📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིནཡཔིཊཀེ

པཱཙིཏྱཱདིཡོཛནཱ

པཱཙིཏྟིཡཡོཛནཱ

མཧཱཀཱརུཎིཀཾ ¶ ནཱཐཾ, ཨབྷིནཏྭཱ སམཱསཏོ;

པཱཙིཏྱཱདིཝཎྞནཱཡ, ཀརིསྶཱམཏྠཡོཛནཾ.

༥. པཱཙིཏྟིཡཀཎྜཾ

༡. མུསཱཝཱདསིཀྑཱཔད-ཨཏྠཡོཛནཱ

ཁུདྡཀཱནནྟི ¶ སུཁུམཱཔཏྟིཔཀཱསཀཏྟཱ ཨཔྤཀཱནཾ, གཎནཏོ ཝཱ པཙུརཏྟཱ བཧུཀཱནཾ. ཡེསཾ སིཀྑཱཔདཱནནྟི སམྦནྡྷོ. ‘‘ཡེས’’ནྟི པདཾ ‘‘སངྒཧོ’’ཏི པདེ སཱམྱཏྠཚཊྛཱི. སངྒཧཱིཡཏེ སངྒཧོ ¶ . ‘‘ནཝཧི ཝགྒེཧཱི’’ཏིཔདཾ ‘‘སངྒཧོ, སུཔྤཏིཊྛིཏོ’’ཏི པདདྭཡེ ཀརཎཾ. དཱནཱིཏི ཀཱལཝཱཙཀོ སཏྟམྱནྟནིཔཱཏོ ཨིདཱནི-པརིཡཱཡོ, ཨིམསྨིཾ ཀཱལེཏི ཨཏྠོ. ཏེསནྟི ཁུདྡཀཱནཾ, ཨཡཾ ཝཎྞནཱཏི སམྦནྡྷོ. བྷཝཏཱིཏི ཨེཏྠ ཏི-སདྡོ ཨེཀཾསཏྠེ ཨནཱགཏཀཱལིཀོ ཧོཏི ‘‘ནིརཡཾ ནཱུན གཙྪཱམི, ཨེཏྠ མེ ནཏྠི སཾསཡོ’’ཏིཨཱདཱིསུ (ཛཱ. ༢.༢༢.༣༣༡) ཝིཡ. ཀིཉྩཱཔེཏྠ ཧི ཡཐཱ ཨེཀཾསཝཱཙཀོ ནཱུནསདྡོ ཨཏྠི, ན ཨེཝཾ ‘‘བྷཝཏཱི’’ཏི པདེ, ཨཏྠཏོ པན ཨཡཾ ཝཎྞནཱ ནཱུན བྷཝིསྶཏཱིཏི ཨཏྠོ གཧེཏབྦོ. ཨཐ ཝཱ ཨཝསྶམྦྷཱཝིཡཏྠེ ཨནཱགཏཀཱལཝཱཙཀོ ཧོཏི ‘‘དྷུཝཾ བུདྡྷོ བྷཝཱམཧ’’ནྟིཨཱདཱིསུ (བུ. ཝཾ. ༢.༡༠༩-༡༡༤) ཝིཡ. ཀཱམཉྷེཏྠ ཡཐཱ ཨཝསྶམྦྷཱཝིཡཏྠཝཱཙཀོ དྷུཝསདྡོ ཨཏྠི, ན ཨེཝཾ ‘‘བྷཝཏཱི’’ཏི པདེ, ཨཏྠཏོ པན དྷུཝཾ བྷཝིསྶཏི ཨཡཾ ཝཎྞནཱཏི ཨཏྠོ གཧེཏབྦོཏི དཊྛབྦཾ.

༡. ‘‘ཏཏྠཱ’’ཏི ¶ པདཾ ‘‘མུསཱཝཱདཝགྒསྶཱ’’ཏི པདེ ནིདྡྷཱརཎསམུདཱཡོ, ཏེསུ ནཝསུ ཝགྒེསཱུཏི ཨཏྠོ. པཋམསིཀྑཱཔདེཏི ཝཱ, ཏེསུ ཁུདྡཀེསུ སིཀྑཱཔདེསཱུཏི ཨཏྠོ. སཀྱཱནཾ པུཏྟོཏི བྷགིནཱིཧི སཾཝཱསཀརཎཏོ ལོཀམརིཡཱདཾ ཚིནྡིཏུཾ, ཛཱཏིསམྦྷེདཏོ ཝཱ རཀྑིཏུཾ སཀྐུཎནྟཱིཏི སཀྱཱ. སཱཀཝནསཎྜེ ནགརཾ མཱཔེནྟཱིཏི ཝཱ སཀྱཱ, པུབྦརཱཛཱནོ. ཏེསཾ ཝཾསེ བྷཱུཏཏྟཱ ཨེཏརཧིཔི རཱཛཱནོ སཀྱཱ ནཱམ, ཏེསཾ པུཏྟོཏི ཨཏྠོ. ‘‘བུདྡྷཀཱལེ’’ཏི པདཾ ‘‘པབྦཛིཾསཱུ’’ཏི པདེ ཨཱདྷཱརོ. སཀྱཀུལཏོ ནིཀྑམིཏྭཱཏི སམྦནྡྷོ. ‘‘ཝཱདཀྑིཏྟོ’’ཏྱཱདིནཱ ཝཱདེན ཁིཏྟོ, ཝཱདམྷི ཝཱཏི ཨཏྠཾ དསྶེཏི. ཡཏྲ ཡཏྲཱཏི ཡསྶཾ ཡསྶཾ དིཊྛིཡཾ པཝཏྟཏཱིཏི སམྦནྡྷོ. ཨཝཛཱནིཏྭཱཏི པཊིསྶཝེན ཝིཡོགཾ ཀཏྭཱ. ཨཝསདྡོ ཧི ཝིཡོགཏྠཝཱཙཀོ. ‘‘ཨཔཛཱནིཏྭཱ’’ཏིཔི པཱཋོ, པཊིཉྙཱཏཾ ཨཔནཱིཏཾ ཀཏྭཱཏི ཨཏྠོ. དོསནྟི ཨཡུཏྟིདོསཾ, སལླཀྑེནྟོ ཧུཏྭཱཏི སམྦནྡྷོ. ཀཐེནྟོ ཀཐེནྟོཏི ཨནྟསདྡོ མཱནསདྡཀཱརིཡོ. ཀཐིཡམཱནོ ཀཐིཡམཱནོཏི ཧི ཨཏྠོ. པཊིཛཱནིཏྭཱཏི པཊིཉྙཱཏཾ ཀཏྭཱ. ཨཱནིསཾསནྟི ནིདྡོསཾ གུཎཾ. པཊིཔུབྦོ ཙརསདྡོ པཊིཙྪཱདནཏྠོཏི ཨཱཧ ‘‘པཊིཙརཏི པཊིཙྪཱདེཏཱི’’ཏི. ‘‘ཀིཾ པན རཱུཔཾ ནིཙྩཾ ཝཱ ཨནིཙྩཾ ཝཱ’’ཏི ཝུཏྟེ ‘‘ཨནིཙྩ’’ནྟི ཝདཏི. ཀསྨཱཏི ཝུཏྟེ ‘‘ཛཱནིཏབྦཏོ’’ཏི ཝདཏི. ཡདི ཨེཝཾ ནིབྦཱནམྤི ཛཱནིཏབྦཏྟཱ ཨནིཙྩཾ ནཱམ སིཡཱཏི ཝུཏྟེ ཨཏྟནོ ཧེཏུམྷི དོསཾ དིསྭཱ ཨཧཾ ‘‘ཛཱནིཏབྦཏོ’’ཏི ཧེཏུཾ ན ཝདཱམི, ‘‘ཛཱཏིདྷམྨཏོ’’ཏི པན ཝདཱམི. ཏཡཱ པན དུསྶུཏཏྟཱ ཨེཝཾ ཝུཏྟནྟི ཝཏྭཱ ཨཉྙེནཉྙཾ པཊིཙརཏི. ‘‘ཀུརུནྡིཡ’’ནྟི པདཾ ‘‘ཝུཏྟ’’ནྟི པདེ ཨཱདྷཱརོ. ཨེཏསྶཱཏི ‘‘རཱུཔཾ ཨནིཙྩཾ ཛཱནིཏབྦཏོ’’ཏི ཝཙནསྶ. ཏཏྲཱཏི ཀུརུནྡིཡཾ. ཏསྶཱཏི པཊིཛཱནནཱཝཛཱནནསྶ. ‘‘པཊིཙྪཱདནཏྠ’’ནྟི པདཾ ‘‘བྷཱསཏཱི’’ཏིཔདེ སམྤདཱནཾ. ‘‘མཧཱཨཊྛཀཐཱཡ’’ནྟིཔདཾ ‘‘ཝུཏྟ’’ནྟི པདེ ཨཱདྷཱརོ. ‘‘དིཝཱཊྛཱནཱདཱིསཱུ’’ཏི པདཾ ཨུཔནེཏབྦཾ. ཨིདཾ ‘‘ཨསུཀསྨིཾ ནཱམཔདེསེ’’ཏི པདེ ནིདྡྷཱརཎསམུདཱཡོ.

༣. སམྨཱ ¶ ཝདཏི ཨནེནཱཏི སཾཝཱདནཾ, ཨུཛུཛཱཏིཀཙིཏྟཾ, ན སཾཝཱདནཾ ཝིསཾཝཱདནཾ, ཝཉྩནཱདྷིཔྤཱཡཝསཔྤཝཏྟཾ ཙིཏྟནྟི དསྶེནྟོ ཨཱཧ ‘‘ཝིསཾཝཱདནཙིཏྟ’’ནྟི. ‘‘ཝཱཙཱ’’ཏྱཱདིནཱ ཝཙཏི ཨེཏཱཡཱཏི ཝཱཙཱཏི ཨཏྠཾ དསྶེཏི ¶ . ཧཱིཏི དལ༹ྷཱིཀརཎཛོཏཀཾ, ཏདམིནཱ སཙྩནྟི ཨཏྠོ. ‘‘ཝཱཙཱཡེཝཱ’’ཏི པདཾ ‘‘བྱཔྤཐོ’’ཏི པདེ ཏུལྱཏྠཾ, ‘‘ཝུཙྩཏཱི’’ཏི པདེ ཀམྨཾ. པཐསདྡཔརཏྟཱ ཝཱཙཱསདྡསྶ བྱཱདེསོ ཀཏོ. སུདྡྷཙེཏནཱ ཀཐིཏཱཏི སམྦནྡྷོ. ཏཾསམུཊྛིཏསདྡསཧིཏཱཏི ཏཱཡ ཙེཏནཱཡ སམུཊྛིཏེན སདྡེན སཧ པཝཏྟཱ ཙེཏནཱ ཀཐིཏཱཏི ཡོཛནཱ.

‘‘ཨེཝ’’ནྟི པདཾ ‘‘དསྶེཏྭཱ’’ཏི པདེ ནིདསྶནཾ, ཀརཎཾ ཝཱ. ‘‘དསྶེཏྭཱ’’ཏི པདཾ ‘‘དསྶེནྟོ ཨཱཧཱ’’ཏི པདདྭཡེ པུབྦཀཱལཀིརིཡཱ. ཨནྟེཏི ‘‘ཝཱཙཱ’’ཏིཨཱདཱིནཾ པཉྩནྣཾ པདཱནཾ ཨཝསཱནེ. ‘‘ཨཱཧཱ’’ཏི ཨེཏྠ ཝཏྟམཱན-ཏིཝཙནསྶ ཨཀཱརོ པཙྩུཔྤནྣཀཱལཝཱཙཀེན ‘‘ཨིདཱནཱི’’ཏི པདེན ཡོཛིཏཏྟཱ. ‘‘ཏཏྠཱ’’ཏི པདཾ ‘‘ཨཏྠོ ཝེདིཏབྦོ’’ཏི པདེ ཨཱདྷཱརོ. ཨེཏྠཱཏི ‘‘ཨདིཊྛཾ དིཊྛཾ མེ’’ཏིཨཱདཱིསུ. ‘‘པཱལི༹ཡ’’ནྟི པདཾ ‘‘དེསནཱ ཀཏཱ’’ཏི པདེ ཨཱདྷཱརོ. ནིསྶིཏཝིཉྙཱཎཝསེན ཨཝཏྭཱ ནིསྶཡཔསཱདཝསེན ‘‘ཙཀྑུནཱ དིཊྛ’’ནྟི ཝུཏྟནྟི ཨཱཧ ‘‘ཨོལཱ༹རིཀེནེཝཱ’’ཏི.

༤. ཏསྶཱཏི ‘‘ཏཱིཧཱཀཱརེཧཱི’’ཏིཨཱདིཝཙནསྶ. ‘‘ཨཏྠོ’’ཏི པདཾ ‘‘ཝེདིཏབྦོ’’ཏི པདེ ཀམྨཾ. ཧཱིཏི ཝིསེསཛོཏཀཾ, ཝིསེསཾ ཀཐཡིསྶཱམཱིཏི ཨཏྠོ. ཏཏྠཱཏི ཙཏུཏྠཔཱརཱཛིཀེ. ཨིདྷཱཏི ཨིམསྨིཾ སིཀྑཱཔདེ.

༩. ཨཱདཱིནམྤཱིཏི པིསདྡོ སམྤིཎྜནཏྠོ.

༡༡. མནྡསདྡོ ཛལ༹ཏྠཝཱཙཀོཏི ཨཱཧ ‘‘མནྡཏྟཱ ཛལ༹ཏྟཱ’’ཏི. ཡོ པན ཨཉྙཾ བྷཎཏཱིཏི སམྦནྡྷོ. ‘‘སཱམཎེརེནཱ’’ཏི པདཾ ‘‘ཝུཏྟོ’’ཏི པདེ ཀཏྟཱ. ཨཔིསདྡོ པུཙྪཱཝཱཙཀོ, ‘‘པསྶིཏྠཱ’’ཏི པདེན ཡོཛེཏབྦོ, ཨཔི པསྶིཏྠཱཏི ཨཏྠོ. ‘‘ཨདིཊྛཾ དིཊྛཾ མེ’’ཏིཨཱདིཝཙནཏོ ཨཉྙཱ པཱུརཎཀཐཱཔི ཏཱཝ ཨཏྠཱིཏི དསྶེནྟོ ཨཱཧ ‘‘ཨཉྙཱ པཱུརཎཀཐཱ ནཱམ ཧོཏཱི’’ཏི. ཨཔྤཏཱཡ ཨཱུནསྶ ཨཏྠསྶ པཱུརཎཝསེན པཝཏྟཱ ཀཐཱ པཱུརཎཀཐཱ. ཨེསཱ པཱུརཎཀཐཱ ¶ ནཱམ ཀཱཏི ཨཱཧ ‘‘ཨེཀོ’’ཏིཨཱདི. ཨེསཱ ཧི གཱམེ ཨཔྤཀམྤི ཏེལཾ ཝཱ པཱུཝཁཎྜཾ ཝཱ པསྶིཏྭཱ ཝཱ ལབྷིཏྭཱ ཝཱ བཧུཀཾ ཀཏྭཱ པཱུརཎཝསེན ཀཐིཏཏྟཱ པཱུརཎཀཐཱ ནཱམ. བཧུཀཱནི ཏེལཱནི ཝཱ པཱུཝེ ཝཱ པསྶནྟོཔི ལབྷནྟོཔི ཨཔྤཀཾ ཀཏྭཱ ཨཱུནཝསེན ཀཐིཏཏྟཱ ¶ ཨཱུནཀཐཱཔི ཨཏྠཱིཏི སཀྐཱ ཝཏྟུཾ. ཨཊྛཀཐཱསུ པན ཨཝུཏྟཏྟཱ ཝཱིམཾསིཏྭཱ གཧེཏབྦཾ. བཧུཀཱཡ པཱུརཎསྶ ཨཏྠསྶ ཨཱུནཝསེན པཝཏྟཱ ཀཐཱ ཨཱུནཀཐཱཏི ཝིགྒཧོ ཀཱཏབྦོཏི. པཋམཾ.

༢. ཨོམསཝཱད སིཀྑཱཔདཾ

༡༢. དུཏིཡེ མསདྷཱཏུ ཝིཛ྄ཛྷནཏྠེ པཝཏྟཏི ‘‘ཨོམཊྛཾ ཨུམྨཊྛ’’ནྟིཨཱདཱིསུ (སཾ. ནི. ཨཊྛ. ༡.༡.༢༡) ཝིཡཱཏི དསྶེནྟོ ཨཱཧ ‘‘ཨོམསནྟཱིཏི ཨོཝིཛ྄ཛྷནྟཱི’’ཏི.

༡༣. ‘‘ཨིདཾ ཝཏྠུ’’ནྟི པདཾ ‘‘ཨཱཧརཱི’’ཏི པདེ ཀམྨཾ. ནནྡིཏབྦོཏི ནནྡོ ཝཎྞབལཱདི, སོ ཨེཏསྶཏྠཱིཏི ནནྡཱི. ཝིསཱལཱནི མཧནྟཱནི ཝིསཱཎཱནི ཨེཏསྶཏྠཱིཏི ཝིསཱལོ, ནནྡཱི ཙ སོ ཝིསཱལོ ཙེཏི ནནྡིཝིསཱལོཏི ཝཙནཏྠཾ དསྶེཏི ‘‘ནནྡིཝིསཱལོ ནཱམཱ’’ཏིཨཱདིནཱ. སོཏི ནནྡིཝིསཱལོ, ‘‘ཨཱཧཱ’’ཏི པདེ ཀཏྟཱ. ཏཏྠེཝཱཏི ཡུཉྫིཏཊྛཱནེཡེཝ. ཨཧེཏུཀཔཊིསནྡྷིཀཱལེཔཱིཏི པི-སདྡོ ཨནུགྒཧཏྠཝཱཙཀོ, པགེཝ དྭིཧེཏུཀ ཏིཧེཏུཀ པཊིསནྡྷིཀཱལེཏི ཨཏྠོ. ‘‘ཏེན ཙཱ’’ཏི ཙཀཱརསྶ ཨཝུཏྟསམྤིཎྜནཏྠཏྟཱ ‘‘ཨཏྟནོ ཀམྨེན ཙཱ’’ཏི ཨཏྠཾ སམྤིཎྜེཏཱིཏི ཨཱཧ ‘‘ཨཏྟནོ ཀམྨེན ཙཱ’’ཏི. ཨཏྟནོཏི ནནྡིཝིསཱལསྶ.

༡༥. ཨེཏྠཱཏི ཨེཏིསྶཾ པདབྷཱཛནིཡཾ, ‘‘ཨཱཧཱ’’ཏི པདེ ཨཱདྷཱརོ. ‘‘ཡསྨཱ’’ཏི པདཾ ཝིབྷཛིཏུཀཱམོ’’ཏི པདེ ཧེཏུ. ཨཊྛུཔྤཏྟིཡཾཡེཝ ‘‘ཧཱིནེནཱཔཱི’’ཏི ཝཏྭཱ པདབྷཱཛནིཡཾ ཨཝུཏྟཏྟཱ ཨིདཾ ཝུཏྟནྟི དཊྛབྦཾ. ཝེཎུཀཱརཛཱཏཱིཏི ཝིལཱིཝཀཱརཛཱཏི. ནེསཱདཛཱཏཱིཏི ཨེཏྠ ཀེཝཊྚཛཱཏིཔི སངྒཧིཏཱ.

པུ ཝུཙྩཏི ཀརཱིསཾ, ཏཾ ཀུསཏི ཨཔནེཏཱིཏི པུཀྐུསོ. པུཔྥཾ ཝུཙྩཏི ཀརཱིསཾ, ཀུསུམཾ ཝཱ, ཏཾ ཚཌྜེཏཱིཏི པུཔྥཚཌྜཀོ.

ཀུཊཏི ¶ ཚིནྡཏཱིཏི ཀོཊྛོ, སོཡེཝ ཀོཊྛཀོ. ཡཀཱརབྷཀཱརེ ཨེཀཏོ ཡོཛེཏྭཱ ‘‘ཡབྷཱ’’ཏི ཡོ ཨཀྐོསོ ཨཏྠི, ཨེསོ ཧཱིནོ ནཱམ ཨཀྐོསོཏི ཡོཛནཱ.

༡༦. སབྦཔདེསཱུཏི ནཱམཱདཱིསུ སབྦཔདེསུ. ཨེཏྠཱཏི ཨིམསྨིཾ སིཀྑཱཔདེ. ཨལིཀནྟི ཨསཙྩཾ, མིཙྪཱཝཱཙནྟི སམྦནྡྷོ. ཡོཔི ཝདཏཱིཏི ཡོཛནཱ.

༢༦. པརིཧརིཏྭཱཏི ¶ པརིམུཁཾ ཀཐནཾ ཨཔནེཏྭཱ. དཝཾ པརིཧཱསཾ ཀཱམེཏཱིཏི དཝཀཱམོ, ཏསྶ བྷཱཝོ དཝཀམྱཾ, ཏཾཡེཝ དཝཀམྱཏཱ. ཨནུཔསམྤནྣནྟི ཨེཏྠ ཨཀཱརསྶ སདིསཏྠམགྒཧེཏྭཱ ཨཉྙཏྠོཝ གཧེཏབྦོཏི ཨཱཧ ‘‘ཋཔེཏྭཱ བྷིཀྑུ’’ནྟིཨཱདི. ཡདི ཧི སདིསཏྠོ བྷཝེཡྻ, སཱམཎེརོཝ ཨནུཔསམྤནྣོ ནཱམ སིཡཱ སཎྛཱནེན ཙ པུརིསབྷཱཝེན ཙ སདིསཏྟཱ, ཏསྨཱ ཨཉྙཏྠོཝ གཧེཏབྦོཏི དཊྛབྦཾ. སབྦསཏྟཱཏི ཨེཏྠ སབྦསདྡོ ཨནཝསེསཏྠོ མནུསྶེ ཨུཔཱདཱཡ ཝཙནཏྠཛཱནནཱཛཱནནཔཀཏིཀཱནཾ སབྦསཏྟཱནམྤི གཧིཏཏྟཱ.

༣༥. ཨཏྠཔུརེཀྑཱརོ ནཱམཱཏི ཝེདིཏབྦོཏི སམྦནྡྷོ. སིཀྑཱཔདམཔེཀྑིཡ ནཔུཾསཀལིངྒཝསེན ‘‘ཀིརིཡ’’ནྟིཨཱདི ཝུཏྟཾ. ཨཱཔཏྟིམཔེཀྑིཡ ཨིཏྠིལིངྒཝསེན ‘‘ཀིརིཡཱ’’ཏིཨཱདི ཝུཏྟཾ. ཝཛྫཀམྨསདྡཱ སིཀྑཱཔདམཔེཀྑནྟཱཔི ཨཱཔཏྟི, མཔེཀྑནྟཱཔི ནིཡཏནཔུཾསཀལིངྒཏྟཱ ནཔུཾསཀཱཡེཝ, ཏསྨཱ ཏེ དྭེ ཨཱཔཏྟིཊྛཱནེ ན ཝུཏྟཱཏི དཊྛབྦནྟི. དུཏིཡཾ.

༣. པེསུཉྙསིཀྑཱཔདཾ

༣༦. ཏཏིཡེ ‘‘ཛཱཏབྷཎྜནཱན’’ནྟི ཝཏྟབྦེ ཨགྱཱཧིཏོཏིཨཱདཱིསུ ཝིཡ ཝིསེསནཔརནིཔཱཏཝསེན ‘‘བྷཎྜནཛཱཏཱན’’ནྟི ཝུཏྟནྟི ཨཱཧ ‘‘སཉྫཱཏབྷཎྜནཱན’’ནྟི. ‘‘པུབྦབྷཱགོ’’ཏི ཝཏྭཱ ཏསྶ སརཱུཔཾ དསྶེཏི ‘‘ཨིམིནཱ ཙ ཨིམིནཱ ཙཱ’’ཏིཨཱདིནཱ. ཝིརུདྡྷཾ ཝདཏི ཨེཏེནཱཏི ཝིཝཱདོ, ཝིགྒཱཧིཀཀཐཱ ¶ , ཏཾ ཨཱཔནྣཱཏི ཝིཝཱདཱཔནྣཱ, ཏེསཾ. པིསཏི སཉྩུཎྞེཏཱིཏི པིསུཎོ, པུགྒལོ, ཏསྶ ཨིདནྟི པེསུཉྙཾ, ཝཙནནྟི ཨཏྠཾ དསྶེནྟོ ཨཱཧ ‘‘པེསུཉྙནྟི པིསུཎཝཱཙ’’ནྟི.

༣༧. བྷིཀྑུཔེསུཉྙེཏི བྷིཀྑཱུནཾ སནྟིཀཾ ཨུཔསཾཧཊེ པེསུཉྙཝཙནེཏི ཚཊྛཱིསམཱསོ.

༣༨. ‘‘དིསྭཱ’’ཏི པདཾ ‘‘བྷཎནྟསྶཱ’’ཏི པདེ པུབྦཀཱལཀིརིཡཱ, དསྶནཾ ཧུཏྭཱཏི ཨཏྠོ. ཏཏིཡཾ.

༤. པདསོདྷམྨསིཀྑཱཔདཾ

༤༤. ཙཏུཏྠེ པཊིམུཁཾ ཨཱདརེན སུཎནྟཱིཏི པཏིསྶཱ, ན པཏིསྶཱ ཨཔྤཏིསྶཱཏི དསྶེནྟོ ཨཱཧ ‘‘ཨཔྤཏིསྶཝཱ’’ཏི.

༤༥. ‘‘པདསོ’’ཏི ¶ ཨེཏྠ སོ-པཙྩཡོ ཝིཙྪཏྠཝཱཙཀོཏི ཨཱཧ ‘‘པདཾ པད’’ནྟི. ཏཏྠཱཏི ཏེསུ ཙཏུབྦིདྷེསུ. པདཾ ནཱམ ཨིདྷ ཨཏྠཛོཏཀཾ ཝཱ ཝིབྷཏྱནྟཾ ཝཱ ན ཧོཏི, ཨཐ ཁོ ལོཀིཡེཧི ལཀྑིཏོ གཱཐཱཡ ཙཏུཏྠཾསོ པཱདོཝ ཨདྷིཔྤེཏོཏི ཨཱཧ ‘‘པདནྟི ཨེཀོ གཱཐཱཔཱདོ’’ཏི. ཨནུ པཙྪཱ ཝུཏྟཔདཏྟཱ དུཏིཡཔཱདོ ཨནུཔདཾ ནཱམ. ཨནུ སདིསཾ བྱཉྫནཾ ཨནུབྱཉྫནནྟི ཨཏྠཾ དསྶེཏི ‘‘ཨནུབྱཉྫན’’ནྟིཨཱདིནཱ. བྱཉྫནསདྡོ པད-པརིཡཱཡོ. ཡཾཀིཉྩི པདཾ ཨནུབྱཉྫནཾ ནཱམ ན ཧོཏི, པུརིམཔདེན པན སདིསཾ པཙྪིམཔདམེཝ ཨནུབྱཉྫནཾ ནཱམ.

ཝཱཙེནྟོ ཧུཏྭཱ ནིཊྛཱཔེཏཱིཏི ཡོཛནཱ. ‘‘ཨེཀམེཀཾ པད’’ནྟི པདཾ ‘‘ནིཊྛཱཔེཏཱི’’ཏི པདེ ཀཱརིཏཀམྨཾ. ‘‘ཐེརེནཱ’’ཏི པདཾ ‘‘ཝུཏྟེ’’ཏི པདེ ཀཏྟཱ, ‘‘ཨེཀཏོ’’ཏི པདེ སཧཏྠོ. སཱམཎེརོ ཨཔཱཔུཎིཏྭཱ བྷཎཏཱིཏི སམྦནྡྷོ. མཏྟམེཝཱཏི ཨེཏྠ ཨེཝསདྡོ མཏྟསདྡསྶ ཨཝདྷཱརཎཏྠཾ དསྶེཏི, ཏེན པཀཱརཾ པཊིཀྑིཔཏི. ‘‘ཨནིཙྩ’’ནྟི ཙ ‘‘ཨནིཙྩཱ’’ཏི ཙ དྭིནྣཾ པདཱནཾ སཏིཔི ལིངྒཝིསེསཏྟེ ཨནུབྱཉྫནཏྟཱ ཨཱཔཏྟིམོཀྑོ ནཏྠཱིཏི ཨཱཧ ‘‘ཨནུབྱཉྫནགཎནཱཡ པཱཙིཏྟིཡཱ’’ཏི.

བྲཧྨཛཱལཱདཱིནཱིཏི ¶ ཨེཏྠ ཨཱདིསདྡེན སཱམཉྙཕལསུཏྟཱདཱིནི དཱིགྷསུཏྟཱནི (དཱི. ནི. ༡.༡༥༠ ཨཱདཡོ) སངྒཧིཏཱནི. ཙསདྡེན ཨོགྷཏརཎསུཏྟཱདཱིནི སཾཡུཏྟསུཏྟཱནི (སཾ. ནི. ༡.༡) ཙ ཙིཏྟཔརིཡཱདཱནསུཏྟཱདཱིནི ཨངྒུཏྟརསུཏྟཱནི (ཨ. ནི. ༡.༢ ཨཱདཡོ) ཙ སངྒཧིཏཱནི. སོཏི དེཝཏཱབྷཱསིཏོ ཝེདིཏབྦོཏི ཡོཛནཱ.

ཀིཉྩཱཔི ཝདཏཱིཏི སམྦནྡྷོ. ཨེཏྠ ཙ ཀིཉྩཱཔིསདྡོ གརཧཏྠཝཱཙཀོ, པནསདྡོ ཨནུགྒཧཏྠཝཱཙཀོ. མེཎྜཀམིལིནྡཔཉྷེསཱུཏི མེཎྜཀཔཉྷེ ཙ མིལིནྡཔཉྷེ ཙ. ཡནྟི སུཏྟཾ ཝུཏྟནྟི སམྦནྡྷོ. ཨཱརམྨཎཀཐཱ བུདྡྷིཀཀཐཱ དཎྜཀཀཐཱ ཉཱཎཝཏྠུཀཐཱཏི ཡོཛེཏབྦཾ པེཡྻཱལཝསེན ཝུཏྟཏྟཱ. ཨིམཱཡོ པཀརཎཱནི ནཱམཱཏི ཝདནྟི. མཧཱཔཙྩརིཡཱདཱིསུ ཝཏྭཱ པརིགྒཧིཏོཏི ཡོཛནཱ. ཡནྟི སུཏྟཾ.

༤༨. ཏཏྲཱཏི ‘‘ཨེཀཏོ ཨུདྡིསཱཔེནྟོ’’ཏི ཝཙནེ. ཨུདྡིསཱཔེནྟཱིཏི ཨཱཙརིཡཾ དེསཱཔེནྟི བཧུཀཏྟཱརམཔེཀྑིཡ བཧུཝཙནཝསེན ཝུཏྟཾ. ཏེཧཱིཏི ཨུཔསམྤནྣཱནུཔསམྤནྣེཧི. དྭེཔཱིཏི ཨུཔསམྤནྣོ ཙ ཨནུཔསམྤནྣོ ཙ.

ཨུཔཙཱརནྟི ¶ དྭཱདསཧཏྠཱུཔཙཱརཾ. ཡེསནྟི བྷིཀྑཱུནཾ. པལཱཡནཀགནྠནྟི པརིཝཛྫེཏྭཱ གཙྪནྟཾ པཀརཎཾ. སཱམཎེརོ གཎྷཱཏཱིཏི ཡོཛནཱ.

ཨོཔཱཏེཏཱིཏི ཨཝཔཱཏེཏི, གལི༹ཏཱཔེཏཱིཏི ཨཏྠོ. སུཏྟེཔཱིཏི ཝེཡྻཱཀརཎསུཏྟེཔི. ཏནྟི ཡེབྷུཡྻེན པགུཎགནྠཾ. པརིསངྐམཱནནྟི སཱརཛྫམཱནཾ. ཡཾ པན ཝཙནཾ ཝུཏྟནྟི སམྦནྡྷོ. ཀིརིཡསམུཊྛཱནཏྟཱཏི ཨིམསྶ སིཀྑཱཔདསྶ ཀིརིཡསམུཊྛཱནཏྟཱཏི. ཙཏུཏྠཾ.

༥. སཧསེཡྻསིཀྑཱཔདཾ

༤༩. པཉྩམེ མུཊྛཱ སཏི ཨེཏེསནྟི མུཊྛསྶཏཱི. ནཏྠི སམྤཛཱནཾ ཨེཏེསནྟི ཨསམྤཛཱནཱ. བྷཝངྒོཏིཎྞཀཱལེཏི ནིདྡོཀྐམནཀཱལེ.

༥༠. ‘‘པཀཏིཡཱ’’ཏི པདཾ ‘‘དེནྟཱི’’ཏི པདེ ཝིསེསནཾ. ཏེ བྷིཀྑཱུ དེནྟཱིཏི སམྦནྡྷོ. ‘‘གཱརཝེནཱ’’ཏི པདཉྩ ‘‘སིཀྑཱཀཱམཏཱཡཱ’’ཏི པདཉྩ ‘‘དེནྟཱི’’ཏི པདེ ཧེཏུ. སཱིསསྶ ཨུཔདྷཱནཾ ཨུསྶཱིསཾ, ཏསྶ ཀརཱིཡཏེ ཨུསྶཱིསཀརཎཾ ¶ , ཏཾཡེཝ ཨཏྠོ པཡོཛནཾ ཨུསྶཱིསཀརཎཏྠོ, ཏདཏྠཱཡ. ཏཏྲཱཏི པུརིམཝཙནཱཔེཀྑཾ, ‘‘སིཀྑཱཀཱམཏཱཡཱ’’ཏི ཝཙནེཏི ཨཏྠོ. ནིདསྶནནྟི སེསོ. ཨཐ ཝཱ སིཀྑཱཀཱམཏཱཡཱཏི པཙྩཏྟེ བྷུམྨཝཙནཾ. ‘‘ཨིདམྤིསྶ ཧོཏི སཱིལསྨི’’ནྟིཨཱདཱིསུ (དཱི. ནི. ༡.༡༩༥ ཨཱདཡོ) ཝིཡ. ཨིདམྤི སིཀྑཱཀཱམཏཱཡ ཨཡཾ སིཀྑཱཀཱམཏཱ སིཀྑཱཀཱམབྷཱཝོ ཧོཏཱིཏི ཡོཛནཱ. ཨེས ནཡོ ‘‘ཏཏྲིདཾ སམནྟཔཱསཱདིཀཱཡ སམནྟཔཱསཱདིཀཏྟསྨི’’ནྟིཨཱདཱིསུཔི. བྷིཀྑཱུ ཁིཔནྟཱིཏི ཡོཛནཱ. ཏནྟི ཨཱཡསྨནྟཾ རཱཧུལཾ. ཨཐཱཏི ཁིཔནཏོ པཙྪཱ. ཨིདནྟི ཝཏྠུ. སམྨུཉྩནིཀཙཝརཚཌྜནཀཱནི སནྡྷཱཡ ཝུཏྟཾ. ཏེནཱཡསྨཏཱ རཱཧུལེན པཱཏིཏཾ ནུ ཁོཏི ཡོཛནཱ. སོ པནཱཡསྨཱ གཙྪཏཱིཏི སམྦནྡྷོ. ཨཔརིབྷོགཱ ཨཉྙེསནྟི ཨཉྙེཧི ན པརིབྷུཉྫིཏབྦཱ.

༥༡. ཧཱིཏི སཙྩཾ, ཡསྨཱ ཝཱ. སཡནཾ སེཡྻཱ, ཀཱཡཔསཱརཎཀིརིཡཱ, སཡནྟི ཨེཏྠཱཏི སེཡྻཱ, མཉྩཔཱིཋཱདི. ཏདུབྷཡམྤི ཨེཀསེསེན ཝཱ སཱམཉྙནིདྡེསེན ཝཱ ཨེཀཏོ ཀཏྭཱ ‘‘སཧསེཡྻ’’ནྟི ཝུཏྟནྟི དསྶེནྟོ ཨཱཧ ‘‘སེཡྻཱ’’ཏིཨཱདི. ཏཏྠཱཏི དྭཱིསུ སེཡྻཱསུ. ཏསྨཱཏི ཡསྨཱ དྭེ སེཡྻཱ དསྶིཏཱ, ཏསྨཱ. ‘‘སབྦཙྪནྣཱ’’ཏིཨཱདིནཱ ལཀྑཎཾ ཝུཏྟནྟི ཡོཛནཱ. པཱཀཊཝོཧཱརནྟི ལོཀེ ཝིདིཏཾ ཝཙནཾ. དུསྶཀུཊིཡནྟི དུསྶེན ཚཱདིཏཀུཊིཡཾ. ཨཊྛཀཐཱསུ ཡཐཱཝུཏྟེ པཉྩཝིདྷཙྪདནེཡེཝ གཡ྄ཧམཱནེ ཀོ དོསོཏི ཨཱཧ ‘‘པཉྩཝིདྷཙྪདནེཡེཝཱ’’ཏིཨཱདི. ཡཾ པན ¶ སེནཱསནཾ པརིཀྑིཏྟནྟི སམྦནྡྷོ. པཱཀཱརེན ཝཱཏི ཨིཊྛཀསིལཱདཱརུནཱ ཝཱ. ཨཉྙེན ཝཱཏི ཀིལཉྫཱདིནཱ ཝཱ. ཝཏྠེནཔཱིཏི པིསདྡོ པགེཝ ཨིཊྛཀཱདིནཱཏི དསྶེཏི. ཡསྶཱཏི སེནཱསནསངྑཱཏཱཡ སེཡྻཱཡ. ཨུཔརཱིཏི ཝཱ སམནྟཏོཏི ཝཱ ཡོཛནཱ. ཨེཀེན དྭཱརེན པཝིསིཏྭཱ སབྦཔཱསཱདསྶ ཝལ༹ཉྫིཏབྦཏཾ སནྡྷཱཡ ཝུཏྟཾ ‘‘ཨེཀཱུཔཙཱརོ’’ཏི. སཏགབྦྷཾ ཝཱ ཙཏུསྶཱལཾ ཨེཀཱུཔཙཱརཾ ཧོཏཱིཏི སམྦནྡྷོ. ཏནྟི སེནཱསནསངྑཱཏཾ སེཡྻཾ.

ཏཏྠཱཏི སེནཱསནསངྑཱཏཱཡཾ སེཡྻཱཡཾ. སམྦཧུལཱ སཱམཎེརཱ སཙེ ཧོནྟི, ཨེཀོ བྷིཀྑུ སཙེ ཧོཏཱིཏི ཡོཛནཱ. ‘‘སཱམཎེརཱ’’ཏི ¶ ཨིདཾ པཙྩཱསནྣཝསེན ཝུཏྟཾ, ཨུཔལཀྑཎཝསེན ཝཱ ཨཉྙེཧིཔི སཧསེཡྻཱནཾ ཨཱཔཏྟིསམྦྷཝཏོ. ཏེཏི སཱམཎེརཱ. སབྦེསནྟི བྷིཀྑཱུནཾ. ཏསྶཱཏི སཱམཎེརསྶ. ཨེསེཝ ནཡོཏི ཨེསོ ཨེཝ ནཡོ, ན ཨཉྙོ ནཡོཏི ཨཏྠོ. ཨཐ ཝཱ ཨེསེཝ ནཡོཏི ཨེསོ ཨིཝ ནཡོ, ཨེསོ ཨེཏཱདིསོ ནཡོ ཨིཝ ཨཡཾ ནཡོ དཊྛབྦོཏི ཨཏྠོ.

ཨཔི ཙཱཏི ཨེཀཾསེན. ཨེཏྠཱཏི ཨིམསྨིཾ སིཀྑཱཔདེ. ཙཏུཀྐནྟི ཨེཀཱཝཱསཨེཀཱནུཔསམྤནྣཾ, ཨེཀཱཝཱསནཱནུཔསམྤནྣཾ, ནཱནཱཝཱསཨེཀཱནུཔསམྤནྣཾ, ནཱནཱཝཱསནཱནུཔསམྤནྣནྟི ཙཏུསམཱུཧཾ, ཙཏུཔརིམཱཎཾ ཝཱ. ཡོཏི བྷིཀྑུ. ཧིསདྡོ ཝིཏྠཱརཛོཏཀོ, ཏཾ ཝཙནཾ ཝིཏྠཱརཡིསྶཱམཱིཏི ཨཏྠོ, ཝིཏྠཱརོ མཡཱ ཝུཙྩཏེཏི ཝཱ. དེཝསིཀནྟི དིཝསེ དིཝསེ. ཎིཀཔཙྩཡོ ཧི ཝིཙྪཏྠཝཱཙཀོ. ཡོཔི སཧསེཡྻཾ ཀཔྤེཏི, ཏསྶཱཔི ཨཱཔཏྟཱིཏི ཡོཛེཏབྦོ. ཏཏྲཱཏི ‘‘ཏིརཙྪཱནགཏེནཱཔཱི’’ཏི ཝཙནེ.

‘‘ཨཔདཱནཾ ཨཧིམཙྪཱ, དྭིཔདཱནཉྩ ཀུཀྐུཊཱི;

ཙཏུཔྤདཱནཾ མཛྫཱརཱི, ཝཏྠུ པཱརཱཛིཀསྶིམཱ’’ཏི. (པཱརཱ. ཨཊྛ. ༡.༥༥);

ཨིམཾ གཱཐཾ སནྡྷཱཡ ཝུཏྟཾ ‘‘ཝུཏྟནཡེནེཝཱ’’ཏི. ཏསྨཱཏི ཡསྨཱ ཝེདིཏབྦོ, ཏསྨཱ. གོདྷཱཏི ཀུཎྜོ. བིལཱ༹ལོཏི ཨཱཁུབྷུཛོ. མངྒུསོཏི ནཀུལོ.

ཨསམྦདྡྷབྷིཏྟིཀསྶ ཀཏཔཱསཱདསྶཱཏི ཡོཛནཱ. ཏུལཱཏི ཨེཏྠ ཏུལཱ ནཱམ ཐམྦྷཱན, མུཔརི དཀྑིཎུཏྟརཝིཏྠཱརཝསེན ཋཔིཏོ དཱརུཝིསེསོ ཐལཏི ཐམྦྷེསུ པཏིཊྛཱཏཱིཏི ཀཏྭཱ. ཏཱ པན ཧེཊྛིམཔརིཙྪེདཏོ ཏིསྶོ, ཨུཀྐཊྛཔརིཙྪེདེན པན པཉྩསཏྟནཝཱདཡོ. ནཱནཱུཔཙཱརེ པཱསཱདེཏི སམྦནྡྷོ.

ཝཱལ༹སངྒྷཱཊཱདཱིསཱུཏི ¶ ཝཱལ༹རཱུཔཾ དསྶེཏྭཱ ཀཏེསུ སངྒྷཱཊཱདཱིསུ. ཨཱདིསདྡེན ཏུལཾ སངྒཎྷཱཏི. ཨེཏྠ ཙ སངྒྷཱཊོ ནཱམ ཏུལཱན, མུཔརི པུབྦཔཙྪིམཱཡཱམཝསེན ཋཔིཏོ ཀཊྛཝིསེསོ སམྨཱ གྷཊེནྟི ཨེཏྠ གོཔཱནསྱཱདཡོཏི ¶ ཀཏྭཱ. ཏེ པན ཏཡོ ཧོནྟི. ནིབྦཀོསབྦྷནྟརེཏི ཚདནཀོཊིཨབྦྷནྟརེ. པརིམཎྜལཾ ཝཱ ཙཏུརསྶཾ ཝཱ སེནཱསནཾ ཧོཏཱིཏི སམྦནྡྷོ. ཏཏྲཱཏི ཏསྨིཾ སེནཱསནེ. ཨཔརིཙྪིནྣོ གབྦྷསྶ ཨུཔཙཱརོ ཨེཏེསནྟི ཨཔརིཙྪིནྣགབྦྷཱུཔཙཱརཱ སབྦགབྦྷཱ, ཏེ པཝིསནྟཱིཏི ཨཏྠོ. ནིཔནྣཱནཾ བྷིཀྑཱུནནྟི ཡོཛནཱ. ཏཏྲཱཏི ཏསྨིཾ པམུཁེ. པམུཁསྶ སབྦཙྪནྣཏྟཱ, སབྦཔརིཙྪནྣཏྟཱ ཙ ཨཱཔཏྟིཾ ཀརོཏཱིཏི ཡོཛནཱ. ནནུ པམུཁེ ཚནྣམེཝ ཨཏྠི, ནོ པརིཙྪནྣནྟི ཨཱཧ ‘‘གབྦྷཔརིཀྑེཔོ’’ཏིཨཱདི. ཧཱིཏི སཙྩཾ.

ཡཾ པན ཨནྡྷཀཊྛཀཐཱཡཾ ཝུཏྟནྟི སམྦནྡྷོ. ཛགཏཱིཏི པཐཝིཡཱ ཙ མནྡིརཱལིནྡཝཏྠུསྶ ཙ ནཱམམེཏཾ. ཨིདྷ པན མནྡིརཱལིནྡཝཏྠུསངྑཱཏཱ བྷཱུབྷེདཱ གཧིཏཱ. ཏཏྠཱཏི ཨནྡྷཀཊྛཀཐཱཡཾ. ཀསྨཱ པཱལི༹ཡཱ ན སམེཏཱིཏི ཨཱཧ ‘‘དསཧཏྠུབྦེདྷཱཔཱི’’ཏིཨཱདི. ཧཱིཏི ཡསྨཱ. ཏཏྠཱཏི ཨནྡྷཀཊྛཀཐཱཡཾ. ཡེཔི མཧཱཔཱསཱདཱ ཧོནྟཱིཏི ཡོཛནཱ. ཏེསུཔཱིཏི མཧཱཔཱསཱདེསུཔི.

སུདྷཱཚདནམཎྜཔསྶཱཏི ཨེཏྠ ‘‘སུདྷཱ’’ཏི ཨིདཾ ཨུཔལཀྑཎཝསེན ཝུཏྟཾ ཡེན ཀེནཙི ཚདནམཎྜཔསྶཱཔི ཨདྷིཔྤེཏཏྟཱ. མཎྜཾ ཝུཙྩཏི སཱུརིཡརསྨི, ཏཾ པཱཏི རཀྑཏི, ཏཏོ ཝཱ ཛནནྟི མཎྜཔཾ. ནནུ ཨེཀཱུཔཙཱརཾ ཧོཏི པཱཀཱརསྶ ཚིདྡཏྟཱཏི ཨཱཧ ‘‘ན ཧཱི’’ཏིཨཱདི. ཧཱིཏི སཙྩཾ, ཡསྨཱ ཝཱ. ཝལ༹ཉྫནཏྠཱཡ ཨེཝཱཏི ཨེཝཀཱརོ ཡོཛེཏབྦོ. ཏེནཱཧ ‘‘ན ཝལ༹ཉྫནཱུཔཙྪེདནཏྠཱཡཱ’’ཏི. ཨཐ ཝཱ ‘‘སདྡནྟརཏྠཱཔོཧནེན སདྡོ ཨཏྠཾ ཝདཏཱི’’ཏི (ཨུདཱ. ཨཊྛ. ༡; དཱི. ནི. ཊི. ༡.༡; མ. ནི. ཊཱི. ༡.མཱུལཔརིཡཱཡསུཏྟཝཎྞནཱ; སཾ. ནི. ཊཱི. ༡.༡.ཨོགྷཏརཎསུཏྟཝཎྞནཱ; ཨ. ནི. ཊཱི. ༡.༡.རུཔཱདིཝགྒཝཎྞནཱ) ཝུཏྟཏྟཱ ‘‘ན ཝལ༹ཉྫནཱུཔཙྪེདནཏྠཱཡཱ’’ཏི ཝུཏྟཾ. ཀཝཱཊནྟི ཨེཏྠ དྭཱརམེཝ ཨདྷིཔྤེཏཾ པརིཡཱཡེན ཝུཏྟཏྟཱ, ཨསཏི ཙ དྭཱརེ ཀཝཱཊསྶཱབྷཱཝཏོ. སཾཝརཎཝིཝརཎཀཱལེ ཀཝཏི སདྡཾ ཀརོཏཱིཏི ཀཝཱཊཾ.

ཏཏྲཱཏི ‘‘ཨེཀཱུཔཙཱརཏྟཱ’’ཏི ཝཙནེ. ཡསྶཱཏི པརཝཱདིནོ. ཨནུཡོགོ སིཡཱཏི ཡོཛནཱ. ཨིདྷཱཏི ཨིམསྨིཾ སཧསེཡྻསིཀྑཱཔདེ, ཝུཏྟནྟི སམྦནྡྷོ. ཏཏྠཱཏི པིཧིཏདྭཱརེ གབྦྷེ. སོཏི པརཝཱདཱི. སབྦཙྪནྣཏྟཱ ཨཱཔཏྟི ཨིཏི ཝུཏྟེཏི ཡོཛནཱ. ཨེསེཝ ནཡོ ¶ ‘‘སབྦཔརིཙྪནྣཏཱ ན ཧོཏཱི’’ཏི ཨེཏྠཱཔི. པཙྩཱགམིསྶཏཱིཏི པཏི ཨཱགམིསྶཏི, པུན ཨཱགམིསྶཏཱིཏི ཨཏྠོ.

བྱཉྫནམཏྟེནེཝཱཏི ‘‘སབྦཙྪནྣཱ’’ཏིཨཱདིཨཀྑརཔདམཏྟེནེཝ, ན ཨཏྠཝསེན. ‘‘ཨེཝཉྩ སཏཱི’’ཏི ¶ ཨིམིནཱ ཨབྱཱཔིཏདོསཾ དསྶེཏི. ཏཏོཏི ཨནཱཔཏྟིཏོ, པརིཧཱཡེཡྻཱཏི སམྦནྡྷོ. ཏསྨཱཏི ཡསྨཱ ཨནིཡཏེསུ ཝུཏྟཾ, ཏསྨཱ. ཏཏྠཱཏི ཨནིཡཏེསུ. ཨིདྷཱཔཱིཏི ཨིམསྨིཾ སིཀྑཱཔདེཔི. ཡཾ ཡནྟི སེནཱསནཾ. སབྦཏྠཱཏི སབྦེསུ སེནཱསནེསུ, སཧསེཡྻཱཔཏྟི ཧོཏཱིཏི སམྦནྡྷོ.

༥༣. དྭཱིསུ ཨཊྛཀཐཱཝཱདེསུ མཧཱཨཊྛཀཐཱཝཱདོཝ ཡུཏྟོཏི སོ པཙྪཱ ཝུཏྟོ.

ཨིམིནཱཔཱིཏི སེནམྦམཎྜཔེནཱཔི. ཨེཏནྟི ཛགཏིཡཱ ཨཔརིཀྑིཏྟཏཾ. ཡཐཱཏི ཡཾསདྡཏྠོ ཏཏིཡནྟནིཔཱཏོ, ཡེན སེནམྦམཎྜཔེནཱཏི ཨཏྠོཏི. པཉྩམཾ.

༦. དུཏིཡསཧསེཡྻསིཀྑཱཔདཾ

༥༥. ཚཊྛེ ཨཱགནྟུཀཱ ཝསནྟི ཨེཏྠཱཏི ཨཱཝསཐོ, ཨཱཝསཐོ ཙ སོ ཨགཱརཉྩེཏི ཨཱཝསཐཱགཱརནྟི དསྶེནྟོ ཨཱཧ ‘‘ཨཱགནྟུཀཱནཾ ཝསནཱགཱར’’ནྟི. མནུསྶཱནཾ སནྟིཀཱ ཝཙནཾ སུཏྭཱཏི ཝཙནསེསོ ཡོཛེཏབྦོ. སཱཊཀནྟི ཨུཏྟརསཱཊཀཾ, ནིཝཏྠཝཏྠནྟིཔི ཝདནྟི. ཨཙྩཱགམྨཱཏི ཏྭཱཔཙྩཡནྟཔདསྶ སམྦནྡྷཾ དསྶེཏུམཱཧ ‘‘པཝཏྟོ’’ཏི. ཡཐཱ ཨོམསཝཱདསིཀྑཱཔདེ ཨཀྐོསེཏུཀཱམཏཱཡ ཁཏྟིཡཾ ‘‘ཙཎྜཱལོ’’ཏི ཝདཏོ ཨལིཀཾ བྷཎཏོཔི མུསཱཝཱདསིཀྑཱཔདེན ཨནཱཔཏྟི, ཨོམསཝཱདསིཀྑཱཔདེནེཝ ཨཱཔཏྟི, ཨེཝམིདྷཱཔི མཱཏུགཱམེན སཧ སཡཏོ པཋམསཧསེཡྻསིཀྑཱཔདེན ཨནཱཔཏྟི, ཨིམིནཱཝ ཨཱཔཏྟཱིཏི དཊྛབྦནྟི. ཚཊྛཾ.

༧. དྷམྨདེསནཱསིཀྑཱཔདཾ

༦༠. སཏྟམེ ¶ མཧཱདྭཱརེཏི བཧི ཋིཏེ མཧཱདྭཱརེ. ཨཱགམྨ, པཝིསིཏྭཱ ཝཱ ཝསནཊྛཱནཏྟཱ ཨོཝརཀོ ཨཱཝསཐོ ནཱམཱཏི ཨཱཧ ‘‘ཨོཝརཀདྭཱརེ’’ཏི. སུནིགྒཏེནཱཏི སུཊྛུ བཧི ནིཀྑམིཏྭཱ གཏེན སདྡེན. ‘‘ཨཉྙཱཏུ’’ནྟི པདསྶ ‘‘ན ཉཱཏུ’’ནྟི ཨཏྠཾ པཊིཀྑིཔནྟོ ཨཱཧ ‘‘ཨཱཛཱནིཏུ’’ནྟི. ཨིམིནཱ ནཀཱརཝིཀཱརོ ཨཨིཏི ནིཔཱཏོ ན ཧོཏི, ཨཱཨིཏི ཨུཔསགྒོཏི པན དསྶེཏི. ‘‘ཝིཉྙུནཱ པུརིསེནཱ’’ཏི ཨེཏྟཀམེཝ ཨཝཏྭཱ ‘‘པུརིསཝིགྒཧེནཱ’’ཏི ཝདནྟོ མནུསྶཔུརིསཝིགྒཧཾ གཧེཏྭཱ ཋིཏེན ཡཀྑེན པེཏེན ཏིརཙྪཱནགཏེན སདྡྷིཾ ཋིཏཱཡ མཱཏུགཱམསྶ དེསེཏུཾ ན ཝཊྚཏཱིཏི དསྶེཏི. ན ཡཀྑེནཱཏི ཡཀྑེན སདྡྷིཾ ཋིཏཱཡ མཱཏུགཱམསྶ དེསེཏུཾ ན ཝཊྚཏཱིཏི ཡོཛནཱ. ཨེས ནཡོ ‘‘ན པེཏེན, ན ཏིརཙྪཱནགཏེནཱ’’ཏི ཨེཏྠཱཔི.

༦༦. ཚཔྤཉྩཝཱཙཱཧཱིཏི ¶ ཨེཏྠ ‘‘པཉྩཱ’’ཏི ཝཱཙཱསིལིཊྛཝསེན ཝུཏྟཾ ཀསྶཙི པཡོཛནསྶཱབྷཱཝཱ. ཏཏྠཱཏི ‘‘ཚཔྤཉྩཝཱཙཱཧཱི’’ཏི པདེ. ཨེཀོ གཱཐཱཔཱདོ ཨེཀཱ ཝཱཙཱཏི ཝདནྟོ ཙུཎྞིཡེ ཝིབྷཏྱནྟཾ ཨེཀཾ པདཾ ཨེཀཱ ཝཱཙཱ ནཱམཱཏི དསྶེཏི, ཨཏྠཛོཏཀཔདཾ ཝཱ ཝཱཀྱཔདཾ ཝཱ ན གཧེཏབྦཾ. ‘‘ཨེཀཾ པདཾ པཱལི༹ཏོ, པཉྩ ཨཊྛཀཐཱཏོ’’ཏི ཨིམིནཱ ‘‘དྭེ པདཱནི པཱལི༹ཏོ, ཙཏྟཱརི ཨཊྛཀཐཱཏོ’’ཏིཨཱདིནཡོཔི གཧེཏབྦོ. ཚཔདཱནཏིཀྐམོཡེཝ ཧི པམཱཎཾ. ཏསྨིནྟི ཨེཏྠ སཏི ཝིབྷཏྟིཝིཔལླཱསེ ལིངྒསྶཱཔི ཝིཔལླཱསོ ཧོཏི ‘‘ཏསྨི’’ནྟི པུལླིངྒེན ཝུཏྟཏྟཱ. སཏི ཙ ཝིབྷཏྟིཝིཔལླཱསེ ‘‘ཏསྶཱ’’ཏི ཨིཏྠིལིངྒབྷཱཝེན པཝཏྟཱ. ‘‘མཱཏུགཱམསྶཱ’’ཏི ནིཡཏཔུལླིངྒཱཔེཀྑནསྶ ཨསམྦྷཝཏོ ཨཏྠཝསེན ‘‘ཨེཀིསྶཱ’’ཏི ཨིཏྠིལིངྒབྷཱཝེན ཝུཏྟཾ. ཨིམིནཱ བྷེདལིངྒནིསྶིཏོ ཝིསེསནཝིསེསྱོཔི ཨཏྠཱིཏི དསྶེཏི. ཏུམྷཱཀནྟི ནིདྡྷཱརཎསམུདཱཡོ. ‘‘སུཎཱཐཱ’’ཏི ཨཝཏྭཱ ཨཱབྷོགོཔི ཝཊྚཏཱིཏི ཨཱཧ ‘‘པཋམ’’ནྟིཨཱདི. པཋམནྟི ཙ པཋམམེཝ. ཏེན ཝུཏྟཾ ‘‘ན པཙྪཱ’’ཏི. པུཊྛོ ཧུཏྭཱ བྷིཀྑུ ཀཐེཏཱིཏི ཡོཛནཱཏི. སཏྟམཾ.

༨. བྷཱུཏཱརོཙནསིཀྑཱཔདཾ

༦༧. ཨཊྛམེ ¶ ཏཏྠཱཏི ཙཏུཏྠཔཱརཱཛིཀསིཀྑཱཔདེ. ཨིདྷཱཏི བྷཱུཏཱརོཙནསིཀྑཱཔདེ. ཧཱིཏི སཙྩཾ, ཡསྨཱ ཝཱ. པཡུཏྟཝཱཙཱཏི པཙྩཡེཧི ཡུཏྟཱ ཝཱཙཱ. ཏཐཱཏི ཏཏོ གུཎཱརོཙནཀཱརཎཱ, ཨརིཡཱ སཱདིཡིཾསཱུཏི ཡོཛནཱ.

ཡཏསདྡཱནཾ ནིཙྩསམྦནྡྷཏྟཱ ཝུཏྟཾ ‘‘ཡེ’’ཏིཨཱདི. སབྦེཔཱིཏི པུཐུཛྫནཱརིཡཱཔི. བྷཱུཏནྟི ཝིཛྫམཱནཾ. ཀསྨཱ སབྦེཔི པཊིཛཱནིཾསུ, ནནུ ཨརིཡེཧི ཨཏྟནོ གུཎཱནཾ ཨནཱརོཙིཏཏྟཱ ན པཊིཛཱནིཏབྦནྟི ཨཱཧ ‘‘ཨརིཡཱནམྤཱི’’ཏིཨཱདི. ཧཱིཏི སཙྩཾ, ཡསྨཱ ཝཱ. ཨརིཡཱནམྤི ཨབྦྷནྟརེ ཨུཏྟརིམནུསྶདྷམྨོ ཡསྨཱ བྷཱུཏོ ཧོཏི, ཏསྨཱ སབྦེཔི ‘‘བྷཱུཏཾ བྷགཝཱ’’ཏི པཊིཛཱནིཾསཱུཏི ཡོཛནཱ. ཡསྨཱ བྷཱསིཏོ ཝིཡ ཧོཏི, ཏསྨཱཏི ཡོཛནཱ. ཨརིཡཱ པཊིཛཱནིཾསཱུཏི སམྦནྡྷོ. ཨནཱདཱིནཝདསྶིནོཏི དོསསྶ ཨདསྶནདྷམྨཱ. ཏེཧཱིཏི ཨརིཡེཧི, བྷཱསིཏོཏི སམྦནྡྷོ. ཡཾ པིཎྜཔཱཏཾ ཨུཔྤཱདེསུནྟི ཡོཛནཱ. ཨཉྙེཏི པུཐུཛྫནཱ. སབྦསངྒཱཧིཀེནེཝཱཏི སབྦེསཾ པུཐུཛྫནཱརིཡཱནཾ སངྒཧཎེ པཝཏྟེནེཝ. སིཀྑཱཔདཝིབྷངྒེཔཱིཏི སིཀྑཱཔདསྶ པདབྷཱཛནིཡེཔི. ཏཏྠཱཏི ཙཏུཏྠཔཱརཱཛིཀེ. ཨིདྷཱཏི ཨིམསྨིཾ སིཀྑཱཔདེ.

༧༧. ཨུཏྟརིམནུསྶདྷམྨམེཝ སནྡྷཱཡ ཝུཏྟཾ, ན སུཏཱདིགུཎནྟི ཨཏྠོ. ཨནྟརཱ ཝཱཏི པརིནིབྦཱནཀཱལཏོ ཨཉྙསྨིཾ ཀཱལེ ཝཱ. ཨཏིཀཌྜྷིཡམཱནེནཱཏི ཨཏིནིཔྤཱིལི༹ཡམཱནེན. ཨུམྨཏྟཀསྶཱཏི ¶ ཨིདཾ པནཱཏི ཨེཏྠ ཨིཏི-སདྡོ ཨཱདྱཏྠོ. ཏེན ‘‘ཁིཏྟཙིཏྟསྶཱ’’ཏིཨཱདིཾ སངྒཎྷཱཏི. དིཊྛིསམྤནྣཱནནྟི མགྒཔཉྙཱཡ, ཕལཔཉྙཱཡ ཙ སམྤནྣཱནཾ. ཨནཱཔཏྟཱིཏི པཱཙིཏྟིཡཱཔཏྟིཡཱ ཨནཱཔཏྟི ན ཝཏྟབྦཱ, ཨཱཔཏྟིཡེཝ ཧོཏི, ཏསྨཱ ‘‘ཨུམྨཏྟཀསྶ ཨནཱཔཏྟཱི’’ཏི ན ཝཏྟབྦནྟི ཨདྷིཔྤཱཡོཏི. ཨཊྛམཾ.

༩. དུཊྛུལླཱརོཙནསིཀྑཱཔདཾ

༧༨. ནཝམེ ཏཏྲཱཏི ཏསྶཾ ‘‘དུཊྛུལླཱ ནཱམཱ’’ཏིཨཱདིཔཱལི༹ཡཾ, ཏཱསུ ཝཱ པཱལི༹ཨཊྛཀཐཱསུ. ཝིཙཱརཎཱཏི ཝཱིམཾསནཱ. ཨུཔསམྤནྣསདྡེཏི ཨུཔསམྤནྣསདྡཏྠབྷཱཝེ ¶ . ཨེཏྠ ཧི སདྡེ ཝུཙྩམཱནེ ཨཝིནཱབྷཱཝཏོ སདྡེན ཨཏྠོཔི ཝུཏྟོ, ཝིནཱཔི བྷཱཝཔཙྩཡེན བྷཱཝཏྠསྶ ཉཱཏབྦཏྟཱ བྷཱཝོཔི གཧེཏབྦོ, ཏསྨཱ ཝུཏྟཾ ‘‘ཨུཔསམྤནྣསདྡཏྠབྷཱཝེ’’ཏི. ཨེསེཝ ནཡོ ‘‘དུཊྛུལླསདྡེ’’ཏི ཨེཏྠཱཔི. ཨེཏཾ པརིམཱཎཾ ཡསྶཱཏི ཨེཏཾ, ‘‘ཏེརས སངྒྷཱདིསེསཱ’’ཏི ཝཙནཾ. ཨེཏཾ ཨེཝ ཝཏྟབྦཾ, ན ‘‘ཙཏྟཱརི ཙ པཱརཱཛིཀཱནཱི’’ཏི ཨིདནྟི ཨཏྠོ. ཏཏྠཱཏི པཱལི༹ཡཾ. ཀསྶཙི ཝིམཏི བྷཝེཡྻ, ཀིཾ བྷཝེཡྻཱཏི ཡོཛནཱ. ཨཱཔཏྟིཾ ཨཱརོཙེནྟེན ཨཀྐོསནྟསྶ སམཱནཏྟཱ ཝུཏྟཾ ‘‘ཨེཝཾ སཏཱི’’ཏིཨཱདི. པཱཙིཏྟིཡམེཝ ཙཱཏི ཙསདྡོ བྱཏིརེཀཏྠོ, ན དུཀྐཊཾ ཨཱཔཛྫཏཱིཏི ཨཏྠོ. ཧཱིཏི སཙྩཾ. ཨེཏནྟི པཱཙིཏྟིཡཱཔཛྫནཏཾ, ‘‘ཨསུདྡྷོ ཧོཏི…པེ… ཨོམསཝཱདསྶཱ’’ཏི ཝཙནཾ ཝཱ, ཝུཏྟནྟི སམྦནྡྷོ. ཨེཏྠཱཏི པཱལི༹ཡཾ. ཨཊྛཀཐཱཙརིཡཱཝེཏི ཨེཏྠ ཨེཝཀཱརོ ཨཊྛཱནཡོགོ, པམཱཎནྟི ཨེཏྠ ཡོཛེཏབྦོ, ཀཱརཎམེཝཱཏི ཨཏྠོ. ཏེན ཝུཏྟཾ ‘‘ན ཨཉྙཱ ཝིཙཱརཎཱ’’ཏི. ཨཐ ཝཱ ཨཉྙཱཏི སཱམྱཏྠེ པཙྩཏྟཝཙནམེཏཾ, ན ཨཉྙེསཾ ཝིཙཱརཎཱ པམཱཎནྟི ཨཏྠོ. ཨེཝཉྷི སཏི ཨེཝཀཱརོ ཋཱནཡོགོཝ. པུབྦེཔི ཙཱཏི གནྠཱརམྦྷཀཱལེཔི ཙ.

ཨེཏནྟི ཨཊྛཀཐཱཙརིཡཱནཾ པམཱཎཏཾ. སཾཝརཏྠཱཡ ཨེཝ, ཨནཱཔཛྫནཏྠཱཡ ཨེཝ ཙ ཨནུཉྙཱཏནྟི ཡོཛནཱ. ཏེནཱཧ ‘‘ན ཏསྶ’’ཏྱཱདི. ཏསྨཱཏི ཡསྨཱ བྷིཀྑུབྷཱཝོ ནཱམ ན ཨཏྠི, ཏསྨཱ སུཝུཏྟམེཝཱཏི སམྦནྡྷོ.

༨༠. སཱཏི བྷིཀྑུསམྨུཏི, སངྒྷེན ཀཱཏབྦཱཏི ཡོཛནཱ. ཀཏྠཙཱིཏི ཀིསྨིཉྩི ཋཱནེ. ཨིདྷཱཏི ཨིམསྨིཾ སིཀྑཱཔདེ. ‘‘ཝུཏྟཏྟཱ’’ཏི པདཾ ‘‘ཀཱཏབྦཱ’’ཏི པདེ ཧེཏུ. ཨེསཱཏི ཨེསོ བྷིཀྑུ. ཧིཏེསིཏཱཡཱཏི ཧིཏསྶ ཨེསིཏཱཡ, ཨཏྠསྶ ཨིཙྪཏཱཡཱཏི ཨཏྠོ.

༨༢. སེསཱནཱིཏི ¶ ཨཱདིམྷི པཉྩསིཀྑཱཔདཏོ སེསཱནི ཨུཔརི པཉྩ སིཀྑཱཔདཱནི. ཨསྶཱཏི ཨནུཔསམྤནྣསྶ. གྷཊེཏྭཱཏི སམྦནྡྷཾ ཀཏྭཱཏི. ནཝམཾ.

༡༠. པཐཝཱིཁཎནསིཀྑཱཔདཾ

༨༦. དསམེ ¶ བྷགཝཱ དསྶེཏཱིཏི ཡོཛནཱ. ཨེཏྠཱཏི པཐཝིཡཾ. ཏཏྠཱཏི ཏེསུ པཱསཱཎཱདཱིསུ. མུཊྛིཔྤམཱཎཏོཏི ཁཊཀཔམཱཎཏོ. སཱཏི ཨདཌྜྷཔཐཝཱི. ཧཏྠིཀུཙྪིཡནྟི ཨེཝཾནཱམཀེ ཋཱནེ. ཨེཀཔཙྪིཔཱུརཾ པཐཝིནྟི སམྦནྡྷོ. ཏེསཾཡེཝཱཏི ཨཔྤཔཾསུཨཔྤམཏྟིཀཱཔདཱནཾ ཨེཝ. ཧཱིཏི སཙྩཾ, ཡསྨཱ ཝཱ. ཨེཏནྟི ཡེབྷུཡྻེནཔཱསཱཎཱདིཔཉྩཀཾ. ཏནྟི ཀུསཱིཏཾ. ཨཱཎཱཔེཏྭཱཏི ཨེཏྠ ‘‘ཨཱཎ པེསནེ’’ཏི དྷཱཏུཔཱཋེསུ ཝུཏྟཏྟཱ ཨཱཎདྷཱཏུཡེཝ པེསནསངྑཱཏཾ ཧེཏྭཏྠཾ ཝདཏི, ན ཎཱཔེཔཙྩཡོ, སོ པན དྷཱཏྭཏྠེཡེཝ ཝཏྟཏི. ན ཧི ཏསྶ ཝིསུཾ ཝུཏྟོ ཨབྷིདྷེཡྻོ ཨཏྠི དྷཱཏྭཏྠཏོ ཨཉྙསྶ ཨབྷིདྷེཡྻསྶཱབྷཱཝཱ. ཏཱཝཱཏི པཋམཾ པཱལི༹མུཏྟཀཝིནིཙྪཡསྶ, ཏཏོ ཝཱ.

པོཀྑརཾ པདུམཾ ནེཏཱིཏི པོཀྑརཎཱི. ‘‘སོདྷེནྟེཧཱི’’ཏི པདཾ ‘‘ཨུསྶིཉྩིཏུཾ ཨཔནེཏུ’’ནྟི པདེསུ བྷཱཝཀཏྟཱ. ཡོཏི ‘‘ཏནུཀདྡམོ’’ཏི པདེན ཡོཛེཏབྦོ. ཡོ ཏནུཀདྡམོཏི ཧི ཨཏྠོ. ཀུཊེཧཱིཏི གྷཊེཧི. ཨུསྶིཉྩིཏུནྟི ཨུཀྑིཔིཏྭཱ, ཨུདྡྷརིཏྭཱ ཝཱ སིཉྩིཏུཾ. ཏཏྲཱཏི སུཀྑཀདྡམེ, ‘‘ཡོ’’ཏི པདེ ཨཝཡཝཱིཨཱདྷཱརོ. ཡོཏི སུཀྑཀདྡམོ.

ཏཊནྟི ཀཱུལཾ. ཨུདཀསཱམནྟཱཏི ཨུདཀསྶ སམཱིཔེ. ཨོམཀཙཏུམཱསནྟི ཙཏུམཱསཏོ ཨཱུནཀཾ. ཨོཝཊྛནྟི དེཝེན ཨོཝསྶིཏཾ ཧོཏི སཙེཏི ཡོཛནཱ. པཏཏཱིཏི ཏཊཾ པཏཏི. ཨུདཀེཡེཝཱཏི པཀཏིཨུདཀེཡེཝ. ཨུདཀསྶཱཏི ཝསྶོདཀསྶ. ཏཏྠཱཏི པཱསཱཎཔིཊྛིཡཾ. པཋམམེཝཱཏི སོཎྜིཁཎནཏོ པཋམཾ ཨེཝ. ཨུདཀེ པརིཡཱདིཎྞེཏི ཨུདཀེ སུཀྑེ. པཙྪཱཏི ཨུདཀཔཱུརཏོ པཙྪཱ. ཏཏྠཱཏི སོཎྜིཡཾ. ཨུདཀེཡེཝཱཏི མཱུལཨུདཀེཡེཝ. ཨུདཀནྟི ཨཱགནྟུཀཨུདཀཾ. ཨལླཱིཡཏཱིཏི པིཊྛིཔཱསཱཎེ ལགྒཏི. ཏམྤཱིཏི སུཁུམརཛམྤི. ཨཀཏཔབྦྷཱརེཏི ཝལ༹ཉྫེན ཨཀཏེ པབྦྷཱརེ. ཨུཔཙིཀཱཧི ཝམཱིཡཏི, གྷརགོལི༹ཀཱདཡོ ཝཱ སཏྟེ ཝམཏཱིཏི ཝམྨིཀོ.

གཱཝཱིནཾ ¶ ཁུརོ ཀཎྚཀསདིསཏྟཱ གོཀཎྚཀོ ནཱམ, ཏེན ཚིནྣོ ཀདྡམོ ‘‘གོཀཎྚཀོ’’ཏི ཝུཙྩཏི. ཨཙྪདནཾ ཝཱ ཝིནཊྛཙྪདནཾ ཝཱ པུརཱཎསེནཱསནཾ ཧོཏཱིཏི ཡོཛནཱ. ཏཏོཏི ¶ པུརཱཎསེནཱསནཏོ, གཎྷིཏུཾ ཝཊྚཏཱིཏི སམྦནྡྷོ. ཨཝསེསནྟི ཝིནཊྛཙྪདནཏོ. ཨཝསེསཾ ཨིཊྛཀཾ གཎྷཱམི ཨིཏི སཉྙཱཡཱཏི ཡོཛེཏབྦོ. ཏེནཱཏི ཨིཊྛཀཱདིནཱ. ཡཱ ཡཱཏི མཏྟིཀཱ. ཨཏིནྟཱཏི ཨནལླཱ, ཨཀིལིནྣཱཏི ཨཏྠོ.

ཏསྨིནྟི མཏྟིཀཱཔུཉྫེ. སབྦོཏི སཀལོ མཏྟིཀཱཔུཉྫོ. ཨསྶཱཏི མཏྟིཀཱཔུཉྫསྶ. ‘‘ཀཔྤིཡཀཱརཀེཧཱི’’ཏི པདཾ ‘‘ཨཔནཱམེཏྭཱ’’ཏི པདེ ཀཱརིཏཀམྨཾ. ཀསྨཱ ཝཊྚཏཱིཏི ཨཱཧ ‘‘ཨུདཀེནཱ’’ཏིཨཱདི. ཧཱིཏི སཙྩཾ, ཡསྨཱ ཝཱ.

ཏཏྠཱཏི མཏྟིཀཱཔཱཀཱརེ. ཨཉྙམྤཱིཏི མཎྜཔཐམྦྷཏོ ཨཉྙམྤི. ཏེན ཨཔདེསེནཱཏི ཏེན པཱསཱཎཱདིཔཝཊྚནལེསེན.

པསྶཱཝདྷཱརཱཡཱཏི མུཏྟསོཏཱཡ. ཀཏྟརཡཊྛིཡཱཏི ཀཏྟརདཎྜེན. ཨེཏྠ ཧི ཀཏྟརཡཏི ཨངྒཔཙྩངྒཱནཾ སིཐིལབྷཱཝེན སིཐིལོ ཧུཏྭཱ བྷཝཏཱིཏི ཀཏྭཱ ཀཏྟརོ ཝུཙྩཏི ཛིཎྞམནུསྶོ, ཏེན ཨེཀནྟཏོ གཧེཏབྦཏྟཱ ཀཏྟརེན གཧིཏཱ ཡཊྛི, ཀཏྟརསྶ ཡཊྛཱིཏི ཝཱ ཀཏྭཱ ཀཏྟརཡཊྛི ཝུཙྩཏི ཀཏྟརདཎྜོ. དནྟཛཔཋམཀྑརེན སཛ྄ཛྷཱཡིཏབྦོ. ཝཱིརིཡསམྤགྒཧཎཏྠནྟི ཝཱིརིཡསྶ སུཊྛུ པགྒཎྷནཏྠཾ, ཝཱིརིཡསྶ ཨུཀྑིཔནཏྠནྟི ཨཏྠོ. ཀེཙི བྷིཀྑཱུཏི ཡོཛནཱ.

༨༧. ཏཏྲཱཔཱིཏི ཨིཊྛཀཀཔཱལཱདཱིསུཔི. ཧཱིཏི སཙྩཾ. ཏེསཾ ཨནུཔཱདཱནཏྟཱཏི ཏེསཾ ཨིཊྛཀཱདཱིནཾ ཨགྒིསྶ ཨནིནྡྷནཏྟཱ. ཧཱིཏི སཙྩཾ, ཡསྨཱཝཱ. ཏཱནཱིཏི ཨིཊྛཀཱདཱིནི. ཨཝིསཡཏྟཱཏི ཨཱཔཏྟིཡཱ ཨནོཀཱསཏྟཱ. ཏིཎུཀྐནྟི ཏིཎམཡཾ ཨུཀྐཾ. ཏཏྠེཝཱཏི མཧཱཔཙྩརིཡཾ ཨེཝ. ཨརཱིཡཏི ཨགྒིནིཔྥཱདནཏྠཾ གྷཾསཱིཡཏི ཨེཏྠཱཏི ཨརཎཱི, ཧེཊྛཱ ནིམནྠནཱིཡདཱརུ. སཧ དྷནུནཱ ཨེཏི པཝཏྟཏཱིཏི སཧིཏོ, ཨུཔརི ནིམནྠནདཱརུ. ཨརཎཱི ཙ སཧིཏོ ཙ ཨརཎཱིསཧིཏོ, ཏེན ཨགྒིཾ ནིབྦཏྟེཏྭཱཏི ཡོཛནཱ. ཡཐཱ ཀརིཡམཱནེ ན ཌཡ྄ཧཏི, ཏཐཱ ཀརོཧཱིཏི སམྦནྡྷོ.

༨༨. ཨཱཝཱཊཾ ¶ ཛཱནཱཏི ཨཱཝཱཊཾ ཀཱཏུཾ, ཁཎིཏུཾ ཝཱ ཛཱནཱཧཱིཏི ཨཏྠོ. ‘‘ཨེཝཾ མཧཱམཏྟིཀཾ ཛཱན, ཐུསམཏྟིཀཾ ཛཱནཱ’’ཏི ཨེཏྠཱཔི ཡཐཱལཱབྷཾ སམྤདཱནཝཱཙཀཔདཾ ཨཛ྄ཛྷཱཧརིཏྭཱ ཡོཛནཱ ཀཱཏབྦཱ. སཱཏི པཐཝཱི. ཏེནཱཏི པཝཊྚནཱདིནཱཏི. དསམཾ.

མུསཱཝཱདཝགྒོ པཋམོ.

༢. བྷཱུཏགཱམཝགྒོ

༡. བྷཱུཏགཱམསིཀྑཱཔད-ཨཏྠཡོཛནཱ

༨༩. དུཏིཡཝགྒསྶ ¶ པཋམེ ཏསྶཱཏི དེཝཏཱཡ. ཨུཀྑིཏྟཾ ཕརསུནྟི ཨུདྡྷཾ ཁིཏྟཾ ཀུཋཱརིཾ. ནིགྒཧེཏུནྟི སཎྛཱཏུཾ, ནིཝཏྟེཏུཾ ཝཱ. ཙཀྑུཝིསཡཱཏཱིཏེཏི པསཱདཙཀྑུསྶ གོཙརཱཏིཀྐནྟེ. མཧཱརཱཛསནྟིཀཱཏི ཝེསྶཝཎམཧཱརཱཛསྶ སནྟིཀཱ. ཐནམཱུལེཡེཝཱཏི ཐནསམཱིཔེཡེཝ. ཧིམཝནྟེཏི ཧིམཨུགྒིརཎེ ཝནེ, ཧིམཡུཏྟེ ཝཱ. ཏཏྠཱཏི ཧིམཝནྟེ, དེཝཏཱསནྣིཔཱཏེ ཝཱ. རུཀྑདྷམྨོཏི རུཀྑསབྷཱཝོ. རུཀྑདྷམྨོ ཙ ནཱམ ཚེདནབྷེདནཱདཱིསུ རུཀྑཱནཾ ཨཙེཏནཏྟཱ ཀོཔསྶ ཨཀརཎཾ, ཏསྨིཾ རུཀྑདྷམྨེ ཋིཏཱ དེཝཏཱ རུཀྑདྷམྨེ ཋིཏཱ ནཱམ, ཚེདནབྷེདནཱདཱིསུ རུཀྑསྶ ཝིཡ རུཀྑཊྛཀདེཝཏཱཡ ཨཀོཔནཾ རུཀྑདྷམྨེ ཋིཏཱ ནཱམཱཏི ཨདྷིཔྤཱཡོ. ཏཏྠཱཏི ཏཱསུ སནྣིཔཱཏདེཝཏཱསུ. ཨིཏཱིཏི ཨིམསྶ ཨལབྷནསྶ, ཨིམསྨིཾ ཨལབྷནེ ཝཱ, ཨཱདཱིནཝནྟི སམྦནྡྷོ. བྷགཝཏོ ཙཱཏི ཙ-སདྡོ ‘‘པུབྦཙརིཏ’’ནྟི ཨེཏྠ ཡོཛེཏབྦོ. ཨིམཉྩ ཨཱདཱིནཝཾ ཨདྡས, བྷགཝཏོ པུབྦཙརིཏཉྩ ཨནུསྶརཱིཏི ཝཱཀྱསམྤིཎྜནཝསེན ཡོཛནཱ ཀཱཏབྦཱ. ཏེནཱཏི དསྶནཱནུསྶརཎཀཱརཎེན. ཨསྶཱཏི དེཝཏཱཡ. སཾཝིཛྫཏི པིཏཱ ཨསྶཱཏི སཔིཏིཀོ, པུཏྟོ. (ཏཱཝཱཏི ཨཏིཝིཡ, པཊིསཉྩིཀྑནྟིཡཱཏི སམྦནྡྷོ) ‘‘མརིཡཱདཾ བནྡྷིསྶཏཱི’’ཏི ཝཏྭཱ ཏསྶ ཨཏྠཾ དསྶེནྟོ ཨཱཧ ‘‘སིཀྑཱཔདཾ པཉྙཔེསྶཏཱི’’ཏི. ཨིཏི པཊིསཉྩིཀྑནྟིཡཱ ཨསྶཱ དེཝཏཱཡ ཨེཏདཧོསཱིཏི ཡོཛནཱ.

ཡོཏི ¶ ཡོ ཀོཙི ཛནོ. ཝེཏི ཨེཀནྟེན. ཨུཔྤཏིཏནྟི ཨུཔྤཛྫནཝསེན ཨཏྟནོ ཨུཔརི པཏིཏཾ. བྷནྟནྟི བྷམནྟཾ དྷཱཝནྟཾ, ཝཱརཡེཏི ནིཝཱརེཡྻ ནིགྒཎྷེཡྻཱཏི ཨཏྠོ. ཏནྟི ཛནཾ. ཨཡཾ པནེཏྠ ཡོཛནཱ – སཱརཐི བྷནྟཾ རཐཾ ཝཱརཡེ ཨིཝ, ཏཐཱ ཡོ ཝེ ཨུཔྤཏིཏཾ ཀོདྷཾ ཝཱརཡེ, ཏཾ ཨཧཾ སཱརཐིཾ ཨིཏི བྲཱུམི. ཨིཏརོ ཀོདྷནིཝཱརཀཏོ ཨཉྙོ རཱཛཨུཔརཱཛཱདཱིནཾ སཱརཐིབྷཱུཏོ ཛནོ རསྨིགྒཱཧོ རཛྫུགྒཱཧོ ནཱམཱཏི.

དུཏིཡགཱཐཱཡ ཝེཛྫོ ཝིསཊཾ ཝིཏྠཏཾ སཔྤཝིསཾ སཔྤསྶ ཨཱསཱིཝིསསྶ ཝིསཾ གརལ༹ཾ ཨོསདྷེཧི བྷེསཛྫེན, མནྟེན ཙ ཝིནེཏི ཨིཝ, ཏཐཱ ཡོ བྷིཀྑཝེ ཨུཔྤཏིཏཾ ཀོདྷཾ མེཏྟཱཡ ཝིནེཏི, སོ བྷིཀྑུ ཨུརགོ བྷུཛགོ པུརཱཎཾ པུརེ བྷཝཾ ཛིཎྞཾ པུརཱཎཏྟཱ ཛིཎྞཾ ཏཙཾ ཛཧཱཏི ཨིཝ, ཏཐཱ ཨོརཔཱརཾ ཨཔཱརསངྑཱཏཾ པཉྩོརམྦྷཱགིཡསཾཡོཛནཾ ཛཧཱཏཱིཏི ཡོཛནཱ ཀཱཏབྦཱ.

ཏཏྲཱཏི ¶ དྭཱིསུ གཱཐཱསུ. ཝཏྠུ པན ཝིནཡེ ཨཱརཱུལ༹ྷནྟི ཡོཛནཱ. ཨཐཱཏི པཙྪཱ. ཡསྶ དེཝཔུཏྟསྶཱཏི ཡེན དེཝཔུཏྟེན. པརིགྒཧོཏི པརིཙྪིནྡིཏྭཱ གཧིཏོ. སོཏི དེཝཔུཏྟོ. ཏཏོཏི ཨུཔགམནཏོ. ཡདཱ ཧོཏི, ཏདཱཏི ཡོཛནཱ. མཧེསཀྑདེཝཏཱསཱུཏི མཧཱཔརིཝཱརཱསུ དེཝཏཱསུ, མཧཱཏེཛཱསུ ཝཱ. པཊིཀྐམནྟཱིཏི ཨཔེནྟི. དེཝཏཱ ཡམྤི པཉྷཾ པུཙྪནྟཱིཏི ཡོཛནཱ. ཏཏྠེཝཱཏི ཨཏྟནོ ཝསནཊྛཱནེཡེཝ. ཨུཔཊྛཱནནྟི ཨུཔཊྛཱནཏྠཱཡ, སམྤདཱནཏྠེ ཙེཏཾ ཨུཔཡོགཝཙནཾ. ཨཐ ཝཱ ཨུཔགནྟྭཱ ཏིཊྛཏི ཨེཏྠཱཏི ཨུཔཊྛཱནཾ, བྷགཝཏོ སམཱིཔཊྛཱནཾ, ཏཾ ཨཱགནྟྭཱཏི ཨཏྠོ. ནནྟི ཏཾ, ཨཡམེཝ ཝཱ པཱཋོ.

༩༠. ‘‘བྷཝནྟཱི’’ཏི ཨིམིནཱ ཝིརཱུལ༹ྷེ མཱུལེ ནཱིལབྷཱཝཾ ཨཱཔཛྫིཏྭཱ ཝཌྜྷམཱནཀེ ཏརུཎརུཀྑགཙྪཱདིཀེ དསྶེཏི. ‘‘ཨཧུཝཏྠུ’’ནྟི ཨིམིནཱ པན ཝཌྜྷིཏྭཱ ཋིཏེ མཧནྟརུཀྑགཙྪཱདིཀེ དསྶེཏི. ‘‘ཨཧུཝཏྠུ’’ནྟི ཙ ཧིཡྻཏྟནིསངྑཱཏཱཡ ཏྠུཾ-ཝིབྷཏྟིཡཱ ཧཱུ-དྷཱཏུསྶ ཨཱུཀཱརསྶ ཨུཝཱདེསོ ཧོཏི. པོཏྠཀེསུ པན ‘‘ཨཧུཝཏཱི’’ཏི པཱཋོ དིསྶཏི, སོ ཨཔཱཋོཏི དཊྛབྦོ. ‘‘ཛཱཡནྟཱི’’ཏི ཨིམིནཱ བྷཱུ-དྷཱཏུསྶ སཏྟཏྠབྷཱཝཾ དསྶེཏི ¶ , ‘‘ཝཌྜྷནྟཱི’’ཏི ཨིམིནཱ ཝཌྜྷནཏྠབྷཱཝཾ. ཨེཏནྟི ‘‘བྷཱུཏགཱམོ’’ཏི ནཱམཾ. པཱིཡཏེ ཡཐཱཀཱམཾ པརིབྷུཉྫཱིཡཏེ, པཱཏབྦཾ པརིབྷུཉྫིཏབྦནྟི ཝཱ པཱཏབྱཾ, པཱསདྡོ ཡཐཱཀཱམཔརིབྷུཉྫནཏྠོ. ཏེནཱཧ – ‘‘ཚེདནབྷེདནཱདཱིཧི ཡཐཱརུཙི པརིབྷུཉྫིཏབྦཏཱཏི ཨཏྠོ’’ཏི.

༩༡. ‘‘ཨིདཱནཱི’’ཏི པདཾ ‘‘ཨཱཧཱ’’ཏི པདེ ཀཱལསཏྟམཱི. ཡསྨིནྟི བཱིཛེ. ཏནྟི བཱིཛཾ. པཉྩ བཱིཛཛཱཏཱནཱིཏི ཨེཏྠ ཛཱཏསདྡསྶ ཏབྦྷཱཝཏྠཏཾ སནྡྷཱཡ ཨཊྛཀཐཱསུ ཨེཝཾ ཝུཏྟཾ. ཏབྦྷཱཝཏྠསྶ ‘‘མཱུལེ ཛཱཡནྟཱི’’ཏི ཨིམཱཡ པཱལི༹ཡཱ ཨསཾསནྡནཏཾ སནྡྷཱཡ ཝུཏྟཾ སངྒཧཀཱརེན ‘‘ན སམེནྟཱི’’ཏི. ཨཊྛཀཐཱཙརིཡཱནཾ མཏེན སཏི ཛཱཏསདྡསྶ ཏབྦྷཱཝཏྠབྷཱཝེ ‘‘མཱུལེ ཛཱཡནྟཱི’’ཏིཨཱདཱིསུ མཱུལེ མཱུལཱནི ཛཱཡནྟཱིཏི དོསོ བྷཝེཡྻཱཏི མནསི ཀཏྭཱ ཨཱཧ ‘‘ན ཧཱི’’ཏིཨཱདི. ཧཱིཏི སཙྩཾ, ཡསྨཱ ཝཱ. ཏཱནཱིཏི རུཀྑཱདཱིནི. ཏསྶཱཏི ‘‘བྷཱུཏགཱམོ ནཱམ པཉྩ བཱིཛཛཱཏཱནཱི’’ཏི པདསྶ. ཨེཏནྟི ‘‘བཱིཛཛཱཏཱནཱི’’ཏི ནཱམཾ. བཱིཛེསུ ཛཱཏཱནི བཱིཛཛཱཏཱནཱིཏི ཝུཏྟེ ‘‘མཱུལེ ཛཱཡནྟཱི’’ཏིཨཱདིནཱ སམེཏི. ཨེཏེནཱཏི ‘‘བཱིཛཏོ’’ཏིཨཱདིནཱ སངྒཧོཏི སམྦནྡྷོ.

‘‘ཡེཧཱི’’ཏི པདཾ ‘‘ཛཱཏཏྟཱ’’ཏི པདེ ཨཔཱདཱནཾ, ཧེཏུ ཝཱ ‘‘ཝུཏྟཱནཱི’’ཏི པདེ ཀརཎཾ, ཀཏྟཱ ཝཱ. ཏེསནྟི བཱིཛཱནཾ. རུཀྑཱདཱིནཾ ཝིརུཧནཾ ཛནེཏཱིཏི བཱིཛཾ. ‘‘བཱིཛཏོ’’ཏིཨཱདིནཱ ཀཱརིཡོཔཙཱརེན ཀཱརཎསྶ དསྶིཏཏྟཱ ཀཱརཎཱུཔཙཱརཾ པདཱིཔེཏི. ཨཉྙཱནིཔི ཡཱནི ཝཱ པན གཙྪཝལླིརུཀྑཱདཱིནི ཨཏྠི སཾཝིཛྫནྟི, ཏཱནི གཙྪཝལླིརུཀྑཱདཱིནི ཛཱཡནྟི སཉྫཱཡནྟཱིཏི ཡོཛནཱ. ཏཱནཱིཏི གཙྪཝལླིརུཀྑཱདཱིནི ¶ . ཏཉྩ མཱུལཾ, པཱལི༹ཡཾ ཝུཏྟཧལིདྡཱདི ཙ ཨཏྠི, སབྦམྤི ཨེཏཾ མཱུལབཱིཛཾ ནཱམཱཏི སམྦནྡྷོ. ཨེཏྠཱཏི བཱིཛེསུ, ཁནྡྷབཱིཛེསུ ཝཱ.

༩༢. སཉྙཱཝསེནཱཏི ‘‘བཱིཛ’’ནྟི སཉྙཱཝསེན. ‘‘ཏཏྠཱ’’ཏི པདཾ ‘‘ཝེདིཏབྦོ’’ཏི པདེ ཨཱདྷཱརོ. ‘‘ཡཐཱ’’ཏིཨཱདིནཱ ཀཱརཎོཔཙཱརེན ཀཱརིཡསྶ ཝུཏྟཏྟཱ ཕལཱུཔཙཱརཾ དསྶེཏི. ཡཾ བཱིཛཾ ཝུཏྟཾ, ཏཾ དུཀྐཊཝཏྠཱུཏི ཡོཛནཱ. ཡདེཏཾ ཨཱདིཔདནྟི ཡོཛེཏབྦཾ. ཏེནཱཏི ཨཱདིཔདེན. རཝཱིཡཏི བྷགཝཏཱ ཀཐཱིཡཏཱིཏི རུཏཾ, པཱལི༹, ཏསྶ ཨནུརཱུཔཾ ཡཐཱརུཏཾ, པཱལི༹ཨནཏིཀྐནྟནྟི ཨཏྠོ.

ཨེཏྠཱཏི ¶ ‘‘བཱིཛེ བཱིཛསཉྙཱི’’ཏིཨཱདིཔདེ, ཨིམསྨིཾ སིཀྑཱཔདེ ཝཱ. ཨུདཀེ ཋཱཏི པཝཏྟཏཱིཏི ཨུདཀཊྛོ, ཨེཝཾ ཐལཊྛོཔི. ཏཏྠཱཏི ཨུདཀཊྛཐལཊྛེསུ. སཱསཔསྶ མཏྟཾ པམཱཎཾ ཨསྶ སེཝཱལསྶཱཏི སཱསཔམཏྟིཀོ. ཏིལསྶ བཱིཛཔམཱཎཾ ཨསྶ སེཝཱལསྶཱཏི ཏིལབཱིཛཀོ. པམཱཎཏྠེ ཀོ. ཨཱདིསདྡེན སངྑཔཎཀཱདཡོ སེཝཱལེ སངྒཎྷཱཏི. ཏཏྠ ཏིལབཱིཛཔམཱཎོ ཛལསཎྛིཏོ ནཱིལཱདིཝཎྞཡུཏྟོ སེཝཱལོ ཏིལབཱིཛཾ ནཱམ, སཔཏྟོ ཨཔྤཀཎྜོ ཨུཀྑལིཔིདྷཱནཱདིཔམཱཎོ སམཱུལོ ཨེཀོ སེཝཱལཝིསེསོ སངྑོ ནཱམ, བྷམརསཎྛཱནོ ནཱིལཝཎྞོ ཨེཀོ སེཝཱལཝིསེསོ པཎཀོ ནཱམ. ཨུདཀཾ སེཝཏཱིཏི སེཝཱལོ. ཏཏྠཱཏི སེཝཱལེསུ. ཡོཏི སེཝཱལོ. པཏིཊྛིཏཾ སེཝཱལནྟི སམྦནྡྷོ. ཡཏྠ ཀཏྠཙཱིཏི མཱུལེ ཝཱ ནལེ༹ ཝཱ པཏྟེ ཝཱ. ཨུདྡྷརིཏྭཱཏི ཨུཔྤཱཊེཏྭཱ. ‘‘ཧཏྠེཧཱི’’ཏི པདཾ ‘‘ཝིཡཱུཧིཏྭཱ’’ཏི པདེ ཀརཎཾ. ཧཱིཏི སཙྩཾ, ཡསྨཱ ཝཱ. ཏསྶཱཏི སེཝཱལསྶ. ཨེཏྟཱཝཏཱཏི ཨིཏོ ཙིཏོ ཙ ཝིཡཱུཧནམཏྟེན. ཡོ སེཝཱལོ ནིཀྑམཏི, ཏཾ སེཝཱལནྟི ཡོཛནཱ. པརིསྶཱཝནནྟརེནཱཏི པརིསྶཱཝནཚིདྡེན. ཨུཔྤལཱནི ཨསྨིཾ གཙྪེཏི ཨུཔྤལིནཱི. པདུམཱནི ཨསྨིཾ གཙྪེཏི པདུམིནཱི, ཨིནོ, ཨིཏྠིལིངྒཛོཏཀོ ཨཱི. ཏཏྠེཝཱཏི ཨུདཀེཡེཝ. ཏཱནཱིཏི ཝལླཱིཏིཎཱནི. ཧཱིཏི སཙྩཾ, ཡསྨཱ ཝཱ. ཨནནྟཀོཏི སཱསཔམཏྟིཀོ སེཝཱལོ. སོ ཧི ནཏྠི ཨཏྟཏོ ཨནྟོ ལཱམཀོ སེཝཱལོ ཨེཏསྶཱཏི ཀཏྭཱ ‘‘ཨནནྟཀོ’’ཏི ཝུཙྩཏི. ཨཏྟནཱཡེཝ ཧི སུཁུམོ, ཏཏོ སུཁུམོ སེཝཱལོ ནཏྠཱིཏི ཨདྷིཔྤཱཡོ. ཏཏྠཱཏི དུཀྐཊཝཏྠུབྷཱཝེ. ཏམྤཱིཏི ‘‘སམྤུཎྞབྷཱུཏགཱམཾ ན ཧོཏཱི’’ཏི ཝཙནམྤི. པིསདྡོ མཧཱཔཙྩརིཨཱདིཨཊྛཀཐཱཙརིཡཱནཾ ཝཙནཱཔེཀྑོ. ཧཱིཏི སཙྩཾ, ཡསྨཱ ཝཱ. ན ཨཱགཏོ, ཏསྨཱ ན སམེཏཱིཏི ཡོཛནཱ. ཨཐཱཏི ཏསྨིཾ ཨནཱགཏེ. ཨེཏནྟི ཨནནྟཀསེཝཱལཱདིཾ. གཙྪིསྶཏཱིཏི ཝདེཡྻཱཏི སམྦནྡྷོ. ཏམྤཱིཏི ‘‘གཙྪིསྶཏཱི’’ཏི ཝཙནམྤི. པིསདྡོ པུརིམཊྛཀཐཱཙརིཡཱནཾ ཝཙནཱཔེཀྑོ.

ཨབྷཱུཏགཱམམཱུལཏྟཱ ¶ ཏཱདིསསྶ བཱིཛགཱམསྶཱཏི ཨེཏྠ བཱིཛགཱམོ ཏིཝིདྷོ ཧོཏི – ཡོ སཡཾ བྷཱུཏགཱམཏོ ཧུཏྭཱ ཨཉྙམྤི བྷཱུཏགཱམཾ ¶ ཛནེཏི, ཨམྦཊྛིཨཱདིཀོ. ཡོ པན སཡཾ བྷཱུཏགཱམཏོ ཧུཏྭཱ ཨཉྙཾ པན བྷཱུཏགཱམཾ ན ཛནེཏི, ཏཱལནཱལི༹ཀེརཱདིཁཱཎུ. ཡོ པན སཡམྤི བྷཱུཏགཱམཏོ ཨཧུཏྭཱ ཨཉྙམྤི བྷཱུཏགཱམཾ ན ཛནེཏི. པཱནཱིཡགྷཊཱདཱིནཾ བཧི སེཝཱལོཏི. བྷཱུཏགཱམོ པན ཙཏུབྦིདྷོ ཧོཏི – ཡོ སཡཾ བཱིཛགཱམཏོ ཧུཏྭཱ ཨཉྙམྤི བཱིཛགཱམཾ ཛནེཏི, ཨེཏརཧི ཨམྦརུཀྑཱདིཀོ. ཡོ པན སཡཾ བཱིཛགཱམཏོ ཨཧུཏྭཱཝ ཨཉྙཾ བཱིཛགཱམཾ ཛནེཏི, ཨཱདིཀཔྤཀཱལེ ཨམྦརུཀྑཱདིཀོ. ཡོ པན སཡཾ བཱིཛགཱམཏོ ཧུཏྭཱ ཨཉྙཾ པན བཱིཛགཱམཾ ན ཛནེཏི, ནཱིལཝཎྞོ ཕལིཏཀདལཱིརུཀྑཱདིཀོ. ཡོ པན སཡམྤི བཱིཛགཱམཏོ ཨཧུཏྭཱ ཨཉྙམྤི བཱིཛགཱམཾ ན ཛནེཏི, ཨིདྷ ཝུཏྟོ ཨནནྟཀསེཝཱལཱདིཀོཏི. ཏཏྠ ཙཏུཏྠཾ བྷཱུཏགཱམཾ སནྡྷཱཡ ཝུཏྟཾ ‘‘ཨབྷཱུཏགཱམམཱུལཀཏྟཱ ཏཱདིསསྶ བཱིཛསྶཱ’’ཏི. ཨཡཾ པན ཏཏིཡབཱིཛགཱམསྶ ཙ ཙཏུཏྠབྷཱུཏགཱམསྶ ཙ ཝིསེསོ – ཏཏིཡབཱིཛགཱམེ མཱུལཔཎྞཱནི ན པཉྙཱཡནྟི, ཙཏུཏྠབྷཱུཏགཱམེ ཏཱནི པཉྙཱཡནྟཱིཏི. མཱུལཔཎྞཱནཾ ཨཔཉྙཱཡནཏྟཱ བཱིཛགཱམོཏི ཝུཏྟོ, ཏེསཾ པཉྙཱཡནཏྟཱ བྷཱུཏགཱམོཏི ཝུཏྟོ. ཨིཏརཐཱ ཧི ཝིརོདྷོ བྷཝེཡྻཱཏི. ཨཏྟནོ ཝཱདེ པཱཙིཏྟིཡབྷཱཝཏོ གརུཀཾ, མཧཱཔཙྩརིཨཱདཱིནཾ ཝཱདེ དུཀྐཊམཏྟབྷཱཝཏོ ལཧུཀཾ. ཨེཏནྟི ཋཱནཾ.

ཨེཝཾ ཨུདཀཊྛཾ དསྶེཏྭཱ ཐལཊྛཾ དསྶེནྟོ ཨཱཧ ‘‘ཐལཊྛེ’’ཏིཨཱདི. ཐལཊྛེ ཝིནིཙྪཡོ ཨེཝཾ ཝེདིཏབྦོཏི ཡོཛནཱ. ཏཏྠཱཏི ཧརིཏཁཱཎཱུསུ. ཨུདྡྷཾ ཝཌྜྷཏཱིཏི ནཝསཱཁཱནིགྒམནེན ཚིནྣཏོ ཨུཔརི ཝཌྜྷཏི. སོཏི ཁཱཎུ. ཕལིཏཱཡ ཀདལིཡཱ ཁཱཎུ བཱིཛགཱམེན སངྒཧིཏོཏི ཡོཛནཱ. ཕལཾ སཉྫཱཏཾ ཨེཏིསྶཱཏི ཕལིཏཱ. ཏཐཱཏི ‘‘བྷཱུཏགཱམེནེཝ སངྒཧིཏཱ’’ཏི པདཱནི ཨཱཀཌྜྷཏི. ཡདཱཏི ཡསྨིཾ ཀཱལེ. རཏནཔྤམཱཎཱཔཱིཏི ཧཏྠཔྤམཱཎཱཔི. ཨཐཱཏི ཨཔཱདཱནཏྠོ, ཏཏོ རཱསིཀརཎཏོ ཨཉྙནྟི ཨཏྠོ. བྷཱུམིཡཾ ནིཁཎནྟཱིཏི སམྦནྡྷོ. ‘‘མཱུལེསུ ཙེཝ པཎྞེསུ ཙཱ’’ཏི ཨེཏྠ ཙསདྡོ སམུཙྩཡཏྠོཝ, ན ཝིཀཔྤཏྠོཏི ཨཱཧ ‘‘མཱུལམཏྟེསུ པནཱ’’ཏིཨཱདི.

བཱིཛཱནཱིཏི མཱུལཱདིབཱིཛཱནི. ཋཔིཏཱནི ཧོནྟཱིཏི སམྦནྡྷོ. ‘‘ཨུཔརཱི’’ཏི པདེན ཧེཊྛཱ མཱུལཱནི ཙཱཏི ཨཏྠཾ ནཡེན ཉཱཔེཏི. ན ཨངྐུརེ ནིགྒཏམཏྟེཡེཝ ¶ , ཨཐ ཁོ ཧརིཏེ ནཱིལཔཎྞཝཎྞེ ཛཱཏེཡེཝ བྷཱུཏགཱམསངྒཧོ ཀཱཏབྦོཏི ཨཱཧ ‘‘ཧརིཏེ’’ཏིཨཱདི. ཏཱལཊྛཱིནཾ མཱུལནྟི སམྦནྡྷོ. དནྟསཱུཙི ཝིཡཱཏི ཧཏྠིདནྟསཱུཙི ཝིཡ. ཡཐཱ ཨསམྤུཎྞབྷཱུཏགཱམོ ཏཏིཡོ ཀོཊྛཱསོ ན ཨཱགཏོ, ན ཨེཝཾ ཨམཱུལཀབྷཱུཏགཱམོ. སོ པན ཨཱགཏོཡེཝཱཏི ཨཱཧ ‘‘ཨམཱུལཀབྷཱུཏགཱམེ’’ཏི. ཨམཱུལིཀལཏཱ ཝིཡ ཨམཱུལཀབྷཱུཏགཱམེ སངྒཧཾ གཙྪཏཱིཏི ཨཏྠོ.

ཝནྡཱཀཱཏི ¶ རུཀྑཱདནཱི. སཱ ཧི སཡཾ རུཀྑཾ ནིསྶཱཡ ཛཱཡནྟཱིཔི ཨཏྟནོ ནིསྶཡཱནཾ རུཀྑཱནཾ ཨདནཏྟཱ བྷཀྑནཏྟཱ ཝདཱིཡཏི ཐུཏཱིཡཏཱིཏི ‘‘ཝནྡཱཀཱ’’ཏི ཝུཙྩཏི. ཨཉྙཱ ཝཱཏི ཝནྡཱཀཱཡ ཨཉྙཱ ཝཱ. ཏནྟི ཝནྡཱཀཱདིཾ. ཏཏོཏི རུཀྑཏོ. ཝནནྟི ཁུདྡཀོ གཙྪོ. པགུམྦོཏི མཧཱགཙྪོ. དཎྜཀོཏི རུཀྑོ དཎྜཡོགཏོ. ཏསྶཱཔཱིཏི ཨམཱུལིཀལཏཱཡཔི. ཨཡམེཝ ཝིནིཙྪཡོཏི ཝནྡཱཀཱདིཀསྶ ཝིནིཙྪཡོ ཝིཡ ཨཡཾ ཝིནིཙྪཡོ དཊྛབྦོཏི ཡོཛནཱ. ‘‘དྭེ ཏཱིཎི པཏྟཱནཱི’’ཏི ཝུཏྟཏྟཱ ཨེཀཔཏྟོ སཉྫཱཡནྟོཔི ཨགྒབཱིཛསངྒཧཾ གཙྪཏཱིཏི ཨཏྠོ. ‘‘ཨནུཔསམྤནྣེནཱ’’ཏི པདཾ ‘‘ལིཏྟསྶཱ’’ཏི པདེ ཀཏྟཱ. ནིདཱགྷསམཡེཏི གིམྷཀཱལེ. ཨབྦོཧཱརིཀོཏི ཨཱཔཏྟིཡཱ ཨངྒནྟི ན ཝོཧརིཏབྦོ. ཝོཧརིཏུཾ ན ཨརཧཏཱིཏི ཨཏྠོ. ཨེཏནྟི ཨབྦོཧཱརིཀཏཾ, ‘‘སཙེ…པེ… པམཛྫིཏབྦཱ’’ཏི ཝཙནཾ ཝཱ.

ཨཧིཾ སཔྤཾ ཚཱདེཏཱིཏི ཨཧིཙྪཏྟཾ, ཏཾཡེཝ ཨཧིཙྪཏྟཀཾ. ཡཐཱཀཐཉྩི ཧི བྱུཔྤཏྟི, རུལ༹ྷིཡཱ ཨཏྠཝིནིཙྪཡོ. ཏསྨཱཏི ཏཏོ ཝིཀོཔནཏོ. ཏཏྠཱཏི ཨཧིཙྪཏྟཀེ. ཧེཊྛཱ ‘‘ཨུདཀཔཔྤཊཀོ’’ཏི ཝཏྭཱ ཨིདྷ ‘‘རུཀྑཔཔྤཊིཀཱཡཔཱི’’ཏི ཝུཏྟཏྟཱ པཔྤཊཀསདྡོ དྭིལིངྒོཏི དཊྛབྦོ. ཏནྟི པཔྤཊིཀཾ. ཋིཏཾ ནིཡྻཱསནྟི སམྦནྡྷོ. ཨེཝཾ ‘‘ལགྒ’’ནྟི ཨེཏྠཱཔི. ཧཏྠཀུཀྐུཙྩེནཱཏི ཧཏྠལོལེན. ‘‘ཚིནྡནྟསྶཱཔཱི’’ཏི པདེ ཧེཏུ.

ཝཱསཏྠིཀེནཱཏི ཝཱསཾ ཨིཙྪནྟེན. ‘‘ཨོཙིནཱཔེཏབྦཱ’’ཏི པདེ ཀཏྟཱ. ཨུཔྤཱཊེནྟེཧཱིཏི ཨུདྡྷརནྟེཧི. ཏེསནྟི སཱམཎེརཱནཾ. སཱཁཾ གཧིཏནྟི སམྦནྡྷོ. ཋཔིཏསྶ སིངྒཱིཝེརསྶཱཏི ཡོཛནཱ.

ཚིཛྫནཀནྟི ¶ ཚིཛྫནཡུཏྟཾ, ཚིཛྫནཱརཧནྟི ཨཏྠོ. ‘‘ཙངྐམིཏཊྛཱནཾ དསྶེསྶཱམཱི’’ཏི ཨིམིནཱ ཝཏྟསཱིསེན ཙངྐམནཾ ཝཊྚཏཱིཏི དསྶེཏི. ‘‘བྷིཛྫཏཱི’’ཏི ཨིམིནཱ ཨབྷིཛྫམཱནེ གཎྛིཔི ཀཱཏབྦོཏི དསྶེཏི. དཱརུམཀྐཊཀནྟི མཀྐཊསྶ ཧཏྠོ མཀྐཊོ ཨུཔཙཱརེན, མཀྐཊོ ཝིཡཱཏི མཀྐཊཀོ, སདིསཏྠེ ཀོ. དཱརུསངྑཱཏོ མཀྐཊཀོ དཱརུམཀྐཊཀོ. ཏཾ ཨཱཀོཊེནྟཱིཏི སམྦནྡྷོ. ཨནིཡཱམིཏཏྟཱཏི ཨིམནྟི ཨནིཡཱམིཏཏྟཱ ཝཙནསྶ. ཨིདཾ མཧཱསཱམཉྙཾ, ཝིསེསསཱམཉྙམྤི ཝཊྚཏཱིཏི ཨཱཧ ‘‘ནཱམཾ གཧེཏྭཱཔཱི’’ཏིཨཱདི. སབྦནྟི སབྦཾ ཝཙནཾ.

‘‘ཨིམཾ ཛཱནཱཏིཨཱདཱིསཱུ’’ཏི པདཾ ‘‘ཨེཝམཏྠོ དཊྛབྦོ’’ཏི པདེ ཨཱདྷཱརོ. ཨིམཾ མཱུལབྷེསཛྫཾ ཛཱནཱཏི ཨིམཾ མཱུལབྷེསཛྫཾ ཡོཛིཏུཾ ཛཱནཱཏི ཡོཛནཱ. ཨེཏྟཱཝཏཱཏི ‘‘ཨིམཾ ཛཱནཱ’’ཏིཨཱདིཝཙནམཏྟེན. ཀཔྤིཡནྟི སམཎཝོཧཱརེན, ཝོཧཱརསྶ ཝཱ ཡུཏྟཾ ཨནུརཱུཔཾ. ཨེཏྠཱཏི ‘‘ཀཔྤིཡཾ ¶ ཀཱཏབྦ’’ནྟི ཝཙནེ. ནིབྦཊྚབཱིཛམེཝཱཏི ཕལཏོ ནིབྦཊྚེཏྭཱ ཝིསུཾ ཀཏཾ བཱིཛཾ ཨེཝ. ཏཏྠཱཏི སུཏྟེ. ཀརོནྟེན བྷིཀྑུནཱ ཀཱཏབྦནྟི ཡོཛནཱ. ‘‘ཀཔྤིཡནྟི ཝཏྭཱཝཱ’’ཏི ཨིམིནཱ པཋམཾ ཀཏྭཱ ཨགྒིསཏྠནཁཱནི ཨུདྡྷརིཏྭཱ པཙྪཱ ཝཏྟུཾ ན ཝཊྚཏཱིཏི དསྶེཏི. ལོཧམཡསཏྠསྶཱཏི ཨཡཏམྦཱདིལོཧམཡསྶ སཏྠསྶ. ཏེཧཱིཏི མནུསྶཱདཱིནཾ ནཁེཧི. ཏེཧཱིཏི ཨསྶཱདཱིནཾ ཁུརེཧི. ཏེཧཱིཏི ཧཏྠིནཁེཧི. ཡེཧཱིཏི ནཁེཧི. ཏཏྠཛཱཏཀེཧིཔཱིཏི ཏསྨིཾ སཏྠེ ཛཱཏཀེཧིཔི, ནཁེཧཱིཏི སམྦནྡྷོ.

ཏཏྠཱཏི པུརིམཝཙནཱཔེཀྑཾ. ‘‘ཀཔྤིཡཾ ཀརོནྟེནཱ’’ཏིཨཱདིཝཙནམཔེཀྑཏི. ‘‘ཨུཙྪུཾ ཀཔྤིཡཾ ཀརིསྶཱམཱི’’ཏི ཨུཙྪུམེཝ ཝིཛ྄ཛྷཏི, པགེཝ. ‘‘དཱརུཾ ཀཔྤིཡཾ ཀརིསྶཱམཱི’’ཏི ཨུཙྪུཾ ཝིཛ྄ཛྷཏི, ‘‘དཱརུཾ ཀཔྤིཡཾ ཀརིསྶཱམཱི’’ཏི དཱརུམེཝ ཝཱ ཝིཛ྄ཛྷཏི, ཝཊྚཏི ཨེཀཱབདྡྷཏྟཱཏི ཝདནྟི. ཏནྟི རཛྫུཾ ཝཱ ཝལླིཾ ཝཱ. སབྦཾ ཁཎྜནྟི སམྦནྡྷོ. ཏཏྠཱཏི མརིཙཔཀྐེསུ. ཀཊཱཧནྟི ཨེཀཱཡ བྷཱཛནཝིཀཏིཡཱ ནཱམམེཏཾ. ཨིདྷ པན བཱིཛཱནཾ བྷཱཛནབྷཱཝེན ཏཾསདིསཏྟཱ ཕལཕེགྒུཔི ‘‘ཀཊཱཧ’’ནྟི ཝུཙྩཏི. ཨེཀཱབདྡྷནྟི ཀཊཱཧེན ཨེཀཏོ ཨཱབདྡྷཾ.

ཏཱནཱིཏི ཏིཎཱནི. ཏེནཱཏི རུཀྑཔཝཊྚནཱདིནཱ. ཏཏྲཱཏི ཏསྨིཾ ཋཔནཔཱཏནཊྛཱནེ. ‘‘མནུསྶཝིགྒཧཔཱརཱཛིཀཝཎྞནཱཡ’’ནྟི པདཾ ‘‘ཝུཏྟ’’ནྟི པདེ ¶ སཱམཉྙཱདྷཱརོ. བྷིཀྑུ ཨཛ྄ཛྷོཏྠཊོ ཧོཏཱིཏི སམྦནྡྷོ. ཨོཔཱཏེཏི ཨཱཝཱཊེ. སོ ཧི ཨཝཔཏནཊྛཱནཏྟཱ ‘‘ཨོཔཱཏོ’’ཏི ཝུཙྩཏི. རུཀྑནྟི ཨཛ྄ཛྷོཏྠཊརུཀྑཾ. བྷཱུམིནྟི ཨོཔཱཏཐིརབྷཱུམིཾ. ཛཱིཝིཏཧེཏཱུཏི ནིམིཏྟཏྠེ པཙྩཏྟཝཙནཾ, ཛཱིཝིཏཀཱརཎཱཏི ཨཏྠོ. ‘‘བྷིཀྑུནཱ’’ཏི པདཾ ‘‘ནིཀྑཱམེཏུ’’ནྟི པདེ བྷཱཝཀཏྟཱ, ཀཱརིཏཀཏྟཱ ཝཱ. ‘‘ཨཛ྄ཛྷོཏྠཊབྷིཀྑུ’’ནྟི ཝཱ ‘‘ཨོཔཱཏབྷིཀྑུ’’ནྟི ཝཱ ཀཱརིཏཀམྨཾ ཨཛ྄ཛྷཱཧརིཏབྦཾ. ཏཏྠཱཏི ཨནཱཔཏྟིབྷཱཝེ, ཨནཱཔཏྟིབྷཱཝསྶ ཝཱ. ཨེཏསྶཱཏི སུཏྟསྶ. པརོ པན ཀཱརུཉྙེན ཀརོཏཱིཏི སམྦནྡྷོ. ཨེཏམྤཱིཏི ཀཱརུཉྙམྤི. ཧཱིཏི སཙྩཾ, ཡསྨཱ ཝཱཏི. པཋམཾ.

༢. ཨཉྙཝཱདཀསིཀྑཱཔདཾ

༩༤. དུཏིཡེ ཨནཱཙཱརནྟི ཨཙརིཏབྦཾ ཀཱཡཝཙཱིདྭཱརཝཱིཏིཀྐམཾ. སབྦནཱམསྶ ཨནིཡམཏྠཏྟཱ ཨིདྷ ཝཙནནྟི ཨཱཧ ‘‘ཨཉྙེན ཝཙནེན ཨཉྙཾ ཝཙན’’ནྟི. སོཏི བྷིཀྑུ, ཝདཏཱིཏི སམྦནྡྷོ. ཀོཏི ཀོ པུགྒལོ. ཀིནྟི ཀིཾ ཨཱཔཏྟིཾ. ཀིསྨིནྟི ཀིསྨིཾ ཝཏྠུསྨིཾ. ཀིནྟི ཀིཾ ཀམྨཾ. ཀནྟི ཀཾ པུགྒལཾ. ཀིནྟི ཀིཾ ཝཙནཾ.

ཨེཏྠཱཏི ¶ ‘‘ཀོ ཨཱཔནྣོ’’ཏིཨཱདིཔཱལི༹ཡཾ. ‘‘བྷིཀྑཱུཧཱི’’ཏི པདཾ ‘‘ཝུཏྟོ’’ཏི པདེ ཀཏྟཱ. ཨསཱརུཔྤནྟི བྷིཀྑཱུནཾ ཨསཱརུཔྤཾ. ཨེསོཏི ཨེསོ ཨཏྠོ, ཝིབྷཝོཏི ཨཏྠོ. ཨེཏནྟི ཝཏྠུ. བྷཎནྟོ ཝཱ ཧུཏྭཱ ཨཉྙེནཉྙཾ པཊིཙརཏཱིཏི སམྦནྡྷོ. ཨེཏྠཱཏི པཊིཙྪནྣཱསནེ. སོཏནྟི སོཏདྭཱརཾ. ཙཀྑུནྟི ཙཀྑུདྭཱརཾ.

༩༨. ཨཉྙནྟི པུཙྪིཏཏྠཏོ ཨཉྙཾ ཨཔུཙྪིཏམཏྠཾ. བྷཱཝཔྤདྷཱནོཡཾ ཀཏྟུནིདྡེསོཏི ཨཱཧ ‘‘ཨཉྙེནཉྙཾ པཊིཙརཎསྶེཏཾ ནཱམ’’ནྟི. ཏུཎྷཱིབྷཱཝསྶཱཏི ཨབྷཱསནསྶ. ཨཱཏྱཱུཔསགྒོ ལུཏྟནིདྡིཊྛོཏི ཨཱཧ ‘‘ཨཱརོཔེཏཱུ’’ཏི. ཨེཝཾ ‘‘ཨརོཔིཏེ’’ཏི ཨེཏྠཔི. ཏེནཱཧ ‘‘ཨནཱརོཔིཏེ’’ཏི.

༡༠༡. ཏནྟི ཨཉྙཝཱདཀཝིཧེསཀརོཔནཀམྨཾ. ཨསྶཱཏི བྷཝེཡྻ, ཧོཏི ཝཱ.

༡༠༢. ཀིནྟི ¶ ཀིཾ ཝཙནཾ. ཡེནཱཏི ཡེན བྱཱདྷིནཱ ཀཐེཏུཾ ན སཀྐོཏི, ཏཱདིསོ བྱཱདྷི མུཁེ ཧོཏཱིཏི ཡོཛནཱ. ཏཔྤཙྩཡཱཏི ཏཏོ ཀཐིཏཀཱརཎཱཏི. དུཏིཡཾ.

༣. ཨུཛ྄ཛྷཱཔནཀསིཀྑཱཔདཾ

༡༠༣. ཏཏིཡེ བྷིཀྑཱུ ཨུཛ྄ཛྷཱཔེནྟཱིཏི ཨེཏྠ ‘‘བྷིཀྑཱུ’’ཏི ཀཱརིཏཀམྨཏྟཱ ཀརཎཏྠེ ཨུཔཡོགཝཙནནྟི ཨཱཧ ‘‘ཏེཧི བྷིཀྑཱུཧཱི’’ཏི. ཨོཀཱརཝིཔརཱིཏོ ཨུཀཱརོཏི ཙ ཛྷེསདྡོ ཉཱཎཏྠོཏི ཙ དསྶེནྟོ ཨཱཧ ‘‘ཨཝཛཱནཱཔེནྟཱི’’ཏི. ‘‘ཏཾ ཨཱཡསྨནྟ’’ནྟི པདཾ ‘‘ཨཝཛཱནཱཔེནྟཱི’’ཏི པདེ དྷཱཏུཀམྨཾ. ཨནེཀཏྠཏྟཱ དྷཱཏཱུནཾ ཛྷེསདྡོ ཨོལོཀནཏྠོ ཙ ཙིནྟནཏྠོ ཙ ཧོཏི, ཏེནཱཧ ‘‘ཨོལོཀཱཔེནྟཱི’’ཏིཨཱདི. ཨེཏྠཱཏི ‘‘བྷིཀྑཱུ ཨུཛ྄ཛྷཱཔེནྟཱི’’ཏི པདེ. ཚནྡཱཡཱཏི ཚནྡཏྠཾ. ཡེསཾ སེནཱསནཱནི ཙ པཉྙཔེཏི, བྷཏྟཱནི ཙ ཨུདྡིསཏི, ཏེསཾ ཨཏྟནི པེམཏྠནྟི ཨཏྠོ. ཨཊྛཀཐཱཡཾ པན ‘‘ཚནྡཱཡཱཏི ཚནྡེནཱ’’ཏི ཝུཏྟཾ. ཨིམིནཱ ལིངྒཝིཔལླཱསནཡོ ཝུཏྟོ. པརེསཾ ཨཏྟནོ པེམེནཱཏི ཨཏྠོ. པཀྑཔཱཏེནཱཏི ཨཏྟནོ པཀྑེ པཱཏཱཔནེན.

༡༠༥. ཨུཛ྄ཛྷཱཔེནྟི ཨནེནཱཏི ཨུཛ྄ཛྷཱཔནཀཾ. ཁིཡྻནྟི ཨནེནཱཏི ཁིཡྻནཀནྟི དསྶེནྟོ ཨཱཧ ‘‘ཡེན ཝཙནེནཱ’’ཏིཨཱདི.

༡༠༦. ཨུཔསམྤནྣཾ སངྒྷེན སམྨཏཾ མངྐུཀཏྟུཀཱམོཏི སམྦནྡྷཾ དསྶེནྟོ ཨཱཧ ‘‘ཨུཔསམྤནྣཾ སངྒྷེན ¶ སམྨཏ’’ནྟིཨཱདི. སམྦཛ྄ཛྷནཾ སམྦནྡྷོ, ཀཱཏབྦོཏི ཡོཛནཱ. ཨུཔསམྤནྣསྶ སངྒྷེན སམྨཏསྶ ཨཝཎྞཾ ཀཏྟུཀཱམོ ཨཡསཾ ཀཏྟུཀཱམོཏི ཝིབྷཏྟིཝིཔརིཎཱམེན སམྦནྡྷཾ དསྶེནྟོ ཨཱཧ ‘‘ཝིབྷཏྟིཝིཔརིཎཱམོ ཀཱཏབྦོ’’ཏི. ‘‘ཝསེནཱ’’ཏི པདཾ ཝིབྷཏྟིཝིཔརིཎཱམོ ཀཱཏབྦོ’’ཏི པདེ ཝིསེསནཾ. ཡསྨཱ ཝིསེསོ ནཏྠི, ཏསྨཱ ཀཏནྟི ཡོཛནཱ. ཏནྟི ‘‘ཁིཡྻནཀ’’ནྟི པདཾ. སོ ཙ བྷིཀྑཱུཏི ཨུཛ྄ཛྷཱཔནཀོ ཙ ཁིཡྻནཀོ ཙ སོ ཙ བྷིཀྑུ. ཨཐཱཏི ཏསྨཱ ཨུཛ྄ཛྷཱཔནཀཁིཡྻནཀཀརཏྟཱ. ཨསྶཱཏི བྷིཀྑུནོ. ཨསྶཱཏི བྷཝེཡྻ.

‘‘ཨུཔསམྤནྣ’’ནྟི ¶ པདཾ ‘‘ཨུཛ྄ཛྷཱཔེཏཱི’’ཏི པདེ དྷཱཏུཀམྨཾ ‘‘ཨནུཔསམྤནྣ’’ནྟི པདཾ ཀཱརིཏཀམྨཾ, ‘‘ཨནུཔསམྤནྣ’’ནྟི པདཾ ‘‘ཨུཛ྄ཛྷཱཔེཏཱི’’ཏི ཀཱརིཏཀིརིཡཾ ཨཔེཀྑིཏྭཱ ཀམྨཾ ཧོཏི. ‘‘ཁིཡྻཏཱི’’ཏི སུདྡྷཀིརིཡཱཡ ཨཔེཀྑཱཡ ཝིབྷཏྟིཝིཔལླཱསོ ཧོཏཱིཏི ཨཱཧ ‘‘ཏསྶ ཝཱ’’ཏིཨཱདི. ཏསྶཱཏི ཨནུཔསམྤནྣསྶ སནྟིཀེཏི སམྦནྡྷོ. ཏནྟི སངྒྷེན སམྨཏཾ ཨུཔསམྤནྣཾ. ‘‘སངྒྷེན ཨསམྨཏ’’ནྟི ཨེཏྠ ན ཨཔལོཀནཀམྨེན ཨསམྨཏཾ, ཀམྨཝཱཙཱཡ པན ཨསམྨཏནྟི ཨཱཧ ‘‘ཀམྨཝཱཙཱཡཱ’’ཏིཨཱདི. དྭེ ཏཡོ ཧུཏྭཱ ཀམྨཝཱཙཱཡ སམྨནིཏུམསཀྐུཎེཡྻཏྟཱ ཨསམྨཏནྟི ཙ དསྶེནྟོ ཨཱཧ ‘‘ཡཏྲཱ’’ཏིཨཱདི. ཡཏྲཱཏི ཡསྨིཾ ཝིཧཱརེ. ‘‘ཨནུཔསམྤནྣཾ སངྒྷེན སམྨཏ’’ནྟི ཨེཏྠ ཨནུཔསམྤནྣསྶ སམྨུཏིཡོ དཱཏུམསཀྐུཎེཡྻཏྟཱ པུབྦཝོཧཱརཝསེན སམྨཏནྟི ཝུཏྟནྟི དསྶེནྟོ ཨཱཧ ‘‘ཀིཉྩཱཔཱི’’ཏིཨཱདི. ཏནྟི ཨནུཔསམྤནྣབྷཱཝེ ཋིཏཾ. བྱཏྟསྶཱཏི ཝིཡཏྟསྶ. སངྒྷེན ཝཱ ཀཏོཏི ཡོཛནཱཏི. ཏཏིཡཾ.

༤. པཋམསེནཱསནསིཀྑཱཔདཾ

༡༠༨. ཙཏུཏྠེ ཧིམམེཝ ཧིམནྟོ, ཧིམནྟེ ནིཡུཏྟོ ཧེམནྟིཀོ, ཀཱལོཏི ཨཱཧ ‘‘ཧེམནྟཀཱལེ’’ཏི. ཨོཏཱཔེནྟཱ པཀྐམིཾསཱུཏི སམྦནྡྷོ. ཀཱལསདྡསྶ སམྦནྡྷིསདྡཏྟཱ སམྦནྡྷཱཔེཀྑོཏི ཨཱཧ ‘‘ཡསྶ ཀསྶཙཱི’’ཏི. ཧིམཝསྶེནཱཏི ཧིམེན ཙ ཝསྶེན ཙ.

༡༡༠. ‘‘ཝསྶིཀོ’’ཏི ན སངྐེཏཱཏི ཨཝསྶིཀསངྐེཏཱ. ‘‘ཨཊྛ མཱསེ’’ཏི སཱམཉྙཏོ ཝུཏྟེཔི ‘‘ཨཝསྶིཀསངྐེཏེ’’ཏི ཝིསེསིཏཏྟཱ ཧེམནྟིཀགིམྷིཀམཱསཱཡེཝ གཧེཏབྦཱཏི ཨཱཧ ‘‘ཙཏྟཱརོ ཧེམནྟིཀེ’’ཏིཨཱདི. ཡཏྠཱཏི ཡསྨིཾ རུཀྑེ. ན ཨཱུཧདནྟཱིཏི སམྦནྡྷོ. ‘‘ཀཱཀཱ ཝཱ’’ཏི ཨེཏྠ ཝཱསདྡོ སམྤིཎྜནཏྠོ. ཏེནཱཧ ‘‘ཨཉྙེ ཝཱ སཀུནྟཱ’’ཏི. ཏསྨཱཏི ཡསྨཱ ཨནུཛཱནཱཏི, ཏསྨཱ. ཡཏྠཱཏི ཡསྨིཾ རུཀྑེ, ཝིསྶམིཏྭཱ གཙྪནྟཱིཏི ཡོཛནཱ. ཡསྨིནྟི རུཀྑེ, ཀཏྭཱ ཝསནྟཱིཏི ཡོཛནཱ. ཨཊྛ མཱསེ ཨེཝཱཏི སམྦྷཝཏོ ཨཱཧ ‘‘ཡེསུ ཛནཔདེསཱུ’’ཏིཨཱདི ¶ . ཏེསུཔཱིཏི ཛནཔདེསུཔི. ཨཝསྶིཀསངྐེཏེ ཨེཝཱཏི སམྦྷཝཏོ ཨཱཧ ‘‘ཡཏྠཱ’’ཏིཨཱདི. ཡཏྠཱཏི ཡེསུ ¶ ཛནཔདེསུ. ‘‘ཝིགཏཝལཱཧཀཾ ཝིསུདྡྷཾ ནབྷཾ ཧོཏཱི’’ཏི ཨིམིནཱ སཙེ ཨཝིགཏཝལཱཧཀཾ ཨཝིསུདྡྷཾ ནབྷཾ ཧོཏི, ནིཀྑིཔིཏུཾ ན ཝཊྚཏཱིཏི དཱིཔེཏི. ‘‘ཨེཝརཱུཔེ ཀཱལེ’’ཏི པདཾ ‘‘ནིཀྑིཔིཏུཾ ཝཊྚཏཱི’’ཏི པདེ ཨཱདྷཱརོ.

