིཀཙཱིཝརཾ ཨཉྙེན ¶ ཝིསྶཱསེན གཧེཏྭཱ པུན དཱཏབྦ’ནྟི ཝདནྟི, ཏཾ ན སུནྡར’’ནྟི (པཱརཱ. ཨཊྛ. ༢.༤༦༩ ཐོཀཾ ཝིསདིསཾ) ཏཏྠེཝ ཝུཏྟཾ.

ཝིནསྶཏཱིཏི ཙོརཱདཱིཧི ཝིནསྶཏི. ‘‘ནསྶཏི, ཌཡ྄ཧཏི, ཨཙྪིནྡིཏྭཱ གཎྷནྟཱི’’ཏི ཨིམཱནིཔི ¶ ཝིནཱསཔྤཀཱརཏྟཱ ‘‘ཝིནསྶཏཱི’’ཏི ཨིམིནཱཝ སངྒཡ྄ཧནྟི. ཏཏྠ ‘‘ནསྶཏཱི’’ཏི ཨིདཾ ཙོརཱདཱིཧི ཧཊཾ སནྡྷཱཡ ཝུཏྟཾ, ‘‘ཝིནསྶཏཱི’’ཏི ཨིདཾ ཨུནྡཱུརཁཱཡིཏཱདིཾ སནྡྷཱཡ ཝུཏྟཾ, ‘‘ཌཡ྄ཧཏཱི’’ཏི ཨགྒིནཱ དཌྜྷཾ སནྡྷཱཡ. ཝིསྶཱསེཏི ཨེཏྠ སནྡིཊྛོ ཙ སམྦྷཏྟོ ཙ ཨཱལཔིཏོ ཙ ཛཱིཝཏི ཙ གཧིཏེ ཙཏྟམནོ ཧོཏཱིཏི པཉྩངྒསམནྣཱགཏེན ཨཏྟནི ཝིསྶཱསེན ཨཉྙེན གཧིཏེཏི ཨཏྠོ. པཀཱསིཏཱཏི ‘‘ཨནཱཔཏྟི ཨནྟོདསཱཧཾ ཨདྷིཊྛེཏཱི’’ཏིཨཱདིནཱ (པཱརཱ. ༤༦༩) ནཡེན ཝུཏྟཱ.

༦༠༡. ཨིདཾ པན སམུཊྛཱནཾ ནཱམེན ཀཐིནསམུཊྛཱནཾ ནཱམཱཏི ཨཏྠོ. ཨིདཾ ཀཐིནསམུཊྛཱནཾ ནཱམ ཀཱཡཝཱཙཏོ ཙ ཀཱཡཝཱཙཱཙིཏྟཏོ ཙ སམུཊྛཱཏི. ཨཏིརེཀཙཱིཝརབྷཱཝསྶ ཛཱནནཙིཏྟེན པཎྞཏྟིཛཱནནཙིཏྟེ ཨསཏིཔི ཨཱཔཏྟིསམྦྷཝཏོ ཨཙིཏྟཾ. ཨནདྷིཊྛཱནཏོ, ཨཝིཀཔྤནཏོ ཙ ཨཀྲིཡཾ. ཀམྨཊྛཱནམནུཡུཉྫནྟོ ཝཱ ཙེཏིཡཱདིཾ ཝནྡནྟོ ཝཱ ཨེཀཱདསམཾ ཨརུཎཾ ཨུཊྛཱཔེཏི, ཀུསལཙིཏྟོ ཨཱཔཛྫཏི, ཀལཧཱདིཔསུཏོ ཝཱ ཝཱིཏིཀྐམཾ ཛཱནནྟོ ཝཱ ཨུཊྛཱཔེཏི, ཨཀུསལཙིཏྟོ ཨཱཔཛྫཏི, ཁཱིཎཱསཝོ པན ཨསཏིཡཱ ཝཱ པཎྞཏྟིཾ ཨཛཱནནྟོ ཝཱ ཏཐཱ ཀརོནྟོ ཨབྱཱཀཏཙིཏྟོ ཨཱཔཛྫཏཱིཏི ཏིཙིཏྟཾ. ཝུཏྟནཡེན ཀམྨཊྛཱནཱདིམནུཡུཉྫནྟསྶ སོམནསྶཙིཏྟསམངྒིནོ སུཁཝེདནཱ, ཨུཔེཀྑཱཙིཏྟསམངྒིནོ ཨུཔེཀྑཱཝེདནཱ, ཀལཧཱདིཔསུཏསྶ དོམནསྶཙིཏྟསམངྒིནོ དུཀྑཝེདནཱ ཧོཏཱིཏི ཏིཝེདནཾ. ཨེས ནཡོ ཨུཔརིཔི ཨེཝརཱུཔེ ཋཱནེ ཡོཛེཏབྦོ.

པཋམཀཐིནཀཐཱཝཎྞནཱ.

༦༠༢. གཱམཱདཱིསུ ¶ པདེསེསུ ཏིཔཉྩསཱུཏི ཏིཙཱིཝརཱནི ནིཀྑིཔིཏྭཱ ཝིཔྤཝཱསེན དོསཾ, ཨུཔྤཛྫནཊྛཱནཉྩ དསྶེཏུཾ ‘‘གཱམོ ཨེཀཱུཔཙཱརོ’’ཏིཨཱདིནཱ (པཱརཱ. ༤༧༧) ནཡེན པཱལི༹ཡཾ ཝུཏྟགཱམནིཝེསནཨུདོསིཏཨཊྚམཱལ༹པཱསཱདཧམྨིཡནཱཝཱསཏྠཁེཏྟདྷཉྙཀར- ཎཨཱརཱམཝིཧཱརརུཀྑམཱུལཨཛ྄ཛྷོཀཱསསངྑཱཏེསུ པནྣརསསུ ཙཱིཝརནིཀྑེཔཊྛཱནེསཱུཏི ཝུཏྟཾ ཧོཏི. ཨེཏྠ གཱམོ ནཱམ ཨེཀཀུཊིཀཱདིགཱམོ.

ནིཝེསནཾ ནཱམ གཱམཏོ བཧི ཙཏུསཱལཱདིཀོ གེཧོ. ཏེནཱཧ གཎྛིཔདེ ‘‘གཱམནིཝེསནཱནཾ ཝིསེསཾ ཝདནྟཱ ‘པུན ཨེཀཔརིཙྪེདཾ ཀཏྭཱ ནིཝེསིཏཱ བཧུགེཧཱ ནིཝེསནཾ ནཱམ ཧོནྟཱི’ཏི ཝདནྟི, ཏསྨཱ ཨིདཾ ནིཝེསནཱདི སབྦཾ ‘གཱམཏོ བཧཱི’ཏི གཧེཏབྦ’’ནྟི. ཨིདཉྩ ཏཏྠེཝ ཝུཏྟཾ ‘‘ནིཝེསནཱདིཀཾ ¶ ཨནྟོགཱམེ ཙེ ཧོཏི, གཱམེ ཝུཏྟཔརིཧཱརསྶེཝ ལབྦྷནཏོ ཨནྟོགཱམཏོ བཧཱི’ཏི གཧེཏབྦ’’ནྟི.

ཨཊྛཀཐཱཡཾ ‘‘ཨུདོསིཏོཏི ཡཱནཱདཱིནཾ བྷཎྜཱནཾ སཱལཱ’’ཏི (པཱརཱ. ཨཊྛ. ༢.༤༨༢-༤༨༧) ཝུཏྟསརཱུཔཾ ཨུདོསིཏཾ ནཱམ. ‘‘ཨཊྚོཏི པཊིརཱཛཱདིཔཊིབཱཧནཏྠཾ ཨིཊྛཀཱཧི ཀཏོ བཧལབྷིཏྟིཀོ ཙཏུཔཉྩབྷཱུམིཀོ པཏིསྶཡཝིསེསོ’’ཏི (པཱརཱ. ཨཊྛ. ༢.༤༨༢-༤༨༧) ཝུཏྟསརཱུཔོ ཨཊྚོ ནཱམ. ‘‘མཱལོ༹ཏི ཨེཀཀཱུཊསངྒཧིཏོ ཙཏུརསྶཔཱསཱདོ’’ཏི (པཱརཱ. ཨཊྛ. ༤༨༢-༤༨༧) ཝུཏྟོ ཨེཀཀཎྞིཀསངྒཧིཏོ ཙཏུརསྶགེཧོ མཱལོ༹ ནཱམ. པཱསཱདོཏི དཱིགྷཔཱསཱདོ. ཧམྨིཡནྟི མུཎྜཙྪདནཔཱསཱདོ. ནཱཝཱཏི ཡཱནཔྤཏྟི. སཏྠནྟི ཛངྒྷསཏྠསཀཊསཏྠཝསེན དུཝིདྷོ ཛནསམཱུཧོ, སོ ཙ ནིཝིཊྛཱནིཝིཊྛཝསེན པཙྩེཀཾ དུཝིདྷོ. ཏཏྠ ནིཝིཊྛེ ཝཏིཨཱདིཔརིཀྑེཔོཔི ཧོཏེཝ.

ཁེཏྟནྟི ¶ ཡཝཁེཏྟཱདིཁེཏྟཾ. དྷཉྙཀརཎཾ ཁལཾ. ཨཱརཱམོ པུཔྥཱརཱམོ, ཕལཱརཱམོ ཙ. ཝིཧཱརོཏི ཨེཀམྤི སེནཱསནཾ ཝུཙྩཏི. ‘‘རུཀྑོ ནཱམ ཡཾ མཛ྄ཛྷནྟིཀེ ཀཱལེ སམནྟཱ ཚཱཡཱ ཕརཏཱི’’ཏི (པཱརཱ. ༤༩༤) ཝུཏྟཔྤམཱཎཔརིཙྪནྣོ རུཀྑོ. ཨཛ྄ཛྷོཀཱསོ ནཱམ སཏྟབྦྷནྟརོ, སོ ཝིཉྩཱཊཝིཨཱདིཨགཱམཀཱརཉྙེ ཙ མཙྪབནྡྷཱནཾ ཨགམནཔཐེ སམུདྡདཱིཔེ ཙ ལབྦྷཏི. མཙྪབནྡྷཱནཾ ཨགམནཔཐོ ནཱམ ཨུདཀཔིཊྛིཡཱ གནྟྭཱ པུན ཏདཧེཝ གེཧཾ ཨཱགནྟུཾ ཨསཀྐུཎེཡྻཏཱཡ དཱུརོ སམུདྡཔྤདེསོ ཝུཙྩཏི.

ཨཡཾ གཱམཱདིཀོ པཙྩེཀཾ ཨེཀཱུཔཙཱརོ, ནཱནཱུཔཙཱརོཏི དུཝིདྷོ. ཏཏྠ ཨཛ྄ཛྷོཀཱསཾ ཝིནཱ གཱམཱདིཀོ ཏཾཏཾརཱཛཱདིསཱམིཀཀུལཱནཾ ཨེཀཏྠནཱནཏྠཝསེན ཨེཀཀུལསནྟཀོ ཙེ ཧོཏི, ཨེཀཱུཔཙཱརོ. ནཱནཱཀུལསནྟཀོ ཙེ, ནཱནཱུཔཙཱརོ ཧོཏི. ཝུཏྟཉྷེཏཾ ‘‘གཱམོ ཨེཀཱུཔཙཱརོ ནཱམ ཨེཀཀུལསྶ གཱམོ ཧོཏཱི’’ཏིཨཱདི (པཱརཱ. ༤༧༨). ཨཊྛཀཐཱཡམྤི ཝུཏྟཾ ‘‘ཨེཀཀུལསྶ གཱམོཏི ཨེཀསྶ རཉྙོ ཝཱ བྷོཛཀསྶ ཝཱ གཱམོ’’ཏི ཙ ‘‘ནཱནཱཀུལསྶ གཱམོཏི ནཱནཱརཱཛཱུནཾ ཝཱ བྷོཛཀཱནཾ ཝཱ གཱམོ ཝེསཱལཱིཀུསིནཱརཱདིསདིསོ’’ཏི (པཱརཱ. ཨཊྛ. ༢.༤༧༩) ཙ.

ཨེཀཀུལེན ཀཱརཱཔིཏོ ཝིཧཱརོ ཨེཀཱུཔཙཱརོ, ནཱནཱཀུལེཧི ཀཱརཱཔིཏོ ནཱནཱུཔཙཱརོ ཧོཏི. ཡཐཱཧ གཎྛིཔདེ ‘‘ཝིཧཱརེ ཨེཀཀུལནཱནཱཀུལཝོཧཱརོ ཀཱརཱཔཀཱནཾ ཝསེན ཝུཏྟོ’’ཏི. ཨཛ྄ཛྷོཀཱསེ པན ¶ ཨུཔཙཱརབྷེདོ ཨབྦྷནྟརཝསེན ཝེདིཏབྦོ. ཝུཏྟཉྩེཏཾ པཱལི༹ཡཾ ‘‘ཨཛ྄ཛྷོཀཱསོ ཨེཀཱུཔཙཱརོ ནཱམ ཨགཱམཀེ ཨརཉྙེ སམནྟཱ སཏྟབྦྷནྟརཱ ཨེཀཱུཔཙཱརོ. ཏཏོ པརཾ ནཱནཱུཔཙཱརོ’’ཏི. ཨིདྷ ཨེཀཾ ཨབྦྷནྟརཾ ཨཊྛཝཱིསཏིརཏནཾ ཧོཏི. ཡཐཱཧ ¶ ཨཊྛཀཐཱཡཾ ‘‘ཨེཀཾ ཨབྦྷནྟརཾ ཨཊྛཝཱིསཏིཧཏྠ’’ནྟི (པཱརཱ. ཨཊྛ. ༢.༤༨༩). ཨེཝཾ སངྑེཔཏོ ཝུཏྟསརཱུཔཔྤབྷེདཱནི པནྣརས ཋཱནཱནི དསྶེཏུམཱཧ ‘‘གཱམཱདཱིསུ པདེསེསུ ཏིཔཉྩསཱུ’’ཏི. ཨཡམེཏྠ སངྑེཔོ, ཝིཏྠཱརོ པན པཱལི༹ཨཊྛཀཐཱཝཎྞནཏོ ཝེདིཏབྦོ.

‘‘ཏིཙཱིཝརེན ཝིཔྤཝཱསེཡྻཱཏི སངྒྷཱཊིཡཱ ཝཱ ཨུཏྟརཱསངྒེན ཝཱ ཨནྟརཝཱསཀེན ཝཱ. ཨནྟོགཱམེ ཙཱིཝརཾ ནིཀྑིཔིཏྭཱ’’ཏི (པཱརཱ. ༤༧༦, ༤༧༨) ཝཙནཏོ ཨེཏྠ ཏིཙཱིཝརནྟི ཏིཎྞཾ ཙཱིཝརཱནམཉྙཏརམེཝ ཙཱིཝརཾ ཝཏྟབྦཾ. ཨེཀརཏྟནྟི ཝིཔྤཝཱསཀིརིཡཱཡ ཨཙྩནྟསཾཡོགེ ཨུཔཡོགཝཙནཾ. ཨཔི-སདྡེན ཀིཾ པན དིརཏྟཱདིཀནྟི དསྶེཏི.

སངྒྷསམྨུཏིཡཱ ཝིནཱཏི ཏིཙཱིཝརཾ པརིཧརིཏུཾ ཨསམཏྠེན གིལཱནེན བྷིཀྑུནཱ སངྒྷཾ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཡ྄ཧ ‘‘ཨཧཾ བྷནྟེ གིལཱནོ, ན སཀྐོམི ཏིཙཱིཝརཾ ཨཱདཱཡ པཀྐམིཏུཾ, སོཧཾ བྷནྟེ སངྒྷཾ ཏིཙཱིཝརེན ཨཝིཔྤཝཱསསམྨུཏིཾ ཡཱཙཱམཱི’’ཏི ཏིཀྑཏྟུཾ ཡཱཙིཏེན སངྒྷེན ཏསྶ ཉཏྟིདུཏིཡཱཡ ཀམྨཝཱཙཱཡ དིནྣཾ ཨཝིཔྤཝཱསསམྨུཏིཾ ཝིནཱཏི ཝུཏྟཾ ཧོཏི. ཏཐཱ ལདྡྷསམྨུཏིཀསྶ གིལཱནསྶ བྷིཀྑུནོ ཏསྨིཾ གེལཉྙེ ཨཝཱུཔསནྟེ ཝཱ ཝཱུཔསནྟེཔི ཙཱིཝརནིཀྑེཔཊྛཱནཾ ཨཱགམནཀཱལེ ཝཱ ཨུཔྤནྣེ ཨཉྙེཔི རོགེ ཨཝཱུཔསནྟེ ཏཱཡཡེཝ སམྨུཏིཡཱ ན དོསོ.

༦༠༣. བྷིཀྑུནོཏི ཨལདྡྷསམྨུཏིཀསྶ བྷིཀྑུནོ. ཏེན ཙཱིཝརེན. ཝིཔྤཝཏྠུཾ ན ཝཊྚཏཱིཏི ཝིནཱ ཝསིཏུཾ ན ཝཊྚཏི. ཀིཾ ཝུཏྟཾ ཧོཏི? ‘‘ཨེཀཀུལསྶ གཱམོ ཧོཏི པརིཀྑིཏྟོ ཙ, ཨནྟོགཱམེ ཙཱིཝརཾ ནིཀྑིཔིཏྭཱ ཨནྟོགཱམེ ཝཏྠབྦཾ. ཨཔརིཀྑིཏྟོ ཧོཏི, ཡསྨིཾ གྷརེ ཙཱིཝརཾ ནིཀྑིཏྟཾ ཧོཏི, ཏསྨིཾ གྷརེ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ. ནཱནཱཀུལསྶ ¶ གཱམོ ཧོཏི པརིཀྑིཏྟོ ཙ, ཡསྨིཾ གྷརེ ཙཱིཝརཾ ནིཀྑིཏྟཾ ཧོཏི, ཏསྨིཾ གྷརེ ཝཏྠབྦཾ སབྷཱཡེ ཝཱ དྭཱརམཱུལེ ཝཱ, ཧཏྠཔཱསཱ ཝཱ ན ཝིཛཧིཏབྦ’’ནྟིཨཱདིནཱ (པཱརཱ. ༤༧༨) ནཡེན པཱལི༹ཡཱ ཝུཏྟཊྛཱནཏོ བཧི ཨརུཎཾ ཨུཊྛཱཔེཏུཾ ན ཝཊྚཏཱིཏི ཝུཏྟཾ ཧོཏི.

ཨིམསྨིཾ ¶ པཱཋེ ‘‘པརིཀྑིཏྟོ’’ཏི ཨིདཾ པཱཀཱརེན ཝཱ ཝཏིཡཱ ཝཱ པརིཁཱཡ ཝཱ པརིཀྑིཏྟཾ སནྡྷཱཡ ཝུཏྟཾ. ཧཏྠཔཱསཱ ཝཱཏི ཨེཏྠ ཧཏྠཔཱསཱ ནཱམ ཨཌྜྷཏིཡརཏནཾ ཧོཏི. ཡཐཱཧ ཨཊྛཀཐཱཡཾ ‘‘ཏཾ གྷརཾ སམནྟཏོ ཧཏྠཔཱསཱ ན ཝིཛཧིཏབྦཾ, ཨཌྜྷཏེཡྻརཏནཔྤམཱཎཱ པདེསཱ ཨུདྡྷཾ ན ཝིཛཧིཏབྦནྟི ཝུཏྟཾ ཧོཏཱི’’ཏི (པཱརཱ. ཨཊྛ. ༢.༤༧༧-༤༧༨).

ཝིཔྤཝསནྟསྶ ཀོ དོསོཏི ཨཱཧ ‘‘ཧོཏི…པེ… ཨརུཎུགྒམེ’’ཏི. ཨནུཉྙཱཏཊྛཱནཏོ ཧི བཧི ཙཱིཝརེན ཝིནཱ ཨརུཎཾ ཨུཊྛཱཔེནྟསྶ ཏཾ ཙཱིཝརཾ ནིསྶཛྫིཏབྦཾ ཧོཏི, ཏཾཧེཏུཀཱ པཱཙིཏྟིཡཱཔཏྟིཔི ཧོཏཱིཏི ཨཏྠོ. ཏེནེཝ ཝཀྑཏི ‘‘ནིསྶཛྫིཏྭཱ…པེ… ཝིཉྙུནཱ’’ཏི.

༦༠༤. ནྷཱཡནྟསྶེཝཱཏི ཙཱིཝརསྶ ཧཏྠཔཱསཏོ དཱུརེ ནཧཱཡནྟསྶེཝ, ཨནཱདརེ སཱམིཝཙནཾ.

༦༠༦. ཨཙྪིནྣཾ ཝིལུཏྟཾ ཙཱིཝརཾ ཡསྶ སོ ཨཙྪིནྣཙཱིཝརོ, བྷིཀྑུ, ཏསྶ ཋཱནཾ ཨཙྪིནྣཙཱིཝརཊྛཱནཾ, ཏསྨིཾ.

༦༠༧. ནིཝཱསེཏྭཱཏི ཨེཏྠ ‘‘ཨནྟརཝཱསཀ’’ནྟི ཙ གཧེཏྭཱཏི ཨེཏྠ ‘‘ཨིཏརཱནཱི’’ཏི ཙ སེསོ. ཨིདཉྩ གནྟབྦཊྛཱནེ, ཨཱསནྣེ མགྒེ ཙ མནུསྶསམྦཱདྷེ ཨསཏི ཀཏྟབྦདསྶནཾ. ཨིཏརཏྠ ནིཝཱསེཏྭཱ, པཱརུཔིཏྭཱ ཙ སངྒྷཱཊིཾ ཨཾསེ ཀཏྭཱཝ གནྟབྦཾ ཧོཏི. ཝིཧཱརེ སབྷཱགེསུ ཨལབྦྷམཱནེསུ ཨཱསནསཱལམྤི གནྟྭཱ སབྷཱགསྶ སནྟིཀེ ཝིནཡཀམྨཾ ཀཏྟབྦནྟི ¶ ཨཊྛཀཐཱཡཾ (པཱརཱ. ཨཊྛ. ༢.༤༩༥ ཨཏྠཏོ སམཱནཾ) ཝུཏྟཾ. ‘‘ནིསྶཛྫིཏྭཱ’’ཏི ཨིམིནཱ ‘‘ཨིདཾ མེ བྷནྟེ ཙཱིཝརཾ རཏྟིཝིཔྤཝུཏྠཾ ཨཉྙཏྲ བྷིཀྑུསམྨུཏིཡཱ ནིསྶགྒིཡཾ, ཨིམཱཧཾ སངྒྷསྶ ནིསྶཛྫཱམཱི’’ཏི སངྒྷེ ཝཱ ‘‘ཨིདཾ མེ བྷནྟེ ཙཱིཝརཾ…པེ… ཨཧཾ ཨཱཡསྨནྟཱནཾ ནིསྶཛྫཱམཱི’’ཏི ཏིཎྞཾ, དྭིནྣཾ ཝཱ སནྟིཀེ ཝཱ ‘‘ཨིདཾ མེ ཨཱཝུསོ…པེ… ཨིམཱཧཾ ཨཱཡསྨཏོ ནིསྶཛྫཱམཱི’’ཏི ཨེཀསྶ སནྟིཀེ ཝཱ ཝཏྭཱ ནིསྶཛྫིཏྭཱཏི ཝུཏྟཾ ཧོཏི. ཝིཉྙུནཱཏི ཨེཝཾ ནིསྶགྒིཡཝཏྠུནིསྶཛྫནཱདིནཱནཔྤཀཱརཝིདྷིཛཱནནཀེན ཉཱཎཝཏཱཏི ཨཏྠོ.

༦༠༨. ཏཾ ནིསྶགྒིཡཙཱིཝརཾ.

༦༠༩. ‘‘ཨདེནྟསྶ ཙ ནིསྶཊྛཾ དུཀྐཊ’’ནྟི ཨིམིནཱ ‘‘བྱཏྟེན བྷིཀྑུནཱ པཊིབལེན ཨཱཔཏྟི ¶ པཊིགྒཧེཏབྦཱ, ནིསྶཊྛཙཱིཝརཾ དཱཏབྦ’’ནྟི ཝུཏྟཏྟཱ ཨིམཾ ཝིདྷིཾ ཛཱནནཏཱཡ བྱཏྟེན ཡཐཱཝིདྷིཾ ཀཱཏུཾ སམཏྠཏཱཡ པཊིབལེན ཁནྡྷཀེ (ཙཱུལ༹ཝ. ༢༣༩) ཨཱགཏནཡེན ཨཱཔཏྟིཾ པཊིགྒཧེཏྭཱ ནིསྶཊྛཙཱིཝརཾ ཧཏྠེན གཧེཏྭཱ ནིསཱིདཱཔེཏྭཱ སཙེ སངྒྷོ ཧོཏི, ‘‘སུཎཱཏུ མེ བྷནྟེ སངྒྷོ, ཨིདཾ ཙཱིཝརཾ ཨིཏྠནྣཱམསྶ བྷིཀྑུནོ ནིསྶགྒིཡཾ སངྒྷསྶ ནིསྶཊྛཾ, ཡདི སངྒྷསྶ པཏྟཀལླཾ, སངྒྷོ ཨིམཾ ཙཱིཝརཾ ཨིཏྠནྣཱམསྶ བྷིཀྑུནོ དདེཡྻཱ’’ཏི, སཙེ ཏཡོ ཧོནྟི, ‘‘སུཎནྟུ མེ ཨཱཡསྨནྟཱ, ཨིདཾ ཙཱིཝརཾ ཨིཏྠནྣཱམསྶ བྷིཀྑུནོ ནིསྶགྒིཡཾ ཨཱཡསྨནྟཱནཾ ནིསྶཊྛཾ, ཡདཱཡསྨནྟཱནཾ པཏྟཀལླཾ, ཨཱཡསྨནྟཱ ཨིམཾ ཙཱིཝརཾ ཨིཏྠནྣཱམསྶ བྷིཀྑུནོ དདེཡྻུ’’ནྟི, སཙེ ཨེཀཀོ ཧོཏི, ‘‘ཨིམཾ ཙཱིཝརཾ ཨཱཡསྨཏོ དམྨཱི’’ཏི དཱཏབྦཾ, ནིསྶཊྛཙཱིཝརཾ ‘‘ཨཏྟནོཡེཝ དིནྣ’’ནྟི སུདྡྷསཉྙཱཡ གཧེཏྭཱ ཨདེནྟསྶ དུཀྐཊཾ ཧོཏཱིཏི ཝུཏྟཾ ཧོཏི.

ཏསྶ སནྟཀབྷཱཝཾ ཉཏྭཱ ལེསེན ཝིལུམྤནྟསྶ པན བྷཎྜགྒྷཝསེན དུཀྐཊཐུལླཙྩཡཔཱརཱཛིཀཱཔཏྟིཡོ ཧོནྟི. ཡཐཱཧ ¶ ཨཊྛཀཐཱཡཾ ‘‘ཏསྶ སནྟཀབྷཱཝཾ པན ཉཏྭཱ ལེསེན ཨཙྪིནྡནྟོ བྷཎྜཾ ཨགྒྷཱཔེཏྭཱ ཀཱརེཏབྦོ’’ཏི (པཱརཱ. ཨཊྛ. ༢.༤༦༩). པརིཡཱཔུཏནྟི ‘‘ན བྷིཀྑཝེ ནིསྶཊྛཙཱིཝརཾ ན དཱཏབྦཾ, ཡོ ན དདེཡྻ, ཨཱཔཏྟི དུཀྐཊསྶཱ’’ཏི (པཱརཱ. ༤༧༠) པཱལི༹ཡཾ ཝུཏྟནྟི ཨཏྠོ.

༦༡༠-༡. ཐེརེ དཧརེ ཙཱཏི ཨེཏེསུ ཨུབྷོསུཔི མགྒཾ གཙྪནྟེསཱུཏི ཡོཛནཱ. ‘‘ཐེརེ’’ཏི ཨིམིནཱ ཨནིསྶིཏབྷཱཝམཱཧ, ‘‘དཧརེ ཙཱ’’ཏི ཨིམིནཱ ནིསྶིཏབྷཱཝཾ. ཨོཧཱིནེཏི ཨོསཀྐིཏེ. སཙེ སོ ཐེརོ ནིསྶཡཱཙརིཡོ བྷཝེཡྻཱཏི ཨདྷིཔྤཱཡེནཱཧ ‘‘གརུ’’ནྟི. ཏསྨིཾ དཧརེ. ཝཏྠནྟི ཏསྶ ཧཏྠེ ཋིཏཙཱིཝརཾ. ན པསྶམྦྷཏཱིཏི དྷུརནིཀྑེཔཾ ཨཀཏྭཱ གམནེ སཨུསྶཱཧཏྟཱ ནིསྶཡཔཊིཔྤསྶདྡྷི ན ཧོཏཱིཏི ཨདྷིཔྤཱཡོ. ཏེནེཝ ‘‘མུཧུཏྟ’’ནྟིཨཱདིམཱཧ.

༦༡༤. པཙྩུདྡྷཱརེ ཨནྟོཡེཝཱརུཎེཏི ཨིམིནཱ སམྦནྡྷོ, དཧརབྷིཀྑུནོ དཱུརབྷཱཝཉྩ ཨརུཎུགྒམནཉྩ ཉཏྭཱ ཙཱིཝརསྶ ཨནིསྶགྒིཡཏྠཾ ཏསྶ ཧཏྠེ ཋིཏབྷཱཝཾ སལླཀྑེཏྭཱ པུརཱརུཎཱ པཙྩུདྡྷརེཏི ཨཏྠོ. ཝིསྶཛྫེཏཱིཏི ཨཉྙསྶ དེཏི. ཝིནསྶཏཱིཏི ཙོརཱདཱིཧི ནསྶཏི.

དུཏིཡཀཐིནཀཐཱཝཎྞནཱ.

༦༡༦. ཨཀཱལཙཱིཝརནྟི ¶ ‘‘ཨཀཱལཙཱིཝརཾ ནཱམ ཨནཏྠཏེ ཀཐིནེ ཨེཀཱདསམཱསེ ཨུཔྤནྣཾ, ཨཏྠཏེ ཀཐིནེ སཏྟམཱསེ ཨུཔྤནྣཾ, ཀཱལེཔི ཨཱདིསྶ དིནྣ’’ནྟི (པཱརཱ. ༥༠༠) ཝཙནཏོ ཨནཏྠཏཀཐིནེ ཝིཧཱརེ ‘‘ཙཱིཝརམཱསོ’’ཏི ཡོ པུབྦཀཏྟིཀཀཱལ༹པཀྑཔཱཊིཔདཏོ པཊྛཱཡ ཡཱཝ ཨཔརཀཏྟིཀཔུཎྞམཱི, ཏཱཝ མཱསོ ཝུཙྩཏི, ཏཏོ པརེསུ ཨེཀཱདསསུ མཱསེསུ ¶ ཨུཔྤནྣཉྩ ཨཏྠཏཀཐིནེ ཝིཧཱརེ ཡོ ཙཱིཝརམཱསོ, ཧེམནྟཱ ཙ ཙཏྟཱརོ མཱསཱཏི པཉྩམཱསཏོ བཧི སཏྟསུ མཱསེསུ ཨུཔྤནྣཉྩ ཨཏྠཏཀཐིནེ པཉྩ མཱསཱ ཡཐཱཔརིཙྪིནྣཀཱལེ སངྒྷསྶ ཙ ‘‘ཨིདཾ ཨཀཱལཙཱིཝརཾ དམྨཱི’’ཏི པུགྒལསྶ ཙ ‘‘ཨིདཾ ཏུཡ྄ཧཾ དམྨཱི’’ཏི དིནྣཉྩེཏི ཨིདཾ ཨཀཱལཙཱིཝརནྟི ཨཏྠོ. ‘‘ཨུཔྤནྣ’’ནྟི སེསོ, ‘‘ཨུཔྤཛྫེཡྻ སངྒྷཏོ ཝཱ གཎཏོ ཝཱ ཉཱཏིཏོ ཝཱ མིཏྟཏོ ཝཱ པཾསུཀཱུལཏོ ཝཱ ཨཏྟནོ ཝཱ དྷནེནཱ’’ཏི (པཱརཱ. ༥༠༠) ཝཙནཏོ སངྒྷསྶ ཝཱ ‘‘ཨིདཾ སུཏྟནྟིཀགཎསྶ དེམ, ཨིདཾ ཨཱབྷིདྷམྨིཀགཎསྶ དེམཱ’’ཏིཨཱདིནཱ ནཡེན གཎསྶ ཝཱ དིནྣཏོ ཨཏྟནོ ཝསྶགྒེན ཝཱ ཉཱཏིཨཱདིཏོ ཝཱ སུསཱནཱདིཔཾསུཀཱུལཁེཏྟཏོ ཝཱ ཨཏྟནོ སནྟཀེན སུཏྟཀཔྤཱསཱདིཀཔྤིཡཝཏྠུཏོ ཝཱ ཨུཔྤནྣཙཱིཝརནྟི ཨཏྠོ.

མཱསཔརམཾ ནིཀྑིཔེཏི མཱསོ པརམཾ པམཱཎཾ ཨེཏསྶ ནིཀྑིཔནསྶཱཏི མཱསཔརམཾ, ནིཀྑིཔནནྟི ཀིརིཡཱཝིསེསནཾ ཀཱཏབྦཾ, མཱསཔརམཾ ནིཀྑིཔནཾ ཀརེཡྻཱཏི ཝུཏྟཾ ཧོཏི. ‘‘ཨཱཀངྑམཱནེན བྷིཀྑུནཱ པཊིགྒཧེཏབྦཾ, པཊིགྒཧེཏྭཱ ཁིཔྤམེཝ ཀཱརེཏབྦཾ, ནོ ཙསྶ པཱརིཔཱུརཱི, མཱསཔརམཾ ཏེན བྷིཀྑུནཱ ཏཾ ཙཱིཝརཾ ནིཀྑིཔིཏབྦཾ ཨཱུནསྶ པཱརིཔཱུརིཡཱ’’ཏི (པཱརཱ. ༥༠༠) ཝཙནཏོ ཨེཝཾ ཨུཔྤནྣཾ ཙཱིཝརཾ ཨིཙྪནྟེན པཊིགྒཧེཏྭཱ སཙེ པཧོཏི, དསཱཧམནཏིཀྐཱམེཏྭཱ ཀཱརེཏབྦཾ. སཙེ ནཔྤཧོཏི, ཨཱུནསྶ པརིཔཱུརཎཏྠཾ མཱསཔརམཾ ཋཔེཏབྦནྟི ཨཏྠོ.

ཀདཱ ཨེཝཾ ནིཀྑིཔིཏབྦནྟི ཨཱཧ ‘‘སཏི པཙྩཱསཱཡཱ’’ཏི, ‘‘པཙྩཱསཱ ཧོཏི སངྒྷཏོ ཝཱ གཎཏོ ཝཱ ཉཱཏིཏོ ཝཱ མིཏྟཏོ ཝཱ པཾསུཀཱུལཏོ ཝཱ ཨཏྟནོ ཝཱ དྷནེནཱ’’ཏི (པཱརཱ. ༥༠༠) ཝུཏྟསངྒྷཱདིཏོ ཨཏྟནོ ཝསྶགྒཱདིཏོ ལབྷེཡྻ, ཏེན ‘‘ཨིམསྶ ཨཱུནེ པརིཔུཎྞེ ཀཱརེསྶཱམཱི’’ཏི པཙྩཱསཱཡ སཏི ཨེཝཾ ནིཀྑིཔིཏབྦནྟི ཨཏྠོ. ཏཏོ ཨུདྡྷཾ ཋཔེཏུཾ ¶ ན ཝཊྚཏཱིཏི མཱསཏོ ཨཏིརེཀཀཱལཾ ནིཀྑིཔིཏུཾ ན ཝཊྚཏི, ནིསྶགྒིཡཔཱཙིཏྟིཡཾ ཧོཏཱིཏི ཨཏྠོ.

ཡདི ཨེཝཾ ‘‘ཏདཧུཔྤནྣེ མཱུལཙཱིཝརེ པཙྩཱསཱཙཱིཝརཾ ཨུཔྤཛྫཏི, དསཱཧཱ ཀཱརེཏབྦཾ…པེ… ཝཱིསེ ¶ ཨུཔྤནྣེ མཱུལཙཱིཝརེ པཙྩཱསཱཙཱིཝརཾ ཨུཔྤཛྫཏི, དསཱཧཱ ཀཱརེཏབྦ’’ནྟི (པཱརཱ. ༥༠༠) ཀསྨཱ ཨཱཧཱཏི? པཙྩཱསཱཙཱིཝརསྶ དསདིཝསེ ཨཏིཀྐམྨ ཋཔེཏུཾ ཨཡུཏྟཏྟཱ, མཱུལཙཱིཝརསྶ ཏགྒཏིཀཏྟཱ ཨེཝཾ ཝུཏྟཾ. ཡཐཱཧ ཨཊྛཀཐཱཡཾ ‘‘མཱུལཙཱིཝརསྶ ཨུཔྤནྣདིཝསཏོ ཡཱཝ ཝཱིསཏིམོ དིཝསོ, ཏཱཝ ཨུཔྤནྣཾ པཙྩཱསཱཙཱིཝརཾ མཱུལཙཱིཝརཾ ཨཏྟནོ གཏིཀཾ ཀརོཏཱི’’ཏི (པཱརཱ. ཨཊྛ. ༢.༥༠༠).

ཏཏིཡཀཐིནཀཐཱཝཎྞནཱ.

༦༡༨-༩. བྷིཀྑུནིཡཱ ཡོ དྷོཝཱཔེཏཱིཏི སམྦནྡྷོ. ‘‘བྷིཀྑུནཱི ནཱམ ཨུབྷཏོསངྒྷེ ཨུཔསམྤནྣཱ’’ཏི (པཱརཱ. ༥༠༠) ཝཙནཏོ བྷིཀྑུནིསངྒྷེ ཉཏྟིཙཏུཏྠཱཡ ཀམྨཝཱཙཱཡ, བྷིཀྑུསངྒྷེ ཉཏྟིཙཏུཏྠཱཡ ཀམྨཝཱཙཱཡཱཏི ཨཊྛཝཱཙིཀཱཡ ཨུཔསམྤནྣཱ བྷིཀྑུནཱི ནཱམ. བྷུཏྟནྟི བྷིཀྑུནཱ ཨཏྟནཱ པརིབྷུཏྟཾ རཛིཏཾ ཨཱདིནྣཀཔྤཾ, ‘‘པརིབྷོགཾ ཀརིསྶཱམཱི’’ཏི ཨནྟམསོ སཱིསཾ ཋཔེཏྭཱ སཡནམཏྟེནཱཔི པུརཱཎབྷཱུཏཾ ཙཱིཝརནྟི ཨཏྠོ. ཡཐཱཧ ཨཊྛཀཐཱཡཾ ‘‘རཛིཏྭཱ ཀཔྤཾ ཀཏྭཱ ཨེཀཝཱརམྤི ནིཝཏྠཾ ཝཱ པཱརུཏཾ ཝཱ ཨནྟམསོ པརིབྷོགསཱིསེན ཨཾསེ ཝཱ མཏྠཀེ ཝཱ ཀཏྭཱ མགྒཾ གཏོ ཧོཏི, ཨུསྶཱིསཀཾ ཝཱ ཀཏྭཱ ནིཔནྣོ ཧོཏི, ཨེཏམྤི པུརཱཎཙཱིཝརམེཝཱ’’ཏི (པཱརཱ. ཨཊྛ. ༢.༥༠༣-༥༠༥). ཝཏྠནྟི ཀཱརིཡེ ཀཱརཎོཔཙཱརཝསེན ཙཱིཝརམེཝ ཨཱཧ.

ཨཉྙཱཏིཀཱཡཱཏི ‘‘ཨཉྙཱཏིཀཱ ནཱམ མཱཏིཏོ ཝཱ པིཏིཏོ ཝཱ ཡཱཝ སཏྟམཱ པིཏཱམཧཡུགཱ ཨསམྦདྡྷཱ’’ཏི ཝཙནཏོ ¶ ཨཏྟནོ ཝཱ ཏསྶཱ ཝཱ མཱཏུ ཝཱ པིཏུ ཝཱ པརམྤརཱཡ ཡཱཝ སཏྟམཱ ཡུགཱ, ཨེཏྠནྟརེ ཡེན ཀེནཙི ཉཱཏཀེན ཨསམྦདྡྷབྷཱཝེན ཨཉྙཱཏིཀཱཡཱཏི ཨཏྠོ. ཡཐཱ ཙཱཧ ཨཊྛཀཐཱཡཾ ‘‘པིཏཱམཧོཡེཝ པིཏཱམཧཡུགཾ. ཏཏོ ཨུདྡྷཾ སབྦེཔི པུབྦཔུརིསཱ པིཏཱམཧགྒཧཎེནེཝ གཧིཏཱ. ཨེཝཾ ཡཱཝ སཏྟམོ པུརིསོ, ཏཱཝ ཡཱ ཨསམྦདྡྷཱ’’ཏི (པཱརཱ. ཨཊྛ. ༢.༥༠༣-༥༠༥). ཨཱཀོཊཱཔེཏཱིཏི པཧརཱཔེཏི.

ཏཏོ དྷོཝཱཔནཱདིཏོ. ནིསྶགྒིཡཱཔཏྟཱིཏི ནིསྶགྒིཡསྶ ཨཱཔཏྟི ནིསྶགྒིཡཱཔཏྟི, ནིསྶགྒིཡསྶ ཙཱིཝརསྶ ནཱམེན ཝིསིཊྛཱ པཱཙིཏྟིཡཱཔཏྟི ཧོཏཱིཏི ཨཏྠོ. ཨིདཉྩ ཏིཎྞཾ པཡོགཱནཾ ཨནྟེ ཨཱཔཛྫིཏབྦཱཡ ཨཱཔཏྟིཡཱ དསྶནཾ. ཏསྶ ནིཡོགེན དྷོཝནཱདིཾ ཀརོནྟིཡཱ བྷིཀྑུནིཡཱ ཏདཏྠཾ སབྦཔུབྦཔཡོགགཎནཱཡ བྷིཀྑུནོ དུཀྐཊཾ ཧོཏཱིཏི གཧེཏབྦོ. ཡཐཱཧ ཨཊྛཀཐཱཡཾ ‘‘ཡཱཝ ནཾ དྷོཝིཏྭཱ ཨུཀྑིཔཏི, ཏཱཝ བྷིཀྑུནིཡཱ པཡོགེ པཡོགེ བྷིཀྑུསྶ དུཀྐཊ’’ནྟི ¶ (པཱརཱ. ཨཊྛ. ༢.༥༠༣-༥༠༥). པཋམེནཱཏི ཏཱིཎིཔི ཀཱརཱཔེནྟསྶ ཡཾ པཋམཾ ཀཱརཱཔེཏི, ཏེནཱཏི ཨཏྠོ. དཱིཔིཏནྟི ‘‘ཨཉྙཱཏིཀཱཡ ཨཉྙཱཏིཀསཉྙཱི པུརཱཎཙཱིཝརཾ དྷོཝཱཔེཏི རཛཱཔེཏི ཨཱཀོཊཱཔེཏི, ནིསྶགྒིཡེན ཨཱཔཏྟི དྭིནྣཾ དུཀྐཊཱན’’ནྟིཨཱདིནཱ (པཱརཱ. ༥༠༦) དེསིཏཾ. ཨིམིནཱ ནཡེན དྭེ ཀཱརཱཔེནྟསྶ པཋམེན ནིསྶགྒིཡཱཔཏྟི, དུཏིཡེན དུཀྐཊནྟི ཨཡམཏྠོ སངྒཡ྄ཧཏི.

༦༢༠. ‘‘དྷོཝནཏྠཱཡ དེཏཱི’’ཏི ཨིམིནཱ ‘‘བྷུཏྟཾ ཝཏྠ’’ནྟི ཨདྷིཀཱརཏོ ལབྦྷཏི.

༦༢༡. སཱམཎེརནིདྡེསེཔཱིཏི ‘‘སཱམཎེརཱ’’ཏི ནིདྡེསོ ནཱམ ཡསྶ, ཏསྨིམྤི, ཨཏྟནཱ པརིབྷུཏྟཾ ཝཏྠཾ དྷོཝནཏྠཱཡ དེཏཱིཏི ཡོཛནཱ, ཨཏྟནོ པརིབྷུཏྟཾ ཙཱིཝརཾ དྷོཝནཏྠཱཡ ¶ སཱམཎེརསྶ དེཏཱིཏི ཨཏྠོ. པི-སདྡོ སམུཙྩཡཏྠོ. ཨུཔསམྤཛྫཱཏི པུབྦཀིརིཡཱཡ ‘‘དྷོཝཏཱི’’ཏི ཨཔརཀིརིཡཱ སཱམཏྠིཡཱ ལབྦྷཏི.

༦༢༢. དཧརཱནཉྩ བྷིཀྑཱུནནྟི ཨཏྟནོ ནཝཀཏརཱནཾ བྷིཀྑཱུནཾ. ནིཡྻཱདིཏེ དིནྣེ. ཨེས ནཡོཏི ‘‘ཨེཀེན པཱཙིཏྟིཡཾ, ཨཝསིཊྛེཧི དྭཱིཧི ཝཱ ཨེཀེན ཝཱ སབྦཔཡོགེསུ དུཀྐཊཾ ཧོཏཱི’’ཏི ནཡོ.

༦༢༣. ཙཱིཝརེཏི པརིབྷུཏྟཙཱིཝརེ.

༦༢༤. ‘‘དྷོཝནཔྤཙྩཡཱཡེཝཱ’’ཏི ཨིམིནཱ ཨིཏརདྭཡསྶ ཏསྶ ཨནཱཎཏྟིཡཱ ཀཏཏྟཱ ཏཏོ ཨནཱཔཏྟིབྷཱཝམཱཧ.

༦༢༦. ཉཱཏིཀཱཏི ཨེཏྠ ‘‘པཊིསངྑཱ ཡོནིསོ’’ཏིཨཱདཱིསུ (མ. ནི. ༡.༢༢-༢༣, ༤༢༢; ཨ. ནི. ༦.༥༨; ༨.༩; མཧཱནི. ༢༠༦; དྷ. ས. ༡༣༥༥; ཝིབྷ. ༥༡༨) ཝིཡ གཱཐཱབནྡྷཝསེན ཡ-ཀཱརལོཔོ, ཉཱཏིཀཱཡ བྷིཀྑུནིཡཱཏི ཨཏྠོ. ‘‘ཉཱཏིཀཱ ཨཉྙཱཏིསཉྙིསྶཱ’’ཏི པདཙྪེདོ. པཙྩཏྠརཎནྟི མཉྩཔཱིཋེ ཨཏྠརིཏབྦཾ པཙྩཏྠརཎཙཱིཝརཉྩ.

༦༢༧. ‘‘བྷིཀྑུནཱིནཾ ཝསེནཱ’’ཏི ཨིདཾ བྷིཀྑུསངྒྷེཔི ཨུཔསམྤནྣཱ ཙེ, པཱཙིཏྟིཡསམྦྷཝཱ ཝུཏྟཾ ¶ . ཡཐཱཧ ཨཊྛཀཐཱཡཾ ‘‘བྷིཀྑཱུནཾ སནྟིཀེ ཨུཔསམྤནྣཱཡ པན ཡཐཱཝཏྠུཀམེཝཱ’’ཏི (པཱརཱ. ཨཊྛ. ༢.༥༠༦). བྷིཀྑུནིསངྒྷེ པཋམཾ ཨུཔསམྤཛྫིཏྭཱ པཙྪཱ བྷིཀྑུསངྒྷེ ཙེ ཨུཔསམྤཛྫཏི, ཀེཝལཾ བྷིཀྑུསངྒྷེ ཨུཔསམྤནྣཱཏི ན ཝུཙྩཏཱིཏི ཏཱ བྷགཝཏི དྷརམཱནེ པཋམཾ པབྦཛིཏཱ པཉྩསཏཱ སཱཀིཡཱནིཡོ ཝུཙྩནྟི. ཡཐཱཧ ཨཊྛཀཐཱཡཾ ‘‘བྷིཀྑཱུནཾ སནྟིཀེ ཨུཔསམྤནྣཱ ནཱམ པཉྩསཏཱ སཱཀིཡཱནིཡོ’’ཏི (པཱརཱ. ཨཊྛ. ༢.༥༠༦). བྷིཀྑུནོ ¶ ལིངྒེ པརིཝཏྟེ ཏསྶེཝ ཨུཔསམྤནྣཀམྨསྶ ཨནུཉྙཱཏཏྟཱ སོཔི གཧེཏབྦོཡེཝ.

༦༢༨. ཨཝུཏྟཱ དྷོཝཏཱིཏི ‘‘ཨིམཾ ཙཱིཝརཾ དྷོཝཱ’’ཏི ཨཝུཏྟཱ ཙཱིཝརཾ ཀིལིཊྛཾ དིསྭཱ ཨཝཏྭཱ ཋཔིཏཊྛཱནཏོ ཙཱིཝརཾ གཧེཏྭཱ ཝཱ སཡམེཝ ཝཏྭཱ ཡཱཙནཱདིནཡེན ཝཱ ཨནཱཎཏྟིཡཱ ཙ གཧེཏྭཱ ཙཱིཝརདྷོཝནཱདིཾ ཀརེཡྻ ཙེ. ཨཔརིབྷུཏྟཾ ཝཱཏི ཧེཊྛཱ ཝུཏྟནཡེན ཨཔརིབྷུཏྟཾ ཙཱིཝརཾ. ཨཉྙཾ ཝཱཏི ཨུཔཱཧནཏྠཝིཀཔཏྟཏྠཝིཀཔོཏྠཀཏྠཝིཀམཉྩཔཱིཋཱདིཾ ཡཾ ཀིཉྩི པརིཀྑཱརཾ.

པུརཱཎཙཱིཝརདྷོཝཱཔནཀཐཱཝཎྞནཱ.

