📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིནཡཔིཊཀེ

ཝིནཡཝིནིཙྪཡ-ཊཱིཀཱ (དུཏིཡོ བྷཱགོ)

པཱཊིདེསནཱིཡཀཐཱཝཎྞནཱ

༡༨༣༠-༡. ཨེཝཾ ¶ ¶ ནཱཏིསངྑེཔཝིཏྠཱརནཡེན དྭེནཝུཏི པཱཙིཏྟིཡཱནི དསྶེཏྭཱ ཏདནནྟརཾ ནིདྡིཊྛེ པཱཊིདེསནཱིཡེ དསྶེཏུམཱཧ ‘‘ཡོ ཙནྟརགྷར’’ནྟིཨཱདི. ཏཏྠ ཨནྟརགྷརནྟི རཐིཀཱདིམཱཧ. ཡཐཱཧ ‘‘ཨནྟརགྷརཾ ནཱམ རཐིཀཱ བྱཱུཧཾ སིངྒྷཱཊཀཾ གྷར’’ནྟི.

ཡོ ¶ པན བྷིཀྑུ ཨནྟརགྷརཾ པཝིཊྛཱཡ ཨཉྙཱཏིཀཱཡ བྷིཀྑུནིཡཱ ཧཏྠཏོ ཡཾ ཀིཉྩི ཁཱདནཾ, བྷོཛནམྤི ཝཱ སཧཏྠཱ པཊིགྒཎྷེཡྻ, ཏསྶ བྷིཀྑུནོ གཧཎེ དུཀྐཊཾ, བྷོགེ ཨཛ྄ཛྷོཧཱརེ པཱཊིདེསནཱིཡཾ སིཡཱཏི ཡོཛནཱ.

ཨིཏོ པཊྛཱཡ ཙཏསྶོ གཱཐཱ ཨུཔྤཊིཔཱཊིཡཱ པོཏྠཀེསུ ལིཁིཏཱ, ཏཱསཾ ཨཡཾ པཊིཔཱཊི – ‘‘ཨེཏྠནྟརགྷར’’ནྟི ཏཏིཡཱ, ‘‘ཏསྨཱ བྷིཀྑུནིཡཱ’’ཏི ཙཏུཏྠཱི, ‘‘རཐིཀཱདཱིསཱུ’’ཏི པཉྩམཱི ¶ , ‘‘རཐིཀཱཡཔི ཝཱ’’ཏི ཚཊྛཱི. པཊིཔཱཊི པནཱཡཾ མཱཏིཀཊྛཀཐཀྐམེན ཝེདིཏབྦཱ. ཨིམཱཡ པཊིཔཱཊིཡཱ ཏཱསཾ ཨཏྠཝཎྞནཱ ཧོཏི –

༡༨༣༢-༣. པུརིམགཱཐཱདྭཡེན པདབྷཱཛནཱགཏསཱམཉྙཝིནིཙྪཡཾ དསྶེཏྭཱ ཨིདཱནི ཨཊྛཀཐཱགཏཾ ཝིསེསཾ དསྶེཏུམཱཧ ‘‘ཨེཏྠཱ’’ཏིཨཱདི. ཏཏྠ ཨེཏྠཱཏི ཨིམསྨིཾ པཋམཔཱཊིདེསནཱིཡསིཀྑཱཔདེ. ཏསྶཱཏི ཨཉྙཱཏིཀབྷིཀྑུནིཡཱ. ཝཱཀྱཏོཏི ‘‘ཨནྟརགྷརཾ པཝིཊྛཱཡཱ’’ཏི ཝཙནཏོ. ཧི-སདྡོ ཧེཏུམྷི. ཡསྨཱ བྷིཀྑུསྶ ཋིཏཊྛཱནཾ ནཔྤམཱཎནྟི ཨཊྛཀཐཱཡ (པཱཙི. ཨཊྛ. ༥༥༣) ཝཎྞིཏཾ, ཏསྨཱ ཨཱརཱམཱདཱིསུ ཋཏྭཱ དེནྟིཡཱ བྷིཀྑུནིཡཱ ཧཏྠཏོ ཝཱིཐིཨཱདཱིསུ ཋཏྭཱ ཡོ པཊིགྒཎྷེཡྻ ཙེ, ཨེཝཾ པཊིགྒཎྷཏོ ཏསྶ བྷིཀྑུནོ ན དོསོཏི ཡོཛནཱ. པརིབྷོགསྶ པཊིགྒཧཎམཱུལཀཏྟཱ ན དོསོ. ‘‘པཊིགྒཎྷཏོ’’ཏི ཨིམིནཱ པརིབྷོགེ པཱཊིདེསནཱིཡཱབྷཱཝོ ཙ དཱིཔིཏོ ཧོཏི.

༡༨༣༤. སཙེ བྷིཀྑུནཱི རཐིཀཱདཱིསུ ཋཏྭཱ བྷོཛནཾ དེཏི, བྷིཀྑུ ཨནྟརཱརཱམེ ཋཏྭཱ པཊིགྒཎྷཱཏི ཙེ, ཏསྶ ཨཱཔཏྟཱིཏི ཡོཛནཱ. གཱཐཱབནྡྷཝསེན ‘‘བྷིཀྑུནི བྷོཛན’’ནྟི རསྶཏྟཾ. ཨཱཔཏྟཱིཏི ཙ པཊིགྒཧཎཔརིབྷོགེསུ དུཀྐཊཔཱཊིདེསནཱིཡཱཔཏྟིཡོ སནྡྷཱཡ ཝུཏྟཾ.

༡༨༣༥. རཐིཀཱདཱིསུ ཋཏྭཱ བྷིཀྑུནཱི བྷོཛནཾ དེཏི ཙེ, ཏཾ རཐིཀཱཡཔི ཝཱ…པེ… ཨཡཾ ནཡོཏི ཡོཛནཱ. ཏཏྠ རཐིཀཱཏི རཙྪཱ. བྱཱུཧནྟི ཨནིབྦིཛ྄ཛྷིཏྭཱ ཋིཏཱ གཏཔཙྩཱགཏརཙྪཱ. སནྡྷི ནཱམ གྷརསནྡྷི. སིངྒྷཱཊཀནྟི ཙཏུཀྐོཎཾ ཝཱ ཏིཀོཎཾ ཝཱ མགྒསམོདྷཱནཊྛཱནཾ. ཨཡཾ ནཡོཏི ‘‘ཨཱཔཏྟཱི’’ཏི ཨནནྟརགཱཐཱཡ ཝུཏྟནཡོ.

༡༨༣༧. ཨཱམིསེན ¶ ¶ ཨསམྦྷིནྣརསཾ སནྡྷཱཡ ཨིདཾ དུཀྐཊཾ བྷཱསིཏཾ. ཨཱམིསེན སམྦྷིནྣེ ཨེཀརསེ ཡཱམཀཱལིཀཱདིམྷི པཊིགྒཧེཏྭཱ ཨཛ྄ཛྷོཧཱརེ པཱཊིདེསནཱིཡཱཔཏྟི སིཡཱཏི ཡོཛནཱ.

༡༨༣༨. ཨེཀཏོཨུཔསམྤནྣཧཏྠཏོཏི བྷིཀྑུནཱིནཾ སནྟིཀེ ཨུཔསམྤནྣཱཡ ཧཏྠཏོ. ཡཐཱཧ ‘‘ཨེཀཏོཨུཔསམྤནྣཱཡཱཏི བྷིཀྑུནཱིནཾ སནྟིཀེ ཨུཔསམྤནྣཱཡཱ’’ཏི (པཱཙི. ཨཊྛ. ༥༥༣). བྷིཀྑཱུནཾ སནྟིཀེ ཨུཔསམྤནྣཱཡ པན ཡཐཱཝཏྠུཀམེཝཱཏི.

༡༨༣༩. ཨཉྙཱཏིཀཱཡ ཉཱཏིཀསཉྙིསྶ, ཏཐེཝ ཝིམཏིསྶ ཙ དུཀྐཊནྟི ཡོཛནཱ.

༡༨༤༠. ཨཉྙཱཏིཀཱཡ དཱཔེནྟིཡཱ བྷཱུམིཡཱ ནིཀྑིཔིཏྭཱ དདམཱནཱཡ ཝཱ ཨནྟརཱརཱམཱདཱིསུ ཋཏྭཱ དེནྟིཡཱ པཊིགྒཎྷཏོ བྷིཀྑུསྶ ཨནཱཔཏྟཱིཏི ཡོཛནཱ. ཨནྟརཱརཱམཱདཱིསཱུཏི ཨེཏྠ ཨཱདི-སདྡེན བྷིཀྑུནུཔསྶཡཏིཏྠིཡསེཡྻཱཔཊིཀྐམནཱདིཾ སངྒཎྷཱཏི. པཊིཀྐམནཾ ནཱམ བྷོཛནསཱལཱ.

༡༨༤༡. གཱམཏོ བཧི ནཱིཧརིཏྭཱ དེཏཱིཏི ཡོཛནཱ.

༡༨༤༢. ཧཏྠཏོཏི ཨེཏྠ ‘‘གཧཎེ’’ཏི སེསོ. ཏཐཱཏི ཨནཱཔཏྟི. སམུཊྛཱནཾ ཨིདཾ སིཀྑཱཔདཾ ཨེལ༹ཀལོམེན སམཾ མཏནྟི ཡོཛནཱ.

པཋམཔཱཊིདེསནཱིཡཀཐཱཝཎྞནཱ.

༡༨༤༣-༤. ཨཝུཏྟེཏི ཝཀྑམཱནནཡེན ཨཝུཏྟེ. ཨེཀེནཔི ཙ བྷིཀྑུནཱཏི སམྦནྡྷོ. ཨཔསཀྐཱཏི ཨཔགཙྪ. ཨཱདི-ཨཏྠཝཱཙིནཱ ཨིཏི-སདྡེན ‘‘ཨཔསཀྐ ཏཱཝ, བྷགིནི, ཡཱཝ བྷིཀྑཱུ བྷུཉྫནྟཱི’’ཏི ཝཱཀྱསེསོ སངྒཧིཏོཏི དཊྛབྦོ. ཨིམིནཱ ཨཔསཱདནཱཀཱརོ ¶ སནྡསྶིཏོ. ‘‘ཨེཀེནཔི ཙ བྷིཀྑུནཱ’’ཏི ཨིམིནཱ ཨཝཀཾསོ དསྶིཏོ. ཨུཀྐཾསོ པན ‘‘ཏེཧི བྷིཀྑཱུཧི སཱ བྷིཀྑུནཱི ཨཔསཱདེཏབྦཱ’’ཏི པཱལི༹ཏོཔི དཊྛབྦོ. ‘‘ཨཱམིས’’ནྟི སཱམཉྙཝཙནེཔི པཉྩནྣཾ བྷོཛནཱནཾ ཨཉྙཏརསྶེཝ གཧཎཾ. ཡཐཱཧ ‘‘པཉྩནྣཾ བྷོཛནཱནཾ ཨཉྙཏརེནཱ’’ཏི. བྷོགེཏི ཙ ཨེཀཏོཨུཔསམྤནྣནྟི ཙ ཝུཏྟཏྠམེཝ.

༡༨༤༥. ཏཐེཝཱཏི ¶ དུཀྐཊཾ. ཏཏྠཱཏི ཨནུཔསམྤནྣཱཡ.

༡༨༤༦. ཨཏྟནོ བྷཏྟེ དིནྣེཔི ཨིམིནཱ སིཀྑཱཔདེན ཨནཱཔཏྟི, པུརིམསིཀྑཱཔདེན པན ཨཱཔཏྟིསམྦྷཝཱ ‘‘ན དེཏཱི’’ཏི ཝུཏྟཾ. ཡཐཱཧ ‘‘ཨཏྟནོ བྷཏྟཾ དཱཔེཏི, ན དེཏཱིཏི ཨེཏྠ སཙེཔི ཨཏྟནོ བྷཏྟཾ དེཏི, ཨིམིནཱ སིཀྑཱཔདེན ཨནཱཔཏྟིཡེཝ, པུརིམསིཀྑཱཔདེན ཨཱཔཏྟཱི’’ཏི (པཱཙི. ཨཊྛ. ༥༥༨). ཏཐཱཏི ཨནཱཔཏྟི. ཨུབྷཡསིཀྑཱཔདེཧིཔི ཨནཱཔཏྟིཾ དསྶེཏུམཱཧ ‘‘པདེཏི ཙེ’’ཏི. ཡཐཱཧ ‘‘ཨཉྙེསཾ བྷཏྟཾ དེཏི, ན དཱཔེཏཱིཏི ཨེཏྠ པན སཙེཔི དཱཔེཡྻ, ཨིམིནཱ སིཀྑཱཔདེན ཨཱཔཏྟི བྷཝེཡྻ, དེནྟིཡཱ པན ནེཝ ཨིམིནཱ, ན པུརིམེན ཨཱཔཏྟཱི’’ཏི.

༡༨༤༧. བྷིཀྑུནཱི ཡཾ ན དིནྣཾ, ཏཾ དཱཔེཏི, ཡཏྠ ཝཱ ན དིནྣཾ, ཏཏྠ དཱཔེཏི, ཏམྤི སབྦེསཾ མིཏྟཱམིཏྟཱནཾ སམཾ དཱཔེཏི, ཏཏྠཱཔི ཨནཱཔཏྟི.

༡༨༤༨. སིཀྑམཱནཱ ཝཱ སཱམཎེརིཀཱ ཝཱ ‘‘ཨིདྷ སཱུཔཾ དེཐ, ཨོདནཾ དེཐཱ’’ཏི ཝོསཱསནྟཱི ཝིདྷཱནཾ ཀརོནྟཱི ཋིཏཱ, ཏཾ ཨནཔསཱདེནྟསྶ ཨནཱཔཏྟི. པཉྩེཝ བྷོཛནཱནི ཝིནཱ ཨཉྙཾ ཝོསཱསནྟིཾ བྷིཀྑུནིཾ ཨནཔསཱདེནྟསྶ ཨནཱཔཏྟི. ཨནཔསཱདེནྟསྶ ཨུམྨཏྟཀཱདིནོཔི ཨནཱཔཏྟཱིཏི ཡོཛནཱ.

༡༨༤༩. སམུཊྛཱནནྟི ¶ ཨེཏྠ ‘‘ཨིམསྶཱ’’ཏི སེསོ. བྷོཛནཾ ཀིརིཡཾ, ཝོསཱསནྟིཡཱ ཨནིཝཱརཎཾ ཨཀིརིཡནྟི ཨེཝམིདཾ ཀྲིཡཱཀྲིཡཾ.

དུཏིཡཔཱཊིདེསནཱིཡཀཐཱཝཎྞནཱ.

༡༨༥༠-༡. སེཀྑནྟི སམྨཏེཏི ‘‘སེཀྑསམྨཏཾ ནཱམ ཀུལཾ ཡཾ ཀུལཾ སདྡྷཱཡ ཝཌྜྷཏི, བྷོགེན ཧཱཡཏི, ཨེཝརཱུཔསྶ ཀུལསྶ ཉཏྟིདུཏིཡེན ཀམྨེན སེཀྑསམྨུཏི དིནྣཱ ཧོཏཱི’’ཏི (པཱཙི. ༥༦༧) ཝུཏྟཾ ཨིདཾ ཀུལཾ སེཀྑསམྨཏཾ ནཱམ. ཏེནཱཧ ‘‘ལདྡྷསམྨུཏིཀེ ཀུལེ’’ཏི. ལདྡྷཱ སམྨུཏི ཡེནཱཏི ཝིགྒཧོ. གྷརཱུཔཙཱརཾ ཨོཀྐནྟེ ནིམནྟིཏོཔི ཨནིམནྟིཏོཝ ཧོཏཱིཏི ཨཱཧ ‘‘གྷརཱུཔཙཱརོཀྐམནཱ པུབྦེཝཱ’’ཏི. ཡཐཱཧ ‘‘ཨནིམནྟིཏོ ནཱམ ཨཛྫཏནཱཡ ཝཱ སྭཱཏནཱཡ ¶ ཝཱ ཨནིམནྟིཏོ, གྷརཱུཔཙཱརཾ ཨོཀྐམནྟེ ནིམནྟེཏི, ཨེསོ ཨནིམནྟིཏོ ནཱམཱ’’ཏི (པཱཙི. ༥༦༧).

‘‘ཨགིལཱནོ ནཱམ ཡོ སཀྐོཏི པིཎྜཱཡ ཙརིཏུ’’ནྟི ཝུཏྟཏྟཱ བྷིཀྑཱཡ ཙརིཏུཾ སམཏྠོ ཨགིལཱནོ ནཱམ. གཧེཏྭཱཏི སཧཏྠཱ པཊིགྒཧེཏྭཱ. ‘‘ཨཱམིས’’ནྟི ཨིམིནཱ སམྦནྡྷོ. ཡཐཱཧ ‘‘ཁཱདནཱིཡཾ ཝཱ བྷོཛནཱིཡཾ ཝཱ སཧཏྠཱ པཊིགྒཧེཏྭཱ’’ཏི (པཱཙི. ༥༦༧). གཧཎེཏི ཨེཏྠ ‘‘ཨཱཧཱརཏྠཱཡཱ’’ཏི སེསོ.

༡༨༥༣. ཏཏྠཱཏི ཨསེཀྑསམྨཏེ ཀུལེ. ཏཐེཝ པརིདཱིཔིཏནྟི དུཀྐཊཾ པརིདཱིཔིཏཾ.

༡༨༥༤. ནིམནྟིཏསྶ ཝཱཏི ཨེཏྠ ཝཱ-སདྡེན ནིམནྟིཏསྶ ཨཝསེསཾ གཎྷཱཏི. ཡཐཱཧ ‘‘ནིམནྟིཏསྶ ཝཱ གིལཱནསྶ ཝཱ སེསཀཾ བྷུཉྫཏཱི’’ཏི. ཨཉྙེསཾ བྷིཀྑཱ ཏཏྠ དཱིཡཏཱིཏི ཡོཛནཱ. ཏཏྠཱཏི ཏསྨིཾ སེཀྑསམྨཏེ ཀུལེ.

༡༨༥༥. ཡཏྠ ¶ ཀཏྠཙཱིཏི ཨཱསནསཱལཱདཱིསུ ཡཏྠ ཀཏྠཙི. ནིཙྩབྷཏྟཱདིཀེ ཝཱཔཱིཏི ཨེཏྠ ཨཱདི-སདྡེན སལཱཀབྷཏྟཔཀྑིཀཨུཔོསཐིཀཔཱཊིཔདིཀབྷཏྟཱནཾ གཧཎཾ.

༡༨༥༦. དྭཱརེཏི ཨེཏྠ ‘‘ཋཔེཏྭཱ’’ཏི སེསོ. སམྤཏྟེཏི ཨེཏྠ ‘‘པཙྪཱ’’ཏི སེསོ. ཡཐཱཧ ‘‘སཙེཔི ཨནཱགཏེ བྷིཀྑུམྷི པཋམཾཡེཝ ནཱིཧརིཏྭཱ དྭཱརེ ཋཔེཏྭཱ པཙྪཱ སམྤཏྟསྶ དེནྟི, ཝཊྚཏཱི’’ཏི (པཱཙི. ཨཊྛ. ༥༦༩).

༡༨༥༧. མཧཱཔཙྩརིཡཱ(པཨཱཙི. ཨཊྛ. ༥༦༩) གཏཝིནིཙྪཡཾ དསྶེཏུམཱཧ ‘‘བྷིཀྑུ’’ནྟིཨཱདི. སམུཊྛཱནེལ༹ཀཱུཔམནྟི སམུཊྛཱནཏོ ཨེལ༹ཀལོམསིཀྑཱཔདསདིསནྟི ཨཏྠོ.

ཏཏིཡཔཱཊིདེསནཱིཡཀཐཱཝཎྞནཱ.

༡༨༥༨-༩. ‘‘པཉྩནྣཾ པཊིསཾཝིདིཏཾ, ཨེཏཾ ཨཔྤཊིསཾཝིདིཏཾ ནཱམཱ’’ཏི ཝཙནཏོ ཙ ཨིདྷཱཔི ‘‘སཧདྷམྨིཀཉཱཔིཏ’’ནྟི ཝཀྑམཱནཏྟཱ ཙ ཨགཧཊྛ-སདྡེན པརིབྦཱཛཀཱནཾ གཧཎཾ. ཝུཏྟམེཝ ¶ ནཡཾ ཝོཧཱརནྟརེན དསྶེཏུམཱཧ ‘‘ཨིཏྠིཡཱ པུརིསེན ཝཱ’’ཏི. ‘‘ཡཱནི ཁོ པན ཏཱནི ཨཱརཉྙཀཱནི སེནཱསནཱནཱི’’ཏི (པཱཙི. ༥༧༣) ཝཙནཏོ ཨཱརཱམནྟི ཨཱརཉྙཀཱརཱམམཱཧ. སཙེ ཨེཝམཱརོཙིཏཾ པཊིསཾཝིདིཏནྟི ཧི ཝུཏྟཾ པདབྷཱཛནེཏི (པཱཙི. ༥༧༣) ཡོཛནཱ. པཊིསཾཝིདིཏནྟི པགེཝ ནིཝེདིཏཾ.

༡༨༦༠. པཙྪཱ ཡཐཱརོཙིཏཾ ཏམེཝ ཝཱ ཏསྶ ཙ པརིཝཱརཾ ཀཏྭཱ ཨཉྙཾ བཧུཾ ཝཱ ཨཱཧརཱིཡཏུ, ཏམྤི པཊིསཾཝེདིཏཾ ནཱམཱཏི ཡོཛནཱ.

༡༨༦༡. ཡཱགུཡཱ ཝིདིཏཾ ཀཏྭཱཏི ཨེཏྠ ‘‘ཏཾ ཋཔེཏྭཱ’’ཏི ཨིདཾ སཱམཏྠིཡཱ ལབྦྷཏི. ཨིདམྤི ཝིདིཏཾ ཀུརུནྡིཡཾ ཝཊྚཏཱིཏི ཝུཏྟནྟི ཡོཛནཱ.

༡༨༦༢. པནཱཏི ¶ ཨཔི-སདྡཏྠོ. ཨཉྙཱནིཔི ཀུལཱནཱིཏི ཡོཛནཱ. ཨེཏྠ ‘‘ཨསུཀཾ ནཱམ ཀུལཾ པཊིསཾཝེདིཏཾ ཀཏྭཱ ཁཱདནཱིཡཱདཱིནི གཧེཏྭཱ གཙྪཏཱིཏི སུཏྭཱ’’ཏི (པཱཙི. ཨཊྛ. ༥༧༣) ཨཊྛཀཐཱསེསོ. ཏེནཱཏི ཀཏཔཊིསཾཝེདིཏེན. ཏམྤི ཙ སབྦཾ ཝཊྚཏཱིཏི ཡོཛནཱ.

༡༨༦༣. ཨེཝཾ ཡཾ ཨནཱརོཙིཏནྟི ‘‘ཨཱརཱམཾ ཝཱ ཨུཔཙཱརཾ ཝཱ པཝིསིཏྭཱ’’ཏིཨཱདིནཱ ནཡེན ཡཾ པཋམཾ ཨནིཝེདིཏཾ. ‘‘ཨེཝ’’ནྟི ཨིདཾ ‘‘ཡཾ ཨཱརཱམམནཱབྷཏ’’ནྟི ཨིམིནཱཔི ཡོཛེཏབྦཾ. ཨེཝནྟི ‘‘ཏསྶ པརིཝཱརཾ ཀཏྭཱ’’ཏིཨཱདིནཱ པཀཱརེན. ‘‘ཏཾ ཨསཾཝིདིཏཾ ནཱམཱ’’ཏི ཨིདཾ ‘‘སཧདྷམྨིཀཉཱཔིཏ’’ནྟི ཨིམིནཱཔི ཡོཛེཏབྦཾ. ཡཐཱཧ ‘‘པཉྩནྣཾ པཊིསཾཝིདིཏཾ, ཨེཏཾ ཨཔྤཊིསཾཝིདིཏཾ ནཱམཱ’’ཏི (པཱཙི. ༥༧༣). ཨཊྛཀཐཱཡཉྩ ‘‘པཉྩནྣཾ པཊིསཾཝིདིཏནྟི པཉྩསུ སཧདྷམྨིཀེསུ ཡཾ ཀིཉྩི པེསེཏྭཱ ‘ཁཱདནཱིཡཾ ཝཱ བྷོཛནཱིཡཾ ཝཱ ཨཱཧརིསྶཱམཱ’ཏི པཊིསཾཝིདིཏཾ ཀཏམྤི ཨཔྤཊིསཾཝིདིཏམེཝཱཏི ཨཏྠོ’’ཏི (པཱཙི. ཨཊྛ. ༥༧༣) ཝུཏྟཾ.

༡༨༦༤. ཀཱརཱཔེཏྭཱཏི ཨེཏྠ ‘‘པཊིསཾཝིདིཏ’’ནྟི སེསོ.

༡༨༦༥. བྷིཀྑུནཱ ཝཱ གནྟྭཱ ཨནྟརཱམགྒེ གཧེཏབྦནྟི ཡོཛནཱ. ཨེཝམཀཏྭཱཏི ‘‘བཧིཨཱརཱམཾ པེསེཏྭཱ’’ཏིཨཱདིནཱ ཝུཏྟཝིདྷཱནཾ ཨཀཏྭཱ. ཨུཔཙཱརཏོཏི ཨེཏྠ བྷུམྨཏྠེ ཏོ-པཙྩཡོ ཝེདིཏབྦོ.

༡༨༦༨. ‘‘པཊིསཾཝིདིཏེ’’ཏིཨཱདཱིནཾ ¶ པདཱནཾ ‘‘ཨནཱཔཏྟེ ཝཱ’’ཏི ཨིམིནཱ སམྦནྡྷོ. པཊིསཾཝིདིཏེཏི ཨེཏྠ ‘‘གིལཱནསྶཱ’’ཏི སེསོ. པཊིསཾཝིདིཏེ ཨནཱཔཏྟི, གིལཱནསྶཱཔི ཨནཱཔཏྟི, ཨཔྤཊིསཾཝིདིཏེཔི ཏསྶ པཊིསཾཝིདིཏསྶ ཨཝསེསཀེ ཝཱ གིལཱནསྶ ཨཝསེསཀེ ཝཱ ཨནཱཔཏྟི ཨེཝཱཏི སམྦནྡྷོ ¶ . ཡཐཱཧ ཨནཱཔཏྟིཝཱརེ ‘‘པཊིསཾཝིདིཏསྶ ཝཱ གིལཱནསྶ ཝཱ སེསཀཾ བྷུཉྫཏཱི’’ཏི (པཱཙི. ༥༧༥). བཧཱརཱམེ པཊིགྒཧེཏྭཱ ཨནྟོཡེཝ བྷུཉྫཏོ ཨསྶ ཨནཱཔཏྟཱིཏི ཡོཛནཱ. གཧེཏྭཱ ཝཱཏི ཨེཏྠ ཝཱ-སདྡོ ‘‘ཏསྶཱ’’ཏིཨཱདཱིསུཔི ཡོཛེཏབྦོ.

༡༨༦༩. ཏཏྠཱཏི ཏསྨིཾ ཨཱརཉྙཀཱརཱམེ. ཁཱདཏོ ཨནཱཔཏྟི ཨེཝཱཏི ཡོཛནཱ, ཏཏྠ ‘‘ཨཉྙེན ཀཔྤིཡཾ ཀཏྭཱ དིནྣཱནཱི’’ཏི སེསོ.

ཙཏུཏྠཔཱཊིདེསནཱིཡཀཐཱཝཎྞནཱ.

ཨིཏི ཝིནཡཏྠསཱརསནྡཱིཔནིཡཱ ཝིནཡཝིནིཙྪཡཝཎྞནཱཡ

པཱཊིདེསནཱིཡཀཐཱཝཎྞནཱ ནིཊྛིཏཱ.

སེཁིཡཀཐཱཝཎྞནཱ

༡༨༧༠. ཨེཝཾ པཱཊིདེསནཱིཡཝིནིཙྪཡཾ དསྶེཏྭཱ ཏདནནྟརཾ ཨུདྡིཊྛཱནཾ སེཁིཡཱནཾ ཝིནིཙྪཡཾ དསྶེཏུམཱཧ ‘‘ཡོ ཨནཱདརིཡེནེཝཱ’’ཏིཨཱདི. ཡོཏི ཐེརོ ཝཱ ནཝོ ཝཱ མཛ྄ཛྷིམོ ཝཱ. ཨེཏྠ ཨནཱདརིཡཾ ནཱམ སཉྩིཙྩ ཨཱཔཏྟིཨཱཔཛྫནཾ, ནིཝཱསནཱདིཝཏྠསྶ ཨུགྒཧཎེ ནིརུསྶཱཧཉྩ. པཙྪཏོཔི ཝཱཏི ཨེཏྠ ཝཱ-སདྡེན ‘‘པསྶཏོཔི ཝཱ’’ཏི ཨིདཾ སངྒཎྷཱཏི. ཏསྶ ཙཱཏི ཨེཏྠ ཙ-སདྡོ ཝཀྑམཱནསམུཙྩཡོ.

༡༨༧༡. ན ཀེཝལཾ ཝུཏྟནཡེན ནིཝཱསེནྟསྶེཝ ཧོཏི, ཁནྡྷཀཱགཏཧཏྠིསོཎྜཱདིཨཱཀཱརེནཱཔི ནིཝཱསེནྟསྶ དུཀྐཊཾ ཧོཏཱིཏི ཨཱཧ ‘‘ཧཏྠིསོཎྜཱདཱི’’ཏིཨཱདི. ཧཏྠིསོཎྜཱདིནིཝཱསནཾ པརཏོ ཁུདྡཀཝཏྠུཀྑནྡྷཀེ (ཙཱུལ༹ཝ. ༢༨༠) ཨཱཝི ¶ བྷཝིསྶཏི. པརིམཎྜལནྟི སམནྟཏོ མཎྜལཾ ཀཏྭཱ. ཝཏྠབྦནྟི ནིཝཏྠབྦཾ ནིཝཱསེཏབྦནྟི ཨཏྠོ.

༡༨༧༢. ཛཱཎུམཎྜལཏོ ¶ ཧེཊྛཱཏི ཨེཏྠ ‘‘ཛངྒྷཊྛིསཱིསཏོ པཊྛཱཡཱ’’ཏི སེསོ. ཨཊྛངྒུལཔྤམཱཎཀནྟི ཝཌྜྷཀིཨངྒུལེན ཨཊྛངྒུལམཏྟནྟི ཨཱཙརིཡཱ. ‘‘ཡོ པན སུཀྑཛངྒྷོ ཝཱ མཧཱཔིཎྜིཀམཾསོ ཝཱ ཧོཏི, ཏསྶ སཱརུཔྤཏྠཱཡ ཛཱཎུམཎྜལཏོ ཨཊྛངྒུལཱདྷིཀམྤི ཨོཏཱརེཏྭཱ ནིཝཱསེཏུཾ ཝཊྚཏཱི’’ཏི (པཱཙི. ཨཊྛ. ༥༧༦) ཨཊྛཀཐཾ སངྒཎྷིཏུམཱཧ ‘‘ཏཏོ ཨཱུནཾ ན ཝཊྚཏཱི’’ཏི.

༡༨༧༣. ཨསཉྩིཙྩ ཨཔརིམཎྜལཾ ནིཝཱསེནྟསྶ ཨནཱཔཏྟཱིཏི ཡོཛནཱ. ཨེཝམུཔརིཔི. ཨསཉྩིཙྩཱཏི ‘‘ཨཔརིམཎྜལཾ ནིཝཱསེསྶཱམཱི’’ཏི ཨེཝཾ ཨསཉྩིཙྩ, ཨཐ ཁོ ‘‘པརིམཎྜལཾཡེཝ ནིཝཱསེསྶཱམཱི’’ཏི ཝིརཛ྄ཛྷིཏྭཱ ཨཔརིམཎྜལཾ ནིཝཱསེནྟསྶ ཨནཱཔཏྟི. ཨསཏིསྶཱཔཱིཏི ཨཉྙཝིཧིཏསྶཱཔི ཏཐཱ ནིཝཱསེནྟསྶ ཨནཱཔཏྟི. ཨཛཱནནྟསྶཱཏི ཀེཝལཾ པརིམཎྜལཾ ནིཝཱསེཏུཾ ཨཛཱནནྟསྶ ཨནཱཔཏྟི. ཨཔིཙ ནིཝཱསནཝཏྟཾ ཨུགྒཧེཏབྦཾ. ཨུགྒཧིཏཝཏྟོཔི སཙེ ‘‘ཨཱརུལ༹ྷ’’ནྟི ཝཱ ‘‘ཨོརུལ༹ྷ’’ནྟི ཝཱ ན ཛཱནཱཏི, ཏསྶཱཔི ཨནཱཔཏྟིཡེཝ. གིལཱནསྶཱཏི ཡསྶ ཛངྒྷཱཡ ཝཱ པཱདེ ཝཱ ཝཎོ ཧོཏི, ཏསྶ ཨུཀྑིཔིཏྭཱ ཝཱ ཨོཏཱརེཏྭཱ ཝཱ ནིཝཱསེནྟསྶ ཨནཱཔཏྟི. པཱདོཏི ཙེཏྠ པཱདསམཱིཔཾ ཨདྷིཔྤེཏཾ. ཨཱཔདཱསཱུཏི ཝཱལཱ༹ ཝཱ ཙོརཱ ཝཱ ཨནུབནྡྷནྟི, ཨེཝརཱུཔཱསུ ཨཱཔདཱསུ ཨནཱཔཏྟི.

པརིམཎྜལཀཐཱཝཎྞནཱ.

༡༨༧༤. ཨུབྷོ ཀོཎེ སམཾ ཀཏྭཱཏི པཱརུཔནསྶ ཨེཀཾསེ ཀཏསྶ པིཊྛིཔསྶེ, ཨུདརཔསྶེ ཙ ཨོལམྦམཱནེ ཨུབྷོ ¶ ཀཎྞེ ཧཏྠིཔིཊྛེ གཎྜཱ ཝིཡ སམཾ ཀཏྭཱ. པརིམཎྜལཾ ཀཏྭཱཏི ཨེཏསྶེཝ ཨཏྠཔདཾ. སཱདརནྟི བྷཱཝནཔུཾསཀནིདྡེསོ. སཱདརཾ ཝཱ པཱརུཔིཏབྦནྟི ཡོཛནཱ, སཱདརཾ པཱརུཔནཾ ཀཏྟབྦནྟི ཨཏྠོ. ཨེཝཾ ཨཀརོནྟསྶཱཏི པཱརུཔནཝཏྟེ ཨཱདརཾ ཛནེཏྭཱ ཨེཝཾ ཨཔཱརུཔནྟསྶ.

༡༨༧༥. ‘‘པརིམཎྜལཾ ནིཝཱསེསྶཱམཱིཏི སིཀྑཱ ཀརཎཱིཡཱ’’ཏི (པཱཙི. ༥༧༦) ཝཱ ‘‘པརིམཎྜལཾ པཱརུཔིསྶཱམཱིཏི སིཀྑཱ ཀརཎཱིཡཱ’’ཏི (པཱཙི. ༥༧༧) ཝཱ ‘‘ཨནྟརགྷརེ’’ཏི ཨཝིསེསེཏྭཱ ཝུཏྟཏྟཱ ཨཱཧ ‘‘ཨཝིསེསེན ཝུཏྟ’’ནྟི. ཨིདཾ སིཀྑཱཔདདྭཡཾ ཡསྨཱ ཨཝིསེསེན ཝུཏྟཾ, ཏསྨཱ གྷརེ, ཝིཧཱརེ ཝཱ ཀཱཏབྦཾ པརིམཎྜལནྟི ཡོཛནཱ. གྷརེཏི ཨནྟརགྷརེ. ཝིཧཱརེ ཝཱཏི བུདྡྷུཔཊྛཱནཱདིཀཱལཾ ¶ སནྡྷཱཡ ཝུཏྟཾ. པརིམཎྜལཾ ཀཏྟབྦནྟི པརིམཎྜལམེཝ ནིཝཱསེཏབྦཾ པཱརུཔིཏབྦནྟི ཨཏྠོ.

དུཏིཡཾ.

༡༨༧༦. ཨུབྷོ ཀོཎེ སམཾ ཀཏྭཱཏི སམྦནྡྷོ. གཱིཝམེཝ ཙ ཨནུཝཱཏེན ཚཱདེཏྭཱཏི ཡོཛནཱ.

༡༨༧༧. ཏཐཱ ཨཀཏྭཱཏི ཡཐཱཝུཏྟཝིདྷཱནཾ ཨཀཏྭཱ. ཛཏྟཱུནིཔཱིཏི ཨུབྷོ ཨཾསཀཱུཊཱནིཔི. ཨུརམྤི ཙཱཏི ཧདཡམྤི. ཝིཝརིཏྭཱཏི ཨཔྤཊིཙྪཱདེཏྭཱ. ཡཐཱཀཱམནྟི ཨིཙྪཱནུརཱུཔཾ. གཙྪཏོཏི ཨེཏྠ ‘‘ཨནྟརགྷརེ’’ཏི སེསོ. ཨནྟརགྷརཾ ནཱམ གཱམེ ཝཱ ཧོཏུ ཝིཧཱརེ ཝཱ, པཙིཏྭཱ བྷུཉྫིཏྭཱ གིཧཱིནཾ ཝསནཊྛཱནཾ.

ཏཏིཡཾ.

༡༨༧༨-༩. ‘‘མཎིབནྡྷཏོ’’ཏི ཨིམིནཱཔི ‘‘ཧེཊྛཱ’’ཏི ཡོཛེཏབྦཾ. ཝཱསཱུཔགསྶཱཏི ཨེཏྠ ‘‘ཀཱཡཾ ཝིཝརིཏྭཱ ནིསཱིདཏོ’’ཏི ¶ སེསོ. ཝཱསཱུཔགོ ནཱམ རཏྟིཝཱསཏྠཱཡ ཨུཔགཏོ, ཨེཏེན ཝཱསཏྠཱཡ ཨནྟརགྷརཾ ཨུཔགཙྪནྟེན སུཔྤཊིཙྪནྣེནེཝ ཨུཔགནྟབྦནྟི དཱིཔིཏཾ ཧོཏི, ཨེཏེནེཝ ཝཱསཱུཔགཏསྶ སནྟིཀཾ ཨུཔགཏསྶ ཡཐཱཀཱམཾ གམནེ ན དོསོཏི ཙ ཝུཏྟམེཝ ཧོཏི. ཏེནཱཧ གཎྛིཔདེ ‘‘ཨེཀདིཝསམྤི ཝཱསཱུཔགཏསྶ སནྟིཀཾ ཡཐཱསུཁཾ གནྟུཾ ཝཊྚཏི, ཀོ པན ཝཱདོ ཙཏུཔཉྩཱཧཾ ཝཱསམདྷིཊྛཱཡ ཝསིཏབྷིཀྑཱུནཾ སནྟིཀ’’ནྟི.

ཙཏུཏྠཾ.

༡༨༨༠. སུཝིནཱིཏེནཱཏི ཧཏྠཔཱདཱནཾ ཨཀཱིལཱ༹པནེནེཝ སུཊྛུ ཝིནཱིཏེན.

པཉྩམཾ.

༡༨༨༡. གཱཐཱབནྡྷཝསེན ‘‘སཏཱིམཏཱ’’ཏི དཱིགྷོ ཀཏོ. ཨཝིཀཱརེནཱཏི ཏཾཏདཝལོཀཱསཧིཏེན ¶ . ཡུགཾ མཏྟཱ པམཱཎཾ ཨེཏསྶཱཏི ཡུགམཏྟཾ, རཐཡུགཾ ཙཏུཧཏྠཔྤམཱཎཾ, ཏཏྟཀཾ པདེསཾ. པེཀྑིནཱཏི ཨོལོཀེནྟེན. ‘‘བྷིཀྑུནཱ ཨོཀྑིཏྟཙཀྑུནཱ’’ཏི པདཙྪེདོ.

༡༨༨༢. ཨནྟརགྷརེ ཡཏྠ ཀཏྠཙིཔི ཨེཀསྨིམྤི ཋཱནེ ཋཏྭཱཏི ཡོཛནཱ. ཨེཝཾ ཝུཏྟེཔི ཏཐཱརཱུཔེ ཨནྟརཱཡེ སཏི གཙྪཏོཔི ཨོལོཀེཏུཾ ལབྦྷཏི. ཨེཀསྨིཾ པན ཋཱནེ ཋཏྭཱཏི ཨེཏྠ གཙྪནྟོཔི པརིསྶཡཱབྷཱཝཾ ཨོལོཀེཏུཾ ལབྦྷཏིཡེཝ. ‘‘ཏཐཱ གཱམེ པཱུཛ’’ནྟི གཎྛིཔདེསུ ཝུཏྟཾ. པི-སདྡོ པན-སདྡཏྠོ, ཨོལོཀེཏུཾ པན ཝཊྚཏཱིཏི ཝུཏྟཾ ཧོཏི.

༡༨༨༣. ཨོལོཀེནྟོ ཏཧཾ ཏཧནྟི ཡོ ཨནཱདརིཡཾ པཊིཙྩ ཏཾ ཏཾ དིསཱབྷཱགཾ པཱསཱདཾ ཀཱུཊཱགཱརཾ ཝཱིཐིཾ ཨོལོཀེནྟོ.

སཏྟམཾ.

༡༨༨༤. ཨེཀཏོ ¶ ཝཱཔཱིཏི ཨེཀཨཾསཀཱུཊཏོ ཝཱ. ཨུབྷཏོ ཝཱཔཱིཏི ཨུབྷཡཾསཀཱུཊཏོ ཝཱ. ཨིནྡཁཱིལཀཏོ ཨནྟོཏི གཱམདྭཱརིནྡཁཱིལཏོ ཨནྟོ, གྷརེཏི ཝུཏྟཾ ཧོཏི.

ནཝམཾ.

༡༨༨༥. ཏཐཱ ནིསིནྣཀཱལེཔཱིཏི ཨིནྡཁཱིལསྶ ཨནྟོ ནིསིནྣཀཱལེཔི. ཀུཎྜིཀཾ ནཱིཧརནྟེན ཙ ཙཱིཝརཾ ཨནུཀྑིཔིཏྭཱ དཱཏབྦཱ ཀུཎྜིཀཱཏི ཡོཛནཱ. ཀུཎྜིཀནྟི ཙ ཨུཔལཀྑཎམཏྟཾ. དྷམྨཀརཎཱདཱིསུཔི ཨེསེཝ ནཡོ.

དསམཾ.

པཋམོ ཝགྒོ.

༡༨༨༦. གནྟུཉྩེཝ ནིསཱིདིཏུཉྩ ན ཝཊྚཏཱིཏི ཡོཛནཱ. ཙ-སདྡོ ཀིརིཡཱསམུཙྩཡོ. ཧསནཱིཡསྨིཾ ཝཏྠུསྨིནྟི ཧཱསཛནཀེ ཀཱརཎེ. སིཏམཏྟནྟི མནྡཧཱསཾ.

པཋམདུཏིཡཱནི.

༡༨༨༧. ཨཔྤསདྡེནཱཏི ¶ ‘‘ཀིཏྟཱཝཏཱ ཨཔྤསདྡོ ཧོཏི? དྭཱདསཧཏྠེ གེཧེ ཨཱདིམྷི སངྒྷཏྠེརོ, མཛ྄ཛྷེ དུཏིཡཏྠེརོ, ཨནྟེ ཏཏིཡཏྠེརོཏི ཨེཝཾ ནིསིནྣེསུཡཾ སངྒྷཏྠེརོ དུཏིཡཏྠེརེན སདྡྷིཾ མནྟེཏི, དུཏིཡཏྠེརོ ཏསྶ སདྡཉྩེཝ སུཎཱཏི, ཀཐཉྩ ཝཝཏྠཔེཏི. ཏཏིཡཏྠེརོ པན སདྡམེཝ སུཎཱཏི, ཀཐཾ ན ཝཝཏྠཔེཏི. ཨེཏྟཱཝཏཱ ཨཔྤསདྡོ ཧོཏཱི’’ཏི (པཱཙི. ༥༨༨) ཝུཏྟཨཔྤསདྡཡུཏྟེན. སཙེ ¶ པན ཏཏིཡཏྠེརོ ཀཐཉྩ ཝཝཏྠཔེཏི, མཧཱསདྡོ ནཱམ ཧོཏཱིཏི.

ཏཏིཡཾ.

༡༨༨༨. ཀཱཡཔྤཙཱལཀཾ ཀཏྭཱཏི ཀཱཡཾ ཙཱལེཏྭཱ ཙཱལེཏྭཱ. ཨུཔརིཔི ཨེསེཝ ནཡོ. ཧཏྠསྶ ཝུཏྟལཀྑཎཏྟཱ ‘‘བཱཧཱུ’’ཏི མཎིབནྡྷཏོ ཡཱཝ ཨཾསཀཱུཊཱ གཧེཏབྦཱ.

༡༨༨༩. ཨུཛུཾ པགྒཧེཏྭཱཏི ཨུཛུཾ ཋཔེཏྭཱ. ཨཱསིཏབྦནྟི ནིསཱིདིཏབྦཾ. ‘‘སམེན ཨིརིཡཱཔཐེན ཏཱུ’’ཏི པདཙྪེདོ.

༡༨༩༠. ཨིཏྠམྦྷཱུཏེ ཀརཎཝཙནཾ. གམནཔཊིསཾཡུཏྟེསུ སིཀྑཱཔདེསུ གམནསྶ ཨསམྦྷཝོཏི ཨཱཧ ‘‘ནིསཱིདནེན ཡུཏྟེསཱུ’’ཏི.

པཉྩམཚཊྛསཏྟམཊྛམནཝམཱནི.

དུཏིཡོ ཝགྒོ.

༡༨༩༡. ཁམྦྷཾ ཀཏྭཱཏི ཀཊིཡཱ ཨེཀཔསྶེ ཝཱ དྭཱིསུ ཝཱ པསྶེསུ ཀཔྤརསནྡྷིཏོ ཨཱབྷུཛིཏྭཱ ཧཏྠཾ ཋཔེཏྭཱ. ཡཐཱཧ – ‘‘ཁམྦྷཀཏོ ནཱམ ཀཊིཡཾ ཧཏྠཾ ཋཔེཏྭཱ ཀཏཁམྦྷོ’’ཏི (པཱཙི. ཨཊྛ. ༥༩༦). ཨུཀྐུཊིཀཱཡ ཝཱ གཙྪཏོཏི ཡོཛནཱ. ཨུཀྐུཊིཀཱ ཝུཙྩཏི པཎྷིཡོ ཨུཀྑིཔིཏྭཱ ཨགྒཔཱདེཧི ཝཱ ཨགྒཔཱདེ ཨུཀྑིཔིཏྭཱ པཎྷཱིཧི ཨེཝ ཝཱ བྷཱུམིཾ ཕུསནྟསྶ གམནཾ.

༡༨༩༢. དུསྶཔལླཏྠིཀཱཡཱཏི ཨཱཡོགཔལླཏྠིཀཱཡ. ཨནྟརགྷརེ ནིསཱིདནྟསྶ ཏསྶ དུཀྐཊཾ ཧོཏཱིཏི ཡོཛནཱ.

༡༨༩༣. དུཏིཡེ ¶ ཙཱཏི ‘‘ན ཁམྦྷཀཏོ ཨནྟརགྷརེ ནིསཱིདིསྶཱམཱི’’ཏི (པཱཙི. ༥༩༧) སིཀྑཱཔདེ ཙ. ཙཏུཏྠེ ཙཱཏི ‘‘ན ཨོགུཎྛིཏོ ¶ ཨནྟརགྷརེ ནིསཱིདིསྶཱམཱི’’ཏི (པཱཙི. ༥༩༩) སིཀྑཱཔདེ ཙ. ཚཊྛེཏི ‘‘ན པལླཏྠིཀཱཡ ཨནྟརགྷརེ’’ཨིཙྩཱདི (པཱཙི. ༦༠༡) སིཀྑཱཔདེ ཙ. ཨིཏི ཨེཝཾ སཱརུཔྤཱ སམཎཱཙཱརཱནུཙྪཝིཀཱ ཚབྦཱིསཏི སིཀྑཱཔདཱནི པཀཱསིཏཱནི.

པཋམདུཏིཡཏཏིཡཙཏུཏྠཔཉྩམཚཊྛཱནི.

༡༨༩༤. ཝིཉྙུནཱ བྷིཀྑུནཱ སཀྐཙྩཾ སཏིཡུཏྟེན, པཏྟསཉྙིནཱ ཙ ཧུཏྭཱ སམསཱུཔོཝ པིཎྜཔཱཏོ གཧེཏབྦོཏི ཡོཛནཱ. ཨེཝཾ ཨེཏཱཡ གཱཐཱཡ སིཀྑཱཔདཏྟཡཾ སངྒཧིཏཾ. སཀྐཙྩནྟི སཏིཾ ཨུཔཊྛཔེཏྭཱ. ‘‘སཏིཡུཏྟེནཱ’’ཏི ཨིདཾ ‘‘སཀྐཙྩ’’ནྟི ཨེཏསྶ ཨཏྠཔདཾ. ‘‘སཏིཾ ཨུཔཊྛཔེཏྭཱ’’ཏི (པཱཙི. ཨཊྛ. ༦༠༢) ཧི ཨཊྛཀཐཱཡཾ ཝུཏྟཾ. པཏྟེ སཉྙཱ པཏྟསཉྙཱ, སཱ ཨསྶ ཨཏྠཱིཏི པཏྟསཉྙཱི, ཨནཉྙཝིཧིཏེན ཨཏྟནོ བྷཱཛནེཡེཝ ཨུཔནིབདྡྷསཉྙིནཱཏི ཨཏྠོ.

༡༨༩༥. བྷཏྟཙཏུབྦྷཱགོཏི བྷཏྟསྶ ཙཏུབྦྷཱགཔྤམཱཎོ. ཏཏོ ཨདྷིཀཾ གཎྷཏོ དུཀྐཊཾ.

༡༨༩༦. ‘‘རསརསེ’’ཏི ཝཏྟབྦེ ‘‘རསེརསེ’’ཏི གཱཐཱབནྡྷཝསེན ཝུཏྟཾ. དྭེ སཱུཔེ ཋཔེཏྭཱ ཨཝསེསཱནི ཨོལོཎིསཱཀསཱུཔེཡྻམཙྪརསམཾསརསཱདཱིནི རསརསཱཏི ཝེདིཏབྦཱནི. ཨེཏྠ ཙ ‘‘ཨོལོཎཱིཏི དདྷིཀཏཾ གོརས’’ནྟི ཀེཙི. ‘‘ཨེཀཱ བྱཉྫནཝིཀཏཱི’’ཏི ཨཔརེ. ‘‘ཡོ ཀོཙི སུདྡྷོ ཀཉྫིཀཏཀྐཱདིརསོ’’ཏི ཨཉྙེ. སཱཀསཱུཔེཡྻགྒཧཎེན ཡཱ ཀཱཙི སཱུཔེཡྻསཱཀེཧི ཀཏཱ བྱཉྫནཝིཀཏི ཝུཏྟཱ. མཾསརསཱདཱིནཱིཏི ཨཱདི-སདྡེན ཨཝསེསཱ སབྦཱཔི བྱཉྫནཝིཀཏི སངྒཧིཏཱཏི དཊྛབྦཾ. ཉཱཏཀཱདཱིནནྟི ཨེཏྠ ‘‘སནྟཀཾ གཎྷནྟསྶཱ’’ཏི སེསོ. ཨཉྙཏྠཱཡཱཏི ཨེཏྠ ‘‘ཀཏཾ གཎྷནྟསྶཱ’’ཏི སེསོ. དྷནེནཱཏི ཨེཏྠ ‘‘ཨཏྟནོ’’ཏི ཙ ¶ ‘‘ཀཱིཏ’’ནྟི ཙ ‘‘གཎྷནྟསྶཱ’’ཏི ཙ སེསོ. ཉཱཏཀཱདཱིནཾ སནྟཀཾ གཎྷནྟསྶ, ཨཉྙཏྠཱཡ ཀཏཾ གཎྷནྟསྶ, ཨཏྟནོ དྷནེན ཀཱིཏཾ གཎྷནྟསྶ ཨནཱཔཏྟཱིཏི ཨཏྠོ.

སཏྟམཊྛམནཝམཱནི.

༡༨༩༧. ཨདྷིཊྛཱནཱུཔགསྶ ¶ པཏྟསྶ མུཁཝཊྚིཡཱ ཨནྟོལེཁཱཔམཱཎེན པཱུརིཏོཝ གཧེཏབྦོཏི ཡོཛནཱ.

༡༨༩༨. ཨནཱཔཏྟིཝིསཡཾ དསྶེཏྭཱ ཨཱཔཏྟིཝིསཡཾ དསྶེཏུམཱཧ ‘‘ཏཏྠཱ’’ཏིཨཱདི. ཏཏྠཱཏི ཨདྷིཊྛཱནཱུཔགེ པཏྟེ. ཐཱུཔཱིཀཏཾ ཀཏྭཱཏི ཨེཏྠ ‘‘དིཡྻམཱན’’ནྟི སེསོ. ཡཐཱཝུཏྟལེཁཱཏིཀྐམོ ཡཐཱ ཧོཏི, ཨེཝཾ ཐཱུཔཱིཀཏཾ དིཡྻམཱནཾ གཎྷཏོ ཨཱཔཏྟི དུཀྐཊནྟི སམྦནྡྷོ. ཨིམིནཱ པཋམཾ ཐཱུཔཱིཀཏསྶ ཨདྷིཊྛཱནཱུཔགཔཏྟསྶ པཙྪཱ པཊིགྒཧཎཉྩ པཋམཔཊིགྒཧིཏཔཏྟེ པཙྪཱ བྷོཛནསྶ ཐཱུཔཱིཀཏསྶ པཊིགྒཧཎཉྩ ནིཝཱརིཏནྟི ཝེདིཏབྦཾ.

༡༨༩༩. ཀཱལིཀཏྟཡམེཝ ཙ ཐཱུཔཱིཀཏཾ ཝཊྚཏེཝཱཏི ཡོཛནཱ. སེསེཏི ཨནདྷིཊྛཱནཱུཔགེ པཏྟེ. སབྦནྟི ཙཏུབྦིདྷཾ ཀཱལིཀཾ ཐཱུཔཱིཀཏཾ ཝཊྚཏཱིཏི ཡོཛནཱ.

༡༩༠༠. པེསེཏཱིཏི ཨེཏྠ ‘‘བྷིཀྑཱུ’’ཏི སེསོ. བྷིཀྑུ བྷིཀྑཱུནཾ ཡདི པེསེཏཱིཏི ཡོཛནཱ. ‘‘ཝིཧཱརཾ པེསེཏུཾ ཝཊྚཏཱི’’ཏི (པཱཙི. ཨཊྛ. ༦༠༥) ཨཊྛཀཐཱཡ ཨདྷིཔྤཱཡཾ དསྶེཏུཾ ‘‘བྷིཀྑཱུན’’ནྟི ཝཙནེན པཊིགྒཧཎཾ ཨཝིཛཧིཏྭཱ བྷིཀྑུནཱ ཨེཝ པེསིཏཾ གཎྷནྟཱནཾ བྷིཀྑཱུནཾ ཨནཱཔཏྟཱིཏི དཱིཔིཏཾ ཧོཏི. ཨཉྙཐཱ ‘‘པཱུརེཏུཾ ཝཊྚཏཱི’’ཏི ཨེཏྟཀམེཝ ཝཏྟབྦནྟི ཝིཉྙཱཡཏི.

༡༩༠༡. པཀྑིཔྤམཱནནྟི མུཁཝཊྚིཏོ ཨུཙྩཾ ཀཏྭཱ མཛ྄ཛྷེ པཀྑིཔིཡམཱནཾ. ཕལཱདིཀནྟི ཨཱདི-སདྡེན ཨོདནཱདིམྤི སངྒཎྷཱཏི. ཧེཊྛཱ ¶ ཨོརོཧཏཱིཏི སམནྟཱ ཨོཀཱསསམྦྷཝཏོ ཙཱལིཡམཱནཾ མུཁཝཊྚིཔྤམཱཎཏོ ཧེཊྛཱ བྷསྶཏི.

༡༩༠༢. ཏཀྐོལཀཱདཱིནནྟི ཨེཏྠ ཨཱདི-སདྡེན པཱུགཕལཱདཱིནཾ སངྒཧོ. ཋཔེཏྭཱཏི བྷཏྟམཏྠཀེ ནིཀྑིཔིཏྭཱ. ཝཊཾསཀནྟི ཨཝཊཾསཀཾ.

༡༩༠༣. པཱུཝསྶཱཏི ཝིཀཱརསམྦནྡྷེ སཱམིཝཙནཾ, པཱུཝཝཊཾསཀནྟི ཝུཏྟཾ ཧོཏི. པཱུཝསྶ ཡཱཝཀཱལིཀཏྟཱ ཨཱཧ ‘‘ཨིདཾ ཐཱུཔཱིཀཏཾ སིཡཱ’’ཏི.

༡༩༠༤. པཎྞཱནཾ ཝིསུཾ བྷཱཛནཏྟཱ ཨཱཧ ‘‘ཝཊྚཏཱི’’ཏི.

༡༩༠༥. ཨསྶཱཏི ¶ བྷིཀྑུསྶ. ཏཾ ཏུ སབྦནྟི ‘‘ཐཱུཔཱིཀཏཏྟཱ ན ཝཊྚཏཱི’’ཏི ཝུཏྟཾ ཏཾ པན སབྦཾ. གཧིཏཾ སུགཧིཏནྟི ཝིརཱདྷེཏྭཱ པཊིགྒཧིཏཾ ཙེ, སུཔྤཊིགྒཧིཏཾ.

དསམཾ.

ཏཏིཡོ ཝགྒོ.

༡༩༠༦. ‘‘ཨུཔརི ཨོདྷི’’ནྟི པདཙྪེདོ. ཨུཔརཱིཏི བྷཏྟསྶ ཨུཔརི. ཨོདྷིནྟི པརིཙྪེདཾ. པཊིཔཱཊིཡཱཏི ཨཏྟནོ དིསཱཡ པརིཡནྟཏོ པཊྛཱཡ ཨནུཀྐམེན.

༡༩༠༧. ཨཉྙེསནྟི ཨེཏྠ ‘‘དེནྟོ’’ཏི སེསོ. ཨཏྟནོ བྷཏྟཾ ཨཉྙེསཾ དེནྟོ ཨཉྙསྶ བྷཱཛནེ ཨཱཀིརཾ ཨཱཀིརནྟོ པན པཊིཔཱཊིཾ ཝིནཱཔི ཏཧིཾ ཏཧིཾ ཨོམསཏི ཙེ, ནཏྠི དོསོཏི ཡོཛནཱ. ཨུཏྟརིབྷངྒཀཾ ཏཐཱ ཨཱཀིརནྟོ ཏཏྠ ཏཏྠ ཨོམསཏི, ནཏྠི དོསོཏི ཡོཛནཱ ¶ . བྷུཉྫནཏྠཱཡ གཎྷནྟོཔི ཙེཏྠ ཝཏྟབྦོ. ཨུཏྟརིབྷངྒཾ ནཱམ བྱཉྫནཾ.

ཏཏིཡཾ.

༡༩༠༨. མཏྠཀཾ ཨོམདྡིཏྭཱ པརིབྷུཉྫཏོ དོསོཏི ཡོཛནཱ. ‘‘ཐཱུཔཀཏོཏི མཏྠཀཏོ, ཝེམཛ྄ཛྷཏོ’’ཏི (པཱཙི. ཨཊྛ. ༦༡༠) ཨཊྛཀཐཱཝཙནཏོ མཏྠཀནྟི ཨེཏྠ བྷཏྟམཏྠཀམཱཧ. ཨོམདྡིཏྭཱཏི ཧཏྠེན བྷཏྟཾ ཨཝམདྡིཏྭཱ.

༡༩༠༩. སེསཀེ པརིཏྟེཔི ཙཱཏི ཨཝསིཊྛེ ཨཔྤཀེཔི ཙ. སཾཀཌྜྷིཏྭཱནཱཏི ཏསྨིཾ ཏསྨིཾ ཋཱནེ ཋིཏཾ སཾཧརིཏྭཱ. ཨེཀཏོ པན མདྡིཏྭཱ བྷུཉྫཏོ ཨནཱཔཏྟཱིཏི ཡོཛནཱ.

པཉྩམཾ.

༡༩༡༠. བྷིཡྻོཀམྱཏཱཧེཏཱུཏི པུན གཎྷིཏུཀཱམཏཱཧེཏུ. སཱུཔཾ ཝཱཏི མུགྒཱདིསཱུཔཾ ཝཱ. བྱཉྫནཾ ཝཱཏི ཨུཏྟརིབྷངྒཾ ཝཱ.

ཚཊྛཾ.

༡༩༡༡. ཝིཉྙཏྟིཡནྟི ¶ སཱུཔོདནཝིཉྙཏྟིཡཾ. ‘‘ཉཱཏཀཱནཾ ཝཱ པཝཱརིཏཱནཾ ཝཱ ཨཉྙསྶ ཨཏྠཱཡ ཝཱ ཨཏྟནོ དྷནེན ཝཱ’’ཏི ཨིདཾ ཨནཱཔཏྟིཡཾ ཨདྷིཀཾ. གིལཱནོཔི ཧུཏྭཱ པརེསཾ པཏྟཾ ཨུཛ྄ཛྷཱནསཉྙཱཡ ཨོལོཀེནྟསྶ ཨཱཔཏྟི ཧོཏཱིཏི ཨཱཧ ‘‘ཨུཛ྄ཛྷཱནེ གིལཱནོཔི ན མུཙྩཏཱི’’ཏི. ཨུཛ྄ཛྷཱནེཏི ནིམིཏྟཏྠེ བྷུམྨཾ.

༡༩༡༢. དསྶཱམཱིཏི ཨིམསྶ བྷཏྟཾ ཨོལོཀེཏྭཱ ‘‘ཡཾ ཏཏྠ ནཏྠི, ཏཾ དསྶཱམཱི’’ཏི ཝཱ ‘‘དཱཔེསྶཱམཱི’’ཏི ཝཱ. ཨཝམཉྙིཏྭཱ ཨུཛ྄ཛྷཱཡནཙིཏྟཾ ཨུཛ྄ཛྷཱནཾ, ཨུཛ྄ཛྷཱནེ སཉྙཱ ཨུཛ྄ཛྷཱནསཉྙཱ, སཱ ¶ ཨསྶ ཨཏྠཱིཏི ཝིགྒཧོ. ནཨུཛ྄ཛྷཱནསཉྙིནོ ཙ ཨནཱཔཏྟཱིཏི ཉཱཏབྦནྟི ཡོཛནཱ.

སཏྟམཊྛམཱནི.

༡༩༡༣. ‘‘ཏེསཾ མཛ྄ཛྷཔྤམཱཎེནཱ’’ཏི ཨིམིནཱ ཨསཱརུཔྤཝསེན ཁུདྡཀཔཊིཀྑེཔོ ཀཏོཏི ཝེདིཏབྦོ. ‘‘ནཱཏིམཧནྟ’’ནྟི ཙ ཨཏིམཧནྟསྶེཝ པཊིཀྑིཏྟཏྟཱ ཁུདྡཀེ ཨཱཔཏྟི ན དིསྶཏཱིཏི. ཀབལོ༹ཏི ཨཱལོཔོ.

༡༩༡༤. མཱུལཁཱདནཱིཡཱདིཀེ སབྦཏྠ ཁཛྫཀེ པནཱཏི ཡོཛནཱ. ཕལཱཕལེཏི ཁུདྡཀེ, མཧནྟེ ཙ ཕལེ.

ནཝམཾ.

༡༩༡༥. དསམེ ནཏྠི ཀིཉྩི ཝཏྟབྦཾ.

དསམཾ.

ཙཏུཏྠོ ཝགྒོ.

༡༩༡༦. ‘‘ཨནཱཧཊེ’’ཏི ཨེཏསྶ ཨཏྠཔདཾ ‘‘མུཁདྭཱརཾ ཨཔྤཏྟེ’’ཏི. ཡཐཱཧ ‘‘ཨནཱཧཊེཏི ཨནཱཧརིཏེ, མུཁདྭཱརཾ ཨསམྤཱཔིཏེཏི ཨཏྠོ’’ཏི (པཱཙི. ཨཊྛ. ༦༡༧). ‘‘མུཁདྭཱརཾ ཝིཝརནྟསྶཱ’’ཏི ཨེཏྟཀེ ཝུཏྟེ མུཁདྭཱར-སདྡསྶ སམྦནྡྷིསདྡཏྟཱ ཀསྶཱཏི ཨཔེཀྑཱཡ ‘‘མུཁདྭཱརཾ ཝིཝརིསྶཱམཱི’’ཏི ¶ ཨཏྟནོཔདེཀཝཙནེན བྱཉྫིཏམེཝཏྠཾ པཀཱསེཏུཾ ཨཏྟནོ-གཧཎཾ ཀཏནྟི ཝེདིཏབྦཾ. ཙ-སདྡོ ཨེཝཀཱརཏྠོ, ཨཔྤཏྟེ ཝཱཏི ཡོཛེཏབྦོ, ཨསམྤཏྟེཡེཝཱཏི ཨཏྠོ.

པཋམཾ.

༡༩༡༧. སཀལཾ ¶ ཧཏྠནྟི ཨེཏྠ ཧཏྠ-སདྡོ ཏདེཀདེསེསུ ཨངྒུལཱིསུ དཊྛབྦོ. ‘‘ཧཏྠམུདྡཱ’’ཏིཨཱདཱིསུ ཝིཡ སམུདཱཡེ པཝཏྟཝོཧཱརསྶ ཨཝཡཝེཔི པཝཏྟནཏོ ཨེཀངྒུལིམྤི མུཁེ པཀྑིཔིཏུཾ ན ཝཊྚཏི.

༡༩༡༨. ཨསྶཱཏི བྷིཀྑུནོ. བྱཱཧརནྟསྶཱཏི ཀཐེནྟསྶ.

དུཏིཡཏཏིཡཱནི.

༡༩༢༠. པིཎྜུཀྑེཔཀནྟི པིཎྜཾ ཨུཀྑིཔིཏྭཱ ཨུཀྑིཔིཏྭཱ. ཨིདྷཱཔི ཁཛྫཀཕལཱཕལེསུ ཨནཱཔཏྟི. ཀབལ༹ཙྪེདཀམྤི ཝཱཏི ཀབལ༹ཾ ཚིནྡིཏྭཱ. ཨིདྷ ཁཛྫཀཕལཱཕལེཧི སདྡྷིཾ ཨུཏྟརིབྷངྒེཔི ཨནཱཔཏྟི. གཎྜེ ཀཏྭཱཏི ཨེཏྠ ཕལཱཕལམཏྟེཡེཝ ཨནཱཔཏྟི.

ཙཏུཏྠཔཉྩམཚཊྛཱནི.

༡༩༢༡-༢. ཧཏྠཾ ནིདྡྷུནིཏྭཱནཱཏི ཧཏྠཾ ནིདྡྷུནིཏྭཱ བྷཏྟཾ བྷུཉྫཏོཏི ཙ སམྦནྡྷོ. སིཏྠཱཝཀཱརཀནྟི སིཏྠཱནི ཨཝཀིརིཏྭཱ ཨཝཀིརིཏྭཱ. ཛིཝ྄ཧཱནིཙྪཱརཀཾ ཝཱཔཱིཏི ཛིཝ྄ཧཾ ནིཙྪཱརེཏྭཱ ནིཙྪཱརེཏྭཱ. ཙཔུ ཙཔཱུཏི ཝཱཏི ‘‘ཙཔུ ཙཔཱུ’’ཏི ཨེཝཾ སདྡཾ ཀཏྭཱ. སཏྟམེཏི ‘‘ན ཧཏྠནིདྡྷུནཀ’’ནྟི སིཀྑཱཔདེ. ཨཊྛམེཏི ‘‘ན སིཏྠཱཝཀཱརཀ’’ནྟི སིཀྑཱཔདེ. ཀཙཝརུཛ྄ཛྷནེཏི ཀཙཝརཱཔནཡནེ.

སཏྟམཊྛམནཝམདསམཱནི.

པཉྩམོ ཝགྒོ.

༡༩༢༣. ‘‘སུརུ ¶ སུརཱུ’’ཏི ཨེཝཾ སདྡཾ ཀཏྭཱ ན བྷོཏྟབྦནྟི ཡོཛནཱ. ཧཏྠནིལླེཧཀཾ ཝཱཔཱིཏི ཧཏྠཾ ནིལླེཧིཏྭཱ ནིལླེཧིཏྭཱ.

༡༩༢༤. ཕཱཎིཏཾ ¶ , གྷནཡཱགུཾ ཝཱ ཨངྒུལཱིཧི གཧེཏྭཱ ཨངྒུལིཡོ མུཁེ པཝེསེཏྭཱཔི ཏཾ བྷོཏྟུཾ ཝཊྚཏཱིཏི ཡོཛནཱ.

༡༩༢༥. ཨེཀཱཡ ཨངྒུལིཀཱཡཔི པཏྟོ ན ལེཧིཏབྦོཝ. ཛིཝ྄ཧཱཡ ཨེཀཨོཊྛོཔི ན ནིལླེཧིཏབྦཀོཏི ཡོཛནཱ. བཧི ཨོཊྛཉྩ ཛིཝ྄ཧཱཡ ན ལེཧིཏབྦཾ. ཨོཊྛེ ལགྒཾ སིཏྠཱདིཾ ཡཾ ཀིཉྩི ཨུབྷོཧི ཨོཊྛམཾསེཧིཡེཝ གཧེཏྭཱ ཨནྟོ ཀཱཏུཾ ཝཊྚཏི.

པཋམདུཏིཡཏཏིཡཙཏུཏྠཱནི.

༡༩༢༦-༨. ན ཙ གཧེཏབྦཾ, པཊིཀྐཱུལཝསེན པཊིཀྑིཏྟནྟི ཡོཛནཱ. ཧི-ཨིཏི ‘‘ཡསྨཱ’’ཏི ཨེཏསྶ ཨཏྠེ, ཏེནེཝ ཝཀྑཏི ‘‘ཏསྨཱ’’ཏི. ‘‘པཱནཱིཡཐཱལཀ’’ནྟི ཨིདཾ ཨུཔལཀྑཎམཏྟཾ སངྑཱདཱིནམྤི ཏཐཱ ནགཧེཏབྦཏྟཱ. སརཱཝཾ ཝཱཏི ཏཊྚཀཾ ཝཱ.

ཨནཱམིསེན ཧཏྠེནཱཏི ཨཱམིསརཧིཏེན ཧཏྠེཀདེསེན. ཡཐཱཧ ‘‘སཙེ པན ཧཏྠསྶ

ཨེཀདེསོ ཨཱམིསམཀྑིཏོ ན ཧོཏི, ཏེན པདེསེན གཧེཏུཾ ཝཊྚཏཱི’’ཏི (པཱཙི. ཨཊྛ. ༦༣༡). ཨཱམིསམཀྑིཏེནེཝ ཧཏྠེན ‘‘དྷོཝིསྶཱམཱི’’ཏི ཝཱ ‘‘དྷོཝཱཔེསྶཱམཱི’’ཏི ཝཱ གཎྷནྟསྶ པན ཨནཱཔཏྟི.

པཉྩམཾ.

༡༩༢༩. ཨུདྡྷརིཏྭཱཏི སསིཏྠཀཱ པཏྟདྷོཝནཱ སིཏྠཀཱནི ཨུདྡྷརིཏྭཱ ཏཾ པཏྟདྷོཝནོདཀཾ གྷརཱ བཧི ཨནྟརགྷརེ ཚཌྜེནྟསྶ ཨནཱཔཏྟི. བྷིནྡིཏྭཱཏི སསིཏྠཀེ པཏྟདྷོཝནེ སིཏྠཀཱནི མདྡིཏྭཱ ཨུདཀེན སམྦྷིནྡིཏྭཱ ཨུདཀགཏིཀཱནེཝ ཀཏྭཱ ཏཾ ཨུདཀཾ གྷརཱ བཧི ཨནྟརགྷརེ ཚཌྜེནྟསྶ ཨནཱཔཏྟི. གཧེཏྭཱཏི སསིཏྠཀཾ པཏྟདྷོཝནོདཀཾ གཧེཏྭཱ པཊིགྒཧེ ཚཌྜེནྟསྶ ཨནཱཔཏྟི. སསིཏྠཀཾ པཏྟདྷོཝནོདཀཾ གྷརཱ ¶ བཧི ནཱིཧརིཏྭཱ ཨནྟརགྷརེ ཚཌྜེནྟསྶ ཨནཱཔཏྟཱིཏི ཨཛ྄ཛྷཱཧཱརཡོཛནཱ ¶ ཝེདིཏབྦཱ. ཨེཏྠ པཊིགྒཧོ ནཱམ ཁེལ༹མལླཱདིཀོ ཨུཙྪིཊྛཧཏྠདྷོཝནབྷཱཛནཝིསེསོ.

ཚཊྛཾ.

༡༩༣༠. ཚཏྟཾ ཡཾ ཀིཉྩཱིཏི ‘‘ཚཏྟཾ ནཱམ ཏཱིཎི ཚཏྟཱནི སེཏཙྪཏྟཾ ཀིལཉྫཙྪཏྟཾ པཎྞཙྪཏྟཾ མཎྜལབདྡྷཾ སལཱཀབདྡྷ’’ནྟི (པཱཙི. ༦༣༤) ཝུཏྟེསུ ཏཱིསུ ཚཏྟེསུ ཨཉྙཏརཾ. ཨེཏྠ ཙ སེཏཙྪཏྟནྟི ཝཏྠཔལིགུཎྛིཏཾ པཎྜརཙྪཏྟཾ. ཀིལཉྫཙྪཏྟནྟི ཝིལཱིཝཙྪཏྟཾ. པཎྞཙྪཏྟནྟི ཏཱལཔཎྞཱདཱིཧི ཡེཧི ཀེཧིཙི ཀཏཾ. ‘‘མཎྜལབདྡྷཾ སལཱཀབདྡྷ’’ནྟི ཨིདཾ པན ཏིཎྞམྤི ཚཏྟཱནཾ པཉྫརདསྶནཏྠཾ ཝུཏྟཾ. ཏཱནི ཧི མཎྜལབདྡྷཱནི ཙེཝ ཧོནྟི སལཱཀབདྡྷཱནི ཙ. ‘‘ཡཾ ཀིཉྩཱི’’ཏི ཨནཝསེསཔརིགྒཧཝཙནེན ‘‘ཡམྤི ཙ ཏཏྠཛཱཏདཎྜེན ཀཏཾ ཨེཀཔཎྞཙྪཏྟཾ ཧོཏི, ཏམྤི ཚཏྟམེཝཱ’’ཏི (པཱཙི. ཨཊྛ. ༦༣༤) ཨཊྛཀཐཱཡ ཝུཏྟཾ ཚཏྟཝིསེསཾ གཎྷཱཏི. ཧཏྠེནཱཏི ཨེཏྠ ‘‘ཨམུཉྩིཏྭཱ’’ཏི སེསོ. སརཱིརཱཝཡཝེནཱཏི ཨེཏྠ ‘‘གཧེཏྭཱ’’ཏི སེསོ. ཝཱ-སདྡོ ཨཔི-སདྡཏྠོ. ཨཾསཀཱུཊཱདིསརཱིརཱཝཡཝེན གཧེཏྭཱཔི ཧཏྠེན ཨམུཉྩིཏྭཱ དྷཱརེནྟསྶཱཏི ཨཏྠོ.

སཙེ པནསྶ ཨཉྙོ ཚཏྟཾ དྷཱརེཏི, ཚཏྟཔཱདུཀཱཡ ཝཱ ཋིཏཾ ཧོཏི, པསྶེ ཝཱ ཋིཏཾ ཧོཏི,

ཧཏྠཏོ ཨཔགཏམཏྟེ ཚཏྟཔཱཎི ནཱམ ན ཧོཏི, ཏསྶ དྷམྨཾ དེསེཏུཾ ཝཊྚཏི. ‘‘ན ཚཏྟཔཱཎིསྶ ཨགིལཱནསྶཱ’’ཏི ཝཙནཏོ, ཨིདྷ ‘‘སབྦཏྠ ཨགིལཱནསྶཱ’’ཏི ཝཀྑམཱནཏྟཱ ཙ ཨེཏྠ ‘‘ཨགིལཱནསྶཱ’’ཏི ལབྦྷཏི. དྷམྨཔརིཙྪེདོ ཙེཏྠ པདསོདྷམྨེ ཝུཏྟནཡེནེཝ ཝེདིཏབྦོ. ཨེཝམུཔརིཔི.

སཏྟམཾ.

༡༩༣༡. དཎྜཔཱཎིམྷཱིཏི ¶ ཨེཏྠ དཎྜོ པཱཎིམྷི ཨསྶཱཏི ཝིགྒཧོ. ཀིཏྟཀཔྤམཱཎོ དཎྜོཏི ཨཱཧ ‘‘ཙཏུཧཏྠཔྤམཱཎོ’’ཏིཨཱདི. མཛ྄ཛྷིམཧཏྠཏོཏི པམཱཎམཛ྄ཛྷིམསྶ པུརིསསྶ ཧཏྠཏོ, ཡོ ‘‘ཝཌྜྷཀིཧཏྠོ’’ཏི ཝུཙྩཏི.

ཨཊྛམཾ.

༡༩༣༢. སཏྠཔཱཎིསྶཱཏི ¶ ཨེཏྠཱཔི ཝིགྒཧོ ཝུཏྟནཡོཝ. ཝཀྑམཱནཾ སཀལཾ དྷནུཝིཀཏིཾ, སརཝིཀཏིཉྩ ཋཔེཏྭཱ ཨཝསེསཾ ཁགྒཱདི སཏྠཾ ནཱམ. ཁགྒཾ སནྣཧིཏྭཱ ཋིཏོཔི སཏྠཔཱཎི ནུ ཁོཏི ཨཱསངྐཱཡ ནིཝཏྟནཏྠམཱཧ ‘‘སཏྠཔཱཎཱི’’ཏིཨཱདི. ‘‘ན ཧོཏི ཨསི’’ནྟི པདཙྪེདོ.

ནཝམཾ.

༡༩༣༣-༥. སརེན སདྡྷིཾ དྷནུཾ ཝཱ སུདྡྷདྷནུཾ ཝཱ སུདྡྷསརཾ ཝཱ སཛིཡཾ དྷནུདཎྜཾ ཝཱ ནིཛིཡཾ དྷནུདཎྜཾ ཝཱ གཧེཏྭཱ ཋིཏསྶཱཔི ཝཱ ནིསིནྣསྶཱཔི ཝཱ ནིཔནྣསྶཱཔི ཝཱ སཙེ ཡོ ཏཐཱ པདསོདྷམྨེ ཝུཏྟལཀྑཎཾ སདྡྷམྨཾ དེསེཏི, ཏསྶ ཨཱཔཏྟི དུཀྐཊཾ ཧོཏཱིཏི ཡོཛནཱ. སཙེ པནསྶ དྷནུ ཁནྡྷེ པཊིམུཀྐཾ ཧོཏི, ཡཱཝ ན གཎྷཱཏི, ཏཱཝ ཝཊྚཏི. ཛིཡཱཡ སཧ ཝཏྟཏཱིཏི སཛིཡཾ.

དསམཾ.

ཚཊྛོ ཝགྒོ.

༡༩༣༦. པཱདུཀཱརུལ༹ྷཀསྶཱཏི པཱདུཀཾ ཨཱརུལ༹ྷོ པཱདུཀཱརུལ༹ྷོ, སོཡེཝ པཱདུཀཱརུལ༹ྷཀོ, ཏསྶ. ཀཐཾ ཨཱརུལ༹ྷསྶཱཏི ཨཱཧ ‘‘ཨཀྐམིཏྭཱ’’ཏིཨཱདི. ཨཀྐམིཏྭཱ ཋིཏསྶཱཏི ¶ ཚཏྟདཎྜཀེ ཨངྒུལནྟརཾ ཨཔྤཝེསེཏྭཱ ཀེཝལཾ པཱདུཀཾ ཨཀྐམིཏྭཱ ཋིཏསྶ. པཊིམུཀྐསྶ ཝཱཏི པཊིམུཉྩིཏྭཱ ཋིཏསྶ. ཨེཏཾ དྭཡམྤི ‘‘པཱདུཀཱརུལ༹ྷཀསྶཱ’’ཏི ཨེཏསྶ ཨཏྠཔདཾ. ཡཐཱཧ ‘‘ན པཱདུཀཱརུལ༹ྷསྶ ཨགིལཱནསྶ དྷམྨོ དེསེཏབྦོ. ཡོ ཨནཱདརིཡཾ པཊིཙྩ ཨཀྐནྟསྶ ཝཱ པཊིམུཀྐསྶ ཝཱ ཨོམུཀྐསྶ ཝཱ ཨགིལཱནསྶ དྷམྨཾ དེསེཏི, ཨཱཔཏྟི དུཀྐཊསྶཱ’’ཏི (པཱཙི. ༦༣༨).

པཋམཾ.

༡༩༣༧-༤༠. ཨུཔཱཧནགཏསྶཱཔཱིཏི ཨཀྐནྟཱདིཨཱཀཱརེན ཨུཔཱཧནཱརུལ༹ྷསྶ ཙ. ཡཐཱཧ ‘‘ཨཀྐནྟསྶ ཝཱ པཊིམུཀྐསྶ ཝཱ’’ཏི. སབྦཏྠཱཏི ཚཏྟཔཱཎིཨཱདཱིསུ སབྦསིཀྑཱཔདེསུ. ཨགིལཱནསྶཱཏི ཨིདཾ ཡོཛེཏབྦནྟི སེསོ. ཡཱནེ ཝཱ གཏསྶ ཨགིལཱནསྶ དྷམྨཾ དེསེཏི, དུཀྐཊནྟི ཡོཛནཱ. ཏཏྠ ཡཱནེ ཝཱ གཏསྶཱཏི སཙེ དྭཱིཧི ཛནེཧི ཧཏྠསངྒྷཱཏེན གཧིཏོ, སཱཊཀེ ¶ ཝཱ ཋཔེཏྭཱ ཝཾསེན ཝཡ྄ཧཏི, ཨཡུཏྟེ ཝཱ ཝཡ྄ཧཱདིཀེ ཡཱནེ, ཝིསངྑརིཏྭཱ ཝཱ ཋཔིཏེ ཙཀྐམཏྟེཔི ནིསིནྣོ ཧོཏི, ཡཱནགཏོཏྭེཝ སངྑྱཾ གཙྪཏི.

སཡནེཔི ཝཱ ཨནྟམསོ ཀཊསཱརཀེ ཝཱ ཚམཱཡ ཝཱ ནིཔནྣསྶཱཔི ཨགིལཱནསྶཱཏི ཡོཛནཱ. ཡཐཱཧ ‘‘སཡནགཏསྶཱཏི ཨནྟམསོ ཀཊསཱརཀེཔི པཀཏིབྷཱུམིཡམྤི ནིཔནྣསྶཱ’’ཏི (པཱཙི. ཨཊྛ. ༦༤༡). ཨུཙྩེ པཱིཋེ ཝཱ ཨུཙྩེ མཉྩེཔི ཝཱ ནིསིནྣེན, ཋིཏེན ཝཱ ནིཔནྣསྶ དེསེཏུཾ ན ཝཊྚཏཱིཏི ཡོཛནཱ. ‘‘ཋཏྭཱ’’ཏི ཨིམིནཱ ‘‘ནིསཱིདིཏྭཱ’’ཏི ཨིདཉྩ སངྒཧིཏམེཝ. སཡནེསུ གཏསྶ ཙ དེསེནྟེན སཡནེསུ གཏེནཱཔི སམཱནེ ཝཱཔི ཨུཙྩེ ཝཱ ནིཔནྣེནེཝ ཝཊྚཏཱིཏི ཡོཛནཱ.

༡༩༤༡. ‘‘ཏཐེཝ ¶ ཙཱ’’ཏི ཨིམིནཱ ‘‘ཝཊྚཏཱི’’ཏི ཨིདཾ གཧིཏཾ.

དུཏིཡཏཏིཡཙཏུཏྠཱནི.

༡༩༤༢. ‘‘པལླཏྠིཀཱཡ ནིསིནྣསྶཱ’’ཏི ཝཏྟབྦེ གཱཐཱབནྡྷཝསེན ཡཀཱརསྶ ལོཔཾ ཀཏྭཱ ‘‘པལླཏྠིཀཱ ནིསིནྣསྶཱ’’ཏི ཝུཏྟཾ, ཨཱཡོགཔལླཏྠིཀཱཡ ཝཱ ཧཏྠཔལླཏྠིཀཱཡ ཝཱ དུསྶཔལླཏྠིཀཱཡ ཝཱ ཡཱཡ ཀཱཡཙི པལླཏྠིཀཱཡ ནིསིནྣསྶཱཏི ཨཏྠོ. ཝེཋིཏསཱིསསྶཱཏི དུསྶཝེཋནེན ཝཱ མོལིཨཱདཱིཧི ཝཱ ཡཐཱ ཀེསནྟོ ན དིསྶཏི, ཨེཝཾ ཝེཋིཏསཱིསསྶ.

༡༩༤༣. ཡདི ཀེསནྟཾ ཝིཝརཱཔེཏྭཱ དེསེཏི, ཝཊྚཏཱིཏི ཡོཛནཱ. ‘‘ཨཡམེཝ ཝིནིཙྪཡོ’’ཏི ཨིམིནཱ ‘‘སཱིསཾ ཝིཝརཱཔེཏྭཱ དེསེཏི, ཝཊྚཏཱི’’ཏི ཨནཱཔཏྟིཝཱརོཔི ཝུཏྟོ ཧོཏི.

པཉྩམཚཊྛསཏྟམཱནི.

༡༩༤༤-༥. ཨཊྛམེ ‘‘ཨཱསནེ ནིསིནྣསྶཱཏི ཨནྟམསོ ཝཏྠམྤི ཏིཎཱནིཔི སནྠརིཏྭཱ ནིསིནྣསྶཱ’’ཏི (པཱཙི. ཨཊྛ. ༦༤༥) ཨིདཉྩ ནཝམེ ‘‘ཨུཙྩེ ཨཱསནེཏི ཨནྟམསོ བྷཱུམིཔྤདེསེཔི ཨུནྣཏེ ཋཱནེ ནིསིནྣསྶ དེསེཏུཾ ན ཝཊྚཏཱི’’ཏི (པཱཙི. ཨཊྛ. ༦༤༧) ཨིདཉྩ དསམེ ‘‘སཙེཔཱི’’ཏིཨཱདིནཱ ཝཀྑམཱནཝིནིཙྪཡཉྩ ཋཔེཏྭཱ ཝཏྟབྦཝིསེསཱབྷཱཝཱ ཨཱཧ ‘‘ཨཊྛམེ ནཝམེ ¶ ཝཱཔི, དསམེ ནཏྠི ཀིཉྩིཔཱི’’ཏི. ཨེཏྠ ‘‘ཝཏྟབྦ’’ནྟི སེསོ. ཐེརུཔཊྛཱནཾ གནྟྭཱན ཋིཏཾ དཧརཾ ཨཱསནེ ནིསིནྣོ ཐེརོ ཙེ པཉྷཾ པུཙྪཏཱིཏི ཨཛ྄ཛྷཱཧཱརཡོཛནཱ. ཀཐེཏབྦམུཔཱཡཾ དསྶེཏུམཱཧ ‘‘ཏསྶ པསྶེ པནཉྙསྶ, ཀཐེཏབྦཾ ཝིཛཱནཏཱ’’ཏི. ཨེཏྠ ‘‘ཋིཏསྶཱ’’ཏི སེསོ ¶ . ཏསྶ སམཱིཔཝཏྟིནོ ཀསྶཙི ཨབྷཱཝེ སཛ྄ཛྷཱཡཾ ཨདྷིཊྛཧིཏྭཱཔི ཝཏྟུཾ ཝཊྚཏི.

ཨཊྛམནཝམདསམཱནི.

སཏྟམོ ཝགྒོ.

༡༩༤༦. གཙྪཏོ པུརཏོཏི ཨེཏྠ ‘‘པཙྪཏོ གཙྪནྟེནཱ’’ཏི སེསོ. པཙྪཏོ གཙྪནྟེན པུརཏོ གཙྪཏོ པཉྷཾ ན ཝཏྟབྦནྟི ཡོཛནཱ. སཙེ པུརཏོ གཙྪནྟོ པཉྷཾ པུཙྪཏི, ཀིཾ ཀཱཏབྦནྟི ཨཱཧ ‘‘པཙྪིམསྶཱ’’ཏིཨཱདི.

༡༩༤༧. ཨུགྒཧིཏཾ དྷམྨཾ པུརཏོ གཙྪནྟེན སདྡྷིཾ པཙྪཏོ གཙྪནྟོ སཛ྄ཛྷཱཡཏི, ཝཊྚཏཱིཏི ཡོཛནཱ. སམམེཝ གཙྪཏོ ཡུགགྒཱཧཾ ཀཐེཏུཾ ཝཊྚཏཱིཏི ཡོཛནཱ. ཡུགགྒཱཧནྟི ཨཉྙམཉྙཾ. ཨཉྙམཉྙ-སདྡཔརིཡཱཡོ ཧི ཡུགགྒཱཧ-སདྡོ.

པཋམཾ.

༡༩༤༨. སཀཊམགྒེ ཨེཀེཀསྶ ཙཀྐསྶ པཐེན གཙྪནྟོ ཨེཀེཀསྶ ཙཀྐསྶ པཐེན སམཾ གཙྪཏོ དྷམྨཾ དེསེཏུཾ ཝཊྚཏི. ཨུཔྤཐེནཱཔི གཙྪནྟོ ཨུཔྤཐེན སམཾ གཙྪནྟསྶ དྷམྨཾ དེསེཏུཾ ཝཊྚཏཱིཏི ཨཛ྄ཛྷཱཧཱརཡོཛནཱ. ཨུཔྤཐེནཱཏི ཨམགྒེན. ཨེཝཾ ཨནཱཔཏྟིཝིསཡེ དསྶིཏེ ཏབྦིཔརིཡཱཡཏོ ཨཱཔཏྟིཝིསཡོ དསྶིཏོཡེཝཱཏི ཝེདིཏབྦོ.

དུཏིཡཾ.

༡༩༤༩. ཏཏིཡེ ནཏྠི ཝཏྟབྦནྟི ‘‘ན ཋིཏོ ཨགིལཱནོ ཨུཙྩཱརཾ ཝཱ པསྶཱཝཾ ཝཱ ཀརིསྶཱམཱི’’ཏི (པཱཙི. ༦༥༡) ཨེཏསྶ ཝིནིཙྪཡོ ཡཐཱརུཏཝསེན ¶ སུཝིཉྙེཡྻོཏི ཀཏྭཱ ཝུཏྟཾ. སཙེ པཊིཙྪནྣཾ ཋཱནཾ གཙྪནྟསྶ སཧསཱ ཨུཙྩཱརོ ཝཱ པསྶཱཝོ ཝཱ ནིཀྑམཏི, ཨསཉྩིཙྩ ¶ ཀཏོ ནཱམ, ཨནཱཔཏྟི. ཨཡམེཏྠ ཝིསེསོ དཊྛབྦོ. སིངྒྷཱཎིཀཱཡ ཁེལེ༹ནེཝ སངྒཧིཏཏྟེཔི བཱཏྟིཾསཀོཊྛཱསེསུ ཝིསུཾཡེཝ དསྶིཏོ ཨེཀོ ཀོཊྛཱསོཏི སིཀྑཱཔདེསུ ཨཝུཏྟམྤི སངྒཧེཏྭཱ ཨཱཧ ‘‘ཨུཙྩཱརཱདིཙཏུཀྐ’’ནྟི.

༡༩༥༠. ཨེཏྠ ཧརིཏཾ ནཱམ ཨིདནྟི དསྶེཏུམཱཧ ‘‘ཛཱིཝརུཀྑསྶཱ’’ཏིཨཱདི. རུཀྑསྶཱཏི ཨུཔལཀྑཎཾ ཛཱིཝམཱནཀཏིཎལཏཱདཱིནམྤི ཧརིཏེཡེཝ སངྒཧིཏཏྟཱ. ‘‘དིསྶམཱནཾ གཙྪཏཱི’’ཏི ཝཙནེནེཝ ཨདིསྶམཱནགཏཾ ཨཧརིཏནྟི བྱཏིརེཀཏོ ཝིཉྙཱཡཏི. སཱཁཱ ཝཱ བྷཱུམིལགྒཱ དིསྶམཱནཱ གཙྪཏི, ཏཾ སབྦཾ ཧརིཏམེཝཱཏི ཡོཛནཱ.

༡༩༥༡. སཧསཱ ཝཙྩཾ ནིཀྑམཏེཝཱཏི སམྦནྡྷོ. ཨསྶ བྷིཀྑུནོ. ཝཙྩནྟི ཨུཔལཀྑཎཾ པསྶཱཝཱདཱིནམྤི དསྶིཏཏྟཱ. ཝཊྚཏཱིཏི ཨེཏྠ ‘‘གིལཱནཊྛཱནེ ཋིཏཏྟཱ’’ཏི སེསོ.

༡༩༥༢. པལཱལཎྜུཔཀེ ཝཱཔཱིཏི པལཱལཙུམྦཊཀེཔི. ཨེཏྠ ‘‘ཨཔྤཧརིཏཾ ཨལབྷནྟེནཱ’’ཏི སེསོ. ཀིསྨིཉྩཱིཏི སུཀྑཏིཎཱདིམྷི ཀིསྨིཉྩི. ཏཾ ཝཙྩཾ པཙྪཱ ཧརིཏཾ ཨོཏྠརཏི, ཝཊྚཏཱིཏི ཡོཛནཱ.

༡༩༥༣. ཨེཏཱིཏི པཝིསཏི. ཨེཏྠཱཏི ཨིམསྨིཾ སིཀྑཱཔདེ. ‘‘ཁེལེ༹ན ཨེཝ ཙཱ’’ཏི པདཙྪེདོ.

ཏཏིཡཙཏུཏྠཱནི.

༡༩༥༤. ཝཙྩཀུཊིསམུདྡཱདིཨུདཀེསཱུཏི ཨེཏྠ ཨཱདི-སདྡེན སབྦཾ ཨཔརིབྷོགཛལཾ སངྒཎྷཱཏི. ཏེནེཝ ‘‘ཏེསཾ ཨཔརིབྷོགཏྟཱ’’ཏི ཨཔརིབྷོགཏྟམེཝ ཀཱརཎམཱཧ.

༡༩༥༥. ཨུདཀོགྷེཏི ¶ ཨེཏྠ ‘‘ཛཱཏེ’’ཏི སེསོ. ཨཛལནྟི ཨཛལཊྛཱནཾ. ཛལེཏི པརིབྷོགཱརཧཛལེ. ཨིདྷཱཔི ཐལཀཏོ ཨུདཀཾ ཨོཏྠརཏི, ཨནཱཔཏྟི.

པཉྩམཾ.

ཨཊྛམོ ཝགྒོ.

༡༩༥༦-༧. པཀིཎྞཀཝིནིཙྪཡཾ ¶ དསྶེཏུམཱཧ ‘‘སམུཊྛཱནཱདཡོ’’ཏིཨཱདི. ཉེཡྻཱཏི ཝཀྑམཱནནཡེན ཝེདིཏབྦཱ. ཨེཏྠཱཏི ཨེཏེསུ སེཁིཡེསུ. ཨུཛྫགྒྷིཀཱ ཨཱདི ཡེསནྟི ཝིགྒཧོ, ཏགྒུཎསཾཝིཉྙཱཎོཡཾ བཱཧིརཏྠསམཱསོ, ཨུཛྫགྒྷིཀཱཨཔྤསདྡཔཊིསཾཡུཏྟཱནི ཙཏྟཱརི སིཀྑཱཔདཱནཱིཏི ཨཏྠོ. ཚམཱ ཙ ནཱིཙཱསནཉྩ ཋཱནཉྩ པཙྪཱ ཙ ཨུཔྤཐོ ཙ ཚམཱནཱིཙཱསནཊྛཱནཔཙྪཱཨུཔྤཐཱ, ཏེ སདྡཱ ཨེཏེསཾ སིཀྑཱཔདཱནཾ ཨཏྠཱིཏི ཏཔྤཊིསཾཡུཏྟཱནི སིཀྑཱཔདཱནི ཚམཱ…པེ… ཨུཔྤཐཝཱ, ཚམཱདིཔདཝནྟཱནི པཉྩ སིཀྑཱཔདཱནཱིཏི ཨཏྠོ. ཨེཏྠ ཋཱན-སདྡེན ཋཱ-དྷཱཏུསྶེཝ རཱུཔཏྟཱ སིཀྑཱཔདཱགཏོ ཋིཏ-སདྡོ གཧིཏོ. ‘‘དསསཱུ’’ཏི ཝཏྟབྦེ ཝཎྞལོཔེན, ཝིབྷཏྟིཝིཔལླཱསེན ཝཱ ‘‘དསཱ’’ཏི ཝུཏྟཾ. སམནུབྷཱསནེ སམུཊྛཱནཱདཱིཧི ཨེཏེསུ དསསུ སིཀྑཱཔདེསུ སམུཊྛཱནཱདཡོ ཏུལྱཱ ཝུཏྟཱཏི ཡོཛནཱ.

ཀིཾ ཝུཏྟཾ ཧོཏི? ཨིམཱནི དས སིཀྑཱཔདཱནི སམནུབྷཱསནསམུཊྛཱནཱནི, ཨེཀེཀམེཏྠ ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི ཝུཏྟཾ ཧོཏི.

༡༩༥༨-༩. ‘‘ཚཏྟ’’ནྟིཨཱདཱིནི སིཀྑཱཔདཱནཾ ཨུཔལཀྑཎཔདཱནི. ཨེཏཱནི ཨེཀཱདས སིཀྑཱཔདཱནི སམུཊྛཱནཱདིནཱ པན དྷམྨདེསནེན ཏུལྱཱཝ སདིསཱ ཨེཝཱཏི ཡོཛནཱ. ཨིདཾ ཝུཏྟཾ ¶ ཧོཏི – ཨིམཱནི ཨེཀཱདས སིཀྑཱཔདཱནི དྷམྨདེསནཱསམུཊྛཱནཱནི, ཀིརིཡཱཀིརིཡཱནི, སཉྙཱཝིམོཀྑཱནི, སཙིཏྟཀཱནི, ལོཀཝཛྫཱནི, ཝཙཱིཀམྨཱནི, ཨཀུསལཙིཏྟཱནི, དུཀྑཝེདནཱནཱིཏི.

སཱུཔོདནེན ཝིཉྙཏྟཱིཏི སཱུཔོདན-སདྡེན ལཀྑིཏཾ ཝིཉྙཏྟིསིཀྑཱཔདཾ. ཝིཉྙཏྟིསིཀྑཱཔདཱནཾ བཧུཏྟཱ ཨིདམེཝ ཝིསེསིཏཾ. ཐེཡྻསཏྠསམཾ མཏནྟི སམུཊྛཱནཱདཱིཧི ཐེཡྻསཏྠསིཀྑཱཔདེན སམཱནཾ མཏནྟི ཨཏྠོ. ཨིདཾ ཝུཏྟཾ ཧོཏི – སཱུཔོདནཝིཉྙཏྟིསིཀྑཱཔདཾ ཐེཡྻསཏྠསམུཊྛཱནཾ, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི.

༡༩༦༠. ཨཝསེསཱ ཏིཔཉྙཱསཱཏི ཨཝསེསཱནི ཏེཔཉྙཱསསིཀྑཱཔདཱནི. སམཱནཱ པཋམེན ཏཱུཏི པཋམེན པཱརཱཛིཀེན སམུཊྛཱནཱདིཏོ སམཱནཱནཱིཏི ཨཏྠོ, པཋམཔཱརཱཛིཀསདིསསམུཊྛཱནཱནཱིཏི ¶ ཝུཏྟཾ ཧོཏི. ‘‘ཨནཱཔཏྟི ཨཱཔདཱསཱུ’’ཏི པདཙྪེདོ. པརིམཎྜལཾ ནིཝཱསེཏྭཱ, པཱརུཔིཏྭཱ ཙརནྟཱནཾ ཙོརུཔདྡཝཱདི ཨཱཔདཱ ནཱམ. ཨཔི-སདྡེན ནདིསནྟརཎཱདིཾ སངྒཎྷཱཏི. སེཁིཡེསུ སབྦེསཱུཏི ཡེབྷུཡྻཝསེན ཝུཏྟཾ.

༡༩༦༡. ‘‘ན ཨུཛ྄ཛྷཱནསཉྙཱི པརེསཾ པཏྟཾ ཨོལོཀེསྶཱམཱི’’ཏིཨཱདཱིནཾ (པཱཙི. ༦༡༤) ཨིམསྶ ཨནཱཔཏྟིཝཱརསྶ ཨསམྦྷཝཏོ ན པནཱགཏོཏི པཱལི༹ཡཾ ན ཝུཏྟོ. ཏསྶཱཔི ཡཐཱཝཏྠུཀཱཝ ཨཱཔཏྟིཡོ དཊྛབྦཱ.

ཨིཏི ཝིནཡཏྠསཱརསནྡཱིཔནིཡཱ

ཝིནཡཝིནིཙྪཡཝཎྞནཱཡ

སེཁིཡཀཐཱཝཎྞནཱ ནིཊྛིཏཱ.

༡༩༦༢. ཡོ ¶ ཨིམཾ ཝིནིཙྪཡཾ ཝིདིཏྭཱ ཋིཏོ, སོ ཧི ཡསྨཱ ཝིནཡེ ཝིསཱརདོ ཧོཏི, ཝིནཱིཏམཱནསོ ཙ ཧོཏི, པརེཧི དུཔྤདྷཾསིཡོ ཙ ཧོཏི, ཏཏོ ཏསྨཱ ཀཱརཎཱ སམཱཧིཏོ སཏཏཾ ཨིམཾ ཝིནཡཝིནིཙྪཡཾ སིཀྑེཡྻཱཏི ཡོཛནཱ.

ཏཏྠ ཨིམཾ ཝིནིཙྪཡཾ ཝིདིཏྭཱཏི སབྦལོཀིཡལོཀུཏྟརགུཎསམྤཏྟིནིདཱནཾ ཨིམཾ ཝིནཡཝིནིཙྪཡཾ ཨཏྠཏོ, གནྠཏོ, ཝིནིཙྪཡཏོ ཙ སཀྐཙྩཾ ཉཏྭཱ. ཝིསཱརདོཏི སཱརཛྫནཾ སཱརདོ, ཝིགཏོ སཱརདོ ཨསྶཱཏི ཝིསཱརདོ, ཝིནཡཔརིཡཏྟིཡཱ, ཨཱཔཏྟཱདིཝིབྷཱགེ ཙ ནིབྦྷཡོ ནིརཱསངྐོཏི ཝུཏྟཾ ཧོཏི. ན ཀེཝལཾ ཨིམསྶ ཛཱནནེ ཨེསོཝ ཨཱནིསཾསོ, ཨཐ ཁོ ཝིནཱིཏམཱནསོ ཙ ཧོཏི, སཾཡཏཙིཏྟོ ཧོཏཱིཏི ཨཏྠོ. སོཏི ཨིམཾ ཝིནིཙྪཡཾ སཀྐཙྩཾ ཝིདིཏྭཱ ཋིཏོ བྷིཀྑུ. པརེཧཱིཏི ཨིམཾ ཨཛཱནནྟེཧི ཨཉྙེཧི. དུཔྤདྷཾསིཡོ ཙ ཧོཏཱིཏི ཨནབྷིབྷཝནཱིཡོ ཙ ཧོཏི.

ཏཏོཏི ཏསྨཱ ཝིནཡེ ཝིསཱརདཏཱདིསབྦགུཎསམྤནྣཧེཏུཏྟཱ. ཧཱིཏི ཡསྨཱཏི ཨཏྠོ. སིཀྑེཏི སཛ྄ཛྷཱཡནསཝནཱདིཝསེན སིཀྑེཡྻ, ཨུགྒཎྷེཡྻཱཏི ཨཏྠོ. ‘‘སཏཏ’’ནྟི ཨིམིནཱ སབྦཏྠཀཀམྨཊྛཱནེ ཝིཡ ཨེཏྠཱཔི སཏཏཱབྷིཡོགོ ཀཱཏབྦོཏི དསྶེཏི. ཝིཀྑིཏྟསྶ ཡཐཱབྷཱུཏཔཊིཝེདྷཱབྷཱཝཏོ ཏཔྤཊིཔཀྑཱཡ ཨེཀགྒཏཱཡ ནིཡོཛེནྟོ ཨཱཧ ‘‘སམཱཧིཏོ’’ཏི, སམྨཱ ཝིནཡཝིནིཙྪཡེ ¶ ཨཱཧིཏོ པཏིཊྛིཏོ ཨེཀགྒཙིཏྟོཏི ཝུཏྟཾ ཧོཏི. ཡཐཱཧ ‘‘ཨཝིཀྑིཏྟསྶཱཡཾ དྷམྨོ, ནཱཡཾ དྷམྨོ ཝིཀྑིཏྟསྶཱ’’ཏི.

༡༩༦༣. ཨེཝཾ ཨིམཱཡ གཱཐཱཡ ཝུཏྟམེཝཏྠཾ པཀཱརནྟརེནཱཔི དསྶེཏུམཱཧ ‘‘ཨིམ’’ནྟིཨཱདི. ཏེཏི ཨཔེཀྑིཏྭཱ ‘‘ཡེ’’ཏི ¶ ལབྦྷཏི. ཡེ ཐེརཱ ཝཱ ནཝཱ ཝཱ མཛ྄ཛྷིམཱ ཝཱ. པརམནྟི ཨམཏམཧཱནིབྦཱནཔྤཏྟིཡཱ མཱུལཀཱརཎསྶ སཱིལསྶ པཀཱསནཏོ ཨུཏྟམཾ. ཨསཾཀརནྟི ནིཀཱཡནྟརལདྡྷཱིཧི ཨསམྨིསྶཾ. སཾཀརནྟི ཝུཏྟཔྤཀཱརགུཎོཔེཏཏྟཱ ཀཱཡཙིཏྟསུཁཀཱརཎཾ སམྨུཁཾ ཀརོཏཱིཏི སཾཀརཾ. སཝནཱམཏནྟི སདྡརསཱདིཡོགེན ཀཎྞརསཱཡནཾ. ཨམཏནྟི ཏཏོཡེཝ ཨམཏཾ སུམདྷུརཾ. ཨམཏམཧཱནིབྦཱནཱཝཧཏྟཱ ཝཱ ཕལཱུཔཙཱརེན ཨམཏཾ. ཨིམཾ ཝིནཡཝིནིཙྪཡཾ. ཨཝེཙྩཱཏི སཀྐཙྩཾ ཝིདིཏྭཱ. ཨདྷིཀེཏི ཨདྷིསཱིལཱདིསིཀྑཏྟཡཔྤཀཱསནེན ཨུཀྐཊྛེ. ཧིཏེཏི ལོཀིཡལོཀུཏྟརསུཁཧེཏུཏྟེན ཧིཏེ. ཧིནོཏི ཨཏྟནོ ཕལནྟི ‘‘ཧིཏ’’ནྟི སུཁཧེཏུ ཝུཙྩཏི. ཀལིསཱསནེཏི ལོབྷཱདིཀིལེསཝིདྡྷཾསནེ. སཱསནེཏི ཝིནཡཔརིཡཏྟིསངྑཱཏསཱསནེཀདེསེ. པཊུཏྟནྟི བྱཏྟབྷཱཝཾ. ན ཡནྟི ན གཙྪནྟི. ཀེ ཏེཏི ཀཏམེ ཏེ. ‘‘ན ཀེཙི སནྟི ཙཱ’’ཏི ནིསྶནྡེཧེ ཨིམིསྶཱ གཱཐཱཡ ཨཏྠོ ལིཁིཏོ.

ཨེཝཾ ཨེཏྠ ཨཏྠཡོཛནཱ ཝེདིཏབྦཱ – པརམཾ ཨུཏྟམཾ ཨསཾཀརཾ ནིཀཱཡནྟརལདྡྷཱིཧི ཨསམྨིསྶཾ སཾཀརཾ སཀལལོཀིཡལོཀུཏྟརསུཁཱབྷིནིཔྥཱདཀཾ སཝནཱམཏཾ སོཏརསཱཡནཾ ཨིམཾ ཝིནིཙྪཡཔྤཀརཎཾ ཨཝེཙྩ སཀྐཙྩཾ ཝིདིཏྭཱ ཨདྷིཀེ ཨདྷིསཱིལཱདིསིཀྑཏྟཡཔྤཀཱསནེན ཨུཀྐཊྛེ ཧིཏེ ལོཀིཡལོཀུཏྟརསུཁཧེཏུབྷཱུཏེ ཀལིསཱསནེ སཀལསཾཀིལེསཝིདྡྷཾསཀེ སཱསནེ ཝིནཡཔིཊཀསངྑཱཏེ པརིཡཏྟིསཱསནེ ཡེ པཊུཏྟཾ ན ཡནྟི, ཏེ ཀེ ནཱམཱཏི ཡོཛནཱ, ཡེ ཨིམཾ པཀརཎཾ ཨཝེཙྩ ཝིདིཏྭཱ ཋིཏཱ, ཏེ ཨེཀཾསཏོ ཝིནཡཔིཊཀེ པཊུཏྟཾ པཱཔུཎནྟི ཡེཝཱཏི ཨདྷིཔྤཱཡོ.

ཨིཏི ཝིནཡཏྠསཱརསནྡཱིཔནིཡཱ

ཝིནཡཝིནིཙྪཡཝཎྞནཱཡ

བྷིཀྑུཝིབྷངྒཀཐཱཝཎྞནཱ ནིཊྛིཏཱ.

བྷིཀྑུནིཝིབྷངྒོ

༡༩༦༤. ཨེཝཾ ¶ བྷིཀྑུཝིབྷངྒཔཱལི༹ཡཱ, ཨཊྛཀཐཱཡ ཙ ཨཱགཏཾ ཝིནིཙྪཡསཱརཾ ནཱཏིསངྑེཔཝིཏྠཱརནཡེན ¶ དསྶེཏྭཱ ཨིདཱནི ཏདནནྟརཱཡ བྷིཀྑུནིཝིབྷངྒཔཱལི༹ཡཱ, ཏདཊྛཀཐཱཡ ཙ ཨཱགཏཝིནིཙྪཡསཱརཾ དསྶེཏུམཱརབྷནྟོ ཨཱཧ ‘‘བྷིཀྑུནཱིན’’ནྟིཨཱདི. ཏསྨིཾ ཨཔཱིཏི ཨེཏྠ ཨཔི-སདྡོ ཝུཏྟཱཔེཀྑཱཡཾ. ‘‘སམཱསེནཱ’’ཏི ཨིདཾ གནྠཝསེན སངྑིཔནཾ སནྡྷཱཡ ཝུཏྟཾ. ‘‘ཀིཉྩིམཏྟ’’ནྟི ཨིདཾ ཨཏྠཝསེནཱཏི ཝེདིཏབྦཾ.

པཱརཱཛིཀཀཐཱཝཎྞནཱ

༡༩༦༥. ཚནྡསོཏི མེཐུནསེཝནརཱགཔཊིསཾཡུཏྟེན ཚནྡེན. ཨེཏེན ‘‘ཚནྡེ པན ཨསཏི བལཀྐཱརེན པདྷཾསིཏཱཡ ཨནཱཔཏྟཱི’’ཏི (ཀངྑཱ. ཨཊྛ. མེཐུནདྷམྨསིཀྑཱཔདཝཎྞནཱ) ཨཊྛཀཐཱ སཱུཙིཏཱ ཧོཏི. སཱ སམཎཱི པཱརཱཛིཀཱ ནཱམ ཧོཏཱིཏི པཝུཙྩཏཱིཏི ཡོཛནཱ.

༡༩༦༦-༧. ‘‘སཛཱིཝསྶ ཨཔི ཨཛཱིཝསྶཱ’’ཏི པདཙྪེདོ. ‘‘སནྠཏཾ ཝཱ ཨསནྠཏ’’ནྟི ཨིདཾ ‘‘ཨངྒཛཱཏ’’ནྟི ཨིམསྶ ཝིསེསནཾ. ཨཏྟནོ ཏིཝིདྷེ མགྒེཏི ཨཏྟནོ ཝཙྩཔསྶཱཝམུཁམགྒཱནཾ ཨཉྙཏརསྨིཾ མགྒེ. ཨེཏྠ ‘‘སནྠཏེ ཝཱ ཨསནྠཏེ ཝཱ’’ཏི སེསོ, ‘‘ཨལློཀཱསེ’’ཏི ཨིམིནཱ སམྦནྡྷོ. ‘‘ཡེབྷུཡྻཨཀྑཱཡིཏཱདིཀ’’ནྟི པདཙྪེདོ. ཨཱདི-སདྡེན ཨཀྑཱཡིཏཾ སངྒཎྷཱཏི.

མནུསྶཔུརིསཱདཱིནཾ ནཝནྣཾ སཛཱིཝསྶཔི ཨཛཱིཝསྶཔི ཡསྶ ཀསྶཙི སནྠཏཾ ཝཱ ཨསནྠཏཾ ཝཱ ཡེབྷུཡྻཀྑཱཡིཏཱདིཀཾ ཨངྒཛཱཏཾ ཨཏྟནོ སནྠཏེ ཝཱ ཨསནྠཏེ ཝཱ ཏིཝིདྷེ མགྒེ ཨལློཀཱསེ ཏིལཕལམཏྟམྤི པཝེསེནྟཱི པརཱཛིཏཱཏི ཡོཛནཱ.

༡༩༦༨. སཱདྷཱརཎཝིནིཙྪཡནྟི ¶ བྷིཀྑུབྷིཀྑུནཱིནཾ སཱདྷཱརཎསིཀྑཱཔདཝིནིཙྪཡཾ.

༡༩༦༩-༧༠. ཨདྷཀྑཀནྟི ཨེཏྠ ཨཀྑཀཱནཾ ཨདྷོཏི ཝིགྒཧོ. ཨུབྦྷཛཱཎུམཎྜལནྟི ཛཱཎུམཎྜལཱནཾ ཨུབྦྷནྟི ཝིགྒཧོ. ཨུབྦྷ-སདྡོ ཨུདྡྷཾ-སདྡཔརིཡཱཡོ. ཨིདྷ ‘‘ཨཏྟནོ’’ཏི སེསོ. ཨཝསྶུཏསྶཱཏི ཀཱཡསཾསགྒརཱགེན ཏིནྟསྶ. ཨཝསྶུཏཱཏི ཨེཏྠཱཔི ཨེསེཝ ནཡོ. ཡཱཏི ཝུཏྟཏྟཱ ‘‘སཱ’’ཏི ལབྦྷཏི. སརཱིརནྟི ཨེཏྠ ‘‘ཡཾ ཀིཉྩཱི’’ཏི སེསོ. པརོཔཀྐམམཱུལཀཾ པཱརཱཛིཀཾ དསྶེཏུམཱཧ ¶ ‘‘ཏེན ཝཱ ཕུཊྛཱ’’ཏི. ཨེཏྠ ‘‘ཡཐཱཔརིཙྪིནྣེ ཀཱཡེ’’ཏི ཙ ‘‘སཱདིཡེཡྻཱ’’ཏི ཙ ཝཏྟབྦཾ.

ཡཱ པན བྷིཀྑུནཱི ཨཝསྶུཏཱ ཨཝསྶུཏསྶ མནུསྶཔུགྒལསྶ ཡཾ ཀིཉྩི སརཱིརཾ ཨཏྟནོ ཨདྷཀྑཀཾ ཨུབྦྷཛཱཎུམཎྜལཾ ཡཾ སརཱིརཀཾ, ཏེན སརཱིརཀེན ཚུཔེཡྻ, ཏེན མནུསྶཔུརིསེན ཡཐཱཔརིཙྪིནྣེ ཀཱཡེ ཕུཊྛཱ སཱདིཡེཡྻ ཝཱ, སཱ པཱརཱཛིཀཱ སིཡཱཏི ཡོཛནཱ.

༡༩༧༡-༢. ‘‘གཧིཏཾ ཨུབྦྷཛཱཎུནཱ’’ཏི ཨིམིནཱ ཀཔྤརཏོ ཨུདྡྷཾ པཱརཱཛིཀཀྑེཏྟམེཝཱཏི དཱིཔེཏི. ཨཏྟནོ ཡཐཱཝུཏྟཔྤཀཱརེན ཀཱཡེནཱཏི ཡོཛནཱ, ཨཏྟནོ ‘‘ཨདྷཀྑཀ’’ནྟིཨཱདིཝུཏྟཔྤཀཱརེན ཀཱཡེནཱཏི ཨཏྠོ. ཏཐཱ ཨཝསྶུཏཱཡ ཨཝསྶུཏསྶ པུརིསསྶ ཀཱཡཔཊིབདྡྷཾ ཕུསནྟིཡཱ ཐུལླཙྩཡཾ ཧོཏི. ཨཏྟནོ ཡཐཱཔརིཙྪིནྣཀཱཡཔཊིབདྡྷེན ཏཐཱ ཨཝསྶུཏཱཡ ཨཝསྶུཏསྶ པུརིསསྶ ཀཱཡཾ ཕུསནྟིཡཱ ཐུལླཙྩཡཾ ཧོཏི.

༡༩༧༣. ཨཏྟནོ ཨཝསེསེན ཀཱཡེན ཨཝསྶུཏཱཡ ཨཝསྶུཏསྶ པུརིསཔུགྒལསྶ ཀཱཡཾ ཕུསནྟིཡཱ ཐུལླཙྩཡཾ ¶ ཧོཏི. ཨེཝཾ ཨཏྟནོ པཡོགེ ཙ པུརིསསྶ པཡོགེ ཙ ཏསྶཱ བྷིཀྑུནིཡཱཡེཝ ཐུལླཙྩཡཾ ཧོཏཱིཏི ཡོཛནཱ.

༡༩༧༤. ཡཀྑཔེཏཏིརཙྪཱནཔཎྜཀཱནཾ ཀཱཡཾ ‘‘ཨདྷཀྑཀཾ ཨུབྦྷཛཱཎུམཎྜལ’’ནྟི ཡཐཱཔརིཙྪིནྣཾ ཏཐེཝ ཨཏྟནོ ཀཱཡེན ཨུབྷཏོཨཝསྶཝེ སཏི ཕུསནྟིཡཱ ཨསྶཱ བྷིཀྑུནིཡཱ ཐུལླཙྩཡཾ, ཏཐེཝ ཡཀྑཱདཱིནཾ པཡོགེཔི ཏསྶཱཡེཝ ཐུལླཙྩཡཾ ཧོཏཱིཏི ཡོཛནཱ.

༡༩༧༥. ཨེཀཏོཝསྶཝེ ཙཱཔཱིཏི བྷིཀྑུནིཡཱ ཝསེན ཨེཀཏོཨཝསྶཝེ ཙཱཔི. ཐུལླཙྩཡམུདཱིརིཏནྟི པཱརཱཛིཀཀྑེཏྟབྷཱུཏེན ཨཏྟནོ ཀཱཡེན མནུསྶཔུརིསསྶ ཀཱཡཾ ཕུསནྟིཡཱ ཐུལླཙྩཡཾ ཨཊྛཀཐཱཡཾ (པཱཙི. ཨཊྛ. ༦༦༢) ཝུཏྟནྟི ཨཏྠོ. ཨཝསེསེ ཙ སབྦཏྠཱཏི ཡཐཱཝུཏྟཔཱརཱཛིཀཀྑེཏྟཏོ ཨཝསེསེ ཐུལླཙྩཡཀྑེཏྟེ སབྦཏྠ ཨེཀཏོཨཝསྶཝེ སཏི དུཀྐཊཾ ཧོཏཱིཏི ཨཏྠོ. ཀཱཡཔཊིབདྡྷེན ཀཱཡཔཊིབདྡྷཱམསནཱདཱིསུ སབྦཏྠ ཨུབྷཏོཨཝསྶཝེ ཝཱ ཨེཀཏོཨཝསྶཝེ ཝཱ དུཀྐཊམེཝ ཧོཏི.

༡༩༧༦. ‘‘ཨུབྦྷཀྑཀམདྷོཛཱཎུམཎྜལ’’ནྟི ¶ ཡཾ ཨཔཱརཱཛིཀཀྑེཏྟཾ ཨིདྷ དསྶིཏཾ, ཨེཏྠ ཨེཀཏོཨཝསྶཝེ དུཀྐཊཾ ཧོཏི. ཀཔྤརསྶ ཙ ཧེཊྛཱཔི ཨེཏྠེཝ ཨདྷོཛཱཎུམཎྜལེ སངྒཧཾ གཏནྟི ཡོཛནཱ.

༡༩༧༧-༩. བྷིཀྑུ བྷིཀྑུནིཡཱ སདྡྷིཾ སཙེ ཀཱཡསཾསགྒཾ ཀེལཱཡཏི སེཝཏཱིཏི ཡོཛནཱ. བྷིཀྑུནིཡཱ ནཱསོ སིཡཱཏི སཱིལཝིནཱསོ པཱརཱཛིཀཱཔཏྟི སིཡཱཏི ཨཏྠོ. གེཧཔེམནྟི ཨེཏྠ ‘‘གེཧསིཏཔེམ’’ནྟི ཝཏྟབྦེ གཱཐཱབནྡྷཝསེན སིཏ-སདྡལོཔོ, ཨཏྠོ པནསྶ བྷིཀྑུཝིབྷངྒེ ཝུཏྟནཡོཝ.

༡༩༨༠. ཨཝིསེསེནཱཏི ¶ ‘‘བྷིཀྑུནིཡཱ’’ཏི ཝཱ ‘‘བྷིཀྑུསྶཱ’’ཏི ཝཱ ཝིསེསཾ ཨཀཏྭཱ.

༡༩༨༡. ཡསྶཱཏི བྷིཀྑུསྶ ཝཱ བྷིཀྑུནིཡཱ ཝཱ. ཡཏྠཱཏི བྷིཀྑུནིཡཾ ཝཱ བྷིཀྑུསྨིཾ ཝཱ. མནོསུདྡྷནྟི ཀཱཡསཾསགྒཱདིརཱགརཧིཏཾ. ཏསྶ བྷིཀྑུསྶ ཝཱ བྷིཀྑུནིཡཱ ཝཱ ཏཏྠ བྷིཀྑུནིཡཾ ཝཱ བྷིཀྑུསྨིཾ ཝཱ ཝིསཡེ ནདོསཏཱ ཨནཱཔཏྟཱིཏི ཨཏྠོ.

༡༩༨༢. བྷིནྡིཏྭཱཏི སཱིལབྷེདཾ ཀཏྭཱ. བྷིཀྑུནིཡཱ ཨཔཀཏཏྟཱ ཨཱཧ ‘‘ནེཝ ཧོཏི བྷིཀྑུནིདཱུསཀོ’’ཏི.

༡༩༨༣. ཨཐཱཏི ཝཱཀྱཱརམྦྷེ. ན ཧོཏཱཔཏྟི བྷིཀྑུནོཏི ཨེཏྠ བྷིཀྑུནཱིཧི ཀཱཡསཾསགྒསངྒྷཱདིསེསམཱཧ.

༡༩༨༤. ‘‘ཁེཏྟེ’’ཏི ཝཀྑམཱནཾ ‘‘ཕུཊྛཱ’’ཏི ཨིམིནཱ ཡོཛེཏྭཱ ‘‘པཱརཱཛིཀ’’ནྟིཨཱདཱིཧི, ‘‘ཐུལླཙྩཡཾ ཁེཏྟེ’’ཏིཨཱདཱིཧི ཙ སམྦནྡྷིཏབྦཾ. ‘‘པཱརཱཛིཀ’’ནྟི ཝཀྑམཱནཏྟཱ ཕུཊྛཱཏི ཨེཏྠ ‘‘པཱརཱཛིཀཀྑེཏྟེ’’ཏི སེསོ.

༡༩༨༥. ཏཐཱཏི ནིཙྩལཱཔི སཱདིཡཏི. ཁེཏྟེཏི ཐུལླཙྩཡཱདཱིནཾ ཁེཏྟེ. ཀཱཡེན ནིཙྩལཱཡཔི ཙིཏྟེན སཱདིཡནྟིཡཱ ཨཱཔཏྟི ཀསྨཱ ཝུཏྟཱཏི ཨཱཧ ‘‘ཝུཏྟཏྟཱ…པེ… སཏྠུནཱ’’ཏི ¶ , བྷིཀྑུཔཱཏིམོཀྑེ ཝིཡ ‘‘ཀཱཡསཾསགྒཾ སམཱཔཛྫེཡྻཱ’’ཏི ཨཝཏྭཱ ཨིདྷ ‘‘ཀཱཡསཾསགྒཾ སཱདིཡེཡྻཱ’’ཏི ཝུཏྟཏྟཱཏི ཨདྷིཔྤཱཡོ.

༡༩༨༦. ཏསྶཱ ཨཱཔཏྟིཡཱ. ཀྲིཡསམུཊྛཱནནྟི ཀིརིཡཱཡ སམུཊྛཱནཾ. ཨེཝཾ སཏཱིཏི སཱདིཡནམཏྟེནེཝ ཨཱཔཛྫིཏབྦབྷཱཝེ སཏི. ཨིདནྟི ‘‘ཀིརིཡསམུཊྛཱན’’མིཏིཝིདྷཱནཾ. ཏབྦཧུལེནེཝ ནཡེནཱཏི ¶ ཀིརིཡསམུཊྛཱནབཱཧུལླེན ནཡེན ཁདིརཝནཱདིཝོཧཱརོ ཝིཡཱཏི དཊྛབྦཾ.

༡༩༨༧. ཏསྶཱ བྷིཀྑུནིཡཱ ཨསཉྩིཙྩ ཝིརཛ྄ཛྷིཏྭཱ ཨཱམསནྟིཡཱ ཨནཱཔཏྟི, ‘‘ཨཡཾ པུརིསོ’’ཏི ཝཱ ‘‘ཨིཏྠཱི’’ཏི ཝཱ ཨཛཱནིཏྭཱ ཨཱམསནྟིཡཱ ཨནཱཔཏྟི, པུརིསསྶ ཨཱམསནེ སཏི ཕསྶཾ ཨསཱདིཡནྟིཡཱ ཝཱ ཨནཱཔཏྟཱིཏི ཡོཛནཱ.

༡༩༨༨. ཁིཏྟཙིཏྟཱཡཱཏི ཡཀྑུམྨཏྟཱཡ. ཨུམྨཏྟིཀཱཡ ཝཱཏི པིཏྟཀོཔེན ཨུམྨཱདཔྤཏྟཱཡ. ཨིདཉྩ ‘‘ཨསུཙཱི’’ཏི ཝཱ ‘‘ཙནྡན’’ནྟི ཝཱ ཝིསེསཏཾ ཨཛཱནནམེཝ པམཱཎཾ.

ཨུབྦྷཛཱཎུམཎྜལཀཐཱཝཎྞནཱ.

༡༩༨༩-༩༠. ‘‘པཱརཱཛིཀཏྟཾ ཛཱནནྟཱི’’ཏི ཨིམིནཱ ཨཝསེསཱཔཏྟིཾ ཛཱནིཏྭཱ ཚཱདེནྟིཡཱ པཱརཱཛིཀཱབྷཱཝཾ དཱིཔེཏི. སལིངྒེ ཏུ ཋིཏཱཡཱཏི པབྦཛྫཱལིངྒེཡེཝ ཋིཏཱཡ. ཨིཏི དྷུརེ ནིཀྑིཏྟམཏྟསྨིནྟི ཡོཛནཱ. ཨིཏི-སདྡོ ནིདསྶནེ. ཨིཏརཱཡ པུབྦེཡེཝ ཨཱཔནྣཏྟཱ ཏམཔེཀྑིཏྭཱ ‘‘སཱ ཙཱ’’ཏི ཨཱཧ.

༡༩༩༡. ཝུཏྟཱཝིསིཊྛཾ སབྦཾ ཝིནིཙྪཡཾ སངྒཧེཏུམཱཧ ‘‘སེས’’ནྟིཨཱདི. ཏཏྠཱཏི དུཊྛུལླཔཊིཙྪཱདནེ.

ཝཛྫཔཊིཙྪཱདིཀཐཱཝཎྞནཱ.

༡༩༩༢-༥. སངྒྷེནཱཏི སམགྒེན སངྒྷེན. ཨུཀྑིཏྟཀོཏི ཨཱཔཏྟིཡཱ ཨདསྶནཱདཱིསུ ཨུཀྑིཏྟཀོ. ‘‘ཨུཀྑེཔནེ ཋིཏོ’’ཏི ཨིམིནཱ ཨུཀྑེཔནཱིཡཀམྨཀཏསྶ ཨནོསཱརིཏབྷཱཝཾ དཱིཔེཏི. ཡཱ ¶ དིཊྛི ཨེཏསྶཱཏི ཡཾདིཊྛིཀོ, སོ ཨུཀྑིཏྟཀོ བྷིཀྑུ ཡཱཡ དིཊྛིཡཱ སམནྣཱགཏོ ཧོཏཱིཏི ཨདྷིཔྤཱཡོ ¶ . ‘‘ཏསྶཱ དིཊྛིཡཱ གཧཎེནཱ’’ཏི ཨིམིནཱ ཨནུཝཏྟཔྤཀཱརོ དསྶིཏོ. ཏཾ ཨུཀྑིཏྟཀཾ བྷིཀྑུནྟི ཡོཛནཱ. སཱ བྷིཀྑུནཱི ཨཉྙཱཧི བྷིཀྑུནཱིཧི ཝིསུམྤིཙ སངྒྷམཛ྄ཛྷེཔི ‘‘ཨེསོ ཁོ ཨཡྻེ བྷིཀྑུ སམགྒེན སངྒྷེན ཨུཀྑིཏྟོ’’ཏིཨཱདིནཱ (པཱཙི. ༦༦༩) ནཡེན ཏིཀྑཏྟུཾ ཝུཙྩམཱནཱཏི ཡོཛནཱ. ཏཾ ཝཏྠུཾ ཨཙཛནྟཱི གཧེཏྭཱ ཡདི ཏཐེཝ ཏིཊྛཏཱིཏི ཡོཛནཱ. ཨེཏྠ ‘‘ཡཱཝཏཏིཡཾ སམནུབྷཱསིཏབྦཱ’’ཏི སེསོ. ཏསྶ ཀམྨསྶ ཨོསཱནེཏི ཏཏིཡཱཡ ཀམྨཝཱཙཱཡ ཡྻཀཱརཔྤཏྟཝསེན ཨསྶ སམནུབྷཱསནཀམྨསྶ པརིཡོསཱནེ. ཨསཱཀིཡདྷཱིཏརཱཏི ཨསཱཀིཡདྷཱིཏཱ, པཙྩཏྟེ ཀརཎཝཙནཾ. ‘‘པུན ཨཔྤཊིསནྡྷེཡཱ’’ཏི ཨིམིནཱ པུན ཏེནེཝ ཙ ཨཏྟབྷཱཝེན བྷིཀྑུནིབྷཱཝེ པཊིསནྡྷཱཏུཾ ཨནརཧཏཱ ཝུཏྟཱ.

༡༩༩༦. ཏིཀདུཀྐཊཾ ནིདྡིཊྛནྟི ཨདྷམྨཀམྨེ ཨདྷམྨཀམྨསཉྙཱ, ཝེམཏིཀཱ, དྷམྨཀམྨསཉྙཱཏི ཨེཏཱསཾ ཝསེན ཏིཀདུཀྐཊཾ ཝུཏྟཾ. སམནུབྷཱསནེ ཝུཏྟཱ སམུཊྛཱནཱདཡོ སབྦེ ཨིདྷ ཝཏྟབྦཱཏི ཡོཛནཱ.

ཨུཀྑིཏྟཱནུཝཏྟིཀཀཐཱཝཎྞནཱ.

༡༩༩༧. ‘‘ཧཏྠགྒཧཎཾ ཝཱ སཱདིཡེཡྻཱཏི ཧཏྠོ ནཱམ ཀཔྤརཾ ཨུཔཱདཱཡ ཡཱཝ ཨགྒནཁཱ. ཨེཏསྶ ཨསདྡྷམྨསྶ པཊིསེཝནཏྠཱཡ ཨུབྦྷཀྑཀཾ ཨདྷོཛཱཎུམཎྜལཾ གཧཎཾ སཱདིཡཏི, ཨཱཔཏྟི ཐུལླཙྩཡསྶཱ’’ཏི (པཱཙི. ༦༧༦) ཝུཏྟཏྟཱ ཨཱཧ ‘‘ཨཔཱརཱཛིཀཁེཏྟསྶཱ’’ཏིཨཱདི. ‘‘ཏ’’ནྟི ཝཀྑམཱནཏྟཱ ‘‘ཡ’’ནྟི ལབྦྷཏི. ཨཔཱརཱཛིཀཀྑེཏྟསྶ ཡསྶ ཀསྶཙི ཨངྒསྶ ཡཾ གཧཎཾ, ཏཾ ཧཏྠགྒཧཎནྟི པཝུཙྩཏཱིཏི ཡོཛནཱ. ཧཏྠེ གཧཎཾ ཧཏྠགྒཧཎཾ.

༡༩༩༨. ཡསྶ ཀསྶཙཱིཏི ཝུཏྟཔྤཀཱརེན ཡསྶ ཀསྶཙི ཙཱིཝརསྶ ཡཾ གཧཎནྟི ཡོཛནཱ.

༡༩༩༩. ཨསདྡྷམྨ-སདྡེན ¶ མེཐུནསྶཱཔི ཝུཙྩམཱནཏྟཱ ཏཏོ ཝིསེསེཏུམཱཧ ‘‘ཀཱཡསཾསགྒ ¶ …པེ… ཀཱརཎཱ’’ཏི. བྷིཀྑུནཱི ཀཱཡསཾསགྒསངྑཱཏསྶ ཨསདྡྷམྨསྶ ཀཱརཎཱ པུརིསསྶ ཧཏྠཔཱསསྨིཾ ཏིཊྛེཡྻ ཝཱཏི ཡོཛནཱ.

༢༠༠༠. ཏཏོཏི ཏསྶ ཨསདྡྷམྨསྶ ཀཱརཎཱ. ཏཏྠཱཏི ཧཏྠཔཱསེ. པུརིསེནཱཏི ཨེཏྠ ‘‘ཀཏ’’ནྟི སེསོ, ‘‘སངྐེཏ’’ནྟི ཨིམིནཱ སམྦནྡྷོ. ‘‘ཨཱགམནཾ ཨསྶཱ’’ཏི པདཙྪེདོ. ཨིཙྪེཡྻཱཏི ཝུཏྟེཔི ན གམནིཙྪཱམཏྟེན, ཨཐ ཁོ བྷིཀྑུནིཡཱ པུརིསསྶ ཧཏྠཔཱསཾ, པུརིསེན ཙ བྷིཀྑུནིཡཱ ཧཏྠཔཱསཾ ཨོཀྐནྟཀཱལེཡེཝ ཝཏྠུཔཱུརཎཾ དཊྛབྦཾ. ཡཐཱཧ ‘‘སངྐེཏཾ ཝཱ གཙྪེཡྻཱཏི ཨེཏསྶ ཨསདྡྷམྨསྶ པཊིསེཝནཏྠཱཡ པུརིསེན ‘ཨིཏྠནྣཱམཾ ཨཱགཙྪཱ’ཏི ཝུཏྟཱ གཙྪཏི, པདེ པདེ ཨཱཔཏྟི དུཀྐཊསྶ. པུརིསསྶ ཧཏྠཔཱསཾ ཨོཀྐནྟམཏྟེ ཨཱཔཏྟི ཐུལླཙྩཡསྶཱ’’ཏི (པཱཙི. ༦༧༦) ཙ ‘‘པུརིསསྶ ཨབྦྷཱགམནཾ སཱདིཡཏི, ཨཱཔཏྟི དུཀྐཊསྶ. ཧཏྠཔཱསཾ ཨོཀྐནྟམཏྟེ ཨཱཔཏྟི ཐུལླཙྩཡསྶཱ’’ཏི (པཱཙི. ༦༧༦) ཙ. ཨེཏྠ ཙ ཨིཏྠནྣཱམཾ ཨཱགཙྪཱཏི ཨིཏྠནྣཱམཾ ཋཱནཾ ཨཱགཙྪཱཏི ཨཏྠོ.

༢༠༠༡. ཏདཏྠཱཡཱཏི ཏསྶེཝ ཀཱཡསཾསགྒསངྑཱཏཨསདྡྷམྨསྶ སེཝནཏྠཱཡ. པཊིཙྪནྣཊྛཱནཉྩཱཏི ཝཏྠཱདིནཱ ཡེན ཀེནཙི པཊིཙྪནྣཨོཀཱསཾ. པུརིསསྶ ཧཏྠཔཱསེ ཋིཏཱ ཏདཏྠཱཡ ཀཱཡཾ ཨུཔསཾཧརེཡྻ ཝཱཏི ཡོཛནཱ.

༢༠༠༢. ཧཏྠགྒཧཎཱདཱིནཾ ཝུཏྟཔྤཀཱརཱནཾ ཨཊྛནྣཾ ཝཏྠཱུནཾ པཱུརཎེན ‘‘ཨཊྛཝཏྠུཀཱ’’ཏི སངྑཱཏཱ ཨཡཾ བྷིཀྑུནཱི ཝིནཊྛཱ ཧོཏི སཱིལཝིནཱསེན, ཏཏོཡེཝ ཨསྶམཎཱི ཧོཏི ཨབྷིཀྑུནཱི ཧོཏཱིཏི ཡོཛནཱ.

༢༠༠༣. ཨནུལོམེན ¶ ཝཱཏི ཧཏྠགྒཧཎཱདིཔཊིཔཱཊིཡཱ ཝཱ. པཊིལོམེན ཝཱཏི ཏབྦིཔརིཡཏོ པཊིལོམེན ཝཱ. ཨེཀནྟརིཀཱཡ ཝཱཏི ཨེཀམེཀཾ ཨནྟརིཏྭཱ པུན ཏསྶཱཔི ཀརཎཝསེན ཨེཀནྟརིཀཱཡ ཝཱ. ཨནུལོམེན ཝཱ པཊིལོམེན ཝཱ ཏཐེཀནྟརིཀཱཡ ཝཱ ཨཊྛམཾ ཝཏྠུཾ པརིཔཱུརེནྟཱི ཙུཏཱཏི ཡོཛནཱ.

༢༠༠༤. ཨེཏདེཝ ཨཏྠཾ བྱཏིརེཀམུཁེན སམཏྠེཏུམཱཧ ‘‘ཨཐཱདིཏོ’’ཏིཨཱདི. སཏཀྑཏྟུམྤཱིཏི ¶ བཧུཀྑཏྟུམྤི. སཏ-སདྡོ ཧེཏྠ བཧུ-སདྡཔརིཡཱཡོ. པཱརཱཛིཀཱ ནེཝ སིཡཱཏི ཡོཛནཱ, ཨིམིནཱ ཏཾཏཾཝཏྠུམཱུལཀཾ དུཀྐཊཐུལླཙྩཡཾ ཨཱཔཛྫཏཱིཏི ཝུཏྟཾ ཧོཏི.

༢༠༠༥. ཡཱ པན ཨཱཔཏྟིཡོ ཨཱཔནྣཱ, དེསེཏྭཱ ཏཱཧི མུཙྩཏཱིཏི ཡོཛནཱ. དྷུརནིཀྑེཔནཾ ཀཏྭཱཏི ‘‘ན པུནེཝཾ ཀརིསྶཱམཱི’’ཏི དྷུརཾ ནིཀྑིཔིཏྭཱ. དེསིཏཱ གཎནཱུཔིཀཱཏི དེསིཏཱ དེསིཏགཎནམེཝ ཨུཔེཏི, པཱརཱཛིཀསྶ ཨངྒཾ ན ཧོཏཱིཏི ཨཏྠོ. ཏསྨཱ ཡཱ ཨེཀཾ ཨཱཔནྣཱ, དྷུརནིཀྑེཔཾ ཀཏྭཱ དེསེཏྭཱ པུན ཀིལེསཝསེན ཨཱཔཛྫཏི, པུན དེསེཏི, ཨེཝཾ ཨཊྛ ཝཏྠཱུནི པཱུརེནྟཱིཔི པཱརཱཛིཀཱ ན ཧོཏི.

༢༠༠༦. སཨུསྶཱཧཱཡ དེསིཏཱཏི པུན ཨཱཔཛྫནེ ཨནིཀྑིཏྟདྷུརཱཡ བྷིཀྑུནིཡཱ དེསིཏཱཔི ཨཱཔཏྟི དེསནཱགཎནཾ ན ཨུཔེཏི. ཀིཾ ཧོཏཱིཏི ཨཱཧ ‘‘དེསིཏཱཔི ཨདེསིཏཱ’’ཏི, ཏསྨཱ པཱརཱཛིཀཱཔཏྟིཡཱ ཨངྒམེཝ ཧོཏཱིཏི ཨདྷིཔྤཱཡོ.

༢༠༠༨. ཨཡཾ ཨཏྠོཏི ‘‘ཨསདྡྷམྨོ ནཱམ ཀཱཡསཾསགྒོ’’ཏི ཨཡཾ ཨཏྠོ. ཨུདྡིསིཏོཏི པཀཱསིཏོ.

༢༠༠༩. ཨཡམཏྠོ ¶ ཀེན ཝཙནེན ཨུདྡིསིཏོཏི ཨཱཧ ‘‘ཝིཉྙཱུ…པེ… སཱདྷཀཾ ཝཙནཾ ཨིད’’ནྟི. ཨིདཾ ཝཙནནྟི ‘‘ཝིཉྙཱུ པཊིབལོ ཀཱཡསཾསགྒཾ སམཱཔཛྫིཏུ’’ནྟི (པཱཙི. ༦༧༦) ཨིདཾ ཝཙནཾ. སཱདྷཀཾ པམཱཎཾ.

ཨཊྛཝཏྠུཀཀཐཱཝཎྞནཱ.

༢༠༡༠. ཨཝསྶུཏཱ, ཝཛྫཔཊིཙྪཱདིཀཱ, ཨུཀྑིཏྟཱནུཝཏྟིཀཱ, ཨཊྛཝཏྠུཀཱཏི ཨིམཱ ཙཏསྶོ པཱརཱཛིཀཱཔཏྟིཡོ མཧེསིནཱ ཨསཱདྷཱརཎཱ བྷིཀྑུནཱིནམེཝ པཉྙཏྟཱཏི ཡོཛནཱ.

ཨིཏི ཝིནཡཏྠསཱརསནྡཱིཔནིཡཱ

ཝིནཡཝིནིཙྪཡཝཎྞནཱཡ

པཱརཱཛིཀཀཐཱཝཎྞནཱ ནིཊྛིཏཱ.

སངྒྷཱདིསེསཀཐཱཝཎྞནཱ

༢༠༡༡. ཨེཝཾ ¶ བྷིཀྑུནིཝིབྷངྒེ ཨཱགཏཾ པཱརཱཛིཀཝིནིཙྪཡཾ ཝཏྭཱ ཨིདཱནི ཏདནནྟརུདྡིཊྛཾ སངྒྷཱདིསེསཝིནིཙྪཡཾ དསྶེཏུམཱཧ ‘‘ཡཱ པན བྷིཀྑུནཱི’’ཏིཨཱདི. ཨུསྶཡཝཱདཱཏི ཀོདྷུསྶཡམཱནུསྶཡཝསེན ཝིཝདམཱནཱ. ཏཏོཡེཝ ཨཊྚཾ ཀརོཏི སཱིལེནཱཏི ཨཊྚཀཱརཱི. ཨེཏྠ ཙ ‘‘ཨཊྚོ’’ཏི ཝོཧཱརིཀཝིནིཙྪཡོ ཝུཙྩཏི, ཡཾ པབྦཛིཏཱ ‘‘ཨདྷིཀརཎ’’ནྟིཔི ཝདནྟི. སབྦཏྠ ཝཏྟབྦེ མུཁམསྶཱ ཨཏྠཱིཏི མུཁརཱི, བཧུབྷཱཎཱིཏི ཨཏྠོ. ཡེན ཀེནཙི ནརེན སདྡྷིནྟི ‘‘གཧཔཏིནཱ ཝཱ གཧཔཏིཔུཏྟེན ཝཱ’’ཏིཨཱདིནཱ (པཱཙི. ༦༧༩) དསྶིཏེན ཡེན ཀེནཙི མནུསྶེན སདྡྷིཾ. ཨིདྷཱཏི ཨིམསྨིཾ སཱསནེ. ཀིརཱཏི པདཔཱུརཎེ, ཨནུསྶཝནེ ཝཱ.

༢༠༡༢. སཀྑིཾ ¶ ཝཱཏི པཙྩཀྑཏོ ཛཱནནཀཾ ཝཱ. ཨཊྚཾ ཀཱཏུཾ གཙྪནྟིཡཱ པདེ པདེ ཏཐཱ དུཀྐཊནྟི ཡོཛནཱ.

༢༠༡༣. ཝོཧཱརིཀེཏི ཝིནིཙྪཡཱམཙྩེ.

༢༠༡༤. ཨནནྟརནྟི ཏསྶ ཝཙནཱནནྟརཾ.

༢༠༡༥. ཨིཏརོཏི ཨཊྚཀཱརཀོ. པུབྦསདིསོཝ ཝིནིཙྪཡོཏི པཋམཱརོཙནེ དུཀྐཊཾ, དུཏིཡཱརོཙནེ ཐུལླཙྩཡནྟི ཝུཏྟཾ ཧོཏི.

༢༠༡༦. ‘‘ཏཝ, མམཱཔི ཙ ཀཐཾ ཏུཝམེཝ ཨཱརོཙེཧཱི’’ཏི ཨིཏརེན ཝུཏྟཱ བྷིཀྑུནཱིཏི ཡོཛནཱ. ཡཐཱཀཱམནྟི ཏསྶཱ ཙ ཨཏྟནོ ཙ ཝཙནེ ཡཾ པཋམཾ ཝཏྟུམིཙྪཏི, ཏཾ ཨིཙྪཱནུརཱུཔཾ ཨཱརོཙེཏུ.

༢༠༡༨-༩. ཨུབྷིནྣམྤི ཡཐཱ ཏཐཱ ཨཱརོཙིཏཀཐཾ སུཏྭཱཏི ཡོཛནཱ. ཡཐཱ ཏཐཱཏི པུབྦེ ཝུཏྟནཡེན ཀེནཙི པཀཱརེན. ཏེཧཱིཏི ཝོཧཱརིཀེཧི. ཨཊྚེ པན ཙ ནིཊྛིཏེཏི ཨཊྚཀཱརཀེསུ ཨེཀསྨིཾ པཀྑེ པརཱཛིཏེ. ཡཐཱཧ ‘‘པརཱཛིཏེ ཨཊྚཀཱརཀེ ཨཊྚཔརིཡོསཱནཾ ནཱམ ཧོཏཱི’’ཏི. ཨཊྚསྶ པརིཡོསཱནེཏི ཨེཏྠ ‘‘ཏསྶཱ’’ཏི སེསོ. ཏསྶ ཨཊྚསྶ པརིཡོསཱནེཏི ཡོཛནཱ.

༢༠༢༠-༢༣. ཨནཱཔཏྟིཝིསཡཾ ¶ དསྶེཏུམཱཧ ‘‘དཱུཏཾ ཝཱཔཱི’’ཏིཨཱདི. པཙྩཏྠིཀམནུསྶེཧི དཱུཏཾ ཝཱཔི པཧིཎིཏྭཱ སཡམྤི ཝཱ ཨཱགནྟྭཱ ཡཱ པན ཨཱཀཌྜྷཱིཡཏཱིཏི ཡོཛནཱ. ཨཉྙེཧཱིཏི གཱམདཱརཀཱདཱིཧི ཨཉྙེཧི. ཀིཉྩི པརཾ ཨནོདིསྶཱཏི ཡོཛནཱ. ཨིམིསྶཱ ཨོདིསྶ ཝུཏྟེ ཏེཧི གཧིཏདཎྜེ ཏསྶཱ ཙ གཱིཝཱཏི སཱུཙིཏཾ ཧོཏི. ཡཱ རཀྑཾ ཡཱཙཏི ¶ , ཏཏྠ ཏསྨིཾ རཀྑཱཡཱཙནེ ཏསྶཱ ཨནཱཔཏྟི པཀཱསིཏཱཏི ཡོཛནཱ. ཨཉྙཏོ སུཏྭཱཏི ཡོཛནཱ. ཨུམྨཏྟིཀཱདཱིནནྟི ཨེཏྠ ཨཱདི-སདྡེན ཨཱདིཀམྨིཀཱ གཧིཏཱ.

སམུཊྛཱནཾ ཀཐིནེན ཏུལྱནྟི ཡོཛནཱ. སེསཾ དསྶེཏུམཱཧ ‘‘སཀིརིཡཾ ཨིད’’ནྟི. ཨིདཾ སིཀྑཱཔདཾ. ཀིརིཡཱཡ སཧ ཝཏྟཏཱིཏི སཀིརིཡཾ ཨཊྚཀརཎེན ཨཱཔཛྫནཏོ. ‘‘སམུཊྛཱན’’ནྟི ཨིམིནཱ ཙ སམུཊྛཱནཱདིཝིནིཙྪཡོ ཨུཔལཀྑིཏོཏི དཊྛབྦོ.

ཨཊྚཀཱརིཀཱཀཐཱཝཎྞནཱ.

༢༠༢༤-༥. ཛཱནནྟཱིཏི ‘‘སཱམཾ ཝཱ ཛཱནཱཏི, ཨཉྙེ ཝཱ ཏསྶཱ ཨཱརོཙེནྟཱི’’ཏི (པཱཙི. ༦༨༤) ཝུཏྟནཡེན ཛཱནནྟཱི. ཙོརིནྟི ཡཱཡ པཉྩམཱསགྒྷནཀཏོ པཊྛཱཡ ཡཾ ཀིཉྩི པརསནྟཀཾ ཨཝཧརིཏཾ, ཨཡཾ ཙོརཱི ནཱམ. ཝཛ྄ཛྷཾ ཝིདིཏནྟི ‘‘ཏེན ཀམྨེན ཝདྷཱརཧཱ ཨཡ’’ནྟི ཨེཝཾ ཝིདིཏཾ. སངྒྷནྟི བྷིཀྑུནིསངྒྷཾ. ཨནཔལོཀེཏྭཱཏི ཨནཱཔུཙྪཱ. རཱཛཱནཾ ཝཱཏི རཉྙཱ ཨནུསཱསིཏབྦཊྛཱནེ ཏཾ རཱཛཱནཾ ཝཱ. ཡཐཱཧ ‘‘རཱཛཱ ནཱམ ཡཏྠ རཱཛཱ ཨནུསཱསཏི, རཱཛཱ ཨཔལོཀེཏབྦོ’’ཏི. གཎམེཝ ཝཱཏི ‘‘ཏུམྷེཝ ཏཏྠ ཨནུསཱསཐཱ’’ཏི རཱཛཱུཧི དིནྣཾ གཱམནིགམམལླགཎཱདིཀཾ གཎཾ ཝཱ. མལླགཎཾ ནཱམ པཱནཱིཡཊྛཔནཔོཀྑརཎིཁཎནཱདིཔུཉྙཀམྨནིཡུཏྟོ ཛནསམཱུཧོ. ཨེཏེནེཝ ཨེཝམེཝ དིནྣགཱམཝརཱ པཱུགཱ ཙ སེནིཡོ ཙ སངྒཧིཏཱ. ཝུཊྛཱཔེཡྻཱཏི ཨུཔསམྤཱདེཡྻ. ཀཔྤནྟི ཙ ཝཀྑམཱནལཀྑཎཾ ཀཔྤཾ. སཱ ཙོརིཝུཊྛཱཔནནྟི སམྦནྡྷོ. ཨུཔཛ྄ཛྷཱཡཱ ཧུཏྭཱ ཡཱ ཙོརིཾ ཨུཔསམྤཱདེཏི, སཱ བྷིཀྑུནཱིཏི ཨཏྠོ. ཨུཔཛ྄ཛྷཱཡསྶ བྷིཀྑུསྶ དུཀྐཊཾ.

༢༠༢༦. པཉྩམཱསགྒྷནནྟི ཨེཏྠ པཉྩམཱསཉྩ པཉྩམཱསགྒྷནཀཉྩ པཉྩམཱསགྒྷནནྟི ཨེཀདེསསརཱུཔེཀསེསནཡེན པཉྩམཱསསྶཱཔི ¶ གཧཎཾ. ཨཏིརེཀགྒྷནཾ ཝཱཔཱིཏི ཨེཏྠཱཔི ཨེསེཝ ནཡོ.

༢༠༢༧. པབྦཛིཏཾ ¶ པུབྦཾ ཡཱཡ སཱ པབྦཛིཏཔུབྦཱ. ཝུཏྟཔྤཀཱརཾ ཙོརཀམྨཾ ཀཏྭཱཔི ཏིཏྠཱཡཏནཱདཱིསུ ཡཱ པཋམཾ པབྦཛིཏཱཏི ཨཏྠོ.

༢༠༢༨-༣༠. ཨིདཱནི པུབྦཔཡོགདུཀྐཊཱདིཨཱཔཏྟིཝིབྷཱགཾ དསྶེཏུམཱཧ ‘‘ཝུཊྛཱཔེཏི ཙ ཡཱ ཙོརི’’ནྟིཨཱདི. ཨིདྷ ‘‘ཨུཔཛ྄ཛྷཱཡཱ ཧུཏྭཱ’’ཏི སེསོ. ཨིདཾ ཀཔྤཾ ཋཔེཏྭཱཏི ཡོཛནཱ. སཱིམཾ སམྨནྣཏི ཙཱཏི ཨབྷིནཝཾ སཱིམཾ སམྨནྣཏི, བནྡྷཏཱིཏི ཝུཏྟཾ ཧོཏི. ཨསྶཱཏི བྷཝེཡྻ. ‘‘དུཀྐཊ’’ནྟི ཨིམིནཱ ཙ ‘‘ཐུལླཙྩཡཾ དྭཡ’’ནྟི ཨིམིནཱ ཙ ཡོཛེཏབྦཾ.

ཀམྨནྟེཏི ཨུཔསམྤདཀམྨསྶ པརིཡོསཱནེ, ཏཏིཡཱཡ ཀམྨཝཱཙཱཡ ཡྻཀཱརཔྤཏྟཱཡཱཏི ཝུཏྟཾ ཧོཏི.

༢༠༣༡. ཨཛཱནནྟཱིཏི ཙོརིཾ ཨཛཱནནྟཱི. (ཨིདཾ སིཀྑཱཔདཾ.)

༢༠༣༢. ཙོརིཝུཊྛཱཔནཾ ནཱམཱཏི ཨིདཾ སིཀྑཱཔདཾ ཙོརིཝུཊྛཱཔནསམུཊྛཱནཾ ནཱམ. ཝཱཙཙིཏྟཏོཏི ཁཎྜསཱིམཾ ཨགནྟྭཱ ཀརོནྟིཡཱ ཝཱཙཱཙིཏྟེཧི. ཀཱཡཝཱཙཱདིཏོ ཙེཝཱཏི གནྟྭཱ ཀརོནྟིཡཱ ཀཱཡཝཱཙཱཙིཏྟཏོ ཙ སམུཊྛཱཏི. ཡཐཱཧ ‘‘ཀེནཙིདེཝ ཀརཎཱིཡེན པཀྐནྟཱསུ བྷིཀྑུནཱིསུ ཨགནྟྭཱ ཁཎྜསཱིམཾ ཝཱ ནདིཾ ཝཱ ཡཐཱནིསིནྣཊྛཱནེཡེཝ ཨཏྟནོ ནིསྶིཏཀཔརིསཱཡ སདྡྷིཾ ཝུཊྛཱཔེནྟིཡཱ ཝཱཙཱཙིཏྟཏོ སམུཊྛཱཏི, ཁཎྜསཱིམཾ ཝཱ ནདིཾ ཝཱ གནྟྭཱ ཝུཊྛཱཔེནྟིཡཱ ¶ ཀཱཡཝཱཙཱཙིཏྟཏོ སམུཊྛཱཏཱི’’ཏི (པཱཙི. ཨཊྛ. ༦༨༣). ཀྲིཡཱཀྲིཡནྟི ཨནཱཔུཙྪཱཝུཊྛཱཔནཝསེན ཀིརིཡཱཀིརིཡཾ.

ཙོརིཝུཊྛཱཔནཀཐཱཝཎྞནཱ.

༢༠༣༣-༤. གཱམནྟརནྟི ཨཉྙཾ གཱམཾ. ཡཱ ཨེཀཱ སཙེ གཙྪེཡྻཱཏི སམྦནྡྷོ. ནདཱིཔཱརནྟི ཨེཏྠཱཔི ཨེསེཝ ནཡོ. ནདིཡཱ པཱརཾ ནདཱིཔཱརཾ. ‘‘ཨེཀཱ ཝཱ’’ཏི ཨུཔརིཔི ཡོཛེཏབྦཾ. ཨོཧཱིཡེཡྻཱཏི ཝིནཱ བྷཝེཡྻ. ཨིདྷ ‘‘ཨརཉྙེ’’ཏི སེསོ. ཨརཉྙལཀྑཎཾ ‘‘ཨིནྡཁཱིལ’’ཨིཙྩཱདིནཱ ཝཀྑཏི. ‘‘ཨེཀཱ ཝཱ རཏྟིཾ ཝིཔྤཝསེཡྻ, ཨེཀཱ ཝཱ གཎམྷཱ ཨོཧཱིཡེཡྻཱ’’ཏི སིཀྑཱཔདཀྐམོ, ཨེཝཾ སནྟེཔི གཱཐཱབནྡྷཝསེན ‘‘རཏྟིཾ ཝིཔྤཝསེཡྻཱ’’ཏི ཨནྟེ ཝུཏྟཾ ¶ . ཏེནེཝ ཝིབྷཱགཝིནིཙྪཡེ དེསནཱརུལ༹ྷཀྐམེནེཝ ‘‘པུརེརུཎོདཡཱཡེཝཱ’’ཏིཨཱདིཾ ཝཀྑཏི. སཱ པཋམཱཔཏྟིཀཾ གརུཀཾ དྷམྨཾ ཨཱཔནྣཱ སིཡཱཏི ཡོཛནཱ. པཋམཾ ཨཱཔཏྟི ཨེཏསྶཱཏི པཋམཱཔཏྟིཀོ, ཝཱིཏིཀྐམཀྑཎེཡེཝ ཨཱཔཛྫིཏབྦོཏི ཨཏྠོ. ‘‘གརུཀཾ དྷམྨ’’ནྟི ཨིམིནཱ སམྦནྡྷོ. སཀགཱམཱ ནིཀྑམནྟིཡཱཏི བྷིཀྑུནིཡཱ ཨཏྟནོ ཝསནགཱམཏོ ནིཀྑམནྟིཡཱ.

༢༠༣༥. ཏཏོ སཀགཱམཏོ.

༢༠༣༦-༧. ཨེཀེན པདཝཱརེན ཨིཏརསྶ གཱམསྶ པརིཀྑེཔེ ཨཏིཀྐནྟེ, ཨུཔཙཱརོཀྐམེ ཝཱ ཐུལླཙྩཡནྟི ཡོཛནཱ. ཨཏིཀྐནྟེ ཨོཀྐནྟེཏི ཨེཏྠ ‘‘པརིཀྑེཔེ ཨུཔཙཱརེ’’ཏི ཨདྷིཀཱརཏོ ལབྦྷཏི.

༢༠༣༨-༩. ནིཀྑམིཏྭཱཏི ཨཏྟནོ པཝིཊྛགཱམཏོ ནིཀྑམིཏྭཱ. ཨཡམེཝ ནཡོཏི ‘‘ཨེཀེན པདཝཱརེན ཐུལླཙྩཡཾ, དུཏིཡེན གརུཀཱཔཏྟཱི’’ཏི ཨཡཾ ནཡོ.

ཝཏིཙྪིདྡེན ¶ ཝཱ ཁཎྜཔཱཀཱརེན ཝཱཏི ཡོཛནཱ. ‘‘ཏཐཱ’’ཏི ཨིམིནཱ ‘‘པཱཀཱརེནཱ’’ཏི ཨེཏྠཱཔི ཝཱ-སདྡསྶ སམྦནྡྷནཱིཡཏཾ དསྶེཏི. ‘‘བྷིཀྑུཝིཧཱརསྶ བྷཱུམི ཏཱསམཀཔྤིཡཱ’’ཏི ཝཀྑམཱནཏྟཱ ཝིཧཱརསྶ བྷཱུམིནྟི བྷིཀྑུནིཝིཧཱརབྷཱུམི གཧིཏཱ. ‘‘ཀཔྤིཡནྟི པཝིཊྛཏྟཱ’’ཏི ཨིམིནཱ ཝཀྑམཱནསྶ ཀཱརཎཾ དསྶེཏི. ཀོཙི དོསོཏི ཐུལླཙྩཡསངྒྷཱདིསེསོ ཝུཙྩམཱནོ ཡོ ཀོཙི དོསོ.

༢༠༤༠. ཏཱསནྟི བྷིཀྑུནཱིནཾ. ‘‘ཨཀཔྤིཡཱ’’ཏི ཨིམིནཱ ཏཏྠཱཔི པཝིཊྛཱཡ གཱམནྟརཔཙྩཡཱ ཨཱཔཏྟིསམྦྷཝམཱཧ.

༢༠༤༡. ‘‘པཋམཾ པཱདཾ ཨཏིཀྐཱམེནྟིཡཱ’’ཏི (པཱཙི. ༦༩༢) ཝུཏྟཏྟཱ ‘‘ཧཏྠི…པེ… ཨནཱཔཏྟི སིཡཱཔཏྟི, པདསཱ གམནེ པནཱ’’ཏི ཝུཏྟཾ.