ཨབྦྷོཀཱསིཀེནཱཔཱིཏི ཨབྦྷོཀཱསདྷུཏངྒཡུཏྟེནཱཔི. པིསདྡོ རུཀྑམཱུལིཀསྶ ཨཔེཀྑཀོ. ཝཏྟཾ ཝིཏྠཱརེནྟོ ཨཱཧ ‘‘ཏསྶ ཧཱི’’ཏིཨཱདི. ཏསྶཱཏི ཨབྦྷོཀཱསིཀསྶ. ཧིསདྡོ ཝིཏྠཱརཛོཏཀོ. ཏཏྠེཝཱཏི པུགྒལིཀམཉྩཀེཡེཝ. སངྒྷིཀཾ མཉྩནྟི སམྦནྡྷོ. ཝཱིཏམཉྩཀོཏི ཝཱཡིཏམཉྩཀོ. ཏསྨིནྟི ཝཱིཏམཉྩཀེ. པུརཱཎམཉྩཀོ ནསྶནྟོཔི ཨནགྒྷོཏི ཨཱཧ ‘‘པུརཱཎམཉྩཀོ གཧེཏབྦོ’’ཏི. ཙམྨེན ཨཝནཧིཏབྦོཏི ཨོནདྡྷོ, སོ ཨེཝ ཨོནདྡྷཀོ. གཧེཏྭཱ ཙ པན པཉྙཔེཏྭཱ ནིཔཛྫིཏུཾ ན ཝཊྚཏཱིཏི ཡོཛནཱ. ཨསམཡེཏི ཝསྶིཀསངྑཱཏེ ཨཀཱལེ. ཙཏུགྒུཎེནཱཔཱིཏི ཙཏུཔཊལེནཔི. ཝཊྚནྟི ཝལཱཧཀཱ ཨཱཝཊྚནྟི ཨསྨིཾ སམཡེཏི ཝཊྚུལོ, སོ ཨེཝ ཝཊྚལིཀོ, སཏྟཱཧཾ ཝཊྚལིཀོ, སཏྟཱཧོ ཝཱ ཝཊྚལིཀོ སཏྟཱཧཝཊྚལིཀོ, སོ ཨཱདི ཡེསཾ ཏཱནཱིཏི སཏྟཱཧཝཊྚལིཀཱདཱིནི. ཨཱདིསདྡེན སཏྟཱཧཏོ ཨཱུནཱདྷིཀཱནི གཧེཏབྦཱནི. ཀཱཡཱནུགཏིཀཏྟཱཏི ཀཱཡཾ ཨནུགམཀཏྟཱ ཀཱཡསདིསཏྟཱཏི ཨཏྠོ.

པཎྞཀུཊཱིསཱུཏི པཎྞེན ཚཱདིཏཀུཊཱིསུ. སབྷཱགབྷིཀྑཱུནནྟི ཨཏྟནཱ སབྷཱགབྷིཀྑཱུནཾ, སནྟིཀནྟི སམྦནྡྷོ. ཨནོཝསྶཀེ ཋཱནེཏི ཡོཛནཱ. ལགྒེཏྭཱཏི ལམྦེཏྭཱ, ཨཡམེཝ ཝཱ པཱཋོ. ‘‘སམྨཛྫནི’’ནྟི པདཾ ‘‘གཧེཏྭཱ’’ཏི པདེ ཨཝུཏྟཀམྨཾ, ‘‘ཋཔེཏབྦཱ’’ཏི པདེ ཝུཏྟཀམྨཾ. དྷོཝིཏྭཱཏི སམྨཛྫནིཾ སུདྡྷཾ ཀཏྭཱ. ཨུཔོསཐཱགཱརཱདཱིསཱུཏིཨཱདིསདྡེན པརིཝེཎཱདཱིནི གཧེཏབྦཱནི.

ཡོ པན བྷིཀྑུ གནྟུཀཱམོ ཧོཏི, ཏེནཱཏི ཡོཛནཱ. ཏཏྠཱཏི སཱལཱཡཾ. ཡཏྠ ཀཏྠཙཱིཏི ཡསྨིཾ ཀིསྨིཉྩི ཋཱནེ. པཱཀཏིཀཊྛཱནེཏི པཀཏིཡཱ གཧིཏཊྛཱནེ. ཏཏྲ ཏཏྲེཝཱཏི ཏེསུ ཏེསུ ཙེཏིཡངྒཎཱདཱིསུཡེཝ ¶ . ཨསནསཱལནྟི ཨསནྟི བྷཀྑནྟི ཨསྶཾ སཱལཱཡནྟི ཨསནཱ, ཨསནཱ ཙ སཱ སཱལཱ ཙེཏི ཨསནསཱལཱ, བྷོཛནསཱལཱཏི ཨཏྠོ. ཏཏྲཱཏི ཏསྶ སམྨཛྫནྟསྶ, ཏསྨིཾ ‘‘ཝཏྟཾ ཛཱནིཏབྦ’’ནྟི པཱཋེ ཝཱ. མཛ྄ཛྷཏོཏི པཝིཏྟཏོ, སུདྡྷཊྛཱནཏོཏི ཨཏྠོ. པཱདཊྛཱནཱབྷིམུཁཱཏི སམྨཛྫནྟསྶ པཱདཊྛཱནཾ ཨབྷིམུཁཱ. ཝཱལིཀཱ ཧརིཏབྦཱཏི པཾསུ ཙ ཝཱལིཀཱ ཙ ཨཔནེཏབྦཱ. སམྨུཉྩནཱིསལཱཀཱཡ པརཾ པེལླེཏབྦཱཏི ཨདྷིཔྤཱཡོ. བཧཱིཏི སམྨཛྫིཏབྦཏལཏོ བཧི.

༡༡༡. མསཱརཀོཏཱིཏི ¶ ཨེཏྠ ཨིཏིསདྡོ ནཱམཔརིཡཱཡོ, མསཱརཀོ ནཱམཱཏི ཨཏྠོ. ཨེཝཾ བུནྡིཀཱབདྡྷོཏཱིཏིཨཱདཱིསུཔི. པཱདེ མསིཏྭཱ ཝིཛ྄ཛྷིཏྭཱ ཏཏྠ ཨཊནིཡོ པཝེསེཏབྦཱ ཨེཏྠཱཏི མསཱརཀོ. བུནྡོ ཨེཝ བུནྡིཀོ, པཱདོ, ཏསྨིཾ ཨཱབདྡྷཱ བནྡྷིཏཱ ཨཊནཱི ཡསྶཱཏི བུནྡིཀཱབདྡྷོ. ཀུལཱི༹རསྶ པཱདོ ཝིཡ པཱདོ ཡསྶཱཏི ཀུལཱི༹རཔཱདཀོ, ཡཐཱ ཀུལཱི༹རོ ཝངྐཔཱདོ ཧོཏི, ཨེཝཾ ཝངྐཔཱདོཏི ཝུཏྟཾ ཧོཏི. ཨཱཧཙྩ ཨངྒེ ཝིཛ྄ཛྷིཏྭཱ ཏཏྠ པཝེསིཏོ པཱདོ ཡསྶཱཏི ཨཱཧཙྩཔཱདཀོ. ཨཱཎིནྟི ཨགྒཁིལཾ. མཉྩཏི པུགྒལཾ དྷཱརེཏཱིཏི མཉྩོ. པཱིཋཏི ཝིསམདུཀྑཾ ཧིཾསཏཱིཏི པཱིཋཾ. པཎཝོཏི ཨེཀོ ཏཱུརིཡཝིསེསོ, ཏསྶ སཎྛཱནཾ ཀཏྭཱཏི ཨཏྠོ. ཏཉྷི ཨེཏརཧི བུདྡྷཔཊིམསྶ པལླངྐསཎྛཱནཾ ཧོཏི. ཏནྟི ཀོཙྪཾ. ཀརོནྟི ཀིརཱཏི སམྦནྡྷོ. ཨེཏྠཱཏི སེནཱསནཔརིབྷོགེ. ཧཱིཏི སཙྩཾ. ཏནྟི ཀོཙྪཾ མཧགྒྷཾ ཧོཏི, མཧགྒྷཏྟཱ བྷདྡཔཱིཋནྟིཔི ཝུཙྩཏི. ཡེནཱཏི ཡེན བྷིཀྑུནཱ. ‘‘ཐཱམམཛ྄ཛྷིམསྶཱ’’ཏི པདེན པམཱཎམཛ྄ཛྷིམཾ ནིཝཏྟེཏི.

ཨེཏྠཱཏི ‘‘ཨནཱཔུཙྪཾ ཝཱ གཙྪེཡྻཱ’’ཏི པདེ. ཐེརོ ཨཱཎཱཔེཏཱིཏི ཡོཛནཱ. ཨཱཎཱཔེཏཱིཏི ཙ ཨཱཎ-དྷཱཏུཡཱ ཨེཝ པེསནསངྑཱཏསྶ ཧེཏྭཏྠསྶ ཝཱཙཀཏྟཱ ཎཱཔེསདྡོ སྭཏྠོཝ. སོཏི དཧརོ. ཏཐཱཏི ཡཐཱ ཐེརེན ཝུཏྟོ, ཏཐཱ ཀཏྭཱཏི ཨཏྠོ. ཏཏྠཱཏི དིཝཱཊྛཱནེ, མཉྩཔཱིཋེ ཝཱ. ཏཏོཏི ཋཔནཀཱལཏོ. པརིབུནྡྷེཏི ཧིཾ སེཏཱིཏི པལིབོདྷོ, པརིསདྡོ ཨུཔསགྒོ, སོ ཝིཀཱརཝསེན ཨཉྙཐཱ ཛཱཏོ. སོ པལིབོདྷོ ཨཉྙཏྠ ཨཱཝཱསཱདིཀོ, ཨིདྷ པན ¶ སནྠརཱཔིཏམཉྩཱདིཀོ. སཱཡནྟི སཱཡནྷེ, བྷུམྨཏྠེ ཙེཏཾ ཨུཔཡོགཝཙནཾ. ཐེརོ བྷཎཏཱིཏི སམྦནྡྷོ. ཏཏྠཱཏི མཉྩཔཱིཋེ. ‘‘བཱལོ ཧོཏཱི’’ཏི ཝཏྭཱ ཏསྶ ཨཏྠཾ དསྶེནྟོ ཨཱཧ ‘‘ཨནུགྒཧིཏཝཏྟོ’’ཏི. ཨནུགྒཧིཏཾ ཝཏྟཾ ཡེནཱཏི ཨནུགྒཧིཏཝཏྟོ, ཐེརོ. ཏཛྫེཏཱིཏི ཨུབྦེཛེཏི. ཏསྨིནྟི དཧརེ. ཨསྶཱཏི ཐེརསྶ.

ཨཱཎཏྟིཀྑཎེཡེཝཱཏི ཐེརསྶ པེསནཀྑཎེཡེཝ. དཧརོ ཝདཏཱིཏི ཡོཛནཱ. ‘‘ཐེརོ’’ཏི པདཾ ‘‘ཝཏྭཱ གཙྪཏཱི’’ཏི པདདྭཡེ ཀཏྟཱ, ‘‘ཀཱརེཏབྦོ’’ཏི པདེ ཀམྨཾ. ནནྟི མཉྩཔཱིཋཾ, ‘‘པཉྙཔེཏྭཱ’’ཏིཔདམཔེཀྑིཡ ཨེཝཾ ཝུཏྟཾ. ནནྟི དཧརཾ ཝཱ. ‘‘ཝཏྭཱ’’ཏི པདམཔེཀྑིཡ ཨེཝཾ ཝུཏྟཾ. ཏཏྠེཝཱཏི མཉྩཔཱིཋེཡེཝ. ཨསྶཱཏི ཐེརསྶ. ཏཏྠཱཏི དིཝཱཊྛཱནེ. བྷོཛནསཱལཏོ ཨཉྙཏྠ གཙྪནྟོཏི བྷོཛནསཱལཏོ ནིཀྑམིཏྭཱ མཉྩཔཱིཋཔཉྙཱཔནཊྛཱནཏོ ཨཉྙཾ ཋཱནཾ གཙྪནྟོ, ཐེརོཏི ཡོཛནཱ. ཏཏྠེཝཱཏི དིཝཱཊྛཱནེཡེཝ. ཡཏྲིཙྪཏཱིཏི ཡཾ ཋཱནཾ གནྟུམིཙྪཏཱིཏི ཨཏྠོ. ཨནྟརསནྣིཔཱཏེཏི སཀལཾ ཨཧོརཏྟཾ ཨསནྣིཔཱཏེཏྭཱ ཨནྟརེ སནྣིཔཱཏེ སཏཱིཏི ཡོཛནཱ.

ཏཏྠཱཏི ཏསྨིཾ ཋཱནེ. ཨཱགནྟུཀཱ གཎྷནྟཱིཏི སམྦནྡྷོ. ཏཏོཏི གཎྷནཏོ. ཏེསནྟི ཨཱགནྟུཀཱནཾ ¶ . ཡེཧཱིཏི ཨཱཝཱསིཀོ ཝཱ ཧོཏུ, ཨཱགནྟུཀོ ཝཱ, ཡེཧི བྷིཀྑཱུཧི. ཏེཏི ནིསིནྣཀབྷིཀྑཱུ. ཨུདྡྷཾ པཱལི༹པཱཋཾ སཱརེཏི པཝཏྟེཏཱིཏི ཨུསྶཱརཀོ. དྷམྨཀཐཱཡཾ སཱདྷཱུཏི དྷམྨཀཐིཀོ. ཏསྨིནྟི ཨུསྶཱརཀེ ཝཱ དྷམྨཀཐིཀེ ཝཱ. ཨཧོརཏྟནྟི ཨཧོ ཙ རཏྟི ཙ ཨཧོརཏྟཾ, ཨཙྩནྟསཾཡོགཔདཾ. ཨིཏརསྨིནྟི པཋམཾ ནིསིནྣབྷིཀྑུཏོ ཨཉྙསྨིཾ བྷིཀྑུམྷཱིཏི ཡོཛནཱ. ཨནྟོཨུཔཙཱརཊྛེཡེཝཱཏི ལེཌྜུཔཱཏསངྑཱཏསྶ ཨུཔཙཱརསྶ ཨནྟོ ཋིཏེཡེཝ, ཨནཱདརེ ཙེཏཾ བྷུམྨཾ. སབྦཏྠཱཏི ཨཱཔཏྟིཝཱརཨནཱཔཏྟིཝཱརེསུ.

༡༡༢. ཙིམིལིཀཾ ཝཱཏིཨཱདཱིསུ ཝིནིཙྪཡོ ཨེཝཾ ཝེདིཏབྦོཏི ཡོཛནཱ. ཏནྟི ཙིམིལིཀཏྠརཎཾ. ཨུཏྟརི ཨཏྠརིཏབྦནྟི ཨུཏྟརཏྠརཎནྟི དསྶེནྟོ ¶ ཨཱཧ ‘‘ཨུཏྟརཏྠརཎཾ ནཱམཱ’’ཏིཨཱདི. བྷཱུམིཡནྟི སུདྷཱདིཔརིཀམྨེན ཨཀཏཱཡཾ པཀཏིབྷཱུམིཡཾ. ཙམྨཁཎྜོཏི ཨེཏྠ ཙམྨཾཡེཝ ཨནྟེ ཁཎྜཏྟཱ ཚིནྣཏྟཱ ཙམྨཁཎྜོཏི ཝུཙྩཏི. ནནུ སཱིཧཙམྨཱདཱིནི ན ཀཔྤནྟཱིཏི ཨཱཧ ‘‘ཨཊྛཀཐཱསུ ཧཱི’’ཏིཨཱདི. ཧཱིཏི སཙྩཾ. ཏསྨཱཏི ཡསྨཱ ན དིསྶཏི, ཏསྨཱ. པརིཧརཎེཡེཝཱཏི ཨཏྟནོ སནྟཀནྟི པརིཙྪིནྡིཏྭཱ, པུགྒལིཀནྟི ཝཱ པརིགྒཧེཏྭཱ ཏཾ ཏཾ ཋཱནཾ ཧརཎེཡེཝ. པཱདོ པུཉྪཱིཡཏི སོདྷཱིཡཏི ཨེཏཱཡཱཏི པཱདཔུཉྪནཱིཏི ཀཏྭཱ རཛྫུཔིལོཏིཀཱཡོ པཱདཔུཉྪནཱིཏི ཝུཙྩཏཱིཏི ཨཱཧ ‘‘པཱདཔུཉྪནཱི ནཱམཱ’’ཏིཨཱདི. མཡསདྡལོཔཾ ཀཏྭཱ ཕལཀཔཱིཋནྟི ཝུཏྟནྟི ཨཱཧ ‘‘ཕལཀཔཱིཋཾ ནཱམ ཕལཀམཡཾ པཱིཋ’’ནྟི. ཕལཀཉྩ པཱིཋཉྩ ཕལཀཔཱིཋནྟི ཝཱ དསྶེཏུཾ ཝུཏྟཾ ‘‘ཨཐ ཝཱ’’ཏི. ཨེཏེནཱཏི ‘‘ཕལཀཔཱིཋ’’ནྟི པདེན. ‘‘སངྒཧིཏ’’ནྟི པདེ ཀརཎཾ, ཀཏྟཱ ཝཱ. བཱིཛནིཔཏྟཀནྟི ཙཏུརསྶབཱིཛནཱིཡེཝ སཀུཎཔཏྟསདིསཏྟཱ བཱིཛནིཔཏྟཀཾ, སདིསཏྠེ ཀོ. ‘‘ཨཛ྄ཛྷོཀཱསེ’’ཏི པདཾ ‘‘པཙིཏྭཱ’’ཏི པདེ ཨཱདྷཱརོ. ཨགྒིསཱལཱཡནྟི ཨགྒིནཱ པཙནསཱལཱཡཾ. པབྦྷཱརེཏི ལེཎསདིསེ པབྦྷཱརེ. ཡཏྠཱཏི ཡསྨིཾ ཋཱནེ.

ཡསྨིནྟི པུགྒལེ. ‘‘ཨཏྟནོ པུགྒལིཀམིཝ ཧོཏཱི’’ཏི ཨིམིནཱ ཨནཱཔཏྟཱིཏི དསྶེཏི.

༡༡༣. ཡོ བྷིཀྑུ ཝཱ ལཛྫཱི ཧོཏི, ཏཐཱརཱུཔཾ བྷིཀྑུཾ ཝཱ ཏི ཡོཛནཱ. ‘‘ལཛྫཱི ཧོཏཱི’’ཏི ཝཏྭཱ ཏསྶ ཨཏྠཾ དསྶེནྟོ ཨཱཧ ‘‘ཨཏྟནོ པལིབོདྷཾ ཝིཡ མཉྙཏཱི’’ཏི. ཡོཏི ཨཱཔུཙྪཀོ བྷིཀྑུ. ‘‘ཀེནཙི ཨུཔདྡུཏཾ ཧོཏཱི’’ཏི སངྑེཔེན ཝུཏྟམཏྠཾ ཝིཏྠཱརེནྟོ ཨཱཧ ‘‘སཙེཔི ཧཱི’’ཏིཨཱདི. ཧིསདྡོ ཝིཏྠཱརཛོཏཀོ. ཝུཌྜྷཏརོ བྷིཀྑུ གཎྷཱཏཱིཏི སམྦནྡྷོ. ཏཾ པདེསནྟི སེནཱསནཊྛཔིཏཊྛཱནཾ. ཨཱཔདཱསཱུཏི ཝིཔཏྟཱིསཱུཏི. ཙཏུཏྠཾ.

༥. དུཏིཡསེནཱསནསིཀྑཱཔདཾ

༡༡༦. པཉྩམེ ¶ མཉྩཀབྷིསཱིཏི མཉྩེ ཨཏྠརིཏབྦོ མཉྩཀོ, སོཡེཝ བྷིསཱིཏི མཉྩཀབྷིསི. ཨེཝཾ པཱིཋཀབྷིསིཔི. པཱཝཱརོ ཀོཛཝོཏི དྭེཡེཝ པཙྩཏྠརཎནྟི ཝུཏྟཱཏི ཨཱཧ ‘‘པཱཝཱརོ’’ཏིཨཱདི. ཝུཏྟནྟི ཨཊྛཀཐཱསུ ¶ ཝུཏྟཾ. དུཏིཡཱཏིཀྐམེཏི དུཏིཡཔཱདཱཏིཀྐམེ. སེནཱསནཏོཏི སཙེ ཨེཀཾ སེནཱསནཾ ཧོཏི, ཏཏོ. ཨཐ བཧཱུནི སེནཱསནཱནི ཧོནྟི, སབྦཔཙྪིམསེནཱསནཏོ. ཨེཀོ ལེཌྜུཔཱཏོ སེནཱསནསྶ ཨུཔཙཱརོ ཧོཏི, ཨེཀོ པརིཀྑེཔཱརཧོཏི ཨཱཧ ‘‘དྭེ ལེཌྜུཔཱཏཱ’’ཏི.

སཙེ བྷིཀྑུ, སཱམཎེརོ, ཨཱརཱམིཀོ ཙཱཏི ཏཡོ ཧོནྟི, བྷིཀྑུཾ ཨནཱཔུཙྪིཏྭཱ སཱམཎེརོ ཝཱ ཨཱརཱམིཀོ ཝཱ ན ཨཱཔུཙྪིཏབྦོ. ཨཐ སཱམཎེརོ, ཨཱརཱམིཀོ ཙཱཏི དྭེ ཧོནྟི, སཱམཎེརཾ ཨནཱཔུཙྪིཏྭཱ ཨཱརཱམིཀོཝ ན ཨཱཔུཙྪིཏབྦོཏི དསྶེནྟོ ཨཱཧ ‘‘བྷིཀྑུམྷི སཏཱི’’ཏིཨཱདི. ཏཱིསུཔི ཨསནྟེསུ ཨཱཔུཙྪིཏབྦཝིདྷིཾ དསྶེཏུཾ ཝུཏྟཾ ‘‘ཏསྨིམྤི ཨསཏཱི’’ཏིཨཱདི. ཡེནཱཏི ཨུཔཱསཀེན, ‘‘ཀཱརིཏོ’’ཏི པདེ ཀཏྟཱ. ཏསྶཱཏི ཝིཧཱརསཱམིཀསྶ. ཏསྨིམྤི ཨསཏི གནྟབྦནྟི ཡོཛནཱ. པཱསཱཎེསཱུཏི པཱསཱཎཕལཀེསུ. སཙེ ཨུསྶཧཏཱིཏི སཙེ སཀྐོཏི. ཨུསྶཧནྟེན བྷིཀྑུནཱ ཋཔེཏབྦནྟི ཡོཛནཱ. ཏེཔཱིཏི ཨུཔཱསཀཱཔི, ན སམྤཊིཙྪནྟཱིཏི སམྦནྡྷོ. ཏཏྠཱཏི དཱརུབྷཎྜཱདཱིསུ.

པརིཙྪེདཱཀཱརེན ཝེཎཱིཡཏི དིསྶཏཱིཏི པརིཝེཎཾ. ‘‘ཨཐ ཁོ’’ཏི པདཾ ‘‘ཝེདིཏབྦ’’ནྟི པདེ ཨརུཙིལཀྑཎཾ. ‘‘ཨཱསནྣེ’’ཏི ཨིམིནཱ ཨུཔཙཱརསདྡསྶ ཨུཔཊྛཱནཏྠཨཉྙརོཔནཏྠེ ནིཝཏྟེཏི. ཡསྨཱ ཝམྨིཀརཱསིཡེཝ ཧོཏི, ཏསྨཱཏི ཡོཛནཱ. ཨུཔཙིནནྟཱིཏི ཨུཔཙིཀཱ, ཏཱཧི ནིམིཏྟབྷཱུཏཱཧི པལུཛྫཏི ནསྶཏཱིཏི ཨཏྠོ. སེནཱསནནྟི ཝིཧཱརཾ. ཁཱཡིཏུནྟི ཁཱདིཏུཾ, ཨཡམེཝ ཝཱ པཱཋོ. ཏནྟི མཉྩཔཱིཋཾ. མཉྩཔཱིཋཾ ཝིཧཱརེ ཨཔཉྙཔེཏྭཱ ཝིཧཱརཱུཔཙཱརེ པཉྙཱཔནསྶ ཝིསེསཕལཾ དསྶེཏུཾ ཨཱཧ ‘‘ཝིཧཱརཱུཔཙཱརེ པནཱ’’ཏིཨཱདི. ཝིཧཱརཱུཔཙཱརེ པཉྙཔིཏནྟི སམྦནྡྷོ.

༡༡༨. ‘‘གཙྪནྟེནཱ’’ཏི པདཾ ‘‘གནྟབྦ’’ནྟི པདེ ཀཏྟཱ. ཏཐེཝཱཏི ཡཐཱ པུརིམབྷིཀྑུ ཀརོཏི, ཏཐེཝ. ཝསནྟེན བྷིཀྑུནཱ པཊིསཱམེཏབྦནྟི ཡོཛནཱ. རཏྟིཊྛཱནནྟི རཏྟིཾ ཝསནཊྛཱནཾ.

ཡཱ དཱིགྷསཱལཱ ཝཱ ཡཱ པཎྞསཱལཱ ཝཱ ཨུཔཙིཀཱནཾ ཨུཊྛཱནཊྛཱནཾ ཧོཏི, ཏཏོཏི ཡོཛནཱ. ཏསྨིནྟི ¶ དཱིགྷསཱལཱདིཀེ. ཧཱིཏི སཙྩཾ ¶ , ཡསྨཱ ཝཱ, སནྟིཊྛནྟཱིཏི སམྦནྡྷོ. སིལུཙྩཡོཏི པབྦཏོ, ཏསྨིཾ ལེཎཾ སིལུཙྩཡལེཎཾ, པབྦཏགུཧཱཏི ཨཏྠོ. ཨུཔཙིཀཱསངྐཱཏི ཨུཔཙིཀཱནཾ ཨུཊྛཱནཊྛཱནནྟི ཨཱསངྐཱ. ཏཏོཏི པཱསཱཎཔིཊྛིཡཾ ཝཱ པཱསཱཎཐམྦྷེསུ ཝཱ ཀཏསེནཱསནཱདིཏོ. ཨཱགནྟུཀོ ཡོ བྷིཀྑུ ཨནུཝཏྟནྟོ ཝསཏཱིཏི སམྦནྡྷོ. སོཏི ཨཱགནྟུཀོ བྷིཀྑུ. པུན སོཏི ཨཱགནྟུཀོ བྷིཀྑུཡེཝ. ཏཏོཏི གཧེཏྭཱ ཨིསྶརིཡེན ཝསནཏོ. ཨུབྷོཔཱིཏི ཨཱཝཱསིཀོཔི ཨཱགནྟུཀོཔི དྭེ བྷིཀྑཱུ. ཏེསཱུཏི དྭཱིསུ ཏཱིསུ. པཙྪིམསྶཱཏི སབྦཔཙྪིམསྶ. ཨཱབྷོགེནཱཏི ཨཱབྷོགམཏྟེན མུཏྟི ནཏྠི, ཨཱཔུཙྪིཏབྦམེཝཱཏི ཨདྷིཔྤཱཡོ. ཨཉྙཏོཏི ཨཉྙཱཝཱསཏོ. ཨཉྙཏྲཱཏི ཨཉྙསྨིཾ ཨཱཝཱསེ. ཏཏྠེཝཱཏི ཨཱནཱིཏཱཝཱསེཡེཝ. ཏེནཱཏི ཝུཌྜྷཏརེན, ‘‘སམྤཊིཙྪིཏེ’’ཏི པདེ ཀཏྟཱ. སམྤཊིཙྪིཏེཏི ཝུཌྜྷཏརེན སམྤཊིཙྪིཏེཔི ཨིཏརསྶ གནྟུཾ ཝཊྚཏི ཨཱཔུཙྪིཏཏྟཱཏི ཝདནྟི. ནཊྛཾ ཝཱཏི ནཊྛེ ཝཱ སེནཱསནེ སཏི གཱིཝཱ ན ཧོཏཱིཏི ཡོཛནཱ. ཨཉྙསྶཱཏི ཨཝིསྶཱསིཀཔུགྒལསྶ. ནཊྛཱནཱིཏི ནཊྛེསུ མཉྩཔཱིཋེསུ སནྟེསུ.

ཝུཌྜྷཏརོ བྷིཀྑུ ཙ ཨིསྶརིཡོ ཙ ཡཀྑོ ཙ སཱིཧོ ཙ ཝཱལ༹མིགོ ཙ ཀཎྷསཔྤོ ཙ ཝུཌྜྷ…པེ… ཀཎྷསཔྤཱ, ཏེ ཨཱདཡོ ཡེསཾ ཏེཏི ཝུཌྜྷ…པེ… ཀཎྷསཔྤཱདཡོ, ཏེསུ. ཨཱདིསདྡེན པེཏཱདཡོ སངྒཎྷཱཏི. ཡཏྠཱཏི ཡསྨིཾ ཋཱནེ. ཨསྶཱཏི བྷིཀྑུནོ. ‘‘པལིབུདྡྷོ’’ཏི པདསྶ ཨཏྠཾ དསྶེཏུཾ ཝུཏྟཾ ‘‘ཨུཔདྡུཏོ’’ཏི. པཉྩམཾ.

༦. ཨནུཔཁཛྫསིཀྑཱཔདཾ

༡༡༩. ཚཊྛེ རཱུམྦྷིཏྭཱཏི ནིཝཱརེཏྭཱ, ཨཱཝརཎཾ ཀཏྭཱཏི ཨཏྠོ. ཝསྶགྒེནཱཏི ཝསྶགཎནཱཡ. ཨནུཔཁཛྫཱཏི ཨེཏྠ ཁད ཧིཾསཱཡནྟི དྷཱཏུཔཱཋེསུ (སདྡནཱིཏིདྷཱཏུམཱལཱཡཾ ༡༥ དཀཱརནྟདྷཱཏུ) ཝུཏྟཏྟཱ ཁདསདྡོ ཧིཾསཏྠོ ཧོཏི. ཨནུསམཱིཔཾ ཨུཔགནྟྭཱ ཁདནཾ ཧིཾ སནཾ ནཱམ ཨནུསམཱིཔཾ པཝིསནམེཝཱཏི དསྶེནྟོ ཨཱཧ ‘‘ཨནུཔཝིསིཏྭཱ’’ཏི.

༡༢༠. ‘‘ཛཱན’’ནྟི ¶ ཨེཏྠ ཛཱནནཱཀཱརཾ དསྶེཏུཾ ཝུཏྟཾ ‘‘ཨནུཊྛཱཔནཱིཡོ ཨཡ’’ནྟི. ཏེནེཝཱཏི ཛཱནནཧེཏུནཱ ཨེཝ. ཨསྶཱཏི ‘‘ཛཱན’’ནྟིཔདསྶ. ཧཱིཏི ཝིཏྠཱརཛོཏཀོ. སངྒྷོ པན དེཏཱིཏི སམྦནྡྷོ. ཡསྶཱཏི ཝུཌྜྷཱདཱིསུ ཨཉྙཏརསྶ. ཨེཏྠཱཏི ཝུཌྜྷགིལཱནཱདཱིསུ. གིལཱནསྶཔི དེཏཱིཏི ཡོཛནཱ. ‘‘གིལཱནོ’’ཏི པདཾ ‘‘ན པཱིལེ༹ཏབྦོ, ཨནུཀམྤིཏབྦོ’’ཏིཔདདྭཡེ ཝུཏྟཀམྨཾ. ‘‘ཀཱམཉྩཱ’’ཏི པདསྶ ཨནུགྒཧཏྠཛོཏཀཏྟཱ པནསདྡོ གརཧཏྠཛོཏཀོ.

༡༢༡. མཉྩཔཱིཋཱནཾ ¶ ཨུཔཙཱརོ ནཱམཱཏི སམྦནྡྷོ. ཡཏོཏི ཡཏོ ཀུཏོཙི ཋཱནཏོ. ཡཱཝ མཉྩཔཱིཋཾ ཨཏྠི, ཏཱཝ ཨུཔཙཱརོ ནཱམཱཏི ཡོཛནཱ. ཏསྨིཾ ཨུཔཙཱརེ ཋིཏསྶ བྷིཀྑུནོ ཨུཔཙཱརེཏི སམྦནྡྷོ.

‘‘ཨབྷིནིསཱིདཏི ཝཱ ཨབྷིནིཔཛྫཏི ཝཱ’’ཏི ཨེཏྠ ཝཱསདྡསྶ ཨནིཡམཝིཀཔྤཏྠཾ དསྶེཏུཾ ཝུཏྟཾ ‘‘ཨབྷིནིསཱིདནམཏྟེནཱ’’ཏིཨཱདི.

༡༢༢. ཨིཏོཏི ཝཱརཏོ. ཨིདྷཱཏི ཨིམསྨིཾ པཱཙིཏྟིཡཝཱརེ. ཡཐཱ ཝུཏྟོ, ཨེཝནྟི སམྦནྡྷོ. སབྦཏྠེཝཱཏི སབྦེསུ ཨེཝ ཝིཧཱརཔརིཝེཎེསུ. ཨསྶཱཏི ཝིསབྷཱགཔུགྒལསྶ. ཨིདྷཱཔཱིཏི ཨིམསྨིམྤི སིཀྑཱཔདེ. ཏཏྠཱཏི ཝིསྶཱསིཀཔུགྒལེ.

༡༢༣. པཱལི༹ཡཾ ‘‘ཨཱཔདཱསཱུ’’ཏིཔདཾ ‘‘པཝིསཏཱི’’ཏི ཨཛ྄ཛྷཱཧཱརཔདེན སམྦནྡྷིཏབྦནྟི ཨཱཧ ‘‘ཨཱཔདཱསཱུཏིཨཱདཱི’’ཏི. ཚཊྛཾ.

༧. ནིཀྐཌྜྷནསིཀྑཱཔདཾ

༡༢༦. སཏྟམེ ཡེ པཱསཱདཱ ཝཱ ཡཱནི ཝཱ ཙཏུསྶཱལཱནཱིཏི ཡོཛནཱ. ཙཏསྶོ བྷཱུམིཡོ ཨེཏེསནྟི ཙཏུབྷཱུམཀཱ. ཨེཝཾ པཉྩབྷཱུམཀཱ. ཀོཊྛཀཱནཱིཏི དྭཱརཀོཊྛཀཱནི. ‘‘པཱསཱདཱ’’ཏིཔདམཔེཀྑིཡ ཝུཏྟཾ ‘‘ཡེ’’ཏིཔདཾ, ‘‘ཙཏུསྶཱལཱནཱི’’ཏིཔདེ ཨཔེཀྑིཏེ ‘‘ཡཱནཱི’’ཏི ལིངྒཝིཔལླཱསོ ཧོཏི. སེནཱསནེསུ ཨེཀེན པཡོགེན བཧུཀེ དྭཱརེ བྷིཀྑུཾ ཨཏིཀྐཱམེཏཱིཏི སམྦནྡྷོ. ནཱནཱཔཡོགེཧི ནཱནཱདྭཱརེ བྷིཀྑུཾ ཨཏིཀྐཱམེནྟསྶཱཏི ཡོཛནཱ. ‘‘དྭཱརགཎནཱཡཱ’’ཏིཨིམིནཱ པཡོགགཎནཱཡཱཏིཔི ཨཏྠཾ ཉཱཔེཏི ཨཏྠཏོ པཱཀཊཏྟཱ. ཨནཱམསིཏྭཱཏི ཨཚུཔིཏྭཱ.

ཨེཏྟཀཱནཱིཏི ¶ ཨེཏཔམཱཎཱནི. ཏསྶཱཏི ནིཀྐཌྜྷིཡམཱནསྶ བྷིཀྑུསྶ. གཱལ༹ྷནྟི དལ༹ྷཾ.

༡༢༧. ཨིདྷཱཔཱིཏི ཨིམསྨིམྤི སིཀྑཱཔདེ. པིསདྡོ པུརིམསིཀྑཱཔདཱཔེཀྑོ. སབྦཏྠཱཏི སབྦེསུ སིཀྑཱཔདེསུ. ཡཏྲཱཏི ཡསྨིཾ སིཀྑཱཔདེ.

༡༢༨. སོཏི བྷཎྜནཀཱརཀཀལཧཀཱརཀོ བྷིཀྑུ. ཧཱིཏི སཙྩཾ, ཡསྨཱ ཝཱ. པཀྑནྟི ཨཏྟནོ ¶ པཀྑཾ. ནིཀྐཌྜྷིཡམཱནཔུགྒལཔཀྑེ ཨུམྨཏྟཀསྶ ནིཀྐཌྜྷཏི ཝཱ ནིཀྐཌྜྷཱཔེཏི ཝཱཏི སམྦནྡྷིཏབྦཾ. ནིཀྐཌྜྷཀཔུགྒལཔཀྑེ ཨུམྨཏྟཀསྶ ཨནཱཔཏྟཱིཏི སམྦནྡྷིཏབྦནྟི. སཏྟམཾ.

༨. ཝེཧཱསཀུཊིསིཀྑཱཔདཾ

༡༢༩. ཨཊྛམེ ཨཙྪནྣཏལཏྟཱ ཨུཔརི ཝེཧཱསོ ཨེཏིསྶཱཏི ཨུཔརིཝེཧཱསཱ, སཱ ཙ སཱ ཀུཊི ཙེཏི ཨུཔརིཝེཧཱསཀུཊཱིཏི དསྶེནྟོ ཨཱཧ ‘‘ཨུཔརིཨཙྪནྣཏལཱཡཱ’’ཏི. ཏསྶཱ ཀུཊིཡཱ སརཱུཔཾ དསྶེཏུཾ ཝུཏྟཾ ‘‘དྭིབྷཱུམིཀཀུཊིཡཱ ཝཱ’’ཏིཨཱདི. ‘‘མཉྩ’’ནྟི པདཾ ‘‘ཨབྷཱི’’ཏིཨུཔསགྒེན སམྦནྡྷིཏབྦནྟི ཨཱཧ ‘‘ཨབྷིབྷཝིཏྭཱ’’ཏི. ‘‘ནིསཱིདཏཱི’’ཏི ཀིརིཡཱཔདེན ཝཱ ཡོཛེཏབྦོཏི ཨཱཧ ‘‘བྷུམྨཏྠེ ཝཱ’’ཏིཨཱདི. ཨེཏནྟི ‘‘མཉྩ’’ནྟིཔདེ ཨེཏཾ ཝཙནཾ ཨུཔཡོགཝཙནཾ. ཨཐ ཝཱ ཨེཏནྟི ‘‘མཉྩ’’ནྟིཔདཾ ཨུཔཡོགཝཙནཝནྟཾ. ཨེཏྠ ཙ པཙྪིམསམྦནྡྷེ ཨབྷཱིཏྱཱུཔསགྒོ པདཱལངྐཱརམཏྟོ པདཝིབྷཱུསནམཏྟོཏི ཨཱཧ ‘‘ཨབྷཱིཏི ཨིདཾ པནཱ’’ཏིཨཱདི. པདསོབྷཎཏྠནྟི པདསྶ ཨལངྐཱརཏྠཾ ཝིབྷཱུསནཏྠཾ པདསྶ ཕུལླིཏཏྠནྟི ཨདྷིཔྤཱཡོ. ནིཔཏིཏྭཱཏི ཨེཏྠ ནཱིཏྱཱུཔསགྒོ དྷཱཏྭཏྠཱནུཝཏྟཀོཏི ཨཱཧ ‘‘པཏིཏྭཱ’’ཏི. ཨཐ ཝཱ ནིཀྑནྟཏྠཝཱཙཀོཏི ཨཱཧ ‘‘ནིཀྑམིཏྭཱ ཝཱ’’ཏི. ཨིམིནཱ ནཱིཏྱཱུཔསགྒསྶ དྷཱཏྭཏྠཝིསེསཀཏཾ དཱིཔེཏི, ནིཀྑནྟོ ཧུཏྭཱ པཏིཏྭཱཏི ཨཏྠོ. ཧཱིཏི ཡསྨཱ. ཨཱཎཱིཏི ཨགྒཁཱིལཱ.

༡༣༡. ཡཱ ཀུཊི སཱིསཾ ན གྷཊྚེཏི, སཱ ཨསཱིསགྷཊྚཱ ནཱམཱཏི ཡོཛནཱ. ‘‘པམཱཎམཛ྄ཛྷིམསྶཱ’’ཏིཨིམིནཱ ཐཱམམཛ྄ཛྷིམཾ ནིཝཏྟེཏི. སབྦཧེཊྛིམཱཧཱིཏི ¶ སབྦེསཾ དབྦསམྦྷཱརཱནཾ ཧེཊྛཱ ཋིཏཱཧི. ཏུལཱཧཱིཏི གེཧཐམྦྷཱནམུཔརི ཝིཏྠཱརཝསེན ཋིཏེཧི ཀཊྛཝིསེསེཧི. ཨིམིནཱ ཨཊྛཀཐཱཝཙནེན ཙ ཏུལཱཡ སརཱུཔཾ པཱཀཊཾ. ཀེཙི པན ཏུལཱཡ སརཱུཔཾ ཨཉྙཐཱ ཝདནྟི. ཨེཏེནཱཏི ‘‘མཛ྄ཛྷིམསྶ པུརིསསྶ ཨསཱིསགྷཊྚཱ’’ཏིཝཙནེན དསྶིཏཱ ཧོཏཱིཏི སམྦནྡྷོ. ཧཱིཏི སཙྩཾ. ཡཱ ཀཱཙི ཀུཊི ཝུཙྩཏཱིཏི ཡོཛནཱ. ཨུཔརཱིཏི དྭིབྷཱུམིཀཀུཊིཡཾ བྷཱུམིཏོ ཨུཔརི བྷཱུམིཡཾ. ཨཙྪནྣཏལཱཏི ཨནུལློཙཏལཱ, ཨཝིཏཱནཏལཱཏི ཨཏྠོ. ཨིདྷ པནཱཏི ཨིམསྨིཾ པན སིཀྑཱཔདེ.

༡༣༣. ཧཱིཏི སཙྩཾ, ཡསྨཱ ཝཱ. ཡཱཡནྟི ཡཱ ཨཡཾ ཀུཊི. ཏཏྠཱཏི ཏསྶཾ སཱིསགྷཊྚཀུཊིཡཾ. ཨནོཎཏེན བྷིཀྑུནཱཏི ཡོཛནཱ. ཡསྶཱཏི ཀུཊིཡཱ. ཨཔརིབྷོགནྟི ན པརིབྷུཉྫིཏབྦཾ, ན པརིབྷུཉྫནཱརཧནྟི ཨཏྠོ. པཏཱཎཱིཏི པཏནསྶ ནིཝཱརཎཱ ཨཱཎི ཨགྒཁཱིལཱ. སཱ ཧི ཨཱབནྡྷཾ ནཡཏི པཝཏྟེཏཱིཏི ཨཱཎཱིཏི ཝུཙྩཏི. ཡཏྠཱཏི ཡསྨིཾ མཉྩཔཱིཋེ ¶ . ན ནིཔྤཏནྟཱིཏི ནིཀྑནྟོ ཧུཏྭཱ ན པཏནྟི. ཨཱཧཙྩཔཱདཀེཏི ཨངྒེ ཨཱཧནིཏྭཱ ཝིཛ྄ཛྷིཏྭཱ ཏཏྠ པཝེསིཏཔཱདཀེ. ནཱགདནྟཀཱདཱིསཱུཏི ནཱགསྶ དནྟོ ཝིཡཱཏི ནཱགདནྟཀོ, སདིསཏྠེ ཀོ, སོ ཨཱདི ཡེསཾ ཏེཏི ནཱགདནྟཀཱདཡོ, ཏེསུ. ཨཱདིསདྡེན བྷིཏྟིཁཱིལཱདཡོ སངྒཎྷཱཏཱིཏི. ཨཊྛམཾ.

༩. མཧལླཀཝིཧཱརསིཀྑཱཔདཾ

༡༣༥. ནཝམེ པིཊྛསངྒྷཱཊསྶཱཏི དྭཱརབཱཧཱཡ. སཱ ཧི པིཊྛེ དྭིནྣཾ ཀཝཱཊཱནཾ སཾ ཨེཀཏོ གྷཱཊོ གྷཊནཾ སམཱགམོ ཨེཏསྶཏྠཱིཏི པིཊྛསངྒྷཱཊོཏི ཝུཙྩཏི. ཀུརུནྡིཡཾ ཝུཏྟནྟི སམྦནྡྷོ. མཧཱཨཊྛཀཐཱཡཾ ཝུཏྟནྟི ཡོཛནཱ. ཏནྟི མཧཱཨཊྛཀཐཱཡ ཝུཏྟཝཙནཾ. ཨེཝཾ ‘‘ཏདེཝཱ’’ཏི ཨེཏྠཱཔི. ཧཱིཏི སཙྩཾ, ཡསྨཱ ཝཱ. བྷགཝཏཱཔཱིཏི ན མཧཱཨཊྛཀཐཱཙརིཡེཧི ཨེཝ ཝུཏྟཾ, ཨཐ ཁོ བྷགཝཏཱཔི ཀཏོཏི ཡོཛནཱ. དྭཱརབནྡྷེན ཨགྒལ༹སྶ ཨཝིནཱབྷཱཝཏོ ‘‘ཨགྒལ༹ཊྛཔནཱཡཱ’’ཏི ཝུཏྟེཔི ཨགྒལེ༹ན སཧ དྭཱརབནྡྷཊྛཔནཱཡཱཏི ཨཏྠོཝ གཧེཏབྦོཏི ཨཱཧ ‘‘སཀཝཱཊཀདྭཱརབནྡྷཊྛཔནཱཡཱ’’ཏི. ཨགྒལོ༹ཏི ཀཝཱཊཕལཀོ. ཨིམམེཝཏྠནྟི ¶ མཡཱ ཝུཏྟཾ ཨིམཾ ཨེཝ ཨཏྠཾ སནྡྷཱཡཱཏི སམྦནྡྷོ. ཨེཏྠཱཏི ‘‘ཨགྒལ༹ཊྛཔནཱཡཱ’’ཏིཝཙནེ. ཨདྷིཔྤཱཡོཏི བྷགཝཏོ ཨབྷིསནྡྷི. ཧི-སདྡོ ཝིཏྠཱརཛོཏཀོ. ཀམྤཏཱིཏི བྷུསཾ ཀམྤཏི. ཙལཏཱིཏི ཨཱིསཾ ཙལཏི. ཏེནཱཏི ཏེན སིཐིལཔཏནཧེཏུནཱ. མཱཏིཀཱཡཾ, པདབྷཱཛནཱིཡཉྩ ‘‘ཨགྒལ༹ཊྛཔནཱཡཱ’’ཏིཔདསྶ སམྦནྡྷཱབྷཱཝཏོ ཏསྶ སམྦནྡྷཾ དསྶེཏུཾ ཝུཏྟཾ ‘‘ཏཏྠཱ’’ཏིཨཱདི. ཏཏྠ ཏཏྠཱཏི ‘‘ཨགྒལ༹ཊྛཔནཱཡཱ’’ཏིཝཙནེ ན ཝུཏྟནྟི སམྦནྡྷོ. ཨཏྠསྶ ཀཱརཎསྶ ཨུཔྤཏྟི ཨཏྠུཔྤཏྟི, སཱཡེཝ ཨཊྛུཔྤཏྟཱིཏི ཝུཙྩཏི ཏྠཀཱརསྶ ཊྛཀཱརཾ ཀཏྭཱ. ཨདྷིཀཱརཏོ དཊྛབྦོཏི ཡོཛནཱ.

ཡཾ པན ཝཙནཾ ཝུཏྟནྟི སམྦནྡྷོ. ཡསྶཱཏི མཧཱཝིཧཱརསྶ. ཨུཔརཱིཏི དྭཱརཏོ ཨུཔརི. ཏཱིསུ དིསཱསཱུཏི ཨུབྷོསུ པསྶེསུ, ཨུཔརཱིཏི ཏཱིསུ དིསཱསུ. ཏཏྲཱཔཱིཏི ཁུདྡཀེ ཝིཧཱརེཔི. སཱཏི བྷིཏྟི. ཨཔརིཔཱུརཨུཔཙཱརཱཔཱིཏི སམནྟཱ ཀཝཱཊཔམཱཎེན ཨཔརིཔཱུརཨུཔཙཱརཱཔི. ཨུཀྐཊྛཔརིཙྪེདེནཱཏི ཨུཀྐཾསཔམཱཎེན. ཧཏྠཔཱསཏོ ཨཏིརེཀཾ ན ལིམྤིཏབྦོཏི ཨདྷིཔྤཱཡོ. ཏཱིསུ དིསཱསུ ཨེཝ ལིམྤིཏབྦོ ན ཧོཏི, ལེཔོཀཱསེ སཏི ཨདྷོབྷཱགེཔི ལིམྤིཏབྦོཏི ཨཱཧ ‘‘སཙེ པནསྶཱ’’ཏིཨཱདི. ཨསྶཱཏི ཝིཧཱརསྶ. ཨཱལོཀཾ སནྡྷེནྟི པིདཧནྟཱིཏི ‘‘ཨཱལོཀསནྡྷཱི’’ཏི ཝུཏྟེ ཝཱཏཔཱནཀཝཱཊཀཱཡེཝཱཏི དསྶེནྟོ ཨཱཧ ‘‘ཝཱཏཔཱནཀཝཱཊཀཱ ཝུཙྩནྟཱི’’ཏི. ཝཱཏཾ པིཝཏཱིཏི ཝཱཏཔཱནཾ, དྭཱརཾ, ཏསྨིཾ ཋིཏཱ ཀཝཱཊཀཱ ཝཱཏཔཱནཀཝཱཊཀཱ. ཏེཏི ཝཱཏཔཱནཀཝཱཊཀཱ པཧརནྟཱིཏི སམྦནྡྷོ. ཨེཏྠཱཏི ཨཱལོཀསནྡྷིམྷི. སབྦདིསཱསཱུཏི ཨུབྷོསུ པསྶེསུ, ཧེཊྛཱ, ཨུཔརཱིཏི ¶ ཙཏཱུསུ དིསཱསུ. ‘‘ཏསྨཱ’’ཏིཔདཾ ‘‘ལིམྤིཏབྦོ ཝཱ ལེཔཱཔེཏབྦོ ཝཱ’’ཏིཔདདྭཡེ ཧེཏུ. ཨེཏྠཱཏི ‘‘ཨཱལོཀསནྡྷིཔརིཀམྨཱཡཱ’’ཏིཔདེ.

ཨིམིནཱཏི སེཏཝཎྞཱདིནཱ. སབྦམེཏནྟི ཨེཏཾ སབྦཾ སེཏཝཎྞཱདིཀཾ.

ཡནྟི ཀིཙྩཾ. ཀཏྟབྦཾ ཀིཙྩནྟི སམྦནྡྷོ. སདྡནྟརབྱཝཧིཏོཔི དྭཏྟིསདྡོ པརིཡཱཡསདྡེན སམཱསོ ཧོཏཱིཏི ཨཱཧ ‘‘ཚདནསྶ དྭཏྟིཔརིཡཱཡ’’ནྟི. དྭེ ཝཱ ཏཡོ ཝཱ པརིཡཱཡཱ སམཱཧཊཱཏི དྭཏྟིཔརིཡཱཡཾ ¶ , སམཱཧཱརེ དིགུ, ཏིསདྡེ པརེ དྭིསྶ ཨཀཱརོ ཧོཏི. པརིཀྑེཔོཏི ཨནུཀྐམེན པརིཀྑེཔོ. ཨཔཏྱཱུཔསགྒསྶ པཊིསེདྷཝཱཙཀཏྟཱ ‘‘ཨཧརིཏེ’’ཏི ཝུཏྟཾ. ཨེཏྠཱཏི ‘‘ཨཔཧརིཏེ’’ཏི པདེ. ‘‘ཧརིཏ’’ནྟི ཨིམིནཱ ཨདྷིཔྤེཏནྟི སམྦནྡྷོ. ཨཱདིཀཔྤཀཱལེ ཨཔརཎྞཏོ པུབྦེ པཝཏྟཾ ཨནྣཾ པུབྦཎྞཾ, ཨཔརསྨིཾ པུབྦཎྞཏོ པཙྪཱ པཝཏྟཾ ཨནྣཾ ཨཔརཎྞཾ, ནཀཱརདྭཡསྶ ཎཀཱརདྭཡཾ ཀཏྭཱ. ཏེནེཝཱཏི ཨདྷིཔྤེཏཏྟཱ ཨེཝ.

ཝུཏྟནྟི ཝཔིཏཾ, ཡཐཱ ‘‘སུམེདྷབྷཱུཏོ བྷགཝཱ’’ཏིཨེཏྠ བོདྷིཾ ཨསམྤཏྟོཔི བོདྷིསཏྟོ སུམེདྷབྷཱུཏོ ‘‘བྷགཝཱ’’ཏི ཝུཙྩཏི ཨཝསྶམྦྷཱཝིཡཏྟཱ, ཨེཝཾ ཧརིཏཾ ཨསམྤཏྟམྤི ཁེཏྟཾ ‘‘ཧརིཏ’’ནྟི ཝུཙྩཏི ཨཝསྶམྦྷཱཝིཡཏྟཱཏི ཨཏྠཾ དསྶེཏི ‘‘ཡསྨིམྤི ཁེཏྟེ’’ཏིཨཱདིནཱ.

ཨཧརིཏེཡེཝཱཏི ཧརིཏཝིརཧེ ཨེཝ ཁེཏྟེཏི ཡོཛནཱ. ཏཏྲཱཔཱིཏི ཨཧརིཏཁེཏྟེཔི. ‘‘པིཊྛིཝཾསསྶཱ’’ཏིཔདཾ ‘‘པསྶེ’’ཏིཔདེ སཱམྱཏྠཚཊྛཱི, ཨིམིནཱ པཀཏིགེཧཾ དསྶེཏི. ‘‘ཀཱུཊཱགཱརཀཎྞིཀཱཡཱ’’ཏིཔདཾ ‘‘ཨུཔརི, ཐཱུཔིཀཱཡཱ’’ཏིཔདེ སཱམྱཏྠཚཊྛཱི, ཨིམིནཱ ཨེཀཀཱུཊཡུཏྟེ མཱལཱ༹དིཀེ དསྶེཏི. ཋིཏཾ བྷིཀྑུནྟི སམྦནྡྷོ. ནིསིནྣཀཾ ཡཾཀཉྩི ཛནནྟི ཡོཛནཱ. ཏསྶཱཏི ཋིཏཊྛཱནསྶ. ཨནྟོཏི ཨབྦྷནྟརེ, ཧི ཡསྨཱ ཨཡཾ ཨོཀཱསོ པཏནོཀཱསོཏི ཡོཛནཱ.

༡༣༦. ཚཱདིཏཾ ནཱམཱཏི ཨེཏྠ ཚཱདིཏསདྡོ བྷཱཝཏྠོ ཧོཏི, ཏེནཱཧ ‘‘ཚཱདན’’ནྟི. ཨུཛུཀམེཝཱཏི ཚདནུཊྛཱཔནཏོ ཨུདྡྷཾ ཨུཛུཀཾ ཨེཝ. ཏནྟི ཚཱདནཾ. ཨཔནེཏྭཱཔཱིཏི ནཱསེཏྭཱཔི. ཏསྨཱཏི ཡསྨཱ ལབྦྷཏི, ཏསྨཱ, པཀྐམིཏབྦནྟི སམྦནྡྷོ. པརིཀྑེཔེནཱཏི པརིཝཱརེན ཚཱདེནྟསྶཱཏི ཡོཛནཱ. ཨིདྷཱཔཱིཏི པརིཡཱཡཚཱདནེཔི ཨདྷིཊྛཧིཏྭཱཏི སམྦནྡྷོ. ཏུཎྷཱིབྷཱུཏེནཱཏི ཏུཎྷཱིབྷཱུཏོ ཧུཏྭཱ. ཚདནུཔརཱིཏི ཚདནསྶ ཨུཔརི. ཧཱིཏི སཙྩཾ. ‘‘ཏཏོ ཙེ ཨུཏྟརི’’ནྟི ཨེཏྠ ཏཏོ དྭཏྟིཔརིཡཱཡཏོ ཨུཔརཱིཏི དསྶེནྟོ ཨཱཧ ‘‘ཏིཎྞཾ མགྒཱནཾ ཝཱ’’ཏིཨཱདི.

༡༣༧. ཀརེན ¶ ¶ ཧཏྠེན ལུནིཏབྦོ, ཚིནྡིཏབྦོ, ལཱཏབྦོ གཧེཏབྦོཏི ཝཱ ཀརལོ༹ཏི ཀཏེ ཨཏྠཔཀརཎཱདིཏོ ཏིཎམུཊྛི ཨེཝཱཏི ཨཱཧ ‘‘ཏིཎམུཊྛིཡ’’ནྟི. ནཝམཾ.

༡༠. སཔྤཱཎཀསིཀྑཱཔདཾ

༡༤༠. དསམེ ‘‘ཛཱན’’ནྟི གཙྪནྟཱདིགཎོཏི ཨཱཧ ‘‘ཛཱནནྟོ’’ཏི. སཾ ཝིཛྫཏི པཱཎོ ཨེཏྠཱཏི སཔཱཎཀཾ. ཨེཏནྟི ཨུདཀཾ. སཡཾ ཛཱནནྟོཔི པརེན ཛཱནཱཔེནྟོཔི ཛཱནཱཏིཡེཝ ནཱམཱཏི ཨཱཧ ‘‘ཡཐཱ ཏཐཱ ཝཱ’’ཏི. སཔཱཎཀཾ ཨུདཀནྟི ཀརཎཏྠེ ཙེཏཾ ཨུཔཡོགཝཙནཾ, ཏེནཱཧ ‘‘ཏེན ཨུདཀེནཱ’’ཏི. པུབྦེཏི པཐཝིཁཎནསིཀྑཱཔདཱདིཀེ.

ཏཏྠཱཏི ‘‘སིཉྩེཡྻ ཝཱ སིཉྩཱཔེཡྻ ཝཱ’’ཏིཔདེ. དྷཱརནྟི སོཏཾ. མཱཏིཀཾ པམུཁནྟི མཱཏིཀཾ ཨབྷིམུཁཾ. ཏཏྠ ཏཏྠཱཏི ཏསྨིཾ ཏསྨིཾ ཋཱནེ. ཨཉྙཏོ ཋཱནཏོ ཨཉྙཾ ཋཱནཾ ནེཏཱིཏི ཡོཛནཱ. ‘‘སཔཱཎཀཾ ཨུདཀ’’ནྟི སཱམཉྙཝཙནསྶཔི ཝིསེསེ ཨཝཊྛཱནཏོ, ཝིསེསཏྠིནཱ ཙ ཝིསེསསྶ ཨནུཔཡོཛིཏབྦཏོ ཨིདྷ ཝིསེསཨུདཀནྟི སནྡྷཱཡབྷཱསིཏཏྠཾ དསྶེནྟོ ཨཱཧ ‘‘ཨིདཾ པནཱ’’ཏིཨཱདི. ཨིདཾ པན ན ཝུཏྟནྟི སམྦནྡྷོ. ཡནྟི ཨུདཀཾ ‘‘གཙྪཏཱི’’ཏིཔདེ ཀཏྟཱ. ཡཏྠཱཏི ཡསྨིཾ ཨུདཀེཏི. དསམཾ.

བྷཱུཏགཱམཝགྒོ དུཏིཡོ.

༣. ཨོཝཱདཝགྒོ

༡. ཨོཝཱདསིཀྑཱཔད-ཨཏྠཡོཛནཱ

༡༤༤. བྷིཀྑུནིཝགྒསྶ པཋམེ ཏེསནྟི ཐེརཱནཾ. མཧཱཀུལེཧི ནིཀྑམིཏྭཱ པབྦཛིཏཱཏི ཡོཛནཱ. ཀུལདྷཱིཏརོ ཝིཛྫམཱནགུཎཾ ཀཐཡནྟཱིཏི ¶ སམྦནྡྷོ. ‘‘ཉཱཏིམནུསྶཱན’’ནྟིཔདཾ ‘‘ཀཐཡནྟཱི’’ཏིཔདེ སམྤདཱནཾ. ཀུཏོཏི ཀསྶ ཐེརསྶ སནྟིཀཱཏི ཨཏྠོ. ཏེསནྟི ཐེརཱནཾ གུཎནྟི སམྦནྡྷོ. ‘‘ཀཐེཏུ’’ནྟིཔདམཔེཀྑིཏྭཱ ‘‘ཝིཛྫམཱནགུཎེ’’ཏི ཝཏྟབྦེ ཨཝཏྭཱ ‘‘ཝཊྚནྟཱི’’ཏིཔདམཔེཀྑིཡ ¶ ‘‘ཝིཛྫམཱནགུཎཱ’’ཏི ཝུཏྟཾ. ཧཱིཏི སཙྩཾ, ཡསྨཱ ཝཱ. ཏཏོཏི ཀཐནཀཱརཎཱ ཨབྷིཧརིཾསཱུཏི སམྦནྡྷོ. ཏེནཱཏི ཨབྷིཧརཎཧེཏུནཱ.

ཏེསནྟི ཚབྦགྒིཡཱནཾ. ཏཱསཱུཏི བྷིཀྑུནཱིསུ. ‘‘བྷིཀྑུནིཡོ’’ཏིཔདཾ ‘‘ཨུཔསངྐམིཏྭཱ’’ཏིཔདེ ཀམྨཾ. ཚབྦགྒིཡཱནཾ བྷིཀྑུནཱིསུ ཨུཔསངྐམནཾ ལཱབྷཏཎྷཱཡ ཧོཏི, བྷིཀྑུནཱིནཾ ཚབྦགྒཱིསུ ཨུཔསངྐམནཾ ཙལཙིཏྟཏཱཡ ཧོཏཱིཏི ཨཉྙམཉྙཱུཔསངྐམནྟཱནཾ ཝིསེསོ. ཏིརཙྪཱནབྷཱུཏཱ ཀཐཱ ཏིརཙྪཱནཀཐཱ ནིརཏྠཀཀཐཱཏི དསྶེནྟོ ཨཱཧ ‘‘ཏིརཙྪཱནཀཐནྟཱི’’ཏི. སགྒམགྒགམནེཔཱིཏི པིསདྡོ མོཀྑགམནེ པན ཀཱ ནཱམ ཀཐཱཏི དསྶེཏི. རཱཛཱནོ ཨཱརབྦྷ པཝཏྟཱ ཀཐཱ རཱཛཀཐཱ. ཨཱདིསདྡེན ཙོརཀཐཱདཡོ སངྒཎྷཱཏི.

༡༤༧. ཏེ བྷིཀྑཱུཏི ཚབྦགྒིཡཱ བྷིཀྑཱུ བྷཝེཡྻུནྟི སམྦནྡྷོ. ཨདིཊྛཾ སཙྩཾ ཡེཧཱིཏི ཨདིཊྛསཙྩཱ, ཏེསཾ བྷཱཝོ ཨདིཊྛསཙྩཏྟཾ, ཏསྨཱ ཨདིཊྛསཙྩཏྟཱ བནྡྷིཏྭཱཏི ཡོཛནཱ. ནེསནྟི ཚབྦགྒིཡཱནཾ. ཨཉྙེནེཝ ཨུཔཱཡེནཱཏི ཨལདྡྷསམྨུཏིཏོ ཨཉྙེནེཝ ལདྡྷསམྨུཏིསངྑཱཏེན ཀཱརཎེན ཀཏྟུཀཱམོཏི སམྦནྡྷོ. པརཏོཏི པརསྨིཾ པཙྪཱ, ཨུཔརཱིཏི ཨཏྠོ. ཀརོནྟོ ཝཱཏི པརིབཱཧིརེ ཀརོནྟོ ཨེཝ ཧུཏྭཱ ཨཱཧཱཏི ཡོཛནཱ. ཧཱིཏི སཙྩཾ, ཡསྨཱ ཝཱ. ཡསྨཱ ན བྷཱུཏཔུབྦཱནི, ཨིཏི ཏསྨཱ པརིབཱཧིརཾ ཀརོནྟོ ཝཱཏི ཨཏྠོ.

ཏཏྠཱཏི ‘‘ཨནུཛཱནཱམཱི’’ཏིཨཱདིཝཙནེ. སཱིལཝཱཏི ཨེཏྠ ཝནྟུསདྡོ པསཾསཏྠེ ཙ ཨཏིསཡཏྠེ ཙ ནིཙྩཡོགཏྠེ ཙ ཧོཏི. ཏསྶཱཏི ལདྡྷསམྨུཏིཀསྶ. ཏནྟི སཱིལཾ. པཱཏིམོཀྑསཾཝརསདྡཱནཾ ཀམྨདྷཱརཡབྷཱཝཾ, ཏེཧི ཙ སཾཝུཏསདྡསྶ ཏཔྤུརིསབྷཱཝཾ དསྶེཏུཾ ཝུཏྟཾ ‘‘པཱཏིམོཀྑོཝཱ’’ཏིཨཱདི. ཏཏྠ ཨེཝསདྡེན ཀམྨདྷཱརཡབྷཱཝཾ, ཨེནསདྡེན ཙ ཏཔྤུརིསབྷཱཝཾ དསྶེཏཱིཏི དཊྛབྦཾ.

ཝཏྟཏཱིཏི ¶ ཨཏྟབྷཱཝཾ པཝཏྟེཏི. ཀཱརིཏཔཙྩཡོ ཧི ཨདསྶནཾ གཏོ. ཨིམིནཱ ཨིརིཡཱཔཐཝིཧཱར དིབྦཝིཧཱར བྲཧྨཝིཧཱར ཨརིཡཝིཧཱརེསུ ཙཏཱུསུ ཝིཧཱརེསུ ཨཏྟབྷཱཝཝཏྟནཾ ཨིརིཡཱཔཐཝིཧཱརཾ དསྶེཏི. ཧཱིཏི སཙྩཾ. ཨེཏནྟི ‘‘པཱཏིམོཀྑསཾཝརསཾཝུཏོ ཝིཧརཏཱི’’ཏིཝཙནཾ. ཝིབྷངྒེཏི ཛྷཱནཝིབྷངྒེ.

‘‘སཱིལ’’ནྟིཨཱདཱིནི ཨཊྛ པདཱནི ཏུལྱཱདྷིཀརཎཱནི. ཨཡཾ པནེཏྠ སམྦནྡྷོ – སཱིལཾ ཀུསལཱནཾ དྷམྨཱནཾ སམཱཔཏྟིཡཱ པཏིཊྛཱ ཨཱདི ཙརཎཾ སཾཡམོ སཾཝརོ མོཀྑཾ པམོཀྑནྟི. སམཱཔཏྟིཡཱཏི ¶ སམཱཔཏྟཏྠཱཡ. ‘‘ཨུཔེཏོ’’ཏིཨཱདཱིནི སཏྟ པདཱནི ཨཉྙམཉྙཝེཝཙནཱནི. ཏཏྠ ཨུཔཔནྣོཏི ཡུཏྟོ ཨནུཡུཏྟོ. སམནྣཱགཏོཏི སམནྟཏོ ཨནུ པུནཔྤུནཾ ཨཱགཏོཏི སམནྣཱགཏོ, སམངྒཱིབྷཱུཏོཏི ཨཏྠོ. ཨེཏྠ ཧི སཾསདྡོ སམནྟཏྠཝཱཙཀོ, ཨནུསདྡོ ནཨུཔཙྪིནྣཏྠཝཱཙཀོ. ཏེནཱཏི ཏེན ཀཱརཎེན. པཱལེཏཱིཏི ཨཏྟབྷཱཝཾ བཱདྷནཏོ རཀྑཏི. ཡཔེཏཱིཏི ཨཏྟབྷཱཝོ པཝཏྟཏི. ཡཱཔེཏཱིཏི ཨཏྟབྷཱཝཾ པཝཏྟཱཔེཏི. ཡཔ ཡཱཔནེ. ཡཱཔནཾ པཝཏྟནནྟི ཧི དྷཱཏུཔཱཋེསུ ཝུཏྟཾ (སདྡནཱིཏིདྷཱཏུམཱལཱཡཾ ༡༨ པཀཱརནྟདྷཱཏུ). ཝིཧརཏཱིཏི ཨེཏྠ ཨེཀོ ཨཱཀཱརཏྠཝཱཙཀོ ཨིཏིསདྡོ ལུཏྟནིདྡིཊྛོ, ཨིཏི ཝུཙྩཏི, ཨིཏི ཝུཏྟནྟི ཝཱ ཡོཛནཱ.

ཨཱཙཱརགོཙརསདྡཱནཾ དྭནྡབྷཱཝཾ, ཏེཧི ཙ སམྤནྣསདྡསྶ ཏཔྤུརིསབྷཱཝཾ དསྶེནྟོ ཨཱཧ ‘‘ཨཱཙཱརགོཙརསམྤནྣོ’’ཏིཨཱདི. ཏཏྠ ཙསདྡེན དྭནྡབྷཱཝཾ, ཨེནསདྡེན ཙ ཏཔྤུརིསབྷཱཝཾ དསྶེཏི. ཨཎུསདྡོ ཨཔྤཏྠོ, མཏྟསདྡོ པམཱཎཏྠོཏི ཨཱཧ ‘‘ཨཔྤམཏྟཀེསཱུ’’ཏི. ‘‘དསྶནསཱིལོ’’ཏིཨིམིནཱ ‘‘དསྶཱཝཱི’’ཏིཨེཏྠ ཨཱཝཱིསདྡསྶ ཏསྶཱིལཏྠབྷཱཝཾ དསྶེཏི. ‘‘སམཱདཱཡཱ’’ཏི ཨེཏྠ སཾཔུབྦཨཱཔུབྦསྶ དཱསདྡསྶ ཀམྨཱཔེཀྑཏྟཱ ཏསྶ ཀམྨཾ དསྶེཏུཾ ཝུཏྟཾ ‘‘ཏཾ ཏཾ སིཀྑཱཔད’’ནྟི. ཨིམིནཱ ‘‘སིཀྑཱཔདེསཱུ’’ཏི ཨུཔཡོགཏྠེ བྷུམྨཝཙནནྟི དསྶེཏི. ཨཐ ཝཱ སིཀྑཱཔདེསཱུཏི ནིདྡྷཱརཎཏྠེ བྷུམྨཝཙནམེཏཾ. ‘‘ཏཾ ཏཾ སིཀྑཱཔད’’ནྟི ཀམྨཾ པན ཨཛ྄ཛྷཱཧརིཏབྦནྟི དསྶེཏི. ‘‘སམཱདཱཡཱ’’ཏི ཨེཏྠ སཾསདྡསྶ ཙ ཨཱཔུབྦསྶ དཱསདྡསྶ ཙ ཡཀཱརསྶ ཙ ཨཏྠཾ དསྶེཏུཾ ¶ ‘‘སཱདྷུཀཾ གཧེཏྭཱ’’ཏི ཝུཏྟཾ. ཨེཏྠཱཏི ཨིམིསྶཾ ཨཊྛཀཐཱཡཾ. ཝིཏྠཱརོ པན གཧེཏབྦོཏི ཡོཛནཱ. ཡོཏི ཀུལཔུཏྟོ.

ཨསྶཱཏི ལདྡྷསམྨུཏིཀསྶ. ཡཾ ཏཾ བཧུ སུཏཾ ནཱམ ཨཏྠི, ཏཾ ན སུཏམཏྟམེཝཱཏི ཡོཛནཱ. མཉྫཱུསཱཡནྟི པེལཱ༹ཡཾ. སཱ ཧི སཱམིཀསྶ སདྷནཏྟཾ མཉྙཏེ ཨིམཱཡཱཏི ‘‘མཉྫཱུསཱ’’ཏི ཝུཙྩཏི. མཉྫཱུསཱཡཾ རཏནཾ སནྣིཙིཏཾ ཝིཡ སུཏཾ སནྣིཙིཏཾ ཨསྨིཾ པུགྒལེཏི ཡོཛནཱ, ཨེཏེནཱཏི ‘‘སནྣིཙིཏ’’ནྟིཔདེན, དསྶེཏཱིཏི སམྦནྡྷོ. སོཏི ལདྡྷསམྨུཏིཀོ བྷིཀྑུ. སནྣིཙིཏརཏནསྶེཝཱཏི སནྣིཙིཏརཏནསྶ ཨིཝ. ཏནྟི ‘‘ཡེ ཏེ དྷམྨཱ’’ཏིཨཱདིཝཙནཾ. ཨེཏྠཱཏི ཨིམསྨིཾ སིཀྑཱཔདེ. ཨསྶཱཏི ལདྡྷསམྨུཏིཀསྶ བྷིཀྑུནོ. ཏཏྠཱཏི ‘‘ཝཙསཱ པརིཙིཏཱ’’ཏིཨཱདིཝཙནེ. ཨེཝམཏྠོ ཝེདིཏབྦོཏི ཡོཛནཱ. པགུཎཱཏི ཨུཛུཀཱ. ཨུཛུཀོ ཧི ཨཛིམྷཏྟཱ པཀཊྛོ ཨུཏྟམོ གུཎོཏི ཨཏྠེན ‘‘པགུཎོ’’ཏི ཝུཙྩཏི. ཨནུཔེཀྑིཏཱཏི པུནཔྤུནཾ ཨུཔགནྟྭཱ ཨིཀྑིཏཱ, པསྶིཏཱ དསྶིཏཱཏི ཨཏྠོ. ཨཏྠཏོཏི ཨབྷིདྷེཡྻཏྠཏོ, ཨཊྛཀཐཱཏོཏི ཨཏྠོ. ཀཱརཎཏོཏི དྷམྨཏོ, པཱལི༹ཏོཏི ཨཏྠོ. དིཊྛིསདྡསྶ པཉྙཱསདྡཝེཝཙནཏྟཱ ‘‘པཉྙཱཡཱ’’ཏི ཝུཏྟཾ. སུཔཙྩཀྑཀཏཱཏི སུཊྛུ ཨཀྑཱནཾ ཨིནྡྲིཡཱནཾ པཊིམུཁཾ ཀཏཱ.

‘‘བཧུསྶུཏོ’’ཏི ¶ ཨེཏྠ བཧུསྶུཏསྶ ཏིཝིདྷབྷཱཝཾ དསྶེནྟོ ཨཱཧ ‘‘ཨཡཾ པནཱ’’ཏིཨཱདི. ནིསྶཡཏོ མུཙྩཏཱིཏི ནིསྶཡམུཙྩནཀོ. པརིསཾ ཨུཔཊྛཱཔེཏཱིཏི པརིསུཔཊྛཱཀོ. བྷིཀྑུནིཡོ ཨོཝདཏཱིཏི བྷིཀྑུནོཝཱདཀོ. ཏཏྠཱཏི ཏིཝིདྷེསུ བཧུསྶུཏེསུ. ནིསྶཡམུཙྩནཀེན ཨེཏྟཀཾ ཨུགྒཧེཏབྦནྟི སམྦནྡྷོ. ཨུཔསམྤདཱཡཱཏི ཨུཔསམྤཱདེཏྭཱ. པཉྩ ཝསྶཱནི ཨེཏསྶཱཏི པཉྩཝསྶོ. ཏེན ཨུགྒཧེཏབྦནྟི ཡོཛནཱ. སབྦནྟིམེནཱཏི སབྦེསཾ པརིཙྪེདཱནཾ ཨནྟེ ལཱམཀེ པཝཏྟེན. པགུཎཱཏི ཨཛིམྷཱ ཨུཛུཀཱ. ཝཱཙུགྒཏཱཏི ཏསྶེཝ ཝེཝཙནཾ. ཡསྶ ཧི པཱལི༹པཱཋཱ སཛ྄ཛྷཱཡནཀཱལེ པགུཎཱ ཧོནྟི, ཏསྶ ཝཱཙུགྒཏཱ. ཡསྶ ཝཱ པན ཝཱཙུགྒཏཱ ཧོནྟི, ཏསྶ པགུཎཱ. ཏསྨཱ ཏཱནི པདཱནི ཨཉྙམཉྙཀཱརཎཝེཝཙནཱནི. པཀྑདིཝསེསཱུཏི ཛུཎྷཔཀྑཀཱལ༹པཀྑཔརིཡཱཔནྣེསུ ¶ དིཝསེསུ. དྷམྨསཱཝནཏྠཱཡཱཏི སམྤཏྟཱནཾ པརིསཱནཾ དྷམྨསྶ སཱཝནཏྠཱཡ སུཎཱཔནཏྠཱཡཱཏི ཨདྷིཔྤཱཡོ. སཱཝནཏྠཱཡཱཏི ཨེཏྠ ཡུཔཙྩཡཔརཏྟཱ ཀཱརིཏཔཙྩཡོ ལོཔོ ཧོཏཱིཏི དཊྛབྦཾ. ཏསྨཱ སཱཝཱིཡཏེ སུཎཱཔཱིཡཏེ སཱཝནནྟི ཝཙནཏྠོ ཀཱཏབྦོ. བྷཱཎཝཱརཱ ཨུགྒཧེཏབྦཱཏི སམྦནྡྷོ. སམྤཏྟཱནནྟི ཨཏྟནོ སནྟིཀཾ སམྤཏྟཱནཾ. པརིཀཐནཏྠཱཡཱཏི པརིསྶངྒེན ཨཱལིངྒནེན ཀཐནཏྠཾ, ཨཔྤསདྡསངྑཱཏཱཡ ཝཱཙཱཡ ཀཐནཏྠནྟི ཨཏྠོ. ‘‘ཀཐཱམགྒོ’’ཏི ཝུཏྟཏྟཱ ཝཏྠུཀཐཱཡེཝ ཨདྷིཔྤེཏཱ, ན སུཏྟསངྑཱཏོ པཱལི༹པཱཋོ. ཨནུ པཙྪཱ, པུནཔྤུནཾ ཝཱ དཱཡཀཱ མོདནྟི ཨེཏཱཡཱཏི ཨནུམོདནཱ. ཛྷཱནཾ ཝཱ མགྒོ ཝཱ ཕལཾ ཝཱ སམཎདྷམྨོ ནཱམ. ཏསྶ ཀརཎཏྠཾ ཨུགྒཧེཏབྦནྟི ཡོཛནཱ. ཧཱིཏི སཙྩཾ, ཡསྨཱ ཝཱ. ཙཏཱུསུ དིསཱསུ ཨཔཊིཧཏོཏི ཙཱཏུདྡིསོ, ཨཔཊིཧཏཏྠེ ཎཔཙྩཡོ.

པརིསུཔཊྛཱཔཀེན ཀཱཏབྦཱཏི ཡོཛནཱ. ཨབྷིཝིནཡེཏི ཨཉྙམཉྙཔརིཙྪིནྣེ ཝིནཡཔིཊཀེ. དྭེ ཝིབྷངྒཱཏི བྷིཀྑུཝིབྷངྒོ ཙ བྷིཀྑུནིཝིབྷངྒོ ཙ. ཨསཀྐོནྟེན པརིསུཔཊྛཱཔཀེན བྷིཀྑུནཱཏི སམྦནྡྷོ. ཨེཝཾ ཨཏྟནོ ཨཏྠཱཡ ཨུགྒཧེཏབྦཾ དསྶེཏྭཱ ཨིདཱནི པརིསཱཡ ཨཏྠཱཡ ཨུགྒཧེཏབྦཾ དསྶེནྟོ ཨཱཧ ‘‘པརིསཱཡ པནཱ’’ཏིཨཱདི. ཨབྷིདྷམྨེཏི ཨཉྙམཉྙཔརིཙྪིནྣེ སུཏྟནྟཔིཊཀེ ཨེཝ, ན ཨབྷིདྷམྨཔིཊཀེ. ཏཡོ ཝགྒཱཏི སགཱཐཱཝགྒོ ནིདཱནཝགྒོ ཁནྡྷཝགྒོཏི ཏཡོ ཝགྒཱ. ཝཱསདྡོ ཨནིཡམཝིཀཔྤཏྠོ. ཨེཀནྟི ཨེཀཾ ནིཔཱཏཾ. ཏཏོ ཏཏོཏི ནིཀཱཡཏོ. སམུཙྩཡཾ ཀཏྭཱཏི རཱསིཾ ཀཏྭཱ. ན ཝུཏྟནྟི ཨཊྛཀཐཱསུ ན ཀཐིཏཾ. ཡསྶ པན ནཏྠི, སོ ན ལབྷཏཱིཏི ཡོཛནཱ. སུཏྟནྟེ ཙཱཏི སུཏྟནྟཔིཊཀེ པན. ཨུགྒཧིཏོཏི སརཱུཔཀཐནེན གཧིཏོ, ཨུཙྩཱརིཏོཏི ཨཏྠོ. དིསཱཔཱམོཀྑོཏི དིསཱསུ ཋིཏཱནཾ བྷིཀྑུཨཱདཱིནཾ པཱམོཀྑོ. ཡེན ཀཱམཾ གམོཏི ཡཐཱཀཱམཾ གམོ.

ཙཏཱུསུ ནིཀཱཡེསཱུཏི ཁུདྡཀནིཀཱཡཏོ ཨཉྙེསུ དཱིགྷནིཀཱཡཱདཱིསུ. ཨེཀསྶཱཏི ཨཉྙཏརསྶ ཨེཀསྶ ¶ . ཨེཀནིཀཱཡེནཱཏི ཨེཀསྨིཾ ¶ ནིཀཱཡེ ལདྡྷནཡེན. ཧཱིཏི སཙྩཾ, ཡསྨཱ ཝཱ. ཏཏྠཱཏི ཙཏུཔྤཀརཎསྶ ཨཊྛཀཐཱཡཾ. ནཱནཏྠནྟི ནཱནཱཔཡོཛནཾ. ཏནྟི ཝིནཡཔིཊཀཾ. ཨེཏྟཱཝཏཱཏི ཨེཏྟཀཔམཱཎེན པགུཎེན. ཧོཏཱིཏི ཨིཏིསདྡོ པརིསམཱཔནཏྠོ. ཨིཏི པརིསམཱཔནཾ ཝེདིཏབྦནྟི ཡོཛནཱ.

ཨུབྷཡཱནི ཁོ པནསྶཱཏི ཨཱདི པན ཝུཏྟནྟི སམྦནྡྷོ. ཨཉྙསྨིནྟི ཝིནཡཔིཊཀཏོ ཨིཏརསྨིཾ. ཏཏྠཱཏི ‘‘ཨུབྷཡཱནི ཁོ པནསྶཱ’’ཏིཨཱདིཝཙནེ. ཡཐཱ ཡེནཱཀཱརེན ཨཱགཏཱནི, ཏཾ ཨཱཀཱརཾ དསྶེཏུནྟི ཡོཛནཱ. པདཔཙྩཱབྷཊྛསངྐརདོསཝིརཧིཏཱནཱིཏི པདཱནཾ པཙྩཱབྷཊྛསངྐརབྷཱུཏེཧི དོསེཧི ཝིརཧིཏཱནི. ཨེཏྠ ཙ པདཔཙྩཱབྷཊྛནྟི པདཱནཾ པཊིནིཝཏྟིཏྭཱ ཨཱབྷསྶནཾ གལ༹ནཾ, ཙུཏནྟི ཨཏྠོ. པདསངྐརནྟི པདཱནཾ ཝིཔཏྟི, ཝིནཱསོཏི ཨཏྠོ. ‘‘སུཏྟསོ’’ཏི སཱམཉྙཏོ ཝུཏྟེཔི ཁནྡྷཀཔརིཝཱརསུཏྟཾ ཨེཝ གཧེཏབྦནྟི ཨཱཧ ‘‘ཁནྡྷཀཔརིཝཱརཏོ’’ཏི. ཨནུབྱཉྫནསོཏི ཨེཏྠ བྱཉྫནསདྡོ ཨཀྑརསྶ ཙ པདསྶ ཙ ཝཱཙཀོཏི ཨཱཧ ‘‘ཨཀྑརཔདཔཱརིཔཱུརིཡཱ ཙཱ’’ཏི. ཧཱིཏི སཙྩཾ, ཡསྨཱ ཝཱ.

‘‘སིཐིལདྷནིཏཱདཱིན’’ནྟིཔདཾ ‘‘ཝཙནེནཱ’’ཏིཔདེ ཀམྨཾ, ‘‘ཝཙནེནཱ’’ཏིཔདཾ ‘‘སམྤནྣཱགཏོ’’ཏིཔདེ ཧེཏུ, ‘‘ཝིསྶཊྛཱཡ ཨནེལགལཱ༹ཡ ཨཏྠསྶ ཝིཉྙཱཔནིཡཱ’’ཏིཔདཱནི ‘‘ཝཱཙཱཡཱ’’ཏིཔདེ ཝིསེསནཱནི. སིཐིལདྷནིཏཱདཱིནནྟི ཨཱདིསདྡེན ནིགྒཧིཏཝིམུཏྟསམྦནྡྷཝཝཏྠིཏདཱིགྷ རསྶ གརུ ལཧུ སངྑཱཏཱ ཨཊྛ བྱཉྫནབུདྡྷིཡོ སངྒཎྷཱཏི. ཡཐཱཝིདྷཱནཝཙནེནཱཏི ཨཀྑརཙིནྟཀཱནཾ ཡཐཱ སཾཝིདཧནཝཙནེན. ཝཱཙཱཡེཝ ཀརཱིཡཏི ཀཐཱིཡཏི ཨུཙྩཱརཱིཡཏི ཝཱཀྐརཎཾ ཙཀཱརསྶ ཀཀཱརཾ ཀཏྭཱ. ཧཱིཏི ཏདེཝ ཡུཏྟཾ. མཱཏུགཱམོ ཡསྨཱ སརསམྤཏྟིརཏོ, ཏསྨཱ ཧཱིལེ༹ཏཱིཏི ཡོཛནཱ. ‘‘སརསམྤཏྟིརཧིཏ’’ནྟིཔདཾ ‘‘ཝཙན’’ནྟིཔདེ ཝིསེསནབྷཱཝེན ཝིསེསཾ ཀཏྭཱ ‘‘ཧཱིལེ༹ཏཱི’’ཏིཔདེ ཧེཏུབྷཱཝེན སམྤཛྫནཏོ ཧེཏུཨནྟོགདྷཝིསེསནནྟི དཊྛབྦཾ. སབྦཱསནྟི བྷིཀྑུནཱིནཾ. ‘‘སཱིལཱཙཱརསམྤཏྟིཡཱ’’ཏིཨིམིནཱ ཛཱཏི གོཏྟ རཱུཔ བྷོགཱདིནཱཏིཨཏྠཾ ནིཝཏྟེཏི. ཀཱརཎཉྩཱཏི ཨཊྛཀཐཉྩ. ཏཛྫེཏྭཱཏི ཨུབྦེཛེཏྭཱ. ཏཱསནྟི བྷིཀྑུནཱིནཾ. གིཧིཀཱལེཏི བྷིཀྑུནོཝཱདཀསྶ གིཧིཀཱལེ ཨནཛ྄ཛྷཱཔནྣཔུབྦོ ¶ ཧོཏཱིཏི སམྦནྡྷོ. ཧི ཏདེཝ ཡུཏྟཾ. ‘‘མཱཏུགཱམོ’’ཏིཔདཾ ‘‘ན ཀརོཏཱི’’ཏིཔདེ སུདྡྷཀཏྟཱ, ‘‘ཨུཔྤཱདེཏཱི’’ཏིཔདེ ཧེཏུཀཏྟཱ. ཋིཏསྶ བྷིཀྑུནོ དྷམྨདེསནཱཡཱཔཱིཏི ཡོཛནཱ. ཨཔིསདྡོ གརཧཏྠོ. ཝིསབྷཱགེཧཱིཏི ཝིརུདྡྷེཧི ཝཏྠཱརམྨཎེཧི. ཨཡུཏྟཊྛཱནེཏི པབྦཛིཏཱནཾ ཨནནུརཱུཔཊྛཱནེ. ཚནྡརཱགནྟི བལཝཏཎྷཾ. ཏེནཱཏི ཏེན ཧེཏུནཱ.

‘‘ཨེཏྠ ¶ ཙཱ’’ཏིཨཱདིམྷི ཨཡཾ པན སངྒཧོ –

‘‘སཱིལཝཱ བཧུསྶུཏོ ཙ, སྭཱགཏོ ཙ སུཝཱཙཀོ;

པིཡོ པཊིབལོ ཙཱཔི, ནཛ྄ཛྷཱཔནྣོ ཙ ཝཱིསཏཱི’’ཏི.

༡༤༨. ཝཏྠུསྨིནྟི ཨཊྛུཔྤཏྟིཡཾ. ཀཀཱརལོཔཾ ཀཏྭཱ གརུདྷམྨཱཏི ཝུཙྩནྟཱིཏི ཨཱཧ ‘‘གརུཀེཧི དྷམྨེཧཱི’’ཏི. ཏེཏི གརུདྷམྨཱ. ཧཱིཏི ཡསྨཱ. ‘‘ཨེཀཏོ’’ཏི སཱམཉྙེན ཝུཏྟཝཙནསྶ ཝིསེསེན གཧེཏབྦཏཾ དསྶེཏུཾ ཝུཏྟཾ ‘‘བྷིཀྑུནཱིནཾ སནྟིཀེ’’ཏི. ཡཐཱཝཏྠུཀམེཝཱཏི པཱཙིཏྟིཡམེཝ. ཏཉྷི ཝཏྠུསྶ ཨཱཔཏྟིཀཱརཎསྶ ཨནུརཱུཔཾ པཝཏྟཏྟཱ ‘‘ཡཐཱཝཏྠུཀ’’ནྟི ཝུཙྩཏི.

༡༤༩. པཱཏོཏི པགེཝ, པཋམནྟི ཨཏྠོ. ཨསམྨཊྛཾ སམྨཛྫཱིཏབྦནྟི སམྦནྡྷོ. ཨསམྨཛྫནེ དོསཾ པཱཀཊཾ ཀརོནྟོ ཨཱཧ ‘‘ཨསམྨཊྛཾ ཧཱི’’ཏིཨཱདི. ཧཱིཏི ཏཔྤཱཀཊཱིཀརཎཛོཏཀོ. ཏནྟི པརིཝེཎཾ. དིསྭཱ བྷཝེཡྻུནྟི སམྦནྡྷོ. ཏེནཱཏི ཨསོཏུཀཱམཱནཾ ཝིཡ བྷཝནཧེཏུནཱ. པརིཝེཎསམྨཛྫནསྶ ཨཱནིསཾསཾ དསྶེཏྭཱ པཱནཱིཡཔརིབྷོཛནཱིཡཨུཔཊྛཱནསྶ ཏམེཝ དསྶེནྟོ ཨཱཧ ‘‘ཨནྟོ གཱམཏོ པནཱ’’ཏི ཨཱདི. ཏསྨིནྟི པཱནཱིཡཔརིབྷོཛནཱིཡེ.

སཱཁཱབྷངྒམྤཱིཏི བྷཉྫིཏབྦསཱཁམྤི. དུཏིཡོཏི ཝིཉྙཱུ པུརིསོ དུཏིཡོ. ནིསཱིདིཏབྦཊྛཱནཾ དསྶེནྟོ ཨཱཧ ‘‘ནིསཱིདིཏབྦ’’ནྟིཨཱདི. ‘‘ཝིཧཱརམཛ྄ཛྷེ’’ཏི སཱམཉྙཏོ ཝཏྭཱ ཝིསེསཏོ དསྶེཏུཾ ཝུཏྟཾ ‘‘དྭཱརེ’’ཏི. ཨོསརནྟི ཨཝསརནྟི ཨེཏྠཱཏི ཨོསརཎཾ, ཏཉྩ ཏཾ ཋཱནཉྩེཏི ཨོསརཎཊྛཱནཾ, ཏསྨིཾ. སམགྒཏྠཱཏི ཨེཏྠ སཾཔུབྦོ ཙ ཨཱཔུབྦོ ཙ གམུསདྡོ ¶ ཧོཏི, ཏཏོ ཧིཡྻཏྟནཱིསངྑཱཏཾ ཏྠཝཙནཾ ཝཱ ཧོཏི, པཉྩམཱིསངྑཱཏསྶ ཐཝཙནསྶ ཏྠཏྟཾ ཝཱ ཧོཏི, སཾཡོགཔརཏྟཱ ཨཱ ཨུཔསགྒོ རསྶོ ཙ ཧོཏི, ཨིཏི ཨཏྠཾ དསྶེནྟོ ཨཱཧ ‘‘སམྨཱ ཨཱགཏཏྠཱ’’ཏི. ཏཏྠ ‘‘སམྨཱ’’ཏིཔདེན སཾསདྡསྶ ཨཏྠཾ དསྶེཏི, ‘‘ཨཱ’’ཨིཏིཔདེན ཨཱཏྱཱུཔསགྒཾ, ‘‘གཏ’’ཨིཏིཔདེན གམུདྷཱཏུཾ, ‘‘ཏྠ’’ཨིཏིཔདེན ཧིཡྻཏྟནཱིསངྑཱཏཾ ཏྠཝཙནཾ ཝཱ, པཉྩམཱིསངྑཱཏསྶ ཐཝཙནསྶ ཏྠཏྟཾ ཝཱ དསྶེཏི. ཨཡཾ པནེཏྠཏྠོ – སམཾ ཏུམྷེ ཨཱགཏཏྠཱཏི. པཉྩམཱིསངྑཱཏསྶ ཐཝཙནསྶ ཏྠཏྟཀཱལེ སམཾ ཏུམྷེ ཨཱགཱ ཨཏྠ བྷཝཐཱཏི. ‘‘ཨཱགཙྪནྟཱི’’ཏིཔདེན ‘‘ཝཏྟནྟཱི’’ཏི ཨེཏྠ ཝཏུདྷཱཏུཡཱ ཨཏྠཾ དསྶེཏི, ‘‘པགུཎཱ ཝཱཙུགྒཏཱ’’ཏིཔདེཧི ཨདྷིཔྤཱཡཾ དསྶེཏི. པཱལཱི༹ཏི གརུདྷམྨཔཱལི༹.

ཏཏྠཱཏི ¶ ཏསྶཾ པཱལི༹ཡཾ, ཏེསུ ཝཱ ཨབྷིཝཱདནཱདཱིསུ ཙཏཱུསུ. མགྒསམྤདཱནནྟི མགྒཾ པརིཧརིཏྭཱ བྷིཀྑུསྶ ཨོཀཱསདཱནཾ. བཱིཛནནྟི བཱིཛནིཡཱ ཝིདྷཱུཔནཾ. པཱནཱིཡཱཔུཙྪནནྟི པཱནཱིཡསྶ ཨཱཔུཙྪནཾ. ཨཱདིསདྡེན པརིབྷོཛནཱིཡཱཔུཙྪནཱདིཀཾ སངྒཎྷཱཏི. ཨེཏྠ ཙཱཏི ཨེཏེསུ ཙཏཱུསུ ཨབྷིཝཱདནཱདཱིསུ. ‘‘ཨནྟོ གཱམེ ཝཱ’’ཏིཨཱདཱིནི ཚ པདཱནི ‘‘ཀཱཏབྦམེཝཱ’’ཏིཔདེ ཨཱདྷཱརོ. རཱཛུསྶཱརཎཱཡཱཏི རཉྙོ ཨཱནུབྷཱཝེན ཛནཱནཾ ཨུསྶཱརཎཱཡ. མཧཱབྷིཀྑུསངྒྷོ སནྣིཔཏཏི ཨེཏྠཱཏི མཧཱསནྣིཔཱཏཾ, ཏསྨིཾ མཧཱསནྣིཔཱཏེ ཋཱནེ ནིསིནྣེ སཏཱིཏི ཡོཛནཱ. པཙྩུཊྛཱནནྟི པཊིཀཙྩེཝ ཨུཊྛཱནཾ. ཏཾ ཏནྟི སཱམཱིཙིཀམྨཾ.

སཀྐཏྭཱཏི ཙིཏྟིཾ ཀཏྭཱ, སཾ ཨཱདརཾ ཀཏྭཱཏི ཨཏྠོ. ཏེནཱཧ ‘‘ཡཐཱ ཀཏོ’’ཏིཨཱདི. ཏིཎྞཾ ཀིཙྩཱནནྟི ‘‘སཀྐཏྭཱ གརུཾཀཏྭཱ མཱནེཏྭཱ’’ཏིསངྑཱཏཱནཾ ཏིཎྞཾ ཀིཙྩཱནཾ. ཨནཱིཡསདྡོ ཀམྨཏྠོཏི ཨཱཧ ‘‘ན ཨཏིཀྐམིཏབྦོ’’ཏི.

ནཏྠི བྷིཀྑུ ཨེཏྠཱཏི ཨབྷིཀྑུཀོ ཨཱཝཱསོ, སོ ཀིཏྟཀེ ཋཱནེ ཨབྷིཀྑུཀོ, ཡོ ཨཱཝཱསོ ཨབྷིཀྑུཀོ ནཱམ ཧོཏཱིཏི ཨཱཧ ‘‘སཙེ’’ཏི ཨཱདི. ‘‘ཨུཔསྶཡཏོ’’ཏིཔདཾ ‘‘ཨབྦྷནྟརེ’’ཏིཔདེ ཨཔཱདཱནཾ. ཨེཏྠཱཏི ཨབྷིཀྑུཀེ ཨཱཝཱསེ. ཧཱིཏི སཙྩཾ. ཏཏོཏི ཨཌྜྷཡོཛནབྦྷནྟརེ ¶ ཋིཏཨཱཝཱསཏོ. པརནྟི ཨཉྙསྨིཾ ཨཱཝཱསེ, བྷུམྨཏྠེ ཙེཏཾ ཨུཔཡོགཝཙནཾ. པཙྪཱབྷཏྟནྟི བྷཏྟཏོ པཙྪཱ. ཏཏྠཱཏི ཨབྷིཀྑུཀེ ཨཱཝཱསེ. ‘‘བྷིཀྑུནིཡོ’’ཏིཔདཾ ‘‘ཝདནྟཱི’’ཏིཔདེ ཀམྨཾ. ཝུཏྟཔྤམཱཎེཏི ཨཌྜྷཡོཛནབྦྷནྟརསངྑཱཏེ ཝུཏྟཔྤམཱཎེ. སཱཁཱམཎྜཔེཔཱིཏི སཱཁཱཡ ཚཱདིཏམཎྜཔེཔི. པིསདྡེན ཨཱཝཱསེ པན ཀཱ ནཱམ ཀཐཱཏི དསྶེཏི. ཝུཏྟཱཏི ཝསིཏཱ. ཨེཏྟཱཝཏཱཏི ཨེཀརཏྟཾ ཝསིཏམཏྟེན. ཨེཏྠཱཏི སབྷིཀྑུཀེ ཨཱཝཱསེ. ཨུཔགཙྪནྟཱིཧི བྷིཀྑུནཱིཧི ཡཱཙིཏབྦཱཏི ཡོཛནཱ. པཀྑསྶཱཏི ཨཱསལ༹ྷཱིམཱསསྶ ཛུཎྷཔཀྑསྶ. ‘‘ཏེརསིཡ’’ནྟིཔདེན ཨཝཡཝིཨཝཡཝབྷཱཝེན ཡོཛེཏབྦཾ. མཡནྟི ཨམྷེ. ཡཏོཏི ཡེན ཨུཛུནཱ མགྒེནཱཏི སམྦནྡྷོ. ཏེནཱཧ ‘‘ཏེན མགྒེནཱ’’ཏི. ཨཉྙེན མགྒེནཱཏི ཨུཛུམགྒཏོ ཨཉྙེན ཛིམྷམགྒེན. ཨཡནྟི ཨཡཾ ཨཱཝཱསོ. ཏཏོཏི བྷིཀྑཱུནཾ ཨཱཝཱསཏོ, བྷིཀྑུནིཨུཔསྶཡཏོ ཝཱ, ཨིདམེཝ ཡུཏྟཏརཾ. ཝཀྑཏི ཧི ‘‘ཨམྷཱཀཾ ཨུཔསྶཡཏོ གཱཝུཏམཏྟེ’’ཏི. ཁེམཊྛཱནེཏི ཨབྷཡཊྛཱནེ. ཏཉྷི ཁཱིཡནྟི བྷཡཱ ཨེཏྠཱཏི ཁེམཾ, ཁེམཉྩ ཏཾ ཋཱནཉྩེཏི ཁེམཊྛཱནནྟི ཀཏྭཱ ‘‘ཁེམཊྛཱན’’ནྟི ཝུཙྩཏི. ཏཱཧི བྷིཀྑུནཱིཧཱིཏི ཨཌྜྷཡོཛནམཏྟེ ཋཱནེ ཝསནྟཱིཧི. ཏཱ བྷིཀྑུནིཡོཏི གཱཝུཏམཏྟེ ཋཱནེ ཝསནྟིཡོ. ཨནྟརཱཏི ཏུམྷཱཀཾ, ཨམྷཱཀཉྩ ནིཝཱསནཊྛཱནསྶ, ནིཝཱསནཊྛཱནཏོ ཝཱ ཨནྟརེ ཝེམཛ྄ཛྷེ. བྷུམྨཏྠེ ཙེཏཾ ནིསྶཀྐཝཙནཾ. ཋིཏེ མགྒེཏི སམྦནྡྷོ ‘‘སནྟིཀཱ’’ཏིཔདཾ ¶ ‘‘ཨཱགཏ’’ཨིཏིཔདེ ཨཔཱདཱནཾ. ཏཏྠཱཏི ཨཉྙཱསཾ བྷིཀྑུནཱིནཾ ཨུཔསྶཡེ. ཨིཏི ཡཱཙིཏབྦཱཏི ཡོཛནཱ. ཏཏོཏི བྷིཀྑཱུནཾ ཡཱཙིཏབྦཏོ, པརནྟི སམྦནྡྷོ.

ཙཱཏུདྡསེཏི ཨཱསལ༹ྷཱིམཱསསྶ ཛུཎྷཔཀྑསྶ ཙཏུདྡསནྣཾ དིཝསཱནཾ པཱུརཎེ དིཝསེ. ཨིདྷཱཏི ཨིམསྨིཾ ཝིཧཱརེ. ‘‘ཨོཝཱད’’ནྟིཔདཾ ‘‘ཨནུ’’ཨིཏིཔདེ ཀམྨཾ. ཨནུཛཱིཝནྟིཡོཏི ཨནུགནྟྭཱ ཛཱིཝནཾ ཝུཏྟིཾ ཀརོནྟིཡོ. ཝུཏྟཱ བྷིཀྑཱུཏི སམྦནྡྷོ. དུཏིཡདིཝསེཏི ཨཱསལ༹ྷཱིཔུཎྞམིཡཾ. ཨཐཱཏི པཀྐམནཱནནྟརཾ. ཨེཏྠཱཏི བྷིཀྑཱུནཾ པཀྐནྟཏྟཱ ཨཔསྶནེ. ‘‘ཨཱབྷོགཾ ཀཏྭཱ’’ཏིཨིམིནཱ ཨཱབྷོགཾ ཨཀཏྭཱ ཝསིཏུཾ ¶ ན ཝཊྚཏཱིཏི དཱིཔེཏི. སབྷིཀྑུཀཱཝཱསཾ གནྟབྦམེཝཱཏི ཨདྷིཔྤཱཡོ. སཱཏི ཝསྶཙྪེདཱཔཏྟི. ཧཱིཏི སཙྩཾ, ཡསྨཱ ཝཱ. ཀེནཙི ཀཱརཎེནཱཏི བྷིཀྑཱཙཱརསྶ ཨསམྤདཱདིནཱ ཀེནཙི ནིམིཏྟེན. ཧཱིཏི སཙྩཾ. བྷིཀྑཱུནཾ པཀྐནྟཱདིཀཱརཎཱ ཨབྷིཀྑུཀཱཝཱསེ ཝསནྟིཡཱ ཀིཾ ཨབྷིཀྑུཀཱཝཱསེཝ པཝཱརེཏབྦནྟི ཨཱཧ ‘‘པཝཱརེནྟིཡཱ པནཱ’’ཏིཨཱདི.

ཨནྭདྡྷམཱསནྟི ཨེཏྠ ཨནུསདྡོ ཝིཙྪཏྠཝཱཙཀོ ཀམྨཔྤཝཙནཱིཡོ, ཏེན པཡོགཏྟཱ བྷུམྨཏྠེ ཨུཔཡོགཝཙནནྟི ཨཱཧ ‘‘ཨདྡྷམཱསེ ཨདྡྷམཱསེ’’ཏི. པཙྩཱསཱིསིཏབྦཱཏི ཨེཏྠ པཏིཔུབྦོ ཙ ཨཱཔུབྦོ ཙ སིདྷཱཏུ ཨིཙྪཏྠེཏི ཨཱཧ ‘‘ཨིཙྪིཏབྦཱ’’ཏི. སིདྷཱཏུཡཱ དྭེབྷཱཝོ ཧོཏི. ཨཱཔུབྦོ སིསི ཨིཙྪཱཡནྟིཔི དྷཱཏུཔཱཋེསུ ཝུཏྟཾ. ཏཏྠཱཏི ‘‘ཨུཔོསཐཔུཙྪཀ’’ནྟིཝཙནེ. པཀྑསྶཱཏི ཡསྶ ཀསྶཙི པཀྑསྶ. མཧཱཔཙྩརིཡཾ པན ཝུཏྟནྟི སམྦནྡྷོ. ཨོཝཱདསྶ ཡཱཙནཾ ཨོཝཱདོ ཨུཏྟརཔདལོཔེན, སོཡེཝ ཨཏྠོ པཡོཛནཾ ཨོཝཱདཏྠོ, ཏདཏྠཱཡ. པཱཊིཔདདིཝསཏོཏི དུཏིཡདིཝསཏོ. སོ ཧི ཙནྡོ ཝུདྡྷིཉྩ ཧཱནིཉྩ པཊིམུཁཾ པཛྫཏི ཨེཏྠ, ཨེཏེནཱཏི ཝཱ པཱཊིཔདོཏི ཝུཙྩཏི. ཨིཏཱིཏི ཨེཝཾ ཝུཏྟནཡེན. བྷགཝཱ པཉྙཔེཏཱིཏི ཡོཛནཱ. ཨཉྙསྶཱཏི དྷམྨསྶཝནཀམྨཏོ ཨཉྙསྶ. ནིརནྟརནྟི ཨབྷིཀྑཎཾ, ‘‘པཉྙཔེཏཱི’’ཏིཔདེ བྷཱཝནཔུཾསཀཾ. ཧཱིཏི ཝིཏྠཱརོ. ཨེཝཉྩ སཏཱིཏི ཨེཝཾ བཧཱུཔཀཱརེ སཏི ཙ. ཡནྟི ཡཾ དྷམྨཾ. སཱཏྠིཀནྟི སཔཡོཛནཾ. ཡཐཱནུསིཊྛནྟི ཨནུསིཊྛིཡཱ ཨནུརཱུཔཾ. སབྦཱཡེཝ བྷིཀྑུནིཡོཔཱིཏི ཡོཛནཱ. ཧཱིཏི སཙྩཾ.

ཨོཝཱདཾ གཙྪཏཱིཏི ཨོཝཱདཾ ཡཱཙིཏུཾ བྷིཀྑུསངྒྷསྶ ཨཱརཱམཾ གཙྪཏི. ན ཨོཝཱདོ གནྟབྦོཏི ཨོཝཱདཾ ཡཱཙིཏུཾ བྷིཀྑུསངྒྷསྶ ཨཱརཱམོ ན གནྟབྦོ. ཨོཝཱདོཏི ཙ ཨུཔཡོགཏྠེ པཙྩཏྟཝཙནནྟི དཊྛབྦཾ. ཨིཏརཐཱ ཧི སདྡཔཡོགོ ཝིརུཛ྄ཛྷེཡྻ. ཨོཝཱདཾ གནྟུནྟི ཨོཝཱདཾ ཡཱཙནཏྠཱཡ བྷིཀྑུསངྒྷསྶ ཨཱརཱམཾ གནྟུཾ.

‘‘དྭེ ¶ ¶ ཏིསྶོ བྷིཀྑུནིཡོ’’ཏིཔདཾ ‘‘ཡཱཙིཏྭཱ’’ཏིཔདེ དུཏིཡཱཀམྨཾ. ‘‘པེསེཏབྦཱ’’ཏིཔདེ པཋམཱཀམྨཾ. ཨོཝཱདཱུཔསངྐམནནྟི ཨོཝཱདསྶ གཧཎཏྠཱཡ ཨུཔསངྐམནཾ. ཨཱརཱམནྟི བྷིཀྑུསངྒྷསྶ ཨཱརཱམཾ. ཏཏོཏི གམནཏོ པརནྟི སམྦནྡྷོ. ཏེན བྷིཀྑུནཱཏི ཨོཝཱདཔཊིགྒཱཧཀེན བྷིཀྑུནཱ. ཏནྟི སམྨཏཾ བྷིཀྑུཾ.

ཨུསྶཧཏཱིཏི སཀྐོཏི. པཱསཱདིཀེནཱཏི པསཱདཾ ཨཱཝཧེན པསཱདཛནཀེན ཀཱཡཝཙཱིམནོཀམྨེནཱཏི ཨཏྠོ. སམྤཱདེཏཱུཏི ཏིཝིདྷཾ སིཀྑཾ སམྤཱདེཏུ. ཨེཏྟཱཝཏཱཏི ཨེཏྟཀེན ‘‘པཱསཱདིཀེན སམྤཱདེཏཱུ’’ཏི ཝཙནམཏྟེན. ཧཱིཏི ཕལཛོཏཀོ. ཨེཏནྟི ‘‘ཏཱཧཱི’’ཏིཝཙནཾ.

ཨེཏྠ ཙ བྷིཀྑཱུནཾ སངྒྷགཎཔུགྒལཝསེན ཝཙནཝཱརོ ཏིཝིདྷོ ཧོཏི, ཏཾ ཏིཝིདྷཾ ཝཙནཝཱརཾ བྷིཀྑུནཱིནཾ སངྒྷགཎཔུགྒལཝསེན ཏཱིཧི ཝཙནཝཱརེཧི གུཎིཏཾ ཀཏྭཱ ནཝ ཝཙནཝཱརཱ ཧོནྟི, ཏཾ ཨཱཀཱརཾ དསྶེནྟོ ཨཱཧ ‘‘ཏཏྲཱཡཾ ཝཙནཀྐམོ’’ཏི. ཏཏྲཱཏི པུརིམཝཙནཱཔེཀྑཾ. ཝཙནཱཀཱརོ པཱཀཊོཝ.

ཨེཀཱ བྷིཀྑུནཱི ཝཱ བཧཱུཧི བྷིཀྑུནཱིཨུཔསྶཡེཧི ཨོཝཱདཏྠཱཡ པེསིཏེ ཝཙནཱཀཱརཾ དསྶེནྟོ ཨཱཧ ‘‘བྷིཀྑུནིསངྒྷོ ཙ ཨཡྻཱ’’ཏིཨཱདི.

ཏེནཱཔཱིཏི ཨོཝཱདཔཊིགྒཱཧཀེནཱཔི ‘‘ཨོཝཱད’’ནྟིཔདཾ ‘‘པཊིགྒཱཧཀེནཱ’’ཏི པདེ ཀམྨཾ. པུན ‘‘ཨོཝཱད’’ནྟིཔདཾ ‘‘ཨཔཊིགྒཧེཏུ’’ནྟིཔདེ ཀམྨཾ. བལཏི ཨསྶཱསཔསྶཱསམཏྟེན ཛཱིཝཏི, ན པཉྙཱཛཱིཝིཏེནཱཏི བཱལོ. གིལཱཡཏི རུཛཏཱིཏི གིལཱནོ. གམིསྶཏི གནྟུཾ བྷབྦོཏི གམིཀོ. ཨཡཾ པནེཏྠ ཡོཛནཱ – གནྟུཾ བྷབྦོ ཡོ བྷིཀྑུ གམིསྶཏི གམནཾ ཀརིསྶཏི, ཨིཏི ཏསྨཱ སོ བྷིཀྑུ གམིཀོ ནཱམ. ཨཐ ཝཱ ཡོ བྷིཀྑུ གནྟུཾ བྷབྦཏྟཱ གམིསྶཏི གམནཾ ཀརིསྶཏི, ཨིཏི ཏསྨཱ སོ བྷིཀྑུ གམིཀོ ནཱམཱཏི. ‘‘བྷབྦོ’’ཏི ཙ ཧེཏུཨནྟོགདྷཝིསེསནཾ.

ཏཏྠཱཏི ¶ ¶ བཱལཱདཱིསུ ཏཱིསུ པུགྒལེསུ. དུཏིཡཔཀྑདིཝསེཏི པཱཊིཔདཏོ དུཏིཡཔཀྑདིཝསེ. ཨུཔོསཐགྒེཏི ཨུཔོསཐགེཧེ. ཏཉྷི ཨུཔོསཐཾ གཎྷནྟི, ཨུཔོསཐོ ཝཱ གཡ྄ཧཏི ཨསྨིནྟི ‘‘ཨུཔོསཐགྒ’’ནྟི ཝུཙྩཏི. ཏསྨིཾ ཨུཔོསཐགྒེ. ‘‘ཨནཱརོཙེཏུ’’ནྟི ཝཙནསྶ ཉཱཔཀཾ དསྶེཏྭཱ ‘‘ཨཔཙྩཱཧརིཏུ’’ནྟི ཝཙནསྶ ཏམེཝ དསྶེནྟོ ཨཱཧ ‘‘ཨཔརམྤི ཝུཏྟ’’ནྟིཨཱདི.

ཏཏྠཱཏི ཨོཝཱདཔཊིགྒཱཧཀེསུ བྷིཀྑཱུསུ. ནོ ཙསྶཱཏི ནོ ཙེ ཨསྶ. སབྷཾ ཝཱཏི སམཛྫཾ ཝཱ. སཱ ཧི སཧ བྷཱསནྟི ཨེཏྠ, སནྟེཧི ཝཱ བྷཱཏི དིབྦཏཱིཏི ‘‘སབྷཱ’’ཏི ཝུཙྩཏི, ཏཾ སབྷཾ ཝཱ ཨུཔསངྐམིསྶཱམཱིཏི ཡོཛནཱ. ཏཏྲཱཏི ཏསྨིཾ སབྷཱདིཀེ. ཨེཝཾ ‘‘ཏཏྠཱ’’ཏིཔདེཔི.

ཙཏུདྡསནྣཾ པཱུརཎོ ཙཱཏུདྡསོ, ཏསྨིཾ པཝཱརེཏྭཱཏི སམྦནྡྷོ. བྷིཀྑུསངྒྷེཏི བྷིཀྑུསངྒྷསྶ སནྟིཀེ, སམཱིཔཏྠེ ཙེཏཾ བྷུམྨཝཙནཾ. ཨཛྫཏནཱཏི ཨེཏྠ ཨསྨིཾ ཨཧནི ཨཛྫ, ཨིམསདྡཏོ ཨཧནཱིཏི ཨཏྠེ ཛྫཔཙྩཡོ, ཨིམསདྡསྶ ཙ ཨཀཱརོ, ཨཛྫ ཨེཝ ཨཛྫཏནཱ, སྭཏྠོ ཧི ཏནཔཙྩཡོ. ཨཔརསྨིཾ ཨཧནི ཨཔརཛྫ, ཨཔརསདྡཏོ ཨཧནཱིཏི ཨཏྠེ ཛྫཔཙྩཡོ སཏྟམྱནྟོཡེཝ. ཨེཏྠཱཏི པཝཱརཎེ, ‘‘ཨནུཛཱནཱམཱི’’ཏིཨཱདིཝཙནེ ཝཱ. ཧཱིཏི སཙྩཾ.

ཀོལཱཧལནྟི ཀོཏཱུཧལཾ. པཋམཾ བྷིཀྑུནཱི ཡཱཙིཏབྦཱཏི སངྒྷེན པཋམཾ བྷིཀྑུནཱི ཡཱཙིཏབྦཱ.

ཏཱཡ བྷིཀྑུནིཡཱ ཝཙནཱིཡོ ཨསྶཱཏི ཡོཛནཱ. པསྶནྟོ པཊིཀརིསྶཏཱིཏི ཝཛྫཱཝཛྫཾ པསྶནྟོ ཧུཏྭཱ པཊིཀརིསྶཏི.

ཨུབྷིནྣནྟི བྷིཀྑུབྷིཀྑུནཱིནཾ. ཡཐཱཋཱནེཡེཝཱཏི ཡཾ ཡཾ ཋཱནཾ ཡཐཱཋཱནཾ, ཏསྨིཾ ཡཐཱཋཱནེཡེཝ. ཀེནཙི པརིཡཱཡེནཱཏི ཀེནཙི ཀཱརཎེན. ཨཝཔུབྦོ ཝརསདྡོ པིཧིཏཏྠོཏི ཨཱཧ ‘‘པིཧིཏོ’’ཏི. ཝཙནཾཡེཝཱཏི ཨོཝཱདཝཙནཾཡེཝ. པཐོཏི ཛེཊྛཀཊྛཱནེ ཋཱནསྶ ཀཱརཎཏྟཱ པཐོ. དོསཾ པནཱཏི ཨབྷིཀྐམནཱདཱིསུ ¶ ཨཱདཱིནཝཾ པན. ཨཉྫེནྟཱིཏི མཀྑེནྟི. བྷིཀྑཱུཧི པན ཨོཝདིཏུཾ ཨནུསཱསིཏུཾ ཝཊྚཏཱིཏི ཡོཛནཱ.

ཨཉྙནྟི ཨོཝཱདཏོ ཨཉྙཾ. ཨེསོཏི གརུདྷམྨོ.

༡༥༠. ‘‘ཨདྷམྨཀམྨེ’’ཏི ཨེཏྠ ཀཏམཾ ཀམྨཾ ནཱམཱཏི ཨཱཧ ‘‘ཨདྷམྨཀམྨེཏིཨཱདཱིསཱུ’’ཏིཨཱདི. ཏཏྠཱཏི ཨདྷམྨཀམྨདྷམྨཀམྨེསུ.

༡༥༢. ཨུདྡེསཾ དེནྟོ བྷཎཏི, ཨནཱཔཏྟཱིཏི ཡོཛནཱ. ཨོསཱརེཏཱིཏི ཀཐེཏི. ཙཏུཔརིསཏཱིཏི ཙཏུཔརིསསྨིཾ. ཏཏྲཱཔཱིཏི ཏེན བྷིཀྑུནཱིནཾ སུཎནཀཱརཎེནཱཏི. པཋམཾ.

༢. ཨཏྠངྒཏསིཀྑཱཔདཾ

༡༥༣. དུཏིཡེ ¶ པརིཡཱཡསདྡོ ཝཱརཏྠོཏི ཨཱཧ ‘‘ཝཱརེནཱ’’ཏི. ཝཱརོཏི ཙ ཨནུཀྐམོཡེཝཱཏི ཨཱཧ ‘‘པཊིཔཱཊིཡཱཏི ཨཏྠོ’’ཏི. ཨདྷིཀཾ ཙིཏྟཾ ཨིམསྶཱཏི ཨདྷིཙེཏོཏི དསྶེནྟོ ཨཱཧ ‘‘ཨདྷིཙིཏྟཝཏོ’’ཏིཨཱདི. ཨདྷིཙིཏྟཾ ནཱམ ཨིདྷ ཨརཧཏྟཕལཙིཏྟམེཝ, ན ཝིཔསྶནཱཔཱདཀབྷཱུཏཾ ཨཊྛསམཱཔཏྟིཙིཏྟནྟི ཨཱཧ ‘‘ཨརཧཏྟཕལཙིཏྟེནཱ’’ཏི. ‘‘ཨདྷིཙིཏྟསིཀྑཱ’’ཏིཨཱདཱིསུ (པཱརཱ. ༤༥; དཱི. ནི. ༣.༣༠༥; མ. ནི. ༡.༤༩༧; ཨ. ནི. ༦.༡༠༥; མཧཱནི. ༡༠) ཧི ཝིཔསྶནཱཔཱདཀབྷཱུཏཾ ཨཊྛསམཱཔཏྟིཙིཏྟཾ ‘‘ཨདྷིཙིཏྟ’’ནྟི ཝུཙྩཏི. ན པམཛྫཏོཏི ན པམཛྫནྟསྶ. སཱཏཙྩཀིརིཡཱཡཱཏི སཏཏཀརཎེན. ཨུབྷོ ལོཀེ མུནཏི ཛཱནཱཏཱིཏི མུནཱིཏི ཙ, མོནཾ ཝུཙྩཏི ཉཱཎཾ མུནནཊྛེན ཛཱནནཏྠེན, ཏམསྶཏྠཱིཏི མུནཱིཏི ཙ དསྶེནྟོ ཨཱཧ ‘‘མུནིནོཏཱི’’ཏིཨཱདི. ཏཏྠ ‘‘ཡོ མུནཏི…པེ… མུནནེན ཝཱ’’ཏིཨིམིནཱ པཋམཏྠཾ དསྶེཏི, ‘‘མོནཾ ཝུཙྩཏི…པེ… ཝུཙྩཏཱི’’ཏིཨིམིནཱ དུཏིཡཏྠཾ དསྶེཏི. མུན གཏིཡནྟི དྷཱཏུཔཱཋེསུ (སདྡནཱིཏིདྷཱཏུམཱལཱཡཾ ༡༥ པཀཱརནྟདྷཱཏུ) ཝུཏྟཏྟཱ ‘‘ཡོ མུནཏཱི’’ཏི ཨེཏྠ བྷཱུཝཱདིགཎིཀོ མུནདྷཱཏུཡེཝ, ན ཀཱིཡཱདིགཎིཀོ མུདྷཱཏཱུཏི དཊྛབྦཾ. ཨཐ ཝཱ མུན ཉཱཎེཏི དྷཱཏུཔཱཋེསུ (སདྡནཱིཏིདྷཱཏུམཱལཱཡཾ ༡༧ ཀིཡཱདིགཎིཀ) ཝུཏྟཏྟཱ ‘‘མུནཱཏཱི’’ཏི ཀཱིཡཱདིགཎིཀོཝ. དྷཱཏྭནྟནཀཱརལོཔོཏི དཊྛབྦཾ. ‘‘མོནཾ ཝུཙྩཏི ཉཱཎ’’ནྟི ཙེཏྠ ཉཱཎཾ ནཱམ ¶ ཨརཧཏྟཉཱཎམེཝ. མོནསྶ པཐོ མོནཔཐོཏི ཝུཏྟེ སཏྟཏིཾས བོདྷིཔཀྑིཡདྷམྨཱཝ ཨདྷིཔྤེཏཱཏི ཨཱཧ ‘‘སཏྟཏིཾསབོདྷིཔཀྑིཡདྷམྨེསཱུ’’ཏི. ཨཐ ཝཱ ཨདྷིསཱིལསིཀྑཱདཡོ ཨདྷིཔྤེཏཱཏི ཨཱཧ ‘‘ཏཱིསུ ཝཱ སིཀྑཱསཱུ’’ཏི. པུབྦབྷཱགཔཊིཔདནྟི ཨརཧཏྟཉཱཎསྶ པུབྦབྷཱགེ པཝཏྟཾ སཱིལསམཐཝིཔསྶནཱསངྑཱཏཾ པཊིཔདཾ. པུབྦབྷཱགེཏི ཨརཧཏྟཉཱཎསྶ པུབྦབྷཱགེ. ཨེཏྠཱཏི ‘‘ཨདྷིཙེཏསོ…པེ… སིཀྑཏོ’’ཏི ཝཙནེ. ‘‘ཏཱདིནོ’’ཏིཔདཾ ‘‘མུནིནོ’’ཏིཔདེན ཡོཛེཏབྦནྟི ཨཱཧ ‘‘ཏཱདིསསྶ ཁཱིཎཱསཝམུནིནོ’’ཏི. ཨེཏྠཱཏི ‘‘སོཀཱ ན བྷཝནྟི ཏཱདིནོ’’ཏི ཝཙནེ. རཱགཱདཡོ ཨུཔསམེཏཱིཏི ཨུཔསནྟོཏི དསྶེཏུཾ ཝུཏྟཾ ‘‘རཱགཱདཱིན’’ནྟི. སཏི ཨསྶཏྠཱིཏི སཏིམཱཏི ཀཏྭཱ མནྟུསདྡོ ནིཙྩཡོགཏྠོཏི ཨཱཧ ‘‘སཏིཡཱ ཨཝིརཧིཏསྶཱ’’ཏི.

ན ཀསཱིཡཏི ན ཝིལེཁཱིཡཏཱིཏི ཨཀཱསོ, སོཡེཝ ཨཱཀཱསོ. ཨནྟརེན ཚིདྡེན ཨིཀྑིཏབྦོཏི ཨནྟལིཀྑོ. ཨཱཀཱསོ ཧི ཙཏུབྦིདྷོ ཨཛཊཱཀཱསོ, ཀསིཎུགྒྷཱཊིམཱཀཱསོ, པརིཙྪིནྣཱཀཱསོ, རཱུཔཔརིཙྪེདཱཀཱསོཏི. ཏཏྠ ཨཛཊཱཀཱསོཝ ཨིདྷཱདྷིཔྤེཏོ ‘‘ཨནྟལིཀྑེ’’ཏི ཝིསེསིཏཏྟཱ. ཏེནཱཧ ‘‘ན ཀསིཎུགྒྷཱཊིམེ, ན པན རཱུཔཔརིཙྪེདེ’’ཏི. པརིཙྪིནྣཱཀཱསོཔི རཱུཔཔརིཙྪེདཱཀཱསེན སངྒཧིཏོ. ‘‘མ’’ནྟི པདཾ ‘‘ཨཝམཉྙནྟཱི’’ཏི པདེ ཀམྨཾ. ཨེཏྟཀམེཝཱཏི ཨེཏཔྤམཱཎཾ ¶ ‘‘ཨདྷིཙེཏསོ’’ཏིཨཱདིསངྑཱཏཾ ཝཙནམེཝ, ན ཨཉྙཾ བུདྡྷཝཙནནྟི ཨཏྠོ. ཨཡནྟི ཙཱུལ༹པནྠཀོ ཐེརོ. ཧནྡཱཏི ཝསྶགྒཏྠེ ནིཔཱཏོ. མམ ཨཱནུབྷཱཝཾ དསྶེམི, ཏུམྷེ པསྶཐ གཎྷཐཱཏི ཨདྷིཔྤཱཡོ. ཝུཊྛཱཡཱཏི ཏཏོ ཙཏུཏྠཛ྄ཛྷཱནཏོ ཝུཊྛཧིཏྭཱ. ཨནྟརཱཔི དྷཱཡཏཱིཏི ཨེཏྠ པིསདྡསྶ ཨཊྛཱནཏྠཾ དསྶེནྟོ ཨཱཧ ‘‘ཨནྟརདྷཱཡཏིཔཱི’’ཏི. ཨེསེཝ ནཡོ ‘‘སེཡྻམྤི ཀཔྤེཏཱི’’ཏི ཨེཏྠཔི. ཐེརོཏི ཙཱུལ༹པནྠཀོ ཐེརོ. ཨིདཾ པདཾ ཨནྟརནྟརཱ ཡུཏྟཊྛཱནེསུ སམྦནྡྷིཏྭཱ ‘‘ཏཉྩེཝ བྷཎཏཱི’’ཏིཨིམིནཱ སམྦནྡྷིཏབྦཾ. བྷཱཏུཐེརསྶཱཏི ཛེཊྛཀབྷཱཏུབྷཱུཏསྶ མཧཱཔནྠཀཐེརསྶ.

པདྨནྟི ¶ གཱཐཱཡཾ ཏཡོ པཱདཱ ཨིནྡཝཛིརཱ, ཙཏུཏྠཔཱདོ ཨུཔེནྡཝཛིརོ. ཏསྨཱ པདྨནྟི ཨེཏྠ མཀཱརེ པརེ དུཀཱརུཀཱརསྶ ལོཔཾ ཀཏྭཱ པརཀྑརཾ ནེཏྭཱ ‘‘པདྨ’’ནྟི དྭིབྷཱཝེན ལིཁིཏབྦཾ. ཨཝཱིཏགནྡྷནྟི ཨེཏྠ ཝཱིཏི དཱིགྷུཙྩཱརཎམེཝ ཡུཏྟཾ. པངྐེ དཝཏི གཙྪཏཱིཏི པདུམཾ. ཀོཀཾ དུགྒནྡྷསྶ ཨཱདཱནཾ ནུདཏི ཨཔནེཏཱིཏི ཀོཀནུདཾ. སུནྡརོ གནྡྷོ ཨིམསྶཱཏི སུགནྡྷཾ. ཨཡཾ པནེཏྠ ཡོཛནཱ – ཡཐཱ ཀོཀནུདསངྑཱཏཾ སུགནྡྷཾ པཱཏོ པགེཝ བཱལཱཏཔེན ཕུལླཾ ཝིཀསིཏཾ ཨཝཱིཏགནྡྷཾ ཧུཏྭཱ ཝིརོཙམཱནཾ པདུམཾ སིཡཱ, ཏཐཱ ཨངྒཱིརསཾ ཨངྒིཏོ སརཱིརཏོ ནིཙྪརཎཔབྷསྶརརསཾ ཧུཏྭཱ ཝིརོཙམཱནབྷཱུཏཾ ཨནྟལིཀྑེ ཏཔནྟཾ ཨཱདིཙྩཾ ཨིཝ ཏེདྷཱཏུཀེ ཏཔནྟཾ སམྨཱསམྦུདྡྷཾ པསྶཱཏི.

པགུཎནྟི ཝཱཙུགྒཏཾ. ཏཏོཏི ཨསཀྐུཎེཡྻཏོ. ནནྟི ཙཱུལ༹པནྠཀཾ. ཐེརོཏི མཧཱཔནྠཀོ ཐེརོ ནིཀྐཌྜྷཱཔེསཱིཏི སམྦནྡྷོ. སོཏི ཙཱུལ༹པནྠཀོ. ཨཐཱཏི ཏསྨིཾ ཀཱལེ. བྷགཝཱ ཨཱཧཱཏི ཡོཛནཱ. བུདྡྷཙཀྑུནཱཏི ཨཱསཡཱནུསཡཨིནྡྲིཡཔརོཔརིཡཏྟཉཱཎསངྑཱཏེན སབྦཉྙུབུདྡྷཱནཾ ཙཀྑུནཱ. ཏནྟི ཙཱུལ༹པནྠཀཾ. ཏསྶཱཏི ཙཱུལ༹པནྠཀསྶ. ཨཐཱཏི ཏསྨིཾ ཨཱརོཙནཀཱལེ. ཨསྶཱཏི ཙཱུལ༹པནྠཀསྶ, དཏྭཱཏི སམྦནྡྷོ. རཛཾ མལཾ ཧརཏི ཨཔནེཏཱིཏི རཛོཧརཎཾ, པིལོཏིཀཁཎྜཾ. སོཏི ཙཱུལ༹པནྠཀོ. ཏསྶཱཏི པིལོཏིཀཁཎྜསྶ, ‘‘ཨནྟ’’ནྟིཔདེ ཨཝཡཝིསམྦནྡྷོ. པརིསུདྡྷམྤཱིཏི པིསདྡོ ཨཔརིསུདྡྷེ པིལོཏིཀཁཎྜེ ཀཱ ནཱམ ཀཐཱཏི དསྶེཏི. སཾཝེགནྟི སནྟཱསཾ བྷཡནྟི ཨཏྠོ. ཨཐཱཏི ཏསྨིཾ ཨཱརམྦྷཀཱལེ. ཨསྶཱཏི ཙཱུལ༹པནྠཀསྶ. ‘‘ཏ’’ནྟིཔདཾ ‘‘མམཱཡནབྷཱཝ’’ནྟིཔདེན སམྦནྡྷཾ ཀཏྭཱ ཡོཛནཱ ཀཱཏབྦཱཏི. དུཏིཡཾ.

༣. བྷིཀྑུནུཔསྶཡསིཀྑཱཔདཾ

༡༦༢. ཏཏིཡེ ‘‘ཨོཝདཏི པཱཙིཏྟིཡསྶཱ’’ཏི སཱམཉྙཏོ ཝུཏྟེཔི ཝིསེསཏོ ཨཏྠོ གཧེཏབྦོཏི ¶ ཨཱཧ ‘‘ཨཊྛཧི གརུདྷམྨེཧི ཨོཝདནྟསྶེཝ པཱཙིཏྟིཡ’’ནྟི. ཨིཏོཏི ཨིམསྨཱ སིཀྑཱཔདམྷཱ. ཡཏྠ ¶ ཡཏྠཱཏི ཡསྨིཾ ཡསྨིཾ སིཀྑཱཔདེ. སབྦཏྠ ཏཏྠ ཏཏྠཱཏི ཡོཛནཱཏི. ཏཏིཡཾ.

པཀིཎྞཀཀཐཱ

ཨེཏྠཱཏི ཨིམསྨིཾ སིཀྑཱཔདེ. ཨིདཾ པཀིཎྞཀཾ ཝུཏྟནྟི སམྦནྡྷོ. ཏཱིཎི པཱཙིཏྟིཡཱནཱིཏི བྷིཀྑུནོ ཨསམྨཏཏྟཱ ཨེཀཾ པཱཙིཏྟིཡཾ, སཱུརིཡསྶ ཨཏྠངྒཏཏྟཱ ཨེཀཾ, བྷིཀྑུནུཔསྶཡཾ ཨུཔསངྐམིཏཏྟཱ ཨེཀནྟི ཏཱིཎི པཱཙིཏྟིཡཱནི. ཀཐནྟི ཀེན ཀཱརཎེན ཧོཏཱིཏི ཡོཛནཱ. ཏཏྠཱཏི བྷིཀྑུནུཔསྶཡཾ. ཏསྶེཝཱཏི སམྨཏསྶེཝ བྷིཀྑུནོ. ཨཉྙེན དྷམྨེནཱཏི གརུདྷམྨེཧི ཨཉྙེན དྷམྨེན. དིཝཱ པནཱཏི སཱུརིཡུགྒམནཏོ ཏསྶ ཨནཏྠངྒཏེཡེཝཱཏི.