༦༢༩. ཝིཀཔྤནུཔགཾ པཙྪིམཾ ཨུཔཱདཱཡ ཀིཉྩི ཙཱིཝརཾ གཎྷཏོཏི ཡོཛནཱ, ཨེཏྠ ‘‘ཨཉྙཱཏིཀཱཡ བྷིཀྑུནིཡཱ ཧཏྠཏོ’’ཏི ཙ ‘‘ཉཱཏིཀཱཡ ཨཉྙཱཏིཀསཉྙིསྶཱ’’ཏི ཙ ‘‘ཨེཀཏོཨུཔསམྤནྣཱཡ ཧཏྠཏོ གཎྷཱཏཱི’’ཏི ཙ ཝཀྑམཱནཝཙནསཱམཏྠིཡཱ ལབྦྷམཱནཏོ པུབྦེ ཝུཏྟནཡེན ཨཉྙཱཏིཀཱཡ ཨུབྷཏོསངྒྷེ ཨུཔསམྤནྣཱཡ བྷིཀྑུནིཡཱ ཧཏྠཏོ ཝིཀཔྤནུཔགརཏནཝིདཏྠིཔྤམཱཎཝཏྠཏོ པཊྛཱཡ ཡཾ ཀིཉྩི ཙཱིཝརཾ གཎྷནྟསྶཱཏི ཨཏྠོ. ‘‘ཨཱཔཏྟཱི’’ཏི སཱམཉྙེན ཝུཏྟེཔི ‘‘ནིསྶགྒིཡཱ པཱཙིཏྟིཡཱཔཏྟཱི’’ཏི པཀརཎཏོ ཙ ‘‘ནིསྶགྒིཡཱཔཏྟཱི’’ཏི ཝཀྑམཱནཏོ ཙ ལབྦྷཏི. ཋཔེཏྭཱ པཱརིཝཏྟཀནྟི ‘‘པཱརིཝཏྟཀཾ པརིཏྟེན ཝཱ ཝིཔུལཾ, ཝིཔུལེན ཝཱ པརིཏྟ’’ནྟི (པཱརཱ. ༥༡༤) ཝཙནཏོ མཧཱཔཙྩརིཡཾ ‘‘ཨནྟམསོ ཧརཱིཏཀཁཎྜེནཱཔཱི’’ཏི (པཱརཱ. ཨཊྛ. ༢.༥༡༤) ཝུཏྟཏྟཱ ཙ ཧེཊྛིམནྟཏོ ཧརཱིཏཀཁཎྜམྤི དཏྭཱ གཧེཏབྦཾ ཏིཙཱིཝརཉྩ པཱརིཝཏྟཀཾ ནཱམ ཧོཏི, ཏཾ ཋཔེཏྭཱཏི ཝུཏྟཾ ཧོཏི. པརིཝཏྟནཾ པརིཝཏྟཾ, ཏཾ ཨེཏསྶ ཨཏྠཱིཏི པཱརིཝཏྟཀཾ, ཀཡཝིཀྐཡེན གཧེཏབྦཾ ཙཱིཝརནྟི ཨཏྠོ.

༦༣༠. གཧཎཏྠཱཡ ¶ པཡོགེཏི གཎྷིཏུཾ ཧཏྠཔསཱརཎཱདིཔྤཡོགེ. པརིཡཱཔུཏནྟི ‘‘པཊིགྒཎྷཱཏི པཡོགེ དུཀྐཊ’’ནྟི (པཱརཱ. ༥༡༢) དེསིཏཾ.

༦༣༡. ཨནུཔསམྤནྣཧཏྠེཏི ¶ བྷིཀྑུབྷིཀྑུནིཏོ ཨཉྙེ སབྦེ ཨནུཔསམྤནྣཱ གཧིཏཱ. ཡཐཱཧ ཨཊྛཀཐཱཡཾ ‘‘སཙེ པན སིཀྑམཱནཱསཱམཎེརསཱམཎེརིཨུཔཱསཀཨུཔཱསིཀཱནཾ ཧཏྠེ པེསིཏཾ པཊིགྒཎྷཱཏི, ཨནཱཔཏྟཱི’’ཏི (པཱརཱ. ཨཊྛ. ༢.༥༡༢).

༦༣༢. ཨེཀཏོཏི ཨེཏྠ བྷིཀྑུནིསངྒྷཏོཏི གཧེཏབྦཾ. ཨཉྙསྨིཾ པཀྑེ པཱཙིཏྟིཡམེཝ. ཡཐཱཧ ཨཊྛཀཐཱཡཾ ‘‘བྷིཀྑཱུནཾ སནྟིཀེ ཨུཔསམྤནྣཱཡ པན པཱཙིཏྟིཡམེཝཱ’’ཏི (པཱརཱ. ཨཊྛ. ༢.༥༡༣).

༦༣༣. ‘‘པཱརིཝཏྟཀཾ དསྶཱམཱི’’ཏི ཨཱབྷོགཾ ཀཏྭཱ གཎྷཱཏི, དོསོ ན ཝིཛྫཏཱིཏི ཡོཛནཱ.

༦༣༤. ཨཉྙཾ པརིཀྑཱརནྟི ཐཝིཀཀཱཡབནྡྷནཱདི ཨཝིཀཔྤིཡཾ ཝཱ ཨཝིཀཔྤནུཔགཾ ཝཱ པརིཀྑཱརམེཝ གཧེཏབྦཾ. ཝིཀཔྤནུཔགཾ པན ན ཝཊྚཏི. ཡཐཱཧ ཨཊྛཀཐཱཡཾ ‘‘ཝིཀཔྤནུཔགཾ པཙྪིམཙཱིཝརཔྤམཱཎཾ པན པཊཔརིསྶཱཝནམྤི ན ཝཊྚཏཱི’’ཏི (པཱརཱ. ཨཊྛ. ༢.༥༡༤). ཙཱིཝརཔཊིགྒཎྷནཾ ཀིརིཡཱ, པཱརིཝཏྟཀསྶ ཨདཱནཾ ཨཀིརིཡཱཏི ཀིརིཡཱཡ ཙ ཨཀིརིཡཱཡ ཙ ཨཱཔཛྫིཏབྦཏོ ཀྲིཡཱཀྲིཡཾ.

ཙཱིཝརཔཊིགྒཧཎཀཐཱཝཎྞནཱ.

༦༣༥. ‘‘ཨཉྙཱཏཀཾ ཨཔྤཝཱརིཏ’’ནྟི པདཙྪེདོ. ‘‘གཧཔཏིཾ ཝཱ གཧཔཏཱནིཾ ཝཱ’’ཏི པཱཋསེསོ. ཝུཏྟཉྷི བྷགཝཏཱ ‘‘ཨཉྙཱཏཀཾ གཧཔཏིཾ ཝཱ གཧཔཏཱནིཾ ཝཱ’’ཏི (པཱརཱ. ༥༡༦, ༥༡༨). པུབྦེ ཝུཏྟནཡེན ཡཱཝ སཏྟམཱ པིཏཱམཧཡུགཱ སམྦདྡྷཉྙཱཏིཀཏཱཡ ཨབྷཱཝཏོ ཨཉྙཱཏཀཾ. ‘‘ཡཾ མཡ྄ཧཾ གེཧེ ¶ ཨཏྠི, ཏཾ པཝཱརེམཱི’’ཏིཨཱདིནཱ ནཡེན ཨཔྤཝཱརིཏཾ. ‘‘གཧཔཏི ནཱམ ཡོ ཀོཙི ཨགཱརཾ ཨཛ྄ཛྷཱཝསཏཱི’’ཏི (པཱརཱ. ༥༡༩) པཱལི༹ཡཾ ཝུཏྟཾ གཧཔཏིཾ ཝཱ. ‘‘གཧཔཏཱནཱི ནཱམ ཡཱ ཀཱཙི ཨགཱརཾ ཨཛ྄ཛྷཱཝསཏཱི’’ཏི (པཱརཱ. ༥༡༩) པཱལི༹ཡཾ ཝུཏྟཾ གྷརཎིཾ ཝཱཏི ཨཏྠོ.

ཧོཏི ནིསྶགྒིཡཱཔཏྟཱིཏི ‘‘ཨཉྙཏྲ སམཡཱ ཝིཉྙཱཔེཏི, པཡོགེ དུཀྐཊཾ, པཊིལཱབྷེན ནིསྶགྒིཡཾ ཧོཏཱི’’ཏི (པཱརཱ. ༥༡༩) པཱལི༹ཡཾ ཝུཏྟེསུ སབྦེསུ པུབྦཔཡོགེསུ དུཀྐཊེན སདྡྷིཾ ནིསྶགྒིཡཔཱཙིཏྟིཡཾ ¶ ཧོཏཱིཏི ཝུཏྟཾ ཧོཏི. ཨཉྙཏྲ སམཡཱཏི ‘‘ཏཏྠཱཡཾ སམཡོ, ཨཙྪིནྣཙཱིཝརོ ཝཱ ཧོཏི བྷིཀྑུ ནཊྛཙཱིཝརོ ཝཱ’’ཏི (པཱརཱ. ༥༡༨) མཱཏིཀཱཡ, ‘‘ཨཙྪིནྣཙཱིཝརོ ནཱམ བྷིཀྑུསྶ ཙཱིཝརཾ ཨཙྪིནྣཾ ཧོཏི རཱཛཱུཧི ཝཱ ཙོརེཧི ཝཱ དྷུཏྟེཧི ཝཱ ཡེཧི ཀེཧིཙི ཝཱ ཨཙྪིནྣཾ ཧོཏི. ནཊྛཙཱིཝརོ ནཱམ བྷིཀྑུསྶ ཙཱིཝརཾ ཨགྒིནཱ ཝཱ དཌྜྷཾ ཧོཏི, ཨུདཀེན ཝཱ ཝཱུལ༹ྷཾ ཧོཏི, ཨུནྡཱུརེཧི ཝཱ ཨུཔཙིཀཱཧི ཝཱ ཁཱཡིཏཾ ཧོཏཱི’’ཏི (པཱརཱ. ༥༡༩) པདབྷཱཛནེ ཙ ནིདྡིཊྛསརཱུཔཀཱལཏོ ཨཉྙཏྲཱཏི ཨཏྠོ.

༦༣༦. ཏིཀཔཱཙིཏྟིཡཾ ཝུཏྟནྟི ‘‘ཨཉྙཱཏཀེ ཨཉྙཱཏཀསཉྙཱི, ཝེམཏིཀོ, ཉཱཏཀསཉྙཱི ཨཉྙཏྲ སམཡཱ ཙཱིཝརཾ ཝིཉྙཱཔེཏི, ནིསྶགྒིཡཾ པཱཙིཏྟིཡ’’ནྟི (པཱརཱ. ༥༢༠) པཱཙིཏྟིཡཏྟཡཾ བྷགཝཏཱ ཝུཏྟཾ. ‘‘ཉཱཏཀེ ཨཉྙཱཏིསཉྙིསྶཱ’’ཏི པདཙྪེདོ. ཏཏྠཱཏི ཏསྨིཾ ཉཱཏཀེ. ཝེམཏིཀསྶཱཏི ‘‘ཉཱཏཀོ ནུ ཁོ, ཨཉྙཱཏཀོ’’ཏི ཝེམཏིཀསྶ. དྭིཀདུཀྐཊཾ ཏཐེཝཱཏི ཡོཛནཱ. ‘‘ཏཐེཝཱ’’ཏི ‘‘ཝུཏྟ’’ནྟི ཨིདཾ ཨཱཀཌྜྷཏི, ‘‘ཉཱཏཀེ ཨཉྙཱཏཀསཉྙཱི, ཝེམཏིཀོ ཨཉྙཏྲ སམཡཱ ཙཱིཝརཾ ཝིཉྙཱཔེཏི, ཨཱཔཏྟི དུཀྐཊསྶཱ’’ཏི (པཱརཱ. ༥༢༠) དེསིཏནྟི ཨཏྠོ.

༦༣༧-༨. སམཡེ ¶ ཝིཉྙཱཔེནྟསྶ ཨནཱཔཏྟཱིཏི ཡོཛནཱ. ཨེཏྠ ‘‘ཙཱིཝརཾ ཨཉྙཱཏཀཨཔྤཝཱརིཏ’’ནྟི ཨཱནེཏྭཱ སམྦནྡྷིཏབྦཾ, ཡཐཱཔརིཙྪིནྣཀཱལདྭཡཏོ ཨཉྙཏརསྨིཾ ཀཱལེ ཨཉྙཱཏཀཨཔྤཝཱརིཏཾ ཙཱིཝརཾ ཝིཉྙཱཔེནྟསྶ ཨནཱཔཏྟཱིཏི ཨཏྠོ. ཉཱཏཀེ ཝཱ པཝཱརིཏེཏི ཨེཏྠཱཔི ‘‘ཨཏྟནོ’’ཏི ཨཛ྄ཛྷཱཧཱརོ, ‘‘སམཡེ’’ཏི ཨིམིནཱ ཡོཛེཏབྦཾ, ཨཏྟནོ ཉཱཏཀཔཝཱརིཏེ ཨསམཡེཔི ཙཱིཝརཾ ཝིཉྙཱཔེནྟསྶ ཨནཱཔཏྟཱིཏི ཨཏྠོ. ཨཉྙསྶཏྠཱཡཱཏི ཨེཏྠ ‘‘ཨཏྟནོ’’ཏི སེསོ, ཨཏྟནོ ཉཱཏཀེ, པཝཱརིཏེ ཝཱ ཝིཉྙཱཔེནྟསྶ ཨནཱཔཏྟཱིཏི ཡོཛནཱ, ཨཉྙཾ བྷིཀྑུཾ ནིསྶཱཡ ཨཏྟནོ ཉཱཏཀེ ཝཱ པཝཱརིཏེ ཝཱ ཙཱིཝརཾ ཝིཉྙཱཔེནྟསྶ ཨནཱཔཏྟཱིཏི ཝུཏྟཾ ཧོཏི. ཨིཏརཾ པཀྑཾ དསྶེཏི ‘‘ཏསྶ ཉཱཏཀེ ཝཱ པཝཱརིཏེ ཝཱ’’ཏི. ཏསྶཱཏི ‘‘ཨཉྙསྶཱ’’ཏི ཝུཏྟསྶ, ‘‘ཝིཉྙཱཔེནྟསྶ ཨནཱཔཏྟཱི’’ཏི ཨིམིནཱ ཡོཛེཏབྦཾ. ཝཱཏི པུརིམཝིཀཔྤཱཔེཀྑཾ. ཡཾ སནྡྷཱཡ ཙཱིཝརཾ ཝིཉྙཱཔེཏི, ཏསྶ ཉཱཏཀེ ཝཱ པཝཱརིཏེ ཝཱ ཏཾཡེཝ སནྡྷཱཡ ཙཱིཝརཾ ཝིཉྙཱཔེནྟསྶ ཨནཱཔཏྟཱིཏི ཝུཏྟཾ ཧོཏི.

‘‘ཨཏྟནོ ཝཱ དྷནེནཱ’’ཏི ཝུཏྟཾ ཨནཱཔཏྟིཨངྒཾ ཨུམྨཏྟཀཱདིནོཏི ཨེཏྠ ཨཱདི-སདྡེན སངྒཡ྄ཧཏི ¶ , ཨཏྟནོ སནྟཀཾ སུཏྟཀཔྤཱསཱདིཀཾ ཀཔྤིཡཝཏྠུཾ དཏྭཱ གཎྷིཏུཀཱམཏཱཡ ཨཀཔྤིཡཝོཧཱརེན ཡཱཙནྟསྶ ཙ ཨནཱཔཏྟཱིཏི ཨཏྠོ.

ཨཉྙཱཏཀཝིཉྙཏྟིཀཐཱཝཎྞནཱ.

༦༣༩. ཨཔྤཝཱརིཏམཉྙཱཏིནྟི ཨེཏྠ ‘‘གཧཔཏིཾ ཝཱ གཧཔཏཱནིཾ ཝཱ’’ཏི ཨིདཾ སཱམཏྠིཡཱ ལབྦྷཏི. ཏཏུཏྟརིནྟི ཏཏོ སནྟརུཏྟརཔརམཏོ ཨུཏྟརིནྟི གཧེཏབྦཾ, ‘‘སནྟརུཏྟརཔརམཾ ཏེན བྷིཀྑུནཱ ཏཏོ ཙཱིཝརཾ སཱདིཏབྦ’’ནྟི (པཱརཱ. ༥༢༣) ཝུཏྟཏྟཱ ¶ ཨཙྪིནྣཙཱིཝརེན སཱདིཏབྦཨནྟརཝཱསཀཨུཏྟརཱསངྒམཏྟེན ཨདྷིཀནྟི ཨཏྠོ.

‘‘ཏཏོ ཙེ ཨུཏྟརི སཱདིཡེཡྻཱ’’ཏི (པཱརཱ. ༥༢༣) ཝཙནཏོ ‘‘སཱདིཡནྟསྶཱ’’ཏི ཝཏྟབྦཾ, ཨེཝཾ ཝཏྟབྦེ ‘‘ཝིཉྙཱཔེནྟསྶཱ’’ཏི ཀསྨཱ ཝུཏྟནྟི? ཨཙྪིནྣཙཱིཝརཱནཾ བྷིཀྑཱུནཾ ཚབྦགྒིཡེཧི བྷིཀྑཱུཧི ཙཱིཝརཝིཉྙཱཔནཝཏྠུསྨིཾ ‘‘ཀཐཉྷི ནཱམ ཏུམྷེ མོགྷཔུརིསཱ ན མཏྟཾ ཛཱནིཏྭཱ བཧུཾ ཙཱིཝརཾ ཝིཉྙཱཔེསྶཐཱ’’ཏི (པཱརཱ. ༥༢༢) ཚབྦགྒིཡེ བྷིཀྑཱུ གརཧིཏྭཱ ཨིམསྶ སིཀྑཱཔདསྶ པཉྙཏྟཏྟཱ ‘‘སཱདིཏབྦ’’ནྟི ཨེཏྠ ཝིཉྙཱཔེཏབྦནྟི ཨཏྠོ ཧོཏི, ཏེནེཝ ཨིམསྨིཾ པདབྷཱཛནེ ‘‘ཏཏོ ཙེ ཨུཏྟརི སཱདིཡེཡྻཱཏི ཏཏུཏྟརི ཝིཉྙཱཔེཏཱི’’ཏི (པཱརཱ. ༥༢༤) ཙ ཨཱཔཏྟིབྷེདསནྡསྶནཊྛཱནེ ‘‘ཨཉྙཱཏཀེ ཨཉྙཱཏཀསཉྙཱི ཏཏུཏྟརི ཙཱིཝརཾ ཝིཉྙཱཔེཏི, ནིསྶགྒིཡཾ པཱཙིཏྟིཡ’’ནྟིཨཱདིཝཙནཏོ (པཱརཱ. ༥༢༥) ཙ ཝུཏྟཾ. ཡདི ཨེཝཾ སིཀྑཱཔདེཡེཝ ‘‘སཱདིཏབྦཾ, སཱདིཡེཡྻཱ’’ཏི ཙ ཨུབྷཡཏྠ ‘‘ཝིཉྙཱཔེཏབྦཾ, ཝིཉྙཱཔེཡྻཱ’’ཏི ཙ ཀསྨཱ ན ཝུཏྟནྟི? ཨཙྪིནྣཙཱིཝརབྷཱཝཾ ཉཏྭཱ ཨཝིཉྙཱཔིཏེཔི ཨབྷིཧརིཏྭཱ དིཡྻམཱནམྤི ཨདྷིཝཱསེནྟེན ཨེཝམེཝ སཱདིཏབྦནྟི ན ཝུཏྟཾ. ཨིམསྶེཝ ཙ ཨདྷིཀཝིཉྙཱཔནནིསེདྷནཏྠཾ ཝདནྟེནཱཔི ‘‘ཏཉྩེ ཨཉྙཱཏཀོ གཧཔཏི ཝཱ གཧཔཏཱནཱི ཝཱ བཧཱུཧི ཙཱིཝརེཧི ཨབྷིཧཊྛུཾ པཝཱརེཡྻ, སནྟརུཏྟརཔརམཾ ཏེན བྷིཀྑུནཱ ཏཏོ ཙཱིཝརཾ སཱདིཏབྦ’’ནྟི སཱདིཏབྦནིཡམཔྤདྷཱནཾ ཝུཏྟཾ. ཏསྨཱ ཨཙྪིནྣཙཱིཝརེན ཨཏྟནཱ ཝཱ ཏཾ སནྡྷཱཡ ཨཉྙེན ཝཱ ཝིཉྙཱཔེནྟེནཔི ཨཝིཉྙཱཔེནྟེཔི དིཡྻམཱནཾ སཱདིཡནྟེནཱཔི སནྟརུཏྟརཔརམཏཾ ནཱཏིཀྐམིཏབྦནྟི ཨིམསྨིཾ སིཀྑཱཔདེ སནྡྷཱཡ བྷཱསིཏཏྠོཏི སལླཀྑེཏབྦནྟི ཨེཏྟཀཾ ཉཱཔེཏུཾ ‘‘སཱདིཡནྟསྶཱ’’ཏི ཨཝཏྭཱ ‘‘ཝིཉྙཱཔེནྟསྶཱ’’ཏི ཝུཏྟནྟི ཨཱཙརིཡཱབྷིསནྡྷི ཝེདིཏབྦཱ.

༦༤༠. ཨིདཱནི ¶ ¶ ཝིཉྙཱཔནེ ཙ ཨདྷིཝཱསནེ ཙ ཨུབྷཡཏྠེཝ ནིཡམཾ དསྶེཏུཾ ‘‘སཙེ ཏཱིཎི ནཊྛཱནི ཧོནྟི, དྭེ སཱདིཏབྦཱནི. དྭེ ནཊྛཱནི, ཨེཀཾ སཱདིཏབྦཾ. ཨེཀཾ ནཊྛཾ, ན ཀིཉྩི སཱདིཏབྦ’’ནྟི (པཱརཱ. ༥༢༤) པདབྷཱཛནེ ཝུཏྟཝིནིཙྪཡཾ དསྶེཏུམཱཧ ‘‘ཡསྶཱ’’ཏིཨཱདི. ‘‘ཡསྶ ཏཱིཎིཔི ནཊྛཱནི, དྭེ ཝཱ ནཊྛཱནི, ཨེཀཾ ཝཱ ནཊྛ’’ནྟི སམྦནྡྷིཏྭཱ ཡཐཱཀྐམཾ ‘‘ཏེན དྭེ སཱདིཏབྦཱནི, ཨེཀཾ སཱདིཏབྦཾ, ན ཀིཉྩིཔི སཱདིཏབྦ’’ནྟི ཡོཛནཱ ཀཱཏབྦཱ. ཡསྶ ཏཱིཎིཔི ཙཱིཝརཱནི ནཊྛཱནི, བཧུ ཙ དིཡྻཏི, ཏེན དྭེཡེཝ ཙཱིཝརཱནི སཱདིཏབྦཱནི. དྭེ ཙཱིཝརཱནི ནཊྛཱནི, ཨེཀཾ སཱདིཏབྦཾ. ཨེཀཉྩེ ནཊྛཾ, ན སཱདིཏབྦཾ, ཨཝསིཊྛཾ པཙྪཱ དྷམྨེན སམེན ལདྡྷནཱིཧཱརེན གཧེཏབྦནྟི ཨཏྠོ. ཡཐཱཧ ཨཊྛཀཐཱཡཾ ‘‘སེསཾ སབྷཱགཊྛཱནཏོ པརིཡེསིསྶཏཱི’’ཏི. ‘‘བྷིཀྑུནིཡཱ པན པཉྩསུཔི ནཊྛེསུ དྭེ སཱདིཏབྦཱནི, ཙཏཱུསུ ནཊྛེསུ ཨེཀཾ སཱདིཏབྦཾ, ཏཱིསུ ནཊྛེསུ ཀིཉྩི ན སཱདིཏབྦ’’ནྟི (པཱརཱ. ཨཊྛ. ༢.༥༢༢-༥༢༤) ཨཊྛཀཐཱཡཾ ཝུཏྟཾ.

༦༤༡-༢. སེསཀཾ ཨཱཧརནྟསྶ ཨནཱཔཏྟཱིཏི ཉཱཏབྦནྟི ཡོཛནཱ. ཨེཝམུཔརིཔི ཡོཛེཏབྦཾ. ཙཱིཝརཾ ཡོཛེཏྭཱ ཨཏིརེཀཾ ཝཏྠཾ པཙྩཱཧརིཏྭཱ ‘‘དསྶཱམཱི’’ཏི བཧུམྤི གཧེཏྭཱ གཙྪནྟསྶ ཨནཱཔཏྟཱིཏི ཨཏྠོ. ཨཏིརེཀམྤི ཏུམྷེཡེཝ གཎྷཐཱཏི དིནྣཾ གཎྷཏོཔི ཨནཱཔཏྟི. ན ཨཙྪིནྣཀཱརཎཱ དིནྣེཏི ཡོཛནཱ, ཨཙྪིནྣཙཱིཝརབྷཱཝཾ ཨནུདྡིསྶ བཧཱུནཾ ཙཱིཝརཱནཾ གཧཎནིམིཏྟེནཱཔི ཨནཱཔཏྟཱིཏི ཨཏྠོ. ཨེཝམེཝ ‘‘ན ནཊྛཀཱརཎཱ དེནྟཱི’’ཏི ཨིདམྤི དསྶིཏམེཝ. ཨཙྪིནྣཙཱིཝརེ ནིསྶཱཡ ཏཏུཏྟརིཙཱིཝརཝིཉྙཱཔནཝཏྠུམྷི ཨིམསྶ སིཀྑཱཔདསྶ པཉྙཏྟཏྟཱ ཨནཱཔཏྟིཝཱརེ ‘‘ཨཉྙསྶཏྠཱཡཱ’’ཏི ན གཧིཏཾ.

ཏཏུཏྟརིཀཐཱཝཎྞནཱ.

༦༤༣. ཀལྱཱཎཀམྱཏཱཧེཏཱུཏི ¶ སུནྡརསྶ མཧགྒྷསྶ ཀཱམཏཾ པཊིཙྩ ཙཱིཝརེ ཝིཀཔྤནཾ ཨཱཔཛྫེཡྻཱཏི ཡོཛནཱ, ‘‘ཀཱིདིསེན ཏེ བྷནྟེ ཙཱིཝརེན ཨཏྠོ’’ཏི པུབྦེ ཨཔྤཝཱརིཏོ ‘‘ཨཱཡཏཾ ཝཱ ཧོཏུ ཝིཏྠཏཾ ཝཱ ཨཔྤིཏཾ ཝཱ སཎྷཾ ཝཱ’’ཏི (པཱརཱ. ༥༢༩) པདབྷཱཛནེ ཝུཏྟཝིསིཊྛཀཔྤཾ ཨདྷིཀཝིདྷཱནཾ ཀརོཏཱིཏི ཨཏྠོ. ཏསྶ ལཱབྷཱ ནིསྶགྒིཡཾ བྷཝེཏི ཏཐཱ ཨཔྤཝཱརིཏེན ཧུཏྭཱ ཀཏེན ཨདྷིཀཝིདྷཱནེན ནིཔྥནྣཙཱིཝརསྶ ལཱབྷཔྤཡོགེན དུཀྐཊནིསྶགྒིཡཔཱཙིཏྟིཡཱ ཧོནྟི.

༦༤༤. མཧགྒྷཾ ¶ …པེ… ཝིཉྙཱཔེཏཱིཏི ཝཱིསཏིཨགྒྷནཀཾ ཙཱིཝརཾ དཱཏུཀཱམམྷི ཨུཔཱསཀེ, ‘‘ཨལཾ མཡ྄ཧཾ ཨེཏེན, དསགྒྷནཀཾ ཝཱ ཨཔྤགྒྷནཀཾ ཝཱ དེཧཱི’’ཏི ཝདཏི.

༦༤༥. ‘‘ཉཱཏཀེ ཨཉྙཱཏིསཉྙིསྶཱ’’ཏི པདཙྪེདོ.

པཋམོཔཀྑཊཀཐཱཝཎྞནཱ.

༦༤༦. པཋམསིཀྑཱཔདེ ཨེཀེན ཨུཔཱསཀེན པཱིལཱ༹ ལདྡྷཱ, ཨིདྷ དྭཱིཧཱིཏི ཨེཏྟཀཾ ནཱནཱཀརཎཾ. སེསཾ པཋམསིཀྑཱཔདསདིསམེཝཱཏི ཨཱཧ ‘‘དུཏིཡོ…པེ… ཝིནིཙྪཡོ’’ཏི. ཨུཔཀྑཊཔདེན ལཀྑིཏཾ སིཀྑཱཔདཾ ཨུཔཀྑཊཾ, དུཏིཡཉྩ ཏཾ ཨུཔཀྑཊཉྩཱཏི དུཏིཡོཔཀྑཊཾ, ཏསྨིཾ དུཏིཡོཔཀྑཊེ. ཨསྶཱཏི དུཏིཡོཔཀྑཊསྶ.

དུཏིཡོཔཀྑཊཀཐཱཝཎྞནཱ.

༦༤༧. རཉྙཱ ཝཱཏི རཱཛཏོ ཝཱ. རཱཛཏོ བྷོགྒཾ བྷུཉྫིཏབྦཾ ཨསྶ ཨཏྠཱིཏི ‘‘རཱཛབྷོགྒོ’’ཏི ཝུཏྟོ, རཱཛཏོ བྷཏྟཝེཏྟནལཱབྷིཏོ ཡཏོ ཀུཏོཙི དཱཡཀཱ ཨཱབྷཏནྟི སམྦནྡྷོ. ན ཙ ཝཊྚཏཱིཏི ཨེཏྠ ‘‘ནིསྶགྒིཡཔཱཙིཏྟིཡབྷཱཝཏོ’’ཏི ¶ ཨཛ྄ཛྷཱཧརིཏབྦཾ. ཨིདྷ ཨུཏྟརིཀརཎཱིཡཾ ‘‘ཏིཀྑཏྟུ’’ནྟིཨཱདིགཱཐཱཡ (ཝི. ཝི. ༦༧༡) ཝཀྑཏི.

༦༤༨. ཙཱིཝརཙེཏཱཔནྣཝསེན ཨདྷིགཏརཛཏཱདི ཡེན ཀེནཙི པརིཡཱཡེནཱཔི ན སཱདིཏབྦནྟི དསྶེཏུམཱཧ ‘‘རཛཏཾ ཝཱ’’ཏིཨཱདི. དྷཝལསབྷཱཝཏཱཡ རཱཛཏཱིཏི རཛཏཾ, སཛ྄ཛྷུ. ཛཱཏཾ རཱུཔཾ ཝཎྞཱཡཏནམེཏསྶཱཏི ཛཱཏརཱུཔཾ, སུཝཎྞཾ. ཀིཉྩཱིཏི ཨཔྤམཏྟཀམྤི. ཨཏྟནོ ཝཱ ཨཏྠཱཡ པརསྶ ཝཱ ཨཏྠཱཡ དིཡྻམཱནཾ ཀིཉྩི གཎྷིཏུཾ ན ཝཊྚཏཱིཏི ཡོཛནཱ.

༦༤༩. ཨཏྟནོ པཊིགྒཧཎེ ཨཱཔཏྟིཡཱ རཱུཔིཡགཧཎསིཀྑཱཔདེ ཝཀྑམཱནཏྟཱ ཨཉྙསྶ ཨཏྠཱཡ གཧཎེ ཨཱཔཏྟིདསྶནཏྠམཱཧ ‘‘ཨཉྙསྶཏྠཱཡཱ’’ཏིཨཱདི. ཏཏྠ ཨཉྙསྶཏྠཱཡཱཏི ཨཉྙསྶ པུགྒལསྶ, གཎསྶ, སངྒྷསྶ, ཙེཏིཡསྶ, ནཝཀམྨསྶ ཝཱ ཨཏྠཱཡ. ནིདྡིཊྛནྟི ཨཱཧརིཏྭཱ ‘‘ཨིམཾ གཎྷཐཱ’’ཏི ཝུཏྟཾ རཛཏཾ, ཛཱཏརཱུཔཾ ཝཱ ཨཉྙཾ ཝཱ ཡཾ ཀིཉྩི ནིསྶགྒིཡདུཀྐཊཝཏྠུཾ ¶ པཊིགྒཎྷཏོ ཏསྶ བྷིཀྑུནོ དུཀྐཊཾ ཧོཏཱིཏི མཧཱཔཙྩརིཡཾ ཝུཏྟནྟི ཡོཛནཱ.

༦༥༠-༡. ཝུཏྟམེཝཏྠཾ སརཱུཔཏོ ཝིབྷཱཝེཏུམཱཧ ‘‘ནེཏྭཱ’’ཏིཨཱདི. ནེཏྭཱཏི ཨཱནེཏྭཱ. ཨཀཔྤིཡཾ བྷཎྜནྟི ‘‘རཛཏཾ ཛཱཏརཱུཔཾ ཝཱ’’ཏི ཡཐཱཝུཏྟམེཝ ཨཀཔྤིཡབྷཎྜཾ. ཨིཏྠནྟི ཝཀྑམཱནཔྤཀཱརེན. ན ཙ ཝཊྚཏཱིཏི ཨེཏྠ ཙ-ཀཱརེན ཝཊྚཏི ཙཱཏི ཨནུཉྙཱཏཾ ཀཏནྟི. ཡཐཱཧ ཨཊྛཀཐཱཡཾ –

‘‘སཙེ པན ‘ནཡིདཾ བྷིཀྑཱུནཾ སམྤཊིཙྪིཏུཾ ཝཊྚཏཱི’ཏི པཊིཀྑིཏྟེ ‘ཝཌྜྷཀཱིནཾ ཝཱ ཀམྨཀརཱནཾ ཝཱ ཧཏྠེ བྷཝིསྶཏི, ཀེཝལཾ ཏུམྷེ སུཀཏདུཀྐཊཾ ཛཱནཱཐཱ’ཏི ཝཏྭཱ ཏེསཾ ཧཏྠེ དཏྭཱ པཀྐམཏི, ཝཊྚཏི. ཨཐཱཔི ‘མམ མནུསྶཱནཾ ཧཏྠེ བྷཝིསྶཏི, མཡ྄ཧམེཝ ¶ ཝཱ ཧཏྠེ བྷཝིསྶཏི, ཀེཝལཾ ཏུམྷེ ཡཾ ཡསྶ དཱཏབྦཾ, ཏདཏྠཱཡ པེསེཡྻཱཐཱ’ཏི ཝདཏི, ཨེཝམྤི ཝཊྚཏཱི’’ཏི (པཱརཱ. ཨཊྛ. ༢.༥༣༨-༥༣༩).

༦༥༢. ཝིཧཱརསྶཱཏི ཨེཏྠ ‘‘ནཝཀམྨསྶཱ’’ཏི (པཱརཱ. ཨཊྛ. ༢.༥༣༨-༥༣༩) ཨཊྛཀཐཱཡཾ ཝུཏྟཏྟཱ ཝཏྟབྦཾ གཱཐཱབནྡྷཝསེན ན ཝུཏྟཾ.

༦༥༤. རཛཏཾ ཛཱཏརཱུཔཾ ཝཱ སངྒྷསྶཱཏི ཨེཏྠ ‘‘ཙཏྟཱརོ པཙྩཡེ པརིབྷུཉྫཐཱཏི དིནྣ’’ནྟི སེསོ. ཡཐཱཧ ཨཊྛཀཐཱཡཾ ‘‘སཙེ པན ཀོཙི བཧུམྤི ཧིརཉྙསུཝཎྞཾ ཨཱནེཏྭཱ ‘ཨིདཾ སངྒྷསྶ དམྨི, ཙཏྟཱརོ པཙྩཡེ པརིབྷུཉྫཐཱ’ཏི ཝདཏི, ཏཾ ཙེ སངྒྷོ སམྤཊིཙྪཏི, པཊིགྒཧཎེཔི པརིབྷོགེཔི ཨཱཔཏྟཱི’’ཏི (པཱརཱ. ཨཊྛ. ༢.༥༣༨-༥༣༩). ཨེཝཾ ཨཱབྷཏཾ ཏསྨིཾ སངྒྷེ ཡོ ཀོཙི བྷིཀྑུ ‘‘ནཡིདཾ ཀཔྤཏཱི’’ཏི སཙེ པཊིཀྑིཔཏི, ‘‘ཨཡཾ སངྒྷསྶ ལཱབྷནྟརཱཡཾ ཀརོཏཱི’’ཏི ཝདནྟསྶེཝ ཨཱཔཏྟི ཧོཏི. ཡཐཱཧ ཨཊྛཀཐཱཡཾ ‘‘ཡོ ཧི ཏཾ ཙོདེཏི, སྭེཝ སཱཔཏྟིཀོ ཧོཏི, ཏེན པན ཨེཀེན བཧཱུ ཨནཱཔཏྟིཀཱ ཀཏཱ’’ཏི (པཱརཱ. ཨཊྛ. ༢.༥༣༨-༥༣༩). ཨིདྷ སྭེཝ སཱཔཏྟིཀོཏི ཨེཏྠ ‘‘དུཀྐཊཱཔཏྟིཀོཏི ཝུཏྟཾ ཧོཏཱི’’ཏི གཎྛིཔདེ ཝུཏྟཾ. ཨིམིསྶཱ གཱཐཱཡ ‘‘སངྒྷསྶཱ’’ཏི ཨལིཁིཏྭཱ ‘‘བྷིཀྑུནོ’’ཏི ཙ ལིཁནྟི, ཏཾ ན སུནྡརཾ. ཨིདཱནི དསྶིཏཨཊྛཀཐཱཔཱཋེ ‘‘སངྒྷོ སམྤཊིཙྪཏཱི’’ཏི (པཱརཱ. ཨཊྛ. ༢.༥༣༨-༥༣༩) ཝུཏྟཏྟཱ ‘‘སངྒྷསྶཱ’’ཏི པཱཋོ སུནྡརོ.

༦༥༥. ཏལཱ༹ཀསྶཱཏི ¶ ཝཱཔིཡཱ. སསྶུཔྤཏྟིནིདཱནཏོ ཏལཱ༹ཀཾ ཁེཏྟཾ, ཏཏོ ཏསྶ གཧཎཾ ཝཱ པརིབྷོགོ ཝཱ ན ཙ ཝཊྚཏཱིཏི ཡོཛནཱ. ཏལཱ༹ཀསྶ ཙཱཏི ཨེཏྠ ཙ-ཀཱརེན ཁེཏྟཝཏྠུ སངྒཧིཏཾ. ན ཙ ཝཊྚཏཱིཏི ཨེཏྠ ཙཀཱརེན ཝཊྚཏི ཙཱཏི དསྶིཏཾ ཧོཏི.

༦༥༦. ཏཾ ¶ ཀཏམནྟི ཨཱཧ ‘‘ཙཏྟཱརོ’’ཏིཨཱདི. སབྦམྤཱིཏི ཏལཱ༹ཀཔོཀྑརཎིཁེཏྟཱདི སབྦམྤི.

༦༥༨-༩. ཨཔརིཙྪིནྣབྷཱགསྨིནྟི ‘‘ཨིམསྨིཾ བྷཱུམིབྷཱགེ ཀཏསྶ ཀམྨེཧི ཨེཏྟཀོ བྷཱགོ དེཡྻོ’’ཏི ཨེཝཾ པུབྦེ ཨནིཡམིཏཨཱཡེ བྷཱུམིབྷཱགེ. ཨཀཏཔུབྦཾ ནཝསསྶཾ ནཱམ. ཨེཏྟཀཾ བྷཱགཾ དེཐཱཏི ཨེཏྟཀཾ ཀཧཱཔཎབྷཱགཾ དེཐ. ཨུཊྛཱཔེཏཱིཏི ཨུཔྤཱདེཏི.

‘‘ཀསཐ ཝཔཐཱ’’ཏི ཨཀཔྤིཡཾ ཝཱཙཾ ཝཏྭཱཏི ཡོཛནཱ. ཝཔཐཱཏི ཙཱཏི ཨེཏྠ ཙ-སདྡོ ཨིདྷ ཨཝུཏྟཾ ཏཾཀཏྟུཡོགཀཱལེ ཝུཙྩམཱནཾ ཨཀཔྤིཡཝཙནནྟརཾ སམུཙྩིནོཏི. ཨུཔྤཱདིཏཉྩཱཏི ཨེཏྠ ཙ-སདྡོ ཀཧཱཔཎཾ སམུཙྩིནོཏི. སབྦནྟི ཏཐཱ ཨུཔྤཱདིཏཀཧཱཔཎཉྩ ཨེཝཾ ཨཀཔྤིཡཝོཧཱརེན ཨུཔྤཱདིཏཉྩཱཏི སབྦཾ.

༦༦༠. ཀསཐཱདིཀཾ ཝཙནཾ ཨཝཏྭཱ ‘‘ཨེཏྟིཀཱཡ བྷཱུམིཡཱ ཨེཏྟཀོ ནཱམ བྷཱགོ’’ཏི བྷཱུམིཾ ཡོ ཙ པཏིཊྛཱཔེཏི, ཏསྶེཝེཏམཀཔྤིཡནྟི ཝཀྑམཱནེན ཡོཛེཏབྦཾ. ཙ-སདྡོ ‘‘ཡོ པནཱ’’ཏི ཝཀྑམཱནཔུགྒལནྟརཱཔེཀྑོ.

༦༦༡-༢. བྷཱུམིཡཱ སཡམེཝ པམཱཎསྶ ཛཱནནཏྠཾ ཏཱུཏི ཡོཛནཱ, ‘‘ཨེཏྟཀེ བྷཱུམིབྷཱགེ ཨམྷེཧི སསྶཾ ཀཏཾ, ཨེཏྟཀཾ ནཱམ བྷཱགཾ གཎྷཐཱ’’ཏི ཀསཀེཧི ཝུཏྟེ ཏེསཾ ཝཙནཾ ཨསདྡཧིཏྭཱ སཡམེཝ ཁེཏྟབྷཱུམིཡཱ པམཱཎཾ ཉཱཏུཀཱམཏཱཡཱཏི ཨཏྠོ. ཏུ-སདྡོ ཨིམམེཝ ཝིསེསཾ ཛོཏེཏི. ཡོ པན མིནཱཏི, ཏསྶེཝེཏམཀཔྤིཡནྟི ཝཀྑམཱནེན ཡོཛེཏབྦཾ. རཛྫུཡཱཔི ཙ དཎྜེནཱཏི ཨེཏྠ པཱདེནཱཔི མིནིཏུཾ ན ཝཊྚཏཱིཏི ཝདནྟི. ‘‘རཀྑཏཱི’’ཏིཨཱདིཀིརིཡཱཔདེཧིཔི ཨེཝམེཝ ཡོཛེཏབྦཾ.

ཁལེ ¶ ཋཏྭཱ རཀྑཏཱིཏི དྷཉྙཀརཎེ ཋཏྭཱ ཨཉྙེ གཎྷིཏུཾ ཨདཏྭཱ པཱལེཏི. ཀཐཾ རཀྑིཏུཾ ¶ ཝཊྚཏི, ཀཐཾ རཀྑིཏུཾ ན ཝཊྚཏཱིཏི? ཏཾ པན ཝཱིཧིཾ ‘‘ཨིདཾ ཝཱ ཨེཏྟཀཾ ཝཱ མཱ གཎྷ, ཨིདཾ གཧེཏུཾ ན ལབྦྷཏཱི’’ཏི ཝཱ ‘‘ཨིཏོ ཨཔནེཧི, ཨིདྷ པུཉྫཾ ཀརོཧཱི’’ཏི ཝཱ ཨེཝམཱདིནཱ པཡོགེན ཙེ རཀྑཏི, ཏཾ ཨཀཔྤིཡཾ. སཙེ ‘‘མཡི ཋིཏེ རཀྑིཏཾ ཧོཏཱི’’ཏི རཀྑཏི, གཎྷནྟེ ཝཱ པསྶིཏྭཱ ‘‘ཀིཾ ཀརོཐཱ’’ཏི བྷཎཏི, ཝཊྚཏི. རཱུཔིཡཔཊིགྒཧཎསིཀྑཱཔདེ དྭཱརཾ པིདཧིཏྭཱ རཀྑནྟེན ཝསིཏབྦནྟི ཧི ཝུཏྟནྟི གཎྛིཔདེ ཝུཏྟནཡེན ཝེདིཏབྦོ. ཨཉྙསྨིམྤི གཎྛིཔདེ ཝུཏྟཾ ‘‘ཐེནེཏྭཱ གཎྷནྟེ སཏི ཨེཏཾ བྷོ པཝཏྟིཾ བྷིཀྑུསངྒྷསྶ ཀིཾ ཨཱརོཙེསྶཱམཱིཏི པཊིཔུཙྪིཏུཾ ཝཊྚཏཱིཏི ཝདནྟཱི’’ཏི. ནཱིཧརཱཔེཏཱིཏི ཨེཏྠཱཔི སཙེ པརིཡཱཡེན ཝདཏི, ཝཊྚཏཱིཏི ཝདནྟི. ཏསྶེཝེཏམཀཔྤིཡནྟི ཨིདཾ ཁེཏྟམིནནཱདིཾ ཀརོནྟེན ལདྡྷབྦཏོ ཨཉྙསྶ ཨབྷིནཝུཔྤཱདིཏསྶ ཨབྷཱཝཱ ཨཉྙེསཾ ཝཊྚཏཱིཏི དྭཱིསུ གཎྛིཔདེསུ ཝུཏྟཾ.

༦༦༣. ‘‘ཨེཏྟཀེཧི ཝཱིཧཱིཧི ཨིདཾ ཨཱཧརཐཱ’’ཏི ཝུཏྟཱ སཙེ ཨཱཧརནྟཱིཏི ཡོཛནཱ. ཨེཏྠ ‘‘ཏསྶེཝེཏམཀཔྤིཡ’’ནྟི ཨིདཾ དྷཉྙསྶ ཝིཙཱརིཏཏྟཱ ཝུཏྟཾ. ཡཐཱཧ ཨཊྛཀཐཱཡཾ ‘‘ཏསྶེཝ ཨཀཔྤིཡཾ. ཀསྨཱ? དྷཉྙསྶ ཝིཙཱརིཏཏྟཱ’’ཏི (པཱརཱ. ཨཊྛ. ༢.༥༣༨-༥༣༩).

༦༦༤. ཧིརཉྙེནཱཏི ཀཧཱཔཎེན. ‘‘ཏམཀཔྤིཡ’’ནྟི ཨིདཾ ཀཧཱཔཎཱནཾ ཝིཙཱརིཏཏྟཱ ཝུཏྟཾ. ཡཐཱཧ ཨཊྛཀཐཱཡཾ ‘‘སབྦེསཾ ཨཀཔྤིཡཾ. ཀསྨཱ? ཀཧཱཔཎཱནཾ ཝིཙཱརིཏཏྟཱ’’ཏི (པཱརཱ. ཨཊྛ. ༢.༥༣༨-༥༣༩).

༦༦༥. པེསཀཱརཀདཱསཾ ཝཱཏི པེསཀཱརཀསངྑཱཏཾ དཱསཾ ཝཱ, པེསཀཱརོ ཏནྟཝཱཡོ. ཨཱརཱམིཀཱནཾ ནཱམེན དེནྟེཏི ‘‘ཨཱརཱམིཀཾ དམྨི, ཝེཡྻཱཝཙྩཀརཾ དམྨཱི’’ཏིཨཱདིནཱ ནཡེན དེནྟེ.

༦༦༦. ཁཱིརཾ ¶ དདྷི ཏཀྐཾ སཔྤི ནཝནཱིཏནྟི པཉྩགོརསཱ.

༦༦༧. ཨཛིཀཱདཱིསཱུཏི ཨཱདི-སདྡེན མཧིསཾ སངྒཎྷཱཏི.

༦༦༩. པཊིསིདྡྷེཔཱིཏི པཊིཀྑིཏྟེཔི. མཱུལཾ དཏྭཱཏི ཀཔྤིཡབྷཎྜམཱུལཾ དཏྭཱ. ཀུཀྐུཊཱདཡོ པན ‘‘སུཁེན ཝསནྟཱུ’’ཏི ཨརཉྙེཡེཝ ཝིསྶཛྫེཏབྦཾ. ཡཐཱཧ ཨཊྛཀཐཱཡཾ ‘‘ཀུཀྐུཊསཱུཀརེ ¶ ‘སུཁཾ ཛཱིཝནྟཱུ’ཏི ཨརཉྙེ ཝིསྶཛྫེཏུཾ ཝཊྚཏཱི’’ཏི (པཱརཱ. ཨཊྛ. ༢.༥༣༨-༥༣༩). སཱུཀརམཡཱུརཱདཱིསུཔི ལདྡྷེསུ ཏེསཾ ཨནུརཱུཔེཡེཝ ཝིསཡེ ཝིསྶཛྫེཏབྦཱ.

༦༧༡. ‘‘ཏིཀྑཏྟུ’’ནྟིཨཱདིགཱཐཱཡ ཀོ སམྦནྡྷོ? ‘‘རཉྙཱ ཝཱ རཱཛབྷོགྒེནཱ’’ཏིཨཱདིགཱཐཱཡ སངྒཧིཏནཡེན རཱཛརཱཛཱམཙྩབྲཱཧྨཎགཧཔཏཱདཱིསུ ཡེན ཀེནཙི ཨཏྟནཱ ཝཱ ཙཱིཝརཙེཏཱཔནྣེན ཙཱིཝརཾ ཙེཏཱཔེཏྭཱ ‘‘ཨིཏྠནྣཱམཾ བྷིཀྑུཾ ཙཱིཝརེན ཨཙྪཱདེཧཱི’’ཏི ཝཏྭཱ ཏཾ ཙཱིཝརཙེཏཱཔནྣསངྑཱཏཾ ཙཱིཝརམཱུལཾ དཏྭཱ པཧིཏདཱུཏེན ཝཱ བྷིཀྑུཾ ཨུཔསངྐམིཏྭཱ ‘‘ཨིདཾ ཁོ བྷནྟེ ཨཱཡསྨནྟཾ ཨུདྡིསྶ ཙཱིཝརཙེཏཱཔནྣཾ ཨཱབྷཏཾ, པཊིགྒཎྷཱཏུ ཨཱཡསྨཱ ཙཱིཝརཙེཏཱཔནྣ’’ནྟི ཡདི ཝུཙྩེཡྻ, བྷིཀྑུནཱ ‘‘ན ཁོ མཡཾ ཨཱཝུསོ ཙཱིཝརཙེཏཱཔནྣཾ པཊིགྒཎྷཱམ, ཙཱིཝརཉྩ ཁོ མཡཾ པཊིགྒཎྷཱམ ཀཱལེན ཀཔྤིཡ’’ནྟི ཝུཏྟེ སཙེ ཏེན ‘‘ཨཏྠི པནཱཡསྨཏོ ཀོཙི ཝེཡྻཱཝཙྩཀརོ’’ཏི ཝུཏྟེ ཙཱིཝརཏྠིཀེན བྷིཀྑུནཱ ‘‘ཨེསོ ཁོ ཨཱཝུསོ བྷིཀྑཱུནཾ ཝེཡྻཱཝཙྩཀརོ’’ཏི ཨཱརཱམིཀེ ཝཱ ཨུཔཱསཀེ ཝཱ དསྶིཏེ ཡདི སོ ཏསྶ ཨཏྟནཱ ཨཱཧརིཏྭཱ ‘‘ཨིམསྶ བྷིཀྑུནོ ཙཱིཝརེན ཨཏྠེ སཏི ཨིམིནཱ ཙཱིཝརཾ ཙེཏཱཔེཏྭཱ ཨཙྪཱདེཧཱི’’ཏི ཝཏྭཱ ཏཾ བྷིཀྑུཾ ཨུཔསངྐམིཏྭཱ ‘‘ཡཾ ཁོ བྷནྟེ ཨཱཡསྨཱ ཝེཡྻཱཝཙྩཀརཾ ནིདྡིསི, སཉྙཏྟོ སོ མཡཱ, ཨུཔསངྐམཏུ ཨཱཡསྨཱ ཀཱལེན, ཙཱིཝརེན ¶ ཏཾ ཨཙྪཱདེསྶཏཱི’’ཏི ཡདི ཝདེཡྻ, ཏེན ཙཱིཝརཏྠིཀེན བྷིཀྑུནཱ ཀིཾ ཀཱཏབྦནྟི བྷགཝཏཱ ཝུཏྟནྟི ཨཱཧཱཏི ཨཡམིམིསྶཱ གཱཐཱཡ སམྦནྡྷོ.