༢༠༤༢. ‘‘ཡཾ ཀིཉྩི…པེ… ཨཱཔཏྟི པཝིསནྟིཡཱ’’ཏི ཝུཏྟསྶེཝཏྠསྶ ཨུཔསཾཧཱརཏྟཱ ན པུནརུཏྟིདོསོ.

༢༠༤༣-༤. ལཀྑཎེནུཔཔནྣཱཡཱཏི ¶ ‘‘ནདཱི ནཱམ ཏིམཎྜལཾ པཊིཙྪཱདེཏྭཱ ཡཏྠ ཀཏྠཙི ཨུཏྟརནྟིཡཱ བྷིཀྑུནིཡཱ ཨནྟརཝཱསཀོ ཏེམིཡཏཱི’’ཏི (པཱཙི. ༦༩༢) ཝུཏྟལཀྑཎེན སམནྣཱགཏཱཡ ནདིཡཱ. ཡཱ པཱརཾ ཏཱིརཾ གཙྪཏཱིཏི ཡོཛནཱ.

པཋམཾ པཱདཾ ཨུདྡྷརིཏྭཱན ཏཱིརེ ཋཔེནྟིཡཱཏི ‘‘ཨིདཱནི པདཝཱརེན ཨཏིཀྐམཏཱི’’ཏི ཝཏྟབྦཀཱལེ པཋམཾ པཱདཾ ཨུཀྑིཔིཏྭཱ པརཏཱིརེ ཋཔེནྟིཡཱ. ‘‘དུཏིཡཔཱདུདྡྷཱརེ སངྒྷཱདིསེསོ’’ཏི (པཱཙི. ཨཊྛ. ༦༩༢) ཨཊྛཀཐཱཝཙནཏོ ‘‘ཨཏིཀྐམེ’’ཏི ཨིམིནཱ ཨུདྡྷཱརོ གཧིཏོ.

༢༠༤༥. ཨནྟརནདིཡནྟི ནདིཝེམཛ྄ཛྷེ. བྷཎྜིཏྭཱཏི ཀལཧཾ ཀཏྭཱ. ཨོརིམཾ ཏཱིརནྟི ཨཱགཏདིསཱཡ ཏཱིརཾ. ཏཐཱ པཋམེ ཐུལླཙྩཡཾ ¶ , དུཏིཡེ གརུ ཧོཏཱིཏི ཨཏྠོ. ཨིམིནཱ སཀལེན ཝཙནེན ‘‘ཨིཏརིསྶཱ པན ཨཡཾ པཀྐནྟཊྛཱནེ ཋིཏཱ ཧོཏི, ཏསྨཱ པརཏཱིརཾ གཙྪནྟིཡཱཔི ཨནཱཔཏྟཱི’’ཏི ཨཊྛཀཐཱཔི ཨུལླིངྒིཏཱ.

༢༠༤༦. རཛྫུཡཱཏི ཝལླིཨཱདིཀཱཡ ཡཱཡ ཀཱཡཙི རཛྫུཡཱ.

༢༠༤༧. པིཝིཏུནྟི ཨེཏྠ ‘‘པཱནཱིཡ’’ནྟི པཀརཎཏོ ལབྦྷཏི. ཨཝུཏྟསམུཙྩཡཏྠེན ཨཔི-སདྡེན བྷཎྜདྷོཝནཱདིཾ སངྒཎྷཱཏི. ཨཐཱཏི ཝཱཀྱཱརམྦྷེ ནིཔཱཏོ. ‘‘ནཧཱནཱདིཀིཙྩཾ སམྤཱདེཏྭཱ ཨོརིམམེཝ ཏཱིརཾ ཨཱགམིསྶཱམཱི’’ཏི ཨཱལཡསྶ ཝིཛྫམཱནཏྟཱ ཨཱཧ ‘‘ཝཊྚཏཱི’’ཏི.

༢༠༤༨. པདསཱནདིཾ ཨོཏརིཏྭཱནཱཏི ཡོཛནཱ. སེཏུཾ ཨཱརོཧིཏྭཱ ཏཐཱ པདསཱ ཨུཏྟརནྟིཡཱ ཨནཱཔཏྟཱིཏི ཡོཛནཱ.

༢༠༤༩. གནྟྭཱནཱཏི ཨེཏྠ ‘‘ནདི’’ནྟི སེསོ. ཨུཏྟརཎཀཱལེ པདསཱ ཡཱཏཱིཏི ཡོཛནཱ.

༢༠༥༠. ཝེགེནཱཏི ཨེཀེནེཝ ཝེགེན, ཨནྟརཱ ཨནིཝཏྟིཏྭཱཏི ཨཏྠོ.

༢༠༥༡. ‘‘ནིསཱིདིཏྭཱ’’ཏི ཨིདཾ ‘‘ཁནྡྷེ ཝཱ’’ཏིཨཱདཱིཧིཔི ཡོཛེཏབྦཾ. ཁནྡྷཱདཡོ ཙེཏྠ སབྷཱགཱནམེཝ གཧེཏབྦཱ. ཧཏྠསངྒྷཱཏནེ ཝཱཏི ཨུབྷོཧི བདྡྷཧཏྠཝལཡེ ཝཱ.

༢༠༥༢-༣. པཱསནྟི ¶ ཧཏྠཔཱསཾ. ‘‘ཨཱབྷོགཾ ཝིནཱ’’ཏི ཨིམིནཱ ‘‘གམིསྶཱམཱི’’ཏི ཨཱབྷོགེ ཀཏེ ཨཛཱནནྟིཡཱ ཨརུཎེ ¶ ཨུཊྛིཏེཔི ཨནཱཔཏྟཱིཏི དཱིཔིཏཾ ཧོཏི. ཡཐཱཧ ‘‘སཙེ སཛ྄ཛྷཱཡཾ ཝཱ སཝནཾ ཝཱ ཨཉྙཾ ཝཱ ཀིཉྩི ཀམྨཾ ཀུརུམཱནཱ ‘པུརེཨརུཎེཡེཝ དུཏིཡིཀཱཡ སནྟིཀཾ གམིསྶཱམཱི’ཏི ཨཱབྷོགཾ ཀརོཏི, ཨཛཱནནྟིཡཱ ཨེཝ ཙསྶཱ ཨརུཎོ ཨུགྒཙྪཏི, ཨནཱཔཏྟཱི’’ཏི (པཱཙི. ཨཊྛ. ༦༩༢). ནཱནཱགབྦྷེ ཝཏྟབྦམེཝ ནཏྠཱིཏི དསྶེཏུམཱཧ ‘‘ཨེཀགབྦྷེཔི ཝཱ’’ཏི. ཨེཀགབྦྷེཔི ཝཱ དུཏིཡིཀཱཡ ཧཏྠཔཱསཾ ཨཏིཀྐམྨ ཨརུཎཾ ཨུཊྛཔེནྟིཡཱ བྷིཀྑུནིཡཱ ཨཱཔཏྟི སིཡཱཏི ཡོཛནཱ.

༢༠༥༤. དུཏིཡཱཔཱསནྟི དུཏིཡིཀཱཡ ཧཏྠཔཱསཾ. ‘‘གམིསྶཱམཱི’’ཏི ཨཱབྷོགཾ ཀཏྭཱ གཙྪནྟིཡཱ སཙེ ཨརུཎཾ ཨུཊྛེཏི, ན དོསོཏི ཡོཛནཱ.

༢༠༥༥-༦. ཨཉྙཏྠ པཉྩདྷནུསཏིཀསྶ (པཱརཱ. ༦༥༤) པཙྪིམསྶ ཨཱརཉྙཀསེནཱསནསྶ ཝུཏྟཏྟཱ ཏཏོ ནིཝཏྟེཏུམཱཧ ‘‘ཨིནྡཁཱིལམཏིཀྐམྨཱ’’ཏིཨཱདི. ཨེཏྠཱཏི ཨིམསྨིཾ སིཀྑཱཔདེ. དཱིཔིཏནྟི ཨཊྛཀཐཱཡ ‘‘ཨརཉྙེཏི ཨེཏྠ ནིཀྑམིཏྭཱ བཧི ཨིནྡཁཱིལཱ སབྦམེཏཾ ཨརཉྙ’’ནྟི (པཱཙི. ཨཊྛ. ༦༩༢) ཨེཝཾ ཝུཏྟལཀྑཎམེཝ ཨརཉྙཾ དསྶིཏནྟི ཨཏྠོ.

དུཏིཡིཀཱཡ དསྶནཱུཔཙཱརཾ ཝིཛཧནྟིཡཱ ཏསྶཱཏི ཡོཛནཱ. ‘‘ཛཧིཏེ’’ཏི ཨིདཾ ཨཔེཀྑིཏྭཱ ‘‘ཨུཔཙཱརེ’’ཏི ཝིབྷཏྟིཝིཔརིཎཱམོ ཀཱཏབྦོ.

༢༠༥༧. སཱཎིཔཱཀཱརཔཱཀཱརཏརུཨནྟརིཏེ ཋཱནེ ཨསཏི དསྶནཱུཔཙཱརེ སཏིཔི སཝནཱུཔཙཱརེ ཨཱཔཏྟི ཧོཏཱིཏི ཡོཛནཱ.

༢༠༥༨-༦༠. ཨེཏྠ ཀཐནྟི ཡཏྠ དཱུརེཔི དསྶནཾ ཧོཏི, ཨེཝརཱུཔེ ཨཛ྄ཛྷོཀཱསེ ཨཱཔཏྟིནིཡམོ ཀཐཾ ཀཱཏབྦོཏི ¶ ཨཏྠོ. ཨནེཀེསུ ཋཱནེསུ ‘‘སཝནཱུཔཙཱརཱཏིཀྐམེ’’ཏི ཝུཙྩམཱནཏྟཱ ཏཏྠ ལཀྑཎཾ ཋཔེཏུམཱཧ ‘‘མགྒ…པེ… ཨེཝརཱུཔཀེ’’ཏི. ཨེཏྠ ‘‘ཋཱནེ’’ཏི སེསོ. ཀཱུཛནྟིཡཱཏི ཡཐཱཝཎྞཝཝཏྠཱནཾ ན ཧོཏི, ཨེཝཾ ཨབྱཏྟསདྡཾ ཀརོནྟིཡཱ.

ཨེཝརཱུཔཀེ ཋཱནེ དྷམྨསྶཝནཱརོཙནེ ཝིཡ ཙ མགྒམཱུལ༹ྷསྶ སདྡེན ཝིཡ ཙ ‘‘ཨཡྻེ’’ཏི ཀཱུཛནྟིཡཱ ¶ ཏསྶཱ སདྡསྶ སཝནཱཏིཀྐམེ བྷིཀྑུནིཡཱ གརུཀཱ ཨཱཔཏྟི ཧོཏཱིཏི ཡོཛནཱ. ‘‘བྷིཀྑུནིཡཱ གརུཀཱ ཧོཏཱི’’ཏི ཨིདཾ ‘‘དུཏིཡིཀཾ ན པཱཔུཎིསྶཱམཱི’’ཏི ནིརུསྶཱཧཝསེན ཝེདིཏབྦཾ. ཏེནེཝ ཝཀྑཏི ‘‘ཨོཧཱིཡིཏྭཱཐ གཙྪནྟཱི’’ཏིཨཱདི. ཨེཏྠཱཏི ‘‘གཎམྷཱ ཨོཧཱིཡེཡྻཱ’’ཏི ཨིམསྨིཾ.

༢༠༦༡. ཨཐ གཙྪནྟཱི ཨོཧཱིཡིཏྭཱཏི ཡོཛནཱ. ‘‘ཨིདཱནི ཨཧཾ པཱཔུཎིསྶཱམི’’ ཨིཏི ཨེཝཾ སཨུསྶཱཧཱ ཨནུབནྡྷཏི, ཝཊྚཏི, དུཏིཡོཔཙཱརཱཏིཀྐམེཔི ཨནཱཔཏྟཱིཏི ཝུཏྟཾ ཧོཏི.

༢༠༦༢. ‘‘གཙྪཏུ ཨཡཾ’’ ཨིཏི ཨུསྶཱཧསྶཙྪེདཾ ཀཏྭཱ ཨོཧཱིནཱ ཙེ, ཏསྶཱ ཨཱཔཏྟཱིཏི ཨཛ྄ཛྷཱཧཱརཡོཛནཱ.

༢༠༦༣. ཨིཏརཱཔཱིཏི གནྟུཾ སམཏྠཱཔི. ཨོཧཱིཡཏུ ཨཡནྟི ཙཱཏི ནིརུསྶཱཧཔྤཀཱརོ སནྡསྶིཏོ. ཝུཏྟཏྠམེཝ སམཏྠཡིཏུམཱཧ ‘‘སཨུསྶཱཧཱ ན ཧོཏི ཙེ’’ཏི.

༢༠༦༤-༥. པུརིམཱ ཨེཀཀཾ མགྒཾ ཡཱཏཱིཏི ཡོཛནཱ. ཨེཀམེཝ ཨེཀཀཾ. ཏསྨཱཏི ཡསྨཱ ཨེཀིསྶཱ ཨིཏརཱ པཀྐནྟཊྛཱནེ ཏིཊྛཏི, ཏསྨཱ. ཏཏྠཱཏི ཏསྨིཾ གཎམྷཱཨོཧཱིཡནེ. པི-སདྡོ ཨེཝཀཱརཏྠོ. ཨནཱཔཏྟི ཨེཝ པཀཱསིཏཱཏི ཡོཛནཱ.

༢༠༦༦-༧. གཱམནྟརགཏཱཡཱཏི གཱམསཱིམགཏཱཡ. ‘‘ནདིཡཱ’’ཏི ཨིམིནཱ སམྦནྡྷོ. ཨཱཔཏྟིཡོཙཏསྶོཔཱིཏི རཏྟིཝིཔྤཝཱས གཱམནྟརགམན ནདིཔཱརགམན གཎམྷཱཨོཧཱིཡན སངྑཱཏཱ ཙཏསྶོ ¶ སངྒྷཱདིསེསཱཔཏྟིཡོ. གཎམྷཱཨོཧཱིཡནམཱུལཀཱཔཏྟིཡཱ གཱམཏོ བཧི ཨཱཔཛྫིཏབྦཏྟེཔི གཱམནྟརོཀྐམནམཱུལཀཱཔཏྟིཡཱ ཨནྟོགཱམེ ཨཱཔཛྫིཏབྦཏྟེཔི ཨེཀཀྑཎེཏི གཱམཱུཔཙཱརཾ སནྡྷཱཡཱཧ.

༢༠༦༨-༩. ཡཱ སདྡྷིཾ ཡཱཏཱ དུཏིཡིཀཱ, སཱ ཙ པཀྐནྟཱ ཝཱ སཙེ ཧོཏི, ཝིབྦྷནྟཱ ཝཱ ཧོཏི, པེཏཱནཾ ལོཀཾ ཡཱཏཱ ཝཱ ཧོཏི, ཀཱལཀཏཱ ཝཱ ཧོཏཱིཏི ཨདྷིཔྤཱཡོ, པཀྑསངྐནྟཱ ཝཱ ཧོཏི, ཏིཏྠཱཡཏནསངྐནྟཱ ཝཱ ཧོཏཱིཏི ཨདྷིཔྤཱཡོ, ནཊྛཱ ཝཱ ཧོཏི, པཱརཱཛིཀཱཔནྣཱ ཝཱ ཧོཏཱིཏི ¶ ཨདྷིཔྤཱཡོ. ཨེཝརཱུཔེ ཀཱལེ གཱམནྟརོཀྐམནཱདཱིནི…པེ… ཨནཱཔཏྟཱིཏི ཉཱཏབྦནྟི ཡོཛནཱ. ཨུམྨཏྟིཀཱཡཔི ཨེཝཾ ཙཏྟཱརིཔི ཀརོནྟིཡཱ ཨནཱཔཏྟཱིཏི ཡོཛནཱ.

༢༠༧༠. ‘‘ཨགཱམཀེ ཨརཉྙེ’’ཏི ཨིདཾ གཱམཱབྷཱཝེན ཝུཏྟཾ, ན ཝིཉྫྷཱཊཝིསདིསཏཱཡ.

༢༠༧༡. གཱམབྷཱཝཏོ ནདིཔཱརགམནགཎམྷཱཨོཧཱིཡནཱཔཏྟི ན སམྦྷཝཏི, ཏསྶཱཔི སཀགཱམཏྟཱ གཱམནྟརགམནམཱུལིཀཱཔཏྟི ཙ དིཝསབྷཱགཏྟཱ རཏྟིཝིཔྤཝཱསམཱུལིཀཱཔཏྟི ཙ ན སམྦྷཝཏཱིཏི ཨཱཧ ‘‘སཀགཱམེ…པེ… ན ཝིཛྫརེ’’ཏི. ཡཐཱཀཱམནྟི ཡཐིཙྪིཏཾ, དུཏིཡིཀཱཡ ཨསནྟིཡཱཔཱིཏི ཨཏྠོ.

༢༠༧༢. སམུཊྛཱནཱདཡོ པཋམནྟིམཝཏྠུནཱ ཏུལྱཱཏི ཡོཛནཱ.

གཱམནྟརགམནཀཐཱཝཎྞནཱ.

༢༠༧༣. སཱིམཱསམྨུཏིཡཱ ཙེཝཱཏི ‘‘སམགྒེན སངྒྷེན དྷམྨེན ཝིནཡེན ཨུཀྑིཏྟཾ བྷིཀྑུནིཾ ཀཱརཀསངྒྷཾ ཨནཱཔུཙྪཱ ཏསྶེཝ ཀཱརཀསངྒྷསྶ ཚནྡཾ ཨཛཱནིཏྭཱ ཨོསཱརེསྶཱམཱི’’ཏི ནཝསཱིམཱསམྨནྣནེ ཙ. དྭཱིཧི ཀམྨཝཱཙཱཧི དུཝེ ཐུལླཙྩཡཱ ཧོནྟཱིཏི ཡོཛནཱ.

༢༠༧༤. ཀམྨསྶ ¶ པརིཡོསཱནེཏི ཨོསཱརཎཀམྨསྶ ཨཝསཱནེ. ཏིཀསངྒྷཱདིསེསནྟི ‘‘དྷམྨཀམྨེ དྷམྨཀམྨསཉྙཱ ཨོསཱརེཏི, ཨཱཔཏྟི སངྒྷཱདིསེསསྶ. དྷམྨཀམྨེ ཝེམཏིཀཱ, དྷམྨཀམྨེ ཨདྷམྨཀམྨསཉྙཱ ཨོསཱརེཏི, ཨཱཔཏྟི སངྒྷཱདིསེསསྶཱ’’ཏི (པཱཙི. ༦༩༧) ཏིཀསངྒྷཱདིསེསཾ ཝུཏྟཾ. ཀམྨནྟི ཙ ཨུཀྑེཔནཱིཡཀམྨཾ. ཨདྷམྨེ ཏིཀདུཀྐཊནྟི ‘‘ཨདྷམྨཀམྨེ དྷམྨཀམྨསཉྙཱ ཨོསཱརེཏི, ཨཱཔཏྟི དུཀྐཊསྶ. ཨདྷམྨཀམྨེ ཝེམཏིཀཱ, ཨདྷམྨཀམྨསཉྙཱ ཨོསཱརེཏི, ཨཱཔཏྟི དུཀྐཊསྶཱ’’ཏི ཏིཀདུཀྐཊཾ ཝུཏྟཾ.

༢༠༧༥. གཎསྶཱཏི ཏསྶེཝ ཀཱརཀགཎསྶ. ཝཏྟེ ཝཱ པན ཝཏྟནྟིནྟི ཏེཙཏྟཱལཱིསཔྤབྷེདེ ནེཏྟཱརཝཏྟེ ཝཏྟམཱནཾ. ཏེཙཏྟཱལཱིསཔྤབྷེདཾ པན ཝཏྟཀྑནྡྷཀེ (ཙཱུལ༹ཝ. ༣༧༦) ཨཱཝི བྷཝིསྶཏི. ནེཏྟཱརཝཏྟེཏི ཀམྨཏོ ནིཏྠརཎསྶ ཧེཏུབྷཱུཏེ ཝཏྟེ.

༢༠༧༧. ཨོསཱརཎཾ ¶ ཀྲིཡཾ. ཨནཱཔུཙྪནཾ ཨཀྲིཡཾ.

ཙཏུཏྠཾ.

༢༠༧༨-༩. ཨཝསྶུཏཱཏི མེཐུནརཱགེན ཏིནྟཱ. ཨེཝམུཔརིཔི. ‘‘མནུསྶཔུགྒལསྶཱ’’ཏི ཨིམིནཱ ཡཀྑཱདཱིནཾ པཊིཀྑེཔོ. ‘‘ཨུདཀེ…པེ… དུཀྐཊ’’ནྟི ཝཀྑམཱནཏྟཱ ཨཱམིསནྟི ཨཉྙཏྲ དནྟཔོནཱ ཨཛ྄ཛྷོཧརཎཱིཡསྶ གཧཎཾ. པཡོགཏོཏི པཡོགགཎནཱཡ.

༢༠༨༠. ཨེཀཏོཝསྶུཏེཏི པུམིཏྠིཡཱ སཱམཉྙེན པུལླིངྒནིདྡེསོ. ཀཐམེཏཾ ཝིཉྙཱཡཏཱིཏི? ‘‘ཨེཀཏོཨཝསྶུཏེཏི ཨེཏྠ བྷིཀྑུནིཡཱ ཨཝསྶུཏབྷཱཝོ དཊྛབྦོཏི མཧཱཔཙྩརིཡཾ ཝུཏྟཾ. མཧཱཨཊྛཀཐཱཡཾ པནེཏཾ ན ཝུཏྟཾ, ཏཾ ¶ པཱལི༹ཡཱ སམེཏཱི’’ཏི (པཱཙི. ཨཊྛ. ༧༠༡) ཝུཏྟཏྟཱ ཝིཉྙཱཡཏི. ཨེཏྠ ཙ ཨེཏཾ ན ཝུཏྟནྟི ‘‘བྷིཀྑུནིཡཱ ཨཝསྶུཏབྷཱཝོ དཊྛབྦོ’’ཏི ཨེཏཾ ནིཡམནཾ ན ཝུཏྟཾ. ཏནྟི ཏཾ ནིཡམེཏྭཱ ཨཝཙནཾ. པཱལི༹ཡཱ སམེཏཱིཏི ‘‘ཨེཀཏོཨཝསྶུཏེ’’ཏི (པཱཙི. ༧༠༡-༧༠༢) ཨཝིསེསེཏྭཱ ཝུཏྟཔཱལི༹ཡཱ, ‘‘ཨནཝསྶུཏོཏི ཛཱནནྟཱི པཊིགྒཎྷཱཏཱི’’ཏི (པཱཙི. ༧༠༣) ཨིམཱཡ ཙ པཱལི༹ཡཱ སམེཏི. ཡདི ཧི པུགྒལསྶ ཨཝསྶུཏབྷཱཝོ ནཔྤམཱཎཾ, ཀིཾ ‘‘ཨནཝསྶུཏོཏི ཛཱནནྟཱི’’ཏི ཨིམིནཱ ཝཙནེན. ‘‘ཨནཱཔཏྟི ཨུབྷོ ཨནཝསྶུཏཱ ཧོནྟི, ཨནཝསྶུཏཱ པཊིགྒཎྷཱཏཱི’’ཏི ཨེཏྟཀམེཝ ཝཏྟབྦཾ སིཡཱ. ཨཛ྄ཛྷོཧཱརཔཡོགེསུ བཧཱུསུ ཐུལླཙྩཡཙཡོ ཐུལླཙྩཡཱནཾ སམཱུཧོ སིཡཱ, པཡོགགཎནཱཡ བཧཱུནི ཐུལླཙྩཡཱནི ཧོནྟཱིཏི ཨདྷིཔྤཱཡོ.

༢༠༨༡. སམྦྷཝེ, བྱབྷིཙཱརེ ཙ ཝིསེསནཾ སཱཏྠཀཾ བྷཝཏཱིཏི ‘‘མནུསྶཝིགྒཧཱན’’ནྟི ཨིདཾ ཝིསེསནཾ ཡཀྑཔེཏཏིརཙྪཱནཔདེཧི ཡོཛེཏབྦཾ. ཨུབྷཏོཨཝསྶུཏེ སཏི མནུསྶཝིགྒཧཱནཾ ཡཀྑཔེཏཏིརཙྪཱནཱནཾ ཧཏྠཏོ ཙ པཎྜཀཱནཾ ཧཏྠཏོ ཙ ཏཐཱཏི ཡོཛནཱ. ཏཐཱ-སདྡེནེཏྠ ‘‘ཡཾ ཀིཉྩི ཨཱམིསཾ པཊིགྒཎྷཱཏི, དུཀྐཊཾ. ཨཛ྄ཛྷོཧཱརཔཡོགེསུ ཐུལླཙྩཡཙཡོ སིཡཱ’’ཏི ཡཐཱཝུཏྟམཏིདིསཏི.

༢༠༨༢. ཨེཏྠཱཏི ཨིམེསུ ཡཀྑཱདཱིསུ. ཨེཀཏོཨཝསྶུཏེ སཏི ཨཱམིསཾ པཊིགྒཎྷནྟིཡཱ དུཀྐཊཾ. སབྦཏྠཱཏི སབྦེསུ མནུསྶཱམནུསྶེསུ ཨེཀཏོ, ཨུབྷཏོ ཝཱ ཨནཝསྶུཏེསུ. ཨུདཀེ དནྟཀཊྛཀེཏི ¶ ཨུདཀསྶ, དནྟཀཊྛསྶ ཙ གཧཎེ. པརིབྷོགེ ཙཱཏི པཊིགྒཧཎེ ཙེཝ པརིབྷོགེ ཙ.

༢༠༨༣-༤. ཨུབྷཡཱཝསྶུཏཱབྷཱཝེཏི བྷིཀྑུནིཡཱ, པུགྒལསྶ ཙ ཨུབྷིནྣཾ ཨཝསྶུཏཏྟེ ཨསཏི ཡདི ཨཱམིསཾ པཊིགྒཎྷཱཏི ¶ , ན དོསོཏི ཡོཛནཱ. ཨཡཾ པུརིསཔུགྒལོ. ན ཙ ཨཝསྶུཏོཏི ནེཝ ཨཝསྶུཏོཏི ཉཏྭཱ. ཡཱ པན ཨཱམིསཾ པཊིགྒཎྷཱཏི, ཏསྶཱ ཙ ཨུམྨཏྟིཀཱདཱིནཉྩ ཨནཱཔཏྟི པཀཱསིཏཱཏི ཡོཛནཱ. ‘‘ཡཱ གཎྷཱཏི, ཏསྶཱ ཨནཱཔཏྟཱི’’ཏི ཝུཏྟེཔི པརིབྷུཉྫནྟིཡཱཝ ཨནཱཔཏྟིབྷཱཝོ དཊྛབྦོ.

པཉྩམཾ.

༢༠༨༥. ཨུཡྻོཛནེཏི ‘‘ཀིཾ ཏེ ཨཡྻེ ཨེསོ པུརིསཔུགྒལོ ཀརིསྶཏི ཨཝསྶུཏོ ཝཱ ཨནཝསྶུཏོ ཝཱ, ཡཏོ ཏྭཾ ཨནཝསྶུཏཱ, ཨིངྒྷ ཨཡྻེ ཡཾ ཏེ ཨེསོ པུརིསཔུགྒལོ དེཏི ཁཱདནཱིཡཾ ཝཱ བྷོཛནཱིཡཾ ཝཱ, ཏཾ ཏྭཾ སཧཏྠཱ པཊིགྒཧེཏྭཱ ཁཱད ཝཱ བྷུཉྫ ཝཱ’’ཏི (པཱཙི. ༧༠༥) ཝུཏྟནཡེན ནིཡོཛནེ. ཨེཀིསྶཱཏི ཨུཡྻོཛིཀཱཡ. ཨིཏརིསྶཱཏི ཨུཡྻོཛིཏཱཡ. པཊིགྒཧེཏི ཨཝསྶུཏསྶ ཧཏྠཏོ ཨཱམིསཔཊིགྒཧཎེ. དུཀྐཊཱནི ཙཱཏི ཨུཡྻོཛིཀཱཡ དུཀྐཊཱནི. བྷོགེསཱུཏི ཨུཡྻོཛིཏཱཡ ཏཐཱ པཊིགྒཧིཏསྶ ཨཱམིསསྶ པརིབྷོགེསུ. ཐུལླཙྩཡགཎོ སིཡཱཏི ཨུཡྻོཛིཀཱཡ ཐུལླཙྩཡསམཱུཧོ སིཡཱཏི ཨཏྠོ.

༢༠༨༦-༧. བྷོཛནསྶཱཝསཱནསྨིནྟི ཨུཡྻོཛིཏཱཡ བྷོཛནཔརིཡནྟེ. སངྒྷཱདིསེསཏཱཏི ཨུཡྻོཛིཀཱཡ སངྒྷཱདིསེསཱཔཏྟི ཧོཏི.

ཡཀྑཱདཱིནནྟི ཨེཏྠ ཨཱདི-སདྡེན པེཏཔཎྜཀཏིརཙྪཱནགཏཱ གཧིཏཱ. ཏཐེཝ པུརིསསྶ ཙཱཏི ཨཝསྶུཏསྶ མནུསྶཔུརིསསྶ. ‘‘གཧཎེ ཨུཡྻོཛནེ’’ཏི པདཙྪེདོ. གཧཎེཏི ཨུཡྻོཛིཏཱཡ གཧཎེ. ཨུཡྻོཛནེཏི ཨུཡྻོཛིཀཱཡ ཨཏྟནོ ཨུཡྻོཛནེ. ཏེསནྟི ཨུདཀདནྟཔོནཱནཾ. པརིབྷོགེཏི ཨུཡྻོཛིཏཱཡ པརིབྷུཉྫནེ. དུཀྐཊཾ པརིཀིཏྟིཏནྟི ཨུཡྻོཛིཀཱཡ དུཀྐཊཾ ཝུཏྟཾ.

༢༠༨༨. སེསསྶཱཏི ¶ ¶ ཨུདཀདནྟཔོནཏོ ཨཉྙསྶ པརིབྷུཉྫིཏབྦཱམིསསྶ. ‘‘གཧཎུཡྻོཛནེ’’ཏིཨཱདི ཝུཏྟནཡམེཝ.

༢༠༨༩-༩༠. ཡཱ པན བྷིཀྑུནཱི ‘‘ཨནཝསྶུཏོ’’ཏི ཉཏྭཱ ཨུཡྻོཛེཏི, ‘‘ཀུཔིཏཱ ཝཱ ན པཊིགྒཎྷཏཱི’’ཏི ཨུཡྻོཛེཏི, ‘‘ཀུལཱནུདྡཡཏཱ ཝཱཔི ན པཊིགྒཎྷཏཱི’’ཏི ཨུཡྻོཛེཏི, ཏསྶཱ ཙ ཨུམྨཏྟིཀཱདཱིནཉྩ ཨནཱཔཏྟི པཀཱསིཏཱཏི ཡོཛནཱ. ཡཐཱཧ ‘‘ཨནཱཔཏྟི ‘ཨནཝསྶུཏོ’ཏི ཛཱནནྟཱི ཨུཡྻོཛེཏི, ‘ཀུཔིཏཱ ན པཊིགྒཎྷཏཱི’ཏི ཨུཡྻོཛེཏི, ‘ཀུལཱནུདྡཡཏཱཡ ན པཊིགྒཎྷཏཱི’ཏི ཨུཡྻོཛེཏཱི’’ཏིཨཱདི (པཱཙི. ༧༠༨).

ཚཊྛཾ.

༢༠༩༡. སཏྟམནྟི ‘‘ཡཱ པན བྷིཀྑུནཱི ཀུཔིཏཱ ཨནཏྟམནཱ ཨེཝཾ ཝདེཡྻ བུདྡྷཾ པཙྩཀྑཱམཱི’’ཏིཨཱདིནཡཔྤཝཏྟཾ (པཱཙི. ༧༡༠) སཏྟམསིཀྑཱཔདཉྩ. ཨཊྛམནྟི ‘‘ཡཱ པན བྷིཀྑུནཱི ཀིསྨིཉྩིདེཝ ཨདྷིཀརཎེ པཙྩཱཀཏཱ’’ཏིཨཱདིནཡཔྤཝཏྟཾ (པཱཙི. ༧༡༦) ཨཊྛམསིཀྑཱཔདཉྩ.

སཏྟམཊྛམཱནི.

༢༠༩༢. ནཝམེཏི ‘‘བྷིཀྑུནིཡོ པནེཝ སཾསཊྛཱ ཝིཧརནྟཱི’’ཏིཨཱདིསིཀྑཱཔདེ (པཱཙི. ༧༢༢) ཙ. དསམེཏི ‘‘ཡཱ པན བྷིཀྑུནཱི ཨེཝཾ ཝདེཡྻ སཾསཊྛཱཝ ཨཡྻེ ཏུམྷེ ཝིཧརཐ, མཱ ཏུམྷེ ནཱནཱ ཝིཧརིཏྠཱ’’ཏིཨཱདིསིཀྑཱཔདེ (པཱཙི. ༧༢༨) ཙ.

ནཝམདསམཱནི.

༢༠༩༣. ཏེན མཧཱཝིབྷངྒཱགཏེན དུཊྛདོསདྭཡེན ཙ ཏཏྠེཝ ཨཱགཏེན ཏེན སཉྩརིཏྟསིཀྑཱཔདེན ཙཱཏི ཨིམེཧི ཏཱིཧི སདྡྷིཾ ཨིདྷཱགཏཱནི ཚ སིཀྑཱཔདཱནཱིཏི ཨེཝཾ ནཝ པཋམཱཔཏྟིཀཱ ¶ . ཨིཏོ བྷིཀྑུནིཝིབྷངྒཏོ ཙཏྟཱརི ཡཱཝཏཏིཡཀཱནི ཏཏོ མཧཱཝིབྷངྒཏོ ཙཏྟཱརི ཡཱཝཏཏིཡཀཱནཱིཏི ¶ ཨེཝཾ ཨཊྛ ཡཱཝཏཏིཡཀཱནི, པུརིམཱནི ནཝ ཙཱཏི སཏྟརས སངྒྷཱདིསེསསིཀྑཱཔདཱནི མཡཱ ཙེཏྠ དསྶིཏཱནཱིཏི ཨདྷིཔྤཱཡོ.

ཨིཏི ཝིནཡཏྠསཱརསནྡཱིཔནིཡཱ ཝིནཡཝིནིཙྪཡཝཎྞནཱཡ

སངྒྷཱདིསེསཀཐཱཝཎྞནཱ ནིཊྛིཏཱ.

ནིསྶགྒིཡཀཐཱཝཎྞནཱ

༢༠༩༤-༥. ཨེཝཾ སཏྟརསསངྒྷཱདིསེསེ དསྶེཏྭཱ ཨིདཱནི ཏདནནྟརཱནི ནིསྶགྒིཡཱནི དསྶེཏུམཱཧ ‘‘ཨདྷིཊྛཱནུཔགཾ པཏྟ’’ནྟིཨཱདི. ‘‘ཨདྷིཊྛཱནུཔགཾ པཏྟ’’ནྟི ཨིམིནཱ པདེན ཀེནཙི ཀཱརཎེན ཨནདྷིཊྛཱནུཔགེ པཏྟེ ཨནཱཔཏྟིབྷཱཝཾ དཱིཔེཏི. ‘‘ཏསྶཱ’’ཏི ཏ-སདྡཱཔེཀྑཱཡ བྷིཀྑུནཱིཏི ཨེཏྠ ‘‘ཡཱ’’ཏི ལབྦྷཏི. པཏྟསནྣིདྷིཀཱརཎཱཏི ཨནདྷིཊྛཱཡ, ཨཝིཀཔྤེཏྭཱ ཨེཀརཏྟམྤི པཏྟསྶ ནིཀྑིཏྟཀཱརཎཱ.

༢༠༩༦. ཨིདྷ ཨིམསྨིཾ སིཀྑཱཔདེ སེསོ སབྦོ ཝིནིཙྪཡོ ཀཐཱམགྒོཏི ཡོཛནཱ, ཨཝསེསསབྦཝིནིཙྪཡཀཐཱམགྒོཏི ཨཏྠོ. པཏྟསིཀྑཱཔདེཏི མཧཱཝིབྷངྒཔཋམཔཏྟསིཀྑཱཔདེ.

༢༠༩༧. ཝིསེསོཝ ཝིསེསཏཱ.

པཋམཾ.

༢༠༩༨. ཨཀཱལེཏི ‘‘ཨནཏྠཏཀཐིནེ ཝིཧཱརེ ཨེཀཱདས མཱསཱ, ཨཏྠཏཀཐིནེ ཝིཧཱརེ སཏྟ མཱསཱ’’ཏི (པཱཙི. ༧༤༠ ཨཏྠཏོ སམཱནཾ) ཨེཝཾ ¶ ཝུཏྟེ ཨཀཱལེ. ཝིཀཔྤནྟརཾ དསྶེཏུམཱཧ ‘‘དིནྣཾ ཀཱལེཔི ཀེནཙཱི’’ཏིཨཱདི. ཝུཏྟཝིཔརིཡཱཡེན ཀཱལནིཡམོ ཝེདིཏབྦོ. ཀེནཙི ཨཀཱལེ ཡཾ ཙཱིཝརཾ དིནྣཾ, ཀཱལེཔི ཡཾ ཙཱིཝརཾ ཨཱདིསྶ དིནྣཾ, ཏཾ ཨཀཱལཙཱིཝརཾ ནཱམཱཏི ཡོཛནཱ. ཨཱདིསྶ དཱནཔྤཀཱརཾ དསྶེཏུམཱཧ ‘‘སམྤཏྟཱ བྷཱཛེནྟཱུ’’ཏི. ནིཡཱམིཏནྟི ‘‘སམྤཏྟཱ བྷཱཛེནྟཱུ’’ཏི ཨེཝཾ ཝཏྭཱ དིནྣཉྩ ‘‘ཨིདཾ གཎསྶ, ཨིདཾ ཏུཡ྄ཧཾ དམྨཱི’’ཏི ཝཏྭཱ ཝཱ དཱཏུཀཱམཏཱཡ པཱདམཱུལེ ཋཔེཏྭཱ ཝཱ དིནྣཉྩ ཨཱདིསྶ དིནྣཾ ནཱམཱཏི ཨཏྠོ. ཡཐཱཧ ‘‘སམྤཏྟཱ བྷཱཛེནྟཱུ’ཏི ཝཏྭཱ ཝཱ ‘ཨིདཾ ¶ གཎསྶ, ཨིདཾ ཏུམྷཱཀཾ དམྨཱི’ཏི ཝཏྭཱ ཝཱ དཱཏུཀམྱཏཱཡ པཱདམཱུལེ ཋཔེཏྭཱ ཝཱ དིནྣམྤི ཨཱདིསྶ དིནྣཾ ནཱམ ཧོཏཱི’’ཏི (པཱཙི. ཨཊྛ. ༧༤༠).

༢༠༩༩. ཨཀཱལཙཱིཝརནྟི ཝུཏྟཔྤཀཱརཾ ཨཀཱལཙཱིཝརཾ.

༢༡༠༠. ཨཏྟནཱ པཊིལདྡྷནྟི ཏཏོ ཡཾ ཙཱིཝརཾ ཨཏྟནཱ ཝསྶགྒེན པཊིལདྡྷཾ. ནིསྶཛྫིཏྭཱ པཊིལདྡྷཀཱལེ ཀཏྟབྦཝིདྷིཾ དསྶེཏུམཱཧ ‘‘ལབྷིཏྭཱ…པེ… ནིཡོཛཡེ’’ཏི. ཡཐཱདཱནེ ནིཡོཛཡེཏི ཡཐཱ དཱཡཀེན དིནྣཾ, ཏཐཱ ཨུཔནེཏབྦཾ, ཨཀཱལཙཱིཝརཔཀྑེཡེཝ ཋཔེཏབྦནྟི ཝུཏྟཾ ཧོཏི.

༢༡༠༡. ཏསྶཱཏི ‘‘ཡཐཱདཱནེ ནིཡོཛཡེ’’ཏི ཝཙནསྶ. ཝིནཡཀམྨཾ ཀཏྭཱ པཊིལདྡྷམྤི ཏཾ པུན སེཝིཏུཾ ན ཙ ཝཊྚཏཱིཏི ཨཡམདྷིཔྤཱཡོཏི ཡོཛནཱ.

༢༡༠༢. ཀཱལཙཱིཝརེ ཨཀཱལཝཏྠསཉྙཱཡ དུཀྐཊནྟི ཡོཛནཱ. ཨུབྷཡཏྠཔཱིཏི ཨཀཱལཙཱིཝརེཔི ཀཱལཙཱིཝརེཔི. ཝེམཏིཀཱཡ ཏཐཱ དུཀྐཊནྟི ཡོཛནཱ.

༢༡༠༣. ཨུབྷཡཏྠཔི ¶ ཙཱིཝརེ ཀཱལཙཱིཝརེ ཙ ཨཀཱལཙཱིཝརེ ཙཱཏི ཨུབྷཡཙཱིཝརེཔི ཀཱལཙཱིཝརསཉྙཱཡ བྷཱཛཱཔེནྟིཡཱ ནདོསོཏི ཡོཛནཱ. སཙིཏྟཀསམུཊྛཱནཏྟཡཾ སནྡྷཱཡཱཧ ‘‘ཏིསམུཊྛཱནཏཱ’’ཏི.

དུཏིཡཾ.

༢༡༠༤. སཙེ སཡཾ ཨཙྪིནྡཏི ཨཉྙཱཡ བྷིཀྑུནིཡཱ སདྡྷིཾ ཙཱིཝརཾ པརིཝཏྟེཏྭཱ པཙྪཱ ‘‘ཏུཡ྄ཧཾ ཙཱིཝརཾ ཏྭམེཝ གཎྷ, མཡ྄ཧཾ ཙཱིཝརཾ དེཧཱི’’ཏི ཨེཝཾ ཡདི སཡཾ ཨཙྪིནྡཏི. ཨེཏྠ ‘‘སཀསཉྙཱཡཱ’’ཏི སེསོ. སཀསཉྙཱཡ གཧིཏཏྟཱ པཱཙིཏྟིཡཾ, དུཀྐཊཉྩ ཝུཏྟཾ, ཨིཏརཐཱ བྷཎྜགྒྷེན ཀཱརེཏབྦོ.

༢༡༠༥. ཨིཏརེསཱུཏི ཨབནྡྷནཉྩ ཨཱཎཏྟིབཧུཏྟཉྩ སངྒཎྷཱཏི. ཏེནཱཧ ‘‘ཝཏྠཱུནཾ པཡོགསྶ ཝསཱ སིཡཱ’’ཏི.

༢༡༠༦. ‘‘ཏིཀཔཱཙིཏྟཱི’’ཏི ¶ ཨིདམཔེཀྑིཏྭཱ ‘‘ཨུདྡིཊྛཱ’’ཏི སམྦནྡྷནཱིཡཾ, ཨུཔསམྤནྣཱཡ ཨུཔསམྤནྣསཉྙཱ, ཝེམཏིཀཱ, ཨནུཔསམྤནྣསཉྙཱཏི ཨེཏཱསཾ ཝསེན ཏིཀཔཱཙིཏྟི ཝུཏྟཱཏི ཨཏྠོ. ཨཉྙསྨིཾ པརིཀྑཱརེཏི ཨུཔསམྤནྣཱནུཔསམྤནྣཱནཾ ཨཉྙསྨིཾ པརིཀྑཱརེ. ཨིཏརིསྶཱཏི ཨནུཔསམྤནྣཱཡ. ཏིཀདུཀྐཊནྟི ཨནུཔསམྤནྣཱཡ ཨུཔསམྤནྣསཉྙཱཝེམཏིཀཱཨནུཔསམྤནྣསཉྙཱནཾ ཝསེན ཏིཀདུཀྐཊཾ ཨུདྡིཊྛཾ.

༢༡༠༧. ཏཱཡ ཝཱ དཱིཡམཱནཾ ཏཱཡ ཨཉྙཱཡ བྷིཀྑུནིཡཱ དུཊྛཱཡ ཝཱ ཏུཊྛཱཡ ཝཱ དཱིཡམཱནཾ གཎྷནྟིཡཱ, ཏསྶཱ ཝིསྶཱསམེཝ ཝཱ གཎྷནྟིཡཱ ཨནཱཔཏྟཱིཏི ཡོཛནཱ. ‘‘ཏིསམུཊྛཱནཏཱ མཏཱ’’ཏི ཨིདཾ ཝུཏྟཏྠམེཝ.

ཏཏིཡཾ.

༢༡༠༨. ཡཱ ¶ པན བྷིཀྑུནཱི ‘‘ཀིཾ ཏེ, ཨཡྻེ, ཨཕཱསུ, ཀིཾ ཨཱཧརཱིཡཏཱུ’’ཏི ཝུཏྟཱ ཨཉྙཾ ཝིཉྙཱཔེཏྭཱ ཏཾ ཨཱཧཊཾ པཊིཀྑིཔིཏྭཱ ཏཉྩ ཨཉྙཉྩ གཎྷིཏུཀཱམཱ སཙེ ཨཉྙཾ ཝིཉྙཱཔེཏི, ཏསྶཱ ཝིཉྙཏྟིདུཀྐཊཾ, ལཱབྷཱ ནིསྶགྒིཡཾ སིཡཱཏི སཱདྷིཔྤཱཡཡོཛནཱ. ཝིཉྙཏྟིཡཱ དུཀྐཊཾ ཝིཉྙཏྟིདུཀྐཊཾ.

༢༡༠༩-༡༡. ཏིཀཔཱཙིཏྟིཡཾ ཝུཏྟནྟི ‘‘ཨཉྙེ ཨཉྙསཉྙཱ, ཨཉྙེ ཝེམཏིཀཱ, ཨཉྙེ ཨནཉྙསཉྙཱ ཨཉྙཾ ཝིཉྙཱཔེཏྭཱ ཨཉྙཾ ཝིཉྙཱཔེཏི, ནིསྶགྒིཡཾ པཱཙིཏྟིཡ’’ནྟི (པཱཙི. ༧༥༡) ཏིཀཔཱཙིཏྟིཡཾ ཝུཏྟཾ. ཨནཉྙེ དྭིཀདུཀྐཊནྟི ཨནཉྙེ ཨཉྙསཉྙཱཡ, ཝེམཏིཀཱཡ ཙ ཝསེན དྭིཀདུཀྐཊཾ. ‘‘ཨནཉྙེནཉྙསཉྙཱཡཱ’’ཏིཨཱདིནཱ ཨནཱཔཏྟིཝིསཡོ དསྶིཏོ. ‘‘ཨནཉྙེ ཨནཉྙསཉྙཱཡཱ’’ཏི པདཙྪེདོ. ཨནཉྙེ ཨནཉྙསཉྙཱཡ ཝིཉྙཱཔེནྟིཡཱ ཨནཱཔཏྟི. ཏསྨིཾ པཋམཝིཉྙཱཔིཏེ ཨཔྤཧོནྟེ ཝཱ ཏཉྙེཝ ཝཱ ཝིཉྙཱཔེནྟིཡཱ ཨནཱཔཏྟི. ཨཉྙེནཔི ཨཏྠེ སཏི ཏེན སདྡྷིཾ ཨཉྙཾ ཝིཉྙཱཔེནྟིཡཱ ཨནཱཔཏྟི. ཨིདཾ ཝུཏྟཾ ཧོཏི – སཙེ པཋམཾ སཔྤི ཝིཉྙཏྟཾ, ‘‘ཨཱམཀམཾསཾ པཙིཏབྦ’’ནྟི ཙ ཝེཛྫེན ཝུཏྟཏྟཱ ཏེལེན ཨཏྠོ ཧོཏི, ཏཏོ ‘‘ཏེལེནཱཔི མེ ཨཏྠོ’’ཏི ཨེཝཾ ཨཉྙཉྩ ཝིཉྙཱཔེཏཱིཏི. ཨཱནིསཾསཉྩ དསྶེཏྭཱ ཏཏོ ཨཉྙཾ ཝིཉྙཱཔེནྟིཡཱཔི ཨནཱཔཏྟཱིཏི ཉཱཏབྦནྟི ཡོཛནཱ. ཨིདཾ ཝུཏྟཾ ཧོཏི – སཙེ ཀཧཱཔཎསྶ ¶ སཔྤི ཨཱབྷཏཾ ཧོཏི, ཨིམིནཱ མཱུལེན དིགུཎཾ ཏེལཾ ལབྦྷཏི, ཏེལེནཱཔི ཙ ཨིདཾ ཀིཙྩཾ ནིཔྤཛྫཏི, ཏསྨཱ ཏེལམཱཧརཱཏི ཨེཝཾ ཨཱནིསཾསཾ དསྶེཏྭཱ ཝིཉྙཱཔེཏཱིཏི.

ཙཏུཏྠཾ.

༢༡༡༢-༣. པུབྦཾ ¶ ཨཉྙཾ ཙེཏཱཔེཏྭཱཏི ཡོཛནཱ, ཨཏྟནོ ཀཔྤིཡབྷཎྜེན ‘‘ཨིདཾ ནཱམ ཨཱཧརཱ’’ཏི པུབྦཾ ཨཉྙཾ པརིཝཏྟཱཔེཏྭཱཏི ཨཏྠོ. ཨེཝནྟི ཨེཏྠ ‘‘ཝུཏྟེ’’ཏི སེསོ. དྷནེན ནིབྦཏྟཾ དྷཉྙཾ, ཨཏྟནོ དྷནེན ནིཔྥཱདིཏཏྟཱ ཏེལཱདི ཨིདྷ ‘‘དྷཉྙ’’ནྟི ཨདྷིཔྤེཏཾ, ན ཝཱིཧཱདི. ཨེཝཾ ཝུཏྟེ མཡ྄ཧཾ ཨཉྙཾ དྷཉྙཾ ཨཱནེཏྭཱ དེཏི ཨིཏི སཉྙཱཡ པཙྪཱ ཨཉྙཾ ཙེཏཱཔེཡྻཱཏི ཡོཛནཱ, ན མེ ཨིམིནཱ ཨཏྠོ, ཨཉྙཾ ཨཱཧརཱཏི ཝུཏྟེ ཨིདཉྩ དཏྭཱ ཨཉྙཉྩ ཨཱཧརིཏྭཱ དེཏཱིཏི སཉྙཱཡ ‘‘ན མེ ཨིདཾ རུཙྩཏི, ཨཉྙཾ ཨཱཧརཱ’’ཏི པཙྪཱ ཨཉྙཾ པརིཝཏྟཱཔེཡྻཱཏི ཨཏྠོ. ཙེཏཱཔནཔཡོགེནཱཏི ཨཱཎཏྟཱཡ ཙེཏཱཔནཝསེན. མཱུལཊྛཱཡཱཏི ཨཱཎཱཔིཀཱཡ. ཏེན ཙ ཨཉྙེན ཝཱ མཱུལེན ཨཱབྷཏཾ ཧོཏུ, ཏསྶ ལཱབྷེ ནིསྶགྒིཡཾ ཧོཏཱིཏི ཡོཛནཱ.

༢༡༡༤. སེསནྟི ཏིཀཔཱཙིཏྟིཡཱདིཀཾ ཝིནིཙྪཡཝིསེསཾ.

པཉྩམཾ.

༢༡༡༥-༦. ཨཉྙདཏྠཱཡ དིནྣེནཱཏི ཨུཔཱསཀེཧི ‘‘ཨེཝརཱུཔཾ གཧེཏྭཱ བྷཱཛེཏྭཱ པརིབྷུཉྫཐཱ’’ཏི ཨཉྙསྶཏྠཱཡ དིནྣེན. ‘‘སངྒྷིཀེན པརིཀྑཱརེནཱ’’ཏི ཨིམིནཱ སམྦནྡྷོ. པརིཀྑཱརེནཱཏི ཀཔྤིཡབྷཎྜེན. སངྒྷིཀེནཱཏི སངྒྷསྶ པརིཙྩཏྟེན. ཨིདྷཱཏི ཨིམསྨིཾ སཱསནེ. ཏསྶཱཏི ཡཱཡ ཙེཏཱཔིཏཾ. ནིསྶགྒིཡཾ སིཡཱཏི ཨེཏྠ ནིསྶཊྛཔཊིལདྡྷཾ ཡཐཱདཱནེ ཨུཔནེཏབྦནྟི ཝཏྟབྦཾ. ཡཐཱཧ ‘‘ནིསྶཊྛཾ པཊིལབྷིཏྭཱ ཡཐཱདཱནེ ཨུཔནེཏབྦ’’ནྟི (པཱཙི. ༧༦༡). ཨིདཾ ཧེཊྛཱ ཝུཏྟཏྠཱདྷིཔྤཱཡམེཝ. ཨེཏྠཱཏི ཨིམསྨིཾ སིཀྑཱཔདེ. ‘‘ཨནཉྙདཏྠིཀེ ཨཉྙདཏྠིཀསཉྙཱ, ཨཱཔཏྟི དུཀྐཊསྶ. ཨནཉྙདཏྠིཀེ ཝེམཏིཀཱ, ཨཱཔཏྟི དུཀྐཊསྶཱ’’ཏི ཝུཏྟཏྟཱ ཨཱཧ ‘‘ཨནཉྙདཏྠིཀེ ནིདྡིཊྛཾ ¶ དྭིཀདུཀྐཊ’’ནྟི. ཨིམིནཱ ཙ ‘‘ཨཉྙདཏྠིཀེ ཏིཀཔཱཙིཏྟིཡ’’ནྟི ཨིདཾ ཝུཏྟམེཝ. ‘‘ཨཉྙདཏྠིཀེ ཨཉྙདཏྠིཀསཉྙཱ, ཝེམཏིཀཱ, ཨནཉྙདཏྠིཀསཉྙཱ ཨཉྙཾ ཙེཏཱཔེཏི, ནིསྶགྒིཡཾ པཱཙིཏྟིཡ’’ནྟི (པཱཙི. ༧༦༡) ཧི ཝུཏྟཾ.

༢༡༡༧. སེསཀནྟི ¶ ཡདཏྠཱཡ དིནྣཾ, ཏཾ ཙེཏཱཔེཏྭཱ ཨཱཧརིཏྭཱ ཨཏིརིཏྟཾ མཱུལཾ ཨཉྙདཏྠཱཡ ཨུཔནེནྟིཡཱ ཨནཱཔཏྟཱིཏི ཡོཛེཏབྦཾ. སཱམིཀེ པུཙྪིཏྭཱཏི ‘‘ཏུམྷེཧི ཙཱིཝརཏྠཱཡ དིནྣཾ, ཨམྷཱཀཉྩ ཙཱིཝརཾ སཾཝིཛྫཏི, ཏེལཱདཱིཧི པན ཨཏྠོ’’ཏི ཨེཝཾ སཱམིཀེ པུཙྪིཏྭཱ. ཏནྟི ཏཾ ཙེཏཱཔནྣཾ. ཨཱཔདཱསཱུཏི བྷིཀྑུནཱིཧི ཝིཧཱརཾ པཧཱཡ གམནཱརཧམུཔདྡཝོ གཧིཏོ. ཡཐཱཧ ‘‘ཨཱཔདཱསཱུཏི ཏཐཱརཱུཔེསུ ཨུཔདྡཝེསུ བྷིཀྑུནིཡོ ཝིཧཱརཾ ཚཌྜེཏྭཱ པཀྐམནྟི, ཨེཝརཱུཔཱསུ ཨཱཔདཱསུ ཡཾ ཝཱ ཏཾ ཝཱ ཙེཏཱཔེཏུཾ ཝཊྚཏཱི’’ཏི (པཱཙི. ཨཊྛ. ༧༦༢).

༢༡༡༨. སཡཾ ཡཱཙིཏཀཾ ཝིནཱཏི ‘‘སཾཡཱཙིཏཀ’’ནྟི པདཾ ཝིནཱ, ཨེཏྟཀམེཝ ཝིསདིསནྟི ཝུཏྟཾ ཧོཏི.

ཚཊྛསཏྟམཱནི.

༢༡༡༩. ཨདྷིཀཝཙནཾ དསྶེཏུམཱཧ ‘‘མཧཱཛནིཀསཉྙཱཙིཀེནཱ’’ཏི. པདཏཱདྷིཀཱཏི པདམེཝ པདཏཱ. མཧཱཛནིཀེནཱཏི གཎསྶ པརིཙྩཏྟེན. སཉྙཱཙིཀེནཱཏི སཡཾ ཡཱཙིཏཀེན.

༢༡༢༠. ཨནནྟརསམཱ མཏཱཏི ཨིདྷ ‘‘པུགྒལིཀེནཱ’’ཏི པདཾ ཝིནཱ སམུཊྛཱནཱདིནཱ སདྡྷིཾ སབྦེ ཝིནིཙྪཡཱ ཨནནྟརསིཀྑཱཔདསདིསཱ མཏཱཏི ཨཏྠོ. ‘‘ཡཱ པན བྷིཀྑུནཱི ཨཉྙདཏྠིཀེན པརིཀྑཱརེན ཨཉྙུདྡིསིཀེན པུགྒལིཀེནཱ’’ཏི ཧི ¶ སིཀྑཱཔདཾ. པུགྒལིཀེནཱཏི ཨེཀབྷིཀྑུནིཡཱ པརིཙྩཏྟེན. ‘‘ཀིཉྩིཔཱི’’ཏི ལིཁནྟི. ‘‘ཀོཙིཔཱི’’ཏི པཱཋོ སུནྡརོ ‘‘ཝིསེསོ’’ཏི ཨིམིནཱ ཏུལྱཱདྷིཀརཎཏྟཱ.

ཨཊྛམནཝམདསམཱནི.

པཋམོ ཝགྒོ.

༢༡༢༡-༢. ཙཏྟཱརི ཀཾསཱནི སམཱཧཊཱནི, ཙཏུནྣཾ ཀཾསཱནཾ སམཱཧཱརོ ཝཱ ཙཏུཀྐཾསཾ, ཙཏུཀྐཾསཏོ ཨཏིརེཀཾ ཨཏིརེཀཙཏུཀྐཾསཾ, ཏེན ཨཏིརེཀཙཏུཀྐཾསགྒྷནཀཾ པཱཝུརཎམཱཧ, ཨུཔཙཱརེན ‘‘ཨཏིརེཀཙཏུཀྐཾས’’ནྟི ཝུཏྟཾ. ཀཾསཔརིམཱཎཾ པནེཏྠ སཡམེཝ ཝཀྑཏི ‘‘ཀཧཱཔཎཙཏུཀྐཾ ཏུ, ཀཾསོ ནཱམ པཝུཙྩཏཱི’’ཏི. ཏསྨཱ ཨཏིརེཀསོལ༹སཀཧཱཔཎགྒྷནཀནྟི ཨཏྠོ. གརུཔཱཝུརཎནྟི སཱིཏཀཱལེ པཱརུཔིཏབྦཔཱཝུརཎཾ. ཙེཏཱཔེཡྻཱཏི ཝིཉྙཱཔེཡྻ. ཙཏྟཱརི སཙྩཱནི ¶ སམཱཧཊཱནི, ཙཏུནྣཾ ཝཱ སཙྩཱནཾ སམཱཧཱརོ ཙཏུསཙྩཾ, ཏཾ པཀཱསེཏི སཱིལེནཱཏི ཙཏུསཙྩཔྤཀཱསཱི, ཏེན, ཙཏུནྣཾ ཨརིཡསཙྩཱནཾ ནིདྡིསཀེན སམྨཱསམྦུདྡྷེན. པཡོགེཏི ‘‘དེཧཱི’’ཏི ཨེཝཾ ཝིཉྙཱཔནཔཡོགེ. ལཱབྷེཏི པཊིལཱབྷེ.

ཙཏུནྣཾ སམཱུཧོ ཙཏུཀྐཾ, ཀཧཱཔཎཱནཾ ཙཏུཀྐཾ ཀཧཱཔཎཙཏུཀྐཾ. ཀཧཱཔཎོ ཙེཏྠ ཏཾཏཾཀཱལེ, ཏཾཏཾཔདེསེ ཙ ཝོཧཱརཱུཔགོ གཧེཏབྦོ. ཨིམཱ ཝུཏྟཔྤཀཱརཱ ནིསྶགྒིཡཱཝསཱནཱཔཏྟིཡོ ‘‘ཉཱཏཀཱནཉྩ སནྟཀེ’’ཏི ཨནཱཔཏྟིཝིསཡེ ཝཀྑམཱནཏྟཱ ‘‘ཡདཱ ཡེན ཨཏྠོ, ཏདཱ ཏཾ ཝདེཡྻཱཐཱ’’ཏི ཨེཝཾ ནིཙྩཔཝཱརཎཾ ཨཀཏྭཱ ཏསྨིཾ ཀཱལེ ཀིསྨིཉྩི གུཎེ པསཱིདིཏྭཱ ‘‘ཝདེཡྻཱཐ ཡེན ཨཏྠོ’’ཏི ཨེཝཾ པཝཱརིཏཊྛཱནེ སམྦྷཝནྟཱིཏི དཊྛབྦཱ.

༢༡༢༣-༥. ཨཱུནཀཙཏུཀྐཾསེ ¶ ཨཏིརེཀསཉྙཱ, ཨཱཔཏྟི དུཀྐཊསྶ. ཨཱུནཀཙཏུཀྐཾསེ ཝེམཏིཀཱ, ཨཱཔཏྟི དུཀྐཊསྶཱ’’ཏི ཝུཏྟཏྟཱ ཨཱཧ ‘‘ཨཱུནཀེ ཏུ ཙཏུཀྐཾསེ, ཨུདྡིཊྛཾ དྭིཀདུཀྐཊ’’ནྟི. ཨིམིནཱ ‘‘ཨཏིརེཀཙཏུཀྐཾསེ ཨཏིརེཀསཉྙཱ, ཝེམཏིཀཱ, ཨཱུནཀསཉྙཱ ཙེཏཱཔེཏི, ནིསྶགྒིཡཾ པཱཙིཏྟིཡ’’ནྟི ཏིཀཔཱཙིཏྟིཡཉྩ དསྶིཏཾ ཧོཏི.

གརུཀནྟི གརུཔཱཝུརཎཾ. ཏདཱུནཾ ཝཱཏི ཙཏུཀྐཾསཏོ ཨཱུནཀཾ ཝཱ. ཉཱཏཀཱནཉྩཱཏི ཨེཏྠ ཙ-སདྡེན པཝཱརིཏཱནཾ སངྒཧོ. ཡཐཱཧ ཨནཱཔཏྟིཝཱརེ ‘‘ཉཱཏཀཱནཾ, པཝཱརིཏཱན’’ནྟི (པཱཙི. ༧༨༧). ཨེཏྠ ཙ ‘‘ཨཏིརེཀཙཏུཀྐཾསམྤཱི’’ཏི ཝཏྟབྦཾ ‘‘ཏདཱུནཾ ཝཱ’’ཏི ཨིམིནཱ ཙཏུཀྐཾསཱུནསྶ ཝུཏྟཏྟཱ. ‘‘ཨཔྤམེཝ ཝཱ’’ཏི ཨིམིནཱ ཨཏིརེཀཙཏུཀྐཾསེཔི མཧགྒྷཏརཾ ཝུཏྟནྟི ཝེདིཏབྦཾ.

ཨེཀཱདསམཾ.

༢༡༢༦-༧. ‘‘ལཧུཔཱཝུརཎཾ པན བྷིཀྑུནིཡཱ ཙེཏཱཔེནྟིཡཱ ཨཌྜྷཏེཡྻཀཾསཔརམཾ ཙེཏཱཔེཏབྦ’’ནྟི (པཱཙི. ༧༨༩) ཝཙནཏོ ལཧུཔཱཝུརཎནྟི ཨེཏྠ ‘‘ཙེཏཱཔེནྟིཡཱ བྷིཀྑུནིཡཱ’’ཏི ཙ ཨཌྜྷཏེཡྻཀཾསགྒྷནནྟི ཨེཏྠ ‘‘ཙེཏཱཔེཏབྦ’’ནྟི ཙ སེསོ. ལཧུཔཱཝུརཎནྟི ཨུཎྷཀཱལེ པཱཝུརཎཾ. ཏིཎྞཾ པཱུརཎོ ཏེཡྻོ, ཨཌྜྷོ ཏེཡྻོ ཨསྶཱཏི ཨཌྜྷཏེཡྻོ, ཨཌྜྷཏེཡྻོ ཙ སོ ཀཾསོ ཙཱཏི ཨཌྜྷཏེཡྻཀཾསོ, ཏཾ ཨགྒྷཏཱིཏི ཨཌྜྷཏེཡྻཀཾསགྒྷནཾ, དསཀཧཱཔཎགྒྷནཀནྟི ཨཏྠོ. ཏཏོཏི ཨཌྜྷཏེཡྻཀཾསགྒྷནཀཏོ. ཡཾ པན པཱཝུརཎཾ ཨཌྜྷཏེཡྻཀཾསགྒྷནཀཾ, ཏཾ ལཧུཔཱཝུརཎཾ ¶ . ཏཏོ ཨཌྜྷཏེཡྻཀཾསགྒྷནཀཏོ ལཧུཔཱཝུརཎཏོ. ཨུཏྟརིནྟི ཨཏིརེཀཾ. ཨཌྜྷཏེཡྻཀཾསགྒྷནཀཾ ཡཾ པཱཝུརཎཾ ཡཱ བྷིཀྑུནཱི ཙེཏཱཔེཏི ¶ , ཏསྶ པཱཝུརཎསྶ པཊིལཱབྷེ ཏསྶཱ བྷིཀྑུནིཡཱ ནིསྶགྒིཡཔཱཙིཏྟིཡཱ ཝུཏྟཱཏི ཡོཛནཱ.

‘‘ཨནནྟརསམཾ སེས’’ནྟི ཨིདཾ སམཏྠེཏུམཱཧ ‘‘ནཏྠི ཀཱཙི ཝིསེསཏཱ’’ཏི. ཝིསེསོཡེཝ ཝིསེསཏཱ.

དྭཱདསམཾ.

༢༡༢༨. ཨིདཱནི པཱཏིམོཀྑུདྡེསེ ཨཱགཏེསུ སམཏིཾསནིསྶགྒིཡེསུ ཀེསཉྩི ཨཏྟནོ ཨཝཙནེ ཀཱརཎཉྩ ཨཝུཏྟེཧི སདྡྷིཾ ཝུཏྟཱནཾ གཧཎཉྩ དསྶེཏུམཱཧ ‘‘སཱདྷཱརཎཱནཱི’’ཏིཨཱདི. ཧི ཡསྨཱ བྷིཀྑུནཱིནཾ བྷིཀྑཱུཧི སཱདྷཱརཎཱནི ཡཱནི སིཀྑཱཔདཱནི སེསཱནི ཨིདྷ ཝུཏྟེཧི ཨཉྙཱནི, ཏཱནི ཨཊྛཱརས སིཀྑཱཔདཱནི ཙེཝ ཨིདྷ ཝུཏྟསརཱུཔཱནི དྭཱདས སིཀྑཱཔདཱནི ཙེཏི ཨིཙྩེཝཾ ནིསྶགྒིཡཔཱཙིཏྟིཡསིཀྑཱཔདཱནི སམཏིཾསེཝ ཧོནྟཱིཏི ཡོཛནཱ.

ཨིཏི ཝིནཡཏྠསཱརསནྡཱིཔནིཡཱ ཝིནཡཝིནིཙྪཡཝཎྞནཱཡ

ནིསྶགྒིཡཀཐཱཝཎྞནཱ ནིཊྛིཏཱ.

པཱཙིཏྟིཡཀཐཱཝཎྞནཱ

༢༡༢༩-༣༠. ཨེཝཾ ཏིཾས ནིསྶགྒིཡཔཱཙིཏྟིཡཱནི དསྶེཏྭཱ ཨིདཱནི སུདྡྷཔཱཙིཏྟིཡཱནི དསྶེཏུམཱཧ ‘‘ལསུཎ’’ནྟིཨཱདི. ལསུཎནྟི ཨེཏྠ ཨིཏི-སདྡོ ལུཏྟནིདྡིཊྛོ. ‘‘ལསུཎཾ’’ཨིཏི བྷཎྜིཀཾ ཝུཏྟཾ ཨཊྛཀཐཱཡཾ (པཱཙི. ཨཊྛ. ༧༩༣-༧༩༥). ཙཏུཔཉྩམིཉྫཱདིཔྤབྷེདཾ བྷཎྜིཀཾ ལསུཎཾ ནཱམ, ན ཏཏོ ཨཱུནཾ. ཏེནཱཧ ‘‘ན ཨེཀདྭིཏིམིཉྫཀ’’ནྟི. པཀྐལསུཎཏོ, སཱིཧལ༹དཱིཔསམྦྷཝཏོ ཙ ཝིསེསམཱཧ ‘‘ཨཱམཀཾ མཱགདྷཾཡེཝཱ’’ཏི. མགདྷེསུ ཛཱཏཾ མཱགདྷཾ, ‘‘ཝུཏྟ’’ནྟི ཨིམིནཱ སམྦནྡྷོ. ཡཐཱཧ ‘‘མགདྷརཊྛེ ཛཱཏལསུཎམེཝ ¶ ཧི ཨིདྷ ལསུཎནྟི ཨདྷིཔྤེཏ’’ནྟི (པཱཙི. ཨཊྛ. ༧༩༥). ཏཾ ‘‘ཁཱདིསྶཱམཱི’’ཏི གཎྷཏཱིཏི སམྦནྡྷོ. ཝུཏྟཔྤཀཱརཾ པཱཙིཏྟིཡཉྩ ཨཛ྄ཛྷོཧཱརཝསེནཱཏི དསྶེཏུམཱཧ ‘‘ཨཛ྄ཛྷོཧཱརཝསེནེཝ, པཱཙིཏྟིཾ པརིདཱིཔཡེ’’ཏི.

༢༡༣༡. ཏདེཝ ¶ ཝཀྑཏི ‘‘དྭེ ཏཡོ’’ཏིཨཱདིནཱ. སདྡྷིནྟི ཨེཀཏོ. སངྑཱདིཏྭཱཏི གལབིལཾ ཨཔྤཝེསེཏྭཱ དནྟེཧི སཾཙུཎྞིཡནྟཱི ཁཱདིཏྭཱ. ཨཛ྄ཛྷོཧརཏི པརགལཾ ཀརོཏི.

༢༡༣༢. ཏཏྠཱཏི ཏསྨིཾ བྷཎྜིཀལསུཎེ. ‘‘མིཉྫཱནཾ གཎནཱཡཱ’’ཏི ཨིམིནཱ ཨཛ྄ཛྷོཧཱརཔཡོགགཎནཱཡེཝ དཱིཔིཏཱ. ཡཐཱཧ ‘‘བྷིནྡིཏྭཱ ཨེཀེཀཾ མིཉྫཾ ཁཱདནྟིཡཱ པན པཡོགགཎནཱཡ པཱཙིཏྟིཡཱནཱི’’ཏི (པཱཙི. ཨཊྛ. ༧༩༥).

༢༡༣༣. སབྷཱཝཏོ ཝཊྚནྟེཝཱཏི ཡོཛནཱ.

༢༡༣༥. ཡཐཱཝུཏྟཔལཎྜུཀཱདཱིནཾ ནཱནཏྟཾ དསྶེཏུམཱཧ ‘‘ཨེཀཱ མིཉྫཱ’’ཏིཨཱདི. ཨིདྷ མིཉྫཱནཾ ཝསེནེཝ ནཱནཏྟཾ དསྶིཏཾ. ཨཊྛཀཐཱཡཾ པན ཝཎྞཝསེནཱཔི. ཡཐཱཧ ‘‘པལཎྜུཀོ པཎྜུཝཎྞོ ཧོཏི. བྷཉྫནཀོ ལོཧིཏཝཎྞོ. ཧརིཏཀོ ཧརིཏཔཎྞཝཎྞོ’’ཏི (པཱཙི. ཨཊྛ. ༧༩༧).

༢༡༣༦. ‘‘སཱལ༹ཝེ ཨུཏྟརིབྷངྒཀེ’’ཏི པདཙྪེདོ. ‘‘བདརསཱལ༹ཝཱདཱིསཱུ’’ཏི (པཱཙི. ཨཊྛ. ༧༩༧) ཨཊྛཀཐཱཝཙནཏོ ཨེཏྠ བདར-སདྡོ སེསོ. བདརསཱལ༹ཝཾ ནཱམ བདརཕལཱནི སུཀྑཱཔེཏྭཱ ཙུཎྞེཏྭཱ ཀཱཏབྦཱ ཁཱདནཱིཡཝིཀཏི. ཨུམྨཏྟིཀཱདཱིནནྟི ཨེཏྠ ཨཱདི-སདྡེན ཨཱདིཀམྨིཀཱ གཧིཏཱ. ཡཐཱཧ ‘‘ཨུམྨཏྟིཀཱཡ ཨཱདིཀམྨིཀཱཡཱ’’ཏི (པཱཙི. ༧༩༧).

པཋམཾ.

༢༡༣༧. སམྦཱདྷེཏི ¶ པཊིཙྪནྣོཀཱསེ. ཏསྶ ཝིབྷཱགཾ དསྶེཏུམཱཧ ‘‘ཨུཔཀཙྪེསུ མུཏྟསྶ ཀརཎེཔི ཝཱ’’ཏི.

༢༡༣༨. ཨསྶཱ ཏཐཱ པཱཙིཏྟཱིཏི སམྦནྡྷོ. ‘‘ན ལོམགཎནཱཡཱ’’ཏི ཨིམིནཱ ‘‘པཡོགགཎནཱཡཱ’’ཏི ཨིདམེཝ སམཏྠཡཏི.

༢༡༣༩. ཨཱབཱདྷེཏི ཀཎྜུཨཱདིཀེ རོགེ. ཡཐཱཧ – ‘‘ཨཱབཱདྷཔཙྩཡཱཏི ཀཎྜུཀཙྪུཨཱདིཨཱབཱདྷཔཙྩཡཱ’’ཏི ¶ (པཱཙི. ཨཊྛ. ༨༠༡). མགྒསཾཝིདྷཱནསམཱ མཏཱཏི བྷིཀྑུནིཡཱ སཾཝིདྷཱཡ ཨེཀདྡྷཱནསིཀྑཱཔདེན སདིསཱ མཏཱ ཉཱཏཱཏི ཨཏྠོ.

དུཏིཡཾ.

༢༡༤༠. པདུམསྶ ཝཱ པུཎྜརཱིཀསྶ ཝཱ ཨནྟམསོ ཀེསརེནཱཔི ཀཱམརཱགེན མུཏྟཀརཎསྶ ཏལགྷཱཏནེ མུཏྟཀརཎམྤི པཧཱརདཱནེ པཱཙིཏྟི ཧོཏཱིཏི ཡོཛནཱ. ཀེསརེནཱཔཱིཏི ཨཔི-སདྡེན མཧཱཔདུམཔཎྞེཧི ཝཏྟབྦམེཝ ནཏྠཱིཏི དཱིཔེཏི. ཡཐཱཧ – ‘‘ཨནྟམསོ ཨུཔྤལཔཏྟེནཱཔཱིཏི ཨེཏྠ པཏྟཾ ཏཱཝ མཧནྟཾ, ཀེསརེནཱཔི པཧཱརཾ དེནྟིཡཱ ཨཱཔཏྟིཡེཝཱ’’ཏི (པཱཙི. ཨཊྛ. ༨༠༣).

༢༡༤༡. ཏཏྠཱཏི ཏསྨིཾ མུཏྟཀརཎཏལེ.

ཏཏིཡཾ.

༢༡༤༢. ཡཱ པན བྷིཀྑུནཱི ཀཱམརཱགཔརེཏཱ ཀཱམརཱགེན པཱིལི༹ཏཱ ཨཏྟནོ བྱཉྫནེ མུཏྟཔཐེ ཨུཔྤལཔཏྟམྤི པཝེསེཏི, ན ཝཊྚཏི པཱཙིཏྟི ཧོཏཱིཏི ཡོཛནཱ. པི-སདྡེན ‘‘ཀེསརམཏྟམྤི པན པཝེསེནྟིཡཱ ཨཱཔཏྟིཡེཝཱ’’ཏི (པཱཙི. ཨཊྛ. ༨༡༢) ཨཊྛཀཐཱ ཨུལླིངྒིཏཱ.

༢༡༤༣-༤. ཡདྱེཝཾ ¶ ‘‘ཛཏུམཊྛཀེ པཱཙིཏྟིཡ’’ནྟི ཀསྨཱ ཝུཏྟནྟི ཨཱཧ ‘‘ཨིདཾ…པེ… ཛཏུམཊྛཀ’’ནྟི. ཨིདཾ ཛཏུམཊྛཀཾ ཝཏྠུཝསེནེཝ ཝུཏྟནྟི ‘‘ཨཐ ཁོ སཱ བྷིཀྑུནཱི ཛཏུམཊྛཀཾ ཨཱདིཡིཏྭཱ དྷོཝིཏུཾ ཝིསྶརིཏྭཱ ཨེཀམནྟཾ ཚཌྜེསི. བྷིཀྑུནིཡོ མཀྑིཀཱཧི སམྤརིཀིཎྞཾ པསྶིཏྭཱ ཨེཝམཱཧཾསུ ‘ཀསྶིདཾ ཀམྨ’ནྟི. སཱ ཨེཝམཱཧ ‘མཡ྄ཧིདཾ ཀམྨ’ནྟི. ཡཱ ཏཱ བྷིཀྑུནིཡོ ཨཔྤིཙྪཱ, ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི ‘ཀཐཉྷི ནཱམ བྷིཀྑུནཱི ཛཏུམཊྛཀཾ ཨཱདིཡིསྶཏཱི’’ཏི (པཱཙི. ༨༠༦) ཨཱགཏཝཏྠུཝསེནེཝ ཝུཏྟཾ, ན ཏཾ ཝིནཱ ཨཉྙསྶ ཝཊྚཀསྶ སམྦྷཝཏོཏི ཨདྷིཔྤཱཡོ. ཛཏུམཊྛཀཾ ནཱམ ཛཏུནཱ ཀཏོ མཊྛདཎྜཀོ.

དཎྜནྟི ¶ ཨེཏྠ ‘‘ཡཾ ཀིཉྩཱི’’ཏི སེསོ. ཡཐཱཧ ‘‘ཨནྟམསོ ཨུཔྤལཔཏྟམྤི མུཏྟཀརཎཾ པཝེསེཏཱི’’ཏི (པཱཙི. ༨༠༨). ཨེཏམྤི ཙ ཨཏིམཧནྟཾ, ཀེསརམཏྟམྤི པན པཝེསེནྟིཡཱ ཨཱཔཏྟི ཨེཝ. ཨེལཱ༹ལུཀནྟི ཀཀྐཱརིཕལཾ ཝཱ. ཏསྨིནྟི ཨཏྟནོ མུཏྟཀརཎེ.

༢༡༤༥. ཨཱབཱདྷཔཙྩཡཱཏི མུཏྟཀརཎཔྤདེསེ ཛཱཏཝཎཱདིམྷི ཝཎཊྛཱནནིརུཔནཱདིཔཙྩཡཱ.

ཙཏུཏྠཾ.

༢༡༤༦. ཨགྒཔབྦདྭཡཱདྷིཀནྟི ཨགྒཔབྦདྭཡཏོ ཀེསགྒམཏྟམྤི ཨདྷིཀཾ. ཡཐཱཧ ‘‘ཨནྟམསོ ཀེསགྒམཏྟམྤི ཨཏིཀྐཱམེཏི, ཨཱཔཏྟི པཱཙིཏྟིཡསྶཱ’’ཏི (པཱཙི. ༨༡༢). དཀསུདྡྷིཾ ཀརོནྟིཡཱཏི མུཏྟཀརཎཊྛཱནེ དྷོཝནཾ ཀརོནྟིཡཱ. ཡཐཱཧ ‘‘ཨུདཀསུདྡྷིཀཾ ནཱམ མུཏྟཀརཎསྶ དྷོཝནཱ ཝུཙྩཏཱི’’ཏི (པཱཙི. ༨༡༢).

༢༡༤༧. ‘‘ཏཱིཎཱི’’ཏི ¶ ཨིམིནཱ ཨེཀངྒུལིཡཱ པབྦདྭཡསྶ པཝེསེཏྭཱ དྷོཝནེ དོསཱབྷཱཝཾ དཱིཔེཏི. དཱིགྷཏོཏི ཨངྒུལིཡཱ དཱིགྷཏོ. ཏཱིཎི པབྦཱནི གམྦྷཱིརཏོ མུཏྟཀརཎེ པཝེསེཏྭཱ ཨུདཀསུདྡྷིཾ ཨཱདིཡནྟིཡཱ པཱཙིཏྟིཡཾ བྷཝེཏི ཡོཛནཱ.

༢༡༤༨. ཏིསྶོ, ཙཏསྶོ ཝཱ ཨངྒུལིཡོ ཨེཀཏོ ཀཏྭཱ ཝིཏྠཱརེན པཝེསནེ ཨེཀཔབྦེཔི པཝིཊྛེ ‘‘དྭངྒུལཔབྦཔརམ’’ནྟི ནིཡམིཏཔྤམཱཎཱཏིཀྐམཏོ ཨཱཧ ‘‘ཨེཀཔབྦམྤི ཡཱ པནཱ’’ཏི. ཡཱ པན བྷིཀྑུནཱི ཙཏུནྣཾ ཝཱཔི ཨངྒུལཱིནཾ ཏིསྶནྣཾ ཝཱཔི ཨངྒུལཱིནཾ ཨེཀཔབྦམྤི ཝིཏྠཱརཏོ པཝེསེཏི, ཏསྶཱ པཱཙིཏྟིཡཾ སིཡཱཏི ཡོཛནཱ.

༢༡༤༩. ཨིཏཱིཏི ཨེཝཾ. སབྦཔྤཀཱརེནཱཏི གམྦྷཱིརཔཝེསནཱདིནཱ སབྦེན པཀཱརེན. ཨབྷིབྱཏྟཏརཾ ཀཏྭཱཏི སུཔཱཀཊཏརཾ ཀཏྭཱ. ཨཡམཏྠོཏི ‘‘ཨེཀིསྶངྒུལིཡཱ ཏཱིཎཱི’’ཏིཨཱདིནཱ ཝུཏྟོ ཨཡམཏྠོ.

༢༡༥༠. དྭངྒུལཔབྦེ དོསོ ནཏྠཱིཏི ཡོཛནཱ. ཨུདཀསུདྡྷིཔཙྩཡེ པན སཏིཔི ཕསྶསཱདིཡནེ ¶ ཡཐཱཝུཏྟཔརིཙྪེདེ ཨནཱཔཏྟི. ཨདྷིཀམྤཱིཏི དྭངྒུལཔབྦཏོ ཨདྷིཀམྤི. ཨུདཀསུདྡྷིཾ ཀརོནྟིཡཱ དོསོ ནཏྠཱིཏི ཡོཛནཱ.

༢༡༥༡. ཏཐཱ ཨུདཀསུདྡྷིཾ ཀརོནྟཱིནཾ ཨུམྨཏྟིཀཱདཱིནཾ ཨནཱཔཏྟི པཀཱསིཏཱཏི ཡོཛནཱ.

པཉྩམཾ.

༢༡༥༢. བྷུཉྫཏོ པན བྷིཀྑུསྶཱཏི པཉྩནྣཾ བྷོཛནཱནཾ ཨཉྙཏརཾ བྷུཉྫཏོ བྷིཀྑུསྶ. ཡཐཱཧ ‘‘བྷུཉྫནྟསྶཱཏི པཉྩནྣཾ བྷོཛནཱནཾ ཨཉྙཏརཾ བྷོཛནཾ བྷུཉྫནྟསྶཱ’’ཏི (པཱཙི. ༨༡༧). པཱནཱིཡཾ ཝཱ ཝིདྷཱུཔནཾ ¶ ཝཱཏི ཝཀྑམཱནཾ པཱནཱིཡཾ, བཱིཛནཱིཡཉྩ. ཨུཔཏིཊྛེཡྻཱཏི ‘‘ཧཏྠཔཱསེ ཏིཊྛཏཱི’’ཏི (པཱཙི. ༨༡༧) ཝཙནཏོ ཨེཏྠ ཨུཔ-སདྡོ ཧཏྠཔཱསསངྑཱཏཾ སམཱིཔཾ ཝདཏཱིཏི ཝེདིཏབྦཾ.

༢༡༥༣. ཝཏྠཀོཎཱདི ཡཱ ཀཱཙི ‘‘བཱིཛནཱི’’ཏི ཝུཙྩཏཱིཏི ཡོཛནཱ, ཨིམིནཱ ‘‘བཱིཛནིཀིཙྩཾ སམྤཱདེསྶཱམཱི’’ཏི ཨདྷིཊྛཱཡ གཧིཏཙཱིཝརཀོཎཔྤཀཱརཾ ཡཾ ཀིཉྩི ‘‘བཱིཛནཱི’’ཏི ཝུཙྩཏཱིཏི ཨཏྠོ.

༢༡༥༤. ‘‘ཨཐ ཁོ སཱ བྷིཀྑུནཱི ཏསྶ བྷིཀྑུནོ བྷུཉྫནྟསྶ པཱནཱིཡེན ཙ ཝིདྷཱུཔནེན ཙ ཨུཔཏིཊྛིཏྭཱ ཨཙྩཱཝདཏི. ཨཐ ཁོ སོ བྷིཀྑུ ཏཾ བྷིཀྑུནིཾ ཨཔསཱདེཏི ‘མཱ, བྷགིནི, ཨེཝརཱུཔཾ ཨཀཱསི, ནེཏཾ ཀཔྤཏཱི’ཏི. ‘པུབྦེ མཾ ཏྭཾ ཨེཝཉྩ ཨེཝཉྩ ཀརོསི, ཨིདཱནི ཨེཏྟཀཾ ན སཧསཱི’ཏི པཱནཱིཡཐཱལཀཾ མཏྠཀེ ཨཱསུམྦྷིཏྭཱ ཝིདྷཱུཔནེན པཧཱརཾ ཨདཱསཱི’’ཏི (པཱཙི. ༨༡༥) ཨིམསྨིཾ ཝཏྠུམྷི བྷིཀྑཱུཧི ཨཱརོཙིཏེ ‘‘ཀཐཉྷི ནཱམ, བྷིཀྑཝེ, བྷིཀྑུནཱི བྷིཀྑུསྶ པཧཱརཾ དསྶཏཱི’’ཏིཨཱདཱིནི (པཱཙི. ༨༡༥) ཝཏྭཱ ‘‘ཡཱ པན བྷིཀྑུནཱི བྷིཀྑུསྶ བྷུཉྫནྟསྶ པཱནཱིཡེན ཝཱ ཝིདྷཱུཔནེན ཝཱ ཨུཔཏིཊྛེཡྻ, པཱཙིཏྟིཡ’’ནྟི (པཱཙི. ༨༡༦) ཝུཏྟཏྟཱ པཧཱརཔཙྩཡཱ ནུ ཁོཏི ཨཱསངྐཾ ནིཝཏྟེཏུམཱཧ ‘‘ཧཏྠཔཱསེ ཨིདྷ ཋཱནཔཙྩཡཱཔཏྟི དཱིཔིཏཱ’’ཏི. ཨེཏྠ ཙ ཨཱསུམྦྷིཏྭཱཏི པཱཏེཏྭཱ. ཨིདྷཱཏི ཨིམསྨིཾ སིཀྑཱཔདེ. ‘‘ན, བྷིཀྑཝེ, བྷིཀྑུནིཡཱ བྷིཀྑུསྶ པཧཱརོ དཱཏབྦོ. ཡཱ དདེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༤༢༠) བྷིཀྑུནིཀྑནྡྷཀེ ¶ ཝུཏྟཾ གཧེཏྭཱ ཨཱཧ ‘‘པཧཱརཔཙྩཡཱ ཝུཏྟཾ, ཁནྡྷཀེ དུཀྐཊཾ ཝིསུ’’ནྟི. ཨིམིནཱ ཝུཏྟསྶེཝཏྠསྶ ཀཱརཎཾ དསྶིཏཾ ཧོཏི.

༢༡༥༥. ཧཏྠཔཱསཾ ཛཧིཏྭཱཏི ཨེཏྠ ‘‘བྷོཛནཾ བྷུཉྫཏོ’’ཏི ཙ ཁཱདནཾ ཁཱདཏོཏི ཨེཏྠ ‘‘ཧཏྠཔཱསེ’’ཏི ཙ ཝཏྟབྦཾ ¶ . བྷོཛནཾ བྷུཉྫཏོ ཧཏྠཔཱསཾ ཛཧིཏྭཱ ཨུཔཏིཊྛནྟིཡཱ ཝཱ ཁཱདནཾ ཁཱདཏོ ཧཏྠཔཱསེ ཨུཔཏིཊྛནྟིཡཱ ཝཱ ཧོཏི ཨཱཔཏྟི དུཀྐཊནྟི ཡོཛནཱ.

༢༡༥༦. དེཏཱིཏི པཱནཱིཡཾ ཝཱ སཱུཔཱདིཾ ཝཱ ‘‘ཨིམཾ པིཝཐ, ཨིམིནཱ བྷུཉྫཐཱ’’ཏི དེཏི. ཏཱལཝཎྚཾ ‘‘ཨིམིནཱ བཱིཛནྟཱ བྷུཉྫཐཱ’’ཏི དེཏི. དཱཔེཏཱིཏི ཨཉྙེན ཨུབྷཡམྤི དཱཔེཏི. ཨིདཾ སིཀྑཱཔདཾ སམུཊྛཱནཏོ ཨེལ༹ཀལོམེན སམཾ མཏནྟི ཡོཛནཱ.

ཚཊྛཾ.

༢༡༥༧. ཝིཉྙཏྭཱཏི སཡཾ ཝིཉྙཏྭཱ, ཨཉྙཱཡ ཝཱ ཝིཉྙཱཔེཏྭཱ. ‘‘ཝིཉྙཏྭཱ ཝཱ ཝིཉྙཱཔེཏྭཱ ཝཱ’’ཏི (པཱཙི. ༨༢༡) ཧི སིཀྑཱཔདཾ. ཨཱམཀཾ དྷཉྙནྟི ཨཔཀྐཾ ཨབྷཊྛཾ སཱལིཨཱདིཀཾ སཏྟཝིདྷཾ དྷཉྙཾ. ཡཐཱཧ – ‘‘ཨཱམཀདྷཉྙཾ ནཱམ སཱལི ཝཱིཧི ཡཝོ གོདྷུམོ ཀངྒུ ཝརཀོ ཀུདྲཱུསཀོ’’ཏི (པཱཙི. ༨༢༢). ཀོཊྚེཏྭཱཏི མུསལེཧི ཀོཊྚེཏྭཱ. ཡདི པརིབྷུཉྫཏཱིཏི ཡོཛནཱ.

༢༡༥༨-༦༠. ‘‘བྷུཉྫིསྶཱམཱིཏི པཊིགྒཎྷཱཏི, ཨཱཔཏྟི དུཀྐཊསྶཱཏི ཨིདཾ པཡོགདུཀྐཊཾ ནཱམ, ཏསྨཱ ན ཀེཝལཾ པཊིགྒཧཎེཡེཝ དུཀྐཊཾ ཧོཏཱི’’ཏིཨཱདིནཱ (པཱཙི. ཨཊྛ. ༨༢༢) ཨཊྛཀཐཱགཏཾ ཝིབྷཱགཾ དསྶེཏུམཱཧ ‘‘ན ཀེཝལཾ ཏུ དྷཉྙཱན’’ནྟིཨཱདི. པནཱཏི ཨཔི-སདྡཏྠེ, སུཀྑཱཔནེཔཱིཏི ཨཏྠོ. བྷཛྫནཏྠཱཡཱཏི ཨེཏྠ ‘‘ཝདྡལིདིཝསེ’’ཏི སེསོ. ‘‘ཀཔལླསཛྫནེ ཨུདྡྷནསཛྫནེ’’ཏི པཙྩེཀཾ ཡོཛེཏབྦཾ. དབྦིསཛྫནེཏི ཀཊཙྪུསམྤཱདནེ. ཏཏྠ ཀཔལླཀེ དྷཉྙཔཀྑིཔནེཏི ཡོཛནཱ. ‘‘གྷཊྚནཀོཊྚནེ’’ཏི ཝཏྟབྦེ གཱཐཱབནྡྷཝསེན ན-ཀཱརལོཔཾ ཀཏྭཱ ‘‘གྷཊྚཀོཊྚནེ’’ཏི ཝུཏྟཾ.

༢༡༦༡-༣. པམཱཎ-སདྡསྶ ¶ ཨཱཝཏྟལིངྒསངྑྱཏྟཱ ཨཱཧ ‘‘བྷོཛནཉྩེཝ ཝིཉྙཏྟིཔམཱཎ’’ནྟི ¶ . ཨཱཝཏྟལིངྒསངྑྱཏྟཾ ནཱམ ནིཡཏལིངྒེཀཏྟབཧུཏྟཾ. ཏཐཱ ཧེཏྠ པམཱཎ-སདྡོ ནིཡཏནཔུཾསཀལིངྒེ ནིཡཏེཀཏྟཾ ཝུཙྩཏི. ཨེཏྠ ཨིམསྨིཾ སིཀྑཱཔདེ བྷོཛནཉྩེཝ ཝིཉྙཏྟི ཙཱཏི ཨིདཾ དྭཡཾ ཧི ཡསྨཱ པམཱཎཾ, ཏསྨཱ སཡཾ ཝིཉྙཏྭཱ ཝཱ ཨཉྙཏོ བྷཛྫནཱདཱིནི ཀཱརཱཔེཏྭཱ ཝཱ ཨཉྙཱཡ པན ཝིཉྙཱཔེཏྭཱ སཡཾ བྷཛྫནཱདཱིནི ཀཏྭཱ ཝཱ ཡཱ པན བྷིཀྑུནཱི ཨཛ྄ཛྷོཧརཏི, ཏསྶཱ ཨཛ྄ཛྷོཧཱརཔཡོགེསུ པཱཙིཏྟིཡོ སིཡུནྟི ཡོཛནཱ.

མཧཱཔཙྩརིཡཾ (པཱཙི. ཨཊྛ. ༨༢༣) ཝུཏྟཾ ཝིནིཙྪཡཾ དསྶེཏུམཱཧ ‘‘མཱཏརཾ ཝཱ’’ཏིཨཱདི. མཱཏརཾ ཝཱཔི ཡཱཙིཏྭཱཏི ཨེཏྠ ཝཱ-སདྡོ ཨཏྠནྟརཝིཀཔྤནེ. པི-སདྡོ སམྦྷཱཝནེ. མཱཏརཾ ཝཱ པིཏརཾ ཝཱ ཨཉྙཾ ཝཱ ཉཱཏཀཾ ཝཱ པཝཱརིཏཾ ཝཱ ཨཱམཀདྷཉྙཾ ཡཱཙིཏྭཱ ཝཱ ཨཉྙཱཡ ཀཱརཱཔེཏྭཱ ཝཱ ཡཱ པརིབྷུཉྫཏི, ཏསྶཱ པཱཙིཏྟཱིཏི ཡོཛནཱ.

༢༡༦༤. ཨཝིཉྙཏྟིཡཱ ལདྡྷཾ སཡཾ ཝཱ བྷཛྫནཱདཱིནི ཀཏྭཱ ཝཱ ཨཉྙཱཡ ཀཱརཱཔེཏྭཱ ཝཱ ཡཱ པརིབྷུཉྫཏི, ཏསྶཱ དུཀྐཊནྟི ཡོཛནཱ.

༢༡༦༥. ཨཉྙཱཡ པན ཝིཉྙཏྟིཡཱ ལདྡྷཾ ཏཱཡ ཀཱརཱཔེཏྭཱཔི སཡཾ ཀཏྭཱ ཝཱ ཨཛ྄ཛྷོཧརནྟིཡཱ ཏཐཱ ཨཱཔཏྟི དུཀྐཊནྟི ཡོཛནཱ. ཨིདཉྩ མཧཱཔཙྩརིཡཱགཏནཡཾ གཧེཏྭཱ ཝུཏྟཾ. མཧཱཨཊྛཀཐཱཡཾ པན ‘‘ཨཉྙཱཡ ཝིཉྙཏྟཾ བྷུཉྫནྟིཡཱ དུཀྐཊ’’ནྟི (པཱཙི. ཨཊྛ. ༨༢༢) ཝུཏྟཏྟཱ ཝིཉྙཏྟིཡཱཔི ཨཉྙཱཡ ལདྡྷཾ ཨཱམཀཾ དྷཉྙཾ ཏཱཡ ཀཱརཱཔེཏྭཱ ཝཱ སཡཾ ཀཏྭཱ ཝཱ པརིབྷུཉྫནྟསྶཱཔི དུཀྐཊམེཝ ཝུཏྟནྟི ཝེདིཏབྦཾ.

༢༡༦༦-༧. སེདཀམྨཱདིཨཏྠཱཡཱཏི ¶ ཝཱཏརོགཱདིནཱ ཨཱཏུརཱནཾ སེདནཱདིཔཊིཀཱརཏྠཱཡ. ཨིདྷ ‘‘ཨཉྙཱཏཀཨཔྤཝཱརིཏཊྛཱནེཔཱི’’ཏི སེསོ. བྷིཀྑཱུནམྤི ཨེསེཝ ནཡོ. ཋཔེཏྭཱ སཏྟ དྷཉྙཱནི ཉཱཏཀཔཝཱརིཏཊྛཱནེ སེསཝིཉྙཏྟིཡཱཔི ཨནཱཔཏྟཱིཏི ཉཱཏབྦནྟི ཡོཛནཱ. སེསཝིཉྙཏྟིཡཱཏི མུགྒམཱསཨལཱབུཀུམྦྷཎྜཀཱདཱིནཾ ཝུཏྟདྷཉྙཱཝསེསཱནཾ ཝིཉྙཏྟིཡཱ.

སཱལིཨཱདཱིནཾ སཏྟནྣཾ དྷཉྙཱནཾ དུཀྐཊསྶ ཝུཏྟཏྟཱ, ཨནཱམཱསཏྟཱ ཙ སབྦེན སབྦཾ ན ཝཊྚནྟཱིཏི དསྶེཏུམཱཧ ‘‘ཉཱཏཀཱནམྤཱི’’ཏིཨཱདི.

༢༡༦༨. ལདྡྷནྟི ¶ ལབྦྷམཱནཾ. ནཝཀམྨེསཱུཏི ནཝཀམྨཏྠཱཡ, ནིམིཏྟཏྠེ བྷུམྨཾ. ཨེཏྠ ‘‘སམྤཊིཙྪིཏུ’’ནྟི སེསོ. ‘‘ཨཝིཉྙཏྟིཡཱ ལབྦྷམཱནཾ པན ནཝཀམྨཏྠཱཡ སམྤཊིཙྪིཏུཾ ཝཊྚཏཱི’’ཏི (པཱཙི. ཨཊྛ. ༨༢༣) མཧཱཔཙྩརིཡཾ ཝུཏྟཾ.

སཏྟམཾ.

༢༡༦༩. སངྐཱརནྟི ཀཙཝརཾ. ཝིགྷཱསཀཾ ཝཱཏི ཨུཙྪིཊྛཀམཙྪཀཎྚཀམཾསཊྛིཙལཀམུཁདྷོཝནཱདིཀཾ ཡཾ ཀིཉྩི. ཚཌྜེཡྻ ཝཱཏི ཨེཏྠ ‘‘སཡ’’ནྟི སེསོ ‘‘ཚཌྜཱཔེཡྻ པརེཧཱི’’ཏི ཝཀྑམཱནཏྟཱ. ཀུཊྚསྶ ཏིརོ ཏིརོཀུཊྚཾ, ཏསྨིཾ, ཀུཊྚསྶ པརབྷཱགེཏི ཨཏྠོ. ‘‘པཱཀཱརེཔི ཨཡཾ ནཡོ’’ཏི ཝཀྑམཱནཏྟཱ ཀུཊྚནྟི ཝཱ བྱཏིརིཏྟཱ བྷིཏྟི གཧེཏབྦཱ.

༢༡༧༡. ཨེཀཱཏི ཨེཏྠ ཨཱཔཏྟཱིཏི སེསོ. ‘‘ཏསྶཱ’’ཏི ཨིམིནཱ སམྦནྡྷོ.

༢༡༧༢. ཚཌྜནེཏི ཨེཏྠ པི-སདྡོ ལུཏྟནིདྡིཊྛོ. དནྟཀཊྛསྶ ཚཌྜནེཔི བྷིཀྑུནིཡཱ པཱཙིཏྟི པརིདཱིཔིཏཱཏི ཡོཛནཱ.

༢༡༧༣-༤. སབྦཏྠཱཏི ¶ ཝུཏྟཔྤཀཱརེསུ སབྦེསུ ཝིཀཔྤེསུ. ཨནཱཔཏྟིཝིསཡཾ དསྶེཏུམཱཧ ‘‘ཨཝལཉྫེཔཱི’’ཏིཨཱདི. ཨཝལཉྫེ ཋཱནེ ཨནོལོཀེཏྭཱ ཚཌྜེནྟིཡཱཔི ཝཱ ཝལཉྫེ ཋཱནེ ཨོལོཀེཏྭཱཔི ཝཱ པན ཚཌྜེནྟིཡཱ ཨནཱཔཏྟཱིཏི ཡོཛནཱ. ཚཌྜནཾ ཀྲིཡཾ. ཨནོལོཀནཾ ཨཀྲིཡཾ.

ཨཊྛམཾ.

༢༡༧༥-༦. ཡཱ པན བྷིཀྑུནཱི ཁེཏྟེ ཝཱ ནཱལི༹ཀེརཱདིཨཱརཱམེ ཝཱ ཡཏྠ ཀཏྠཙི རོཔིམེ ཧརིཏཊྛཱནེ ཏཱནི ཝིགྷཱསུཙྩཱརསངྐཱརམུཏྟསངྑཱཏཱནི ཙཏྟཱརི ཝཏྠཱུནི སཙེ སཡཾ ཚཌྜེཏི ཝཱ, ཏཐཱ པརེ ཚཌྜཱཔེཏི ཝཱ, ཏསྶཱ བྷིཀྑུནིཡཱ ཨཱཔཏྟིཝིནིཙྪཡོ ཝུཏྟནཡོ ‘‘ཨེཀེཀ’’མིཙྩཱདིནཱ ཡཐཱཝུཏྟཔཀཱརོཏི ཡོཛནཱ.

༢༡༧༧-༨. ཡཱ པན བྷིཀྑུནཱི ཧརིཏེ ཁེཏྟེ ནིསཱིདིཏྭཱ བྷུཉྫམཱནཱ ཝཱ ཏཐཱ ཧརིཏེ ཏཏྠ ¶ ཁེཏྟེ ཨུཙྪུཨཱདཱིནི ཁཱདནྟི ཁཱདམཱནཱ གཙྪནྟཱི ཝཱ ཡདི ཨུཙྪིཊྛཾ ཨུདཀཾ ཝཱ ཙལཀཱདིཾ ཝཱ ཚཌྜེཏི, ཏསྶཱ པཱཙིཏྟིཡཾ ཧོཏཱིཏི ཡོཛནཱ. ཙལཀཾ ནཱམ ཝམིཀརཾ.

༢༡༧༩. ཏཱདིསེ ཧརིཏེ ཋཱནེ ཨནྟམསོ མཏྠཀཚིནྣཾ ནཱལི༹ཀེརམྤི ཛལཾ པིཝིཏྭཱ ཚཌྜེནྟིཡཱ ཨཱཔཏྟི སིཡཱཏི ཡོཛནཱ.

༢༡༨༠. སབྦེསནྟི བྷིཀྑུབྷིཀྑུནཱིནཾ.

༢༡༨༡. ལཱཡིཏམྤི ཁེཏྟཾ པུན རོཧཎཏྠཱཡ མནུསྶཱ རཀྑནྟི ཙེ, ཏཏྠ ཏསྨིཾ ཁེཏྟེ ཝིགྷཱསུཙྩཱརཱདཱིནི ཚཌྜེནྟིཡཱ ཨསྶཱ བྷིཀྑུནིཡཱ ཡཐཱཝཏྠུཀམེཝ ཧི པཱཙིཏྟིཡམེཝཱཏི ¶ ཡོཛནཱ. ‘‘ཨསྶཱ ཡཐཱཝཏྠུཀ’’ནྟི ཨིམིནཱ བྷིཀྑུསྶ དུཀྐཊནྟི ཝུཏྟམེཝ ཧོཏི.

༢༡༨༢. ཚཌྜིཏེ ཁེཏྟེཏི མནུསྶེཧི ཨུདྡྷཊསསྶེ ཁེཏྟེ. ཡཐཱཧ – ‘‘མནུསྶེསུ སསྶཾ ཨུདྡྷརིཏྭཱ གཏེསུ ཚཌྜིཏཁེཏྟཾ ནཱམ ཧོཏི, ཏཏྠ ཝཊྚཏཱི’’ཏི (པཱཙི. ཨཊྛ. ༨༣༠). ཨེཝཾ ཨཀཏེཔི ཁེཏྟེ སཱམིཀེ ཨཱཔུཙྪིཏྭཱ ཀཱཏུཾ ཝཊྚཏི. ཡཐཱཧ ‘‘སཱམིཀེ ཨཔལོཀེཏྭཱ ཚཌྜེཏཱི’’ཏི (པཱཙི. ༨༣༢). ཨིདྷ ཁེཏྟཔཱལཀཱ, ཨཱརཱམཱདིགོཔཀཱ ཙ སཱམིཀཱ ཨེཝ. སངྒྷསྶ ཁེཏྟེ, ཨཱརཱམེ ཙ སཙེ ‘‘ཏཏྠ ཀཙཝརཾ ན ཚཌྜེཏབྦ’’ནྟི ཀཏིཀཱ ནཏྠི, བྷིཀྑུསྶ ཚཌྜེཏུཾ ཝཊྚཏི སངྒྷཔརིཡཱཔནྣཏྟཱ, ན བྷིཀྑུནཱིནཾ. ཏཱསཾ པན བྷིཀྑུསངྒྷེ ཝུཏྟནཡེན ན ཝཊྚཏི, ན ཏསྶ བྷིཀྑུསྶ, ཨེཝཾ སནྟེཔི སཱརུཔྤཝསེན ཀཱཏབྦནྟི. སབྦནྟི ཨུཙྩཱརཱདི ཙཏུབྦིདྷཾ.

ནཝམཾ.

༢༡༨༣. ཨེཏྠ ‘‘ནཙྩཾ ནཱམ ཡཾ ཀིཉྩི ནཙྩཾ. གཱིཏཾ ནཱམ ཡཾ ཀིཉྩི གཱིཏཾ. ཝཱདིཏཾ ནཱམ ཡཾ ཀིཉྩི ཝཱདིཏ’’ནྟི (པཱཙི. ༨༣༥) ཝཙནཏོ ‘‘ཡཾ ཀིཉྩཱི’’ཏི སེསོ. ཡཱ པན བྷིཀྑུནཱི ཡཾ ཀིཉྩི ནཙྩཾ ཝཱ ཡཾ ཀིཉྩི གཱིཏཾ ཝཱ ཡཾ ཀིཉྩི ཝཱདིཏཾ ཝཱ དསྶནཏྠཱཡ གཙྪེཡྻཱཏི ཡོཛནཱ. ཏཏྠ ཡཾ ཀིཉྩི ནཙྩནྟི ནཊཱདཡོ ཝཱ ནཙྩནྟུ སོཎྜཱ ཝཱ, ཨནྟམསོ མོརསུཀམཀྐཊཱདཡོཔི, སབྦམྤེཏཾ ནཙྩམེཝ. ཡཾ ཀིཉྩི གཱིཏནྟི ནཊཱདཱིནཾ ཝཱ གཱིཏཾ ཧོཏུ ཨརིཡཱནཾ པརིནིབྦཱནཀཱལེ རཏནཏྟཡགུཎཱུཔསཾཧིཏཾ སཱདྷུཀཱིལི༹ཏགཱིཏཾ ཝཱ ཨསཉྙཏབྷིཀྑཱུནཾ ¶ དྷམྨབྷཱཎཀགཱིཏཾ ཝཱ, སབྦམྤེཏཾ གཱིཏམེཝ. ཡཾ ཀིཉྩི ཝཱདིཏནྟི གྷནཱདིཝཱདནཱིཡབྷཎྜཝཱདིཏཾ ཝཱ ཧོཏུ ཀུཊབྷེརིཝཱདིཏཾ ཝཱ ཨནྟམསོ ཨུདརབྷེརིཝཱདིཏམྤི ¶ , སབྦམྤེཏཾ ཝཱདིཏམེཝ. ‘‘དསྶནསཝནཏྠཱཡཱ’’ཏི ཝཏྟབྦེ ཝིརཱུཔེཀསེསནཡེན ‘‘དསྶནཏྠཱཡཱ’’ཏི ཝུཏྟཾ. པཉྩནྣཾ ཝིཉྙཱཎཱནཾ ཡཐཱསཀཾ ཝིསཡསྶ ཨཱལོཙནསབྷཱཝཏཱཡ ཝཱ ‘‘དསྶནཏྠཱཡ’’ ཨིཙྩེཝ ཝུཏྟཾ.

༢༡༨༤. པུབྦཔཡོགདུཀྐཊེན སཧ པཱཙིཏྟིཡཾ དསྶེཏུམཱཧ ‘‘དསྶནཏྠཱཡ ནཙྩསྶཱ’’ཏིཨཱདི. གཱིཏསྶཱཏི ཨེཏྠ ‘‘ཝཱདིཏསྶཱ’’ཏི པཀརཎཏོ ལབྦྷཏི.

༢༡༨༥. ཨེཀཔཡོགེནཱཏི ཨེཀདིསཱཝལོཀནཔཡོགེན. ཏེནེཝ ཝཀྑཏི ‘‘ཨཉྙསྨིམྤི…པེ… སིཡུ’’ནྟི. པསྶཏཱིཏི ཨེཏྠ ‘‘ནཙྩ’’ནྟི སེསོ. ཏེསནྟི ཡེསཾ ནཙྩཾ པསྶཏི. པི-སདྡེན ཝཱདིཏམྤི སམྤིཎྜེཏི. ཡཐཱཧ ‘‘ཏེསཾཡེཝ གཱིཏཝཱདིཏཾ སུཎཱཏི, ཨེཀམེཝ པཱཙིཏྟིཡ’’ནྟི (པཱཙི. ཨཊྛ. ༨༣༦).

༢༡༨༦. ཨཉྙཏོཏི ཨཉྙསྨིཾ དིསཱབྷཱགེ.

༢༡༨༧. ‘‘ཝིསུཾ པཱཙིཏྟིཡོ སིཡུ’’ནྟི ཨིདམེཝ པཀཱསེཏུམཱཧ ‘‘པཡོགགཎནཱཡེཏྠ, ཨཱཔཏྟིགཎནཱ སིཡཱ’’ཏི. ཨེཏྠཱཏི ཨིམསྨིཾ ནཱནཱདིསཱབྷཱགེ. ནཙྩགཱིཏཝཱདིཏཱནཾ དསྶནསཝནེ ཨཊྛཀཐཱགཏཾ ཝིནིཙྪཡཾ དསྶེཏུམཱཧ ‘‘ནཙྩིཏུ’’ནྟིཨཱདི.

༢༡༨༨. ‘‘ནཙྩ ཨིཏཱི’’ཏི པདཙྪེདོ, ‘‘ནཙྩཱཧཱི’’ཏིཔི པཱཋོ. ཨུཔཊྛཱནནྟི བྷེརིསདྡཔཱུཛཾ. སམྤཊིཙྪིཏུནྟི ‘‘སཱདྷཱུ’’ཏི ཨདྷིཝཱསེཏུཾ. ཨིམསྶ ཨུཔལཀྑཎཝསེན ཝུཏྟཏྟཱ ནཙྩགཱིཏེཔི ཨེསེཝ ནཡོ.

༢༡༨༩-༩༠. སབྦཏྠཱཏི ནཙྩནཱདཱིསུ སབྦཏྠ. ཨུཔཊྛཱནཾ ཀརོམཱཏི ཏུམྷཱཀཾ ཙེཏིཡསྶ ནཙྩཱདཱིཧི ཨུཔཧཱརཾ ཀརོམཱཏི. ཨུཔཊྛཱནཾ པསཏྠནྟི ཨུཔཊྛཱནཀརཎཾ ནཱམ སུནྡརནྟི.

ཡཱ ¶ ཨཱརཱམེཡེཝ ཙ ཋཏྭཱ པསྶཏི ཝཱ སུཎཱཏི ཝཱཏི ཡོཛནཱ, ཨིདྷ ‘‘ཨནྟརཱརཱམེ ཝཱ’’ཏིཨཱདི ¶ སེསོ. ‘‘ཨཱརཱམེ ཋཏྭཱ ཨནྟརཱརཱམེ ཝཱ བཧིཨཱརཱམེ ཝཱ ནཙྩཱདཱིནི པསྶཏི ཝཱ སུཎཱཏི ཝཱ, ཨནཱཔཏྟཱི’’ཏི (པཱཙི. ཨཊྛ. ༨༣༧) ཨཊྛཀཐཱཡ ཝུཏྟཾ. ‘‘ཋཏྭཱ’’ཏི ཝུཏྟེཔི སབྦེསུཔི ཨིརིཡཱཔཐེསུ ལབྦྷཏི. ཨཱརཱམེ ཋཏྭཱཏི ན ཀེཝལཾ ཋཏྭཱཝ, ཏཏོ གནྟྭཱཔི སབྦིརིཡཱཔཐེཧིཔི ལབྷཏི. ‘‘ཨཱརཱམེ ཋིཏཱ’’ཏི (པཱཙི. ༨༣༧) པན ཨཱརཱམཔརིཡཱཔནྣདསྶནཏྠཾ ཝུཏྟཾ. ཨིཏརཐཱ ནིསིནྣཱཔི ན ལབྷེཡྻཱཏི གཎྛིཔདཱདཱིསུ ཝུཏྟཾ. བྷིཀྑཱུནམྤི ཨེསེཝ ནཡོ.

༢༡༩༡. ཡཱ ཨཏྟནོ ཋིཏོཀཱསཾ ཨཱགནྟྭཱ པཡོཛིཏཾ པསྶཏི ཝཱ སུཎཱཏི ཝཱཏི ཡོཛནཱ. ཋིཏོཀཱསནྟི ཨེཏྠ གཏིནིཝཏྟིསཱམཉྙེན སཡིཏནིསིནྣམྤི གཡ྄ཧཏི. ཏཐཱརཱུཔཱ ཧི ཀཱརཎཱ གནྟྭཱ པསྶནྟིཡཱ ཝཱཔཱིཏི ཡོཛནཱ. ཀཱརཎཾ ནཱམ སལཱཀབྷཏྟཱདིཀཱརཎཾ. ཡཐཱཧ ‘‘སཏི ཀརཎཱིཡེཏི སལཱཀབྷཏྟཱདཱིནཾ ཝཱ ཨཏྠཱཡ ཨཉྙེན ཝཱ ཀེནཙི ཀརཎཱིཡེན གནྟྭཱ གཏཊྛཱནེ པསྶཏི ཝཱ སུཎཱཏི ཝཱ, ཨནཱཔཏྟཱི’’ཏི (པཱཙི. ཨཊྛ. ༨༣༧).

༢༡༩༢. མགྒཾ གཙྪནྟཱི པཊིཔཐེ ནཙྩཾ ཨཊྛཏྭཱ པསྶཏཱིཏི ཨེཝཾ པསྶནྟིཡཱཔི ཙ ཏཐཱ ཨནཱཔཏྟཱིཏི ཨཛ྄ཛྷཱཧཱརཡོཛནཱ. པཊིཔཐེཏི གམནམགྒཱབྷིམུཁེ. ཨཱཔདཱསུཔཱིཏི ཏཱདིསེན ཨུཔདྡཝེན ཨུཔདྡུཏཱ སམཛྫཊྛཱནཾ པཝིསཏི, ཨེཝཾ པཝིསིཏྭཱ པསྶནྟིཡཱ ཝཱ སུཎནྟིཡཱ ཝཱ ཨནཱཔཏྟི.

༢༡༩༣. ཨིདཾ སིཀྑཱཔདཾ སམུཊྛཱནཏོ ཨེལ༹ཀལོམསིཀྑཱཔདེན སམཾ མཏཾ ‘‘སམཱན’’ནྟི ཝིཉྙཱཏཾ.

དསམཾ.

ལསུཎཝགྒོ པཋམོ.

༢༡༩༤-༥. ཨིདྷ ¶ ཨིམསྨིཾ སཱསནེ ཡཱ པན བྷིཀྑུནཱི རཏྟནྡྷཀཱརསྨིཾ ཨཔྤདཱིཔེ པུརིསེན སདྡྷིཾ ཨེཀིཀཱ སཙེ སནྟིཊྛཏི, ཏསྶཱ པཱཙིཏྟིཡཾ ཝུཏྟནྟི ཡོཛནཱ. རཏྟནྡྷཀཱརསྨིནྟི རཏྟིཡཾ. རཏྟིཔརིཡཱཡོ ཧི རཏྟནྡྷཀཱར-སདྡོ. ཡཐཱཧ པདབྷཱཛནེ ‘‘རཏྟནྡྷཀཱརེཏི ཨོགྒཏེ སཱུརིཡེ’’ཏི (པཱཙི. ༨༤༠). ཨཔྤདཱིཔེཏི པཛྫོཏཙནྡསཱུརིཡཨགྒཱིསུ ཨེཀེནཱཔི ཨནོབྷཱསིཏེ, ཨིམིནཱ ¶ རཏྟིཀྑེཏྟཾ དསྶེཏི. ‘‘སནྟིཊྛཏཱི’’ཏི ཨིམིནཱ གམནནིསིནྣསཡནསངྑཱཏཾ ཨིརིཡཱཔཐཏྟིཀཉྩ ཨུཔལཀྑིཏནྟི དཊྛབྦཾ. ཝུཏྟཉྷི ཝཛིརབུདྡྷིནཱ ‘‘སནྟིཊྛེཡྻཱཏི ཨེཏྠ ཋཱནཱཔདེསེན ཙཏུབྦིདྷོཔི ཨིརིཡཱཔཐོ སངྒཧིཏོ, ཏསྨཱ པུརིསེན སདྡྷིཾ ཙངྐམནཱདཱིནི ཀརོནྟིཡཱཔི པཱཙིཏྟིཡཉྩ ཨུཔལབྦྷཏཱི’’ཏི (ཝཛིར. ཊཱི. པཱཙིཏྟིཡ ༨༣༩ ཐོཀཾ ཝིསདིསཾ). པུརིསེན སདྡྷིནྟི སནྟིཊྛིཏུཾ, སལླཔིཏུཉྩ ཝིཉྙུནཱ མནུསྶཔུརིསེན སདྡྷིཾ.

རཧསྶཱདཝསེན པུརིསསྶ ཧཏྠཔཱསཾ སམཱགནྟྭཱ ཏེན སདྡྷིཾ སལླཔནྟིཡཱ ཝཱ པཱཙིཏྟིཡཾ ཝུཏྟནྟི ཡོཛནཱ.

༢༡༩༦-༧. ཡཱ པན བྷིཀྑུནཱི སཙེ མནུསྶཔུརིསསྶ ཧཏྠཔཱསཾ ཝིཛཧིཏྭཱ སནྟིཊྛཏི ཝཱ སལླཔཏི ཝཱ, ཡཀྑཔེཏཏིརཙྪཱནགཏཱནཾ ཧཏྠཔཱསཾ ཨཝིཛཧིཏྭཱ སནྟིཊྛཏི ཝཱ སལླཔཏི ཝཱ, ཏསྶཱ དུཀྐཊཾ པརིདཱིཔིཏནྟི ཡོཛནཱ.

ཝིཉྙུགྒཧཎེན ཨཝིཉྙཱུ པུརིསོ ཨནཱཔཏྟིཾ ན ཀརོཏཱིཏི དཱིཔེཏི.

༢༡༩༨. ཨཉྙཝིཧིཏཱཡཱཏི རཧོཨསྶཱདཏོ ཨཉྙཾ ཙིནྟེནྟིཡཱ. ཡཐཱཧ ‘‘རཧོཨསྶཱདཏོ ཨཉྙཝིཧིཏཱཝ ཧུཏྭཱ’’ཏི (པཱཙི. ཨཊྛ. ༨༤༡). ཙཏུཏྠེན, ཚཊྛེན ཙ སམུཊྛཱནེན སམུཊྛཱནཏོ ¶ ཐེཡྻསཏྠསམུཊྛཱནཾ. སནྟིཊྛནསལླཔནཝསེན ཀྲིཡཾ. སཉྙཱཡ ཝིམོཀྑོ ཨེཏསྨིནྟི སཉྙཱཝིམོཀྑཀཾ.

པཋམཾ.

༢༡༩༩. པཊིཙྪནྣེ ཨོཀཱསེཏི ཀུཊྚཱདཱིསུ ཡེན ཀེནཙི པཊིཙྪནྣེ ཨོཀཱསེ. ཨིདཾ ཝཙནཾ.

དུཏིཡཾ.

༢༢༠༠. ཏཏིཡེ ‘‘ཨཛ྄ཛྷོཀཱསེ’’ཏི ཙ ཙཏུཏྠེ ‘‘རཐིཀཱཡ, བྱཱུཧེ, སིངྒྷཱཊཀེ’’ཏི པདཱནི ཙ ཝཛྫེཏྭཱ ཨཝསེསཾ སནྡྷཱཡཱཧ ‘‘ཨཔུབྦཾ ནཏྠི ཀིཉྩིཔཱི’’ཏི. ཨེཏྠ ‘‘ཝཏྟབྦ’’ནྟི སེསོ. ཨེཏྠ ¶ ཙ རཐིཀཱཡཱཏི རཙྪཱཡ. བྱཱུཧེཏི ཨནིབྦིདྡྷརཙྪཱཡ. སིངྒྷཱཊཀེཏི ཙཙྩརེ ཨོཀཱསེ, ཏིཀོཎཾ ཝཱ ཙཏུཀོཎཾ ཝཱ མགྒསམོདྷཱནཊྛཱནེཏི ཝུཏྟཾ ཧོཏི.

ཏཏིཡཙཏུཏྠཱནི.

༢༢༠༡-༢. ‘‘ཡཱ པན བྷིཀྑུནཱི པུརེབྷཏྟཾ ཀུལཱནི ཨུཔསངྐམིཏྭཱ ཨཱསནེ ནིསཱིདིཏྭཱ སཱམིཀེ ཨནཱཔུཙྪཱ པཀྐམེཡྻ, པཱཙིཏྟིཡ’’ནྟི (པཱཙི. ༨༥༥) ཝཙནཏོ ཡཱ པན བྷིཀྑུནཱི པུརེབྷཏྟཾ ཀུལཱནི ཨུཔསངྐམིཏྭཱ ཚདནནྟོ ཨཱསནེ ནིསཱིདིཏྭཱ སཱམིཀེ ཨནཱཔུཙྪཱ ཨནོཝསྶཀཔྤདེསཾ ཨཏིཀྐམེཏི, ཡཱ ཙ ཨཛ྄ཛྷོཀཱསེ ཝཱ ནིསཱིདིཏྭཱ སཙེ ཨུཔཙཱརཾ ཨཏིཀྐམེཏི, ཏསྶཱ པཋམེ པདེ དུཀྐཊཾ ཧོཏི, དུཏིཡེ པདེ པཱཙིཏྟི པརིཡཱཔུཏཱཏི ཡོཛནཱ. ‘‘ཨཱསནེ’’ཏི ཨིམིནཱ པལླངྐམཱབྷུཛིཏྭཱ ནིསཱིདནཱརཧམཱསནཾ ཨདྷིཔྤེཏཾ. ཡཐཱཧ – ‘‘ཨཱསནཾ ནཱམ པལླངྐསྶ ཨོཀཱསོ ཝུཙྩཏཱི’’ཏི (པཱཙི. ༨༥༦). ཨནོཝསྶཔྤདེསནྟི ནིབྦཀོསབྦྷནྟརཾ. ཨབྦྷོཀཱསེ ཨཱཔཏྟིཁེཏྟཾ དསྶེཏུམཱཧ ‘‘ཨུཔཙཱརམྤི ཝཱ སཙེ’’ཏི. ཨུཔཙཱརནྟི དྭཱདསཧཏྠཔྤམཱཎཾ ¶ པདེསཾ. ཡཐཱཧ གཎྛིཔདེ ‘‘ཨུཔཙཱརོ དྭཱདསཧཏྠོ’’ཏི.

༢༢༠༣. ‘‘ཏཐཱ’’ཏི ཨིམིནཱ ‘‘དུཀྐཊཾ སམུདཱིརིཏ’’ནྟི ཨིདཾ པཙྩཱམསཏི. ཨཱཔུཊྛེ ཨནཱཔུཊྛསཉྙཱཡ ཨཱཔུཊྛེ ཝིཙིཀིཙྪཏོ པཀྐམནྟིཡཱ ཏཐཱ དུཀྐཊནྟི ཡོཛནཱ. ཨེཏྠ ཙ ‘‘བྷིཀྑུནིཡཱ’’ཏི སམྦནྡྷིནིཡཱ སམཱནཏྟཱ ‘‘ཝིཙིཀིཙྪནྟིཡཱ’’ཏི ཝཏྟབྦེ ལིངྒཝིཔལླཱསཝསེན ‘‘ཝིཙིཀིཙྪཏོ’’ཏི ཝུཏྟནྟི དཊྛབྦཾ.

༢༢༠༤. གིལཱནཱཡཱཏི ཡཱ ཏཱདིསེན གེལཉྙེན ཨཱཔུཙྪིཏུཾ ན སཀྐོཏི. ཨཱཔདཱསཱུཏི གྷརེ ཨགྒི ཨུཊྛིཏོ ཧོཏི ཙོརཱ ཝཱ, ཨེཝརཱུཔེ ཨུཔདྡཝེ ཨནཱཔུཙྪཱ པཀྐམནྟིཡཱ ཨནཱཔཏྟི.

པཉྩམཾ.

༢༢༠༥-༦. ‘‘གཙྪནྟིཡཱ ཝཛནྟིཡཱ’’ཏི ཙ ནིསཱིདནནིཔཛྫནཱཝསཱནདསྶནཏྠཾ ཝུཏྟཾ. པཱཙིཏྟིཡཾ པན པཙྪཱབྷཏྟཾ སཱམིཀེ ‘‘ཨིདྷ ནིསཱིདཱམ ཝཱ སཡཱམ ཝཱ’’ཏི ཨནཱཔུཙྪིཏྭཱ ནིསིནྣནིཔནྣཔཙྩཡཱ ¶ ཧོཏཱིཏི ཝེདིཏབྦཾ. པཙྪཱབྷཏྟཾ སཱམིཀེ ཨནཱཔུཙྪཱ ཨཱསནེ ནིསཱིདིཏྭཱ གཙྪནྟིཡཱ ཨེཀཱ པཱཙིཏྟི ཧོཏཱིཏི ཡོཛནཱ. ཨེས ནཡོ ‘‘ནིཔཛྫིཏྭཱ’’ཏིཨཱདཱིསུཔི.

ཡཐཱ པན ཏཏྠ ཨསཾཧཱརིམེ ཨནཱཔཏྟི, ཨེཝམིདྷ དྷུཝཔཉྙཏྟེ ཝཱ ཨནཱཔཏྟཱིཏི.

ཚཊྛཾ.

༢༢༠༧. ཏིསམུཊྛཱནནྟི སཙིཏྟཀེཧི ཏཱིཧི སམུཊྛཱནེཧི སམུཊྛཱནཏོ.

ཨཊྛམཾ.

༢༢༠༨. ཡཱ ¶ པན བྷིཀྑུནཱི ཨཏྟཱནམྤི ཝཱ པརམྤི ཝཱ ནིརཡབྲཧྨཙརིཡེཧི ཨབྷིསཔེཡྻ, ཏསྶཱ ཝཱཙཏོ ཝཱཙཏོ སིཡཱ པཱཙིཏྟཱིཏི ཡོཛནཱ. ཏཏྠ ཨབྷིསཔེཡྻཱཏི སཔཐཾ ཀརེཡྻ, ‘‘ནིརཡེ ནིབྦཏྟཱམི, ཨཝཱིཙིམྷི ནིབྦཏྟཱམཱི’’ཏི ཨཏྟཱནཾ ཝཱ ‘‘ནིརཡེ ནིབྦཏྟཏུ, ཨཝཱིཙིམྷི ནིབྦཏྟཏཱུ’’ཏི པརཾ ཝཱ ‘‘གིཧིནཱི ཧོམི, ཨོདཱཏཝཏྠཱ ཧོམཱི’’ཏི ཨཏྟཱནཾ ཝཱ ‘‘གིཧིནཱི ཧོཏུ, ཨོདཱཏཝཏྠཱ ཧོཏཱུ’’ཏི པརཾ ཝཱ ཨབྷིསཔེཡྻཱཏི ཝུཏྟཾ ཧོཏི.

༢༢༡༠. ཨཀྐོསཏི ཨཏྟཱནཾ ཝཱ པརཾ ཝཱཏི སམྦནྡྷོ. ཏིཀཔཱཙིཏྟིཡནྟི ཨུཔསམྤནྣཱཡ ཨུཔསམྤནྣསཉྙཱཝེམཏིཀཱཨནུཔསམྤནྣསཉྙཱཝསེན. སེསཱཡཱཏི ཨནུཔསམྤནྣཱཡ. ཨནུཔསམྤནྣཱཡ ཨུཔསམྤནྣསཉྙཱ, ཝེམཏིཀཱ, ཨནུཔསམྤནྣསཉྙཱ ཨཀྐོསཏི, དུཀྐཊནྟི ཨེཝཾ ཏིཀདུཀྐཊཾ.

༢༢༡༡. ཨཏྠདྷམྨཱནུསཱསནིཾ པུརཀྑཏྭཱ ཝདནྟཱིནཾ ཨནཱཔཏྟཱིཏི ཡོཛནཱ. ཡཐཱཧ ཨཊྛཀཐཱཡཾ ‘‘ཨཏྠཔུརེཀྑཱརཱཡཱཏི ཨཊྛཀཐཾ ཀཐེནྟིཡཱ. དྷམྨཔུརེཀྑཱརཱཡཱཏི པཱལི༹ཾ ཝཱཙེནྟིཡཱ. ཨནུསཱསནིཔུརེཀྑཱརཱཡཱཏི ‘ཨིདཱནིཔི ཏྭཾ ཨེདིསཱ, སཱདྷུ ཝིརམསྶུ, ནོ ཙེ ཝིརམསི, ཨདྡྷཱ པུན ཨེཝརཱུཔཱནི ཀམྨཱནི ཀཏྭཱ ནིརཡེ ཨུཔྤཛྫིསྶསི, ཏིརཙྪཱནཡོནིཡཱ ཨུཔྤཛྫིསྶསཱི’ཏི ཨེཝཾ ཨནུསཱསནིཡཾ ཋཏྭཱ ཝདནྟིཡཱ ཨནཱཔཏྟཱི’’ཏི (པཱཙི. ཨཊྛ. ༨༧༨).

ནཝམཾ.

༢༢༡༢. ཝདྷིཏྭཱཏི ¶ སཏྠཱདཱིཧི པཧརིཏྭཱ. ཝདྷིཏྭཱ ཝཱཏི ཨེཏྠ ཝཱ-སདྡོ པཱལི༹ཡཾ ‘‘ཝདྷིཏྭཱ ཝདྷིཏྭཱ’’ཏི (པཱཙི. ༨༨༠) ཝུཏྟཾ ཨཱམེཌིཏཾ སཱུཙེཏི.

༢༢༡༣. ཨེཏྠཱཏི ¶ ཨིམསྨིཾ སིཀྑཱཔདེ. ཀཱཡཝཱཙཱཙིཏྟསམུཊྛཱནཾ དྷུརནིཀྑེཔསམུཊྛཱནཾ ནཱམ, སམནུབྷཱསནསམུཊྛཱནནྟིཔི ཨེཏསྶེཝ ནཱམཾ.

དསམཾ.

ཨནྡྷཀཱརཝགྒོ དུཏིཡོ.

༢༢༡༤. ཡཱ པན བྷིཀྑུནཱི ནགྒཱ ཨནིཝཏྠཱ ཨཔཱརུཏཱ ཧུཏྭཱ ནཧཱཡཏི, ཨསྶཱ སབྦཔཡོགེ དུཀྐཊཾ. ཏསྶ ནཧཱནསྶ ཝོསཱནེ པརིཡོསཱནེ སཱ བྷིཀྑུནཱི ཛིནཝུཏྟཾ ཛིནེན བྷགཝཏཱ བྷིཀྑུནཱིནཾ པཉྙཏྟཾ དོསཾ པཱཙིཏྟིཡཱཔཏྟིཾ སམུཔེཏི ཨཱཔཛྫཏཱིཏི ཡོཛནཱ. བྷིཀྑུནི དོསནྟི ཨེཏྠ གཱཐཱབནྡྷཝསེན རསྶོ ཀཏོ.

༢༢༡༥. ཨཙྪིནྣཙཱིཝརཱཏི ཨཙྪིནྣཨུདཀསཱཊིཀཙཱིཝརཱ. ནཊྛཙཱིཝརཱཏི ཙོརཱདཱིཧི ནཊྛཨུདཀསཱཊིཀཙཱིཝརཱ. ཨཱཔདཱསུ ཝཱཏི ‘‘མཧགྒྷཾ ཨིམཾ དིསྭཱ ཙོརཱཔི ཧརེཡྻུ’’ནྟི ཨེཝརཱུཔཱསུ ཨཱཔདཱསུ ཝཱ ནགྒཱཡ ནཧཱཡནྟིཡཱ ན དོསོ.

པཋམཾ.

༢༢༡༦. དུཏིཡེཏི ‘‘ཨུདཀསཱཊིཀཾ པན བྷིཀྑུནིཡཱ ཀཱརཡམཱནཱཡཱ’’ཏིཨཱདིསིཀྑཱཔདེ (པཱཙི. ༨༨༨).

དུཏིཡཾ.

༢༢༡༧-༨. དུསྶིབྦིཏཾ ཙཱིཝརནྟི ཨསཀྐཙྩསིབྦིཏཾ ཙཱིཝརཾ. ཝིསིབྦེཏྭཱཏི དུསྶིབྦིཏཾ པུན སིབྦནཏྠཱཡ སཡཾ ཝཱ ཝིགཏསིབྦནཾ ཀཏྭཱ. ‘‘ཝིསིབྦཱཔེཏྭཱ’’ཏི སེསོ. ཡཐཱཧ ‘‘ཝིསིབྦེཏྭཱ ཝཱ ཝིསིབྦཱཔེཏྭཱ ཝཱ’’ཏི (པཱཙི. ༨༩༣). ཨནནྟརཱཡཱཏི དསསུ ཨནྟརཱཡེསུ ¶ ཨཉྙཏརནྟརཱཡརཧིཏཱ. ཏཾ ཝིསིབྦིཏཾ, ཝིསིབྦཱཔིཏཾ ཝཱ ཙཱིཝརཾ. ‘‘ཨནནྟརཱཡཱ ཏཾ ¶ པཙྪཱ’’ཏི ཝཏྟབྦེ གཱཐཱབནྡྷཝསེན རསྶོ ཀཏོ. ན སིབྦེཡྻཱཏི ཨེཏྠཱཔི ‘‘ན སིབྦཱཔེཡྻཱ’’ཏི སེསོ. ཡཐཱཧ ‘‘ནེཝ སིབྦེཡྻ, ན སིབྦཱཔནཱཡ ཨུསྶུཀྐཾ ཀརེཡྻཱ’’ཏི (པཱཙི. ༨༩༣).

ཙཏུཔཉྩཱཧནྟི ཨེཏྠ ‘‘ཨུཏྟརིཚཔྤཉྩཝཱཙཱཧི (པཱཙི. ༦༢-༦༤), ཨུཏྟརིདིརཏྟཏིརཏྟ’’ནྟིཨཱདཱིསུ (པཱཙི. ༥༡-༥༢) ཝིཡ ཨཔྤསངྑྱཱཡ བཧུསངྑྱཱཡཾ ཨནྟོགདྷཏྟེཔི ཨུབྷཡཝཙནཾ ལོཀཝོཧཱརཝསེན ཝཙནསིལིཊྛཏཱཡཱཏི དཊྛབྦཾ. དྷུརེཏི སིབྦནུསྶཱཧེ. ནིཀྑིཏྟམཏྟེཏི ཝིསྶཊྛམཏྟེ.

༢༢༡༩. ཏིཀཔཱཙིཏྟིཡཾ ཝུཏྟནྟི ཨུཔསམྤནྣཱཡ ཨུཔསམྤནྣསཉྙཱ, ཝེམཏིཀཱ, ཨནུཔསམྤནྣསཉྙཱཏི ཏཱིསུ ཝཱརེསུ ཏིཀཔཱཙིཏྟིཡཾ ཝུཏྟཾ. སེསཱཡཱཏི ཨནུཔསམྤནྣཱཡ. ཏིཀདུཀྐཊནྟི ཝཱརཏྟཡེ དུཀྐཊཏྟཡཾ.

༢༢༢༠. ཨུབྷིནྣནྟི ཨུཔསམྤནྣཱནུཔསམྤནྣཱནཾ. ཨཉྙསྨིནྟི ཙཱིཝརཏོ ཨཉྙསྨིཾ. ཨནྟརཱཡེཔི ཝཱ སཏཱིཏི རཱཛཙོརཱདིཨནྟརཱཡཱནཾ དསནྣཾ ཨཉྙཏརེ སཏི.

༢༢༢༡. ‘‘དྷུརནིཀྑེཔནཾ ནཱམ, སམུཊྛཱནམིདཾ མཏ’’ནྟི ཨིདཾ ཨཊྛཀཐཱཡ ‘‘དྷུརནིཀྑེཔསམུཊྛཱན’’ནྟི (པཱཙི. ཨཊྛ. ༨༩༣) ཝུཏྟམེཝ གཧེཏྭཱ ཝུཏྟཾ, ཏེརསསུ སམུཊྛཱནསཱིསེསུ ‘‘དྷུརནིཀྑེཔསམུཊྛཱན’’ནྟི ཝིསུཾ སམུཊྛཱནསཱིསཾ ནཱམ ནཏྠི. མཱཏིཀཊྛཀཐཱཡཉྩ ‘‘སམནུབྷཱསནསམུཊྛཱན’’ནྟི (ཀངྑཱ. ཨཊྛ. ཙཱིཝརསིབྦནསིཀྑཱཔདཝཎྞནཱ, ཨཏྠཏོ སམཱནཾ) ཝུཏྟཾ, ཏཾ སམུཊྛཱནསཱིསེསུ ཨནྟོགདྷམེཝ. ཏསྨཱ ‘‘དྷུརནིཀྑེཔསམུཊྛཱན’’ནྟི ཨིདཾ སམནུབྷཱསནསམུཊྛཱནསྶེཝ པརིཡཱཡོཏི གཧེཏབྦཾ.

ཏཏིཡཾ.

༢༢༢༢. པཉྩ ¶ ཨཧཱནི པཉྩཱཧཾ, པཉྩཱཧམེཝ པཉྩཱཧིཀཾ. ‘‘ཨཏིཀྐམེཡྻཱ’’ཏི ཀིརིཡཱཡ དྭིཀམྨཀཏྟཱ ‘‘པཉྩཱཧིཀ’’ནྟི ཙ ‘‘སངྒྷཱཊིཙཱར’’ནྟི ཙ ཨུཔཡོགཏྠེ ཨེཝ ཨུཔཡོགཝཙནཾ. སངྒྷཊིཏཊྛེན སངྒྷཱཊི, ཨིཏི ཝཀྑམཱནཱནཾ པཉྩནྣཾ ཙཱིཝརཱནམེཝཱདྷིཝཙནཾ, སངྒྷཱཊཱིནཾ ¶ ཙཱརོ སངྒྷཱཊིཙཱརོ, པརིབྷོགཝསེན ཝཱ ཨོཏཱཔནཝསེན ཝཱ པརིཝཏྟནནྟི ཨཏྠོ. ‘‘པཉྩཱཧིཀཾ སངྒྷཱཊིཙཱརཾ ཨཏིཀྐམེཡྻཱཏི པཉྩམཾ དིཝསཾ པཉྩ ཙཱིཝརཱནི ནེཝ ནིཝཱསེཏི ན པཱརུཔཏི ན ཨོཏཱཔེཏི པཉྩམཾ དིཝསཾ ཨཏིཀྐཱམེཏི, ཨཱཔཏྟི པཱཙིཏྟིཡསྶཱ’’ཏི (པཱཙི. ༨༩༩) ཝཙནཏོ པཉྩདིཝསབྦྷནྟརེ ཡཾ ཀིཉྩི ཨཀཏྭཱ ཨཏིཀྐཱམེནྟིཡཱ ཙཱིཝརགཎནཱཡ པཱཙིཏྟི ཧོཏཱིཏི དསྶེཏུམཱཧ ‘‘ཡཱཏིཀྐམེཡྻཱ’’ཏིཨཱདི.

༢༢༢༣. ཏིཙཱིཝརནྟི ཨནྟརཝཱསཀཨུཏྟརཱསངྒསངྒྷཱཊིསངྑཱཏཾ ཏིཙཱིཝརཉྩ. སཾཀཙྩཱིཏི ཐནཝེཋནསངྑཱཏཾ ཙཱིཝརཉྩ. དཀསཱཊཱིཏི ཨུཏུནིཀཱལེ ནིཝཱསེཏབྦཨུདཀསཱཊིཙཱིཝརཉྩ. ཨིཏི ཨིམེ པཉྩ. པཉྩ ཏཱུཏི པཉྩ ཙཱིཝརཱནི ནཱམ.

༢༢༢༤-༥. ཏིཀཔཱཙིཏྟཱིཏི པཉྩཱཧཱཏིཀྐནྟསཉྙཱ, ཝེམཏིཀཱ, ཨནཏིཀྐནྟསཉྙཱཏི ཝིཀཔྤཏྟཡེ པཱཙིཏྟིཡཏྟཡཾ ཧོཏི. པཉྩཱཧཱནཏིཀྐནྟེ ཨཏིཀྐནྟསཉྙཱཝེམཏིཀཱནཾ ཝསེན དྭིཀདུཀྐཊཾ.

‘‘པཉྩམེ དིཝསེ’’ཏིཨཱདི ཨནཱཔཏྟིཝཱརསནྡསྶནཾ. ནིསེཝཏཱིཏི ནིཝཱསེཏི ཝཱ པཱརུཔཏི ཝཱ. ཨོཏཱཔེཏཱིཏི ཨེཏྠ ཝཱ-སདྡོ ལུཏྟནིདྡིཊྛོ, ཨོཏཱཔེཏི ཝཱཏི ཨཏྠོ. ཨཱཔདཱསུཔཱིཏི མཧགྒྷཾ ཙཱིཝརཾ, ན སཀྐཱ ཧོཏི ཙོརབྷཡཱདཱིསུ པརིབྷུཉྫིཏུཾ, ཨེཝརཱུཔེ ཨུཔདྡཝེ ཨནཱཔཏྟི.

ཙཏུཏྠཾ.

༢༢༢༦. ཨཉྙིསྶཱ ¶ སངྐམེཏབྦཙཱིཝརཾ ཨནཱཔུཙྪཱ གཧེཏྭཱ ཡཱ པརིབྷུཉྫཏི, ཏསྶཱ པཱཙིཏྟིཡཾ སིཡཱཏི ཡོཛནཱ, ཨཉྙིསྶཱ ཨུཔསམྤནྣཱཡ སནྟཀཾ པཉྩནྣཾ ཙཱིཝརཱནཾ ཨཉྙཏརཾ ཏསྶཱ ཨཝཏྭཱ ཨཱདཱཡ པུན ཏསྶཱ དཱཏབྦཾ, ཨདཏྭཱ ཡཱ བྷིཀྑུནཱི པཊིསེཝཏི, ཏསྶཱ པཱཙིཏྟིཡཾ ཧོཏཱིཏི ཨཏྠོ. ‘‘སངྐམེཏབྦཙཱིཝརཾ སངྐམནཱིཡ’’ནྟི པརིཡཱཡསདྡཱ ཨེཏེ. ཡཐཱཧ ‘‘ཙཱིཝརསངྐམནཱིཡནྟི སངྐམེཏབྦཙཱིཝརཾ, ཨཉྙིསྶཱ སནྟཀཾ ཨནཱཔུཙྪཱ གཧིཏཾ པུན པཊིདཱཏབྦཙཱིཝརནྟི ཨཏྠོ’’ཏི (པཱཙི. ཨཊྛ. ༩༠༣).

༢༢༢༧. ཏིཀཔཱཙིཏྟིཡཾ ཝུཏྟནྟི ‘‘ཨུཔསམྤནྣཱཡ ཨུཔསམྤནྣསཉྙཱ…པེ… ཝེམཏིཀཱ ¶ …པེ… ཨནུཔསམྤནྣསཉྙཱ ཙཱིཝརསངྐམནཱིཡཾ དྷཱརེཏི, ཨཱཔཏྟི པཱཙིཏྟིཡསྶཱ’’ཏི (པཱཙི. ༩༠༥) ཨེཝཾ ཏིཀཔཱཙིཏྟིཡཾ པཱལི༹ཡཾ ཝུཏྟཾ. སེསཱཡཱཏི ཨནུཔསམྤནྣཱཡ. ‘‘ཏིཀདུཀྐཊ’’ནྟི ཨིདཉྩ ཝུཏྟནཡམེཝ. ཨཱཔདཱསཱུཏི སཙེ ཨཔཱརུཏཾ ཝཱ ཨནིཝཏྠཾ ཝཱ ཙོརཱ ཧརནྟི, ཨེཝརཱུཔཱསུ ཨཱཔདཱསུ ཝཱ.

༢༢༢༨. ཨེཏཾ སམུཊྛཱནཾ ཀཐིནེན ཏུལྱནྟི ཡོཛནཱ. གཧཎཾ, པརིབྷོགོ ཙ ཀྲིཡཾ. ཨནཱཔུཙྪནཾ ཨཀྲིཡཾ.

པཉྩམཾ.

༢༢༢༩. ལབྷིཏབྦཾ ཏུ ཙཱིཝརནྟི ལབྷིཏབྦཾ ཝིཀཔྤནུཔགཾ ཙཱིཝརཾ. ནིཝཱརེཏཱིཏི ཡཐཱ ཏེ དཱཏུཀཱམཱ ན དེནྟི, ཨེཝཾ ཨནྟརཱཡཾ པརཀྐམཏི. པཱཙིཏྟིཾ པརིདཱིཔཡེཏི སཙེ ཏསྶཱ ཝཙནེན ཏེ ན དེནྟི, བྷིཀྑུནིཡཱ པཱཙིཏྟིཡཾ ཝདེཡྻཱཏི ཨཏྠོ.

༢༢༣༠. ཨེཏྠ པཋམཾ ‘‘སངྒྷསྶཱ’’ཏི ཝུཏྟཏྟཱ གཎསྶཱཏི དྭེ ཏཡོཝ གཧེཏབྦཱ. ལཱབྷེཏི ཨེཏྠ ‘‘ནིཝཱརིཏེ’’ཏི སེསོ. སཙེ ཨཉྙཾ པརིཀྑཱརཾ ནིཝཱརེཏི, ཏཐེཝ དུཀྐཊནྟི ཡོཛནཱ. ཨཉྙནྟི ཝིཀཔྤནུཔགཙཱིཝརཏོ ཨཉྙཾ. པརིཀྑཱརནྟི ¶ ཡཾ ཀིཉྩི ཐཱལཀཱདཱིནཾ ཝཱ སཔྤིཏེལཱདཱིནཾ ཝཱ ཨཉྙཏརཾ.

༢༢༣༡. ཨཱནིསཾསཾ ནིདསྶེཏྭཱཏི ‘‘ཀིཏྟཀཾ ཨགྒྷནཀཾ དཱཏུཀཱམཏྠཱཏི པུཙྪཏི, ‘ཨེཏྟཀཾ ནཱམཱ’ཏི ཝདནྟི, ‘ཨཱགམེཐ ཏཱཝ, ཨིདཱནི ཝཏྠུ མཧགྒྷཾ, ཀཏིཔཱཧེན ཀཔྤཱསེ ཨཱགཏེ སམགྒྷཾ བྷཝིསྶཏཱི’’ཏི ཨེཝཾ ཨཱནིསཾསཾ དསྶེཏྭཱ. ན དོསཏཱཏི ན དོསོ, ཨནཱཔཏྟཱིཏི ཨཏྠོ.

ཚཊྛཾ.

༢༢༣༢-༣. དྷམྨིཀཾ སམགྒེན སངྒྷེན སནྣིཔཏིཏྭཱ ཀརིཡམཱནཾ ཙཱིཝརཱནཾ ཝིབྷངྒཾ བྷཱཛནཾ ཡཱ བྷིཀྑུནཱི པཊིསེདྷེཡྻ པཊིབཱཧེཡྻ, ཏསྶཱ ཨེཝཾ པཊིསེདྷེནྟིཡཱ པཱཙིཏྟིཡཾ ཧོཏཱིཏི ཡོཛནཱ. ཨདྷམྨེ དྷམྨསཉྙཱཡ དུཀྐཊཾ པརིདཱིཔིཏནྟི ཡོཛནཱ. ཨུབྷོ ཝེམཏིཀཱཡ ཝཱཏི ཨུབྷོསུ ཝེམཏིཀཱཡ. གཱཐཱབནྡྷཝསེན སུ-སདྡལོཔོ. དྷམྨིཀེ ཨདྷམྨིཀེ ཙཱིཝརཝིབྷངྒེ ཝེམཏིཀཱཡ པཊིབཱཧནྟིཡཱ ¶ དུཀྐཊཾ པརིདཱིཔིཏནྟི ཡོཛནཱ. ཡཐཱཧ ‘‘དྷམྨིཀེ ཝེམཏིཀཱ པཊིབཱཧཏི, ཨཱཔཏྟི དུཀྐཊསྶ. ཨདྷམྨིཀེ ཝེམཏིཀཱ པཊིབཱཧཏི, ཨཱཔཏྟི དུཀྐཊསྶཱ’’ཏི. ཨཱནིསཾསཾ ནིདསྶེཏྭཱཏི ‘‘ཨེཀིསྶཱ ཨེཀཾ སཱཊཀཾ ནཔྤཧོཏི, ཨཱགམེཐ ཏཱཝ, ཀཏིཔཱཧེནེཝ ཨུཔྤཛྫིསྶཏི, ཏཏོ བྷཱཛེསྶཱམཱི’’ཏི (པཱཙི. ༩༡༤) ཨེཝཾ ཨཱནིསཾསཾ དསྶེཏྭཱ.

སཏྟམཾ.

༢༢༣༥-༦. ནིཝཱསནུཔགཾ ཝཱ ཏཐཱ པཱརུཔནུཔགཾ ཝཱ ཀཔྤབིནྡུཀཏཾ ཝཱ ཡཾ ཀིཉྩི ཙཱིཝརཾ པཉྩ སཧདྷམྨིཀེ ཙ མཱཏཱཔིཏརོཔི མུཉྩིཏྭཱ ཨཉྙསྶ ཡསྶ ཀསྶཙི གཧཊྛསྶ ཝཱ པརིབྦཱཛཀསྶ ཝཱ ¶ ཡདི དདེཡྻ, ཏསྶཱཔི པཱཙིཏྟིཡཾ པརིཡཱཔུཏནྟི ཡོཛནཱ. ཨེཏྠ ཙ ‘‘པིཏརོ’’ཏི མཱཏཱ ཙ པིཏཱ ཙ མཱཏཱཔིཏརོཏི ཝཏྟབྦེ ཝིརཱུཔེཀསེསཝསེན ནིདྡེསོ དཊྛབྦོ.

༢༢༣༧. ཨེཏྠ ཨིམསྨིཾ སིཀྑཱཔདེ ཏཱ པན པཱཙིཏྟིཡོ ཙཱིཝརཱནཾ གཎནཱཡ ཝསེན གཎེཏབྦཱཏི ཡོཛནཱ.

༢༢༣༨. ཏཱཝ སམྤཊིཙྪིཏོ ཀཱལོ ཨེཏསྶཱཏི ཏཱཝཀཱལིཀཾ, ཙཱིཝརཾ. ‘‘ཨཉྙསྶཱ’’ཏི པུབྦེ ཝུཏྟསྶ དཱུརཏྟཱ པུནཔི ‘‘ཨཉྙེས’’ནྟི ཨཱཧ, སོཡེཝཏྠོ.

ཨཊྛམཾ.

༢༢༣༩. ཡཱ པན བྷིཀྑུནཱི ‘‘སཙེ མཡཾ སཀྐོམ, དསྶཱམ ཀརིསྶཱམཱཏི ཨེཝཾ ཝཱཙཱ བྷིནྣཱ ཧོཏཱི’’ཏི ཝུཏྟཱཡ དུབྦལཱཡ ཙཱིཝརཔཙྩཱསཱཡ ཙཱིཝརསྶ ཝིབྷངྒཾ ནིསེདྷེཏྭཱ ཙཱིཝརེ ཀཱལཾ ཨཏིཀྐམེཡྻ, ཨསྶཱ དོསཏཱ པཱཙིཏྟིཡཱཔཏྟི ཧོཏཱིཏི ཡོཛནཱ. ཙཱིཝརེ ཀཱལནྟི ‘‘ཙཱིཝརཀཱལསམཡོ ནཱམ ཨནཏྠཏེ ཀཐིནེ ཝསྶཱནསྶ པཙྪིམོ མཱསོ, ཨཏྠཏེ ཀཐིནེ པཉྩམཱསཱ’’ཏི (པཱཙི. ༩༢༢) པདབྷཱཛནེ ཝུཏྟཾ ཙཱིཝརཀཱལཾ. ཨཏིཀྐམེཡྻཱཏི ‘‘ཨནཏྠཏེ ཀཐིནེ ཝསྶཱནསྶ པཙྪིམཾ དིཝསཾ, ཨཏྠཏེ ཀཐིནེ ཀཐིནུདྡྷཱརདིཝསཾ ཨཏིཀྐཱམེཏཱི’’ཏི ཝུཏྟཝིདྷིཾ ཨཏིཀྐཱམེཡྻ.

༢༢༤༠. ‘‘ཨདུབྦལཙཱིཝརེ ¶ དུབྦལཙཱིཝརསཉྙཱ, ཨཱཔཏྟི དུཀྐཊསྶཱ’’ཏི ཝཙནཏོ སུདུབྦལནྟི ཙེཏསཱཏི ཨེཏྠ སུ-སདྡོ པདཔཱུརཎེ. ཨུབྷོསཱུཏི དུབྦལེ, ཨདུབྦལེ ཙ. ཀངྑིཏཱཡ ཝཱཏི ཝེམཏིཀཱཡ ཝཱ.

༢༢༤༡. ཨཱནིསཾསཾ ནིདསྶེཏྭཱཏི ‘‘ཀིཉྩཱཔི ‘ན མཡཾ ཨཡྻེ སཀྐོམཱ’ཏི ཝདནྟི, ཨིདཱནི པན ཏེསཾ ཀཔྤཱསོ ཨཱགམིསྶཏི, སདྡྷོ པསནྣོ པུརིསོ ཨཱགམིསྶཏི ¶ , ཨདྡྷཱ དསྶཏཱི’’ཏི (པཱཙི. ཨཊྛ. ༩༢༡) ཨེཝཾ ཨཊྛཀཐཱཡ ཝུཏྟནཡེན ཨཱནིསཾསཾ དསྶེཏྭཱ.

ནཝམཾ.

༢༢༤༢. དྷམྨིཀཾ ཀཐིནུདྡྷཱརནྟི ‘‘དྷམྨིཀོ ནཱམ ཀཐིནུདྡྷཱརོ སམགྒོ བྷིཀྑུནིསངྒྷོ སནྣིཔཏིཏྭཱ ཨུདྡྷརཏཱི’’ཏི (པཱཙི. ༩༢༩) ཝུཏྟཾ ཀཐིནུདྡྷཱརཾ.

༢༢༤༣. ཡསྶཱཏི ཡསྶ ཀཐིནསྶ. ཨཏྠཱརམཱུལཀོ ཨཱནིསཾསོ ནཱམ ‘‘ཡོ ཙ ཏཏྠ ཙཱིཝརུཔྤཱདོ, སོ ནེསཾ བྷཝིསྶཏཱི’’ཏི (མཧཱཝ. ༣༠༦) ཨནུཉྙཱཏོ ཏསྨིཾ ཝིཧཱརེ ཨུཔྤཛྫནཀཙཱིཝརཝཏྠཱནིསཾསོ. ཨུདྡྷཱརམཱུལཀོ ནཱམ ཨནྟརུབྦྷཱརཾ ཀཱརཱཔེནྟེཧི ཨུཔཱསཀེཧི དིཡྻམཱནཙཱིཝརཝཏྠཱནིསཾསོ.

༢༢༤༥. སམཱནིསཾསོཔཱིཏི ཨཏྠཱརཨཱནིསཾསེན སམཱནིསཾསོཔི ཨུབྦྷཱརོ. སདྡྷཱཔཱལནཀཨཱརཎཱཏི པསཱདཱནུརཀྑནཏྠཱཡ དཱཏབྦོཏི ཡོཛནཱ. ཨཱནིསཾསཾ ནིདསྶེཏྭཱཏི ‘‘བྷིཀྑུནིསངྒྷོ ཛིཎྞཙཱིཝརོ, ཀཐིནཱནིསཾསམཱུལཀོ མཧཱལཱབྷོ’’ཏི ཨེཝརཱུཔཾ ཨཱནིསཾསཾ དསྶེཏྭཱ.

༢༢༤༦. སམུཊྛཱནཱདིནཱ སདྡྷིཾ སེསཾ པན ཝིནིཙྪཡཛཱཏཾ ཨསེསེན སབྦཱཀཱརེན སཏྟམེན སིཀྑཱཔདེན སམཾ མཏཾ ‘‘སདིས’’ནྟི ཝིཉྙཱཏཾ. ཀིཉྩིཔི ཨཔྤཀམྤི ཨཔུབྦཾ ཏཏྠ ཝུཏྟནཡཏོ ཨཉྙཾ ནཏྠཱིཏི ཡོཛནཱ.

དསམཾ.

ནགྒཝགྒོ ཏཏིཡོ.

༢༢༤༧. ‘‘ཡཱ ¶ ¶ པན བྷིཀྑུནིཡོ དྭེ ཨེཀམཉྩེ ཏུཝཊྚེཡྻུཾ, པཱཙིཏྟིཡ’’ནྟི (པཱཙི. ༩༣༣) པཉྙཏྟསིཀྑཱཔདེ ཝིནིཙྪཡཾ དསྶེཏུམཱཧ ‘‘ཨེཀཱཡཱ’’ཏིཨཱདི. ཨེཀཱཡཱཏི ཨེཀཱཡ བྷིཀྑུནིཡཱ. ཨཔརཱཏི ཨཉྙཱ ཨུཔསམྤནྣཱ. ནིཔཛྫེཡྻུནྟི ཨེཏྠ ‘‘ཨེཀམཉྩེ’’ཏི སེསོ. དྭེཏི དྭེ བྷིཀྑུནིཡོ.

༢༢༤༨-༩. ‘‘ཨེཀཱཡ ཙཱ’’ཏིཨཱདི ཨནཱཔཏྟིཝཱརནིདྡེསོ. ཨུབྷོ ཝཱཔི སམཾ ནིསཱིདནྟཱིཏི ཡོཛནཱ. ཨེལ༹ཀེནཱཏི ཨེལ༹ཀལོམསིཀྑཱཔདེན.

པཋམཾ.

༢༢༥༠-༡. པཱཝཱརཀཊསཱརཱདིནྟི ཨེཏྠ བྷུམྨེཀཝཙནཾ. ‘‘སཾཧཱརིམེསཱུ’’ཏི ཨིམིནཱ སམཱནཱདྷིཀརཎཏྟཱ བཧུཝཙནཔྤསངྒེ ཝཙནཝིཔལླཱསེནེཏྠ ཨེཀཝཙནནིདྡེསོཏི དཊྛབྦོ. པཱཝཱརོ ཙ ཀཊསཱརོ ཙ ཏེ ཨཱདི ཡསྶཱཏི ཝིགྒཧོ, ནིདྡྷཱརཎེ ཙེཏཾ བྷུམྨཾ. ཨེཀཀནྟི ནིདྡྷཱརིཏབྦནིདསྶནཾ. ཨེཀམེཝ ཨེཀཀཾ. སཾཧཱརིམེསུ པཱཝཱརཱདཱིསུ ཨཉྙཏརནྟི ཨཏྠོ. ‘‘པཱཝཱརོཏི ཀོཛཝཱདཡོ’’ཏི ཝདནྟི. ཀཊསཱརོཏི ཀཊོཡེཝ. ཨཱདི-སདྡེན ཨཏྠརིཏྭཱ སཡནཱརཧཾ སབྦཾ སངྒཎྷཱཏི. ཏེནེཝཱཏི ཡཾ ཨཏྠཏཾ, ཏེནེཝ. པཱརུཔིཏྭཱ སཙེ ཡཱ པན དྭེ སཧེཝ ནིཔཛྫནྟི, ཏཱསཾ པཱཙིཏྟིཡཾ སིཡཱཏི ཡོཛནཱ. ཨེཏྠ ཙ ཨཏྠརཎཔཱཝུརཎཀིཙྩེ ཨེཀསྶེཝ ནིདྡིཊྛཏྟཱ ཨེཀསྶ ཨནྟསྶ ཨཏྠརཎཉྩ ཨེཀསྶ ཨནྟསྶ པཱརུཔནཉྩ ཝིཉྙཱཡཏི. ཡཐཱཧ ‘‘སཾཧཱརིམཱནཾ པཱཝཱརཏྠརཎཀཊསཱརཀཱདཱིནཾ ཨེཀཾ ཨནྟཾ ཨཏྠརིཏྭཱ ཨེཀཾ པཱརུཔིཏྭཱ ཏུཝཊྚེནྟཱིནམེཏཾ ཨདྷིཝཙན’’ནྟི (པཱཙི. ཨཊྛ. ༩༣༧).