༤. ཨཱམིསསིཀྑཱཔདཾ

༡༦༤. ཙཏུཏྠེ བཧུཾ མཱནཾ ཀཏཾ ཡེཧཱིཏི བཧུཀཏཱ. བཧུཀཏཱ ཧུཏྭཱ ན ཨོཝདནྟཱིཏི ཨཏྠཾ དསྶེནྟོ ཨཱཧ ‘‘ན བཧུཀཏཱ’’ཏིཨཱདི. དྷམྨེཏི སཱིལཱདིདྷམྨེ. ཨདྷིཔྤཱཡོཏི ‘‘ན བཧུཀཏཱ’’ཏིཔདསྶ, ཚབྦགྒིཡཱནཾ ཝཱ ཨདྷིཔྤཱཡོཏི ཡོཛནཱ. ‘‘ཀཏྟུཀཱམོཏི ཨཱདཱིན’’ནྟིཔདཾ ‘‘ཨཏྠོ’’ཏིཔདེ ཝཱཙཀསམྦནྡྷོ.

ཨསམྨཏོ ནཱམ ཋཔིཏོ ཝེདིཏབྦོཏི ཡོཛནཱ. སམྨུཏིནྟི བྷིཀྑུནོཝཱདཀསམྨུཏིཾ. པཙྪཱ སཱམཎེརབྷཱུམིཡཾ ཋིཏོཏི ཡོཛནཱཏི. ཙཏུཏྠཾ.

༥. ཙཱིཝརདཱནསིཀྑཱཔདཾ

༡༦༩. པཉྩམེ རཐིཀཱཡཱཏི རཙྪཱཡ. སཱ ཧི རཐསྶ ཧིཏཏྟཱ རཐིཀཱཏི ཝུཙྩཏི. སནྡིཊྛཱཏི སམོདྷཱནཝསེན དསྶཱིཡིཏྠཱཏི སནྡིཊྛཱ. དིཊྛམཏྟཀཱ མིཏྟཱཏི ཨཱཧ ‘‘མིཏྟཱ’’ཏི. སེསནྟི ཝུཏྟཝཙནཏོ སེསཾ ཝཙནཾ. ཏཏྲཱཏི ཙཱིཝརཔཊིགྒཧཎསིཀྑཱཔདེ. ཧཱིཏི ཝིསེསཛོཏཀཾ. ཨིདྷཱཏི ཨིམསྨིཾ ཙཱིཝརདཱནསིཀྑཱཔདེཏི. པཉྩམཾ.

༦. ཙཱིཝརསིབྦནསིཀྑཱཔདཾ

༡༧༥. ཚཊྛེ ¶ ¶ ཨུདཱཡཱིཏི ཨེཏྠ མཧཱཨུདཱཡཱི, ཀཱལུ༹དཱཡཱི, ལཱལུ༹དཱཡཱིཏི ཏཡོ ཨུདཱཡཱི ཧོནྟི. ཏེསུ ཏཏིཡོཝཱདྷིཔྤེཏོཏི ཨཱཧ ‘‘ལཱལུ༹དཱཡཱི’’ཏི. པབྷཱཝེན ཋཱཏི པཝཏྟཏཱིཏི པཊྛོཏི ཀཏེ པཊིབལོཝ ལབྦྷཏི. ཏེནཱཧ ‘‘པཊིབལོ’’ཏི. ནིཔུཎོཏི ཀུསལོ. ‘‘པཊིབྷཱནེན ཀཏཙིཏྟ’’ནྟིཨིམིནཱ ‘‘པཊིབྷཱནཙིཏྟ’’ནྟི པདསྶ མཛ྄ཛྷེ པདལོཔཾ དསྶེཏི. སོཏི ལཱལུ༹དཱཡཱི ཨཀཱསཱིཏི སམྦནྡྷོ. ཏསྶཱཏི ཙཱིཝརསྶ. ‘‘ཡཐཱསཾཧཊ’’ནྟི ཨེཏྠ ཨེཝསདྡོ ཨཛ྄ཛྷཱཧརིཏབྦོཏི ཨཱཧ ‘‘ཡཐཱསཾཧཊམེཝཱ’’ཏི.

༡༧༦. ཡཾ ཙཱིཝརཾ ནིཝཱསིཏུཾ ཝཱ པཱརུཔིཏུཾ ཝཱ སཀྐཱ ཧོཏི, ཏཾ ཙཱིཝརཾ ནཱམཱཏི ཡོཛནཱ. ཨེཝཾ ཧཱིཏི ཨེཝམེཝ. ‘‘དུཀྐཊ’’ནྟིཨིམིནཱ ‘‘སཡཾ སིབྦཏི, ཨཱཔཏྟི པཱཙིཏྟིཡསྶཱ’’ཏི ཨེཏྠ ཨནྟརཱཔཏྟིཾ དསྶེཏི. ཨཱརཱཏི སཱུཙི. སཱ ཧི ཨརཏི ནིསྶངྒཝསེན གཙྪཏི པཝིསཏཱིཏི ‘‘ཨཱརཱ’’ཏི ཝུཙྩཏི, ཏསྶཱ པཐོ གམནཾ ཨཱརཱཔཐོ, ཏསྨིཾ, ཨཱརཱཔཐསྶ ནཱིཧརཎཱཝསཱནཏྟཱ ‘‘ནཱིཧརཎེ’’ཏི ཝུཏྟཾ. སཏཀྑཏྟུམྤཱིཏི ཨནེཀཀྑཏྟུམྤི. ཨཱཎཏྟོཏི ཨཱཎཱཔཱིཡཏཱིཏི ཨཱཎཏྟོ. ‘‘ཨཱཎཱཔིཏོ’’ཏི ཝཏྟབྦེ ཎཱཔེསདྡསྶ ལོཔཾ, ཨིཀཱརསྶ ཙ ཨཀཱརཾ ཀཏྭཱ, ‘‘ཨཱདཏྟེ’’ཏི ཨཱཁྱཱཏཔདེ ཏེཝིབྷཏྟིཡཱ ཝིཡ ཏཔཙྩཡསྶ ཙ དྭིབྷཱཝཾ ཀཏྭཱ ཨེཝཾ ཝུཏྟཾ. ཏེནཱཧ ‘‘སཀིཾ ཙཱིཝརཾ སིབྦཱཏི ཝུཏྟོ’’ཏི. ཨཐ པནཱཏི ཏཏོ ཨཉྙཐཱ པན. ཨཱཎཏྟསྶཱཏི ཨཱཎཱཔིཏསྶ. སམྦཧུལཱནིཔི པཱཙིཏྟིཡཱནི ཧོནྟཱིཏི སམྦནྡྷོ.

ཡེཔི ནིསྶིཏཀཱ སིབྦནྟཱིཏི ཡོཛནཱ, ཨཱཙརིཡུཔཛ྄ཛྷཱཡེསུ སིབྦནྟེསཱུཏི སམྦནྡྷོ. ཏེསནྟི ཨཱཙརིཡུཔཛ྄ཛྷཱཡཱནཾ. ཏེསམྤཱིཏི ནིསྶིཏཀཱནམྤི. ཉཱཏིཀཱནཾ བྷིཀྑུནཱིནཾ ཙཱིཝརནྟི སམྦནྡྷོ. ‘‘ཨནྟེཝཱསིཀེཧཱི’’ཏིཔདཾ ‘‘སིབྦཱཔེནྟཱི’’ཏིཔདེ ཀཱརིཏཀམྨཾ. ཏཏྲཱཔཱིཏི ཨཱཙརིཡུཔཛ྄ཛྷཱཡེཧི སིབྦཱཔནེཔི. ‘‘ཨནྟེཝཱསིཀེ’’ཏིཔདཾ ‘‘ཝཉྩེཏྭཱ’’ཏིཔདེ ¶ སུདྡྷཀམྨཾ, ‘‘སིབྦཱཔེནྟཱི’’ཏིཔདེ ཀཱརིཏཀམྨཾ. ཨིཏརེསནྟི ཨཱཙརིཡུཔཛ྄ཛྷཱཡཱནནྟི. ཚཊྛཾ.

༧. སཾཝིདྷཱནསིཀྑཱཔདཾ

༡༨༡. སཏྟམེ ‘‘ཏཱསཾ བྷིཀྑུནཱིནཾ པཙྪཱ གཙྪནྟཱིན’’ནྟི པདཱནི ‘‘པཏྟཙཱིཝར’’ནྟི པཱཋསེསེན ཡོཛེཏབྦཱནཱིཏི ཨཱཧ ‘‘པཙྪཱ གཙྪནྟཱིནཾ པཏྟཙཱིཝར’’ནྟི. ཏཱ བྷིཀྑུནིཡོ པཙྪཱ གཙྪནྟིཡོཏི ཝིབྷཏྟིཝིཔལླཱསཾ ཀཏྭཱ ‘‘དཱུསེསུ’’ནྟིཔདེན ཡོཛེཏབྦཱནཱིཏི ཨཱཧ ‘‘ཏཱ བྷིཀྑུནིཡོ ¶ ཙོརཱ དཱུསཡིཾསཱུ’’ཏི. ཨཐ ཝཱ ཝིབྷཏྟིཝིཔལླཱསམཀཏྭཱ ‘‘ཨཙྪིནྡིཾསཱུ’’ཏི པདེ ‘‘པཏྟཙཱིཝར’’ནྟིཔདཾ ཨཛ྄ཛྷཱཧརིཏྭཱ ‘‘དཱུསེསུ’’ནྟིཔདེ ‘‘སཱིལ’’ནྟི པཱཋཾ ཨཛ྄ཛྷཱཧརིཏྭཱ ཡོཛེཏབྦནྟི དཊྛབྦཾ.

༡༨༢-༣. སཾཔུབྦོ, ཝིཔུབྦོ ཙ དྷཱདྷཱཏུ ཏྭཱཔཙྩཡོ ཧོཏཱིཏི ཨཱཧ ‘‘སཾཝིདཧིཏྭཱ’’ཏི. ཀུཀྐུཊོཏི ཏམྦཙཱུལོ༹. སོ ཧི ཀུཀཏི ཨཱཧཱརཏྠཾ པཱཎཀཱདཡོ ཨཱདདཱཏཱིཏི ཀུཀྐུཊོ. ཨཡནྟི གཱམོ. ཨདྷིཀརཎེ ཎོཏི ཨཱཧ ‘‘སམྤདནྟི ཨེཏྠཱ’’ཏི. ཨེཏྠཱཏི ཙ ཨེཏསྨིཾ གཱམེ. ཨུཏྟརཔདསྶ ཨདྷིཀརཎཏྠཏྟཱ པུབྦཔདེན ཚཊྛཱིསམཱསོཏི ཨཱཧ ‘‘ཀུཀྐུཊཱན’’ནྟིཨཱདི. ཨེཝཾ ཎསདྡསྶ ཨདྷིཀརཎཏྠཾ, པུབྦཔདེན ཚཊྛཱིསམཱསཉྩ དསྶེཏྭཱ ཨིདཱནི ཎསདྡསྶ བྷཱཝཏྠཾ, པུབྦཔདེན བཱཧིརཏྠསམཱསཉྩ དསྶེཏུཾ ཝུཏྟཾ ‘‘ཨཐ ཝཱ’’ཏི. ཏཏྠཱཏི པཙྪིམཔཱཋེ. ཨུཔྤཏིཏྭཱཏི ཨུཌྜིཏྭཱ ཨུདྡྷཾ ཨཱཀཱསཾ ལངྒིཏྭཱཏི ཨཏྠོ. ཨེཏྠཱཏི པཙྪིམཔཱཋེ. དྭིདྷཱཏི པདགམནཔཀྑགམནཝསེན དྭིཔཀཱརེན. ‘‘ཨུཔཙཱརོ ན ལབྦྷཏཱི’’ཏིཨིམིནཱ གཱམནྟརོ ན ཧོཏི, ཨེཀགཱམོཡེཝ པན ཧོཏི, ཏསྨཱ ཨཱཔཏྟིཔི ཨེཀཱཡེཝ ཧོཏཱིཏི དསྶེཏི. པཙྩཱུསེཏི པབྷཱཏེ. སོ ཧི པཊིཝིརུདྡྷཾ ཏིམིརཾ ཨུསེཏི ནཱསེཏཱིཏི པཙྩཱུསོཏི ཝུཙྩཏི. ཝསྶནྟསྶཱཏི རཝནྟསྶ. ‘‘ཝཙནཏོ’’ཏིཔདཾ ‘‘ཨཱཔཏྟིཡེཝཱ’’ཏིཔདེ ཉཱཔཀཧེཏུ. རཏནམཏྟནྟརོཏི ཀུཀྐུཔམཱཎེན བྱཝདྷཱནོ.

ཏཏྲཱཏི ¶ ‘‘གཱམནྟརེ གཱམནྟརེ’’ཏི ཝཙནེ. ཧཱིཏི ཝིཏྠཱརོ. ཨུབྷོཔཱིཏི བྷིཀྑུབྷིཀྑུནིཡོཔི སཾཝིདཧནྟཱིཏི སམྦནྡྷོ. ན ཝདནྟཱིཏི ཨཊྛཀཐཱཙརིཡཱ ན ཀཐཡནྟི. ཙཏུནྣཾ མགྒཱནཾ སམཱགམཊྛཱནཾ ཙཏུཀྐཾ, དྭིནྣཾ, ཏིཎྞཾ, ཙཏུཀྐཏོ ཨཏིརེཀཱནཾ ཝཱ མགྒཱནཾ སམྦདྡྷཊྛཱནཾ སིངྒྷཱཊཀཾ. ཏཏྲཱཔཱིཏི ཨུཔཙཱརོཀྐམནེཔི. གཱམཏོཏི ཨཏྟནོ གཱམཏོ. ཡཱཝ ན ཨོཀྐམནྟི, ཏཱཝཱཏི ཡོཛནཱ. སནྡྷཱཡཱཏི ཨཱརབྦྷ. ཨཐཱཏི ཏསྨིཾ ནིཀྑམནཀཱལེ. དྭེཔཱིཏི བྷིཀྑུབྷིཀྑུནིཡོཔི གཙྪནྟཱིཏི སམྦནྡྷོ. ཏནྟི ཝཙནཾ.

ཧཱིཏི ཝིསེསོ. ‘‘གཱམནྟརེ གཱམནྟརེ’’ཏི པུརིམསྨིཾ ནཡེ ཨཏིཀྐམེ ཨནཱཔཏྟི, ཨོཀྐམནེ ཨཱཔཏྟཱིཏི ཨཡཾ ཝིསེསོ.

༡༨༤. གཏཔུབྦཏྠཱཏི གཏཔུབྦཱ ཨཏྠ བྷཝཐཱཏི ཨཏྠོ. ཨེཧི གཙྪཱམཱཏི ཝཱ ཨཱགཙྪེཡྻཱསཱིཏི ཝཱ ཝདཏཱིཏི ཡོཛནཱ. ཙེཏིཡཝནྡནཏྠནྟི ཐཱུཔསྶ ཝནྡིཏུཾ.

༡༨༥. ཝིསངྐེཏེནཱཏི ¶ ཨེཏྠ ཀཱལཝིསངྐེཏོ, དྭཱརཝིསངྐེཏོ, མགྒཝིསངྐེཏོཏི ཏིཝིདྷོ. ཏཏྠ ཀཱལཝིསངྐེཏེནེཝ ཨནཱཔཏྟིཾ སནྡྷཱཡ ‘‘ཝིསངྐེཏེན གཙྪནྟི, ཨནཱཔཏྟཱི’’ཏི ཨཱཧ. དྭཱརཝིསངྐེཏེན ཝཱ མགྒཝིསངྐེཏེན ཝཱ ཨཱཔཏྟིམོཀྑོ ནཏྠི. ཏམཏྠཾ དསྶེནྟོ ཨཱཧ ‘‘པུརེབྷཏྟ’’ནྟིཨཱདི. ཙཀྐསམཱརུལ༹ྷཱཏི ཨིརིཡཱཔཐཙཀྐཾ ཝཱ སཀཊཙཀྐཾ ཝཱ སམྨཱ ཨཱརུལ༹ྷཱ. ཛནཔདཱཏི ཛནཀོཊྛཱསཱ. པརིཡཱཡནྟཱིཏི པརི པུནཔྤུནཾ ཡནྟི ཙ ཨཱཡནྟི ཙཱཏི. སཏྟམཾ.

༨. ནཱཝཱབྷིརུཧནསིཀྑཱཔདཾ

༡༨༨. ཨཊྛམེ སཧ ཨཉྙམཉྙཾ ཐཝནཾ ཨབྷིཏྠཝནཾ སནྠཝོ, སངྒམོཏི ཝུཏྟཾ ཧོཏི. མིཏྟབྷཱཝེན སནྠཝོ མིཏྟསནྠཝོ, ལོཀེཧི ཨསྶཱདེཏབྦོ ཙ སོ མིཏྟསནྠཝོ ཙེཏི ལོཀསྶཱདམིཏྟསནྠཝོ, ཏསྶ ཝསོ པབྷཱུ, ཏེན ཝཱ ཨཱཡཏྟོཏི ལོཀསྶཱདམིཏྟསནྠཝཝསོ, ཏེན. ཨུདྡྷཾ གཙྪཏཱིཏི ཨུདྡྷཾགཱམིནཱིཏི དསྶེནྟོ ཨཱཧ ‘‘ཨུདྡྷ’’ནྟིཨཱདི. ཨུདྡྷནྟི ཙ ཨིདྷ པཊིསོཏོ. ཏེནཱཧ ¶ ‘‘ནདིཡཱ པཊིསོཏ’’ནྟི. ‘‘ཨུདྡྷཾགཱམིནི’’ནྟིམཱཏིཀཱཔདཾ ‘‘ཨུཛྫཝནིཀཱཡཱ’’ཏིཔདབྷཱཛནིཡཱ སཾསནྡེནྟོ ཨཱཧ ‘‘ཡསྨཱ པནཱ’’ཏིཨཱདི. ཡོཏི བྷིཀྑུ. ཨུདྡྷཾ ཛཝནཏོཏི པཊིསོཏཾ གམནཏོ. ཏེནཱཏི ཏེན ཧེཏུནཱ. ཨསྶཱཏི ‘‘ཨུདྡྷཾགཱམིནི’’ནྟིཔདསྶ. ཨནུསོཏཾ ཨིདྷ ཨདྷོ ནཱམཱཏི ཨཱཧ ‘‘ཨནུསོཏ’’ནྟི. ཨསྶཔཱིཏི པིསདྡོ པུརིམཱཔེཀྑོ. ཏཏྠཱཏི ‘‘ཨུདྡྷཾགཱམིནིཾ ཝཱ ཨདྷོགཱམིནིཾ ཝཱ’’ཏིཝཙནེ. ཡནྟི ནཱཝཾ ཧརནྟཱིཏི སམྦནྡྷོ. སམྤཊིཔཱདནཏྠནྟི སམྨཱ པཊིམུཁཾ པཱདནཏྠཾ, ཨུཛུཔཛྫཱཔནཏྠནྟི ཨཏྠོ. ཨེཏྠཱཏི ནཱཝཱཡཾ. ‘‘ཋཔེཏྭཱ’’ཏིཔདབྷཱཛནིམཔེཀྑིཏྭཱ ‘‘ཨུཔཡོགཏྠེ ནིསྶཀྐཝཙན’’ནྟི ཨཱཧ. ‘‘ཨཉྙཏྲཱ’’ཏི མཱཏིཀཱཔདེ ཨཔེཀྑིཏེ ནིསྶཀྐཏྠེ ནིསྶཀྐཝཙནམྤི ཡུཛྫཏེཝ.

༡༨༩. ཨེཀཾ ཏཱིརཾ ཨགཱམཀཾ ཨརཉྙཾ ཧོཏཱིཏི ཡོཛནཱ. ཨདྡྷཡོཛནགཎནཱཡ པཱཙིཏྟིཡཱནི ཧོནྟཱིཏི སམྦནྡྷོ. མཛ྄ཛྷེན གམནེཔཱིཏི པིསདྡོ ཨགཱམཀཨརཉྙཏཱིརཔསྶེན གམནེ ཀཱ ནཱམ ཀཐཱཏི དསྶེཏི. ན ཀེཝལཾ ནདིཡཱཏི ཀེཝལཾ ནདིཡཱ ཨེཝ ཨནཱཔཏྟི ནཱཏི ཡོཛནཱ, ཨཉྙེསུཔི སམུདྡཱདཱིསུ ཨནཱཔཏྟཱིཏི ཨདྷིཔྤཱཡོ. ཡོཔི བྷིཀྑུ གཙྪཏཱིཏི སམྦནྡྷོ. ཧཱིཏི སཙྩཾ, ཡསྨཱ ཝཱ.

༡༩༡. ཀཱལཝིསངྐེཏོ, ཏིཏྠཝིསངྐེཏོ, ནཱཝཱཝིསངྐེཏོཏི ཏིཝིདྷོ ཝིསངྐེཏོ. ཏཏྠ ཀཱལཝིསངྐེཏེན ¶ ཨནཱཔཏྟིཾ སནྡྷཱཡ ‘‘ཝིསངྐེཏེན ཨབྷིརུཧནྟཱི’’ཏི ཝུཏྟཾ. ཨཉྙེན ཝིསངྐེཏེན ཨཱཔཏྟིཡེཝ, ཏམཏྠཾ དསྶེནྟོ ཨཱཧ ‘‘ཨིདྷཱཔཱི’’ཏིཨཱདཱིཏི. ཨཊྛམཾ.

༩. པརིཔཱཙིཏསིཀྑཱཔདཾ

༡༩༢. ནཝམེ མཧཱནཱགེསཱུཏི མཧཱཨརཧནྟེསུ ཏིཊྛམཱནེསུ སནྟེསུ, ཙེཏཀེ པེསྶབྷཱུཏེ ནཝཀེ བྷིཀྑཱུ ནིམནྟེཏཱིཏི ཨདྷིཔྤཱཡོ. ཨིཏརཐཱཏི ཝིབྷཏྟིཝིཔལླཱསཏོ ཝཱ པཱཋསེསཏོ ཝཱ ཨཉྙེན པཀཱརེན. ཨནྟརཾ མཛ྄ཛྷཾ པཏྟཱ ཀཐཱ ཨནྟརཀཐཱཏི དསྶེནྟོ ཨཱཧ ‘‘ཨཝསཱན’’ནྟིཨཱདི. པཀིརཱིཡིཏྠཱཏི པཀཏཱ, ན ¶ པཀཏཱ ཝིཔྤཀཏཱཏི ཝུཏྟེ ཀརིཡམཱནཀཐཱཝཱཏི ཨཱཧ ‘‘ཀརིཡམཱནཱ ཧོཏཱི’’ཏི. ཨདྡྷཙྪིཀེནཱཏི ཨུཔཌྜྷཙཀྑུནཱ. ཏེཧཱིཏི ཐེརེཧི.

༡༩༤. ལདྡྷབྦནྟི ལདྡྷཱརཧཾ. ཨསྶཱཏི ‘‘བྷིཀྑུནིཔརིཔཱཙིཏ’’ནྟིཔདསྶ. སམྨཱ ཨཱརབྷིཏབྦོཏི སམཱརམྦྷོཏི དསྶེནྟོ ཨཱཧ ‘‘སམཱརདྡྷཾ ཝུཙྩཏཱི’’ཏི. པཊིཡཱདིཏསྶཱཏི པརིཔཱཙིཏསྶ བྷཏྟསྶ. གིཧཱིནཾ སམཱརམྦྷོཏི གིཧིསམཱརམྦྷོ, ཀཏྭཏྠེ ཙེཏཾ སཱམིཝཙནཾ. ཏཏོཏི ཏཏོ བྷཏྟཏོ. ཨཉྙཏྲཱཏི ཝིནཱ. ཏམཏྠཾ ཝིཝརནྟོ ཨཱཧ ‘‘ཏཾ པིཎྜཔཱཏཾ ཋཔེཏྭཱ’’ཏི. པདབྷཱཛནེ པན ཝུཏྟནྟི སམྦནྡྷོ. ‘‘ཉཱཏཀཔཝཱརིཏེཧཱི’’ཏིཔདཾ ‘‘ཨསམཱརདྡྷོ’’ཏིཔདེ ཀཏྟཱ. ཨཏྠཏོཏི བྷིཀྑུནིཨཔརིཔཱཙིཏཨཏྠཏོ. ཏསྨཱཏི ཡསྨཱ ཨཏྠཏོ སམཱརདྡྷོཝ ཧོཏི, ཏསྨཱ.

༡༩༥. པཊིཡཱདིཏནྟི པཊིཡཏྟཾ. པཀཏིཡཱ པཊིཡཏྟཾ པཀཏིཔཊིཡཏྟནྟི དསྶེནྟོ ཨཱཧ ‘‘པཀཏིཡཱ’’ཏིཨཱདི. མཧཱཔཙྩརིཡཾ པན ཝུཏྟནྟི སམྦནྡྷོ. ཏསྶཱཏི ཏསྶེཝ བྷིཀྑུནོ. ཨཉྙསྶཱཏི ཏཏོ ཨཉྙསྶ བྷིཀྑུནོ.

༡༩༧. བྷིཀྑུནིཔརིཔཱཙིཏེཔཱིཏི པིསདྡོ བྷིཀྑུནིཨཔརིཔཱཙིཏེ ཀཱ ནཱམ ཀཐཱཏི དསྶེཏཱིཏི. ནཝམཾ.

༡༠. རཧོནིསཛྫསིཀྑཱཔདཾ

༡༩༨. དསམེ པཱལི༹ཨཏྠོ ཙཱཏི ཨེཏྠ པཱལི༹སདྡོ ཝིནིཙྪིཡསདྡེ ཙ ཡོཛེཏབྦོ ‘‘པཱལི༹ཝིནིཙྪཡོ’’ཏི. ཧཱིཏི སཙྩཾ, ཡསྨཱ ཝཱ. ‘‘ཨིདཾ སིཀྑཱཔད’’ནྟིཔདཾ ‘‘ཨེཀཔརིཙྪེད’’ནྟིཔདེ ¶ ཏུལྱཏྠཀཏྟཱ, ‘‘པཉྙཏྟ’’ནྟིཔདེ ཀམྨཾ. ཨུཔརཱིཏི ཨཙེལཀཝགྒེཏི. དསམཾ.

ཨོཝཱདཝགྒོ ཏཏིཡོ.

༤. བྷོཛནཝགྒོ

༡. ཨཱཝསཐཔིཎྜསིཀྑཱཔད-ཨཏྠཡོཛནཱ

༢༠༣. བྷོཛནཝགྒསྶ ¶ པཋམེ ཨཱཝསཐེ པཉྙཏྟོ པིཎྜོ ཨཱཝསཐཔིཎྜོཏི དསྶེནྟོ ཨཱཧ ‘‘སམནྟཱ’’ཏིཨཱདི. པརིཀྑིཏྟནྟི པརིཝུཏཾ ཨཱཝསཐནྟི སམྦནྡྷོ. ཨདྡྷཾ པཐཾ གཙྪནྟཱིཏི ཨདྡྷིཀཱ. གིལཱཡནྟི རུཛནྟཱིཏི གིལཱནཱ. གབྦྷོ ཀུཙྪིཊྛསཏྟོ ཨེཏཱསནྟི གབྦྷིནིཡོ. མལཾ པབྦཱཛེནྟཱིཏི པབྦཛིཏཱ, ཏེསཾ ཡཐཱནུརཱུཔནྟི སམྦནྡྷོ. པཉྙཏྟཱནི མཉྩཔཱིཋཱནི ཨེཏྠཱཏི པཉྙཏྟམཉྩཔཱིཋོ, ཏཾ. ཨནེཀགབྦྷཔརིཙྪེདཾ ཨནེཀཔམུཁཔརིཙྪེདཾ ཨཱཝསཐཾ ཀཏྭཱཏི ཡོཛནཱ. ཏཏྠཱཏི ཨཱཝསཐེ. ཏེསཾ ཏེསནྟི ཨདྡྷིཀཱདཱིནཾ. ཧིཡྻོསདྡསྶ ཨཏཱིཏཱནནྟརཱཧསྶ ཙ ཨནཱགཏཱནནྟརཱཧསྶ ཙ ཝཱཙཀཏྟཱ ཨིདྷ ཨནཱགཏཱནནྟརཱཧཝཱཙཀོཏི ཨཱཧ ‘‘སྭེཔཱི’’ཏི. ཀུཧིཾ གཏཱ ཨིཏི ཝུཏྟེཏི ཡོཛནཱ. ‘‘ཀུཀྐུཙྩཱཡནྟོ’’ཏིཔདསྶ ནཱམདྷཱཏུཾ དསྶེནྟོ ཨཱཧ ‘‘ཀུཀྐུཙྩཾ ཀརོནྟོ’’ཏི.

༢༠༦. ‘‘ཨདྡྷཡོཛནཾ ཝཱ ཡོཛནཾ ཝཱ’’ཏིཨིམིནཱ ‘‘པཀྐམིཏུ’’ནྟིཔདསྶ ཀམྨཾ དསྶེཏི. ‘‘གནྟུ’’ནྟིཨིམིནཱ ཀམུསདྡསྶ པདཝིཀྑེཔཏྠཾ དསྶེཏི. ‘‘ཨནོདིསྶཱ’’ཏིཔདསྶ ཏྭཱཔཙྩཡནྟབྷཱཝཾ དསྶེཏུཾ ‘‘ཨནུདྡིསིཏྭཱ’’ཏི ཝུཏྟཾ. པཱསཾ ཌེཏཱིཏི པཱསཎྜོ, སཏྟཱནཾ ཙིཏྟེསུ དིཊྛིཔཱསཾ ཁིཔཏཱིཏི ཨཏྠོ. ཨཐ ཝཱ ཏཎྷཱཔཱསཾ, དིཊྛིཔཱསཉྩ ཌེཏི ཨུཌྜེཏཱིཏི པཱསཎྜོ, ཏཾ པཱསཎྜཾ. ཡཱཝཏཏྠོ པཉྙཏྟོ ཧོཏཱིཏི ཡཱཝཏཱ ཨཏྠོ ཧོཏི, ཏཱཝཏཱ པཉྙཏྟོ ཧོཏཱིཏི ཡོཛནཱ. ‘‘ཡཱཝདཏྠོ’’ཏིཔི པཱཋོ, ཨཡམེཝཏྠོ. དཀཱརོ པདསནྡྷིཀརོ. སཀིཾ བྷུཉྫིཏབྦནྟི ཨེཀདིཝསཾ སཀིཾ བྷུཉྫིཏབྦནྟི ཨཏྠོ. ཏེནཱཧ ‘‘ཨེཀདིཝསཾ བྷུཉྫིཏབྦ’’ནྟི.

ཨེཏྠཱཏི ¶ ཨིམསྨིཾ སིཀྑཱཔདེ. ཨེཀཀུལེན ཝཱ པཉྙཏྟནྟི སམྦནྡྷོ. བྷུཉྫིཏུཾ ན ཝཊྚཏི ཨེཀཏོ ཧུཏྭཱ པཉྙཏྟཏྟཱཏི ཨདྷིཔྤཱཡོ. ནཱནཱཀུལེཧི པཉྙཏྟཾ པིཎྜནྟི ཡོཛནཱ. བྷུཉྫིཏུཾ ཝཊྚཏི ནཱནཱཀུལཱནི ཨེཀཏོ ཨཧུཏྭཱ ཝིསུཾ ཝིསུཾ པཉྙཏྟཏྟཱཏི ཨདྷིཔྤཱཡོ. ཡོཔི པིཎྜོ ¶ ཚིཛྫཏཱིཏི སམྦནྡྷོ. ཨུཔཙྪིནྡིཏྭཱཏི ཨསདྡྷིཡཱདིཔཱཔཙིཏྟཏྟཱ ཨུཔཙྪིནྡིཏྭཱ.

༢༠༨. ཨནུཝསིཏྭཱཏི པུནཔྤུནཾ ཝསིཏྭཱ. ཨནྟརཱམགྒེ གཙྪནྟཏྟཱ ‘‘གཙྪནྟོ བྷུཉྫཏཱི’’ཏི ཨིདཾ ཏཱཝ ཡུཏྟཾ ཧོཏུ, གཏཊྛཱནེ པན གམིཏཏྟཱ ཀཐཾ? པཙྩུཔྤནྣསམཱིཔོཔི ཨཏཱིཏོ ཏེན སངྒཧིཏཏྟཱ ཡུཏྟཾ. ‘‘ཀུཏོ ནུ ཏྭཾ བྷིཀྑུ ཨཱགཙྪསཱི’’ཏིཨཱདཱིསུ (སཾ. ནི. ༡.༡༣༠) ཝིཡ. ཏཾསམཱིཔོཔི ཧི ཏཱདིསོ. ནཱནཱཊྛཱནེསུ ནཱནཱཀུལཱནཾ སནྟཀེ པཀཏིཡཱ ཨནཱཔཏྟིབྷཱཝཏོ ནཱནཱཊྛཱནེསུ ཨེཀཀུལསྶེཝ སནྟཀཾ སནྡྷཱཡ ཝུཏྟཾ ‘‘ཨནཱཔཏྟཱི’’ཏི. ཨཱརདྡྷསྶ ཝིཙྪེདཏྟཱ ‘‘པུན ཨེཀདིཝསཾ བྷུཉྫིཏུཾ ལབྷཏཱི’’ཏི ཝུཏྟཾ. ‘‘ཨོདིསྶཱ’’ཏི སཱམཉྙཏོ ཝུཏྟེཔི བྷིཀྑཱུཡེཝ གཧེཏབྦཱཏི ཨཱཧ ‘‘བྷིཀྑཱུནཾཡེཝཱ’’ཏི. པཋམཾ.

༢. གཎབྷོཛནསིཀྑཱཔདཾ

༢༠༩. དུཏིཡེ པཧཱིནལཱབྷསཀྐཱརསྶ ཧེཏུཾ དསྶེནྟོ ཨཱཧ ‘‘སོ ཀིརཱ’’ཏིཨཱདི. སོཏི དེཝདཏྟོ. ‘‘ཨཧོསཱི’’ཏི ཙ ‘‘པཱཀཊོ ཛཱཏོ’’ཏི ཙ ཡོཛེཏབྦོ. ཨཛཱཏསཏྟུནཱཏི ཨཛཱཏསྶེཡེཝ པིཏུརཱཛསྶ སཏྟུབྷཱཝཏོ ཨཛཱཏསཏྟུནཱ, ‘‘མཱརཱཔེཏྭཱ’’ཏིཔདེ ཀཱརིཏཀམྨཾ. རཱཛཱནནྟི བིམྦིསཱརརཱཛཾ, ‘‘མཱརཱཔེཏྭཱ’’ཏིཔདེ དྷཱཏུཀམྨཾ. ཨབྷིམཱརེཏི ཨབྷིནིལཱིཡིཏྭཱ བྷགཝཏོ མཱརཎཏྠཱཡ པེསིཏེ དྷནུདྷརེ. གཱུལ༹ྷཔཊིཙྪནྣོཏི གུཧིཏོ ཧུཏྭཱ པཊིཙྪནྣོ. པརིཀཐཱཡཱཏི པརིགུཧནཱཡ ཀཐཱཡ. ‘‘རཱཛཱནམྤཱི’’ཏིཔདཾ ‘‘མཱརཱཔེསཱི’’ཏིཔདེ དྷཱཏུཀམྨཾ. པཝིཛ྄ཛྷཱིཏི པཝཊྚེསི. ཏཏོཏི ཏཏོ ཝུཏྟཏོ པརཾ ཨུཊྛཧིཾསཱུཏི སམྦནྡྷོ. ནགརེ ནིཝསནྟཱིཏི ནཱགརཱ. རཱཛཱཏི ཨཛཱཏསཏྟུརཱཛཱ. སཱསནཀཎྚཀནྟིསཱསནསྶ ཀཎྚཀསདིསཏྟཱ སཱསནཀཎྚཀཾ. ཏཏོཏི ནཱིཧརཏོ. ཨུཔཊྛཱནམྤཱིཏི ཨུཔཊྛཱནམྤི, ཨུཔཊྛཱནཏྠཱཡཔི ཝཱ. ཨཉྙེཔཱིཏི རཱཛཏོ ཨཉྙེཔི. ཨསྶཱཏི དེཝདཏྟསྶ. ཀིཉྩི ཁཱདནཱིཡབྷོཛནཱིཡཾ ‘‘དཱཏབྦ’’ནྟི ཨིམིནཱ ཡོཛེཏབྦཾ. ཀིཉྩི ཝཱ ཨབྷིཝཱདནཱདི ‘‘ཀཱཏབྦ’’ནྟི ཨིམིནཱ སམྦནྡྷོ. ཀུལེསུ ¶ ཝིཉྙཱཔེཏྭཱ བྷུཉྫནསྶ ཧེཏུཾ དསྶེནྟོ ཨཱཧ ‘‘མཱ མེ’’ཏིཨཱདི. པོསེནྟོ ཧུཏྭཱ བྷུཉྫཏཱིཏི སམྦནྡྷོ.

༢༡༡. བྷཏྟཾ ཨནདྷིཝཱསེནྟཱནཾ ཀསྨཱ ཙཱིཝརཾ པརིཏྟཾ ཨུཔྤཛྫཏཱིཏི ཨཱཧ ‘‘བྷཏྟཾ ཨགཎྷནྟཱན’’ནྟིཨཱདི.

༢༡༢. ཙཱིཝརཀཱརཀེ ¶ བྷིཀྑཱུ བྷཏྟེན ཀསྨཱ ནིམནྟེནྟཱིཏི ཨཱཧ ‘‘གཱམེ’’ཏིཨཱདི.

༢༡༥. ནཱནཱཝེརཛྫཀེཏི ཨེཏྠ རཉྙོ ཨིདཾ རཛྫཾ, ཝིསདིསཾ རཛྫཾ ཝིརཛྫཾ, ནཱནཔྤཀཱརཾ ཝིརཛྫཾ ནཱནཱཝིརཛྫཾ. ནཱནཱཝིརཛྫེཧི ཨཱགཏཱ ནཱནཱཝེརཛྫཀཱ. མཛ྄ཛྷེ ཝུདྡྷི ཧོཏཱིཏི ཨཱཧ ‘‘ནཱནཱཝིདྷེཧི ཨཉྙརཛྫེཧི ཨཱགཏེ’’ཏི. ཨཉྙརཛྫེཧཱིཏི རཱཛགཧཏོ ཨཉྙེཧི རཛྫེཧི. རཉྫིཏབྦནྟི རཉྫནྟི ཝུཏྟེ ནིགྒཧིཏསྶ ཨནཱསནཾ སནྡྷཱཡ ཝུཏྟཾ ‘‘ནཱནཱཝེརཉྫཀེཨིཏིཔི པཱཋོ’’ཏི.

༢༡༨. གཎབྷོཛནེཏི གཎསྶ བྷོཛནཾ གཎབྷོཛནཾ, གཎབྷོཛནསྶ བྷོཛནཾ གཎབྷོཛནཾ, ཏསྨིཾ གཎབྷོཛནེ པཱཙིཏྟིཡནྟི ཨཏྠོ. ‘‘རཏྟཱུཔརཏོ’’ཏིཨཱདཱིསུ (དཱི. ནི. ༡.༡༠; མ. ནི. ༡.༢༩༣) ཝིཡ ཨེཀསྶ བྷོཛནསདྡསྶ ལོཔོ དཊྛབྦོ. ནནུ ཨུཔོསཐེ ཝིཡ དྭེ ཏཡོ གཎོ ནཱམཱཏི ཨཱཧ ‘‘ཨིདྷ གཎོ ནཱམ ཙཏྟཱརོ’’ཏིཨཱདི. ཏེན དྭེ ཏཡོ གཎོ ནཱམ ན ཧོནྟི, ཙཏྟཱརོ པན ཨཱདིཾ ཀཏྭཱ ཏདུཏྟརི གཎོ ནཱམཱཏི དསྶེཏི. ཏཾ པནེཏནྟི ཨེཏྠ ཨེཏསདྡོ ཝཙནཱལངྐཱརོ དྭཱིསུ སབྦནཱམེསུ པུབྦསྶེཝ ཡེབྷུཡྻེན པདྷཱནཏྟཱ. པསཝཏཱིཏི ཝཌྜྷཏི, ཛཱཡཏཱིཏི ཨཏྠོ. ཝེཝཙནེན ཝཱཏི ‘‘བྷཏྟེན ནིམནྟེམི, བྷོཛནེན ནིམནྟེམཱི’’ཏི པརིཡཱཡེན ཝཱ. བྷཱསནྟརེན ཝཱཏི མཱུལབྷཱསཱཏོ ཨཉྙཱཡ བྷཱསཱཡ ཝཱ. ཨེཀཏོ ནིམནྟིཏཱ བྷིཀྑཱུཏི སམྦནྡྷོ. ཧཱིཏི སཙྩཾ, ཡསྨཱ ཝཱ. པམཱཎནྟི ཀཱརཎཾ. ‘‘ཙཏྟཱརོ’’ཏི ལིངྒཝིཔལླཱསཾ ཀཏྭཱ ‘‘ཝིཧཱརེ’’ཏིཔདེན ཡོཛེཏབྦཾ. ཋིཏེསུཡེཝཱཏི པདཾ ནིདྡྷཱརཎསམུདཱཡོ. ཨེཀོ ནིམནྟིཏོཏི སམྦནྡྷོ.

ཙཏྟཱརོ ¶ བྷིཀྑཱུ ཝིཉྙཱཔེཡྻུནྟི སམྦནྡྷོ. པཱཊེཀྐནྟི པཏིཨེཀསྶ བྷཱཝོ པཱཊེཀྐཾ, ཝིསུནྟི ཨཏྠོ. ཨེཀཏོ ཝཱ ནཱནཱཏོ ཝཱ ཝིཉྙཱཔེཡྻུནྟི སམྦནྡྷོ.

ཚཝིསངྑཱཏཏོ བཱཧིརཙམྨཏོ ཨབྦྷནྟརཙམྨསྶ ཐཱུལཏྟཱ ‘‘མཧཱཙམྨསྶཱ’’ཏི ཝུཏྟཾ. ཕཱལཾ ཨེཏེསཾ པཱདཱནཾ སཉྫཱཏནྟི ཕཱལིཏཱ, ཨུཔྤཱདེནྟཱིཏི སམྦནྡྷོ. པཧཊམཏྟེ སཏཱིཏི ཡོཛནཱ. ལེསེན ཀཔྤནྟི པཝཏྟཾ ཙིཏྟཾ ལེསཀཔྤིཡཾ.

སུཏྟཉྩཱཏི སཱུཙིཔཱསཔཝེསནསུཏྟཉྩ. ནནུ ཝིསུཾ ཙཱིཝརདཱནསམཡོ ཝིཡ ཙཱིཝརཀཱརསམཡོཔི ཨཏྠི, ཀསྨཱ ‘‘ཡདཱ ཏདཱ’’ཏི ཝུཏྟནྟི ཨཱཧ ‘‘ཝིསུཾ ཧཱི’’ཏིཨཱདི. ཧཱིཏི སཙྩཾ, ཡསྨཱ ཝཱ. ཝིསུཾ ཙཱིཝརདཱནསམཡོ ཝིཡ ཙཱིཝརཀཱརསམཡོ ནཱམ ཡསྨཱ ནཏྠི, ཏསྨཱ ¶ ‘‘ཡདཱ ཏདཱ’’ཏི མཡཱ ཝུཏྟནྟི ཨདྷིཔྤཱཡོ. ཏསྨཱ ཡོ བྷིཀྑུ ཀརོཏི, ཏེན བྷུཉྫིཏབྦནྟི ཡོཛནཱ. སཱུཙིཝེཋནཀོཏི སིབྦནཏྠཱཡ དྭེ པིལོཏིཀཁཎྜེ སམྦནྡྷིཏྭཱ སཱུཙིཡཱ ཝིཛ྄ཛྷནཀོ. ཝིཙཱརེཏཱིཏི པཉྩཁཎྜསཏྟཁཎྜཱདིཝསེན སཾཝིདཧཏི. ཚིནྡཏཱིཏི སཏྠཀེན ཝཱ ཧཏྠེན ཝཱ ཚིནྡཏི. མོགྷསུཏྟནྟི མུཡ྄ཧནཾ མོགྷོ, ཨཏྠཏོ གཧེཏབྦཚཊྚེཏབྦཊྛཱནེ མུཡ྄ཧནཙིཏྟཾ, ཏསྶ ཚིནྡནཾ སུཏྟནྟི མོགྷསུཏྟཾ. ཨཱགནྟུཀཔཊྚནྟི དུཔཊྚཙཱིཝརེ མཱུལཔཊྚསྶ ཨུཔརི ཋཔིཏཔཊྚཾ. པཙྩཱགཏནྟི པཊྚཙཱིཝརཱདཱིསུ ལབྦྷཏི. བནྡྷཏཱིཏི མཱུལཔཊྚེན ཨཱགནྟུཀཔཊྚཾ. བནྡྷཏི. ཨནུཝཱཏནྟི ཙཱིཝརཾ ཨནུཔརིཡཱཡིཏྭཱ ཝཱིཡཏི བནྡྷཱིཡཏཱིཏི ཨནུཝཱཏཾ, ཏཾ ཚིནྡཏི. གྷཊྚེཏཱིཏི དྭེ ཨནུཝཱཏནྟེ ཨཉྙམཉྙཾ སམྦཛ྄ཛྷཏི. ཨཱརོཔེཏཱིཏི ཙཱིཝརསྶ ཨུཔརི ཨཱརོཔེཏི. ཏཏྠཱཏི ཙཱིཝརེ. སུཏྟཾ ཀརོཏཱིཏི སཱུཙིཔཱསཔཝེསནསུཏྟཾ ཝཊྚེཏི. ཝལེཏཱིཏི ཝཊྚིཏྭཱ སུཏྟཝེཋནདཎྜཀེ ཨཱཝཊྚེཏི. པིཔྥལིཀནྟི སཏྠཀཾ. ཏཉྷི པིཡམྤི ཕཱལེཏཱིཏི པིཔྥལི, སཱཡེཝ པིཔྥལིཀནྟི ཀཏྭཱ པིཔྥལིཀནྟི ཝུཙྩཏི, ཏཾ ནིསེཏི ནིསཱནཾ ཀརོཏཱིཏི ཨཏྠོ. ཡོ པན ཀཐེཏི, ཨེཏཾ ཋཔེཏྭཱཏི ཡོཛནཱ.

ཨདྡྷཱནམགྒསྶ དྭིགཱཝུཏཏྟཱ ‘‘ཨདྡྷཡོཛནབྦྷནྟརེ གཱཝུཏེ’’ཏི ཝུཏྟཾ. ཨབྷིརཱུལ༹ྷེན བྷུཉྫིཏབྦནྟི སམྦནྡྷོ. ཡཏྠཱཏི ཡསྨིཾ ཀཱལེ. ‘‘སནྣིཔཏནྟཱི’’ཏི བཧུཀཏྟུཝསེན ཝུཏྟཾ. ཨཀུསལཾ པརིཝཛྫེཏཱིཏི པརིབྦཱཛཀོ ¶ , པབྦཛྫཝེསཾ ཝཱ པརིགྒཧེཏྭཱ ཝཛཏི གཙྪཏི པཝཏྟཏཱིཏི པརིབྦཱཛཀོ. ཝིནཱ བྷཱཝཔཙྩཡེན བྷཱཝཏྠསྶ ཉཱཏབྦཏོ པརིབྦཱཛཀབྷཱཝོ པརིབྦཱཛཀོ, ཏཾ སམཱཔནྣོཏི པརིབྦཱཛཀསམཱཔནྣོ. ཨཐ ཝཱ པརིབྦཱཛཀེསུ སམཱཔནྣོ པརིཡཱཔནྣོཏི པརིབྦཱཛཀསམཱཔནྣོ. ‘‘ཨེཏེས’’ནྟིཔདཾ ‘‘ཡེན ཀེནཙཱི’’ཏིཔདེ ནིདྡྷཱརཎསམུདཱཡོ.

༢༢༠. ཡེཔི བྷིཀྑཱུ བྷུཉྫནྟཱིཏི སམྦནྡྷོ. ཏཏྠཱཏི ‘‘དྭེ ཏཡོ ཨེཀཏོ’’ཏིཝཙནེ. ཨནིམནྟིཏོ ཙཏུཏྠོ ཡསྶ ཙཏུཀྐསྶཱཏི ཨནིམནྟིཏཙཏུཏྠཾ, ཨནིམནྟིཏེན ཝཱ ཙཏུཏྠཾ ཨནིམནྟིཏཙཏུཏྠཾ. ཨེསེཝ ནཡོ ཨཉྙེསུཔི ཙཏུཏྠེསུ. ཨིདྷཱཏི ཨིམསྨིཾ སཱསནེ. ནིམནྟེཏཱིཏི ཨཀཔྤིཡནིམནྟནེན ནིམནྟེཏི. ཏེསཱུཏི ཙཏཱུསུ བྷིཀྑཱུསུ. སོཏི ཨུཔཱསཀོ. ཨཉྙནྟི ནཱགཏབྷིཀྑུཏོ ཨཉྙཾ, ནིམནྟིཏབྷིཀྑུཏོ ཝཱ. ཏངྑཎཔྤཏྟནྟི ཏསྨིཾ པུཙྪནཀཐནཀྑཎེ པཏྟཾ. ཧཱིཏི ཝིཏྠཱརོ. ཏཏྠཱཏི ཏསྨིཾ ཋཱནེ, གེཧེ ཝཱ. ཏེཧཱིཏི ཀརཎབྷཱུཏེཧི བྷིཀྑཱུཧི.

སོཏི པིཎྜཔཱཏིཀོ. ཨནཱགཙྪནྟམྤཱིཏི སཡཾ ན ཨཱགཙྪནྟམྤི. ལཙྪཐཱཏི ལབྷིསྶཐ.

སོཔཱིཏི སཱམཎེརོཔི, ན པིཎྜཔཱཏིཀོཡེཝཱཏི ཨཏྠོ.

ཏཏྠཱཏི ¶ གིལཱནཙཏུཏྠེ, ཏེསུ ཙཏཱུསུ ཝཱ. གིལཱནོ ཨིཏརེསཾ པན གཎཔཱུརཀོ ཧོཏཱིཏི ཡོཛནཱ.

གཎཔཱུརཀཏྟཱཏི སམཡལདྡྷསྶ གཎཔཱུརཀཏྟཱ. ཙཏུཀྐཱནཱིཏི ཙཱིཝརདཱནཙཏུཏྠཾ ཙཱིཝརཀཱརཙཏུཏྠཾ ཨདྡྷཱནགམནཙཏུཏྠཾ ནཱཝཱབྷིརུཧནཙཏུཏྠཾ མཧཱསམཡཙཏུཏྠཾ, སམཎབྷཏྟཙཏུཏྠནྟི ཚ ཙཏུཀྐཱནི. པུརིམེཧི མིསྶེཏྭཱ ཨེཀཱདས ཙཏུཀྐཱནི ཝེདིཏབྦཱནི. ཨེཀོ པཎྜིཏོ བྷིཀྑུ ནིསིནྣོ ཧོཏཱིཏི སམྦནྡྷོ. ཏེསཱུཏི ཏཱིསུ བྷིཀྑཱུསུ, གཏེསུ གཙྪཏཱིཏི ཡོཛནཱ. བྷུཏྭཱ ཨཱགནྟྭཱ ཋིཏེསུཔི ཨནཱཔཏྟིཡེཝ. ཀསྨཱ སབྦེསཾ ཨནཱཔཏྟི, ནནུ ཙཏྟཱརོ བྷིཀྑཱུ ཨེཀཏོ གཎྷནྟཱིཏི ཨཱཧ ‘‘པཉྩནྣཾ ཧཱི’’ཏིཨཱདི. ཧཱིཏི སཙྩཾ, ཡསྨཱ ཝཱ. བྷོཛནཱནཾཡེཝཱཏི ན ཡཱགུཁཛྫཀཕལཱཕལཱདཱིནཾ. ཏཱནི ཙཱཏི ཡེཧི བྷོཛནེཧི ཝིསངྐེཏཾ ནཏྠི, ཏཱནི ཙ བྷོཛནཱནི. ཏེཧཱིཏི ཙཏཱུཧི བྷིཀྑཱུཧི ¶ . ཏཱནཱིཏི ཡཱགུཨཱདཱིནི. ཨིཏཱིཏི ཏསྨཱ ཨནཱཔཏྟིནྟི ཡོཛནཱ.

ཀོཙི པེསིཏོ ཨཔཎྜིཏམནུསྶོ ཝདཏཱིཏི ཡོཛནཱ. ཀཏྟུཀཱམེན པེསིཏོཏི སམྦནྡྷོ. བྷཏྟཾ གཎྷཐཱཏི ཝཱཏི ཝཱསདྡོ ‘‘ཨོདནཾ གཎྷཐ, བྷོཛནཾ གཎྷཐ, ཨནྣཾ གཎྷཐ, ཀུརཾ གཎྷཐཱ’’ཏི ཝཙནཱནིཔི སངྒཎྷཱཏི. ནིམནྟནཾ སཱདིཡནྟཱིཏི ནེམནྟནིཀཱ. པིཎྜཔཱཏེ དྷུཏངྒེ ནིཡུཏྟཱཏི པིཎྜཔཱཏིཀཱ. པུནདིཝསེ བྷནྟེཏི ཝུཏྟེཏི ཡོཛནཱ. ཧརིཏྭཱཏི ཨཔནེཏྭཱ. ཏཏོཏི ཏཏོ ཝདནཏོ པརནྟི སམྦནྡྷོ. ཝིཀྑེཔནྟི ཝིཝིདྷཾ ཁེཔཾ. ཏེཏི ཨསུཀཱ ཙ ཨསུཀཱ ཙ གཱམིཀཱ. བྷནྟེཏི ཝུཏྟེཏི ཡོཛནཱ. སོཔཱིཏི ཨཔཎྜིཏམནུསྶོཔི, ན གཱམིཀཱཡེཝཱཏི ཨཏྠོ. ཀསྨཱ ན ལབྷཱམི བྷནྟེཏི ཝུཏྟེཏི ཡོཛནཱ. ཨེཝཾ ‘‘ཀཐཾ ནིམནྟེསུཾ བྷནྟེ’’ཏི ཨེཏྠཱཔི. ཏཏོཏི ཏསྨཱ ཀཱརཎཱ. ཨེསཱཏི ཨེསོ གཱམོ. ཏནྟི བྷཱུམཏྠེ ཙེཏཾ ཨུཔཡོགཝཙནཾ, ཏསྨིཾ གཱམེ ཙརཐཱཏི ཧི ཨཏྠོ. ཀིཾ ཨེཏེནཱཏི ཨེཏེན པུཙྪནེན ཀིཾ པཡོཛནཾ. ཨེཏྠཱཏི པུཙྪནེ. མཱ པམཛྫིཏྠཱཏི ཝདཏཱིཏི སམྦནྡྷོ. དུཏིཡདིཝསེཏི ནིམནྟནདིཝསཏོ དུཏིཡདིཝསེ. དྷུརགཱམེཏི པདྷཱནགཱམེ, ཨནྟིཀགཱམེ ཝཱ. བྷཱཝོ ནཱམ ཀིརིཡཏྟཱ ཨེཀོཡེཝ ཧོཏི, ཏསྨཱ ཀཏྟཱརཾ ཝཱ ཀམྨཾ ཝཱ སམྦནྡྷཾ ཝཱ ཨཔེཀྑིཏྭཱ བཧུཝཙནེན ན བྷཝིཏབྦཾ, ཏེན ཝུཏྟཾ ‘‘ན དུབྦཙེཧི བྷཝིཏབྦ’’ནྟི. ཏེསཱུཏི གཱམིཀེསུ བྷོཛེནྟེསཱུཏི སམྦནྡྷོ. ཨསནསཱལཱཡནྟི བྷོཛནསཱལཱཡཾ. སཱ ཧི ཨསཏི བྷུཉྫཏི ཨེཏྠཱཏི ཨསནཱ, སལནྟི པཝིསནྟི ཨསྶནྟི སཱལཱ, ཨསནཱ ཙ སཱ སཱལཱཙེཏི ཨསནསཱལཱཏི ཨཏྠེན ‘‘ཨསནསཱལཱ’’ཏི ཝུཙྩཏི.

ཨཐ པནཱཏི ཏཏོ ཨཉྙཐཱ པན. ཨཔཱདཱནཏྠོ ཧི ཨཐསདྡོ. ཏཏྠ ཏཏྠཱཏི ཏསྨིཾ ཏསྨིཾ ¶ ཋཱནེ ཨནྟརཝཱིཐིཨཱདཱིསཱུཏི ཨཏྠོ. པཊིཀཙྩེཝཱཏི པཋམཾ ཀཏྭཱ ཨེཝ. བྷིཀྑཱུསུ གཱམཏོ ཨནིཀྑནྟེསུ པགེཝཱཏི ཝུཏྟཾ ཧོཏི. ན ཝཊྚཏཱིཏི ‘‘བྷཏྟཾ གཎྷཐཱ’’ཏི པཧིཎཏྟཱ ན ཝཊྚཏི. ཡེ པན མནུསྶཱ བྷོཛེནྟཱིཏི སམྦནྡྷོ. ནིཝཏྟཐཱཏི ཝུཏྟཔདེཏི ‘‘ནིཝཏྟཐཱ’’ཏི ཝུཏྟེ ཀིརིཡཱཔདེ. ཡསྶ ཀསྶཙི ¶ ཧོཏཱིཏི ཡསྶ ཀསྶཙི ཨཏྠཱཡ ཧོཏཱིཏི ཡོཛནཱ. ནིཝཏྟིཏུཾ ཝཊྚཏཱིཏི ‘‘བྷཏྟཾ གཎྷཐཱ’’ཏི ཨཝུཏྟཏྟཱ ནིཝཏྟིཏུཾ ཝཊྚཏི. སམྦནྡྷཾ ཀཏྭཱཏི ‘‘ནིཝཏྟཐ བྷནྟེ’’ཏི བྷནྟེསདྡེན ཨབྱཝཧིཏཾ ཀཏྭཱ. ནིསཱིདཐ བྷནྟེ, བྷཏྟཾ གཎྷཐཱཏི བྷནྟེསདྡེན བྱཝཧིཏཾ ཀཏྭཱ ཝུཏྟེ ‘‘ནིསཱིདཐཱ’’ཏིཔདེ ནིསཱིདིཏུཾ ཝཊྚཏི. ཨཐ བྷནྟེསདྡེན བྱཝཧིཏཾ ཨཀཏྭཱ ‘‘ནིསཱིདཐ, བྷཏྟཾ གཎྷཐཱ’’ཏི སམྦནྡྷཾ ཀཏྭཱ ཝུཏྟེ ནིསཱིདིཏུཾ ཝཊྚཏི. ཨིཙྩེཏཾ ནཡཾ ཨཏིདིསཏི ‘‘ཨེསེཝ ནཡོ’’ཏིཨིམིནཱཏི. དུཏིཡཾ.

༣. པརམྤརབྷོཛནསིཀྑཱཔདཾ

༢༢༡. ཏཏིཡེ ‘‘ན ཁོ…པེ… ཀརོནྟཱི’’ཏིཔཱཋསྶ ཨཏྠསམྦནྡྷཾ དསྶེནྟོ ཨཱཧ ‘‘ཡེན ནིཡཱམེནཱ’’ཏིཨཱདི. ཏཏྠ ‘‘ཡེན ནིཡཱམེནཱ’’ཏིཨིམིནཱ ‘‘ཡཐཡིམེ མནུསྶཱ’’ཏི ཨེཏྠ ཡཐཱསདྡསྶ ཡཾསདྡཏྠབྷཱཝཾ དསྶེཏི. ཏེནཱཏི ཏེན ནིཡཱམེན. ཨིམིནཱ ཡཐཱསདྡསྶ ནིཡམནིདྡིཊྛབྷཱཝཾ དསྶེཏི. ‘‘ཉཱཡཏཱི’’ཏིཨིམིནཱ ཀིརིཡཱཔཱཋསེསཾ དསྶེཏི. ‘‘སཱསནཾ ཝཱ དཱནཾ ཝཱ’’ཏིཔདེཧི ཨིདཾསདྡསྶ ཨཏྠཾ དསྶེཏི. བུདྡྷཔྤམུཁེ སངྒྷེཏི སམྤདཱནཏྠེ ཙེཏཱནི བྷུམྨཝཙནཱནི, བུདྡྷཔྤམུཁསྶ སངྒྷསྶ དཱནཾ ཝཱཏི ཨཏྠོ. ‘‘པརིཏྟ’’ནྟིཨིམིནཱ ཨོརཀསདྡསྶ ཨཏྠཾ དསྶེཏི. ‘‘ལཱམཀ’’ནྟིཨིམིནཱ པརིཏྟསདྡསྶ པརིཝཱརཏྠཾ ནིཝཏྟེཏི. ཀིརོ ཨེཝ པཏིབྷཱཝེ ནིཡུཏྟོ ཀིརཔཏིཀོཏི ཨཏྠཾ དསྶེནྟོ ཨཱཧ ‘‘ཀིརཔཏིཀོཏི ཨེཏྠཱ’’ཏི ཨཱདི. སོཏི ཀིརཔཏིཀོ. ཀམྨཾ ཀཱརེཏཱིཏི སམྦནྡྷོ. ཨུཔཙཱརཝསེནཱཏི ཝོཧཱརཝསེན, ཨུཔལཀྑཎཝསེན, པདྷཱནཝསེན ཝཱཏི ཨཏྠོ. ན ཀེཝལཾ བདརཱཡེཝ, ཨཉྙེཔི པན བཧཱུ ཁཱདནཱིཡབྷོཛནཱིཡཱ པཊིཡཏྟཱཏི ཨདྷིཔྤཱཡོ. བདརེན མིསྶོ བདརམིསྶོ, བདརསཱལ༹ཝོཏི ཨཱཧ ‘‘བདརསཱལ༹ཝེནཱ’’ཏི. བདརཙུཎྞེན མིསྶོ མདྷུསཀྑརཱདི ‘‘བདརསཱལ༹ཝོ’’ཏི ཝུཙྩཏི.

༢༢༢. ཨུདྡྷཾ ¶ སཱུརོ ཨུགྒཏོ ཨསྨིཾ ཀཱལེཏི ཨུསྶཱུརོཏི ཝུཏྟེ ཨཏིདིཝཱཀཱལོཏི ཨཱཧ ‘‘ཨཏིདིཝཱ’’ཏི.

༢༢༦. ཨཡཾ བྷཏྟཝིཀཔྤནཱ ནཱམ ཝཊྚཏཱིཏི ཡོཛནཱ. པཉྩསུ སཧདྷམྨིཀེསཱུཏི ནིདྡྷཱརཎསམུདཱཡོ, ཨིཏྠནྣཱམསྶཱཏི སམྦནྡྷོ. ཡདི པན སམྨུཁཱཔི ཝིཀཔྤིཏུཾ ཝཊྚཏི, ཏདཱ ཨཏྟནཱ ¶ སཧ ཋིཏསྶ བྷགཝཏོ ཀསྨཱ ན ཝིཀཔྤེཏཱིཏི ཨཱཧ ‘‘སཱ ཙཱཡ’’ནྟིཨཱདི. སཱ ཨཡཾ ཝིཀཔྤནཱ སངྒཧིཏཱཏི སམྦནྡྷོ. ཀསྨཱ བྷགཝཏོ ཝིཀཔྤེཏུཾ ན ཝཊྚཏཱིཏི ཨཱཧ ‘‘བྷགཝཏི ཧཱི’’ཏིཨཱདི. ཧཱིཏི སཙྩཾ, ཡསྨཱ ཝཱ. སངྒྷེན ཀཏནྟི སམྦནྡྷོ.

༢༢༩. ‘‘དྭེ ཏཡོ ནིམནྟནེ’’ཏིཔདཱནི ལིངྒཝིཔལླཱསཱནཱིཏི ཨཱཧ ‘‘དྭེ ཏཱིཎི ནིམནྟནཱནཱི’’ཏི. ནིམནྟིཏབྦོ ཨེཏེཧཱིཏི ནིམནྟནཱནི བྷོཛནཱནི བྷུཉྫཏཱིཏི སམྦནྡྷོ. དྭེ ཏཱིཎི ཀུལཱནི ཨཱཀིརནྟཱིཏི ཡོཛནཱ. སཱུཔབྱཉྫནནྟི སཱུཔོ ཙ བྱཉྫནཉྩ སཱུཔབྱཉྫནཾ. ཨནཱཔཏྟི ཨེཀཏོ མིསྶིཏཏྟཱཏི ཨདྷིཔྤཱཡོ. མཱུལནིམནྟནནྟི པཋམནིམནྟནཾ བྷོཛནཾ. ཨནྟོཏི ཧེཊྛཱ. ཨེཀམྤི ཀབལ༹ནྟི ཨེཀམྤི ཨཱལོཔཾ. ཡཐཱ ཏཐཱ ཝཱཏི ཡེན ཝཱ ཏེན ཝཱ ཨཱཀཱརེན. ཏཏྠཱཏི ཏསྨིཾ བྷོཛནེ. རསཾ ཝཱཏི ཁཱིརཏོ ཨཉྙཾ རསཾ ཝཱ. ཡེན ཁཱིརརསེན ཨཛ྄ཛྷོཏྠཏཾ བྷཏྟཾ ཨེཀརསཾ ཧོཏི, ཏཾ ཁཱིརཾ ཝཱ ཏཾ རསཾ ཝཱ ཨཱཀིརནྟཱིཏི ཡོཛནཱ. ཡཾསདྡོ ཧི ཨུཏྟརཝཱཀྱེ ཋིཏོ པུབྦཝཱཀྱེ ཏཾསདྡཾ ཨཝགམཡཏི. ཁཱིརེན སཾསཊྛཾ བྷཏྟཾ ཁཱིརབྷཏྟཾ. ཨེཝཾ རསབྷཏྟཾ. ཨཉྙེཔཱིཏི ཁཱིརབྷཏྟརསབྷཏྟདཱཡཀཏོ ཨཉྙེཔི. ཨནཱཔཏྟི བྷཏྟེན ཨམིསྶིཏཏྟཱཏི ཨདྷིཔྤཱཡོ. ‘‘བྷུཉྫནྟེནཱ’’ཏིཔདཾ ‘‘བྷུཉྫིཏུ’’ནྟིཔདེ བྷཱཝཀཏྟཱ. སཔྤིཔཱཡཱསེཔཱིཏི སཔྤིནཱ ཙ པཱཡཱསེན ཙ ཀཏེ བྷཏྟེཔི.

ཏསྶཱཏི མཧཱཨུཔཱསཀསྶ. ཨཱཔཏྟཱིཏི ཙ ཝཊྚཏཱིཏི ཙ དྭིནྣཾ ཨཊྛཀཐཱཝཱདཱནཾ ཡུཏྟབྷཱཝཾ མཧཱཔཙྩརིཝཱདེན དསྶེཏུཾ ཝུཏྟཾ ‘‘མཧཱཔཙྩརིཡ’’ནྟིཨཱདི. དྭེ ཨཊྛཀཐཱཝཱདཱ ཧི སནྡྷཱཡབྷཱསིཏམཏྟམེཝ ཝིསེསཱ, ཨཏྠཏོ པན ཨེཀཱ. མཧཱཔཙྩརིཡཾ ཝུཏྟནྟི སམྦནྡྷོ. ཨེཀོཝཱཏི ཀུམྦྷིཡཱ ཨེཀོཝ. པརམྤརབྷོཛནནྟི པརསྶ པརསྶ བྷོཛནཾ ¶ . ནིམནྟིཏམྷཱཏི ཨཧཾ ནིམནྟིཏོ ཨམྷི ནནཱུཏི ཨཏྠོ. ཨཱཔུཙྪིཏྭཱཔཱིཏི མཧཱཨུཔཱསཀཾ ཨཱཔུཙྪིཏྭཱཔི.

སོཏི ཨནུམོདཀོ བྷིཀྑུ. ཏནྟི བྷིཀྑུཾ. ཨཉྙོཏི ཨཉྙཏརོ. ཀིནྟི ཀསྨཱ. ནིམནྟིཏཏྟཱཏི ནིམནྟིཏབྷཱཝཏོ.

སཀལེན གཱམེན ནིམནྟིཏོཔི ཨེཀཏོ ཧུཏྭཱཝ ནིམནྟིཏསྶ ཀཔྤཏི, ན ཝིསུཾ ཝིསུནྟི ཨཱཧ ‘‘ཨེཀཏོ ཧུཏྭཱ’’ཏི. པཱུགེཔཱིཏི སམཱདཔེཏྭཱ པུཉྙཾ ཀརོནྟཱནཾ སམཱུཧེཔི. ‘‘ནིམནྟིཡམཱནོ’’ཏིཔདསྶ ནིམནྟནཱཀཱརཾ དསྶེནྟོ ཨཱཧ ‘‘བྷཏྟཾ གཎྷཱ’’ཏི. ཡདགྒེནཱཏི ཡཾ ཨགྒེན ཡེན ཀོཊྛཱསེནཱཏི ཨཏྠོ. དྭཱིསུ ཐེརཝཱདེསུ མཧཱསུམཏྠེརཝཱདོཝ ཡུཏྟོཏི སོ པཙྪཱ ཝུཏྟོཏི. ཏཏིཡཾ.

༤. ཀཱཎམཱཏཱསིཀྑཱཔདཾ

༢༣༠. ཙཏུཏྠེ ¶ ‘‘ནཀུལམཱཏཱཏི’’ཨཱདཱིསུ (ཨ. ནི. ༡.༢༦༦; ཨ. ནི. ཨཊྛ. ༡.༡.༢༦༦) ནཀུལསྶ བྷགཝཏོ མཱཏཱ ནཀུལམཱཏཱཏི ཙ ནཀུལཉྩ བྷགཝཏོ ཏཾ མཱཏཱ ཙཱཏི ནཀུལམཱཏཱཏི ཙ ཨཏྠོ སམྦྷཝཏི, ‘‘ཨུཏྟརམཱཏཱཏི’’ཨཱདཱིསུ ཨུཏྟརཱཡ མཱཏཱ ཨུཏྟརམཱཏཱཏི ཨཏྠོཡེཝ སམྦྷཝཏི. ཏེསུ ‘‘ཨུཏྟརམཱཏཱ’’ཏིཔདསྶེཝ ‘‘ཀཱཎམཱཏཱ’’ཏིཔདསྶ ཀཱཎཱཡ མཱཏཱ ཀཱཎམཱཏཱཏི ཨཏྠོཡེཝ སམྦྷཝཏཱིཏི ཨཱཧ ‘‘ཀཱཎཱཡ མཱཏཱ’’ཏི. ཏསྶཱ དྷཱིཏུཡཱ ‘‘ཀཱཎཱ’’ཏིནཱམེན ཝིསྶུཏབྷཱཝཾ དསྶེནྟོ ཨཱཧ ‘‘སཱ ཀིརཱ’’ཏིཨཱདི. སཱཏི དཱརིཀཱ ཝིསྶུཏཱ ཨཧོསཱིཏི སམྦནྡྷོ. ཨསྶཱཏི མཧཱཨུཔཱསིཀཱཡ. ཡེ ཡེཏི པུརིསཱ. ‘‘རཱགེན ཀཱཎཱ ཧོནྟཱི’’ཏིཨིམིནཱ ཀཎནྟི ནིམིལནྟི རཱགེན པུརིསཱ ཨེཏཱཡཱཏི ཀཱཎཱཏི ཨཏྠཾ དསྶེཏི. ཏསྶཱཏི ཀཱཎཱཡ. ཨཱགཏནྟི ཨེཏྠ བྷཱཝཏྠེ ཏོཏི ཨཱཧ ‘‘ཨཱགམན’’ནྟི. ཨདྷིཔྤཱཡོཏི ‘‘ཀིསྨིཾ ཝིཡཱ’’ཏིཔདསྶ, ཀཱཎམཱཏཱཡ ཝཱ ཨདྷིཔྤཱཡོ ¶ . རིཏྟཱཏི ཏུཙྪཱ, སུཉྙཱཏི ཨཏྠོ. ‘‘ཨསྨིཾ གམནེ’’ཏིཨིམིནཱ བཱཧིརཏྠསམཱསཾ དསྶེཏི. ‘‘ཨརིཡསཱཝིཀཱ’’ཏིཨཱདིནཱ ཨརིཡཱནཾ བྷིཀྑཱུཧི ཨཔཊིཝིབྷཏྟབྷོགཾ དསྶེཏི. ན ཀེཝལཾ ཀིཉྩི པརིཀྑཡཾ ཨགམཱསི, ཨཐ ཁོ སབྦནྟི ཨཱཧ ‘‘སབྦཾ པརིཀྑཡཾ ཨགམཱསཱི’’ཏི. ཀཱཎཱཔཱིཏི པིསདྡོ ན ཀེཝལཾ མཱཏཱཡེཝ མགྒཕལབྷཱགིནཱི ཨཧོསི, ཨཐ ཁོ ཀཱཎཱཔི སོཏཱཔནྣཱ ཨཧོསཱིཏི དསྶེཏི. སོཔི པུརིསོཏི ཀཱཎཱཡ པཏིབྷཱུཏོ སོཔི པུརིསོ. པཀཏིཊྛཱནེཡེཝཱཏི ཛེཊྛཀཔཛཱཔཏིཊྛཱནེཡེཝ.

༢༣༡. ཨིམསྨིཾ པན ཝཏྠུསྨིནྟི ཨིམསྨིཾ པཱུཝཝཏྠུསྨིཾ. ཨེཏནྟི པཱཐེཡྻཝཏྠུཾ. ཨརིཡསཱཝཀཏྟཱཏི ཨརིཡབྷཱུཏསྶ སཱཝཀསྶ བྷཱཝཏོ, ཨརིཡསྶ ཝཱ སམྨཱསམྦུདྡྷསྶ སཱཝཀབྷཱཝཏོ.

༢༣༣. པཧེཎཀཔཎྞཱཀཱརསདྡཱནཾ ཨཉྙམཉྙཝེཝཙནཏྟཱ ཝུཏྟཾ ‘‘པཧེཎཀཏྠཱཡཱཏི པཎྞཱཀཱརཏྠཱཡཱ’’ཏི. ཨིདྷཱཏི ‘‘པཱུཝེཧི ཝཱ’’ཏིཔདེ, སིཀྑཱཔདེ ཝཱ. བདྡྷསཏྟཱུཏི མདྷུསཀྑརཱདཱིཧི མིསྶེཏྭཱ བདྡྷསཏྟུ. ཐཱུཔཱིཀཏནྟི ཐཱུཔཱིཀཏཾ ཀཏྭཱ.

‘‘དྭཏྟིཔཏྟཔཱུརེ’’ཏིཔདསྶ ཝིསེསནུཏྟརབྷཱཝཾ དསྶེཏུཾ ཝུཏྟཾ ‘‘པཱུརེ པཏྟེ’’ཏི. དྭེ ཝཱ ཏཡོ ཝཱ པཏྟཱཏི དྭཏྟིཔཏྟཱ, ཝཱསདྡཏྠེ སངྑྱོབྷཡབཱཧིརཏྠསམཱསོ, ཏིསདྡཔརཏྟཱ དྭིསྶ ཙ ཨཀཱརོ ཧོཏི, དྭཏྟིཔཏྟཱ ཙ ཏེ པཱུརཱ ཙཱཏི དྭཏྟིཔཏྟཔཱུརཱ, ཏེ དྭཏྟིཔཏྟཔཱུརེ གཧེཏྭཱཏི ཡོཛནཱ. ‘‘ཨཱཙིཀྑིཏབྦ’’ནྟི ཝུཏྟཝཙནསྶ ཨཱཙིཀྑནཱཀཱརཾ དསྶེནྟོ ཨཱཧ ‘‘ཨཏྲ མཡཱ’’ཏིཨཱདི. ཏེནཱཔཱིཏི ¶ དུཏིཡེནཱཔི. པཋམབྷིཀྑུ ཨེཀཾ གཧེཏྭཱ དུཏིཡབྷིཀྑུསྶ ཨཱརོཙནཉྩ དུཏིཡབྷིཀྑུ ཨེཀཾ གཧེཏྭཱ ཏཏིཡབྷིཀྑུསྶ ཨཱརོཙནཉྩ ཨཏིདིསནྟོ ཨཱཧ ‘‘ཡེནཱ’’ཏིཨཱདི. ཏཏྠ ཡེནཱཏི པཋམབྷིཀྑུནཱ. པཊིཀྐམནྟི བྷུཉྫཱིཏྭཱ ཨེཏྠཱཏི པཊིཀྐམནནྟི ཝུཏྟེ ཨསནསཱལཱཝ གཧེཏབྦཱཏི ཨཱཧ ‘‘ཨསནསཱལ’’ནྟི. ཡཏྠཱཏི ཡསྶཾ ཨསནསཱལཱཡཾ. མུཁོལོཀནཾ ན ཝཊྚཏཱིཏི ཨཱཧ ‘‘ཨཏྟནོ’’ཏིཨཱདི. ཨཉྙཏྠཱཏི པཊིཀྐམནཏོ ཨཉྙཏྠ. ཨསྶཱཏི བྷིཀྑུསྶ.

‘‘སཾཝིབྷཛིཏབྦ’’ནྟི ¶ ཝུཏྟཝཙནསྶ སཾཝིབྷཛནཱཀཱརཾ དསྶེཏུཾ ཝུཏྟཾ ‘‘སཙེ ཏཡོ’’ཏིཨཱདི. ཡཐཱམིཏྟནྟི ཡསྶ ཡསྶ མིཏྟསྶ. ཨཀཱམཱཏི ན ཀཱམེན. ཀཱརཎཏྠེ ཙེཏཾ ནིསྶཀྐཝཙནཾ.

༢༣༥. ཨནྟརཱམགྒེཏི མགྒསྶ ཨནྟརོ ཨནྟརཱམགྒོ, སུཁུཙྩཱརཎཏྠཾ མཛ྄ཛྷེ དཱིགྷོ, ཏསྨིཾ. བཧུམྤི དེནྟཱནཾ ཨེཏེསཾ ཉཱཏཀཔཝཱརིཏཱནཾ བཧུམྤི པཊིགྒཎྷནྟསྶཱཏི ཡོཛནཱ. ཨཊྛཀཐཱསུ པན ཝུཏྟནྟི སམྦནྡྷོ. ཨཊྛཀཐཱནཾ ཝཙནཾ པཱལི༹ཡཱ ན སམེཏཱིཏི. ཙཏུཏྠཾ.

༥. པཋམཔཝཱརཎསིཀྑཱཔདཾ

༢༣༦. པཉྩམེ པཝཱརིཏཱཏི ཨེཏྠ ཝསྶཾཝུཏྠཔཝཱརཎཱ, པཙྩཡཔཝཱརཎཱ, པཊིཀྑེཔཔཝཱརཎཱ, ཡཱཝདཏྠཔཝཱརཎཱ ཙཱཏི ཙཏུབྦིདྷཱསུ པཝཱརཎཱསུ ཡཱཝདཏྠཔཝཱརཎཱ ཙ པཊིཀྑེཔཔཝཱརཎཱ ཙཱཏི དྭེ པཝཱརཎཱ ཨདྷིཔྤེཏཱཏི དསྶེནྟོ ཨཱཧ ‘‘བྲཱཧྨཎེནཱ’’ཏིཨཱདི. བྲཱཧྨཎེན པཝཱརིཏཱཏི སམྦནྡྷོ. སཡནྟི ཏཏིཡནྟནིཔཱཏོ ‘‘པཝཱརིཏཱ’’ཏིཔདེན སམྦནྡྷོ. ཙསདྡོ ཨཉྙཏྠ ཡོཛེཏབྦོ ཡཱཝདཏྠཔཝཱརཎཱཡ ཙ པཊིཀྑེཔཔཝཱརཎཱཡ ཙཱཏི. པཊིམུཁཾ ཨཏྟནོ གེཧཾ ཝིསནྟི པཝིསནྟཱིཏི པཊིཝིསྶཀཱཏི ཝུཏྟེ ཨཱསནྣགེཧཝཱསིཀཱ གཧེཏབྦཱཏི ཨཱཧ ‘‘སཱམནྟགྷརཝཱསིཀེ’’ཏི.

༢༣༧. ཨུདྡྷངྒམོ རཝོ ཨོརཝོ, སོཡེཝ སདྡོ ཨོརཝསདྡོ, ཀཱཀཱནཾ ཨོརཝསདྡོ ཀཀོརཝསདྡོཏི དསྶེནྟོ ཨཱཧ ‘‘ཀཱཀཱན’’ནྟིཨཱདི.

༢༣༩. ཏཝནྟུཔཙྩཡསྶ ཨཏཱིཏཏྠབྷཱཝཾ དསྶེཏུཾ ཝུཏྟཾ ‘‘ཏཏྠ ཙཱ’’ཏིཨཱདི. ཏཏྠཱཏི ‘‘བྷུཏྟཝཱ’’ཏིཔདེ. ཡསྨཱ ཡེན བྷིཀྑུནཱ ཨཛ྄ཛྷོཧརིཏཾ ཧོཏི, ཏསྨཱ སོ ‘‘བྷུཏྟཱཝཱི’’ཏི སངྑྱཾ གཙྪཏཱིཏི ¶ ཡོཛནཱ. སངྑཱདིཏྭཱཏི དནྟེཧི ཙུཎྞཾ ཀཏྭཱ. ཏེནཱཏི ཏེན ཧེཏུནཱ. ཨསྶཱཏི ‘‘བྷུཏྟཱཝཱི’’ཏིཔདསྶ. པཝཱརེཏི པཊིཀྑིཔཏཱིཏི པཝཱརིཏོ བྷིཀྑཱུཏི དསྶེནྟོ ཨཱཧ ‘‘ཀཏཔཝཱརཎོ’’ཏི. སོཔི ཙཱཏི སོ པཊིཀྑེཔོ ཙ ཧོཏཱིཏི སམྦནྡྷོ. ཨསྶཱཏི ‘‘པཝཱརིཏོ’’ཏིཔདསྶ. ཏཏྠཱཏི ‘‘ཨསནཾ པཉྙཱཡཏཱི’’ཏིཨཱདིཝཙནེ. ཡསྨཱ ¶ བྷུཏྟཱཝཱིཏིཔི སངྑྱཾ གཙྪཏི, ཏསྨཱ ན པསྶཱམཱཏི ཡོཛནཱ. ‘‘ཨསནཾ པཉྙཱཡཏཱི’’ཏི པདབྷཱཛནིཡཱ ‘‘བྷུཏྟཱཝཱི’’ཏི མཱཏིཀཱཔདསྶ ཨསཾསནྡནབྷཱཝཾ དསྶེཏུཾ ཝུཏྟཾ ‘‘ཨསནཾ པཉྙཱཡཏཱིཏི ཨིམིནཱ’’ཏིཨཱདི. ཡཉྩཱཏི ཡཉྩ བྷོཛནཾ. དིརཏྟཱདཱིཏི ཨེཏྠ ཨཱདིསདྡེན པཉྩཱདིཝཙནཾ སངྒཎྷཱཏི. ཨེཏནྟི ‘‘བྷུཏྟཱཝཱི’’ཏིཔདཾ.

‘‘ཨསནཾ པཉྙཱཡཏཱི’’ཏིཨཱདཱིསུ ཝིནིཙྪཡོ ཨེཝཾ ཝེདིཏབྦོཏི སམྦནྡྷོ. ‘‘པཉྙཱཡཏཱི’’ཏི ཨེཏྠ ཉཱདྷཱཏུཡཱ ཁཱཡནཏྠཾ དསྶེཏུཾ ཝུཏྟཾ ‘‘དིསྶཏཱི’’ཏི. ‘‘ཧཏྠཔཱསེ’’ཏིཔདསྶ དྭཱདསཧཏྠཔྤམཱཎོ ཧཏྠཔཱསོ ནཱདྷིཔྤེཏོཏི ཨཱཧ ‘‘ཨཌྜྷཏེཡྻཧཏྠཔྤམཱཎེ’’ཏི. ཝཱཙཱཡ ཨབྷིཧརཎཾ ནཱདྷིཔྤེཏཾ. ཏེནཱཧ ‘‘ཀཱཡེནཱ’’ཏི. ཨབྷིཧརཏཱིཏི ཨབྷིམུཁཾ ཧརཏི. ཏནྟི བྷོཛནཾ. ཨེཏནྟི པཉྩངྒབྷཱཝཾ, ‘‘པཉྩཧི…པེ… པཉྙཱཡཏཱི’’ཏི ཝཙནཾ ཝཱ.

ཏཏྲཱཏི ‘‘ཨསནཾ པཉྙཱཡཏཱི’’ཏིཨཱདིཝཙནེ. ཨསྣཱཏཱིཏི ཀཱིཡཱདིགཎཏྟཱ, ཏསྶ ཙ ཨེཀཀྑརདྷཱཏུཏྟཱ སཀཱརནཀཱརཱནཾ སཾཡོགོ དཊྛབྦོ. ཏནྟི བྷོཛནཾ. ཨུནྡཏི པསཝཏི བྷུཉྫནྟཱནཾ ཨཱཡུབལཾ ཛནེཏཱིཏི ཨོདནོ. ཡཝཱདཡོ པཱུཏིཾ ཀཏྭཱ ཀཏཏྟཱ ཀུཙྪིཏེན མསཱིཡཏི ཨཱམསཱིཡཏཱིཏི ཀུམཱསོ. སཙཏི སམཝཱཡོ ཧུཏྭཱ བྷཝཏཱིཏི སཏྟུ. བྱཉྫནཏྠཱཡ མཱརེཏབྦོཏི མཙྪོ. མཱནཱིཡཏི བྷུཉྫནྟེཧཱིཏི མཾསཾ. ཏཏྠཱཏི ཨོདནཱདཱིསུ པཉྩསུ བྷོཛནེསུ. སཱརོ ཨསྶཏྠི ཨཉྙེསཾ དྷཉྙཱནནྟི སཱལཱི. ཝཧཏི བྷུཉྫནྟཱནཾ ཛཱིཝིཏནྟི ཝཱིཧི. ཡཝཏི ཨམིསྶིཏོཔི མིསྶིཏོ ཝིཡ བྷཝཏཱིཏི ཡཝོ. གུདྷཏི པརིཝེཋཏི མིལཀྑབྷོཛནཏྟཱཏི གོདྷུམོ. སོབྷནསཱིསཏྟཱ ཀམནཱིཡབྷཱཝཾ གཙྪཏཱིཏི ཀངྒུ. མཧནྟསཱིསཏྟཱ, མདྷུརརསནཱལ༹ཏྟཱ ཙ ཝརཱིཡཏི པཏྠཱིཡཏི ཛནེཧཱིཏི ཝརཀོ. ཀོརཾ རུདྷིརཾ དཱུསཏི བྷུཉྫནྟཱནནྟི ཀུདྲཱུསཀོ. ནིབྦཏྟོ ཨོདནོ ནཱམཱཏི སམྦནྡྷོ. ཏཏྠཱཏི སཏྟསུ དྷཉྙེསུ. སཱལཱིཏཱིཏི ཨེཏྠ ཨིཏིསདྡོ ནཱམཔརིཡཱཡོ. སཱལཱི ནཱམཱཏི ཨཏྠོ. ཨེསེཝ ནཡོ ‘‘ཝཱིཧཱིཏཱི’’ཏིཨཱདཱིསུཔི.

ཨེཏྠཱཏི ¶ ཏིཎདྷཉྙཛཱཏཱིསུ. ནཱིཝཱརོ སཱལིཡཱ ཨནུལོམོ, ཝརཀཙོརཀོ ཝརཀསྶ ཨནུལོམོ. ཨམྦིལཔཱཡཱསཱདཱིསཱུཏི ཨེཏྠ ཨཱདིསདྡེན ཁཱིརབྷཏྟཱདཡོ སངྒཎྷནྟི. ཨོདྷཱིཏི ཨཝདྷི, མརིཡཱདོཏི ཨཏྠོ. སོ ཧི ཨཝཧཱིཡཏི ཙཛཱིཡཏི ཨསྨཱཏི ཨོདྷཱིཏི ཝུཙྩཏི.

ཡོཔི ¶ པཱཡཱསོ ཝཱ ཡཱཔི ཨམྦིལཡཱགུ ཝཱ ཨོདྷིཾ ན དསྶེཏི, སོ པཝཱརཎཾ ན ཛནེཏཱིཏི ཡོཛནཱ. པཡེན ཁཱིརེན ཀཏཏྟཱ པཱཡཱསོ. པཱཏབྦསྶ, ཨསིཏབྦསྶ ཙཱཏི དྭིནྣཾ བྱུཔྤཏྟིནིམིཏྟཱནཾ སམྦྷཝཏོ ཝཱ པཱཡཱསོཏི ཝུཙྩཏི. ཨུདྡྷནཏོཏི ཙུལླིཏོ. སཱ ཧི ཨུཔརི དྷཱིཡནྟི ཋཔིཡནྟི ཐཱལྱཱདཡོ ཨེཏྠཱཏི ཨུདྡྷནནྟི ཝུཙྩཏི. ཨཱཝཛྫིཏྭཱཏི པརིཎཱམེཏྭཱ. གྷནབྷཱཝནྟི ཀཐིནབྷཱཝཾ. ཨེཏྠཱཔི ཝཱཀྱེ ‘‘ཡོ སོ’’ཏི པདཱནི ཡོཛེཏབྦཱནི. པུབྦེཏི ཨབྦྷུཎྷཀཱལེ. ནིམནྟནེཏི ནིམནྟནཊྛཱནེ. བྷཏྟེ ཨཱཀིརིཏྭཱ དེནྟཱིཏི སམྦནྡྷོ. ཡཱཔནཾ གཙྪཏི ཨིམཱཡཱཏི ཡཱགུ. ཀིཉྩཱཔི ཏནུཀཱ ཧོཏི, ཏཐཱཔཱིཏི ཡོཛནཱ. ཨུདཀཱདཱིསཱུཏིཨཱདིསདྡེན ཀིཉྫིཀཁཱིརཱདཡོ སངྒཡ྄ཧནྟི. ཡཱགུསངྒཧམེཝ གཙྪཏི, ཀསྨཱ? ཨུདཀཱདཱིནཾ པཀྐུཐིཏཏྟཱཏི ཨདྷིཔྤཱཡོ. ཏསྨིཾ ཝཱཏི སབྷཏྟེ, པཀྐུཐིཏཨུདཀཱདིཀེ ཝཱ. ཨཉྙསྨིཾ ཝཱཏི པཀྐུཐིཏཨུདཀཱདིཏོ ཨཉྙསྨིཾ ཨུདཀཱདིཀེ ཝཱ. ཡཏྠ ཡསྨིཾ ཨུདཀཱདིཀེ པཀྑིཔནྟི, ཏཾ པཝཱརཎཾ ཛནེཏཱིཏི ཡོཛནཱ.

སུདྡྷརསཀོཏི མཙྪམཾསཁཎྜནྷཱརཱུཧི ཨམིསྶོ སུདྡྷོ མཙྪཱདིརསཀོ. རསཀཡཱགཱུཏི རསཀབྷཱུཏཱ དྲཝབྷཱུཏཱ ཡཱགུ. གྷནཡཱགཱུཏི ཀཐིནཡཱགུ. ཨེཏྠཱཏི གྷནཡཱགུཡཾ. པུཔྥིཨཏྠཱཡཱཏི པུཔྥཾ ཕུལླཾ ཨིམསྶ ཁཛྫཀསྶཱཏི པུཔྥཱི, པུཔྥིནོ ཨཏྠོ པཡོཛནཾ པུཔྥིཨཏྠོ, ཏདཏྠཱཡ ཀཏནྟི སམྦནྡྷོ. ཏེ ཏཎྜུལེཏི ཏེ སེདིཏཏཎྜུལེ. ཨཙུཎྞཏྟཱ ནེཝ སཏྟུསངྑྱཾ, ཨཔཀྐཏྟཱ ན བྷཏྟསངྑྱཾ གཙྪནྟི. ཏེཧཱིཏི སེདིཏཏཎྜུལེཧི. ཏེ ཏཎྜུལེ པཙནྟི, ཀརོནྟཱིཏི སམྦནྡྷོ.

‘‘ཡཝེཧཱི’’ཏི བཧུཝཙནེན སཏྟ དྷཉྙཱནིཔི གཧིཏཱནི. ཨེས ནཡོ སཱལིཝཱིཧིཡཝེཧཱིཏི ཨེཏྠཱཔི. ཐུསེཏི དྷཉྙཏཙེ. པལཱཔེཏྭཱཏི པཊིཀྐམཱཔེཏྭཱ ¶ . ཏནྟི ཙུཎྞཾ གཙྪཏཱིཏི སམྦནྡྷོ. ཁརཔཱཀབྷཛྫིཏཱནནྟི ཁརོ པཱཀོ ཁརཔཱཀོ, ཁརཔཱཀེན བྷཛྫིཏཱ ཁརཔཱཀབྷཛྫིཏཱ, ཏེསཾ. ན པཝཱརེནྟི ཨསཏྟུསངྒཧཏྟཱཏི ཨདྷིཔྤཱཡོ. ཀུཎྜཀམྤཱིཏི ཀཎམྤི. པཝཱརེཏི སཏྟུསངྒཧཏྟཱཏི ཨདྷིཔྤཱཡོ. ཏེཧཱིཏི ལཱཛེཧི. སུདྡྷཁཛྫཀནྟི པིཊྛེཧི ཨམིསྶིཏཾ སུདྡྷཾ ཕལཱཕལཱདིཁཛྫཀཾ. ཡཱགུཾ པིཝནྟསྶ དེནྟཱིཏི ཡོཛནཱ. ཏཱནཱིཏི དྭེ མཙྪམཾསཁཎྜཱནི. ན པཝཱརེཏི དྭིནྣཾ མཙྪམཾསཁཎྜཱནཾ ཨཁཱདིཏཏྟཱཏི ཨདྷིཔྤཱཡོ. ཏཏོཏི དྭེམཙྪམཾསཁཎྜཏོ ནཱིཧརིཏྭཱ ཨེཀནྟི སམྦནྡྷོ, ཏེསུ ཝཱ. སོཏི ཁཱདཀོ བྷིཀྑུ. ཨཉྙནྟི དྭཱིཧི མཙྪམཾསཁཎྜེཧི ཨཉྙཾ པཝཱརཎཔཧོནཀཾ བྷོཛནཾ.

ཨཝཏྠུཏཱཡཱཏི པཝཱརཎཱཡ ཨཝཏྠུབྷཱཝཏོ. ཏཾ ཝིཏྠཱརེནྟོ ཨཱཧ ‘‘ཡཾ ཧཱི’’ཏི. ཧིསདྡོ ཝིཏྠཱརཛོཏཀོ. ཡནྟི མཾསཾ. ཨིདཾ པནཱཏི ཨིདཾ མཾསཾ པན. པཊིཀྑིཏྟམཾསཾ ཀཔྤིཡབྷཱཝཏོ ཨཔཊིཀྑིཔིཏབྦཊྛཱནེ ¶ ཋིཏཏྟཱ པཊིཀྑིཏྟམྤི མཾསབྷཱཝཾ ན ཛཧཱཏི. ནནུ ཁཱདིཏམཾསཾ པན ཨཀཔྤིཡབྷཱཝཏོ པཊིཀྑིཔིཏབྦཊྛཱནེ ཋིཏཏྟཱ ཁཱདིཡམཱནམྤི མཾསབྷཱཝཾ ཛཧཱཏཱིཏི ཨཱཧ ‘‘ཡཾ པནཱ’’ཏིཨཱདི. ཀུལདཱུསཀཀམྨཉྩ ཝེཛྫཀམྨཉྩ ཨུཏྟརིམནུསྶདྷམྨཱརོཙནཉྩ སཱདིཏརཱུཔིཡཉྩ ཀུལ…པེ… རཱུཔིཡཱནི, ཏཱནི ཨཱདཱིནི ཡེསཾ ཀུཧནཱདཱིནནྟི ཀུལ…པེ… རཱུཔིཡཱདཡོ, ཏེཧི. སབྦཏྠཱཏི སབྦེསུ ཝཱརེསུ.

ཨེཝནྟིཨཱདི ནིགམནནིདསྶནཾ. ཏནྟི བྷོཛནཾ. ཡཐཱཏི ཡེནཱཀཱརེན. ཡེན ཨཛ྄ཛྷོཧཊཾ ཧོཏི, སོ པཊིཀྑིཔཏི པཝཱརེཏཱིཏི ཡོཛནཱ. ཀཏྠཙཱིཏི ཀིསྨིཉྩི པཏྟཱདིཀེ. ཏསྨིཾ ཙེ ཨནྟརེཏི ཏསྨིཾ ཁཎེ ཙེ. ཨཉྙཏྲཱཏི ཨཉྙསྨིཾ ཋཱནེ. པཏྟེ ཝིཛྫམཱནབྷོཛནཾ ཨནཛ྄ཛྷོཧརིཏུཀཱམོ ཧོཏི ཡཐཱ, ཨེཝནྟི ཡོཛནཱ. ཧཱིཏི སཙྩཾ. སབྦཏྠཱཏི སབྦེསུ པདེསུ. ཏཏྠཱཏི ཀུརུནྡཱིཡཾ. ཨཱནིསདསྶཱཏི ཨཱགམྨ ནིསཱིདཏི ཨེཏེནཱཏི ཨཱནིསདོ, ཏསྶ པཙྪིམནྟཏོཏི སམྦནྡྷོ. པཎྷིཨནྟཏོཏི པསཏི ཋིཏཀཱལེ ཝཱ གམནཀཱལེ ¶ ཝཱ བྷཱུམིཾ ཕུསཏཱིཏི པཎྷཱི, ཏསྶ ཨནྟཏོ. ‘‘དཱཡཀསྶཱ’’ཏིཔདཾ ‘‘པསཱརིཏཧཏྠ’’ནྟི པདེན ཙ ‘‘ཨངྒ’’ནྟི པདེན ཙ ཨཝཡཝཱིསམྦནྡྷོ. ཧཏྠཔཱསོཏི ཧཏྠསྶ པཱསོ སམཱིཔོ ཧཏྠཔཱསོ, ཧཏྠོ པསཏི ཕུསཏི ཨསྨིཾ ཋཱནེཏི ཝཱ ཧཏྠཔཱསོ, ཨཌྜྷཏེཡྻཧཏྠོ པདེསོ. ཏསྨིནྟི ཧཏྠཔཱསེ.

ཨུཔནཱམེཏཱིཏི སམཱིཔཾ ནཱམེཏི. ཨནནྟརནིསིནྣོཔཱིཏི ཧཏྠཔཱསཾ ཨཝིཛཧིཏྭཱ ཨནནྟརེ ཋཱནེ ནིསིནྣོཔི བྷིཀྑུ ཝདཏཱིཏི ཡོཛནཱ. བྷཏྟཔཙྪིནྟི བྷཏྟེན པཀྑིཏྟཾ པཙྪིཾ. ཨཱིསཀནྟི བྷཱཝནཔུཾསཀཾ. ཨུདྡྷརིཏྭཱ ཝཱ ཨཔནཱམེཏྭཱ ཝཱཏི སམྦནྡྷིཏབྦཾ. དཱུརེཏི ནཝཱསནེ. ཨིཏོཏི པཏྟཏོ. གཏོ དཱུཏོཏི སམྦནྡྷོ.

པརིཝེསནཱཡཱཏི པརིཝེསནཏྠཱཡ, བྷཏྟགྒེ ཝཱ. ཏཏྲཱཏི ཨསྨིཾ པརིཝེསནེ. ཏནྟི བྷཏྟཔཙྪིཾ. ཕུཊྛམཏྟཱཝཱཏི ཕུསིཡམཏྟཱཝ. ཀཊཙྪུནཱ ཨུདྡྷཊབྷཏྟེ པན པཝཱརཎཱ ཧོཏཱིཏི ཡོཛནཱ. ཧཱིཏི སཙྩཾ, ཡསྨཱ ཝཱ. ཏསྶཱཏི པརིཝེསཀསྶ. ཨབྷིཧཊེ པཊིཀྑིཏྟཏྟཱཏི ཨབྷིཧཊསྶ བྷཏྟསྶ པཊིཀྑིཏྟབྷཱཝཏོ.

‘‘ཀཱཡེན ཝཱཙཱཡ ཝཱ པཊིཀྑིཔནྟསྶ པཝཱརཎཱ ཧོཏཱི’’ཏི སངྑེཔེན ཝུཏྟམཏྠཾ ཝིཏྠཱརེན དསྶེནྟོ ཨཱཧ ‘‘ཏཏྠཱ’’ཏིཨཱདི. ཏཏྠཱཏི ཏེསུ ཀཱཡཝཱཙཱཔཊིཀྑེཔེསུ. མཙྪིཀབཱིཛནིནྟི མཀྑིཀཱནཾ ཨུཏྟཱསནིཾ བཱིཛནིཾ. ཁཀཱརསྶ ཧི ཚཀཱརཾ ཀཏྭཱ ‘‘མཙྪིཀཱ’’ཏི ཝུཙྩཏི ‘‘སཙྪིཀཏྭཱ’’ཏིཨཱདཱིསུ ¶ ཝིཡ (ཨ. ནི. ༣.༡༠༣). ཨེཏྠ ཧི ‘‘སཀྑིཀཏྭཱ’’ཏི ཝཏྟབྦེ ཁཀཱརསྶ ཚཀཱརོ ཧོཏི.

ཨེཀོ ཝདཏཱིཏི སམྦནྡྷོ. ཨཔནེཏྭཱཏི པཏྟཏོ ཨཔནེཏྭཱ. ཨེཏྠཱཏི ཝཙནེ. ཀཐནྟི ཀེནཱཀཱརེན ཧོཏཱིཏི ཡོཛནཱ. ཝདནྟསྶ ནཱམཱཏི ཨེཏྠ ནཱམསདྡོ གརཧཏྠོ ‘‘ཨཏྠཱི’’ཏིཔདེན ཡོཛེཏབྦོ. ཨཏྠི ནཱམཱཏི ཨཏྠོ. ཨིཏོཔཱིཏི པཏྟཏོཔི. ཏཏྲཱཔཱིཏི ཏསྨིཾ ཝཙནེཔི.

སམཾསཀནྟི མཾསེན སཧ པཝཏྟཾ. རསནྟི དྲཝཾ. ཏནྟི ཝཙནཾ. པཊིཀྑིཔཏོ ཧོཏི. ཀསྨཱ? མཙྪོ ཙ རསོ ཙ མཙྪེན མིསྶོ རསོ ¶ ཙཱཏི ཨཏྠསྶ སམྦྷཝཏོ. ཨིདནྟི ཝཏྠུཾ. མཾསཾ ཝིསུཾ ཀཏྭཱཏི ‘‘མཾསསྶ རསཾ མཾསརས’’ནྟི མཾསཔདཏྠསྶ པདྷཱནབྷཱཝཾ ཨཀཏྭཱ, རསཔདཏྠསྶེཝ པདྷཱནབྷཱཝཾ ཀཏྭཱཏི ཨཏྠོ.

ཨཱཔུཙྪནྟནྟི ‘‘མཾསརསཾ གཎྷཐཱ’’ཏི ཨཱཔུཙྪནྟཾ. ཏནྟི མཾསཾ. ཀརམྦཀོཏི མིསྶཀཱདྷིཝཙནམེཏཾ. ཡཉྷི ཨཉྙེན ཨཉྙེན མིསྶེཏྭཱ ཀརོནྟི, སོ ‘‘ཀརམྦཀོ’’ཏི ཝུཙྩཏི. ཨཡཾ པནེཏྠ ཝཙནཏྠོ – ཀརོཏི སམཱུཧཾ ཨཝཡཝིནྟི ཀརོ, ཀརཱིཡཏི ཝཱ སམཱུཧེན ཨཝཡཝིནཱཏི ཀརོ, ཨཝཡཝོ, ཏཾ ཝཀཏི ཨཱདདཱཏཱིཏི ཀརམྦཀོ, སམཱུཧོ. ‘‘ཀདམྦཀོ’’ཏིཔི པཱཋོ, སོཔི ཡུཏྟོཡེཝ ཨནུམཏཏྟཱ པཎྜིཏེཧི. ཨབྷིདྷཱནེཔི ཨེཝམེཝ ཨཏྠཱི. ཨཏྠོ པན ཨཉྙཐཱ ཙིནྟེཏབྦོ. ཨིམསྨིཾ ཝཱ ཨཏྠེ རཀཱརསྶ དཀཱརོ ཀཱཏབྦོ. མཾསེན མིསྶོ, ལཀྑིཏོ ཝཱ ཀརམྦཀོ མཾསཀརམྦཀོ. ན པཝཱརེཏཱིཏི ཡེསཾ ཀེསཉྩི མིསྶཀཏྟཱ ན པཝཱརེཏི. པཝཱརེཏཱིཏི མཾསེན མིསྶིཏཏྟཱ པཝཱརེཏི.

ཡོ པན པཊིཀྑིཔཏི, སོ པཝཱརིཏོཝ ཧོཏཱིཏི ཡོཛནཱ. ནིམནྟནེཏི ནིམནྟནཊྛཱནེ. ཧཱིཏི སཙྩཾ. ཏཏྠཱཏི ཀུརུནྡིཡཾ. ཡེནཱཏི ཡེན བྷཏྟེན. ཨེཏྠཱཏི ‘‘ཡཱགུཾ གཎྷཐཱ’’ཏིཨཱདིཝཙནེ. ཨདྷིཔྤཱཡོཏི ཨཊྛཀཐཱཙརིཡཱནཾ ཨདྷིཔྤཱཡོ. ཨེཏྠཱཏི ‘‘ཡཱགུམིསྶཀཾ གཎྷཐཱ’’ཏིཨཱདིཝཙནེ. དུདྡསནྟི དུཀྐརཾ དསྶནཾ. ཨིདཉྩཱཏི ‘‘མིསྶཀཾ གཎྷཐཱ’’ཏིཝཙནཉྩ. ན སམཱནེཏབྦནྟི སམཾ ན ཨཱནེཏབྦཾ, སམཱནཾ ཝཱ ན ཀཱཏབྦཾ. ཧཱིཏི སཙྩཾ, ཡསྨཱ ཝཱ. ཨིདཾ པནཱཏི མིསྶཀཾ པན. ཨེཏྠཱཏི མིསྶཀེ. ཝིསུཾ ཀཏྭཱཏི རསཁཱིརསཔྤཱིནི ཨཱཝེཎིཾ ཀཏྭཱ. ཏནྟི རསཱདིཾ.

ཀདྡཱིཡཏི མདྡཱིཡཏཱིཏི ཀདྡམོ. ཨུནྡཏི པསཝཏི ཝཌྜྷཏཱིཏི ཨུདཀཾ. ཨུནྡཏི ཝཱ ཀླེདནཾ ཀརོཏཱིཏི ¶ ཨུདཀཾ, ནིལཱིནེ སཏྟེ གུཔཏི རཀྑཏཱིཏི གུམྦོ, གུཧཏི སཾཝརཏཱིཏི ཝཱ གུམྦོ. ཨནུཔརིཡཱཡནྟེནཱཏི ཨནུཀྐམེན པརིཝཏྟིཏྭཱ ¶ ཨཱཡནྟེན. ཏནྟི ནཱཝཾ ཝཱ སེཏུཾ ཝཱ. མཛ྄ཛྷནྷིཀནྟི ཨཧསྶ མཛ྄ཛྷཾ མཛ྄ཛྷནྷཾ, ཨཧསདྡསྶ ནྷཱདེསོ, མཛ྄ཛྷནྷཾ ཨེཝ མཛ྄ཛྷནྷིཀཾ. པོཏྠཀེསུ པན མཛ྄ཛྷནྟིཀནྟི པཱཋོ ཨཏྠི, སོ ཨཔཱཋོཡེཝ. ཡོ ཋིཏོ པཝཱརེཏི, ཏེན ཋིཏེནེཝ བྷུཉྫིཏབྦནྟི ཡོཛནཱ. ཨཱནིསདནྟི པཱིཋེ ཕུཊྛཨཱནིསདམཾསཾ. ཨཙཱལེཏྭཱཏི ཨཙཱཝེཏྭཱ. ཨཡམེཝ ཝཱ པཱཋོ. ཨུཔརི ཙ པསྶེསུ ཙ ཨམོཙེཏྭཱཏི ཝུཏྟཾ ཧོཏི. ཨདིནྣཱདཱནེ ཝིཡ ཋཱནཱཙཱཝནཾ ན ཝེདིཏབྦཾ. སཾསརིཏུནྟི སཾསབྦིཏུཾ. ནནྟི བྷིཀྑུཾ.

ཨཏིརེཀཾ རིཙཏི གཙྪཏཱིཏི ཨཏིརིཏྟཾ, ན ཨཏིརིཏྟཾ ཨནཏིརིཏྟནྟི ཨཏྠཾ དསྶེནྟོ ཨཱཧ ‘‘ན ཨཏིརིཏྟ’’ནྟི. ‘‘ཨདྷིཀ’’ནྟིཨིམིནཱ ཨཏིརིཏྟསདྡསྶ ཨཏིསུཉྙཏྠཾ ནིཝཏྟེཏི. ཨདྷི ཧུཏྭཱ ཨེཏི པཝཏྟཏཱིཏི ཨདྷིཀཾ. ཏཾ པནཱཏི ཨནཏིརིཏྟཾ པན ཧོཏཱིཏི སམྦནྡྷོ. ཏཏྠཱཏི ‘‘ཨཀཔྤིཡཀཏ’’ནྟིཨཱདིཝཙནེ. ཝིཏྠཱརོ ཨེཝཾ ཝེདིཏབྦོཏི ཡོཛནཱ. ཏཏྠཱཏི ཨཏིརིཏྟཾ ཀཱཏབྦེསུ ཝཏྠཱུསུ. ཡཾ ཕལཾ ཝཱ ཡཾ ཀནྡམཱུལཱདི ཝཱ ཨཀཏནྟི ཡོཛནཱ. ཨཀཔྤིཡབྷོཛནཾ ཝཱཏི ཀུལདཱུསཀཀམྨཱདཱིཧི ནིབྦཏྟཾ ཨཀཔྤིཡབྷོཛནཾ ཝཱ ཨཏྠཱིཏི སམྦནྡྷོ. ཡོཏི ཝིནཡདྷརོ བྷིཀྑུ. ཏེན ཀཏནྟི ཡོཛནཱ. ‘‘བྷུཏྟཱཝིནཱ པཝཱརིཏེན ཨཱསནཱ ཝུཊྛིཏེན ཀཏ’’ནྟིཝཙནཏོ བྷུཏྟཱཝིནཱ ཨཔཝཱརིཏེན ཨཱསནཱ ཝུཊྛིཏེན ཀཏྟབྦནྟི སིདྡྷཾ. ཏསྨཱ པཱཏོ ཨདྡྷཱནཾ གཙྪནྟེསུ དྭཱིསུ ཨེཀོ པཝཱརིཏོ, ཏསྶ ཨིཏརོ པིཎྜཱཡ ཙརིཏྭཱ ལདྡྷཾ བྷིཀྑཾ ཨཏྟནཱ ཨབྷུཏྭཱཔི ‘‘ཨལམེཏཾ སབྦ’’ནྟི ཀཱཏུཾ ལབྷཏི ཨེཝ. ཡནྟི ཁཱདནཱིཡབྷོཛནཱིཡཾ. ‘‘ཏདུབྷཡམྤཱི’’ཏིཨིམིནཱ ཨཏིརིཏྟཉྩ ཨཏིརིཏྟཉྩ ཨཏིརིཏྟཾ, ན ཨཏིརིཏྟཾ ཨནཏིརིཏྟནྟི ཨཏྠཾ དསྶེཏི.

ཏསྶེཝཱཏི ཨནཏིརིཏྟསྶེཝ. ཨེཏྠཱཏི ཨནཏིརིཏྟེ, ‘‘ཀཔྤིཡཀཏ’’ནྟི ཨཱདཱིསུ སཏྟསུ ཝིནཡཀམྨཱཀཱརེསུ ཝཱ. ཨནནྟརེཏི ཝིནཡདྷརསྶ ཨནནྟརེ ཨཱསནེ. པཏྟཏོ ནཱིཧརིཏྭཱཏི སམྦནྡྷོ. ཏཏྠེཝཱཏི བྷུཉྫནཊྛཱནེཡེཝ. ཏསྶཱཏི ནིསིནྣསྶ. ཏེནཱཏི བྷཏྟཾ ཨཱནེནྟེན བྷིཀྑུནཱ བྷུཉྫིཏབྦནྟི ཡོཛནཱ. ‘‘ནིསིནྣེན བྷིཀྑུནཱ’’ཏི ཀཱརིཏཀམྨཾ ¶ ཨཱནེཏབྦཾ. ཀསྨཱ ‘‘ཧཏྠཾ དྷོཝིཏྭཱ’’ཏི ཝུཏྟནྟི པུཙྪནྟོ ཨཱཧ ‘‘ཀསྨཱ’’ཏི. ཧཱིཏི ཀཱརཎཾ. ཡསྨཱ ཨཀཔྤིཡཾ ཧོཏི, ཏསྨཱ ཧཏྠཾ དྷོཝིཏྭཱཏི མཡཱ ཝུཏྟནྟི ཨདྷིཔྤཱཡོ. ཏསྶཱཏི བྷཏྟཾ ཨཱནེནྟསྶ. ཡེནཱཏི ཝིནཡདྷརེན. པུན ཡེནཱཏི ཨེཝམེཝ. ཡཉྩཱཏི ཁཱདནཱིཡབྷོཛནཱིཡཉྩ. ཡེན ཝིནཡདྷརེན པཋམཾ ཨཀཏཾ, ཏེནེཝ ཀཏྟབྦཾ. ཡཉྩ ཁཱདནཱིཡབྷོཛནཱིཡཾ པཋམཾ ཨཀཏཾ, ཏཉྙེཝ ཀཏྟབྦནྟི ཝུཏྟཾ ཧོཏི ¶ . ཏཏྠཱཏི པཋམབྷཱཛནེ. ཧཱིཏི སཙྩཾ. པཋམབྷཱཛནཾ སུདྡྷཾ དྷོཝིཏྭཱ ཀཏམྤི ནིདྡོསམེཝ. ཏེན བྷིཀྑུནཱཏི པཝཱརིཏེན བྷིཀྑུནཱ.

ཀུཎྜེཔཱིཏི ཨུཀྑལིཡམྤི. སཱ ཧི ཀུཌཏི ཨོདནཱདིཾ དཱཧཾ ཀརོཏཱིཏི ཀུཎྜོཏི ཝུཙྩཏི. ཏནྟི ཨཏིརིཏྟཀཏཾ ཁཱདནཱིཡབྷོཛནཱིཡཾ. ཡེན པནཱཏི ཝིནཡདྷརེན པན. བྷིཀྑུཾ ནིསཱིདཱཔེནྟཱིཏི སམྦནྡྷོ. མངྒལནིམནྟནེཏི མངྒལཏྠཱཡ ནིམནྟནཊྛཱནེ. ཏཏྠཱཏི མངྒལནིམནྟནེ. ཀརོནྟེནཱཏི ཀརོནྟེན ཝིནཡདྷརེན.

གིལཱནེན བྷུཉྫིཏཱཝསེསམེཝ ན ཀེཝལཾ གིལཱནཱཏིརིཏྟཾ ནཱམ, གིལཱནཾ པན ཨུདྡིསྶ ཨཱབྷཏཾ གིལཱནཱཏིརིཏྟམེཝ ནཱམཱཏི དསྶེནྟོ ཨཱཧ ‘‘ན ཀེཝལ’’ནྟིཨཱདི. ཡཾཀིཉྩི གིལཱནནྟི ཨུཔསམྤནྣཾ ཝཱ ཨནུཔསམྤནྣཾ ཝཱ ཡཾཀིཉྩི གིལཱནཾ. ཡཾ དུཀྐཊཾ ཝུཏྟཾ, ཏཾ ཨསཾསཊྛཝསེན ཝུཏྟནྟི ཡོཛནཱ. ཨནཱཧཱརཏྠཱཡཱཏི པིཔཱསཙྪེདནཨཱབཱདྷཝཱུཔསམཏྠཱཡ.

༢༤༡. སཏི པཙྩཡེཏི ཨེཏྠ པཙྩཡསྶ སརཱུཔཾ དསྶེཏུཾ ‘‘པིཔཱསཱཡ སཏཱི’’ཏི ཙ ‘‘ཨཱབཱདྷེ སཏཱི’’ཏི ཙ ཝུཏྟཾ. ཏེན ཏེནཱཏི སཏྟཱཧཀཱལིཀེན ཙ ཡཱཝཛཱིཝིཀེན ཙ. ཏསྶཱཏི ཨཱབཱདྷསྶ. ཨིདཾ པདཾ ‘‘ཨུཔསམནཏྠ’’ནྟི ཨེཏྠ སམུདྷཱཏུཡཱ སམྦནྡྷེ སམྦནྡྷོ, ཡུཔཙྩཡེན སམྦནྡྷེ ཀམྨནྟི དཊྛབྦནྟི. པཉྩམཾ.

༦. དུཏིཡཔཝཱརཎསིཀྑཱཔདཾ

༢༤༢. ཚཊྛེ ན ཨཱཙརིཏབྦོཏི ཨནཱཙཱརོཏི ཝུཏྟེ པཎྞཏྟིཝཱིཏིཀྐམོཏི ཨཱཧ ‘‘པཎྞཏྟིཝཱིཏིཀྐམ’’ནྟི. ‘‘ཀརོཏཱི’’ཏིཨིམིནཱ ‘‘ཨཏྟཱནམཱཙརཏཱི’’ཏིཨཱདཱིསུ ¶ ཝིཡ ཙརསདྡོ ཀརསདྡཏྠོཏི དསྶེཏི. ཨུཔནནྡྷཱིཏི ཨེཏྠ ཨུཔསདྡོ ཨུཔནཱཧཏྠོ, ནཧདྷཱཏུ བནྡྷནཏྠོཏི དསྶེནྟོ ཨཱཧ ‘‘ཨུཔནཱཧ’’ནྟིཨཱདི. ཛནིཏོ ཨུཔནཱཧོ ཡེནཱཏི ཛནིཏཨུཔནཱཧོ. ཨིམིནཱ ‘‘ཨུཔནནྡྷོ’’ཏི པདསྶ ཨུཔནཧཏཱིཏི ཨུཔནནྡྷོཏི ཀཏྠུཏྠཾ དསྶེཏི.

༢༤༣. ཨབྷིཧཊྛུནྟི ཨེཏྠ ཏུཾཔཙྩཡོ ཏྭཱཔཙྩཡཏྠོཏི ཨཱཧ ‘‘ཨབྷིཧརིཏྭཱ’’ཏི. པདབྷཱཛནེ པན ཝུཏྟནྟི སམྦནྡྷོ. སཱདྷཱརཎམེཝ ཨཏྠནྟི ཡོཛནཱ. ཨསྶཱཏི བྷིཀྑུསྶ. ཏཱིཧཱཀཱརེཧཱིཏི སཱམཾ ཛཱནནེན ཙ ཨཉྙེསམཱརོཙནེན ཙ ཏསྶཱརོཙནེན ཙཱཏི ཏཱིཧི ཀཱརཎེཧི. ཨཱསཱདཱིཡཏེ ¶ མངྐུཾ ཀརཱིཡཏེ ཨཱསཱདནཾ, ཏཾ ཨཔེཀྑོ ཨཱསཱདནཱཔེཀྑོཏི དསྶེནྟོ ཨཱཧ ‘‘ཨཱསཱདན’’ནྟིཨཱདི.

ཡསྶ ཨཏྠཱཡ ཨབྷིཧཊནྟི སམྦནྡྷོ. ཨིཏརསྶཱཏི ཨབྷིཧཱརཀཏོ ཨཉྙསྶ བྷུཏྟསྶཱཏི. ཚཊྛཾ.

༧. ཝིཀཱལབྷོཛནསིཀྑཱཔདཾ

༢༤༧. སཏྟམེ གིརིམྷཱིཏི པབྦཏམྷི. སོ ཧི ཧིམཝམནཱདིཝསེན ཛལཾ, སཱརབྷཱུཏཱནི ཙ བྷེསཛྫཱདིཝཏྠཱུནི གིརཏི ནིགྒིརཏཱིཏི གིརཱིཏི ཝུཙྩཏི. ཨགྒསམཛྫོཏི ཨུཏྟམསམཛྫོ. ཨིམེཧི པདེཧི ཨགྒོ སམཛྫོ ཨགྒསམཛྫོ, གིརིམྷི པཝཏྟོ ཨགྒསམཛྫོ གིརགྒསམཛྫོཏི ཨཏྠཾ དསྶེཏི. སམཛྫོཏི ཙ སབྷཱ. སཱ ཧི སམཱགམཾ ཨཛནྟི གཙྪནྟི ཛནཱ ཨེཏྠཱཏི སམཛྫོཏི ཝུཙྩཏི. ‘‘གིརིསྶ ཝཱ’’ཏིཨཱདིནཱ གིརིསྶ ཨགྒོ ཀོཊི གིརགྒོ, ཏསྨིཾ པཝཏྟོ སམཛྫོ གིརགྒསམཛྫོཏི ཨཏྠོ དསྶིཏོ. སོཏི གིརགྒསམཛྫོ. བྷཝིསྶཏི ཀིརཱཏི ཡོཛནཱ. བྷཱུམིབྷཱགེཏི ཨཝཡཝིཨཱདྷཱརོ, སནྣིཔཏཏཱིཏི སམྦནྡྷོ. ནཊཉྩ ནཱཊཀཉྩ ནཊནཱཊཀཱནི. ‘‘ནཙྩཾ གཱིཏཾ ཝཱདིཏཉྩཱ’’ཏི ཨིདཾ ཏཡཾ ‘‘ནཱཊཀ’’ནྟི ཝུཙྩཏི. ཏེསནྟི ནཊནཱཊཀཱནཾ. དསྶནཏྠནྟི དསྶནཱཡ ཙ སཝནཱཡ ཙ. སཝནམྤི ཧི དསྶནེནེཝ སངྒཧིཏཾ. ཨཔཉྙཏྟེ ¶ སིཀྑཱཔདེཏི ཨཱུནཝཱིསཏིཝསྶསིཀྑཱཔདསྶ ཏཱཝ ཨཔཉྙཏྟཏྟཱ. ཏེཏི སཏྟརསཝགྒིཡཱ. ཏཏྠཱཏི གིརགྒསམཛྫཾ. ཨཐཱཏི ཏསྨིཾ ཀཱལེ. ནེསནྟི སཏྟརསཝགྒིཡཱནཾ ཨདཾསཱུཏི སམྦནྡྷོ. ཝིལིམྤེཏྭཱཏི ཝིལེཔནེཧི ཝིཝིདྷཱཀཱརེན ལིམྤེཏྭཱ.

༢༤༩. ‘‘ཝིཀཱལེ’’ཏི སཱམཉྙེན ཝུཏྟེཔི ཝིསེསཀཱལོཝ གཧེཏབྦོཏི ཨཱཧ ‘‘ཀཱལོ’’ཏིཨཱདི. སོ ཙཱཏི བྷོཛནཀཱལོ ཙ. མཛ྄ཛྷནྷིཀོ ཧོཏཱིཏི ཡོཛནཱ. ཏེནེཝཱཏི བྷོཛནཀཱལསྶ ཨདྷིཔྤེཏཏྟཱ ཨེཝ. ཨསྶཱཏི ‘‘ཝིཀཱལེ’’ཏིཔདསྶ. ‘‘ཝིཀཱལོ ནཱམ…པེ… ཨརུཎུགྒམནཱ’’ཏི པདབྷཱཛནེན ཨརུཎུགྒམནཏོ ཡཱཝ མཛ྄ཛྷནྷིཀཱ ཀཱལོ ནཱམཱཏི ཨཏྠོ ནཡེན དསྶིཏོ ཧོཏི. ཏཏོཏི ཋིཏམཛ྄ཛྷནྷིཀཏོ. སཱུརིཡསྶ ཨཏིསཱིགྷཏྟཱ ཝེགེན ཋིཏམཛ྄ཛྷནྷིཀཾ ཝཱིཏིཝཏྟེཡྻཱཏི ཨཱཧ ‘‘ཀུཀྐུཙྩཀེན པན ན ཀཏྟབྦ’’ནྟི. ཀཱལཏྠམྦྷོཏི ཀཱལསྶ ཛཱནནཏྠཱཡ ཐཱུཎོ. ཀཱལནྟརེཏི ཀཱལསྶ ཨབྦྷནྟརེ.

ཨཝསེསཾ ཁཱདནཱིཡཾ ནཱམཱཏི ཨེཏྠ ཝིནིཙྪཡོ ཨེཝཾ ཝེདིཏབྦོཏི ཡོཛནཱ. ཡནྟི ཁཱདནཱིཡཾ ¶ ཨཏྠཱིཏི སམྦནྡྷོ. ཝནམཱུལཱདིཔབྷེདཾ ཡམྤི ཁཱདནཱིཡཾ ཨཏྠི, ཏམྤི ཨཱམིསགཏིཀཾ ཧོཏཱིཏི ཡོཛནཱ. སེཡྻཐིདནྟི པུཙྪཱཝཱཙཀནིཔཱཏསམུདཱཡོ. ཨིདཾ ཁཱདནཱིཡཾ སེཡྻཐཱ ཀཏམནྟི ཨཏྠོ. ཨིདམྤཱིཏི ཨིདཾ དྭཱདསཝིདྷམྤི. པིསདྡེན ན པཱུཝཱདིཡེཝཱཏི དསྶེཏི.

ཏཏྠཱཏི དྭཱདསསུ ཁཱདནཱིཡེསུ, ཨཱདྷཱརེ བྷུམྨཾ. མཱུལཏི པཏིཊྛཱཏི ཨེཏྠ, ཨེཏེནཱཏི ཝཱ མཱུལཾ. ཁཱདིཏབྦནྟི ཁཱདནཱིཡཾ. མཱུལམེཝ ཁཱདནཱིཡཾ མཱུལཁཱདནཱིཡཾ, ཏསྨིཾ ཝིནིཙྪཡོ ཨེཝཾ ཝེདིཏབྦོཏི ཡོཛནཱ. མཱུལཀམཱུལཱདཱིནི ལོཀསངྐེཏོ པདེསཏོཡེཝ ཝེདིཏབྦཱནི. ཏཾ ཏཉྷི ནཱམཾ ཨཛཱནནྟཱནཾ ཨཏིསམྨཱུལ༹ྷཀཱརཎཏྟཱ སཧ པརིཡཱཡནྟརེན ཝཙནཏྠཾ ཝཀྑཱམ. སཱུཔསྶ ཧིཏཾ སཱུཔེཡྻཾ, སཱུཔེཡྻཾ པཎྞཾ ཨེཏེསནྟི སཱུཔེཡྻཔཎྞཱ, ཏེསཾ མཱུལཱནི སཱུཔེཡྻཔཎྞམཱུལཱནི. ཨཱམཱིཡཏི ཨནྟོ པཝེསཱིཡཏཱིཏི ཨཱམིསོ, ཨཱཀཱརོ ཨནྟོཀརཎཏྠོ, ཨཱམིསསྶ གཏི ཝིཡ གཏི ཨེཏེསནྟི ཨཱམིསགཏིཀཱནི ¶ . ཨེཏྠཱཏི མཱུལེསུ. ཛརཌྜྷནྟི ཛརབྷཱུཏཾ ཨུཔཌྜྷཾ. ཨཉྙམྤཱིཏི ཝཛཀལིམཱུལཏོ ཨཉྙམྤི.

ཡཱནི པན མཱུལཱནི ཝུཏྟཱནི, ཏཱནི ཡཱཝཛཱིཝིཀཱནཱིཏི ཡོཛནཱ. པཱལི༹ཡཾ ཝུཏྟཱནཱིཏི སམྦནྡྷོ. ཁཱདནཱིཡཏྠནྟི ཁཱདནཱིཡསྶ, ཁཱདནཱིཡེ ཝཱ ཝིཛྫམཱནཾ, ཁཱདནཱིཡེན ཝཱ ཀཱཏབྦཾ ཀིཙྩཾ, པཡོཛནཾ ཝཱཏི ཁཱདནཱིཡཏྠཾ. ‘‘ཁཱདནཱིཡེ’’ཏིཨིམིནཱ ‘‘ཏཏྠ ཝུཏྟཱབྷིདྷམྨཏྠཱ’’ཏིཨཱདཱིསུ ཝིཡ ཁཱདནཱིཡཏྠཔདསྶ ཨུཏྟརཔདཏྠཔདྷཱནབྷཱཝཾ དསྶེཏི. ཏཏྠ ཁཱདནཱིཡསྶ, ཁཱདནཱིཡེ ཝཱ ཝིཛྫམཱནཾ, ཁཱདནཱིཡེན ཝཱ ཀཱཏབྦཾ ཀིཙྩཾ ནཱམ ཛིགྷཙྪཱཧརཎམེཝ. ཡཉྷི པཱུཝཱདིཁཱདནཱིཡཾ ཁཱདིཏྭཱ ཛིགྷཙྪཱཧརཎཾ ཧོཏི, ཏསྶ ཀིཙྩཾ ཀིཙྩཾ ནཱམཱཏི ཝུཏྟཾ ཧོཏི. ཏཾ ཀིཙྩཾ, པཡོཛནཾ ཝཱ ནེཝ ཕརནྟི, ནེཝ ནིཔྥཱདེནྟི. ཨེསེཝ ནཡོ ‘‘ན བྷོཛནཱིཡེ བྷོཛནཱིཡཏྠཾ ཕརནྟཱི’’ཏིཨེཏྠཱཔི.

ཏེསནྟི མཱུལཱནཾ ཨནྟོ, ལཀྑཎནྟི ཝཱ སམྦནྡྷོ. ཨེཀསྨིཾ ཛནཔདེ ཁཱདནཱིཡཏྠབྷོཛནཱིཡཏྠེསུ ཕརམཱནེསུ ཨཉྙེསུཔི ཛནཔདེསུ ཕརནྟིཡེཝཱཏི དསྶནཏྠཾ ‘‘ཏེསུ ཏེསུ ཛནཔདེསཱུ’’ཏི ཝིཙྪཱཔདཾ ཝུཏྟཾ. ཀིཉྩཱཔི ཧི བཧཱུསུ ཛནཔདེསུ པཐཝཱིརསཨཱཔོརསསམྤཏྟིཝསེན ཁཱདནཱིཡཏྠབྷོཛནཱིཡཏྠཾ ཕརམཱནམྤི ཨེཀསྨིཾ ཛནཔདེ པཐཝཱིརསཨཱཔོརསཝིཔཏྟིཝསེན ཨཕརམཱནཾ བྷཝེཡྻ, ཝིཀཱརཝསེན པན ཏཏྠ པཝཏྟཏྟཱ ཏཾ ཛནཔདཾ པམཱཎཾ ན ཀཱཏབྦཾ, གཧེཏབྦམེཝཱཏི ཝུཏྟཾ ཧོཏི. པཀཏིཨཱཧཱརཝསེནཱཏི ཨཉྙེཧི ཡཱཝཀཱལིཀ, སཏྟཱཧཀཱལིཀེཧི ཨམིསྶིཏཾ ཨཏྟནོ པཀཏིཡཱཝ ཨཱཧཱརཀིཙྩཀརཎཝསེན. ‘‘མནུསྶཱན’’ནྟིཨིམིནཱ ཨཉྙེསཾ ཏིརཙྪཱནཱདཱིནཾ ཁཱདནཱིཡཏྠབྷོཛནཱིཡཏྠཾ ¶ ཕརམཱནམྤི ན པམཱཎནྟི དསྶེཏི. ཏནྟི མཱུལཾ. ཧཱིཏི སཙྩཾ. ནཱམསཉྙཱསཱུཏི ནཱམསངྑཱཏཱསུ སཉྙཱསུ.

ཡཐཱ མཱུལེ ལཀྑཎཾ དསྶིཏཾ, ཨེཝཾ ཀནྡཱདཱིསུཔི ཡཾ ལཀྑཎཾ དསྶིཏནྟི ཡོཛནཱ. ན ཀེཝལཾ པཱལི༹ཡཾ ཨཱགཏཱནཾ ཧལིདྡཱདཱིནཾ མཱུལཾཡེཝ ཡཱཝཛཱིཝིཀཾ ཧོཏི, ཨཐ ཁོ ཏཙཱདཡོཔཱིཏི ཨཱཧ ‘‘ཡཉྩེཏ’’ནྟིཨཱདི. ཡཾ ཨེཏཾ ཨཊྛཝིདྷནྟི སམྦནྡྷོ.