ཏིཀྑཏྟུཾ ཙོདནཱ ཝུཏྟཱཏི ‘‘ཙཱིཝརཏྠིཀེན བྷིཀྑཝེ བྷིཀྑུནཱ ཝེཡྻཱཝཙྩཀརོ ཨུཔསངྐམིཏྭཱ དྭཏྟིཀྑཏྟུཾ ཙོདེཏབྦོ སཱརེཏབྦོ ‘ཨཏྠོ མེ ཨཱཝུསོ ཙཱིཝརེནཱ’’ཏི ཏིཀྑཏྟུཾ ཙོདནཱ ཀཱཏབྦཱཏི ཝུཏྟཱ.

ཚཀྑཏྟུཾ ཋཱནམབྲཝཱིཏི ‘‘དྭཏྟིཀྑཏྟུཾ ཙོདཡམཱནོ སཱརཡམཱནོ ཏཾ ཙཱིཝརཾ ཨབྷིནིཔྥཱདེཡྻ, ཨིཙྩེཏཾ ཀུསལཾ, ནོ ཙེ ཨབྷིནིཔྥཱདེཡྻ, ཙཏུཀྑཏྟུཾ པཉྩཀྑཏྟུཾ ཚཀྑཏྟུཔརམཾ ཏུཎྷཱིབྷཱུཏེན ཨུདྡིསྶ ཋཱཏབྦ’’ནྟི (པཱརཱ. ༥༣༨) ཝུཏྟཏྟཱ ཏིཀྑཏྟུཾ ཨུཔསངྐམིཏྭཱ ‘‘ཨཏྠོ མེ ཨཱཝུསོ ཙཱིཝརེནཱ’’ཏི ཀཏཱཡ ཙོདནཱཡ ན ནིཔྤཛྫེཡྻ, ཏེན པུན གནྟྭཱ ཡཾ ཀིཉྩི ཨཝཏྭཱ ‘‘ན ཨཱསནེ ནིསཱིདིཏབྦཾ, ན ཨཱམིསཾ པཊིགྒཧེཏབྦཾ, ན དྷམྨོ བྷཱསིཏབྦོ’’ཏི (པཱརཱ. ༥༣༩) ཝཙནཏོ ཋཱནབྷཉྫནཀཾ ནིསཛྫཱདིཾ ཀིཉྩི ཨཀཏྭཱ ‘‘ཀིཾ ཀཱརཎཾ ཨཱགཏོསཱི’’ཏི པུཙྪིཏེ ‘‘ཛཱནཱཧི ¶ , ཨཱཝུསོ’’ཏི ཨེཏྟཀམཏྟཾ ཝཏྭཱ ཨུཀྐཊྛཔརིཙྪེདེན ཚཀྑཏྟུཾ ཋཱནཾ སདྡྷམྨཝརཙཀྐཝཏྟིནཱ བྷགཝཏཱ དེསིཏནྟི ཝུཏྟཾ ཧོཏི.

ཡདི ཙོདེཏིཡེཝཱཏི སཙེ ཋཱནཾ ཨཀཏྭཱ ཙོདནཱམཏྟཾ ཀརོཏི, ཚ ཨབྲཝཱིཏི ཡོཛནཱ, ‘‘ཙོདནཱ’’ཏི སཱམཏྠིཡཏོ ལབྦྷཏི, ཚཀྑཏྟུཾ ཙོདེཏྭཱ སཀིམྤི ན ཋཱཏབྦནྟི ཝུཏྟཾ ཧོཏི.

ཚཙོདནཾ ཨཀཏྭཱ ཡོ ཋཱནམེཝ ཀརོཏི, ཏེན ཀཏི ཋཱནཱནི ཀཱཏབྦཱནཱིཏི ཨཱཧ ‘‘ཙོདནཱདིགུཎཱ ཋིཏཱི’’ཏི, ‘‘ཀཱཏབྦཱ’’ཏི སེསོ, ‘‘ཨབྲཝཱི’’ཏི ཨིམིནཱ ཡོཛེཏབྦཾ, ‘‘ཙཏུཀྑཏྟུཾ ཙོདེཏྭཱ ཙཏུཀྑཏྟུཾ ཋཱཏབྦཾ, པཉྩཀྑཏྟུཾ ཙོདེཏྭཱ དྭིཀྑཏྟུཾ ཋཱཏབྦཾ, ཚཀྑཏྟུཾ ཙོདེཏྭཱ ན ¶ ཋཱཏབྦ’’ནྟི (པཱརཱ. ༥༣༩) ཝཙནཏོ, ‘‘ཚཀྑཏྟུཔརམ’’ནྟི (པཱརཱ. ༥༣༩) ཝཙནཏོ ཙ ཚཀྑཏྟུཾ ཙོདནཱཡ དིགུཎཱ དྭཱདསཀྑཏྟུཀཱ ཋིཏི ཧོཏཱིཏི སིདྡྷཏྟཱ ཙོདནམེཝ ཨཀཏྭཱ ཋཱནམཏྟམེཝ ཀརོནྟསྶ དྭཱདསཀྑཏྟུཾ ཝུཏྟནཡེན ཋཱཏབྦམེཝཱཏི ཝུཏྟཾ ཧོཏི. ཏཏོ པརཾ ཀཱཏབྦཾ ཨདསྶེཏྭཱ ཨེཏྟཀེནེཝ ནིཝཏྟེཏབྦནྟི ཉཱཔེནྟོ ‘‘ཏཏོ ཙེ ཨུཏྟརི ཝཱཡམམཱནོ ཏཾ ཙཱིཝརཾ ཨབྷིནིཔྥཱདེཏི, པཡོགེ དུཀྐཊཾ, པཊིལཱབྷེན ནིསྶགྒིཡ’’ནྟི (པཱརཱ. ༥༣༩) ཝུཏྟནཡཱ ཨཱཔཏྟི ཧོཏཱིཏི དསྶེཏི.

༦༧༢. ‘‘ཨཙོདེཏྭཱ ལདྡྷེ’’ཏི ཨིདཾ ཨུཔལཀྑཎཾ ‘‘ཨཊྛཏྭཱ ལདྡྷེ’’ཏི ཙ གཡ྄ཧམཱནཏྟཱ.

རཱཛསིཀྑཱཔདཀཐཱཝཎྞནཱ.

ཙཱིཝརཝགྒོ པཋམོ.

༦༧༣. ‘‘ཨེཀེནཱཔཱི’’ཏི ཨིམིནཱ ཀིཾ པན དྭཱིཧི, བཧཱུཧི ཝཱཏི ཝུཏྟཾ ཧོཏི. མིསྶེཏྭཱཏི ཨནྟམསོ ཝཱཏེན ཨཱཧཊེནཱཔི ཀོསིཡཾསུནཱ མིསྶེཏྭཱ. སནྠཏནྟི ‘‘སནྠཏཾ ནཱམ སནྠརིཏྭཱ ཀཏཾ ཧོཏི ཨཝཱཡིམ’’ནྟི (པཱརཱ. ༥༤༤) པདབྷཱཛནེ ཙ ‘‘སམེ བྷཱུམིབྷཱགེ ཀོསིཡཾསཱུནི ཨུཔརཱུཔརི སནྠརིཏྭཱ ཀཉྫིཀཱདཱིཧི སིཉྩིཏྭཱ ཀཏཾ ཧོཏཱི’’ཏི (པཱརཱ. ཨཊྛ. ༢.༥༤༢) ཨཊྛཀཐཱཡ ཙ ཝུཏྟསརཱུཔཾ ཀཉྫིཀཾ སིཉྩིཏྭཱ ཀོསིཡཾསཱུནི ཨཏྠརིཏྭཱ ཡཱཝ བཧལམིཙྪཏི, ཏཱཝ ཝཌྜྷེཏྭཱ ནིསཱིདནནིཔཛྫནཱདིཨཏྠཾ ཀཱཏབྦཾ སནྠཏནྟི ཨཏྠོ. ཀོསིཡཾསུནཱཏི ཀོསིཡཀིམིཀོསིཡསྶ ཨིདནྟི ཀོསིཡཾ, སུཏྟཾ, ཏསྶ སུཏྟསྶ ཨཾསུ, ཏེན ཀོསིཡཾསུནཱཏི ཨཏྠོ ¶ . ཀཱརཱཔེནྟསྶཱཏི ཨུཔལཀྑཎཏྟཱ ¶ ‘‘ཀརོནྟསྶཱ’’ཏིཔི གཧེཏབྦཾ. ཝུཏྟཉྷེཏཾ ‘‘ཀཱརཱཔེཡྻཱཏི ཨེཀེནཱཔི ཀོསིཡཾསུནཱ མིསྶེཏྭཱ ཀརོཏི ཝཱ ཀཱརཱཔེཏི ཝཱ’’ཏི (པཱརཱ. ༥༤༤). ཏེནེཝཱཧ ‘‘པརཏྠཱཡ ཀརོནྟསྶ ཀཱརཱཔེནྟསྶཱ’’ཏི.

༦༧༥. བྷཱུམཏྠརཎནྟི པརིཀམྨཀཏཱཡ བྷཱུམིཡཱ ཚཝིརཀྑནཏྠཱཡ ཨཏྠརིཏབྦཾ ཨཏྠརཎཾ. བྷིསི ནཱམ མཉྩབྷིསི, པཱིཋབྷིསཱིཏི དྭཡཾ. བིབྦོཧནཾ ཨུཔདྷཱནཾ.

ཀོསིཡཀཐཱཝཎྞནཱ.

༦༧༦. ཀཱལ༹ཀེལ༹ཀལོམཱནནྟི ‘‘ཀཱལ༹ཀཾ ནཱམ དྭེ ཀཱལ༹ཀཱནི ཛཱཏིཡཱ ཀཱལ༹ཀཾ ཝཱ རཛནཀཱལ༹ཀཾ ཝཱ’’ཏི (པཱརཱ. ༥༤༩) ཝཙནཏོ ཨེཝཾ ཀཱལ༹ཀཱནཾ ཨེལ༹ཀལོམཱནཾ. སུདྡྷཱནནྟི ཨིཏརཝཎྞེཧི ཨེལ༹ཀལོམེཧི ཨམིསྶཱནཾ. ཡཐཱཧ ཨཊྛཀཐཱཡཾ ‘‘སུདྡྷཀཱལ༹ཀཱནནྟི སུདྡྷཱནཾ ཀཱལ༹ཀཱནཾ, ཨཉྙེཧི ཨམིསྶིཏཀཱལ༹ཀཱནནྟི ཨཏྠོ’’ཏི (པཱརཱ. ཨཊྛ. ༢.༥༤༧). ཀརེཡྻཱཏི ཀརོནྟསྶ ཙ ཀཱརཱཔེནྟསྶ ཙཱཏི ཝུཏྟཾ ཧོཏི. ཡཐཱཧ ‘‘ཀཱརཱཔེཡྻཱཏི ཀརོཏི ཝཱ ཀཱརཱཔེཏི ཝཱ’’ཏི. ཨཱཔཏྟི ཧོཏཱིཏི ‘‘པཡོགེ དུཀྐཊཾ, པཊིལཱབྷེན ནིསྶགྒིཡ’’ནྟི པཱལི༹ཡཾ ཝུཏྟཾ པུབྦཔཡོགདུཀྐཊཉྩ ནིསྶགྒིཡཔཱཙིཏྟིཡཉྩ ཨཱཧ.

སུདྡྷཀཱལ༹ཀཀཐཱཝཎྞནཱ.

༦༧༧. ཨོདཱཏཾ ཏུལཾ ཝཱ བཧུཾ ཝཱ སབྦམེཝ ཝཱ གཧེཏྭཱནཱཏི ཡོཛནཱ. ཀཔིལམྤི ཝཱཏི ཨེཏྠཱཔི ཨེཝམེཝ ཡོཛེཏབྦཾ. ཨེཏྠ སབྦམེཝ ཝཱཏི སནྠཏསྶ གཧེཏབྦཾ སབྦམེཝ ཝཱ ལོམཾ. ཀརོནྟསྶཱཏི ཨེཏྠ ‘‘སནྠཏ’’ནྟི ཨདྷིཀཱརཏོ ¶ ལབྦྷཏི. ‘‘ནཝ’’ནྟི ཨིདཾ ‘‘ཀརོནྟསྶཱ’’ཏི པདསཱམཏྠིཡེན ལབྦྷཏི, ནཝཾ སནྠཏཾ ཀརོནྟསྶཱཏི ཨཏྠོ, ‘‘ཨནཱཔཏྟཱི’’ཏི ཨིམིནཱ སམྦནྡྷོ. ཀཔིལམྤི ཝཱཏི ཝཱཀཱརེན པཀཱརནྟརེནཱཔི ཀརོནྟསྶ ཨནཱཔཏྟིཾ སངྒཎྷཱཏི. སེཡྻཐིདཾ? ‘‘ནཝཾ པན བྷིཀྑུནཱ སནྠཏཾ ཀཱརཡམཱནེན དྭེ བྷཱགཱ སུདྡྷཀཱལ༹ཀཱནཾ ཨེལ༹ཀལོམཱནཾ ཨཱདཱཏབྦཱ ཏཏིཡཾ ཨོདཱཏཱནཾ ཙཏུཏྠཾ གོཙརིཡཱན’’ནྟི (པཱརཱ. ༥༥༣) མཱཏིཀཱཡ ཨནུཉྙཱཏཔྤཀཱརོ ཝེདིཏབྦོ.

ཨེཏྠ ¶ ‘‘ཨོདཱཏཾ ཀཔིལམྤི ཝཱ’’ཏི ཨེཏསྶ ‘‘བཧུཾ ཝཱ’’ཏི ཝིསེསནེན ཀཱལ༹ཀཱནཾ ཨེལ༹ཀལོམཱནཾ ཡཐཱཝུཏྟབྷཱགདྭཡཏོ ཨདྷིཀཾ ཨེལ༹ཀལོམམྤི ན གཧེཏབྦནྟི དཱིཔེཏི ཀེཝལཱནཾ ཀཱལ༹ཀཱནཾ ཨེལ༹ཀལོམཱནཾ ཨགྒཧེཏབྦཏཱཡ པཋམསིཀྑཱཔདེནེཝ ཝུཏྟཏྟཱ. ‘‘སབྦམེཝ ཝཱ’’ཏི ཨིམིནཱཔི པུརིམསིཀྑཱཔདེ ཝིཡ ཨིམེ ཨོདཱཏཱདཡོ སབྦེ ཀེཝལཱ ན གཧེཏབྦཱ ན ཧོནྟཱིཏི དསྶིཏཾ ཧོཏི. ‘‘ཨནཱཔཏྟཱི’’ཏི ཨིམིནཱ ཨེཝཾ ཨཀཏྭཱ ཨཉྙེན པཀཱརེན ཀརོནྟསྶ ཨཱཔཏྟི ཧོཏཱིཏི བྱཏིརེཀཏོ དཱིཔིཏཾ ཧོཏི.

སེཡྻཐིདཾ? ཝུཏྟཉྷེཏཾ བྷགཝཏཱ ‘‘ཨནཱདཱ ཙེ བྷིཀྑུ དྭེ བྷཱགེ སུདྡྷཀཱལ༹ཀཱནཾ ཨེལ༹ཀལོམཱནཾ ཏཏིཡཾ ཨོདཱཏཱནཾ ཙཏུཏྠཾ གོཙརིཡཱནཾ ནཝཾ སནྠཏཾ ཀཱརཱཔེཡྻ, ནིསྶགྒིཡཾ པཱཙིཏྟིཡ’’ནྟི. ཡཏྟཀཔྤམཱཎེཧི ཨེལ༹ཀལོམེཧི ནཝཾ སནྠཏཾ ཀཱཏུཀཱམོ ཧོཏི, ཏེ ལོམེ ཙཏུབྷཱགཾ ཏུལཡིཏྭཱ དྭེ ཏུལེ ཝཱ ཨཱུནེ ཝཱ ཀཱལ༹ཀལོམེ གཧེཏྭཱ ཨེཀཾ ཏུལཾ ཨོདཱཏེཧི ཝཱ ཨེཀཾ ཏུལཾ གོཙརིཡེཧི ཝཱ ཀཱལ༹ཀེཧི ཝཱ ཨཱུནེ ཀཏྭཱ དྭཱིཧིཔི ཨདྷིཀེ ཝཱ ཀཏྭཱ ཀཱལ༹ཀལོམེ ཝཛྫེཏྭཱ དྭཱིསུ ཨེཀཾ ཝཱ དྭེ ཨེཝ ཝཱ གཧེཏྭཱ ཀཱཏུཉྩ ཀཱརཱཔེཏུཉྩ ཝཊྚཏཱིཏི ཝུཏྟཾ ཧོཏི ¶ . ཨེཝཾ ཨནཱཔཏྟིདསྶནེན སབྦོཔི སིཀྑཱཔདཏྠོ སངྒཧིཏོཏི དཊྛབྦོ.

༦༧༨. ‘‘ཨནུཀྐམེནཱ’’ཏི ཨིམིནཱ ཨིམམེཝ ཨགྒཧེཏྭཱ པུརིམཱནནྟརཾ ཝུཏྟསིཀྑཱཔདདྭཡཉྩ གཧེཏབྦནྟི དཱིཔེཏི. ནིསྶཛྫིཏྭཱ ལདྡྷཱནིཔཱིཏི ཡོཛནཱ. ‘‘ཨཔཱི’’ཏི ཨིམིནཱ ‘‘ཨཉྙེན ཀཏཾ པཊིལབྷིཏྭཱ པརིབྷུཉྫཏི, ཨཱཔཏྟི དུཀྐཊསྶཱ’’ཏི (པཱརཱ. ༥༥༥) ཝུཏྟདུཀྐཊཉྩ ‘‘ནིསྶགྒིཡཾ ཙཱིཝརཾ ཨནིསྶཛྫིཏྭཱ པརིབྷུཉྫཏི, ཨཱཔཏྟི དུཀྐཊསྶཱ’’ཏི (པཱརཱ. ༤༦༨) པཋམནིསྶགྒིཡསིཀྑཱཔདེ ཝུཏྟནཡེན ཨིཧཱཔི ‘‘ནིསྶགྒིཡཾ སནྠཏཾ ཨནིསྶཛྫིཏྭཱ པརིབྷུཉྫཏི, ཨཱཔཏྟི དུཀྐཊསྶཱ’’ཏི ཝུཏྟམྤི དྷམྨསངྒཧཀཱརཀེཧི པེཡྻཱལཝསེན སཾཁིཏྟཾ ཏཾ དུཀྐཊཉྩཱཏི ཨིདཾ དྭཡཾ སངྒཧིཏནྟི དཊྛབྦཾ.

༦༧༩. ཏཏིཡཾ ཏུ ཀྲིཡཱཀྲིཡནྟི ཨིདཾ ཏཏིཡསིཀྑཱཔདཾ པན ‘‘དྭེ བྷཱགཱ སུདྡྷཀཱལ༹ཀཱན’’ནྟིཨཱདིནཱ (པཱརཱ. ༥༥༤) ཝུཏྟནཡེན ཨགྒཧེཏྭཱ ཀཱལ༹ཀཱནཾ ཨཏིརེཀགྒཧཎཝསེན ཨནནུཉྙཱཏཔྤཀཱརེན ཀརཎཏོ ཀིརིཡཱཀིརིཡཾ ནཱམ. ཡཐཱཧ ཨཊྛཀཐཱཡཾ ‘‘ཨཱདཱཡ ཙ ཨནཱདཱཡ ཙ ཀརཎཏོ ཀིརིཡཱཀིརིཡ’’ནྟི (པཱརཱ. ཨཊྛ. ༢.༥༥༢).

དྭེབྷཱགཀཐཱཝཎྞནཱ.

༦༨༠. ཚནྣཾ ¶ ཝསྶཱནཾ ཨོརེནཱཏི པུབྦེ སནྠཏསྶ ཀཏདིཝསཏོ པཊྛཱཡ ཨུཔརི ཚནྣཾ ཝསྶཱནཾ ཨབྦྷནྟརེཏི ཨཏྠོ. ཧོཏི ནིསྶགྒིཡཱཔཏྟཱིཏི ཚབྦསྶནྟརེ ཀཏསནྠཏཾ ནིསྶགྒིཡཾ ཧོཏི, ཀཱརཀསྶ ཙ པཱཙིཏྟིཡཾ ཧོཏཱིཏི ཨཏྠོ. བྷིཀྑུསམྨུཏིཾ ཋཔེཏྭཱཏི སནྠཏཾ གཧེཏྭཱ ཨདྡྷཱནམགྒཾ པཊིཔཛྫིཏུཾ ཨསམཏྠསྶ གིལཱནསྶ ‘‘ཨཧཾ བྷནྟེ གིལཱནོ ¶ ན སཀྐོམི སནྠཏཾ ཨཱདཱཡ པཀྐམིཏུཾ, སོཧཾ བྷནྟེ སངྒྷཾ སནྠཏསམྨུཏིཾ ཡཱཙཱམཱི’’ཏི (པཱརཱ. ༥༥༩) སངྒྷམཛ྄ཛྷེ ནིསཛྫ ཨཉྫལིཾ པགྒཧེཏྭཱ ཏིཀྑཏྟུཾ ཡཱཙིཏེ ཉཏྟིདུཏིཡཱཡ ཀམྨཝཱཙཱཡ གཏཊྛཱནེ ཚབྦསྶཱནཾ ཨནྟོཔི སནྠཏཾ ཀཱཏུཾ སངྒྷེན དིནྣསམྨུཏིཾ ཝིནཱཏི ཨཏྠོ.

༦༨༢. ཚབྦསྶཱནི ཀརོནྟསྶཱཏི ཨེཏྠ ‘‘ཡདཱ པརིཔུཎྞཱནི, ཏདཱ’’ཏི སེསོ, ཚབྦསྶེསུ པརིཔུཎྞེསུ སནྠཏཾ ཀརོནྟསྶཱཏི ཨཏྠོ. ཡཐཱཧ ཨཊྛཀཐཱཡཾ ‘‘ཡདཱ ཚབྦསྶཱནི པརིཔུཎྞཱནི ཧོནྟི, ཏདཱ སནྠཏཾ ཀརོཏཱི’’ཏི (པཱརཱ. ཨཊྛ. ༢.༥༥༧). ཏདུདྡྷམྤཱིཏི ཚབྦསྶཏོ ཨུཔརིཔི. ཝིཏཱནེཏི ཝིཏཱནནིམིཏྟཾ ཀརོནྟསྶ. སཱཎིཔཱཀཱརེཏི པཱཀཱརསདིསཏིརོཀརཎཱིཡནིམིཏྟཾ ཀརོནྟསྶ. ནིསྶཛྫིཏྭཱ ཀཏེཔི ཙཱཏི པུརཱཎསནྠཏེ ཨཉྙསྶ དཏྭཱ ཨཉྙསྨིཾ སནྠཏེ ཨོརཏོ ཚནྣཾ ཝསྶཱནཾ ཀཏེཔི ཙ ཨནཱཔཏྟཱིཏི ཡོཛནཱ. ཨཡམནཱཔཏྟིཝཱརོ ནེཝ པཱལི༹ཡཾ, ན ཨཊྛཀཐཱསུ དིསྶཏི, ཏསྨཱ སོ ཨཱཙརིཡཔརམྤརཱབྷཏོ ཨཱཙརིཡེན དསྶིཏོཏི ཝིཉྙཱཡཏི. སཱདྷཱརཎཝིནིཙྪཡཾ པན ‘‘ཨནནྟརསྶིམསྶཱཔི, ཝིསེསོ ནུཔལབྦྷཏཱི’’ཏི ཝཀྑཏི.

ཚབྦསྶཀཐཱཝཎྞནཱ.

༦༨༣. ཨནཱདཱཡཱཏི ནཝཾ ནིསཱིདནསནྠཏཾ ཀརོནྟེན བྷིཀྑུནཱ ཏསྶ ཝིཝཎྞཀརཎཏྠཱཡ པཱལི༹ཡཾ ‘‘པུརཱཎསནྠཏསྶ སཱམནྟཱ སུགཏཝིདཏྠི ཨཱདཱཏབྦཱ དུབྦཎྞཀརཎཱཡཱ’’ཏི (པཱརཱ. ༥༦༧) ཡཱ ཨཱདཱཏུཾ ཝུཏྟཱ, ཏཾ པུརཱཎསནྠཏསྶ ཚིནྣམུཁཱཝཏྟཏོ སུགཏཝིདཏྠིཾ ཨདཏྭཱ. ཨེཝམེཏཾ ཝུཏྟནྟི ཀཐཾ ཝིཉྙཱཡཏཱིཏི? ‘‘ཨནཱདཱནཝསེནསྶ, སུགཏསྶ ཝིདཏྠིཡཱ’’ཏི ཝཀྑམཱནེན ཝིཉྙཱཡཏི. སནྠཏེཏི ཨེཏྠ ‘‘པུརཱཎེ’’ཨིཏི ཙ ཀཱརེཏུཾ ཀཏཉྩཱཏི ཨེཏྠ ‘‘ནཝཾ ནིསཱིདནཾ སནྠཏ’’ནྟི ཙ སེསོ ¶ , པུརཱཎེ སནྠཏེ ཨསནྟེ སཱམནྟཱ སུགཏཝིདཏྠིཾ ཨནཱདཱཡ ནཝཾ ནིསཱིདནསནྠཏཾ ཀརོནྟསྶ ཨནཱཔཏྟི. ཨཉྙསྶཏྠཱཡ ནཝཾ ནིསཱིདནསནྠཏཾ ཀཱརེཏུཾ, ནཝཾ ནིསཱིདནསནྠཏཾ ཨཉྙེན ཀཏཾ པཊིལབྷིཏྭཱ པརིབྷུཉྫིཏུཉྩ ཨནཱཔཏྟཱིཏི ཡོཛནཱ.

‘‘ཨཉྙསྶཏྠཱཡ ¶ ཀཱརེཏུ’’ནྟི ཨིདམེཏྠ པཱཙིཏྟིཡེནེཝ ཨནཱཔཏྟིདསྶནནྟི གཧེཏབྦཾ. ཏསྨཱ ‘‘ཨཉྙསྶཏྠཱཡ ཀརོཏི ཝཱ ཀཱརཱཔེཏི ཝཱ, ཨཱཔཏྟི དུཀྐཊསྶཱ’’ཏི (པཱརཱ. ༥༦༩) ཝུཏྟཏྟཱ ཙ ཨཊྛཀཐཱཡ, ཏབྦཎྞནཱསུ ཙ ཨདིསྶམཱནཏྟཱ ཝཱ ཏཾ ན ཝཏྟབྦཾ. ‘‘ཨནཱཔཏྟི ཚབྦསྶཱནི ཀརོཏི…པེ… ཨཉྙསྶཏྠཱཡ ཀརོཏི ཝཱ ཀཱརཱཔེཏི ཝཱ’’ཏི (པཱརཱ. ༥༦༤) ཨནནྟརསིཀྑཱཔདེ ཝུཏྟམོལོཀེཏྭཱ ཝཱ དུཀྐཊསྶ ཙ ཝིཧིཏཏྟཱ པཱཙིཏྟིཡེན ཨནཱཔཏྟིབྷཱཝཾ སནྡྷཱཡ ལིཁིཏནྟི ཝིཉྙཱཡཏི. ཀཏཉྩ པརིབྷུཉྫིཏུནྟི ཨེཏྠ ‘‘ཨཉྙེནཱ’’ཏི ཝཏྟབྦཾ, ཨིམིནཱ ‘‘ཨཉྙེན ཀཏཾ པཊིལབྷིཏྭཱ པརིབྷུཉྫཏི, ཨནཱཔཏྟཱི’’ཏི པཱཋོཝ དསྶིཏོ.

༦༨༤. སུགཏསྶ ཝིདཏྠིཡཱ ཨནཱདཱནཝསེན ཙ ཨསྶ སནྠཏསྶ ཀརཎེན ཙ སཏྠཱརཱ ཨེཏཾ སིཀྑཱཔདཾ ཀིརིཡཱཀིརིཡཾ ཝུཏྟནྟི ཡོཛནཱ.

༦༨༥. ནནུ ཙ ཨིམསྶ སིཀྑཱཔདསྶ ཨཊྛཀཐཱཡ ‘‘སམུཊྛཱནཱདཱིནི ཀིརིཡཱཀིརིཡཏྟཱ ཨིམསྶ སིཀྑཱཔདསྶ དྭེབྷཱགསིཀྑཱཔདསདིསཱནཱི’’ཏི (པཱརཱ. ཨཊྛ. ༢.༥༦༧) ཝུཏྟཱནི, ཨིཧ ‘‘སཉྩརིཏྟསམཱ’’ཏི ཀསྨཱ ཝུཏྟཱནཱིཏི? ཝུཙྩཏེ – དྭེབྷཱགསིཀྑཱཔདེ ‘‘སམུཊྛཱནཱདཱིནིཔི ཀོསིཡསིཀྑཱཔདསདིསཱནེཝཱ’’ཏི (པཱརཱ. ཨཊྛ. ༢.༥༥༢) ཨཊྛཀཐཱཡ ཝུཏྟཱནི, ཀོསིཡསིཀྑཱཔདེ སམུཊྛཱནཱདཱིནཾ སཉྩརིཏྟེན སམབྷཱཝསྶ ཝུཏྟཏྟཱ, མཱུལམེཝ སརིཏྭཱ ཀིརིཡཱཀིརིཡསངྑཱཏཝིསེསསྶ ¶ ཝིསུཾ དསྶིཏཏྟཱ ཨཝསིཊྛཝིནིཙྪཡམཏྟཾ སནྡྷཱཡ ཨེཝཾ ཝུཏྟནྟི གཧེཏབྦཾ. ཨིམཾ ཝིསེསཾ མུཉྩིཏྭཱ ཨཝསིཊྛཝིནིཙྪཡེན དྭཱིསུ སིཀྑཱཔདེསུ སཱདྷཱརཎཝིནིཙྪཡསྶ ཨཝིསེསཏཾ དསྶེཏུམཱཧ ‘‘ཨནནྟརསྶཱ’’ཏིཨཱདི.

ནིསཱིདནསནྠཏཀཐཱཝཎྞནཱ.

༦༨༦-༧. གཙྪནྟེཏི ཏིཡོཛནཔཱུརཎཊྛཱནཾ ཨཏིཀྐམྨ གཙྪནྟེ. ཡཱནེཏི སཀཊཱདིཀེ. ལོམཱནཱིཏི ཨེལ༹ཀལོམཱནི. སཱམིཀསྶཱཏི ཡཱནཱདིསཱམིནོ. ཨཛཱནཏོཏི ཨནཱདརེ སཱམིཝཙནཾ. ཨདྡྷཱནམགྒཔཊིཔནྣོ ཡོ པན བྷིཀྑུ ཨེལ༹ཀལོམཾ ལབྷིཏྭཱ ‘‘ཏིཡོཛནཔརམཾ སཧཏྠཱ ཧཱརེཏབྦཱནཱི’’ཏི (པཱརཱ. ༥༧༣) ཨནུཉྙཱཏཏྟཱ ཏིཡོཛནབྦྷནྟརེ སཧཏྠེནཱཔི ཧརིཏྭཱ ཏིཡོཛནཱཏིཀྐམེ པརེསཾ ཡཱནཱདཱིསུ སཱམིཀེསུ ཨཛཱནནྟེསུ ‘‘ཨེཏེ ཧརིསྶནྟཱི’’ཏི ཙིནྟེཏྭཱ ཡདི ཋཔེཡྻཱཏི ཨཏྠོ. ཏེསཱུཏི ཡེསུ ཨེལ༹ཀལོམཱནི ཋཔིཏཱནི, ཏེསུ ཡཱནཱདཱིསུ ཏིཡོཛནམཏཱིཏེསུ ¶ བྷིཀྑུསྶ པཡོགཾ ཝིནཱཔི ཏིཡོཛནཾ ཨཏིཀྐནྟེསུ ཏསྶ བྷིཀྑུནོ ཨཱཔཏྟི ཧོཏཱིཏི ཡོཛནཱ, ཏསྶ བྷིཀྑུནོ ‘‘པཋམཾ པཱདཾ ཏིཡོཛནཾ ཨཏིཀྐཱམེཏི, ཨཱཔཏྟི དུཀྐཊསྶ. དུཏིཡཾ པཱདཾ ཨཏིཀྐཱམེཏི, ནིསྶགྒིཡཾ པཱཙིཏྟིཡ’’ནྟི (པཱརཱ. ༥༧༣) ཝུཏྟཏྟཱ དུཀྐཊཔཱཙིཏྟིཡཱ ཧོནྟཱིཏི ཨཏྠོ.

ཨཡཾ ནཡོཏི བྷིཀྑུནོ པཡོགཾ ཝིནཱ ཡཏྠ ཨེལ༹ཀལོམཱནི ཋཔིཏཱནི, ཏེསུ ཡཱནཱདཱིསུ ཏིཡོཛནཾ ཨཏིཀྐམནྟེསུ ཨཱཔཏྟི ཧོཏཱིཏི ཨཡམཏྠོ དཊྛབྦོཏི ཨཏྠོ.

༦༨༨. ཨགཙྪནྟེཏི ཏིཡོཛནབྦྷནྟརེ ཋིཏེ. ‘‘ཨབྷིརཱུཧིཏྭཱ’’ཏི ཨིདཾ ཨནཱཔཏྟིཀཱརཎེསུ ཨེཀཾ དསྶེཏུམཱཧ. ‘‘བྷཱུམིཡཉྷི ¶ ཋཏྭཱ དེནྟོ, ཨཝ྄ཧཱཡནྟོ ཝཱ པུརཏོ གཙྪཏི, ཨེསེཝནཡོ’’ཏི ཨཊྛཀཐཱཡཾ ཝུཏྟཾ. ཨནཱཔཏྟིཝཱརེ ‘‘ཨཉྙཾ ཧརཱཔེཏཱི’’ཏི ཝཙནཏོ ཨཏྟནཱ པེསིཏེ ཨཉྙསྨིཾ ཧརནྟེ ཝཊྚཏཱིཏི དསྶེཏུམཱཧ ‘‘སཙེ སཱརེཏི ཝཊྚཏཱི’’ཏི. ཏེནེཝཱཧ ‘‘ཏཾ པནཉྙཾ ཧརཱཔེཏི, ཝཙནེན ཝིརུཛ྄ཛྷཏཱི’’ཏི.

༦༩༠. ཀཎྞཙྪིདྡེསཱུཏི ཨཏྟནོ ཀཎྞབིལེསུ.

༦༩༡. ཨནཱཔཏྟིཝཱརེ ‘‘ཀཏབྷཎྜ’’ནྟི ཝུཏྟཏྟཱ ཏཏྠ ཨནྟམསོ སུཏྟཀེན བདྡྷམཏྟམྤི ཀཏབྷཎྜམེཝཱཏི ཨཱཧ ‘‘སུཏྟཀེན ཙ བནྡྷིཏྭཱ’’ཏི. ཝེཎིཾ ཀཏྭཱཏི ཀུདྲཱུསསཱིསཔལཱལཝེཎིསདིསཾ ཝེཎིཾ ཀཏྭཱ. ཨཱཔཏྟི པརིདཱིཔིཏཱཏི ‘‘ཝེཎིཾ ཀཏྭཱ ཧརཏི, ཨིདཾ ནིདྷཱནམུཁཾ ནཱམ, ཨཱཔཏྟིཡེཝཱ’’ཏི (པཱརཱ. ཨཊྛ. ༢.༥༧༥) ཨཊྛཀཐཱཡཾ ཝུཏྟཾ.

༦༩༢. སུངྐགྷཱཏནྟི ཨེཏྠ ‘‘ཏཾ ཋཱན’’ནྟི སེསོ, ཡདི ཏཾ ཋཱནཾ སུངྐགྷཱཏནྟི ཡོཛནཱ, ཏིཡོཛནོསཱནཊྛཱནཾ ཡདི སུངྐགྷཱཏཊྛཱནཾ བྷཝེཡྻཱཏི ཨཏྠོ. ཨནུཔྤཏྭཱཏི ཏཾ ཋཱནཾ པཏྭཱ. ཙོརཱདཱིཧི ཨུཔདྡུཏོ ཝཱ གཙྪཏི, ཡོ ཨཉྙཝིཧིཏོ ཝཱ གཙྪཏཱིཏི ཡོཛནཱ. ཨཱཔཏྟཱིཏི ཨེཏྠ ཨཱཔཏྟི ཏསྶ གཙྪཏོཏི ལབྦྷཏི. ཨེཏྠ ‘‘ཨཱཔཏྟཱི’’ཏི ཨིམིནཱ སིཀྑཱཔདེན ཨཱཔཏྟིམཱཧ. ཨིམིསྶཱ ཨཙིཏྟཀཏཱཡ ཏེསཾ དྭིནྣམྤི ཧོཏི. ཨདིནྣཱདཱནཔཱརཱཛིཀཾ པན སཙིཏྟཀཏཱཡ ཨེཏེསཾ ན ཧོཏི. ཏེནཱཧ ཨཊྛཀཐཱཡཾ ‘‘ཡཱ ཧི ཏཏྠ ཨཱཔཏྟི, སཱ ཨིདྷ ཨནཱཔཏྟི. ཡཱ ཨིདྷ ཨཱཔཏྟི, སཱ ཏཏྠ ཨནཱཔཏྟཱི’’ཏི (པཱརཱ. ཨཊྛ. ༢.༥༧༢). ཐེཡྻཙིཏྟེན ཧརཏོ བྷཎྜགྒྷཝསེན པཱརཱཛིཀཐུལླཙྩཡདུཀྐཊེསུ ¶ ཨེཀཾ ཧོཏི. ཏེནཱཧ ཨཊྛཀཐཱཡཾ ¶ ‘‘ཨདིནྣཱདཱནེ པན སུངྐགྷཱཏེ ཨཱཔཏྟི ཧོཏཱི’’ཏི (པཱརཱ. ཨཊྛ. ༢.༥༧༢).

༦༩༣. ཏིཡོཛནནྟི ཨེཏྠ ཧརཎཀིརིཡཱཡ ཨཙྩནྟསཾཡོགེ ཨུཔཡོགཝཙནཾ. ‘‘ཧརནྟསྶཱ’’ཏི ཨིམསྶ ཀམྨདཱིཔཀཾ ‘‘ལོམཱནཱི’’ཏི ཨིདཾ པཀརཎཏོ ལབྦྷཏི. ‘‘ཨནཱཔཏྟི པཀཱསིཏཱ’’ཏི ཨིདཾ སབྦཏྠ ཝཀྑམཱནེན སམྦནྡྷནཱིཡཾ. ཏཱནིཡེཝ པཙྩཱཧརནྟསྶཱཏི ཡོཛནཱ. ཏིཡོཛནནྟི ཨེཏྠ ཏཾཡེཝ ཏིཡོཛནནྟི ལབྦྷཏི. ཨཏྟནཱ གཏཾ ཏིཡོཛནཾ པུན ཏཱནེཝ ལོམཱནི གཧེཏྭཱ པཙྩཱགཙྪནྟསྶཱཏི ཨཏྠོ.

༦༩༤. ནིཝཱསཏྠཱཡ ཝཱ གནྟྭཱཏི ཏིཡོཛནབྦྷནྟརེ ཝཱ སཱིམཱཡ ཝཱ ཨཱཝཱསེ ཝསིཏུཀཱམཏཱཡ གནྟྭཱ. ཏཏོ པརཾ ཧརནྟསྶཱཏི ཏསྨིཾ ཨཱཝཱསེ ཨུདྡེསཱདིཾ ཨལབྷིཏྭཱ ཏཏོ པརཾ ཨཉྙསྨིཾ ཨཱཝཱསེ ཝསིཏུཀཱམཏཱཡ པུནཔི ཏིཡོཛནཾ ཧརནྟསྶཱཏི ཨཏྠོ. ཨིམིནཱཝ ནཡེན ཏཏོཔི ཨཉྙཾ ཋཱནཾ, ཏཏོཔི ཨཉྙནྟི སུདྡྷཙིཏྟེན གཏགཏཊྛཱནཏོ པུནཔི པརམྤརཾ ཋཱནཾ གམནཝསེན ཡོཛནསཏམྤི ཧརཏོ དོསོ ནཏྠཱིཏི ཨིདམྤི ཝུཏྟཾ ཧོཏི. ཡཐཱཧ ཨཊྛཀཐཱཡཾ ‘‘ཨེཝཾ ཡོཛནསཏམྤི ཧརནྟསྶ ཨནཱཔཏྟཱི’’ཏི (པཱརཱ. ཨཊྛ. ༢.༥༧༥). ཨཙྪིནྣཾ ཝཱཔི ལབྷིཏྭཱ ཧརཏོཔཱིཏི ‘‘ཙོརཱཝཧཊཔརིཙྩཏྟཾ ལབྷིཏྭཱ ཧརནྟསྶ. ཨིདྷ སབྦཏྠེཝ ‘‘ནིཝཱསཏྠཱཡ ཝཱ གནྟྭཱ’’ཏིཨཱདིཀེ ཨནཱཔཏྟིཝཱརེ པཋམལདྡྷཊྛཱནཏོ པབྷུཏི ཨཏིརེཀཏིཡོཛནམྤི ཧརནྟསྶ ཨནཱཔཏྟཱིཏི ཨཏྠོ ཝིཉྙཱཡཏི. ནིསྶཊྛཾ ལབྷིཏྭཱཏི ནིསྶཛྫིཏྭཱ ཝིནཡཀམྨཾ ཀཏྭཱ དིནྣཾ ལབྷིཏྭཱ.

༦༩༥. ཨཉྙེནཱཏི ཏཱནི ཧཱརིནཱ ཨཉྙེན. ཀཏབྷཎྜཀནྟི ‘‘ཀམྦལཀོཛཝསནྠཏཱདིཾ ཡཾ ཀིཉྩི ཨནྟམསོ སུཏྟཀེན ¶ བདྡྷམཏྟམྤཱི’’ཏི (པཱརཱ. ཨཊྛ. ༢.༥༧༥) ཨཊྛཀཐཱཡཾ ཝུཏྟཨེལ༹ཀལོམེཧི ཀཏབྷཎྜཀཾ.

༦༩༦. ཨིདཾ སམུཊྛཱནནྟི ཨིདཾ ཨེལ༹ཀལོམསམུཊྛཱནཾ. པཎྞཏྟིཾ ཨཛཱནནཏཱཡ ཝཱ ཉཏྭཱཔི ཙཱིཝརཱདིཔརིཀྑཱརེསུ ལོམསྶ ཨལླིནབྷཱཝཾ ཨཛཱནིཏྭཱཔི ཝཱ ཏིཡོཛནཾ ཨཏིཀྐཱམེནྟསྶ ཨརཧཏོཔི ཨིམཱཡ ཨཱཔཏྟིཡཱ སམྦྷཝཏོ ‘‘ཨཙིཏྟ’’ནྟི ཨཱཧ.

ཨེལ༹ཀལོམཀཐཱཝཎྞནཱ.

༦༩༧. ཨེལ༹ཀལོམདྷོཝཱཔནཀཐཱ ¶ ཨུཏྟཱནཱཡེཝ.

ཨེལ༹ཀལོམདྷོཝཱཔནཀཐཱཝཎྞནཱ.

༦༩༨. གཎྷེཡྻ ཝཱཏི ཨེཏྠ ‘‘ཡོ’’ཏི སེསོ. ‘‘གཎྷེཡྻ ཝཱ གཎྷཱཔེཡྻ ཝཱ’’ཏི ཨིམིནཱ ‘‘ཏཏྠཏྟནོ པནཏྠཱཡཱ’’ཏི ཝཀྑམཱནཏྟཱ ཙ ‘‘ནིསྶཛྫིཏྭཱ’’ཏིཨཱདིཝཙནཏོ ཙ ཨཏྟནོ ཨཏྠཱཡ ཨུགྒཎྷེཡྻ ཝཱ ཨུགྒཎྷཱཔེཡྻ ཝཱཏི ཝུཏྟཾ ཧོཏི. ཝཱཀཱརེན ‘‘ཨུཔནིཀྑིཏྟཾ ཝཱ སཱདིཡེཡྻཱ’’ཏི ཨིདཾ སངྒཎྷཱཏི, ‘‘ཨིདཾ ཨཡྻསྶ ཧོཏཱུ’’ཏི ཨུཔནིཀྑིཏྟཾ ཙེ སཱདིཡཏཱིཏི ཨཏྠོ.

རཛཏནྟི ཨཉྙཏྠ སཛ྄ཛྷུ ཝུཙྩཏི, ཨིདྷ པན ཝོཧཱརཱུཔགཀཧཱཔཎཱདི ཝུཙྩཏི. ཝུཏྟཉྷེཏཾ པཱལི༹ཡཾ ‘‘རཛཏཾ ནཱམ ཀཧཱཔཎོ ལོཧམཱསཀོ དཱརུམཱསཀོ ཛཏུམཱསཀོ, ཡེ ཝོཧཱརཾ གཙྪནྟཱི’’ཏི (པཱརཱ. ༥༨༤). ཨིདྷ ཀཧཱཔཎཱདཱིནཾ སརཱུཔཾ ཨཊྛཀཐཱཡཾ –

‘‘ཏཏྠ ཀཧཱཔཎོཏི སོཝཎྞམཡོ ཝཱ རཱུཔིཡམཡོ ཝཱ པཱཀཏིཀོ ཝཱ. ལོཧམཱསཀོཏི ཏམྦལོཧཱདཱིཧི ཀཏམཱསཀོ. དཱརུམཱསཀོཏི ¶ སཱརདཱརུནཱ ཝཱ ཝེལུ༹པེསིཀཱཡ ཝཱ ཨནྟམསོ ཏཱལཔཎྞེཔི རཱུཔཾ ཚིནྡིཏྭཱ ཀཏམཱསཀོ. ཛཏུམཱསཀོཏི ལཱཁཱཡ ཝཱ ནིཡྻཱསེན ཝཱ རཱུཔཾ སམུཊྛཱཔེཏྭཱ ཀཏམཱསཀོ. ‘ཡེ ཝོཧཱརཾ གཙྪནྟཱི’ཏི ཨིམིནཱ པན པདེན ཡོ ཡོ ཡཏྠ ཡཏྠ ཛནཔདེ ཡདཱ ཡདཱ ཝོཧཱརཾ གཙྪཏི, ཨནྟམསོ ཨཊྛིམཡོཔི ཙམྨམཡོཔི རུཀྑཕལབཱིཛམཡོཔི སམུཊྛཱཔིཏརཱུཔོཔི ཨསམུཊྛཱཔིཏརཱུཔོཔི སབྦོ སངྒཧིཏོ’’ཏི (པཱརཱ. ཨཊྛ. ༢.༥༨༣-༥༨༤) –

ཝུཏྟནཡེན ཝེདིཏབྦཾ.

ཨེཏྠ ཙ པཱཀཏིཀོ ནཱམ ཨེཏརཧི པཀཏིཀཧཱཔཎོ. རུཀྑཕལབཱིཛམཡོཏི ཏིནྟིཎིཀཱདིརུཀྑཱནཾ ཕལབཱིཛེན ཀཏོ.

ཛཱཏརཱུཔཀཾ སུཝཎྞཾ. ཡཐཱཧ པཱལི༹ཡཾ ‘‘ཛཱཏརཱུཔཾ ནཱམ སཏྠུཝཎྞོ ཝུཙྩཏཱི’’ཏི (པཱརཱ. ༥༨༤). ནིསྶཛྫིཏྭཱཏི ¶ ཨེཏྠ ‘‘ཏེནཱ’’ཏི ལབྦྷཏི, ‘‘བྷིཀྑུནཱ’’ཏི ཨིམིནཱ ཡུཛྫཏི, ཨེཝཾ སཱདིཏབྷིཀྑུནཱཏི ཨཏྠོ. ནིསྶཛྫིཏྭཱཏི ཨཏྟནཱ ཨུགྒཧིཏཾ ཝཱ པརེན ཨུགྒཧཱཔིཏཾ ཝཱ ཨུཔནིཀྑིཔིཏསྶ སཱདིཡནཝསེན སཱདིཏཾ ཝཱ རཛཏཾ ཝཱ ཛཱཏརཱུཔཾ ཝཱ ‘‘ཏེན བྷིཀྑུནཱ སངྒྷཾ ཨུཔསངྐམིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ’’ཏི (པཱརཱ. ༥༨༤) ཝཙནཏོ སངྒྷམཛ྄ཛྷེ ཨུཔསངྐམིཏྭཱ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཡ྄ཧ ‘‘ཨཧཾ བྷནྟེ རཱུཔིཡཾ པཊིགྒཧེསིཾ, ཨིདཾ མེ ནིསྶགྒིཡཾ, ཨིམཱཧཾ ནིསྶཛྫཱམཱི’’ཏི ནིསྶཛྫིཏྭཱཏི ཝུཏྟཾ ཧོཏི.

ཨཱཔཏྟི ¶ དེསེཏབྦཱཝཱཏི ཨཏྟནཱ ཨེཝ ཨཱཔནྣཾ ནིསྶགྒིཡཾ པཱཙིཏྟིཡཾ ཏསྨིཾ སངྒྷམཛ྄ཛྷེ ཨེཝམེཝ ནིསཱིདིཏྭཱ དེསེཏབྦཱ. ཨེཝཾ དེསིཏཱ ཨཱཔཏྟི སངྒྷཱནུམཏེན བྱཏྟེན པཊིབལེན བྷིཀྑུནཱ པཊིགྒཧེཏབྦཱ. ཝུཏྟཉྷེཏཾ ‘‘བྱཏྟེན བྷིཀྑུནཱ པཊིབལེན ཨཱཔཏྟི པཊིགྒཧེཏབྦཱ’’ཏི (པཱརཱ. ༥༨༤).