ཨེཀསྨིཾ ཨེཀཏྠརཎེ ཝཱ ཨེཀཔཱཝུརཎེ ཝཱ ནིཔཛྫནེ སཏི ཏཱསཾ དྭིནྣཾ བྷིཀྑུནཱིནཾ དུཀྐཊནྟི སམྦནྡྷོ. དྭིཀདུཀྐཊཾ ཝུཏྟནྟི ¶ ‘‘ནཱནཏྠརཎཔཱཝུརཎེ ཨེཀཏྠརཎཔཱཝུརཎསཉྙཱ…པེ… ཝེམཏིཀཱ, ཨཱཔཏྟི དུཀྐཊསྶཱ’’ཏི (པཱཙི. ༩༣༩) ཝུཏྟཾ དུཀྐཊདྭཡཾ.

༢༢༥༢. ཝཝཏྠཱནཾ ནིདསྶེཏྭཱཏི མཛ྄ཛྷེ ཀཱསཱཝཾ ཝཱ ཀཏྟརཡཊྛིཾ ཝཱ ཨནྟམསོ ཀཱཡབནྡྷནམྤི ¶ ཋཔེཏྭཱ ནིཔཛྫནྟི, ཨནཱཔཏྟཱིཏི ཨཏྠོ. སེསཾ སམུཊྛཱནཱདིཝིདྷཱནཾ. ཨཱདིནཱཏི ཨིམསྨིཾཡེཝ ཝགྒེ པཋམསིཀྑཱཔདེན. ཏུལྱནྟི སམཱནཾ.

དུཏིཡཾ.

༢༢༥༣. ཨཉྙིསྶཱ བྷིཀྑུནིཡཱ. ཨཕཱསུཀཱརཎཱཏི ཨཕཱསུཀརཎཧེཏུ. ཨནཱཔུཙྪཱཏི ཨནཱཔུཙྪིཏྭཱ. ཏསྶཱ པུརཏོ ཙ ཙངྐམནཱདཡོ ཡདི ཀརེཡྻ, ཨེཝཾ ཀརོནྟིཡཱ པཱཙིཏྟིཡཱཔཏྟི ཧོཏཱིཏི ཡོཛནཱ. ཙངྐམནཱདཡོཏི ཨེཏྠ ཨཱདི-སདྡེན ‘‘ཏིཊྛཏི ཝཱ ནིསཱིདཏི ཝཱ སེཡྻཾ ཝཱ ཀཔྤེཏི ཨུདྡིསཏི ཝཱ ཨུདྡིསཱཔེཏི ཝཱ སཛ྄ཛྷཱཡཾ ཝཱ ཀརོཏཱི’’ཏི (པཱཙི. ༩༤༣) པདབྷཱཛནེ ཝུཏྟཱནཾ སངྒཧོ.

༢༢༥༤. ནིཝཏྟནཱནཾ གཎནཱཡཱཏི ཙངྐམནྟིཡཱ ཙངྐམསྶ ཨུབྷཡཀོཊིཾ པཏྭཱ ནིཝཏྟནྟིཡཱ ནིཝཏྟནགཎནཱཡ. པཡོགཏོཡེཝཱཏི པཡོགགཎནཱཡེཝ, ཨིརིཡཱཔཐཔརིཝཏྟནགཎནཱཡེཝཱཏི ཝུཏྟཾ ཧོཏི. དོསཱཏི པཱཙིཏྟིཡཱཔཏྟིཡོ.

༢༢༥༥. པདཱནཾ གཎནཱཝསཱཏི ཨེཏྠ ཨཱདི-སདྡོ ལུཏྟནིདྡིཊྛོ. ཡཐཱཧ ‘‘པདཱདིགཎནཱཡཱ’’ཏི (པཱཙི. ཨཊྛ. ༩༤༣). ཏིཀཔཱཙིཏྟིཡཾ ཝུཏྟནྟི ཨུཔསམྤནྣཱཡ ཨུཔསམྤནྣསཉྙཱ, ཝེམཏིཀཱ, ཨནུཔསམྤནྣསཉྙཱཏི ཝིཀཔྤཏྟཡསྶ ཝསེན པཱཙིཏྟིཡཏྟཡཾ ཝུཏྟཾ. སེསཱཡཱཏི ཨནུཔསམྤནྣཱཡ.

༢༢༥༦. ན ¶ ཙ ཨཕཱསུཀཱམཱཡཱཏི ཨཱཔུཙྪིཏྭཱ ཏསྶཱ བྷིཀྑུནིཡཱ པུརཏོ ཙངྐམནཱདཱིནི ཀརོནྟིཡཱ ཨནཱཔཏྟཱིཏི ཡོཛནཱ.

༢༢༥༧. ཀྲིཡཱཀྲིཡནྟི ཙངྐམནཱདིཀརཎཾ ཀིརིཡཾ. ཨཱཔུཙྪཱཡ ཨཀརཎཾ ཨཀིརིཡཾ. པཱཔམཱནསནྟི ཨཀུསལཙིཏྟཾ.

ཏཏིཡཾ.

༢༢༥༨-༩. ཨནནྟརཱཡཱཏི ཝཀྑམཱནེསུ རཱཛནྟརཱཡཱདཱིསུ དསསུ ཨནྟརཱཡེསུ ཨཉྙཏརརཧིཏཱ ¶ བྷིཀྑུནཱི. དུཀྑིཏནྟི གིལཱནཾ. ཡཐཱཧ ‘‘དུཀྑིཏཱ ནཱམ གིལཱནཱ ཝུཙྩཏཱི’’ཏི (པཱཙི. ༩༤༨). སཧཛཱིཝིནིནྟི སདྡྷིཝིཧཱརིནིཾ. ཡཐཱཧ ‘‘སཧཛཱིཝིནཱི ནཱམ སདྡྷིཝིཧཱརིནཱི ཝུཙྩཏཱི’’ཏི. ཨཉྙཱཡ ཝཱ ནུཔཊྛཱཔེཡྻཱཏི ཨཉྙཱཡ བྷིཀྑུནིཡཱ, སིཀྑམཱནཱཡ, སཱམཎེརིཡཱ ཝཱ གིཧིནིཡཱ ཝཱ ཨུཔཊྛཱནཾ ན ཀཱརཱཔེཡྻ. ནུཔཊྛེཡྻ སཡམྤི ཝཱཏི ཡཱ ཨུཔཊྛཱནཾ ན ཀརེཡྻ. དྷུརེ ནིཀྑིཏྟམཏྟེ ཝཱཏི ‘‘ནེཝ ཨུཔཊྛེསྶཱམི, ན ཨུཔཊྛཱཔནཱཡ ཨུསྶུཀྐཾ ཀརིསྶཱམཱི’’ཏི དྷུརེ ཨུསྶཱཧེ ནིཀྑིཏྟམཏྟེཡེཝ. ཏསྶཱཏི ཨུཔཛ྄ཛྷཱཡཱཡ.

ཨནྟེཝཱསིནིཡཱ ཝཱཔཱིཏི པབྦཛྫཱཨུཔསམྤདཱདྷམྨནིསྶཡཝསེན ཙཏུབྦིདྷཱསུ ཨནྟེཝཱསིནཱིསུ ཨཉྙཏརཱཡ. ཨིཏརཱཡཱཏི ཨནུཔསམྤནྣཱཡ.

༢༢༦༠. གིལཱནཱཡཱཏི སཡཾ གིལཱནཱཡ. ‘‘གཝེསིཏྭཱ ཨལབྷནྟིཡཱ’’ཏི པདཙྪེདོ, ཨཉྙཾ ཨུཔཊྛཱཡིཀཾ པརིཡེསིཏྭཱ ཨལབྷམཱནཱཡཱཏི ཨཏྠོ. ‘‘ཨཱཔདཱསུ ཨུམྨཏྟིཀཱདཱིན’’ནྟི པདཙྪེདོ. གཱཐཱབནྡྷཝསེན ཝཎྞལོཔོཔི དཊྛབྦོ. ཨཱཔདཱསཱུཏི ཏཐཱརཱུཔེ ཨུཔདྡཝེ སཏི. དྷུརནིཀྑེཔནོདཡནྟི ¶ དྷུརནིཀྑེཔསམུཊྛཱནཾ. ཡདེཏྠ ཝཏྟབྦཾ, ཏཾ ཧེཊྛཱ ཝུཏྟམེཝ.

ཙཏུཏྠཾ.

༢༢༦༡-༢. པུགྒལིཀསྶ ཨཏྟཱཡཏྟཔརཱཡཏྟཝསེན ཨནིཡམིཏཏྟཱ ‘‘སཀ’’ནྟི ཨིམིནཱ ནིཡམེཏི. སཀཾ པུགྒལིཀནྟི ཨཏྟནོ པུགྒལིཀཾ. དཏྭཱཏི ཨེཏྠ ‘‘བྷིཀྑུནིཡཱ’’ཏི སེསོ. སཀཝཱཊནྟི པརིཝཏྟཀདྭཱརཀཝཱཊསཧིཏཾ. ཨུཔསྶཡནྟི གེཧཾ. དྭཱརཱདཱིསཱུཏི ཨེཏྠ ཨཱདི-སདྡེན གབྦྷཔམུཁཱནཾ སངྒཧོ, ནིདྡྷཱརཎེ ཙེཏཾ བྷུམྨཾ. བཧཱུནིཔཱིཏི ནིདྡྷཱརེཏབྦནིདསྶནཾ. བཧཱུནིཔི དྭཱརཱནི ཝཱ བཧཱུ གབྦྷེ ཝཱ བཧཱུནི པམུཁཱནི ཝཱ. ཏནྟི ཡསྶཱ ཨུཔསྶཡོ དིནྣོ, ཏཾ བྷིཀྑུནིཾ. ནིཀྐཌྜྷནྟིཡཱཏི ཨཏིཀྐཱམེནྟིཡཱ. ཏསྶཱཏི ཡཱ ནིཀྐཌྜྷཏི, ཏསྶཱ.

༢༢༦༣. ཨེཏྠཱཏི ནིཀྐཌྜྷནེ. ཨེསེཝ ནཡོཏི ‘‘པཡོགགཎནཱཡ ཨཱཔཏྟཱི’’ཏི དསྶིཏནཡོ. ཨེཏྠ པཡོགོ ནཱམ ཨཱཎཱཔནཾ, ཨིམིནཱ ‘‘ཨེཀཱཡཱཎཏྟིཡཱ ཨནེཀེསུ དྭཱརེསུ ཨཏིཀྐཱམིཏེསུཔི ཨེཀཱཝ ཨཱཔཏྟི ཧོཏཱི’’ཏི ཨེཝམཱདིཀཾ ཨཊྛཀཐཱགཏཝིནིཙྪཡཾ (པཱཙི. ཨཊྛ. ༩༤༣, ༩༥༢ ཨཏྠཏོ སམཱནཾ) སངྒཎྷཱཏི.

༢༢༦༤. ཏེསུ ¶ ཝིནིཙྪཡེསུ ཨེཀཾ ཝིནིཙྪཡཝིསེསཾ དསྶེཏུམཱཧ ‘‘ཨེཏྟཀཱཝ ཨིམཾ དྭཱརཱ’’ཏིཨཱདི. དྭཱརགཎནཱཡ ཨཱཔཏྟིཡོ དྭཱརགཎནཱཔཏྟིཡོ.

༢༢༦༥. ཨཀཝཱཊམྷཱཏི ཨཀཝཱཊབནྡྷཏོ ཨུཔསྶཡཱ ནིཀྐཌྜྷནྟིཡཱ དུཀྐཊནྟི ཡོཛནཱ. སེསཱཡཱཏི ཨནུཔསམྤནྣཱཡ. ཏིཀདུཀྐཊནྟི ཨནུཔསམྤནྣཱཡ ཨུཔསམྤནྣསཉྙཱཡ, ཝེམཏིཀཱཡ, ཨནུཔསམྤནྣསཉྙཱཡ ཙ ཝསེན ཏིཀདུཀྐཊཾ. ཨུབྷིནྣནྟི ཨུཔསམྤནྣཱནུཔསམྤནྣཱནཾ. པརིཀྑཱརེསཱུཏི པཏྟཙཱིཝརཱདཱིསུ པརིཀྑཱརེསུ ¶ . སབྦཏྠཱཏི སབྦེསུ པཡོགེསུ, ནིཀྐཌྜྷིཡམཱནེསུ, ནིཀྐཌྜྷཱཔིཡམཱནེསུ ཙཱཏི ཝུཏྟཾ ཧོཏི.

༢༢༦༦. ཨེཏྠ ཨིམསྨིཾ སིཀྑཱཔདེ སམུཊྛཱནཱདིཝིནིཙྪཡེན སཧ སེསཾ ཝིནིཙྪཡཛཱཏཾ ཨསེསེན སབྦཔྤཀཱརེན སངྒྷིཀཱ ཝིཧཱརསྨཱ ནིཀྐཌྜྷནསིཀྑཱཔདེན སམཾ མཏཾ ‘‘སདིས’’ནྟི སལླཀྑིཏནྟི ཡོཛནཱ.

པཉྩམཾ.

༢༢༦༧. ཚཊྛེཏི ‘‘ཡཱ པན བྷིཀྑུནཱི སཾསཊྛཱ ཝིཧརེཡྻ གཧཔཏིནཱ ཝཱ གཧཔཏིཔུཏྟེན ཝཱ’’ཏིཨཱདིམཱཏིཀཱཡ (པཱཙི. ༩༥༦) ནིདྡིཊྛེ ཚཊྛསིཀྑཱཔདེ. ཨིདྷ ཝཏྟབྦནྟི ཨིམསྨིཾ ཝིནཡཝིནིཙྪཡེ ཀཐེཏབྦཾ. ཨརིཊྛསྶ སིཀྑཱཔདེནཱཏི ཨརིཊྛསིཀྑཱཔདེན. ཝིནིཙྪཡོཏི སམུཊྛཱནཱདིཀོ.

ཚཊྛཾ.

༢༢༦༨. སཱསངྐསམྨཏེཏི ཨེཏྠ ‘‘སཔྤཊིབྷཡེ’’ཏི སེསོ. ཨུབྷཡམྤི ཧེཊྛཱ ཝུཏྟཏྠམེཝ. ཨནྟོརཊྛེཏི ཡསྶ ཝིཛིཏེ ཝིཧརཏི, ཏསྶེཝ རཊྛེ. སཱསངྐསམྨཏེ སཔྤཊིབྷཡེ ཨནྟོརཊྛེ སཏྠེན ཝིནཱ ཙཱརིཀཾ ཙརནྟིཡཱ བྷིཀྑུནིཡཱ ཨཱཔཏྟི སིཡཱཏི ཡོཛནཱ.

༢༢༦༩. ཨེཝཾ ཙརནྟིཡཱ སགཱམཀཊྛཱནེ གཱམནྟརཔྤཝེསེ ཙ ཨགཱམཀེ ཨརཉྙེ ཨདྡྷཡོཛནེ ཙ ཝིནཡཉྙུནཱ བྷིཀྑུནཱ པཱཙིཏྟིཡནཡོ པཱཙིཏྟིཡཱཔཏྟིཝིདྷཱནཀྐམོ ཉེཡྻོ ཉཱཏབྦོཏི ཡོཛནཱ.

༢༢༧༠. སཧ ¶ སཏྠེན ཙརནྟིཡཱ ན དོསོཏི ཡོཛནཱ. ཁེམཊྛཱནེ ཙརནྟིཡཱ, ཨཱཔདཱསུ ཝཱ ཙརནྟིཡཱ ན དོསོཏི ཡོཛནཱ.

སཏྟམཾ.

༢༢༧༡. ཨཊྛམེ ¶ ནཝམེ ཝཱཔཱིཏི ‘‘ཡཱ པན བྷིཀྑུནཱི ཏིརོརཊྛེ’’ཏིཨཱདིཀེ (པཱཙི. ༩༦༦) ཨཊྛམསིཀྑཱཔདེ ཙ ‘‘ཡཱ པན བྷིཀྑུནཱི ཨནྟོཝསྶཾ ཙཱརིཀཾ ཙརེཡྻ, པཱཙིཏྟིཡ’’ནྟི (པཱཙི. ༩༧༠) ཝུཏྟནཝམསིཀྑཱཔདེ ཙ. ཨནུཏྟཱནཾ ན ཝིཛྫཏི, སབྦཾ ཨུཏྟཱནམེཝ, ཏསྨཱ ཨེཏྠ མཡཱ ན ཝིཙཱརཱིཡཏཱིཏི ཨདྷིཔྤཱཡོ.

ཨཊྛམནཝམཱནི.

༢༢༧༢. ‘‘ཡཱ པན བྷིཀྑུནཱི ཝསྶཾཝུཏྠཱ ཙཱརིཀཾ ན པཀྐམེཡྻ ཨནྟམསོ ཚཔྤཉྩཡོཛནཱནིཔི, པཱཙིཏྟིཡ’’ནྟི (པཱཙི. ༩༧༤) ཝུཏྟསིཀྑཱཔདེ ཝིནིཙྪཡཾ དསྶེཏུམཱཧ ‘‘པཱཙིཏྟཱི’’ཏིཨཱདི. ཨཧཾ ན གམིསྶཱམི ན པཀྐམིསྶཱམཱིཏི དྷུརནིཀྑེཔེ ཀཏེ པཱཙིཏྟཱིཏི ཡོཛནཱ. ཏཐཱཏི པཱཙིཏྟི.

༢༢༧༣. ཝསྶཾཝུཏྠཱཡ པཝཱརེཏྭཱ ཨནྟམསོ པཉྩ ཡོཛནཱནི གནྟུཾ ཝཊྚཏི. ཨེཏྠ ཨཔི-སདྡསྶ སམྦྷཱཝནཏྠཏཾ དསྶེཏུམཱཧ ‘‘ཚསཱུ’’ཏིཨཱདི. ཨིདྷ ཨིམསྨིཾ ཨནཱཔཏྟིཝཱརེ ཚསུ ཡོཛནེསུ ཡདཏྠི ཝཏྟབྦཾ, ཏཾ ཀིནྣུ ནཱམ སིཡཱ, ནཏྠི ཀིཉྩི ཝཏྟབྦནྟི ཨཏྠོ. པཝཱརེཏྭཱ ཚ ཡོཛནཱནི གཙྪནྟིཡཱ ཨནཱཔཏྟིབྷཱཝོ ཨཝུཏྟསིདྡྷོཝཱཏི དཱིཔེཏི.

༢༢༧༤. ཏཱིཎི ཡོཛནཱནི. ཏེནེཝཱཏི ཡེན གཏཱ, ཏེནེཝ མགྒེན. ཨཉྙེན མགྒེནཱཏི གཏམགྒཏོ ཨཉྙེན པཐེན.

༢༢༧༥. དསཝིདྷེ ཨནྟརཱཡསྨིཾ སཏཱིཏི ཝཀྑམཱནེསུ ཨནྟརཱཡེསུ ཨཉྙཏརསྨིཾ སཏི. ཏསྶཱ ཨནཱཔཏྟཱིཏི ཡོཛནཱ. ཨཱཔདཱསཱུཏི ཨཊྚཱདིཀཱརཎེན ཀེནཙི པལིབུདྡྷཱདིབྷཱཝསངྑཱཏཱསུ ཨཱཔདཱསུ. གིལཱནཱཡཱཏི སཡཾ གིལཱནཱཡ. དུཏིཡཱཡ བྷིཀྑུནིཡཱ ཨལཱབྷེ ཝཱ ཨཔཀྐམནྟིཡཱ ཨནཱཔཏྟི.

༢༢༧༦. རཱཛཱ ¶ ¶ ཙ ཙོརཱ ཙ ཨམནུསྶཱ ཙ ཨགྒི ཙ ཏོཡཉྩ ཝཱལཱ༹ ཙ སརཱིསཔཱ ཙཱཏི ཝིགྒཧོ. མནུསྶོཏི ཨེཏྠ གཱཐཱབནྡྷཝསེན པུབྦཔདལོཔོ ‘‘ལཱབཱུནི སཱིདནྟཱི’’ཏིཨཱདཱིསུ (ཛཱ. ༡.༡.༧༧) ཝིཡ. ཛཱིཝིཏཉྩ བྲཧྨཙརིཡཱ ཙ ཛཱིཝིཏབྲཧྨཙརིཡནྟི སམཱཧཱརདྭནྡེ སམཱསོ, ཏསྶ ཛཱིཝིཏབྲཧྨཙརིཡསྶ. ཨནྟརཱཡཱ ཨེཝ ཨནྟརཱཡིཀཱ. ཨེཏེསཾ དསནྣཾ ཨཉྙཏརསྨིཾ ཨཔཀྐམནྟིཡཱ ཨནཱཔཏྟི. ཡཐཱཧ ‘‘ཨནྟརཱཡེཏི དསཝིདྷེ ཨནྟརཱཡེ. ‘པརཾ གཙྪིསྶཱམཱི’ཏི ནིཀྑནྟཱ, ནདིཔཱུརོ པན ཨཱགཏོ, ཙོརཱ ཝཱ མགྒེ ཧོནྟི, མེགྷོ ཝཱ ཨུཊྛཱཏི, ནིཝཏྟིཏུཾ ཝཊྚཏཱི’’ཏི (པཱཙི. ཨཊྛ. ༩༧༦).

༢༢༧༧. ཨཔཀྐམནཾ ཨཀྲིཡཾ. ཨནཱདརིཡེན ཨཱཔཛྫནཏོ ཨཱཧ ‘‘དུཀྑཝེདན’’ནྟི.

དསམཾ.

ཏུཝཊྚཝགྒོ ཙཏུཏྠོ.

༢༢༧༨-༨༠. རཱཛཱགཱརནྟི རཉྙོ ཀཱིལ༹ནགྷརཾ. ཙིཏྟཱགཱརནྟི ཀཱིལ༹ནཙིཏྟསཱལཾ. ཨཱརཱམནྟི ཀཱིལ༹ནཨུཔཝནཾ. ཀཱིལུ༹ཡྻཱནནྟི ཀཱིལ༹ནཏྠཱཡ ཀཏཾ ཨུཡྻཱནཾ. ཀཱིལཱ༹ཝཱཔིནྟི ཨེཏྠ ཀིཉྩཱཔི པཱལི༹ཡཾ (པཱཙི. ༩༧༩) པོཀྑརཎཱི ཝུཏྟཱ, སཱ པན སབྦཛལཱསཡཱནཾ ཀཱིལཱ༹ཡ ཀཏཱནཾ ཨུཔལཀྑཎཝསེན ཝུཏྟཱཏི ཨཱཧ ‘‘ཀཱིལཱ༹ཝཱཔི’’ནྟི, ཀཱིལ༹ནཏྠཱཡ ཀཏཝཱཔིནྟི ཨཏྠོ. ‘‘ནཱནཱཀཱར’’ནྟི ཨིདཾ ཡཐཱཝུཏྟཔདེཧི པཙྩེཀཾ ཡོཛེཏབྦཾ. སབྦསངྒཱཧིཀཝསེན ‘‘ཏཱནཱི’’ཏི ཝུཏྟཾ. ནཱནཱཀཱརཾ རཱཛཱགཱརཾ ཙིཏྟཱགཱརཾ ཨཱརཱམཾ ཀཱིལུ༹ཡྻཱནཾ ཝཱ ཀཱིལཱ༹ཝཱཔིཾ དཊྛུཾ གཙྪནྟཱིནཾ ཏཱནི སབྦཱནི ཨེཀཏོ དཊྛུཾ གཙྪནྟཱིནཾ ཏཱསཾ བྷིཀྑུནཱིནཾ པདེ པདེ དུཀྐཊཾ མུནིནཱ ནིདྡིཊྛནྟི ཡོཛནཱ.

པཉྩཔཱིཏི ¶ རཱཛཱགཱརཱདཱིནི པཉྩཔི. ཨེཀཱཡེཝ པཱཙིཏྟི ཨཱཔཏྟི པརིདཱིཔིཏཱཏི ཡོཛནཱ. ཏཾ ཏཾ དིསཱབྷཱགཾ གནྟྭཱ པསྶནྟི ཙེ, པཱཊེཀྐཱཔཏྟིཡོ པཡོགགཎནཱཡ སིཡུནྟི ཡོཛནཱ.

༢༢༨༡. གམནབཱཧུལླེན ཨཱཔཏྟིབཱཧུལླཾ པཀཱསེཏྭཱ གཱིཝཱཔརིཝཏྟནསངྑཱཏེན པཡོགབཱཧུལླེནཱཔི ¶ ཨཱཔཏྟིབཱཧུལླཾ པཀཱསེཏུམཱཧ ‘‘པཡོགབཧུཏཱཡཱཔི, པཱཙིཏྟིབཧུཏཱ སིཡཱ’’ཏི. སབྦཏྠཱཏི ཡཏྠ བྷིཀྑུནིཡཱ པཱཙིཏྟིཡཾ ཝུཏྟཾ, ཏཏྠ སབྦཏྠ.

༢༢༨༢. ‘‘ཨཝསེསོཔི ཨནཱཔཏྟཱི’’ཏི པདཙྪེདོ. ཨནཱཔཏྟི ཙ ཀཐཱམགྒོ ཙ ཨནཱཔཏྟིཀཐཱམགྒོ, ཏེསཾ ཝིནིཙྪཡོ ཨནཱཔཏྟིཀཐཱམགྒཝིནིཙྪཡོ, ‘‘ཨནཱཔཏྟི ཨཱརཱམེ ཋིཏཱ པསྶཏཱི’’ཏིཨཱདིཀོ (པཱཙི. ༩༨༡) ཨནཱཔཏྟིཝིནིཙྪཡོ ཙ ཨཊྛཀཐཱགཏོ (པཱཙི. ཨཊྛ. ༩༨༡) ཨཝསེསཝིནིཙྪཡོ ཙཱཏི ཨཏྠོ. ‘‘ཨཱརཱམེ ཋིཏཱ’’ཏི ཨེཏེན ཨཛ྄ཛྷཱརཱམེ རཱཛཱགཱརཱདཱིནི ཀརོནྟི, ཏཱནི པསྶནྟིཡཱ ཨནཱཔཏྟཱིཏི ཨཡམནཱཔཏྟིཝཱརོ དསྶིཏོ. ཨེཏེནེཝ ཨནྟོཨཱརཱམེ ཏཏྠ ཏཏྠ གནྟྭཱ ནཙྩཱདཱིནི ཝིཡ རཱཛཱགཱརཱདཱིནིཔི པསྶིཏུཾ ལབྷཏཱིཏིཔི སིདྡྷཾ. ཨཱདི-སདྡེན ‘‘པིཎྜཔཱཏཱདཱིནཾ ཨཏྠཱཡ གཙྪནྟིཡཱ མགྒེ ཧོནྟི, ཏཱནི པསྶཏི, ཨནཱཔཏྟི. རཉྙོ སནྟིཀཾ ཀེནཙི ཀརཎཱིཡེན གནྟྭཱ པསྶཏི, ཨནཱཔཏྟི. ཀེནཙི ཨུཔདྡུཏཱ པཝིསིཏྭཱ པསྶཏི, ཨནཱཔཏྟཱི’’ཏི ཨེཏེ ཨནཱཔཏྟིཝཱརཱ སངྒཧིཏཱ. ནཙྩདསྶན…པེ… སཧཱཏི སམུཊྛཱནཱདིནཱ ཝིནིཙྪཡེན སཧ ནཙྩདསྶནསིཀྑཱཔདསདིསོཝ.

པཋམཾ.

༢༢༨༣. མཱནཏོ ¶ པམཱཎཏོ ཨཏཱིཏཱ ཨཔེཏཱ མཱནཱཏཱིཏཱ, ཨཱསནྡཱི, ཏཾ. ཝཱལེ༹ཧི ཨུཔེཏོ ཝཱལཱུ༹པེཏོ, པལླངྐོ, ཏཾ. ‘‘ཨཱསནྡཱི ནཱམ ཨཏིཀྐནྟཔྤམཱཎཱ ཝུཙྩཏཱི’’ཏི ཝཙནཏོ ཧེཊྛཱ ཨཊྚནིཡཱ ཝཌྜྷཀིཧཏྠཏོ ཨུཙྩཏརཔཱདོ ཨཱཡཱམཙཏུརསྶོ མཉྩཔཱིཋཝིསེསོ ཨཱསནྡཱི ནཱམ སམཙཏུརསྶཱནཾ ཨཏིཀྐནྟཔྤམཱཎཱནམྤི ཨནུཉྙཱཏཏྟཱ. ‘‘པལླངྐོ ནཱམ ཨཱཧརིམེཧི ཝཱལེ༹ཧི ཀཏོ’’ཏི (པཱཙི. ༩༨༤) ཝཙནཏོ པམཱཎཡུཏྟོཔི ཨེཝརཱུཔོ ན ཝཊྚཏི. ཨཱཧརིཏྭཱ ཡཐཱནུརཱུཔཊྛཱནེ ཋཔེཏབྦཝཱལ༹རཱུཔཱནི ཨཱཧརིམཝཱལཱ༹ ནཱམ, སཾཧརིམཝཱལ༹རཱུཔཡུཏྟོཏི ཝུཏྟཾ ཧོཏི. མཱནཱཏཱིཏཾ ཨཱསནྡིཾ ཝཱ ཝཱལཱུ༹པེཏཾ པལླངྐཾ ཝཱ སེཝནྟཱིནཾ ཨབྷིནིསཱིདནྟཱིནཾ, ཨབྷིནིཔཛྫནྟཱིནཉྩ ཡཱསཾ བྷིཀྑུནཱིནཾ སཏྠཱ པཱཙིཏྟིཡཱཔཏྟིཾ ཨཱཧ.

༢༢༨༤. ཏཱསཾ ནིསཱིདནསྶཱཔི ནིཔཛྫནསྶཱཔི པཡོགབཱཧུལླཝསེན པཱཙིཏྟིཡཱནཾ གཎནཱ ཧོཏི ཨིཏི ཨེཝཾ ནིདྡིཊྛཱ ཨེཝཾ ཨཡཾ གཎནཱ ཨཙྩནྟཡསེན ཨནནྟཔརིཝཱརེན བྷགཝཏཱ ཝུཏྟཱཏི ¶ ཡོཛནཱ. ཨེཏྠ ཙ ཨིཙྩེཝནྟི ནིཔཱཏསམུདཱཡོ, ཨིཏི-སདྡོ ནིདསྶནེ, ཨེཝཾ-སདྡོ ཨིདམཏྠེ དཊྛབྦོ.

༢༢༨༥. པཱདེ ཨཱསནྡིཡཱ ཚེཏྭཱཏི ཨཱསནྡིཡཱ པཱདེ པམཱཎཏོ ཨདྷིཀཊྛཱནཚིནྡནེན ཚེཏྭཱ. པལླངྐསྶ པཱདེ ཝཱལ༹ཀཱ པལླངྐཝཱལ༹ཀཱ, ཏེ ཧིཏྭཱ ཨཔནེཏྭཱ, ཨནཱཔཏྟཱིཏི སེཝནྟཱིནཾ ཨནཱཔཏྟི.

དུཏིཡཾ.

༢༢༨༦-༧. ཚནྣནྟི ཁོམཱདཱིནཾ ཚནྣཾ, ནིདྡྷཱརཎེ སཱམིཝཙནཾ. ཨཉྙཏརཾ སུཏྟནྟི ནིདྡྷཱརིཏབྦནིདསྶནཾ. ཧཏྠཱཏི ཧཏྠེན, ཀརཎཏྠེ ཙེཏཾ ནིསྶཀྐཝཙནཾ. ཨཉྩིཏནྟི ཧཏྠཱཡཱམེན ཨཱཀཌྜྷིཏཾ ¶ . ཏསྨིནྟི ཏསྨིཾ ཨཉྪིཏེ སུཏྟཔྤདེསེ. ཏཀྐམྷཱིཏི ཀནྟནསཱུཙིམྷི. ཝེཋིཏེཏི པལིཝེཋིཏེ.

སུཏྟཀནྟནཏོ སབྦཔུབྦཔཡོགེསཱུཏི སུཏྟཀནྟནཏོ པུབྦེསུ ཀཔྤཱསཝིཙིནནཱདིསབྦཔཡོགེསུ. ཧཏྠཝཱརཏོཏི ཧཏྠཝཱརགཎནཱཡ. ཡཐཱཧ ‘‘ཀཔྤཱསཝིཙིནནཾ ཨཱདིཾ ཀཏྭཱ སབྦཔུབྦཔཡོགེསུ ཧཏྠཝཱརགཎནཱཡ དུཀྐཊ’’ནྟི (པཱཙི. ཨཊྛ. ༩༨༨).

༢༢༨༨. ཀནྟིཏཾ སུཏྟནྟི པཋམམེཝ ཀནྟིཏཾ དསིཀསུཏྟཱདིཾ. པུན ཀནྟནྟིཡཱཏི ཀོཊིཡཱ ཀོཊིཾ སངྒྷཱཊེཏྭཱ པུན ཀནྟནྟིཡཱ.

ཏཏིཡཾ.

༢༢༨༩. ཏཎྜུལཱནཾ ཀོཊྚནཾ ཏུ ཨཱདིཾ ཀཏྭཱ གིཧཱིནཾ ཝེཡྻཱཝཙྩཾ ཀརོནྟིཡཱ སབྦཔུབྦཔཡོགེསུ དུཀྐཊནྟི ཡོཛནཱ.

༢༢༩༠. ཡཱགུཨཱདིསུ ནིཔྥཱདེཏབྦེསུ ཏདཱདྷཱརཱནི བྷཱཛནཱནི གཎེཏྭཱཝ པཱཙིཏྟིཾ པརིདཱིཔཡེ, ཁཛྫཀཱདཱིསུ རཱུཔཱནཾ གཎནཱཡ པཱཙིཏྟིཾ པརིདཱིཔཡེཏི ཡོཛནཱ. ཡཱགུཨཱདིསཱུཏི ཨེཏྠ ¶ ཨཱདི-སདྡེན བྷཏྟསཱུཔཱདཱིནཾ སངྒཧོ. ཁཛྫཀཱདཱིསཱུཏི ཨཱདི-སདྡེན མཙྪམཾསཱདིཨུཏྟརིབྷངྒཱནཾ སངྒཧོ.

༢༢༩༡. ‘‘སཙེཔི མཱཏཱཔིཏརོ ཨཱགཙྪནྟི, ཡཾཀིཉྩི བཱིཛནིཾ ཝཱ སམྨཛྫནིདཎྜཾ ཝཱ ཀཱརཱཔེཏྭཱ ཝེཡྻཱཝཙྩཀརཊྛཱནེ ཋཔེཏྭཱཝ ཡཾ ཀིཉྩི པཙིཏུཾ ཝཊྚཏཱི’’ཏི ཨཊྛཀཐཱགཏཾ ཝིནིཙྪཡཾ དསྶེཏུམཱཧ ‘‘སཙེ’’ཏིཨཱདི. སཙེཏི ཨེཏྠ ‘‘མཱཏཱཔིཏརོ ཨཱགཙྪནྟཱི’’ཏི སེསོ. ཨཏྟནོ ཨེཝམཱགཏཱནཾ མཱཏཱཔིཏཱུནམྤི ¶ ཀིཉྩི ཀམྨཾ ཨཀཱརེཏྭཱ ཀིཉྩི ཀམྨཾ ཀཱཏུཾ ན ཝཊྚཏཱིཏི ཡོཛནཱ. ཨཔི-སདྡོ སམྦྷཱཝནེ, ཏེན ཨཉྙེསཾ ཀཐཱཡེཝ ནཏྠཱིཏི དཱིཔེཏི.

༢༢༩༢-༣. སངྒྷསྶ ཡཱགུཔཱནེ ཝེཡྻཱཝཙྩཾ ཀརོནྟིཡཱ ཨནཱཔཏྟཱིཏི ཡོཛནཱ. ‘‘སངྒྷབྷཏྟེཔཱི’’ཏིཨཱདཱིསུཔི ཨེསེཝ ནཡོ. ཨཏྟནོ ཝེཡྻཱཝཙྩཀརསྶ ཝཱཏི སམྦནྡྷོ. ཡཐཱཧ ‘‘ཡཱགུཔཱནེཏི མནུསྶེཧི སངྒྷསྶཏྠཱཡ ཀརིཡམཱནེ ཡཱགུཔཱནེ ཝཱ སངྒྷབྷཏྟེ ཝཱ ཏེསཾ སཧཱཡིཀབྷཱཝེན ཡཾ ཀིཉྩི པཙནྟིཡཱ ཨནཱཔཏྟི. ཙེཏིཡཔཱུཛཱཡ སཧཱཡིཀཱ ཧུཏྭཱ གནྡྷམཱལཱདཱིནི པཱུཛེཏི, ཝཊྚཏཱི’’ཏི (པཱཙི. ཨཊྛ. ༩༩༣).

ཙཏུཏྠཾ.

༢༢༩༤. ‘‘ཡཱ པན བྷིཀྑུནཱི ‘ཨེཧཱཡྻེ ཨིམཾ ཨདྷིཀརཎཾ ཝཱུཔསམེཧཱི’ཏི ཝུཙྩམཱནཱ ‘སཱདྷཱུ’ཏི པཊིསྶུཎིཏྭཱ སཱ པཙྪཱ ཨནནྟརཱཡིཀིནཱི ནེཝ ཝཱུཔསམེཡྻ ན ཝཱུཔསམཱཡ ཨུསྶུཀྐཾ ཀརེཡྻ, པཱཙིཏྟིཡ’’ནྟི (པཱཙི. ༩༩༥) སིཀྑཱཔདསྶ ཝིནིཙྪཡཾ དསྶེཏུམཱཧ ‘‘པཱཙིཏྟི དྷུརནིཀྑེཔེ’’ཏིཨཱདི. དྷུརནིཀྑེཔེཏི ན དཱནི ཏཾ ཝཱུཔསམེསྶཱམི, ཨཉྙཱཧི ཝཱ ན ཝཱུཔསམཱཔེསྶཱམཱི’’ཏི ཨེཝཾ དྷུརསྶ ཨུསྶཱཧསྶ ནིཀྑེཔེ པཱཙིཏྟཱིཏི ཡོཛནཱ. ཙཱིཝརསིབྦནེ ཡཐཱ པཉྩཱཧཔརིཧཱརོ ལབྦྷཏི, ཨིདྷ པན ཏཐཱ ཨེཀཱཧམྤི པརིཧཱརོ ན ལབྦྷཏཱིཏི ཡོཛནཱ.

༢༢༩༥. སེསནྟི ‘‘དྷུརཾ ནིཀྑིཔིཏྭཱ པཙྪཱ ཝིནིཙྪིནནྟཱི ཨཱཔཏྟིཾ ཨཱཔཛྫིཏྭཱཝ ཝིནིཙྪིནཱཏཱི’’ཏིཨཱདིཀཾ ཝིནིཙྪཡཛཱཏཾ. ཏཏྠ ཙཱིཝརསིབྦནེ ཝུཏྟནཡེནེཝ ཝེདིཏབྦནྟི ཡོཛནཱ.

པཉྩམཾ.

༢༢༩༦-༧. ཡཱ ¶ ¶ པན བྷིཀྑུནཱི གིཧཱིནཾ ཝཱ སཧདྷམྨིཀེ ཋཔེཏྭཱ ཨཉྙེསཾ པརིབྦཱཛཀཔརིབྦཱཛིཀཱནཾ ཝཱ དནྟཔོནོདཀཾ ཝིནཱ ཨཉྙཾ ཡཾ ཀིཉྩི ཨཛ྄ཛྷོཧརཎཱིཡཾ ཁཱདནཱིཡཾ, བྷོཛནཱིཡཾ ཝཱ ཀཱཡེན ཝཱ ཀཱཡཔཊིབདྡྷེན ཝཱ ནིསྶགྒིཡེན ཝཱ དདཱཏི, ཏསྶཱ པཱཙིཏྟིཡཾ ཧོཏཱིཏི ཡོཛནཱ.

༢༢༩༨-༩. ཨིདྷ ཨིམསྨིཾ སིཀྑཱཔདེ མུནིནཱ དནྟཀཊྛོདཀེ དུཀྐཊཾ ཝུཏྟནྟི ཡོཛནཱ. ཡཱ པན བྷིཀྑུནཱི ཀཱཡཱདཱིཧི སཡཾ ན དེཏི ཨཉྙེན དཱཔེཏི, ཏསྶཱ ཙ ཀཱཡཱདཱིཧི ཨདཏྭཱ བྷཱུམིཡཾ ནིཀྑིཔིཏྭཱ དེནྟིཡཱཔི ཡཱ བཱཧིརལེཔཾ ཝཱ དེཏི, ཏསྶཱཔི ཨུམྨཏྟིཀཱཡ ཙ ན དོསོ ཨནཱཔཏྟཱིཏི ཡོཛནཱ.

ཚཊྛཾ.

༢༣༠༠-༡. ཨཱཝསཐཙཱིཝརནྟི ‘‘ཨུཏུནིཡོ བྷིཀྑུནིཡོ པརིབྷུཉྫནྟཱུ’’ཏི དིནྣཾ ཙཱིཝརཾ. ཡཱ བྷིཀྑུནཱི ཡཾ ‘‘ཨཱཝསཐཙཱིཝར’’ནྟི ནིཡམིཏཾ ཙཱིཝརཾ, ཏཾ ཙཏུཏྠེ དིཝསེ དྷོཝིཏྭཱ ཨནྟམསོ ཨུཏུནིཡཱ སཱམཎེརཱཡ ཝཱ ཨདཏྭཱ སཙེ པརིབྷུཉྫེཡྻ, ཏསྶཱ པཱཙིཏྟིཡཾ ཝུཏྟནྟི ཡོཛནཱ. ཏིཀཔཱཙིཏྟིཡཾ སིཡཱཏི ‘‘ཨནིསྶཛྫིཏེ ཨནིསྶཛྫིཏསཉྙཱ…པེ… ཝེམཏིཀཱ…པེ… ནིསྶཛྫིཏསཉྙཱ པརིབྷུཉྫཏི, ཨཱཔཏྟི པཱཙིཏྟིཡསྶཱ’’ཏི (པཱཙི. ༡༠༠༦) ཝུཏྟཾ པཱཙིཏྟིཡཾ ཧོཏཱིཏི ཡོཛནཱ.

༢༣༠༢-༣. ཏསྨིཾ ཙཱིཝརེ ནིསྶཛྫིཏེ ཨནིསྶཛྫིཏསཉྙཱཡ ཝཱ ཝེམཏིཀཱཡ ཝཱ ཏསྶཱ བྷིཀྑུནིཡཱ དྭིཀདུཀྐཊཾ ཝུཏྟནྟི ཡོཛནཱ. ཨཉྙཱསཾ ཨུཏུནཱིནཾ ཨབྷཱཝེ ཨདཏྭཱཔི པརིབྷུཉྫནྟིཡཱ ཨནཱཔཏྟི. པུན པརིཡཡེཏི པུན ཨུཏུནིཝཱརེ ཡཐཱཀཱལཾ པརིབྷུཉྫནྟིཡཱ ཨནཱཔཏྟི. ཨཙྪིནྣཙཱིཝརཱདཱིནཉྩ ཨནཱཔཏྟཱིཏི ཡོཛནཱ. པརིཡཡེཏི གཱཐཱབནྡྷཝསེན རསྶཏྟཾ ¶ . ཨཙྪིནྣཙཱིཝརཱདཱིནནྟི ཨེཏྠ ཨཱདི-སདྡེན ནཊྛཙཱིཝརཱདཱིནཾ སངྒཧོ. ཨཱཔདཱསུཔཱིཏི མཧགྒྷཙཱིཝརཾ སརཱིརཏོ མོཙེཏྭཱ སུཔྤཊིསཱམིཏམྤི ཙོརཱ ཧརནྟི, ཨེཝརཱུཔཱསུ ཨཱཔདཱསུ པརིབྷུཉྫནྟིཡཱ ཨནཱཔཏྟཱིཏི ཡོཛནཱ.

སཏྟམཾ.

༢༣༠༤. སཀཝཱཊཀཾ ¶ ཝིཧཱརནྟི ཀཝཱཊབནྡྷཝིཧཱརཾ, དྭཱརཀཝཱཊཡུཏྟཾ སུགུཏྟསེནཱསནནྟི ཝུཏྟཾ ཧོཏི. རཀྑནཏྠཱཡ ཨདཏྭཱཏི ‘‘ཨིམཾ ཛགྒེཡྻཱསཱི’’ཏི ཨེཝཾ ཨནཱཔུཙྪིཏྭཱ.

༢༣༠༥-༦. ‘‘ཧོཏི པཱཙིཏྟིཡཾ ཏསྶཱ, ཙཱརིཀཾ པཀྐམནྟིཡཱ’’ཏི ཝུཏྟམེཝ པཀཱསེཏུམཱཧ ‘‘ཨཏྟནོ གཱམཏོ’’ཏིཨཱདི. ཨཏྟནོ གཱམཏོཏི ཨཏྟནོ ཝསནཀགཱམཏོ. ཏཐཱ ཨིཏརསྶཱཏི ཨཔརིཀྑིཏྟསྶ ཝིཧཱརསྶ པརིཀྑེཔཾ ཨུཔཙཱརཾ. ཏནྟིཨཱདིཔདཏྟཡེ བྷུམྨཏྠེ ཨུཔཡོགཝཙནཾ ཝེདིཏབྦཾ. པརིཀྑིཏྟསྶ ཝིཧཱརསྶ པརིཀྑེཔེ པཋམེན པདེན སམཏིཀྐནྟེ དུཀྐཊཾ, ཏཐཱ ཨིཏརསྶ ཨཔརིཀྑིཏྟསྶ ཝིཧཱརསྶ ཏསྨིཾ ཨུཔཙཱརེ ཨཏིཀྐནྟེ དུཀྐཊཾ. དུཏིཡེན པདེན པརིཀྑེཔེ, ཨུཔཙཱརེ སམཏིཀྐནྟམཏྟེ པཱཙིཏྟཱིཏི ཡོཛནཱ.

༢༣༠༧. ཨཀཝཱཊབནྡྷནསྨིཾ ཀཝཱཊབནྡྷརཧིཏེ ཝིཧཱརེ ཏཐཱ ཨནིསྶཛྫནྟིཡཱ དུཀྐཊཾ པརིདཱིཔིཏཾ. ཛགྒིཀཾ ཨལབྷནྟིཡཱཏི ཨེཏྠ ‘‘པརིཡེསིཏྭཱ’’ཏི སེསོ. ཛགྒིཀནྟི ཝིཧཱརཔཊིཛགྒིཀཾ.

༢༣༠༨. ཨཱཔདཱསཱུཏི རཊྛེ བྷིཛྫནྟེ ཨཱཝཱསེ ཚཌྜེཏྭཱ གཙྪནྟི, ཨེཝརཱུཔཱསུ ཨཱཔདཱསུ. གིལཱནཱཡཱཏི ཝཙཱིབྷེདཾ ཀཱཏུཾ ཨསམཏྠཱཡཱཏི.

ཨཊྛམཾ.

༢༣༠༩-༡༠. ཧཏྠཱི ¶ ཙ ཨསྶོ ཙ རཐོ ཙ ཧཏྠིཨསྶརཐཱ, ཏེ ཨཱདི ཡེསཾ ཏེ ཧཏྠིཨསྶརཐཱདཡོ, ཏེཧི. ཨཱདི-སདྡེན དྷནུ ཐརཱུཏི པདདྭཡཾ གཧིཏཾ. སཾཡུཏྟནྟི ཡཐཱཝུཏྟེཧི ཧཏྠིཨསྶཱདིཔདེཧི སཾཡོཛིཏཾ, ‘‘ཧཏྠཱིནཾ སིཔྤཾ ཧཏྠིསིཔྤ’’ནྟིཨཱདིནཱ ཀཏསམཱསནྟི ཨཏྠོ, ‘‘ཧཏྠིསིཔྤཾ ཨསྶསིཔྤཾ རཐསིཔྤཾ དྷནུསིཔྤཾ ཐརུསིཔྤ’’ནྟི ཨེཝཾ ཝུཏྟཾ ཡཾ ཀིཉྩི སིཔྤནྟི ཝུཏྟཾ ཧོཏི. ཧཏྠིསིཀྑཱདིསིཔྤཾ སནྡཱིཔཀོ གནྠོ ཝཙྩཝཱཙཀཱནཾ ཨབྷེདོཔཙཱརེན ཨེཝཾ ཝུཏྟོཏི གཧེཏབྦཾ. ཏེནེཝ ཝཀྑཏི ‘‘པདཱདཱིནཾ ཝསེནིདྷཱ’’ཏི. པརཱུཔགྷཱཏཀཾ མནྟཱགདཡོགཔྤབྷེདཀཾ ཀིཉྩཱིཏི པརེསཾ ཨནྟརཱཡཀརཾ ཁིལནཝསཱིཀརཎསོསཱཔནཱདིབྷེདཾ ཨཱཐབྦཎམནྟཉྩ ཝིསཡོགཱདིཔྤབྷེདཀཉྩ ཡཾ ཀིཉྩི སིཔྤནྟི ཨཏྠོ.

ཨེཏྠ ¶ ཙ ཁིལནམནྟོ ནཱམ དཱརུསཱརཁིལཾ མནྟེཏྭཱ པཐཝིཡཾ པཝེསེཏྭཱ མཱརཎམནྟོ. ཝསཱིཀརཎམནྟོ ནཱམ པརཾ ཨཏྟནོ ཝསེ ཝཏྟཱཔནཀམནྟོ. སོསཱཔནཀམནྟོ ནཱམ པརསརཱིརཾ རསཱདིདྷཱཏུཀྑཡེན སུཀྑབྷཱཝཾ པཱཔནཀམནྟོ. ཨཱདི-སདྡེན ཝིདེསྶནཱདིམནྟཱནཾ སངྒཧོ. ཝིདེསྶནཾ ནཱམ མིཏྟཱནཾ ཨཉྙམཉྙསྶ ཝེརིབྷཱཝཱཔཱདནཾ. ཨིདྷ ཨིམསྨིཾ སཱསནེ ཡཱ བྷིཀྑུནཱི ཧཏྠི…པེ… ཀིཉྩི ཡསྶ ཀསྶཙི སནྟིཀེ པདཱདཱིནཾ ཝསེན པརིཡཱཔུཎེཡྻ ཨདྷཱིཡེཡྻ ཙེ, ཏསྶཱ པཱཙིཏྟིཡཾ ཧོཏཱིཏི ཡོཛནཱ.

༢༣༡༡. ལེཁེཏི ལིཁིཏསིཔྤེ. དྷཱརཎཱཡ ཙཱཏི དྷཱརཎསཏྠེ, ཡསྨིཾ ཝུཏྟནཡེན པཊིཔཛྫནྟཱ བཧཱུནིཔི གནྠཱནི དྷཱརེནྟི. གུཏྟིཡཱཏི ཨཏྟནོ ཝཱ པརེསཾ ཝཱ གུཏྟཏྠཱཡ. པརིཏྟེསུ ཙ སབྦེསཱུཏི ཡཀྑཔརིཏྟཙོརཝཱལཱ༹དིསབྦེསུ པརིཏྟེསུ ཙ.

ནཝམཾ.

༢༣༡༢. དསམེཏི ¶ ‘‘ཡཱ པན བྷིཀྑུནཱི ཏིརཙྪཱནཝིཛྫཾ ཝཱཙེཡྻ, པཱཙིཏྟིཡ’’ནྟི (པཱཙི. ༡༠༡༨) སམུདྡིཊྛེ དསམསིཀྑཱཔདེ. ཨིདཾ དསམསིཀྑཱཔདཾ.

དསམཾ.

ཙིཏྟཱགཱརཝགྒོ པཉྩམོ.

༢༣༡༣. སབྷིཀྑུཀཾ ཨཱརཱམནྟི ཡཏྠ བྷིཀྑཱུ རུཀྑམཱུལེཔི ཝསནྟི, ཏཾ པདེསཾ. ཛཱནིཏྭཱཏི ‘‘སབྷིཀྑུཀ’’ནྟི ཛཱནིཏྭཱ. ཡཾ ཀིཉྩཱིཏི བྷིཀྑུཾ ཝཱ སཱམཎེརཾ ཝཱ ཨཱརཱམིཀཾ ཝཱ ཡཾ ཀིཉྩི.

༢༣༡༤-༥. ‘‘སབྷིཀྑུཀོ ནཱམ ཨཱརཱམོ ཡཏྠ བྷིཀྑཱུ རུཀྑམཱུལེཔི ཝསནྟཱི’’ཏི (པཱཙི. ༡༠༢༥) ཝཙནཏོ ཨཱཧ ‘‘སཙེ ཨནྟམསོ’’ཏིཨཱདི. ཡཱ པན བྷིཀྑུནཱི ཨནྟམསོ རུཀྑམཱུལསྶཔི ཨནཱཔུཙྪཱ སཙེ པརིཀྑེཔཾ ཨཏིཀྐཱམེཏི, ཏསྶཱ པཋམེ པཱདེ དུཀྐཊཾ, ཨཔརིཀྑིཏྟེ ཏསྶ ཝིཧཱརསྶ ཨུཔཙཱརོཀྐམེ ཝཱཔི བྷིཀྑུནིཡཱ དུཀྐཊཾ, དུཏིཡེ པཱདེ ཨཏིཀྐཱམིཏེ པཱཙིཏྟི སིཡཱཏི ཡོཛནཱ.

༢༣༡༦. ཨབྷིཀྑུཀེ ¶ ཨཱརཱམེ སབྷིཀྑཱུཏི སཉྙཱཡ ཨུབྷོསུཔི སབྷིཀྑུཀཱབྷིཀྑུཀེསུ ཨཱརཱམེསུ ཛཱཏཀངྑཱཡ སཉྫཱཏཝིཙིཀིཙྪཱཡ, ཝེམཏིཀཱཡཱཏི ཨཏྠོ. ཏསྶཱ ཨཱཔཏྟི དུཀྐཊཾ ཧོཏཱིཏི ཡོཛནཱ.

༢༣༡༧. སཱིསཱནུལོཀིཀཱ ཡཱ བྷིཀྑུནཱི གཙྪཏི, ཏསྶཱ ཙ ཨནཱཔཏྟི པཀཱསིཏཱཏི ཡོཛནཱ. ཨེཝམུཔརིཔི. ཏཱ བྷིཀྑུནིཡོ ཡཏྠ སནྣིཔཏིཏཱ ཧོནྟི, ཏཱསཾ སནྟིཀཾ ‘‘གཙྪཱམཱི’’ཏི གཙྪཏི. ཡཐཱཧ ‘‘ཡཏྠ བྷིཀྑུནིཡོ པཋམཏརཾ ¶ པཝིསིཏྭཱ སཛ྄ཛྷཱཡཾ ཝཱ ཙེཏིཡཝནྡནཱདཱིནི ཝཱ ཀརོནྟི, ཏཏྠ ཏཱསཾ སནྟིཀཾ གཙྪཱམཱིཏི གནྟུཾ ཝཊྚཏཱི’’ཏི (པཱཙི. ཨཊྛ. ༡༠༢༧).

༢༣༡༨. ‘‘སནྟཾ བྷིཀྑུཾ ཨནཱཔུཙྪཱ’’ཏི ཝཙནེནེཝ ཨབྷིཀྑུཀཾ ཨཱརཱམཾ ཀིཉྩི ཨནཱཔུཙྪཱ པཝིསནྟིཡཱ ཨནཱཔཏྟཱིཏི དཱིཔིཏཾ ཧོཏི. ཨཱརཱམམཛ྄ཛྷཏོ ཝཱ མགྒོ ཧོཏི, ཏེན གཙྪནྟིཡཱཔི. ཨཱཔདཱསཱུཏི ཡེན ཀེནཙི ཨུཔདྡུཏཱ ཧོཏི, ཨེཝརཱུཔཱསུ ཨཱཔདཱསུ པཝིསནྟིཡཱ.

པཋམཾ.

༢༣༢༠. ཨཀྐོསེཡྻཱཏི དསནྣཾ ཨཀྐོསཝཏྠཱུནཾ ཨཉྙཏརེན སམྨུཁཱ, པརམྨུཁཱ ཝཱ ཨཀྐོསེཡྻ ཝཱ. པརིབྷཱསེཡྻ ཝཱཏི བྷཡ’མསྶ ཨུཔདཾསེཡྻ ཝཱ. ཏིཀཔཱཙིཏྟིཡནྟི ‘‘ཨུཔསམྤནྣེ ཨུཔསམྤནྣསཉྙཱ…པེ… ཝེམཏིཀཱ…པེ… ཨནུཔསམྤནྣསཉྙཱ ཨཀྐོསཏི ཝཱ པརིབྷཱསཏི ཝཱ, ཨཱཔཏྟི པཱཙིཏྟིཡསྶཱ’’ཏི (པཱཙི. ༡༠༣༡) ཏིཀཔཱཙིཏྟིཡཾ ཝུཏྟཾ. སེསེཏི ཨནུཔསམྤནྣེ. ཏིཀདུཀྐཊཾ ཏསྶཱ ཧོཏཱིཏི ཡོཛནཱ.

༢༣༢༡. ‘‘པུརཀྑཏྭཱ’’ཏིཨཱདཱིསུ ཡཾ ཝཏྟབྦཾ, ཏཾ ‘‘ཨབྷིསཔེཡྻཱ’’ཏི (པཱཙི. ༨༧༥) ཝུཏྟསིཀྑཱཔདེ ཝུཏྟནཡམེཝ.

དུཏིཡཾ.

༢༣༢༢-༣. སངྒྷནྟི བྷིཀྑུནིསངྒྷཾ. པརིབྷཱསེཡྻཱཏི ‘‘བཱལཱ ཨེཏཱ, ཨབྱཏྟཱ ཨེཏཱ, ནེཏཱ ཛཱནནྟི ཀམྨཾ ཝཱ ཀམྨདོསཾ ཝཱ ཀམྨཝིཔཏྟིཾ ཝཱ ཀམྨསམྤཏྟིཾ ཝཱ’’ཏི (པཱཙི. ༡༠༣༥) ཨཱགཏནཡེན ¶ པརིབྷཱསེཡྻཱཏི ཨཏྠོ. ཨིཏརཱཡཱཏི ཨེཏྠ ཨུཔཡོགཏྠེ ཀརཎཝཙནཾ. ཨེཀཾ བྷིཀྑུནིཾ ཝཱ སམྦཧུལཱ བྷིཀྑུནིཡོ ¶ ཝཱ ཏཐེཝ ཨིཏརཾ ཨནུཔསམྤནྣཾ ཝཱ པརིབྷཱསནྟིཡཱ ཏསྶཱ དུཀྐཊཾ པརིདཱིཔིཏནྟི ཡོཛནཱ.

ཏཏིཡཾ.

༢༣༢༤-༦. ཡཱ ནིམནྟནཔཝཱརཎཱ ཨུབྷོཔི གཎབྷོཛནསིཀྑཱཔདེ (པཱཙི. ༢༡༧-༢༡༩), པཝཱརཎསིཀྑཱཔདེ (པཱཙི. ༢༣༨-༢༣༩) ཙ ཝུཏྟལཀྑཎཱ, ཏཱཧི ཨུབྷོཧི ནིམནྟནཔཝཱརཎཱཧི ཡཱ ཙ བྷིཀྑུནཱི སཙེ ནིམནྟིཏཱཔི ཝཱ པཝཱརིཏཱཔི ཝཱ བྷཝེཡྻ, སཱ པུརེབྷཏྟཾ ཡཱགུཉྩ ཡཱམཀཱལིཀཱདིཀཱལིཀཏྟཡཉྩ ཋཔེཏྭཱ ཡཾ ཀིཉྩི ཨཱམིསཾ ཡཱཝཀཱལིཀཾ ཨཛ྄ཛྷོཧརཎཏྠཱཡ པཊིགྒཎྷཱཏི ཙེ, ཏསྶཱ གཧཎེ དུཀྐཊཾ སིཡཱ, ཨཛ྄ཛྷོཧཱརཝསེན ཨེཏྠ ཨིམསྨིཾ སིཀྑཱཔདེ པཱཙིཏྟི པརིདཱིཔིཏཱཏི ཡོཛནཱ.

ཨེཏྠ ཙ ནིམནྟིཏཱ ནཱམ ‘‘པཉྩནྣཾ བྷོཛནཱནཾ ཨཉྙཏརེན བྷོཛནེན ནིམནྟིཏཱ’’ཏི གཎབྷོཛནསིཀྑཱཔདེ ཝུཏྟལཀྑཎཱ. པཝཱརཎཱ ཙ ‘‘པཝཱརིཏོ ནཱམ ཨསནཾ པཉྙཱཡཏི, བྷོཛནཾ པཉྙཱཡཏི, ཧཏྠཔཱསེ ཋིཏོ ཨབྷིཧརཏི, པཊིཀྑེཔོ པཉྙཱཡཏཱི’’ཏི པཝཱརཎསིཀྑཱཔདེ ཝུཏྟལཀྑཎཱཏི ཝེདིཏབྦཱ.

༢༣༢༧. ཀཱལིཀཱནི ཙ ཏཱིཎེཝཱཏི ཡཱམཀཱལིཀཱདཱིནི ཏཱིཎི ཀཱལིཀཱནི ཨེཝ.

༢༣༢༨-༩. ནིམནྟིཏཔཝཱརིཏཱནཾ དྭིནྣཾ སཱདྷཱརཎཱཔཏྟིཾ དསྶེཏྭཱ ཨནཱཔཏྟིཾ དསྶེཏུམཱཧ ‘‘ནིམནྟིཏཱ’’ཏིཨཱདི. ཨིདྷ ཨིམསྨིཾ སཱསནེ ཡཱ པན བྷིཀྑུནཱི ནིམནྟིཏཱ ཨཔྤཝཱརིཏཱ སཙེ ཡཱགུཾ པིཝཏི, ཝཊྚཏི ཨནཱཔཏྟཱིཏི ཨཏྠོ. སཱམིཀསྶཱཏི ཡེན ནིམནྟིཏཱ, ཏསྶ ནིམནྟནསཱམིཀསྶེཝ. ཨཉྙབྷོཛནནྟི ¶ ཡེན ནིམནྟིཏཱ, ཏཏོ ཨཉྙསྶ བྷོཛནཾ. སཙེ སཱ བྷུཉྫཏི, ཏཐཱ ཝཊྚཏཱིཏི ཡོཛནཱ.

ཀཱལིཀཱནི ཙ ཏཱིཎེཝཱཏི ཡཱམཀཱལིཀཱདཱིནི ཏཱིཎི ཀཱལིཀཱནེཝ. པཙྩཡེ སཏཱིཏི པིཔཱསཱདིཔཙྩཡེ སཏི.

༢༣༣༠. ཨིམསྶ ¶ སིཀྑཱཔདསྶ ཨིདཾ སམུཊྛཱནཾ ཨདྡྷཱནེན ཏུལྱནྟི ཡོཛནཱ. པཝཱརིཏཱཡ, ཨཔྤཝཱརིཏཱཡ ཝཱ ནིམནྟིཏཱཡ ཝསེན ཀིརིཡཱཀིརིཡཏཾ དསྶེཏུམཱཧ ‘‘ནིམནྟིཏཱ’’ཏིཨཱདི. ནིམནྟིཏཱ པན སཱམིཀཾ ཨནཱཔུཙྪཱ བྷུཉྫཏི ཙེ, ཏསྶཱ ཝསེན ཨིདཾ སིཀྑཱཔདཾ ཀིརིཡཱཀིརིཡཾ ཧོཏི. ཨེཏྠ བྷུཉྫནཾ ཀྲིཡཾ. སཱམིཀསྶ ཨནཱཔུཙྪནཾ ཨཀྲིཡཾ.

༢༣༣༡. ‘‘ཀཔྤིཡཾ ཀཱརཱཔེཏྭཱ’’ཏིཨཱདིཾ པཝཱརིཏམེཝ སནྡྷཱཡཱཧ. ཡཱ ཡདི པརིབྷུཉྫཏི, ཏསྶཱ ཙ པཱཙིཏྟི སིཡཱ ཀིརིཡཏོ ཧོཏཱིཏི ཡོཛནཱ. སིཡཱཏི ཨཝསྶཾ. པཝཱརཎསིཀྑཱཔདེ ཝུཏྟནཡེན ཀཔྤིཡཾ ཀཱརེཏྭཱ ཝཱ ཨཀཱརཱཔེཏྭཱ ཝཱ པརིབྷུཉྫནྟིཡཱ ཏསྶཱ པརིབྷོགེནེཝ ཨིམིནཱ སིཀྑཱཔདེན ཨཝསྶཾ ཨཱཔཏྟི ཧོཏཱིཏི ཨཏྠོ.

ཙཏུཏྠཾ.

༢༣༣༢. ‘‘ཡཱ པན བྷིཀྑུནཱི ཀུལམཙྪརིནཱི ཨསྶ, པཱཙིཏྟིཡ’’ནྟི (པཱཙི. ༡༠༤༣) ཨིམསྨིཾ སིཀྑཱཔདེ ཝིནིཙྪཡཾ དསྶེཏུམཱཧ ‘‘བྷིཀྑུནཱིན’’ནྟིཨཱདི. ཀུལསནྟིཀེ བྷིཀྑུནཱིནཾ ཨཝཎྞཾ ཝདནྟིཡཱ པཱཙིཏྟཱིཏི སམྦནྡྷོ, ཀུལསྶ སནྟིཀེ ‘‘བྷིཀྑུནིཡོ དུསྶཱིལཱ པཱཔདྷམྨཱ’’ཏི བྷིཀྑུནཱིནཾ ཨཝཎྞཾ བྷཱསནྟིཡཱཏི ཨཏྠོ. ཀུལསྶཱཝཎྞནཾ ཝཱཔཱིཏི ‘‘ཏཾ ཀུལཾ ཨསྶདྡྷཾ ཨཔྤསནྣ’’ནྟི བྷིཀྑུནཱིནཾ སནྟིཀེ ཀུལསྶ ཨཝཎྞཾ ཨགུཎཾ ཝདནྟིཡཱ པཱཙིཏྟཱིཏི སམྦནྡྷོ.

༢༣༣༣. སནྟཾ ¶ བྷཱསནྟིཡཱ དོསནྟི ཨམཙྪརཱཡིཏྭཱ ཀུལསྶ ཝཱ བྷིཀྑུནཱིནཾ ཝཱ སནྟཾ དོསཾ ཨཱདཱིནཝཾ ཀཐེནྟིཡཱ.

པཉྩམཾ.

༢༣༣༤-༥. ཨོཝཱདདཱཡཀོཏི ཨཊྛཧི གརུདྷམྨེཧི ཨོཝཱདཾ དེནྟོ. ཝསྶཾ ཨུཔགཙྪནྟིཡཱཏི ཝསྶཾ ཝསནྟིཡཱ.

༢༣༣༦. བྷིཀྑཱུཏི ཨོཝཱདདཱཡཀཱ བྷིཀྑཱུ.

ཚཊྛཾ.

༢༣༣༨. ཡཱ ¶ སཱ བྷིཀྑུནཱི ཝསྶཾ ཝུཏྠཱ པུརིམཾ ཝཱ པཙྪིམཾ ཝཱ ཏེམཱསཾ ཝུཏྠཱ ཏཏོ ཨནནྟརཾ ཨུབྷཏོསངྒྷེ བྷིཀྑུནིསངྒྷེ ཙ བྷིཀྑུསངྒྷེ ཙ ‘‘ནཱཧཾ པཝཱརེསྶཱམཱི’’ཏི དྷུརཾ ནིཀྑིཔཏི ཙེཏི ཡོཛནཱ.

སཏྟམཾ.

༢༣༤༡. ཨོཝཱདཱདཱིནམཏྠཱཡཱཏི ཨཊྛགརུདྷམྨསྶཝནཱདཱིནམཏྠཱཡ. ཨཱདི-སདྡེན ཨུཔོསཐཔུཙྪནཔཝཱརཎཱནཾ གཧཎཾ.

༢༣༤༢. ཨོཝཱདཱདཱིནམཏྠཱཡ ཨགམནེན ཨཀྲིཡཾ. ཀཱཡིཀནྟི ཀཱཡཀམྨཾ.

ཨཊྛམཾ.

༢༣༤༣. ‘‘ཨནྭདྡྷམཱསཾ བྷིཀྑུནིཡཱ བྷིཀྑུསངྒྷཏོ དྭེ དྷམྨཱ པཙྩཱསཱིསིཏབྦཱ ཨུཔོསཐཔུཙྪནཉྩ ཨོཝཱདཱུཔསངྐམནཉྩ, ཏཾ ཨཏིཀྐཱམེནྟིཡཱ པཱཙིཏྟིཡ’’ནྟི (པཱཙི. ༡༠༥༩) ཨིམསྨིཾ སིཀྑཱཔདེ ཝིནིཙྪཡཾ དསྶེཏུམཱཧ ‘‘ན ཡཱཙིསྶཱམཱི’’ཏིཨཱདི. ཏཾ ཨུཏྟཱནཏྠམེཝ.

ནཝམཾ.

༢༣༤༦-༧. པསཱཁོ ¶ ནཱམ ནཱབྷིཡཱ ཧེཊྛཱ, ཛཱཎུམཎྜལཱནཾ ཨུཔརི པདེསོ. ཏཐཱ ཧི ཡསྨཱ རུཀྑསྶ སཱཁཱ ཝིཡ ཨུབྷོ ཨཱུརཱུ པབྷིཛྫིཏྭཱ གཏཱ, ཏསྨཱ སོ པསཱཁོཏི ཝུཙྩཏི, ཏསྨིཾ པསཱཁེ. སཉྫཱཏནྟི ཨུཊྛིཏཾ. གཎྜནྟི ཡཾ ཀིཉྩི གཎྜཾ. རུདྷིཏནྟི ཡཾ ཀིཉྩི ཝཎཾ. སངྒྷཾ ཝཱཏི བྷིཀྑུནིསངྒྷཾ ཝཱ. གཎཾ ཝཱཏི སམྦཧུལཱ བྷིཀྑུནིཡོ ཝཱ. ཨེཀེནཱཏི ཨེཏྠ ‘‘པུརིསེནཱ’’ཏི སེསོ, སཧཏྠེ ཨིདཾ ཀརཎཝཙནཾ. ཡཐཱཧ ‘‘པུརིསེན སདྡྷིཾ ཨེཀེནེཀཱ’’ཏི. པུརིསོཏི ཙ མནུསྶཔུརིསོཝ གཧེཏབྦོ.

དྷོཝཱཏི ཨེཏྠ ཨཱདི-ཨཏྠེ ཝཏྟམཱནེན ཨིཏི-སདྡེན ‘‘ཨཱལིམྤཱཔེཡྻ ཝཱ བནྡྷཱཔེཡྻ ཝཱ མོཙཱཔེཡྻ ཝཱ’’ཏི (པཱཙི. ༡༠༦༣) སིཀྑཱཔདཱགཏཱནཾ ཨིཏརེསཾ ཏིཎྞཾ སངྒཎྷནཏོ ‘‘ཨཱལིམྤ ¶ བནྡྷ མོཙེཧཱི’’ཏི ཨཱཎཏྟིཏྟཡཾ སངྒཧིཏཾ. ཏེནེཝ ཝཀྑཏི ‘‘དུཀྐཊཱནིཙྪ པཱཙིཏྟིཡོ ཚ ཙཱ’’ཏི.

ཡཱ པན བྷིཀྑུནཱི པསཱཁེ ཛཱཏཾ གཎྜཾ ཝཱ རུདྷིཏཾ ཝཱ སངྒྷཾ ཝཱ གཎཾ ཝཱ ཨནཱཔུཙྪིཏྭཱ ཨེཀེན པུརིསེན ཨེཀིཀཱ ‘‘བྷིནྡ ཕཱལེཧི དྷོཝ ཨཱལིམྤ བནྡྷ མོཙེཧཱི’’ཏི སབྦཱནི ཀཱཏབྦཱནི ཨཱཎཱཔེཏི, ཏསྶཱ ཚ དུཀྐཊཱནི, ཀཏེསུ བྷིནྡནཱདཱིསུ ཚསུ ཀིཙྩེསུ ཏསྶཱ ཚ པཱཙིཏྟིཡོ ཧོནྟཱིཏི ཡོཛནཱ.

༢༣༤༨-༩. ཨེཏྠཱཏི གཎྜེ ཝཱ ཝཎེ ཝཱ. ‘‘ཡཾ ཀཱཏབྦཾ ཨཏྠི, ཏཾ སབྦཾ ཏྭཾ ཀརོཧི’’ཨིཏི སཙེ ཨེཝཾ ཡཱ ཨཱཎཱཔེཏཱིཏི ཡོཛནཱ. ཏསྶཱ ཨེཀཱཡ ཨཱཎཱཔནཝཱཙཱཡ ཚ དུཀྐཊཱནི ཙ པཱཙིཏྟིཡཙྪཀྐཉྩེཏི དྭཱདསཱཔཏྟིཡོ སིཡུནྟི ཡོཛནཱ.

༢༣༥༡. ཨཱཔུཙྪིཏྭཱ ¶ ཝཱཏི སངྒྷཾ ཝཱ གཎཾ ཝཱ ཨཱཔུཙྪིཏྭཱ. དུཏིཡནྟི དུཏིཡིཀཾ. ཝིཉྙུཾ དུཏིཡཾ གཧེཏྭཱཔི ཝཱཏི ཡོཛནཱ.

དསམཾ.

ཨཱརཱམཝགྒོ ཚཊྛོ.

༢༣༥༣. ‘‘གཎཔརིཡེསནཱདིསྨི’’ནྟི ཝཏྟབྦེ ཚནྡཱནུརཀྑནཏྠཾ ནིགྒཧིཏཱགམོ. གབྦྷིནིནྟི ཨཱཔནྣསཏྟཾ, ཀུཙྪིཔཝིཊྛསཏྟནྟི ཨཏྠོ. ཝུཊྛཱཔེནྟིཡཱཏི ཨུཔསམྤཱདེནྟིཡཱ. ཀམྨཝཱཙཱཧཱིཏི དྭཱིཧི ཀམྨཝཱཙཱཧི.

༢༣༥༤-༥. ཀམྨཝཱཙཱཡ ཨོསཱནེཏི ཏཏིཡཀམྨཝཱཙཱཡ པརིཡོསཱནེ, ཡྻཀཱརཔྤཏྟེཏི ཨཏྠོ. གབྦྷིནིསཉྙཱཡ ན ཙ གབྦྷིནིཡཱཏི ཨགབྦྷིནིཡཱ གབྦྷིནིསཉྙཱཡ ཙ. ཨུབྷོ སཉྫཱཏཀངྑཱཡཱཏི ཨུབྷོསུ སམུཔྤནྣསཾསཡཱཡ, གབྦྷིནིཡཱ, ཨགབྦྷིནིཡཱ ཙ ཝེམཏིཀཱཡཱཏི ཨཏྠོ. གཱཐཱབནྡྷཝསེནེཏྠ སུ-སདྡལོཔོ. ཏཐཱ ཝུཊྛཱཔེནྟིཡཱ ཨུཔཛ྄ཛྷཱཡཱཡ ཨཱཔཏྟི དུཀྐཊཾ ཧོཏཱིཏི ཡོཛནཱ. ཨཱཙརིནིཡཱ ཏསྶཱཏི ཨུཔཛ྄ཛྷཱཡཱ གབྦྷིནིཾ ཝུཊྛཱཔེཏི, ཏསྶཱ ཀམྨཝཱཙཾ སཱཝེནྟིཡཱ ¶ ཨཱཙརིནིཡཱ ཙ. གཎསྶཱཏི ཨུཔཛ྄ཛྷཱཡཱཙརིནཱིཧི ཨཉྙསྶ བྷིཀྑུནིགཎསྶ ཙ. ཏཐཱ དུཀྐཊཾ དཱིཔིཏནྟི ཡོཛནཱ.

༢༣༥༦. ‘‘དྭཱིསུ ཨགབྦྷིནིསཉྙཱཡཱ’’ཏི པདཙྪེདོ. དྭཱིསཱུཏི གབྦྷིནིཡཱ, ཨགབྦྷིནིཡཱ ཙ.

པཋམཾ.

༢༣༥༧. དུཏིཡེཏི ‘‘ཡཱ པན བྷིཀྑུནཱི པཱཡནྟིཾ ཝུཊྛཱཔེཡྻ, པཱཙིཏྟིཡ’’ནྟི (པཱཙི. ༡༠༧༣) སིཀྑཱཔདེ. ཨིམསྨིཾ སིཀྑཱཔདེ པཱཡནྟཱི ¶ ནཱམ མཱཏཱ ཝཱ ཧོཏི དྷཱཏི ཝཱཏི ཨཡཾ ཝིསེསོ.

དུཏིཡཾ.

༢༣༥༨. ཡཱ པན བྷིཀྑུནཱི དྭེ ཝསྶཱནི ཚསུ དྷམྨེསུ ཨསིཀྑིཏསིཀྑཾ སིཀྑམཱནཾ སཙེ ཝུཊྛཱཔེཡྻ, པཱཙིཏྟི སིཡཱཏི ཡོཛནཱ. ཏཏྠ དྭེ ཝསྶཱནཱིཏི པཝཱརཎཝསེན དྭེ སཾཝཙྪརཱནི. ཚསུ དྷམྨེསཱུཏི པཱཎཱཏིཔཱཏཱཝེརམཎིཨཱདཱིསུ ཝིཀཱལབྷོཛནཱཝེརམཎིཔརིཡོསཱནེསུ ཚསུ དྷམྨེསུ. ཨསིཀྑིཏསིཀྑནྟི ‘‘པཱཎཱཏིཔཱཏཱཝེརམཎིཾ དྭེ ཝསྶཱནི ཨཝཱིཏིཀྐམྨ སམཱདཱནཾ སམཱདིཡཱམཱི’’ཏིཨཱདིནཱ (པཱཙི. ༡༠༧༩) ནཡེན ཨནཱདིནྣསིཀྑཱཔདཾ ཝཱ ཨེཝཾ སམཱདིཡིཏྭཱཔི ཀུཔིཏསིཀྑཾ ཝཱ. སིཀྑམཱནཾ ཏེསུ ཚསུ དྷམྨེསུ སིཀྑནཏོ ཝཱ ཏེ ཝཱ སིཀྑཱསངྑཱཏེ དྷམྨེ མཱནནཏོ ཨེཝཾ ལདྡྷནཱམཾ ཨནུཔསམྤནྣཾ. ཝུཊྛཱཔེཡྻཱཏི ཨུཔསམྤཱདེཡྻ. ཨཱཔཏྟི སིཡཱཏི པཋམསིཀྑཱཔདེ ཝུཏྟནཡེནེཝ ཀམྨཝཱཙཱཔརིཡོསཱནེ པཱཙིཏྟི ཨཱཔཏྟི སིཡཱ, པཱཙིཏྟི ཧོཏཱིཏི ཨཏྠོ.

༢༣༥༩. ‘‘དྷམྨཀམྨེ དྷམྨཀམྨསཉྙཱ ཝུཊྛཱཔེཏི, ཨཱཔཏྟི པཱཙིཏྟིཡསྶ. དྷམྨཀམྨེ ཝེམཏིཀཱ ཝུཊྛཱཔེཏི, ཨཱཔཏྟི པཱཙིཏྟིཡསྶ. དྷམྨཀམྨེ ཨདྷམྨཀམྨསཉྙཱ ཝུཊྛཱཔེཏི, ཨཱཔཏྟི པཱཙིཏྟིཡསྶཱ’’ཏི ཨེཝཾ དྷམྨཀམྨེ སཏྠུནཱ ཏིཀཔཱཙིཏྟིཡཾ ཝུཏྟཾ. ‘‘ཨདྷམྨཀམྨེ དྷམྨཀམྨསཉྙཱ, ཨཱཔཏྟི དུཀྐཊསྶ. ཨདྷམྨཀམྨེ ཝེམཏིཀཱ ཨཱཔཏྟི དུཀྐཊསྶ. ཨདྷམྨཀམྨེ ཨདྷམྨཀམྨསཉྙཱ ཝུཊྛཱཔེཏི, ཨཱཔཏྟི དུཀྐཊསྶཱ’’ཏི (པཱཙི. ༡༠༨༢) ཨེཝཾ ཨདྷམྨེ པན ཀམྨསྨིཾ སཏྠུནཱ ཏིཀདུཀྐཊཾ དཱིཔིཏཾ.

༢༣༦༠. ཨཁཎྜཏོ ¶ ཁཎྜཾ ཨཀཏྭཱ.

༢༣༦༡. སཙེ ¶ ཨུཔསམྤདཱཔེཀྑཱ པབྦཛྫཱཡ སཊྛིཝསྶཱཔི ཧོཏི, ཏསྶཱ ཨིམཱ ཚ སིཀྑཱཡོ དྭེ ཝསྶཱནི ཨཝཱིཏིཀྐམནཱིཡཱ པདཱཏབྦཱ, ཨིམཱ ཨདཏྭཱ ན ཀཱརཡེ ནེཝ ཝུཊྛཱཔེཡྻཱཏི ཡོཛནཱ.

ཏཏིཡཾ.

༢༣༦༢. ཙཏུཏྠེ ནཏྠི ཝཏྟབྦནྟི ཝཀྑམཱནཝིསེསཏོ ཨཉྙཾ ཝཏྟབྦཾ ནཏྠཱིཏི ཡཐཱཝུཏྟནཡམེཝཱཏི ཨདྷིཔྤཱཡོ. ‘‘ཨིདྷཱ’’ཏིཨཱདིནཱ ཨིམསྨིཾ སིཀྑཱཔདེ ལབྦྷམཱནཝིསེསཾ དསྶེཏི. ཨིདྷ ཨིམསྨིཾ སིཀྑཱཔདེ སངྒྷེན སམྨཏཾ ཏཾ སིཀྑམཱནཾ ཝུཊྛཱཔེནྟིཡཱ བྷིཀྑུནིཡཱ ཨནཱཔཏྟི ཧོཏཱིཏི ཡོཛནཱ.

༢༣༦༣. དྭེ ཝསྶཱནི ཚསུ དྷམྨེསུ སིཀྑིཏསིཀྑཱཡ སིཀྑམཱནཱཡ བྷིཀྑུནིསངྒྷེན ཨུཔསམྤདཏོ པཋམཾ ཉཏྟིདུཏིཡཱཡ ཀམྨཝཱཙཱཡ ཡཱ ཝུཊྛཱནསམྨུཏི དཱཏབྦཱ ཧོཏི, སཱ ཝུཊྛཱནསམྨུཏི སཙེ པཋམཾ ཨདིནྣཱ ཧོཏི. ཏཏྠ ཏསྨིཾ ཨུཔསམྤདམཱལ༹ཀེཔི པདཱཏབྦཱཡེཝཱཏི ཡོཛནཱ.

༢༣༦༤. ཏཏིཡཉྩཱཏི ཏཏིཡསིཀྑཱཔདཉྩ. ཙཏུཏྠཉྩཱཏི ཨིདཾ ཙཏུཏྠསིཀྑཱཔདཉྩ. པཋམེན སམཾ ཉེཡྻནྟི པཋམེན སིཀྑཱཔདེན སམུཊྛཱནཱདིནཱ ཝིནིཙྪཡེན སམཱནནྟི ཉཱཏབྦཾ. ཙཏུཏྠཾ པན སིཀྑཱཔདཾ ཝུཊྛཱཔནསམྨུཏིཾ ཨདཱཔེཏྭཱ ཝུཊྛཱཔནཝསེན ཀྲིཡཱཀྲིཡཾ ཧོཏི.

ཙཏུཏྠཾ.

༢༣༦༥. གིཧིགཏནྟི པུརིསནྟརགཏཾ, པུརིསསམཱགམཔྤཏྟནྟི ཨཏྠོ. པརིཔུཎྞདྭཱདསཝསྶཱ པརིཔུཎྞཱ ཨུཏྟརཔདལོཔེན. ཀིཉྩཱཔི ན དོསོཏི ཡོཛནཱ. ཝུཊྛཱཔེནྟིཡཱཏི ཨུཔཛ྄ཛྷཱཡཱ ཧུཏྭཱ ཨུཔསམྤཱདེནྟིཡཱ.

༢༣༦༦. སེསནྟི ¶ ¶ ཝུཏྟཾ. ཨསེསེན སབྦསོ.

པཉྩམཾ.

༢༣༦༨. དུཀྑིཏཾ སཧཛཱིཝིནིནྟི ཨེཏྠ ‘‘སིཀྑཱཔད’’ནྟི སེསོ. ཏུཝཊྚཀཝགྒསྨིཾ ‘‘དུཀྑིཏཾ སཧཛཱིཝིནི’’ནྟི ཨིམེཧི པདེཧི ཡུཏྟཾ ཡཾ སིཀྑཱཔདཾ ཝུཏྟཾ, ཏེན སིཀྑཱཔདེན ཨཊྛམཾ སམཾ ཉེཡྻཾ, ན ཝིསེསཏཱ ཝིསེསོ ནཏྠཱིཏི ཡོཛནཱ. ཨཊྛམནྟི ‘‘ཡཱ པན བྷིཀྑུནཱི སཧཛཱིཝིནིཾ ཝུཊྛཱཔེཏྭཱ དྭེ ཝསྶཱནི ནེཝ ཨནུགྒཎྷེཡྻ ན ཨནུགྒཎྷཱཔེཡྻ, པཱཙིཏྟིཡ’’ནྟི (པཱཙི. ༡༡༠༨) ཝུཏྟསིཀྑཱཔདཾ. ཏཏྠ སཧཛཱིཝིནིནྟི སདྡྷིཝིཧཱརིནིཾ. ནེཝ ཨནུགྒཎྷེཡྻཱཏི སཡཾ ཨུདྡེསཱདཱིཧི ནཱནུགྒཎྷེཡྻ. ན ཨནུགྒཎྷཱཔེཡྻཱཏི ‘‘ཨིམིསྶཱ ཨཡྻེ ཨུདྡེསཱདཱིནི དེཧཱི’’ཏི ཨེཝཾ ན ཨཉྙཱཡ ཨནུགྒཎྷཱཔེཡྻ. པཱཙིཏྟིཡནྟི དྷུརེ ནིཀྑིཏྟམཏྟེ པཱཙིཏྟིཡཾ.

ཨཊྛམཾ.

༢༣༦༩. ཡཱ ཀཱཙི བྷིཀྑུནཱི ཝུཊྛཱཔིཏཔཝཏྟིནིཾ དྭེ ཝསྶཱནི ནཱནུབནྡྷེཡྻ ཙེ, ཏསྶཱ པཱཙིཏྟི པརིཡཱཔུཏཱ ཀཐིཏཱཏི ཡོཛནཱ. ཝུཊྛཱཔེཏཱིཏི ཝུཊྛཱཔིཏཱ, པཝཏྟེཏི སུསིཀྑཱཔེཏཱིཏི པཝཏྟིནཱི, ཝུཊྛཱཔིཏཱ ཙ སཱ པཝཏྟིནཱི ཙཱཏི ཝུཊྛཱཔིཏཔཝཏྟིནཱི, ཨུཔཛ྄ཛྷཱཡཱཡེཏཾ ཨདྷིཝཙནཾ, ཏཾ, ཨུཔཛ྄ཛྷཱཡཾ. ནཱནུབནྡྷེཡྻཱཏི ཙུཎྞེན, མཏྟིཀཱཡ, དནྟཀཊྛེན, མུཁོདཀེནཱཏི ཨེཝཾ ཏེན ཏེན ཀརཎཱིཡེན ཨུཔཊྛཧེཡྻ.

༢༣༧༠. ‘‘དྭེ ཝསྶཱནི ཨཧཾ ནཱནུབནྡྷིསྶཱམཱི’’ཏི དྷུརཾ ནིཀྑིཔཏི ཙེ, ཨེཝཾ དྷུརེ ནིཀྑིཏྟམཏྟསྨིཾ པན ཏསྶཱ པཱཙིཏྟིཡཾ སིཡཱཏི ཡོཛནཱ.

༢༣༧༡. ཡཱ ¶ པན བྷིཀྑུནཱི ཨུཔཛ྄ཛྷཱཡཾ བཱལཾ ཝཱ ཨལཛྫིཾ ཝཱ ནཱནུབནྡྷཏི, ཏསྶཱ, གིལཱནཱཡ ཝཱ ཨཱཔདཱསུ ཝཱ ཨུམྨཏྟིཀཱཡ ཝཱ ནཱནུབནྡྷནྟིཡཱ ན དོསོཏི ཡོཛནཱ.

༢༣༧༢. ཨནུཔཊྛཱནེན ཧོཏཱིཏི ཨཱཧ ‘‘ཨཀྲིཡཾ ཝུཏྟ’’ནྟི.

ནཝམཾ.

༢༣༧༣-༥. ཡཱ ¶ ཀཱཙི བྷིཀྑུནཱི སཧཛཱིཝིནིཾ སདྡྷིཝིཧཱརིནིཾ ཝུཊྛཱཔེཏྭཱ ཨུཔསམྤཱདེཏྭཱ ཏཾ གཧེཏྭཱ ཨནྟམསོ ཚཔྤཉྩཡོཛནཱནིཔི ན གཙྪེཡྻ ན ཙཉྙཾ ཨཱཎཱཔེཡྻ ‘‘ཨིམཾ, ཨཡྻེ, གཧེཏྭཱ གཙྪཱ’’ཏི ཨཉྙཉྩ ན ནིཡོཛེཡྻ ཙེ, དྷུརེ ནིཀྑིཏྟམཏྟསྨིཾ ‘‘ན དཱནི གཙྪིསྶཱམི, ཨཉྙཉྩ གཧེཏྭཱ གནྟུཾ ན ནིཡོཛེསྶཱམཱི’’ཏི ཨུསྶཱཧེ ཝིསྶཊྛམཏྟེ ཏསྶཱ པཱཙིཏྟིཡཾ སིཡཱཏི ཡོཛནཱ.

ཨནྟརཱཡསྨིཾ སཏི ཝཱ དུཏིཡཾ ཨལབྷནྟིཡཱ ཝཱ ཨཱཔདཱསུ ཝཱ གིལཱནཱཡ ཝཱ ཨུམྨཏྟིཀཱཡ ཝཱ ན དོསོཏི ཡོཛནཱ.

དསམཾ.

གབྦྷིནིཝགྒོ སཏྟམོ.

༢༣༧༦. གིཧིགཏེཧི ཏཱིཧེཝཱཏི ཨནནྟརེ གབྦྷིནིཝགྒེ གིཧིགཏཔདཡུཏྟེཧི པཉྩམཚཊྛསཏྟམེཧི ཏཱིཧེཝ སིཀྑཱཔདེཧི. སདིསཱནཱིཏི ཨིདྷ ཝཱིསཏིཝསྶཝཙནཉྩ ཀུམཱརིབྷཱུཏཝཙནཉྩ ཏཏྠ དྭཱདསཝསྶཝཙནཉྩ གིཧིགཏཝཙནཉྩ ཋཔེཏྭཱ ཨཝསེསེཧི ཝིནིཙྪཡེཧི ཡཐཱཀྐམཾ སདིསཱནེཝཱཏི.

༢༣༧༧. མཧཱུཔཔདཱཏི མཧཱ ཨུཔཔདོ ཡཱསཾ སིཀྑམཱནཱནཾ ཏཱ མཧཱུཔཔདཱ. ཨུཔཔདཾ ནཱམ པདཱནམེཝ ཡུཛྫཏི, ན ཨཏྠཱནནྟི ¶ ‘‘ཡཱས’’ནྟི ཨཉྙཔདེན སིཀྑམཱནཱདིཔདཱནཾ གཧཎཾ, སདྡཏྠཱནམབྷེདོཔཙཱརསྶ པན ཨིཙྪིཏཏྟཱ སིཀྑམཱནཔདགཧིཏཱནམེཏྠ གཧཎཾ ཝེདིཏབྦཾ, མཧཱསིཀྑམཱནཱཏི ཝུཏྟཾ ཧོཏི. ཨཱདིཏོཏི ཨེཏྠ ‘‘ཝུཏྟཱ’’ཏི སེསོ, གབྦྷིནིཝགྒེ ཏིསྶནྣཾ གིཧིགཏཱནཾ པུརིམེསུ ཏཏིཡཙཏུཏྠསིཀྑཱཔདེསུ ཨཱགཏཱ དྭེ སིཀྑམཱནཱཏི ཨཏྠོ. གིཧིགཏཱཡ ‘‘པརིཔུཎྞདྭཱདསཝསྶཱ’’ཏི ཙ ཀུམཱརིབྷཱུཏཱཡ ‘‘པརིཔུཎྞཝཱིསཏིཝསྶཱ’’ཏི ཙ ཝསྶཝསེན ནཱནཱཀརཎསྶ ཝུཏྟཏྟཱ ཏཱཧི དྭཱིཧི མཧཱསིཀྑམཱནཱཡ ཝསྶཝསེནེཝ ནཱནཱཀརཎཾ དསྶེཏུམཱཧ ‘‘གཏཱ ཝཱིསཏིཝསྶཱཏི, ཝིཉྙཱཏབྦཱ ཝིབྷཱཝིནཱ’’ཏི, ཨཏིཀྐནྟཝཱིསཏིཝསྶཱ མཧཱསིཀྑམཱནཱ ནཱམ ཧོཏཱིཏི ཨཏྠོ.

༢༣༧༨. ཏཱ དྭེ མཧཱསིཀྑམཱནཱ སཙེ གིཧིགཏཱ ཝཱ ཧོནྟུ, ན ཙ པུརིསགཏཱ ཝཱ ཧོནྟུ ¶ , སམྨུཏིཨཱདིསུ ཀམྨཝཱཙཱཡ ‘‘སིཀྑམཱནཱ’’ཏི ཝཏྟབྦཱཏི ཡོཛནཱ. ཨེཏྠ ཙ སམྨུཏི ནཱམ ཉཏྟིདུཏིཡཱཡ ཀམྨཝཱཙཱཡ ཀཱཏབྦཱཡ སིཀྑཱཡ སམྨུཏི ཙེཝ ཝུཊྛཱནསམྨུཏི ཙ. ཨཱདི-སདྡེན ཨུཔསམྤདཱཀམྨཾ གཧིཏཾ.

༢༣༧༩. ཨིམཱསཾ དྭིནྣཾ སམྨུཏིདཱནཱདཱིསུ ཉཏྟིཡཱ ཙ ཀམྨཝཱཙཱཡ ཙ ཝཏྟབྦཾ དསྶེཏྭཱ ཨིདཱནི ཨཝཏྟབྦཾ དསྶེཏུམཱཧ ‘‘ན ཏཱ’’ཏིཨཱདི. ཏཱ ཨེཏཱ ཨུབྷོཔི མཧཱསིཀྑམཱནཱ ‘‘ཀུམཱརིབྷཱུཏཱ’’ཏི ཝཱ ཏཐཱ ‘‘གིཧིགཏཱ’’ཏི ཝཱ ཀམྨཝཱཙཱཡ ན ཝཏྟབྦཱ ཡསྨཱ, ཏསྨཱ ཨེཝཾ ཝཏྟུཾ ན ཝཊྚཏཱིཏི ཡོཛནཱ. ‘‘ན ཝཏྟབྦཱ’’ཏི ཨིམིནཱ ཏཐཱ ཙེ ཀམྨཝཱཙཱ ཝུཙྩེཡྻ, ཏཾ ཀམྨཾ ཀུཔྤཏཱིཏི དཱིཔེཏི. ཨིདྷ པན-སདྡོ ཡསྨཱ-པདཏྠོཏི ཏདཏྠཝསེན ཡོཛནཱ དསྶིཏཱ.

༢༣༨༠. སམྨུཏིནྟི ¶ སིཀྑམཱནསམྨུཏིཾ. དསཝསྶཱཡཱཏི ཨེཏྠ ‘‘གིཧིགཏཱཡཱ’’ཏི སེསོ. ཡཐཱཧ – ‘‘གིཧིགཏཱཡ དསཝསྶཀཱལེ སིཀྑཱསམྨུཏིཾ དཏྭཱ དྭཱདསཝསྶཀཱལེ ཨུཔསམྤདཱ ཀཱཏབྦཱ’’ཏི (པཱཙི. ཨཊྛ. ༡༡༡༩). སེསཱསུཔཱིཏི ཨེཀཱདསཝསྶཀཱལེ དཏྭཱ ཏེརསཝསྶཀཱལེ ཀཱཏབྦཱ, དྭཱདས, ཏེརས, ཙུདྡས, པནྣརས, སོལ༹ས, སཏྟརས, ཨཊྛཱརསཝསྶཀཱལེ སིཀྑཱསམྨུཏིཾ དཏྭཱ ཝཱིསཏིཝསྶཀཱལེ ཀཱཏབྦཱཏི ཨེཝཾ ཨཊྛཱརསཝསྶཔརིཡནྟཱསུ སེསཱསུཔི སིཀྑམཱནཱསུ. ཨཡཾ ནཡོཏི ‘‘སམྨུཏིཡཱ དིནྣསཾཝཙྪརཏོ ཨཱགཱམིནི དུཏིཡེ སཾཝཙྪརེ ཨུཔསམྤཱདེཏབྦཱ’’ཏི ཨཡཾ ནཡོ. ཏེནེཝ ཝུཏྟཾ ‘‘ཨེཀཱདསཝསྶཀཱལེ དཏྭཱ ཏེརསཝསྶཀཱལེ ཀཱཏབྦཱ’’ཏིཨཱདི.

༢༣༨༡. ‘‘ཀུམཱརིབྷཱུཏཱ’’ཏིཔི ‘‘གིཧིགཏཱ’’ཏིཔི ཝཏྟུཾ ཝཊྚཏཱིཏི ཨཊྛཀཐཱཡཾ ཝུཏྟཱཏི ཡོཛནཱ.

༢༣༨༢. ཡཱ པན པརིཔུཎྞཝཱིསཏིཝསྶཱ སཱམཎེརཱི ‘‘ཀུམཱརིབྷཱུཏཱ’’ཏི ཝུཏྟཱ, སཱ ཀམྨཝཱཙཱཡ ‘‘ཀུམཱརིབྷཱུཏཱ’’ཨིཙྩེཝ ཝཏྟབྦཱ, ཨཉྙཐཱ པན ན ཝཏྟབྦཱ ‘‘གིཧིགཏཱ’’ཏི ཝཱ ‘‘པུརིསནྟརགཏཱ’’ཏི ཝཱ ན ཝཏྟབྦཱཏི ཡོཛནཱ. ཡཐཱཧ ‘‘ཀུམཱརིབྷཱུཏཱ པན ‘གིཧིགཏཱ’ཏི ན ཝཏྟབྦཱ, ‘ཀུམཱརིབྷཱུཏཱ’ཨིཙྩེཝ ཝཏྟབྦཱ’’ཏི.

༢༣༨༣. ཨེཏཱ ཏུ པན ཏིསྶོཔཱིཏི མཧཱསིཀྑམཱནཱ གིཧིགཏཱ, ཀུམཱརིབྷཱུཏཱཏི ཝུཏྟཱ པན ¶ ཨེཏཱ ཏིསྶོཔི. ཨཔི-སདྡེན གིཧིགཏཱ ཀུམཱརིབྷཱུཏཱ དྭེ སཀསཀནཱམེནཱཔི ཝཏྟུཾ ཝཊྚནྟཱིཏི དཱིཔེཏི. ‘‘ཀུམཱརིབྷཱུཏསིཀྑམཱནཱཡཱ’’ཏི པཱལི༹ཡཾ ཨཝུཏྟཏྟཱ ན ཝཊྚཏཱིཏི ཀོཙི མཉྙེཡྻཱཏི ¶ ཨཱཧ ‘‘ན སཾསཡོ’’ཏི. ཏཐཱ ཝཏྟབྦཏཱཧེཏུདསྶནཏྠམཱཧ ‘‘སིཀྑཱསམྨུཏིདཱནཏོ’’ཏི.

པཋམདུཏིཡཏཏིཡཱནི.

༢༣༨༤-༥. ཡཱ པན བྷིཀྑུནཱི ཨཱུནདྭཱདསཝསྶཱཝ ཨུཔསམྤདཱཝསེན ཨཔརིཔུཎྞདྭཱདསཝསྶཱ ཨེཝ སཡཾ ཨུཔཛ྄ཛྷཱཡཱ ཧུཏྭཱ པརཾ སིཀྑམཱནཾ སཙེ ཝུཊྛཱཔེཏི, པུབྦེ ཝུཏྟནཡེནེཝ གཎཔརིཡེསནཱདིདུཏིཡཱནུསྶཱཝནཔརིཡོསཱནེསུ ཨཱཔནྣཱནཾ དུཀྐཊཱནཾ ཨནནྟརཾ ཀམྨཝཱཙཱནཾ ཨོསཱནེ ཏཏིཡཱནུསྶཱཝནཱཡ ཡྻཏཱརཔྤཏྟཱཡ ཏསྶཱ པཱཙིཏྟི པརིདཱིཔིཏཱཏི ཡོཛནཱ.

ཙཏུཏྠཾ.

༢༣༨༦. པཉྩམེཏི ‘‘ཡཱ པན བྷིཀྑུནཱི པརིཔུཎྞདྭཱདསཝསྶཱ སངྒྷེན ཨསམྨཏཱ ཝུཊྛཱཔེཡྻ, པཱཙིཏྟིཡ’’ནྟི (པཱཙི. ༡༡༤༢) སིཀྑཱཔདེ. ཀཱཡཙིཏྟཝཱཙཱཙིཏྟཀཱཡཝཱཙཱཙིཏྟཝསེན ཏིསམུཊྛཱནཾ. ཀྲིཡཱཀྲིཡནྟི ཝུཊྛཱཔནཾ ཀིརིཡཾ, སངྒྷསམྨུཏིཡཱ ཨགྒཧཎཾ ཨཀིརིཡཾ.

པཉྩམཾ.

༢༣༨༧. སངྒྷེནཱཏི བྷིཀྑུནིསངྒྷེན. ཨུཔཔརིཀྑིཏྭཱཏི ཨལཛྫིབྷཱཝཱདིཾ ཨུཔཔརིཀྑིཏྭཱ. ཨལཾ ཏཱཝཱཏི ཨེཏྠ ‘‘ཏེ ཨཡྻེ’’ཏི སེསོ. ཝཱརིཏཱཏི ཨེཏྠ ‘‘སཱདྷཱུཏི པཊིསྶུཎིཏྭཱ’’ཏི སེསོ. ‘‘ཨལཾ ཏཱཝ ཏེ, ཨཡྻེ, ཨུཔསམྤཱདིཏེནཱ’’ཏི ཝཱརིཏཱ ‘‘སཱདྷཱུ’’ཏི པཊིསྶུཎིཏྭཱ ཨེཏྠ ཨེཏསྨིཾ པཝཱརཎེ པཙྪཱ ཁཱིཡཏི ‘‘ཨཧམེཝ ནཱུན བཱལཱ, ཨཧམེཝ ནཱུན ཨལཛྫིནཱི’’ཏིཨཱདིནཱ ཨཝཎྞཾ པཀཱསེཏི, དོསཏཱ པཱཙིཏྟིཡཱཔཏྟི ཧོཏཱིཏི ཡོཛནཱ.

༢༣༨༨. ཚནྡདོསཱདཱིཧི ¶ ཀརོནྟིཡཱཏི ཨེཏྠ ‘‘པཀཏིཡཱ’’ཏི སེསོ. པཀཏིཡཱ ཚནྡདོསཱདཱིཧི ཨགཏིགམནེཧི ནིཝཱརཎཾ ཀརོནྟིཡཱ སཙེ ཨུཛ྄ཛྷཱཡཏི, ན དོསོཏི ཡོཛནཱ.

ཚཊྛཾ.

༢༣༨༩-༩༠. ལདྡྷེ ¶ ཙཱིཝརེཏི སིཀྑཱམཱནཱཡ ‘‘སཙེ མེ ཏྭཾ, ཨཡྻེ, ཙཱིཝརཾ དསྶསི, ཨེཝཱཧཾ ཏཾ ཝུཊྛཱཔེསྶཱམཱི’’ཏི ཝཏྭཱ ཡཱཙིཏེ ཏསྨིཾ ཙཱིཝརེ ལདྡྷེ. པཙྪཱཏི ཙཱིཝརལཱབྷཏོ པཙྪཱ. ཨསནྟེ ཨནྟརཱཡིཀེཏི དསནྣཾ ཨནྟརཱཡཱནཾ ཨཉྙཏརསྨིཾ ཨནྟརཱཡེ ཨཝིཛྫམཱནེ. ཝུཊྛཱཔེསྶཱམིནཱཧནྟི ཨཧཾ ཏཾ ན སམུཊྛཱཔེསྶཱམཱིཏི དྷུརནིཀྑེཔནེ ཏསྶཱ པཱཙིཏྟིཡཾ ཧོཏཱིཏི ཡོཛནཱ.

༢༣༩༡. ཨིདནྟི ཨིདཾ སིཀྑཱཔདཾ. ཨཝུཊྛཱཔནེན ཨཀྲིཡཾ.

སཏྟམཾ.

༢༣༩༢. ཨཊྛམནྟི ‘‘ཡཱ པན བྷིཀྑུནཱི སིཀྑམཱནཾ ‘སཙེ མཾ ཏྭཾ, ཨཡྻེ, དྭེ ཝསྶཱནི ཨནུབནྡྷིསྶསི, ཨེཝཱཧཾ ཏཾ ཝུཊྛཱཔེསྶཱམཱི’’ཏིཨཱདི (པཱཙི. ༡༡༥༥) སིཀྑཱཔདཾ. ནཝམེཏི ‘‘ཡཱ པན བྷིཀྑུནཱི པུརིསསཾསཊྛཾ ཀུམཱརཀསཾསཊྛཾ ཙཎྜིཾ སོཀཱཝཱསཾ སིཀྑམཱནཾ ཝུཊྛཱཔེཡྻ, པཱཙིཏྟིཡ’’ནྟི (པཱཙི. ༡༡༥༩) ཝུཏྟསིཀྑཱཔདེ. ‘‘ཝཏྟབྦཾ ནཏྠཱི’’ཏི ཨིདཾ སདྡཏྠཝིསེསམནྟརེན ཝིནིཙྪཡསྶ སུཝིཉྙེཡྻཏྟཱ ཝུཏྟཾ. ཏེནེཝཱཧ ‘‘ཨུཏྟཱནམེཝིད’’ནྟི.

སདྡཏྠོ པན ཨེཝཾ ཝེདིཏབྦོ – པུརིསསཾསཊྛནྟི པརིཔུཎྞཝཱིསཏིཝསྶེན པུརིསེན ཨནནུལོམིཀེན ཀཱཡཝཙཱིཀམྨེན སཾསཊྛཾ. ཀུམཱརཀསཾསཊྛནྟི ཨཱུནཝཱིསཏིཝསྶེན ཀུམཱརེན ཏཐེཝ སཾསཊྛཾ. ཙཎྜིནྟི ཀོདྷནཾ. སོཀཱཝཱསནྟི སངྐེཏཾ ཀཏྭཱ ¶ ཨཱགཙྪམཱནཱ པུརིསཱནཾ ཨནྟོ སོཀཾ པཝེསེཏཱིཏི སོཀཱཝཱསཱ, ཏཾ སོཀཱཝཱསཾ. ཨཐ ཝཱ གྷརཾ ཝིཡ གྷརསཱམིཀཱ, ཨཡམྤི པུརིསསམཱགམཾ ཨལབྷམཱནཱ སོཀཾ ཨཱཝིསཏི, ཨིཏི ཡཾ ཨཱཝིསཏི, སྭཱསྶཱ ཨཱཝཱསོ ཧོཏཱིཏི སོཀཱཝཱསཱ. ཏེནེཝསྶ པདབྷཱཛནེ ‘‘སོཀཱཝཱསཱ ནཱམ པརེསཾ དུཀྑཾ ཨུཔྤཱདེཏི, སོཀཾ ཨཱཝིསཏཱི’’ཏི (པཱཙི. ༡༡༦༠) དྭེདྷཱ ཨཏྠོ ཝུཏྟོ. པཱཙིཏྟིཡནྟི ཨེཝརཱུཔཾ ཝུཊྛཱཔེནྟིཡཱ ཝུཏྟནཡེནེཝ ཀམྨཝཱཙཱཔརིཡོསཱནེ ཨུཔཛ྄ཛྷཱཡཱཡ པཱཙིཏྟིཡཾ.

༢༣༩༣. ‘‘ནཏྠི ཨཛཱནནྟིཡཱ’’ཏི པཙྪེདོ, སིཀྑམཱནཱཡ པུརིསསཾསཊྛཱདིབྷཱཝཾ ཨཛཱནནྟིཡཱཏི ཨཏྠོ.

ཨཊྛམནཝམཱནི.

༢༣༩༤. ཝིཛཱཏམཱཏརཱ ¶ ཝཱ ཛནཀཔིཏརཱ ཝཱ སཱམིནཱ པརིགྒཱཧཀསཱམིནཱ ཝཱ ནཱནུཉྙཱཏཾ ཨུཔསམྤདཏྠཱཡ ཨནནུཉྙཱཏཾ ཏཾ སིཀྑམཱནཾ ཝུཊྛཱཔེནྟིཡཱ ཏསྶཱ པཱཙིཏྟིཡཱཔཏྟི སིཡཱཏི ཡོཛནཱ.

༢༣༩༥. ན བྷིཀྑུནཱཏི བྷིཀྑུནཱ དྭིཀྑཏྟུཾ ན པུཙྪིཏབྦཾ, སཀིམེཝ པུཙྪིཏབྦནྟི ཝུཏྟཾ ཧོཏི. ཡཐཱཧ ‘‘བྷིཀྑུནཱིཧི དྭིཀྑཏྟུཾ ཨཱཔུཙྪིཏབྦཾ པབྦཛྫཱཀཱལེ ཙ ཨུཔསམྤདཱཀཱལེ ཙ, བྷིཀྑཱུནཾ པན སཀིཾ ཨཱཔུཙྪིཏེཔི ཝཊྚཏཱི’’ཏི (པཱཙི. ཨཊྛ. ༡༡༦༢).

༢༣༩༦-༧. ཨཏྠིཏནྟི ཨཏྠིབྷཱཝཾ. ཙཏཱུཧི སམུཊྛཱཏི, ཙཏྟཱརི ཝཱ སམུཊྛཱནཱནི ཨེཏསྶཱཏི ཙཏུསམུཊྛཱནཾ. ཀཏམེཧི ཙཏཱུཧི སམུཊྛཱཏཱིཏི ཨཱཧ ‘‘ཝཱཙཏོ…པེ… ཀཱཡཝཱཙཱདིཏོཔི ཙཱ’’ཏི. ཀཐཾ ཝཱཙཱདཱིཧི ཙཏཱུཧི སམུཊྛཱཏི? ཨབྦྷཱནཀམྨཱདཱིསུ ཀེནཙིདེཝ ཀརཎཱིཡེན ཁཎྜསཱིམཱཡཾ ནིསིནྣཱ ¶ ‘‘པཀྐོསཐ སིཀྑམཱནཾ, ཨིདྷེཝ ནཾ ཨུཔསམྤཱདེསྶཱམཱ’’ཏི ཨུཔསམྤཱདེཏི, ཨེཝཾ ཝཱཙཏོ སམུཊྛཱཏི. ‘‘ཨུཔསྶཡཏོ པཊྛཱཡ ཨུཔསམྤཱདེསྶཱམཱི’’ཏི ཝཏྭཱ ཁཎྜསཱིམཾ གཙྪནྟིཡཱ ཀཱཡཝཱཙཏོ སམུཊྛཱཏི. དྭཱིསུཔི ཋཱནེསུ པཎྞཏྟིཾ ཛཱནིཏྭཱ ཝཱིཏིཀྐམཾ ཀརོནྟིཡཱ ཝཱཙཱཙིཏྟཏོ, ཀཱཡཝཱཙཱཙིཏྟཏོ ཙ སམུཊྛཱཏི. ཨུཔསམྤཱདནཾ ཀྲིཡཾ, ཨནཱཔུཙྪནཾ ཨཀྲིཡཾ.

དསམཾ.

༢༣༩༨. ཨེཏྠ ཨིམསྨིཾ སཱསནེ ཡཱ བྷིཀྑུནཱི པཱརིཝཱསིཀེན ཚནྡདཱནེན སིཀྑམཱནཾ སཙེ ཝུཊྛཱཔེཏི, ཏསྶཱ པཱཙིཏྟིཡཾ སིཡཱཏི ཡོཛནཱ. ཏཏྠ པཱརིཝཱསིཀེན ཚནྡདཱནེནཱཏི ཙཏུབྦིདྷཾ པཱརིཝཱསིཡཾ པརིསཔཱརིཝཱསིཡཾ, རཏྟིཔཱརིཝཱསིཡཾ, ཚནྡཔཱརིཝཱསིཡཾ, ཨཛ྄ཛྷཱསཡཔཱརིཝཱསིཡནྟི.

ཏཏྠ པརིསཔཱརིཝཱསིཡཾ ནཱམ བྷིཀྑཱུ ཀེནཙིདེཝ ཀརཎཱིཡེན སནྣིཔཏིཏཱ ཧོནྟི, ཨཐ མེགྷོ ཝཱ ཨུཊྛཧཏི, ཨུསྶཱརཎཱ ཝཱ ཀརཱིཡཏི, མནུསྶཱ ཝཱ ཨཛ྄ཛྷོཏྠརནྟཱ ཨཱགཙྪནྟི, བྷིཀྑཱུ ‘‘ཨནོཀཱསོ ཨཡཾ, ཨཉྙཏྲ གཙྪཱམཱ’’ཏི ཚནྡཾ ཨཝིསྶཛྫེཏྭཱཝ ཨུཊྛཧནྟི. ཨིདཾ པརིསཔཱརིཝཱསིཡཾ. ཀིཉྩཱཔི པརིསཔཱརིཝཱསིཡཾ, ཚནྡསྶ པན ཨཝིསྶཊྛཏྟཱ ཀམྨཾ ཀཱཏུཾ ཝཊྚཏི.

པུན ¶ བྷིཀྑཱུ ‘‘ཨུཔོསཐཱདཱིནི ཀརིསྶཱམཱ’’ཏི རཏྟིཾ སནྣིཔཏིཏྭཱ ‘‘ཡཱཝ སབྦེ སནྣིཔཏནྟི, ཏཱཝ དྷམྨཾ སུཎིསྶཱམཱ’’ཏི ཨེཀཾ ཨཛ྄ཛྷེསནྟི, ཏསྨིཾ དྷམྨཀཐཾ ཀཐེནྟེཡེཝ ཨརུཎོ ཨུགྒཙྪཏི. སཙེ ‘‘ཙཱཏུདྡསིཀཾ ཨུཔོསཐཾ ཀརིསྶཱམཱ’’ཏི ནིསིནྣཱ, ‘‘པནྣརསོ’’ཏི ཀཱཏུཾ ཝཊྚཏི. སཙེ པནྣརསིཀཾ ཀཱཏུཾ ¶ ནིསིནྣཱ, པཱཊིཔདེ ཨནུཔོསཐེ ཨུཔོསཐཾ ཀཱཏུཾ ན ཝཊྚཏི. ཨཉྙཾ པན སངྒྷཀིཙྩཾ ཀཱཏུཾ ཝཊྚཏི. ཨིདཾ པན རཏྟིཔཱརིཝཱསིཡཾ ནཱམ.

པུན བྷིཀྑཱུ ‘‘ཀིཉྩིདེཝ ཨབྦྷཱནཱདིསངྒྷཀམྨཾ ཀརིསྶཱམཱ’’ཏི ནིསིནྣཱ ཧོནྟི, ཏཏྲེཀོ ནཀྑཏྟཔཱཋཀོ བྷིཀྑུ ཨེཝཾ ཝདཏི ‘‘ཨཛྫ ནཀྑཏྟཾ དཱརུཎཾ, མཱ ཨིདཾ ཀམྨཾ ཀརོཐཱ’’ཏི, ཏེ ཏསྶ ཝཙནེན ཚནྡཾ ཝིསྶཛྫེཏྭཱ ཏཏྠེཝ ནིསིནྣཱ ཧོནྟི, ཨཐཉྙོ ཨཱགནྟྭཱ –

‘‘ནཀྑཏྟཾ པཊིམཱནེནྟཾ, ཨཏྠོ བཱལཾ ཨུཔཙྩགཱ’’ཏི. (ཛཱ. ༡.༡.༤༩) –

ཝཏྭཱ ‘‘ཀིཾ ནཀྑཏྟེན, ཀརོཐཱ’’ཏི ཝདཏི. ཨིདཾ ཚནྡཔཱརིཝཱསིཡཉྩེཝ ཨཛ྄ཛྷཱསཡཔཱརིཝཱསིཡཉྩ. ཨེཏསྨིཾ པཱརིཝཱསིཡེ པུན ཚནྡཔཱརིསུདྡྷིཾ ཨནཱཧརིཏྭཱ ཀམྨཾ ཀཱཏུཾ ན ཝཊྚཏི. ཨིདཾ སནྡྷཱཡ ཝུཏྟཾ ‘‘པཱརིཝཱསིཀེན ཚནྡདཱནེནཱ’’ཏི.

པཱཙིཏྟིཡཾ སིཡཱཏི ཨེཝཾ ཝུཊྛཱཔེནྟིཡཱ ཝུཏྟནཡེནེཝ ཀམྨཝཱཙཱཔརིཡོསཱནེ པཱཙིཏྟིཡཾ སིཡཱཏི ཨཏྠོ.

༢༣༩༩. ཚནྡཾ ཨཝིཧཱཡ ཝཱ ཨཝིསྶཛྫེཏྭཱཝ ཨཝུཊྛིཏཱཡ པརིསཱཡ ཏུ ཡཐཱནིསིནྣཱཡ པརིསཱཡ ཝུཊྛཱཔེནྟིཡཱ ཨནཱཔཏྟཱིཏི ཡོཛནཱ. ཝཱ-སདྡོ ཨེཝཀཱརཏྠོ.

ཨེཀཱདསམཾ.

༢༤༠༠. དྭཱདསེཏི ‘‘ཡཱ པན བྷིཀྑུནཱི ཨནུཝསྶཾ ཝུཊྛཱཔེཡྻ, པཱཙིཏྟིཡ’’ནྟི (པཱཙི. ༡༡༧༡) སིཀྑཱཔདེ. ཏེརསེཏི ‘‘ཡཱ པན བྷིཀྑུནཱི ཨེཀཾ ཝསྶཾ དྭེ ཝུཊྛཱཔེཡྻ, པཱཙིཏྟིཡ’’ནྟི (པཱཙི. ༡༡༧༥) སིཀྑཱཔདེ.

དྭཱདསམཏེརསམཱནི.

ཀུམཱརིབྷཱུཏཝགྒོ ཨཊྛམོ.

༢༤༠༡. ཨགིལཱནཱཏི ¶ ¶ ཚཏྟུཔཱཧནེན ཝཱུཔསམེཏབྦརོགརཧིཏཱ. ཡཐཱཧ ‘‘ཨགིལཱནཱ ནཱམ ཡསྶཱ ཝིནཱ ཚཏྟུཔཱཧནཱ ཕཱསུ ཧོཏཱི’’ཏི. ཚཏྟཉྩ ཨུཔཱཧནཱ ཙ ཚཏྟུཔཱཧནཾ. ཏཏྠ ཚཏྟཾ ཝུཏྟལཀྑཎཾ, ཨུཔཱཧནཱ ཝཀྑམཱནལཀྑཎཱ. དྷཱརེཡྻཱཏི ཨུབྷཡཾ ཨེཀཏོ དྷཱརེཡྻ. ཝིསུཾ དྷཱརེནྟིཡཱ ཧི དུཀྐཊཾ ཝཀྑཏི.

༢༤༠༢. དིཝསནྟི ཨཙྩནྟསཾཡོགེ ཨུཔཡོགཝཙནཾ. སཙེ དྷཱརེཏཱིཏི ཡོཛནཱ.

༢༤༠༣. ཀདྡམཱདཱིནཱིཏི ཨེཏྠ ཨཱདི-སདྡེན མཧཱཝཱལུཀཱདཱིནཾ གཧཎཾ.

༢༤༠༤. སཙེ གཙྪཏཱིཏི སམྦནྡྷོ. དིསྭཱ གཙྪཱདིཀནྟི ཚཏྟེ ལགྒནཡོགྒཾ ནཱིཙཏརཾ གཙྪཱདིཀཾ དིསྭཱ. ཨཱདི-སདྡེན གུམྦཱདཱིནཾ གཧཎཾ. དུཀྐཊནྟི ཨུཔཱཧནམཏྟསྶེཝ དྷཱརཎེ དུཀྐཊཾ.

༢༤༠༥. ཨཔནཱམེཏྭཱཏི སཱིསཏོ ཨཔནཱམེཏྭཱ. ཨོམུཉྩིཏྭཱཏི པཱདཏོ ཨོམུཉྩིཏྭཱ. ཧོཏི པཱཙིཏྟིཡནྟི པུན པཱཙིཏྟིཡཾ ཧོཏི.

༢༤༠༦. པཡོགགཎནཱཡེཝཱཏི ཚཏྟུཔཱཧནསྶ ཨཔནེཏྭཱ ཨཔནེཏྭཱ ཨེཀཏོ དྷཱརཎཔཡོགགཎནཱཡ. ཏིཀཔཱཙིཏྟིཡཾ ཝུཏྟནྟི ‘‘ཨགིལཱནཱ ཨགིལཱནསཉྙཱ, ཝེམཏིཀཱ, གིལཱནསཉྙཱ ཚཏྟུཔཱཧནཾ དྷཱརེཏི, ཨཱཔཏྟི པཱཙིཏྟིཡསྶཱ’’ཏི (པཱཙི. ༡༡༨༡) ཨེཝཾ ཏིཀཔཱཙིཏྟིཡཾ ཝུཏྟཾ. ‘‘གིལཱནཱ ཨགིལཱནསཉྙཱ, གིལཱནཱ ཝེམཏིཀཱ, ཚཏྟུཔཱཧནཾ དྷཱརེཏི, ཨཱཔཏྟི དུཀྐཊསྶཱ’’ཏི (པཱཙི. ༡༡༨༢) ཨེཝཾ དྭིཀདུཀྐཊཾ ཏཐེཝ ཝུཏྟནྟི སམྦནྡྷོ.

༢༤༠༧. ཡཏྠ ¶ བྷིཀྑཱུ ཝཱ བྷིཀྑུནིཡོ ཝཱ ནིཝསནྟི, ཏསྨིཾ ཨཱརཱམེ ཝཱ ཨུཔཙཱརེ ཝཱ ཨཔརིཀྑིཏྟསྶ ཨཱརཱམསྶ ཨུཔཙཱརེ ཝཱ. ཨཱཔདཱསཱུཏི རཊྛབྷེདཱདིཨཱཔདཱསུ.

པཋམཾ.

༢༤༠༨. བྷིཀྑུནིཡཱཏི ཨེཏྠ ‘‘ཨགིལཱནཱཡཱ’’ཏི སེསོ, པཱདེན གནྟུཾ སམཏྠཱཡ ཨགིལཱནཱཡ ¶ བྷིཀྑུནིཡཱཏི ཨཏྠོ. ཡཐཱཧ ‘‘ཨགིལཱནཱ ནཱམ སཀྐོཏི པདསཱ གནྟུ’’ནྟི (པཱཙི. ༡༡༨༧). ཡཱནཾ ནཱམ རཐཱདི, ཏཾ ཧེཊྛཱ ཝུཏྟསརཱུཔམེཝ.

༢༤༠༩. ཨཱཔདཱསཱུཏི རཊྛབྷེདཱདིཨཱཔདཱསུ. ཚཏྟུཔཱཧནསིཀྑཱཔདེ ཨཱརཱམེ, ཨཱརཱམཱུཔཙཱརེ ཙ ཨནཱཔཏྟི ཝུཏྟཱ, ཨིདྷ ཏཐཱ ཨཝུཏྟཏྟཱ སབྦཏྠཱཔི ཨཱཔཏྟིཡེཝ ཝེདིཏབྦཱ.

དུཏིཡཾ.

༢༤༡༠. ‘‘ཡཾ ཀིཉྩིཔི ཀཊཱུཔིཡ’’ནྟི ཨིདཾ ‘‘སངྒྷཱཎི’’ནྟི ཨེཏསྶ ཨཏྠཔདཾ. ཡཐཱཧ – ‘‘སངྒྷཱཎི ནཱམ ཡཱ ཀཱཙི ཀཊཱུཔགཱ’’ཏི. སངྒྷཱཎི ནཱམ མེཁལཱདིཀཊིཔིལ༹ནྡྷནཾ. ཀཊཱུཔིཡནྟི ཀཊིཔྤདེསོཔགཾ.

༢༤༡༢. ཀཊིསུཏྟཾ ནཱམ ཀཊིཡཾ པིལ༹ནྡྷནརཛྫུསུཏྟཀཾ.

༢༤༡༣. ཨིདྷ ཨིམསྨིཾ སིཀྑཱཔདེ ཙིཏྟཾ ཨཀུསལཾ, ཨིདཾ པན སིཀྑཱཔདཾ ལོཀཝཛྫཾ, ཨིཏི ཨིདཾ ཨུབྷཡམེཝ ཝིསེསཏཱ པུརིམསིཀྑཱཔདཏོ ཨིམསྶ ནཱནཱཀརཎཾ.

ཏཏིཡཾ.

༢༤༡༤. སཱིསཱུཔགཱདིསུ ¶ ཡཾ ཀིཉྩི སཙེ ཡཱ དྷཱརེཏི, ཏསྶཱ ཏསྶ ཝཏྠུསྶ གཎནཱཡ ཨཱཔཏྟིཡོ སིཡུནྟི ཡོཛནཱ. སཱིསཾ ཨུཔགཙྪཏཱིཏི སཱིསཱུཔགཾ, སཱིསེ པིལ༹ནྡྷནཱརཧནྟི ཨཏྠོ. ཨཱདི-སདྡེན གཱིཝཱུཔགཱདཱིནཾ གཧཎཾ. ཡཐཱཧ – ‘‘ཨིཏྠཱལངྐཱརོ ནཱམ སཱིསཱུཔགོ གཱིཝཱུཔགོ ཧཏྠཱུཔགོ པཱདཱུཔགོ ཀཊཱུཔགོ’’ཏི.

༢༤༡༥. ན ཙ དོསོཏི ཡོཛནཱ. ‘‘སདིསནྟི པརིདཱིཔིཏ’’ནྟི ཝཏྟབྦེ ཨིཏི-སདྡོ ལུཏྟནིདྡིཊྛོ.

ཙཏུཏྠཾ.

༢༤༡༦. ཡེན ¶ ཀེནཙི གནྡྷེནཱཏི ཙནྡནཏགརཱདིནཱ ཡེན ཀེནཙི གནྡྷཀཀྐེན. སཝཎྞཱཝཎྞཀེན ཙཱཏི ཝཎྞེན སཧ ཝཏྟཏཱིཏི སཝཎྞཀཾ, ཧལིདྡིཀཀྐཱདི, ནཏྠི ཨེཏསྶ ཨུབྦཊྚནཔཙྩཡཱ དིསྶམཱནོ ཝཎྞཝིསེསོཏི ཨཝཎྞཀཾ, སཱསཔཀཀྐཱདི, སཝཎྞཀཉྩ ཨཝཎྞཀཉྩ སཝཎྞཱཝཎྞཀཾ, ཏེན སཝཎྞཱཝཎྞཀེན ཙ. ཨུབྦཊྚེཏྭཱ ནྷཱཡནྟིཡཱ ནྷཱནོསཱནེ པཱཙིཏྟིཡཱཔཏྟི པཀཱསིཏཱཏི ཡོཛནཱ.

༢༤༡༧. སབྦཔཡོགེཏི སབྦསྨིཾ པུབྦཔཡོགེ. ཨཱབཱདྷཔཙྩཡཱཏི དདྡུཀུཊྛཱདིརོགཔཙྩཡཱ.

༢༤༡༨. ཚཊྛནྟི ‘‘ཡཱ པན བྷིཀྑུནཱི ཝཱསིཏཀེན པིཉྙཱཀེན ནཧཱཡེཡྻ, པཱཙིཏྟིཡ’’ནྟི (པཱཙི. ༡༢༠༣) སིཀྑཱཔདཾ.

པཉྩམཚཊྛཱནི.

༢༤༡༩. ཡཱ པན བྷིཀྑུནཱི ཨཉྙཱཡ བྷིཀྑུནིཡཱ སཙེ ཨུབྦཊྚཱཔེཡྻ ཝཱ སམྦཱཧཱཔེཡྻ ཝཱ, ཏསྶཱ བྷིཀྑུནིཡཱ ཏཐཱ པཱཙིཏྟིཡཱཔཏྟི ཧོཏཱིཏི ཡོཛནཱ.

༢༤༢༠. ཨེཏྠ ¶ ཨིམསྨིཾ ཨུབྦཊྚནེ, སམྦཱཧནེ ཙ ཧཏྠཾ ཨམོཙེཏྭཱ ཨུབྦཊྚནེ ཨེཀཱ ཨཱཔཏྟི སིཡཱ, ཧཏྠཾ མོཙེཏྭཱ མོཙེཏྭཱ ཨུབྦཊྚནེ པཡོགགཎནཱཡ སིཡཱཏི ཡོཛནཱ.

༢༤༢༡. ཨཱཔདཱསཱུཏི ཙོརབྷཡཱདཱིཧི སརཱིརཀམྤནཱདཱིསུ. གིལཱནཱཡཱཏི ཨནྟམསོ མགྒགམནཔརིསྶམེནཱཔི ཨཱབཱདྷིཀཱཡ.

༢༤༢༢. ཨཊྛམསིཀྑཱཔདེ ‘‘སིཀྑམཱནཱཡཱ’’ཏི ཙ ནཝམསིཀྑཱཔདེ ‘‘སཱམཎེརིཡཱ’’ཏི ཙ དསམསིཀྑཱཔདེ ‘‘གིཧིནིཡཱ’’ཏི ཙ ཝིསེསཾ ཝཛྫེཏྭཱ ཨཝསེསཝིནིཙྪཡོ སཏྟམེནེཝ སམཱནོཏི དསྶེཏུམཱཧ ‘‘ཨཊྛམཱདཱིནི ཏཱིཎིཔཱི’’ཏི.

སཏྟམཊྛམནཝམདསམཱནི.

༢༤༢༣. ཨནྟོཨུཔཙཱརསྨིནྟི ¶ དྭཱདསརཏནབྦྷནྟརེ. ‘‘བྷིཀྑུསྶ པུརཏོ’’ཏི ཨིདཾ ཨུཔལཀྑཎཾ. ཏསྨཱ པུརཏོ ཝཱ ཧོཏུ པཙྪཏོ ཝཱ པསྶཏོ ཝཱ, སམནྟཏོ དྭཱདསརཏནབྦྷནྟརེཏི ནིདསྶནཔདམེཏཾ. ཚམཱཡཔཱིཏི ཨནནྟརཧིཏཱཡ བྷཱུམིཡཱཔི. ཡཱ ནིསཱིདེཡྻཱཏི སམྦནྡྷོ. ན ཝཊྚཏི པཱཙིཏྟིཡཱཔཏྟི ཧོཏཱིཏི ཨཏྠོ.

༢༤༢༤. ཏིཀཔཱཙིཏྟིཡཾ ཝུཏྟནྟི ཨནཱཔུཙྪིཏེ ཨནཱཔུཙྪིཏསཉྙཱ, ཝེམཏིཀཱ, ཨཱཔུཙྪིཏསཉྙཱཏི ཏཱིསུ ཝིཀཔྤེསུ པཱཙིཏྟིཡཏྟཡཾ ཝུཏྟཾ. ཨཱཔུཙྪིཏེ ཨནཱཔུཙྪིཏསཉྙཱ, ཝེམཏིཀཱ ཝཱ བྷིཀྑུསྶ པུརཏོ ནིསཱིདེཡྻཱཏི ཝིཀཔྤདྭཡེ དུཀྐཊདྭཡཾ ཧོཏི. ཨཱཔདཱསཱུཏི རཊྛབྷེདཱདིཨཱཔདཱསུ. ཨཱཔུཙྪིཏུཉྩ ཋཱཏུཉྩ ཨསཀྐོནྟིཡཱ གིལཱནཱཡ.

༢༤༢༥. ནིཔཛྫནཾ ཀྲིཡཾ. ཨནཱཔུཙྪནཾ ཨཀྲིཡཾ.

ཨེཀཱདསམཾ.

༢༤༢༦. ཨོཀཱསོ ¶ ཀཏོ ཡེན སོ ཨོཀཱསཀཏོ, ན ཨོཀཱསཀཏོ ཨནོཀཱསཀཏོ, ཏཾ, ཨཀཏོཀཱསནྟི ཨཏྠོ, ‘‘ཨསུཀསྨིཾ ནཱམ ཋཱནེ པུཙྪཱམཱི’’ཏི ཨཏྟནཱ པུཙྪིཏབྦཝིནཡཱདཱིནཾ ནཱམཾ གཧེཏྭཱ ཨོཀཱསཾ ཀཱརཱཔནཀཱལེ ཨདྷིཝཱསནཝསེན ཨཀཏོཀཱསནྟི ཝུཏྟཾ ཧོཏི. དོསཏཱཏི པཱཙིཏྟིཡཱཔཏྟི. ཨེཀསྨིཾ པིཊཀེ ཨོཀཱསཾ ཀཱརཱཔེཏྭཱ ཨཉྙསྨིཾ པིཊཀེ པཉྷཾ པུཙྪནྟིཡཱཔི པཱཙིཏྟིཡཾ ཧོཏཱིཏི དསྶེཏུམཱཧ ‘‘ཝིནཡེ ཙཱ’’ཏིཨཱདི.

པུཙྪནྟིཡཱཔི ཙཱཏི ཨེཏྠ པི-སདྡེན ‘‘ཨབྷིདྷམྨཾ པུཙྪནྟིཡཱཔཱི’’ཏི ཨིདཉྩ ཨནུཏྟསམུཙྩཡཏྠེན ཙ-སདྡེན ‘‘སུཏྟནྟེ ཨོཀཱསཾ ཀཱརཱཔེཏྭཱ ཝིནཡཾ ཝཱ ཨབྷིདྷམྨཾ ཝཱ པུཙྪཏི, ཨཱཔཏྟི པཱཙིཏྟིཡསྶ. ཨབྷིདྷམྨེ ཨོཀཱསཾ ཀཱརཱཔེཏྭཱ སུཏྟནྟཾ ཝཱ ཝིནཡཾ ཝཱ པུཙྪཏི, ཨཱཔཏྟི པཱཙིཏྟིཡསྶཱ’’ཏི ཨིདཉྩ སངྒཧིཏཾ.

༢༤༢༧. ཨནོདིསྶཱཏི ‘‘ཨསུཀསྨིཾ ནཱམ པུཙྪཱམཱི’’ཏི ཨེཝཾ ཨནིཡམེཏྭཱ ཀེཝལཾ ‘‘པུཙྪིཏབྦཾ ཨཏྠི, པུཙྪཱམི ཨཡྻཱ’’ཏི ཨེཝཾ ཝཏྭཱ.

དྭཱདསམཾ.

༢༤༢༨-༩. སཾཀཙྩིཀནྟི ¶ ཐནཝེཋནཙཱིཝརཾ, ཏཾ པན པཱརུཔནྟིཡཱ ཨདྷཀྑཀཾ ཨུབྦྷནཱབྷིམཎྜལཾ པཊིཙྪཱདེནྟིཡཱ པཱརུཔིཏབྦཾ. ཏེནཱཧ མཱཏིཀཊྛཀཐཱཡཾ ‘‘ཨསཾཀཙྩིཀཱཏི ཨདྷཀྑཀཨུབྦྷནཱབྷིམཎྜལསངྑཱཏསྶ སརཱིརསྶ པཊིཙྪཱདནཏྠཾ ཨནུཉྙཱཏསཾཀཙྩིཀཙཱིཝརརཧིཏཱ’’ཏི (ཀངྑཱ. ཨཊྛ. ཨསཾཀཙྩིཀསིཀྑཱཔདཝཎྞནཱ). ‘‘སཾཀཙྩིཀཱཡ པམཱཎཾ ཏིརིཡཾ དིཡཌྜྷཧཏྠནྟི པོརཱཎགཎྛིཔདེ ཝུཏྟ’’ནྟི (ཝཛིར. ཊཱི. པཱཙིཏྟིཡ ༡༢༢༤-༡༢༢༦) ཝཛིརབུདྡྷིཏྠེརོ. པརིཀྑེཔོཀྐམེཏི པརིཀྑེཔསྶ ཨནྟོཔཝེསནེ. ཨུཔཙཱརོཀྐམེཔཱིཏི ¶ ཨཔརིཀྑིཏྟསྶ གཱམསྶ དུཏིཡལེཌྜུཔཱཏབྦྷནྟརཔཝེསནེཔི. ཨེཏྠཱཏི ཨིམསྨིཾ སིཀྑཱཔདེ. ཨེསེཝ ནཡོཏི ‘‘པཋམེ པཱདེ དུཀྐཊཾ, དུཏིཡེ པཱཙིཏྟིཡ’’ནྟི ཡཐཱཝུཏྟོཡེཝ ནཡོ མཏོ ཝིཉྙཱཏོཏི ཨཏྠོ.

༢༤༣༠. ཨཱཔདཱསུཔཱིཏི མཧགྒྷཾ ཧོཏི སཾཀཙྩིཀཾ, པཱརུཔིཏྭཱ གཙྪནྟིཡཱ ཙ ཨུཔདྡཝོ ཨུཔྤཛྫཏི, ཨེཝརཱུཔཱསུ ཨཱཔདཱསུ ཨནཱཔཏྟི.

༢༤༣༡. སེསནྟི ཨིདྷ སརཱུཔཏོ ཨདསྶིཏཉྩ. ཝུཏྟནཡེནེཝཱཏི མཱཏིཀཱཔདབྷཱཛནཱདཱིསུ ཝུཏྟནཡེནེཝ. སུནིཔུཎསྨིཾ དྷམྨཛཱཏཾ, ཨཏྠཛཱཏཉྩ ཝིབྷཱཝེཏི ཝིཝིདྷེནཱཀཱརེན པཀཱསེཏཱིཏི ཝིབྷཱཝཱི, ཏེན ཝིབྷཱཝིནཱ.

ཏེརསམཾ.

ཚཏྟུཔཱཧནཝགྒོ ནཝམོ.

ཨེཝཾ ནཝཧི ཝགྒེཧི བྷིཀྑུནཱིནཾ བྷིཀྑཱུཧི ཨསཱདྷཱརཎཱནི ཚནྣཝུཏི སིཀྑཱཔདཱནི དསྶེཏྭཱ ཨིཏོ པརེསུ མུསཱཝཱདཝགྒཱདཱིསུ སཏྟསུ ཝགྒེསུ བྷིཀྑཱུཧི སཱདྷཱརཎསིཀྑཱཔདཱནི བྷིཀྑུཔཱཏིམོཀྑཝིནིཙྪཡཀཐཱཡ ཝུཏྟནཡེནེཝ ཝེདིཏབྦཱནཱིཏི ཏཱནི ཨིདྷ ན དསྶིཏཱནི.

སབྦཱནེཝ བྷིཀྑུནཱིནཾ ཁུདྡཀེསུ ཚནྣཝུཏི, བྷིཀྑཱུནཾ དྭེནཝུཏཱིཏི ཨཊྛཱསཱིཏིསཏཾ སིཀྑཱཔདཱནི. ཏཏོ པརཾ སཀལཾ བྷིཀྑུནིཝགྒཾ, པརམྤརབྷོཛནཾ, ཨནཏིརིཏྟབྷོཛནཾ, ཨནཏིརིཏྟེན ཨབྷིཧཊྛུཾ པཝཱརཎཾ, པཎཱིཏབྷོཛནཝིཉྙཏྟི, ཨཙེལཀསིཀྑཱཔདཾ, དུཊྛུལླཔཨཙྪཱདནཾ, ཨཱུནཝཱིསཏིཝསྶཨུཔསམྤཱདནཾ, མཱཏུགཱམེན སདྡྷིཾ སཾཝིདྷཱཡ ཨདྡྷཱནགམནཾ, རཱཛནྟེཔུརཔྤཝེསནཾ ¶ , སནྟཾ ¶ བྷིཀྑུཾ ཨནཱཔུཙྪཱ ཝིཀཱལེ གཱམཔྤཝེསནཾ, ནིསཱིདནཾ, ཝསྶིཀསཱཊིཀནྟི ཨིམཱནི བཱཝཱིསཏི སིཀྑཱཔདཱནི ཨཔནེཏྭཱ སེསཱནི སཏཉྩ ཚསཊྛི ཙ སིཀྑཱཔདཱནི བྷིཀྑུནིཔཱཏིམོཀྑུདྡེསམགྒེན ཨུདྡིཊྛཱནཱིཏི ཝེདིཏབྦཱནི.

ཏཏྲཱཡཾ སངྑེཔཏོ ཨསཱདྷཱརཎསིཀྑཱཔདེསུ སམུཊྛཱནཝིནིཙྪཡོ – གིརགྒསམཛྫཱ, ཙིཏྟཱགཱརསིཀྑཱཔདཾ, སངྒྷཱཎི, ཨིཏྠཱལངྐཱརོ, གནྡྷཝཎྞཀོ, ཝཱསིཏཀཔིཉྙཱཀོ, བྷིཀྑུནིཨཱདཱིཧི ཨུམྨདྡནཔརིམདྡནཱནཱིཏི ཨིམཱནི དས སིཀྑཱཔདཱནི ཨཙིཏྟཀཱནི, ལོཀཝཛྫཱནི, ཨཀུསལཙིཏྟཱནི. ཨཡཾ པནེཏྠ ཨདྷིཔྤཱཡོ – ཝིནཱཔི ཙིཏྟེན ཨཱཔཛྫིཏབྦཏྟཱ ཨཙིཏྟཀཱནི, ཙིཏྟེ པན སཏི ཨཀུསལེནེཝ ཨཱཔཛྫིཏབྦཏྟཱ ལོཀཝཛྫཱནི ཙེཝ ཨཀུསལཙིཏྟཱནི ཙ. ཨཝསེསཱནི ཨཙིཏྟཀཱནི པཎྞཏྟིཝཛྫཱནེཝ. ཙོརིཝུཊྛཱཔནཾ, གཱམནྟརཾ, ཨཱརཱམསིཀྑཱཔདཾ, གབྦྷིནིཝགྒེ ཨཱདིཏོ པཊྛཱཡ སཏྟ, ཀུམཱརིབྷཱུཏཝགྒེ ཨཱདིཏོ པཊྛཱཡ པཉྩ, པུརིསསཾསཊྛཾ, པཱརིཝཱསིཡཚནྡདཱནཾ, ཨནུཝསྶཝུཊྛཱཔནཾ, ཨེཀནྟརིཀཝུཊྛཱཔནནྟི ཨིམཱནི ཨེཀཱུནཝཱིསཏི སིཀྑཱཔདཱནི སཙིཏྟཀཱནི, པཎྞཏྟིཝཛྫཱནི. ཨཝསེསཱནི སཙིཏྟཀཱནི ལོཀཝཛྫཱནེཝཱཏི.

ཨིཏི ཝིནཡཏྠསཱརསནྡཱིཔནིཡཱ ཝིནཡཝིནིཙྪཡཝཎྞནཱཡ

པཱཙིཏྟིཡཀཐཱཝཎྞནཱ ནིཊྛིཏཱ.

པཱཊིདེསནཱིཡཀཐཱཝཎྞནཱ

༢༤༣༢. ཨེཝཾ པཱཙིཏྟིཡཝིནིཙྪཡཾ དསྶེཏྭཱ ཨིདཱནི པཱཊིདེསནཱིཡཾ དསྶེཏུམཱཧ ‘‘ཨགིལཱནཱ’’ཏིཨཱདི. ཡཱ པན བྷིཀྑུནཱི ¶ ཨགིལཱནཱ སཡཾ ཨཏྟནཱ ཝིཉྙཏྟིཡཱ ལདྡྷཾ སཔྤིཾ སཙེ ‘‘བྷུཉྫིསྶཱམཱི’’ཏི གཎྷཏི, ཏསྶཱ ཨེཝཾ གཧཎེ དུཀྐཊཾ པརིདཱིཔིཏནྟི ཡོཛནཱ. ཏཏྠ ཡསྶཱ ཝིནཱ སཔྤིནཱ ཕཱསུ ཧོཏི, སཱ ཨགིལཱནཱ ནཱམ. སཔྤིནྟི པུབྦེ ཝུཏྟཝིནིཙྪཡཾ པཱལི༹ཨཱགཏཾ གོསཔྤིཨཱདིཀམེཝ.

༢༤༣༣. ཏིཔཱཊིདེསནཱིཡནྟི ཨགིལཱནཱ ཨགིལཱནསཉྙཱ, ཝེམཏིཀཱ, གིལཱནསཉྙཱཏི ཏཱིསུ ¶ ཝིཀཔྤེསུ ཏཱིཎི པཱཊིདེསནཱིཡཱནི. གིལཱནཱ དྭིཀདུཀྐཊནྟི གིལཱནཱཡ དྭིཀདུཀྐཊཾ. གིལཱནཱ ཨགིལཱནསཉྙཱ, ཝེམཏིཀཱ ཝཱཏི དྭཱིསུ ཝིཀཔྤེསུ དྭེ དུཀྐཊཱནི.

༢༤༣༤-༥. གིལཱནཱ ཧུཏྭཱ སཔྤིཾ ཝིཉྙཱཔེཏྭཱ པཙྪཱ ཝཱུཔསནྟགེལཉྙཱ ཧུཏྭཱ སེཝནྟིཡཱ པརིབྷུཉྫནྟིཡཱཔི ཙ གིལཱནཱཡ ཨཝསེསཾ པརིབྷུཉྫནྟིཡཱ ཝཱ ཉཱཏཀཱདིཏོ ཉཱཏཀཔཝཱརིཏཊྛཱནཏོ ཝིཉྙཏྟཾ བྷུཉྫནྟིཡཱ ཝཱ ཨཉྙསྶཏྠཱཡ ཝིཉྙཏྟཾ པརིབྷུཉྫནྟིཡཱ ཝཱ ཨཏྟནོ དྷནེན གཧིཏཾ བྷུཉྫནྟིཡཱ ཝཱ ཨུམྨཏྟིཀཱཡ ཝཱ ཨནཱཔཏྟཱིཏི ཡོཛནཱ.

པཋམཾ.

༢༤༣༦. སེསེསུ དུཏིཡཱདཱིསཱུཏི ‘‘ཡཱ པན བྷིཀྑུནཱི ཨགིལཱནཱ ཏེལཾ…པེ… མདྷུཾ…པེ… ཕཱཎིཏཾ…པེ… མཙྪཾ…པེ… མཾསཾ…པེ… ཁཱིརཾ…པེ… དདྷིཾ ཝིཉྙཱཔེཏྭཱ བྷུཉྫེཡྻ, པཊིདེསེཏབྦཾ ཏཱཡ བྷིཀྑུནིཡཱ གཱརཡ྄ཧཾ ཨཡྻེ དྷམྨཾ ཨཱཔཛྫིཾ ཨསཔྤཱཡཾ པཱཊིདེསནཱིཡཾ, ཏཾ པཊིདེསེམཱི’’ཏི (པཱཙི. ༡༢༣༦) ཨེཝཾ དུཏིཡཱདཱིསུ སཏྟསུ པཱཊིདེསནཱིཡེསུ. ནཏྠི ཀཱཙི ཝིསེསཏཱཏི ཏེལཱདིཔདཱནི ཝིནཱ ཨཉྙོ ཀོཙི ཝིསེསོ ནཏྠཱིཏི ཨཏྠོ.

༢༤༣༧. པཱལི༹ཡཾ ¶ ཨནཱགཏེསུ སབྦེསུ སཔྤིཨཱདཱིསུ ཨཊྛསུ ཨཉྙཏརཾ ཝིཉྙཱཔེཏྭཱ བྷུཉྫནྟིཡཱཔི དུཀྐཊནྟི ཡོཛནཱ.

ཨིཏི ཝིནཡཏྠསཱརསནྡཱིཔནིཡཱ ཝིནཡཝིནིཙྪཡཝཎྞནཱཡ

པཱཊིདེསནཱིཡཀཐཱཝཎྞནཱ ནིཊྛིཏཱ.

སིཀྑཱཀརཎཱིཡཀཐཱཝཎྞནཱ

༢༤༣༨. པཱཊིདེསནཱིཡཱནནྟརཾ ཨུདྡིཊྛཱནི པཉྩསཏྟཏི སེཁིཡཱནི མཧཱཝིབྷངྒེ ཝུཏྟཝིནིཙྪཡཱནེཝཱཏི ཏདེཝ ཨཏིདིསནྟོ ཨཱཧ ‘‘སེཁིཡཱ པན ཡེ དྷམྨཱ’’ཏིཨཱདི. ཡེ པན པཉྩསཏྟཏི ¶ སེཁིཡཱ དྷམྨཱ པཱཊིདེསནཱིཡཱནནྟརཾ ཨུདྡིཊྛཱ, ཏེསཾ ཨཏྠཝིནིཙྪཡོ མཧཱཝིབྷངྒེ ཝུཏྟོཝཱཏི ཡོཛནཱ, ཨཏྠིཀེཧི ཏཏོཝ གཧེཏབྦོ, ན པུན ཨིདྷ དསྶེསྶཱམཱིཏི ཨདྷིཔྤཱཡོ.

ཨིཏི ཝིནཡཏྠསཱརསནྡཱིཔནིཡཱ ཝིནཡཝིནིཙྪཡཝཎྞནཱཡ

སིཀྑཱཀརཎཱིཡཀཐཱཝཎྞནཱ ནིཊྛིཏཱ.

༢༤༣༩-༤༠. སཝིབྷངྒཱནཾ ཨུབྷཏོཝིབྷངྒསཧིཏཱནཾ ཨུབྷཏོཔཱཏིམོཀྑཱནཾ བྷིཀྑཱུནཾ, བྷིཀྑུནཱིནཉྩ པཱཏིམོཀྑཱནཾ ཨཊྛཀཐཱསཱརོ སབྦཊྛཀཐཱནཾ སཱརབྷཱུཏོ ཡོ སོ ཨཏྠོ ཝིསེསཏོ སམནྟཔཱསཱདིཀཱཡཾ ཝུཏྟོ. ཏཾ སབྦཾ སཱརབྷཱུཏཾ ཨཏྠཾ སམཱདཱཡ ཡོ ཝིནཡསྶཝིནིཙྪཡོ བྷིཀྑཱུནཾ, བྷིཀྑུནཱིནཉྩ ཧིཏཏྠཱཡ མཡཱ ཀཏོ ཝིརཙིཏོཏི སམྦནྡྷོ.

༢༤༤༡. ནོ ཨམྷཱཀཾ པཊིབྷཱཎཛཾ པཊིབྷཱཎཏོ ཛཱཏཾ ཨིམཾ ཏུ ཨིམཾ ཝིནཡཝིནིཙྪཡཾ པན ཡེ ཛནྟུནོ སཏྟཱ སུཎནྟི ¶ , ཏེ ཛནྟུནོ ཛནསྶ སཏྟལོཀསྶ ཧིཏེ ཨདྷིསཱིལསིཀྑཱཔཀཱསཀཏྟཱ ཨུཔཀཱརཀེ སུམཏསྶ སོབྷཎནྟི བུདྡྷཱདཱིཧི མཏསྶ, སོབྷཎེཧི ཝཱ བུདྡྷཱདཱིཧི མཏསྶ པཊིཝིདྡྷསྶ ཨམཏམཧཱནིབྦཱནསྶ ཨཡནེ ཨཉྫསབྷཱུཏེ ཛནསྶ ཏཱཡནེ ཀཱཡིཀཝཱཙསིཀཝཱིཏིཀྐམཔཊིཔཀྑཏྟཱ ཨཔཱཡབྷཡནིཝཱརཎཊྛེན ཏཱཎབྷཱུཏེ ཝིནཡེ ཝིནཡཔིཊཀེ པཀཏཉྙུནོ ཡཐཱསབྷཱཝཾ ཛཱནནྟཱ ཏཉྙུནོ བྷཝནྟི ཏཾ ཏཾ ཀཔྤིཡཱཀཔྤིཡཾ སེཝིཏབྦཱསེཝིཏབྦཾ ཛཱནནྟཱ བྷཝནྟེཝཱཏི ཨཏྠོ.

༢༤༤༢. བཧཝོ སཱརབྷཱུཏཱ ནཡཱ ཨེཏྠཱཏི བཧུསཱརནཡོ, ཏསྨིཾ བཧུསཱརནཡེ. པརམེ ཨུཏྟམེ ཝིནཡེ ཝིནཡཔིཊཀེ ཝིསཱརདཏཾ ཝེསཱརཛྫཾ ཨསཾཧཱིརཉཱཎཾ ཨབྷིཔཏྠཡཏཱ ཝིསེསཏོ ཨིཙྪནྟེན བུདྡྷིམཏཱ ཉཱཎཱཏིསཡམནྟེན ཡཏིནཱ སབྦཀཱལཾ ཏིཝིདྷསིཀྑཱཔརིཔཱུརཎེ ཨསིཐིལཔཝཏྟསམྨཱཝཱཡཱམེན བྷིཀྑུནཱ ཨིམསྨིཾ ཝིནཡཝིནིཙྪཡེ པརམཱ ཨུཏྟརིཏརཱ མཧཏཱི ཨཱདརཏཱ ཀརཎཱིཡཏམཱ ཝིསེསེན ཀཱཏབྦཱཡེཝཱཏི ཨཏྠོ.

༢༤༤༣. ཨིཙྩེཝཾ སཱིལཝིསུདྡྷིསཱདྷནེ ཝིནཡཔིཊཀེ ཝེསཱརཛྫཧེཏུཏཱཡ ཨིམསྶ ཝིནཡཝིནིཙྪཡསྶ སཱིལཝིསུདྡྷིཨཱདིསཏྟཝིསུདྡྷིཔརམྤརཱཡ ཨདྷིགནྟབྦསྶ ཨམཏམཧཱནིབྦཱནསྶ པཏྟིཡཱཔི མཱུལབྷཱུཏཏཾ དསྶེཏུམཱཧ ‘‘ཨཝགཙྪཏཱི’’ཏིཨཱདི.

ཡོ ¶ པན བྷིཀྑུ ཨཏྠཡུཏྟཾ མཧཏཱ པཡོཛནཏྠེན, ཨབྷིདྷེཡྻཏྠེན ཙ སམནྣཱགཏཾ ཨིམཾ ཝིནཡསྶཝིནིཙྪཡཾ ཨཝགཙྪཏི ཨཝེཙྩ ཡཱཐཱཝཏོ ཛཱནཱཏི, སོ ཨཔརམྤརཾ མརཎཱབྷཱཝཱ ཨམརཾ ཛརཱཡཱབྷཱཝཱ ཨཛརཾ རཱགཱདིཀིལེསརཛཔཊིཔཀྑཏྟཱ ཨརཛཾ ཨནེཀཔྤཀཱརརོགཱནཾ ཨཔྤཝཏྟིཧེཏུཏྟཱ ཨརུཛཾ སནྟིཔདཾ སབྦཀིལེསདརཐཔརིལཱ༹ཧཱནཾ ཝཱུཔསམཧེཏུཏྟཱ ¶ སནྟིསངྑཱཏཾ ནིབྦཱནཔདཾ ཨདྷིགཙྪཏི སཱིལཝིསུདྡྷིཨཱདིསཏྟཝིསུདྡྷིཔརམྤརཱཡ གནྟྭཱ པཊིཝིཛ྄ཛྷཏཱིཏི ཡོཛནཱ.

ཨིཏི ཝིནཡཏྠསཱརསནྡཱིཔནིཡཱ ཝིནཡཝིནིཙྪཡཝཎྞནཱཡ

བྷིཀྑུནིཝིབྷངྒཀཐཱཝཎྞནཱ ནིཊྛིཏཱ.

ཁནྡྷཀཀཐཱ

མཧཱཝགྒོ

མཧཱཁནྡྷཀཀཐཱ

པབྦཛྫཱཀཐཱཝཎྞནཱ

༢༤༤༤. ཨིཙྩེཝཾ ¶ ¶ ནཱཏིསངྑེཔཝིཏྠཱརཝསེན ཝིབྷངྒདྭཡེ, ཏདཊྛཀཐཱཡ ཙ ཨཱགཏཾ ཝིནིཙྪཡཾ དསྶེཏྭཱ ཨིདཱནི ཁནྡྷཀཱགཏཾ ཝིནིཙྪཡཾ དསྶེཏུམཱརབྷནྟོ ཨཱཧ ‘‘སཱིལཀྑནྡྷཱདཱི’’ཏིཨཱདི. ཏཏྠ སཱིལཀྑནྡྷཱདིཡུཏྟེནཱཏི སཱིལསམཱདྷིཔཉྙཱཝིམུཏྟིཝིམུཏྟིཉཱཎདསྶནསངྑཱཏེཧི པཉྩཧི ཁནྡྷེཧི གུཎརཱསཱིཧི ཡུཏྟེན སམནྣཱགཏེན. སུབྷཀྑནྡྷེནཱཏི སུཝཎྞཱལིངྒསདིསཝཊྚཀྑནྡྷཏཱཡ སུབྷོ སུནྡརོ ཁནྡྷོ ཨེཏསྶཱཏི སུབྷཀྑནྡྷོ, བྷགཝཱ, ཏེན. ཨིམིནཱ བཱཏྟིཾསལཀྑཎཱནམེཀདེསབྷཱུཏསྶ སམཝཊྚཀྑནྡྷཏཱལཀྑཎསྶ པརིདཱིཔཀེན ཝཙནེན ལཀྑཎཱཧཱརནཡེན བཱཏྟིཾསལཀྑཎཱདིཀཱ སབྦཱཔི རཱུཔཀཱཡསིརཱི སནྡསྶིཏཱཏི ཝེདིཏབྦཱ.

ཁནྡྷཀེཏི ཁནྡྷཱནཾ སམཱུཧོ ཁནྡྷཀོ, ཁནྡྷཱནཾ ཝཱ ཀཱཡནཏོ དཱིཔནཏོ ཁནྡྷཀོ. ‘‘ཁནྡྷཱ’’ཏི ཙེཏྠ པབྦཛྫཱུཔསམྤདཱདིཝིནཡཀམྨསངྑཱཏཱ, ཙཱརིཏྟཝཱརིཏྟསིཀྑཱཔདསངྑཱཏཱ ཙ པཉྙཏྟིཡོ ཨདྷིཔྤེཏཱ. པབྦཛྫཱདཱིནི ཧི བྷགཝཏཱ པཉྙཏྟཏྟཱ ‘‘པཉྙཏྟིཡོ’’ཏི ཝུཙྩནྟི. པཉྙཏྟིཡཉྩ ཁནྡྷ-སདྡོ དིསྶཏི ‘‘དཱརུཀྑནྡྷོ (སཾ. ནི. ༤.༢༤༡) ཨགྒིཀྑནྡྷོ (པཊི. མ. ༡.༡༡༦) ཨུདཀཀྑནྡྷོ’’ཏིཨཱདཱིསུ (ཨ. ནི. ༦.༣༧) ཝིཡ. ཨཔིཙ བྷཱགརཱསཏྠཏཱ ¶ ཙེཏྠ ཡུཛྫཏིཡེཝ ཏཱསཾ པཉྙཏྟཱིནཾ བྷཱགསོ, རཱསིཏོ ཙ ཝིབྷཏྟཏྟཱ. ཏསྨིཾ ཁནྡྷཀེ. པི-སདྡོ ཝུཏྟཱཔེཀྑཱཡ པཉྩསཏིཀསཏྟསཏིཀཀྑནྡྷཀེ དྭེ ཝཛྫེཏྭཱ ¶ པབྦཛྫཀྑནྡྷཀཱདིཀེ བྷིཀྑུནིཁནྡྷཀཔརིཡོསཱནེ ཝཱིསཏིཝིདྷེ ཁནྡྷཀེ ཝུཏྟཝིནིཙྪཡསྶ ཨིདྷ ཝཀྑམཱནཏྟཱ. ཏདེཝ སནྡྷཱཡཱཧ ‘‘ཁནྡྷཀེཔི པཝཀྑཱམི, སམཱསེན ཝིནིཙྪཡ’’ནྟི.

༢༤༤༥. ‘‘མཱཏརཱ པིཏརཱ’’ཏི ཨིམིནཱ ཛནཀཱཡེཝ ཨདྷིཔྤེཏཱ. ‘‘བྷཎྜུཀམྨཾ, སམཎཀརཎཾ, པབྦཱཛནནྟི ཙ པརིཡཱཡ-སདྡཱ’’ཏི ‘‘ཨནུཛཱནཱམི, བྷིཀྑཝེ, སངྒྷཾ ཨཔལོཀེཏུཾ བྷཎྜུཀམྨཱཡཱ’’ཏི (མཧཱཝ. ༩༨) ཨིམིསྶཱ པཱལི༹ཡཱ ཨཊྛཀཐཱཡ (མཧཱཝ. ཨཊྛ. ༩༨) ཝུཏྟཾ. ཨཱཔུཙྪིཏྭཱཏི ཨེཏྠ ‘‘སངྒྷ’’ནྟི སེསོ.