ཨེཝཾ ¶ མཱུལཁཱདནཱིཡེ ཝིནིཙྪཡཾ དསྶེཏྭཱ ཨིདཱནི ཀནྡཁཱདནཱིཡེ ཏཾ དསྶེནྟོ ཨཱཧ ‘‘ཀནྡཁཱདནཱིཡེ’’ཏིཨཱདི. ཏཏྠ ཀནྡཁཱདནཱིཡེཏི ཀཾ སུཁཾ དདཱཏཱིཏི ཀནྡོ, པདུམཱདིཀནྡོ, སུཁསྶ ཨདཱཡཀཱ པན ཀནྡཱ རུལ༹ྷཱིཝསེན ཀནྡཱཏི ཝུཙྩནྟི, ཀནྡོ ཨེཝ ཁཱདནཱིཡཾ ཀནྡཁཱདནཱིཡཾ, ཏསྨིཾ ཝིནིཙྪཡོ ཨེཝཾ ཝེདིཏབྦོཏི ཡོཛནཱ. ཨེསེཝ ནཡོ ཨུཔརིཔི. ཡནྟི ཀནྡཾ. ཨིམིནཱ ཏཾསདྡཱནཔེཀྑོ ཡཾསདྡོཔི ཨཏྠཱིཏི ཉཱཔེཏི. ཏཏྠཱཏི ཀནྡཁཱདནཱིཡེ. ཏརུཎོ, སུཁཁཱདནཱིཡོཏི ཝིསེསནཔདཱནི ཡཐཱཝཙནཾ ཨུཔརིཔི ཡོཛེཏབྦཱནི. ཨེཝམཱདཡོ ཕརཎཀཀནྡཱ ཡཱཝཀཱལིཀཱཏི སམྦནྡྷོ.

ཨདྷོཏོཏི ཝིསརསོ ཨུདཀེན ཨདྷཱུནིཏོ. ཏེཏི ཀནྡཱ སངྒཧིཏཱཏི སམྦནྡྷོ.

མཱུལེ ཨལཏི པཝཏྟཏཱིཏི མུལཱ༹ལོ, ཨུདཀཏོ ཝཱ ཨུདྡྷཊམཏྟེ མིལཏི ནིམིལཏཱིཏི མུལཱ༹ལཾ. ཨེཝམཱདི ཕརཎཀམུལཱ༹ལཾ ཡཱཝཀཱལིཀནྟི ཡོཛནཱ. ཏཾ སབྦམྤཱིཏི སབྦམྤི ཏཾ མུལཱ༹ལཾ སངྒཧིཏནྟི སམྦནྡྷོ.

མསཏི ཝིཛ྄ཛྷཏཱིཏི མཏྠཀོ. ཨེཝམཱདི མཏྠཀོ ཡཱཝཀཱལིཀོཏི ཡོཛནཱ. ཛརཌྜྷབུནྡོཏི ཛརབྷཱུཏཨཌྜྷསངྑཱཏོ པཱདོ.

ཁནཱིཡཏི ཨཝདཱརཱིཡཏཱིཏི ཁནྡྷོ, ཁཱཡཏཱིཏི ཝཱ ཁནྡྷོ. ‘‘ཨནྟོཔཐཝཱིགཏོ’’ཏིཔདཾ ‘‘སཱལཀལྱཱཎིཁནྡྷོ’’ཏིཔདེནེཝ ཡོཛེཏབྦཾ, ན ཨཉྙེཧི. ཨེཝམཱདི ཁནྡྷོ ཡཱཝཀཱལིཀོཏི ཡོཛནཱ. ཨཝསེསཱཏི ཏཱིཧི དཎྜཀཱདཱིཧི ཨཝསེསཱ.

ཏཙཏི སཾཝརཏི པཊིཙྪཱདེཏཱིཏི ཏཙོ. སརསོཏི ཨེཏྠ ཨེཝཀཱརོ ཡོཛེཏབྦོ, སརསོ ཨེཝཱཏི ཨཏྠོ. ཏེསཾ སངྒཧོཏི སམྦནྡྷོ. ཧཱིཏི སཙྩཾ. ཨེཏནྟི ཀསཱཝབྷེསཛྫཾ, ‘‘ཨནུཛཱནཱམི ¶ …པེ… བྷོཛནཱིཡཏྠ’’ནྟི ཝཙནཾ ཝཱ. ཨེཏྠཱཏི ཀསཱཝབྷེསཛྫེ. ཨེཏེསམྤཱིཏི མཏྠཀཁནྡྷཏྟཙཱནམྤི.

པཏཏཱིཏི པཏྟཾ. ཨེཏེསནྟི མཱུལཀཱདཱིནཾ. ཨེཝརཱུཔཱནི པཏྟཱནི ཙ ཨེཀཾསེན ཡཱཝཀཱལིཀཱནཱིཏི ཡོཛནཱ. ཡཱ ལོཎཱི ཨཱརོཧཏི, ཏསྶཱ ལོཎིཡཱ པཏྟཾ ཡཱཝཛཱིཝིཀནྟི ཡོཛནཱ. དཱིཔཝཱསིནོཏི ཏམྦཔཎྞིདཱིཔཝཱསིནོ ¶ , ཛམྦུདཱིཔཝཱསིནོ ཝཱ. ཡཱནི ཝཱ ཕརནྟཱིཏི ཝུཏྟཱནཱིཏི སམྦནྡྷོ. ཏེསནྟི ནིམྦཱདཱིནཾ. ཨིདཾ པདཾ པུབྦཔརཱཔེཀྑཀཾ, ཏསྨཱ དྭིནྣཾ མཛ྄ཛྷེ ཝུཏྟནྟི དཊྛབྦཾ. པཎྞཱནཾ ཨནྟོ ནཏྠཱིཏི སམྦནྡྷོ.

པུཔྥཏི ཝིཀསཏཱིཏི པུཔྥཾ. ཨེཝམཱདི པུཔྥཾ ཡཱཝཀཱལིཀནྟི ཡོཛནཱ. ཏསྶཱཏི པུཔྥསྶ. ཨསྶཱཏི ཨེཝམེཝ.

ཕལཏཱིཏི ཕལཾ. ཡཱནཱིཏི ཕལཱནི. ཕརནྟཱིཏི སམྦནྡྷོ. ནེསནྟི ཕལཱནཾ པརིཡནྟནྟི སམྦནྡྷོ. ཡཱནི ཝུཏྟཱནི, ཏཱནི ཡཱཝཛཱིཝིཀཱནཱིཏི ཡོཛནཱ. ཏེསམྤཱིཏི ཕལཱནམྤི པརིཡནྟནྟི སམྦནྡྷོ.

ཨསཱིཡཏི ཁིཔཱིཡཏི, ཚཌྜཱིཡཏཱིཏི ཝཱ ཨཊྛི. ཨེཝམཱདཱིནི ཕརཎཀཱནི ཨཊྛཱིནི ཡཱཝཀཱལིཀཱནཱིཏི ཡོཛནཱ. ཏེསནྟི ཨཊྛཱིནཾ.

པིསཱིཡཏི ཙུཎྞཾ ཀརཱིཡཏཱིཏི པིཊྛཾ. ཨེཝམཱདཱིནི ཕརཎཀཱནི པིཊྛཱནི ཡཱཝཀཱལིཀཱནཱིཏི ཡོཛནཱ. ཨདྷོཏཀནྟི ཨུདཀེན ཨདྷཱུནིཏཾ. ཏེསནྟི པིཊྛཱནཾ.

ནིརནྟརཾ ཨསཏི སམྦཛ྄ཛྷཏཱིཏི ནིཡྻཱསོ. སེསཱཏི ཨུཙྪུནིཡྻཱསཏོ སེསཱ. པཱལི༹ཡཾ ཝུཏྟནིཡྻཱསཱཏི སམྦནྡྷོ. ཏཏྠཱཏི ནིཡྻཱསཁཱདནཱིཡེ. སངྒཧིཏཱནཾ ནིཡྻཱསཱནཾ པརིཡནྟནྟི ཡོཛནཱ. ཨེཝནྟིཨཱདི ནིགམནཾ.

ཝུཏྟམེཝཱཏི ཧེཊྛཱ པཋམཔཝཱརཎསིཀྑཱཔདེ ཝུཏྟམེཝཱཏི. སཏྟམཾ.

༨. སནྣིདྷིཀཱརཀསིཀྑཱཔདཾ

༢༥༢. ཨཊྛམེ ¶ ཨབྦྷནྟརེ ཛཱཏོ ཨབྦྷནྟརོ. མཧཱཐེརོཏི མཧནྟེཧི ཐིརགུཎེཧི ཡུཏྟོ. ཨིམིནཱ ‘‘བེལཊྛོ’’ཏི སཉྙཱནཱམསྶ སཉྙིནཱམིཾ དསྶེཏི. པདྷཱནགྷརེཏི སམཐཝིཔསྶནཱནཾ པདཧནཊྛཱནགྷརསངྑཱཏེ ཨེཀསྨིཾ ཨཱཝཱསེ. སུཀྑཀུརནྟི ཨེཏྠ སོསནཀུརཏྟཱ ན སུཀྑཀུརཾ ཧོཏི, ཀེཝལཾ པན ཨསཱུཔབྱཉྫནཏྟཱཏི ཨཱཧ ‘‘ཨསཱུཔབྱཉྫནཾ ¶ ཨོདན’’ནྟི. སོསནཀུརམྤི ཡུཏྟམེཝ. ཝཀྑཏི ཧི ‘‘ཏཾ པིཎྜཔཱཏཾ ཨུདཀེན ཏེམེཏྭཱ’’ཏི. ‘‘ཨོདན’’ནྟིཨིམིནཱ ཀུརསདྡསྶ ཨོདནཔརིཡཱཡཏཾ དསྶེཏི. ཨོདནཉྷི ཀརོཏི ཨཱཡུཝཎྞཱདཡོཏི ‘‘ཀུར’’ནྟི ཝུཙྩཏི. སོཏི བེལཊྛསཱིསོ. ཏཉྩ ཁོཏི ཏཉྩ སུཀྑཀུརཾ ཨཱཧརཏཱིཏི སམྦནྡྷོ. པཙྩཡགིདྡྷཏཱཡཱཏི པིཎྜཔཱཏཔཙྩཡེ ལུདྡྷཏཱཡ. ཐེརོ བྷུཉྫཏཱིཏི སམྦནྡྷོ. མནུསྶཱནཾ ཨེཀཱཧཱརསྶ སཏྟཱཧམཏྟཊྛིཏཏྟཱ ‘‘སཏྟཱཧ’’ནྟི ཝུཏྟཾ. ཏཏོཏི བྷུཉྫནཏོ པརནྟི སམྦནྡྷོ. ཙཏྟཱརིཔཱིཏི ཨེཏྠ པིསདྡེན ཨདྷིཀཱནིཔི སཏྟཱཧཱནི གཧེཏབྦཱནི.

༢༥༣. ཨིཏཱིཏི ཨིདཾ ཏཡཾ. ‘‘སནྣིདྷི ཀཱརོ ཨསྶཱ’’ཏི སམཱསོ ཝིསེསནཔརནིཔཱཏཝསེན གཧེཏབྦོ. ‘‘སནྣིདྷིཀིརིཡནྟི ཨཏྠོ’’ཏི ཨིམིནཱ ཀརཱིཡཏཱིཏི ཀཱརོཏི ཀམྨཏྠཾ དསྶེཏི. ཨེཀརཏྟནྟི ཨནྟིམཔརིཙྪེདཝསེན ཝུཏྟཾ ཏདདྷིཀཱནམྤི ཨདྷིཔྤེཏཏྟཱ. ཨསྶཱཏི ‘‘སནྣིདྷིཀཱརཀ’’ནྟི པདསྶ.

སནྣིདྷིཀཱརཀསྶ སཏྟཱཧཀཱལིཀསྶ ནིསྶགྒིཡཔཱཙིཏྟིཡཱཔཏྟིཡཱ པཙྩཡཏྟཱ སནྣིདྷིཀཱརཀཾ ཡཱམཀཱལིཀཾ ཁཱདནཱིཡབྷོཛནཱིཡཾ ཨསམཱནམྤི སུདྡྷཔཱཙིཏྟིཡཱཔཏྟིཡཱ པཙྩཡོ ཧོཏཱིཏི ཨཱཧ ‘‘ཡཱམཀཱལིཀཾ ཝཱ’’ཏི. པཊིགྒཧཎེཏི པཊིགྒཧཎེ ཙ གཧཎེ ཙ. ཨཛ྄ཛྷོཧརིཏུཀཱམཏཱཡ ཧི པཊིགྒཧཎེ ཙ པཊིགྒཧེཏྭཱ གཧཎེ ཙཱཏི ཝུཏྟཾ ཧོཏི. ཡཾ པཏྟཾ ཨངྒུལིཡཱ གྷཾསནྟསྶ ལེཁཱ པཉྙཱཡཏི, སོ པཏྟོ དུདྡྷོཏོ ཧོཏི སཙེཏི ཡོཛནཱ ཨུཏྟརཝཱཀྱེ ཡཾསདྡཾ དིསྭཱ པུབྦཝཱཀྱེ ཏཾསདྡསྶ གམནཱིཡཏྟཱ. གཎྛིཀཔཏྟསྶཱཏི བནྡྷནཔཏྟསྶ. སོཏི སྣེཧོ. པགྒྷརཏི སནྡིསྶཏཱིཏི སམྦནྡྷོ. ཏཱདིསེཏི དུདྡྷོཏེ, གཎྛིཀེ ཝཱ. ཏཏྠཱཏི དྷོཝིཏཔཏྟེ ཨཱསིཉྩིཏྭཱཏི སམྦནྡྷོ. ཧཱིཏི སཙྩཾ. ཨབྦོཧཱརིཀཱཏི ན ཝོཧརིཏབྦཱ, ཝོཧརིཏུཾ ན ཡུཏྟཱཏི ཨཏྠོ. ཡནྟི ཁཱདནཱིཡབྷོཛནཱིཡཾ པརིཙྩཛནྟཱིཏི སམྦནྡྷོ. ཧཱིཏི སཙྩཾ, ཡསྨཱ ཝཱ. ཏཏོཏི ཨཔརིཙྩཏྟཁཱདནཱིཡབྷོཛནཱིཡཏོ ནཱིཧརིཏྭཱཏི སམྦནྡྷོ.

ཨཀཔྤིཡམཾསེསཱུཏི ¶ ནིདྡྷཱརཎསམུདཱཡོ. སཏི པཙྩཡེཏི པིཔཱསསངྑཱཏེ པཙྩཡེ སཏི. ཨནཏིརིཏྟཀཏནྟི ¶ ཨཏིརིཏྟེན ཨཀཏཾ སནྣིདྷིཀཱརཀཾ ཁཱདནཱིཡབྷོཛནཱིཡནྟི ཡོཛནཱ. ཨེཀམེཝ པཱཙིཏྟིཡནྟི སམྦནྡྷོ. ཝིཀཔྤདྭཡེཏི སཱམིསནིརཱམིསསངྑཱཏེ ཝིཀཔྤདྭཡེ. སབྦཝིཀཔྤེསཱུཏི ཝིཀཱལསནྣིདྷིཨཀཔྤིཡམཾསཡཱམཀཱལིཀཔཙྩཡསངྑཱཏེསུ སབྦེསུ ཝིཀཔྤེསུ.

༢༥༥. ཨཱམིསསཾསཊྛནྟི ཨཱམིསེན སཾསཊྛཾ སཏྟཱཧཀཱལིཀཾ ཡཱཝཛཱིཝིཀཾ.

༢༥༦. ཙཏུབྦིདྷཀཱལིཀསྶ སརཱུཔཉྩ ཝཙནཏྠཉྩ དསྶེནྟོ ཨཱཧ ‘‘ཝིཀཱལབྷོཛནསིཀྑཱཔདེ’’ཏིཨཱདི. ཏཏྠ ནིདྡིཊྛཾ ཁཱདནཱིཡབྷོཛནཱིཡ’’ནྟིཨིམིནཱ ཡཱཝཀཱལིཀསྶ སརཱུཔཾ དསྶེཏི. ‘‘ཡཱཝ…པེ… ཀཱལིཀ’’ནྟིཨིམིནཱ ཝཙནཏྠཾ དསྶེཏི. ‘‘སདྡྷིཾ…པེ… པཱན’’ནྟིཨིམིནཱ ཡཱམཀཱལིཀསྶ སརཱུཔཾ དསྶེཏི. ‘‘ཡཱཝ…པེ… ཀཱལིཀ’’ནྟིཨིམིནཱ ཝཙནཏྠཾ དསྶེཏི. ‘‘སབྦིཨཱདི པཉྩཝིདྷཾ བྷེསཛྫ’’ནྟིཨིམིནཱ སཏྟཱཧཀཱལིཀསྶ སརཱུཔཾ དསྶེཏི. ‘‘སཏྟཱཧཾ…པེ… ཀཱལིཀ’’ནྟིཨིམིནཱ ཝཙནཏྠཾ དསྶེཏི. ‘‘ཋཔེཏྭཱ…པེ… སབྦམྤཱི’’ཏིཨིམིནཱ ཡཱཝཛཱིཝིཀསྶ སརཱུཔཾ དསྶེཏི. ‘‘ཡཱཝ…པེ… ཛཱིཝིཀ’’ནྟིཨིམིནཱ ཝཙནཏྠཾ དསྶེཏི. སབྦཝཙནཏྠོ ལཧུཀམཏྟམེཝ, གརུཀོ པནེཝཾ ཝེདིཏབྦོ – ཡཱཝ ཡཏྟཀོ མཛ྄ཛྷནྷིཀོ ཀཱལོ ཡཱཝཀཱལོ, སོ ཨསྶཏྠཱི, ཏཾ ཝཱ ཀཱལཾ བྷུཉྫིཏབྦནྟི ཡཱཝཀཱལིཀཾ. ཡཱམོ ཀཱལོ ཡཱམཀཱལོ, སོ ཨསྶཏྠི, ཏཾ ཝཱ ཀཱལཾ པརིབྷུཉྫཱིཏབྦནྟི ཡཱམཀཱལིཀཾ. སཏྟཱཧོ ཀཱལོ སཏྟཱཧཀཱལོ, སོ ཨསྶཏྠི, ཏཾ ཝཱ ཀཱལཾ ནིདཧིཏྭཱ པརིབྷུཉྫིཏབྦནྟི སཏྟཱཧཀཱལིཀཾ. ཡཱཝ ཡཏྟཀོ ཛཱིཝོ ཡཱཝཛཱིཝོ, སོ ཨསྶཏྠི, ཡཱཝཛཱིཝཾ ཝཱ པརིཧརིཏྭཱ པརིབྷུཉྫིཏབྦནྟི ཡཱཝཛཱིཝིཀནྟི.

ཏཏྠཱཏི ཙཏུབྦིདྷེསུ ཀཱལིཀེསུ. སཏཀྑཏྟུནྟི ཨནེཀཝཱརཾ. ཡཱཝ ཀཱལོ ནཱཏིཀྐམཏི, ཏཱཝ བྷུཉྫནྟསྶཱཏི ཡོཛནཱ. ཨཧོརཏྟཾ བྷུཉྫནྟསྶཱཏི སམྦནྡྷོཏི. ཨཊྛམཾ.

༩. པཎཱིཏབྷོཛནསིཀྑཱཔདཾ

༢༥༧. ནཝམེ ¶ པཀཊྛབྷཱཝཾ ནཱིཏནྟི པཎཱིཏནྟི ཝུཏྟེ པཎཱིཏསདྡོ ཨུཏྟམཏྠོཏི ཨཱཧ ‘‘ཨུཏྟམབྷོཛནཱནཱི’’ཏི. སམྤནྣོ ནཱམ ན མདྷུརགུཎོ, ཨཐ ཁོ མདྷུརགུཎཡུཏྟཾ བྷོཛནམེཝཱཏི ཨཱཧ ‘‘སམྤཏྟིཡུཏྟ’’ནྟི. ཀསྶཱཏི ཀརཎཏྠེ ཙེཏཾ སཱམིཝཙནཾ, ཀེནཱཏི ཧི ཨཏྠོ. ‘‘སུརས’’ནྟིཨིམིནཱ སཱདཱིཡཏི ཨསྶཱདཱིཡཏཱིཏི སཱདཱུཏི ཝཙནཏྠསྶ སརཱུཔཾ དསྶེཏི.

༢༥༩. ‘‘ཡོ ¶ པན…པེ… བྷུཉྫེཡྻཱ’’ཏི ཨེཏྠ ཝིནིཙྪཡོ ཨེཝཾ ཝེདིཏབྦོཏི ཡོཛནཱ. སུདྡྷཱནཱིཏི ཨོདནེན ཨསཾསཊྛཱནི. ཨོདནསཾསཊྛཱནི སབྦིཨཱདཱིནཱིཏི སམྦནྡྷོ. ཨེཏྠཱཏི ཨིམསྨིཾ སིཀྑཱཔདེ. ཧཱིཏི སཙྩཾ. ‘‘པཎཱིཏསཾསཊྛཱནཱི’’ཏིཨིམིནཱ པཎཱིཏེཧི སབྦིཨཱདཱིཧི སཾསཊྛཱནི བྷོཛནཱནི པཎཱིཏབྷོཛནཱནཱིཏི ཨཏྠཾ དསྶེཏི. ‘‘སཏྟདྷཉྙནིབྦཏྟཱནཱི’’ཏི ཨིམིནཱ བྷོཛནཱནཾ སརཱུཔཾ དསྶེཏི.

‘‘སབྦིནཱ བྷཏྟ’’ནྟིཨཱདཱིནཾ པཉྩནྣཾ ཝིཀཔྤཱནཾ མཛ྄ཛྷེ ཏཱིསུཔི ཝིཀཔྤེསུ ‘‘བྷཏྟ’’ནྟི ཡོཛེཏབྦཾ. ཨེཝཾ ཝཱཀྱཾ ཀཏྭཱ ཝིཉྙཱཔནེ ཨཱཔཏྟིཾ དསྶེཏྭཱ སམཱསཾ ཀཏྭཱ ཝིཉྙཱཔནེ ཏཾ དསྶེནྟོ ཨཱཧ ‘‘སབྦིབྷཏྟཾ དེཧཱི’’ཏིཨཱདི.

ཨིཏོཏི གཱཝིཏོ ལདྡྷེནཱཏི སམྦནྡྷོ. ཝིསངྐེཏནྟི སངྐེཏཏོ ཉཱཔིཏཏོ ཝིགཏཾ ཝིརཧིཏནྟི ཨཏྠོ. ཧཱིཏི སཙྩཾ. ཨིམིནཱ ཝིསངྐེཏསྶ གུཎདོསཾ དསྶེཏི.

ཀཔྤིཡསབྦིནཱ དེཧཱིཏི ཀཔྤིཡསབྦིནཱ སཾསཊྛཾ བྷཏྟཾ དེཧཱིཏི ཡོཛནཱ. ཨེསེཝ ནཡོ སེསེསུཔི. ཡེན ཡེནཱཏི ཡེན ཡེན སབྦིཨཱདིནཱ. ཏསྨིཾ ཏསྶཱཏི ཨེཏྠཱཔི ཝིཙྪཱཝསེན ཨཏྠོ དཊྛབྦོ. པཱལི༹ཡཾ ཨཱགཏསབྦི ནཱམ གོསབྦི, ཨཛིཀཱསབྦི, མཧིཾསསབྦི, ཡེསཾ མཾསཾ ཀཔྤཏི, ཏེསཾ སབྦི ཙ. ནཝནཱིཏཾ ནཱམ ཨེཝམེཝ. ཏེལཾ ནཱམ ཏིལཏེལཾ, སཱསཔཏེལཾ, མདྷུཀཏེལཾ, ཨེརཎྜཏེལཾ, ཝསཱཏེལཉྩ. མདྷུ ནཱམ མཀྑིཀཱམདྷུ. ཕཱཎིཏཾ ནཱམ ཨུཙྪུམྷཱ ནིབྦཏྟཾ. མཙྪོ ནཱམ ཨུདཀཙརོ. པཱལི༹ཨནཱགཏོ མཙྪོ ནཱམ ནཏྠི. མཾསཾ ནཱམ ¶ ཡེསཾ མཾསཾ ཀཔྤཏི, ཏེསཾ མཾསཾ. ཁཱིརདདྷཱིནི སབྦིསདིསཱནེཝ. ཝུཏྟཾ ཡཐཱ ཨེཝཾ ‘‘ནཝནཱིཏབྷཏྟཾ དེཧཱི’’ཏིཨཱདཱིསུཔི སཱུཔོདནཝིཉྙཏྟིདུཀྐཊམེཝ ཧོཏཱིཏི ཡོཛནཱ. ཧཱིཏི སཙྩཾ. སོ ཙཱཏི སོ ཙཏྠོ. ཏཏྠཱཏི ཏསྨིཾ ཨཏྠེ. ཀིཾ པཡོཛནཾ. ནཏྠེཝ པཡོཛནནྟི ཨདྷིཔྤཱཡོ.

པཊིལདྡྷཾ བྷོཛནནྟི སམྦནྡྷོ. ཨེཀརསནྟི ཨེཀཀིཙྩཾ. ཏཏོཏི ནཝཔཎཱིཏབྷོཛནཏོ ནཱིཧརིཏྭཱཏི སམྦནྡྷོ.

སབྦཱནཱིཏི ནཝ པཱཙིཏྟིཡཱནི སནྡྷཱཡ ཝུཏྟཾ.

༢༦༡. ཨུབྷཡེསམྤཱིཏི བྷིཀྑུབྷིཀྑུནཱིནམྤི. སབྦཱིཏི ཙེཏྠ ཡོ ནཾ པརིབྷུཉྫཏི, ཏསྶ བལཱཡུཝཌྜྷནཏྠཾ སབྦཏི གཙྪཏི པཝཏྟཏཱིཏི སབྦི, གྷཏཾ. ཏཏིཡཀྑརེནེཝ སཛ྄ཛྷཱཡིཏབྦཾ ལིཁིཏབྦཉྩ ¶ . ཀསྨཱ? ཏཏིཡཀྑརཊྛཱནེཡེཝ སབྦ གཏིཡནྟི གཏིཨཏྠསྶ སབྦདྷཱཏུསྶ དྷཱཏུཔཱཋེསུ ཨཱགཏཏྟཱཏི. ནཝམཾ.

༡༠. དནྟཔོནསིཀྑཱཔདཾ

༢༦༣. དསམེ དནྟཀཊྛནྟི དནྟཔོནཾ. ཏཉྷི དནྟོ ཀསཱིཡཏི ཝིལེཁཱིཡཏི ཨནེནཱཏི ‘‘དནྟཀཊྛ’’ནྟི ཝུཙྩཏི. ‘‘སབྦ’’ནྟི ཨཱདིནཱ སབྦམེཝ པཾསུཀཱུལཾ སབྦཔཾསུཀཱུལཾ, ཏམསྶཏྠཱིཏི ‘‘སབྦཔཾསུཀཱུལིཀོ’’ཏི ཨཏྠཾ དསྶེཏི. སོཏི བྷིཀྑུ པརིབྷུཉྫཏི ཀིརཱཏི སམྦནྡྷོ. སུསཱནེཏི ཨཱལ༹ཧནེ. ཏཉྷི ཚཝཱནཾ སཡནཊྛཱནཏྟཱ ‘‘སུསཱན’’ནྟི ཝུཙྩཏི ནིརུཏྟིནཡེན. ཏཏྠཱཏི སུསཱནེ. པུན ཏཏྠཱཏི ཨེཝམེཝ. ཨཡྻསརཱུཔཉྩ ཝོསཱཊིཏཀསརཱུཔཉྩ དསྶེཏུཾ ཝུཏྟཾ ‘‘ཨཡྻཝོསཱཊིཏཀཱནཱིཏི ཨེཏྠཱ’’ཏི. ཏཏྠ ‘‘ཨཡྻཱ…པེ… པིཏཱམཧཱ’’ཏིཨིམིནཱ ཨཡྻསརཱུཔཾ དསྶེཏི. ‘‘ཝོ…པེ… བྷོཛནཱིཡཱནཱི’’ཏིཨིམིནཱ ཝོསཱཊིཏཀསརཱུཔཾ. ཨཡྻསངྑཱཏཱནཾ པིཏིཔིཏཱམཧཱནཾ ཨཏྠཱཡ, ཏེ ཝཱ ཨུདྡིསྶ ཚཌྜིཏཱནི ཝོསཱཊིཏཀསངྑཏཱནི ¶ ཁཱདནཱིཡབྷོཛནཱིཡཱནི ཨཡྻཝོསཱཊིཏཀཱནཱིཏི ཝིགྒཧོ ཀཱཏབྦོ. མནུསྶཱ ཋཔེནྟི ཀིརཱཏི སམྦནྡྷོ. ཡནྟི ཁཱདནཱིཡབྷོཛནཱིཡཾ. ཏེསནྟི ཉཱཏཀཱནཾ. པིཎྜཾ པིཎྜཾ ཀཏྭཱཏི སངྒྷཱཊཾ སངྒྷཱཊཾ ཀཏྭཱ. ཨཉྙནྟི ཝུཏྟཁཱདནཱིཡབྷོཛནཱིཡཏོ ཨཉྙཾ. ཨུམྨཱརེཔཱིཏི སུསཱནསྶ ཨིནྡཁཱིལེཔི. སོ ཧི ཨུདྡྷཊོ ཀིལེསམཱརོ ཨེཏྠཱཏི ‘‘ཨུམྨཱརོ’’ཏི ཝུཙྩཏི. བོདྷིསཏྟོ ཧི ཨབྷིནིཀྑམནཀཱལེ པུཏྟཾ ཙུམྦིསྶཱམཱིཏི ཨོཝརཀསྶ ཨིནྡཁཱིལེ ཋཏྭཱ པསྶནྟོ མཱཏརཾ པུཏྟསྶ ནལཱཊེ ཧཏྠཾ ཋཔེཏྭཱ སཡནྟིཾ དིསྭཱ ‘‘སཙེ མེ པུཏྟཾ གཎྷེཡྻཾ, མཱཏཱ ཏསྶ པབུཛ྄ཛྷེཡྻ, པབུཛ྄ཛྷམཱནཱཡ ཨནྟརཱཡོ བྷཝེཡྻཱ’’ཏི ཨབྷིནིཀྑམནནྟརཱཡབྷཡེན པུཏྟདཱརེ པརིཙྩཛིཏྭཱ ཨིནྡཁཱིལཏོ ནིཝཏྟིཏྭཱ མཧཱབྷིནིཀྑམནཾ ནིཀྑམི. ཏསྨཱ བོདྷིསཏྟསྶ ཋཏྭཱ པུཏྟདཱརེསུ ཨཔེཀྑཱསངྑཱཏསྶ མཱརསྶ ཨུདྡྷཊཊྛཱནཏྟཱ སོ ཨིནྡཁཱིལོ ནིཔྤརིཡཱཡེན ‘‘ཨུམྨཱརོ’’ཏི ཝུཙྩཏི, ཨཉྙེ པན རཱུལ༹ྷཱིཝསེན. ཐིརོཏི ཐདྡྷོ. གྷནབདྡྷོཏི གྷནེན བདྡྷོ. ཀཐིནེན མཾསེན ཨཱབདྡྷོཏི ཨཏྠོ. ཝཋཏི ཐཱུལོ བྷཝཏཱིཏི ཝཋོ, མུདྡྷཛདུཏིཡོཡཾ, སོ ཨསྶཏྠཱིཏི ཝཋརོཏི དསྶེནྟོ ཨཱཧ ‘‘ཝཋརོཏི ཐཱུལོ’’ཏི. ‘‘སལླཀྑེམཱ’’ཏིཨིམིནཱ ‘‘མཉྙེ’’ཏི ཨེཏྠ མནདྷཱཏུ སལླཀྑཎཏྠོ, མཀཱརསྶེཀཱརོཏི དསྶེཏི. ཧཱིཏི སཙྩཾ. ཏེསནྟི མནུསྶཱནཾ.

༢༦༤. སམྨཱཏི ཨཝིཔརཱིཏཾ. ཨསལླཀྑེཏྭཱཏི ཨཱཧཱརསདྡསྶ ཁཱདནཱིཡབྷོཛནཱིཡཱདཱིསུ ནིརཱུལ༹ྷབྷཱཝཾ ཨམཉྙིཏྭཱ. བྷགཝཱ པན ཋཔེསཱིཏི སམྦནྡྷོ. ཡཐཱཨུཔྤནྣསྶཱཏི ཡེནཱཀཱརེན ཨུཔྤནྣསྶ ¶ . པིཏཱ པུཏྟསངྑཱཏེ དཱརཀེ སཉྙཱཔེནྟོ ཝིཡ བྷགཝཱ ཏེ བྷིཀྑཱུ སཉྙཱཔེནྟོཏི ཡོཛནཱ.

༢༦༥. ཨེཏདེཝཱཏི ཏིཎྞམཱཀཱརཱནམཉྙཏརཝསེན ཨདིནྣམེཝ སནྡྷཱཡཱཏི སམྦནྡྷོ. ཧཱིཏི སཙྩཾ. མཱཏིཀཱཡཾ ‘‘དིནྣ’’ནྟི ཝུཏྟཊྛཱནཾ ནཏྠི, ཨཐ ཀསྨཱ པདབྷཱཛནེཡེཝ ཝུཏྟནྟི ཨཱཧ ‘‘དིནྣནྟི ཨིད’’ནྟིཨཱདི. ‘‘དིནྣ’’ནྟི ཨིདཾ ཨུདྡྷཊནྟི སམྦནྡྷོ. ཨསྶཱཏི ‘‘དིནྣ’’ནྟི པདསྶ. ནིདྡེསེ ཙ ‘‘ཀཱཡེན…པེ… དེནྟེ’’ཏི ཨུདྡྷཊནྟི ཡོཛནཱ. ཨེཝནྟི ཨིམེཧི ཏཱིཧཱཀཱརེཧི དདམཱནེཏི སམྦནྡྷོ. ཨེཝནྟི ཨིམེཧི དྭཱིཧཱཀཱརེཧི ¶ . ཨཱདཱིཡམཱནནྟི སམྦནྡྷོ. རཐརེཎུམྤཱིཏི རཐིཀཝཱིཐིཡཾ ཨུཊྛིཏཔཾསུམྤི. པུབྦེཏི པཋམཔཝཱརཎསིཀྑཱཔདེ. ཨེཝཾ པཊིགྒཧིཏཾ ཨེཏཾ ཨཱཧཱརཾ དིནྣཾ ནཱམ ཝུཙྩཏཱིཏི ཡོཛནཱ. ‘‘ཨེཏམེཝཱ’’ཏི ཨེཝསྶ སམྦྷཝཏོ ཏསྶ ཕལཾ དསྶེཏུཾ ཝུཏྟཾ ‘‘ན ཨིད’’ནྟིཨཱདི. ནིསྶཊྛཾ ན ཝུཙྩཏཱིཏི ཡོཛནཱ.

ཏཏྠཱཏི ‘‘ཀཱཡེནཱ’’ཏིཨཱདིཝཙནེ. ཧཱིཏི སཙྩཾ. ནཏྠུ ཀརཱིཡཏི ཨིམཱཡཱཏི ནཏྠུཀརཎཱི, ཏཱཡ. ནཱསཱཔུཊེན པཊིགྒཎྷཱཏཱིཏི སམྦནྡྷོ. ཨཀལླཀོཏི གིལཱནོ. ཧཱིཏི སཙྩཾ. ཀཱཡེན པཊིབདྡྷོ ཀཱཡཔཊིབདྡྷོ ཀཊཙྪུཨཱདཱིཏི ཨཱཧ ‘‘ཀཊཙྪུཨཱདཱིསཱུ’’ཏིཨཱདི. ཧཱིཏི སཙྩཾ. པཱཏིཡམཱནནྟི པཱཏཱཔིཡམཱནཾ.

ཨེཏྠཱཏི ཨིམསྨིཾ སིཀྑཱཔདེ. ‘‘པཉྩཧངྒེཧཱི’’ཏི པདསྶ ཝིཏྠཱརཾ དསྶེནྟོ ཨཱཧ ‘‘ཐཱམམཛ྄ཛྷིམསྶཱ’’ཏིཨཱདི. ཏནྟི དཱཏབྦཝཏྠུཾ.

ཏཏྠཱཏི ‘‘ཧཏྠཔཱསོ པཉྙཱཡཏཱི’’ཏིཝཙནེ. གཙྪནྟོཔི ཋིཏེནེཝ སངྒཧིཏོ. བྷཱུམཊྛསྶཱཏི བྷཱུམིཡཾ ཋིཏསྶ. ཨཱཀཱསཊྛསྶཱཏི ཨཱཀཱསེ ཋིཏསྶ. ‘‘ཧཏྠཾ ཨངྒ’’ནྟི པདེཧི ཨཝཡཝིསམྦནྡྷོ ཀཱཏབྦོ. ཝུཏྟནཡེནེཝཱཏི ‘‘བྷཱུམཊྛསྶ ཙ སཱིསེནཱ’’ཏིཨཱདིནཱ ཝུཏྟནཡེནེཝ. པཀྑཱིཏི སཀུཎོ. སོ ཧི པཀྑཡུཏྟཏྟཱ པཀྑཱིཏི ཝུཙྩཏི. ཧཏྠཱིཏི ཀུཉྫརོ. སོ ཧི སོཎྜསངྑཱཏཧཏྠཡུཏྟཏྟཱ ཧཏྠཱིཏི ཝུཙྩཏི. ཨདྡྷེན ཨཊྛམཾ རཏནམསྶཱཏི ཨདྡྷཊྛམརཏནོ, ཧཏྠཱི, ཏསྶ. ཏེནཱཏི ཧཏྠིནཱ.

ཨེཀོ དཱཡཀོ ཝདཏཱིཏི སམྦནྡྷོ. ཨོཎམཏཱིཏི ཧེཊྛཱ ནམཏི. ཨེཏྟཱཝཏཱཏི ཨེཀདེསསམྤཊིཙྪནམཏྟེན. ཏཏོཏི སམྤཊིཙྪནཏོ. ཨུགྒྷཱཊེཏྭཱཏི ཝིཝརིཏྭཱ. ཀཱཛེནཱཏི བྱཱབྷངྒིཡཱ. སཱ ཧི ཀཙཏི བནྡྷཏི ཝིཝིདྷཾ བྷཱརཾ ཨསྨིནྟི ཀཱཙོཏི ཝུཙྩཏི, ཙཀཱརསྶ ཛཀཱརེ ཀཏེ ཀཱཛོཔི ཡུཏྟོཡེཝ. ཏིཾས ཧཏྠཱ རཏནཱནི ཨིམསྶཱཏི ཏིཾསཧཏྠོ, ཝེཎུ. གུལ༹ཀུམྦྷོཏི ¶ ཕཱཎིཏེན པཱུརིཏོ གྷཊོ. པཊིགྒཧིཏམེཝཱཏི ཀུམྦྷེསུ ཧཏྠཔཱསཏོ བཧི ཋིཏེསུཔི ཨབྷིཧཱརཀསྶ ¶ ཧཏྠཔཱསེ ཋིཏཏྟཱ པཊིགྒཧིཏམེཝཱཏི ཝུཏྟཾ ཧོཏི. ཨུཙྪུཡནྟདོཎིཏོཏི ཨུཙྪུཾ པཱིལ༹ནཡནྟསྶ ཨམྦཎཏོ.

བཧཱུ པཏྟཱ ཋཔིཏཱ ཧོནྟཱིཏི སམྦནྡྷོ. ཡཏྠཱཏི ཡསྨིཾ ཋཱནེ. ཋིཏསྶ བྷིཀྑུནོ ཧཏྠཔཱསེཏི ཡོཛནཱ. ཋཏྭཱ ཕུསིཏྭཱ ‘‘ནིསིནྣསྶ བྷིཀྑུནོ’’ཏི པཱཋསེསེན ཡོཛེཏབྦཾ. ཋིཏེན ཝཱ ནིསིནྣེན ཝཱ ནིཔནྣེན ཝཱ དཱཡཀེན དིཡྻཏཱིཏི སམྦནྡྷོ.

པཐཝིཡཾ ཋིཏཱ ཧོནྟཱིཏི སམྦནྡྷོ. ཡཾ ཡནྟི ཡཾ ཡཾ པཏྟཾ. ཡཏྠ ཀཏྠཙཱིཏི ཡེསུ ཀེསུཙཱིཏི སམྦནྡྷོ. ཏནྟི ཏཾ ཝཙནཾ.

ཏཏྠ ཏསྨིཾ ཋཱནེ ཛཱཏོ ཏཏྠཛཱཏོ, ཨལུཏྟསམཱསོཡཾ, སོཡེཝ ཏཏྠཛཱཏཀོ, ཏསྨིཾ. ཧཱིཏི སཙྩཾ, ཡསྨཱ ཝཱ. ཏཏྠཛཱཏཀེ ན རུཧཏི ཡཐཱ, ཨེཝཾ ན རུཧཏིཡེཝཱཏི ཡོཛནཱ. ཐཱམམཛ྄ཛྷིམེན པུརིསེན སུཊྛུ ཧརིཏབྦནྟི སཾཧཱརིཡཾ, ཏཾཡེཝ སཾཧཱརིམཾ ཡཀཱརསྶ མཀཱརཾ ཀཏྭཱ, ན སཾཧཱརིམཾ ཨསཾཧཱརིམཾ, ཏསྨིཾ. ཏེཔཱིཏི ཏེ ཨསཾཧཱརིམཱཔི. ཧཱིཏི སཙྩཾ, ཡསྨཱ ཝཱ. ཏཏྠཛཱཏཀསངྑེཔཱུཔགཱཏི ཏཏྠཛཱཏཀེ སམོདྷཱནེཏྭཱ ཁེཔཾ པཀྑེཔཾ ཨུཔགཏཱ. ཧཱིཏི སཙྩཾ, ཡསྨཱ ཝཱ. ཨིདཉྷི ཝཱཀྱནྟརཏྟཱ པུནཔྤུནཾ ཝུཏྟནྟི དཊྛབྦཾ. ཏཱནཱིཏི ཏིནྟིཎིཀཱདིཔཎྞཱནི. སནྡྷཱརེཏུནྟི སམྨཱ དྷཱརེཏུཾ. ཋིཏོ དཱཡཀོཏི སམྦནྡྷོ.

ལདྡྷསྶ ལདྡྷསྶ ཝཏྠུསྶ སནྣིདྷིཊྛཱནཏྟཱ, པཀྑིཏྟཊྛཱནཏྟཱ ཝཱ ཐཝཱིཡཏི པསཾསཱིཡཏཱིཏི ཐཝིཀཱ, ཏཏོ. པུཉྪིཏྭཱ པཊིགྒཧེཏྭཱཏི ‘‘པུཉྪིཏྭཱ ཝཱ པཊིགྒཧེཏྭཱ ཝཱ’’ཏི ཨནིཡམཝིཀཔྤཏྠོ ཝཱསདྡོ ཨཛ྄ཛྷཱཧརིཏབྦོ. ཏེསུ ཏེསུ ཝཏྠཱུསུ རཉྫཏི ལགྒཏཱིཏི རཛོ, ཏཾ. ཝིནཡེ པཉྙཏྟཾ དུཀྐཊཾ ཝིནཡདུཀྐཊཾ. ཏཾ པནཱཏི བྷིཀྑཾ པན. པཊིགྒཧེཏྭཱ དེཐཱཏི མཾ པཊིགྒཧཱཔེཏྭཱ མམ དེཐཱཏི ཨདྷིཔྤཱཡོ.

ཏཏོ ཏཏོཏི ཏསྨཱ ཏསྨཱ ཋཱནཱ ཨུཊྛཱཔེཏྭཱཏི སམྦནྡྷོ. ཏནྟི བྷིཀྑཾ. ཏསྶཱཏི ཨནུཔསམྤནྣསྶ.

སོ ཝཏྟབྦོཏི སོ དིཡྻམཱནོ བྷིཀྑུ དཱཡཀེན བྷིཀྑུནཱ ཝཏྟབྦོཏི ཡོཛནཱ. ཨིམནྟི སརཛཔཏྟཾ. ཏེནཱཏི དིཡྻམཱནབྷིཀྑུནཱ. ཏཐཱ ¶ ཀཱཏབྦནྟི ཡཐཱ དཱཡཀེན བྷིཀྑུནཱ ཝུཏྟཾ, ཏཐཱ ¶ ཀཱཏབྦནྟི ཨཏྠོ. ཨུཔླཝཏཱིཏི ཨུཔརི གཙྪཏི, པླུ གཏིཡནྟི ཧི དྷཱཏུཔཱཋེསུ (སདྡནཱིཏིདྷཱཏུམཱལཱཡཾ ༡༦ ལ༹ཀཱརནྟདྷཱཏུ) ཝུཏྟཾ. ཨེཏྠ ཨུཨིཏི ཨུཔསགྒསྶ ཨཏྠདསྶནཏྠཾ ‘‘ཨུཔརཱི’’ཏི ཝུཏྟཾ, པཀཱརལཀཱརསཾཡོགོ དཊྛབྦོ. པོཏྠཀེསུ པན ‘‘ཨུཔྤིལཝཏཱི’’ཏི ལིཁནྟི, སོ ཨཔཱཋོ. ཀཉྫིཀནྟི བིལངྒཾ. ཏཉྷི ཀེན ཛལེན ཨཉྫིཡཾ ཨབྷིབྱཏྟཾ ཨསྶཱཏི ‘‘ཀཉྫིཡ’’ནྟི ཝུཙྩཏི, ཏམེཝ ཀཉྫིཀཾ ཡཀཱརསྶ ཀཀཱརཾ ཀཏྭཱ. ཏཾ པཝཱཧེཏྭཱ, ཨཔནེཏྭཱཏི ཨཏྠོ. ཡཏྠཱཏི ཡསྨིཾ ཋཱནེ. སུཀྑམེཝ བྷཏྟཾ བྷཛིཏབྦཊྛེན སེཝིཏབྦཊྛེནཱཏི སུཀྑབྷཏྟཾ, ཏསྨིཾ. པུརཏོཏི བྷིཀྑུསྶ པུརཏོ, པུབྦེ ཝཱ. ཕུསིཏཱནཱིཏི བིནྡཱུནི. ཏཱནི ཧི སམྦཱདྷཊྛཱནེསུཔི ཕུསནྟཱིཏི ཕུསིཏཱནཱིཏི ཝུཙྩནྟི.

ཨུལུ༹ངྐོཏི ཀོསིཡསཀུཎནཱམོ དཱིགྷདཎྜཀོ ཨེཀོ བྷཱཛནཝིསེསོ, ཏེན. ཐེཝཱཏི ཕུསིཏཱནི. ཏཱནི ཧི སམྦཱདྷཊྛཱནེསུཔི ཕུསིཏཏྟཱ ཐཝཱིཡནྟི པསཾསཱིཡནྟཱིཏི ‘‘ཐེཝཱ’’ཏི ཝུཙྩནྟི. ཙརུཀེནཱཏི ཙརཱིཡཏི བྷཀྑཱིཡཏཱིཏི ཙརུ, ཧབྱཔཱཀོ, ཏཾ ཀརོཏི ཨནེནཱཏི ཙརུཀཾ, ཐཱལྱཱདིཀཾ ཁུདྡཀབྷཱཛནཾ, ཏེན ཨཱཀིརིཡམཱནེཏི སམྦནྡྷོ. ཀཱལ༹ཝཎྞཀཱམེཧི མཱནཱིཡཏཱིཏི མསི. ཁཱདཏཱིཏི ཚཱརོ ཁཀཱརསྶ ཚཀཱརཾ, དཀཱརསྶ ཙ རཀཱརཾ ཀཏྭཱ, ཁཱརརསོ, སོ ཨིམིསྶཏྠཱིཏི ཚཱརིཀཱ. ཨུཔྤཏིཏྭཱཏི ཨུདྡྷཾ གནྟྭཱ. ཧཱིཏི སཙྩཾ, ཡསྨཱ ཝཱ.

ཕཱལེཏྭཱཏི ཚིནྡིཏྭཱ. དེནྟཱནཾ ཨནུཔསམྤནྣཱནནྟི སམྦནྡྷོ. པཱཡཱསསྶཱཏི པཱཡཱསེན. ཏཐཱཔཱིཏི ཏེན མུཁཝཊྚིཡཱ གཧཎཱཀཱརེནཔི.

ཨཱབྷོགཾ ཀཏྭཱཏི ‘‘པཊིགྒཧེསྶཱམཱི’’ཏི མནསིཀཱརཾ ཀཏྭཱ. སོཏི ནིདྡཾ ཨོཀྐནྟོ བྷིཀྑུ. ཝཊྚཏིཡེཝཱཏི ཨཱབྷོགསྶ ཀཏཏྟཱ ཝཊྚཏིཡེཝ. ཨནཱདརནྟི ཨནཱདརེན, ཀརཎཏྠེ ཙེཏཾ ཨུཔཡོགཝཙནཾ, ཨནཱདརཾ ཧུཏྭཱཏི ཝཱ ཡོཛེཏབྦཾ. ཀེཙཱིཏི ཨབྷཡགིརིཝཱསིནོ. ཀཱཡེན པཊིབདྡྷོ ཀཱཡཔཊིབདྡྷོ, ཏེན པཊིབདྡྷོ ཀཱཡཔཊིབདྡྷཔཊིབདྡྷོ ¶ , ཏེན. ཝཙནམཏྟམེཝཱཏི ‘‘པཊིབདྡྷཔཊིབདྡྷ’’ནྟི ཨེཀཾ ཨཏིརེཀཾ པཊིབདྡྷཝཙནམཏྟམེཝ ནཱནཾ, ཨཏྠཏོ པན ཀཱཡཔཊིབདྡྷམེཝཱཏི ཨདྷིཔྤཱཡོ. ཡམྤཱིཏི ཡམྤི ཝཏྠུ. ཏཏྲཱཏི ཏསྨིཾ ཝཊྚནེ. ཏནྟི ཨནུཛཱནནཾ.

ནེཡྻོ ཨདྷིཔྤཱཡཾ ནེཏྭཱ ཉཱཏོ ཨཏྠོ ཨིམསྶཱཏི ནེཡྻཏྠཾ. ཨེཏྠཱཏི སུཏྟེ, སུཏྟསྶ ཝཱ. ཡནྟི ཝཏྠུ པཏཏཱིཏི སམྦནྡྷོ. པརིགལི༹ཏྭཱཏི བྷསྶིཏྭཱ. སུདྡྷཱཡཱཏི ནིརཛཱཡ. སཱམནྟི སཡཾ. པུཉྪིཏྭཱ ཝཱཏིཨཱདཱིསུ ཏཡོ ཝཱསདྡཱ ཨནིཡམཝིཀཔྤཏྠཱ. པུཉྪིཏཱདཱིསུ ཧི ཨེཀསྨིཾ ཀིཙྩེ ¶ ཀཏེ ཨིཏརཀིཙྩཾ ཀཱཏབྦཾ ནཏྠཱིཏི ཨདྷིཔྤཱཡོ. ཏེནཱཏི ཏེན བྷིཀྑུནཱ, ‘‘ཨཱཧརཱཔེཏུམྤཱི’’ཏིཔདེ ཀཱརིཏཀམྨཾ. ‘‘ཀསྨཱ ན ཝཊྚཏཱི’’ཏི པུཙྪཱ. ཧཱིཏི ཝིཏྠཱརོ. ཝདནྟེན བྷགཝཏཱཏི སམྦནྡྷོ. ཨེཏྠཱཏི སུཏྟཝཙནེསུ. ‘‘པརིཙྩཏྟཾ ཏཾ བྷིཀྑཝེ དཱཡཀེཧཱི’’ཏི ཝཙནེནཱཏི ཡོཛནཱ. ཨདྷིཔྤཱཡོཏི ནཱིཏཏྠོ ཨདྷིཔྤཱཡོ, ནིཔྤརིཡཱཡེན ཨིཏཏྠོ ཉཱཏཏྠོ ཨདྷིཔྤཱཡོཏི ཝུཏྟཾ ཧོཏི.

ཨེཝཾ ནཱིཏཏྠམདྷིཔྤཱཡཾ དསྶེཏྭཱ ནེཡྻཏྠ, མདྷིཔྤཱཡཾ དསྶེནྟོ ཨཱཧ ‘‘ཡསྨཱ ཙཱ’’ཏི ཨཱདི. ཏནྟི པརིབྷུཉྫནཾ ཨནུཉྙཱཏནྟི སམྦནྡྷོ. དུཏིཡདིཝསེཔཱིཏི པིསདྡོ སམྤིཎྜནཏྠོ, ཨཔརདིཝསེཔཱིཏི ཨཏྠོ. ཨདྷིཔྤཱཡོཏི ནེཡྻཏྠོ ཨདྷིཔྤཱཡོ ནེཏྭཱ ཨིཡྻཏྠོ ཉཱཏཏྠོ ཨདྷིཔྤཱཡོཏི ཝུཏྟཾ ཧོཏི.

བྷུཉྫནྟཱནཾ བྷིཀྑཱུནནྟི སམྦནྡྷོ. ཧཱིཏི ཝིཏྠཱརོ. དནྟཱཏི དསནཱ. ཏེ ཧི དཾསཱིཡནྟི བྷཀྑཱིཡནྟི ཨེཏེཧཱིཏི ‘‘དནྟཱ’’ཏི ཝུཙྩནྟི. སཏྠཾཡེཝ སཏྠཀཾ ཁུདྡཀཊྛེན, ཏེན པཊིགྒཧིཏེན སཏྠཀེན. ཨེཏནྟི མལཾ. ཏནྟི ལོཧགནྡྷམཏྟཾ. པརིཧརནྟཱིཏི པཊིགྒཧེཏྭཱ ཧརནྟི. ཧཱིཏི སཙྩཾ, ཡསྨཱ ཝཱ. ཏཾ སཏྠཀཾ པརིབྷོགཏྠཱཡ ཡསྨཱ ན པརིཧརནྟི, ཏསྨཱ ཨེསེཝ ནཡོཏི ཨཏྠོ. ཨུགྒཧིཏཔཙྩཡཱ, སནྣིདྷིཔཙྩཡཱ ཝཱ དོསོ ནཏྠཱིཏི ཝུཏྟཾ ཧོཏི. ཏཏྠཱཏི ཏེསུ ཏཀྐཁཱིརེསུ. ནཱིལིཀཱཏི ནཱིལཝཎྞཱ སྣེཧཱ. ཨཱམཀཏཀྐཱདཱིསཱུཏི ཨཔཀྐེསུ ཏཀྐཁཱིརེསུ.

ཀིལིཊྛཨུདཀནྟི ¶ སམལཾ ཨུདཀཾ. ཏསྶཱཏི སཱམཎེརསྶ. པཏྟགཏཾ ཨོདནནྟི སམྦནྡྷོ. ཨསྶཱཏི སཱམཎེརསྶ. ཨུགྒཧིཏཀོཏི ཨཝགཧིཏཀོ. ‘‘ཨུཉྙཱཏོ’’ཏིཨཱདཱིསུ (སཾ. ནི. ༡.༡༡༢) ཝིཡ ཨུཀཱརོ ཨོཀཱརཝིཔརཱིཏོ ཧོཏི, ཨཔཊིགྒཧེཏྭཱ གཧིཏཏྟཱ དུགྒཧིཏཀོཏི ཝུཏྟཾ ཧོཏི.

ཨེཏེནཱཏི ཨོདནེན. པཊིགྒཧིཏམེཝ ཧོཏི ཧཏྠཏོ ཨམུཏྟཏྟཱཏི ཨདྷིཔྤཱཡོ.

པུན པཊིགྒཧེཏབྦཾ སཱཔེཀྑེ སཏཱིཏི ཨདྷིཔྤཱཡོ. ཨེཏྟོཏི ཨིཏོ པཏྟཏོ. སཱམཎེརོ པཀྑིཔཏཱིཏི སམྦནྡྷོ. ཏཏོཏི པཏྟཏོ. ཀེཙཱིཏི ཨབྷཡགིརིཝཱསིནོ. ཏནྟི ‘‘པུན པཊིགྒཧེཏབྦ’’ནྟི ཝདནྟཱནཾ ཀེསཉྩི ཨཱཙརིཡཱནཾ ཝཙནཾ ཝེདིཏབྦནྟི སམྦནྡྷོ. ཡནྟི པཱུཝབྷཏྟཱདི.

ཨཏྟནོ ¶ ཝཱཏི སཱམཎེརསྶ ཝཱ. སཱམཎེརཱཏི ཨཱམནྟནཾ. ཏསྶཱཏི སཱམཎེརསྶ. བྷཱཛནེཏི ཡཱགུཔཙནཀབྷཱཛནེ. ཡཱགུཀུཊནྟི ཡཱགུཡཱ པཱུརིཏཾ ཀུཊཾ. ཏནྟི ཡཱགུཀུཊཾ. ‘‘བྷིཀྑུནཱ པཊིགྒཎྷཱཔེཏུ’’ནྟི ཀཱརིཏཀམྨཾ ཨུཔནེཏབྦཾ. གཱིཝཾ ཋཔེཏྭཱ ཨཱཝཛྫེཏཱིཏི སམྦནྡྷོ. ཨཱཝཛྫེཏཱིཏི པརིཎཱམེཏི.

པཊིགྒཧཎཱུཔགཾ བྷཱརནྟི ཐཱམམཛ྄ཛྷིམེན པུརིསེན སཾཧཱརིམཾ བྷཱརཾ. བལཝཏཱ སཱམཎེརེནཱཏི སམྦནྡྷོ. ཏེལགྷཊཾ ཝཱཏི ཏེལེན པཀྑིཏྟཾ གྷཊཾ ཝཱ. ལགྒེནྟཱིཏི ལམྦེནྟི. ཨཡམེཝ ཝཱ པཱཋོ.

ནཱགསྶ དནྟོ ཝིཡཱཏི ནཱགདནྟཀོ, སདིསཏྠེ ཀོ. ཨངྐཱིཡཏེ ལཀྑཱིཡཏེ ཨནེནཱཏི ཨངྐུསོ, གཛམཏྠཀམྷི ཝིཛ྄ཛྷནཀཎྜཀོ. ཨངྐུསོ ཝིཡཱཏི ཨངྐུསཀོ, ཏསྨིཾ ཨངྐུསཀེ ཝཱ ལགྒིཏཱ ཧོནྟཱིཏི སམྦནྡྷོ. གཎྷཏོཏི གཎྷནྟསྶ. མཉྩསྶ ཧེཊྛཱ ཧེཊྛཱམཉྩོ, ཏསྨིཾ. ཏནྟི ཏེལཐཱལཀཾ.

ཨཱརོཧནྟེཧི ¶ ཙ ཨོརོཧནྟེཧི ཙ ནིཙྩཾ སེཝཱིཡཏཱིཏི ནིསྶེཎཱི, ཏསྶཱ མཛ྄ཛྷཾ ནིསྶེཎིམཛ྄ཛྷཾ, ཏསྨིཾ. ཀཎྞེ ཨུཊྛིཏཾ ཀཎྞིཀཾ, ཀཎྞམལཾ, ཀཎྞིཀཾ ཝིཡ ཀཎྞིཀཾ, ཡཐཱ ཧི ཀཎྞམལཾ ཀཎྞཏོ ཨུཊྛཧིཏྭཱ སཡཾ པཝཏྟཏི, ཨེཝཾ ཏེལཱདིཏོ ཨུཊྛཧིཏྭཱ སཡཾ པཝཏྟཏཱིཏི ཝུཏྟཾ ཧོཏི. གྷནཙུཎྞནྟི ཀཐིནཙུཎྞཾ. ཏཾསམུཊྛཱནམེཝ ནཱམཱཏི ཏཏོ ཏེལཱདིཏོ སམུཊྛཱནམེཝ ནཱམ ཧོཏཱིཏི ཨཏྠོ. ཨེཏནྟི ཀཎྞིཀཱདི. ཨིདཾ པདཾ པུབྦཱཔརཱཔེཀྑཾ.

ཡོཏྟེནཱཏི རཛྫུནཱ. ཨཉྙོ དེཏཱིཏི སམྦནྡྷོ.

པཝིསནྟེ ཙ ནིཀྑམནྟེ ཙ ཝརཏི ཨཱཝརཏི ཨིམཱཡཱཏི ཝཏི, ཏཾ. ཨུཙྪཱུཏི རསཱལོ. སོ ཧི ཨུསཏི ཝིསཾ དཱཧེཏཱིཏི ཨུཙྪཱུཏི ཝུཙྩཏི, ཏཾ. ཏིམྦརུསཀནྟི ཏིནྡུཀཾ. ཏཉྷི ཏེམེཏི བྷུཉྫནྟཾ པུགྒལཾ ཨདྡེཏི རསེནཱཏི ཏིམྦོ, རུསཏི ཁུདྡིཏཾ ནཱསེཏཱིཏི རུསཀོ, ཏིམྦོ ཙ སོ རུསཀོ ཙཱཏི ‘‘ཏིམྦརུསཀོ’’ཏི ཝུཙྩཏི, ཏཾ. ཝཏིདཎྜཀེསཱུཏི ཝཏིཡཱ ཨཏྠཱཡ ནིཀྑཎིཏེསུ དཎྜཀེསུ. མཡཾ པནཱཏི སངྒཧཀཱརཱཙརིཡབྷཱུཏཱ བུདྡྷགྷོསནཱམཀཱ མཡཾ པན, ཨཏྟཱནཾ སནྡྷཱཡ བཧུཝཙནཝསེན ཝུཏྟཾ. ན པུཐུལོ པཱཀཱརོཏི ཨཌྜྷཏེཡྻཧཏྠཔཱསཱནཏིཀྐམཾ སནྡྷཱཡ ཝུཏྟཾ. ཧཏྠསཏམྤཱིཏི རཏནསཏམྤི.

སོཏི ¶ སཱམཎེརོ. བྷིཀྑུསྶ དེཏཱིཏི ཡོཛནཱ. ཨཔརོཏི སཱམཎེརོ.

ཕལཾ ཨིམིསྶཏྠཱིཏི ཕལིནཱི, ཨིནཔཙྩཡོ ཨིཏྠིལིངྒཛོཏཀོ ཨཱི, ཏཾ སཱཁནྟི ཡོཛནཱ. ཕལིནིསཱཁནྟི སམཱསཏོཔི པཱཋོ ཨཏྠི. མཙྪིཀཝཱརཎཏྠནྟི མདྷུཕཱཎིཏཱདཱིཧི མཀྑནཊྛཱནེ ནིལཱིཡནྟཱིཏི མཀྑིཀཱ, ཏཱཡེཝ མཙྪིཀཱ ཁཀཱརསྶ ཚཀཱརཾ ཀཏྭཱ, ཏཱསཾ ནིཝཱརཎཱཡ. མཱུལཔཊིགྒཧམེཝཱཏི མཱུལེ པཊིགྒཧཎམེཝ, པཋམཔཊིགྒཧམེཝཱཏི ཝུཏྟཾ ཧོཏི.

བྷིཀྑུ གཙྪཏཱིཏི སམྦནྡྷོ. ཨརིཏྟེནཱཏི ཀེནིཔཱཏེན. ཏཉྷི ཨརཏི ནཱཝཱ གཙྪཏི ཨནེནཱཏི ཨརིཏྟཾ, ཏེན. ཏནྟི པཊིགྒཧཎཱརཧཾ བྷཎྜཾ ¶ . ཨནུཔསམྤནྣེནཱཏི ཀཱརིཏཀམྨཾ. ཏསྨིམྤཱིཏི ཙཱཊིཀུཎྜཀེཔི. ཏནྟི ཨནུཔསམྤནྣཾ.

པཱཐེཡྻཏཎྜུལེཏི པཐསྶ ཧིཏེ ཏཎྜུལེ. ཏེསནྟི སཱམཎེརཱནཾ. ཨིཏརེཧཱིཏི བྷིཀྑཱུཧི གཧིཏཏཎྜུལེཧི. སབྦེཧི བྷིཀྑཱུཧི བྷུཏྟནྟི སམྦནྡྷོ. ཨེཏྠཱཏི བྷིཀྑཱུཧི གཧིཏེཧི སཱམཎེརསྶ ཏཎྜུལེཧི ཡཱགུཔཙནེ ན དིསྶཏཱིཏི སམྦནྡྷོ. ཀཱརཎནྟི པརིཝཏྟེཏྭཱ བྷུཏྟསྶ ཙ ཨཔརིཝཏྟེཏྭཱ བྷུཏྟསྶ ཙ ཀཱརཎཾ.

བྷཏྟཾ པཙིཏུཀཱམོ སཱམཎེརོཏི ཡོཛནཱ. བྷིཀྑུནཱ ཨཱརོཔེཏབྦཾ, ཨགྒི ན ཀཱཏབྦོཏི སམྦནྡྷོ. པུན པཊིགྒཧཎཀིཙྩཾ ནཏྠི མཱུལེ པཊིགྒཧིཏཏྟཱཏི ཨདྷིཔྤཱཡོ.

ཨསྶཱཏི སཱམཎེརསྶ. ཏཏོཏི ཨགྒིཛཱལནཏོ.

ཏཏྟེ ཨུདཀེཏི ཨུདཀེ ཏཱཔེ. ཏཏོཏི ཏཎྜུལཔཀྑིཔནཏོ.

པིདྷཱནནྟི ཨུཀྑལིཔིདྷཱནཾ. ཏསྶེཝཱཏི ཧཏྠཀུཀྐུཙྩཀསྶ བྷིཀྑུནོ ཨེཝ. དབྦིཾ ཝཱཏི ཀཊཙྪུཾ ཝཱ. སོ ཧི དརཱིཡཏི ཝིལོལཱི༹ཡཏི ཨིམཱཡཱཏི དབྦཱིཏི ཝུཙྩཏི.

ཏཏྲཱཏི ཏསྨིཾ ཋཔནེ. ཏསྶེཝཱཏི ལོལབྷིཀྑུསྶེཝ. ཏཏོཏི པཏྟཏོ. པུན ཏཏོཏི སཱཁཱདིཏོ. ཏཏྠཱཏི ཕལརུཀྑེ.

ཝིཏཀྐཾ སོདྷེཏུནྟི ‘‘མཡ྄ཧམྤི དསྶཏཱི’’ཏི ཝིཏཀྐཾ སོདྷེཏུཾ. ཏཏོཏི ཨམྦཕལཱདིཏོ.

པུན ¶ ཏཏོཏི མཱཏཱཔིཏཱུནམཏྠཱཡ གཧིཏཏེལཱདིཏོ. ཏེཏི མཱཏཱཔིཏརོ. ཏཏོཡེཝཱཏི ཏེཧིཡེཝ ཏཎྜུལེཧི སམྤཱདེཏྭཱཏི སམྦནྡྷོ.

ཨེཏྠཱཏི ཏཱཔིཏཨུདཀེ. ཨམུཉྩནྟེནེཝ ཧཏྠེནཱཏི ཡོཛནཱ. ཨངྒནྟི ཝིནཱསཾ གཙྪནྟཱིཏི ཨངྒཱརཱ. དརཱིཡནྟི ཕལཱིཡནྟཱིཏི དཱརཱུནི.

ཝུཏྟོ སཱམཎེརོཏི ཡོཛནཱ.

གཝཏི ¶ པརིབྷུཉྫནྟཱནཾ ཝིསྶཊྛཾ སདྡཾ ཀརོཏཱིཏི གུལོ༹, གུལ༹ཏི ཝིསཏོ ཛཱིཝིཏཾ རཀྑཏཱིཏི ཝཱ གུལོ༹, ཏཾ བྷཱཛེནྟོ བྷིཀྑཱུཏི སམྦནྡྷོ. ཏསྶཱཏི ལོལསཱམཎེརསྶ.

དྷཱུམསྶཏྠཱཡ ཝཊྚཱིཡཏི ཝཊྚིཏྭཱ ཀརཱིཡཏཱིཏི དྷཱུམཝཊྚི, ཏཾ. མུཁཱིཡཏི ཝིཔརཱིཡཏཱིཏི མུཁཾ. ཀཾ ཝུཙྩཏི སཱིསཾ, ཏཾ ཏིཊྛཏི ཨེཏྠཱཏི ཀཎྛོ.

བྷཏྟུགྒཱརོཏི ཨུདྡྷཾ གིརཏི ནིགྒིརཏཱིཏི ཨུགྒཱརོ, བྷཏྟམེཝ ཨུགྒཱརོ བྷཏྟུགྒཱརོ, ཨུགྒཱརབྷཏྟནྟི ཨཏྠོ. དནྟནྟརེཏི དནྟཝིཝརེ.

ཨུཔཀཊྛེ ཀཱལེཏི ཨཱསནྣེ མཛ྄ཛྷནྷིཀེ ཀཱལེ. ཀཀྑཱརེཏྭཱཏི སཉྩིཏྭཱ. ཏསྶ ཨཏྠཾ དསྶེཏུཾ ཝུཏྟཾ ‘‘དྭེ ཏཡོ ཁེལ༹པིཎྜེ པཱཏེཏྭཱ’’ཏི. ཕལུ༹སངྑཱཏཾ སིངྒཾ ཝིསཱཎཾ ཨསྨིཾ ཨཏྠཱིཏི སིངྒཱི, སོཡེཝ ཀཊུཀབྷཡེཧི ཝིརམིཏབྦཏྟཱ སིངྒཱིཝེརོཏི ཝུཙྩཏི. ཨངྐཱིཡཏི རུཀྑོ ནཝཾ ཨུགྒཏོཏི ལཀྑཱིཡཏི ཨེཏེཧཱིཏི ཨངྐུརཱ, སམཾ ལོཎེན ཨུདཀཾ, སམཾ ཝཱ ཨུདཀེན ལོཎཾ ཨསྨིནྟི སམུདྡོ, ཏསྶ ཨུདཀཾ ཨཝཡཝཱིཨཝཡཝབྷཱཝེནཱཏི སམུདྡོདཀཾ, ཏེན ཨཔཊིགྒཧིཏེནཱཏི སམྦནྡྷོ. ཕཱཎཏི གུལ༹ཏོ ཐདྡྷབྷཱཝཾ གཙྪཏཱིཏི ཕཱཎིཏཾ. ཀརེན ཧཏྠེན གཧིཏབྦཱཏི ཀརཀཱ, ཝསྶོཔལཾ, ཀརེན གཎྷིཏུམརཧཱཏི ཨཏྠོ. ཀཏཀཊྛིནཱཏི ཀཏཀནཱམཀསྶ ཨེཀསྶ རུཀྑཝིསེསསྶ ཨཊྛིནཱ. ཏནྟི ཨུདཀཾ. ཀཔིཏྠོཏི ཨེཀསྶ ཨམྦིལཕལསྶ རུཀྑཝིསེསསྶ ནཱམཾ.

བཧལནྟི ཨཱཝིལཾ. སནྡིཏྭཱཏི ཝིསནྡིཏྭཱ. ཀཀུདྷསོབྦྷཱདཡོཏི ཀཀུདྷརུཀྑསམཱིཔེ ཋིཏཱ སོབྦྷཱདཡོ. རུཀྑཏོཏི ཀཀུདྷརུཀྑཏོ. པརིཏྟནྟི ཨཔྤཀཾ.

པཱནཱིཡགྷཊེ པཀྑིཏྟཱནི ཧོནྟཱིཏི སམྦནྡྷོ. ཏནྟི ཝཱསམཏྟཾ ཨུདཀཾ. ཏཏྠེཝཱཏི ཋཔིཏཔུཔྥཝཱསིཏཔཱནཱིཡེཡེཝ ¶ . ཋཔིཏཾ དནྟཀཊྛནྟི སམྦནྡྷོ. ཨཛཱནནྟསྶ བྷིཀྑུསྶཱཏི ཡོཛནཱ. ཨནཱདརེ ཙེཏཾ སཱམིཝཙནཾ. ཧཱིཏི སཙྩཾ, ཡསྨཱ ཝཱ.

ཀིཾ ¶ མཧཱབྷཱུཏཾ ཝཊྚཏི, ཀིཾ ན ཝཊྚཏཱིཏི ཡོཛནཱ. ཡཾ པནཱཏི མཧཱབྷཱུཏཾ པན. ཨངྒལགྒནྟི ཨངྒེསུ ལགྒཾ, མཧཱབྷཱུཏནྟི སམྦནྡྷོ. ཨེཏྠཱཏི སེདེ. སུཛྷཱཔིཏནྟི ཨངྒཱརསདིསཾ ཀཏྭཱ སུཊྛུ ཛྷཱཔིཏཾ.

ཙཏྟཱརཱིཏི པཐཝཱི ཚཱརིཀཱ གཱུཐཾ མུཏྟནྟི ཙཏྟཱརི. མཧཱཝིཀཊཱནཱིཏི མཧནྟཱནི སཔྤདཊྛཀྑཎསངྑཱཏེ ཝིཀཱརཀཱལེ ཀཏྟབྦཱནི ཨོསདྷཱནི. ཨེཏྠཱཏི ‘‘ཨསཏི ཀཔྤིཡཀཱརཀེ’’ཏི ཝཙནེ. ཀཱལོདིསྶཾ ནཱམཱཏི བྱཱདྷོདིསྶ, པུགྒལོདིསྶ, ཀཱལོདིསྶ, སམཡོདིསྶ, དེསོདིསྶ, ཝསོདིསྶ, བྷེསཛྫོདིསྶསངྑཱཏེསུ སཏྟསུ ཨོདིསྶེསུ ཀཱལོདིསྶཾ ནཱམཱཏི ཨཏྠོ. དསམཾ.

བྷོཛནཝགྒོ ཙཏུཏྠོ.

༥. ཨཙེལཀཝགྒོ

༡. ཨཙེལཀསིཀྑཱཔད-ཨཏྠཡོཛནཱ

༢༦༩. ཨཙེལཀཝགྒསྶ པཋམེ པརིཝིསཏི ཨེཏྠཱཏི པརིཝེསནནྟི དསྶེནྟོ ཨཱཧ ‘‘པརིཝེསནཊྛཱན’’ནྟི. པརིབྦཱཛཀཔབྦཛསདྡཱ སམཱནཱཏི ཨཱཧ ‘‘པརིབྦཱཛཀསམཱཔནྣོཏི པབྦཛྫཾ སམཱཔནྣོ’’ཏི. ཏིཏྠེན སམཾ པཱུརཏཱིཏི སམཏིཏྠཱིཀཾ, ནདཱིཨཱདཱིསུ ཨུདཀཾ, སམཏིཏྠིཀཾ ཝིཡཱཏི སམཏིཏྠིཀཾ, པཏྟབྷཱཛནེསུ ཡཱགུབྷཏྟཾ. ཏེསནྟི མཱཏཱཔིཏཱུནཾ དེནྟསྶཱཏི སམྦནྡྷོ. ‘‘དཱཔེཏཱི’’ཏི ཨེཏྠ དཱདྷཱཏུཡཱ སམྤདཱནསྶ སུཝིཛཱནིཏཏྟཱ ཏཾ ཨདསྶེཏྭཱ ཀཱརིཏཀམྨམེཝ དསྶེནྟོ ཨཱཧ ‘‘ཨནུཔསམྤནྣེནཱ’’ཏི.

༢༧༣. ‘‘སནྟིཀེ’’ཏིཨིམིནཱ ‘‘ཨུཔནིཀྑིཔིཏྭཱ’’ཏི ཨེཏྠ ཨུཔསདྡསྶ སམཱིཔཏྠཾ དསྶེཏི. ཏེསནྟི ¶ ཏིཏྠིཡཱནཾ. ཏཏྠཱཏི བྷཱཛནེ. ཨིཏོཏི པཏྟཏོ. ཨིདྷཱཏི མཡ྄ཧཾ བྷཱཛནེ. ནནྟི ཁཱདནཱིཡབྷོཛནཱིཡཾ. ཏསྶཱཏི ཏིཏྠིཡསྶཱཏི. པཋམཾ.

༢. ཨུཡྻོཛནསིཀྑཱཔདཾ

༢༧༤. དུཏིཡེ ¶ པཊིཀྐམནཨསནསཱལསདྡཱནཾ པརིཡཱཡཏྟཱ ཝུཏྟཾ ‘‘ཨསནསཱལཱཡཔཱི’’ཏི. བྷཏྟསྶ ཝིསྶཛྫནཾ བྷཏྟཝིསྶགྒོཏི ཀཏེ བྷཏྟཀིཙྩནྟི ཨཱཧ ‘‘བྷཏྟཀིཙྩ’’ནྟི. སམྦྷཱུདྷཱཏུསྶ པཔུབྦཨཔདྷཱཏྭཏྠཏྟཱ ཝུཏྟཾ ‘‘ན པཱཔུཎཱི’’ཏི.

༢༧༦. ཝུཏྟཱཝསེསནྟི ཝུཏྟེཧི མཱཏུགཱམེན སདྡྷིཾ ཧསིཏུཀཱམཏཱདཱིཧི ཨཝསེསཾ. ཏསྨིནྟི ཨུཡྻོཛིཏབྷིཀྑུམྷི. ཨཏྠཏོཏི ཝིཛཧནྟཝིཛཧིཏབྷིཀྑཱུནཾ ཨཝིནཱབྷཱཝསངྑཱཏཨཏྠཏོ. ཨིཏརེནཱཏི ཨུཡྻོཛཀབྷིཀྑུནཱ. ཏཏྠཱཏི ‘‘དསྶནཱུཔཙཱརཾ ཝཱ སཝནཱུཔཙཱརཾ ཝཱ’’ཏིཝཙནེ. ཨེཏྠཱཏི ནིདྡྷཱརཎསམུདཱཡོ, དསྶནཱུཔཙཱརསཝནཱུཔཙཱརེསཱུཏི ཨཏྠོ. ‘‘ཏཐཱཏིཨིམིནཱ དྭཱདསཧཏྠཔམཱཎཾ ཨཏིདིསཏི. ཏེཧཱིཏི ཀུཊྚཱདཱིཧི. ཏསྶཱཏི དསྶནཱུཔཙཱརཱཏིཀྐམསྶ. ‘‘ཝུཏྟཔཀཱརམནཱཙཱར’’ནྟི ཨིམིནཱ ‘‘ན ཨཉྙོ ཀོཙི པཙྩཡོ’’ཏི ཨེཏྠ ཨཉྙསདྡསྶ ཨཔཱདཱནཾ དསྶེཏི, ‘‘ཀཱརཎ’’ནྟིཨིམིནཱ པཙྩཡསདྡསྶཏྠཾ.

༢༧༧. ཀལིསདྡསྶ པཱཔཔརཱཛཡསངྑཱཏེསུ དྭཱིསུ ཨཏྠེསུ པཱཔསངྑཱཏོ ཀོདྷོཏི ཨཱཧ ‘‘ཀལཱིཏི ཀོདྷོ’’ཏི. ‘‘ཨཱཎ’’ནྟིཨིམིནཱ སཱསནསདྡསྶཏྠཾ དསྶེཏི. ཝུཏྟཉྷི ‘‘ཨཱཎཱ ཙ སཱསནཾ ཉེཡྻ’’ནྟི. ཀོདྷཝསེན ཝདཏཱིཏི སམྦནྡྷོ. དསྶེཏྭཱ ཝདཏཱིཏི ཡོཛནཱ. ཨིམསྶ ཋཱནཾ ནིསཛྫཾ ཨཱལོཀིཏཾ ཝིལོཀིཏཾ པསྶཐ བྷོཏི ཡོཛནཱ. ཨིམིནཱཔཱིཏི ཨམནཱཔཝཙནཾ ཝཙནེནཱཔཱིཏི. དུཏིཡཾ.

༣. སབྷོཛནསིཀྑཱཔདཾ

༢༧༩. ཏཏིཡེ ‘‘སཡནིཡགྷརེ’’ཏི ཝཏྟབྦེ ཡཀཱརལོཔཾ ཀཏྭཱ ‘‘སཡནིགྷརེ’’ཏི ཝུཏྟནྟི ཨཱཧ ‘‘སཡནིགྷརེ’’ཏི. ཡཏོཏི ཨེཏྠ ཏོསདྡོ པཋམཱདཱིསུ ཨཏྠེསུ དིསྶཏི. ‘‘ཡཏོནིདཱན’’ནྟིཨཱདཱིསུ (སུ. ནི. ༢༧༥) པཋམཏྠེ. ‘‘ཨནྟརཱཡེ ཨསེསཏོ’’ཏིཨཱདཱིསུ (དྷ. ས. ཨཊྛ. གནྠཱརམྦྷཀཐཱ ༧) དུཏིཡཏྠེ ¶ . ‘‘ཨནིཙྩཏོ’’ཏིཨཱདཱིསུ (པཊྛཱ. ༡.༡.༤༠༩) ཏཏིཡཏྠེ. ‘‘མཱཏིཏོ པིཏིཏོ’’ཏིཨཱདཱིསུ (དཱི. ནི. ༡.༣༡༡) པཉྩམྱཏྠེ. ‘‘ཡཾ ¶ པརཏོ དཱནཔཙྩཡཱ’’ཏིཨཱདཱིསུ (ཛཱ. ༢.༢༢.༥༨༥) ཚཊྛྱཏྠེ. ‘‘པུརཏོ པཙྪཏོ’’ཏིཨཱདཱིསུ (པཱཙི. ༥༧༦) སཏྟམྱཏྠེ. ‘‘པདམཏོ’’ཏིཨཱདཱིསུ ཀཱརཎཏྠེ དིསྶཏི. ཨིདྷཱཔི ཀཱརཎཏྠེཡེཝཱཏི ཨཱཧ ‘‘ཡསྨཱ’’ཏི. ཡསྨཱ ཀཱརཎཱ ཨཡྻསྶ བྷིཀྑཱ དིནྣཱ, ཏསྨཱ གཙྪཐ བྷནྟེ ཏུམྷེཏི ཨཏྠོ. ཡནྟི བྷིཀྑཾ. ཝོཏི ཏུམྷེཧི. ཨདྷིཔྤཱཡོཏི པུརིསསྶ ཨཛ྄ཛྷཱསཡོ. ‘‘པརིཡུཊྛིཏོ’’ཏི སཱམཉྙཏོ ཝུཏྟེཔི ཨཏྠཔཀརཎཱདིཏོ རཱགཔརིཡུཊྛིཏོཝཱདྷིཔྤེཏོཏི ཨཱཧ ‘‘རཱགཔརིཡུཊྛིཏོ’’ཏི, རཱགེན པརིབྷཝིཏྭཱ ཨུཊྛིཏོཏི ཨཏྠོ.

༢༨༠. སབྷོཛནནྟི ཨེཏྠ སཀཱརོ སཧསདྡཀཱརིཡོ ཙ ཨཀཱརུཀཱརཱནཾ ཨསརཱུཔཏྟཱ ཨཀཱརཏོ ཨུཀཱརསྶ ལོཔོ ཙ ཏཱིསུ པདེསུ པཙྪིམཱནཾ དྭིནྣཾ པདཱནཾ ཏུལྱཏྠནིསྶིཏསམཱསོ ཙ པུབྦཔདེན སཧ བྷེདནིསྶིཏབཱཧིརཏྠསམཱསོ ཙ ཧོཏི, ཨིཏི ཨིམམཏྠཾ དསྶེནྟོ ཨཱཧ ‘‘སཧ ཨུབྷོཧི ཛནེཧཱི’’ཏི. ཨཐ ཝཱ བྷུཉྫིཏབྦནྟི བྷོཛནཾ, སཾ ཝིཛྫཏི བྷོཛནཾ ཨསྨིཾ ཀུལེཏི སབྷོཛནནྟི དསྶེནྟོ ཨཱཧ ‘‘ཨཐ ཝཱ’’ཏིཨཱདི. ཧཱིཏི སཙྩཾ. ཏེནེཝཱཏི ཏེནེཝ ཨཉྙམཉྙཾ བྷུཉྫིཏབྦཏྟཱ. ཨསྶཱཏི ‘‘སབྷོཛནེ’’ཏིཔདསྶ. གྷརེཏི ཨེཏྠ པུབྦོ སཡནིསདྡོ ལོཔོཏི ཨཱཧ ‘‘སཡནིགྷརེ’’ཏི. ཨིམིནཱ ‘‘དཏྟོ’’ཏིཨཱདཱིསུ ཝིཡ པུབྦཔདལོཔསམཱསཾ དསྶེཏི. པིཊྛསངྒྷཱཊསྶཱཏི ཨེཏྠ པིཊྛསངྒྷཱཊོ ནཱམ ན ཨཉྙསྶ ཡསྶ ཀསྶཙི, ཨཐ ཁོ སཡནིགྷརགབྦྷསྶེཝཱཏི ཨཱཧ ‘‘ཏསྶ སཡནིགྷརགབྦྷསྶཱ’’ཏི. ཡཐཱ ཝཱ ཏཐཱ ཝཱཏི ཡེན ཝཱ ཏེ ན ཝཱ ཨཱཀཱརེན. ཀཏསྶཱཏི པིཊྛིཝཾསཾ ཨཱརོཔེཏྭཱ ཝཱ ཨནཱརོཔེཏྭཱ ཝཱ ཀཏསྶཱཏི. ཏཏིཡཾ.

༢༨༤. ཙཏུཏྠཔཉྩམེསུ ཡཐཱ ཙ སབྷོཛནསིཀྑཱཔདཾ པཋམཔཱརཱཛིཀསམུཊྛཱནཾ, ཨེཝམེཝ ཏཱནིཔཱིཏི ཡོཛནཱཏི. ཙཏུཏྠཔཉྩམཱནི.

༦. ཙཱརིཏྟསིཀྑཱཔདཾ

༢༩༤. ཚཊྛེ ¶ ཀསྨཱ ཏེཧི ‘‘དེཐཱཝུསོ བྷཏྟ’’ནྟི ཝུཏྟཾ, ནནུ བྷིཀྑཱུནཾ ཨེཝཾ ཝཏྟུཾ ན ཝཊྚཏཱིཏི ཨཱཧ ‘‘ཨེཏྠ ཏཾ ཀིརཱ’’ཏིཨཱདི. ཏསྨཱཏི ཡསྨཱ ཨབྷིཧཊཾ ཨཧོསི, ཏསྨཱ.

༢༩༥. ཨིདཾ པན ཝཙནཾ ཨཱཧཱཏི སམྦནྡྷོ. པསཱདཉྙཐཏྟནྟི པསཱདསྶ ཨཉྙེནཱཀཱརེན བྷཱཝོ. ནནྟི ཁཱདནཱིཡཾ. ‘‘གཧེཏྭཱ ཨཱགམཾསཱུ’’ཏིཨིམིནཱ ‘‘ཨུསྶཱརིཡིཏྠཱ’’ཏི ཨེཏྠ ཨུཀཱརསྶ ཨུགྒཧཏྠཏཉྩ ¶ སརདྷཱཏུསྶ གཏྱཏྠཏཉྩ ཨཛྫཏནིཉུཾཝིབྷཏྟིཡཱ ཏྠཏྟཉྩ དསྶེཏི, ཨུགྒཧེཏྭཱ སཱརིཾསུ ཨགམཾསཱུཏི ཨཏྠོ.

༢༩༨. ཡཏྠཱཏི ཡསྨིཾ ཋཱནེ. ཋིཏསྶ བྷིཀྑུནོ ཙིཏྟཾ ཨུཔྤནྣནྟི ཡོཛནཱ. ཏཏོཏི ཙིཏྟུཔྤནྣཏོ. ཡནྟི བྷིཀྑུཾ. པཀཏིཝཙནེནཱཏི ཨུཙྩཱསདྡམཀཏྭཱ པཝཏྟེན སབྷཱཝཝཙནེན. ཨནྟོཝིཧཱརེཏི ཝཙནསྶ ཨཏིསམྦཱདྷཏྟཱ ཨཡུཏྟབྷཱཝཾ མཉྙམཱནོ ཨཱཧ ‘‘ཨཔི ཙ ཨནྟོཨུཔཙཱརསཱིམཱཡཱ’’ཏི.

༣༠༢. གཱམསྶ ཨནྟརེ ཨཱརཱམོ ཏིཊྛཏཱིཏི ཨནྟརཱརཱམོ ཝིཧཱརོ, ཏཾ གཙྪཏཱིཏི དསྶེནྟོ ཨཱཧ ‘‘ཨནྟོགཱམེ’’ཏིཨཱདཱིཏི. ཚཊྛཾ.

༧. མཧཱནཱམསིཀྑཱཔདཾ

༣༠༣. སཏྟམེ ‘‘བྷགཝཏོ’’ཏིཔདཾ ‘‘ཙཱུལ༹པིཏུཔུཏྟོ’’ཏིཔདེ སམྦནྡྷོ, ‘‘མཧལླཀཏརོ’’ཏིཔདེ ཨཔཱདཱནཾ. ཙཱུལ༹པིཏུཔུཏྟོཏི སུདྡྷོདནོ, སཀྐོདནོ, སུཀྐོདནོ, དྷོཏོདནོ, ཨམིཏོདནོཏི པཉྩ ཛནཱ བྷཱཏརོ, ཨམིཏཱ, པཱལིཏཱཏི དྭེ བྷགིནིཡོ. ཏེསུ བྷགཝཱ ཙ ནནྡོ ཙ ཛེཊྛབྷཱཏུབྷཱུཏསྶ སུདྡྷོདནསྶ པུཏྟཱ, ཨཱནནྡོ ཀནིཊྛབྷཱཏུབྷཱུཏསྶ ཨམིཏོདནསྶ པུཏྟོ, མཧཱནཱམོ ཙ ཨནུརུདྡྷོ ཙ ཏཏིཡསྶ སུཀྐོདནསྶ པུཏྟཱ. སཀྐོདནདྷོཏོདནཱནཾ པུཏྟཱ ཨཔཱཀཊཱ. ཏིསྶཏྠེརོ ཨམིཏཱཡ ནཱམ བྷགིནིཡཱ པུཏྟོ, པཱལིཏཱཡ པུཏྟདྷཱིཏརཱ ཨཔཱཀཊཱ. ཏསྨཱ ཙཱུལ༹པིཏུནོ སུཀྐོདནསྶ ¶ པུཏྟོ ཙཱུལ༹པིཏུཔུཏྟོཏི ཨཏྠོ དཊྛབྦོ. དྭཱིསུ ཕལེསཱུཏི ཧེཊྛིམེསུ དྭཱིསུ ཕལེསུ. ཨུསྶནྣསདྡོ བཧུཔརིཡཱཡོཏི ཨཱཧ ‘‘བཧཱུ’’ཏི. ཝཛཏོཏི གོཊྛཏོ. ཏཉྷི གཱཝོ གོཙརཊྛཱནཏོ པཊིཀྐམིཏྭཱ ནིཝཱསཏྠཱཡ ཝཛནྟི གཙྪནྟི ཨསྨིནྟི ཝཛོཏི ཝུཙྩཏི.

༣༠༦. ཏསྨིཾ སམཡེཏི ཏསྨིཾ པཝཱརཎསམཡེ. ‘‘ཨེཏྟཀེཧཱི’’ཏིཔདསྶ ནཱམཝསེན ཝཱ པརིམཱཎཝསེན ཝཱ དུཝིདྷསྶ ཨཏྠསྶ ཨདྷིཔྤེཏཏྟཱ ཝུཏྟཾ ‘‘ནཱམཝསེན པརིམཱཎཝསེནཱ’’ཏི. ཏེསུ ནཱམཾ སནྡྷཱཡ ཨེཏཾ ནཱམཾ ཨེཏེསཾ བྷེསཛྫཱནནྟི ཨེཏྟཀཱནཱིཏི ཝཙནཏྠོ ཀཱཏབྦོ, པརིམཱཎཾ སནྡྷཱཡ ཨེཏཾ པརིམཱཎཾ ཨེཏེསནྟི ཨེཏྟཀཱནཱིཏི ཝཙནཏྠོ ཀཱཏབྦོ. ‘‘ཨཉྙཾ བྷེསཛྫ’’ནྟི ཨེཏྠ ཨཉྙསདྡསྶ ཨཔཱདཱནཾ ནཱམཾ ཝཱ པརིམཱཎཾ ཝཱ བྷཝེཡྻཱཏི ཨཱཧ ‘‘སབྦིནཱ པཝཱརིཏོ’’ཏིཨཱདི.

༣༡༠. ཡེཏི ¶ དཱཡཀཱ, པཝཱརིཏཱ ཧོནྟཱིཏི སམྦནྡྷོཏི. སཏྟམཾ.

༨. ཨུཡྻུཏྟསེནཱསིཀྑཱཔདཾ

༣༡༡. ཨཊྛམེ ‘‘ཨབྷིམུཁ’’ནྟིཨིམིནཱ ཨབྷིསདྡསྶཏྠཾ དསྶེཏི. ‘‘ཨུཡྻཱཏོ’’ཏིཔདསྶ ཨུཊྛཧིཏྭཱ ཡཱཏོཏི དསྶེནྟོ ཨཱཧ ‘‘ནགརཏོ ནིགྒཏོ’’ཏི. ‘‘ཀཏཨུཡྻོག’’ནྟི ཨིམིནཱ ཨུཊྛཧིཏྭཱ ཡུཉྫཏི གཙྪཏཱིཏི ཨུཡྻུཏྟཱཏི དསྶེཏི. དྷཱཏཱུན, མནེཀཏྠཏྟཱ ཝུཏྟཾ ‘‘གཱམཏོ ནིཀྑནྟ’’ནྟི.

༣༡༤. དྭཱདས པུརིསཱ ཨིམསྶ ཧཏྠིནོཏི དྭཱདསཔུརིསོ, ཨཱཝུདྷོ ཧཏྠེསུ ཨེཏེསནྟི ཨཱཝུདྷཧཏྠཱ. ནིནྣནྟི ནིནྣཊྛཱནཾ, པསྶཏོ བྷིཀྑུནོཏི སམྦནྡྷོཏི. ཨཊྛམཾ.

༩. སེནཱཝཱསསིཀྑཱཔདཾ

༣༡༩. ནཝམེ ‘‘ཏིཊྛཏུ ཝཱ’’ཏིཨཱདིནཱ ཝསནཱཀཱརཾ དསྶེཏི. ཝཱསདྡོ ‘‘ཙངྐམཏུ ཝཱ’’ཏིཨཏྠཾ སམྤིཎྜེཏི. ཀིཉྩི ཨིརིཡཱཔཐནྟི ཙཏཱུསུ ¶ ཨིརིཡཱཔཐེསུ ཀིཉྩི ཨིརིཡཱཔཐཾ. ཡཐཱ རུདྡྷམཱནེ སཉྩཱརོ ཚིཛྫཏི, ཨེཝཾ རུདྡྷཱ སཾཝུཏཱ ཧོཏཱིཏི ཡོཛནཱ. ‘‘རུདྡྷོ’’ཏི ཨིམིནཱ ‘‘པལིབུདྡྷོ’’ཏི ཨེཏྠ པརིཔུབྦསྶ བུདྷིདྷཱཏུསྶ ཨདྷིཔྤཱཡཏྠཾ དསྶེཏཱིཏི. ནཝམཾ.

༡༠. ཨུཡྻོདྷིཀསིཀྑཱཔདཾ

༣༢༢. དསམེ ཡུཛ྄ཛྷནྟཱིཏི སཾཔཧརནྟི. ‘‘བལསྶ ཨགྒཾ ཨེཏྠཱ’’ཏིཨིམིནཱ བྷིནྣཱདྷིཀརཎབཱཧིརཏྠསམཱསཾ དསྶེཏི. ‘‘ཛཱནནྟཱི’’ཏིཔདཾ ཨཏྠསམྤུཎྞཏྠཱཡ པཀྑིཏྟཾ. ཨགྒནྟི ཀོཊྛཱསཾ. བལཾ གཎཱིཡཏི ཨེཏྠཱཏི བལགྒནྟི ཝཙནཏྠོཔི ཡུཛྫཏི. ཏེནཱཧ ‘‘བལགཎནཊྛཱན’’ནྟི. ཨིདཉྷི ཝཙནཾ ཨམྦསེཙནགརུསིནནཡེན ཝུཏྟཾ. ཀཐཾ? ‘‘བལགཎནཊྛཱན’’ནྟི ཝདནྟེན ཨཊྛཀཐཱཙརིཡེན ‘‘བལསྶ ཨགྒཾ ཛཱནནྟི ཨེཏྠཱཏི བལགྒ’’ནྟི ཝཙནཏྠསྶ པིཎྜཏྠོ ཙ ཉཱཔཱིཡཏི, ‘‘བལཾ གཎཱིཡཏི ཨེཏྠཱཏི བལགྒ’’ནྟི ཝཙནཏྠོ ཙ དསྶཱིཡཏི. ཝིཡཱུཧཱིཡཏེ སམྤིཎྜཱིཡཏེ བྱཱུཧོ, སེནཱཡ བྱཱུཧོ སེནཱབྱཱུཧོཏི ཨཏྠཾ དསྶེཏི ‘‘སེནཱཡ ཝིཡཱུཧ’’ནྟིཨཱདིནཱ. ཨཎཏི བྷེརཝསདྡཾ ཀརོཏཱིཏི ཨཎཱིཀཾ, མུདྡྷཛཎཀཱརོ, ཧཏྠཱིཡེཝ ཨཎཱིཀཾ ¶ ཧཏྠཱཎཱིཀཾ. ཨེསེཝ ནཡོ སེསེསུཔི. ཡོ ཧཏྠཱི པུབྦེ ཝུཏྟོ, ཏེན ཧཏྠིནཱཏི ཡོཛནཱཏི. དསམཾ.

ཨཙེལཀཝགྒོ པཉྩམོ.

༦. སུརཱཔཱནཝགྒོ

༡. སུརཱཔཱནསིཀྑཱཔད-ཨཏྠཡོཛནཱ

༣༢༦. སུརཱཔཱནཝགྒསྶ པཋམེ བྷདྡཱ ཝཏི ཨེཏྠཱཏི བྷདྡཝཏིཀཱཏི ཙ, བྷདྡཱ ཝཏི བྷདྡཝཏི, སཱ ཨེཏྠ ཨཏྠཱིཏི བྷདྡཝཏིཀཱཏི ཙ ཨཏྠཾ དསྶེནྟོ ཨཱཧ ‘‘སོ’’ཏིཨཱདི. སོཏི གཱམོ ལབྷཱིཏི སམྦནྡྷོ. པཐཾ གཙྪནྟཱིཏི པཐཱཝིནོཏི ཀཏེ ཨདྡྷིཀཱཡེཝཱཏི ཨཱཧ ‘‘ཨདྡྷིཀཱ’’ཏི. ཨདྡྷཾ གཙྪནྟཱིཏི ཨདྡྷིཀཱ. ‘‘པཐིཀཱ’’ཏིཔི པཱཋོ, ཨཡམེཝཏྠོ. ‘‘ཏེཛསཱ ཏེཛ’’ནྟིཔདཱནི སམྦནྡྷཱཔེཀྑཱནི ཙ ཧོནྟི ¶ , པདཱནཾ སམཱནཏྟཱ སམྦནྡྷོ ཙ སམཱནོཏི མཉྙིཏུཾ སཀྐུཎེཡྻཱ ཙ ཧོནྟི, ཏསྨཱ ཏེསཾ སམྦནྡྷཉྩ ཏསྶ ཨསམཱནཏཉྩ དསྶེཏུཾ ཝུཏྟཾ ‘‘ཨཏྟནོ ཏེཛསཱ ནཱགསྶ ཏེཛ’’ནྟི. ‘‘ཨཱནུབྷཱཝེནཱ’’ཏིཨིམིནཱ པན ཏེཛསདྡསྶ ཨཏྠཾ དསྶེཏི. ཀཔོཏསྶ པཱདོ ཀཔོཏོ ཨུཔཙཱརེན, ཏསྶ ཨེསོ ཀཱཔོཏོ, ཝཎྞོ. ཀཱཔོཏོ ཝིཡ ཝཎྞོ ཨསྶཱཏི ཀཱཔོཏིཀཱཏི དསྶེནྟོ ཨཱཧ ‘‘ཀཔོཏཔཱདསམཝཎྞརཏྟོབྷཱསཱ’’ཏི. པསནྣསདྡསྶ པསཱདསདྡྷཱདཡོ ནིཝཏྟེཏུཾ ‘‘སུརཱམཎྜསྶེཏཾ ཨདྷིཝཙན’’ནྟི ཝུཏྟཾ. པཉྩཱབྷིཉྙསྶ སཏོཏི པཉྩཱབྷིཉྙསྶ སམཱནསྶ སཱགཏསྶཱཏི ཡོཛནཱ.

༣༢༨. ‘‘མདྷུཀཔུཔྥཱདཱིནཾ རསེན ཀཏོ’’ཏིཨིམིནཱ པུཔྥཱནཾ རསེན ཀཏོ ཨཱསཝོ པུཔྥཱསཝོཏི ཝཙནཏྠཾ དསྶེཏི. ཨེས ནཡོ ‘‘ཕལཱསཝོ’’ཏིཨཱདཱིསུཔི. སུརཱམེརཡཱནཾ ཝིསེསཾ དསྶེཏུཾ ཝུཏྟཾ ‘‘སུརཱ ནཱམཱ’’ཏིཨཱདི. པིཊྛཀིཎྞཔཀྑིཏྟཱཏི པིཊྛེན ཙ ཀིཎྞེན ཙ པཀྑིཏྟཱ ཀཏཱ ཝཱརུཎཱིཏི སམྦནྡྷོ. ཀིཎྞཱཏི ཙ སུརཱཡ བཱིཛཾ. ཏཉྷི ཀིརནྟི ནཱནཱསམྦྷཱརཱནི མིསྶཱིབྷཝནྟི ཨེཏྠཱཏི ཀིཎྞཱཏི ཝུཙྩཏི. ཏསྶཱཡེཝ མཎྜེཏི ཡོཛནཱ. སུརནཱམཀེན ཨེཀེན ཝནཙརཀེན ཀཏཱཏི སུརཱ. མདཾ ཛནེཏཱིཏི མེརཡཾ.

༣༢༩. ལོཎསོཝཱིརཀནྟི ¶ ཨེཝཾནཱམཀཾ པཱནཾ. སུཏྟནྟིཔི ཨེཝམེཝ. ཏསྨིནྟི སཱུཔསཾཔཱཀེ. ཏེལཾ པན པཙནྟཱིཏི སམྦནྡྷོ. ནཏྠི ཏིཁིཎཾ མཛྫཾ ཨེཏྠཱཏི ཨཏིཁིཎམཛྫཾ, ཨཏིཁིཎམཛྫེ ཏསྨིཾཡེཝ ཏེལེཏི ཨཏྠོ. ཡཾ པནཱཏི ཏེལཾ པན. ཏིཁིཎཾ མཛྫཾ ཨིམསྶ ཏེལསྶཱཏི ཏིཁིཎམཛྫཾ. ཡཏྠཱཏི ཏེལེ. ཨརིཊྛོཏི ཨེཝཾནཱམཀཾ བྷེསཛྫཾ. ཏནྟི ཨརིཊྛཾ, ‘‘སནྡྷཱཡཱ’’ཏིཔདེ ཨཝུཏྟཀམྨཾ. ཨེཏནྟི ‘‘ཨམཛྫཾ ཨརིཊྛ’’ནྟིཝཙནཾ, ‘‘ཝུཏྟ’’ནྟིཔདེ ཝུཏྟཀམྨནྟི. པཋམཾ.

༢. ཨངྒུལིཔཏོདཀསིཀྑཱཔདཾ

༣༣༠. དུཏིཡེ ཨངྒུལཱིཧི པཏུཛྫནཾ ཨངྒུལིཔཏོདོ, སོཡེཝ ཨངྒུལིཔཏོདཀོཏི དསྶེནྟོ ཨཱཧ ‘‘ཨངྒུལཱིཧཱི’’ཏིཨཱདི. ཨུཏྟནྟོཏི ¶ ཨཝཏཔནྟོ. ཨཝཏཔནྟོཏི ཙ ཨཏྠཏོ ཀིལམནྟོཡེཝཱཏི ཨཱཧ ‘‘ཀིལམནྟོ’’ཏི. ཀིལམནྟོ ཧུཏྭཱཏི ཡོཛནཱ. ཨསྶཱསགཧཎེན པསྶཱསོཔི གཧེཏབྦོཏི ཨཱཧ ‘‘ཨསྶཱསཔསྶཱསསཉྩཱརོ’’ཏི. ཏམྤཱིཏི བྷིཀྑུནིམྤཱིཏི. དུཏིཡཾ.

༣. ཧསདྷམྨསིཀྑཱཔདཾ

༣༣༥. ཏཏིཡེ པཀཱརེན ཀརཱིཡཏི ཋཔཱིཡཏཱིཏི པཀཏཾ པཉྙཏྟནྟི དསྶེནྟོ ཨཱཧ ‘‘ཡཾ བྷགཝཏཱ’’ཏིཨཱདི. ཡནྟི སིཀྑཱཔདཾ.

༣༣༦. ཧསསངྑཱཏོ དྷམྨོ སབྷཱཝོ ཧསདྷམྨོཏི ཝུཏྟེ ཨཏྠཏོ ཀཱིལི༹ཀཱཡེཝཱཏི ཨཱཧ ‘‘ཀཱིལི༹ཀཱ ཝུཙྩཏཱི’’ཏི.

༣༣༧. གོཔྥཀཱནནྟི ཙརཎགཎྛིཀཱནཾ. ཏེ ཧི པཱདེ པཱདཾ ཋཔནཀཱལེ ཨཉྙམཉྙཱུཔརི ཋཔནཏོ གོཔཱིཡནྟཱིཏི གོཔྥཱ, ཏེ ཨེཝ གོཔྥཀཱཏི ཝུཙྩནྟི. པཱདསྶ ཧི ཨུཔརི པཱདཾ ཋཔནཀཱལེ ཨེཀསྶ ཨུཔརི ཨེཀོ ན ཋཔེཏབྦོ. ཏེནཱཧ བྷགཝཱ ‘‘པཱདེ པཱདཾ ཨཙྩཱདྷཱཡཱ’’ཏི (དཱི. ནི. ༢.༡༩༦; མ. ནི. ༡.༤༢༣; ཨ. ནི. ༣.༡༦). ཨོཊྛཛོ དུཏིཡོ. ཨོརོཧནྟསྶ བྷིཀྑུནོཏི སམྦནྡྷོ.

༣༣༨. ཕིཡཱརིཏྟཱདཱིཧཱིཏི ཨཱདིསདྡེན ལངྐཱརཱདཡོ སངྒཎྷཱཏི. ཀེཙི ཝདནྟཱིཏི སམྦནྡྷོ. པཏནུཔྤཏནཝཱརེསཱུཏི པཏནཝཱར ཨུཔྤཏནཝཱརེསུ. ཏཏྠཱཏི ཏསྶཾ ཁིཏྟཀཐལཱཡཾ. ཧཱིཏི སཙྩཾ ¶ , ཡསྨཱ ཝཱ. ཋཔེཏྭཱ ཀཱིལ༹ནྟསྶཱཏི སམྦནྡྷོ. ལིཁིཏུཾ ཝཊྚཏི ཀཱིལཱ༹དྷིཔྤཱཡསྶ ཝིརཧིཏཏྟཱཏི ཨདྷིཔྤཱཡོ. ཀཱིལཱ༹དྷིཔྤཱཡེན ཨཏྠཛོཏཀཾ ཨཀྑརཾ ལིཁནྟསྶཱཔི ཨཱཔཏྟིཡེཝཱཏི ཝདནྟི. ཨེཏྠཱཏི ཨིམསྨིཾ སིཀྑཱཔདེཏི. ཏཏིཡཾ.

༤. ཨནཱདརིཡསིཀྑཱཔདཾ

༣༤༢. ཙཏུཏྠེ དྷམྨོ ནཱམ ཏནྟིཡེཝཱཏི ཨཱཧ ‘‘ཏནྟཱི’’ཏི. པཝེཎཱིཏི ཏསྶེཝ ཝེཝཙནཾ. ‘‘ཏཾ ཝཱ ན སིཀྑིཏུཀཱམོ’’ཏི ཨེཏྠ ཏཾསདྡསྶ ཨཏྠམཱཝིཀཱཏུཾ ཝུཏྟཾ ‘‘ཡེན པཉྙཏྟེནཱ’’ཏི. ཝིནཡེ ཨཔཉྙཏྟཾ ¶ སནྡྷཱཡ ཝུཏྟཾ ‘‘ཨཔཉྙཏྟེནཱ’’ཏི ཨཱཧ ‘‘སུཏྟེ ཝཱ ཨབྷིདྷམྨེ ཝཱ ཨཱགཏེནཱ’’ཏི.

༣༤༤. པཝེཎིཡཱཏི ཨུཔཱལིཨཱདིཀཱཡ ཨཱཙརིཡཔརམྤརསངྑཱཏཱཡ ཏནྟིཡཱ. ཀུརུནྡིཡཾ ཝུཏྟནྟི སམྦནྡྷོ. མཧཱཔཙྩརིཡཾ ཝུཏྟནྟི སམྦནྡྷོ. ཏཾ སབྦནྟི ཀུརུནྡིཝཱདམཧཱཔཙྩརིཝཱདསངྑཱཏཾ སབྦཾ ཏཾ ཝཙནཾ. པཝེཎིཡཱ ཨཱགཏེཏི པཝེཎིཡཱ ཨཱགཏསངྑཱཏེ མཧཱཨཊྛཀཐཱཝཱདེཏི. ཙཏུཏྠཾ.

༣༤༥. པཉྩམེ མནུསྶཝིགྒཧེཏི མནུསྶཝིགྒཧཔཱརཱཛིཀེཏི. པཉྩམཾ.

༦. ཛོཏིསིཀྑཱཔདཾ

༣༥༠. ཚཊྛེ ཛནཔདསྶ ནཱམཏྟཱ བཧུཝཙནཝསེན ‘‘བྷགྒེསཱུ’’ཏི པཱལི༹ཡཾ ཝུཏྟཾ. སུསུམཱརསཎྛཱནོ པབྦཏསངྑཱཏོ གིརི ཨེཏྠཱཏི སུསུམཱརགིརི, ཨེཏསྶ ཝཱ མཱཔིཏཀཱལེ སུསུམཱརོ གིརཏི སདྡཾ ནིགྒིརཏི ཨེཏྠཱཏི སུསུམཱརགིརཱིཏི ཨཏྠམནཔེཀྑིཏྭཱ ཝུཏྟཾ ‘‘ནགརསྶ ནཱམ’’ནྟི. ཏཾ པནཱཏི ཝནཾ པན. ‘‘མིགཱན’’ནྟིཨཱདིནཱ མིགཱནཾ ཨབྷཡོ དཱིཡཏི ཨེཏྠཱཏི མིགདཱཡོཏི ཨཏྠཾ དསྶེཏི.

༣༥༢. ‘‘ཛོཏིཀེ’’ཏིཔདསྶ ཛོཏིསྶ ཨགྒིསྶ ཀརཎཾ ཛོཏིཀནྟི དསྶེཏུཾ ཝུཏྟཾ ‘‘ཛོཏིཀརཎེ’’ཏི.

༣༥༤. ‘‘སམཱདཧིཏུཀཱམཏཱཡཱ’’ཏིཔདཾ ¶ ‘‘ཨརཎིསཎྛཱཔནཏོ’’ཏིཔདེ ཧེཏུ. ཛཱལཱཏི སིཁཱ. སཱ ཧི ཛལཏི དིབྦཏཱིཏི ཛཱལཱཏི ཝུཙྩཏི.

པཏིལཱཏཾ ཨུཀྑིཔཏཱིཏི ཨེཏྠ ‘‘པཏིཏཱལཱཏ’’ནྟི ཝཏྟབྦེ ཏཀཱརལོཔཾ ཀཏྭཱ སནྡྷིཝསེན པཏིལཱཏནྟི ཝུཏྟནྟི ཨཱཧ ‘‘ཨལཱཏཾ པཏིཏཾ ཨུཀྑིཔཏཱི’’ཏི. ཨལཱཏནྟི ཨུམྨུཀྐཾ. ཏཉྷི ཨཱདིཏྟཾ ཧུཏྭཱ ཨཏིཨུཎྷཏྟཱ ན ལཱཏབྦཾ ན གཎྷིཏབྦནྟི ཨལཱཏནྟི ཝུཙྩཏི. ཨཝིཛ྄ཛྷཱཏནྟི ཛྷཱཡནཏོ ཌཡ྄ཧནཏོ ཨཝིགཏཾ ཨལཱཏནྟི སམྦནྡྷོ. ཛྷཱཡནཾ ཌཡ྄ཧནཾ ཛྷཱཏཾ, ཝིགཏཾ ཛྷཱཏཾ ཨིམསྶཱལཱཏསྶཱཏི ཝིཛ྄ཛྷཱཏཾ.

༣༥༦. པདཱིཔཱདཱིནཱིཏི ¶ པདཱིཔཛོཏིཀཱདཱིནི. ཏཏྠཱཏི ཏཱསུ དུཊྛཝཱལ༹མིགཨམནུསྶསངྑཱཏཱསུ ཨཱཔདཱསུ ནིམིཏྟབྷཱུཏཱསུ. ནིམིཏྟཏྠེ ཙེཏཾ བྷུམྨཝཙནནྟི. ཚཊྛཾ.

༧. ནཧཱནསིཀྑཱཔདཾ

༣༦༦. སཏྟམེ པཱརཾ གཙྪནྟོ ན ཀེཝལཾ སཨུདཀཱཡ ནདིཡཱ ཨེཝ ནྷཱཡིཏུཾ ཝཊྚཏི, སུཀྑཱཡ ནདིཡཱཔི ཝཊྚཏཱིཏི དསྶེནྟོ ཨཱཧ ‘‘སུཀྑཱཡཱ’’ཏིཨཱདི. ཨུཀྐིརིཏྭཱཏི ཝིཡཱུཧིཏྭཱ. ཨཱཝཱཊཱཡེཝ ཁུདྡཀཊྛེན ཨཱཝཱཊཀཱ, ཏེསཱུཏི. སཏྟམཾ.

༨. དུབྦཎྞཀརཎསིཀྑཱཔདཾ

༣༦༨. ཨཊྛམེ ཨལབྷཱིཏི ལབྷོཏི ཝཙནཏྠེ ཨཔཙྩཡཾ ཀཏྭཱ ཎཔཙྩཡསྶ སྭཏྠབྷཱཝཾ དསྶེཏུཾ ཝུཏྟཾ ‘‘ལབྷོཡེཝ ལཱབྷོ’’ཏི. ཨཔཙྩཡམཀཏྭཱ པཀཏིཡཱ ཎཔཙྩཡོཔི ཡུཏྟོཡེཝཱཏི དཊྛབྦཾ. སདྡནྟརོཔི ཨཏྠནྟརཱབྷཱཝཱ སམཱསོ ཧོཏཱིཏི ཨཱཧ ‘‘ནཝཙཱིཝརལཱབྷེནཱཏི ཝཏྟབྦེ’’ཏི. ཨནུནཱསིཀལོཔནྟི ‘‘ནཝ’’ནྟི ཨེཏྠ ནིགྒཧཱིཏསྶ ཝིནཱསཾ. ནིགྒཧཱིཏཉྷི ནཱསཾ ཨནུགཏཏྟཱ ‘‘ཨནུནཱསིཀ’’ནྟི ཝུཙྩཏི, ཏསྶ ཨདསྶན, མཀཏྭཱཏི ཨཏྠོ. མཛ྄ཛྷེ ཋིཏཔདདྭཡེཏི ‘‘ནཝ’’ནྟི ཙ ‘‘ཙཱིཝརལཱབྷེནཱ’’ཏི ཙ དྭིནྣཾ པདཱནམནྟརེ ‘‘ཋིཏེ པནཱ’’ཏི ཙ ‘‘བྷིཀྑུནཱ’’ཏི ཙ པདདྭཡེ. ནིདྡྷཱརཎེ ཙེཏཾ བྷུམྨཝཙནཾ. ནིཔཱཏོཏི ནིཔཱཏམཏྟཾ. ཨལབྷཱིཏི ལབྷོཏི ཝཙནཏྠསྶ ཨབྷིདྷེཡྻཏྠཾ དསྶེཏུཾ ‘‘བྷིཀྑུནཱ’’ཏི ཝུཏྟནྟི ཨཱཧ ‘‘བྷིཀྑུནཱ’’ཏིཨཱདི. པདབྷཱཛནེ པན ཝུཏྟནྟི སམྦནྡྷོ. ཡནྟི ཡཾ ཙཱིཝརཾ. ‘‘ཙཱིཝར’’ནྟི ཨེཏྠ ཙཱིཝརསརཱུཔཾ དསྶེནྟོ ཨཱཧ ‘‘ཡཾ ནིཝཱསེཏུཾ ཝཱ’’ཏིཨཱདི. ཙམྨཀཱརནཱིལནྟི ཙམྨཀཱརཱནཾ ཏིཕལེ པཀྑིཏྟསྶ ཨཡགཱུཐསྶ ནཱིལཾ. མཧཱཔཙྩརིཡཾ ¶ ཝུཏྟནྟི སམྦནྡྷོ. དུབྦཎྞོ ཀརཱིཡཏི ཨནེནཱཏི དུབྦཎྞཀརཎཾ, ཀཔྤབིནྡུནྟི ཨཱཧ ‘‘ཀཔྤབིནྡུཾ སནྡྷཱཡཱ’’ཏི. ཨཱདིཡནྟེན བྷིཀྑུནཱ ཨཱདཱཏབྦནྟི སམྦནྡྷོ. ཀོཎེསཱུཏི ཨནྟེསུ. ཝཱསདྡོ ཨནིཡམཝིཀཔྤཏྠོ. ཨཀྑིམཎྜལམཏྟཾ ཝཱཏི ཨཀྑིམཎྜལསྶ པམཱཎཾ ཝཱ ཀཔྤབིནྡཱུཏི སམྦནྡྷོ. པཊྚེ ཝཱཏི ཨནུཝཱཏཔཊྚེ ¶ ཝཱ. གཎྛིཡཾ ཝཱཏི གཎྛིཀཔཊྚེ ཝཱ. པཱལི༹ཀཔྤོཏི དྭེ ཝཱ ཏིསྶོ ཝཱ ཏཏོ ཨདྷིཀཱ ཝཱ བིནྡུཨཱཝལཱི ཀཏྭཱ ཀཏོ ཀཔྤོ. ཀཎྞིཀཀཔྤོཏི ཀཎྞིཀཾ ཝིཡ བིནྡུགོཙྪཀཾ ཀཏྭཱ ཀཏོ ཀཔྤོ. ཨཱདིསདྡེན ཨགྒྷིཡཀཔྤཱདཡོ སངྒཎྷཱཏི. སབྦཏྠཱཏི སབྦཱསུ ཨཊྛཀཐཱསུ. ཨེཀོཔི བིནྡུ ཝཊྚོཡེཝ ཝཊྚཏཱིཏི ཨཱཧ ‘‘ཨེཀཾ ཝཊྚབིནྡུ’’ནྟི.

༣༧༡. ཨགྒལཱ༹དཱིནཱིཏི ཨཱདིསདྡེན ཨནུཝཱཏཔརིབྷཎྜེ སངྒཎྷཱཏཱིཏི. ཨཊྛམཾ.

༩. ཝིཀཔྤནསིཀྑཱཔདཾ

༣༧༤. ནཝམེ ཏསྶཱཏི ཨེཏྠ ཏསདྡསྶ ཝིསཡོ ཙཱིཝརསཱམིཀོཡེཝཱཏི ཨཱཧ ‘‘ཙཱིཝརསཱམིཀསྶཱ’’ཏི. དུཏིཡསྶ ཏསདྡསྶ ཝིསཡོ ཝིནཡདྷརོཡེཝཱཏི ཨཱཧ ‘‘ཡེནཱ’’ཏིཨཱདི. ‘‘ཨཝིསྶཱསནྟོ’’ཏིཔདསྶ ཀིརིཡཱཝིསེསནབྷཱཝཾ དསྶེཏུཾ ཝུཏྟཾ ‘‘ཨཝིསྶཱསེནཱ’’ཏི. ཏེནཱཏི ཝིནཡདྷརེནཱཏི. ནཝམཾ.

༡༠. ཙཱིཝརཱཔནིདྷཱནསིཀྑཱཔདཾ

༣༧༧. དསམེ ‘‘ཨཔནེཏྭཱ’’ཏིཨིམིནཱ ཨཔཨིཏྱཱུཔསགྒསྶ ཨཏྠཾ དསྶེཏི. ནིདྷེནྟཱིཏི ནིགཱུཧིཏྭཱ ཋཔེནྟི. ཧསཱདྷིཔྤཱཡོཏི ཧསཾ, ཧསནཏྠཱཡ ཝཱ ཨདྷིཔྤཱཡོ. པརིཀྑཱརསྶ སརཱུཔཾ དསྶེཏུཾ ཝུཏྟཾ ‘‘པཏྟཏྠཝིཀཱདི’’ནྟི. པཏྟསྶ པཱལི༹ཡམཱགཏཏྟཱ པཏྟསྶ ཐཝིཀཱཏི ཨཏྠོཡེཝ གཧེཏབྦོ, ན པཏྟོ ཙ ཐཝིཀཱ ཙཱཏི. ‘‘སམཎེན ནཱམཱ’’ཏིཔདཾ ‘‘བྷཝིཏུ’’ནྟིཔདེ བྷཱཝཀཏྟཱཏི. དསམཾ.

སུརཱཔཱནཝགྒོ ཚཊྛོ.

༧. སཔྤཱཎཀཝགྒོ

༡. སཉྩིཙྩཔཱཎསིཀྑཱཔད-ཨཏྠཡོཛནཱ

༣༨༢. སཔྤཱཎཀཝགྒསྶ ¶ པཋམེ ཨུསུཾ ཨསཏི ཁིཔཏི ཨནེནཱཏི ཨིསྶཱསོཏི ཀཏེ དྷནུཡེཝ མུཁྱཏོ ཨིསྶཱསོ ནཱམ, དྷནུགྒཧཱ- ཙརིཡོ ¶ པན ཨུཔཙཱརེན. ཨུསུཾ ཨསཏི ཁིཔཏཱིཏི ཨིསྶཱསོཏི ཀཏེ དྷནུགྒཧཱཙརིཡོ ཨིསྶཱསོ ནཱམ, ཨིདྷ པན ཨུཔཙཱརཏྠོ ཝཱ ཀཏྟུཏྠོ ཝཱ གཧེཏབྦོཏི ཨཱཧ ‘‘དྷནུགྒཧཱཙརིཡོ ཧོཏཱི’’ཏི. པབྦཛིཏཀཱལེ ཨིསྶཱསསྶ ཨཡུཏྟཏྟཱ ཝུཏྟཾ ‘‘གིཧིཀཱལེ’’ཏི. ཝོརོཔིཏཱཏི ཨེཏྠ ཝི ཨཝ པུབྦསྶ རུཧདྷཱཏུསྶ ཨདྷིཔྤཱཡཏྠཾ དསྶེཏུཾ ཝུཏྟཾ ‘‘ཝིཡོཛིཏཱ’’ཏི.

ཡསྨཱ གཙྪཏཱིཏི སམྦནྡྷོ. ཨེཏནྟི ‘‘ཛཱིཝིཏཱ ཝོརོཔིཏཱ’’ཏིཝཙནཾ. ཀསྨཱ ཝོཧཱརམཏྟམེཝ ཧོཏི, ནནུ ཡཏོ ཀུཏོཙི ཡསྨིཾ ཀིསྨིཾཙི ཝིཡོཛིཏེ དྭེ ཝཏྠཱུནི ཝིཡ ཝིསུཾ ཏིཊྛནྟི པཱཎཏོ ཛཱིཝིཏེ ཝིཡོཛིཏེ པཱཎཛཱིཝིཏཱཔཱིཏི ཨཱཧ ‘‘ན ཧེཏྠཱ’’ཏིཨཱདི. ཧཱིཏི སཙྩཾ. ཨེཏྠཱཏི ‘‘ཛཱིཝིཏཱ ཝོརོཔིཏཱ’’ཏིཝཙནེ དསྶེཏུནྟི སམྦནྡྷོ. ཀིཉྩི ཛཱིཝིཏཾ ནཱམཱཏི ཡོཛནཱ. ཨཡཾ པནེཏྠ ཨཏྠསམྦནྡྷོ – སཱིསཱལངྐཱརེ སཱིསཏོ ཝིཡོཛིཏེ སཱིསཾ ཨལངྐཱརཏོ ཝིསུཾ ཏིཊྛཏི ཡཐཱ, ཨེཝཾ ཛཱིཝིཏེ པཱཎཏོ ཝིཡོཛིཏེ ཛཱིཝིཏཾ པཱཎཏོ ཝིསུཾ ན ཏིཊྛཏི ནཱམཱཏི. ཨཉྙདཏྠཱུཏི ཨེཀཾསེན. ‘‘པཱཎ’’ནྟི སཱམཉྙཏོ ཝུཏྟོཔི མནུསྶཔཱཎསྶ པཱརཱཛིཀཊྛཱནེ གཧིཏཏྟཱ ཨིདྷ པཱརིསེསཉཱཡེན ཏིརཙྪཱནཔཱཎོཝ གཧེཏབྦོཏི ཨཱཧ ‘‘ཏིརཙྪཱནགཏོཡེཝ པཱཎོ’’ཏི. ཏནྟི པཱཎཾ. མཧནྟེ པན པཱཎེཏི སམྦནྡྷོ.

༣༨༥. སོདྷེནྟོ ཨཔནེཏཱིཏི ཡོཛནཱ. མངྒུལོཏི མནུསྶརཏྟཔོ ཨེཀོ ཀིམིཝིསེསོ. སོ ཧི རཏྟཔིཝནཏྠཱཡ མངྒཏི ཨིཏོ ཙིཏོ ཙ ཨིམཾ ཙིམཉྩ ཋཱནཾ གཙྪཏཱིཏི ‘‘མངྒུལོ’’ཏི ཝུཙྩཏི. པདཀྑརཱནཉྷི ཨཝིཔརིཏཏྠཾ, སོཏཱུནཉྩ སཛ྄ཛྷཱཡོཔདེསལབྷནཏྠཾ ཀཏྠཙི ཋཱནེ ཝཙནཏྠོ ཝུཏྟོཏི དཊྛབྦཾ. ཏསྶ བཱིཛམེཝ ཁུདྡཀཊྛེན མངྒུལབཱིཛཀཾ, ཏསྨིཾ. ཏནྟི མངྒུལབཱིཛཀཾ. བྷིནྡནྟོ ཧུཏྭཱཏི ཡོཛནཱཏི. པཋམཾ.

༢. སཔྤཱཎཀསིཀྑཱཔདཾ

༣༨༧. དུཏིཡེ ¶ སཧ པཱཎེཧཱིཏི སཔྤཱཎཀཾ ཨུདཀནྟི དསྶེནྟོ ཨཱཧ ‘‘ཡེ པཱཎཀཱ’’ཏིཨཱདི. ཧཱིཏི སཙྩཾ. པཏྟཔཱུརམྤི ཨུདཀནྟི སམྦནྡྷོ ¶ . ཏཱདིསེནཱཏི སཔྤཱཎཀེན. དྷོཝཏོཔི པཱཙིཏྟིཡནྟི ཡོཛནཱ. ཨུདཀསོཎྜིནྟི སིལཱམཡཾ ཨུདཀསོཎྜིཾ. པོཀྑརཎིནྟི སིལཱམཡཾ པོཀྑརཎིཾ. ཨུཊྛཱཔཡཏོཔི པཱཙིཏྟིཡནྟི སམྦནྡྷོ. ཏཏོཏི སོཎྜིཔོཀྑརཎཱིཧི. ཨུདཀསྶཱཏི ཨུདཀེན, པཱུརེ གྷཊེ ཨཱསིཉྩིཏྭཱཏི སམྦནྡྷོ. ཏཏྠཱཏི ཨུདཀེ. ཨུདཀེཏི ཨུདཀསཎྛཱནཀཔདེསེ ཨཱསིཉྩིཏཨུདཀེ. པཏིསྶཏཱིཏི སོཎྜིཔོཀྑརཎཱིཧི གཧིཏཨུདཀཾ པཏིསྶཏཱིཏི. དུཏིཡཾ.

༣. ཨུཀྐོཊནསིཀྑཱཔདཾ

༣༩༢. ཏཏིཡེ ‘‘ཨུཙྩཱལེནྟཱི’’ཏིཨིམིནཱ ཨུཀྐོཊེནྟཱིཏི ཨེཏྠ ཨུཔུབྦསྶ ཀུཊདྷཱཏུསྶ ཨུཙྩཱལནཏྠཾ དསྶེཏི དྷཱཏཱུན, མནེཀཏྠཏྟཱ. ཡཾ ཡཾ པཏིཊྛིཏཾ ཡཐཱཔཏིཊྛིཏཾ, ཏསྶ བྷཱཝོ ཡཐཱཔཏིཊྛིཏབྷཱཝོ, ཏེན.

༣༩༣. ཡོ དྷམྨོཏི ཡོ སམཐདྷམྨོ. དྷམྨེནཱཏི ཨེཏྠ ཨེནསདྡེན ‘‘ཡཐཱདྷམྨ’’ནྟི ཨེཏྠ ཨཾཨིཏིཀཱརིཡསྶ ཀཱརིཾ དསྶེཏི. ཨིམིནཱ ‘‘ཡཐཱདྷམྨ’’ནྟི པདསྶ ‘‘ནིཧཏཱདྷིཀརཎ’’ནྟི ཨེཏྠ ནིཧཏསདྡེན སམྦནྡྷིཏབྦབྷཱཝཾ དསྶེཏི. ‘‘སཏྠཱརཱ’’ཏིཔདཾ ‘‘ཝུཏྟཾ’’ ཨིཏིཔདེ ཀཏྟཱ. ནཏྠི ཧཏཾ ཧནནཾ ཨིམསྶཱཏི ནིཧཏནྟི ཝུཏྟེ ཨཏྠཏོ ཝཱུཔསམནམེཝཱཏི ཨཱཧ ‘‘ཝཱུཔསམིཏ’’ནྟི.

༣༩༥. ཡཾ ཝཱ ཏཾ ཝཱ ཀམྨཾ དྷམྨཀམྨཾ ནཱམ ན ཧོཏི, ཨཐ ཁོ ཨདྷིཀརཎཝཱུཔསམཀམྨམེཝ དྷམྨཀམྨཾ ནཱམཱཏི དསྶེནྟོ ཨཱཧ ‘‘ཡེན ཀམྨེནཱ’’ཏིཨཱདི. ཨཡམྤཱིཏི ཨཡམྤི བྷིཀྑུ. སེསཔདཱནིཔཱིཏི ‘‘དྷམྨཀམྨེ ཝེམཏིཀོ’’ཏིཨཱདཱིནི སེསཔདཱནིཔི. ཨེཏྠཱཏི ཨིམསྨིཾ སིཀྑཱཔདེ. ཝིཏྠཱརོ པན ཝུཏྟོཏི སམྦནྡྷོ. ཏཏྠེཝཱཏི པརིཝཱརེ ཨེཝ. ཨིདྷཱཏི ཨིམསྨིཾ སིཀྑཱཔདེ, ཝིབྷངྒེ ཝཱཏི. ཏཏིཡཾ.

༤. དུཊྛུལླསིཀྑཱཔདཾ

༣༩༩. ཙཏུཏྠེ ཨཏྠུདྡྷཱརཝསེན དསྶིཏཱནི དུཊྛུལླསདྡཏྠབྷཱཝེན སདིསཏྟཱཏི ཨདྷིཔྤཱཡོ. ‘‘དྷུར’’ནྟི ¶ ཨེཏྠ ལཀྑཎཝནྟཏྟཱ བྷུམྨཏྠེ ཨུཔཡོགཝཙནནྟི ཨཱཧ ‘‘དྷུརེ’’ཏི. དྷུརེ ནིཀྑིཏྟམཏྟེ སཏཱིཏི ཡོཛནཱ.

ཨེཝཾ ¶ དྷུརཾ ནིཀྑིཔིཏྭཱཏི ‘‘ཨཉྙསྶ ནཱརོཙེསྶཱམཱི’’ཏི ཨེཝཾ དྷུརཾ ནིཀྑིཔིཏྭཱ. ཨཉྙསྶཱཏི ཝཏྠུ, པུགྒལཏོ ཨཉྙསྶ དུཏིཡསྶ. སོཔཱིཏི དུཏིཡོཔི. ཨཉྙསྶཱཏི ཏཏིཡསྶ. ཡཱཝ ཀོཊི ན ཚིཛྫཏི, ཏཱཝ ཨཱཔཛྫཏིཡེཝཱཏི ཡོཛནཱ. ཏསྶེཝཱཏི ཨཱཔཏྟིཾ ཨཱཔནྣཔུགྒལསྶ. ཝཏྠུཔུགྒལོཡེཝཱཏི ཨཱཔཏྟིཾ ཨཱཔནྣཔུགྒལོཡེཝ. ཨཡནྟི པཋམབྷིཀྑུ. ཨཉྙསྶཱཏི དུཏིཡསྶ. སོཏི དུཏིཡོ ཨཱརོཙེཏཱིཏི སམྦནྡྷོ. ཡེནཱཏི པཋམབྷིཀྑུནཱ. ཨསྶཱཏི དུཏིཡསྶ. ཏསྶེཝཱཏི པཋམབྷིཀྑུསྶེཝ. ཝཏྠུཔུགྒལཾ ཨུཔནིདྷཱཡ ‘‘ཏཏིཡེན པུགྒལེན དུཏིཡསྶཱ’’ཏི ཝུཏྟཾ.

