ཏཱིཀཱ > ཝིནཡཔིཊཀ (ཊཱིཀཱ) > ཁུདྡསིཀྑཱ-མཱུལསིཀྑཱ

ཏེན བྷིཀྑུནཱ ‘‘ཏིསྶསྶ བྷིཀྑུནོ, ཏིསྶཱཡ བྷིཀྑུནིཡཱ, ཏིསྶསྶ སཱམཎེརསྶ ¶ , ཏིསྶཱཡ སཱམཎེརིཡཱ, ཏིསྶཱཡ སིཀྑམཱནཱཡ སནྟཀཾ པརིབྷུཉྫ ཝཱ ཝིསྶཛྫེཧི ཝཱ ཡཐཱཔཙྩཡཾ ཝཱ ཀརོཧཱི’’ཏི ཝཏྟབྦཾ.

པརམྨུཁཱཝིཀཔྤནེ-ཀསྶནྟིཀེཝམཱིརཡེ;

‘‘ཨིམཾ ཙཱིཝརཾ ཏུཡ྄ཧཾ ཝིཀཔྤནཏྠཱཡ དམྨཱི’’ཏི.

༢༢༧. ཏེན ཝཏྟབྦོ ‘‘ཀོ ཏེ མིཏྟོ ཝཱ སནྡིཊྛོ ཝཱ’’ཏི. ཨིཏརེན ཙེཝཾ ཝཏྟབྦཾ ‘‘ཏིསྶོ བྷིཀྑཱུ’’ཏི ཝཱ ¶ ‘‘ཏིསྶཱ བྷིཀྑུནཱི’’ཏི ཝཱ ‘‘ཏིསྶོ སཱམཎེརོ’’ཏི ཝཱ ‘‘ཏིསྶཱ སཱམཎེརཱི’’ཏི ཝཱ ‘‘ཏིསྶཱ སིཀྑམཱནཱ’’ཏི ཝཱ.

པུན ཏེན ‘‘ཨཧཾ ཏིསྶསྶ ཏིསྶཱཡ ཝཱ དམྨཱི’’ཏི ཝིཀཔྤེཏྭཱ ཏེནེཝ ‘‘ཏིསྶསྶ བྷིཀྑུནོ, ཏིསྶཱཡ བྷིཀྑུནིཡཱ, ཏིསྶསྶ སཱམཎེརསྶ, ཏིསྶཱཡ སཱམཎེརིཡཱ, ཏིསྶཱཡ སིཀྑམཱནཱཡ སནྟཀཾ པརིབྷུཉྫ ཝཱ ཝིསྶཛྫེཧི ཝཱ ཡཐཱཔཙྩཡཾ ཝཱ ཀརོཧཱི’’ཏི པཙྩུདྡྷརིཏབྦཾ.

དཱུརསནྟིཀཏྟེཀཏྟབཧུབྷཱཝཾ ཝིཛཱནིཡ;

‘‘ཨེཏཾ ཨིམ’’ནྟི ‘‘ཨེཏཱནི, ཨིམཱནཱི’’ཏེཏྠ ཡོཛཡེ.

དསཱཧཾ མཱསམེཀཾ ཝཱ, པཉྩ ཝཱ ཀཐིནཏྠཏེ;

པཱརིཔཱུརཏྠམཱུནསྶ, པཙྩཱསཱ སཏི མཱསཀཾ;

ནུཔྤཱདཡཏི ནིསྶགྒིཾ, ནཱདྷིཊྛིཏཝིཀཔྤིཏནྟི.

བྱཏྟསྶ པཉྩཝསྶསྶ, ནཏྠི ནིསྶཡ ཀཱརིཡཾ;

ཡཱཝཛཱིཝམྤི ཨབྱཏྟོ, ནིསྶིཏོཡེཝ ཛཱིཝཏི.

ཨེཀཾསཾ ¶ ཙཱིཝརཾ ཀཏྭཱ, པགྒཎྷིཏྭཱན ཨཉྫལིཾ;

ཨུཀྐུཊིཀཾ ནིསཱིདིཏྭཱ, ཝདེ ཡཱཝཏཏཱིཡཀཾ;

པཀྐནྟེ པཀྑསངྐནྟེ, ཝིབྦྷནྟེ ཝཱཔི ནིསྶཡོ;

མརཎཱཎཏྟུཔཛ྄ཛྷཱཡ-སམོདྷཱནེཧི སམྨཏི.

ནིསྶཱཡ ¶ ན ཝསེལཛྫིཾ, ཨཔུབྦཾ ཋཱནམཱགཏོ;

ཨཱགམེ ཙཏུཔཉྩཱཧཾ, ཉཱཏུཾ བྷིཀྑུསབྷཱགཏཾ.

ཨདྡྷིཀསྶ གིལཱནསྶ, གིལཱནུཔཊྛཀསྶ ཙ;

ཡཱཙིཏསྶ ཨརཉྙེ ཝཱ, སལླཀྑནྟེན ཕཱསུཀཾ;

སབྷཱགེ དཱཡཀེསནྟེ, ཝསིཏུཾ ཏཱཝ ལབྦྷཏཱིཏི.

ཨཀཱཡབནྡྷནོ གཱམཾ, དུཀྐཊཾ པཝིསེཡྻ ཙེ;

བནྡྷེཡྻ ཡཏྠ སརཏི, ཏཏྠེཝཱསཏིཡཱ གཏོ.

པཊྚིཀཱ སཱུཀརནྟནྟི, དུཝིདྷཾ ཀཱཡབནྡྷནཾ;

དུསྶཔཊྚོ ཙ རཛྫུ ཙ, ཨེཀཱ ཏདནུལོམིཀཱ.

མཙྪཀཎྚཀཁཛྫཱུརཱི-པཏྟཱ མཊྛཱ ཙ པཊྚིཀཱ;

ལབྦྷཱ དསཱ ཙཏསྶོཔི, ཨནྟེ དིགུཎསུཏྟཀཾ.

མཱལཱདིཾ ¶ ཀཀྐཊཙྪཱདིཾ, དསྶེཏྭཱ གུཎསུཏྟཀ;

ཀོཊྚིཏཱ ཀུཉྫརཙྪཱདིཾ, པཊྚིཀཱ ན ཙ ཀཔྤཏི.

གྷཊཀཾ མཀརམུཁཱདིཾ, ན ཀཔྤནྟི དསཱམུཁེ;

ཨུབྷནྟེ གྷཊཀཱ ལེཁཱ, ཝིདྷེ ཨཉྙཉྩ ཙིཏྟཀཾ.

དེཌྜུབྷཀཉྩ མུརཛཾ, མདྡཝཱིཎཾ ཀལཱབུཀཾ;

ན ཀཔྤནྟི དསཱསུ དྭེ, མཛ྄ཛྷིམཱཡེཝ ཀཔྤརེ.

ཝེལུ༹དནྟཝིསཱཎཊྛིཀཊྛལཱཁཱཕལཱམཡཱ;

སངྑནཱབྷིམཡཱ སུཏྟནལ༹ལོཧམཡཱཔི ཙ;

ཝིདྷཱ ཀཔྤནྟི ཀཔྤིཡཱ, གཎྛིཡོ ཙཱཔི ཏམྨཡཱཏི.

ཛཱཏཱཛཱཏཱཏི ¶ དུཝིདྷཱ, སུདྡྷམཏྟིཀཔཾསུཀཱ;

ཛཱཏཱདཌྜྷཱ ཙ པཐཝཱི, བཧུམཏྟིཀཔཾསུཀཱ;

ཙཱཏུམཱསཱདྷིཀོཝཊྛཔཾསུམཏྟིཀརཱསི ཙ.

སུདྡྷསཀྑརཔཱསཱཎམརུམྦཀཐལཝཱལུཀཱ;

དཌྜྷཱ ཙ བྷཱུམི ཡེབྷུཡྻསཀྑརཱདིམཧཱིཔི ཙ;

དུཏིཡཱ ཝུཏྟརཱསི ཙ, ཙཱཏུམཱསོམཝཊྛཀོ.

དྭེ ¶ བྷཱགཱ ཏཱིསུ བྷཱགེསུ, མཏྟིཀཱ ཡསྶ བྷཱུམིཡཱ;

ཡེབྷུཡྻམཏྟིཀཱ ཨེསཱ, སེསེསུཔི ཨཡཾ ནཡོ.

པཱཙིཏྟི ཁཎནེ ཛཱཏེ, ཛཱཏསཉྙིསྶ དུཀྐཊཾ;

དྭེལ༹ྷསྶཱཛཱཏསཉྙིསྶ, ནཱཔཏྟཱཎཱཔནེ ཏཐཱ.

པཧཱརེ པཧཱརཱཔཏྟི, ཁཎམཱནསྶ ཨཏྟནཱ;

ཨེཀཱཡཱཎཏྟིཡཱ ཨེཀཱ, ནཱནཱཎཏྟཱིསུ ཝཱཙསོ.

‘‘ཨིམཾ ཋཱནམིམཾ ཀནྡམིདྷ ཝཱཔིཾ ཁཎེཏྠ ཙ;

ཛཱལེཧགྒི’’ནྟི ཝཱ ཝཏྟུཾ, ནིཡམེཏྭཱ ན ཝཊྚཏི.

‘‘ཐམྦྷསྶིམསྶཱཝཱཊཾ ཝཱ, མཏྟིཀཾ ཛཱན མཱཧར;

ཀརོཧི ཀཔྤིཡཉྩེ’’ཏི, ཝཙནཾ ཝཊྚཏེདིསཾ.

ཨསམྦདྡྷཾ པཐཝིཡཱ, སུཀྑཀདྡམཨཱདིཀཾ;

ཀོཔེཏུཾ ཏནུཀཾ ལབྦྷམུསྶིཉྩནཱིཡཀདྡམཾ.

གཎྜུཔྤཱདཾ ཨུཔཙིཀཱམཏྟིཀཾ མཱུསིཀུཀྐིརཾ;

ཙཱཏུམཱསཱདྷིཀོཝཊྛཾ, ལེཌྜཱདིཉྩ ན ཀོཔཡེ.

པཏིཏེ ཝཱཔིཨཱདཱིནཾ, ཀཱུལེ ཨུདཀསནྟིཀེ;

པཱསཱཎེ ཙ རཛེ ལགྒེ, པཏིཏེ ནཝསོཎྜིཡཱ.

ཝམྨིཀེ ¶ མཏྟིཀཱཀུཊྚེ, ཨབྦྷོཀཱསུཊྛིཏེ ཏཐཱ;

ཡེབྷུཡྻཀཐལཊྛཱནེ, ཏིཊྛཏིཊྛཀཀུཊྚཀོ.

ཐམྦྷཱདིཾ ¶ གཎྷིཏུཾ བྷཱུམིཾ, སཉྩཱལེཏྭཱ ཝིཀོཔཡཾ;

དྷཱརཱཡ བྷིནྡིཏུཾ བྷཱུམིཾ, ཀཱཏུཾ ཝཱ ཝིསམཾ སམཾ.

སམྨུཉྫནཱིཧི གྷཾསིཏུཾ, ཀཎྚཀཱདིཾ པཝེསིཏུཾ;

དསྶེསྶཱམཱིཏི བྷིནྡནྟོ, བྷཱུམིཾ ཙངྐམིཏུཾ པདཾ.

གྷཾསིཏུཾ ཨངྒཔཙྩངྒཾ, ཀཎྜུརོགཱི ཏཊཱདིསུ;

ཧཏྠཾ ཝཱ དྷོཝིཏུཾ བྷཱུམིཾ, གྷཾསིཏུཾ ན ཙ ཀཔྤཏི.

ཐམྦྷཱདིཨུཛུཀུདྡྷཱརོ, པཱསཱཎཱདིཔཝཊྚནཾ;

སཱཁཱདིཀཌྜྷནཾ རུཀྑལཏཱཙྪེདནཕཱལནཾ.

སེཀོ པསྶཱཝཨཱདཱིནཾ, སུདྡྷཙིཏྟསྶ ཝཊྚཏི;

ཨལླཧཏྠཾ ཋཔེཏྭཱན, རཛགྒཱཧོ ཙ བྷཱུམིཡཱ.

ཨགྒིསྶ ཨནུཔཱདཱནེ, ཀཔཱལེ ཨིཊྛཀཱཡ ཝཱ;

པཱཏེཏུཾ ལབྦྷཏེ ཨགྒིཾ, བྷཱུམིཡཾ ཝཱཝསེ སཏཱིཏི.

པཉྩཝཎྞེཧི སུཏྟེཧི, ཨནྟོ བཧི ཙ སིབྦིཏུཾ;

གིརིཀཱུཊཌྜྷཙནྡཱདིཾ, ཚཏྟེ པཎྞེ ཙ ཚིནྡིཏུཾ.

གྷཊཀཾ ཝཱལ༹རཱུཔཾ ཝཱ, དཎྜེ ལེཁཱ ན ཝཊྚཏི;

ཝཊྚཏཱི དཎྜབུནྡམྷི, ཨཧིཙྪཏྟཀསཱདིསཾ.

སིབྦིཏུཾ ¶ ཨེཀཝཎྞེན, པཉྫརཾ ཝཱ ཝིནནྡྷིཏུཾ;

ཐིརཏྠཾ ཝཊྚཏཱི ཚཏྟེ, དཎྜེ ལེཁཱཝ བནྡྷིཏུཾ.

ཨནྟེ ¶ པཊྚམུཁེ ཝཱཔི, ཝེཎི སངྑལིཀཱཔི ཝཱ;

སཱུཙིཝིཀཱརམཉྙཾ ཝཱ, ཙཱིཝརེ ན ཙ ཀཔྤཏི;

ཀཔྤབིནྡུཝིཀཱརམྤི, པཱལི༹ཀཎྞིཀཨཱདིཀཾ.

གཎྛིཔཱསཀཔཊྚཱཔི, ཙཏུཀྐོཎཱཝ ཨགྒྷིཡཾ;

མུགྒརོ ཀཀྐཊཙྪཱདི-ཝིཀཱརཾ ནེཏྠ ཝཊྚཏི.

ཀོཎསུཏྟཱ ཙ པཱིལ༹ཀཱ, དུཝིཉྙེཡྻཱཝ ཀཔྤརེ;

གནྡྷཾ ཏེལཾ ཝ ལཱཁཾ ཝཱ, རཛནེ ན ཙ པཀྑིཔེ.

རཏྟཾ སངྑེན མཎིནཱ, གྷཊྚེཡྻཉྙེན ཝཱ ན ཙ;

གྷཾསེཡྻ དོཎིཡཾ ཀཏྭཱ, པཧཱརེ ན ཙ མུཊྛིནཱ.

ཀཎྞཀོཎཀསུཏྟཱནི, རཏྟེ ཚིནྡེཡྻ ཙཱིཝརེ;

ལེཁཱ ན ཝཊྚཏཱི དྷམྨ-ཀརཎེ ཚཏྟཝཊྚིཡཾ.

ལེཁཾ ཋཔེཏྭཱ མཎིཀཱ, པཱིལ༹ཀཱ ཀུཉྩིཀཱཡ ཙ;

པིཔྥལེ ཙ པརིཙྪེད-ལེཁཱ དཎྜམྷི ཝཊྚཏི.

མཱལཱདྱརཎིཡཾ པཏྟ-མཎྜལེ བྷིཏྟིཀམྨ ཙ;

ཧེཊྛཱ ལེཁཱདྭཡཾ ཨུདྡྷཾ, ཨཧིཙྪཏྟཀསཱདིསཾ.

ཧིཏྭཱ ཀཏྟརཡཊྛིམྷི, སཱུཙིསཎྜཱསཀེཔི ཙ;

ཡཾ ཀིཉྩི གིརིཀཱུཊཱདི-ཝཎྞམཊྛཾ ན ཝཊྚཏི.

བིམྦོཧནེ ¶ བྷིསིམཉྩ-པཱིཋཱདིསཡནཱསནེ;

སམྨུཉྫནིམྷི སངྐཱར-ཚཌྜནེ རངྒབྷཱཛནེ.

པཱནཱིཡབྷཱཛནེ པཱད-པཱིཋེ ཀཐལིཀཱཡ ཙ;

པཏྟཱདྷཱརཔིདྷཱནེསུ, ཏཱལཝཎྚེ ཙ བཱིཛནེ;

ཡཾ ཀིཉྩི མཱལཱཀམྨཱདི-ཝཎྞམཊྛམཝཱརིཏཾ.

སེནཱསནེ པན དྭཱརཀཝཱཊཱདིཔྤབྷེདནེ;

སོཝཎྞམཡནུཉྙཱཏཾ, ཝཎྞམཊྛམྷི ཀཱ ཀཐཱ.

ཝིསཱཎནཱལི༹ལཱབྭཱདིཔྤབྷེདེ ¶ ཏེལབྷཱཛནེ;

པུམིཏྠིརཱུཔརཧིཏཾ, ཝཎྞམཊྛམཝཱརིཏནྟི.

ཛནསྶ ཀཱཏུཾ བྷེསཛྫཾ, དཱཏུཾ ཝཏྟུཾ ན ལབྦྷཏི;

བྷིཀྑཱཙརིཡཝིཉྙཏྟི, སཀེཧི སཧདྷམྨིནཾ.

པིཏཱུནཾ ཏདུཔཊྛཱཀབྷིཀྑུནིསྶིཏབྷཎྜུནཾ;

ལབྦྷཾ བྷེསཛྫཀརཎཾ, ཝེཡྻཱཝཙྩཀརསྶ ཙ.

མཧཱཙཱུལ༹པིཏཱམཱཏཱབྷཱཏཱབྷགིནིཨཱདིནཾ;

ཏེསཾ སཀེནཏྟནིཡེ, དཱཏབྦཾ ཏཱཝཀཱལིཀཾ.

ཀུལདཱུསནཝིཉྙཏྟི, བྷེསཛྫཀརཎཱདི ཧི;

མཱཏཱཔིཏཱུཧི སམྦནྡྷཉཱཏཀེསུ ན རཱུཧཏི.

པིཎྜཔཱཏོ ¶ ཨནཱམཊྛོ, མཱཏཱདཱིནམཝཱརིཏོ;

ཚནྣཾ དཱམརིཀཙོརསྶ, དཱཏུམིསྶརིཡསྶ ཙ.

ཏེསཾ སུཏྟོདཀེཧེཝ, པརིཏྟཾ ཀཡིརཱ ནཏྟནོ;

བྷཎིཏབྦཾ བྷཎཱཔེནྟེ, པརིཏྟཾ སཱསནོགདྷཾ.

སཱིལཾ དྷམྨཾ པརིཏྟཾ ཝཱ, ཨཱགནྟྭཱ དེཏུ བྷཱསཏུ;

དཱཏུཾ ཝཏྟུཉྩ ལབྦྷཏི, གནྟྭཱ ཀེནཙི པེསིཏོཏི.

ཀམྨཙེཏིཡསངྒྷཉྙ-པུགྒལཏྠཾ གཎསྶ ཙ;

དསབྷེདམྤི རཏནཾ, ཨུགྒཎྷནྟསྶ དུཀྐཊཾ.

ནིསྶགྒི ¶ ཏེསུ ཨཏྟཏྠཾ, དྭཱིསུ སེསེསུ དུཀྐཊཾ;

ཨནཱམསིཏྭཱ ཝུཏྟེ ཏུ, གཎཾ སངྒྷཉྩ པུགྒལཾ.

‘‘ཙེཏྱསྶ ནཝཀམྨསྶ, དམྨཱི’’ཏི ན པཊིཀྑིཔེ;

ཝདེ ཀཔྤིཡཀཱརཱནཾ, ‘‘ཝདནྟེཝམིམེ’’ ཨིཏི.

ཁེཏྟཾ ཝཏྠུཾ ཏལཱ༹ཀཾ ཝཱ, དེནྟེ དཱསཔསྭཱདིཀཾ;

པཊིཀྑིཔིཏྭཱ གཎྷེཡྻ, ཀཔྤིཡེན ཀམེན ཙ;

ཁེཏྟཱདཱིནི ཝིཧཱརསྶ, ཝུཏྟེ དམྨཱིཏི ཝཊྚཏི.

ནཝམཱཏིཀཀེདཱར-ཏལཱ༹ཀཀིརིཡཱནཝེ;

མཏྟིཀུདྡྷརཎཾ བནྡྷོ, ཐིརཀཱརོ ཙ ཨཱལི༹ཡཱ.

ཏིརེཀབྷཱགགཧཎཾ ¶ , ཀེདཱརེ ཨནཝེ ནཝེ;

ཨཔརིཙྪནྣབྷཱགེ ཙ, སསྶེ ‘‘དེཐེཏྟཀེ’’ ཨིཏི;

ཀཧཱཔཎུཊྛཱཔནཉྩ, སབྦེསམྤི ཨཀཔྤིཡཾ.

ཨཝཏྭཱ ཀས ཝཔྤིཙྩཱདེཏྟིཀཱཡ ཙ བྷཱུམིཡཱ;

པཏིཊྛཱཔེཏི བྷཱུམིཾ ཝཱ, བྷཱགོ དེཡྻོཏི ཨེཏྟཀོ.

བྷཱུམིབྷཱགེ ཀཏཾ སསྶཾ, ཨེཏྟཀེ གཎྷཐེཏྟཀཾ;

གཎྷནཏྠཾ ཝདནྟེཝཾ, པམཱཎཾ དཎྜརཛྫུབྷི.

མིནནེ རཀྑཎེ ཋཏྭཱ, ཁལེ ཏཾནཱིཧརཱཔནེ;

ཀོཊྛཱདིཔཊིསཱམནེ, ཏསྶེཝེཏམཀཔྤིཡཾ.

པཊིསཱམེཡྻ པཱཙིཏྟི, ཡཾ ཀིཉྩི གིཧིསནྟཀཾ;

བྷཎྜཱགཱརིཀསཱིསེན, སཙེཔི པིཏུསནྟཀཾ.

པིཏཱུནཾ ཀཔྤིཡཾ ཝཏྠུཾ, ཨཝསྶཾ པཊིསཱམིཡཾ;

ཨཏྟནོ སནྟཀཾ ཀཏྭཱ, ལབྦྷཏེ པཊིསཱམིཏུཾ.

དེཧཱིཏི པཊིསཱམེཏྭཱ, ཝུཏྟེ ཙཱཔི པཊིཀྑིཔེ;

པཱཏེཏྭཱན གཏེ ལབྦྷཾ, པལིབོདྷོཏི གོཔིཏུཾ.

ཀམྨཾ ¶ ཀརོནྟོ ཨཱརཱམེ, སཀཾ ཝཌྜྷཀིཨཱདཡོ;

པརིཀྑཱརཉྩ སཡན-བྷཎྜཾ ཝཱ རཱཛཝལླབྷཱ.

དེཧཱིཏི པཊིསཱམེཏྭཱ, ཝདནྟི ཡདི ཚནྡཏོ;

ན ཀརེཡྻ བྷཡཱ ཋཱནཾ, གུཏྟཾ དསྶེཏུ ཝཊྚཏི.