༢༤༤༦. ཝཱཝཊོཏི པསུཏོ, ཡུཏྟཔཡུཏྟོཏི ཨཏྠོ. ‘‘པབྦཱཛེཏྭཱ ཨཱནཡ ཨིཏི ཙཱ’’ཏི པདཙྪེདོ. ཨེཏྠ ཙ ཏིདྷཱ པབྦཱཛནཾ ཝེདིཏབྦཾ ཀེསཙྪེདནཾ, ཀཱསཱཡཨཙྪཱདནཾ, སརཎདཱནནྟི, ཨིམཱནི ཏཱིཎི ཀརོནྟོ ‘‘པབྦཱཛེཏཱི’’ཏི ཝུཙྩཏི. ཏེསུ ཨེཀཾ, དྭེ ཝཱཔི ཀརོནྟོ ཏཐཱ ཝོཧརཱིཡཏིཡེཝ. ཏསྨཱ ‘‘པབྦཱཛེཏྭཱནཡཱ’’ཏི ཨིམིནཱ ཀེསེ ཚིནྡིཏྭཱ ཀཱསཱཡཱནི ཨཙྪཱདེཏྭཱ ཨཱནེཧཱིཏི ཨཡམཏྠོ དཱིཔིཏོཏི དཊྛབྦོ.

༢༤༤༧. ཨཝུཏྟོཏི ཨུཔཛ྄ཛྷཱཡེན ཨནུཡྻོཛིཏོ. སོ དཧརོ སཙེ ཏཾ སཡམེཝ ཀེསཙྪེདནཀཱསཱཡཙྪཱདནེཧི པབྦཱཛེཏི, ཝཊྚཏཱིཏི ཡོཛནཱ.

༢༤༤༨. ཏཏྠཱཏི ཨཏྟནོ སམཱིཔེ. ཁཎྜསཱིམཾ ནེཏྭཱཏི བྷཎྜུཀམྨཱརོཙནཔརིཧཱརཏྠཾ ཝུཏྟཾ. ཏེན སབྷིཀྑུཀེ ཝིཧཱརེ ཨཉྙམྤི བྷིཀྑུཾ ‘‘ཨེཏསྶ ཀེསེ ཚིནྡཱ’’ཏི ཝཏྟུཾ ན ཝཊྚཏི. པབྦཱཛེཏྭཱཏི ཀེསཙྪེདནཾ སནྡྷཱཡ ཝདཏི.

༢༤༥༠. ‘‘པུརིསཾ ¶ བྷིཀྑུཏོ ཨཉྙོ, པབྦཱཛེཏི ན ཝཊྚཏཱི’’ཏི ཨིདཾ སརཎདཱནཾ སནྡྷཱཡ ཝུཏྟཾ. ཏེནེཝཱཧ ‘‘སཱམཎེརོ’’ཏིཨཱདི.

༢༤༥༡. ཨུབྷིནྣམྤི ཐེརཐེརཱིནཾ ‘‘ཨིམེཧི ཙཱིཝརེཧི ཨིམཾ ཨཙྪཱདེཧཱི’’ཏི ཨཱཎཏྟིཡཱ སཱམཎེརོཔི ¶ ཝཱ ཧོཏུ, ཏཐཱ སཱམཎེརཱི ཝཱ ཧོཏུ, ཏེ ཨུབྷོ སཱམཎེརསཱམཎེརཱི ཀཱསཱཡཱནི དཱཏུཾ ལབྷནྟཱིཏི ཡོཛནཱ.

༢༤༥༢-༤. པབྦཱཛེནྟེན བྷིཀྑུནཱཏི ཨེཏྠ ‘‘ཏཙཔཉྩཀཀམྨཊྛཱནཾ དཏྭཱ’’ཏི ཝཏྟབྦཾ ཨེཝཉྷི ཀཏྭཱ ཀེསཱཔནཡནསྶ ཨཊྛཀཐཱཡཾ ཝུཏྟཏྟཱ. ཝུཏྟཉྷི ཏཏྠ ‘‘ཨཱཝུསོ, སུཊྛུ ཨུཔདྷཱརེཧི, སཏིཾ ཨུཔཊྛཱཔེཧཱིཏི ཝཏྭཱ ཏཙཔཉྩཀཀམྨཊྛཱནཾ ཨཱཙིཀྑིཏབྦཾ. ཨཱཙིཀྑནྟེན ཙ ཝཎྞསཎྛཱནགནྡྷཱསཡོཀཱསཝསེན ཨསུཙིཛེགུཙྪཔཊིཀྐཱུལབྷཱཝཾ, ནིཛྫཱིཝནིསྶཏྟབྷཱཝཾ ཝཱ པཱཀཊཾ ཀརོནྟེན ཨཱཙིཀྑིཏབྦ’’ནྟིཨཱདི. ཀིམཏྠམེཝཾ ཀརཱིཡཏཱིཏི ཙེ? སཙེ ཨུཔནིསྶཡསམྤནྣོ ཧོཏི, ཏསྶ ཁུརགྒེཡེཝ ཨརཧཏྟཔཱཔུཎནཏྠཾ. ཝུཏྟཉྩེཏཾ ཨཊྛཀཐཱཡཾ –

‘‘ཡེ ཧི ཀེཙི ཁུརགྒེ ཨརཧཏྟཾ པཏྟཱ, སབྦེ ཏེ ཨེཝརཱུཔཾ སཝནཾ ལབྷིཏྭཱ ཀལྱཱཎམིཏྟེན ཨཱཙརིཡེན དིནྣནཡཾ ནིསྶཱཡ, ནོ ཨནིསྶཱཡ, ཏསྨཱསྶ ཨཱདིཏོཝ ཨེཝརཱུཔཱི ཀཐཱ ཀཐེཏབྦཱ’’ཏི (མཧཱཝ. ཨཊྛ. ༣༤).

ཨེཏེནེཝ བྱཏིརེཀཏོ ཨིཏོ ཨཉྙཱ ཨནིཡྻཱནིཀཀཐཱ ན ཀཐེཏབྦཱཏི དཱིཔིཏཾ ཧོཏི. གོམཡཱདིནཱཏི གོམཡཙུཎྞཱདིནཱ. ཨཱདི-སདྡེན མཏྟིཀཱདཱིནཾ གཧཎཾ. པཱིལ༹ཀཱ ཝཱཏི ཐུལླཔཱིལ༹ཀཱ ཝཱ. ཀཙྪུ ཝཱཏི སུཁུམཀཙྪུ ཝཱ. ནིཡཾཔུཏྟནྟི ¶ ཨཏྟནོ པུཏྟཾ. ‘‘བྷིཀྑུནཱ’’ཏི ཨིམསྶ པདསྶ དཱུརཏྟཱ ‘‘ཡཏིནཱ’’ཏི ཨཱཧ.

༢༤༥༥-༦. ཀསྨཱ པན ཨེཝཾ ནཧཱཔེཏབྦོཏི ཨཱཧ ‘‘ཨེཏྟཀེནཱཔཱི’’ཏིཨཱདི. སོཏི པབྦཛྫཱཔེཀྑོ. ཨུཔཛ྄ཛྷཱཡཀཱདིསཱུཏི ཨེཏྠ ཨཱདི-སདྡེན ཨཱཙརིཡསམཱནུཔཛ྄ཛྷཱཡཀཱདཱིནཾ གཧཎཾ. པཱཔུཎནྟི ཧཱིཏི ཨེཏྠ ཧི-སདྡོ ཡསྨཱ-པདཏྠེ ཝཏྟཏི. ཡསྨཱ ཨེཏྟཀེནཱཔི ཨུཔཛ྄ཛྷཱཡཱདཱིསུ སགཱརཝོ ཧོཏི, ཡསྨཱ ཙ ཨེཝརཱུཔཾ ཨུཔཀཱརཾ ལབྷིཏྭཱ ཀུལཔུཏྟཱ ཨུཔྤནྣཾ ཨནབྷིརཏིཾ པཊིཝིནོདེཏྭཱ སིཀྑཱཡོ པརིཔཱུརེཏྭཱ ནིབྦཱནཾ པཱཔུཎིསྶནྟི, ཏསྨཱ ཨེཝརཱུཔོ ཨུཔཀཱརོ ཀཱཏབྦོཏི ཨཏྠོ.

༢༤༥༨. ཨེཀཏོཏི སབྦཱནི ཙཱིཝརཱནི ཨེཀཏོ ཀཏྭཱ.

༢༤༥༩. ཨཐཱཏི ¶ ཨདྷིཀཱརནྟརཱརམྦྷེ ནིཔཱཏོ. ཏསྶ ཧཏྠེ ཨདཏྭཱཔི ཨུཔཛ྄ཛྷཱཡོ ཝཱ ཨཱཙརིཡོ ཝཱཔི སཡམེཝ ཏཾ པབྦཛྫཱཔེཀྑཾ ཨཙྪཱདེཏི, ཝཊྚཏཱིཏི ཡོཛནཱ.

༢༤༦༠. ཨདིནྣཙཱིཝརསྶ ཨགྒཧེཏབྦཏྟཱ ཨཱཧ ‘‘ཨཔནེཏྭཱ ཏཏོ སབྦཾ, པུན དཱཏབྦམེཝ ཏ’’ནྟི. ཏཏོཏི ཏསྶ སརཱིརཏོ. ཏནྟི ཙཱིཝརཾ.

༢༤༦༡-༢. ཨེཏདེཝ ཨཱཧ ‘‘བྷིཀྑུནཱ’’ཏིཨཱདིནཱ. ཨདིནྣཾ ན ཝཊྚཏཱིཏི ཨེཏྠ པབྦཛྫཱ ན རུཧཏཱིཏི ཝདནྟི. ཏསྶེཝ སནྟཀཾ ཝཱཔི ཙཱིཝརཾ ཨདིནྣཾ ན ཝཊྚཏི ཨཏྟསནྟཀེ ཨཱཙརིཡུཔཛ྄ཛྷཱཡཱནཾ ཨཏྟནོ སནྟཀེ ཙཱིཝརེ ཀཱ ཀཐཱ ཝཏྟབྦམེཝ ནཏྠཱིཏི ཨཏྠོ. བྷིཀྑཱུཏི ཡེ ཏཏྠ སནྣིཔཏིཏཱ. ཀཱརཱཔེཏྭཱན ཨུཀྐུཊིནྟི ཨེཏྠ སབྦདྷཱཏྭཏྠཱནུགཏོ ཀརོཏི-སདྡོ གཧིཏོཏི ཨུཀྐུཊིཀཾ ནིསཱིདཱཔེཏྭཱཏི ཨཏྠོ གཧེཏབྦོ, ‘‘ཨུཀྐུཊིཀ’’ནྟི (མཧཱཝ. ཨཊྛ. ༣༤) ཨཊྛཀཐཱཔཱཋོ གཱཐཱབནྡྷསུཁཏྠཾ ཨིདྷ ཀ-ཀཱརལོཔེན ནིདྡིཊྛོ.

༢༤༦༤. ཨེཀཔདཾ ¶ ཝཱཔཱིཏི བུདྡྷམིཙྩཱདིཀཾ ཨེཀམྤི ཝཱ པདཾ. ཨེཀཀྑརམྤི ཝཱཏི བུཀཱརཱདིཨཀྑརེསུ ཨེཀམྤི ཝཱ ཨཀྑརཾ. པཊིཔཱཊིནྟི ‘‘བུདྡྷ’’མིཙྩཱདིཀཾ པདཔནྟིཾ.

༢༤༦༥. ཨཀཏྟབྦཔྤཀཱརནྟརཾ དསྶེཏུམཱཧ ‘‘ཏིཀྑཏྟུཾ ཡདི ཝཱ’’ཏིཨཱདི. ཏཐཱ སེསེསཱུཏི ཡདི ཝཱ ‘‘དྷམྨཾ སརཎ’’ནྟི ཏིཀྑཏྟུཾ དེཏི, ‘‘སངྒྷཾ སརཎ’’ནྟི ཡདི ཝཱ ཏིཀྑཏྟུཾ དེཏི, ཨེཝམྤི ཏཱིཎི སརཎཱནི ཨདིནྣཱནེཝ ཧོནྟི.

༢༤༦༦. ཨནུནཱསིཀནྟཱནི ཀཏྭཱ དཱཏབྦཱནཱིཏི སམྦནྡྷོ. ཨནུནཱསིཀནྟཾ ཀཏྭཱ དཱནཀཱལེ ཨནྟརཱཝིཙྪེདཾ ཨཀཏྭཱ དཱཏབྦཱནཱིཏི དསྶེཏུཾ ‘‘ཨེཀཱབདྡྷཱནི ཝཱ པནཱ’’ཏི ཝུཏྟཾ. ཝིཙྪིནྡིཏྭཱ པདཔཊིཔཱཊིཏོ མ-ཀཱརནྟཾ ཀཏྭཱ དཱནསམཡེ ཝིཙྪེདཾ ཀཏྭཱ. མནྟཱནཱིཏི ‘‘བུདྡྷཾ སརཎཾ ཨིཙྩཱདིནཱ མ-ཀཱརནྟཱནི. ‘‘བུདྡྷཾ སརཎཾ གཙྪཱམཱི’’ཏིཨཱདིནཱ ནཡེན ནིགྒཧིཏནྟམེཝ ཀཏྭཱ ན དཱཏབྦནྟི ‘‘ཨཐཱ’’ཏི ཨཱཧ.

༢༤༦༧. སུདྡྷི ནཱམ ཨཱཙརིཡསྶ ཉཏྟིཡཱ, ཀམྨཝཱཙཱཡ ཙ ཨུཙྩཱརཎཝིསུདྡྷི. པབྦཛྫཱཏི སཱམཎེརསཱམཎེརིཔབྦཛྫཱ. ཨུབྷཏོསུདྡྷིཡཱ ཝིནཱཏི ཨུབྷཏོསུདྡྷིཾ ཝིནཱ ཨཱཙརིཡནྟེཝཱསཱིནཾ ¶ ཨུབྷིནྣཾ ཏཱིསུ སརཎཏྟཡདཱནགྒཧཎེསུ ཨུཙྩཱརཎསུདྡྷིཾ ཝིནཱ, ཨེཀསྶཱཔི ཨཀྑརསྶ ཝིཔཏྟིསབྦྷཱཝེ ན ཧོཏཱིཏི ཨཏྠོ.

༢༤༦༨-༩. ‘‘པབྦཛྫཱགུཎམིཙྪཏཱ’’ཏི ཨིདཾ ‘‘ཨཱཙརིཡེན, ཨནྟེཝཱསིཀེནཱ’’ཏི པདདྭཡསྶ ཝིསེསནཾ དཊྛབྦཾ, ཨནྟེཝཱསིཀསྶ པབྦཛྫཱགུཎཾ ཨིཙྪནྟེན ཨཱཙརིཡེན, ཨཏྟནོ པབྦཛྫཱགུཎཾ ཨིཙྪནྟེན ཨནྟེཝཱསིཀེན ཙ བུ-དྡྷ-ཀཱརཱདཡོ ཝཎྞཱ བུ-ཀཱར དྷ-ཀཱརཱདཡོ ཝཎྞཱ ཨཀྑརཱ ཋཱནཀརཎསམྤདཾ ཀཎྛཏཱལུམུདྡྷདནྟཨོཊྛནཱསིཀཱབྷེདཾ ཋཱནསམྤདཉྩ ¶ ཨཀྑརུཔྤཏྟིསཱདྷཀཏམཛིཝ྄ཧཱམཛ྄ཛྷཱདིཀརཎསམྤདཉྩ ཨཧཱཔེནྟེན ཨཔརིཧཱཔེནྟེན ཝཏྟབྦཱཏི ཡོཛནཱ. ཀསྨཱ ཨིདམེཝ དལ༹ྷཾ ཀཏྭཱ ཝུཏྟནྟི ཨཱཧ ‘‘ཨེཀཝཎྞཝིནཱསེནཱ’’ཏིཨཱདི. ཧི-སདྡོ ཡསྨཱ-པདཏྠེ, ཡསྨཱ ཨེཀསྶཱཔི ཝཎྞསྶ ཝིནཱསེན ཨནུཙྩཱརཎེན ཝཱ དུརུཙྩཱརཎེན ཝཱ པབྦཛྫཱ ན རུཧཏི, ཏསྨཱ ཨེཝཾ ཝུཏྟནྟི ཨདྷིཔྤཱཡོ.

༢༤༧༠. ཡདི སིདྡྷཱཏི སཱསངྐཝཙནེན ཨུབྷཏོཨུཙྩཱརཎསུདྡྷིཡཱ དུཀྐརཏྟཾ དཱིཔེཏྭཱ ‘‘ཨཔྤམཏྟེཧི བྷཝིཏབྦ’’ནྟི ཨུབྷིནྣཾ ཨཱཙརིཡནྟེཝཱསིཀཱནཾ ཨནུསིཊྛི དིནྣཱ ཧོཏི. སརཎགམནཏོཝཱཏི ཨཝདྷཱརཎེན སཱམཎེརཔབྦཛྫཱ ཨུཔསམྤདཱ ཝིཡ ཉཏྟིཙཏུཏྠེན ཀམྨེན ན ཧོཏི, ཨིདཱནིཔི སརཎགམནེནེཝ སིཛ྄ཛྷཏཱིཏི དཱིཔེཏི. ཧི-སདྡོ པསིདྡྷིཡཾ. ཡཐཱཧ –

‘‘ཡསྨཱ སརཎགམནེན ཨུཔསམྤདཱ པརཏོ པཊིཀྑིཏྟཱ, ཏསྨཱ སཱ ཨེཏརཧི སརཎགམནམཏྟེནེཝ ན རུཧཏི. སཱམཎེརསྶ པབྦཛྫཱ པན ཡསྨཱ པརཏོཔི ‘ཨནུཛཱནཱམི, བྷིཀྑཝེ, ཨིམེཧི ཏཱིཧི སརཎགམནེཧི སཱམཎེརཔབྦཛྫ’ནྟི (མཧཱཝ. ༡༠༥) ཨནུཉྙཱཏཱ ཨེཝ, ཏསྨཱ སཱ ཨེཏརཧིཔི སརཎགམནམཏྟེནེཝ རུཧཏཱི’’ཏི (མཧཱཝ. ཨཊྛ. ༣༤).

སརཎགམནཏོ ཨེཝ པབྦཛྫཱ ཡདིཔི ཀིཉྩཱཔི སིདྡྷཱ ནིཔྥནྣཱ, ཏཐཱཔི ཨསྶ སཱམཎེརསྶ ‘‘ཨིདཉྩིདཉྩ མཡཱ པཱུརེཏབྦཾ སཱིལ’’ནྟི ཉཏྭཱ པརིཔཱུརཎཏྠཱཡ བྷིཀྑུནཱ དས སཱིལཱནི དཱཏབྦཱནཱིཏི ཡོཛནཱ. ཡཐཱཧ ‘‘ཨནུཛཱནཱམི, བྷིཀྑཝེ, སཱམཎེརཱནཾ དས སིཀྑཱཔདཱནི, ཏེསུ ཙ སཱམཎེརེཧི སིཀྑིཏུཾ. པཱཎཱཏིཔཱཏཱ ཝེརམཎཱི’’ཏིཨཱདི (མཧཱཝ. ༡༠༦).

པབྦཛྫཱཀཐཱཝཎྞནཱ.

༢༤༧༡. ཨུཔཛ྄ཛྷཱཡནྟི ¶ ¶ ཝཛྫཱཝཛྫེ ཨུཔནིཛ྄ཛྷཱཡཏཱིཏི ཨུཔཛ྄ཛྷཱཡོ, ཏཾ, བྷགཝཏཱ ཝུཏྟེཧི ཨངྒེཧི སམནྣཱགཏོ པརིཔུཎྞདསཝསྶོ པུགྒལོ. ནིཝཱསེཏྭཱ ཙ པཱརུཔིཏྭཱ ཙ སིརསི ཨཉྫལིཾ པགྒཧེཏྭཱ ཨཏྟནོ ཨབྷིམུཁེ ཨུཀྐུཊིཀཾ ནིསཱིདིཏྭཱ ‘‘ཨུཔཛ྄ཛྷཱཡོ མེ, བྷནྟེ, ཧོཧཱི’’ཏི ཏིཀྑཏྟུཾ ཝཏྭཱ ཨཱཡཱཙནཱཡ ཀཏཱཡ ‘‘སཱཧུ, ལཧུ, ཨོཔཱཡིཀཾ, པཊིརཱུཔཾ, པཱསཱདིཀེན སམྤཱདེཧཱི’’ཏི ཨིམེསུ པཉྩསུ པདེསུ ཨཉྙཏརཾ ཀཱཡེན ཝཱ ཝཱཙཱཡ ཝཱ ཨུབྷཡེན ཝཱ ཝིཉྙཱཔེཏྭཱ ཏསྨིཾ སམྤཊིཙྪིཏེ པིཏུཊྛཱནེ ཋཏྭཱ ཨཏྲཛམིཝ ཏཾ གཧེཏྭཱ ཝཛྫཱཝཛྫཾ ཨུཔཔརིཀྑིཏྭཱ དོསེན ནིགྒཎྷིཏྭཱ སདྡྷིཝིཧཱརིཀེ སིཀྑཱཔེནྟོ ཨུཔཛ྄ཛྷཱཡོ ནཱམ.

ཝིཛྫཱསིཔྤཾ, ཨཱཙཱརསམཱཙཱརཾ ཝཱ སིཀྑིཏུཀཱམེཧི ཨཱདརེན ཙརིཏབྦོ ཨུཔཊྛཱཏབྦོཏི ཨཱཙརིཡོ, ཏཾ, ཨུཔཛ྄ཛྷཱཡེ ཝུཏྟལཀྑཎསམནྣཱགཏོཡེཝ པུགྒལོ. ཝུཏྟནཡེནེཝ ནིསཱིདིཏྭཱ ‘‘ཨཱཙརིཡོ མེ, བྷནྟེ, ཧོཧི, ཨཱཡསྨཏོ ནིསྶཱཡ ཝཙྪཱམཱི’’ཏི ཏིཀྑཏྟུཾ ཝཏྭཱ ཨཱཡཱཙནཱཡ ཀཏཱཡ ‘‘སཱཧཱུ’’ཏིཨཱདཱིསུ པཉྩསུ ཨཉྙཏརཾ ཝཏྭཱ ཏསྨིཾ སམྤཊིཙྪིཏེ པིཏུཊྛཱནེ ཋཏྭཱ པུཏྟཊྛཱནིཡཾ ཨནྟེཝཱསིཾ སིཀྑཱཔེནྟོ ཨཱཙརིཡོ ནཱམ.

ཨེཏྠ ཙ སཱཧཱུཏི སཱདྷུ. ལཧཱུཏི ཨགརུ, མམ ཏུཡ྄ཧཾ ཨུཔཛ྄ཛྷཱཡབྷཱཝེ བྷཱརིཡཾ ནཏྠཱིཏི ཨཏྠོ. ཨོཔཱཡིཀནྟི ཨུཔཱཡཔཊིསཾཡུཏྟཾ, ཏཾ ཨུཔཛ྄ཛྷཱཡགྒཧཎཾ ཨིམིནཱ ཨུཔཱཡེན ཏྭཾ མེ ཨིཏོ པཊྛཱཡ བྷཱརོ ཛཱཏོསཱིཏི ཝུཏྟཾ ཧོཏི. པཊིརཱུཔནྟི ཨནུརཱུཔཾ ཏེ ཨུཔཛ྄ཛྷཱཡགྒཧཎནྟི ཨཏྠོ. པཱསཱདིཀེནཱཏི པསཱདཱཝཧེན ཀཱཡཝཙཱིཔཡོགེན. སམྤཱདེཧཱིཏི ཏིཝིདྷཾ སིཀྑཾ ནིཔྥཱདེཧཱིཏི ཨཏྠོ. ཀཱཡེན ཝཱཏི ཧཏྠམུདྡཱདིཾ དསྶེནྟོ ཀཱཡེན ཝཱ. ནཱམཝིསེསཾ ཝིནཱ པཱུརེཏབྦཝཏྟཱནཾ སམཏཱཡ ཨུབྷོཔི ཨེཀཏོ ཝུཏྟཱ.

ཨེཏཱནི ¶ ཝཏྟཱནི ཨུཔཛ྄ཛྷཱཡསྶ སདྡྷིཝིཧཱརིཀེན, ཨཱཙརིཡསྶ ཨནྟེཝཱསིཀེནཱཔི ཨེཝམེཝ ཀཱཏབྦཱནེཝཱཏི. ཝསཏཱཏི ཝསནྟེན. པིཡསཱིལེནཱཏི པིཡཾ སཱིལམེཏསྶཱཏི པིཡསཱིལོ, ཏེན, སཱིལཾ པརིཔཱུརིཏུཀཱམེནཱཏི ཝུཏྟཾ ཧོཏི.

༢༤༧༢-༣. ཨཱསནཾ པཉྙཔེཏབྦནྟི ཨེཏྠ ‘‘ཀཱལསྶེཝ ཝུཊྛཱཡ ཨུཔཱཧནཱ ཨོམུཉྩིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ’’ཏི (མཧཱཝ. ༦༦) ཝུཏྟཱ པུབྦཀིརིཡཱ ཝཏྟབྦཱ. ཨཱསནཾ པཉྙཔེཏབྦནྟི ¶ དནྟཀཊྛཁཱདནཊྛཱནཾ སམྨཛྫིཏྭཱ ནིསཱིདནཏྠཱཡ ཨཱསནཾ པཉྙཔེཏབྦཾ. ཨིམིནཱ ཙ ཡཱགུཔཱནཊྛཱནཱདཱིསུཔི ཨཱསནཱནི པཉྙཔེཏབྦཱནེཝཱཏི དསྶིཏཾ ཧོཏི.

དནྟཀཊྛཾ དཱཏབྦནྟི མཧནྟཾ, མཛ྄ཛྷིམཾ, ཁུདྡཀནྟི ཏཱིཎི དནྟཀཊྛཱནི ཨུཔནེཏྭཱ ཏཏོ ཡཾ ཏཱིཎི དིཝསཱནི གཎྷཱཏི, ཙཏུཏྠདིཝསཏོ པཊྛཱཡ ཏཱདིསམེཝ དཱཏབྦཾ. སཙེ ཨནིཡམཾ ཀཏྭཱ ཡཾ ཝཱ ཏཾ ཝཱ གཎྷཱཏི, ཨཐ ཡཱདིསཾ ལབྷཏི, ཏཱདིསཾ དཱཏབྦཾ.

མུཁོདཀཾ དཱཏབྦནྟི མུཁདྷོཝནོདཀཾ མུཁོདཀནྟི མཛ྄ཛྷེཔདལོཔཱིསམཱསོ, ཏཾ དེནྟེན སཱིཏཉྩ ཨུཎྷཉྩ ཨུདཀཾ ཨུཔནེཏྭཱ ཏཏོ ཡཾ ཏཱིཎི དིཝསཱནི ཝལ༹ཉྫེཏི, ཙཏུཏྠདིཝསཏོ པཊྛཱཡ ཏཱདིསམེཝ མུཁདྷོཝནོདཀཾ དཱཏབྦཾ. སཙེ ཨནིཡམཾ ཀཏྭཱ ཡཾ ཝཱ ཏཾ ཝཱ གཎྷཱཏི, ཨཐ ཡཱདིསཾ ལབྷཏི, ཏཱདིསཾ དཱཏབྦཾ. སཙེ དུཝིདྷམྤི ཝལ༹ཉྫེཏི, དུཝིདྷམྤི ཨུཔནེཏབྦཾ. ‘‘མུཁོདཀཾ མུཁདྷོཝནཊྛཱནེ ཋཔེཏྭཱ ཨཝསེསཊྛཱནཱནི སམྨཛྫིཏབྦཱནི. སམྨཛྫནྟེན ཙ ཝཙྩཀུཊིཏོ པཊྛཱཡ སམྨཛྫིཏབྦཾ. ཐེརེ ཝཙྩཀུཊིཾ གཏེ པརིཝེཎཾ སམྨཛྫིཏབྦཾ, ཨེཝཾ པརིཝེཎཾ ཨསུཉྙཾ ཧོཏཱི’’ཏི ཨཊྛཀཐཱཡཾ (མཧཱཝ. ཨཊྛ. ༦༤ ཨཏྠཏོ སམཱནཾ) ཝུཏྟནཡེནེཝ སམྨཛྫིཏབྦཾ.

ཏཏོ ¶ ཨུཏྟརིཾ ཀཏྟབྦཾ དསྶེཏུམཱཧ ‘‘ཏསྶ ཀཱལེནཱ’’ཏིཨཱདི. ཏསྶཱཏི ཨུཔཛ྄ཛྷཱཡསྶ ཝཱ ཨཱཙརིཡསྶ ཝཱ. ཀཱལེནཱཏི ཡཱགུཔཱནཀཱལེ. ཨིདྷཱཔི ‘‘ཨཱསནཾ པཉྙཔེཏབྦ’’ནྟི སེསོ. ཡཐཱཧ ‘‘ཐེརེ ཝཙྩཀུཊིཏོ ཨནིཀྑནྟེཡེཝ ཨཱསནཾ པཉྙཔེཏབྦཾ. སརཱིརཀིཙྩཾ ཀཏྭཱ ཨཱགནྟྭཱ ཏསྨིཾ ནིསིནྣསྶ ‘སཙེ ཡཱགུ ཧོཏཱི’ཏིཨཱདིནཱ ནཡེན ཝུཏྟཾ ཝཏྟཾ ཀཱཏབྦ’’ནྟི (མཧཱཝ. ཨཊྛ. ༦༤).

ཡཱགུ ཏསྶུཔནེཏབྦཱཏི ཨེཏྠ ‘‘བྷཱཛནཾ དྷོཝིཏྭཱ’’ཏི སེསོ. ཡཐཱཧ – ‘‘བྷཱཛནཾ དྷོཝིཏྭཱ ཡཱགུ ཨུཔནཱམེཏབྦཱ’’ཏི (མཧཱཝ. ༦༦). སངྒྷཏོ ཝཱཏི སལཱཀཱདིཝསེན སངྒྷཏོ ལབྦྷམཱནཱ ཝཱ. ཀུལཏོཔི ཝཱཏི ཨུཔཱསཀཱདིཀུལཏོ ཝཱ.

‘‘པཏྟེ ཝཏྟཉྩ ཀཱཏབྦ’’ནྟི ཨིདཾ ‘‘ཡཱགུཾ པཱིཏསྶ ཨུདཀཾ དཏྭཱ བྷཱཛནཾ པཊིགྒཧེཏྭཱ ནཱིཙཾ ཀཏྭཱ སཱདྷུཀཾ ཨཔྤཊིགྷཾསནྟེན དྷོཝིཏྭཱ པཊིསཱམེཏབྦཾ, ཨུཔཛ྄ཛྷཱཡམྷི ཝུཊྛིཏེ ཨཱསནཾ ཨུདྡྷརིཏབྦཾ ¶ . སཙེ སོ དེསོ ཨུཀླཱཔོ ཧོཏི, སོ དེསོ སམྨཛྫིཏབྦོ’’ཏི (མཧཱཝ. ༦༦) ཨཱགཏཝཏྟཾ སནྡྷཱཡཱཧ. དིཝཱ བྷུཏྟཔཏྟེཔི ཀཱཏབྦཾ ཨེཏེནེཝ དསྶིཏཾ ཧོཏི.

ཝཏྟཾ ‘‘གཱམཔྤཝེསནེ’’ཏི ཨིདཾ ‘‘སཙེ ཨུཔཛ྄ཛྷཱཡོ གཱམཾ པཝིསིཏུཀཱམོ ཧོཏི, ནིཝཱསནཾ དཱཏབྦཾ, པཊིནིཝཱསནཾ པཊིགྒཧེཏབྦ’’ནྟིཨཱདིནཡཔྤཝཏྟཾ (མཧཱཝ. ༦༦) ཝཏྟཾ སནྡྷཱཡཱཧ. ‘‘ཀཱཏབྦ’’ནྟི ཨིདཾ སབྦཔདེཧི ཡོཛེཏབྦཾ.

༢༤༧༤. ཙཱིཝརེ ཡཱནི ཝཏྟཱནཱིཏི གཱམཾ པཝིསིཏུཀཱམསྶ ཙཱིཝརདཱནེ, པཊིནིཝཏྟསྶ ཙཱིཝརགྒཧཎསངྒྷརཎཔཊིསཱམནེསུ མཧེསིནཱ ཡཱནི ཝཏྟཱནི ཝུཏྟཱནི, ཏཱནི ཙ ཀཱཏབྦཱནི. སེནཱསནེ ཏཐཱཏི ‘‘ཡསྨིཾ ཝིཧཱརེ ཨུཔཛ྄ཛྷཱཡོ ཝིཧརཏཱི’’ཏིཨཱདིནཱ ¶ (མཧཱཝ. ༦༦) ཝུཏྟནཡེན ‘‘སེནཱསནེ ཀཏྟབྦ’’ནྟི དསྶིཏཾ སེནཱསནཝཏྟཉྩ.

པཱདཔཱིཋཀཐལིཀཱདཱིསུ ཏཐཱཏི ཡོཛནཱ. ཨུཔཛ྄ཛྷཱཡེ གཱམཏོ པཊིནིཝཏྟེ ཙ ཛནྟཱགྷརེ ཙ ‘‘པཱདོདཀཾ པཱདཔཱིཋཾ པཱདཀཐལིཀཾ ཨུཔནིཀྑིཔིཏབྦ’’ནྟི (མཧཱཝ. ༦༦) ཨེཝམཱགཏཾ ཝཏྟཉྩ ཀཱཏབྦཾ. ཨཱདི-སདྡེན ‘‘ཨུཔཛ྄ཛྷཱཡོ པཱནཱིཡེན པུཙྪིཏབྦོ’’ཏིཨཱདིཝཏྟཾ (མཧཱཝ. ༦༦) སངྒཎྷཱཏི.

༢༤༧༥. ཨེཝཾ སབྦཏྠ ཝཏྟེསུ པཱཊིཡེཀྐཾ དསྶིཡམཱནེསུ པཔཉྩོཏི ཁནྡྷཀཾ ཨོལོཀེཏྭཱ སུཁགྒཧཎཏྠཱཡ གཎནཾ དསྶེཏུཀཱམོ ཨཱཧ ‘‘ཨེཝམཱདཱིནཱི’’ཏིཨཱདི. རོགཏོ ཝུཊྛཱནཱགམནནྟཱནཱིཏི ཨཱཙརིཡུཔཛ྄ཛྷཱཡཱནཾ རོགཏོ ཝུཊྛཱནཱགམནཔརིཡོསཱནཱནི. སཏྟཏིཾསསཏཾ སིཡུནྟི སཏྟཏིཾསཱདྷིཀསཏཝཏྟཱནཱིཏི ཨཏྠོ.

ཏཱནི པན ཝཏྟཱནི ཁནྡྷཀཔཱལི༹ཡཱ (མཧཱཝ. ༦༦) ཨཱགཏཀྐམེན ཨེཝཾ ཡཐཱཝུཏྟགཎནཱཡ སམཱནེཏབྦཱནི – དནྟཀཊྛདཱནཾ, མུཁོདཀདཱནཾ, ཨཱསནཔཉྙཱཔནཾ, སཙེ ཡཱགུ ཧོཏི, བྷཱཛནཾ དྷོཝིཏྭཱ ཡཱགུཡཱ ཨུཔནཱམནཾ, ཡཱགུཾ པཱིཏསྶ ཨུདཀཾ དཏྭཱ བྷཱཛནཾ པཊིགྒཧེཏྭཱ ནཱིཙཾ ཀཏྭཱ སཱདྷུཀཾ ཨཔྤཊིགྷཾསནྟེན དྷོཝིཏྭཱ པཊིསཱམནཾ, ཨུཔཛ྄ཛྷཱཡམྷི ཝུཊྛིཏེ ཨཱསནསྶ ཨུདྡྷརཎཾ, སཙེ སོ དེསོ ཨུཀླཱཔོ ཧོཏི, ཏསྶ སམྨཛྫནཾ, སཙེ ཨུཔཛ྄ཛྷཱཡོ གཱམཾ པཝིསིཏུཀཱམོ ཧོཏི, ཏསྶ ནིཝཱསནདཱནཾ, པཊིནིཝཱསནཔཊིགྒཧཎཾ, ཀཱཡབནྡྷནདཱནཾ, སགུཎཾ ཀཏྭཱ ¶ སངྒྷཱཊིདཱནཾ, དྷོཝིཏྭཱ སོདཀཔཏྟསྶ དཱནཾ, སཙེ ཨུཔཛ྄ཛྷཱཡོ པཙྪཱསམཎཾ ཨཱཀངྑཏི, ཏིམཎྜལཾ པཊིཙྪཱདེནྟེན པརིམཎྜལཾ ནིཝཱསེཏྭཱ ཀཱཡབནྡྷནཾ བནྡྷིཏྭཱ སགུཎཾ ཀཏྭཱ སངྒྷཱཊིཡོ པཱརུཔིཏྭཱ ¶ གཎྛིཀཾ པརིམུཉྩིཏྭཱ དྷོཝིཏྭཱ པཏྟཾ གཧེཏྭཱ ཨུཔཛ྄ཛྷཱཡསྶ པཙྪཱསམཎེན གམནཾ, ནཱཏིདཱུརནཙྩཱསནྣེ གམནཾ, པཏྟཔརིཡཱཔནྣསྶ པཊིགྒཧཎཾ, ན ཨུཔཛ྄ཛྷཱཡསྶ བྷཎམཱནསྶ ཨནྟརནྟརཱ ཀཐཱཨོཔཱཏནཾ, ཨུཔཛ྄ཛྷཱཡསྶ ཨཱཔཏྟིསཱམནྟཱ བྷཎམཱནསྶ ཙ ནིཝཱརཎཾ, ནིཝཏྟནྟེན པཋམཏརཾ ཨཱགནྟྭཱ ཨཱསནཔཉྙཱཔནཾ, པཱདོདཀཔཱདཔཱིཋཔཱདཀཐལིཀཱནཾ ཨུཔནིཀྑིཔནཾ, པཙྩུགྒནྟྭཱ པཏྟཙཱིཝརཔཊིགྒཧཎཾ, པཊིནིཝཱསནདཱནཾ, ནིཝཱསནཔཊིགྒཧཎཾ, སཙེ ཙཱིཝརཾ སིནྣཾ ཧོཏི, མུཧུཏྟཾ ཨུཎྷེ ཨོཏཱཔནཾ, ནེཝ ཨུཎྷེ ཙཱིཝརསྶ ནིདཧནཾ, མཛ྄ཛྷེ ཡཐཱ བྷངྒོ ན ཧོཏི, ཨེཝཾ ཙཏུརངྒུལཾ ཀཎྞཾ ཨུསྶཱརེཏྭཱ ཙཱིཝརསྶ སངྒྷརཎཾ, ཨོབྷོགེ ཀཱཡབནྡྷནསྶ ཀརཎཾ, སཙེ པིཎྜཔཱཏོ ཧོཏི, ཨུཔཛ྄ཛྷཱཡོ ཙ བྷུཉྫིཏུཀཱམོ ཧོཏི, ཨུདཀཾ དཏྭཱ པིཎྜཔཱཏསྶ ཨུཔནཱམནཾ, ཨུཔཛ྄ཛྷཱཡསྶ པཱནཱིཡེན པུཙྪནཾ, བྷུཏྟཱཝིསྶ ཨུདཀཾ དཏྭཱ པཏྟཾ པཊིགྒཧེཏྭཱ ནཱིཙཾ ཀཏྭཱ སཱདྷུཀཾ ཨཔྤཊིགྷཾསནྟེན དྷོཝིཏྭཱ ཝོདཀཾ ཀཏྭཱ མུཧུཏྟཾ ཨུཎྷེ ཨོཏཱཔནཾ, ན ཙ ཨུཎྷེ པཏྟསྶ ནིདཧནཾ, པཏྟཙཱིཝརཾ ནིཀྑིཔིཏབྦཾ –

པཏྟཾ ནིཀྑིཔནྟེན ཨེཀེན ཧཏྠེན པཏྟཾ གཧེཏྭཱ ཨེཀེན ཧཏྠེན ཧེཊྛཱམཉྩཾ ཝཱ ཧེཊྛཱཔཱིཋཾ ཝཱ པརཱམསིཏྭཱ པཏྟསྶ ནིཀྑིཔནཾ, ན ཙ ཨནནྟརཧིཏཱཡ བྷཱུམིཡཱ པཏྟསྶ ནིཀྑིཔནཾ, ཙཱིཝརཾ ནིཀྑིཔནྟེན ཨེཀེན ཧཏྠེན ཙཱིཝརཾ གཧེཏྭཱ ཨེཀེན ཧཏྠེན ཙཱིཝརཝཾསཾ ཝཱ ཙཱིཝརརཛྫུཾ ཝཱ པམཛྫིཏྭཱ པཱརཏོ ཨནྟཾ ཨོརཏོ བྷོགཾ ཀཏྭཱ ཙཱིཝརསྶ ནིཀྑིཔནཾ, ཨུཔཛ྄ཛྷཱཡམྷི ཝུཊྛིཏེ ཨཱསནསྶ ཨུདྡྷརཎཾ, པཱདོདཀཔཱདཔཱིཋཔཱདཀཐལིཀཱནཾ པཊིསཱམནཾ, སཙེ སོ དེསོ ཨུཀླཱཔོ ཧོཏི, ཏསྶ སམྨཛྫནཾ, སཙེ ཨུཔཛ྄ཛྷཱཡོ ནྷཱཡིཏུཀཱམོ ཧོཏི, ནྷཱནསྶ པཊིཡཱདནཾ, སཙེ སཱིཏེན ཨཏྠོ ཧོཏི, སཱིཏསྶ སཙེ ཨུཎྷེན ཨཏྠོ ཧོཏི, ཨུཎྷསྶ པཊིཡཱདནཾ, སཙེ ཨུཔཛ྄ཛྷཱཡོ ཛནྟཱགྷརཾ པཝིསིཏུཀཱམོ ཧོཏི, ཙུཎྞསྶ ¶ སནྣཡནཾ, མཏྟིཀཱཏེམནཾ, ཛནྟཱགྷརཔཱིཋཾ ཨཱདཱཡ ཨུཔཛ྄ཛྷཱཡསྶ པིཊྛིཏོ པིཊྛིཏོ གནྟྭཱ ཛནྟཱགྷརཔཱིཋཾ དཏྭཱ ཙཱིཝརཾ པཊིགྒཧེཏྭཱ ཨེཀམནྟཾ ནིཀྑིཔནཾ, ཙུཎྞདཱནཾ, མཏྟིཀཱདཱནཾ, སཙེ ཨུསྶཧཏི, ཛནྟཱགྷརཾ པཝིསིཏབྦཾ –

ཛནྟཱགྷརཾ པཝིསནྟེན མཏྟིཀཱཡ མུཁཾ མཀྑེཏྭཱ པུརཏོ ཙ པཙྪཏོ ཙ པཊིཙྪཱདེཏྭཱ ཛནྟཱགྷརཔྤཝེསོ, ན ཐེརཱནཾ བྷིཀྑཱུནཾ ཨནུཔཁཛྫ ནིསཱིདནཾ, ན ནཝཱནཾ བྷིཀྑཱུནཾ ཨཱསནེན པཊིབཱཧནཾ, ཛནྟཱགྷརེ ཨུཔཛ྄ཛྷཱཡསྶ པརིཀམྨསྶ ཀརཎཾ, ཛནྟཱགྷརཱ ནིཀྑམནྟེན ཛནྟཱགྷརཔཱིཋཾ ཨཱདཱཡ ¶ པུརཏོ ཙ པཙྪཏོ ཙ པཊིཙྪཱདེཏྭཱ ཛནྟཱགྷརཱ ནིཀྑམནཾ, ཨུདཀེཔི ཨུཔཛ྄ཛྷཱཡསྶ པརིཀམྨཀརཎཾ, ནྷཱཏེན པཋམཏརཾ ཨུཏྟརིཏྭཱ ཨཏྟནོ གཏྟཾ ཝོདཀཾ ཀཏྭཱ ནིཝཱསེཏྭཱ ཨུཔཛ྄ཛྷཱཡསྶ གཏྟཏོ ཨུདཀསྶ པམཛྫནཾ, ནིཝཱསནདཱནཾ, སངྒྷཱཊིདཱནཾ, ཛནྟཱགྷརཔཱིཋཾ ཨཱདཱཡ པཋམཏརཾ ཨཱགནྟྭཱ ཨཱསནསྶ པཉྙཱཔནཾ, པཱདོདཀཔཱདཔཱིཋཔཱདཀཐལིཀཱནཾ ཨུཔནིཀྑིཔནཾ, ཨུཔཛ྄ཛྷཱཡསྶ པཱནཱིཡེན པུཙྪནཾ, སཙེ ཨུདྡིསཱཔེཏུཀཱམོ ཧོཏི, ཨུདྡིསཱཔནཾ, སཙེ པརིཔུཙྪིཏུཀཱམོ ཧོཏི, པརིཔུཙྪནཾ, ཡསྨིཾ ཝིཧཱརེ ཨུཔཛ྄ཛྷཱཡོ ཝིཧརཏི, སཙེ སོ ཝིཧཱརོ ཨུཀླཱཔོ ཧོཏི, སཙེ ཨུསྶཧཏི, ཏསྶ སོདྷནཾ, ཝིཧཱརཾ སོདྷེནྟེན པཋམཾ པཏྟཙཱིཝརསྶ ནཱིཧརིཏྭཱ ཨེཀམནྟཾ ནིཀྑིཔནཾ, ནིསཱིདནཔཙྩཏྠརཎསྶ ནཱིཧརིཏྭཱ ཨེཀམནྟཾ ནིཀྑིཔནཾ, བྷིསིབིབྦོཧནསྶ ནཱིཧརིཏྭཱ ཨེཀམནྟཾ ནིཀྑིཔནཾ, མཉྩསྶ ནཱིཙཾ ཀཏྭཱ སཱདྷུཀཾ ཨཔྤཊིགྷཾསནྟེན ཨསངྒྷཊྚེནྟེན ཀཝཱཊཔཱིཋཾ ནཱིཧརིཏྭཱ ཨེཀམནྟཾ ནིཀྑིཔནཾ, པཱིཋསྶ ནཱིཙཾ ཀཏྭཱ སཱདྷུཀཾ ཨཔྤཊིགྷཾསནྟེན ཨསངྒྷཊྚེནྟེན ཀཝཱཊཔཱིཋཾ ནཱིཧརིཏྭཱ ཨེཀམནྟཾ ནིཀྑིཔནཾ, མཉྩཔཊིཔཱདཀཱནཾ ནཱིཧརིཏྭཱ ཨེཀམནྟཾ ནིཀྑིཔནཾ, ཁེལ༹མལླཀསྶ ནཱིཧརིཏྭཱ ཨེཀམནྟཾ ནིཀྑིཔནཾ, ཨཔསྶེནཕལཀསྶ ནཱིཧརིཏྭཱ ཨེཀམནྟཾ ནིཀྑིཔནཾ, བྷཱུམཏྠརཎསྶ ཡཐཱཔཉྙཏྟསྶ སལླཀྑེཏྭཱ ནཱིཧརིཏྭཱ ཨེཀམནྟཾ ནིཀྑིཔནཾ ¶ , སཙེ ཝིཧཱརེ སནྟཱནཀཾ ཧོཏི, ཨུལློཀཱ པཋམཾ ཨོཧཱརཎཾ, ཨཱལོཀསནྡྷིཀཎྞབྷཱགཱནཾ པམཛྫནཾ, སཙེ གེརུཀཔརིཀམྨཀཏཱ བྷིཏྟི ཀཎྞཀིཏཱ ཧོཏི, ཙོལ༹ཀཾ ཏེམེཏྭཱ པཱིལེ༹ཏྭཱ པམཛྫནཾ, སཙེ ཀཱལ༹ཝཎྞཀཏཱ བྷཱུམི ཀཎྞཀིཏཱ ཧོཏི, ཙོལ༹ཀཾ ཏེམེཏྭཱ པཱིལེ༹ཏྭཱ པམཛྫནཾ, སཙེ ཨཀཏཱ ཧོཏི བྷཱུམི, ཨུདཀེན པརིཔྥོསིཏྭཱ པམཛྫནཾ ‘‘མཱ ཝིཧཱརོ རཛེན ཨུཧཉྙཱི’’ཏི, སངྐཱརཾ ཝིཙིནིཏྭཱ ཨེཀམནྟཾ ཚཌྜནཾ, བྷཱུམཏྠརཎསྶ ཨོཏཱཔེཏྭཱ སོདྷེཏྭཱ པཔྥོཊེཏྭཱ ཨཏིཧརིཏྭཱ ཡཐཱཔཉྙཏྟཾ པཉྙཱཔནཾ, མཉྩཔཊིཔཱདཀཱནཾ ཨོཏཱཔེཏྭཱ པམཛྫིཏྭཱ ཨཏིཧརིཏྭཱ ཡཐཱཊྛཱནེ ཋཔནཾ, མཉྩསྶ ཨོཏཱཔེཏྭཱ སོདྷེཏྭཱ པཔྥོཊེཏྭཱ ནཱིཙཾ ཀཏྭཱ སཱདྷུཀཾ ཨཔྤཊིགྷཾསནྟེན ཨསངྒྷཊྚེནྟེན ཀཝཱཊཔཱིཋཾ ཨཏིཧརིཏྭཱ ཡཐཱཔཉྙཏྟཾ པཉྙཱཔནཾ, པཱིཋསྶ ཨོཏཱཔེཏྭཱ སོདྷེཏྭཱ པཔྥོཊེཏྭཱ ནཱིཙཾ ཀཏྭཱ སཱདྷུཀཾ ཨཔྤཊིགྷཾསནྟེན ཨསངྒྷཊྚེནྟེན ཀཝཱཊཔཱིཋཾ ཨཏིཧརིཏྭཱ ཡཐཱཔཉྙཏྟཾ པཉྙཱཔནཾ, བྷིསིབིབྦོཧནསྶ ཨོཏཱཔེཏྭཱ སོདྷེཏྭཱ པཔྥོཊེཏྭཱ ཨཏིཧརིཏྭཱ ཡཐཱཔཉྙཏྟཾ པཉྙཱཔནཾ, ནིསཱིདནཔཙྩཏྠརཎསྶ ཨོཏཱཔེཏྭཱ སོདྷེཏྭཱ པཔྥོཊེཏྭཱ ཨཏིཧརིཏྭཱ ཡཐཱཔཉྙཏྟཾ པཉྙཱཔནཾ, ཁེལ༹མལླཀསྶ ཨོཏཱཔེཏྭཱ པམཛྫིཏྭཱ ཨཏིཧརིཏྭཱ ཡཐཱཊྛཱནེ ཋཔནཾ, ཨཔསྶེནཕལཀསྶ ཨོཏཱཔེཏྭཱ པམཛྫིཏྭཱ ཨཏིཧརིཏྭཱ ཡཐཱཊྛཱནེ ཋཔནཾ, པཏྟཙཱིཝརཾ ནིཀྑིཔིཏབྦཾ –

པཏྟཾ ¶ ནིཀྑིཔནྟེན ཨེཀེན ཧཏྠེན པཏྟཾ གཧེཏྭཱ ཨེཀེན ཧཏྠེན ཧེཊྛཱམཉྩཾ ཝཱ ཧེཊྛཱཔཱིཋཾ ཝཱ པརཱམསིཏྭཱ པཏྟསྶ ནིཀྑིཔནཾ, ན ཙ ཨནནྟརཧིཏཱཡ བྷཱུམིཡཱ པཏྟསྶ ནིཀྑིཔནཾ, ཙཱིཝརཾ ནིཀྑིཔནྟེན ཨེཀེན ཧཏྠེན ཙཱིཝརཾ གཧེཏྭཱ ཨེཀེན ཧཏྠེན ¶ ཙཱིཝརཝཾསཾ ཝཱ ཙཱིཝརརཛྫུཾ ཝཱ པམཛྫིཏྭཱ པཱརཏོ ཨནྟཾ ཨོརཏོ བྷོགཾ ཀཏྭཱ ཙཱིཝརསྶ ནིཀྑིཔནཾ, སཙེ པུརཏྠིམཱཡ སརཛཱ ཝཱཏཱ ཝཱཡནྟི, པུརཏྠིམཱནཾ ཝཱཏཔཱནཱནཾ ཐཀནཾ, ཏཐཱ པཙྪིམཱནཾ, ཏཐཱ ཨུཏྟརཱནཾ, ཏཐཱ དཀྑིཎཱནཾ ཝཱཏཔཱནཱནཾ ཐཀནཾ, སཙེ སཱིཏཀཱལོ ཧོཏི, དིཝཱ ཝཱཏཔཱནཱནཾ ཝིཝརཎཾ, རཏྟིཾ ཐཀནཾ, སཙེ ཨུཎྷཀཱལོ ཧོཏི, དིཝཱ ཝཱཏཔཱནཱནཾ ཐཀནཾ, རཏྟིཾ ཝིཝརཎཾ, སཙེ པརིཝེཎཾ ཨུཀླཱཔཾ ཧོཏི, པརིཝེཎསྶ སམྨཛྫནཾ, སཙེ ཀོཊྛཀོ ཨུཀླཱཔོ ཧོཏི, ཀོཊྛཀསྶ སམྨཛྫནཾ, སཙེ ཨུཔཊྛཱནསཱལཱ ཨུཀླཱཔཱ ཧོཏི, ཏསྶཱ སམྨཛྫནཾ, སཙེ ཨགྒིསཱལཱ ཨུཀླཱཔཱ ཧོཏི, ཏསྶཱ སམྨཛྫནཾ, སཙེ ཝཙྩཀུཊི ཨུཀླཱཔཱ ཧོཏི, ཏསྶཱ སམྨཛྫནཾ, སཙེ པཱནཱིཡཾ ན ཧོཏི, པཱནཱིཡསྶ ཨུཔཊྛཱཔནཾ, སཙེ པརིབྷོཛནཱིཡཾ ན ཧོཏི, པརིབྷོཛནཱིཡསྶ ཨུཔཊྛཱཔནཾ, སཙེ ཨཱཙམནཀུམྦྷིཡཱ ཨུདཀཾ ན ཧོཏི, ཨཱཙམནཀུམྦྷིཡཱ ཨུདཀསྶ ཨཱསིཉྩནཾ, སཙེ ཨུཔཛ྄ཛྷཱཡསྶ ཨནབྷིརཏི ཨུཔྤནྣཱ ཧོཏི, སདྡྷིཝིཧཱརིཀེན ཝཱུཔཀཱསནཾ ཝཱུཔཀཱསཱཔནཾ ཝཱ, དྷམྨཀཐཱཡ ཝཱ ཏསྶ ཀརཎཾ, སཙེ ཨུཔཛ྄ཛྷཱཡསྶ ཀུཀྐུཙྩཾ ཨུཔྤནྣཾ ཧོཏི, སདྡྷིཝིཧཱརིཀེན ཝིནོདནཾ ཝིནོདཱཔནཾ ཝཱ, དྷམྨཀཐཱཡ ཝཱ ཏསྶ ཀརཎཾ, སཙེ ཨུཔཛ྄ཛྷཱཡསྶ དིཊྛིགཏཾ ཨུཔྤནྣཾ ཧོཏི, སདྡྷིཝིཧཱརིཀེན ཝིཝེཙནཾ ཝིཝེཙཱཔནཾ ཝཱ, དྷམྨཀཐཱཡ ཝཱ ཏསྶ ཀརཎཾ, སཙེ ཨུཔཛ྄ཛྷཱཡོ གརུདྷམྨཾ ཨཛ྄ཛྷཱཔནྣོ ཧོཏི པརིཝཱསཱརཧོ, སདྡྷིཝིཧཱརིཀེན ཨུསྶུཀྐཀརཎཾ ‘‘ཀིནྟི ནུ ཁོ སངྒྷོ ཨུཔཛ྄ཛྷཱཡསྶ པརིཝཱསཾ དདེཡྻཱ’’ཏི, སཙེ ཨུཔཛ྄ཛྷཱཡོ མཱུལཱཡཔཊིཀསྶནཱརཧོ ཧོཏི, སདྡྷིཝིཧཱརིཀེན ཨུསྶུཀྐཀརཎཾ ‘‘ཀིནྟི ¶ ནུ ཁོ སངྒྷོ ཨུཔཛ྄ཛྷཱཡཾ མཱུལཱཡ པཊིཀསྶེཡྻཱ’’ཏི, སཙེ ཨུཔཛ྄ཛྷཱཡོ མཱནཏྟཱརཧོ ཧོཏི, སདྡྷིཝིཧཱརིཀེན ཨུསྶུཀྐཀརཎཾ ‘‘ཀིནྟི ནུ ཁོ སངྒྷོ ཨུཔཛ྄ཛྷཱཡསྶ མཱནཏྟཾ དདེཡྻཱ’’ཏི, སཙེ ཨུཔཛ྄ཛྷཱཡོ ཨབྦྷཱནཱརཧོ ཧོཏི, སདྡྷིཝིཧཱརིཀེན ཨུསྶུཀྐཀརཎཾ ‘‘ཀིནྟི ནུ ཁོ སངྒྷོ ཨུཔཛ྄ཛྷཱཡཾ ཨབྦྷེཡྻཱ’’ཏི, སཙེ སངྒྷོ ཨུཔཛ྄ཛྷཱཡསྶ ཀམྨཾ ཀཏྟུཀཱམོ ཧོཏི ཏཛྫནཱིཡཾ ཝཱ ནིཡསྶཾ ཝཱ པབྦཱཛནཱིཡཾ ཝཱ པཊིསཱརཎཱིཡཾ ཝཱ ཨུཀྑེཔནཱིཡཾ ཝཱ, སདྡྷིཝིཧཱརིཀེན ཨུསྶུཀྐཀརཎཾ ‘‘ཀིནྟི ནུ ཁོ སངྒྷོ ཨུཔཛ྄ཛྷཱཡསྶ ཀམྨཾ ན ཀརེཡྻ, ལཧུཀཱཡ ཝཱ པརིཎཱམེཡྻཱ’’ཏི, ཀཏཾ ཝཱ པནསྶ ཧོཏི སངྒྷེན ཀམྨཾ ཏཛྫནཱིཡཾ ཝཱ ནིཡསྶཾ ཝཱ པབྦཱཛནཱིཡཾ ཝཱ པཊིསཱརཎཱིཡཾ ཝཱ ཨུཀྑེཔནཱིཡཾ ཝཱ, སདྡྷིཝིཧཱརིཀེན ཨུསྶུཀྐཀརཎཾ ‘‘ཀིནྟི ནུ ཁོ ཨུཔཛ྄ཛྷཱཡོ སམྨཱ ཝཏྟེཡྻ, ལོམཾ པཱཏེཡྻ, ནེཏྠཱརཾ ཝཏྟེཡྻ, སངྒྷོ ཏཾ ཀམྨཾ པཊིཔྤསྶམྦྷེཡྻཱ’’ཏི, སཙེ ཨུཔཛ྄ཛྷཱཡསྶ ཙཱིཝརཾ དྷོཝིཏབྦཾ ཧོཏི ¶ , སདྡྷིཝིཧཱརིཀེན དྷོཝནཾ ཨུསྶུཀྐཀརཎཾ ཝཱ ‘‘ཀིནྟི ནུ ཁོ ཨུཔཛ྄ཛྷཱཡསྶ ཙཱིཝརཾ དྷོཝིཡེཐཱ’’ཏི, སཙེ ཨུཔཛ྄ཛྷཱཡསྶ ཙཱིཝརཾ ཀཱཏབྦཾ ཧོཏི, སདྡྷིཝིཧཱརིཀེན ཀརཎཾ ཨུསྶུཀྐཀརཎཾ ཝཱ ‘‘ཀིནྟི ནུ ཁོ ཨུཔཛ྄ཛྷཱཡསྶ ཙཱིཝརཾ ཀརིཡེཐཱ’’ཏི, སཙེ ཨུཔཛ྄ཛྷཱཡསྶ རཛནཾ པཙིཏབྦཾ ཧོཏི, སདྡྷིཝིཧཱརིཀེན པཙནཾ ཨུསྶུཀྐཀརཎཾ ཝཱ ‘‘ཀིནྟི ནུ ཁོ ཨུཔཛ྄ཛྷཱཡསྶ རཛནཾ པཙིཡེཐཱ’’ཏི, སཙེ ཨུཔཛ྄ཛྷཱཡསྶ ཙཱིཝརཾ རཛེཏབྦཾ ཧོཏི, སདྡྷིཝིཧཱརིཀེན རཛནཾ ཨུསྶུཀྐཀརཎཾ ཝཱ ‘‘ཀིནྟི ནུ ཁོ ཨུཔཛ྄ཛྷཱཡསྶ ཙཱིཝརཾ རཛིཡེཐཱ’’ཏི, ཙཱིཝརཾ རཛནྟེན སཱདྷུཀཾ སམྤརིཝཏྟཀཾ སམྤརིཝཏྟཀཾ རཛནཾ, ན ཙ ཨཙྪིནྣེ ཐེཝེ པཀྐམནཾ, ཨུཔཛ྄ཛྷཱཡཾ ཨནཱཔུཙྪཱ ན ཨེཀཙྩསྶ པཏྟདཱནཾ, ན ཨེཀཙྩསྶ པཏྟཔཊིགྒཧཎཾ, ན ཨེཀཙྩསྶ ཙཱིཝརདཱནཾ, ན ཨེཀཙྩསྶ ཙཱིཝརཔཊིགྒཧཎཾ, ན ཨེཀཙྩསྶ པརིཀྑཱརདཱནཾ, ན ཨེཀཙྩསྶ པརིཀྑཱརཔཊིགྒཧཎཾ, ན ཨེཀཙྩསྶ ཀེསཙྪེདནཾ, ན ཨེཀཙྩེན ཀེསཱནཾ ཚེདཱཔནཾ, ན ཨེཀཙྩསྶ པརིཀམྨཀརཎཾ, ན ཨེཀཙྩེན པརིཀམྨསྶ ཀཱརཱཔནཾ, ན ཨེཀཙྩསྶ ཝེཡྻཱཝཙྩཀརཎཾ, ན ཨེཀཙྩེན ཝེཡྻཱཝཙྩསྶ ¶ ཀཱརཱཔནཾ, ན ཨེཀཙྩསྶ པཙྪཱསམཎེན གམནཾ, ན ཨེཀཙྩསྶ པཙྪཱསམཎསྶ ཨཱདཱནཾ, ན ཨེཀཙྩསྶ པིཎྜཔཱཏསྶ ནཱིཧརཎཾ, ན ཨེཀཙྩེན པིཎྜཔཱཏནཱིཧརཱཔནཾ, ན ཨུཔཛ྄ཛྷཱཡཾ ཨནཱཔུཙྪཱ གཱམཔྤཝེསནཾ, ན སུསཱནགམནཾ, ན དིསཱཔཀྐམནཾ, སཙེ ཨུཔཛ྄ཛྷཱཡོ གིལཱནོ ཧོཏི, ཡཱཝཛཱིཝཾ ཨུཔཊྛཱནཾ, ཝུཊྛཱནམསྶ ཨཱགམནནྟི ཏེསུ ཀཱནིཙི ཝཏྟཱནི སཝིབྷཏྟིཀཱནི, ཀཱནིཙི ཨཝིབྷཏྟིཀཱནི, ཏེསུ ཨཝིབྷཏྟིཀཱནཾ ཝིབྷཱགེ ཝུཙྩམཱནེ ཡཐཱཝུཏྟགཎནཱཡ ཨཏིརེཀཏརཱནི ཧོནྟི, ཏཾ པན ཝིབྷཱགཾ ཨནཱམསིཏྭཱ པིཎྜཝསེན གཧེཏྭཱ ཡཐཱ ཨཡཾ གཎནཱ དསྶིཏཱཏི ཝེདིཏབྦཱ.

༢༤༧༦. ཨཀརོནྟསྶཱཏི ཨེཏྠ ‘‘ཝཏྟ’’ནྟི སེསོ. ཨནཱདརཝསེནེཝ ཝཏྟཾ ཨཀརོནྟསྶ བྷིཀྑུནོ ཏེན ཝཏྟབྷེདེན ཝཏྟཱཀརཎེན སབྦཏྠ སཏྟཏིཾསཱདྷིཀསཏཔྤབྷེདཊྛཱནེ ཏཏྟཀཾཡེཝ དུཀྐཊཾ པཀཱསིཏནྟི ཡོཛནཱ.

ཨུཔཛ྄ཛྷཱཡཱཙརིཡཝཏྟཀཐཱཝཎྞནཱ.

༢༤༧༧. ཨེཝཾ ཨུཔཛ྄ཛྷཱཡཱཙརིཡཝཏྟཱནི སངྑེཔེན དསྶེཏྭཱ ཨུཔཛ྄ཛྷཱཡཱཙརིཡེཧི སདྡྷིཝིཧཱརིཀནྟེཝཱསཱིནཾ ཀཱཏབྦཝཏྟཱནི དསྶེཏུམཱཧ ‘‘ཨུཔཛ྄ཛྷཱཡསྶ ཝཏྟཱནཱི’’ཏིཨཱདི. ཨུཔཛ྄ཛྷཱཡསྶ ཝཏྟཱནཱིཏི ཨུཔཛ྄ཛྷཱཡེན སདྡྷིཝིཧཱརིཀསྶ ཡུཏྟཔཏྟཀཱལེ ཀཏྟབྦཏྟཱ ཨུཔཛ྄ཛྷཱཡཱཡཏྟཝཏྟཱནཱིཏི ¶ ཨཏྠོ. ཏཐཱ སདྡྷིཝིཧཱརིཀེཏི ཡཐཱ སདྡྷིཝིཧཱརིཀེན ཨུཔཛ྄ཛྷཱཡསྶ ཀཱཏབྦཱནི, ཏཐཱ ཨུཔཛ྄ཛྷཱཡེན སདྡྷིཝིཧཱརིཀེ ཀཱཏབྦཱནི.

ཨུཔཛ྄ཛྷཱཡཱཙརིཡཝཏྟེསུ གཱམཔྤཝེསེ པཙྪཱསམཎེན ཧུཏྭཱ ནཱཏིདཱུརནཙྩཱསནྣགམནཾ, ན ཨནྟརནྟརཱ ཀཐཱཨོཔཱཏནཾ, ཨཱཔཏྟིསཱམནྟཱ བྷཎམཱནསྶ ནིཝཱརཎཾ, པཏྟཔརིཡཱཔནྣཔཊིགྒཧཎནྟི ཙཏྟཱརི ཝཏྟཱནི, ན ཨེཀཙྩསྶ པཏྟདཱནཱདིཨནཱཔུཙྪཱདིསཱཔཀྐམནཱཝསཱནཱནི ཝཱིསཏི པཊིཀྑེཔཱ ཙེཏི ཨེཏཱནི ¶ ཙཏུཝཱིསཏི ཝཏྟཱནི ཋཔེཏྭཱ ཨཝསེསཱནི ཏེརསཱདྷིཀསཏཝཏྟཱནི སནྡྷཱཡཱཧ ‘‘སཏཾ ཏེརས ཧོནྟེཝཱ’’ཏི, ཏེརསཱདྷིཀསཏཝཏྟཱནི ཧོནྟཱིཏི ཨཏྠོ. ཨཱཙརིཡེན ཨནྟེཝཱསིཀེཔི ཙ ཀཱཏབྦཝཏྟཱནི ཏཐཱ ཏཏྟཀཱནེཝཱཏི ཨཏྠོ.

སདྡྷིཝིཧཱརིཀནྟེཝཱསིཀཝཏྟཀཐཱཝཎྞནཱ.

༢༤༧༨. ཨུཔཛ྄ཛྷཱཡཱཙརིཡེཧི སདྡྷིཝིཧཱརིཀནྟེཝཱསིཀཱནཾ ནིསྶཡཔཊིཔྤསྶདྡྷིཔྤཀཱརཾ དསྶེཏུམཱཧ ‘‘པཀྐནྟེ ཝཱཔཱི’’ཏིཨཱདི. པཀྐནྟེ ཝཱཔི ཝིབྦྷནྟེ ཝཱཔི པཀྑསངྐནྟེ ཝཱཔི མཏེ ཝཱཔི ཨཱཎཏྟིཡཱ ཝཱཔི ཨེཝཾ པཉྩདྷཱ ཨུཔཛ྄ཛྷཱཡཱ སདྡྷིཝིཧཱརིཀེན གཧིཏོ ནིསྶཡོ པཊིཔྤསྶམྦྷཏཱིཏི ཡོཛནཱ. པཀྐནྟེཏི ཏདཧུ ཨཔཙྩཱགནྟུཀཱམཏཱཡ དིསཾ གཏེ. ཝིབྦྷནྟེཏི གིཧིབྷཱཝཾ པཏྟེ. པཀྑསངྐནྟཀེཏི ཏིཏྠིཡཱཡཏནཾ གཏེ. མཏེཏི ཀཱལཀཏེ. ཨཱཎཏྟིཡཱཏི ནིསྶཡཔཎཱམནེན.

༢༤༧༩-༨༠. ཨཱཙརིཡམྷཱཔི ཨནྟེཝཱསིཀེན གཧིཏནིསྶཡསྶ བྷེདནཾ ཚདྷཱ ཚཔྤཀཱརེན ཧོཏཱིཏི ཡོཛནཱ. ཀཐནྟི ཨཱཧ ‘‘པཀྐནྟེ ཙཱ’’ཏིཨཱདི. ཏཾ ཨུཔཛ྄ཛྷཱཡཏོ ནིསྶཡབྷེདེ ཝུཏྟནཡམེཝ. ཝིསེསཾ པན སཡམེཝ ཝཀྑཏི ‘‘ཨཱཎཏྟིཡ’’ནྟིཨཱདིནཱ. ཨཱཎཏྟིཡནྟི ཨེཏྠ ཝིསེསཏྠཛོཏཀོ པན-སདྡོ ལུཏྟནིདྡིཊྛོ. ཨུབྷིནྣམྤི དྷུརནིཀྑེཔནེཔི ཙཱཏི ཨཱཙརིཡསྶ ནིསྶཡཔཎཱམནེ པན ཨུབྷིནྣཾ ཨཱཙརིཡནྟེཝཱསིཀཱནཾཡེཝ ཨཉྙམཉྙནིརཱལཡབྷཱཝེ སཏི ནིསྶཡབྷེདོ ཧོཏི, ན ཨེཀསྶཱཏི ཨཏྠོ. ཏམེཝཏྠཾ བྱཏིརེཀཏོ དལ༹ྷཱིཀརོཏི ‘‘ཨེཀེཀསྶཱ’’ཏིཨཱདིནཱ. ཨེཀེཀསྶ ཝཱ ཨུབྷིནྣཾ ཝཱ ཨཱལཡེ སཏི ན བྷིཛྫཏཱིཏི ཡོཛནཱ. ཡཐཱཧ –

‘‘ཨཱཎཏྟིཡཾ ¶ ¶ པན སཙེཔི ཨཱཙརིཡོ མུཉྩིཏུཀཱམོཝ ཧུཏྭཱ ནིསྶཡཔཎཱམནཱཡ པཎཱམེཏི, ཨནྟེཝཱསིཀོ ཙ ‘ཀིཉྩཱཔི མཾ ཨཱཙརིཡོ པཎཱམེཏི, ཨཐ ཁོ ཧདཡེན མུདུཀོ’ཏི སཱལཡོཝ ཧོཏི, ནིསྶཡོ ན པཊིཔྤསྶམྦྷཏིཡེཝ. སཙེཔི ཨཱཙརིཡོ སཱལཡོ, ཨནྟེཝཱསིཀོ ནིརཱལཡོ ‘ན དཱནི ཨིམཾ ནིསྶཱཡ ཝསིསྶཱམཱི’ཏི དྷུརཾ ནིཀྑིཔཏི, ཨེཝམྤི ན པཊིཔྤསྶམྦྷཏི. ཨུབྷིནྣཾ སཱལཡབྷཱཝེ པན ན པཊིཔྤསྶམྦྷཏིཡེཝ. ཨུབྷིནྣཾ དྷུརནིཀྑེཔེན པཊིཔྤསྶམྦྷཏཱི’’ཏི (མཧཱཝ. ཨཊྛ. ༨༣).

ཨཡཾ པན ཝིསེསོ ཨཱཙརིཡཱཎཏྟིཡཱ ནིསྶཡབྷེདེཡེཝ དསྶིཏོ, ན ཨུཔཛ྄ཛྷཱཡཱཎཏྟིཡཱ. སཱརཏྠདཱིཔནིཡཾ པན ‘‘སཙེཔི ཨཱཙརིཡོ མུཉྩིཏུཀཱམོཝ ཧུཏྭཱ ནིསྶཡཔཎཱམནཱཡ པཎཱམེཏཱིཏིཨཱདི སབྦཾ ཨུཔཛ྄ཛྷཱཡསྶ ཨཱཎཏྟིཡམྤི ཝེདིཏབྦ’’ནྟི ཝུཏྟཾ.

༢༤༨༡. ཨེཝཾ པཉྩ སཱདྷཱརཎངྒཱནི དསྶེཏྭཱ ཨསཱདྷཱརཎངྒཾ དསྶེཏུམཱཧ ‘‘ཨུཔཛ྄ཛྷཱཡསམོདྷཱན-གཏསྶཱཔི ཙ བྷིཛྫཏཱི’’ཏི. ཏཏྠ སམོདྷཱནགམནཾ སརཱུཔཏོ, པབྷེདཏོ ཙ དསྶེཏུམཱཧ ‘‘དསྶནཾ སཝནཉྩཱཏི, སམོདྷཱནཾ དྭིདྷཱ མཏ’’ནྟི. ཨཡམེཏྠ སངྑེཔོ, ཝིཏྠཱརོ པན སམནྟཔཱསཱདིཀཱཡཾ (མཧཱཝ. ཨཊྛ. ༨༣) གཧེཏབྦོ. གནྠཝིཏྠཱརབྷཱིརཱུནཾ ཨནུགྒཧཱཡ པན ཨིདྷ ན ཝིཏྠཱརིཏོ.

༢༤༨༢-༣. སབྷཱགེ དཱཡཀེ ཨསནྟེ ཨདྡྷིཀསྶ ཙ གིལཱནསྶ ཙ ‘‘གིལཱནེན མཾ ཨུཔཊྛཧཱ’’ཏི ཡཱཙིཏསྶ གིལཱནུཔཊྛཱཀསྶ ཙ ནིསྶཡཾ ཝིནཱ ཝསིཏུཾ དོསོ ནཏྠཱིཏི ཡོཛནཱ ¶ . ‘‘གིལཱནུཔཊྛཱཀསྶཱ’’ཏི ཝཏྟབྦེ གཱཐཱབནྡྷཝསེན རསྶཏྟཾ. ཨིམིནཱ སབྷཱགེ ནིསྶཡདཱཡཀེ སནྟེ ཨེཀདིཝསམྤི པརིཧཱརོ ན ལབྦྷཏཱིཏི དཱིཔེཏི. ཨཏྟནོ ཝནེ ཕཱསུཝིཧཱརཏཾ ཛཱནཏཱཏི ཨཏྟནོ སམཐཝིཔསྶནཱཔཊིལཱབྷསྶ ཝནེ ཕཱསུཝིཧཱརཾ ཛཱནནྟེནཔི. ‘‘སབྷཱགེ དཱཡཀེ ཨསནྟེ’’ཏི པདཙྪེདོ. སབྦམེཏཾ ཝིདྷཱནཾ ཨནྟོཝསྶཏོ ཨཉྙསྨིཾ ཀཱལེ ཝེདིཏབྦཾ. ཨཡམེཏྠ སངྑེཔོ, ཝིཏྠཱརོ པན སམནྟཔཱསཱདིཀཱཡ གཧེཏབྦོ.

ནིསྶཡཔཊིཔྤསྶམྦྷནཀཐཱཝཎྞནཱ.

༢༤༨༤. ཀུཊྛམསྶ ¶ ཨཏྠཱིཏི ཀུཊྛཱི, ཏཾ. ‘‘གཎྜི’’ནྟིཨཱདཱིསུཔི ཨེསེཝ ནཡོ. རཏྟསེཏཱདིབྷེདེན ཡེན ཀེནཙི ཀུཊྛེན ཝེཝཎྞིཡཾ པཏྟསརཱིརནྟི ཨཏྠོ. ཡཐཱཧ –

‘‘རཏྟཀུཊྛཾ ཝཱ ཧོཏུ ཀཱལ༹ཀུཊྛཾ ཝཱ, ཡཾ ཀིཉྩི ཀིཊིབྷདདྡུཀཙྪུཨཱདིཔྤབྷེདམྤི སབྦཾ ཀུཊྛམེཝཱཏི ཝུཏྟཾ. ཏཉྩེ ནཁཔིཊྛིཔྤམཱཎམྤི ཝཌྜྷནཀཔཀྑེ ཋིཏཾ ཧོཏི, ན པབྦཱཛེཏབྦོ. སཙེ པན ནིཝཱསནཔཱརུཔནེཧི པཀཏིཔཊིཙྪནྣཊྛཱནེ ནཁཔིཊྛིཔྤམཱཎཾ ཨཝཌྜྷནཀཔཀྑེ ཋིཏཾ ཧོཏི, ཝཊྚཏི. མུཁེ, པན ཧཏྠཔཱདཔིཊྛེསུ ཝཱ སཙེཔི ཨཝཌྜྷནཀཔཀྑེ ཋིཏཾ ནཁཔིཊྛིཏོ ཁུདྡཀཔམཱཎམྤི ན ཝཊྚཏིཡེཝཱཏི ཀུརུནྡིཡཾ ཝུཏྟཾ. ཏཾ ཏིཀིཙྪཱཔེཏྭཱ པབྦཱཛེནྟེནཱཔི པཀཏིཝཎྞེ ཛཱཏེཡེཝ པབྦཱཛེཏབྦོ’’ཏི (མཧཱཝ. ཨཊྛ. ༨༨).

ནཁཔིཊྛིཔྤམཱཎནྟི ཨེཏྠ ‘‘ཀནིཊྛངྒུལིནཁཔིཊྛི ཨདྷིཔྤེཏཱ’’ཏི ཏཱིསུཔི གཎྛིཔདེསུ ཝུཏྟཾ.

གཎྜིནྟི ¶ མེདགཎྜཱདིགཎྜབྷེདཝནྟཾ. ཡཐཱཧ ‘‘མེདགཎྜོ ཝཱ ཧོཏུ ཨཉྙོ ཝཱ, ཡོ ཀོཙི ཀོལཊྛིམཏྟཀོཔི ཙེ ཝཌྜྷནཀཔཀྑེ ཋིཏོ གཎྜོ ཧོཏི, ན པབྦཱཛེཏབྦོ’’ཏིཨཱདི (མཧཱཝ. ཨཊྛ. ༨༨). ཀོལཊྛཱིཏི བདརཊྛི. ཀིལཱསིནྟི ཀིལཱསཝནྟཾ. ཡཐཱཧ – ‘‘ཀིལཱསོཏི ནབྷིཛྫནཀཾ ནཔགྒྷརཎཀཾ པདུམཔུཎྜརཱིཀཔཏྟཝཎྞཾ ཀུཊྛཾ, ཡེན གུནྣཾ ཝིཡ སབལཾ སརཱིརཾ ཧོཏཱི’’ཏི (མཧཱཝ. ཨཊྛ. ༨༨). ཙ-སདྡོ སབྦེཧི ཨུཔཡོགཝནྟེཧི པཙྩེཀཾ ཡོཛེཏབྦོ. སོསིནྟི ཁཡརོགཝནྟཾ. ཡཐཱཧ – ‘‘སོསོཏི སོསབྱཱདྷི. ཏསྨིཾ སཏི ན པབྦཱཛེཏབྦོ’’ཏི (མཧཱཝ. ཨཊྛ. ༨༨). ཨཔམཱརིཀནྟི ཨཔམཱརཝནྟཾ. ཡཐཱཧ – ‘‘ཨཔམཱརོཏི པིཏྟུམྨཱརོ ཝཱ ཡཀྑུམྨཱརོ ཝཱ. ཏཏྠ པུབྦཝེརིཀེན ཨམནུསྶེན གཧིཏོ དུཏྟིཀིཙྪོ ཧོཏི, ཨཔྤམཏྟཀེཔི པན ཨཔམཱརེ སཏི ན པབྦཱཛེཏབྦོ’’ཏི.

རཱཛབྷཊནྟི རཉྙོ བྷཏྟཝེཏནབྷཊཾ ཝཱ ཋཱནནྟརཾ པཏྟཾ ཝཱ ཨཔྤཏྟཾ ཝཱ རཱཛཔུརིསཾ. ཡཐཱཧ – ‘‘ཨམཙྩོ ཝཱ ཧོཏུ མཧཱམཏྟོ ཝཱ སེཝཀོ ཝཱ ཀིཉྩི ཋཱནནྟརཾ པཏྟོ ཝཱ ཨཔྤཏྟོ ཝཱ, ཡོ ཀོཙི རཉྙོ བྷཏྟཝེཏནབྷཊོ. སབྦོ ‘རཱཛབྷཊོ’ཏི སངྑྱཾ གཙྪཏཱི’’ཏི. ཙོརནྟི མནུསྶེཧི ཨཔྤམཱདནཾ གཱམགྷཱཏཔནྠགྷཱཏཱདིཀམྨེན པཱཀཊཾ ཙོརཉྩ. ལིཁིཏཀནྟི ཡཾ ཀཉྩི ཙོརིཀཾ ཝཱ ཨཉྙཾ ཝཱ གརུཾ རཱཛཱཔརཱདྷཾ ཀཏྭཱ པལཱཏཾ, རཱཛཱ ཙ ནཾ པཎྞེ ཝཱ པོཏྠཀེ ཝཱ ‘‘ཨིཏྠནྣཱམོ ¶ ཡཏྠ དིསྶཏི, ཏཏྠ གཧེཏྭཱ མཱརེཏབྦོ’’ཏི ཝཱ ‘‘ཧཏྠཔཱདཱདཱིནིསྶ ཚིནྡིཏབྦཱནཱི’’ཏི ཝཱ ‘‘ཨེཏྟཀཾ ནཱམ དཎྜཾ ཧརཱཔེཏབྦོ’’ཏི ཝཱ ལིཁཱཔེཏི, ཨེཝརཱུཔཾ ལིཁིཏཀཾ.

‘‘ཀཱརབྷེདཀ’’ནྟི གཱཐཱབནྡྷཝསེན རསྶོ ཀཏོ. ཀཱརབྷེདཀནྟི དཱཏབྦཀརསྶ ཝཱ ཀཏཙོརཀམྨསྶ ཝཱ ཀཱརཎཱ ¶ ཀཱརཱགྷརེ པཀྑིཏྟོ ཝཱ ནིགལ༹བནྡྷནཱདཱིཧི བདྡྷོ ཝཱ, ཏཏོ སོ མུཙྩིཏྭཱ པལཱཡཏི, ཨེཝརཱུཔཾ ཀཱརཱབྷེདཀཉྩ. ཡཐཱཧ – ‘‘ཀཱརཱ ཝུཙྩཏི བནྡྷནཱགཱརཾ, ཨིདྷ པན ཨནྡུབནྡྷནཾ ཝཱ ཧོཏུ སངྑལིཀབནྡྷནཾ ཝཱ རཛྫུབནྡྷནཾ ཝཱ གཱམབནྡྷནཾ ཝཱ ནིགམབནྡྷནཾ ཝཱ ནགརབནྡྷནཾ ཝཱ པུརིསགུཏྟི ཝཱ ཛནཔདབནྡྷནཾ ཝཱ དཱིཔབནྡྷནཾ ཝཱ, ཡོ ཨེཏེསུ ཡཾ ཀིཉྩི བནྡྷནཾ ཚིནྡིཏྭཱ བྷིནྡིཏྭཱ མུཉྩིཏྭཱ ཝིཝརིཏྭཱ ཝཱ པསྶམཱནཱནཾ ཝཱ ཨཔསྶམཱནཱནཾ ཝཱ པལཱཡཏི, སོ ‘ཀཱརཱབྷེདཀོ’ཏི སངྑྱཾ གཙྪཏཱི’’ཏི (མཧཱཝ. ཨཊྛ. ༩༢).

༢༤༨༥. ཀསཱཧཏནྟི ཨིཎཾ གཧེཏྭཱ དཱཏུཾ ཨསམཏྠཏྟཱ ‘‘ཨཡམེཝ ཏེ དཎྜོ ཧོཏཱུ’’ཏི ཀསཱདིནཱ དིནྣཔྤཧཱརཾ ཨཝཱུཔསནྟཝཎཾ. ཡཐཱཧ –

‘‘ཡོ ཝཙནཔེསནཱདཱིནི ཨཀརོནྟོ ཧཉྙཏི, ན སོ ཀཏདཎྜཀམྨོ. ཡོ པན ཀེཎིཡཱ ཝཱ ཨཉྙཐཱ ཝཱ ཀིཉྩི གཧེཏྭཱ ཁཱདིཏྭཱ པུན དཱཏུཾ ཨསཀྐོནྟོ ‘ཨཡམེཝ ཏེ དཎྜོ ཧོཏཱུ’ཏི ཀསཱཧི ཧཉྙཏི, ཨཡཾ ཀསཱཧཏོ ཀཏདཎྜཀམྨོ. ཡོ ཙ ཀསཱཧི ཝཱ ཧཏོ ཧོཏུ ཨདྡྷདཎྜཀཱདཱིནཾ ཝཱ ཨཉྙཏརེན, ཡཱཝ ཨལླཝཎོ ཧོཏི, ཏཱཝ ན པབྦཱཛེཏབྦོ’’ཏི (མཧཱཝ. ཨཊྛ. ༩༤).

ལཀྑཎཱཧཏནྟི ཨེཀཾསཾ ཀཏྭཱ པཱརུཏེན ཨུཏྟརཱསངྒེན ཨཔྤཊིཙྪཱདནཱིཡཊྛཱནེ ཏཏྟེན ལོཧེན ཨཱཧཏཾ ཨསཙྪཝིབྷཱུཏལཀྑཎེན སམནྣཱགཏཾ. ཡཐཱཧ –

‘‘ཡསྶ པན ནལཱཊེ ཝཱ ཨུརཱདཱིསུ ཝཱ ཏཏྟེན ལོཧེན ལཀྑཎཾ ཨཱཧཏཾ ཧོཏི, སོ སཙེ བྷུཛིསྶོ, ཡཱཝ ཨལླཝཎོ ཧོཏི, ཏཱཝ ན པབྦཱཛེཏབྦོ. སཙེཔིསྶ ཝཎཱ རུལ༹ྷཱ ཧོནྟི ཚཝིཡཱ ¶ སམཔརིཙྪེདཱ, ལཀྑཎཾ པན པཉྙཱཡཏི, ཏིམཎྜལཾ ནིཝཏྠསྶ ཨུཏྟརཱསངྒེ ¶ ཀཏེ པཊིཙྪནྣོཀཱསེ ཙེ ཧོཏི, པབྦཱཛེཏུཾ ཝཊྚཏི. ཨཔྤཊིཙྪནྣོཀཱསེ ཙེ, ན ཝཊྚཏཱི’’ཏི (མཧཱཝ. ཨཊྛ. ༩༥).

ཨིཎཱཡིཀཉྩཱཏི མཱཏཱཔིཏུཔིཏཱམཧཱདཱིཧི ཝཱ ཨཏྟནཱ ཝཱ གཧིཏཨིཎཾ. ཡཐཱཧ –

‘‘ཨིཎཱཡིཀོ ནཱམ ཡསྶ པིཏིཔིཏཱམཧེཧི ཝཱ ཨིཎཾ གཧིཏཾ ཧོཏི, སཡཾ ཝཱ ཨིཎཾ གཧིཏཾ ཧོཏི, ཡཾ ཝཱ ཨཱཋཔེཏྭཱ མཱཏཱཔིཏཱུཧི ཀིཉྩི གཧིཏཾ ཧོཏི, སོ ཏཾ ཨིཎཾ པརེསཾ དྷཱརེཏཱིཏི ཨིཎཱཡིཀོ. ཡཾ པན ཨཉྙེ ཉཱཏཀཱ ཨཱཋཔེཏྭཱ ཀིཉྩི གཎྷནྟི, སོ ན ཨིཎཱཡིཀོ. ན ཧི ཏེ ཏཾ ཨཱཋཔེཏུཾ ཨིསྶརཱ. ཏསྨཱ ཏཾ པབྦཱཛེཏུཾ ཝཊྚཏཱི’’ཏི (མཧཱཝ. ཨཊྛ. ༩༦).

དཱསནྟི ཨནྟོཛཱཏོ, དྷནཀྐཱིཏོ, ཀརམརཱནཱིཏོ, སཡཾ ཝཱ དཱསབྱཾ ཨུཔགཏོཏི ཙཏུནྣཾ དཱསཱནཾ ཨཉྙཏརཾ. དཱསཝིནིཙྪཡོ པནེཏྠ སམནྟཔཱསཱདིཀཱཡ (མཧཱཝ. ཨཊྛ. ༩༧) ཝིཏྠཱརཏོ གཧེཏབྦོ. པབྦཱཛེནྟསྶ དུཀྐཊནྟི ‘‘ཀུཊྛི’’ནྟིཨཱདཱིཧི ཨུཔཡོགཝནྟཔདེཧི པཙྩེཀཾ ཡོཛེཏབྦཾ.

༢༤༨༦. ཧཏྠཙྪིནྣནྟི ཧཏྠཏལེ ཝཱ མཎིབནྡྷེ ཝཱ ཀཔྤརེ ཝཱ ཡཏྠ ཀཏྠཙི ཚིནྣཧཏྠཾ. ཨཊྛཙྪིནྣནྟི ཡཐཱ ནཁཾ ན པཉྙཱཡཏི, ཨེཝཾ ཙཏཱུསུ ཨངྒུཊྛཀེསུ ཨཉྙཏརཾ ཝཱ སབྦེ ཝཱ ཡསྶ ཚིནྣཱ ཧོནྟི, ཨེཝརཱུཔཾ. པཱདཙྪིནྣནྟི ཡསྶ ཨགྒཔཱདེསུ ཝཱ གོཔྥཀེསུ ཝཱ ཛངྒྷཱཡ ཝཱ ཡཏྠ ཀཏྠཙི ཨེཀོ ཝཱ དྭེ ཝཱ པཱདཱ ཚིནྣཱ ཧོནྟི. ཧཏྠཔཱདཚིནྣསྶཱཔི པཱལི༹ཡཾ (མཧཱཝ. ༡༡༩) ཨཱགཏཏྟཱ སོཔི ཨིདྷ ཝཏྟབྦོ, ཡཐཱཝུཏྟནཡེནེཝ ཏསྶ དུཀྐཊཝཏྠུཏཱ པཉྙཱཡཏཱིཏི ན ཝུཏྟོཏི དཊྛབྦཾ.

ཀཎྞནཱསངྒུལིཙྪིནྣནྟི ¶ ཨེཏྠ ‘‘ཀཎྞཙྪིནྣཾ ནཱསཙྪིནྣཾ ཀཎྞནཱསཙྪིནྣཾ ཨངྒུལིཙྪིནྣ’’ནྟི ཡོཛནཱ. ཀཎྞཙྪིནྣནྟི ཡསྶ ཀཎྞམཱུལེ ཝཱ ཀཎྞསཀྑལིཀཱཡ ཝཱ ཨེཀོ ཝཱ དྭེ ཝཱ ཀཎྞཱ ཚིནྣཱ ཧོནྟི. ཡསྶ པན ཀཎྞཱཝཊྚེ ཚིནྣཱ ཧོནྟི, སཀྐཱ ཙ ཧོནྟི སངྒྷཱཊེཏུཾ, སོ ཀཎྞཾ སངྒྷཱཊེཏྭཱ པབྦཱཛེཏབྦོ. ནཱསཙྪིནྣནྟི ཡསྶ ཨཛཔདཀེ ཝཱ ཨགྒེ ཝཱ ཨེཀཔུཊེ ཝཱ ཡཏྠ ཀཏྠཙི ནཱསཱ ཚིནྣཱ ཧོཏི. ཡསྶ པན ནཱསིཀཱ སཀྐཱ ཧོཏི སནྡྷེཏུཾ, སོ ¶ ཏཾ ཕཱསུཀཾ ཀཏྭཱ པབྦཱཛེཏབྦོ. ཀཎྞནཱསཙྪིནྣནྟི ཏདུབྷཡཙྪིནྣཾ. ཨངྒུལིཙྪིནྣནྟི ཡསྶ ནཁསེསཾ ཨདསྶེཏྭཱ ཨེཀཱ ཝཱ བཧཱུ ཝཱ ཨངྒུལིཡོ ཚིནྣཱ ཧོནྟི. ཡསྶ པན སུཏྟཏནྟུམཏྟམྤི ནཁསེསཾ པཉྙཱཡཏི, ཏཾ པབྦཱཛེཏུཾ ཝཊྚཏི. ཀཎྜརཙྪིནྣམེཝ ཙཱཏི ཡསྶ ཀཎྜརནཱམཀཱ མཧཱནྷཱརཱུ པུརཏོ ཝཱ པཙྪཏོ ཝཱ ཚིནྣཱ ཧོནྟི, ཡེསུ ཨེཀསྶཱཔི ཚིནྣཏྟཱ ཨགྒཔཱདེན ཝཱ ཙངྐམཏི, མཱུལེན ཝཱ ཙངྐམཏི, ན ཝཱ པཱདཾ པཏིཊྛཱཔེཏུཾ སཀྐོཏི.

༢༤༨༧. ཀཱཎནྟི པསནྣནྡྷོ ཝཱ ཧོཏུ པུཔྥཱདཱིཧི ཝཱ ཨུཔཧཏཔསཱདོ, ཡོ དྭཱིཧི ཝཱ ཨེཀེན ཝཱ ཨཀྑིནཱ ན པསྶཏི, ཏཾ ཀཱཎཾ. ཀུཎིནྟི ཧཏྠཀུཎཱི ཝཱ པཱདཀུཎཱི ཝཱ ཨངྒུལིཀུཎཱི ཝཱ, ཡསྶ ཨེཏེསུ ཧཏྠཱདཱིསུ ཡཾ ཀིཉྩི ཝངྐཾ པཉྙཱཡཏི, སོ ཀུཎཱི. ཁུཛྫཉྩཱཏི ཡོ ཨུརསྶ ཝཱ པིཊྛིཡཱ ཝཱ པསྶསྶ ཝཱ ནིཀྑནྟཏྟཱ ཁུཛྫསརཱིརོ, ཏཾ ཁུཛྫཾ. ཡསྶ པན ཀིཉྩི ཀིཉྩི ཨངྒཔཙྩངྒཾ ཨཱིསཀཾ ཝངྐཾ, ཏཾ པབྦཱཛེཏུཾ ཝཊྚཏི. མཧཱཔུརིསོ ཨེཝ ཧི བྲཧྨུཛུགཏྟོ, ཨཝསེསོ སཏྟོ ཨཁུཛྫོ ནཱམ ནཏྠི.

ཝཱམནནྟི ཡོ ཛངྒྷཝཱམནོ ཝཱ ཀཊིཝཱམནོ ཝཱ ཨུབྷཡཝཱམནོ ཝཱ, ཏཾ. ཏཏྠ ཛངྒྷཝཱམནསྶ ཀཊིཏོ པཊྛཱཡ ཧེཊྛིམཀཱཡོ ¶ རསྶོ ཧོཏི, ཨུཔརིམཀཱཡོ པརིཔུཎྞོ. ཀཊིཝཱམནསྶ ཀཊིཏོ པཊྛཱཡ ཨུཔརིམཀཱཡོ རསྶོ ཧོཏི, ཧེཊྛིམཀཱཡོ པརིཔུཎྞོ ཧོཏི. ཨུབྷཡཝཱམནསྶ ཨུབྷོཔི ཀཱཡཱ རསྶཱ ཧོནྟི. ཡེསཾ ཀཱཡརསྶཏྟཱ བྷཱུཏཱནཾ ཝིཡ པརིཝཊུམོ མཧཱཀུཙྪིགྷཊསདིསོ ཨཏྟབྷཱཝོ ཧོཏི. ཏཾ ཏིཝིདྷམྤི པབྦཱཛེཏུཾ ན ཝཊྚཏི.

ཕཎཧཏྠཀནྟི ཡསྶ ཝགྒུལིཔཀྑཀཱ ཝིཡ ཨངྒུལིཡོ སམྦདྡྷཱ ཧོནྟི, ཏཾ. ཨེཏཾ པབྦཱཛེཏུཀཱམེན ཨངྒུལནྟརིཀཱཡོ ཕཱལེཏྭཱ སབྦཾ ཨནྟརཙམྨཾ ཨཔནེཏྭཱ ཕཱསུཀཾ ཀཏྭཱ པབྦཱཛེཏབྦོ. ཡསྶཱཔི ཚ ཨངྒུལིཡོ ཧོནྟི, ཏཾ པབྦཱཛེཏུཀཱམེན ཨདྷིཀཾ ཨངྒུལིཾ ཚིནྡིཏྭཱ ཕཱསུཀཾ ཀཏྭཱ པབྦཱཛེཏབྦོ.

ཁཉྫནྟི ཡོ ནཏཛཱཎུཀོ ཝཱ བྷིནྣཛངྒྷོ ཝཱ མཛ྄ཛྷེ སཾཀུཊིཏཔཱདཏྟཱ ཀུཎྜཔཱདཀོ ཝཱ པིཊྛིཔཱདམཛ྄ཛྷེན ཙངྐམནྟོ ཨགྒེ སཾཀུཊིཏཔཱདཏྟཱ ཀུཎྜཔཱདཀོ ཝཱ པིཊྛིཔཱདགྒེན ཙངྐམནྟོ ཨགྒཔཱདེནེཝ ཙངྐམནཁཉྫོ ཝཱ པཎྷིཀཱཡ ཙངྐམནཁཉྫོ ཝཱ པཱདསྶ བཱཧིརནྟེན ཙངྐམནཁཉྫོ ཝཱ པཱདསྶ ཨབྦྷནྟརནྟེན ཙངྐམནཁཉྫོ ཝཱ གོཔྥཀཱནཾ ཨུཔརི བྷགྒཏྟཱ སཀལེན ¶ པིཊྛིཔཱདེན ཙངྐམནཁཉྫོ ཝཱ, ཏཾ པབྦཱཛེཏུཾ ན ཝཊྚཏི. ཨེཏྠ ནཏཛཱཎུཀོཏི ཨནྟོཔཝིཊྛཨཱནཏཔཱདོ. པཀྑཧཏནྟི ཡསྶ ཨེཀོ ཧཏྠོ ཝཱ པཱདོ ཝཱ ཨཌྜྷསརཱིརཾ ཝཱ སུཁཾ ན ཝཧཏི.

སཱིཔདིནྟི བྷཱརཔཱདཾ. ཡསྶ པཱདོ ཐཱུལོ ཧོཏི སཉྫཱཏཔཱིལ༹ཀོ ཁརོ, སོ ན པབྦཱཛེཏབྦོ. ཡསྶ པན ན ཏཱཝ ཁརབྷཱཝཾ གཎྷཱཏི, སཀྐཱ ཧོཏི ཨུཔནཱཧཾ བནྡྷིཏྭཱ ཨུདཀཨཱཝཱཊེ པཝེསེཏྭཱ ཨུདཀཝཱལིཀཱཡ པཱུརེཏྭཱ ¶ ཡཐཱ སིརཱ པཉྙཱཡནྟི, ཛངྒྷཱ ཙ ཏེལནཱལི༹ཀཱ ཝིཡ ཧོནྟི, ཨེཝཾ མིལཱཔེཏུཾ སཀྐཱ, ཏསྶ པཱདཾ ཨཱིདིསཾ ཀཏྭཱ ཏཾ པབྦཱཛེཏུཾ ཝཊྚཏི. སཙེ པུན ཝཌྜྷཏི, ཨུཔསམྤཱདེནྟེནཱཔི ཏཐཱ ཀཏྭཱཝ ཨུཔསམྤཱདེཏབྦོ. པཱཔརོགིནནྟི ཡོ ཨརིསབྷགནྡརཔིཏྟསེམྷཀཱསསོསཱདཱིསུ ཡེན ཀེནཙི རོགེན ནིཙྩཱཏུརོ ཨཏེཀིཙྪརོགོ ཛེགུཙྪོ ཨམནཱཔོ, ཏཾ.

༢༤༨༨. ཛརཱཡ དུབྦལནྟི ཡོ ཛིཎྞབྷཱཝེན དུབྦལོ ཨཏྟནོ ཙཱིཝརརཛནཱདིཀམྨམྤི ཀཱཏུཾ ཨསམཏྠོ, ཏཾ. ཡོ པན མཧལླཀོཔི བལཝཱ ཧོཏི ཨཏྟཱནཾ པཊིཛགྒིཏུཾ སཀྐོཏི, སོ པབྦཱཛེཏབྦོ. ཨནྡྷནྟི ཛཙྩནྡྷཾ. པདྷིརཉྩེཝཱཏི ཡོ སབྦེན སབྦཾ ན སུཎཱཏི, ཏཾ. ཡོ པན མཧཱསདྡཾ སུཎཱཏི, ཏཾ པབྦཱཛེཏུཾ ཝཊྚཏི. མམྨནནྟི ཡསྶ ཝཙཱིབྷེདོ ཝཏྟཏི, སརཎགམནཾ པརིཔུཎྞཾ བྷཱསིཏུཾ ན སཀྐོཏི, ཏཱདིསཾ མམྨནམྤི པབྦཱཛེཏུཾ ན ཝཊྚཏི. ཡོ པན སརཎགམནམཏྟཾ པརིཔུཎྞཾ བྷཱསིཏུཾ སཀྐོཏི, ཏཾ པབྦཱཛེཏུཾ ཝཊྚཏི. ཨཐ ཝཱ མམྨནནྟི ཁལིཏཝཙནཾ, ཡོ ཨེཀམེཝ ཨཀྑརཾ ཙཏུཔཉྩཀྑཏྟུཾ ཝདཏི, ཏསྶེཏམདྷིཝཙནཾ. པཱིཋསཔྤིནྟི ཚིནྣིརིཡཱཔཐཾ. མཱུགནྟི ཡསྶ ཝཙཱིབྷེདོ ནཔྤཝཏྟཏི.

༢༤༨༩. ཨཏྟནོ ཝིརཱུཔབྷཱཝེན པརིསཾ དཱུསེནྟེན པརིསདཱུསཀེ (མཧཱཝ. ཨཊྛ. ༡༡༩) དསྶེཏུམཱཧ ‘‘ཨཏིདཱིགྷོ’’ཏིཨཱདི. ཨཏིདཱིགྷོཏི ཨཉྙེསཾ སཱིསཔྤམཱཎནཱབྷིཔྤདེསོ. ཨཏིརསྶོཏི ཝུཏྟཔྤཀཱརོ ཨུབྷཡཝཱམནོ ཝིཡ ཨཏིརསྶོ. ཨཏིཀཱལོ༹ ཝཱཏི ཛྷཱཔིཏཁེཏྟེ ཁཱཎུཀོ ཝིཡ ཨཏིཀཱལ༹ཝཎྞོ. མཊྛཏམྦལོཧནིདསྶནོ ཨཙྩོདཱཏོཔི ཝཱཏི སམྦནྡྷོ, དདྷིཏཀྐཱདཱིཧི མཛྫིཏམཊྛཏམྦལོཧཝཎྞོ ཨཏཱིཝ ཨོདཱཏསརཱིརོཏི ཨཏྠོ.

༢༤༩༠. ཨཏིཐཱུལོ ¶ ཝཱཏི བྷཱརིཡམཾསོ མཧོདརོ མཧཱབྷཱུཏསདིསོ. ཨཏིཀིསོཏི མནྡམཾསལོཧིཏོ ¶ ཨཊྛིསིརཱཙམྨསརཱིརོ ཝིཡ. ཨཏིམཧཱསཱིསོ ཝཱཏི ཡོཛནཱ. ཨཏིམཧཱསཱིསོ ཝཱཏི པཙྪིཾ སཱིསེ ཀཏྭཱ ཋིཏོ ཝིཡ. ‘‘ཨཏིཁུདྡཀསཱིསེན ཨསཧིཏེནཱ’’ཏི པདཙྪེདོ. ཨསཧིཏེནཱཏི སརཱིརསྶ ཨནནུརཱུཔེན. ‘‘ཨཏིཁུདྡཀསཱིསེནཱ’’ཏི ཨེཏསྶ ཝིསེསནཾ. ཨསཧིཏེན ཨཏིཁུདྡཀསཱིསེན སམནྣཱགཏོཏི ཡོཛནཱ. ཡཐཱཧ – ‘‘ཨཏིཁུདྡཀསཱིསོ ཝཱ སརཱིརསྶ ཨནནུརཱུཔེན ཨཏིཁུདྡཀེན སཱིསེན སམནྣཱགཏོ’’ཏི.

༢༤༩༡. ཀུཊཀུཊཀསཱིསོཏི ཏཱལཕལཔིཎྜིསདིསེན སཱིསེན སམནྣཱགཏོ. སིཁརསཱིསཀོཏི ཨུདྡྷཾ ཨནུཔུབྦཏནུཀེན སཱིསེན སམནྣཱགཏོ, མཏྠཀཏོ སཾཀུཊིཀོ མཱུལཏོ ཝིཏྠཏོ ཧུཏྭཱ ཋིཏཔབྦཏསིཁརསདིསསཱིསོཏི ཨཏྠོ. ཝེལུ༹ནཱལི༹སམཱནེནཱཏི མཧཱཝེལུ༹པབྦསདིསེན. སཱིསེནཱཏི དཱིགྷསཱིསེན. ཡཐཱཧ – ‘‘ནཱལི༹སཱིསོ ཝཱ མཧཱཝེལུ༹པབྦསདིསེན སཱིསེན སམནྣཱགཏོ’’ཏི (མཧཱཝ. ཨཊྛ. ༡༡༩).

༢༤༩༢. ཀཔྤསཱིསོཔཱིཏི མཛ྄ཛྷེ དིསྶམཱནཨཱཝཱཊེན ཧཏྠིཀུམྦྷསདིསེན དྭིདྷཱབྷཱུཏསཱིསེན སམནྣཱགཏོ. པབྦྷཱརསཱིསོ ཝཱཏི ཙཏཱུསུ པསྶེསུ ཡེན ཀེནཙི པསྶེན ཨོཎཏེན སཱིསེན སམནྣཱགཏོ. ཝཎསཱིསཀོཏི ཝཎེཧི སམནྣཱགཏསཱིསོ. ཀཎྞིཀཀེསོ ཝཱཏི པཱཎཀེཧི ཁཱཡིཏཀེདཱརེ སསྶསདིསེཧི ཏཧིཾ ཏཧིཾ ཨུཊྛིཏེཧི ཀེསེཧི སམནྣཱགཏོ. ཐཱུལཀེསོཔི ཝཱཏི ཏཱལཧཱིརསདིསེཧི ཀེསེཧི སམནྣཱགཏོ.

༢༤༩༣. པཱུཏིསཱིསོཏི ¶ དུགྒནྡྷསཱིསོ. ནིལློམསཱིསོ ཝཱཏི ལོམརཧིཏསཱིསོ. ཛཱཏིཔཎྜརཀེསཀོཏི ཛཱཏིཕལིཏེཧི པཎྜརཀེསོ ཝཱ. ཛཱཏིཡཱ ཏམྦཀེསོ ཝཱཏི ཨཱདིཏྟེཧི ཝིཡ ཏམྦཝཎྞེཧི ཀེསེཧི སམནྣཱགཏོ. ཨཱཝཊྚསཱིསཀོཏི གུནྣཾ སརཱིརེ ཨཱཝཊྚསདིསེཧི ཨུདྡྷགྒེཧི ཀེསཱཝཊྚེཧི སམནྣཱགཏོ.

༢༤༩༤. སཱིསལོམེཀབདྡྷེཧི བྷམུཀེཧི ཡུཏོཔཱིཏི སཱིསལོམེཧི སདྡྷིཾ ཨེཀཱབདྡྷལོམེཧི བྷམུཀེཧི སམནྣཱགཏོ. སམྦདྡྷབྷམུཀོ ཝཱཏི ཨེཀཱབདྡྷཨུབྷཡབྷམུཀོ, མཛ྄ཛྷེ སཉྫཱཏལོམེཧི བྷམུཀེཧི སམནྣཱགཏོཏི ཨཏྠོ. ནིལློམབྷམུཀོཔི ཝཱཏི བྷམུལོམརཧིཏོ. ནིལློམབྷམུཀོཔི ཝཱཏི པི-སདྡེན ཨཝུཏྟསམུཙྩཡཏྠེན མཀྐཊབྷམུཀོ སངྒཧིཏོ.

༢༤༩༥. མཧནྟཁུདྡནེཏྟོ ¶ ཝཱཏི ཨེཏྠ ནེཏྟ-སདྡོ མཧནྟཁུདྡ-སདྡེཧི པཙྩེཀཾ ཡོཛེཏབྦོ, མཧནྟནེཏྟོ ཝཱ ཁུདྡཀནེཏྟོ ཝཱཏི ཨཏྠོ. མཧནྟནེཏྟོ ཝཱཏི ཨཏིམཧནྟེཧི ནེཏྟེཧི སམནྣཱགཏོ. ཁུདྡཀནེཏྟོ ཝཱཏི མཧིཾསཙམྨེ ཝཱསིཀོཎེན པཧརིཏྭཱ ཀཏཚིདྡསདིསེཧི ཨཏིཁུདྡཀཀྑཱིཧི སམནྣཱགཏོ. ཝིསམལོཙནོཏི ཨེཀེན མཧནྟེན, ཨེཀེན ཁུདྡཀེན ཨཀྑིནཱ སམནྣཱགཏོ. ཀེཀརོ ཝཱཔཱིཏི ཏིརིཡཾ པསྶནྟོ. ཨེཏྠ ཨཔི-སདྡེན ནིཀྑནྟཀྑིཾ སམྤིཎྜེཏི, ཡསྶ ཀཀྐཊཀསྶེཝ ཨཀྑིཏཱརཀཱ ནིཀྑནྟཱ ཧོནྟི. གམྦྷཱིརནེཏྟོཏི ཡསྶ གམྦྷཱིརེ ཨུདཔཱནེ ཨུདཀཏཱརཀཱ ཝིཡ ཨཀྑིཏཱརཀཱ པཉྙཱཡནྟི. ཨེཏྠ ཙ ཨུདཀཏཱརཀཱ ནཱམ ཨུདཀཔུབྦུལ༹ཾ. ཨཀྑིཏཱརཀཱཏི ཨཀྑིགེཎྜཀཱ. ཝིསམཙཀྐལོཏི ཨེཀེན ཨུདྡྷཾ, ཨེཀེན ཨདྷོཏི ཨེཝཾ ཝིསམཛཱཏེཧི ཨཀྑིཙཀྐེཧི སམནྣཱགཏོ.

༢༤༩༦. ཛཏུཀཎྞོ ¶ ཝཱཏི ཨཏིཁུདྡིཀཱཧི ཀཎྞསཀྑལཱིཧི སམནྣཱགཏོ. མཱུསིཀཀཎྞོ ཝཱཏི མཱུསིཀཱནཾ ཀཎྞསདིསེཧི ཀཎྞེཧི སམནྣཱགཏོ. ཧཏྠིཀཎྞོཔི ཝཱཏི ཨནནུརཱུཔཱཧི མཧནྟཱཧི ཧཏྠིཀཎྞསདིསཱཧི ཀཎྞསཀྑལཱིཧི སམནྣཱགཏོ. ཚིདྡམཏྟཀཀཎྞོ ཝཱཏི ཡསྶ ཝིནཱ ཀཎྞསཀྑལཱིཧི ཀཎྞཙྪིདྡམེཝ ཧོཏི. ཨཝིདྡྷཀཎྞཀོཏི ཀཎྞབནྡྷཏྠཱཡ ཨཝིདྡྷེན ཀཎྞེན སམནྣཱགཏོ.

༢༤༩༧. ཊངྐིཏཀཎྞོ ཝཱཏི གོབྷཏྟནཱལི༹ཀཱཡ ཨགྒསདིསེཧི ཀཎྞེཧི སམནྣཱགཏོ, གོཧནུཀོཊིསཎྛཱནེཧི ཀཎྞེཧི སམནྣཱགཏོཏི ཨཏྠོ. པཱུཏིཀཎྞོཔི ཝཱཏི སདཱ པགྒྷརིཏཔུབྦེན ཀཎྞེན སམནྣཱགཏོ. པཱུཏིཀཎྞོཔཱིཏི ཨཔི-སདྡེན ཀཎྞབྷགནྡརིཀོ གཧིཏོ. ཀཎྞབྷགནྡརིཀོཏི ནིཙྩཔཱུཏིནཱ ཀཎྞེན སམནྣཱགཏོ. ཨཝིདྡྷཀཎྞོ པརིསདཱུསཀོ ཝུཏྟོ, ཀཐཾ ཡོནཀཛཱཏཱིནཾ པབྦཛྫཱཏི ཨཱཧ ‘‘ཡོནཀཱདིཔྤབྷེདོཔི, ནཱཡཾ པརིསདཱུསཀོ’’ཏི, ཀཎྞཱཝེདྷནཾ ཡོནཀཱནཾ སབྷཱཝོ, ཨཡཾ ཡོནཀཱདིཔྤབྷེདོ པརིསདཱུསཀོ ན ཧོཏཱིཏི ཝུཏྟཾ ཧོཏི.

༢༤༩༨. ཨཏིཔིངྒལནེཏྟོཏི ¶ ཨཏིསཡེན པིངྒལེཧི ནེཏྟེཧི སམནྣཱགཏོ. མདྷུཔིངྒལཾ པན པབྦཱཛེཏུཾ ཝཊྚཏི. ནིཔྤཁུམཀྑི ཝཱཏི ཨཀྑིདལརོམེཧི ཝིརཧིཏཨཀྑིཀོ. པཁུམ-སདྡོ ཧི ལོཀེ ཨཀྑིདལརོམེསུ ནིརུལ༹ྷོ. ཨསྶུཔགྒྷརནེཏྟོ ཝཱཏི པགྒྷརཎསྶཱུཧི ནེཏྟེཧི སམནྣཱགཏོ. པཀྐཔུཔྥིཏལོཙནོཏི པཀྐལོཙནོ པུཔྥིཏལོཙནོཏི ཡོཛནཱ. པརིཔཀྐནེཏྟོ སཉྫཱཏཔུཔྥནེཏྟོཏི ཨཏྠོ.

༢༤༩༩. མཧཱནཱསོཏི སརཱིརསྶ ཨནནུརཱུཔཱཡ མཧཏིཡཱ ནཱསཱཡ སམནྣཱགཏོ. ཨཏིཁུདྡཀནཱསིཀོཏི ཏཐཱ ¶ ཨཏིཁུདྡིཀཱཡ ནཱསཱཡ སམནྣཱགཏོ. ཙིཔིཊནཱསོ ཝཱཏི ཙིཔིཊཱཡ ཨནྟོ པཝིཊྛཱཡ ཝིཡ ཨལླིནཱསཱཡ སམནྣཱགཏོ. ཙིཔིཊནཱསོ ཝཱཏི ཨཝུཏྟཝིཀཔྤཏྠེན ཝཱ-སདྡེན དཱིགྷནཱསིཀོ སངྒཡ྄ཧཏི. སོ ཙ སུཀཏུཎྜསདིསཱཡ ཛིཝ྄ཧཱཡ ལེཧིཏུཾ སཀྐུཎེཡྻཱཡ ནཱསིཀཱཡ སམནྣཱགཏོ. ཀུཊིལནཱསིཀོཏི མུཁམཛ྄ཛྷེ ཨཔྤཏིཊྛཧིཏྭཱ ཨེཀཔསྶེ ཋིཏནཱསིཀོ.

༢༥༠༠. ནིཙྩཝིསྶཝནཱསོ ཝཱཏི ནིཙྩཔགྒྷརིཏསིངྒྷཱཎིཀནཱསོ ཝཱ. མཧཱམུཁོཏི ཡསྶ པཊངྒམཎྜུཀསྶེཝ མུཁནིམིཏྟཾཡེཝ མཧནྟཾ ཧོཏི, མུཁཾ པན ལཱབུསདིསཾ ཨཏིཁུདྡཀཾ. པཊངྒམཎྜུཀོ ནཱམ མཧཱམུཁམཎྜུཀོ. ཝངྐབྷིནྣམུཁོ ཝཱཔཱིཏི ཨེཏྠ ‘‘ཝངྐམུཁོ ཝཱ བྷིནྣམུཁོ ཝཱཔཱི’’ཏི ཡོཛནཱ. ཝངྐམུཁོཏི བྷམུཀསྶ, ནལཱཏསྶ ཝཱ ཨེཀཔསྶེ ནིནྣཏཱཡ ཝངྐམུཁོ. བྷིནྣམུཁོ ཝཱཏི མཀྐཊསྶེཝ བྷིནྣམུཁོ. མཧཱཨོཊྛོཔི ཝཱཏི ཨུཀྑལིམུཁཝཊྚིསདིསེཧི ཨོཊྛེཧི སམནྣཱགཏོ.

༢༥༠༡. ཏནུཀཨོཊྛོ ཝཱཏི བྷེརིཙམྨསདིསེཧི དནྟེ པིདཧིཏུཾ ཨསམཏྠེཧི ཨོཊྛེཧི སམནྣཱགཏོ. བྷེརིཙམྨསདིསེཧཱིཏི བྷེརིམུཁཙམྨསདིསེཧི. ཏནུཀཨོཊྛོ ཝཱཏི ཨེཏྠ ཝཱ-སདྡེན མཧཱདྷརོཊྛོ ཝཱ ཏནུཀཨུཏྟརོཊྛོ ཝཱ ཏནུཀཨདྷརོཊྛོ ཝཱཏི ཏཡོ ཝིཀཔྤཱ སངྒཧིཏཱ. ཝིཔུལུཏྟརཨོཊྛཀོཏི མཧཱཨུཏྟརོཊྛོ. ཨོཊྛཚིནྣོཏི ཡསྶ ཨེཀོ ཝཱ དྭེ ཝཱ ཨོཊྛཱ ཚིནྣཱ ཧོནྟི. ཨུཔྤཀྐམུཁོཏི པཀྐམུཁོ. ཨེལ༹མུཁོཔི ཝཱཏི ནིཙྩཔགྒྷརཎམུཁོ.

༢༥༠༢-༣. སངྑཏུཎྜོཔཱིཏི བཧི སེཏེཧི ཨནྟོ ཨཏིརཏྟེཧི ཨོཊྛེཧི སམནྣཱགཏོ. དུགྒནྡྷམུཁོཏི དུགྒནྡྷཀུཎཔམུཁོ. མཧཱདནྟོཔཱིཏི ཨཊྛཀདནྟསདིསེཧི སམནྣཱགཏོ ¶ . ཨཙྩནྟནྟི ཨཏིསཡེན. ‘‘ཧེཊྛཱ ཨུཔརིཏོ ཝཱཔི, བཧི ནིཀྑནྟདནྟཀོ’’ཏི ཨིདཾ ‘‘ཨསུརདནྟཀོ’’ཏི ཨེཏསྶ ཨཏྠཔདཾ. ཨསུརོཏི དཱནཝོ. ‘‘སིཔྤིདནྟོ ཝཱ ཨོཊྛདནྟོ ཝཱ’’ཏི གཎྛིཔདེ ལིཁིཏོ. ཡསྶ པན སཀྐཱ ཧོནྟི ཨོཊྛེཧི པིདཧིཏུཾ, ཀཐེནྟསྶེཝ པཉྙཱཡཏི, ནོ ཨཀཐེནྟསྶ, ཏཾ པབྦཱཛེཏུཾ ཝཊྚཏི. ཨདནྟོཏི དནྟརཧིཏོ. པཱུཏིདནྟོཏི པཱུཏིབྷཱུཏེཧི དནྟེཧི སམནྣཱགཏོ.

༢༥༠༤. ‘‘ཨཏིཁུདྡཀདནྟཀོ’’ཏི ཨིམསྶ ‘‘ཡསྶཱ’’ཏིཨཱདི ཨཔཝཱདོ. ཡསྶ དནྟནྟརེ ཀཱལ༹ཀདནྟསནྣིབྷོ ¶ ཀལནྡཀདནྟསདིསོ དནྟོ སུཁུམོཝ ཋིཏོ ཙེ, ཏཾ ཏུ པབྦཱཛེཏུཾ ཝཊྚཏཱིཏི ཡོཛནཱ. པབྦཱཛེཏུམྤཱིཏི ཨེཏྠ པི-སདྡོ ཏུ-སདྡཏྠོ.

༢༥༠༥. ཡོ པོསོཏི སམྦནྡྷོ. མཧཱཧནུཀོཏི གོཧནུསདིསེན ཧནུནཱ སམནྣཱགཏོ. ‘‘རསྶེན ཧནུནཱ ཡུཏོ’’ཏི ཨིདཾ ‘‘ཙིཔིཊཧནུཀོ ཝཱ’’ཏི ཨིམསྶ ཨཏྠཔདཾ. ཡཐཱཧ – ‘‘ཙིཔིཊཧནུཀོ ཝཱ ཨནྟོཔཝིཊྛེན ཝིཡ ཨཏིརསྶེན ཧནུཀེན སམནྣཱགཏོ’’ཏི (མཧཱཝ. ཨཊྛ. ༡༡༩). ཙིཔིཊཧནུཀོ ཝཱཔཱིཏི ཨེཏྠ པི-སདྡེན ‘‘བྷིནྣཧནུཀོ ཝཱ ཝངྐཧནུཀོ ཝཱ’’ཏི ཝིཀཔྤདྭཡཾ སངྒཎྷཱཏི.

༢༥༠༦. ནིམྨསྶུདཱཋིཀོ ཝཱཔཱིཏི བྷིཀྑུནིསདིསམུཁོ. ཨཏིདཱིགྷགལོཔི ཝཱཏི བཀགལསདིསེན གལེན སམནྣཱགཏོ. ཨཏིརསྶགལོཔི ཝཱཏི ཨནྟོཔཝིཊྛེན ཝིཡ གལེན སམནྣཱགཏོ. བྷིནྣགལོ ཝཱ གཎྜགལོཔི ཝཱཏི ཡོཛནཱ, བྷིནྣགལཊྛིཀོ ཝཱ གཎྜེན སམནྣཱགཏགལོཔི ཝཱཏི ཨཏྠོ.

༢༥༠༧. བྷཊྛཾསཀཱུཊོ ¶ ཝཱཏི མཱཏུགཱམསྶ ཝིཡ བྷཊྛེན ཨཾསཀཱུཊེན སམནྣཱགཏོ. བྷིནྣཔིཊྛི ཝཱ བྷིནྣཨུརོཔི ཝཱཏི ཡོཛནཱ, སུདཱིགྷཧཏྠོ ཝཱ སུརསྶཧཏྠོ ཝཱཏི ཡོཛནཱ, ཨཏིདཱིགྷཧཏྠོ ཝཱ ཨཏིརསྶཧཏྠོ ཝཱཏི ཨཏྠོ. ཝཱ-སདྡེན ཨཧཏྠཨེཀཧཏྠཱནཾ གཧཎཾ. ཀཙྪུསམཱཡུཏོ ཝཱ ཀཎྜུསམཱཡུཏོ ཝཱཏི ཡོཛནཱ. ཝཱ-སདྡེན ‘‘དདྡུགཏྟོ ཝཱ གོདྷཱགཏྟོ ཝཱ’’ཏི ཨིམེ དྭེ སངྒཎྷཱཏི. ཏཏྠ གོདྷཱགཏྟོ ཝཱཏི ཡསྶ གོདྷཱཡ ཝིཡ གཏྟཏོ ཙུཎྞཱནི པཏནྟི.

༢༥༠༨. མཧཱནིསདམཾསོཏི ཨིམསྶ ཨཏྠཔདཾ ‘‘ཨུདྡྷནགྒུཔམཱཡུཏོ’’ཏི. ཡཐཱཧ – ‘‘མཧཱཨཱནིསདོ ཝཱ ཨུདྡྷནཀཱུཊསདིསེཧི ཨཱནིསདམཾསེཧི ཨཙྩུགྒཏེཧི སམནྣཱགཏོ’’ཏི (མཧཱཝ. ཨཊྛ. ༡༡༩). མཧཱནིསདམཾསོ ཝཱཏི ཨེཏྠ ཝཱ-སདྡེན བྷཊྛཀཊིཀོ སངྒཧིཏོ. ཝཱཏཎྜིཀོཏི ཨཎྜཀོསེསུ ཝུདྡྷིརོགེན སམནྣཱགཏོ. མཧཱཨཱུརཱུཏི སརཱིརསྶ ཨནནུརཱུཔེཧི མཧནྟེཧི སཏྟཱིཧི སམནྣཱགཏོ. སངྒྷཊྚནཀཛཱཎུཀོཏི ཨཉྙམཉྙཾ སངྒྷཊྚེཧི ཛཱཎཱུཧི སམནྣཱགཏོ.

༢༥༠༩. བྷིནྣཛཱཎཱུཏི ཡསྶ ཨེཀོ ཝཱ དྭེ ཝཱ ཛཱཎཱུ བྷིནྣཱ ཧོནྟི. མཧཱཛཱཎཱུཏི མཧནྟེན ¶ ཛཱཎུནཱ སམནྣཱགཏོ. དཱིགྷཛངྒྷོཏི ཡཊྛིསདིསཛངྒྷོ. ཝིཀཊོ ཝཱཏི ཏིརིཡཾ གམནཔཱདེཧི སམནྣཱགཏོ, ཡསྶ ཙངྐམཏོ ཛཱཎུཀཱ བཧི ནིགྒཙྪནྟི. པཎྷོ ཝཱཏི པཙྪཏོ པརིཝཏྟཔཱདེཧི སམནྣཱགཏོ, ཡསྶ ཙངྐམཏོ ཛཱཎུཀཱ ཨནྟོ པཝིསནྟི. ‘‘པནྟོ’’ཏི ཙ ‘‘སཎྷོ’’ཏི ཙ ཨེཏསྶེཝ ཝེཝཙནཱནི. ཨུབྦདྡྷཔིཎྜིཀོཏི ཧེཊྛཱ ཨོརུལ༹ྷཱཧི ཝཱ ཨུཔརི ཨཱརུལ༹ྷཱཧི ཝཱ མཧཏཱིཧི ཛངྒྷཔིཎྜིཀཱཧི སམནྣཱགཏོ.

༢༥༡༠. ཡཊྛིཛངྒྷོཏི ¶ ཡཊྛིསདིསཱཡ ཛངྒྷཱཡ སམནྣཱགཏོ. མཧཱཛངྒྷོཏི སརཱིརསྶ ཨནནུརཱུཔཱཡ མཧཏིཡཱ ཛངྒྷཱཡ སམནྣཱགཏོ. མཧཱཔཱདོཔི ཝཱཏི སརཱིརསྶ ཨནནུརཱུཔེཧི མཧནྟེཧི པཱདེཧི སམནྣཱགཏོ. ཨཔི-སདྡེན ཐཱུལཛངྒྷཔིཎྜིཀོ སངྒཧིཏོ, བྷཏྟཔུཊསདིསཱཡ ཐཱུལཱཡ ཛངྒྷཔིཎྜིཡཱ སམནྣཱགཏོཏི ཨཏྠོ. པིཊྛིཀཔཱདོ ཝཱཏི པཱདཝེམཛ྄ཛྷཏོ ཨུཊྛིཏཛངྒྷོ. མཧཱཔཎྷིཔི ཝཱཏི ཨནནུརཱུཔེཧི ཨཏིམཧནྟེཧི པཎྷཱིཧི སམནྣཱགཏོ.

༢༥༡༡. ཝངྐཔཱདོཏི ཨནྟོ ཝཱ བཧི ཝཱ པརིཝཏྟཔཱདཝསེན དུཝིདྷོ ཝངྐཔཱདོ. གཎྛིཀངྒུལིཀོཏི སིངྒིཝེརཕཎསདིསཱཧི ཨངྒུལཱིཧི སམནྣཱགཏོ. ‘‘ཨནྡྷནཁོ ཝཱཔཱི’’ཏི ཨེཏསྶ ཨཏྠཔདཾ ‘‘ཀཱལ༹པཱུཏིནཁོཔི ཙཱ’’ཏི. ཡཐཱཧ – ‘‘ཨནྡྷནཁོ ཝཱ ཀཱལ༹ཝཎྞེཧི པཱུཏིནཁེཧི སམནྣཱགཏོ’’ཏི (མཧཱཝ. ཨཊྛ. ༡༡༩).

༢༥༡༢. ཨིཙྩེཝནྟི ཡཐཱཝུཏྟཝཙནཱིཡནིདསྶནཏྠོཡཾ ནིཔཱཏསམུདཱཡོ. ཨངྒཝེཀལླཏཱཡ བཧུཝིདྷཏྟཱ ཨནཝསེསཾ ཝེཀལླཔྤཀཱརཾ སངྒཎྷིཏུམཱཧ ‘‘ཨིཙྩེཝམཱདིཀ’’ནྟི.

པརིསདཱུསཀཀཐཱཝཎྞནཱ.

༢༥༡༤. པཏྟཙཱིཝརནྟི ཨེཏྠ ‘‘སཱམཎེརསྶཱ’’ཏི ཨདྷིཀཱརཏོ ལབྦྷཏི. ཨནྟོ ནིཀྑིཔཏོཏི ཨོཝརཀཱདཱིནཾ ཨནྟོ ནིཀྑིཔནྟསྶ. སབྦཔཡོགེསཱུཏི པཏྟཙཱིཝརསྶ ཨཱམསནཱདིསབྦཔཡོགེསུ.

༢༥༡༥-༦. དཎྜཀམྨཾ ཀཏྭཱཏི དཎྜཀམྨཾ ཡོཛེཏྭཱ. དཎྜེནྟི ཝིནེནྟི ཨེཏེནཱཏི དཎྜོ, སོཡེཝ ཀཏྟབྦཏྟཱ ཀམྨནྟི ¶ དཎྜཀམྨཾ, ཨཱཝརཎཱདི. ཨནཱཙཱརསྶ དུབྦཙསཱམཎེརསྶ ཀེཝལཾ ¶ ཧིཏཀཱམེན བྷིཀྑུནཱ དཎྜཀམྨཾ ཀཏྭཱ དཎྜཀམྨཾ ཡོཛེཏྭཱ ཡཱགུཾ ཝཱ བྷཏྟཾ ཝཱ ཝཱ-སདྡེན པཏྟཾ ཝཱ ཙཱིཝརཾ ཝཱ དསྶེཏྭཱ ‘‘དཎྜཀམྨེ ཨཱཧཊེ ཏྭཾ ཨིདཾ ལཙྪསི’’ ཨིཏི བྷཱསིཏུཾ ཝཊྚཏཱིཏི ཡོཛནཱ. ཀིརཱཏི པདཔཱུརཎཏྠེ ནིཔཱཏོ.

༢༥༡༧. དྷམྨསངྒཱཧཀཏྠེརེཧི ཋཔིཏདཎྜཀམྨཾ དསྶེཏུམཱཧ ‘‘ཨཔརཱདྷཱནུརཱུཔེནཱ’’ཏིཨཱདི. ཏཾ ཨཔརཱདྷཱནུརཱུཔདཎྜཀམྨཾ ནཱམ ཝཱལིཀཱསལིལཱདཱིནཾ ཨཱཧརཱཔནམེཝཱཏི ཡོཛེཏབྦཾ. ཨཱདི-སདྡེན དཱརུཨཱདཱིནཾ ཨཱཧརཱཔནཾ གཎྷཱཏི. ཏཉྩ ཁོ ‘‘ཨོརམིསྶཏཱི’’ཏི ཨནུཀམྤཱཡ, ན ‘‘ནསྶིསྶཏི ཝིབྦྷམིསྶཏཱི’’ཏིཨཱདིནཡཔྤཝཏྟེན པཱཔཛ྄ཛྷཱསཡེན.

༢༥༡༨-༩. ཨཀཏྟབྦཾ དཎྜཀམྨཾ དསྶེཏུམཱཧ ‘‘སཱིསེ ཝཱ’’ཏིཨཱདི. སཱིསེ ཝཱཏི ཨེཏྠ ‘‘སཱམཎེརསྶཱ’’ཏི ཨདྷིཀཱརཏོ ལབྦྷཏི. པཱསཱཎཱདཱིནཱིཏི ཨེཏྠ ཨཱདི-སདྡེན ཨིཊྛཀཱདཱིནཾ གཧཎཾ. སཱམཎེརཾ ཨུཎྷེ པཱསཱཎེ ནིཔཛྫཱཔེཏུཾ ཝཱ ཨུཎྷཱཡ བྷཱུམིཡཱ ནིཔཛྫཱཔེཏུཾ ཝཱ ཨུདཀཾ པཝེསེཏུཾ ཝཱ བྷིཀྑུནོ ན ཝཊྚཏཱིཏི ཡོཛནཱ.

བྷགཝཏཱ ཨནུཉྙཱཏདཎྜཀམྨཾ དསྶེཏུམཱཧ ‘‘ཨིདྷཱ’’ཏིཨཱདི. ཨིདྷཱཏི ཨིམསྨིཾ དཎྜཀམྨཱདྷིཀཱརེ. ཨཱཝརཎམཏྟནྟི ‘‘མཱ ཨིདྷ པཱཝིསཱི’’ཏི ནིཝཱརཎམཏྟཾ. པཀཱསིཏནྟི ‘‘ཨནུཛཱནཱམི, བྷིཀྑཝེ, ཡཏྠ ཝཱ ཝསཏི, ཡཏྠ ཝཱ པཊིཀྐམཏི, ཏཏྠ ཨཱཝརཎཾ ཀཱཏུ’’ནྟི (མཧཱཝ. ༡༠༧) བྷཱསིཏཾ.

‘‘ཡཏྠ ཝཱ ཝསཏི, ཡཏྠ ཝཱ པཊིཀྐམཏཱིཏི ཡཏྠ ཝསཏི ཝཱ པཝིསཏི ཝཱ, ཨུབྷཡེནཱཔི ཨཏྟནོ པརིཝེཎཉྩ ཝསྶགྒེན པཏྟསེནཱསནཉྩ ཝུཏྟ’’ནྟི (མཧཱཝ. ཨཊྛ. ༡༠༧) ཨཊྛཀཐཱཡ ཝུཏྟཏྟཱ ཡཱཝ ཡོཛིཏཾ ¶ དཎྜཀམྨཾ ཀརོནྟི, ཏཱཝ ཨཏྟནོ པུགྒལིཀཔརིཝེཎཾ ཝཱ ཝསྶགྒེན པཏྟསེནཱསནཾ ཝཱ པཝིསིཏུཾ ཨདཏྭཱ ནིཝཱརཎཾ ཨཱཝརཎཾ ནཱམ. ཨཊྛཀཐཱཡཾ ‘‘ཨཏྟནོ’’ཏི ཝཙནཾ ཡེ ཨཱཝརཎཾ ཀརོནྟི, ཏེ ཨཱཙརིཡུཔཛ྄ཛྷཱཡེ སནྡྷཱཡ ཝུཏྟནྟི ཝིཉྙཱཡཏི. ཀེཙི པནེཏྠ ‘‘ཨཏྟནོ’’ཏི ཨིདཾ ཡསྶ ཨཱཝརཎཾ ཀརོནྟི, ཏཾ སནྡྷཱཡ ཝུཏྟནྟི གཧེཏྭཱ ཏཏྠ ཝིནིཙྪཡཾ ཝདནྟི. ཀེཙི ཨུབྷཡཐཱཔི ཨཏྠཾ གཧེཏྭཱ ཨུབྷཡཏྠཱཔི ཨཱཝརཎཾ ཀཱཏབྦནྟི ཝདནྟི. ཝཱིམཾསིཏྭཱ ཡམེཏྠ ཡུཏྟཏརཾ, ཏཾ གཧེཏབྦཾ.

ནིཝཱརཎཀཐཱཝཎྞནཱ.

༢༥༢༠. པཀྑོ ¶ ཙ ཨོཔཀྐམིཀོ ཙ ཨཱསིཏྟོ ཙཱཏི ཝིགྒཧོ. ཨེཏྠ ཙ ‘‘ཨནུཔོསཐེ ཨུཔོསཐཾ ཀརོཏཱི’’ཏིཨཱདཱིསུ ཡཐཱ ཨུཔོསཐདིནེ ཀཏྟབྦཀམྨཾ ‘‘ཨུཔོསཐོ’’ཏི ཝུཙྩཏི, ཏཐཱ མཱསསྶ པཀྑེ པཎྜཀབྷཱཝམཱཔཛྫནྟོ ‘‘པཀྑོ’’ཏི ཝུཏྟོ. ཨཐ ཝཱ པཀྑཔཎྜཀོ པཀྑོ ཨུཏྟརཔདལོཔེན ཡཐཱ ‘‘བྷཱིམསེནོ བྷཱིམོ’’ཏི. ཨིདཉྩ པཱཔཱནུབྷཱཝེན ཀཎྷཔཀྑེཡེཝ པཎྜཀབྷཱཝམཱཔཛྫནྟསྶ ཨདྷིཝཙནཾ. ཡཐཱཧ ‘‘ཨཀུསལཝིཔཱཀཱནུབྷཱཝེན ཀཱལ༹པཀྑེ ཀཱལ༹པཀྑེ པཎྜཀོ ཧོཏི, ཛུཎྷཔཀྑེ པནསྶ པརིལཱ༹ཧོ ཝཱུཔསམྨཏི, ཨཡཾ པཀྑཔཎྜཀོ’’ཏི (མཧཱཝ. ཨཊྛ. ༡༠༩).

ཡསྶ ཨུཔཀྐམེན བཱིཛཱནི ཨཔནཱིཏཱནི, ཨཡཾ ཨོཔཀྐམིཀཔཎྜཀོ. ཡསྶ པརེསཾ ཨངྒཛཱཏཾ མུཁེན གཧེཏྭཱ ཨསུཙིནཱ ཨཱསིཏྟསྶ པརིལཱ༹ཧོ ཝཱུཔསམྨཏི, ཨཡཾ ཨཱསིཏྟཔཎྜཀོ. ཨུསཱུཡཀོཏི ཡསྶ པརེསཾ ཨཛ྄ཛྷཱཙཱརཾ པསྶཏོ ཨུསཱུཡཱཡ ཨུཔྤནྣཱཡ པརིལཱ༹ཧོ ཝཱུཔསམྨཏི, ཨཡཾ ཨུསཱུཡཔཎྜཀོ. ཡོ པཊིསནྡྷིཡཾཡེཝ ཨབྷཱཝཀོ ཨུཔྤནྣོ, ཨཡཾ ནཔུཾསཀཔཎྜཀོ.

༢༥༢༡. ཏེསཱུཏི ¶ ཏེསུ པཉྩསུ པཎྜཀེསུ. ‘‘པཀྑཔཎྜཀསྶ ཡསྨིཾཔཀྑེ པཎྜཀོ ཧོཏི, ཏསྨིཾཡེཝསྶ པཀྑེ པབྦཛྫཱ ཝཱརིཏཱ’’ཏི (མཧཱཝ. ཨཊྛ. ༡༠༩) ཀུརུནྡིཡཾ ཝུཏྟཏྟཱ ‘‘ཏིཎྞཾ ནིཝཱརིཏཱ’’ཏི ཨིདཾ ཏསྶ པཎྜཀསྶ པཎྜཀཔཀྑཾ སནྡྷཱཡ ཝུཏྟནྟི གཧེཏབྦཾ.

༢༥༢༢. ‘‘ནཱསེཏབྦོ’’ཏི ཨིདཾ ལིངྒནཱསནཾ སནྡྷཱཡ ཝུཏྟཾ. ཡཐཱཧ ‘‘སོཔི ལིངྒནཱསནེནེཝ ནཱསེཏབྦོ’’ཏི (མཧཱཝ. ཨཊྛ. ༡༠༩). ཨེས ནཡོ ཨུཔརིཔི ཨཱིདིསེསུ ཋཱནེསུ.

པཎྜཀཀཐཱཝཎྞནཱ.

༢༥༢༣. ཐེནེཏཱིཏི ཐེནོ, ལིངྒསྶ པབྦཛིཏཝེསསྶ ཐེནོ ལིངྒཐེནོ. སཾཝཱསསྶ བྷིཀྑུཝསྶགཎནཱདིཀསྶ ཐེནོ སཾཝཱསཐེནོ. ཏདུབྷཡསྶ ཙཱཏི ཏསྶ ལིངྒསྶ, སཾཝཱསསྶ ཙ ཨུབྷཡསྶ ཐེནོཏི སམྦནྡྷོ. ཨེས ཏིཝིདྷོཔི ཐེཡྻསཾཝཱསཀོ ནཱམ པཝུཙྩཏཱིཏི ཡོཛནཱ.

༢༥༢༤-༦. ཏཏྠ ཏེསུ ཏཱིསུ ཐེཡྻསཾཝཱསཀེསུ ཡོ སཡམེཝ པབྦཛིཏྭཱ བྷིཀྑུཝསྶཱནི ན གཎྷཏི, ཡཐཱཝུཌྜྷཾ ཝནྡནམྤི ནེཝ གཎྷཏི, ཨཔི-སདྡེན ཨཱསནེན ནེཝ པཊིབཱཧཏི ཨུཔོསཐཔཝཱརཎཱདཱིསུ ¶ ནེཝ སནྡིསྶཏཱིཏི སངྒཎྷནཏོ ཏདུབྷཡམྤི ན ཀརོཏི, ཨཡཾ ལིངྒམཏྟསྶ པབྦཛིཏཝེསམཏྟསྶ ཐེནཏོ ཙོརིཀཱཡ གཧཎཏོ ལིངྒཏྠེནོ སིཡཱཏི ཡོཛནཱ.

ཡོ ཙ པབྦཛིཏོ ཧུཏྭཱ བྷིཀྑུཝསྶཱནི གཎྷཏི, སོ ཡཐཱཝུཌྜྷཝནྡནཱདིཀཾ སཾཝཱསཾ སཱདིཡནྟོཝ སཾཝཱསཏྠེནཀོ མཏོཏི ཡོཛནཱ. ཡཐཱཧ – ‘‘བྷིཀྑུཝསྶགཎནཱདིཀོ ཧི སབྦོཔི ཀིརིཡབྷེདོ ཨིམསྨིཾ ཨཏྠེ ‘སཾཝཱསོ’ཏི ཝེདིཏབྦོ’’ཏི (མཧཱཝ. ཨཊྛ. ༡༡༠).

ཝུཏྟནཡོཡེཝཱཏི ¶ ཨུབྷིནྣཾ པཙྩེཀཾ ཝུཏྟལཀྑཎམེཝ ཨེཏསྶ ལཀྑཎནྟི ཀཏྭཱ ཝུཏྟཾ. ཨཡཾ ཏིཝིདྷོཔི ཐེཡྻསཾཝཱསཀོ ཨནུཔསམྤནྣོ ན ཨུཔསམྤཱདེཏབྦོ, ཨུཔསམྤནྣོ ནཱསེཏབྦོ, པུན པབྦཛྫཾ ཡཱཙནྟོཔི ན པབྦཱཛེཏབྦོ. བྱཏིརེཀམུཁེན ཐེཡྻསཾཝཱསལཀྑཎཾ ནིཡམེཏུཾ ཨཊྛཀཐཱཡ (མཧཱཝ. ཨཊྛ. ༡༡༠) ཝུཏྟགཱཐཱདྭཡཾ ཨུདཱཧརནྟོ ཨཱཧ ‘‘ཡཐཱཧ ཙཱ’’ཏི. ཡཐཱ ཨཊྛཀཐཱཙརིཡོ རཱཛདུབྦྷིཀྑཱདིགཱཐཱདྭཡམཱཧ, ཏཐཱཡམཏྠོ བྱཏིརེཀཏོ ཝེདིཏབྦོཏི ཨདྷིཔྤཱཡོ.

༢༥༢༧-༨. རཱཛདུབྦྷིཀྑཀནྟཱར-རོགཝེརིབྷཡེཧི ཝཱཏི ཨེཏྠ བྷཡ-སདྡོ པཙྩེཀཾ ཡོཛེཏབྦོ ‘‘རཱཛབྷཡེན དུབྦྷིཀྑབྷཡེནཱ’’ཏིཨཱདིནཱ. ཙཱིཝརཱཧརཎཏྠཾ ཝཱཏི ཨཏྟནཱ པརིཙྩཏྟཙཱིཝརཾ པུན ཝིཧཱརཾ ཨཱཧརཎཏྠཱཡ. ཨིདྷ ཨིམསྨིཾ སཱསནེ. སཾཝཱསཾ ནཱདྷིཝཱསེཏི, ཡཱཝ སོ སུདྡྷམཱནསོཏི རཱཛབྷཡཱདཱིཧི གཧིཏལིངྒཏཱཡ སོ སུདྡྷམཱནསོ ཡཱཝ སཾཝཱསཾ ནཱདྷིཝཱསེཏཱིཏི ཨཏྠོ.

ཡོ ཧི རཱཛབྷཡཱདཱིཧི ཝིནཱ ཀེཝལཾ བྷིཀྑཱུ ཝཉྩེཏྭཱ ཏེཧི སདྡྷིཾ ཝསིཏུཀཱམཏཱཡ ལིངྒཾ གཎྷཱཏི, སོ ཨསུདྡྷཙིཏྟཏཱཡ ལིངྒགྒཧཎེནེཝ ཐེཡྻསཾཝཱསཀོ ནཱམ ཧོཏི. ཨཡཾ པན ཏཱདིསེན ཨསུདྡྷཙིཏྟེན བྷིཀྑཱུ ཝཉྩེཏུཀཱམཏཱཡ ཨབྷཱཝཏོ ཡཱཝ སཾཝཱསཾ ནཱདྷིཝཱསེཏི, ཏཱཝ ཐེཡྻསཾཝཱསཀོ ནཱམ ན ཧོཏི. ཏེནེཝ ‘‘རཱཛབྷཡཱདཱིཧི གཧིཏལིངྒཱནཾ ‘གིཧཱི མཾ སམཎོཏི ཛཱནནྟཱུ’ཏི ཝཉྩནཱཙིཏྟེ སཏིཔི བྷིཀྑཱུནཾ ཝཉྩེཏུཀཱམཏཱཡ ཨབྷཱཝཱ དོསོ ན ཛཱཏོ’’ཏི ཏཱིསུཔི གཎྛིཔདེསུ ཝུཏྟཾ.

ཀེཙི ¶ པན ‘‘ཝཱུཔསནྟབྷཡཏཱ ཨིདྷ སུདྡྷཙིཏྟཏཱ’’ཏི ཝདནྟི, ཨེཝཉྩ སཏི སོ ཝཱུཔསནྟབྷཡོ ཡཱཝ སཾཝཱསཾ ནཱདྷིཝཱསེཏི, ཏཱཝ ཐེཡྻསཾཝཱསཀོ ནཱམ ན ཧོཏཱིཏི ཨཡམཏྠོ ཝིཉྙཱཡཏི. ཨིམསྨིཉྩ ཨཏྠེ ཝིཉྙཱཡམཱནེ ཨཝཱུཔསནྟབྷཡསྶ སཾཝཱསསཱདིཡནེཔི ཐེཡྻསཾཝཱསཀཏཱ ¶ ན ཧོཏཱིཏི ཨཱཔཛྫེཡྻ, ན ཙ ཨཊྛཀཐཱཡཾ ཨཝཱུཔསནྟབྷཡསྶ སཾཝཱསསཱདིཡནེ ཨཐེཡྻསཾཝཱསཀཏཱ དསྶིཏཱ. ‘‘སབྦཔཱསཎྜིཡབྷཏྟཱནི བྷུཉྫནྟོ’’ཏི ཙ ཨིམིནཱ ཨཝཱུཔསནྟབྷཡེནཱཔི སཾཝཱསཾ ཨསཱདིཡནྟེནེཝ ཝསིཏབྦནྟི དཱིཔེཏི. ཏེནེཝ ཏཱིསུཔི གཎྛིཔདེསུ ཝུཏྟཾ ‘‘ཡསྨཱ ཝིཧཱརཾ ཨཱགནྟྭཱ སངྒྷིཀཾ གཎྷནྟསྶ སཾཝཱསཾ པརིཧརིཏུཾ དུཀྐརཾ, ཏསྨཱ ‘སབྦཔཱསཎྜིཡབྷཏྟཱནི བྷུཉྫནྟོ’ཏི ཨིདཾ ཝུཏྟ’’ནྟི. ཏསྨཱ རཱཛབྷཡཱདཱིཧི གཧིཏལིངྒཏཱ ཙེཏྠ སུདྡྷཙིཏྟཏཱཏི གཧེཏབྦཾ.

ཏཱཝ ཨེས ཐེཡྻསཾཝཱསཀོ ནཱམ ན ཝུཙྩཏཱིཏི ཡོཛནཱ. ཨཡམེཏྠ སངྑེཔོ, ཝིཏྠཱརོ པན ‘‘ཏཏྲཱཡཾ ཝིཏྠཱརནཡོ’’ཏི ཨཊྛཀཐཱཡཾ (མཧཱཝ. ཨཊྛ. ༡༡༠) ཨཱགཏནཡེན ཝེདིཏབྦོ.

ཐེཡྻསཾཝཱསཀཀཐཱཝཎྞནཱ.

༢༥༢༩-༣༠. ཡོ ཨུཔསམྤནྣོ བྷིཀྑུ ‘‘ཨཧཾ ཏིཏྠིཡོ བྷཝིསྶ’’ནྟི སལིངྒེནེཝ ཨཏྟནོ བྷིཀྑུཝེསེནེཝ ཏིཏྠིཡཱནཾ ཨུཔསྶཡཾ ཡཱཏི ཙེཏི སམྦནྡྷོ. ཏིཏྠིཡེསུ པཀྐནྟཀོ པཝིཊྛོ ཏིཏྠིཡཔཀྐནྟཀོ. ཏེསཾ ལིངྒེ ནིསྶིཏེཏི ཏེསཾ ཏིཏྠིཡཱནཾ ཝེསེ གཧིཏེ.

༢༥༣༡. ‘‘ཨཧཾ ཏིཏྠིཡོ བྷཝིསྶ’’ནྟི ཀུསཙཱིརཱདིཀཾ ཡོ སཡམེཝ ནིཝཱསེཏི, སོཔི པཀྐནྟཀོ ཏིཏྠིཡཔཀྐནྟཀོ སིཡཱཏི ཡོཛནཱ.

༢༥༣༢-༤. ནགྒོ ¶ ཏེསཾ ཨཱཛཱིཝཀཱདཱིནཾ ཨུཔསྶཡཾ གནྟྭཱཏི ཡོཛནཱ. ཀེསེ ལུཉྩཱཔེཏཱིཏི ཨཏྟནོ ཀེསེ ལུཉྩཱཔེཏི. ཏེསཾ ཝཏཱནི ཨཱདིཡཏི ཝཱཏི ཡོཛནཱ. ཝཏཱནི ཨཱདིཡཏཱིཏི ཨུཀྐུཊིཀཔྤདྷཱནཱདཱིནི ཝཱ ཝཏཱནི ཨཱདིཡཏི. ཏེསཾ ཏིཏྠིཡཱནཾ མོརཔིཉྪཱདིཀཾ ལིངྒཾ སཉྙཱཎཾ སཙེ གཎྷཱཏི ཝཱ ཏེསཾ པབྦཛྫཾ, ལདྡྷིམེཝ ཝཱ སཱརཏོ ཝཱ ཨེཏི ཨུཔགཙྪཏི ཝཱཏི ཡོཛནཱ. ‘‘ཨཡཾ པབྦཛྫཱ སེཊྛཱཏི སེཊྛབྷཱཝཾ ཝཱ ཨུཔགཙྪཏཱི’’ཏི (མཧཱཝ. ཨཊྛ. ༡༡༠ ཏིཏྠིཡཔཀྐནྟཀཀཐཱ) ཨཊྛཀཐཱཡཾ ཝུཏྟཾ. ཨེས ཏིཏྠིཡཔཀྐནྟཀོ ཧོཏི ཨེཝ, ན པན ཝིམུཙྩཏི ཏིཏྠིཡཔཀྐནྟབྷཱཝཏོ. ནགྒསྶ གཙྪཏོཏི ‘‘ཨཱཛཱིཝཀོ བྷཝིསྶ’’ནྟི ཀཱསཱཡཱདཱིནི ཨནཱདཱཡ ནགྒསྶ ཨཱཛཱིཝཀཱནཾ ཨུཔསཾགཙྪཏོ.

༢༥༣༥. ཐེཡྻསཾཝཱསཀོ ¶ ཨནུཔསམྤནྣཝསེན ཝུཏྟོ, ནོ ཨུཔསམྤནྣཝསེན. ཨིམིནཱ ‘‘ཨུཔསམྤནྣོ བྷིཀྑུ ཀཱུཊཝསྶཾ གཎྷནྟོཔི ཨསྶམཎོ ན ཧོཏི. ལིངྒེ སཨུསྶཱཧོ པཱརཱཛིཀཾ ཨཱཔཛྫིཏྭཱ བྷིཀྑུཝསྶཱདཱིནི གཎེནྟོཔི ཐེཡྻསཾཝཱསཀོ ན ཧོཏཱི’’ཏི ཨཊྛཀཐཱགཏཝིནིཙྪཡཾ དཱིཔེཏི. ཏཐཱ ཝུཏྟོཏི ཡོཛནཱ. ‘‘ཨུཔསམྤནྣབྷིཀྑུནཱ’’ཏི ཨིམིནཱ ཨནུཔསམྤནྣཾ ནིཝཏྟེཏི. ཏེན ཙ ‘‘སཱམཎེརོ སལིངྒེན ཏིཏྠཱཡཏནཾ གཏོཔི པུན པབྦཛྫཉྩ ཨུཔསམྤདཉྩ ལབྷཏཱི’’ཏི ཀུརུནྡཊྛཀཐཱགཏཝིནིཙྪཡཾ དསྶེཏི.

ཏིཏྠིཡཔཀྐནྟཀསྶ ཀིཾ ཀཱཏབྦནྟི? ན པབྦཱཛེཏབྦོ, པབྦཱཛིཏོཔི ན ཨུཔསམྤཱདེཏབྦོ, ཨུཔསམྤཱདིཏོ ཙ ཀཱསཱཡཱནི ཨཔནེཏྭཱ སེཏཀཱནི དཏྭཱ གིཧིབྷཱཝཾ ཨུཔནེཏབྦོ. ཨཡམཏྠོ ཙ ‘‘ཏིཏྠིཡཔཀྐནྟཀོ བྷིཀྑཝེ ཨནུཔསམྤནྣོ ¶ ན ཨུཔསམྤཱདེཏབྦོ, ཨུཔསམྤནྣོ ནཱསེཏབྦོ’’ཏི (མཧཱཝ. ༡༡༠) པཱལི༹ཏོ ཙ ‘‘སོ ན ཀེཝལཾ ན ཨུཔསམྤཱདེཏབྦོ, ཨཐ ཁོ ན པབྦཱཛེཏབྦོཔཱི’’ཏི (མཧཱཝ. ཨཊྛ. ༡༡༠ ཏིཏྠིཡཔཀྐནྟཀཀཐཱ) ཨཊྛཀཐཱཝཙནཏོ ཙ ཝེདིཏབྦོ.

ཏིཏྠིཡཔཀྐནྟཀཀཐཱཝཎྞནཱ.

༢༥༣༦. ཨིདྷཱཏི ཨིམསྨིཾ པབྦཛྫཱུཔསམྤདཱདྷིཀཱརེ. མནུསྶཛཱཏིཀཏོ ཨཉྙསྶ ཏིརཙྪཱནགཏེཡེཝ ཨནྟོགདྷཏྟཾ དསྶེཏུམཱཧ ‘‘ཡཀྑོ སཀྐོཔི ཝཱ’’ཏི. ཏིརཙྪཱནགཏོ ཝུཏྟོཏི ཨེཏྠ ཨིཏི-སདྡོ ལུཏྟནིདྡིཊྛོ. ‘‘ཏིརཙྪཱནགཏོ, བྷིཀྑཝེ, ཨནུཔསམྤནྣོ ན ཨུཔསམྤཱདེཏབྦོ, ཨུཔསམྤནྣོ ནཱསེཏབྦོ’’ཏི (མཧཱཝ. ༡༡༡) ཝཙནཏོ པབྦཛྫཱཔི ཨུཔལཀྑཎཏོ ནིཝཱརིཏཱཡེཝཱཏི ཀཏྭཱ ཝུཏྟཾ ‘‘པབྦཱཛེཏུཾ ན ཝཊྚཏཱི’’ཏི. ཏེན ཏིརཙྪཱནགཏོ ཙ བྷགཝཏོ ཨདྷིཔྤཱཡཉྙཱུཧི ཨཊྛཀཐཱཙརིཡེཧི ན པབྦཱཛེཏབྦོཏི (མཧཱཝ. ཨཊྛ. ༡༡༡) ཝུཏྟཾ.

ཏིརཙྪཱནཀཐཱཝཎྞནཱ.

༢༥༣༧. པཉྩཱནནྟརིཀེ པོསེཏི མཱཏུགྷཱཏཀོ, པིཏུགྷཱཏཀོ, ཨརཧནྟགྷཱཏཀོ, ལོཧིཏུཔྤཱདཀོ, སངྒྷབྷེདཀོཏི ཨཱནནྟརིཡཀམྨེཧི སམནྣཱགཏེ པཉྩ པུགྒལེ.

ཏཏྠ ¶ མཱཏུགྷཱཏཀོ (མཧཱཝ. ཨཊྛ. ༡༡༢) ནཱམ ཡེན མནུསྶིཏྠིབྷཱུཏཱ ཛནིཀཱ མཱཏཱ སཡམྤི མནུསྶཛཱཏིཀེནེཝ སཏཱ སཉྩིཙྩ ཛཱིཝིཏཱ ཝོརོཔིཏཱ, ཨཡཾ ཨཱནནྟརིཡེན མཱཏུགྷཱཏཀཀམྨེན མཱཏུགྷཱཏཀོ, ཨེཏསྶ པབྦཛྫཱ ཙ ཨུཔསམྤདཱ ཙ པཊིཀྑིཏྟཱ. ཡེན པན མནུསྶིཏྠིབྷཱུཏཱཔི ཨཛནིཀཱ པོསཱཝནིཀམཱཏཱ ཝཱ ཙཱུལ༹མཱཏཱ ཝཱ མཧཱམཱཏཱ ཝཱ ཛནིཀཱཔི ཝཱ ནམནུསྶིཏྠིབྷཱུཏཱ ¶ མཱཏཱགྷཱཏིཏཱ, ཏསྶ པབྦཛྫཱ ན ཝཱརིཏཱ, ན ཙ ཨཱནནྟརིཡོ ཧོཏི. ཡེན སཡཾ ཏིརཙྪཱནབྷཱུཏེན མནུསྶིཏྠིབྷཱུཏཱ མཱཏཱ གྷཱཏིཏཱ, སོཔི ཨཱནནྟརིཡོ ན ཧོཏི, ཏིརཙྪཱནགཏཏྟཱ པནསྶ པབྦཛྫཱ པཊིཀྑིཏྟཱཝ. པིཏུགྷཱཏཀེཔི ཨེསེཝ ནཡོ. སཙེཔི ཧི ཝེསིཡཱ པུཏྟོ ཧོཏི, ‘‘ཨཡཾ མེ པིཏཱ’’ཏི ན ཛཱནཱཏི, ཡསྶ སམྦྷཝེན ནིབྦཏྟོ, སོ ཙེ ཨནེན གྷཱཏིཏོ, ‘‘པིཏུགྷཱཏཀོ’’ཏྭེཝ སངྑྱཾ གཙྪཏི, ཨཱནནྟརིཡཉྩ ཕུསཏི.

ཨརཧནྟགྷཱཏཀོཔི མནུསྶཨརཧནྟཝསེནེཝ ཝེདིཏབྦོ. མནུསྶཛཱཏིཡཉྷི ཨནྟམསོ ཨཔབྦཛིཏམྤི ཁཱིཎཱསཝཾ དཱརཀཾ ཝཱ དཱརིཀཾ ཝཱ སཉྩིཙྩ ཛཱིཝིཏཱ ཝོརོཔེནྟོ ཨརཧནྟགྷཱཏཀོཝ ཧོཏི, ཨཱནནྟརིཡཉྩ ཕུསཏི, པབྦཛྫཱ ཙསྶ ཝཱརིཏཱ. ཨམནུསྶཛཱཏིཀཾ པན ཨརཧནྟཾ, མནུསྶཛཱཏིཀཾ ཝཱ ཨཝསེསཾ ཨརིཡཔུགྒལཾ གྷཱཏེཏྭཱ ཨཱནནྟརིཡོ ན ཧོཏི, པབྦཛྫཱཔིསྶ ན ཝཱརིཏཱ, ཀམྨཾ པན བལཝཾ ཧོཏི. ཏིརཙྪཱནོ མནུསྶཨརཧནྟམྤི གྷཱཏེཏྭཱ ཨཱནནྟརིཡོ ན ཧོཏི, ཀམྨཾ པན བྷཱརིཡཾ.

ཡོ དེཝདཏྟོ ཝིཡ དུཊྛཙིཏྟེན ཝདྷཀཙིཏྟེན ཏཐཱགཏསྶ ཛཱིཝམཱནཀསརཱིརེ ཁུདྡཀམཀྑིཀཱཡ པིཝནཀམཏྟམྤི ལོཧིཏཾ ཨུཔྤཱདེཏི, ཨཡཾ ལོཧིཏུཔྤཱདཀོ ནཱམ, ཨེཏསྶ པབྦཛྫཱ ཙ ཨུཔསམྤདཱ ཙ ཝཱརིཏཱ. ཡོ པན རོགཝཱུཔསམནཏྠཾ ཛཱིཝཀོ ཝིཡ སཏྠེན ཕཱལེཏྭཱ པཱུཏིམཾསཉྩ ལོཧིཏཉྩ ནཱིཧརིཏྭཱ ཕཱསུཾ ཀརོཏི, བཧུཾ སོ པུཉྙཾ པསཝཏི.