༦༩༩. རཛཏནྟི རཱུཔིཡཾ. ཛཱཏརཱུཔནྟི སུཝཎྞཾ. ཨིམིནཱ པདདྭཡེན ཀཏཱཀཏཾ སབྦཾ སངྒཎྷཱཏི. ཨུབྷིནྣཾ མཱསཀོཏི ཛཱཏརཱུཔམཱསཀོ, རཛཏམཱསཀོཔི ཙཱཏི ཝུཏྟཾ ཧོཏི. ཨིདྷ རཛཏམཱསཀོཏི ‘‘རཛཏ’’ནྟི པདབྷཱཛནེ (པཱརཱ. ༥༨༤) ཝུཏྟཀཧཱཔཎཱདི པཉྩཔྤཀཱརོ མཱསཀོ གཧིཏོ. ཡཐཱཧ ཨཊྛཀཐཱཡཾ ‘‘ཝུཏྟཔྤཀཱརོ སབྦོཔི རཛཏམཱསཀོ’’ཏི (པཱརཱ. ཨཊྛ. ༢.༥༨༣-༥༨༤). ཨིདྷ ‘‘ཛཱཏརཱུཔམཱསཀོ’’ཏི ཝིསུཾ གཧིཏཏྟཱ ཀཧཱཔཎཔདེན སུཝཎྞཀཧཱཔཎཾ ཝཛྫེཏྭཱ ཨིཏརདྭཡམེཝ ཝཏྟབྦཾ. ‘‘ནིསྶགྒིཡཱཝཧ’’ནྟི ཨིདཾ ཨཏྟནོ ཨཏྠཱཡ ཨུགྒཎྷནཨུགྒཎྷཱཔནསཱདིཡནཱནི ཀརོནྟཾ སནྡྷཱཡཱཧ. ‘‘ཏཏྠཱ’’ཏིཨཱདིནཱ ཝཀྑམཱནནཡེན དུཀྐཊཱཝཧཉྩ ཧོཏེཝ.

༧༠༠-༡. མུཏྟཱདཱིནཾ ཨིམསྨིཾ སིཀྑཱཔདཝིབྷངྒེ ཨཝུཏྟཏྟེཔི པཱཙིཏྟིཡཀཎྜེ ནཝམཝགྒེ དུཏིཡསྶ རཏནསིཀྑཱཔདསྶ པདབྷཱཛནེ ‘‘རཏནཾ ནཱམ མུཏྟཱ མཎི ཝེལུ༹རིཡོ སངྑོ སིལཱ པཝཱལཾ རཛཏཾ ཛཱཏརཱུཔཾ ལོཧིཏངྐོ མསཱརགལླ’’ནྟི (པཱཙི. ༥༠༦) ཝུཏྟཱནཾ དསནྣཾ རཏནཱནཾ ཨིམསྨིཾ སིཀྑཱཔདེ ནིསྶགྒིཡཝཏྠུཾ ཀཏྭཱ ཝུཏྟཾ རཛཏཾ, ཛཱཏརཱུཔཉྩ ཝཛྫེཏྭཱ ཨཝསིཊྛཱནཾ ཨཊྛནྣཾ རཏནཱནཾ དུཀྐཊཝཏྠུབྷཱཝོ ཨིམསྶ ཨཊྛཀཐཱཡཾ ཝཝཏྠཱཔིཏོཏི དསྶནཏྠམཱཧ ‘‘མུཏྟཱ…པེ… མསཱརགལླ’’ནྟི. ཨེཏྠ ཝེལུ༹རིཡོ གཱཐཱབནྡྷཝསེན ན ཝུཏྟོ ¶ , སོ ཨེཀཡོགནིདྡིཊྛཱནཾ ¶ སཏྟནྣཾ རཏནཱནཾ གཧཎེནེཝ གཡ྄ཧཏི. མུཏྟཱདཡོ ཡཐཱདསྶིཏསརཱུཔཱཡེཝ. བྲཧྨཛཱལཱདིསུཏྟནྟཝསེནཱཔི ‘‘ཨཀཔྤིཡཱ’’ཏི སིདྡྷཱནཾ སཏྟདྷཉྙཱདཱིནཾ པཊིགྒཧཎེ ཨཱཔཏྟིཾ དསྶེཏུམཱཧ ‘‘དྷཉྙཱནཱི’’ཏིཨཱདི.

༧༠༢. རཏནསིཀྑཱཔདེཡེཝ ‘‘རཏནསམྨཏ’’ནྟི ཨཱགཏཾ ཀཔྤིཡཝཏྠུཾ པཊིགྒཎྷཏོ ཨནཱཔཏྟིབྷཱཝཾ དསྶེཏུམཱཧ ‘‘མུགྒམཱསཱདིཀ’’ནྟིཨཱདི.

༧༠༣-༤. ཨེཝཾ ཏིཔྤཀཱརེན ཋིཏཾ ཝཏྠུཾ གཎྷཏོ ཨདྷིཔྤཱཡནཱནཏྟེན སམྦྷཝནྟཾ ཨཱཔཏྟིཔྤབྷེདཾ དསྶེཏུམཱཧ ‘‘ཏཏྠཱ’’ཏིཨཱདི. ཏཏྠཱཏི ཏེསུ ཏཱིསུ ནིསྶགྒིཡཱདིཝཏྠཱུསུ. སངྒྷཱདཱིནནྟི སངྒྷགཎཔུགྒལཙེཏིཡཱདཱིནཾ. ཏནྟི ནིསྶགྒིཡཝཏྠུཾ. སབྦཏྠཱཡཱཏི སབྦེསཾ ཨཏྠཱཡཱཏི ཝིགྒཧོ. ཨཏྟནོ ཨཏྠཱཡ ཙ སངྒྷཱདཱིནམཏྠཱཡ ཙ དུཀྐཊཝཏྠུཾ གཎྷནྟསྶཱཔི དུཀྐཊམེཝ ཧོཏཱིཏི ཨཏྠོ. ཨཝུཏྟསམུཙྩཡེནེཏྠ ཙ-སདྡེན ‘‘སབྦམྤི ནིཀྑིཔནཏྠཱཡ བྷཎྜཱགཱརིཀསཱིསེན སམྤཊིཙྪཏོ ཨུཔརི རཏནསིཀྑཱཔདེ ཨཱགཏཝསེན པཱཙིཏྟིཡ’’ནྟི (པཱརཱ. ཨཊྛ. ༢.༥༨༣-༥༨༤) ཨཊྛཀཐཱཡ ཝུཏྟཝིནིཙྪཡཝིསེསསྶ སངྒཧོ ཀཏོ.

༧༠༥. ཀཧཱཔཎཱདཱིནནྟི ཨཱདི-སདྡེན སུཝཎྞཱདཱིནཾ སངྒཧོ. ‘‘སཧསྶ’’ནྟི ཨིདཾ ཨུཔལཀྑཎཾ, སཧསྶམྤཱིཏི ཝུཏྟཾ ཧོཏི.

༧༠༦. ཐཝིཀཱདཱིསཱུཏི ཨཱདི-སདྡེན སིཐིལཔཱུརིཏཱནི བྷཱཛནཱནི གཧིཏཱནི. ‘‘སིཐིལབདྡྷེསཱུ’’ཏི ཝིསེསནེན བྱཏིརེཀཝསེན ‘‘གྷནབདྡྷེ, པན གྷནཔཱུརིཏེ ཝཱ ཨེཀཱཝ ཨཱཔཏྟཱི’’ཏི (པཱརཱ. ཨཊྛ. ༢.༥༨༣-༥༨༤) ཨཊྛཀཐཱསེསཾ དཱིཔེཏི.

༧༠༧. ཨུཔནིཀྑིཏྟསཱདིཡནཀམྨཾ ¶ དསྶེཏུམཱཧ ‘‘ཨིད’’ནྟིཨཱདི. གཎྷིཏུཀཱམོཔཱིཏི ཨེཏྠ ‘‘ཧོཏཱུ’’ཏི སེསོ. ནིསེདྷེཏབྦམེཝཱཏི ཀཱཡེན ཝཱ ཝཱཙཱཡ ཝཱ ‘‘ཨིདཾ ན ཀཔྤཏཱི’’ཏི པཊིཀྑིཔིཏབྦམེཝ, ཨེཝཾ སཏི ཨནཱཔཏྟིཡེཝཱཏི ཨཏྠོ. ཨཡམཏྠོ ཨཊྛཀཐཱཡཾ ‘‘ཀཱཡཝཱཙཱཧི ཝཱ ཨཔྤཊིཀྑིཔིཏྭཱཔི སུདྡྷཙིཏྟོ ཧུཏྭཱ ‘ནཡིདཾ ཨམྷཱཀཾ ཀཔྤཏཱི’ཏི ན སཱདིཡཏི, ཨནཱཔཏྟིཡེཝཱ’’ཏི (པཱརཱ. ཨཊྛ. ༢.༥༨༣-༥༨༤) ཨཱགཏོཡེཝ.

༧༠༨. ཏཾ ¶ ཝཏྠུནྟི ཏཐཱ པཊིཀྑིཏྟཾ ཝཏྠུཾ. ཋཔེཏྭཱ ཡདི གཙྪཏཱིཏི ‘‘ཏུམྷེ གཎྷཐ ཝཱ, མཱ ཝཱ, དིནྣཾ དིནྣམེཝཱ’’ཏི སཙེ སོ ཋཔེཏྭཱཝ གཙྪཏི. ཡཐཱ ཏཾ ན ཝིནསྶཏི, ཏཐཱ ཏཾ གོཔཡིཏབྦནྟི ཡོཛནཱ. ‘‘ཨཉྙོ ཏཏྠ ཨཱགནྟྭཱ པུཙྪཏཱི’’ཏིཨཱདིནཱ ཨཊྛཀཐཱཡ ཝུཏྟནཡེན ཏཏྠཱགཏེན ཀཔྤིཡཀཱརཀེན ‘‘ཀིམིད’’ནྟི པུཙྪིཏེ སརཱུཔཾ ཨཱཝི ཀཏྭཱ ‘‘གོཔཡིསྶཱམཧཾ བྷནྟེ, གུཏྟཊྛཱནཾ དསྶེཐཱ’’ཏི ཝུཏྟེ ‘‘ཨིམཾ གཧེཏྭཱ ཨེཧཱི’’ཏི ཨཝཏྭཱ སཏྟབྷཱུམིཀམྤི པཱསཱདཾ ཨབྷིརུཧིཏྭཱ ‘‘ཨིདྷ ཋཔེཧཱི’’ཏི ཨཝཏྭཱ ‘‘ཨིདཾ གུཏྟཊྛཱན’’ནྟི སུརཀྑིཏཊྛཱནཾ དསྶེཏྭཱ ཏཏྠ ཋཔིཏེ ཨགྒལ༹ཾ དཏྭཱ རཀྑིཏབྦནྟི ཝུཏྟཾ ཧོཏི.

༧༠༩. གུཏྟཊྛཱནཾ གཧེཏྭཱ གཙྪནྟསྶ ཀཔྤིཡཀཱརཀསྶ ཨཝཏྟབྦཝོཧཱརཾ དསྶེཏུམཱཧ ‘‘ཨཱཧརེདམིད’’ནྟིཨཱདི. ཨཀཔྤིཡནྟི ཨེཏྠ ‘‘ཝཙན’’ནྟི ལབྦྷཏི. ཨེཝཾ ཨཀཔྤིཡཝཙནཾ ཨཝཏྭཱ སུརཀྑིཏཊྛཱནེ ཨཱཧརིཏྭཱ ཋཔིཏེ ཀིཾ ཀཱཏབྦནྟི? ཝིཀྐཱཡིཀེ པཏྟཙཱིཝརཱདིཀཔྤིཡབྷཎྜེ ཨཱཧཊེ ‘‘ཨམྷཱཀཾ ཨིམིནཱ ཨཏྠོ, ཨིམསྶ ཨེཝརཱུཔཾ མཱུལམྤི ཨཏྠི, ཀཔྤིཡཀཱརཀོ ཨེཝ ནཏྠཱི’’ཏི ཝཏྭཱ ཏེན ‘‘ཨཧཾ ཀཔྤིཡཀཱརཀོ, མཡ྄ཧཾ དསྶེཐཱ’’ཏི ཝུཏྟེ སཙེ རུཙྩཏི, དྭཱརཾ ཝིཝརིཏྭཱ ‘‘ཨིདཾ གཎྷཱ’’ཏི ཨཝཏྭཱ ‘‘ཨེཏྠ ཋཔིཏ’’ནྟི དསྶེཏྭཱ ཏསྨིཾ ཏསྶ ཨགྒྷཔྤམཱཎཾ ¶ གཧེཏྭཱ དེནྟེ ཨདྷིཝཱསེཏབྦཾ. ཨཏིརེཀཾ གཎྷནྟེ ‘‘མཡཾ ཏུམྷཱཀཾ བྷཎྜཾ ན གཎྷཱམ, གཙྪཐཱ’’ཏི ནཱིཧརིཏྭཱ ཨགྒལ༹ཾ དཏྭཱ ཀཔྤིཡཀཱརཀེ ལདྡྷེ ‘‘ཨམྷཱཀཾ ཨེཝརཱུཔེན ཨཏྠོ, ཨིདཾ ནཱམ མཱུལཾ ཨཏྠཱི’’ཏི ཝཏྭཱ ཏེན ཀིཎིཏྭཱ དིནྣེ ཨདྷིཝཱསེཏབྦནྟི ཨཊྛཀཐཱཡཾ ཝུཏྟནཡེན པཊིཔཛྫིཏབྦཾ.

༧༡༠. ཋཔེཏྭཱ རཱུཔིཡགྒཱཧནྟི ཨནནྟརསིཀྑཱཔདེ ཝཀྑམཱནསརཱུཔཾ སུཝཎྞཱདིརཱུཔིཡཾ པཊིགྒཧེཏྭཱ ནིསྶཛྫིཏྭཱ དེསིཏཱཔཏྟིཀཾ པུགྒལཾ ཋཔེཏྭཱ. ནིསྶཊྛཔརིཝཏྟིཏནྟི ཨེཏྠ ནིསྶཛྫིཏྭཱ ཨཱཔཏྟིཡཱ དེསིཏཱཡ ‘‘སཙེ ཏཏྠ ཨཱགཙྪཏི ཨཱརཱམིཀོ ཝཱ ཨུཔཱསཀོ ཝཱ’’ཏིཨཱདིནཱ (པཱརཱ. ༥༨༤) པདབྷཱཛནེ ཝུཏྟནཡེན ཏཏྠཱགཏཾ ཀཔྤིཡཀཱརཀཾ ‘‘ཨཱཝུསོ ཨིམཾ ཛཱནཱ’’ཏི ཝཏྭཱ ‘‘ཨིམིནཱ ཀིཾ ཨཱཧརིཡྻཏཱུ’’ཏི ཏེན ཝུཏྟེ ‘‘ཨིམཾ ཝཱ ཨིམཾ ཝཱ ཨཱཧརཱ’’ཏི ཨཝཏྭཱ ‘‘ཀཔྤིཡཾ ཨཱཙིཀྑིཏབྦཾ སཔྤི ཝཱ ཏེལཾ ཝཱ མདྷུ ཝཱ ཕཱཎིཏཾ ཝཱ’’ཏི (པཱརཱ. ༥༨༤) ཝུཏྟཏྟཱ བྷིཀྑཱུནཾ ཀཔྤིཡཝཏྠུམཏྟེ ཨཱཙིཀྑིཏེ ཏེན ནིསྶཊྛཝཏྠུཾ པརིཝཏྟེཏྭཱ ཨཱཧཊཾ ཀཔྤིཡབྷཎྜནྟི ཨཏྠོ.

༧༡༡. ཨཏྟནོ ¶ པཏྟབྷཱགམྤཱིཏི ཏཐཱ ཨཱཧཊེ ཀཔྤིཡབྷཎྜེ སངྒྷསྶ བྷཱཛིཡམཱནེ ཨཏྟནོ ཝསྶགྒེན ཨཏྟནོ པཏྟཀོཊྛཱསམྤི. པཊིགྒཱཧཀབྷིཀྑུནོཏི རཱུཔིཡཾ པཊིགྒཧེཏྭཱ ཨཱཔཛྫིཏྭཱ ནིསྶཛྫིཏྭཱ དེསིཏཱཔཏྟིཀསྶ བྷིཀྑུནོ ན ཝཊྚཏཱིཏི སམྦནྡྷོ. ཨཉྙཏོཏི ཨཏྟཏོ ཨཉྙསྨཱ པབྦཛིཏམནུསྶཱམནུསྶཏིརཙྪཱནགཏིཏྠིཔུརིསཱནཾ ཨཉྙཏརཏོ. ལདྡྷནྟི ཏེཧི ཨཏྟནཱ ལདྡྷཀོཊྛཱསཏོ དིནྣཝསེནཔི ལདྡྷཾ ཏཾ ཝཏྠུཾ.

༧༡༢. ཡཾ ཀིཉྩི པཙྩཡནྟི ཏཾ ཝཏྠུཾ པརིཝཏྟེཏྭཱ གཧིཏེསུ ཙཏཱུསུ པཙྩཡེསུ ཨཉྙཏརམྤི པཙྩཡཾ. ཨནྟམསོ པཐཝིཾ ཁཎིཏྭཱ ¶ ཨུཔྤཱདིཏོདཀམྤི དཱརཱུཧི ཨཱདིཏྟཨགྒིམྤི ཏེལེན ཛལིཏཔདཱིཔམྤི རུཀྑེ ཝཱ གེཧེ ཝཱ པཀཏིཚཱཡམྤི ཏཱལཔཎྞམྤི ཨུཔབྷོགཔརིབྷོགཱརཧཾ ཨཉྙམྤི ཡཾ ཀིཉྩཱིཏི ཨཊྛཀཐཱཡ ཝུཏྟནཡཾ ཨིམིནཱཝ སངྒཧིཏནྟི གཧེཏབྦཾ. ཡཐཱཧ ཨཊྛཀཐཱཡཾ ‘‘ཨནྟམསོ མཀྐཊཱདཱིཧི ཏཏོ ཧརིཏྭཱ ཨརཉྙེ ཋཔིཏཾ ཝཱ ཏེསཾ ཧཏྠཏོ གལི༹ཏྭཱ ཏིརཙྪཱནཔརིགྒཧིཏམྤི པཾསུཀཱུལམྤི ན ཝཊྚཏིཡེཝཱ’’ཏིཨཱདི (པཱརཱ. ཨཊྛ. ༢.༥༨༣-༥༨༤), ‘‘རཱུཔིཡཔཊིགྒཱཧཀསྶ པན ཀེནཙི པརིཡཱཡེན ཏཏོ ཨུཔྤནྣཔཙྩཡཔརིབྷོགོ ན ཝཊྚཏཱི’’ཏི (པཱརཱ. ཨཊྛ. ༢.༥༨༥) ཙཱཏི. བྷིཀྑུནོཏི རཱུཔིཡཔཊིགྒཱཧཀསྶ བྷིཀྑུསྶ.

༧༡༣. ཨཛ྄ཛྷཱརཱམེ ཝཱཏི ཨུཔརི ཝཀྑམཱནལཀྑཎེན པརིཙྪིནྣེ ཨཛ྄ཛྷཱརཱམེ ཝཱ. ཏཾ རཱུཔིཡཾ, ‘‘པཏིཏཾ དིསྭཱ’’ཏི སེསོ. ཨཛ྄ཛྷཱཝསཐེཔི ཝཱཏི ཝཀྑམཱནལཀྑཎེ ཨནྟོཨཱཝཱསེ ཙ. ནིཀྑིཔནྟསྶཱཏི ‘‘ཡསྶ བྷཝིསྶཏི, སོ ཧརིསྶཏཱི’’ཏི ཝུཏྟེ ཋཱནེ ཏསྨིཾ ཝཏྠུསྨིཾ གཎནཉྩ ཨུཔལཀྑཎཉྩ སལླཀྑེཏྭཱ ཋཔེནྟསྶ.

༧༡༤. ཏིཀཔཱཙིཏྟིཡཾ ཝུཏྟནྟི ‘‘རཱུཔིཡེ རཱུཔིཡསཉྙཱི, ཝེམཏིཀོ, ཨརཱུཔིཡསཉྙཱི རཱུཔིཡཾ པཊིགྒཎྷཱཏི, ནིསྶགྒིཡཾ པཱཙིཏྟིཡ’’ནྟི (པཱརཱ. ༥༨༦) བྷགཝཏཱ པཱཙིཏྟིཡཾ ཝུཏྟཾ. དུཀྐཊནྟི ཨེཏྠ ‘‘དྭིཀདུཀྐཊ’’ནྟི སཱམཏྠིཡཱ ལབྦྷཏི.

༧༡༥. ཀྲིཡཱཀྲིཡནྟི གཧཎེན ཨཱཔཛྫནཏོ ཀིརིཡཾ. པཊིཀྑེཔསྶ ཨཀརཎཏོ ཨཀིརིཡནྟི.

རཱུཔིཡཔཊིགྒཧཎཀཐཱཝཎྞནཱ.

༧༡༦-༧. ནིསྶགྒིཡསྶཱཔི ¶ ཝཏྠུནྟི ‘‘ནིསྶགྒིཡཔཱཙིཏྟིཡསྶ ཝཏྠཱུ’’ཏི པཋམསིཀྑཱཔདེ ནིདྡིཊྛེསུ རཛཏཱདཱིསུ ཙཏཱུསུ ཨཉྙཏརཾ ¶ ཝཏྠུཾ. དུཀྐཊསྶ ཙ ཝཏྠུཾ ཝཱཏི པཋམཾ དསྶིཏམུཏྟཱདིདུཀྐཊཝཏྠཱུསུ ཨཉྙཏརཾ ཝཱ, ཨིཧོབྷཡཏྠ ཧེཏུཕལསམྦནྡྷེ སཱམིཝཙནཾ. ཀཔྤིཡསྶ ཙ ཝཏྠུཾ ཝཱཏི ཡཐཱདསྶིཏེསུ ཨེཝ མུགྒམཱསཱདིཀཔྤིཡཝཏྠཱུསུ ཨཉྙཏརཾ ཝཱ, ཨིཧ ཨཝཡཝཱཝཡཝིསམྦནྡྷེ སཱམིཝཙནཾ. ཨཝཡཝཱཝཡཝཱིནཾ ཨབྷེདེཔི བྷེདཱུཔཙཱརཝསེན ཡཐཱ ‘‘སིལཱཔུཏྟཀསྶ སརཱིར’’ནྟི ཀཔྤིཡཝཏྠུནྟི ཝུཏྟཾ ཧོཏི ‘‘ཀཔྤིཡེན ཝཏྠུནཱ’’ཏི ཝཀྑམཱནཏྟཱ. ཨིདཱནེཏྠ དུཀྐཊཝཏྠུནོ, ཀཔྤིཡཝཏྠུནོ ཙ ནིསྶགྒིཡཝཏྠུནཱ པརིཝཏྟིཏཏྟཱ ཨཱཔཏྟི ཧོཏཱིཏི གཧེཏབྦཾ. ནིསྶགྒིཡཝཏྠུནཱ ཡོ པརིཝཏྟེཏི, ཏསྶ ཨཱཔཏྟཱིཏི ཡོཛནཱ.

དུཀྐཊསྶ ཝཏྠུནཱ, ཀཔྤིཡེན ཙ ཝཏྠུནཱ ཝཏྠུཾ ནིསྶགྒིཡསྶ པརིཝཏྟེཏི, ཨཱཔཏྟཱིཏི ཡོཛནཱ. ཨིདྷ ཨུབྷཡཏྠཱཔི པརིཝཏྟིཏསྶ ནིསྶགྒིཡཝཏྠུཏྟཱ ཨཱཔཏྟི ཧོཏི. ཨེཝཾ ཏཱིསུཔི ཋཱནེསུ ‘‘ཨཱཔཏྟཱི’’ཏི སཱམཉྙཝཙནེན ནིསྶགྒིཡཔཱཙིཏྟིཡམེཝ ཝུཏྟནྟི པཀརཎཏོ ལབྦྷཏི.

༧༡༨. དུཀྐཊསྶེཝ ཝཏྠུནཱ དུཀྐཊསྶ ཙ ཝཏྠུཾ ཝཱ པརིཝཏྟེཏི, དུཀྐཊནྟི ཡོཛནཱ. ‘‘ཝཏྠུཾ ཝཱ ཀཔྤིཡསྶཱ’’ཏི ཨིདཾ ཝུཏྟནཡམེཝ, ཀཔྤིཡཝཏྠུནྟི ཝུཏྟཾ ཧོཏི. ཨིམསྶ ཀཔྤིཡཝཏྠུནོཔི དུཀྐཊཝཏྠུནཱ པརིཝཏྟིཏཏྟཱ དུཀྐཊཾ ཧོཏཱིཏི གཧེཏབྦཾ.

༧༡༩. ‘‘ཝཏྠུནཱ ཀཔྤིཡསྶཱ’’ཏི ཨིདམྤི ཝུཏྟནཡམེཝ. ཀཔྤིཡཝཏྠུནཱཔི པརིཝཏྟིཏེ དུཀྐཊཝཏྠུཝསེན དུཀྐཊཾ ཧོཏཱིཏི ཨཱཧ ‘‘ཏཐཱ’’ཏི.

༧༢༠. ‘‘ཏཐཱ’’ཏི ཨིམིནཱ ‘‘ཝཏྠུནོ’’ཏི ཨིདཾ ཨཱཀཌྜྷཏི. ‘‘ནིསྶགྒིཡསྶཱ’’ཏི ཨིམིནཱ པཱཙིཏྟིཡམཱཧ. པུབྦནྟི པཋམཾ, པུབྦེ ¶ ཝུཏྟརཱུཔིཡཔཊིགྒཧཎསིཀྑཱཔདེཏི ཝུཏྟཾ ཧོཏི. ཨིམིནཱཏི རཱུཔིཡསཾཝོཧཱརསིཀྑཱཔདེན. པརིཝཏྟནཾ ཝཱརིཏནྟི སམྦནྡྷོ.

༧༢༡. རཱུཔིཡནྟི ཙ སཉྙིསྶཱཏི ‘‘རཱུཔིཡཾ ནཱམ སཏྠུཝཎྞོ ཀཧཱཔཎོ ལོཧམཱསཀོ དཱརུམཱསཀོ ཛཏུམཱསཀོ, ཡེ ཝོཧཱརཾ གཙྪནྟཱི’’ཏི (པཱརཱ. ༥༨༩) པདབྷཱཛནེ ཝུཏྟེསུ རཱུཔིཡསཉྙིཏེསུ ཝཏྠཱུསུ ‘‘ཨཉྙཏར’’ནྟི སཉྙིསྶ. ཨརཱུཔིཡེཏི ཁརཔཏྟཱདིམྷི. ཏེན ཨརཱུཔིཡེན. ‘‘ཙེཏཱཔེནྟསྶ ཨརཱུཔིཡ’’ནྟི པདཙྪེདོ. ‘‘ཨརཱུཔིཡེ རཱུཔིཡསཉྙཱི རཱུཔིཡཾ ཙེཏཱཔེཏི ¶ , ནིསྶགྒིཡཾ པཱཙིཏྟིཡ’’ནྟི (པཱརཱ. ༥༩༡) ཝུཏྟཏྟཱ རཱུཔིཡཔརིཝཏྟནེ དུཀྐཊསྶ ཨབྷཱཝཏོ, པཱཙིཏྟིཡསྶ ཙ སམྦྷཝཏོ རཱུཔིཡཾ ན གཧེཏབྦཾ. ཨརཱུཔིཡེ རཱུཔིཡཾ ཨིཏི སཉྙིསྶ ཙ ཝིམཏིསྶ ཙ ཨརཱུཔིཡཾ ཙེཏཱཔེནྟསྶ ཏེན དྭེ དུཀྐཊཱནི ཧོནྟཱིཏི ཡོཛནཱ.

༧༢༢. ཨརཱུཔིཡེ ཨརཱུཔིཡནྟི སཉྙིསྶཱཏི ཨེཏྠ ‘‘ཨརཱུཔིཡཾ པརིཝཏྟེནྟསྶཱ’’ཏི སེསོ. པཉྩཧཱིཏི སཧཏྠེ ཀརཎཝཙནཾ, ‘‘སཧདྷམྨིཀེཧཱི’’ཏི སེསོ, པཉྩཧི སཧདྷམྨིཀེཧི སདྡྷིནྟི ཨཏྠོ. ཝདཏོཏི ཝོཧརཏོ, ཀཡཝིཀྐཡཾ ཀརོནྟསྶཱཏི ཨཏྠོ. བྷིཀྑུབྷིཀྑུནིསཱམཎེརསཱམཎེརིསིཀྑམཱནཱསངྑཱཏེཧི པཉྩཧི སཧདྷམྨིཀེཧི ཨརཱུཔིཡཾ པརིཝཏྟེནྟསྶ ཨནཱཔཏྟཱིཏི ཨཏྠོ.

༧༢༣. སཾཝོཧཱརེན སམུཊྛཱནཏོ ཀྲིཡསམུཊྛཱནཾ.

རཱུཔིཡསཾཝོཧཱརཀཐཱཝཎྞནཱ.

༧༢༤. ཀཔྤིཡཾ ནཱམ ‘‘ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱ, ཨནྟམསོ ཙུཎྞཔིཎྜོཔི དནྟཀཊྛམྤི དསིཀསུཏྟམྤཱི’’ཏི ¶ པདབྷཱཛནེ ཝུཏྟཱནི ཀཔྤིཡཝཏྠཱུནི. ཡཐཱཧ ཨཊྛཀཐཱཡཾ ‘‘ཙཱིཝརཱདཱིནཾ ཀཔྤིཡབྷཎྜཱནཾ ཝསེན ཨནེཀཝིདྷ’’ནྟི. ཀཔྤིཡེནེཝཱཏི ཏེནེཝ ཀཔྤིཡེན ཝཏྠུནཱ. ‘‘ཀཡཝིཀྐཡཾ སམཱཔཛྫེཡྻཱཏི ‘ཨིམིནཱ ཨིམཾ དེཧི, ཨིམིནཱ ཨིམཾ ཨཱཧར, ཨིམིནཱ ཨིམཾ པརིཝཏྟེཧི, ཨིམིནཱ ཨིམཾ ཙེཏཱཔེཧཱི’ཏི ཨཛ྄ཛྷཱཙརཏཱི’’ཏི (པཱརཱ. ༥༩༥) ཝཙནཏོ ‘‘པརིཝཏྟཡཏོ’’ཏི ཨིམསྶ ‘‘ཀཡཝིཀྐཡཾ སམཱཔཛྫཏོ’’ཏི པརིཡཱཡོ.

ཏཏྠ ཨཉྙསྶ ཧཏྠཏོ ཀཔྤིཡཝཏྠུནཱ པརིཝཏྟེཏྭཱ གཧཎཾ ཀཡོ ནཱམ. ཨཏྟནོ ཧཏྠཏོ ཀཔྤིཡཝཏྠུཾ པརིཝཏྟེཏྭཱ དཱནཾ ཝིཀྐཡོ. ཡཐཱཧ ཨཊྛཀཐཱཡཾ ‘‘ཨིམིནཱ ཨིམཾ དེཧཱི’ཏིཨཱདིནཱ ཧི ནཡེན པརསྶ ཀཔྤིཡབྷཎྜཾ གཎྷནྟོ ཀཡཾ སམཱཔཛྫཏི, ཨཏྟནོ ཀཔྤིཡཾ དེནྟོ ཝིཀྐཡ’’ནྟི. ‘‘ཋཔེཏྭཱ སཧདྷམྨིཀེ’’ཏི ཝུཏྟཏྟཱ པརིཝཏྟཡཏོཏི ཨེཏྠ ཨཉྙེཧི སདྡྷིནྟི ལབྦྷཏི. ཨེཏྠ ཨཉྙེ ནཱམ གིཧིནོ ཨིཏྠིཔུརིསཱ, སཱསནཏོ བཱཧིརཱ པབྦཛིཏཱ ཙ. ཏསྨཱ ཨཡཾ ཀཡཝིཀྐཡོ ཨནྟམསོ མཱཏཱཔིཏཱུཧིཔི ན ཀཱཏབྦོཡེཝ. ཡཐཱཧ ཨཊྛཀཐཱཡཾ ‘‘ཨཡཉྷི ཀཡཝིཀྐཡོ ¶ ཋཔེཏྭཱ པཉྩ སཧདྷམྨིཀེ ཨཝསེསེཧི གིཧིཔབྦཛིཏེཧི ཨནྟམསོ མཱཏཱཔིཏཱུཧིཔི སདྡྷིཾ ན ཝཊྚཏཱི’’ཏི (པཱརཱ. ཨཊྛ. ༢.༥༩༥).

༧༢༥. ཨཀཔྤིཡསྶ ཝཏྠུསྶཱཏི ཨིམསྨིཾ སིཀྑཱཔདེ ཝུཏྟཙཱིཝརཱདིཀཔྤིཡཝཏྠུཏོ ཨཉྙསྶ ནིསྶགྒིཡདུཀྐཊཝཏྠུསྶ. ཏེནེཝཱཏི ཨཀཔྤིཡཝཏྠུནཱཡེཝ. ‘‘ཀཔྤིཡསྶ ཙཱ’’ཏི པཱཋསེསོ, ཏེནེཝ ཨཀཔྤིཡེན ཝཏྠུནཱ ཀཔྤིཡསྶ ཝཏྠུསྶ པརིཝཏྟནཉྩཱཏི ཡོཛནཱ. ཨེཝཉྷི པཱཋསེསེ ཨཀཏེ ཨཀཔྤིཡེན ཝཏྠུནཱ ཀཔྤིཡསྶ པརིཝཏྟནཾ ཀཡཝིཀྐཡེ སངྒཧེཏབྦཾ སིཡཱ, ཏཾ ན ཡུཛྫཏི ཏསྶ རཱུཔིཡསཾཝོཧཱརེཡེཝ སངྒཧིཏཏྟཱ, ཨིདྷ ཙ ‘‘ཀཔྤིཡཝཏྠུསྶེཝ ཀཔྤིཡཝཏྠུནཱ ¶ པརིཝཏྟནཾ ཀཡཝིཀྐཡོ’’ཏི ནིཡམིཏཏྟཱ. ནིདྡིཊྛནྟི ‘‘ཨཀཔྤིཡབྷཎྜཔརིཝཏྟནཉྷི ཀཡཝིཀྐཡསངྒཧཾ ན གཙྪཏཱི’’ཏི (པཱརཱ. ཨཊྛ. ༢.༥༩༤) ཨཊྛཀཐཱཡཾ ནིདྡིཊྛནྟི ཨཏྠོ.

༧༢༦. ཏསྨཱཏི ཡསྨཱ ཨཉྙཏྲ སཧདྷམྨིཀེཧི ཀཔྤིཡཝཏྠུསྶཱཔི ཀཡཝིཀྐཡོ ན ཝཊྚཏི, ཨཀཔྤིཡསྶ, ཀཔྤིཡསྶ ཙ ཝཏྠུནོ ཨཀཔྤིཡེནེཝ ཝཏྠུནཱ པརིཝཏྟནཉྩ རཱུཔིཡསཾཝོཧཱརེ སངྒཧིཏཏྟཱ ཀཡཝིཀྐཡསངྒཧཾ ན གཙྪཏི, ཏསྨཱ.

༧༢༩. ཨིདཾ ནཱམཱཏི ཨོདནཱདིཀཔྤིཡཝཏྠུམེཝ ཨཱཧ.

༧༣༠-༡. ‘‘གཧེཏྭཱ’’ཏིཨཱདིགཱཐཱཡ ཝཏྠུལཀྑཎསྶ ཨུདཱཧརཎཾ དསྶེཏྭཱཝ ཨཱཔཏྟིབྷེདཾ དསྶེཏུམཱཧ ‘‘ཝིགྷཱསཱད’’ནྟིཨཱདི. ཚལླིནྟི རུཀྑཏཙཾ. ཝལླིནྟི ལཏཾ. ཀཊྛནྟི ཨིནྡྷནདཱརུཾ. དཱརུནྟི གེཧསམྦྷཱརཱདིདཱརུཾ. ཝིཔལླཱསེནཱཔི ཝཏྟབྦཾ ‘‘ཝལླིཾ ཝཱ པན ཚལླིཾ ཝཱ, དཱརུཾ ཝཱ ཀཊྛམེཝ ཝཱ’’ཏི. ཝཏྠཱུནནྟི ཏཐཱ ཝཏྭཱ ཨཱཧརཱཔིཏཱནཾ ཚལླིཨཱདིཝཏྠཱུནཾ. ཀཡཝིཀྐཡེ ཨཱཔཏྟིཡོ ཧོནྟཱིཏི ཡོཛནཱ, ནིསྶགྒིཡཔཱཙིཏྟིཡཱཔཏྟིཡོ ཧོནྟཱིཏི ཝུཏྟཾ ཧོཏི.

༧༣༢. ‘‘ཨིཏི ཨེཝཱ’’ཏི པདཙྪེདོ, ‘‘པིཝིཏྭཱ’’ཏིཨཱདིནཱ ནཡེན པུབྦཀཱལེ ཝིཧིཏཔཙྩཡནྟཾ ཨཀཏྭཱ ཝུཏྟནཡེནེཝཱཏི ཨཏྠོ.

༧༣༣. བྷཱུམིཡཱ ལིམྤནེཏི ཡོཛནཱཡཾ པན སེནཱསནབྷཱུམིཡཾ པརིབྷཎྜཀརཎཀཱལ༹ཀཱདིཝཎྞཀརཎཝསེན ¶ ལེཔནེ. ཝཏྠུདྷོཝནེཏི ཙཱིཝརཱདིཝཏྠཱུནཾ དྷོཝནེ. ཨེཏྠཱཏི ཏེསུ ཝུཏྟཔྤཀཱརེསུ. ཨེཏེསཾ གཧཎསྶ ཨུཔལཀྑཎཏྟཱ ཨེཝརཱུཔེསུ ཨཉྙེསུ ཋཱནེསུ.

༧༣༤. ཨཡནྟི ¶ བྷཱུམིསོདྷནཱདིཝསེན ཨཱཔནྣཱ པཱཙིཏྟིཡཱཔཏྟི.

༧༣༥. ཋཔེཏྭཱ བྷཎྜསཱམིཀནྟི ཨེཏྠ བྱཏིརེཀཝསེན ཨཉྙསྶ ཀཔྤིཡཀཱརསྶཱཏི ལབྦྷཏི.

༧༣༦. བྷཱསཏོ ཨནཱཔཏྟཱིཏི ཡོཛནཱ. སེསམེཏྠ ཨུཏྟཱནམེཝ.

ཀཡཝིཀྐཡཀཐཱཝཎྞནཱ.

ཀོསིཡཝགྒོ དུཏིཡོ.

༧༣༧. ཀཔྤིཡཱ པཏྟཱ མཏྟིཀཱཡོམཡཱ ཛཱཏིཏོ དུཝེཏི ཡོཛནཱ. ཝཎྞཱཏི པམཱཎཱནི. ཡཐཱཧ ཨཊྛཀཐཱཡཾ ‘‘ཏཡོ པཏྟསྶ ཝཎྞཱཏི ཏཱིཎི པཏྟསྶ པམཱཎཱནཱི’’ཏི (པཱརཱ. ཨཊྛ. ༢.༦༠༢). ཏེནཱཧ ‘‘ཨུཀྐཊྛོ མཛ྄ཛྷིམོམཀོ’’ཏི.

༧༣༨. དྭིནྣཾ ཏཎྜུལནཱལཱི༹ནནྟི སུཀོཊྚིཏཱནཾ ཨཁཎྜཱནཾ པུརཱཎསཱལིཏཎྜུལཱནཾ དྭེ ནཱལི༹ཡོ གཧེཏབྦཱ. ཡཐཱཧ ཨཊྛཀཐཱཡཾ ‘‘ཨནུཔཧཏཔུརཱཎསཱལིཏཎྜུལཱནཾ སུཀོཊྚིཏཔརིསུདྡྷཱན’’ནྟི (པཱརཱ. ཨཊྛ. ༢.༦༠༢). བྷཏྟནྟི ཨཝསྶཱཝིཏཾ ཨནུཏྟཎྜུལཾ ཨཀིལིནྣཾ ཨཔིཎྜིཏཾ སུཝིསདཾ ཀུནྡམཀུལརཱསིསདིསཾ སུཔཀྐོདནམེཝ གཧེཏབྦཾ. ཡཐཱཧ ཨཊྛཀཐཱཡཾ ‘‘ཨནུཏྟཎྜུལཾ ཨཀིལིནྣཾ ཨཔིཎྜིཏཾ སུཝིསདཾ ཀུནྡམཀུལརཱསིསདིསཾ ཨཝསྶཱཝིཏོདན’’ནྟི (པཱརཱ. ཨཊྛ. ༢.༦༠༢). མགདྷནཱལི༹ཡཱཏི མགདྷརཊྛེ ནཱལི༹ཡཱ, སཱ ནཱལི༹ ཏིལཱནཾ ཨཊྛཔསཏཱནི གཎྷཱཏི. ཏེནཱཧུ པོརཱཎཱ –

‘‘ཁཱརིདསདྭཡཾ ¶ ཝཱཧོ, ཁཱརཱི དོཎཊྛཀདྭཡཾ;

དྭིཨཊྛནཱལི༹ཡོ དོཎོ, ནཱལེ༹ཀཱ པསཏཊྛཀཾ;

ལཀྑཾ ཏིལཱནཾ པསཏཾ, ཨེཏཾ ཝུཏྟཾ པམཱཎཏོ’’ཏི.

‘‘མགདྷནཱལི༹ ¶ ནཱམ ཨཌྜྷཏེརསཔལཱ ཧོཏཱི’’ཏི (པཱརཱ. ཨཊྛ. ༢.༦༠༢) ཨནྡྷཀཊྛཀཐཱཡཾ ཝུཏྟཾ. ཏབྦཎྞནཱཡ ‘‘ཨཌྜྷཏེརསཔལཱནི མཱསེཧི གཧེཏབྦཱནཱི’’ཏི ཝུཏྟཾ. ཀེཙི པནཱཧུ –

‘‘ཙཏུཔྤསཏིཀཱ མུཊྛི, པལཉྩེཏཾ ཙཏུགྒུཎཾ;

ཀུཌུཝཔྤསཏཉྩེཝ, ཙཏྟཱརི ཙེཝ ནཱལི༹ ཏུ.

‘‘སོཡེཝ པཏྠོ ཙཏྟཱརོ, པཏྠཱ ཨལ༹ྷཀམུཙྩཏེ;

ཨལ༹ྷཀཱནམྤི ཙཏྟཱརི, ‘དོཎོ’ཏི པརིཀིཏྟིཏོ’’ཏི.

ཨཱཙརིཡཱ པན ‘‘ཨཊྛཔསཏཱ མཱགདྷནཱལཱི༹’’ཏི པུབྦཔཀྑམེཝ རོཙཡནྟི.

ཁཱདནཉྩ ཙཏུབྦྷཱགནྟི ཏསྨིཾ བྷཏྟེ ཙཏུདྷཱ ཝིབྷཏྟེ ཨེཀབྷཱགམཏྟཾ ཧཏྠཧཱརིཡགྷནམུགྒསཱུཔནྟི ཨཏྠོ. ཡཐཱཧ ཨཊྛཀཐཱཡཾ ‘‘ཏསྶ ཨོདནསྶ ཙཏུཏྠབྷཱགཔྤམཱཎོ ནཱཏིགྷནོ ནཱཏིཏནུཀོ ཧཏྠཧཱརིཡོ སབྦསམྦྷཱརསངྑཏོ མུགྒསཱུཔོ པཀྑིཔིཏབྦོ’’ཏི (པཱརཱ. ཨཊྛ. ༢.༦༠༢).

བྱཉྫནཉྩ ཏདཱུཔིཡནྟི ཡཱཝ ཙརིམཱལོཔཾ, ཏཱཝ སབྦཱལོཔཱནུརཱུཔཾ མཙྪམཾསཱདིབྱཉྫནཉྩ. ཡཐཱཧ ཨཊྛཀཐཱཡཾ ‘‘ཨཱལོཔསྶ ཨཱལོཔསྶ ཨནུརཱུཔཾ ཡཱཝཙརིམཱལོཔཔྤཧོནཀཾ མཙྪམཾསཱདིབྱཉྫནཾ པཀྑིཔིཏབྦ’’ནྟི. ཨེཏྠ ཙ ཨཱལོཔསྶ ཨཱལོཔསྶ ཨནུརཱུཔནྟི ‘‘བྱཉྫནསྶ མཏྟཱ ནཱམ ཨོདནཙཏུཏྠབྷཱགོ’’ཏི (མ. ནི. ཨཊྛ. ༢.༣༨༧) བྲཧྨཱཡུསུཏྟསྶ ཨཊྛཀཐཱཡཾ ཝུཏྟཏྟཱ ཨཱལོཔསྶ ཙཏུཏྠབྷཱགཔྤམཱཎཾ བྱཉྫནཾ ཨཱལོཔསྶ ཨནུརཱུཔནྟི གཧེཏབྦཾ. ཨིདྷ པན སཱུཔསྶེཝ ཨོདནཙཏུཏྠབྷཱགཔྤམཱཎཾ ¶ དསྶེཏྭཱ ཨེཏསྶ ལཀྑཎེ དསྶིཏེ ཨིཏརསྶཱཔི དསྶིཏམེཝ ཧོཏཱིཏི བྱཉྫནསྶ ཏཐཱ ཝིསེསེཏྭཱ པམཱཎཾ ན དསྶིཏཾ. ཨོདནེ པཀྑིཔིཏབྦཱནི སཔྤིཏེལཏཀྐརསཀཉྫིཀཱདཱིནི གཎནཱུཔགཱནི ན ཧོནྟི.

༧༣༩. ཏཾ སབྦནྟི ཡཐཱཝུཏྟབྷཏྟཱདིནིརཝསེསཾ. གཎྷཏཱིཏི ཝཀྑམཱནེཧི ཏཱིཧི པཀཱརེཧི གཎྷཱཏི. ཏསྶཱཏི ཨུཀྐཊྛསྶ པཏྟསྶ. ཨུཔཌྜྷོཏི ཏསྨིཾ པཏྟེ གཎྷནཀདབྦསམྦྷཱརགཱཧཱི པཏྟོ ཏཾསཧཙརིཡེན ¶ ‘‘ཨུཔཌྜྷོ’’ཏི ཝུཏྟོ. ཏདུཔཌྜྷོ ཙཱཏི ཨེཏྠཱཔི ཨེསེཝ ནཡོ. ཏསྶ མཛ྄ཛྷིམསྶ པཏྟསྶ ཨུཔཌྜྷོ ཏདུཔཌྜྷོཏི གཧེཏབྦཾ.

༧༤༠. ཨིམེསུ ཏཱིསུ པཏྟེསུ ཨུཀྐཊྛསྶ ཝུཏྟཾ ཨོདནཱདི སབྦཾ ཡསྨིཾ པཏྟེ པཀྑིཏྟཾ, ཏསྶ མུཁཝཊྚིམཏྠཀེ པུཉྫིཡམཱནཾ ཧཱིརཀཾ ཧེཊྛཱབྷཱགེ ཕུསཏི, སོ ཨུཀྐཊྛམཛ྄ཛྷིམོ ནཱམ, ཧཱིརཏོ ཨཏིརེཀཾ ཏིཊྛཏི, སོ ཨུཀྐཊྛོམཀོ ནཱམ, ཨནྟོཔཏྟེ མུཁཝཊྚིཡཱ ཧེཊྛིམནྟཾ ཨཔྤཏྭཱ ཏིཊྛཏི, སོ ཨུཀྐཊྛུཀྐཊྛོ ནཱམ, ཨེཝཾ མཛ྄ཛྷིམོ ཙ ཨོམཀོ ཙ པཙྩེཀཾ ཏིཝིདྷོ ཧོཏཱིཏི སབྦེ ནཝ པཏྟཱ ཧོནྟཱིཏི དསྶེཏུམཱཧ ‘‘ཨུཀྐཊྛསྶཱ’’ཏིཨཱདི. ཏསྶེཝཱཏི ཨུཀྐཊྛསྶེཝ. ཨོམཀོ ཙ མཛ྄ཛྷིམོ ཙཱཏི ཨོམཀམཛ྄ཛྷིམཱ. ཨིདྷ མཛ྄ཛྷིམོ ཙ ཨོམཀོ ཙ ཨུཀྐཊྛསྶེཝ བྷེདོ. ཨེས ནཡོ ཨིཏརདྭཡེཔི. ‘‘ཨེཝ’’ནྟི ཨིམིནཱ ཡཐཱ ‘‘ཨུཀྐཊྛུཀྐཊྛོ ཨུཀྐཊྛོམཀོ ཨུཀྐཊྛམཛ྄ཛྷིམོ’’ཏི ཡོཛེཏབྦོ, ཨེཝཾ མཛ྄ཛྷིམོམཀཱནམྤི ཡཐཱཀྐམཡོཛནཾ དསྶེཏི ‘‘མཛ྄ཛྷིམོ མཛ྄ཛྷིམུཀྐཊྛོ མཛ྄ཛྷིམོམཀོ, ཨོམཀུཀྐཊྛོ ཨོམཀམཛ྄ཛྷིམོ ཨོམཀོམཀོ ཙཱ’’ཏི.

༧༤༡. ཏེསཱུཏི ¶ ནཝསུ པཏྟེསུ. ཏསྨཱཏི ཨཔཏྟབྷཱཝཏོ. ན གཙྪནྟཱིཏི ཨུཀྐཊྛུཀྐཊྛཉྩ ཨོམཀོམཀཉྩཱཏི དྭེ ཨཔེཀྑིཏྭཱ བཧུཝཙནཾ ཀཏཾ. ཨེཏེ བྷཱཛནསངྑེཔེན པརིབྷུཉྫིཏབྦཱཏི. ཡཐཱཧ ཨཊྛཀཐཱཡཾ ‘‘ཏསྨཱ ཨེཏེ བྷཱཛནཔརིབྷོགེན པརིབྷུཉྫིཏབྦཱ’’ཏི (པཱརཱ. ཨཊྛ. ༢.༦༠༢).

༧༤༢. པཏྟལཀྑཎསཾཡུཏནྟི ཨེཏྠ པཏྟལཀྑཎཾ ནཱམ ཡཐཱཝུཏྟཔམཱཎཡུཏྟཏཱ, ‘‘ཨཡོཔཏྟོ པཉྩཧི པཱཀེཧི པཀྐོ མཏྟིཀཱཔཏྟོ དྭཱིཧི པཱཀེཧི པཀྐོ’’ཏི (པཱརཱ. ཨཊྛ. ༢.༦༠༨) ཝུཏྟཱ པཱཀསམྤཏྟི, ཀིཎིཏྭཱ གཎྷཱཏི ཙེ, ཏསྶ དཱཏབྦམཱུལསྶ ཨསེསེཏྭཱ དིནྣབྷཱཝོ, ཚིདྡཱབྷཱཝོ, ཚིནྣརཱཛཱིནཾ ཨབྷཱཝོཏི པཉྩཝིདྷཾ. ཧོཏི ཙེཏྠ –

‘‘པམཱཎཡུཏྟཏཱ པཱཀ-སམྤཏྟི དིནྣམཱུལཏཱ;

ཨཙྪིདྡཱརཱཛིཏཱ ཙེཏི, པཏྟལཀྑཎཔཉྩཀ’’ནྟི.