བལཀྐཱརེན ¶ པཱཏེཏྭཱ, གཏེསུ པཊིསཱམིཏུཾ;

བྷིཀྑུཾ མནུསྶཱ སངྐནྟི, ནཊྛེ ཝཏྠུམྷི ཏཱདིསེ.

ཝིཧཱརཱཝསཐསྶནྟོ, རཏནཾ རཏྣསམྨཏཾ;

ནིཀྑིཔེཡྻ གཧེཏྭཱན, མགྒེརཉྙེཔི ཏཱདིསེ;

སཱམིཀཱནཱགམཾ ཉཏྭཱ, པཏིརཱུཔཾ ཀརཱིཡཏཱིཏི.

པུཔྥཾ ཝེལུ༹ཾ ཕལཾ ཙུཎྞཾ, དནྟཀཊྛཉྩ མཏྟིཀཾ;

སངྒཧཎཏྠཾ དདཏོ, ཀུལདཱུསནདུཀྐཊཾ.

ཐུལླཙྩཡཾ གརུབྷཎྜཾ, ཨིསྶརེནེཏྠ སངྒྷིཀཾ;

དེནྟསྶ དུཀྐཊཱདཱིནི, ཐེཡྻཱ སངྒྷཉྙ སནྟཀཾ.

ཀུལསངྒཧཱ རོཔེཏུཾ, རོཔཱཔེཏུཉྩ སབྦཐཱ;

ཕལཔུཔྥཱུཔགཾ རུཀྑཾ, ཛགྒིཏུཉྩ ན ཝཊྚཏི.

ནིམིཏྟོབྷཱསཏོ ཀཔྤཝོཧཱརཔརིཡཱཡཏོ;

ཨཏྟནོ པརིབྷོགཏྠཾ, རོཔནཱདཱིནི ལབྦྷརེ.

ཝུཏྟཱཝ ཝེཛྫིཀཱ ཛངྒྷཔེསནེ གིཧིཀམྨསུ;

ཋཔེཏྭཱ པིཏརོ བྷཎྜུཾ, ཝེཡྻཱཝཙྩཀརཾ སཀཾ.

དུཀྐཊཾ པདཝཱརེན, ཧརཎེ དཱུཏསཱསནཾ;

སཱསནཾ ཨགྒཧེཏྭཱཔི, པཋམཾ ཝདཏོ པུན.

ཨུཔྤནྣཔཙྩཡཱ ¶ ¶ ཨེཝཾ, པཉྩནྣམྤི ཨཀཔྤིཡཱ;

ཨབྷཱུཏཱརོཙནཱརཱུཔ-སཾཝོཧཱརུགྒཧཱདིསཱ.

ཧརཱཔེཏྭཱ ཧརིཏྭཱཔི, པིཏཱུནཾ སེསཉཱཏིནཾ;

པཏྟཱནཾ ཝཏྠུཔཱུཛཏྠཾ, དཱཏུཾ པུཔྥཱནི ལབྦྷཏི;

མཎྜནཏྠཉྩ ལིངྒཱདི-པཱུཛཏྠཉྩ ན ལབྦྷཏི.

ཏཐཱ ཕལཾ གིལཱནཱནཾ, སམྤཏྟིསྶརིཡསྶ ཙ;

པརིབྦཡཝིཧཱིནཱནཾ, དཱཏུཾ སཔརསནྟཀཾ.

བྷཱཛེནྟེ ཕལཔུཔྥམྷི, དེཡྻཾ པཏྟསྶ ཀསྶཙི;

སམྨཏེནཱཔལོཀེཏྭཱ, དཱཏབྦམིཏརེན ཏུ.

ཝིཧཱརེ ཝཱ པརིཙྪིཛྫ, ཀཏྭཱན ཀཏིཀཾ ཏཏོ;

དེཡྻཾ ཡཐཱཔརིཙྪེདཾ, གིལཱནསྶེཏརསྶ ཝཱ;

ཡཱཙམཱནསྶ ཀཏིཀཾ, ཝཏྭཱ རུཀྑཱཝ དསྶིཡཱ.

སིརཱིསཀསཝཱདཱིནཾ, ཙུཎྞེ སེསེ ཙ ནིཙྪཡོ;

ཡཐཱཝུཏྟནཡོ ཨེཝ, པཎྞམྤེཏྠ པཝེསཡེཏི.

པུརིམིཀཱ པཙྪིམིཀཱ, དུཝེ ཝསྶཱུཔནཱཡིཀཱ;

ཏཏྠཱལཡཔརིགྒཱཧོ, ཝཙཱིབྷེདོ ཙ ཨེདིསོ.

‘‘ཨིམསྨིཾ ¶ ཝིཧཱརེ ཨིམཾ, ཏེམཱསཾ ཝསྶཾ ཨུཔེམི;

ཨིདྷ ཝསྶཾ ཨུཔེམཱི’’ཏི, ཙིཏྟུཔྤཱདེཏྠ ཨཱལཡོ.

ནོཔེཏུཀཱམོ ཨཱཝཱསཾ, ཏདཧཱུཏིཀྐམེཡྻ ཝཱ;

བྷཝེཡྻ དུཀྐཊཱཔཏྟི, ཛཱནཾ ཝཱནུཔགཙྪཏོ.

དུཏིཡཾ ¶ ཨུཔགཙྪེཡྻ, ཚིནྣཝསྶོནུཔཱགཏོ;

ན པཀྐམེཡྻ ཏེམཱསཾ, ཨཝསིཏྭཱན ཙཱརིཀཾ.

མཱཏཱཔིཏཱུནམཏྠཱཡ, པཉྩནྣཾ སཧདྷམྨིནཾ;

གིལཱནཏདུཔཊྛཱཀ-བྷཏྟམེསིསྶམོསདྷཾ.

པུཙྪིསྶཱམི ཨུཔཊྛིསྶཾ, གནྟྭཱནབྷིརཏཾ ཨཧཾ;

ཝཱུཔཀཱསིསྶཾ ཀུཀྐུཙྩཾ, དིཊྛིཾ གརུཀམཱདིཀཾ.

ཀརིསྶཾ ཝཱཔི ཀཱརེསྶཾ, ཝིནོདནཾ ཝིཝེཙནཾ;

ཝུཊྛཱནཾ ཝཱཔི ཨུསྶུཀྐཾ, གནྟུམིཙྩེཝམཱདིནཱ;

ལབྦྷཾ སཏྟཱཧཀིཙྩེན, པཧིཏཱཔཧིཏེཔི ཝཱ.

སངྒྷཀམྨེ ཝཛེ དྷམྨ-སྶཝནཏྠཾ ནིམནྟིཏོ;

གརཱུཧི པཧིཏོ ཝཱཔི, གརཱུནཾ ཝཱཔི པསྶིཏུཾ.

ན བྷཎྜདྷོཝནུདྡེས-ཉཱཏུཔཊྛཱཀདསྶནེ;

ལབྦྷཾ ན པཱཔུཎེཡྻཛྫེ-ཝཱགམིསྶནྟུདཱུརགོ.

སེསཉཱཏཱིཧི པཧིཏེ, བྷིཀྑུནིསྶིཏཀེན ཙ;

ཨུཔཱསཀོཔཱསིཀཱཧི, ནིདྡིསིཏྭཱཝ པེསིཏེ.

ཝསྶཙྪེདེ ¶ ཨནཱཔཏྟི, ཨནྟརཱཡེ སཏཏྟནོ;

སངྒྷསཱམགྒིཡཱ ཝཱ ནོ, ཚིནྣཝསྶོ པཝཱརཡེ.

ཨཛ྄ཛྷོཀཱསེ ཙ རུཀྑསྶ, སུསིརེ ཝིཊཔེཔི ཝཱ;

ཚཝཀུཊིཚཏྟཙཱཊཱི-སཱུཔགནྟུཾ ན ཝཊྚཏི.

ཨསེནཱསནིཀེནཱཔི, ཨུཔགནྟུཾ ན ལབྦྷཏི;

པཝཱརེཏུཉྩ ལབྦྷཏི, ནཱཝཱསཏྠཝཛཱུཔགོཏི.

ཨཱརཱམཱརཱམཝཏྠཱུནི, ཝིཧཱརོ ཏསྶ ཝཏྠུ ཙ;

མཉྩོ པཱིཋཾ བྷིསི བིབྦོ-ཧནཱདིསཡནཱསནཾ.

ཝལླི ཝེལུ༹ ཏིཎཾ པཎྞཾ, མུཉྫཔབྦཛམཏྟིཀཱ;

དཱརུམཏྟིཀབྷཎྜཱནི, པཉྩེཏེ ཨཝིབྷཱཛིཡཱ.

ཐུལླཙྩཡཾ བྷཱཛཡཏོ, བྷཱཛིཏཱཔི ཨབྷཱཛིཏཱ;

གརུབྷཎྜཱནི ཝུཙྩནྟི, ཨེཏེཝིསྶཛྫིཡཱནི ཙ.

ཝལླིཌྜྷབཱཧུམཏྟཱཔི ¶ , ཝེལུ༹ ཨཊྛངྒུལཱཡཏོ;

ཏིཎཱདི མུཊྛིམཏྟམྤི, པཎྞཾ ཨེཀམྤི མཏྟིཀཱ.

པཱཀཏཱ པཉྩཝཎྞཱ ཝཱ, སུདྷཱཀངྒུཊྛ ཨཱདིཀཱ;

ཏཱལཔཀྐཔྤམཱཎཱཔི, དིནྣཱ ཝཱ ཏཏྠཛཱཏཀཱ.

རཀྑིཏཱ སངྒྷིཀཱ རཛྫུ-ཡོཏྟཱདཱིཔི ཨབྷཱཛིཡཱ;

ནིཊྛིཏེ བྷཱཛིཡཱ ཀམྨེ, སངྒྷིཀེ ཙེཏིཡསྶ ཝཱ.

པཏྟཱདི བྷིཀྑུསཱརུཔྤཾ, ཏཐཱ ཝིཔྤཀཏཱཀཏཾ;

བྷཱཛིཡཾ ལོཧབྷཎྜེསུ, ཝཱརཀཾ པཱདགཎྷཀཾ.

ཝེལུ༹མྷི བྷཱཛིཡཱ ཏེལ-ནཱལི༹ ཀཏྟརདཎྜཀོ;

ཨནུཉྙཱཏཝཱསིདཎྜོ, ཀརཎྜོ པཱདགཎྷཀོ;

ཨརཎཉྫནིསིངྒཱདི, བྷིཀྑཱུཔཀརཎཾ ཏཐཱ.

ཏཙྪིཏཱནིཊྛིཏཾ དཱརུབྷཎྜཾ དནྟཉྩ བྷཱཛིཡཾ;

བྷིཀྑཱུཔཀརཎེ པཱདགྷཊཀོ མཏྟིཀཱམཡོ.

བྷཱཛིཡཾ ཀཔྤིཡཾ ཙམྨཾ, ཨེལ༹ཙམྨམབྷཱཛིཡཾ;

གརུནཱ གརུབྷཎྜཉྩ, ཐཱཝརཾ ཐཱཝརེན ཙ.

ཐཱཝརཾ ¶ པརིཝཏྟེཡྻ, ཏཐཱ ཀཏྭཱ ཙ བྷུཉྫཏུ;

ཝལླཱདིཾ ཕཱཏིཀམྨེན, གཎྷེ སེསམབྷཱཛིཡནྟི.

སདྭཱརབནྡྷནེ ཋཱནེ, སོདུཀྑལཀཔཱསཀེ;

སཡནྟེན དིཝཱ དྭཱརཾ, བནྡྷེཡྻ པརིཝཊྚཀཾ.

སནྟེ ཝིཉྙུམྷི པུརིསེ, ཨཱབྷོགོ ཙཱཔི ཀཔྤཏི;

སཝསེ ཏཾ ཝིནཱཀཱརཾ, སཡནྟོ དུཀྐཊཾ ཕུསེ.

རཏནཱནིཏྠིརཱུཔཱནི, དྷཉྙམིཏྠིཔསཱདྷནཾ;

ཏཱུརིཡཱཝུདྷབྷཎྜཱནི, ཨཱམསནྟསྶ དུཀྐཊཾ.

སིཏྠཏེལོདཏེལེཧི, ཕཎཧཏྠཕཎེཧི ཝཱ;

ཀོཙྪེནཝཱཔི ཡོ ཀེསེ, ཨོསཎྛེཡྻསྶ དུཀྐཊཾ.

ནེཀཔཱཝུརཎཱ ཨེཀཏྠརཎཱ ཝཱ ཏུཝཊྚཡུཾ;

ཏཐེཀམཉྩེ བྷུཉྫེཡྻུཾ, ཨེཀསྨིཾ ཝཱཔི བྷཱཛནེ.

ཙཏུརངྒུལཏོ ཨཱུནམདྷིཀཊྛངྒུལཾ ཏཐཱ;

དནྟཀཊྛཾ ན ཁཱདེཡྻ, ལསུཎཾ ན ཨཀལླཀོ.

ཧཱིནུཀྐཊྛེཧི ཨུཀྐཊྛཾ, ཧཱིནཾ ཝཱ ཛཱཏིཨཱདིཧི;

ཨུཛུཾ ཝཱཉྙཱཔདེསེན, ཝདེ དུབྦྷཱསིཏཾ དཝཱ.

དཱིགྷེ ནཁེ ཙ ཀེསེ ཙ, ནཱསལོམེ ན དྷཱརཡེ;

ན ལབྦྷཾ ཝཱིསཏིམཊྛཾ, སམྦཱདྷེ ལོམཧཱརཎཾ.

ཡཐཱཝུཌྜྷཾ ན བཱདྷེཡྻ, སངྒྷུདྡིཊྛཾཝ སངྒྷིཀཾ;

སུདྷོཏཔཱདཀཾ ཝཱཔི, ཏཐེཝ སཨུཔཱཧནོ.

སངྒྷཱཊིཡཱ ¶ ¶ ན པལླཏྠེ, བྷིཏྟཱདིཾ ན ཨཔསྶཡེ;

པརིཀམྨཀཏཾ སནྟེ, ཨུདཀེ ནོ ན ཨཱཙམེ.

ཨཀཔྤིཡསམཱདཱནེ, དཝཱ སིལཱཔཝིཛ྄ཛྷནེ;

དེསནཱཡ སབྷཱགཱཡ, ཨཱཝིཀམྨེ ཙ དུཀྐཊཾ.

པཊིསྶཝཝིསཾཝཱདེ, སུདྡྷཙིཏྟསྶ དུཀྐཊཾ;

པཊིསྶཝཀྑཎེ ཨེཝ, པཱཙིཏྟི ཨིཏརསྶ ཏུ.

ན རུཀྑམབྷིརཱུཧེཡྻ, སཏི ཀིཙྩེཝ པོརིསཾ;

ཨཱཔདཱསུ ཡཐཱཀཱམཾ, ཀཔྤཏཱི ཨབྷིརཱུཧིཏུཾ.

ཝིནཱདྡྷཱནཾ ཝཛནྟསྶ, དུཀྐཊཾ པརིསཱཝནཾ;

ཡཱཙམཱནསྶ ཨདྡྷཱནེ, ཨདདནྟསྶ དུཀྐཊཾ.

ཐུལླཙྩཡཾ ཕུསེ ཨངྒཛཱཏཙྪེདེན དུཀྐཊཾ;

ཨཱབཱདྷཔྤཙྩཡཱཉྙཏྲ, སེསངྒེ ཨཏྟགྷཱཏནེ.

ཙིཏྟཔོཏྠཀརཱུཔཱནི, ན ཀརེ ན ཙ ཀཱརཡེ;

ན ཝུཊྛཱཔེཡྻ བྷུཉྫནྟཾ, ཨཱརཱམཱརཉྙགེཧསུ.

ཡཱནཱནི པུམཡུཏྟཱནི, སིཝིཀཾ ཧཏྠཝཊྚཀཾ;

པཱཊངྐིཉྩ གིལཱནསྶ, ཀཔྤཏཱི ཨབྷིརཱུཧིཏུཾ.

བུདྡྷཾ དྷམྨཉྩ སངྒྷཉྩ, ཨཱརབྦྷ ཀརཎེ དཝཾ;

དུཀྐཊཾ པརིསཾ ཝཱཔི, ཨཉྙསྶ ཨུཔལཱལ༹ནེ.

ཀཱཡཾ ¶ ཨཱུརུཾ ནིམིཏྟཾ ཝཱ, བྷིཀྑུནཱིནཾ ན དསྶཡེ;

ཝིཝརིཏྭཱ ན སིཉྩེཡྻ, ཏཱ ཀདྡམུདཀཱདིནཱ.

ན གཎྷཏོ ཙ ཨོཝཱདཾ, ན པཙྩཱཧརཏོཔི ཙ;

བཱལཾ གིལཱནཾ གམིཡཾ, ཝཛྫཡིཏྭཱན དུཀྐཊཾ.

ལོཀཱཡཏཾ ན ཝཱཙེཡྻ, པལིཏཾ ན ཙ གཱཧཡེ;

པེལཱ༹ཡཔི ན བྷུཉྫེཡྻ, ན ཀཱིལེ༹ ཀིཉྩི ཀཱིལི༹ཏཾ.

པཱརུཔེ ¶ ན ནིཝཱསེཡྻ, གིཧིཔཱརུཏནིཝཱསནཾ;

སཾཝེལླིཡཾ ནིཝཱསེཡྻ, དཱཡཾ ནཱལིམྤཡེཡྻ ཝཱ.

ཝཌྜྷིཾ པཡོཛཡེ ཡཱཙེ, ནོཉྙཱཏཀཔྤཝཱརིཏེ;

ཨཏྟནོ པརིབྷོགཏྠཾ, དིནྣམཉྙསྶ ནོ དདེ;

ཨགྒཾ གཧེཏྭཱ བྷུཏྭཱ ཝཱ, ཀཏིཔཱཧཾ པུནོ དདེ.

ཨུདྡིསྶ ཡཱཙནེ རཀྑཾ, ཉཏྭཱཉཏྭཱ ཝ དཎྜིནཾ;

གཱིཝཱསྶ དཎྜིཏེ དཎྜོ, སཡཾ དཎྜཱཔནེ པན;

དཎྜསྶ ཨགྒྷབྷེདེན, ཉེཡྻཱ པཱརཱཛིཀཱདིཀཱ.

ཧརནྟེསུ པརིཀྑཱརཾ, ‘‘ཙོརོ ཙོརོ’’ཏི བྷཱསིཏེ;

ཨནཏྠཱཡེསཾ གཎྷནྟེ, དཎྜཾ གཱིཝཱསྶ ཏཏྟཀཾ.

ཝིགྷཱསུཙྩཱརསངྐཱར-མུཏྟཾ ཚཌྜེཡྻ དུཀྐཊཾ;

བཧི པཱཀཱརཀུཊྚཱནཾ, ཝལ༹ཉྫེ ནཱཝལོཀིཡ;

ཧརིཏེ ཝཱཔི ཝཱིཧཱདི-ནཱལི༹ཀེརཱདིརོཔིམེ.

ཡོཛཱཔེཏུཾ ¶ པཡོཛེཏུཾ, པཡུཏྟཱནི ཙ པསྶིཏུཾ;

ན ལབྦྷཾ དྷམྨཡུཏྟམྤི, ནཙྩཾ གཱིཏཉྩ ཝཱདིཏཾ;

‘‘ཨུཔཧཱརཾ ཀརོམཱ’’ཏི, ཝུཏྟེ ཝཱ སམྤཊིཙྪིཏུཾ.

རཱཛཱགཱརཾ པོཀྑརཎིཾ, ཨུཡྻཱནཾ ཙིཏྟགཱརཀཾ;

ཀཱིལ༹ཏྠཾ གཙྪཏོ དཊྛུཾ, ཨཱརཱམཾ དུཀྐཊཾ ཀཏཾ.

ནཝེ ན པཊིབཱཧེཡྻཱ-སནེནུཎྷེ ན ཙཱིཝརཾ;

ནིདཧེཡྻ ཁམཱཔེཡྻ, གརུནཱ ཙ པཎཱམིཏོ.

ཨཀྐོསནེ པརམྨུཁཱ, ཨཱཔཏྟཱིཧི ཙ སཏྟཧི;

བྷིཀྑུཾ ཨུཔཱསཀཾ ཝཱཔི, ཨཉྙེནེཝ ཙ དུཀྐཊཾ.

ན ལབྦྷཾ ཝིནིཔཱཏེཏུཾ, སདྡྷཱདེཡྻཉྩ ཙཱིཝརཾ;

ལབྦྷཾ པིཏཱུནཾ སེསཱནཾ, ཉཱཏཱིནམྤི ན ལབྦྷཏི.

ཝསྶཾཝུཏྠོཉྙཏོཉྙཏྲ ¶ , བྷཱགཾ གཎྷེཡྻ དུཀྐཊཾ;

པཊིདེཡྻ ནཊྛེ ཛིཎྞེ, གཱིཝཱ ནོ དེཡྻ ཙོདིཏོ;

དྷུརནིཀྑེཔཏོ ཏེསཾ, ཧོཏི བྷཎྜགྒྷཀཱརིཡོ.

ན སནྟརུཏྟརོ གཱམཾ, ཀལློ ཝཱ སཨུཔཱཧནོ;

པཝིསེཡྻ ན དྷཱརེཡྻ, ཙཱམརཱིམཀསབཱིཛནིཾ.

ཨགིལཱནོ ན ཚིནྡེཡྻ, ཀེསེ ཀཏྟརིཡཱ བཧི;

ཨཱརཱམཏོ ན དྷཱརེཡྻ, ཚཏྟཾ ལབྦྷཏི གུཏྟིཡཱ.

གཱཧེཡྻ ནུབྷཏོཀཱཛཾ, ཨེཀནྟརིཀཀཱཛཀཾ;

སཱིསཀྑནྡྷཀཊིབྷཱརཱ, ཧཏྠོལམྦོ ཙ ལབྦྷཏི.

ཨཱཔཏྟིཡཱ ¶ ཨནོཀཱས-ཀཏཾ ཙོདེཡྻ དུཀྐཊཾ;

སུདྡྷསྶ ཙ ཨཝཏྠུསྨིཾ, ཏཐཱ ཨོཀཱསཀཱརཎེ.

ཨཊྛངྒུལཱདྷིཀཾ མཉྩཔཊིཔཱདཾ ན དྷཱརཡེ;

པཀཏངྒུལེན སཏྟཱནཾ, མཉྩཾ ཝཱ ཨུཙྩཔཱདཀཾ.

མཱུགབྦཏཱདིཾ གཎྷེཡྻ, དུཀྐཊཾ ཏིཏྠིཡབྦཏཾ;

ཁུརབྷཎྜཾ པརིཧརེ, ཏཐཱ ནྷཱཔིཏཔུབྦཀོ.