ཡོ དེཝདཏྟོ ཝིཡ སཱསནཾ ཨུདྡྷམྨཾ ཨུབྦིནཡཾ ཀཏྭཱ ཙཏུནྣཾ ཀམྨཱནཾ ཨཉྙཏརཝསེན སངྒྷཾ བྷིནྡཏི, ཨཡཾ སངྒྷབྷེདཀོ ནཱམ, ཨེཏསྶ པབྦཛྫཱ ཙ ཨུཔསམྤདཱ ཙ ཝཱརིཏཱ. ‘‘མཱཏུགྷཱཏཀོ, བྷིཀྑཝེ, ཨནུཔསམྤནྣོ ན ཨུཔསམྤཱདེཏབྦོ, ཨུཔསམྤནྣོ ¶ ནཱསེཏབྦོ’’ཏིཨཱདིཀཱཡ (མཧཱཝ. ༡༡༢) པཱལི༹ཡཱ ཨུཔསམྤདཱཔཊིཀྑེཔོ པབྦཛྫཱཔཊིཀྑེཔསྶ ཨུཔལཀྑཎནྟི ཨཱཧ ‘‘པབྦཱཛེནྟསྶ དུཀྐཊ’’ནྟི.

ཨུབྷཏོབྱཉྫནཉྩེཝ ¶ བྷིཀྑུནིདཱུསཀཉྩ ཏཐཱ པབྦཱཛེནྟསྶ དུཀྐཊནྟི སམྦནྡྷོ. ཨུབྷཏོབྱཉྫནནྟི ཀ-ཀཱརལོཔེན ནིདྡེསོ. ཨིཏྠིནིམིཏྟུཔྤཱདནཀམྨཏོ ཙ པུརིསནིམིཏྟུཔྤཱདནཀམྨཏོ ཙ ཨུབྷཏོ བྱཉྫནམསྶ ཨཏྠཱིཏི ཨུབྷཏོབྱཉྫནཀོ. སོ དུཝིདྷོ ཧོཏི ཨིཏྠིཨུབྷཏོབྱཉྫནཀོ, པུརིསཨུབྷཏོབྱཉྫནཀོཏི.

ཏཏྠ ཨིཏྠིཨུབྷཏོབྱཉྫནཀསྶ (མཧཱཝ. ཨཊྛ. ༡༡༦) ཨིཏྠིནིམིཏྟཾ པཱཀཊཾ ཧོཏི, པུརིསནིམིཏྟཾ པཊིཙྪནྣཾ. པུརིསཨུབྷཏོབྱཉྫནཀསྶ པུརིསནིམིཏྟཾ པཱཀཊཾ ཧོཏི, ཨིཏྠིནིམིཏྟཾ པཊིཙྪནྣཾ. ཨིཏྠིཨུབྷཏོབྱཉྫནཀསྶ ཨིཏྠཱིསུ པུརིསཏྟཾ ཀརོནྟསྶ ཨིཏྠིནིམིཏྟཾ པཊིཙྪནྣཾ ཧོཏི, པུརིསནིམིཏྟཾ པཱཀཊཾ ཧོཏི. པུརིསཨུབྷཏོབྱཉྫནཀསྶ པུརིསཱནཾ ཨིཏྠིབྷཱཝཾ ཨུཔགཙྪནྟསྶ པུརིསནིམིཏྟཾ པཊིཙྪནྣཾ ཧོཏི, ཨིཏྠིནིམིཏྟཾ པཱཀཊཾ ཧོཏི. ཨིཏྠིཨུབྷཏོབྱཉྫནཀོ སཡཉྩ གབྦྷཾ གཎྷཱཏི, པརཉྩ གབྦྷཾ གཎྷཱཔེཏི. པུརིསཨུབྷཏོབྱཉྫནཀོ སཡཾ ན གཎྷཱཏི, པརཾ གཎྷཱཔེཏཱིཏི ཨིདམེཏེསཾ ནཱནཱཀརཎཾ. ཨིམསྶ པན དུཝིདྷསྶཱཔི ཨུབྷཏོབྱཉྫནཀསྶནེཝ པབྦཛྫཱ ཨཏྠི, ན ཨུཔསམྤདཱཏི ཨིདམིདྷ སནྣིཊྛཱནཾ ཝེདིཏབྦཾ.

ཡོ པཀཏཏྟཾ བྷིཀྑུནིཾ (མཧཱཝ. ཨཊྛ. ༡༡༥) ཏིཎྞཾ མགྒཱནཾ ཨཉྙཏརསྨིཾ དཱུསེཏི, ཨཡཾ བྷིཀྑུནིདཱུསཀོ ནཱམ, ཨེཏསྶ པབྦཛྫཱ ཙ ཨུཔསམྤདཱ ཙ ཝཱརིཏཱ. ཡོ པན ཀཱཡསཾསགྒེན སཱིལཝིནཱསཾ པཱཔེཏི, ཏསྶ པབྦཛྫཱ ཙ ཨུཔསམྤདཱ ཙ ན ཝཱརིཏཱ. བལཀྐཱརེན པན ཨོདཱཏཝཏྠཝསནཾ ཀཏྭཱ ཨནིཙྪམཱནཾཡེཝ དཱུསེནྟོཔི བྷིཀྑུནིདཱུསཀོཡེཝ. བལཀྐཱརེན པན ཨོདཱཏཝཏྠཝསནཾ ¶ ཀཏྭཱ ཨིཙྪམཱནཾ དཱུསེནྟོ བྷིཀྑུནིདཱུསཀོ ན ཧོཏི. ཀསྨཱ? ཡསྨཱ གིཧིབྷཱཝེ སམྤཊིཙྪིཏམཏྟེཡེཝ སཱ ཨབྷིཀྑུནཱི ཧོཏི. སཀིཾ སཱིལཝིཔནྣཾ པན པཙྪཱ དཱུསེནྟོ ནེཝ བྷིཀྑུནིདཱུསཀོ ཧོཏི, པབྦཛྫམྤི ཨུཔསམྤདམྤི ལབྷཏི.

༢༥༣༨. པཱལི༹ཨཊྛཀཐཱཝིམུཏྟཾ ཨཱཙརིཡཔརམྤརཱབྷཏཝིནིཙྪཡཾ དསྶེཏུམཱཧ ‘‘ཨེཀཏོ’’ཏིཨཱདི. ‘‘ཨེཀཏོ’’ཏི ཨིམིནཱ བྷིཀྑུསངྒྷསྶཱཔི གཧཎཾ བྷཝེཡྻཱཏི ཏཾ པརིཝཛྫེཏུཾ ‘‘བྷིཀྑུནཱིནཾ ཏུ སནྟིཀེ’’ཏི ཝུཏྟཾ. ཨེཏེན ཏཾདཱུསཀསྶ བྷབྦཏཾ དཱིཔེཏི. སོ ནེཝ བྷིཀྑུནིདཱུསཀོ སིཡཱ, ‘‘ཨུཔསམྤདཾ ལབྷཏེཝ ཙ པབྦཛྫཾ, སཱ ཙ ནེཝ པརཱཛིཏཱ’’ཏི ཨིདཾ དུཏིཡགཱཐཱཡ ཨིདྷཱནེཏྭཱ ཡོཛེཏབྦཾ. ཀེཝལཾ བྷིཀྑུནིསངྒྷེ ཨུཔསམྤནྣཱ ནཱམ ན ཧོཏཱིཏི ཨདྷིཔྤཱཡེནེཝ ཝུཏྟཾ. ‘‘སཱ ཙ ནེཝ པརཱཛིཏཱ’’ཏི ཨིམིནཱ ཏསྶཱ ཙ པུན པབྦཛྫཱུཔསམྤདཱཡ བྷབྦཏཾ ¶ དཱིཔེཏི. ཨཡམཏྠོ ཨཊྛཀཐཱགཎྛིཔདེཔི ཝུཏྟོཡེཝ ‘‘བྷིཀྑུནཱིནཾ ཝསེན ཨེཀཏོཨུཔསམྤནྣཾ དཱུསེཏྭཱ བྷིཀྑུནིདཱུསཀོ ན ཧོཏི, པབྦཛྫཱདཱིནི ལབྷཏི, སཱ ཙ པཱརཱཛིཀཱ ན ཧོཏཱིཏི ཝིནིཙྪཡོ’’ཏི.

༢༥༣༩. ‘‘སིཀྑམཱནཱསཱམཎེརཱིསུ ཙ ཝིཔྤཊིཔཛྫནྟོ ནེཝ བྷིཀྑུནིདཱུསཀོ ཧོཏི, པབྦཛྫམྤི ཨུཔསམྤདམྤི ལབྷཏཱི’’ཏི (མཧཱཝ. ཨཊྛ. ༡༡༥) ཨཊྛཀཐཱགཏཝིནིཙྪཡཾ དསྶེཏུམཱཧ ‘‘སཙེ ཨནུཔསམྤནྣདཱུསཀོ’’ཏི. ‘‘ཨུཔསམྤདཾ ལབྷཏེཝ ཙ པབྦཛྫ’’ནྟི ཨིདཾ ཡཐཱཋཱནེཔི ཡོཛེཏབྦཾ. སཱ ཙ ནེཝ པརཱཛིཏཱཏི ཨིདཾ པན ཨཊྛཀཐཱཡ ཨནཱགཏཏྟཱ ཙ ཨནུཔསམྤནྣཱཡ ཨུཔསམྤནྣཝིཀཔྤཱབྷཱཝཱ ཙ ན ཡོཛེཏབྦཾ. ཨསཏི ཧི ཨུཔསམྤནྣཝིཀཔྤེ པརཱཛིཏཝིཀཔྤཱསངྒཧོ པཊིསེདྷོ ནིརཏྠཀོཏི སཱ པབྦཛྫཱུཔསམྤདཱནཾ བྷབྦཱཡེཝཱཏི དཊྛབྦཱ. ཨིམེ ¶ པན པཎྜཀཱདཡོ ཨེཀཱདས པུགྒལཱ ‘‘པཎྜཀོ, བྷིཀྑཝེ, ཨནུཔསམྤནྣོ ན ཨུཔསམྤཱདེཏབྦོ, ཨུཔསམྤནྣོ ནཱསེཏབྦོ’’ཏིཨཱདིཝཙནཏོ (མཧཱཝ. ༡༠༩) ཨབྷབྦཱཡེཝ, ནེསཾ པབྦཛྫཱ ཙ ཨུཔསམྤདཱ ཙ ན རུཧཏི, ཏསྨཱ ན པབྦཱཛེཏབྦཱ. ཛཱནིཏྭཱ པབྦཱཛེནྟོ, ཨུཔསམྤཱདེནྟོ ཙ དུཀྐཊཾ ཨཱཔཛྫཏི. ཨཛཱནིཏྭཱཔི པབྦཱཛིཏཱ, ཨུཔསམྤཱདིཏཱ ཙ ཛཱནིཏྭཱ ལིངྒནཱསནཱཡ ནཱསེཏབྦཱ.

ཨེཀཱདསཨབྷབྦཔུགྒལཀཐཱཝཎྞནཱ.

༢༥༤༠. ནཱུཔསམྤཱདནཱིཡོཝཱཏི ན ཨུཔསམྤཱདེཏབྦོཝ. ཨནུཔཛ྄ཛྷཱཡཀོཏི ཨསནྣིཧིཏཨུཔཛ྄ཛྷཱཡོ ཝཱ ཨགྒཧིཏཨུཔཛ྄ཛྷཱཡགྒཧཎོ ཝཱ. ཀརོཏོཏི ཨནུཔཛ྄ཛྷཱཡཀཾ ཨུཔསམྤཱདཡཏོ. དུཀྐཊཾ ཧོཏཱིཏི ཨཱཙརིཡསྶ ཙ གཎསྶ ཙ དུཀྐཊཱཔཏྟི ཧོཏི. ན ཀུཔྤཏི སཙེ ཀཏནྟི སཙེ ཨནུཔཛ྄ཛྷཱཡཀསྶ ཨུཔསམྤདཱཀམྨཾ ཀཏཾ བྷཝེཡྻ, ཏཾ ན ཀུཔྤཏི སམགྒེན སངྒྷེན ཨཀུཔྤེན ཋཱནཱརཧེན ཀཏཏྟཱ.

༢༥༤༡. ཨེཀེཏི ཨབྷཡགིརིཝཱསིནོ. ‘‘ན གཧེཏབྦམེཝཱ’’ཏི ཨཊྛཀཐཱཡ དལ༹ྷཾ ཝུཏྟཏྟཱ ཝུཏྟཾ. ཏཾ ཝཙནཾ. ཨེཏྠ ཙ ཨུཔཛ྄ཛྷཱཡེ ཨསནྣིཧིཏེཔི ཨུཔཛ྄ཛྷཱཡགྒཧཎེ ཨཀཏེཔི ཀམྨཝཱཙཱཡཾ པན ཨུཔཛ྄ཛྷཱཡཀིཏྟནཾ ཀཏཾཡེཝཱཏི དཊྛབྦཾ. ཨཉྙཐཱ ‘‘པུགྒལཾ ན པརཱམསཏཱི’’ཏི ཝུཏྟཱཡ ཀམྨཝིཔཏྟིཡཱ སམྦྷཝཏོ ཀམྨཾ ཀུཔྤེཡྻ. ཏེནེཝ ‘‘ཨུཔཛ྄ཛྷཱཡཾ ཨཀིཏྟེཏྭཱ’’ཏི ཨཝཏྭཱ ‘‘ཨུཔཛ྄ཛྷཾ ཨགྒཱཧཱཔེཏྭཱ’’ཏི (མཧཱཝ. ཨཊྛ. ༡༡༧) ཨཊྛཀཐཱཡཾ ཝུཏྟཾ. ཡཐཱ ཙ ཨཔརིཔུཎྞཔཏྟཙཱིཝརསྶ ¶ ཨུཔསམྤདཱཀཱལེ ཀམྨཝཱཙཱཡཾ ‘‘པརིཔུཎྞསྶ པཏྟཙཱིཝར’’ནྟི ཨསནྟཾ ཝཏྠུཾ ཀིཏྟེཏྭཱ ཀམྨཝཱཙཱཡ ཀཏཱཡཔི ཨུཔསམྤདཱ རུཧཏི, ཨེཝཾ ‘‘ཨཡཾ བུདྡྷརཀྑིཏོ ཨཱཡསྨཏོ དྷམྨརཀྑིཏསྶ ཨུཔསམྤདཱཔེཀྑོ’’ཏི ཨསནྟཾ པུགྒལཾ ཀིཏྟེཏྭཱ ཀེཝལཾ སནྟཔདནཱིཧཱརེན ཀམྨཝཱཙཱཡ ¶ ཀཏཱཡ ཨུཔསམྤདཱ རུཧཏིཡེཝཱཏི དཊྛབྦཾ. ཏེནེཝཱཧ ‘‘ན ཀུཔྤཏི སཙེ ཀཏ’’ནྟི. ‘‘ན, བྷིཀྑཝེ, ཨནུཔཛ྄ཛྷཱཡཀོ ཨུཔསམྤཱདེཏབྦོ, ཡོ ཨུཔསམྤཱདེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༡༧) ཨེཏྟཀམེཝ ཝཏྭཱ ‘‘སོ ཙ པུགྒལོ ཨནུཔསམྤནྣོ’’ཏི ཨཝུཏྟཏྟཱ, ཀམྨཝིཔཏྟིལཀྑཎསྶ ཙ ཨསམྦྷཝཏོ ‘‘ན གཧེཏབྦམེཝ ཏ’’ནྟི ཝུཏྟཾ.

སེསེསུ སབྦཏྠཔཱིཏི སངྒྷགཎཔཎྜཀཐེཡྻསཾཝཱསཀཏིཏྠིཡཔཀྐནྟཀཏིརཙྪཱནགཏམཱཏུཔིཏུཨརཧནྟགྷཱཏཀབྷིཀྑུནིདཱུསཀསངྒྷབྷེདཀལོཧིཏུཔྤཱདཀཨུབྷཏོབྱཉྫནཀསངྑཱཏེཧི ཨུཔཛ྄ཛྷཱཡེཧི ཨུཔསམྤཱདིཏེསུ སབྦེསུ ཏེརསསུ ཝིཀཔྤེསུ. ཝུཏྟཉྷི བྷགཝཏཱ ‘‘ན, བྷིཀྑཝེ, སངྒྷེན ཨུཔཛ྄ཛྷཱཡེན ཨུཔསམྤཱདེཏབྦོ, ཡོ ཨུཔསམྤཱདེཡྻ, ཨཱཔཏྟི དུཀྐཊསྶཱ’’ཏིཨཱདི. ན ཀེཝལཾ ཨེཏེསུཡེཝ ཏེརསསུ, ཨཐ ‘‘ཨཔཏྟཀཨཙཱིཝརཀཨཙཱིཝརཔཏྟཀཡཱཙིཏཀཔཏྟཡཱཙིཏཀཙཱིཝརཡཱཙིཏཀཔཏྟཙཱིཝརཀཱ’’ཏི ཨེཏེསུ ཚསུ ཝིཀཔྤེསུ ཨཡཾ ནཡོ ཡོཛེཏབྦོཏི. སེས-གྒཧཎེན ཨེཏེསམྤི སངྒཧོ. ཝུཏྟཉྷེཏཾ བྷགཝཏཱ ‘‘ན, བྷིཀྑཝེ, ཨཔཏྟཀོ ཨུཔསམྤཱདེཏབྦོ, ཡོ ཨུཔསམྤཱདེཡྻ, ཨཱཔཏྟི དུཀྐཊསྶཱ’’ཏིཨཱདི (མཧཱཝ. ༡༡༨). ཨཡཾ ནཡོཏི ‘‘ན ཀུཔྤཏི སཙེ ཀཏ’’ནྟི ཝུཏྟནཡོ.

༢༥༤༢. པཉྩཝཱིསཏཱིཏི ཙཏུཝཱིསཏི པཱརཱཛིཀཱ, ཨཱུནཝཱིསཏིཝསྶོ ཙཱཏི པཉྩཝཱིསཏི. ཝུཏྟཉྷི ‘‘ན, བྷིཀྑཝེ, ཛཱནཾ ཨཱུནཝཱིསཏིཝསྶོ པུགྒལོ ཨུཔསམྤཱདེཏབྦོ. ཡོ ཨུཔསམྤཱདེཡྻ, ཡཐཱདྷམྨོ ཀཱརེཏབྦོ’’ཏི (མཧཱཝ. ༩༩). ཨོསཱརོཏི ཨུཔསམྤདཱསངྑཱཏོ ཨོསཱརོ. ཏེནེཝ ཙམྤེཡྻཀྑནྡྷཀེ ‘‘ཏཉྩེ སངྒྷོ ཨོསཱརེཏི, ཨེཀཙྩོ སོསཱརིཏོ’’ཏིཨཱདིཔཱཋསྶ (མཧཱཝ. ༣༩༦) ཨཊྛཀཐཱཡཾ ‘‘ཨོསཱརེཏཱིཏི ཨུཔསམྤདཱཀམྨཝསེན ¶ པཝེསེཏཱི’’ཏི (མཧཱཝ. ཨཊྛ. ༣༩༦) ཝུཏྟཾ. ‘‘ནཱསནཱརཧོ’’ཏི ཨིམིནཱ ‘‘པཎྜཀོ, བྷིཀྑཝེ, ཨནུཔསམྤནྣོ ན ཨུཔསམྤཱདེཏབྦོ’’ཏིཨཱདིཝཙནཏོ (མཧཱཝ. ༡༠༩) ཨུཔསམྤཱདིཏསྶཱཔི སེཏཀཱནི དཏྭཱ གིཧིབྷཱཝཾ པཱཔེཏབྦཏཾ དཱིཔེཏི.

༢༥༤༣. ཧཏྠཙྪིནྣཱདི ¶ བཱཏྟིཾསཱཏི ཙམྤེཡྻཀྑནྡྷཀེ –

‘‘ཧཏྠཙྪིནྣོ, བྷིཀྑཝེ, ཨཔྤཏྟོ ཨོསཱརཎཾ, ཏཉྩེ སངྒྷོ ཨོསཱརེཏི, སོསཱརིཏོ. པཱདཙྪིནྣོ…པེ… ཧཏྠཔཱདཙྪིནྣོ… ཀཎྞཙྪིནྣོ… ནཱསཙྪིནྣོ… ཀཎྞནཱསཙྪིནྣོ… ཨངྒུལིཙྪིནྣོ… ཨལ༹ཙྪིནྣོ… ཀཎྜརཙྪིནྣོ… ཕཎཧཏྠཀོ… ཁུཛྫོ… ཝཱམནོ… གལགཎྜཱི… ལཀྑཎཱཧཏོ… ཀསཱཧཏོ… ལིཁིཏཀོ… སཱིཔདིཀོ… པཱཔརོགཱི… པརིསདཱུསཀོ… ཀཱཎོ… ཀུཎཱི… ཁཉྫོ… པཀྑཧཏོ… ཚིནྣིརིཡཱཔཐོ… ཛརཱདུབྦལོ… ཨནྡྷོ… མཱུགོ… པདྷིརོ… ཨནྡྷམཱུགོ… ཨནྡྷཔདྷིརོ… མཱུགཔདྷིརོ… ཨནྡྷམཱུགཔདྷིརོ, བྷིཀྑཝེ, ཨཔྤཏྟོ ཨོསཱརཎཾ, ཏཉྩེ སངྒྷོ ཨོསཱརེཏི, སོསཱརིཏོ’’ཏི (མཧཱཝ. ༣༩༦) བཱཏྟིཾས.

ཀུཊྛིཨཱདི ཙ ཏེརསཱཏི མཧཱཁནྡྷཀེ ཨཱགཏཱ –

‘‘ཀུཊྛིཾ གཎྜིཾ ཀིལཱསིཉྩ, སོསིཉྩ ཨཔམཱརིཀཾ;

ཏཐཱ རཱཛབྷཊཾ ཙོརཾ, ལིཁིཏཾ ཀཱརབྷེདཀཾ.

‘‘ཀསཱཧཏཾ ནརཉྩེཝ, པུརིསཾ ལཀྑཎཱཧཏཾ;

ཨིཎཱཡིཀཉྩ དཱསཉྩ, པབྦཱཛེནྟསྶ དུཀྐཊ’’ནྟི. –

ཡཐཱཝུཏྟཱ ཏེརས.

ཨེཝམེཏེ པཉྩཙཏྟཱལཱིས ཝུཏྟཱ. ཏེསུ ཀསཱཧཏལཀྑཎཱཧཏལིཁིཏཀཱནཾ ཏིཎྞཾ ཨུབྷཡཏྠ ཨཱགཏཏྟཱ ཨགྒཧིཏགྒཧཎེན དྭཱཙཏྟཱལཱིསེཝ དཊྛབྦཱ.

‘‘ཧཏྠཙྪིནྣཱདིབཱཏྟིཾས ¶ , ཀུཊྛིཨཱདི ཙ ཏེརསཱ’’ཏི ཡེ པུགྒལཱ ཝུཏྟཱ, ཏེསཾ. ཨོསཱརོ ཨཔྤཏྟོཏི ཨུཔསམྤདཱཨནནུརཱུཔཱཏི ཨཏྠོ. ཀཏོ ཙེཏི ཨཀཏྟབྦབྷཱཝམསལླཀྑནྟེཧི བྷིཀྑཱུཧི ཡདི ཨུཔསམྤདཱསངྑཱཏོ ཨོསཱརོ ཀཏོ བྷཝེཡྻ. རཱུཧཏཱིཏི སིཛ྄ཛྷཏི, ཏེ པུགྒལཱ ཨུཔསམྤནྣཱཡེཝཱཏི ཨདྷིཔྤཱཡོ. ཨཱཙརིཡཱདཡོ པན ཨཱཔཏྟིཾ ཨཱཔཛྫནྟི. ཡཐཱཧ ཙམྤེཡྻཀྑནྡྷཀཊྛཀཐཱཡཾ ¶ – ‘‘ཧཏྠཙྪིནྣཱདཡོ པན དྭཏྟིཾས སུཨོསཱརིཏཱ, ཨུཔསམྤཱདིཏཱ ཨུཔསམྤནྣཱཝ ཧོནྟི, ན ཏེ ལབྦྷཱ ཀིཉྩི ཝཏྟུཾ. ཨཱཙརིཡུཔཛ྄ཛྷཱཡཱ, པན ཀཱརཀསངྒྷོ ཙ སཱཏིསཱརཱ, ན ཀོཙི ཨཱཔཏྟིཏོ མུཙྩཏཱི’’ཏི (མཧཱཝ. ཨཊྛ. ༣༩༦).

༢༥༤༤-༥. ‘‘ཨནུཛཱནཱམི, བྷིཀྑཝེ, དྭེ ཏཡོ ཨེཀཱནུསྶཱཝནེ ཀཱཏུཾ, ཏཉྩ ཁོ ཨེཀེན ཨུཔཛ྄ཛྷཱཡེནཱ’’ཏི (མཧཱཝ. ༡༢༣) ཝཙནཏོ སཙེ ཏཡོ ཨཱཙརིཡཱ ཨེཀསཱིམཱཡཾ ནིསིནྣཱ ཨེཀསྶ ཨུཔཛ྄ཛྷཱཡསྶ ནཱམཾ གཧེཏྭཱ ཏིཎྞཾ ཨུཔསམྤདཱཔེཀྑཱནཾ ཝིསུཾ ཝིསུཾཡེཝ ཀམྨཝཱཙཾ ཨེཀཀྑཎེ ཝཏྭཱ ཏཡོ ཨུཔསམྤཱདེནྟི, ཝཊྚཏཱིཏི དསྶེཏུམཱཧ ‘‘ཨེཀཱུཔཛ྄ཛྷཱཡཀོ ཧོཏཱི’’ཏིཨཱདི.

‘‘ཏཡོ’’ཏི ཨིདཾ ཨཊྛུཔྤཏྟིཡཾ ‘‘སམྦཧུལཱནཾ ཐེརཱན’’ནྟི (མཧཱཝ. ༡༢༣) ཨཱགཏཏྟཱ ཝུཏྟཾ. ཨེཀཏོཏི ཨེཀཀྑཎེ. ཨནུསཱཝནནྟི ཀམྨཝཱཙཾ. ཨོསཱརེཏྭཱཏི ཝཏྭཱ. ཀམྨནྟི ཨུཔསམྤདཱཀམྨཾ. ན ཙ ཀུཔྤཏཱིཏི ན ཝིཔཛྫཏི. ཀཔྤཏཱིཏི ཨཝིཔཛྫནཏོ ཨེཝཾ ཀཱཏུཾ ཝཊྚཏི.

༢༥༤༦-༧. ‘‘ཨནུཛཱནཱམི, བྷིཀྑཝེ, དྭེ ཏཡོ ཨེཀཱནུསྶཱཝནེ ཀཱཏུ’’ནྟི (མཧཱཝ. ༡༢༣) ཝཙནཏོ སཙེ ཨེཀོ ཨཱཙརིཡོ ‘‘བུདྡྷརཀྑིཏོ ཙ དྷམྨརཀྑིཏོ ཙ སངྒྷརཀྑིཏོ ཙ ཨཱཡསྨཏོ སཱརིཔུཏྟསྶ ཨུཔསམྤདཱཔེཀྑོ’’ཏི ཨུཔསམྤདཱཔེཀྑཱནཾ ¶ པཙྩེཀཾ ནཱམཾ གཧེཏྭཱ ཀམྨཝཱཙཾ ཝཏྭཱ དྭེ ཏཡོཔི ཨུཔསམྤཱདེཏི, ཝཊྚཏཱིཏི དསྶེཏུམཱཧ ‘‘ཨེཀཱུཔཛ྄ཛྷཱཡཀོ ཧོཏཱི’’ཏིཨཱདི.

ཨུཔསམྤདཾ ཨཔེཀྑནྟཱིཏི ‘‘ཨུཔསམྤདཱཔེཀྑཱ’’ཏི ཨུཔསམྤཛྫནཀཱ ཝུཙྩནྟི. ཏེསཾ ནཱམནྟི ཏེསཾ ཨུཔསམྤཛྫནྟཱནཉྩེཝ ཨུཔཛ྄ཛྷཱཡཱནཉྩ ནཱམཾ. ཨནུཔུབྦེན སཱཝེཏྭཱཏི ཡོཛནཱ, ‘‘བུདྡྷརཀྑིཏོ’’ཏིཨཱདིནཱ ཡཐཱཝུཏྟནཡེན ཀམྨཝཱཙཱཡཾ སཀཊྛཱནེ ཝཏྭཱ སཱཝེཏྭཱཏི ཝུཏྟཾ ཧོཏི. ཏེནཱཏི ཨེཀེན ཨཱཙརིཡེན. ཨེཀཏོཏི དྭེ ཏཡོ ཛནེ ཨེཀཏོ ཀཏྭཱ. ཨནུསཱཝེཏྭཱཏི ཀམྨཝཱཙཾ ཝཏྭཱ. ཀཏཾ ཨུཔསམྤདཱཀམྨཾ.

༢༥༤༨. ཨཉྙམཉྙཱནུསཱཝེཏྭཱཏི ¶ ཨཉྙམཉྙསྶ ནཱམཾ ཨནུསཱཝེཏྭཱ, གཧེཏྭཱཏི ཨཏྠོ, ཨཉྙམཉྙསྶ ནཱམཾ གཧེཏྭཱ ཀམྨཝཱཙཾ ཝཏྭཱཏི ཝུཏྟཾ ཧོཏི.

༢༥༤༩. ཏཾ ཝིདྷིཾ དསྶེཏུམཱཧ ‘‘སུམནོ’’ཏིཨཱདི. སུམནོཏི ཨཱཙརིཡོ. ཏིསྶཐེརསྶ ཨུཔཛ྄ཛྷཱཡསྶ. སིསྶཀཾ སདྡྷིཝིཧཱརིཀཾ. ཨནུསཱཝེཏཱིཏི ཀམྨཝཱཙཾ སཱཝེཏི. ཏིསྶོཏི པཋམཾ ཨུཔཛ྄ཛྷཱཡབྷཱུཏསྶ གཧཎཾ. སུམནཐེརསྶཱཏི པཋམཾ ཨཱཙརིཡཏྠེརམཱཧ. ཨིམེ དྭེ ཨེཀསཱིམཱཡཾ ནིསཱིདིཏྭཱ ཨེཀཀྑཎེ ཨཉྙམཉྙསྶ སདྡྷིཝིཧཱརིཀཱནཾ ཀམྨཝཱཙཾ ཝདནྟཱ ཨཏྟནོ ཨཏྟནོ སདྡྷིཝིཧཱརིཀཾ པཊིཙྩ ཨུཔཛ྄ཛྷཱཡཱཔི ཧོནྟི, ཨནྟེཝཱསིཀེ པཊིཙྩ ཨཱཙརིཡཱཔི ཧོནྟི, ཨཉྙམཉྙསྶ གཎཔཱུརཀཱ ཙ ཧོནྟཱིཏི ཝུཏྟཾ ཧོཏི. ཡཐཱཧ –

‘‘སཙེ པན ནཱནཱཙརིཡཱ ནཱནཱཨུཔཛ྄ཛྷཱཡཱ ཧོནྟི, ཏིསྶཏྠེརོ སུམནཏྠེརསྶ སདྡྷིཝིཧཱརིཀཾ, སུམནཏྠེརོ ཏིསྶཏྠེརསྶ སདྡྷིཝིཧཱརིཀཾ ཨནུསྶཱཝེཏི ¶ , ཨཉྙམཉྙཉྩ གཎཔཱུརཀཱ ཧོནྟི, ཝཊྚཏཱི’’ཏི (མཧཱཝ. ཨཊྛ. ༡༢༣).

༢༥༥༠. ཨིདྷཱཏི ཨིམསྨིཾ ཨུཔསམྤདཱདྷིཀཱརེ. པཊིཀྑིཏྟཱཏི ‘‘ན ཏྭེཝ ནཱནུཔཛ྄ཛྷཱཡེནཱ’’ཏི (མཧཱཝ. ༡༢༣) པཊིསིདྡྷཱ. ལོཀིཡེཧི ཨཱདིཙྩཔུཏྟོ མནཱུཏི ཡོ པཋམཀཔྤིཀོ མནུསྶཱནཾ ཨཱདིརཱཛཱ ཝུཙྩཏི, ཏསྶ ཝཾསེ ཛཱཏཏྟཱ ཨཱདིཙྩོ བནྡྷུ ཨེཏསྶཱཏི ཨཱདིཙྩབནྡྷུ, བྷགཝཱ, ཏེན.

མཧཱཁནྡྷཀཀཐཱཝཎྞནཱ.

ཨུཔོསཐཀྑནྡྷཀཀཐཱཝཎྞནཱ

༢༥༥༡-༢. ཡཱ ཨེཀཱདསཧི སཱིམཱཝིཔཏྟཱིཧི ཝཛྫིཏཱ ཏིསམྤཏྟིསཾཡུཏཱ ནིམིཏྟེན ནིམིཏྟཾ གྷཊེཏྭཱ སམྨཏཱ, སཱ ཨཡཾ བདྡྷསཱིམཱ ནཱམ སིཡཱཏི ཡོཛནཱ. ཏཏྠ ཨཏིཁུདྡཀཱ, ཨཏིམཧཏཱི, ཁཎྜནིམིཏྟཱ, ཚཱཡཱནིམིཏྟཱ, ཨནིམིཏྟཱ, བཧིསཱིམེ ཋིཏསམྨཏཱ, ནདིཡཱ སམྨཏཱ, སམུདྡེ སམྨཏཱ, ཛཱཏསྶརེ སམྨཏཱ, སཱིམཱཡ སཱིམཾ སམྦྷིནྡནྟེན སམྨཏཱ, སཱིམཱཡ སཱིམཾ ཨཛ྄ཛྷོཏྠརནྟེན སམྨཏཱཏི ‘‘ཨིམེཧི ཨེཀཱདསཧི ཨཱཀཱརེཧི སཱིམཏོ ཀམྨཱནི ཝིཔཛྫནྟཱི’’ཏི ¶ (པརི. ༤༨༦) ཝཙནཏོ ཨིམཱ ཨེཀཱདས ཝིཔཏྟིསཱིམཱཡོ ནཱམ, ཝིཔནྣསཱིམཱཏི ཝུཏྟཾ ཧོཏི.

ཏཏྠ ཨཏིཁུདྡཀཱ ནཱམ ཡཏྠ ཨེཀཝཱིསཏི བྷིཀྑཱུ ནིསཱིདིཏུཾ ན སཀྐོནྟི. ཨཏིམཧཏཱི ནཱམ ཡཱ ཨནྟམསོ ཀེསགྒམཏྟེནཱཔི ཏིཡོཛནཾ ཨཏིཀྐམིཏྭཱ སམྨཏཱ. ཁཎྜནིམིཏྟཱ ནཱམ ཨགྷཊིཏནིམིཏྟཱ ཝུཙྩཏི. པུརཏྠིམཱཡ དིསཱཡ ནིམིཏྟཾ ཀིཏྟེཏྭཱ ཨནུཀྐམེནེཝ དཀྑིཎཱཡ, པཙྪིམཱཡ, ཨུཏྟརཱཡ དིསཱཡ ཀིཏྟེཏྭཱ པུན པུརཏྠིམཱཡ དིསཱཡ པུབྦཀིཏྟིཏཾ ¶ པཊིཀིཏྟེཏྭཱ ཋཔེཏུཾ ཝཊྚཏི, ཨེཝཾ ཨཁཎྜནིམིཏྟཱ ཧོཏི. སཙེ པན ཨནུཀྐམེན ཨཱཧརིཏྭཱ ཨུཏྟརཱཡ དིསཱཡ ནིམིཏྟཾ ཀིཏྟེཏྭཱ ཏཏྠེཝ ཋཔེཏི, ཁཎྜནིམིཏྟཱ ནཱམ ཧོཏི. ཨཔརཱཔི ཁཎྜནིམིཏྟཱ ནཱམ ཡཱ ཨནིམིཏྟུཔགཾ ཏཙསཱརརུཀྑཾ ཝཱ ཁཱཎུཀཾ ཝཱ པཾསུཔུཉྫཝཱལིཀཱཔུཉྫཱནཾ ཝཱ ཨཉྙཏརཾ ཨནྟརཱ ཨེཀཾ ནིམིཏྟཾ ཀཏྭཱ སམྨཏཱ. ཚཱཡཱནིམིཏྟཱ ནཱམ པབྦཏཙྪཱཡཱདཱིནཾ ཡཾ ཀིཉྩི ཚཱཡཾ ནིམིཏྟཾ ཀཏྭཱ སམྨཏཱ. ཨནིམིཏྟཱ ནཱམ སབྦེན སབྦཾ ནིམིཏྟཱནི ཨཀིཏྟེཏྭཱ སམྨཏཱ. བཧིསཱིམེ ཋིཏསམྨཏཱ ནཱམ ནིམིཏྟཱནི ཀིཏྟེཏྭཱ ནིམིཏྟཱནཾ བཧི ཋིཏེན སམྨཏཱ.

ནདིཡཱ སམུདྡེ ཛཱཏསྶརེ སམྨཏཱ ནཱམ ཨེཏེསུ ནདིཨཱདཱིསུ སམྨཏཱ. སཱ ཧི ཨེཝཾ སམྨཏཱཔི ‘‘སབྦཱ, བྷིཀྑཝེ, ནདཱི ཨསཱིམཱ, སབྦོ སམུདྡོ ཨསཱིམོ, སབྦོ ཛཱཏསྶརོ ཨསཱིམོ’’ཏི (མཧཱཝ. ༡༤༨) ཝཙནཏོ ཨསམྨཏཱཝ ཧོཏི. སཱིམཱཡ སཱིམཾ སམྦྷིནྡནྟེན སམྨཏཱ ནཱམ ཨཏྟནོ སཱིམཱཡ པརེསཾ སཱིམཾ སམྦྷིནྡནྟེན སམྨཏཱ. སཙེ ཧི པོརཱཎཀསྶ ཝིཧཱརསྶ པུརཏྠིམཱཡ དིསཱཡ ཨམྦོ ཙེཝ ཛམྦཱུ ཙཱཏི དྭེ རུཀྑཱ ཨཉྙམཉྙཾ སཾསཊྛཝིཊཔཱ ཧོནྟི, ཏེསུ ཨམྦསྶ པཙྪིམདིསཱབྷཱགེ ཛམྦཱུ, ཝིཧཱརསཱིམཱ ཙ ཛམྦུཾ ཨནྟོ ཀཏྭཱ ཨམྦཾ ཀིཏྟེཏྭཱ བདྡྷཱ ཧོཏི, ཨཐ པཙྪཱ ཏསྶ ཝིཧཱརསྶ པུརཏྠིམཱཡ དིསཱཡ ཝིཧཱརེ ཀཏེ སཱིམཾ བནྡྷནྟཱ བྷིཀྑཱུ ཏཾ ཨམྦཾ ཨནྟོ ཀཏྭཱ ཛམྦུཾ ཀིཏྟེཏྭཱ བནྡྷནྟི, སཱིམཱཡ སཱིམཾ སམྦྷིནྣཱ ཧོཏི. སཱིམཱཡ སཱིམཾ ཨཛ྄ཛྷོཏྠརནྟེན སམྨཏཱ ནཱམ ཨཏྟནོ སཱིམཱཡ པརེསཾ སཱིམཾ ཨཛ྄ཛྷོཏྠརནྟེན སམྨཏཱ. སཙེ ཧི པརེསཾ བདྡྷསཱིམཾ སཀལཾ ཝཱ ཏསྶཱ པདེསཾ ཝཱ ཨནྟོ ཀཏྭཱ ཨཏྟནོ སཱིམཾ སམྨནྣཏི, སཱིམཱཡ སཱིམཱ ཨཛ྄ཛྷོཏྠརིཏཱ ནཱམ ཧོཏཱིཏི. ཨིཏི ཨིམཱཧི ཨེཀཱདསཧི ཝིཔཏྟིསཱིམཱཧི ཝཛྫིཏཱཏི ཨཏྠོ.

ཏིསམྤཏྟིསཾཡུཏཱཏི ¶ ནིམིཏྟསམྤཏྟི, པརིསཱསམྤཏྟི, ཀམྨཝཱཙཱསམྤཏྟཱིཏི ཨིམཱཧི ཏཱིཧི སམྤཏྟཱིཧི ¶ སམནྣཱགཏཱ. ཏཏྠ ནིམིཏྟསམྤཏྟིཡུཏྟཱ ནཱམ ‘‘པབྦཏནིམིཏྟཾ, པཱསཱཎནིམིཏྟཾ, ཝནནིམིཏྟཾ, རུཀྑནིམིཏྟཾ, མགྒནིམིཏྟཾ, ཝམྨིཀནིམིཏྟཾ, ནདིནིམིཏྟཾ, ཨུདཀནིམིཏྟ’’ནྟི (མཧཱཝ. ༡༣༨) ཨེཝཾ ཝུཏྟེསུ ཨཊྛསུ ནིམིཏྟེསུ ཏསྨིཾ ཏསྨིཾ དིསཱབྷཱགེ ཡཐཱལདྡྷཱནི ནིམིཏྟུཔགཱནི ནིམིཏྟཱནི ‘‘པུརཏྠིམཱཡ དིསཱཡ ཀིཾ ནིམིཏྟཾ? པབྦཏོ, བྷནྟེ, ཨེསོ པབྦཏོ ནིམིཏྟ’’ནྟིཨཱདིནཱ ནཡེན སམྨཱ ཀིཏྟེཏྭཱ སམྨཏཱ.

པརིསཱསམྤཏྟིཡུཏྟཱ ནཱམ སབྦནྟིམེན པརིཙྪེདེན ཙཏཱུཧི བྷིཀྑཱུཧི སནྣིཔཏིཏྭཱ ཡཱཝཏིཀཱ ཏསྨིཾ གཱམཁེཏྟེ བདྡྷསཱིམཾ ཝཱ ནདིསམུདྡཛཱཏསྶརེ ཝཱ ཨནོཀྐམིཏྭཱ ཋིཏཱ བྷིཀྑཱུ, ཏེ སབྦེ ཧཏྠཔཱསེ ཝཱ ཀཏྭཱ, ཚནྡཾ ཝཱ ཨཱཧརིཏྭཱ སམྨཏཱ.

ཀམྨཝཱཙཱསམྤཏྟིཡུཏྟཱ ནཱམ ‘‘སུཎཱཏུ མེ, བྷནྟེ སངྒྷོ, ཡཱཝཏཱ སམནྟཱ ནིམིཏྟཱ ཀིཏྟིཏཱ’’ཏིཨཱདིནཱ (མཧཱཝ. ༡༣༩) ནཡེན ཝུཏྟཱཡ པརིསུདྡྷཱཡ ཉཏྟིདུཏིཡཀམྨཝཱཙཱཡ སམྨཏཱ. ཨེཝཾ ཨེཀཱདས ཝིཔཏྟིསཱིམཱཡོ ཨཏིཀྐམིཏྭཱ ཏིཝིདྷསམྤཏྟིཡུཏྟཱ ནིམིཏྟེན ནིམིཏྟཾ གྷཊེཏྭཱ སམྨཏཱ སཱིམཱ བདྡྷསཱིམཱཏི ཝེདིཏབྦཱ.

༢༥༥༣-༤. ཁཎྜསམཱནསཾཝཱསཨཝིཔྤཝཱསཱ ཨཱདཡོ ཨཱདིབྷཱུཏཱ, ཨཱདིམྷི ཝཱ ཡཱསཾ སཱིམཱནཾ ཏཱ ཁཎྜསམཱནསཾཝཱསཱཝིཔྤཝཱསཱདཱི, ཏཱསཾ, ཏཱཧི ཝཱ པབྷེདོ ཁཎྜསམཱནསཾཝཱསཱདིབྷེདོ, ཏཏོ ཁཎྜསམཱནསཾཝཱསཱདིབྷེདཏོ, ཁཎྜསཱིམཱ, སམཱནསཾཝཱསསཱིམཱ, ཨཝིཔྤཝཱསསཱིམཱཏི ཨིམཱསཾ སཱིམཱནཾ ཨེཏཱཧི ཝཱ ཀརཎབྷཱུཏཱཧི, ཧེཏུབྷཱུཏཱཧི ཝཱ ཛཱཏེན ཝིབྷཱགེནཱཏི ཝུཏྟཾ ཧོཏི. སམཱནསཾཝཱསཱཝིཔྤཝཱསཱནམནྟརེ ཁཎྜཱ པརིཙྪིནྣཱ ཏཱཧི ཨསངྐརཱ ¶ སཱིམཱ ཁཎྜསཱིམཱ ནཱམ. སམཱནསཾཝཱསེཧི བྷིཀྑཱུཧི ཨེཀཏོ ཨུཔོསཐཱདིཀོ སཾཝཱསོ ཨེཏྠ ཀརཱིཡཏཱིཏི སམཱནསཾཝཱསཱ ནཱམ. ཨཝིཔྤཝཱསཱཡ ལཀྑཎཾ ‘‘བནྡྷིཏྭཱ’’ཏིཨཱདིནཱ ཝཀྑཏི. ཨིཏི བདྡྷཱ ཏིདྷཱ ཝུཏྟཱཏི ཨེཝཾ བདྡྷསཱིམཱ ཏིཔྤབྷེདཱ ཝུཏྟཱ.

ཨུདཀུཀྑེཔཱཏི ཧེཏུམྷི ནིསྶཀྐཝཙནཾ. སཏྟནྣཾ ཨབྦྷནྟརཱནཾ སམཱཧཱརཱ སཏྟབྦྷནྟརཱ, ཏཏོཔི ཙ. ཨབདྡྷཱཔི ཏིཝིདྷཱཏི སམྦནྡྷོ. ཏཏྠཱཏི ཏཱསུ ཏཱིསུ ཨབདྡྷསཱིམཱསུ. གཱམཔརིཙྪེདོཏི སབྦདིསཱསུ སཱིམཾ པརིཙྪིནྡིཏྭཱ ‘‘ཨིམསྶ པདེསསྶ ཨེཏྟཀོ ཀརོ’’ཏི ཨེཝཾ ཀརེན ནིཡམིཏོ གཱམཔྤདེསོ. ཡཐཱཧ – ‘‘ཡཏྟཀེ པདེསེ ཏསྶ གཱམསྶ བྷོཛཀཱ བལིཾ ཧརནྟི ¶ , སོ པདེསོ ཨཔྤོ ཝཱ ཧོཏུ མཧནྟོ ཝཱ, ‘གཱམསཱིམཱ’ཏྭེཝ སངྑྱཾ གཙྪཏི. ཡམྤི ཨེཀསྨིཾཡེཝ གཱམཀྑེཏྟེ ཨེཀཾ པདེསཾ ‘ཨཡཾ ཝིསུཾ གཱམོ ཧོཏཱུ’ཏི པརིཙྪིནྡིཏྭཱ རཱཛཱ ཀསྶཙི དེཏི, སོཔི ཝིསུཾགཱམསཱིམཱ ཧོཏིཡེཝཱ’’ཏི (མཧཱཝ. ཨཊྛ. ༡༤༧).

‘‘གཱམཔརིཙྪེདོ’’ཏི ཨིམིནཱ ཙ ནགརཔརིཙྪེདོ ཙ སངྒཧིཏོ. ཡཐཱཧ – ‘‘གཱམགྒཧཎེན ཙེཏྠ ནགརམྤི གཧིཏམེཝ ཧོཏཱི’’ཏི (མཧཱཝ. ཨཊྛ. ༡༤༧). ནིགམསཱིམཱཡ ཝིསུཾཡེཝ ཝུཏྟཏྟཱ ཏསྶཱ ཨིདྷ སངྒཧོ ན ཝཏྟབྦོ. ཝུཏྟཉྷི པཱལི༹ཡཾ ‘‘ཡཾ གཱམཾ ཝཱ ནིགམཾ ཝཱ ཨུཔནིསྶཱཡ ཝིཧརཏི. ཡཱ ཏསྶ ཝཱ གཱམསྶ གཱམསཱིམཱ, ནིགམསྶ ཝཱ ནིགམསཱིམཱ, ཨཡཾ ཏཏྠ སམཱནསཾཝཱསཱ ཨེཀུཔོསཐཱ’’ཏི (མཧཱཝ. ༡༤༧). ཨིམིསྶཱ ཝིསུཾཡེཝ ལཀྑཎསྶ ཝུཏྟཏྟཱ གཱམསཱིམཱལཀྑཎེནེཝ ཨུཔལཀྑིཏཱ.

༢༥༥༥. ‘‘ཛཱཏསྶརེ’’ཏིཨཱདཱིསུ ཛཱཏསྶརཱདཱིནཾ ལཀྑཎཾ ཨེཝཾ ཝེདིཏབྦཾ – ཡོ པན ཀེནཙི ཁཎིཏྭཱ ཨཀཏོ སཡཾཛཱཏོ སོབྦྷོ སམནྟཏོ ཨཱགཏེན ཨུདཀེན པཱུརིཏོ ¶ ཏིཊྛཏི, ཡཏྠ ནདིཡཾ ཝཀྑམཱནཔྤཀཱརེ ཝསྶཀཱལེ ཨུདཀཾ སནྟིཊྛཏི, ཨཡཾ ཛཱཏསྶརོ ནཱམ. ཡོཔི ནདིཾ ཝཱ སམུདྡཾ ཝཱ བྷིནྡིཏྭཱ ནིཀྑནྟཨུདཀེན ཁཎིཏོ སོབྦྷོ ཨེཏཾ ལཀྑཎཾ པཱཔུཎཱཏི, ཨཡམྤི ཛཱཏསྶརོཡེཝ. སམུདྡོ པཱཀཊོཡེཝ.

ཡསྶཱ དྷམྨིཀཱནཾ རཱཛཱུནཾ ཀཱལེ ཨནྭཌྜྷམཱསཾ ཨནུདསཱཧཾ ཨནུཔཉྩཱཧཾ ཨནཏིཀྐམིཏྭཱ དེཝེ ཝསྶནྟེ ཝལཱཧཀེསུ ཝིགཏམཏྟེསུ སོཏཾ པཙྪིཛྫཏི, ཨཡཾ ནདིསངྑྱཾ ན གཙྪཏི. ཡསྶཱ པན ཨཱིདིསེ སུཝུཊྛིཀཱལེ ཝསྶཱནསྶ ཙཏུམཱསེ སོཏཾ ན པཙྪིཛྫཏི, ཡཏྠ ཏིཏྠེན ཝཱ ཨཏིཏྠེན ཝཱ སིཀྑཱཀརཎཱིཡེ ཨཱགཏལཀྑཎེན ཏིམཎྜལཾ པཊིཙྪཱདེཏྭཱ ཨནྟརཝཱསཀཾ ཨནུཀྑིཔིཏྭཱ ཨུཏྟརནྟིཡཱ བྷིཀྑུནིཡཱ ཨེཀདྭངྒུལམཏྟམྤི ཨནྟརཝཱསཀོ ཏེམིཡཏི, ཨཡཾ སམུདྡཾ ཝཱ པཝིསཏུ ཏལཱ༹ཀཾ ཝཱ, པབྷཝཏོ པཊྛཱཡ ནདཱི ནཱམ.

སམནྟཏོཏི སམནྟཱ. མཛ྄ཛྷིམསྶཱཏི ཐཱམམཛ྄ཛྷིམསྶ པུརིསསྶ. ཨུདཀུཀྑེཔོཏི ཝཀྑམཱནེན ནཡེན ཐཱམཔྤམཱཎེན ཁིཏྟསྶ ཨུདཀསྶ ཝཱ ཝཱལུཀཱཡ ཝཱ པཏིཏཊྛཱནེན པརིཙྪིནྣོ ཨནྟོཔདེསོ. ཡཐཱ ཨཀྑདྷུཏྟཱ དཱརུགུལ༹ཾ ཁིཔནྟི, ཨེཝཾ ཨུདཀཾ ཝཱ ཝཱལུཀཾ ཝཱ ཧཏྠེན གཧེཏྭཱ ཐཱམམཛ྄ཛྷིམེན པུརིསེན སབྦཐཱམེན ཁིཔིཏབྦཾ, ཏཏྠ ཡཏྠ ཨེཝཾ ཁིཏྟཾ ཨུདཀཾ ཝཱ ¶ ཝཱལུཀཱ ཝཱ པཏཏི, ཨཡཾ ཨུདཀུཀྑེཔོ ནཱམཱཏི. ཨུདཀུཀྑེཔསཉྙིཏོཏི ‘‘ཨུདཀུཀྑེཔོ’’ཏི སལླཀྑིཏོ.

༢༥༥༦. ཨགཱམཀེ ཨརཉྙེཏི ཝིཉྫྷཱཊཝིསདིསེ གཱམརཧིཏེ མཧཱཨརཉྙེ. སམནྟཏོ སཏྟེཝབྦྷནྟརཱཏི ཨཏྟནོ ཋིཏཊྛཱནཏོ པརིཀྑིཔིཏྭཱ སཏྟེཝ ཨབྦྷནྟརཱ ཡསྶཱ སཱིམཱཡ པརིཙྪེདོ, ཨཡཾ སཏྟབྦྷནྟརནཱམིཀཱ སཱིམཱ ནཱམ.

༢༥༥༧. གུལུ༹ཀྑེཔནཡེནཱཏི ¶ ཨཀྑདྷུཏྟཀཱནཾ དཱརུགུལུ༹ཀྑིཔནཱཀཱརེན. ཨུདཀུཀྑེཔཀཱཏི ཨུདཀུཀྑེཔསདིསཝསེན.

༢༥༥༨. ཨིམཱསཾ དྭིནྣཾ སཱིམཱནཾ ཝཌྜྷནཀྐམཾ དསྶེཏུམཱཧ ‘‘ཨབྦྷནྟརཱུདཀུཀྑེཔཱ, ཋིཏོཀཱསཱ པརཾ སིཡུ’’ནྟི. ཋིཏོཀཱསཱ པརནྟི པརིསཱཡ ཋིཏཊྛཱནཏོ པརཾ, པརིསཔརིཡནྟཏོ པཊྛཱཡ སཏྟབྦྷནྟརཱ ཙ མིནིཏབྦཱ, ཨུདཀུཀྑེཔོ ཙ ཀཱཏབྦོཏི ཨཏྠོ.

༢༥༥༩-༦༠. ཨནྟོཔརིཙྪེདེཏི ཨུདཀུཀྑེཔེན ཝཱ སཏྟབྦྷནྟརེཧི ཝཱ པརིཙྪིནྣོཀཱསསྶ ཨནྟོ. ཧཏྠཔཱསཾ ཝིཧཱཡ ཋིཏོ ཝཱ པརཾ ཏཏྟཀཾ པརིཙྪེདཾ ཨནཏིཀྐམྨ ཋིཏོ ཝཱཏི ཡོཛནཱ, སཱིམནྟརིཀཏྠཱཡ ཋཔེཏབྦཾ ཨེཀཾ ཨུདཀུཀྑེཔཾ ཝཱ སཏྟབྦྷནྟརཾ ཨེཝ ཝཱ ཨནཏིཀྐམྨ ཋིཏོཏི ཨཏྠོ.

ཀམྨཾ ཝིཀོཔེཏཱིཏི ཨནྟོ ཋིཏོ ཀམྨསྶ ཝགྒབྷཱཝཀརཎཏོ, བཧི ཏཏྟཀཾ པདེསཾ ཨནཏིཀྐམིཏྭཱ ཋིཏོ ཨཉྙསྶ སངྒྷསྶ གཎཔཱུརཎབྷཱཝཾ གཙྪནྟོ སཱིམཱཡ སངྐརབྷཱཝཀརཎེན ཀམྨཾ ཝིཀོཔེཏི. ཨིཏི ཡསྨཱ ཨཊྛཀཐཱནཡོ, ཏསྨཱ སོ ཨནྟོསཱིམཱཡ ཧཏྠཔཱསཾ ཝིཛཧིཏྭཱ ཋིཏོ ཧཏྠཔཱསེ ཝཱ ཀཱཏབྦོ, སཱིམནྟརིཀཏྠཱཡ པརིཙྪིནྣོཀཱསཏོ བཧི ཝཱ ཀཱཏབྦོ. ཏཏྟཀཾ པརིཙྪེདཾ ཨནཏིཀྐམིཏྭཱ ཋིཏོ ཡཐཱཋིཏོཝ སཙེ ཨཉྙསྶ ཀམྨསྶ གཎཔཱུརཀོ ན ཧོཏི, ཀམྨཾ ན ཀོཔེཏཱིཏི གཧེཏབྦཾ.

༢༥༦༡-༢. སཎྛཱནནྟི ཏིཀོཊིསཎྛཱནཾ. ནིམིཏྟནྟི པབྦཏཱདིནིམིཏྟཾ. དིསཀིཏྟནནྟི ‘‘པུརཏྠིམཱཡ དིསཱཡ ཀིཾ ནིམིཏྟ’’ནྟིཨཱདིནཱ དིསཱཀིཏྟནཾ. པམཱཎནྟི ཏིཡོཛནཔརམཾ པམཱཎཾ ¶ . སོདྷེཏྭཱཏི ཡསྨིཾ གཱམཀྑེཏྟེ སཱིམཾ བནྡྷཏི, ཏཏྠ ཝསནྟེ ¶ ཨུཔསམྤནྣབྷིཀྑཱུ བདྡྷསཱིམཝིཧཱརེ ཝསནྟེ སཱིམཱཡ བཧི གནྟུཾ ཨདཏྭཱ, ཨབདྡྷསཱིམཝིཧཱརེ ཝསནྟེ ཧཏྠཔཱསཾ ཨུཔནེཏབྦེ ཧཏྠཔཱསཾ ནེཏྭཱ ཨཝསེསེ བཧིསཱིམཱཡ ཀཏྭཱ སབྦམགྒེསུ ཨཱརཀྑཾ ཝིདཧིཏྭཱཏི ཝུཏྟཾ ཧོཏི. སཱིམནྟི ཁཎྜསཱིམཾ.

ཀཱིདིསནྟི ཨཱཧ ‘‘ཏིཀོཎ’’ནྟིཨཱདི. པཎཝཱུཔམནྟི པཎཝསཎྛཱནཾ མཛ྄ཛྷེ སཾཁིཏྟཾ ཨུབྷཡཀོཊིཡཱ ཝིཏྠཏཾ. ‘‘ཝིཏཱནཱཀཱརཾ དྷནུཀཱཀཱར’’ནྟི ཨཱཀཱར-སདྡོ པཙྩེཀཾ ཡོཛེཏབྦོ. དྷནུཀཱཀཱརནྟི ཨཱརོཔིཏདྷནུསཎྛཱནཾ, ‘‘མུདིངྒཱུཔམཾ སཀཊཱུཔམ’’ནྟི ཨུཔམཱ-སདྡོ པཙྩེཀཾ ཡོཛེཏབྦོ. མུདིངྒཱུཔམནྟི མཛ྄ཛྷེ ཝིཏྠཏཾ ཨུབྷཡཀོཊིཡཱ ཏནུཀཾ ཏུརིཡཝིསེསཾ མུདིངྒནྟི ཝདནྟི, ཏཱདིསནྟི ཨཏྠོ. སཱིམཾ བནྡྷེཡྻཱཏི ཡོཛནཱ.

༢༥༦༣. པབྦཏཱདིནིམིཏྟུཔགནིམིཏྟཱནི དསྶེཏུམཱཧ ‘‘པབྦཏ’’ནྟིཨཱདི. ཨིཏི ཨཊྛ ནིམིཏྟཱནི དཱིཔཡེཏི ཡོཛནཱ. ཏཏྲེཝཾ སངྑེཔཏོ ནིམིཏྟུཔགཏཱ ཝེདིཏབྦཱ – སུདྡྷཔཾསུསུདྡྷཔཱསཱཎཨུབྷཡམིསྶཀཝསེན (ཀངྑཱ. ཨཊྛ. ནིདཱནཝཎྞནཱ; མཧཱཝ. ཨཊྛ. ༡༣༨) ཏིཝིདྷོཔི ཧི པབྦཏོ ཧཏྠིཔྤམཱཎཏོ པཊྛཱཡ ཨུདྡྷཾ ནིམིཏྟུཔགོ, ཏཏོ ཨོམཀཏརོ ན ཝཊྚཏི. ཨནྟོསཱརེཧི ཝཱ ཨནྟོསཱརམིསྶཀེཧི ཝཱ རུཀྑེཧི ཙཏུཔཉྩརུཀྑམཏྟམྤི ཝནཾ ནིམིཏྟུཔགཾ, ཏཏོ ཨཱུནཏརཾ ན ཝཊྚཏི. པཱསཱཎནིམིཏྟེ ཨཡགུལ༹མྤི པཱསཱཎསངྑྱམེཝ གཙྪཏི, ཏསྨཱ ཡོ ཀོཙི པཱསཱཎོ ཨུཀྐཾསེན ཧཏྠིཔྤམཱཎཏོ ཨོམཀཏརཾ ཨཱདིཾ ཀཏྭཱ ཧེཊྛིམཔརིཙྪེདེན དྭཏྟིཾསཔལགུལ༹པིཎྜཔརིམཱཎོ ནིམིཏྟུཔགོ, ན ཏཏོ ཁུདྡཀཏརོ. པིཊྛིཔཱསཱཎོ པན ཨཏིམཧནྟོཔི ཝཊྚཏི. རུཀྑོ ཛཱིཝནྟོཡེཝ ཨནྟོསཱརོ བྷཱུམིཡཾ པཏིཊྛིཏོ ཨནྟམསོ ཨུབྦེདྷཏོ ཨཊྛངྒུལོ ¶ པརིཎཱཧཏོ སཱུཙིདཎྜཔྤམཱཎོཔི ནིམིཏྟུཔགོ, ན ཏཏོ ཨོརཾ ཝཊྚཏི. མགྒོ ཛངྒྷམགྒོ ཝཱ ཧོཏུ སཀཊམགྒོ ཝཱ, ཡོ ཝིནིཝིཛ྄ཛྷིཏྭཱ དྭེ ཏཱིཎི གཱམཀྑེཏྟཱནི གཙྪཏི, ཏཱདིསོ ཛངྒྷསཀཊསཏྠེཧི ཝལ༹ཉྫིཡམཱནོཡེཝ ནིམིཏྟུཔགོ, ཨཝལ༹ཉྫོ ན ཝཊྚཏི. ཧེཊྛིམཔརིཙྪེདེན ཏཾདིཝསཾ ཛཱཏོ ཨཊྛངྒུལུབྦེདྷོ གོཝིསཱཎམཏྟོཔི ཝམྨིཀོ ནིམིཏྟུཔགོ, ཏཏོ ཨོརཾ ན ཝཊྚཏི. ཨུདཀཾ ཡཾ ཨསནྡམཱནཾ ཨཱཝཱཊཔོཀྑརཎིཏལཱ༹ཀཛཱཏསྶརལོཎིསམུདྡཱདཱིསུ ཋིཏཾ, ཏཾ ཨཱདིཾ ཀཏྭཱ ཨནྟམསོ ཏངྑཎཾཡེཝ པཐཝིཡཾ ཁཏེ ཨཱཝཱཊེ གྷཊེཧི ཨཱཧརིཏྭཱ པཱུརིཏམྤི ཡཱཝ ཀམྨཝཱཙཱཔརིཡོསཱནཱ སཎྛཧནཀཾ ནིམིཏྟུཔགཾ, ཨིཏརཾ སནྡམཱནཀཾ, ཝུཏྟཔརིཙྪེདཀཱལཾ ¶ ཨཏིཊྛནྟཾ, བྷཱཛནགཏཾ ཝཱ ན ཝཊྚཏི. ཡཱ ཨབདྡྷསཱིམཱལཀྑཎེ ནདཱི ཝུཏྟཱ, སཱ ནིམིཏྟུཔགཱ, ཨཉྙཱ ན ཝཊྚཏཱིཏི.

༢༥༦༤. ཏེསཱུཏི ནིདྡྷཱརཎེ བྷུམྨཾ. ཏཱིཎཱིཏི ནིདྡྷཱརིཏབྦདསྶནཾ, ཨིམིནཱ ཨེཀཾ ཝཱ དྭེ ཝཱ ནིམིཏྟཱནི ན ཝཊྚནྟཱིཏི དསྶེཏི. ཡཐཱཧ – ‘‘སཱ ཨེཝཾ སམྨནྣིཏྭཱ བཛ྄ཛྷམཱནཱ ཨེཀེན, དྭཱིཧི ཝཱ ནིམིཏྟེཧི ཨབདྡྷཱ ཧོཏཱི’’ཏི (མཧཱཝ. ཨཊྛ. ༡༣༨). སཏེནཱཔཱིཏི ཨེཏྠ པི-སདྡོ སམྦྷཱཝནཱཡཾ དཊྛབྦོ, ཏེན ཝཱིསཏིཡཱ, ཏིཾསཱཡ ཝཱ ནིམིཏྟེཧི ཝཏྟབྦམེཝ ནཏྠཱིཏི དཱིཔེཏི.

༢༥༦༥. ཏིཡོཛནཾ པརཾ ཨུཀྐཊྛོ པརིཙྪེདོ ཨེཏིསྶཱཏི ཏིཡོཛནཔརཱ. ‘‘ཝཱིསཏཱི’’ཏིཨཱདཱིནཾ སངྑྱཱནེ, སངྑྱེཡྻེ ཙ ཝཏྟནཏོ ཨིདྷ སངྑྱཱནེ ཝཏྟམཱནཾ ཝཱིསཏི-སདྡཾ གཧེཏྭཱ ཨེཀཝཱིསཏི བྷིཀྑཱུནནྟི བྷིནྣཱདྷིཀརཎནིདྡེསོ ཀཏོཏི དཊྛབྦཾ. ‘‘ཨེཀཝཱིསཏི’’ནྟི ཝཏྟབྦེ གཱཐཱབནྡྷཝསེན ནིགྒཧཱིཏལོཔོ, ཝཱིསཏིཝགྒཀརཎཱིཡཔརམཏྟཱ སངྒྷཀམྨསྶ ཀམྨཱརཧེན སདྡྷིཾ བྷིཀྑཱུནཾ ཨེཀཝཱིསཏིཾ གཎྷནྟཱིཏི ཨཏྠོ, ཨིདཉྩ ¶ ནིསིནྣཱནཾ ཝསེན ཝུཏྟཾ. ཧེཊྛིམནྟཏོ ཧི ཡཏྠ ཨེཀཝཱིསཏི བྷིཀྑཱུ ནིསཱིདིཏུཾ སཀྐོནྟི, ཏཏྟཀེ པདེསེ སཱིམཾ བནྡྷིཏུཾ ཝཊྚཏཱིཏི.

༢༥༦༦. ཡཱ ཨུཀྐཊྛཱཡཔི ཡཱ ཙ ཧེཊྛིམཱཡཔི ཀེསགྒམཏྟཏོཔི ཨདྷིཀཱ ཝཱ ཨཱུནཱ ཝཱ, ཨེཏཱ དྭེཔི སཱིམཱཡོ ‘‘ཨསཱིམཱ’’ཏི ཨཱདིཙྩབནྡྷུནཱ ཝུཏྟཱཏི ཡོཛནཱ.

༢༥༦༧. སམནྟཏོ སབྦམེཝ ནིམིཏྟཾ ཀིཏྟེཏྭཱཏི པུབྦདིསཱནུདིསཱདཱིསུ པརིཏོ སབྦདིསཱསུ ཡཐཱལདྡྷཾ ནིམིཏྟོཔགཾ སབྦནིམིཏྟཾ ‘‘ཝིནཡདྷརེན པུཙྪིཏབྦཾ ‘པུརཏྠིམཱཡ དིསཱཡ ཀིཾ ནིམིཏྟ’ནྟི? ‘པབྦཏོ, བྷནྟེ’ཏི. པུན ཝིནཡདྷརེན ‘ཨེསོ པབྦཏོ ནིམིཏྟ’’ནྟིཨཱདིནཱ (མཧཱཝ. ཨཊྛ. ༡༣༨) ཨཊྛཀཐཱཡཾ ཝུཏྟནཡེན ནིམིཏྟེན ནིམིཏྟཾ གྷཊེཏྭཱ ཀིཏྟེཏྭཱ. ཉཏྟི དུཏིཡཱ ཡསྶཱཏི ཝིགྒཧོ, ‘‘སུཎཱཏུ མེ, བྷནྟེ སངྒྷོ, ཡཱཝཏཱ སམནྟཱ ནིམིཏྟཱ ཀིཏྟིཏཱ’’ཏིཨཱདིནཱ (མཧཱཝ. ༡༣༩) པདབྷཱཛནེ ཝུཏྟེན ཉཏྟིདུཏིཡེན ཀམྨེནཱཏི ཨཏྠོ. ཨརཧཏི པཧོཏི ཝིནཡདྷརོཏི ཨདྷིཔྤཱཡོ.

༢༥༦༨. བནྡྷིཏྭཱཏི ཡཐཱཝུཏྟལཀྑཎནཡེན སམཱནསཾཝཱསསཱིམཾ པཋམཾ བནྡྷིཏྭཱ. ཨནནྟརནྟི ཀིཙྩནྟརེན བྱཝཧིཏཾ ཨཀཏྭཱ, ཀཱལཀྑེཔཾ ཨཀཏྭཱཏི ཝུཏྟཾ ཧོཏི, སཱིམཾ སམཱུཧནིཏུཀཱམཱནཾ ¶ པཙྩཏྟིཀཱནཾ ཨོཀཱསཾ ཨདཏྭཱཏི ཨདྷིཔྤཱཡོ. པཙྪཱཏི སམཱནསཾཝཱསསམྨུཏིཏོ པཙྪཱ. ཙཱིཝརཱཝིཔྤཝཱསཀཾ སམྨནྣིཏྭཱན ཡཱ བདྡྷཱ, སཱ ‘‘ཨཝིཔྤཝཱསཱ’’ཏི ཝུཙྩཏཱིཏི ཡོཛནཱ.

ཏཏྠ ཙཱིཝརཱཝིཔྤཝཱསཀཾ སམྨནྣིཏྭཱན ཡཱ བདྡྷཱཏི ‘‘སུཎཱཏུ མེ, བྷནྟེ སངྒྷོ, ཡཱ སཱ སངྒྷེན སཱིམཱ སམྨཏཱ སམཱནསཾཝཱསཱ ¶ ཨེཀུཔོསཐཱ…པེ… ཋཔེཏྭཱ གཱམཉྩ གཱམཱུཔཙཱརཉྩ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི (མཧཱཝ. ༡༤༤) ཝུཏྟནཡེན ཙཱིཝརེན ཨཝིཔྤཝཱསཾ སམྨནྣིཏྭཱ ཡཱ བདྡྷཱ. སཱ ཨཝིཔྤཝཱསཱཏི ཝུཙྩཏཱིཏི ཏཏྠ ཝསནྟཱནཾ བྷིཀྑཱུནཾ ཙཱིཝརེན ཝིཔྤཝཱསནིམིཏྟཱཔཏྟིཡཱ ཨབྷཱཝཏོ ཏཐཱ ཝུཙྩཏི, ‘‘ཨཝིཔྤཝཱསསཱིམཱ’’ཏི ཝུཙྩཏཱིཏི ཝུཏྟཾ ཧོཏི.

༢༥༦༩. ‘‘ཡཱ ཀཱཙི ནདིལཀྑཎཔྤཏྟཱ ནདཱི ནིམིཏྟཱནི ཀིཏྟེཏྭཱ ‘ཨེཏཾ བདྡྷསཱིམཾ ཀརོམཱ’ཏི ཀཏཱཔི ཨསཱིམཱཝ ཧོཏཱི’’ཏིཨཱདིཀཾ (མཧཱཝ. ཨཊྛ. ༡༤༧) ཨཊྛཀཐཱནཡཾ དསྶེཏུམཱཧ ‘‘ནདཱི…པེ… ན ཝོཏྠརཏཱི’’ཏི, ན པཏྠརཏི སཱིམཱབྷཱཝེན བྱཱཔིནཱི ན ཧོཏཱིཏི ཨཏྠོ. ཏེནེཝཱཏི ཡེན ན ཝོཏྠརཏི, ཏེནེཝ ཀཱརཎེན. ཨབྲཝཱིཏི ‘‘སབྦཱ, བྷིཀྑཝེ, ནདཱི ཨསཱིམཱ, སབྦོ སམུདྡོ ཨསཱིམོ, སབྦོ ཛཱཏསྶརོ ཨསཱིམོ’’ཏི (མཧཱཝ. ༡༤༧) ཨཝོཙ.

སཱིམཱཀཐཱཝཎྞནཱ.

༢༥༧༠. ཨཊྛམིཡཱཔི ཨུཔོསཐཝོཧཱརཏྟཱ དིནཝསེན ཨུཔོསཐཱནཾ ཨཏིརེཀཏྟེཔི ཨིདྷ ཨདྷིཔྤེཏེཡེཝ ཨུཔོསཐེ གཧེཏྭཱ ཨཱཧ ‘‘ནཝེཝཱ’’ཏི.

༢༥༧༡-༣. ཏེ སརཱུཔཏོ དསྶེཏུམཱཧ ‘‘ཙཱཏུདྡསོ…པེ… ཀམྨེནུཔོསཐཱ’’ཏི. ཙཏུདྡསནྣཾ པཱུརཎོ ཙཱཏུདྡསོ. པནྣརསནྣཾ པཱུརཎོ པནྣརསོ. ཡདཱ པན ཀོསམྦཀྑནྡྷཀེ (མཧཱཝ. ༤༥༡ ཨཱདཡོ) ཨཱགཏནཡེན བྷིནྣེ སངྒྷེ ཨོསཱརིཏེ ཏསྨིཾ བྷིཀྑུསྨིཾ སངྒྷོ ཏསྶ ཝཏྠུསྶ ཝཱུཔསམཱཡ སངྒྷསཱམགྒིཾ ཀརོཏི, ཏདཱ ‘‘ཏཱཝདེཝ ཨུཔོསཐོ ཀཱཏབྦོ, པཱཏིམོཀྑཾ ཨུདྡིསིཏབྦ’’ནྟི (མཧཱཝ. ༤༧༥) ཝཙནཏོ ཋཔེཏྭཱ ཙཱཏུདྡསཔནྣརསེ ¶ ཨཉྙོཔི ཡོ ཀོཙི དིཝསོ སཱམགྒཱི ཨུཔོསཐོཏི. ཨེཏྠ ཨིཏི-སདྡོ ལུཏྟནིདྡིཊྛོ. ཙཱཏུདྡསོ, པནྣརསོ, སཱམགྒཱི ཙ ཨུཔོསཐོཏི ཨེཏེ ཏཡོཔི ཨུཔོསཐཱ དིཝསེནེཝ ནིདྡིཊྛཱ དིཝསེནེཝ ཝུཏྟཱཏི ཡོཛནཱ.

སངྒྷེཨུཔོསཐོཏི ¶ སངྒྷེན ཀཱཏབྦཨུཔོསཐོ. གཎེཔུགྒལུཔོསཐོཏི ཨེཏྠཱཔི ཨེསེཝ ནཡོ. སཱདྷྱསཱདྷནལཀྑཎསྶ སམྦནྡྷསྶ ལབྦྷམཱནཏྟཱ ‘‘སངྒྷེ’’ཏིཨཱདཱིསུ སཱམིཝཙནཔྤསངྒེ བྷུམྨནིདྡེསོ. ཨུཔོསཐོ སཱདྷྱོ ཀམྨབྷཱཝཏོ, སངྒྷགཎཔུགྒལཱ སཱདྷནཾ ཀཱརཀབྷཱཝཏོ.

སུཏྟསྶ ཨུདྡེསོ སུཏྟུདྡེསོ, སུཏྟུདྡེསོཏི ཨབྷིདྷཱནཾ ནཱམཾ ཡསྶ སོ སུཏྟུདྡེསཱབྷིདྷཱནོ. ཀམྨེནཱཏི ཀིཙྩཝསེན.

༢༥༧༤. ‘‘ཨདྷིཊྛཱན’’ནྟི ཝཱཙྩལིངྒམཔེཀྑིཏྭཱ ‘‘ནིདྡིཊྛ’’ནྟི ནཔུཾསཀནིདྡེསོ. ཝཱཙྩལིངྒཱ ཧི ཏབྦཱདཡོཏི པཱཏིམོཀྑོ ནིདྡིཊྛོ, པཱརིསུདྡྷི ནིདྡིཊྛཱཏི པུམིཏྠིལིངྒེན ཡོཛེཏབྦཱ.

༢༥༧༥. ཝུཏྟཱཏི ‘‘པཉྩིམེ, བྷིཀྑཝེ, པཱཏིམོཀྑུདྡེསཱ, ནིདཱནཾ ཨུདྡིསིཏྭཱ ཨཝསེསཾ སུཏེན སཱཝེཏབྦཾ, ཨཡཾ པཋམོ པཱཏིམོཀྑུདྡེསོ’’ཏིཨཱདིནཱ (མཧཱཝ. ༡༥༠) དེསིཏཱ, སཡཉྩ ཏེསཉྩ ཨུདྡེསེ སངྑེཔཏོ དསྶེཏུམཱཧ ‘‘ནིདཱན’’ནྟིཨཱདི. སཱཝེཏབྦནྟི ཨེཏྠ ‘‘སུཏེནཱ’’ཏི སེསོ. སེསཀནྟི ཨནུདྡིཊྛཊྛཱནཾ –

‘‘སུཎཱཏུ མེ, བྷནྟེ སངྒྷོ…པེ… ཨཱཝིཀཏཱ ཧིསྶ ཕཱསུ ཧོཏཱིཏི ཨིམཾ ནིདཱནཾ ཨུདྡིསིཏྭཱ ‘ཨུདྡིཊྛཾ ཁོ ¶ ཨཱཡསྨནྟོ ནིདཱནཾ, ཏཏྠཱཡསྨནྟེ པུཙྪཱམི ཀཙྩིཏྠ པརིསུདྡྷཱ, དུཏིཡམྤི པུཙྪཱམི…པེ… ཨེཝམེཏཾ དྷཱརཡཱམཱི’ཏི ཝཏྭཱ ‘ཨུདྡིཊྛཾ ཁོ ཨཱཡསྨནྟོ ནིདཱནཾ. སུཏཱ ཁོ པནཱཡསྨནྟེཧི ཙཏྟཱརོ པཱརཱཛིཀཱ དྷམྨཱ…པེ… ཨཝིཝདམཱནེཧི སིཀྑིཏབྦ’’ནྟི (མཧཱཝ. ཨཊྛ. ༡༥༠) –

ཨཊྛཀཐཱཡ ཝུཏྟནཡེན ཨཝསེསཾ སུཏེན སཱཝེཏབྦཾ.

༢༥༧༦. སེསེསུཔཱིཏི ཨུདྡིཊྛཱཔེཀྑཱཡ སེསེསུ པཱརཱཛིཀུདྡེསཱདཱིསུཔི. ‘‘ཨཡམེཝ ནཡོ ཉེཡྻོ’’ཏི སཱམཉྙེན ཝུཏྟེཔི ‘‘ཝིཏྠཱརེནེཝ པཉྩམོ’’ཏི ཝཙནཏོ ཝིཏྠཱརུདྡེསེ ‘‘སཱཝེཏབྦཾ ཏུ སེསཀ’’ནྟི ཨཡཾ ནཡོ ན ལབྦྷཏི. ‘‘སཱཝེཏབྦཾ ཏུ སེསཀ’’ནྟི ཝཙནཏོ པཱརཱཛིཀུདྡེསཱདཱིསུ ཡསྨིཾ ཝིཔྤཀཏེ ཨནྟརཱཡོ ཨུཔྤཛྫཏི, ཏེན སདྡྷིཾ ཨཝསེསཾ སུཏེན སཱཝེཏབྦཾ. ནིདཱནུདྡེསེ པན ¶ ཨནུདྡིཊྛེ སུཏེན སཱཝེཏབྦཾ ནཱམ ནཏྠི. བྷིཀྑུནིཔཱཏིམོཀྑེ ཨནིཡཏུདྡེསསྶ པརིཧཱིནཏྟཱ ‘‘བྷིཀྑུནཱིནཉྩ ཙཏྟཱརོ’’ཏི ཝུཏྟཾ. ཨུདྡེསཱ ནཝིམེ པནཱཏི བྷིཀྑཱུནཾ པཉྩ, བྷིཀྑུནཱིནཾ ཙཏྟཱརོཏི ཨུབྷཏོཔཱཏིམོཀྑེ ཨིམེ ནཝ ཨུདྡེསཱ ཝུཏྟཱཏི ཨཏྠོ.

༢༥༧༧. ཨུཔོསཐེཏི སངྒྷུཔོསཐེ. ཨནྟརཱཡནྟི རཱཛནྟརཱཡཱདིཀཾ དསཝིདྷཾ ཨནྟརཱཡཾ. ཡཐཱཧ – ‘‘རཱཛནྟརཱཡོ ཙོརནྟརཱཡོ ཨགྱནྟརཱཡོ ཨུདཀནྟརཱཡོ མནུསྶནྟརཱཡོ ཨམནུསྶནྟརཱཡོ ཝཱལ༹ནྟརཱཡོ སརཱིསཔནྟརཱཡོ ཛཱིཝིཏནྟརཱཡོ བྲཧྨཙརིཡནྟརཱཡོ’’ཏི (མཧཱཝ. ༡༥༠).

ཏཏྠ སཙེ བྷིཀྑཱུསུ ‘‘ཨུཔོསཐཾ ཀརིསྶཱམཱ’’ཏི (མཧཱཝ. ཨཊྛ. ༡༥༠) ནིསིནྣེསུ རཱཛཱ ཨཱགཙྪཏི, ཨཡཾ རཱཛནྟརཱཡོ. ཙོརཱ ཨཱགཙྪནྟི ¶ , ཨཡཾ ཙོརནྟརཱཡོ. དཝདཱཧོ ཨཱགཙྪཏི ཝཱ, ཨཱཝཱསེ ཝཱ ཨགྒི ཨུཊྛཧཏི, ཨཡཾ ཨགྱནྟརཱཡོ. མེགྷོ ཝཱ ཨུཊྛེཏི, ཨོགྷོ ཝཱ ཨཱགཙྪཏི, ཨཡཾ ཨུདཀནྟརཱཡོ. བཧཱུ མནུསྶཱ ཨཱགཙྪནྟི, ཨཡཾ མནུསྶནྟརཱཡོ. བྷིཀྑུཾ ཡཀྑོ གཎྷཱཏི, ཨཡཾ ཨམནུསྶནྟརཱཡོ. བྱགྒྷཱདཡོ ཙཎྜམིགཱ ཨཱགཙྪནྟི, ཨཡཾ ཝཱལ༹ནྟརཱཡོ. བྷིཀྑུཾ སཔྤཱདཡོ ཌཾསནྟི, ཨཡཾ སརཱིསཔནྟརཱཡོ. བྷིཀྑུ གིལཱནོ ཝཱ ཧོཏི, ཀཱལཾ ཝཱ ཀརོཏི, ཝེརིནོ ཝཱ ཏཾ མཱརེཏུཾ གཎྷནྟི, ཨཡཾ ཛཱིཝིཏནྟརཱཡོ. མནུསྶཱ ཨེཀཾ ཝཱ བཧུཾ ཝཱ བྷིཀྑཱུ བྲཧྨཙརིཡཱ ཙཱཝེཏུཀཱམཱ གཎྷནྟི, ཨཡཾ བྲཧྨཙརིཡནྟརཱཡོ.

‘‘ཙེཝཱ’’ཏི ཨིམིནཱ ཨནྟརཱཡེཝ ཨནྟརཱཡསཉྙིནཱ ཝིཏྠཱརུདྡེསེ ཨཀཏེཔི ཨནཱཔཏྟཱིཏི དཱིཔེཏི. ཨནུདྡེསོཏི ཝིཏྠཱརེན ཨནུདྡེསོ. ནིཝཱརིཏོཏི ‘‘ན, བྷིཀྑཝེ, ཨསཏི ཨནྟརཱཡེ སཾཁིཏྟེན པཱཏིམོཀྑཾ ཨུདྡིསིཏབྦ’’ནྟིཨཱདིནཱ (མཧཱཝ. ༡༥༠) པཊིསིདྡྷོ. ཨིམིནཱ ‘‘ཨནུཛཱནཱམི, བྷིཀྑཝེ, སཏི ཨནྟརཱཡེ སཾཁིཏྟེན པཱཏིམོཀྑཾ ཨུདྡིསིཏུ’’ནྟི (མཧཱཝ. ༡༥༠) ཨིདམྤི ཝིབྷཱཝིཏཾ ཧོཏི.

༢༥༧༨. ཏསྶཱཏི པཱཏིམོཀྑསྶ. ཨིསྶརཎསྶ ཧེཏུམཱཧ ‘‘‘ཐེརཱདྷེཡྻ’ནྟི པཱཋཏོ’’ཏི. ཐེརཱདྷེཡྻནྟི ཐེརཱདྷཱིནཾ, ཐེརཱཡཏྟནྟི ཨཏྠོ. པཱཋཏོཏི པཱལི༹ཝཙནཏོ. ‘‘ཡོ ཏཏྠ བྷིཀྑུ བྱཏྟོ པཊིབལོ, ཏསྶཱདྷེཡྻཾ པཱཏིམོཀྑ’’ནྟི (མཧཱཝ. ༡༥༥) ཝཙནཏོ ཨཱཧ ‘‘ཨཝཏྟནྟེནཱ’’ཏིཨཱདི. ཨཝཏྟནྟེནཱཏི ཨནྟམསོ དྭེཔི ཨུདྡེསེ ཨུདྡིསིཏུཾ ཨསཀྐོནྟེན. ཐེརེན ཡོ ¶ ཨཛ྄ཛྷིཊྛོ, ཨེཝམཛ྄ཛྷིཊྛསྶ ཡསྶ པན ཐེརསྶ, ནཝསྶ, མཛ྄ཛྷིམསྶ ཝཱ སོ པཱཏིམོཀྑོ ¶ ཝཏྟཏི པགུཎོ ཧོཏི, སོ ཨིསྶརོཏི སམྦནྡྷོ.

ཨཛ྄ཛྷིཊྛོཏི ‘‘ཏྭཾ, ཨཱཝུསོ, པཱཏིམོཀྑཾ ཨུདྡིསཱ’’ཏི ཨཱཎཏྟོ, ཨིམིནཱ ཨནཱཎཏྟསྶ ཨུདྡིསིཏུཾ སཱམཏྠིཡཱ སཏིཔི ཨནིསྶརབྷཱཝོ དཱིཔིཏོ ཧོཏི. ཡཐཱཧ – ‘‘སཙེ ཐེརསྶ པཉྩ ཝཱ ཙཏྟཱརོ ཝཱ ཏཡོ ཝཱ པཱཏིམོཀྑུདྡེསཱ ནཱགཙྪནྟི, དྭེ པན ཨཁཎྜཱ སུཝིསདཱ ཝཱཙུགྒཏཱ ཧོནྟི, ཐེརཱཡཏྟོཝ པཱཏིམོཀྑོ. སཙེ པན ཨེཏྟཀམྤི ཝིསདཾ ཀཱཏུཾ ན སཀྐོཏི, བྱཏྟསྶ བྷིཀྑུནོ ཨཱཡཏྟོ ཧོཏཱི’’ཏི (མཧཱཝ. ཨཊྛ. ༡༥༥).

༢༥༧༩. ཨུདྡིསནྟེཏི པཱཏིམོཀྑུདྡེསཀེ པཱཏིམོཀྑཾ ཨུདྡིསནྟེ. སམཱ ཝཱཏི ཨཱཝཱསིཀེཧི གཎནེན སམཱ ཝཱ. ཨཔྤཱ ཝཱཏི ཨཱུནཱ ཝཱ. ཨཱགཙྪནྟི སཙེ པནཱཏི སཙེ པན ཨཱགནྟུཀཱ བྷིཀྑཱུ ཨཱགཙྪནྟི. སེསཀནྟི ཨནུདྡིཊྛཊྛཱནཾ.

༢༥༨༠. ཨུདྡིཊྛམཏྟེཏི ཨུདྡིཊྛཀྑཎེཡེཝ ཀཐཱརམྦྷཏོ པུབྦམེཝ. ‘‘ཝཱ’’ཏི ཨིདཾ ཨེཏྠཱཔི ཡོཛེཏབྦཾ, ཨིམིནཱ ཨཝུཏྟཾ ‘‘ཨཝུཊྛིཏཱཡ ཝཱ’’ཏི ཨིམཾ ཝིཀཔྤཾ སམྤིཎྜེཏི. ཨཝུཊྛིཏཱཡ པརིསཱཡཱཏི ཙ བྷིཀྑུཔརིསཱཡ ཨཉྙམཉྙཾ སུཁཀཐཱཡ ནིསིནྣཱཡཡེཝཱཏི ཨཏྠོ. པརིསཱཡཱཏི ཨེཏྠ ‘‘ཨེཀཙྩཱཡཱ’’ཏི ཙ ‘‘སབྦཱཡཱ’’ཏི ཙ སེསོ. བྷིཀྑཱུནཾ ཨེཀཙྩཱཡ པརིསཱཡ ཝུཊྛིཏཱཡ ཝཱ སབྦཱཡ པརིསཱཡ ཝུཊྛིཏཱཡ ཝཱཏི ཡོཛནཱ. ཏེསནྟི ཝུཏྟཔྤཀཱརཱནཾ ཨཱཝཱསིཀཱནཾ. མཱུལེཏི སནྟིཀེ. པཱརིསུདྡྷི ཀཱཏབྦཱཏི ཡོཛནཱ. ‘‘ཨིདྷ པན, བྷིཀྑཝེ…པེ… ཨཱགཙྪནྟི བཧུཏརཱ, ཏེཧི, བྷིཀྑཝེ, བྷིཀྑཱུཧི པུན པཱཏིམོཀྑཾ ཨུདྡིསིཏབྦ’’ནྟི ཝུཏྟནཡཾ དསྶེཏུམཱཧ ‘‘སཙེ བཧཱུ’’ཏི. ཨེཏྠ ‘‘པུན པཱཏིམོཀྑཾ ཨུདྡིསིཏབྦ’’ནྟི སེསོ. སབྦཝིཀཔྤེསུ པུབྦཀིཙྩཾ ཀཏྭཱ ¶ པུན པཱཏིམོཀྑཾ ཨུདྡིསིཏབྦནྟི ཨཏྠོ. ཨཡཾ པནེཏྠ སེསཝིནིཙྪཡོ –

‘‘པནྣརསོཝཱསིཀཱནཾ, ཨིཏརཱནཾ སཙེཏརོ;

སམཱནེཏརེནུཝཏྟནྟུ, པུརིམཱནཾ སཙེདྷིཀཱ;

པུརིམཱ ཨནུཝཏྟནྟུ, ཏེསཾ སེསེཔྱཡཾ ནཡོ.

‘‘པཱཊིཔདོཝཱསིཀཱནཾ ¶ ,

ཨིཏརཱནཾ ཨུཔོསཐོ;

སམཐོཀཱནཾ སཱམགྒིཾ,

མཱུལཊྛཱ དེནྟུ ཀཱམཏོ.

བཧི གནྟྭཱན ཀཱཏབྦོ,

ནོ ཙེ དེནྟི ཨུཔོསཐོ;

དེཡྻཱནིཙྪཱཡ སཱམགྒཱི,

བཧཱུསུ བཧི ཝཱ ཝཛེ.

‘‘པཱཊིཔདེགནྟུཀཱནཾ, ཨེཝམེཝ ཨཡཾ ནཡོ;

སཱཝེཡྻ སུཏྟཾ སཉྩིཙྩ, ཨསྶཱཝེནྟསྶ དུཀྐཊནྟི.

༢༥༨༡. ཝིནིདྡིཊྛསྶཱཏི ཨཱཎཏྟསྶ, ཨིམིནཱ ཨིཏརེསཾ ཨནཱཔཏྟཱིཏི དཱིཔེཏི. ཨིདྷ ‘‘ཨགིལཱནསྶཱ’’ཏི སེསོ. ཐེརེན ཨཱཎཱཔེནྟེན ‘‘ཀིཉྩི ཀམྨཾ ཀརོནྟོ ཝཱ སདཱཀཱལམེཝ ཨེཀོ ཝཱ བྷཱརནིཏྠརཎཀོ ཝཱ སརབྷཱཎཀདྷམྨཀཐིཀཱདཱིསུ ཨཉྙཏརོ ཝཱ ན ཨུཔོསཐཱགཱརསམྨཛྫནཏྠཾ ཨཱཎཱཔེཏབྦོ, ཨཝསེསཱ པན ཝཱརེན ཨཱཎཱཔེཏབྦཱ’’ཏི (མཧཱཝ. ཨཊྛ. ༡༥༩) ཨཊྛཀཐཱཡ ཝུཏྟཝིདྷིནཱ ཨཱཎཱཔེཏབྦོ. སཙེ ཨཱཎཏྟོ སམྨཛྫནིཾ ཏཱཝཀཱལིཀམྤི ན ལབྷཏི, སཱཁཱབྷངྒཾ ཀཔྤིཡཾ ཀཱརེཏྭཱ སམྨཛྫིཏབྦཾ. ཏམྤི ཨལབྷནྟསྶ ལདྡྷཀཔྤིཡཾ ཧོཏི.

ཨཱསནཔཉྙཱཔནཱཎཏྟིཡམྤི ¶ ཝུཏྟནཡེནེཝ ཨཱཎཱཔེཏབྦོ. ཨཱཎཱཔེནྟེན ཙ སཙེ ཨུཔོསཐཱགཱརེ ཨཱསནཱནི ནཏྠི, སངྒྷིཀཱཝཱསཏོཔི ཨཱཧརིཏྭཱ པཉྙཔེཏྭཱ པུན ཨཱཧརིཏབྦཱནི. ཨཱསནེསུ ཨསཏི ཀཊསཱརཀེཔི ཏཊྚིཀཱཡོཔི པཉྙཔེཏུཾ ཝཊྚཏི, ཏཊྚིཀཱསུཔི ཨསཏི སཱཁཱབྷངྒཱནི ཀཔྤིཡཾ ཀཱརེཏྭཱ པཉྙཔེཏབྦཱནི, ཀཔྤིཡཀཱརཀཾ ཨལབྷནྟསྶ ལདྡྷཀཔྤིཡཾ ཧོཏི.

པདཱིཔཀརཎེཔི ཝུཏྟནཡེནེཝ ཨཱཎཱཔེཏབྦོ. ཨཱཎཱཔེནྟེན ཙ ‘‘ཨསུཀསྨིཾ ནཱམ ཨོཀཱསེ ཏེལཾ ཝཱ ཝཊྚི ཝཱ ཀཔལླིཀཱ ཝཱ ཨཏྠི, ཏཾ གཧེཏྭཱ ཀརོཧཱི’’ཏི ཝཏྟབྦོ. སཙེ ཏེལཱདཱིནི ནཏྠི ¶ , བྷིཀྑཱཙཱརེནཔི པརིཡེསིཏབྦཱནི. པརིཡེསིཏྭཱ ཨལབྷནྟསྶ ལདྡྷཀཔྤིཡཾ ཧོཏི. ཨཔིཙ ཀཔཱལེ ཨགྒིཔི ཛཱལེཏབྦོ.

༢༥༨༢. དཱིཔནྟི ཨེཏྠ ‘‘ཛཱལེཏྭཱ’’ཏི སེསོ. ཨཐ ཝཱ ‘‘ཀཏྭཱ’’ཏི ཨིམིནཱ ཙ ཡོཛེཏབྦཾ. གཎཉཏྟིཾ ཋཔེཏྭཱཏི ‘‘སུཎནྟུ མེ, ཨཱཡསྨནྟཱ, ཨཛྫུཔོསཐོ པནྣརསོ, ཡདཱཡསྨནྟཱནཾ པཏྟཀལླཾ, མཡཾ ཨཉྙམཉྙཾ པཱརིསུདྡྷིཨུཔོསཐཾ ཀརེཡྻཱམཱ’’ཏི ཨེཝཾ གཎཉཏྟིཾ ནིཀྑིཔིཏྭཱ. ཀཏྟབྦོ ཏཱིཧུཔོསཐོཏི ཏཱིཧི བྷིཀྑཱུཧི ཨུཔོསཐོ ཀཱཏབྦོ. ཏཱིསུ ཐེརེན ཨེཀཾསཾ ཨུཏྟརཱསངྒཾ ཀཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ དྭེ ཨེཝཾ ཏིཀྑཏྟུམེཝ ཝཏྟབྦོ ‘‘པརིསུདྡྷོ ཨཧཾ, ཨཱཝུསོ, ‘པརིསུདྡྷོ’ཏི མཾ དྷཱརེཐཱ’’ཏི (མཧཱཝ. ༡༦༨). དུཏིཡེན, ཏཏིཡེན ཙ ཡཐཱཀྐམཾ ‘‘པརིསུདྡྷོ ཨཧཾ, བྷནྟེ, ‘པརིསུདྡྷོ’ཏི མཾ དྷཱརེཐཱ’’ཏི ཏིཀྑཏྟུམེཝ ཝཏྟབྦཾ.

༢༥༨༣. པུབྦཀིཙྩཱདཱིནི ཀཏྭཱ ཉཏྟིཾ ཨཊྛཔེཏྭཱ ཐེརེན ནཝོ ཨེཝཾ ཏིཀྑཏྟུམེཝ ཝཏྟབྦོ ‘‘པརིསུདྡྷོ ཨཧཾ, ཨཱཝུསོ ¶ , ‘པརིསུདྡྷོ’ཏི མཾ དྷཱརེཧཱི’’ཏི (མཧཱཝ. ༡༦༨), ནཝེན ཐེརོཔི ‘‘པརིསུདྡྷོ ཨཧཾ, བྷནྟེ, ‘པརིསུདྡྷོ’ཏི མཾ དྷཱརེཐཱ’’ཏི (མཧཱཝ. ༡༦༨) ཏིཀྑཏྟུཾ ཝཏྟབྦོ. ཨིམསྨིཾ པན ཝཱརེ ཉཏྟིཡཱ ཨཊྛཔནཉྩ ‘‘དྷཱརེཧཱི’’ཏི ཨེཀཝཙནནིདྡེསོ ཙཱཏི ཨེཏྟཀོཝ ཝིསེསོཏི ཏཾ ཨནཱདིཡིཏྭཱ པུགྒལེན ཀཱཏབྦཾ ཨུཔོསཐཝིདྷིཾ དསྶེཏུམཱཧ ‘‘པུབྦཀིཙྩཾ སམཱཔེཏྭཱ, ཨདྷིཊྛེཡྻ པནེཀཀོ’’ཏི. ཨདྷིཊྛེཡྻཱཏི ‘‘ཨཛྫ མེ ཨུཔོསཐོ, པནྣརསོ’ཏི ཝཱ ‘ཙཱཏུདྡསོ’ཏི ཝཱ ཨདྷིཊྛཱམཱི’’ཏི ཨདྷིཊྛེཡྻ. ཨསྶཱཏི ཨཝསཱནེ ཝུཏྟཔུགྒལཾ སནྡྷཱཡ ཨེཀཝཙནནིདྡེསོ. ཡཐཱཝུཏྟོ སངྒྷོཔི ཏཡོཔི དྭེཔི ཨཏྟནོ ཨཏྟནོ ཨནུཉྙཱཏཾ ཨུཔོསཐཾ ཨནྟརཱཡཾ ཝིནཱ སཙེ ན ཀརོནྟི, ཨེཝམེཝ ཨཱཔཏྟིམཱཔཛྫནྟཱིཏི ཝེདིཏབྦོ.

༢༥༨༤-༥. ཨིདཱནི ‘‘ཙཏྟཱརིམཱནི, བྷིཀྑཝེ, ཨུཔོསཐཀམྨཱནི, ཨདྷམྨེན ཝགྒཾ ཨུཔོསཐཀམྨ’’ནྟིཨཱདིནཱ (མཧཱཝ. ༡༤༩) ནཡེན ཝུཏྟཾ ཀམྨཙཏུཀྐཾ དསྶེཏུམཱཧ ‘‘ཨདྷམྨེན ཙ ཝགྒེནཱ’’ཏིཨཱདི. ཨདྷམྨེན ཝགྒེན ཀམྨཾ, ཨདྷམྨཏོ སམགྒེན ཀམྨཾ, དྷམྨེན ཝགྒེན ཀམྨཾ, དྷམྨཏོ སམགྒེན ཀམྨནྟི ཨེཏཱནི ཙཏྟཱརི ཨུཔོསཐསྶ ཀམྨཱནཱིཏི ཛིནོ ཨབྲཝཱིཏི ཡོཛནཱ. ཙཏཱུསྭཔི པནེཏེསཱུཏི ཨེཏེསུ ཙཏཱུསུ ཀམྨེསུ པན. ཙཏུཏྠནྟི ‘‘སམགྒེན ཙ དྷམྨཏོ’’ཏི ཝུཏྟཾ ཙཏུཏྠཾ ཨུཔོསཐཀམྨཾ ‘‘དྷམྨཀམྨ’’ནྟི ཨདྷིཔྤེཏཾ.

༢༥༨༦-༧. ཏཱནི ¶ ཀམྨཱནི ཝིབྷཱཝེཏུམཱཧ ‘‘ཨདྷམྨེནིདྷཱ’’ཏིཨཱདི. ཨིདྷ ཨིམསྨིཾ སཱསནེ ཨེཏྠ ཨེཏེསུ ཙཏཱུསུ ཨུཔོསཐེསུ. ཨདྷམྨེན ཝགྒོ ཨུཔོསཐོ ཀཏམོཏི ཀཐེཏུཀཱམཏཱཔུཙྪཱ. ཡཏྠ ཡསྶཾ ཨེཀསཱིམཱཡཾ བྷིཀྑུནོ ཙཏྟཱརོ ཝསནྟཱིཏི ཡོཛནཱ.

ཏཏྲ ¶ ཨེཀསྶ པཱརིསུདྡྷིཾ ཨཱནཡིཏྭཱ ཏེ ཏཡོ ཛནཱ པཱརིསུདྡྷིཾ ཨུཔོསཐཾ ཀརོནྟི ཙེ, ཨེཝཾ ཀཏོ ཨུཔོསཐོ ཨདྷམྨོ ཝགྒུཔོསཐོ ནཱམཱཏི ཡོཛནཱ, ཨེཀསཱིམཊྛེཧི ཙཏཱུཧི སངྒྷུཔོསཐེ ཀཱཏབྦེ གཎུཔོསཐསྶ ཀཏཏྟཱ ཨདྷམྨོ ཙ སངྒྷམཛ྄ཛྷཾ ཝིནཱ གཎམཛ྄ཛྷཾ པཱརིསུདྡྷིཡཱ ཨགམནཏོ ཏསྶ ཧཏྠཔཱསཾ ཨནུཔགམནེན ཝགྒོ ཙ ཧོཏཱིཏི ཨཏྠོ.

༢༥༨༨. ཨདྷམྨེན སམགྒོཏི ཨེཏྠ ‘‘ཨུཔོསཐོ ཀཏམོ’’ཏི ཨནུཝཏྟེཏབྦཾ. ‘‘བྷིཀྑུནོ ཨེཀཏོ’’ཏི པདཙྪེདོ. ‘‘ཧོཏི ཨདྷམྨིཀོ’’ཏི པདཙྪེདོ. ཙཏཱུཧི སམགྒེཧི སངྒྷུཔོསཐེ ཀཱཏབྦེ གཎུཔོསཐཀརཎཾ ཨདྷམྨོ, ཧཏྠཔཱསུཔགམནཏོ སམགྒོ ཧོཏི.

༢༥༨༩-༩༠. ཡོ ཨུཔོསཐོ དྷམྨེན ཝགྒོ ཧོཏི, སོ ཀཏམོཏི ཡོཛནཱ. ཡཏྠ ཡསྶཾ ཨེཀསཱིམཱཡཾ ཙཏྟཱརོ བྷིཀྑུནོ ཝསནྟི, ཏཏྲ ཨེཀསྶ པཱརིསུདྡྷིཾ ཨཱནཡིཏྭཱ ཏེ ཏཡོ ཛནཱ པཱཏིམོཀྑཾ ཨུདྡིསནྟེ ཙེ, དྷམྨེན ཝགྒོ ཨུཔོསཐོ ཧོཏཱིཏི ཡོཛནཱ. ཨེཀསཱིམཊྛེཧི ཙཏཱུཧི སངྒྷུཔོསཐསྶ ཀཏཏྟཱ དྷམྨོ, ཨེཀསྶ ཧཏྠཔཱསཾ ཨནུཔགམནེན ཝགྒོ ཙ ཧོཏཱིཏི ཨཏྠོ.

༢༥༩༡. ཡོ དྷམྨཏོ སམགྒོ, སོ ཀཏམོཏི ཡོཛནཱ. ཨིདྷ ཨིམསྨིཾ སཱསནེ ཙཏྟཱརོ བྷིཀྑུནོ ཨེཀཏོ པཱཏིམོཀྑཾ ཨུདྡིསནྟི ཙེ, ཨཡཾ དྷམྨཏོ སམགྒོ ཨུཔོསཐོཏི མཏོ ཨདྷིཔྤེཏོཏི ཡོཛནཱ. ཙཏཱུཧི སངྒྷུཔོསཐསྶ ཀཏཏྟཱ དྷམྨོ, ཨེཀསྶཱཔི ཧཏྠཔཱསཾ ཨཝིཛཧནེན སམགྒོཏི ཨདྷིཔྤཱཡོ.

༢༥༩༢. ཝགྒེ སངྒྷེ ཝགྒོཏི སཉྙིནོ, སམགྒེ ཙ སངྒྷེ ཝགྒོཏི སཉྙིནོ ཨུབྷཡཏྠ ཝིམཏིསྶ ཝཱ ཨུཔོསཐཾ ཀརོནྟསྶ དུཀྐཊཾ ཨཱཔཏྟི ཧོཏཱིཏི ཡོཛནཱ.

༢༥༩༣. བྷེདཱདྷིཔྤཱཡཏོཏི ¶ ‘‘ནསྶནྟེཏེ, ཝིནསྶནྟེཏེ, ཀོ ཏེཧི ཨཏྠོ’’ཏི ཨེཝཾ བྷེདཔུརེཀྑཱརཏཱཡ ‘‘ཨུཔོསཐཾ ཀརོནྟསྶཱ’’ཏི ཨཱནེཏྭཱ ཡོཛེཏབྦཾ. ཏསྶ བྷིཀྑུནོ ཐུལླཙྩཡཾ ཧོཏི ¶ ཨཀུསལབལཝཏཱཡ ཙ ཐུལླཙྩཡཾ ཧོཏཱིཏི. ཡཐཱཧ – ‘‘བྷེདཔུརེཀྑཱརཔནྣརསཀེ ཨཀུསལབལཝཏཱཡ ཐུལླཙྩཡཾ ཝུཏྟ’’ནྟི (མཧཱཝ. ཨཊྛ. ༡༧༦). ཝགྒེ ཝཱ སམགྒེ ཝཱ སངྒྷེ སམགྒོ ཨིཏི སཉྙིནོ ཨུཔོསཐཾ ཀརོནྟསྶ ཨནཱཔཏྟཱིཏི ཡོཛནཱ. ཨཝསེསོ པནེཏྠ ཝཏྟབྦཝིནིཙྪཡོ པཝཱརཎཝིནིཙྪཡཱཝསཱནེ ‘‘པཱརིསུདྡྷིཔྤདཱནེནཱ’’ཏིཨཱདཱིཧི (ཝི. ཝི. ༢༦༤༢) ཨེཀཏོ ཝཏྟུམིཙྪནྟེན ན ཝུཏྟོ.

༢༥༩༤-༥. ‘‘ཨུཀྑིཏྟེནཱ’’ཏིཨཱདིཀཱནི ཀརཎཝཙནནྟཱནི པདཱནི ‘‘སཧཱ’’ཏི ཨིམིནཱ སདྡྷིཾ ‘‘ཨུཔོསཐོ ན ཀཱཏབྦོ’’ཏི པདེན པཙྩེཀཾ ཡོཛེཏབྦཱནི. ཨུཀྑིཏྟེནཱཏི ཨཱཔཏྟིཡཱ ཨདསྶནེ ཨུཀྑིཏྟཀོ, ཨཱཔཏྟིཡཱ ཨཔྤཊིཀམྨེ ཨུཀྑིཏྟཀོ, པཱཔིཀཱཡ དིཊྛིཡཱ ཨཔྤཊིནིསྶགྒེ ཨུཀྑིཏྟཀོཏི ཏིཝིདྷེན ཨུཀྑིཏྟེན. ཨེཏེསུ ཧི ཏིཝིདྷེ ཨུཀྑིཏྟཀེ སཏི ཨུཔོསཐཾ ཀརོནྟོ སངྒྷོ པཱཙིཏྟིཡཾ ཨཱཔཛྫཏི.

‘‘གཧཊྛེནཱ’’ཏི ཨིམིནཱ ཏིཏྠིཡོཔི སངྒཧིཏོ. སེསེཧི སཧདྷམྨིཧཱིཏི བྷིཀྑུནཱི, སིཀྑམཱནཱ, སཱམཎེརོ, སཱམཎེརཱིཏི ཙཏཱུཧི སཧདྷམྨིཀེཧི. ཙུཏནིཀྑིཏྟསིཀྑེཧཱིཏི ཨེཏྠ ཙུཏོ ཙ ནིཀྑིཏྟསིཀྑོ ཙཱཏི ཝིགྒཧོ. ཙུཏོ ནཱམ ཨནྟིམཝཏྠུཾ ཨཛ྄ཛྷཱཔནྣཀོ. ནིཀྑིཏྟསིཀྑོ ནཱམ སིཀྑཱཔཙྩཀྑཱཏཀོ.

ཨེཀཱདསཧཱིཏི པཎྜཀོ, ཐེཡྻསཾཝཱསཀོ, ཏིཏྠིཡཔཀྐནྟཀོ, ཏིརཙྪཱནགཏོ, མཱཏུགྷཱཏཀོ, པིཏུགྷཱཏཀོ, ཨརཧནྟགྷཱཏཀོ, བྷིཀྑུནིདཱུསཀོ, སངྒྷབྷེདཀོ ¶ , ལོཧིཏུཔྤཱདཀོ, ཨུབྷཏོབྱཉྫནཀོཏི ཨིམེཧི ཨེཀཱདསཧི ཨབྷབྦེཧི.

སབྷཱགཱཔཏྟིཀེན ཝཱ སཧ ཨུཔོསཐོ ན ཀཱཏབྦོ, པཱརིཝུཏྠེན ཚནྡེན ཨུཔོསཐོ ན ཀཱཏབྦོ, ཀརོཏོ དུཀྐཊཾ ཧོཏཱིཏི ཡོཛནཱ. ཨེཝཾ ཨུཀྑིཏྟཝཛྫིཏེསུ སབྦཝིཀཔྤེསུ དུཀྐཊམེཝ ཝེདིཏབྦཾ. ‘‘ཡཾ དྭེཔི ཛནཱ ཝིཀཱལབྷོཛནཱདིནཱ སབྷཱགཝཏྠུནཱ ཨཱཔཏྟིཾ ཨཱཔཛྫནྟི, ཨེཝརཱུཔཱ ཝཏྠུསབྷཱགཱ ‘སབྷཱགཱ’ཏི ཝུཙྩཏཱི’’ཏི (མཧཱཝ. ཨཊྛ. ༡༦༩) ཝཙནཏོ ‘‘སབྷཱགཱཔཏྟཱི’’ཏི ཝཏྠུསབྷཱགཱཔཏྟིཡེཝ གཧེཏབྦཱ.

ཨུཔོསཐདིཝསེ སབྦོཝ སངྒྷོ སཙེ སབྷཱགཱཔཏྟིཾ ཨཱཔནྣོ ཧོཏི,

‘‘ཨིདྷ ¶ པན, བྷིཀྑཝེ, ཨཉྙཏརསྨིཾ ཨཱཝཱསེ ཏདཧུཔོསཐེ སབྦོ སངྒྷོ སབྷཱགཾ ཨཱཔཏྟིཾ ཨཱཔནྣོ ཧོཏི, ཏེཧི, བྷིཀྑཝེ, བྷིཀྑཱུཧི ཨེཀོ བྷིཀྑུ སཱམནྟཱ ཨཱཝཱསཱ སཛྫུཀཾ པཱཧེཏབྦོ ‘གཙྪཱཝུསོ, ཏཾ ཨཱཔཏྟིཾ པཊིཀརིཏྭཱ ཨཱགཙྪ, མཡཾ ཏེ སནྟིཀེ ཏཾ ཨཱཔཏྟིཾ པཊིཀརིསྶཱམཱ’ཏི. ཨེཝཉྩེཏཾ ལབྷེཐ, ཨིཙྩེཏཾ ཀུསལཾ. ནོ ཙེ ལབྷེཐ, བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ – ‘སུཎཱཏུ མེ, བྷནྟེ སངྒྷོ, ཨཡཾ སབྦོ སངྒྷོ སབྷཱགཾ ཨཱཔཏྟིཾ ཨཱཔནྣོ, ཡདཱ ཨཉྙཾ བྷིཀྑུཾ སུདྡྷཾ ཨནཱཔཏྟིཀཾ པསྶིསྶཏི, ཏདཱ ཏསྶ སནྟིཀེ ཏཾ ཨཱཔཏྟིཾ པཊིཀརིསྶཏཱི’’ཏི (མཧཱཝ. ༡༧༡) ཙ,

ཝེམཏིཀོ ཙེ ཧོཏི,

‘‘སུཎཱཏུ མེ, བྷནྟེ སངྒྷོ, ཨཡཾ སབྦོ སངྒྷོ སབྷཱགཱཡ ཨཱཔཏྟིཡཱ ཝེམཏིཀོ, ཡདཱ ནིབྦེམཏིཀོ ¶ བྷཝིསྶཏི, ཏདཱ ཏཾ ཨཱཔཏྟིཾ པཊིཀརིསྶཏཱི’’ཏི (མཧཱཝ. ༡༧༡) ཙ,

ཝུཏྟནཡེན ཨུཔོསཐོ ཀཱཏབྦོ.

ཨེཏྠ ཙ སཛ྄ཛྷུཀནྟི ཏདཧེཝཱགམནཏྠཱཡ. གཎུཔོསཐཱདཱིསུཔི ཨེསེཝ ནཡོ. ཝུཏྟཉྷི ཨཊྛཀཐཱགཎྛིཔདེ ‘‘ཡཐཱ སངྒྷོ སབྷཱགཾ ཨཱཔཏྟིཾ ཨཱཔཛྫིཏྭཱ སུདྡྷཾ ཨལབྷིཏྭཱ ‘ཡདཱ སུདྡྷཾ པསྶིསྶཏི, ཏདཱ ཏསྶ སནྟིཀེ ཏཾ ཨཱཔཏྟིཾ པཊིཀརིསྶཏཱི’ཏི ཝཏྭཱ ཨུཔོསཐཾ ཀཱཏུཾ ལབྷཏི, ཨེཝཾ དྭཱིཧིཔི ཨཉྙམཉྙཾ ཨཱརོཙེཏྭཱ ཨུཔོསཐཾ ཀཱཏུཾ ཝཊྚཏི. ཨེཀེནཱཔི ‘པརིསུདྡྷཾ ལབྷིཏྭཱ པཊིཀརིསྶཱམཱི’ཏི ཨཱབྷོགཾ ཀཏྭཱ ཀཱཏུཾ ཝཊྚཏི ཀིརཱ’’ཏི. ཀིརཱཏི ཙེཏྠ ཨནུསྶཝཏྠེ དཊྛབྦོ, ན པནཱརུཙིཡཾ.

པཱརིཝུཏྠེན ཚནྡེནཱཏི ཚནྡཾ ཨཱཧརིཏྭཱ ཀམྨཾ ཀཱཏུཾ ནིསིནྣེནཔི ‘‘ཨསུབྷལཀྑཎཏཱདིནཱ ཀེནཙི ཀཱརཎེན ན ཀརིསྶཱམཱི’’ཏི ཝིསྶཊྛེ ཚནྡེ སཙེ པུན ཀརིསྶཏི, པུན ཚནྡཔཱརིསུདྡྷིཾ ཨཱཧརིཏྭཱ ཀཱཏབྦཾ. ཡཐཱཧ – ‘‘ཨེཏསྨིཾ པཱརིཝཱསིཡེ པུན ཚནྡཔཱརིསུདྡྷིཾ ཨནཱནེཏྭཱ ཀམྨཾ ཀཱཏུཾ ན ཝཊྚཏཱི’’ཏི (མཧཱཝ. ཨཊྛ. ༡༡༦༧).

༢༥༩༦. ཨདེསེཏྭཱ ¶ པནཱཔཏྟིནྟི ཨཱཔནྣཾ ཨཱཔཏྟིཾ ཨདེསེཏྭཱ. ནཱཝིཀཏྭཱན ཝེམཏིནྟི ‘‘ཨཧཾ, བྷནྟེ, སམྦཧུལཱསུ ཨཱཔཏྟཱིསུ ཝེམཏིཀོ, ཡདཱ ནིབྦེམཏིཀོ བྷཝིསྶཱམི, ཏདཱ ཏཱ ཨཱཔཏྟིཡོ པཊིཀརིསྶཱམཱི’’ཏི ཝིམཏིཾ ཨནཱརོཙེཏྭཱ. ‘‘ཡདཱ ནིབྦེམཏིཀོཏི ཨེཏྠ སཙེ པནེས ནིབྦེམཏིཀོ ན ཧོཏི, ཝཏྠུཾ ཀིཏྟེཏྭཱཝ དེསེཏུཾ ཝཊྚཏཱི’’ཏི (མཧཱཝ. ཨཊྛ. ༡༦༩) ཨནྡྷཀཊྛཀཐཱཡཾ ཝུཏྟཾ. ཏཏྲཱཡཾ དེསནཱཝིདྷི – སཙེ མེགྷཙྪནྣེ སཱུརིཡེ ‘‘ཀཱལོ ནུ ཁོ, ཝིཀཱལོ’’ཏི ¶ ཝེམཏིཀོ བྷུཉྫཏི, ཏེན བྷིཀྑུནཱ ‘‘ཨཧཾ, བྷནྟེ, ཝེམཏིཀོ བྷུཉྫིཾ, སཙེ ཀཱལོ ཨཏྠི, སམྦཧུལཱ དུཀྐཊཱ ཨཱཔཏྟིཡོ ཨཱཔནྣོམྷི. ནོ ཙེ ཨཏྠི, སམྦཧུལཱ པཱཙིཏྟིཡཱཔཏྟིཡོ ཨཱཔནྣོམྷཱི’’ཏི ཨེཝཾ ཝཏྠུཾ ཀིཏྟེཏྭཱ ‘‘ཨཧཾ, བྷནྟེ, ཡཱ ཏསྨིཾ ཝཏྠུསྨིཾ སམྦཧུལཱ དུཀྐཊཱ ཝཱ པཱཙིཏྟིཡཱ ཝཱ ཨཱཔཏྟིཡོ ཨཱཔནྣོ, ཏཱ ཏུམྷམཱུལེ པཊིདེསེམཱི’’ཏི ཝཏྟབྦཾ. ཨེསེཝ ནཡོ སབྦཱཔཏྟཱིསཱུཏི.

གཎྛིཔདེསུ པནེཝཾ ཝིནིཙྪཡོ ཝུཏྟོ – ‘‘ཨཧཾ, ཨཱཝུསོ, ཨིཏྠནྣཱམཱཡ ཨཱཔཏྟིཡཱ ཝེམཏིཀོ, ཡདཱ ནིབྦེམཏིཀོ བྷཝིསྶཱམི, ཏདཱ ཏཾ ཨཱཔཏྟིཾ པཊིཀརིསྶཱམཱི’ཏི ཝཏྭཱ ཨུཔོསཐོ ཀཱཏབྦོ, པཱཏིམོཀྑཾ སོཏབྦ’’ནྟི (མཧཱཝ. ༡༧༠) ཝཙནཏོ ཡཱཝ ནིབྦེམཏིཀོ ན ཧོཏི, ཏཱཝ སབྷཱགཱཔཏྟིཾ པཊིགྒཧེཏུཾ ན ལབྷཏི. ཨཉྙེསཉྩ ཀམྨཱནཾ པརིསུདྡྷོ ནཱམ ཧོཏི. ‘‘པུན ནིབྦེམཏིཀོ ཧུཏྭཱ དེསེཏབྦམེཝཱ’’ཏི (ཀངྑཱ. ཨབྷི. ཊཱི. ནིདཱནཝཎྞནཱ) ནེཝ པཱལི༹ཡཾ, ན ཨཊྛཀཐཱཡཾ ཨཏྠི, དེསིཏེ པན ན དོསོ. ‘‘ཨིཏོ ཝུཊྛཧིཏྭཱ ཏཾ ཨཱཔཏྟིཾ པཊིཀརིསྶཱམཱི’’ཏི (མཧཱཝ. ༡༧༠) ཨེཏྠཱཔི ཨེསེཝ ནཡོཏི.

༢༥༩༧. ཨུཔོསཐེཏི དིནཀཱརཀཀཏྟབྦཱཀཱརཝསེན པནྣརསཱི, སངྒྷུཔོསཐོ, སུཏྟུདྡེསོཏི ཨིམེཧི ཏཱིཧི ལཀྑཎེཧི སམནྣཱགཏེ ཨུཔོསཐེ. སབྷིཀྑུམྷཱ ཙ ཨཱཝཱསཱཏི ‘‘ཡསྨིཾ ཨུཔོསཐེ ཀིཙྩ’’ནྟིཨཱདིནཱ ཝཀྑམཱནཔྤཀཱརཱ སབྷིཀྑུཀཱ ཨཱཝཱསཱ. ཨིདྷ ‘‘ཨནཱཝཱསཱ’’ཏི སེསོ. ཨཱཝཱསོ ཝཱ ཨནཱཝཱསོ ཝཱཏི ཨེཏྠ ‘‘ཨབྷིཀྑུཀོ ཝཱ ནཱནཱསཾཝཱསཀེཧི སབྷིཀྑུཀོ ཝཱ’’ཏི ཙ ¶ ན གནྟབྦོཏི ཨེཏྠ ‘‘ཨཉྙཏྲ སངྒྷེན ཨཉྙཏྲ ཨནྟརཱཡཱ’’ཏི ཙ སེསོ. ‘‘ཨནཱཝཱསོ’’ཏི ཨུདོསིཏཱདཡོ ཝུཏྟཱ. བྷིཀྑུནཱ ཨུཔོསཐེ སབྷིཀྑུམྷཱ ཨཱཝཱསཱ ཝཱ ཨནཱཝཱསཱ ཝཱ ཨབྷིཀྑུཀོ ཝཱ ནཱནཱསཾཝཱསཀེཧི སབྷིཀྑུཀོ ཝཱ ཨཱཝཱསོ ཝཱ ཨནཱཝཱསོ ཝཱ ཨཉྙཏྲ སངྒྷེན ཨཉྙཏྲ ཨནྟརཱཡཱ ཀུདཱཙནཾ ཀདཱཙིཔི ན གནྟབྦོཏི ཡོཛནཱ.

༢༥༩༨. ཡསྨིཾ ¶ ཨཱཝཱསེ པན ཨུཔོསཐེ ཀིཙྩཾ སཙེ ཝཏྟཏི, སོ ཨཱཝཱསོ ‘‘སབྷིཀྑུཀོ ནཱམཱ’’ཏི པཀཱསིཏོཏི ཡོཛནཱ, ཨིམིནཱ སཙེ ཡཏྠ ཨུཔོསཐོ ན ཝཏྟཏི, སོ སནྟེསུཔི བྷིཀྑཱུསུ ཨབྷིཀྑུཀོ ནཱམཱཏི དཱིཔེཏི.

༢༥༩༩. ཨུཔོསཐསྶ པཡོཛནཾ, ཏཔྤསངྒེན པཝཱརཎཱཡ ཙ ནིདྡྷཱརེཏུཀཱམཏཱཡཱཧ ‘‘ཨུཔོསཐོ ཀིམཏྠཱཡཱ’’ཏིཨཱདི.

༢༦༠༠. པཊིཀྐོསེཡྻཱཏི ནིཝཱརེཡྻ. ཨདེནྟསྶཔི དུཀྐཊནྟི ཨེཏྠ ‘‘ཀོཔེཏུཾ དྷམྨིཀཾ ཀམྨ’’ནྟི ཨཱནེཏྭཱ སམྦནྡྷིཏབྦཾ.

༢༦༠༡. སོ ཙཱཏི (ཀངྑཱ. ཨཊྛ. ནིདཱནཝཎྞནཱ) ཙཏུཝགྒཱདིཔྤབྷེདེན པཉྩཝིདྷོ སོ སངྒྷོ ཙ. ཧེཊྛིམཔརིཙྪེདེན ཀཏྟབྦཀམྨཱནཾ ཝསེན པརིདཱིཔིཏོ, ན ཚབྦགྒཱདཱིནཾ ཀཱཏུཾ ཨཡུཏྟཏཱདསྶནཝསེན.

༢༦༠༢. ཙཏུཝགྒཱདིབྷེདནིབནྡྷནཾ ཀམྨཾ དསྶེཏུམཱཧ ‘‘པཝཱརཎ’’ནྟིཨཱདི. པཝཱརཎཉྩ ཏཐཱ ཨབྦྷཱནཉྩ ཨུཔསམྤདཉྩ ཋཔེཏྭཱ ཙཏུཝགྒེན ཨཀཏྟབྦཾ ཀམྨཾ ན ཝིཛྫཏཱིཏི ཡོཛནཱ.

༢༦༠༣. མཛ྄ཛྷདེསེ ¶ ཨུཔསམྤདཱ མཛ྄ཛྷདེསཱུཔསམྤདཱ, ཏཾ. ཨབྦྷཱནཾ, མཛ྄ཛྷདེསཱུཔསམྤདཉྩ ཝིནཱ པཉྩཝགྒེན སབྦཾ ཀམྨཾ ཀཱཏུཾ ཝཊྚཏཱིཏི ཡོཛནཱ.

༢༦༠༤. ཀིཉྩིཔི ཀམྨཾ ན ན ཀཏྟབྦནྟི ཡོཛནཱ, སབྦམྤི ཀམྨཾ ཀཏྟབྦམེཝཱཏི ཨཏྠོ. དྭེ པཊིསེདྷཱ པཀཏཏྠཾ གམཡནྟཱིཏི. ཝཱིསཏིཝགྒེན སངྒྷེན སབྦེསམྤི ཀམྨཱནཾ ཀཏྟབྦབྷཱཝེ ཀིམཏྠཾ ཨཏིརེཀཝཱིསཏིཝགྒསྶ གཧཎནྟི ཨཱཧ ‘‘ཨཱུནེ དོསོཏི ཉཱཔེཏུཾ, ནཱདྷིཀེ ཨཏིརེཀཏཱ’’ཏི. ཡཐཱཝུཏྟེ ཙཏུབྦིདྷེ སངྒྷེ གཎནཏོ ཨཱུནེ དོསོ ཧོཏི, ཨདྷིཀེ དོསོ ན ཧོཏཱིཏི ཉཱཔེཏུཾ ཨཏིརེཀཏཱ དསྶིཏཱ, ཨཏིརེཀཝཱིསཏིཝགྒསངྒྷོ དསྶིཏོཏི ཨདྷིཔྤཱཡོ.

༢༦༠༥. ཙཏུཝགྒེན ཀཏྟབྦེ པཀཏཏྟཱཝ ཙཏྟཱརོ ཀམྨཔྤཏྟཱཏི དཱིཔིཏཱཏི ཡོཛནཱ. སེསཱ ¶ པཀཏཏྟཱ ཚནྡཱརཧཱཏི སེསོ. པཀཏཏྟཱཏི ཨནུཀྑིཏྟཱ ཙེཝ ཨནྟིམཝཏྠུཾ ཨནཛ྄ཛྷཱཔནྣཱ ཙ གཧེཏབྦཱ. སེསེསུ ཙཱཏི པཉྩཝགྒཱདཱིསུཔི.

༢༦༠༦. ཙཏུཝགྒཱདིཀཏྟབྦཀམྨཾ ཨསཾཝཱསཔུགྒལཾ གཎཔཱུརཾ ཀཏྭཱ ཀརོནྟསྶ དུཀྐཊཾ ཧོཏི. ན ཀེཝལཾ དུཀྐཊམེཝ, ཀཏཉྩ ཀམྨཾ ཀུཔྤཏཱིཏི ཡོཛནཱ.

༢༦༠༧. པརིཝཱསཱདཱིཏི ཨེཏྠ ཨཱདི-སདྡེན མཱུལཱཡཔཊིཀསྶནཱདཱིནཾ གཧཎཾ. ཏཏྲཊྛནྟི པརིཝཱསཱདཱིསུ ཋིཏཾ. ‘‘ཏཐཱ’’ཏི ཨིམིནཱ ‘‘ཀཏཾ ཀུཔྤཏི དུཀྐཊ’’ནྟི ཨིདཾ ཨནུཝཏྟེཏི. སེསཾ ཏཱུཏི པརིཝཱསཱདིཀམྨཏོ ཨཉྙཾ པན ཨུཔོསཐཱདིཀམྨཾ ¶ . ཝཊྚཏཱིཏི ཏེ པཱརིཝཱསིཀཱདཡོ གཎཔཱུརཀེ ཀཏྭཱ ཀཱཏུཾ ཝཊྚཏི.

ཨུཔོསཐཀྑནྡྷཀཀཐཱཝཎྞནཱ.

ཝསྶཱུཔནཱཡིཀཀྑནྡྷཀཀཐཱཝཎྞནཱ

༢༦༠༨. ཝསྶཱུཔནཱཡིཀཱ ཝུཏྟཱཏི སེསོ. པཙྪིམཱ ཙཱཏི ཨེཏྠ ཨིཏི-སདྡོ ནིདསྶནེ. ཝསྶཱུཔནཱཡིཀཱཏི ཝསྶཱུཔགམནཱ. ཨཱལཡོ, ཝཙཱིབྷེདོ ཝཱ ཀཱཏབྦོ ཨུཔགཙྪཏཱཏི ཨིམིནཱ ཝསྶཱུཔགམནཔྤཀཱརོ དསྶིཏོ. ཨུཔགཙྪཏཱ ཨཱལཡོ ཀཏྟབྦོ, ཝཙཱིབྷེདོ ཝཱ ཀཏྟབྦོཏི སམྦནྡྷོ. ཨུཔགཙྪནྟེན ཙ སེནཱསནེ ཨསཏི ‘‘ཨིདྷ ཝསྶཾ ཝསིསྶཱམཱི’’ཏི ཙིཏྟུཔྤཱདམཏྟཾ ཝཱ ཀཱཏབྦཾ, སེནཱསནེ སཏི ‘‘ཨིམསྨིཾ ཝིཧཱརེ ཨིམཾ ཏེམཱསཾ ཝསྶཾ ཨུཔེམཱི’’ཏི ཙ ‘‘ཨིདྷ ཝསྶཾ ཨུཔེམཱི’’ཏི ཙ ཝཙཱིབྷེདོ ཝཱ ཀཱཏབྦོཏི ཨཏྠོ.

༢༦༠༩. ཛཱནཾ ཝསྶཱུཔགམནཾ ཨནུཔགཙྪཏོ ཝཱཔཱིཏི ཡོཛནཱ. ཏེམཱསནྟི ཨེཏྠ ‘‘པུརིམཾ ཝཱ པཙྪིམཾ ཝཱ’’ཏི སེསོ. ཙརནྟསྶཱཔཱིཏི ཨེཏྠ ‘‘ཙཱརིཀ’’ནྟི སེསོ. པུརིམཾ ཝཱ ཏེམཱསཾ པཙྪིམཾ ཝཱ ཏེམཱསཾ ཨཝསིཏྭཱཝ ཙཱརིཀཾ ཙརནྟསྶཱཔི དུཀྐཊནྟི ཡོཛནཱ. ཏེམཱསནྟི ཨཙྩནྟསཾཡོགེ ཨུཔཡོགཝཙནཾ. ཡཐཱཧ – ‘‘ན, བྷིཀྑཝེ, ཝསྶཾ ཨུཔགནྟྭཱ པུརིམཾ ཝཱ ཏེམཱསཾ པཙྪིམཾ ཝཱ ཏེམཱསཾ ཨཝསིཏྭཱ ཙཱརིཀཱ པཀྐམིཏབྦཱ, ཡོ པཀྐམེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༨༥).

༢༦༡༠. རུཀྑསྶ ¶ སུསིརེཏི ཨེཏྠ ‘‘སུདྡྷེ’’ཏི སེསོ. ཡཐཱཧ – ‘‘རུཀྑསུསིརེཏི ཨེཏྠ སུདྡྷེ རུཀྑསུསིརེཡེཝ ན ཝཊྚཏི, མཧནྟསྶ པན རུཀྑསུསིརསྶ ཨནྟོ པདརཙྪདནཾ ཀུཊིཀཾ ¶ ཀཏྭཱ པཝིསནདྭཱརཾ ཡོཛེཏྭཱ ཨུཔགནྟུཾ ཝཊྚཏཱི’’ཏི. ‘‘རུཀྑསྶ སུསིརེ’’ཏི ཨིམིནཱ རུཀྑེཀདེསོ ཝིཊཔོཔི སངྒཧིཏོ, སོཔི སུདྡྷོཝ ན ཝཊྚཏི. ཡཐཱཧ – ‘‘རུཀྑཝིཊབྷིཡཱཏི ཨེཏྠཱཔི སུདྡྷེ ཝིཊཔམཏྟེ ན ཝཊྚཏི, མཧཱཝིཊཔེ པན ཨཊྚཀཾ བནྡྷིཏྭཱ ཏཏྠ པདརཙྪདནཾ ཀུཊིཀཾ ཀཏྭཱ ཨུཔགནྟུཾ ཝཊྚཏཱི’’ཏི (མཧཱཝ. ཨཊྛ. ༢༠༣).

‘‘ཚཏྟེཏི ཨེཏྠཱཔི ཙཏཱུསུ ཐམྦྷེསུ ཚཏྟཾ ཋཔེཏྭཱ ཨཱཝརཎཾ ཀཏྭཱ དྭཱརཾ ཡོཛེཏྭཱ ཨུཔགནྟུཾ ཝཊྚཏི, ཚཏྟཀུཊིཀཱ ནཱམེསཱ ཧོཏི. ཙཱཊིཡཱཏི ཨེཏྠཱཔི མཧནྟེན ཀཔལླེན ཚཏྟེ ཝུཏྟནཡེན ཀུཊིཾ ཀཏྭཱཝ ཨུཔགནྟུཾ ཝཊྚཏཱི’’ཏི ཨཊྛཀཐཱཝཙནཏོ ཨེཝམཀཏཱསུ སུདྡྷཚཏྟཙཱཊཱིསུ ནིཝཱརཎཾ ཝེདིཏབྦཾ. ཚཝཀུཊཱིཏི ཊངྐིཏམཉྩཱདཡོ ཝུཏྟཱ. ཡཐཱཧ – ‘‘ཚཝཀུཊིཀཱ ནཱམ ཊངྐིཏམཉྩཱདིབྷེདཱ ཀུཊི, ཏཏྠ ཨུཔགནྟུཾ ན ཝཊྚཏཱི’’ཏི (མཧཱཝ. ཨཊྛ. ༢༠༣).

སུསཱནེ པན ཨཉྙཾ ཀུཊིཀཾ ཀཏྭཱ ཨུཔགནྟུཾ ཝཊྚཏི. ‘‘ཚཝསརཱིརཾ ཛྷཱཔེཏྭཱ ཚཱརིཀཱཡ, ཨཊྛིཀཱནཉྩ ཨཏྠཱཡ ཀུཊིཀཱ ཀརཱིཡཏཱི’’ཏི ཨནྡྷཀཊྛཀཐཱཡཾ ཚཝཀུཊི ཝུཏྟཱ. ‘‘ཊངྐིཏམཉྩོཏི ཀསིཀུཊིཀཱཔཱསཱཎགྷརནྟི ལིཁིཏ’’ནྟི (ཝཛིར. ཊཱི. མཧཱཝགྒ ༢༠༣) ཝཛིརབུདྡྷིཏྠེརོ. ཙཏུནྣཾ པཱསཱཎཱནཾ ཨུཔརི པཱསཱཎཾ ཨཏྠརིཏྭཱ ཀཏོ གེཧོཔི ‘‘ཊངྐིཏམཉྩོ’’ཏི ཝུཙྩཏི. དཱིགྷེ མཉྩཔཱདེ མཛ྄ཛྷེ ཝིཛ྄ཛྷིཏྭཱ ཨཊནིཡོ པཝེསེཏྭཱ མཉྩཾ ཀརོནྟཱིཏི ཏསྶ ཨིདཾ ཨུཔརི, ཨིདཾ ཧེཊྛཱཏི ནཏྠི, པརིཝཏྟེཏྭཱ ཨཏྠཏོཔི ཏཱདིསོཝ ཧོཏི, ཏཾ སུསཱནེ, དེཝཊྛཱནེ ཙ ཋཔེནྟི, ཨཡམྤི ཊངྐིཏམཉྩོ ནཱམ.

༢༦༡༡. ‘‘སཏི པཙྩཡཝེཀལླེ, སརཱིརཱཕཱསུཏཱཡ ཝཱ’’ཏི ཨཝསེསནྟརཱཡཱནཾ ཝཀྑམཱནཏྟཱ ‘‘ཨནྟརཱཡོ’’ཏི ཨིམིནཱ རཱཛནྟརཱཡཱདི དསཝིདྷོ གཧེཏབྦོ.

༢༦༡༢-༤. ‘‘ཨནུཛཱནཱམི ¶ , བྷིཀྑཝེ, སཏྟནྣཾ སཏྟཱཧཀརཎཱིཡེན ཨཔྤཧིཏེཔི གནྟུཾ, པགེཝ པཧིཏེ བྷིཀྑུསྶ བྷིཀྑུནིཡཱ སིཀྑམཱནཱཡ སཱམཎེརསྶ སཱམཎེརིཡཱ མཱཏུཡཱ ཙ པིཏུསྶ ཙཱ’’ཏི (མཧཱཝ. ༡༩༨) ཝུཏྟནཡཾ དསྶེཏུམཱཧ ‘‘མཱཏཱཔིཏཱུན’’ནྟིཨཱདི.

མཱཏཱཔིཏཱུནཾ ¶ དསྶནཏྠཾ, པཉྩནྣཾ སཧདྷམྨིཀཱནཾ དསྶནཏྠཾ ཝཱ ནེསཾ ཨཏྠེ སཏི ཝཱ ནེསཾ ཨནྟརེ གིལཱནཾ དཊྛུཾ ཝཱ ཏདུཔཊྛཱཀཱནཾ བྷཏྟཱདིཾ པརིཡེསནཏྠཾ ཝཱ ནེསཾ བྷཏྟཱདིཾ པརིཡེསནཏྠཾ ཝཱ ཏཐཱ ནེསཾ པཉྩནྣཾ སཧདྷམྨིཀཱནཾ ཨཉྙཏརཾ ཨནབྷིརཏཾ ཨུཀྐཎྛིཏཾ ཨཧཾ གནྟྭཱ ཝཱུཔཀཱསེསྶཾ ཝཱ ཝཱུཔཀཱསཱཔེསྶཱམི ཝཱ དྷམྨཀཐམསྶ ཀརིསྶཱམཱིཏི ཝཱ ཏསྶ པཉྩནྣཾ སཧདྷམྨིཀཱནཾ ཨཉྙཏརསྶ ཨུཊྛིཏཾ ཨུཔྤནྣཾ དིཊྛིཾ ཝིཝེཙེསྶཱམི ཝཱ ཝིཝེཙཱཔེསྶཱམི ཝཱ དྷམྨཀཐམསྶ ཀརིསྶཱམཱིཏི ཝཱ ཏཐཱ ཨུཔྤནྣཾ ཀུཀྐུཙྩཾ ཝིནོདེསྶཱམཱིཏི ཝཱ ཝིནོདཱཔེསྶཱམཱིཏི ཝཱ དྷམྨཀཐམསྶ ཀརིསྶཱམཱིཏི ཝཱ ཨེཝཾ ཝིནཡཉྙུནཱ བྷིཀྑུནཱ སཏྟཱཧཀིཙྩེན ཨཔེསིཏེཔི གནྟབྦཾ, པགེཝ པཧིཏེཏི ཡོཛནཱ.

བྷཏྟཱདཱིཏི ཨེཏྠ ཨཱདི-སདྡེན བྷེསཛྫཔརིཡེསནཱདིཾ སངྒཎྷཱཏི. ཡཐཱཧ – ‘‘གིལཱནབྷཏྟཾ ཝཱ པརིཡེསིསྶཱམི, གིལཱནུཔཊྛཱཀབྷཏྟཾ ཝཱ པརིཡེསིསྶཱམི, གིལཱནབྷེསཛྫཾ ཝཱ པརིཡེསིསྶཱམི, པུཙྪིསྶཱམི ཝཱ ཨུཔཊྛཧིསྶཱམི ཝཱ’’ཏི. ཝཱུཔཀཱསེསྶནྟི ཡཏྠ ཨནབྷིརཏི ཨུཔྤནྣཱ, ཏཏོ ཨཉྙཏྠ གཧེཏྭཱ གམིསྶཱམཱིཏི ཨཏྠོ.

ཝིནོདེསྶཱམཧནྟི ཝཱཏི ཨེཏྠ ཝཱ-སདྡེན ‘‘ཨིདྷ པན, བྷིཀྑཝེ, བྷིཀྑུ གརུདྷམྨཾ ཨཛ྄ཛྷཱཔནྣོ ཧོཏི པརིཝཱསཱརཧོ, སོ ཙེ བྷིཀྑཱུནཾ སནྟིཀེ དཱུཏཾ པཧིཎེཡྻ ‘ཨཧཉྷི གརུདྷམྨཾ ཨཛ྄ཛྷཱཔནྣོ པརིཝཱསཱརཧོ, ཨཱགཙྪནྟུ བྷིཀྑཱུ, ཨིཙྪཱམི ¶ བྷིཀྑཱུནཾ ཨཱགཏ’ནྟི. གནྟབྦཾ, བྷིཀྑཝེ, སཏྟཱཧཀརཎཱིཡེན ཨཔྤཧིཏེཔི, པགེཝ པཧིཏེ ‘པརིཝཱསདཱནཾ ཨུསྶུཀྐཾ ཀརིསྶཱམི ཝཱ ཨནུསྶཱཝེསྶཱམི ཝཱ གཎཔཱུརཀོ ཝཱ བྷཝིསྶཱམཱི’’ཏིཨཱདིནཡཾ (མཧཱཝ. ༡༩༣) སངྒཎྷཱཏི. ཨེཝཾ སཏྟཱཧཀིཙྩེན གཙྪནྟེན ཨནྟོཨུཔཙཱརསཱིམཱཡ ཋིཏེནེཝ ‘‘ཨནྟོསཏྟཱཧེ ཨཱགཙྪིསྶཱམཱི’’ཏི ཨཱབྷོགཾ ཀཏྭཱ གནྟབྦཾ. སཙེ ཨཱབྷོགཾ ཨཀཏྭཱ ཨུཔཙཱརསཱིམཾ ཨཏིཀྐམཏི, ཚིནྣཝསྶོ ཧོཏཱིཏི ཝདནྟི.

༢༦༡༥. ‘‘ཨཡཾ པནེཏྠ པཱལི༹མུཏྟཀརཏྟིཙྪེདཝིནིཙྪཡོ’’ཏི ཨཊྛཀཐཱགཏཾ རཏྟིཙྪེདཝིནིཙྪཡཾ དསྶེཏུམཱཧ ‘‘ཝསྶཾ ཨུཔགཏེནེཏྠཱ’’ཏིཨཱདི. ཨེཏྠཱཏི ཨིམསྨིཾ སཏྟཱཧཀིཙྩཱདྷིཀཱརེ. ཨཡཾ པཱལི༹མུཏྟཀཝིནིཙྪཡོ དཊྛབྦོཏི ཨཏྠོ.

༢༦༡༦. ‘‘ཨསུཀཾ ནཱམ དིཝས’’ནྟིཨཱདིནཱ ནིམནྟནཱཀཱརཾ ཝཀྑཏི. པུབྦནྟི པཋམཾ. ཝཊྚཏཱིཏི ¶ སཏྟཱཧཀིཙྩེན གནྟུཾ ཝཊྚཏི. ཡཐཱཧ – ‘‘སཙེ ཨེཀསྨིཾ མཧཱཝཱསེ པཋམཾཡེཝ ཀཏིཀཱ ཀཏཱ ཧོཏི ‘ཨསུཀདིཝསཾ ནཱམ སནྣིཔཏིཏབྦ’ནྟི, ནིམནྟིཏོཡེཝ ནཱམ ཧོཏི, གནྟུཾ ཝཊྚཏཱི’’ཏི (མཧཱཝ. ཨཊྛ. ༡༩༩). ‘‘ཨུཔཱསཀེཧི ‘ཨིམསྨིཾ ནཱམ དིཝསེ དཱནཱདཱིནི ཀརོམ, སབྦེ ཨེཝ སནྣིཔཏནྟཱུ’ཏི ཀཏིཀཱཡཔི ཀཏཱཡ གནྟུཾ ཝཊྚཏི, ནིམནྟིཏོཡེཝ ནཱམ ཧོཏཱི’’ཏི ཀེཙི.

༢༦༡༧. བྷཎྜཀནྟི ཨཏྟནོ ཙཱིཝརབྷཎྜཾ. ན ཝཊྚཏཱིཏི སཏྟཱཧཀིཙྩེན གནྟུཾ ན ཝཊྚཏི. པཧིཎནྟཱིཏི ཙཱིཝརདྷོཝནཱདིཀམྨེན པཧིཎནྟི. ཨཱཙརིཡུཔཛ྄ཛྷཱཡཱནཾ ཨཱཎཏྟིཡེན ཀེནཙི ཨནཝཛྫཀིཙྩེན སཏྟཱཧཀརཎཱིཡེན གནྟུཾ ཝཊྚཏཱིཏི ཨིམིནཱཝ དཱིཔིཏཾ ཧོཏི.

༢༦༡༨. ཨུདྡེསཱདཱིནམཏྠཱཡཱཏི ¶ པཱལི༹ཝཱཙནཱནི སནྡྷཱཡ. ཨཱདི-སདྡེན པརིཔུཙྪཱདིཾ སངྒཎྷཱཏི. གརཱུནནྟི ཨགིལཱནཱནམྤི ཨཱཙརིཡུཔཛ྄ཛྷཱཡཱནཾ. གནྟུཾ ལབྷཏཱིཏི སཏྟཱཧཀརཎཱིཡེན གནྟུཾ ལབྷཏི. པུགྒལོཏི པཀརཎཏོ བྷིཀྑུཾཡེཝ གཎྷཱཏི.

༢༦༡༩. ཨཱཙརིཡོཏི ནིདསྶནམཏྟཾ, ཨུཔཛ྄ཛྷཱཡེན ནིཝཱརིཏེཔི ཨེསེཝ ནཡོ. ‘‘སཙེ པན ནཾ ཨཱཙརིཡོ ‘ཨཛྫ མཱ གཙྪཱ’ཏི ཝདཏི, ཝཊྚཏཱི’’ཏི (མཧཱཝ. ཨཊྛ. ༡༩༩) ཨཊྛཀཐཱནཡཾ དསྶེཏུམཱཧ ‘‘རཏྟིཙྪེདེ ཨནཱཔཏྟི, ཧོཏཱིཏི པརིདཱིཔིཏཱ’’ཏི. རཏྟིཙྪེདེཏི ཝསྶཙྪེདནིམིཏྟཾ. ‘‘རཏྟིཙྪེདེ’’ཏི སབྦཏྠ ཝསྶཙྪེདོཏི སནྣིཊྛཱནཾ ཀཏྭཱ ཝདནྟི, ཨེཝཾ སཏྟཱཧཀརཎཱིཡེན གཏཾ ནཾ ཨནྟོསཏྟཱཧེཡེཝ པུན ཨཱགཙྪནྟཾ སཙེ ཨཱཙརིཡོ ཝཱ ཨུཔཛ྄ཛྷཱཡོ ཝཱ ‘‘ཨཛྫ མཱ གཙྪཱ’’ཏི ཝདཏི, སཏྟཱཧཱཏིཀྐམེཔི ཨནཱཔཏྟཱིཏི ཨདྷིཔྤཱཡོ, ཝསྶཙྪེདོ པན ཧོཏིཡེཝཱཏི དཊྛབྦཾ སཏྟཱཧསྶ བཧིདྡྷཱ ཝཱིཏིནཱམིཏཏྟཱ.

༢༦༢༠. ཡསྶ ཀསྶཙི ཉཱཏིསྶཱཏི མཱཏཱཔིཏཱུཧི ཨཉྙསྶ ཉཱཏིཛནསྶ. ‘‘གཙྪཏོ དསྶནཏྠཱཡཱ’’ཏི ཨིམིནཱ སེསཉཱཏིཀེཧི ‘‘མཡཾ གིལཱནཱ བྷདནྟཱནཾ ཨཱགམནཾ ཨིཙྪཱམཱ’’ཏི ཙ ‘‘ཨུཔཊྛཱཀཀུལེཧི དཱནཾ དསྶཱམ, དྷམྨཾ སོསྶཱམ, བྷིཀྑཱུནཾ དསྶནཾ ཨིཙྪཱམཱ’’ཏི ཙ ཨེཝཾ ཀཏྟབྦཾ ནིདྡིསིཏྭཱ དཱུཏེ ཝཱ པེསིཏེ སཏྟཱཧཀརཎཱིཡེན གཙྪཏོ རཏྟིཙྪེདོ ཙ དུཀྐཊཉྩ ན ཧོཏཱིཏི ཝུཏྟཾ ཧོཏི. ཡཐཱཧ ‘‘ཨིདྷ པན, བྷིཀྑཝེ, བྷིཀྑུསྶ ཉཱཏཀོ གིལཱནོ ཧོཏི…པེ… གནྟབྦཾ, བྷིཀྑཝེ, སཏྟཱཧཀརཎཱིཡེན པཧིཏེ, ན ཏྭེཝ ཨཔྤཧིཏེ’’ཏི (མཧཱཝ. ༡༩༩) ཙ ¶ ‘‘ཨིདྷ པན, བྷིཀྑཝེ, ཨུཔཱསཀེན སངྒྷཾ ཨུདྡིསྶ ཝིཧཱརོ ཀཱརཱཔིཏོ ཧོཏི…པེ… ཨིཙྪཱམི དཱནཉྩ ¶ དཱཏུཾ དྷམྨཉྩ སོཏུཾ བྷིཀྑཱུ ཙ པསྶིཏུནྟི. གནྟབྦཾ, བྷིཀྑཝེ, སཏྟཱཧཀརཎཱིཡེན པཧིཏེ, ན ཏྭེཝ ཨཔྤཧིཏེ’’ཏི (མཧཱཝ. ༡༨༨) ཙ.

༢༦༢༡. ‘‘ཨཧཾ གཱམཀཾ གནྟྭཱ ཨཛྫེཝ ཨཱགམིསྶཱམཱི’’ཏི ཨཱགཙྪཾ ཨཱགཙྪནྟོ སཙེ པཱཔུཎིཏུཾ ན སཀྐོཏེཝ, ཝཊྚཏཱིཏི ཡོཛནཱ. ཝཊྚཏཱིཏི ཨེཏྠ ‘‘ཨཛྫེཝ ཨཱགམིསྶཱམཱི’’ཏི གནྟྭཱ ཨཱགཙྪནྟསྶ ཨནྟརཱམགྒེ སཙེ ཨརུཎུགྒམནཾ ཧོཏི, ཝསྶཙྪེདོཔི ན ཧོཏི, རཏྟིཙྪེདདུཀྐཊཉྩ ནཏྠཱིཏི ཨདྷིཔྤཱཡོ.

༢༦༢༢. ཝཛེཏི (མཧཱཝ. ཨཊྛ. ༢༠༣) གོཔཱལཀཱནཾ ནིཝཱསནཊྛཱནེ. སཏྠེཏི ཛངྒྷསཏྠསཀཊསཏྠཱནཾ སནྣིཝིཊྛོཀཱསེ. ཏཱིསུ ཋཱནེསུ བྷིཀྑུནོ, ཝསྶཙྪེདེ ཨནཱཔཏྟཱིཏི ཏེཧི སདྡྷིཾ གཙྪནྟསྶེཝ ནཏྠི ཨཱཔཏྟི, ཏེཧི ཝིཡུཉྫིཏྭཱ གམནེ པན ཨཱཔཏྟིཡེཝ, པཝཱརེཏུཉྩ ན ལབྷཏི.

ཝཛཱདཱིསུ ཝསྶཾ ཨུཔགཙྪནྟེན ཝསྶཱུཔནཱཡིཀདིཝསེ ཏེན བྷིཀྑུནཱ ཨུཔཱསཀཱ ཝཏྟབྦཱ ‘‘ཀུཊིཀཱ ལདྡྷུཾ ཝཊྚཏཱི’’ཏི. སཙེ ཀརིཏྭཱ དེནྟི, ཏཏྠ པཝིསིཏྭཱ ‘‘ཨིདྷ ཝསྶཾ ཨུཔེམཱི’’ཏི ཏིཀྑཏྟུཾ ཝཏྟབྦཾ. ནོ ཙེ དེནྟི, སཱལཱསངྑེཔེན ཋིཏསཀཊསྶ ཧེཊྛཱ ཨུཔགནྟབྦཾ. ཏམྤི ཨལབྷནྟེན ཨཱལཡོ ཀཱཏབྦོ. སཏྠེ པན ཀུཊིཀཱདཱིནཾ ཨབྷཱཝེ ‘‘ཨིདྷ ཝསྶཾ ཨུཔེམཱི’’ཏི ཝཙཱིབྷེདཾ ཀཏྭཱ ཨུཔགནྟུཾ ན ཝཊྚཏི, ཨཱལཡཀརཎམཏྟམེཝ ཝཊྚཏི. ཨཱལཡོ ནཱམ ‘‘ཨིདྷ ཝསྶཾ ཝསིསྶཱམཱི’’ཏི ཙིཏྟུཔྤཱདམཏྟཾ.

སཙེ མགྒཔྤཊིཔནྣེཡེཝ སཏྠེ པཝཱརཎདིཝསོ ཧོཏི, ཏཏྠེཝ པཝཱརེཏབྦཾ. ཨཐ སཏྠོ ཨནྟོཝསྶེཡེཝ བྷིཀྑུནཱ པཏྠིཏཊྛཱནཾ པཏྭཱ ཨཏིཀྐམཏི. པཏྠིཏཊྛཱནེ ¶ ཝསིཏྭཱ ཏཏྠ བྷིཀྑཱུཧི སདྡྷིཾ པཝཱརེཏབྦཾ. ཨཐཱཔི སཏྠོ ཨནྟོཝསྶེཡེཝ ཨནྟརཱ ཨེཀསྨིཾ གཱམེ ཏིཊྛཏི ཝཱ ཝིཔྤཀིརཏི ཝཱ, ཏསྨིཾཡེཝ གཱམེ བྷིཀྑཱུཧི སདྡྷིཾ ཝསིཏྭཱ པཝཱརེཏབྦཾ, ཨཔྤཝཱརེཏྭཱ ཏཏོ པརཾ གནྟུཾ ན ཝཊྚཏི.

ནཱཝཱཡ ཝསྶཾ ཨུཔགཙྪནྟེནཱཔི ཀུཊིཡཾཡེཝ ཨུཔགནྟབྦཾ. པརིཡེསིཏྭཱ ཨལབྷནྟེ ཨཱལཡོ ཀཱཏབྦོ ¶ . སཙེ ཨནྟོཏེམཱསཾ ནཱཝཱ སམུདྡེཡེཝ ཧོཏི, ཏཏྠེཝ པཝཱརེཏབྦཾ. ཨཐ ནཱཝཱ ཀཱུལཾ ལབྷཏི, སཡཉྩ པརཏོ གནྟུཀཱམོ ཧོཏི, གནྟུཾ ན ཝཊྚཏི. ནཱཝཱཡ ལདྡྷགཱམེཡེཝ ཝསིཏྭཱ བྷིཀྑཱུཧི སདྡྷིཾ པཝཱརེཏབྦཾ. སཙེཔི ནཱཝཱ ཨནུཏཱིརམེཝ ཨཉྙཏྠ གཙྪཏི, བྷིཀྑུ ཙ པཋམཾ ལདྡྷགཱམེཡེཝ ཝསིཏུཀཱམོ, ནཱཝཱ གཙྪཏུ, བྷིཀྑུནཱ ཏཏྠེཝ ཝསིཏྭཱ བྷིཀྑཱུཧི སདྡྷིཾ པཝཱརེཏབྦཾ.

ཨིཏི ཝཛེ, སཏྠེ, ནཱཝཱཡནྟི ཏཱིསུ ཋཱནེསུ ནཏྠི ཝསྶཙྪེདེ ཨཱཔཏྟི, པཝཱརེཏུཉྩ ལབྷཏི.

༢༦༢༣. སཏི པཙྩཡཝེཀལླེཏི པིཎྜཔཱཏཱདཱིནཾ པཙྩཡཱནཾ ཨཱུནཏྟེ སཏི. སརཱིརཱཕཱསུཏཱཡ ཝཱཏི སརཱིརསྶ ཨཕཱསུཏཱཡ ཨཱབཱདྷེ ཝཱ སཏི. ཝསྶཾ ཚེཏྭཱཔི པཀྐམེཏི ཝསྶཙྪེདཾ ཀཏྭཱཔི ཡཐཱཕཱསུཀཊྛཱནཾ གཙྪེཡྻ. ཨཔི-སདྡེན ཝསྶཾ ཨཚེཏྭཱ ཝསྶཙྪེདཀཱརཎེ སཏི སཏྟཱཧཀརཎཱིཡེན གནྟུམྤི ཝཊྚཏཱིཏི དཱིཔེཏི.

༢༦༢༤. ཡེན ཀེནནྟརཱཡེནཱཏི རཱཛནྟརཱཡཱདཱིསུ ཡེན ཀེནཙི ཨནྟརཱཡེན. ཡོ བྷིཀྑུ ཝསྶཾ ནོཔགཏོ, ཏེནཱཔི ཚིནྣཝསྶེན ཝཱཔི དུཏིཡཱ ཝསྶཱུཔནཱཡིཀཱ ཨུཔགནྟབྦཱཏི ཡོཛནཱ.

༢༦༢༥-༦. སཏྟཱཧནྟི ¶ ཨཙྩནྟསཾཡོགེ ཨུཔཡོགཝཙནཾ. ‘‘ཝཱིཏིནཱམེཏཱི’’ཏི ཨིམིནཱ སམྦནྡྷོ. ཨུཔགནྟྭཱཔི ཝཱ བཧིདྡྷཱ ཨེཝ སཏྟཱཧཾ ཝཱིཏིནཱམེཏི ཙེ. ཡོ གཙྪཏི, ཡོ ཙ ཝཱིཏིནཱམེཏི, ཏསྶ བྷིཀྑུསྶ. པུརིམཱཔི ན ཝིཛྫཏཱིཏི ཨནུཔགཏཏྟཱ, ཚིནྣཝསྶཏྟཱ ཙ པུརིམཱཔི ཝསྶཱུཔནཱཡིཀཱ ན ཝིཛྫཏི ན ལབྷཏི. ཨིམེསཾ དྭིནྣཾ ཡཐཱཀྐམཾ ཨུཔཙཱརཱཏིཀྐམེ, སཏྟཱཧཱཏིཀྐམེ ཙ ཨཱཔཏྟི ཝེདིཏབྦཱ.

པཊིསྶཝེ ཙ བྷིཀྑུསྶ, ཧོཏི ཨཱཔཏྟི དུཀྐཊནྟི ‘‘ཨིདྷ ཝསྶཾ ཝསཐཱ’’ཏི ཝུཏྟེ ‘‘སཱདྷཱུ’’ཏི པཊིསྶུཎིཏྭཱ ཏསྶ ཝིསཾཝཱདེ ཨསཙྩཱཔནེ ཨཱཔཏྟི ཧོཏི. ཀཏམཱཏི ཨཱཧ ‘‘དུཀྐཊ’’ནྟི. ན ཀེཝལཾ ཨེཏསྶེཝ ཝིསཾཝཱདེ ཨཱཔཏྟི ཧོཏི, ཨཐ ཁོ ཨིཏརེསམྤི པཊིསྶཝཱནཾ ཝིསཾཝཱདེ ཨཱཔཏྟི ཝེདིཏབྦཱ. ཡཐཱཧ – ‘‘པཊིསྶཝེ ཙ ཨཱཔཏྟི དུཀྐཊསྶཱཏི ཨེཏྠ ན ཀེཝལཾ ‘ཨིམཾ ཏེམཱསཾ ཨིདྷ ཝསྶཾ ཝསཐཱ’ཏི ཨེཏསྶེཝ པཊིསྶཝསྶ ཝིསཾཝཱདེ ཨཱཔཏྟི, ‘ཨིམཾ ¶ ཏེམཱསཾ བྷིཀྑཾ གཎྷཐ, ཨུབྷོཔི མཡཾ ཨིདྷ ཝསྶཾ ཝསིསྶཱམ, ཨེཀཏོཝ ཨུདྡིསཱཔེསྶཱམཱ’ཏི ཨེཝམཱདིནཱཔི ཏསྶ ཏསྶ པཊིསྶཝསྶ ཝིསཾཝཱདེ དུཀྐཊ’’ནྟི (མཧཱཝ. ཨཊྛ. ༢༠༧). ཏཉྩ ཁོ པཊིསྶཝཀཱལེ སུདྡྷཙིཏྟསྶ པཙྪཱ ཝིསཾཝཱདནཔཙྩཡཱ ཧོཏི. པཋམཾ ཨསུདྡྷཙིཏྟསྶ པན པཊིསྶཝེ པཱཙིཏྟིཡཾ, ཝིསཾཝཱདེན དུཀྐཊནྟི པཱཙིཏྟིཡེན སདྡྷིཾ དུཀྐཊཾ ཡུཛྫཏི.