‘‘ཨདྷིཊྛཱཡ ཝཱ ཝིཀཔྤེཏྭཱ ཝཱ’’ཏི ཝཱ-སདྡོ ཡོཛེཏབྦོ. ཨདྷིཊྛཱཡཱཏི པཋམཾ པརིབྷུཏྟེ པཏྟེ སཏི ཏཾ པཙྩུདྡྷརིཏྭཱ ཨདྷིཊྛཱཏབྦཔཏྟོ ཧཏྠཔཱསེ ཙེ ཧོཏི, ཝཀྑམཱནནཡེན ‘‘ཨིམཾ པཏྟཾ ཨདྷིཊྛཱམཱི’’ཏི ¶ ཝཙཱིབྷེདཀརཎཝསེན ཝཱཙཱཡ ཝཱ ཝཙཱིབྷེདཾ ཨཀཏྭཱ ཨེཝམེཝ ཙིནྟེཏྭཱ ཧཏྠེན གཧེཏྭཱ ཕནྡཱཔེནྟེན ཀཱཡེན ཝཱ དཱུརེ ཙེ ཧཏྠཔཱསཱ ཧོཏི, ཋཔིཏཊྛཱནཾ སལླཀྑེཏྭཱ ‘‘ཨེཏཾ པཏྟཾ ཨདྷིཊྛཱམཱི’’ཏི ཝཱཙཱ བྷིནྡིཏབྦཱཏི ཨཊྛཀཐཱཡཾ (པཱརཱ. ཨཊྛ. ༢.༦༠༨ ཨཏྠཏོ སམཱནཾ) ཝུཏྟནཡེན ཨེཀཀེན ཝཱ པཙྪཱ སཏིསམྨོསེ སརཱཔེཏྭཱ ཀུཀྐུཙྩཾ ཝཱུཔསམེཏུཾ སམཏྠསྶ པུགྒལསྶ སནྣིདྷཱནེ ཝཱ ཨདྷིཊྛཱཡཱཏི ཝུཏྟཾ ཧོཏི. ‘‘ཨཉྙསྶ སནྟིཀེ ཨདྷིཊྛཱནེ ཨཡམཱནིསཾསོ – སཙསྶ ‘ཨདྷིཊྛིཏོ ནུ ཁོ མེ, ནོ’ཏི ཝིམཏི ཨུཔྤཛྫཏི, ཨིཏརོ སཱརེཏྭཱ ཝིམཏིཾ ཚིནྡིསྶཏཱི’’ཏི ¶ (པཱརཱ. ཨཊྛ. ༢.༦༠༨) ཨཡམཏྠོ ཨཊྛཀཐཱཡཾ ཝུཏྟོ. ‘‘དྭེ པཏྟེ ཨདྷིཊྛཱཏུཾ ན ལབྷཏཱི’’ཏི གཎྛིཔདེ ཝུཏྟཾ.

ཝིཀཔྤེཏྭཱཏི (པཱཙི. ༣༧༣; པཱརཱ. ཨཊྛ. ༢.༦༠༨; ཀངྐཱ. ཨཊྛ. ཝིཀཔྤནསིཀྑཱཔདཝཎྞནཱ) ཏྠ ཝིཀཔྤེཏབྦསྶ པཏྟསྶ ཨེཀཏྟབཧུཏྟཾ, སནྣིཧིཏཱསནྣིཧིཏཏྟཉྩ སལླཀྑེཏྭཱ ཨེཀཾ ཙེ སནྣིཧིཏཾ, ‘‘ཨིམཾ པཏྟཾ ཏུཡ྄ཧཾ ཝིཀཔྤེམཱི’’ཏི ཝཱ ‘‘ཨིམཾ པཏྟཾ ཏིསྶསྶ བྷིཀྑུནོ ཝིཀཔྤེམཱི’’ཏི ཝཱ ཨཱདིནཱ ནཡེན ཨེཀཾ ཝིཀཔྤེཏྭཱཏི ཝུཏྟཾ ཧོཏི. ཨེཏྠ ‘‘པརིབྷུཉྫེཡྻཱ’’ཏི ཝུཏྟཏྟཱ, ‘‘མཡ྄ཧཾ སནྟཀཾ པརིབྷུཉྫེཧི ཝཱ ཝིསྶཛྫེཧི ཝཱ ཡཐཱཔཙྩཡཾ ཝཱ ཀརོཧཱི’’ཏི ཏེན ཨཔཙྩུདྡྷཊེ པརིབྷུཉྫིཏུཾ ཨཡུཏྟཏྟཱ ‘‘ཝིཀཔྤེཏྭཱ’’ཏི པཙྩུདྡྷཊཝིསེསོ གཧེཏབྦོ.

༧༤༣. དྷཱརེཡྻཱཏི ཨནདྷིཊྛཧིཏྭཱ, ཨཝིཀཔྤེཏྭཱ ཙ པརིབྷུཉྫིཏབྦོ. ཏཾ ཀཱལཾ པཏྟཾ ཨཏིཀྐཱམཡཏོཏི ཡོཛནཱ. ‘‘ནིསྶགྒིཡ’’ནྟི ཨིམིནཱཔི ‘‘པཏྟ’’ནྟི ཨིདཾ ཡུཛྫཏི. པཏྟ-སདྡོ མཱགདྷིཀཱནཾ དྭིལིངྒཀོ, ཏསྨཱ ཨེཝཾ ཝུཏྟོ.

༧༤༤. ཨདྷིཊྛིཏཝིཀཔྤིཏེསུ ཨནནྟོགདྷཏྟཱ ཨཏིརེཀབྷཱཝཾ དསྶེཏུམཱཧ ‘‘ཡཾ པཏྟ’’ནྟིཨཱདི.

༧༤༥. སམྨུཁེཏི ཨཌྜྷཏེཡྻཧཏྠཔྤདེསཏོ ཨནྟོ ཋིཏཾ པཏྟཾ. དཱུརསྨིནྟི ཨཌྜྷཏེཡྻརཏནཏོ པརབྷཱགེ ‘‘ཨནྟོགབྦྷེ ཝཱ ཨུཔརིཔཱསཱདེ ཝཱ སཱམནྟཝིཧཱརེ ཝཱ’’ཏི ཨཊྛཀཐཱཡཾ ཝུཏྟཔྤཀཱརེ དཱུརེཔི. ཡཏྠ ཀཏྠཙི ཝིཀཔྤནཀཱལེཔི སནྟིཀདཱུརཝཙནབྷེདཱ ཨེཝམེཝ ཡོཛེཏྭཱ ཝཏྟབྦཱ. ‘‘ཝིཀཔྤེཏུཾ ¶ པན བཧཱུནིཔི ལབྦྷཏཱི’’ཏི གཎྛིཔདེ ཝུཏྟཾ. ཨཡཾ ནཡོཏི ‘‘ཨིམཾ པཏྟཾ པཙྩུདྡྷརཱམཱི’’ཏིཨཱདིནཡོ.

༧༤༦. ཝཱཙཱཀཱཡཝསེན ¶ དུཝིདྷེ ཨདྷིཊྛཱནེ ཝཱཙཱདྷིཊྛཱནཾ དསྶེཏྭཱ ཀཱཡཱདྷིཊྛཱནཾ དསྶེཏུམཱཧ ‘‘ཨཱབྷོག’’ནྟིཨཱདི. ཨཱབྷོགནྟི ‘‘ཨིམཾ པཏྟཾ ཨདྷིཊྛཱམཱི’’ཏི ཨཱབྷོགཾ. ‘‘མནསཱ’’ཏི ཨིམིནཱ ན ཝཙསཱཏི ཝུཏྟཾ ཧོཏི. ཀཱཡཝིཀཱརོཝ ཀཱཡཝིཀཱརཀཾ, ཧཏྠེན ཕནྡཱཔནཱདིཀཱཡཀིརིཡཱཏི ཨཏྠོ. ཨེཏེནེཝ ཀཱཡཱདྷིཊྛཱནཾ ཧཏྠེན ཨཔཏྟབྦེ དཱུརེ ན ཀཱཏབྦནྟི དསྶེཏི.

༧༤༧-༨. ‘‘ཛཧཏི ཨདྷིཊྛཱན’’ནྟི པདཙྪེདོ. དཱནཏོཏི ཨཉྙསྶ དཱནེན. བྷེདཀཏོཏི བྷིཛྫནེན. ནཱསཏོཏི པཏྟསཱམིཀསྶ ཀཱལཀིརིཡཱཡ. ཝིབྦྷམཏོཏི སིཀྑཾ ཨཔཙྩཀྑཱཡ གིཧིབྷཱཝཱུཔགམནེན. ཨུདྡྷཱརཏོཏི པཙྩུདྡྷརཎེན. པཙྩཀྑཏོཏི སིཀྑཱཔཙྩཀྑཱནེན. པརིཝཏྟནཏོཏི ལིངྒཔརིཝཏྟནེན. གཱཧཏོཏི ཝིསྶཱསགྒཧཎེན, ཨཙྪིནྡིཏྭཱ གཧཎེན ཙ.

ཀངྒུསིཏྠཔྤམཱཎེནཱཏི སཏྟནྣཾ དྷཉྙཱནཾ ཁུདྡཀཏརསྶ ཀངྒུནོ སིཏྠཔྤམཱཎེན. ཁེནཱཏི མུཁཝཊྚིཡཱ དྭངྒུལཏོ ཧེཊྛཱ ཨཱཀཱསཔརིཡཱཡེན ཚིདྡེན. ཨཱཎིཡཱ ཝཱཏི ཨཡོམཡཱཡ ཨཱཎིཡཱ ཝཱ.

༧༥༠-༡. མཎིཔཏྟོཏི མཎིནཱ ཀཏོ. ཝེལུ༹རིཡུབྦྷཝོཏི མརཀཏམཎིམཡོ. ཕལིཀུབྦྷཝོཏི ཕལིཀཔཱསཱཎེན ཀཏོ. ཀཱཙམཡོཏི ཀཱཙམཏྟིཀཱམཡོ. ཀཾསམཡོཏི ཀཾསལོཧེན ཀཏོ. ཏིཔུམཡོཏི ཀཱལ༹ཏིཔུམཡོ. སཱིསམཡོཏི སེཏཏིཔུམཡོ. ཝིཔལླཱསེན ཙ ཝདནྟི. སཛ྄ཛྷུམཡོཏི རཛཏམཡོ.

༧༥༢. གྷཊཀཊཱཧོཏི གྷཊཀཔཱལཾ. སཱིསཀཊཱཧོཏི ཚཝསཱིསཀཔཱལཾ. ཏུམྦནྟི ཨལཱབུ. ཨསྶཱཏི ཨེཀཱདསཝིདྷསྶ ¶ པཏྟསྶ. ཨནུལོམིཀནྟི ཨཀཔྤིཡཝསེན ཨནུལོམཾ. ཏཏྠཱཏི ཏསྨིཾ ཨེཀཱདསཝིདྷེ. ཏམྦམཡཾ ལོཧམཡཾ ཐཱལཀཾ པན ཝཊྚཏཱིཏི ཡོཛནཱ, པཏྟོཡེཝ ན ཝཊྚཏི, ཏམྦལོཧམཡཱ ཐཱལཀཱ པན ཝཊྚནྟཱིཏི ཨཏྠོ.

༧༥༣. ཏཊྚིཀཱདཱིནཱིཏི ¶ ཨཱདི-སདྡེན ཝཊྚཀཱདཱིནཾ སངྒཧོ. ཝཊྚཀནྟི ཙ ཨཌྜྷཙནྡཱཀཱརོ ལོཧཱདིམཡོ བྷཱཛནིཡཝིསེསོ. པུགྒལསྶཱཏི བྷིཀྑུསྶ. གིཧཱི ཙ སངྒྷོ ཙ གིཧིསངྒྷཱ, ཏེསཾ སནྟཀཱ གིཧིསངྒྷིཀཱ.

༧༥༤. ཡཾ ཀིཉྩི པཏྟནྟི སཏྟསུ པཏྟེསུ ཡཾ ཀིཉྩི པཏྟཾ. ཝོདཀཾ ཀཏྭཱཏི ཝིགཏོདཀཾ ཀཏྭཱ. པཊིསཱམེཡྻཱཏི ནིཀྑེཔཱརཧཊྛཱནེ ནིཀྑིཔནཝསེན, ཐཝིཀཱཡ པཀྑིཔིཏྭཱ བནྡྷནཝསེན ཝཱ སངྒོཔེཡྻ.

༧༥༥. ཨོཏཱཔེཏུནྟི ཨཱཏཔེ, ཨགྒིམྷི ཝཱ ཏཱཔེཏུཾ. ཨུཎྷེཏི ཏསྨིཾཡེཝ ཨུཎྷེ. ན ནིདཧེཏབྦོཏི ན ཛྷཱཔེཏབྦོ. སཱིསཱཔནཡནམེཝ ན ཝཊྚཏཱིཏི ན ནིདཧེཏབྦོཏི ཨཏྠོ ཨདྷིཀནིཝཱརཎེནེཝ ཝིཉྙཱཡཏི.

༧༥༦. མིཌྜྷནྟེཏི མིཌྜྷིཡཱ ཨནྟེ. པརིབྷཎྜནྟེཏི པམུཁེ མཧཱམིཌྜྷིཡཱ ཨནྟེ. ‘‘ཝིཏྠིཎྞེཏི ཨནྟམསོ དྭིཔཏྟམཏྟོཀཱསཝིཏྠཱརེ’’ཏི ཀེཙི. ཋཔེཏུཾ པན ཝཊྚཏཱིཏི ཡོཛནཱ, ཝལཡཱདིཨཱདྷཱརེན ཝིནཱཔི ཋཔེཏུཾ ཝཊྚཏཱིཏི ཨཏྠོ. ‘‘མིཌྜྷིཡཱ པམུཁེ མིཌྜྷིཡཱ ཙ ཁརབྷཱུམིཔདེསཱདཱིསུ ཙ ཝལཡམཏྠཀེ ཋཔེཏུཾ ཝཊྚཏཱི’’ཏི ཝདནྟི.

༧༥༧. དཱརུཨཱདྷཱརཀེཏི ཨུདུཀྑལསདིསེ དཱརུམཡེ ཨཱདྷཱརེ. དྭེ པཏྟེ ཋཔེཏུམྤི ཝཊྚཏཱིཏི པཏྟམཏྠཀེ ཨཔརསྶཱཔི པཏྟསྶ ཋཔནཝསེན དྭེ པཏྟེ ཋཔེཏུམྤི ཝཊྚཏི. ཨཔི-སདྡེན ¶ ཨེཀསྨིཾ ཝཏྟབྦམེཝ ནཏྠཱིཏི དསྶེཏི. ཨཡམེཝ ནཡོཏི ‘‘དྭེཔི པཏྟེ ཋཔེཏུཾ ཝཊྚཏཱི’’ཏི ཨཡཾ ནཡོ. དཎྜབྷཱུམིཨཱདྷཱརཀེསཱུཏི ཨེཏྠ དཎྜཱདྷཱརོ ནཱམ བཧཱུཧི དཎྜེཧི ཀཏོ. བྷཱུམིཨཱདྷཱརཀོ ནཱམ བྷཱུམིཡཾ ཀཏོ ཨཱལཝཱལཝལཡཱཀཱརོ སིལིཊྛཱདྷཱརོ. ‘‘དནྟཝེཏྟལཏཱདིམཡོ བྷཱུམིཨཱདྷཱརཀོ’’ཏི ཀེཙི.

༧༥༨-༩. ཏཊྚིཀཱཡཱཏི ཏཱལཔཎྞཱདཱིཧི ཀཏཏཊྚིཀཱཡ. པོཏྠཀེཏི མཀཙིཝཱཀམཡེ ཝཱ རུཀྑཝཱཀམཡེ ཝཱ ཨཏྠརཎེ. ཀཊསཱརཀེཏི ཏཱལཔཎྞཱདཱིཧི ཝཱིཏེ ཨཏྠརཎེ. པརིབྷཎྜཀཏཱཡཱཏི ཀཏགོམཡཔརིབྷཎྜཱཡ. ཨཔི-སདྡེན སུདྷཱཀམྨཾ ཀཏྭཱ པཱསཱཎེན གྷཾསིཏྭཱ མཊྛཀཏཱཡ བྷཱུམིཡཱ ཝཏྟབྦམེཝ ནཏྠཱིཏི དསྶེཏི. ཝཱལུཀཱསུ ཝཱཏི ལེཌྜུཔཱསཱཎསཀྑརཀཔཱལཱདིཨམིསྶཱསུ སཎྷསུཁུམཝཱལུཀཱསཱུཏི ¶ ཝུཏྟཾ ཧོཏི. ཏེནེཝཱཧ ‘‘ཏཐཱརཱུཔཱསཱུ’’ཏིཨཱདི. རཛམྷི སནྟེཔི ཨསནྟེཔི ཝིསུཾཡེཝ ‘‘ཁརབྷཱུམིཡཱ ན ཋཔེཏབྦ’’ནྟི ཝུཏྟཏྟཱ ‘‘སརཛཱཡཱ’’ཏི ཨིམིནཱ རཛོཀིཎྞཾ སཎྷབྷཱུམིམཱཧ. ཁརབྷཱུམིཡཱཏི ཕརུསབྷཱུམིཡཱ.

༧༦༠. ལགྒེཏུནྟི ཨོལམྦེཏུཾ. དཎྜཀོཊིཡཱ, ནཱགདནྟཀོཊིཡཱ ཙ པཏྟམུཁེན པཀྑིཔིཏྭཱ ཋཔནམྤི ལགྒནཾ ནཱམ. ཚཏྟངྐམཉྩཔཱིཋེསཱུཏི ཚཏྟེ, ཨངྐེ, མཉྩཔཱིཋེ ཙ.

༧༦༡. ཨཊནཱིསཱུཏི ཨངྒེསུ. བནྡྷིཏྭཱཏི ཐཝིཀཱཡ ཨཾསཝདྡྷནཀཱདིནཱ ཡེན ཀེནཙི བནྡྷིཏྭཱ. ཨོལམྦེཏུམྤཱིཏི ལགྒེཏུམྤི. ‘‘ཋཔེཏུཾ ཨུཔརཱི’’ཏི པདཙྪེདོ.

༧༦༢. མཉྩཔཱིཋཊྚཀེཏི མཉྩཔཱིཋེསུ ཋཔིཏཔཏྟཱ ཡཐཱ ན པཏནྟི, ཏཐཱ ཨཊནིམཏྠཀེ དཱརུནཱ པརིཀྑེཔེ ཀཏེ མཉྩཔཱིཋཊྚཀཱ ¶ ནཱམ ཧོནྟི, ཏཱདིསེ མཉྩཔཱིཋཊྚཀེ ཋཔེཏུཾ ཝཊྚཏཱིཏི ཨཏྠོ. བྷཏྟཔཱུརོཔཱིཏི བྷཏྟསྶ པཱུརོཔི. ཨཔི-སདྡེན ཡཱགུཏེལཔརིཔཱུརིཏསྶཱཔི སངྒཧོ. ཏུཙྪཔཏྟེ ཝིནིཙྪཡོ ཡཐཱཝུཏྟོཡེཝ. པཱུརཎཾ པཱུརོ, བྷཏྟསྶ པཱུརོ བྷཏྟཔཱུརོ.

ཏིབྷཱཎཝཱརཝཎྞནཱ ནིཊྛིཏཱ.

༧༦༣. ཀཝཱཊནྟི དྭཱརཀཝཱཊཕལཀཾ. ‘‘སེནཱསནེ དྭཱརཀཝཱཊཝཱཏཔཱནཀཝཱཊཱདཱི’’ཏིཨཱདཱིསུ དྭཱརཕལཀཾ ‘‘ཀཝཱཊ’’ནྟི ཧི ཝུཏྟཾ. ན པཎཱམེཡྻཱཏི ན ནཱམེཡྻ ན ཙཱལེཡྻ, ན ཙ པིདཧེཡྻཱཏི ཨཏྠོ. པཏྟཾ ཧཏྠེ ཡསྶ སོ པཏྟཧཏྠོཏི བྷིནྣཱདྷིཀརཎོཡཾ བཱཧིརཏྠསམཱསོ ‘‘ཝཛིརཔཱཎཱི’’ཏིཨཱདཱིསུ ཝིཡ. ‘‘པཎཱམེཡྻ ཨསྶཱ’’ཏི པདཙྪེདོ.

༧༦༤. ན ནཱིཧརེཡྻ པཏྟེན ཙལཀཱནཱིཏི རསཾ པིཝིཏྭཱ པཱཏིཏམདྷུཀཕལཊྛིཀཱདི ཚཌྜིཏཱནི བཧི ཚཌྜེཏུཾ པཏྟེན ན ནཱིཧརེཡྻ. ཨཊྛིཀཱནི ཝཱཏི པནསཊྛིཀོལཊྛིཨཱདིཨཊྛིཀཱནི ཝཱ. ཨུཙྪིཊྛམུདཀནྟི མུཁདྷོཝནཱདིཀཾ ཨུཙྪིཊྛམུདཀཾ. པཏྟེན ནཱིཧརནྟསྶཱཏི ཡོཛནཱ, བཧི ཚཌྜེཏུཾ ཏཾ པཏྟེ ཨཱསིཉྩིཏྭཱ ཧརནྟསྶཱཏི ཝུཏྟཾ ཧོཏི. ཨིཏརཐཱ ཨུཙྪིཊྛཔཏྟདྷོཝནོདཀམྤི ཏེནེཝ པཏྟེན བཧི ན ནཱིཧརིཏབྦཾ སིཡཱ.

༧༦༥. པཊིགྒཧེཏི ¶ མུཁདྷོཝནོདཀནྟི པཊིགྒཧོ, ཁེལ༹མལླཀོཝ. མུཁཏོ ནཱིཧཊནྟི མུཁེན ཚཌྜིཏཾ མཾསཁཎྜཱདི ཡཾ ཀིཉྩི.

༧༦༦. ཝིནསྶཏཱིཏི ཝིབྦྷམེན ཝཱ སིཀྑཱཔཙྩཀྑཱནེན ཝཱ ཀཱལཀིརིཡཱཡ ཝཱ ཝིནསྶཏི. ཨཐ ཝཱ ཡོཏི པཙྩཏྟཝཙནཾ ‘‘ཡསྶཱ’’ཏི སཱམིཝསེན པརིཎཱམེཏྭཱ ཡསྶ བྷིཀྑུནོ ¶ པཏྟོ བྷེདེན ཝཱ ཨཙྪེདེན ཝཱ ཙོརིཀཱཡ ཧརཎེན ཝཱ ནསྶཏི, ཏསྶ ཨནཱཔཏྟཱིཏི ཡོཛནཱ.

༧༦༧. པཋམསྶཱཏི པཏྟཝགྒསྶ པཋམཾ སངྒཧིཏཏྟཱ པཋམསྶ. པཏྟསྶཱཏི པཏྟསིཀྑཱཔདསྶ. པཋམེནཱཏི ཙཱིཝརཝགྒསྶ པཋམཾ སངྒཧིཏཏྟཱ པཋམེན ཀཐིནེནཱཏི སམྦནྡྷོ. མཧེསིནཱཏི མཧནྟེ སཱིལཀྑནྡྷཱདཡོ གུཎེ ཨེསི གཝེསཱིཏི མཧེསི. པཋམསྶ པཏྟསྶ སམུཊྛཱནཱདཡོ སབྦེ ཨིདྷ ཨནིདྡིཊྛཝིནིཙྪཡཱ པཋམེན ཀཐིནེན སམཱ སདིསཱ ཨིཏི མཧེསིནཱ མཏཱ ཨནུམཏཱ ཨནུཉྙཱཏཱཏི ཡོཛནཱ.

པཋམཔཏྟཀཐཱཝཎྞནཱ.

༧༦༨. པཉྩ བནྡྷནཱནི ཨཱུནཱནི ཡསྶ སོ པཉྩབནྡྷནཨཱུནོ, པཏྟོ, ཏསྨིཾ, ཨབནྡྷནཉྩ ཨེཀདྭིཏིཙཏུབནྡྷནཉྩ ‘‘པཉྩབནྡྷནཨཱུན’’ནྟི གཧིཏཾ. ཡཐཱཧ པཱལི༹ཡཾ ‘‘ཨཱུནཔཉྩབནྡྷནོ ནཱམ པཏྟོ ཨབནྡྷནོ ཝཱ ཨེཀབནྡྷནོ ཝཱ དྭིབནྡྷནོ ཝཱ ཏིབནྡྷནོ ཝཱ ཙཏུབནྡྷནོ ཝཱ’’ཏི (པཱརཱ. ༦༡༣). བནྡྷནེ ཨཀཏེཔི བནྡྷནཱརཧོ ཝཀྑམཱནལཀྑཎརཱཛིཡུཏྟོཔི ‘‘ཨཱུནཔཉྩབནྡྷནོཡེཝཱ’’ཏི གཧེཏབྦོ. ཨེཏྠ ཨབནྡྷནོ ནཱམ ཡསྶ བནྡྷནམེཝ ནཏྠི, སོ. ཏེནེཝཱཧ ཨཊྛཀཐཱཡཾ ‘‘ཡསྨཱ ཨབནྡྷནསྶཔི པཏྟསྶ པཉྩ བནྡྷནཱནི ན པཱུརེནྟི སབྦསོ ནཏྠིཏཱཡཱ’’ཏི (པཱརཱ. ཨཊྛ. ༢.༦༡༢-༦༡༣). དྭངྒུལཔྤམཱཎཏོ ཨཱུནརཱཛིཡུཏྟོ ཨབནྡྷནོཀཱསོཔི ‘‘ཨབནྡྷནོཡེཝཱ’’ཏི གཧེཏབྦོ. ཡཐཱཧ པཱལི༹ཡཾ ‘‘ཨབནྡྷནོཀཱསོ ནཱམ པཏྟོ ཡསྶ དྭངྒུལཱ རཱཛི ན ཧོཏཱི’’ཏི (པཱརཱ. ༦༡༣).

༧༦༩. ཨུདྡིཊྛནྟི ‘‘བནྡྷནོཀཱསོ ནཱམ པཏྟོ ཡསྶ དྭངྒུལཱ རཱཛི ཧོཏཱི’’ཏི (པཱརཱ. ༦༡༣) པདབྷཱཛནེ ཝུཏྟཾ. དྭངྒུལཱཡ རཱཛིཡཱ ཨེཀཉྩ བནྡྷནནྟི ཡོཛནཱ. ‘‘མུཁཝཊྚིཏོ ཧེཊྛཱ བྷཊྛཱ’’ཏི ¶ ཨཊྛཀཐཱཝཙནཏོ (པཱརཱ. ཨཊྛ. ༢.༦༡༢-༦༡༣) ‘‘སབྦཱཔི རཱཛིཡོ མུཁཝཊྚིཏོ པཊྛཱཡ ¶ ཧེཊྛཱ བྷཊྛཱཡེཝ གཧེཏབྦཱ’’ཏི ནིསྶནྡེཧེ ཝུཏྟཾ. མུཁཝཊྚིཾ ཝིནཱ ཨཉྙཏྠཱཔི ཨཱུནཔཉྩབནྡྷནེ ཝཱ ཨཱུནཔཉྩབནྡྷནོཀཱསེ ཝཱ སཏི སོཔི པཏྟོ ཨཱུནཔཉྩབནྡྷནོ ན ཧོཏཱིཏི ན སཀྐཱ ཝཏྟུཾ, ཏསྨཱ ‘‘མུཁཝཊྚིཏོ པཊྛཱཡཱ’’ཏི (པཱརཱ. ཨཊྛ. ༢.༦༡༢-༦༡༣) ཨཊྛཀཐཱཡཾ ནིཡམེཏྭཱ ཝཙནཾ ཝཱིམཾསིཏབྦཾ. ཨིདྷ པན ཏཐཱ ནིཡམོ ན དསྶིཏོ, ཏསྨཱ ཨཡམེཝ ཝིནིཙྪཡོ སཱམཉྙེན ཝུཏྟཱཡ པཱལི༹ཡཱ ཨཉྙདཏྠུ སཾསནྡཏི སམེཏི. ཙ-ཀཱརསྶ ཨཝུཏྟསམུཙྩཡཏྠཏྟཱ དྭངྒུལདྭངྒུལཱཧི དྭཱིཧི དྭེ བནྡྷནཱནི ཙ ཏཱིཎི བནྡྷནཱནི ཙཱཏི ཨིདམྤི ཝུཏྟམེཝ ཧོཏི. ཡཐཱཧ ཨཊྛཀཐཱཡཾ ‘‘ཡསྶ པན དྭེ རཱཛིཡོ, ཨེཀཱཡེཝ ཝཱ ཙཏུརངྒུལཱ, ཏསྶ དྭེ བནྡྷནཱནི དཱཏབྦཱནི. ཡསྶ ཏིསྶོ, ཨེཀཱཡེཝ ཝཱ ཚལ༹ངྒུལཱ, ཏསྶ ཏཱིཎི བནྡྷནཱནི དཱཏབྦཱནཱི’’ཏི (པཱརཱ. ཨཊྛ. ༢.༦༡༢-༦༡༣).

ཨཱུནཔཉྩབནྡྷནཔཏྟེསུ ཨནྟིམཔཏྟསྶ ཝིབྷཱགཾ དསྶེཏུམཱཧ ‘‘བནྡྷནཱནི ཙཱ’’ཏིཨཱདི. མུཁཝཊྚིཡཱ ཨཊྛངྒུལཔྤམཱཎཱནཾ ཙཏུནྣཾ རཱཛཱིནཾ ཙཏྟཱརི བནྡྷནཱནི ཙཱཏི ཝུཏྟཾ ཧོཏི. ཙཀཱརོ པུབྦེ ཝུཏྟསྶེཝ སམུཙྩཡཾ ཀརོཏི. ཨཊྛངྒུལརཱཛིཡཱ ཏཐཱཏི མུཁཝཊྚིཏོ པཊྛཱཡ ཨཊྛངྒུལཱཡཱམཾ བྷཊྛཱཡ རཱཛིཡཱ དྭངྒུལདྭངྒུལམཏྟེ ཋཱནེ ཏེནེཝ ནཱིཧཱརེན བདྡྷཱནི ཙཏྟཱརི བནྡྷནཱནི ཙཱཏི ཨཏྠོ.

༧༧༠. ཨེཝཾ ཨཱུནཔཉྩབནྡྷནཔཏྟཾ དསྶེཏྭཱ ཨིདཱནི པརིཔུཎྞཔཉྩབནྡྷནཔཏྟཾ དསྶེཏུམཱཧ ‘‘པཉྩ ཝཱ’’ཏིཨཱདི. མུཁཝཊྚིཡཱ དྭངྒུལདྭངྒུལཱཡཱམཾ ཨོཏིཎྞཱ པཉྩ རཱཛིཡོ ཙ. ཝཱ-སདྡེན པཉྩབནྡྷནཝིཀཔྤཱ དསྶིཏཱ. ཨེཀཱ ཝཱཔི དསངྒུལཱཏི མུཁཝཊྚིཏོ དསངྒུལཱཡཱམཱ ཨེཀཱ ཝཱ རཱཛི ཧོཏི. ཨཔི-སདྡེན ཏསྶཱ རཱཛིཡཱ བནྡྷནོ པཉྩབནྡྷནཔཀྑོ དསྶིཏོ. ཨཡཾ པཏྟོཏི ¶ ཡསྶ པཉྩ རཱཛིཡོ ཝཱ ཏཏྠ བནྡྷནཱནི པཉྩབནྡྷནཱནི ཝཱ, དསངྒུལཱ ཨེཀཱ རཱཛི ཝཱ ཏཏྠ བནྡྷནཱནི པཉྩབནྡྷནཱནི ཝཱ སནྟི, ཨཡཾ པཏྟོ པཉྩབནྡྷནོ ནཱམ.

༧༧༡. ཨེཏྟཱཝཏཱ མཏྟིཀཱཔཏྟེ ཝིནིཙྪཡཾ དསྶེཏྭཱ ཨིདཱནི ཨཡོཔཏྟེ དསྶེཏུམཱཧ ‘‘ཨཡོཔཏྟོ’’ཏིཨཱདི. ཚིདྡཱནི པཊིཙྪཱདེཏུཾ བནྡྷིཏབྦཱནི ཨཡོཔཊྚཱནི ལོཧམཎྜལཀཱནི ནཱམ. ‘‘བྷཎྜཱི’’ཏིཔི ཏསྶེཝ པརིཡཱཡོ. བྷཎྜིཏབྦཾ བནྡྷིཏྭཱ ཚིདྡེ པཊིཙྪཱདིཏེཔི ཡཏྠ ཨསཎྷཏཱཡ ཨཱམིསཾ ཏིཊྛཏི, ཏཱདིསོཔི ཨཔཏྟོཡེཝཱཏི ཨཱཧ ‘‘མཊྛོ ཝཊྚཏཱི’’ཏི. ཨཡོཙུཎྞེན ཝཱཎིཡཱཏི ཨེཏྠཱཔི ‘‘མཊྛོ ཝཊྚཏཱི’’ཏི སམྦནྡྷནཱིཡཾ.

༧༧༢. ཏསྶ ¶ ནིསྶགྒིཡཾ སངྒྷསྶ ནིསྶཊྛཾ ཏཾ པཏྟཾ ཏསྨིཾ ཨནུཀམྤཱཡ ཨགཎྷནྟསྶཱཏི ཡོཛནཱ, ‘‘སངྒྷམཛ྄ཛྷེ ནིསྶཛྫིཏབྦོ’’ཏི (པཱརཱ. ༦༡༣) ཝཙནཏོ སངྒྷམཛ྄ཛྷེ ནིསྶཊྛཾ ཏསྶ ཏཾ པཏྟཾ ཏསྨིཾ པཏྟནིསྶཛྫཀེ པུགྒལེ ཨནུཀམྤཱཡ ཨགཎྷནྟསྶ.

༧༧༣. དཱིཡམཱནེ ཏུ པཏྟསྨིནྟི ཨཱུནཔཉྩབནྡྷནེན པཏྟེན ཝིཉྙཱཔིཏནཝཔཏྟེ བྷིཀྑུམྷི ཏཾ པཏྟཾ སངྒྷམཛ྄ཛྷེ ནིསྶཛྫིཏྭཱ ཨཱཔཏྟིཾ དེསེཏྭཱ ནིསིནྣེ ཙཏསྶོ ཨགཏིཡོ ཨགམནཾ, གཧིཏཱགཧིཏཛཱནནནྟི ཨིམེཧི པཉྩཧི ཨངྒེཧི སམནྣཱགཏེན བྷིཀྑུནཱ པཋམཾ སངྒྷཾ ཡཱཙིཏྭཱ ཉཏྟིདུཏིཡཱཡ ཀམྨཝཱཙཱཡ སངྒྷེན པཏྟགཱཧཀཾ ཀཏྭཱ སམྨཏེན ནིསྶཊྛཔཏྟཾ ཧཏྠེན གཧེཏྭཱ ཏསྨིཾ སངྒྷེ སངྒྷཏྠེརཏོ པཊྛཱཡ ཨནུཀྐམེན ཨུཔསངྐམྨ ཝིཉྙཱཡམཱནཾ གུཎཾ ཝཏྭཱ པཎཱམིཏེ. ཡསྶཱཏི ཏསྨིཾ སངྒྷམཛ྄ཛྷེ ནིསིནྣསྶ ཡསྶ ¶ བྷིཀྑུནོ, རོཙནཏྠཡོགེ སམྤདཱནཝཙནཾ. སོ དཱིཡམཱནོ པཏྟོ. ཏཾ དཱིཡམཱནཾ པཏྟཾ.

༧༧༤. དཱིཔིཏོཏི ‘‘ཨཔཏྟཀསྶ ན གཱཧེཏབྦོ’’ཏི (པཱརཱ. ༦༡༥) ཝུཏྟོ. ཏཏྠཱཏི ཏསྶཾ བྷིཀྑུཔརིསཱཡཾ. པཏྟཔརིཡནྟོཏི ཨེཏྠ ‘‘ཨེཝཾ པརིཝཏྟེཏྭཱ པརིཡནྟེ ཋིཏཔཏྟོ’’ཏི (པཱརཱ. ཨཊྛ. ༢.༦༡༥) ཨཊྛཀཐཱཡཾ ཝུཏྟཏྟཱ ཏེན པཏྟཔརིཝཏྟནེན ཨཱགཏོ ཝཱ སབྦེཧི ཨགྒཧིཏཏྟཱ ཨཱགཏོ སོ ཨེཝ ཝཱ པཏྟོ པརིཡནྟོ ནཱམ ཧོཏཱིཏི ཨཏྠོ. ཏསྶ བྷིཀྑུནོཏི པཏྟཾ ནིསྶཛྫིཏྭཱ ནིསིནྣསྶ ཏསྶ བྷིཀྑུནོ.

༧༧༥. ཏནྟི ཨཏྟནོ དིནྣཾ ཏཾ པརིཡནྟཔཏྟཾ. ཨཔྤདེསེཏི མཉྩཔཱིཋཱདིཨཊྛཱནེ. ཡཐཱཧ ཨཊྛཀཐཱཡཾ ‘‘མཉྩཔཱིཋཚཏྟནཱགདནྟཱདིཀེ ཨདེསེ’’ཏི (པཱརཱ. ཨཊྛ. ༢.༦༡༥). ཝིསྶཛྫེཏཱིཏི ཨཉྙསྶ དེཏི. ཨཏྟནཱ ཨདཱཔེཏྭཱ ཨཉྙེན ཏཾ པཏྟཾ སཡམེཝ ཨཏྟནོ གཧེཏྭཱ ཨཉྙཾ ཨནུརཱུཔཾ པཏྟཾ དིཡྻམཱནཾ གཎྷིཏུཾ ཝཊྚཏཱིཏི ཨཊྛཀཐཱཡཾ ཝུཏྟཾ. ཨབྷོགེན པརིབྷུཉྫཏཱིཏི ཡཱགུརནྡྷནཱདིཝསེན པརིབྷུཉྫཏི. ཡཐཱཧ ཨཊྛཀཐཱཡཾ ‘‘ཨབྷོགེནཱཏི ཡཱགུརནྡྷནརཛནཔཙནཱདིནཱ’’ཏི (པཱརཱ. ཨཊྛ. ༢.༦༡༥). ‘‘ཨནྟརཱམགྒེ པན བྱཱདྷིམྷི ཨུཔྤནྣེ ཨཉྙསྨིཾ བྷཱཛནེ ཨསཏི མཏྟིཀཱཡ ལིམྤིཏྭཱ ཡཱགུཾ ཝཱ པཙིཏུཾ ཨུདཀཾ ཝཱ ཏཱཔེཏུཾ ཝཊྚཏཱི’’ཏི (པཱརཱ. ཨཊྛ. ༢.༦༡༥) ཨཊྛཀཐཱཡཾ ཝུཏྟཏྟཱ ཏཱདིསེ ཋཱནེ ཏཐཱཔི པརིབྷུཉྫིཏུཾ ཝཊྚཏཱིཏི ཨེཏྠ ཝིསེསོ.

༧༧༦. ནཊྛེཏི ¶ ཨཏྟནོ པརིབྷུཉྫིཡམཱནེ པཏྟེ ཙོརགྒཧཎཱདིནཱ ནཊྛེ. བྷིནྣེཏི བྷེདམུཔགཏེ. ཨནཱཔཏྟཱིཏི ཨཉྙཾ པཏྟཾ ཝིཉྙཱཔེནྟསྶ ཨནཱཔཏྟི. པཀཱསིཏཱཏི ‘‘ཨནཱཔཏྟི ནཊྛཔཏྟསྶ བྷིནྣཔཏྟསྶ ཉཱཏཀཱནཾ པཝཱརིཏཱནཾ ཨཉྙསྶཏྠཱཡ ¶ ཨཏྟནོ དྷནེནཱ’’ཏིཨཱདིནཱ (པཱརཱ. ༦༡༧) ནཡེན པཱལི༹ཡཾ དེསིཏཱ. ཨིདྷ ‘‘ཨཉྙསྶཏྠཱཡཱ’’ཏི ཝུཏྟཏྟཱ ཨཏྟནོ ཝལ༹ཉྫིཡམཱནེ པཏྟེ སཏིཔི ཨཉྙསྶཏྠཱཡ པཏྟཾ ཝིཉྙཱཔེཏུཾ ཝཊྚཏི. ཉཱཏཀཱདཱིནཾ གཎྷཏོཏི ཨེཏྠ ‘‘སནྟཀ’’ནྟི ལབྦྷཏི. ཨཏྟནོ དྷནེནཱཏི ཡོཛནཱ. ཨེཏྠ དྷནཾ ནཱམ སུཏྟཝཏྠཱདི ཀཔྤིཡཝཏྠུ.

༧༧༧. ཨེཏྠ ཝིཉྙཱཔནཾ ཀྲིཡཾ.

དུཏིཡཔཏྟཀཐཱཝཎྞནཱ.

༧༧༨. སཔྤིཨཱདིཾ བྷེསཛྫནྟི ཨེཏྠ པཱལི༹ཡཾ ‘‘སེཡྻཐིདཾ? སཔྤི ནཝནཱིཏཾ ཏེལཾ མདྷུ ཕཱཎིཏ’’ནྟི (པཱརཱ. ༦༢༢) ཨུདྡིསིཏྭཱ ‘‘སཔྤི ནཱམ གོསཔྤི ཝཱ ཨཛིཀཱསཔྤི ཝཱ མཧིཾསསཔྤི ཝཱ, ཡེསཾ མཾསཾ ཀཔྤཏི, ཏེསཾ སཔྤཱི’’ཏི (པཱརཱ. ༦༢༣) ནིདྡིཊྛཾ གྷཏཉྩ ‘‘ཏེསཾཡེཝ ནཝནཱིཏ’’ནྟི (པཱརཱ. ༦༢༣) ནིདྡིཊྛཾ ནཝནཱིཏཉྩ ‘‘ཏིལཏེལཾ སཱསཔཏེལཾ མདྷུཀཏེལཾ ཨེརཎྜཀཏེལཾ ཝསཱཏེལ’’ནྟི (པཱརཱ. ༦༢༣) ནིདྡིཊྛཾ ཏེལཉྩ ‘‘མདྷུ ནཱམ མཀྑིཀཱམདྷཱུ’’ཏི (པཱརཱ. ༦༢༣) ནིདྡིཊྛཾ མདྷུཉྩ ‘‘ཕཱཎིཏཾ ནཱམ ཨུཙྪུམྷཱ ནིབྦཏྟ’’ནྟི (པཱརཱ. ༦༢༣) ནིདྡིཊྛཾ གུལཱ༹དིཕཱཎིཏཉྩཱཏི ཨེཏསྨིཾ པཉྩབྷེསཛྫརཱསིམྷི ཡཾ ཡཾ བྷེསཛྫནྟི ཨཏྠོ. པུརེབྷཏྟནྟི པུརེབྷཏྟེ. པཊིགཡ྄ཧཱཏི པཊིགྒཧེཏྭཱ.

༧༧༩. ཏཾ པུརེབྷཏྟཾ པཊིགྒཧིཏཾ བྷེསཛྫཾ. སཏྟཱཧནྟི ཨེཏྠ ‘‘ཝཊྚཏཱི’’ཏི ཀིརིཡཱཡ ཨཙྩནྟསཾཡོགེ ཨུཔཡོགཝཙནཾ. ‘‘སཏྟཱཧཾ ཨཏིཀྐམནྟསྶཱ’’ཏི པདཙྪེདོ. ‘‘སཏྟཱཧཱཏིཀྐམེ ཏསྶཱ’’ཏི ཝཱ པཱཋོ. སཏྟཱཧསྶ ཨཏིཀྐམོ སཏྟཱཧཱཏིཀྐམོ, ཏསྨིཾ སཏྟཱཧཱཏིཀྐམེ. ཏསྶཱཏི བྷེསཛྫཔཊིགྒཱཧཀསྶ བྷིཀྑུནོ. ‘‘ནིསྶགྒིཡ’’ནྟི ཨིམིནཱ པཱཙིཏྟིཡམེཝ དསྶིཏཾ. ནིསྶགྒིཡཝཏྠུ བྷཱཛནགཎནཱཡ ཨཱཔཏྟིཾ ཀརོཏི. ཨེཀསྨིཾ བྷཱཛནེཔི ཝིསུཾ ཝིསུཾ ཋཔིཏཱནི ནཝནཱིཏཔིཎྜགུལ༹པིཎྜསཀྐརམདྷུཔཊལཱནིཔི ¶ ཨཏྟནོ གཎནཱཡ ཨཱཔཏྟིཾ ཀརོནྟི.

༧༨༠. གཎྷིཏྭཱཏི པཊིགྒཧེཏྭཱ. སནྣིདྷཱིཡཏཱིཏི སནྣིདྷི, སནྣིཧིཏཝཏྠུ, ཏསྶ ཀཱརཀཾ ཀརཎཾ ¶ ཨཔརཱཔརདིཝསཏྠཱཡ ཋཔནཾ, ཏཾ ཀཏྭཱ, པཙྪཱབྷཏྟཾ པཊིགྒཧིཏཾ ཡཐཱ ཨཔརཾ དིཝསཾ གཙྪཏི, ཏཐཱ ཀཏྭཱ ནིཀྑིཔིཏྭཱཏི ཨཏྠོ. ནིརཱམིསཾ སཱཡཏོཏི ཨཱམིསེན ཨམིསྶེཏྭཱ བྷུཉྫནྟསྶ.

༧༨༡. ཨུགྒཧིཏནྟི ཨཔྤཊིགྒཧཱཔེཏྭཱ ཧཏྠེན གཧིཏཾ. སརཱིརབྷོགེཏི བཧི སརཱིརཔརིབྷོགེནེཝ.

༧༨༢. གཧིཏཾ པཊིགྒཧིཏཾ. ཏཱཔེཏྭཱཏི ཝིལཱིཡཱཔེཏྭཱ.

༧༨༣. ‘‘སཡཾ ཏཱཔེཏི…པེ… ན ཧོཏི སོ’’ཏི ཨིདཾ སུདྷོཏནཝནཱིཏཾ སནྡྷཱཡ ཝུཏྟཾ, དུདྡྷོཏེན པན དདྷིགུལི༹ཀཱདིསཧིཏེན སཱམཾཔཱཀོ ཧོཏེཝ. ནཝནཱིཏསྶ ཡཾ སཡཾ ཏཱཔནཾ, སོ སཱམཾཔཱཀོ ན ཧོཏཱིཏི ཡོཛནཱ.

༧༨༤. ཡེན ཀེནཙཱིཏི ཨུཔསམྤནྣེན, ཨནུཔསམྤནྣེན ཝཱ.

༧༨༥. ‘‘སཡཾ ཀརོཏཱི’’ཏི ཨིམིནཱ ཨནུཔསམྤནྣཾ ནིཝཏྟེཏི. ཏེན ཀཏཾ པན ཏདཧུ པུརེབྷཏྟཾ སཱམིསམྤི ཝཊྚཏི. ཡཐཱཧ ཨཊྛཀཐཱཡཾ ‘‘པུརེབྷཏྟཾ པཊིགྒཧིཏཁཱིརེན ཝཱ དདྷིནཱ ཝཱ ཀཏསཔྤི ཨནུཔསམྤནྣེན ཀཏཾ སཱམིསམྤི ཏདཧུ པུརེབྷཏྟཾ ཝཊྚཏཱི’’ཏི (པཱརཱ. ཨཊྛ. ༢.༦༢༢).

༧༨༦. སཝཏྠུཀསྶཱཏི ཨེཏྠ ཝཏྠུ ནཱམ ཁཱིརདདྷི.

༧༨༧. ཨསྶཱཏི པཊིགྒཧིཏཁཱིརདདྷཱིཧི ཀཏསཔྤིམཱཧ. ‘‘པཊིགྒཧེཏྭཱ ཏཱནཱི’’ཏི ཝུཏྟཏྟཱཏི ཨིདཾ ‘‘ཡཱནི ཁོ པན ཏཱནི ¶ གིལཱནཱནཾ བྷིཀྑཱུནཾ པཊིསཱཡནཱིཡཱནི བྷེསཛྫཱནི, སེཡྻཐིདཾ? སཔྤི ནཝནཱིཏཾ ཏེལཾ མདྷུ ཕཱཎིཏཾ, ཏཱནི པཊིགྒཧེཏྭཱ’’ཏི (པཱརཱ. ༦༢༢) ཨིམསྨིཾ མཱཏིཀཱཔཱཋེ ‘‘ཡཱནཱི’’ཏི ཝུཏྟསཔྤིཨཱདཱིནམེཝ ‘‘ཏཱནི པཊིགྒཧེཏྭཱ’’ཏི ཝུཏྟཏྟཱཏི ཝུཏྟཾ ཧོཏི, ཏཏྠ ཁཱིརདདྷཱིནཾ ཨཝུཏྟཏྟཱཏི ཨདྷིཔྤཱཡོ.

༧༨༨. ཀཔྤིཡསཔྤིམྷཱིཏི ¶ ཀཔྤིཡམཾསཱནཾ སཏྟཱནཾ གྷཏེ. ཨཀཔྤིཡསཔྤིམྷཱིཏི ཨཀཔྤིཡམཾསཱནཾ སཏྟཱནཾ གྷཏེ, པཊིགྒཧེཏྭཱ སཏྟཱཧེ ཨཏིཀྐནྟེཏི ཝུཏྟཾ ཧོཏི.

༧༨༩. ཏེན སཔྤིནཱ ཨཀཔྤིཡེན བྷཝིཏབྦནྟི ཨིདཾ དུཀྐཊཾ ཀཐཾ ཧོཏཱིཏི ཨཱཧ ‘‘སབྦཱ’’ཏིཨཱདི. ཨཀཔྤིཡཾ མཾསཾ ཡེསཾ ཏེ ཨཀཔྤིཡམཾསཱ, མནུསྶཱདཡོ, སབྦེ ཙ ཏེ ཨཀཔྤིཡམཾསཱ ཙཱཏི སབྦཱཀཔྤིཡམཾསཱ, ཏེསཾ.