༤༠༠. པཉྩཱཔཏྟིཀྑནྡྷེཏི ཐུལླཙྩཡཱདིཀེ པཉྩ ཨཱཔཏྟིཀྑནྡྷེ. ཨཛ྄ཛྷཱཙཱརོ ནཱམཱཏི ཨདྷིབྷཝིཏྭཱ ཝཱིཏིཀྐམིཏྭཱ ཨཱཙརིཏབྦཏྟཱ ཨཛ྄ཛྷཱཙཱརོ ནཱམཱཏི. ཙཏུཏྠཾ.

༥. ཨཱུནཝཱིསཏིཝསྶསིཀྑཱཔདཾ

༤༠༢. པཉྩམེ ཨངྒུལིཡོཏི ཀརསཱཁཱཡོ. ཏཱ ཧི ཨངྒནྟི ཧཏྠཏོ པཉྩདྷཱ བྷིཛྫིཏྭཱ ཨུགྒཙྪནྟཱིཏི ཨངྒུལིཡོཏི ཝུཙྩནྟི. ལིཁནྟསྶ ཨུཔཱལིསྶཱཏི སམྦནྡྷོ. ཏེནཱཏི བཧུཙིནྟེཏབྦཀཱརཎེན. ཨསྶཱཏི ཨུཔཱལིསྶ. ཨུརོཏི ཧདཡཾ. ཏཉྷི ཨུསཏི ཙིཏྟཏཱཔོ དཧཏི ཨེཏྠཱཏི ཨུརོཏི ཝུཙྩཏི. རཱུཔསུཏྟནྟི ཧེརཉྙིཀཱནཾ རཱུཔསུཏྟཾ, ཡཐཱ ཧཏྠཱཙརིཡཱནཾ ཧཏྠིསུཏྟནྟི. ཨཀྑཱིནཱིཏི ཙཀྑཱུནི. ཏཱནི ཧི ཨཀྑནྟི ཝིསཡེསུ བྱཱཔཱིབྷཝནྟི, རཱུཔཾ ཝཱ པསྶཏི ཨིམེཧཱིཏི ཨཀྑཱིནཱིཏི ཝུཙྩནྟི. མཀསེན སཱུཙིམུཁཱནཾ གཧིཏཏྟཱ ཌཾསེན པིངྒལམཀྑིཀཱཡོཝ གཧེཏབྦཱཏི ཨཱཧ ‘‘ཌཾསཱཏི པིངྒལམཀྑིཀཱཡོ’’ཏི. པིངྒལམཀྑིཀཱཡོ ཧི ཌཾསནཊྛེན ཁཱདནཊྛེན ཌཾསཱཏི ཝུཙྩནྟི. དུཀྐརོ ཁམོ ཨེཏཱསནྟི དུཀྑཱཏི དསྶེནྟོ ཨཱཧ ‘‘དུཀྑམཱན’’ནྟི. ཝེདནཱནནྟི སམྦནྡྷོ. ཨསཱཏསྶ ཀཱརཎཾ དསྶེཏུཾ ཝུཏྟཾ ‘‘ཨམདྷུརཱན’’ནྟི. ཨིམིནཱ ཨམདྷུརཏྟཱ ན སཱདིཏབྦཱཏི ཨསཱཏཱཏི ཨཏྠཾ དསྶེཏི. པཱཎསདྡཛཱིཝིཏསདྡཱནཾ པརིཡཱཡབྷཱཝཾ དསྶེཏུཾ ཝུཏྟཾ ‘‘ཛཱིཝིཏཧརཱན’’ནྟི. པཱཎཾ ཧརནྟི ཨཔནེནྟཱིཏི པཱཎཧརཱ, ཏཱསཾ ཝེདནཱནནྟི སམྦནྡྷོ.

༤༠༤. ཝིཛཱཡནཀཱལཏོ ¶ པཊྛཱཡ པརིཔུཎྞཝཱིསཏིཝསྶོ ན གཧེཏབྦོ, གབྦྷགཧཎཀཱལཏོ ¶ པན པཊྛཱཡཱཏི དསྶེནྟོ ཨཱཧ ‘‘པཊིསནྡྷིགྒཧཎཏོ པཊྛཱཡཱ’’ཏི. གབྦྷེ སཡིཏཀཱལེན སདྡྷིཾ ཝཱིསཏིམཾ ཝསྶཾ པརིཔུཎྞམསྶཱཏི གབྦྷཝཱིསོ པུགྒལོ. ཧཱིཏི སཙྩཾ. ཡཐཱཧཱཏི ཡེནཱཀཱརེན སངྑྱཾ གཙྪཏི, ཏེནཱཀཱརེན བྷགཝཱ ཨཱཧཱཏི ཡོཛནཱ. ཨཐ ཝཱ ཡཐཱ ཀིཾ ཝཙནཾ བྷགཝཱ ཨཱཧཱཏི ཡོཛནཱ.

གབྦྷཝཱིསོ ཧུཏྭཱ ཨུཔསམྤནྣོཏི སམྦནྡྷོ. ཨམྷཱིཏི ཨསྨི. ནུསདྡོ པརིཝིཏཀྐཏྠེ ནིཔཱཏོ. ཡནྟི ཡཱདིསཾ པཋམཾ ཙིཏྟནྟི སམྦནྡྷོ. ཨིམིནཱ པཊིསནྡྷིཙིཏྟཾ དསྶེཏི. ‘‘པཋམཾ ཝིཉྙཱཎ’’ནྟི ཏསྶེཝ ཝེཝཙནཾ. ཏནྟི པཋམཾ ཙིཏྟཾ པཋམཾ ཝིཉྙཱཎཾ. ཨསྶཱཏི སཏྟསྶ. སཱཝ ཛཱཏཱིཏི སཱ ཨེཝ པཊིསནྡྷི, གབྦྷོ ནཱམ ཧོཏཱིཏི སམྦནྡྷོ.

ཏཏྠཱཏི པཱལི༹ཡཾ, ཝིནིཙྪཡོ ཨེཝཾ ཝེདིཏབྦོཏི ཡོཛནཱ. ཡོཏི པུགྒལོ. མཧཱཔཝཱརཎཱཡཱཏི ཨསྶཡུཛཔུཎྞམིཡཾ. སཱ ཧི པཱུཛིཏཔཝཱརཎཏྟཱ མཧཱཔཝཱརཎཱཏི ཝུཙྩཏི. ཏཏོཏི པཝཱརཎཱཡ ཛཱཏཀཱལཏོ. ཏནྟི མཧཱཔཝཱརཎཾ. པཱཊིཔདེ ཙཱཏི ཨེཏྠ ཙསདྡོ ཨནིཡམཝིཀཔྤཏྠོ, པཝཱརཎདིཝསཔཱཊིཔདདིཝསེསུ ཨཉྙཏརསྨིཾ དིཝསེ ཨུཔསམྤཱདེཏབྦོཏི ཨཏྠོ. ཧཱཡནཝཌྜྷནནྟི ཀུཙྪིམྷི ཝསིཏམཱསེསུ ཨདྷིཀེསུ ཧཱཡནཉྩ ཨཱུནེསུ ཝཌྜྷུནཉྩ ཝེདིཏབྦཾ.

པོརཱཎཀཏྠེརཱ པན ཨུཔསམྤཱདེནྟཱིཏི སམྦནྡྷོ. ཨེཀཱུནཝཱིསཏིཝསྶནྟི ཨནནྟརེ ཝུཏྟཾ ཨེཀཱུནཝཱིསཏིཝསྶཾ. ནིཀྑམནཱིཡོཏི སཱཝཎམཱསོ. སོ ཧི ཨནྟོཝཱིཐིཏོ བཱཧིརཝཱིཐིཾ ནིཀྑམཏི སཱུརིཡོ ཨསྨིནྟི ‘‘ནིཀྑམནཱིཡོ’’ཏི ཝུཙྩཏི. པཱཊིཔདདིཝསེཏི པཙྪིམིཀཱཡ ཝསྶཱུཔགམནདིཝསེ. ཏཾ ཨུཔསམྤཱདནཾ. ཀསྨཱཏི པུཙྪཱ. ཨེཏྠ ཋཏྭཱ པརིཧཱརོ ཝུཙྩཏེ མཡཱཏི ཡོཛནཱ. ཝཱིསཏིཡཱ ཝསྶེསཱུཏི ཨུཔསམྤནྣཔུགྒལསྶ ཝཱིསཏིཡཱ ཝསྶེསུ. ཏིཾསརཏྟིདིཝསྶ ཨེཀམཱསཏྟཱ ‘‘ཙཏྟཱརོ ¶ མཱསཱ པརིཧཱཡནྟཱི’’ཏི ཝུཏྟཾ. ཨུཀྐཌྜྷནྟཱིཏི ཨེཀསྶ ཨདྷིཀམཱསསྶ ནཱསནཏྠཱཡ ཝསྶཾ ཨུཔརི ཀཌྜྷནྟི. ཏཏོཏི ཚམཱསཏོ ཨཔནེཏྭཱཏི སམྦནྡྷོ. ཨེཏྠཱཏི ‘‘ཨེཀཱུནཝཱིསཏིཝསྶ’’ནྟིཨཱདིཝཙནེ. པན-སདྡོ ཧིསདྡཏྠོ, སཙྩནྟི ཨཏྠོ. ཡོཏི པུགྒལོ. ཏསྨཱཏི ཡསྨཱ གབྦྷམཱསཱནམྤི གཎནཱུཔགཏྟཱ གཧེཏྭཱ ཨུཔསམྤཱདེནྟི, ཏསྨཱ ཚ མཱསེ ཝསིཏྭཱཏི སམྦནྡྷོ. ཨཊྛ མཱསེ ཝསིཏྭཱ ཛཱཏོཔི ན ཛཱིཝཏཱིཏི སུཏྟནྟཨཊྛཀཐཱསུ (དཱི. ནི. ཨཊྛ. ༢.༢༤-༢༥; མ. ནི. ཨཊྛ. ༣.༢༠༥) ཝུཏྟཾ.

༤༠༦. དསཝསྶཙྩཡེནཱཏི ཨུཔསམྤདཏོ དསཝསྶཱཏིཀྐམེན. ཨུཔསམྤཱདེཏཱིཏི ཨུཔཛ྄ཛྷཱཡོ ཝཱ ¶ ཀམྨཝཱཙཱཙརིཡོ ཝཱ ཧུཏྭཱ ཨུཔསམྤཱདེཏི. ཏནྟི ཨུཔཛ྄ཛྷཱཙརིཡབྷཱུཏཾ ཨནུཔསམྤནྣཔུགྒལཾ. ཀམྨཝཱཙཱཙརིཡོ ཧུཏྭཱ ཨུཔསམྤཱདེནྟོ ཏཾ མུཉྩིཏྭཱ སཙེ ཨཉྙོཔི ཀམྨཝཱཙཱཙརིཡོ ཨཏྠི, སཱུཔསམྤནྣོ. སོཝ སཙེ ཀམྨཝཱཙཾ སཱཝེཏི, ནུཔསམྤནྣོ. ཉཏྭཱ པན པུན ཨནུཔསམྤཱདེནྟེ སགྒནྟརཱཡོཔི མགྒནྟརཱཡོཔི ཧོཏིཡེཝཱཏི དཊྛབྦནྟི. པཉྩམཾ.

༦. ཐེཡྻསཏྠསིཀྑཱཔདཾ

༤༠༧. ཚཊྛེ ‘‘པཊིཡཱལོཀ’’ནྟི ཨེཏྠ ཨཱལོཀསདྡེན སཱུརིཡོ ཝུཏྟོ ཨུཔཙཱརེན. སཱུརིཡོ ཧི པུརཏྠིམདིསཏོ ཨུགྒནྟྭཱ པཙྪིམདིསཾ གཏོ, ཏསྨཱ སཱུརིཡསངྑཱཏསྶ ཨཱལོཀསྶ པཊིམུཁཾ ‘‘པཊིཡཱལོཀ’’ནྟི ཝུཏྟེ པཙྪིམདིསཱཡེཝ གཧེཏབྦཱཏི ཨཱཧ ‘‘པཙྪིམཾ དིསནྟི ཨཏྠོ’’ཏི. ཀམྨིཀཱཏི ཀམྨེ ཡུཏྟཱ པཡུཏྟཱ.

༤༠༩. རཱཛཱནནྟི ཨེཏྠ རཉྙོ སནྟཀཾ ‘‘རཱཛཱ’’ཏི ཝུཙྩཏི ཨུཔཙཱརེན, ཨཐ ཝཱ རཉྙོ ཨེསོ ‘‘རཱཛཱ’’ཏི ཀཏྭཱ རཉྙོ སནྟཀཾ ‘‘རཱཛཱ’’ཏི ཝུཙྩཏི. ཐེཡྻནྟི ཐེནེཏྭཱ ‘‘སཀྐཙྩ’’ནྟིཨཱདཱིསུ (པཱཙི. ༦༠༦) ཝིཡ ནིགྒཧཱིཏཱགམོ ཧོཏི. རཱཛཱནཾ, རཉྙོ སནྟཀཾ ཝཱ ཐེཡྻཾ ཐེནེཏྭཱ ¶ གཙྪནྟཱིཏི ཨཏྠོ. ཨིཏི ཨིམམཏྠཾ དསྶེནྟོ ཨཱཧ ‘‘རཱཛཱནཾ ཝཱ ཐེནེཏྭཱ’’ཏིཨཱདི.

༤༡༡. ཙཏཱུསུ ཝིསངྐེཏེསུ དྭཱིཧི ཨནཱཔཏྟི, དྭཱིཧི ཨཱཔཏྟིཡེཝཱཏི. ཚཊྛཾ.

༧. སཾཝིདྷཱནསིཀྑཱཔདཾ

༤༡༢. སཏྟམེ ‘‘པདྷཱུཔེནྟོ’’ཏི ཨེཏྠ པཔུབྦ དྷཱུཔདྷཱཏུ པརིབྷཱསནཏྠེ ཝཏྟཏཱིཏི ཨཱཧ ‘‘པརིབྷཱསནྟོ’’ཏི. ཏྭཾ སམཎོཔི མཱཏུགཱམེན སདྡྷིཾ གཙྪསི, ཏུཡ྄ཧེཝེསོ དོསོ, ནེཏསྶ པུརིསསྶཱཏི ཨཏྟཱནཾཡེཝ པརིབྷཱསནྟོཏི ཨཏྠོ. ‘‘ནིཀྑཱམེསཱི’’ཏིཨིམིནཱ ‘‘ནིཔྤཱཏེསཱི’’ཏིཨེཏྠ ནིཔུབྦ པཏདྷཱཏུ གཏྱཏྠོཏི དསྶེཏཱིཏི. སཏྟམཾ.

༨. ཨརིཊྛསིཀྑཱཔདཾ

༤༡༧. ཨཊྛམེ གནྡྷེཏི གིཛ྄ཛྷེ. ཏེ ཧི གིདྷནྟི ཀུཎཔཾ ཨབྷིཀངྑནྟཱིཏི ‘‘གནྡྷཱ’’ཏི ཝུཙྩནྟི ¶ . གདྡྷེཏིཔི པཱཋོ, སོཔི ཡུཛྫཏི ཡཐཱ ‘‘ཡུགནནྡྷོ, ཡུགནདྡྷོ’’ཏི ཙ ‘‘པཊིབནྡྷོ པཊིབདྡྷོ’’ཏི ཙ. བཱདྷཡིཾསཱུཏི ཧནིཾསུ. ཨསྶཱཏི ཨརིཊྛསྶ.

ཏདྡྷིཏེན ཝུཏྟསྶ ཨཏྠསྶ དསྶེཏུམཱཧ ‘‘ཏེ’’ཏིཨཱདི. ཏེཏི ཨནྟརཱཡིཀཱ. ཏཏྠཱཏི པཉྩཝིདྷེསུ ཨནྟརཱཡིཀེསུ. ‘‘ཏཐཱ’’ཏིཔདེན ‘‘ཀམྨནྟརཱཡིཀཾ ནཱམཱ’’ཏི པདཾ ཨཏིདིསཏི. ཏཾ པནཱཏི བྷིཀྑུནིདཱུསཀཀམྨཾ པན. མོཀྑསྶེཝཱཏི མགྒནིབྦཱནསྶེཝ. མགྒོ ཧི ཀིལེསེཧི མུཙྩཏཱིཏི ཨཏྠེན མོཀྑོ ནཱམ. ཛྷཱནམྤེཏྠ སངྒཧིཏཾ ནཱིཝརཎེཧི ཝིམུཙྩནཏྟཱ. ནིབྦཱནཾ ཝིམུཙྩཱིཏི ཨཏྠེན མོཀྑོ ནཱམ. ཕལམྤེཏྠ སངྒཧིཏཾ ཝིམུཙྩིཏཏྟཱ. ནིཡཏམིཙྪཱདིཊྛིདྷམྨཱཏི ནིཡཏབྷཱཝཾ པཏྟཱ, ནིཡཏཝསེན ཝཱ པཝཏྟཱ མིཙྪཱདིཊྛིསངྑཱཏཱ དྷམྨཱ. ཏེ པན ནཏྠིཀཨཧེཏུཀ ཨཀིརིཡཝསེན ཏིཝིདྷཱ. པཎྜཀཱདིགཧཎསྶ ནིདསྶནམཏྟཏྟཱ ‘པཊིསནྡྷིདྷམྨཱ’’ཏིཔདེན ཨཧེཏུཀདྭིཧེཏུཀཔཊིསནྡྷིདྷམྨཱ གཧེཏབྦཱ སབྦེསམྤི ཝིཔཱཀནྟརཱཡིཀབྷཱཝཏོ. ཏེཔི མོཀྑསྶེཝ ཨནྟརཱཡཾ ཀརོནྟི, ན སགྒསྶ. ཏེ པནཱཏི ཨརིཡཱུཔཝཱདཱ པན. ཏཱཝདེཝ ཨུཔཝཱདནྟརཱཡིཀཱ ¶ ནཱམཱཏི ཡོཛནཱ. ཏཱཔཱིཏི སཉྩིཙྩ ཨཱཔནྣཱ ཨཱཔཏྟིཡོཔི. པཱརཱཛིཀཱཔཏྟིཾ སནྡྷཱཡ ཝུཏྟཾ ‘‘བྷིཀྑུབྷཱཝཾ ཝཱ པཊིཛཱནཱཏཱི’’ཏི. སངྒྷཱདིསེསཱཔཏྟིཾ སནྡྷཱཡ ཝུཏྟཾ ‘‘ན ཝུཊྛཱཏི ཝཱ’’ཏི. ལཧུཀཱཔཏྟིཾ སནྡྷཱཡ ཝུཏྟཾ ‘‘ན དེསེཏི ཝཱ’’ཏི.

ཏཏྲཱཏི པཉྩཝིདྷེསུ ཨནྟརཱཡིཀེསུ. ཨཡཾ བྷིཀྑཱུཏི ཨརིཊྛོ གནྡྷབཱདྷིཔུབྦོ བྷིཀྑུ. སེསནྟརཱཡིཀེཏི ཨཱཎཱཝཱིཏིཀྐམནྟརཱཡིཀཏོ སེསེ ཙཏུབྦིདྷེ ཨནྟརཱཡིཀེ. ཨིམེ ཨཱགཱརིཀཱཏི ཨགཱརེ ཝསནསཱིལཱ ཨིམེ མནུསྶཱ. བྷིཀྑཱུཔི པསྶནྟི ཕུསནྟི པརིབྷུཉྫནྟཱིཏི སམྦནྡྷོ. ཀསྨཱ ན ཝཊྚནྟི, ཝཊྚནྟིཡེཝཱཏི ཨདྷིཔྤཱཡོ. རསེན རསཾ སཾསནྡིཏྭཱཏི ཨུཔཱདིཎྞཀརསེན ཨནུཔཱདིཎྞཀརསཾ, ཨནུཔཱདིཎྞཀརསེན ཝཱ ཨུཔཱདིཎྞཀརསཾ སམཱནེཏྭཱ. ཡོནིསོ པཙྩཝེཀྑཎསྶ ཨབྷཱཝཏོ སཾཝིཛྫཏི ཚནྡརཱགོ ཨེཏྠཱཏི སཙྪནྡརཱགོ, སོཡེཝ པརིབྷོགོ སཙྪནྡརཱགཔརིབྷོགོ, ཏཾ. ཨེཀཾ ཀཏྭཱཏི སམཱནཾ ཀཏྭཱ. གྷཊེནྟོ ཝིཡ པཱཔཀཾ དིཊྛིགཏཾ ཨུཔྤཱདེཏྭཱཏི ཡོཛནཱ. ཀིཾསདྡོ གརཧཏྠོ, ཀསྨཱ བྷགཝཏཱ པཋམཔཱརཱཛིཀཾ པཉྙཏྟཾ, ན པཉྙཱཔེཏབྦནྟི ཨཏྠོ. མཧཱསམུདྡཾ བནྡྷནྟོ ཡཐཱ ཨཀཏྟབྦཾ ཀརོཏི, ཏཐཱ པཋམཔཱརཱཛིཀཾ པཉྙཔེནྟོ བྷགཝཱ ཨཔཉྙཏྟཾ པཉྙཔེཏཱིཏི ཨདྷིཔྤཱཡོ. ཨེཏྠཱཏི པཋམཔཱརཱཛིཀེ. ཨཱསནྟི བྷབྦཱསཾ. ཨཱཎཱཙཀྐེཏི ཨཱཎཱསངྑཱཏེ ཙཀྐེ.

ཨཊྛིཡེཝ ཨཊྛིཀཾ ཀུཙྪིཏཏྠེན, ཀུཙྪིཏཏྠེ ཧི ཀོ. ཨཊྛིཀམེཝ ཁལོ ནཱིཙཊྛེན ལཱམཀཊྛེནཱཏི ཨཊྛིཀངྑལོ ནིགྒཧཱིཏཱགམཾ ཀཏྭཱ. ཏེན ཨུཔམཱ སདིསཱཏི ཨཊྛིཀངྑལཱུཔམཱ. ‘‘ཨཊྛཱི’’ཏི ¶ ཙ ‘‘ཀངྑལ’’ནྟི ཙ པདཾ གཧེཏྭཱ ཝཎྞེནྟི ཨཱཙརིཡཱ (སཱརཏྠ. ཊཱི. པཱཙིཏྟིཡ ༣.༤༡༧; ཝི. ཝི. ཊཱི. པཱཙིཏྟིཡ ༢.༤༡༧; མ. ནི. ཨཊྛ. ༢.༤༢; མ. ནི. ཊཱི. ༣.༤༢). ཨངྒཱརཀཱསཱུཔམཱཏི ཨངྒཱརརཱསིསདིསཱ, ཨངྒཱརེཧི ཝཱ པརིཔུཎྞཱ ཨཱཝཱཊསདིསཱ. ཨསིསཱུནཱུཔམཱཏི ཨེཏྠ ཨསཱིཏི ཁགྒོ. སོ ཧི ཨསཏེ ཁིཔཏེ ཨནེནཱཏི ‘‘ཨསཱི’’ཏི ཝུཙྩཏི. སཱུནཱཏི ཨདྷིཀོཊྚནཾ. ཏཉྷི སུནཏི སཉྩུཎྞབྷཱཝཾ གཙྪཏི ཨེཏྠཱཏི ‘‘སཱུནཱ’’ཏི ཝུཙྩཏི. ཨསིནཱ སཱུནཱཏི ཨསིསཱུནཱ, ཏཱཡ ཨུཔམཱ སདིསཱཏི ཨསིསཱུནཱུཔམཱ. སཏྟིསཱུལཱུཔམཱཏི སཏྟིཡཱ ཙ སཱུལེན ¶ ཙ སདིསཱ. ཨེཏྠཱཏི ཨིམིསྶཾ ཨཊྛཀཐཱཡཾ. མཛ྄ཛྷིམཊྛཀཐཱཡཾ ཨལགདྡཱུཔམསུཏྟེ (མ. ནི. ཨཊྛ. ༡.༢༣༤ ཨཱདཡོ) གཧེཏབྦོ. ཨེཝཾསདྡཁོསདྡཱནམནྟརེ ཝིཡསདྡསྶ བྱཱདེསབྷཱཝཾ དསྶེཏུཾ ཝུཏྟཾ ‘‘ཨེཝཾ ཝིཡ ཁོ’’ཏི. ཨཊྛམཾ.

༩. ཨུཀྑིཏྟསམྦྷོགསིཀྑཱཔདཾ

༤༢༤. ནཝམེ ཨནུདྷམྨསྶ སརཱུཔཾ དསྶེཏུཾ ཝུཏྟཾ ‘‘ཨནུལོམཝཏྟཾ དིསྭཱ ཀཏཱ ཨོསཱརཎཱ’’ཏི. ཨིམིནཱ ཨནུལོམཝཏྟཾ དིསྭཱ ཀཏོ ཨོསཱརཎསངྑཱཏོ དྷམྨོ ཨནུདྷམྨོཏི དསྶེཏི. ཨོསཱརཎཱཏི པཝེསནཱ. ཏེནེཝཱཏི ཨུཀྑིཏྟཀསྶ ཨཀཊཱནུདྷམྨཏྟཱ ཨེཝ. ཨསྶཱཏི ‘‘ཨཀཊཱནུདྷམྨེནཱ’’ཏི པདསྶ.

དདཏོ ཝཱ གཎྷཏོ ཝཱཏི ཝཱསདྡོ ཨནིཡམཝིཀཔྤཏྠོཏི. ནཝམཾ.

༡༠. ཀཎྚཀསིཀྑཱཔདཾ

༤༢༨. དསམེ ཨརིཊྛསྶ ཨུཔྤནྣཾ ཝིཡ ཨེཏསྶཱཔི ཨུཔྤནྣནྟི ཡོཛནཱ. ཨུམྨཛྫནྟསྶཱཏི མནསིཀརོནྟསྶ. སཾཝཱསསྶ ནཱསནཱ སཾཝཱསནཱསནཱ. ལིངྒསྶ ནཱསནཱ ལིངྒནཱསནཱ. དཎྜཀམྨེན ནཱསནཱ དཎྜཀམྨནཱསནཱ. ཏཏྠཱཏི ཏིཝིདྷཱསུ ནཱསནཱསུ. དཱུསཀོ…པེ… ནཱསེཐཱཏི ཨེཏྠ ཨཡཾ ནཱསནཱ ལིངྒནཱསནཱ ནཱམཱཏི ཡོཛནཱ. ཨཡནྟི དཎྜཀམྨནཱསནཱ. ཨིདྷཱཏི ཨིམསྨིཾ སིཀྑཱཔདེ, ‘‘ནཱསེཏཱུ’’ཏི པདེ ཝཱ. ཏཏྠཱཏི པུརིམཝཙནཱཔེཀྑཾ, ‘‘ཨེཝཉྩ པན བྷིཀྑཝེ’’ཏི ཨཱདིཝཙནེཏི ཨཏྠོ. པིརེཏི ཨཱམནྟནཔདཾ པརསདྡེན སམཱནཏྠནྟི ཨཱཧ ‘‘པརཱ’’ཏི. ‘‘ཨམྷཱཀཾ ཨནཛ྄ཛྷཏྟིཀབྷཱུཏ’’ཨིཏི ཝཱ ‘‘ཨམྷཱཀཾ པཙྩནཱིཀབྷཱུཏ’’ ཨིཏི ཝཱ ཨཏྠོ དཊྛབྦོ. ‘‘ཨམཱམཀ’’ཨིཏིཔདེན ‘‘པར’’ཨིཏིཔདསྶ ཨདྷིཔྤཱཡཏྠཾ དསྶེཏི. ཨམྷེ ནམམཱཡཀ, ཨམྷེཧི ཝཱ ནམམཱཡིཏབྦ ཨིཏི ཨཏྠོ. ‘‘ཨམྷཱམཀ’’ཨིཏིཔི ཧཀཱརཡུཏྟོ པཱཋོ. ཨམྷེཧི ཨཱམཀཨིཏི ¶ ཨཏྠོ. ཡཏྠཱཏི ཡསྨིཾ ཋཱནེ. ཏེཏི ཨུཔཡོགཏྠེ སཱམིཝཙནཾ, ཏནྟི ¶ ཨཏྠོ. ཏཝ རཱུཔསདྡེ ཝཱཏི སམྦནྡྷོ. ན པསྶཱམཱཏི ན པསྶཱམ, ན སུཎཱམ.

༤༢༩. ཏེནཱཏི སཱམཎེརེན. ‘‘ཀཱརཱཔེཡྻཱ’’ཏི པདེ ཀཱརིཏཀམྨནྟི. དསམཾ.

སཔྤཱཎཀཝགྒོ སཏྟམོ.

༨. སཧདྷམྨིཀཝགྒོ

༡. སཧདྷམྨིཀསིཀྑཱཔད-ཨཏྠཡོཛནཱ

༤༣༤. སཧདྷམྨིཀཝགྒསྶ པཋམེ ཡནྟི ཡཾ པཉྙཏྟཾ. ‘‘སིཀྑམཱནེནཱ’’ཏི ཨེཏྠ མཱནཔཙྩཡསྶ ཨནཱགཏཏྠབྷཱཝཾ དསྶེཏུཾ ཝུཏྟཾ ‘‘སིཀྑིཏུཀཱམེནཱ’’ཏི. ‘‘སིཀྑམཱནེནཱ’’ཏིཔདཾ ‘‘བྷིཀྑུནཱ’’ཏིཔདེ ཨེཝ ན ཀེཝལཾ ཀཱརཀཝིསེསནཾ ཧོཏི, ཨཐ ཁོ ‘‘ཨཉྙཱཏབྦ’’ནྟིཨཱདིཔདེསུཔི ཀིརིཡཱཝིསེསནཾ ཧོཏཱིཏི དསྶེནྟོ ཨཱཧ ‘‘ཧུཏྭཱ’’ཏི. པདཏྠཏོཏི པདཏོ ཙ ཨཏྠཏོ ཙ, པདཱནཾ ཨཏྠཏོ ཝཱཏི. པཋམཾ.

༢. ཝིལེཁནསིཀྑཱཔདཾ

༤༣༨. དུཏིཡེ ཝིནཡེ པཊིསཾཡུཏྟཱ ཀཐཱ ཝིནཡཀཐཱཏི དསྶེནྟོ ཨཱཧ ‘‘ཝིནཡཀཐཱ ནཱམཱ’’ཏིཨཱདི. ཏནྟི ཝིནཡཀཐཾ. པདབྷཱཛནེན ཝཎྞནཱ ཝིནཡསྶ ཝཎྞོ ནཱམཱཏི ཡོཛནཱ. ཏནྟི ཝིནཡསྶ ཝཎྞཾ. པརིཡཱཔུཎནཾ པརིཡཏྟི, ཝིནཡསྶ པརིཡཏྟི ཝིནཡཔརིཡཏྟི, ཝིནཡཔརིཡཏྟིསངྑཱཏཾ མཱུལམསྶ ཝཎྞསྶཱཏི ཝིནཡཔརིཡཏྟིམཱུལཀོ, ཏཾ. ཝིནཡདྷརོ ལབྷཏཱིཏི སམྦནྡྷོ. ཧཱིཏི ཝིཏྠཱརོ. ཏེ སབྦེ བྷགཝཱ བྷཱསཏཱིཏི སམྦནྡྷོ. ཧཱིཏི སཙྩཾ.

ཨསྶཱཏི ཝིནཡདྷརསྶ. ཨིདྷཱཏི ཨིམསྨིཾ སཱསནེ. ཨལཛྫིཏཱཏིཨཱདཱིསུ ཀརཎཏྠེ པཙྩཏྟཝཙནཾ. ཨལཛྫིཏཱཡཱཏི ཧི ཨཏྠོ. ཏེན ཝུཏྟཾ ‘‘ཀཐཾ ཨལཛྫིཏཱཡཱ’’ཏིཨཱདི. ཙཱཏི སཙྩཾ ¶ . ‘‘སཉྩིཙྩཱ’’ཏི པདཾ ཏཱིསུ ཝཱཀྱེསུ ¶ ཡོཛེཏབྦཾ. སཉྩིཙྩ ཨཱཔཏྟིཾ ཨཱཔཛྫཏི, སཉྩིཙྩ ཨཱཔཏྟིཾ པརིགཱུཧཏི, སཉྩིཙྩ ཨགཏིགམནཉྩ གཙྪཏཱིཏི ཨཏྠོ. མནྡོཏི བཱལོ. མོམཱུཧོཏི ཨཏིསམྨཱུལ༹ྷོ. ཝིརཱདྷེཏཱིཏི ཝིརཛ྄ཛྷཱཔེཏི. ཀུཀྐུཙྩེ ཨུཔྤནྣེཏི ‘‘ཀཔྤཏི ནུ ཁོ, ནོ’’ཏི ཝིནཡཀུཀྐུཙྩེ ཨུཔྤནྣེ. ཨཡཾ པནཱཏི ཨཡཾ པུགྒལོ པན ཝཱིཏིཀྐམཏིཡེཝཱཏི སམྦནྡྷོ. ཨཙྪམཾསེན སཱུཀརམཾསསྶ ཝཎྞསཎྛཱནེན སདིསཏྟཱ, དཱིཔིམཾསེན ཙ མིགམཾསསྶ སདིསཏྟཱ ཝུཏྟཾ ‘‘ཨཙྪམཾསཾ སཱུཀརམཾས’’ནྟིཨཱདི.

ཨཱཔཏྟིཾཙ སཏིསམྨོསཱཡཱཏི ཨེཏྠ ཙསདྡོ ཨཝུཏྟཝཱཀྱསམྤིཎྜནཏྠོ, ཀཏྟབྦཉྩ ན ཧི ཀརོཏཱིཏི ཨཏྠོ. ཨེཝནྟིཨཱདི ནིགམནཾ.

ཨེཝཾ ཨཝིནཡདྷརསྶ དོསཾ དསྶེཏྭཱ ཝིནཡདྷརསྶ གུཎཾ དསྶེནྟོ ཨཱཧ ‘‘ཝིནཡདྷརོ པནཱ’’ཏིཨཱདི. སོཏི ཝིནཡདྷརོ. ཧཱིཏི ཝིཏྠཱརོ. པརཱུཔཝཱདནྟི པརེསཾ ཨུཔཝཱདཾ. སུདྡྷནྟེཏི སུདྡྷསྶ ཀོཊྛཱསེ. ཏཏོཏི པཏིཊྛཱནཏོ པརནྟི སམྦནྡྷོ. ཨསྶཱཏི ཝིནཡདྷརསྶ. ཨེཝནྟིཨཱདི ནིགམནཾ. ཨསྶཱཏི ཝིནཡདྷརསྶ. ཀུཀྐུཙྩཔཀཏཱནནྟི ཀུཀྐུཙྩེན ཨབྷིབྷཱུཏཱནཾ. སོཏི ཝིནཡདྷརོ. ཏེཧཱིཏི ཀུཀྐུཙྩཔཀཏེཧི. སངྒྷམཛ྄ཛྷེ ཀཐེནྟསྶ ཨཝིནཡདྷརསྶཱཏི ཡོཛནཱ. ཏནྟི བྷཡཾ སཱརཛྫཾ.

པཊིཔཀྑཾ, པཊིཝིརུདྡྷཾ ཝཱ ཨཏྠཡནྟི ཨིཙྪནྟཱིཏི པཙྩཏྠཱིཀཱ, ཎྱསདྡོ བཧུལཾ ཀཏྟཱབྷིདྷཱཡཀོ, ཨཏྟནོ པཙྩཏྠིཀཱ ཨཏྟཔཙྩཏྠིཀཱ. ཏཏྠཱཏི དུཝིདྷེསུ པཙྩཏྠིཀེསུ. ཨིམེཏི མེཏྟིཡབྷུམྨཛཀཝཌྜྷལིཙྪཝིནོ. ཨཉྙེཔི ཡེ ཝཱ པན བྷིཀྑཱུཏི སམྦནྡྷོ. ཨརིཊྛབྷིཀྑུ ཙ ཀཎྚཀསཱམཎེརོ ཙ ཝེསཱལིཀཝཛྫིཔུཏྟཀཱ ཙ ཨརིཊྛ…པེ… ཝཛྫཱིཔུཏྟཀཱ. ཏེ ཙ སཱསནཔཙྩཏྠིཀཱ ནཱམཱཏི སམྦནྡྷོ. པརཱུཔཧཱརོ ཙ ཨཉྙཱཎོ ཙ ཀངྑཱཔརཝིཏརཎོ ཙ པརཱུ…པེ… ཝིཏརཎཱ. ཏེ ཨཱདཡོ ཡེསཾ ཝཱདཱནནྟི པརཱུ…པེ… ཝིཏརཎཱདཡོ. ཏེ ཨེཝ ཝཱདཱ ཨེཏེསནྟི པརཱུ…པེ… ཝིཏརཎཱདིཝཱདཱ. ཏེ ཙ སཱསནཔཙྩཏྠིཀཱ ནཱམཱཏི སམྦནྡྷོ. ཨབུདྡྷསཱསནཾ བུདྡྷསཱསནནྟི ཝཏྭཱ ཀཏཔགྒཧཱ མཧཱསངྒྷིཀཱདཡོ ཙ སཱསནཔཙྩཏྠིཀཱ ནཱམཱཏི ཡོཛནཱ. ཀངྑཱཔརཝིཏརཎཱདཱིཏི ཨེཏྠ ¶ ཨཱདིསདྡེན ཀཐཱཝཏྠུཔཀརཎེ ཨཱགཏཱ ཝཱདཱ སངྒཡ྄ཧནྟི. མཧཱསངྒྷིཀཱདཡོཏི ཨེཏྠ ཨཱདིསདྡེན དཱིཔཝཾསེ ཨཱགཏཱ གཎཱ སངྒཡ྄ཧནྟི. ཨཱདིམྷི ‘‘ཝིཔརཱིཏདསྶནཱ’’ཏི པདཾ སབྦཔདེཧི ཡོཛེཏབྦཾ. ‘‘སཧདྷམྨེནཱ’’ཏི པདསྶཏྠཾ དསྶེཏུཾ ཝུཏྟཾ ‘‘སཧ ཀཱརཎེནཱ’’ཏི. ཡཐཱཏི ཡེནཱཀཱརེན ནིགྒཡ྄ཧམཱནེཏི སམྦནྡྷོ.

ཏཏྠཱཏི ¶ ཏིཝིདྷེསུ སདྡྷམྨེསུ. མཧཱཝཏྟཱནི སནྟི, ཨཡཾ སབྦོཏི ཡོཛནཱ. ཙཏྟཱརི ཕལཱནི ཙཱཏི ལིངྒཝིཔལླཱསེན ཡོཛེཏབྦཾ. ཨེཏྠ ཙཀཱརེན ཨབྷིཉྙཱཔཊིསམྦྷིདཱ སངྒཧིཏཱ ཏཱསམྤི ཨདྷིགམསཱསནབྷཱཝཏོ.

ཏཏྠཱཏི ཏིཝིདྷེསུ སདྡྷམྨེསུ. ཀེཙི ཐེརཱཏི དྷམྨཀཐིཀཱ ཀེཙི ཐེརཱ. ‘‘ཡོ ཁོ’’ཏི ཀཎྛཛདུཏིཡཀྑརེན པཋིཏབྦོ. པོཏྠཀེསུ པན ‘‘ཡོ ཝོ’’ཏི ཝཀཱརེན པཱཋོ ཨཏྠི, སོ ཨཡུཏྟོ. ཀསྨཱ? ‘‘སོ ཝོ’’ཏི པརཏོ ཝུཏྟཏྟཱ, ཨེཀསྨིཾ ཝཱཀྱེ དྭིནྣཾ སམཱནསུཏིསདྡཱནཾ ཨཡུཏྟཏྟཱ ཙ. ཀེཙི ཐེརཱཏི པཾསུཀཱུལིཀཱ ཀེཙི ཐེརཱ ཨཱཧཾསཱུཏི སམྦནྡྷོ. ཨིཏརེ པན ཐེརཱཏི དྷམྨཀཐིཀཐེརེཧི ཙ པཾསུཀཱུལིཀཐེརེཧི ཙ ཨཉྙེ ཐེརཱ. ཏེཏི པཉྩ བྷིཀྑཱུ ཀརིསྶནྟཱིཏི སམྦནྡྷོ. ཛམྦུདཱིཔསྶ པཙྩནྟེ ཏིཊྛཏཱིཏི པཙྩནྟིམོ, ཏསྨིཾ. ཛམྦུདཱིཔསྶ མཛ྄ཛྷེ ཝེམཛ྄ཛྷེ ཏིཊྛཏཱིཏི མཛ྄ཛྷིམོ. ཨཐ ཝཱ མཛ྄ཛྷཱནཾ སུདྡྷཱནཾ བུདྡྷཱདཱིནཾ ནིཝཱསོ མཛ྄ཛྷིམོ, ཏསྨིཾ. ཝཱིསཏི ཝགྒཱ ཨིམསྶཱཏི ཝཱིསཏིཝགྒོ, སོཡེཝ གཎོ ཝཱིསཏིཝགྒགཎོ, ཏཾ. ཨེཝནྟིཨཱདི ནིགམནཾ.

ཏསྶཱདྷེཡྻོཏི ཏསྶཱཡཏྟོ, ཏསྶ སནྟཀོཏི ཝུཏྟཾ ཧོཏི. པཝཱརཎཱ ཨཱདྷེཡྻཱ, སངྒྷཀམྨཾ ཨཱདྷེཡྻཾ, པབྦཛྫཱ ཨཱདྷེཡྻཱ, ཨུཔསམྤདཱ ཨཱདྷེཡྻཱཏི ཡོཛནཱ.

ཡེཔི ཨིམེ ནཝ ཨུཔོསཐཱཏི སམྦནྡྷོ. ཡཱཔི ཙ ཨིམཱ ནཝ པཝཱརཎཱཡོཏི ཡོཛནཱ. ཏསྶཱཏི ཝིནཡདྷརསྶ. ཏཱསནྟི ནཝཔཝཱརཎཱནཾ.

ཡཱནིཔི ¶ ཨིམཱནི ཙཏྟཱརི སངྒྷཀམྨཱནཱིཏི ཡོཛེཏབྦཾ. ཨེཏྠ ཙ ཏཱནི ཝིནཡདྷརཱཡཏྟཱནེཝཱཏི པཱཋསེསོ ཨཛ྄ཛྷཱཧརིཏབྦོ.

ཡཱཔི ཙ ཨཡཾ པབྦཛྫཱ ཙ ཨུཔསམྤདཱ ཙ ཀཱཏབྦཱཏི ཡོཛནཱ. ཧཱིཏི སཙྩཾ. ཨཉྙོཏི ཝིནཡདྷརཏོ པརོ. སོ ཨེཝཱཏི ཝིནཡདྷརོ ཨེཝ. ‘‘ཨུཔཛ྄ཛྷ’’ནྟི དྷཱཏུཀམྨཾ, ‘‘སཱམཎེརེནཱ’’ཏི ཀཱརིཏཀམྨཾ ཨུཔནེཏབྦཾ. ཨེཏྠ ཙཱཏི ཨུཔོསཐཱདཱིསུ ཙ. ནིསྶཡདཱནཉྩ སཱམཎེརཱུཔཊྛཱནཉྩ ཝིསུཾ ཀཏྭཱ དྭཱདསཱནིསཾསེ ལབྷཏཱིཏིཔི སཀྐཱ ཝཏྟུཾ.

ཝིསུཾ ཝིསུཾ ཀཏྭཱཏི ‘‘པཉྩཱཏི ཙ…པེ… ཨེཀཱདསཱ’’ཏི ཙ ཀོཊྛཱསཾ ཀོཊྛཱསཾ ཀཏྭཱ, སཏྟ ཀོཊྛཱསེ ཀཏྭཱ བྷཱསཏཱིཏི ཨདྷིཔྤཱཡོ. ཐོམེཏཱིཏི སམྨུཁཱ ཐོམེཏི. པསཾསཏཱིཏི པརམྨུཁཱ པསཾསཏི. ‘‘ཨུགྒཧེཏབྦ’’ནྟིཔདསྶཏྠཾ དསྶེཏུཾ ཝུཏྟཾ ‘‘པརིཡཱཔུཎིཏབྦ’’ནྟི. ཨདྡྷནི དཱིགྷེ ¶ སཱདྷཱུཏི ཨདྡྷནིཡཾ ཨདྡྷཀྑམཾ ཨདྡྷཡོགྱནྟི ཨཏྠོ སཱདྷུཨཏྠེ ནིཡཔཙྩཡོ (མོགྒལླཱནེ ༤.༣༣.༧༣).

ཐེརཱ ཙ ནཝཱ ཙ མཛ྄ཛྷིམཱ ཙ བཧཱུ ཏེ བྷིཀྑཱུ པརིཡཱཔུཎནྟཱིཏི ཡོཛནཱ.

༤༣༩. ‘‘ཨུདྡིསྶམཱནེ’’ཏི པདསྶ ཀམྨརཱུཔཏྟཾ དསྶེཏུཾ ཝུཏྟཾ ‘‘ཨུདྡིསིཡམཱནེ’’ཏི. སོ པནཱཏི པཱཏིམོཀྑོ པན. ཡསྨཱ ཨུདྡིསྶམཱནོ ནཱམ ཧོཏི, ཏསྨཱཏི ཡོཛནཱ. ཨུདྡིསནྟེ ཝཱཏི ཨུདྡིསིཡམཱནེ ཝཱ. ཨུདྡིསཱཔེནྟེ ཝཱཏི ཨུདྡིསཱཔིཡམཱནེ ཝཱ. ཨནྟསདྡོ ཧི མཱནསདྡཀཱརིཡོ. ཡོཏི བྷིཀྑུ. ནནྟི ཏཾ པཱཏིམོཀྑཾ. ཙསདྡོ ཁུདྡཱནུཁུདྡཀཔདསྶ དྭནྣཝཱཀྱཾ དསྶེཏི, པུབྦཔདེ ཀཀཱརལོཔོ དཊྛབྦོ. ཏེསནྟི ཁུདྡཱནུཁུདྡཱཀཱནཾ. ཧཱིཏི སཙྩཾ. ཨེཏཱནཱིཏི ཁུདྡཱནུཁུདྡཀཱནི. ཡེཏི བྷིཀྑཱུ. ‘‘ཡཱཝ ཨུཔྤཛྫཏིཡེཝ, ཏཱཝ སཾཝཏྟནྟི ཨིཏི ཝུཏྟཾ ཧོཏཱིཏི ཡོཛནཱ ཨིམསྶ ནཡསྶ པཱཋསེསེཧི ཡོཛེཏབྦཏྟཱ. གརུཀབྷཱཝཾ སལླཀྑེནྟོ ལཧུཀབྷཱཝཾ དསྶེནྟོ ཨཱཧ ‘‘ཨཐ ཝཱ’’ཏིཨཱདི. ཨཏིཝིཡཱཏི ཨཏི ཨི ཨེཝ. ཨིཀཱརོ ཧི སནྡྷིཝསེན ཨདསྶནཾ གཏོ. ཝིཡསདྡོ ཨེཝཀཱརཏྠཝཱཙཀོ ‘‘ཝརམྷཱཀཾ བྷུསཱམིཝཱ’’ཏི ཨེཏྠ ¶ (ཛཱ. ༡.༣.༡༠༨) ཨིཝསདྡོ ཝིཡ, ཨཏི ཧུཏྭཱ ཨེཝཱཏི ཨཏྠོ དཊྛབྦོ. ‘‘ཨུཔསམྤནྣསྶཱ’’ཏི ཨེཏྠ སམཱིཔེ སཱམིཝཙནནྟི (རུཔསིདྡྷིཡཾ ༣༡༦ སུཏྟེ) ཨཱཧ ‘‘ཨུཔསམྤནྣསྶ སནྟིཀེ’’ཏི. ཏསྶཱཏི ཨུཔསམྤནྣསྶ. ཏསྨིནྟི ཝིནཡེ. ཝིཝཎྞེཏཱིཏི ན ཀེཝལཾ ཏསྶེཝ ཝིཝཎྞམཏྟམེཝ, ཨཐ ཁོ ནིནྡཏིཡེཝཱཏི ཨཱཧ ‘‘ནིནྡཏཱི’’ཏི. གརཧཏཱིཏི ཏསྶེཝ ཝེཝཙནཾ. ཨཐ ཝཱ ནིནྡཏཱིཏི ཨུཔསམྤནྣསྶ སམྨུཁཱ ནིནྡཏི. གརཧཏཱིཏི པརམྨུཁཱ གརཧཏཱིཏི. དུཏིཡཾ.

༣. མོཧནསིཀྑཱཔདཾ

༤༤༤. ཏཏིཡེ ཨནུསདྡོ པཊིཔཱཊིཨཏྠཾ ཨནྟོཀཏྭཱ ཝིཙྪཏྠཝཱཙཀོཏི ཨཱཧ ‘‘ཨནུཔཊིཔཱཊིཡཱ ཨདྡྷམཱསེ ཨདྡྷམཱསེ’’ཏི. སོཏི པཱཏིམོཀྑོ. ཨུཔོསཐེ ཨུཔོསཐེ ཨུདྡིསིཏབྦནྟི ཨནུཔོསཐིཀཾ. ཨེཏྠཱཔི ཧི ཨནུསདྡོ ཝིཙྪཏྠཝཱཙཀོ. སོཏི པཱཏིམོཀྑོ. ཨུདྡིསིཡམཱནོ ནཱམ ཧོཏཱིཏི ཡོཛནཱ. ‘‘ཏསྨིཾ ཨནཱཙཱརེ’’ཏི པདེན ‘‘ཏཏྠཱ’’ཏི པདསྶཏྠཾ དསྶེཏི. ‘‘ཡཾ ཨཱཔཏྟི’’ནྟི པདེན ཡཾསདྡསྶ ཝིསཡཾ དསྶེཏི. ཡཐཱདྷམྨོཏི ཨེཏྠ དྷམྨསདྡེན དྷམྨོ ཙ ཝིནཡོ ཙ ཨདྷིཔྤེཏོཏི ཨཱཧ ‘‘དྷམྨོ ཙ ཝིནཡོ ཙཱ’’ཏི. ཡཐཱཏི ཡེནཱཀཱརེན. སཱདྷུསདྡོ སུནྡརཏྠོ, ཀསདྡོ པདཔཱུརཎོཏི ཨཱཧ ‘‘སུཊྛཱུ’’ཏི. ཨཊྛིནྟི ཙ ‘‘ཀཏྭཱ’’ཏི ཙ དྭེ པདཱནི དཊྛབྦཱནི. ‘‘ཨཊྛིཀཏྭཱ’’ཏི ཝཱ ཨེཀཾ པདཾ. ཏཏྠ པུབྦནཡེ ཨཏྠོ ཡསྶཏྠཱིཏི ཨཊྛི ཏྠཀཱརསྶ ¶ ཊྛཀཱརཾ ཀཏྭཱ, ཏཾ ཨཊྛིཾ. ཀཏྭཱཏི ཏྭཱཔཙྩཡནྟཨུཏྟརཔདེན སམཱསོ ན ཧོཏི. ཨཊྛིཀབྷཱཝནྟི ཨེཏྠ ཨིཀསདྡེན ‘‘ཨཊྛཱི’’ཏི ཨེཏྠ ཨཱིཔཙྩཡཾ དསྶེཏི. ‘‘བྷཱཝ’’ནྟིཔདེན བྷཱཝཔཙྩཡེན ཝིནཱ བྷཱཝཏྠསྶ ཉཱཔེཏབྦཏཾ དསྶེཏི. ཨཏྠོ པནེཝཾ དཊྛབྦོ – ཨཊྛིབྷཱཝཾ ཀཏྭཱཏི. པཙྪིམནཡེ ཨཏྠོ ཡསྶཏྠཱིཏི ཨཊྛིཀོ པུརིམནཡེནེཝ ཏྠཀཱརསྶ ཊྛཀཱརཾ ཀཏྭཱ. ཨཏྠཡིཏབྦོ ཨིཙྪིཏབྦོཏི ཝཱ ཨཊྛིཀོ, ཨཊྛིཀཨིཏི ནཱམསདྡཏོ ཏྭཱཔཙྩཡོ ཀཱཏབྦོ. ‘‘ཨཊྛིཀཏྭཱ’’ཏི ཨིདཾ པདཾ ཀིརིཡཱཝིསེསནཾ. ཀིརིཡཱཝིསེསནེ ཝཏྟམཱནེ ཀརདྷཱཏུ ཝཱ བྷཱུདྷཱཏུ ཝཱ ཡོཛེཏབྦཱཏི དསྶེབྷུཾ ¶ ཝུཏྟཾ ‘‘ཀཏྭཱ ཧུཏྭཱ’’ཏི. ཏཾ སབྦཾ དསྶེནྟོ ཨཱཧ ‘‘ཨཊྛིཀཏྭཱཏི ཨཊྛིཀབྷཱཝཾ ཀཏྭཱ, ཨཊྛིཀོ ཧུཏྭཱ’’ཏི. ཏཏིཡཾ.

༤. པཧཱརསིཀྑཱཔདཾ

༤༤༩. ཙཏུཏྠེ ཀསྨཱ ཚབྦགྒིཡཱ སཏྟརསཝགྒིཡཱནཾ པཧཱརཾ དེནྟི, ནནུ ཨཀཱརཎེན པཧཱརཾ དེནྟཱིཏི ཨཱཧ ‘‘ཨཱཝུསོ’’ཏིཨཱདི. ཨིམིནཱ ཡཐཱ ཝདནྟི, ཏཐཱ ཨཀཏཏྟཱ པཧཱརཾ དེནྟཱིཏི དསྶེཏི.

༤༥༡. སཙེཔཱིཏི ཨེཏྠ པིསདྡེན སཙེ ཨམརཏི, ཀཱ ནཱམ ཀཐཱ, པཱཙིཏྟིཡམེཝཱཏི དསྶེཏི. པཧཱརེནཱཏི པཧཱརཧེཏུནཱ. ཡཐཱཏི ཡེནཱཀཱརེན. ཨཡནྟི བྷིཀྑུ. ན ཝིརོཙཏཱིཏི ན སོབྷཏི.

༤༥༢. ‘‘ཨནུཔསམྤནྣསྶཱ’’ཏི ཨེཏྠ ཨཀཱརསྶ ཨཉྙཏྠཾ དསྶེཏུཾ ཝུཏྟཾ ‘‘གཧཊྛསྶ ཝཱ’’ཏིཨཱདི. པབྦཛིཏསྶ ཝཱཏི པརིབྦཱཛཀསྶ ཝཱ སཱམཎེརསྶ ཝཱ.

༤༥༣. ‘‘ཀེནཙཱི’’ཏི པདསྶ ཨཏྠཾ དསྶེཏུཾ ཝུཏྟཾ ‘‘མནུསྶེན ཝཱ’’ཏིཨཱདི. ཏཏོཏི ཝིཧེཋནཏོ, ཨིམིནཱ མོཀྑསྶ ཨཔཱདཱནཾ དསྶེཏི, ‘‘ཨཏྟནོ’’ཏི ཨིམིནཱ སམྦནྡྷཾ དསྶེཏི. ‘‘པཏྠཡམཱནོ’’ཏི ཨིམིནཱ ‘‘ཨདྷིཔྤཱཡོ’’ཏི པདསྶཏྠཾ དསྶེཏི. མུགྒརེན ཝཱཏི ཙཏུཧཏྠདཎྜསྶ ཨདྡྷེན དཎྜེན ཝཱ. སོཏི ཙོརཱདིཀོཏི. ཙཏུཏྠཾ.

༥. ཏལསཏྟིཀསིཀྑཱཔདཾ

༤༥༤. པཉྩམེ ཏལནྟི ཧཏྠཏལཾ. ཏཉྷི ཏལཏི ཡཾཀིཉྩི གཧིཏཝཏྠུ པཏིཊྛཱཏི ཨེཏྠཱཏི ¶ ‘‘ཏལ’’ནྟི ཝུཙྩཏི. སཏྟཱིཏི ཀུནྟོ. སོ ཧི སཀཏི ཝིཛ྄ཛྷིཏུཾ སམཏྠེཏཱིཏི ‘‘སཏྟཱི’’ཏི ཝུཙྩཏི. ཏལམེཝ སཏྟིསདིསཏྟཱ ཏལསཏྟིཀཾ, སདིསཏྠེ ཀོ, ཏཾ ཏལསཏྟིཀཾ ཨུཔཙཱརེན གཧེཏྭཱ ‘‘ཀཱཡམྤཱི’’ཏི ཝུཏྟཾ. ཀཱཡཏོ ཨཉྙཾ ཝཏྠུམྤི ཏལསཏྟིཀསངྑཱཏེན ཀཱཡེན གཧེཏྭཱ ཨུགྒིརཏྟཱ ཝུཏྟཾ ‘‘ཀཱཡཔཊིབདྡྷམྤཱི’’ཏི. ‘‘པཧཱརསམུཙྩིཏཱ’’ཏི ཨེཏྠ སཾཔུབྦོ ཙ ཨུཔུབྦོ ཙ ཙིསདྡོ པགུཎནསངྑཱཏེ པརིཙིཏེ ཝཏྟཏཱིཏི ཨཱཧ ‘‘པཧཱརཔརིཙིཏཱ’’ཏི. པཧཱརེན སཾ པུནཔྤུནཾ ཨུཙྩིཏཱ པརིཙིཏཱཏི ཨཏྠོ. ཨིམམེཝཏྠཾ སནྡྷཱཡ ཝུཏྟཾ ¶ ‘‘པུབྦེཔི…པེ… ཨཏྠོ’’ཏི. ཨཉྙམྤི སཛ྄ཛྷཱཡནནཡཾ དསྶེཏུཾ ཝུཏྟཾ ‘‘པཧཱརསྶ ཨུབྦིགཱ’’ཏི. ཏསྶཱཏི ཏསྶ པཱཋསྶ. པཧཱརསྶཱཏི པཧཱརཏོ. ནིསྶཀྐཏྠེ ཙེཏཾ སཱམིཝཙནཾ. ‘‘བྷཱིཏཱ’’ཏི ཨིམིནཱ ‘‘ཨུབྦིགཱ’’ཏི ཨེཏྠ ཨུཔུབྦ ཝིཛདྷཱཏུསྶཏྠཾ དསྶེཏི.

༤༥༧-༨. ཝིརདྡྷོཏི པཎྞཀོ ཧུཏྭཱ. པུབྦེཏི པུརིམསིཀྑཱཔདེ. ཝུཏྟེསུ ཝཏྠཱུསཱུཏི ‘‘ཙོརཾ ཝཱ པཙྩཏྠཱིཀཾ ཝཱ’’ཏིཨཱདིནཱ ཝུཏྟེསུ ཝཏྠཱུསཱུཏི. པཉྩམཾ.

༦. ཨམཱུལཀསིཀྑཱཔདཾ

༤༥༩. ཚཊྛེ ཏེཏི ཚབྦགྒིཡཱ. ཙོདེནྟི ཀིརཱཏི སམྦནྡྷོ. ཨཱཀིཎྞདོསཏྟཱཏི ཏེསཾ ཨཱཀུལཨཱདཱིནཝཏྟཱ. ཨེཝནྟི ཙོདིཡམཱནེ. ཨཏྟཔརིཏྟཱཎནྟི ཨཏྟནོ པརིསམནྟཏོ ཏཱཎཾ རཀྑནཾ ཀརོནྟཱ ཙོདེནྟཱིཏི ཡོཛནཱཏི. ཚཊྛཾ.

༧. སཉྩིཙྩསིཀྑཱཔདཾ

༤༦༤. སཏྟམེ ཨུཔཔུབྦདཧདྷཱཏུསྶ སཀམྨིཀཏྟཱ ཀཱརིཏནྟོགདྷབྷཱཝཾ དསྶེཏུཾ ཝུཏྟཾ ‘‘ཨུཔྤཱདེནྟཱི’’ཏི. ‘‘ཨནུཔསམྤནྣསྶཱ’’ཏི ཨེཏྠ ཨཀཱརསྶ སདིསཏྠཾ དསྶེཏུཾ ཝུཏྟཾ ‘‘སཱམཎེརསྶཱ’’ཏི. སཱམཎེརོཔི ཧི ཨུཔསམྤནྣེན སདིསོ ཧོཏི སཎྛཱནེན ཙ པུརིསབྷཱཝེན ཙ. སཱམཎེརསྶ ཀུཀྐུཙྩཾ ཨུཔདཧཏཱིཏི སམྦནྡྷོ. ནིསིནྣཾ མཉྙེ, ནིཔནྣཾ མཉྙེ, བྷུཏྟཾ མཉྙེ, པཱིཏཾ མཉྙེ, ཀཏཾ མཉྙེཏི ཡོཛནཱ. ནིསིནྣནྟི ནིསཱིདིཏཾ. ནིཔནྣནྟི ནིཔཛྫིཏནྟི. སཏྟམཾ.

༨. ཨུཔསྶུཏིསིཀྑཱཔདཾ

༤༧༡. ཨཊྛམེ ¶ ‘‘ཨདྷིཀརཎཛཱཏཱན’’ནྟི ཨེཏྠ ཨདྷིཀརཎསྶ པཀརཎཏོ ཝིཝཱདཱདྷིཀརཎབྷཱཝཉྩ ཝིསེསནཔརཔདབྷཱཝཉྩ དསྶེནྟོ ཨཱཧ ‘‘ཨུཔྤནྣཝིཝཱདཱདྷིཀརཎཱན’’ནྟི. ཏཏྠ ཨུཔྤནྣསདྡེན ཛཱཏསདྡསྶཏྠཾ དསྶེཏི ¶ . ཝིཝཱདསདྡེན ཨདྷིཀརཎསྶ སརཱུཔཾ དསྶེཏི. སུཡྻཏཱིཏི སུཏི ཝཙནཾ, སུཏིཡཱ སམཱིཔཾ ཨུཔསྶུཏི ཋཱནནྟི ཨཏྠཾ དསྶེཏུཾ ཝུཏྟཾ ‘‘སུཏིསམཱིཔ’’ནྟི. ‘‘སམཱིཔ’’ནྟི ཨིམིནཱ ཨུཔསདྡསྶཏྠཾ དསྶེཏི. ‘‘ཡཏྠཱ’’ཏིཨཱདིནཱ ‘‘ཨུཔསྶུཏཱི’’ཏི ཨེཏྠ ཨུཔསདྡསྶ པདྷཱནཏྟཱ ཏསྶ སརཱུཔཾ དསྶེཏི. ཡཏྠཱཏི ཡསྨིཾ ཋཱནེ. མནྟེནྟནྟི ཨེཏྠ ཨུཔཡོགཝཙནསྶ བྷུམྨཏྠེ ཨདྷིཔྤེཏཏྟཱ ཝུཏྟཾ ‘‘མནྟཡམཱནེ’’ཏི.

༤༧༣. ‘‘ཝཱུཔསམིསྶཱམཱི’’ཏི ཨེཏྠ ཨིདྷཱཏུཡཱ གཏྱཏྠཾ དསྶེཏུཾ ཝུཏྟཾ ‘‘ཝཱུཔསམཾ གམིསྶཱམཱི’’ཏི. ཨཀཱརཀབྷཱཝནྟི ནིདྡོསབྷཱཝཾ. སོཏུཀཱམཏཱཡ གམནཝསེན སིཡཱ ཀིརིཡནྟི ཡོཛནཱ. པརཏོཔི ཨེསེཝ ནཡོཏི. ཨཊྛམཾ.

༩. ཀམྨཔཊིབཱཧནསིཀྑཱཔདཾ

༤༧༤. ནཝམེ མཡནྟི ཚབྦགྒིཡནཱམཀཱ ཨམྷེ. ཀཏཏྟཱཏི ཀམྨཱནཾ ཀཏཏྟཱ. དྷམྨོཏི བྷཱུཏོ སབྷཱཝོ. ཨེཏེསཱུཏི ཙཏཱུསུ སངྒྷཀམྨེསཱུཏི. ནཝམཾ.

༡༠. ཚནྡཾ ཨདཏྭཱགམནསིཀྑཱཔདཾ

༤༨༡. དསམེ ཙོདེཏི པརསྶ དོསཾ ཨཱརོཔེཏཱིཏི ཙོདཀོ. ཏེན ཙ ཙོདཀེན ཙོདེཏབྦོ དོསཾ ཨཱརོཔེཏབྦོཏི ཙུདིཏོ, སོཡེཝ ཙུདིཏཀོ, ཏེན ཙ. ‘‘ཨནུཝིཛྫཀོཏི ཙ ཝིནཡདྷརོ. སོ ཧི ཙོདཀཙུདིཏཀཱནཾ མཏཾ ཨནུམིནེཏྭཱ ཝིདཏི ཛཱནཱཏཱིཏི ཨནུཝིཛྫཀོ. ཨེཏྟཱཝཏཱཔཱིཏི ཨེཏྟཀེནཔི པམཱཎེནཱཏི. དསམཾ.

༡༡. དུབྦལསིཀྑཱཔདཾ

༤༨༤. ཨེཀཱདསམེ ‘‘ཨལཛྫཱིཏཱ’’ཏིཨཱདཱིསུ (པརི. ༢༩༥) ཝིཡ ཡཀཱརལོཔེན ནིདྡེསོཏི ཨཱཧ ‘‘ཡཐཱམིཏྟཏཱཡཱ’’ཏི. ‘‘ཡོ ཡོ’’ཏི ཨིམིནཱ ཡཐཱསདྡསྶ ཝིཙྪཏྠཾ དསྶེཏི. ཡཐཱཝུཌྜྷནྟིཨཱདཱིསུ ¶ (ཙཱུལ༹ཝ. ༣༡༡ ཨཱདཡོ) ཝིཡ ཡོ ཡོ ¶ མིཏྟོ ‘‘ཡཐཱམིཏྟ’’ནྟི ཝཙནཏྠོ ཀཱཏབྦོ. སབྦཔདེསཱུཏི ‘‘ཡཐཱསནྡིཊྛཏཱ’’ཏིཨཱདཱིསུ སབྦེསུ པདེསཱུཏི. ཨེཀཱདསམཾ.

༡༢. པརིཎཱམནསིཀྑཱཔདཾ

༤༨༩. དྭཱདསམེ ཡནྟི པདཏྠཝིནིཙྪཡཏྠསངྑཱཏཾ ཡཾ ཝཙནཾ. ཏཏྠཱཏི ཏིཾསཀཀཎྜེ. ཨིདྷཱཏི དྭེནཝུཏིཀཎྜེ, སིཀྑཱཔདེ ཝཱ. པུགྒལསྶཱཏི པརཔུགྒལསྶཱཏི. དྭཱདསམཾ.

སཧདྷམྨིཀཝགྒོ ཨཊྛམོ.

༩. རཏནཝགྒོ

༡. ཨནྟེཔུརསིཀྑཱཔད-ཨཏྠཡོཛནཱ

༤༩༤. རཱཛཝགྒསྶ པཋམེ པརིཏྟཀོཏི གུཎེན ཁུདྡཀོ. པཱསཱདཝརསདྡསྶ ཨུཔརིསདྡེན སམྦནྡྷིཏབྦབྷཱཝཾ དསྶེཏུཾ ཝུཏྟཾ ‘‘པཱསཱདཝརསྶ ཨུཔརི གཏོ’’ཏི. ཨིམིནཱ པཱསཱདཝརསྶ ཨུཔརི ཨུཔརིཔཱསཱདཝརཾ, ཏཾ གཏོ ཨུཔགཏོཏི ཨུཔརིཔཱསཱདཝརགཏོཏི ཝཙནཏྠཾ དསྶེཏི. ཨཡྻཱནནྟི བྷིཀྑཱུནཾ. ‘‘ཀཱརཎཱ’’ཏི ཨིམིནཱ ‘‘ཝཱཧསཱ’’ཏི པདསྶཏྠཾ དསྶེཏི. ཏེཧཱིཏི ཨཡྻེཧི.

༤༩༧. ཨནྟརནྟི ཁཎཾ, ཨོཀཱསཾ ཝཱ ཝིཝརཾ ཝཱ. གྷཱཏེཏུནྟི ཧནིཏུཾ. ཨིཙྪཏཱིཏི ཨིམིནཱ པཏྠདྷཱཏུཡཱ ཡཱཙནཏྠཾ དསྶེཏི. ‘‘རཱཛནྟེཔུརཾ ཧཏྠིསམྨདྡ’’ནྟིཨཱདཱིསུ ཝཙནཏྠོ ཨེཝཾ ཝེདིཏབྦོཏི ཡོཛནཱ. ཧཏྠིསམྨདྡནྟི ཧཏྠིསམྦཱདྷཊྛཱནཾ. ཨསྶེཧི སམྨདྡོ ཨེཏྠཱཏི ཨསྶསམྨདྡོ. རཐེཧི སམྨདྡོ ཨེཏྠཱཏི རཐསམྨདྡོཏི ཝཙནཏྠཾ ཨཏིདིསནྟོ ཨཱཧ ‘‘ཨེསེཝ ནཡོ’’ཏི. ‘‘སམྨཏྟ’’ནྟི པཋམཀྑརེན པཱཋསྶ སམྦཱདྷསྶ ཨཝཱཙཀཏྟཱ ཝུཏྟཾ ‘‘ཏཾ ན གཧེཏབྦ’’ནྟི. ཏཏྠཱཏི པཱཋེ. ‘‘ཧཏྠཱིནཾ སམྨདྡ’’ནྟི ཨིམིནཱ ཨུཏྟརཔདསྶ སམྨདྡནཾ སམྨདྡནྟི བྷཱཝཏྠཾ དསྶེཏི, པུརིམཔདེན ཚཊྛཱིསམཱསཉྩ. པུརིམཔཱཋེ པན ཨུཏྟརཔདསྶ ཨདྷིཀརཎཏྠཉྩ པུབྦཔདེན ཏཏིཡཱསམཱསཉྩ དསྶེཏི. བཱཧིརཏྠསམཱསོཏིཔི ཝུཙྩཏི. པཙྪིམཔཱཋེ ‘‘ཧཏྠིསམྨདྡ’’ནྟིཨཱདིཔདསྶ ¶ ལིངྒཝིཔལླཱསཉྩ ¶ ‘‘ཨཏྠཱི’’ཏི པཱཋསེསེན ཡོཛེཏབྦཏཉྩ དསྶེཏུཾ ཝུཏྟཾ ‘‘ཧཏྠིསམྨདྡོ ཨཏྠཱི’’ཏི. རཛིཏབྦཱནཱིཏི རཛནཱིཡཱནི, རཛིཏུཾ ཨརཧཱནཱིཏི ཨཏྠོ. ཨིམིནཱ སམྦནྡྷཀཱལེ པུརིམཔཱཋེ རཉྙོ ཨནྟེཔུརེཏི ཝིབྷཏྟིཝིཔལླཱསོ ཀཱཏབྦོཏི. པཙྪིམཔཱཋེ པན མུཁྱཏོཝ ཡུཛྫཏི. ཏེན ཝུཏྟཾ ‘‘ཏསྨིཾ ཨནྟེཔུརེ’’ཏི.

༤༩༨. ཨཝསིཏྟསྶཱཏི ཁཏྟིཡཱབྷིསེཀེན ཨབྷིསིཏྟསྶ. ཨིཏོཏི སཡནིགྷརཏོ. ཨིམིནཱ པཉྩམཱིབཱཧིརསམཱསཾ དསྶེཏི. རཉྙོ རཏིཛནནཊྛེན རཏནཾ ཝུཙྩཏི མཧེསཱི. མཧེསཱིཏི ཙ སཱབྷིསེཀཱ དེཝཱི. ནིཔུབྦ གམུདྷཱཏུསྶ ནིཔུབྦཀམུདྷཱཏུཡཱ པརིཡཱཡབྷཱཝཾ དསྶེཏུཾ ཝུཏྟཾ ‘‘ནིགྒཏནྟི ནིཀྑནྟ’’ནྟི. པཋམཾ.

༢. རཏནསིཀྑཱཔདཾ

༥༠༢. དུཏིཡེ པམུསྶིཏྭཱཏི སཏིཝིཔྤཝཱསེན པམུསྶིཏྭཱ. པུཎྞཔཏྟནྟི ཏུཊྛིདཱཡཾ. ཏཉྷི མནོརཐཔུཎྞེན པཏྟབྦབྷཱགཏྟཱ ‘‘པུཎྞཔཏྟ’’ནྟི ཝུཙྩཏི. ཏསྶ སརཱུཔཾ དསྶེཏུཾ ཝུཏྟཾ ‘‘སཏཏོ པཉྩ ཀཧཱཔཎཱ’’ཏི. ཨིདྷ པན ཀཧཱཔཎཱནཾ པཉྩསཏཏྟཱ པཉྩཝཱིསཀཧཱཔཎཱ ཨདྷིཔྤེཏཱ. ཨཱབྷརཎསདྡསྶ ཨལངྐཱརསདྡེན པརིཡཱཡབྷཱཝཾ དསྶེཏུཾ ཝུཏྟཾ ‘‘ཨལངྐཱར’’ནྟི. ‘‘མཧཱལཏཾ ནཱམཱ’’ཏི ཨིམིནཱ ན ཡོ ཝཱ སོ ཝཱ ཨལངྐཱརོ, ཨཐ ཁོ ཝིསེསཱལངྐཱརོཏི དསྶེཏི. མཧནྟཱནི མཱལཱཀམྨལཏཱཀམྨཱནི ཨེཏྠཱཏི མཧཱལཏཱ. ལཏཱགཧཎེན ཧི མཱལཱཔི གཧིཏཱ. ནཝཧི ཀོཊཱིཧི ཨགྒྷཾ ཨིམསྶཱཏི ནཝཀོཊིཨགྒྷནཀཾ, ནཝཀོཊིསངྑཱཏཾ ཨགྒྷཾ ཨརཧཏཱིཏི ཝཱ ནཝཀོཊིཨགྒྷནཀཾ.

༥༠༤. ཨནྟེ སམཱིཔེ ཝསནསཱིལཏྟཱ པརིཙཱརིཀོ ‘‘ཨནྟེཝཱསཱི’’ཏི ཝུཙྩཏཱིཏི ཨཱཧ ‘‘པརིཙཱརིཀོ’’ཏི.

༥༠༦. དྭེ ལེཌྜུཔཱཏཱཏི ཐཱམམཛ྄ཛྷིམསྶ པུརིསསྶ དྭེ ལེཌྜུཔཱཏཱ. སངྒྷ…པེ… ནཝཀམྨཱནཾ ཨཏྠཱཡ ཨུགྒཎྷནྟསྶ ཝཱ ཨུགྒཎྷཱཔེནྟསྶ ཝཱ དུཀྐཊནྟི ¶ ཡོཛནཱ. ཨཝསེསནྟི ཛཱཏརཱུཔརཛཏཏོ ཨཝསེསཾ. མཱཏུཀཎྞཔིལ༹ནྡྷནཏཱལཔཎྞམྤཱིཏི མཱཏུཡཱ ཀཎྞེ པིལ༹ནྡྷིཏཏཱལཔཎྞམྤི, པཊིསཱམེནྟསྶཱཏི སམྦནྡྷོ.

‘‘ཀཔྤིཡབྷཎྜཾ ཧོཏཱི’’ཏི ཨིམིནཱ ཨཀཔྤིཡབྷཎྜཾ ན ཝཊྚཏཱིཏི དསྶེཏི. ཨིདནྟི བྷཎྜཾ. པལིབོདྷོ ¶ ནཱམཱཏི ཨཏྟནོ པལིབོདྷོ ནཱམ. ཚནྡེནཔཱིཏི ཝཌྜྷཀཱིཨཱདཱིནཾ ཚནྡཧེཏུནཱཔི. བྷཡེནཔཱིཏི རཱཛཝལླབྷཱནཾ བྷཡཧེཏུནཱཔི. བལཀྐཱརེནཱཏི ཀརཎཾ ཀཱརོ, བལེན ཀཱརོ བལཀྐཱརོ, ཏེན, བལཀྐཱརོ ཧུཏྭཱ པཱཏེཏྭཱཏི ཨཏྠོ.

ཏཏྠཱཏི མཧཱརཱམེ. ཡཏྠཱཏི ཡསྨིཾ ཋཱནེ, སངྐཱ ཨུཔྤཛྫཏཱིཏི སམྦནྡྷོ. མཧཱཛནསཉྩརཎཊྛཱནེསཱུཏི བཧཱུནཾ ཛནཱནཾ སཉྩརཎསངྑཱཏེསུ ཋཱནེསུ. ནགཧེཏབྦསྶ ཧེཏུཾ དསྶེཏུཾ ཝུཏྟཾ ‘‘པལིབོདྷོ ན ཧོཏཱི’’ཏི. ཡསྨཱ པལིབོདྷོ ན ཧོཏི, ཏསྨཱ ན གཧེཏབྦནྟི ཨདྷིཔྤཱཡོ. ཨེཀོཏི ཨེཀོ བྷིཀྑུ པསྶཏཱིཏི སམྦནྡྷོ. ཨོཀྐམྨཱཏི ཨོཀྐམིཏྭཱ.

རཱུཔསདྡོ བྷཎྜཔརིཡཱཡོཏི ཨཱཧ ‘‘བྷཎྜ’’ནྟི. བྷཎྜཾ རཱུཔཾ ནཱམཱཏི ཡོཛནཱ. བྷཎྜིཀནྟི བྷཎྜེན ནིཡུཏྟཾ པུཊཀཾ. གཎེཏྭཱཏི གཎནཾ ཀཏྭཱ. ནིམིཏྟནྟཱིཏི ཨེཏྠ ཨིཏིསདྡོ ནཱམཔརིཡཱཡོ. ལཉྪནཱདི ནིམིཏྟཾ ནཱམཱཏི ཧི ཡོཛནཱ. ལཉྪནཱདཱིཏི ཨཱདིསདྡེན ནཱིལཔིལོཏིཀཱདཡོ སངྒཎྷཱཏི. ལཱཁཱཡཱཏི ཛཏུནཱ.

པཏིརཱུཔཱ ནཱམ ཨིདྷ ལཛྫིཀུཀྐུཙྩཀཱཏི ཨཱཧ ‘‘ལཛྫིནོ ཀུཀྐུཙྩཀཱ’’ཏི. ཐཱཝརནྟི ཛངྒམཱ ཨཉྙཾ ཐཱཝརཾ. ཨདྡྷུནོཏི ཀཱལསྶ. སམཱདཔེཏྭཱཏི ཨཉྙེ སམཱདཔེཏྭཱ. ཨུདྡིསྶ ཨརིཡཱ ཏིཊྛནྟི, ཨེསཱ ཨརིཡཱན ཡཱཙནཱ’’ཏི (ཛཱ. ༡.༧.༥༩) ཝུཏྟནཡེན ཡཱཙིཏྭཱཏི ཨཏྠོ.

༥༠༧. རཏནསམྨཏནྟི མནུསྶཱནཾ ཨུཔབྷོགཔརིབྷོགནྟི. དུཏིཡཾ.

༣. ཝིཀཱལགཱམཔྤཝིསནསིཀྑཱཔདཾ

༥༠༨. ཏཏིཡེ ¶ ‘‘ཏིརཙྪཱནབྷཱུཏཾ ཀཐ’’ནྟི ཨིམིནཱ ‘‘ཏིརཙྪཱནཀཐ’’ནྟི པདསྶ ཏུལྱནིསྶིཏསམཱསཾ དསྶེཏི. རཱཛཔཊིསཾཡུཏྟནྟི རཱཛཱུཧི པཊིསཾཡུཏྟཾ.

༥༡༢. སམྦཧུལཱ བྷིཀྑཱུཏི སམྦནྡྷོ. ཏསྨིཾ གཱམེཏི ཏསྨིཾ པཋམཔཝིསནགཱམེ. ཏཾ ཀམྨནྟི ཏཾ ཨིཙྪིཏཀམྨཾ. ཨནྟརཱཏི གཱམཝིཧཱརཱནམནྟརེ. བྷུམྨཏྠེ ཙེཏཾ ནིསྶཀྐཝཙནཾ.

ཀུལགྷརེ ཝཱཏི ཉཱཏིཀུལཨུཔཊྛཱཀཀུལགྷརེ ཝཱ. ཏེལབྷིཀྑཱཡ ཝཱཏི ཏེལཡཱཙནཏྠཱཡ ཝཱ. པསྶེཏི ¶ ཨཏྟནོ པསྶེ སམཱིཔེཏི ཝུཏྟཾ ཧོཏི. ཏེནཱཏི གཱམམཛ྄ཛྷམགྒེན. ཨནོཀྐམྨཱཏི ཨནོཀྐམིཏྭཱ, ཨཔཀྐམིཏྭཱཏི ཨཏྠོཏི. ཏཏིཡཾ.

༤. སཱུཙིགྷརསིཀྑཱཔདཾ

༥༡༧. ཙཏུཏྠེ ཀཀཱརསྶ པདཔཱུརཎབྷཱཝཾ དསྶེཏུཾ ཝུཏྟཾ ‘‘བྷེདནམེཝ བྷེདནཀ’’ནྟི. ཨསྶཏྠིཨཏྠེ ཨཔཙྩཡོཏི ཨཱཧ ‘‘ཏཾ ཨསྶ ཨཏྠཱི’’ཏི. ཨསྶཱཏི པཱཙིཏྟིཡསྶ. པཋམཾ སཱུཙིགྷརཾ བྷིནྡིཏྭཱ པཙྪཱ པཱཙིཏྟིཡཾ དེསེཏབྦནྟི ཨཏྠོ. ཨརཎིདྷནུཀེཏི ཨརཎིཡཱ དྷནུཀེ. ཝེདྷཀེཏི ཀཱཡབནྡྷནཝེདྷཀེཏི. ཙཏུཏྠཾ.

༥. མཉྩསིཀྑཱཔདཾ

༥༢༢. པཉྩམེ ཚེདནམེཝ ཚེདནཀཾ, ཏམསྶཏྠཱིཏི ཚེདནཀནྟི ཨཏྠཾ སནྡྷཱཡ ཝུཏྟཾ ‘‘ཝུཏྟནཡམེཝཱ’’ཏི.

ནིཁཎིཏྭཱཏི པམཱཎཱཏིརེཀཾ ནིཁཎིཏྭཱ. ཨུཏྟཱནཾ ཝཱ ཀཏྭཱཏི ཧེཊྛུཔརི པརིཝཏྟནཾ ཝཱ ཀཏྭཱ. ཋཔེཏྭཱཏི ལམྦཎཝསེན ཋཔེཏྭཱཏི. པཉྩམཾ.

༦. ཏཱུལོནདྡྷསིཀྑཱཔདཾ

༥༢༦. ཚཊྛེ ¶ ཨེཏྠཱཏི མཉྩཔཱིཋེ. ཨཝནཧིཏབྦནྟི ཨོནདྡྷཾ, ཏཱུལེན ཨོནདྡྷཾ ཏཱུལོནདྡྷནྟི ཨཏྠོཔི ཡུཛྫཏི. ཏཱུལཾ པཀྑིཔིཏྭཱཏི མཉྩཔཱིཋེ ཙིམིལིཀཾ པཏྠརིཏྭཱ ཏསྶུཔརི ཏཱུལཾ པཀྑིཔིཏྭཱཏི ཨཏྠོཏི. ཚཊྛཾ.

༧. ནིསཱིདནསིཀྑཱཔདཾ

༥༣༡. སཏྟམེ ཀཏྠཱཏི ཀིསྨིཾ ཁནྡྷཀེ, ཀིསྨིཾ ཝཏྠུསྨིཾ ཝཱ. ཧཱིཏི སཙྩཾ. ཏཏྠཱཏི ཙཱིཝརཀྑནྡྷཀེ, པཎཱིཏབྷོཛནཝཏྠུསྨིཾ ཝཱ. ‘‘ཡཐཱ ནཱམཱ’’ཏི ཨིམིནཱ ‘‘སེཡྻཐཱཔཱི’’ཏི པདསྶ ཨཏྠཾ དསྶེཏི, ‘‘པུརཱཎོ ཙམྨཀཱརོ’’ཏི ཨིམིནཱ ‘‘པུརཱཎཱསིཀོཊྛོ’’ཏི པདསྶ. ཙམྨཀཱརོ ཧི ཨསིནཱ ཙམྨཾ ཀུཊཏི ཚིནྡཏཱིཏི ‘‘ཨསིཀོཊྛོ’’ཏི ཝུཙྩཏི. ཝཏྠུཔྤནྣཀཱལམུཔནིདྷཱཡ ཝུཏྟཾ ‘‘པུརཱཎོ’’ཏི ¶ . ཏམེཝཱུཔམཾ པཱཀཊཾ ཀརོནྟོ ཨཱཧ ‘‘ཡཐཱ ཧཱི’’ཏི. ཧཱིཏི ཏཔྤཱཀཊཱིཀརཎཾ, ཏཾ པཱཀཊཾ ཀརིསྶཱམཱིཏི ཧི ཨཏྠོ. ཙམྨཀཱརོ ཀཌྜྷཏཱིཏི སམྦནྡྷོ. ཝིཏྠཏནྟི ཝིསཱལཾ. སོཔཱིཏི ཨུདཱཡཱིཔི. ཏཾ ནིསཱིདནཾ ཀཌྜྷཏཱིཏི ཡོཛནཱ. ཏེནཱཏི ཀཌྜྷནཧེཏུནཱ. ཏནྟི ཨུདཱཡིཾ. སནྠཏསདིསནྟི སནྠཏེན སདིསཾ. ཨེཀསྨིཾ ཨནྟེཏི ཨེཀསྨིཾ ཀོཊྛཱསེ, ཕཱལེཏྭཱཏི སམྦནྡྷོཏི. སཏྟམཾ.

༨. ཀཎྜུཔཊིཙྪཱདིསིཀྑཱཔདཾ

༥༣༧. ཨཊྛམེ ‘‘ཀཏྠཱ’’ཏིཨཱདཱིནི ཝུཏྟནཡཱནེཝ.

༥༣༩. ‘‘ཡསྶཱ’’ཏི པདསྶ ཝིསཡཾ དསྶེཏུཾ ཝུཏྟཾ ‘‘བྷིཀྑུནོ’’ཏི. ‘‘ནཱབྷིཡཱ ཧེཊྛཱ’’ཏི ཨིམིནཱ ནཱབྷིཡཱ ཨདྷོ ཨདྷོནཱབྷཱིཏི ཝཙནཏྠཾ དསྶེཏི, ‘‘ཛཱཎུམཎྜལཱནཾ ཨུཔརཱི’’ཏི ཨིམིནཱ ཛཱཎུམཎྜལཱནཾ ཨུབྦྷ ཨུབྦྷཛཱཎུམཎྜལནྟི. ཨུབྦྷསདྡོ ཧི ཨུཔརིཔརིཡཱཡོ སཏྟམྱནྟནིཔཱཏོ. ཀཎྜུཁཛྫུསདྡཱནཾ ཝེཝཙནཏྟཱ ཝུཏྟཾ ‘‘ཀཎྜཱུཏི ཁཛྫཱུ’’ཏི. ཀཎྜཏི བྷེདནཾ ཀརོཏཱིཏི ཀཎྜུ. ཁཛྫཏི བྱདྷནཾ ཀརོཏཱིཏི ཁཛྫུ. ཀེསུཙི པོཏྠཀེསུ ‘‘ཀཙྪཱུ’’ཏི པཱཋོ ཨཏྠི, སོ ཨཡུཏྟོ.

ལོཧིཏཾ ¶ ཏུཎྜཾ ཨེཏིསྶཱཏི ལོཧིཏཏུཎྜིཀཱ. པིལ༹ཡཏི ཝིབཱདྷཡཏཱིཏི པིལ༹ཀཱ. ཨཱ བྷུསོ ཨསུཙིཾ སཝཏི པགྒྷརཱཔེཏཱིཏི ཨསྶཱཝོཏི ཝཙནཏྠཾ དསྶེནྟོ ཨཱཧ ‘‘ཨསུཙིཔགྒྷརཎ’’ནྟི. ཨརིསཉྩ བྷགནྡརཱ ཙ མདྷུམེཧོ ཙ. ཨཱདིསདྡེན དུནྣཱམཀཱདཡོ སངྒཎྷཱཏི. ཏཏྠ ཨརི ཝིཡ ཨཱིསཏི ཨབྷིབྷཝཏཱིཏི ཨརིསཾ. བྷགཾ ཝུཙྩཏི ཝཙྩམགྒཾ, ཏཾ དརཏི ཕཱལེཏཱིཏི བྷགནྡརཱ, གཱུཐསམཱིཔེ ཛཱཏོ ཝཎཝིསེསོ. མདྷུ ཝིཡ མུཏྟཱདིཾ མིཧཏི སེཙཏཱིཏི མདྷུམེཧོ, སོ ཨཱབཱདྷོ མུཏྟམེཧོ སུཀྐམེཧོ རཏྟམེཧོཏི ཨནེཀཝིདྷོ. ཐུལླསདྡོ མཧནྟཔརིཡཱཡོཏི ཨཱཧ ‘‘མཧཱ’’ཏི. ཨཊྛམཾ.

༩. ཝསྶིཀསཱཊིཀསིཀྑཱཔདཾ

༥༤༢. ནཝམེ ཝསྶེ ཝསྶཀཱལེ ཨདྷིཊྛཱཏབྦཱཏི ཝསྶིཀཱ, ཝསྶིཀཱ ཙ སཱ སཱཊིཀཱ ཙེཏི ཝསྶིཀསཱཊིཀཱཏི. ནཝམཾ.

༡༠. ནནྡཏྠེརསིཀྑཱཔདཾ

༥༤༧. དསམེ ¶ ‘‘ཙཏཱུཧི ཨངྒུལེཧཱི’’ཏི ཨིམིནཱ ཙཏུརོ ཨངྒུལཱ ཙཏུརངྒུལཱཏི ཨསམཱཧཱརདིགུཾ དསྶེཏི. ཨཱུནཀཔྤམཱཎོཏི བྷགཝཏོ ལཱམཀཔམཱཎོ. ཨིམིནཱ ཨོམཀསདྡསྶ ལཱམཀཏྠཾ དསྶེཏཱིཏི དཊྛབྦནྟི. དསམཾ.

རཏནཝགྒོ ནཝམོ.

ཨིཏི སམནྟཔཱསཱདིཀཱཡ ཝིནཡསཾཝཎྞནཱཡ

ཁུདྡཀཝཎྞནཱཡ ཡོཛནཱ སམཏྟཱ.

༦. པཱཊིདེསནཱིཡཀཎྜཾ

༡. པཋམཔཱཊིདེསནཱིཡསིཀྑཱཔད-ཨཏྠཡོཛནཱ

ཁུདྡཀཱནཾ ཨནནྟརཱ པཱཊིདེསནཱིཡཱ ཡེ དྷམྨཱ སངྒཱིཏིཀཱརེཧི ཋཔིཏཱ, ཨིདཱནི ཏེསཾ དྷམྨཱནཾ ཨཡཾ ཝཎྞནཱ བྷཝཏཱིཏི ཡོཛནཱ.

༥༥༢. པཋམཔཱཊིདེསནཱིཡེ ¶ ཏཱཝ ཨཏྠོ ཨེཝཾ ཝེདིཏབྦོཏི ཡོཛནཱ. པཊིཨཱགམནཀཱལེཏི པིཎྜཱཡ ཙརཎཊྛཱནཏོ པཀྐམིཏྭཱ, པཊིནིཝཏྟིཏྭཱ ཝཱ ཨཱགམནཀཱལེ. སབྦེཝཱཏི ཨེཏྠ ནིགྒཧཱིཏལོཔཝསེན སནྡྷི ཧོཏཱིཏི ཨཱཧ ‘‘སབྦམེཝཱ’’ཏི. ‘‘ཀམྤམཱནཱ’’ཏི ཨིམིནཱ པཔུབྦཝིདྷདྷཱཏུཡཱ ཀམྤནཏྠཾ དསྶེཏི. ཨཔེཧཱིཏི ཨེཏྠ ཨཔཔུབྦཨིདྷཱཏུ གཏྱཏྠོཏི ཨཱཧ ‘‘ཨཔགཙྪཱ’’ཏི.

༥༥༣. པཊིདེསེཏབྦཱཀཱརཾ དསྶེཏི ཨནེནཱཏི པཊིདེསེཏབྦཱཀཱརདསྶནཾ. དྭིནྣཾ སདྡཱནཾ པརིཡཱཡབྷཱཝཾ དསྶེཏུཾ ཝུཏྟཾ ‘‘རཐིཀཱཏི རཙྪཱ’’ཏི. རཐསྶ ཧིཏཱ རཐིཀཱ. ཎྱཔཙྩཡེ ཀཏེ ‘‘རཙྪཱ’’ཏི (མོགྒལླཱནེ ༤.༧༢ སུཏྟེ) ཝུཙྩཏི. རཙྪནྟརེན ཨནིབྦིདྡྷཱ རཙྪཱ བྱཱུཧོ ནཱམཱཏི ཨཱཧ ‘‘ཨནིབྦིཛ྄ཛྷིཏྭཱ’’ཏིཨཱདི. བྱཱུཧེཏི སམྤིཎྜེཏི ཛནེ ཨཉྙཏྠ གནྟུམཔདཱནཝསེནཱཏི ¶ བྱཱུཧོ. སིངྒྷཱཊཀཾ ནཱམ མགྒསནྡྷཱིཏི ཨཱཧ ‘‘མགྒསམོདྷཱནཊྛཱན’’ནྟི. སིངྒྷཏི མགྒསམོདྷཱནཾ ཀརོཏི ཨེཏྠཱཏི སིངྒྷཱཊཀཾ. ཨེཏེསཱུཏི རཐིཀཱདཱིསུ. ཨེསེཝ ནཡོཏི དུཀྐཊཔཱཊིདེསནཱིཡེ ཨཏིདིསཏི. ཧཱིཏི སཙྩཾ. ‘‘ཝཙནཏོ’’ཏི པདཾ ‘‘ཝེདིཏབྦོ’’ཏི པདེ ཉཱཔཀཧེཏུ. དདམཱནཱཡ བྷིཀྑུནིཡཱ ཝསེནཱཏི ཡོཛནཱ. ཨེཏྠཱཏི སིཀྑཱཔདེ. ཏསྨཱཏི ཡསྨཱ ཨཔམཱཎཾ, ཏསྨཱ.

ཨིདནྟི ཝཙནཾ ཝུཏྟནྟི སམྦནྡྷོ. སམྦྷིནྣེ ཨེཀརསེ ཀཱལིཀཏྟཡེཏི ཡོཛནཱ.

༥༥༦. ‘‘དཱཔེཏཱི’’ཏི ཧེཏུཏྠཀིརིཡཱཡ ཀཱརིཏཀཏྟུཀཱརིཏཀམྨཱནི དསྶེཏུཾ ཝུཏྟཾ ‘‘ཨཉྙཱཏིཀཱཡ ཨཉྙེན ཀེནཙཱི’’ཏི. ཨཉྙེནཱཏི ཨཏྟནཱ ཨཉྙེན. ‘‘ཏཱཡ ཨེཝ ཝཱ བྷིཀྑུནིཡཱ ཨཉྙེན ཝཱ ཀེནཙཱི’’ཏི པདཱནི ‘‘པཊིགྒཧཱཔེཏྭཱ’’ཏིཔདེ ཀཱརིཏཀམྨཱནཱིཏི. པཋམཾ.

༢. དུཏིཡཔཱཊིདེསནཱིཡསིཀྑཱཔདཾ

༥༥༨. དུཏིཡེ པུརིམསིཀྑཱཔདེན ཨཱཔཏྟི ཨནྟརགྷརཏྟཱཏི ཨདྷིཔྤཱཡོ. ཨིམིནཱ སིཀྑཱཔདེན ཨཱཔཏྟི བྷཝེཡྻ ཝོསཱསམཱནཏྟཱཏི ¶ ཨདྷིཔྤཱཡོ. དེནྟིཡཱ པན ནེཝ ཨིམིནཱ, ན པུརིམེན ཨཱཔཏྟི ཨཉྙསྶ བྷཏྟཏྟཱཏི ཨདྷིཔྤཱཡོཏི. དུཏིཡཾ.

༣. ཏཏིཡཔཱཊིདེསནཱིཡསིཀྑཱཔདཾ

༥༦༢. ཏཏིཡེ ‘‘ཨུབྷཏོ’’ཏི ཨེཏྠ ཀརཎཏྠེ ཏོཏི ཨཱཧ ‘‘དྭཱིཧཱི’’ཏི. ‘‘ཨུབྷཏོཔསནྣ’’ནྟི བྱཱསོཔི སམཱསོཔི ཡུཏྟོཡེཝ, སམཱསེ ཏོཔཙྩཡསྶ ཨལོཔོ ཧོཏི. ‘‘ཨུབྷཏོ’’ཏིཔདསྶ སརཱུཔཾ དསྶེཏུཾ ཝུཏྟཾ ‘‘ཨུཔཱསཀེནཔི ཨུཔཱསིཀཱཡཔཱི’’ཏི. ཀསྨཱ ཨུབྷཏོ པསནྣཾ ཧོཏཱིཏི ཨཱཧ ‘‘ཏསྨིཾ ཀིརཱ’’ཏིཨཱདི. ཡསྨཱ ཏསྨིཾ ཀུལེ…པེ… སོཏཱཔནྣཱཡེཝ ཧོནྟི ཀིར, ཏསྨཱ ‘‘ཨུབྷཏོཔསནྣ’’ནྟི ཝུཏྟཾ ཧོཏི. ‘‘སཙེཔཱི’’ཏི ཨེཏྠ པིསདྡེན ཨསཱིཏིཀོཊིདྷནཏོ ཨདྷིཀམྤི སམྤིཎྜེཏི. ཧཱཡནསྶ ཀཱརཎཾ དསྶེཏི ‘‘ཡསྨཱ’’ཏིཨཱདིནཱ.

༥༦༩. ‘‘གྷརཏོ ནཱིཧརིཏྭཱ’’ཏི ཨེཏྠ ‘‘ནཱིཧརིཏྭཱ’’ཏི པདསྶ ཀམྨཾ དསྶེཏུཾ ཝུཏྟཾ ‘‘ཨཱསནསཱལཾ ¶ ཝཱ ཝིཧཱརཾ ཝཱ’’ཏི. ‘‘ཨཱནེཏྭཱ’’ཏིཨིམིནཱ ནཱིཔུབྦཧརདྷཱཏུཡཱ ཨཏྠཾ དསྶེཏི. དྭཱརེཏི ཨཏྟནོ གེཧདྭཱརེཏི. ཏཏིཡཾ.

༤. ཙཏུཏྠཔཱཊིདེསནཱིཡསིཀྑཱཔདཾ

༥༧༠. ཙཏུཏྠེ ཨཝརུདྡྷསདྡོ པརིརུདྡྷསདྡསྶ པརིཡཱཡོཏི ཨཱཧ ‘‘པརིརུདྡྷཱ ཧོནྟཱི’’ཏི. ཨཱརཉྙཀསྶ སེནཱསནསྶ པརིསམནྟཏོ རུདྡྷཱ ཨཱཝུཏཱ ཧོནྟཱིཏི ཨཏྠོ.

༥༧༣. ‘‘པཉྩནྣ’’ནྟི ནིདྡྷཱརཎེ སཱམིཝཙནབྷཱཝཉྩ ‘‘ཡཾཀིཉྩཱི’’ཏི ནིདྡྷཱརཎཱིཡེན སམྦནྡྷིཏབྦབྷཱཝཉྩ དསྶེཏུཾ ཝུཏྟཾ ‘‘པཉྩསུ སཧདྷམྨིཀེསུ ཡཾ ཀིཉྩཱི’’ཏི. ‘‘པེསེཏྭཱ ཁཱདནཱིཡཾ བྷོཛནཱིཡཾ ཨཱཧརིསྶཱམཱི’’ཏིཨིམིནཱ པཊིསཾཝིདིཏཱཀཱརདསྶནཾ. ‘‘ཨཱརཱམ’’ནྟི སཱམཉྙཏོ ཝུཏྟེཔི ཨཱརཉྙཀསེནཱསནསྶ ¶ ཨཱརཱམོ ཨེཝ ཨདྷིཔྤེཏོཏི ཨཱཧ ‘‘ཨཱརཉྙཀསེནཱསནཱརཱམཉྩཱ’’ཏི. ཏསྶཱཏི ཨཱརཉྙཀསེནཱསནཱརཱམསྶ. ‘‘ཀསྨཱ’’ཏི པུཙྪཱཡ ‘‘པཊིམོཙནཏྠ’’ནྟི ཝིསཛྫནཱཡ སམེཏུཾ སམྤདཱནཏྠེ ནིསྶཀྐཝཙནཾ ཀཱཏབྦཾ. ཀིམཏྠནྟི ཧི ཨཏྠོ. པཊིམོཙནཏྠནྟི ཏདཏྠེ པཙྩཏྟཝཙནཾ. པཊིམོཙནསངྑཱཏཱཡ ཨཏྠཱཡཱཏི ཧི ཨཏྠོ. ཨཏྠསདྡོ ཙ པཡོཛནཝཱཙཀོ. པཡོཛནཱཡཱཏི ཧི ཨཏྠོ. ཨཐ ཝཱ ‘‘པཊིམོཙནཏྠ’’ནྟི ཝིསཛྫནཱཡཾ. ‘‘ཀསྨཱ’’ཏི པུཙྪཱཡ སམེཏུཾ ནིསྶཀྐཏྠེ པཙྩཏྟཝཙནཾ ཀཱཏབྦཾ. པཊིམོཙནསངྑཱཏཱ ཨཏྠཱཏི ཧི ཨཏྠོ. ཨཏྠསདྡོ ཙ ཀཱརཎཝཱཙཀོ. ཀཱརཎཱཏི ཧི ཨཏྠོ. ཨེཝཉྷི པུཙྪཱཝིསཛྫནཱནཾ པུབྦཱཔརསམསངྑཱཏོ ཝིཙཡོ ཧཱརོ པརིཔུཎྞོ ཧོཏཱིཏི དཊྛབྦཾ. ཨམྷཱཀནྟི ཁཱདནཱིཡབྷོཛནཱིཡཔཊིཧརནྟཱནཾ ཨམྷཱཀཾ. ཨམྷེཏི ཙོརསངྑཱཏེ ཨམྷེ.

‘‘ཏསྶཱ’’ཏི པདསྶཏྠཾ དསྶེཏུཾ ཝུཏྟཾ ‘‘ཨེཏིསྶཱ ཡཱགུཡཱ’’ཏི. ཨཉྙཱནིཔཱིཏི པཊིསཾཝིདིཏཀུལཏོ ཨཉྙཱནིཔི ཀུལཱནི. ཏེནཱཏི པཊིསཾཝིདིཏཀུལེན. ཀུརུནྡིཝཱདེ ཡཱགུཡཱ པཊིསཾཝིདིཏཾ ཀཏྭཱ ཡཱགུཾ ཨགྒཧེཏྭཱ པཱུཝཱདཱིནི ཨཱཧརནྟི, ཝཊྚཏཱིཏི ཨདྷིཔྤཱཡོ.

༥༧༥. ཨེཀསྶཱཏི བྷིཀྑུསྶ. ཏསྶཱཏི པཊིསཾཝིདིཏབྷིཀྑུསྶ, ཙཏུནྣཾ ཝཱ པཉྩནྣཾ ཝཱ བྷིཀྑཱུནཾ ཨཏྠཱཡཱཏི ཡོཛནཱ. ཨཉྙེསམྤཱིཏི ཙཏུཔཉྩབྷིཀྑུཏོ ཨཉྙེསམྤི. ཨདྷིཀམེཝཱཏི པརིབྷུཏྟཏོ ཨཏིརེཀམེཝ. ཡཾ པནཱཏི ཁཱདནཱིཡབྷོཛནཱིཡཾ པན, ཡམྤི ཁཱདནཱིཡབྷོཛནཱིཡཾ ཝནཏོ ཨཱཧརིཏྭཱ དེནྟཱིཏི ཡོཛནཱ. ‘‘ཏཏྠཛཱཏཀ’’ནྟི ཨེཏྠ ཏསདྡསྶ ཝིསཡཾ ¶ དསྶེཏུཾ ཝུཏྟཾ ‘‘ཨཱརཱམེ’’ཏི. ཨཉྙེན དིནྣནྟི སམྦནྡྷོ. ནནྟི མཱུལཁཱདནཱིཡཱདིཾ. པཊིསཾཝིདིཏནྟི པཊིཀཙྩེཝ སུཊྛུ ཛཱནཱཔིཏནྟི ཨཏྠོཏི. ཙཏུཏྠཾ.

ཨིཏི སམནྟཔཱསཱདིཀཱཡ ཝིནཡསཾཝཎྞནཱཡ

པཱཊིདེསནཱིཡཝཎྞནཱཡ

ཡོཛནཱ སམཏྟཱ.

༧. སེཁིཡཀཎྜཾ

༡. པརིམཎྜལཝགྒ-ཨཏྠཡོཛནཱ

སིཀྑིཏསིཀྑེན ¶ ཏཱིསུ སིཀྑཱསུ ཙཏཱུཧི མགྒེཧི སིཀྑིཏསིཀྑེན ཏཱདིནཱ ཨཊྛཧི ལོཀདྷམྨེཧི ཨཀམྤིཡཊྛེན ཏཱདིནཱ, ཨིཊྛཱནིཊྛེསུ ཝཱ ཨཝིཀཱརཊྛེན ཏཱདིནཱ བྷགཝཏཱ ཡཱནི སིཀྑཱཔདཱནི ‘‘སེཁིཡཱནཱི’’ཏི བྷཱསིཏཱནི, དཱནི ཏེསམྤི སིཀྑཱཔདཱནཾ ཨཡམྤི ཝཎྞནཱཀྐམོ བྷཝཏཱིཏི ཡོཛནཱ.

༥༧༦. ཏཏྠཱཏི སེཁིཡསིཀྑཱཔདེསུ, ཨཏྠོ ཨེཝཾ ཝེདིཏབྦོཏི ཡོཛནཱ. ‘‘སམནྟཏོ’’ཏིཨིམིནཱ པརིཏྱཱུཔསགྒསྶཏྠཾ དསྶེཏི. ‘‘ནཱབྷིམཎྜལཾ ཛཱཎུམཎྜལ’’ནྟི ཨེཏྠ ཨུདྡྷཾསདྡོ ཙ ཨདྷོསདྡོ ཙ ཨཛ྄ཛྷཱཧརིཏབྦོཏི ཨཱཧ ‘‘ཨུདྡྷ’’ནྟིཨཱདི. ཨཊྛངྒུལམཏྟནྟི བྷཱཝནཔུཾསཀཾ, ནིཝཱསེཏབྦནྟི སམྦནྡྷོ. ཏཏོཏི ཨཊྛངྒུལམཏྟཏོ. ཡཐཱ པཊིཙྪནྣཾ ཧོཏི, ཨེཝཾ ནིཝཱསེནྟསྶཱཏི ཡོཛནཱ. ཏཏྲིདཾ པམཱཎནྟི ཏསྶ ནིཝཱསནསྶ ཨིདཾ པམཱཎཾ. ཏཱདིསསྶཱཏི དཱིགྷཏོ མུཊྛིཔཉྩཀསྶ ཏིརིཡཾ ཨཌྜྷཏེཡྻཧཏྠསྶ ནིཝཱསནསྶ. ཛཱཎུམཎྜལཾ པཊིཙྪཱདནཏྠཾ ཝཊྚཏཱིཏི ཡོཛནཱ. ཏཏྠཱཏི ཙཱིཝརེསུ. ན ཏིཊྛཏཱིཏི ཝིརལ༹ཏྟཱ ན ཏིཊྛཏི. ཏིཊྛཏཱིཏི གྷནཏྟཱ ཏིཊྛཏི.

ནིཝཱསེནྟསྶ ཙཱཏིཨེཏྠ ཙསདྡོ ཨཝདྷཱརཎཏྠོ, ནིཝཱསེནྟསྶེཝཱཏི ཨཏྠོ. ཀེཝལཾ ཨེཝཾ ནིཝཱསེནྟསྶེཝ དུཀྐཊཾ ན ཧོཏི, ཨཐ ཁོ ཏཐཱ ནིཝཱསེནྟསྶཱཔི དུཀྐཊམེཝཱཏི ཡོཛནཱ. ཡེ པན ནིཝཱསནདོསཱཏི སམྦནྡྷོ. ཨཉྙེཏི པུརཏོ ཙ པཙྪཏོ ཙ ཨོལམྦེཏྭཱ ནིཝསནཏོ ཨཉྙེ ¶ . ཏེ སབྦེཏི སབྦེ ཏེ ནིཝཱསནདོསཱ. ཨེཏྠཱཏི ཨིམསྨིཾ ཝིབྷངྒེ. ཏཏྠེཝཱཏི ཁནྡྷཀེཡེཝ.

ཨསཉྩིཙྩ ནིཝཱསེནྟསྶ ཨནཱཔཏྟཱིཏི སམྦནྡྷོ. ཨེསེཝ ནཡོ ‘‘ཨསཏིཡཱ’’ཏི ཨེཏྠཱཔི. ཨཛཱནནྟསྶཱཏི ཨེཏྠ ཨཛཱནནཾ དུཝིདྷཾ ནིཝཱསནཝཏྟསྶ ཨཛཱནནཾ, ཨཱརཱུལ༹ྷོརཱུལ༹ྷབྷཱཝསྶ ཨཛཱནནནྟི. ཏཏྠ ཨཱརཱུལ༹ྷོརཱུལ༹ྷབྷཱཝསྶ ཨཛཱནནཾ སནྡྷཱཡ ཝུཏྟཾ ‘‘ཨཛཱནནྟསྶཱ’’ཏི དསྶེནྟོ ¶ ཨཱཧ ‘‘ཨཛཱནནྟསྶཱཏི ཨེཏྠཱ’’ཏིཨཱདི. ཧཱིཏི སཙྩཾ. ཏསྶཱཏི ནིཝཱསནཝཏྟསྶ. ཨསྶཱཏི བྷིཀྑུནོ. ཏཾ པནཱཏི ཨཱཔཏྟིཏོ ཨམོཀྑནཾ པན. ཏསྨཱཏི ཡསྨཱ ཡུཛྫཏི, ཏསྨཱ. ཡོཏི བྷིཀྑུ. ཀུརུནྡིཡཾ ཝུཏྟནྟི སམྦནྡྷོ. སུཀྑཱ ཛངྒྷཱ ཨིམསྶཱཏི སུཀྑཛངྒྷོ. མཧནྟཾ པིཎྜིཀམཾསཾ ཨིམསྶཱཏི མཧཱཔིཎྜིཀམཾསོ. ཏསྶཱཏི བྷིཀྑུསྶ.

ཝཎོཏི ཨརུ. ཏཉྷི ཝཎཏི གཏྟཝིཙུཎྞནཾ ཀརོཏཱིཏི ཝཎོཏི ཝུཙྩཏི. ཝཱལ༹མིགཱ ཝཱ ཙོརཱ ཝཱཏི ཨེཏྠ ཝཱསདྡོ ཨཝུཏྟསམྤིཎྜནཏྠོ, ཏེན ཨཉྙཱཔི ཨུདཀཙིཀྑལླཱདཡོ ཨཱཔདཱ སངྒཡ྄ཧནྟི.

༥༧༧. ཨིདྷཱཏི ཨིམསྨིཾ ཝིབྷངྒེ, སིཀྑཱཔདེ ཝཱ. ཨུབྷོ ཀཎྞེཏི པུརཏོ ཙ པཙྪཏོ ཙ ནིགྒཏེ དྭེ ཀཎྞེ. ཨཝིསེསེནཱཏི ‘‘ཨནྟརགྷརེ’’ཏི ཙ ‘‘ཨཱརཱམེ’’ཏི ཙ ཝིསེསཾ ཨཀཏྭཱ སཱམཉྙེན. ཝིཧཱརེཔཱིཏི སངྒྷསནྣིཔཱཏབུདྡྷུཔཊྛཱནཐེརུཔཊྛཱནཱདིཀཱལཾ སནྡྷཱཡ ཝུཏྟཾ.

༥༧༨. ཀཱཡེཀདེསེ ཀཱཡསདྡོ ཝཏྟཏཱིཏི ཨཱཧ ‘‘ཛཱཎུམྤི ཨུརམྤཱི’’ཏི. ‘‘ན སཱིསཾ པཱརུཏེནཱ’’ཏིཨིམིནཱ ‘‘སུཔྤཊིཙྪནྣེནཱ’’ཏིཔདསྶ ཨཏིབྱཱཔིཏདོསཾ པཊིཀྑིཔཏི. གཎྛིཀནྟི པཱསོ. སོ ཧི གནྠེཏི བནྡྷཏཱིཏི ཝཱ, གནྠེཏི བནྡྷཏི ཨེཏྠཱཏི ཝཱ ཀཏྭཱ གནྠིཀོཏི ཝུཙྩཏི. ནྠཀཱརསྶ ཝཱཎྛཀཱརེ ཀཏེ གཎྛིཀོ, ཏཾ གཎྛིཀཾ པཊིམུཉྩིཏྭཱ. ཨུབྷོ ཀཎྞེཏི ཙཱིཝརསྶ དྭེ ཀོཎེ. གལཝཱཊཀཏོཏི ཨེཏྠ གལོཏི ཀཎྛོ. སོ ཧི ཁཛྫབྷོཛྫལེཡྻཔེཡྻསངྑཱཏཾ ཙཏུབྦིདྷཾ ཨསནཾ གལཏི པནྣོ ཧུཏྭཱ ཀུཙྪིཡཾ པཏཏི ཨིཏོཏི གལོཏི ཝུཙྩཏི. ཨཱཝཱཊོཡེཝ ཁུདྡཀཊྛེན ཨཱཝཱཊཀོ, ཁུདྡཀཏྠེ ཀོ. གལེ ཋིཏོ ཨཱཝཱཊཀོ གལཝཱཊཀོ. ཨཀཱརཏོ ཧི ཨཱཀཱརསྶ ལོཔོ ‘‘པཔ’’ནྟིཨཱདཱིསུ (ཛཱ. ༡.༡.༢) ཝིཡ. ཨེཏྠ ཧི པཨཱཔནྟི པདཙྪེདོ, ཨཀཱརཏོ ཨཱཀཱརསྶ ཙ ལོཔོ. པཝདྡྷཾ ཨཱཔཾ པཔཾ, མཧནྟཾ ཨུདཀནྟི ཨཏྠོ. སཱིསཾ ཝིཝརིཏྭཱཏི སམྦནྡྷོ.

༥༧༩. ཝཱསཾ ¶ ¶ ཨུཔགཏོཏི ཝཱ ཝཱསེན ཨུཔགཏོཏི ཝཱ ཨཏྠཾ པཊིཀྑིཔནྟོ ཨཱཧ ‘‘ཝཱསཏྠཱཡ ཨུཔགཏསྶཱ’’ཏི.

༥༨༠. ཧཏྠཔཱདེ ཨཀཱིལ༹ནྟོ སུསཾཝུཏོ ནཱམཱཏི དསྶེནྟོ ཨཱཧ ‘‘ཧཏྠཾ ཝཱ པཱདཾ ཝཱ ཨཀཱིལཱ༹པེནྟོ’’ཏི.

༥༨༢. ཨོཀྑིཏྟཙཀྑཱུཏི ཨེཏྠ ཨོསདྡོ ཧེཊྛཱཔརིཡཱཡོཏི ཨཱཧ ‘‘ཧེཊྛཱ ཁིཏྟཙཀྑཱུ’’ཏི. ‘‘ཧུཏྭཱ’’ཏིཨིམིནཱ ཀིརིཡཱཝིསེསནབྷཱཝཾ དསྶེཏི. ཡུགཡུཏྟཀོཏི ཡུགེ ཡུཏྟཀོ. དམིཡིཏྠཱཏི དནྟོ. ཨཱབྷུསོ ཛཱནཱཏི ཀཱརཎཱཀཱརཎནྟི ཨཱཛཱནེཡྻོ. ཨེཏྟཀནྟི ཙཏུཧཏྠཔམཱཎཾ. ཡོ གཙྪཏི, ཨསྶ བྷིཀྑུནོ དུཀྐཊཱ ཨཱཔཏྟི ཧོཏཱིཏི ཡོཛནཱ. ‘‘པརིསྶཡབྷཱཝ’’ནྟི ཙ ‘‘པརིསྶཡཱབྷཱཝ’’ནྟི ཙ དྭེ པཱཋཱ ཡུཛྫནྟིཡེཝ.

༥༨༤. ཨིཏྠམྦྷཱུཏལཀྑཎེཏི ཨིམཾ པཀཱརཾ ཨིཏྠཾ ཙཱིཝརུཀྑིཔནཾ, བྷཝཏི གཙྪཏཱིཏི བྷཱུཏོ, བྷིཀྑུ. ལཀྑཱིཡཏི ཨནེནཱཏི ལཀྑཎཾ, ཙཱིཝརཾ. ཨིཏྠཾ བྷཱུཏོ ཨིཏྠམྦྷཱུཏོ, ཏསྶ ལཀྑཎཾ ཨིཏྠམྦྷཱུཏལཀྑཎཾ, ཏསྨིཾ. ཀརཎཝཙནཾ དཊྛབྦནྟི ཡོཛནཱ. ཨིཏྠམྦྷཱུཏལཀྑཎཾ ནཱམ ཀིརིཡཱཝིསེསནསྶ སབྷཱཝོཏི ཨཱཧ ‘‘ཨེཀཏོ ཝཱ…པེ… ཧུཏྭཱཏི ཨཏྠོ’’ཏི. ཨནྟོཨིནྡཁཱིལཏོཏི གཱམསྶ ཨནྟོཨིནྡཁཱིལཏོཏི. པཋམོ ཝགྒོ.

༢. ཨུཛྫགྒྷིཀཝགྒ-ཨཏྠཡོཛནཱ

༥༨༦. ཨུཙྩཱསདྡཾ ཀཏྭཱ ཛགྒྷནཾ ཧསནཾ ཨུཛྫགྒྷོ, སོཡེཝ ཨུཛྫགྒྷིཀཱ, ཏཱཡ. ཨིཏི ཨིམམཏྠཾ དསྶེནྟོ ཨཱཧ ‘‘མཧཱཧསིཏཾ ཧསནྟོ’’ཏི. ཨེཏྠཱཏི ‘‘ཨུཛྫགྒྷིཀཱཡཱ’’ཏིཔདེ.

༥༨༨. ཀིཏྟཱཝཏཱཏི ཀིཏྟཀེན པམཱཎེན, ཨེཝཾ ནིསིནྣེསུ ཐེརེསཱུཏི སམྦནྡྷོ, ནིདྡྷཱརཎེ ཙེཏཾ བྷུམྨཝཙནཾ. ཝཝཏྠཔེཏཱིཏི ཨིདཉྩཱིདཉྩ ཀཐེཏཱིཏི ཝཝཏྠཔེཏི. ཨེཏྟཱཝཏཱཏི ཨེཏྟཀེན པམཱཎེན.

༥༩༠. ནིཙྩལཾ ཀཏྭཱ ཀཱཡསྶ ཨུཛུཊྛཔནཾ ཀཱཡཔགྒཧོ ནཱམཱཏི ཨཱཧ ‘‘ནིཙྩལཾ ཀཏྭཱ’’ཏིཨཱདི. ཨེསེཝ ནཡོ བཱཧུཔགྒཧསཱིསཔགྒཧེསུཔཱིཏི. དུཏིཡོ ཝགྒོ.

༣. ཁམྦྷཀཏཝགྒ-ཨཏྠཡོཛནཱ

༥༩༦. ཁམྦྷོ ¶ ¶ ཀཏོ ཡེནཱཏི ཁམྦྷཀཏོ. ཁམྦྷོཏི ཙ པཊིབདྡྷོ. ཀཏྠ པཊིབདྡྷོཏི ཨཱཧ ‘‘ཀཊིཡཾ ཧཏྠཾ ཋཔེཏྭཱ’’ཏི. སསཱིསཾ ཨཝགུཎྛཡཏི པརིཝེཋཏཱིཏི ཨོགུཎྛིཏོཏི ཨཱཧ ‘‘སསཱིསཾ པཱརུཏོ’’ཏི.

༦༠༠. ཨུདྡྷཾ ཨེཀཱ ཀོཊི ཨིམིསྶཱ གམནཱཡཱཏི ཨུཀྐུཊིཀཱཏི དསྶེནྟོ ཨཱཧ ‘‘ཨུཀྐུཊིཀཱ ཝུཙྩཏཱི’’ཏིཨཱདི. ཨེཏྠཱཏི ‘‘ཨུཀྐུཊིཀཱཡཱ’’ཏིཔདེ.

༦༠༡. ཧཏྠཔལླཏྠཱིཀདུསྶཔལླཏྠཱིཀེསུ དྭཱིསུ དུསྶཔལླཏྠིཀེ ཨཱཡོགཔལླཏྠཱིཀཱཔི སངྒཧཾ གཙྪཏཱིཏི ཨཱཧ ‘‘ཨཱཡོགཔལླཏྠིཀཱཔི དུསྶཔལླཏྠིཀཱ ཨེཝཱ’’ཏི.

༦༠༢. སཏིཡཱ ཨུཔཊྛཱནཾ སཀྐཙྩནྟི ཨཱཧ ‘‘སཏིཾཨུཔཊྛཔེཏྭཱ’’ཏི.

༦༠༣. པིཎྜཔཱཏཾ དེནྟེཔཱིཏི པིཎྜཔཱཏཾ པཏྟེ པཀྑིཔནྟེཔི. པཏྟེ སཉྙཱ པཏྟསཉྙཱ, སཱ ཨསྶཏྠཱིཏི པཏྟསཉྙཱི. ‘‘ཀཏྭཱ’’ ཏིཨིམིནཱ ཀིརིཡཱཝིསེསནབྷཱཝཾ དསྶེཏི.

༦༠༤. སམསཱུཔཀཾ པིཎྜཔཱཏནྟི ཨེཏྠ སཱུཔཔིཎྜཔཱཏཱནཾ སམཨུཔཌྜྷབྷཱཝཾ ཨཱསངྐཱ བྷཝེཡྻཱཏི ཨཱཧ ‘‘སམསཱུཔཀོ ནཱམཱ’’ཏིཨཱདི. ཡཏྠཱཏི པིཎྜཔཱཏེ. བྷཏྟསྶ ཙཏུཏྠབྷཱགཔམཱཎོ སཱུཔོ ཧོཏི, སོ པིཎྜཔཱཏོ སམསཱུཔཀོ ནཱམཱཏི ཡོཛནཱ. ཨོལོཎཱི ཙ སཱཀསཱུཔེཡྻཉྩ མཙྪརསོ ཙ མཾསརསོ ཙཱཏི དྭནྡོ. ཏཏྠ ཨོལོཎཱིཏི ཨེཀཱ བྱཉྫནཝིཀཏི. སཱཀསཱུཔེཡྻནྟི སཱུཔསྶ ཧིཏཾ སཱུཔེཡྻཾ, སཱཀམེཝ སཱུཔེཡྻཾ སཱཀསཱུཔེཡྻཾ. ཨིམིནཱ སབྦཱཔི སཱཀསཱུཔེཡྻབྱཉྫནཝིཀཏི གཧིཏཱ. མཙྪརསམཾསརསཱདཱིནཱིཏི ཨེཏྠ ཨཱདིསདྡེན ཨཝསེསཱ སབྦཱཔི བྱཉྫནཝིཀཏི སངྒཧིཏཱ. ཏཾ སབྦཾ རསཱནཾ རསོ རསརསོཏི ཀཏྭཱ ‘‘རསརསོ’’ཏི ཝུཙྩཏི.

༦༠༥. སམཔུཎྞཾ སམབྷརིཏནྟི ཝེཝཙནམེཝ. ཐཱུཔཾ ཀཏོ ཐཱུཔཱིཀཏོཏི ཨཏྠཾ དསྶེནྟོ ཨཱཧ ‘‘ཐཱུཔཱིཀཏོ ནཱམཱ’’ཏིཨཱདི.

ཏཏྠཱཏི ¶ ‘‘ཐཱུཔཱིཀཏ’’ནྟིཨཱདིཝཙནེ. ཏེསནྟི ཨབྷཡཏྠེརཏིཔིཊཀཙཱུལ༹ནཱགཏྠེརཱནཾ. ཨིཏི པུཙྪིཾསུ, ཏེསཉྩ ཐེརཱནཾ ཝཱདཾ ཨཱརོཙེསུནྟི ཡོཛནཱ. ཐེརོཏི ཙཱུལ༹སུམནཏྠེརོ. ཨེཏསྶཱཏི ཏིཔིཊཀཙཱུལ༹ནཱགཏྠེརསྶ ¶ . སཏྟཀྑཏྟུནྟི སཏྟ ཝཱརེ. ཀུཏོཏི ཀསྶཱཙརིཡསྶ སནྟིཀཱ. ཏསྨཱཏི ཡསྨཱ ཡཱཝཀཱལིཀེན པརིཙྪིནྣོ, ཏསྨཱ. ཨཱམིསཛཱཏིཀཾ ཡཱགུབྷཏྟཾ ཝཱ ཕལཱཕལཾ ཝཱཏི ཡོཛནཱ. ཏཉྩ ཁོཏི ཏཉྩ སམཏིཏྠིཀཾ. ཨིཏརེན པནཱཏི ནཱདྷིཊྛཱནུཔགེན པཏྟེན པན. ཡཾ པཱུཝཨུཙྪུཁཎྜཕལཱཕལཱདི ཧེཊྛཱ ཨོརོཧཏི, ཏཾ པཱུཝཨུཙྪུཁཎྜཕལཱཕལཱདཱིཏི ཡོཛནཱ. པཱུཝཝཊཾསཀོཏི ཨེཏྠ ཝཊཾསཀོཏི ཨུཏྟཾསོ. སོ ཧི ཨུདྡྷཾ ཏསཱིཡཏེ ཨལངྐརཱིཡཏེཏི ཝཊཾསོཏི ཝུཙྩཏི ཨུཀཱརསྶ ཝཀཱརཾ, ཏཀཱརསྶ ཙ ཊཀཱརཾ ཀཏྭཱ, སོཡེཝ ཝཊཾསཀོ, མུདྡྷནི པིལནྡྷིཏོ ཨེཀོ ཨལངྐཱརཝིསེསོ. པཱུཝམེཝ ཏཾསདིསཏྟཱ པཱུཝཝཊཾསཀོ, ཏཾ. པུཔྥཝཊཾསཀོ ཙ ཏཀྐོལཀཊུཀཕལཱདིཝཊཾསཀོ ཙཱཏི དྭནྡོ, ཏེ.

ཨིདྷཱཏི ཨིམསྨིཾ སིཀྑཱཔདེ. ནནུ སབྦཐཱུཔཱིཀཏེསུ པཊིགྒཧཎསྶ ཨཀཔྤིཡཏྟཱ པརིབྷུཉྫནམྤི ན ཝཊྚཏཱིཏི ཨཱཧ ‘‘སབྦཏྠ པནཱ’’ཏིཨཱདི. ཏཏྠ སབྦཏྠཱཏི སབྦེསུ ཐཱུཔཱིཀཏེསཱུཏི. ཏཏིཡོ ཝགྒོ.

༤. སཀྐཙྩཝགྒ-ཨཏྠཡོཛནཱ

༦༠༨. ཏཏྠ ཏཏྠཱཏི ཏསྨིཾ ཏསྨིཾ ཋཱནེ. ཨོདྷིནྟི ཨཝདྷིཾ མརིཡཱདཾ.

༦༡༠. ཐཱུཔཀཏོཏི ཐཱུཔམེཝ ཐཱུཔཀཾ, ཏཏོ ཐཱུཔཀཏོཏི དསྶེནྟོ ཨཱཧ ‘‘མཏྠཀཏོ’’ཏི.

༦༡༡. མཱགྷཱཏསམཡཱདཱིསཱུཏི ‘‘པཱཎེ མཱ གྷཱཏེཐཱ’’ཏི རཱཛཱནོ བྷེརིཾ ཙརཱཔེནྟི ཨེཏྠཱཏི མཱགྷཱཏོ, སོཡེཝ སམཡོ མཱགྷཱཏསམཡོ. ཨཱདིསདྡེན ཨཉྙཾ པཊིཙྪནྣཀཱརཎཾ གཧེཏབྦཾ.

༦༡༥. ཏེསནྟི མཡཱུརཎྜཀུཀྐུཊཎྜཱནནྟི. ཙཏུཏྠོ ཝགྒོ.

༥. ཀབལ༹ཝགྒ-ཨཏྠཡོཛནཱ

༦༡༧. ‘‘མུཁདྭཱར’’ནྟི ¶ ཀམྨསྶ ‘‘ཨནཱཧཊེ’’ཏི ཙ ‘‘ཝིཝརིསྶཱམཱི’’ཏི ཙ དྭཱིསུ ཀིརིཡཱསུ སམྦནྡྷབྷཱཝཾ དསྶེཏུཾ ཝུཏྟཾ ‘‘ཨནཱཧརིཏེ མུཁདྭཱར’’ནྟི.

༦༡༨. སཀལཾ ཧཏྠནྟི པཉྩངྒུལིཾ སནྡྷཱཡ ཝུཏྟཾ.

༦༡༩. སཀབལེ༹ནཱཏི ¶ ཨེཏྠ ཀབལ༹སདྡེན ཝཙནསྶ ཨཔརིཔུཎྞཀཱརཎཾ སབྦམྤི གཧེཏབྦཾ.

༦༢༠. པིཎྜུཀྑེཔཀནྟིཨཱདཱིསུ ཝིཙྪཏྠེ ཀཔཙྩཡོཏི ཨཱཧ ‘‘པིཎྜཾ ཨུཀྑིཔིཏྭཱ ཨུཀྑིཔིཏྭཱ’’ཏི. ཏྭཱསདྡེན ཀིརིཡཱཝིསེསནབྷཱཝཾ དསྶེཏི.

༦༢༤. ‘‘ཨཝཀིརིཏྭཱ’’ཏི ཨིམིནཱ སིཏྠཱཝཀཱརཀནྟི ཨེཏྠ ཨཝཔུབྦོ ཀིརདྷཱཏུཡེཝ, ན ཀརདྷཱཏཱུཏི དསྶེཏི.

༦༢༦. ‘‘ཙཔུཙཔཱུ’’ཏི ཨེཝཾ སདྡནྟི ‘‘ཙཔུཙཔཱུ’’ཏི ཨེཝཾ ཨནུཀརཎརཝནྟི. པཉྩམོ ཝགྒོ.

༦. སུརུསུརུཝགྒ-ཨཏྠཡོཛནཱ

༦༢༧. ‘‘སུརུསུརཱུ’’ཏི ཨེཝཾ སདྡནྟི ‘‘སུརུསུརཱུ’’ཏི ཨེཝཾ ཨནུཀརཎརཝཾ. དཝནཾ ཀཱིལ༹ནནྟི ཨིམིནཱ ཝཙནཏྠེན པརིཧཱསོ དཝོ ནཱམཱཏི ཨཱཧ ‘‘དཝོཏི པརིཧཱསཝཙན’’ནྟི. ཏནྟི སོ དཝོ. ལིངྒཝིཔལླཱསོ ཧེས. ན ཀཱཏབྦཾ ན ཀཱཏབྦོཏི སམྦནྡྷོ. སིལཀབུདྡྷོཏི སིལཱཡ ཀཏོ, སིལེན ནིཡུཏྟོ ཝཱ བུདྡྷོ. ཨཔཊིབུདྡྷོཏི ཨཔཊིཝིདྡྷོ བུདྡྷོ, པརིཧཱསཝཙནམེཏཾ. གོདྷམྨོཏི གུནྣཾ དྷམྨོ. ཨཛདྷམྨོཏི ཨཛཱནཾ དྷམྨོ. མིགསངྒྷོཏི མིགཱནཾ སངྒྷོ. པསུསངྒྷོཏི པསཱུནཾ སངྒྷོ.

༦༢༨. ‘‘བྷུཉྫནྟེནཱ’’ཏི པདཾ ‘‘ནིལླེཧིཏུ’’ནྟི པདེ བྷཱཝཀཏྟཱ.

༦༣༡. ཨེཝཾནཱམཀེཏི ¶ ‘‘ཀོཀནུད’’ནྟི ཨེཝཾ ནཱམཾ ཨསྶ པཱསཱདསྶཱཏི ཨེཝཾནཱམཀོ, པཱསཱདོ, ཏསྨིཾ. ‘‘པདུམསཎྛཱནོ’’ཏི ཨིམིནཱ པཱསཱདསྶ སདིསཱུཔཙཱརེན ‘‘ཀོཀནུདོ’’ཏི ནཱམལབྷནཾ དསྶེཏི. ཏེནཱཏི པདུམསཎྛཱནཏྟཱ. ཨསྶཱཏི པཱསཱདསྶ. པུགྒལིཀམྤཱིཏི པརཔུགྒལསནྟཀཾ གཧེཏབྦཾ ‘‘ཨཏྟནོ སནྟཀམྤཱི’’ཏི ཨཏྟཔུགྒལསནྟཀསྶ ཝིསུཾ གཡ྄ཧམཱནཏྟཱ. སངྑམྤཱིཏི པཱནཱིཡསངྑམྤི. སརཱཝམྤཱིཏི པཱནཱིཡསརཱཝམྤི. ཐཱལཀམྤཱིཏི པཱནཱིཡཐཱལཀམྤི.