ཡཾ ཀིཉྩི ཡཱཙིཏུཾ ཧཏྠཀམྨཾ ཏདནུསཱརཏོ;

ལདྡྷཾ གཧེཏུཾ ནིཀྐམྨམཡཱཙིཏྭཱཔི ཀཔྤཏི;

ཀཱརེཏུམཱཧརཱཔེཏུཾ, ཡཾ ཀིཉྩིཔརསནྟཀཾ.

གིཧཱིནཾ གོཔཀེ དེནྟེ, གཧེཏུཾ དེཏི ཡཏྟཀཾ;

ལབྦྷཾ ཡཐཱཔརིཙྪེདཾ, སངྒྷཙེཏིཡསནྟཀེ.

དྭཱིཧཱཔཛྫེཡྻ ཨཱཔཏྟིཾ, ཀཱཡཝཱཙཱཧི ཝཱ ཚཧི;

ཨལཛྫིཉྙཱཎཀུཀྐུཙྩཔཀཏཏྟཱ སཏིཔླཝཱ;

ཨཀཔྤིཡེ ཝཱ ཀཔྤིཡེ, ཀཔྤཱཀཔྤིཡསཉྙིཏཱ.

ཨལཛྫིཉྙཱཎཏཱཔཏྟིཾ ¶ , ཀཱཡཝཱཙཱཧི ཚཱདཡེ;

ལིངྒེ སངྒྷེ གཎེཀསྨིཾ, ཙཏུདྷཱཔཏྟིཝུཊྛིཏི.

པརིཀཐོབྷཱསཝིཉྙཏྟི, ན ལབྦྷཱ པཙྩཡདྭཡེ;

ཝིཉྙཏྟིཡེཝ ཏཏིཡེ, སེསེ སབྦམྤི ལབྦྷཏི.

ན རཱུཧཏཙྩཡེ དཱནཾ, པཉྩནྣཾ སཧདྷམྨིནཾ;

སངྒྷསྶེཝ ཙ ཏཾ ཧོཏི, གིཧཱིནཾ པན རཱུཧཏི.

བྷིཀྑུ ¶ ཝཱ སཱམཎེརོ ཝཱ, ཀཱལཾ ཀཡིརཱཐཱུཔསྶཡེ;

བྷིཀྑུསངྒྷོཝ དཱཡཛྫོ, ཏཏྠ སེསེཔྱཡཾནཡོ.

པུརིམསྶེཝིམཾ དིནྣཾ, དེཧི ནེཏྭཱསུཀསྶཏི;

པཙྪིམསྶེཝ དམྨཱིཏི, དིནྣཾ ཉཏྭཱ ཨིམཾ ཝིདྷིཾ;

གཎྷེ ཝིསྶཱསགཱཧཾ ཝཱདྷིཊྛེ མཏཀཙཱིཝརཾ.

ལོཧབྷཎྜེ པཧརཎིཾ, དཱརུབྷཎྜེ ཙ དཱརུཛཾ;

པཏྟཾ པཱདུཀཔལླངྐཾ, ཨཱསནྡིཾ མཏྟིཀཱམཡེ;

ཋཔེཏྭཱ ཀཔྤཏི སབྦཾ, ཀཏཀཾ ཀུམྦྷཀཱརིཀནྟི.

ཙཱགོ ཡོ བྷིཀྑུབྷཱཝསྶ, སཱ པཱརཱཛིཀདེསནཱ;

ཡཐཱཝུཏྟེན ཝུཊྛཱནཾ, གརུཀཱཔཏྟིདེསནཱ.

ཨུཀྐུཊིཀཾ ནིསཱིདིཏྭཱ, པགྒཎྷིཏྭཱན ཨཉྫལིཾ;

ཐུལླཙྩཡཱདིཾ དེསེཡྻ, ཨེཝམེཀསྶ སནྟིཀེ.

༣༨༤. ‘‘ཨཧཾ, བྷནྟེ, ཨེཀཾ ཐུལླཙྩཡཱཔཏྟིཾ ཨཱཔཛྫིཾ, ཏཾ ཏུམྷམཱུལེ པཊིདེསེམཱི’’ཏི ཝཏྭཱ ཏེན ‘‘པསྶསི, ཨཱཝུསོ, ཏཾ ཨཱཔཏྟི’’ནྟི ཝུཏྟེ ‘‘ཨཱམ, བྷནྟེ, པསྶཱམཱི’’ཏི ཝཏྭཱ པུན ཏེན ‘‘ཨཱཡཏིཾ, ཨཱཝུསོ, སཾཝརེཡྻཱསཱི’’ཏི ཝུཏྟེ ‘‘སཱདྷུ སུཊྛུ, བྷནྟེ, སཾཝརིསྶཱམཱི’’ཏི ¶ ཝཏྟབྦཾ. ‘‘ཨཧཾ, བྷནྟེ, དྭེ ཐུལླཙྩཡཱཔཏྟིཡོ ཨཱཔཛྫིཾ, ཨཧཾ བྷནྟེ སམྦཧུལཱ ཐུལླཙྩཡཱཔཏྟིཡོ ཨཱཔཛྫིཾ, ཏཱ ཏུམྷམཱུལེ པཊིདེསེམཱི’’ཏི ཝཏྟབྦཾ.

ནིསྶགྒིཡེསུ པན ‘‘ཨིདཾ མེ, བྷནྟེ, ཙཱིཝརཾ དསཱཧཱཏིཀྐནྟཾ ནིསྶགྒིཡཾ, ཨིམཱཧཾ ཨཱཡསྨཏོ ¶ ནིསྶཛྫཱམཱི’’ཏི. ‘‘ཨིམཱནི མེ, བྷནྟེ, ཙཱིཝརཱནི…པེ… ཨེཏཾ མེ, བྷནྟེ, ཙཱིཝརཾ…པེ… ཨེཏཱནི མེ, བྷནྟེ, ཙཱིཝརཱནི དསཱཧཱཏིཀྐནྟཱནི ནིསྶགྒིཡཱནི, ཨེཏཱནཱཧཾ ཨཱཡསྨཏོ ནིསྶཛྫཱམཱི’’ཏི.

ནིསྶཛྫིཏྭཱན དེསེཡྻ, ཨཱཔཏྟིཾ ཏེན བྷིཀྑུནཱ;

པཊིགྒཧེཏྭཱ ཨཱཔཏྟིཾ, དེཡྻཾ ནིསྶཊྛཙཱིཝརཾ.

‘‘ཨིམཾ, ཨིམཱནི, ཨེཏཾ, ཨེཏཱནི ཙཱིཝརཱནི ཨཱཡསྨཏོ དམྨཱི’’ཏི.

༣༨༦. (ཀ) ཨིདཾ མེ, བྷནྟེ, ཙཱིཝརཾ རཏྟིཝིཔྤཝུཏྠཾ ཨཉྙཏྲ བྷིཀྑུསམྨུཏིཡཱ ནིསྶགྒིཡཾ.

(ཁ) ཨིདཾ མེ, བྷནྟེ, ཨཀཱལཙཱིཝརཾ མཱསཱཏིཀྐནྟཾ ནིསྶགྒིཡཾ.

(ག) ཨིདཾ མེ, བྷནྟེ, པུརཱཎཙཱིཝརཾ ཨཉྙཱཏིཀཱཡ བྷིཀྑུནིཡཱ དྷོཝཱཔིཏཾ ནིསྶགྒིཡཾ.

(གྷ) ཨིདཾ མེ, བྷནྟེ, ཙཱིཝརཾ ཨཉྙཱཏིཀཱཡ བྷིཀྑུནིཡཱ ཧཏྠཏོ པཊིགྒཧིཏཾ ཨཉྙཏྲ པཱརིཝཏྟཀཱ ནིསྶགྒིཡཾ.

(ང) ཨིདཾ མེ, བྷནྟེ, ཙཱིཝརཾ ཨཉྙཱཏཀཾ གཧཔཏིཀཾ ཨཉྙཏྲ སམཡཱ ཝིཉྙཱཔིཏཾ ནིསྶགྒིཡཾ.

(ཙ) ཨིདཾ ¶ མེ, བྷནྟེ, ཙཱིཝརཾ ཨཉྙཱཏཀཾ གཧཔཏིཀཾ ཏཏུཏྟརི ཝིཉྙཱཔིཏཾ ནིསྶགྒིཡཾ.

(ཚ) ཨིདཾ མེ, བྷནྟེ, ཙཱིཝརཾ པུབྦེ ཨཔྤཝཱརིཏོ ཨཉྙཱཏཀཾ གཧཔཏིཀཾ ཨུཔསངྐམིཏྭཱ ཝིཀཔྤཾ ཨཱཔནྣཾ ནིསྶགྒིཡཾ.

(ཛ) ཨིདཾ ¶ མེ, བྷནྟེ, ཙཱིཝརཾ པུབྦེ ཨཔྤཝཱརིཏོ ཨཉྙཱཏཀེ གཧཔཏིཀེ ཨུཔསངྐམིཏྭཱ ཝིཀཔྤཾ ཨཱཔནྣཾ ནིསྶགྒིཡཾ.

(ཛྷ) ཨིདཾ མེ, བྷནྟེ, ཙཱིཝརཾ ཨཏིརེཀཏིཀྑཏྟུཾ ཙོདནཱཡ ཨཏིརེཀཚཀྑཏྟུཾ ཋཱནེན ཨབྷིནིཔྥཱདིཏཾ ནིསྶགྒིཡཾ.

(ཉ) ཨིདཾ མེ, བྷནྟེ, ཀོསིཡམིསྶཀཾ སནྠཏཾ ཀཱརཱཔིཏཾ ནིསྶགྒིཡཾ.

(ཊ) ཨིདཾ མེ, བྷནྟེ, སུདྡྷཀཱལ༹ཀཱནཾ ཨེལ༹ཀལོམཱནཾ སནྠཏཾ ཀཱརཱཔིཏཾ ནིསྶགྒིཡཾ.

(ཋ) ཨིདཾ མེ, བྷནྟེ, སནྠཏཾ ཨནཱདིཡིཏྭཱ ཏུལཾ ཨོདཱཏཱནཾ ཏུལཾ གོཙརིཡཱནཾ ཀཱརཱཔིཏཾ ནིསྶགྒིཡཾ.

(ཌ) ཨིདཾ མེ, བྷནྟེ, སནྠཏཾ ཨཱུནཀཚབྦསྶཱནི ཀཱརཱཔིཏཾ ཨཉྙཏྲ བྷིཀྑུསམྨུཏིཡཱ ནིསྶགྒིཡཾ.

(ཌྷ) ཨིདཾ མེ, བྷནྟེ, ནིསཱིདནསནྠཏཾ ཨནཱདིཡིཏྭཱ པུརཱཎསནྠཏསྶ སཱམནྟཱ སུགཏཝིདཏྠིཾ ཀཱརཱཔིཏཾ ནིསྶགྒིཡཾ.

(ཎ) ཨིམཱནི མེ, བྷནྟེ, ཨེལ༹ཀལོམཱནི ཏིཡོཛནཔརམཾ ཨཏིཀྐཱམིཏཱནི ནིསྶགྒིཡཱནི.

(ཏ) ཨིམཱནི ¶ མེ, བྷནྟེ, ཨེལ༹ཀལོམཱནི ཨཉྙཱཏིཀཱཡ བྷིཀྑུནིཡཱ དྷོཝཱཔིཏཱནི ནིསྶགྒིཡཱནི.

(ཐ) ཨཧཾ, བྷནྟེ, རཱུཔིཡཾ པཊིགྒཧེསིཾ, ཨིདཾ མེ, བྷནྟེ, ནིསྶགྒིཡཾ, ཨིམཱཧཾ སངྒྷསྶ ནིསྶཛྫཱམི.

(ད) ཨཧཾ ¶ , བྷནྟེ, ནཱནཔྤཀཱརཀཾ རཱུཔིཡསཾཝོཧཱརཾ སམཱཔཛྫིཾ, ཨིདཾ མེ, བྷནྟེ, ནིསྶགྒིཡཾ, ཨིམཱཧཾ སངྒྷསྶ ནིསྶཛྫཱམཱིཏི.

ནིསྶཛྫིཏྭཱན ཨཱཔཏྟིཾ, དེསེཡྻཱཐ གིཧིཾ ཝདེ;

‘‘ཛཱནཱཧིམ’’ནྟི ཨིམིནཱ, སོ ཝདེཡྻཱཧརཱམི ཀིཾ.

ཨཝཏྭཱམནྟི ཏེལཱདིཾ, ཝདེ བྷིཀྑཱུན ཀཔྤིཡཾ;

ཡཾ ཨཱཧརཏི སོ ཏེན, པརིཝཏྟེཏྭཱན ཀཔྤིཡཾ.

ལབྦྷཾ ཋཔེཏྭཱ དྭེཔེཏེ, སེསེཧི པརིབྷུཉྫིཏུཾ;

ཏཏོ ཨཉྙེན ལདྡྷོཔི, བྷཱགོ ཏེསཾ ན ཀཔྤཏི.

རུཀྑཙྪཱཡཱཔྱནྟམསོ, ཏནྣིབྦཏྟཱ ན ཀཔྤཏི;

ནིསྶཊྛཾ པཊིལདྡྷམྤི, ཨཱདིཏོ སནྠཏཏྟཡཾ.

ནོ ཙེ ལབྷེཐ ཨེཝཾ སོ, ཨིམཾ ཚཌྜེཧི སཾསིཡོ;

ཨེཝམྤི བྷིཀྑུ ཚཌྜེཡྻ, ནོ ཙེ ལབྷེཐ སམྨཏོ.

ཨེཏཱནི དུཏིཡོ པཏྟོ, སངྒྷེ སེསཱནི ལབྦྷརེ;

སངྒྷེཀསྨིཾ གཎེ ཝཏྟུཾ, ལབྦྷཾ བྷཱསནྟརེནཔི.

༣༩༣. (ཀ) ཨཧཾ, བྷནྟེ, ནཱནཔྤཀཱརཀཾ ཀཡཝིཀྐཡཾ སམཱཔཛྫིཾ, ཨིདཾ མེ, བྷནྟེ, ནིསྶགྒིཡཾ.

(ཁ) ཨཡཾ ¶ མེ, བྷནྟེ, པཏྟོ དསཱཧཱཏིཀྐནྟོ ནིསྶགྒིཡོ.

(ག) ཨཡཾ མེ, བྷནྟེ, པཏྟོ ཨཱུནཔཉྩབནྡྷནེན པཏྟེན ཙེཏཱཔིཏོ ནིསྶགྒིཡོ, ཨིམཱཧཾ སངྒྷསྶ ནིསྶཛྫཱམཱིཏི.

ནིསྶཛྫིཏྭཱན ¶ དེསེཡྻ, ཨཱཔཏྟིཾ པཏྟགཱཧཀཾ;

སམྨནྣིཏྭཱན སངྒྷསྶ, པཏྟནྟཾ ཏསྶ དཱཔཡེ.

༣༩༥. (ཀ) ཨིདཾ མེ, བྷནྟེ, བྷེསཛྫཾ སཏྟཱཧཱཏིཀྐནྟཾ ནིསྶགྒིཡཾ.

(ཁ) ཨིདཾ མེ, བྷནྟེ, ཝསྶིཀསཱཊིཀཙཱིཝརཾ ཨཏིརེཀམཱསེ སེསེ གིམྷཱནེ པརིཡིཊྛཾ, ཨཏིརེཀཌྜྷམཱསེ སེསེ གིམྷཱནེ ཀཏྭཱ པརིདཧིཏཾ ནིསྶགྒིཡཾ.

(ག) ཨིདཾ མེ, བྷནྟེ, ཙཱིཝརཾ བྷིཀྑུསྶ སཱམཾ དཏྭཱ ཨཙྪིནྣཾ ནིསྶགྒིཡཾ.

(གྷ) ཨིདཾ མེ, བྷནྟེ, ཙཱིཝརཾ སཱམཾ སུཏྟཾ ཝིཉྙཱཔེཏྭཱ ཏནྟཝཱཡེཧི ཝཱཡཱཔིཏཾ ནིསྶགྒིཡཾ.

(ང) ཨིདཾ མེ, བྷནྟེ, ཙཱིཝརཾ པུབྦེ ཨཔྤཝཱརིཏོ ཨཉྙཱཏཀསྶ གཧཔཏིཀསྶ ཏནྟཝཱཡེ ཨུཔསངྐམིཏྭཱ ཝིཀཔྤཾ ཨཱཔནྣཾ ནིསྶགྒིཡཾ.

(ཙ) ཨིདཾ མེ, བྷནྟེ, ཨཙྩེཀཙཱིཝརཾ ཙཱིཝརཀཱལསམཡཾ ཨཏིཀྐཱམིཏཾ ནིསྶགྒིཡཾ.

(ཚ) ཨིདཾ མེ, བྷནྟེ, ཙཱིཝརཾ ཨཏིརེཀཚཱརཏྟཾ ཝིཔྤཝུཏྠཾ ཨཉྙཏྲ བྷིཀྑུསམྨུཏིཡཱ ནིསྶགྒིཡཾ.

(ཛ) ཨིདཾ མེ, བྷནྟེ, ཛཱནཾ སངྒྷིཀཾ ལཱབྷཾ པརིཎཏཾ ཨཏྟནོ པརིཎཱམིཏཾ ནིསྶགྒིཡཾ, ཨིམཱཧཾ ཨཱཡསྨཏོ ནིསྶཛྫཱམཱིཏི.

༣༩༦. སེསཾ ¶ སབྦཾ ཡཐཱཡོགཾ, ཨཱདིམྷི ཝིཡ ཡོཛཡེ.

༣༩༧. (ཀ) ཨཧཾ ¶ , བྷནྟེ, ཨེཀཾ པཱཙིཏྟིཡཱཔཏྟིཾ ཨཱཔཛྫིཾ. དྭེ སམྦཧུལཱ པཱཙིཏྟིཡཱཔཏྟིཡོ ཨཱཔཛྫིཾ.

(ཁ) གཱརཡ྄ཧཾ, བྷནྟེ, དྷམྨཾ ཨཱཔཛྫིཾ ཨསཔྤཱཡཾ པཱཊིདེསནཱིཡཾ, ཏཾ པཊིདེསེམཱིཏི. ཏེན ‘‘པསྶསི, ཨཱཝུསོ, ཏཾ དྷམྨ’’ནྟི ཝཏྟབྦཾ.

(ག) ཨཧཾ, བྷནྟེ, ཨེཀཾ དུཀྐཊཱཔཏྟིཾ ཨཱཔཛྫིཾ. དྭེ སམྦཧུལཱ དུཀྐཊཱཔཏྟིཡོ ཨཱཔཛྫིཾ.

(གྷ) ཨཧཾ, བྷནྟེ, ཨེཀཾ དུབྦྷཱསིཏཱཔཏྟིཾ ཨཱཔཛྫིཾ. དྭེ སམྦཧུལཱ དུབྦྷཱསིཏཱཔཏྟིཡོ ཨཱཔཛྫིཾ. ཏཱ ཏུམྷམཱུལེ པཊིདེསེམཱིཏི.

(ང) ‘‘ཨཧཾ, བྷནྟེ, དྭེ ནཱནཱཝཏྠུཀཱ ཐུལླཙྩཡཱཔཏྟིཡོ ཨཱཔཛྫིཾ. སམྦཧུལཱ ནཱནཱཝཏྠུཀཱ ཐུལླཙྩཡཱཔཏྟིཡོ ཨཱཔཛྫིཾ, ཏཱ ཏུམྷམཱུལེ པཊིདེསེམཱི’’ཏི ཝཏྭཱ ཏེན ‘‘པསྶསི, ཨཱཝུསོ, ཏཱ ཨཱཔཏྟིཡོ’’ཏི ཝུཏྟེ ‘‘ཨཱམ, བྷནྟེ, པསྶཱམཱི’’ཏི ཝཏྭཱ པུན ཏེན ‘‘ཨཱཡཏིཾ, ཨཱཝུསོ, སཾཝརེཡྻཱསཱི’’ཏི ཝུཏྟེ ‘‘སཱདྷུ སུཊྛུ, བྷནྟེ, སཾཝརིསྶཱམཱི’’ཏི ཝཏྟབྦཾ.

ཨདེསནཱགཱམིནིཡཾ, ཨནཱཔཏྟིཉྩ དེསིཏཾ;

ནཱནཱ སཾཝཱསནིསྶཱིམཊྛིཏཱནཾ ཙཏུཔཉྩཧི;

མནསཱ པཀཏཏྟཱནཾ, ནཱནེཀཱཏི ན དེསཡེཏི.

བྷེརིཾ གྷཎྚིཾ པཏཱལེ༹ཏྭཱ, ཀམྨཔྤཏྟེ སམཱགཏེ;

སངྒྷེ ཧརེཡྻ ཚནྡཾ ཝཱ, པཱརིསུདྡྷིཾ པཝཱརཎཾ.

ཨེཀཾ ¶ ¶ བྷིཀྑུཾ ཨུཔགྒམྨ, ནིསཱིདིཏྭཱ ཨུཀྐུཊིཀཾ;

ཨཉྫལིཾ པགྒཎྷིཏྭཱན, དདེ ཚནྡཾ ཝིཙཀྑཎོ.

༤༠༡. (ཀ) ‘‘ཚནྡཾ དམྨི, ཚནྡཾ མེ ཧར, ཚནྡཾ མེ ཨཱརོཙེཧཱི’’ཏི ཝཏྟབྦཾ.

(ཁ) པཱརིསུདྡྷིཾ དེནྟེན ‘‘པཱརིསུདྡྷིཾ དམྨི, པཱརིསུདྡྷིཾ མེ ཧར, པཱརིསུདྡྷིཾ མེ ཨཱརོཙེཧཱི’’ཏི ཝཏྟབྦཾ.

པཱརིསུདྡྷིཔྤདཱནེན, སམྤཱདེཏི ཨུཔོསཐཾ;

སངྒྷསྶ ཨཏྟནོ ཙཱཔི, སེསཀམྨཾ ཝིབཱདྷཏི.

ཚནྡདཱནེན སངྒྷསྶ, དྭཡཾ སཱདྷེཏི ནཏྟནོ;

ཏསྨཱ ཚནྡཾ དདནྟེན, དཱཏབྦཱ པཱརིསུདྡྷིཔི.

ཧརེཡྻེཀོ བཧཱུནམྤི, པརམྤརཱ ན ཧཱརཡེ;

པརམྤརཱཧཊཱ ཚནྡ-པཱརིསུདྡྷི ན གཙྪཏི.

༤༠༥. སབྦཱུཔཙཱརཾ ཀཏྭཱན, ཨེཝཾ དེཡྻཱ པཝཱརཎཱ. ‘‘པཝཱརཎཾ དམྨི, པཝཱརཎཾ མེ ཧར, པཝཱརཎཾ མེ ཨཱརོཙེཧི, མམཏྠཱཡ པཝཱརེཧཱི’’ཏི.