༧༩༠-༡. ཨེཝཾ ཙེ ཝཊྚཏི, ‘‘ཡེསཾ མཾསཾ ཀཔྤཏི, ཏེསཾ སཔྤཱི’’ཏི ཀསྨཱ པཱལི༹ཡཾ ཝུཏྟནྟི ཙོདནཾ སམུཊྛཱཔེཏྭཱ ཏཾ པརིཧརིཏུམཱཧ ‘‘ཡེས’’ནྟིཨཱདི. ཏཏྠ ‘‘ཡེསཉྷི ཀཔྤཏི མཾསཾ, ཏེསཾ སཔྤཱི’’ཏི ཨིདཾ ཝཙནཾ ཀིཾ པཡོཛནཾ སཱདྷེཏཱིཏི ཝུཏྟཾ ཧོཏི. ཨིདཱནི པརིཙྪེདནིཡམནསངྑཱཏཾ ཏཾཔཡོཛནཉྩ ཏབྦིསཡཉྩ དསྶེཏུམཱཧ ‘‘པཎཱིཏབྷོཛནསྶཱ’’ཏིཨཱདི. པཎཱིཏབྷོཛནསྶ པརིཙྪེདནིཡཱམནནྟི ཡོཛནཱ. སཏྟཱཧཀཱལིཀེ པཉྩཝིདྷེ བྷེསཛྫེཏི ཝུཏྟཾ ཧོཏི, ནིདྡྷཱརཎེ བྷུམྨཾ. ནིསྶགྒིཡསྶ ཝཏྠཱུནནྟི ནིདྡྷཱརིཏབྦདསྶནཾ. ནིསྶགྒིཡསྶཱཏི ཨེཏྠ ཏཾཧེཏུཀསྶ པཱཙིཏྟིཡསྶཱཏི ཨཏྠོ. ཝཏྠཱུནནྟི སཔྤིནཝནཱིཏདྭཡམེཝ ཝུཏྟཾ. སཏྟཱཧཀཱལིཀེ ནིསྶགྒིཡཔཱཙིཏྟིཡསྶ ཝཏྠུ ནཱམ ཨེཏེསམེཝ སཔྤིནཝནཱིཏཱནི, པཎཱིཏབྷོཛནཉྩ ཏེསམེཝ ཁཱིརདདྷིསཔྤིནཝནཱིཏཱནཱིཏི དསྶེཏུཾ ཏཐཱ ཝུཏྟཾ, ན ཨཀཔྤིཡམཾསསཏྟཱནཾ སཔྤིཨཱདིནིཝཱརཎཏྠཾ ¶ ཝུཏྟནྟི ཨཡཾ པཱལི༹ཡཾ ཏཐཱགཏཱ དྷིཔྤེཏོ ཨཏྠོཏི ཝུཏྟཾ ཧོཏི.

༧༩༢. གཧིཏུགྒཧིཏཱདིཀེ ཨུགྒཧིཏཔཊིགྒཧིཏཱདིཀེ ནཝནཱིཏེཔི སབྦོ ཝིནིཙྪཡོ སཔྤིམྷི ཝུཏྟནཡེནེཝ ཝེདིཏབྦོཏི ཡོཛནཱ. ཨཱདི-སདྡེན པུརེབྷཏྟཾ, པཙྪཱབྷཏྟཾ པཊིགྒཧིཏཁཱིརདདྷཱིཧི, ཨུགྒཧིཏཁཱིརདདྷཱིཧི ཙ ཀཏཾ ནཝནཱིཏཾ, ཏཱདིསམེཝ ཨཀཔྤིཡམཾསནཝནཱིཏཉྩ སངྒཧིཏཾ. སབྦོ ཝིནིཙྪཡོཏི ཨཱཔཏྟིཨཱདིཀཾ སབྦཝིནིཙྪཡཾ སངྒཎྷཱཏི. ཡཐཱཧ ཨཊྛཀཐཱཡཾ ‘‘སབྦོ ཨཱཔཏྟཱནཱཔཏྟིཔརིབྷོགཱཔརིབྷོགནཡོ’’ཏི (པཱརཱ. ཨཊྛ. ༢.༦༢༢).

༧༩༣-༤. བྷིཀྑཱུནཾ ཨཱཀིརནྟཱིཏི ཨེཏྠ ‘‘པཏྟེ’’ཏི སཱམཏྠིཡཱ ལབྦྷཏི. ཨཱདིཙྩཔཀྐནྟི ཨཱཏཔེ ཝིལཱིནཾ. སཾསཊྛཾ པརིསྶཱཝིཏཾ.

༧༩༥-༦. ཏིལཏེལཾ སཱསཔཏེལཾ མདྷུཀཏེལཾ ཨེརཎྜཀཏེལཾ. གཧིཏནྟི པཊིགྒཧིཏཾ. པུརེབྷཏྟཾ སཱམིསམྤི ¶ ནིརཱམིསམྤི སཱཡིཏབྦནྟི ཡོཛནཱ. ཏེསཾ ཝསཱཏི སཏྟཱཧཱཏིཀྐནྟཱནཾ ཏེསཾ ཏེལཱནཾ ཝསེན, ཏེལབྷཱཛནགཎནཱཡཱཏི ཝུཏྟཾ ཧོཏི.

༧༩༨. ཏེསཾ ཏིཎྞམྤཱིཏི ཨེརཎྜམདྷུཀསཱསཔབཱིཛཱནཾ ཏིཎྞཾ.

༧༩༩. ནིསྶགྒིཡཾ པཱཙིཏྟིཡཾ.

༨༠༠. སཱསཔཱདཱིནནྟི ཨེཏྠ ཨཱདི-སདྡེན པཊིལོམེན མདྷུཀེརཎྜཀཱནཾ གཧཎཾ. གཧེཏྭཱཏི པཊིགྒཧེཏྭཱ. བྷིཀྑུནཱ ཏེལཏྠཱཡེཝ གཧེཏྭཱ ཋཔིཏཱནཾ སཱསཔཱདཱིནཾ སཏྟཱཧཱཏིཀྐམེ དུཀྐཊཾ སིཡཱཏི ཡོཛནཱ.

༨༠༡-༢. ནཱལི༹ཀེརཉྩ ¶ ཀརཉྫཉྩ ནཱལི༹ཀེརཀརཉྫཱནི, ཏེསཾ, ནཱལི༹ཀེརཕལཱནཾ, ནཏྟམཱལཊྛཱིནཉྩ ཏེལནྟི སམྦནྡྷོ. ཀུརུཝཀསྶཱཏི ཨཏསིབཱིཛསྶ. ནིམྦཉྩ ཀོསམྦཀཉྩ ནིམྦཀོསམྦཀཱནི, ཏེསཾ, པུཙིམནྡབཱིཛསྶ ཙ ཕནྡནབཱིཛསྶ ཙ ཏེལནྟི སམྦནྡྷོ. བྷལླཱཏཀསྶཱཏི ཨེཝཾནཱམཀསྶ རུཀྑབཱིཛསྶ. སམཡཙྩཡེཏི སཏྟཱཧཱཏིཀྐམེ.

༨༠༣. ཡཱཝཀཱལིཀབྷེདཉྩཱཏི ཨེཏྠ ‘‘ཡཱཝཀཱལིཀ’’ནྟི བྷེདོ ཝིསེསནཾ ཡསྶཱཏི ཝིགྒཧོ, ‘‘ཨིདཾ ཝཏྠུ’’ནྟི ཨེཏསྶ ཨཛ྄ཛྷོཧརཎཱིཡཝིསེསིཏབྦསྶ ཝིསེསནཾ. ཡཱཝཛཱིཝིཀནྟིཔི ཏསྶེཝ ཝིསེསནཾ. སེསནྟི ‘‘སཱམཾཔཱཀསཝཏྠུཀ པུརེབྷཏྟཔཙྪཱབྷཏྟཔཊིགྒཧིཏཨུགྒཧིཏཀཝཏྠུཝིདྷཱནཾ སབྦ’’ནྟི (པཱརཱ. ཨཊྛ. ༢.༦༢༢) ཨཊྛཀཐཱཡཾ དསྶིཏཾ སེསཾ ཝིསེསཔྤཀཱརཛཱཏམཱཧ. ཨེཏྠཱཔཱིཏི ཨིམསྨིཾ ཏེལཝིནིཙྪཡེཔི.

༨༠༤. ཨཙྪསྶ ཨིསསྶ. མཙྪསྶ ཛལཛསྶ. ཝརཱཧསྶ སཱུཀརསྶ. སུསུཀཱསངྑཱཏསྶ མཀརསྶ. མཙྪཝཙནེནེཝ མཀརསྶ སངྒཧིཏཏྟེཔི ཝཱལ༹མཙྪབྷཱཝེན ཝིསུཾ གཧཎནྟི ཨཊྛཀཐཱཡཾ ཝུཏྟཾ. གདྲབྷསྶ ཁརསྶ. ཨིམེསཾ པཉྩནྣཾ སཏྟཱནཾ ཝསེན པཉྩཝིདྷཱནཾ ཝསཱནཾ ཏེལཉྩ པཉྩཔྤཀཱརཾ ཧོཏཱིཏི ཨཏྠོ.

༨༠༥. ཀཔྤིཡཱཀཔྤིཡསྶ ཙཱཏི ཀཔྤིཡཱཀཔྤིཡམཾསསྶ སཏྟསྶཱཏི ཝུཏྟཾ ཧོཏི, སབྦམེཝ ¶ ཝསཱཏེལཾ ཝཊྚཏཱིཏི ཨིམིནཱ སམྦནྡྷོ. ཨེཏྠ ‘‘ཨནུཛཱནཱམི བྷིཀྑཝེ ཝསཱནི བྷེསཛྫཱནི ཨཙྪཝསཾ མཙྪཝསཾ སུསུཀཱཝསཾ སཱུཀརཝསཾ གདྲབྷཝས’’ནྟི (མཧཱཝ. ༢༦༢) ཨནུཉྙཱཏཔཱཋེ ཨཙྪཝསཱགྒཧཎེན མནུསྶེཧི ཨཉྙེསཾ སབྦཱཀཔྤིཡམཾསསཏྟཱནཾ ཝསཱཡ ཨནུཉྙཱཏཏྟཱ ¶ ཏཾ སངྒཧེཏུཾ ཨཀཔྤིཡགྒཧཎཾ ཀཏནྟི དཊྛབྦཾ. ཡཐཱཧ ཨཊྛཀཐཱཡཾ ‘‘ཨཙྪཝས’ནྟི ཝཙནེན ཋཔེཏྭཱ མནུསྶཝསཾ སབྦེསཾ ཨཀཔྤིཡམཾསཱནཾ ཝསཱ ཨནུཉྙཱཏཱ’’ཏི (པཱརཱ. ཨཊྛ. ༢.༦༢༣). ཨེཏྠ ཨཀཔྤིཡམཾསསཏྟཱནཾ མཾསཱནཾ ཨཀཔྤིཡབྷཱཝོ ‘‘མཾསེསུ ཧི དས མནུསྶཧཏྠིཨསྶསུནཁཨཧིསཱིཧབྱགྒྷདཱིཔིཨཙྪཏརཙྪཱནཾ མཾསཱནི ཨཀཔྤིཡཱནི. ཝསཱསུ ཨེཀཱ མནུསྶཝསཱཝ. ཁཱིརཱདཱིསུ ཨཀཔྤིཡཾ ནཱམ ནཏྠཱི’’ཏི (པཱརཱ. ཨཊྛ. ༢.༦༢༣) ཨཊྛཀཐཱཝཙནཏོ ཝེདིཏབྦོ. ཨཀཔྤིཡཝཙནེན མནུསྶཝསཱཡཔི གཡ྄ཧམཱནཏྟཱ ཏསྨིཾ ནཱིཧརིཏུམཱཧ ‘‘ཋཔེཏྭཱ’’ཏི.

༨༠༦. པུརེབྷཏྟནྟི པུརེབྷཏྟེ. སཾསཊྛཾ པརིསྶཱཝིཏཾ. ‘‘པུརེབྷཏྟ’’ནྟི ཨིདཾ ‘‘པཊིགྒཧེཏྭཱན, པཀྐཾ, སཾསཊྛ’’ནྟི ཨིམེཧི པདེཧི པཙྩེཀཾ ཡོཛེཏབྦཾ. ཡཐཱཧ པཱལི༹ཡཾ ‘‘ཀཱལེ པཊིགྒཧིཏཾ ཀཱལེ ནིཔྤཀྐཾ ཀཱལེ སཾསཊྛཾ ཏེལཔརིབྷོགེན པརིབྷུཉྫིཏུ’’ནྟི (མཧཱཝ. ༢༦༢).

༨༠༧. ཏཾ ཀཏྭཱ དེཏཱིཏི ཨཔཊིགྒཧིཏཝསཾ གཧེཏྭཱ པཙིཏྭཱ ཏེལཾ དེཏཱིཏི ཨཏྠོ. ཏེནཱཧ ཨཊྛཀཐཱཡཾ ‘‘ཨནུཔསམྤནྣེཧི ཀཏཾ ནིབྦཊྚིཏཝསཱཏེལཾ པུརེབྷཏྟཾ པཊིགྒཧིཏཾ པུརེབྷཏྟཾ སཱམིསམྤི ཝཊྚཏཱི’’ཏི (པཱརཱ. ཨཊྛ. ༢.༦༢༣). ཏཏོ ཨུདྡྷཾ སཏྟཱཧམནཏིཀྐམྨཱཏི གཧེཏབྦཾ. ཡཐཱཧ ཨཊྛཀཐཱཡཾ ‘‘པཙྪཱབྷཏྟཏོ པཊྛཱཡ སཏྟཱཧཾ ནིརཱམིསམེཝ ཝཊྚཏཱི’’ཏི (པཱརཱ. ཨཊྛ. ༢.༦༢༣). ཨིདྷ ཨུབྷཡཏྠཱཔི ཀཱལེ, ཝིཀཱལེ ཙ ཀཔྤིཡཱཀཔྤིཡམཾསཝསཱནཾ ཏེལཾ དིཡྻམཱནཾ སུཁུམམཾསཙུཎྞཱདིཀཾ ཨབྦོཧཱརིཀཾ. ཡཐཱཧ ཨཊྛཀཐཱཡཾ ‘‘ཡཾ པན ཏཏྠ སུཁུམརཛསདིསཾ མཾསཾ ཝཱ ནྷཱརུ ཝཱ ཨཊྛི ཝཱ ལོཧིཏཾ ཝཱ ཧོཏི, ཏཾ ཨབྦོཧཱརིཀ’’ནྟི (པཱརཱ. ཨཊྛ. ༢.༦༢༣).

༨༠༨. པཊིགྒཧེཏུནྟི ཨེཏྠ ‘‘ཝས’’ནྟི ཙ ཀཱཏུནྟི ཨེཏྠ ‘‘ཏེལ’’ནྟི ཙ པཀརཎཏོ ལབྦྷཏི. ཀཱཏུནྟི ཨེཏྠ པཙིཏུཾ པརིསྶཱཝིཏུནྟི ¶ ཨུབྷཡམེཝཱཏི ཨཏྠོ. ‘‘ན ཝཊྚཏཱི’’ཏི ཨིདཾ པཊིགྒཧཎཱདིཔཡོགཏྟཡེ ཝིསུཾ ཝིསུཾ དུཀྐཊཏྟཱ ཝུཏྟཾ. ཡཐཱཧ པཱལི༹ཡཾ ‘‘ཝིཀཱལེ ཙེ བྷིཀྑཝེ པཊིགྒཧིཏཾ ཝིཀཱལེ ནིཔྤཀྐཾ ཝིཀཱལེ སཾསཊྛཾ, ཏཾ ཙེ པརིབྷུཉྫེཡྻ, ཨཱཔཏྟི ཏིཎྞཾ དུཀྐཊཱན’’ནྟི ¶ (མཧཱཝ. ༢༦༢). ཨིམཱནི ཧི ཏཱིཧི པཡོགེཧི ཏཱིཎི དུཀྐཊཱནི ཧོནྟི. སེསོཏི ཨུགྒཧིཏཀཔཊིགྒཧིཏཀསཝཏྠུཀཝིསཡོ ཝིནིཙྪཡོ ཙ བྷཱཛནགཎནཱཡ ཨཱཔཏྟིབྷེདོ ཙཱཏི ཨེཝཾཔཀཱརོ ཝཏྟབྦཝིསེསོ.

༨༠༩. གཧིཏནྟི པཊིགྒཧིཏཾ. མདྷུཀརཱིཀཏནྟི མདྷུམཀྑིཀཱཁུདྡཀམཀྑིཀཱབྷམརམཀྑིཀཱསངྑཱཏཱཧི ཏཱིཧི མདྷུཀརཱིཧི ཀཏཾ.

༨༡༠. ཝཏྠཱུནཾ གཎནཱཏི མདྷུཔཊལེན ཋིཏཾ ཙེ, པཊལགཎནཱཡ, པཱིལེ༹ཏྭཱ བྷཱཛནེ པཀྑིཔིཏྭཱ ཋཔིཏཾ ཙེ, བྷཱཛནགཎནཱཡ, སིལེསམིཝ པཏྠིནྣཾ ཙེ, མཧཱབྷམརམདྷུཁཎྜཔིཎྜཝསེན, ཝིསུཾ ཝིསུཾ ཀཏེ ཏེསཾ གཎནཱཡཱཏི ཨཏྠོ.

༨༡༡. གྷནཱགྷནནྟི ཨེཏྠ གུལ༹ཉྩ ནཱནཔྤཀཱརཱ སཀྐརཱ ཙ གྷནཔཀྐཾ ནཱམ. པཀྐཏནུཀཾ ཕཱཎིཏཾ ཨགྷནཔཀྐཾ ནཱམ. ཨུཙྪུསིལེསོ ཨཔཀྐགྷནཾ ནཱམ. ཨུཙྪུདཎྜཏོ པཱིལི༹ཏརསོ ཨཔཀྐཱགྷནཾ ནཱམ. ‘‘ཕཱཎིཏཾ ནཱམ ཨུཙྪུམྷཱ ནིབྦཏྟ’’ནྟི (པཱརཱ. ༦༢༣) སཱདྷཱརཎཔཱལི༹ཝཙནཏོ, ‘‘ཕཱཎིཏཾ ནཱམ ཨུཙྪུརསཾ ཨུཔཱདཱཡཱ’’ཏི (ཀངྑཱ. ཨཊྛ. བྷེསཛྫསིཀྑཱཔདཝཎྞནཱ; ཝི. སངྒ ཨཊྛ. ༩༨) ཨཊྛཀཐཱཝཙནཏོ ཙ ཨིཧ རསཱདཱིཧི ཨུཙྪུཔཱནམྤི སངྒཧིཏཾ. ཀེཙི ཨུཙྪུནོ ཙཏུཀཱལིཀཏྟཾ ཝཎྞཡནྟི, ཏཾ ན སཱརཏོ པཙྩེཏབྦཾ.

༨༡༢. ཕཱཎིཏནྟི ཝུཏྟཔྤཀཱརེ ཏསྨིཾ ཕཱཎིཏེ ཨཉྙཏརཾ. གཧིཏཾ པཊིགྒཧིཏཾ.

༨༡༣. ཨསཾསཊྛེནཱཏི ¶ ཨཔརིསྶཱཝིཏེན. ཀཏཕཱཎིཏནྟི པརིསྶཱཝེཏྭཱ ཨཏྟནཱ ཀཏཕཱཎིཏཾ. པུརེབྷཏྟཾ གཧིཏེནཱཏི པུརེབྷཏྟཾ པཊིགྒཧིཏེན. ‘‘སཡཾ ཀཏ’’ནྟི (པཱརཱ. ཨཊྛ. ༢.༦༢༣) ཝུཏྟཏྟཱ ཀཏནྟི ཨུཙྪུརསོ གཧེཏབྦོ.

༨༡༦. ཀཏྭཱཏི པཙིཏྭཱ ཕཱཎིཏཾ ཀཏྭཱ.

༨༡༧. པཙྪཱབྷཏྟཾ ཀཏཉྩཱཔཱིཏི པཙྪཱབྷཏྟཾ ཨཏྟནཱ ཙ ཀཏཾ ཨནུཔསམྤནྣེན ཙ ཀཏཾ ཕཱཎིཏམྤི.

༨༡༨. ཀཏཾ ¶ …པེ… སཱིཏཝཱརིནཱཏི སཱིཏུདཀེ མདྷུཀཔུཔྥཱནི པཀྑིཔིཏྭཱ ཋཔེཏྭཱ མདྡིཏྭཱ པརིསྶཱཝིཏརསེན ཀཏཾ མདྷུཀཕཱཎིཏཾ.

༨༡༩. ཨསྶཱཏི མདྷུཀཕཱཎིཏསྶ. དུཀྐཊནྟི ཏདཱདྷཱརབྷཱཛནགཎནཱཡ དུཀྐཊཾ. ཁཱིརཾ པཀྑིཔིཏྭཱ ཀཏཾ མདྷུཀཕཱཎིཏཾ ཡཱཝཀཱལིཀཾ ཙེ ཧོཏི, ཀཐཾ ཁཎྜསཀྐརཱཀཏཾ སཏྟཱཧཀཱལིཀཾ ཧོཏཱིཏི ཝིཙཱརཎཱཡཾ ཁཱིརཛལླིཀཾ དྷོཝིཏྭཱ དྷོཝིཏྭཱ གཡ྄ཧམཱནཏྟཱ ཝཊྚཏཱིཏི པརིཧརནྟི. ཡཐཱཧ ཨཊྛཀཐཱཡཾ ‘‘ཁཎྜསཀྐརཾ པན ཁཱིརཛལླིཀཾ ཨཔནེཏྭཱ ཨཔནེཏྭཱ སོདྷེནྟི, ཏསྨཱ ཝཊྚཏཱི’’ཏི (པཱརཱ. ཨཊྛ. ༢.༦༢༣). ‘‘བཱིཛཏོ པཊྛཱཡ ན ཝཊྚཏཱི’’ཏི པཊིཀྑིཏྟམདྷུཀཔུཔྥམེརཡཾ ཝིནཱ ཨཱམཀཉྩ པཀྐཉྩ མདྷུཀཔུཔྥཾ པུརེབྷཏྟཾ ཝཊྚཏཱིཏི ཨཊྛཀཐཱཡཾ ཝུཏྟཾ.

༨༢༠. སབྦེསཾ པན ཕལཱནནྟི ཀདལིཁཛྫཱུརིཨཱདིཕལཱནཾ.

༨༢༡. སཱམཉྙཛོཏནཱཡ ཝིསེསེཔི ཨཝཊྛཱནཏོ ‘‘ཀཱལིཀཱ’’ཏི ཨིམིནཱ ‘‘པཙྪཱབྷཏྟཾ སཏི པཙྩཡེ’’ཏི ཝཙནསཱམཏྠིཡཱ ཡཱཝཀཱལིཀཝཛྫཱ ཏཡོ ཀཱལིཀཱ གཧེཏབྦཱ ¶ , ‘‘པུརེབྷཏྟཾ ཡཐཱསུཁ’’ནྟི ཝཙནསཱམཏྠིཡཱ ཙཏྟཱརོཔི གཧེཏབྦཱ. ཡཱཝཀཱལིཀཝཛྫཱ ཏཡོ ཀཱལིཀཱ པཙྪཱབྷཏྟཾ ཝིཀཱལེ པཙྩཡེ པིཔཱསཱདིཀཱརཎེ སཏི ཀེཝལམྤི པཙྩེཀམྤི མིསྶེཏྭཱཔི པརིབྷུཉྫིཏུཾ བྷིཀྑུསྶ ཝཊྚནྟི. ཀཱལིཀཱ ཙཏྟཱརོཔི པུརེབྷཏྟཾ ཀཱལེ ཡཱཝམཛ྄ཛྷནྷཱ ཀེཝལམྤི མིསྶེཏྭཱཔི ཡཐཱསུཁཾ ཨསཏིཔི པཙྩཡེ པརིབྷུཉྫིཏུཾ བྷིཀྑུསྶ ཝཊྚནྟཱིཏི ཡོཛནཱ.

༨༢༢. ཨརུཨཱདཱིནཱིཏི ཝཎཱདཱིནི. ‘‘མཀྑེཏུཾ ན ཝཊྚཏཱི’’ཏི ཨིམིནཱ བཱཧིརཔརིབྷོགོཔི ནིཝཱརིཏོ.

༨༢༣. ཨནཱཔཏྟིཝཱརེ ‘‘ཨནྟོསཏྟཱཧ’’ནྟི ཨདྷིཀཱརེ ‘‘ཨནུཔསམྤནྣསྶ ཙཏྟེན ཝནྟེན མུཏྟེན ཨནཔེཀྑོ དཏྭཱ པཊིལབྷིཏྭཱ པརིབྷུཉྫཏཱི’’ཏི (པཱརཱ. ༦༢༥) ཝུཏྟཏྟཱ ཙཛིཏྭཱཏི ཨེཏྠ ‘‘ཨནྟོསཏྟཱཧཾ ཨནུཔསམྤནྣསྶཱ’’ཏི ཝཏྟབྦཾ. ལབྷིཏྭཱཏི ཨེཏྠ ‘‘སཏྟཱཧཱཏིཀྐམེཔཱི’’ཏི སཱམཏྠིཡཱ ལབྦྷཏི. ཏེནཱཧ མཧཱཔདུམཏྠེརོ ‘‘ཨནྟོསཏྟཱཧེ དིནྣསྶ ཧི པུན པརིབྷོགེ ཨཱཔཏྟིཡེཝ ནཏྠི, སཏྟཱཧཱཏིཀྐནྟསྶ པན པརིབྷོགེ ཨནཱཔཏྟཱིཏི དསྶནཏྠམིདཾ ཝུཏྟ’’ནྟི. ལབྷིཏྭཱཏི ¶ གཧིཏཏེལེན ཨནུཔསམྤནྣེན སཀྐཙྩཾ, ཨསཀྐཙྩཾ ཝཱ དིནྣཾ ལབྷིཏྭཱ. སཱཡིཏུནྟི ཨེཏྠ ‘‘ལབྷཏཱི’’ཏི སེསོ.

༨༢༤. ‘‘ཨནཱཔཏྟི ཨདྷིཊྛེཏཱི’’ཏི དྭིནྣཾ པདཱནཾ ཨནྟརེ ‘‘ཨནྟོསཏྟཱཧ’’ནྟི སེསོ, སབྦཔདེཧིཔི ཡུཛྫཏི. ཨདྷིཊྛེཏཱིཏི སཏྟཱཧབྦྷནྟརེ སཔྤིཉྩ ཏེལཉྩ ཝསཉྩ མུདྡྷནི ཏེལཾ ཝཱ ཨབྦྷཉྫནཾ ཝཱ, མདྷུཾ ཨརུམཀྑནཾ, ཕཱཎིཏཾ གྷརདྷཱུཔནཾ བྷཝིསྶཏཱིཏི ཨདྷིཊྛེཏི. ཨདྷིཊྛིཏེན ཨནདྷིཊྛིཏཾ ཙེ མིསྶཾ ཧོཏི, པུནཔི ཨདྷིཊྛཱཏབྦཾ. ཝིསྶཛྫེཏཱིཏི ཨནྟོསཏྟཱཧེ ཨཉྙསྶ ཨུཔསམྤནྣསྶ དེཏི. སཙེ ཏཐཱ དིནྣཾ ཨཉྙེན ཨཔྤཊིགྒཧིཏཏྟཱ ¶ , ཏེན པཊིགྒཧིཏམྤི ཨིཏརསྶ དིནྣཏྟཱ ཏེསཾ ཨནཱཔཏྟཱིཏི ཨཊྛཀཐཱཡཾ (པཱརཱ. ཨཊྛ. ༢.༦༢༥ ཨཏྠཏོ སམཱནཾ) ཝུཏྟཾ.

ཝིནསྶཏཱིཏི སཏྟཱཧབྦྷནྟརེ ཡེན ཀེནཙི ཨཱཀཱརེན ཡཐཱ ཨཔརིབྷོགཾ ཧོཏི, ཏཐཱ ཙོརིཀཱཡ ཧརཎཱདིཝསེན ནསྶཏི. ཡཐཱཧ ཨཊྛཀཐཱཡཾ ‘‘ཝིནསྶཏཱིཏི ཨཔརིབྷོགཾ ཧོཏཱི’’ཏི (པཱརཱ. ཨཊྛ. ༢.༦༢༥). ཨཙྪིནྡིཏྭཱ གཎྷཏཱིཏི ཨཉྙོ ཏསྨིཾ སཏྟཱཧབྦྷནྟརེ ཝིལུམྤིཏྭཱ གཎྷཱཏི. ཝིསྶཱསཾ གཎྷཏཱིཏི ཏསྨིཾཡེཝ སཏྟཱཧབྦྷནྟརེ ཨཉྙོ ཝིསྶཱསཾ གཎྷཱཏི.

༨༢༥. ཨཀཐིནཙིཏྟེན སཏྠུནཱ སམུཊྛཱནཱདཡོ སབྦེཝ པཋམེན ཀཐིནེན སམཱ པཀཱསིཏཱཏི ཡོཛནཱ. ཨཀཐིནཙིཏྟེནཱཏི མཧཱཀརུཎཱརསེན ཏིནྟཏཱཡ ཨཀཀྐསཙིཏྟེན, ཨཝིཧིཾསཱབྷིརཏཙིཏྟེནཱཏི ཝུཏྟཾ ཧོཏི. སཏྠུནཱཏི དིཊྛདྷམྨིཀསམྤརཱཡིཀཱདཱིཧི ཨཏྠེཧི སདེཝཀཾ ལོཀཾ ཨནུསཱསཏཱིཏི སཏྠཱ, ཏེན སབྦཉྙུནཱ དསབལེན སམྨཱསམྦུདྡྷེན.

བྷེསཛྫསིཀྑཱཔདཀཐཱཝཎྞནཱ.

༨༢༦. གིམྷཱནནྟི ཨེཏྠ ‘‘མཱསཱན’’ནྟི སཱམཏྠིཡཱ ལབྦྷཏི, ནིདྡྷཱརཎེ སཱམིཝཙནཾ, གིམྷེསུ ཙཏཱུསུ མཱསེསཱུཏི ཨཏྠོ. ནིདྡྷཱརིཏབྦཾ དསྶེཏི ‘‘མཱསོ སེསོ’’ཏི, ཨེཏྠ ‘‘ཝཏྟབྦེ ཀཱལེ’’ཏི སེསོ. ཕགྒུནམཱསཀཎྷཔཀྑཔཱཊིཔདཏོ པཊྛཱཡ ཛེཊྛམཱསཔུཎྞམིཔརིཡོསཱནེསུ ཏཱིསུ མཱསེསུ ཨཏིཀྐནྟེསཱུཏི ཨཏྠོ. སེསམཱསོ ནཱམ ཛེཊྛམཱསསྶ ཀཎྷཔཀྑཔཱཊིཔདཏོ པཊྛཱཡ ཨཱསཱལ༹ྷིམཱསཔུཎྞམིཔརིཡོསཱནོ. གིམྷཱནཾ མཱསོ སེསོཏི ཝཏྟབྦེ ཀཱལེཏི ཨཏྠོ.

ཨིམསྨིཾ ¶ ¶ པཙྪིམེ གིམྷམཱསེ ཛེཊྛམཱསསྶ ཀཎྷཔཀྑོ ཝསྶིཀསཱཊིཀཱ ཙེ ན ལདྡྷཱ, པརིཡེསིཏུཾ ལདྡྷཾ ཀཱཏུཾ ཁེཏྟཾ, ཨདྷིཊྛཱནནིཝཱསནཱནཾ ཨཁེཏྟཾ. ཨཱསཱལ༹ྷིཔུརིམཔཀྑོ པརིཡེསནཀརཎནིཝཱསནཱནཾ ཁེཏྟཾ, ཨདྷིཊྛཱཏུཾ ཨཁེཏྟཾ. ཨཱསཱལ༹ྷིཀཎྷཔཀྑཔཱཊིཔདཏོ ཡཱཝ པཙྪིམཀཏྟིཀཔུཎྞམཱི, ཨིདཾ ཙཏུནྣམྤི ཁེཏྟནྟི ཨཡམེཏྠ སངྑེཔོ.

པརིཡེསེཡྻཱཏི ‘‘ཡེ མནུསྶཱ པུབྦེ ཝསྶིཀསཱཊིཀཾ དེནྟཱི’’ཏིཨཱདིནཱ (པཱརཱ. ༦༢༨) པདབྷཱཛནེ ཝུཏྟནཡེན པུབྦེ ཝསྶིཀསཱཊིཀདཱཡཀཾ ཨུཔསངྐམྨ ‘‘དེཐ མེ ཝསྶིཀསཱཊིཀཙཱིཝར’’ནྟིཨཱདིནཱ ཝཙནེན ཨཝིཉྙཱཔེཏྭཱ ‘‘ཀཱལོ ཝསྶིཀསཱཊིཀཱཡ སམཡོ ཝསྶིཀསཱཊིཀཱཡ, ཨཉྙེཔི མནུསྶཱ ཝསྶིཀསཱཊིཀཾ དེནྟཱི’’ཏི ཨེཝཾ སཏུཔྤཱདམཏྟཀརཎེན པརིཡེསེཡྻ.

སཱཊིཀནྟི ཝསྶིཀསཱཊིཀཾ. ‘‘ཨདྡྷམཱསོ སེསོ’’ཏི ཨིདཾ ‘‘གིམྷཱན’’ནྟི ཨིམིནཱཝ ཡུཛྫཏི. ཏཏྠ ‘‘ཝཏྟབྦེ ཀཱལེ’’ཏི ཨཛ྄ཛྷཱཧརིཏབྦཾ, ཨཱསཱལ༹ྷིམཱསསྶ པུརིམཔཀྑེཏི ཨཏྠོ. ཀཏྭཱཏི ཨེཏྠ ‘‘ལདྡྷ’’ནྟི སཱམཏྠིཡཱ ལབྦྷཏི. ཡཐཱཝུཏྟནཡེན སཏུཔྤཱདེན ཝཱ ཨཝསེསཱནཾ སདྡྷཱསམྤནྣཀུལཱནཾ ཝཱ སནྟིཀཱ ལདྡྷཾ སིབྦནརཛནཀཔྤབིནྡུདཱནཝསེན ནིཊྛཱཔེཏྭཱཏི ཝུཏྟཾ ཧོཏི. པརིདཧེཏི ནིཝཱསེཡྻ.

༨༢༧-༨. པིཊྛིསམྨཏེ སམཡེཏི ‘‘ཀཏྟིཀཔུཎྞམཱསིཡཱ པན པཙྪིམཔཱཊིཔདདིཝསཏོ པཊྛཱཡ ཡཱཝ ཛེཊྛམཱུལཔུཎྞམཱ ཨིམེ སཏྟ མཱསཱ པིཊྛིསམཡོ ནཱམཱ’’ཏི (པཱརཱ. ཨཊྛ. ༢.༦༢༨) ཨེཝཾ དསྶིཏེསུ སཏྟསུ མཱསེསུ. ཉཱཏཀཱཉྙཱཏཀཱདིནོ སཏུཔྤཱདཾ ཀཏྭཱཏི ཡོཛནཱ. ཨཱདི-སདྡེན པཝཱརིཏཱཔཝཱརིཏཱནཾ སངྒཧོ. ཡཐཱཧ ཨཊྛཀཐཱཡཾ ‘‘ཨཉྙཱཏཀཨཔྤཝཱརིཏཊྛཱནཏོ’’ཏི.

ཏེསུཡེཝཱཏི ¶ ཉཱཏཀཨཉྙཱཏཀཔཝཱརིཏཨཔྤཝཱརིཏེསུ. ‘‘ཏཐཱ’’ཏི ཨིམིནཱ ‘‘ཧོཏི ནིསྶགྒིཡཱཔཏྟཱི’’ཏི ཨིདཾ དསྶིཏཾ. སཱ ཨཱཔཏྟི ཨཉྙཱཏཀཨཔྤཝཱརིཏེསུ ཨཉྙཱཏཀཝིཉྙཏྟིསིཀྑཱཔདེན ཧོཏི. ཡཐཱཧ ཨཊྛཀཐཱཡཾ ‘‘དེཐ མེ ཝསྶིཀསཱཊིཀཙཱིཝར’ནྟིཨཱདིནཱ ནཡེན ཝིཉྙཏྟིཾ ཀཏྭཱ ནིཔྥཱདེནྟསྶ ཨཉྙཱཏཀཝིཉྙཏྟིསིཀྑཱཔདེན ནིསྶགྒིཡཾ པཱཙིཏྟིཡ’’ནྟི (པཱརཱ. ཨཊྛ. ༢.༦༢༨). ཉཱཏཀཔཝཱརིཏེསུ ཏེན སིཀྑཱཔདེན ཨནཱཔཏྟི, པིཊྛིསམཡཏྟཱ ཨིམིནཱ ¶ ཨཱཔཏྟི ཧོཏི. ཨཉྙཱཏཀཨཔྤཝཱརིཏེསུ ཙ ཝཀྑམཱནནཡེན ཝཏྟབྷེདདུཀྐཊེན སདྡྷིཾ ཧོཏཱིཏི དཊྛབྦཾ.

༨༢༩-༣༠. ཨཉྙཱཏཀཱདིནོ ཀཏྭཱ པན སཏུཔྤཱདནྟི ཡོཛནཱ. ཨཱདི-སདྡེན ཨཔྤཝཱརིཏཱནཾ སངྒཧོ. ཀུཙྪིསཉྙིཏེ སམཡེཏི ཡཐཱཝུཏྟཔིཊྛིསམཡེ སཏྟམཱསེ ཝིནཱ ཨིཏརེ པཉྩ མཱསཱ ཝུཏྟཱ. ཡཐཱཧ ཨཊྛཀཐཱཡཾ ‘‘ཛེཊྛམཱུལཔུཎྞམཱསིཡཱ པན པཙྪིམཔཱཊིཔདདིཝསཏོ པཊྛཱཡ ཡཱཝ ཀཏྟིཀཔུཎྞམཱ ཨིམེ པཉྩ མཱསཱ ཀུཙྪིསམཡོ ནཱམཱ’’ཏི (པཱརཱ. ཨཊྛ. ༢.༦༢༨). ཝཏྠནྟི ཝསྶིཀསཱཊིཀཾ. ཨདིནྣཔུབྦེསཱུཏི ཡེཧི ཝསྶིཀསཱཊིཀཱ ན དིནྣཔུབྦཱ, ཏེསུ, ཨིམིནཱ ཝཏྟབྷེདསྶ ཀཱརཎམཱཧ. ཨིཧ ཝཏྟབྷེདོ ནཱམ ‘‘ཡེ མནུསྶཱ པུབྦེ ཝསྶིཀསཱཊིཀཙཱིཝརཾ དེནྟཱི’’ཏིཨཱདིཝཙནཏོ (པཱརཱ. ༦༢༨) དིནྣཔུབྦེསུ ཀཱཏབྦསྶ སཏུཔྤཱདསྶ ཨདིནྣཔུབྦེསུ ཀརཎཾ. བྱཏིརེཀཏོ དིནྣཔུབྦེསུ ནཏྠཱིཏི དཱིཔིཏཾ ཧོཏི.

ཏཏྲཱཏི ཨཉྙཱཏཀཱདིམྷི. ‘‘ནིསྶགྒིཡ’’ནྟི ཨིམིནཱ ཨཉྙཱཏཀཝིཉྙཏྟིསིཀྑཱཔདེན ཨཱཔཏྟིཾ ཨཱཧ. ཡཐཱཧ ཀུཙྪིསམཡཙཏུཀྐེ ‘‘ཝིཉྙཏྟིམྤི ཀཏྭཱ ནིཔྥཱདེནྟསྶ ཨཉྙཱཏཀཝིཉྙཏྟིསིཀྑཱཔདེན ནིསྶགྒིཡཾ པཱཙིཏྟིཡ’’ནྟི. ཨཡཾ པཱཙིཏྟིཡཱཔཏྟི པཀཏིཡཱ ཝསྶིཀསཱཊིཀདཱཡཀེསུཔི ཧོཏཱིཏི ཨིདཾ ¶ ཨཊྛཀཐཱཡཾ ‘‘ཨིདཾ པན པཀཏིཡཱ ཝསྶིཀསཱཊིཀདཱཡཀེསུཔི ཧོཏིཡེཝཱ’’ཏི (པཱརཱ. ཨཊྛ. ༢.༦༢༨) ཝཙནཏོ ཝིཉྙཱཡཏི.

༨༣༡. ཨོཝསྶཱཔེཏཱིཏི ཨཱཀཱསཏོ པཏིཏཨུདཀེནེཝ ཀཱཡཾ ཏེམེཏི, ཨིམིནཱ ‘‘གྷཊཱདཱིཧི ཨོསིཉྩིཏུཾ ཝཊྚཏཱི’’ཏི དཱིཔིཏཾ ཧོཏི. ‘‘ནིབྦཀོསམྦུནཱ ནཧཱཡིཏུཾ ཝཊྚཏཱི’’ཏི གཎྛིཔདེསུ ཝུཏྟཾ. སཏིཔི ཙཱིཝརེཏི ཝསྶིཀསཱཊིཀཱཡ སཏིཡཱཔི. ‘‘པརིཡོསཱནེ དུཀྐཊ’’ནྟི ཨིམིནཱ བིནྡུགཎནཱཡཱཏི དཱིཔེཏི. ཝིཝཊངྒཎེཏི རུཀྑཱདིནཱ ཀེནཙི ཨནཱཝཊཊྛཱནེ.

༨༣༢. མཱསསྨིནྟི གིམྷཱནཾ པཙྪིམམཱསསྨིཾ.

༨༣༣. ‘‘ཨཙྪིནྣཙཱིཝརསྶཱཏི ཨེཏཾ ཝསྶིཀསཱཊིཀམེཝ སནྡྷཱཡ ཝུཏྟ’’ནྟི (པཱརཱ. ཨཊྛ. ༢.༦༣༠) ཨཊྛཀཐཱཡཾ ཝུཏྟཾ. ཝསྶིཀསཱཊིཀཾ ནིཝཱསེཏྭཱ ནཧཱཡནྟསྶ ཙོརུཔདྡཝོ ཨཱཔདཱ ནཱམ. ནྷཱནཀོཊྛཀནྟི ནཧཱནཏྠཱཡ ཀཏཀོཊྛཀཾ. ‘‘ཝཱཔཱི’’ཏི ཨིམིནཱ པོཀྑརཎིཛཱཏསྶརཱདཡོ ¶ ཨུཔལཀྑིཏཱ. ནྷཱཡནྟསྶཱཏི ནགྒོ ཧུཏྭཱ ནཧཱཡནྟསྶཱཏི པཀརཎཏོ ལབྦྷཏི. ‘‘ཨཱཀཱསཏོ པཏིཏཨུདཀེནེཝཱ’’ཏི (པཱརཱ. ཨཊྛ. ༢.༦༢༩) ཨཊྛཀཐཱཡམེཝ ཝུཏྟཾ.

༨༣༤. ཀྲིཡནྟི ཨཀཱལེ པརིཡེསནཀརཎཨདྷིཊྛཱནནིཝཱསནེཧི ཨཱཔཛྫིཏབྦཏོ ཀིརིཡཾ. ཀཱཡེན ཙ ཝཱཙཱཡ ཙ ཝིཉྙཱཔནཱདིཾ ཀརོནྟསྶ ཀཱཡཀམྨཾ ཝཙཱིཀམྨཾ ཧོཏི.

ཝསྶིཀསཱཊིཀཀཐཱཝཎྞནཱ.

༨༣༥. ‘‘ཡོ ¶ པན བྷིཀྑུ བྷིཀྑུསྶ སཱམཾ ཙཱིཝརཾ དཏྭཱ’’ཏི (པཱརཱ. ༦༣༢) ཝཙནཏོ སཱམནྟི ཨེཏྠ ‘‘བྷིཀྑཱུ’’ཏི ཙ དཏྭཱཏི ཨེཏྠ ‘‘བྷིཀྑུསྶ’’ཨིཏི ཙ ལབྦྷཏི. ཙཱིཝརནྟི ཚནྣཾ ཙཱིཝརཱནཾ ཨཉྙཏརཾ ཙཱིཝརཾ ཝིཀཔྤནུཔགཾ པཙྪིམཾ. ‘‘ཀུཔིཏོ ཨནཏྟམནོ ཨཙྪིནྡེཡྻཱ’’ཏི (པཱརཱ. ༦༣༢) ཝཙནཏོ ཨཙྪིནྡནྟསྶཱཏི ཨེཏྠ ‘‘ཀུཔིཏསྶ ཨནཏྟམནསྶཱ’’ཏི སེསོ, ཀུཔིཏསྶ ཨནཏྟམནསྶ ཨཙྪིནྡནྟསྶ ཝཱ ཨཙྪིནྡཱཔེནྟསྶ ཝཱཏི ཨཏྠོ. ཏནྟི ཨཏྟནཱ དིནྣཙཱིཝརཾ. ‘‘སཀསཉྙཱཡཱ’’ཏི ཨིམིནཱ པཱརཱཛིཀཱཡ ཨཝཏྠུབྷཱཝཾ དཱིཔེཏི.

༨༣༦. ཏཐཱཏི ཨེཀཱཡེཝ ཨཱཔཏྟཱིཏི དཱིཔེཏི.

༨༣༧. ཝཏྠཱནནྟི ཙཱིཝརཱནཾ. ཨསྶཱཏི བྷིཀྑུསྶ.

༨༤༡. སངྒྷཱཊིཾ གཎྷ, ཨུཏྟརཱསངྒཾ གཎྷཱཏི ཡོཛནཱ.

༨༤༢. ཝིཀཔྤནུཔགཾ པཙྪིམནྟི ཨེཏྠ ‘‘ཙཱིཝར’’ནྟི ལབྦྷཏི. ཨཱཡཱམཏོ ཝཌྜྷཀིཧཏྠཾ ཏིརིཡཾ ཏཐཱ ཝིདཏྠིཔྤམཱཎཾ ཝཏྠཁཎྜཾ ཧེཊྛིམཔརིཙྪེདཏོ ཝིཀཔྤནུཔགཾ ནཱམ. ཨཉྙཾ ཀིཉྩི པརིཀྑཱརནྟི ཡོཛནཱ, ཨནྟམསོ སུཙིམྤཱིཏི ཝུཏྟཾ ཧོཏི. པརཾ པུགྒལཾ. ཚིནྡཱཔེནྟསྶཱཏི ཨཙྪིནྡཱཔེནྟསྶ. ཀཱརིཏནྟསྶ དྭིཀམྨཀཏྟཱ ‘‘པར’’ནྟི ཙ ‘‘པརིཀྑཱར’’ནྟི ཙ ཀམྨདྭཡགཧཎཾ. ཨཉྙནྟི པརིཀྑཱརཝིསེསནཾ. དུཀྐཊཾ ཝཏྠུགཎནཱཡ, ཝཙནགཎནཱཡ ཙ.

༨༤༤. ཨེཝནྟི ¶ ཡཐཱ ཨནུཔསམྤནྣེ ཨནུཔསམྤནྣསཉྙིནོ དུཀྐཊཾ, ཨེཝཾ ཨནུཔསམྤནྣེ…པེ… ཝེམཏིཀསྶཱཔི དུཀྐཊནྟི ཡོཛནཱ. ཨཙྪིནྡནྟསྶཱཏི ཨེཏྠ ཡཐཱཝུཏྟཾ ‘‘ཨནུཔསམྤནྣེ’’ཏི ཨིདཾ ཝིབྷཏྟིཝིཔརིཎཱམེན སཱམིཝཙནཾ ཀཏྭཱ ‘‘དིནྣ’’ནྟི ཨཛ྄ཛྷཱཧཱརེན སཧ ཡོཛེཏབྦཾ, ‘‘ཙཱིཝར’’ནྟི པཀརཎཏོ ¶ ལབྦྷཏི, ཨནུཔསམྤནྣསྶ དིནྣཾ ཙཱིཝརཾ ཨཙྪིནྡནྟསྶཱཏི ཝུཏྟཾ ཧོཏི.

༨༤༥. སོ ཝཱཏི ཡསྶ ཙཱིཝརཾ དིནྣཾ, སོ ཨེཝ ཝཱ བྷིཀྑུ. ཏུཊྛོ ཝཱ དུཊྛོ ཝཱ སོ དེཏཱིཏི ཡོཛནཱ. ཝིསྶཱསམེཝ ཝཱཏི ཝིསྶཱསཾ ཀཏྭཱ གཎྷཏོཏི ཡོཛནཱ.

༨༤༦. ཨེཏྠཱཏི ཨིམསྨིཾ སིཀྑཱཔདེ.

ཙཱིཝརཙྪིནྡནཀཐཱཝཎྞནཱ.

༨༤༧. ཝིཉྙཱཔེཏྭཱཏི ཝཏྠཝཱཡཱཔནཾ སནྡྷཱཡ ཡཱཙིཏྭཱ. ཚབྦིདྷཾ སུཏྟནྟི པདབྷཱཛནེ ‘‘ཁོམཾ ཀཔྤཱསིཀཾ ཀོསེཡྻཾ ཀམྦལཾ སཱཎཾ བྷངྒ’’ནྟི (པཱརཱ. ༦༣༨) ཨཱགཏཾ ཚཔྤཀཱརཾ སུཏྟཾ. ཀམྦལནྟི ཨེལ༹ཀལོམསུཏྟཾ. སཱནུལོམཱནི ཚཔྤཀཱརསུཏྟཱནི ཧེཊྛཱ ཙཱིཝརཝིནིཙྪཡེ ཝུཏྟཱནུསཱརེན ཝེདིཏབྦཱནི. ཙཱིཝརཏྠཾ ཝཏྠཾ ‘‘ཙཱིཝར’’ནྟི ཝུཏྟཾ. ཏནྟཝཱཡེཧཱིཏི ཀཔྤིཡཱཀཔྤིཡེཧི པེསཀཱརེཧི. པོཏྠཀེསུ ‘‘ཝཱཡཱཔེཏུཾ ན ཝཊྚཏཱི’’ཏི པཱཋོ དིསྶཏི, ‘‘སཙེ’’ཏི ཨིམིནཱ ཨཡུཛྫམཱནཏྟཱ སོ ཨཔཱཋོ. ‘‘ཝཱཡཱཔེཏི ན ཝཊྚཏཱི’’ཏི པཱཋོ ཡུཛྫཏཱིཏི སཙེ ཝཱཡཱཔེཏཱིཏི ཡོཛནཱ, ཨཏྟནོ ཨཏྠཱཡ ཡདི ཝཱཡཱཔེཡྻཱཏི ཨཏྠོ.

༨༤༨. ཏཐཱ ཨཀཔྤིཡོ. ཀཱིདིསོཏི ཨཱཧ ‘‘ཨཉྙཱཏཀཱདིཀོ’’ཏི. ཨཉྙཱཏཀཱདིཀོཏི ཨཉྙཱཏཀོ ཨཱདི ཡསྶ སོ ཨཉྙཱཏཀཱདིཀོ. ཨཱདི-སདྡེན ཨཔྤཝཱརིཏོ གཧིཏོ. ཡོ བྷིཀྑུ ཏནྟཝཱཡསྶ ཨཉྙཱཏཀོ, ཏེན ཨཔྤཝཱརིཏོ ཙ, ཏསྶ ཨཉྙཱཏཀཱདིཀོ བྷིཀྑུནཱ ཝིཉྙཏྟོ སོ ཏནྟཝཱཡོ ཨཀཔྤིཡོཏི ཨཏྠོ.