༦༣༢. ‘‘ཨུདྡྷརིཏྭཱ’’ཏི སཱམཉྙཏོ ཝུཏྟཝཙནསྶ ཀམྨཱཔཱདཱནཱནི དསྶེཏུཾ ཝུཏྟཾ ‘‘སིཏྠཱནི ཨུདཀཏོ’’ཏི. བྷིནྡིཏྭཱཏི ཙུཎྞཝིཙུཎྞཱནི ཀཏྭཱ. བཧཱིཏི ཨནྟརགྷརཏོ བཧི.

༦༣༤. སེཏཙྪཏྟནྟི ¶ ཨེཏྠ སེཏསདྡོ པཎྜརཔརིཡཱཡོཏི ཨཱཧ ‘‘པཎྜརཙྪཏྟ’’ནྟི. ཝཏྠཔལིགུཎྛིཏནྟི ཝཏྠེཧི སམནྟཏོ ཝེཋིཏཾ. སེཏཾ ཚཏྟཾ སེཏཙྪཏྟཾ. ཀིལ༹ཉྫེཧི ཀཏཾ ཚཏྟཾ ཀིལ༹ཉྫཙྪཏྟཾ. པཎྞེཧི ཀཏཾ ཚཏྟཾ པཎྞཙྪཏྟཾ. མཎྜལེན བདྡྷཾ མཎྜལབདྡྷཾ. སལཱཀཱཧི བདྡྷཾ སལཱཀབདྡྷཾ. ཏཱནཱིཏི ཏཱིཎི ཚཏྟཱནི. ཧཱིཏི སཙྩཾ. ཡམྤི ཨེཀཔཎྞཙྪཏྟནྟི ཡོཛནཱ. ཨེཏེསཱུཏི ཏཱིསུ ཚཏྟེསུ. ཨསྶཱཏི ཡསྶ ཀསྶཙི གཧཊྛསྶ ཝཱ པབྦཛིཏསྶ ཝཱ. སོཏི ཡོ ཀོཙི གཧཊྛོ ཝཱ པབྦཛིཏོ ཝཱ. ཚཏྟཔཱདུཀཱཡ ཝཱཏི ཚཏྟདཎྜནིཀྑེཔནཱཡ པཱདུཀཱཡ ཝཱ. ཨེཏྠཱཏི ཨིམསྨིཾ སིཀྑཱཔདེ.

༦༣༥. མཛ྄ཛྷིམསྶཱཏི པམཱཎམཛ྄ཛྷིམསྶ. ‘‘ཙཏུཧཏྠཔྤམཱཎོ’’ཏིཨིམིནཱ ཙཏུཧཏྠཏོ ཨཱུནཱཏིརེཀོ དཎྜོ ན དཎྜོ ནཱམཱཏི དསྶེཏི. དཎྜོ པཱཎིམྷི ཨསྶཱཏི ཝཙནཏྠཾ ཨཏིདིསནྟོ ཨཱཧ ‘‘ཝུཏྟནཡེནེཝཱ’’ཏི.

༦༣༦. ‘‘སཏྠཔཱཎིམྷཱི’’ཏི ཨེཏྠ ཨསི ཨེཝ ཨདྷིཔྤེཏོཏི ཨཱཧ ‘‘ཨསི’’ནྟི. ཨསིནྟི ཁགྒཾ.

༦༣༧. ‘‘ཨཱཝུདྷཾ ནཱམ ཙཱཔོ ཀོདཎྜོ’’ཏི པཱལི༹ཡཾ ཝུཏྟཝཙནཾ ཨུཔལཀྑཎམེཝཱཏི དསྶེནྟོ ཨཱཧ ‘‘ཨཱཝུདྷཔཱཎིསྶཱཏི ཨེཏྠཱ’’ཏིཨཱདི. སབྦཱཔི དྷནུཝིཀཏི ཨཱཝུདྷནྟི ཝེདིཏབྦཱཏི ཡོཛནཱ. ཡཐཱ ཨསིཾ ¶ སནྣཧིཏྭཱ ཋིཏོ སཏྠཔཱཎཱིཏི སངྑྱཾ ན གཙྪཏི, ཨེཝཾ དྷནུཾ ཀཎྛེ པཊིམུཀྐོ ཨཱཝུདྷཔཱཎཱིཏི ཨཱཧ ‘‘སཙེ པནཱ’’ཏིཨཱདི, ཨིམིནཱ ཨཱཝུདྷོ པཱཎིནཱ གཧིཏོཡེཝ ཨཱཝུདྷཔཱཎི ནཱམཱཏི དསྶེཏཱིཏི. ཚཊྛོ ཝགྒོ.

༧. པཱདུཀཝགྒ-ཨཏྠཡོཛནཱ

༦༣༨. ཨངྒུལནྟརནྟི པཱདངྒུལཝིཝརཾ. པཱདུཀནྟི ཨུཔཱཧནཝིསེསོ. སོ ཧི པཛྫཏེ ཨིམཱཡཱཏི པཱདུཀཱཏི ཝུཙྩཏི, སཱ བཧུཔཊལཱ ཙམྨམཡཱ ཝཱ ཧོཏི ཀཊྛམཡཱ ཝཱ. པཊིམུཉྩིཏྭཱཏི པཱདུཀཾ པཊིམུཉྩཱིཏྭཱ.

༦༤༠. དྭཱིཧི ཛནེཧི གཧིཏོཏི སམྦནྡྷོ. ཝཾསེནཱཏི ཝེཎུནཱ, ཡཱནེ ནིསིནྣོཏི སམྦནྡྷོ. ཝིསངྑརིཏྭཱཏི ཝིཔཏྟིཾ ཀརིཏྭཱ. དྭེཔཱིཏི དྷམྨཀཐིཀདྷམྨཔཊིགྒཱཧཀསངྑཱཏཱ ཨུབྷོཔི ཛནཱ. ཝཊྚཏཱིཏི དེསེཏུཾ ཝཊྚཏི.

༦༤༡. སཡནགཏསྶཱཏི ¶ སཡནཾ གཏསྶ, སཡནེ ནིཔནྣསྶཱཏི ཨཏྠོ. ནིཔནྣསྶ དེསེཏུཾ ན ཝཊྚཏཱིཏི སམྦནྡྷོ.

༦༤༢. ཏཱིསུ པལླཏྠིཀཱསུ ཡཱཡ ཀཱཡཙི པལླཏྠིཀཱཡ ནིསིནྣསྶ དྷམྨཾ དེསེཏུཾ ན ཝཊྚཏཱིཏི དསྶེནྟོ ཨཱཧ ‘‘པལླཏྠིཀཱཡཱ’’ཏིཨཱདི.

༦༤༣. ཡཐཱ ཝེཋིཡམཱནེ ཀེསནྟོ ན དིསྶཏི, ཨེཝཾ ཝེཋིཏསཱིསསྶཱཏི ཡོཛནཱ.

༦༤༧. ཚཔཀསདྡསྶ ཙ ཙཎྜཱལསདྡསྶ ཙ ཝེཝཙནཏྟཱ ཝུཏྟཾ ‘‘ཙཎྜཱལསྶཱ’’ཏི. ཙཎྜཱལོ ཧི སཾ སུནཁཾ པཙཏཱིཏི ཚཔཀོཏི ཝུཙྩཏི སཀཱརསྶ ཚཀཱརཾ ཀཏྭཱ. ཚཔཀསྶ ཨེསཱ ཚཔཀཱི, ཙཎྜཱལབྷརིཡཱ. ཡཏྲཱཏི ཨེཏྠ ཏྲཔཙྩཡོ པཙྩཏྟེ ཧོཏཱིཏི ཨཱཧ ‘‘ཡོ ཧི ནཱམཱ’’ཏི. ཡོ རཱཛཱ ཨུཙྩེ ཨཱསནེ ནིསཱིདིཏྭཱ མནྟཾ པརིཡཱཔུཎིསྶཏི ནཱམ, ཨཡཾ རཱཛཱ ཡཱཝ ཨཏིཝིཡ ཨདྷམྨིཀོཏི ཝུཏྟཾ ཧོཏི. ‘‘སབྦམིད’’ནྟི ཨཡཾ སདྡོ ལིངྒཝིཔལླཱསོཏི ཨཱཧ ‘‘སབྦོ ཨཡ’’ནྟི ¶ . ‘‘ལོཀོ’’ཏི ཨིམིནཱ ཨིདྷསདྡསྶ ཝིསཡཾ དསྶེཏི. ཙརིམསདྡོ ཨནྟིམཔརིཡཱཡོ. ཨནྟིམོཏི ཙ ལཱམཀོ. ལཱམཀོཏི ཙ ནཱམ ཨིདྷ ཝིཔཏྟཱིཏི ཨཱཧ ‘‘སངྐར’’ནྟི. སངྐརནྟི ཝིཔཏྟིཾ. ‘‘ནིམྨརིཡཱདོ’’ཏི ཨིམིནཱ ‘‘སངྐརཾ གཏོ’’ཏི པདཱནཾ ཨདྷིཔྤཱཡཏྠཾ དསྶེཏི. ཙརིམཾ གཏཾ ཙརིམགཏཾ, སབྦོ ཨཡཾ ལོཀོ ཙརིམགཏོཏི ཨཏྠོ. ཨིདྷ ཙ ཛཱཏཀེ (ཛཱ. ༡.༤.༣༣) ཙ ཀེསུཙི པོཏྠཀེསུ ‘‘ཙམརིཀཏ’’ནྟི པཱཋོ ཨཏྠི, སོ ཨཡུཏྟོཡེཝ. ཏཏྠེཝཱཏི ཨམྦརུཀྑམཱུལེཡེཝ. ཏེསནྟི རཱཛབྲཱཧྨཎཱནཾ.

ཏཏྠཱཏི ཏིསྶཾ གཱཐཱཡཾ. པཱལི༹ཡཱཏི ཨཏྟནོ ཨཱཙཱརཔཀཱསཀགནྠསངྑཱཏཱཡ པཱལི༹ཡཱ. ན པསྶརེཏི ཨེཏྠ རེསདྡོ ཨནྟིསྶ ཀཱརིཡོཏི ཨཱཧ ‘‘ན པསྶནྟཱི’’ཏི. ཡོ ཙཱཡནྟི ཡོ ཙ ཨཡཾ. ཨཡཾསདྡོ པདཱལངྐཱརམཏྟོ, བྲཱཧྨཎོཏི ཨཏྠོ. ཨདྷཱིཡཏཱིཏི ཨཛ྄ཛྷཱཡཏི, སིཀྑཏཱིཏི ཨཏྠོ.

ཏཏོཏི བོདྷིསཏྟེན ཝུཏྟགཱཐཱཏོ པརནྟི སམྦནྡྷོ. ཏསྶཱཏི གཱཐཱཡ. བྷོཏི བོདྷིསཏྟཾ ཨཱམནྟེཏི. ‘‘བྷུཏྟོ’’ཏི པདསྶ ཀམྨཝཱཙཀབྷཱཝམཱཝིཀཱཏུཾ ཝུཏྟཾ ‘‘མཡཱ’’ཏི. ཨསྶཱཏི ཨོདནསྶ. ཨིམིནཱ སུཙི པརིསུདྡྷཾ མཾསཾ སུཙིམཾསཾ, ཏེན ཨུཔསེཙནམསྶཱཏི སུཙིམཾསཱུཔསེཙནོཏི བཱཧིརཏྠསམཱསཾ དསྶེཏི. དྷམྨེཏི ཨཱཙཱརདྷམྨེ. བདྡྷོ ཧུཏྭཱཏི ཐདྡྷོ ཧུཏྭཱ, ཨཡམེཝ ཝཱ པཱཋོ ¶ . ཝཎྞསདྡསྶ སཎྛཱནཱདིཀེ ཨཉྙེ ཨཏྠེ པཊིཀྑིཔིཏུཾ ཝུཏྟཾ ‘‘པསཏྠོ’’ཏི. ཐོམིཏོཏི ཏསྶེཝ ཝེཝཙནཾ.

ཨཐཱཏི ཨནནྟརེ. ནནྟི བྲཱཧྨཎཾ. ཏསྶཱཏི གཱཐཱདྭཡསྶ. བྲཱཧྨཎཱཏི པུརོཧིཏཾ ཨཱལཔཏི. སམྤཏཱིཏི སནྡཱིཊྛིཀེ. ‘‘ཡཱ ཝུཏྟི ཝིནིཔཱཏེན, ཨདྷམྨཙརཎེན ཝཱ’’ཏི པདཱནཾ སམྦནྡྷཾ དསྶེཏུཾ ཝུཏྟཾ ‘‘ནིཔྤཛྫཏཱི’’ཏི.

མཧཱབྲཧྨེཏི ཨེཏྠ བྲཧྨསདྡོ བྲཱཧྨཎཝཱཙཀོཏི ཨཱཧ ‘‘མཧཱབྲཱཧྨཎཱ’’ཏི. ཨཉྙེཔཱིཏི རཱཛབྲཱཧྨཎེཧི ཨཔརེཔི. ‘‘པཙནྟཱི’’ཏི ཝུཏྟེ ¶ ཨཝིནཱབྷཱཝཏོ ‘‘བྷུཉྫནྟཱི’’ཏི ཨཏྠོཔི གཧེཏབྦོཏི ཨཱཧ ‘‘པཙནྟི ཙེཝ བྷུཉྫནྟི ཙཱ’’ཏི. ‘‘ན ཀེཝལ’’ནྟིཨཱདིནཱ ཨཉྙེཔཱིཏི ཨེཏྠ པིསདྡསྶ སམྤིཎྜནཏྠཾ དསྶེཏི, ཏྭཾ ཨཱཙརིསྶསཱིཏི སམྦནྡྷོ. པུན ཏྭནྟི ཏཾ, ཨུཔཡོགཏྠེ ཙེཏཾ པཙྩཏྟཝཙནཾ, ‘‘མཱ བྷིདཱ’’ཏིཨིམིནཱ སམྦནྡྷིཏབྦཾ. ‘‘པཱསཱཎོ’’ཏིཨིམིནཱ ཨསྨསདྡོ པཱསཱཎཔརིཡཱཡོཏི དསྶེཏི. ཏེནཱཏི བྷིནྡནཧེཏུནཱ.

༦༤༨. ཨཏྟནོ ཀངྑཱཋཱནསྶ པུཙྪནཾ སནྡྷཱཡ ཝུཏྟཾ ‘‘ན ཀཐེཏབྦ’’ནྟི.

༦༤༩. སམདྷུརེནཱཏི སམཾ དྷུརེན, སམཾ མུཁེནཱཏི ཨཏྠོ.

༦༥༢. ཡཾ མཱུལཾ ཝཱ ཡཱ སཱཁཱ ཝཱ གཙྪཏཱིཏི ཡོཛནཱ. ཁནྡྷེཏི རུཀྑསྶ ཁནྡྷེ. ནིཀྑམཏཱིཏི ཨུཙྩཱརཔསྶཱཝོ ནིཀྑམཏི. ཏིཎཎྜུཔཀནྟི ཏིཎེན ཀཏཾ, ཏིཎམཡཾ ཝཱ ཨཎྜུཔཀཾ. ཨེཏྠཱཏི ཨུཙྩཱརཔསྶཱཝཁེལེ༹སུ.

༦༥༣. ཨདྷིཔྤེཏཨུདཀཾ དསྶེཏུཾ ཝུཏྟཾ ‘‘པརིབྷོགཨུདཀམེཝཱ’’ཏི. སཏྟམོ ཝགྒོ.

ཨེཏྠཱཏི སེཁིཡེསུ. སཱུཔབྱཉྫནཔཊིཙྪཱདནེཏི སཱུཔབྱཉྫནེ ཨོདནེན པཊིཙྪཱདེཏི. སམཏྟཱ སེཁིཡཱ.

༨. སཏྟཱདྷིཀརཎསམཐ-ཨཏྠཡོཛནཱ

༦༥༥. སངྑྱཾ ¶ པརིཙྪིཛྫཏཱིཏི སངྑྱཱཔརིཙྪེདོ. ཏེསནྟི ཙཏུབྦིདྷཱནམདྷིཀརཎཱནཾ. ཏསྶཱཏི ཏེསཾ ཁནྡྷཀཔརིཝཱརཱནཾ. ཏཏྠེཝཱཏི ཏེསུ ཨེཝ ཁནྡྷཀཔརིཝཱརེསུ. སབྦཏྠཱཏི སབྦེསུ སིཀྑཱཔདེསཱུཏི.

ཨིཏི སམནྟཔཱསཱདིཀཱཡ ཝིནཡསཾཝཎྞནཱཡ

བྷིཀྑུཝིབྷངྒཝཎྞནཱཡ ཡོཛནཱ སམཏྟཱ.

ཛཱདིལཉྪིཏནཱམེན ནེཀཱནཾ ཝཱཙིཏོ མཡཱ.

སཱདྷུཾ མཧཱཝིབྷངྒསྶ, སམཏྟོ ཡོཛནཱནཡོཏི.

བྷིཀྑུནཱིཝིབྷངྒོ

༡. པཱརཱཛིཀཀཎྜཨཏྠཡོཛནཱ

ཨེཝཾ ¶ ¶ བྷིཀྑུཝིབྷངྒསྶ, ཀཏྭཱན ཡོཛནཱནཡཾ;

བྷིཀྑུནཱིནཾ ཝིབྷངྒསྶ, ཀརིསྶཾ ཡོཛནཱནཡཾ.

ཡོཏི ཝིབྷངྒོ. ཝིབྷངྒསྶཱཏི ཝིབྷངྒོ ཨསྶ. ཨསྶཱཏི ཧོཏི. ཏསྶཱཏི བྷིཀྑུནཱིནཾ ཝིབྷངྒསྶ. ཡཏོཏི ཡསྨཱ. ཨཡཾ པནེཏྠ ཡོཛནཱ – བྷིཀྑཱུནཾ ཝིབྷངྒསྶ ཨནནྟརཾ བྷིཀྑུནཱིནཾ ཡོ ཝིབྷངྒོ སངྒཧིཏོ ཨསྶ, ཏསྶ བྷིཀྑུནཱིནཾ ཝིབྷངྒསྶ སཾཝཎྞནཱཀྐམོ པཏྟོ ཡཏོ, ཏཏོ ཏསྶ བྷིཀྑུནཱིནཾ ཝིབྷངྒསྶ ཨཔུབྦཔདཝཎྞནཾ ཀཱཏུཾ ཏཱཝ པཱརཱཛིཀེ ཨཡཾ སཾཝཎྞནཱ ཧོཏཱིཏི. ཨཔུབྦཱནཾ པདཱནཾ ཝཎྞནཱ ཨཔུབྦཔདཝཎྞནཱ, ཏཾ.

༡. པཋམཔཱརཱཛིཀསིཀྑཱཔདཾ

༦༥༦. ‘‘ཏེན…པེ… སཱལ༹ྷོ’’ཏི ཨེཏྠ ‘‘ཨེཏྠཱ’’ཏི པཱཋསེསོ ཡོཛེཏབྦོ. དབྦགུཎཀིརིཡཱཛཱཏིནཱམསངྑཱཏེསུ པཉྩསུ སདྡེསུ སཱལ༹ྷསདྡསྶ ནཱམསདྡབྷཱཝཾ དསྶེཏུཾ ཝུཏྟཾ ‘‘སཱལ༹ྷོཏི ཏསྶ ནཱམ’’ནྟི. མིགཱརམཱཏུཡཱཏི ཝིསཱཁཱཡ. སཱ ཧི མིགཱརསེཊྛིནཱ མཱཏུཊྛཱནེ ཋཔིཏཏྟཱ མིགཱརམཱཏཱ ནཱམ. ནཝཀམྨཾ ཨདྷིཊྛཱཏཱིཏི ནཝཀམྨིཀནྟི དསྶེནྟོ ཨཱཧ ‘‘ནཝཀམྨཱདྷིཊྛཱཡིཀ’’ནྟི. ‘‘པཎྜིཙྩེན སམནྣཱགཏཱ’’ཏིཨིམིནཱ པཎྜཱ ཝུཙྩཏི པཉྙཱ, སཱ སཉྫཱཏཱ ཨིམིསྶཱཏི པཎྜིཏཱཏི ཝཙནཏྠཾ དསྶེཏི. ཝེཡྻཏྟིཀེནཱཏི ཝིསེསེན ཨཉྫཏི པཱཀཊཾ གཙྪཏཱིཏི ཝིཡཏྟོ, པུགྒལོ, ཏསྶ ཨིདཾ ཝེཡྻཏྟིཀཾ, ཉཱཎཾ, ཏེན. ‘‘པཎྜཱ’’ཏི ཝུཏྟཔཉྙཱཡ ‘‘མེདྷཱ’’ཏི ཝུཏྟཔཉྙཱཡ ཝིསེསབྷཱཝཾ དསྶེཏུཾ ཝུཏྟཾ ‘‘པཱལི༹གཧཎེ’’ཏིཨཱདི. ‘‘མེདྷཱ’’ཏི ཧི ཝུཏྟཔཉྙཱ ‘‘པཎྜཱ’’ཏི ཝུཏྟཔཉྙཱཡ ཝིསེསོ ཧོཏི སཏིསཧཱཡཏྟཱ. ཏཏྲུཔཱཡཱཡཱཏི ཨལུཏྟསམཱསོ ¶ ‘‘ཏཏྲམཛ྄ཛྷཏྟཏཱ’’ཏིཨཱདཱིསུ (དྷ. ས. ཨཊྛ. ཡེཝཱཔནཀཝཎྞནཱ) ཝིཡ. ‘‘ཀམྨེསཱུ’’ཏི ཨིམིནཱ ཏསདྡསྶ ཝིསཡཾ དསྶེཏི ¶ . ཀཏྟབྦཀམྨུཔཔརིཀྑཱཡཱཏི ཀཏྟབྦཀམྨེསུ ཝིཙཱརཎཱཡ. ཙསདྡེན ‘‘ཀཏཱཀཏ’’ནྟི པདསྶ དྭནྡཝཱཀྱཾ དསྶེཏི. པརིཝེསནཊྛཱནེཏི པརིབྷུཉྫིཏུཾ ཝིསནྟི པཝིསནྟི ཨེཏྠཱཏི པརིཝེསནཾ, ཏམེཝ ཋཱནཾ པརིཝེསནཊྛཱནཾ, ཏསྨིཾ. ནིཀཱུཊེཏི ཨེཏྠ ཀཱུཊསངྑཱཏསིཁརཝིརཧིཏེ ཨོཀཱསེཏི དསྶེནྟོ ཨཱཧ ‘‘ཀོཎསདིསཾ ཀཏྭཱ དསྶིཏེ གམྦྷཱིརེ’’ཏི. ཝིཏྱཱུཔསགྒོ ཝིཀཱརཝཱཙཀོ, སརསདྡོ སདྡཝཱཙཀོཏི ཨཱཧ ‘‘ཝིཔྤཀཱརསདྡོ’’ཏི. ཙརཏི ཨནེནཱཏི ཙརཎཾ པཱདོ, ཏསྨིཾ ཨུཊྛིཏོ གིལཱནོ ཨེཏིསྶཱཏི ཙརཎགིལཱནཱཏི དསྶེནྟོ ཨཱཧ ‘‘པཱདརོགེན སམནྣཱགཏཱ’’ཏི.

༦༥༧. ‘‘ཏིནྟཱ’’ཏི ཨིམིནཱ ཨཝསྶུཏསདྡོ ཨིདྷ ཀིལིནྣཏྠེ ཨེཝ ཝཏྟཏི, ན ཨཉྙཏྠེཏི དསྶེཏི. ཨསྶཱཏི ‘‘ཨཝསྶུཏཱ’’ཏིཔདསྶ. པདབྷཱཛནེ ཝུཏྟནྟི སམྦནྡྷོ. ཏཏྠཱཏི པདབྷཱཛནེ. ཝཏྠཾ རངྒཛཱཏེན རཏྟཾ ཝིཡ, ཏཐཱ ཀཱཡསཾསགྒརཱགེན སུཊྛུ རཏྟཱཏི ཡོཛནཱ. ‘‘ཨཔེཀྑཱཡ སམནྣཱགཏཱ’’ཏི ཨིམིནཱ ཨཔེཀྑཱ ཨེཏིསྶམཏྠཱིཏི ཨཔེཀྑཝཏཱིཏི ཨཏྠཾ དསྶེཏི. པཊིབདྡྷཾ ཙིཏྟཾ ཨིམིསྶནྟི པཊིབདྡྷཙིཏྟཱཏི དསྶེནྟོ ཨཱཧ ‘‘པཊིབནྡྷིཏྭཱ ཋཔིཏཙིཏྟཱ ཝིཡཱ’’ཏི. དུཏིཡཔདཝིབྷངྒེཔཱིཏི ‘‘ཨཝསྶུཏོ’’ཏི དུཏིཡཔདབྷཱཛནེཔི. པུགྒལསདྡསྶ སཏྟསཱམཉྙཝཱཙཀཏྟཱ པུརིསསདྡེན ཝིསེསེཏི. ཨདྷོཨུབྦྷཨིཏི ནིཔཱཏཱནཾ ཚཊྛིཡཱ སམསིཏབྦབྷཱཝཾ དསྶེཏུཾ ཝུཏྟཾ ‘‘ཨཀྑཀཱནཾ ཨདྷོ’’ཏིཨཱདི. ནནུ ཡཐཱ ཨིདྷ ‘‘ཨཀྑཀཱནཾ ཨདྷོ’’ཏི ཝུཏྟཾ, ཨེཝཾ པདབྷཱཛནེཔི ཝཏྟབྦཾ, ཀསྨཱ ན ཝུཏྟནྟི ཨཱཧ ‘‘པདབྷཱཛནེ’’ཏིཨཱདི. པདཔཊིཔཱཊིཡཱཏི ‘‘ཨདྷོ’’ཏི ཙ ‘‘ཨཀྑཀ’’ནྟི ཙ པདཱནཾ ཨནུཀྐམེན. ཨེཏྠཱཏི ཨདྷཀྑཀཨུབྦྷཛཱཎུམཎྜལེསུ. སཱདྷཱརཎཔཱརཱཛིཀེཧཱིཏི བྷིཀྑུབྷིཀྑུནཱིནཾ སཱདྷཱརཎེཧི པཱརཱཛིཀེཧི. ནཱམམཏྟནྟི ནཱམམེཝ.

༦༥༩. ཨེཝནྟི ཨིམཱཡ པཱལི༹ཡཱ ཝིབྷཛིཏྭཱཏི སམྦནྡྷོ. ཏཏྠཱཏི ‘‘ཨུབྷཏོཨཝསྶུཏེ’’ཏིཨཱདིཝཙནེ. ‘‘ཨུབྷཏོཨཝསྶུཏེ’’ཏི པཱཋོ མཱུལཔཱཋོཡེཝ, ནཱཉྙོཏི དསྶེནྟེན ཝིསེསམཀཏྭཱ ‘‘ཨུབྷཏོཨཝསྶུཏེཏི ཨུབྷཏོ ཨཝསྶུཏེ’’ཏི ཝུཏྟཾ. ཨུབྷཏོཏི ཨེཏྠ ¶ ཨུབྷསརཱུཔཉྩ ཏོསདྡསྶ ཚཊྛྱཏྠེ པཝཏྟིཉྩ དསྶེཏུཾ ཝུཏྟཾ ‘‘བྷིཀྑུནིཡཱ ཙེཝ པུརིསསྶ ཙཱ’’ཏི. ཏཏྠ བྷིཀྑུནཱིཔུརིསསདྡེཧི ཨུབྷསརཱུཔཾ དསྶེཏི. ‘‘ཡཱ’’ཏི ཙ ‘‘ས’’ཨིཏི ཙ དྭཱིཧི སདྡེཧི ཏོཔཙྩཡསྶ ཚཊྛྱཏྠཾ, ཨུབྷིནྣཾ ཨཝསྶུཏབྷཱཝེ སཏཱིཏི ཨཏྠོ. བྷཱཝཔཙྩཡེན ཝིནཱ བྷཱཝཏྠོ ཉཱཏབྦོཏི ཨཱཧ ‘‘ཨཝསྶུཏབྷཱཝེ’’ཏི. ཡཐཱཔརིཙྪིནྣེནཱཏི ‘‘ཨདྷཀྑཀཾ, ཨུབྦྷཛཱཎུམཎྜལ’’ནྟི ¶ ཡེན ཡེན པརིཙྪིནྣེན. ཨཏྟནོཏི བྷིཀྑུནིཡཱ. ཏསྶ ཝཱཏི པུརིསསྶ ཝཱ. ཨིདྷཱཔཱིཏི ཀཱཡཔཊིབདྡྷེན ཀཱཡཱམསནེཔི.

ཏཏྲཱཏི ཏེསུ བྷིཀྑུབྷིཀྑུནཱིསུ. ན ཀཱརེཏབྦོ ‘‘ཀཱཡསཾསགྒཾ སཱདིཡེཡྻཱ’’ཏི ཨཝུཏྟཏྟཱཏི ཨདྷིཔྤཱཡོ. ཨཙོཔཡམཱནཱཔཱིཏི ཨཙཱལཡམཱནཱཔི, པིསདྡོ སམྦྷཱཝནཏྠོ, ཏེན ཙོཔཡམཱནཱ པགེཝཱཏི དསྶེཏི. ཨེཝཾ པན སཏཱིཏི ཙིཏྟེནེཝ ཨདྷིཝཱསཡམཱནཱཡ སཏི པན. ཀིརིཡསམུཊྛཱནཏཱཏི ཨིམསྶ སིཀྑཱཔདསྶ ཀིརིཡསམུཊྛཱནབྷཱཝོ. ཏབྦཧུལནཡེནཱཏི ‘‘ཝནཙརཀོ (མ. ནི. ཨཊྛ. ༢.༢༠༡; ༣.༡༣༣), སངྒཱམཱཝཙརོ’’ཏིཨཱདཱིསུ (མ. ནི. ༢.༡༠༨) ཝིཡ ཏསྶཾ ཀིརིཡཱཡཾ བཧུལཏོ སམུཊྛཱནནཡེན. སཱཏི ཀིརིཡསམུཊྛཱནཏཱ.

༦༦༠. ཨེཏྠཱཏི ཨུབྦྷཀྑཀཨདྷོཛཱཎུམཎྜལེསུ.

༦༦༢. ‘‘ཨེཀཏོ ཨཝསྶུཏེ’’ཏི ཨེཏྠཱཔི ཏོཔཙྩཡོ ཚཊྛྱཏྠེ ཧོཏི. སཱམཉྙཝཙནསྶཱཔི ཝིསེསེ ཨཝཊྛཱནཏོ, ཝིསེསཏྠིནཱ ཙ ཝིསེསསྶ ཨནུཔཡོཛིཏབྦཏོ ཨཱཧ ‘‘བྷིཀྑུནིཡཱ ཨེཝཱ’’ཏི. ཏཏྲཱཏི ‘‘ཨེཀཏོ ཨཝསྶུཏེ’’ཏིཨཱདིཝཙནེ. ‘‘ཏཐེཝཱ’’ཏིཨིམིནཱ ཀཱཡསཾསགྒརཱགེན ཨཝསྶུཏོཏི ཨཏྠཾ ཨཏིདིསཏི. ཙཏཱུསཱུཏི མེཐུནརཱག ཀཱཡསཾསགྒརཱགགེཧསིཏཔེམ སུདྡྷཙིཏྟསངྑཱཏེསུ ཙཏཱུསུ. ཡཏྠཱཏི ཡསྨིཾ ཋཱནེ.

༦༦༣. ཨཡཾ པུརིསོ ཨིཏི ཝཱ ཨིཏྠཱི ཨིཏི ཝཱ ཨཛཱནནྟིཡཱ ཝཱཏི ཡོཛནཱཏི. པཋམཾ.

༢. དུཏིཡཔཱརཱཛིཀསིཀྑཱཔདཾ

༦༦༤. དུཏིཡེ ¶ ཀཙྩི ནོ སཱཏི ཨེཏྠ ནོསདྡོ ནུསདྡཏྠོཏི ཨཱཧ ‘‘ཀཙྩི ནུ སཱ’’ཏི. པརིཝཱརཝིཔཏྟཱིཏི པརིཛནསྶ ཝིནཱསནཾ. ‘‘ཨཀིཏྟཱི’’ཏི ཨེཏྠ སམྨུཁཱ ནིནྡཾ གཧེཏྭཱ ‘‘ཨཡསོ’’ཏིཨིམིནཱ པརམྨུཁཱ ནིནྡཱ གཧེཏབྦཱཏི དསྶེཏུཾ ཝུཏྟཾ ‘‘པརམྨུཁགརཧཱ ཝཱ’’ཏི.

༦༦༦. ‘‘ཡཱ པཱརཱཛིཀཾ ཨཱཔནྣཱ’’ཏིཨིམིནཱ ‘‘སཱ ཝཱ’’ཏི ཨེཏྠ ཏསདྡསྶ ཝིསཡཾ དསྶེཏི. ཙཏུནྣནྟི ནིདྡྷཱརཎཏྠེ ཙེཏཾ སཱམིཝཙནཾ, ཙཏཱུསཱུཏི ཨཏྠོ. པཙྪཱཏི སབྦཔཱརཱཛིཀཱནཾ པཙྪཱ. ཨིམསྨིཾ ཨོཀཱསེཏི པཋམཏཏིཡཔཱརཱཛིཀཱནམནྟརེ ཋཱནེ. ཋཔིཏནྟི སངྒཱིཏིཀཱརེཧི ནིཀྑིཏྟཾ. ཨེཏྠཱཏི ཨིམསྨིཾ སིཀྑཱཔདེ. ཏཏྲཱཏི དུཊྛུལླསིཀྑཱཔདེཏི. དུཏིཡཾ.

༣. ཏཏིཡཔཱརཱཛིཀསིཀྑཱཔདཾ

༦༦༩. ཏཏིཡེ ¶ ཨསྶཱཏི ‘‘དྷམྨེན ཝིནཡེནཱ’’ཏི པདསྶ. པདབྷཱཛནཾ ཝུཏྟནྟི སམྦནྡྷོ. ཉཏྟིསམྤདཱ ཙེཝ ཨནུསཱཝནསམྤདཱ ཙ སཏྠུསཱསནཾ ནཱམཱཏི དསྶེནྟོ ཨཱཧ ‘‘ཉཏྟི…པེ… སམྤདཱཡ ཙཱ’’ཏི. སཏྠུསཱསནེནཱཏི ཙ སཏྠུ ཨཱཎཱཡ. ཀམྨནྟི ཨུཀྑེཔནཱིཡཀམྨཾ. ཏཏྠཱཏི སངྒྷེ. ‘‘ཝཙནཾ ནཱདིཡཏཱི’’ཏིཨཱདཱིསུ ཝིཡ སངྒྷཾ ཝཱ ནཱདིཡཏཱིཏི ཨེཏྠ ནཱདིཡནཾ ནཱམ ནཱནུཝཏྟནམེཝཱཏི ཨཱཧ ‘‘ནཱནུཝཏྟཏཱི’’ཏི. ཏཏྠཱཏི སངྒྷཱདཱིསུ. ཨཡཾ ཏཱཝ སཾཝཱསོཏི སཧ བྷིཀྑཱུ ཝསནྟི ཨེཏྠཱཏི སཾཝཱསོཏི ཨཏྠེན ཨཡཾ ཨེཀཀམྨཱདི སཾཝཱསོ ནཱམ. ‘‘སཧ ཨཡནབྷཱཝེནཱ’’ཏིཨིམིནཱ སཧ ཨཡནྟི པཝཏྟནྟཱིཏི སཧཱཡཱཏི ཝཙནཏྠཾ དསྶེཏི. ཏེཏི བྷིཀྑཱུ. ཡེཧི ཙཱཏི བྷིཀྑཱུཧི ཙ. ཏསྶཱཏི ཨུཀྑིཏྟཀསྶ. ཏེནཱཏི ཨུཀྑིཏྟཀེན. ཨཏྟནོཏི ཨུཀྑིཏྟཀསྶཱཏི. ཏཏིཡཾ.

༤. ཙཏུཏྠཔཱརཱཛིཀསིཀྑཱཔདཾ

༦༧༥. ཙཏུཏྠེ མེཐུནརཱགེན ཨཝསྶུཏཱ ནཱདྷིཔྤེཏཱ, ཀཱཡསཾསགྒརཱགེན ཨཝསྶུཏཱཝཱདྷིཔྤེཏཱཏི ཨཱཧ ‘‘ཀཱཡསཾསགྒརཱགེན ཨཝསྶུཏཱ’’ཏི ¶ . ‘‘པུརིསཔུགྒལསྶཱ’’ཏིཔདཾ ན ཧཏྠསདྡེན སམྦནྡྷིཏབྦཾ, གཧཎསདྡེནེཝ སམྦནྡྷིཏབྦནྟི དསྶེནྟོ ཨཱཧ ‘‘ཡཾ པུརིསཔུགྒལེནཱ’’ཏིཨཱདི. ཏནྟི གཧཎཾ, ‘‘ཧཏྠགྒཧཎ’’ནྟི ཝུཏྟཝཙནཾ ཨུཔལཀྑཎམཏྟམེཝཱཏི ཨཱཧ ‘‘ཨཉྙམྤཱི’’ཏིཨཱདི. ཏཏྠ ‘‘ཨཉྙམྤཱི’’ཏི ཧཏྠགཧཎཏོ ཨིཏརམྤི. ཨཔཱརཱཛིཀཀྑེཏྟེཏི ཨུབྦྷཀྑཀེ ཨདྷོཛཱཎུམཎྜལེ. ཨསྶཱཏི ‘‘ཧཏྠགྒཧཎ’’ནྟིཔདསྶ. ཨེཏྠཱཏི ‘‘ཨསདྡྷམྨསྶ པཊིསེཝནཏྠཱཡཱ’’ཏིཔདེ. ཀཱཡསཾསགྒོཏི ཀཱཡསཾསགྒོ ཨེཝ. ཏེན ཝུཏྟཾ ‘‘ན མེཐུནདྷམྨོ’’ཏི. ཧཱིཏི སཙྩཾ, ཡསྨཱ ཝཱ. ཨེཏྠཱཏི ཀཱཡསཾསགྒགཧཎེ. སཱདྷཀནྟི ཉཱཔཀཾ.

ཏིསྶིཏྠིཡོཏི བྷུམྨཏྠེ ཙེཏཾ ཨུཔཡོགཝཙནཾ. ཏཱིསུ ཨིཏྠཱིསཱུཏི ཧི ཨཏྠོ, ཏིསྶོ ཨིཏྠིཡོ ཨུཔགནྟྭཱཏི ཝཱ ཡོཛེཏབྦོ. ཨེསེཝ ནཡོ པརཏོཔི. ཡཾ མེཐུནཾ ཨཏྠི, ཏཾ ན སེཝེཏི ཡོཛནཱ. ན སེཝེཏི ཙ ན སེཝཏི. ཏིཀཱརསྶ ཧི ཨེཀཱརོ. ཏཡོ པུརིསེཏི ཏཱིསུ པུརིསེསུ, ཏེ ཝཱ ཨུཔགནྟྭཱ. ཏཡོ ཙ ཨནརིཡཔཎྜཀེཏི ཏཱིསུ ཨནརིཡསངྑཱཏེསུ ཨུབྷཏོབྱཉྫནཀེསུ ཙ པཎྜཀེསུ ཙ, ཏེ ཝཱ ཨུཔགནྟྭཱཏི ཡོཛནཱ. ན ཙཱཙརེ མེཐུནཾ བྱཉྫནསྨིནྟི ཨཏྟནོ ནིམིཏྟསྨིཾ མེཐུནཾ ན ཙ ཨཱཙརཏི. ཨིདཾ ཨནུལོམཔཱརཱཛིཀཾ སནྡྷཱཡ ཝུཏྟཾ. ཚེཛྫཾ སིཡཱ མེཐུནདྷམྨཔཙྩཡཱཏི ¶ མེཐུནདྷམྨཀཱརཎཱ ཚེཛྫཾ སིཡཱ, པཱརཱཛིཀཾ བྷཝེཡྻཱཏི ཨཏྠོ. ཀུསལེཧཱིཏི པཉྷཱཝིསཛྫནེ ཚེཀེཧི, ཚེཀཀཱམེཧི ཝཱ. ཨཡཾ པཉྷོ ཨཊྛཝཏྠུཀཾ སནྡྷཱཡ ཝུཏྟོ.

པཉྷཱཝིསཛྫནཏྠཱཡ ཙིནྟེནྟཱནཾ སེདམོཙནཀཱརཎཏྟཱ ‘‘སེདམོཙནགཱཐཱ’’ཏི ཝུཏྟཱ. ཝིརུཛ྄ཛྷཏཱིཏི ‘‘ན མེཐུནདྷམྨོ’’ཏི ཝཙནེན ‘‘ཚེཛྫཾ སིཡཱ མེཐུནདྷམྨཔཙྩཡཱ’’ཏི ཝཙནཾ ཝིརུཛ྄ཛྷཏི, ན སམེཏཱིཏི ཨཏྠོ. ཨིཏི ཙེ ཝདེཡྻ, ན ཝིརུཛ྄ཛྷཏི. ཀསྨཱ? མེཐུནདྷམྨསྶ པུབྦབྷཱགཏྟཱཏི ཡོཛནཱ. ཨིམིནཱ མེཐུནདྷམྨསྶ པུབྦབྷཱགབྷཱུཏོ ཀཱཡསཾསགྒོཝ ཨུཔཙཱརེན ཏཏྠ མེཐུནདྷམྨསདྡེན ཝུཏྟོ, ན དྭཡཾདྭཡསམཱཔཏྟཱིཏི དཱིཔེཏི. ཧིསདྡོ ཝིཏྠཱརཛོཏཀོ. པརིཝཱརེཡེཝ ཝུཏྟཱནཱིཏི སམྦནྡྷོ. ཝཎྞཱཝཎྞོཏི སུཀྐཝིསཊྛི. དྷནམནུཔྤཱདཱནནྟི སཉྩརིཏྟཾ ¶ . ‘‘ཨིམིནཱ པརིཡཱཡེནཱ’’ཏི ཨིམིནཱ ལེསེན སམཱིཔཱུཔཙཱརེནཱཏི ཨཏྠོ. ཨེཏེནུཔཱཡེནཱཏི ‘‘ཧཏྠགྒཧཎཾ སཱདིཡེཡྻཱ’’ཏིཔདེ ཝུཏྟཨུཔཱཡེན. སབྦཔདེསཱུཏི སབྦེསུ ‘‘སངྒྷཱཊིཀཎྞགྒཧཎཾ སཱདིཡེཡྻཱ’’ཏིཨཱདཱིསུ པདེསུ. ཨཔི ཙཱཏི ཨེཀཾསེན, ཝིསེསཾ ཝཀྑཱམཱིཏི ཨདྷིཔྤཱཡོ. ‘‘ཨེཝཾནཱམཀཾ ཋཱན’’ནྟི ཨིམིནཱ ‘‘ཨིཏྠཾནཱམཾ ཨིམསྶ ཋཱནསྶཱ’’ཏི ཝཙནཏྠཾ དཱིཔེཏི.

༦༧༦. ཨེཀནྟརིཀཱཡ ཝཱཏི ཨེཏྠ ཝཱསདྡེན དྭནྟརིཀཱདཱིནིཔི སངྒཡ྄ཧནྟི. ཡེན ཏེནཱཏི ཡེན ཝཱ ཏེན ཝཱ. དྭིཏིཙཏུཔྤཉྩཚཝཏྠཱུནི པེཡྻཱལཝསེན ཝཱ ཝཱསདྡེན ཝཱ གཧེཏབྦཱནི. ཨཔི ཙཱཏི ཀིཉྩ བྷིཡྻོ, ཝཏྟབྦཝིསེསཾ ཝཀྑཱམཱིཏི ཨདྷིཔྤཱཡོ. ཨེཏྠཱཏི ‘‘ཨཱཔཏྟིཡོ དེསེཏྭཱ’’ཏི ཝཙནེ. ཧཱིཏི སཙྩཾ. ཝུཏྟནྟི པརིཝཱརེ ཝུཏྟཾ. ཏཏྲཱཏི པུརིམཝཙནཱཔེཀྑཾ. དེསིཏཱ ཨཱཔཏྟི གཎནཱུཔིཀཱཏི ཡོཛནཱ. ཨེཀཾ ཝཏྠུཾ ཨཱཔནྣཱ ཡཱ བྷིཀྑུནཱིཏི ཡོཛནཱ. དྷུརནིཀྑེཔཾ ཀཏྭཱཏི ‘‘ཨིམཉྩ ཝཏྠུཾ, ཨཉྙམྤི ཙ ཝཏྠུཾ ནཱཔཛྫིསྶཱམཱི’’ཏི དྷུརནིཀྑེཔཾ ཀཏྭཱ. ཡཱ པན སཨུསྶཱཧཱཝ དེསེཏཱིཏི ཡོཛནཱཏི. ཙཏུཏྠཾ.

སཱདྷཱརཎཱཏི བྷིཀྑུནཱིཧི སཱདྷཱརཎཱ. ཨེཏྠཱཏི ‘‘ཨུདྡིཊྛཱ ཁོ ཨཡྻཱཡོ’’ཏིཨཱདིཝཙནེ.

ཨིཏི སམནྟཔཱསཱདིཀཱཡ ཝིནཡསཾཝཎྞནཱཡ

བྷིཀྑུནིཝིབྷངྒེ པཱརཱཛིཀཀཎྜཝཎྞནཱཡ ཡོཛནཱ སམཏྟཱ.

༢. སངྒྷཱདིསེསཀཎྜཾ

༡. པཋམསངྒྷཱདིསེསསིཀྑཱཔད-ཨཏྠཡོཛནཱ

པཱརཱཛིཀཱནནྟརསྶཱཏི ¶ པཱརཱཛིཀཱནཾ ཨནནྟརེ ཋཔིཏསྶ, སངྒཱིཏསྶ ཝཱ, སངྒྷཱདིསེསཀཎྜསྶཱཏི སམྦནྡྷོ. ཨཡཾ ཨཱིདིསཱ ཨནུཏྟཱནཏྠཝཎྞནཱ ཨནུཏྟཱནཱནཾ པདཱནཾ ཨཏྠསྶ ཝཎྞནཱ དཱནི ཨིམསྨིཾཀཱལེ བྷཝིསྶཏཱིཏི ཡོཛནཱ.

༦༧༨. པཋམེ ¶ ཨུདཀཾ ཝསིཏཾ ཨཙྪཱདནཾ ཨནེན ཀཏནྟི ཨུདོསིཏོཏི ཝཙནཏྠེན བྷཎྜསཱལཱ ཨུདོསིཏཾ ནཱམཱཏི དསྶེནྟོ ཨཱཧ ‘‘ཨུདོསིཏནྟི བྷཎྜསཱལཱ’’ཏི. ཨེཏྠ ཧི ཨུདསདྡོ ཨུདཀཔརིཡཱཡོ. སཾཡོགོ ན ཡུཏྟོཡེཝ. བྷཎྜསཱལཱཏི ཡཱནཱདཱིནཾ བྷཎྜཱནཾ ཋཔནསཱལཱ. ཨཙྩཱཝདཐཱཏི ཨེཏྠ ཨཏཱིཏྱཱུཔསགྒོ ཨཏིཀྐམནཏྠོ, ཨཱཏྱཱུཔསགྒོ དྷཱཏྭཏྠཱནུཝཏྟཀོཏི ཨཱཧ ‘‘ཨཏིཀྐམིཏྭཱ ཝདཐཱ’’ཏི.

༦༧༩. ཨུསྶཡཝསེན ཝདནཾ ཨུསྶཡཝཱདོ, སོཡེཝ ཨུསྶཡཝཱདིཀཱཏི དསྶེནྟོ ཨཱཧ ‘‘ཨུསྶཡཝཱདིཀཱ’’ཏིཨཱདི. ‘‘མཱནུསྶཡཝསེན ཀོདྷུསྶཡཝསེནཱ’’ཏི ཨིམིནཱ ཨུསྶཡབྷེདཾ དསྶེཏི. སཱཏི ཨུསྶཡཝཱདིཀཱ. ཨཏྠཏོཏི སརཱུཔཏོ. ཨེཏྠཱཏི པདབྷཱཛནེ. ཨཌྜནཾ ཨབྷིཡུཉྫནཾ ཨཌྜོཏི ཀཏྭཱ དྭིནྣཾ ཛནཱནཾ ཨཌྜོ ཝོཧཱརིཀཱནཾ ཝིནིཙྪཡཀཱརཎཾ ཧོཏི, ཏསྨཱ ཝུཏྟཾ ‘‘ཨཌྜོཏི ཝོཧཱརིཀཝིནིཙྪཡོ ཝུཙྩཏཱི’’ཏི, མུདྡྷཛཏཏིཡཀྑརོཡེཝ. ཡནྟི ཨཌྜཾ. ཡཏྠཱཏི ཡསྨིཾ ཀིསྨིཾཙི ཋཱནེ. དྭིནྣཾ ཨཌྜཀཱརཀཱནཾ ཝོཧཱརཾ ཛཱནནྟཱིཏི ཝོཧཱརིཀཱ, ཨཀྑདསྶཱ, ཏེསཾ. དྭཱིསུ ཛནེསཱུཏི ཨཌྜཀཱརཀེསུ ཛནེསུ དྭཱིསུ. ཡོ ཀོཙཱིཏི ཨཌྜཀཱརཀོ ཝཱ ཨཉྙོ ཝཱ ཡོ ཀོཙི.

ཨེཏྠཱཏི ‘‘ཨེཀསྶ ཨཱརོཙེཏཱི’’ཏིཨཱདིཝཙནེ. ཡཏྠ ཀཏྠཙཱིཏི ཡཾཀིཉྩི ཋཱནཾ ཨཱགཏེཔཱིཏི སམྦནྡྷོ. ཨཐཱཏི པཙྪཱ. སཱཏི བྷིཀྑུནཱི. སོཏི ཨུཔཱསཀོ.

‘‘ཀཔྤིཡཀཱརཀེནཱ’’ཏིཔདཾ ‘‘ཀཐཱཔེཏཱི’’ཏིཔདེ ཀཱརིཏཀམྨཾ. ཏཏྠཱཏི ཀཔྤིཡཀཱརཀཨིཏརེསུ ¶ . ཝོཧཱརིཀེཧི ཀཏེཏི སམྦནྡྷོ. གཏིགཏནྟི ཙིརཀཱལཔཏྟཾ. སུཏཔུབྦནྟི པུབྦེ སུཏཾ. ཨཐཱཏི སུཏཔུབྦཏྟཱ ཨེཝ. ཏེཏི ཝོཧཱརིཀཱ, དེནྟཱིཏི སམྦནྡྷོ.

པཋམནྟི སམནུབྷཱསནཏོ པུབྦཾ. ཨཱཔཏྟཱིཏི ཨཱཔཛྫནཾ. ཨེཏསྶཱཏི སངྒྷཱདིསེསསྶ. ཨཡཾ ཧཱིཏི ཨཡཾ ཨེཝ, ཝཀྑམཱནོ ཨེཝཱཏི ཨཏྠོ. ཨེཏྠཱཏི པདབྷཱཛནེ. སཧ ཝཏྠུཛ྄ཛྷཱཙཱརཱཏི ཝཏྠུཛ྄ཛྷཱཙཱརེན སཧ, ཝཱཀྱམེཝ, ན སམཱསོ. ཝཏྠུཛ྄ཛྷཱཙཱརཱཏི ཀརཎཏྠེ ནིསྶཀྐཝཙནཾ དཊྛབྦཾ ¶ . ཏེན ཝུཏྟཾ ‘‘སཧ ཝཏྠུཛ྄ཛྷཱཙཱརེནཱ’’ཏི. བྷིཀྑུནིནྟི ཨཱཔཏྟིམཱཔནྣཾ བྷིཀྑུནིཾ. སངྒྷཏོཏི བྷིཀྑུནིསངྒྷམྷཱ. ཨནཱིཡསདྡོ ཧེཏུཀཏྟཱབྷིདྷཱཡཀོཏི ཨཱཧ ‘‘ནིསྶཱརེཏཱིཏི ནིསྶཱརཎཱིཡོ’’ཏི. བྷིཀྑུནིསངྒྷཏོ ནིསྶརཏི, ནིསྶཱརིཡཏི ཝཱ ཨནེནཱཏི ནིསྶཱརཎཱིཡོཏི ཀརཎཏྠོཔི ཡུཏྟོཡེཝ. ཏཏྠཱཏི པདབྷཱཛནེ. ཡནྟི སངྒྷཱདིསེསཾ. སོཏི སངྒྷཱདིསེསོ. པདབྷཱཛནསྶ ཨཏྠོ ཀཱརཎོཔཙཱརེན དཊྛབྦོ. ཧཱིཏི སཙྩཾ. ཀེནཙཱིཏི པུགྒལེན, ན ནིསྶཱརཱིཡཏཱིཏི སམྦནྡྷོ. ཏེན དྷམྨེན ཀརཎབྷཱུཏེན, ཧེཏུབྷཱུཏེན ཝཱ. སོཏི དྷམྨོ.

ཨཌྜཀཱརཀམནུསྶེཧི ཝུཙྩམཱནཱཏི ཡོཛནཱ. སཡནྟི སཱམཾ. ཏཏོཏི གམནཏོ, པརནྟི སམྦནྡྷོ. བྷིཀྑུནིཡཱ ཝཱ ཀཏཾ ཨཱརོཙེཏཱུཏི ཡོཛནཱ.

དྷམྨིཀནྟི དྷམྨེན སབྷཱཝེན ཡུཏྟཾ. ཡཐཱཏི ཡེནཱཀཱརེན. ཏནྟི ཨཱཀཱརཾ. ཏཏྠཱཏི ‘‘ཨནོདིསྶ ཨཱཙིཀྑཏཱི’’ཏི ཝཙནེ.

དྷུཏྟཱདཡོཏི ཨཱདིསདྡེན ཙོརཱདཡོ སངྒཎྷཱཏི. སཱཏི ཨཱཙིཀྑནཱ. ཏནྟི ཨཱཙིཀྑནཾ. ཏེསནྟི གཱམདཱརཀཱདཱིནཾ. དཎྜནྟི དྷནདཎྜཾ. གཱིཝཱ ཧོཏཱིཏི ཨིཎཾ ཧོཏི. ཨདྷིཔྤཱཡེ སཏིཔཱིཏི ཡོཛནཱ. ཏསྶཱཏི ཨནཱཙཱརཾ ཙརནྟསྶ.

ཀེཝལཾ ཧཱིཏི ཀེཝལམེཝ. ཏནྟི རཀྑཾ. ཀཱརཀེཏི ཨནཱཙཱརསྶ ཀཱརཀེ. ཏེས+?ནྟི ཀཱརཀཱནཾ.

ཏེསནྟི ཧརནྟཱནཾ. ‘‘ཨནཏྠཀཱམཏཱཡཱ’’ཏི ཨིམིནཱ བྷཡཱདིནཱ ཝུཏྟེ ནཏྠི དོསོཏི དསྶེཏི. ཧཱིཏི ལདྡྷདོསཛོཏཀོ. ཨཏྟནོ ཝཙནཀརཾ…པེ… ཝཏྟུཾ ཝཊྚཏཱིཏི ཨཏྟནོ ཝཙནཾ ཨཱདིཡིསྶཏཱིཏི ཝུཏྟེ ཝཙནཾ ཨནཱདིཡིཏྭཱ དཎྜེ གཧིཏེཔི ནཏྠི དོསོ དཎྜགཧཎསྶ པཊིཀྑིཏྟཏྟཱ. དཱསདཱསཱིཝཱཔིཨཱདཱིནནྟི ཨཱདིསདྡེན ཁེཏྟཱདཡོ སངྒཡ྄ཧནྟི.

ཝུཏྟནཡེནེཝཱཏི ¶ ཨཏཱིཏཾ ཨཱརབྦྷ ཨཱཙིཀྑནེ ཝུཏྟནཡེན ཨེཝ. ‘‘ཨཱཡཏིཾ ཨཀརཎཏྠཱཡཱ’’ཏི ཨིམིནཱ ཨནཱགཏཾ ཨཱརབྦྷ ཨོདིསྶ ཨཱཙིཀྑནཾ ¶ དསྶེཏི. ‘‘ཀེན ཨེཝཾ ཀཏ’’ནྟི པུཙྪཱཡ ཨཏཱིཏེ ཀཏཔུབྦཾ པུཙྪཏི. སཱཔཱིཏི པིསདྡོ ཝུཏྟསམྤིཎྜནཏྠོ. ཧཱིཏི སཙྩཾ, ཡསྨཱ ཝཱ.

ཝོཧཱརིཀཱ དཎྜེནྟཱིཏི སམྦནྡྷོ. དཎྜེནྟཱིཏི ཝདྷདཎྜེན ཙ དྷནདཎྜེན ཙ ཨཱཎཾ ཀརོནྟི.

ཡོ ཙཱཡནྟི ཡོ ཙ ཨཡཾ. བྷིཀྑུནཱིནཾ ཡོ ཨཡཾ ནཡོ ཝུཏྟོ, ཨེསེཝ ནཡོ བྷིཀྑཱུནམྤི ནཡོཏི ཡོཛནཱ. ‘‘ཨེསེཝ ནཡོ’’ཏི ཝུཏྟཝཙནམེཝ ཝིཏྠཱརེནྟོ ཨཱཧ ‘‘བྷིཀྑུནོཔི ཧཱི’’ཏིཨཱདི. ‘‘ཏཐཱ’’ཏིཨིམིནཱ ‘‘ཨོདིསྶཱ’’ཏིཔདཾ ཨཏིདིསཏི. ཏེ ཙཱཏི ཏེ ཙ ཝོཧཱརིཀཱ. ཧཱིཏི སཙྩཾ, ཡསྨཱ ཝཱཏི. པཋམཾ.

༢. དུཏིཡསངྒྷཱདིསེསསིཀྑཱཔདཾ

༦༨༢. དུཏིཡེ ཝརིཏབྦཾ ཨིཙྪིཏབྦནྟི ཝརཾ, ཏམེཝ བྷཎྜནྟི ཝརབྷཎྜནྟི དསྶེནྟོ ཨཱཧ ‘‘མཧགྒྷབྷཎྜ’’ནྟི. ‘‘མུཏྟཱ’’ཏིཨཱདིནཱ ཏསྶ སརཱུཔཾ དསྶེཏི.

༦༨༣. ཨཱཔུབྦོ ལོཀསདྡོ ཨབྷིམུཁཾ ལོཀནཏྠོ ཧོཏི, ཨུཔུབྦོ ཨུདྡྷཾ ལོཀནཏྠོ, ཨོཔུབྦོ ཨདྷོ ལོཀནཏྠོ, ཝིཔུབྦོ ཨིཏོ ཙིཏོ ཙ ཝཱིཏིཧརཎལོཀནཏྠོ, ཨཔཔུབྦོ ཨཱཔུཙྪནཏྠོ. ཨིདྷ པན ཨཔཔུབྦཏྟཱ ཨཱཔུཙྪནཏྠོཏི ཨཱཧ ‘‘ཨནཱཔུཙྪིཏྭཱ’’ཏི. མལླགཎ བྷཊིཔུཏྟ གཎཱདིཀནྟིཨཱདཱིསུ མལླགཎོ ནཱམ ནཱརཱཡནབྷཏྟིཀོ གཎོ. བྷཊིཔུཏྟགཎོ ནཱམ ཀུམཱརབྷཏྟིཀོ གཎོ. ཨཱདིསདྡེན ཨཉྙམྤི གཱམནིགམེ ཨནུསཱསིཏུཾ སམཏྠཾ གཎཾ སངྒཎྷཱཏི. ཨཐ ཝཱ མལླགཎོཏི མལླརཱཛཱུནཾ གཎོ. ཏེ ཧི གཎཾ ཀཏྭཱ ཀུསིནཱརཱཡཾ རཛྫཾ ཨནུསཱསནྟི, ཏེ སནྡྷཱཡ ཝུཏྟཾ ‘‘མལླགཎོ’’ཏི. བྷཊིཔུཏྟགཎོཏི ལིཙྪཝིགཎོ པརིཡཱཡནྟརེན ཝུཏྟོ. ལིཙྪཝིརཱཛཱུནཉྷི པུབྦརཱཛཱནོ བྷཊིནཱམཀསྶ ཛཊིལསྶ པུཏྟཱ ཧོནྟི, ཏེསཾ ཝཾསེ པཝཏྟཱ ཨེཏརཧི ལིཙྪཝིརཱཛཱནོཔི བྷཊིཔུཏྟཱཏི ཝུཙྩནྟི. ཛཊིལོ པན བཱརཱཎསིརཉྙོ པུཏྟེ ནདིསོཏེན ཝུཡ྄ཧམཱནེ ནདིཏོ ཨུདྡྷརིཏྭཱ ཨཏྟནོ ¶ ཨསྶམེ པུཏྟཾ ཀཏྭཱ བྷརཎཏྟཱ པོསནཏྟཱ བྷཊཱིཏི ཝུཙྩཏི, ཏསྶ པུཏྟཏྟཱ ལིཙྪཝིགཎོ བྷཊིཔུཏྟོཏི ཝུཙྩཏི. ཏེཔི གཎཾ ཀཏྭཱ ཝེསཱལིཡཾ རཛྫཾ ཨནུསཱསནྟི, ཏཾ སནྡྷཱཡ ཝུཏྟཾ ‘‘བྷཊིཔུཏྟགཎོ’’ཏི. དྷམྨགཎོ ནཱམ སཱསནདྷམྨབྷཏྟིཀོ ¶ གཎོ. གནྡྷིཀསེཎཱིཏི གནྡྷཀཱརཱནཾ སམཛཱཏིཀཱནཾ སིཔྤིཀཱནཾ གཎོ. དུསྶིཀསེཎཱིཏི དུསྶཀཱརཱནཾ སམཛཱཏིཀཱནཾ པེསཀཱརཱནཾ གཎོ. ཨཱདིསདྡེན ཏཙྪཀསེཎིརཛཀསེཎིཨཱདཡོ སངྒཡ྄ཧནྟི. ཡཏྠ ཡཏྠཱཏི ཡསྨིཾ ཡསྨིཾ ཋཱནེ. ཧཱིཏི སཙྩཾ. ཏེ ཨེཝཱཏི གཎཱདཡོ ཨེཝ. པུན ཏེཏི གཎཱདཡོ. ཨིདནྟི ‘‘གཎཾ ཝཱ’’ཏིཨཱདིཝཙནཾ. ཨེཏྠཱཏི རཱཛཱདཱིསུ. སངྒྷཱཔུཙྪནམེཝ པདྷཱནཀཱརཎནྟི ཨཱཧ ‘‘བྷིཀྑུནིསངྒྷོ ཨཱཔུཙྪིཏབྦོཝཱ’’ཏི. ཀཔྤགཏིཀནྟི ཀཔྤཾ གཙྪཏཱིཏི ཀཔྤགཏཱ, སཱ ཨེཝ ཀཔྤགཏིཀཱ, ཏཾ.

ཀེནཙི ཀརཎཱིཡེན ཁཎྜསཱིམཾ ཨགནྟྭཱ ཀེནཙི ཀརཎཱིཡེན བྷིཀྑུནཱིསུ པཀྐནྟཱསཱུཏི ཡོཛནཱ. ནིསྶིཏཀཔརིསཱཡཱཏི ཨནྟེཝཱསིཀཔརིསཱཡ. ཝུཊྛཱཔེནྟིཡཱཏི ཨུཔསམྤཱདེནྟིཡཱཏི. དུཏིཡཾ.

༣. ཏཏིཡསངྒྷཱདིསེསསིཀྑཱཔདཾ

༦༩༢. ཏཏིཡེ དུཏིཡེན པཱདེན ཨཏིཀྐནྟམཏྟེཏི སམྦནྡྷོ. པརིཀྑེཔཱརཧཊྛཱནཾ ནཱམ གྷརཱུཔཙཱརཏོ པཋམལེཌྜུཔཱཏོ. སངྑེཔཏོ ཝུཏྟམཏྠཾ ཝིཏྠཱརཏོ དསྶེནྟོ ཨཱཧ ‘‘ཨཔི ཙེཏྠཱ’’ཏིཨཱདི. ཨེཏྠཱཏི ཨིམསྨིཾ སིཀྑཱཔདེ. ཨུཔཙཱརེ ཝཱཏི ཨཔརིཀྑིཏྟསྶ གཱམསྶ པརིཀྑེཔཱརཧཊྛཱནེ ཝཱ. ཏཏོཏི གཱམནྟརཏོ, ཁཎྜཔཱཀཱརེན ཝཱ ཝཏིཚིདྡེན ཝཱ པཝིསིཏུནྟི སམྦནྡྷོ.

སམྦདྡྷཱ ཝཏི ཨེཏེསནྟི སམྦདྡྷཝཏིཀཱ, དྭེ གཱམཱ. ཝིཧཱརནྟི བྷིཀྑུནིཝིཧཱརཾ. ཏཏོ པན གཱམཏོཏི ཏཏོ ཨིཏརགཱམཏོ པན, ནིཀྑནྟཱཡ བྷིཀྑུནིཡཱ ཋཱཏབྦནྟི སམྦནྡྷོ. ཨུསྶཱརཎཱ ཝཱཏི མནུསྶཱནཾ ཨུསྶཱརཎཱ ཝཱ.

ཛནཱཏི ¶ གཱམབྷོཛཀཱ ཛནཱ. ཨེཀཾ གཱམནྟི ཡཾཀིཉྩི ཨིཙྪིཏཾ ཨེཀཾ གཱམཾ. ཏཏོཏི གཱམཏོ. ‘‘ཀསྨཱ’’ཏི ཨིམཱཡ པུཙྪཱཡ ‘‘ཝིཧརཏོ ཨེཀཾ གཱམཾ གནྟུཾ ཝཊྚཏཱི’’ཏི ཝཙནསྶ ཀཱརཎཾ པུཙྪཏི. ‘‘ཝིཧཱརསྶ ཙཏུགཱམསཱདྷཱརཎཏྟཱ’’ཏིཨིམིནཱ ཝིསཛྫནེན ཏཾ པུཙྪཾ ཝིསཛྫེཏི.

ཡཏྠཱཏི ཡསྶཾ ནདིཡཾ. ཨུཏྟརནྟིཡཱ ཨེཀདྭངྒུལམཏྟམྤི ཨནྟརཝཱསཀོ ཏེམིཡཏི, སཱ ནདཱི ནཱམཱཏི ཡོཛནཱ. ཡཐཱ ནིཝསིཡམཱནཱཡ ཏིམཎྜལཔཊིཙྪཱདནཾ ཧོཏི, ཨེཝཾ ནིཝཏྠཱཡཱཏི ཡོཛནཱ ¶ . བྷིཀྑུནིཡཱ ཨུཏྟརནྟིཡཱ ཨནྟརཝཱསཀོཏི སམྦནྡྷོ. ཡཏྠ ཀཏྠཙཱིཏི ཡསྨིཾ ཀིསྨིཾཙི ཋཱནེ. ‘‘སེཏུནཱ གཙྪཏི, ཨནཱཔཏྟཱི’’ཏིཨིམིནཱ པདསཱ ཨུཏྟརནྟིཡཱ ཨེཝ ཨཱཔཏྟཱིཏི དསྶེཏི. ཨུཏྟརཎཀཱལེཏི ནདིཏོ ཨུཏྟརཎཀཱལེ. ཨཱཀཱསགམནནྟི ཨིདྡྷིཡཱ གམནཾ. ཨཱདིསདྡེན ཧཏྠིཔིཊྛིཨཱདཡོ སངྒཎྷཱཏི. ཨཀྐམནྟིཡཱཏི ཨཏིཀྐམནྟིཡཱ. ཨེཏྠཱཏི དྭཱིསུ ཏཱིསུ བྷིཀྑུནཱིསུ. ཨོརིམཏཱིརམེཝཱཏི ཨཔཱརཏཱིརམེཝ. ཏམེཝ ཏཱིརནྟི ཨོརིམཏཱིརམེཝ. པཙྩུཏྟརཏཱིཏི པཊིནིཝཏྟིཏྭཱ ཨུཏྟརཏི.

ཀུརུམཱནཱ བྷིཀྑུནཱི ཀརོཏཱིཏི ཡོཛནཱ. ཨསྶཱཏི བྷིཀྑུནིཡཱ ཨཛཱནནྟིཡཱ ཨེཝ ཙཱཏི སམྦནྡྷོ, ཨནཱདརེ ཙེཏཾ སཱམིཝཙནཾ. ཨཐ པནཱཏི ཨཐསདྡོ ཡདིཔརིཡཱཡོ, ཀིརིཡཱཔདེན ཡོཛེཏབྦོ. ཨཐ ཨཙྪཏི, ཨཐ ན ཨོཏརཏཱིཏི ཨཏྠོ. ཨཙྪཏཱིཏི ཝསཏི. ཧཱིཏི སཙྩཾ. ཨིདྷཱཏི ‘‘ཨེཀཱ ཝཱ རཏྟིཾ ཝིཔྤཝསེཡྻཱ’’ཏིཔདེ.

ཨེཝཾ ཝུཏྟལཀྑཎམེཝཱཏི ཨེཝཾ ཨབྷིདྷམྨཔརིཡཱཡེན ཝུཏྟལཀྑཎམེཝ. ཏཾ པནེཏནྟི ཏཾ པན ཨརཉྙཾ. ཏེནེཝཱཏི ཨཱཔནྣཧེཏུནཱ ཨེཝ. ཨཊྛཀཐཱཡནྟི མཧཱཨཊྛཀཐཱཡཾ. བྷིཀྑུནཱིསུ པཝིསནྟཱིསཱུཏི སམྦནྡྷོ, ནིདྡྷཱརཎཏྠེ ཙེཏཾ བྷུམྨཝཙནཾ. ཨེཏྠཱཏི དསྶནཱུཔཙཱརསཝནཱུཔཙཱརེསུ. ཡཏྠ ཨོཀཱསེ ཋིཏཾ དུཏིཡིཀཱ པསྶཏི, སོ ཨོཀཱསོ དསྶནཱུཔཙཱརོ ནཱམཱཏི ཡོཛནཱ. སཱཎིཔཱཀཱརནྟརིཀཱཔཱིཏི སཱཎིཔཱཀཱརེན བྱཝཧིཀཱཔི. ཡཏྠ ཨོཀཱསེ ཋིཏཱ…པེ… སདྡཾ སུཎཱཏི, སོ ཨོཀཱསོ སཝནཱུཔཙཱརོ ནཱམཱཏི ཡོཛནཱ. མགྒམཱུལ༹ྷསདྡེནཱཏི མགྒེ མཱུལ༹ྷཱནཾ སདྡེན. དྷམྨསྶཝནཱརོཙནསདྡེནཱཏི དྷམྨསྶཝནཏྠཱཡ ཨཱརོཙནཱནཾ སདྡེན. མགྒམཱུལ༹ྷསདྡེན སདྡཱཡནྟིཡཱ སདྡཾ སུཎཱཏི ཝིཡ ¶ ཙ དྷམྨསྶཝནཱརོཙནསདྡེན སདྡཱཡནྟིཡཱ སདྡཾ སུཎཱཏི ཝིཡ ཙ ‘‘ཨཡྻེ’’ཏི སདྡཱཡནྟིཡཱ སདྡཾ སུཎཱཏཱིཏི ཡོཛནཱ. སདྡཱཡནྟིཡཱཏི སདྡཾ ཀརོནྟིཡཱ. ནཱམདྷཱཏུ ཧེསཱ. ཨེཝརཱུཔེཏི ‘‘མགྒམཱུལ༹ྷསདྡེན ཝིཡཱ’’ཏིཨཱདིནཱ ཝུཏྟེ ཨེཝརཱུཔེ.

ཏིཏྠཱཡཏནཾ སངྐནྟཱ ཝཱཏི ཏིཏྠཱིནཾ ཝཱསཊྛཱནཾ སངྐནྟཱ ཝཱ. ཨིམིནཱ ‘‘པཀྑསངྐནྟཱ’’ཏི ཨེཏྠ པཀྑསདྡསྶ པཊིཔཀྑཝཱཙཀཏྟཱ ཏེན སཱསནཔཊིཔཀྑཱ ཏིཏྠིཡཱ ཨེཝ གཧེཏབྦཱཏི དསྶེཏི. ཏིཏྠིཡཱ ཧི སཱསནསྶ པཊིཔཀྑཱ ཧོནྟཱིཏི. ཏཏིཡཾ.

༤. ཙཏུཏྠསངྒྷཱདིསེསསིཀྑཱཔདཾ

༦༩༤. ཙཏུཏྠེ པཱདསྶ ཋཔནཀཾ པཱིཋཾ པཱདཔཱིཋཾ. པཱདསྶ ཋཔནཀཱ ཀཐལིཀཱ པཱདཀཐལིཀཱཏི ¶ དསྶེནྟོ ཨཱཧ ‘‘པཱདཔཱིཋཾ ནཱམཱ’’ཏིཨཱདི. ཨནཉྙཱཡཱཏི ཨེཏྠ ཡཀཱརོ ཏྭཱཔཙྩཡསྶ ཀཱརིཡོཏི ཨཱཧ ‘‘ཨཛཱནིཏྭཱ’’ཏི. ནེཏྠཱརཝཏྟེཏི ཨུཀྑེཔནཱིཡཀམྨཏོ ནིཏྠརཎཀཱརཎེ ཝཏྟེ. ‘‘ཝཏྟམཱན’’ནྟིཨིམིནཱ ‘‘ཝཏྟནྟི’’ནྟི ཨེཏྠ ཨནྟཔཙྩཡཾ ནཡེན དསྶེཏཱིཏི. ཙཏུཏྠཾ.

༥. པཉྩམསངྒྷཱདིསེསསིཀྑཱཔདཾ

༧༠༡. པཉྩམེ ‘‘ཨེཀཏོ ཨཝསྶུཏེ’’ཏི ཨེཏྠ ཧེཊྛཱ ཝུཏྟནཡེན ‘‘ཨེཀཏོ’’ཏི སཱམཉྙཏོ ཝུཏྟེཔི བྷིཀྑུནིཡཱ ཨེཝ གཧེཏབྦབྷཱཝཉྩ ཏོཔཙྩཡསྶ ཚཊྛུཏྠེ པཝཏྟབྷཱཝཉྩ ཨཝསྶུབྷཔདེ བྷཱཝཏྠཉྩ དསྶེཏུཾ ཝུཏྟཾ ‘‘བྷིཀྑུནིཡཱ ཨཝསྶུཏབྷཱཝོ དཊྛབྦོ’’ཏི. ཨེཏནྟི ‘‘བྷིཀྑུནིཡཱ ཨཝསྶུཏབྷཱཝོ’’ཏི ཝཙནཾ. ཏནྟི ཨཝཙནཾ. པཱལི༹ཡཱཏི ཨིམཱཡ སིཀྑཱཔདཔཱལི༹ཡཱཏི. པཉྩམཾ.

༦. ཚཊྛསངྒྷཱདིསེསསིཀྑཱཔདཾ

༧༠༥. ཚཊྛེ ཡཏོ ཏྭནྟི ཨེཏྠ ཀཱརཎཏྠེ ཏོཔཙྩཡོཏི ཨཱཧ ‘‘ཡསྨཱ’’ཏི. ཀསྶཱ ཧོནྟཱིཏི ཨུཡྻོཛིཀཱཨུཡྻོཛིཏཱསུ ཀསྶཱ བྷིཀྑུནིཡཱ ཧོནྟཱིཏི ཡོཛནཱ. ན ¶ དེཏཱིཏི ཨུཡྻོཛིཀཱ ཨུཡྻོཛིཏཱཡ ན དེཏི. ན པཊིགྒཎྷཱཏཱིཏི ཨུཡྻོཛིཏཱ ཨུཡྻོཛིཀཱཡ ཧཏྠཏོ ན པཊིགྒཎྷཱཏི. པཊིགྒཧོ ཏེན ན ཝིཛྫཏཱིཏི ཏེནེཝ ཀཱརཎེན ཨུཡྻོཛིཀཱཡ ཧཏྠཏོ ཨུཡྻོཛིཏཱཡ པཊིགྒཧོ ན ཝིཛྫཏི. ཨཱཔཛྫཏི གརུཀཾ, ན ལཧུཀནྟི ཨེཝཾ སནྟེཔི ཨུཡྻོཛིཀཱ གརུཀམེཝ སངྒྷཱདིསེསཱཔཏྟིཾ ཨཱཔཛྫཏི, ན ལཧུཀཾ. ཏཉྩཱཏི ཏཾ ཨཱཔཛྫནཉྩ. པརིབྷོགཔཙྩཡཱཏི ཨུཡྻོཛིཀཱཡ པརིབྷོགསངྑཱཏཱ ཀཱརཎཱཏི ཨཡཾ གཱཐཱཡཏྠོ.

ཨིཏརིསྶཱ པནཱཏི ཨུཡྻོཛིཏཱཡ པན བྷིཀྑུནིཡཱ. པཋམསིཀྑཱཔདེཏི པཉྩམསིཀྑཱཔདེ. པཉྩམསིཀྑཱཔདཉྷི ཨིམིནཱ སིཀྑཱཔདེན ཡུགལ༹བྷཱཝེན སདིསཏྟཱ ཨིམཾ ཨུཔཱདཱཡ པཋམནྟི ཝུཏྟནྟི. ཚཊྛཾ.

༧. སཏྟམསངྒྷཱདིསེསསིཀྑཱཔདཾ

༧༠༩. སཏྟམེ ¶ ཡཱཝཏཏིཡཀཔདཏྠོཏི ‘‘ཡཱཝཏཏིཡཀ’’ནྟི ཨུཙྩཱརིཏསྶ པདསྶ ཨཏྠོ ཝེདིཏབྦོཏི སམྦནྡྷོཏི. སཏྟམཾ.

༨. ཨཊྛམསངྒྷཱདིསེསསིཀྑཱཔདཾ

༧༡༥. ཨཊྛམེ ཀིསྨིཾཙིདེཝ ཨདྷིཀརཎེཏི ནིདྡྷཱརཎཱིཡསྶ ནིདྡྷཱརཎསམུདཱཡེན ཨཝིནཱབྷཱཝཏོ ཨཱཧ ‘‘ཙཏུནྣ’’ནྟི. ཀསྨཱ པན ནིདྡྷཱརཎསམུདཱཡནིདྡྷཱརཎཱིཡབྷཱཝེན ཝུཏྟཾ, ནནུ པདབྷཱཛནེ ཙཏྟཱརིཔི ཨདྷིཀརཎཱནི ཝུཏྟཱནཱིཏི ཨཱཧ ‘‘པདབྷཱཛནེ པནཱ’’ཏིཨཱདཱིཏི. ཨཊྛམཾ.

༩. ནཝམསངྒྷཱདིསེསསིཀྑཱཔདཾ

༧༢༣. ནཝམེ སཾསཊྛསདྡོ མིསྶཔརིཡཱཡོཏི ཨཱཧ ‘‘མིསྶཱིབྷཱུཏཱ’’ཏི. ‘‘ཨནནུལོམེནཱ’’ཏིཨིམིནཱ ‘‘ཨནནུལོམིཀེནཱ’’ཏི ཨེཏྠ ཨིཀསདྡོ སྭཏྠོཏི དསྶེཏི. ཀོཊྚནཉྩ པཙནཉྩ གནྡྷཔིསནཉྩ མཱལཱགནྠནཉྩ. ཨཱདིསདྡེན ཨཉྙེཔི ཨནནུལོམིཀེ ཀཱཡིཀེ སངྒཎྷཱཏི. སཱསནཱཧརཎཉྩ པཊིསཱསནཧརཎཉྩ སཉྩརིཏྟཉྩ. ཨཱདིསདྡེན ཨཉྙེཔི ཨནནུལོམིཀེ ཝཱཙསིཀེ སངྒཎྷཱཏི. ཨེཏཱསནྟི བྷིཀྑུནཱིནཾ. སིལོཀོཏི ཡསོཏི. ནཝམཾ.

༡༠. དསམསངྒྷཱདིསེསསིཀྑཱཔདཾ

༧༢༧. དསམེ ¶ ཨེཝཱཙཱརཱཏི ཨེཏྠ ནིགྒཧིཏལོཔཝསེན སནྡྷཱིཏི ཨཱཧ ‘‘ཨེཝཾཨཱཙཱརཱ’’ཏི. ‘‘ཡཱདིསོ’’ཏིཨཱདིནཱ ཨེཝཾསདྡསྶ ནིདསྶནཱདཱིསུ (ཨབྷིདྷཱནཔྤདཱིཔིཀཱཡཾ ༡༡༨༦ གཱཐཱཡཾ) ཨེཀཱདསསུ ཨཏྠེསུ ཨུཔམཏྠཾ དསྶེཏི. སབྦཏྠཱཏི ‘‘ཨེཝཾསདྡཱ ཨེཝཾསིལོཀཱ’’ཏི སབྦེསུ པདེསུ. ཨུཉྙཱཡཱཏི ཨེཏྠ ཨོཀཱརཝིཔརཱིཏོ ཨུཀཱརོཏི ཨཱཧ ‘‘ཨཝཉྙཱཡཱ’’ཏི. ‘‘ནཱིཙཾ ཀཏྭཱ ཛཱནནཱཡཱ’’ཏི ཨིམིནཱ ཨཝསདྡོ ནཱིཙཏྠོ, ཉཱདྷཱཏུ ཨཝབོདྷནཏྠོཏི དསྶེཏི. ‘‘པརིབྷཝཉྙཱཡཱ’’ཏི ཝཏྟབྦེ ཨུཏྟརཔདལོཔཝསེན ‘‘པརིབྷཝེནཱ’’ཏི ཝུཏྟནྟི ཨཱཧ ‘‘པརིབྷཝིཏྭཱ ཛཱནནེནཱ’’ཏི. ཨཀྑནྟིཡཱཏི ཨེཏྠ སཧནཁནྟིཡེཝཱདྷིཔྤེཏཱ, ནེཝ ཨནུལོམཁནྟི, ན དིཊྛིནིཛ྄ཛྷཱནཀྑནྟཱིཏི དསྶེནྟོ ཨཱཧ ‘‘ཨསཧནཏཱཡཱ’’ཏི. ཝེབྷསྶིཡཱཏི ཨེཏྠ ཝིསེསེན བྷཱསེཏི ¶ ཨོབྷཱསེཏཱིཏི ཝིབྷཱསོ ཨཱནུབྷཱཝོ, ཝིབྷཱསོ ཨིམསྶ སངྒྷསྶ ཨཏྠཱིཏི ཝིབྷསྶོ སངྒྷོ, བཧྭཏྠེ ཙ ཨཏིསཡཏྠེ ཙ སཔཙྩཡོ ཧོཏི. ཀསྨཱ? མནྟུཔཙྩཡཏྠཏྟཱ ‘‘ལོམསོ’’ཏིཨཱདཱིསུ (ཛཱ. ༡.༡༤.༥༧) ཝིཡ, བཧུཨཱནུབྷཱཝོ ཨཏིསཡཨཱནུབྷཱཝོ སངྒྷོཏི ཝུཏྟཾ ཧོཏི, སཾཡོགཔརཏྟཱ ཨཱཀཱརསྶ རསྶོ. ཝིབྷསྶསྶ བྷཱཝོ ཝེབྷསྶིཡཾ, བཧུཨཱནུབྷཱཝོ ཨཏིསཡཨཱནུབྷཱཝོཡེཝ. ཨིཏི ཨིམམཏྠཾ དསྶེནྟོ ཨཱཧ ‘‘བལཝབྷསྶབྷཱཝེནཱ’’ཏི. ཏཏྠ བལཝཨིཏི པདེན མནྟུཨཏྠེ པཝཏྟསྶ སཔྤཙྩཡསྶ བཧྭཏྠཉྩ ཨཏིསཡཏྠཉྩ དསྶེཏི, བྷཱཝཨིཏི པདེན ཎིཡཔཙྩཡསྶ བྷཱཝཏྠཾ, ཨེནཨིཏི པདེན ནིསྶཀྐཝཙནསྶ ཀརཎཏྠེ པཝཏྟབྷཱཝཾ དསྶེཏི. ཏམེཝཏྠམཱཝིཀརོནྟོ ཨཱཧ ‘‘ཨཏྟནོ བལཝཔྤཀཱསནེནཱ’’ཏི. ཏཏྠ ཨཏྟནོཏི ཨཏྟསངྑཱཏསྶ སངྒྷསྶ. བལཝཔྤཀཱསནེནཱཏི བཧུཨཱནུབྷཱཝཔྤཀཱསནེན, ཨཏིསཡཨཱནུབྷཱཝཔྤཀཱསནེན ཝཱ. བལཝཔྤཀཱསནཾ ནཱམ ཨཏྠཏོ པརེསཾ སམུཏྲཱསནམེཝཱཏི ཨཱཧ ‘‘སམུཏྲཱསནེནཱཏི ཨཏྠོ’’ཏི. དུབྦལབྷཱཝེནཱཏི ཨེཏྠ བྷཱཝཨིཏིཔདེན ཎྱཔཙྩཡསྶ བྷཱཝཏྠཾ, ཨེནཨིཏིཔདེན ¶ ནིསྶཀྐཝཙནསྶ ཀརཎཏྠཾ དསྶེཏཱིཏི དཊྛབྦཾ. སབྦཏྠཱཏི ‘‘ཨུཉྙཱཡཱ’’ཏིཨཱདཱིསུ སབྦེསུ པདེསུ. ཙསདྡོ ལུཏྟནིདྡིཊྛོཏི ཨཱཧ ‘‘ཨེཝཾ སམུཙྩཡཏྠོ དཊྛབྦོ’’ཏི. ཝིཝིཙྩཐཱཏི ཨེཏྠ ཝཱིཏྱཱུཔསགྒོ ཝིནཱསདྡཏྠོ, ཝིཙདྷཱཏུ སཏྟཏྠོཏི ཨཱཧ ‘‘ཝིནཱ ཧོཐཱ’’ཏི. དསམཾ.

ཨནནྟརཱ པཀྑིཔིཏྭཱཏི སམྦནྡྷོ. མཧཱཝིབྷངྒཏོ ཨཱཧརིཏཱནི ཨིམཱནི ཏཱིཎི སིཀྑཱཔདཱནཱིཏི ཡོཛནཱ. ནཝ པཋམཱཔཏྟིཀཱ ཝེདིཏབྦཱཏི སམྦནྡྷོ. སབྦེཔི དྷམྨཱཏི ཡོཛནཱ. ཨེཏྠཱཏི ‘‘ཨུདྡིཊྛཱ ཁོ’’ཏིཨཱདིཔཱཋེ. ཏཾ པནཱཏི པཀྑམཱནཏྟཾ པནཱཏི.

ཨིཏི སམནྟཔཱསཱདིཀཱཡ ཝིནཡསཾཝཎྞནཱཡ

བྷིཀྑུནིཝིབྷངྒེ

སཏྟརསཀཝཎྞནཱཡ ཡོཛནཱ སམཏྟཱ.

༣. ནིསྶགྒིཡཀཎྜཾ

༡. པཋམནིསྶགྒིཡཔཱཙིཏྟིཡསིཀྑཱཔད-ཨཏྠཡོཛནཱ

ཏིཾས ནིསྶགྒིཡཱ ཡེ དྷམྨཱ བྷིཀྑུནཱིནཾ བྷགཝཏཱ པཀཱསིཏཱ, ཏེསཾ དྷམྨཱནཾ དཱནི ཨིམསྨིཾ ཀཱལེ ཨཡཾ སཾཝཎྞནཱཀྐམོ བྷཝཏཱིཏི ཡོཛནཱ.

༧༣༣. པཋམེ ¶ ཨཱམཏྟིཀཱཔཎནྟི ཨེཏྠ ཨཱམཏྟསདྡོ བྷཱཛནཔརིཡཱཡོཏི ཨཱཧ ‘‘བྷཱཛནཱནཱི’’ཏི. བྷཱཛནཱནི ཧི ཨམནྟི པརིབྷུཉྫིཏབྦབྷཱཝཾ གཙྪནྟཱིཏི ‘‘ཨམཏྟཱནཱི’’ཏི ཝུཙྩནྟི. ཨམཏྟཱནི ཝིཀྐིཎནྟཱིཏི ‘‘ཨཱམཏྟིཀཱ’’ཏི ཝཙནཏྠཾ དསྶེནྟོ ཨཱཧ ‘‘ཏཱནཱི’’ཏིཨཱདི. ཏེསནྟི ཨཱམཏྟིཀཱནཾ. ཏཾ ཝཱཏི ཨཱམཏྟིཀཱཔཎཾ ཝཱ.

༧༣༤. ‘‘སནྣིདྷི’’ནྟི ཨིམིནཱ སཾནིཔུབྦོ ཙིསདྡོ ཨུཙིནནཏྠོཏི དསྶེཏི. ཧིསདྡོ ཝིསེསཛོཏཀོ. ཏཏྠཱཏི མཧཱཝིབྷངྒེ. ཨིདྷཱཏི བྷིཀྑུནིཝིབྷངྒེ.

ཨིདམྤཱིཏི ཨིདཾ སིཀྑཱཔདམྤི. པིསདྡོ མཧཱཝིབྷངྒསིཀྑཱཔདཾ ཨཔེཀྑཏཱིཏི. པཋམཾ.

༢. དུཏིཡནིསྶགྒིཡཔཱཙིཏྟིཡསིཀྑཱཔདཾ

༧༣༨. དུཏིཡེ ¶ ཨཧཏཙོལཱ༹ནམྤི སེདམལཱདིཀིལིནྣེ ཝིརཱུཔཏྟཱ ‘‘ཛིཎྞཙོལཱ༹’’ཏི ཝུཏྟཾ. ‘‘ཨཔི ཨཡྻཱཧཱི’’ཏིཨིམིནཱ ‘‘ཨཔ ཨཡྻཱཧཱི’’ཏིཔདཝིབྷཱགཾ ནིཝཏྟེཏི.

༧༤༠. སབྦམྤི ཨེཏཾ ཙཱིཝརནྟི ཡོཛནཱ. ཨེཝཾ པཊིལདྡྷནྟི ཨེཝཾ ནིསྶཛྫིཏྭཱ ལདྡྷཾ. ཡཐཱདཱནེཡེཝཱཏི ཡཐཱ དཱཡཀེཧི དིནྣཾ, ཏསྨིཾ དཱནེཡེཝ ཨུཔནེཏབྦཾ, ཨཀཱལཙཱིཝརེཡེཝ པཀྑིཔིཏབྦནྟི ཨཏྠོཏི. དུཏིཡཾ.

༣. ཏཏིཡནིསྶགྒིཡཔཱཙིཏྟིཡསིཀྑཱཔདཾ

༧༤༣. ཏཏིཡེ ཧནྡསདྡོ ཝཝསྶགྒཏྠེ ནིཔཱཏོཏི ཨཱཧ ‘‘ཧནྡཱཏི གཎྷཱ’’ཏི. བཧཱུནི ནིསྶགྒིཡཱནཱིཏི སམྦནྡྷོ. སཾཧརིཏྭཱཏི ཝིསུཾ ཝིསུཾ སངྒྷརིཏྭཱཏི. ཏཏིཡཾ.

༤. ཙཏུཏྠནིསྶགྒིཡཔཱཙིཏྟིཡསིཀྑཱཔདཾ

༧༤༨. ཙཏུཏྠེ ཀིཎཱཏི ཨནེནཱཏི ཀཡནྟི ཝཙནཏྠེན མཱུལཾ ཀཡཾ ནཱམཱཏི ཨཱཧ ‘‘མཱུལེནཱ’’ཏི. སཱཏི ཐུལླནནྡཱ, ཨཱཧ ཀིརཱཏི སམྦནྡྷོ. ཉཱདྷཱཏུཡཱ ཨཝབོདྷནཏྠཏོ ཨཉྙམྤི ཉཱདྷཱཏུཡཱ ཡཱཙནཏྠཾ དསྶེནྟོ ཨཱཧ ‘‘ཡཱཙིཏྭཱ ཝཱ’’ཏི.

༧༥༢. ཡནྟི ¶ སབྦིཏེལཱདི. ཏཉྙེཝཱཏི སབྦིཏེལཱདིམེཝ. ཡམཀནྟི སབྦིཾ སཧ ཏེལེན ཡུགལ༹ཾ ཀཏྭཱ. ཝེཛྫེནཱཏི བྷིསཀྐེན. སོ ཧི ཨཱཡུབྦེདསངྑཱཏཾ ཝིཛྫཾ ཛཱནཱཏཱིཏི ཝེཛྫོཏི ཙ རོགཉྩ ཏསྶ ནིདཱནཉྩ བྷེསཛྫཉྩ ཝིདཏི ཛཱནཱཏཱིཏིཔི ཝེཛྫོཏི ཙ ཝུཙྩཏི. ཏཏོཏི ཝེཛྫེན ཝུཏྟཀཱརཎཱ. ཀཧཱཔཎསྶཱཏི ཀཧཱཔཎེན, ཨཱབྷཏནྟི སམྦནྡྷོཏི. ཙཏུཏྠཾ.

༥. པཉྩམནིསྶགྒིཡཔཱཙིཏྟིཡསིཀྑཱཔདཾ

༧༥༣. པཉྩམེ སཱཏི སིཀྑམཱནཱ. ཨཡནྟི སིཀྑམཱནཱ. ཨདྡྷཱཏི ཨེཀཾསེན. ‘‘ཙེཏཱཔེཏྭཱ’’ཏི ཨེཏྠ ཙིཏིསདྡོ ཛཱནནཏྠོཏི ཨཱཧ ‘‘ཛཱནཱཔེཏྭཱ’’ཏི. པཉྩམཾ.

༦. ཚཊྛནིསྶགྒིཡཔཱཙིཏྟིཡསིཀྑཱཔདཾ

༧༥༨. ཚཊྛེ ¶ ཚནྡཾ ཨུཔྤཱདེཏྭཱ གཧིཏཾ ཚནྡཀནྟི ཝཙནཏྠཾ དསྶེནྟོ ཨཱཧ ‘‘ཚནྡཀ’’ནྟིཨཱདི. དྷམྨཀིཙྩནྟི པུཉྙཀརཎཱིཡཾ. དྷམྨསདྡོ ཧེཏྠ པུཉྙཝཱཙཀོ. ཡནྟི ཝཏྠུཾ. པརེསནྟི ཨཏྟནཱ ཨཉྙེསཾ. ‘‘ཨེཏ’’ནྟི ‘‘ཚནྡཀ’’ནྟི ཨེཏཾ ནཱམཾ. ‘‘ཨཉྙསྶཏྠཱཡ དིནྣེནཱ’’ཏིཨིམིནཱ ཨཉྙསྶ ཨཏྠོ ཨཉྙདཏྠོ, དཀཱརོ པདསནྡྷིཀརོ, ཏདཏྠཱཡ དིནྣོ ཨཉྙདཏྠིཀོཏི ཝཙནཏྠཾ དསྶེཏི. ‘‘ཨཉྙཾ ཨུདྡིསིཏྭཱ དིནྣེནཱ’’ཏིཨིམིནཱ ཨཉྙཾ ཨུདྡིསིཏྭཱ དིནྣཾ ཨཉྙུདྡིསིཀནྟི ཝཙནཏྠཾ དསྶེཏི. ‘‘སངྒྷསྶ པརིཙྩཏྟེནཱ’’ཏི ཨིམིནཱ སངྒྷསྶ པརིཙྩཏྟོ སངྒྷིཀོཏི ཝཙནཏྠཾ དསྶེཏི.

༧༦༢. ཡདཏྠཱཡཱཏི ཡེསཾ ཙཱིཝརཱདཱིནཾ ཨཏྠཱཡ. ཡསདྡེན སམཱསབྷཱཝཏོ པུབྦེ ནིགྒཧིཏཱགམོ ཧོཏི. ཏནྟི ཙཱིཝརཱདིཀཾ. ཏུམྷེཧཱིཏི དཱཡཀེ སནྡྷཱཡ ཝུཏྟཾ. ཨུཔདྡཝེསཱུཏི དུབྦྷིཀྑཱདིཨུཔསགྒེསུ. ཡཾ ཝཱ ཏཾ ཝཱཏི ཙཱིཝརཾ ཝཱ ཨཉྙེ ཝཱ པིཎྜཔཱཏཱདིཀེཏི ཡཾ ཝཱ ཏཾ ཝཱཏི. ཚཊྛཾ.

༧. སཏྟམནིསྶགྒིཡཔཱཙིཏྟིཡསིཀྑཱཔདཾ

༧༦༤. སཏྟམེ སཉྙཱཙིཀེནཱཏི ཨེཏྠ སཾསདྡསྶ སཡམཏྠེ པཝཏྟིབྷཱཝཾ དསྶེཏུཾ ཝུཏྟཾ ‘‘སཡཾ ཡཱཙིཏཀེནཱ’’ཏི. ཨེཏདེཝཱཏི ‘‘སཉྙཱཙིཀེནཱ’’ཏི པདམེཝ. ཨེཏྠཱཏི ཨིམསྨིཾ སིཀྑཱཔདེཏི. སཏྟམཾ.

༨. ཨཊྛམནིསྶགྒིཡཔཱཙིཏྟིཡསིཀྑཱཔདཾ

༧༦༩. ཨཊྛམེ ¶ གཎསྶཱཏི བྷིཀྑུནིགཎསྶ. ཨིམིནཱ ‘‘མཧཱཛནིཀེནཱ’’ཏི ཨེཏྠ བྷིཀྑུནིགཎོཝ མཧཱཛནོཏི ཨདྷིཔྤེཏོཏི དཱིཔེཏཱིཏི. ཨཊྛམཾ.

༩. ནཝམནིསྶགྒིཡཔཱཙིཏྟིཡསིཀྑཱཔདཾ

༧༧༤. ནཝམེ ཨིཏོཏི ཨིམསྨཱ ཨཊྛམསིཀྑཱཔདཏོ. ཨདྷིཀཏརནྟི ཨཏིརེཀཏརནྟི. ནཝམཾ.

༡༠. དསམནིསྶགྒིཡཔཱཙིཏྟིཡསིཀྑཱཔདཾ

༧༧༨. དསམེ ¶ ‘‘ཝིནསྶཏཱི’’ཏིཨིམིནཱ ‘‘ཨུནྡྲིཡཏཱི’’ཏི ཨེཏྠ ཨུདིདྷཱཏུཡཱ ནསྶནཏྠཾ དསྶེཏི དྷཱཏཱུནམནེཀཏྠཏྟཱ. པརིཔཏཏཱིཏི པརིགལིཏྭཱ པཏཏི. ཨིམིནཱ ནསྶནཱཀཱརཾ དསྶེཏི. ཨེཏྟཀམེཝཱཏི ཨེཏཾ པརིམཱཎཾ དྭིཔདམེཝཱཏི. དསམཾ.

༡༡. ཨེཀཱདསམནིསྶགྒིཡཔཱཙིཏྟིཡསིཀྑཱཔདཾ

༧༨༤. ཨེཀཱདསམེ གརུཔཱཝུརཎཾ ནཱམ སཱིཏཀཱལེ པཱཝུརཎཝཏྠནྟི དསྶེནྟོ ཨཱཧ ‘‘སཱིཏཀཱལེ པཱཝུརཎ’’ནྟི. སཱིཏཀཱལེ ཧི མནུསྶཱ ཐཱུལཔཱཝུརཎཾ པཱརུཔནྟི. ‘‘ཙཏུཀྐཾསཔརམ’’ནྟི ཨེཏྠ ཀཾསསདྡོ བྷུཉྫནཔཏྟེ ཙ སུཝཎྞཱདིལོཧཝིསེསེ ཙ ཙཏུཀཧཱཔཎེ ཙཱཏི ཏཱིསུ ཨཏྠེསུ དིསྶཏི, ཨིདྷ པན ཙཏུཀཧཱཔཎེ ཝཏྟཏཱིཏི དསྶེནྟོ ཨཱཧ ‘‘ཀཾསོ ནཱམ ཙཏུཀྐཧཱཔཎིཀོ ཧོཏཱི’’ཏི. ཙཏུཀྐཾསསངྑཱཏཾ པརམཾ ཨིམསྶཱཏི ཙཏུཀྐཾསཔརམཾ, སོལ༹སཀཧཱཔཎགྒྷནཀཾ པཱཝུརཎནྟི ཨཏྠོཏི. ཨེཀཱདསམཾ.

༡༢. དྭཱདསམནིསྶགྒིཡཔཱཙིཏྟིཡསིཀྑཱཔདཾ

༧༨༩. དྭཱདསམེ ལཧུཔཱཝུརཎཾ ནཱམ ཨུཎྷཀཱལེ པཱཝུརཎཝཏྠནྟི དསྶེནྟོ ཨཱཧ ‘‘ཨུཎྷཀཱལེ པཱཝུརཎ’’ནྟི. ཨུཎྷཀཱལེ ཧི མནུསྶཱ སུཁུམཔཱཝུརཎཾ པཱརུཔནྟཱིཏི. དྭཱདསམཾ.

ནིསྶགྒིཡཱནཾ ¶ ཏིཾསབྷཱཝཾ དསྶེནྟོ ཨཱཧ ‘‘མཧཱཝིབྷངྒེ’’ཏིཨཱདི. ཙཱིཝརཝགྒཏོ ཨཔནེཏྭཱཏི སམྦནྡྷོ. ཨཉྙདཏྠིཀཱནཱིཏི ཨཉྙདཏྠིཀཔདེན ཝུཏྟཱནི སིཀྑཱཔདཱནི. ཨིཏཱིཏི ཨེཝཾ. ཨེཀཏོཔཉྙཏྟཱནཱིཏི ཨེཀསྶེཝ པཉྙཏྟཱནི, ཨུབྷཏོཔཉྙཏྟཱནཱིཏི ཨུབྷཡེསཾ པཉྙཏྟཱནི. ཨེཏྠཱཏི ‘‘ཨུདྡིཊྛཱ ཁོ’’ཏིཨཱདིཝཙནེཏི.

ཨིཏི སམནྟཔཱསཱདིཀཱཡ ཝིནཡསཾཝཎྞནཱཡ

བྷིཀྑུནིཝིབྷངྒེ

ཏིཾསཀཝཎྞནཱཡ ཡོཛནཱ སམཏྟཱ.

༤. པཱཙིཏྟིཡཀཎྜཾ

༡. ལསུཎཝགྒོ

༡. པཋམསིཀྑཱཔད-ཨཏྠཡོཛནཱ

ཏིཾསཀཱནནྟརཾ ¶ ཏིཾསཀཱནཾ ཨནནྟརེ ཀཱལེ ཚསཊྛིསཏསངྒཧཱ ཚཨུཏྟརསཊྛིཨདྷིཀསཏེཧི སིཀྑཱཔདེཧི སངྒཧིཏཱ ཡེ དྷམྨཱ སངྒཱིཏིཀཱརེཧི སངྒཱིཏཱ, དཱནི ཨིམསྨིཾ ཀཱལེ ཏེསམྤི དྷམྨཱནཾ ཨཡཾ ཝཎྞནཱ ཧོཏཱིཏི ཡོཛནཱ.

༧༩༣. ཏཏྠཱཏི ཏེསུ ཚསཊྛིསཏསངྒཧེསུ སིཀྑཱཔདེསུ, པཋམསིཀྑཱཔདེཏི སམྦནྡྷོ. ‘‘དྭེ ཏཡོ’’ཏི ཨེཏྠ ཝཱསདྡོ ལུཏྟནིདྡིཊྛོཏི ཨཱཧ ‘‘དྭེ ཝཱ ཏཡོ ཝཱ’’ཏི. ཕོཊལཀེཏི ཀནྡེ, མིཉྫེ ཝཱ. ཨེཏནྟི ‘‘གཎྜིཀེ’’ཏི ཨེཏཾ ནཱམཾ. ‘‘པམཱཎ’’ནྟིཨིམིནཱ མཏྟསདྡོ པམཱཎཏྠོཝ, ན ཨཔྤཏྠོ, ནཱཔི ཨཝདྷཱརཎཏྠོཏི དསྶེཏི. ལསུཎནྟི སེཏཝཎྞམཱུལཾ མཧཱཀནྡཾ. མཧཱཀནྡོ ཧི བྱཉྫནསམྤཱཀཱདཱིསུ ཨཱམགནྡྷཱནཾ ཨབྷིབྷཝནཏྟཱ ལསཱིཡཏི ཀནྟཱིཡཏཱིཏི ལསུཎནྟི ཝུཙྩཏི.

སུཝཎྞཧཾསཡོནིནྟི སུཝཎྞམཡེན པཏྟེན ཡུཏྟཾ ཧཾསཡོནིཾ. ཛཱཏིསྶརོཏི ཛཱཏིཾ བྷཝཾ སརཏི ¶ ཛཱནཱཏཱིཏི ཛཱཏིསྶརོ. ཨཐཱཏི ཛཱཏིསྶརསྶ ནིཔྥནྣཏྟཱ. ནིཔྥནྣཏྠོ ཧི ཨཐསདྡོ. པུབྦསིནེཧེནཱཏི པུབྦེ མནུསྶབྷཝེ བྷཱཝིཏེན སིནེཧེན. ཏཱསནྟི པཛཱཔཏིཡཱ ཙ ཏིསྶནྣཾ དྷཱིཏརཱནཉྩ. ཏཾ པནཱཏི པཏྟཾ པན.

༧༩༥. མགདྷེསཱུཏི མགདྷརཊྛེ ཋིཏེསུ ཛནཔདེསུ. ཧཱིཏི སཙྩཾ, ཡསྨཱ ཝཱ. ཨིདྷཱཏི ‘‘ལསུཎཾ ཁཱདེཡྻཱ’’ཏིཔདེ. ཏམྤཱིཏི མཱགདྷཀམྤི. གཎྜིཀལསུཎམེཝཱཏི གཎྜོ ཕོཊོ ཨེཏསྶཏྠཱིཏི གཎྜིཀཾ. གཎྜསདྡོ ཧི ཕོཊཔརིཡཱཡོ, བཧུཏྠེ ཨིཀཔཙྩཡོ. བཧུགཎྜིཀལསུཎནྟི ཧི ཝུཏྟཾ ཧོཏི. གཎྜསདྡོ ཧི ཕོཊེ ཙ ཀཔོལེ ཙཱཏི དྭཱིསུ ཨཏྠེསུ ཝཏྟཏི, ཨིདྷ པན ཕོཊེ ཝཏྟཏཱིཏི དཊྛབྦཾ. པོཏྠཀེསུ པན ཨོཊྛཛེན ཙཏུཏྠཀྑརེན པཱཋོ ཨཏྠི, སོ ཝཱིམཾསིཏྭཱ གཧེཏབྦོ. བཧཱུསུ ཧི པུབྦཔོཏྠཀེསུ ¶ ཀཎྛཛོ ཏཏིཡཀྑརོ ཙ ཨོཊྛཛོ ཙཏུཏྠཀྑརོ ཙཱཏི དྭེ ཨཀྑརཱ ཨཉྙམཉྙཾ པརིཝཏྟིཏྭཱ ཏིཊྛནྟི. ན ཨེཀདྭིཏིམིཉྫཀནྟི ཨེཀམིཉྫོ པལཎྜུཀོ ན ཧོཏི, དྭིམིཉྫོ བྷཉྫནཀོ ན ཧོཏི, ཏིམིཉྫོ ཧརིཏཀོ ན ཧོཏཱིཏི ཨཏྠོ. ཀུརུནྡིཡཾ པན ཝུཏྟནྟི སམྦནྡྷོ. སངྑཱདིཏྭཱཏི དནྟེཧི ཙུཎྞཝིཙུཎྞཾ ཀཏྭཱ.

༧༩༧. པལཎྜུཀོཏི སུཀནྡཀོ ཨེཀོ ལསུཎཝིསེསོ. བྷཉྫནཀཱདཱིནི ལོཀསངྐེཏོཔདེསཏོ དཊྛབྦཱནི. ཧཱིཏི སཙྩཾ. ཏསྶཱཏི ཙཱཔལསུཎསྶ. སབྷཱཝེནེཝཱཏི སཱུཔསམྤཱཀཱདིཾ ཝིནཱ ཨཏྟནོ སབྷཱཝཏོ ཨེཝ. ཏནྟི མཱགདྷཀཾ, པཀྑིཔིཏུནྟི སམྦནྡྷོ. ཧཱིཏི སཙྩཾ. ཡཏྠ ཀཏྠཙཱིཏི ཡེསུ ཀེསུཙཱིཏི. པཋམཾ.

༢. དུཏིཡསིཀྑཱཔདཾ

༧༩༩. དུཏིཡེ སཾདསྶནཾ བཱདྷཏི ནིསེདྷེཏི ཨསྨིཾ ཋཱནེཏི སམྦཱདྷནྟི ཝཙནཏྠེན པཊིཙྪནྣོཀཱསོ སམྦཱདྷོ ནཱམཱཏི དསྶེནྟོ ཨཱཧ ‘‘པཊིཙྪནྣོཀཱསེ’’ཏི. ཨུབྷོ ཨུཔཀཙྪཀཱཏི དྭེ བཱཧུམཱུལཱ. ཏེ ཧི ཨུཔརི ཡཾཀིཉྩི ཝཏྠུཾ ཀཙཏི བནྡྷཏི ཨེཏྠཱཏི ཨུཔཀཙྪཀཱཏི ཝུཙྩནྟི. མུཏྟཀརཎནྟི པསྶཱཝམགྒོ. སོ ཧི མུཏྟཾ ཀརོཏི ཨནེནཱཏི མུཏྟཀརཎནྟི ཝུཙྩཏི. ལོམོ ཀཏྟཱིཡཏི ཚིནྡཱིཡཏི ཨིམཱཡཱཏི ཀཏྟརི, ཏཱཡ ཝཱ, སུཊྛུ དལ༹ྷཾ ལོམཾ ཌཾསཏཱིཏི སཎྜཱསོ, སོཡེཝ སཎྜཱསཀོ, ཏེན ཝཱ, ཁུརཏི ལོམཾ ཚིནྡཏཱིཏི ཁུརོ, ཏེན ཝཱ སཾཧརཱཔེནྟིཡཱཏི སམྦནྡྷོ. སཾཧརཱཔེནྟིཡཱཏི ཨཔནེནྟིཡཱཏི. དུཏིཡཾ.

༣. ཏཏིཡསིཀྑཱཔདཾ

༨༠༣. ཏཏིཡེ ¶ མུཏྟཀརཎཏལགྷཱཏནེཏི མུཏྟཀརཎསྶ ཏལཾ ཧནནཾ པཧརཎཾ མུཏྟཀརཎཏལགྷཱཏནཾ, ཏསྨིཾ མུཏྟཀརཎཏལགྷཱཏནེ ནིམིཏྟབྷཱུཏེ. ཏཱཝ མཧནྟནྟི ཨཏིཝིཡ མཧནྟཾ. ཀེསརེནཱཔཱིཏི ཀིཉྫཀྑེནཱཔི. སོ ཧི ཀེ ཛལེ སརཏི པཝཏྟཏཱིཏི ཀེསརོཏི ཝུཙྩཏི.

༨༠༥. གཎྜཾ ཝཱཏི པཱིལ༹ཀཾ ཝཱ. ཝཎཾ ཝཱཏི ཨརུཾ ཝཱཏི. ཏཏིཡཾ.

༤. ཙཏུཏྠསིཀྑཱཔདཾ

༨༠༦. ཙཏུཏྠེ ¶ རཉྙོ ཨོརོདྷཱ རཱཛོརོདྷཱ, པུརཱཎེ རཱཛོརོདྷཱ པུརཱཎརཱཛོརོདྷཱཏི ཝཙནཏྠཾ དསྶེནྟོ ཨཱཧ ‘‘པུརཱཎེ’’ཏིཨཱདི. ‘‘གིཧིབྷཱཝེ’’ཏི ཨིམིནཱ པུརཱཎེཏི ཨེཏྠ ཎཔཙྩཡསྶ སརཱུཔཾ དསྶེཏི. ཙིརཱཙིརནྟི ནིཔཱཏཔཊིརཱུཔཀཾ. ཏེན ཝུཏྟཾ ‘‘ཙིརེན ཙིརེནཱ’’ཏི. ‘‘སཀྐོཐཱ’’ཏི ཨིམིནཱ ཀཐཾ ཏུམྷེ རཱགཙིཏྟཾ པཊིཧནིཏྭཱ ཨཏྟཱནཾ དྷཱརེཐ དྷཱརེཏུཾ སཀྐོཐཱཏི ཨཏྠཾ དསྶེཏི. ཨནཱརོཙིཏེཔཱིཏི བྷཱུཏཏོ ཨནཱརོཙིཏེཔི.

༨༠༧. ཛཏུནཱཏི ལཱཁཱཡ. པཊྛདཎྜཀེཏི པཊུབྷཱཝེན ཋཱཏི པཝཏྟཏཱིཏི པཊྛོ, སོཡེཝ དཎྜོ པཊྛདཎྜོ, ཏསྶ པཝེསནཾ པཊྛདཎྜཀཾ, ཏསྨིཾ ནིམིཏྟབྷཱུཏེ. ཨེཏནྟི ‘‘ཛཏུམཊྛཀེ’’ཏི ཨེཏཾ ཝཙནནྟི. ཙཏུཏྠཾ.

༥. པཉྩམསིཀྑཱཔདཾ

༨༡༠. པཉྩམེ ‘‘ཨཏིགམྦྷཱིར’’ནྟིཔདཾ ཀིརིཡཱཝིསེསནནྟི ཨཱཧ ‘‘ཨཏིཨནྟོ པཝེསེཏྭཱ’’ཏི. ‘‘ཨུདཀེན དྷོཝནཾ ཀུརུམཱནཱ’’ཏི ཨིམིནཱ ‘‘ཨུདཀསུདྡྷིཀ’’ནྟིཔདསྶ ཨུདཀེན སུདྡྷིཡཱ ཀརཎནྟི ཨཏྠཾ དསྶེཏི.

༨༡༢. དྭངྒུལཔབྦཔརམནྟི ཨེཏྠ དྭེ ཨངྒུལཱནི ཙ དྭེ པབྦཱནི ཙ དྭངྒུལཔབྦཾ, ཨུཏྟརཔདེ པུབྦཔདལོཔོ. དྭངྒུལཔབྦཾ པརམཾ པམཱཎཾ ཨེཏསྶ ཨུདཀསུདྡྷིཀསྶཱཏི དྭངྒུལཔབྦཔརམཾ. ཝིཏྠཱརཏོ དྭངྒུལཔརམཾ, གམྦྷཱིརཏོ དྭིཔབྦཔརམནྟི ཝུཏྟཾ ཧོཏི. ཏེནཱཧ ‘‘ཝིཏྠཱརཏོ’’ཏིཨཱདི. ཨངྒུལཾ ¶ པཝེསེནྟིཡཱཏི སམྦནྡྷོ. ཧཱིཏི སཙྩཾ. ‘‘ཙཏུནྣཾ ཝཱ’’ཏི ཨིདཾ ཨུཀྐཊྛཝསེན ཝུཏྟཾ, ཏིཎྞམྤི པབྦཾ ན ཝཊྚཏི, ཙཏུནྣཾ པན པགེཝཱཏི ཨཏྠོཏི. པཉྩམཾ.

༦. ཚཊྛསིཀྑཱཔདཾ

༨༡༥. ཚཊྛེ བྷཏྟསྶ ཝིསྶཛྫནཾ བྷཏྟཝིསྶགྒོཏི ཝུཏྟེ བྷཏྟཀིཙྩནྟི དསྶེནྟོ ཨཱཧ ‘‘བྷཏྟཀིཙྩ’’ནྟི. པཱནཱིཡསདྡེན པཱནཱིཡཐཱལཀཾ གཧེཏབྦཾ ¶ , ཝིདྷཱུཔནསདྡེན བཱིཛནཱི གཧེཏབྦཱ, ཨུཔསདྡོ སམཱིཔཏྠོཏི སབྦཾ དསྶེནྟོ ཨཱཧ ‘‘ཨེཀེན ཧཏྠེནཱ’’ཏིཨཱདི. ‘‘ཨཙྩཱཝདཏཱི’’ཏིཔདསྶ ཨཏིཀྐམིཏྭཱ ཝདནཱཀཱརཾ དསྶེཏི ‘‘པུབྦེཔཱི’’ཏིཨཱདིནཱ.

༨༡༧. ‘‘སུདྡྷཨུདཀཾ ཝཱ ཧོཏཱུ’’ཏིཨཱདིནཱ ‘‘པཱནཱིཡེནཱ’’ཏི ཝཙནཾ ཨུཔལཀྑཎཾ ནཱམཱཏི དསྶེཏི. དདྷིམཏྠཱུཏི དདྷིམཎྜཾ དདྷིནོ སཱརོ, དདྷིམྷི པསནྣོདཀནྟི ཝུཏྟཾ ཧོཏི. རསོཏི མཙྪརསོ མཾསརསོ. ‘‘ཨནྟམསོ ཙཱིཝརཀཎྞོཔཱི’’ཏི ཨིམིནཱ ‘‘ཝིདྷཱུཔནེནཱ’’ཏི ཝཙནཾ ནིདསྶནཾ ནཱམཱཏི དསྶེཏི.

༨༡༩. དེཏཱིཏི སཡཾ དེཏི. དཱཔེཏཱིཏི ཨཉྙེན དཱཔེཏི. ཨུབྷཡམྤཱིཏི པཱནཱིཡཝིདྷཱུཔནདྭཡམྤཱིཏི. ཚཊྛཾ.

༧. སཏྟམསིཀྑཱཔདཾ

༨༢༢. སཏྟམེ ‘‘པཡོགདུཀྐཊཾ ནཱམཱ’’ཏི ཨིམིནཱ ཧེཊྛཱ ཝུཏྟེསུ ཨཊྛསུ དུཀྐཊེསུ པུབྦཔཡོགདུཀྐཊཾ དསྶེཏི. ན ཀེཝལཾ པུབྦཔཡོགདུཀྐཊཾ ཨེཏྟཀམེཝ, ཨཐ ཁོ ཨཉྙམྤི བཧུ ཧོཏཱིཏི དསྶེནྟོ ཨཱཧ ‘‘ཏསྨཱ’’ཏིཨཱདི. སངྒྷཊྚནེསུཔཱིཏི ཝིལོལ༹ནེསུཔི. དནྟེཧི སངྑཱདཏཱིཏི དནྟེཧི ཙུཎྞཝིཙུཎྞཾ ཀརོཏི. ཨེཏྠཱཏི ཨིམསྨིཾ སིཀྑཱཔདེ, ཨཉྙཱཡ བྷིཀྑུནིཡཱ ཀཱརཱཔེཏྭཱཏི སམྦནྡྷོ. ‘‘ཨཉྙཱཡཱ’’ཏིཔདཾ ‘‘ཝིཉྙཱཔེཏྭཱ’’ཏི པདེ ཀཱརིཏཀམྨཾ. མཱཏརམྤཱིཏི ཨེཏྠ པིསདྡོ ཨཉྙཾ ཝིཉྙཱཔེཏྭཱ བྷུཉྫནྟིཡཱ པགེཝཱཏི དསྶེཏི. ཏཱཡ ཝཱཏི ཝིཉྙཱཔིཏབྷིཀྑུནིཡཱ ཝཱ. ཏནྟི ཨཱམཀདྷཉྙཾ. ཏནྟི མཧཱཔཙྩརིཡཾ ཝུཏྟཝཙནཾ. པུབྦཱཔརཝིརུདྡྷནྟི པུབྦཱཔརཏོ ཝིརུདྡྷཾ. ‘‘ཨཉྙཱཡ…པེ… དུཀྐཊམེཝཱ’’ཏི པུབྦཝཙནེ དུཀྐཊམེཝ ཝུཏྟཾ, པུན ‘‘ཨཉྙཱཡ…པེ… དུཀྐཊ’’ནྟི ཙ པཙྪིམཝཙནེ པཱཙིཏྟིཡཉྩ དུཀྐཊཉྩ ཝུཏྟཾ, ཏསྨཱ པུབྦཱཔརཝིརུདྡྷནྟི ཝུཏྟཾ ཧོཏི. ཧཱིཏི སཙྩཾ, ཡསྨཱ ཝཱ.

༨༢༣. ལབྦྷམཱནཾ ¶ ཨཱམཀདྷཉྙནྟི སམྦནྡྷོ. ཨཉྙཾ ཝཱ ཡཾཀིཉྩཱིཏི མུགྒམཱསཱདཱིཧི ཝཱ ལཱབུཀུམྦྷཎྜཱདཱིཧི ཝཱ ཨཉྙཾ ཡཾཀིཉྩི ཏིལཱདིཾ ཝཱཏི. སཏྟམཾ.

༨. ཨཊྛམསིཀྑཱཔདཾ

༨༢༤. ཨཊྛམེ ¶ ནིབྦིཊྛརཱཛབྷཊོཏི ཨེཏྠ ཨུཏྟརཔདསྶ ཚཊྛཱིསམཱསཉྩ པུབྦཔདེན བཱཧིརཏྠསམཱསཉྩ དསྶེནྟོ ཨཱཧ ‘‘ནིབྦིཊྛོ’’ཏིཨཱདི. ཏཏྠ ‘‘རཉྙོ བྷཏཱི’’ཏི ཨིམིནཱ རཉྙོ བྷཊོ རཱཛབྷཊོཏི ཚཊྛཱིསམཱསཾ དསྶེཏི, ‘‘ཨེཏེནཱ’’ཏི ཨིམིནཱ བཱཧིརཏྠསམཱསཾ. ནིབྦིཊྛོཏི ནིཝིཊྛོ པཏིཊྛཱཔིཏོཏི ཨཏྠོ. ཀེཎཱིཏི རཉྙོ དཱཏབྦསྶ ཨཱཡསྶེཏམདྷིཝཙནཾ. ཨེཏེནཱཏི བྲཱཧྨཎེན. ཏཏོཏི ཋཱནནྟརཏོ. བྷཊསངྑཱཏཱཡ ཀེཎིཡཱ པཐཏྟཱ ཀཱརཎཏྟཱ ཋཱནནྟརཾ བྷཊཔཐནྟི ཨཱཧ ‘‘ཏཾཡེཝ ཋཱནནྟར’’ནྟི.

༨༢༦. ཙཏྟཱརིཔི ཝཏྠཱུནཱིཏི ཨུཙྩཱརཱདཱིནི. པཱཊེཀྐནྟི པཊིཝིསུཾ ཨེཀེཀམེཝ. ཨུཙྩཱརཾ ཝཱཏིཨཱདཱིསུ ཝཱསདྡེན དནྟཀཊྛཱདཡོཔི གཧེཏབྦཱཏི ཨཱཧ ‘‘དནྟཀཊྛ…པེ… པཱཙིཏྟིཡམེཝཱ’’ཏི. སབྦཏྠཱཏི སབྦེསུ ཨུཙྩཱརཱདཱིསཱུཏི. ཨཊྛམཾ.

༩. ནཝམསིཀྑཱཔདཾ

༨༣༠. ནཝམེ རོཔིམཧརིཏཊྛཱནེཏི རོཔིམཊྛཱནེ ཙ ཧརིཏཊྛཱནེ ཙ. རོཔིཡཏི ཨསྨིནྟི རོཔིཡཾ, ཏཾཡེཝ རོཔིམཾ ཡཀཱརསྶ མཀཱརཾ ཀཏྭཱ. ཨེཏཱནཱིཏི ཨུཙྩཱརཱདཱིནི. སབྦེསནྟི བྷིཀྑུབྷིཀྑུནཱིནཾ. ཡཏྠ པནཱཏི ཡསྨིཾ ཁེཏྟེཏི. ནཝམཾ.

༡༠. དསམསིཀྑཱཔདཾ

༨༣༥. དསམེ སོཎྜཱ ཝཱཏི སུརཱསོཎྜཱ ཝཱ. མོརོཏི མཡཱུརོ. སུཝོཏི སུཀོ. མཀྐཊོཏི ཝཱནརོ. ཨཱདིསདྡེན སཔྤཱདཡོ སངྒཎྷཱཏི, མཀྐཊཱདཡོཔི ནཙྩནྟཱུཏི སམྦནྡྷོ. ཨསཾཡཏབྷིཀྑཱུནནྟི ཝཱཙསིཀཀམྨེ ཨསཾཡཏཱནཾ བྷིཀྑཱུནཾ, དྷམྨབྷཱཎཀགཱིཏཾ ཝཱ ཧོཏཱུཏི ཡོཛནཱ. ཏནྟིཡཱ གུཎེན བདྡྷཱ ཏནྟིབདྡྷཱ. ‘‘བྷི’’ནྟིསངྑཱཏོ རཱསདྡོ ཨེཏིསྶཱཏི བྷེརི. ཀུཊེན ཀཏཱ བྷེརི ཀུཊབྷེརི, ཏཱཡ ཝཱདིཏཾ ཀུཊབྷེརིཝཱདིཏཾ, ཏཾ ཝཱ. ཨུདཀབྷེརཱིཏི ¶ ཨུདཀེན པཀྑིཏྟཱ བྷེརི, ཏཱཡ ཝཱདིཏམྤི ཧོཏཱུཏི སམྦནྡྷོ.

༨༣༦. ཏེསཾཡེཝཱཏི ¶ ཡེསཾ ནཙྩཾ པསྶཏི, ཏེསཾཡེཝ. ཡདི པན ནཙྩགཱིཏཝཱདིཏེ ཝིསུཾ ཝིསུཾ པསྶཏི སུཎཱཏི, པཱཊེཀྐཱ ཨཱཔཏྟིཡོཏི དསྶེནྟོ ཨཱཧ ‘‘སཙེ པནཱ’’ཏིཨཱདི. ཨཉྙཏོཏི ཨཉྙཏོ དེསཏོ, པསྶཏཱིཏི སམྦནྡྷོ. ‘‘ཨོལོཀེཏྭཱ’’ཏི པདེ ཨཔེཀྑིཏེ ཨུཔཡོགཏྠེ ཏོཔཙྩཡོ ཧོཏི. ཨཉྙཾ ཨོལོཀེཏྭཱཏི ཧི ཨཏྠོ. ཨཉྙཏོ ཝཱདེནྟེ པསྶཏཱིཏི ཡོཛནཱ. བྷིཀྑུནཱི ན ལབྷཏཱིཏི སམྦནྡྷོ. ཨཉྙེ ཝཏྟུམྤཱིཏི སམྦནྡྷོ. ཨུཔཧཱརནྟི པཱུཛཾ. ཨུཔཊྛཱནནྟི པཱརིཙརིཡཾ. སབྦཏྠཱཏི སབྦེསུ སཡཾ ནཙྩཱདཱིསུ.

༨༣༧. ཨནྟརཱརཱམེ ཝཱཏི ཨཱརཱམསྶ ཨནྟརེ ཝཱ. བཧིཨཱརཱམེ ཝཱཏི ཨཱརཱམསྶ བཧི ཝཱ. ཨཉྙེན ཝཱཏི སལཱཀབྷཏྟཱདཱིཧི ཨཉྙེན ཝཱ. ཏཱདིསེནཱཏི ཡཱདིསོ ཙོརཱདིཨུཔདྡཝོ, ཏཱདིསེནཱཏི. དསམཾ.

ལསུཎཝགྒོ པཋམོ.

༢. ཨནྡྷཀཱརཝགྒོ

༡. པཋམསིཀྑཱཔད-ཨཏྠཡོཛནཱ

༨༣༩. ཨནྡྷཀཱརཝགྒསྶ པཋམེ ཨཔྤདཱིཔེཏི ཨུཔལཀྑཎཝསེན ཝུཏྟཏྟཱ ཨཉྙེཔི ཨཱལོཀཱ གཧེཏབྦཱཏི དསྶེནྟོ ཨཱཧ ‘‘པདཱིཔཙནྡསཱུརིཡཨགྒཱིསཱུ’’ཏིཨཱདི. ཨསྶཱཏི ‘‘ཨཔྤདཱིཔེ’’ཏིཔདསྶ.

༨༤༡. ནརཧོཨསྶཱདཱཔེཀྑཱ ཧུཏྭཱ ཙ རསྶཱདཏོ ཨཉྙཝིཧིཏཱཝ ཧུཏྭཱ ཙཱཏི ཡོཛནཱ. ཨིམིནཱ ‘‘སནྟིཊྛཏི ཝཱ སལླཔཏི ཝཱ’’ཏི པདེ ཀིརིཡཱཝིསེསནབྷཱཝཾ དསྶེཏི. དཱནེན ཝཱ ནིམིཏྟབྷཱུཏེན, པཱུཛཱཡ ཝཱ ནིམིཏྟབྷཱུཏཱཡ མནྟེཏཱིཏི ཡོཛནཱཏི. པཋམཾ.

༢. དུཏིཡསིཀྑཱཔདཾ

༨༤༢. དུཏིཡེ ¶ ¶ ཨིདམེཝ པདཾ ནཱནནྟི སམྦནྡྷོཏི. དུཏིཡཾ.

༣. ཏཏིཡསིཀྑཱཔདཾ

༨༤༦. ཏཏིཡེ ‘‘ཨིདམེཝཱ’’ཏི པདཾ ཨནུཝཏྟེཏབྦཾ. ཏཱདིསམེཝཱཏི པཋམསདིསམེཝཱཏི ཨཏྠོཏི. ཏཏིཡཾ.

༤. ཙཏུཏྠསིཀྑཱཔདཾ

༨༥༠. ཙཏུཏྠེ ཀཎྞསྶ སམཱིཔཾ ནིཀཎྞཾ, ཏམེཝ ནིཀཎྞིཀནྟི ཝུཏྟེ ཀཎྞམཱུལནྟི ཨཱཧ ‘‘ཀཎྞམཱུལཾ ཝུཙྩཏཱི’’ཏི. ‘‘ཀཎྞམཱུལེ’’ཏི ཨིམིནཱ ‘‘ནིཀཎྞིཀ’’ནྟི ཨེཏྠ བྷུམྨཏྠེ ཨུཔཡོགཝཙནནྟི དསྶེཏི. ཨཱཧརཎཏྠཱཡཱཏི ཨཱཧརཱཔནཏྠཱཡཱཏི. ཙཏུཏྠཾ.

༥. པཉྩམསིཀྑཱཔདཾ

༨༥༤. པཉྩམེ ཏེསནྟི གྷརསཱམིཀཱནཾ. གྷརམྤཱིཏི ན ཀེཝལཾ ཨཱསནམེཝ, གྷརམྤི སོདྷེམཱཏི ཨཏྠོ. ཏཏོཏི པརིཝིཏཀྐནཏོ, པརནྟི སམྦནྡྷོ.

༨༥༨. ཙོརཱ ཝཱ ཨུཊྛིཏཱ ཧོནྟཱིཏི ཡོཛནཱཏི. པཉྩམཾ.

༦. ཚཊྛསིཀྑཱཔདཾ

༨༦༠. ཚཊྛེ ཨབྷིནིསཱིདེཡྻཱཏི ཨེཏྠ ཨབྷིསདྡོ ཨུཔསགྒམཏྟོཝཱཏི དསྶེནྟོ ཨཱཧ ‘‘ནིསཱིདེཡྻཱ’’ཏི. ཨེསེཝ ནཡོ ཨབྷིནིཔཛྫེཡྻཱཏི ཨེཏྠཱཔི. དྭེ ཨཱཔཏྟིཡོཏི སམྦནྡྷོཏི. ཚཊྛཾ.

༧. སཏྟམསིཀྑཱཔདཾ

༨༦༤. སཏྟམེ ¶ སབྦནྟི སཀལཾ ཝཏྟབྦཝཙནནྟི. སཏྟམཾ.

༨. ཨཊྛམསིཀྑཱཔདཾ

༨༦༩. ཨཊྛམེ ཨནུཏྟཱནཝཙནཾ ནཏྠཱིཏི. ཨཊྛམཾ.

༩. ནཝམསིཀྑཱཔདཾ

༨༧༥. ནཝམེ ¶ ཨབྷིསཔེཡྻཱཏི ཨེཏྠ སཔདྷཱཏུསྶ ཨཀྐོསནཏྠཾ ཨནྟོཀཏྭཱ ཀརདྷཱཏུཡཱ ཨཏྠཾ དསྶེནྟོ ཨཱཧ ‘‘སཔཐཾ ཀརེཡྻཱ’’ཏི. ནིརཡེ ནིབྦཏྟཱམྷཱིཏི ཨཧཾ ནིརཡེ ནིབྦཏྟཱ ཨམྷཱིཏི ཡོཛནཱ. ནིརཡེ ནིབྦཏྟཏཱུཏི ཨེསཱ བྷིཀྑུནཱི ནིརཡེ ནིབྦཏྟཏཱུཏི ཡོཛནཱ. ཨཱིདིསཱ ཧོཏཱུཏི མམ སདིསཱ ཧོཏཱུཏི ཨཏྠོ. ཀཱཎཱཏི ཨེཀཀྑིཀཱཎཱ, དྭཀྑིཀཱཎཱ ཝཱ. ཀུཎཱིཏི ཧཏྠཔཱདཱདིཝངྐཱ.