༤༠༦. ཨཱརོཙེཏྭཱཐ སོ སངྒྷཾ, པཝཱརེཡྻེཝམཱགཏོ. ‘‘ཨིཏྠནྣཱམོ, བྷནྟེ, སངྒྷཾ པཝཱརེཏི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདཏུ ཏཾ སངྒྷོ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཏཱི’’ཏི.

གཧེཏྭཱ པཱརིསུདྡྷིཾ ཝཱ, ཚནྡཾ ཝཱཔི པཝཱརཎཾ;

ཧཱརཀོ སངྒྷམཔྤཏྭཱ, ཝིབྦྷམེཡྻ མརེཡྻ ཝཱ.

སངྒྷཔྤཏྟོ ¶ པམཏྟོ ཝཱ, སུཏྟོ ནཱརོཙཡེཡྻ ཝཱ;

ཨནཱཔཏྟིཝ སཉྩིཙྩ, ནཱརོཙེནྟསྶ དུཀྐཊནྟི.

དུཝེ ཨུཔོསཐཱ ཙཱཏུ-དྡསོ པནྣརསོ ཨིཏི;

སུཏྟུདྡེསམདྷིཊྛཱན-པཱརིསུདྡྷིཝསཱ ཏཡོ.

སུཏྟུདྡེསོཝ སངྒྷསྶ, ཨདྷིཊྛཱནཨུཔོསཐོ;

པུགྒལསྶེཝ སེསཱནཾ, པཱརིསུདྡྷིཨུཔོསཐོ.

པུབྦཀིཙྩེ ཙ ཀརཎེ, པཏྟཀལླེ སམཱནིཏེ;

སུཏྟཾ ཨུདྡིསཏི སངྒྷོ, པཉྩདྷཱ སོ ཝིབྷཱཝིཏོ.

ཝིནཱནྟརཱཡཾ སངྑེཔེ-ནུདྡེསོ ཝིནིཝཱརིཏོ;

‘‘ཐེརོཝ ཨིསྶརོ དྭཱིསུ, ཨུདྡེསེསྭེཏྠ ཏཱིསུ ཝཱ;

ཝིསདེསཱུ’’ཏི ཝུཏྟཏྟཱ, ཨཝཏྟནྟེཔི ཝཊྚཏི.

ཨཱགཙྪེཡྻུཾ ཡདི སམཱ, ཨུདྡིསནྟེ ཝ ཐོཀིཀཱ;

ཨུདྡིཊྛཾ ཡཾ སུཨུདྡིཊྛཾ, སོཏབྦམཝསེསཀཾ.

ཨུདྡིཊྛམཏྟེ ¶ སཀལཱ-ཡེཀཙྩཱཡུཊྛིཏཱཡ ཝཱ;

པཱརིསུདྡྷིཾ ཀརེཡྻེསཾ, སནྟིཀེ བཧུཀཱཐ ཙེ;

ཀཏྭཱ སབྦཝིཀཔྤེསུ, པུབྦཀིཙྩཾ པུནུདྡིསེ.

པནྣརསོཝཱསིཀཱནཾ, ཨིཏརཱནཾ སཙེཏརོ;

སམཱནེཏརེནུཝཏྟནྟུ, པུརིམཱནཾ སཙེདྷིཀཱ;

པུརིམཱ ཨནུཝཏྟནྟུ, ཏེསཾ སེསེཔྱཡཾ ནཡོ.

པཱཊིཔདོཝཱསིཀཱནཾ, ཨིཏརཱནཾ ཨུཔོསཐོ;

སམཐོཀཱནཾ སཱམགྒིཾ, མཱུལཊྛཱ དེནྟུ ཀཱམཏོ.

བཧི གནྟྭཱན ཀཱཏབྦོ, ནོ ཙེ དེནྟི ཨུཔོསཐོ;

དེཡྻཱནིཙྪཱཡ སཱམགྒཱི, བཧཱུསུ བཧི ཝཱ ཝཛེ.

པཱཊིཔདེགནྟུཀཱནཾ ¶ , ཨེཝམེཝ ཨཡཾ ནཡོ;

སཱཝེཡྻ སུཏྟཾ སཉྩིཙྩ, ཨསྶཱཝེནྟསྶ དུཀྐཊཾ.

སམྨཛྫིཏུཾ པདཱིཔེཏུཾ, པཉྙཱཔེཏུཾ དཀཱསནཾ;

ན ཀརེཡྻ ཏཐཱ ཀལློ, མཧཱཐེརེན པེསིཏོ.

༤༢༡. སམྨཛྫིཏྭཱ པདཱིཔེཏྭཱ, པཊྛཔེཏྭཱ དཀཱསནཾ. གཎཉཏྟིཾ ཋཔེཏྭེཝཾ, ཀཏྟབྦོ ཏཱིཧུཔོསཐོ. ‘‘སུཎནྟུ མེ ཨཱཡསྨནྟཱ, ཨཛྫུཔོསཐོ པནྣརསོ, ཡདཱཡསྨནྟཱནཾ པཏྟཀལླཾ, མཡཾ ཨཉྙམཉྙཾ པཱརིསུདྡྷིཨུཔོསཐཾ ཀརེཡྻཱམཱ’’ཏི.

༤༢༢. ཨེཀཾསཾ ཙཱིཝརཾ ཀཏྭཱ, ནིསཱིདིཏྭཱ ཨུཀྐུཊིཀཾ,. ཐེརེན ཨཉྫལིཾ ཏེཝཾ, པགྒཡ྄ཧ སམུདཱིརིཡཱ. ‘‘པརིསུདྡྷོ ¶ ཨཧཾ ཨཱཝུསོ, པརིསུདྡྷོཏི མཾ དྷཱརེཐཱ’’ཏི, ཝདེ ཡཱཝཏཏཱིཡཀཾ.

༤༢༣. སམཏྟཔུབྦཱརམྦྷེན, ཏེ ནཝེནེཝམཱིརིཡཱ. ‘‘པརིསུདྡྷོ ཨཧཾ བྷནྟེ, པརིསུདྡྷོཏི མཾ དྷཱརེཐཱ’’ཏི, ཝདེ ཡཱཝཏཏཱིཡཀཾ.

༤༢༤. དྭཱིསུ ཐེརེན ཀཏྟབྦཾ, ཀཏྭེཝམཱིརིཡོ ནཝོ. ‘‘པརིསུདྡྷོ ཨཧཾ ཨཱཝུསོ, པརིསུདྡྷོཏི མཾ དྷཱརེཧཱི’’ཏི ཏིཀྑཏྟུཾ ཝཏྟབྦོ.

ནཝེན ཐེརོ ཏིཀྑཏྟུཾ, ཨེཝམསྶ ཨུདཱིརིཡོ;

‘‘པརིསུདྡྷོ ཨཧཾ བྷནྟེ, པརིསུདྡྷོཏི མཾ དྷཱརེཐཱ’’ཏི.

༤༢༦. པུབྦཀིཙྩཾ ¶ སམཱཔེཏྭཱ, ཨདྷིཊྛེཡྻེཝམེཀཀོ. ‘‘ཨཛྫ མེ ཨུཔོསཐོ པནྣརསོཏི ཝཱ ཙཱཏུདྡསོཏི ཝཱ ཨདྷིཊྛཱམཱི’’ཏི ཝཏྟབྦཾ, ནོ ཙེདྷིཊྛེཡྻ དུཀྐཊཾ.

ཡཏྠ ཝསནྟི ཙཏྟཱརོ, ཏཡོ ཝཱ ཡདི ཝཱ དུཝེ;

པཱརིསུདྡྷིཾ ཧརིཏྭཱན, ཨེཀེཀསྶིཏརཱིཏརེ;

ཏཾ ཏཾ ཨུཔོསཐཾ ཀཡིརུཾ, སིཡཱ ཨཱཔཏྟི དུཀྐཊཾ.

ཝགྒེ སམགྒེ ཝགྒོཏི, སཉྙིནོ ཝིམཏིསྶ ཝཱ;

དུཀྐཊཾ ཀརོཏོ བྷེདཱ-དྷིཔྤཱཡེན ཐུལླཙྩཡཾ;

ཝགྒེ སམགྒེནཱཔཏྟི, སམགྒོ ཨིཏི སཉྙིནོ.

ཨུཀྑིཏྟསྶ ¶ གཧཊྛསྶ, སེསཱནཾ སཧདྷམྨིནཾ;

པཱརཱཛིཀསྶཱབྷབྦསྶ, སིཀྑཱནིཀྑིཏྟཀསྶ ཙ.

ནིསིནྣཔརིསཱཡཉྩ, སབྷཱགཱཔཏྟིཀོ ཏཐཱ;

ཚནྡེན པརིཝུཏྠེན, པཱཏིམོཀྑཾ ན ཨུདྡིསེ.

ཨདེསཡིཏྭཱནཱཔནྣཾ, ནཱཝིཀཏྭཱན ཝེམཏིཾ;

ནུཔོསཐེཔི ཝཱ ཀཱཏུཾ, པོསཐོ ན ཙ ཀཔྤཏི.

ཨཊྛིཏོཔོསཐཱཝཱསཱ, ན ཝཛེ ཏདཧཱུ ཝིནཱ;

ཨནྟརཱཡཾ ཝ སངྒྷཾ ཝཱ-དྷིཊྛཱཏུཾ སཱིམམེཝ ཝཱཏི.

དྭིནྣཾ ཏིཎྞཾ ཙཏུནྣཉྩ, ཨཉྙམཉྙཔྤཝཱརཎཱ;

ཨེཀསྶ ཙ ཨདྷིཊྛཱནཾ, སེསཱ སངྒྷཔྤཝཱརཎཱ.

པུབྦཀིཙྩེ ཙ ཀརཎེ, པཏྟཀལླེ སམཱནིཏེ;

ཋཔེཏྭཱ ཉཏྟིཾ སངྒྷེན, ཀཏྟབྦེཝཾ པཝཱརཎཱ.

‘‘སུཎཱཏུ ¶ མེ བྷནྟེ སངྒྷོ, ཨཛྫ པཝཱརཎཱ པནྣརསཱི, ཡདི སངྒྷསྶ པཏྟཀལླཾ, སངྒྷོ པཝཱརེཡྻཱ’’ཏི.

ཨེཀཾསཾ ཙཱིཝརཾ ཀཏྭཱ, ནིསཱིདིཏྭཱ ཨུཀྐུཊིཀཾ;

ཐེརེན ཨཉྫལིཾ སངྒྷོ, པགྒཡ྄ཧ སམུདཱིརིཡོ.

༤༣༦. ‘‘སངྒྷཾ, ཨཱཝུསོ, པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟོ ¶ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམི. དུཏིཡམྤི…པེ… ཏཏིཡམྤི, ཨཱཝུསོ, སངྒྷཾ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟོ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམཱི’’ཏི.

པཝཱརེནྟེསུ ཐེརེསུ, ནིསཛྫུཀྐུཊིཀཾ ནཝོ;

པཝཱརེཏི སཡཾ ཡཱཝ, ཨུཀྐུཊིཀོཝ ཨཙྪཏུ.

༤༣༨. པུབྦཱརམྦྷཾ སམཱཔེཏྭཱ, ནཝོ སངྒྷམུདཱིརཡེ.

༤༣༩. ‘‘སངྒྷཾ, བྷནྟེ, པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟོ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམི. དུཏིཡམྤི…པེ… ཏཏིཡམྤི, བྷནྟེ, སངྒྷཾ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟོ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམཱི’’ཏི.

དཱནེན དྷམྨསཱཀཙྪཱ, ཀལཧེཧི ཙ རཏྟིཡཱ;

ཏེཝཱཙིཀཱཡ ཨོཀཱསེ-སཏི ཁེཔིཏབྷཱཝཏོ;

ཨནྟརཱཡེ དསཝིདྷེ, ཉཏྟིཾ ཝཏྭཱནུརཱུཔཏོ.

༤༤༡. ‘‘སུཎཱཏུ མེ བྷནྟེ སངྒྷོ, མནུསྶེཧི དཱནཾ དེནྟེཧི, དྭཱིཧི བྷིཀྑཱུཧི དྷམྨཾ སཱཀཙྪནྟེཧི, ཀལཧཾ ཀརོནྟེཧི ཡེབྷུཡྻེན རཏྟི ཁེཔིཏཱ. སཙེ སངྒྷོ ¶ ཏེཝཱཙིཀཾ པཝཱརེསྶཏི, ཨཔྤཝཱརིཏོཝ སངྒྷོ བྷཝིསྶཏི, ཨཐཱཡཾ རཏྟི ཝིབྷཱཡིསྶཏི. ཨཡཾ རཱཛནྟརཱཡོ, ཨཡཾ ཙོརནྟརཱཡོ, ཨཡཾ ཨགྱནྟརཱཡོ, ཨཡཾ ཨུདཀནྟརཱཡོ, ཨཡཾ མནུསྶནྟརཱཡོ, ཨཡཾ ཨམནུསྶནྟརཱཡོ, ཨཡཾ ཝཱལ༹ནྟརཱཡོ, ཨཡཾ སརཱིསཔནྟརཱཡོ, ཨཡཾ ཛཱིཝིཏནྟརཱཡོ, ཨཡཾ བྲཧྨཙརིཡནྟརཱཡོ. སཙེ སངྒྷོ ཏེཝཱཙིཀཾ པཝཱརེསྶཏི, ཨཔྤཝཱརིཏོཝ སངྒྷོ བྷཝིསྶཏི, ཨཐཱཡཾ བྲཧྨཙརིཡནྟརཱཡོ བྷཝིསྶཏི. ཡདི སངྒྷསྶ པཏྟཀལླཾ, སངྒྷོ དྭེཝཱཙིཀཾ, ཨེཀཝཱཙིཀཾ, སམཱནཝསྶིཀཾ པཝཱརེཡྻཱ’’ཏི.

པཝཱརེཡྻཱནུརཱུཔེན ¶ , ཡཐཱཋཔིཏཉཏྟིཡཱ;

ཨཱགཙྪེཡྻུཾ ཡདི སམཱ, ཨཱདིཀཱ ཙེཏྠ ཨཱཧརེ.

༤༤༣. ཨེཝཾ ཏིཙཏུཝགྒོ ཙ, ཉཏྟིཾ ཝཏྭཱ པཝཱརཡེ. ‘‘སུཎནྟུ མེ ཨཱཡསྨནྟཱ, ཨཛྫ པཝཱརཎཱ པནྣརསཱི, ཡདཱཡསྨནྟཱནཾ པཏྟཀལླཾ, མཡཾ ཨཉྙམཉྙཾ པཝཱརེཡྻཱམཱ’’ཏི.

ཨེཀཾསཾ ཙཱིཝརཾ ཀཏྭཱ, ནིསཱིདིཏྭཱ ཨུཀྐུཊིཀཾ;

ཐེརེན ཨཉྫལིཾ ཏེཝཾ, པགྒཡ྄ཧ སམུདཱིརིཡཱ.

༤༤༥. ‘‘ཨཧཾ, ཨཱཝུསོ, ཨཱཡསྨནྟེ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟཱ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམི. དུཏིཡམྤི…པེ… ཏཏིཡམྤི ཨཧཾ, ཨཱཝུསོ, ཨཱཡསྨནྟེ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟཱ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམཱི’’ཏི.

ནཝེནཱཔི ¶ ‘‘ཨཧཾ, བྷནྟེ, ཨཱཡསྨནྟེ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟཱ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམི. དུཏིཡམྤི…པེ… ཏཏིཡམྤི ཨཧཾ, བྷནྟེ, ཨཱཡསྨནྟེ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟཱ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམཱི’’ཏི.

༤༤༦. དྭཱིསུ ཐེརེན ཀཏྟབྦཾ, ནཝོ ཀཏྭེཝམཱིརིཡོ.

༤༤༧. ‘‘ཨཧཾ, ཨཱཝུསོ, ཨཱཡསྨནྟཾ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདཏུ མཾ ཨཱཡསྨཱ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམི. དུཏིཡམྤི…པེ… ཏཏིཡམྤི ཨཧཾ, ཨཱཝུསོ, ཨཱཡསྨནྟཾ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདཏུ མཾ ཨཱཡསྨཱ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམཱི’’ཏི.

ནཝེནཱཔི ¶ ‘‘ཨཧཾ, བྷནྟེ, ཨཱཡསྨནྟཾ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདཏུ མཾ ཨཱཡསྨཱ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམི. དུཏིཡམྤི…པེ… ཏཏིཡམྤི ཨཧཾ, བྷནྟེ, ཨཱཡསྨནྟཾ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདཏུ མཾ ཨཱཡསྨཱ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམཱི’’ཏི.

༤༤༨. པུབྦཀིཙྩཾ སམཱཔེཏྭཱ, ཨདྷིཊྛེཡྻེཝམེཀཀོ. ‘‘ཨཛྫ མེ པཝཱརཎཱ ཙཱཏུདྡསཱིཏི ཝཱ པནྣརསཱིཏི ཝཱ ཨདྷིཊྛཱམཱི’’ཏི ཝཏྟབྦཾ.

ཡསྨིཾ ཝསནྟི ཝཱ པཉྩ, ཙཏྟཱརོ ཝཱ ཏཡོ དུཝེ;

པཝཱརཎཾ ཧརིཏྭཱན, ཨེཀེཀསྶིཏརཱིཏརེ.

པཝཱརིཏེཝ སངྒྷམྷི, པཱརིསུདྡྷིཨུཔོསཐཾ;

ཀརེཡྻ ཚིནྣཝསྶོ ཝཱ, ཨཝུཏྠོ ཝཱནུཔགཏོ.

ཙཱཏུམཱསིནིཡཱ ཙཱཔི, ཀཏེ སངྒྷེནུཔོསཐེ;

ཝུཏྠཝསྶཱ པཝཱརེཡྻུཾ, སཙེ ཨཔྤཏརཱ སིཡུནྟི.

ཙཀྑུསོཏཱདིབྷེདེཧི, རཱུཔསདྡཱདིགོཙརེ;

ཨབྷིཛ྄ཛྷཱདོམནསྶཱདི-པྤཝཏྟིཾ ཝིནིཝཱརཡེ.

ནིགྒཎྷེཡྻ ¶ སཀཾ ཙིཏྟཾ, ཀིཊྛཱདིཾ ཝིཡ དུཔྤསུཾ;

སཏིམཱ སམྤཛཱནོ ཙ, ཙརེ སབྦིརིཡཱཔཐེཏི.

དེསནཱ སཾཝརོ ཨེཊྛིཔཙྩཝེཀྑཎ བྷེདཏོ;

སུདྡྷཱི ཙཏུབྦིདྷཱ པཱཏིམོཀྑསཾཝརསམྨཏཾ;

དེསནཱཡ ཝིསུདྡྷཏྟཱ, དེསནཱསུདྡྷི ཝུཙྩཏི.

‘‘ན པུནེཝཾ ཀརིསྶ’’ནྟི, ཙིཏྟཱདྷིཊྛཱནསཾཝརཱ;

ཝུཏྟོ སཾཝརསུདྡྷཱིཏི, སུཛ྄ཛྷཏིནྡྲིཡསཾཝརོ.

པཧཱཡཱནེསནཾ དྷམྨེནུཔྤཱདེནྟསྶ ཨེཊྛིཡཱ;

སུདྡྷཏྟཱ ཨེཊྛིསུདྡྷཱིཏི, ཝུཏྟམཱཛཱིཝནིསྶིཏཾ.

ཡོནིསོ ¶ པཊིསངྑཱཡ, ཙཱིཝརཾ པཊིསེཝཏི;

ཨེཝམཱདིཡཐཱཝུཏྟ-པཙྩཝེཀྑཎསུཛ྄ཛྷནཱ;

པཙྩཝེཀྑཎསུདྡྷཱིཏི, ཝུཏྟཾ པཙྩཡནིསྶིཏནྟི.

ཨཔྤེན ཨནཝཛྫེན, སནྟུཊྛོ སུལབྷེན ཙ;

མཏྟཉྙཱུ སུབྷརོ ཧུཏྭཱ, ཙརེ སདྡྷམྨགཱརཝོ.

ཨཏཱིཏཾ ¶ ནཱནུསོཙནྟོ, ནཔྤཛཔྤམནཱགཏཾ;

པཙྩུཔྤནྣེན ཡཱཔེནྟོ, སནྟུཊྛོཏི པཝུཙྩཏཱིཏི.

བུདྡྷཱནུསྶཏི མེཏྟཱ ཙ, ཨསུབྷཾ མརཎསྶཏི;

ཨཱརཀཏྟཱདིནཱརཧཾ, སམྨཱ སཱམཉྩ བུདྡྷཏོ.

སམྨཱསམྦུདྡྷཨིཏི ཝཱནུསྶཏི ཡཱ པུནཔྤུནཾ;

ནཝབྷེདེ བྷགཝཏོ, བུདྡྷཱནུསྶཏི སཱ གུཎེ.

སཱིམཊྛསངྒྷེ སཱིམཊྛདེཝཏཱསུ ཙ ཨིསྶརེ;

ཛནེ གོཙརགཱམམྷི, ཏཏྠུཔཱདཱཡ མཱནུསེ.

སབྦསཏྟེསུ སུཁིཏཱ, ཧོནྟཱཝེརཱཏིཨཱདིནཱ;

པརིཙྪིཛྫ པརིཙྪིཛྫ, བྷཱཝནཱ མེཏྟབྷཱཝནཱ.

ཝཎྞསཎྛཱནཨོཀཱས-དིསཏོ པརིཙྪེདཏོ;

ཝཝཏྠཔེཏྭཱ ཀེསཱདི-ཀོཊྛཱསེ ཨནུཔུབྦཏོ.

ནཱཏིསཱིགྷཉྩ སཎིཀཾ, ཝིཀྑེཔཾ པཊིབཱཧཡཾ;

པཎྞཏྟིཾ སམཏིཀྐམྨ, མུཉྩནྟསྶཱནུཔུབྦཏོ.

ཝཎྞཨཱསཡསཎྛཱན-གནྡྷོཀཱསེཧི ¶ བྷཱཝནཱ;

པཊིཀྐཱུལཱཏི ཀོཊྛཱསེ, ཨུདྡྷུམཱཏཱདིཝཏྠུསུ;

གཧེཏྭཱ ཨསུབྷཱཀཱརཾ, པཝཏྟཱ བྷཱཝནཱསུབྷཾ.

‘‘མརཎཾ ¶ མེ བྷཝིསྶཏི, ཛཱིཝིཏཾ ཨུཙྪིཛྫིསྶཏི;

མརཎཾ མརཎཾ ཝཱ’’ཏི, བྷཱཝཡིཏྭཱན ཡོནིསོ.

ཝདྷཀསྶེཝུཔཊྛཱནཱ, སམྤཏྟཱིནཾ ཝིཔཏྟིཏོ;

ཨཱཡུདུབྦལཏོ ཀཱལཝཝཏྠཱནསྶབྷཱཝཏོ;

ཨདྡྷཱནསྶ པརིཙྪེདཱ, བྷཱཝནཱ མརཎསྶཏཱིཏི.