༢༦༢༧. ‘‘ཝསྶཾ ཨུཔགནྟྭཱ པན ཨརུཎཾ ཨནུཊྛཱཔེཏྭཱ ཏདཧེཝ སཏྟཱཧཀརཎཱིཡེན པཀྐམནྟསྶཱཔི ཨནྟོསཏྟཱཧེ ནིཝཏྟནྟསྶ ཨནཱཔཏྟཱི’’ཏི (མཧཱཝ. ཨཊྛ. ༢༠༧) ཨཊྛཀཐཱཝཙནཏོ, ‘‘ཀོ ཝཱདོ ཝསིཏྭཱ བཧི གཙྪཏོ’’ཏི ཝཀྑམཱནཏྟཱ ¶ ཙ ‘‘ནུཊྛཱཔེཏྭཱ པནཱརུཎ’’ནྟི པཱཋོ གཧེཏབྦོ. ཀཏྠཙི པོཏྠཀེསུ ‘‘ཨུཊྛཱཔེཏྭཱ པནཱརུཎ’’ནྟི པཱཋོ དིསྶཏི, སོ ན གཧེཏབྦོ.

༢༦༢༨. ཝསིཏྭཱཏི དྭཱིཧཏཱིཧཾ ཝསིཏྭཱ. ཡཐཱ ཝསྶཾ ཝསིཏྭཱ ཨརུཎཾ ཨནུཊྛཱཔེཏྭཱཝ སཏྟཱཧཀརཎཱིཡེན གཙྪཏོ ཨནཱཔཏྟི, ཏཐཱ གཏཊྛཱནཏོ ཨནྟོསཏྟཱཧེ ཨཱགནྟྭཱ པུནཔི ཨརུཎཾ ཨནུཊྛཱཔེཏྭཱཝ སཏྟཱཧཀརཎཱིཡེན གཙྪཏོ ཨནཱཔཏྟི. ‘‘སཏྟཱཧཝཱརེན ཨརུཎོ ཨུཊྛཱཔེཏབྦོ’’ཏི (མཧཱཝ. ཨཊྛ. ༢༠༡) ཨཊྛཀཐཱཝཙནཾ སཏྟམཱརུཎེན པཊིབདྡྷདིཝསཾ སཏྟམེན ཨརུཎེནེཝ སངྒཧེཏྭཱ སཏྟམཨརུཎབྦྷནྟརེ ཨནཱགནྟྭཱ ཨཊྛམཾ ཨརུཎཾ བཧི ཨུཊྛཱཔེནྟསྶ རཏྟིཙྪེདདསྶནཔརཾ, ན སཏྟམཨརུཎསྶེཝ ཏཏྠ ཨུཊྛཱཔེཏབྦབྷཱཝདསྶནཔརནྟི གཧེཏབྦཾ སིཀྑཱབྷཱཛནཨཊྛཀཐཱཡ, སཱིཧལ༹གཎྛིཔདེསུ ཙ ཏཐཱ ཝིནིཙྪིཏཏྟཱ.

༢༦༢༩. ‘‘ནོཔེཏི ཨསཏིཡཱ’’ཏི པདཙྪེདོ, ནོཔེཏཱིཏི ‘‘ཨིམསྨིཾ ཝིཧཱརེ ཨིམཾ ཏེམཱསཾ ཝསྶཾ ཨུཔེམཱི’’ཏི ཝཙཱིབྷེདེན ན ཨུཔགཙྪཏི.

༢༦༣༠. ཝུཏྟམེཝཏྠཾ སམཏྠེཏུམཱཧ ‘‘ན དོསོ ཀོཙི ཝིཛྫཏཱི’’ཏི.

༢༦༣༡. ‘‘ཨིམསྨིཾ ཝིཧཱརེ ཨིམཾ ཏེམཱསཾ ཝསྶཾ ཨུཔེམཱི’’ཏི ཏིཀྑཏྟུཾ ཝཙནེ ནིཙྪཱརིཏེ ཨེཝ ཝསྶཾ ཨུཔགཏོ སིཡཱཏི ཡོཛནཱ. ‘‘ནིཙྪཱརིཏེཝ ཏིཀྑཏྟུ’’ནྟི ཨིདཾ ཨུཀྐཾསཝསེན ཝུཏྟཾ, སཀིཾ, དྭིཀྑཏྟུཾ ཝཱ ནིཙྪཱརིཏེཔི ཝསྶཱུཔགཏོ ནཱམ ཧོཏཱིཏི. ཡཐཱཧ – ‘‘ཨིམསྨིཾ ཝིཧཱརེ ཨིམཾ ¶ ཏེམཱསཾ ཝསྶཾ ཨུཔེམཱིཏི སཀིཾ ཝཱ དྭཏྟིཀྑཏྟུཾ ཝཱ ཝཱཙཾ ནིཙྪཱརེཏྭཱཝ ཝསྶཾ ཨུཔགནྟབྦ’’ནྟི (མཧཱཝ. ཨཊྛ. ༡༨༤).

༢༦༣༢. ནཝམིཏོ ¶ པཊྛཱཡ གནྟུཾ ཝཊྚཏི, ཨཱགཙྪཏུ ཝཱ མཱ ཝཱ, ཨནཱཔཏྟཱི’’ཏི (མཧཱཝ. ཨཊྛ. ༢༠༧) ཨཊྛཀཐཱནཡཾ དསྶེཏུམཱཧ ‘‘ཨཱདིཾ ཏུ ནཝམིཾ ཀཏྭཱ’’ཏིཨཱདི. ནཝམིཾ པབྷུཏི ཨཱདིཾ ཀཏྭཱ, ནཝམིཏོ པཊྛཱཡཱཏི ཝུཏྟཾ ཧོཏི. གནྟུཾ ཝཊྚཏཱིཏི སཏྟཱཧཀརཎཱིཡེནེཝ གནྟུཾ ཝཊྚཏི, ཏསྨཱ པཝཱརཎདིཝསེཔི ཏདཧེཝ ཨཱགནྟུཾ ཨསཀྐུཎེཡྻཊྛཱནཾ པཝཱརཎཏྠཱཡ གཙྪནྟེན ལབྦྷམཱནེན སཏྟཱཧཀརཎཱིཡེན གནྟུཾ ཝཊྚཏི. ‘‘པཝཱརེཏྭཱ པན གནྟུཾ ཝཊྚཏི པཝཱརཎཱཡ ཏཾདིཝསསནྣིསྶིཏཏྟཱ’’ཏི (ཝཛིར. ཊཱི. མཧཱཝགྒ ༢༠༧) ཧི ཝཛིརབུདྡྷིཏྠེརོ. སོ པཙྪཱ ཨཱགཙྪཏུ ཝཱ མཱ ཝཱ, དོསོ ན ཝིཛྫཏཱིཏི ཡོཛནཱ.

ཝསྶཱུཔནཱཡིཀཀྑནྡྷཀཀཐཱཝཎྞནཱ.

པཝཱརཎཀྑནྡྷཀཀཐཱཝཎྞནཱ

༢༦༣༣. ‘‘པཝཱརཎཱ’’ཏི ཨིདཾ ‘‘ཙཱཏུདྡསཱི’’ཏིཨཱདཱིཧི པཙྩེཀཾ ཡོཛེཏབྦཾ. ཏསྨིཾ ཏསྨིཾ དིནེ ཀཱཏབྦཱ པཝཱརཎཱ ཨབྷེདོཔཙཱརེན ཏཐཱ ཝུཏྟཱ. སཱམགྒཱི ཨུཔོསཐཀྑནྡྷཀཀཐཱཝཎྞནཱཡ ཝུཏྟསརཱུཔཱཝ. སཱམགྒིཔཝཱརཎཾ ཀརོནྟེཧི ཙ པཋམཾ པཝཱརཎཾ ཋཔེཏྭཱ པཱཊིཔདཏོ པཊྛཱཡ ཡཱཝ ཀཏྟིཀཙཱཏུམཱསིཔུཎྞམཱ ཨེཏྠནྟརེ ཀཱཏབྦཱ, ཏཏོ པཙྪཱ ཝཱ པུརེ ཝཱ ན ཝཊྚཏི. ཏེཝཱཙཱི དྭེཀཝཱཙཱིཏི ‘‘སུཎཱཏུ མེ, བྷནྟེ…པེ… ཏེཝཱཙིཀཾ པཝཱརེཡྻ, དྭེཝཱཙིཀཾ པཝཱརེཡྻ, ཨེཀཝཱཙིཀཾ པཝཱརེཡྻཱ’’ཏི ཏཾ ཏཾ ཉཏྟིཾ ཋཔེཏྭཱ ཀཱཏབྦཱ པཝཱརཎཱ ཝུཙྩཏི.

༢༦༣༤. ཏཱིཎི ཀམྨཱནི མུཉྩིཏྭཱ, ཨནྟེནེཝ པཝཱརཡེཏི ‘‘ཙཏྟཱརིམཱནི, བྷིཀྑཝེ, པཝཱརཎཀམྨཱནི, ཨདྷམྨེན ཝགྒཾ པཝཱརཎཀམྨཾ…པེ… དྷམྨེན སམགྒཾ པཝཱརཎཀམྨ’’ནྟི (མཧཱཝ. ༢༡༢) ཝཏྭཱ ‘‘ཏཏྲ, བྷིཀྑཝེ ¶ , ཡདིདཾ ཨདྷམྨེན ཝགྒཾ པཝཱརཎཀམྨཾ, ན, བྷིཀྑཝེ, ཨེཝརཱུཔཾ པཝཱརཎཀམྨཾ ཀཱཏབྦཾ…པེ… ཏཏྲ, བྷིཀྑཝེ, ཡདིདཾ དྷམྨེན སམགྒཾ པཝཱརཎཀམྨཾ, ཨེཝརཱུཔཾ, བྷིཀྑཝེ, པཝཱརཎཀམྨཾ ཀཱཏབྦ’’ནྟིཨཱདིཝཙནཏོ (མཧཱཝ. ༢༡༢) ཏཱིཎི ¶ ཨཀཏྟབྦཱནི པཝཱརཎཀམྨཱནི མུཉྩིཏྭཱ ཀཱཏུཾ ཨནུཉྙཱཏེན ཙཏུཏྠེན པཝཱརཎཀམྨེན པཝཱརེཡྻཱཏི ཨཏྠོ. ཏསྶ ཝིབྷཱགེཀདེསཾ ‘‘པཉྩ ཡསྨིཾ པནཱཝཱསེ’’ཏིཨཱདིནཱ ཝཀྑཏི.

༢༦༣༥. པུབྦཀིཙྩཾ སམཱཔེཏྭཱཏི –

‘‘སམྨཛྫནཱི པདཱིཔོ ཙ, ཨུདཀཾ ཨཱསནེན ཙ;

པཝཱརཎཱཡ ཨེཏཱནི, ‘པུབྦཀརཎ’ནྟི ཝུཙྩཏི.

‘‘ཚནྡཔཱརིསུདྡྷིཨུཏུཀྑཱནཾ, བྷིཀྑུགཎནཱ ཙ ཨོཝཱདོ;

པཝཱརཎཱཡ ཨེཏཱནི, ‘པུབྦཀིཙྩ’ནྟི ཝུཙྩཏཱི’’ཏི. –

ཝུཏྟཾ ནཝཝིདྷཾ པུབྦཀིཙྩཾ ནིཊྛཱཔེཏྭཱ.

པཏྟཀལླེ སམཱནིཏེཏི –

‘‘པཝཱརཎཱ ཡཱཝཏིཀཱ ཙ བྷིཀྑཱུ ཀམྨཔྤཏྟཱ,

སབྷཱགཱཔཏྟིཡོ ཙ ན ཝིཛྫནྟི;

ཝཛྫནཱིཡཱ ཙ པུགྒལཱ ཏསྨིཾ ན ཧོནྟི,

‘པཏྟཀལླ’ནྟི ཝུཙྩཏཱི’’ཏི. –

ཝུཏྟེ ཙཏུབྦིདྷེ པཏྟཀལླེ སམོདྷཱནིཏེ པརིསམཱཔིཏེ.

ཉཏྟིཾ ཋཔེཏྭཱཏི ‘‘སུཎཱཏུ མེ, བྷནྟེ སངྒྷོ, ཨཛྫ པཝཱརཎཱ, ཡདི སངྒྷསྶ པཏྟཀལླཾ, སངྒྷོ པཝཱརེཡྻཱ’’ཏི (མཧཱཝ. ༢༡༠) ཨེཝཾ སབྦསངྒཱཧིཀཝསེན ཙ ‘‘ཏེཝཱཙིཀཾ པཝཱརེཡྻཱ’’ཏི ཙ དཱནཱདིཀརཎེན ཡེབྷུཡྻེན རཏྟིཡཱ ཁེཔིཏཱཡ ཙ རཱཛཱདིཨནྟརཱཡེ སཏི ཙ ཏདནུརཱུཔཏོ ‘‘དྭེཝཱཙིཀཾ, ཨེཀཝཱཙིཀཾ, སམཱནཝསྶིཀཾ པཝཱརེཡྻཱ’’ཏི ཙ ཉཏྟིཾ ཋཔེཏྭཱ ¶ , ཏཱསཾ ཝིསེསོ ཨཊྛཀཐཱཡཾ དསྶིཏོཡེཝ. ཡཐཱཧ –

‘‘ཨེཝཉྷི ¶ ཝུཏྟེ ཏེཝཱཙིཀཉྩ དྭེཝཱཙིཀཉྩ ཨེཀཝཱཙིཀཉྩ པཝཱརེཏུཾ ཝཊྚཏི, སམཱནཝསྶིཀཾ ན ཝཊྚཏི. ‘ཏེཝཱཙིཀཾ པཝཱརེཡྻཱ’ཏི ཝུཏྟེ པན ཏེཝཱཙིཀམེཝ ཝཊྚཏི, ཨཉྙཾ ན ཝཊྚཏི, ‘དྭེཝཱཙིཀཾ པཝཱརེཡྻཱ’ཏི ཝུཏྟེ དྭེཝཱཙིཀཉྩ ཏེཝཱཙིཀཉྩ ཝཊྚཏི, ཨེཀཝཱཙིཀཉྩ སམཱནཝསྶིཀཉྩ ན ཝཊྚཏི. ‘ཨེཀཝཱཙིཀཾ པཝཱརེཡྻཱ’ཏི ཝུཏྟེ པན ཨེཀཝཱཙིཀདྭེཝཱཙིཀཏེཝཱཙིཀཱནི ཝཊྚནྟི, སམཱནཝསྶིཀམེཝ ན ཝཊྚཏི. ‘སམཱནཝསྶིཀ’ནྟི ཝུཏྟེ སབྦཾ ཝཊྚཏཱི’’ཏི (མཧཱཝ. ཨཊྛ. ༢༡༠).

ཀཱཏབྦཱཏི ཐེརེན བྷིཀྑུནཱ ཨེཀཾསཾ ཨུཏྟརཱསངྒཾ ཀརིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཨེཝམསྶ ཝཙནཱིཡོ ‘‘སངྒྷཾ, ཨཱཝུསོ, པཝཱརེམི དིཊྛེན ཝཱ…པེ… ཏཏིཡམྤི ཨཱཝུསོ, སངྒྷཾ པཝཱརེམི དིཊྛེན ཝཱ…པེ… པསྶནྟོ པཊིཀརིསྶཱམཱི’’ཏི (མཧཱཝ. ༢༡༠) ཝུཏྟནཡེན ཀཱཏབྦཱ. ནཝཀེན བྷིཀྑུནཱ ཨེཀཾསཾ ཨུཏྟརཱསངྒཾ ཀརིཏྭཱ…པེ… ཏཏིཡམྤི, བྷནྟེ, སངྒྷཾ པཝཱརེམི དིཊྛེན ཝཱ…པེ… པསྶནྟོ པཊིཀརིསྶཱམཱིཏི (མཧཱཝ. ༢༡༠) ཝུཏྟནཡེན ཀཱཏབྦཱ.

༢༦༣༦. ཐེརེསུ པཝཱརེནྟེསུ ཡོ པན ནཝོ, སོ སཡཾ ཡཱཝ པཝཱརེཏི, ཏཱཝ ཨུཀྐུཊིཀཾ ནིསཱིདེཡྻཱཏི ཡོཛནཱ.

༢༦༣༧. ཙཏྟཱརོ ཝཱ ཏཡོཔི ཝཱ ཨེཀཱཝཱསེ ཨེཀསཱིམཱཡཾ ཝསནྟི ཙེ, ཉཏྟིཾ ཝཏྭཱ ‘‘སུཎནྟུ མེ, ཨཱཡསྨནྟོ, ཨཛྫ པཝཱརཎཱ, ཡདཱཡསྨནྟཱནཾ པཏྟཀལླཾ, མཡཾ ཨཉྙམཉྙཾ པཝཱརེཡྻཱམཱ’’ཏི (མཧཱཝ. ༢༡༦) གཎཉཏྟིཾ ཋཔེཏྭཱ པཝཱརེཡྻུནྟི ཡོཛནཱ.

པཝཱརེཡྻུནྟི ¶ ཨེཏྠ ཐེརེན བྷིཀྑུནཱ ཨེཀཾསཾ ཨུཏྟརཱསངྒཾ ཀཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཏེ ཏཡོ ཝཱ དྭེ ཝཱ བྷིཀྑཱུ ཨེཝམསྶུ ཝཙནཱིཡཱ ‘‘ཨཧཾ, ཨཱཝུསོ, ཨཱཡསྨནྟེ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟོ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམི. དུཏིཡམྤི…པེ… ཏཏིཡམྤི ཨཧཾ, ཨཱཝུསོ, ཨཱཡསྨནྟེ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟོ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམཱི’’ཏི (མཧཱཝ. ༢༡༦) པཝཱརེཏབྦཾ. ནཝེནཔི ‘‘ཨཧཾ, བྷནྟེ, ཨཱཡསྨནྟེ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟོ ཨནུཀམྤཾ ཨུཔཱདཱཡ ¶ , པསྶནྟོ པཊིཀརིསྶཱམི. དུཏིཡམྤི…པེ… ཏཏིཡམྤི ཨཧཾ, བྷནྟེ, ཨཱཡསྨནྟེ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟོ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམཱི’’ཏི པཝཱརེཏབྦཾ.

༢༦༣༨. ཨཉྙམཉྙཾ པཝཱརེཡྻུཾ, ཝིནཱ ཉཏྟིཾ དུཝེ ཛནཱ. ཏེསུ ཐེརེན ‘‘ཨཧཾ, ཨཱཝུསོ, ཨཱཡསྨནྟཾ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདཏུ མཾ ཨཱཡསྨཱ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམི. དུཏིཡམྤི…པེ… ཏཏིཡམྤི ཨཧཾ, ཨཱཝུསོ, ཨཱཡསྨནྟཾ པཝཱརེམི…པེ… པཊིཀརིསྶཱམཱི’’ཏི (མཧཱཝ. ༢༡༧) པཝཱརེཏབྦཾ. ནཝེནཔི ‘‘ཨཧཾ, བྷནྟེ, ཨཱཡསྨནྟཾ པཝཱརེམི…པེ… ཝདཏུ མཾ ཨཱཡསྨཱ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམི. དུཏིཡམྤི…པེ… ཏཏིཡམྤི ཨཧཾ, བྷནྟེ, ཨཱཡསྨནྟཾ པཝཱརེམི…པེ… པཊིཀརིསྶཱམཱི’’ཏི པཝཱརེཏབྦཾ.

ཨདྷིཊྛེཡྻཱཏི པུབྦཀིཙྩཾ སམཱཔེཏྭཱ ‘‘ཨཛྫ མེ པཝཱརཎཱ ཙཱཏུདྡསཱི’’ཏི ཝཱ ‘‘པནྣརསཱི’’ཏི ཝཱ ཝཏྭཱ ‘‘ཨདྷིཊྛཱམཱི’’ཏི ཨདྷིཊྛེཡྻ ¶ . ཡཐཱཧ ‘‘ཨཛྫ མེ པཝཱརཎཱཏི ཨེཏྠ སཙེ ཙཱཏུདྡསིཀཱ ཧོཏི, ‘ཨཛྫ མེ པཝཱརཎཱ ཙཱཏུདྡསཱི’ཏི, སཙེ པནྣརསིཀཱ, ‘ཨཛྫ མེ པཝཱརཎཱ པནྣརསཱི’ཏི ཨེཝཾ ཨདྷིཊྛཱཏབྦ’’ནྟི (མཧཱཝ. ཨཊྛ. ༢༡༨), ཨིམིནཱ སབྦསངྒཱཧཱདིཉཏྟཱིསུ ཙ ཏསྨིཾ ཏསྨིཾ དིཝསེ སོ སོ ཝོཧཱརོ ཀཱཏབྦོཏི དཱིཔིཏམེཝ.

སེསཱ སངྒྷཔཝཱརཎཱཏི པཉྩཧི, ཨཏིརེཀེཧི ཝཱ བྷིཀྑཱུཧི ཀཏྟབྦཱ པཝཱརཎཱ སངྒྷཔཝཱརཎཱ.

༢༦༣༩. པཝཱརིཏེཏི པཋམཔཝཱརཎཱཡ པཝཱརིཏེ. ཨནཱགཏོཏི ཀེནཙི ཨནྟརཱཡེན པུརིམིཀཱཡ ཙ པཙྪིམིཀཱཡ ཙ ཝསྶཱུཔནཱཡིཀཱཡ ཝསྶཾ ཨནུཔགཏོ. ཨཝུཏྠོཏི པཙྪིམིཀཱཡ ཨུཔགཏོ. ཝུཏྟཉྷི ཁུདྡསིཀྑཱཝཎྞནཱཡ ‘‘ཨཝུཏྠོཏི པཙྪིམིཀཱཡ ཨུཔགཏོ ཨཔརིནིཊྛིཏཏྟཱ ‘ཨཝུཏྠོ’ཏི ཝུཙྩཏཱི’’ཏི. པཱརིསུདྡྷིཨུཔོསཐཾ ཀརེཡྻཱཏི ཡོཛནཱ. ཨེཏྠ ‘‘ཏེསཾ སནྟིཀེ’’ཏི སེསོ.

༢༦༤༠-༡. ཡསྨིཾ ¶ པནཱཝཱསེ པཉྩ ཝཱ ཙཏྟཱརོ ཝཱ ཏཡོ ཝཱ སམཎཱ ཝསནྟི, ཏེ ཏཏྠ ཨེཀེཀསྶ པཝཱརཎཾ ཧརིཏྭཱན སཙེ ཨཉྙམཉྙཾ པཝཱརེནྟི, ཨཱཔཏྟི དུཀྐཊནྟི ཡོཛནཱ.

སེསནྟི ‘‘ཨདྷམྨེན སམགྒ’’ནྟིཨཱདིཀཾ ཝིནིཙྪཡཾ. ཨིདྷཱཏི ཨིམསྨིཾ པཝཱརཎཱདྷིཀཱརེ. བུདྷོཏི ཝིནཡདྷརོ. ཨུཔོསཐེ ཝུཏྟནཡེནཱཏི ཨུཔོསཐཝིནིཙྪཡེ ཝུཏྟཀྐམེན. ནཡེཏི ཛཱནེཡྻ.

༢༦༤༢. སམྤཱདེཏཏྟནོ སུཙིནྟི ཨཏྟནོ ཨུཔོསཐཾ སམྤཱདེཏི. སབྦཾ སཱདྷེཏཱིཏི ཨུཔོསཐཱདིསབྦཾ ཀམྨཾ ནིཔྥཱདེཏི. ནཏྟནོཏི ཨཏྟནོ ཨུཔོསཐཾ ན ནིཔྥཱདེཏི.

༢༦༤༣. ཏསྨཱཏི ¶ ཡསྨཱ ཨཏྟནོ སུཙིཾ ན སཱདྷེཏི, ཏསྨཱ. ཨུབྷིནྣནྟི ཨཏྟནོ ཙ སངྒྷསྶ ཙ. ཀིཙྩསིདྡྷཏྠམེཝིདྷཱཏི ཨུཔོསཐཱདིཀམྨནིཔྤཛྫནཏྠཾ ཨིདྷ ཨིམསྨིཾ ཨུཔོསཐཀམྨཱདིཔཀརཎེ. པཱརིསུདྡྷིཔཱིཏི ཨེཏྠ པི-སདྡེན པཝཱརཎཱ སངྒཧིཏཱ. ཏེནེཝ ཝཀྑཏི ‘‘ཚནྡཾ ཝཱ པཱརིསུདྡྷིཾ ཝཱ, གཧེཏྭཱ ཝཱ པཝཱརཎ’’ནྟི.

ཚནྡཔཱརིསུདྡྷིཔཝཱརཎཾ དེནྟེན སཙེ སཱཔཏྟིཀོ ཧོཏི, ཨཱཔཏྟིཾ དེསེཏྭཱ ཨེཀཾསཾ ཨུཏྟརཱསངྒཾ ཀཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཚནྡཱདིཧཱརཀོ བྷིཀྑུ ཝཏྟབྦོ ‘‘ཚནྡཾ དམྨི, ཚནྡཾ མེ ཧར, ཚནྡཾ མེ ཨཱརོཙེཧཱི’’ཏི (མཧཱཝ. ༡༦༥), ‘‘པཱརིསུདྡྷིཾ དམྨི, པཱརིསུདྡྷིཾ མེ ཧར, པཱརིསུདྡྷིཾ མེ ཨཱརོཙེཧཱི’’ཏི (མཧཱཝ. ༡༦༤), ‘‘པཝཱརཎཾ དམྨི, པཝཱརཎཾ མེ ཧར, པཝཱརཎཾ མེ ཨཱརོཙེཧི, མམཏྠཱཡ པཝཱརེཧཱི’’ཏི (མཧཱཝ. ༢༡༣).

༢༦༤༤. ‘‘ཚནྡོ ཨེཀེནཱ’’ཏི པདཙྪེདོ. ཨེཀེན བཧཱུནམྤི ཚནྡོ ཧཱཏབྦོ, ཏཐཱ པཱརིསུདྡྷི ཧཱཏབྦཱ. པི-སདྡེན པཝཱརཎཱ ཧཱཏབྦཱཏི ཡོཛནཱ. པརམྤརཱཧཊོ ཚནྡོཏི བཧཱུནཾ ཝཱ ཨེཀསྶ ཝཱ ཚནྡཱདིཧཱརཀསྶ ཧཏྠཏོ ཨནྟརཱ ཨཉྙེན གཧིཏཱ ཚནྡཔཱརིསུདྡྷིཔཝཱརཎཱ. ཝིསུདྡྷིཡཱ ན གཙྪཏི ཨནཝཛྫབྷཱཝཱཡ ན པཱཔུཎཱཏི བིལཱ༹ལསངྑལིཀཚནྡཱདཱིནཾ སངྒྷམཛ྄ཛྷཾ ཨགམནེན ཝགྒབྷཱཝཀརཎཏོ.

ཨེཏྠ ཙ ཡཐཱ བིལཱ༹ལསངྑལིཀཱཡ པཋམཝལཡཾ དུཏིཡཝལཡཾ པཱཔུཎཱཏི, ན ཏཏིཡཾ, ཨེཝམིམེཔི ཚནྡཱདཡོ དཱཡཀེན ཡསྶ དིནྣཱ, ཏཏོ ཨཉྙཏྠ ན གཙྪཏཱིཏི བིལཱ༹ལསངྑལིཀཱསདིསཏྟཱ ¶ ‘‘བིལཱ༹ལསངྑལིཀཱ’’ཏི ཝུཏྟཱ. བིལཱ༹ལསངྑལིཀཱགྒཧཎཉྩེཏྠ ཡཱསཾ ཀཱསཉྩི སངྑལིཀཱནཾ ཨུཔལཀྑཎམཏྟནྟི དཊྛབྦཾ.

༢༦༤༥-༦. ཚནྡཾ ¶ ཝཱ པཱརིསུདྡྷིཾ ཝཱ པཝཱརཎཾ ཝཱ གཧེཏྭཱ ཚནྡཱདིཧཱརཀོ སངྒྷམཔྤཏྭཱ སཙེ སཱམཎེརཱདིབྷཱཝཾ པཊིཛཱནེཡྻ ཝཱ ཝིབྦྷམེཡྻ ཝཱ མརེཡྻ ཝཱ, ཏཾ སབྦཾ ཚནྡཱདིབྷཱཝཾ ནཱཧཊཾ ཧོཏི, སངྒྷཾ པཏྭཱ ཨེཝཾ སིཡཱ སཱམཎེརཱདིབྷཱཝཾ པཊིཛཱནནྟོ, ཝིབྦྷནྟོ, ཀཱལཀཏོ ཝཱ བྷཝེཡྻ, ཏཾ སབྦཾ ཧཊཾ ཨཱནཱིཏཾ ཧོཏཱིཏི ཡོཛནཱ.

ཏཏྠ སཱམཎེརཱདིབྷཱཝཾ ཝཱ པཊིཛཱནེཡྻཱཏི ‘‘ཨཧཾ སཱམཎེརོ’’ཏིཨཱདིནཱ བྷཱུཏཾ སཱམཎེརཱདིབྷཱཝཾ ཀཐེཡྻ, པཙྪཱ སཱམཎེརབྷཱུམིཡཾ པཏིཊྛཧེཡྻཱཏི ཨཏྠོ. ཨཱདི-སདྡེན ཨནྟིམཝཏྠུཾ ཨཛ྄ཛྷཱཔནྣོ གཧིཏོ.

༢༦༤༧. སངྒྷཾ པཏྭཱཏི ཨནྟམསོ ཏཾཏཾཀམྨཔྤཏྟསྶ ཙཏུཝགྒཱདིསངྒྷསྶ ཧཏྠཔཱསཾ པཏྭཱཏི ཨཏྠོ. པམཏྟོཏི པམཱདཾ སཏིསམྨོསཾ པཏྟོ. སུཏྟོཏི ནིདྡཱུཔགཏོ. ཁིཏྟཙིཏྟཀོཏི ཡཀྑཱདཱིཧི ཝིཀྑེཔམཱཔཱདིཏཙིཏྟོ. ནཱརོཙེཏཱིཏི ཨཏྟནོ ཚནྡཱདཱིནཾ ཨཱཧཊབྷཱཝཾ ཨེཀསྶཱཔི བྷིཀྑུནོ ན ཀཐེཏི. སཉྩིཙྩཱཏི སཉྩེཏེཏྭཱ ཛཱནནྟོཡེཝ ཨནཱདརིཡོ ནཱརོཙེཏི, དུཀྐཊཾ ཧོཏི.

༢༦༤༨. ཡེ ཏེཏི ཡེ ཏེ བྷིཀྑཱུ ཐེརཱ ཝཱ ནཝཱ ཝཱ མཛ྄ཛྷིམཱ ཝཱ. ཝིཔསྶནཱཏི སཧཙརིཡེན སམཐོཔི གཡ྄ཧཏི. སམཐཝིཔསྶནཱ ཙ ཨིདྷ ཏརུཎཱཡེཝ ཨདྷིཔྤེཏཱ, ཏསྨཱ ཝིཔསྶནཱཡུཏྟཱཏི ཨེཏྠ ཏརུཎཱཧི སམཐཝིཔསྶནཱཧི སམནྣཱགཏཱཏི ཨཏྠོ. རཏྟིནྡིཝནྟི ཨཙྩནྟསཾཡོགེ ཨུཔཡོགཝཙནཾ. ཨཏནྡིཏཱཏི ཨནལསཱ.

‘‘རཏྟིནྡིཝ’’ནྟི ཨེཏྠ རཏྟི-སདྡེན རཏྟིཡཱཡེཝ གཧཎཾ, ཨུདཱཧུ ཨེཀདེསསྶཱཏི ཨཱཧ ‘‘པུབྦརཏྟཱཔརརཏྟ’’ནྟི. པུབྦཱ ཙ སཱ རཏྟི ཙཱཏི པུབྦརཏྟི, པཋམཡཱམོ, ཨཔརཱ ཙ ¶ སཱ རཏྟི ཙཱཏི ཨཔརརཏྟི, པཙྪིམཡཱམོ, པུབྦརཏྟི ཙ ཨཔརརཏྟི ཙཱཏི སམཱཧཱརདྭནྡེ སམཱསནྟེ ཨ-ཀཱརཔཙྩཡཾ ཀཏྭཱ ‘‘པུབྦརཏྟཱཔརརཏྟ’’ནྟི ཝུཏྟཾ. ཨིདྷཱཔི ཨཙྩནྟསཾཡོགེ ཨུཔཡོགཝཙནཾ. མཛ྄ཛྷིམཡཱམེ ཀཱཡདརཐཝཱུཔསམནཏྠཱཡ སུཔནཾ ཨནུཉྙཱཏནྟི ཏཾ ཝཛྫེཏྭཱ པུརིམཔཙྪིམཡཱམེསུ ནིརནྟརབྷཱཝནཱནུཡོགོ ཀཱཏབྦོཏི དསྶནཏྠམེཝ ཝུཏྟཾ. ཝིཔསྶནཱ པརཱཡནཱ སམཐཝིཔསྶནཱཝ པརཾ ¶ ཨཡནཾ པཏིཊྛཱ ཨེཏེསནྟི ཝིཔསྶནཱཔརཱཡནཱ, སམཐཝིཔསྶནཱཡ ཡུཏྟཔཡུཏྟཱ ཧོནྟཱིཏི ཝུཏྟཾ ཧོཏི.

༢༦༤༩. ལདྡྷོ ཕཱསུཝིཧཱརོ ཡེཧི ཏེ ལདྡྷཕཱསུཝིཧཱརཱ, ཏེསཾ. ཕཱསུཝིཧཱརོཏི ཙ སུཁཝིཧཱརསྶ མཱུལཀཱརཎཏྟཱ ཏརུཎཱ སམཐཝིཔསྶནཱ ཨདྷིཔྤེཏཱ, པཊིལདྡྷཏརུཎསམཐཝིཔསྶནཱནནྟི ཨཏྠོ. སིཡཱ ན པརིཧཱནིཏི པརིཧཱནི ནཱམ ཨེཝཾ ཀཏེ ན བྷཝེཡྻ.

ཀཏྟིཀམཱསཀེཏི ཙཱིཝརམཱསསངྑཱཏེ ཀཏྟིཀམཱསེ པཝཱརཎཱཡ སངྒཧོ ཝུཏྟོཏི ཡོཛནཱ. གཱཐཱབནྡྷཝསེན ‘‘སངྒཱཧོ’’ཏི དཱིགྷོ ཀཏོ, པཝཱརཎཱསངྒཧོ ཝུཏྟོཏི ཨཏྠོ. ཡཐཱཧ –

‘‘པཝཱརཎཱསངྒཧོ ཙ ནཱམཱཡཾ ཝིསྶཊྛཀམྨཊྛཱནཱནཾ ཐཱམགཏསམཐཝིཔསྶནཱནཾ སོཏཱཔནྣཱདཱིནཉྩ ན དཱཏབྦོ. ཏརུཎསམཐཝིཔསྶནཱལཱབྷིནོ པན སབྦེ ཝཱ ཧོནྟུ, ཨུཔཌྜྷཱ ཝཱ, ཨེཀཔུགྒལོ ཝཱ, ཨེཀསྶཔི ཝསེན དཱཏབྦོཡེཝ. དིནྣེ པཝཱརཎཱསངྒཧེ ཨནྟོཝསྶེ པརིཧཱརོཝ ཧོཏི, ཨཱགནྟུཀཱ ཏེསཾ སེནཱསནཾ གཧེཏུཾ ན ལབྷནྟི. ཏེཧིཔི ཚིནྣཝསྶེཧི ན བྷཝིཏབྦཾ, པཝཱརེཏྭཱ པན ཨནྟརཱཔི ཙཱརིཀཾ པཀྐམིཏུཾ ལབྷནྟཱི’’ཏི (མཧཱཝ. ཨཊྛ. ༢༤༡).

པཝཱརཎཱསངྒཧསྶ ¶ དཱནཔྤཀཱརོ པན པཱལི༹ཏོ གཧེཏབྦོ.

པཝཱརཎཀྑནྡྷཀཀཐཱཝཎྞནཱ.

ཙམྨཀྑནྡྷཀཀཐཱཝཎྞནཱ

༢༦༥༠. ཨེལ༹ཀཱ ཙ ཨཛཱ ཙ མིགཱ ཙཱཏི ཝིགྒཧོ. པསཱུནཾ དྭནྡེ ཨེཀཏྟནཔུཾསཀཏྟསྶ ཝིབྷཱསིཏཏྟཱ བཧུཝཙནནིདྡེསོ. ཨེལ༹ཀཱནཉྩ ཨཛཱནཉྩ མིགཱནཾ རོཧིཏེཎིཀུརུངྒཱནཉྩ. པསདཱ ཙ མིགམཱཏཱ ཙ པསདམིགམཱཏཱ, ‘‘པསདམིགམཱཏུཡཱ’’ཏི ཝཏྟབྦེ གཱཐཱབནྡྷཝསེན ‘‘པསད’’ནྟི ནིགྒཧིཏཱགམོ. པསདམིགམཱཏུཡཱ ཙ ཙམྨཾ བྷིཀྑུནོ ཝཊྚཏཱིཏི ཡོཛནཱ. ‘‘མིགཱན’’ནྟི ཨིམིནཱ གཧིཏཱནམེཝེཏྠ ཝིབྷཱགདསྶནཾ ‘‘རོཧིཏེཎཱི’’ཏིཨཱདི. རོཧིཏཱདཡོ མིགཝིབྷཱགཝིསེསཱ.

༢༦༥༡. ཨེཏེསཾ ¶ ཡཐཱཝུཏྟསཏྟཱནཾ ཙམྨཾ ཋཔེཏྭཱ ཨཉྙཾ ཙམྨཾ དུཀྐཊཱཔཏྟིཡཱ ཝཏྠུབྷཱུཏནྟི ཨཏྠོ. ཨཉྙནྟི ཙ –

‘‘མཀྐཊོ ཀཱལ༹སཱིཧོ ཙ, སརབྷོ ཀདལཱིམིགོ;

ཡེ ཙ ཝཱལ༹མིགཱ ཧོནྟི, ཏེསཾ ཙམྨཾ ན ཝཊྚཏཱི’’ཏི. (མཧཱཝ. ཨཊྛ. ༢༥༩) –

ཨཊྛཀཐཱཡ པཊིཀྑིཏྟཾ ཙམྨམཱཧ. མཀྐཊོ ནཱམ སཱཁམིགོ. ཀཱལ༹སཱིཧོ ནཱམ མཧཱམུཁཝཱནརཛཱཏིཀོ. ཝཱལ༹མིགཱ ནཱམ སཱིཧབྱགྒྷཱདཡོ. ཡཐཱཧ – ‘‘ཏཏྠ ཝཱལ༹མིགཱཏི སཱིཧབྱགྒྷཨཙྪཏརཙྪཱ, ན ཀེཝལཉྩ ཨེཏེཡེཝ, ཡེསཾ པན ཙམྨཾ ཝཊྚཏཱིཏི ཝུཏྟཾ, ཏེ ཋཔེཏྭཱ ཨཝསེསཱ ཨནྟམསོ གོམཧིཾསསྶམིལཱ༹རཱདཡོཔི སབྦེ ཨིམསྨིཾ ཨཏྠེ ‘ཝཱལ༹མིགཱ’ཏྭེཝ ཝེདིཏབྦཱ’’ཏི.

ཐཝིཀཱ ¶ ཙ ཨུཔཱཧནཱ ཙ ཐཝིཀོཔཱཧནཾ. ཨམཱནུསཾ མནུསྶཙམྨརཧིཏཾ སབྦཾ ཙམྨཾ ཐཝིཀོཔཱཧནེ ཝཊྚཏཱིཏི ཡོཛནཱ. ཨེཏྠ ཐཝིཀཱཏི ཨུཔཱཧནཱདིཀོསཀསྶ གཧཎཾ. ཡཐཱཧ ‘‘མནུསྶཙམྨཾ ཋཔེཏྭཱ ཡེན ཀེནཙི ཙམྨེན ཨུཔཱཧནཱ ཝཊྚཏི. ཨུཔཱཧནཱཀོསཀསཏྠཀཀོསཀཀུཉྫིཀཱཀོསཀེསུཔི ཨེསེཝ ནཡོ’’ཏི (མཧཱཝ. ཨཊྛ. ༢༥༩).

༢༦༥༢. ‘‘ཨནུཛཱནཱམི, བྷིཀྑཝེ, སབྦཔཙྩནྟིམེསུ ཛནཔདེསུ གུཎངྒུཎཱུཔཱཧན’’ནྟི (མཧཱཝ. ༢༥༩) ཝཙནཏོ ‘‘ཝཊྚནྟི མཛ྄ཛྷིམེ དེསེ, ན གུཎངྒུཎཱུཔཱཧནཱ’’ཏི ཝུཏྟཾ. མཛ྄ཛྷིམེ དེསེཏི ‘‘པུརཏྠིམཱཡ དིསཱཡ གཛངྒལཾ ནཱམ ནིགམོ’’ཏིཨཱདིནཱ (མཧཱཝ. ༢༥༩) ཝུཏྟསཱིམཱཔརིཙྪེདེ མཛ྄ཛྷིམདེསེ. གུཎངྒུཎཱུཔཱཧནཱཏི ཙཏུཔཊལཏོ པཊྛཱཡ བཧུཔཊལཱ ཨུཔཱཧནཱ. ཡཐཱཧ – ‘‘གུཎངྒུཎཱུཔཱཧནཱཏི ཙཏུཔཊལཏོ པཊྛཱཡ ཝུཙྩཏཱི’’ཏི (མཧཱཝ. ཨཊྛ. ༢༤༥). མཛ྄ཛྷིམདེསེ གུཎངྒུཎཱུཔཱཧནཱ ན ཝཊྚནྟཱིཏི ཡོཛནཱ. ཨནྟོཨཱརཱམེཏི ཨེཏྠ པཀརཎཏོ ‘‘སབྦེས’’ནྟི ལབྦྷཏི, གིལཱནཱནམིཏརེསཉྩ སབྦེསནྟི ཨཏྠོ. སབྦཏྠཱཔི ཙཱཏི ཨནྟོཨཱརཱམེ, བཧི ཙཱཏི སབྦཏྠཱཔི. རོགིནོཏི གིལཱནསྶ ཝཊྚནྟཱིཏི ཡོཛནཱ.

༢༦༥༣. པུཊབདྡྷཱ ཁལླཀབདྡྷཱཙཱཏི པཙྩེཀཾ ཡོཛེཏབྦཾ. ཝིསེསོ པནེཏཱསཾ ཨཊྛཀཐཱཡམེཝ ¶ ཝུཏྟོ ‘‘པུཊབདྡྷཱཏི ཡོནཀཨུཔཱཧནཱ ཝུཙྩཏི, ཡཱ ཡཱཝཛངྒྷཏོ སབྦཔཱདཾ པཊིཙྪཱདེཏི. ཁལླཀབདྡྷཱཏི པཎྷིཔིདྷཱནཏྠཾ ཏལེ ཁལླཀཾ བནྡྷིཏྭཱ ཀཏཱ’’ཏི. པཱལིགུཎྛིམཱ ཙ ‘‘པལིགུཎྛིཏྭཱ ཀཏཱ, ཡཱ ཨུཔརི པཱདམཏྟམེཝ པཊིཙྪཱདེཏི, ན ཛངྒྷ’’ནྟི ཨཊྛཀཐཱཡཾ དསྶིཏཱཝ. ཏཱུལཔུཎྞཱཏི ཏཱུལཔིཙུནཱ པཱུརེཏྭཱ ཀཏཱ.

སབྦཱཝ ¶ ནཱིལཱ སབྦནཱིལཱ, སཱ ཨཱདི ཡཱསཾ ཏཱ སབྦནཱིལཱདཡོ. ཨཱདི-སདྡེན མཧཱནཱམརཏྟཔརིཡནྟཱནཾ གཧཎཾ. ཨེཏཱསཾ སརཱུཔཾ ཨཊྛཀཐཱཡམེཝ ཝུཏྟཾ ‘‘ནཱིལིཀཱ ཨུམཱཔུཔྥཝཎྞཱ ཧོཏི, པཱིཏིཀཱ ཀཎིཀཱརཔུཔྥཝཎྞཱ, ལོཧིཏིཀཱ ཛཡསུམནཔུཔྥཝཎྞཱ, མཉྫིཊྛིཀཱ མཉྫིཊྛཝཎྞཱ ཨེཝ, ཀཎྷཱ ཨདྡཱརིཊྛཀཝཎྞཱ, མཧཱརངྒརཏྟཱ སཏཔདིཔིཊྛིཝཎྞཱ, མཧཱནཱམརཏྟཱ སམྦྷིནྣཝཎྞཱ ཧོཏི པཎྜུཔལཱསཝཎྞཱ. ཀུརུནྡིཡཾ པན ‘པདུམཔུཔྥཝཎྞཱ’ཏི ཝུཏྟ’’ནྟི (མཧཱཝ. ཨཊྛ. ༢༤༦). སབྦནཱིལཱདཡོཔི ཙཱཏི ཨཔི-སདྡེན ནཱིལཱདིཝདྡྷིཀཱནཾ གཧཎཾ.

༢༦༥༤. ཙིཏྲཱཏི ཝིཙིཏྲཱ. མེཎྜཝིསཱཎཱུཔམཝདྡྷིཀཱཏི མེཎྜཱནཾ ཝིསཱཎསདིསཝདྡྷིཀཱ, ཀཎྞིཀཊྛཱནེ མེཎྜསིངྒསཎྛཱནེ ཝདྡྷེ ཡོཛེཏྭཱ ཀཏཱཏི ཨཏྠོ. ‘‘མེཎྜཝིསཱཎཱུཔམཝདྡྷིཀཱ’’ཏི ཨིདཾ ཨཛཝིསཱཎཱུཔམཝདྡྷིཀཱནཾ ཨུཔལཀྑཎཾ. མོརསྶ པིཉྪེན པརིསིབྦིཏཱཏི ཏལེསུ ཝཱ ཝདྡྷེསུ ཝཱ མོརཔིཉྪེཧི སུཏྟཀསདིསེཧི པརིསིབྦིཏཱ. ཨུཔཱཧནཱ ན ཙ ཝཊྚནྟཱིཏི ཡོཛནཱ.

༢༦༥༥. མཛྫཱརཱཏི བིལཱ༹རཱ. ཀཱལ༹ཀཱ རུཀྑཀཎྚཀཱ. ཨཱུལཱུཀཱ པཀྑིབིལཱ༹ལཱ. སཱིཧཱཏི ཀེསརསཱིཧཱདཡོ སཱིཧཱ. ཨུདྡཱཏི ཙཏུཔྤདཛཱཏིཀཱ. དཱིཔཱི སདྡལཱ. ཨཛིནསྶཱཏི ཨེཝཾནཱམིཀསྶ. པརིཀྑཊཱཏི ཨུཔཱཧནཔརིཡནྟེ ཙཱིཝརེ ཨནུཝཱཏཾ ཝིཡ ཝུཏྟཔྤཀཱརཾ ཙམྨཾ ཡོཛེཏྭཱ ཀཏཱ.

༢༦༥༦. སཙེ ཨཱིདིསཱ ཨུཔཱཧནཱ ལབྷནྟི, ཏཱསཾ ཝལ༹ཉྫནཔྤཀཱརཾ དསྶེཏུམཱཧ ‘‘པུཊཱདིཾ ཨཔནེཏྭཱ’’ཏིཨཱདི. པུཊཱདིཾ སབྦསོ ཚིནྡིཏྭཱ ཝཱ ཨཔནེཏྭཱ ཝཱ ཨུཔཱཧནཱ དྷཱརེཏབྦཱཏི ཡོཛནཱ. ཨེཝམཀཏྭཱ ལདྡྷནཱིཧཱརེནེཝ དྷཱརེནྟསྶ དུཀྐཊཾ. ཡཐཱཧ – ‘‘ཨེཏཱསུ ཡཾ ཀིཉྩི ལབྷིཏྭཱ སཙེ ¶ ཏཱནི ཁལླཀཱདཱིནི ཨཔནེཏྭཱ སཀྐཱ ཧོནྟི ཝལ༹ཉྫིཏུཾ, ཝལ༹ཉྫེཏབྦཱ, ཏེསུ པན སཏི ཝལ༹ཉྫནྟསྶ དུཀྐཊ’’ནྟི (མཧཱཝ. ཨཊྛ. ༢༤༦).

ཝཎྞབྷེདཾ ¶ ཏཐཱ ཀཏྭཱཏི ཨེཏྠ ‘‘ཨེཀདེསེནཱ’’ཏི སེསོ. ‘‘སབྦསོ ཝཱ’’ཏི ཨཱཧརིཏྭཱ སབྦསོ ཝཱ ཨེཀདེསེན ཝཱ ཝཎྞབྷེདཾ ཀཏྭཱ སབྦནཱིལཱདཡོ ཨུཔཱཧནཱ དྷཱརེཏབྦཱཏི ཡོཛནཱ. ཏཐཱ ཨཀཏྭཱ དྷཱརེནྟསྶ དུཀྐཊཾ. ཡཐཱཧ ‘‘ཨེཏཱསུ ཡཾ ཀིཉྩི ལབྷིཏྭཱ རཛནཾ ཙོལ༹ཀེན པུཉྪིཏྭཱ ཝཎྞཾ བྷིནྡིཏྭཱ དྷཱརེཏུཾ ཝཊྚཏི. ཨཔྤམཏྟཀེཔི བྷིནྣེ ཝཊྚཏིཡེཝཱ’’ཏི. ནཱིལཝདྡྷིཀཱདཡོཔི ཝཎྞབྷེདཾ ཀཏྭཱ དྷཱརེཏབྦཱ.

༢༦༥༧. ཏཏྠ ཋཱནེ པསྶཱཝཔཱདུཀཱ, ཝཙྩཔཱདུཀཱ, ཨཱཙམནཔཱདུཀཱཏི ཏིསྶོ པཱདུཀཱཡོ ཋཔེཏྭཱ སབྦཱཔི པཱདུཀཱ ཏཱལཔཏྟིཀཱདིབྷེདཱ སབྦཱཔི སངྐམནཱིཡཱ པཱདུཀཱ དྷཱརེཏུཾ ན ཝཊྚནྟཱིཏི ཡོཛནཱ.

༢༦༥༨. ཨཏིཀྐནྟཔམཱཎཾ ཨུཙྩཱསཡནསཉྙིཏཾ ཨཱསནྡིཉྩེཝ པལླངྐཉྩ སེཝམཱནསྶ དུཀྐཊནྟི ཡོཛནཱ. ཨཱསནྡཱི ཝུཏྟལཀྑཎཱཝ. པལླངྐོཏི པཱདེསུ ཨཱཧརིམཱནི ཝཱལ༹རཱུཔཱནི ཋཔེཏྭཱ ཀཏོ, ཨེཀསྨིཾཡེཝ དཱརུམྷི ཀཊྛཀམྨཝསེན ཚིནྡིཏྭཱ ཀཏཱནི ཨསཾཧཱརིམཱནི ཏཏྲཊྛཱནེཝ ཝཱལ༹རཱུཔཱནི ཡསྶ པཱདེསུ སནྟི, ཨེཝརཱུཔོ པལླངྐོ ཀཔྤཏཱིཏི ‘‘ཨཱཧརིམེནཱ’’ཏི ཨིམིནཱཝ དཱིཔིཏཾ. ‘‘ཨཀཔྤིཡརཱུཔཀཏོ ཨཀཔྤིཡམཉྩོ པལླངྐོ’’ཏི ཧི སཱརསམཱསེ ཝུཏྟཾ.

༢༦༥༩. གོནཀནྟི དཱིགྷལོམཀམཧཱཀོཛཝཾ. ཙཏུརངྒུལཱདྷིཀཱནི ཀིར ཏསྶ ལོམཱནི, ཀཱལ༹ཝཎྞཉྩ ཧོཏི. ‘‘ཙཏུརངྒུལཏོ ཨཱུནཀཔྤམཱཎལོམོ ཀོཛཝོ ཝཊྚཏཱི’’ཏི ཝདནྟི. ཀུཏྟཀནྟི སོལ༹སནྣཾ ནཱཊཀིཏྠཱིནཾ ཋཏྭཱ ནཙྩནཡོགྒཾ ¶ ཨུཎྞཱམཡཏྠརཎཾ. ཙིཏྟནྟི བྷིཏྟིཙྪིདྡཱདིཀཝིཙིཏྲཾ ཨུཎྞཱམཡཏྠརཎཾ. པཊིཀནྟི ཨུཎྞཱམཡཾ སེཏཏྠརཎཾ. པཊལིཀནྟི གྷནཔུཔྥཀཾ ཨུཎྞཱམཡཾ ལོཧིཏཏྠརཎཾ, ཡོ ‘‘ཨཱམལཀཔཏྟོ’’ཏིཔི ཝུཙྩཏི.

ཨེཀནྟལོམིནྟི ཨུབྷཏོ ཨུགྒཏལོམཾ ཨུཎྞཱམཡཏྠརཎཾ. ཝིཀཏིནྟི སཱིཧབྱགྒྷཱདིརཱུཔཝིཙིཏྲཾ ཨུཎྞཱམཡཏྠརཎཾ. ‘‘ཨེཀནྟལོམཱིཏི ཨེཀཏོདསཾ ཨུཎྞཱམཡཏྠརཎ’’ནྟི དཱིགྷནིཀཱ. ཏཱུལིཀནྟི རུཀྑཏཱུལལཏཱཏཱུལཔོཊཀིཏཱུལསངྑཱཏཱནཾ ཏིཎྞཾ ཏཱུལཱནཾ ཨཉྙཏརཔུཎྞཾ པཀཏིཏཱུལིཀཾ. ཨུདྡལོམིཀནྟི ཨེཀཏོ ཨུགྒཏལོམཾ ཨུཎྞཱམཡཏྠརཎཾ. ‘‘ཨུདྡལོམཱིཏི ཨུབྷཏོདསཾ ཨུཎྞཱམཡཏྠརཎཾ. ཨེཀནྟལོམཱིཏི ཨེཀཏོདསཾ ཨུཎྞཱམཡཏྠརཎ’’ནྟི (དཱི. ནི. ཨཊྛ. ༡.༡༥) དཱིགྷནིཀཱཡཊྛཀཐཱཡཾ ¶ ཝུཏྟཾ. སཱརསམཱསེ པན ‘‘ཨུདྡལོམཱིཏི ཨེཀཏོ ཨུགྒཏཔུཔྥཾ. ཨེཀནྟལོམཱིཏི ཨུབྷཏོ ཨུགྒཏཔུཔྥ’’ནྟི ཝུཏྟཾ.

༢༦༦༠. ཀཊྚིསྶནྟི རཏནཔརིསིབྦིཏཾ ཀོསེཡྻཀཊྚིསྶམཡཾ པཙྩཏྠརཎཾ. ‘‘ཀོསེཡྻཀཊྚིསྶམཡནྟི ཀོསེཡྻཀསཊམཡ’’ནྟི (དཱི. ནི. ཊཱི. ༡.༡༥) ཨཱཙརིཡདྷམྨཔཱལཏྠེརེན ཝུཏྟཾ, ཀནྟིཏཀོསེཡྻཔུཊམཡནྟི ཨཏྠོ. ཀོསེཡྻནྟི རཏནཔརིསིབྦིཏཾ ཀོསིཡསུཏྟམཡཾ པཙྩཏྠརཎཾ. རཏནཔརིསིབྦནརཧིཏཾ སུདྡྷཀོསེཡྻཾ པན ཝཊྚཏི.

དཱིགྷནིཀཱཡཊྛཀཐཱཡཾ པནེཏྠ ‘‘ཋཔེཏྭཱ ཏཱུལིཀཾ སབྦཱནེཝ གོནཀཱདཱིནི རཏནཔརིསིབྦིཏཱནི ན ཝཊྚནྟཱི’’ཏི (དཱི. ནི. ཨཊྛ. ༡.༡༥) ཝུཏྟཾ. ཏཏྠ ‘‘ཋཔེཏྭཱ ཏཱུལིཀ’’ནྟི ཨེཏེན རཏནཔརིསིབྦནརཧིཏཱཔི ཏཱུལིཀཱ ན ཝཊྚཏཱིཏི དཱིཔེཏི. ‘‘རཏནཔརིསིབྦིཏཱནི ན ཝཊྚནྟཱི’’ཏི ཨིམིནཱ པན ཡཱནི རཏནཔརིསིབྦིཏཱནི, ཏཱནི བྷཱུམཏྠརཎཝསེན ཡཐཱནུརཱུཔཾ མཉྩཱདཱིསུ ཙ ཨུཔནེཏུཾ ཝཊྚཏཱིཏི དཱིཔིཏནྟི ¶ ཝེདིཏབྦཾ. ཨེཏྠ ཙ ཝིནཡཔརིཡཱཡཾ པཏྭཱ གརུཀེ ཋཱཏབྦཏྟཱ ཨིདྷ ཝུཏྟནཡེནེཝེཏྠ ཝིནིཙྪཡོ ཝེདིཏབྦོ. སུཏྟནྟིཀདེསནཱཡཾ པན གཧཊྛཱནམྤི ཝསེན ཝུཏྟཏྟཱ ནེསཾ སངྒཎྷནཏྠཾ ‘‘ཋཔེཏྭཱ ཏཱུལིཀཾ…པེ… ཝཊྚནྟཱིཏི ཝུཏྟ’’ནྟི (དཱི. ནི. ཨཊྛ. ༡.༡༥) ཨཔརེ.

ཧཏྠིཨསྶརཐཏྠརནྟི ཧཏྠིཔིཊྛེ ཨཏྠརིཏཾ ཨཏྠརཎཾ ཧཏྠཏྠརཎཾ ནཱམ. ཨསྶརཐཏྠརེཔི ཨེསེཝ ནཡོ. ཀདལིམིགཔཝར-པཙྩཏྠརཎཀམྤི ཙཱཏི ཀདལིམིགཙམྨཾ ནཱམ ཨཏྠི, ཏེན ཀཏཾ པཝརཔཙྩཏྠརཎནྟི ཨཏྠོ. ཏཾ ཀིར སེཏཝཏྠསྶ ཨུཔརི ཀདལིམིགཙམྨཾ པཏྠརིཏྭཱ སིབྦེཏྭཱ ཀརོནྟི. པི-སདྡེན ཨཛིནཔྤཝེཎཱི གཧིཏཱ. ཨཛིནཔྤཝེཎཱི ནཱམ ཨཛིནཙམྨེཧི མཉྩཔམཱཎེན སིབྦེཏྭཱ ཀཏཱ པཝེཎཱི. ཏཱནི ཀིར ཙམྨཱནི སུཁུམཏརཱནི, ཏསྨཱ དུཔཊྚཏིཔཊྚཱནི ཀཏྭཱ སིབྦནྟི. ཏེན ཝུཏྟཾ ‘‘ཨཛིནཔྤཝེཎཱི’’ཏི.

༢༦༦༡. རཏྟཝིཏཱནསྶ ཧེཊྛཱཏི ཀུསུམྦྷཱདིརཏྟསྶ ལོཧིཏཝིཏཱནསྶ ཧེཊྛཱ ཀཔྤིཡཔཙྩཏྠརཎེཧི ཨཏྠཏཾ སཡནཱསནཉྩ. ཀསཱཝརཏྟཝིཏཱནསྶ པན ཧེཊྛཱ ཀཔྤིཡཔཙྩཏྠརཎེན ཨཏྠཏཾ ཝཊྚཏི. ཏེནེཝ ཝཀྑཏི ‘‘ཧེཊྛཱ ཨཀཔྤིཡེ’’ཏིཨཱདི.

དྭིདྷཱ ¶ རཏྟཱུཔདྷཱནཀནྟི སཱིསཔསྶེ, པཱདཔསྶེ ཙཱཏི ཨུབྷཏོཔསྶེ པཉྙཏྟརཏྟབིབྦོཧནཝནྟཉྩ སཡནཱསནཾ. ཨིདཾ སབྦཾ ཨཀཔྤིཡཾ པརིབྷུཉྫཏོ དུཀྐཊཾ ཧོཏི. ‘‘ཡཾ པན ཨེཀམེཝ ཨུཔདྷཱནཾ ཨུབྷོསུ པསྶེསུ རཏྟཾ ཝཱ ཧོཏི པདུམཝཎྞཾ ཝཱ ཝིཙིཏྲཾ ཝཱ, སཙེ པམཱཎཡུཏྟཾ, ཝཊྚཏཱི’’ཏི (མཧཱཝ. ཨཊྛ. ༢༥༤) ཨཊྛཀཐཱཝིནིཙྪཡོ ཨེཏེནེཝ བྱཏིརེཀཏོ ཝུཏྟོ ཧོཏི. ‘‘ཡེབྷུཡྻརཏྟཱནིཔི དྭེ བིབྦོཧནཱནི ན ཝཊྚནྟཱི’’ཏི གཎྛིཔདེ ཝུཏྟཾ. ཏེནེཝ ཡེབྷུཡྻེན རཏྟཝིཏཱནམྤི ན ཝཊྚཏཱིཏི ཝིཉྙཱཡཏི.

ཨེཏྠ ¶ ཙ ཀིཉྩཱཔི དཱིགྷནིཀཱཡཊྛཀཐཱཡཾ ‘‘ཨལོཧིཏཀཱནི དྭེཔི ཝཊྚནྟིཡེཝ, ཏཏོ ཨུཏྟརི ལབྷིཏྭཱ ཨཉྙེསཾ དཱཏབྦཱནི, དཱཏུཾ ཨསཀྐོནྟོ མཉྩེ ཏིརིཡཾ ཨཏྠརིཏྭཱ ཨུཔརི པཙྩཏྠརཎཾ དཏྭཱ ནིཔཛྫིཏུམྤི ལབྷཏཱི’’ཏི (དཱི. ནི. ཨཊྛ. ༡.༡༥) ཨཝིསེསེན ཝུཏྟཾ. སེནཱསནཀྑནྡྷཀསཾཝཎྞནཱཡཾ པན ‘‘ཨགིལཱནསྶ སཱིསཱུཔདྷཱནཉྩ པཱདཱུཔདྷཱནཉྩཱཏི དྭཡམེཝ ཝཊྚཏི, གིལཱནསྶ བིབྦོཧནཱནི སནྠརིཏྭཱ ཨུཔརི པཙྩཏྠརཎཾ དཏྭཱ ནིཔཛྫིཏུམྤི ཝཊྚཏཱི’’ཏི (ཙཱུལ༹ཝ. ཨཊྛ. ༢༩༧) ཝུཏྟཏྟཱ གིལཱནོཡེཝ མཉྩེ ཏིརིཡཾ ཨཏྠརིཏྭཱ ནིཔཛྫིཏུཾ ལབྷཏཱིཏི ཝེདིཏབྦཾ.

༢༦༦༢. ཨུདྡྷཾ སེཏཝིཏཱནམྤི ཧེཊྛཱ ཨཀཔྤིཡེ པཙྩཏྠརཎེ སཏི ན ཝཊྚཏཱིཏི ཡོཛནཱ. ཏསྨིནྟི ཨཀཔྤིཡཔཙྩཏྠརཎེ.

༢༦༦༣. ‘‘ཋཔེཏྭཱ’’ཏི ཨིམིནཱ ཨཱསནྡཱདིཏྟཡསྶ ཝཊྚནཱཀཱརོ ནཏྠཱིཏི དཱིཔེཏི. སེསཾ སབྦནྟི གོནཀཱདི དྭིདྷཱརཏྟཱུཔདྷཱནཀཔརིཡནྟཾ སབྦཾ. གིཧིསནྟཀནྟི གིཧཱིནཾ སནྟཀཾ ཏེཧིཡེཝ པཉྙཏྟཾ, ཨིམིནཱ པཉྩསུ སཧདྷམྨིཀེསུ ཨཉྙཏརེན ཝཱ ཏེསཾ ཨཱཎཏྟིཡཱ ཝཱ པཉྙཏྟཾ ན ཝཊྚཏཱིཏི དཱིཔེཏི. ལབྷཏེཏི ནིསཱིདིཏུཾ ལབྷཏི.

༢༦༦༤. ཏཾ ཀཏྠ ལབྷཏཱིཏི པདེསནིཡམཾ དསྶེཏུམཱཧ ‘‘དྷམྨཱསནེ’’ཏིཨཱདི. དྷམྨཱསནེཏི ཨེཏྠ ཨཊྛཀཐཱཡཾ ‘‘ཡདི དྷམྨཱསནེ སངྒྷིཀམྤི གོནཀཱདིཾ བྷིཀྑཱུཧི ཨནཱཎཏྟཱ ཨཱརཱམིཀཱདཡོ སཡམེཝ པཉྙཱཔེནྟི ཙེཝ ནཱིཧརནྟི ཙ, ཨེཏཾ གིཧིཝིཀཏནཱིཧཱརཾ ནཱམ. ཨིམིནཱ གིཧིཝིཀཏནཱིཧཱརེན ཝཊྚཏཱི’’ཏི (ཙཱུལ༹ཝ. ཨཊྛ. ༣༢༠; ཝི. སངྒ. ཨཊྛ. པཀིཎྞཀཝིནིཙྪཡཀཐཱ ༥༦ ཨཏྠཏོ སམཱནཾ) ཝུཏྟཾ. བྷཏྟགྒེ ཝཱཏི ཝིཧཱརེ ནིསཱིདཱཔེཏྭཱ པརིཝེསནཊྛཱནེ ¶ ཝཱ བྷོཛནསཱལཱཡཾ ཝཱ. ཨཔིསདྡེན གིཧཱིནཾ གེཧེཔི ཏེཧི པཉྙཏྟེ གོནཀཱདིམྷི ནིསཱིདིཏུཾ ¶ ཨནཱཔཏྟཱིཏི དཱིཔེཏི. དྷམྨཱསནཱདིཔདེསནིཡམནེན ཏཏོ ཨཉྙཏྠ གིཧིཔཉྙཏྟེཔི ཏཏྠ ནིསཱིདིཏུཾ ན ཝཊྚཏཱིཏི བྱཏིརེཀཏོ ཝིཉྙཱཡཏི.

བྷཱུམཏྠརཎཀེཏི ཨེཏྠ ‘‘ཀཏེ’’ཏི སེསོ. ཏཏྠཱཏི སངྒྷིཀེ ཝཱ གིཧིསནྟཀེ ཝཱ གོནཀཱདིམྷི སཧདྷམྨིཀེཧི ཨནཱཎཏྟེཧི གིཧཱིཧི ཨེཝ བྷཱུམཏྠརཎེ ཀཏེ. སཡིཏུནྟི ཨུཔརི ཨཏྟནོ པཙྩཏྠརཎཾ དཏྭཱ ནིཔཛྫིཏུཾ ཝཊྚཏི. ཨཔི-སདྡེན ནིསཱིདིཏུམྤི ཝཱཏི སམུཙྩིནོཏི. ‘‘བྷཱུམཏྠརཎཀེ’’ཏི ཨིམིནཱ གིཧཱིཧི ཨེཝ མཉྩཱདཱིསུ སཡནཏྠཾ ཨཏྠཏེ ཨུཔརི ཨཏྟནོ པཙྩཏྠརཎཾ དཏྭཱ སཡིཏུཾ ཝཱ ནིསཱིདིཏུཾ ཝཱ ན ཝཊྚཏཱིཏི དཱིཔེཏི.

ཙམྨཀྑནྡྷཀཀཐཱཝཎྞནཱ.

བྷེསཛྫཀྑནྡྷཀཀཐཱཝཎྞནཱ

༢༦༦༥. གཧཔཏིསྶ བྷཱུམི, སམྨུཏིབྷཱུམི, ཨུསྶཱཝནནྟིཀཱབྷཱུམི, གོནིསཱདིབྷཱུམཱིཏི ཀཔྤིཡབྷཱུམིཡོ ཙཏསྶོ ཧོནྟཱིཏི ཝུཏྟཱ བྷགཝཏཱཏི ཡོཛནཱ.

༢༦༦༦. ཀཐཾ ཀཔྤིཡཾ ཀཏྟབྦནྟི ‘‘ཨནུཛཱནཱམི, བྷིཀྑཝེ, ཙཏསྶོ ཀཔྤིཡབྷཱུམིཡོ ཨུསྶཱཝནནྟིཀཾ གོནིསཱདིཀཾ གཧཔཏིཾ སམྨུཏི’’ནྟི (མཧཱཝ. ༢༩༥) ཨེཝཾ ཙཏསྶོ བྷཱུམིཡོ ཨུདྡྷརིཏྭཱ ཏཱསཾ སཱམཉྙལཀྑཎཾ དསྶེཏུམཱཧ ‘‘སངྒྷསྶཱ’’ཏིཨཱདི. སངྒྷསྶ སནྟཀཾ ཝཱསཏྠཱཡ ཀཏཾ གེཧཾ ཝཱ བྷིཀྑུནོ སནྟཀཾ ཝཱསཏྠཱཡ ཀཏཾ གེཧཾ ཝཱཏི ཡོཛནཱ. ཀཔྤིཡཾ ཀཏྟབྦནྟི ཀཔྤིཡཊྛཱནཾ ཀཏྟབྦཾ. སཧསེཡྻཔྤཧོནཀནྟི སབྦཙྪནྣཔརིཙྪནྣཱདིལཀྑཎེན སཧསེཡྻཱརཧཾ.

༢༦༦༧. ཨིདཱནི ¶ ཙཏསྶོཔི བྷཱུམིཡོ སརཱུཔཏོ དསྶེཏུམཱཧ ‘‘ཋཔེཏྭཱ’’ཏིཨཱདི. བྷིཀྑུཾ ཋཔེཏྭཱ ཨཉྙེཧི ཀཔྤིཡབྷཱུམིཡཱ ཨཏྠཱཡ དིནྣཾ ཝཱ ཏེསཾ སནྟཀཾ ཝཱ ཡཾ གེཧཾ, ཨིདཾ ཨེཝ གཧཔཏིབྷཱུམི ནཱམཱཏི ཡོཛནཱ.

༢༦༦༨. ཡཱ པན ཀུཊི སངྒྷེན སམྨཏཱ ཉཏྟིདུཏིཡཱཡ ཀམྨཝཱཙཱཡ, སཱ སམྨུཏིཀཱ ནཱམ. ཏསྶཱ སམྨནྣནཀཱལེ ཀམྨཝཱཙཾ ཨཝཏྭཱ ཨཔལོཀནཾ ཝཱ ཀཱཏུཾ ཝཊྚཏེཝཱཏི ཡོཛནཱ.

༢༦༦༩-༧༠. པཋམཨིཊྛཀཱཡ ¶ ཝཱ པཋམཔཱསཱཎསྶ ཝཱ པཋམཏྠམྦྷསྶ ཝཱ ཨཱདི-གྒཧཎེན པཋམབྷིཏྟིཔཱདསྶ ཝཱ ཋཔནེ པརེསུ མནུསྶེསུ ཨུཀྑིཔིཏྭཱ ཋཔེནྟེསུ སམནྟཏོ པརིཝཱརེཏྭཱ ‘‘ཀཔྤིཡཀུཊིཾ ཀརོམ, ཀཔྤིཡཀུཊིཾ ཀརོམཱ’’ཏི ཨབྷིཀྑཎཾ ཝདནྟེཧི ཨཱམསིཏྭཱ ཝཱ སཡམེཝ ཨུཀྑིཔིཏྭཱ ཝཱ ཨིཊྛཀཱ ཋཔེཡྻ པཱསཱཎོ ཝཱ ཐམྦྷོ ཝཱ བྷིཏྟིཔཱདོ ཝཱ ཋཔེཡྻ ཋཔེཏབྦོ, ཨཡཾ ཨུསྶཱཝནནྟིཀཱ ཀུཊཱིཏི ཡོཛནཱ.

༢༦༧༡. ཨིཊྛཀཱདིཔཏིཊྛཱནནྟི པཋམིཊྛཀཱདཱིནཾ བྷཱུམིཡཾ པཏིཊྛཱནཾ. ཝདཏནྟི ‘‘ཀཔྤིཡཀུཊིཾ ཀརོམ, ཀཔྤིཡཀུཊིཾ ཀརོམཱ’’ཏི ཝདནྟཱནཾ. སམཀཱལཾ ཏུ ཝཊྚཏཱིཏི ཨེཀཀཱལཾ ཝཊྚཏི, ཨིམིནཱ ‘‘སཙེ ཧི ཨནིཊྛིཏེ ཝཙནེ ཐམྦྷོ པཏིཊྛཱཏི, ཨཔྤཏིཊྛིཏེ ཝཱ ཏསྨིཾ ཝཙནཾ ནིཊྛཱཏི, ཨཀཏཱ ཧོཏི ཀཔྤིཡཀུཊཱི’’ཏི (མཧཱཝ. ཨཊྛ. ༢༩༥) ཨཊྛཀཐཱཝིནིཙྪཡོ སཱུཙིཏོ.

༢༦༧༢. ཨཱརཱམོ སཀལོ ཨཔརིཀྑིཏྟོ ཝཱ ཡེབྷུཡྻཏོ ཨཔརིཀྑིཏྟོ ཝཱཏི དུཝིདྷོཔི ཝིཉྙཱུཧི ཝིནཡདྷརེཧི ¶ ‘‘གོནིསཱདཱི’’ཏི ཝུཙྩཏི. པཝེསནིཝཱརཎཱབྷཱཝེན པཝིཊྛཱནཾ གུནྣཾ ནིསཛྫཱཡོགཏོ ཏཐཱ ཝུཙྩཏཱིཏི ཡོཛནཱ.

༢༦༧༣. པཡོཛནཾ དསྶེཏུམཱཧ ‘‘ཨེཏྠ པཀྐཉྩཱ’’ཏིཨཱདི. ཨཱམིསནྟི པུརིམཀཱལིཀདྭཡཾ. ‘‘ཨཱམིས’’ནྟི ཨིམིནཱ ནིརཱམིསཾ ཨིཏརཀཱལིཀདྭཡཾ ཨཀཔྤིཡཀུཊིཡཾ ཝུཏྠམྤི པཀྐམྤི ཀཔྤཏཱིཏི དཱིཔེཏི.

༢༦༧༤-༥. ཨིམཱ ཀཔྤིཡཀུཊིཡོ ཀདཱ ཛཧིཏཝཏྠུཀཱ ཧོནྟཱིཏི ཨཱཧ ‘‘ཨུསྶཱཝནནྟིཀཱ ཡཱ སཱ’’ཏིཨཱདི. ཡཱ ཨུསྶཱཝནནྟིཀཱ ཡེསུ ཐམྦྷཱདཱིསུ ཨདྷིཊྛིཏཱ, སཱ ཏེསུ ཐམྦྷཱདཱིསུ ཨཔནཱིཏེསུ ཏདཉྙེསུཔི ཐམྦྷཱདཱིསུ ཏིཊྛཏཱིཏི ཡོཛནཱ.

སབྦེསུ ཐམྦྷཱདཱིསུ ཨཔནཱིཏེསུ སཱ ཛཧིཏཝཏྠུཀཱ སིཡཱཏི ཡོཛནཱ. གོནིསཱདིཀུཊི པརིཀྑིཏྟཱ ཝཏིཨཱདཱིཧི ཛཧིཏཝཏྠུཀཱ སིཡཱ. པརིཀྑིཏྟཱཏི ཙ ‘‘ཨཱརཱམོ པན ཨུཔཌྜྷཔརིཀྑིཏྟོཔི བཧུཏརཾ པརིཀྑིཏྟོཔི པརིཀྑིཏྟོཡེཝ ནཱམཱ’’ཏི (མཧཱཝ. ཨཊྛ. ༢༩༥) ཀུརུནྡིམཧཱཔཙྩརིཡཱདཱིསུ ཝུཏྟཏྟཱ ན ཀེཝལཾ སབྦཔརིཀྑིཏྟཱཝ, ཨུཔཌྜྷཔརིཀྑིཏྟཱཔི ཡེབྷུཡྻཔརིཀྑིཏྟཱཔི གཧེཏབྦཱ.

སེསཱཏི ¶ གཧཔཏིསམྨུཏིཀུཊིཡོ. ཚདནནཱསཏོ ཛཧིཏཝཏྠུཀཱ སིཡུནྟི ཡོཛནཱ. ཚདནནཱསཏོཏི ཨེཏྠ ‘‘གོཔཱནསིམཏྟཾ ཋཔེཏྭཱ’’ཏི སེསོ. སཙེ གོཔཱནསཱིནཾ ཨུཔརི ཨེཀམྤི པཀྑཔཱསམཎྜལཾ ཨཏྠི, རཀྑཏི. ཡཏྲ པནིམཱ ཙཏསྶོཔི ཀཔྤིཡབྷཱུམིཡོ ནཏྠི, ཏཏྠ ཀིཾ ཀཱཏབྦཾ? ཨནུཔསམྤནྣསྶ དཏྭཱ ཏསྶ སནྟཀཾ ཀཏྭཱ པརིབྷུཉྫིཏབྦཾ.

༢༦༧༦. བྷིཀྑུཾ ¶ ཋཔེཏྭཱ ཨཉྙེསཾ ཧཏྠཏོ པཊིགྒཧོ ཙ ཏེསཾ སནྣིདྷི ཙ ཏེསཾ ཨནྟོཝུཏྠཉྩ བྷིཀྑུསྶ ཝཊྚཏཱིཏི ཡོཛནཱ.

༢༦༧༧. བྷིཀྑུསྶ སནྟཀཾ སངྒྷིཀམྤི ཝཱ ཨཀཔྤིཡབྷཱུམིཡཾ སཧསེཡྻཔྤཧོནཀེ གེཧེ ཨནྟོཝུཏྠཉྩ ཨནྟོཔཀྐཉྩ བྷིཀྑུསྶ ན ཝཊྚཏི. བྷིཀྑུནིཡཱ སནྟཀཾ སངྒྷིཀམྤི ཝཱ ཨཀཔྤིཡབྷཱུམིཡཾ སཧསེཡྻཔྤཧོནཀེ གེཧེ ཨནྟོཝུཏྠཉྩ ཨནྟོཔཀྐཉྩ བྷིཀྑུནིཡཱ ན ཝཊྚཏཱིཏི ཨེཝཾ ཨུབྷིནྣཾ བྷིཀྑུབྷིཀྑུནཱིནཾ ན ཝཊྚཏཱིཏི ཡོཛནཱ.

༢༦༧༨. ཨཀཔྤཀུཊིཡཱཏི ཨཀཔྤིཡཀུཊིཡཱ, ‘‘ཨཀཔྤིཡབྷཱུམིཡཾ སཧསེཡྻཔྤཧོནཀེ གེཧེ’’ཏི ཨཊྛཀཐཱཡཾ ཝུཏྟཱཡ ཨཀཔྤིཡབྷཱུམིཡཱཏི ཨཏྠོ. ཨཱདི-སདྡེན ནཝནཱིཏཏེལམདྷུཕཱཎིཏཱནཾ གཧཎཾ.

༢༦༧༩. ཏེཧེཝ ཨནྟོཝུཏྠེཧི སཔྤིཨཱདཱིཧི སཏྟཱཧཀཱལིཀེཧི སཧ བྷིཀྑུནཱ པཀྐཾ ཏཾ ཡཱཝཛཱིཝིཀཾ ནིརཱམིསཾ སཏྟཱཧཾ པརིབྷུཉྫིཏུཾ ཝཊྚཏེཝཱཏི ཡོཛནཱ.

༢༦༨༠. པཀྐཾ སཱམཾཔཀྐཾ ཏཾ ཡཱཝཛཱིཝིཀཾ སཙེ ཨཱམིསསཾསཊྛཾ པརིབྷུཉྫཏི, ཨནྟོཝུཏྠཉྩ བྷུཉྫཏི, ཀིཉྩ བྷིཡྻོ སཱམཾཔཀྐཉྩ བྷུཉྫཏཱིཏི ཡོཛནཱ. ཡཱཝཛཱིཝིཀསྶ ཨཱམིསསཾསཊྛསྶ ཨཱམིསགཏིཀཏྟཱ ‘‘ཨནྟོཝུཏྠ’’ནྟི ཝུཏྟཾ.

༢༦༨༢. ཨུདཀཾ ན ཧོཏི ཀཱལིཀཾ ཙཏཱུསུ ཀཱལིཀེསུ ཨསངྒཧིཏཏྟཱ.

༢༦༨༣. ཏིཀཱལིཀཱ ཡཱཝཀཱལིཀཱ ཡཱམཀཱལིཀཱ སཏྟཱཧཀཱལིཀཱཏི ཏཡོ ཀཱལིཀཱ པཊིགྒཧཝསེནེཝ ¶ ཨཏྟནོ ¶ ཨཏྟནོ ཀཱལཾ ཨཏིཀྐམིཏྭཱ བྷུཏྟཱ དོསཀརཱ ཧོནྟི, ཏཏིཡཾ སཏྟཱཧཱཏིཀྐམེ ནིསྶགྒིཡཔཱཙིཏྟིཡཝཏྠུཏྟཱ ཨབྷུཏྟམྤི དོསཀརནྟི ཡོཛནཱ.

‘‘བྷུཏྟཱ དོསཀརཱ’’ཏི ཨིམིནཱ པུརིམཀཱལིཀདྭཡཾ པཊིགྒཧེཏྭཱ ཀཱལཱཏིཀྐམནམཏྟེན ཨཱཔཏྟིཡཱ ཀཱརཎཾ ན ཧོཏི, བྷུཏྟམེཝ ཧོཏི. སཏྟཱཧཀཱལིཀཾ ཀཱལཱཏིཀྐམེན ཨཔརིབྷུཏྟམྤི ཨཱཔཏྟིཡཱ ཀཱརཎཾ ཧོཏཱིཏི དཱིཔེཏི. ཏེསུ སཏྟཱཧཀཱལིཀེཡེཝ ཝིསེསཾ དསྶེཏུམཱཧ ‘‘ཨབྷུཏྟཾ ཏཏིཡམྤི ཙཱ’’ཏི. ཙ-སདྡོ ཏུ-སདྡཏྠེ. ཡཱཝཛཱིཝིཀཾ པན པཊིགྒཧེཏྭཱ ཡཱཝཛཱིཝཾ པརིབྷུཉྫིཡམཱནཾ ཨིཏརཀཱལིཀསཾསགྒཾ ཝིནཱ དོསཀརཾ ན ཧོཏཱིཏི ན གཧིཏཾ.

༢༦༨༤. ཨམྦཱདཡོ སདྡཱ རུཀྑཱནཾ ནཱམབྷཱུཏཱ ཏཾཏཾཕལེཔི ཝཏྟམཱནཱ ཨིདྷ ཨུཔཙཱརཝསེན ཏཛྫེ པཱནཀེ ཝུཏྟཱ, ཏེནེཝཱཧ ‘‘པཱནཀཾ མཏ’’ནྟི. ཙོཙཾ ཨཊྛིཀཀདལིཔཱནཾ. མོཙཾ ཨིཏརཀདལིཔཱནཾ. མདྷཱུཏི མུདྡིཀཕལཱནཾ རསཾ. མུདྡིཀཱཏི སཱིཏོདཀེ མདྡིཏཱནཾ མུདྡིཀཕལཱནཾ པཱནཾ. ‘‘སཱལཱུཀཔཱནནྟི རཏྟུཔྤལནཱིལུཔྤལཱདཱིནཾ སཱལཱུཀེ མདྡིཏྭཱ ཀཏཔཱན’’ནྟི པཱལི༹ཡཾ, ཨཊྛཀཐཱཡ (མཧཱཝ. ཨཊྛ. ༣༠༠) ཙ སཱལཱུཀ-སདྡསྶ དཱིགྷཝསེན སཾཡོགདསྶནཏོ ‘‘སཱལུ ཕཱརུསཀཉྩཱ’’ཏི གཱཐཱབནྡྷཝསེན རསྶོ ཀཏོ.

སཱལཱུཀཾ ཀུམུདུཔྤལཱནཾ ཕལརསཾ. ཁུདྡསིཀྑཱཝཎྞནཱཡཾ པན ‘‘སཱལཱུཀཔཱནཾ ནཱམ རཏྟུཔྤལནཱིལུཔྤལཱདཱིནཾ ཀིཉྫཀྑརེཎཱུཧི ཀཏཔཱན’’ནྟི ཝུཏྟཾ. ‘‘ཕཱརུསཀ’ནྟིཨཱདཱིསུ ཨེཀོ རུཀྑོ’’ཏི གཎྛིཔདེ ཝུཏྟཾ. ཏསྶ ཕལརསོ ཕཱརུསཀཾ ནཱམ. ཨེཏེསཾ ཨཊྛནྣཾ ཕལཱནཾ རསོ ཨུདཀསམྦྷིནྣོ ཝཊྚཏི, སཱིཏུདཀེ མདྡིཏོ པསནྣོ ནིཀྐསཊོཝ ཝཊྚཏི, ཨུདཀེན པན ཨསམྦྷིནྣོ རསོ ཡཱཝཀཱལིཀོ.

༢༦༨༥. ཕལནྟི ¶ ཨམྦཱདིཕལཾ. སཝཏྠུཀཔཊིགྒཧོཏི པཱནཝཏྠུཀཱནཾ ཕལཱནཾ པཊིགྒཧོ. ཝསཏི ཨེཏྠ པཱནནྟི ཝཏྠུ, ཕལཾ, ཝཏྠུནཱ སཧ ཝཊྚཏཱིཏི སཝཏྠུཀཾ, པཱནཾ, སཝཏྠུཀསྶ པཊིགྒཧོ སཝཏྠུཀཔཊིགྒཧོ. སཝཏྠུཀསྶ པཊིགྒཧཾ ནཱམ ཝཏྠུཔཊིགྒཧཎམེཝཱཏི ཀཏྭཱ ཝུཏྟཾ ‘‘པཱནཝཏྠུཀཱནཾ ཕལཱནཾ པཊིགྒཧོ’’ཏི.

༢༦༨༦. ‘‘སུཀོཊྚེཏྭཱ’’ཏི ཝུཙྩམཱནཏྟཱ ‘‘ཨམྦཔཀྐ’’ནྟི ཨཱམཀམེཝ ཨམྦཕལཾ ཝུཙྩཏི ¶ . ཨུདཀེཏི སཱིཏོདཀེ. པརིསྶཝཾ པརིསྶཱཝིཏཾ. ཀཏྭཱཏི མདྷུཨཱདཱིཧི ཨབྷིསངྑརིཏྭཱ. ཡཐཱཧ – ‘‘ཏདཧུཔཊིགྒཧིཏེཧི མདྷུསཀྐརཀཔྤཱུརཱདཱིཧི ཡོཛེཏྭཱ ཀཱཏབྦ’’ནྟི (མཧཱཝ. ཨཊྛ. ༣༠༠). པཱཏུཾ ཝཊྚཏཱིཏི ཨེཏྠ ཝིནིཙྪཡོ ‘‘ཨེཝཾ ཀཏཾ པུརེབྷཏྟམེཝ ཀཔྤཏི, ཨནུཔསམྤནྣེཧི ཀཏཾ ལབྷིཏྭཱ པན པུརེབྷཏྟཾ པཊིགྒཧིཏཾ པུརེབྷཏྟཾ སཱམིསཔརིབྷོགེནཱཔི ཝཊྚཏི, པཙྪཱབྷཏྟཾ ནིརཱམིསཔརིབྷོགེན ཡཱཝ ཨརུཎུགྒམནཱ ཝཊྚཏིཡེཝ. ཨེས ནཡོ སབྦཔཱནེསཱུ’’ཏི ཨཊྛཀཐཱཡཾ ཝུཏྟོ.

༢༦༨༧. སེསཔཱནཀེསུཔཱིཏི ཛམྦུཔཱནཀཱདཱིསུཔི.

༢༦༨༨. ཨུཙྪུརསོ ཨནྟོགདྷཏྟཱ ཨིདྷ ཝུཏྟོ, ན པན ཡཱམཀཱལིཀཏྟཱ, སོ པན སཏྟཱཧཀཱལིཀོཡེཝ.

༢༦༨༩. མདྷུཀསྶ རསནྟི མདྷུཀཔུཔྥསྶ རསཾ. ཨེཏྠ མདྷུཀཔུཔྥརསོ ཨགྒིཔཱཀོ ཝཱ ཧོཏུ ཨཱདིཙྩཔཱཀོ ཝཱ, པཙྪཱབྷཏྟཾ ན ཝཊྚཏི. པུརེབྷཏྟམྤི ཡཾ པཱནཾ གཧེཏྭཱ མཛྫཾ ཀརོནྟི, སོ ཨཱདིཏོ པཊྛཱཡ ན ཝཊྚཏི. མདྷུཀཔུཔྥཾ པན ཨལླཾ ཝཱ སུཀྑཾ ཝཱ བྷཛྫིཏཾ ཝཱ ཏེན ཀཏཕཱཎིཏཾ ཝཱ ཡཏོ པཊྛཱཡ མཛྫཾ ན ཀརོནྟི, ཏཾ སབྦཾ པུརེབྷཏྟཾ ཝཊྚཏི.

པཀྐཌཱཀརསནྟི ¶ པཀྐསྶ ཡཱཝཀཱལིཀསྶ རསཾ. སབྦོ པཏྟརསོ ཡཱམཀཱལིཀོ ཝུཏྟོཏི ཡོཛནཱ. ཨཊྛཀཐཱཡཾ ‘‘ཡཱཝཀཱལིཀཔཏྟཱནཉྷི པུརེབྷཏྟཾཡེཝ རསོ ཀཔྤཏཱི’’ཏི (མཧཱཝ. ཨཊྛ. ༣༠༠) ཨིམམེཝ སནྡྷཱཡ ཝུཏྟཾ.

༢༦༩༠. སཱནུལོམཱནཾ སཏྟནྣཾ དྷཉྙཱནཾ ཕལཛཾ རསཾ ཋཔེཏྭཱ སབྦོ ཕལཛོ རསོ ཝིཀཱལེ ཡཱམསཉྙིཏེ ཨནུལོམཏོ པརིབྷུཉྫིཏུཾ ཨནུཉྙཱཏོཏི ཡོཛནཱ.

༢༦༩༡. ཡཱཝཀཱལིཀཔཏྟཱནཾ སཱིཏུདཀེ མདྡིཏྭཱ ཀཏོ རསོཔི ཨཔཀྐོ, ཨཱདིཙྩཔཱཀོཔི ཝིཀཱལེ པན ཝཊྚཏཱིཏི ཡོཛནཱ.

༢༦༩༢-༣. སཏྟདྷཉྙཱནུལོམཱནི སརཱུཔཏོ དསྶེཏུམཱཧ ‘‘ཏཱལཉྩནཱལི༹ཀེརཉྩཱ’’ཏིཨཱདི. ཨཔརཎྞཾ ¶ མུགྒཱདི. ‘‘སཏྟདྷཉྙཱནུལོམིཀ’’ནྟི ཨིམིནཱ ཨེཏེསཾ རསོ ཡཱཝཀཱལིཀོ ཡཱམཀཱལསངྑཱཏེ ཝིཀཱལེ པརིབྷུཉྫིཏུཾ ན ཝཊྚཏཱིཏི དསྶེཏི.

༢༦༩༥. ཨེཝམཱདཱིནཾ ཁུདྡཀཱནཾ ཕལཱནཾ རསོ པན ཨཊྛཔཱནཱནུལོམཏྟཱ ཨནུལོམིཀེ ཡཱམཀཱལིཀཱནུལོམིཀེ ནིདྡིཊྛོ ཀཐིཏོཏི ཡོཛནཱ.

༢༦༩༦. ཨིདྷ ཨིམསྨིཾ ལོཀེ སཱནུལོམསྶ དྷཉྙསྶ ཕལཛཾ རསཾ ཋཔེཏྭཱ ཨཡཱམཀཱལིཀོ ཨཉྙོ ཕལརསོ ནཏྠཱིཏི ཡོཛནཱ, སབྦོ ཡཱམཀཱལིཀོཡེཝཱཏི དཱིཔེཏི.

བྷེསཛྫཀྑནྡྷཀཀཐཱཝཎྞནཱ.

ཀཐིནཀྑནྡྷཀཀཐཱཝཎྞནཱ

༢༦༩༧. ཝུཏྠཝསྶཱནཾ ¶ པུརིམིཀཱཡ ཝསྶཾ ཨུཔགནྟྭཱ ཡཱཝ མཧཱཔཝཱརཎཱ, ཏཱཝ རཏྟིཙྪེདཾ ཨཀཏྭཱ ཝུཏྠཝསྶཱནཾ བྷིཀྑཱུནཾ ཨེཀསྶ ཝཱ དྭིནྣཾ ཏིཎྞཾ ཙཏུནྣཾ པཉྩནྣཾ ཨཏིརེཀཱནཾ ཝཱ བྷིཀྑཱུནཾ པཉྩནྣཾ ཨཱནིསཾསཱནཾ ཝཀྑམཱནཱནཾ ཨནཱམནྟཙཱརཱདཱིནཾ པཉྩནྣཾ ཨཱནིསཾསཱནཾ པཊིལཱབྷཀཱརཎཱ མུནིཔུངྒཝོ སབྦེསཾ ཨགཱརིཀཱདིམུནཱིནཾ སཀལགུཎགཎེཧི ཨུཏྟམོ བྷགཝཱ ཀཐིནཏྠཱརཾ ‘‘ཨནུཛཱནཱམི, བྷིཀྑཝེ, ཝསྶཾཝུཏྠཱནཾ བྷིཀྑཱུནཾ ཀཐིནཾ ཨཏྠརིཏུ’’ནྟི (མཧཱཝ. ༣༠༦) ཨབྲྭི ཀཐེསཱིཏི ཡོཛནཱ.

ཨེཏྠཱཡཾ ཝིནིཙྪཡོ – ‘‘ཀཐིནཏྠཱརཾ ཀེ ལབྷནྟི, ཀེ ན ལབྷནྟཱིཏི? གཎནཝསེན ཏཱཝ པཙྪིམཀོཊིཡཱ པཉྩ ཛནཱ ལབྷནྟི, ཨུདྡྷཾ སཏསཧསྶམྤི, པཉྩནྣཾ ཧེཊྛཱ ན ལབྷནྟཱི’’ཏི (མཧཱཝ. ཨཊྛ. ༣༠༦) ཨིདཾ ཨཊྛཀཐཱཡ ཨཏྠཱརཀསྶ བྷིཀྑུནོ སངྒྷསྶ ཀཐིནདུསྶདཱནཀམྨཾ སནྡྷཱཡ ཝུཏྟཾ. ‘‘ཝུཏྠཝསྶཝསེན པུརིམིཀཱཡ ཝསྶཾ ཨུཔགནྟྭཱ པཋམཔཝཱརཎཱཡ པཝཱརིཏཱ ལབྷནྟི, ཚིནྣཝསྶཱ ཝཱ པཙྪིམིཀཱཡ ཨུཔགཏཱ ཝཱ ན ལབྷནྟི. ཨཉྙསྨིཾ ཝིཧཱརེ ཝུཏྠཝསྶཱཔི ན ལབྷནྟཱིཏི མཧཱཔཙྩརིཡཾ ཝུཏྟ’’ནྟི (མཧཱཝ. ཨཊྛ. ༣༠༦) ཨིདཾ ཨཊྛཀཐཱཡ ཨཱནིསཾསལཱབྷཾ སནྡྷཱཡ ཝུཏྟཾ, ན ཀམྨཾ.

ཨིདཱནི ཏདུབྷཡཾ ཝིབྷཛིཏྭཱ དསྶེཏི –

‘‘པུརིམིཀཱཡ ¶ ཨུཔགཏཱནཾ པན སབྦེ གཎཔཱུརཀཱ ཧོནྟི, ཨཱནིསཾསཾ ན ལབྷནྟི, ཨཱནིསཾསོ ཨིཏརེསཾཡེཝ ཧོཏི. སཙེ པུརིམིཀཱཡ ཨུཔགཏཱ ཙཏྟཱརོ ཝཱ ཧོནྟི, ཏཡོ ཝཱ དྭེ ཝཱ ཨེཀོ ཝཱ, ཨིཏརེ གཎཔཱུརཀེ ཀཏྭཱ ཀཐིནཾ ཨཏྠརིཏབྦཾ. ཨཐ ཙཏྟཱརོ བྷིཀྑཱུ ཨུཔགཏཱ, ཨེཀོ པརིཔུཎྞཝསྶོ སཱམཎེརོ, སོ ཙེ པཙྪིམིཀཱཡ ཨུཔསམྤཛྫཏི, གཎཔཱུརཀོ ཙེཝ ཧོཏི, ཨཱནིསཾསཉྩ ལབྷཏི ¶ . ཏཡོ བྷིཀྑཱུ དྭེ སཱམཎེརཱ, དྭེ བྷིཀྑཱུ ཏཡོ སཱམཎེརཱ, ཨེཀོ བྷིཀྑུ ཙཏྟཱརོ སཱམཎེརཱཏི ཨེཏྠཱཔི ཨེསེཝ ནཡོ. སཙེ པུརིམིཀཱཡ ཨུཔགཏཱ ཀཐིནཏྠཱརཀུསལཱ ན ཧོནྟི, ཨཏྠཱརཀུསལཱ ཁནྡྷཀབྷཱཎཀཏྠེརཱ པརིཡེསིཏྭཱ ཨཱནེཏབྦཱ, ཀམྨཝཱཙཾ སཱཝེཏྭཱ ཀཐིནཾ ཨཏྠརཱཔེཏྭཱ དཱནཉྩ བྷུཉྫིཏྭཱ གམིསྶནྟི, ཨཱནིསཾསོ པན ཨིཏརེསཾཡེཝ ཧོཏཱི’’ཏི (མཧཱཝ. ཨཊྛ. ༣༠༦).

ཀཐིནཾ ཀེན དིནྣཾ ཝཊྚཏཱིཏི? ཡེན ཀེནཙི དེཝེན ཝཱ མནུསྶེན ཝཱ པཉྩནྣཾ ཝཱ སཧདྷམྨིཀཱནཾ ཨཉྙཏརེན དིནྣཾ ཝཊྚཏི. ཀཐིནདཱཡཀསྶ ཝཏྟཾ ཨཏྠི, སཙེ སོ ཏཾ ཨཛཱནནྟོ པུཙྪཏི ‘‘བྷནྟེ, ཀཐཾ ཀཐིནཾ དཱཏབྦ’’ནྟི, ཏསྶ ཨེཝཾ ཨཱཙིཀྑིཏབྦཾ ‘‘ཏིཎྞཾ ཙཱིཝརཱནཾ ཨཉྙཏརཔྤཧོནཀཾ སཱུརིཡུགྒམནསམཡེ ཝཏྠཾ ‘ཀཐིནཙཱིཝརཾ དེམཱ’ཏི དཱཏུཾ ཝཊྚཏི, ཏསྶ པརིཀམྨཏྠཾ ཨེཏྟཀཱ ནཱམ སཱུཙིཡོ, ཨེཏྟཀཾ སུཏྟཾ, ཨེཏྟཀཾ རཛནཾ, པརིཀམྨཾ ཀརོནྟཱནཾ ཨེཏྟཀཱནཾ བྷིཀྑཱུནཾ ཡཱགུབྷཏྟཉྩ དཱཏུཾ ཝཊྚཏཱི’’ཏི.

ཀཐིནཏྠཱརཀེནཱཔི དྷམྨེན སམེན ཨུཔྤནྣཾ ཀཐིནཾ ཨཏྠརནྟེན ཝཏྟཾ ཛཱནིཏབྦཾ. ཏནྟཝཱཡགེཧཏོ ཧི ཨཱབྷཏསནྟཱནེནེཝ ཁལིམཀྑིཏསཱཊཀོཔི ན ཝཊྚཏི, མལཱིནསཱཊཀོཔི ན ཝཊྚཏི, ཏསྨཱ ཀཐིནཏྠཱརསཱཊཀཾ ལབྷིཏྭཱ སུདྡྷཾ དྷོཝིཏྭཱ སཱུཙིཨཱདཱིནི ཙཱིཝརཀམྨཱུཔཀརཎཱནི སཛྫེཏྭཱ བཧཱུཧི བྷིཀྑཱུཧི སདྡྷིཾ ཏདཧེཝ སིབྦིཏྭཱ ནིཊྛིཏསཱུཙིཀམྨཾ རཛིཏྭཱ ཀཔྤབིནྡུཾ དཏྭཱ ཀཐིནཾ ཨཏྠརིཏབྦཾ. སཙེ ཏསྨིཾ ཨནཏྠཏེཡེཝ ཨཉྙོ ཀཐིནསཱཊཀཾ ཨཏྠརིཏབྦཀཾ ཨཱཧརཏི, ཨཉྙཱནི ཙ བཧཱུནི ཀཐིནཱནིསཾསཝཏྠཱནི དེཏི, ཡོ ¶ ཨཱནིསཾསཾ བཧུཾ དེཏི, ཏསྶ སནྟཀེནེཝ ཨཏྠརིཏབྦཾ. ཨིཏརོ ཡཐཱ ཏཐཱ ཨོཝདིཏྭཱ སཉྙཱཔེཏབྦོ.

ཀཐིནཾ པན ཀེན ཨཏྠརིཏབྦཾ? ཡསྶ སངྒྷོ ཀཐིནཙཱིཝརཾ དེཏི. སངྒྷེན པན ཀསྶ དཱཏབྦཾ? ཡོ ཛིཎྞཙཱིཝརོ ཧོཏི. སཙེ བཧཱུ ཛིཎྞཙཱིཝརཱ ཧོནྟི, ཝུཌྜྷསྶ དཱཏབྦཾ. ཝུཌྜྷེསུཔི ཡོ མཧཱཔརིཝཱརོ ཏདཧེཝ ཙཱིཝརཾ ཀཏྭཱ ཨཏྠརིཏུཾ སཀྐོཏི, ཏསྶ དཱཏབྦཾ. སཙེ ཝུཌྜྷོ ¶ ན སཀྐོཏི, ནཝཀཏརོ སཀྐོཏི, ཏསྶ དཱཏབྦཾ. ཨཔི ཙ སངྒྷེན མཧཱཐེརསྶ སངྒཧཾ ཀཱཏུཾ ཝཊྚཏི, ཏསྨཱ ‘‘ཏུམྷེ, བྷནྟེ, གཎྷཐ, མཡཾ ཀཏྭཱ དསྶཱམཱ’’ཏི ཝཏྟབྦཾ.

ཏཱིསུ ཙཱིཝརེསུ ཡཾ ཛིཎྞཾ ཧོཏི, ཏདཏྠཱཡ དཱཏབྦཾ. པཀཏིཡཱ དུཔཊྚཙཱིཝརསྶ དུཔཊྚཏྠཱཡེཝ དཱཏབྦཾ. སཙེཔིསྶ ཨེཀཔཊྚཙཱིཝརཾ གྷནཾ ཧོཏི, ཀཐིནསཱཊཀོ ཙ པེལཝོ, སཱརུཔྤཏྠཱཡ དུཔཊྚཔྤཧོནཀམེཝ དཱཏབྦཾ. ‘‘ཨཧཾ ཨལབྷནྟོ ཨེཀཔཊྚཾ པཱརུཔཱམཱི’’ཏི ཝདནྟསྶཱཔི དུཔཊྚཾ དཱཏུཾ ཝཊྚཏི. ཡོ པན ལོབྷཔཀཏིཀོ ཧོཏི, ཏསྶ ན དཱཏབྦཾ. ཏེནཱཔི ཀཐིནཾ ཨཏྠརིཏྭཱ ‘‘པཙྪཱ ཝིསིབྦིཏྭཱ དྭེ ཙཱིཝརཱནི ཀརིསྶཱམཱི’’ཏི ན གཧེཏབྦཾ.

ཡསྶ པན དིཡྻཏི, ཏསྶ –

‘‘སུཎཱཏུ མེ, བྷནྟེ སངྒྷོ, ཨིདཾ སངྒྷསྶ ཀཐིནདུསྶཾ ཨུཔྤནྣཾ, ཡདི སངྒྷསྶ པཏྟཀལླཾ, སངྒྷོ ཨིམཾ ཀཐིནདུསྶཾ ཨིཏྠནྣཱམསྶ བྷིཀྑུནོ དདེཡྻ ཀཐིནཾ ཨཏྠརིཏུཾ, ཨེསཱ ཉཏྟི.

‘‘སུཎཱཏུ མེ, བྷནྟེ སངྒྷོ, ཨིདཾ སངྒྷསྶ ཀཐིནདུསྶཾ ཨུཔྤནྣཾ, སངྒྷོ ཨིམཾ ཀཐིནདུསྶཾ ཨིཏྠནྣཱམསྶ བྷིཀྑུནོ དེཏི ཀཐིནཾ ཨཏྠརིཏུཾ, ཡསྶཱཡསྨཏོ ཁམཏི ¶ ཨིམསྶ ཀཐིནདུསྶསྶ ཨིཏྠནྣཱམསྶ བྷིཀྑུནོ དཱནཾ ཀཐིནཾ ཨཏྠརིཏུཾ, སོ ཏུཎྷསྶ, ཡསྶ ནཀྑམཏི, སོ བྷཱསེཡྻ.

‘‘དིནྣཾ ཨིདཾ སངྒྷེན ཀཐིནདུསྶཾ ཨིཏྠནྣཱམསྶ བྷིཀྑུནོ ཀཐིནཾ ཨཏྠརིཏུཾ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི (མཧཱཝ. ༣༠༧) –

ཨེཝཾ ཉཏྟིདུཏིཡཱཡ ཀམྨཝཱཙཱཡ དཱཏབྦནྟི ཨེཝཾ དིནྣཾ.

༢༦༩༨-༩. ན ཨུལླིཁིཏམཏྟཱདི-ཙཏུཝཱིསཏིཝཛྫིཏནྟི པཱལི༹ཡཾ ཨཱགཏེཧི ‘‘ན ཨུལླིཁིཏམཏྟེན ཨཏྠཏཾ ཧོཏི ཀཐིན’’ནྟི (མཧཱཝ. ༣༠༨) ཨུལླིཁིཏམཏྟཱདཱིཧི ཙཏུཝཱིསཏིཡཱ ཨཱཀཱརེཧི ཝཛྫིཏཾ. ཙཱིཝརནྟི ‘‘ཨཧཏེན ཨཏྠཏཾ ཧོཏི ཀཐིན’’ནྟི (མཧཱཝ. ༣༠༩) པཱལི༹ཡཾ ¶ ཨཱགཏཱནཾ སོལ༹སནྣཾ ཨཱཀཱརཱནཾ ཨཉྙཏརེན ཡུཏྟཾ ཀཏཔརིཡོསིཏཾ དིནྣཾ ཀཔྤབིནྡུཾ ཏིཎྞཾ ཙཱིཝརཱནཾ ཨཉྙཏརཙཱིཝརཾ. ཏེ པན ཙཏུཝཱིསཏི ཨཱཀཱརཱ, སོལ༹སཱཀཱརཱ ཙ པཱལི༹ཏོ (མཧཱཝ. ༣༠༨), ཨཊྛཀཐཱཏོ (མཧཱཝ. ཨཊྛ. ༣༠༨) ཙ གཧེཏབྦཱ. གནྠགཱརཝཔརིཧཱརཏྠམིདྷ ན ཝུཏྟཱ.

བྷིཀྑུནཱ ཝཀྑམཱནེ ཨཊྛདྷམྨེ ཛཱནནྟེན ཨཏྠརཀེན ཨཱདཱཡ གཧེཏྭཱ པུརཱཎཀཾ ཨཏྟནཱ པརིབྷུཉྫིཡམཱནཾ ཨཏྠརིཏབྦཙཱིཝརེན ཨེཀནཱམཀཾ པུརཱཎཙཱིཝརཾ ཨུདྡྷརིཏྭཱ པཙྩུདྡྷརིཏྭཱ ནཝཾ ཨཏྠརིཏབྦཾ ཙཱིཝརཾ ཨདྷིཊྛཧིཏྭཱ པུརཱཎཔཙྩུདྡྷཊཙཱིཝརསྶ ནཱམེན ཨདྷིཊྛཧིཏྭཱཝ ཏཾ ཨནྟརཝཱསཀཾ ཙེ, ‘‘ཨིམིནཱ ཨནྟརཝཱསཀེན ཀཐིནཾ ཨཏྠརཱམི’’ཨིཏི ཝཙསཱ ཝཏྟབྦནྟི ཡོཛནཱ. སཙེ ཨུཏྟརཱསངྒོ ཧོཏི, ‘‘ཨིམིནཱ ཨུཏྟརཱསངྒེན ཀཐིནཾ ཨཏྠརཱམི’’, སཙེ སངྒྷཱཊི ཧོཏི, ‘‘ཨིམཱཡ སངྒྷཱཊིཡཱ ཀཐིནཾ ཨཏྠརཱམཱི’’ཏི ཝཏྟབྦཾ.

༢༧༠༠-༡. ཨིཙྩེཝཾ ¶ ཏིཀྑཏྟུཾ ཝུཏྟེ ཀཐིནཾ ཨཏྠཏཾ ཧོཏཱིཏི ཡོཛནཱ. ཏེན པན བྷིཀྑུནཱ ནཝཀེན ཀཐིནཙཱིཝརཾ ཨཱདཱཡ སངྒྷཾ ཨུཔསངྐམྨ ‘‘ཨཏྠཏཾ, བྷནྟེ, སངྒྷསྶ ཀཐིནཾ, དྷམྨིཀོ ཀཐིནཏྠཱརོ, ཨནུམོདཐ’’ཨིཏི ཝཏྟབྦནྟི ཡོཛནཱ.

༢༧༠༢. ཨནུམོདཀེསུ ཙ ཐེརེཧི ‘‘ཨཏྠཏཾ, ཨཱཝུསོ, སངྒྷསྶ ཀཐིནཾ, དྷམྨིཀོ ཀཐིནཏྠཱརོ, ཨནུམོདཱམཱ’’ཏི ཝཏྟབྦཾ, ནཝེན པན ‘‘ཨཏྠཏཾ, བྷནྟེ, སངྒྷསྶ ཀཐིནཾ, དྷམྨིཀོ ཀཐིནཏྠཱརོ, ཨནུམོདཱམཱི’’ཏི ཨིཏི པུན ཨཱིརཡེ ཀཐེཡྻཱཏི ཡོཛནཱ. གཱཐཱཡ པན ཨནུམོདནཔཱཋསྶ ཨཏྠདསྶནམུཁེན ‘‘སུཨཏྠཏཾ ཏཡཱ བྷནྟེ’’ཏི ཝུཏྟཾ, ན པཱཋཀྐམདསྶནཝསེནཱཏི ཝེདིཏབྦཾ.

ཨཏྠཱརཀེསུ ཙ ཨནུམོདཀེསུ ཙ ནཝེཧི ཝུཌྜྷཱནཾ ཝཙནཀྐམོ ཝུཏྟོ, ཝུཌྜྷེཧི ནཝཱནཾ ཝཙནཀྐམོ པན ཏདནུསཱརེན ཡཐཱརཧཾ ཡོཛེཏྭཱ ཝཏྟབྦོཏི གཱཐཱསུ ན ཝུཏྟོཏི ཝེདིཏབྦོ. ཨཏྠཱརཀེན ཐེརེན ཝཱ ནཝེན ཝཱ གཎཔུགྒལཱནཾ ཝཙནཀྐམོ ཙ གཎཔུགྒལེཧི ཨཏྠཱརཀསྶ ཝཙནཀྐམོ ཙ ཝུཏྟནཡེན ཡཐཱརཧཾ ཡོཛེཏུཾ སཀྐཱཏི ན ཝུཏྟོ.

ཨེཝཾ ཨཏྠཏེ པན ཀཐིནེ སཙེ ཀཐིནཙཱིཝརེན སདྡྷིཾ ཨཱབྷཏཾ ཨཱནིསཾསཾ དཱཡཀཱ ‘‘ཡེན ཨམྷཱཀཾ ¶ ཀཐིནཾ གཧིཏཾ, ཏསྶེཝ ཙ དེམཱ’’ཏི དེནྟི, བྷིཀྑུསངྒྷོ ཨནིསྶརོ. ཨཐ ཨཝིཙཱརེཏྭཱཝ དཏྭཱ གཙྪནྟི, བྷིཀྑུསངྒྷོ ཨིསྶརོ. ཏསྨཱ སཙེ ཀཐིནཏྠཱརཀསྶ སེསཙཱིཝརཱནིཔི དུབྦལཱནི ཧོནྟི, སངྒྷེན ཨཔལོཀེཏྭཱ ཏེསམྤི ཨཏྠཱཡ ཝཏྠཱནི དཱཏབྦཱནི, ཀམྨཝཱཙཱཡ པན ཨེཀཱཡེཝ ཝཊྚཏི. ཨཝསེསེ ¶ ཀཐིནཱནིསཾསེ བལཝཝཏྠཱནི ཝསྶཱཝཱསིཀཋིཏིཀཱཡ དཱཏབྦཱནི, ཋིཏིཀཱཡ ཨབྷཱཝེ ཐེརཱསནཏོ པཊྛཱཡ དཱཏབྦཱནི, གརུབྷཎྜཾ ན བྷཱཛེཏབྦཾ. སཙེ པན ཨེཀསཱིམཱཡ བཧཱུ ཝིཧཱརཱ ཧོནྟི, སབྦེ བྷིཀྑཱུ སནྣིཔཱཏེཏྭཱ ཨེཀཏྠ ཀཐིནཾ ཨཏྠརིཏབྦཾ, ཝིསུཾ ཝིསུཾ ཨཏྠརིཏུཾ ན ཝཊྚཏི.

༢༧༠༣. ‘‘ཀཐིནསྶ ཙ ཀིཾ མཱུལ’’ནྟིཨཱདཱིནི སཡམེཝ ཝིཝརིསྶཏི.

༢༧༠༦. ཨཊྛདྷམྨུདྡེསགཱཐཱཡ པུབྦཀིཙྩཾ པུབྦ-ཝཙནེནེཝ ཨུཏྟརཔདལོཔེན ཝུཏྟཾ. ཏེནེཝ ཝཀྑཏི ‘‘པུབྦཀིཙྩནྟི ཝུཙྩཏཱི’’ཏི. ‘‘པཙྩུདྡྷཱར’’ཨིཏི ཝཏྟབྦེ ‘‘པཙྩུདྡྷར’’ཨིཏི གཱཐཱབནྡྷཝསེན རསྶོ. ཏེནེཝ ཝཀྑཏི ‘‘པཙྩུདྡྷཱརོ’’ཏི. ཨདྷིཊྛཧནཾ ཨདྷིཊྛཱནཾ. པཙྩུདྡྷཱརོ ཙ ཨདྷིཊྛཱནཉྩ པཙྩུདྡྷརཱདྷིཊྛཱནཱ. ཨིཏརཱིཏརཡོགེན དྭནྡསམཱསོ. ཨཏྠཱརོཏི ཨེཏྠ ‘‘ཀཐིནཏྠཱརོ’’ཏི པཀརཎཏོ ལབྦྷཏི.

‘‘མཱཏིཀཱ’’ཏི ཨིམིནཱ ‘‘ཨཊྛ ཀཐིནུབྦྷཱརམཱཏིཀཱ’’ཏི པཀརཎཏོ ཝིཉྙཱཡཏི. ཡཐཱཧ – ‘‘ཨཊྛིམཱ, བྷིཀྑཝེ, མཱཏིཀཱ ཀཐིནསྶ ཨུབྦྷཱརཱཡཱ’’ཏི (མཧཱཝ. ༣༡༠). མཱཏིཀཱཏི མཱཏརོ ཛནེཏྟིཡོ, ཀཐིནུབྦྷཱརཾ ཨེཏཱ ཨཊྛ ཛནེནྟཱིཏི ཨཏྠོ. ཨུདྡྷཱརོཏི ཀཐིནསྶ ཨུདྡྷཱརོ. ཨཱནིསཾསཱཏི ཨེཏྠ ‘‘ཀཐིནསྶཱ’’ཏི པཀརཎཏོ ལབྦྷཏི. ཀཐིནསྶ ཨཱནིསཾསཱཏི ཨིམེ ཨཊྛ དྷམྨཱཏི ཡོཛནཱ. ཡཐཱཧ ‘‘ཨཏྠཏཀཐིནཱནཾ ཝོ, བྷིཀྑཝེ, པཉྩ ཀཔྤིསྶནྟཱི’’ཏིཨཱདི (མཧཱཝ. ༣༠༦). ‘‘ཨཱནིསཾསེནཱ’’ཏིཔི པཱཋོ. ཨཱནིསཾསེན སཧ ཨིམེ ཨཊྛ དྷམྨཱཏི ཡོཛནཱ.

༢༧༠༧. ‘‘ན ཨུལླིཁིཏམཏྟཱདི-ཙཏུཝཱིསཏིཝཛྫིཏ’’ནྟིཨཱདིནཱ ཀཐིནཾ ཨཏྠརིཏུཾ ཀཏཔརིཡོསིཏཾ ཙཱིཝརཾ ཙེ ལདྡྷཾ, ཏཏྠ ¶ པཊིཔཛྫནཝིདྷིཾ དསྶེཏྭཱ སཙེ ཨཀཏསིབྦནཱདིཀམྨཾ ཝཏྠམེཝ ལདྡྷཾ, ཏཏྠ པཊིཔཛྫནཝིདྷིཾ པུབྦཀིཙྩཝསེན དསྶེཏུམཱཧ ‘‘དྷོཝན’’ནྟིཨཱདི. ཏཏྠ དྷོཝནནྟི ཀཐིནདུསྶསྶ སེཏབྷཱཝཀརཎཾ. ཝིཙཱརོཏི ‘‘པཉྩཀཾ ཝཱ སཏྟཀཾ ཝཱ ནཝཀཾ ཝཱ ཨེཀཱདསཀཾ ¶ ཝཱ ཧོཏཱུ’’ཏི ཝིཙཱརཎཾ. ཚེདནནྟི ཡཐཱཝིཙཱརིཏསྶ ཝཏྠསྶ ཚེདནཾ. བནྡྷནནྟི མོགྷསུཏྟཀཱརོཔནཾ. སིབྦནནྟི སབྦསཱུཙིཀམྨཾ. རཛནནྟི རཛནཀམྨཾ. ཀཔྤནྟི ཀཔྤབིནྡུདཱནཾ. ‘‘པུབྦཀིཙྩ’’ནྟི ཝུཙྩཏི ཨིདཾ སབྦཾ ཀཐིནཏྠཱརསྶ པཋམམེཝ ཀཏྟབྦཏྟཱ.

༢༧༠༨. ཨནྟརཝཱསཀོཏི ཨེཏྠ ཨིཏི-སདྡོ ལུཏྟནིདྡིཊྛོ. སངྒྷཱཊི, ཨུཏྟརཱསངྒོ, ཨཐོ ཨནྟརཝཱསཀོཏི ཨེསམེཝ ཏུ པཙྩུདྡྷཱརོཔི ཨདྷིཊྛཱནམྤི ཨཏྠཱརོཔི ཝུཏྟོཏི ཡོཛནཱ.

༢༧༠༩. ཨཊྛམཱཏིཀཱ (མཧཱཝ. ༣༡༠-༣༡༡; པརི. ༤༡༥; མཧཱཝ. ཨཊྛ. ༣༡༠-༣༡༡) དསྶེཏུམཱཧ ‘‘པཀྐམནཉྩཱ’’ཏིཨཱདི. པཀྐམནཾ ཨནྟོ ཨེཏསྶཱཏི པཀྐམནནྟིཀཱཏི ཝཏྟབྦེ ཨུཏྟརཔདལོཔེན ‘‘པཀྐམན’’ནྟི ཝུཏྟཾ. ཨེས ནཡོ སབྦཏྠ. ཨཊྛིམཱཏི ཨེཏྠ ‘‘མཱཏིཀཱ’’ཏི པཀརཎཏོ ལབྦྷཏི. ཨིམཱ ཨཊྛ མཱཏིཀཱཏི ཡོཛནཱ.

༢༧༡༠. ཨུདྡེསཱནུཀྐམེན ནིདྡིསིཏུམཱཧ ‘‘ཀཏཙཱིཝརམཱདཱཡཱ’’ཏིཨཱདི. ‘‘ཀཏཙཱིཝརམཱདཱཡཱ’’ཏི ཨིམིནཱ ཙཱིཝརཔལིབོདྷུཔཙྪེདོ དསྶིཏོ. ‘‘ཨཱཝཱསེ ནིརཔེཀྑཀོ’’ཏི ཨིམིནཱ དུཏིཡོ ཨཱཝཱསཔལིབོདྷུཔཙྪེདོ དསྶིཏོ. ཨེཏྠ སབྦཝཱཀྱེསུ ‘‘ཨཏྠཏཀཐིནོ ཡོ བྷིཀྑུ སཙེ པཀྐམཏཱི’’ཏི སེསོ. ཨཏིཀྐནྟཱཡ སཱིམཱཡཱཏི ཝིཧཱརསཱིམཱཡ ཨཏིཀྐནྟཱཡ. ཧོཏི པཀྐམནནྟིཀཱཏི ཨེཏྠ ‘‘ཏསྶ བྷིཀྑུནོ’’ཏི སེསོ, ཏསྶ བྷིཀྑུནོ པཀྐམནནྟིཀཱ ནཱམ མཱཏིཀཱ ཧོཏཱིཏི ཨཏྠོ.

༢༧༡༡-༢. ཨཱནིསཾསཾ ¶ ནཱམ ཝུཏྠཝསྶེན ལདྡྷཾ ཨཀཏསཱུཙིཀམྨཝཏྠཾ. ཏེནེཝ ཝཀྑཏི ‘‘ཀརོཏཱི’’ཏིཨཱདི. ‘‘ཝིཧཱརེ ཨནཔེཀྑཀོ’’ཏི ཨིམིནཱ ཨེཏྠ པཋམཾ ཨཱཝཱསཔལིབོདྷུཔཙྪེདོ དསྶིཏོ. སུཁཝིཧརཎཾ པཡོཛནམསྶཱཏི སུཁཝིཧཱརིཀོ, ཝིཧཱརོཏི. ཏཏྠ ཏསྨིཾ ཝིཧཱརེ ཝིཧརནྟོཝ ཏཾ ཙཱིཝརཾ ཡདི ཀརོཏི, ཏསྨིཾ ཙཱིཝརེ ནིཊྛིཏེ ནིཊྛཱནནྟཱ ནིཊྛཱནནྟིཀཱཏི ཝུཙྩཏཱིཏི ཡོཛནཱ. ‘‘ནིཊྛིཏེཙཱིཝརེ’’ཏི ཨིམིནཱ ཙཱིཝརཔལིབོདྷུཔཙྪེདོ དསྶིཏོ.

༢༧༡༣. ཏམསྶམནྟི ཏཾ ཝུཏྠཝསྶཱཝཱསཾ. དྷུརནིཀྑེཔེཏི ཨུབྷཡདྷུརནིཀྑེཔཝསེན ཙིཏྟཔྤཝཏྟཀྑཎེ. སནྣིཊྛཱནཾ ནཱམ དྷུརནིཀྑེཔོ. ཨེཏྠ པལིབོདྷདྭཡསྶ ཨེཀཀྑཎེཡེཝ ཨུཔཙྪེདོ ཨཊྛཀཐཱཡཾ ¶ ཝུཏྟོ ‘‘སནྣིཊྛཱནནྟིཀེ དྭེཔི པལིབོདྷཱ ‘ནེཝིམཾ ཙཱིཝརཾ ཀཱརེསྶཾ, ན པཙྩེསྶ’ནྟི ཙིནྟིཏམཏྟེཡེཝ ཨེཀཏོ ཚིཛྫནྟཱི’’ཏི (མཧཱཝ. ཨཊྛ. ༣༡༡).

༢༧༡༤. ཀཐིནཙྪཱདནནྟི ཀཐིནཱནིསཾསཾ ཙཱིཝརཝཏྠུཾ. ན པཙྩེསྶནྟི ན པཙྩཱགམིསྶཱམི. ཀརོནྟསྶེཝཱཏི ཨེཏྠ ‘‘ཙཱིཝར’’ནྟི པཀརཎཏོ ལབྦྷཏི. ‘‘ཀཐིནཙྪཱདན’’ནྟི ཨིདཾ ཝཱ སམྦནྡྷནཱིཡཾ. ཀརོནྟསྶཱཏི ཨནཱདརེ སཱམིཝཙནཾ. ནཊྛནྟི ཙོརེཧི ཧཊཏྟཱ ཝཱ ཨུཔཙིཀཱདཱིཧི ཁཱདིཏཏྟཱ ཝཱ ནཊྛཾ. དཌྜྷཾ ཝཱཏི ཨགྒིནཱ དཌྜྷཾ ཝཱ. ནཱསནནྟིཀཱཏི ཨེཝཾ ཙཱིཝརསྶ ནཱསནནྟེ ལབྦྷམཱནཱ ཨཡཾ མཱཏིཀཱ ནཱསནནྟིཀཱ ནཱམཱཏི ཨཏྠོ. ཨེཏྠ ‘‘ན པཙྩེསྶ’’ནྟི ཨིམིནཱ པཋམཾ ཨཱཝཱསཔལིབོདྷུཔཙྪེདོ དསྶིཏོ. ‘‘ཀརོནྟསྶེཝཱ’’ཏི ཨིམིནཱ དུཏིཡཾ ཙཱིཝརཔལིབོདྷུཔཙྪེདོ དསྶིཏོ.

༢༧༡༥. ལདྡྷཱནིསཾསོཏི ལདྡྷཀཐིནཱནིསཾསཙཱིཝརོ. ཨཱནིསཾསེ ཙཱིཝརེ སཱཔེཀྑོ ཨཔེཀྑཝཱ བཧིསཱིམགཏོ ཝསྶཾཝུཏྠསཱིམཱཡ ¶ བཧིསཱིམགཏོ ཏཾ ཙཱིཝརཾ ཀརོཏི, སོ ཀཏཙཱིཝརོ ཨནྟརུབྦྷཱརཾ ཨནྟརཱ ཨུབྦྷཱརཾ སུཎཱཏི ཙེ, སཝནནྟིཀཱ ནཱམ ཧོཏཱིཏི ཡོཛནཱ. ‘‘བཧིསཱིམགཏོ’’ཏིཨཱདིནཱ དུཏིཡཔལིབོདྷུཔཙྪེདོ དསྶིཏོ. ཨེཏྠ ‘‘ཀཏཙཱིཝརོ’’ཏི ཝུཏྟཏྟཱ ཙཱིཝརཔལིབོདྷུཔཙྪེདོ པཋམཾ ཧོཏི, ཨིཏརོ པན ‘‘སཧ སཝནེན ཨཱཝཱསཔལིབོདྷོ ཚིཛྫཏཱི’’ཏི (མཧཱཝ. ཨཊྛ. ༣༡༡) ཨཊྛཀཐཱཡ ཝུཏྟཏྟཱ པཙྪཱ ཧོཏི.

༢༧༡༦-༧. ཙཱིཝརཱསཱཡ ཝསྶཾཝུཏྠོ ཨཱཝཱསཏོ པཀྐནྟོ ‘‘ཏུཡ྄ཧཾ ཙཱིཝརཾ དསྶཱམཱི’’ཏི ཀེནཙི ཝུཏྟོ བཧིསཱིམགཏོ པན སཝཏི, པུན ‘‘ཏཝ ཙཱིཝརཾ དཱཏུཾ ན སཀྐོམཱི’’ཏི ཝུཏྟོ ཨཱསཱཡ ཚིནྣམཏྟཱཡ ཙཱིཝརེ པཙྩཱསཱཡ ཨུཔཙྪིནྣམཏྟཱཡ ཨཱསཱཝཙྪེདིཀཱ ནཱམ མཱཏིཀཱཏི མཏཱ ཉཱཏཱཏི ཡོཛནཱ. ཨཱསཱཝཙྪཱདིཀེ ཀཐིནུབྦྷཱརེ ཨཱཝཱསཔལིབོདྷོ པཋམཾ ཚིཛྫཏི, ཙཱིཝརཱསཱཡ ཨུཔཙྪིནྣཱཡ ཙཱིཝརཔལིབོདྷོ ཚིཛྫཏི.

༢༧༡༨-༢༠. ཡོ ཝསྶཾཝུཏྠཝིཧཱརམྷཱ ཨཉྙཾ ཝིཧཱརཾ གཏོ ཧོཏི, སོ ཨཱགཙྪཾ ཨཱགཙྪནྟོ ཨནྟརཱམགྒེ ཀཐིནུདྡྷཱརཾ ཨཏིཀྐམེཡྻ, ཏསྶ སོ ཀཐིནུདྡྷཱརོ སཱིམཱཏིཀྐནྟིཀོ མཏོཏི ཡོཛནཱ. ཏཏྠ སཱིམཱཏིཀྐནྟིཀེ ཀཐིནུབྦྷཱརེ ཙཱིཝརཔལིབོདྷོ པཋམཾ ཚིཛྫཏི, ཏསྶ བཧིསཱིམེ ཨཱཝཱསཔལིབོདྷོ ཚིཛྫཏི.

ཨེཏྠ ¶ ཙ ‘‘སཱིམཱཏིཀྐནྟིཀོ ནཱམ ཙཱིཝརཀཱལསཱིམཱཏིཀྐནྟིཀོ’’ཏི ཀེནཙི ཝུཏྟཾ. ‘‘བཧིསཱིམཱཡཾ ཙཱིཝརཀཱལསམཡསྶ ཨཏིཀྐནྟཏྟཱ སཱིམཱཏིཀྐནྟིཀོ’’ཏི (སཱརཏྠ. ཊཱི. མཧཱཝ. ༣༡༡) སཱརཏྠདཱིཔནིཡཾ ཝུཏྟཾ. ‘‘ཨཱགཙྪཾ ཨནྟརཱམགྒེ, ཏདུདྡྷཱརམཏིཀྐམེ’’ཏི ཝུཏྟཏྟཱ པན སངྒྷེན ¶ ཀརིཡམཱནཾ ཨནྟརུབྦྷཱརཾ ཨཱགཙྪནྟོ ཝིཧཱརསཱིམཾ ཨསམྤཏྟེཡེཝ ཀཐིནུབྦྷཱརསྶ ཛཱཏཏྟཱ ཏཾ ན སམྦྷུཎེཡྻ, ཏསྶེཝཾ སཱིམམཏིཀྐནྟསྶེཝ སཏོ པུན ཨཱགཙྪཏོ ཨནྟརཱམགྒེ ཛཱཏོ ཀཐིནུབྦྷཱརོ སཱིམཱཏིཀྐནྟིཀོཏི ཨམྷཱཀཾ ཁནྟི.

ཀཐིནཱནིསཾསཙཱིཝརཾ ཨཱདཱཡ སཙེ ཨཱཝཱསེ སཱཔེཀྑོཝ གཏོ ཧོཏི, པུན ཨཱགནྟྭཱ ཀཐིནུདྡྷཱརཾ ཀཐིནསྶ ཨནྟརུབྦྷཱརམེཝ སམྦྷུཎཱཏི ཙེ ཡདི པཱཔུཎེཡྻ, ཏསྶ སོ ཀཐིནུདྡྷཱརོ ཧོཏི, སོ ‘‘སཧུབྦྷཱརོ’’ཏི ཝུཙྩཏཱིཏི ཡོཛནཱ. སཧུབྦྷཱརེ དྭེ པལིབོདྷཱ ཨཔུབྦཾ ཨཙརིམཾ ཚིཛྫནྟི.

༢༧༢༡. ‘‘སཱིམཱཏིཀྐནྟིཀེནཱ’’ཏི ཝཏྟབྦེ ཨུཏྟརཔདལོཔེན ‘‘སཱིམཏོ’’ཏི ཝུཏྟཾ. པཀྐམནཉྩ ནིཊྛཱནཉྩ སནྣིཊྛཱནཉྩ སཱིམཏོ སཱིམཱཏིཀྐནྟིཀེན སཧ ཨིམེ ཙཏྟཱརོ ཀཐིནུབྦྷཱརཱ པུགྒལཱདྷཱིནཱ པུགྒལཱཡཏྟཱ སཧུབྦྷཱརསངྑཱཏོ ཨནྟརུབྦྷཱརོ སངྒྷཱདྷཱིནོཏི ཡོཛནཱ. ‘‘ཨནྟརུབྦྷརོ’’ཏི གཱཐཱབནྡྷཝསེན རསྶཏྟཾ.

༢༧༢༢. ནཱསནནྟི ནཱསནནྟིཀོ. སཝནནྟི སཝནནྟིཀོ. ཨཱསཱཝཙྪེདིཀཱཔི ཙཱཏི ཏཡོཔི ཀཐིནུབྦྷཱརཱ. ན ཏུ སངྒྷཱ ན བྷིཀྑུཏོཏི སངྒྷཏོཔི ན ཧོནྟི, པུགྒལཏོཔི ན ཧོནྟཱིཏི ཨཏྠོ. ཙཱིཝརསྶ ཝིནཱསོ སངྒྷསྶ ཝཱ ཙཱིཝརསཱམིཀསྶ ཝཱ པཡོགེན ན ཛཱཏོཏི ནཱསནཀོ ཏཱཝ ཀཐིནུབྦྷཱརོ ཨུབྷཏོཔི ན ཧོཏཱིཏི ཝུཏྟོ. སཝནཉྩ ཨུབྷཡེསཾ པཡོགཏོ ན ཛཱཏནྟི ཏཐཱ ཝུཏྟཾ. ཏཐཱ ཨཱསཱཝཙྪེདིཀཱཔི.

༢༧༢༣. ཨཱཝཱསོཡེཝ པལིབོདྷོཏི ཝིགྒཧོ. པལིབོདྷོ ཙ ཙཱིཝརེཏི ཨེཏྠ ཙཱིཝརེཏི བྷེདཝཙནིཙྪཱཡ ནིམིཏྟཏྠེ ¶ བྷུམྨཾ, ཙཱིཝརནིམིཏྟཔལིབོདྷོཏི ཨཏྠོ, ཙཱིཝརསངྑཱཏོ པལིབོདྷོཏི ཝུཏྟཾ ཧོཏི. སཙྩཱདིགུཎཡུཏྟཾ མུསཱཝཱདཱདིདོསཝིམུཏྟཾ ཨཏྠཾ ཝདཏི སཱིལེནཱཏི ཡུཏྟམུཏྟཏྠཝཱདཱི, ཏེན.

༢༧༢༤. ཨཊྛནྣཾ ¶ མཱཏིཀཱནནྟི བཧིསཱིམགཏཱནཾ ཝསེན ཝུཏྟཱ པཀྐམནནྟིཀཱདཡོ སཏྟ མཱཏིཀཱ, བཧིསཱིམཾ གནྟྭཱ ཨནྟརུབྦྷཱརཾ སམྦྷུཎནྟསྶ ཝསེན ཝུཏྟོ སཧུབྦྷཱརོཏི ཨིམཱསཾ ཨཊྛནྣཾ མཱཏིཀཱནཾ ཝསེན ཙ. ཨནྟརུབྦྷཱརཏོཔི ཝཱཏི བཧིསཱིམཾ ཨགནྟྭཱ ཏཏྠེཝ ཝསིཏྭཱ ཀཐིནུབྦྷཱརཀམྨེན ཨུབྦྷཱརཀཐིནཱནཾ ཝསེན ལབྦྷནཏོ ཨནྟརུབྦྷཱརཏོ ཙཱཏི མཧེསིནཱ ཀཐིནསྶ དུཝེ ཨུབྦྷཱརཱཔི ཝུཏྟཱཏི ཡོཛནཱ. བཧིསཱིམཾ གནྟྭཱ ཨཱགཏསྶ ཝསེན སཧུབྦྷཱརོ, བཧིསཱིམཾ ཨཱགཏཱནཾ ཝསེན ཨནྟརུབྦྷཱརོཏི ཨེཀོཡེཝ ཨུབྦྷཱརོ དྭིདྷཱ ཝུཏྟོ, ཏསྨཱ ཨནྟརུབྦྷཱརཾ ཝིསུཾ ཨགྒཧེཏྭཱ ཨཊྛེཝ མཱཏིཀཱ པཱལི༹ཡཾ (མཧཱཝ. ༣༡༠) ཝིབྷཏྟཱཏི ཝེདིཏབྦཱ.

༢༧༢༥. ཨནཱམནྟཙཱརོ ཨུཏྟརཔདལོཔཝསེན ‘‘ཨནཱམནྟཱ’’ ཨིཏི ཝུཏྟོ. ཡཱཝ ཀཐིནཾ ན ཨུདྡྷརཱིཡཏི, ཏཱཝ ཨནཱམནྟེཏྭཱ ཙརཎཾ ཀཔྤིསྶཏི, ཙཱརིཏྟསིཀྑཱཔདེན ཨནཱཔཏྟི བྷཝིསྶཏཱིཏི ཨཏྠོ.

ཨསམཱདཱནཙཱརོ ‘‘ཨསམཱདཱན’’ནྟི ཨུཏྟརཔདལོཔེན ཝུཏྟོ. ཨསམཱདཱནཙཱརོཏི ཏིཙཱིཝརཾ ཨསམཱདཱཡ ཙརཎཾ, ཙཱིཝརཝིཔྤཝཱསོ ཀཔྤིསྶཏཱིཏི ཨཏྠོ.

‘‘གཎཏོ’’ཏི ཨིམིནཱ ཨུཏྟརཔདལོཔེན གཎབྷོཛནཾ དསྶིཏཾ. གཎབྷོཛནམྤི ཀཔྤིསྶཏི, ཏཾ སརཱུཔཏོ པཱཙིཏྟིཡཀཎྜེ ཝུཏྟཾ.

‘‘ཡཱཝདཏྠིཀ’’ནྟི ¶ ཨིམིནཱ ཡཱཝདཏྠཙཱིཝརཾ ཝུཏྟཾ. ཡཱཝདཏྠཙཱིཝརནྟི ཡཱཝཏཀེན ཙཱིཝརེན ཨཏྠོ, ཏཱཝཏཀཾ ཨནདྷིཊྛིཏཾ ཨཝིཀཔྤིཏཾ ཀཔྤིསྶཏཱིཏི ཨཏྠོ.

‘‘ཏཏྠ ཡོ ཙཱིཝརུཔྤཱདོ’’ཏི ཨིམིནཱ ‘‘ཡོ ཙ ཏཏྠ ཙཱིཝརུཔྤཱདོ’’ཏི (མཧཱཝ. ༣༠༦) ཝུཏྟོ ཨཱནིསཾསོ དསྶིཏོ. ཡོ ཙ ཏཏྠ ཙཱིཝརུཔྤཱདོཏི ཏཏྠ ཀཐིནཏྠཏསཱིམཱཡཾ མཏཀཙཱིཝརཾ ཝཱ ཧོཏུ སངྒྷསྶ ཨུདྡིསྶ དིནྣཾ ཝཱ སངྒྷིཀེན ཏཏྲུཔྤཱདེན ཨཱབྷཏཾ ཝཱ, ཡེན ཀེནཙི ཨཱཀཱརེན ཡཾ སངྒྷིཀཾ ཙཱིཝརཾ ཨུཔྤཛྫཏི, ཏཾ ཏེསཾ བྷཝིསྶཏཱིཏི ཨཏྠོ. ཨིམེ པཉྩ ཀཐིནཱནིསཾསཱ ཙ ཝུཏྟཱཏི སམྦནྡྷོ.

ཀཐིནཀྑནྡྷཀཀཐཱཝཎྞནཱ.

ཙཱིཝརཀྑནྡྷཀཀཐཱཝཎྞནཱ

༢༧༢༦-༧. ཙཱིཝརཾ ¶ ཨུཔྤཛྫཏི ཨེཏཱསཱུཏི ‘‘ཨུཔྤཱདཱ’’ཏི ཛནིཀཱཝ ཝུཙྩནྟི, ཙཱིཝརཝཏྠཔརིལཱབྷཀྑེཏྟནྟི ཨཏྠོ. ཡཐཱཧ – ‘‘ཡཐཱཝུཏྟཱནཾ ཙཱིཝརཱནཾ པཊིལཱབྷཱཡ ཁེཏྟཾ དསྶེཏུཾ ཨཊྛིམཱ བྷིཀྑཝེ མཱཏིཀཱཏིཨཱདིམཱཧཱ’’ཏི (མཧཱཝ. ཨཊྛ. ༣༧༩). ཙཱིཝརམཱཏིཀཱཏི ཙཱིཝརུཔྤཱདཧེཏུབྷཱུཏམཱཏརོ. ཏེནཱཧ ཀཐིནཀྑནྡྷཀཝཎྞནཱཡཾ ‘‘མཱཏིཀཱཏི མཱཏརོ, ཛནེཏྟིཡོཏི ཨཏྠོ’’ཏི (མཧཱཝ. ཨཊྛ. ༣༡༠). མཱཏིཀཱཏི ཙེཏྠ ཙཱིཝརདཱནམདྷིཔྤེཏཾ. ཡཐཱཧ ‘‘སཱིམཱཡ དཱནཾ ཨེཀཱ མཱཏིཀཱ, ཀཏིཀཱཡ དཱནཾ དུཏིཡཱ’’ཏིཨཱདི. སཱིམཱཡ དེཏི, ཀཏིཀཱཡ དེཏི, བྷིཀྑཱཔཉྙཏྟིཡཱ དེཏི, སངྒྷསྶ དེཏི, ཨུབྷཏོསངྒྷེ དེཏི, ཝསྶཾཝུཏྠསངྒྷསྶ དེཏི, ཨཱདིསྶ དེཏི, པུགྒལསྶ དེཏི. ‘‘ཨིམཱ པན ཨཊྛ མཱཏིཀཱ’’ཏི ཝུཏྟམེཝ ནིགམནཝསེན ཝུཏྟཾ.

༢༧༢༨. ཏཏྠཱཏི ¶ ཏཱསུ ཨཊྛམཱཏིཀཱསུ. སཱིམཱཡ དེཏཱིཏི ‘‘སཱིམཱཡ དམྨཱི’’ཏི ཨེཝཾ སཱིམཾ པརཱམསིཏྭཱ དེནྟོ སཱིམཱཡ དེཏི, ཨེཝཾ དིནྣཾ ཨནྟོསཱིམགཏེཧི བྷིཀྑཱུཧི བྷཱཛེཏབྦནྟི ཝཎྞིཏནྟི ཡོཛནཱ. ཏཏྠ ཨནྟོསཱིམགཏེཧཱིཏི དཱཡཀོ ཡཾ སཱིམཾ ཨཔེཀྑིཏྭཱ ཨེཝམཱཧ, ཏསྶཱ སཱིམཱཡ ཨནྟོགཏེཧི སབྦེཧི. བྷཱཛེཏབྦནྟི ཏཾ ཙཱིཝརཾ བྷཱཛེཏབྦཾ. ཝརཝཎྞིནཱཏི ‘‘ཨིཏིཔི སོ བྷགཝཱ ཨརཧ’’ནྟིཨཱདིནཱ སཀལལོཀབྱཱཔིགུཎཱཏིསཡཡུཏྟེན བྱཱམཔྤབྷཱཡ, ཚབྦཎྞཱནཾ རཾསཱིནཉྩ ཝསེན ཨུཏྟམཔྤབྷཱཏིསཡཡུཏྟེན ཝརཝཎྞིནཱ ཝཎྞིཏཾ ཀཐིཏཾ. ཨཡམེཏྠ པདཝཎྞནཱ, ཨཡཾ པན ཝིནིཙྪཡོ – སཱིམཱཡ དེཏཱིཏི ཨེཏྠ ཏཱཝ ཁཎྜསཱིམཱ ཨུཔཙཱརསཱིམཱ སམཱནསཾཝཱསསཱིམཱ ཨཝིཔྤཝཱསསཱིམཱ ལཱབྷསཱིམཱ གཱམསཱིམཱ ནིགམསཱིམཱ ནགརསཱིམཱ ཨབྦྷནྟརསཱིམཱ ཨུདཀུཀྑེཔསཱིམཱ ཛནཔདསཱིམཱ རཊྛསཱིམཱ རཛྫསཱིམཱ དཱིཔསཱིམཱ ཙཀྐཝཱལ༹སཱིམཱ ཨིཏི པནྣརས སཱིམཱ ཝེདིཏབྦཱ.

ཏཏྠ ཁཎྜསཱིམཱ སཱིམཱཀཐཱཡཾ ཝུཏྟཱ. ཨུཔཙཱརསཱིམཱ པརིཀྑིཏྟསྶ ཝིཧཱརསྶ པརིཀྑེཔེན, ཨཔརིཀྑིཏྟསྶ ཝིཧཱརསྶ པརིཀྑེཔཱརཧཊྛཱནེན པརིཙྪིནྣཱ ཧོཏི. ཨཔིཙ བྷིཀྑཱུནཾ དྷུཝསནྣིཔཱཏཊྛཱནཏོ ཝཱ པརིཡནྟེ ཋིཏབྷོཛནསཱལཏོ ཝཱ ནིབདྡྷཝསནཀཨཱཝཱསཏོ ཝཱ ཐཱམམཛ྄ཛྷིམསྶ པུརིསསྶ དྭིནྣཾ ལེཌྜུཔཱཏཱནཾ ཨནྟོ ཨུཔཙཱརསཱིམཱ ཝེདིཏབྦཱ. སཱ པན ཨཱཝཱསེསུ ཝཌྜྷནྟེསུ ཝཌྜྷཏི, པརིཧཱཡནྟེསུ པརིཧཱཡཏི. མཧཱཔཙྩརིཡཾ པན ‘‘བྷིཀྑཱུསུཔི ཝཌྜྷནྟེསུ ཝཌྜྷཏཱི’’ཏི (མཧཱཝ. ཨཊྛ. ༣༧༩) ཝུཏྟཾ. ཏསྨཱ སཙེ ཝིཧཱརེ སནྣིཔཏིཏབྷིཀྑཱུཧི སདྡྷིཾ ¶ ཨེཀཱབདྡྷཱ ཧུཏྭཱ ཡོཛནསཏམྤི པཱུརེཏྭཱ ནིསཱིདནྟི, ཡོཛནསཏམྤི ཨུཔཙཱརསཱིམཱཝ ཧོཏི, སབྦེསཾ ལཱབྷོ པཱཔུཎཱཏི. སམཱནསཾཝཱསཨཝིཔྤཝཱསསཱིམཱདྭཡམྤི ཝུཏྟམེཝ.

ལཱབྷསཱིམཱ ¶ ནཱམ ནེཝ སམྨཱསམྦུདྡྷེན ཨནུཉྙཱཏཱ, ན དྷམྨསངྒཱཧཀཏྠེརེཧི ཋཔིཏཱ, ཨཔིཙ ཁོ རཱཛརཱཛམཧཱམཏྟཱ ཝིཧཱརཾ ཀཱརེཏྭཱ གཱཝུཏཾ ཝཱ ཨཌྜྷཡོཛནཾ ཝཱ ཡོཛནཾ ཝཱ སམནྟཏོ པརིཙྪིནྡིཏྭཱ ‘‘ཨཡཾ ཨམྷཱཀཾ ཝིཧཱརསྶ ལཱབྷསཱིམཱ’’ཏི ནཱམལིཁིཏཀེ ཐམྦྷེ ནིཁཎིཏྭཱ ‘‘ཡཾ ཨེཏྠནྟརེ ཨུཔྤཛྫཏི, སབྦཾ ཏཾ ཨམྷཱཀཾ ཝིཧཱརསྶ དེམཱ’’ཏི སཱིམཾ ཋཔེནྟི, ཨཡཾ ལཱབྷསཱིམཱ ནཱམ. གཱམནིགམནགརཨབྦྷནྟརཨུདཀུཀྑེཔསཱིམཱཔི ཝུཏྟཱ ཨེཝ.

ཛནཔདསཱིམཱ ནཱམ ཀཱསིཀོསལརཊྛཱདཱིནཾ ཨནྟོ བཧཱུ ཛནཔདཱ ཧོནྟི, ཨེཏྠ ཨེཀེཀོ ཛནཔདཔརིཙྪེདོ ཛནཔདསཱིམཱ. རཊྛསཱིམཱ ནཱམ ཀཱསིཀོསལཱདིརཊྛཔརིཙྪེདོ. རཛྫསཱིམཱ ནཱམ མཧཱཙོལ༹བྷོགོ ཀེརལ༹བྷོགོཏི ཨེཝཾ ཨེཀེཀསྶ རཉྙོ ཨཱཎཱཔཝཏྟིཊྛཱནཾ. དཱིཔསཱིམཱ ནཱམ སམུདྡནྟེན སམུཙྪིནྣམཧཱདཱིཔཱ ཙ ཨནྟརདཱིཔཱ ཙ. ཙཀྐཝཱལ༹སཱིམཱ ནཱམ ཙཀྐཝཱལ༹པབྦཏེནེཝ པརིཙྪིནྣཱ.

ཨེཝམེཏཱསུ སཱིམཱསུ ཁཎྜསཱིམཱཡ ཀེནཙི ཀམྨེན སནྣིཔཏིཏཾ སངྒྷཾ དིསྭཱ ‘‘ཨེཏྠེཝ སཱིམཱཡ སངྒྷསྶ དེམཱི’’ཏི ཝུཏྟེ ཡཱཝཏིཀཱ བྷིཀྑཱུ ཨནྟོཁཎྜསཱིམགཏཱ, ཏེཧི བྷཱཛེཏབྦཾ. ཏེསཾཡེཝ ཧི ཏཾ པཱཔུཎཱཏི, ཨཉྙེསཾ སཱིམནྟརིཀཱཡ ཝཱ ཨུཔཙཱརསཱིམཱཡ ཝཱ ཋིཏཱནམྤི ན པཱཔུཎཱཏི. ཁཎྜསཱིམཱཡ ཋིཏེ པན རུཀྑེ ཝཱ པབྦཏེ ཝཱ ཋིཏསྶ ཧེཊྛཱ ཝཱ པཐཝིཡཱ ཝེམཛ྄ཛྷཾ གཏསྶ པཱཔུཎཱཏིཡེཝ.

‘‘ཨིམིསྶཱ ཨུཔཙཱརསཱིམཱཡ སངྒྷསྶ དམྨཱི’’ཏི དིནྣཾ པན ཁཎྜསཱིམཱསཱིམནྟརིཀཱསུ ཋིཏཱནམྤི པཱཔུཎཱཏི. ‘‘སམཱནསཾཝཱསསཱིམཱཡ དམྨཱི’’ཏི དིནྣཾ པན ཁཎྜསཱིམཱསཱིམནྟརིཀཱསུ ཋིཏཱནཾ ན པཱཔུཎཱཏི. ཨཝིཔྤཝཱསསཱིམཱལཱབྷསཱིམཱསུ དིནྣཾ ཏཱསུ སཱིམཱསུ ཨནྟོགཏཱནཾཡེཝ པཱཔུཎཱཏི. གཱམསཱིམཱདཱིསུ དིནྣཾ ¶ ཏཱསཾ སཱིམཱནཾ ཨབྦྷནྟརེ བདྡྷསཱིམཱཡ ཋིཏཱནམྤི པཱཔུཎཱཏི. ཨབྦྷནྟརསཱིམཱཨུདཀུཀྑེཔསཱིམཱསུ དིནྣཾ ཏཏྠ ཨནྟོགཏཱནཾཡེཝ པཱཔུཎཱཏི. ཛནཔདརཊྛརཛྫདཱིཔཙཀྐཝཱལ༹སཱིམཱསུཔི གཱམསཱིམཱདཱིསུ ཝུཏྟསདིསོཡེཝ ཝིནིཙྪཡོ.

སཙེ ¶ པན ཛམྦུདཱིཔེ ཋིཏོ ‘‘ཏམྦཔཎྞིདཱིཔེ སངྒྷསྶ དམྨཱི’’ཏི ཝདཏི, ཏམྦཔཎྞིདཱིཔཏོ ཨེཀོཔི གནྟྭཱ སབྦེསཾ གཎྷིཏུཾ ལབྷཏི. སཙེཔི ཏཏྲེཝ ཨེཀོ སབྷཱགབྷིཀྑུ སབྷཱགཱནཾ བྷཱགཾ གཎྷཱཏི, ན ཝཱརེཏབྦོ. ཨེཝཾ ཏཱཝ ཡོ སཱིམཾ པརཱམསིཏྭཱ དེཏི, ཏསྶ དཱནེ ཝིནིཙྪཡོ ཝེདིཏབྦོ.

ཡོ པན ‘‘ཨསུཀསཱིམཱཡཱ’’ཏི ཝཏྟུཾ ན ཛཱནཱཏི, ཀེཝལཾ ‘‘སཱིམཱ’’ཏི ཝཙནམཏྟམེཝ ཛཱནནྟོ ཝིཧཱརཾ ཨཱགནྟྭཱ ‘‘སཱིམཱཡ དམྨཱི’’ཏི ཝཱ ‘‘སཱིམཊྛཀསངྒྷསྶ དམྨཱི’’ཏི ཝཱ བྷཎཏི, སོ པུཙྪིཏབྦོ ‘‘སཱིམཱ ནཱམ བཧུཝིདྷཱ, ཀཏརཾ སཱིམཾ སནྡྷཱཡ བྷཎསཱི’’ཏི, སཙེ ཝདཏི ‘‘ཨཧཾ ‘ཨསུཀསཱིམཱ’ཏི ན ཛཱནཱམི, སཱིམཊྛཀསངྒྷོ བྷཱཛེཏྭཱ གཎྷཏཱུ’’ཏི, ཀཏརསཱིམཱཡ བྷཱཛེཏབྦཾ? མཧཱསཱིཝཏྠེརོ ཀིརཱཧ ‘‘ཨཝིཔྤཝཱསསཱིམཱཡཱ’’ཏི. ཏཏོ ནཾ ཨཱཧཾསུ ‘‘ཨཝིཔྤཝཱསསཱིམཱ ནཱམ ཏིཡོཛནཱཔི ཧོཏི, ཨེཝཾ སནྟེ ཏིཡོཛནེ ཋིཏཱ ལཱབྷཾ གཎྷིསྶནྟི, ཏིཡོཛནེ ཋཏྭཱ ཨཱགནྟུཀཝཏྟཾ པཱུརེཏྭཱ ཨཱརཱམཾ པཝིསིཏབྦཾ བྷཝིསྶཏི, གམིཀོ ཏིཡོཛནཾ གནྟྭཱ སེནཱསནཾ ཨཱཔུཙྪིསྶཏི, ནིསྶཡཔཊིཔནྣསྶ ཏིཡོཛནཱཏིཀྐམེ ནིསྶཡོ པཊིཔྤསྶམྦྷིསྶཏི, པཱརིཝཱསིཀེན ཏིཡོཛནཾ ཨཏིཀྐམིཏྭཱ ཨརུཎཾ ཨུཊྛཱཔེཏབྦཾ བྷཝིསྶཏི, བྷིཀྑུནིཡཱ ཏིཡོཛནེ ཋཏྭཱ ཨཱརཱམཔྤཝེསནཾ ཨཱཔུཙྪིཏབྦཾ བྷཝིསྶཏི, སབྦམྤེཏཾ ཨུཔཙཱརསཱིམཱཔརིཙྪེདཝསེནེཝ ཀཏྟུཾ ཝཊྚཏི. ཏསྨཱ ཨུཔཙཱརསཱིམཱཡམེཝ བྷཱཛེཏབྦ’’ནྟི.

༢༧༢༩. ཡེ ¶ ཝིཧཱརཱ སངྒྷེན ཀཏིཀཱཡ ཨེཀལཱབྷཀཱ སམཱནལཱབྷཀཱ ཨེཏྠ ཨེཏེསུ ཝིཧཱརེསུ དིནྣཾ ‘‘ཀཏིཀཱཡ དམྨཱི’’ཏི དིནྣཾ སབྦེཧི བྷིཀྑཱུཧི སཧ བྷཱཛེཏབྦཾ ཙཱིཝརཾ ཀཏིཀཱཡ ཝུཙྩཏཱིཏི ཡོཛནཱ.

ཨཡམེཏྠ ཝིནིཙྪཡོ – ཀཏིཀཱ ནཱམ སམཱནལཱབྷཀཏིཀཱ, ཏཏྲེཝཾ ཀཏིཀཱ ཀཱཏབྦཱ – ཨེཀསྨིཾ ཝིཧཱརེ སནྣིཔཏིཏེཧི བྷིཀྑཱུཧི ཡཾ ཝིཧཱརཾ སངྒཎྷིཏུཀཱམཱ སམཱནལཱབྷཾ ཀཱཏུཾ ཨིཙྪནྟི, ཨསྶ ནཱམཾ གཧེཏྭཱ ‘‘ཨསུཀོ ནཱམ ཝིཧཱརོ པོརཱཎཀོ’’ཏི ཝཱ ‘‘བུདྡྷཱདྷིཝུཏྠོ’’ཏི ཝཱ ‘‘ཨཔྤལཱབྷོ’’ཏི ཝཱ ཡཾ ཀིཉྩི ཀཱརཎཾ ཝཏྭཱ ‘‘ཏཾ ཝིཧཱརཾ ཨིམིནཱ ཝིཧཱརེན སདྡྷིཾ ཨེཀལཱབྷཾ ཀཱཏུཾ སངྒྷསྶ རུཙྩཏཱི’’ཏི ཏིཀྑཏྟུཾ སཱཝེཏབྦཾ. ཨེཏྟཱཝཏཱ ཏསྨིཾ ཝིཧཱརེ ནིསིནྣོཔི ཨིདྷ ནིསིནྣོཝ ཧོཏི. ཏསྨིཾ ཝིཧཱརེཔི སངྒྷེན ཨེཝམེཝ ཀཱཏབྦཾ. ཨེཏྟཱཝཏཱ ཨིདྷ ¶ ནིསིནྣོཔི ཏསྨིཾ ཝིཧཱརེ ནིསིནྣོཝ ཧོཏི. ཨེཀསྨིཾ ལཱབྷེ བྷཱཛིཡམཱནེ ཨིཏརསྨིཾ ཋིཏསྶ བྷཱགཾ གཧེཏུཾ ཝཊྚཏི. ཨེཝཾ ཨེཀེན ཝིཧཱརེན སདྡྷིཾ བཧཱུཔི ཨཱཝཱསཱ ཨེཀལཱབྷཱ ཀཱཏབྦཱཏི.

༢༧༣༠. ཙཱིཝརདཱཡཀེན དྷུཝཀཱརཱ པཱཀཝཏྟཱདིནིཙྩསཀྐཱརཱ ཡཏྠ སངྒྷསྶ ཀྲཱིཡནྟི ཀརཱིཡནྟི ཏཏྠ ཏསྨིཾ ཝིཧཱརེ ཏེནེཝ དཱཡཀེན སངྒྷསྶ དིནྣཾ ཝིཧཱརཾ ‘‘བྷིཀྑཱཔཉྙཏྟིཡཱ དིནྣ’’ནྟི མཧེསིནཱ ཝུཏྟནྟི ཡོཛནཱ.

ཏཏྲཱཡཾ ཝིནིཙྪཡོ – ཡསྨིཾ ཝིཧཱརེ ཨིམསྶ ཙཱིཝརདཱཡཀསྶ སནྟཀཾ སངྒྷསྶ པཱཀཝཏྟཾ ཝཱ ཝཏྟཏི, ཡསྨིཾ ཝཱ ཝིཧཱརེ བྷིཀྑཱུ ཨཏྟནོ བྷཱརཾ ཀཏྭཱ སདཱ གེཧེ བྷོཛེཏི, ཡཏྠ ཝཱ ཏེན ཨཱཝཱསོ ཀཱརིཏོ, སལཱཀབྷཏྟཱདཱིནི ཝཱ ནིབདྡྷཱནི, ཡེན པན སཀལོཔི ཝིཧཱརོ ¶ པཏིཊྛཱཔིཏོ, ཏཏྠ ཝཏྟབྦམེཝ ནཏྠི, ཨིམེ དྷུཝཀཱརཱ ནཱམ. ཏསྨཱ སཙེ སོ ‘‘ཡཏྠ མཡ྄ཧཾ དྷུཝཀཱརཱ ཀརཱིཡནྟི, ཨེཏྠ དམྨཱི’’ཏི ཝཱ ‘‘ཏཏྠ དེཐཱ’’ཏི ཝཱ བྷཎཏི, བཧཱུསུ ཙེཔི ཋཱནེསུ དྷུཝཀཱརཱ ཧོནྟི, སབྦཏྠ དིནྣམེཝ ཧོཏི.

སཙེ པན ཨེཀསྨིཾ ཝིཧཱརེ བྷིཀྑཱུ བཧུཏརཱ ཧོནྟི, ཏེཧི ཝཏྟབྦཾ ‘‘ཏུམྷཱཀཾ དྷུཝཀཱརེ ཨེཀཏྠ བྷིཀྑཱུ བཧཱུ, ཨེཀཏྠ ཨཔྤཀཱ’’ཏི, སཙེ ‘‘བྷིཀྑུགཎནཱཡ གཎྷཐཱ’’ཏི བྷཎཏི, ཏཐཱ བྷཱཛེཏྭཱ གཎྷིཏུཾ ཝཊྚཏི. ཨེཏྠ ཙ ཝཏྠབྷེསཛྫཱདི ཨཔྤཀམྤི སུཁེན བྷཱཛཱིཡཏི, ཡདི པན མཉྩོ ཝཱ པཱིཋཀཾ ཝཱ ཨེཀམེཝ ཧོཏི, ཏཾ པུཙྪིཏྭཱ ཡསྶ ཝཱ ཝིཧཱརསྶ ཨེཀཝིཧཱརེཔི ཝཱ ཡསྶ སེནཱསནསྶ སོ ཝིཙཱརེཏི, ཏཏྠ དཱཏབྦཾ. སཙེ ‘‘ཨསུཀབྷིཀྑུ གཎྷཏཱུ’’ཏི ཝདཏི, ཝཊྚཏི.