༨༧༨. ཨེདིསཱཏི ཝིརཱུཔཱདིཛཱཏིཀཱ. ཝིརམསྶཱུཏི ཝིརམཱཧི. ཨདྡྷཱཏི དྷུཝནྟི. ནཝམཾ.

༡༠. དསམསིཀྑཱཔདཾ

༨༧༩. དསམེ ཨནུཏྟཱནཊྛཱནཾ ནཏྠཱིཏི. དསམཾ.

ཨནྡྷཀཱརཝགྒོ དུཏིཡོ.

༣. ནགྒཝགྒོ

༡. པཋམསིཀྑཱཔད-ཨཏྠཡོཛནཱ

༨༨༣. ནགྒཝགྒསྶ ¶ པཋམེ བྲཧྨཙརིཡེན ཙིཎྞེནཱཏི ཙིཎྞེན བྲཧྨཙརིཡེན ཀིཾ ནུ ཁོ ནཱམཱཏི ཨཏྠོ. ‘‘བྲཧྨཙརིཡསྶ ཙརཎེནཱ’’ཏི ཨིམིནཱ ཙིཎྞསདྡསྶ ཙརཎཾ ཙིཎྞནྟི ཝཙནཏྠཾ དསྶེཏི. ‘‘ན ཨཉྙཾ ཙཱིཝར’’ནྟི ཨིམིནཱ ཨེཝཏྠཾ དསྶེཏི, ཨཉྙཏྠཱཔོཧནཾ ཝཱཏི. པཋམཾ.

༢. དུཏིཡསིཀྑཱཔདཾ

༨༨༧. དུཏིཡེ ཨནུཏྟཱནཊྛཱནཾ ནཏྠཱིཏི. དུཏིཡཾ.

༣. ཏཏིཡསིཀྑཱཔདཾ

༨༩༣. ཏཏིཡེ ¶ ཨནནྟརཱཡིཀིནཱིཏི ཨེཏྠ ནཏྠི ཨནྟརཱཡོ ཨེཏིསྶཱཏི ཨནནྟརཱཡཱ, སཱ ཨེཝ ཨནནྟརཱཡིཀིནཱིཏི ཝཙནཏྠཾ དསྶེནྟོ ཨཱཧ ‘‘ཨནནྟརཱཡཱ’’ཏི. ཏཏིཡཾ.

༤. ཙཏུཏྠསིཀྑཱཔདཾ

༨༩༨. ཙཏུཏྠེ པཉྩཱཧནྟི སམཱཧཱརདིགུ, ཎིཀཔཙྩཡོ སྭཏྠོ. སངྒྷཱཊིཙཱརོཏིཨེཏྠ ཀེནཊྛེན སངྒྷཱཊི ནཱམ, ཙཱརསདྡོ ཀིམཏྠོཏི ཨཱཧ ‘‘པརིབྷོགཝསེན ཝཱ’’ཏིཨཱདི. ཏཏྠ སངྒྷཊིཏཊྛེནཱཏི སཾཧརིཏཊྛེན. ཨིམིནཱ ‘‘ཀེནཊྛེན སངྒྷཱཊི ནཱམཱ’’ཏི པུཙྪཾ ཝིསཛྫེཏི. ‘‘པརིཝཏྟན’’ནྟི ཨིམིནཱ ‘‘ཙཱརསདྡོ ཀིམཏྠོ’’ཏི ཙོདནཾ པརིཧརཏི. པཉྩསཱུཏི ཏིཙཱིཝརཾ ཨུདཀསཱཊིཀཱ སཾཀཙྩིཀཱཏི པཉྩསཱུཏི. ཙཏུཏྠཾ.

༥. པཉྩམསིཀྑཱཔདཾ

༩༠༣. པཉྩམེ ‘‘ཙཱིཝརསངྐམནཱིཡ’’ནྟིཨེཏྠ སངྐམེཏབྦཾ པཊིདཱཏབྦནྟི སངྐམནཱིཡནྟི ཀམུདྷཱཏུསྶ པཊིདཱནཏྠཉྩ ཨནཱིཡསདྡསྶ ཀམྨཏྠཉྩ, ‘ཙཱིཝརཉྩ ཏཾ སངྐམནཱིཡཉྩེ’ཏི ཙཱིཝརསངྐམནཱིཡནྟི ¶ ཝིསེསནཔརཔདབྷཱཝཉྩ དསྶེནྟོ ཨཱཧ ‘‘སངྐམེཏབྦཾ ཙཱིཝར’’ནྟི. ཏཏྠ ‘‘སངྐམེཏབྦཾ ཙཱིཝར’’ནྟི ཨིམིནཱ ཀམྨཏྠཉྩ ཝིསེསནཔརཔདབྷཱཝཉྩ དསྶེཏི. ‘‘པཊིདཱཏབྦཙཱིཝར’’ནྟི ཨིམིནཱ ཀམུདྷཱཏུཡཱ ཨཏྠཾ དསྶེཏི ཨདྷིཔྤཱཡཝསེནཱཏི. པཉྩམཾ.

༦. ཚཊྛསིཀྑཱཔདཾ

༩༠༩. ཚཊྛེ ‘‘ཨཉྙཾ པརིཀྑཱར’’ནྟིཨེཏྠ པརིཀྑཱརསྶ སརཱུཔཾ དསྶེནྟོ ཨཱཧ ‘‘ཡཾཀིཉྩཱི’’ཏིཨཱདི. ཡཾཀིཉྩི ཨཉྙཏརནྟི སམྦནྡྷོ. ཀིཏྟཀཾཨགྒྷནཀནྟི ཀིཾ པམཱཎེན ཨགྒྷེན ཨརཧཾ ཙཱིཝརཾ. དཱཏུཀཱམཏྠཱཏི ཏུམྷེ དཱཏུཀཱམཱ བྷཝཐཱཏི ཨཏྠོ. ཀཏིཔཱཧེནཱཏི ཀཏིཔཡཱནི ཨཧཱནི ཀཏིཔཱཧཾ, ཡཀཱརལོཔོ. ཀཏིཔཡསདྡོཧི དྭིཏིཝཱཙཀོ རཱུལ༹ྷཱིསདྡོ ¶ , ཏེན ཀཏིཔཱཧེན. སམགྒྷནྟི ཨཔྤགྒྷཾ. སཾསདྡོ ཧི ཨཔྤཏྠཝཱཙཀོཏི. ཚཊྛཾ.

༧. སཏྟམསིཀྑཱཔདཾ

༩༡༡. སཏྟམེ ‘‘ཝིཔཀྐམིཾསཱུ’’ཏི ཨེཏྠ ཝིཝིདྷཾ ཋཱནཾ པཀྐམིཾསཱུཏི དསྶེནྟོ ཨཱཧ ‘‘ཏཏྠ ཏཏྠ ཨགམཾསཱུ’’ཏི. ཨམྷཱཀམྤི ཨཱགམནནྟི སམྦནྡྷོ.

༩༡༥. ཀཏིཔཱཧེན ཨུཔྤཛྫིསྶཏཱིཏི ཀཏིཔཱཧེན ཙཱིཝརཾ ཨུཔྤཛྫིསྶཏི. ཏཏོཏི ཏསྨིཾ ཙཱིཝརུཔྤཛྫནཀཱལེཏི. སཏྟམཾ.

༨. ཨཊྛམསིཀྑཱཔདཾ

༩༡༦. ཨཊྛམེ ཡེ ནཱཊཀཾ ནཱཊེནྟི, ཏེ ནཊཱ ནཱམཱཏི ཡོཛནཱ. ཨིམིནཱ ནཊཀཾ ནཱཊེནྟཱིཏི ནཊཱཏི ཝཙནཏྠཾ དསྶེཏི. ཡེ ནཙྩནྟི, ཏེ ནཱཊཀཱ ནཱམཱཏི ཡོཛནཱ. ཨིམིནཱ སཡཾ ནཊནྟཱིཏི ནཱཊཀཱཏི ཝཙནཏྠཾ དཱིཔེཏི. ཝཾསཝརཏྟཱདཱིསཱུཏི ཨེཏྠ ཝཾསོ ནཱམ ཝེཎུ. ཝརཏྟཱ ནཱམ ནདྡྷིཀཱ. ཨཱདིསདྡེན རཛྫུཨཱདཡོ སངྒཎྷཱཏི. ཡེ ལངྒྷནཀམྨཾ ཀརོནྟི, ཏེ ལངྒྷཀཱ ནཱམཱཏི ཡོཛནཱ. མཱཡཱཀཱརཱཏི ཨེཏྠ མཱཡཱ ནཱམ མཡནཱམཀེན ཨསུརེན སུརེ ཙལཡིཏུཾ ཀཏཏྟཱ མཡསྶ ཨེསཱཏི མཱཡཱ, ཏཾ ཀརོཏཱིཏི མཱཡཱཀཱརོ, མཡནཱམཀོ ཨསུརོཡེཝ. ཨཉྙེ པན རཱུལ༹ྷཱིཝསེན ‘‘མཱཡཱཀཱརཱ’’ཏི ཝུཙྩནྟི. སོཀེན ཛྷཱཡནཾ ཌཡ྄ཧནཾ སོཀཛ྄ཛྷཱཡཾ, སུརཱནཾ སོཀཛ྄ཛྷཱཡཾ ཀརོཏཱིཏི སོཀཛ྄ཛྷཱཡིཀོ, མཡནཱམཀོ ཨསུརོཡེཝ. ཨཉྙེ པན རཱུལ༹ྷཱིཝསེན ‘‘སོཀཛ྄ཛྷཱཡིཀཱ’’ཏི ¶ ཝུཙྩནྟི. ཨིཏི ཨིམམཏྠཾ དསྶེཏུཾ ཝུཏྟཾ ‘‘སོཀཛ྄ཛྷཱཡིཀཱ ནཱམ མཱཡཱཀཱརཱ’’ཏི. ཀུམྦྷཐུཎིཀཱ ནཱམཱཏི ཨེཏྠ ཝིསྶཊྛཏྟཱ ཐཝཱིཡཏཱིཏི ཐུཎོ, སདྡོ. ཀུམྦྷསྶ ཐུཎོ ཀུམྦྷཐུཎོ. ཏེན ཀཱིལ༹ནྟཱིཏི ཀུམྦྷཐུཎིཀཱ, ཨིཏི ཨིམམཏྠཾ དསྶེཏི ‘‘གྷཊཀེན ཀཱིལ༹ནཀཱ’’ཏི ཨིམིནཱ. བིམྦིསཀནྟི ཙཏུརསྶཨམྦཎཏཱལ༹ནཾ, ཏཾ ཝཱདེནྟཱིཏི བིམྦིསཀཝཱདཀཱཏི. ཨཊྛམཾ.

༩. ནཝམསིཀྑཱཔདཾ

༩༢༡. ནཝམེ ¶ ཏེསནྟི ཡེ ‘‘ན མཡཾ ཨཡྻེ སཀྐོམཱ’’ཏི ཝདནྟི, ཏེསཾ. དསྶཏཱིཏི ཨཙྪཱདེསྶཏཱིཏི. ནཝམཾ.

༡༠. དསམསིཀྑཱཔདཾ

༩༢༧. དསམེ ཡསྶཱཏི ཀཐིནསྶ. ཨུབྦྷཱརམཱུལཀོཏི ཨུདྡྷཱརམཱུལཀོ. སདྡྷཱཔརིཔཱལནཏྠནྟི ཀཐིནུདྡྷཱརཾ ཡཱཙནྟསྶ སདྡྷཱཡ པརིཔཱལནཏྠནྟི. དསམཾ.

ནགྒཝགྒོ ཏཏིཡོ.

༤. ཏུཝཊྚཝགྒོ

༡. པཋམསིཀྑཱཔད-ཨཏྠཡོཛནཱ

༩༣༣. ཏུཝཊྚཝགྒསྶ པཋམེ ‘‘ཏུཝཊྚ ནིཔཛྫཱཡ’’ནྟི དྷཱཏུཔཱཋེསུ (སདྡནཱིཏིདྷཱཏུམཱལཱཡཾ ༡༨ ཊཀཱརནྟདྷཱཏུ) ཝུཏྟཏྟཱ ‘‘ཏུཝཊྚེཡྻུནྟི ནིཔཛྫེཡྻུ’’ནྟི ཝུཏྟནྟི. པཋམཾ.

༢. དུཏིཡསིཀྑཱཔདཾ

༩༣༧. དུཏིཡེ ¶ ཨེཀཏྠརཎཔཱཝུརཎནྟིཨེཏྠ ཨུཏྟརཔདཱནཾ དྭནྡབྷཱཝཾ, པུབྦཔདེན ཙ བཱཧིརཏྠསམཱསབྷཱཝཾ དསྶེཏུཾ ཝུཏྟཾ ‘‘ཨེཀ’’ནྟིཨཱདི. ཏཏྠ ཙེཝ, ཙསདྡེཧི དྭནྡབྷཱཝཾ དཱིཔེཏི, ‘‘ཨེཏཱས’’ནྟིཨིམིནཱ བཱཧིརཏྠསམཱསབྷཱཝཾ. ཨེཏནྟི ‘‘ཨེཀཏྠརཎཔཱཝུརཎཱ’’ཏི ཨེཏཾ ནཱམནྟི. དུཏིཡཾ.

༣. ཏཏིཡསིཀྑཱཔདཾ

༩༤༡. ཏཏིཡེ ཨུལཱ༹རཀུལཱཏི ཛཱཏིསེཊྛཀུལཱ, ཨིསྶརིཡབྷོགཱདཱིཧི ཝཱ ཝིཔུལཀུལཱ. གུཎེཧཱིཏི སཱིལཱདིགུཎེཧི. ‘‘ཨུལཱ༹རཱཏི སམྦྷཱཝིཏཱ’’ཏི ཨིམིནཱ ཨིཏིལོཔཏུལྱཱདྷིཀརཎསམཱསཾ དསྶེཏི.

‘‘ཨབྷིབྷཱུཏཱ’’ཏི ¶ ཨིམིནཱ ‘‘ཨཔཀཏཱ’’ཏི ཨེཏྠ ཀརདྷཱཏུ སབྦདྷཱཏྭཏྠཝཱཙཱིཔི ཨིདྷ ཨཔཔུབྦཏྟཱ ཝིསེསཏོ ཨབྷིབྷཝནཏྠེ ཝཏྟཏཱིཏི དསྶེཏི. ཨེཏཱསནྟི བྷིཀྑུནཱིནཾ. ‘‘སཉྙཱཔཡམཱནཱ’’ཏི ཨིམིནཱ སཉྙཱཔནཾ སཉྙཏྟཱིཏི ཝཙནཏྠཾ དསྶེཏི. ཧེཏཱུདཱཧརཎཱདཱིཧཱིཏི ཨེཏྠ ཨཱདིསདྡེན ཨུཔམཱདཡོ སངྒཎྷཱཏི. ‘‘ཝིཝིདྷེཧི ནཡེཧི ཉཱཔནཱ’’ཏི ཨིམིནཱ ཝིཝིདྷེཧི ཉཱཔནཾ ཝིཉྙཏྟཱིཏི ཝཙནཏྠཾ དསྶེཏི.

༩༤༣. ཙངྐམནེ པདཝཱརགཎནཱཡ ཨཱཔཏྟིཡཱ ན ཀཱརེཏབྦོཏི ཨཱཧ ‘‘ནིཝཏྟནགཎནཱཡཱ’’ཏི. པདཱདིགཎནཱཡཱཏི པདཨནུཔདཱདིགཎནཱཡཱཏི. ཏཏིཡཾ.

༤. ཙཏུཏྠསིཀྑཱཔདཾ

༩༤༩. ཙཏུཏྠེ ཨནུཏྟཱནཊྛཱནཾ ནཏྠཱིཏི. ཙཏུཏྠཾ.

༥. པཉྩམསིཀྑཱཔདཾ

༩༥༢. པཉྩམེ ཨཱཎཏྟཱ བྷིཀྑུནཱིཏི ཡོཛནཱ. ཨིདཉྩ པཙྩཱསནྣཝསེན ཝུཏྟཾ ཡཾཀིཉྩིཔི ཨཱཎཱཔེཏུཾ སཀྐུཎེཡྻཏྟཱཏི. པཉྩམཾ.

༦-༩. ཚཊྛཱདིསིཀྑཱཔདཾ

༩༥༥. ཚཊྛ-སཏྟམ-ཨཊྛམ-ནཝམེསུ ¶ ཨནུཏྟཱནཝཙནཾ ནཏྠཱིཏི. ཚཊྛ སཏྟམ ཨཊྛམ ནཝམཱནི.

༡༠. དསམསིཀྑཱཔདཾ

༩༧༣. དསམེ ཨཧུནྡརིཀཱཏི ཏསྨིཾ ཀཱལེ, དེསེ ཝཱ སམྦཱདྷསྶ ནཱམམེཏནྟི ཨཱཧ ‘‘ཨཧུནྡརིཀཱཏི སམྦཱདྷཱ’’ཏི.

༩༧༥. ཡཐཱ ‘‘ཨུཏྟརིཚཔྤཉྩཝཱཙཱཧཱི’’ཏི (པཱཙི. ༦༢-༦༥) ཨེཏྠ པཉྩསདྡོ ན ཀོཙི ཨཏྠོ, ཝཱཙཱསིལིཊྛཏྠཾ ལོཀཝོཧཱརཝསེན ཝུཏྟོ, ན ཨེཝམིདྷ, ཨིདྷ པན ཨཏྠོ ཨཏྠི, པཉྩ ཡོཛནཱནི གཙྪནྟིཡཱཔི ཨནཱཔཏྟིཡེཝཱཏི ཨཱཧ ¶ ‘‘པཝཱརེཏྭཱ…པེ… ཨནཱཔཏྟཱི’’ཏི. པཙྩཱགཙྪཏཱིཏི པཊིནིཝཏྟེཏྭཱ ཨཱགཙྪཏཱིཏི. དསམཾ.

ཏུཝཊྚཝགྒོ ཙཏུཏྠོ.

༥. ཙིཏྟཱགཱརཝགྒོ

༡. པཋམསིཀྑཱཔད-ཨཏྠཡོཛནཱ

༩༧༨. ཙིཏྟཱགཱརཝགྒསྶ པཋམེ རཉྙོ ཀཱིལ༹ནཊྛཱནཾ ཨགཱརཾ རཱཛཱགཱརནྟི ཝཙནཏྠཾ དསྶེནྟོ ཨཱཧ ‘‘རཉྙོ ཀཱིལ༹ནགྷར’’ནྟི. ཙིཏྟཾ ཨགཱརཾ ཙིཏྟཱགཱརཾ. ཨཱརཱམནྟི ནགརཏོ ནཱཏིདཱུརཨཱརཱམོཏི ཨཱཧ ‘‘ཨུཔཝན’’ནྟི. ཨུཡྻཱནནྟི སམྤནྣཔུཔྥཕལཏཱཡ ཨུདྡྷཾ ཨུལློཀེཏྭཱ མནུསྶཱ ཡནྟི གཙྪནྟི ཨེཏྠཱཏི ཨུཡྻཱནཾ. པོཀྑརཎིནྟི པོཀྑརཾ པདུམཾ ནེཏཱིཏི པོཀྑརཎཱི. པཉྩཔཱིཏི རཱཛཱགཱརཱདཱིནི པཉྩཔི. སབྦཏྠཱཏི དསྶནཏྠཱཡ གམནེ ཙ གནྟྭཱ པསྶནེ ཙཱཏི སབྦེསུ.

༩༨༡. ‘‘ཨཛ྄ཛྷཱརཱམེ’’ཏིཨཱདིནཱ ¶ ཨཱརཱམེ ཋིཏཱཡ ཨཱརཱམཏོ བཧི ཀཏེ རཱཛཱགཱརཱདིཀེ པསྶནྟིཡཱཔི ཨནཱཔཏྟཱིཏི དསྶེཏི. ཏཱནཱིཏི རཱཛཱགཱརཱདཱིནཱིཏི. པཋམཾ.

༢. དུཏིཡསིཀྑཱཔདཾ

༩༨༢. དུཏིཡེ ཨནུཏྟཱནཊྛཱནཾ ནཏྠཱིཏི. དུཏིཡཾ.

༣. ཏཏིཡསིཀྑཱཔདཾ

༩༨༨. ཏཏིཡེ ཡཏྟཀནྟི ཡཏྟཀཾ སུཏྟནྟི སམྦནྡྷོ. ཨཉྪིཏནྟི ཀཌྜྷིཏཾ. ཏསྨིནྟི ཏཏྟཀེ སུཏྟེཏི སམྦནྡྷོ. ཏཀྐམྷཱིཏི ཨེཏྠ ཏཀྐོཏི ཨེཀོ ཨཡོམཡོ སུཏྟཀནྟནསྶ ཨུཔཀརཎཝིསེསོ. སོ ཧི ཏཀཱིཡཏི སུཏྟཾ བནྡྷཱིཡཏི ཨེཏྠ, ཨེཏེནཱཏི ཝཱ ཏཀྐོཏི ཝུཙྩཏི, ཏསྨིཾ. ཀནྟནཏོཏི ཀནྟཱིཡཏེ ཀཔྤཱསཱདིབྷཱཝསྶ ཚིནྡཱིཡཏེ ཀནྟནཾ, ཏཏོ.

༩༨༩. དསིཀསུཏྟཱདིནྟི ¶ ཨེཏྠ དསཱཏི ཝཏྠསྶཱཝཡཝོ. སོ ཧི དིཡྻཏི ཨཝཁཎྜཱིཡཏཱིཏི དསཱཏི ཝུཙྩཏི, ཏསྶཾ དསཱཡཾ པཝཏྟཾ དསིཀཾ, ཏམེཝ སུཏྟཾ དསིཀསུཏྟཾ. ཨཱདིསདྡེན ཝཀྑམཱནཾ དུཀྐནྟིཏསུཏྟཱདིཾ སངྒཎྷཱཏཱིཏི. ཏཏིཡཾ.

༤. ཙཏུཏྠསིཀྑཱཔདཾ

༩༩༢. ཙཏུཏྠེ ཨཱདིཾ ཀཏྭཱཏི དྷོཝནཱདཱིནི ཨཱདིཾ ཀཏྭཱ. ཁཱདནཱིཡཱདཱིསཱུཏི པཱུཝཁཱདནཱིཡཱདཱིསུ. རཱུཔགཎནཱཡཱཏི པཱུཝཱདཱིནཾ སཎྛཱནགཎནཱཡ.

༩༩༣. ཡཱགུཔཱནེཏྟ ཡཱགུསངྑཱཏེ པཱནེ. ཏེསནྟི མནུསྶཱནཾ. ཝེཡྻཱཝཙྩཀརཊྛཱནེ ཋཔེཏྭཱཏི མཱཏཱཔིཏརོ ཨཏྟནོ ཝེཡྻཱཝཙྩཀརཊྛཱནེ ཋཔེཏྭཱཏི. ཙཏུཏྠཾ.

༥. པཉྩམསིཀྑཱཔདཾ

༩༩༦. པཉྩམེ ཝིནིཙྪིནནྟཱིཏི ཨདྷིཀརཎཾ ཝིནིཙྪིནནྟཱི བྷིཀྑུནཱིཏི ཡོཛནཱཏི. པཉྩམཾ.

༦. ཚཊྛསིཀྑཱཔདཾ

༩༩༩. ཚཊྛེ ¶ ཨནུཏྟཱནཝཙནཾ ནཏྠཱིཏི.

༧. སཏྟམསིཀྑཱཔདཾ

༡༠༠༧. སཏྟམེ ‘‘པུན པརིཡཱཡེ’’ཏི ཨེཏྠ པརིཡཱཡསདྡོ ཝཱརཝེཝཙནོཏི ཨཱཧ ‘‘པུན ཝཱརེ’’ཏི. མཧགྒྷཙཱིཝརནྟི མཧགྒྷཾ ཨཱཝསཐཙཱིཝརནྟི. སཏྟམཾ.

༨. ཨཊྛམསིཀྑཱཔདཾ

༡༠༠༨. ཨཊྛམེ ཨནིསྶཛྫིཏྭཱཏི ཨེཏྠ བྲཧྨདེཡྻེན ན ཨནིསྶཛྫནཾ, ཨཐ ཁོ ཏཱཝཀཱལིཀམེཝཱཏི དསྶེནྟོ ཨཱཧ ‘‘རཀྑནཏྠཱཡཱ’’ཏིཨཱདི.

༡༠༡༢. པཊིཛགྒིཀནྟི ¶ རཀྑཎཀཾ. ཝཙཱིབྷེདནྟི ‘‘པཊིཛགྒཱཧཱི’’ཏི ཝཙཱིབྷེདཾ. རཊྛེཏི ཝིཛིཏེ. ཏཉྷི རཋནྟི གཱམནིགམཱདཡོ ཏིཊྛནྟི ཨེཏྠཱཏི རཊྛནྟི ཝུཙྩཏཱིཏི. ཨཊྛམཾ.

༩. ནཝམསིཀྑཱཔདཾ

༡༠༡༥. ནཝམེ སིཔྤསདྡོ པཙྩེཀཾ ཡོཛེཏབྦོ ‘‘ཧཏྠིསིཔྤཉྩ ཨསྶསིཔྤཉྩ རཐསིཔྤཉྩ དྷནུསིཔྤཉྩ ཐརུསིཔྤཉྩཱ’’ཏི. ཏཏྠ ཐརུསིཔྤནྟི ཨསིཀཱིལ༹ནསིཔྤཾ. མནྟསདྡོཔི པཙྩེཀཾ ཡོཛེཏབྦོ ‘‘ཨཱཐབྦཎམནྟོ ཙ ཁཱིལནམནྟོ ཙ ཝསཱིཀརཎམནྟོ ཙ སོསཱཔནམནྟོ ཙཱ’’ཏི. ཏཏྠ ཨཱཐབྦཎམནྟོཏི ཨཱཐབྦཎཝེདེན ཝིཧིཏོ པརཱུཔགྷཱཏཀརོ མནྟོ. ཁཱིལནམནྟོཏི སཱརདཱརུཁཱིལཾ མནྟེན ཛཔྤིཏྭཱ པཐཝིཡཾ ནིཁཎིཏྭཱ དྷཱརཎམནྟོ. ཝསཱིཀརཎམནྟོཏི མནྟེན ཛཔྤིཏྭཱ པརསྶ ཨུམྨཏྟབྷཱཝམཱཔནྣཀརཎོ མནྟོ. སོསཱཔནམནྟོཏི པརསྶ མཾསལོཧིཏཱདིསོསཱཔནམནྟོ. ཨགདཔཡོགོཏི བྷུསཝིསསྶ པཡོཛནཾ. ཨཱདིསདྡེན ཨཉྙེཔི པརཱུཔགྷཱཏཀརཎེ སིཔྤེ སངྒཎྷཱཏི. ཡཀྑཔརིཏྟནྟི ཡཀྑེཧི སམནྟཏོ ཏཱཎཾ. ནཱགམཎྜལནྟི སཔྤཱནཾ པཝེསནནིཝཱརཎཏྠཾ མཎྜལབནྡྷམནྟོ. ཨཱདིསདྡེན ཝིསཔཊིཧནནམནྟཱདཡོ སངྒཎྷཱཏཱིཏི. ནཝམཾ.

༡༠. དསམསིཀྑཱཔདཾ

༡༠༡༨. དསམེ ¶ ཨནུཏྟཱནཝཙནཾ ནཏྠཱིཏི. དསམཾ.

ཙིཏྟཱགཱརཝགྒོ པཉྩམོ.

༦. ཨཱརཱམཝགྒོ

༡. པཋམསིཀྑཱཔད-ཨཏྠཡོཛནཱ

༡༠༢༥. ཨཱརཱམཝགྒསྶ པཋམེ ཨུཔཙཱརནྟི ཨཔརིཀྑིཏྟསྶ ཨཱརཱམསྶ པརིཀྑེཔཱརཧཊྛཱནཾ ཨུཔཙཱརཾ.

༡༠༢༧. ‘‘སཱིསཱནུལོཀིཀཱ’’ཏི ¶ སཱམཉྙཏོ ཝུཏྟེཔི བྷིཀྑུནཱིནམེཝ སཱིསནྟི ཨཱཧ ‘‘བྷིཀྑུནཱིན’’ནྟི. ཡཏྠཱཏི ཡསྨིཾ ཋཱནེཏི. པཋམཾ.

༢. དུཏིཡསིཀྑཱཔདཾ

༡༠༢༨. དུཏིཡེ ཨབྦྷནྟརོཏི ཨབྦྷནྟརེ པརིཡཱཔནྣོ, ཛཱཏོ ཝཱ. ‘‘སངྐཱམེསཱི’’ཏི ཨིམིནཱ སཾཧརཱིཏི ཨེཏྠ ཧརདྷཱཏུཡཱ སངྐམནཏྠཾ དསྶེཏི. ནྷཱཔིཏཱཏི ཀཔྤཀཱ. ཏེ ཧི ནཧཱཔེནྟི སོཙཱཔེནྟཱིཏི ནྷཱཔིཏཱཏི ཝུཙྩནྟི. ཏནྟི ཀཱསཱཝནིཝཱསནནྟི. དུཏིཡཾ.

༣-༤. ཏཏིཡ-ཙཏུཏྠསིཀྑཱཔདཾ

༡༠༣༦. ཏཏིཡཙཏུཏྠེསུ ཨནུཏྟཱནཊྛཱནཾ ནཏྠཱིཏི. ཏཏིཡཙཏུཏྠཱནི.

༥. པཉྩམསིཀྑཱཔདཾ

༡༠༤༣. པཉྩམེ ¶ ‘‘ཀུལེ མཙྪརོ’’ཏི ཨེཏྠ མཙྪརནཾ མཙྪརོཏི ཝཙནཏྠོ ཀཱཏབྦོ. ‘‘ཏཾ ཀུལཾ ཨསྶདྡྷཾ ཨཔྤསནྣ’’ནྟི ཀུལསྶ ཨཝཎྞཾ བྷཱསཏཱིཏི ཡོཛནཱ. ‘‘བྷིཀྑུནིཡོ དུསྶཱིལཱ པཱཔདྷམྨཱ’’ཏི བྷིཀྑུནཱིནཾ ཨཝཎྞཾ བྷཱསཏཱིཏི ཡོཛནཱ.

༡༠༤༥. ‘‘སནྟཾཡེཝ ཨཱདཱིནཝ’’ནྟི སམྦནྡྷིཡཱ སམྦནྡྷཾ དསྶེཏུཾ ཝུཏྟཾ ‘‘ཀུལསྶ ཝཱ བྷིཀྑུནཱིནཾ ཝཱ’’ཏི ཨིམིནཱ དྭཱིསུ ཨཉྙཏརམེཝ ན སམྦནྡྷོ ཧོཏི, ཨཐ ཁོ དྭཡམྤཱིཏི དསྶེཏཱིཏི. པཉྩམཾ.

༦. ཚཊྛསིཀྑཱཔདཾ

༡༠༤༨. ཚཊྛེ ཨོཝཱདཱཡཱཏི ཨེཏྠ ན ཡོ ཝཱ སོ ཝཱ ཨོཝཱདོ ཧོཏི, ཨཐ ཁོ གརུདྷམྨོཡེཝཱཏི ཨཱཧ ‘‘གརུདྷམྨཏྠཱཡཱ’’ཏི. སཧ ཝསཏི ཨེཏྠ, ཨེཏེནཱཏི ཝཱ སཾཝཱསོཏི ཝཙནཏྠེན ཨུཔོསཐཔཝཱརཎཱ སཾཝཱསོ ནཱམཱཏི ཨཱཧ ‘‘ཨུཔོསཐཔཝཱརཎཱཔུཙྪནཏྠཱཡཱ’’ཏི. ‘‘པུཙྪནཏྠཱཡཱ’’ཏི ཨིམིནཱ ‘‘སཾཝཱསཱཡཱ’’ཏི ཨེཏྠ ཨུཏྟརཔདལོཔབྷཱཝཾ དསྶེཏི. ཨེཏྠཱཏི བྷིཀྑུནིཝིབྷངྒེ, སིཀྑཱཔདེ ཝཱ པཱལི༹ཡཾ ཝཱཏི. ཚཊྛཾ.

༧-༩. སཏྟམ-ཨཊྛམ-ནཝམསིཀྑཱཔདཾ

༡༠༥༣. སཏྟམཊྛམནཝམེསུ ¶ ཨནུཏྟཱནཝཙནཾ ནཏྠི. ཀེཝལཾ པན ‘‘ཨིམིསྶཱཔཱི’’ཏི པདཾ ཝིསེསོ, ཨིམིསྶཱཔི པཱལི༹ཡཱཏི ཨཏྠོཏི. སཏྟམཊྛམནཝམཱནི.

༡༠. དསམསིཀྑཱཔདཾ

༡༠༦༢. དསམེ དྭེ ཀཱཡཱ ཨུཔརིམཀཱཡོ ཧེཊྛིམཀཱཡོཏི. ཏཏྠ ཀཊིཏོ ཨུདྡྷཾ ཨུཔརིམཀཱཡོ, ཧེཊྛཱ ཧེཊྛིམཀཱཡོ. ཏཏྠ ‘‘པསཱཁེ’’ཏི ཨིདཾ ཧེཊྛིམཀཱཡསྶ ནཱམནྟི ཨཱཧ ‘‘ཨདྷོཀཱཡེ’’ཏི. ཧཱིཏི སཙྩཾ. ཏཏོཏི ཨདྷོཀཱཡཏོ. ཨིམིནཱ པཉྩམཱིབཱཧིརཏྠསམཱསཾ དསྶེཏི. རུཀྑསྶ སཱཁཱ པབྷིཛྫིཏྭཱ གཏཱ ཝིཡ ཨུབྷོ ཨཱུརཱུ པབྷིཛྫིཏྭཱ གཏཱཏི ཡོཛནཱ.

༡༠༦༥. ཕཱལེཧཱིཏི ¶ ཨེཏྠ ཨིཏིསདྡོ ཨཱདྱཏྠོ. ཏེན ‘‘དྷོཝཱ’’ཏིཨཱདཱིནི ཙཏྟཱརི པདཱནི སངྒཎྷཱཏི. ཨཱཎཏྟིདུཀྐཊཱནཱིཏི ཧེཊྛཱ ཝུཏྟེསུ ཨཊྛསུ དུཀྐཊེསུ ཝིནཡདུཀྐཊམེཝ. སེསེསཱུཏི བྷིནྡནཏོ སེསེསུ ཕཱལནཱདཱིསཱུཏི. དསམཾ.

ཨཱརཱམཝགྒོ ཚཊྛོ.

༧. གབྦྷིནིཝགྒོ

༡. པཋམསིཀྑཱཔད-ཨཏྠཡོཛནཱ

༡༠༦༩. གབྦྷིནིཝགྒསྶ པཋམེ ཀུཙྪིཾ པཝིཊྛོ སཏྟོ ཨེཏིསྶཱ ཨཏྠཱིཏི ཀུཙྪིཔཝིཊྛསཏྟཱ. ‘‘ཀུཙྪི’’ནྟིཔི པཱཋོ. ཨིམིནཱ གབྦྷིནཱིཏི ཨེཏྠ གབྦྷསདྡོ ཀུཙྪིཊྛསཏྟཝཱཙཀོཏི དསྶེཏི. གབྦྷསདྡོ (ཨབྷིདྷཱནཔྤདཱིཔིཀཱཡཾ ༩༤༤ གཱཐཱཡཾ) ཧི ཀུཙྪིཊྛསཏྟེ ཙ ཀུཙྪིམྷི ཙ ཨོཝརཀེ ཙ ཝཏྟཏཱིཏི. པཋམཾ.

༢. དུཏིཡསིཀྑཱཔདཾ

༡༠༧༣. དུཏིཡེ ¶ ཐཉྙཾ པིཝཏཱིཏི པཱཡནྟོ, དཱརཀོ, སོ ཨེཏིསྶཱ ཨཏྠཱིཏི པཱཡནྟཱིཏི དསྶེནྟོ ཨཱཧ ‘‘ཐཉྙཾ པཱཡམཱནི’’ནྟི. དུཏིཡཾ.

༣. ཏཏིཡསིཀྑཱཔདཾ

༡༠༧༧. ཏཏིཡེ ནིཏྠརིསྶཏཱིཏི ཝཊྚདུཀྑཏོ ནིཏྠརིསྶཏི.

༡༠༧༩. པཱཎཱཏིཔཱཏཱ ཝེརམཎིནྟི ཨེཏྠ པཱཎཱཏིཔཱཏཱ ཝིརམཏི ཨིམཱཡཱཏི ཝེརམཎཱིཏི ཨཏྠེན སིཀྑཱཔདཾ ཝེརམཎི ནཱམཱཏི ཨཱཧ ‘‘པཱཎཱཏིཔཱཏཱ ཝེརམཎིསིཀྑཱཔད’’ནྟི. ཡཾ ཏཾ སིཀྑཱཔདནྟི ¶ སམྦནྡྷོ. སབྦཏྠཱཏི ‘‘ཨདིནྣཱདཱནཱ ཝེརམཎི’’ནྟིཨཱདཱིསུ སབྦེསུ ཝཱཀྱེསུ. པབྦཛིཏཱཡ སཱམཎེརིཡཱཏི སམྦནྡྷོ. ཨེཏཱསཱུཏི ཚསུ སིཀྑཱསཱུཏི. ཏཏིཡཾ.

༤. ཙཏུཏྠསིཀྑཱཔདཾ

༡༠༨༤. ཙཏུཏྠེ ‘‘ཝུཊྛཱནསམྨུཏཱི’’ཏི པདཾ ‘‘ཧོཏཱི’’ཏི པདེ ཀཏྟཱ, ‘‘དཱཏབྦཱཡེཝཱ’’ཏི པདེ ཀམྨནྟི. ཙཏུཏྠཾ.

༥-༩. པཉྩམཱདིསིཀྑཱཔདཾ

༡༠༩༥. པཉྩམཱདཱིསུ ནཝམཔརིཡོསཱནེསུ སིཀྑཱཔདེསུ ཨནུཏྟཱནཊྛཱནཾ ནཏྠཱིཏི. པཉྩམཚཊྛསཏྟམཊྛམནཝམཱནི.

༡༠. དསམསིཀྑཱཔདཾ

༡༡༡༦. དསམེ ཝཱུཔཀཱསེཡྻཱཏི ཨེཏྠ ཀཱསདྷཱཏུཡཱ གཏྱཏྠཾ དསྶེནྟོ ཨཱཧ ‘‘གཙྪེཡྻཱ’’ཏི. དསམཾ.

གབྦྷིནིཝགྒོ སཏྟམོ.

༨. ཀུམཱརིབྷཱུཏཝགྒོ

༡-༢-༣. པཋམ-དུཏིཡ-ཏཏིཡསིཀྑཱཔད-ཨཏྠཡོཛནཱ

༡༡༡༩. ཀུམཱརིབྷཱུཏཝགྒསྶ ¶ པཋམདུཏིཡཏཏིཡེསུ ཡཱ པན ཏཱ མཧཱསིཀྑམཱནཱཏི སམྦནྡྷོ. སབྦཔཋམཱ དྭེ མཧཱསིཀྑམཱནཱཏི གབྦྷིནིཝགྒེ སབྦཱསཾ སིཀྑམཱནཱནཾ པཋམཾ ཝུཏྟཱ དྭེ མཧཱསིཀྑམཱནཱ. ཏཱ པནཱཏི མཧཱསིཀྑམཱནཱ པན. སིཀྑམཱནཱཨིཙྩེཝ ཝཏྟབྦཱཏི སམྨུཏིཀམྨེསུ ¶ སཱམཉྙཏོ ཝཏྟབྦཱ. ‘‘གིཧིགཏཱ’’ཏི ཝཱ ‘‘ཀུམཱརིབྷཱུཏཱ’’ཏི ཝཱ ན ཝཏྟབྦཱ, ཝདནྟི ཙེ, སམྨུཏིཀམྨཾ ཀུཔྤཏཱིཏི ཨདྷིཔྤཱཡོ. གིཧིགཏཱཡཱཏི ཨེཏྠ གིཧིགཏཱ ནཱམ པུརིསནྟརགཏཱ ཝུཙྩཏི. སཱ ཧི ཡསྨཱ པུརིསསངྑཱཏེན གིཧིནཱ གམིཡིཏྠ, ཨཛ྄ཛྷཱཙཱརཝསེན, གིཧིཾ ཝཱ གམིཏྠ, ཏསྨཱ གིཧིགཏཱཏི ཝུཙྩཏི. ཨཡཾ སིཀྑམཱནཱཏི སམྦནྡྷོ. ཀུམཱརིབྷཱུཏཱ ནཱམ སཱམཎེརཱ ཝུཙྩཏི. སཱ ཧི ཡསྨཱ ཨགིཧིགཏཏྟཱ ཀུམཱརཱི ཧུཏྭཱ བྷཱུཏཱ, ཀུམཱརིབྷཱཝཾ ཝཱ བྷཱུཏཱ གཏཱ, ཏསྨཱ ཀུམཱརིབྷཱུཏཱཏི ཝུཙྩཏི. ཏིསྶོཔཱིཏི གིཧིགཏཱ ཀུམཱརིབྷཱུཏཱ མཧཱསིཀྑམཱནཱཏི ཏིསྶོཔི. སིཀྑམཱནཱཏི སིཀྑཾ མཱནེཏཱིཏི སིཀྑམཱནཱཏི. པཋམ དུཏིཡ ཏཏིཡཱནི.

༤. ཙཏུཏྠསིཀྑཱཔདཾ

༡༡༣༦. ཙཏུཏྠེ ཨནུཏྟཱནཝཙནཾ ནཏྠཱིཏི. ཙཏུཏྠཾ.

༥. པཉྩམསིཀྑཱཔདཾ

པཉྩམེ ཨེཏྠ སིཀྑཱཔདེ ‘‘སངྒྷེན པརིཙྪིནྡིཏབྦཱ’’ཏི ཡཾ ཝཙནཾ ཝུཏྟཾ, ཏསྶཱཏི ཡོཛནཱཏི. པཉྩམཾ.

༦-༧-༨. ཚཊྛ-སཏྟམ-ཨཊྛམསིཀྑཱཔདཾ

ཚཊྛསཏྟམཊྛམེསུ ཨནུཏྟཱནཊྛཱནཾ ནཏྠཱིཏི. ཚཊྛསཏྟམཊྛམཱནི.

༩. ནཝམསིཀྑཱཔདཾ

༡༡༥༨. ནཝམེ ཨནྟོཏི ཨབྦྷནྟརེ. ཨིམིནཱ ཨཱཏྱཱུཔསགྒསྶཏྠཾ དསྶེཏི. ‘‘སོཀ’’ནྟིཨཱདིནཱ ཨནྟོ ཝཱསེཏི པཝེསེཏཱིཏི ཨཱཝཱསཱ ¶ . སོཀཾ ཨཱཝཱསཱ སོཀཱཝཱསཱཏི ཝཙནཏྠཾ དསྶེཏི. གྷརཾ གྷརསཱམིཀཱ ཨཱཝིསནྟི ཝིཡ, ཨེཝཾ ཨཡམྤི སོཀཾ ཨཱཝིསཏཱིཏི ཡོཛནཱ. ཨིཏཱིཏི ཨེཝཾ. ཡནྟི སོཀཾ. སྭཱསྶཱཏི སོ ཨསྶཱ. སོཏི སོཀོ. ཨསྶཱཏི སིཀྑམཱནཱཡ. ཨཱཝཱསོཏི ཨཱཝཱསོཀཱསོ. ‘‘ཨེདིསཱ ཨཡ’’ནྟི ཨིམིནཱ ‘‘ཨཛཱནནྟཱི’’ཏི ཨེཏྠ ཨཛཱནནཱཀཱརཾ དསྶེཏཱིཏི. ནཝམཾ.

༡༠. དསམསིཀྑཱཔདཾ

༡༡༦༢. དསམེ ¶ ཨནཱཔུཙྪཱཏི ཨེཏྠ ཏྭཱཔཙྩཡོ ལོཔོཏི ཨཱཧ ‘‘ཨནཱཔུཙྪིཏྭཱ’’ཏི. དྭིཀྑཏྟུནྟི དྭེ ཝཱརེ. སཀིནྟི ཨེཀཝཱརཾ.

༡༡༦༣. ཨཔུབྦཾ སམུཊྛཱནསཱིསཾ ཨིམསྶཱཏི ཨཔུབྦསམུཊྛཱནསཱིསཾ. དྭཱིསུཔི ཋཱནེསཱུཏི ཝཱཙཱཏོ ཙ ཀཱཡཝཱཙཱཏོ ཙཱཏི དྭཱིསུ ཋཱནེསུཔི. ཨནནུཛཱནཱཔེཏྭཱཏི མཱཏཱཔིཏཱུཧི ཙ སཱམིཀེན ཙ ན ཨནུཛཱནཱཔེཏྭཱཏི. དསམཾ.

༡༡. ཨེཀཱདསམསིཀྑཱཔདཾ

༡༡༦༧. ཨེཀཱདསམེ ཏཏྠཱཏི ‘‘པཱརིཝཱསིཡཚནྡདཱནེནཱ’’ཏི ཝཙནེ. ཨཉྙཏྲཱཏི ཨཉྙཾ ཋཱནཾ.

ཨེཀཾ ཨཛ྄ཛྷེསནྟཱིཏི ཨེཀཾ བྷིཀྑུཾ དྷམྨཀཐནཏྠཱཡ ནིཡྻོཛེནྟི. ཨཉྙཾ པནཱཏི ཨུཔོསཐིཀཏོ ཨཉྙཾ པན.

ཏཏྲཱཏི ཏེསུ བྷིཀྑཱུསུ. སུབྷཱསུབྷཾ ནཀྑཏྟཾ པཋཏཱིཏི ནཀྑཏྟཔཱཋཀོ. དཱརུཎནྟི ཀཀྑལ༹ཾ. ཏེཏི བྷིཀྑཱུ. ཏསྶཱཏི ནཀྑཏྟཔཱཋཀསྶ བྷིཀྑུསྶ. ‘‘ནཀྑཏྟཾ པཊིམཱནེནྟཾ, ཨཏྠོ བཱལཾ ཨུཔཙྩགཱ’’ཏིཛཱཏཀཔཱལི༹ (ཛཱ. ༡.༡.༤༩). ཨཡཾ པནེཏྠ ཡོཛནཱ – ནཀྑཏྟཾ པཊིམཱནེནྟཾ བཱལཾ ཨཏྠོ ཧིཏཾ ཨུཔཙྩགཱ ཨུཔསམཱིཔེ ཨཏིཀྐམིཏྭཱ ཨགཱཏི. ཨེཀཱདསམཾ.

༡༢. དྭཱདསམསིཀྑཱཔདཾ

༡༡༧༠. དྭཱདསམེ ¶ ནཔྤཧོཏཱིཏི བྷིཀྑུནིཡོ ནིཝཱསཱཔེཏུཾ ན སཀྐོཏཱིཏི. དྭཱདསམཾ.

༡༣. ཏེརསམསིཀྑཱཔདཾ

༡༡༧༥. ཏེརསམེ ཨེཀཾ ཝསྶནྟི ཨེཏྠ ཝསྶསདྡོ སཾཝཙྪརཔརིཡཱཡོ, ཨུཔཡོགཝཙནཉྩ བྷུམྨཏྠེ ཧོཏཱིཏི ཨཱཧ ‘‘ཨེཀསྨིཾ སཾཝཙྪརེ’’ཏི. ཏེརསམཾ.

ཀུམཱརིབྷཱུཏཝགྒོ ཨཊྛམོ.

༩. ཚཏྟུཔཱཧནཝགྒོ

༡. པཋམསིཀྑཱཔད-ཨཏྠཡོཛནཱ

༡༡༨༡. ཚཏྟཝགྒསྶ ¶ པཋམེ ཀདྡམཱདཱིནཱིཏི ཙིཀྑལླཱདཱིནི. ཨཱདིསདྡེན ཨུདཀཱདཱིནི སངྒཎྷཱཏི. གཙྪཱདཱིནཱིཏི ཁུདྡཔཱདཔཱདཱིནི. ཨཱདིསདྡེན ཨཉྙཱནིཔི ཚཏྟཾ དྷཱརེཏུཾ ཨསཀྐུཎེཡྻཱནི སམྦཱདྷཊྛཱནཱནི སངྒཎྷཱཏཱིཏི. པཋམཾ.

༢. དུཏིཡསིཀྑཱཔདཾ

༡༡༨༤. དུཏིཡེ ཡཱནེནཱཏི ཡནྟི ཨིཙྪིཏཊྛཱནཾ སུཁེན གཙྪནྟི ཨནེནཱཏི ཡཱནནྟི. དུཏིཡཾ.

༣. ཏཏིཡསིཀྑཱཔདཾ

༡༡༩༡. ཏཏིཡེ ‘‘ཝིཔྤཀིརིཡིཾསཱུ’’ཏི ཀིརིཡཱཔདསྶ ཀཏྟུནཱ ཨཝིནཱབྷཱཝཏོ ཀཏྟཱརཾ དསྶེཏུཾ ཝུཏྟཾ ‘‘མཎཡོ’’ཏི. མཎཡོཏི ཙ རཏནཱནཱིཏི. ཏཏིཡཾ.

༤. ཙཏུཏྠསིཀྑཱཔདཾ

༡༡༩༤. ཙཏུཏྠེ སཱིསཱུཔགཱདཱིསཱུཏི ཨཱདིསདྡེན གཱིཝཱུཔགཱདཡོ སངྒཎྷཱཏི. ཡཾ ཡནྟི ཨལངྐཱརནྟི. ཙཏུཏྠཾ.

༥. པཉྩམསིཀྑཱཔདཾ

༡༡༩༩. པཉྩམེ ¶ གནྡྷེན ཙཱཏི གནྡྷེཏི ཨཏྟནོ ཝཏྠུཾ སཱུཙེཏི པཀཱསེཏཱིཏི གནྡྷོ. ཝཎྞཀེན ཙཱཏི ཝིལེཔནེན ཙ. ཏཉྷི ཝཎྞཡཏི ཚཝིསོབྷཾ པཀཱསེཏཱིཏི ཝཎྞཀནྟི ཝུཙྩཏི. ཙསདྡེན སམཱཧཱརདྭནྡཝཱཀྱཾ དཱིཔེཏཱིཏི. པཉྩམཾ.

༦. ཚཊྛསིཀྑཱཔདཾ

༡༢༠༢. ཚཊྛེ ¶ ཨནུཏྟཱནཝཙནཾ ནཏྠཱིཏི. ཚཊྛཾ.

༧. སཏྟམསིཀྑཱཔདཾ

༡༢༠༨. སཏྟམེ ཨུམྨདྡནེཏི ཨུཔྤཱིལི༹ཏྭཱ མདྡནེ. སཾབཱཧནེཔཱིཏི པུནཔྤུནཾ བཱཧནེཔཱིཏི. སཏྟམཾ.

༨-༡༠. ཨཊྛམཱདིསིཀྑཱཔདཾ

༡༢༡༠. ཨཊྛམཱདཱིསུ ཏཱིསུ ཨནུཏྟཱནཝཙནཾ ནཏྠཱིཏི. ཨཊྛམནཝམདསམཱནི.

༡༡. ཨེཀཱདསམསིཀྑཱཔདཾ

༡༢༡༤. ཨེཀཱདསམེ ཨབྷིམུཁམེཝཱཏི ཨབྷིམུཁེ ཨེཝ. མུཁསྶ ཧི ཨབྷི ཨབྷིམུཁནྟི ཝཙནཏྠོ ཀཱཏབྦོ, སཏྟམིཡཱ ཨཾཀཱརོ. ཨིམིནཱ པུརཏོཏི ཨེཏྠ ཏོཔཙྩཡོ བྷུམྨཏྠེ ཧོཏཱིཏི དསྶེཏི. ཨུཔཙཱརནྟི དྭཱདསཧཏྠཱུཔཙཱརནྟི. ཨེཀཱདསམཾ.

༡༢. དྭཱདསམསིཀྑཱཔདཾ

༡༢༡༩. དྭཱདསམེ ‘‘ཨནོཀཱསཀཏ’’ནྟིཔདསྶ ཨཡུཏྟསམཱསབྷཱཝཉྩ ཝིསེསནཔརཔདབཱཧིརསམཱསབྷཱཝཉྩ དསྶེཏུཾ ཝུཏྟཾ ‘‘ཨཀཏཨོཀཱས’’ནྟི. ཨོཀཱསོ ན ཀཏོ ཡེནཱཏི ཨནོཀཱསཀཏོ, བྷིཀྑུ, ཏཾ. ‘‘ཨནིཡམེཏྭཱ’’ཏི ཨིམིནཱ ‘‘ཨནོདིསྶཱ’’ཏི པདསྶ ཏྭཱཔཙྩཡནྟབྷཱཝཾ དསྶེཏཱིཏི. དྭཱདསམཾ.

༡༣. ཏེརསམསིཀྑཱཔདཾ

༡༢༢༦. ཏེརསམེ ¶ ཨུཔཙཱརེཔཱིཏི ཨཔརིཀྑིཏྟསྶ གཱམསྶ པརིཀྑེཔཱརཧཊྛཱནསངྑཱཏེ ཨུཔཙཱརེཔི.

༡༢༢༧. ‘‘ཨཙྪིནྣཙཱིཝརིཀཱཡཱ’’ཏི ¶ སཱམཉྙཏོ ཝུཏྟེཔི ཝིསེསོཡེཝཱདྷིཔྤེཏོཏི ཨཱཧ ‘‘སངྐཙྩིཀཙཱིཝརམེཝཱ’’ཏི. སམནྟཏོ པུརིསཱནཾ དསྶནཾ ཀནྟཱིཡཏི ཚིནྡཱིཡཏི ཨེཏྠཱཏི སངྐཙྩི, ཨདྷཀྑཀཨུབྦྷནཱབྷིཊྛཱནཾ, སངྐཙྩེ ནིཝསིཏབྦནྟི སཾཀཙྩིཀཾ, ཏམེཝ ཙཱིཝརནྟི སངྐཙྩིཀཙཱིཝརནྟི. ཏེརསམཾ.

ཚཏྟུཔཱཧནཝགྒོ ནཝམོ.

སབྦཱནེཝ སིཀྑཱཔདཱནཱིཏི སམྦནྡྷོ. ཏཏོཏི ཏེཧི ཨཊྛཱསཱིཏིསཏསིཀྑཱཔདེཧི, ཨཔནེཏྭཱཏི སམྦནྡྷོ.

ཏཏྲཱཏི ཏེསུ ཁུདྡཀེསུ. ཨེཏྠཱཏི དསསུ སིཀྑཱཔདེསཱུཏི.

བྷིཀྑུནིཝིབྷངྒེ ཁུདྡཀཝཎྞནཱཡ

ཡོཛནཱ སམཏྟཱ.

༥. པཱཊིདེསནཱིཡསིཀྑཱཔད-ཨཏྠཡོཛནཱ

ཁུདྡཀཱནཾ ཨནནྟརཱ པཱཊིདེསནཱིཡཱ ནཱམ ཨཊྛ ཡེ དྷམྨཱ སངྑེཔེནེཝ སངྒཧཾ ཨཱརཱུལ༹ྷཱ སངྒཱིཏིཀཱརེཧི, ཏེསཾ ཨཊྛནྣཾ པཱཊིདེསནཱིཡནཱམཀཱནཾ དྷམྨཱནཾ སངྑེཔེནེཝ ཨེསཱ ཝཎྞནཱ པཝཏྟཏེཏི ཡོཛནཱ.

༡༢༢༨. ཡཱནི སབྦིཏེལཱདཱིནཱིཏི སམྦནྡྷོ. ཧཱིཏི ཝིཏྠཱརོ. ཨེཏྠཱཏི ཨཊྛསུ པཱཊིདེསནཱིཡེསུ. པཱལི༹ཝིནིམུཏྟཀེསཱུཏི པཱལི༹ཏོ ཝིནིམུཏྟཀེསུ. སབྦེསཱུཏི ཨཁིལེསུ སབྦིཏེལཱདཱིསཱུཏི.

བྷིཀྑུནིཝིབྷངྒེ པཱཊིདེསནཱིཡཝཎྞནཱཡ ཡོཛནཱ སམཏྟཱ.

པནཱཏི པཀྑནྟརཛོཏཀོ. ཡེ དྷམྨཱ ཨུདྡིཊྛཱཏི སམྦནྡྷོ. ཏེསནྟི པཱཊིདེསནཱིཡཱནཾ. པུན ཏེསནྟི སེཁིཡཨདྷིཀརཎསམཐདྷམྨཱནཾ.

ཏནྟི ¶ ¶ ཨཏྠཝིནིཙྪཡཾ, ཝིདཱུ ཝདནྟཱིཏི སམྦནྡྷོ. ཡཀཱརོ པདསནྡྷིཀརོ. ཨཡཾ པནེཏྠ ཡོཛནཱ – ཏེསཾ པཱཊིདེསནཱིཡཱནཾ ཨནནྟརཱ ཡེ ཙ སེཁིཡཱ པཉྩསཏྟཏི ཡེ ཙ དྷམྨཱ, ཙསདྡོ ལུཏྟནིདྡིཊྛོ, ཨདྷིཀརཎཝ྄ཧཡཱ ཨདྷིཀརཎསམཐནཱམཀཱ སཏྟ ཡེ ཙ དྷམྨཱ བྷགཝཏཱ ཨུདྡིཊྛཱ, ཏེསཾ སེཁིཡཨདྷིཀརཎསམཐདྷམྨཱནཾ ཡོ ཨཏྠཝིནིཙྪཡོ ཝིབྷངྒེ མཡཱ ཝུཏྟོ, ཏཱདིསམེཝ ཏཾ ཨཏྠཝིནིཙྪཡཾ བྷིཀྑུནཱིནཾ ཝིབྷངྒེཔི ཝིདཱུ ཝདནྟི ཡསྨཱ, ཏསྨཱ ཏེསཾ དྷམྨཱནཾ སེཁིཡཨདྷིཀརཎསམཐདྷམྨཱནཾ ཡཱ ཨཏྠཝཎྞནཱ ཏཏྠ མཧཱཝིབྷངྒེ ཝིསུཾ མཡཱ ན ཝུཏྟཱ. ཨིམཱ ཨཏྠཝཎྞནཱ ཨིདྷཱཔི བྷིཀྑུནཱིནཾ ཝིབྷངྒེཔི, པིསདྡོ ལུཏྟནིདྡིཊྛོ, མཡཱ ན ཝུཏྟཱཡེཝཱཏི. ནཀཱརོ དྭཱིསུ ཀིརིཡཱསུ ཡོཛེཏབྦོ.

‘‘སབྦཱསཝཔཧཾ མགྒཾ, པུཉྙཀམྨེན ཙིམིནཱ;

ཨུཔྤཱདེཏྭཱ སསནྟཱནེ, སཏྟཱ པསྶནྟུ ནིབྦུཏི’’ནྟི.

ཨཡཾ གཱཐཱ ཨེཏརཧི པོཏྠཀེསུ ནཏྠི, ཊཱིཀཱསུ པན ཨཏྠི. ཏསྨཱ ཨེཝམེཏྠ ཡོཛནཱ ཝེདིཏབྦཱ – ཨིམིནཱ པུཉྙཀམྨེན ཙ ཝིབྷངྒཝཎྞནཱཡ ཀཏེན ཨིམིནཱ པུཉྙཀམྨེན ཙ ཨཉྙེན པུཉྙཀམྨེན ཙ. ཙསདྡོ ཧི ཨཝུཏྟསམྤིཎྜནཏྠོ. སཏྟཱ སབྦེ སཏྟཱ སབྦཱསཝཔཧཾ སབྦེསཾ ཨཱསཝཱནཾ ཝིགྷཱཏཀཾ མགྒཾ ཨརཧཏྟམགྒཾ སསནྟཱནེ ཨཏྟནོ ནིཡཀཛ྄ཛྷཏྟེ ཨུཔྤཱདེཏྭཱ ཛནེཏྭཱ ནིབྦུཏིཾ ཁནྡྷཔརིནིབྦཱནཾ ཉཱཎཱལོཙནེན པསྶནྟཱུཏི.

ཨིཏི སམནྟཔཱསཱདིཀཱཡ ཝིནཡསཾཝཎྞནཱཡ

བྷིཀྑུནིཝིབྷངྒཝཎྞནཱཡ

ཡོཛནཱ སམཏྟཱ.

ཛཱདིལཉྪིཏནཱམེན, ནེཀཱནཾ ཝཱཙིཏོ མཡཱ;

བྷིཀྑུནཱིནཾ ཝིབྷངྒསྶ, སམཏྟོ ཡོཛནཱནཡོཏི.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

མཧཱཝགྒཡོཛནཱ

༡. མཧཱཁནྡྷཀཾ

༡. བོདྷིཀཐཱ

ཨེཝཱུབྷཏོཝིབྷངྒསྶ ¶ ¶ , ཀཏྭཱན ཡོཛནཱནཡཾ;

མཧཱཝགྒཁནྡྷཀསྶ, ཀརིསྶཾ ཡོཛནཱནཡཾ.

ཨུབྷིནྣནྟི ཨུབྷཡེསཾ. པཱཏིམོཀྑཱནནྟི པཱཏིམོཀྑཝིབྷངྒཱནཾ. པཱཏིམོཀྑགཧཎེན ཧེཏྠ ཏེསཾ ཝིབྷངྒོཔི གཧིཏོ ཨབྷེདེན ཝཱ ཨུཏྟརཔདལོཔཝསེན ཝཱ. ཁནྡྷཀནྟི པཉྙཏྟིསམཱུཧཾ. ཁནྡྷསདྡོ ཧེཏྠ པཉྙཏྟིཝཱཙཀོ. ཝིནཡཔཉྙཏྟིཡོ ཝུཙྩནྟི ‘‘ཁནྡྷོ’’ཏི. ཏེསཾ སམཱུཧོ ཁནྡྷཀོ. ཨཐཝཱ ཁནྡྷོཏི རཱསི. ཁནྡྷསདྡོ ཧི རཱསཏྠཝཱཙཀོ. ཝིནཡཔཉྙཏྟིརཱསི ཝུཙྩཏི ‘‘ཁནྡྷོ’’ཏི. ཀཀཱརོ པཀཱསཀཝཱཙཀོ. ཁནྡྷཱནཾ ཝིནཡཔཉྙཏྟིརཱསཱིནཾ ཀོ པཀཱསཀོཏི ཁནྡྷཀོ, ¶ ཏཾ ཁནྡྷཀཾ. ཨཡཾ པནེཏྠ ཡོཛནཱ – ཨུབྷིནྣཾ པཱཏིམོཀྑཱནཾ སངྒཱིཏིསམནནྟརཾ ཁནྡྷཀོཝིདཱ ཁནྡྷཀེསུ ཀུསལཱ མཧཱཐེརཱ ཡཾ ཁནྡྷཀཾ སངྒཱཡིཾསུ, ཏསྶ ཁནྡྷཀསྶ དཱནི སཾཝཎྞནཱཀྐམོ ཡསྨཱ སམྤཏྟོ, ཏསྨཱ ཏསྶ ཁནྡྷཀསྶ ཨཡཾ ཨནུཏྟཱནཏྠཝཎྞནཱ ཧོཏཱིཏི.

ཡེ ཨཏྠཱཏི སམྦནྡྷོ. ཧིསདྡོ པདཱལངྐཱརོ. ཡེསནྟི པདཱནཾ. ཏེཏི ཏེ ཨཏྠེ. བྷཝེཏི བྷཝེཡྻ, བྷཝིཏུཾ སཀྐུཎེཡྻཱཏི ཨཏྠོ. ཏེསནྟི ཨཏྠཱནཾ. ཀིནྟི ཀིཾ པཡོཛནཾ. ཏེཏི ཨཏྠེ, ཉཱཏུནྟི སམྦནྡྷོ. ཨཐཝཱ ཏེཏི ཨཏྠཱ, ཨཝཎྞིཏཱཏི སམྦནྡྷོ. ཏེསཾཡེཝཱཏི ཨཏྠཱནམེཝ. ཨཡཾ པནེཏྠ ཡོཛནཱ – པདབྷཱཛནཱིཡེ ཡེསཾ པདཱནཾ ཡེ ཨཏྠཱ བྷགཝཏཱ པཀཱསིཏཱ, ཏེསཾ པདཱནནྟི པཱཋསེསོ, ཏེ ཨཏྠེ པུན ཝདེཡྻཱམ ཙེ, ཀདཱ པརིཡོསཱནཾ སཾཝཎྞནཱཡ པརིནིཊྛཱནཾ བྷཝེ, ན བྷཝེཡྻཱཏི ཨདྷིཔྤཱཡོ. ཡེ ཙེཝ ཨཏྠཱ ཨུཏྟཱནཱ, ཏེསཾ སཾཝཎྞནཱཡ ཀིཾ པཡོཛནཾ, ན པཡོཛནནྟི ཨདྷིཔྤཱཡོ. ཨདྷིཔྤཱཡཱནུསནྡྷཱིཧི ཙ ཨདྷིཔྤཱཡེན ཙ ཨནུསནྡྷིནཱ ཙ བྱཉྫནེན ཙ ཡེ པན ཨཏྠཱ ཨནུཏྟཱནཱ, ཏེ ཨཏྠེ, ཨཏྠཱ ཝཱ ཨཝཎྞིཏཱ ¶ ཡསྨཱ ཉཱཏུཾ ན སཀྐཱ, ཏསྨཱ ཏེསཾཡེཝ ཨཏྠཱནཾ ཨཡཾ སཾཝཎྞནཱནཡོ ཧོཏཱིཏི. ཨིཏིསདྡོ པརིསམཱཔནཏྠོ.

༡. ‘‘ཏེན…པེ… ཝེརཉྫཱཡ’’ནྟིཨཱདཱིསུ (པཱརཱ. ༡) ཀརཎཝཙནེ ཝིསེསཀཱརཎམཏྠི ཝིཡ, ‘‘ཏེན…པེ… པཋམཱབྷིསམྦུདྡྷོ’’ཏི ཨེཏྠ ཀིཉྩཱཔི ནཏྠཱིཏི ཡོཛནཱ. ཨསདིསོཔམཱཡཾ. ཀིཉྩཱཔིསདྡོ གརཧཏྠཛོཏཀོ, པན-སདྡོ སམྦྷཱཝནཏྠཛོཏཀོ. ‘‘ཀརཎཝཙནེནེཝཱ’’ཏི ཨེཏྠ ཨེཝཀཱརེན ཨུཔཡོགཝཙནཾ ཝཱ བྷུམྨཝཙནཾ ཝཱ ནིཝཱརེཏི. ཨབྷིལཱཔོཏི ཨབྷིམུཁཾ ཨཏྠཾ ལཔཏཱིཏི ཨབྷིལཱཔོ, སདྡོ. ཨཱདིཏོཏི ཝེརཉྫཀཎྜཏོ. ཨེཏནྟི ‘‘ཏེན སམཡེན བུདྡྷོ བྷགཝཱ ཨུརུཝེལཱཡ’’ནྟིཨཱདིཝཙནཾ. ‘‘ཨཉྙེསུཔཱི’’ཏི ཝཏྭཱ ཏམེཝཏྠཾ དསྶེཏུཾ ཝུཏྟཾ ‘‘ཨིཏོ པརེསཱུ’’ཏི.

ཡདི ཝིསེསཀཱརཎཾ ནཏྠི, ཀིཾ པནེཏསྶ ཝཙནེ པཡོཛནནྟི ཙོདེནྟོ ཨཱཧ ‘‘ཀིཾ པནེཏསྶཱ’’ཏིཨཱདི. ཨེཏསྶཱཏི ‘‘ཏེན སམཡེན བུདྡྷོ བྷགཝཱ ཨུརུཝེལཱཡ’’ནྟིཨཱདིཝཙནསྶ. ནིདཱནདསྶནཾ པཡོཛནཾ ནཱམཱཏི ཡོཛནཱ. ཏམེཝཏྠཾ ཝིབྷཱཝེཏུམཱཧ ‘‘ཡཱ ཧཱི’’ཏིཨཱདི. ཡཱ པབྦཛྫཱ ཙེཝ ཡཱ ཨུཔསམྤདཱ ཙ བྷགཝཏོ ཨནུཉྙཱཏཱཏི ཡོཛནཱ. ཡཱནི ཙ ཨནུཉྙཱཏཱནཱིཏི སམྦནྡྷོ. ཏཱནཱིཏི པབྦཛྫཱདཱིནི. ཨབྷིསམྦོདྷིནྟི ཨརཧཏྟམགྒཉཱཎཔདཊྛཱནཾ སབྦཉྙུཏཉྙཱཎཉྩ སབྦཉྙུཏཉྙཱཎཔདཊྛཱནཾ ཨརཧཏྟམགྒཉཱཎཉྩ. བོདྷིམཧཱམཎྜེཏི མཧནྟཱནཾ མགྒཉཱཎསབྦཉྙུཏཉྙཱཎཱནཾ པསནྣཊྛཱནེ བོདྷིརུཀྑམཱུལེཏི ཨཏྠོ. ཨེཝནྟིཨཱདི ནིགམནཾ.

ཏཏྠཱཏི ¶ ཡཾ ‘‘ཏེན སམཡེན ཨུརུཝེལཱཡ’’ནྟིཨཱདིཝཙནཾ ཝུཏྟཾ, ཏཏྠ. ཨུརུཝེལཱཡནྟི ཨེཏྠ ཨུརུསདྡོ མཧནྟཔརིཡཱཡོཏི ཨཱཧ ‘‘མཧཱཝེལཱཡ’’ནྟི. ‘‘ཝཱལིཀརཱསིམྷཱི’’ཏི ཨིམིནཱ ཝེལཱསདྡསྶ རཱསཏྠཾ དསྶེཏི, ཀཱལསཱིམཱདཡོ ནིཝཏྟེཏི. ཡདི པན ‘‘ཨུརཱུ’’ཏི ཝཱལིཀཱཡ ནཱམཾ, ‘‘ཝེལཱ’’ཏི མརིཡཱདཱཡ, ཨེཝཉྷི སཏི ནནུ ཨུརུཡཱ ཝེལཱཏི ཨཏྠོ དཊྛབྦོཏི ཨཱཧ ‘‘ཝེལཱཏིཀྐམནཧེཏུ ཨཱཧཊཱ ཨུརུ ཨུརུཝེལཱ’’ཏི. ཨིམིནཱ ¶ ཝེལཱཡ ཨཏིཀྐམོ ཝེལཱ ཨུཏྟརཔདལོཔཝསེན, ཝེལཱཡ ཨཱཧཊཱ ཨུརུ ཨུརུཝེལཱ པདཝིཔརིཡཱཡཝསེནཱཏི དསྶེཏི. ཨེཏྠཱཏི ‘‘ཨུརུཝེལཱཡ’’ནྟིཔདེ. ཏམེཝཏྠཾ ཝིབྷཱཝེནྟོ ཨཱཧ ‘‘ཨཏཱིཏེ ཀིརཱ’’ཏིཨཱདི. ཨནུཔྤནྣེ བུདྡྷེ པབྦཛིཏྭཱཏི སམྦནྡྷོ. ཏཱཔསཔབྦཛྫནྟི ཨིསིཔབྦཛྫཾ, ན སམཎཔབྦཛྫཾ. ཀཏིཀཝཏྟནྟི ཀརཎཾ ཀཏཾ, ཀཏེན པཝཏྟཾ ཀཏིཀཾ, ཏམེཝ ཝཏྟཾ ཀཏིཀཝཏྟཾ. ཨཀཾསུ ཀིརཱཏི སམྦནྡྷོ. ཡོཏི ཡོ ཀོཙི. ཨཉྙོཏི ཨཏྟནཱ ཨཔརོ. སོ ཨཱཀིརཏཱུཏི སམྦནྡྷོ. པཏྟཔུཊེནཱཏི པཎྞེན ཀཏེན པུཊེན. ཏཏོཏི ཀཏིཀཝཏྟཀརཎཏོ. ཏཏྠཱཏི ཏསྨིཾ པདེསེ. ཏཏོཏི མཧཱཝཱལིཀརཱསིཛནནཏོ, པརནྟི སམྦནྡྷོ. ནནྟི ཏཾ པདེསཾ. ཏནྟི མཧཱཝཱལིཀརཱསིཾ.

‘‘བོདྷིརུཀྑམཱུལེ’’ཏི ཨེཏྠ ཨསྶཏྠརུཀྑསྶ ཨུཔཙཱརཝསེན བོདྷཱིཏི ནཱམལབྷནཾ དསྶེནྟོ ཨཱཧ ‘‘བོདྷི ཝུཙྩཏི ཙཏཱུསུ མགྒེསུ ཉཱཎ’’ནྟིཨཱདི. ཨིམིནཱ ཙཏྟཱརི སཙྩཱནི བུཛ྄ཛྷཏཱིཏི བོདྷཱིཏི ཝཙནཏྠེན ཙཏཱུསུ མགྒེསུ ཉཱཎཾ བོདྷི ནཱམཱཏི དསྶེཏི. ཨེཏྠཱཏི བོདྷིམྷི, བོདྷིཡཾ ཝཱ. སམཱིཔཏྠེ ཙེཏཾ བྷུམྨཝཙནཾ. རུཀྑོཔཱིཏི པིསདྡེན ན མགྒཉཱཎམེཝཱཏི དསྶེཏི. མཱུལེཏི ཨཱསནྣེ. པཋམཱབྷིསམྦུདྡྷོཏི ཨནུནཱསིཀལོཔཝསེན སནྡྷཱིཏི ཨཱཧ ‘‘པཋམཾ ཨབྷིསམྦུདྡྷོ’’ཏི. ‘‘ཧུཏྭཱ’’ཏི ཨིམིནཱ ‘‘པཋམ’’ནྟིཔདསྶ བྷཱཝནཔུཾསཀཾ དསྶེཏི. སབྦཔཋམཾཡེཝཱཏི སབྦེསཾ ཛནཱནཾ པཋམམེཝ ཨབྷིསམྦུདྡྷོ ཧུཏྭཱཏི སམྦནྡྷོ. ཨེཀོ ཨེཝ པལླངྐོ ཨེཀཔལླངྐོཏི ཨཝདྷཱརཎསམཱསཾ དསྶེནྟོ ཨཱཧ ‘‘ཨེཀེནེཝ པལླངྐེནཱ’’ཏི. ‘‘སཀིཾ…པེ… ཨཱབྷུཛིཏེནཱ’’ཏི ཨིམིནཱ ཨཝདྷཱརཎཕལཾ དསྶེཏི. པལླངྐོཏི ཙ ཨཱུརུབདྡྷཱསནཾ. ཝིམུཏྟིསུཁཾ པཊིསཾཝེདཱིཏི ཨེཏྠ ཏདངྒཱདཱིསུ (པཊི. མ. ཨཊྛ. ༡.༡.༡༠༤) པཉྩསུ ཝིམུཏྟཱིསུ པཊིཔྤསྶདྡྷིསངྑཱཏཱ ཕལསམཱཔཏྟི ཨེཝཱདྷིཔྤེཏཱཏི ཨཱཧ ‘‘ཕལསམཱཔཏྟིསུཁ’’ནྟི. ཕལསམཱཔཏྟཱིཏི ཨརཧཏྟཕལསམཱཔཏྟི. སཱ ཧི ཝིརུདྡྷེཧི ཨུཔཀྐིལེསེཧི མུཙྩིཏཊྛེན ཝིམུཏྟཱིཏི ཝུཙྩཏི, ཏཱཡ སམྤཡུཏྟཾ སུཁཾ ཝིམུཏྟིསུཁཾ, ཙཏུཏྠཛ྄ཛྷཱནིཀཾ ཨརཧཏྟཕལསམཱཔཏྟིསུཁཾ. ཨཐཝཱ ཏཱཡ ཛཱཏཾ སུཁཾ ཝིམུཏྟིསུཁཾ, སཀལཀིལེསདུཀྑཱུཔསམསུཁཾ ¶ . ‘‘པཊིསཾཝེདཡམཱནོ’’ཏིཨིམིནཱ ‘‘པཊིསཾཝེདཱི’’ཏི ཨེཏྠ ཎཱིཔཙྩཡསྶ ཀཏྟུཏྠཾ དསྶེཏི. པུནཔྤུནཾ སུཊྛུ ཝདཏི ཨནུབྷཝཏཱིཏི པཊིསཾཝེདཱི. པཊིསཾཝེདཱི ཧུཏྭཱ ནིསཱིདཱིཏི སམྦནྡྷོ.

པཙྩཡཱཀཱརནྟི ¶ ཨཝིཛྫཱདིཔཙྩཡཱནཾ ཨུཔྤཱདཱཀཱརཾ. ཀསྨཱ པཙྩཡཱཀཱརོ པཊིཙྩསམུཔྤཱདོ ནཱམཱཏི ཨཱཧ ‘‘པཙྩཡཱཀཱརོ ཧཱི’’ཏིཨཱདི. ཧཱིཏི སཙྩཾ, ཡསྨཱ ཝཱ. ‘‘ཨཉྙམཉྙ’’ནྟིཨིམིནཱ ‘‘པཊིཙྩཱ’’ཏིཔདསྶ ཀམྨཾ དསྶེཏི, ‘‘སཧིཏེ’’ཏིཨིམིནཱ སཾསདྡསྶཏྠཾ. ‘‘དྷམྨེ’’ཏིཨིམིནཱ ཏསྶ སརཱུཔཾ. ཨེཏྠཱཏི ཨིམིསྶཾ ཝིནཡཊྛཀཐཱཡཾ. ཏཏྠཱཏི ‘‘ཨནུལོམཔཊིལོམ’’ནྟིཔདེ, ཨནུལོམཔཊིལོམེསུ ཝཱ. སྭེཝ པཙྩཡཱཀཱརོ ཝུཙྩཏཱིཏི ཡོཛནཱ. ‘‘ཨཏྟནཱ ཀཏྟབྦཀིཙྩཀརཎཏོ’’ཏིཨིམིནཱ ཨནུལོམསདྡསྶ སབྷཱཝཏྠཾ དསྶེཏི. སྭེཝཱཏི པཙྩཡཱཀཱརོ ཨེཝ. ཏཾ ཀིཙྩནྟི ཨཏྟནཱ ཀཏྟབྦཾ ཏཾ ཀིཙྩཾ. ཏསྶ ཨཀརཎཏོཏི ཨཏྟནཱ ཀཏྟབྦཀིཙྩསྶ ཨཀརཎཏོ. ཨིམིནཱ པཊིལོམསདྡསྶ སབྷཱཝཏྠཾ དསྶེཏི. པུརིམནཡེནེཝཱཏི ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིནཱ པུརིམནཡེནེཝ. ཝཱཏི ཨཐཝཱ. པཝཏྟིཡཱཏི སཾསཱརཔཝཏྟིཡཱ. ཨནུལོམོཏི ཨནུཀཱུལོ, ཨནུརཱུཔོ ཝཱ. ཨིཏརོཏི ‘‘ཨཝིཛྫཱཡཏྭེཝཱ’’ཏིཨཱདིནཱ ཝུཏྟོ པཙྩཡཱཀཱརོ. ཏསྶཱཏི པཝཏྟིཡཱ. པཊིལོམོཏི པཊིཝིརུདྡྷོ, ཨེཏྠཱཏི ‘‘ཨནུལོམཔཊིལོམ’’ནྟིཔདེ. ཨཏྠོ དཊྛབྦོཏི ཨེཏྠ ཨཏྠོ ཨེཝཱཏི སམྦྷཝཏོ ཏསྶ ཕལཾ ཝཱ ‘‘སདྡནྟརཏྠཱཔོཧནེན སདྡོ ཨཏྠཾ ཝདཏཱི’’ཏི ཝཙནཏོ (ཨུདཱ. ཨཊྛ. ༡; དཱི. ནི. ཊཱི. ༡.༡; མ. ནི. ཊཱི. ༡.མུལཔརིཡཱཡསུཏྟཝཎྞནཱ; སཾ. ནི. ཊཱི. ༡.༡.ཨོགྷཏརཡསུཏྟཝཎྞནཱ; ཨ. ནི. ཊཱི. ༡.༡.རུཔཱདིཝགྒཝཎྞནཱ) སདྡནྟརཏྠཱཔོཧནཾ ཝཱ དསྶེནྟོ ཨཱཧ ‘‘ཨཱདིཏོ པནཱ’’ཏིཨཱདི. ཡཱཝསདྡོ ཨཝདྷིཝཙནོ. ཡཱཝ ཨནྟཾ པཱཔེཏྭཱཏི སམྦནྡྷོ. ཨིཏོཏི ཨིམེཧི ཝུཏྟེཧི དྭཱིཧི ཨཏྠེཧི. ‘‘མནསཱཀཱསཱི’’ཏི ཨེཏྠ ཨིཀཱརལོཔཝསེན སནྡྷཱིཏི ཨཱཧ ‘‘མནསི ཨཀཱསཱི’’ཏི. ཏཏྠཱཏི ‘‘མནསཱཀཱསཱི’’ཏིཔདེ. ཡཐཱཏི ཡེནཱཀཱརེན. ཨིདནྟི ཨིམཾ ཨཱཀཱརཾ. ཏཏྠཱཏི ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིཔཱཋེ ཨཝཡཝཏྠོ ཨེཝཾ ཝེདིཏབྦོཏི ཡོཛནཱ. སམཱསམཛ྄ཛྷེ ཏསདྡེན པུབྦཔདསྶེཝ ལིངྒཝཙནཱནི གཧེཏབྦཱནཱིཏི ཨཱཧ ‘‘ཨཝིཛྫཱ ཙ སཱ པཙྩཡོ ཙཱ’’ཏི ¶ . ཝཱཀྱེ པན ཏསདྡེན པརཔདསྶེཝ ལིངྒཝཙནཱནི གཧེཏབྦཱནི. ‘‘ཨཝིཛྫཱཔཙྩཡཱ’’ཏིཔདཾ ‘‘སམྦྷཝནྟཱི’’ཏིཔདེན སམྦནྡྷིཏབྦནྟི ཨཱཧ ‘‘ཏསྨཱ ཨཝིཛྫཱཔཙྩཡཱ སངྑཱརཱ སམྦྷཝནྟཱི’’ཏི. སབྦཔདེསཱུཏི ‘‘སངྑཱརཔཙྩཡཱ ཝིཉྙཱཎ’’ནྟིཨཱདཱིསུ སབྦེསུ པདེསུ.

ཡཐཱ པནཱཏི ཡེནཱཀཱརེན པན. ཨིདནྟི ཨིམཾ ཨཱཀཱརཾ. ཏཏྠཱཏི ‘‘ཨཝིཛྫཱཡ…པེ… ནིརོདྷོ’’ཏིཨཱདིཝཱཀྱེ. ཨཝིཛྫཱཡཏྭེཝཱཏི ཨེཏྠ ‘‘བྷདྡིཡོཏྭེཝཱ’’ཏིཨཱདཱིསུ ཝིཡ ‘‘བྷདྡིཡོ ཨིཏི ཨེཝཱ’’ཏི པདཙྪེདོ ཀཏྟབྦོ, ན ཨེཝཾ ‘‘ཨཝིཛྫཱཡ ཨིཏི ཨེཝཱ’’ཏི, ཨཐ ཁོ ‘‘ཨཝིཛྫཱཡ ཏུ ཨེཝཱ’’ཏི ཀཱཏབྦོཏི ཨཱཧ ‘‘ཨཝིཛྫཱཡ ཏུ ཨེཝཱ’’ཏི. ‘‘པ ཨཏིམོཀྑཾ ཨཏིཔམོཀྑ’’ནྟིཨཱདཱིསུ (ཀངྑཱ. ཨཊྛ. ནིདཱནཝཎྞནཱ) ཝིཡ ཨུཔསགྒབྱཏྟཡེན ཝུཏྟཾ, ཨེཝམིདྷ ¶ ནིཔཱཏབྱཏྟཡེན ཝུཏྟནྟི དཊྛབྦཾ. ཏཏྠ ཨེཝསདྡེན སཏྟཛཱིཝཱདཡོ ནིཝཏྟེཏི. ཏུསདྡོ པཀྑནྟརཏྠཛོཏཀོ. ཨནུལོམཔཀྑཏོ པཊིལོམསངྑཱཏཾ པཀྑནྟརཾ མནསཱཀཱསཱིཏི ཨཏྠོ. ཨསེསཝིརཱགནིརོདྷསདྡོ ཨཡུཏྟསམཱསོ, ཨུཏྟརཔདེན ཙ ཏཏིཡཱསམཱསོཏི ཨཱཧ ‘‘ཝིརཱགསངྑཱཏེན མགྒེན ཨསེསནིརོདྷཱ’’ཏི. ཏཏྠ ཨསེསསདྡཾ ཝིརཱགསདྡེན སམྦནྡྷམཀཏྭཱ ནིརོདྷསདྡེན སམྦནྡྷཾ ཀཏྭཱ ཨཏྠསྶ གཧཎཾ ཨཡུཏྟསམཱསོ ནཱམ. ‘‘མགྒེནཱ’’ཏིཨིམིནཱ ཝིརཱགསདྡསྶཏྠཾ དསྶེཏི. མགྒོ ཧི ཝིརཛྫནཊྛེན ཝིརཱགོཏི ཝུཙྩཏི. སངྑཱརནིརོདྷོཏི ཨེཏྠ མགྒེན ནིརོདྷཏྟཱ ཨནུཔྤཱདནིརོདྷོ ཧོཏཱིཏི ཨཱཧ ‘‘སངྑཱརཱནཾ ཨནུཔྤཱདནིརོདྷོ ཧོཏཱི’’ཏི. ཨནུཔྤཱདནིརོདྷོཏི ཙ ཨནུཔྤཱདེན ནིརོདྷོ སམུཙྪེདཝསེན ནིརུདྡྷཏྟཱ. ཨེཝནྟི ཡཐཱ ཨཝིཛྫཱཡཏྭེཝ ཨསེསཝིརཱགནིརོདྷཱ སངྑཱརནིརོདྷོ, ཨེཝཾ ཏཐཱཏི ཨཏྠོ. ཏཏྠཱཏི ‘‘ཨེཝམེཏསྶཱ’’ཏིཨཱདིཝཙནེ. ཀེཝལསདྡོ སཀལཔརིཡཱཡོཏི ཨཱཧ ‘‘སཀལསྶཱ’’ཏི, ཨནཝསེསསྶཱཏི ཨཏྠོ. ཨཐཝཱ སཏྟཛཱིཝཱདཱིཧི ཨམིསྶིཏཏྟཱ ཨམིསྶཏྠོཏི ཨཱཧ ‘‘སུདྡྷསྶ ཝཱ’’ཏི. ‘‘སཏྟཝིརཧིཏསྶཱ’’ཏི ཨིམིནཱ སུདྡྷབྷཱཝཾ དསྶེཏི. དུཀྑཀྑནྡྷསྶཱཏི ཨེཏྠ ཁནྡྷསདྡོ རཱསཏྠཝཱཙཀོཏི ཨཱཧ ‘‘དུཀྑརཱསིསྶཱ’’ཏི.

ཨེཏམཏྠཾ ¶ ཝིདིཏྭཱཏི ཨེཏྠ ཨེཏསདྡསྶ ཝིསཡཾ དསྶེཏུཾ ཝུཏྟཾ ‘‘ཡྭཱཡ’’ནྟིཨཱདི. ཏཏྠ ‘‘ཨཝིཛྫཱདིཝསེན…པེ… ནིརོདྷོ ཧོཏཱི’’ཏི ཡྭཱཡཾ ཨཏྠོ ཝུཏྟོཏི ཡོཛནཱ. སམུདཡོ ཙ ཧོཏཱིཏི སམྦནྡྷོ. ཝིདིཏཝེལཱཡནྟི པཱཀཊཝེལཱཡཾ པསིདྡྷཀཱལེཏི ཨཏྠོ. ཨིམཾ ཨུདཱནནྟི ཨེཏྠ ཨིམསདྡོ ཝུཙྩམཱནཱཔེཀྑོ. ཏསྨིཾ ཨཏྠེ ཝིདིཏེ སཏཱིཏི ཡོཛནཱ. པཛཱནནཏཱཡཱཏི པཀཱརེན ཛཱནནབྷཱཝསྶ. སོམནསྶཡུཏྟཉཱཎསམུཊྛཱནནྟི སོམནསྶེན ཨེཀུཔྤཱདཱདིཝསེན ཡུཏྟེན ཉཱཎེན སམུཊྛཱནཾ, ཡུཏྟཾ ཝཱ ཉཱཎསངྑཱཏཾ སམུཊྛཱནཾ ཨུདཱནནྟི སམྦནྡྷོ. ཏཏྠ ཨུདཱནནྟི ཀེནཊྛེན ཨུདཱནཾ? ཨུདཱནཊྛེན, མོདནཊྛེན, ཀཱིལ༹ནཊྛེན ཙཱཏི ཨཏྠོ. ཀིམིདཾ ཨུདཱནཾ ནཱམ? པཱིཏིཝེགསམུཊྛཱཔིཏོ ཨུདཱཧཱརོ. ཡཐཱ (ཨུདཱ. ཨཊྛ. གནྠཱརམྦྷཀཐཱ) ཧི ཡཾ ཏེལཱདིམིནིཏབྦཝཏྠུ མཱནཾ གཧེཏུཾ ན སཀྐོཏི ཝིསནྡིཏྭཱ གཙྪཏི, ཏཾ ‘‘ཨཝསེཀོ’’ཏི ཝུཙྩཏི. ཡཉྩ ཛལཾ ཏལཱ༹ཀཾ གཧེཏུཾ ན སཀྐོཏི, ཨཛ྄ཛྷོཏྠརིཏྭཱ གཙྪཏི, ཏཾ ‘‘ཨོགྷོ’’ཏི ཝུཙྩཏི. ཨེཝམེཝཾ ཡཾ པཱིཏིཝེགསམུཊྛཱཔིཏཾ ཝིཏཀྐཝིཔྥཱརཾ ཧདཡཾ སནྡྷཱརེཏུཾ ན སཀྐོཏི, སོ ཨདྷིཀོ ཧུཏྭཱ ཨནྟོ ཨསཎྛཧིཏྭཱ ཝཙཱིདྭཱརེན ནིཀྑམནྟོ པཊིགྒཱཧཀནིརཔེཀྑོ ཨུདཱཧཱརཝིསེསོ ‘‘ཨུདཱན’’ནྟི ཝུཙྩཏི. ‘‘ཨཏྟམནཝཱཙཾ ནིཙྪཱརེསཱི’’ཏི ཨིམིནཱ ཨུདདྷཱཏུསྶ ཨུདཱཧཱརཏྠཾ དསྶེཏི.

ཏསྶཱཏི ཨུདཱནསྶ ཨཏྠོ ཨེཝཾ ཝེདིཏབྦོཏི ཡོཛནཱ. ཡདཱཏི ཨེཏྠ དཱཔཙྩཡསྶ ཨཏྠཝཱཀྱཾ ¶ དསྶེནྟོ ཨཱཧ ‘‘ཡསྨིཾ ཀཱལེ’’ཏི. ཧཝེཏི ‘‘བྱཏྟ’’ནྟི ཨིམསྨིཾ ཨཏྠེ ནིཔཱཏོ. བྱཏྟཾ པཱཀཊནྟི ཧི ཨཏྠོ. པཱཏུབྷཝནྟཱིཏི ཨེཏྠ པཱཏུནིཔཱཏསྶ ཨཏྠསྶ ‘‘ཧཝེ’’ཏི ནིཔཱཏེན ཝུཏྟཏྟཱ བྷཱུདྷཱཏུསྶེཝ ཨཏྠཾ དསྶེནྟོ ཨཱཧ ‘‘ཨུཔྤཛྫནྟཱི’’ཏི. ཨནུལོམ པཊིལོམ པཙྩཡཱཀཱར པཊིཝེདྷསཱདྷཀཱཏི ཨནུལོམཏོ ཙ པཊིལོམཏོ ཙ པཙྩཡཱཀཱརསྶ པཊིཝིཛ྄ཛྷནསྶ སཱདྷཀཱ. བོདྷིཔཀྑིཡདྷམྨཱཏི བོདྷིཡཱ མགྒཉཱཎསྶ པཀྑེ བྷཝཱ སཏྟཏིཾས དྷམྨཱ. ཨཐཝཱ པཱཏུནིཔཱཏེན སཧ ‘‘བྷཝནྟཱི’’ཏིཔདསྶ ཨཏྠཾ དསྶེནྟོ ཨཱཧ ‘‘པཀཱསནྟཱི’’ཏི. ཨིམསྨིཾ ནཡེ ཧཝེསདྡོ ཨེཀཾསཏྠཝཱཙཀོ. ཧཝེ ཨེཀཾསེནཱཏི ཧི ཨཏྠོ. ཨབྷིསམཡཝསེནཱཏི མགྒཉཱཎཝསེན ¶ . མགྒཉཱཎཉྷི ཡསྨཱ ཨབྷིམུཁཾ ཙཏྟཱརི སཙྩཱནི སམེཙྩ ཨཡཏི ཛཱནཱཏི, ཏསྨཱ ཨབྷིསམཡོཏི ཝུཙྩཏི.

‘‘ཀིལེསསནྟཱཔནཊྛེནཱ’’ཏི ཨིམིནཱ ཨཱབྷུསོ ཀིལེསེ ཏཱཔེཏཱིཏི ཨཱཏཱཔོཏི ཝཙནཏྠཾ དསྶེཏི. ན ཝཱིརིཡསཱམཉྙཾ ཧོཏི, ཨཐ ཁོ སམྨཔྤདྷཱནཝཱིརིཡམེཝཱཏི ཨཱཧ ‘‘སམྨཔྤདྷཱནཝཱིརིཡཝཏོ’’ཏི. ཨིམིནཱ ཨཱཏཱཔཱིཏི ཨེཏྠ ཨཱིཔཙྩཡསྶ ཝནྟུཨཏྠཾ དསྶེཏི. ཨཱརམྨཎཱུཔནིཛ྄ཛྷཱནལཀྑཎེན ཙཱཏི ཀསིཎཱདིཨཱརམྨཎཾ ཨུཔགནྟྭཱ ནིཛ྄ཛྷཱནསབྷཱཝེན ཨཊྛསམཱཔཏྟིསངྑཱཏེན ཛྷཱནེན ཙ. ལཀྑཎཱུཔནིཛ྄ཛྷཱནལཀྑཎེན ཙཱཏི ཨནིཙྩཱདིལཀྑཎཾ ཨུཔགནྟྭཱ ནིཛ྄ཛྷཱནསབྷཱཝེན ཝིཔསྶནཱམགྒཕལསངྑཱཏེན ཛྷཱནེན ཙ. ‘‘བཱཧིཏཔཱཔསྶཱ’’ཏི ཨིམིནཱ བཱཧིཏོ ཨཎོ པཱཔོ ཨནེནཱཏི བྲཱཧྨཎོཏི ཝཙནཏྠཾ དསྶེཏི. ཨཎསདྡོ ཧི པཱཔཔརིཡཱཡོ. ‘‘ཁཱིཎཱསཝསྶཱ’’ཏི ཨིམིནཱ ཏསྶ སརཱུཔཾ དསྶེཏི. ཨཐསྶཱཏི ཨཐ ཨསྶ, ཏསྨིཾ ཀཱལེ བྲཱཧྨཎསྶཱཏི ཨཏྠོ. ཡཱ ཨེཏཱ ཀངྑཱ ཝུཏྟཱཏི སམྦནྡྷོ. ‘‘ཀོ ནུ ཁོ…པེ… ཨཝོཙཱ’’ཏིཨཱདིནཱ (སཾ. ནི. ༢.༡༢) ནཡེན ཙ ཏཐཱ ‘‘ཀཏམཾ ནུ ཁོ…པེ… ཨཝོཙཱ’’ཏིཨཱདིནཱ (སཾ. ནི. ༢.༣༥) ནཡེན ཙ པཙྩཡཱཀཱརེ ཝུཏྟཱཏི ཡོཛནཱ. ནོ ཀལློ པཉྷོཏི ཨཡུཏྟོ པཉྷོ, དུཔྤཉྷོ ཨེསོཏི ཨཏྠོ. ཏཐཱཏི ཨེཝཾ, ཏཏོ ཨཉྙཐཱ ཝཱ. ཡཱ ཙ སོལ༹ས ཀངྑཱ (མ. ནི. ༡.༡༨; སཾ. ནི. ༢.༢༠) ཨཱགཏཱཏི སམྦནྡྷོ. ཨཔཊིཝིདྡྷཏྟཱ ཀངྑཱཏི ཡོཛནཱ. སོལ༹ས ཀངྑཱཏི ཨཏཱིཏཝིསཡཱ པཉྩ, ཨནཱགཏཝིསཡཱ པཉྩ, པཙྩུཔྤནྣཝིསཡཱ ཚཱཏི སོལ༹སཝིདྷཱ ཀངྑཱ. ཝཔཡནྟཱིཏི ཝི ཨཔཡནྟི, ཨིཀཱརལོཔེནཱཡཾ སནྡྷི. ཝིཏྱཱུཔསགྒོ དྷཱཏྭཏྠཱནུཝཏྟཀོ, ཨཔཡནྟི – སདྡོ ཨཔགམནཏྠོཏི ཨཱཧ ‘‘ཨཔགཙྪནྟཱི’’ཏི. ‘‘ནིརུཛ྄ཛྷནྟཱི’’ཏིཨིམིནཱ ཨཔགམནཏྠམེཝ པརིཡཱཡནྟརེན དཱིཔེཏི. ‘‘ཀསྨཱ’’ཏི ཨིམིནཱ ‘‘ཡཏོ པཛཱནཱཏི སཧེཏུདྷམྨ’’ནྟི ཝཱཀྱསྶ པུབྦཝཱཀྱཀཱརཎབྷཱཝཾ དསྶེཏི. སཧེཏུདྷམྨནྟི ཨེཏྠ སཧ ཨཝིཛྫཱདིཧེཏུནཱཏི སཧེཏུ, སངྑཱརཱདིཀོ པཙྩཡུཔྤནྣདྷམྨོ. སཧེཏུ ཙ སོ དྷམྨོ ཙཱཏི སཧེཏུདྷམྨོཏི ཝཙནཏྠཾ དསྶེནྟོ ཨཱཧ ‘‘ཨཝིཛྫཱདིཀེནཱ’’ཏིཨཱདི ¶ . ‘‘པཊིཝིཛ྄ཛྷཏཱི’’ཏི ཨིམིནཱ པཛཱནཱ ཏཱིཏི ¶ ཨེཏྠ ཉཱདྷཱཏུཡཱ ཨཝབོདྷནཏྠཾ དསྶེཏི, མཱརཎཏོསནཱདིཀེ ཨཏྠེ ནིཝཏྟེཏི. ཨིཏཱིཏི ཏསྨཱ, ཝཔཡནྟཱིཏི ཡོཛནཱ.

༢. པཙྩཡཀྑཡསྶཱཏི པཙྩཡཱནཾ ཁཡཊྛཱནསྶ ཨསངྑཏསྶཱཏི ཡོཛནཱ. ཏཏྲཱཏི དུཏིཡཨུདཱནེ. ཁཱིཡནྟི པཙྩཡཱ ཨེཏྠཱཏི ཁཡཾ, ནིབྦཱནནྟི ཨཱཧ ‘‘པཙྩཡཱནཾ ཁཡསངྑཱཏཾ ནིབྦཱན’’ནྟི. ‘‘ཨཉྙཱསཱི’’ཏི ཨིམིནཱ ཨཝེདཱིཏི ཨེཏྠ ཝིདདྷཱཏུཡཱ ཉཱཎཏྠཾ དསྶེཏི, ཨནུབྷཝནལཱབྷཱདིཀེ ནིཝཏྟེཏི. ཏསྨཱ ཝཔཡནྟཱིཏི སམྦནྡྷོ. ཝུཏྟཔྤཀཱརཱཏི པཋམཨུདཱནེ ཝུཏྟསདིསཱ. དྷམྨཱཏི བོདྷིཔཀྑིཡདྷམྨཱ, ཙཏུཨརིཡསཙྩདྷམྨཱ ཝཱ.

༣. ཨིམཾ ཨུདཱནཾ ཨུདཱནེསཱིཏི སམྦནྡྷོ. ཡེན མགྒེན ཝིདིཏོཏི ཡོཛནཱ. ཏཏྲཱཏི ཏཏིཡཨུདཱནེ. སོ བྲཱཧྨཎོ ཏིཊྛཏཱིཏི སམྦནྡྷོ. ཏེཧི ཨུཔྤནྣེཧི བོདྷིཔཀྑིཡདྷམྨེཧི ཝཱ ཡསྶ ཨརིཡམགྒསྶ ཙཏུསཙྩདྷམྨཱ པཱཏུབྷཱུཏཱ, ཏེན ཨརིཡམགྒེན ཝཱ ཝིདྷཱུཔཡནྟི ཡོཛནཱ. ཝུཏྟཔྤཀཱརནྟི སུཏྟནིཔཱཏེ ཝུཏྟཔྤཀཱརཾ. མཱརསེནནྟི ཀཱམཱདིཀཾ དསཝིདྷཾ མཱརསེནཾ. ‘‘ཝིདྷམེནྟོ’’ཏིཨིམིནཱ ཝིདྷཱུཔཡནྟི ཨེཏྠ དྷཱུཔདྷཱཏུཡཱ ཝིདྷམནཏྠཾ དསྶེཏི, ལིམྤནཏྠཱདཡོ ནིཝཏྟེཏི. ‘‘ཝིདྡྷཾ སེནྟོ’’ཏིཨིམིནཱ ཝིདྷམེནྟོཏི ཨེཏྠ དྷམུདྷཱཏུཡཱ དྷཾསནཏྠཾ དསྶེཏི, སདྡཏྠཱདཡོ ནིཝཏྟེཏི. ‘‘སཱུརིཡོཝ ཨོབྷཱསཡ’’ནྟིཔདསྶ ‘‘སཱུརིཡོ ཨིཝཱ’’ཏི ཨཏྠཾ དསྶེནྟོ ཨཱཧ ‘‘ཡཐཱ’’ཏིཨཱདི. སཱུརིཡོཏི ཨཱདིཙྩོ. སོ ཧི ཡསྨཱ པཋམཀཔྤིཀཱནཾ སཱུརཾ ཛནེཏི, ཏསྨཱ སཱུརིཡོཏི ཝུཙྩཏི. ཨབྦྷུགྒཏོཏི ཨབྷིམུཁཾ ཨུདྡྷཾ ཨཱཀཱསཾ གཏོ, ཨབྦྷཾ ཝཱ ཨཱཀཱསཾ ཨུགྒཏོ. ཨབྦྷསདྡོ ཧི ཨཱཀཱསཔརིཡཱཡོ. ཨཱཀཱསོ ཧི ཡསྨཱ ཨཱབྷུསོ བྷཱཏི དིཔྤཏི, ཏསྨཱ ‘‘ཨབྦྷ’’ནྟི ཝུཙྩཏི. ཨཡཾ པནེཏྠ ཨོཔམྨསཾསནྡནཾ – ཡཐཱ སཱུརིཡོ ཨོབྷཱསཡནྟོ ཏིཊྛཏི, ཨེཝཾ བྲཱཧྨཎོ སཙྩཱནི པཊིཝིཛ྄ཛྷནྟོ. ཡཐཱ སཱུརིཡོ ཨནྡྷཀཱརཾ ཝིདྷམེནྟོ ཏིཊྛཏི, ཨེཝཾ བྲཱཧྨཎོ མཱརསེནམྤི ཝིདྷཱུཔཡནྟོཏི.

ཨེཏྠཱཏི ཨེཏེསུ ཏཱིསུ ཨུདཱནེསུ. པཋམཾ ཨུདཱནཾ ཨུཔྤནྣནྟི སམྦནྡྷོ. ཨིམིསྶཱ ཁནྡྷཀཔཱལི༹ཡཱ ཨུདཱནཔཱལི༹ཾ སཾསནྡནྟོ ཨཱཧ ‘‘ཨུདཱནེ པནཱ’’ཏིཨཱདི ¶ . ཨུདཱནེ པན ཝུཏྟནྟི སམྦནྡྷོ. ཏནྟི ཨུདཱནེ ཝུཏྟཝཙནཾ, ཝུཏྟནྟི སམྦནྡྷོ. ཨཙྩཡེནཱཏི ཨཏིཀྐམེན, ཏམེཝཏྠཾ ཝིབྷཱཝེནྟོ ཨཱཧ ‘‘ཏདཱ ཧཱི’’ཏིཨཱདི. ཏདཱཏི ‘‘སྭེ ཨཱསནཱ ཝུཊྛཧིསྶཱམཱི’’ཏི རཏྟིཾ ཨུཔྤཱདིཏམནསིཀཱརཀཱལེ. བྷགཝཱ མནསཱཀཱསཱིཏི སམྦནྡྷོ. པུརིམཱ དྭེ ཨུདཱནགཱཐཱ ཨཱནུབྷཱཝདཱིཔིཀཱ ཧོནྟཱིཏི ཡོཛནཱ. ཏསྶཱཏི པཙྩཡཱཀཱརཔཛཱནནཔཙྩཡཀྑཡཱདྷིགམསྶ. ཨེཀེཀམེཝཱཏི ¶ ཨནུལོམཔཊིལོམེསུ ཨེཀེཀམེཝ. པཋམཡཱམཉྩཱཏི ཨཙྩནྟསཾཡོགེ ཨུཔཡོགཝཙནཾ, ནིརནྟརཾ པཋམཡཱམཀཱལནྟི ཨཏྠོ. ཨིདྷ པནཱཏི ཨིམསྨིཾ ཁནྡྷཀེ པན. ཏམེཝཏྠཾ ཝིཏྠཱརེནྟོ ཨཱཧ ‘‘བྷགཝཱ ཧཱི’’ཏིཨཱདི. ཏཏྠ བྷགཝཱ ཨུདཱནེསཱིཏི སམྦནྡྷོ. ཝིསཱཁཔུཎྞམཱཡཱཏི ཝིསཱཁཱཡ ཡུཏྟཱཡ པུཎྞམཱཡ. ‘‘ཨརུཎོ ཨུགྒམིསྶཏཱི’’ཏི ཝཏྟབྦསམཡེཏི སམྦནྡྷོ. སབྦཉྙུཏནྟི སབྦཉྙུབྷཱཝཾ, ཨནཱཝརཎཉཱཎནྟི ཨཏྠོ. ཏཏོཏི ཨརུཎུགྒམནཏོ. ཏཾ དིཝསནྟི བྷུམྨཏྠེ ཨུཔཡོགཝཙནཾ, ཏསྨིཾ དིཝསེཏི ཧི ཨཏྠོ. ཨཙྩནྟསཾཡོགེ ཝཱ, ཏཾ དིཝསཾ ཀཱལནྟི ཧི ཨཏྠོ. ཨེཝཾ མནསི ཀཏྭཱཏི ཡཐཱ ཏཾ དིཝསཾ ཨནུལོམཔཊིལོམཾ མནསཱཀཱསི, ཨེཝཾ མནསི ཀཏྭཱཏི ཨཏྠོ. ཨིཏཱིཏི ཨེཝཾ. ‘‘བོདྷིརུཀྑམཱུལེ…པེ… ནིསཱིདཱི’’ཏི ཨེཝཾ ཝུཏྟཾ ཏཾ སཏྟཱཧནྟི ཡོཛནཱ. ཏཏྠེཝཱཏི བོདྷིརུཀྑམཱུལེཡེཝ.

༢. ཨཛཔཱལཀཐཱ

༤. ན བྷགཝཱཏི ཨེཏྠ ནཀཱརོ ‘‘ཨུཔསངྐམཱི’’ཏི པདེན ཡོཛེཏབྦོ, ན ཨུཔསངྑམཱིཏི ཧི ཨཏྠོ. ཏམྷཱ སམཱདྷིམྷཱཏི ཏཏོ ཨརཧཏྟཕལསམཱཔཏྟིསམཱདྷིཏོ. ཨནནྟརམེཝ ཨནུཔསངྐམནཾ ཨུཔམཱཡ ཨཱཝིཀརོནྟོ ཨཱཧ ‘‘ཡཐཱ པནཱ’’ཏིཨཱདི. ཨིཙྩེཝཾ ཝུཏྟཾ ན ཧོཏཱིཏི ཡོཛནཱ. ཨིདནྟི ཨིདཾ ཨཏྠཛཱཏཾ. ཨེཏྠཱཏི ‘‘བྷུཏྭཱ སཡཏཱི’’ཏི ཝཱཀྱེ. ཨེཝནྟི ཨུཔམེཡྻཛོཏཀོ. ཨིདྷཱཔཱིཏི ཨིམིསྶཾ ‘‘ཨཐ ཁོ བྷགཝཱ’’ཏིཨཱདིཔཱལི༹ཡམྤི. ཨིདནྟི ཨཡམཏྠོ དཱིཔིཏོ ཧོཏཱིཏི ཡོཛནཱ. ཨེཏྠཱཏི ‘‘ཨཐ ཁོ བྷགཝཱ’’ཏིཨཱདིཔཱཋེ.

ཨཔརཱནིཔཱིཏི པལླངྐསཏྟཱཧཏོ ཨཉྙཱནིཔི. ཏཏྲཱཏི ‘‘ཨཔརཱནིཔཱི’’ཏིཨཱདིཝཙནེ. བྷགཝཏི ནིསིནྣེ སཏཱིཏི ཡོཛནཱ. ཀིརསདྡོ ཝིཏྠཱརཛོཏཀོ ¶ . ཀིཾ ནུ ཁོཏི པརིཝིཏཀྐནཏྠེ ནིཔཱཏོ. ཨེཀཙྩཱནནྟི ཨཔྤེསཀྑཱནཾ ཨེཀཙྩཱནཾ. ཏཱསནྟི དེཝཏཱནཾ. བལཱདྷིགམཊྛཱནནྟི བལེན ཏེཛསཱ ཨདྷིགམཊྛཱནཾ. ཨནིམིསེཧཱིཏི ཨུམྨིསེཧི. སཏྟཱཧནྟི ཀམྨཏྠེ ཙེཏཾ ཨུཔཡོགཝཙནཾ, ཨཙྩནྟསཾཡོགེ ཝཱ. ཨེཝཉྷི སཏི ‘‘ཀཱལ’’ནྟི ཀམྨཾ ཝེདིཏབྦཾ. ཏཾ ཋཱནནྟི ཨནིམིསེཧི ཨཀྑཱིཧི ཨོལོཀིཡམཱནཊྛཱནཾ. ཨཐཱཏི ཨནིམིསསཏྟཱཧསྶ ཨནནྟརེ. རཏནཙངྐམེཏི རཏནམཡེ ཙངྐམེ. ཏཾ ཋཱནནྟི ཙངྐམཊྛཱནཾ. ཏཏོཏི ཙངྐམསཏྟཱཧཏོ. རཏནགྷརནྟི རཏནམཡཾ གེཧཾ. ཏཏྠཱཏི རཏནགྷརེ ཨབྷིདྷམྨཔིཊཀཾ ཝིཙིནནྟོཏི སམྦནྡྷོ. ཨེཏྠཱཏི རཏནགྷརེ, ཨབྷིདྷམྨཔིཊཀེ ཝཱ, ནིདྡྷཱརཎེ ཙེཏཾ བྷུམྨཝཙནཾ. ཏཾ ཋཱནནྟི ཨབྷིདྷམྨཔིཊཀཝིཙིནནཊྛཱནཾ.

ཨེཝནྟིཨཱདི པུབྦཝཙནསྶ ནིགམཝསེན པཙྪིམཝཙནསྶ ཨནུསནྡྷིནིདསྶནཾ. ཏེནཱཏི ཨཛཔཱལཱནཾ ¶ ནིསཱིདནཀཱརཎེན. ཨསྶཱཏི ནིགྲོདྷསྶ. ‘‘ཨཛཔཱལནིགྲོདྷོཏྭེཝ ནཱམ’’ནྟི ཨིམིནཱ ཨུཔཙཱརཝསེན ནཱམལབྷནཾ དསྶེཏི. ཨཛཔཱ བྲཱཧྨཎཱ ལནྟི ནིཝཱསཾ གཎྷནྟི ཨེཏྠཱཏི ཨཛཔཱལོ, ཨུཎྷཀཱལེ ཝཱ ཨནྟོཔཝིཊྛེ ཨཛེ ཨཏྟནོ ཚཱཡཱཡ པཱལེཏཱིཏི ཨཛཔཱལོ, ཨཛཔཱལོ ཙ སོ ནིགྲོདྷོ ཙེཏི ཨཛཔཱལནིགྲོདྷོཏི ཝཙནཏྠཱནིཔི པཀརཎནྟརེསུ (ཨུདཱ. ཨཊྛ. ༤) དསྶིཏཱནི. ཏཏྲཱཔཱིཏི ཨཛཔཱལནིགྲོདྷེཔི. བོདྷིཏོཏི བོདྷིརུཀྑཏོ. ཨེཏྠཱཏི ཨཛཔཱལནིགྲོདྷེ. བྷགཝཏི ནིསིནྣེཏི ཡོཛནཱ. ཏཏྠཱཏི ‘‘ཨཐ ཁོ ཨཉྙཏརོ’’ཏིཨཱདིཝཙནེ. སོཏི བྲཱཧྨཎོ. དིཊྛམངྒལིཀོ ནཱམཱཏི དིཊྛསུཏམུཏསངྑཱཏེསུ ཏཱིསུ མངྒལིཀེསུ དིཊྛམངྒལིཀོ ནཱམ ཀིརཱཏི ཨཏྠོ. ‘‘མཱནཝསེན…པེ… ཝུཙྩཏཱི’’ཏི ཨིམིནཱ ‘‘ཧུཾཧུ’’ནྟི ཀརོཏཱིཏི ཧུཾཧུངྐོ, ཧུཾཧུངྐོ ཛཱཏི སབྷཱཝོ ཨིམསྶཱཏི ཧུཾཧུངྐཛཱཏིཀོཏི ཝཙནཏྠཾ དསྶེཏི.

ཏེནཱཏི བྲཱཧྨཎེན. སིཁཱཔྤཏྟནྟི ཨགྒཔྤཏྟཾ. ཏསྶཱཏི ཨུདཱནསྶ. ཡོཏི པུགྒལོ, པཊིཛཱནཱཏཱིཏི སམྦནྡྷོ. ‘‘ན དིཊྛམངྒལིཀཏཱཡཱ’’ཏི ཨིམིནཱ ཨཝདྷཱརཎཕལཾ དསྶེཏི. ‘‘བཱཧིཏཔཱཔདྷམྨཏྟཱ’’ཏི ཨིམིནཱ བཱཧིཏོ ¶ པཱཔོ དྷམྨོ ཨནེནཱཏི བཱཧིཏཔཱཔདྷམྨོཏི ཝཙནཏྠཾ དསྶེཏི. ‘‘ཧུཾཧུངྐཱརཔཧཱནེནཱ’’ཏི ཨིམིནཱ ནཏྠི ཧུཾཧུངྐཱརོ ཨིམསྶཱཏི ནིཧུཾཧུངྐོཏི ཝཙནཏྠཾ དསྶེཏི. རཱགཱདིཀསཱཝཱབྷཱཝེནཱཏི ཨིམིནཱ ནཏྠི རཱགཱདིཀསཱཝོ ཨིམསྶཱཏི ནིཀྐསཱཝོཏི ཝཙནཏྠཾ དསྶེཏི. ‘‘བྷཱཝནཱནུཡོགཡུཏྟཙིཏྟཏཱཡཱ’’ཏི ཨིམིནཱ ཡཏཾ ཨནུཡུཏྟཾ ཨཏྟཾ ཙིཏྟཾ ཨིམསྶཱཏི ཡཏཏྟོཏི ཝཙནཏྠཾ དསྶེཏི. ཨེཏྠ ཧི ཡཏསདྡོ ཝཱིརིཡཝཱཙཀོ, ཡཏདྷཱཏུཡཱ ནིཔྥནྣོ, ཨཏྟསདྡོ ཙིཏྟཔརིཡཱཡོ. ཡཏསདྡསྶ ཡམུདྷཱཏུཡཱ ཙ ནིཔྥནྣབྷཱཝཾ དསྶེཏུཾ ཝུཏྟཾ ‘‘སཱིལསཾཝརེན ཝཱ’’ཏིཨཱདི. ‘‘སཉྙཏཙིཏྟཏཱཡཱ’’ཏི ཨིམིནཱ ཡམཏི སཾཡམཏཱིཏི ཡཏཾ, ཡཏཾ ཨཏྟཾ ཙིཏྟཾ ཨིམསྶཱཏི ཡཏཏྟོཏི ཝཙནཏྠཾ དསྶེཏི. སཙྩཱནི ཝིདནྟི ཛཱནནྟཱིཏི ཝེདཱནཱིཏི ཝཙནཏྠེན མགྒཉཱཎཱནི ཝེདཱནི ནཱམཱཏི དསྶེནྟོ ཨཱཧ ‘‘ཙཏུམགྒཉཱཎསངྑཱཏེཧི ཝེདེཧཱི’’ཏི. ‘‘ཙཏུམགྒཉཱཎསངྑཱཏཱན’’ནྟི ཝིབྷཏྟིཔརིཎཱམཾ ཀཏྭཱ ‘‘ཝེདཱན’’ནྟིཔདེན ཡོཛེཏབྦོ. ཨནྟནྟི ནིབྦཱནཾ. ཏཉྷི ཡསྨཱ སངྑཱརཱནཾ ཨཝསཱནེ ཛཱཏཾ, ཏསྨཱ ཨནྟནྟི ཝུཙྩཏི. པུན ཨནྟནྟི ཨརཧཏྟཕལཾ. ཏཉྷི ཡསྨཱ མགྒསྶ པརིཡོསཱནེ པཝཏྟཾ, ཏསྨཱ ཨནྟནྟི ཝུཙྩཏི. ‘‘མགྒབྲཧྨཙརིཡསྶ ཝུསིཏཏྟཱ’’ཏི ཨིམིནཱ ཝུསིཏཾ མགྒསངྑཱཏཾ བྲཧྨཙརིཡཾ ཨནེནཱཏི ཝུསིཏབྲཧྨཙརིཡོཏི ཝཙནཏྠཾ དསྶེཏི. དྷམྨེན བྲཧྨཝཱདཾ ཝདེཡྻཱཏི ཝུཏྟཝཙནསྶ ཨཏྠཾ དསྶེནྟོ ཨཱཧ ‘‘བྲཱཧྨཎོ ཨཧནྟི ཨེཏཾ ཝཱདཾ དྷམྨེན ཝདེཡྻཱ’’ཏི. དྷམྨེནཱཏི བྷཱུཏེན སབྷཱཝེན. ལོཀེཏི ཨེཏྠ སཏྟལོཀོཝཱདྷིཔྤེཏོཏི ཨཱཧ ‘‘སཀལེ ལོཀསནྣིཝཱསེ’’ཏི.

༣. མུཙལིནྡཀཐཱ

༥. ཨཀཱལམེགྷོཏི ¶ ཨེཏྠ ཝཔྤཱདིཀཱལསྶ ཨབྷཱཝཱ ན ཨཀཱལོ ཧོཏི, ཨཐ ཁོ ཝསྶཀཱལེ ཨསམྤཏྟཏྟཱ ཨཀཱལོཏི ཨཱཧ ‘‘ཨསམྤཏྟེ ཝསྶཀཱལེ’’ཏི. ‘‘ཨུཔྤནྣམེགྷོ’’ཏི ཨིམིནཱ ཨཀཱལེ ཨུཔྤནྣོ མེགྷོ ཨཀཱལམེགྷོཏི ཝཙནཏྠཾ དསྶེཏི. གིམྷཱནཾ པཙྪིམེ མཱསེཏི ཛེཊྛམཱུལམཱསེ. ཏསྨིནྟི མེགྷེ. སཱིཏཝཱཏདུདྡིནཱིཏི ཨེཏྠ སཱིཏེན ཝཱཏེན དཱུསིཏཾ དིནཾ ཨིམིསྶཱ ཝཊྚལིཀཱཡཱཏི སཱིཏཝཱཏདུདྡིནཱིཏི ཝཙནཏྠཾ ¶ དསྶེནྟོ ཨཱཧ ‘‘སཱ ཙ པནཱ’’ཏིཨཱདི. སཱ ཙ པན སཏྟཱཧཝཊྚལིཀཱ སཱིཏཝཱཏདུདྡིནཱི ནཱམ ཨཧོསཱིཏི སམྦནྡྷོ. ‘‘སམཱིཔེ པོཀྑརཎིཡཱ ནིབྦཏྟོ’’ཏི ཨིམིནཱ མུཙལིནྡསྶ སམཱིཔེ ནིབྦཏྟོ མུཙལིནྡོཏི ཝཙནཏྠཾ དསྶེཏི. མུཙལིནྡོཏི ཙ ནིཙུལོ. སོ ནཱིཔོཏི ཙ པིཡཀོཏི ཙ ཝུཙྩཏི. ནཱགསྶ བྷོགོ ཨེཀོཔི སཏྟཱབྷུཛཏྟཱ ‘‘བྷོགེཧཱི’’ཏི བཧུཝཙནཝསེན ཝུཏྟཾ. ཏསྨིནྟི ནཱགརཱཛེ ཋིཏེ སཏཱིཏི ཡོཛནཱ. ཏསྶཱཏི ནཱགརཱཛསྶ. ཏསྨཱཏི ཡསྨཱ བྷཎྜཱགཱརགབྦྷཔམཱཎཾ ཨཧོསི, ཏསྨཱ. ཋཱནསྶ ཀཱརཎཾ པརིདཱིཔེཏི ཨནེནཱཏི ཋཱནཀཱརཎཔརིདཱིཔནཾ ‘‘མཱ བྷགཝནྟཾ སཱིཏ’’ནྟིཨཱདིཝཙནཾ. སོཏི ནཱགརཱཛཱ. ཧཱིཏི སཙྩཾ. པཱལི༹ཡཾ ‘‘བཱདྷཡིཏྠཱ’’ཏི ཀིརིཡཱཔདཾ ཨཛ྄ཛྷཱཧརིཏབྦནྟི ཨཱཧ ‘‘མཱ སཱིཏཾ བྷགཝནྟཾ བཱདྷཡིཏྠཱ’’ཏི. ཏཏྠཱཏི ‘‘མཱ བྷགཝནྟཾ སཱིཏ’’ནྟིཨཱདིཝཙནེ. སཏྟཱཧཝཊྚལིཀཱཡ སཏཱིཏི སམྦནྡྷོ. ཏམྤཱིཏི ཨུཎྷམྤི. ནནྟི བྷགཝནྟཾ. ཏསྶཱཏི ནཱགརཱཛསྶ. ཨུབྦིདྡྷནྟི ཨུདྡྷཾ ཚིདྡཾ. ཝིདྡྷཚིདྡསདྡཱ ཧི པརིཡཱཡཱ. ཨཱཀཱསཾ མེགྷཔཊལཔཊིཙྪནྣཾ ཨཱསནྣཾ ཝིཡ ཧོཏི, མེགྷཔཊལཝིགམེ དཱུརཾ ཝིཡ ཨུཔཊྛཱཏི, ཏསྨཱ ཝུཏྟཾ ‘‘མེགྷཝིགམེན དཱུརཱིབྷཱུཏ’’ནྟི. ཝིགཏཝལཱཧཀནྟི ཨེཏྠ ཝིགཏསདྡོ ཨཔགཏཏྠཝཱཙཀོ, ཝལཱཧཀསདྡོ མེགྷཔརིཡཱཡོཏི ཨཱཧ ‘‘ཨཔགཏམེགྷ’’ནྟི. ཨིནྡནཱིལམཎི ཝིཡ དིབྦཏཱིཏི དེཝོཏི ཝཙནཏྠེན ཨཱཀཱསོ དེཝོ ནཱམཱཏི ཨཱཧ ‘‘དེཝནྟི ཨཱཀཱས’’ནྟི. ཨཏྟནོ རཱུཔནྟི ཨཏྟནོ ནཱགསཎྛཱནཾ. ཨིམིནཱ སཀཝཎྞནྟི ཨེཏྠ སཀསདྡོ ཨཏྟཝཱཙཀོ, ཝཎྞསདྡོ སཎྛཱནཝེཝཙནོཏི དསྶེཏི.

སུཁོ ཝིཝེཀོཏི ཨེཏྠ ཏདངྒ ཝིཀྑམྦྷན སམུཙྪེད པཊིཔྤསྶདྡྷིནིསྶརཎཝིཝེཀསངྑཱཏེསུ པཉྩསུ ཝིཝེཀེསུ ནིབྦཱནསངྑཱཏོ ནིསྶརཎཝིཝེཀོ ཙ ཀཱཡཙིཏྟཨུཔདྷིཝིཝེཀསངྑཱཏེསུ ཏཱིསུ ཝིཝེཀེསུ ནིབྦཱནསངྑཱཏོ ཨུཔདྷིཝིཝེཀོ ཙ གཧེཏབྦོཏི ཨཱཧ ‘‘ནིབྦཱནསངྑཱཏོ ཨུཔདྷིཝིཝེཀོ’’ཏི. ‘‘ཙཏུམགྒཉཱཎསནྟོསེནཱ’’ཏི ཨིམིནཱ ཏུཊྛསྶཱཏི ཨེཏྠ པིཎྜཔཱཏསནྟོསཱདིཀེ ནིཝཏྟེཏི. སུཏདྷམྨསྶཱཏི ཨེཏྠ སུཏསདྡོ ཝིསྶུཏཔརིཡཱཡོཏི ཨཱཧ ‘‘པཀཱསིཏདྷམྨསྶཱ’’ཏི, པཱཀཊསཙྩདྷམྨསྶཱཏི ཨཏྠོ. པསྶཏོཏི ཨེཏྠ མཾསཙཀྑུསྶ ཀརཎབྷཱཝེན ¶ ¶ ཨཱསངྐཱ བྷཝེཡྻཱཏི ཨཱཧ ‘‘ཉཱཎཙཀྑུནཱ’’ཏི. ‘‘ཨཀུཔྤནབྷཱཝོ’’ཏི ཨིམིནཱ ཨབྱཱཔཛྫནྟི ཨེཏྠ བྱཱཔཱདསདྡསྶ དོསཝཱཙཀབྷཱཝོ ཙ ཎྱཔཙྩཡསྶ བྷཱཝཏྠོ ཙ དསྶིཏོ. ཨེཏེནཱཏི ‘‘ཨབྱཱཔཛྫ’’ནྟིཔདེན. མེཏྟཱཔུབྦབྷཱགོཏི ཨབྱཱཔཛྫསྶ པུབྦབྷཱགེ མེཏྟཱཡ ཨུཔྤནྣབྷཱཝོ. པཱཎབྷཱུཏེསུ སཾཡམོཏི ཨེཏྠ པཱཎབྷཱུཏསདྡཱ ཝེཝཙནབྷཱཝེན སཏྟེསུ ཨེཝ ཝཏྟནྟཱིཏི ཨཱཧ ‘‘སཏྟེསུ ཙཱ’’ཏི. ཀརུཎཱཔུབྦབྷཱགོཏི སཾཡམསྶ པུབྦབྷཱགེ ཀརུཎཱཡ ཨུཔྤནྣབྷཱཝོ. ཡཱཏི ཡཱ ཝིརཱགཏཱ. ཨནཱགཱམིམགྒསྶ ཀཱམརཱགསྶ ཨནཝསེསཔཧཱནཏྟཱ ཝུཏྟཾ ‘‘ཨེཏེན ཨནཱགཱམིམགྒོ ཀཐིཏོ’’ཏི. ཡཱཐཱཝམཱནསྶ ཨརཧཏྟམགྒེན ནིརུདྡྷཏྟཱ ཝུཏྟཾ ‘‘ཨསྨི…པེ… ཀཐིཏ’’ནྟི. ཨིཏོཏི ཨརཧཏྟཏོ.

༤. རཱཛཱཡཏནཀཐཱ

༦. པཱཙཱིནཀོཎེཏི པུརཏྠིམཨསྶེ, པུབྦདཀྑིཎདིསཱབྷཱགེཏི ཨཏྠོ. རཱཛཱཡཏནརུཀྑནྟི ཁཱིརིཀཱརུཀྑཾ. ཏེན ཁོ པན སམཡེནཱཏི ཨེཏྠ ཏསདྡསྶ ཝིསཡཾ པུཙྪིཏྭཱ དསྶེནྟོ ཨཱཧ ‘‘ཀཏརེན སམཡེནཱ’’ཏི. ནིསིནྣསྶ བྷགཝཏོཏི ཡོཛནཱ. དེཝརཱཛསདྡསྶ ཨཉྙེ པཛཱཔཏིཨཱདཡོ དེཝརཱཛཱནོ ནིཝཏྟེཏུཾ ‘‘སཀྐོ’’ཏི ཝུཏྟཾ. ཏནྟི ཧརཱིཏཀཾ. པརིབྷུཏྟམཏྟསྶེཝ བྷགཝཏོཏི སམྦནྡྷོ. ནིསིནྣེ བྷགཝཏི.

‘‘ཏེན ཁོ པན སམཡེནཱ’’ཏི ཨིམིནཱ ཡེན སམཡེན བྷགཝཱ རཱཛཱཡཏནམཱུལེ ནིསཱིདི, ཏེན ཁོ པན སམཡེནཱཏི ཨཏྠཾ དསྶེཏི. ཨུཀྐལཛནཔདཏོཏི ཨུཀྐལནཱམཀཱ ཛནཔདམྷཱ. ཡསྨིཾ དེསེ བྷགཝཱ ཝིཧརཏི, ཏཾ དེསནྟི ཡོཛནཱ. ཨེཏྠཱཏི ‘‘ཏཾ དེསཾ ཨདྡྷཱནམགྒཔྤཊིཔནྣཱ’’ཏིཔདེ. ཏེསནྟི ཝཱཎིཛཱནཾ. ཉཱཏིསཱལོཧིཏསདྡཱནཾ ཨཉྙམཉྙཝེཝཙནཏྟཱ ‘‘ཉཱཏཱི’’ཏི ཝུཏྟེ སཱལོཧིཏསདྡསྶ ཨཏྠོ སིདྡྷོཏི དསྶེཏུཾ ཝུཏྟཾ ‘‘ཉཱཏིབྷཱུཏཔུབྦཱ དེཝཏཱ’’ཏི. སཱཏི དེཝཏཱ. ནེསནྟི ཝཱཎིཛཱནཾ. ཏཏོཏི ཨཔཝཏྟནཀཱརཎཱ. ཏེཏི ཝཱཎིཛཱ ¶ . ཨིདནྟི ཨཔཝཏྟནཾ. བལིནྟི ཨུཔཧཱརཾ. ཏེསནྟི ཝཱཎིཛཱནཾ. ‘‘སབྦིམདྷུཕཱཎིཏཱདཱིཧི ཡོཛེཏྭཱ’’ཏི པདཾ པུབྦཱཔརཱཔེཀྑཾ, ཏསྨཱ མཛ྄ཛྷེ ཝུཏྟཾ. པཏིམཱནེཐཱཏི ཨེཏྠ མཱན པཱུཛཱཡཾ པེམནེཏི དྷཱཏུཔཱཋེསུ (སདྡནཱིཏིདྷཱཏུམཱལཱཡཾ ༡༨ ནཀཱརནྟདྷཱཏུ) ཝུཏྟཏྟཱ པཱུཛནཔེམནཾ ནཱམ ཨཏྠཏོ ཨུཔཊྛཧནནྟི ཨཱཧ ‘‘ཨུཔཊྛཧཐཱ’’ཏི. ཏཾ ཝོཏི ཨེཏྠ ཏཾསདྡོ པཏིམཱནནཝིསཡོ, ཝོསདྡོ ཏཱིསུ ཝོསདྡེསུ ཏུམྷསདྡསྶ ཀཱརིཡོ ཝོསདྡོ, སོ ཙ ཙཏུཏྠྱཏྠོཏི ཨཱཧ ‘‘ཏཾ པཏིམཱནཾ ཏུམྷཱཀ’’ནྟི. ཝོཀཱརོ ཧི ཏིཝིདྷོ ཏུམྷསདྡསྶ ཀཱརིཡོ, ཡོཝཙནསྶ ཀཱརིཡོ, པདཔཱུརཎོཏི. ཏཏྠ ཏུམྷསདྡསྶ ཀཱརིཡོ པཉྩཝིདྷོ པཙྩཏྟཨུཔཡོགཀརཎསམྤདཱནསཱམིཝཙནཝསེནཱཏི. ཏཏྠ ཏུམྷསདྡཀཱརིཡོ སམྤདཱནཝཙནོ ¶ ཨིདྷཱདྷིཔྤེཏོ. ཏེནཱཧ ‘‘ཏུམྷཱཀ’’ནྟི. ‘‘ཡ’’ནྟིསདྡསྶ ཝིསཡོ པཊིགྒཧཎཏྠོཏི ཨཱཧ ‘‘ཡཾ པཊིགྒཧཎ’’ནྟི. ཨསྶཱཏི བྷཝེཡྻ. ཡོ པཏྟོ ཨཧོསཱིཏི ཡོཛནཱ. ཨསྶཱཏི བྷགཝཏོ. སོཏི པཏྟོ. སུཛཱཏཱཡ ཨཱགཙྪནྟིཡཱ ཨེཝཱཏི སམྦནྡྷོ. ཨནཱདརེ ཙེཏཾ སཱམིཝཙནཾ. ཏེནཱཏི ཨནྟརདྷཱཡཧེཏུནཱ. ཨསྶཱཏི བྷགཝཏོ. ཧཏྠེསཱུཏི ཀརཎཏྠེ ཙེཏཾ བྷུམྨཝཙནཾ. ཧཏྠེཧཱིཏི ཧི ཨཏྠོ. ཀིམྷཱིཏི ཀེན.