ནཱམརཱུཔཾ པརིགྒཡ྄ཧ, ཏཏོ ཏསྶ ཙ པཙྩཡཾ;

ཧུཏྭཱ ཨབྷཱཝཏོནིཙྩཱ, ཨུདཡབྦཡཔཱིལ༹ནཱ.

དུཀྑཱ ཨཝསཝཏྟིཏྟཱ, ཨནཏྟཱཏི ཏིལཀྑཎཾ;

ཨཱརོཔེཏྭཱན སངྑཱརེ, སམྨསནྟོ པུནཔྤུནཾ;

པཱཔུཎེཡྻཱནུཔུབྦེན, སབྦསཾཡོཛནཀྑཡནྟི.

ཨདྷིསཱིལཱདྷིཙིཏྟཱནཾ, ཨདྷིཔཉྙཱཡ སིཀྑནཱ;

བྷིཀྑུཀིཙྩམཏོ ཁུདྡསིཀྑཱཡཾ སམུདཱཧཊཱ.

མཧཏོ ཀིཏྟིསདྡསྶ, ཡསྶ ལོཀཝིཙཱརིནོ;

པརིསྶམོ ན སམྦྷོཏི, མཱལུཏསྶེཝ ནིཙྩསོ.

ཏེན ¶ ¶ དྷམྨསིརཱིཀེན, ཏམྦཔཎྞིཡཀེཏུནཱ;

ཐེརེན རཙིཏཱ དྷམྨཝིནཡཉྙུཔསཾསིཏཱ.

ཨེཏྟཱཝཏཱཡཾ ནིཊྛཱནཾ, ཁུདྡསིཀྑཱ ཨུཔཱགཏཱ;

པཉྩམཏྟེཧི གཱཐཱནཾ, སཏེཧི པརིམཱཎཏོཏི.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཡོ ¶ ¶ ཙིརཾ དཱིགྷམདྡྷཱནཾ, ཝིདིཏྭཱ དུཀྑིཏཾ ཛནཾ;

ཏཐཱཔི ནཱཝབུཛ྄ཛྷནྟམནུཀམྤཱཡ ཙོདིཏོ.

བོདྷཱཡ པཎིདྷིཾ ཀཏྭཱ, པཏྟོ སམྦོདྷིམུཏྟམཾ;

ཏསྶ པཱདེ ནམསྶིཏྭཱ, དྷམྨཾ སངྒྷཉྩ སཱདྷུཀཾ.

པུབྦཱཙརིཡཔཱདེསུ, ཋཔེཏྭཱ སཱིསམཏྟནོ;

ཐེརེན དྷམྨསིརིནཱ, ཐིརསཱིལེན ཡཱ ཀཏཱ.

‘‘ཨཱདིཏོ ¶ ཨུཔསམྤནྣསིཀྑིཏབྦ’’ནྟིཨཱདིནཱ;

ཁུདྡསིཀྑཱ སམཱསེན, ཏསྶཱ ཨཏྠཝིནིཙྪཡཾ.

ལིཁིསྶཱམི ཧིཏཏྠཱཡ, ཨཱདིཀམྨིཀབྷིཀྑུནཾ;

ཏཏྠ ཡུཏྟཾ གཧེཏབྦམཡུཏྟཾ ཏུཛ྄ཛྷིཏབྦཀནྟི;

(ཀ) ཨེཏྠཱཧ – ཀཏམཱ ཁུདྡསིཀྑཱ, ཀཐཾ སིཀྑིཏབྦཱ, ཀསྨཱ སིཀྑིཏབྦཱ, ཀེ སིཀྑནྟི, ཀེ སིཀྑིཏསིཀྑཱཏི? ཝུཙྩཏེ – ཨདྷིསཱིལཨདྷིཙིཏྟཨདྷིཔཉྙཱཝསེན ཏིསྶོ སིཀྑཱ, གནྠཝསེནེཏྠ སངྑིཔིཏྭཱ ཝུཏྟཏྟཱ ཏདྡཱིཔནོ གནྠོ ‘‘ཁུདྡསིཀྑཱ’’ཏི ¶ ཝུཙྩཏི, ཨཐ ཝཱ ‘‘ཁུདྡཾ ཨནེལཀཾ མདྷུཔཊལ’’ནྟིཨཱདཱིནི ཝིཡ སིཀྑཱཀཱམཱནཾ མདྷུརཏཱཡ ཁུདྡཱ ཙ ཏཱ སིཀྑཱ ཙཱཏི ཁུདྡསིཀྑཱ, ཨཐ ཝཱ ‘‘ཁུདྡཔུཏྟམྷི སམཎ པོས མ’’ནྟིཨཱདཱིསུ ཝིཡ བཧུཝིདྷཏྟཱཔི ཁུདྡཱ ཙ ཏཱ སིཀྑིཏབྦཏོ སིཀྑཱ ཙཱཏི ཁུདྡསིཀྑཱ. ཨདྷིསཱིལསིཀྑཱ པནེཏྠ ཙཱརིཏྟཝཱརིཏྟཝསེན དུཝིདྷམྤི སཱིལཾ ཡཐཱནུསིཊྛཾ པཊིཔཛྫམཱནེན ཏཔྤཊིཔཀྑེ ཀིལེསེ ཏདངྒཔྤཧཱནཝསེན པཛཧནྟེན སིཀྑིཏབྦཱ, ཨདྷིཙིཏྟསིཀྑཱ པན ཡཐཱཝུཏྟེསུ ཨཱརམྨཎེསུ ཨབྷིཡོགཀརཎཝསེན ཛྷཱནཔྤཊིཔཀྑཱནཾ ནཱིཝརཎགཎཱནཾ ཝིཀྑམྦྷནཔྤཧཱནཾ ཀུརུམཱནེན སིཀྑིཏབྦཱ, ཨདྷིཔཉྙཱསིཀྑཱ པན ཡཐཱནུརཱུཔཾ སམུཙྪེདཝསེན སཱནུསཡེ ཀིལེསེ སམུཙྪིནྡནྟེན སིཀྑིཏབྦཱ.

ཛཱཏིཨཱདཱིཧི དུཀྑེཧི, ཨནེཀེཧི ཨུཔདྡུཏཾ;

ཁནྡྷལོཀཾ ཛཧིཏྭཱན, པཏྟུཾ ཁེམཾ པུརཾ སིཝཾ.

ཀལྱཱཎཔུཐུཛྫནེན སཧ སཏྟ སེཀྑཱ སིཀྑནྟི. ཨརཧནྟོ སིཀྑིཏསིཀྑཱ.

ཨཱདིཏོཏི ཨེཏྠ ཨཱདིམྷིཡེཝཱཏི ཨཏྠོ, ཨཱདིཏོ པཊྛཱཡཱཏི ཝཱ. ཨུཔསམྤནྣེན ཙ ཨུཔསམྤནྣཱཡ ཙ སིཀྑིཏབྦཾ ཨུཔསམྤནྣསིཀྑིཏབྦཾ. སཧ མཱཏིཀཱཡ སམཱཏིཀཾ. པུབྦེ ཝུཏྟཔྤཀཱརཾ ཁུདྡསིཀྑཾ པཝཀྑཱམི ཨཱདརེན, པཀཱརེན ཝཱ ཝཀྑཱམི རཏནཏྟཡཾ ཝནྡིཏྭཱཏི ཨཏྠོ. ཨཔིཙ ཐེརོ ཨཱདིཏོཏི ཝཙནེན སདྡྷཱཔབྦཛིཏཱནཾ ཀུལཔུཏྟཱནཾ ཨཱལསིཡདོསེན ཨཔྤཊིཔཛྫནྟཱནཾ ཨཉྙཱཎདོསེན ཨཉྙཐཱ པཊིཔཛྫནྟཱནཾ ¶ སཾཝེགཾ ཛནེཏི. ཀཐཾ? ཨཏིདུལླབྷཾ ཁཎསམཝཱཡཾ པཊིལབྷིཏྭཱ ཏངྑཎཾ ན ཀུསཱིཏེན ཝཱ ནིརཏྠཀཀཐཱཔསུཏེན ཝཱ ཝཱིཏིནཱམེཏབྦཾ, ཀིཾ ཀཱཏབྦཾ? ཨཱདིཏོ པཊྛཱཡ ནིརནྟརམེཝ ཏཱིསུ སིཀྑཱསུ ཨཱདརོ ཛནེཏབྦོཏི. ཨེཏྠཱཧ – ཀིཾ ཏཾ རཏནཏྟཡཾ ནཱམ, ཡཾ ཝནྡིཏྭཱ ཐེརོ ཁུདྡསིཀྑཾ པཝཀྑཏཱིཏི? ཝུཙྩཏེ – བུདྡྷརཏནཾ དྷམྨརཏནཾ སངྒྷརཏནནྟི ཨིམཱནི ཏཱིཎི རཏནཱནི. ཏཱནི ཧི རཏིཛནནཊྛེན ‘‘རཏནཱནཱི’’ཏི ཝུཙྩནྟི. ཨཔིཙ –

‘‘ཙིཏྟཱིཀཏཾ མཧགྒྷཉྩ, ཨཏུལཾ དུལླབྷདསྶནཾ;

ཨནོམསཏྟཔརིབྷོགཾ, རཏནཾ ཏེན ཝུཙྩཏཱི’’ཏི. (དཱི. ནཱི. ཨཊྛ. ༢.༣༣; སཾ. ནི. ཨཊྛ. ༣.༥.༢༢༣; ཁུ. པཱ. ཨཊྛ. ༦.༣; སུ. ནི. ཨཊྛ. ༡.༢༢༦; མཧཱནི. ཨཊྛ. ༥༠; ཨུདཱ. ཨཊྛ. ༤༥) –

ཨིམིསྶཱ གཱཐཱཡ ཝསེན རཏནཏྠོ ཝེདིཏབྦོ.

(ཁ-ཛ) ཨིདཱནི ‘‘སམཱཏིཀ’’ནྟི ཝུཏྟཏྟཱ མཱཏིཀཾ ཏཱཝ དསྶེཏུཾ ‘‘པཱརཱཛིཀཱ ཙ ཙཏྟཱརོ’’ཏིཨཱདི ཨཱརདྡྷཾ. སབྦསིཀྑཱནཾ པན མཱུལབྷཱུཏཏྟཱ ཨདྷིསཱིལསིཀྑཱཝ པཋམཾ ཝུཏྟཱ. ‘‘སཱིལེ པཏིཊྛཱཡཱ’’ཏི (སུཾ. ནི. ༡.༡.༢༣, ༡༩༢; པེཊཀོ. ༢༢; མི. པ. ༢.༡.༩) ཧི ¶ ཝུཏྟཾ. ཏཏྲཱཔི མཧཱསཱཝཛྫཏྟཱ, མཱུལཙྪེཛྫཝསེན པཝཏྟནཏོ ཙ སབྦཔཋམཾ ཛཱནིཏབྦཱཏི པཱརཱཛིཀཱཝ པཋམཾ ཝུཏྟཱཏི. ཨིདཱནི ཡཐཱནིཀྑིཏྟཱནི མཱཏིཀཱཔདཱནི པཊིཔཱཊིཡཱ ཝིཏྠཱརེཏྭཱ དསྶེཏུཾ ‘‘པཱརཱཛིཀཱ ཙ ཙཏྟཱརོ’’ཏི པཋམཔདཾ ཨུདྡྷཊཾ, ཏསྶཱཡམཏྠོ – པཱརཱཛིཀཱཏི པརཱཛིཏཱ པརཱཛཡམཱཔནྣཱ, སིཀྑཱཔདཾ ཨཏིཀྐམིཏྭཱ ཏེནེཝ ཨཱཔཏྟིཾ ཨཱཔཛྫིཏྭཱ, ཏཱཡ ཝཱ པརཱཛཡམཱཔཱདིཏཱནམེཏཾ ཨདྷིཝཙནཾ, ཏེ པན ཙཏྟཱརོཏི ཝུཏྟཾ ཧོཏི.

༡-༢. ཨིདཱནི ¶ ཏེ དསྶེཏུཾ ‘‘མགྒཏྟཡེ’’ཏིཨཱདི ཨཱརདྡྷཾ. ཏཏྠ མནུསྶཱམནུསྶཏིརཙྪཱནགཏཱནཾ ཝསེན ཏིསྶོ ཨིཏྠིཡོ, ཏཡོ ཨུབྷཏོབྱཉྫནཀཱ, ཏཡོ པཎྜཀཱ, ཏཡོ པུརིསཱཏི པཱརཱཛིཀཝཏྠུབྷཱུཏཱནཾ ནིམིཏྟཱནཾ ནིསྶཡཱ དྭཱདསམཏྟཱ ཧོནྟི, ཏེསཾ ཝཙྩམགྒཔྤསྶཱཝམགྒམུཁམགྒཝསེན ཏཡོ མགྒཱ. ཏཏྠ མནུསྶིཏྠིཡཱ ཏཡོ, ཨམནུསྶིཏྠིཡཱ ཏཡོ, ཏིརཙྪཱནགཏིཏྠིཡཱ ཏཡོཏི ནཝ, ཏཐཱ མནུསྶཨུབྷཏོབྱཉྫནཀཱདཱིནཾ. མནུསྶཔཎྜཀཱདཱིནཾ པན ཝཙྩམགྒམུཁམགྒཝསེན དྭེ དྭེ ཀཏྭཱ ཚ, ཏཐཱ མནུསྶཔུརིསཱདཱིནནྟི སབྦེསཾ ཝསེན ཏིཾས མགྒཱ ཧོནྟི. ཏེ སབྦེ པརིགྒཧེཏྭཱ ཨིདྷ ‘‘མགྒཏྟཡེ’’ཏི ཝུཏྟཾ, ཏསྨིཾ མགྒཏྟཡེཏི ཨཏྠོ. ཨནིཀྑིཏྟསིཀྑོཏི བྷིཀྑུབྷཱཝཏོ ཙཝིཏུཀཱམཏཱཙིཏྟེན ཡཐཱལཀྑཎཾ ཨཔཙྩཀྑཱཏསིཀྑོཏི ཨཏྠོ. སནྠཏསནྠཏེཏི ཝཏྠཱདཱིསུ ཡེན ཀེནཙི སནྠཏེ ཝཱ ཨསནྠཏེ ཝཱ. ཨལློཀཱསེཏི མགྒཏྟཡསྶ པཀཏིཝཱཏེན ཨསམྥུཊྛཔྤདེསེ. ནིམིཏྟནྟི ཨངྒཛཱཏཾ. སཾསནྠཏཾ ཝཱ ཨསནྠཏཾ ཝཱཏི ཨཏྟནོ ཨངྒཛཱཏཾ ཝཏྠཱདཱིནཾ ཨཉྙཏརེན པཊིཙྪནྣཾ ཝཱ ཨཔྤཊིཙྪནྣཾ ཝཱ. ཨུཔཱདིཎྞནྟི ཨནཊྛཀཱཡཔྤསཱདཾ. ཝུཏྟཔྤཀཱརེ མགྒཏྟཡེ པཝེསནྟོ ཙུཏོ པཱརཱཛིཀོཏི སམྦནྡྷོ. ནཊྛཀཱཡཔྤསཱདཾ པན པཱིལ༹ཀཾ ཝཱ ཙམྨཁིལཾ ཝཱ ལོམཾ ཝཱ པཝེསནྟསྶ དུཀྐཊཾ, མནུསྶཱནཾ པན ཛཱིཝམཱནཀསརཱིརེ ཨཀྑིནཱསཱཀཎྞཙྪིདྡཝཏྠིཀོསེསུ སཏྠཀཱདཱིཧི ཀཏཝཎེ ཝཱ མེཐུནརཱགེན ཏིལབཱིཛམཏྟམྤི ཨངྒཛཱཏཾ པཝེསནྟསྶ ཐུལླཙྩཡཾ, ཨཝསེསསརཱིརེསུ ཨུཔཀཙྪཀཱདཱིསུ ཙ དུཀྐཊཾ. ཏིརཙྪཱནགཏཱནཾ ཧཏྠིཨསྶགོཎགདྲབྷཨོཊྛམཧིཾསཱདཱིནཾ ནཱསཱཡ ཐུལླཙྩཡཾ, ཏཐཱ ཏེསཾ ཝཏྠིཀོསེསུ. སབྦེསམྤི ཏིརཙྪཱནགཏཱནཾ ཨཀྑིཀཎྞཝཎེསུ དུཀྐཊཾ, ཏཐཱ ཏེསཾ ཨཝསེསསརཱིརེསུཔི.

ཨིདཱནི ¶ པཝེསནཾ ནཱམ ན ཀེཝལཾ ཨཏྟུཔཀྐམེནེཝ ཧོཏི, བྷིཀྑུཔཙྩཏྠིཀཱདཱིནཾ པན ཝསེན ¶ པརཱུཔཀྐམེནཱཔི ཧོཏི, ཏཏྠཱཔི སེཝནཙིཏྟེ སཏི པཱརཱཛིཀོ ཧོཏཱིཏི དསྶནཏྠཾ ‘‘ཨཐ ཝཱ’’ཏིཨཱདི ཝུཏྟཾ. ཏསྶཏྠོ – ཡོ བྷིཀྑུ པཝེསནཔཝིཊྛཋིཏཨུདྡྷཱརཎཀྑཎེསུ སཱདིཡཏི, ཏསྨིཾ ཁཎེ སེཝནཙིཏྟཾ ཨུཔཊྛཔེཏི, སོཔི པཱརཱཛིཀོ ཧོཏི. ཡོ པན བྷིཀྑུ སབྦསོ ཨསཱདིཡནྟོ ཨཱསཱིཝིསམུཁཾ ཨངྒཱརཀཱསུཉྩ པཝིཊྛཾ ཝིཡ མཉྙཏི, སོ ནིཔྤརཱདྷོ ཧོཏི. ཨེཏྠ ཋིཏཾ ནཱམ སུཀྐཝིསྶཊྛིསམཡཔྤཝཏྟི.

༣-༤. ཨིདཱནི དུཏིཡཾ དསྶེཏུཾ ‘‘ཨཱདིཡེཡྻཱ’’ཏིཨཱདིམཱཧ. ‘‘ཨཱདིཡེཡྻཱ’’ཏིཨཱདཱིནཾ པདཱནཾ ‘‘ཨདིནྣཾ ཐེཡྻཙིཏྟེན བྷཝེ པཱརཱཛིཀོ’’ཏི ཨིམིནཱ སམྦནྡྷོ. ཨཱདིཡེཡྻཱཏི ཨཱརཱམཱདིཾ ཨབྷིཡུཉྫིཏྭཱ ཡོ བྷིཀྑུ གཎྷེཡྻ, སོ བྷཝེ པཱརཱཛིཀོཏི ཨཏྠོ. ཨེཝཾ སེསེསུཔི. ཧརེཡྻཱཏི ཝེཏནེན ཝཱ མིཏྟབྷཱཝེན ཝཱ ཨཉྙསྶ བྷཎྜཾ ཧརནྟོ པུན ཐེཡྻཙིཏྟེ ཨུཔྤནྣེ ‘‘སཱིསེ བྷཱརཾ ཐེཡྻཙིཏྟོ ཨཱམསཏཱི’’ཏིཨཱདིནཱ གཎྷེཡྻཱཏི ཨཏྠོ. ཨཝཧརེཡྻཱཏི ‘‘ཨུཔནིཀྑིཏྟཾ བྷཎྜཾ ‘དེཧི མེ བྷཎྜ’ནྟི ཝུཙྩམཱནོ ‘ནཱཧཾ གཎྷཱམཱི’’ཏིཨཱདིནཱ ཨཝཧརེཡྻ. ཨིརིཡཱཔཐཾ ཀོཔེཡྻཱཏི ‘‘སཧབྷཎྜཧཱརཀཾ ནེསྶཱམཱི’’ཏི ཏེནེཝ པུརིསེན ཏཾ ནེཏུཾ ཏསྶ གམནཔཐཾ ཝཱརེཏྭཱ ཨཉྙེན མགྒེན ཏཾ སནྟཛྫེཏྭཱ ནེཏི, ཨེཝཾ ནེནྟསྶ ཏསྶ པུརིསསྶ པཋམཔཱདེ ཐུལླཙྩཡཾ, དུཏིཡཔཱདུདྡྷཱརེ པཱརཱཛིཀཾ. ‘‘ཐལཊྛཾ བྷཎྜཾ ཐེཡྻཙིཏྟོ ཨཱམསཏཱི’’ཏིཨཱདིནཱ ཋཱནཱ ཙཱཝེཡྻ. པརིཀཔྤིཏཊྛཱནཾ ཝཱ སུངྐགྷཱཏཾ ཝཱ ཨཏིཀྐཱམེནྟོ སངྐེཏཾ ཝཱིཏིནཱམེཡྻ. ཡཾ ཀིཉྩི པརཔརིགྒཧིཏཾ སསྶཱམིཀཾ བྷཎྜཾ ཏེཧི སཱམིཀེཧི ཀཱཡེན ཝཱ ཝཱཙཱཡ ཝཱ ན དིནྣནྟི ཨདིནྣཾ.

ཨིདཱནི ¶ ན ཨིམིནཱཝ ཨཱཀཱརེན ཨཝཧཱརཀོ པཱརཱཛིཀོ ཧོཏི, ཨཉྙཐཱཔི ཧོཏཱིཏི དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. ཐེཡྻཱཝཧཱརཀོ ཙ བལཱཝཧཱརཀོ ཙ ཀུསཱཝཧཱརཀོ ཙ པཊིཙྪནྣཱཝཧཱརཀོ ཙ པརིཀཔྤཱཝཧཱརཀོ ཙ བྷཝེ པཱརཱཛིཀོཏི སམྦནྡྷོ. ཏཏྠ ཐེཡྻཱཝཧཱརོ ནཱམ སནྡྷིཙྪེདཱདཱིཧི ཝཱ ཀཾསཀཱུཊམཱནཀཱུཊཏུལཱཀཱུཊཱདཱིཧི ཝཱ ཝཉྩེཏྭཱ གཧཎཾ. པསཡ྄ཧཱཝཧཱརོ བལཱཝཧཱརོ. ཀུསསངྐམནཾ ཀཏྭཱ པརཀོཊྛཱསགྒཧཎཾ ཀུསཱཝཧཱརོ. པརབྷཎྜཾ པཾསུཨཱདིནཱ པཊིཙྪཱདེཏྭཱ སཱམིཀེསུ ཨཔསྶིཏྭཱ གཏེསུ པཙྩཱགནྟྭཱ གཧཎཾ པཊིཙྪནྣཱཝཧཱརོ. པརིཀཔྤཱཝཧཱརོ པན དུཝིདྷོ བྷཎྜོཀཱསཝསེན. ཏཏྠ ‘‘སཱཊཀོ ཙེ, གཎྷིསྶཱམི, སུཏྟཉྩེ, ན གཎྷིསྶཱམཱི’’ཏི བྷཎྜཾ པརིཀཔྤེཏྭཱ ཨནྡྷཀཱརེ པསིབྦཀཾ གཎྷཱཏི. ཏཏྠ ཙེ སཱཊཀོ ཧོཏི, ཨུདྡྷཱརེཡེཝ ¶ པཱརཱཛིཀཾ. སཙེ སུཏྟཾ ཧོཏི, རཀྑཏི, པུན ‘‘སུཏྟ’’ནྟི ཉཏྭཱཔི ‘‘ཡཾ ལདྡྷཾ, ཏཾ གཧེཏབྦ’’ནྟི ཨུགྒཎྷནྟོ ཨུདྡྷཱརེཡེཝ པཱརཱཛིཀཾ, ཨཡཾ བྷཎྜཔརིཀཔྤོ. ཨོཀཱསཔརིཀཔྤོ གབྦྷདྭཱརཔྤམུཁཝིཧཱརཱདཱིནཾ ཝསེན པརིཙྪེདཾ ཀརོཏི ‘‘སཙེ མཾ ཨེཏྠནྟརེ པསྶནྟི, དསྶཱམི, ནོ ཙེ པསྶནྟི, གཎྷིཏྭཱ གཙྪཱམཱི’’ཏི, ཏསྶ ཏཾ པརིཀཔྤིཏཔརིཙྪེདཾ ཨཏིཀྐམནྟསྶ པདཝཱརེན པཱརཱཛིཀཾ ཝེདིཏབྦཾ, ཨཡཾ ཨོཀཱསཔརིཀཔྤོ.