ཨཐ ‘‘མཡ྄ཧཾ དྷུཝཀཱརེ དེཐཱ’’ཏི ཝཏྭཱ ཨཝིཙཱརེཏྭཱཝ གཙྪཏི, སངྒྷསྶཔི ཝིཙཱརེཏུཾ ཝཊྚཏི. ཨེཝཾ པན ཝིཙཱརེཏབྦཾ – ‘‘སངྒྷཏྠེརསྶ ཝསནཊྛཱནེ དེཐཱ’’ཏི ཝཏྟབྦཾ. སཙེ ཏཏྠ སེནཱསནཾ པརིཔུཎྞཾ ཧོཏི. ཡཏྠ ནཔྤཧོཏི, ཏཏྠ དཱཏབྦཾ. སཙེ ཨེཀོ བྷིཀྑུ ‘‘མཡ྄ཧཾ ཝསནཊྛཱནེ སེནཱསནཔརིབྷོགབྷཎྜཾ ནཏྠཱི’’ཏི ཝདཏི, ཏཏྠ དཱཏབྦནྟི.

༢༧༣༡. སངྒྷསྶ པན ཡཾ དིནྣནྟི ཝིཧཱརཾ པཝིསིཏྭཱ ‘‘ཨིམཱནི ཙཱིཝརཱནི སངྒྷསྶ དམྨཱི’’ཏི ཡཾ ཙཱིཝརཾ དིནྣཾ. ‘‘སམྨུཁཱིབྷཱུཏེནཱ’’ཏི ཝཏྟབྦེ གཱཐཱབནྡྷེན རསྶཏྟཾ. སམྨུཁིབྷཱུཏེནཱཏི ཙ ¶ ཨུཔཙཱརསཱིམཱཡ ཋིཏེན. བྷཱཛེཏབྦནྟི གྷཎྚིཾ པཧརིཏྭཱ ཀཱལཾ གྷོསེཏྭཱ བྷཱཛེཏབྦཾ. ཨིདམེཏྠ མུཁམཏྟདསྶནཾ. ཝིནིཙྪཡོ ཨཊྛཀཐཱཡ (མཧཱཝ. ཨཊྛ. ༣༧༩) ཝེདིཏབྦོ. སེཡྻཐིདཾ – ཙཱིཝརདཱཡཀེན ¶ ཝིཧཱརཾ པཝིསིཏྭཱ ‘‘ཨིམཱནི ཙཱིཝརཱནི སངྒྷསྶ དམྨཱི’’ཏི དིནྣེསུ བྷཱཛིཡམཱནེསུ སཱིམཊྛསྶ ཨསམྤཏྟསྶཔི བྷཱགཾ གཎྷནྟོ ན ཝཱརེཏབྦོ. ཝིཧཱརོ མཧཱ ཧོཏི, ཐེརཱསནཏོ པཊྛཱཡ ཝཏྠེསུ དིཡྻམཱནེསུ ཨལསཛཱཏིཀཱ མཧཱཐེརཱ པཙྪཱ ཨཱགཙྪནྟི, ‘‘བྷནྟེ, ཝཱིསཏིཝསྶཱནཾ དིཡྻཏི, ཏུམྷཱཀཾ ཋིཏིཀཱ ཨཏིཀྐནྟཱ’’ཏི ན ཝཏྟབྦཱ, ཋིཏིཀཾ ཋཔེཏྭཱ ཏེསཾ དཏྭཱ པཙྪཱ ཋིཏིཀཱཡ དཱཏབྦཾ.

‘‘ཨསུཀཝིཧཱརེ ཀིར བཧུཾ ཙཱིཝརཾ ཨུཔྤནྣ’’ནྟི སུཏྭཱ ཡོཛནནྟརིཀཝིཧཱརཏོཔི བྷིཀྑཱུ ཨཱགཙྪནྟི, སམྤཏྟསམྤཏྟཱནཾ ཋིཏཊྛཱནཏོ པཊྛཱཡ དཱཏབྦཾ. ཨསམྤཏྟཱནམྤི ཨུཔཙཱརསཱིམཾ པཝིཊྛཱནཾ ཨནྟེཝཱསིཀཱདཱིསུ གཎྷནྟེསུ དཱཏབྦམེཝ. ‘‘བཧི ཨུཔཙཱརསཱིམཱཡ ཋིཏཱནཾ དེཐཱ’’ཏི ཝདནྟི, ན དཱཏབྦཾ. སཙེ པན ཨུཔཙཱརསཱིམཾ ཨོཀྐནྟེཧི ཨེཀཱབདྡྷཱ ཧུཏྭཱ ཨཏྟནོ ཝིཧཱརདྭཱརེ ཝཱ ཨནྟོཝིཧཱརེཡེཝ ཝཱ ཧོནྟི, པརིསཝསེན ཝཌྜྷིཏཱ ནཱམ སཱིམཱ ཧོཏི, ཏསྨཱ དཱཏབྦཾ. སངྒྷནཝཀསྶ དིནྣེཔི པཙྪཱ ཨཱགཏཱནཾ དཱཏབྦམེཝ. དུཏིཡབྷཱགེ པན ཐེརཱསནཾ ཨཱརུལ༹ྷེ ཨཱགཏཱནཾ པཋམབྷཱགོ ན པཱཔུཎཱཏི, དུཏིཡབྷཱགཏོ ཝསྶགྒེན དཱཏབྦཾ.

ཨེཀསྨིཾ ཝིཧཱརེ དས བྷིཀྑཱུ ཧོནྟི, དས ཝཏྠཱནི ‘‘སངྒྷསྶ དེམཱ’’ཏི དེནྟི, པཱཊེཀྐཾ བྷཱཛེཏབྦཱནི. སཙེ ‘‘སབྦཱནེཝ ཨམྷཱཀཾ པཱཔུཎནྟཱི’’ཏི གཧེཏྭཱ གཙྪནྟི, དུཔྤཱཔིཏཱནི ཙེཝ དུགྒཧིཏཱནི ཙ, གཏགཏཊྛཱནེ སངྒྷིཀཱནེཝ ཧོནྟི. ཨེཀཾ པན ཨུདྡྷརིཏྭཱ ‘‘ཨིདཾ ཏུམྷཱཀཾ པཱཔུཎཱཏཱི’’ཏི སངྒྷཏྠེརསྶ དཏྭཱ སེསཱནི ‘‘ཨིམཱནི ཨམྷཱཀཾ པཱཔུཎནྟཱི’’ཏི གཧེཏུཾ ཝཊྚཏི.

ཨེཀམེཝ ཝཏྠཾ ‘‘སངྒྷསྶ དེམཱ’’ཏི ཨཱཧརནྟི, ཨབྷཱཛེཏྭཱཝ ‘‘ཨམྷཱཀཾ པཱཔུཎཱཏཱི’’ཏི གཎྷནྟི, དུཔྤཱཔིཏཉྩེཝ དུགྒཧིཏཉྩ, སཏྠཀེན, པན ཧལིདྡིཨཱདིནཱ ཝཱ ལེཁཾ ཀཏྭཱ ཨེཀཾ ¶ ཀོཊྛཱསཾ ‘‘ཨིམཾ ཋཱནཾ ཏུམྷཱཀཾ པཱཔུཎཱཏཱི’’ཏི སངྒྷཏྠེརསྶ པཱཔེཏྭཱ སེསཾ ‘‘ཨམྷཱཀཾ པཱཔུཎཱཏཱི’’ཏི གཧེཏུཾ ཝཊྚཏི. ཡཾ པན ཝཏྠསྶེཝ པུཔྥཾ ཝཱ ཝལི ཝཱ, ཏེན པརིཙྪེདཾ ཀཱཏུཾ ན ཝཊྚཏི. སཙེ ཨེཀཾ ཏནྟཾ ཨུདྡྷརིཏྭཱ ‘‘ཨིདཾ ཋཱནཾ ཏུམྷཱཀཾ པཱཔུཎཱཏཱི’’ཏི སངྒྷཏྠེརསྶ དཏྭཱ སེསཾ ‘‘ཨམྷཱཀཾ པཱཔུཎཱཏཱི’’ཏི གཎྷནྟི, ཝཊྚཏི. ཁཎྜཾ ཁཎྜཾ ཚིནྡིཏྭཱ བྷཱཛིཡམཱནཾ ཝཊྚཏིཡེཝ.

ཨེཀབྷིཀྑུཀེ ¶ ཝིཧཱརེ སངྒྷསྶ ཙཱིཝརེསུ ཨུཔྤནྣེསུ སཙེ པུབྦེ ཝུཏྟནཡེནེཝ སོ བྷིཀྑུ ‘‘སབྦཱནི མཡ྄ཧཾ པཱཔུཎནྟཱི’’ཏི གཎྷཱཏི, སུགྒཧིཏཱནི, ཋིཏིཀཱ པན ན ཏིཊྛཏི. སཙེ ཨེཀེཀཾ ཨུདྡྷརིཏྭཱ ‘‘ཨིདཾ མཡ྄ཧཾ པཱཔུཎཱཏཱི’’ཏི གཎྷཱཏི, ཋིཏིཀཱ ཏིཊྛཏི. ཏཏྠ ཋིཏིཀཱཡ ཨཊྛིཏཱཡ པུན ཨཉྙསྨིཾ ཙཱིཝརེ ཨུཔྤནྣེ སཙེ ཨེཀོ བྷིཀྑུ ཨཱགཙྪཏི, མཛ྄ཛྷེ ཚིནྡིཏྭཱ དྭཱིཧིཔི གཧེཏབྦཾ. ཋིཏཱཡ ཋིཏིཀཱཡ པུན ཨཉྙསྨིཾ ཙཱིཝརེ ཨུཔྤནྣེ སཙེ ནཝཀཏརོ ཨཱགཙྪཏི, ཋིཏིཀཱ ཧེཊྛཱ ཨོརོཧཏི. སཙེ ཝུཌྜྷཏརོ ཨཱགཙྪཏི, ཋིཏིཀཱ ཨུདྡྷཾ ཨཱརོཧཏི. ཨཐ ཨཉྙོ ནཏྠི, པུན ཨཏྟནོ པཱཔེཏྭཱ གཧེཏབྦཾ.

‘‘སངྒྷསྶ དེམཱ’’ཏི ཝཱ ‘‘བྷིཀྑུསངྒྷསྶ དེམཱ’’ཏི ཝཱ ཡེན ཀེནཙི ཨཱཀཱརེན སངྒྷཾ ཨཱམསིཏྭཱ དིནྣཾ པན པཾསུཀཱུལིཀཱནཾ ན ཝཊྚཏི ‘‘གཧཔཏིཙཱིཝརཾ པཊིཀྑིཔཱམི, པཾསུཀཱུལིཀངྒཾ སམཱདིཡཱམཱི’’ཏི ཝུཏྟཏྟཱ, ན པན ཨཀཔྤིཡཏྟཱ. བྷིཀྑུསངྒྷེན ཨཔལོཀེཏྭཱ དིནྣམྤི ན གཧེཏབྦཾ. ཡཾ པན བྷིཀྑུ ཨཏྟནོ སནྟཀཾ དེཏི, ཏཾ བྷིཀྑུདཏྟིཡཾ ནཱམ ཝཊྚཏི. པཾསུཀཱུལཾ པན ན ཧོཏི. ཨེཝཾ སནྟེཔི དྷུཏངྒཾ ན བྷིཛྫཏི. ‘‘བྷིཀྑཱུནཾ དེམ, ཐེརཱནཾ དེམཱ’’ཏི ཝུཏྟེ པན པཾསུཀཱུལིཀཱནམྤི ཝཊྚཏི. ‘‘ཨིདཾ ཝཏྠཾ སངྒྷསྶ དེམ, ཨིམིནཱ ཨུཔཱཧནཏྠཝིཀཔཏྟཏྠཝིཀཨཱཡོགཨཾསབདྡྷཀཱདཱིནི ¶ ཀརོཐཱ’’ཏི དིནྣམྤི ཝཊྚཏི.

པཏྟཏྠཝིཀཱདཱིནཾ ཨཏྠཱཡ དིནྣཱནི བཧཱུནིཔི ཧོནྟི, ཙཱིཝརཏྠཱཡཔི པཧོནྟི, ཏཏོ ཙཱིཝརཾ ཀཏྭཱ པཱརུཔིཏུཾ ཝཊྚཏི. སཙེ པན སངྒྷོ བྷཱཛིཏཱཏིརིཏྟཱནི ཝཏྠཱནི ཚིནྡིཏྭཱ ཨུཔཱཧནཏྠཝིཀཱདཱིནཾ ཨཏྠཱཡ བྷཱཛེཏི, ཏཏོ གཧེཏུཾ ན ཝཊྚཏི. སཱམིཀེཧི ཝིཙཱརིཏམེཝ ཧི ཝཊྚཏི, ན ཨིཏརཾ.

‘‘པཾསུཀཱུལིཀསངྒྷསྶ དྷམྨཀརཎཨཾསབདྡྷཱདཱིནཾ ཨཏྠཱཡ དེམཱ’’ཏི ཝུཏྟེཔི གཧེཏུཾ ཝཊྚཏི. པརིཀྑཱརོ ནཱམ པཾསུཀཱུལིཀཱནམྤི ཨིཙྪིཏབྦོ. ཡཾ ཏཏྠ ཨཏིརེཀཾ ཧོཏི, ཏཾ ཙཱིཝརེཔི ཨུཔནེཏུཾ ཝཊྚཏི. སུཏྟཾ སངྒྷསྶ དེནྟི, པཾསུཀཱུལིཀེཧིཔི གཧེཏབྦཾ. ཨཡཾ ཏཱཝ ཝིཧཱརཾ པཝིསིཏྭཱ ‘‘ཨིམཱནི ཙཱིཝརཱནི སངྒྷསྶ དམྨཱི’’ཏི དིནྣེསུ ཝིནིཙྪཡོ.

སཙེ པན བཧི ཨུཔཙཱརསཱིམཱཡ ཨདྡྷཱནཔཊིཔནྣེ བྷིཀྑཱུ དིསྭཱ ‘‘སངྒྷསྶ དམྨཱི’’ཏི སངྒྷཏྠེརསྶ ཝཱ སངྒྷནཝཀསྶ ཝཱ ཨཱརོཙེཏི, སཙེཔི ཡོཛནཾ ཕརིཏྭཱ པརིསཱ ཋིཏཱ ཧོཏི, ཨེཀཱབདྡྷཱ ¶ ཙེ, སབྦེསཾ པཱཔུཎཱཏི. ཡེ པན དྭཱདསཧི ཧཏྠེཧི པརིསཾ ཨསམྤཏྟཱ, ཏེསཾ ན པཱཔུཎཱཏཱིཏི.

༢༧༣༢. ཨིདཱནི ‘‘ཨུབྷཏོསངྒྷེ དེཏཱི’’ཏི མཱཏིཀཾ ཝིཝརནྟོ ཨཱཧ ‘‘ཨུབྷཏོསངྒྷམུདྡིསྶཱ’’ཏིཨཱདི. ཨུབྷཏོསངྒྷམུདྡིསྶཱཏི བྷིཀྑུསངྒྷཾ, བྷིཀྑུནིསངྒྷཉྩ ཨུདྡིསིཏྭཱ. དེཏཱིཏི ‘‘ཨུབྷཏོསངྒྷསྶ དེམཱི’’ཏི དེཏི. ‘‘བཧུ ཝཱ’’ཏི ཨེཏྠ ‘‘བཧཱུ ཝཱ’’ཏི ཝཏྟབྦེ གཱཐཱབནྡྷཝསེན རསྶཏྟཾ. བྷིཀྑུནཱིནཾ བྷིཀྑཱུ ཐོཀཱ ཝཱ ཧོནྟུ བཧཱུ ཝཱ, པུགྒལགྒེན ཨཀཏྭཱ ཨུབྷཏོསངྒྷཝསེན སམབྷཱགོཝ ཀཱཏུཾ ཝཊྚཏཱིཏི ཡོཛནཱ.

ཏཏྲཱཡཾ ¶ ཝིནིཙྪཡོ – ‘‘ཨུབྷཏོསངྒྷསྶ དམྨཱི’’ཏི ཝུཏྟེཔི ‘‘དྭེདྷཱསངྒྷསྶ དམྨི, དྭིནྣཾ སངྒྷཱནཾ དམྨི, བྷིཀྑུསངྒྷསྶ ཙ བྷིཀྑུནིསངྒྷསྶ ཙ དམྨཱི’’ཏི ཝུཏྟེཔི ཨུབྷཏོསངྒྷསྶ དིནྣམེཝ ཧོཏི, དྭེ བྷཱགེ སམེ ཀཏྭཱ ཨེཀོ དཱཏབྦོ.

‘‘ཨུབྷཏོསངྒྷསྶ ཙ ཏུཡ྄ཧཉྩ དམྨཱི’’ཏི ཝུཏྟེ སཙེ དས དས བྷིཀྑཱུ, བྷིཀྑུནིཡོ ཙ ཧོནྟི, ཨེཀཝཱིསཏི པཊིཝཱིསེ ཀཏྭཱ ཨེཀོ པུགྒལསྶ དཱཏབྦོ, དས བྷིཀྑུསངྒྷསྶ, དས བྷིཀྑུནིསངྒྷསྶ. ཡེན པུགྒལིཀོ ལདྡྷོ, སོ སངྒྷཏོཔི ཨཏྟནོ ཝསྶགྒེན གཧེཏུཾ ལབྷཏི. ཀསྨཱ? ཨུབྷཏོསངྒྷགྒཧཎེན གཧིཏཏྟཱ.

‘‘ཨུབྷཏོསངྒྷསྶ ཙ ཙེཏིཡསྶ ཙ དམྨཱི’’ཏི ཝུཏྟེཔི ཨེསེཝ ནཡོ. ཨིདྷ པན ཙེཏིཡསྶ སངྒྷཏོ པཱཔུཎནཀོཊྛཱསོ ནཱམ ནཏྠི, ཨེཀཔུགྒལསྶ པཏྟཀོཊྛཱསསམོཝ ཀོཊྛཱསོ ཧོཏི.

‘‘ཨུབྷཏོསངྒྷསྶ ཙ ཏུཡ྄ཧཉྩ ཙེཏིཡསྶ ཙཱ’’ཏི ཝུཏྟེ པན དྭཱཝཱིསཏི ཀོཊྛཱསེ ཀཏྭཱ དས བྷིཀྑཱུནཾ, དས བྷིཀྑུནཱིནཾ, ཨེཀོ པུགྒལསྶ, ཨེཀོ ཙེཏིཡསྶ དཱཏབྦོ. ཏཏྠ པུགྒལོ སངྒྷཏོཔི ཨཏྟནོ ཝསྶགྒེན པུན གཧེཏུཾ ལབྷཏི. ཙེཏིཡསྶ ཨེཀོཡེཝ.

‘‘བྷིཀྑུསངྒྷསྶ ཙ བྷིཀྑུནཱིནཉྩ དམྨཱི’’ཏི ཝུཏྟེ པན མཛ྄ཛྷེ བྷིནྡིཏྭཱ ན དཱཏབྦཾ, བྷིཀྑཱུ ཙ བྷིཀྑུནིཡོ ཙ གཎེཏྭཱ དཱཏབྦཾ.

‘‘བྷིཀྑུསངྒྷསྶ ¶ ཙ བྷིཀྑུནཱིནཉྩ ཏུཡ྄ཧཉྩཱ’’ཏི ཝུཏྟེ པན པུགྒལོ ཝིསུཾ ¶ ན ལབྷཏི, པཱཔུཎནཊྛཱནཏོ ཨེཀམེཝ ལབྷཏི. ཀསྨཱ? བྷིཀྑུསངྒྷགྒཧཎེན གཧིཏཏྟཱ.

‘‘བྷིཀྑུསངྒྷསྶ ཙ བྷིཀྑུནཱིནཉྩ ཏུཡ྄ཧཉྩ ཙེཏིཡསྶ ཙཱ’’ཏི ཝུཏྟེཔི ཙེཏིཡསྶ ཨེཀཔུགྒལཔཊིཝཱིསོ ལབྦྷཏི, པུགྒལསྶ ཝིསུཾ ན ལབྦྷཏི. ཏསྨཱ ཨེཀཾ ཙེཏིཡསྶ དཏྭཱ ཨཝསེསཾ བྷིཀྑཱུ ཙ བྷིཀྑུནིཡོ ཙ གཎེཏྭཱ བྷཱཛེཏབྦཾ.

‘‘བྷིཀྑཱུནཉྩ བྷིཀྑུནཱིནཉྩ དམྨཱི’’ཏི ཝུཏྟེཔི ན མཛ྄ཛྷེ བྷིནྡིཏྭཱ དཱཏབྦཾ, པུགྒལགཎནཱཡ ཨེཝ ཝིབྷཛིཏབྦཾ.

‘‘བྷིཀྑཱུནཉྩ བྷིཀྑུནཱིནཉྩ ཏུཡ྄ཧཉྩ ཙེཏིཡསྶ ཙཱ’’ཏི ཨེཝཾ ཝུཏྟེཔི ཙེཏིཡསྶ ཨེཀཔུགྒལཔཊིཝཱིསོ ལབྦྷཏི, པུགྒལསྶ ཝིསུཾ ནཏྠི, བྷིཀྑཱུ ཙ བྷིཀྑུནིཡོ ཙ གཎེཏྭཱ ཨེཝ བྷཱཛེཏབྦཾ. ཡཐཱ ཙ བྷིཀྑུསངྒྷཾ ཨཱདིཾ ཀཏྭཱ ནཡོ ནཱིཏོ, ཨེཝཾ བྷིཀྑུནིསངྒྷཾ ཨཱདིཾ ཀཏྭཱཔི ནེཏབྦོ.

‘‘བྷིཀྑུསངྒྷསྶ ཙ ཏུཡ྄ཧཉྩཱ’’ཏི ཝུཏྟེ པུགྒལསྶ ཝིསུཾ ན ལབྦྷཏི, ཝསྶགྒེནེཝ གཧེཏབྦཾ.

‘‘བྷིཀྑུསངྒྷསྶ ཙ ཙེཏིཡསྶ ཙཱ’’ཏི ཝུཏྟེ པན ཙེཏིཡསྶ ཝིསུཾ པཊིཝཱིསོ ལབྦྷཏི.

‘‘བྷིཀྑུསངྒྷསྶ ཙ ཏུཡ྄ཧཉྩ ཙེཏིཡསྶ ཙཱ’’ཏི ཝུཏྟེཔི ཙེཏིཡསྶེཝ ལབྦྷཏི, ན པུགྒལསྶ.

‘‘བྷིཀྑཱུནཉྩ ཏུཡ྄ཧཉྩཱ’’ཏི ཝུཏྟེཔི ཝིསུཾ ན ལབྦྷཏི.

‘‘བྷིཀྑཱུནཉྩ ཙེཏིཡསྶ ཙཱ’’ཏི ཝུཏྟེ པན ཙེཏིཡསྶ ལབྦྷཏི.

‘‘བྷིཀྑཱུནཉྩ ¶ ཏུཡ྄ཧཉྩ ཙེཏིཡསྶ ཙཱ’’ཏི ཝུཏྟེཔི ཙེཏིཡསྶེཝ ཝིསུཾ ལབྦྷཏི, ན པུགྒལསྶ. བྷིཀྑུནིསངྒྷཾ ཨཱདིཾ ཀཏྭཱཔི ཨེཝམེཝ ཡོཛེཏབྦཾ.

པུབྦེ བུདྡྷཔྤམུཁསྶ ཨུབྷཏོསངྒྷསྶ དཱནཾ དེནྟི, བྷགཝཱ མཛ྄ཛྷེ ནིསཱིདཏི, དཀྑིཎཏོ བྷིཀྑཱུ, ཝཱམཏོ བྷིཀྑུནིཡོ ནིསཱིདནྟི, བྷགཝཱ ཨུབྷིནྣཾ སངྒྷཏྠེརོ, ཏདཱ བྷགཝཱ ཨཏྟནོ ལདྡྷཔཙྩཡེ ཨཏྟནཱཔི པརིབྷུཉྫཏི, བྷིཀྑཱུནམྤི དཱཔེཏི. ཨེཏརཧི པན པཎྜིཏམནུསྶཱ སདྷཱཏུཀཾ པཊིམཾ ཝཱ ཙེཏིཡཾ ཝཱ ཋཔེཏྭཱ བུདྡྷཔྤམུཁསྶ ཨུབྷཏོསངྒྷསྶ དཱནཾ དེནྟི, པཊིམཱཡ ཝཱ ¶ ཙེཏིཡསྶ ཝཱ པུརཏོ ཨཱདྷཱརཀེ པཏྟཾ ཋཔེཏྭཱ དཀྑིཎོདཀཾ དཏྭཱ ‘‘བུདྡྷཱནཾ དེམཱ’’ཏི ཏཏྠ ཡཾ པཋམཾ ཁཱདནཱིཡཾ བྷོཛནཱིཡཾ དེནྟི, ཝིཧཱརཾ ཝཱ ཨཱཧརིཏྭཱ ‘‘ཨིདཾ ཙེཏིཡསྶ དེམཱ’’ཏི པིཎྜཔཱཏཉྩ མཱལཱགནྡྷཱདཱིནི ཙ དེནྟི, ཏཏྠ ཀཐཾ པཊིཔཛྫིཏབྦནྟི? མཱལཱགནྡྷཱདཱིནི ཏཱཝ ཙེཏིཡེ ཨཱརོཔེཏབྦཱནི, ཝཏྠེཧི པཊཱཀཱ, ཏེལེན པདཱིཔཱ ཀཱཏབྦཱ. པིཎྜཔཱཏམདྷུཕཱཎིཏཱདཱིནི པན ཡོ ནིབདྡྷཾ ཙེཏིཡསྶ ཛགྒཀོ ཧོཏི པབྦཛིཏོ ཝཱ གཧཊྛོ ཝཱ, ཏསྶ དཱཏབྦཱནི. ནིབདྡྷཛགྒཀེ ཨསཏི ཨཱཧཊཔཏྟཾ ཋཔེཏྭཱ ཝཏྟཾ ཀཏྭཱ པརིབྷུཉྫིཏུཾ ཝཊྚཏི. ཨུཔཀཊྛེ ཀཱལེ བྷུཉྫིཏྭཱ པཙྪཱཔི ཝཏྟཾ ཀཱཏུཾ ཝཊྚཏིཡེཝ.

མཱལཱགནྡྷཱདཱིསུ ཙ ཡཾ ཀིཉྩི ‘‘ཨིདཾ ཧརིཏྭཱ ཙེཏིཡསྶ པཱུཛཾ ཀརོཐཱ’’ཏི ཝུཏྟེ དཱུརམྤི ཧརིཏྭཱ པཱུཛེཏབྦཾ. ‘‘བྷིཀྑཾ སངྒྷསྶ ཧརཱ’’ཏི ཝུཏྟེཔི ཧརིཏབྦཾ. སཙེ པན ‘‘ཨཧཾ པིཎྜཱཡ ཙརཱམི, ཨཱསནསཱལཱཡ བྷིཀྑཱུ ཨཏྠི, ཏེ ཧརིསྶནྟཱི’’ཏི ཝུཏྟེ ‘‘བྷནྟེ, ཏུཡ྄ཧཾཡེཝ དམྨཱི’’ཏི ཝདཏི, བྷུཉྫིཏུཾ ཝཊྚཏི. ཨཐ པན ‘‘བྷིཀྑུསངྒྷསྶ དསྶཱམཱི’’ཏི ཧརནྟསྶ གཙྪཏོ ཨནྟརཱཝ ཀཱལོ ཨུཔཀཊྛོ ཧོཏི, ཨཏྟནོ པཱཔེཏྭཱ བྷུཉྫིཏུཾ ཝཊྚཏི.

༢༧༣༣. ཡཾ པན ཙཱིཝརཾ ‘‘ཡསྨིཾ ཨཱཝཱསེ ཝསྶཾཝུཏྠསྶ སངྒྷསྶ དམྨཱི’’ཏི དེཏི, ཏསྨིཾཡེཝ ཨཱཝཱསེ ཝུཏྠཝསྶེན སངྒྷེན ཝཱ གཎེན ཝཱ པུགྒལེན ཝཱ ཏཾ ཙཱིཝརཾ བྷཱཛེཏབྦནྟི ཝཎྞིཏཾ དེསིཏནྟི ཡོཛནཱ.

ཏཏྲཱཡཾ ཝིནིཙྪཡོ – ཝིཧཱརཾ པཝིསིཏྭཱ ‘‘ཨིམཱནི ཙཱིཝརཱནི ཝསྶཾཝུཏྠསངྒྷསྶ དམྨཱི’’ཏི དེཏི, ཡཱཝཏིཀཱ བྷིཀྑཱུ ཏསྨིཾ ཨཱཝཱསེ ཝསྶཾཝུཏྠཱ, ཡཏྟཀཱ ཝསྶཙྪེདཾ ཨཀཏྭཱ པུརིམཝསྶཾཝུཏྠཱ, ཏེཧི བྷཱཛེཏབྦཾ, ཨཉྙེསཾ ན པཱཔུཎཱཏི. དིསཱཔཀྐནྟསྶཱཔི ¶ སཏི གཱཧཀེ ¶ ཡཱཝ ཀཐིནསྶ ཨུབྦྷཱརཱ དཱཏབྦཾ. ཨནཏྠཏེ པན ཀཐིནེ ཨནྟོཧེམནྟེ ཨེཝཉྩ ཝཏྭཱ དིནྣཾ པཙྪིམཝསྶཾཝུཏྠཱནམྤི པཱཔུཎཱཏཱིཏི ལཀྑཎཉྙཱུ ཝདནྟི. ཨཊྛཀཐཱསུ པནེཏཾ ཨཝིཙཱརིཏཾ.

སཙེ པན བཧི ཨུཔཙཱརསཱིམཱཡཾ ཋིཏོ ‘‘ཝསྶཾཝུཏྠསངྒྷསྶ དམྨཱི’’ཏི ཝདཏི, སམྤཏྟཱནཾ སབྦེསཾ པཱཔུཎཱཏི. ཨཐ ‘‘ཨསུཀཝིཧཱརེ ཝསྶཾཝུཏྠསངྒྷསྶཱ’’ཏི ཝདཏི, ཏཏྲ ཝསྶཾཝུཏྠཱནམེཝ ཡཱཝ ཀཐིནསྶུབྦྷཱརཱ པཱཔུཎཱཏི. སཙེ པན གིམྷཱནཾ པཋམདིཝསཏོ པཊྛཱཡ ཨེཝཾ ཝདཏི, ཏཏྲ སམྨུཁཱིབྷཱུཏཱནཾཡེཝ སབྦེསཾ པཱཔུཎཱཏི. ཀསྨཱ? པིཊྛིསམཡེ ཨུཔྤནྣཏྟཱ. ཨནྟོཝསྶེཡེཝ ‘‘ཝསྶཾ ཝསནྟཱནཾ དམྨཱི’’ཏི ཝུཏྟེ ཚིནྣཝསྶཱ ན ལབྷནྟི, ཝསྶཾ ཝསནྟཱཝ ལབྷནྟི. ཙཱིཝརམཱསེ པན ‘‘ཝསྶཾ ཝསནྟཱནཾ དམྨཱི’’ཏི ཝུཏྟེ པཙྪིམིཀཱཡ ཝསྶཱུཔགཏཱནཾཡེཝ པཱཔུཎཱཏི, པུརིམིཀཱཡ ཝསྶཱུཔགཏཱནཉྩ ཚིནྣཝསྶཱནཉྩ ན པཱཔུཎཱཏི.

ཙཱིཝརམཱསཏོ པཊྛཱཡ ཡཱཝ ཧེམནྟསྶ པཙྪིམོ དིཝསོ, ཏཱཝ ‘‘ཝསྶཱཝཱསིཀཾ དེམཱ’’ཏི ཝུཏྟེ ཀཐིནཾ ཨཏྠཏཾ ཝཱ ཧོཏུ ཨནཏྠཏཾ ཝཱ, ཨཏཱིཏཝསྶཾཝུཏྠཱནམེཝ པཱཔུཎཱཏི. གིམྷཱནཾ པཋམདིཝསཏོ པཊྛཱཡ ཝུཏྟེ པན མཱཏིཀཱ ཨཱརོཔེཏབྦཱ ‘‘ཨཏཱིཏཝསྶཱཝཱསསྶ པཉྩ མཱསཱ ཨབྷིཀྐནྟཱ, ཨནཱགཏེ ཙཱཏུམཱསཙྩཡེན བྷཝིསྶཏི, ཀཏརཝསྶཱཝཱསསྶ དེསཱི’’ཏི. སཙེ ‘‘ཨཏཱིཏཝསྶཾཝུཏྠཱནཾ དམྨཱི’’ཏི ཝདཏི, ཏཾ ཨནྟོཝསྶཾ ཝུཏྠཱནམེཝ པཱཔུཎཱཏི. དིསཱཔཀྐནྟཱནམྤི སབྷཱགཱ གཎྷིཏུཾ ལབྷནྟི.

སཙེ ‘‘ཨནཱགཏེ ཝསྶཱཝཱསིཀཾ དམྨཱི’’ཏི ཝདཏི, ཏཾ ཋཔེཏྭཱ ཝསྶཱུཔནཱཡིཀདིཝསེ གཧེཏབྦཾ. ཨཐ ‘‘ཨགུཏྟོ ཝིཧཱརོ, ཙོརབྷཡཾ ཨཏྠི, ན སཀྐཱ ཋཔེཏུཾ, གཎྷིཏྭཱ ཝཱ ཨཱཧིཎྜིཏུ’’ནྟི ¶ ཝུཏྟེ ‘‘སམྤཏྟཱནཾ དམྨཱི’’ཏི ཝདཏི, བྷཱཛེཏྭཱ གཧེཏབྦཾ. སཙེ ཝདཏི ‘‘ཨིཏོ མེ, བྷནྟེ, ཏཏིཡེ ཝསྶེ ཝསྶཱཝཱསིཀཾ ན དིནྣཾ, ཏཾ དམྨཱི’’ཏི, ཏསྨིཾ ཨནྟོཝསྶེ ཝུཏྠབྷིཀྑཱུནཾ པཱཔུཎཱཏི. སཙེ ཏེ དིསཱཔཀྐནྟཱ, ཨཉྙོ ཝིསྶཱསིཀོ གཎྷཱཏི, དཱཏབྦཾ. ཨཐ ཨེཀོཡེཝ ཨཝསིཊྛོ, སེསཱ ཀཱལཀཏཱ, སབྦཾ ཨེཀསྶེཝ པཱཔུཎཱཏི. སཙེ ཨེཀོཔི ནཏྠི, སངྒྷིཀཾ ཧོཏི, སམྨུཁཱིབྷཱུཏེཧི བྷཱཛེཏབྦནྟི.

༢༧༣༤. ཡཱགུཡཱ པན པཱིཏཱཡ ཝཱ བྷཏྟེ ཝཱ བྷུཏྟེ སཙེ པན ཨཱདིསྶ ‘‘ཡེན མེ ཡཱགུ པཱིཏཱ, ཏསྶ དམྨི, ཡེན མེ བྷཏྟཾ བྷུཏྟཾ, ཏསྶ དམྨཱི’’ཏི པརིཙྪིནྡིཏྭཱ ཙཱིཝརཾ དེཏི, ཝིནཡདྷརེན ¶ ཏཏྠ ཏཏྠེཝ དཱནཾ དཱཏབྦནྟི ཡོཛནཱ. ཨེས ནཡོ ཁཱདནཱིཡཙཱིཝརསེནཱསནབྷེསཛྫཱདཱིསུ.

ཏཏྲཱཡཾ ཝིནིཙྪཡོ – བྷིཀྑཱུ ཨཛྫཏནཱཡ ཝཱ སྭཱཏནཱཡ ཝཱ ཡཱགུཡཱ ནིམནྟེཏྭཱ ཏེསཾ གྷརཾ པཝིཊྛཱནཾ ཡཱགུཾ དེཏི, ཡཱགུཾ དཏྭཱ པཱིཏཱཡ ཡཱགུཡཱ ‘‘ཨིམཱནི ཙཱིཝརཱནི ཡེཧི མཡ྄ཧཾ ཡཱགུ པཱིཏཱ, ཏེསཾ དམྨཱི’’ཏི དེཏི, ཡེཧི ནིམནྟིཏེཧི ཡཱགུ པཱིཏཱ, ཏེསཾཡེཝ པཱཔུཎནྟི, ཡེཧི པན བྷིཀྑཱཙཱརཝཏྟེན གྷརདྭཱརེན གཙྪནྟེཧི ཝཱ གྷརཾ པཝིཊྛེཧི ཝཱ ཡཱགུ ལདྡྷཱ, ཡེསཾ ཝཱ ཨཱསནསཱལཏོ པཏྟཾ ཨཱཧརིཏྭཱ མནུསྶེཧི ནཱིཏཱ, ཡེ ཝཱ ཐེརེཧི པེསིཏཱ, ཏེསཾ ན པཱཔུཎནྟི.

སཙེ པན ནིམནྟིཏབྷིཀྑཱུཧི སདྡྷིཾ ཨཉྙེཔི བཧཱུ ཨཱགནྟྭཱ ཨནྟོགེཧཉྩ བཧིགེཧཉྩ པཱུརེཏྭཱ ནིསིནྣཱ, དཱཡཀོ ཙ ཨེཝཾ ཝདཏི ‘‘ནིམནྟིཏཱ ཝཱ ཧོནྟུ ཨནིམནྟིཏཱ ཝཱ, ཡེསཾ མཡཱ ཡཱགུ དིནྣཱ, སབྦེསཾ ཨིམཱནི ཝཏྠཱནི ཧོནྟཱུ’’ཏི, སབྦེསཾ པཱཔུཎནྟི. ཡེཧི པན ཐེརཱནཾ ཧཏྠཏོ ཡཱགུ ¶ ལདྡྷཱ, ཏེསཾ ན པཱཔུཎནྟི. ཨཐ སོ ‘‘ཡེཧི མཡ྄ཧཾ ཡཱགུ པཱིཏཱ, སབྦེསཾ ཧོནྟཱུ’’ཏི ཝདཏི, སབྦེསཾ པཱཔུཎནྟི. བྷཏྟཁཱདནཱིཡེསུཔི ཨེསེཝ ནཡོ.

ཙཱིཝརེ ཝཱཏི པུབྦེཔི ཡེན ཝསྶཾ ཝཱསེཏྭཱ བྷིཀྑཱུནཾ ཙཱིཝརཾ དིནྣཔུབྦཾ ཧོཏི, སོ ཙེ བྷིཀྑཱུ བྷོཛེཏྭཱ ཝདཏི ‘‘ཡེསཾ མཡཱ པུབྦེ ཙཱིཝརཾ དིནྣཾ, ཏེསཾཡེཝ ཨིམཾ ཙཱིཝརཾ ཝཱ སུཏྟཾ ཝཱ སཔྤིམདྷུཕཱཎིཏཱདཱིནི ཝཱ ཧོནྟཱུ’’ཏི, སབྦཾ ཏེསཾཡེཝ པཱཔུཎཱཏི.

སེནཱསནེ ཝཱཏི ‘‘ཡོ མཡཱ ཀཱརིཏེ ཝིཧཱརེ ཝཱ པརིཝེཎེ ཝཱ ཝསཏི, ཏསྶིདཾ ཧོཏཱུ’’ཏི ཝུཏྟེ ཏསྶེཝ ཧོཏི.

བྷེསཛྫེ ཝཱཏི ‘‘མཡཾ ཀཱལེན ཀཱལཾ ཐེརཱནཾ སཔྤིཨཱདཱིནི བྷེསཛྫཱནི དེམ, ཡེཧི ཏཱནི ལདྡྷཱནི, ཏེསཾཡེཝིདཾ ཧོཏཱུ’’ཏི ཝུཏྟེ ཏེསཾཡེཝ ཧོཏཱིཏི.

༢༧༣༥. དཱིཡཏེཏི དཱནནྟི ཀམྨསཱདྷནེན ཙཱིཝརཾ ཝུཙྩཏི. ཡཾ-སདྡེན ཙཱིཝརསྶ པརཱམཊྛཏྟཱ ཏཾ-སདྡེནཱཔི ཏདེཝ པརཱམསིཏབྦནྟི.

ཏཏྲཱཡཾ ཝིནིཙྪཡོ – ‘‘ཨིམཾ ¶ ཙཱིཝརཾ ཨིཏྠནྣཱམསྶ དམྨཱི’’ཏི ཨེཝཾ པརམྨུཁཱ ཝཱ ‘‘ཨིདཾ མེ, བྷནྟེ, ཏུམྷཱཀཾ དམྨཱི’’ཏི ཨེཝཾ སམྨུཁཱ ཝཱ པཱདམཱུལེ ཋཔེཏྭཱ ཝཱ དེཏི, ཏཾ ཏསྶེཝ ཧོཏི. སཙེ པན ‘‘ཨིདཾ ཏུམྷཱཀཉྩ ཏུམྷཱཀཾ ཨནྟེཝཱསིཀཱནཉྩ དམྨཱི’’ཏི ཨེཝཾ ཝདཏི, ཐེརསྶ ཙ ཨནྟེཝཱསིཀཱནཉྩ པཱཔུཎཱཏི. ཨུདྡེསཾ གཧེཏུཾ ཨཱགཏོ གཧེཏྭཱ གཙྪནྟོ ཙ ཨཏྠི, ཏསྶཱཔི པཱཔུཎཱཏི. ‘‘ཏུམྷེཧི སདྡྷིཾ ནིབདྡྷཙཱརིཀབྷིཀྑཱུནཾ དམྨཱི’’ཏི ཝུཏྟེ ཨུདྡེསནྟེཝཱསིཀཱནཾ ཝཏྟཾ ཀཏྭཱ ཨུདྡེསཔརིཔུཙྪཱདཱིནི གཧེཏྭཱ ཝིཙརནྟཱནཾ སབྦེསཾ པཱཔུཎཱཏཱིཏི.

༢༧༣༧. ཝདཏིཙྩེཝམེཝ ¶ ཙེཏི ཨིཙྩེཝཾ ཡཐཱཝུཏྟནཡེན ཝདཏི ཙེ. ཏནྟི ཏཾ པརིཀྑཱརཾ. ཏེསནྟི མཱཏུཨཱདཱིནཾ. སངྒྷསྶེཝ སནྟཀཾ ཧོཏཱིཏི ཡོཛནཱ.

༢༧༣༨. ‘‘པཉྩནྣཾ…པེ… ཧོཏཱི’’ཏི ཨིམིནཱ པུརིམགཱཐཱདྭཡེན ཝིཏྠཱརིཏམེཝཏྠཾ སཾཁིཔིཏྭཱ དསྶེཏི. པཉྩནྣཾ སཧདྷམྨིཀཱནཾ. ཨཙྩཡེཏི ཀཱལཀིརིཡཱཡ. དཱནནྟི ‘‘མཡི ཀཱལཀཏེ ཨིམཾ པརིཀྑཱརཾ ཏུཡ྄ཧཾ ཧོཏུ, ཏཝ སནྟཀཾ ཀརོཧཱི’’ཏིཨཱདིནཱ པརིཙྩཛནཾ. ཀིཉྩིཔཱིཏི ཨནྟམསོ དནྟཀཊྛམྤི. གིཧཱིནཾ པན དཱནཾ ཏཐཱ དཱཡཀཱནཾ གིཧཱིནམེཝ ཨཙྩཡེ རཱུཧཏཱིཏི ཡོཛནཱ.

༢༧༣༩. བྷིཀྑུ ཝཱ སཱམཎེརོ ཝཱ བྷིཀྑུནིཨུཔསྶཡེ ཀཱལཾ ཀརོཏི, ཨསྶ བྷིཀྑུསྶ ཝཱ སཱམཎེརསྶ ཝཱ པརིཀྑཱརཱ བྷིཀྑཱུནཾཡེཝ སནྟཀཱ བྷིཀྑུསངྒྷསྶེཝ སནྟཀཱཏི ཡོཛནཱ. བྷིཀྑུསངྒྷསྶེཝ སནྟཀཱ ཀཱལཀཏསྶ བྷིཀྑུསངྒྷཔརིཡཱཔནྣཏྟཱ.

༢༧༤༠. སཱམཎེརཱི ཝཱཏི ཨེཏྠ ཝཱ-སདྡེན ‘‘སིཀྑམཱནཱ ཝཱ’’ཏི ཨིདཾ སངྒཎྷཱཏི. ཝིཧཱརསྨིཾ བྷིཀྑཱུནཾ ནིཝཱསནཊྛཱནེ. ཏསྶཱཏི བྷིཀྑུནིཡཱ ཝཱ སཱམཎེརིཡཱ ཝཱ སིཀྑམཱནཱཡ ཝཱ པརིཀྑཱརཱ བྷིཀྑུནཱིནཾ སནྟཀཱ ཧོནྟཱིཏི ཡོཛནཱ. སནྟཀཱཏི ཨེཏྠཱཔི བྷིཀྑཱུསུ ཝུཏྟནཡེནེཝཏྠོ གཧེཏབྦོ.

༢༧༤༡. དེཧི ནེཏྭཱཏི ཨེཏྠ ‘‘ཨིམཾ ཙཱིཝར’’ནྟི པཀརཎཏོ ལབྦྷཏི. ‘‘ཨིམཾ ཙཱིཝརཾ ནེཏྭཱ ཨསུཀསྶ དེཧཱི’’ཏི ཡཾ ཙཱིཝརཾ དིནྣཾ, ཏཾ ཏསྶ པུརིམསྶེཝ སནྟཀཾ ཧོཏི. ‘‘ཨིདཾ ཙཱིཝརཾ ¶ ཨསུཀསྶ དམྨཱི’’ཏི ཡཾ ཙཱིཝརཾ དིནྣཾ, ཏཾ ཡསྶ པཧིཡྻཏི, ཏསྶ པཙྪིམསྶེཝ སནྟཀཾ ཧོཏཱིཏི ཡོཛནཱ.

༢༧༤༢. ཡཐཱཝུཏྟཝཙནཔྤཀཱརཱནུརཱུཔེན ¶ སཱམིཀེ ཉཏྭཱ སཱམིཀེསུ ཝིསྶཱསེན ཝཱ ཏེསུ མཏེསུ མཏཀཙཱིཝརམྤི གཎྷིཏུཾ ཝཊྚཏཱིཏི དསྶེཏུཾ ཨཱཧ ‘‘ཨེཝ’’ནྟིཨཱདི. ‘‘མཏསྶ ཝཱ ཨམཏསྶ ཝཱ’’ཏི པདཙྪེདོ. ཝིསྶཱསཾ ཝཱཔི གཎྷེཡྻཱཏི ཛཱིཝནྟསྶ སནྟཀཾ ཝིསྶཱསགྒཱཧཾ གཎྷེཡྻ. གཎྷེ མཏཀཙཱིཝརནྟི མཏསྶ ཙཱིཝརཾ མཏཀཔརིཀྑཱརནཱིཧཱརེན པཱཔེཏྭཱ གཎྷེཡྻ.

༢༧༤༣. རཛཏེ ཨནེནཱཏི རཛནནྟི མཱུལཱདིསབྦམཱཧ. ཝནྟདོསེནཱཏི སཝཱསནསམུཙྪིནྣརཱགཱདིདོསེན. ཏཱདིནཱཏི རཱུཔཱདཱིསུ ཚལཱ༹རམྨཎེསུ རཱགཱདཱིནཾ ཨནུཔྤཏྟིཡཱ ཨཊྛསུ ལོཀདྷམྨེསུ ནིབྦིཀཱརཏཱཡ ཨེཀསདིསེན.

༢༧༤༤-༥. ‘‘མཱུལེ’’ཏིཨཱདཱིསུ ནིདྡྷཱརཎེ བྷུམྨཾ. མཱུལརཛནེ ཧལིདྡིཾ ཋཔེཏྭཱ སབྦཾ མཱུལརཛནཾ ཝཊྚཏི. ཁནྡྷེསུ རཛནེསུ མཉྫེཊྛཉྩ ཏུངྒཧཱརཀཉྩ ཋཔེཏྭཱ སབྦཾ ཁནྡྷརཛནཾ ཝཊྚཏི. པཏྟེསུ རཛནེསུ ཨལླིཡཱ པཏྟཾ ཏཐཱ ནཱིལིཡཱ པཏྟཉྩ ཋཔེཏྭཱ སབྦཾ པཏྟརཛནཾ ཝཊྚཏི. པུཔྥརཛནེསུ ཀུསུམྦྷཉྩ ཀིཾསུཀཉྩ ཋཔེཏྭཱ སབྦཾ པུཔྥརཛནཾ ཝཊྚཏི. ཏཙརཛནེ ལོདྡཉྩ ཀཎྜུལཉྩ ཋཔེཏྭཱ སབྦཾ ཏཙརཛནཾ ཝཊྚཏི. ཕལརཛནཾ སབྦམྤི ཝཊྚཏཱིཏི ཡོཛནཱ.

མཉྫེཊྛནྟི ཨེཀོ སཀཎྚཀརུཀྑོ, ཝལླིཝིསེསོ ཙ, ཡསྶ རཛནཾ མཉྫེཊྛབཱིཛཝཎྞཾ ཧོཏི. མཉྫེཊྛརུཀྑསྶ ཁནྡྷོ སེཏཝཎྞོཏི སོ ཨིདྷ ན གཧེཏབྦོ རཛནཱདྷིཀཱརཏྟཱ. ཏུངྒཧཱརཀོ ནཱམ ཨེཀོ སཀཎྚཀརུཀྑོ, ཡསྶ རཛནཾ ཧརིཏཱལཝཎྞཾ ཧོཏི. ཨལླཱིཏི ཙུལླཏཱཔིཉྪརུཀྑོ, ཡསྶ པཎྞརཛནཾ ཧལིདྡིཝཎྞཾ ཧོཏི. ནཱིལཱིཏི གཙྪཝིསེསོ, ཡསྶ པན རཛནཾ ནཱིལཝཎྞཾ ཧོཏི. ཀིཾསུཀཾ ནཱམ ཝལླིཀིཾསུཀཔུཔྥཾ, ཡསྶ རཛནཾ ལོཧིཏཝཎྞཾ ཧོཏི.

༢༧༤༦. ཀིལིཊྛསཱཊཀནྟི ¶ མལཱིནསཱཊཀཾ. དྷོཝིཏུནྟི ཨེཀཝཱརཾ དྷོཝིཏུཾ. ཨལླིཡཱ དྷོཏཾ ཀིར སམྨདེཝ རཛནཾ པཊིགྒཎྷཱཏི.

༢༧༤༧. ཙཱིཝརཱནཾ ¶ ཀཐཱ སེསཱཏི བྷེདཀཱརཎཔྤཀཱརཀཐཱདིཀཱ ཨིདྷ ཨཝུཏྟཀཐཱ. པཋམེ ཀཐིནེ ཝུཏྟཱཏི སེསོ. ཝིབྷཱཝིནཱཏི ཁནྡྷཀབྷཱཎཀེན.

ཙཱིཝརཀྑནྡྷཀཀཐཱཝཎྞནཱ.

ཨིཏི ཝིནཡཏྠསཱརསནྡཱིཔནིཡཱ ཝིནཡཝིནིཙྪཡཝཎྞནཱཡ

མཧཱཝགྒཝིནིཙྪཡཝཎྞནཱ ནིཊྛིཏཱ.

ཙཱུལ༹ཝགྒོ

པཱརིཝཱསིཀཀྑནྡྷཀཀཐཱཝཎྞནཱ

༢༧༤༨. ཨེཝཾ ¶ ¶ མཧཱཝགྒཝིནིཙྪཡཾ སངྑེཔེན དསྶེཏྭཱ ཙཱུལ༹ཝགྒཱགཏཝིནིཙྪཡཾ དསྶེཏུམཱཧ ‘‘ཏཛྫནཱིཡ’’ནྟིཨཱདི. ཏཛྫནཱིཡནྟི ཀལཧཀཱརཀཱནཾ བྷིཀྑཱུནཾ ཏཏོ ཝིརམནཏྠཱཡ ནིགྒཧཝསེན ཨནུཉྙཱཏཾ ཉཏྟིཙཏུཏྠཾ ཏཛྫནཱིཡཀམྨཉྩ. ནིཡསྶནྟི བཱལསྶ ཨབྱཏྟསྶ ཨཱཔཏྟིབཧུལསྶ ཨནཔདཱནསྶ ཨནནུལོམིཀེཧི གིཧིསཾསགྒེཧི སཾསཊྛསྶ ཝིཧརཏོ བྷིཀྑུནོ ནིགྒཧཝསེན ནིསྶཱཡ ཝསནཏྠཱཡ ཀཱཏུཾ ཨནུཉྙཱཏཾ ཉཏྟིཙཏུཏྠཾ ནིཡསྶཀམྨཉྩ.

པབྦཱཛནྟི ཀུལདཱུསཀསྶ བྷིཀྑུནོ ཡཏྠ ཏེན ཀུལདཱུསནཾ ཀཏཾ, ཏཏྠ ན ལབྷིཏབྦཨཱཝཱསཏྠཱཡ ནིགྒཧཝསེན ཨནུཉྙཱཏཾ ཉཏྟིཙཏུཏྠཾ པབྦཱཛནཱིཡཀམྨཉྩ. པཊིསཱརཎནྟི སདྡྷསྶ ཨུཔཱསཀསྶ དཱཡཀསྶ ཀཱརཀསྶ སངྒྷུཔཊྛཱཀསྶ ཛཱཏིཨཱདཱིཧི ཨཀྐོསཝཏྠཱུཧི ཨཀྐོསཀསྶ བྷིཀྑུནོ ཏཾཁམཱཔནཏྠཱཡ ནིགྒཧཝསེན ཨནུཉྙཱཏཾ ཉཏྟིཙཏུཏྠཾ པཊིསཱརཎཱིཡཀམྨཉྩ.

ཏིཝིདྷུཀྑེཔནནྟི ཨཱཔཏྟིཡཱ ཨདསྶནེ, ཨཱཔཏྟིཡཱ ཨཔྤཊིཀམྨེ, པཱཔིཀཱཡ དིཊྛིཡཱ ཨཔྤཊིནིསྶགྒེ ཙ ཏཏོ ཨོརམིཏུཾ ནིགྒཧཝསེན ཨནུཉྙཱཏཾ ཉཏྟིཙཏུཏྠཾ ཏིཝིདྷཾ ཨུཀྑེཔནཱིཡཀམྨཉྩཱཏི. དཱིཔཡེཏི པཱལི༹ཡཱ, ཨཊྛཀཐཱཡ ཙ ཝུཏྟནཡེན པཀཱསེཡྻཱཏི ཨཏྠོ.

ཏཛྫནཱིཡཱདིཀམྨཱནཾ ཨོསཱརཎནིསྶཱརཎཝསེན པཙྩེཀཾ དུཝིདྷཏྟེཔི ཏཾ བྷེདཾ ཨནཱམསིཏྭཱ ཀེཝལཾ ¶ ཛཱཏིཝསེན ‘‘སཏྟ ཀམྨཱནཱི’’ཏི ཝུཏྟནྟི ཝེདིཏབྦཾ. ཡཐཱ དསྶིཏོ པནེཏེསཾ ¶ ཝིསེསོ ཨཏྠུཔྤཏྟིཝསེནཱཏི དཊྛབྦོ. ཝིཏྠཱརོ པནེསཾ ཀམྨཀྑནྡྷཀཏོ ཝེདིཏབྦོ.

༢༧༤༩. ཁནྡྷཀེ ཀམྨསངྑཱཏེ ཁནྡྷཀེ ཨཱགཏཱནི ཏེཙཏྟཱལཱིས ཝཏྟཱནི. ཏདནནྟརེཏི ཏསྶ ཀམྨཀྑནྡྷཀསྶ ཨནནྟརེ. ཁནྡྷཀེཏི པཱརིཝཱསིཀཀྑནྡྷཀེ. ནཝ ཨདྷིཀཱནི ཡེསཾ ཏེ ནཝཱདྷིཀཱནི ཏིཾསེཝ ཝཏྟཱནི, ཨེཀཱུནཙཏྟཱལཱིས ཝཏྟཱནཱིཏི ཝུཏྟཾ ཧོཏི.

ཀམྨཀྑནྡྷཀེ ཏཱཝ –

‘‘ཨཱཔཏྟིཡཱ ཨདསྶནེ ཨུཀྑེཔནཱིཡཀམྨཀཏེན, བྷིཀྑཝེ, བྷིཀྑུནཱ སམྨཱ ཝཏྟིཏབྦཾ. ཏཏྲཱཡཾ སམྨཱཝཏྟནཱ – ན ཨུཔསམྤཱདེཏབྦཾ, ན ནིསྶཡོ དཱཏབྦོ, ན སཱམཎེརོ ཨུཔཊྛཱཔེཏབྦོ, ན བྷིཀྑུནོཝཱདཀསམྨུཏི སཱདིཏབྦཱ, སམྨཏེནཱཔི བྷིཀྑུནིཡོ ན ཨོཝདིཏབྦཱ, ཡཱཡ ཨཱཔཏྟིཡཱ སངྒྷེན ཨཱཔཏྟིཡཱ ཨདསྶནེ ཨུཀྑེཔནཱིཡཀམྨཾ ཀཏཾ ཧོཏི, སཱ ཨཱཔཏྟི ན ཨཱཔཛྫིཏབྦཱ, ཨཉྙཱ ཝཱ ཏཱདིསིཀཱ, ཏཏོ ཝཱ པཱཔིཊྛཏརཱ, ཀམྨཾ ན གརཧིཏབྦཾ, ཀམྨིཀཱ ན གརཧིཏབྦཱ, ན པཀཏཏྟསྶ བྷིཀྑུནོ ཨབྷིཝཱདནཾ པཙྩུཊྛཱནཾ ཨཉྫལིཀམྨཾ སཱམཱིཙིཀམྨཾ ཨཱསནཱབྷིཧཱརོ སེཡྻཱབྷིཧཱརོ པཱདོདཀཾ པཱདཔཱིཋཾ པཱདཀཐལིཀཾ པཏྟཙཱིཝརཔཊིགྒཧཎཾ ནཧཱནེ པིཊྛིཔརིཀམྨཾ སཱདིཏབྦཾ, ན པཀཏཏྟོ བྷིཀྑུ སཱིལཝིཔཏྟིཡཱ ཨནུདྡྷཾསེཏབྦོ, ན ཨཱཙཱརཝིཔཏྟིཡཱ ཨནུདྡྷཾསེཏབྦོ, ན དིཊྛིཝིཔཏྟིཡཱ ཨནུདྡྷཾསེཏབྦོ, ན ཨཱཛཱིཝཝིཔཏྟིཡཱ ཨནུདྡྷཾསེཏབྦོ, ན བྷིཀྑུ བྷིཀྑཱུཧི བྷེདེཏབྦོ, ན གིཧིདྡྷཛོ དྷཱརེཏབྦོ, ན ཏིཏྠིཡདྡྷཛོ དྷཱརེཏབྦོ, ན ཏིཏྠིཡཱ སེཝིཏབྦཱ, བྷིཀྑཱུ སེཝིཏབྦཱ, བྷིཀྑུསིཀྑཱཡ ¶ སིཀྑིཏབྦཾ, ན པཀཏཏྟེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ཝཏྠབྦཾ, ན ཨེཀཙྪནྣེ ཨནཱཝཱསེ ཝཏྠབྦཾ, ན ཨེཀཙྪནྣེ ཨཱཝཱསེ ཝཱ ཨནཱཝཱསེ ཝཱ ཝཏྠབྦཾ, པཀཏཏྟཾ བྷིཀྑུཾ དིསྭཱ ཨཱསནཱ ཝུཊྛཱཏབྦཾ, ན པཀཏཏྟོ བྷིཀྑུ ཨཱསཱདེཏབྦོ ཨནྟོ ཝཱ བཧི ཝཱ, ན པཀཏཏྟསྶ བྷིཀྑུནོ ཨུཔོསཐོ ཋཔེཏབྦོ, ན པཝཱརཎཱ ཋཔེཏབྦཱ, ན སཝཙནཱིཡཾ ཀཱཏབྦཾ, ན ཨནུཝཱདོ པཊྛཔེཏབྦོ, ན ཨོཀཱསོ ཀཱརེཏབྦོ, ན ཙོདེཏབྦོ, ན སཱརེཏབྦོ, ན བྷིཀྑཱུཧི སམྤཡོཛེཏབྦ’’ནྟི (ཙཱུལ༹ཝ. ༥༡) –

ཨེཝཾ ¶ ཙེཏཱནི ཏེཙཏྟཱལཱིས ཝཏྟཱནི སནྡྷཱཡ ཝུཏྟཾ ‘‘ཏེཙཏྟཱལཱིས ཝཏྟཱནི, ཁནྡྷཀེ ཀམྨསཉྙིཏེ’’ཏི.

པཱརིཝཱསིཀཀྑནྡྷཀེ (ཙཱུལ༹ཝ. ༧༦-༨༢) –

‘‘པཱརིཝཱསིཀེན, བྷིཀྑཝེ, བྷིཀྑུནཱ སམྨཱ ཝཏྟིཏབྦཾ. ཏཏྲཱཡཾ སམྨཱཝཏྟནཱ – ན ཨུཔསམྤཱདེཏབྦཾ, ན ནིསྶཡོ དཱཏབྦོ, ན སཱམཎེརོ ཨུཔཊྛཱཔེཏབྦོ, ན བྷིཀྑུནོཝཱདཀསམྨུཏི སཱདིཏབྦཱ, སམྨཏེནཔི བྷིཀྑུནིཡོ ན ཨོཝདིཏབྦཱ, ཡཱཡ ཨཱཔཏྟིཡཱ སངྒྷེན པརིཝཱསོ དིནྣོ ཧོཏི, སཱ ཨཱཔཏྟི ན ཨཱཔཛྫིཏབྦཱ, ཨཉྙཱ ཝཱ ཏཱདིསིཀཱ, ཏཏོ ཝཱ པཱཔིཊྛཏརཱ, ཀམྨཾ ན གརཧིཏབྦཾ, ཀམྨིཀཱ ན གརཧིཏབྦཱ, ན པཀཏཏྟསྶ བྷིཀྑུནོ ཨུཔོསཐོ ཋཔེཏབྦོ, ན པཝཱརཎཱ ཋཔེཏབྦཱ, ན སཝཙནཱིཡཾ ཀཱཏབྦཾ, ན ཨནུཝཱདོ པཊྛཔེཏབྦོ, ན ཨོཀཱསོ ཀཱརེཏབྦོ, ན ཙོདེཏབྦོ, ན སཱརེཏབྦོ, ན བྷིཀྑཱུཧི སམྤཡོཛེཏབྦཾ.

‘‘ན ¶ , བྷིཀྑཝེ, པཱརིཝཱསིཀེན བྷིཀྑུནཱ པཀཏཏྟསྶ བྷིཀྑུནོ པུརཏོ གནྟབྦཾ, ན པུརཏོ ནིསཱིདིཏབྦཾ, ཡོ ཧོཏི སངྒྷསྶ ཨཱསནཔརིཡནྟོ སེཡྻཱཔརིཡནྟོ ཝིཧཱརཔརིཡནྟོ, སོ ཏསྶ པདཱཏབྦོ, ཏེན ཙ སོ སཱདིཏབྦོ.

‘‘ན, བྷིཀྑཝེ, པཱརིཝཱསིཀེན བྷིཀྑུནཱ པཀཏཏྟསྶ བྷིཀྑུནོ པུརེསམཎེན ཝཱ པཙྪཱསམཎེན ཝཱ ཀུལཱནི ཨུཔསངྐམིཏབྦཱནི, ན ཨཱརཉྙིཀངྒཾ སམཱདཱཏབྦཾ, ན པིཎྜཔཱཏིཀངྒཾ སམཱདཱཏབྦཾ, ན ཙ ཏཔྤཙྩཡཱ པིཎྜཔཱཏོ ནཱིཧརཱཔེཏབྦོ ‘མཱ མཾ ཛཱནིཾསཱུ’ཏི.

‘‘པཱརིཝཱསིཀེན, བྷིཀྑཝེ, བྷིཀྑུནཱ ཨཱགནྟུཀེན ཨཱརོཙེཏབྦཾ, ཨཱགནྟུཀསྶ ཨཱརོཙེཏབྦཾ, ཨུཔོསཐེ ཨཱརོཙེཏབྦཾ, པཝཱརཎཱཡ ཨཱརོཙེཏབྦཾ, སཙེ གིལཱནོ ཧོཏི, དཱུཏེནཔི ཨཱརོཙེཏབྦཾ.

‘‘ན ¶ , བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཨབྷིཀྑུཀོ ཨཱཝཱསོ གནྟབྦོ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ.

‘‘ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཨབྷིཀྑུཀོ ཨནཱཝཱསོ གནྟབྦོ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ. ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཨབྷིཀྑུཀོ ཨཱཝཱསོ ཝཱ ཨནཱཝཱསོ ཝཱ གནྟབྦོ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ.

‘‘ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨནཱཝཱསཱ ཨབྷིཀྑུཀོ ཨཱཝཱསོ གནྟབྦོ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ. ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨནཱཝཱསཱ ཨབྷིཀྑུཀོ ¶ ཨནཱཝཱསོ གནྟབྦོ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ. ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨནཱཝཱསཱ ཨབྷིཀྑུཀོ ཨཱཝཱསོ ཝཱ ཨནཱཝཱསོ ཝཱ གནྟབྦོ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ.

‘‘ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཝཱ ཨནཱཝཱསཱ ཝཱ ཨབྷིཀྑུཀོ ཨཱཝཱསོ གནྟབྦོ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ. ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཝཱ ཨནཱཝཱསཱ ཝཱ ཨབྷིཀྑུཀོ ཨནཱཝཱསོ གནྟབྦོ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ. ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཝཱ ཨནཱཝཱསཱ ཝཱ ཨབྷིཀྑུཀོ ཨཱཝཱསོ ཝཱ ཨནཱཝཱསོ ཝཱ གནྟབྦོ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ.

‘‘ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ སབྷིཀྑུཀོ ཨཱཝཱསོ གནྟབྦོ ཡཏྠསྶུ བྷིཀྑཱུ ནཱནཱསཾཝཱསཀཱ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ. ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ སབྷིཀྑུཀོ ཨནཱཝཱསོ གནྟབྦོ ཡཏྠསྶུ བྷིཀྑཱུ ནཱནཱསཾཝཱསཀཱ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ. ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ སབྷིཀྑུཀོ ཨཱཝཱསོ ¶ ཝཱ ཨནཱཝཱསོ ཝཱ གནྟབྦོ ཡཏྠསྶུ བྷིཀྑཱུ ནཱནཱསཾཝཱསཀཱ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ.

‘‘ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨནཱཝཱསཱ སབྷིཀྑུཀོ ཨཱཝཱསོ གནྟབྦོ ཡཏྠསྶུ ¶ བྷིཀྑཱུ ནཱནཱསཾཝཱསཀཱ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ. ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨནཱཝཱསཱ སབྷིཀྑུཀོ ཨནཱཝཱསོ གནྟབྦོ ཡཏྠསྶུ བྷིཀྑཱུ ནཱནཱསཾཝཱསཀཱ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ. ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨནཱཝཱསཱ སབྷིཀྑུཀོ ཨཱཝཱསོ ཝཱ ཨནཱཝཱསོ ཝཱ གནྟབྦོ ཡཏྠསྶུ བྷིཀྑཱུ ནཱནཱསཾཝཱསཀཱ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ.

‘‘ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཝཱ ཨནཱཝཱསཱ ཝཱ སབྷིཀྑུཀོ ཨཱཝཱསོ གནྟབྦོ ཡཏྠསྶུ བྷིཀྑཱུ ནཱནཱསཾཝཱསཀཱ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ. ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཝཱ ཨནཱཝཱསཱ ཝཱ སབྷིཀྑུཀོ ཨནཱཝཱསོ གནྟབྦོ ཡཏྠསྶུ བྷིཀྑཱུ ནཱནཱསཾཝཱསཀཱ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ. ན, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཝཱ ཨནཱཝཱསཱ ཝཱ སབྷིཀྑུཀོ ཨཱཝཱསོ ཝཱ ཨནཱཝཱསོ ཝཱ གནྟབྦོ ཡཏྠསྶུ བྷིཀྑཱུ ནཱནཱསཾཝཱསཀཱ ཨཉྙཏྲ པཀཏཏྟེན ཨཉྙཏྲ ཨནྟརཱཡཱ.

‘‘གནྟབྦོ, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ སབྷིཀྑུཀོ ཨཱཝཱསོ ཡཏྠསྶུ བྷིཀྑཱུ སམཱནསཾཝཱསཀཱ ཡཾ ཛཉྙཱ ‘སཀྐོམི ཨཛྫེཝ གནྟུ’ནྟི.

‘‘གནྟབྦོ, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ སབྷིཀྑུཀོ ཨནཱཝཱསོ ཡཏྠསྶུ ¶ བྷིཀྑཱུ སམཱནསཾཝཱསཀཱ ཡཾ ཛཉྙཱ ‘སཀྐོམི ཨཛྫེཝ གནྟུ’ནྟི.

‘‘གནྟབྦོ, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ སབྷིཀྑུཀོ ¶ ཨཱཝཱསོ ཝཱ ཨནཱཝཱསོ ཝཱ ཡཏྠསྶུ བྷིཀྑཱུ སམཱནསཾཝཱསཀཱ ཡཾ ཛཉྙཱ ‘སཀྐོམི ཨཛྫེཝ གནྟུ’ནྟི.

‘‘གནྟབྦོ, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨནཱཝཱསཱ སབྷིཀྑུཀོ ཨཱཝཱསོ ཡཏྠསྶུ བྷིཀྑཱུ སམཱནསཾཝཱསཀཱ ཡཾ ཛཉྙཱ ‘སཀྐོམི ཨཛྫེཝ གནྟུ’ནྟི.

‘‘གནྟབྦོ, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨནཱཝཱསཱ སབྷིཀྑུཀོ ཨནཱཝཱསོ ཡཏྠསྶུ བྷིཀྑཱུ སམཱནསཾཝཱསཀཱ ཡཾ ཛཉྙཱ ‘སཀྐོམི ཨཛྫེཝ གནྟུ’ནྟི.

‘‘གནྟབྦོ, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨནཱཝཱསཱ སབྷིཀྑུཀོ ཨཱཝཱསོ ཝཱ ཨནཱཝཱསོ ཝཱ ཡཏྠསྶུ བྷིཀྑཱུ སམཱནསཾཝཱསཀཱ ཡཾ ཛཉྙཱ ‘སཀྐོམི ཨཛྫེཝ གནྟུ’ནྟི.

‘‘གནྟབྦོ, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཝཱ ཨནཱཝཱསཱ ཝཱ སབྷིཀྑུཀོ ཨཱཝཱསོ ཡཏྠསྶུ བྷིཀྑཱུ སམཱནསཾཝཱསཀཱ ཡཾ ཛཉྙཱ ‘སཀྐོམི ཨཛྫེཝ གནྟུ’ནྟི.

‘‘གནྟབྦོ, བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཝཱ ཨནཱཝཱསཱ ཝཱ སབྷིཀྑུཀོ ཨནཱཝཱསོ ཡཏྠསྶུ བྷིཀྑཱུ སམཱནསཾཝཱསཀཱ ཡཾ ཛཉྙཱ ‘སཀྐོམི ཨཛྫེཝ གནྟུ’ནྟི.

‘‘གནྟབྦོ ¶ , བྷིཀྑཝེ, པཱརིཝཱསིཀེན བྷིཀྑུནཱ སབྷིཀྑུཀཱ ཨཱཝཱསཱ ཝཱ ཨནཱཝཱསཱ ཝཱ སབྷིཀྑུཀོ ཨཱཝཱསོ ཝཱ ཨནཱཝཱསོ ཝཱ ཡཏྠསྶུ བྷིཀྑཱུ སམཱནསཾཝཱསཀཱ ཡཾ ཛཉྙཱ ‘སཀྐོམི ཨཛྫེཝ གནྟུ’ནྟི.

‘‘ན, བྷིཀྑཝེ, པཱརིཝཱསིཀེན བྷིཀྑུནཱ པཀཏཏྟེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ¶ ཝཏྠབྦཾ, ན ཨེཀཙྪནྣེ ཨནཱཝཱསེ ཝཏྠབྦཾ, ན ཨེཀཙྪནྣེ ཨཱཝཱསེ ཝཱ ཨནཱཝཱསེ ཝཱ ཝཏྠབྦཾ, པཀཏཏྟཾ བྷིཀྑུཾ དིསྭཱ ཨཱསནཱ ཝུཊྛཱཏབྦཾ, པཀཏཏྟོ བྷིཀྑུ ཨཱསནེན ནིམནྟེཏབྦོ, ན པཀཏཏྟེན བྷིཀྑུནཱ སདྡྷིཾ ཨེཀཱསནེ ནིསཱིདིཏབྦཾ, ན ནཱིཙེ ཨཱསནེ ནིསིནྣེ ཨུཙྩེ ཨཱསནེ ནིསཱིདིཏབྦཾ, ན ཚམཱཡཾ ནིསིནྣེ ཨཱསནེ ནིསཱིདིཏབྦཾ, ན ཨེཀཙངྐམེ ཙངྐམིཏབྦཾ, ན ནཱིཙེ ཙངྐམེ ཙངྐམནྟེ ཨུཙྩེ ཙངྐམེ ཙངྐམིཏབྦཾ, ན ཚམཱཡཾ ཙངྐམནྟེ ཙངྐམེ ཙངྐམིཏབྦཾ.

‘‘ན, བྷིཀྑཝེ, པཱརིཝཱསིཀེན བྷིཀྑུནཱ པཱརིཝཱསིཀེན ཝུཌྜྷཏརེན བྷིཀྑུནཱ སདྡྷིཾ…པེ… མཱུལཱཡཔཊིཀསྶནཱརཧེན བྷིཀྑུནཱ སདྡྷིཾ…པེ… མཱནཏྟཱརཧེན བྷིཀྑུནཱ སདྡྷིཾ…པེ… མཱནཏྟཙཱརིཀེན བྷིཀྑུནཱ སདྡྷིཾ…པེ… ཨབྦྷཱནཱརཧེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ཝཏྠབྦཾ, ན ཨེཀཙྪནྣེ ཨནཱཝཱསེ ཝཏྠབྦཾ, ན ཨེཀཙྪནྣེ ཨཱཝཱསེ ཝཱ ཨནཱཝཱསེ ཝཱ ཝཏྠབྦཾ, ན ཨེཀཱསནེ ནིསཱིདིཏབྦཾ, ན ནཱིཙེ ཨཱསནེ ནིསིནྣེ ཨུཙྩེ ཨཱསནེ ནིསཱིདིཏབྦཾ, ན ཚམཱཡཾ ནིསིནྣེ ཨཱསནེ ནིསཱིདིཏབྦཾ, ན ཨེཀཙངྐམེ ཙངྐམིཏབྦཾ, ན ནཱིཙེ ཙངྐམེ ཙངྐམནྟེ ཨུཙྩེ ཙངྐམེ ཙངྐམིཏབྦཾ, ན ཚམཱཡཾ ཙངྐམནྟེ ཙངྐམེ ཙངྐམིཏབྦཾ.

‘‘པཱརིཝཱསིཀཙཏུཏྠོ ¶ ཙེ, བྷིཀྑཝེ, པརིཝཱསཾ དདེཡྻ, མཱུལཱཡ པཊིཀསྶེཡྻ, མཱནཏྟཾ དདེཡྻ, ཏཾཝཱིསོ ཨབྦྷེཡྻ, ཨཀམྨཾ ན ཙ ཀརཎཱིཡ’’ནྟི (ཙཱུལ༹ཝ. ༧༦-༨༢) –

ཨེཝཾ པཱརིཝཱསིཀཱནཾ ཙཏུནཝུཏི ཝཏྟཱནི.

སཱ ཙ ནེསཾ ཙཏུནཝུཏིསངྑཱ ཨེཝཾ ཝེདིཏབྦཱ – ནཨུཔསམྤཱདནཱདིནཀམྨིཀགརཧཔརིཡོསཱནཱནི ནཝ ཝཏྟཱནི, ཏཏོ པཀཏཏྟསྶ ཨུཔོསཐཊྛཔནཱདིབྷིཀྑཱུཧིསམྤཡོཛནཔརིཡོསཱནཱནི ཨཊྛ, ཏཏོ ནཔུརཏོགམནཱདཱི པཉྩ, ནཔུརེགམནཱདཱི ཙཏྟཱརི, ཨཱགནྟུཀེན ཨཱརོཙནཱདཱི ཙཏྟཱརཱིཏི ཏིཾས, སབྷིཀྑུཀཱཝཱསཱདིཏོ ཨབྷིཀྑུཀཱཝཱསཱདིགམནཔཨསཾཡུཏྟཱནི ཏཱིཎི ནཝཀཱནི ཙཱཏི སཏྟཔཉྙཱས, ཏཏོ ནཔཀཏཏྟེན སདྡྷིཾ ཨེཀཙྪནྣཝཱསཱདིཔཊིསཾཡུཏྟཱནི ཨེཀཱདས, ཏཏོ ནཔཱརིཝཱསིཀཝུཌྜྷཏརམཱུལཱཡཔཊིཀསྶནཱརཧམཱནཏྟཱརཧམཱནཏྟཙཱརིཀཨབྦྷཱནཱརཧེཧི ¶ སདྡྷིཾ ཨེཀཙྪནྣཝཱསཱདིཔཊིསཾཡུཏྟཱནི པཙྩེཀཾ ཨེཀཱདས ཀཏྭཱ པཉྩཔཉྙཱསཱཡ ཝཏྟེསུ པཱརིཝཱསིཀཝུཌྜྷཏརམཱུལཱཡཔཊིཀསྶནཱརཧམཱནཏྟཱརཧཱནཾ ཏིཎྞཾ སམཱནཏྟཱ ཏེསུ ཨེཀཾ ཨེཀཱདསཀཾ, མཱནཏྟཙཱརིཀཨབྦྷཱནཱརཧཱནཾ དྭིནྣཾ སམཱནཏྟཱ ཏེསུ ཨེཀཾ ཨེཀཱདསཀནྟི དུཝེ ཨེཀཱདསཀཱནི, ཨནྟེ པཱརིཝཱསིཀཙཏུཏྠསྶ སངྒྷསྶ པརིཝཱསཱདིདཱནཙཏུཀྐེ གཎཔཱུརཎཏྠདོསཏོ ནིཝཏྟིཝསེན ཙཏྟཱརི ཙཏྟཱརཱིཏི ཙཏུནཝུཏི ཝཏྟཱནི. ཏཱནི ཨགྒཧིཏགྒཧཎེན ཨེཀཱུནཙཏྟཱལཱིསཝཏྟཱནི ནཱམ. ཨཱདིཏོ ནཝ, ཨུཔོསཐཊྛཔནཱདཱིནི ཨཊྛ, པཀཏཏྟེན ཨེཀཙྪནྣཝཱསཱདཱི ཙཏྟཱརི ཙཱཏི ཨེཀཝཱིསཏི ཝཏྟཱནི ཀམྨཀྑནྡྷཀེ གཧིཏཏྟཱ ཨིདྷ གཎནཱཡ ཨགྒཧེཏྭཱ ཏཏོ སེསེསུ ཏེསཏྟཏིཡཱ ཝཏྟེསུ པཱརིཝཱསིཀཝུཌྜྷཏརཱདཱིཧི ཨེཀཙྪནྣེ ཝཱསཱདིཔཊིསཾཡུཏྟཱནི དྭཱཝཱིསཏི ཝཏྟཱནི པཀཏཏྟེཧི སམཱནཏྟཱ ཏཱནི ཙ ‘‘གནྟབྦོ བྷིཀྑཝེ’’ཏིཨཱདིཀཾ ནཝཀཾ ཏཐཱ ¶ གཙྪནྟསྶ ཨནཱཔཏྟིདསྶནཔརཾ, ན ཨཱཝཱསཏོ གཙྪནྟསྶ ཨཱཔཏྟིདསྶནཔརནྟི ཏཉྩ ཨགྒཧེཏྭཱ ཨཝསེསེསུ དྭཱཙཏྟཱལཱིསཝཏྟེསུ པཱརིཝཱསིཀཙཏཨུཏྠཱདིཀམྨཙཏུཀྐཾ གརུཀཱཔཏྟིཝུཊྛཱནཱཡ གཎཔཱུརཎཏྠསཱམཉྙེན ཨེཀཾ ཀཏྭཱ ཏཡོ ཨཔནེཏྭཱ གཎིཏཱནི ཨེཀཱུནཙཏྟཱལཱིསཱནི ཧོནྟཱིཏི ཝུཏྟཾ ‘‘ནཝཱདྷིཀཱནི ཏིཾསེཝ, ཁནྡྷཀེ ཏདནནྟརེ’’ཏི.

༢༧༥༠. ཨིམཱནི ཨེཀཱུནཙཏྟཱལཱིས ཝཏྟཱནི པུརིམེཧི ཏེཙཏྟཱལཱིསཝཏྟེཧི སདྡྷིཾ དྭཱསཱིཏི ཧོནྟཱིཏི ཨཱཧ ‘‘ཨེཝཾ སབྦཱནི…པེ… གཧིཏཱགཧཎེན ཏཱུ’’ཏི.

ཨེཝཾ ཀམྨཀྑནྡྷཀཔཱརིཝཱསིཀཀྑནྡྷཀེསུ མཧེསིནཱ ཝུཏྟཱནི ཁནྡྷཀཝཏྟཱནི གཧིཏཱགཧཎེན དྭཱསཱིཏི ཨེཝ ཧོནྟཱིཏི ཡོཛནཱ. ཨེཝམེཏྠ དྭཱསཱིཏིཀྑནྡྷཀཝཏྟཱནི དསྶིཏཱནི.

ཨཱགམཊྛཀཐཱཝཎྞནཱཡཾ པན –

‘‘པཱརིཝཱསིཀཱནཾ བྷིཀྑཱུནཾ ཝཏྟཾ པཉྙཔེསྶཱམཱིཏི (ཙཱུལ༹ཝ. ༧༥) ཨཱརབྷིཏྭཱ ‘ན ཨུཔསམྤཱདེཏབྦཾ…པེ… ན ཚམཱཡཾ ཙངྐམནྟེ ཙངྐམེ ཙངྐམིཏབྦ’ནྟི (ཙཱུལ༹ཝ. ༧༦-༨༡) ཝུཏྟཱཝསཱནཱནི ཚསཊྛི, ཏཏོ པརཾ ‘ན, བྷིཀྑཝེ, པཱརིཝཱསིཀེན བྷིཀྑུནཱ པཱརིཝཱསིཀེན ཝུཌྜྷཏརེན བྷིཀྑུནཱ སདྡྷིཾ, མཱུལཱཡཔཊིཀསྶནཱརཧེན, མཱནཏྟཱརཧེན, མཱནཏྟཙཱརིཀེན, ཨབྦྷཱནཱརཧེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ཝཏྠབྦ’ནྟིཨཱདཱིནཾ (ཙཱུལ༹ཝ. ༨༢) པཀཏཏྟེ ཙརིཏབྦེཧི ཨནཉྙཏྟཱ ཝིསུཾ ཏེ ཨགཎེཏྭཱ པཱརིཝཱསིཀཝུཌྜྷཏརཱདཱིསུ ¶ པུགྒལནྟརེསུ ཙརིཏབྦཏྟཱ ཏེསཾ ཝསེན སམྤིཎྜེཏྭཱ ཨེཀེཀཾ ཀཏྭཱ གཎིཏཱནི པཉྩཱཏི ཨེཀསཏྟཏི ཝཏྟཱནི, ཨུཀྑེཔནཱིཡཀམྨཀཏཝཏྟེསུ ཝཏྟཔཉྙཱཔནཝསེན ཝུཏྟཾ ‘ན པཀཏཏྟསྶ བྷིཀྑུནོ ཨབྷིཝཱདནཾ ¶ …པེ… ནཧཱནེ པིཊྛིཔརིཀམྨཾ སཱདིཏབྦ’ནྟི (ཙཱུལ༹ཝ. ༥༡) ཨིདཾ ཨབྷིཝཱདནཱདཱིནཾ ཨསཱདིཡནཾ ཨེཀཾ, ‘ན པཀཏཏྟོ བྷིཀྑུ སཱིལཝིཔཏྟིཡཱ ཨནུདྡྷཾསེཏབྦོ’ཏིཨཱདཱིནི ཙ དསཱཏི ཨེཝམེཏཱནི དྭཱསཱིཏི ཧོནྟི. ཨེཏེསྭེཝ ཀཱནིཙི ཏཛྫནཱིཡཀམྨཱདིཝཏྟཱནི, ཀཱནིཙི པཱརིཝཱསིཀཱདིཝཏྟཱནཱིཏི ཨགྒཧིཏགྒཧཎེན དྭཱསཱིཏི ཨེཝཱ’’ཏི (མ. ནི. ཊཱི. ༢.༢༥; སཱརཏྠ. ཊཱི. ༢.༣༩; ཝི. ཝི. ཊཱི. ༡.༣༩) –

ཝུཏྟཾ. ཨེཏཱནི པན ཝཏྟཱནི ཀདཱཙི ཏཛྫནཱིཡཀམྨཀཏཱདིཀཱལེ, པཱརིཝཱསིཀཱདིཀཱལེ ཙ ཙརིཏབྦཱནི ཁུདྡཀཝཏྟཱནཱིཏི གཧེཏབྦཱནི ཨཱགནྟུཀཝཏྟཱདཱིནཾ ཙུདྡསམཧཱཝཏྟཱནཾ ཝཀྑམཱནཏྟཱ.

༢༧༥༡. ཨིདཱནི པཱརིཝཱསིཀསྶ བྷིཀྑུནོ རཏྟིཙྪེདཾ, ཝཏྟབྷེདཉྩ དསྶེཏུམཱཧ ‘‘པརིཝཱསཉྩ ཝཏྟཉྩཱ’’ཏིཨཱདི. པརིཝཱསཉྩ ཝཏྟཉྩ སམཱདིནྣསྶཱཏི ‘‘པརིཝཱསཾ སམཱདིཡཱམཱི’’ཏི པརིཝཱསཉྩ ‘‘ཝཏྟཾ སམཱདིཡཱམཱི’’ཏི ཝཏྟཉྩ པཀཏཏྟསྶ བྷིཀྑུནོ སནྟིཀེ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཝཙཱིབྷེདཾ ཀཏྭཱ སམཱདིནྣསྶ. བྷིཀྑུནོཏི པཱརིཝཱསིཀསྶ བྷིཀྑུནོ.

༢༧༥༢. སཧཝཱསཱདཡོ ‘‘ཨེཀཙྪནྣེ’’ཏིཨཱདིནཱ སཡམེཝ ཝཀྑཏི. སཧཝཱསོ, ཝིནཱཝཱསོ, ཨནཱརོཙནམེཝ ཙཱཏི ཨིམེཧི ཏཱིཧི པཱརིཝཱསིཀབྷིཀྑུསྶ རཏྟིཙྪེདོ ཙ དུཀྐཊཉྩ ཧོཏཱིཏི ཡོཛནཱ.

༢༧༥༣. ཨུདཀཔཱཏེན སམནྟཱ ནིབྦཀོསསྶ ཨུདཀཔཱཏཊྛཱནེན. ཨེཀཙྪནྣེཏི ཨེཀཙྪནྣེ པརིཙྪནྣེ ཝཱ ཨཔརིཙྪནྣེ ཝཱ ཨཱཝཱསེ. པཀཏཏྟེན བྷིཀྑུནཱ སཧ ཨུཀྑིཏྟསྶ ནིཝཱསོ ¶ ནིཝཱརིཏོཏི ཡོཛནཱ. ‘‘ནིཝཱརིཏོ’’ཏི ཨིམིནཱ དུཀྐཊཾ ཧོཏཱིཏི དཱིཔེཏི.

༢༧༥༤. ཨནྟོཡེཝཱཏི ཨེཀཙྪནྣསྶ ཨཱཝཱསཔརིཙྪེདསྶ ཨནྟོཡེཝ. ‘‘ན ལབྦྷཏཱི’’ཏི ཨིམིནཱ རཏྟིཙྪེདོ ཙ དུཀྐཊཉྩ ཧོཏཱིཏི དཱིཔེཏི.

༢༧༥༥. མཧཱཨཊྛཀཐཱདིསཱུཏི ¶ ཨཱདི-སདྡེན ཀུརུནྡཊྛཀཐཱདིཾ སངྒཎྷཱཏི. ཨུབྷིནྣནྟི ཨུཀྑིཏྟཀཔཱརིཝཱསིཀཱནཾ. ཨིཏི ཨཝིསེསེན ནིདྡིཊྛནྟི ཡོཛནཱ.

༢༧༥༦. ཨིམིནཱ སཧཝཱསེན རཏྟིཙྪེདཉྩ དུཀྐཊཉྩ དསྶེཏྭཱ ཝིནཱཝཱསེན དསྶེཏུམཱཧ ‘‘ཨབྷིཀྑུཀེ པནཱཝཱསེ’’ཏི. ཨཱཝཱསེཏི ཝསནཏྠཱཡ ཀཏསེནཱསནེ. ཨནཱཝཱསེཏི ཝཱསཏྠཱཡ ཨཀཏེ ཙེཏིཡགྷརེ ཝཱ བོདྷིགྷརེ ཝཱ སམྨཛྫནིཨཊྚཀེ ཝཱ དཱརུཨཊྚཀེ ཝཱ པཱནཱིཡམཱལེ༹ ཝཱ ཝཙྩཀུཊིཡཾ ཝཱ དྭཱརཀོཊྛཀེ ཝཱ ཨཉྙཏྲ ཝཱ ཡཏྠ ཀཏྠཙི ཨེཝརཱུཔེ ཋཱནེ. ཝིཔྤཝཱསཾ ཝསནྟསྶཱཏི པཀཏཏྟེན ཝིནཱ ཝཱསཾ ཀཔྤེནྟསྶ. རཏྟིཙྪེདོ ཙ དུཀྐཊནྟི རཏྟིཙྪེདོ ཙེཝ ཝཏྟབྷེདདུཀྐཊཉྩ ཧོཏི.

༢༧༥༧. ཨེཝཾ ཝིཔྤཝཱསེན རཏྟིཙྪེདདུཀྐཊཱནི དསྶེཏྭཱ ཨནཱརོཙནེན དསྶེཏུམཱཧ ‘‘པཱརིཝཱསིཀབྷིཀྑུསྶཱ’’ཏིཨཱདི. བྷིཀྑུཾ དིསྭཱནཱཏི ཨཱཀཱསེནཱཔི གཙྪནྟཾ སམཱནསཾཝཱསཀཾ ཨཱགནྟུཀཾ བྷིཀྑུཾ དིསྭཱ. ཏངྑཎེཏི ཏསྨིཾ དིཊྛཀྑཎེཡེཝ. ‘‘ཨནཱརོཙེནྟསྶ ཨེཝ ཨེཏསྶཱ’’ཏི པདཙྪེདོ. ཨེཝཀཱརེན རཏྟིཙྪེདོ ཙ དུཀྐཊཉྩཱཏི ཨུབྷཡཾ ཨེཏསྶ ཧོཏཱིཏི དཱིཔེནྟེན ཨདིཊྛོ ཙེ, རཏྟིཙྪེདོཝ ཧོཏཱིཏི ཉཱཔེཏི. ཡཐཱཧ – ‘‘སོཔིསྶ རཏྟིཙྪེདཾ ཀརོཏི, ཨཉྙཱཏཏྟཱ པན ཝཏྟབྷེདདུཀྐཊཾ ནཏྠཱི’’ཏི (ཙཱུལ༹ཝ. ཨཊྛ. ༧༥). ནཱནཱསཾཝཱསཀེན ¶ སཧ ཝིནཡཀམྨཾ ཀཱཏུཾ ན ཝཊྚཏི, ཏསྶ ཨནཱརོཙནེཔི རཏྟིཙྪེདོ ན ཧོཏི.

༢༧༥༨-༩. པཱརིཝཱསིཀོ བྷིཀྑུ ཡཏྠ སངྒྷནཝཀཊྛཱནེ ཋིཏོ, ཏཏྠེཝ ཏསྨིཾཡེཝ ཋཱནེ ཋཏྭཱ ཡཐཱཝུཌྜྷཾ པཀཏཏྟེཧིཔི སདྡྷིཾ ཝུཌྜྷཔཊིཔཱཊིཡཱ པཉྩ ཀིཙྩཱནི ཀཱཏུཾ ཝཊྚཏཱིཏི ཡོཛནཱ.

ཏཱནི སརཱུཔཏོ དསྶེཏུམཱཧ ‘‘ཨུཔོསཐཔཝཱརཎ’’ནྟིཨཱདི. ཨུཔོསཐཔཝཱརཎཾ ཡཐཱཝུཌྜྷཾ ཀཱཏུཾ ལབྷཏཱིཏི ཡོཛནཱ. དེནྟཱིཏི ཨེཏྠ ‘‘གྷཎྚིཾ པཧརིཏྭཱ’’ཏི སེསོ. སངྒྷདཱཡཀཱཏི ཀམྨདྷཱརཡསམཱསོ. སངྒྷསྶ ཨེཀཏྟེཔི གརཱུསུ བཧུཝཙནནིདྡེསོ. ‘‘དེཏི ཙེ སངྒྷདཱཡཀོ’’ཏིཔི པཱཋོ. ཏཏྠ གྷཎྚིཾ པཧརིཏྭཱ བྷཱཛེཏྭཱ དེནྟོ སངྒྷོ ཝསྶིཀསཱཊིཀཾ དེཏི ཙེ, པཱརིཝཱསིཀོ ཡཐཱཝུཌྜྷཾ ཨཏྟནོ པཏྟཊྛཱནེ ལབྷཏཱིཏི ཡོཛནཱ.

ཨོཎོཛནནྟི ཝིསྶཛྫནཾ, སངྒྷཏོ ཨཏྟནོ པཏྟཱནཾ དྭིནྣཾ, ཏིཎྞཾ ཝཱ ཨུདྡེསབྷཏྟཱདཱིནཾ ཨཏྟནོ ¶ པུགྒལིཀབྷཏྟཔཙྩཱསཱཡ པཊིགྒཧེཏྭཱ ‘‘མཡ྄ཧཾ ཨཛྫ བྷཏྟཔཙྩཱསཱ ཨཏྠི, སྭེ གཎྷིསྶཱམཱི’’ཏི ཝཏྭཱ སངྒྷཝིསྶཛྫནཾ ལབྷཏཱིཏི ཝུཏྟཾ ཧོཏི. བྷཏྟནྟི ཨཱགཏཱགཏེཧི ཝུཌྜྷཔཊིཔཱཊིཡཱ གཧེཏྭཱ གནྟབྦཾ ཝིཧཱརེ སངྒྷསྶ ཙཏུསྶཱལབྷཏྟཾ. ཏཐཱ པཱརིཝཱསིཀོ ཡཐཱཝུཌྜྷཾ ལབྷཏཱིཏི ཡོཛནཱ. ཨིམེ པཉྩཱཏི ཝུཏྟམེཝཏྠཾ ནིགམཡཏི.

ཏཏྲཱཡཾ ཝིནིཙྪཡོ (ཙཱུལ༹ཝ. ཨཊྛ. ༧༥) – ཨུཔོསཐཔཝཱརཎེ ཏཱཝ པཱཏིམོཀྑེ ཨུདྡིསྶམཱནེ ཧཏྠཔཱསེ ནིསཱིདིཏུཾ ཝཊྚཏི. མཧཱཔཙྩརིཡཾ པན ‘‘པཱལི༹ཡཱ ཨནིསཱིདིཏྭཱ པཱལི༹ཾ ཝིཧཱཡ ཧཏྠཔཱསཾ ཨམུཉྩནྟེན ནིསཱིདིཏབྦ’’ནྟི ཝུཏྟཾ. པཱརིསུདྡྷིཨུཔོསཐེ ཀརིཡམཱནེ སངྒྷནཝཀཊྛཱནེ ནིསཱིདིཏྭཱ ཏཏྠེཝ ¶ ནིསིནྣེན ཨཏྟནོ པཱལི༹ཡཱ པཱརིསུདྡྷིཨུཔོསཐོ ཀཱཏབྦོཝ. པཝཱརཎཱཡཔི སངྒྷནཝཀཊྛཱནེ ནིསཱིདིཏྭཱ ཏཏྠེཝ ནིསིནྣེན ཨཏྟནོ པཱལི༹ཡཱ པཝཱརེཏབྦཾ. སངྒྷེན གྷཎྚིཾ པཧརིཏྭཱ བྷཱཛིཡམཱནཾ ཝསྶིཀསཱཊིཀམྤི ཨཏྟནོ པཏྟཊྛཱནེ གཧེཏུཾ ཝཊྚཏི.

ཨོཎོཛནེ སཙེ པཱརིཝཱསིཀསྶ དྭེ ཏཱིཎི ཨུདྡེསབྷཏྟཱདཱིནི པཱཔུཎནྟི, ཨཉྙཱ ཙསྶ པུགྒལིཀབྷཏྟཔཙྩཱསཱ ཧོཏི, ཏཱནི པཊིཔཱཊིཡཱ གཧེཏྭཱ ‘‘བྷནྟེ, ཧེཊྛཱ གཱཧེཐ, ཨཛྫ མཡ྄ཧཾ བྷཏྟཔཙྩཱསཱ ཨཏྠི, སྭེཝ གཎྷིསྶཱམཱི’’ཏི ཝཏྭཱ ཝིསྶཛྫེཏབྦཱནི, ཨེཝཾ ཏཱནི པུནདིཝསེསུ གཎྷིཏུཾ ལབྷཏི. ‘‘པུནདིཝསེ སབྦཔཋམཾ ཨེཏསྶ དཱཏབྦ’’ནྟི ཀུརུནྡིཡཾ ཝུཏྟཾ. ཡདི པན ན གཎྷཱཏི ན ཝིསྶཛྫེཏི, པུནདིཝསེ ན ལབྷཏི. ཨིདཾ ཨོཎོཛནཾ ནཱམ པཱརིཝཱསིཀསྶེཝ ཨོདིསྶ ཨནུཉྙཱཏཾ. ཀསྨཱ? ཏསྶ ཧི སངྒྷནཝཀཊྛཱནེ ནིསིནྣསྶ བྷཏྟགྒེ ཡཱགུཁཛྫཀཱདཱིནི པཱཔུཎནྟི ཝཱ ན ཝཱ, ཏསྨཱ ‘‘སོ བྷིཀྑཱཧཱརེན མཱ ཀིལམིཏྠཱ’’ཏི ཨིདམསྶ སངྒཧཀརཎཏྠཱཡ ཨོདིསྶ ཨནུཉྙཱཏཾ.

བྷཏྟེ ཙཏུསྶཱལབྷཏྟཾ ཡཐཱཝུཌྜྷཾ ལབྷཏི, པཱལི༹ཡཱ པན གནྟུཾ ཝཱ ཋཱཏུཾ ཝཱ ན ལབྷཏི. ཏསྨཱ པཱལི༹ཏོ ཨོསཀྐིཏྭཱ ཧཏྠཔཱསེ ཋིཏེན ཧཏྠཾ པསཱརེཏྭཱ ཡཐཱ སེནོ ནིཔཏིཏྭཱ གཎྷཱཏི, ཨེཝཾ གཎྷིཏབྦཾ. ཨཱརཱམིཀསམཎུདྡེསེཧི ཨཱཧརཱཔེཏུཾ ན ལབྷཏི. སཙེ སཡམེཝ ཨཱཧརནྟི, ཝཊྚཏི. རཉྙོ མཧཱཔེལ༹བྷཏྟེཔི ཨེསེཝ ནཡོ. ཙཏུསྶཱལབྷཏྟེ པན སཙེ ཨོཎོཛནཾ ཀཏྟུཀཱམོ ཧོཏི, ཨཏྟནོ ཨཏྠཱཡ ཨུཀྑིཏྟེ པིཎྜེ ‘‘ཨཛྫ མེ བྷཏྟཾ ཨཏྠི, སྭེཝ གཎྷིསྶཱམཱི’’ཏི ཝཏྟབྦཾ. ‘‘པུནདིཝསེ དྭེ པིཎྜེ ལབྷཏཱི’’ཏི (ཙཱུལ༹ཝ. ཨཊྛ. ༧༥) མཧཱཔཙྩརིཡཾ ཝུཏྟཾ. ཨུདྡེསབྷཏྟཱདཱིནིཔི ¶ པཱལི༹ཏོ ཨོསཀྐིཏྭཱཝ གཧེཏབྦཱནི. ཡཏྠ པན ནིསཱིདཱཔེཏྭཱ པརིཝིསནྟི ¶ , ཏཏྠ སཱམཎེརཱནཾ ཛེཊྛཀེན བྷིཀྑཱུནཾ སངྒྷནཝཀེན ཧུཏྭཱ ནིསཱིདིཏབྦནྟི.

པཱརིཝཱསིཀཀྑནྡྷཀཀཐཱཝཎྞནཱ.

སམཐཀྑནྡྷཀཀཐཱཝཎྞནཱ

༢༧༦༠. ཨིདཱནི སམཐཝིནིཙྪཡཾ དསྶེཏུཾ ཡེསུ ཨདྷིཀརཎེསུ སནྟེསུ སམཐེཧི བྷཝིཏབྦཾ, ཏཱནི ཏཱཝ དསྶེནྟོ ཨཱཧ ‘‘ཝིཝཱདཱདྷཱརཏཱ’’ཏིཨཱདི. ཝིཝཱདཱདྷཱརཏཱཏི ཝིཝཱདཱདྷིཀརཎཾ. ཨཱཔཏྟཱདྷཱརཏཱཏི ཨེཏྠཱཔི ཨེསེཝ ནཡོ. ཨཱདྷཱརཏཱཏི ཨདྷིཀརཎཔརིཡཱཡོ. ཨཱདྷཱརཱིཡཏི ཨབྷིབྷུཡྻཏི ཝཱུཔསམྨཏི སམཐེཧཱིཏི ཨཱདྷཱརོ, ཝིཝཱདོ ཙ སོ ཨཱདྷཱརོ ཙཱཏི ཝིཝཱདཱདྷཱརོ, སོ ཨེཝ ཝིཝཱདཱདྷཱརཏཱ. ཨེཝམཱདྷཱརཱདྷིཀརཎ-སདྡཱནཾ ཝིཝཱདཱདིསདྡེཧི སཧ ཀམྨདྷཱརཡསམཱསོ དཊྛབྦོ. ཨདྷིཀརཱིཡཏི ཨབྷིབྷུཡྻཏི ཝཱུཔསམྨཏི སམཐེཧཱིཏི ཨདྷིཀརཎནྟི ཝིཝཱདཱདིཙཏུབྦིདྷམེཝ པཱལི༹ཡཾ དསྶིཏཾ. ཨཡམཏྠོ ‘‘ཨེཏེསཾ ཏུ ཙཏུནྣམྤི, སམཏྟཱ སམཐཱ མཏཱ’’ཏི ཝཀྑམཱནེན ཝིཉྙཱཡཏི.

༢༧༦༡. ཨེཏཱནི ཙཏྟཱརི ཨདྷིཀརཎཱནི ཙ ‘‘ཨིདྷ པན, བྷིཀྑཝེ, བྷིཀྑཱུ ཝིཝདནྟི ‘དྷམྨོ’ཏི ཝཱ ‘ཨདྷམྨོ’ཏི ཝཱ’’ཏི (ཙཱུལ༹ཝ. ༢༡༥) ཨཊྛཱརས བྷེདཀཱརཀཝཏྠཱུནི ཙ མཧེསིནཱ ཝུཏྟཱནི. ཏཏྠ ཏེསུ ཙཏཱུསུ ཨདྷིཀརཎེསུ ཝིཝཱདོ ཨདྷིཀརཎསངྑཱཏོ ཨེཏཱནི ཨཊྛཱརས བྷེདཀརཝཏྠཱུནི ནིསྶིཏོ ནིསྶཱཡ པཝཏྟོཏི ཡོཛནཱ.

༢༧༦༢. ཝིཔཏྟིཡོ ཙཏསྶོཝཱཏི ‘‘ཨིདྷ པན, བྷིཀྑཝེ, བྷིཀྑཱུ བྷིཀྑུཾ ཨནུཝདནྟི སཱིལཝིཔཏྟིཡཱ ཝཱ ཨཱཙཱརཝིཔཏྟིཡཱ ཝཱ ¶ དིཊྛིཝིཔཏྟིཡཱ ཝཱ ཨཱཛཱིཝཝིཔཏྟིཡཱ ཝཱ’’ཏི (ཙཱུལ༹ཝ. ༢༡༥) ཝུཏྟཱ ཙཏསྶོ ཝིཔཏྟིཡོ. དིཊྛཱདཱིནཾ ཨནུགནྟྭཱ སཱིལཝིཔཏྟིཨཱདཱིཧི ཝདནཾ ཙོདནཱ ཨནུཝཱདོ. ཨུཔཱགཏོཏི ནིསྶིཏོ, ཨནུཝཱདོ ཙཏསྶོ ཝིཔཏྟིཡོ ནིསྶཱཡ པཝཏྟོཏི ཨཏྠོ. ‘‘ཏཏྠཱ’’ཏི པཋམམེཝ ནིདྡྷཱརཎསྶ ཝུཏྟཏྟཱ ཨིདྷ པུནཝཙནེ པཡོཛནཾ ན དིསྶཏི, ‘‘སམྦྷཝཱ’’ཏི ཝཙནསྶཱཔི ན ཀོཙི ཨཏྠཝིསེསོ དིསྶཏི. ཏསྨཱ ‘‘ཨཱཔཏྟཱདྷཱརཏཱ ཏཏྠ, སཏྟཨཱཔཏྟིསམྦྷཝཱ’’ཏི པཱཋོ ན ཡུཛྫཏི, ‘‘ཨཱཔཏྟཱདྷཱརཏཱ ནཱམ, སཏྟ ཨཱཔཏྟིཡོ མཏཱ’’ཏི པཱཋོ ¶ ཡུཏྟཏརོ, ཨཱཔཏྟཱདྷཱརཏཱ ནཱམ ཨཱཔཏྟཱདྷིཀརཎཾ ནཱམ སཏྟ ཨཱཔཏྟིཡོ མཏཱ སཏྟ ཨཱཔཏྟིཡོཝ ཨདྷིཔྤེཏཱཏི ཨཏྠོ.

༢༧༦༣. སངྒྷཀིཙྩཱནི ནིསྶཱཡཱཏི ཨཔལོཀནཀམྨཱདཱིནི ཙཏྟཱརི སངྒྷཀམྨཱནི ཨུཔཱདཱཡ ཀིཙྩཱདྷིཀརཎཱབྷིདྷཱནཾ སིཡཱ, ཀིཙྩཱདྷིཀརཎཾ ནཱམ ཙཏྟཱརི སངྒྷཀམྨཱནཱིཏི ཨཏྠོ. ཨེཏེསཾ ཏུ ཙཏུནྣམྤཱིཏི ཨེཏེསཾ པན ཙཏུནྣམྤི ཨདྷིཀརཎཱནཾ. སམཏྟཱཏི ཝཱུཔསམཧེཏུཏྟཱ. སམཐཱ མཏཱཏི སམྨུཁཱཝིནཡཱདཡོ སཏྟ ཨདྷིཀརཎསམཐཱཏི ཨདྷིཔྤེཏཱ. ཨདྷིཀརཎཱནི སམེནྟི, སམྨནྟི ཝཱ ཨེཏེཧཱིཏི ‘‘སམཐཱ’’ཏི ཝུཙྩནྟཱིཏི ‘‘སམཏྟཱ སམཐཱ མཏཱ’’ཏི ཨིམིནཱ སམཐ-སདྡསྶ ཨནྭཏྠཾ དཱིཔེཏི.

༢༧༦༤-༥. ཏེ སརཱུཔཏོ དསྶེཏུམཱཧ ‘‘སམྨུཁཱ’’ཏིཨཱདི. ‘‘ཝིནཡོ’’ཏི ཨིདཾ སམྨུཁཱདིཔདེཧི པཙྩེཀཾ ཡོཛེཏབྦཾ ‘‘སམྨུཁཱཝིནཡོ སཏིཝིནཡོ ཨམཱུལ༹ྷཝིནཡོ’’ཏི. ‘‘པཊིཉྙཱཝིནཡོ’’ཏི ཙ པཊིཉྙཱཏཀརཎཾ ཝུཏྟཾ. སཏྟམོ ཝིནཡོཏི སམཐོ ཨདྷིཔྤེཏོ. ཏིཎཝཏྠཱརཀོཏི ཨིམེ སཏྟ སམཐཱ བུདྡྷེནཱདིཙྩབནྡྷུནཱ ཝུཏྟཱཏི ཡོཛནཱ.

༢༧༦༦. ཙཏཱུསུ ¶ ཨདྷིཀརཎེསུ ཡཾ ཨདྷིཀརཎཾ ཡཏྟཀེཧི སམཐེཧི སམྨཏི, ཏེ སངྒཧེཏྭཱ དསྶེནྟོ ཨཱཧ ‘‘ཝིཝཱདོ’’ཏིཨཱདི.

༢༧༦༧-༩. ‘‘ཝིཝཱདོ’’ཏིཨཱདིནཱ ཨུདྡིཊྛམཏྠཾ ནིདྡིསནྟོ ཨཱཧ ‘‘ཚཊྛེནཱ’’ཏིཨཱདི. ཨེཏྠ ཨེཏེསུ ཙཏཱུསུ ཨདྷིཀརཎེསུ, སམཐེསུ ཙ ཀིཾ ཀེན སམྨཏཱིཏི ཙེ? ཝིཝཱདོ ཝིཝཱདཱདྷིཀརཎཾ ཚཊྛེན ཡེབྷུཡྻསིཀཱཡ, པཋམེན སམཐེན སམྨུཁཱཝིནཡེན ཙཱཏི དྭཱིཧི སམཐེཧི སམྨཏི. ཡསྶཱ ཀིརིཡཱཡ དྷམྨཝཱདིནོ བཧུཏརཱ, ཨེསཱ ཡེབྷུཡྻསིཀཱ. ‘‘སངྒྷསམྨུཁཏཱ, དྷམྨསམྨུཁཏཱ, ཝིནཡསམྨུཁཏཱ, པུགྒལསམྨུཁཏཱ’’ཏི (ཙཱུལ༹ཝ. ༢༢༩, ༢༣༤, ༢༣༦, ༢༣༧, ༢༤༢) ཝུཏྟཱནཾ སངྒྷཱདཱིནཾ ཙཏུནྣཾ སནྣིདྷཱནེན ཝཱ གཎཔུགྒལེཧི སམིཡམཱནཾ ཝིཝཱདཱདྷིཀརཎཾ སངྒྷསམྨུཁཏཾ ཝིནཱ ཨིཏརེཧི ཏཱིཧི ཝཱ སམྨཏཱིཏི ཝུཏྟཾ ཧོཏི.

ཨེཏྠ ཙ ཀཱརཀསངྒྷསྶ སངྒྷསཱམགྒིཝསེན སམྨུཁཱིབྷཱཝོ སངྒྷསམྨུཁཏཱ, སམེཏབྦསྶ ཝཏྠུནོ ¶ བྷཱུཏཏཱ དྷམྨསམྨུཁཏཱ, ཡཐཱ ཏཾ སམེཏབྦཾ, ཏཐེཝསྶ སམནཾ ཝིནཡསམྨུཁཏཱ, ཡོ ཙ ཝིཝདཏི, ཡེན ཙ ཝིཝདཏི, ཏེསཾ ཨུབྷིནྣཾ ཨཏྠཔཙྩཏྠིཀཱནཾ སམྨུཁཱིབྷཱཝོ པུགྒལསམྨུཁཏཱ.

‘‘ཨནུཝཱདོ ཙཏཱུཧིཔཱི’’ཏི ཨུདྡིཊྛཾ ནིདྡིསནྟོ ཨཱཧ ‘‘སམྨུཁཱ’’ཏིཨཱདི. ཨནུཔུབྦེནཱཏི ཨནུཔཊིཔཱཊིཡཱ. སམྨུཁཱཝིནཡཱདཱིཧི ཏཱིཧིཔཱིཏི སམྨུཁཱཝིནཡསཏིཝིནཡཨམཱུལ༹ྷཝིནཡེཧི ཏཱིཧིཔི. ཏཐེཝཱཏི ཡཐཱ ཏཱིཧི, ཏཐཱ པཉྩམེན ཏསྶཔཱཔིཡསིཀཱསམཐེནཱཔི ཨནུཝཱདོ སམྨཏི, པགེཝ ཙཏཱུཧཱིཏི ཨཏྠོ.

ཡོ པཱཔུསྶནྣཏཱཡ པཱཔིཡོ པུགྒལོ, ཏསྶ ཀཏྟབྦཏོ ‘‘ཏསྶཔཱཔིཡསིཀཱ’’ཏི ཀམྨཾ ཝུཙྩཏི. ཨཱཡསྨཏོ དབྦསྶ ¶ མལླཔུཏྟསྶ ཝིཡ སཏིཝེཔུལླཔྤཏྟསྶ ཁཱིཎཱསཝསྶ ཀཏཱ ཨམཱུལིཀཱ སཱིལཝིཔཏྟིཙོདནཱ སམྨུཁཱཝིནཡེན, ཉཏྟིཙཏུཏྠཱཡ ཀམྨཝཱཙཱཡ དིནྣེན སཏིཝིནཡེན ཙ སམྨཏི. ཨུམྨཏྟཀསྶ བྷིཀྑུནོ ཀཏཱ ཨཱཔཏྟིཙོདནཱ སམྨུཁཱཝིནཡེན ཙ ཏཐེཝ དིནྣེན ཨམཱུལ༹ྷཝིནཡེན ཙ སམྨཏི. སངྒྷམཛ྄ཛྷེ ཨཱཔཏྟིཡཱ ཙོདིཡམཱནསྶ ཨཝཛཱནིཏྭཱ པཊིཛཱནནཱདིཾ ཀརོནྟསྶ པཱཔབྷིཀྑུནོ བཧུལཱཔཏྟིཙོདནཱ སམྨུཁཱཝིནཡེན ཙེཝ ཏཐེཝ པཀཏེན ཏསྶཔཱཔིཡསིཀཱཀམྨེན ཙ ཝཱུཔསམྨཏཱིཏི ཝུཏྟཾ ཧོཏི.

‘‘ཨཱཔཏྟི པན ཏཱིཧེཝཱ’’ཏི ཨུདྡེསསྶ ནིདྡེསམཱཧ ‘‘སམྨུཁེནཱ’’ཏིཨཱདི. སམྨུཁེན སམྨུཁཱཝིནཡེན, པཊིཉྙཱཡ པཊིཉྙཱཏཀརཎེན, ཏིཎཝཏྠཱརཀེན ཝཱ ཨིམེཧི ཏཱིཧི ཨེཝ སམཐེཧི སཱ ཨཱཔཏྟི ཨཱཔཏྟཱདྷིཀརཎཾ ཨུཔསམཾ ཡཱཏཱིཏི ཡོཛནཱ. ཨེཏྠ པཊིཉྙཱཏཀརཎཾ ནཱམ ཨཱཔཏྟིཾ པཊིགྒཎྷནྟེན ‘‘པསྶསཱི’’ཏི ཝུཏྟེ ཨཱཔཏྟིཾ དེསེནྟེན ‘‘ཨཱམ པསྶཱམཱི’’ཏི སམྤཊིཙྪནཾ. ཏིཎཝཏྠཱརཀཾ པན སཡམེཝ ཝཀྑཏི.

ཏཱིཧེཝ སམཐེཧཱིཏི ཨེཏྠ གརུཀཱཔཏྟི སམྨུཁཱཝིནཡེན, པཊིཉྙཱཏཀརཎེན ཙཱཏི དྭཱིཧི, ལཧུཀཱཔཏྟིཾ ཨཱཔཛྫིཏྭཱ སངྒྷེ ཝཱ གཎེ ཝཱ པུགྒལེ ཝཱ དེསནཱཡ སམྨུཁཱཝིནཡེན ཙེཝ པཊིཉྙཱཏཀརཎེན ཙ, ཀོསམྦཀཱནཾ ཝིགྒཧསདིསཾ མཧཱཝིགྒཧཾ ཀརོནྟེཧི ཨཱཔནྣཱ ཨནེཀཝིདྷཱ ཨཱཔཏྟིཡོ སཙེ ཧོནྟི, ཏཱསུ ཝཀྑམཱནསརཱུཔཾ ཐུལླཝཛྫཱདིཾ ཋཔེཏྭཱ ཨཝསེསཱ སབྦཱ ཨཱཔཏྟིཡོ སམྨུཁཱཝིནཡེན, ཏིཎཝཏྠཱརཀེན ཙ སམྨནྟཱིཏི ཨཏྠོ.

ཀིཙྩཾ ¶ ཀིཙྩཱདྷིཀརཎཾ ཨེཀེན སམྨུཁཱཝིནཡེནེཝ སམྨཏཱིཏི ཡོཛནཱ.

༢༧༧༠. ཡེབྷུཡྻསིཀཀམྨེཏི ¶ ཨེཏྠ ནིམིཏྟཏྠེ བྷུམྨཾ. སལཱཀཾ གཱཧཡེཏི ཝིནིཙྪཡཀཱརཀེ སངྒྷེ དྷམྨཝཱདཱིནཾ བཧུཏྟཾ ཝཱ ཨཔྤཏརཏྟཾ ཝཱ ཛཱནིཏུཾ ཝཀྑམཱནེན ནཡེན སལཱཀཾ གཱཧཱཔེཡྻ. བུདྷོཏི ‘‘ན ཚནྡཱགཏིཾ གཙྪཏི…པེ… གཧིཏཱགཧིཏཉྩ ཛཱནཱཏཱི’’ཏི ཝུཏྟཾ པཉྩཧི ཨངྒེཧི སམནྣཱགཏཾ པུགྒལཾ དསྶེཏི. ‘‘གཱུལ༹ྷེནཱ’’ཏིཨཱདིནཱ སལཱཀགྒཱཧཔྤཀཱརོ དསྶིཏོ. ཀཎྞཛཔྤེནཱཏི ཨེཏྠ ཀཎྞེ ཛཔྤོ ཡསྨིཾ སལཱཀགྒཱཧཔཡོགེཏི ཝིགྒཧོ. ཨེཏྠ གཱུལ༹ྷསལཱཀགྒཱཧོ ནཱམ དྷམྨཝཱདིསལཱཀཱ ཙ ཨདྷམྨཝཱདིསལཱཀཱ ཙ ཝིསུཾ ཝིསུཾ ཙཱིཝརཀཎྞེ པཀྑིཔིཏྭཱ པུགྒལཱནཾ སནྟིཀཾ ཝིསུཾ ཝིསུཾ ཨུཔསངྐམིཏྭཱ སལཱཀཱ ཝིསུཾ ཝིསུཾ དསྶེཏྭཱ ‘‘ཨིཏོ ཏཝ རུཙྩནཀཾ གཎྷཱཧཱི’’ཏི རཧོ ཋཏྭཱ གཱཧཱཔནཾ. ཝིཝཊཀཾ ནཱམ དྷམྨཝཱདཱིནཾ བཧུབྷཱཝཾ ཉཏྭཱ སབྦེསུ ཛཱནནྟེསུ པུགྒལཱནཾ སནྟིཀཾ གཱཧཱཔནཾ. ཀཎྞཛཔྤནཾ ནཱམ ཨེཝམེཝ ཀཎྞམཱུལེ རཧོ ཋཏྭཱ གཱཧཱཔནཾ.

༢༧༧༡. ཨལཛྫུསྶདེཏི ཨེཏྠ ‘‘སངྒྷེ’’ཏི སེསོ. ལཛྫིསུ བཱལེསཱུཏི ཨེཏྠཱཔི ‘‘ཨུསྶདེསཱུ’’ཏི ཝཏྟབྦཾ.

༢༧༧༢. སཀེན ཀམྨུནཱཡེཝཱཏི ཨཏྟནོ ཡཾ ཀིཙྩཾ, ཏེནེཝཱཏི.

༢༧༧༣-༥. ‘‘ཨཱཔཛྫཏཱི’’ཏིཨཱདི ‘‘ཨལཛྫཱི, ལཛྫཱི, བཱལོ’’ཏི ཛཱནནསྶ ཧེཏུབྷཱུཏཀམྨདསྶནཾ. དུཙྩིནྟིཏོཏི ཨབྷིཛ྄ཛྷཱདིཏིཝིདྷམནོདུཙྩརིཏཝསེན དུཊྛུ ཙིནྟེནྟོ. དུབྦྷཱསཱིཏི མུསཱཝཱདཱདིཙཏུབྦིདྷཝཙཱིདུཙྩརིཏཝསེན ཝཙཱིདྭཱརེ པཉྙཏྟཱནཾ སིཀྑཱཔདཱནཾ ཝཱིཏིཀྐམཝསེན དུཊྛུ བྷཱསནསཱིལོ. དུཀྐཊཀཱརིཀོཏི པཱཎཱཏིཔཱཏཱདིཏིཝིདྷཀཱཡདུཙྩརིཏཝསེན ཀཱཡདྭཱརེ ¶ པཉྙཏྟསིཀྑཱཔདཱནཾ ཝཱིཏིཀྐམཝསེན ཀུཙྪིཏཀམྨསྶ ཀརཎསཱིལོ. ཨིཏི ལཀྑཎེནེཝཱཏི ཡཐཱཝུཏྟཾ ཨལཛྫཱིལཛྫཱིབཱལལཀྑཎཾ ནིགམེཏི.

༢༧༧༦. ‘‘ཡེབྷུཡྻསིཀཱ’’ཏིཨཱདིགཱཐཱཧི ནིདྡིཊྛམེཝ ཨཏྠཾ ནིགམེཏུམཱཧ ‘‘ཏིདྷཱ’’ཏིཨཱདི. ཏིདྷཱསལཱཀགཱཧེནཱཏི ཏིཝིདྷསྶ སལཱཀགཱཧསྶ ཨཉྙཏརེན. བཧུཀཱ དྷམྨཝཱདིནོ ཡདི སིཡུནྟི ཡོཛནཱ. ཀཱཏབྦནྟི ཨེཏྠ ‘‘ཝིཝཱདཱདྷིཀརཎཝཱུཔསམན’’ནྟི སེསོ.

༢༧༧༧. ཡོ ¶ པུགྒལོ ཨལཛྫཱི ཙ ཧོཏི སཱནུཝཱདོ ཙ ཀམྨཏོ ཀཱཡཀམྨཏོ, ཝཙཱིཀམྨཏོ ཙ ཨསུཙི ཙ སམྦུདྡྷཛིགུཙྪནཱིཡོཏི ཨཏྠོ. སོ ཨེཝཾཝིདྷོ པཱཔཔུགྒལོ ཏསྶ པཱཔིཡསིཀཀམྨསྶ ཡོགོ ཧོཏཱིཏི སམྦནྡྷོ. སཱནུཝཱདོཏི ཨེཏྠ ཨནུཝཱདོ ནཱམ ཙོདནཱ, སཧ ཨནུཝཱདེན ཝཏྟཏཱིཏི སཱནུཝཱདོ, པཱཔགརཧིཏཔུགྒལེཧི ཀཱཏབྦཙོདནཱཡ ཨནུརཱུཔོཏི ཨཏྠོ.

༢༧༧༨-༩. བྷཎྜནེཏི ཀལཧསྶ པུབྦབྷཱགེ. ཀལཧེཏི ཀཱཡཝཙཱིདྭཱརཔྤཝཏྟེ ཧཏྠཔརཱམསཱདིཀེ ཀལཧེ ཙ. ཝིཝཱདམྷི ཨནཔྤཀེཏི བཧུཝིདྷེ ཝིཝཱདེ ཛཱཏེ. བཧུཨསྶཱམཎེ ཙིཎྞེཏི སམཎཱནཾ ཨནནུཙྪཝིཀེ ནཱནཔྤཀཱརེ ཀཱཡིཀཝཱཙསིཀཝཱིཏིཀྐམེ ཙ ཀཏེ. ཨནགྒེཏི ཨནནྟེ. བྷསྶཀེཏི ཀུཙྪིཏེ ཨམནཱཔཝཙནེ ཙིཎྞེཏི ཡོཛནཱ, བྷཱསིཏེཏི ཨཏྠོ. གཝེསནྟནྟི གཝེསིཡམཱནཾ, ཨཱཔཏྟཱདྷིཀརཎནྟི སེསོ. ཝཱལ༹ནྟི ཙཎྜཾ. ཀཀྑལ༹ནྟི ཨཱསཛྫཾ. ཀཱཏབྦནྟི ཝཱུཔསམེཏབྦཾ.

༢༧༨༠-༢. ཡཐཱ ཙ ཝཱུཔསམྨཏི, ཏཐཱ ཏིཎཝཏྠཱརཀེ སུདྡྷོ ཧོཏཱིཏི སམྦནྡྷོ.

ཐུལླཝཛྫནྟི ¶ པཱརཱཛིཀཉྩེཝ སངྒྷཱདིསེསཉྩ. གིཧཱིཧི པཊིསཾཡུཏནྟི གིཧཱིནཾ ཛཱཏིཨཱདཱིཧི པཱལི༹ཡཱ ཨཱགཏེཧི དསཧི ཨཀྐོསཝཏྠཱུཧི, ཨཊྛཀཐཱགཏེཧི ཙ ཏདཉྙེཧི ཨཀྐོསཝཏྠཱུཧི ཁུཾསནཝམྦྷནཔཙྩཡཱ ཙ དྷམྨིཀཔཊིསྶཝསྶ ཨསཙྩཱཔནཔཙྩཡཱ ཙ ཨཱཔནྣཱཔཏྟིཾ. ཨེསཱ ཨེཝ ཧི ཨཱཔཏྟི གིཧིཔཊིསཾཡུཏྟཱ ནཱམ པརིཝཱརེ ‘‘ཨཏྠི གིཧིཔཊིསཾཡུཏྟཱ, ཨཏྠི ནགིཧིཔཊིསཾཡུཏྟཱ’’ཏི དུཀཾ ནིཀྑིཔིཏྭཱ ‘‘གིཧིཔཊིསཾཡུཏྟཱཏི སུདྷམྨཏྠེརསྶ ཨཱཔཏྟི, ཡཱ ཙ དྷམྨིཀསྶ པཊིསྶཝསྶ ཨསཙྩཱཔནེ ཨཱཔཏྟི. ཨཝསེསཱ ནགིཧིཔཊིསཾཡུཏྟཱ’’ཏི (པརི. ཨཊྛ. ༣༢༡) ཝཙནཏོ.

སུདྷམྨཏྠེརསྶ ཨཱཔཏྟཱིཏི ཙ ཏེན ཙིཏྟསྶ གཧཔཏིནོ ཛཱཏིཾ པཊིཙྩ ཁུཾསནཝམྦྷནཔཙྩཡཱ ཨཱཔནྣཱ ཨོམསཝཱདསིཀྑཱཔདཝིབྷཱགགཏཱ དུཀྐཊཱཔཏྟི གཧེཏབྦཱ. ཨིདཉྩ ཨུཔལཀྑཎམཏྟཾ, ཏསྨཱ ཨིཏརེཧིཔི ཨཀྐོསཝཏྠཱུཧི གིཧིཾ ཁུཾསེནྟཱནཾ ཝམྦྷེནྟཱནཾ ཨིཏརེསཾ བྷིཀྑཱུནཾ སཱ ཨཱཔཏྟི གིཧིཔཊིསཾཡུཏྟཱཝཱཏི ཝེདིཏབྦཾ. ཏཐཱ ཨཱཔནྣཾ ཨཱཔཏྟིཾ དེསཱཔེནྟེན དསྶནཱུཔཙཱརཾ ཨཝིཛཧཱཔེཏྭཱ སཝནཱུཔཙཱརཾ ཛཧཱཔེཏྭཱ ཨེཀཾསེ ཨུཏྟརཱསངྒཾ ཀཱརཱཔེཏྭཱ ཨུཀྐུཊིཀཾ ནིསཱིདཱཔེཏྭཱ ཨཉྫལིཾ པགྒཎྷཱཔེཏྭཱ སཱ ཨཱཔཏྟི དེསཱཔེཏབྦཱ.

དིཊྛཱཝིཀམྨིཀནྟི ¶ དིཊྛཱཝིཀམྨེ ནིཡུཏྟོ དིཊྛཱཝིཀམྨིཀོ, ཏཾ, ཨཊྛཀཐཱཡཾ ‘‘ཡེ པན ‘ན མེཏཾ ཁམཏཱི’ཏི ཨཉྙམཉྙཾ དིཊྛཱཝིཀམྨཾ ཀརོནྟཱི’’ཏི (ཙཱུལ༹ཝ. ཨཊྛ. ༢༡༤) ཡེ པུགྒལཱ དསྶིཏཱ, ཏེསམཉྙཏརསྶེཝ གཧཎཾ.

ཡོཏི བྷཎྜནཀཱརཀེཧི བྷིཀྑཱུཧི སདྡྷིཾ མཧནྟཾ ཝིགྒཧཾ ཀཏྭཱ སམྦཧུལཱ ཨཱཔཏྟིཡོ ཨཱཔནྣོ ཡོ བྷིཀྑུ. ཏཏྠཱཏི ཏསྨིཾ ཏིཎཝཏྠཱརཀསམཐཀཱརཀེ བྷིཀྑུསམཱུཧེ. ན ཧོཏཱིཏི ཚནྡཾ དཏྭཱ ཏཾ བྷིཀྑུཔརིསཾ ཨནཱགཏཏྟཱ ན སཾཝིཛྫཏི. ཏཉྩ ཋཔེཏྭཱཏི ཡོཛནཱ.

ཏིཎཝཏྠཱརཀེ ¶ ཀཏེ སཏི ཡཱཝ ཨུཔསམྤདམཱལ༹ཏོ པབྷུཏི ཨཱཔནྣཱཡ སེསཱཡ ཨཱཔཏྟིཡཱ ནིརཱཔཏྟི ཧུཏྭཱ སུདྡྷོ ཧོཏི སངྒྷོཏི ཡོཛནཱ.

སམཐཀྑནྡྷཀཀཐཱཝཎྞནཱ.

ཁུདྡཀཝཏྠུཀྑནྡྷཀཀཐཱཝཎྞནཱ

༢༧༨༣. ཀུཊྚེཏི ཨིཊྛཀཱསིལཱདཱརུཀུཊྚཱནཾ ཨཉྙཏརསྨིཾ. ཨཊྚཱནེཏི ཨེཏྠ ཨཊྚཱནཾ ནཱམ རུཀྑེ ཕལཀཾ ཝིཡ ཏཙྪེཏྭཱ ཨཊྛཔདཱཀཱརེན རཱཛིཡོ ཚིནྡིཏྭཱ ནཧཱནཏིཏྠེ ནིཁཎནྟི, ཏཏྠ ཙུཎྞཱནི ཨཱཀིརིཏྭཱ མནུསྶཱ ཀཱཡཾ གྷཾསནྟི.

༢༧༨༤. གནྡྷབྦཧཏྠེནཱཏི ནཧཱནཏིཏྠེ ཋཔིཏེན དཱརུམཡཧཏྠེན. ཏེན ཀིར ཙུཎྞཱནི གཧེཏྭཱ མནུསྶཱ སརཱིརཾ གྷཾསནྟི. ཀུརུཝིནྡཀསུཏྟིཡཱཏི ཀུརུཝིནྡཀཔཱསཱཎཙུཎྞཱནི ལཱཁཱཡ བནྡྷིཏྭཱ ཀཏགུལི༹ཀཀལཱཔཀོ ཝུཙྩཏི, ཏཾ ཨུབྷོསུ ཨནྟེསུ གཧེཏྭཱ སརཱིརཾ གྷཾསནྟི. མལླཀེནཱཏི མཀརདནྟཀཾ ཚིནྡིཏྭཱ མལླཀམཱུལསཎྛཱནེན ཀཏེན མལླཀེན, ཨིདཾ གིལཱནསྶཱཔི ན ཝཊྚཏི. ཨཉྙམཉྙཉྩ ཀཱཡཏོཏི ཨཉྙམཉྙཾ སརཱིརེན གྷཾསེཡྻ.

༢༧༨༥. ཨཀཏཾ མལླཀཾ ནཱམ མཀརདནྟེ ཨཙྪིནྡིཏྭཱ ཀཏཾ, ཨིདཾ ཨགིལཱནསྶ ན ཝཊྚཏི.

༢༧༨༦. ཀཔཱལིཊྛཀཁཎྜཱནཱིཏི ཀཔཱལཁཎྜཨིཊྛཀཁཎྜཱནི. སབྦསྶཱཏི གིལཱནཱགིལཱནསྶ ¶ སརཱིརེ གྷཾསིཏྭཱ ཨུབྦཊྚེཏུཾ ཝཊྚཏི. ‘‘པུཐུཔཱཎིཀ’’ནྟི ཧཏྠཔརིཀམྨཾ ཝུཙྩཏི, ཏསྨཱ སབྦསྶ ཧཏྠེན པིཊྛིཔརིཀམྨཾ ཀཱཏུཾ ཝཊྚཏི. ‘‘ཝཏྠཝཊྚཱི’’ཏི ཨིདཾ པཱལི༹ཡཾ ཝུཏྟཨུཀྐཱསིཀསྶ ¶ པརིཡཱཡཾ, ཏསྨཱ ནཧཱཡནྟསྶ ཡསྶ ཀསྶཙི ནཧཱནསཱཊཀཝཊྚིཡཱཔི གྷཾསིཏུཾ ཝཊྚཏི.

༢༧༨༧. ཕེཎཀཾ ནཱམ སམུདྡཕེཎཾ. ཀཐལནྟི ཀཔཱལཁཎྜཾ. པཱདགྷཾསནེ ཝུཏྟཱ ཨནུཉྙཱཏཱ. ཀཏཀཾ ནཱམ པདུམཀཎྞིཀཱཀཱརཾ པཱདགྷཾསནཏྠཾ ཀཎྚཀེ ཨུཊྛཱཔེཏྭཱ ཀཏཾ, ཨེཏཾ ནེཝ པཊིགྒཧེཏུཾ, ན པརིབྷུཉྫིཏུཾ ཝཊྚཏི.

༢༧༨༨. ཡཾ ཀིཉྩིཔི ཨལངྐཱརནྟི ཧཏྠཱུཔགཱདིཨལངྐཱརེསུ ཡཾ ཀིཉྩི ཨལངྐཱརཾ.

༢༧༨༩. ཨོསཎྛེཡྻཱཏི ཨལངྐཱརཏྠཾ སངྑརོནྟོ ནམེཡྻ. ཧཏྠཕཎཀེནཱཏི ཧཏྠེནེཝ ཕཎཀིཙྩཾ ཀརོནྟཱ ཨངྒུལཱིཧི ཨོསཎྛེནྟི. ཕཎཀེནཱཏི དནྟམཡཱདཱིསུ ཡེན ཀེནཙི. ཀོཙྪེནཱཏི ཨུསིརམཡེན ཝཱ མུཉྫཔབྦཛམཡེན ཝཱ ཀོཙྪེན.

༢༧༩༠. སིཏྠཏེལོདཏེལེཧཱིཏི སིཏྠཏེལཉྩ ཨུདཀཏེལཉྩཱཏི ཝིགྒཧོ, ཏེཧི. ཏཏྠ སིཏྠཏེལཾ ནཱམ མདྷུསིཏྠཀནིཡྻཱསཱདི ཡཾ ཀིཉྩི ཙིཀྐཎཾ. ཙིཀྐཎཾ ནཱམ ནིཡྻཱསཾ. ཨུདཀཏེལཾ ནཱམ ཨུདཀམིསྶཀཾ ཏེལཾ. ཀཏྠཙི པོཏྠཀེསུ ‘‘སིཊྛཱ’’ཏི པཱཋོ, སོཡེཝཏྠོ. ཨནུལོམནིཔཱཏཏྠནྟི ནལཱཊཱབྷིམུཁཾ ཨནུལོམེན པཱཏནཏྠཾ. ཨུདྡྷལོམེནཱཏི ཨུདྡྷགྒཾ ཧུཏྭཱ ཋིཏལོམེན.

༢༧༩༡. ཧཏྠཾ ཏེལེན ཏེམེཏྭཱཏི ཀརཏལཾ ཏེལེན མཀྑེཏྭཱ. སིརོརུཧཱ ཀེསཱ. ཨུཎྷཱབྷིཏཏྟསྶཱཏི ཨུཎྷཱབྷིཏཏྟརཛསིརསྶ. ཨལླཧཏྠེན སིརོརུཧེ པུཉྪིཏུཾ ཝཊྚཏཱིཏི ཡོཛནཱ.

༢༧༩༢. ཨཱདཱསེ ¶ ཨུདཔཏྟེ ཝཱཏི ཨེཏྠ ཀཾསཔཏྟཱདཱིནིཔི, ཡེསུ མུཁནིམིཏྟཾ པཉྙཱཡཏི, སབྦཱནི ཨཱདཱསསངྑམེཝ གཙྪནྟི, ཀཉྫིཡཱདཱིནིཔི ཙ ཨུདཔཏྟསངྑམེཝ, ཏསྨཱ ཡཏྠ ཀཏྠཙི ཨོལོཀེནྟསྶ དུཀྐཊཾ.

༢༧༩༣. ཡེན ¶ ཧེཏུནཱ མུཁཾ ཨོལོཀེནྟསྶ ཨནཱཔཏྟི, ཏཾ དསྶེཏུམཱཧ ‘‘སཉྪཝི’’ནྟིཨཱདི. ཨཱབཱདྷཔཙྩཡཱ ‘‘མེ མུཁེ ཝཎོ སཉྪཝི ནུ ཁོ, ཨུདཱཧུ ན སཉྪཝཱི’’ཏི མུཁཾ དཊྛུཉྩ ‘‘ཨཧཾ ཛིཎྞོ ནུ ཁོ, ཨུདཱཧུ ནོ’’ཏི ཨཏྟནོ ཨཱཡུསངྑཱརཛཱནནཏྠཉྩ མུཁཾ དཊྛུཾ ཝཊྚཏཱིཏི ཡོཛནཱ.

༢༧༩༤. ནཙྩཾ ཝཱཏི ཡཾ ཀིཉྩི ནཙྩཾ ཨནྟམསོ མོརནཙྩམྤི. གཱིཏནྟི ཡཾ ཀིཉྩི ནཊགཱིཏཾ ཝཱ སཱདྷུགཱིཏཾ ཝཱ ཨནྟམསོ དནྟགཱིཏམྤི, ཡཾ ‘‘གཱཡིསྶཱམཱ’’ཏི པུབྦབྷཱགེ ཨོཀཱུཛནྟཱ ཀརོནྟི, ཨེཏམྤི ན ཝཊྚཏི. ཝཱདིཏནྟི ཡཾ ཀིཉྩི ཝཱདིཏཾ. དཊྛུཾ ཝཱ པན སོཏུཾ ཝཱཏི ནཙྩཾ དཊྛུཾ ཝཱ གཱིཏཾ ཝཱདིཏཾ སོཏུཾ ཝཱ.

༢༧༩༥. སཡཾ ནཙྩནྟསྶ ཝཱ ནཙྩཱཔེནྟསྶ ཝཱ གཱཡནྟསྶ ཝཱ གཱཡཱཔེནྟསྶ ཝཱ ཝཱདེནྟསྶ ཝཱ ཝཱདཱཔེནྟསྶ ཝཱ དུཀྐཊམེཝ ཨཊྛཀཐཱཡ (ཙཱུལ༹ཝ. ཨཊྛ. ༢༤༨) ཝུཏྟནྟི ཏདེཀདེསཾ དསྶེཏུམཱཧ ‘‘དཊྛུམནྟམསོ’’ཏིཨཱདི.

༢༧༩༦. སུཎཱཏཱིཏི གཱིཏཾ ཝཱ ཝཱདིཏཾ ཝཱ. པསྶཏཱིཏི ནཙྩཾ པསྶཏི.

༢༧༩༧. པསྶིསྶཱམཱིཏི ཨེཏྠ ‘‘སུཎིསྶཱམཱི’’ཏི སེསོ. ‘‘ནཙྩཾ པསྶིསྶཱམི, གཱིཏཾ, ཝཱདིཏཾ ཝཱ སུཎིསྶཱམཱི’’ཏི ཝིཧཱརཏོ ཝིཧཱརཾ གཙྪཏོ ཝཱཔི དུཀྐཊཾ ཧོཏཱིཏི ཡོཛནཱ.

༢༧༩༨. ཨུཊྛཧིཏྭཱན གཙྪཏོཏི ‘‘ནཙྩཾ པསྶིསྶཱམཱི’’ཏི, ‘‘གཱིཏཾ, ཝཱདིཏཾ ཝཱ སུཎིསྶཱམཱི’’ཏི ནིསིནྣཊྛཱནཏོ ཨུཊྛཧིཏྭཱ ཨནྟོཝིཧཱརེཔི ¶ ཏཾ ཏཾ དིསཾ གཙྪཏོ ཨཱཔཏྟི ཧོཏཱིཏི ཡོཛནཱ. ཝཱིཐིཡཾ ཋཏྭཱ གཱིཝཾ པསཱརེཏྭཱ པསྶཏོཔི ཙ ཨཱཔཏྟཱིཏི ཡོཛནཱ.

༢༧༩༩. དཱིགྷཱཏི དྭངྒུལཏོ དཱིགྷཱ. ན དྷཱརེཡྻཱཏི ན དྷཱརེཏབྦཱ. དྭངྒུལཾ ཝཱ དུམཱསཾ ཝཱཏི ཨེཏྠ དྭེ ཨངྒུལཱནི པརིམཱཎཾ ཨེཏསྶཱཏི དྭངྒུལོ, ཀེསོ. དྭེ མཱསཱ ཨུཀྐཊྛཔརིཙྪེདོ ཨསྶཱཏི དུམཱསོ. ཀེསཾ དྷཱརེནྟོ དྭངྒུལཾ ཝཱ དྷཱརེཡྻ དུམཱསཾ ཝཱ. ཏཏོ ཨུདྡྷཾ ན ཝཊྚཏཱིཏི ཏཏོ དྭངྒུལཏོ ཝཱ དུམཱསཏོ ཝཱ ཀེསཏོ ཨུདྡྷཾ ཀེསཾ དྷཱརེཏུཾ ན ཝཊྚཏི.

ཨཐ ¶ ཝཱ དྭེ ཨངྒུལཱནི སམཱཧཊཱནི དྭངྒུལཾ, དྭེ མཱསཱ སམཱཧཊཱ དུམཱསཾ, ཨུབྷཡཏྠ ཨཙྩནྟསཾཡོགེ ཨུཔཡོགཝཙནཾ. ཀེསེ དྷཱརེནྟོ དྭངྒུལམཏྟཾ ཝཱ དྷཱརེཡྻ དུམཱསམཏྟཾ ཝཱ, ཏཏོ ཀཱལཔརིམཱཎཏོ ཨུདྡྷཾ ཀེསེ དྷཱརེཏུཾ ན ཝཊྚཏཱིཏི ཨཏྠོ. སཙེ ཀེསེ ཨནྟོདྭེམཱསེ དྭངྒུལེ པཱཔུཎནྟི, ཨནྟོདྭེམཱསེཡེཝ ཚིནྡིཏབྦཱ. དྭངྒུལེ ཧི ཨཏིཀྐམེཏུཾ ན ཝཊྚཏི. སཙེཔི ན དཱིགྷཱ, དྭེམཱསཏོ ཨེཀདིཝསམྤི ཨཏིཀྐམེཏུཾ ན ལབྷཏིཡེཝ. ཨེཝམཡཾ ཨུབྷཡེནཔི ཨུཀྐཊྛཔརིཙྪེདེནེཝ ཝུཏྟོ, ཏཏོ ཨོརཾ པན ནཝཊྚནབྷཱཝོ ནཱམ ནཏྠི.

༢༨༠༠. དཱིགྷེ ནཁེ, དཱིགྷཱནི ནཱསིཀལོམཱནི ཙ ན དྷཱརཡེཏི ཡོཛནཱ, ན དྷཱརེཡྻ, ཚིནྡེཡྻཱཏི ཨཏྠོ. ཝཱིསཏིམཊྛནྟི ཝཱིསཏིཡཱ ནཁཱནཾ མཊྛཾ ལིཁིཏམཊྛབྷཱཝཾ ཀཱཏུཾ བྷིཀྑུནོ ན ཝཊྚཏཱིཏི ཡོཛནཱ. སཏྠཀེན ཏཙྪེཏྭཱ ཙུཎྞཀེན པམཛྫིཏྭཱ ཕལིཀམཎཱིནཾ ཝིཡ ཨུཛྫལཀརཎཾ ལིཁིཏམཊྛཾ ནཱམ. ‘‘ཨནུཛཱནཱམི, བྷིཀྑཝེ, མལམཏྟཾ ཨཔཀཌྜྷིཏུ’’ནྟི (ཙཱུལ༹ཝ. ༢༧༤) ཨནུཉྙཱཏཏྟཱ མུགྒཕལཏཙཱདཱིཧི ནཁམལཾ ཨཔནེཏུཾ ཝཊྚཏི.

༢༨༠༡. ཀཔྤཱཔེཡྻ ¶ ཝིསུཾ མསྶུནྟི ཡོ ཀེསཙྪིནྣོ ཝིསུཾ མསྶུཾ ཀཔྤཱཔེཡྻ. དཱཋིཀཾ ཋཔེཡྻཱཏི ཀེསེ ཚིནྡཱཔེཏྭཱ མསྶུཾ ཨཀཔྤཱཔེཏྭཱ ཝིསུཾ ཋཔེཡྻ. སམྦཱདྷེཏི ཨུཔཀཙྪཀམུཏྟཀརཎསངྑཱཏེ སམྦཱདྷཊྛཱནེ. ལོམཾ སཾཧརཱཔེཡྻཝཱཏི སཏྠེན ཝཱ སཎྜཱསེན ཝཱ ཨཉྙེན ཡེན ཀེནཙི པརེན ཚིནྡཱཔེཡྻ, སཡཾ ཝཱ ཚིནྡེཡྻ. ‘‘ཨནུཛཱནཱམི, བྷིཀྑཝེ, ཨཱབཱདྷཔཙྩཡཱ སམྦཱདྷེ ལོམཾ སཾཧརཱཔེཏུ’’ནྟི (ཙཱུལ༹ཝ. ༢༧༥) ཨནུཉྙཱཏཏྟཱ ཡཐཱཝུཏྟསམྦཱདྷེ གཎྜཔིལ༹ཀཝཎཱདིཀེ ཨཱབཱདྷེ སཏི ལོམཾ སཾཧརཱཔེཏུཾ ཝཊྚཏི.

༢༨༠༢. ཨགིལཱནསྶ ཚིནྡཏོ དུཀྐཊཾ ཝུཏྟཾ. ཨཉྙེན ཝཱ པུགྒལེན ཏཐཱ ཀཏྟརིཡཱ ཚིནྡཱཔེནྟསྶ དུཀྐཊཾ ཝུཏྟནྟི སམྦནྡྷོ.

༢༨༠༣. སེསངྒཚེདནེཏི ཨངྒུལིཡཱདིཨཝསེསསརཱིརཱཝཡཝཱནཾ ཚེདནེ. ཨཏྟཝདྷེཏི ཨཏྟུཔཀྐམེན ཝཱ ཨཱཎཏྟིཡཱ ཨུཔཀྐམེན ཝཱ ཨཏྟནོ ཛཱིཝིཏནཱསེ.

༢༨༠༤. ཨངྒནྟི ཨངྒཛཱཏཏོ ཨཝསེསཾ སརཱིརཱཝཡཝཾ. ཨཧིཀཱིཊཱདིདཊྛསྶ ཏཔྤཊིཀཱརཝསེན ¶ ཨངྒཾ ཚིནྡཏོ ན དོསོ. ཏཱདིསཱབཱདྷཔཙྩཡཱ ཏཔྤཊིཀཱརཝསེན ཨངྒཾ ཚིནྡཏོ ན དོསོ. ལོཧིཏཾ མོཙེནྟསྶཱཔི ན དོསོཏི ཡོཛནཱ.

༢༨༠༥. ཨཔརིསྶཱཝནོ བྷིཀྑུ སཙེ མགྒཾ གཙྪཏི, དུཀྐཊཾ. མགྒེ ཨདྡྷཱནེ ཏཾ པརིསྶཱཝནཾ ཡཱཙམཱནསྶ ཡོ ན དདཱཏི, ཏསྶ ཨདདཏོ ཨདེནྟསྶཱཔི ཏཐེཝ དུཀྐཊམེཝཱཏི ཡོཛནཱ. ཡོ པན ཨཏྟནོ ཧཏྠེ པརིསྶཱཝནེ ཝིཛྫམཱནེཔི ཡཱཙཏི, ཏསྶ ན ཨཀཱམཱ དཱཏབྦཾ.

༢༨༠༦. ‘‘ནགྒོ’’ཏི ¶ པདཾ ‘‘ན བྷུཉྫེ’’ཏིཨཱདི ཀིརིཡཱཔདེཧི པཙྩེཀཾ ཡོཛེཏབྦཾ. ན བྷུཉྫེཏི བྷཏྟཱདིཾ བྷུཉྫིཏབྦཾ ན བྷུཉྫེཡྻ. ན པིཝེཏི ཡཱགུཨཱདིཾ པཱཏབྦཾ ན པིཝེཡྻ. ན ཙ ཁཱདེཏི མཱུལཁཱདནཱིཡཱདིཀཾ ཁཱདནཱིཡཾ ན ཁཱདེཡྻ. ན སཱཡཡེཏི ཕཱཎིཏཱདིཀཾ སཱཡིཏབྦཉྩ ན སཱཡེཡྻ ན ལིཧེཡྻ. ན དདེཏི ཨཉྙསྶ བྷཏྟཱདིཾ ཀིཉྩི ན དདེཡྻ. ན གཎྷེཡྻཱཏི ཏཐཱ སཡཾ ནགྒོ ཧུཏྭཱ ན པཊིགྒཎྷེཡྻ. ཨཉྫསཾ མགྒཾ.

༢༨༠༧. པརིཀམྨཾ ན ཀཱཏབྦནྟི པིཊྛིཔརིཀམྨཱདིཔརིཀམྨཾ ན ཀཱཏབྦཾ. ཀཱརཡེཏི སཡཾ ནགྒོ ཧུཏྭཱ ཨཉྙེན པིཊྛིཔརིཀམྨཱདིཔརིཀམྨཾ ན ཀཱརཱཔེཡྻཱཏི ཨཏྠོ.

༢༨༠༨. པིཊྛིཀམྨཱདིཀེ པརིཀམྨེ ཛནྟཱགྷརཱདིཀཱ ཏིསྶོ པཊིཙྪཱདཱི ཝུཏྟཱ ‘‘ཨནུཛཱནཱམི, བྷིཀྑཝེ, ཏིསྶོ པཊིཙྪཱདིཡོ ཛནྟཱགྷརཔཊིཙྪཱདིཾ ཨུདཀཔཊིཙྪཱདིཾ ཝཏྠཔཊིཙྪཱདི’’ནྟི (ཙཱུལ༹ཝ. ༢༦༡) ཨནུཉྙཱཏཱཏི ཡོཛནཱ. པཊིཙྪཱདེཏི ཧིརིཀོཔིནནྟི པཊིཙྪཱདི, ཛནྟཱགྷརམེཝ པཊིཙྪཱདི ཛནྟཱགྷརཔཊིཙྪཱདི. ཨུདཀམེཝ པཊིཙྪཱདི ཨུདཀཔཊིཙྪཱདི. ཝཏྠམེཝ པཊིཙྪཱདི ཝཏྠཔཊིཙྪཱདི. ‘‘སབྦཏྠ པན ཝཊྚཏཱི’’ཏི ཨིམིནཱ ཨིཏརཔཊིཙྪཱདིདྭཡཾ པརིཀམྨེཡེཝ ཝཊྚཏཱིཏི དཱིཔེཏི. སབྦཏྠཱཏི བྷོཛནཱདིསབྦཀིཙྩེསུ.

༢༨༠༩. ཡཏྠ ཀཏྠཙི པེལཱ༹ཡནྟི ཏམྦལོཧཝཊྚལོཧཀཾསལོཧཀཱལ༹ལོཧསུཝཎྞརཛཏཱདཱིཧི ཀཏཱཡ ཝཱ དཱརུམཡཱཡ ཝཱ ཡཱཡ ཀཱཡཙི པེལཱ༹ཡ ཨཱསིཏྟཀཱུཔདྷཱནེ. བྷུཉྫིཏུཾ ན ཙ ཝཊྚཏཱིཏི བྷཱཛནཾ ཋཔེཏྭཱ བྷུཉྫིཏུཾ ན ཝཊྚཏི. ཡཐཱཧ – ‘‘ཨཱསིཏྟཀཱུཔདྷཱནཾ ནཱམ ཏམྦལོཧེན ཝཱ རཛཏེན ཝཱ ཀཏཱཡ པེལཱ༹ཡ ཨེཏཾ ཨདྷིཝཙནཾ, ‘ན བྷིཀྑཝེ ཨཱསིཏྟཀཱུཔདྷཱནེ བྷུཉྫིཏབྦ’ནྟི སཱམཉྙེན པཊིཀྑིཏྟཏྟཱ ¶ པན ¶ དཱརུམཡཱཔི ན ཝཊྚཏཱི’’ཏི (ཙཱུལ༹ཝ. ཨཊྛ. ༢༦༤). ‘‘ཨནུཛཱནཱམི བྷིཀྑཝེ མལོ༹རིཀ’’ནྟི (ཙཱུལ༹ཝ. ༢༦༤) ཨནུཉྙཱཏཏྟཱ མལོ༹རིཀཱཡ ཋཔེཏྭཱ བྷུཉྫིཏུཾ ཝཊྚཏི. ‘‘མལོ༹རིཀཱ’’ཏི ཙ དཎྜཱདྷཱརཀོ ཝུཙྩཏི, ཡཾ ཏཡོ, ཙཏྟཱརོ, བཧཱུ ཝཱ དཎྜཀེ ཨུཔརི ཙ ཧེཊྛཱ ཙ ཝིཏྠཏཾ མཛ྄ཛྷེ སངྐུཙིཏཾ ཀཏྭཱ བནྡྷིཏྭཱ ཨཱདྷཱརཀཾ ཀརོནྟི. ཡཊྛིཨཱདྷཱརཀཔཎྞཱདྷཱརཀཔཙྪིཀཔིཊྛགྷཊཀཀཝཱཊཀཱདིབྷཱཛནམུཁཨུདུཀྑལཱདཱིནིཔི ཨེཏྠེཝ སངྒཧཾ གཙྪནྟི. ཡཊྛིཨཱདྷཱརཀོཏི ཡཊྛིཾཡེཝ ཨུཛུཀཾ ཋཔེཏྭཱ བནྡྷཱིཀཏཨཱདྷཱརཀོ.

ཨེཀབྷཱཛནེ ཝིསུཾ ཝིསུཾ བྷོཛནསྶཱཔི སམྦྷཝཏོ ‘‘བྷུཉྫཏོ ཨེཀབྷཱཛནེ’’ཏི ཨེཏྟཀེཡེཝ ཝུཏྟེ ཏསྶཱཔི པསངྒོ སིཡཱཏི ཏནྣིཝཏྟནཏྠམཱཧ ‘‘ཨེཀཏོ’’ཏི. ‘‘བྷུཉྫཏོ’’ཏི ཨིདཾ ཨུཔལཀྑཎཾ. ཨེཀཏོ ཨེཀབྷཱཛནེ ཡཱགུཨཱདིཔཱནམྤི ན ཝཊྚཏི. ཡཐཱཧ – ‘‘ན, བྷིཀྑཝེ, ཨེཀཐཱལཀེ པཱཏབྦ’’ནྟི (ཙཱུལ༹ཝ. ༢༦༤). ཨཐ ཝཱ བྷུཉྫཏོཏི ཨཛ྄ཛྷོཧཱརསཱམཉྙེན པཱནམྤི སངྒཧིཏནྟི ཝེདིཏབྦཾ. ཨཡམེཏྠ ཝིནིཙྪཡོ – སཙེ ཨེཀོ བྷིཀྑུ བྷཱཛནཏོ ཕལཾ ཝཱ པཱུཝཾ ཝཱ གཧེཏྭཱ གཙྪཏི, ཏསྨིཾ ཨཔགཏེ ཨིཏརསྶ སེསཀཾ བྷུཉྫིཏུཾ ཝཊྚཏི. ཨིཏརསྶཱཔི ཏསྨིཾ ཁཎེ པུན གཧེཏུཾ ཝཊྚཏཱིཏི.

༢༨༡༠. ཡེ དྭེ ཝཱ ཏཡོ ཝཱ བྷིཀྑཱུ ཨེཀཔཱཝུརཎཱ ཝཱ ཨེཀཏྠརཎཱ ཝཱ ཨེཀཏྠརཎཔཱཝུརཎཱ ཝཱ ནིཔཛྫནྟི, ཏེསཉྩ, ཡེ ཨེཀམཉྩེཔི ཨེཀཏོ ནིཔཛྫནྟི, ཏེསཉྩ ཨཱཔཏྟི དུཀྐཊཾ ཧོཏཱིཏི ཡོཛནཱ.

༢༨༡༡. སངྒྷཱཊིཔལླཏྠིཀམུཔཱགཏོཏི ཨེཏྠ སངྒྷཱཊཱིཏི སངྒྷཱཊིནཱམེན ཨདྷིཊྛིཏཙཱིཝརམཱཧ. སངྒྷཱཊིཔལླཏྠིཀཾ ཨུཔགཏེན ཡུཏྟོ ཧུཏྭཱཏི ཨཏྠོ. ན ནིསཱིདེཡྻཱཏི ཝིཧཱརེ ¶ ཝཱ ཨནྟརགྷརེ ཝཱ ཡཏྠ ཀཏྠཙི ན ནིསཱིདེཡྻ. ‘‘སངྒྷཱཊཱིཏི ནཱམེན ཨདྷིཊྛིཏཙཱིཝརཝོཧཱརཔྤཏྟམདྷིཊྛིཏཙཱིཝརཾ ‘སངྒྷཱཊཱི’ཏི ཝུཏྟ’’ནྟི ནིསྶནྡེཧེ, ཁུདྡསིཀྑཱཝཎྞནཱཡམྤི ‘‘སངྒྷཱཊིཡཱ ན པལླཏྠེཏི ཨདྷིཊྛིཏཙཱིཝརེན ཝིཧཱརེ ཝཱ ཨནྟརགྷརེ ཝཱ པལླཏྠིཀོ ན ཀཱཏབྦོ’’ཏི ཝུཏྟཾ. ཨཊྛཀཐཱཡཾ པན ‘‘ཨནྟོགཱམེ ཝཱསཏྠཱཡ ཨུཔགཏེན ཨདྷིཊྛིཏཾ སངྒྷཱཊིཾ ཝིནཱ སེསཙཱིཝརེཧི པལླཏྠིཀཱཡ ནིསཱིདིཏུཾ ཝཊྚཏཱི’’ཏི ཝུཏྟཾ.

ཀིཉྩི ¶ ཀཱིལ༹ཾ ན ཀཱིལེ༹ཡྻཱཏི ཛུཏཀཱིལཱ༹དིཀཾ ཡཾ ཀིཉྩི ཀཱཡིཀཝཱཙསིཀཀཱིལི༹ཀཾ ན ཀཱིལེ༹ཡྻ. ན ཙ གཱཧཡེཏི ན ཙ གཱཧཱཔེཡྻ, ན ཧརཱཔེཡྻཱཏི ཨཏྠོ.

༢༨༡༢. དཱཋིཀཱཡཔཱིཏི མསྶུམྷི. ཨུགྒཏནྟི ཨེཏྠ ‘‘བཱིབྷཙྪ’’ནྟི སེསོ. ཨཉྙནྟི ཨཔལིཏཾ. ཏཱདིསནྟི བཱིབྷཙྪཾ.

༢༨༡༣. ‘‘ཨགིལཱནོ’’ཏི ཨིམིནཱ གིལཱནསྶ ཨནཱཔཏྟིབྷཱཝཾ དཱིཔེཏི. ‘‘དྷཱརེཡྻཱ’’ཏི ཨིམིནཱ སུདྡྷཀཏྟུནིདྡེསེན ཨགིལཱནསྶཔི པརཾ དྷཱརཱཔནེ, པརསྶ དྷཱརཎསཱདིཡནེ ཙ ཨནཱཔཏྟཱིཏི ཝིཉྙཱཡཏཱིཏི. ཨཏྟནོ གུཏྟཏྠཾ, ཙཱིཝརཱདཱིནཾ གུཏྟཏྠཉྩ ཝཊྚཏཱིཏི ཡོཛནཱ. ཏཏྲཱཡཾ ཝིནིཙྪཡོ (ཙཱུལ༹ཝ. ཨཊྛ. ༢༧༠) – ཡསྶ ཀཱཡདཱཧོ ཝཱ པིཏྟཀོཔོ ཝཱ ཧོཏི, ཙཀྑུ ཝཱ དུབྦལཾ, ཨཉྙོ ཝཱ ཀོཙི ཨཱབཱདྷོ ཝིནཱ ཚཏྟེན ཨུཔྤཛྫཏི, ཏསྶ གཱམེ ཝཱ ཨརཉྙེ ཝཱ ཚཏྟཾ ཝཊྚཏི. ཝཱལ༹མིགཙོརབྷཡེསུ ཨཏྟགུཏྟཏྠཾ, ཝསྶེ པན ཙཱིཝརགུཏྟཏྠམྤི ཝཊྚཏི. ཨེཀཔཎྞཙྪཏྟཾ པན སབྦཏྠེཝ ཝཊྚཏི. ‘‘ཨེཀཔཎྞཙྪཏྟཾ ནཱམ ཏཱལཔཏྟ’’ནྟི གཎྛིཔདེསུ ཝུཏྟནྟི.

༢༨༡༤. ཧཏྠིསོཎྜཱཀཱརོ ཨབྷེདོཔཙཱརེན ‘‘ཧཏྠིསོཎྜ’’ནྟི ཝུཏྟོ. ཨེཝམུཔརིཔི. ཙཱིཝརསྶ ནཱམདྷེཡྻཾ ‘‘ཝསན’’ནྟི ¶ ཨིདཾ. ‘‘ནིཝཱསེནྟསྶ དུཀྐཊ’’ནྟི པདདྭཡཉྩ ‘‘ཧཏྠིསོཎྜ’’ནྟིཨཱདཱིཧི སབྦཔདེཧི པཙྩེཀཾ ཡོཛེཏབྦཾ. ཝེལླིཡནྟི ཨེཏྠ གཱཐཱབནྡྷཝསེན སཾ-སདྡལོཔོ, སཾཝེལླིཡནྟི ཨཏྠོ.