ཨིཏོཏི ཨཱསལ༹ྷཱིམཱསཛུཎྷཔཀྑཔཉྩམིཏོ. ཨེཏྟཀཾ ཀཱལནྟི ཨེཏཾ པམཱཎཾ ཨེཀཱུནཔཉྙཱསདིཝསཀཱལཾ. ཛིགྷཙྪཱཏི གྷསིཏུམིཙྪཱ. པིཔཱསཱཏི པཱཏུམིཙྪཱ. ཨསྶཱཏི བྷགཝཏོ. ཙེཏསཱ-ཙེཏོསདྡཱནཾ སམྦནྡྷཱཔེཀྑཏྟཱ ཏེསཾ སམྦནྡྷཾ དསྶེཏུཾ ཝུཏྟཾ ‘‘ཨཏྟནོ’’ཏི ཙ ‘‘བྷགཝཏོ’’ཏི ཙ. ཨིམེཧི སམྦནྡྷིསདྡཱནམསདིསཏྟཱ སམྦནྡྷོཔི ཨསདིསོཏི དསྶེཏི. ཨཏྟནོཏི ཙཏུནྣཾ མཧཱརཱཛཱནཾ. སམཱསོཡེཝ ཨཝཡཝཱིཔདྷཱནོ ཧོཏི, ཝཱཀྱཾ པན ཨཝཡཝཔདྷཱནོཡེཝཱཏི དསྶེནྟོ ཨཱཧ ‘‘ཙཏཱུཧི དིསཱཧཱི’’ཏི. པཱལི༹ཡཾ ‘‘ཨཱགནྟྭཱ’’ཏི པཱཋསེསོ ཡོཛེཏབྦོ. ‘‘སིལཱམཡེ’’ཏི ཨིམིནཱ སིལཱམཡམེཝ སེལཱམཡནྟི ཨཏྠཾ དསྶེཏི. ཨིདནྟི ‘‘སེལཱམཡེ པཏྟེ’’ཏི ཝཙནཾ. ཡེཏི མུགྒཝཎྞསིལཱམཡེ པཏྟེ. ཏཏོཏི ཨིནྡནཱིལམཎིམཡཔཏྟཨུཔནཱམནཏོ, པརནྟི སམྦནྡྷོ. ཏེསནྟི ཙཏུནྣཾ མཧཱརཱཛཱནཾ. ཙཏྟཱརོཔི ཨདྷིཊྛཧཱིཏི སམྦནྡྷོ ¶ . ཡཐཱཏི ཡེནཱཀཱརེན, ཨདྷིཊྛིཡམཱནེཏི ཡོཛནཱ. ཨེཀསདིསོཏི ཨེཀཾསེན སདིསོ. ཨདྷིཊྛིཏེ པཏྟེཏི སམྦནྡྷོ. པཏྟེཏི ཙ ཀརཎཏྠེ བྷུམྨཝཙནཾ. པཏྟེན པཊིགྒཧེསཱིཏི ཧི ཨཏྠོ. པཙྩགྒྷེཏི ཨེཏྠ ཨེཀཱརོ སྨིཾཝཙནསྶ ཀཱརིཡོཏི ཨཱཧ ‘‘པཙྩགྒྷསྨི’’ནྟི. པཊི ཨགྒྷནྟི པདཝིབྷཱགཾ ཀཏྭཱ པཊིསདྡོ པཱཊེཀྐཏྠོ, ‘‘ཨགྒྷ’’ནྟི སཱམཉྙཏོ ཝུཏྟེཔི མཧགྒྷཏྠོཏི དསྶེནྟོ ཨཱཧ ‘‘པཱཊེཀྐཾ མཧགྒྷསྨི’’ནྟི. ཨིམིནཱ ཙཏྟཱརོ ཨེཀཏོ ཧུཏྭཱ ན མཧགྒྷཱ ཧོནྟི, པཱཊེཀྐཾ པན མཧགྒྷཱ ཧོནྟཱིཏི དསྶེཏི. ཨཐ ཝཱ སཨུཔསགྒོ པཙྩགྒྷསདྡོ ཨབྷིནཝཔརིཡཱཡོཏི ཨཱཧ ‘‘ཨབྷིནཝེ’’ཏི. ཨབྷིནཝོཏི ཙ ཨཙིརཏནཝཏྠུསྶ ནཱམཾ. ཨཙིརཏནཝཏྠུ ཨཙིརཏནཏྟཱ ཨབྦྷུཎྷཾ ཝིཡ ཧོཏི, ཏསྨཱ ཝུཏྟཾ ‘‘ཨབྦྷུཎྷེ’’ཏི. ‘‘ཏངྑཎེ ནིབྦཏྟསྨི’’ནྟི ཨིམིནཱ ཏམེཝཏྠཾ ཝིབྷཱཝེཏི. དྭེཝཱཙིཀཱཏིཔདསྶ སམཱསཝསེན ཙ ཏདྡྷིཏཝསེན ཙ ནིཔྥནྣབྷཱཝཾ དསྶེནྟོ ཨཱཧ ‘‘དྭེ ཝཱཙཱ’’ཏིཨཱདི. པཏྟཱཏི ཨེཏྠ ཨེཀོ ཨིཏིསདྡོ ལུཏྟནིདྡིཊྛོ. ཨིཏི ཏསྨཱ དྭེཝཱཙིཀཱཨིཏི ཨཏྠོཏི ཡོཛནཱ. ཏེཏི ཝཱཎིཛཱ. ཨཐཱཏི ཏསྨིཾ ཀཱལེ. ཏེཏི ཀེསེ. ཏེསནྟི ཝཱཎིཛཱནཾ. པརིཧརཐཱཏི ཨཏྟནོ ཨབྷིཝཱདནཔཙྩུཊྛཱནཊྛཱནནྟི པཊིགྒཧེཏྭཱ, པརིཙྪིནྡིཏྭཱ ཝཱ ཧརཐཱཏི ཨཏྠོ. ཏེཏི ཝཱཎིཛཱ. ཨམཏེནེཝཱཏི ཨམཏེན ཨིཝ, ཨབྷིསིཏྟཱ ཨིཝཱཏི ཡོཛནཱ.

༥. བྲཧྨཡཱཙནཀཐཱ

༧. བྷགཝཱ ¶ ཨུཔསངྐམཱིཏི སམྦནྡྷོ. ཏསྨིནྟི ཨཛཔཱལནིགྲོདྷེ. ཨཱཙིཎྞསམཱཙིཎྞོཏི ཨཱཙརིཏོ སམྨཱཙརིཏོ, ན ཨེཀསྶ བུདྡྷསྶ ཨཱཙིཎྞོ, ཨཐ ཁོ སབྦབུདྡྷཱནཾ ཨཱཙིཎྞསམཱཙིཎྞོ, ཨཏིཨཱཙིཎྞོ ནིཙྩཱཙིཎྞོཏི ཨཏྠོ. སངྑེཔེན ཝུཏྟམཏྠཾ ཝིཏྠཱརེནྟོ ཨཱཧ ‘‘ཛཱནནྟི ཧཱི’’ཏིཨཱདི. དྷམྨདེསནནྟི བྷགཝཏོ དྷམྨདེསནཾ, དྷམྨདེསནཏྠཱཡ ཝཱ བྷགཝནྟཾ, བྷགཝནྟཾ ཝཱ དྷམྨདེསནཾ. ཏཏོཏི ཡཱཙནཀཱརཎཱ. ཧཱིཏི སཙྩཾ, ཡསྨཱ ཝཱ. ལོཀསནྣིཝཱསོ བྲཧྨགརུཀོ ཡསྨཱ, ཨིཏི ཏསྨཱ ཨུཔྤཱདེསྶནྟཱིཏི ཡོཛནཱ. ཨིཏཱིཏིཨཱདི ནིགམནཾ.

ཏཏྠཱཏི ¶ པརིཝིཏཀྐནཱཀཱརཔཱཋེ. ‘‘པཉྩཀཱམགུཎེསུ ཨལླཱིཡ’’ནྟཱིཏི ཨིམིནཱ ཨལླཱིཡནྟི ཨབྷིརམིཏབྦཊྛེན ལགྒནྟི ཨེཏྠཱཏི ཨཱལཡཱ པཉྩ ཀཱམགུཎཱཏི ཝཙནཏྠཾ དསྶེཏི. ཨལླཱིཡནྟཱིཏི ལགྒནྟི. ‘‘པཉྩ ཀཱམགུཎེ ཨལླཱིཡནྟཱི’’ཏིཔི པཱཋོ, ཨེཝཾ སཏི ཨལླཱིཡནྟི ཨབྷིརམིཏབྦཊྛེན སེཝིཡནྟཱིཏི ཨཱལཡཱ པཉྩ ཀཱམགུཎཱཏི ཝཙནཏྠོ ཀཱཏབྦོ. ཨལླཱིཡནྟཱིཏི སེཝནྟི. ཏེཏི པཉྩ ཀཱམགུཎཱ. ‘‘ཡདིད’’ནྟིཔདསྶ ཡཾ ཨིདནྟི པདཝིབྷཱགཾ ཀཏྭཱ ‘‘ཡ’’ནྟི ཙ ‘‘ཨིད’’ནྟི ཙ སབྦནཱམཔདནྟི ཨཱསངྐཱ བྷཝེཡྻཱཏི ཨཱཧ ‘‘ཡདིདནྟི ནིཔཱཏོ’’ཏི. ཨིམིནཱ ཏཱིསུ ལིངྒེསུ དྭཱིསུ ཙ ཝཙནེསུ ཝིནཱསཾ, ཝིཀཱརཾ ཝཱ ཝིསདིསཾ ཝཱ ནཨཡནཏྟཱ ནགམནཏྟཱ ཨབྱཡཾ ནཱམཱཏི དསྶེཏི, ཨཏྠོ པན སབྦནཱམཏྠོཡེཝཱཏི དཊྛབྦཾ. ཏསྶཱཏི ‘‘ཡདིད’’ནྟིནིཔཱཏསྶ, ཨཏྠོཏི སམྦནྡྷོ. ཋཱནནྟི ‘‘ཋཱནཾ’’ཨིཏིཔདཾ. པཊིཙྩསམུཔྤཱདནྟི ‘‘པཊིཙྩསམུཔྤཱདོ’’ཨིཏིཔདཾ. ཨཏྠོཔི ཡུཏྟོཡེཝཱཏི དཊྛབྦཾ. ཨིམེསནྟི སངྑཱརཱདཱིནཾ པཙྩཡུཔྤནྣཱནཾ. པཙྩཡཱཏི ཨཝིཛྫཱདིཀཱརཎཱ. ‘‘ཨིདཔྤཙྩཡཱ ཨེཝཱ’’ཏི ཨིམིནཱ ཨིདཔྤཙྩཡཏཱཏི ཨེཏྠ ཏཱཔཙྩཡསྶ སྭཏྠཾ དཱིཔེཏི ‘‘དེཝཏཱ’’ཏིཨཱདཱིསུ (ཁུ. པཱ. ཨཊྛ. ཨེཝམིཙྩཱདིཔཱཋཝཎྞནཱ) ཝིཡ.

སོ མམསྶ ཀིལམཐོཏི ཨེཏྠ ཏཾསདྡསྶ ཝིསཡཾ དསྶེནྟོ ཨཱཧ ‘‘ཡཱ ཨཛཱནནྟཱནཾ དེསནཱ ནཱམཱ’’ཏི, ཨིམིནཱ ‘‘དེསེཡྻཾ, ན ཨཱཛཱནེཡྻུ’’ནྟི དྭིནྣམེཝ ཀིརིཡཱཔདཱནཾ ཏསདྡསྶ ཝིསཡབྷཱཝཾ དསྶེཏི, ན ཨེཀསྶ ཀིརིཡཱཔདསྶ. སོཏི དེསནཱསངྑཱཏོ ཀཱཡཝཙཱིཔཡོགོ, ཨིམིནཱ ཝཱཀྱཝིསཡེ ཏསདྡོ ཨུཏྟརཔདསྶེཝ ལིངྒཝཙནཱནི གཎྷཱཏཱིཏི དསྶེཏི, སམཱསམཛ྄ཛྷེ པན ཏསདྡོ པུབྦཔདསྶེཝ ལིངྒཝཙནཱནི གཎྷཱཏི. ཏེན ཝུཏྟཾ ‘‘ཨཝིཛྫཱ ཙ སཱ པཙྩཡོ ཙཱ’’ཏི (ཨུདཱ. ཨཊྛ. པཋམབོདྷིསུཏྟཝཎྞནཱ) ཙ ‘‘ཨབྷིདྷམྨོ ཙ སོ པིཊཀཉྩཱ’’ཏི ཙ (པཱརཱ. ཨཊྛ. ༡.པཋམམཧཱསངྒཱིཏིཀཐཱ; དྷ. ས. ཨཊྛ. ནིདཱནཀཐཱ) ཨཱདི ¶ . ཀིལམཐོཏི ཀཱཡཀིལམནཧེཏུ. ཀིལམཏི ཨནེནཱཏི ཀིལམཐོ. ཨསྶཱཏི བྷཝེཡྻ. སཱཏི ཀཱཡཝཙཱིཔཡོགསངྑཱཏཱ དེསནཱ. ཝིཧེསཱཏི ཀཱཡཝིཧིཾསཱཧེཏུ. ཝིཧིཾསཏི ཨིམཱཡཱཏི ཝིཧེསཱ. ཙིཏྟེན པན བུདྡྷཱནཾ ཀིལམཐོ ཝཱ ཝིཧེསཱ ཝཱ ནཏྠི ཨརཧཏྟམགྒེན སམུཙྪིནྣཏྟཱ ¶ . ‘‘པཊིབྷཾསཱུ’’ཏི ཨེཏྠ པཊཱིཏི ཀམྨཔྤཝཙནཱིཡཡོགཏྟཱ ‘‘བྷགཝནྟ’’ནྟི ཨེཏྠ སཱམྱཏྠེ ཨུཔཡོགཝཙནནྟི ཨཱཧ ‘‘བྷགཝཏོ’’ཏི. ‘‘ཨནུ ཨཙྪརིཡཱ’’ཏི ཨིམིནཱ ‘‘ན ཨཙྪརིཡཱ’’ཏི པདཝིབྷཱགཾ ནིཝཏྟེཏི, པུནཔྤུནཾ ཨཙྪརིཡཱཏི ཨཏྠོ. པཊིབྷཾསཱུཏི ཨེཏྠ པཊིསདྡོ པཊིབྷཱནཏྠོ, བྷཱདྷཱཏུ ཁཱཡནཏྠོཏི ཨཱཧ ‘‘པཊིབྷཱནསངྑཱཏསྶ ཉཱཎསྶ གོཙརཱ ཨཧེསུ’’ནྟི. ‘‘གོཙརཱ ཨཧེསུ’’ནྟི ཨིམིནཱ ཁཱཡནཾ ནཱམ ཨཏྠཏོ གོཙརབྷཱཝེན བྷཝནནྟི དསྶེཏི.

མེཏི མམ, མཡཱ ཝཱ, ཨདྷིགཏཾ དྷམྨཾ པཀཱསིཏུནྟི སམྦནྡྷོ. ཨརིཡམགྒསོཏསྶ པཊི པཊིསོཏནྟི ཝུཏྟེ ནིབྦཱནམེཝཱཏི ཨཱཧ ‘‘པཊིསོཏཾ ཝུཙྩཏི ནིབྦཱན’’ནྟི. ནིབྦཱནགཱམིནྟི ཨརིཡམགྒཾ. ཨརིཡམགྒོ ཧི ཡསྨཱ ནིབྦཱནཾ གམཡཏི, ཏསྨཱ ནིབྦཱནགཱམཱིཏི ཝུཙྩཏི. ཏམོཁནྡྷེནཱཏི ཨེཏྠ ཏམསདྡོ ཨཝིཛྫཱཔརིཡཱཡོ, ཁནྡྷསདྡོ རཱསཏྠོཏི ཨཱཧ ‘‘ཨཝིཛྫཱརཱསིནཱ’’ཏི. ‘‘ཨཛ྄ཛྷོཏྠཊཱ’’ཏི ཨིམིནཱ ཨཱཝུཊཱཏི ཨེཏྠ ཝུདྷཱཏུ ཨཱཝརཎཏྠོཏི དསྶེཏི. ཨཔྤོསྶུཀྐཏཱཡཱཏི ཨེཏྠ ཨཔཏྱཱུཔསགྒོ ཨབྷཱཝཏྠོ, ཏཱཔཙྩཡོ བྷཱཝཏྠོཏི ཨཱཧ ‘‘ནིརུསྶུཀྐབྷཱཝེནཱ’’ཏི.

༨. ལོཀེཏི སཏྟལོཀེ. མཧཱབྲཧྨེཏི མཧཱབྲཧྨཱནོ. ཨཔྤརཛཀྑཛཱཏིཀཱཏི ཨེཏྠ ཨཔྤཾ རཛཾ ཨཀྑིམྷི ཨེཏེསནྟི ཨཔྤརཛཀྑཱ, ཨཔྤརཛཀྑཱ ཛཱཏི སབྷཱཝོ ཨེཏེསནྟི ཨཔྤརཛཀྑཛཱཏིཀཱཏི ཝཙནཏྠཾ དསྶེནྟོ ཨཱཧ ‘‘པཉྙཱམཡེ’’ཏིཨཱདི. ‘‘པཉྙཱམཡེ’’ཏི ཨིམིནཱ མཾསམཡེཏི ཨཏྠཾ ནིཝཏྟེཏི. ཨེཏེསནྟི སཏྟཱནཾ. དྷམྨསྶཱཏི ཏུཔཙྩཡཡོགེ ཚཊྛཱིཀམྨཾ. ཨཱཔུབྦོ ཉཱདྷཱཏུ པཊིཝིཛ྄ཛྷནཏྠོཏི ཨཱཧ ‘‘པཊིཝིཛ྄ཛྷིཏཱརོ’’ཏི.

སཾཝིཛྫཏི མལཾ ཨེཏེསནྟི སམལཱ, པཱུརཎཀསྶཔཱདིཀཱ ཚ སཏྠཱརོ, ཏེཧི. ‘‘རཱགཱདཱིཧཱི’’ཏི ཨིམིནཱ མལསརཱུཔཾ དསྶེཏི. ཨཝཱཔུརེཏནྟི ཨེཏྠ ཨཝཔུབྦོ ཙ ཨཱཔུབྦོ ཙ པུརདྷཱཏུ ཝིཝརཎཏྠོཏི ཨཱཧ ‘‘ཝིཝར ཨེཏ’’ནྟི. ཝཀཱརསྶ པཀཱརཾ ཀཏྭཱ ‘‘ཨཔཱཔུརེཏ’’ནྟིཔི པཱཋོ ¶ . ཨམཏསདྡསྶ སལིལཱདཡོ ནིཝཏྟེཏུཾ ཝུཏྟཾ ‘‘ནིབྦཱནསྶཱ’’ཏི. ཨིམེ སཏྟཱ སུཎནྟཱུཏི སམྦནྡྷོ. ཝིམལེནཱཏི ཨེཏྠ ཝིསདྡོ ཨབྷཱཝཏྠོཏི ཨཱཧ ‘‘ཨབྷཱཝཏོ’’ཏི. ཨིམིནཱ ནཏྠི མལཾ ཨེཏསྶཱཏི ཝིམལོཏི ཝཙནཏྠཾ དསྶེཏི ¶ . ‘‘སམྨཱསམྦུདྡྷེནཱ’’ཏི ཨིམིནཱ ཨཉྙཔདཏྠསརཱུཔཾ དསྶེཏི. ཨནུཀྐམེན མགྒེན བུཛ྄ཛྷིཏབྦནྟི ཨནུབུདྡྷནྟི ཝུཏྟེ ཙཏུསཙྩདྷམྨོ གཧེཏབྦོཏི ཨཱཧ ‘‘ཙཏུསཙྩདྷམྨ’’ནྟི.

‘‘སེལམཡེ’’ཏི ཨིམིནཱ སིལཱཡ ནིབྦཏྟོ སེལོཏི ཝཙནཏྠཾ དསྶེཏི. ‘‘སབྦཉྙུཏཉྙཱཎེནཱ’’ཏི ཨིམིནཱ སམནྟཙཀྑུསརཱུཔཾ དསྶེཏི. བྷགཝཱ ཏྭམྤཱིཏི ཡོཛནཱ. དྷམྨསདྡོ པཉྙཱཔརིཡཱཡོཏི ཨཱཧ ‘‘དྷམྨམཡཾ པཉྙཱམཡ’’ནྟི. ཨཔེཏོ སོཀོ ཨིམསྶཱཏི ཨཔེཏསོཀོ, བྷགཝཱ. སོཀཾ ཨཝཏརཏཱིཏི སོཀཱཝཏིཎྞཱ, ཛནཏཱ. སོཀཱཝཏིཎྞཉྩ ཛཱཏིཛརཱབྷིབྷཱུཏཉྩཱཏི ཙསདྡོ ཡོཛེཏབྦོ. ཨིམིནཱ ཙསདྡོ ལུཏྟནིདྡིཊྛོཏི དསྶེཏི.

‘‘བྷགཝཱ’’ཏིཔདཾ ‘‘ཝཱིརོ’’ཏིཨཱདཱིསུ ཡོཛེཏབྦཾ. ‘‘ཝཱིརིཡཝནྟཏཱཡཱ’’ཏི ཨིམིནཱ ཝཱིརཾ ཡསྶཏྠཱིཏི ཝཱིརོཏི ཝཙནཏྠཾ དསྶེཏི. སདྡསཏྠེསུ ཨཱལཔནཔདེསུ ཝིགྒཧོ ན ཀཱཏབྦོཏི ཨིདཾ ཨཱལཔནཱཝཏྠཾ སནྡྷཱཡ ཝུཏྟཾ, ཨིདྷ པན ཏེསམཏྠདསྶནཏྠཱཡ ཝིགྒཧོ ཝུཏྟོཏི དཊྛབྦཾ. ‘‘དེཝཔུཏྟ…པེ… ཝིཛིཏཏྟཱ’’ཏི ཨིམིནཱ ཝིཛིཏོ མཱརེཧི སཾགཱམོ ཨནེནཱཏི ཝིཛིཏསངྒཱམོཏི ཝཙནཏྠཾ དསྶེཏི. ཨེཏྠ ཙ ཁནྡྷམཱརོ མཙྩུམཱརེན སངྒཧིཏོ དྭིནྣཾ མཱརཱནཾ ཨེཀཏོ ཝིཛིཏཏྟཱ. ‘‘སཏྟཝཱཧོ’’ཏི པཋམཀྑརེན ཙ ‘‘སཏྠཝཱཧོ’’ཏི དུཏིཡཀྑརེན ཙ ཡུཏྟོ. ཏཏྠ སཏྠཝཱཧོ ཝིཡཱཏི ‘‘སཏྠཝཱཧོ’’ཏི ཨུཔཙཱརེན ཝུཏྟེ དུཏིཡཀྑརེན ཡུཏྟོ, སཏྟེ ཝཧཧཱིཏི སཏྟཝཱཧོཏི མུཁྱཏོ ཝུཏྟེ པཋམཀྑརེན ཡུཏྟོ. ཨིདྷ པན པཋམཀྑརེན ཡུཏྟོཏི ཨཱཧ ‘‘སཏྟེ ཝཧཏཱིཏི སཏྟཝཱཧོ’’ཏི. ནཏྠི ཨིཎཾ ཨིམསྶཱཏི ཨཎཎོ བྷགཝཱ.

༩. བུདྡྷཙཀྑུནཱཏི ¶ ཨེཏྠ ཙཀྑུ དུཝིདྷཾ མཾསཙཀྑུཉཱཎཙཀྑུཝསེན. ཏཏྠཱཔི མཾསཙཀྑུ དུཝིདྷཾ པསཱདཙཀྑུསསམྦྷཱརཙཀྑུཝསེན. ཏཏྠ པསཱདརཱུཔཾ པསཱདཙཀྑུ ནཱམ, བྷམུཀཊྛིཔརིཙྪིནྣོ མཾསཔིཎྜོ སསམྦྷཱརཙཀྑུ ནཱམ. ཉཱཎཙཀྑུ པན པཉྩཝིདྷཾ (པཊི. མ. ཨཊྛ. ༡.༡.༣) དིབྦདྷམྨཔཉྙཱབུདྡྷསམནྟཙཀྑུཝསེན. ཏཏྠ དིབྦཙཀྑུཨབྷིཉྙཱཉཱཎཾ དིབྦཙཀྑུ ནཱམ, ཧེཊྛིམམགྒཏྟཡཾ དྷམྨཙཀྑུ ནཱམ, ཨརཧཏྟམགྒཉཱཎཾ པཉྙཱཙཀྑུ ནཱམ, ཨིནྡྲིཡཔརོཔརིཡཏྟཉཱཎཉྩ ཨཱསཡཱནུསཡཉཱཎཉྩ བུདྡྷཙཀྑུ ནཱམ, སབྦཉྙུཏཉྙཱཎཾ སམནྟཙཀྑུ ནཱམ. ཨིདྷ པན ‘‘བུདྡྷཙཀྑུནཱ’’ཏི ཝུཏྟཏྟཱ ཡཐཱཝུཏྟདྭེཉཱཎཱནིཡེཝཱཏི ཨཱཧ ‘‘ཨིནྡྲིཡ…པེ… ཉཱཎེན ཙཱ’’ཏི. ཧཱིཏི སཙྩཾ. ཡེསནྟི སཏྟཱནཾ. སདྡྷཱདཱིནཱིཏི ཨཱདིསདྡེན ཝཱིརིཡསཏིསམཱདྷིཔཉྙིནྡྲིཡཱནི སངྒཎྷཱཏི. ཏིཀྑཱནཱིཏི ཏིཁིཎཱནི. མུདཱུནཱིཏི སུཁུམཏརཱནི. ཨཱཀཱརཱཏི ཀཱརཎཱ. ཨིམཱནི ཏཱིཎི དུཀཱནི བཱཧིརཏྠསམཱསཝསེན ཝུཏྟཱནི. སུཁེན ཝིཉྙཱཔེཏབྦཱཏི སུཝིཉྙཱཔཡཱ, ཏཐཱ དུཝིཉྙཱཔཡཱཏི ཝཙནཏྠཾ དསྶེནྟོ ཨཱཧ ‘‘ཡེ ཀཐིཏཀཱརཎ’’ནྟིཨཱདི ¶ . པརལོཀོ ཙ ཝཛྫཉྩ པརལོཀཝཛྫཱནི, ཏཱནི བྷཡཏོ པསྶནྟཱིཏི པརལོཀཝཛྫབྷཡདསྶཱཝིནོཏི ཝཙནཏྠཾ དསྶེནྟོ ཨཱཧ ‘‘ཡེ’’ཏིཨཱདི. ཨིམཱནི དྭེ དུཀཱནི ཀིཏཝསེན ཝུཏྟཱནི, ཨིདྷ པཙྪིམདུཀེ ‘‘ན ཨཔྤེཀཙྩེ པརལོཀཝཛྫབྷཡདསྶཱཝིནོ’’ཏི དུཏིཡཔདཾ ན ཝུཏྟཾ, པཊིསམྦྷིདཱམགྒཔཱལི༹ཡཾ (པཊི. མ. ༡.༡༡༡) པན ཡུགལ༹ཝསེན ཝུཏྟཾ. ཨུཔྤལཱནི ཨེཏྠ སནྟཱིཏི ཨུཔྤལིནཱིཏི ཝཙནཏྠེན གཙྪོ ཝཱ ལཏཱ ཝཱ པོཀྑརཎཱི ཝཱ ཝནཾ ཝཱ ‘‘ཨུཔྤལིནཱི’’ཏི ཝུཙྩཏི, ཨིདྷ པན ‘‘ཝན’’ནྟི ཨཱཧ ‘‘ཨུཔྤལཝནེ’’ཏི. ནིམུགྒཱནེཝ ཧུཏྭཱཏི སམྦནྡྷོ. པོསཡནྟཱིཏི ཝཌྜྷནྟི, ཨིམིནཱ ཨནྟོནིམུགྒཱནེཝ ཧུཏྭཱ པོསཡནྟཱིཏི ཨནྟོནིམུགྒཔོསཱིནཱིཏི ཝཙནཏྠཾ དསྶེཏི. ‘‘ཨུདཀེན སམ’’ནྟི ཨིམིནཱ ཨུདཀེན སམཾ སམོདཀཾ, སམོདཀཾ ཧུཏྭཱ ཋིཏཱནཱིཏི ཨཏྠཾ དསྶེཏི. ‘‘ཨཏིཀྐམིཏྭཱ’’ཏི ཨིམིནཱ ཨཙྩུགྒམྨཱཏིཔདསྶ ཨཏིཨུགྒནྟྭཱཏི ཨཏྠཾ དསྶེཏི.

པཊིཙྪནྣེན ཨཱརོཔིཏཱཏི པཱརུཏཱ, ན པཱརུཏཱ ཨཔཱརུཏཱ. ཨཔཱརུཏཱ ནཱམ ཨཏྠཏོ ཝིཝརཎཱཏི ཨཱཧ ‘‘ཝིཝཊཱ’’ཏི སོཏི ཨརིཡམགྒོ ¶ . ཧཱིཏི སཙྩཾ. པཙྪིམཔདདྭཡེཏི གཱཐཱཡ ཨུཏྟམཔདདྭཡེ. ཨཡམེཝཏྠོཏི ཨཡཾ ཝཀྑམཱནོ ཨེཝཾ ཨཏྠོ དཊྛབྦོཏི ཡོཛནཱ. ཧཱིཏི ཝིཏྠཱརོ. ན བྷཱསིནྟི ཨེཏྠ ཨུཏྟམཔུརིསཏྟཱ ‘‘ཨཧ’’ནྟི ཝུཏྟཾ. ‘‘དེཝམནུཛེསུ’’ཏི ཝཏྟབྦེ ཨེཀསེསཝསེན ‘‘མནུཛེསཱུ’’ཏི ཝུཏྟནྟི ཨཱཧ ‘‘དེཝམནུསྶེསཱུ’’ཏི.

༦. པཉྩཝགྒིཡཀཐཱ

༡༠. ཋཱནུཔྤཏྟིཡཱཏི ཀཱརཎེན ཨུཔྤཏྟིཡཱ. ནིཀྐིལེསོ ཛཱཏི སབྷཱཝོ ཨིམསྶཱཏི ནིཀྐིལེསཛཱཏིཀོ. ‘‘ཉཱཎ’’ནྟི ཨཝིསེསེན ཝུཏྟེཔི ཨཏྠཏོ ཨནཱཝརཎཉཱཎམེཝཱཏི ཨཱཧ ‘‘སབྦཉྙུཏཉྙཱཎ’’ནྟི. ཨིཏོཏི ‘‘དྷམྨཾ དེསེསྶཱམཱི’’ཏི པརིཝིཏཀྐདིཝསཏོ, ཧེཊྛཱཏི སམྦནྡྷོ. དེཝཏཱ པན ཨཱལཱ༹རསྶ ཀཱལངྐརཎམེཝ ཛཱནཱཏི, ན ཨཱཀིཉྩཉྙཱཡཏནེ ནིབྦཏྟབྷཱཝཾ. བྷགཝཱ པན སབྦཾ ཛཱནཱཏི, ཏེན ཝུཏྟཾ ‘‘ཨཱཀིཉྩཉྙཱཡཏནེ ནིབྦཏྟོ’’ཏི. ‘‘པརིཧཱིནཏྟཱ’’ཏི ཨིམིནཱ མཧཱཛཱནིཡོཏི ཨེཏྠ ཧཱདྷཱཏུཡཱ ཨཏྠཾ དསྶེཏི. ཨསྶཱཏི ཨཱལཱ༹རསྶ. མཧཏཱི ཛཱནིཨསྶཱཏི ‘‘མཧཱཛཱནིཀོ’’ཏི ཝཏྟབྦེ ཀཀཱརསྶ ཡཀཱརཾ ཀཏྭཱ ‘‘མཧཱཛཱནིཡོ’’ཏི ཝུཏྟཾ. ཨཀྑཎེཏི བྲཧྨཙརིཡཝཱསཱཡ ཨནོཀཱསེ, ཨཱཀིཉྩཉྙཱཡཏནེཏི ཨཏྠོ. ཧིཡྻོཏི ཨནནྟརཱཏཱིཏཱཧེ. སོཔཱིཏི ཨུདཀོ རཱམཔུཏྟོཔི. པིསདྡོ ཨཱལཱ༹རཱཔེཀྑོ. ཏཏྠ ཨཱལཱ༹རོ ཀཱལཱམོ ཡཱཝཨཱཀིཉྩཉྙཱཡཏནཛྷཱནལཱབྷཱི ཧོཏི, ཏསྨཱ ཨཱཀིཉྩཉྙཱཡཏནེ ནིབྦཏྟོ. ཨུདཀོ རཱམཔུཏྟོ ཡཱཝནེཝསཉྙཱནཱསཉྙཱཡཏནཛྷཱནལཱབྷཱི ཧོཏི, ཏསྨཱ ནེཝསཉྙཱནཱསཉྙཱཡཏནེ ནིབྦཏྟོཏི ¶ དཊྛབྦཾ. ‘‘བཧུཀཱརཱ’’ཏི ཙ ‘‘བཧཱུཔཀཱརཱ’’ཏི ཙ པཱཋསྶ དྭིདྷཱ ཡུཏྟབྷཱཝཾ དསྶེཏུཾ ཝུཏྟཾ ‘‘བཧུཀཱརཱཏི བཧཱུཔཀཱརཱ’’ཏི. པེསིཏཏྟབྷཱཝཾ མནྟི ཡོཛནཱ. ཨིམིནཱ པཧིཏཏྟནྟི ཨེཏྠ ཨཏྟསདྡོ ཀཱཡཝཱཙཀོཏི དསྶེཏི.

༡༡. ཨནྟརཱསདྡེན ཡུཏྟཏྟཱ ‘‘གཡཾ, བོདྷི’’ནྟི ཨེཏྠ སཱམྱཏྠེ ཨུཔཡོགཝཙནནྟི ཨཱཧ ‘‘གཡཱཡ ཙ བོདྷིམཎྜསྶ ཙཱ’’ཏི.

གཱཐཱཡ ¶ ཙཏཱུསུ སབྦསདྡེསུ དུཏིཡོ སབྦསདྡོ ཨནཝསེསཏྠོ, སེསཱ སཱཝསེསཏྠཱཏི དསྶེནྟོ ཨཱཧ ‘‘སབྦཾ ཏེབྷཱུམཀདྷམྨ’’ནྟིཨཱདི. ཝཙནཏྠོ སུཝིཉྙེཡྻོཝ. ཨརཧཏྟཕལསྶཱཔི ཏཎྷཱཀྑཡཏྟཱ ཝུཏྟཾ ‘‘ཏཎྷཱཀྑཡེ ནིབྦཱནེ’’ཏི. སཡཾསདྡོ ཨཏྟཔརིཡཱཡོ, ཨབྷིཉྙཱཡསདྡོ ཏུ ཏྭཱཔཙྩཡནྟོཏི ཨཱཧ ‘‘ཨཏྟནཱཝ ཛཱནིཏྭཱ’’ཏི. ‘‘སབྦཾ ཙཏུབྷཱུམཀདྷམྨ’’ནྟི ཨིམིནཱ ཉཱདྷཱཏུཡཱ ཀམྨཾ དསྶེཏི. ‘‘ཨཡཾ མེ ཨཱཙརིཡོ’’ཏི ཨུདྡིསནཱཀཱརདསྶནཾ.

‘‘ལོཀུཏྟརདྷམྨེ’’ཏི ཨིམིནཱ ལོཀིཡདྷམྨེ པན ཨཱཙརིཡོ (མི. པ. ༤.༥.༡༡) ཨཏྠཱིཏི དསྶེཏི. པཊིཔུགྒལོཏི ཨེཏྠ པཊིསདྡོ པཊིབྷཱགཏྠོཏི ཨཱཧ ‘‘པཊིབྷཱགཔུགྒལོ’’ཏི. སདིསཔུགྒལོ ནཱམ ནཏྠཱིཏི ཨཏྠོ. སཱིཏིབྷཱུཏོཏི སཱིཏི ཧུཏྭཱ བྷཱུཏོ, སཱིཏིབྷཱཝཾ ཝཱ པཏྟོ.

ཀཱསཱིནནྟི བཧུཝཙནཝསེན ཝུཏྟཏྟཱ ཛནཔདཱནཾ ནཱམཾ. ཛནཔདསམཱུཧསྶ རཊྛནཱམཏྟཱ ཝུཏྟཾ ‘‘ཀཱསིརཊྛེ’’ཏི. ‘‘ནགར’’ནྟི ཨིམིནཱ པུརསདྡོ ནགརཔརིཡཱཡོཏི དསྶེཏི. པཊིལཱབྷཱཡཱཏི པཊིལཱབྷཱཔནཏྠཱཡ. ‘‘བྷེརི’’ནྟི ཨིམིནཱ དུནྡུབྷིསདྡོ བྷེརིཝཱཙཀོཏི དསྶེཏི. བྷེརི ཧི ‘‘དུཾདུ’’ནྟིསདྡེན ཨུབྷི པཱུརཎམེཏྠཱཏི དུནྡུབྷཱིཏི ཝུཙྩཏི. དཀཱརརཀཱརཱནཾ སཾཡོགཾ ཀཏྭཱ དུནྡྲུབྷཱིཏིཔི པཱཋོ ཨཏྠི, སོ ཨཔཱཋོཡེཝ. ‘‘པཧརིསྶཱམཱི’’ཏི ཨེཏྠ པཧཱརསདྡེན ཨཱཧཉྙིནྟི ཨེཏྠ ཨཱཔུབྦཧནདྷཱཏུཡཱ ཨཏྠཾ དསྶེཏི, སྶཱམིསདྡེན ཨཛྫཏནིཨིཾཝིབྷཏྟིཡཱ ཨནཱགཏཀཱལེ པཝཏྟབྷཱཝཾ, ཨིཏིསདྡེན གམནཱཀཱརཝཱཙཀསྶ ཨིཏིསདྡསྶ ལོཔབྷཱཝཾ དསྶེཏི.

ཨནནྟཛིནོཏི ཨནནྟསངྑཱཏསྶ སབྦཉྙུཏཉྙཱཎསྶ པདཊྛཱནབྷཱུཏེན ཨརཧཏྟམགྒཉཱཎེན སབྦཀིལེསཱརཱིནཾ ཛིཏཝཱ, ཨེཏེན ཕལཱུཔཙཱརེན ཨནནྟཛིནབྷཱཝཾ དསྶེཏི. ཧུཝེཡྻ པཱཝུསོཏི ཨེཏྠ ‘‘ཧུཝེཡྻ ཨཔི ཨཱཝུསོ’’ཏི པདཝིབྷཱགཾ ཀཏྭཱ ཧུདྷཱཏུ སཏྟཏྠཝཱཙཀོ, ཨཔིསདྡོ ཨེཝཾནཱམཝཱཙཀོཏི དསྶེནྟོ ཨཱཧ ཨཱཝུསོ ‘‘ཨེཝཾ ནཱམ བྷཝེཡྻཱ’’ཏི. ཝཀཱརསྶ པཀཱརཾ ཀཏྭཱ ‘‘ཧུཔེཡྻཱ’’ཏི པཱཋོཔི ཡུཛྫཏིཡེཝ.

༡༢. ‘‘ཨཏྠཱཡ ¶ ¶ པཊིཔནྣོ’’ཏི ཨིམིནཱ བཱཧུལླསྶ ཨཏྠཱཡ པཊིཔནྣོ བཱཧུལླིཀོཏི ཝཙནཏྠཾ དསྶེཏི. པདྷཱནཏོཏི དུཀྐརཙརིཡཱཡ པདཧནཏོ. ‘‘བྷཊྛོ’’ཏི ཨིམིནཱ ཝིབྦྷནྟོཏི ཨེཏྠ ཝིཔུབྦབྷམུདྷཱཏུཡཱ ཨནཝཊྛཱནཏྠོ ནཱམ ཨཏྠཏོ བྷཊྛོཏི དསྶེཏི. སོཏནྟི ཨེཏྠ སོཏསདྡསྶ སོཏཝིཉྙཱཎཱདིཝཱཙཀཏྟཱ ‘‘སོཏིནྡྲིཡ’’ནྟི ཝུཏྟཾ. ཨིརིཡཱཡཱཏི ཨེཏྠ ཨིརིཡནཾ ཙརཎཾ ཨིརིཡཱཏི ཝཙནཏྠཾ དསྶེནྟོ ཨཱཧ ‘‘དུཀྐརཙརིཡཱཡཱ’’ཏི. ཨབྷིཛཱནཱཐ ནོཏི ཨེཏྠ ནོསདྡོ ནུསདྡཏྠོཏི ཨཱཧ ‘‘ཨབྷིཛཱནཱཐ ནཱུ’’ཏི. ཝཱཀྱནྟི ཝཱཙཀཾ. སཉྙཱཔེཏུནྟིཔདསྶ སཉྙཱཔནཱཀཱརཾ དསྶེཏུཾ ཝུཏྟཾ ‘‘ཨཧཾ བུདྡྷོ’’ཏི.

༡༣. ཨིཏོཏི ‘‘ཙཀྑུཀརཎཱི’’ཏིཨཱདིཏོ. པདཏྠཏོཏི པདཏོ ཙ ཨཏྠཏོ ཙ, པདཱནཾ ཨཏྠཏོ ཝཱ. ཨིཏོཏི ཡཐཱཝུཏྟཏོ. ཧཱིཏི སཙྩཾ. སུཏྟནྟཀཐནྟི སུཏྟནྟཝསེན ཝུཏྟཝཙནཾ.

༡༨. དེཝཏཱཀོཊཱིཧཱིཏི བྲཧྨསངྑཱཏཱཧི དེཝཏཱཀོཊཱིཧི. པཏིཊྛིཏསྶ ཏསྶ ཨཱཡསྨཏོཏི སམྦནྡྷོ. སཱཝ ཨེཧིབྷིཀྑུཨུཔསམྤདཱཏི ཡོཛནཱ.

༡༩. དུཏིཡདིཝསེ དྷམྨཙཀྑུཾ ཨུདཔཱདཱིཏི སམྦནྡྷོ. ‘‘དུཏིཡདིཝསེ’’ཏིཨཱདི པཱཊིཔདདིཝསཾ ཨུཔནིདྷཱཡ ཝུཏྟཾ. པཀྑསྶཱཏི ཨཱསལ༹ྷཱིམཱསཀཱལ༹པཀྑསྶ. སབྦེཝ ཏེ བྷིཀྑཱུཏི ཡོཛནཱ. ཨནཏྟསུཏྟེནཱཏི ཨནཏྟལཀྑཎསུཏྟནྟེན (མཧཱཝ. ༢༠; སཾ. ནི. ༣.༥༩).

པཉྩམིཡཱ པཀྑསྶཱཏི པཀྑསྶ པཉྩམིཡཱ. ལོཀསྨིནྟི སཏྟལོཀེ. ‘‘མནུསྶཨརཧནྟོཏི ཨིམིནཱ དེཝཨརཧནྟོ བཧཱུཏི དསྶེཏི.

༧. པབྦཛྫཱཀཐཱ

༣༡. པོརཱཎཱནུཔོརཱཎཱནནྟི པུརཱཎེ ཙ ཨནུཔུརཱཎེ ཙ བྷཝཱནཾ. ཨེཀསཊྛཱིཏི ཨེཀོ ཙ སཊྛི ཙ, ཨེཀེན ཝཱ ཨདྷིཀཱ སཊྛི ཨེཀསཊྛི.

ཏཏྲཱཏི ¶ ཏེསུ ཨེཀསཊྛིམནུསྶཨརཧནྟེསུ. པུབྦཡོགོཏི པུབྦེ ཀཏོ ཨུཔཱཡོ, པུབྦཱུཔནིསྶཡོཏི ཨཏྠོ. ཝགྒབནྡྷེནཱཏི སམཱུཧཾ ཀཏྭཱ བནྡྷེན. ཏེཏི པཉྩཔཉྙཱས ཛནཱ. ཛྷཱཔེསྶཱམཱཏི ཌཡ྄ཧིསྶཱམ. ནཱིཧརིཾསཱུཏི གཱམཏོ ནཱིཧརིཾསུ. ཏེསཱུཏི པཉྩཔཉྙཱསཛནེསུ. པཉྩ ཛནེ ¶ ཋཔེཏྭཱཏི སམྦནྡྷོ. སེསཱཏི པཉྩཧི ཛནེཧི ཨཝསེསཱ. སོཏི ཡསོ དཱརཀོ. ཏེཔཱིཏི ཙཏྟཱརོཔི ཛནཱ. ཏཏྠཱཏི སརཱིརེ. ཏེ སབྦེཔཱིཏི ཡསསྶ མཱཏཱཔིཏུབྷརིཡཱཧི སདྡྷིཾ སབྦེཔི ཏེ སཧཱཡཀཱ. ཏེནཱཏི པུབྦཡོགེན.

ཨཱམནྟེསཱིཏི ཀཐེསི.

༣༢. དིབྦེསུ ཝིསཡེསུ བྷཝཱ དིབྦཱ ལོབྷཔཱསཱཏི དསྶེནྟོ ཨཱཧ ‘‘དིབྦཱ ནཱམཱ’’ཏིཨཱདི. ལོབྷཔཱསཱཏི ལོབྷསངྑཱཏཱ བནྡྷནཱ. ཨསཝནཏཱཏི ཨེཏྠ ཀརཎཏྠེ པཙྩཏྟཝཙནནྟི ཨཱཧ ‘‘ཨསཝནཏཱཡཱ’’ཏི. པརིཧཱཡནྟཱིཏི ཨེཏྠ ཀེན པརིཧཱཡནྟཱིཏི ཨཱཧ ‘‘ཝིསེསཱདྷིགམཏོ’’ཏི. ཝིསེསཱདྷིགམཏོཏི མགྒཕལསངྑཱཏསྶ ཝིསེསསྶ ཨདྷིགམཏོ.

༣༣. ཨནྟཾ ལཱམཀཾ ཀརོཏཱིཏི ཨནྟཀོཏི ཝཙནཏྠཾ དསྶེནྟོ ཨཱཧ ‘‘ལཱམཀཱ’’ཏི. ‘‘ཧཱིནསཏྟཱ’’ཏི ཨིམིནཱ ཨནྟཀསྶ སརཱུཔཾ དསྶེཏི. ཨཱམནྟནཔདམེཏཾ. ཏནྟི རཱགཔཱསཾ. ཧཱིཏི སཙྩཾ. སོཏི མཱརོ པཱཔིམཱ. ཨནྟལིཀྑེ ཙརནྟཱནཾ པཉྩཱབྷིཉྙཱནམྤི བནྡྷནཏྟཱ ཨནྟལིཀྑེ ཙརཏི པཝཏྟཏཱིཏི ཨནྟལིཀྑཙརོཏི ཝཙནཏྠེན རཱགཔཱསོ ‘‘ཨནྟལིཀྑཙརོ’’ཏི མཱརེན པཱཔིམཏཱ ཝུཏྟོ.

༣༤. ནཱནཱཛནཔདཏོཏི ཨེཀིསྶཱཔི དིསཱཡ ནཱནཱཛནཔདཏོ. ‘‘ཨནུཛཱནཱམི…པེ… པབྦཱཛེཐཱ’’ཏིཨཱདིམྷི ཝིནིཙྪཡོ ཨེཝཾ ཝེདིཏབྦོཏི ཡོཛནཱ. པབྦཱཛེནྟེན བྷིཀྑུནཱ པབྦཱཛེཏབྦོཏི སམྦནྡྷོ. ཡེ པཊིཀྑིཏྟཱ པུགྒལཱཏི ཡོཛནཱ. པརཏོཏི པརསྨིཾ. ‘‘ན བྷིཀྑཝེ…པེ… པབྦཱཛེཏབྦོ’’ཏི པཱལི༹ཾ (མཧཱཝ. ༨༩) ཨཱདིཾ ཀཏྭཱཏི ཡོཛནཱ. ཏེཏི པཊིཀྑིཏྟཔུགྒལེ. སོཔི ཙཱཏི སོཔི ཙ པུགྒལོ. ཨནུཉྙཱཏོཡེཝ པབྦཱཛེཏབྦོཏི ¶ སམྦནྡྷོ. ཏསྶ ཙཱཏི པུགྒལསྶ ཙ, ཨཐ ཝཱ ཏེསཉྩ མཱཏཱཔིཏཱུནཾ. ཝཙནཝིཔལླཱསོ ཧེས. ཨནུཛཱནནལཀྑཎཾ ཝཎྞཡིསྶཱམཱཏི སམྦནྡྷོ.

ཨེཝནྟི ཨིམིནཱ ཝུཏྟནཡེན. ཙསདྡོ ཝཱཀྱསམྤིཎྜནཏྠོ. སཙེ ཨཙྪིནྣཀེསོ ཧོཏི ཙ, སཙེ ཨེཀསཱིམཱཡ ཨཉྙེཔི བྷིཀྑཱུ ཨཏྠི ཙཱཏི ཨཏྠོ. ཨཉྙེཔཱིཏི ཨཏྟནཱ ཨཔརེཔི. བྷཎྜཱུཏི མུཎྜོ, སོཡེཝ ཀམྨཾ བྷཎྜུཀམྨཾ. ཏསྶཱཏི བྷཎྜུཀམྨསྶ. ཨོཀཱསོཏི པབྦཛྫཱཡ ཁཎོ. ‘‘ཨོཀཱསཾ ན ལབྷཏཱི’’ཏི ཝཏྭཱ ཏསྶ ཀཱརཎཾ དསྶེཏུཾ ཝུཏྟཾ ‘‘སཙེ’’ཏིཨཱདི.

ཨཝུཏྟོཔཱིཏི ¶ ཨེཏྠ པིསདྡོ ཝུཏྟོ པན ཀཱ ནཱམ ཀཐཱཏི དསྶེཏི. ཨུཔཛ྄ཛྷཱཡཾ ཨུདྡིསྶ པབྦཱཛེཏཱིཏི ཨེཏྠ པབྦཛྫཱ ཙཏུབྦིདྷཱ ཏཱཔསཔབྦཛྫཱ པརིབྦཱཛཀཔབྦཛྫཱ སཱམཎེརཔབྦཛྫཱ ཨུཔསམྤདཔབྦཛྫཱཏི. ཏཏྠ ཀེསམསྶུཧརཎཾ ཏཱཔསཔབྦཛྫཱ ནཱམ ཝཀྐལཱདིགཧཎཏོ པཋམམེཝ ཝཛིཏབྦཏྟཱ. ཨིསིཔབྦཛྫཱཏིཔི ཏསྶཱཡེཝ ནཱམཾ. ཀེསམསྶུཧརཎམེཝ པརིབྦཱཛཀཔབྦཛྫཱ ནཱམ ཀཱསཱཡཱདིགཧཎཏོ པཋམམེཝ ཝཛིཏབྦཏྟཱ. ཀེསམསྶུཧརཎཉྩ ཀཱསཱཡཙྪཱདནཉྩ སཱམཎེརཔབྦཛྫཱ ནཱམ སརཎགཧཎཏོ པཋམམེཝ ཝཛིཏབྦཏྟཱ. ཨུཔསམྤདཔབྦཛྫཱ ཏིཝིདྷཱ ཨེཧིབྷིཀྑུཨུཔསམྤདཔབྦཛྫཱ སརཎགཧཎཱུཔསམྤདཔབྦཛྫཱ ཉཏྟིཙཏུཏྠཝཱཙིཀཱུཔསམྤདཔབྦཛྫཱཏི. ཏཏྠ ཨེཧིབྷིཀྑཱུཔསམྤདཔབྦཛྫཱཡཾ ཀེསམསྶུཧརཎཱདི སབྦཾ ཨེཀཏོཝ སམྤཛྫཏི ‘‘ཨེཧི བྷིཀྑཱུ’’ཏི བྷགཝཏོ ཝཙནེན ཨབྷིནིཔྥནྣཏྟཱ. སརཎགཧཎཱུཔསམྤདཔབྦཛྫཱ སཱམཎེརཔབྦཛྫསདིསཱཡེཝ. ཀེསམསྶུཧརཎཉྩ ཀཱསཱཡཙྪཱདནཉྩ སརཎགཧཎཉྩ ཉཏྟིཙཏུཏྠཝཱཙིཀཱུཔསམྤདཔབྦཛྫཱ ནཱམ ཀམྨཝཱཙཱགཧཎཏོ པཋམམེཝ ཝཛིཏབྦཏྟཱ. ཏཏྠ སཱམཎེརཔབྦཛྫཾ སནྡྷཱཡ ཝུཏྟཾ ‘‘ཨུཔཛ྄ཛྷཱཡཾ ཨུདྡིསྶ པབྦཱཛེཏཱི’’ཏི. ཨུཔཛ྄ཛྷཱཡཾ ཨུདྡིསྶཱཏི ཨུཔཛ྄ཛྷཱཡསྶ ཝེཡྻཱཝཙྩཀརཊྛཱནནིཡམཾ ཀཏྭཱ. པབྦཛྫཱཀམྨེ ཨཏྟནོ ཨིསྶརིཡམཀཏྭཱཏི ཨཏྠོ. དཧརེན བྷིཀྑུནཱ ཀེསཙྪེདནཾ ཀཱསཱཡཙྪཱདནཾ སརཎདཱནནྟི ཏཱིཎི ཀིཙྩཱནི ཀཱཏབྦཱནིཡེཝ. ཀེཙི ‘‘སརཎཱནི པན སཡཾ དཱཏབྦཱནཱི’’ཏི པཱཋཾ ཨིདྷཱནེཏྭཱ དཧརེན བྷིཀྑུནཱ སརཎཱནི ན དཱཏབྦཱནཱིཏི ¶ ཝདནྟི, ཏཾ ན གཧེཏབྦཾ དཧརསྶ བྷིཀྑུཏྟཱ, བྷིཀྑཱུནཾ པབྦཱཛེཏུཾ ལབྷནཏྟཱ ཙ. ཨུཔཛ྄ཛྷཱཡོ ཙེ ཀེསཙྪེདནཉྩ ཀཱསཱཡཙྪཱདནཉྩ ཨཀཏྭཱ པབྦཛྫཏྠཾ སརཎཱནིཡེཝ དེཏི, ན རུཧཏི པབྦཛྫཱ པབྦཛྫཱཡ ཨཀཏྟབྦཏྟཱ. ཀམྨཝཱཙཾ སཱཝེཏྭཱ ཨུཔསམྤཱདེཏི, རུཧཏི ཨུཔསམྤདཱ ཨཔཏྟཙཱིཝརཱནཾ ཨུཔསམྤདསིདྡྷིཏོ, ཀམྨཝིཔཏྟིཡཱ ཨབྷཱཝཏོ ཙ. ཁཎྜསཱིམནྟི ཨུཔཙཱརསཱིམཊྛཾ བདྡྷསཱིམཾ. པབྦཱཛེཏྭཱཏི ཀེསཙྪེདནཾ སནྡྷཱཡ ཝུཏྟཾ ‘‘ཀཱསཱཡཱནི ཨཙྪཱདེཏྭཱ’’ཏི ཀཱསཱཡཙྪཱདནསྶ ཝིསུཾ ཝུཏྟཏྟཱ. སཱམཎེརསྶ སརཎདཱནསྶ ཨརུཧཏྟཱ ‘‘སརཎཱནི པན སཡཾ དཱཏབྦཱནཱི’’ཏི ཝུཏྟཾ. པུརིསཾ པབྦཱཛེཏུནྟི སམྦནྡྷོ. ཧཱིཏི སཙྩཾ. ཨཱཎཏྟིཡཱཏི བྷིཀྑཱུནཾ ཨཱཎཏྟིཡཱ. ཡེན ཀེནཙཱིཏི གཧཊྛཔབྦཛིཏེསུ ཡེན ཀེནཙི.

‘‘བྷབྦརཱུཔོ’’ཏི ཝཏྭཱ ཏསྶ ཨཏྠཾ དསྶེཏུཾ ཝུཏྟཾ ‘‘སཧེཏུཀོ’’ཏི. སཧེཏུཀོཏི མགྒཕལཱནཾ ཨུཔནིསྶཡེཧི སཧ པཝཏྟོ. ཡསསྶཱིཏི པརིཝཱརཡསེན ཙ ཀིཏྟིཡསེན ཙ སམནྣཱགཏོ. ཨོཀཱསཾ ཀཏྭཱཔཱིཏི ཨོཀཱསཾ ཀཏྭཱ ཨེཝ. སཡམེཝཱཏི ན ཨཉྙོ ཨཱཎཱཔེཏབྦོ. ཨེཏྟོཡེཝཱཏི དསྶནཊྛཱནཏོཡེཝ. ཨསྶཱཏི པབྦཛྫཱཔེཀྑསྶ. ཁཛྫུ ཝཱཏི ཀཎྜུཝནཾ ཝཱ. ‘‘ཀཙྪུ ཝཱ’’ཏིཔི པཱཋོ, པཱམཾ ཝཱཏི ཨཏྠོ. པིལ༹ཀཱ ཝཱཏི ཕོཊཱ ཝཱ. ཨེཏྟཀེནཱཏི ཨེཏཔམཱཎེན ¶ གྷཾསིཏྭཱ ནྷཱཔནམཏྟེན. ཨནིཝཏྟིདྷམྨཱཏི གིཧིབྷཱཝཾ ཨནིཝཏྟནསབྷཱཝཱ. ཀཏཉྙཱུཏི ཀཏསྶཱུཔཀཱརསྶ ཛཱནནསཱིལཱ. ཀཏཝེདིནོཏི ཀཏཉྙཱུཔཀཱརསྶ ཝེདཾ པཱཀཊཾ ཀརོནྟོ.

ཨནིཡྻཱནིཀཀཐཱཏི ཡཱཝདཏྠཾ སུཔིཏྭཱ ཡཱཝདཏྠཾ བྷུཉྫཱིཏྭཱ ཙིཏྟཀེལི༹ཾ ཀརོནྟོ ཨནུཀྐཎྛིཏོ ཝིཧརཱཧཱིཏིཨཱདིཀཱ ཀཐཱ. ནཀཐེཏབྦཾ དསྶེཏྭཱ ཀཐེཏབྦཾ དསྶེནྟོ ཨཱཧ ‘‘ཨཐཁྭསྶཱ’’ཏི. ཨསྶཱཏི པབྦཛྫཱཔེཀྑསྶ. ཨཱཙིཀྑནཱཀཱརཾ དསྶེནྟོ ཨཱཧ ‘‘ཨཱཙིཀྑནྟེན ཙཱ’’ཏིཨཱདི. ཝཎྞ…པེ… ཝསེནཱཏི ཝཎྞོ ཙ སཎྛཱནཉྩ གནྡྷོ ཙ ཨཱསཡོ ཙ ཨོཀཱསོ ཙ, ཏེསཾ ཝསེན, ཨཱཙིཀྑིཏབྦནྟི སམྦནྡྷོ. ཧཱིཏི ཕལཛོཏཀོ, ཨཱཙིཀྑནསྶ ཕལཾ ཝཀྑཱམཱིཏི ཨཏྠོ. སོཏི པབྦཛྫཱཔེཀྑོ. པུབྦེཏི པུབྦབྷཝེ, པབྦཛནཏོ ¶ པུབྦེ ཝཱ. ཀཎྚཀཝེདྷཱཔེཀྑོ པརིཔཀྐགཎྜོ ཝིཡ ཉཱཎཾ པཝཏྟཏཱིཏི ཡོཛནཱ. ཨསྶཱཏི པབྦཛྫཱཔེཀྑསྶ. ཨིནྡཱསནཱིཏི སཀྐསྶ ཝཛིརཱཝུདྷོ. སོ ཧི ཨིནྡེན ཨསཱིཡཏི ཁིཔཱིཡཏཱིཏི ཨིནྡཱསནཱིཏི ཝུཙྩཏི. ཨིནྡཱསནི པབྦཏེ ཙུཎྞཡམཱནཱ ཝིཡ སབྦེ ཀིལེསེ ཙུཎྞཡམཱནཾཡེཝཱཏི ཡོཛནཱ. ཁུརགྒེཡེཝཱཏི ཁུརསྶ ཀོཊིཡམེཝ. ཁུརཀམྨཔརིཡོསཱནེཡེཝཱཏི ཨཏྠོ. ཧཱིཏི སཙྩཾ. ཏསྨཱཏི ཡསྨཱ པཏྟཱ, ཏསྨཱ. ཨསྶཱཏི པབྦཛྫཱཔེཀྑསྶ.

གིཧིགནྡྷནྟི གེཧེ ཋིཏསྶ ཛནསྶ གནྡྷཾ. ཨཐཱཔཱིཏི ཡདིཔི ཨཙྪཱདེཏཱིཏི སམྦནྡྷོ. ཨསྶཱཏི པབྦཛྫཱཔེཀྑསྶ. ཨཱཙརིཡོ ཝཱཏི སརཎདཱནཱཙརིཡོ ཝཱ ཀམྨཝཱཙཱཙརིཡོ ཝཱ ཨོཝཱདཱཙརིཡོ ཝཱ. ཏཾཡེཝ ཝཱཏི པབྦཛྫཱཔེཀྑམེཝ ཝཱ. ཏེན བྷིཀྑུནཱཝཱཏི ཨཱཙརིཡུཔཛ྄ཛྷཱཡབྷིཀྑུནཱ ཨེཝ.

ཨནཱཎཏྟིཡཱཏི ཨཱཙརིཡུཔཛ྄ཛྷཱཡེཧི ཨནཱཎཏྟིཡཱ. ཨིམིནཱ ཨཱཙརིཡུཔཛ྄ཛྷཱཡེཧི ཨནཱཎཏྟེན ཡེན ཀེནཙི ནིཝཱསནཱདཱིནི ན ཀཱཏབྦཱནཱིཏི དསྶེཏི. བྷིཀྑུནཱཏི ཨཱཙརིཡུཔཛ྄ཛྷཱཡབྷིཀྑུནཱ. ཏསྶེཝཱཏི པབྦཛྫཱཔེཀྑསྶེཝ. ཨུཔཛ྄ཛྷཱཡམཱུལཀེཏི ཨུཔཛ྄ཛྷཱཡམཱུལཀེ ནིཝཱསནཔཱརུཔནེ. ཨཡནྟི ཝིནིཙྪཡོ.

ཏཏྠཱཏི པབྦཛྫཱུཔསམྤདཊྛཱནེ. ཏེསནྟི བྷིཀྑཱུནཾ. ཨཐཱཏི ཝནྡཱཔནཏོ པཙྪཱ, ཝནྡཱཔནསྶ ཨནནྟརཱ ཝཱ. ‘‘ཨེཝཾ ཝདེཧཱི’’ཏི པཱལི༹ནཡནིདསྶནམུཁེན ‘‘ཡམཧཾ ཝདཱམི, ཏཾ ཝདེཧཱི’’ཏི ཨཊྛཀཐཱནཡཾ ནིདསྶེཏི. ཨཐཱཏི ཏདནནྟརཾ. ཨསྶཱཏི པབྦཛྫཱཔེཀྑསྶ, དཱཏབྦཱནཱིཏི སམྦནྡྷོ. ཨེཀཔདམྤཱིཏི ཏཱིསུ ཝཱཀྱཔདེསུ ཨེཀཾ ཝཱཀྱཔདམྤི, ནཝསུ ཝཱ ཝིབྷཏྱནྟཔདེསུ ཨེཀཔདམྤི. ཨེཀཀྑརམྤཱིཏི ཙཏུཝཱིསཏཀྑརེསུ ཨེཀཀྑརམྤི.

ཨེཀཏོ ¶ སུདྡྷིཡཱཏི ཨེཀསྶེཝ ཀམྨཝཱཙཱཙརིཡསྶ ཋཱནཀརཎསམྤཏྟིཡཱ སུཛ྄ཛྷནེན. ཨུབྷཏོ སུདྡྷིཡཱཝཱཏི ཨུབྷཡེསཾ སརཎདཱནཱཙརིཡསཱམཎེརཱནཾ སུཛ྄ཛྷནེན ཨེཝ. ཋཱནཀརཎསམྤདནྟི ཨུརཨཱདིཊྛཱནཱནཉྩ སཾཝུཏཱདིཀརཎཱནཉྩ སམྤདཾ. ཝཏྟུནྟི ཋཱནཀརཎསམྤདཾ ཝཏྟུཾ. ན སཀྐོཏཱིཏི ཝཏྟུཾ ན སཀྐོཏཱིཏི ཡོཛནཱ.

ཨིམཱནཱིཏི ¶ སརཎཱནི. ཙསདྡོ ཨུཔནྱཱསོ, པནསདྡོ པདཱལངྐཱརོ. ཨེཀསམྦནྡྷཱནཱིཏི ཨེཀཏོ སམྦནྡྷཱནི. ཨནུནཱསིཀནྟཾ ཀཏྭཱ དཱནཀཱལེ ‘‘བུདྡྷཾ’’ཨིཏི ‘‘སརཎཾ’’ཨིཏི པདཱནཉྩ ‘‘སརཎཾ’’ཨིཏི ‘‘གཙྪཱམི’’ཨིཏི པདཱནཉྩ ཨནྟརཱ ཝིཙྪེདམཀཏྭཱ ཨེཀསམྦནྡྷམེཝ ཀཏྭཱ དཱཏབྦཱནཱིཏི ཝུཏྟཾ ཧོཏི. ཀསྨཱ ཏིཎྞཾ པདཱནམནྟརཱ བྱཝདྷཱནསྶ ཀསྶཙི ཨཀྑརསྶ ཨབྷཱཝཏོ. ཝིཙྪིནྡིཏྭཱཏི ཝིཙྪེདཾ ཀཏྭཱ. མཀཱརནྟཾ ཀཏྭཱ དཱནཀཱལེ ཏིཎྞཾ པདཱནམནྟརཱ ཨེཀསམྦནྡྷམཀཏྭཱ ཝིཙྪིནྡིཏྭཱ ཨེཝ ཀཏྭཱ དཱཏབྦཱནཱིཏི ཝུཏྟཾ ཧོཏི. ཀསྨཱ? ཏིཎྞཾ པདཱནམནྟརཱ བྱཝདྷཱནསྶ ནིསྶརསྶ མཀཱརསྶ ཨཏྠིབྷཱཝཏོ. ཨནྡྷཀཊྛཀཐཱཡཾ ཝུཏྟནྟི སམྦནྡྷོ. ཏནྟི ཝཙནཾ, ‘‘ནཏྠཱི’’ཏིཔདེ ཀཏྟཱ, ‘‘ན ཝུཏྟ’’ནྟིཔདེ ཀམྨཾ. ཏཐཱཏི ‘‘ཨཧཾ བྷནྟེ བུདྡྷརཀྑིཏོ’’ཏིཨཱདིནཱ ཨཱཀཱརེན, ཨཝདནྟསྶ སརཎཾ ན ཀུཔྤཏི, བུཀཱརདཀཱརཱདཱིནཾ བྱཉྫནཱནཾ ཋཱནཀརཎསམྤདཾ ཧཱཔེནྟསྶེཝ སརཎཾ ཀུཔྤཏཱིཏི ཨདྷིཔྤཱཡོ.

‘‘ཏིཀྑཏྟུ’’ནྟི ཨིམིནཱ སཀིཾ ཝཱ དྭིཀྑཏྟུཾ ཝཱ ན ཝཊྚཏཱིཏི དཱིཔེཏི. ཏིཀྑཏྟུཏོ ཨདྷིཀཾ པན སཧསྶཀྑཏྟུམྤི ཝཊྚཏིཡེཝ. ཏཏྠཱཏི ཏཱསུ པབྦཛྫཱཨུཔསམྤདཱསུ. པརཏོཏི པརསྨིཾ. སཱཏི ཨུཔསམྤདཱ. པབྦཛྫཱ པན ཨནུཉྙཱཏཱ ཨེཝཱཏི སམྦནྡྷོ. པརཏོཔཱིཏི པིསདྡོ པུབྦཱཔེཀྑོ. སཱཏི པབྦཛྫཱ. ཨེཏྟཱཝཏཱཏི ཨེཏྟཀེན ཀེསཙྪེདནཀཱསཱཡཙྪཱདནསརཎདཱནེན. ཧཱིཏི ཕལཛོཏཀོ.

ཨེསཱཏི ཨེསོ སཱམཎེརོཏི ཨཏྠོ. ‘‘གཏིམཱ’’ཏི ཝཏྭཱ ཏསྶཏྠཾ དསྶེནྟོ ཨཱཧ ‘‘པཎྜིཏཛཱཏིཀོ’’ཏི. ཨཐཱཏི ཨེཝཾ སཏི. ཨསྶཱཏི སཱམཎེརསྶ. ཏསྨིཾཡེཝ ཋཱནེཏི སཱམཎེརབྷཱུམིཡཾ ཋིཏཊྛཱནེཡེཝ. ཡཐཱ བྷགཝཏཱ ཨུདྡིཊྛཱནི, ཏཐཱ ཨུདྡིསིཏབྦཱནཱིཏི ཡོཛནཱ. ཨེཏནྟི ‘‘ཨནུཛཱནཱམི…པེ… ཛཱཏརཱུཔ རཛཏཔཊིགྒཧཎཱ ཝེརམཎཱི’’ཏི ཝཙནཾ.

ཏནྟི ཨནྡྷཀཊྛཀཐཱཡཾ ཝུཏྟཝཙནཾ. ཡཐཱཔཱལི༹ཡཱཝཱཏི ཨེཝསདྡོ སནྣིཊྛཱནཏྠོ, ཏེན ཡཐཱཔཱལི༹ཡཱཝ ཨུདྡིསིཏབྦཱནི. ཡཐཱཔཱལི༹ཾ ཝིསཛྫེཏྭཱ ཨཉྙཐཱ ཨེཝ ཨུདྡིསིཏབྦཱནཱིཏི ཝཱདཾ ནིཝཱརེཏི. ཡཐཱཔཱལི༹ཾ ཝིསཛྫེཏྭཱ ¶ ཨཉྙཐཱ ‘‘པཱཎཱཏིཔཱཏཱ ཝེརམཎིཾ སིཀྑཱཔདཾ སམཱདིཡཱམཱི’’ཏི ¶ ཨུདྡིསནྟོཔི ནིདྡོསོཡེཝ. ཧཱིཏི སཙྩཾ, ཡསྨཱ ཝཱ. ཏཱནཱིཏི སིཀྑཱཔདཱནི. ཡཱཝཱཏི ཡཏྟཀཾ ཀཱལཾ ན ཛཱནཱཏི, ན ཀུསལོ ཧོཏཱིཏི སམྦནྡྷོ. སནྟིཀཱཝཙརོཡེཝཱཏི ཨཱཙརིཡུཔཛ྄ཛྷཱཡཱནཾ སམཱིཔེ ཨཝཙཱརོཝ. ཨསྶཱཏི སཱམཎེརསྶ. ཀཔྤིཡཱཀཔྤིཡནྟི དསསིཀྑཱཔདཝིནིམུཏྟཾ ཀཔྤིཡཾ པརཱམཱསཱདིཉྩ ཨཀཔྤིཡཾ ཨཔརཱམཱསཱདིཉྩ. ཏེནཱཔཱིཏི སཱམཎེརེནཱཔི. ནཱསནངྒཱནཱིཏི ལིངྒནཱསནཨངྒཱནི. སཱདྷུཀཾ སིཀྑིཏབྦནྟི སཱདྷུཀཾ ཨསིཀྑནྟསྶ ལིངྒནཱསནཉྩ དཎྜཀམྨནཱསནཉྩ ཧོཏཱིཏི ཨདྷིཔྤཱཡོ.

༡༠. དུཏིཡམཱརཀཐཱ

༣༥. མཡ྄ཧནྟིཔདསྶ ‘‘ཨནུཔྤཏྟཱ སཙྪིཀཏཱ’’ཏིཔདེསུ ཚཊྛཱིཀཏྟུབྷཱཝཾ དསྶེནྟོ ཨཱཧ ‘‘མཡཱ ཁོཏི ཨཏྠོ’’ཏི. ‘‘ཨཐ ཝཱ’’ཏིཨཱདིནཱ ‘‘མཡ྄ཧ’’ནྟིཔདསྶ ‘‘ཡོནིསོ མནསིཀཱརཱ, ཡོནིསོ སམྨཔྤདྷཱནཱ’’ཏིཔདེསུ སམྦནྡྷབྷཱཝཾ དསྶེཏི. ‘‘ཡོནིསོ མནསིཀཱརཱ, ཡོནིསོ སམྨཔྤདྷཱནཱ’’ཏི ཨེཏྠ ཀཱརཎཏྠེ ནིསྶཀྐཝཙནནྟི ཨཱཧ ‘‘ཏེན ཧེཏུནཱ’’ཏི. ‘‘པུནཱ’’ཏིཨཱདིནཱ ‘‘མཡ྄ཧ’’ནྟིཔདཾ ‘‘ཡོནིསོ མནསིཀཱརཱ, ཡོནིསོ སམྨཔྤདྷཱནཱ’’ཏིཔདེསུ སཱམྱཏྠེ སཱམིབྷཱཝེན ཡོཛེཏྭཱ པུན ‘‘ཨནུཔྤཏྟཱ, སཙྪིཀཏཱ’’ཏི པདེསུ ཀཏྟུཏྠེ སཱམིབྷཱཝེན ཝིབྷཏྟིཝིཔལླཱསོ ཀཱཏབྦོཏི དསྶེཏི.

༡༡. བྷདྡཝགྒིཡཀཐཱ

༣༦. བྷདྡཾ རཱུཔཉྩ ཙིཏྟཉྩ ཨེཏེསམཏྠཱིཏི བྷདྡཀཱ. ཝགྒབནྡྷནཾ ཝགྒོ ཨུཏྟརཔདལོཔེན, ཝགྒེན ཙརནྟཱིཏི ཝགྒིཡཱ. བྷདྡཀཱ ཙ ཏེ ཝགྒིཡཱ ཙཱཏི བྷདྡཝགྒིཡཱ ཀཀཱརལོཔེནཱཏི ཨཏྠཾ དསྶེནྟོ ཨཱཧ ‘‘བྷདྡཝགྒིཡཱ’’ཏིཨཱདི. ‘‘ཝོཀཱརོ ནིཔཱཏམཏྟོ’’ཏི ཨིམིནཱ ཏུམྷསདྡསྶ ཙ ཡོཝཙནསྶ ཙ ཀཱརིཡབྷཱཝཾ ནིཝཏྟེཏི. ཧཱིཏི སཙྩཾ. ཏེཏི བྷདྡཝགྒིཡཱ. ཨིདནྟི པཉྩསཱིལརཀྑནཾ. པུབྦཀམྨནྟི པུབྦེ ཨུཔཙིཏཾ ཀུསལཀམྨཾ.

༡༢. ཨུརུཝེལཔཱཊིཧཱརིཡཀཐཱ

༣༨. པརིཡཱདིཡེཡྻནྟི ¶ ཨེཏྠ དཱདྷཱཏུསྶ པརཱིཏི ཙ ཨཱཏི ཙ ཨུཔསགྒཝསེན ཨབྷིབྷཝནཏྠོཏི ཨཱཧ ‘‘ཨབྷིབྷཝེཡྻ’’ནྟི.

༣༩. པཙྪཱ ¶ པཀྑིཏྟཱཏི སངྒཱིཏིཏོ པརཾ པོཏྠཀཱརཱུལ༹ྷེཧི ཋཔིཏཱཏི ཨཏྠོ.

༤༤. ‘‘ཨེཝཾ ཝདནྟོ ཝིཡ ཨོཎཏོ’’ཏི ཨིམིནཱ ‘‘ཨཱཧརཧཏྠོ’’ཏིཔདསྶ ཏདྡྷིཏབྷཱཝཾ དསྶེཏི. ཝིཏྠིཎྞམུཁཏྟཱ མནྡཾ ཧཱིནཾ ཨཏིམུཁམེཏཱསནྟི ཝཙནཏྠེན ཨགྒིཀཔཱལཱ མནྡཱམུཁིཡོཏི ཝུཙྩནྟཱིཏི ཨཱཧ ‘‘ཨགྒིབྷཱཛནཱནི ཝུཙྩནྟཱི’’ཏི.

༥༡. ཡསྨཱ ཡོ ནཱགདམནཀཱལོ ཙིརཾ པཏཏི པཝཏྟཏི, ཏསྨཱ སོ ཙིརཔཏིཀོཏི ཝུཙྩཏི, ཏསྨཱ ཙིརཔཏིཀཱ པཊྛཱཡ ཨབྷིཔྤསནྣཱཏི ཡོཛནཱ. ཨིཏི ཨིམམཏྠཾ དསྶེནྟོ ཨཱཧ ‘‘ཙིརཀཱལཏོ པཊྛཱཡཱ’’ཏི.

༥༢. སབྦཏྠཱཏི སབྦེསུ ‘‘ཛཊཱམིསྶ’’ནྟིཨཱདིཔདེསུ. ཁཱརིཀཱཛནྟི ཨེཏྠ ཀམཎྜལུཨཱདིཀཱ ཏཱཔསཔརིཀྑཱརཱ ཁཱརཱིཏི ཝུཙྩནྟི, ཁཱརིསངྑཱཏེན བྷཱརེན པཱུརིཏོ ཀཱཛོ ཁཱརིཀཱཛོཏི ཨཏྠཾ ཨེཀདེསེན དསྶེནྟོ ཨཱཧ ‘‘ཁཱརིབྷཱརོ’’ཏི.

༡༣. བིམྦིསཱརསམཱགམཀཐཱ

༥༥. ལཊྛིསདྡོ ཏརུཎརུཀྑཝཱཙཀོ ‘‘ཨམྦལཊྛིཀཱཡ’’ནྟིཨཱདཱིསུ (དཱི. ནི. ༡.༢), ཨིདྷཱཔི ཏརུཎཏཱལརུཀྑོ ལཊྛི ནཱམཱཏི དསྶེནྟོ ཨཱཧ ‘‘ཏཱལུཡྻཱནེ’’ཏི. ཝཊརུཀྑེཏི ནིགྲོདྷརུཀྑེ. ཨེཏྠ ‘‘ཝཊ’’ཨིཏི ཨིམིནཱ ཝཊརུཀྑོ བཧུམཱུལཏྟཱ སུཊྛུཾ པཏིཊྛཱཏཱིཏི ཨཏྠེན སུཔྤཏིཊྛོ ནཱམཱཏི དསྶེཏི. ‘‘རུཀྑེ’’ཨིཏི ཨིམིནཱ ཙེཏིཡསདྡོ ཙེཏིཡརུཀྑེ ཝཏྟཏཱིཏི དསྶེཏི, དེཝཱལཡཉྩ ཐཱུཔཉྩ ནིཝཏྟེཏི. ཏསྶཱཏི ཝཊརུཀྑསྶ. ཨེཏནྟི ‘‘སུཔྤཏིཊྛེ ཙེཏིཡེ’’ཏི ཨེཏཾ ནཱམཾ. ལོཀཝོཧཱརཝསེན དསསཧསྶསངྑཱཏེ སངྑྱཱཝིསེསེ ནཱིཧརིཏྭཱ ཡུཛྫིཏབྦནྟི ནིཡུཏནྟི ཝཙནཏྠེན ¶ དསསཧསྶཾ ནིཡུཏཾ ནཱམཱཏི དསྶེནྟོ ཨཱཧ ‘‘ཨེཀནིཡུཏཾ དསསཧསྶཱནཱི’’ཏི. ‘‘ནཧུཏ’’ནྟིཔི པཱཋོ, སོ ཨཡུཏྟོ ནཧུཏསངྑཱཏེན སངྑྱཱཝིསེསེན མིསྶཱིབྷཱཝེན པསངྒཏྟཱ. ཏེསནྟི དྭཱདསནིཡུཏཱནཾ བྲཱཧྨཎགཧཔཏིཀཱནཾ.

‘‘ཀིསསརཱིརཏྟཱ’’ཏི ཨིམིནཱ ཀིསོ ཀོ ཨཏྟཱ ཨེཏེསནྟི ཀིསཀཱཏི ཝཙནཏྠཾ དསྶེཏི. ཀཀཱརོ ཧེཏྠ ཨཏྟཝཱཙཀོ. ‘‘ཨོཝཱདཀོ’’ཏི ཨིམིནཱ ཨོཝདཱནོཏི ཨེཏྠ ཡུཔཙྩཡོ ཀཏྟུཏྠོཏི དསྶེཏི. གཱཐཱབནྡྷཏྟཱ ཨཀཱརསྶ དཱིགྷོ. ‘‘ཨཐ ཝཱ’’ཏིཨཱདིནཱ ཀིསཀོ ཧུཏྭཱ ཨཉྙེ ཨོཝདཱནོ ¶ ཀིསཀོཝདཱནོཏི ཝཙནཏྠཾ དསྶེཏི. ཨིདནྟི ཨིདཾ ཨཏྠཛཱཏཾ, ཨཡམཏྠོ ཝཱ. ཏྭཾ པཧཱསཱིཏི སམྦནྡྷོ. ཏནྟི ཏུཝཾ. ཨིཏི ཝུཏྟཾ ཧོཏཱིཏི ཡོཛནཱ.

ཀཱམིཏྠིཡོཏི ཨེཀཱརལོཔཝསེན སནྡྷཱིཏི ཨཱཧ ‘‘ཀཱམེ ཨིཏྠིཡོ ཙཱ’’ཏི. ཨུཔཙཱིསཱུཏི ཨེཏྠ ཀཱམཁནྡྷཀིལེསཨབྷིསངྑཱརསངྑཱཏེསུ ཙཏཱུསུ ཨུཔདྷཱིསུ ཁནྡྷུཔདྷི ཨདྷིཔྤེཏོཏི ཨཱཧ ‘‘ཁནྡྷུཔདྷཱིསཱུ’’ཏི.

ཀོཙརཧཱིཏི ཨེཏྠ ཀོསདྡོ ‘‘ཀོ ཏེ བལཾ མཧཱརཱཛཱ’’ཏིཨཱདཱིསུ (ཛཱ. ༢.༢༢.༡༨༨༠) ཝིཡ ཀྭསདྡཏྠོཏི ཨཱཧ ‘‘ཀྭཙརཧཱི’’ཏི. ནིཔཱཏོཡེཝེས.

པདསདྡསྶ ཙརཎཔདཱདཡོ ནིཝཏྟེཏུཾ ཝུཏྟཾ ‘‘ནིབྦཱནཔད’’ནྟི. ‘‘སནྟསབྷཱཝཏཱཡཱ’’ཏིཨཱདིནཱ སནྟོ སབྷཱཝོ ཨིམསྶ པདསྶཱཏི སནྟཾ. ནཏྠི ཨུཔདྷཡོ ཨེཏྠཱཏི ཨནུཔདྷིཀཾ. ནཏྠི ཀིཉྩནམེཏྠཱཏི ཨཀིཉྩནཾ. ཏཱིསུ བྷཝེསུ ན སཉྫཏཱིཏི ཨསཏྟཾ. ཨཉྙཐཱ ན བྷཝཏཱིཏི ཨནཉྙཐཱབྷཱཝི. ཨཉྙེན ཀེནཙི ན ནེཏབྦནྟི ཨནཉྙནེཡྻནྟི ཝཙནཏྠཾ དསྶེཏི. ཏེནཱཏི ‘‘སནྟ’’ནྟིཨཱདིཔདེན. མེཏི མམ, མནོཏི སམྦནྡྷོ. ཨེཏྠ དེཝམནུསྶལོཀེ མེ མནོ རཏོ ནཱམཱཏི ཀིཾ ཝཀྑཱམི. ཨིཏི ཨིམམཏྠཾ དསྶེཏཱིཏི ཡོཛནཱ.

༥༦. ཏཉྩཱཏི སཱཝཀབྷཱཝཉྩ.

༥༧. ཨསྶཱསཀཱཏི ཨེཏྠ ཨཱཔུབྦོ སཱསདྷཱཏུ ཨཱཔུབྦ སིསདྷཱཏུནཱ སདིསོ, ‘‘མེ’’ཏི ཚཊྛཱིཡོགཏྟཱ ཎྭུཔཙྩཡོ ཙ བྷཱཝཏྠོཏི ¶ ཨཱཧ ‘‘ཨཱསིསནཱ’’ཏི. ‘‘པཏྠནཱ’’ཏི ཨིམིནཱ ཨཱཔུབྦསིསདྷཱཏུཡཱ ཨཏྠཾ དསྶེཏི. ཨསྶཱཏི བིམྦིསཱརརཉྙོ. ཏཏྠཱཏི རཏནཏྟཡེ. ནིཙྪཡགམནམེཝཱཏི ‘‘སརཎ’’ཨིཏིནིཙྪཡེན ཛཱནནམེཝ གཏོ. ཨཏྟསནྣིཡྻཱཏནནྟི ཨཏྟནོ ཨཏྟཱནཾ རཏནཏྟཡེ སནྣིཡྻཱཏནཾ. ཨིམིནཱ ཨཏྟསནྣིཡྻཱཏན, པཎིཔཱཏ, ཏཔྤརཱཡན, སིསྶབྷཱཝཱུཔགམནསངྑཱཏེསུ ཙཏཱུསུ སརཎགམནེསུ (དཱི. ནི. ཨཊྛ. ༡.༢༥༠; མ. ནི. ཨཊྛ. ༡.༥༦; ཁུ. པཱ. ཨཊྛ. ༡.སརཎགམནགམཀཝིབྷཱཝནཱ) ཨཏྟསནྣིཡྻཱཏནསརཎགམནཾ དཱིཔེཏི. ཨཡནྟི བིམྦིསཱརོ རཱཛཱ. ཏནྟི ནིཡཏསརཎཏཾ. པཎིཔཱཏགམནཉྩཱཏི ཨེཏྠ པཎཱིཏི ཀརོ. ཡཐཱ ཧི པཱདཔདསདྡཱ དཱིགྷརསྶཝསེན ཧུཏྭཱ ཙརཎཾ ཝདནྟི, ཨེཝཾ པཱཎིཔཎིསདྡཱ ཀརཾ ཝདནྟི. ཏསྨཱ ཝུཏྟཾ ‘‘པཎཱིཏི ཀརོ’’ཏི. པཏནཾ པཱཏོ, པཎིནོ པཱཏོ པཎིཔཱཏོ. ཨཏྠཏོ ཨཉྫལིཔཎམནནྟི ཝུཏྟཾ ཧོཏི. ཏསྶ གམནཉྩ གཙྪནྟོཏི ཨཏྠོ. ཨིམིནཱ པཎིཔཱཏསརཎགམནཾ ¶ དཱིཔེཏི. ཙསདྡོ ‘‘པཱཀཊ’’ནྟི ཨེཏྠཱཔི ཡོཛེཏབྦོ. པཱཀཊཉྩ ཀརོནྟོཏི ཧི ཨཏྠོ.

༥༨. སིངྒཱིནིཀྑསཝཎྞོཏི ཨེཏྠ སིངྒཱིསངྑཱཏོ ནིཀྑོ སིངྒཱིནིཀྑོ, ཏེན སམཱནོ ཝཎྞོ ཨེཏསྶཱཏི སིངྒཱིནིཀྑསཝཎྞོཏི ཝཙནཏྠཾ དསྶེནྟོ ཨཱཧ ‘‘སིངྒཱིསུཝཎྞནིཀྑེན སམཱནཝཎྞོ’’ཏི. ཏཏྠ ‘‘སུཝཎྞ’’ཨིཏིཔདེན ནིཀྑསདྡསྶ སུཝཎྞཏྠཾ དསྶེཏི, པཉྩསུཝཎྞཱདཡོ ཨཏྠེ ནིཝཏྟེཏི. ‘‘སམཱན’’ཨིཏིཔདེན སཝཎྞོཏི ཨེཏྠ སཀཱརོ སམཱནསདྡསྶེཝ ཀཱརིཡོཏི དསྶེཏི. སབྦེསཱུཏི ཨཁིལེསུ ཙཀྑཱདིཨིནྡྲིཡེསུ. དནྟོཏི དམིཏོ. ཨིནྡྲིཡསཾཝརོཏི ཝུཏྟཾ ཧོཏི. ཏམེཝཏྠཾ པཱཀཊཾ ཀརོནྟོ ཨཱཧ ‘‘བྷགཝཏོ ཧཱི’’ཏིཨཱདི.

༥༩. ཨོཎཱིཏོ པཏྟཏོ པཱཎི ཡེནཱཏི ཨོཎཱིཏཔཏྟཔཱཎཱིཏི ཝཙནཏྠཾ དསྶེནྟོ ཨཱཧ ‘‘པཏྟཏོ ཙཱ’’ཏིཨཱདི. ‘‘ཨཔནཱིཏཔཱཎི’’ནྟི ཨིམིནཱ ཨོཎཱིཏསདྡོ ཨཔནཱིཏཏྠོ, པཱཎིསདྡེན ཙ སམྦནྡྷིཏབྦོཏི དསྶེཏི. ‘‘སལླཀྑེཏྭཱ’’ཏི ཨིམིནཱ ‘‘བྷགཝནྟ’’ནྟི ཨིམཾ ཀམྨཾ ‘‘སལླཀྑེཏྭཱ’’ཏི པཱཋསེསེན ཡོཛེཏབྦནྟི དསྶེཏི. ཨེཀམནྟནྟི ཨེཏྠ ཨནྟསདྡོ སམཱིཔདེསཏྠོ, ཀོཊིདེསཏྠོ ཝཱ ཧོཏི ¶ , ཨུཔཡོགཝཙནཉྩ བྷུམྨཏྠེ ཧོཏཱིཏི དསྶེནྟོ ཨཱཧ ‘‘ཨེཀསྨིཾ པདེསེ’’ཏི. ཨཏྠིཀཔཡོགེ ཀརཎསྶ སམྦྷཝཏོ ཨཱཧ ‘‘བུདྡྷཱབྷིཝཱདནགམནེན ཝཱ དྷམྨསྶཝནགམནེན ཝཱ’’ཏི. ཨཔྤཱཀིཎྞནྟི ཨེཏྠ ཨཔྤསདྡོ པཊིསེདྷཏྠོཏི ཨཱཧ ‘‘ཨནཱཀིཎྞ’’ནྟི. ‘‘ཨབྦོཀིཎྞ’’ནྟིཔི པཱཋོ. ཨཔྤནིགྒྷོསནྟི ཨེཏྠ ‘‘ཨཔྤསདྡ’’ནྟིཔདེན ཝཙནསདྡསྶ གཧིཏཏྟཱ ཨིམིནཱ པཱརིསེསནཡེན ནགརནིགྒྷོསསདྡོཡེཝ གཧེཏབྦོཏི ཨཱཧ ‘‘ནགརནིགྒྷོསསདྡེན ཨཔྤནིགྒྷོས’’ནྟི. ཏཱིསུ པཱཋེསུ པཋམེན པཱཋེན ཛནསྶ ཝཱཏོ ཛནཝཱཏོ, ཏེན ཝིརཧིཏཾ ཝིཛནཝཱཏནྟི ཝིཀཔྤཾ དསྶེཏི. དུཏིཡེན ཛནསྶ ཝཱདོ ཛནཝཱདོ, ཏེན ཝིརཧིཏཾ ཝིཛནཝཱདནྟི ཝིཀཔྤཾ དསྶེཏི. ཏཏིཡེན ཛནསྶ པཱཏོ སཉྩརཎཾ ཛནཔཱཏོ, ཏེན ཝིརཧིཏཾ ཝིཛནཔཱཏནྟི ཝིཀཔྤཾ དསྶེཏི. རཧསྶཾ ཀརཱིཡཏི ཨེཏྠཱཏི རཱཧསྶེཡྻཀཾ. མནུསྶཱནཾ རཱཧསྶེཡྻཀཾ མནུསྶརཱཧསྶེཡྻཀནྟི ཝཙནཏྠཾ དསྶེཏི ‘‘མནུསྶཱན’’ནྟིཨཱདིནཱ.

༡༤. སཱརིཔུཏྟམོགྒལླཱན པབྦཛྫཱཀཐཱ

༦༠. ‘‘ཏེཏི སཱརིཔུཏྟམོགྒལླཱནཱ. ཨགམཾསུ ཀིརཱཏི ཡོཛནཱ. ཏཏྲཱཏི གིརགྒསམཛྫེ. ཨཐཱཏི པརིཝིཏཀྐནཱནནྟརཾ. ཏསྶཱཏི སཉྩཡསྶ. པཱརནྟི པརཏཱིརཾ. ཨེཏྠཱཏི ཏུམྷཱཀཾ ཝཱདེ. ཨིདནྟི ཨཡཾ ཝཱདོ ཨེཏྟཀོཡེཝཱཏི ཨཏྠོ. ཡོཏི ཡོ ཀོཙི. ཏྭཉྩ ཨཧཉྩ ¶ ཨམྷེ, ཏེསུ. ནཱམཏུམྷསངྑཱཏེསུ ཧི ཏཱིསུ སདྡེསུ ཨེཀསེསེན ཀཏྟབྦེསུ པཙྪིམསྶེཝ ཨེཀསེསོ ཀཱཏབྦོ. ཏེནཱཏི ཀཏིཀཀརཎཧེཏུནཱ.

སཾཁེཔེན ཝུཏྟཾ ཝིཏྠཱརེན དསྶེནྟོ ཨཱཧ ‘‘ཨིདཾ ཧཱི’’ཏིཨཱདི. ཨཏྠཱིཀེཧཱིཏི ཨམཏེན ཨཏྠིཀེཧི. ཨུཔཉྙཱཏཾ མགྒནྟི ཨམཏསྶ མགྒོ ཨུཔགནྟྭཱ ཉཱཏོ. ཉཱཏོ ཙེཝ ཨུཔགཏོ ཙཱཏི སཧ ཨུཔསགྒེན པདཾ པརིཝཏྟིཏྭཱ ཨཏྠཾ ཀཐེནྟོ ཨུཔསགྒཏྠོ ཙ དྷཱཏུཏྠོ ཙ ཝིསུཾཡེཝ ཧོཏཱིཏི ཉཱཔེཏི. ཨཏྠིཀེཧི ཨམྷེཧི ཨུཔཉྙཱཏཾ ¶ ནིབྦཱནཾ མགྒཾ མགྒནྟོ ཨནུབནྡྷེཡྻནྟི ཝཱ དསྶེནྟོ ཨཱཧ ‘‘ཨཐ ཝཱ’’ཏིཨཱདི. མགྒཕལཔཙྩཝེཀྑཎཉཱཎེཧི ཨུཔགནྟྭཱ ཉཱཏབྦནྟི ཨུཔཉྙཱཏཾ ནིབྦཱནཾ. མགྒདྷཱཐུཡཱ ཨནྭེསནཏྠཾ དསྶེནྟོ ཨཱཧ ‘‘པརིཡེསནྟོ’’ཏི.

སཱརིཔུཏྟོཔི པཉྷཾ པུཙྪཱིཏི སམྦནྡྷོ. ཀམཎྜལུཏོཏི ཀུཎྜིཀཏོ. ཨཏྟནོ ཙ པརེསཉྩ ཨཀཐནེན ཨནྟརེ ཝིཝརཾ པཊིསནྡཧཏཱིཏི པཊིསནྡྷཱརོ, ཏཾ. ཨེཏྠཱཏི ‘‘ན ཏྱཱཧཾ སཀྐོམཱི’’ཏིཔདེ. ཨདྷིཔྤཱཡོ ཨེཝཾ ཝེདིཏབྦོཏི ཡོཛནཱ. ཨེཏྟཀནྟི ཨེཏྟཀཾ པཉྷཾ. ཨིམསྶཱཏི པརིབྦཱཛཀསྶ. ཨཝིསཡབྷཱཝནྟི ཨཏྟནོ ཨཝིསཡབྷཱཝཾ.

ཧེཏུཾ པཊིཙྩ བྷཝནྟཱིཏི ཧེཏུཔྤབྷཝཱཏི ཝཙནཏྠེན པཉྩཀྑནྡྷཱ ཧེཏུཔྤབྷཝཱ ནཱམཱཏི དསྶེནྟོ ཨཱཧ ‘‘ཧེཏུཔྤབྷཝཱ ནཱམ པཉྩཀྑནྡྷཱ’’ཏི. ཏེནཱཏི ‘‘ཡེ དྷམྨཱ ཧེཏུཔྤབྷཝཱ’’ཏི པདེན. ཨསྶཱཏི སཱརིཔུཏྟཔརིབྦཱཛཀསྶ. ‘‘ཏེསཾ ཧེཏུ ནཱམ སམུདཡསཙྩ’’ནྟི ཨིམིནཱ ཧིནོཏི ཨེཏསྨཱ ཕལནྟི ཧེཏཱུཏི ཝཙནཏྠེན སམུདཡསཙྩཾ ཧེཏུ ནཱམཱཏི དསྶེཏི. ཏཉྩཱཏི སམུདཡསཙྩཉྩ. ཏེསནྟི ཨེཏྠ ཏསདྡསྶ ཝིསཡཾ དསྶེཏུཾ ཝུཏྟཾ ‘‘ཨུབྷིནྣམྤི སཙྩཱན’’ནྟི. ཨཔཝཏྟིཝསེན ནིརུཛ྄ཛྷཏི ཨེཏྠཱཏི ནིརོདྷོ. ཏཉྩཱཏི ནིརོདྷཉྩ. ཏེནཱཏི ‘‘ཏེསཉྩ ཡོ ནིརོདྷོ’’ཏིཔདེན. ཨསྶཱཏི སཱརིཔུཏྟཔརིབྦཱཛཀསྶ. ཨེཏྠཱཏི ཨིམིསྶཾ གཱཐཱཡཾ, ཙཏཱུསུ སཙྩེསུ ཝཱ. ནཡཏོཏི ནཱནནྟརིཀནཡཏོ, ཨཝིནཱབྷཱཝནཡཏོ ཝཱ, ནེཏྟིདེསནཱཧཱརནཡཏོ ཝཱ. ཏམེཝཏྠཾ པཱཀཊཾ ཀརོནྟོ ཨཱཧ ‘‘ནིརོདྷེ ཧཱི’’ཏིཨཱདི. ཨེཀདེསསརཱུཔེཀསེསནཡེན ཝཱ མགྒསཙྩཾ གཧེཏབྦནྟི དསྶེནྟོ ཨཱཧ ‘‘ཨཐ ཝཱ’’ཏིཨཱདི. ནིརོདྷོ ཙ ནིརོདྷཱུཔཱཡོ ཙ ནིརོདྷོཏི ཨེཀདེསསརཱུཔེཀསེསོ ཀཱཏབྦོ. ཏེསཉྩཱཏི ཨེཏྠ ཨཝུཏྟསམྤིཎྜནཏྠེན ཙསདྡེན མགྒསཙྩཾ གཧེཏབྦནྟིཔི ཝདནྟི. ཨཡཾ ནཡོ ཨཊྛཀཐཱཡཾ ན ཝུཏྟོ. ཏམེཝཏྠནྟི ཙཏུསཙྩསངྑཱཏཾ ཏམེཝཏྠཾ. པཊིཔཱདེནྟོཏི ནིགམེནྟོ.

‘‘སཙེཔཱི’’ཏི ¶ ཨིམིནཱ ཡདཱིཏི པདསྶཏྠཾ ཝཎྞེཏི. ‘‘ཨེཏྟཀམེཝཱ’’ཏི ཨིམིནཱ ཏཱཝདེཝཱཏི པདསྶཏྠཾ ¶ ཝཎྞེཏི. ‘‘ཨིཏོ ཨུཏྟརི ནཏྠཱི’’ཏི ཨིམིནཱ ཨེཝཀཱརསྶ ཕལཾ དསྶེཏི. ཨིཏོཏི སོཏཱཔཏྟིཕལཏོ. ‘‘ཨིདཾ…པེ… པཏྟབྦ’’ནྟི ཨིམིནཱ ‘‘ཨེཏྟཀམེཝཱ’’ཏི པདསྶ ཨཏྠསརཱུཔཾ དསྶེཏི. ‘‘ཨེསོ ཨེཝ དྷམྨོ’’ཏི ཨིམིནཱ ‘‘ཨེསེཝ དྷམྨོ’’ཏིཔདསྶ ཨཏྠཾ ཝཎྞེཏི. པཙྩབྱཏྠཱཏི པཏིཨཝཔུབྦོ ཨིདྷཱཏུ པཊིཝིདྡྷཏྠོཏི ཨཱཧ ‘‘པཊིཝིདྡྷཏྠཱ’’ཏི. ཏུམྷེཧཱིཏི ཨསྶཛིཏྠེརཾ སནྡྷཱཡཱཧ. ཨིམིནཱ ‘‘པཙྩབྱཏྠཱ’’ཏི ཨེཏྠ ཧིཡྻཏྟནཱིཔརསྶཔདམཛ྄ཛྷིམཔུརིསབཧུཝཙནཏྠཝིབྷཏྟིཾ དཱིཔེཏི. ཀཔྤནཧུཏེཧཱིཏི ཀཔྤཱནཾ ནཧུཏེཧི, ཀོཊིཔཀོཊིསཏསཧསྶཱནཾ སཏེཧི ནཧུཏེཧཱིཏི ཨཏྠོ. ཨབྦྷཏཱིཏནྟི ཨབྷིཨཏཱིཏཾ. ཨམྷེཧི ཨདིཊྛམེཝ ཧུཏྭཱ ཨཏིཀྐམཱཔིཏནྟི ཨཏྠོ.

༦༢. ཨཱརམྨཎབྷཱུཏསྶ ནིབྦཱནསྶ གམྦྷཱིརཏྟཱ ཨཱརམྨཎིཀབྷཱུཏཾ ཉཱཎམྤི གམྦྷཱིརམེཝཱདྷིཔྤེཏནྟི ཨཱཧ ‘‘གམྦྷཱིརསྶ ཙ ཉཱཎསྶཱ’’ཏི. ཡཐཱ ཧི སཎྷཝཏྠསྶ སིབྦནཏྠཱཡ སཎྷསཱུཙི ཨདྷིཔྤེཏཱཏི. ཨུཔདྷཱིནཾ སམྨཱ ཁཡཊྛེན ནིབྦཱནཾ ཨུཔདྷིསངྑཡཾ ནཱམཱཏི ཨཱཧ ‘‘ཨུཔདྷིསངྑཡེཏི ནིབྦཱནེ’’ཏི. ཏདཱརམྨཎཱཡཱཏི ཏཾནིབྦཱནཱརམྨཎཱཡ. ཝིམུཏྟིཡཱཏི ཕལཝིམུཏྟིཡཱ. སཱཝཀཔཱརམཱིཉཱཎེཏི ཨགྒསཱཝཀཔཱརམཱིཉཱཎེ. ཏེསཱུཏི སཱརིཔུཏྟམོགྒལླཱནེསུ. ཨཌྜྷམཱསེན ཨརཧཏྟེ པཏིཊྛིཏོཏི སམྦནྡྷོ.

ཨཏཱིཏེཏི ཀཔྤསཏསཧསྶཱདྷིཀེ ཨསངྑྱེཡྻམཏྠཀེ. ཏསྶཱཏི བུདྡྷསྶ སནྟིཀེ ཨགྒསཱཝཀབྷཱཝཾ པཏྠེསཱིཏི ཡོཛནཱ. ཨསྶམེཏི མུནཱིནཾ ཋཱནེ. ཏཉྷི ཨཱ ཀོདྷཾ, ཨཱ བྷུསོ ཝཱ རཱགཱདཡོ སམེནྟི ཨེཏྠཱཏི ཨསྶམོཏི ཝུཙྩཏི, ཏསྨིཾ. པཏྠཡིཏྭཱ ཙ པེསེསཱིཏི སམྦནྡྷོ. ཏཏྠཱཏི ནཱིལུཔྤལམཎྜཔེ. ཏེསཱུཏི ཏཱཔསསེཊྛཱིསུ.

༦༣. ཡེསནྟི ཀུལཱནཾ. ‘‘ཝིདྷཝབྷཱཝཱཡཱ’’ཏི ཨིམིནཱ ཝིདྷཝཱཡ བྷཱཝོ ཝེདྷབྱནྟི ཝཙནཏྠཾ དསྶེཏི. ཝིདྷཝཱཏི ཙ པཏིསུཉྙཱ. སཱ ཧི དྷཝེན ཝིགཏཱཏི ‘‘ཝིདྷཝཱ’’ཏི ཙ, ཝིགཏོ དྷཝོ ཨིམིསྶཱཏི ‘‘ཝིདྷཝཱ’’ཏི ཙ ཝུཙྩཏི. ཨུབྷཡེནཱཔཱིཏི པུཏྟཔབྦཛྫཔཏིཔབྦཛྫསངྑཱཏེན དུཝིདྷེནཔི.

སཉྩཡཱནཱིཏི ¶ ཨེཏྠ ནིསྶཡཱུཔཙཱརེན ནིསྶཡེ ནིསྶིཏཱུཔཙཱརོ ཧོཏཱིཏི ཨཱཧ ‘‘སཉྩཡསྶ ཨནྟེཝཱསིཀཱནཱི’’ཏི. ཨཐ ཝཱ ཎཔཙྩཡོ ཏསྶེདམཏྠེ ཧོཏཱིཏི ཨཱཧ ‘‘སཉྩཡསྶ ཨནྟེཝཱསིཀཱནཱི’’ཏི. ‘‘མགདྷཱན’’ནྟི བཧུཝཙནཝསེན ཝུཏྟཏྟཱ ཛནཔདསྶ ནཱམནྟི ཨཱཧ ‘‘མགདྷཱནཾ ཛནཔདསྶཱ’’ཏི. གིརིབྦཛནྟི ཨེཏྠ ཝཛོ ཝིཡཱཏི ཝཛོ, གིརི. ཝཛསདིསོ གིརི ཨེཏྠཱཏི ¶ གིརིབྦཛཾ པདཧེཊྛུཔརིཡཝསེན, ནགརཾ. ‘‘མཧཱཝཱིརིཡཝནྟོ’’ཏི ཨིམིནཱ མཧནྟོ ཝཱིརོ ཨེཏེསཾ ཏཐཱགཏཱནནྟི མཧཱཝཱིརཱཏི ཝཙནཏྠཾ དསྶེཏི. དྷམྨེན ནཡམཱནཱནཾ ཀཱ ཨུསཱུཡཱ ཝིཛཱནཏནྟི ཨེཏྠ ཀཙྩཱཡནནཡེན (ཀཙྩཱཡནེ ༢༧༧ སུཏྟེ) ཨུསཱུཡཔཡོགེ སམྤདཱནཾ ཧོཏཱིཏི ཨཱསངྐཱ བྷཝེཡྻཱཏི ཨཱཧ ‘‘བྷུམྨཏྠེ སཱམིཝཙནཾ, ཨུཔཡོགཏྠེ ཝཱ’’ཏི. ཝིཛཱནནྟཱནནྟི ཝིཛཱནནྟེསུ ཏཐཱགཏེསུ, ཝིཛཱནནྟེ ཝཱ.

༡༥. ཨུཔཛ྄ཛྷཱཡཝཏྟཀཐཱ

༦༤. ཨནུཔཛ྄ཛྷཱཡཀཱཏི ཨེཏྠ ཝཛྫཱཝཛྫཾ ཨུཔགནྟྭཱ ཛྷཱཡཏཱིཏི ཨུཔཛ྄ཛྷཱཡོ, སོ ནཏྠི ཨེཏེསནྟི ཨནུཔཛ྄ཛྷཱཡཀཱཏི ཨཏྠཾ དསྶེནྟོ ཨཱཧ ‘‘ཝཛྫཱཝཛྫ’’ནྟིཨཱདི. ‘‘པིཎྜཱཡ ཙརཎཀཔཏྟ’’ནྟི ཨིམིནཱ པིཎྜཱཡ ཨུདྡིསྶ, ཨུཊྛཧིཏྭཱ ཝཱ ཏིཊྛཏི ཨནེནཱཏི ཨུཏྟིཊྛོ, སོཡེཝ པཏྟོ ཨུཏྟིཊྛཔཏྟོཏི ཨཏྠཾ དསྶེཏི. ‘‘ཨུཏྟིཊྛེ ན པམཛྫེཡྻཱ’’ཏིཨཱདཱིསུ (དྷ. པ. ༡༦༨) པན པིཎྜཱཡ ཙརཎཾ ‘‘ཨུཏྟིཊྛ’’ནྟི ཝུཙྩཏི. ཏསྨཱ ཏཏྠ པིཎྜཱཡ ཨུདྡིསྶ, ཨུཊྛཧིཏྭཱ ཝཱ ཏིཊྛནཾ ཨུཏྟིཊྛནྟི ཝཙནཏྠོ ཀཱཏབྦོ. ‘‘པིཎྜཱཡ ཙརཎཔཏྟ’’ནྟི ཨིདཾ ཝཙནཾ ‘‘ཏསྨིཉྷི མནུསྶཱ ཨུཙྪིཊྛསཉྙིནོ’’ཏིཔདཾ ལངྒྷིཏྭཱ ‘‘ཏསྨཱ ཨུཏྟིཊྛཔཏྟནྟི ཝུཏྟ’’ནྟིཔདེན ཡོཛེཏབྦཾ, ཏསྨཱ པིཎྜཱཡ ཙརཎཀཔཏྟཏྟཱ ཨུཏྟིཊྛཔཏྟནྟི ཝུཏྟནྟི ཝུཏྟཾ ཧོཏི. ཏསྨིཾ མནུསྶཱ ཀིཾསཉྙིནོཏི ཨཱཧ ‘‘ཏསྨིཉྷི མནུསྶཱ ཨུཙྪིཊྛསཉྙིནོ’’ཏི. ཏསྨིཉྷི ཏསྨིཾ ཨེཝ ཨུཏྟིཊྛཔཏྟེ པབྦཛིཏཱནཾ པརིབྷོགབྷཱཝེན མནུསྶེཧི ཨཝསཛྫིཏབྦཏྟཱ, ཨཝཚཌྜེཏབྦཏྟཱ ཝཱ མནུསྶཱ ཨུཙྪིཊྛསཉྙིནོ ཧོནྟཱིཏི ཡོཛནཱ. པབྦཛིཏཱནཾ པིཎྜཱཡ ཙརཎཀཔཏྟཏྟཱ ཨུཏྟིཊྛཔཏྟནྟི ཝུཏྟཾ, མནུསྶཱནཾ པན ཨཝསཛྫིཏཔཏྟཏྟཱ ཨུཙྪིཊྛཔཏྟནྟི ཝུཏྟནྟི ཨདྷིཔྤཱཡོ. ཨུཏྟིཊྛ པཏྟནྟིཔདཾ ཝཱཀྱམེཝ, ན སམཱསོཏིཔི དསྶེནྟོ ཨཱཧ ‘‘ཨཐ ¶ ཝཱ’’ཏིཨཱདི. ‘‘ཨུཊྛཧིཏྭཱ’’ཏི ཨིམིནཱ ཨུཏྟིཊྛཱཏི ཨེཏྠ ཏྭཱལོཔོཏི དསྶེཏི. ‘‘གཧེཏུ’’ནྟི ཨིམིནཱ པཱཋསེསཾ དསྶེཏི. གེཧསིཏཔེམཝསེནཱཏི གེཧེ ནིསྶིཏཔེམཝསེན, མེཏྟཱཔུབྦངྒམཔེམཝསེནཱཏི ཨཏྠོ. སགཱརཝཱ ཧུཏྭཱ སཔྤཏིསྶཱ ཧུཏྭཱ ཝིཧརནྟཱཏི ཨཏྠཾ དསྶེནྟོ ཨཱཧ ‘‘ཨུཔཊྛཔེཏྭཱ’’ཏི. ‘‘སབྷཱགཛཱིཝིཀཱ’’ཏི ཨིམིནཱ སབྷཱགཝུཏྟིཀཱཏི ཨེཏྠ ཝུཏྟིསདྡོ ཛཱིཝིཀཏྠོཡེཝ, ན ཝིཝརཎཱདྱཏྠོཏི དསྶེཏི. ཨུཔཛ྄ཛྷཱཡབྷཱཝཾ སམྤཊིཙྪཏི ཨེཏེཧཱིཏི ཨུཔཛ྄ཛྷཱཡབྷཱཝསམྤཊིཙྪནཱནི, ཏཱནིཡེཝ ཝེཝཙནཱནི ཨུཔཛ྄ཛྷཱཡབྷཱཝསམྤཊིཙྪནཝེཝཙནཱནི. ཏིཀྑཏྟུནྟི ཨུཀྐཊྛཝསེན ཝུཏྟཾ, སཀིམྤི ཝཊྚཏིཡེཝ. པདསྶ ཝསེན ཝིཉྙཱཔེཏཱིཏི སམྦནྡྷོ. ཧཱིཏི སཙྩཾ. ཨེཏྠཱཏི ཨུཔཛ྄ཛྷཱཡགཧཎཊྛཱནེ. ཡདིདཾ ཝཱཙཱཡ ཝཱ སཱཝནཾ, ཡདིདཾ ཀཱཡེན ཝཱ ཨཏྠཝིཉྙཱཔནཾ ཨཏྠི, ཨིདམེཝ སཱཝནཨཏྠཝིཉྙཱཔནམེཝ ཨུཔཛ྄ཛྷཱཡགཧཎནྟི ཡོཛནཱ. སཱདྷཱུཏི སམྤཊིཙྪནནྟི ཨུཔཛ྄ཛྷཱཡེན ¶ པཉྩསུ པདེསུ ཡསྨིཾ ཀིསྨིཾཙི ཝུཏྟེ སདྡྷིཝིཧཱརིཀསྶ ‘‘སཱདྷཱུ’’ཏི སམྤཊིཙྪནཾ. ཏནྟི ཀེསཉྩི ཝཙནཾ. ཧཱིཏི སཙྩཾ, ཡསྨཱ ཝཱ. ཨེཏྠཱཏི ཨུཔཛ྄ཛྷཱཡགཧཎེ. ‘‘ན སམྤཊིཙྪནཾ ཨངྒ’’ནྟི ཨིམིནཱ ཨཱཡཱཙནདཱནཱནིཡེཝ ཨངྒཱནི ནཱམཱཏི དསྶེཏི. སདྡྷིཝིཧཱརིཀེནཱཔི ཉཱཏུནྟི སམྦནྡྷོ. ཨིམིནཱ པདེནཱཏི ‘‘སཱདྷཱུ’’ཏི ཨིམིནཱ པདེན.

ཏཏྲཱཡཾ སམྨཱཝཏྟནཱཏི ཨེཏྠ ཏསདྡསྶ ཝིསཡཾ དསྶེཏུཾ ཝུཏྟཾ ‘‘ཡཾ ཝུཏྟཾ སམྨཱ ཝཏྟིཏབྦ’’ནྟི. ཨིམིནཱ ཀིརིཡཱཝིསཡབྷཱཝམེཝ དཱིཔེཏི, ན དབྦཝིསཡབྷཱཝཾ. ཨཡནྟི ཝུཙྩམཱནཱ. ཨསྶཱཏི སདྡྷིཝིཧཱརིཀསྶ. དྷོཏཔཱདཔརིཧརཎཏྠཱཡཱཏི དྷོཏསྶ པཱདསྶ པཾསུམཀྑནཱདཱིནཾ པརིཧརཎཏྠཱཡ. ཏཱཏི ཨུཔཱཧནཱཡོ. ཀཱལསྶེཝཱཏི པཙྩཱུསཀཱལཏོཡེཝ, ནིསྶཀྐཏྠེ ཙེཏཾ སཱམིཝཙནཾ. ཏཏོཏི ཏེཧི ཏཱིཧི དནྟཀཊྛེཧི, ཝིབྷཏྟཨཔཱདཱནམེཏཾ. ཏེསུ ཝཱ ཏཱིསུ དནྟཀཊྛེསུ. ཡནྟི ཡཾ དནྟཀཊྛཾ. ཨཐཱཏི ཏསྨིཾ གཧཎེ.

ཏཏོཏི སཱིཏུཎྷོདཀེཧི, སཱིཏུཎྷོདཀེསུ ཝཱ. ཝལ༹ཉྫེཏཱིཏི པརིབྷུཉྫཏི. ཨུདཀནྟི མུཁདྷོཝནོདཀཾ. ‘‘ཝཙྩཀུཊིཏོ’’ཏི ཨིམིནཱ པསྶཱཝཀུཊཱིཔི ¶ གཧེཏབྦཱ. ཨེཝནྟི སམྨཛྫིཡམཱནེ. ཨསུཉྙནྟི ཛནསདྡཏོ ཨཏུཙྪཾ. ཨཱསནནྟི ཐེརསྶ ཨཱསནཾ. ཏསྨིནྟི ཨཱསནེ. ནིསིནྣསྶ ཐེརསྶ ཝཏྟཾ ཀཱཏབྦནྟི སམྦནྡྷོ. ཨུཀླཱཔོ ཨསྨིཾ དེསེ ཨཏྠཱིཏི ཨུཀླཱཔོཏི ཨཏྠཾ དསྶེནྟོ ཨཱཧ ‘‘ཀེནཙི ཀཙཝརེན སཾཀིཎྞོ’’ཏི. ཨེཏྠ ཙ སངྐཱརོ ཨུཙྪིཊྛོ ཀལཱཔོ སམཱུཧོ ཨུཀླཱཔོཏི ཝཙནཏྠེན ཨུཀླཱཔོཏི ཝུཙྩཏི. ཀཙཱིཡཏི བནྡྷཱིཡཏི ཨསྨིཾ དེསེཏི ཀཙོ, སོ ཝརཱིཡཏི ཨིཙྪཱིཡཏི ཨནེནཱཏི ཀཙཝརོཏི ཝཙནཏྠེན ཀཙཝརོཏི ཝུཙྩཏི. ཧཏྠེནཔཱིཏི ཨེཏྠ པིསདྡོ པིལོཏིཀེནཔཱིཏིཨཱདིཾ སངྒཎྷཱཏི.

ཨེཀཏོ ཀཏྭཱཏི ཨེཀཏོ སམཱནཔཊལཾ ཀཏྭཱ. ཀསྨཱ སངྒྷཱཊཱིཏི ཨཱཧ ‘‘སབྦཾ ཧཱི’’ཏིཨཱདི. ‘‘སངྒྷཊིཏཏྟཱ’’ཏི ཨིམིནཱ སཾཧརིཏབྦཱཏི སངྒྷཱཊཱིཏི ཝཙནཏྠཾ དསྶེཏི. ནིཝཏྟིཏྭཱ ཨོལོཀེནྟཾ ཨུཔཛ྄ཛྷཱཡཾ སཾཔཱཔུཎཱཏཱིཏི ཡོཛནཱ. ཨེཀེན ཝཱ པདཝཱིཏིཧཱརེནཱཏི སམྦནྡྷོ. པཏྟོཡེཝ ཨུཎྷབྷཱརིཀེསུ པརིཡཱཔནྣོཏི པཏྟཔརིཡཱཔནྣོ, པཏྟེ པརིཡཱཔནྣོ ཡཱགུཨཱདིཀོ པཏྟཔརིཡཱཔནྣོཏིཔི ཡུཛྫཏིཡེཝ. བྷིཀྑཱཙཱརེཏི བྷིཀྑཱཙཱརཊྛཱནེ. ཡཱགུཡཱ ཝཱ ལདྡྷཱཡཱཏི སམྦནྡྷོ. ཏསྶཱཏི ཨུཔཛ྄ཛྷཱཡསྶ. སོ པཏྟོཏི ཨུཎྷཱདཱིསུ པརིཡཱཔནྣོ སོ པཏྟོ. ཨཉྙཏྲ ཝཱཏི ཨཱརཱམཱདཱིསུ ཝཱ. ཏསྶཱཏི ཨུཔཛ྄ཛྷཱཡསྶ. ཝཙནེ ཨནིཊྛིཏེཏི སམྦནྡྷོ. ཨིཏོ པཊྛཱཡཱཏི ‘‘ན ཨུཔཛ྄ཛྷཱཡསྶ བྷཎམཱནསྶཱ’’ཏི ཨེཏྠ ཝུཏྟནཀཱརཏོ པཊྛཱཡ. ཨིམིནཱ ཧེཊྛཱ ཝུཏྟེསུ ‘‘ནཱཏིདཱུརེ གནྟབྦ’’ནྟིཨཱདཱིསུ ནཀཱརཔཊིསིདྡྷེསུ ཨཱཔཏྟི ནཏྠཱིཏི དསྶེཏི. ཡཏྠ ཀཏྠཙཱིཏི ‘‘ན ¶ ཙ ཨུཎྷེ ཙཱིཝརཾ ནིདཧིཏབྦ’’ནྟིཨཱདཱིསུ ཡེསུ ཀེསུཙི. ཨཡནྟི དུཀྐཊཱཔཏྟི. ཧཱིཏི སཙྩཾ. ཨཱཔཏྟིསཱམནྟཱཏི ཨེཏྠ ཨཱཔཏྟིཡཱ སཱམནྟཱ ཨཱཔཏྟིསཱམནྟཱཏི ཨཏྠཾ དསྶེནྟོ ཨཱཧ ‘‘ཨཱཔཏྟིཡཱ ཨཱསནྣ’’ནྟི. ‘‘ཨཱསནྣ’’ནྟི ཨིམིནཱ སཱམནྟཱསདྡསྶ ཨཱསནྣཝེཝཙནཏཉྩ ཨུཔཡོགཏྠེ ནིསྶཀྐཝཙནཏཉྩ དསྶེཏི. ཨཱིདིསཾ ཝཙནཾ བྷནྟེ ཝཏྟུཾ ཝཊྚཏི ནཱམཱཏི ཡོཛནཱ.

གཱམཏོ ¶ པཋམཏརནྟི གཱམཏོ ཨུཔཛ྄ཛྷཱཡསྶ པཋམཏརཾ. ཏེནེཝཱཏི ཨུཔཛ྄ཛྷཱཡེནེཝ. ནིཝཏྟནྟེན སདྡྷིཝིཧཱརིཀེནཱཏི སམྦནྡྷོ. ‘‘ཏིནྟ’’ནྟི ཝཏྭཱ ཏམེཝཏྠཾ དསྶེཏུཾ ཝུཏྟཾ ‘‘སེདགྒཧིཏ’’ནྟི. ཨིམིནཱ སེདེན སཱིདཏཱིཏི སིནྣནྟི ཨཏྠཾ དསྶེཏི. ‘‘ཨཏིརེཀཾ ཀཏྭཱ’’ཏི ཨིམིནཱ ཨུསྶཱརེཏྭཱཏིཔདསྶ ཨདྷིཔྤཱཡཏྠཾ དསྶེཏི, ཨུདྡྷཾ ཨུདྡྷཾ སཱརེཏྭཱཏི ཝུཏྟཾ ཧོཏི. པཙྪིམཝཱཀྱསྶ པུབྦཝཱཀྱཀཱརཎབྷཱཝཾ དསྶེཏུཾ ཝུཏྟཾ ‘‘ཀིཾ ཀཱརཎཱ’’ཏི. མཛ྄ཛྷེ བྷངྒསྶ དོསཾ ཨཱཝིཀརོནྟོ ཨཱཧ ‘‘སམཾ ཀཏྭཱ’’ཏིཨཱདི. ཏཏོཏི སམཾ ཀཏྭཱ སཾཧརཎཏོ, ནིཙྩཾ བྷིཛྫམཱནནྟི སམྦནྡྷོ. མཛ྄ཛྷེ བྷངྒཏོ ཝཱ, དུབྦལནྟི སམྦནྡྷོ. ཨེཏནྟི ‘‘ཙཏུརངྒུལཾ ཀཎྞཾ ཨུསྶཱརེཏྭཱ’’ཏི ཨེཏཾ ཝཙནཾ. ཡཐཱཏི ཡེནཱཀཱརེན སཾཧརིཡམཱནེཏི སམྦནྡྷོ. ཙཱིཝརབྷོགསྶ ཨོརོ ཨནྟོ ཨོབྷོགོཏི ཨཏྠཾ དསྶེནྟོ ཨཱཧ ‘‘ཀཱཡབནྡྷན’’ནྟིཨཱདི.

ཡོཏི ཨུཔཛ྄ཛྷཱཡོ. ‘‘གཱམེཡེཝཱ’’ཏི ཝཏྭཱ ཏམེཝཏྠཾ དསྶེཏུཾ ཝུཏྟཾ ‘‘ཨནྟརགྷརེ ཝཱ པཊིཀྐམནེ ཝཱ’’ཏི. པཊིཀྐམནེ ཝཱཏི བྷོཛནསཱལཱཡཾ ཝཱ. ཏསྶཱཏི ཨུཔཛ྄ཛྷཱཡསྶ. ལདྡྷཱ བྷིཀྑཱ ཡེནཱཏི ལདྡྷབྷིཀྑོ, ཏསྶ ཝཱ. པིཎྜཔཱཏོ ཧོཏཱིཏི ཡོཛནཱ. ཏསྶཱཏི ཨུཔཛ྄ཛྷཱཡསྶ. པིཎྜཔཱཏོ ན ཧོཏཱིཏི སམྦནྡྷོ. ཨཏྟནཱ ལདྡྷོཔཱིཏི པིསདྡོ ཨུཔཛ྄ཛྷཱཡེན ལདྡྷོཔཱིཏི ཨཏྠཾ སམྤིཎྜེཏི. ཨཱཧརིཡཏཱུཏི ཨེཏྠ ཏུཝིབྷཏྟི པུཙྪཱཡཾ ཧོཏི, ཨཱཧརིཡཏུ ཀིནྟི ཨཏྠོ. ཀཱལོཏི བྷོཛནཀཱལོ. བྷུཉྫིཏྠཱཏི བྷུཏྟོ, ཏསྨིཾ སཏཱིཏི སམྦནྡྷོ. ཨུཔཀཊྛོཏི མཛ྄ཛྷནྷིཀསྶ ཨཱསནྣོ.

ཨནནྟརཧིཏཱཡཱཏི ཨེཏྠ ཨནྟརདྷཱཡཏཱིཏི ཨནྟརཧིཏོ, ཏཊྚིཀཙམྨཁཎྜཱདི, ནཏྠི ཨནྟརཧིཏོ ཨེཏསྨིཾ པཏྟབྷཱུམཱིནམནྟརེཏི ཨནནྟརཧིཏོཏི ཨཏྠཾ དསྶེནྟོ ཨཱཧ ‘‘ཨནཏྠཏཱཡཱ’’ཏི. ཀཱལ༹ཝཎྞཀཏཱ ཝཱ སུདྷཱབདྡྷཱ ཝཱ ནིརཛམཏྟིཀཱ ཧོཏཱིཏི ཡོཛནཱ. ཏནྟི པཏྟཾ. དྷོཏཝཱལིཀཱཡཔཱིཏི སུདྡྷཝཱལིཀཱཡཔི. ཏཏྠཱཏི པཾསུརཛསཀྑརཱདཱིསུ. པུན ཏཏྠཱཏི པཎྞཱདྷཱརཀེསུ. ཨིདཾ ཝཙནཾ ཝུཏྟནྟི སམྦནྡྷོ. ཨབྷིམུཁེནཱཏི ཨཏྟནོ ཨབྷིམུཁེན. སཎིཀནྟི སིནྣཾ ¶ . ཨནྟེ པནཱཏི ཙཱིཝརསྶ ཀོཊིཡཾ པན. ནིཀྑིཔནྟསྶ སདྡྷིཝིཧཱརིཀསྶ ཙཱིཝརསྶ བྷོགོཏི ཡོཛནཱ.

ཙུཎྞཾ ¶ སནྣེཏབྦནྟི ཨེཏྠ ཙུཎྞསམོདྷཱནེན ནེཏབྦནྟི ཨཏྠཾ དསྶེནྟོ ཨཱཧ ‘‘པིཎྜི ཀཱཏབྦཱ’’ཏི. ‘‘ཨེཀསྨིཾ ནིདྡྷཱུམེ ཋཱནེ’’ཏི ཨིམིནཱ ཨེཀམནྟནྟི ཨེཏྠ ཨེཀསྨིཾ ཨནྟེ ཋཱནེཏི ཨཏྠཾ དསྶེཏི. ཛནྟཱགྷརེཏི ཨགྒིསཱལཱཡཾ. སཱ ཧི ཛལཏི དིབྦཏི ཨགྒི ཨེཏྠཱཏི ཛནྟཱ, ཛནེཏི སརཱིརསེདམེཏྠཱཏི ཝཱ ཛནྟཱ, སཱ ཨེཝ གྷརཾ ཛནྟཱགྷརནྟི ཝུཙྩཏི, ཏསྨིཾ. པརིཔཱུཛཱཝསེན ཀརཱིཡཏཱིཏི པརིཀམྨནྟི ཨཏྠེན ཨངྒཱརདཱནཱདིཀཾ པརིཀམྨཾ ནཱམཱཏི དསྶེནྟོ ཨཱཧ ‘‘པརིཀམྨཾ ནཱམཱ’’ཏིཨཱདི.

‘‘ན ཀེནཙི གེལཉྙེནཱ’’ཏིཨཱདིནཱ ཨུསྶཧནསྶ ཀཱརཎཾ དསྶེཏི. ཧཱིཏི སཙྩཾ. ཨགིལཱནེན སཊྛིཝསྶེན སདྡྷིཝིཧཱརིཀེནཱཔི ཀཱཏབྦནྟི ཡོཛནཱ. ཨནཱདརེནཱཏི ཝཏྟཀརཎསྶ ཨནཱདརེན. ནཀཱརཔཊིསཾཡུཏྟེསཱུཏི པཊིསེདྷཝཱཙཀེན ནཀཱརེན པཊིསཾཡུཏྟེསུ. པདེསཱུཏི ‘‘ན ཨུཔཛ྄ཛྷཱཡསྶ བྷཎམཱནསྶ ཨནྟརནྟརཱ ཀཐཱ ཨོཔཱཏེཏབྦཱ’’ཏིཨཱདཱིསུ ཝཱཀྱེསུ. བྷཱུམིཡནྟི ཨུཔལཀྑཎཝསེན ཝུཏྟཾ བྷིཏྟིཡམྤི ཨཔཊིགྷཾསིཏབྦཏྟཱ. ‘‘པིཋསངྒྷཱཊཉྩཱ’’ཏི ཨིམིནཱ ཀཝཱཊཔཱིལ༹ནྟི ཨེཏྠ པཱིཋསདྡེན པིཋསངྒྷཱཊཾ ཝུཙྩཏི ཨུཏྟརཔདལོཔཝསེན ཝཱ ཨེཀདེསཝོཧཱརཝསེན ཝཱཏི དསྶེཏི. ‘‘ཨཙྪུཔནྟེནཱ’’ཏི ཨིམིནཱ ཨཔྤཊིགྷཾསནྟེནཱཏི ཨེཏྠ གྷཾསདྷཱཏུཡཱ ཨཏྠཾ དསྶེཏི. སམྨཱ ཏཱཡཏི ཨཏྟཱནཉྩ པརཉྩ ཨནེནཱཏི སནྟཱནཾ, ཏམེཝ སནྟཱནཀནྟི ཨཏྠེན ཀཱིཊཀུལཱཝཀམཀྐཊཀསུཏྟཱདི སནྟཱནཀཾ ནཱམཱཏི དསྶེནྟོ ཨཱཧ ‘‘སནྟཱནཀ’’ནྟིཨཱདི. ཨུལློཀཏོཏི ཝིཏཱནཏོ. ཏཉྷི ཨུདྡྷཾ ལུཙཱིཡཏེ བནྡྷཱིཡཏེཏི ཨུལློཀནྟི ཝུཙྩཏི, ཙཀཱརསྶ ཀཀཱརམཀཏྭཱ ‘‘ཨུལློཙ’’ནྟིཔི ཝུཙྩཏི. ཏོསདྡེན ཨཱཀཱརསྶ སྨཱཝཙནསྶ ཀཱརིཡབྷཱཝཾ དསྶེཏི. ཨཔཧརིཏབྦནྟི ཨཔནེཏབྦཾ. ‘‘ཨཝཧརིཏབྦ’’ནྟིཔི པཱཋོ, ཧེཊྛཱ ཧརིཏབྦཾ པཱཏེཏབྦནྟི ཨཏྠོ.