ཨིདཱནི ཨིམསྨིཾ ཨདིནྣཱདཱནེ ཝིནིཙྪཡནཡཾ དསྶེཏུཾ ‘‘བྷཎྜཀཱལགྒྷདེསེཧཱི’’ཏིཨཱདི ཝུཏྟཾ. ཨེཏྠཱཏི ཨདིནྣཱདཱནེ. ནིཙྪཡོཏི ཝིནིཙྪཡོ ཀཱཏབྦོཏི ཨཏྠོ. ཏཏྠ ཀེནཙི བྷིཀྑུནཱ ‘‘མཡཱ ཨིདཾ ནཱམ བྷཎྜཾ ཐེཡྻཙིཏྟེན གཧིཏ’’ནྟི ཝུཏྟེ ཝིནཡདྷརེན སཧསཱཝ ཏཾ ཨཱཔཏྟིཾ ཨནཱརོཔེཏྭཱ ཏསྶ བྷཎྜསྶ སཱམིཀཨསྶཱམིཀབྷཱཝཾ ཨུཔཔརིཀྑིཏྭཱ ཡདི སསྶཱམིཀཾ, ཏསྶ བྷཎྜསྶ ཨགྒྷཝསེན ཨཱཔཏྟིཡཱ ཀཱརེཏབྦོ. སཙེ ནིརཱལཡཀཱལེ གཧིཏཾ ¶ , པཱརཱཛིཀེན ན ཀཱརེཏབྦོ, ཨཡཾ བྷཎྜཝསེན ཝིནིཙྪཡོ.

ཀཱལོཏི ཨཝཧཱརཀཱལོ. ཏདེཝ ཧི བྷཎྜཾ ཀདཱཙི མཧགྒྷཾ ཧོཏི, ཀདཱཙི ཨཔྤགྒྷཾ, ཏསྨཱ ཡསྨིཾ ཀཱལེ ཨཝཧཊཾ, ཏསྨིཾ ཀཱལེ ཡོ ཏསྶ ཨགྒྷོ, ཏེན ཨགྒྷེན ཨཱཔཏྟིཡཱ ཀཱརེཏབྦོ, ཨཡཾ ཀཱལཝསེན ཝིནིཙྪཡོ.

ཨགྒྷོཏི བྷཎྜགྒྷོ. ནཝབྷཎྜསྶ ཧི ཡོ ཨགྒྷོ, སོ པཙྪཱ པརིཧཱཡཏི, ཏསྨཱ སབྦདཱ བྷཎྜཾ པཀཏིཨགྒྷཝསེནེཝ ན ཀཱརེཏབྦཾ, ཨཡཾ ཨགྒྷཝསེན ཝིནིཙྪཡོ. དེསོཏི ཨཝཧཱརདེསོ. བྷཎྜུཊྛཱནདེསེ ཧི བྷཎྜཾ ཨཔྤགྒྷཾ ཧོཏི, ཨཉྙཏྠ མཧགྒྷཾ, ཏསྨཱ ཡསྨིཾ དེསེ བྷཎྜཾ ཨཝཧཊཾ, ཏསྨིཾཡེཝ དེསེ ཨགྒྷེན ཀཱརེཏབྦོ, ཨཡཾ དེསཝསེན ཝིནིཙྪཡོ.

པརིབྷོགེནཔི སཱཊཀཱདིཀསྶ བྷཎྜསྶ ཨགྒྷོ པརིཧཱཡཏི, ཏསྨཱ ཏསྶ པརིབྷོགཝསེན པརིཧཱིནཱཔརིཧཱིནབྷཱཝོ ཨུཔཔརིཀྑིཏབྦོ, ཨཡཾ པརིབྷོགཝསེན ཝིནིཙྪཡོ.

༥. ཨིདཱནི ཏཏིཡཾ དསྶེཏུཾ ‘‘མནུསྶཝིགྒཧ’’ནྟིཨཱདི ཨཱརདྡྷཾ. ཏཏྠ མནུསྶཝིགྒཧནྟི པཊིསནྡྷིཝིཉྙཱཎེན ¶ སདྡྷིཾ ཨུཔྤནྣཾ ཀལལརཱུཔཾ ཨཱདིཾ ཀཏྭཱ པཀཏིཡཱ ཝཱིསཏིཝསྶསཏཱཡུཀསྶ སཏྟསྶ ཡཱཝ མརཎཀཱལཱ ཨེཏྠནྟརེ ཨནུཔུབྦེན ཝུདྡྷིཔྤཏྟོ ཨཏྟབྷཱཝོ, ཨེསོ མནུསྶཝིགྒཧོ ནཱམ, ཨེཝརཱུཔཾ མནུསྶཝིགྒཧནྟི ཨཏྠོ. ཙིཙྩཱཏི ཝདྷཀཙེཏནཱཝསེན སཉྩེཏེཏྭཱ པཀཔྤེཏྭཱ ཨབྷིཝིཏརིཏྭཱ ཝཱིཏིཀྐམོཏི ཨཏྠོ. ཛཱིཝིཏཱ ཝཱ ཝིཡོཛཡེཏི ཝུཏྟཔྤཀཱརཾ མནུསྶཝིགྒཧཾ ¶ ཀལལཀཱལེཔི ཏཱཔནམདྡནེཧི ཝཱ བྷེསཛྫསམྤདཱནེན ཝཱ ཏཏོ ཝཱ ཨུདྡྷམྤི ཏདནུརཱུཔེན ཨུཔཀྐམེན སནྟཏིཝིཀོཔནཝསེན ཡོ ཛཱིཝིཏཱ ཝིཡོཛེཡྻ, སོ ཙུཏོ བྷཝེཏི སམྦནྡྷོ. ཀིཉྩ བྷིཡྻོ – ‘‘སཏྠཧཱརཀཾ ཝཱ’’ཏིཨཱདི ཝུཏྟཾ. ཨེཏྠ ཧརཏཱིཏི ཧཱརཀཾ, ཀིཾ ཧརཏི? ཛཱིཝིཏཾ, ཧརིཏབྦནྟི ཝཱ ཧཱརཀཾ, ཨུཔནིཀྑིཔིཏབྦནྟི ཨཏྠོ, སཏྠཉྩ ཏཾ ཧཱརཀཉྩཱཏི སཏྠཧཱརཀཾ. ཨསྶཱཏི མནུསྶཝིགྒཧསྶ. ཡཐཱ མནུསྶཝིགྒཧོ ཨིཙྪིཏིཙྪིཏཀྑཎེ ཏཾ ཨསིཨཱདིསཏྠཾ པཊིལབྷཏི, ཏཐཱ སཡཾ མརཎཙེཏནོ མརཎཱདྷིཔྤཱཡོ ཧུཏྭཱ ཨུཔནིཀྑིཔེཡྻ. སོཔི ཙུཏོ བྷཝེཏི ཨཏྠོ. ཨེཏེན ཐཱཝརཔྤཡོགཾ དསྶེཏི.

༦-༧. ཨིདཱནི ‘‘མརཎཝཎྞཾ ཝཱ སཾཝཎྞེཡྻཱ’’ཏིཨཱདིཝིདྷིཾ དསྶེཏུཾ ‘‘གཱཧེཡྻ མརཎཱུཔཱཡཾ, ཝདེཡྻ མརཎེ གུཎ’’ནྟི ཝུཏྟཾ. ཏཏྠ ‘‘སཏྠཾ ཝཱ ཨཱཧར, ཝིསཾ ཝཱ ཁཱད, རཛྫུཡཱ ཝཱ ཨུབྦནྡྷིཏྭཱ ཀཱལཾ ཀརོཧཱི’’ཏིཨཱདིནཱ ནཡེན མརཎཏྠཱཡ ཨུཔཱཡཾ གཱཧེཡྻ. མརཎསཾཝཎྞནཱ པནེཏྠ བཧུཝིདྷཱ ‘‘ཀཱཡེན སཾཝཎྞེཏི, ཝཱཙཱཡ ཀཱཡཝཱཙཱཡ དཱུཏེན ལེཁཱཡ ཝཱ སཾཝཎྞེཏཱི’’ཏི ཝུཏྟཏྟཱ. ཏཏྠ ཀཱཡེན སཾཝཎྞེཏི ནཱམ ཀཱཡེན ཝིཉྙཱཔེཏི. ‘‘ཡོ པཔཱཏེ པཔཏནཱདཱིནི ཀཏྭཱ མརཏི, སོ དྷནཾ ཝཱ ལབྷཏི, ཡསཾ ཝཱ ལབྷཏི, སགྒཾ ཝཱ གཙྪཏཱི’’ཏིཨཱདིནཱ ནཡེན སཾཝཎྞེཏི, ཨཱཔཏྟི དུཀྐཊསྶ. ཏསྶ ཝཙནཾ སུཏྭཱ ཀོཙི ‘‘མརིསྶཱམཱི’’ཏི དུཀྑཾ ཝེདནཾ ཨུཔྤཱདེཏི, ཐུལླཙྩཡཾ. མརཏི ཙེ, པཱརཱཛིཀཾ. ཨེཝཾ སེསེསུཔི. དཱུཏེན སཾཝཎྞནཱཡཾ པན དཱུཏསྶ སཱསནཾ ཨཱརོཙཱཔེཏི ‘‘ཨེཝཾ ཨཱརོཙེཧཱི’’ཏི, ‘‘ཡོ ཨེཝཾ མརཏི, སོ དྷནཾ ཝཱ ལབྷཏཱི’’ཏི སབྦཾ པུརིམསདིསམེཝ. ལེཁཱཡ སཾཝཎྞེཏི ནཱམ གིརིཔབྦཏཔུརཱཎཱདིལེཁཾ ལིཁཏི, ‘‘ཡོ ཨེཝཾ མརཏཱི’’ཏིཨཱདི ཝུཏྟནཡམེཝ. ཨེཏྠཱཔི ཡོ མརཎཱུཔཱཡཾ ཝཱ གཱཧེཡྻ, མརཎེ ཝཱ གུཎཾ ཝདེཡྻ, སོ ཙུཏོ བྷཝེཏི སམྦནྡྷོ.

ཨིདཱནི ¶ པན ཨིམསྶ མནུསྶཝིགྒཧསྶ ཚབྦིདྷེ པཡོགེ དསྶེཏུཾ ‘‘པཡོགཱ’’ཏིཨཱདི ཨཱརདྡྷཾ. སཱཧཏྠིཀནིསྶགྒིཀཨཱཎཏྟིཀཐཱཝརཨིདྡྷིམཡཝིཛྫཱམཡཱནཾ ཝསེན ཏསྶ མནུསྶཝིགྒཧསྶ ཚཔྤཡོགཱཏི ཨདྷིཔྤཱཡོ. ཏཏྠ སཱཧཏྠིཀོཏི སཡཾ མཱརེནྟསྶ ཀཱཡེན ཝཱ ཀཱཡཔྤཊིབདྡྷེན ¶ ཝཱ པཧརཎཾ. ནིསྶགྒིཀོཏི དཱུརེ ཋིཏཾ མཱརེཏུཀཱམསྶ ཀཱཡཱདཱིཧི ཨུསུསཏྟིཡནྟཔཱསཱཎཱདཱིནཾ ནིསྶཛྫནཾ. ཨཱཎཏྟིཀོཏི ‘‘ཨསུཀཾ ནཱམ མཱརེཧཱི’’ཏི ཨཉྙཾ ཨཱཎཱཔེནྟསྶ ཨཱཎཱཔནཾ. ཐཱཝརོཏི ཨོཔཱཏཀྑཎནཾ, ཨཔསྶེནསཾཝིདྷཱནཾ, ཨསིཨཱདཱིནཾ ཨུཔནིཀྑིཔནཾ, ཏལཱ༹ཀཱདཱིསུ ཝིསསམྤཡོཛནཾ, རཱུཔཱུཔཧཱརོཏི ཨེཝམཱདི. ཀམྨཝིཔཱཀཛཱཡ ཨིདྡྷིཡཱ པཡོཛནཾ ཨིདྡྷིཔཡོགཾ. མཱརཎཏྠཱཡ ཝིཛྫཱནཾ པརིཛཔྤནཾ ཝིཛྫཱམཡོཏི.

ཨིདཱནི ཨིམེསུ ཚསུ པཡོགེསུ ཨཱཎཏྟིཡཾ སངྐེཏཝིསངྐེཏཏཾ དསྶེཏུཾ ‘‘ཀཱལཝཏྠཱཝུདྷིརིཡཱཔཐཱ’’ཏིཨཱདིམཱཧ. ཏཏྠ ཀཱལོཏི པུབྦཎྷསཱཡནྷཱདིཀཱལོ ཙ ཡོབྦནཐཱཝརིཡཱདིཀཱལོཔི ཙ. ཨིམེསུ ཡཾ ཀིཉྩི ཀཱལཾ ནིཡམེཏྭཱ ‘‘ཨིམསྨིཾ ནཱམ ཀཱལེ མཱརེཧཱི’’ཏི ཨཱཎཏྟོ སཙེ ཏསྨིཾཡེཝ ཀཱལེ མཱརེཏི, ཨཱཎཏྟིཀྑཎེཡེཝ པཱརཱཛིཀཾ. སཙེ ནིཡམིཏཀཱལཏོ པུརེ ཝཱ པཙྪཱ ཝཱ མཱརེཏི, ཨཱཎཱཔཀོ མུཙྩཏི. ཝཏྠཱུཏི མཱརེཏབྦོ པུགྒལོ. སཙེ ཨཱཎཏྟོ ཏམེཝ མཱརེཏི, ཨཱཎཱཔཀསྶ ཨཱཎཏྟིཀྑཎེཡེཝ པཱརཱཛིཀཾ. ཨཐ ཨཉྙཾ མཱརེཏི, ཨཱཎཱཔཀོ མུཙྩཏི. ཨེཝཾ སེསེསུཔི ཝུཏྟནཡེནེཝ ཝིནིཙྪཡོ ཝེདིཏབྦོ. ཨཱཝུདྷནྟི ཨསིཨཱདི. ཨིརིཡཱཔཐོཏི མཱརེཏབྦསྶ གམནཾ ཝཱ ནིསཛྫཱ ཝཱཏི ཨེཝམཱདིཀོ. ཀིརིཡཱཝིསེསོཏི ཝིཛ྄ཛྷནཾ ཝཱ ཚེདནཾ ཝཱ བྷེདནཾ ཝཱ སཱུལཱརོཔནཾ ཝཱཏི ཨེཝམཱདིཀོ. ཨོཀཱསོཏི གཱམོ ཝཱ ཝནཾ ཝཱ གེཧཾ ཝཱཏི ཨེཝམཱདིཀོ. ཨིམེསུ ཡཐཱ ¶ ཡཐཱ ཝདྷཀོ ཨཱཎཏྟོ, ཏཐཱ ཏཐཱ ཀཏེ ཨཱཎཱཔཀསྶ ཨཱཔཏྟི, ཨཉྙཐཱ ཀཏེ ཝིསངྐེཏོ ཧོཏི. ཨཱཎཏྟིཡཾ པན ཨཡཾ ཝིསེསོ ‘‘ཨདྷིཊྛཱཡཱཏི ཨདྷིཊྛཧིཏྭཱ ཨཱཎཱཔེཏི ‘ཨེཝཾ ཝིཛ྄ཛྷ, ཨེཝཾ པཧར, ཨེཝཾ གྷཱཏེཧཱི’’ཏི ཝུཏྟཱཡ པཱལི༹ཡཱ ལབྦྷཏཱིཏི ཉཱཏབྦོ.

༨-༩. ཨིདཱནི ཙཏུཏྠཾ དསྶེཏུཾ ‘‘ཛྷཱནཱདིབྷེད’’ནྟིཨཱདིམཱཧ. ཏསྶཏྠོ – ‘‘ཛྷཱནཾ ཝིམོཀྑོ སམཱདྷི སམཱཔཏྟི ཉཱཎདསྶནཾ མགྒབྷཱཝནཱ ཕལསཙྪིཀིརིཡཱ ཀིལེསཔྤཧཱནཾ ཝིནཱིཝརཎཏཱ ཙིཏྟསྶ སུཉྙཱགཱརེ ཨབྷིརཏཱི’’ཏི ཨེཝཾ ཝུཏྟཾ ཨུཏྟརིམནུསྶདྷམྨཾ ཨཏྟནི ནཏྠིཏཱཡ ནོསནྟཾ ‘‘མཡི ཨཏྠཱི’’ཏི ཨཏྟནི ཝཱ ཏཾ ‘‘ཨཧཾ ཨེཏྠ སནྡིསྶཱམཱི’’ཏི ཨཏྟཱནཾ ཝཱ ཏཏྠ ཨུཔནེཏྭཱ དཱིཔེནྟོ ཙུཏོ བྷཝེ. ཀོཊྛཱསཾ ཝཱཏི ཨེཏྠ ‘‘ཛྷཱནལཱབྷཱི, ཝིམོཀྑལཱབྷཱི, སམཱདྷིལཱབྷཱི, སམཱཔཏྟིལཱབྷཱིམྷཱི’’ཏི ཨེཝམཱདིནཱ ནཡེན ཀོཊྛཱསཏོ ཝཱཏི ཨཏྠོ. ཨེཀེཀཾ ཝཱཏི ‘‘པཋམསྶ ¶ ཛྷཱནསྶ ལཱབྷཱི, དུཏིཡསྶ ཛྷཱནསྶ ལཱབྷཱིམྷཱི’’ཏི ཨེཝམཱདིནཱ ནཡེན ཨེཀེཀཾ ཝཱཏི ཨཏྠོ. ‘‘ཨཏཱིཏབྷཝེ སོཏཱཔནྣོམྷཱི’’ཏི ཝདཏོ ཨཏཱིཏབྷཝཾ སནྡྷཱཡ ཀཐིཏཏྟཱ པཱརཱཛིཀཾ ནཏྠི, ཏསྨཱ ‘‘པཙྩུཔྤནྣབྷཝསྶིཏ’’ནྟི ཝུཏྟཾ, ཏསྶ པཙྩུཔྤནྣབྷཝནིསྶིཏཾ ཀཏྭཱཏི ཨཏྠོ. ཨཉྙཱཔདེསརཧིཏནྟི ‘‘ཡོ ཏེ ཝིཧཱརེ ཝསཏི, སོ བྷིཀྑུ པཋམསྶ ཛྷཱནསྶ ལཱབྷཱི’’ཏིཨཱདིནཱ ནཡེན ཨཉྙཱཔདེསཾ ཝིནཱཏི ཨཏྠོ. ཨེཝཾ དཱིཔེནྟོ ཧི ཐུལླཙྩཡམཱཔཛྫཏི. དཱིཔེནྟོཏི ‘‘པཋམཾ ཛྷཱནཾ སམཱཔཛྫིཾ, སམཱཔཛྫཱམི, སམཱཔནྣོ, པཋམསྶ ཛྷཱནསྶ ལཱབྷཱིམྷི, ཝསཱིམྷི, སཙྪིཀཏཾ ཨསྶཱ’’ཏི ཨེཝམཱདིནཱ ནཡེན དཱིཔེནྟོཏི ཨཏྠོ. ‘‘ཨདྷིགཏོ’’ཏི མཱནོ ཨདྷིམཱནོ, སོ ཡསྶ ནཏྠི, སོ ཨནདྷིམཱནིཀོ. ཀེན ཨེཝཾ དཱིཔེནྟོཏི ཙེ? ཏཾ དསྶེཏུཾ ‘‘ཀཱཡེན ཝཱཙཱ’’ཏིཨཱདི ཝུཏྟཾ ¶ , ཀཱཡེན ཝཱ ཝཱཙཱཡ ཝཱ ཏདུབྷཡེན ཝཱཏི ཨཏྠོ. ཝིཉྙཏྟིཔཐེཏི ཡཏྠ ཋིཏོ མནུསྶཛཱཏིཀོ གཧཊྛོ ཝཱ པབྦཛིཏོ ཝཱ ཏསྶ ཝཙནཾ པཀཏིསོཏེན སུཏྭཱ སམནནྟརམེཝ ‘‘ཨིམཾ ནཱམ ཨེས ཝདཏཱི’’ཏི ཛཱནཱཏི, ཏཏྠ ཋཏྭཱ དཱིཔེནྟོ ཙུཏོ བྷཝེ, ན དེཝབྲཧྨཱདཱིསུ ཨཉྙཏརེན ཉཱཏེཏི ཨཏྠོ.

༡༠. ཨིདཱནི ཙཏུནྣམྤི སཱདྷཱརཎཝིནིཙྪཡཾ ཝཏྟུཾ ‘‘པཱརཱཛིཀེཏེ ཙཏྟཱརོ’’ཏིཨཱདིམཱཧ. ཏཏྠཱཡཾ སངྑེཔོ – ཙཏྟཱརོཔི ཨེཏེ པཱརཱཛིཀཱ ‘‘ཨེཀཀམྨཾ ཨེཀུདྡེསོ སམསིཀྑཏཱ’’ཏི ཨེཝཾ ཝུཏྟསཾཝཱསསྶ ཨབྷབྦཏཱཡ ཨསཾཝཱསཱ, ཡཐཱཔུརེ པུབྦེ གིཧིཀཱལེ ཙ ཨནུཔསམྤནྣཀཱལེ ཙ ཨསཾཝཱསིཀཱ, ཨེཝཾ པཙྪཱ པཱརཱཛིཀཾ ཨཱཔནྣཱཔི ཨསཾཝཱསཱཏི. ཀིཉྩ བྷིཡྻོ – ཨབྷབྦཱ བྷིཀྑུབྷཱཝཱཡ པུན ཏེན ཨཏྟབྷཱཝེན ཨུཔསམྤདཱཡ ཨཝཏྠུཏཱཡ ཨུཔསམྤནྣཱ བྷཝིཏུམྤི ཨབྷབྦཱཏི ཨཏྠོ. ཀིཾ ཝིཡཱཏི ཙེ? སཱིསཙྪིནྣོཝ ཛཱིཝིཏུཾ, ཡཐཱཔི སཱིསཙྪིནྣོ ཏེན ཨཏྟབྷཱཝེན པུན ཛཱིཝིཏུཾ ཨབྷབྦོ, ཨེཝམིམེ ཙཏྟཱརོཏི ཨདྷིཔྤཱཡོ.