༨༤༩. ཨཀཔྤིཡེནཱཏི ¶ ཝིཉྙཱཔིཏེན. ཝཱཡཱཔེནྟསྶཱཏི ཨེཏྠ ‘‘པཡོགེ པཡོགེ དུཀྐཊཾ, པཊིལཱབྷེནཱ’’ཏི སེསོ. ཡཐཱཧ ‘‘ཝཱཡཱཔེཏི, པཡོགེ པཡོགེ དུཀྐཊཾ. པཊིལཱབྷེན ནིསྶགྒིཡ’’ནྟི (པཱརཱ. ༦༣༨).

༨༥༠. ཀིཏྟཀེ ¶ ཝཱིཏེ ནིསྶགྒིཡཾ ཧོཏཱིཏི ཨཱཧ ‘‘ཝིདཏྠིམཏྟེ’’ཏིཨཱདི. ཧཏྠམཏྟེཏི རཏནམཏྟེ. པདབྷཱཛནེ ‘‘པཊིལཱབྷེན ནིསྶགྒིཡ’’ནྟི ཝུཏྟཾ, ཨིདྷ ‘‘ཝཱིཏེ ནིསྶགྒིཡ’’ནྟི ཀསྨཱ ཨཱཧཱཏི? ཨཊྛཀཐཱཡཾ ཝུཏྟཏྟཱ. ཏཏྠཱཔི ཏཐཱ ཀསྨཱ ཝུཏྟནྟི? ཏདནནྟརཾ ཨཏྟནོ སནྟཀཏྟཱ ཝཱིཏཝཱིཏཊྛཱནཾ པཊིལདྡྷམེཝ ཧོཏི, པདབྷཱཛནེཔི ཨིམིནཱ ཨདྷིཔྤཱཡེན པཊིལཱབྷེན ནིསྶགྒིཡཾ ཝུཏྟཾ, ཏསྨཱ ཡཱཝ ཙཱིཝརཾ ཝཌྜྷཏི, ཏཱཝ ཨིམིནཱ པམཱཎེན ཨཱཔཏྟིཡོ ཝཌྜྷནྟི. ཕལཀེཔི ཙཱཏི ཨེཏྠ ཕལཀཾ ནཱམ ཏུརིཝཱིཏཊྛཱནཾ, ཡཏྠ སཾཧརིཏྭཱ ཋཔེནྟི. ཕལཀེ ཕལཀེཔི ཙ ནིསྶགྒིཡཾ ཝུཏྟནྟི ཡོཛནཱ.

༨༥༡. ཏེནེཝཱཏི ཝིཉྙཏྟཏནྟཝཱཡེནེཝ. ཀཔྤིཡཾ སུཏྟནྟི ཨཝིཉྙཏྟིཡཱ ལདྡྷསུཏྟཾ. ཀཔྤིཡེན ཏནྟཝཱཡེན ཨཀཔྤིཡསུཏྟཾ ཝཱཡཱཔེནྟསྶ ཏཐེཝ དུཀྐཊནྟི ཡོཛནཱ.

༨༥༢. ཨེཀནྟརིཀཏོ ཝཱ ཀཔྤིཡཱཀཔྤིཡེཧེཝ སུཏྟེཧི ཝཱིཏེ དུཀྐཊནྟི ཡོཛནཱ, ཨནྟརནྟརཱ ཨཀཔྤིཡསུཏྟཱནཾ པསཱརཎེན, ཝཱཡནེན ཙ དུཀྐཊཾ ཧོཏཱིཏི ཨཏྠོ. དཱིགྷཏོ ཝཱ ཏིརིཡཏོ ཝཱ ཀཔྤིཡཱཀཔྤིཡེཧེཝ སུཏྟེཧི ཝཱིཏེ དུཀྐཊནྟི ཡོཛནཱ, དཱིགྷཏོ ཀཔྤིཡསུཏྟཾ པསཱརེཏྭཱ ཏིརིཡཾ ཨཀཔྤིཡསུཏྟེན ཝཱིཏེ དུཀྐཊཾ ཧོཏཱིཏི ཨཏྠོ. ཝཱགྒཧཎེན ཝུཏྟཝིཔརིཡཱཡཏོཔི ཡོཛེཏབྦཾ. དཱིགྷཏོ ཨཀཔྤིཡསུཏྟཾ པསཱརེཏྭཱ ཏིརིཡཏོ ཀཔྤིཡསུཏྟེན ¶ ཝཱིཏེཏི ཨཡམེཏྠ ཝིཔརིཡཱཡོ. ཝཱིཏེཏི ཨེཏྠ ‘‘ཕལཀེ ཕལཀེ’’ཏི ཨནུཝཏྟེཏབྦཾ.

༨༥༣. ཀཔྤིཡཱཀཔྤིཡེཧི ཏནྟཝཱཡེཧི ཀཔྤིཡཱཀཔྤིཡསུཏྟཾ མིསྶེཏྭཱ ཀཏེ ཝཱིཏེ ཕལཀེ ཕལཀེ ཏསྶ བྷིཀྑུསྶ དུཀྐཊནྟི ཡོཛནཱ. ཝེཏི ནིཔཱཏམཏྟཾ, ཨཐ ཝཱ ཝེ ཏསྨིཾ ཀཏེ ཝཱིཏེཏི ཨཏྠོ.

༨༥༤-༥. ཏེ ཀཔྤིཡཱཀཔྤིཡཏནྟཝཱཡཱ པརིཙྪེདཾ དསྶེཏྭཱ ཝཱརེནེཝ ཨཀཔྤིཡསུཏྟཾ སཙེ ཝིནནྟཱིཏི ཡོཛནཱ. ཨཀཔྤིཡེན ཏནྟཝཱཡེན ཝཱིཏེ. ཚནྡཱནུརཀྑནཏྠཾ ‘‘ཝིཏེ’’ཏི ཝུཏྟཾ. པམཱཎསྨིནྟི ཝིཀཔྤནུཔགཔཙྪིམཔྤམཱཎསྨིཾ. ཏདཱུནེཏི ཏཏོ ཝིཀཔྤནུཔགཔཙྪིམཔྤམཱཎཏོ ཨཱུནེ. ཨིཏརེནཱཏི ཀཔྤིཡཏནྟཝཱཡེན. ཨུབྷཡཏྠཱཏི པམཱཎསྨིཾ, ཏདཱུནེ ཙ དུཀྐཊཾ ཨེཝཱཏི ཡོཛནཱ.

༨༥༦. སཙེ ¶ ཀཔྤིཡཱཀཔྤིཡཏནྟཝཱཡཱ དྭེཔི ཝེམཾ ཨུབྷཡཀོཊིཡཱ གཧེཏྭཱ ཨེཀཏོཝ ཝིནནྟི ཝཱཏི ཡོཛནཱ. ཏིརིཡཾ སུཏྟཾ པཝེསེཏྭཱ ཡེན ཨཱཀོཊེནྟོ གྷནབྷཱཝཾ སམྤཱདེནྟི, ཏཾ ཝེམཾ ཝུཙྩཏི.

༨༥༧. སབྦཏྠ བྷེདེཏི ཀཔྤིཡཱཀཔྤིཡསུཏྟཏནྟཝཱཡེཧི ཀཏེ པམཱཎཏདཱུནཨེཀནྟརིཀདཱིགྷཏིརིཡཔྤཀཱརེ སབྦཏྠ ཝཱརབྷེདེ. ཨཱཔཏྟིབྷེདོཏི ཨཀཔྤིཡསུཏྟེཧི ཨཱཡཱམཝིཏྠཱརཏོ ཨཀཔྤིཡཏནྟཝཱཡེན ཝཱིཏཔྤདེསེ པམཱཎཡུཏྟེ པཱཙིཏྟིཡཾ, ཨིཏརཏྲ དུཀྐཊནྟི བྷེདོ.

༨༥༨. ཀཔྤིཡོ ཏནྟཝཱཡོ ནཱམ ཉཱཏཀོ ཝཱ པཝཱརིཏོ ཝཱ ཀཔྤིཡམཱུལེན པཡོཛིཏོ ཝཱ.

༨༥༩. ‘‘ཨནཱཔཏྟི ¶ ཙཱིཝརཾ སིབྦེཏུཾ, ཨཱཡོགེ, ཀཱཡབནྡྷནེ, ཨཾསབདྡྷཀེ, པཏྟཏྠཝིཀཱཡ, པརིསྶཱཝནེ, ཉཱཏཀཱནཾ, པཝཱརིཏཱནཾ, ཨཉྙསྶཏྠཱཡ, ཨཏྟནོ དྷནེནཱ’’ཏིཨཱདིཀཾ (པཱརཱ. ༦༤༠) ཨནཱཔཏྟིཝཱརཾ དསྶེཏུམཱཧ ‘‘ཨནཱཔཏྟཱི’’ཏིཨཱདི. ཨིདྷ ནིདྡིཊྛོཝ ལཀྑཎེན ཨནིདྡིཊྛམྤི ཝེདིཏབྦཾ. ཨེཏྠ ཙཱིཝརཾ སིབྦེཏུཾ སུཏྟཾ ཝིཉྙཱཔེནྟསྶ ཨནཱཔཏྟཱིཏི ཡོཛནཱ. དྷནཾ ནཱམ ཏཎྜུལཱདི ཀཔྤིཡཝཏྠུ. ‘‘པརིསྶཱཝནེ’’ཏིཨཱདཱིསུ ནིམིཏྟཏྠེ བྷུམྨཾ, པརིསྶཱཝནཱདིནིམིཏྟཾ སུཏྟཉྩ ཏནྟཝཱཡེ ཙ ཝིཉྙཱཔེནྟསྶ ཨནཱཔཏྟཱིཏི ཝུཏྟཾ ཧོཏི.

སུཏྟཝིཉྙཏྟིཀཐཱཝཎྞནཱ.

༨༦༠. ཨཔྤཝཱརིཏཉྙཱཏཱིནནྟི ཨཔྤཝཱརིཏཱནཾ ཨཉྙཱཏཱིནཾ, ‘‘ཀཱིདིསེན ཏེ བྷནྟེ ཙཱིཝརེན ཨཏྠོ, ཀཱིདིསཾ ཏེ ཙཱིཝརཾ ཝཱཡཱཔེམཱི’’ཏི (པཱརཱ. ༦༤༣) པདབྷཱཛནེ ཝུཏྟནཡེན ཨཔྤཝཱརིཏཱནཾ ཨཉྙཱཏཱིནནྟི ཨཏྠོ. སམེཙྩཱཏི ཨུཔགནྟྭཱ. ཝིཀཔྤནྟི ཝིསིཊྛཾ ཀཔྤཾ ཨདྷིཀཝིདྷཱནཾ. ཨཱཔཛྫཏཱིཏི ཀརོཏི, ‘‘ཨིདཾ ཁོ ཨཱཝུསོ ཙཱིཝརཾ མཾ ཨུདྡིསྶ ཝིཡྻཏི, ཨཱཡཏཉྩ ཀརོཐ, ཝིཏྠཏཉྩ ཨཔྤིཏཉྩ སུཝཱིཏཉྩ སུཔྤཝཱཡིཏཉྩ སུཝིལེཁིཏཉྩ སུཝིཏཙྪིཏཉྩ ཀརོཐཱ’’ཏིཨཱདིནཱ (པཱརཱ. ༦༤༢) ནཡེན དཱཡཀཱནཾ ཨདྷིཔྤཱཡཏོ ཨདྷིཀཏརཨཱཡཏཱདིཀརཎཏྠཾ ཝིདྷཱནཾ ཀརོཏཱིཏི ཝུཏྟཾ ཧོཏི.

ཏཏྠ ¶ ཨཱཡཏནྟི དཱིགྷཾ. ཝིཏྠཏནྟི པུཐུལཾ. ཨཔྤིཏནྟི གྷནཾ. སུཝཱིཏནྟི སུཊྛུ ཝཱིཏཾ སབྦཊྛཱནེསུ སམཾ ཀཏྭཱ ཝཱིཏཾ. སུཔྤཝཱཡིཏནྟི སུཊྛུ པཝཱཡིཏཾ སབྦཊྛཱནེ སམཾ ཀཏྭཱ ཏནྟེ པསཱརིཏཾ. སུཝིལེཁིཏནྟི ལེཁནིཡཱ སུཊྛུ ཝིལིཁིཏཾ. སུཝིཏཙྪིཏནྟི ཀོཙྪེན སུཊྛུ ཝིཏཙྪིཏཾ, སུཝིནིདྡྷོཏནྟི ཨཏྠོ.

༨༦༡. སུཏྟཝཌྜྷནཔྤཀཱརཾ ¶ དསྶེཏུམཱཧ ‘‘དཱིགྷཱཡཏཔྤིཏཏྠཱཡཱ’’ཏི. ཏེན ཙ པདབྷཱཛནེ ‘‘ཏསྶ ཝཙནེན ཨཱཡཏཾ ཝཱ ཝིཏྠཏཾ ཝཱ ཨཔྤིཏཾ ཝཱ ཀརོཏི, པཡོགེ དུཀྐཊཾ, པཊིལཱབྷེན ནིསྶགྒིཡཾ ཧོཏཱི’’ཏི (པཱརཱ. ༦༤༣) ཨེཏཾ ཨཱཡཏཱདིཏྟཡམེཝ ཝུཏྟཾ. སུཏྟཝཌྜྷནཀེ ཀཏེཏི ཨེཏྠ ཨནནྟརཾ ཝཏྟབྦེན ‘‘པཡོགེ དུཀྐཊཾ པཊིལཱབྷེནཱ’’ཏི པཱཋསེསེན སཧ ཡོཛནཱ ཀཱཏབྦཱ, དཱཡཀེཧི ཏུལཡིཏྭཱ དིནྣཔྤམཱཎཏོ སུཏྟཾ ཝཌྜྷིཏུཾ ཏེན ཀཏེན སབྦེནཱཔི པཡོགེན བྷིཀྑུནོ དུཀྐཊཉྩ པཊིལཱབྷེན ནིསྶགྒིཡཔཱཙིཏྟིཡཉྩ ཧོཏཱིཏི ཨཏྠོ.

༨༦༢. ཉཱཏཀཱདཱིནཾ ཏནྟཝཱཡེསུ ཙཱིཝརེ ཝིཀཔྤཾ ཨཱཔཛྫནྟསྶ ཨནཱཔཏྟིཾ ཝིནིདྡིསེཏི ཡོཛནཱ. ཨཏྟནོ དྷནེནཱཏི ཨེཏྠ ‘‘པཡོཛིཏེསཱུ’’ཏི སེསོ, ཏནྟཝཱཡེསཱུཏི ཨེཏསྶ ཝིསེསནཾ. ཨཏྟནོ དྷནེན པཡོཛིཏེསུ ཏནྟཝཱཡེསུ ཙཱིཝརེ ཝིཀཔྤཾ ཨཱཔཛྫནྟསྶ ཨནཱཔཏྟིཾ ཝིནིདྡིསེཏི ཡོཛནཱ, ཨཏྟནོ སནྟཀཾ ཀཔྤིཡཝཏྠུཾ གཧེཏྭཱ ཝིནནྟེསུ ཝིཀཔྤཾ ཨཱཔཛྫནྟསྶཱཏི ཨཏྠོ. ཨཉྙསྶཏྠཱཡ ཝིནནྟེསུ ཝིཀཔྤཾ ཨཱཔཛྫནྟསྶཱཏི སཧ པཱཋསེསེན ཡོཛནཱ དཊྛབྦཱ.

༨༦༣. མཧགྒྷཾ ཀཏྟུཀཱམིནོ ཏནྟཝཱཡེཧི ཨཔྤགྒྷཾ ཝཱཡཱཔེནྟསྶ ཨནཱཔཏྟིཾ ཝིནིདྡིསེཏི ཡོཛནཱ.

པེསཀཱརཀཐཱཝཎྞནཱ.

༨༦༤. ཝསྶཾཝུཏྠེ བྷིཀྑཱུ ཨུདྡིསྶཱཏི པུརིམིཀཱཡ ཝསྶཱུཔགཏེ བྷིཀྑཱུ ཨུདྡིསིཏྭཱ. པཝཱརཎཱཡ པུབྦེཝ ཡཾ ཙཱིཝརཾ དཱིཡཏཱིཏི སམྦནྡྷོ. ཨིདཾ ཝུཏྟཾ ཧོཏི – ‘‘དསཱཧཱནཱགཏཾ ཀཏྟིཀཏེམཱསིཀཔུཎྞམ’’ནྟི ¶ (པཱརཱ. ༦༤༨) པཱལི༹ཡཾ ཝུཏྟཾ མཧཱཔཝཱརཎཱཨུཔོསཐདིཝསསྶ པུརེཏརམེཝ པུབྦཀཏྟིཀམཱསསྶ ཛུཎྷཔཀྑཔཉྩམིཡཾ ཡཾ ཙཱིཝརཾ ‘‘ཨཙྩེཀཙཱིཝརཾ ནཱམ སེནཱཡ ཝཱ གནྟུཀཱམོ ཧོཏཱི’’ཏིཨཱདིནཱ (པཱརཱ. ༦༤༩) པདབྷཱཛནཱགཏེསུ གམིཀགིལཱནགབྦྷིནིཨབྷིནཝུཔྤནྣསདྡྷཱདཱིསུ ¶ ཨཉྙཏརེན དཱུཏཾ པེསེཏྭཱ ཝཱ ཨཏྟནཱ ཝཱ ཨཱགནྟྭཱ ‘‘ཝསྶཱཝཱསིཀཾ དམྨཱི’’ཏི ཝཏྭཱ དིཡྻཏཱིཏི. ཏཾ ཧོཏཙྩེཀཙཱིཝརནྟི ཏཾ ཨཙྩཱཡིཀཙཱིཝརཾ ནཱམ ཧོཏི.

༨༦༥. པུརེ པཝཱརཎཱཡེཝཱཏི མཧཱཔཝཱརཎཱཡ པུརེཏརམེཝ པཉྩམིཏོ པཊྛཱཡ ཡསྨིཾ ཀིསྨིཉྩི དིཝསེ. བྷཱཛེཏྭཱ ཡདི གཡ྄ཧཏཱིཏི ཨེཏྠ ‘‘ཡེནཱ’’ཏི ཙ ན ཀཱཏབྦོཏི ཨེཏྠ ‘‘ཏེནཱ’’ཏི ཙ ཀརོཏི ཙེཏི ཨེཏྠ ‘‘སོ ཝསྶཙྪེད’’ནྟི ཙ སཱམཏྠིཡཱ ལབྦྷཏི. བྷཱཛེཏྭཱ ཡདི ཡེན གཡ྄ཧཏི, ཏེན ཝསྶཙྪེདོ ན ཀཱཏབྦོ. སོ ཝསྶཙྪེདཾ ཀརོཏི ཙེ, ཏཾ བྷཱཛེཏྭཱ གཧིཏཙཱིཝརཾ སངྒྷིཀཾ ཧོཏཱིཏི ཡོཛནཱ, ཚིནྣཝསྶེན ཏཾ ཙཱིཝརཾ སངྒྷསྶེཝ དཱཏབྦནྟི ཝུཏྟཾ ཧོཏི.

༨༦༦. ‘‘ཨནྟོསམཡམེཝཱ’’ཏི ཨིདཾ ‘‘ཨདྷིཊྛེཏཱི’’ཏིཨཱདཱིཧི པདེཧི པཙྩེཀཾ ཡོཛེཏབྦཾ. པདབྷཱཛནེ ‘‘ཙཱིཝརཀཱལསམཡོ ནཱམ ཨནཏྠཏེ ཀཐིནེ ཝསྶཱནསྶ པཙྪིམོ མཱསོ, ཨཏྠཏེ ཀཐིནེ པཉྩམཱསཱ’’ཏི ཝུཏྟསམཡབྦྷནྟརེཡེཝ ཏཾ ཨཙྩེཀཙཱིཝརཾ.

༨༦༧. ཀཐིནེ ཏུ ཨནཏྠཏེཏི ཡསྨིཾ ཀཐིནཾ ཨནཏྠཏཾ, ཏསྨིཾ ཝིཧཱརེཏི ཝུཏྟཾ ཧོཏི. ཏུ-སདྡོ ཝིསེསཏྠཛོཏཀོ. ཨནདྷིཊྛཱཡ ཨཝིཀཔྤེཏྭཱ པརིཧརཱིཡཏི ཨེཏྠ ཨཙྩེཀཙཱིཝརནྟི པརིཧཱརོ, མཱསོ, ཨེཀོ ཙ སོ མཱསོ ¶ ཙཱཏི ཨེཀམཱསོ, པུབྦཀཏྟིཀམཱསསྶ པཱཊིཔདདིཝསཏོ པཊྛཱཡ ཡཱཝ ཨཔརཀཏྟིཀམཱསསྶ པུཎྞམཱི, ཨཡཾ ཙཱིཝརཀཱལསམཡོཏི ཝུཏྟོ མཱསོ. དསནྣཾ ཨཧཱནཾ སམཱཧཱརོ དསཱཧཾ, ཏཾ པརམཾ ཨདྷིཀཾ ཨེཏསྶཱཏི དསཱཧཔརམོ, མཱསོ. ‘‘དསཱཧཱནཱགཏཾ ཀཏྟིཀཏེམཱསིཀཔུཎྞམ’’ནྟི (པཱརཱ. ༦༤༨) པཱལི༹ཡཾ ཝུཏྟཔུབྦཀཏྟིཀཔུཎྞམིཔརིཡནྟདསཱཧཱདྷིཀོཏི ཨཏྠོ. ཀཐིནེ ཨནཏྠཏེ ཏུ དསཱཧཔརམོ ཨེཀམཱསོཝ ཏསྶ ཨཙྩཱཡིཀཝཏྠསྶ པརིཧཱརོ མཏོཏི ཡོཛནཱ.

༨༦༨. ཨཏྠཏེ ཀཐིནེཏི ཀཐིནཏྠཏཝིཧཱརེཏི ཝུཏྟཾ ཧོཏི. ཏསྶ ཨཙྩཱཡིཀཝཏྠསྶཱཏི སམྦནྡྷོ. དསཱཧཔརམཱ པཉྩ མཱསཱཏི སམྦནྡྷོ. ཨནཏྠཏཀཐིནེ ཝིཧཱརེ ཡཐཱཝུཏྟཙཱིཝརཀཱལསམཡསངྑཱཏཝསྶཱནཱཝསཱནམཱསོ ཙ ཀཐིནུདྡྷཱརདིཝསསངྑཱཏཔཙྪིམཀཏྟིཀཀཱལ༹པཀྑཔཱཊིཔདཏོ ཡཱཝ ཕགྒུནམཱསཔུཎྞམཱི, ཏཱཝ ཧེམནྟཱ ཙཏྟཱརོ མཱསཱ ཙཱཏི པཉྩ མཱསཱ. པཀཱསིཏཱཏི ‘‘ཨནཏྠཏེ ཀཐིནེ ཝསྶཱནསྶ པཙྪིམོ མཱསོ, ཨཏྠཏེ ཀཐིནེ པཉྩ མཱསཱ’’ཏི ¶ (པཱརཱ. ༦༤༩) དཱིཔིཏཱ. དསཱཧཔརམཱཏི ཝུཏྟཏྠོཡེཝ. ཨཏྠཏེ ཀཐིནེ དསཱཧཔརམཱ པཉྩ མཱསཱ ཏསྶ ཨཙྩཱཡིཀཝཏྠསྶ པརིཧཱརོ ཀཱལོཏི མུནིནྡེན པཀཱསིཏཱཏི ཡོཛནཱ.

ཨཡམུབྷཡཏྠ ཝུཏྟཱ དསཱཧཔརམཏཱ ཨཊྛཀཐཱཡཾ ‘‘ཨནཏྠཏེ ཀཐིནེ ཨེཀཱདསདིཝསཱདྷིཀོ མཱསོ, ཨཏྠཏེ ཀཐིནེ ཨེཀཱདསདིཝསཱདྷིཀཱ པཉྩ མཱསཱ’’ཏི (པཱརཱ. ཨཊྛ. ༢.༦༥༠) ཝུཏྟཔཱཋེན ཡཐཱ ན ཝིརུཛ྄ཛྷཏི, ཏཐཱ ཝིཙཱརེཏྭཱ གཧེཏབྦཱ. ཨེཝཉྷི པཱཋེ སཏི ན ཝིརུཛ྄ཛྷཏི –

‘‘ཏསྶཙྩཱཡིཀཝཏྠསྶ ¶ , ཀཐིནེ ཏུ ཨནཏྠཏེ;

པརིཧཱརེཀམཱསེཀཱ-དསཱཧཔརམོ མཏོ.

ཨཏྠཏེ ཀཐིནེ ཏསྶ, པཉྩ མཱསཱ པཀཱསིཏཱ;

པརིཧཱརོ དིནེནེཀཱ-དསཱཧཔརམཱ པནཱ’’ཏི.

༨༦༩. པཋམེན ཀཐིནེནཱཏི ཡོཛནཱ. ‘‘ཨཀྲིཡཾ ཨཙིཏྟ’’ནྟི པདཙྪེདོ. ཨཀྲིཡནྟི ཨནྟོསམཡེ ཨདྷིཊྛཱནཱདིཨཀརཎཾ.

ཨཙྩེཀཙཱིཝརཀཐཱཝཎྞནཱ.

༨༧༠-༡. བྷིཀྑཱུཏི སཱསངྐསམྨཏེ སཔྤཊིབྷཡེ ཨཱརཉྙཀསེནཱསནེ ཝསནྟཾ བྷིཀྑུམཱཧ. ཡཐཱཧ ‘‘ཡཱནི ཁོ པན ཏཱནི ཨཱརཉྙཀཱནི སེནཱསནཱནི སཱསངྐསམྨཏཱནི སཔྤཊིབྷཡཱནི, ཏཐཱརཱུཔེསུ བྷིཀྑུ སེནཱསནེསུ ཝིཧརནྟོ’’ཏི (པཱརཱ. ༦༥༣). པུབྦཀཏྟིཀཔུཎྞམཾ ཝསིཏྭཱཏི སམྦནྡྷོ. པུབྦཀཏྟིཀཔུཎྞམཱ ནཱམ ཨསྶཡུཛམཱསསྶ ཛུཎྷཔཀྑཔནྣརསཱི, ཨེཏྠ པན སཧཙརིཡནཡེན ཏདུཔལཀྑིཏཱ པུརིམིཀཱ ཏཡོ ཝསྶཱནམཱསཱ ཝུཙྩནྟི. པུཎྞམནྟི ཨེཏྠ ཝཱསཀིརིཡཱཡ ཨཙྩནྟསཾཡོགེ ཨུཔཡོགཝཙནཾ. པུརིམིཀཱཡ ཝསྶཾ ཨུཔགནྟྭཱ ཨཙྪིནྣཝསྶོ ཧུཏྭཱ ཏཡོ མཱསེ ཝསིཏྭཱཏི ཨཏྠོ. ཡཐཱཧ ཨཊྛཀཐཱཡཾ ‘‘ཡསྨཱ པན ཡོ ཝསྶཾ ཨུཔགནྟྭཱ ཡཱཝ པཋམཀཏྟིཀཔུཎྞམཾ ཝསཏཱི’’ཏི (པཱརཱ. ཨཊྛ. ༢.༦༥༣-༦༥༤).

‘‘ཙཱིཝར’’ནྟི ཏིཎྞཾ ཙཱིཝརཱནཾ ཨཉྙཏརཾ ཝུཙྩཏི. གཱམེ ཋཔེཏྭཱཏི སམྦནྡྷོ, ཨེཏྠ ‘‘ཀཏྟིཀཔུཎྞམ’’ནྟི ¶ ཙ ‘‘ཨཱཀངྑམཱནོ’’ཏི ཙ སེསོ, ཨཔརཀཏྟིཀམཱསེ ཀཏྟིཀཙོརབྷཡེན ཙཱིཝརཾ པཊིསཱམེཏུཀཱམོ བྷིཀྑུ ཨཱརཉྙཀསེནཱསནསྶ སཱམནྟཱ གོཙརགཱམེ ནིཀྑིཔིཏྭཱཏི ཨཏྠོ. ཡཐཱཧ ‘‘ཨུཔཝསྶཾ ¶ ཁོ པན ཀཏྟིཀཔུཎྞམཾ…པེ… ཨཱཀངྑམཱནོ ཏིཎྞཾ ཙཱིཝརཱནཾ ཨཉྙཏརཾ ཙཱིཝརཾ ཨནྟརགྷརེ ནིཀྑིཔེཡྻཱ’’ཏི (པཱརཱ. ༦༥༣).

‘‘སམནྟཱ གོཙརགཱམེ’’ཏི ཨིདཾ ‘‘ཨནྟརགྷརེ ནིཀྑིཔེཡྻཱཏི སམནྟཱ གོཙརགཱམེ ནིཀྑིཔེཡྻཱ’’ཏི (པཱརཱ. ༦༥༤) པདབྷཱཛནེ ཝུཏྟཏྟཱ ཝུཏྟཾ. ‘‘ཨཔརཀཏྟིཀམཱསེ’’ཏི ཙ ‘‘ཀཏྟིཀཔུཎྞམནྟི ཀཏྟིཀཙཱཏུམཱསིནཱི ཝུཙྩཏཱི’’ཏི (པཱརཱ. ༦༥༤) པདབྷཱཛནིཡཝསེན ཝུཏྟཾ. ཨིདྷཱཔི ཧི ‘‘ཀཏྟིཀཔུཎྞམ’’ནྟི ཨཔརཀཏྟིཀཛུཎྷཔཀྑཔནྣརསིཡཱ ཝུཙྩམཱནཱཡཱཔི སཧཙརིཡནཡེན ཏཾསཧཙརིཏོ ཙཏུཏྠོ མཱསོ ཝུཏྟོ.

ཨེཏྟཱཝཏཱ པུརིམིཀཱཡ ཝསྶཾ ཨུཔགནྟྭཱ མཧཱཔཝཱརཎཱཡ པཝཱརེཏྭཱ ཝུཏྟལཀྑཎེ ཨཱརཉྙཀསེནཱསནེ ཝསནྟསྶ ཨཱརཉྙཀསྶ བྷིཀྑུནོ པཙྪིམཀཏྟིཀམཱསེ ཀཏྟིཀཙོརབྷཡེ སཏི ཏིཎྞཾ ཙཱིཝརཱནཾ ཨཉྙཏརཾ གོཙརགཱམེ ཋཔེཏྭཱ ཨཱརཉྙཀངྒཾ པཱུརཡཏོ ཙཱིཝརེན ཝིཔྤཝཱསོ ཏསྨིཾ མཱསེ ན ཧོཏཱིཏི ཨནུཉྙཱཏབྷཱཝོ དཱིཔིཏོ. ཏདེཝ པཀཱསེཏུཾ ནིཀྑེཔོཔཱཡསནྡསྶནམུཁེན ཝཀྑཏི ‘‘ཀཏྟིཀེཡེཝ མཱསསྨིཾ…པེ… ཝཊྚཏཱི’’ཏི.

ཨིདཱནི ཨསྨིཾཡེཝ མཱསེ ཏཏོ ཨཉྙཏྠ ཏསྶ བྷིཀྑུནོ ཀེནཙི ཀརཎཱིཡེན གཙྪཏོ གཱམེ ཋཔིཏེན ཏེན ཙཱིཝརེན ཝིཔྤཝསཏོ ནིདྡོསབྷཱཝཾ ཨནུཛཱནནྟེན བྷགཝཏཱ ‘‘སིཡཱ ཙ ཏསྶ བྷིཀྑུནོ…པེ… ཏེན ཙཱིཝརེན ཝིཔྤཝསིཏབྦ’’ནྟི (པཱརཱ. ༦༥༣) ཝུཏྟམཏྠཾ དསྶེཏུམཱཧ ‘‘པཙྩཡེ…པེ… སམྨུཏི’’ནྟི. པཙྩཡེ སཏི ཏཱདིསེཏི ‘‘སིཡཱ པཙྩཡོ, སིཡཱ ཀརཎཱིཡ’’ནྟི (པཱརཱ. ༦༥༤) ཝཙནཏོ ཏཱདིསེ ཀིཙྩེ སཏཱིཏི ཨཏྠོ. ཚཱརཏྟཔརམནྟི ཚ རཏྟིཡོ པརམཱ ཡསྶ ཝཱསཀམྨསྶ ཏཾ ཚཱརཏྟཔརམཾ, ཀིརིཡཱཝིསེསནཾ, ཚཱརཏྟཔརམཾ ཝཱསཀམྨཾ ཀཱཏབྦནྟི ཨཏྠོ. ཏེན ཝིནཱ ཝསིཏབྦནྟི གཱམེ ནིཀྑིཏྟེན ཏེན ཙཱིཝརེན ཝིནཱ ཏམྷཱ ཨཱཝཱསཱ ཨཉྙཏྠ ཝསིཏབྦཾ. ཏདེཝ ¶ པཱཀཊཾ ཀཱཏུཾ ཝཀྑཏི ‘‘ཨཉྙཏྠེཝ ཝསནྟསྶ, ཚཱརཏྟཔརམཾ མཏ’’ནྟི.

ཏཏོཏི ཚཱརཏྟཏོ. ཨུཏྟརི ཝསཏོཏི སཏྟམཾ ཨརུཎཾ ཨུཊྛཱཔེཏྭཱ ཝསནྟསྶཱཏི ཨཏྠོ. ཡཐཱཧ ¶ ‘‘ཏཏོ ཙེ ཨུཏྟརི ཝིཔྤཝསེཡྻཱཏི སཏྟམེ ཨརུཎུགྒམནེ ནིསྶགྒིཡ’’ནྟི (པཱརཱ. ༦༥༤). དོསོཏི ནིསྶགྒིཡཔཱཙིཏྟིཡཾ. ‘‘ཝིནཱ སངྒྷསྶ སམྨུཏི’’ནྟི ཨིམིནཱ ཀིཾ ཝུཏྟཾ ཧོཏི? ཨུདོསིཏསིཀྑཱཔདེ ཨནུཔཉྙཏྟིཾ ཀཏྭཱ ཀོསམྦིཡཾ གིལཱནབྷིཀྑུནོ ‘‘ཨནུཛཱནཱམི བྷིཀྑཝེ གིལཱནསྶ བྷིཀྑུནོ ཏིཙཱིཝརེན ཨཝིཔྤཝཱསསམྨུཏིཾ དཱཏུ’’ནྟི (པཱརཱ. ༤༧༣) ཨནུཉྙཱཏཏྟཱ གིལཱནསྶ བྷིཀྑུནོ སངྒྷེན ཉཏྟིདུཏིཡཱཡ ཀམྨཝཱཙཱཡ པུརིམམེཝ ཡཱ ཨཝིཔྤཝཱསསམྨུཏི དིནྣཱ, ཏཾ ཝིནཱཏི ཝུཏྟཾ ཧོཏི. ཏེན ལདྡྷསམྨུཏིཀེན ཡཱཝ རོགོ ཝཱུཔསམྨཏི, ཏཱཝ ཙིརམྤི ཏེན ཙཱིཝརེན ཝིནཱ ཝསིཏུཾ ཝཊྚཏཱིཏི ཨདྷིཔྤཱཡོ. ཡཐཱཧ ཨཊྛཀཐཱཡཾ ‘‘ཨཉྙཏྲ བྷིཀྑུསམྨུཏིཡཱཏི ཡཱ ཨུདོསིཏསིཀྑཱཔདེ ཀོསམྦཀསམྨུཏི ཨནུཉྙཱཏཱ, ཏསྶཱ སམྨུཏིཡཱ ཨཉྙཏྲ. སཙེ སཱ ལདྡྷཱ ཧོཏི, ཚཱརཏྟཱཏིརེཀམྤི ཝིཔྤཝསིཏུཾ ཝཊྚཏཱི’’ཏི (པཱརཱ. ཨཊྛ. ༢.༦༥༣-༦༥༤).

༨༧༢-༣. ཙཱིཝརནིཀྑེཔཾ དསྶེཏུམཱཧ ‘‘ཀཏྟིཀེཡེཝ…པེ… པཀཱསིཏོ’’ཏི. ཀཏྟིཀེཡེཝ མཱསསྨིནྟི ཙཏུནྣཾ ཝསྶཱནཱནཾ མཱསཱནཾ པཙྪིམེ ཀཏྟིཀམཱསེཡེཝ ཨིདམེཀངྒཾ. པཋམཱཡ པཝཱརིཏོཏི དུཏིཡམངྒཾ, ཨིདྷ པཋམཱཡ ཝསྶཱུཔནཱཡིཀཱཡ ཝསྶཾ ཨུཔགནྟྭཱ པཝཱརིཏོཏི ཡོཛནཱ, མཧཱཔཝཱརཎཱཡ པཝཱརིཏོཏི ཝུཏྟཾ ཧོཏི. ཡཐཱཧ ཨཊྛཀཐཱཡཾ ‘‘པུརིམིཀཱཡ ཨུཔགནྟྭཱ མཧཱཔཝཱརཎཱཡ པཝཱརིཏོ ཧོཏཱི’’ཏི (པཱརཱ. ཨཊྛ. ༢.༦༥༣-༦༥༤). པཙྪིམེན པམཱཎེན ཡུཏྟེཏི ཏཏིཡམངྒཾ. སེནཱསནེཏི ཨེཏསྶ ཝིསེསནཾ. ཨིཧ ཨཱརཉྙཀསེནཱསནསྶ པཙྪིམཔྤམཱཎཾ ¶ ནཱམ པཱཀཱརེན ཝཱ ཝཏིཡཱ ཝཱ པརིཁཱཡ ཝཱ པརིཀྑིཏྟསྶ གཱམསྶ ཨིནྡཁཱིལསངྑཱཏགཱམདྭཱརཀོཊྛཀུམྨཱརཏོ ཝཱ ཨཔརིཀྑིཏྟསྶ གཱམསྶ པརིཀྑེཔཱརཧཊྛཱནསངྑཱཏེ པརིཡནྟགེཧསྶ ཨུཔཙཱརེ ཋིཏསྶ ཐཱམམཛ྄ཛྷིམསྶ པུརིསསྶ བལཔྤམཱཎེན ཝིསྶཊྛལེཌྜུཔཱཏདྭཡཏོ ཝཱ པཊྛཱཡ པརིཀྑིཏྟསྶ ཝིཧཱརསྶ སཔརིཀྑེཔཾ ཝཱ ཨཔརིཀྑིཏྟསྶ ཝིཧཱརསྶ ཡསྶཾ དིསཱཡཾ གཱམོ ཧོཏི, ཏཏྠ གཱམཔརིཡནྟསེནཱསནཾ ཝཱ ཙེཏིཡཾ ཝཱ བོདྷིཾ ཝཱ ཨཝདྷིཾ ཀཏྭཱ ཝིཧཱརགམནཱིཡེན པཀཏིམགྒེན ཝིདཏྠིགམྦྷཱིརཾ ཨཱརོཔིཏེན ཨཱཙརིཡདྷནུནཱ པམིཏཔཉྩདྷནུསཏཔམཱཎདཱུརནྟི སངྑེཔཏོ གཧེཏབྦཾ.

སཱསངྐསམྨཏེཏི ཙཏུཏྠམངྒཾ, ‘‘ཨིཧ སཔྤཊིབྷཡེ’’ཏི སེསོ. ‘‘སཱསངྐསམྨཏཱནི སཔྤཊིབྷཡཱནཱི’’ཏི (པཱརཱ. ༦༥༣) ཧི པཱལི༹. ཨིདཾ དྭཡམྤི ‘‘སེནཱསནེ’’ཏི ཨེཏསྶ ཝིསེསནཾ. ཨཱརཱམཨཱརཱམཱུཔཙཱརེསུ ཙོརཱནཾ ནིསིནྣསཡིཏཊྛིཏབྷུཏྟཔཱིཏཊྛཱནཱདཱིནཾ དིསྶམཱནཏཱཡ ཨཱསངྐཱསཧིཏེ ཏཏྠེཝ ཨཱརཱམཱདཱིསུ པཧཊམཱརིཏཝིལུཏྟམནུསྶཱནཾ དིསྶམཱནཏཱཡ ཝིསེསེན སཧབྷཡཏཱཡ ¶ སཔྤཊིབྷཡེ ཨཱརཉྙཀེ སེནཱསནེཏི ཨཏྠོ. ཝསནྟོ བྷིཀྑུ. ཝསནྟོཝཱཏི ཨེཏྠ ཨེཝཀཱརོ ཨཊྛཱནཔྤཡུཏྟོ. ཏསྨཱ ཏཏོ ཨཱནེཏྭཱ ཙཏུརངྒསམཱཡོགེ ཨེཝཱཏི ཡོཛེཏབྦོ. ཙཏུརངྒསམཱཡོགེ ཨེཝཱཏི ཡཐཱཝུཏྟཱནཾ ཙཏུནྣཾ ཨངྒཱནཾ སམཱཡོགེ སནྣིཔཱཏེ སཏི ཨེཝ. ཨེཏྠ ཨེཝཀཱརེན ཏསྶ ཨངྒསྶ ཨབྷཱཝེ ཨལབྦྷམཱནཏཾ དཱིཔེཏི. པཀཱསིཏོཏི ‘‘ཏཏྲཱཡཾ ཨངྒསམྤཏྟཱི’’ཏིཨཱདིཀཱཡ (པཱརཱ. ཨཊྛ. ༢.༦༥༣-༦༥༤) ཨཊྛཀཐཱཡ ཝུཏྟོ.

༨༧༤. ཏཾ ཙཱིཝརཾ. མཱསམེཀནྟི ཝསྶཱནསྶ པཙྪིམམཱསསངྑཱཏཾ ཨེཀཾ མཱསཾ. ཡོ གཱམོ སཙེ པུརིམབདྡྷཱཡ ཨཝིཔྤཝཱསསཱིམཱཡ ¶ ཨནྟོ ཧོཏི, ཏཏྠ མཱསཏོ ཨཏིརེཀམྤི ཋཔེཏུཾ ཝཊྚཏཱིཏི (ཝཛིར. ཊཱི. པཱརཱཛིཀ ༦༥༣ ཨཏྠཏོ སམཱནཾ) ཝཛིརབུདྡྷིཏྠེརེན ཝུཏྟཾ.

༨༧༥. ཨཉྙཏྠེཝཱཏི ཡསྶ ཨཱརཉྙཀསེནཱསནསྶ གོཙརགཱམེ ཙཱིཝརཾ ནིཀྑིཏྟཾ, ཏཏོ ཨཱརཉྙཀསེནཱསནཏོ བཧི ཨེཝ. ཨཡཾ ཨདྷིཔྤཱཡོཏི ‘‘ཡཾ གཱམ’’ནྟིཨཱདིཀཱཡ དིཡཌྜྷགཱཐཱཡ པཊིཔཱདིཏཏྠདྭཡསངྑཱཏོ ཨདྷིཔྤཱཡོ. ཨསྶཱཏི སཱསངྐསིཀྑཱཔདསྶ. ཨེཝཾ ཨིམིནཱ སིཀྑཱཔདེན ‘‘ཙཱིཝརེན ཝིནཱ ཀཏྟིཀམཱསེ ཨརཉྙེ ཝསེཡྻཱ’’ཏི ཨནུཉྙཱཏཏྟཱ ‘‘ཚཱརཏྟཔརམཾ ཏེན བྷིཀྑུནཱ ཏེན ཙཱིཝརེན ཝིཔྤཝསིཏབྦ’’ནྟི (པཱརཱ. ༦༥༣) ཨིམིནཱ གོཙརགཱམེ ཏཾ ཋཔེཏྭཱ ཏསྨིཾ ཨཱརཉྙཀཱཝཱསེ ཝསིཏྭཱ ཀེནཙི ཀརཎཱིཡེན ཏཏོ ཨཱཝཱསཏོ གནྟྭཱ བཧི ཝསཏོ དིཝསཔརིཙྪེདསྶ ཝིཉྙཱཡམཱནཏྟཱཡེཝཱཧ ‘‘པཊིཙྪནྣོ པཀཱསིཏོ’’ཏི.

༨༧༦. ‘‘སཙེ གོཙརགཱམཏོ པུརཏྠིམཱཡ དིསཱཡ སེནཱསནཾ, ཨཡཉྩ པཙྪིམཾ དིསཾ གཏོ ཧོཏཱི’’ཏིཨཱདིནཱ (པཱརཱ. ཨཊྛ. ༢.༦༥༦) ཨཊྛཀཐཱཡཾ ཀཐིཏནིཡཱམེན ཝིནིཙྪཡཾ དསྶེཏུམཱཧ ‘‘སེནཱསནམཐཱགནྟྭཱ’’ཏིཨཱདི. སེནཱསནནྟི ཨཏྟནཱ ནིཝུཏྠཾ ཨཱརཉྙཀསེནཱསནཾ. ཨཱགནྟྭཱཏི བཧི གཏཊྛཱནཏོ ཨཱགནྟྭཱ. གོཙརགཱམེ ཙཱིཝརཾ ནིཀྑིཔིཏྭཱ ཏཏོ པུརཏྠིམཱཡ དིསཱཡ ཨཱརཉྙཀསེནཱསནེ ཝིཧརཏོ ཝིཧཱརཱ ནིཀྑམྨ ཏཏོ གོཙརགཱམཏོ པཙྪིམདིསཱཡ དཱུརཊྛཱནཾ གཏསྶ ཨཱགཏཊྛཱནཏོ ཏཾ སེནཱསནཾ ཨཱགནྟྭཱ ཝིདཱུརཏྟཱ སཏྟམཾ ཨརུཎཾ ཨུཊྛཱཔེཏུཾ ཨསཀྐོནྟསྶ བྷིཀྑུནོ ཀིཾ ཝིཧིཏནྟི ཨཡམེཏྠ ཡོཛནཱ.

༨༧༧. གཱམསཱིམམྤི ¶ ཝཱགནྟྭཱཏི ཡཏྠ ཙཱིཝརཾ ནིཀྑིཏྟཾ, ཏཾ གཱམསཱིམམྤི པུརཱརུཎཱཡེཝ ཨཱགནྟྭཱ. ཡཏྠ ཀཏྠཙཱིཏི (པཱརཱ. ཨཊྛ. ༢.༦༥༦) སབྷཱདེཝཱལཡདྭཱརཀོཊྛཀཱདཱིསུ ཡཏྠ ཀཏྠཙི ཀཔྤིཡཊྛཱནེ ¶ . ‘‘ཡཏྠ ཀཏྠཙཱི’’ཏི སཱམཉྙེན ཝུཏྟཏྟཱ ཏསྶཱ གཱམསཱིམཱཡ ཨནྟོ ཨཱརཉྙཀངྒཱརཀྑནཱརཧཾ དཱུརཊྛཱནཾ ལདྡྷཾ ཙེ, ཨངྒབྷེདཾ ཨཀཏྭཱ ཏཏྠ ཨརུཎཾ ཨུཊྛཱཔེཏབྦཾ. དྷུཏངྒེ ཝིཛྫམཱནེཔི ཨཱཔཏྟིཾ ཨནཱཔཛྫིཏུཾ ཨནྟོགཱམེཔི ཨརུཎཾ ཨུཊྛཱཔེཏྭཱ ཙཱིཝརཔཝཏྟིཡེཝ ཉཱཏབྦཱ. ཡཐཱཧ ཨཊྛཀཐཱཡཾ ‘‘གཱམསཱིམམྤི ཨོཀྐམིཏྭཱ སབྷཱཡཾ ཝཱ ཡཏྠ ཀཏྠཙི ཝཱ ཝསིཏྭཱ ཙཱིཝརཔྤཝཏྟིཾ ཉཏྭཱ པཀྐམིཏུཾ ཝཊྚཏཱི’’ཏི (པཱརཱ. ཨཊྛ. ༢.༦༥༦).

༨༧༨. ཨེཝཉྩཱཔི ཨསཀྐོནྟོཏི ཨངྒབྷེདཾ ཨཀཏྭཱ, ཀཏྭཱ ཝཱ ཨནྟོགཱམསཱིམཱཡ ཨརུཎཾ ཨུཊྛཱཔེཏུམྤི གནྟུཾ ཨསཀྐོནྟོ. ཉཏྭཱཏི ཨཏྟནོ ཙཱིཝརསྶ ཋཔིཏཊྛཱནཾ སལླཀྑེཏྭཱ. ཏཏྠེཝཱཏི ཨེཏྠ ‘‘ཋིཏོ’’ཏི ལབྦྷཏི. ཁིཔྤནྟི སཱིགྷཾ, པུརཱརུཎཱཏི ཝུཏྟཾ ཧོཏི. ཨཏིརེཀེ ཋཱནེཏི ཡོཛནཱ, ཡཐཱཧ ཨཊྛཀཐཱཡཾ ‘‘ཨཏིརེཀཙཱིཝརཊྛཱནེ ཋསྶཏཱི’’ཏི (པཱརཱ. ཨཊྛ. ༢.༦༥༦), ‘‘ཨཏིརེཀཙཱིཝརཊྛཱནེ ཏིཊྛཏཱི’’ཏི ཙིནྟེཏྭཱཏི ཨཏྠོ.

༨༧༩. ཝིསྶཛྫེཏཱིཏི སཏྟམཨརུཎུཊྛཱནཏོ པུརེཏརམེཝ ཨཉྙསྶ དེཏི. ཨུཔརིཔི ཨེཝམེཝ ཝཏྟབྦཾ.

༨༨༠. སཱསངྐསམྨཏེ ཨེཝཾནཱམཀེ སིཀྑཱཔདེ སམུཊྛཱནཱདཡོ སབྦེ ཏེན དུཏིཡེན ཀཐིནེན སམཱ ཨིཏི མུནིནྡེན མཏཱ ཨནུམཏཱ ཨནུཉྙཱཏཱཏི ཡོཛནཱ.

སཱསངྐཀཐཱཝཎྞནཱ.