ཨེཏྠ ཧཏྠིསོཎྜཾ (ཙཱུལ༹ཝ. ཨཊྛ. ༢༨༠) ནཱམ ནཱབྷིམཱུལཏོ ཧཏྠིསོཎྜསཎྛཱནཾ ཨོལམྦཀཾ ཀཏྭཱ ནིཝཏྠཾ ཙོལི༹ཀིཏྠཱིནཾ ནིཝཱསནཾ ཝིཡ. ཙཏུཀྐཎྞཾ ནཱམ ཨུཔརིཏོ དྭེ, ཧེཊྛཏོ དྭེཏི ཨེཝཾ ཙཏྟཱརོ ཀཎྞེ དསྶེཏྭཱ ནིཝཏྠཾ. མཙྪཝཱལ༹ཀཾ ནཱམ ཨེཀཏོ དསནྟཾ ཨེཀཏོ པཱསནྟཾ ཨོལམྦེཏྭཱ ནིཝཏྠཾ. སཾཝེལླིཡནྟི མལླཀམྨཀཱརཱདཡོ ཝིཡ ཀཙྪཾ བནྡྷིཏྭཱ ནིཝཱསནཾ. ཏཱལཝཎྚཀཾ ནཱམ ཏཱལཝཎྚཱཀཱརེན སཱཊཀཾ ཨོལམྦེཏྭཱ ནིཝཱསནཾ. ཙ-སདྡེན སཏཝལིཀཾ སངྒཎྷཱཏི. སཏཝལིཀཾ ནཱམ དཱིགྷསཱཊཀཾ ཨནེཀཀྑཏྟུཾ ཨོབྷཉྫིཏྭཱ ཨོཝཊྚིཀཾ ཀརོནྟེན ནིཝཏྠཾ, ཝཱམདཀྑིཎཔསྶེསུ ཝཱ ནིརནྟརཾ ཝལིཡོ དསྶེཏྭཱ ནིཝཏྠཾ. སཙེ པན ཛཱཎུཏོ པཊྛཱཡ ཨེཀཱ ཝཱ དྭེ ཝཱ ཝལིཡོ པཉྙཱཡནྟི, ཝཊྚཏི. ཨེཝཾ ནིཝཱསེཏུཾ གིལཱནསྶཔི མགྒཔཊིཔནྣསྶཔི ན ཝཊྚཏི.

ཡམྤི ¶ མགྒཾ གཙྪནྟཱ ཨེཀཾ ཝཱ དྭེ ཝཱ ཀོཎེ ཨུཀྑིཔིཏྭཱ ཨནྟརཝཱསཀསྶ ཨུཔརི ལགྒེནྟི, ཨནྟོ ཝཱ ཨེཀཾ ཀཱསཱཝཾ ཏཐཱ ནིཝཱསེཏྭཱ བཧི ཨཔརཾ ནིཝཱསེནྟི, སབྦཾ ན ཝཊྚཏི. གིལཱནོ པན ཨནྟོཀཱསཱཝསྶ ཨོཝཊྚིཀཾ དསྶེཏྭཱ ཨཔརཾ ཨུཔརི ནིཝཱསེཏུཾ ལབྷཏི. ཨགིལཱནེན དྭེ ནིཝཱསེནྟེན སགུཎཾ ཀཏྭཱ ནིཝཱསེཏབྦཱནི. ཨིཏི ཡཉྩ ཨིདྷ པཊིཀྑིཏྟཾ, ཡཉྩ སེཁིཡཝཎྞནཱཡཾ, ཏཾ སབྦཾ ཝཛྫེཏྭཱ ནིབྦིཀཱརཾ ཏིམཎྜལཾ པཊིཙྪཱདེནྟེན པརིམཎྜལཾ ནིཝཱསེཏབྦཾ. ཡཾ ཀིཉྩི ཝིཀཱརཾ ཀརོནྟོ དུཀྐཊཱ ན མུཙྩཏི.

༢༨༡༥. གིཧིཔཱརུཔནནྟི ¶ ‘‘སེཏཔཊཔཱརུཏཾ (ཙཱུལ༹ཝ. ཨཊྛ. ༢༨༠) པརིབྦཱཛཀཔཱརུཏཾ ཨེཀསཱཊཀཔཱརུཏཾ སོཎྜཔཱརུཏཾ ཨནྟེཔུརིཀཔཱརུཏཾ མཧཱཛེཊྛཀཔཱརུཏཾ ཀུཊིཔཝེསཀཔཱརུཏཾ བྲཱཧྨཎཔཱརུཏཾ པཱལི༹ཀཱརཀཔཱརུཏ’’ནྟི ཨེཝམཱདིཔརིམཎྜལལཀྑཎཏོ ཨཉྙཐཱ པཱརུཏཾ, སབྦམེཏཾ གིཧིཔཱརུཏཾ ནཱམ. ཏསྨཱ ཡཐཱ སེཏཔཊཱ ཨཌྜྷཔཱལཀནིགཎྛཱ པཱརུཔནྟི, ཡཐཱ ཙ ཨེཀཙྩེ པརིབྦཱཛཀཱ ཨུརཾ ཝིཝརིཏྭཱ དྭཱིསུ ཨཾསཀཱུཊེསུ པཱཝུརཎཾ ཋཔེནྟི, ཡཐཱ ཙ ཨེཀསཱཊཀཱ མནུསྶཱ ནིཝཏྠསཱཊཀསྶ ཨེཀེནནྟེན པིཊྛིཾ པཱརུཔིཏྭཱ ཨུབྷོ ཀཎྞེ ཨུབྷོསུ ཨཾསཀཱུཊེསུ ཋཔེནྟི, ཡཐཱ ཙ སུརཱསོཎྜཱདཡོ སཱཊཀེན གཱིཝཾ པརིཀྑིཔནྟཱ ཨུབྷོ ཨནྟེ ཨུདརེ ཝཱ ཨོལམྦེནྟི, པིཊྛིཡཾ ཝཱ ཁིཔནྟི, ཡཐཱ ཙ ཨནྟེཔུརིཀཱཡོ ཨཀྑིཏཱརཀམཏྟཾ དསྶེཏྭཱ ཨོགུཎྛིཀཾ པཱརུཔནྟི, ཡཐཱ ཙ མཧཱཛེཊྛཱ དཱིགྷསཱཊཀཾ ནིཝཱསེཏྭཱ ཏསྶེཝ ཨེཀེནནྟེན སཀལསརཱིརཾ པཱརུཔནྟི, ཡཐཱ ཙ ཀསྶཀཱ ཁེཏྟཀུཊིཾ པཝིསནྟཱ སཱཊཀཾ པལིཝེཋེཏྭཱ ཨུཔཀཙྪཀེ པཀྑིཔིཏྭཱ ཏསྶེཝ ཨེཀེནནྟེན སརཱིརཾ པཱརུཔནྟི, ཡཐཱ ཙ བྲཱཧྨཎཱ ཨུབྷིནྣཾ ཨུཔཀཙྪཀཱནཾ ཨནྟརེན སཱཊཀཾ པཝེསེཏྭཱ ཨཾསཀཱུཊེསུ པཀྑིཔནྟི, ཡཐཱ ཙ པཱལི༹ཀཱརཀོ བྷིཀྑུ ཨེཀཾསཔཱརུཔནེན པཱརུཏཾ ཝཱམབཱཧཾ ཝིཝརིཏྭཱ ཙཱིཝརཾ ཨཾསཀཱུཊཾ ཨཱརོཔེཏི, ཨེཝཾ ཨཔཱརུཔིཏྭཱ སབྦེཔི ཨེཏེ, ཨཉྙེ ཙ ཨེཝརཱུཔེ པཱརུཔནདོསེ ཝཛྫེཏྭཱ ནིབྦིཀཱརཾ པརིམཎྜལཾ པཱརུཔིཏབྦཾ. ཏཐཱ ཨཔཱརུཔིཏྭཱ ཨཱརཱམེ ཝཱ ཨནྟརགྷརེ ཝཱ ཨནཱདརེན ཡཾ ཀིཉྩི ཝིཀཱརཾ ཀརོནྟསྶ དུཀྐཊཾ. པརིམཎྜལཏོ ཝིམུཏྟལཀྑཎནིཝཱསནཔཱརུཔནདོསེ ཝཛྫེཏྭཱ པརིམཎྜལབྷཱཝོཡེཝ ཝུཏྟལཀྑཎོ ཨདྷིཔྤེཏོཏི ཨཏྠོ.

༢༨༡༦. ལོཀཱཡཏཾ ན ཝཱཙེཡྻཱཏི ‘‘སབྦཾ ཨུཙྪིཊྛཾ, སབྦཾ ཨནུཙྪིཊྛཾ, སེཏོ ཀཱཀོ, ཀཱལོ༹ བཀོ ཨིམིནཱ ཙ ཨིམིནཱ ཙ ཀཱརཎེནཱ’’ཏི ཨེཝམཱདིནིརཏྠཀཀཱརཎཔཊིསཾཡུཏྟཾ ཏིཏྠིཡསཏྠཾ ¶ ཨཉྙེསཾ ན ཝཱཙེཡྻ. ན ཙ ཏཾ པརིཡཱཔུཎེཏི ཏཾ ལོཀཱཡཏཾ ན ཙ པརིཡཱཔུཎེཡྻ ན ¶ ཨུགྒཎྷེཡྻ. ཏིརཙྪཱནཝིཛྫཱཏི ཧཏྠིསིཔྤཨསྶསིཔྤདྷནུསིཔྤཱདིཀཱ པརོཔགྷཱཏཀརཱ ཝིཛྫཱ ཙ. བྷིཀྑུནཱ ན པརིཡཱཔུཎིཏབྦཱ, ན ཝཱཙེཏབྦཱཏི ཡོཛནཱ.

༢༨༡༧. སབྦཱཙཱམརིབཱིཛནཱིཏི སེཏཱདིཝཎྞེཧི སབྦེཧི ཙམརཝཱལེཧི ཀཏཱ བཱིཛནཱི. ན ཙཱལིམྤེཡྻ དཱཡཾ ཝཱཏི དཝཌཱཧཱདིཨུཔདྡཝནིཝཱརཎཱཡ ཨནུཉྙཱཏཾ པཊགྒིདཱནཀཱརཎཾ ཝིནཱ ཨརཉྙཾ ཨགྒིནཱ ན ཨཱལིམྤེཡྻ. དཝཌཱཧེ པན ཨཱགཙྪནྟེ ཨནུཔསམྤནྣེ ཨསཏི པཊགྒིཾ དཱཏུཾ, ཨཔྤཧརིཏཀརཎེན ཝཱ པརིཁཱཁཎནེན ཝཱ པརིཏྟཱཎཾ ཀཱཏུཾ, སེནཱསནཾ པཏྟཾ ཝཱ ཨཔྤཏྟཾ ཝཱ ཨགྒིཾ ཨལླསཱཁཾ བྷཉྫིཏྭཱ ནིབྦཱཔེཏུཉྩ ལབྷཏི. ཨུདཀེན པན ཀཔྤིཡེནེཝ ལབྷཏི, ནེཏརེན. ཨནུཔསམྤནྣེ པན སཏི ཏེནེཝ ཀཔྤིཡཝོཧཱརེན ཀཱརཱཔེཏབྦཾ. མུཁཾ ན ཙ ལཉྫེཏི མནོསིལཱདིནཱ མུཁཾ ན ལིམྤེཡྻ, ཏིལཀེན ཨངྒཾ ན ཀརེཡྻཱཏི ཨཏྠོ.

༢༨༡༨. ཨུབྷཏོཀཱཛནྟི ཨུབྷཏོཀོཊིཡཱ བྷཱརཝཧནཀོཊིཀཱཛཾ. ཨནྟརཀཱཛཀནྟི ཨུབྷཡཀོཊིཡཱ ཋིཏཝཱཧཀེཧི ཝཧིཏབྦཾ མཛ྄ཛྷེབྷཱརཡུཏྟཀཱཛཾ. སཱིསཀྑནྡྷཀཊིབྷཱརཱདཡོ ཧེཊྛཱ ཝུཏྟལཀྑཎཱཝ.

༢༨༡༩. ཡོ བྷིཀྑུ ཝཌྜྷཀིཨངྒུལེན ཨཊྛངྒུལཱདྷིཀཾ ཝཱ ཏེནེཝ ཨངྒུལེན ཙཏུརངྒུལཔཙྪིམཾ ཝཱ དནྟཀཊྛཾ ཁཱདཏི, ཨེཝཾ ཁཱདཏོ ཏསྶ ཨཱཔཏྟི དུཀྐཊཾ ཧོཏཱིཏི ཡོཛནཱ.

༢༨༢༠. ཀིཙྩེ སཏིཔཱིཏི སུཀྑཀཊྛཱདིགྒཧཎཀིཙྩེ པན སཏི. པོརིསནྟི པུརིསཔྤམཱཎཾ, བྱཱམམཏྟནྟི ཝུཏྟཾ ཧོཏི. ཨཱཔདཱསཱུཏི ཝཱལ༹མིགཱདཡོ ཝཱ དིསྭཱ མགྒམཱུལ༹ྷོ ཝཱ དིསཱ ཨོལོཀེཏུཀཱམོ ཧུཏྭཱ དཝཌཱཧཾ ཝཱ ཨུདཀོགྷཾ ཝཱ ཨཱགཙྪནྟཾ ¶ དིསྭཱ ཝཱ ཨེཝརཱུཔཱསུ ཨཱཔདཱསུ. ཝཊྚཏེཝཱབྷིརཱུཧིཏུནྟི ཨཏིཨུཙྩམྤི རུཀྑཾ ཨཱརོཧིཏུཾ ཝཊྚཏི ཨེཝ.

༢༨༢༡. སཙེ ཨཀལླཀོ གིལཱནོ ན སིཡཱ, ལསུཎཾ མཱགདྷཾ ཨཱམཀཾ བྷཎྜིཀལསུཎཾ ན ཙ ཁཱདེཡྻ ནེཝ པརིབྷུཉྫེཡྻཱཏི ཡོཛནཱ. བྷཎྜིཀལསུཎཾ ནཱམ ཙཏུམིཉྫཏོ པཊྛཱཡ བཧུམིཉྫཾ. པལཎྜུཀབྷཉྫནཀཱདིལསུཎེ མགདྷེསུ ཛཱཏཏྟེཔི ན དོསོ. ལསུཎཝིབྷཱགོ ཧེཊྛཱ དསྶིཏོཡེཝ. གིལཱནསྶ པན ལསུཎཾ ཁཱདིཏུཾ ཝཊྚཏི. ཡཐཱཧ – ‘‘ཨནུཛཱནཱམི, བྷིཀྑཝེ, ཨཱབཱདྷཔཙྩཡཱ ལསུཎཾ ཁཱདིཏུ’’ནྟི (ཙཱུལ༹ཝ. ༢༨༩). ཨཱབཱདྷཔཙྩཡཱཏི ཡསྶ ཨཱབཱདྷསྶ ལསུཎཾ ¶ བྷེསཛྫཾ ཧོཏི, ཏཔྤཙྩཡཱཏི ཨཏྠོ. བུདྡྷཝཙནནྟི སངྒཱིཏིཏྟཡཱརུལ༹ྷཱ པིཊཀཏྟཡཔཱལི༹. ཨཉྙཐཱཏི སཀྐཊཱདིཁལིཏཝཙནམཡཾ ཝཱཙནཱམགྒཾ ན རོཔེཏབྦཾ, ཏཐཱ ན ཋཔེཏབྦནྟི ཝུཏྟཾ ཧོཏི.

༢༨༢༢. ཁིཔིཏེཏི ཡེན ཀེནཙི ཁིཔིཏེ. ‘‘ཛཱིཝཱ’’ཏི ན ཝཏྟབྦནྟི ཡོཛནཱ. བྷིཀྑུནཱ ཁིཔིཏེ གིཧིནཱ ‘‘ཛཱིཝཐཱ’’ཏི ཝུཏྟེན པུན ‘‘ཙིརཾ ཛཱིཝཱ’’ཏི ཝཏྟུཾ ཝཊྚཏཱིཏི ཡོཛནཱ. ‘‘ཙིར’’ནྟི པདེ སཏིཔི ཝཊྚཏི.

༢༨༢༣. ཨཱཀོཊེནྟསྶཱཏི ཀཱཡེན ཝཱ ཀཱཡཔཊིབདྡྷཱདཱིཧི ཝཱ པཧརནྟསྶ. པུཔྥསཾཀིཎྞེཏི པུཔྥསནྠཏེ.

༢༨༢༤. ནྷཱཔིཏཱ པུབྦཀཱ ཨེཏསྶཱཏི ནྷཱཔིཏཔུབྦཀོ, ནྷཱཔིཏཛཱཏིཀོཏི ཨཏྠོ. ཁུརབྷཎྜནྟི ནྷཱཔིཏཔརིཀྑཱརཾ. ན གཎྷེཡྻཱཏི ན པརིཧརེཡྻ. སཙེ ཡོ ནྷཱཔིཏཛཱཏིཀོ ཧོཏི, སོ ཁུརབྷཎྜཾ གཧེཏྭཱ ན ཧརེཡྻཱཏི ཨཏྠོ. ཨཉྙསྶ ཧཏྠཏོ གཧེཏྭཱ ཀེསཙྪེདཱདི ཀཱཏུཾ ཝཊྚཏི. ཨུཎྞཱིཏི ཀེསཀམྦལཾ ཝིནཱ ཨུཎྞམཡཱ པཱཝུརཎཛཱཏི. ‘‘གོནཀཾ ¶ ཀུཏྟཀཾ ཙིཏྟཀ’’མིཙྩཱདིནཱ ཝུཏྟབྷེདཝནྟཏཱཡ ཨཱཧ ‘‘སབྦཱ’’ཏི. ཨུཎྞམཡཾ ཨནྟོཀརིཏྭཱ པཱརུཔིཏུཾ ཝཊྚཏཱིཏི ཨཱཧ ‘‘བཱཧིརལོམིཀཱ’’ཏི. ཡཐཱཧ – ‘‘ན, བྷིཀྑཝེ, བཱཧིརལོམཱི ཨུཎྞཱིདྷཱརེཏབྦཱ’’ཏི (ཙཱུལ༹ཝ. ༢༤༩). སིཀྑཱཔདཊྛཀཐཱཡཾ ‘‘ཨུཎྞལོམཱནི བཧི ཀཏྭཱ ཨུཎྞཔཱཝཱརཾ པཱརུཔནྟི, ཏཐཱ དྷཱརེནྟསྶ དུཀྐཊཾ. ལོམཱནི ཨནྟོ ཀཏྭཱ པཱརུཔིཏུཾ ཝཊྚཏཱི’’ཏི (ཙཱུལ༹ཝ. ཨཊྛ. ༢༤༩).

༢༨༢༥. ཨངྒརཱགཾ ནཱམ ཀུངྐུམཱདི. ཀརོནྟསྶཱཏི ཨབྦྷཉྫནྟསྶ. ཨཀཱཡབནྡྷནསྶ གཱམཾ པཝིསཏོཔི དུཀྐཊཾ སམུདཱིརིཏནྟི ཡོཛནཱ. ཨེཏྠ ཙ ཨསཏིཡཱ ཨབནྡྷིཏྭཱ ནིཀྑནྟེན ཡཏྠ སརཏི, ཏཏྠ བནྡྷིཏབྦཾ. ‘‘ཨཱསནསཱལཱཡ བནྡྷིསྶཱམཱི’’ཏི གནྟུཾ ཝཊྚཏི. སརིཏྭཱ ཡཱཝ ན བནྡྷཏི, ན ཏཱཝ པིཎྜཱཡ ཙརིཏབྦཾ.

༢༨༢༦. སབྦཾ ཨཱཡུདྷཾ ཝིནཱ སབྦཾ ལོཧཛཾ ལོཧམཡབྷཎྜཉྩ པཏྟཾ, སངྐམནཱིཡཔཱདུཀཾ, ཡཐཱཝུཏྟལཀྑཎཾ པལླངྐཾ, ཨཱསནྡིཉྩ ཝིནཱ སབྦཾ དཱརུཛཾ དཱརུམཡབྷཎྜཉྩ ཝུཏྟལཀྑཎམེཝ ཀཏཀཾ ¶ , ཀུམྦྷཀཱརིཀཾ དྷནིཡསྶེཝ སབྦམཏྟིཀཱམཡཾ ཀུཊིཉྩ ཝིནཱ སབྦཾ མཏྟིཀཱམཡཾ བྷཎྜཉྩ ཀཔྤིཡནྟི ཡོཛནཱ.

ཁུདྡཀཝཏྠུཀྑནྡྷཀཀཐཱཝཎྞནཱ.

སེནཱསནཀྑནྡྷཀཀཐཱཝཎྞནཱ

༢༨༢༧. ཨཱསནྡིཀོཏི ཙཏུརསྶཔཱིཋཾ. ཨཏིཀྐནྟཔམཱཎོཏི ཧེཊྛཱ ཨཊནིཡཱ ཝཌྜྷཀིཧཏྠཏོ ཨུཙྩཏརཔྤམཱཎཔཱདཀོ. ཨེཀཔསྶཏོ དཱིགྷོ པན ཨུཙྩཔཱདཀོ ན ཝཊྚཏི. ཡཐཱཧ ¶ – ‘‘ཨུཙྩཀམྤི ཨཱསནྡིཀནྟི ཝཙནཏོ ཨེཀཏོབྷཱགེན དཱིགྷཔཱིཋམེཝ ཧི ཨཊྛངྒུལཱདྷིཀཔཱདཀཾ ན ཝཊྚཏི, ཙཏུརསྶཨཱསནྡིཀོ པན པམཱཎཱཏིཀྐནྟོཔི ཝཊྚཏཱི’’ཏི (ཙཱུལ༹ཝ. ཨཊྛ. ༢༩༧).

ཏཐཱཏི ཨིམིནཱ ‘‘ཨཏིཀྐནྟཔམཱཎོ’’ཏི ཨིདཾ པཙྩཱམསཏི. པཉྩངྒཔཱིཋནྟི ཙཏྟཱརོ པཱདཱ, ཨཔསྶེནནྟི ཨིམེཧི པཉྩངྒེཧི ཡུཏྟཔཱིཋཾ. སཏྟངྒནྟི ཏཱིསུ དིསཱསུ ཨཔསྶཡེ ཡོཛེཏྭཱ ཀཏཾ. ཏཉྷི ཙཏཱུཧི པཱདེཧི, ཏཱིཧི ཨཔསྶེཧི ཙ ཡུཏྟཏྟཱ ‘‘སཏྟངྒཔཱིཋ’’ནྟི ཝུཏྟཾ. ཨེས ནཡོ མཉྩེཔི. ཡཐཱཧ – ‘‘སཏྟངྒོ ནཱམ ཏཱིསུ དིསཱསུ ཨཔསྶཡཾ ཀཏྭཱ ཀཏམཉྩོ, ཨཡམྤི པམཱཎཱཏིཀྐནྟོ ཝཊྚཏཱི’’ཏི (ཙཱུལ༹ཝ. ཨཊྛ. ༢༩༧).

༢༨༢༨. ཏཱུལོནདྡྷཱཏི ཨུཔརི ཏཱུལཾ པཀྑིཔིཏྭཱ བདྡྷཱ. གྷརེཡེཝཱཏི གིཧཱིནཾ གེཧེཡེཝ ནིསཱིདིཏུཾ ཝཊྚཏཱིཏི སམྦནྡྷོ. ‘‘ནིསཱིདིཏུ’’ནྟི ཨིམིནཱཝ སཡནཾ པཊིཀྑིཏྟཾ. སཱིསཔཱདཱུཔདྷཱནནྟི སཱིསཱུཔདྷཱནཉྩེཝ པཱདཱུཔདྷཱནཉྩ. ཙ-སདྡོ པི-སདྡཏྠེ སོ ‘‘ཨགིལཱནསྶཱ’’ཏི ཨེཏྠ ཨཱནེཏྭཱ སམྦནྡྷིཏབྦོ, ཏེན ཨགིལཱནསྶཱཔི ཏཱཝ ཝཊྚཏི, པགེཝ གིལཱནསྶཱཏི དཱིཔེཏི.

༢༨༢༩. ན ཀེཝལཾ གིལཱནསྶ སཱིསཔཱདཱུཔདྷཱནམེཝ ཝཊྚཏི, ཨཐ ཁོ ཨིདམྤཱིཏི དསྶེཏུམཱཧ ‘‘སནྠརིཏྭཱ’’ཏིཨཱདི. ཨུཔདྷཱནཱནི སནྠརིཏྭཱཏི བཧཱུ ཨུཔདྷཱནཱནི ཨཏྠརིཏྭཱ. ཏཏྠ ཙཱཏི ཏསྨིཾ ཨུཔདྷཱནསནྠརེ. པཙྩཏྠརཎཀཾ དཏྭཱཏི ཨུཔརི པཙྩཏྠརཎཀཾ ཨཏྠརིཏྭཱ.

༢༨༣༠. ཏིརིཡནྟི ¶ ཝིཏྠཱརཏོ. མུཊྛིརཏནནྟི པཱཀཏིཀམུཊྛིཀརཏནཾ. ཏཾ པན ཝཌྜྷཀཱིནཾ ཝིདཏྠིམཏྟཾ. མིཏནྟི པཱཀཊིཏཾ པམཱཎཡུཏྟཾ ཧོཏཱིཏི ཡོཛནཱ. ཀཏྠཙི པོཏྠཀེསུ ‘‘མཏ’’ནྟི ¶ པཱཋོ དིསྶཏི, སོ ན གཧེཏབྦོ. དཱིགྷཏོཏི བིམྦོཧནསྶ དཱིགྷཏོ. དིཡཌྜྷནྟི དིཡཌྜྷཧཏྠཾ ཝཱ དྭིཧཏྠཾ ཝཱ ཧོཏཱིཏི ཀུརུནྡིཡཾ ཝུཏྟནྟི སམྦནྡྷོ. ཨིདམེཝ ཧི ‘‘སཱིསཔྤམཱཎབིམྦོཧན’’ནྟི ཨདྷིཔྤེཏཾ. ཡཐཱཧ –

‘‘སཱིསཔྤམཱཎཾ ནཱམ ཡསྶ ཝིཏྠཱརཏོ ཏཱིསུ ཀཎྞེསུ དྭིནྣཾ ཀཎྞཱནཾ ཨནྟརཾ མིནིཡམཱནཾ ཝིདཏྠི ཙེཝ ཙཏུརངྒུལཉྩ ཧོཏི, མཛ྄ཛྷཊྛཱནཾ མུཊྛིརཏནཾ ཧོཏི. དཱིགྷཏོ པན དིཡཌྜྷརཏནཾ ཝཱ དྭིརཏནཾ ཝཱཏི ཀུརུནྡིཡཾ ཝུཏྟཾ. ཨཡཾ སཱིསཔྤམཱཎསྶ ཨུཀྐཊྛཔརིཙྪེདོ, ཨིཏོ ཨུདྡྷཾ ན ཝཊྚཏི, ཧེཊྛཱ པན ཝཊྚཏཱི’’ཏི (ཙཱུལ༹ཝ. ཨཊྛ. ༢༩༧).

༢༨༣༡. ཙོལ༹ནྟི པིལོཏིཀཱ. པཎྞནྟི རུཀྑལཏཱནཾ པཎྞཾ. ཨུཎྞཱཏི ཨེལ༹ཀཱདཱིནཾ ལོམཾ. ཏིཎནྟི དབྦཏིཎཱདི ཡཾ ཀིཉྩི ཏིཎཾ. ཝཱཀནྟི ཀདལིཨཀྐམཀཙིཝཱཀཱདིཀཾ. ཨེཏེཧི པཉྩཧི པཱུརིཏཱ བྷིསིཡོ ཏཱུལཱནཾ གཎནཱཝསཱ ཧེཏུགབྦྷཱནཾ ཨེཏེསཾ པཉྩནྣཾ གབྦྷཱནཾ གཎནཱཝསེན པཉྩ བྷཱསིཏཱཏི ཡོཛནཱ.

༢༨༣༢. བིམྦོཧནགབྦྷཾ དསྶེཏུམཱཧ ‘‘བྷིསཱི’’ཏིཨཱདི. པཉྩེཝཱཏི ཡཐཱཝུཏྟཙོལཱ༹དིཔཉྩེཝ. ཏཐཱ ཏཱུལཱནི ཏཱིཎིཔཱིཏི ‘‘ཨནུཛཱནཱམི, བྷིཀྑཝེ, ཏཱིཎི ཏཱུལཱནི རུཀྑཏཱུལཾ ལཏཱཏཱུལཾ པོཊཀིཏཱུལ’’ནྟི (ཙཱུལ༹ཝ. ༢༩༧) ཨནུཉྙཱཏཱནི ཏཱིཎིཔི ཏཱུལཱནི. ཨེཏྠ ཙ རུཀྑཏཱུལཾ ནཱམ སིམྦལིརུཀྑཱདཱིནཾ ཡེསཾ ཀེསཉྩི རུཀྑཱནཾ ཏཱུལཾ. ལཏཱཏཱུལཾ ནཱམ ཁཱིརཝལླིཨཱདཱིནཾ ཡཱསཾ ཀཱསཉྩི ཝལླཱིནཾ ཏཱུལཾ. པོཊཀིཏཱུལཾ ནཱམ པོཊཀིཏིཎཱདཱིནཾ ཡེསཾ ཀེསཉྩི ཏིཎཛཱཏིཀཱནཾ ཨནྟམསོ ཨུཙྪུནལཱ༹དཱིནམྤི ཏཱུལཾ. ལོམཱནི མིགཔཀྑཱིནནྟི སཱིཧཱདིཙཏུཔྤདཱནཾ, མོརཱདིཔཀྑཱིནཾ ལོམཱནི. ཨིམེཏི བྷིསིགབྦྷཱདཡོ ཨིམེ དས བིམྦོཧནསྶ གབྦྷཱཏི སམྦནྡྷོ.

༢༨༣༣. ཨེཝཾ ¶ ཀཔྤིཡཾ བྷིསིབིམྦོཧནགབྦྷཾ དསྶེཏྭཱ ཨིདཱནི ཨཀཔྤིཡཾ དསྶེཏུམཱཧ ‘‘མནུསྶལོམ’’ནྟིཨཱདི. ལོམེསུ མནུསྶལོམཉྩ པུཔྥེསུ བཀུལཔིཡངྒུཔུཔྥཱདིཀཾ སབྦཾ པུཔྥཉྩ པཎྞེསུ ¶ ཙ སུདྡྷཾ ཀེཝལཾ ཏམཱལཔཏྟཉྩ ན ཝཊྚཏཱིཏི ཡོཛནཱ. ‘‘སུདྡྷ’’ནྟི ཨིམིནཱ ཏམཱལཔཏྟཾ སེསགབྦྷེཧི མིསྶཾ ཝཊྚཏཱིཏི བྱཏིརེཀཏོ དཱིཔེཏི.

༢༨༣༤. མསཱུརཀེཏི ཙམྨཚཝིབྷིསིབིམྦོཧནེ.

༢༨༣༥. ‘‘སུདྡྷ’’ནྟི ཨིམིནཱ བྱཏིརེཀཏོ དསྶིཏམེཝཏྠཾ སརཱུཔཏོ ཝིབྷཱཝེཏུམཱཧ ‘‘མིསྶ’’ནྟིཨཱདི.

༢༨༣༦. ཏིརཙྪཱནགཏསྶ ཝཱཏི ཨནྟམསོ གཎྜུཔྤཱདསྶཱཔི. ཀཱརེནྟསྶཱཏི ཙིཏྟཀམྨཀཊྛཀམྨཱདིཝསེན ཀཱརཱཔེནྟསྶ ཝཱ ཀརོནྟསྶ ཝཱ.

༢༨༣༧. ཛཱཏཀནྟི ཨཔཎྞཀཛཱཏཀཱདིཛཱཏཀཉྩ. ཝཏྠུནྟི ཝིམཱནཝཏྠུཨཱདིཀཾ པསཱདཛནཀཾ ཝཱ པེཏཝཏྠུཨཱདིཀཾ སཾཝེགཛནཀཾ ཝཱ ཝཏྠུཾ. ཝཱ-སདྡེན ཨཊྛཀཐཱགཏཾ ཨིདྷ དསྶིཏཔཀརཎཾ སངྒཎྷཱཏི. པརེཧི ཝཱཏི ཨེཏྠ ཝཱ-སདྡོ ཨཝདྷཱརཎེ, ཏེན པརེཧི ཀཱརཱཔེཏུམེཝ ཝཊྚཏི, ན སཡཾ ཀཱཏུནྟི དཱིཔེཏི. སཡཾ ཀཱཏུམྤཱིཏི ཨེཏྠ ཨཔི-སདྡོ པགེཝ ཀཱརཱཔེཏུནྟི དཱིཔེཏི.

༢༨༣༨. ཡོ པན བྷིཀྑུ དྭཱིཧི ཝསྶེཧི ཝཱ ཨེཀེན ཝཱ ཝསྶེན ཡསྶ བྷིཀྑུནོ ཝུཌྜྷཏརོ ཝཱ ཧོཏི དཧརཏརོ ཝཱ, སོ ཏེན བྷིཀྑུནཱ སམཱནཱསནིཀོ ནཱམ ཧོཏཱིཏི ཡོཛནཱ.

༢༨༣༩. ‘‘སཏྟཝསྶེན པཉྩཝསྶོ’’ཏི ཨིདཾ དྭཱིཧི ཝསྶེཧི ཝུཌྜྷནཝཀཱནཾ སམཱནཱསནིཀཏྟེ ཨུདཱཧརཎཾ. ‘‘ཚ ¶ ཝསྶེན པཉྩཝསྶོ’’ཏི ཨིདཾ ཨེཀཝསྶེན ཝུཌྜྷནཝཀཱནཾ སམཱནཱསནིཀཏྟེ ཨུདཱཧརཎཾ.

༢༨༤༠. ཡཾ ཏིཎྞཾ ནིསཱིདིཏུཾ པཧོཏི, ཏཾ ཧེཊྛཱ དཱིགྷཱསནཾ ནཱམཱཏི ཡོཛནཱ. ‘‘སམཱནཱསནིཀཱ མཉྩེ ནིསཱིདིཏྭཱ མཉྩཾ བྷིནྡིཾསུ, པཱིཋེ ནིསཱིདིཏྭཱ པཱིཋཾ བྷིནྡིཾསཱུ’’ཏི (ཙཱུལ༹ཝ. ༣༢༠) ཨཱརོཔིཏེ ཝཏྠུམྷི ‘‘ཨནུཛཱནཱམི, བྷིཀྑཝེ, དུཝགྒསྶ མཉྩཾ དུཝགྒསྶ པཱིཋ’’ནྟི (ཙཱུལ༹ཝ. ༣༢༠) ཨནུཉྙཱཏཏྟཱ ‘‘དྭེ’’ཏི སམཱནཱསནིཀེ དྭེ སནྡྷཱཡ ཝུཏྟཾ.

༢༨༤༡. ཨུབྷཏོབྱཉྫནཾ ¶ , ཨིཏྠིཾ, པཎྜཀཾ ཋཔེཏྭཱ སབྦེཧིཔི གཧཊྛེཧི, པབྦཛིཏེཧི ཝཱ པུརིསེཧི སཧ དཱིགྷཱསནེ ནིསཱིདིཏུཾ ཨནུཉྙཱཏནྟི ཡོཛནཱ. པོཏྠཀེསུ པན ཀཏྠཙི ‘‘སབྦེས’’ནྟི སཱམིཝཙནནྟོ པཱཋོ དིསྶཏི, ཏཏོ ‘‘སབྦེཧིཔཱི’’ཏི ཀརཎཝཙནནྟོཝ པཱཋོ ཡུཏྟཏརོ. ཀརཎཝཙནཔྤསངྒེ ཝཱ སཱམིཝཙནནིདྡེསོཏི ཝེདིཏབྦཾ. ཡཐཱཧ ‘‘ཡཾ ཏིཎྞཾ པཧོཏི, ཏཾ སཾཧཱརིམཾ ཝཱ ཧོཏུ ཨསཾཧཱརིམཾ ཝཱ, ཏཐཱརཱུཔེ ཨཔི ཕལཀཁཎྜེ ཨནུཔསམྤནྣེནཱཔི སདྡྷིཾ ནིསཱིདིཏུཾ ཝཊྚཏཱི’’ཏི (ཙཱུལ༹ཝ. ཨཊྛ. ༣༢༠).

༢༨༤༢. པུརིམིཀོཏི ཉཏྟིདུཏིཡཱཡ ཀམྨཝཱཙཱཡ སམྨཏེན ‘‘ན ཚནྡཱགཏིཾ གཙྪེཡྻ…པེ… གཧིཏཱགཧིཏཉྩ ཛཱནེཡྻཱ’’ཏི (ཙཱུལ༹ཝ. ༣༡༧) ཝུཏྟེཧི པཉྩཧི ཨངྒེཧི སམནྣཱགཏེན བྷིཀྑུནཱ པུརིམཝསྶཱུཔནཱཡིཀདིཝསེ ‘‘ཨནུཛཱནཱམི, བྷིཀྑཝེ, པཋམཾ བྷིཀྑཱུ གཎེཏུཾ, པཋམཾ བྷིཀྑཱུ གཎེཏྭཱ སེཡྻཱ གཎེཏུཾ, སེཡྻཱ གཎེཏྭཱ སེཡྻགྒེན གཱཧེཏུ’’ནྟིཨཱདིནཱ (ཙཱུལ༹ཝ. ༣༡༨) ནཡེན ཨནུཉྙཱཏནིཡཱམེནེཝ སེནཱསནགྒཱཧཱཔནཾ པུརིམིཀོ ནཱམ སེནཱསནགྒཱཧོ. ཨེཝམེཝ པཙྪིམིཀཱཡ ¶ ཝསྶཱུཔནཱཡིཀདིཝསེ སེནཱསནགྒཱཧཱཔནཾ པཙྪིམིཀོ ནཱམ. ཨེཝམེཝ མཧཱཔཝཱརཎཱདིཝསསྶ ཨནནྟརདིཝསེ ‘‘བྷནྟེ, ཨནྟརཱམུཏྟཀཾ སེནཱསནཾ གཎྷཐཱ’’ཏི ཝཏྭཱ ཝུཌྜྷཔཊིཔཱཊིཡཱ སེནཱསནགྒཱཧཱཔནཾ ཨནྟརཱམུཏྟཀོ ནཱམ. པཀཱསིཏོ ‘‘ཨཔརཛྫུགཏཱཡ ཨཱསཱལ༹ྷིཡཱཔུརིམིཀོ གཱཧཱཔེཏབྦོ, མཱསགཏཱཡ ཨཱསཱལ༹ྷིཡཱ པཙྪིམིཀོ གཱཧེཏབྦོ, ཨཔརཛྫུགཏཱཡ པཝཱརཎཱཡ ཨཱཡཏིཾ ཝསྶཱཝཱསཏྠཱཡ ཨནྟརཱམུཏྟཀོ གཱཧེཏབྦོ’’ཏི (ཙཱུལ༹ཝ. ༣༡༨) ཝུཏྟོ.

༢༨༤༣. ཝུཏྟམེཝཏྠཾ ནིཡམེཏྭཱ དསྶེཏུམཱཧ ‘‘པུབྦཱརུཎཱ’’ཏིཨཱདི. ཨིདྷ པཱཊིཔདཱ ནཱམ དྭེ ཝསྶཱུཔནཱཡིཀདིཝསཱ ཙེཝ མཧཱཔཝཱརཎཱཡ ཨནནྟརདིཝསོ ཙ. ཨིམེསཾ ཏིཎྞཾ པཱཊིཔདདིཝསཱནཾ ཨརུཎོ པུབྦཱརུཎོ ནཱམ. ཏེ དིཝསེ ཨཏིཀྐམྨ དུཏིཡཏིཐིཔཊིབདྡྷོ ཨརུཎོ པུནཱརུཎོ ནཱམ. ཨིདནྟི ཨུབྷཡཱརུཎཱནནྟརཾ. སེནཱསནགཱཧཀསྶཱཏི ཨེཏྠ སཀཏྠེ ཀ-པཙྩཡོ, སེནཱསནགྒཱཧསྶཱཏི ཨཏྠོ. ཡཐཱཧ – ‘‘ཨིདཉྷི སེནཱསནགྒཱཧསྶ ཁེཏྟ’’ནྟི. ཝསྶཱུཔགཏེ ཝསྶཱུཔགམེ ཀཱཏབྦེ སཏི, སཱདྷེཏབྦཔཡོཛནེ བྷུམྨཾ. ཝསྶཱུཔགཏེཏི ཝཱ ནིམིཏྟཏྠེ བྷུམྨཾ. པུརིམིཀཱཡ, ཧི པཙྪིམིཀཱཡ ཙ ཝསྶཱུཔགམནསྶ ཏཾ ཏདཧུ སེནཱསནགྒཱཧོ ནིམིཏྟཾ, ཨནྟརཱམུཏྟཀོ པན ཨཱགམིནོ ཝསྶཱུཔགམནསྶཱཏི ཨེཝཾ ཏིཝིདྷོཔི སེནཱསནགྒཱཧོ ཝསྶཱུཔགམནསྶ ནིམིཏྟཾ ཧོཏི.

༢༨༤༤. པཱཊིཔདདིཝསསྶ ¶ ཨརུཎེ ཨུགྒཏེཡེཝ སེནཱསནེ པན གཱཧིཏེ ཨཉྙོ བྷིཀྑུ ཨཱགནྟྭཱ སཙེ སེནཱསནཔཉྙཱཔཀཾ སེནཱསནཾ ཡཱཙཏི, སོ བྷིཀྑུ སེནཱསནཔཉྙཱཔཀེན ¶ ‘‘སེནཱསནཾ གཱཧིཏ’’ནྟི ཝཏྟབྦོཏི ཡོཛནཱ.

༢༨༤༥. ཝསྶཱཝཱསསྶ ཨིདཾ ཝསྶཱཝཱསིཀཾ, ཝསྶཾཝུཏྠཱནཾ དཱཏབྦཙཱིཝརཾ, གཱཐཱབནྡྷཝསེན ‘‘ཝསྶཝཱསིཀ’’ནྟི རསྶཏྟཾ. སངྒྷིཀཾ ཨཔལོཀེཏྭཱ གཧིཏཾ ཝསྶཱཝཱསིཀཾ ཙཱིཝརཾ སཙེ ཏཏྲཛཾ ཏཏྲུཔྤཱདཾ ཧོཏི, ཨནྟོཝསྶེ ཝིབྦྷནྟོཔི ལབྷཏེཏི ཡོཛནཱ. ‘‘ཏཏྲཛཾ སཙེ’’ཏི ཨིམིནཱ ཙསྶ དཱཡཀཱནཾ ཝསྶཱཝཱསིཀཔཙྩཡཝསེན གཱཧིཏཾ པན ན ལབྷཏཱིཏི དཱིཔེཏི. ཡཐཱཧ – ‘‘པཙྩཡཝསེན གཱཧིཏཾ པན ན ལབྷཏཱིཏི ཝདནྟཱི’’ཏི (ཙཱུལ༹ཝ. ཨཊྛ. ༣༡༨).

༢༨༤༦-༨. སཙེ ཝུཏྠཝསྶོ ཡོ བྷིཀྑུ ཨཱཝཱསིཀཧཏྠཏོ ཀིཉྩི ཏིཙཱིཝརཱདིཀཾ ཀཔྤིཡབྷཎྜཾ ཨཏྟནོ གཧེཏྭཱ ‘‘ཨསུཀསྨིཾ ཀུལེ མཡ྄ཧཾ གཧིཏཾ ཝསྶཱཝཱསིཀཙཱིཝརཾ གཎྷ’’ ཨིཏི ཨེཝཾ ཝཏྭཱ ཏསྶ ཨཱཝཱསིཀསྶ དཏྭཱ དིསཾ གཙྪཏི པཀྐམཏི, སོ ཏཏྠ གཏཊྛཱནེ སཙེ ཨུཔྤབྦཛཏི གིཧཱི ཧོཏི, ཏསྶ དིསཾགཏསྶ སམྤཏྟཾ ཏཾ ཝསྶཱཝཱསིཀཾ ཏེན ཏཐཱ དིནྣམྤི ཨཱཝཱསིཀོ བྷིཀྑུ གཧེཏུཾ ན ལབྷཏི, ཏསྶ པཱཔིཏཾ ཝསྶཱཝཱསིཀཙཱིཝརཾ སངྒྷིཀཾཡེཝ སིཡཱཏི ཡོཛནཱ. ཡཐཱཧ – ‘‘ཨིདྷ, བྷིཀྑཝེ, ཝསྶཾཝུཏྠོ བྷིཀྑུ ཝིབྦྷམཏི, སངྒྷསྶེཝེཏ’’ནྟི.

༢༨༤༩. ཏསྨིཾ ཀུལེ དཱཡཀེ མནུསྶེ སམྨུཁཱ ཙེ པཊིཙྪཱཔེཏི, ཏསྶ དིསཾགམིསྶ སམྤཏྟཾ ཝསྶཱཝཱསིཀཙཱིཝརཾ ཨཱཝཱསིཀོ ལབྷཏཱིཏི ཡོཛནཱ.

༢༨༥༠. ཏཏྠ ཨཱརཱམོ ནཱམ པུཔྥཱརཱམོ ཝཱ ཕལཱརཱམོ ཝཱ. ཝིཧཱརོ ནཱམ ཡཾ ཀིཉྩི པཱསཱདཱདིསེནཱསནཾ. ཝཏྠཱུནི དུཝིདྷསྶཔཱིཏི ཨཱརཱམཝཏྠུ, ཝིཧཱརཝཏྠཱུཏི དུཝིདྷསྶ ཝཏྠཱུནི ¶ ཙ. ཨཱརཱམཝཏྠུ ནཱམ ཏེསཾཡེཝ ཨཱརཱམཱནཾ ཨཏྠཱཡ པརིཙྪིནྡིཏྭཱ ཋཔིཏོཀཱསོ, ཏེསུ ཝཱ ཨཱརཱམེསུ ཝིནཊྛེསུ ཏེསཾ པོརཱཎཀབྷཱུམིབྷཱགོ. ཝིཧཱརཝཏྠུ ནཱམ ཏསྶ པཏིཊྛཱནོཀཱསོ. བྷིསི ནཱམ ཨུཎྞབྷིསིཨཱདཱིནཾ པཉྩནྣཾ ཨཉྙཏརཱ. བིམྦོཧནཾ ནཱམ ཝུཏྟཔྤཀཱརཱནཾ བིམྦོཧནཱནཾ ཨཉྙཏརཾ. མཉྩཾ ནཱམ མསཱརཀོ བུནྡིཀཱབདྡྷོ, ཀུལཱི༹རཔཱདཀོ, ཨཱཧཙྩཔཱདཀོཏི ཨིམེསཾ པུབྦེ ཝུཏྟཱནཾ ཙཏུནྣཾ མཉྩཱནཾ ཨཉྙཏརཾ. པཱིཋཾ ནཱམ མསཱརཀཱདཱིནཾཡེཝ ཙཏུནྣཾ པཱིཋཱནཾ ཨཉྙཏརཾ.

༢༨༥༡. ལོཧཀུམྦྷཱི ¶ ནཱམ ཀཱལ༹ལོཧེན ཝཱ ཏམྦལོཧེན ཝཱ ཡེན ཀེནཙི ལོཧེན ཀཏཱ ཀུམྦྷཱི. ཀཊཱཧོ པཱཀཊོཝ. ‘‘བྷཱཎཀ’’ནྟི ཨལཉྫརོ ཝུཙྩཏི. ཨལཉྫརོཏི ཙ བཧུཨུདཀགཎྷནིཀཱ མཧཱཙཱཊི, ཛལཾ གཎྷིཏུཾ ཨལནྟི ཨལཉྫརོ. ‘‘ཝཊྚཙཱཊི ཝིཡ ཧུཏྭཱ ཐོཀཾ དཱིགྷམུཁོ མཛ྄ཛྷེ པརིཙྪེདཾ དསྶེཏྭཱ ཀཏོ’’ཏི གཎྛིཔདེ ཝུཏྟཾ. ཝཱརཀོཏི གྷཊོ. ཀུ ཝུཙྩཏི པཐཝཱི, ཏསྶཱ དཱལནཏོ ཝིདཱརཎཏོ ‘‘ཀུདཱལོ’’ཏི ཨཡོམཡཨུཔཀརཎཝིསེསོ ཝུཙྩཏི.

༢༨༥༢. ཝལླིཝེལུ༹ཨཱདཱིསུ ཝེལཱུ༹ཏི མཧཱཝེཎུ. ཏིཎནྟི གེཧཙྪཱདནཾ ཏིཎཾ. པཎྞཾ ཏཱལཔཎྞཱདིཀཾ. མུཉྫནྟི མུཉྫཏིཎཾ. པབྦཛནྟི པབྦཛཏིཎཾ, མཏྟིཀཱ པཀཏིམཏྟིཀཱ ཝཱ གེརུཀཱདིཔཉྩཝཎྞཱ ཝཱ མཏྟིཀཱ. ཨཱཧ ཙ ཨཊྛཀཐཱཙརིཡོ.

༢༨༥༣. དྭེཏི པཋམདུཏིཡགརུབྷཎྜཱནི. དྭཱིཧི སངྒཧིཏཱནི ‘‘ཨཱརོམོ, ཨཱརཱམཝཏྠུ, ཨིདཾ པཋམཾ. ཝིཧཱརོ, ཝིཧཱརཝཏྠུ, ཨིདཾ དུཏིཡ’’ནྟི (ཙཱུལ༹ཝ. ༣༢༡-༣༢༢) ཝུཏྟཏྟཱ. ཙཏུསངྒཧནྟི ཙཏཱུཧི བྷིསིཨཱདཱིཧི ¶ སངྒཧོ ཡསྶཱཏི ཝིགྒཧོ. ནཝཀོཊྛཱསནྟི ལོཧཀུམྦྷིཨཱདཡོ ནཝ ཀོཊྛཱསཱ ཨསྶཱཏི ཝིགྒཧོ. ཨཊྛདྷཱ ཝལླིཨཱདཱིཧི ཨཊྛཧི པཀཱརེཧི.

༢༨༥༤. ཨིཏཱིཏི ནིདསྶནཏྠེ. ཨེཝཾ ཝུཏྟནཡེན པཉྩཧི རཱསཱིཧི ནིདྡིཊྛཱནཾ གརུབྷཎྜགཎནཱནཾ པིཎྜཝསེན པཉྩཝཱིསཏིཝིདྷཾ གརུབྷཎྜཾ པཉྩནིམྨལལོཙནོ ནཱཐོ པཀཱསཡཱིཏི ཡོཛནཱ. པཉྩ ནིམྨལཱནི ལོཙནཱནི ཡསྶཱཏི ཝིགྒཧོ, མཾསདིབྦདྷམྨབུདྡྷསམནྟཙཀྑུཝསེན པཉྩཝིདྷཝིཔྤསནྣལོཙནོཏི ཨཏྠོ.

༢༨༥༥. ཝིསྶཛྫེནྟོཏི ཨིསྶརཝཏཱཡ པརསྶ ཝིསྶཛྫེནྟོ. ཝིབྷཱཛེནྟོཏི ཝསྶགྒེན པཱཔེཏྭཱ ཝིབྷཱཛེནྟོ. ཨིདཉྷི སབྦམྤི གརུབྷཎྜཾ སེནཱསནཀྑནྡྷཀེ (ཙཱུལ༹ཝ. ༣༢༡) ‘‘ཨཝིསྶཛྫིཡཾ. ཀིཊཱགིརིཝཏྠུམྷི (ཙཱུལ༹ཝ. ༣༢༢) ཨཝེབྷངྒིཡ’’ནྟི ཙ ཝུཏྟཾ. ཨུབྷཡཏྠ ཨཱགཏཝོཧཱརབྷེདདསྶནམུཁེན ཏཏྠ ཝིཔྤཊིཔཛྫནྟསྶ ཨཱཔཏྟིཾ དསྶེནྟོ ཨཱཧ ‘‘བྷིཀྑུ ཐུལླཙྩཡཾ ཕུསེ’’ཏི. པརིཝཱརེ པན –

ཨཝིསྶཛྫིཡཾ ¶ ཨཝེབྷངྒིཡཾ, པཉྩ ཝུཏྟཱ མཧེསིནཱ;

ཝིསྶཛྫེནྟསྶ པརིབྷུཉྫནྟསྶ ཨནཱཔཏྟི;

པཉྷཱ མེསཱ ཀུསལེཧི ཙིནྟིཏཱཏི. (པརི. ༤༧༩) –

ཨཱགཏཾ. ཏསྨཱ མཱུལཙྪེཛྫཝསེན ཨཝིསྶཛྫིཡཾ, ཨཝེབྷངྒིཡཉྩ, པརིཝཏྟནཝསེན པན ཝིསྶཛྫེནྟསྶ, པརིབྷུཉྫནྟསྶ ཙ ཨནཱཔཏྟཱིཏི ཨེཝམེཏྠ ཨདྷིཔྤཱཡོ.

༢༨༥༦. བྷིཀྑུནཱ པུགྒལེན ཝཱ སངྒྷེན ཝཱ གཎེན ཝཱ གརུབྷཎྜཾ ཏུ ཝིསྶཛྫིཏཾ ཨཝིསྶཊྛམེཝ ཧོཏི, ཝིབྷཏྟཉྩ ཨཝིབྷཱཛིཏམེཝ ཧོཏཱིཏི ཡོཛནཱ.

༢༨༥༧. ཨེཏྠ ¶ ཨེཏེསུ པཉྩསུ གརུབྷཎྜེསུ པུརིམེསུ ཏཱིསུ ཨགརུབྷཎྜཀཾ ཀིཉྩི ན ཙ ཨཏྠཱིཏི ཡོཛནཱ. ཙཏུཏྠེ པན གརུབྷཎྜེ ཨཊྛཀཐཱཡ ‘‘ལོཧཀུམྦྷཱི, ལོཧབྷཱཎཀཾ, ལོཧཀཊཱཧནྟི ཨིམཱནི ཏཱིཎི མཧནྟཱནི ཝཱ ཧོནྟུ ཁུདྡཀཱནི ཝཱ, ཨནྟམསོ པསཏམཏྟཨུདཀགཎྷནཀཱནིཔི གརུབྷཎྜཱནིཡེཝཱ’’ཏི ཝུཏྟནཡཾ དསྶེཏུམཱཧ ‘‘ལོཧཀུམྦྷཱི’’ཏིཨཱདི.

༢༨༥༨. ཨིདཾ ཏིཝིདྷནྟི སམྦནྡྷོ. པཱདགཎྷནཀོཏི ཨེཏྠ པཱདོ ནཱམ མགདྷནཱལི༹ཡཱ པཉྩནཱལི༹མཏྟགཎྷནཀོ བྷཱཛནཝིསེསོ. བྷཱཛནཱནཾ པམཱཎཾ ཀརོནྟཱ སཱིཧལ༹དཱིཔེ ཡེབྷུཡྻེན ཏེནེཝ པཱདེན མིནནྟི. ཏསྨཱ ཨཊྛཀཐཱཡཾ ‘‘སཱིཧལ༹དཱིཔེ པཱདགཎྷནཀོ བྷཱཛེཏབྦོ’’ཏི (ཙཱུལ༹ཝ. ཨཊྛ. ༣༢༡) ཝུཏྟཾ. ལོཧཝཱརཀོཏི ཀཱལ༹ལོཧཏམྦལོཧཝཊྚལོཧཀཾསལོཧཱནཾ ཡེན ཀེནཙི ཀཏོ. བྷཱཛིཡོཏི བྷཱཛེཏབྦོ.

༢༨༥༩. ཏཏོ ཨུདྡྷནྟི ཏཏོ པཱདགཎྷནཀཝཱརཀཏོ ཨུདྡྷཾ ཨདྷིཀཾ གཎྷནཀོ. ཨེཝཾ པཱལི༹ཨཱགཏཱནཾ ཝིནིཙྪཡཾ དསྶེཏྭཱ ཨཊྛཀཐཱགཏཱནཾ (ཙཱུལ༹ཝ. ཨཊྛ. ༣༢༡) དསྶེཏུམཱཧ ‘‘བྷིངྒཱརཱདཱིནཱི’’ཏིཨཱདི. བྷིངྒཱརོ ནཱམ ཨུཀྑིཏྟཧཏྠིསོཎྜཱཀཱརེན ཀཏཛལནིགྒམཀཎྞིཀོ ཨུཙྩགཱིཝོ མཧཱམུཁཨུདཀབྷཱཛནཝིསེསོ. ཨཱདི-སདྡེན ཨཊྛཀཐཱགཏཱནི ‘‘པཊིགྒཧཨུལུ༹ངྐདབྦིཀཊཙྪུཔཱཏིཏཊྚཀསརཀསམུགྒཨངྒཱརཀཔལླདྷཱུམཀཊཙྪུཨཱདཱིནི ཁུདྡཀཱནི ཝཱ མཧནྟཱནི ཝཱ’’ཏི (ཙཱུལ༹ཝ. ཨཊྛ. ༣༢༡) ཝུཏྟཱནི སངྒཎྷཱཏི. སབྦཱནཱིཏི ཁུདྡཀཱནི ཝཱ མཧནྟཱནི ཝཱ.

༢༨༦༠. ཏམྦཐཱལཀཱ ¶ ཨཡཐཱལཀཱ བྷཱཛེཏབྦཱཏི ཡོཛནཱ. ཙ-སདྡེན ཨཊྛཀཐཱཡཾ ཝུཏྟཾ ‘‘ཋཔེཏྭཱ པན བྷཱཛནཝིཀཏིཾ ¶ ཨཉྙསྨིམྤི ཀཔྤིཡལོཧབྷཎྜེ ཨཉྫནཱི ཨཉྫནིསལཱཀཱ ཀཎྞམལཧརཎཱི སཱུཙི པཎྞསཱུཙི ཁུདྡཀོ པིཔྥལཀོ ཁུདྡཀཾ ཨཱརཀཎྚཀཾ ཀུཉྩིཀཱ ཏཱལ༹ཾ ཀཏྟརཡཊྛིཝེདྷཀོ ནཏྠུདཱནཾ བྷིནྡིཝཱལོ ལོཧཀཱུཊོ ལོཧཀུཊྚི ལོཧགུལོ༹ ལོཧཔིཎྜི ལོཧཨརཎཱི ཙཀྐལིཀཾ ཨཉྙམྤི ཝིཔྤཀཏཾ ལོཧབྷཎྜཾ བྷཱཛིཡ’’ནྟི (ཙཱུལ༹ཝ. ཨཊྛ. ༣༢༡) ཝཙནཾ སངྒཎྷཱཏི. དྷཱུམནེཏྟནྟི དྷཱུམནཱལི༹ཀཱ. ཨཱདི-སདྡེན ‘‘ཕཱལདཱིཔརུཀྑདཱིཔཀཔལླཀཨོལམྦཀདཱིཔཀཨིཏྠིཔུརིསཏིརཙྪཱནགཏརཱུཔཀཱནི པན ཨཉྙཱནི ཝཱ བྷིཏྟིཙྪདནཀཝཱཊཱདཱིསུ ཨུཔནེཏབྦཱནི ཨནྟམསོ ལོཧཁིལཀཾ ཨུཔཱདཱཡ སབྦཱནི ལོཧབྷཎྜཱནི གརུབྷཎྜཱནིཡེཝ ཧོནྟཱི’’ཏི (ཙཱུལ༹ཝ. ཨཊྛ. ༣༢༡) ཝུཏྟཾ སངྒཎྷཱཏི.

༢༨༦༡. ཨཏྟནཱ པཊིལདྡྷནྟི ཨེཏྠ པི-སདྡོ ལུཏྟནིདྡིཊྛོ, ཨཏྟནཱ པཊིལདྡྷམྤཱིཏི ཨཏྠོ. བྷིཀྑུནཱ ཨཏྟནཱ པཊིལདྡྷམྤི ཏཾ ལོཧབྷཎྜཾ ཀིཉྩིཔི པུགྒལིཀཔརིབྷོགེན ན བྷུཉྫིཏབྦནྟི ཡོཛནཱ.

༢༨༦༢. ཀཾསཝཊྚལོཧཱནཾ ཝིཀཱརབྷཱུཏཱནི ཏམྦམཡབྷཱཛནཱནིཔི པུགྒལིཀཔརིབྷོགེན སབྦསོ པརིབྷུཉྫིཏུཾ ན ཝཊྚནྟཱིཏི ཡོཛནཱ.

༢༨༦༣. ཨེསེཝ ནཡོཏི ‘‘ན པུགྒལིཀབྷོགེནཱ’’ཏིཨཱདིནཱ དསྶིཏནཡོ. སངྒྷིཀེསུ ཝཱ གིཧཱིནཾ སནྟཀེསུ ཝཱ ཡཐཱཝུཏྟབྷཎྜེསུ པརིབྷོགཔཙྩཡཱ དོསོ ན ཨཏྠཱིཏི ཡོཛནཱ. ‘‘ཀཾསལོཧཱདིབྷཱཛནཾ སངྒྷསྶ དིནྣམྤི པཱརིཧཱརིཡཾ ན ཝཊྚཏི, གིཧིཝིཀཏནཱིཧཱརེནེཝ པརིབྷུཉྫིཏབྦ’’ནྟི (ཙཱུལ༹ཝ. ཨཊྛ. ༣༢༡) མཧཱཔཙྩརིཡཾ ཝུཏྟཾ. ཨེཏྠ ཙ པཱརིཧཱརིཡཾ ན ཝཊྚཏི ཨཏྟནོ སནྟཀཾ ཝིཡ གཧེཏྭཱ པརིབྷུཉྫིཏུཾ ན ཝཊྚཏཱིཏི. ‘‘གིཧིཝིཀཏནཱིཧཱརེནེཝ ¶ པརིབྷུཉྫིཏབྦ’’ནྟི ཨིམིནཱ སཙེ ཨཱརཱམིཀཱདཡོ པཊིསཱམེཏྭཱ པཊིདེནྟི, པརིབྷུཉྫིཏུཾ ཝཊྚཏཱིཏི དསྶེཏི.

༢༨༦༤. ཁཱིརཔཱསཱཎནྟི མུདུཀཱ པཱཎཛཱཏི. ཝུཏྟཉྷི མཱཏིཀཱཊྛཀཐཱགཎྛིཔདེ ‘‘ཁཱིརཔཱསཱཎོ ནཱམ མུདུཀོ པཱསཱཎོ’’ཏི. གརུཀནྟི གརུབྷཎྜཾ. ཏཊྚཀཱདིཀནྟི ཨཱདི-སདྡེན སརཀཱདཱིནཾ ¶ སངྒཧོ. གྷཊཀོཏི ཁཱིརཔཱསཱཎམཡོཡེཝ ཝཱརཀོ. ‘‘པཱདགཎྷནཏོ ཨུདྡྷ’’ནྟི ཨིམིནཱ པཱདགཎྷནཀོ ཨགརུབྷཎྜནྟི དཱིཔེཏི.

༢༨༦༥. ‘‘སུཝཎྞརཛཏཧཱརཀཱུཊཛཱཏིཕལིཀབྷཱཛནཱནི གིཧིཝིཀཏཱནིཔི ན ཝཊྚནྟི, པགེཝ སངྒྷིཀཔརིབྷོགེན ཝཱ པུགྒལིཀཔརིབྷོགེན ཝཱ’’ཏི (ཙཱུལ༹ཝ. ཨཊྛ. ༣༢༡) ཨཊྛཀཐཱཡཾ ཝུཏྟནཡཾ དསྶེཏུམཱཧ ‘‘སིངྒཱི’’ཏིཨཱདི. སིངྒཱིཏི སུཝཎྞཾ. སཛ྄ཛྷུ རཛཏཾ. ཧཱརཀཱུཊཾ ནཱམ སུཝཎྞཝཎྞཾ ལོཧཛཱཏཾ. ཕལིཀེན ཨུབྦྷཝཾ ཛཱཏཾ, ཕལིཀམཡཾ བྷཱཛནནྟི ཨཏྠོ. གིཧཱིནཾ སནྟཀཱནིཔཱིཏི ཨཔི-སདྡེན གིཧིཝིཀཏཔརིབྷོགེནཱཔི ཏཱཝ ན ཝཊྚནྟི, པགེཝ སངྒྷིཀཔརིབྷོགེན ཝཱ པུགྒལིཀཔརིབྷོགེན ཝཱཏི དཱིཔེཏི. སེནཱསནཔརིབྷོགེ པན ཨཱམཱསམྤི ཨནཱམཱསམྤི སབྦཾ ཝཊྚཏི.

༢༨༦༦. ཁུདྡཱཏི ཡཱཡ ཝཱསིཡཱ ཋཔེཏྭཱ དནྟཀཊྛཙྪེདནཾ ཝཱ ཨུཙྪུཏཙྪནཾ ཝཱ ཨཉྙཾ མཧཱཀམྨཾ ཀཱཏུཾ ན སཀྐཱ, ཨེཝརཱུཔཱ ཁུདྡཀཱ ཝཱསི བྷཱཛནཱིཡཱ. མཧཏྟརཱིཏི ཡཐཱཝུཏྟཔྤམཱཎཱཡ ཝཱསིཡཱ མཧནྟཏརཱ ཡེན ཀེནཙི ཨཱཀཱརེན ཀཏཝཱསི གརུབྷཎྜཾ. ཝེཛྫཱནཾ སིརཱཝེདྷནཀམྤི ཙ ཕརསུ ཏཐཱ གརུབྷཎྜནྟི ཡོཛནཱ.

༢༨༦༧. ཀུཋཱརཱིཏི ¶ ཨེཏྠ ཕརསུསདིསོཝ ཝིནིཙྪཡོ. ཡཱ པན ཨཱཝུདྷསངྑེཔེན ཀཏཱ, ཨཡཾ ཨནཱམཱསཱ. ཀུདཱལོ ཨནྟམསོ ཙཏུརངྒུལམཏྟོཔི. སིཁརནྟི དྷནུརཛྫུཏོ ནཱམེཏྭཱ དཱརུཨཱདཱིནཾ ཝིཛ྄ཛྷནཀཀཎྚཀོ. ཏེནེཝཱཏི ནིཁཱདནེནེཝ.

༢༨༦༨. ནིཁཱདནསྶ བྷེདཝནྟཏཱཡ ཏཾ ཝིབྷཛིཏྭཱ དསྶེཏུམཱཧ ‘‘ཙཏུརསྶམུཁཾ དོཎིམུཁ’’ནྟི. དོཎིམུཁནྟི དོཎི ཝིཡ ཨུབྷཡཔསྶེན ནཱམིཏམུཁཾ. ཝངྐནྟི ཨགྒཏོ ནཱམེཏྭཱ ཀཏནིཁཱདནཾ. པི-སདྡེན ཨུཛུཀཾ སངྒཎྷཱཏི. ཏཏྠ ཙཱཏི ཏསྨིཾ ནིཁཱདནེ. སདཎྜཾ ཁུདྡཀཉྩ ནིཁཱདནཾ སབྦཾ གརུབྷཎྜནྟི ཡོཛནཱ. ‘‘སདཎྜཾ ཁུདྡཀ’’ནྟི ཨིམིནཱ ཝིསེསནདྭཡེན ཨདཎྜཾ ཕལམཏྟཾ སིཔཱཊིཀཱཡ ཋཔེཏྭཱ པརིཧརཎཡོགྒཾ སམྨཛྫནིདཎྜཝེདྷནཀཾ ནིཁཱདནཾ ཨགརུབྷཎྜཾ, ཏཏོ མཧནྟཾ ནིཁཱདནཾ ཨདཎྜམྤི གརུབྷཎྜནྟི དཱིཔེཏི. ཡེཧི མནུསྶེཧི ཝིཧཱརེ ཝཱསིཨཱདཱིནི དིནྣཱནི ཙ ཧོནྟི, ཏེ ཙེ གྷརེ དཌྜྷེ ཝཱ ཙོརེཧི ཝཱ ཝིལུཏྟེ ‘‘དེཐ ནོ, བྷནྟེ, ཨུཔཀརཎེ ¶ པུན པཱཀཏིཀེ ཀརིསྶཱམཱ’’ཏི ཝདནྟི, དཱཏབྦཱ. སཙེ ཨཱཧརནྟི, ན ཝཱརེཏབྦཱ, ཨནཱཧརནྟཱཔི ན ཙོདེཏབྦཱ.

༢༨༦༩. ‘‘ཀམྨཱརཏཊྚཀཱརཙུནྡཀཱརནལ༹ཀཱརམཎིཀཱརཔཏྟབནྡྷཀཱནཾ ཨདྷིཀརཎིམུཊྛིཀསཎྜཱསཏུལཱདཱིནི སབྦཱནི ལོཧམཡཨུཔཀརཎཱནི སངྒྷེ དིནྣཀཱལཏོ པཊྛཱཡ གརུབྷཎྜཱནི. ཏིཔུཀོཊྚཀསུཝཎྞཀཱརཙམྨཀཱརཨུཔཀརཎེསུཔི ཨེསེཝ ནཡོ. ཨཡཾ པན ཝིསེསོ – ཏིཔུཀོཊྚཀཨུཔཀརཎེསུཔི ཏིཔུཙྪེདནསཏྠཀཾ, སུཝཎྞཀཱརཨུཔཀརཎེསུ སུཝཎྞཙྪེདནསཏྠཀཾ, ཙམྨཀཱརཨུཔཀརཎེསུ ཀཏཔརིཀམྨཙམྨཚིནྡནཀཾ ཁུདྡཀསཏྠནྟི ཨིམཱནི བྷཱཛནཱིཡབྷཎྜཱནཱི’’ཏི (ཙཱུལ༹ཝ. ཨཊྛ. ༣༢༡) ཨཊྛཀཐཱགཏཾ ཝིནིཙྪཡེཀདེསཾ དསྶེཏུམཱཧ ‘‘མུཊྛིཀ’’ནྟིཨཱདི ¶ . ཏུལཱདིཀནྟི ཨེཏྠ ཨཱདི-སདྡེན ཀཏྟརིཨཱདིཨུཔཀརཎཾ སངྒཎྷཱཏི.

༢༨༧༠. ‘‘ནཧཱཔིཏཏུནྣཀཱརཱནཾ ཨུཔཀརཎེསུཔི ཋཔེཏྭཱ མཧཱཀཏྟརིཾ, མཧཱསཎྜཱསཾ, མཧཱཔིཔྥལཀཉྩ སབྦཾ བྷཱཛནཱིཡཾ. མཧཱཀཏྟརིཨཱདཱིནི གརུབྷཎྜཱནཱི’’ཏི (ཙཱུལ༹ཝ. ཨཊྛ. ༣༢༡) ཨཊྛཀཐཱགཏཾ ཝིནིཙྪཡཾ དསྶེཏུམཱཧ ‘‘ནྷཱཔིཏཀསྶཱ’’ཏིཨཱདི. ནྷཱཔིཏཀསྶ ཨུཔཀརཎེསུ སཎྜཱསོ, མཧཏྟརཱི ཀཏྟརཱི ཙ ཏུནྣཀཱརཱནཉྩ ཨུཔཀརཎེསུ མཧཏྟརཱི ཀཏྟརཱི ཙ མཧཱཔིཔྥལཀཉྩ གརུབྷཎྜཀནྟི ཡོཛནཱ.

༢༨༧༡. ཨེཏྟཱཝཏཱ ཙཏུཏྠགརུབྷཎྜེ ཝིནིཙྪཡཾ དསྶེཏྭཱ ཨིདཱནི པཉྩམགརུབྷཎྜེ ཝིནིཙྪཡཾ དསྶེཏུམཱཧ ‘‘ཝལླཱི’’ཏིཨཱདི. ཝེཏྟལཏཱདིཀཱ ཝལླི དུལླབྷཊྛཱནེ སངྒྷསྶ དིནྣཱ ཝཱ ཏཏྠ སངྒྷསྶ བྷཱུམིཡཾ ཛཱཏཱ, རཀྑིཏཱ གོཔིཏཱ ཝཱ ཨཌྜྷབཱཧུཔྤམཱཎཱ གརུབྷཎྜཾ ཧོཏཱིཏི ཡོཛནཱ. ‘‘ཨཌྜྷབཱཧཱུཏི ཀཔྤརཏོ པཊྛཱཡ ཡཱཝ ཨཾསཀཱུཊ’’ནྟི གཎྛིཔདེ ཝུཏྟཾ. ‘‘ཨཌྜྷབཱཧུ ནཱམ ཝིདཏྠིཙཏུརངྒུལ’’ནྟིཔི ཝདནྟི. སཙེ སཱ ཝལླི སངྒྷཀམྨེ, ཙེཏིཡཀམྨེ ཙ ཀཏེ ཨཏིརེཀཱ ཧོཏི, པུགྒལིཀཀམྨེཔི ཨུཔནེཏུཾ ཝཊྚཏི. ཨརཀྑིཏཱ པན གརུབྷཎྜམེཝ ན ཧོཏི.

༢༨༧༢. ཨཊྛཀཐཱཡཾ ‘‘སུཏྟམཀཙིཝཱཀནཱལི༹ཀེརཧཱིརཙམྨམཡཱ རཛྫུཀཱ ཝཱ ཡོཏྟཱནི ཝཱ ཝཱཀེ ཙ ནཱལི༹ཀེརཧཱིརེ ཙ ཝཊྚེཏྭཱ ཀཏཱ ཨེཀཝཊྚཱ ཝཱ དྭིཝཊྚཱ ཝཱ སངྒྷསྶ དིནྣཀཱལཏོ པཊྛཱཡ གརུབྷཎྜཾ. སུཏྟཾ པན ཨཝཊྚེཏྭཱ དིནྣཾ, མཀཙིཝཱཀནཱལི༹ཀེརཧཱིརཱ ཙ བྷཱཛནཱིཡཱ’’ཏི (ཙཱུལ༹ཝ. ཨཊྛ. ༣༢༡) ཨཱགཏཝིནིཙྪཡཾ དསྶེཏུམཱཧ ‘‘སུཏྟཝཱཀཱདིནིབྦཏྟཱ’’ཏིཨཱདི. ཝཱཀཱདཱིཏི ¶ ཨཱདི-སདྡེན མཀཙིཝཱཀནཱལི༹ཀེརཧཱིརཙམྨཱནཾ གཧཎཾ. ནཱཏིདཱིགྷཱ རཛྫུཀཱ. ཨཏིདཱིགྷཾ ཡོཏྟཀཾ.

༢༨༧༣. ནཱལི༹ཀེརསྶ ¶ ཧཱིརེ ཝཱ མཀཙིཝཱཀེ ཝཱ ཝཊྚེཏྭཱ ཀཏཱ ཨེཀཝཊྚཱཔི གརུབྷཎྜཀནྟི ཡོཛནཱ. ཡེཧི པནེཏཱནི རཛྫུཀཡོཏྟཱདཱིནི དིནྣཱནི ཧོནྟི, ཏེ ཨཏྟནོ ཀརཎཱིཡེན ཧརནྟཱ ན ཝཱརེཏབྦཱ.

༢༨༧༤. ཝཌྜྷཀིཨངྒུལེན ཨཊྛངྒུལཱཡཏོ སཱུཙིདཎྜམཏྟོ པརིཎཱཧཏོ སཱིཧལ༹དཱིཔེ ལེཁཀཱནཾ ལེཁནིསཱུཙིདཎྜམཏྟོ སངྒྷསྶ དིནྣོ ཝཱ ཏཏྠཛཱཏཀོ ཝཱ རཀྑིཏོ གོཔིཏོ ཝེལུ༹ གརུབྷཎྜཾ སིཡཱཏི ཡོཛནཱ. ‘‘ཡཾ མཛ྄ཛྷིམཔུརིསསྶ ཀནིཊྛངྒུལིཡཱ ཨགྒཔྤམཱཎཾ, ཨིདཾ སཱིཧལ༹དཱིཔེ ལེཁཀཱནཾ ལེཁནིསཱུཙིཡཱ པམཱཎ’’ནྟི ཝདནྟི. སོ ཙ སངྒྷཀམྨེ ཙ ཙེཏིཡཀམྨེ ཙ ཀཏེ ཨཏིརེཀོ པུགྒལིཀཀམྨེ དཱཏུཾ ཝཊྚཏི.

༢༨༧༥. དཎྜོ ཙ སལཱཀཱ ཙ དཎྜསལཱཀཱ, ཚཏྟསྶ དཎྜསལཱཀཱཏི ཝིགྒཧོ. ཚཏྟདཎྜོ ནཱམ ཚཏྟཔིཎྜི. ཚཏྟསལཱཀཱཏི ཚཏྟཔཉྫརསལཱཀཱ. དཎྜོཏི ཨུཔཱཧནདཎྜཀོ. ‘‘དཎྜོ’’ཏི སཱམཉྙེན ཝུཏྟེཔི ཨཊྛཀཐཱགཏེསུ སརཱུཔེན ཨིདྷཱཝུཏྟོ ཨུཔཱཧནདཎྜོཡེཝ སཱམཉྙཝཙནེན པཱརིསེསཏོ གཧེཏབྦོཏི. དཌྜྷགེཧམནུསྶཱ གཎྷིཏྭཱ གཙྪནྟཱ ན ཝཱརེཏབྦཱ.

༢༨༧༦. མུཉྫཱདཱིསུ གེཧཙྪདནཱརཧེསུ ཏིཎེསུ ཡཾ ཀིཉྩི མུཊྛིམཏྟཾ ཏིཎཾ ཝཱ གེཧཙྪདནཱརཧཾ ཏཱལཔཎྞཱདི ཨེཀམྤི སངྒྷསྶ དིནྣཾ ཝཱ ཏཏྠ སངྒྷིཀབྷཱུམིཡཾ ཛཱཏཾ ཝཱ གརུབྷཎྜཾ སིཡཱཏི ཡོཛེཏབྦཱ. ཏཏྠ མུཊྛིམཏྟཾ ནཱམ ཀརལ༹མཏྟཾ. ཨིདཉྩ ཀརལ༹ཾ ཀཏྭཱ ཚཱདེནྟཱནཾ ཚདནཀརལ༹ཝསེན གཧེཏབྦཾ. ཏཱལཔཎྞཱདཱིཏི ཨཱདི-སདྡེན ནཱལི༹ཀེརཔཎྞཱདིགེཧཙྪདནཔཎྞཱནཾ གཧཎཾ. ཏམྤི མུཉྫཱདི སངྒྷཀམྨེ ཙ ཙེཏིཡཀམྨེ ཙ ཀཏེ ཨཏིརེཀཾ པུགྒལིཀཀམྨེ དཱཏུཾ ཝཊྚཏི. དཌྜྷགེཧམནུསྶཱ གཧེཏྭཱ གཙྪནྟི, ན ཝཱརེཏབྦཱཏི.

༢༨༧༧-༨. ཨཊྛངྒུལཔྤམཱཎོཏི ¶ དཱིགྷཏོ ཨཊྛངྒུལམཏྟོ. ཀེཙི ‘‘པུཐུལཏོ’’ཏི ཝདནྟི. རིཏྟཔོཏྠཀོཏི ལེཁཱཧི སུཉྙཔོཏྠཀོ, ན ལིཁིཏཔོཏྠཀོཏི ཝུཏྟཾ ཧོཏི. ‘‘ཨཊྛངྒུལཔྤམཱཎོ’’ཏི ¶ ཨིམིནཱ ཨཊྛངྒུལཏོ ཨཱུནཔྤམཱཎོ བྷཱཛིཡོ, ‘‘རིཏྟཔོཏྠཀོ’’ཏི ཨིམིནཱ ཨཊྛངྒུལཏོ ཨཏིརེཀཔྤམཱཎོཔི ལིཁིཏཔོཏྠཀོ བྷཱཛིཡོཏི དསྶེཏི.

‘‘མཏྟིཀཱ པཀཏིམཏྟིཀཱ ཝཱ ཧོཏུ པཉྩཝཎྞཱ ཝཱ སུདྷཱ ཝཱ སཛྫུརསཀངྒུཊྛསིལེསཱདཱིསུ ཝཱ ཡཾ ཀིཉྩི དུལླབྷཊྛཱནེ ཨཱནེཏྭཱ ཝཱ དིནྣཾ ཏཏྠཛཱཏཀཾ ཝཱ རཀྑིཏགོཔིཏཾ ཏཱལཕལཔཀྐམཏྟཾ གརུབྷཎྜཾ ཧོཏཱི’’ཏི (ཙཱུལ༹ཝ. ཨཊྛ. ༣༢༡) ཨཊྛཀཐཱགཏཝིནིཙྪཡཾ དསྶེཏུམཱཧ ‘‘མཏྟིཀཱ’’ཏིཨཱདི. པཱཀཏིཀཱ ཝཱ སེཏགེརུཀཱདིཔཉྩཝཎྞཱ ཝཱཔི མཏྟིཀཱཏི ཡོཛནཱ. སིལེསོ ནཱམ ཀབིཊྛཱདིསིལེསོ. ཨཱདི-སདྡེན སཛྫུརསཀངྒུཊྛཱདཱིནཾ གཧཎཾ. ཏཱལཔཀྐཔམཱཎནྟི ཨེཀཊྛིཏཱལཕལཔམཱཎཱཔི. ཏམྤི མཏྟིཀཱདི སངྒྷཀམྨེ, ཙེཏིཡཀམྨེ ཙ ནིཊྛིཏེ ཨཏིརེཀཾ པུགྒལིཀཀམྨེ དཱཏུཾ ཝཊྚཏི.

༢༨༧༩-༨༠. ‘‘ཝེལུ༹ཨཱདིཀ’’ནྟི པདཙྪེདོ. རཀྑིཏཾ གོཔིཏཾ ཝཱཔི གཎྷཏཱ སམཀཾ ཝཱ ཨཏིརེཀཾ ཝཱ ཐཱཝརཾ ཨནྟམསོ ཏཾཨགྒྷནཀཾ ཝཱལིཀམེཝ ཝཱ དཏྭཱ གཧེཏབྦནྟི ཡོཛནཱ.

ཨཊྛཀཐཱཡཾ པན ‘‘རཀྑིཏགོཔིཏཾ ཝེལུ༹ཾ གཎྷནྟེན སམཀཾ ཝཱ ཨཏིརེཀཾ ཝཱ ཐཱཝརཾ ཨནྟམསོ ཏཾཨགྒྷནཀཝཱལིཀཱཡཔི ཕཱཏིཀམྨཾ ཀཏྭཱ གཧེཏབྦོ. ཕཱཏིཀམྨཾ ཨཀཏྭཱ གཎྷནྟེན ཏཏྠེཝ ཝལ༹ཉྫེཏབྦོ, གམནཀཱལེ སངྒྷིཀེ ཨཱཝཱསེ ཋཔེཏྭཱ གནྟབྦཾ. ཨསཏིཡཱ གཧེཏྭཱ གཏེན ¶ པན པཧིཎིཏྭཱ དཱཏབྦོ. དེསནྟརགཏེན སམྤཏྟཝིཧཱརེ སངྒྷིཀཱཝཱསེ ཋཔེཏབྦོ’’ཏི (ཙཱུལ༹ཝ. ཨཊྛ. ༣༢༡) ཝེལུ༹མྷིཡེཝ ཨཡཾ ཝིནིཙྪཡོ ཝུཏྟོ, ཨིདྷ པན ‘‘ཝལླིཝེལཱ༹དིཀཾ ཀིཉྩཱི’’ཏི ཝལླིཨཱདཱིནམྤི སཱམཉྙེན ཝུཏྟཏྟཱ ཏཾ ཨུཔལཀྑཎམཏྟཾ ཝལླིཨཱདཱིསུཔི ཡཐཱརཧཾ ལབྦྷཏཱིཏི ཝེདིཏབྦཾ.

༢༨༨༡. ཨཉྫནནྟི སིལཱམཡོ. ཨེཝཾ ཧརིཏཱལམནོསིལཱཔི.

༢༨༨༢. དཱརུབྷཎྜེ ཨཡཾ ཝིནིཙྪཡོ – པརིཎཱཧཏོ ཡཐཱཝུཏྟ སཱུཙིདཎྜཔྤམཱཎཀོ ཨཊྛངྒུལདཱིགྷོ ཡོ ཀོཙི དཱརུབྷཎྜཀོ དཱརུདུལླབྷཊྛཱནེ སངྒྷསྶ དིནྣོ ཝཱ ཏཏྠཛཱཏཀོ ཝཱ རཀྑིཏགོཔིཏོ གརུབྷཎྜཾ ཧོཏཱིཏི ཡོཛནཱ.

༢༨༨༣. ཨེཝཾ ¶ ཀུརུནྡཊྛཀཐཱཡ ཨཱགཏཝིནིཙྪཡཾ དསྶེཏྭཱ མཧཱཨཊྛཀཐཱཡ (ཙཱུལ༹ཝ. ཨཊྛ. ༣༢༡) ཨཱགཏཾ དསྶེཏུམཱཧ ‘‘མཧཱཨཊྛཀཐཱཡ’’ནྟིཨཱདི. ཏཏྠ ཨཱསནྡིཀསཏྟངྒཱ ཝུཏྟལཀྑཎཱཝ. ‘‘བྷདྡཔཱིཋ’’ནྟི ཝེཏྟམཡཾ པཱིཋཾ ཝུཙྩཏི. པཱིཋིཀཱཏི པིལོཏིཀཱབདྡྷཔཱིཋམེཝ.

༢༨༨༤. ཨེལ༹ཀཔཱདཔཱིཋཾ ནཱམ དཱརུཔཊྚིཀཱཡ ཨུཔརི པཱདེ ཋཔེཏྭཱ བྷོཛནཔལླངྐཾ ཝིཡ ཀཏཔཱིཋཾ ཝུཙྩཏི. ‘‘ཨཱམལཀཝཊྚཀཔཱིཋ’’ནྟི ཨེཏསྶ ‘‘ཨཱམཎྜཀཝཊྚཀ’’ནྟི པརིཡཱཡོ, ཏསྨཱ ཨུབྷཡེནཱཔི ཨཱམལཀཱཀཱརེན ཡོཛིཏཾ བཧུཔཱདཀཔཱིཋཾ ཝུཙྩཏི. ཀེསུཙི པོཏྠཀེསུ ‘‘ཏཐཱམཎྜཀཔཱིཋཀ’’ནྟི པཱཋོ. གཱཐཱབནྡྷཝསེན མཎྜཀ-སདྡཔཡོགོ. ཀོཙྪཾ བྷཱུཏགཱམཝགྒེ ཙཏུཏྠསིཀྑཱཔདེ ཝུཏྟསརཱུཔཾ. པལཱལཔཱིཋནྟི ནིཔཛྫནཏྠཱཡ ཀཏཱ པལཱལབྷིསི, ཨིམིནཱ ཀདལིཔཏྟཱདིམཡཔཱིཋམྤི ཨུཔལཀྑཎཏོ དསྶིཏཾ. ཡཐཱཧ – ‘‘པལཱལཔཱིཋེན ཙེཏྠ ཀདལིཔཏྟཱདིཔཱིཋཱནིཔི སངྒཧིཏཱནཱི’’ཏི (ཙཱུལ༹ཝ. ཨཊྛ. ༣༢༡). དྷོཝནེ ¶ ཕལཀནྟི ཙཱིཝརདྷོཝནཕལཀཾ, དྷོཝནཱདིསདྡཱནཾ ཝིཡེཏྠ ཝིབྷཏྟིཨལོཔོ. ཨིམེསུ ཏཱཝ ཡཾ ཀིཉྩི ཁུདྡཀཾ ཝཱ ཧོཏུ མཧནྟཾ ཝཱ, སངྒྷསྶ དིནྣཾ གརུབྷཎྜཾ ཧོཏི. བྱགྒྷཙམྨཨོནདྡྷམྤི ཝཱལ༹རཱུཔཔརིཀྑིཏྟཾ རཏནཔརིསིབྦིཏཾ ཀོཙྪཾ གརུབྷཎྜམེཝ.

༢༨༨༥. བྷཎྜིཀཱཏི དཎྜཀཊྛཙྪེདནབྷཎྜིཀཱ. མུགྒརོཏི དཎྜམུགྒརོ. དཎྜམུགྒརོ ནཱམ ཡེན རཛིཏཙཱིཝརཾ པོཐེནྟི. ཝཏྠགྷཊྚནམུགྒརོཏི ཙཱིཝརགྷཊྚནམུགྒརོ, ཡེན ཨནུཝཱཏཱདིཾ གྷཊྚེནྟི. ཨམྦཎནྟི ཕལཀེཧི པོཀྑརཎིསདིསཾ ཀཏཔཱནཱིཡབྷཱཛནཾ. མཉྫཱུསཱ ནཱམ དོཎིཔེལཱ༹. ནཱཝཱ པོཏོ. རཛནདོཎིཀཱ ནཱམ ཡཏྠ ཙཱིཝརཾ རཛནྟི, པཀྐརཛནཾ ཝཱ ཨཱཀིརནྟི.

༢༨༨༦. ཨུལུ༹ངྐོཏི ནཱལི༹ཀེརཕལཀཊཱཧཱདིམཡོ ཨུལུ༹ངྐོ. ཨུབྷཡཾ པིདྷཱནསམཀོ སམུགྒོ. ‘‘ཁུདྡཀོ པརིཝིདྷནོ ཀརཎྜ’’ནྟི ཝདནྟི. ཀརཎྜོ ཙ པཱདགཎྷནཀཏོ ཨཏིརེཀཔྤམཱཎོ ཨིདྷ ཨདྷིཔྤེཏོ. ཀཊཙྪཱུཏི དབྦི. ཨཱདི-སདྡེན པཱནཱིཡསརཱཝཔཱནཱིཡསངྑཱདཱིནཾ གཧཎཾ.

༢༨༨༧. གེཧསམྦྷཱརནྟི གེཧོཔཀརཎཾ. ཐམྦྷཏུལཱསོཔཱནཕལཀཱདི དཱརུམཡཾ, པཱསཱཎམཡམྤི ཨིམིནཱཝ གཧིཏཾ. ཀཔྤིཡཙམྨནྟི ‘‘ཨེལ༹ཀཱཛམིགཱན’’ནྟིཨཱདིནཱ (ཝི. ཝི. ༢༦༥༠) ཧེཊྛཱ དསྶིཏཾ ཀཔྤིཡཙམྨཾ. ཏབྦིཔརིཡཱཡཾ ཨཀཔྤིཡཾ. ཨབྷཱཛིཡཾ གརུབྷཎྜཏྟཱ. བྷཱུམཏྠརཎཾ ཀཏྭཱ པརིབྷུཉྫིཏུཾ ཝཊྚཏི.

༢༨༨༨. ཨཊྛཀཐཱཡཾ ¶ ‘‘ཨེལ༹ཀཙམྨཾ པན པཙྩཏྠརཎགཏིཀམེཝ ཧོཏི, ཏམྤི གརུབྷཎྜམེཝཱ’’ཏི (ཙཱུལ༹ཝ. ཨཊྛ. ༣༢༡) ཝུཏྟཏྟཱ ཨཱཧ ‘‘ཨེལ༹ཙམྨཾ གརུཾ ཝུཏྟ’’ནྟི. ཀུརུནྡིཡཾ པན ‘‘སབྦཾ མཉྩཔྤམཱཎཾ ཙམྨཾ གརུབྷཎྜ’’ནྟི (ཙཱུལ༹ཝ. ཨཊྛ. ༣༢༡) ¶ ཝུཏྟཾ. ཨེཏྠ ཙ ‘‘པཙྩཏྠརཎགཏིཀམེཝཱ’’ཏི ཨིམིནཱ མཉྩཔཱིཋེཔི ཨཏྠརིཏུཾ ཝཊྚཏཱིཏི དཱིཔེཏི. ‘‘པཱཝཱརཱདིཔཙྩཏྠརཎམྤི གརུབྷཎྜ’’ནྟི ཨེཀེ, ‘‘ནོ’’ཏི ཨཔརེ, ཝཱིམཾསིཏྭཱ གཧེཏབྦཾ. མཉྩཔྤམཱཎནྟི ཙ པམཱཎཡུཏྟཾ མཉྩཾ. པམཱཎཡུཏྟམཉྩོ ནཱམ ཡསྶ དཱིགྷསོ ནཝ ཝིདཏྠིཡོ ཏིརིཡཉྩ ཏདུཔཌྜྷཾ. ཨུདྡྷཾ མུཁམསྶཱཏི ཨུདུཀྑལཾ. ཨཱདི-སདྡེན མུསལཾ, སུཔྤཾ, ནིསདཾ, ནིསདཔོཏོ, པཱསཱཎདོཎི, པཱསཱཎཀཊཱཧཉྩ སངྒཧིཏཾ. པེསཀཱརཱདཱིཏི ཨཱདི-སདྡེན ཙམྨཀཱརཱདཱིནཾ གཧཎཾ. ཏུརིཝེམཱདི པེསཀཱརབྷཎྜཉྩ བྷསྟཱདི ཙམྨཀཱརབྷཎྜཉྩ ཀསིབྷཎྜཉྩ ཡུགནངྒལཱདི སངྒྷིཀཾ སངྒྷསནྟཀཾ གརུབྷཎྜནྟི ཡོཛནཱ.

༢༨༨༩. ‘‘ཏཐེཝཱ’’ཏི ཨིམིནཱ ‘‘སངྒྷིཀ’’ནྟི ཨིདཾ པཙྩཱམསཏི. ཨཱདྷཱརཀོཏི པཏྟཱདྷཱརོ. ཏཱལཝཎྚནྟི ཏཱལཝཎྚེཧི ཀཏཾ. ཝེལུ༹དནྟཝིལཱིཝེཧི ཝཱ མོརཔིཉྪེཧི ཝཱ ཙམྨཝིཀཏཱིཧི ཝཱ ཀཏམྤི ཏཾསདིསཾ ‘‘ཏཱལཝཎྚ’’ནྟེཝ ཝུཙྩཏི. ཝཊྚཝིདྷཱུཔནཱནཾ ཏཱལཝཎྚེཡེཝ ཨནྟོགདྷཏྟཱ ‘‘བཱིཛནཱི’’ཏི ཙཏུརསྶཝིདྷཱུཔནཉྩ ཀེཏཀཔཱརོཧཀུནྟཱལཔཎྞཱདིམཡདནྟམཡཝིསཱཎམཡདཎྜཀམཀསབཱིཛནཱི ཙ ཝུཙྩཏི. པཙྪི པཱཀཊཱཡེཝ. པཙྪིཏོ ཁུདྡཀོ ཏཱལཔཎྞཱདིམཡོ བྷཱཛནཝིསེསོ ཙངྐོཊཀཾ. སབྦཱ སམྨཛྫནཱིཏི ནཱལི༹ཀེརཧཱིརཱདཱིཧི བདྡྷཱ ཡཊྛིསམྨཛྫནཱི, མུཊྛིསམྨཛྫནཱིཏི དུཝིདྷཱ པརིཝེཎངྒཎཱདིསམྨཛྫནཱི ཙ ཏཐེཝ དུཝིདྷཱ ཁཛྫཱུརིནཱལི༹ཀེརཔཎྞཱདཱིཧི བདྡྷཱ གེཧསམྨཛྫནཱི ཙཱཏི སབྦཱཔི སམྨཛྫནཱི གརུབྷཎྜཾ ཧོཏི.

༢༨༩༠. ཙཀྐཡུཏྟཀཡཱནནྟི ཧཏྠཝཊྚཀསཀཊཱདིཡུཏྟཡཱནཉྩ.

༢༨༩༡. ཚཏྟནྟི པཎྞཀིལཉྫསེཏཙྪཏྟཝསེན ཏིཝིདྷཾ ཚཏྟཾ. མུཊྛིཔཎྞནྟི ཏཱལཔཎྞཾ སནྡྷཱཡ ཝུཏྟཾ. ཝིསཱཎབྷཱཛནཉྩ ཏུམྦབྷཱཛནཉྩཱཏི ¶ ཝིགྒཧོ, ཨེཀདེསསརཱུཔེཀསེསོ, གཱཐཱབནྡྷཝསེན ནིགྒཧིཏཱགམོ ཙ. ཝིསཱཎམཡཾ, བྷཱཛནཾ ཏུམྦམཡཾ བྷཱཛནཉྩཱཏི ཨཏྠོ. ཨིདྷ ‘‘པཱདགཎྷནཀཏོ ཨཏིརིཏྟཔྤམཱཎ’’ནྟི སེསོ. ཨརཎཱི ཨརཎིསཧིཏཾ. ཨཱདི-སདྡེན ཨཱམལཀཏུམྦཾ ཨནུཉྙཱཏཝཱསིཡཱ དཎྜཉྩ སངྒཎྷཱཏི. ལཧུ ཨགརུབྷཎྜཾ, བྷཱཛནཱིཡནྟི ཨཏྠོ. པཱདགཎྷནཀཏོ ཨཏིརིཏྟཔྤམཱཎཾ གརུབྷཎྜཾ.

༢༨༩༢. ཝིསཱཎནྟི ¶ གོཝིསཱཎཱདི ཡཾ ཀིཉྩི ཝིསཱཎཾ. ཨཏཙྪིཏཾ ཡཐཱགཏམེཝ བྷཱཛནཱིཡཾ. ཨནིཊྛིཏཾ མཉྩཔཱདཱདི ཡཾ ཀིཉྩི བྷཱཛནཱིཡནྟི ཡོཛནཱ. ཡཐཱཧ – ‘‘མཉྩཔཱདོ མཉྩཨཊནཱི པཱིཋཔཱདོ པཱིཋཨཊནཱི ཝཱསིཕརསུཨཱདཱིནཾ དཎྜོཏི ཨེཏེསུ ཡཾ ཀིཉྩི ཝིཔྤཀཏཏཙྪནཀམྨཾ ཨནིཊྛིཏམེཝ བྷཱཛནཱིཡཾ, ཏཙྪིཏམཊྛཾ པན གརུབྷཎྜཾ ཧོཏཱི’’ཏི (ཙཱུལ༹ཝ. ཨཊྛ. ༣༢༡).

༢༨༩༣. ནིཊྛིཏོ ཏཙྪིཏོ ཝཱཔཱིཏི ཏཙྪིཏནིཊྛིཏོཔི. ཝིདྷོཏི ཀཱཡབནྡྷནེ ཨནུཉྙཱཏཝིདྷོ. ཧིངྒུཀརཎྜཀོཏི ཧིངྒུམཡོ ཝཱ ཏདཱདྷཱརོ ཝཱ ཀརཎྜཀོ. ཨཉྫནཱིཏི ཨཉྫནནཱལི༹ཀཱ ཙ ཨཉྫནཀརཎྜཀོ ཙ. སལཱཀཱཡོཏི ཨཉྫནིསལཱཀཱ. ཨུདཔུཉྪནཱིཏི ཧཏྠིདནྟཝིསཱཎཱདིམཡཱ ཨུདཀཔུཉྪནཱི. ཨིདཾ སབྦཾ བྷཱཛནཱིཡམེཝ.

༢༨༩༤. པརིབྷོགཱརཧནྟི མནུསྶཱནཾ ཨུཔབྷོགཔརིབྷོགཡོགྒཾ. ཀུལཱལབྷཎྜནྟི གྷཊཔིཋརཱདིཀུམྦྷཀཱརབྷཎྜམྤི. པཏྟངྒཱརཀཊཱཧནྟི པཏྟཀཊཱཧཾ, ཨངྒཱརཀཊཱཧཉྩ. དྷཱུམདཱནཾ ནཱལི༹ཀཱ. ཀཔལླིཀཱཏི དཱིཔཀཔལླིཀཱ.

༢༨༩༥. ཐུཔིཀཱཏི པཱསཱདཱདིཐུཔིཀཱ. དཱིཔརུཀྑོཏི པདཱིཔཱདྷཱརོ. ཙཡནཙྪདནིཊྛཀཱཏི པཱཀཱརཙེཏིཡཱདཱིནཾ ཙཡནིཊྛཀཱ ¶ ཙ གེཧཱདཱིནཾ ཚདནིཊྛཀཱ ཙ. སབྦམྤཱིཏི ཡཐཱཝུཏྟཾ སབྦམྤི ཨནཝསེསཾ པརིཀྑཱརཾ.

༢༨༩༦. ཀཉྩནཀོཏི སརཀོ. གྷཊཀོཏི པཱདགཎྷནཀཏོ ཨནཏིརིཏྟཔྤམཱཎོ གྷཊཀོ. ‘‘ཡཐཱ ཙ མཏྟིཀཱབྷཎྜེ, ཨེཝཾ ལོཧབྷཎྜེཔི ཀུཎྜིཀཱ བྷཱཛནཱིཡཀོཊྛཱསམེཝ བྷཛཏཱི’’ཏི (ཙཱུལ༹ཝ. ཨཊྛ. ༣༢༡) ཨཊྛཀཐཱནཡཾ སངྒཧེཏུམཱཧ ‘‘ལོཧབྷཎྜེཔི ཀུཎྜིཀཱཔི ཙ བྷཱཛིཡཱ’’ཏི.

༢༨༩༧. གརུ ནཱམ པཙྪིམཾ གརུབྷཎྜཏྟཡཾ. ཐཱཝརཾ ནཱམ པུརིམདྭཡཾ. སངྒྷསྶཱཏི སངྒྷེན. པརིཝཏྟེཏྭཱཏི པུགྒལིཀཱདཱིཧི ཏཱདིསེཧི ཏེཧི པརིཝཏྟེཏྭཱ. ཏཏྲཱཡཾ པརིཝཏྟནནཡོ (ཙཱུལ༹ཝ. ཨཊྛ. ༣༢༡) – སངྒྷསྶ ནཱལི༹ཀེརཱརཱམོ དཱུརེ ཧོཏི, ཀཔྤིཡཀཱརཀཱ ཏཾ བཧུཏརཾ ཁཱདནྟི, ཏཏོ སཀཊཝེཏནཾ དཏྭཱ ཨཔྤམེཝ ཨཱཧརནྟི, ཨཉྙེསཾ པན ཏསྶ ཨཱརཱམསྶ ཨཝིདཱུརགཱམཝཱསཱིནཾ མནུསྶཱནཾ ཝིཧཱརསྶ སམཱིཔེ ཨཱརཱམོ ཧོཏི, ཏེ སངྒྷཾ ཨུཔསངྐམིཏྭཱ སཀེན ཨཱརཱམེན ¶ ཏཾ ཨཱརཱམཾ ཡཱཙནྟི, སངྒྷེན ‘‘རུཙྩཏི སངྒྷསྶཱ’’ཏི ཨཔལོཀེཏྭཱ སམྤཊིཙྪིཏབྦོ. སཙེཔི བྷིཀྑཱུནཾ རུཀྑསཧསྶཾ ཧོཏི, མནུསྶཱནཾ པཉྩསཏཱནི, ‘‘ནནུ ཏུམྷཱཀཾ ཨཱརཱམོ ཁུདྡཀོ’’ཏི ན ཝཏྟབྦཾ. ཀིཉྩཱཔི ཧི ཨཡཾ ཁུདྡཀོ, ཨཐ ཁོ ཨིཏརཏོ བཧུཏརཾ ཨཱཡཾ དེཏི. སཙེཔི སམཀམེཝ དེཏི, ཨེཝམྤི ཨིཙྪིཏིཙྪིཏཀྑཎེ པརིབྷུཉྫིཏུཾ སཀྐཱཏི གཧེཏབྦམེཝ.

སཙེ པན མནུསྶཱནཾ བཧུཏརཱ རུཀྑཱ ཧོནྟི, ‘‘ནནུ ཏུམྷཱཀཾ བཧུཏརཱ རུཀྑཱ’’ཏི ཝཏྟབྦཾ. སཙེ ‘‘ཨཏིརེཀཾ ཨམྷཱཀཾ པུཉྙཾ ཧོཏུ, སངྒྷསྶ དེམཱ’’ཏི ཝདནྟི, ཛཱནཱཔེཏྭཱ སམྤཊིཙྪིཏུཾ ཝཊྚཏི. བྷིཀྑཱུནཾ རུཀྑཱ ཕལདྷཱརིནོ, མནུསྶཱནཾ རུཀྑཱ ན ཏཱཝ ཕལཾ གཎྷནྟི. ཀིཉྩཱཔི ན གཎྷནྟི, ན ¶ ཙིརསྶེཝ གཎྷིསྶནྟཱིཏི སམྤཊིཙྪིཏབྦམེཝ. མནུསྶཱནཾ རུཀྑཱ ཕལདྷཱརིནོ, བྷིཀྑཱུནཾ ན ཏཱཝ ཕལཾ གཎྷནྟི. ‘‘ནནུ ཏུམྷཱཀཾ རུཀྑཱ ཕལདྷཱརིནོ’’ཏི ཝཏྟབྦཾ. སཙེ ‘‘གཎྷཐ, བྷནྟེ, ཨམྷཱཀཾ པུཉྙཾ བྷཝིསྶཏཱི’’ཏི ཝདནྟི, ཛཱནཱཔེཏྭཱ སམྤཊིཙྪིཏུཾ ཝཊྚཏི. ཨེཝཾ ཨཱརཱམེན ཨཱརཱམོ པརིཝཏྟེཏབྦོ. ཨེཏེནེཝ ནཡེན ཨཱརཱམཝཏྠུཔི ཝིཧཱརོཔི ཝིཧཱརཝཏྠུཔི ཨཱརཱམེན པརིཝཏྟེཏབྦཾ. ཨཱརཱམཝཏྠུནཱ ཙ མཧནྟེན ཝཱ ཁུདྡཀེན ཝཱ ཨཱརཱམཨཱརཱམཝཏྠུཝིཧཱརཝིཧཱརཝཏྠཱུནི.

ཀཐཾ ཝིཧཱརེན ཝིཧཱརོ པརིཝཏྟེཏབྦོ? སངྒྷསྶ ཨནྟོགཱམེ གེཧཾ ཧོཏི, མནུསྶཱནཾ ཝིཧཱརམཛ྄ཛྷེ པཱསཱདོ, ཨུབྷོཔི ཨགྒྷེན སམཀཱ, སཙེ མནུསྶཱ ཏེན པཱསཱདེན ཏཾ གེཧཾ ཡཱཙནྟི, སམྤཊིཙྪིཏུཾ ཝཊྚཏི. བྷིཀྑཱུནཾ ཙེ མཧགྒྷཏརཾ གེཧཾ ཧོཏི, ‘‘མཧགྒྷཏརཾ ཨམྷཱཀཾ གེཧ’’ནྟི ཝུཏྟེ ཙ ‘‘ཀིཉྩཱཔི མཧགྒྷཏརཾ, པབྦཛིཏཱནཾ པན ཨསཱརུཔྤཾ, ན སཀྐཱ ཏཏྠ པབྦཛིཏེཧི ཝསིཏུཾ, ཨིདཾ པན སཱརུཔྤཾ, གཎྷཐཱ’’ཏི ཝདནྟི, ཨེཝམྤི སམྤཊིཙྪིཏུཾ ཝཊྚཏི. སཙེ པན མནུསྶཱནཾ མཧགྒྷཾ ཧོཏི, ‘‘ནནུ ཏུམྷཱཀཾ གེཧཾ མཧགྒྷ’’ནྟི ཝཏྟབྦཾ. ‘‘ཧོཏུ, བྷནྟེ, ཨམྷཱཀཾ པུཉྙཾ བྷཝིསྶཏི, གཎྷཐཱ’’ཏི ཝུཏྟེ པན སམྤཊིཙྪིཏུཾ ཝཊྚཏི. ཨེཝཾ ཝིཧཱརེན ཝིཧཱརོ པརིཝཏྟེཏབྦོ. ཨེཏེནེཝ ནཡེན ཝིཧཱརཝཏྠུཔི ཨཱརཱམོཔི ཨཱརཱམཝཏྠུཔི ཝིཧཱརེན པརིཝཏྟེཏབྦཾ. ཝིཧཱརཝཏྠུནཱ ཙ མཧགྒྷེན ཝཱ ཨཔྤགྒྷེན ཝཱ ཝིཧཱརཝིཧཱརཝཏྠུཨཱརཱམཨཱརཱམཝཏྠཱུནི. ཨེཝཾ ཏཱཝ ཐཱཝརེན ཐཱཝརཔརིཝཏྟནཾ ཝེདིཏབྦཾ.

གརུབྷཎྜེན གརུབྷཎྜཔརིཝཏྟནེ པན མཉྩཔཱིཋཾ མཧནྟཾ ཝཱ ཧོཏུ ཁུདྡཀཾ ཝཱ, ཨནྟམསོ ཙཏུརངྒུལཔཱདཀཾ ¶ གཱམདཱརཀེཧི པཾསྭཱགཱརཀེསུ ཀཱིལ༹ནྟེཧི ཀཏམྤི སངྒྷསྶ དིནྣཀཱལཏོ པཊྛཱཡ གརུབྷཎྜཾ ཧོཏི. སཙེཔི རཱཛརཱཛམཧཱམཏྟཱདཡོ ཨེཀཔྤཧཱརེནེཝ མཉྩསཏཾ ཝཱ མཉྩསཧསྶཾ ཝཱ ¶ དེནྟི, སབྦེ ཀཔྤིཡམཉྩཱ སམྤཊིཙྪིཏབྦཱ, སམྤཊིཙྪིཏྭཱ ཝུཌྜྷཔཊིཔཱཊིཡཱ ‘‘སངྒྷིཀཔརིབྷོགེན པརིབྷུཉྫཐཱ’’ཏི དཱཏབྦཱ, པུགྒལིཀཝསེན ན དཱཏབྦཱ. ཨཏིརེཀམཉྩེ བྷཎྜཱགཱརཱདཱིསུ པཉྙཔེཏྭཱ པཏྟཙཱིཝརཾ ནིཀྑིཔིཏུམྤི ཝཊྚཏི.

བཧིསཱིམཱཡ ‘‘སངྒྷསྶ དེམཱ’’ཏི དིནྣམཉྩོ སངྒྷཏྠེརསྶ ཝསནཊྛཱནེ དཱཏབྦོ. ཏཏྠ ཙེ བཧཱུ མཉྩཱ ཧོནྟི, མཉྩེན ཀམྨཾ ནཏྠི, ཡསྶ ཝསནཊྛཱནེ ཀམྨཾ ཨཏྠི, ཏཏྠ ‘‘སངྒྷིཀཔརིབྷོགེན པརིབྷུཉྫཐཱ’’ཏི དཱཏབྦོ. མཧགྒྷེན སཏགྒྷནཀེན, སཧསྶགྒྷནཀེན ཝཱ མཉྩེན ཨཉྙཾ མཉྩསཏཾ ལབྷཏི, པརིཝཏྟེཏྭཱ གཧེཏབྦཾ. ན ཀེཝལཾ མཉྩེན མཉྩོཡེཝ, ཨཱརཱམཨཱརཱམཝཏྠུཝིཧཱརཝིཧཱརཝཏྠུཔཱིཋབྷིསིབིམྦོཧནཱནིཔི པརིཝཏྟེཏུཾ ཝཊྚནྟི. ཨེས ནཡོ པཱིཋབྷིསིབིམྦོཧནེསུཔི ཨེཏེསུ ཧི ཀཔྤིཡཱཀཔྤིཡཾ ཝུཏྟནཡམེཝ. ཏཏྠ ཨཀཔྤིཡཾ ན པརིབྷུཉྫིཏབྦཾ, ཀཔྤིཡཾ སངྒྷིཀཔརིབྷོགེན པརིབྷུཉྫིཏབྦཾ. ཨཀཔྤིཡཾ ཝཱ མཧགྒྷཾ ཀཔྤིཡཾ ཝཱ པརིཝཏྟེཏྭཱ ཝུཏྟཝཏྠཱུནི གཧེཏབྦཱནི, ཨགརུབྷཎྜུཔགཾ པན བྷིསིབིམྦོཧནཾ ནཱམ ནཏྠཱིཏི.

༢༨༩༨. བྷིཀྑུ ཨདྷོཏེན པཱདེན, ཨལླཔཱདེན ཝཱ སེནཱསནཾ ནཀྐམེཏི སམྦནྡྷོ. སཡནྟི ཨེཏྠ, ཨཱསནྟི ཙཱཏི སཡནཱསནཾ, པརིཀམྨཀཏབྷཱུམཏྠརཎཱདི. ཨལླཔཱདེན ཝཱཏི ཡེན ཨཀྐནྟཊྛཱནེ ཨུདཀཾ པཉྙཱཡཏི, ཨེཝརཱུཔེན ཏིནྟཔཱདེན. ཡཐཱཧ – ‘‘ཨལླེཧི པཱདེཧཱིཏི ཡེཧི ཨཀྐནྟཊྛཱནེ ཨུདཀཾ པཉྙཱཡཏི, ཨེཝརཱུཔེཧི པཱདེཧི པརིབྷཎྜཀཏབྷཱུམི ཝཱ སེནཱསནཾ ཝཱ ན ཨཀྐམིཏབྦཾ. སཙེ པན ཨུདཀསིནེཧམཏྟམེཝ པཉྙཱཡཏི, ན ཨུདཀཾ, ཝཊྚཏཱི’’ཏི (ཙཱུལ༹ཝ. ཨཊྛ. ༣༢༤). སཨུཔཱཧནོཏི ཨེཏྠ ‘‘དྷོཏཔཱདཀ’’ནྟི ཝཏྟབྦཾ. པཱདེ པཊིམུཀྐཱཧི ཨུཔཱཧནཱཧི སཨུཔཱཧནོ བྷིཀྑུ དྷོཏཔཱདཀཾ དྷོཏཔཱདེཧི ཨཀྐམིཏབྦཊྛཱནཾ ཏཐེཝ ན ཨཀྐམེཏི ཡོཛནཱ.

༢༨༩༩. པརིཀམྨཀཏཱཡཱཏི ¶ སུདྷཱདིཔརིཀམྨཀཏཱཡ. ནིཊྛུབྷནྟསྶཱཏི ཁེལ༹ཾ པཱཏེནྟསྶ. པརིཀམྨཀཏཾ བྷིཏྟིནྟི སེཏབྷིཏྟིཾ ཝཱ ཙིཏྟཀམྨཀཏཾ ཝཱ བྷིཏྟིཾ. ན ཀེཝལཉྩ བྷིཏྟིམེཝ, དྭཱརམྤི ཝཱཏཔཱནམྤི ཨཔསྶེནཕལཀམྤི པཱསཱཎཏྠམྦྷམྤི རུཀྑཏྠམྦྷམྤི ཙཱིཝརེན ཝཱ ཀེནཙི ཝཱ ཨཔྤཊིཙྪཱདེཏྭཱ ཨཔསྶཡིཏུཾ ན ལབྷཏིཡེཝ. ‘‘དྭཱརཝཱཏཔཱནཱདཡོ པན ཨཔརིཀམྨཀཏཱཔི ཨཔཊིཙྪཱདེཏྭཱ ན ཨཔསྶཡིཏབྦཱ’’ཏི གཎྛིཔདེ ཝུཏྟཾ.

༢༩༠༡. ནིདྡཱཡཏོ ¶ ཏསྶ ཀོཙི སརཱིརཱཝཡཝོ པཙྩཏྠརཎེ སངྐུཊིཏེ སཧསཱ ཡདི མཉྩཾ ཕུསཏི, དུཀྐཊནྟི ཡོཛནཱ.

༢༩༠༢. ལོམེསུ མཉྩཾ ཕུསནྟེསུ. ཧཏྠཔཱདཱནཾ ཏལེན ཨཀྐམིཏུཾ ཝཊྚཏཱིཏི ཡོཛནཱ. མཉྩཔཱིཋཾ ནཱིཧརནྟསྶ ཀཱཡེ པཊིཧཉྙཏི, ཨནཱཔཏྟི.

‘‘དཱཡཀེཧི ‘ཀཱཡེན ཕུསིཏྭཱ ཡཐཱསུཁཾ པརིབྷུཉྫཐཱ’ཏི དིནྣསེནཱསནཾ, མཉྩཔཱིཋཱདིཉྩ དཱཡཀེན ཝུཏྟནིཡཱམེན པརིབྷུཉྫནྟསྶ དོསོ ནཏྠཱི’’ཏི མཱཏིཀཊྛཀཐཱཡ སཱིཧལ༹གཎྛིཔདེ ཝུཏྟཏྟཱ ཏཐཱ པརིབྷུཉྫནྟསྶ ཨནཱཔཏྟི. ‘‘ཨིམཾ མཉྩཔཱིཋཱདིཾ སངྒྷསྶ དམྨཱི’’ཏི ཝུཏྟེ གརུབྷཎྜཾ ཧོཏི, ན བྷཱཛེཏབྦཾ སངྒྷསྶ པརཱམཊྛཏྟཱ. ‘‘ཨིམཾ མཉྩཔཱིཋཱདིཾ བྷདནྟཱནཾ ཝསྶགྒེན གཎྷིཏུཾ དམྨཱི’’ཏི ཝུཏྟེ སཏིཔི གརུབྷཎྜབྷཱཝེ ཀཔྤིཡཝཏྠུཾ བྷཱཛེཏྭཱ གཎྷིཏུཾ ཝཊྚཏི, ཨཀཔྤིཡབྷཎྜམེཝ བྷཱཛེཏྭཱ གཧེཏུཾ ན ལབྦྷཏི. ‘‘ཨིམཾ མཉྩཔཱིཋཾ ཝསྶགྒེན གཧེཏུཾ སངྒྷསྶ དམྨཱི’’ཏི ཝུཏྟེ ཝསྶགྒེན བྷཱཛེཏྭཱ གཧེཏབྦཾ ཝསྶགྒེན བྷཱཛནཾ པཋམཾ ཝཏྭཱ པཙྪཱ སངྒྷསྶ པརཱམཊྛཏྟཱ. ‘‘སངྒྷསྶ ཨིམཾ མཉྩཔཱིཋཾ ཝསྶགྒེན གཎྷིཏུཾ དམྨཱི’’ཏི ཝུཏྟེ པན གརུབྷཎྜཾ ཧོཏི པཋམཾ སངྒྷསྶ པརཱམཊྛཏྟཱཏི ¶ ཨཡམྤི ཝིསེསོ མཱཏིཀཊྛཀཐཱ གཎྛིཔདེཡེཝ ཝུཏྟོ.

༢༩༠༣-༤. ཨུདྡེསབྷཏྟཝིནིཙྪཡེཀདེསཾ དསྶེཏུམཱཧ ‘‘སཧསྶགྒྷནཀོ’’ཏིཨཱདི. སཧསྶགྒྷནཀོ སཙཱིཝརོ པིཎྜཔཱཏོ ཨཝསྶིཀཾ བྷིཀྑུཾ པཏྟོ, ཏསྨིཾ ཝིཧཱརེ ཙ ‘‘ཨེཝརཱུཔོ པིཎྜཔཱཏོ ཨཝསྶིཀཾ བྷིཀྑུཾ པཏྟོ’’ཏི ལིཁིཏྭཱ ཋཔིཏོཔི ཙ ཧོཏི, ཏཏོ སཊྛིཝསྶཱནམཙྩཡེ ཏཱདིསོ སཧསྶགྒྷནཀོ སཙཱིཝརོ ཀོཙི པིཎྜཔཱཏོ སཙེ ཨུཔྤནྣོ ཧོཏི, ཏཾ པིཎྜཔཱཏཾ བུདྷོ ཝིནིཙྪཡཀུསལོ བྷིཀྑུ ཨཝསྶིཀཊྛིཏིཀཱཡ ཨདཏྭཱ སཊྛིཝསྶིཀཊྛིཏིཀཱཡ དདེཡྻཱཏི ཡོཛནཱ.

༢༩༠༥. ཨུདྡེསབྷཏྟཾ བྷུཉྫིཏྭཱཏི ཨུཔསམྤནྣཀཱལེ ཨཏྟནོ ཝསྶགྒེན པཏྟཾ ཨུདྡེསབྷཏྟཾ པརིབྷུཉྫིཏྭཱ. ཛཱཏོ ཙེ སཱམཎེརཀོཏི སིཀྑཱཔཙྩཀྑཱནཱདིཝསེན སཙེ སཱམཎེརོ ཛཱཏོ. ཏནྟི ཨུཔསམྤནྣཀཱལེ གཧིཏཾ ཏདེཝ ཨུདྡེསབྷཏྟཾ. སཱམཎེརསྶ པཱལི༹ཡཱཏི སཱམཎེརཔཊིཔཱཊིཡཱ ཨཏྟནོ པཏྟཾ པཙྪཱ གཧེཏུཾ ལབྷཏི.

༢༩༠༦. ཡོ ¶ སཱམཎེརོ སམྤུཎྞཝཱིསཏིཝསྶོ ‘‘སྭེ ཨུདྡེསཾ ལབྷིསྶཏཱི’’ཏི ཝཏྟབྦོ, ཨཛྫ སོ ཨུཔསམྤནྣོ ཧོཏི, ཋིཏིཀཱ ཨཏཱིཏཱ སིཡཱཏི ཡོཛནཱ, སྭེ པཱཔེཏབྦཱ སཱམཎེརཊྛིཏིཀཱ ཨཛྫ ཨུཔསམྤནྣཏྟཱ ཨཏིཀྐནྟཱ ཧོཏཱིཏི ཨཏྠོ, ཏཾ བྷཏྟཾ ན ལབྷཏཱིཏི ཝུཏྟཾ ཧོཏི.

༢༩༠༧. ཨུདྡེསབྷཏྟཱནནྟརཾ སལཱཀབྷཏྟཾ དསྶེཏུམཱཧ ‘‘སཙེ པནཱ’’ཏིཨཱདི. སཙེ སལཱཀཱ ལདྡྷཱ, ཏཾདིནེ བྷཏྟཾ ན ལདྡྷཾ, པུནདིནེ ཏསྶ བྷཏྟཾ གཧེཏབྦཾ, ན སཾསཡོ ‘‘གཧེཏབྦཾ ¶ ནུ ཁོ, ན གཧེཏབྦ’’ནྟི ཨེཝཾ སཾསཡོ ན ཀཱཏབྦོཏི ཡོཛནཱ.

༢༩༠༨. ཨུཏྟརི ཨུཏྟརཾ ཨཏིརེཀཾ བྷངྒཾ བྱཉྫནཾ ཨེཏསྶཱཏི ཨུཏྟརིབྷངྒཾ, ཏསྶ, ཨཏིརེཀབྱཉྫནསྶཱཏི ཨཏྠོ. ཨེཀཙརསྶཱཏི ཨེཀཙཱརིཀསྶ. སལཱཀཱཡེཝ སལཱཀིཀཱ.

༢༩༠༩. ཨུཏྟརིབྷངྒམེཝ ཨུཏྟརིབྷངྒཀཾ.

༢༩༡༠. ཡེན ཡེན ཧཱིཏི གཱཧིཏསལཱཀེན ཡེན ཡེན བྷིཀྑུནཱ. ཡཾ ཡནྟི བྷཏྟབྱཉྫནེསུ ཡཾ ཡཾ བྷཏྟཾ ཝཱ ཡཾ ཡཾ བྱཉྫནཾ ཝཱ.

༢༩༡༡. སངྒྷུདྡེསཱདིཀནྟི སངྒྷབྷཏྟཨུདྡེསབྷཏྟཱདིཀཾ. ཨཱདི-སདྡེན ནིམནྟནཾ, སལཱཀཾ, པཀྑིཀཾ, ཨུཔོསཐིཀཾ, པཱཊིཔདིཀནྟི པཉྩ བྷཏྟཱནི གཧིཏཱནི.

ཏཏྠ སབྦསངྒྷསྶ དིནྣཾ སངྒྷབྷཏྟཾ ནཱམ. ‘‘སངྒྷཏོ ཨེཏྟཀེ བྷིཀྑཱུ ཨུདྡིསིཏྭཱ དེཐཱ’’ཏིཨཱདིནཱ ཝཏྭཱ དིནྣཾ ཨུདྡེསབྷཏྟཾ. ‘‘སངྒྷཏོ ཨེཏྟཀཱནཾ བྷིཀྑཱུནཾ བྷཏྟཾ གཎྷཐཱ’’ཏིཨཱདིནཱ ཝཏྭཱ དིནྣཾ ནིམནྟནཾ ནཱམ. ཨཏྟནོ ཨཏྟནོ ནཱམེན སལཱཀགཱཧཀཱནཾ བྷིཀྑཱུནཾ དིནྣཾ སལཱཀབྷཏྟཾ ནཱམ. ཙཱཏུདྡསིཡཾ དིནྣཾ པཀྑིཀཾ. ཨུཔོསཐེ དིནྣཾ ཨུཔོསཐིཀཾ. པཱཊིཔདེ དིནྣཾ པཱཊིཔདིཀཾ. ཏཾཏཾནཱམེན དིནྣམེཝ ཏཐཱ ཏཐཱ ཝོཧརཱིཡཏི. ཨེཏེསཾ པན ཝིཏྠཱརཀཐཱ ‘‘ཨབྷིལཀྑིཏེསཱུ’’ཏིཨཱདིནཱ (ཙཱུལ༹ཝ. ཨཊྛ. ༣༢༥ པཀྑིཀབྷཏྟཱདིཀཐཱ) ཨཊྛཀཐཱཡཾ ཝུཏྟནཡེན ཝེདིཏབྦཱ. ཨཱགནྟུཀཱདཱིཏི ཨེཏྠ ཨཱདི-སདྡེན གམིཀབྷཏྟཾ, གིལཱནབྷཏྟཾ, གིལཱནུཔཊྛཱཀབྷཏྟནྟི ¶ ཏཱིཎི གཧིཏཱནི. ཨཱགནྟུཀཱནཾ དིནྣཾ བྷཏྟཾ ཨཱགནྟུཀབྷཏྟཾ. ཨེསེཝ ནཡོ སེསེསུ.

༢༩༡༢. ཝིཧཱརནྟི ¶ ཝིཧཱརབྷཏྟཾ ཨུཏྟརཔདལོཔེན, ཝིཧཱརེ ཏཏྲུཔྤཱདབྷཏྟསྶེཏཾ ཨདྷིཝཙནཾ. ཝཱརབྷཏྟནྟི དུབྦྷིཀྑསམཡེ ‘‘ཝཱརེན བྷིཀྑཱུ ཛགྒིསྶཱམཱ’’ཏི དྷུརགེཧཏོ པཊྛཱཡ དིནྣཾ. ནིཙྩནྟི ནིཙྩབྷཏྟཾ ཨུཏྟརཔདལོཔེན, ཏཉྩ ཏཐཱ ཝཏྭཱཝ དིནྣཾ. ཀུཊིབྷཏྟཾ ནཱམ སངྒྷསྶ ཨཱཝཱསཾ ཀཏྭཱ ‘‘ཨམྷཱཀཾ སེནཱསནཝཱསིནོ ཨམྷཱཀཾ བྷཏྟཾ གཎྷནྟཱུ’’ཏི དིནྣཾ. པནྣརསཝིདྷཾ སབྦམེཝ བྷཏྟཾ ཨིདྷ ཨིམསྨིཾ སེནཱསནཀྑནྡྷཀེ ཨུདྡིཊྛཾ ཀཐིཏཾ. ཨེཏེསཾ ཝིཏྠཱརཝིནིཙྪཡོ ཨཏྠིཀེཧི སམནྟཔཱསཱདིཀཱཡ གཧེཏབྦོ.

༢༩༡༣. པཙྩཡབྷཱཛནེ མིཙྪཱཔཊིཔཏྟིཡཱ མཧཱདཱིནཝཏྟཱ ཨཔྤམཏྟེནེཝ པཊིཔཛྫིཏབྦནྟི པཙྩཡབྷཱཛནཀཾ ཨནུསཱསནྟོ ཨཱཧ ‘‘པཱལི༹’’ནྟིཨཱདི.

སེནཱསནཀྑནྡྷཀཀཐཱཝཎྞནཱ.

ཝཏྟཀྑནྡྷཀཀཐཱཝཎྞནཱ

༢༩༡༤-༥. ཨཱགནྟུཀོ ཙ ཨཱཝཱསིཀོ ཙ པིཎྜཙཱརིཀོ ཙ སེནཱསནཉྩ ཨཱརཉྙཀོ ཙ ཨནུམོདནཱ ཙཱཏི ཝིགྒཧོ, ཏཱསུ ཝཏྟཱནི, ཨིཏརཱིཏརཡོགདྭནྡསམཱསསྶ ཨུཏྟརཔདལིངྒཏྟཱ ཨིཏྠི ལིངྒནིདྡེསོ. བྷཏྟེ བྷཏྟགྒེ, ཨུཏྟརཔདལོཔོ. ‘‘བྷཏྟེ’’ཏིཨཱདཱིཧི པདེཧི ‘‘ཝཏྟཱནཱི’’ཏི པཙྩེཀཾ ཡོཛེཏབྦཾ.

ཨཱཙརིཡོ ཙ ཨུཔཛ྄ཛྷཱཡཀོ ཙ སིསྶོ ཙ སདྡྷིཝིཧཱརིཀོ ཙ, ཏེསཾ ཝཏྟཱནཱིཏི ཝིགྒཧོ. སབྦསོཏི སབྦཱཝཡཝབྷེདེཧི. ཙཏུདྡསེཝཱཏི ཨཝཡཝབྷེདེཧི བཧུཝིདྷཱནིཔི ཝཏྟཱནི ཝིསཡབྷེདེན ཙུདྡས ཨེཝ ཝུཏྟཱནི. ཝིསུདྡྷཙིཏྟེནཱཏི སཝཱསནསཀལསཾཀིལེསཔྤཧཱནཏོ ཨཙྩནྟཔརིསུདྡྷཙིཏྟསནྟཱནེན ¶ . ཝིནཱཡཀེནཱཏི སཏྟེ ཝིནེཏཱིཏི ཝིནཱཡཀོ, ཨནུཏྟརཔུརིསདམྨསཱརཐིབྷཱཝེན དམྨདེཝབྲཧྨནཱགཱདིཀེ སཏྟེ ནཱནཱཝིདྷེན ཝིནཡནུཔཱཡེན དམེཏཱིཏི ཨཏྠོ. ཨཐ ཝཱ ཝིགཏོ ནཱཡཀོ ཨསྶཱཏི ཝིནཱཡཀོ, ཏེན.

༢༩༡༦. ཨཱརཱམནྟི ¶ ཨེཏྠ ཏཾསམཱིཔེ ཏབྦོཧཱརོ. ཡཐཱཧ ‘‘ཨིདཱནི ‘ཨཱརཱམཾ པཝིསིསྶཱམཱི’ཏི ཨིམིནཱ ཨུཔཙཱརསཱིམསམཱིཔཾ དསྶེཏི, ཏསྨཱ ཨུཔཙཱརསཱིམཾ པཏྭཱ ཨུཔཱཧནཱཨོམུཉྩནཱདི སབྦཾ ཀཱཏབྦ’’ནྟི (ཙཱུལ༹ཝ. ཨཊྛ. ༣༥༧). ‘‘པན ཨཔནེཏབྦ’’ནྟི པདཙྪེདོ. མུཉྩིཏབྦཱཏི ཨུཔཱཧནཱ པཱདཏོ ཨཔནེཏབྦཱ.

༢༩༡༧. ཨོགུཎྛནནྟི སསཱིསཔཱརུཔནཾ. སཱིསེ ཙཱིཝརམེཝ ཝཱ ན ཀཱཏབྦནྟི སམྦནྡྷོ. ཏེནཱཏི ཨཱགནྟུཀེན. པཱནཱིཡཝཱརིནཱཏི པཱཏབྦཛལེན.

༢༩༡༨. པུཙྪིཏྭཱཏི ཝསྶགཎནཾ པུཙྪིཏྭཱ. ཝིཧཱརེ ཝུཌྜྷབྷིཀྑུནོ ཨཱགནྟུཀེན བྷིཀྑུནཱ ཝནྡིཏབྦཱཝ. ཀཱལེཏི ཀཱལསྶེཝ. ཏེན ཨཱགནྟུཀེན བྷིཀྑུནཱ སེནཱསནཾ ‘‘མཡ྄ཧཾ ཀཏརཾ སེནཱསནཾ པཱཔུཎཱཏཱི’’ཏི པུཙྪིཏབྦཉྩཱཏི ཡོཛནཱ.

༢༩༡༩. ‘‘པུཙྪིཏབྦ’’ནྟི ཨིདཾ ‘‘ཝཙྩཊྛཱན’’ནྟིཨཱདིཀེཧི སབྦེཧི ཨུཔཡོགནྟཔདེཧི པཙྩེཀཾ ཡོཛེཏབྦཾ. པཱནཱིཡམེཝ ཙཱཏི ‘‘ཀིཾ ཨིམིསྶཱ པོཀྑརཎིཡཱ པཱནཱིཡམེཝ པིཝནྟི, ཨུདཱཧུ ནཧཱནཱདིཔརིབྷོགམྤི ཀརོནྟཱི’’ཏི (ཙཱུལ༹ཝ. ཨཊྛ. ༣༥༧) ཨཊྛཀཐཱགཏནཡེན པཱནཱིཡཉྩ. ཏཐཱ པརིབྷོཛནཱིཡཉྩ. སངྒྷཀཏིཀནྟི ‘‘ཀེསུཙི ཋཱནེསུ ཝཱལ༹མིགཱ ཝཱ ཨམནུསྶཱ ཝཱ ཧོནྟི, ཏསྨཱ ཀཾ ཀཱལཾ པཝིསིཏབྦཾ, ཀཾ ཀཱལཾ ནིཀྑམིཏབྦ’’ནྟི ཨཊྛཀཐཱགཏནཡེན སངྒྷསྶ ཀཏིཀསཎྛཱནཉྩ. གོཙརཱདིཀནྟི ¶ ཨེཏྠ ཙ ‘‘གོཙརོ པུཙྪིཏབྦོཏི ‘གོཙརགཱམོ ཨཱསནྣེ, ཨུདཱཧུ དཱུརེ, ཀཱལསྶེཝ ཙ པིཎྜཱཡ ཙརིཏབྦཾ, ཨུདཱཧུ ནོ’ཏི ཨེཝཾ བྷིཀྑཱཙཱརོ པུཙྪིཏབྦོ’’ཏི (ཙཱུལ༹ཝ. ཨཊྛ. ༣༥༧) ཝུཏྟནཡེན གོཙརཉྩ. ཨཱདི-སདྡེན ཨགོཙརཾ གཧིཏཾ. ‘‘ཨགོཙརོ ནཱམ མིཙྪཱདིཊྛིཀཱནཾ ཝཱ གཱམོ པརིཙྪིནྣབྷིཀྑོ ཝཱ གཱམོ, ཡཏྠ ཨེཀསྶ ཝཱ དྭིནྣཾ ཝཱ བྷིཀྑཱ དིཡྻཏི, སོཔི པུཙྪིཏབྦོ’’ཏི (ཙཱུལ༹ཝ. ཨཊྛ. ༣༥༧) ཝུཏྟནཡེན ཨགོཙརཉྩ.

༢༩༢༠. ཨེཝཾ ཨཱགནྟུཀཝཏྟཾ དསྶེཏྭཱ ཨིདཱནི ཨཱཝཱསིཀཝཏྟཾ དསྶེཏུམཱཧ ‘‘ཝུཌྜྷ’’ནྟིཨཱདི. པཙྩུགྒནྟྭཱ པཏྟཉྩ ཙཱིཝརཉྩ པཊིགྒཧེཏབྦནྟི ཡོཛནཱ. ཙ-སདྡོ ལུཏྟནིདྡིཊྛོ.

༢༩༢༡. ཏསྶཱཏི ¶ ཨཱགནྟུཀསྶ. པཱདོདཀཉྩཱཏི ཙ-སདྡེན དྷོཏཱདྷོཏཔཱདཱ ཡཏྠ ཋཔཱིཡནྟི, ཏཾ པཱདཔཱིཋཾ, པཱདཀཐལིཀཉྩ ཨུཔནིཀྑིཔིཏབྦནྟི ཨེཏཾ གཧིཏཾ. པུཙྪིཏབྦཉྩ ཝཱརིནཱཏི ‘‘པཱནཱིཡེན པུཙྪནྟེན སཙེ སཀིཾ ཨཱནཱིཏཾ པཱནཱིཡཾ སབྦཾ པིཝཏི, ‘པུན ཨཱནེམཱི’ཏི པུཙྪིཏབྦོཡེཝཱ’’ཏི ཝུཏྟནཡེན པཱནཱིཡེན པུཙྪིཏབྦོ. ཨིདྷ ཙ-སདྡེན –

‘‘ཨཔིཙ བཱིཛནེནཔི བཱིཛིཏབྦོ, བཱིཛནྟེན སཀིཾ པཱདཔིཊྛིཡཾ བཱིཛིཏྭཱ སཀིཾ མཛ྄ཛྷེ, སཀིཾ སཱིསེ བཱིཛིཏབྦཾ, ‘ཨལཾ ཧོཏཱུ’ཏི ཝུཏྟེན ཏཏོ མནྡཏརཾ བཱིཛིཏབྦཾ. པུན ‘ཨལ’ནྟི ཝུཏྟེན ཏཏོ མནྡཏརཾ བཱིཛིཏབྦཾ. ཏཏིཡཝཱརཾ ཝུཏྟེན བཱིཛནཱི ཋཔེཏབྦཱ. པཱདཱཔིསྶ དྷོཝིཏབྦཱ, དྷོཝིཏྭཱ སཙེ ཨཏྟནོ ཏེལཾ ཨཏྠི, ཏེན མཀྑེཏབྦཱ. ནོ ཙེ ཨཏྠི, ཏསྶ སནྟཀེན མཀྑེཏབྦཱ’’ཏི (ཙཱུལ༹ཝ. ཨཊྛ. ༣༥༩) –

ཝུཏྟཝཏྟཱནི སངྒཎྷཱཏི.

༢༩༢༢-༣. ཝནྡེཡྻོཏི ¶ ཝུཌྜྷཱགནྟུཀོ ཝནྡིཏབྦོ. པཉྙཔེཏབྦནྟི ‘‘ཀཏྠ མཡ྄ཧཾ སེནཱསནཾ པཱཔུཎཱཏཱི’’ཏི པུཙྪིཏེན སེནཱསནཾ པཉྙཔེཏབྦཾ, ‘‘ཨེཏཾ སེནཱསནཾ ཏུམྷཱཀཾ པཱཔུཎཱཏཱི’’ཏི ཨེཝཾ ཨཱཙིཀྑིཏབྦནྟི ཨཏྠོ. ‘‘ཝཏྟབྦོ’’ཏི ཨིདཾ ‘‘ཨཛ྄ཛྷཱཝུཏྠམཝུཏྠ’’ནྟིཨཱདཱིཧི པདེཧི ཏཾཏཾལིངྒཝཙནཱནུརཱུཔེན པརིཝཏྟེཏྭཱ པཙྩེཀཾ ཡོཛེཏབྦཾ. ཨཛ྄ཛྷཱཝུཏྠནྟི པཉྙཏྟསེནཱསནསྶ བྷིཀྑཱུཧི པཋམཾ ཝུཏྠབྷཱཝཾ. ཨཝུཏྠཾ ཝཱཏི ཙཱིཝརཀཱལཾ ཏསྨིཾ བྷིཀྑཱུཧི ཨནཛ྄ཛྷཱཝུཏྠབྷཱཝཾ ཝཱ. གོཙརཱགོཙརཾ ཝུཏྟམེཝ.

སེཀྑཀུལཱནི ཙཱཏི ལདྡྷསེཀྑསམྨུཏིཀཱནི ཀུལཱནི ཙ ཝཏྟབྦཱནི. ‘‘པཝེསེ ནིཀྑམེ ཀཱལོ’’ཏི ཨིདཾ ‘‘སངྒྷཀཏིཀ’’ནྟི ཨེཏྠ ཝུཏྟཏྠམེཝ. པཱནཱིཡཱདིཀནྟི ཨཱདི-སདྡེན པརིབྷོཛནཱིཡཀཏྟརཡཊྛཱིནཾ ཨཱཙིཀྑནཾ སངྒཎྷཱཏི.

༢༩༢༤. ཡཐཱནིསིནྣེནེཝཱཏི ཨཏྟནཱ ནིསིནྣཊྛཱནེཡེཝ ནིསིནྣེན. ཨསྶཱཏི ནཝཀསྶ.

༢༩༢༥. ‘‘ཨཏྲ པཏྟཾ ཋཔེཧི, ཨིདམཱསནཾ ནིསཱིདཱཧཱི’’ཏི ཨིཙྩེཝཾ ཨིམིནཱ པཀཱརེན སབྦཾ ཝཏྟབྦནྟི ཡོཛནཱ. དེཡྻཾ སེནཱསནམྤི ཙཱཏི སེནཱསནཉྩ དཱཏབྦཾ. ཙ-སདྡེན ‘‘ཨཝུཏྠཾ ཝཱ ཨཛ྄ཛྷཱཝུཏྠཾ ¶ ཝཱ ཨཱཙིཀྑིཏབྦ’’ནྟིཨཱདིནཱ ཝུཏྟཾ སམྤིཎྜེཏི. མཧཱཨཱཝཱསེཔི ཨཏྟནོ སནྟིཀཾ སམྤཏྟསྶ ཨཱགནྟུཀསྶ ཝཏྟཾ ཨཀཱཏུཾ ན ལབྦྷཏི.

༢༩༢༦. ‘‘མཱཏིཀཱཡ ནིདྡིཊྛཀྐམེནེཝ ཝཏྟཱནི ཀཱཏབྦཱནི, ཨུདཱཧུ ཡཐཱནུཔྤཏྟིཝསེནཱ’’ཏི ཀོཙི མཉྙེཡྻཱཏི མཱཏིཀཱཀྐམེནེཝ ཀཱཏབྦནྟི ནིཡམོ ནཏྠི, ཡཐཱནུཔྤཏྟཝསེནེཝ ཀཱཏབྦནྟི ཝིཉྙཱཔེཏུཾ མཱཏིཀཱཀྐམམནཱདིཡིཏྭཱ གམིཀཝཏྟཾ ཨཱརདྡྷཾ. ཨཐ ཝཱ ཝཏྟིཙྪཱནུཔུབྦཀཏྟཱ སདྡཔཡོགསྶ ¶ མཱཏིཀཱཀྐམམནཱདིཡིཏྭཱ ཡཐིཙྪཾ ནིདྡེསོ ཀཏོཏི ཝེདིཏབྦོཏི. དཱརུམཏྟིཀབྷཎྜཱནཱིཏི མཉྩཔཱིཋཱདཱིནི ཙེཝ རཛནབྷཱཛནཱནི ཙ. པཊིསཱམེཏྭཱཏི གུཏྟཊྛཱནེ ཋཔེཏྭཱ. ཨཱཝསཐམྤི ཐཀེཏྭཱཏི ཨཱཝསཐེ དྭཱརཀཝཱཊཱདཱིནི ཙ ཐཀེཏྭཱ.

༢༩༢༧. ཨཱཔུཙྪིཏྭཱཔཱིཏི བྷིཀྑུསྶ ཝཱ སཱམཎེརསྶ ཝཱ ཨཱརཱམིཀསྶ ཝཱ ‘‘ཨིམཾ པཊིཛགྒཱཧཱི’’ཏི ནིཡྻཱདེཏྭཱ ཝཱ. པུཙྪིཏབྦེ ཨསནྟེཔཱིཏི ཨེཏྠ པི-སདྡོ པན-སདྡཏྠོ. གོཔེཏྭཱ ཝཱཔི སཱདྷུཀནྟི ‘‘ཙཏཱུསུ པཱསཱཎེསུ མཉྩཾ པཉྙཔེཏྭཱ མཉྩེ མཉྩཾ ཨཱརོཔེཏྭཱ’’ཏིཨཱདིནཱ (ཙཱུལ༹ཝ. ༣༦༠) ཝུཏྟནཡེན སམྨཱ པཊིསཱམེཏྭཱ གནྟབྦནྟི ཡོཛནཱ.

༢༩༢༨. པིཎྜཙཱརིཀཝཏྟཾ དསྶེཏུམཱཧ ‘‘སཧསཱ’’ཏིཨཱདི. པིཎྜཙཱརིཀོ བྷིཀྑུ ཨནྟརགྷརཾ པཝིསནྟོ སཧསཱ ན པཝིསེ སཱིགྷཾ ན པཝིསེཡྻ, ནིཀྑམནྟོ སཧསཱ ན ནིཀྑམེ སཱིགྷཾ ན ནིཀྑམེཡྻ, བྷིཀྑུསཱརུཔྤེན པཝིསེཡྻ, ནིཀྑམེཡྻ ཙ. པིཎྜཙཱརིནཱ བྷིཀྑུནཱ གེཧདྭཱརཾ སམྤཏྟེན ཨཏིདཱུརེ ན ཋཱཏབྦཾ ནིབྦཀོསཏོ ཨཏིདཱུརཊྛཱནེ ན ཋཱཏབྦཾ. ཨཙྩཱསནྣེ ན ཋཱཏབྦཾ ནིབྦཀོསཏོ ཨཱསནྣཏརེ ཋཱནེ ན ཋཱཏབྦཾ.

༢༩༢༩. ཨུཙྩཱརེཏྭཱཏི ཨུཔནཱམེཏྭཱ. བྷཱཛནནྟི པཏྟཾ. དཀྑིཎེན པཎཱམེཏྭཱཏི དཀྑིཎེན ཧཏྠེན ཨུཔནཱམེཏྭཱ. བྷིཀྑཾ གཎྷེཡྻཱཏི ཨེཏྠ ‘‘ཨུབྷོཧི ཧཏྠེཧི པཊིགྒཧེཏྭཱ’’ཏི སེསོ. ཡཐཱཧ – ‘‘ཨུབྷོཧི ཧཏྠེཧི པཏྟཾ པཊིགྒཧེཏྭཱ བྷིཀྑཱ གཧེཏབྦཱ’’ཏི (ཙཱུལ༹ཝ. ༣༦༦).

༢༩༣༠. སཱུཔཾ དཱཏུཀཱམཱ ཝཱ ཨདཱཏུཀཱམཱ ཝཱ ཨིཏི མུཧུཏྟཀཾ སལླཀྑེཡྻ ཏིཊྛེཡྻ. ཨནྟརཱཏི ¶ བྷིཀྑཱདཱནསམཡེ. ན ¶ བྷིཀྑཱདཱཡིཀཱཏི ཨིཏྠཱི ཝཱ ཧོཏུ པུརིསོ ཝཱ, བྷིཀྑཱདཱནསམཡེ མུཁཾ ན ཨོལོཀེཏབྦནྟི.

༢༩༣༡. པིཎྜཙཱརིཀཝཏྟཾ དསྶེཏྭཱ ཨཱརཉྙིཀཝཏྟཾ དསྶེཏུམཱཧ ‘‘པཱནཱིཡཱདཱི’’ཏིཨཱདི. པཱནཱིཡཱདཱིཏི ཨཱདི-སདྡེན པརིབྷོཛནཱིཡཨགྒིཨརཎིསཧིཏཀཏྟརཡཊྛཱིནཾ གཧཎཾ. ཏཏྲཱཡཾ ཝིནིཙྪཡོ – པཱནཱིཡཾ ཨུཔཊྛཱཔེཏབྦནྟི སཙེ བྷཱཛནཱནི ནཔྤཧོནྟི, པཱནཱིཡམེཝ པརིབྷོཛནཱིཡམྤི ཀཏྭཱ ཨུཔཊྛཱཔེཏབྦཾ. བྷཱཛནཾ ཨལབྷནྟེན ཝེལུ༹ནཱལི༹ཀཱཡཔི ཨུཔཊྛཱཔེཏབྦཾ. ཏམྤི ཨལབྷནྟསྶ ཡཐཱ སམཱིཔེ ཁུདྡཀཨཱཝཱཊོ ཧོཏི, ཨེཝཾ ཀཱཏབྦཾ. ཨརཎིསཧིཏེ ཨསཏི ཨགྒིཾ ཨཀཱཏུམྤི ཙ ཝཊྚཏི. ཡཐཱ ཙ ཨཱརཉྙིཀསྶ, ཨེཝཾ ཀནྟཱརཔཊིཔནྣསྶཱཔི ཨརཎིསཧིཏཾ ཨིཙྪིཏབྦཾ. གཎཝཱསིནོ པན ཏེན ཝིནཱཔི ཝཊྚཏཱིཏི.

ནཀྑཏྟནྟི ཨསྶཡུཛཱདིསཏྟཝཱིསཏིཝིདྷཾ ནཀྑཏྟཾ ཛཱནིཏབྦནྟི སམྦནྡྷོ. ཀཐཾ ཛཱནིཏབྦནྟི ཨཱཧ ‘‘ཏེན ཡོགོ ཙཱ’’ཏི, ཏེན ནཀྑཏྟེན ཙནྡསྶ ཡོགོ ཉཱཏབྦོཏི ཨཏྠོ. ཛཱནིཏབྦཱ དིསཱཔི ཙཱཏི ཨརཉྙེ ཝིཧརནྟེན ཨཊྛཔི དིསཱ ཨསམྨོཧཏོ ཛཱནིཏབྦཱ.

༢༩༣༢. ཨཉྙཝཏྟཾ དསྶེཏུམཱཧ ‘‘ཝཙྩཔསྶཱཝཏིཏྠཱནཱི’’ཏིཨཱདི. པཊིཔཱཊིཡཱ བྷཝནྟཱིཏི གཏཱནུཀྐམེན སེཝིཏབྦཱ བྷཝནྟི. ཡཐཱཧ – ‘‘ཝཙྩཀུཊིཡཾ, པསྶཱཝཊྛཱནེ, ནྷཱནཏིཏྠེཏི ཏཱིསུཔི ཨཱགཏཔཊིཔཱཊིཡེཝ པམཱཎ’’ནྟི (ཙཱུལ༹ཝ. ཨཊྛ. ༣༧༣). ཡཐཱཝུཌྜྷཾ ཀརོནྟསྶཱཏི གཏཔཊིཔཱཊིཾ ཝིནཱ ཝུཌྜྷཔཊིཔཱཊིཡཱ ཀརོནྟསྶ.

༢༩༣༣. ཝཙྩཀུཊིཾ ¶ པཝིསནྟོ སཧསཱ ན པཝིསེཡྻ. ཨུབྦྷཛིཏྭཱཏི ཙཱིཝརཾ ཨུཀྑིཔིཏྭཱ.

༢༩༣༤. ནིཏྠུནནྟེན བྷིཀྑུནཱ ཝཙྩཾ ན ཀཱཏབྦནྟི ཡོཛནཱ. ‘‘ཝཙྩསྶ དུནྣིགྒམནེན ཨུཔཧཏོ ཧུཏྭཱ ནིཏྠུནཏི ཙེ, ན དོསོ’’ཏི སིཀྑཱབྷཱཛནཝིནིཙྪཡེ ཝུཏྟཾ. དཎྜཀཊྛཾ ཁཱདཏོ ཝཙྩཾ ཀརོཏོ བྷིཀྑུནོ དུཀྐཊཾ ཧོཏཱིཏི ཡོཛནཱ.

༢༩༣༦. ཁརེནཱཏི ཕརུསེན ཝཱ ཕཱལིཏཀཊྛེན ཝཱ གཎྛིཀེན ཝཱ ཀཎྚཀེན ཝཱ སུསིརེན ¶ ཝཱ པཱུཏིནཱ ཝཱ དཎྜེན ན ཨཝལེཁེཡྻ ན པུཉྪེཡྻ. ན ཀཊྛཾ ཝཙྩཀཱུཔཀེ ཚཌྜེཡྻཱཏི ཏཾ ཀཊྛཾ ཝཙྩཀཱུཔེ ན ཚཌྜེཡྻ. པསྶཱཝདོཎིཡཱ ཁེལ༹ཾ ན པཱཏེཡྻཱཏི ཡོཛནཱ.

༢༩༣༧. པཱདུཀཱསཱུཏི ཝཙྩཔསྶཱཝཔཱདུཀཱསུ. ནིཀྑམནེ ནིཀྑམནཀཱལེ. ཏཏྠེཝཱཏི ཝཙྩཔསྶཱཝཔཱདུཀཱསྭེཝ. པཊིཙྪཱདེཡྻཱཏི ཨུཀྑིཏྟཾ ཙཱིཝརཾ ཨོཏཱརེཏྭཱ སརཱིརཾ པཊིཙྪཱདེཡྻ.

༢༩༣༨. ཡོ ཝཙྩཾ ཀཏྭཱ སལིལེ སཏི སཙེ ནཱཙམེཡྻ ཨུདཀཀིཙྩཾ ན ཀརེཡྻ, ཏསྶ དུཀྐཊཾ ཨུདྡིཊྛནྟི ཡོཛནཱ. མོཧནཱསིནཱཏི སཝཱསནསྶ མོཧསྶ, ཏེན སཧཛེཀཊྛཔཧཱནེཀཊྛཱནཾ སཀལསཾཀིལེསཱནཉྩ པཧཱཡིནཱ ཨཱསཝཀྑཡཉཱཎེན སམུཙྪིནྡཏཱ མུནིནཱ སབྦཉྙུནཱ སམྨཱསམྦུདྡྷེན. ‘‘སལིལེ སཏཱི’’ཏི ཨིམིནཱ ཨསཏི ནིདྡོསཏཾ དཱིཔེཏི. ཡཐཱཧ –

‘‘སཏི ཨུདཀེཏི ཨེཏྠ སཙེ ཨུདཀཾ ཨཏྠི, པཊིཙྪནྣཊྛཱནཾ པན ནཏྠི, བྷཱཛནེན ནཱིཧརིཏྭཱ ཨཱཙམིཏབྦཾ. བྷཱཛནེ ཨསཏི པཏྟེན ནཱིཧརིཏབྦཾ. པཏྟེཔི ཨསཏི ཨསནྟཾ ནཱམ ཧོཏི. ‘ཨིདཾ ཨཏིཝིཝཊཾ, པུརཏོ ཨཉྙཾ ¶ ཨུདཀཾ བྷཝིསྶཏཱི’ཏི གཏསྶ ཨུདཀཾ ཨལབྷནྟསྶེཝ བྷིཀྑཱཙཱརཝེལཱ ཧོཏི, ཀཊྛེན ཝཱ ཀེནཙི ཝཱ པུཉྪིཏྭཱ གནྟབྦཾ, བྷུཉྫིཏུམྤི ཨནུམོདནམྤི ཀཱཏུཾ ཝཊྚཏཱི’’ཏི (ཙཱུལ༹ཝ. ཨཊྛ. ༣༧༣).

༢༩༣༩. སསདྡནྟི ཨུདཀསདྡཾ ཀཏྭཱ. ‘‘པཱསཱཎཱདིཊྛཱནེ པཧརིཏྭཱ ཨུདཀཾ སདྡཱཡཏི ཙེ, ན དོསོ’’ཏི སིཀྑཱབྷཱཛནཝིནིཙྪཡེ ཝུཏྟཾ. ཙཔུ ཙཔཱུཏི ཙཱཏི ཏཱདིསཾ ཨནུཀརཎཾ ཀཏྭཱ ནཱཙམེཏབྦནྟི ཡོཛནཱ. ཨཱཙམིཏྭཱཏི ཨུདཀཀིཙྩཾ ཀཏྭཱ. སརཱཝེ ཨཱཙམནབྷཱཛནེ ཨུདཀཾ ན སེསེཏབྦནྟི ཡོཛནཱ, ཨིདཾ པན སབྦསཱདྷཱརཎཊྛཱནཾ སནྡྷཱཡ ཝུཏྟཾ. ཡཐཱཧ ཨཊྛཀཐཱཡཾ –

‘‘ཨཱཙམནསརཱཝཀེཏི སབྦསཱདྷཱརཎཊྛཱནཾ སནྡྷཱཡེཏཾ ཝུཏྟཾ. ཏཏྲ ཧི ཨཉྙེ ཨཉྙེ ཨཱགཙྪནྟི, ཏསྨཱ ཨུདཀཾ ན སེསེཏབྦཾ. ཡཾ པན སངྒྷིཀེཔི ཝིཧཱརེ ཨེཀདེསེ ནིབདྡྷགམནཏྠཱཡ ཀཏཾ ཋཱནཾ ཧོཏི པུགྒལིཀཊྛཱནཾ ཝཱ, ཏསྨིཾ ཝཊྚཏི. ཝིརེཙནཾ པིཝིཏྭཱ པུནཔྤུནཾ པཝིསནྟསྶཱཔི ཝཊྚཏིཡེཝཱ’’ཏི (ཙཱུལ༹ཝ. ཨཊྛ. ༣༧༤).

༢༩༤༠. ཨཱུཧཏམྤཱིཏི ཨཉྙེན ཝཱ ཨཏྟནཱ ཝཱ ཨསཉྩིཙྩ ཨཱུཧཏཾ མལེན དཱུསིཏཊྛཱནཾ. ཨདྷོཝིཏྭཱཏི ¶ ཛལེ སཏི ཨསོདྷེཏྭཱ ཛལེ ཨསཏི ཀཊྛེན ཝཱ ཀེནཙི ཝཱ པུཉྪིཏྭཱ གནྟབྦཾ. ཡཐཱཧ – ‘‘ཨུདཀཾ ཨཏྠི བྷཱཛནཾ ནཏྠི, ཨསནྟཾ ནཱམ ཧོཏི, བྷཱཛནཾ ཨཏྠི ཨུདཀཾ ནཏྠི, ཨེཏམྤི ཨསནྟཾ, ཨུབྷཡེ པན ཨསཏི ཨསནྟམེཝ, ཀཊྛེན ཝཱ ཀེནཙི ཝཱ པུཉྪིཏྭཱ གནྟབྦ’’ནྟི (ཙཱུལ༹ཝ. ཨཊྛ. ༣༧༤). ཨུཀླཱཔཱཔི སཙེ ཧོནྟཱིཏི ཝཙྩཔསྶཱཝཊྛཱནཱནི སཙེ ཀཙཝརཱཀིཎྞཱནི ཧོནྟི. ‘‘ཨསེསཏོ སོདྷེཏབྦ’’ནྟི ཨིམིནཱ ཏཏོ ཀསྶཙི ཀཙཝརསྶ ¶ ཨཔནཡནཾ སོདྷནཾ ནཱམ ན ཧོཏི, ནིསྶེསཀཙཝརཱཔནཡནམེཝ སོདྷནནྟི དཱིཔེཏི.

༢༩༤༡. པིཋརོཏི ཨཝལེཁནཀཊྛནིཀྑེཔནབྷཱཛནཾ. ཀུམྦྷཱི ཙེ རིཏྟཱཏི ཨཱཙམནཀུམྦྷཱི སཙེ ཏུཙྪཱ.

༢༩༤༢. ཨེཝཾ ཝཙྩཀུཊིཝཏྟཾ དསྶེཏྭཱ སེནཱསནཝཏྟཾ དསྶེཏུམཱཧ ‘‘ཨནཛ྄ཛྷིཊྛོ’’ཏིཨཱདི. ཨནཛ྄ཛྷིཊྛོཏི ཨནནུཉྙཱཏོ.

༢༩༤༣. ཝུཌྜྷཾ ཨཱཔུཙྪིཏྭཱ ཀཐེནྟསྶཱཏི ཡོཛནཱ. ཝུཌྜྷཏརཱགམེཏི ཡཾ ཨཱཔུཙྪིཏྭཱ ཀཐེཏུམཱརདྡྷོ, ཏཏོཔི ཝུཌྜྷཏརསྶ བྷིཀྑུནོ ཨཱགམེ སཏི.

༢༩༤༤. ཨེཀཝིཧཱརསྨིནྟི ཨེཀསྨིཾ གེཧེ. ‘‘ཨནཱཔུཙྪཱ’’ཏི ཨིདཾ ཝཀྑམཱནེཧི ཡཐཱརཧཾ ཡོཛེཏབྦཾ.

༢༩༤༥. པཋམཾ ཡཏྠ ཀཏྠཙི ཝུཌྜྷཱནཾ སནྣིདྷཱནེ ཀཏྟབྦཝཏྟཾ ནིདྡིཊྛནྟི ཨིདཱནི ཨེཀཝིཧཱརེ ཝསནྟེནཱཔི ཏསྶ ཀཱཏབྦཏཾ དསྶེཏུཾ པུནཔི ‘‘ན ཙ དྷམྨོ ཀཐེཏབྦོ’’ཏི ཨཱཧ. དྷམྨཙཀྑུནཱཏི དྷམྨལོཙནེན དྷམྨགརུཀེན, ཨིམིནཱ ཨཏཱདིསསྶ ཀཏོ ཝཱརོ ནིརཏྠཀོཏི དཱིཔེཏི.

༢༩༤༦. ཀཱཏབྦོཏི ཛཱལེཏབྦོ. སོཏི དཱིཔོ. ‘‘དྭཱརཾ ནཱམ ཡསྨཱ མཧཱཝལ༹ཉྫཾ, ཏསྨཱ ཏཏྠ ཨཱཔུཙྪནཀིཙྩཾ ནཏྠཱི’’ཏི (ཙཱུལ༹ཝ. ཨཊྛ. ༣༦༩) ཝཙནཏོ ཏཾ ཨཝཏྭཱ ཨཱཔཏྟིཀྑེཏྟམེཝ དསྶེཏུམཱཧ ‘‘ཝཱཏཔཱནཀཝཱཊཱནི, ཐཀེཡྻ ཝིཝརེཡྻ ནོ’’ཏི.

༢༩༤༧. ཝུཌྜྷཏོ ¶ པརིཝཏྟཡེཏི ཡེན ཝུཌྜྷོ, ཏཏོ པརིཝཏྟཡེ, པིཊྛིཾ ཨདསྶེཏྭཱ ཝུཌྜྷཱབྷིམུཁོ ཏེན པརིཝཏྟཡེཏི ཨཏྠོ. ཙཱིཝརཀཎྞེན ཝཱ ཀཱཡེན ཝཱ ཏཾ ཝུཌྜྷཾ ན ཙ གྷཊྚཡེ.