༡༡. ཨིདཱནི ཨིམེསུ ཙཏཱུསུ པཱརཱཛིཀེསུ ཡེ པརིཡཱཡཱཎཏྟཱིཧི སམྦྷཝནྟི, ཏེ དསྶེཏུཾ ‘‘པརིཡཱཡོ ཙཱ’’ཏིཨཱདི ཝུཏྟཾ. ཏཏྠ པརིཡཱཡོཏི མརཎཱདྷིཔྤཱཡསྶ ཀཱཡཔཡོགོ ཝཱ ཝཙཱིཔཡོགོ ཝཱ. ཏསྨཱ ‘‘ཡོ ཨཱིདིསེ མུཧུཏྟེ སཏྠཾ ཝཱ ཨཱཧརིཏྭཱ ཝིསཾ ཝཱ ཁཱདིཏྭཱ སོབྦྷཱདཱིསུ ཝཱ པཔཏིཏྭཱ མརཏི, སོ དྷནཾ ཝཱ ལབྷཏི, ཡསཾ ཝཱ ལབྷཏཱི’’ཏིཨཱདིནཱ ནཡེན མརཎཾ ཨབྷིནནྡནྟོ ‘‘ཨིདཾ སུཏྭཱ ཡོ ཀོཙི མརཏཱུ’’ཏི ཡོ པརིཡཱཡེན ཝདཏི, ཏཾ སུཏྭཱ སཙེ ¶ ཀོཙི ཏཐཱ མརཏི, པཱརཱཛིཀཾ. ནིཡམིཏེན པན ཡཾ སནྡྷཱཡ ཝུཏྟཾ, ཏསྶེཝ མརཎེ པཱརཱཛིཀཾ. ཨཱཎཏྟི ¶ པན ཝུཏྟཏྠཱཡེཝ. ཏཏིཡེ མནུསྶཝིགྒཧཔཱརཱཛིཀེ ལབྦྷཏཱིཏི སམྦནྡྷོ. དུཏིཡེ པན ཨདིནྣཱདཱནེ ཨཱཎཏྟི ཨེཝ ལབྦྷཏི, ན པརིཡཱཡོཏི ཨཏྠོ. ཀསྨཱ ནཾ པརིཡཱཡེན ནཱཔཛྫཏཱིཏི? ཡཐཱ མནུསྶཝིགྒཧེ ‘‘མརཎཝཎྞཾ ཝཱ སཾཝཎྞེཡྻཱ’’ཏི ཝུཏྟཾ, ཏཐཱ ཨིདྷ ཨདིནྣཱདཱནེ ‘‘ཝཎྞཾ ཝཱ སཾཝཎྞེཡྻཱ’’ཏི ཨཝུཏྟཏྟཱ. སེསེསཱུཏི པཋམཙཏུཏྠེསུ པརིཡཱཡཱཎཏྟིདྭཡཾ ན ལབྦྷཏཱིཏི ཨཏྠོ.

༡༢. ཨིདཱནི ཙཏཱུསུཔི ཡཐཱསམྦྷཝཾ ཨངྒབྷེདཾ དསྶེཏུཾ ‘‘སེཝེཏུཀཱམཏཱཙིཏྟ’’ནྟིཨཱདི ཝུཏྟཾ. ཏཏྠ མེཐུནདྷམྨསྶཱཏི མེཐུནདྷམྨཔཱརཱཛིཀསྶ. བུདྷཱཏི ཝིནཡདྷརཱ.

༡༣. མནུསྶསནྟི མནུསྶསནྟཀཏཱ. ཨེཏེན པེཏཏིརཙྪཱནགཏཔརིགྒཧེསུ ཨནཱཔཏྟཱིཏི དཱིཔིཏཾ ཧོཏི. ཏཐཱསཉྙཱིཏི མནུསྶསནྟཀཝསེན པརཔརིགྒཧིཏསཉྙཱིཏི ཨཏྠོ. ཝཏྠུནོ གརུཏཱཏི པཉྩམཱསཀཾ ཝཱ ཨཏིརེཀཔཉྩམཱསཀཾ ཝཱ ཏདགྒྷནཀཾ བྷཎྜཾ ཝཱ ཧོཏཱིཏི ཨཏྠོ. ཨཝཧཱརོ ཙཱཏི པཉྩཝཱིསཏིཡཱ ཨཝཧཱརེསུ ཡེན ཀེནཙི ཨཝཧཱརོ ཧོཏཱིཏི ཨཏྠོ. ཨདིནྣཱདཱནཧེཏུཡོཏི ཨདིནྣཱདཱནཔཱརཱཛིཀསྶ ཨེཏཱནི པཉྩ ཨངྒཱནཱིཏི ཨདྷིཔྤཱཡོ.

༡༤. པཱཎོ མཱནུསྶཀོཏི མནུསྶཛཱཏིཀཔཱཎོ. ཏསྨིཾ པཱཎེ པཱཎསཉྙིཏཱ. གྷཱཏཙེཏནཱཏི ཝདྷཀཙེཏནཱ. པཡོགོཏི ཏཾསམུཊྛིཏོ སཱཧཏྠིཀཱདཱིནཾ ཚནྣཾ པཡོགཱནཾ ཨཉྙཏརཔཡོགོ. ཏེན པཡོགེན མརཎཾ. པཉྩེཏེ ཝདྷཧེཏུཡོཏི མནུསྶཝིགྒཧཔཱརཱཛིཀསྶ པཉྩ ཨངྒཱནཱིཏི ཨཏྠོ.

༡༥. ཨསནྟཏཱཏི ཨུཏྟརིམནུསྶདྷམྨསྶ ཨཏྟནི ཨསནྟཏཱ ཙཱཏི ཨཏྠོ. པཱཔམིཙྪཏཱཡཱརོཙནཱཏི ཨིམིནཱ ཡོ ཀེཝལཾ ¶ པཱཔམིཙྪཏཾ ཝིནཱ མནྡཏྟཱ མོམཱུཧཏྟཱ བྷཎཏི, ཏསྶ ཨནཱཔཏྟཱིཏི དཱིཔིཏཾ ཧོཏི. ཏསྶཱཏི ཡསྶ ཨཱརོཙེཏི, ཏསྶ མནུསྶཛཱཏིཏཱ ཙ. ‘‘ཡོ ཏེ ཝིཧཱརེ ཝསཏི, སོ བྷིཀྑུ ཨརཧཱ’’ཏིཨཱདིནཱ (པརི. ༡༦༠, ༣༣༦) ནཱཉྙཱཔདེསོ ཙ. ཏདེཝཱཏི ཏདཱ ཨེཝ ཏངྑཎེཡེཝ ཛཱནནཾ. ཨསནྟདཱིཔནེཏི ཨུཏྟརིམནུསྶདྷམྨཱརོཙནཔཱརཱཛིཀེཏི ཨཏྠོ.

༡༦. ཨིདཱནི ¶ ‘‘པཱརཱཛིཀཱ ཙ ཙཏྟཱརོ’’ཏི ཨེཏྠ ཙ-སདྡེན སངྒཧིཏེཧི སདྡྷིཾ སམོདྷཱནེཏྭཱ དསྶེཏུཾ ‘‘ཨསཱདྷཱརཎཱ ཙཏྟཱརོ’’ཏིཨཱདི ཝུཏྟཾ. ཏཏྠ ཨུབྦྷཛཱཎུམཎྜལིཀཱ ཝཛྫཔྤཊིཙྪཱདིཀཱ ཨུཀྑིཏྟཱནུཝཏྟིཀཱ ཨཊྛཝཏྠུཀཱཏི ཨིམེ ཙཏྟཱརོ བྷིཀྑུནཱིནཾ བྷིཀྑཱུཧི ཨསཱདྷཱརཎཱ ནཱམ. ཨེཏཱསུ ཨུབྦྷཛཱཎུམཎྜལིཀཱ ནཱམ ཡཱ ཀཱཡསཾསགྒརཱགེན ཨཝསྶུཏཱ ཏེནེཝ རཱགེན ཨཝསྶུཏསྶ མནུསྶཔུརིསསྶ ཨཀྑཀཱནཾ ཨདྷོ, ཛཱཎུམཎྜལཱནཾ ཀཔྤརཱནཉྩ ཨུཔརི ཡེན ཀེནཙི སརཱིརཱཝཡཝེན ཨཱམསནཱདིཾ སཱདིཡཏི, ཏསྶཱ ཨདྷིཝཙནཾ. ཡཱ པན བྷིཀྑུནཱི ཨཉྙིསྶཱ བྷིཀྑུནིཡཱ པཱརཱཛིཀསངྑཱཏཾ ཝཛྫཾ ཛཱནཾ པཊིཙྪཱདེཏི, སཱ ཝཛྫཔྤཊིཙྪཱདིཀཱ ནཱམ. སམགྒེན པན སངྒྷེན ཨུཀྑིཏྟཾ བྷིཀྑུཾ ཡཱ བྷིཀྑུནཱི ཡཾདིཊྛིཀོ སོ ཧོཏི, ཏསྶཱ དིཊྛིཡཱ གཧཎཝསེན ཨནུཝཏྟཏི, སཱ ཨུཀྑིཏྟཱནུཝཏྟིཀཱ ནཱམ. ཡཱ པན ཀཱཡསཾསགྒརཱགེན ཏིནྟཱ ཏཐཱཝིདྷསྶེཝ པུརིསསྶ ཧཏྠགྒཧཎཾ ཝཱ སངྒྷཱཊིཀཎྞགྒཧཎཾ ཝཱ སཱདིཡཏི, ཀཱཡསཾསགྒསངྑཱཏསྶ ཨསདྡྷམྨསྶ པཊིསེཝནཏྠཱཡ པུརིསསྶ ཧཏྠཔཱསེ སནྟིཊྛཏི ཝཱ, ཏཏྠ ཋཏྭཱ སལླཔཏི ཝཱ, སངྐེཏཾ ཝཱ གཙྪཏི, པུརིསསྶ ཨཱགམནཾ ཝཱ སཱདིཡཏི, ཀེནཙི ཝཱ པཊིཙྪནྣོཀཱསཾ པཝིསཏི, ཧཏྠཔཱསེ ཋཏྭཱ ཀཱཡཾ ཨུཔསཾཧརཏི, ཨཡཾ ཨཊྛཝཏྠུཀཱ ནཱམཱཏི ཝེདིཏབྦཱ.

ཨབྷབྦཀཱ ¶ ཨེཀཱདསཱཏི ཨེཏྠ པཎྜཀོ ཐེཡྻསཾཝཱསཀོ ཏིཏྠིཡཔཀྐནྟཀོ ཏིརཙྪཱནགཏོ མཱཏུགྷཱཏཀོ པིཏུགྷཱཏཀོ ཨརཧནྟགྷཱཏཀོ བྷིཀྑུནིདཱུསཀོ སངྒྷབྷེདཀོ ལོཧིཏུཔྤཱདཀོ ཨུབྷཏོབྱཉྫནཀོཏི ཨིམེ ཨེཀཱདས ཨབྷབྦཔུགྒལཱ ནཱམ. ཝིབྦྷནྟཱ བྷིཀྑུནཱིཏི ཡདཱ བྷིཀྑུནཱི ཝིབྦྷམིཏུཀཱམཱ ཧུཏྭཱ སེཏཝཏྠཾ ཝཱ ཀཱསཱཡམེཝ ཝཱ གིཧིནིཝཱསནཱཀཱརེན ནིཝཱསེཏི, ཏདཱ པཱརཱཛིཀམཱཔནྣཱ ནཱམ ཧོཏི, པུན ཨུཔསམྤདཾ ན ལབྷཏི, སཱ ཙ པཱརཱཛིཀཱཏི ཨཏྠོ. མུདུཔིཊྛིཀོ ནཱམ ཀཏཔརིཀམྨཱཡ མུདུཀཱཡ པིཊྛིཡཱ སམནྣཱགཏོ. སོ ཨེཏྟཱཝཏཱ ན པཱརཱཛིཀོ, ཨཐ ཁོ ཡདཱ ཨནབྷིརཏིཡཱ པཱིལི༹ཏོ ཨཏྟནོ ཨངྒཛཱཏཾ ཨཏྟནོ མུཁམགྒཝཙྩམགྒེསུ ཨཉྙཏརཾ པཝེསེཏི, ཏདཱ པཱརཱཛིཀོ ཧོཏི.

༡༧-༡༨. ལམྦཱིཏི ཨངྒཛཱཏསྶ དཱིགྷཏྟཱ ཨེཝཾ ཝུཏྟོ. སོཔི ཡདཱ ཨནབྷིརཏིཡཱ པཱིལི༹ཏོ ཨཏྟནོ ཨངྒཛཱཏཾ ཨཏྟནོ མུཁེ ཝཱ ཝཙྩམགྒེ ཝཱ པཝེསེཏི, ཏདཱ པཱརཱཛིཀོ ཧོཏི. མུཁེན གཎྷནྟོཏི ཨེཏྠ ཡོ ཨནབྷིརཏིཡཱ པཱིལི༹ཏོ པརསྶ སུཏྟསྶ ཝཱ པམཏྟསྶ ཝཱ ཨངྒཛཱཏཾ ཨཏྟནོ མུཁེན གཎྷཱཏི, སོ ཙཱཏི ཨཏྠོ. ཏཏྠེཝཱཏི པརསྶ ཨངྒཛཱཏེཝཱཏི ཨཏྠོ ¶ . ཡོ ཨནབྷིརཏིཡཱ པཱིལི༹ཏོ པརསྶ ཨངྒཛཱཏཾ ཀམྨནིཡཾ དིསྭཱ ཨཏྟནོ ཝཙྩམགྒེན ཏསྶ ཨུཔརི ནིསཱིདཏི, ཏཾ ཨཏྟནོ ཝཙྩམགྒཾ པཝེསེཏི, སོ ཙཱཏི ཨཏྠོ. ཨེཏེ ཙཏྟཱརོ ཨནུལོམིཀཱ མེཐུནསྶཱཏི སམྦནྡྷོ. ཀཐམིཏི ཙེ? མགྒེ མགྒཔྤཝེསནསདིསཏཱཡ, ན ཨུབྷིནྣཾ རཱགཝསེན སདིསབྷཱཝཱུཔགཏཱནཾ དྭཡཾདྭཡསམཱཔཏྟིསདིསཏཱཡ. ཨིདྷཱགཏཱ ཙཏྟཱརོཏི མེཐུནདྷམྨཱདིཝསེན པཱརཱཛིཀཱ ཙཏྟཱརོ ཙཱཏི ཨེཝཾ སམོདྷཱནཏོ ཙཏུཝཱིསཏི པཱརཱཛིཀཱཏི ཨཏྠོ.

ཨེཏྠཱཧ ¶ – མཱཏུགྷཱཏཀཔིཏུགྷཱཏཀཨརཧནྟགྷཱཏཀཱ ཏཏིཡཔཱརཱཛིཀཾ ཨཱཔནྣཱ, བྷིཀྑུནིདཱུསཀོ ལམྦཱིཨཱདཡོ ཙཏྟཱརོ པཋམཔཱརཱཛིཀཾ ཨཱཔནྣཱཡེཝཱཏི ཀཏྭཱ ཀུཏོ ཙཏུཝཱིསཏཱིཏི? ཨདྷིཔྤཱཡོ པནེཏྠ ཨཏྠི, མཱཏུགྷཱཏཀཱདཡོ ཧི ཙཏྟཱརོ ཨིདྷ ཨནུཔསམྤནྣཱཡེཝ ཨདྷིཔྤེཏཱ, ལམྦཱིཨཱདཡོ ཙཏྟཱརོ ཀིཉྩཱཔི པཋམཔཱརཱཛིཀེན སངྒཧིཏཱ, ཡསྨཱ ཨེཀེན པརིཡཱཡེན མེཐུནདྷམྨཾ ཨཔྤཊིསེཝིནོཔི ཧོནྟི, ཏསྨཱ ཝིསུཾ ཝུཏྟཱཏི. པཱརཱཛིཀཝིནིཙྪཡོ.

༡༩. ཨིདཱནི སངྒྷཱདིསེསཾ པཀཱསེཏུཾ ‘‘གརུཀཱ ནཝཱ’’ཏིཨཱདི ཨཱརདྡྷཾ. གརུཀཱཏི སངྒྷཱདིསེསཱ ཨིདྷ ཨདྷིཔྤེཏཱ, ཨཉྙཏྠ པན པཱརཱཛིཀཱཔི སངྒཡ྄ཧནྟི. ཀསྨཱ ‘‘ཏེརསཱ’’ཏི ཨཝཏྭཱ ‘‘ནཝཱ’’ཏི ཝུཏྟནྟི ཙེ? ཝཱིཏིཀྐམཀྑཎེཡེཝ ཨཱཔཛྫིཏབྦཏྟཱ པཋམཱཔཏྟིཀཱ ཝུཏྟཱ, ཡཱཝཏཏིཡཀཱ པན ཙཏྟཱརོ སངྒྷཱདིསེསཱ སངྒྷཱཡཏྟཏྟཱ ཙིརེན ཨཱཔཛྫནྟཱིཏི ན ཝུཏྟཱ. ཏཏྠ མོཙེཏུཀཱམཏཱཏི མོཙེཏུཀཱམཏཱཡཱཏི ཨཏྠོ ‘‘ཨལཛྫིཏཱ’’ཏིཨཱདཱིསུ ཝིཡ. ཨིམིནཱ པན ནཡེན མོཙནསྶཱདོ མུཙྩནསྶཱདོ མུཏྟསྶཱདོ མེཐུནསྶཱདོ ཕསྶསྶཱདོ ཀཎྜཱུཝནསྶཱདོ དསྶནསྶཱདོ ནིསཛྫནསྶཱདོ ཝཱཙསྶཱདོ གེཧསིཏཔེམཾ ཝནབྷངྒིཡནྟི ཨེཀཱདས ཨསྶཱདཱ ཝུཏྟཱ, ཏེསུ ཨེཀཾཡེཝ མོཙནསྶཱདཾ གཧེཏྭཱ སེསཱ པཊིཀྑིཏྟཱ ཧོནྟི.

ཏེསཾ ཨསྶཱདཱནཾ ཝསེན ཨེཝཾ ཝིནིཙྪཡོ ཝེདིཏབྦོ – མོཙེཏུཾ ཨསྶཱདོ མོཙནསྶཱདོ. མོཙནསྶཱདཙེཏནཱཡ ¶ ནིམིཏྟེ ཨུཔཀྐམཏི, མུཙྩཏི, སངྒྷཱདིསེསོ. ན མུཙྩཏི ¶ ཙེ, ཐུལླཙྩཡཾ. མུཙྩནསྶཱདེ སཙེ ཨཏྟནོ དྷམྨཏཱཡ མུཙྩམཱནཾ ཨསྶཱདེཏི, ན ཨུཔཀྐམཏི, ཨནཱཔཏྟི. སཙེ མུཙྩམཱནཾ ཨསྶཱདེནྟོ ཨུཔཀྐམིཏྭཱ མོཙེཏི, སངྒྷཱདིསེསོཝ. ཨཏྟནོ དྷམྨཏཱཡ མུཏྟེ ཨསྶཱདོ མུཏྟསྶཱདོ. ཨེཏྠཱཔི ཨུཔཀྐམསྶ ནཏྠིཏཱཡ ཨནཱཔཏྟི. ཨེཝཾ སབྦཏྠ. མེཐུནསྶཱདེན ཨིཏྠིཾ གཎྷནྟསྶ མུཏྟེཔི ཨནཱཔཏྟི, ཨཡཾ མེཐུནསྶཱདོ. ཕསྶསྶཱདོ དུཝིདྷོ ཨཛ྄ཛྷཏྟིཀོ བཱཧིརོ ཙཱཏི. ཏཏྠ ཨཛ྄ཛྷཏྟིཀེ ཏཱཝ ཨཏྟནོ ནིམིཏྟཾ ‘‘ཐདྡྷཾ མུདུཀནྟི ཛཱནིསྶཱམཱི’’ཏི ཝཱ ལོལབྷཱཝེན ཝཱ ཀཱིལཱ༹པཡཏོ སཙེ མུཙྩཏི, ཨནཱཔཏྟི. བཱཧིརཕསྶསྶཱདེ ཀཱཡསཾསགྒརཱགེན མཱཏུགཱམཾ ཕུསཏོ ཨཱལིངྒཏོ ཙ མུཏྟེ ཨནཱཔཏྟི. ཀཎྜཱུཝནསྶཱདེ དདྡུཀཙྪཱདཱིནཾ ཝསེན ཁཛྫམཱནཾ ནིམིཏྟཾ ཀཎྜཱུཝནསྶཱདེན ཀཎྜཱུཝཏོ མུཏྟེཔི ཨནཱཔཏྟི. དསྶནསྶཱདེ མཱཏུགཱམསྶ ཨནོཀཱསཾ ཨུཔནིཛ྄ཛྷཱཡཏོ མུཏྟེཔི ཨནཱཔཏྟི. ནིསཛྫནསྶཱདེ མཱཏུགཱམེན སདྡྷིཾ རཧོ ནིསིནྣསྶ མུཏྟེཔི ཨནཱཔཏྟི. ཝཱཙཱཡ ཨསྶཱདོ ཝཱཙསྶཱདོ. ཏེན ཨསྶཱདེན མཱཏུགཱམཾ མེཐུནཔྤཊིསཾཡུཏྟཱཧི ཝཱཙཱཧི ཨོབྷཱསནྟསྶ མུཏྟེཔི ཨནཱཔཏྟི. གེཧསིཏཔེམེ མཱཏཱདཱིནཾ མཱཏཱདིཔེམེན ཨཱལིངྒནཱདིཾ ཀརོནྟསྶ མུཏྟེཔི ཨནཱཔཏྟི. ཝནབྷངྒེ ཙ སནྠཝཀརཎཏྠཱཡ ཨིཏྠིཡཱ པེསིཏཾ པུཔྥཱདིཝནབྷངྒསཉྙིཏཾ པཎྞཱཀཱརཾ ‘‘ཨིཏྠནྣཱམཱཡ ནཱམ ཨིདཾ མེ པེསིཏ’’ནྟི ཨསྶཱདེན ཨཱམསནྟསྶ མུཏྟེཔི ཨནཱཔཏྟི. ཨེཏེསུ པན མོཙནསྶཱདཝསེནེཝ ཨུཔཀྐམནྟསྶ ཨཱཔཏྟི, སེསཱནཾ ཝསེན ཨནཱཔཏྟཱིཏི ཝེདིཏབྦཾ.