༨༨༡. ཛཱནནྟི ‘‘སངྒྷསྶ དེམཱ’’ཏི ཝཙནེན པརིཎཱམིཏབྷཱཝཾ ཡེན ཀེནཙི ཨཱཀཱརེན ཛཱནནྟོ. ཡཐཱཧ པདབྷཱཛནེ ¶ ‘‘སཱམཾ ཝཱ ཛཱནཱཏཱི’’ཏིཨཱདི (པཱརཱ. ༦༥༩). པརིཎཏནྟི ཨེཏྠ པདབྷཱཛནེ ‘‘པརིཎཏཾ ནཱམ ‘དསྶཱམ ཀརིསྶཱམཱ’ཏི ཝཱཙཱ བྷིནྣཱ ཧོཏཱི’’ཏི ཝུཏྟནིཡཱམེན སངྒྷསྶ པརིཎཏནྟི ཨཏྠོ. ལཱབྷནྟི ལབྷིཏབྦཾ ཙཱིཝརཱདི ཡཾ ཀིཉྩི. ཡཐཱཧ ‘‘ལཱབྷོ ནཱམ ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱ, ཨནྟམསོ ཙུཎྞཔིཎྜོཔི དནྟཀཊྛམྤི དསིཀསུཏྟམྤཱི’’ཏི. ཨཏྟནོ པརིཎཱམེཡྻཱཏི ‘‘བཧཱུ ཨཱཝུསོ སངྒྷསྶ དཱཡཀཱ, བཧཱུ སངྒྷསྶ བྷཏྟཱ, མཡཾ ཏུམྷེ ནིསྶཱཡ ཏུམྷེ སམྤསྶནྟཱ ཨིདྷ ཝིཧརཱམ. ཏུམྷེ ཙེ ཨམྷཱཀཾ ན དསྶཐ, ཨཐ ཀོ ཙརཧི ཨམྷཱཀཾ དསྶཏི. དེཐཱཝུསོ ཨམྷཱཀཾ ཨིམཱནི ཙཱིཝརཱནཱི’’ཏི (པཱརཱ. ༦༥༧) པཱལི༹ཡཱ ¶ ཨཱགཏནཡེན ཨཏྟནོ པརིཎཱམེཡྻཱཏི ཝུཏྟཾ ཧོཏི. ཏསྶ ནིསྶགྒིཡནྟི ཨེཏྠ ‘‘པཡོགེ དུཀྐཊཾ, པཊིལཱབྷེནཱ’’ཏི སེསོ. ནིསྶགྒིཡནྟི ཨིདཾ པརིཎཏེ པརིཎཏསཉྙིཾ སནྡྷཱཡ ཝུཏྟཾ. ཝེམཏིཀསྶ པན དུཀྐཊཾ ཧོཏི. ཡཐཱཧ ‘‘པརིཎཏེ ཝེམཏིཀོ ཨཏྟནོ པརིཎཱམེཏི, ཨཱཔཏྟི དུཀྐཊསྶཱ’’ཏི. ཨཔརིཎཏསཉྙིནོ ཨནཱཔཏྟི. ཡཐཱཧ ‘‘པརིཎཏེ ཨཔརིཎཏསཉྙཱི ཨཏྟནོ པརིཎཱམེཏི, ཨནཱཔཏྟཱི’’ཏི.

༨༨༢. ‘‘ཨཉྙསྶ དེཧཱི’’ཏི སཙེ པརིཎཱམེཏཱིཏི ཏཐཱ སངྒྷསྶ པརིཎཏབྷཱཝཾ ཛཱནནྟོ ‘‘ཨཉྙསྶ དེཧཱི’’ཏི ཡདི པརིཎཱམེཏི. སུདྡྷིཀཾ པཱཙིཏྟིཡནྟི ནིསྶཛྫིཏབྦཝཏྠུརཧིཏཾ ཀེཝལཾ པཱཙིཏྟིཡམཏྟནྟི ཨཏྠོ. སུདྡྷཙིཏྟེནཱཏི སཝཱསནཱནཝསེསཀིལེསཔྤཧཱནེན པརིསུདྡྷཙིཏྟེན བྷགཝཏཱ. པཱཙིཏྟིཡམུདཱིརིཏནྟི པཱཙིཏྟིཡེསུ ཨཊྛམསྶ སཧདྷམྨིཀཝགྒསྶ ཨཝསཱནེ ‘‘ཡོ པན བྷིཀྑུ ཛཱནཾ སངྒྷིཀཾ ལཱབྷཾ པརིཎཏཾ པུགྒལསྶ པརིཎཱམེཡྻ, པཱཙིཏྟིཡ’’ནྟི (པཱཙི. ༤༩༠) དེསིཏཾ.

༨༨༣. ཨེཀཾ ¶ ཙཱིཝརནྟི སངྒྷསྶ པརིཎཏཙཱིཝརཏོ ཨེཀཾ ཙཱིཝརཾ. ཙཱིཝརཾ ཝཱཏི ཨེཏྠ ཝཱ-སདྡོ པཙྩཡནྟརཝིཀཔྤཏྠོ. ཝཱ པནཱཏི ཨེཏྠ ཝཱ-སདྡོ ཨཏྠཝིཀཔྤཏྠོ. ཨེཀཾ ཙཱིཝརཾ ཝཱ ཨཉྙཾ ཝཱ པཙྩཡཾ པརསྶ, ཨེཀཾ པན ཨཏྟནོ ཝཱ པརིཎཱམེཡྻ ཙེཏི ཡོཛནཱ. སདྡྷིནྟི ཨེཀཏོ, ཨེཀཀྑཎེཏི ཝུཏྟཾ ཧོཏི. དྭེ པཱཙིཏྟིཡོ སདྡྷིཾ སིཡུནྟི ཡོཛནཱ, ཨཉྙསྶ པརིཎཱམནེན སུདྡྷཔཱཙིཏྟིཡཉྩ ཨཏྟནོ པརིཎཱམནེན ནིསྶགྒིཡཔཱཙིཏྟིཡཉྩཱཏི དྭེ པཱཙིཏྟིཡོ ཨེཀཀྑཎེ ཧོནྟཱིཏི ཨཏྠོ.

༨༨༤. པརིཎཱམེཏྭཱ ཋཔིཏེ ཝིནིཙྪཡཾ དསྶེཏྭཱ པརིཙྩཛིཏྭཱ དིནྣེ ཝིནིཙྪཡཾ དསྶེཏུམཱཧ ‘‘སངྒྷསྶཱ’’ཏིཨཱདི. ‘‘པརཱཛཡོ’’ཏི ཨིདཾ པཱདཔྤཧོནཀཾ ཝཏྠུཾ སནྡྷཱཡ ཝུཏྟཾ. ཡཐཱཝཏྠུཝསེན པན དུཀྐཊཐུལླཙྩཡཱཔི ཝཏྟབྦཱ.

༨༨༥. ཨཉྙསྶ ཙེཏིཡསྶ པོཎཾ པརིཎཏཾ ཨཉྙསྶ ཙེཏིཡསྶ ཝཱ སངྒྷསྶ ཝཱ པུགྒལསྶ ཝཱཔི པན པརིཎཱམེཡྻཱཏི ཡོཛནཱ. སངྒྷསྶ པུགྒལསྶཱཏི པདདྭཡེཔི ཨེཝམེཝ ཡོཛེཏབྦཾ. ཡཐཱཧ ‘‘སངྒྷསྶ པརིཎཏཾ ཨཉྙསངྒྷསྶ ཝཱ ཙེཏིཡསྶ ཝཱ པུགྒལསྶ ཝཱ པརིཎཱམེཏི ¶ , ཨཱཔཏྟི དུཀྐཊསྶཱ’’ཏིཨཱདི (པཱཙི. ༤༩༢). ཨཉྙསྶ པུགྒལསྶ པོཎཾ ཨཉྙསྶ པུགྒལསྶ པརིཎཱམེཡྻཱཏི.

༨༨༦. ཨིམསྶ སབྦསཏྟཝིསཡཏཾ དསྶེཏུམཱཧ ‘‘ཡོ པནཱ’’ཏིཨཱདི.

༨༨༧. ཨིདཾ པརིཎཏསིཀྑཱཔདཾ. ཏིསམུཊྛཱནནྟི ཀཱཡཙིཏྟཝཱཙཱཙིཏྟཀཱཡཝཱཙཱཙིཏྟསངྑཱཏེཧི ཏཱིཧི སཙིཏྟཀསམུཊྛཱནེཧི སམུཊྛཱནཏོ ཏིསམུཊྛཱནཾ. པརིཎཱམནཔཙྩཡཱ ཨཱཔཛྫིཏབྦཏོ ཀྲིཡཾ. སངྒྷཱདཱིནཾ པརིཎཏནྟིསཉྙཱཡ ཨབྷཱཝེན ¶ ཝིམུཙྩནཏོ སཉྙཱཝིམོཀྑཾ. ཀཱཡཝིཉྙཏྟིཝཙཱིཝིཉྙཏྟཱིཧི པརིཎཱམེཏབྦཏོ ཀཱཡཀམྨཾ ཝཙཱིཀམྨཾ.

པརིཎཏཀཐཱཝཎྞནཱ.

པཏྟཝགྒོ ཏཏིཡོ.

༨༨༨. ཡེ ཨིམཾ ཝིནིཙྪཡཾ ཏརནྟི, ཏེ པཉྙཏྟིམཧཱསམུདྡཾ ཏརནྟཱིཏི ཡོཛནཱ. པཉྙཏྟིསངྑཱཏཾ ཝིནཡཔིཊཀམེཝ མཧཱསམུདྡོ ཝིཡཱཏི པཉྙཏྟིམཧཱསམུདྡོ, ཏཾ. ཨེཝཾ སམུདཱཡཾ དསྶེཏྭཱ ཏདཝཡཝེ དསྶེཏུམཱཧ ‘‘ནེཀཱ’’ཏིཨཱདི. ནེཀཱནི ནཱནཔྤཀཱརཱནི ཝཏྟཱནི སེནཱསནཝཏྟཱདཱིནི ཁནྡྷཀཱགཏཱནི ཨུགྒཱ ཨུཏྟུངྒཱ ཏརངྒམཱལཱ མཧཱཝཱིཙིཔརམྤརཱ ཡསྶཱཏི ཝིགྒཧོ, ནཱནཔྤཀཱརཁནྡྷཀཝཏྟསངྑཱཏམཧཱཏརངྒཔརམྤརཱཡ སཛྫིཏནྟི ཨཏྠོ. སཱིལཾ པཱཏིམོཀྑསཾཝརཱདིཀམེཝ ཨནྟོ ཝེལཱཝལཡོ ཡསྶ སོ སཱིལནྟོ, ཏཾ, པཱཏིམོཀྑསཾཝརསཱིལཱདིཙཏུཔཱརིསུདྡྷིསཱིལམེཝ པཊིཔཱདེཏབྦཏཱཡ ཨནྟཾ ཝེལཱཝལཡབྷཱུཏནྟི ཨཏྠོ. ཨཱཔཏྟིཡོ སཏྟཱཔཏྟིཀྑནྡྷཱ, སཱིལཱཙཱརདིཊྛིཨཱཛཱིཝཝིཔཏྟིཡོ ཙ གཱཧཀཱ མཀརཱདཡོ ཡསྶཱཏི ཝིགྒཧོ, སཱིལཱཙཱརཱཛཱིཝདིཊྛིསམྤཏྟིསངྑཱཏམུདུསཏྟནཱསཀཨཱཔཏྟིཝིཔཏྟིསངྑཱ- ཏམཱཏངྒམཀརཱདིཙཎྜསཏྟཝནྟནྟི ཨཏྠོ. ཨེཝཾ ཨཡཾ གཱཐཱ སམུདཱཡཱཝཡཝཱནཾ སབྦེསམེཝ རཱུཔཀཱལངྐཱརེན ཝིརཙིཏཱཏི དཊྛབྦཱ.

ཨིཏི ཝིནཡཏྠསཱརསནྡཱིཔནིཡཱ

ཝིནཡཝིནིཙྪཡཝཎྞནཱཡ

ནིསྶགྒིཡཀཐཱཝཎྞནཱ ནིཊྛིཏཱ.

པཱཙིཏྟིཡཀཐཱཝཎྞནཱ

༨༨༩. ཨེཝཾ ¶ ནཱཏིཝིཏྠཱརསངྑེཔཏོ ནིསྶགྒིཡཝིནིཙྪཡཾ དསྶེཏྭཱ ཨིདཱནི ཏདནནྟརཾ ནིདྡིཊྛསྶ པཱཙིཏྟིཡཀཎྜསྶ ཝིནིཙྪཡཾ ¶ དསྶེཏུཾ ‘‘སམྤཛཱནམུསཱཝཱདེ’’ཏིཨཱདི ཨཱརདྡྷཾ. སམྤཛཱནམུསཱཝཱདེཏི ཨཏྟནོ ཝཙནསྶ མུསཱབྷཱཝཾ ཉཏྭཱ, ཨདིཊྛཾ ‘‘དིཊྛ’’ནྟིཨཱདིནཱ ནཡེན མུསཱཝཱདེ སམྤཛཱནནྟསྶ མུསཱབྷཎནེཏིཔི ཨཏྠོ གཧེཏབྦོ. ཡཐཱཧ ཨཊྛཀཐཱཡཾ ‘‘ཛཱནིཏྭཱ ཛཱནནྟསྶ ཙ མུསཱབྷཎནེ’’ཏི (པཱཙི. ཨཊྛ. ༢). ‘‘མུསཱཝཱདེ’’ཏི ཧི ནིམིཏྟཏྠེ བྷུམྨཾ, མུསཱཝཱདནིམིཏྟནྟི ཨཏྠོ.

དཝཱ བྷཎནྟསྶཱཏི ཡོཛནཱ. ཨནུཔཔརིཀྑིཏྭཱ ཝེགེན དིཊྛམྤི ‘‘ཨདིཊྛཾ མེ’’ཏི ཝདནྟསྶཱཏི ཨཏྠོ. ཡཐཱཧ ‘‘དཝཱ བྷཎཏི ནཱམ སཧསཱ བྷཎཏཱི’’ཏི པདབྷཱཛནཱིཨཊྛཀཐཱཡཾ ‘‘སཧསཱ བྷཎཏཱིཏི ཨཝཱིམཾསིཏྭཱ ཨནུཔདྷཱརེཏྭཱ ཝེགེན དིཊྛམྤི ‘ཨདིཊྛཾ མེ’ཏི བྷཎཏཱི’’ཏི (པཱཙི. ཨཊྛ. ༡༡). རཝཱ བྷཎནྟསྶཱཏི ‘‘ཙཱིཝར’’ནྟི ཝཏྟུཀཱམསྶ ‘‘ཙཱིར’’ནྟི ཝཙནཾ ཝིཡ མནྡཏྟཱ མོམཱུཧཏྟཱ ‘‘ཨཉྙཾ བྷཎིསྶཱམཱི’’ཏི ཨཉྙཾ བྷཎནྟསྶ. ཡཐཱཧ ‘‘རཝཱ བྷཎཏི ནཱམ ‘ཨཉྙཾ བྷཎིསྶཱམཱི’ཏི ཨཉྙཾ བྷཎཏཱི’’ཏི.

༨༩༠. ཨཉྙཏྠཱཏི ཙཏུཏྠཔཱརཱཛིཀཱདཱིསུ. ཨཏྟནཱ ཨལདྡྷཾ ཨུཏྟརིམནུསྶདྷམྨཾ ‘‘ལདྡྷཾ མཡཱ’’ཏི མུསཱ ཡསྶ བྷཎཏི, ཏེན ཏངྑཎམེཝ སུཏྭཱ ཏདཏྠེ ཉཱཏེ པཱརཱཛིཀསྶ, ཨཉྙཱཏེ ཀཱལནྟརེན ཉཱཏེ ཙ པརིཡཱཡཝཙནེ ཙ ཉཱཏེ ཐུལླཙྩཡསྶ, པརིཡཱཡཝཙནེ ཨཝིཉྙཱཏེ དུཀྐཊསྶ, དུཊྛདོསསིཀྑཱཔདེ པཱརཱཛིཀཾ ཨནཱཔནྣསྶ ‘‘ཨཱཔནྣོ’’ཏི མུསཱབྷཎནེ སངྒྷཱདིསེསསྶ, ཨོམསཝཱདསིཀྑཱཔདེ དུབྦྷཱསིཏསྶ ཙ ཝུཏྟཏྟཱ ཨཱཧ ‘‘མུསཱཝཱདསྶ ཀཱརཎཱ པཉྩ ཨཱཔཏྟིཡོ’’ཏི. ཨིམཱཡ པཱཙིཏྟིཡཱ སདྡྷིཾ ཚ ཨཱཔཏྟིཀྑནྡྷཱ ཧོནྟི.

སམྤཛཱནམུསཱཝཱདཀཐཱཝཎྞནཱ.

༨༩༡-༣. ཝུཏྟེསུ ¶ ཛཱཏིཨཱདཱིསུ དསསུ ཨཀྐོསཝཏྠཱུསཱུཏི ཡོཛནཱ, པདབྷཱཛནེ ཝུཏྟེསུ ཛཱཏིནཱམགོཏྟཀམྨསིཔྤཨཱབཱདྷལིངྒཀིལེསཨཱཔཏྟིཨཀྐོསཱནཾ ཝསེན དསསུ ཨཀྐོསཝཏྠཱུསཱུཏི ཨཏྠོ ¶ . ཏེསུ ཀིལེསཾ ཝིནཱ སབྦེཏེ ཧཱིནུཀྐཊྛཝསེན དྭིཔྤཀཱརཱ ཧོནྟི. ཡཐཱཧ པདབྷཱཛནེ ‘‘ཛཱཏི ནཱམ དྭེ ཛཱཏིཡོ ཧཱིནཱ ཙ ཛཱཏི ཨུཀྐཊྛཱ ཙ ཛཱཏཱི’’ཏིཨཱདི.

ཏཏྠ ཙཎྜཱལཱདིཛཱཏི ཧཱིནཱ, ཁཏྟིཡབྲཱཧྨཎཛཱཏིཡོ ཨུཀྐཊྛཱ. ནཱམེསུ ཨཝཀཎྞཀཛཝཀཎྞཀཱདིནཱམཱནི དཱསནཱམཏྟཱ ཧཱིནཱནི, བུདྡྷརཀྑིཏཱདིནཱམཱནི ཨུཀྐཊྛཱནི. ཀོསིཡཱདིགོཏྟཾ ཧཱིནཾ, གོཏམཱདིགོཏྟཾ ཨུཀྐཊྛཾ. ཀམྨེསུ ཝཌྜྷཀིམཎིཀཱརཱདིཀམྨཱནི ཧཱིནཱནི, ཀསིཝཱཎིཛྫཱགོརཀྑཀམྨཱནི ཨུཀྐཊྛཱནི. སིཔྤེསུ ནལ༹ཀཱརཀུམྦྷཀཱརཱདིསིཔྤཾ ཧཱིནཾ, མུདྡཱགཎནཱདིསིཔྤཾ ཨུཀྐཊྛཾ. ཨཱབཱདྷེསུ སབྦེཔི ཨཱབཱདྷཱ ཧཱིནཱ, ཨཔིཙ མདྷུམེཧོ པཱིལཱ༹ཛནཀཏྟཱབྷཱཝཱ ཨུཀྐཊྛོ. ལིངྒེསུ ཨཏིདཱིགྷཏཱདཡོ ཧཱིནཱ, ནཱཏིདཱིགྷཏཱདཡོ ཨུཀྐཊྛཱ. སབྦེཔི ཀིལེསཱ ཧཱིནཱ. སབྦཱཔཏྟིཡོཔི ཧཱིནཱ, ཨཔིཙ སོཏཱཔཏྟིསམཱཔཏྟི ཨུཀྐཊྛཱ. ཨཀྐོསེསུ ‘‘ཨོཊྛོསི མེཎྜོསི གོཎོསཱི’’ཏིཨཱདིཀོ ཧཱིནོ, ‘‘པཎྜིཏོསི བྱཏྟོསཱི’’ཏིཨཱདིཀོ ཨུཀྐཊྛོ.

ཨཉྙཏྲཉྙཱཔདེསེནཱཏི པརིཡཱཡཀཐནེན ཝིནཱ. ཨོམསནྟསྶཱཏི ཝཙནཔཏོདེན ཨོཝིཛ྄ཛྷནྟསྶ. སམྦུདྡྷེན པཀཱསིཏཱཏི ‘‘ཙཎྜཱལོསི ཝེནོསི ནེསཱདོསི རཐཀཱརོསི པུཀྐུསོསཱི’ཏི བྷཎཏི, ཨཱཔཏྟི ཝཱཙཱཡ ཝཱཙཱཡ པཱཙིཏྟིཡསྶཱ’’ཏི སཱམཾ སབྦདྷམྨཱཝབོདྷཏོ ‘‘སམྦུདྡྷོ’’ཏི པཉྙཱཏེན བྷགཝཏཱ དེསིཏཱ.

༨༩༤. ཏེཧེཝཱཏི ¶ ཛཱཏིཨཱདཱིཧི ཨཀྐོསཝཏྠཱུཧེཝ. ཨཉྙཱཔདེསེན བྷཱུཏེན ཝཱ…པེ… ཨཱཔནྣམེཝ ཝཱ ཨནུཔསམྤནྣཾ ཨཀྐོསནྟསྶ དུཀྐཊཾ སམྦུདྡྷེན པཀཱསིཏནྟི སམྦནྡྷོ. ཨིདྷ བྷཱུཏཱབྷཱུཏཔདཱནི ཏེཧཱིཏི ཨཔེཀྑིཏྭཱ བཧུཝཙནནྟཱནི ཡོཛེཏབྦཱནི. ཨེཏེན ‘‘སནྟི ཨིདྷེཀཙྩེ’’ཏིཨཱདིདུཏིཡཝཱརཏྠཾ (པཱཙི. ༢༦) དསྶེནྟེན དུཀྐཊསཱདྷནཏྠེན ཏདེཀཀཱརིཡཾ ཏཏིཡཾ ཡེནཱུནཝཱརཉྩ ཙཏུཏྠཾ ན མཡནྟིཨཱདིཝཱརཉྩ སངྒཧིཏནྟི དཊྛབྦཾ. ཡཐཱཧ ཨཊྛཀཐཱཡཾ ‘‘སནྟི ཨིདྷེཀཙྩེ’ཏི ཝཱརེ པན པརིཧརིཏྭཱ ཝུཏྟབྷཱཝེན དུཀྐཊཾ. ཨེསེཝ ནཡོ ‘ཡེནཱུན…པེ… ན མཡ’ནྟི ཝཱརེསུཔཱི’’ཏི (པཱཙི. ཨཊྛ. ༢༦).

པཱལི༹མུཏྟཔདེཧིཔཱིཏི ཨེཏྠཱཔི ཏཐེཝ ‘‘བྷཱུཏེན ཝཱ’’ཏིཨཱདཱིནི པདཱནི སམྦནྡྷིཏབྦཱནི. ‘‘ཙོརོསི, གཎྛིབྷེདཀོསཱི’’ཏིཨཱདི པཱལི༹མུཏྟཔདཾ ནཱམ. སབྦཏྠཱཏི སབྦེསུ ཙཏཱུསུ ཝཱརེསུ, པཱལི༹མུཏྟཔདེསུ ¶ ཙ. ཝུཏྟཉྷི ‘‘ཨནུཔསམྤནྣེ པན ཙཏཱུསུཔི ཝཱརེསུ དུཀྐཊམེཝ. ‘ཙོརོསི, གཎྛིབྷེདཀོསཱི’ཏིཨཱདིཝཙནེཧི པན ཨུཔསམྤནྣེཔི ཨནུཔསམྤནྣེཔི སབྦཝཱརེསུ དུཀྐཊམེཝཱ’’ཏི (པཱཙི. ཨཊྛ. ༢༦). ‘‘ཨནུཔསམྤནྣ’’ནྟི ཨིམིནཱ ‘‘ཨིམསྨིཉྩ སིཀྑཱཔདེ ཋཔེཏྭཱ བྷིཀྑུཾ བྷིཀྑུནིཨཱདཡོ སབྦེ སཏྟཱ ཨནུཔསམྤནྣཊྛཱནེ ཋིཏཱ’’ཏི (པཱཙི. ཨཊྛ. ༢༦) ཨཊྛཀཐཱཡཾ ཝུཏྟཱ ཨནུཔསམྤནྣཱ སངྒཧིཏཱ. ཏེནེཝེཏྠཱཔི ཝཀྑཏི ‘‘པཝིཊྛཱནུཔསམྤནྣཊྛཱནེ ཨིདྷ ཙ བྷིཀྑུནཱི’’ཏི.

༨༩༥. དཝཀམྱཏཱཏི ཨེཏྠ ‘‘པཊིསངྑཱ ཡོནིསོ’’ཏིཨཱདཱིསུ (མ. ནི. ༡.༢༢, ༢༣, ༤༢༢; ཨ. ནི. ༦.༥༨; ༩.༩; མཧཱནི. ༢༠༦; ཝིབྷ. ༥༡༨) ཝིཡ ཡ-ཀཱརལོཔོ. སབྦཏྠཱཏི སབྦེསུ ཝུཏྟཔཱཙིཏྟིཡཝཏྠཱུསུ ཙ དུཀྐཊཝཏྠཱུསུ ཙཱཏི སབྦཏྠེཝ. དུབྦྷཱསིཏམུདཱིརིཏནྟི ‘‘ཙཎྜཱལོསི…པེ… པུཀྐུསོསཱི’ཏི བྷཎཏི, ཨཱཔཏྟི ¶ ཝཱཙཱཡ ཝཱཙཱཡ དུབྦྷཱསིཏསྶཱ’’ཏི (པཱཙི. ༣༢) ཝུཏྟནྟི ཨཏྠོ. པརམྨུཁཱ པན པཱཙིཏྟིཡཝཏྠཱུཧི ཙ དུཀྐཊཝཏྠཱུཧི ཙ ཨཀྐོསནེ དུཀྐཊམེཝ. ཏཐཱ དཝཀམྱཏཱཡ པརམྨུཁཱ ཝདནྟསྶཱཔི དུབྦྷཱསིཏམེཝཱཏི ཨཱཙརིཡཱ ཝདནྟི.

༨༩༦-༧. ཨཏྠཾ པུརཀྑཏྭཱ ཝདཏོ བྷིཀྑུསྶ ཨནཱཔཏྟཱིཏི ཡོཛནཱ. དྷམྨོ ནཱམ ‘‘ཙཎྜཱལོསཱི’’ཏིཨཱདིཔཱལི༹ཡེཝ. ཡཐཱཧ ཨཊྛཀཐཱཡཾ ‘‘པཱལི༹ཾ ཝཱཙེནྟོ དྷམྨཔུརེཀྑཱརོ’’ཏི (པཱཙི. ཨཊྛ. ༣༥). ཨནུསཱསནཱི ནཱམ ‘‘ཨིདཱནིཔི ཙཎྜཱལོསི, མཱ པཱཔདྷམྨཾ ཨཀཱསི, མཱ ཏམོ ཏམཔརཱཡནོ ཨཧོསཱི’’ཏིཨཱདིནཱ (པཱཙི. ཨཊྛ. ༣༥) ནཡེན ཨཊྛཀཐཱཡཾ ཝུཏྟསརཱུཔཱཡེཝ ཨནུསཱསནཱིཔུརེཀྑཏཱཡ ཋཏྭཱ ཝདནྟསྶ ཙིཏྟསྶ ལཧུཔརིཝཏྟིཏབྷཱཝཏོ ཨནྟརཱ ཀོདྷེ ཨུཔྤནྣེཔི ཨནཱཔཏྟི.

ཨེཏྠཱཏི ཨིམསྨིཾ ཨོམསཝཱདསིཀྑཱཔདེ. པཊིགྷསམྤཡུཏྟཙིཏྟེནེཝ ཨཱཔཛྫིཏབྦཏྟཱ མཱནསིཀདུཀྑཝེདནཱཝ ཧོཏི.

ཨོམསཝཱདཀཐཱཝཎྞནཱ.

༨༩༨. དུཝིདྷཱཀཱརཏོ བྷིཀྑུཔེསུཉྙེ ཨཱཔཏྟི སིཡཱཏི ཡོཛནཱ. པིསཏཱིཏི པིསུཎཱ, ཝཱཙཱ ¶ , སམགྒེ སཏྟེ ཨཝཡཝབྷཱུཏེ ཝགྒེ བྷིནྣེ ཀརོཏཱིཏི ཨཏྠོ. པིསུཎཱ ཨེཝ པེསུཉྙཾ, ཏཱཡ ཝཱཙཱཡ སམནྣཱགཏོ པུགྒལོ སཧཙརིཡནཡེན པིསུཎོ, ཏསྶ ཀམྨཾ པེསུཉྙཾ, བྷིཀྑཱུནཾ པེསུཉྙཾ བྷིཀྑུཔེསུཉྙཾ, ཏསྨིཾ བྷིཀྑུཔེསུཉྙེ. པདབྷཱཛནེ ‘‘ཨུཔསམྤནྣོ ཨུཔསམྤནྣསྶ སུཏྭཱ ཨུཔསམྤནྣསྶ པེསུཉྙཾ ཨུཔསཾཧརཏི ‘ཨིཏྠནྣཱམོ ཏཾ ‘ཙཎྜཱལོ…པེ… པུཀྐུསོ’ཏི བྷཎཏཱི’ཏི ཨཱཔཏྟི…པེ… པཱཙིཏྟིཡསྶཱ’’ཏི (པཱཙི. ༣༩) ཝུཏྟཏྟཱ སཡཾ ཨུཔསམྤནྣོ ཧུཏྭཱ ཨུཔསམྤནྣསྶ ཛཱཏིཨཱདཱིསུ དསསུ ཨཀྐོསཝཏྠཱུསུ ཨཉྙཏརེན ཨཉྙཾ ཨུཔསམྤནྣཾ ¶ པརམྨུཁཱ ཨཀྐོསནྟསྶ སུཏྭཱ ཏསྶ སནྟིཀཾ གནྟྭཱ ཝཀྑམཱནསརཱུཔེསུ ཨཏྟནོ པིཡཀཱམཏཱབྷེདཱདྷིཔྤཱཡསངྑཱཏེསུ དྭཱིསུ ཀཱརཎེསུ ཨཉྙཏརཀཱརཎཾ པཊིཙྩ ‘‘ཨསུཀོ ཏུཡ྄ཧཾ ཨེཝཾ ཝདཏཱི’’ཏི པེསུཉྙཾ ཧརཏི, ཏསྶ པེསུཉྙཀཐནནིམིཏྟཾ པཱཙིཏྟིཡཾ ཧོཏཱིཏི ཨཏྠོ.

དུཝིདྷཱཀཱརཏོཏི ཨེཏྠ ཨཱཀཱར-སདྡོ ཀཱརཎཔརིཡཱཡོ. ཡཐཱཧ ཨཊྛཀཐཱཡཾ ‘‘དྭཱིཧཱཀཱརེཧཱིཏི དྭཱིཧི ཀཱརཎེཧཱི’’ཏི (པཱཙི. ཨཊྛ. ༣༨). ཨེཏྠ ཀཱརཎཾ ནཱམ ཨདྷིཔྤཱཡཝིསེསོ. ཏཾ ཀཱརཎཾ ཨདྷིཔྤཱཡམུཁེན དསྶེཏུམཱཧ ‘‘ཨཏྟནོ’’ཏིཨཱདི. ཨཏྟནོ པིཡཀཱམསྶཱཏི ཨཏྟནོ པིཡབྷཱཝཀཱམསྶ པེསུཉྙཾ བྷཎནྟསྶ, ཨཏྟནོ པིཡབྷཱཝཾ ཀཱམཡནྟསྶཱཏི ཨཏྠོ, ཏཱདིསེན ཨདྷིཔྤཱཡེནཱཏི ཝུཏྟཾ ཧོཏི. ཡཐཱཧ ཨཊྛཀཐཱཡཾ ‘‘ཨེཝཾ ཨཧཾ ཨེཏསྶ པིཡོ བྷཝིསྶཱམཱི’’ཏི ཨཏྟནོ པིཡབྷཱཝཾ པཏྠཡམཱནསྶཱ’’ཏི (པཱཙི. ཨཊྛ. ༣༨). པརབྷེདཏྠིནོཔི ཝཱཏི ཨཀྐོསཀསྶ ཙ ཨཏྟནོ པེསུཉྙཝཙནཾ སུཎནྟསྶ ཙཱཏི ཨུབྷིནྣཾ བྷེདཾ ཨིཙྪནྟསྶཱཏི ཨཏྠོ, བྷེདཱདྷིཔྤཱཡེནཱཏི ཝུཏྟཾ ཧོཏི. ཡཐཱཧ ཨཊྛཀཐཱཡཾ ‘‘པརསྶ པརེན བྷེདཾ ཨིཙྪནྟསྶཱ’’ཏི (པཱཙི. ཨཊྛ. ༣༨).

༨༩༩. པརིཡཱཡནཡེན ཨཀྐོསནྟསྶ ཝཙནསྶ…པེ… དུཀྐཊནྟི ཡོཛནཱ, པརིཡཱཡཨཀྐོསཝཙནཾ སུཏྭཱ པརསྶ སནྟིཀཾ གནྟྭཱ ཝདནྟསྶ བྷིཀྑུནོ དུཀྐཊཾ ཧོཏཱིཏི ཨཏྠོ. ཡཐཱཧ ‘‘ཨིཏྠནྣཱམོ སནྟི ཨིདྷེཀཙྩེ ཙཎྜཱལཱ…པེ… བྷཎཏི, ན སོ ཨཉྙཾ བྷཎཏི, ཏཾཡེཝ བྷཎཏཱིཏི ཨཱཔཏྟི ཝཱཙཱཡ ཝཱཙཱཡ དུཀྐཊསྶཱ’’ཏིཨཱདི (པཱཙི. ༤༡). པཱལི༹མུཏྟནཡེན ཨཀྐོསནྟསྶ ཝཙནསྶ…པེ… དུཀྐཊནྟི ཡོཛནཱ. ཨེཏྠ ‘‘ཙོརོསི, གཎྛིབྷེདཀོསཱི’’ཏིཨཱདིནཱ དསྶིཏོ པཱལི༹མུཏྟནཡོ ནཱམ.

༩༠༠. ཨནུཔསམྤནྣསྶ ¶ ཨཀྐོསཾ ཨུཔསམྤནྣཾ ཧརཏོཔི ཙ ཏཐཱ དུཀྐཊནྟི ཡོཛནཱ. ཙ-སདྡེན ¶ ཨུཔསམྤནྣསྶ ཨཀྐོསཾ ཨནུཔསམྤནྣཾ ཧརཏོཔི ཙ, ཨནུཔསམྤནྣསྶ ཨཀྐོསཾ ཨནུཔསམྤནྣཾ ཧརཏོཔི ཙ ཏཐཱ དུཀྐཊནྟི ཝིཀཔྤདྭཡཉྩ སམུཙྩིནོཏི. ‘‘ཨིདྷཱཔི བྷིཀྑུནིཾ ཨཱདིཾ ཀཏྭཱ སབྦེ ཨནུཔསམྤནྣཱ ནཱམཱ’’ཏི (པཱཙི. ཨཊྛ. ༣༨) ཨཊྛཀཐཱཝཙནཏོ ‘‘བྷིཀྑུནཱི’’ཏི ཨུཔལཀྑཎཾ.

༩༠༡. ན ཙེཝ པིཡཀཱམསྶཱཏི པིཡབྷཱཝཾ ཨཀཱམཡནྟསྶ ཙ. ན བྷེདཏྠིནོཔི ཙཱཏི བྷེདཾ ཨནིཙྪནྟསྶ ཙ. པཱཔཱནཾ གརཧཏྠཱཡཱཏི ཨེཏྠ ‘‘ཀེཝལ’’ནྟི སེསོ. ཡཐཱཧ ཨཊྛཀཐཱཡཾ ‘‘ཨེཀཾ ཨཀྐོསནྟཾ, ཨེཀཉྩ ཁམནྟཾ དིསྭཱ ‘ཨཧོ ནིལླཛྫོ, ཨཱིདིསམྤི ནཱམ ཨཱཡསྨནྟཾ པུན ཝཏྟབྦཾ མཉྙིསྶཏཱི’ཏི ཨེཝཾ ཀེཝལཾ པཱཔགརཧིཏཱཡ བྷཎནྟསྶ ཨནཱཔཏྟཱི’’ཏི (པཱཙི. ཨཊྛ. ༣༨).

པེསུཉྙཀཐཱཝཎྞནཱ.

༩༠༣. ཨཉྙེནཱཏི སཱམཎེརཱདིནཱ. ‘‘ཡཉྩ པདཾ ཡཉྩ ཨནུཔདཾ ཡཉྩ ཨནྭཀྑརཾ ཡཉྩ ཨནུབྱཉྫནཾ, སབྦམེཏཾ པདསོ ནཱམཱ’’ཏི (པཱཙི. ༤༦) པདབྷཱཛནེ ཝུཏྟཏྟཱ ཨཝཡཝེ སམུདཱཡོཔཙཱརཝསེན ‘‘པིཊཀཏྟཡ’’ནྟི ཏདེཀདེསཔདཱདི ཨེཝ ཝུཏྟོཏི གཧེཏབྦོ. ཨེཏྠ པདཱདིསརཱུཔཾ ཨཊྛཀཐཱཡ ཝེདིཏབྦཾ. ཝུཏྟཉྷི ཏཏྠ ‘‘པདནྟི ཨེཀོ གཱཐཱཔཱདོ ཨདྷིཔྤེཏོ. ཨནུཔདནྟི དུཏིཡོ པཱདོ. ཨནྭཀྑརནྟི ཨེཀེཀམཀྑརཾ. ཨནུབྱཉྫནནྟི པུརིམབྱཉྫནེན སདིསཾ པཙྪཱབྱཉྫན’’ནྟི (པཱཙི. ཨཊྛ. ༤༥). ཨིདཾ གཱཐཱམཡདེསནཾ སནྡྷཱཡ ཝུཏྟཾ. ‘‘ཡཾ ཀིཉྩི ཝཱ ཨེཀམཀྑརཾ ¶ ཨནྭཀྑརཾ, ཨཀྑརསམཱུཧོ ཨནུབྱཉྫནཾ, ཨཀྑརཱནུབྱཉྫནསམཱུཧོ པདཾ, པཋམཔདཾ པདམེཝ, དུཏིཡཾ ཨནུཔདནྟི ཨེཝམེཏྠ ནཱནཱཀརཎཾ ཝེདིཏབྦ’’ནྟིཔི (པཱཙི. ཨཊྛ. ༤༥) ཝུཏྟཾ. ཨིདཾ ཙུཎྞིཡདེསནཾ སནྡྷཱཡ ཝུཏྟཾ.

དྷམྨནྟི བུདྡྷབྷཱསིཏཱདིཔཱལི༹དྷམྨཾ. པཊིསམྦྷིདཱཡཉྷི དྷམྨཔཉྩཀེ པཱལི༹པི དྷམྨོཏི ཝུཏྟཱ. དྷམྨཔཉྩཀཾ ནཱམ ཕལནིབྦཏྟཀོ ཧེཏུ, ཨརིཡམགྒོ, བྷཱསིཏཾ, ཀུསལཱཀུསལཾ ཙེཏི ཨེཏེ དྷམྨསཉྙིཏཱཏི ནིདྡིཊྛཾ. ཨེཏྠ ཧི བྷཱསིཏནྟི པཱལི༹ ཝུཏྟཱ. ཨཊྛཀཐཱནིསྶིཏོཔི ཨེཏྠེཝ སངྒཧཾ གཙྪཏི. སོ ཙ པུབྦེ མགདྷབྷཱསཱཡ ཋིཏོ སངྒཱིཏིཏྟཡཱརུལ༹ྷོ གཧེཏབྦོ.

‘‘སཧ བྷཎནྟསྶ པཱཙིཏྟིཡཾ སིཡཱ’’ཏི ཨིམིནཱ ‘‘ཨེཀཏོ པཊྛཔེཏྭཱ ཨེཀཏོ ཨོསཱཔེནྟཱི’’ཏིཨཱདིནཱ ¶ (པཱཙི. ༤༦) པདབྷཱཛནཱགཏནཡེན ཨནུཔསམྤནྣེན སདྡྷིཾ ཨཱརབྷིཏྭཱ ཨེཀཏོ ཨུཙྩཱརཎཝསེན པདཾ ཝཱ ཨནུཔདཾ ཝཱ ཨནྭཀྑརཾ ཝཱ ཨནུབྱཉྫནཾ ཝཱ ཝདཏོ པདཱདིགཎནཱཝསེན པཱཙིཏྟིཡནྟི ཝུཏྟཾ ཧོཏི.

༩༠༤. སངྒཱིཏིཾ ཨནཱརུལ༹ྷེསུ དྷམྨེསུ རཱཛོཝཱདཱདཡོ སུཏྟནྟཱ ཨཱཔཏྟིཛནཀཱཡེཝཱཏི མཧཱཔཙྩརིཡཱདིསུ ཝུཏྟཱཏི ཡོཛནཱ. རཱཛོཝཱདོ ནཱམ ཨེཀོ སུཏྟནྟོ. ཨཱདི-སདྡེན ཏིཀྑིནྡྲིཡཱདིསུཏྟནྟཱ གཧིཏཱ.

༩༠༥. བྷིཀྑུསྨིམྤི བྷིཀྑུནིཡཱཔི ཙ ཨནུཔསམྤནྣསཉྙིནོ, ཝིམཏིསྶ ཝཱ བྷིཀྑུསྶ ཏཐཱ པདསོདྷམྨེ དུཀྐཊཾ ཧོཏཱིཏི ཡོཛནཱ.

༩༠༦-༧. ཨེཀཏོ ཨུདྡིསཱཔེཏཱིཏི ཨེཀཏོ ཨུདྡེསཾ གཎྷནྟེཧི ཨནུཔསམྤནྣེཧི སདྡྷིཾ ཨུཙྩཱརཎཝསེན ཨུདྡིསཱཔེཏི. སཛ྄ཛྷཱཡཾ ཝཱ ཀརོཏཱིཏི ཏཐཱ ཨེཀཏོ སཛ྄ཛྷཱཡཏི.

‘‘སཙེ ¶ ཨེཀགཱཐཱཡ ཨེཀོ པཱདོ ན ཨཱགཙྪཏི, སེསཾ ཨཱགཙྪཏི, ཨཡཾ ཡེབྷུཡྻེན པགུཎགནྠོ ནཱམ. ཨེས ནཡོ སུཏྟེཔི ཝེདིཏབྦོཏཱི’’ཏི (པཱཙི. ཨཊྛ. ༤༨) ཨཊྛཀཐཱཝཙནཏོ པགུཎགནྠནྟི ཨེཏྠ ‘‘ཡེབྷུཡྻེནཱ’’ཏི སེསོ. ཨོཔཱཏེཏཱིཏི ‘‘ཨེཝཾ བྷཎཱཧཱི’’ཏི ཨེཀཏོ བྷཎཏི. ཨུདྡེསནྟི ཨུདྡིསིཏབྦཾ. ཏེནཱཏི ཨནུཔསམྤནྣེན.

༩༠༨. ཡསྨཱ ཨིདཾ པདསོདྷམྨསིཀྑཱཔདཾ ཝཱཙཏོ ཙ སམུཊྛཱཏི, ཝཱཙཱཙིཏྟདྭཡཱཔི ཙ སམུཊྛཱཏི, ཏསྨཱ ཨིདཾ སམུཊྛཱནཾ པདསོདྷམྨསཉྙིཏནྟི ཝུཏྟནྟི ཡོཛནཱ.

པདསོདྷམྨཀཐཱཝཎྞནཱ.

༩༠༩-༡༠. སབྦཙྪནྣསབྦཔརིཙྪནྣེ སེནཱསནེ ཏིསྶནྣཾ པན རཏྟཱིནཾ ཡོ པན བྷིཀྑུ རཏྟིཡཾ ཋཔེཏྭཱ བྷིཀྑུཾ ཨཉྙེན སཙེ ནིཔཛྫེཡྻ, ཏསྶ པཱཙིཏྟིཡཾ སིཡཱཏི ཡོཛནཱ. ‘‘ཡཾ ཀིཉྩི པཊིཙྪཱདནསམཏྠཾ ཨིདྷ ཚདནཉྩ པརིཙྪནྣཉྩ ཝེདིཏབྦ’’ནྟི (པཱཙི. ཨཊྛ. ༥༡) ཨཊྛཀཐཱཡཾ ཝུཏྟཏྟཱ ཚདནཱརཧཾ ཨིཊྛཀཱསིལཱསུདྷཱཏིཎཔཎྞཱདཱིནཾ ཡེན ཀེནཙི སབྦསོ ཚཱདིཏཾ སེནཱསནཾ ¶ སབྦཙྪནྣཾ. ‘‘བྷཱུམིཏོ པཊྛཱཡ ཡཱཝ ཚདནཾ ཨཱཧཙྩ པཱཀཱརེན ཝཱ ཨཉྙེན ཝཱ ཀེནཙི ཨནྟམསོ ཝཏྠེནཔི པརིཀྑིཏྟ’’ནྟི (པཱཙི. ཨཊྛ. ༥༡) ཨཊྛཀཐཱཡཾ ཝུཏྟཏྟཱ ཡེན ཀེནཙི པརིཀྑིཔིཏྭཱ པཊིཙྪཱདིཏསེནཱསནཾ སབྦཔརིཙྪནྣཾ. ‘‘ཚདནཾ ཨནཱཧཙྩ སབྦནྟིམེན པརིཡཱཡེན དིཡཌྜྷཧཏྠུབྦེདྷེན པཱཀཱརཱདིནཱ པརིཀྑིཏྟཱཔི སབྦཔརིཙྪནྣཱཡེཝཱ’’ཏི (པཱཙི. ཨཊྛ. ༥༡) ཀུརུནྡཊྛཀཐཱཡཾ ཝུཏྟཾ, ཏཾ ‘‘དིཡཌྜྷཱ’’ཏིཨཱདིནཱ ཝཀྑཏི.

ཨེཝཾ སབྦཙྪནྣསབྦཔརིཙྪནྣེ ཨེཀསྨིཾ སེནཱསནེ ཡོ བྷིཀྑུ ཨུཔསམྤནྣཏོ ཨཉྙེན ཨེཀེན ཝཱ ཨནེཀེཧི ཝཱ ཏིརཏྟཾ ¶ སཧསེཡྻཾ ཀཔྤེཏྭཱ ཙཏུཏྠརཏྟིཾ ཨཱདིཾ ཀཏྭཱ སབྦརཏྟཱིསུ སཱུརིཡཏྠངྒམཏོ པཊྛཱཡ སཀལརཏྟིཡཾ པཋམཾ ཝཱ པཙྪཱ ཝཱ ཨཔུབྦཱཙརིམཾ ཝཱ པིཊྛིཾ པསཱརེཏྭཱ སཙེ ཨེཀསེནཱསནེ སེཡྻཾ ཀཔྤེཏི, ཏསྶ དེཝསིཀཾ པཱཙིཏྟིཡཾ ཧོཏཱིཏི ཨིདཾ ཝིདྷཱནཾ ‘‘ཨཔིཙེཏྠ ཨེཀཱཝཱསཱདིཀམྤི ཙཏུཀྐཾ ཝེདིཏབྦ’’ནྟིཨཱདིནཱ (པཱཙི. ཨཊྛ. ༥༡) ཨཊྛཀཐཱཡཾ ཝུཏྟཾ.

‘‘ཡེབྷུཡྻེན པརིཙྪནྣེ ཚནྣེ’’ཏི ཨིམིནཱཔི ཨེཝམེཝ ཡོཛེཏྭཱ ཨཏྠོ ཝེདིཏབྦོ. ‘‘ཡསྶཱ པན ཨུཔརི བཧུཏརཾ ཋཱནཾ ཚནྣཾ, ཨཔྤཾ ཨཙྪནྣཾ, སམནྟཏོ ཙ བཧུཏརཾ པརིཀྑིཏྟཾ, ཨཔྤཾ ཨཔརིཀྑིཏྟཾ, ཨཡཾ ཡེབྷུཡྻེནཚནྣཱ ཡེབྷུཡྻེནཔརིཙྪནྣཱ ནཱམཱ’’ཏི (པཱཙི. ཨཊྛ. ༥༡) ཨཊྛཀཐཱཡཾ ཝུཏྟནཡེན ཡེབྷུཡྻེན ཚནྣཔརིཙྪནྣཾ ཝེདིཏབྦཾ. ཨཏྠོ ཝུཏྟནཡོཡེཝ. ‘‘ཡེབྷུཡྻེན པཾསུཀཱ’’ཏི ཨེཏསྶ ཨཊྛཀཐཱཡཾ (པཱཙི. ཨཊྛ. ༨༦) ཏཱིསུ དྭེ ཡེབྷུཡྻཾ ནཱམ, ཨིདྷ པན པདསོདྷམྨེ ‘‘ཡེབྷུཡྻེན པགུཎཾ གནྠ’’ནྟི ཨེཏསྶ ཨཊྛཀཐཱཡཾ (པཱཙི. ཨཊྛ. ༤༨) ‘‘ཨེཀགཱཐཱཡཱ’’ཏིཨཱདིཝིཝརཎེ ཝིཡ ཙཏཱུསུ ཏཡོཔི བྷཱགཱ ཡེབྷུཡྻཾ ནཱམཱཏི ཝེདིཏབྦཾ.

༩༡༡. མེཐུནསྶ པཧོནཀཾ ཡཾ པན ཝཏྠུ པཋམཔཱརཱཛིཀཱཡ ནིདྡིཊྛཾ ཨནྟམསོ ཏིརཙྪཱནགཏེནཔི, ཏེན པཋམཔཱརཱཛིཀཝཏྠུནཱ པུགྒལེན སཧ ནིཔཛྫིཏྭཱ ཨཱཔཏྟི སཧསེཡྻཱཔཏྟི ཧོཏཱིཏི ཡོཛནཱ.

༩༡༢-༣. ‘‘ཨུབྷོ ཝཱ ནིཔཛྫནྟཱི’’ཏི ཝིཀཔྤསྶ པཋམགཱཐཱདྭཡེནེཝ ཨཏྠཏོ དསྶིཏཏྟཱ པུབྦཱཔརིཡཝསེནཔི སམྦྷཝནྟཾ དསྶེཏུཾ ‘‘ཨནུཔསམྤནྣེ’’ཏིཨཱདིནཱ (པཱཙི. ༥༢-༥༤) ནཡེན དསྶིཏཔཀྑདྭཡཾ ནིདསྶེཏུམཱཧ ‘‘ནིཔནྣེ’’ཏིཨཱདི. ‘‘ཨུཊྛཧིཏྭཱ’’ཏི ཨིདཾ ཝིཙྪཱཝསེན གཧེཏབྦཾ. ཨནུཔསམྤནྣགཎནཱཡཔི ཝཱཏི བཧཱུསུ ¶ ཨནུཔསམྤནྣེསུ ཏེསཾ གཎནཱཡ ཙ. ཨནུཔསམྤནྣེསུ ¶ བཧཱུསུ ཏེསཾ གཎནཱཡ ཨེཀསྶ བྷིཀྑུནོ བཧཱུ ཨཱཔཏྟིཡོ ཧོནྟཱིཏི ཨེཝཾ དསྶནེན ཨུཔསམྤནྣེསུ བཧཱུསུ ཨེཀསྨིཾ ཨནུཔསམྤནྣེ སཏི ཏེསཉྩ ཏསྶ པཡོགགཎནཱཡ ཨཱཔཛྫིཏབྦཱ བཧཱུ ཨཱཔཏྟིཡོ ཙ ཨུབྷོསུཔི བཧཱུསུ ཨེཀེཀསྶེཝ ཨུཔསམྤནྣསྶ ཨནུཔསམྤནྣགཎནཱཡ བཧཱུ ཨཱཔཏྟིཡོ ཙ ཧོནྟཱིཏིཔི དསྶིཏཾ ཧོཏི.