སུཀྐསྶཱཏི ‘‘ནཱིལཾ པཱིཏཀཾ ལོཧིཏཀཾ ཨོདཱཏཾ ཏཀྐཝཎྞཾ དཀཝཎྞཾ ཏེལཝཎྞཾ ཁཱིརཝཎྞཾ དདྷིཝཎྞཾ སཔྤིཝཎྞ’’ནྟི (པཱརཱ. ༢༣༧) ཨེཝཾ ཨཱགཏེསུ དསསུ ཝཎྞེསུ ཡསྶ ཀསྶཙི སུཀྐསྶཱཏི ཨདྷིཔྤཱཡོ ¶ . ཨུཔཀྐམྨཱཏི ‘‘ཨཛ྄ཛྷཏྟརཱུཔེ མོཙེཏི, བཧིདྡྷཱརཱུཔེ མོཙེཏི, ཨཛ྄ཛྷཏྟབཧིདྡྷཱརཱུཔེ མོཙེཏི, ཨཱཀཱསེ ཀཊིཾ ཀམྤེནྟོ མོཙེཏཱི’’ཏི (པཱརཱ. ༢༣༧) ཨེཝཾ ཝུཏྟེསུ ཙཏཱུསུ ཨུཔཱཡེསུ ཨཉྙཏརེན ཨུཔཱཡེན ‘‘རཱགཱུཔཏྠམྦྷེ མོཙེཏི, ཝཙྩཱུཔཏྠམྦྷེ མོཙེཏི, པསྶཱཝཱུཔཏྠམྦྷེ མོཙེཏི, ཝཱཏཱུཔཏྠམྦྷེ མོཙེཏི, ཨུཙྩཱལིངྒཔཱཎཀདཊྛཱུཔཏྠམྦྷེ མོཙེཏཱི’’ཏི ཨེཝཾ ཝུཏྟེསུ པཉྩསུ ཀཱལེསུ ཀིསྨིཉྩི ཀཱལེ ཨངྒཛཱཏེ ཀམྨནིཡཾ པཏྟེ ‘‘ཨཱརོགྱཏྠཱཡ མོཙེཏི, སུཁཏྠཱཡ མོཙེཏི, བྷེསཛྫཏྠཱཡ, དཱནཏྠཱཡ, པུཉྙཏྠཱཡ, ཡཉྙཏྠཱཡ, སགྒཏྠཱཡ, བཱིཛཏྠཱཡ, ཝཱིམཾསཏྠཱཡ, དཝཏྠཱཡ མོཙེཏཱི’’ཏི (པཱརཱ. ༢༣༧) ཨེཝཾ ཝུཏྟེསུ དསསུ ཨདྷིཔྤཱཡེསུ ཡེན ཀེནཙི ཨདྷིཔྤཱཡེན ཧཏྠཱདཱིསུ ཡེན ཀེནཙི ཨུཔཀྐམིཏྭཱཏི ཨཏྠོ. ཝིམོཙཡནྟི ཨནྟམསོ ཡཾ ཨེཀཱ ཁུདྡཀམཀྑིཀཱ པིཝེཡྻ, ཏཏྟཀམྤི མོཙེནྟོཏི ཨཏྠོ. ཨཉྙཏྲ སུཔིནནྟེནཱཏི ཡཱ སུཔིནནྟེ ¶ སུཀྐཝིསྶཊྛི ཧོཏི, ཏཾ ཋཔེཏྭཱཏི ཨཏྠོ. སམཎོཏི ཡོ ཀོཙི ཨུཔསམྤནྣོ. གརུཀནྟི སངྒྷཱདིསེསཾ. ཕུསེཏི ཨཱཔཛྫེཡྻཱཏི ཨཏྠོ.

༢༠. ཨིདཱནི ཀཱཡསཾསགྒཾ དཱིཔེཏུཾ ‘‘ཨིཏྠིསཉྙཱི’’ཏིཨཱདི ཨཱརདྡྷཾ. ཏཏྠ ཨིཏྠིསཉྙཱིཏི ཏདཧུཛཱཏཱཡཔི མནུསྶིཏྠིཡཱ ཨིཏྠིསཉྙཱིཡེཝ ཧུཏྭཱཏི ཨཏྠོ. སཙེ ཏཏྠ ཝེམཏིཀོ ཝཱ པཎྜཀཔུརིསཏིརཙྪཱནགཏསཉྙཱི ཝཱ ཧོཏི, ཐུལླཙྩཡཾ, ཏཐཱ ཨིཏྠིཡཱ ཀཱཡེན ཀཱཡཔྤཊིབདྡྷཱམསནེ ཙ ཀཱཡཔྤཊིབདྡྷེན ཀཱཡཱམསནེ ཙ ཡཀྑཱིཔེཏཱིཔཎྜཀཱནཾ ཀཱཡེན ཀཱཡཱམསནེ ཙ. པུརིསཏིརཙྪཱནགཏིཏྠཱིནཾ པན ཀཱཡེན ཀཱཡཱམསནེཔི དུཀྐཊཾ, ཏཐཱ ཡཀྑཱིཨཱདཱིནཾ ཀཱཡེན ཀཱཡཔྤཊིབདྡྷཱདཱིསུ ¶ ཙ. མཏིཏྠིཡཱ པན ཐུལླཙྩཡཾ. ཀཱཡསཾསགྒརཱགཝཱཏི ཨིམིནཱ མཱཏུཔེམཱདིཾ མོཀྑཱདྷིཔྤཱཡཉྩ པཊིཀྑིཔཏི. སམྥུསནྟོཏི ཀཱཡསཾསགྒརཱགེན ཨུཔཀྐམྨ ཨནྟམསོ ལོམེནཔི མནུསྶིཏྠིཾ སམྥུསནྟོཏི ཨཏྠསམྦནྡྷོ. ཨིམིནཱ ཡོ ཨིཏྠིཡཱ ཨཱལིངྒཏོཔི ཀཱཡེན ན ཝཱཡམཏི, ཀེཝལཾ ཕསྶཾཡེཝ ཨནུབྷཝཏི, ཏསྶ ཨནཱཔཏྟཱིཏི དཱིཔིཏཾ ཧོཏི.

༢༡. ཨིདཱནི དུཊྛུལླཝཱཙཾ པཀཱསེཏུཾ ‘‘ཏཐཱ སུཎནྟི’’ནྟིཨཱདི ཨཱརདྡྷཾ. ཏཏྠ ཏཐཱཏི ཨིཏྠིསཉྙཱི. མནུསྶིཏྠིཾ སུཎནྟིནྟི སམྦནྡྷོ. སུཎནྟིནྟི ཨིམིནཱ པཊིབལཱཡཔི ཨིཏྠིཡཱ ཨཝིཉྙཏྟིཔཐེ ཋིཏཱཡ དཱུཏེན ཝཱ པཎྞེན ཝཱ ཨཱརོཙེནྟསྶ དུཊྛུལླཝཱཙཱཔཏྟིན ཧོཏཱིཏི དཱིཔིཏཾ ཧོཏི. ཝིཉྙུཉྩཱཏི ཨིམིནཱ ཡཱ མཧལླིཀཱཔི བཱལཱཔི ཨེལ༹མཱུགཱཔི ཨསདྡྷམྨཔྤཊིསཾཡུཏྟཾ ཀཐཾ ན ཛཱནཱཏི, སཱ ཨིདྷ ནཱདྷིཔྤེཏཱཏི དསྶེཏི. ཝཙྩམགྒཔསྶཱཝམགྒཱནཾ ཝསེན མགྒཾ ཝཱ མེཐུནཾ ཝཱ ཨཱརབྦྷཱཏི སམྦནྡྷོ. དུཊྛུལླཝཱཙཱཡ རཱགོ དུཊྛུལླཝཱཙཱརཱགོ, ཏེན དུཊྛུལླཝཱཙཱརཱགེན. ཏཾ ཨསྶཱདེནྟོ ཨོབྷཱསེཏྭཱ དུརུཏྟཝཙནཾ ཝཏྭཱ གརུཀཾ ཕུསེཏི ཨཏྠོ.

ཀཐཾ དྭེ མགྒེ ཨཱརབྦྷ པསཾསཏི གརཧཏི? ཏཏྠ པསཾསཱཡཔི ཏཱཝ ‘‘ཨིཏྠིལཀྑཎེན སུབྷལཀྑཎེན སམནྣཱགཏཱསཱི’’ཏི ཝདཏི, ན ཏཱཝསཱིསཾ ཨེཏི. ‘‘ཏཝ ཝཙྩམགྒོ ཙ པསྶཱཝམགྒོ ཙ སུབྷོ སུསཎྛཱནོ དསྶནཱིཡོ, ཨཱིདིསེན ནཱམ ཨིཏྠིལཀྑཎེན སུབྷལཀྑཎེན སམནྣཱགཏཱསཱི’’ཏི ¶ ཝདཏི, སཱིསཾ ཨེཏི, སངྒྷཱདིསེསོ ཧོཏཱིཏི ཨཏྠོ. གརཧཎེ པན ‘‘སིཁརཎཱིསི, སམྦྷིནྣཱསི, ཨུབྷཏོབྱཉྫནཱསཱི’’ཏི ཨིམཱནི ཏཱིཎི སུདྡྷཱནིཡེཝ སཱིསཾ ཨེནྟི ཝཙྩམགྒཔསྶཱཝམགྒཱནཾ ནིཡཏཝཙནཏྟཱ ཨཙྩོལཱ༹རིཀཏྟཱ ཙ. ཨཉྙཱནི པན ‘‘ཨནིམིཏྟཱསི, ནིམིཏྟམཏྟཱསཱི’’ཏིཨཱདཱིནི ¶ མགྒཱནཾ ཨནིཡཏཝཙནཏྟཱ མེཐུནེན གྷཊེཏྭཱ ཝུཏྟཱནི ཨེཝ སཱིསཾ ཨེནྟི. མེཐུནཔྤཊིསཾཡུཏྟེ ‘‘དེཧི མེ, ཨརཧསི མེ དཱཏུ’’ནྟིཨཱདཱིཧི པན སཱིསཾ ན ཨེཏི, ‘‘མེཐུནདྷམྨཾ དེཧཱི’’ཏིཨཱདིནཱ མེཐུནདྷམྨེ གྷཊིཏེཡེཝ སངྒྷཱདིསེསོ. ཨིཏྠིཡཱ ཝཙྩམགྒཔསྶཱཝམགྒེ ཋཔེཏྭཱ ཨདྷཀྑཀཾ ཨུབྦྷཛཱཎུམཎྜལཾ ཨཱདིསྶ ཝཎྞཱདིབྷཎནེ ཐུལླཙྩཡཾ, ཏཐཱ ཡཀྑཱིཔེཏཱིཔཎྜཀེསུ ཝཙྩམགྒཔསྶཱཝམགྒེ མེཐུནེཔི. ཨིམེསཾ པན ཡཀྑཱིཨཱདཱིནཾ ཨདྷཀྑཀཱདིཀེ ཝུཏྟཔྤཀཱརེ པདེསེ དུཾཀྐཊཾ, ཏཐཱ ཨིཏྠིཡཱདཱིནཾ ཨུབྦྷཀྑཀེ ཨདྷོཛཱཎུམཎྜལེ ཀཱཡཔྤཊིབདྡྷེ ཙཱཏི.

༢༢. ཨིདཱནི ཨཏྟཀཱམཔཱརིཙརིཡཾ དསྶེཏུཾ ‘‘ཝཏྭཱ’’ཏིཨཱདི ཝུཏྟཾ. ཏཏྠ ཝཏྭཱཏི དུཊྛུལློབྷཱསནེ ཝུཏྟཔྤཀཱརཾ ཨིཏྠིཾ ཨིཏྠིསཉྙཱིཡེཝ ཧུཏྭཱ ཝཏྭཱཏི ཨཏྠོ. ཨཏྟཀཱམུཔཊྛཱནཝཎྞནྟི ཨེཏྠ མེཐུནདྷམྨསངྑཱཏེན ཀཱམེན ཨུཔཊྛཱནཾ ཀཱམུཔཊྛཱནཾ, ཨཏྟནོ ཨཏྠཱཡ ཀཱམུཔཊྛཱནཾ ཨཏྟཀཱམུཔཊྛཱནཾ, ཨཏྟནཱ ཝཱ ཀཱམིཏཾ ཨིཙྪིཏནྟི ཨཏྟཀཱམཾ, སཡཾ མེཐུནརཱགཝསེན པཏྠིཏནྟི ཨཏྠོ, ཨཏྟཀཱམཉྩ ཏཾ ཨུཔཊྛཱནཉྩཱཏི ཨཏྟཀཱམུཔཊྛཱནཾ, ཏསྶ ཝཎྞོ ཨཏྟཀཱམུཔཊྛཱནཝཎྞོ, ཏཾ ཨཏྟཀཱམུཔཊྛཱནཝཎྞཾ. ‘‘ཨེཏདགྒཾ, བྷགིནི, པཱརིཙརིཡཱནཾ ཡཱ མཱདིསཾ སཱིལཝནྟཾ ཀལྱཱཎདྷམྨཾ བྲཧྨཙཱརིཾ ཨེཏེན དྷམྨེན པརིཙརེཡྻཱ’’ཏི ཨེཝཾ ཝཏྭཱཏི སམྦནྡྷོ. མེཐུནརཱགིནོཏི ཨིམིནཱ གིལཱནཔཙྩཡཱདཱིཧི ཨུཔཊྛཱནསྶ ཝཎྞཾ བྷཎཏོ ཨནཱཔཏྟཱིཏི དཱིཔིཏཾ ཧོཏི. ཝཱཙཱ མེཐུནཡུཏྟེནཱཏི ཨེཏྠ མེཐུནཡུཏྟེནེཝ ཝཱཙཱཡ མེཐུནཡཱཙནེ གརུཀཾ ཧོཏི, ན ཨཉྙཐཱཏི ཨདྷིཔྤཱཡོ.

ཨཏྟཀཱམཔཱརིཙརིཡསིཀྑཱཔདཾ ཙཏུཏྠཾ.

༢༣. ཨིདཱནི ¶ སཉྩརིཏྟཾ དསྶེཏུཾ ‘‘པཊིགྒཧེཏྭཱ’’ཏིཨཱདི ཨཱརདྡྷཾ. ཏཏྠ པཊིགྒཧེཏྭཱཏི ཨིཏྠིཡཱ ཝཱ པུརིསེན ཝཱ ཨུབྷིནྣཾ མཱཏཱདཱིཧི ཝཱ ‘‘བྷནྟེ, ཨིཏྠནྣཱམཾ ཨིཏྠིཾ ཝཱ པུརིསཾ ཝཱ ཨེཝཾ བྷཎཱཧཱི’’ཏི ཝུཏྟོ ཏེསཾ ཝཙནཾ ‘‘སཱདྷཱུ’’ཏི ཝཱ ‘‘ཧོཏཱུ’’ཏི ཝཱ ‘‘བྷཎཱམཱི’’ཏི ཝཱ ཡེན ཀེནཙི ཨཱཀཱརེན ཝཙཱིབྷེདཾ ཀཏྭཱ, སཱིསཀམྤནཱདཱིཧི ཝཱ སམྤཊིཙྪིཏྭཱཏི ཨཏྠོ. སནྡེསནྟི ཨེཏྠ ¶ པན ཨིཏྠཱི དསཝིདྷཱ མཱཏུརཀྑིཏཱ པིཏུརཀྑིཏཱ མཱཏཱཔིཏུརཀྑིཏཱ བྷཱཏུརཀྑིཏཱ བྷགིནིརཀྑིཏཱ ཉཱཏིརཀྑིཏཱ གོཏྟརཀྑིཏཱ དྷམྨརཀྑིཏཱ སཱརཀྑཱ སཔརིདཎྜཱཏི. དས བྷརིཡཱཡོ དྷནཀྐཱིཏཱ ཚནྡཝཱསིནཱི བྷོགཝཱསིནཱི པཊཝཱསིནཱི ཨོདཔཏྟཀིནཱི ཨོབྷཊཙུམྦཊཀཱ དཱསཱི ཙ བྷརིཡཱ ཙ ཀམྨཀཱརཱི ཙ བྷརིཡཱ ཙ དྷཛཱཧཊཱ མུཧུཏྟིཀཱ ཙཱཏི.

ཏཱསུ མཱཏུརཀྑིཏཱ བྷིཀྑུཾ པཧིཎཏི ‘‘གཙྪ, བྷནྟེ, ཨིཏྠནྣཱམཾ བྲཱུཧི ‘ཧོམི ཨིཏྠནྣཱམསྶ བྷརིཡཱ དྷནཀྐཱིཏཱ…པེ… མུཧུཏྟིཀཱ ཙཱ’’ཏི, ཨཡཾ ཨིཏྠིཡཱ སནྡེསོ ནཱམ. སཙེ མཱཏུརཀྑིཏཱཡ མཱཏཱཔིཏཱབྷཱཏཱབྷགིནིཨཱདཡོ བྷིཀྑུཾ པཧིཎནྟི ‘‘གཙྪ, བྷནྟེ, ཨིཏྠནྣཱམཾ བྲཱུཧི ‘ཧོཏུ ཨིཏྠནྣཱམསྶ བྷརིཡཱ དྷནཀྐཱིཏཱ…པེ… མུཧུཏྟིཀཱ ཙཱ’’ཏི, ཨཡམྤི ཨིཏྠིཡཱ སནྡེསོཡེཝ ནཱམ. ཨེཝཾ པིཏུརཀྑིཏཱདཱིསུཔི ནཡོ ནེཏབྦོ. པུརིསོ བྷིཀྑུཾ པཧིཎཏི ‘‘གཙྪ, བྷནྟེ, ཨིཏྠནྣཱམཾ མཱཏུརཀྑིཏཾ བྲཱུཧི…པེ… སཔརིདཎྜཾ བྲཱུཧི ‘ཧོཏུ ཀིར ཨིཏྠནྣཱམསྶ བྷརིཡཱ དྷནཀྐཱིཏཱ…པེ… མུཧུཏྟིཀཱ ཙཱ’’ཏི, ཨཡཾ པུརིསསྶ སནྡེསོ ནཱམ. སཙེ པུརིསསྶ མཱཏཱཔིཏཱབྷཱཏཱབྷགིནིཨཱདཡོ བྷིཀྑུཾ པཧིཎནྟི ‘‘གཙྪ, བྷནྟེ, ཨིཏྠནྣཱམཾ མཱཏུརཀྑིཏཾ བྲཱུཧི…པེ… སཔརིདཎྜཾ བྲཱུཧི ‘ཧོཏུ ཨིཏྠནྣཱམསྶ བྷརིཡཱ དྷནཀྐཱིཏཱ…པེ… མུཧུཏྟིཀཱ ཙཱ’’ཏི, ཨཡམྤི པུརིསསྶ སནྡེསོཡེཝ ནཱམ, ཨཱཎཱཔནནྟི ཨཏྠོ.

ཝཱིམཾསིཏྭཱཏི ¶ ཨེཏྠ ཝུཏྟཔྤཀཱརེན སཱསནཾ གཧེཏྭཱ ཏསྶཱ ཨིཏྠིཡཱ ཝཱ པུརིསསྶ ཝཱ ཏེསཾ ཨཝསྶཱརོཙནཀཱནཾ མཱཏཱཔིཏཱབྷཱཏཱབྷགིནིཨཱདཱིནཾ ཝཱ ཨཱརོཙེཏྭཱཏི ཨཏྠོ. ཧརནྟི ཡཏྠ པཧིཏོ, ཏཏྠ གནྟྭཱ ཏསྶཱ ཨིཏྠིཡཱ ཝཱ པུརིསསྶ ཝཱ ཨཱརོཙེཏི, སཱ ཨིཏྠཱི ཝཱ པུརིསོ ཝཱ ‘‘སཱདྷཱུ’’ཏི སམྤཊིཙྪཏུ ཝཱ, མཱ ཝཱ, ལཛྫཱཡ ཝཱ ཏུཎྷཱི ཧོཏུ, པུན ཨཱགནྟྭཱ ཏསྶཱ ཨིཏྠིཡཱ ཝཱ པུརིསསྶ ཝཱ ཧརནྟོ གརུཀཾ ཕུསེཏི སམྦནྡྷོ. ཨེཏྟཱཝཏཱ ‘‘པཊིགྒཎྷཏི ཝཱིམཾསཏི པཙྩཱཧརཏཱི’’ཏི ཝུཏྟཾ ཨངྒཏྟཡཾ སམྤཱདིཏཾ ཧོཏི. ཨིམཱཡ ཏིཝངྒསམྤཏྟིཡཱ སངྒྷཱདིསེསོ, ཨིཏོ ཡེཧི ཀེཧིཙི དྭཱིཧི ཨངྒེཧི ཐུལླཙྩཡཾ, ཨེཀེན དུཀྐཊཾ. ཡཀྑཱིཔེཏཱིཔཎྜཀེསུ ཨངྒཏྟཡེནཔི ཐུལླཙྩཡམེཝ, ཨེཀེན ཝཱ དྭཱིཧི ཝཱ དུཀྐཊནྟི.

༢༤. ཨིདཱནི ཀུཊིཀཱརསིཀྑཱཔདཾ ཨཱཝི ཀཱཏུཾ ‘‘སཾཡཱཙིཏཔརིཀྑཱར’’ནྟིཨཱདི ཨཱརདྡྷཾ. ཏཏྲཱཡཾ ¶ སངྑེཔཏྠོ – ‘‘ཝཱསིཾ དེཐ, ཕརསུཾ དེཐཱ’’ཏིཨཱདིནཱ སཡཾ པཝཏྟིཏཡཱཙནཱཡ གཧིཏཔརིཀྑཱརཾ སཾཡཱཙིཏཔརིཀྑཱརཾ པདབྷཱཛནེ ཝུཏྟནཡེན སངྒྷཾ ཏིཀྑཏྟུཾ ཡཱཙིཏྭཱ ལདྡྷབྷིཀྑཱུཧི ཝཱ སངྒྷེནེཝ ཝཱ ཏཏྠ གནྟྭཱ སཱརམྦྷཱནཱརམྦྷསཔརིཀྐམནཱཔརིཀྐམནབྷཱཝཾ ཉཏྭཱ ཨདེསིཏཝཏྠུཀཾ ‘‘ཀུཊི ནཱམ ཨུལླིཏྟཱ ཝཱ ཧོཏི ཨཝལིཏྟཱ ཝཱ ཨུལླིཏྟཱཝལིཏྟཱ ཝཱ’’ཏི (པཱརཱ. ༣༤༩) ཨེཝཾ ཝུཏྟལཀྑཎཾ ཀུཊིཾ. ‘‘ཏཏྲིདཾ པམཱཎཾ, དཱིགྷསོ དྭཱདས ཝིདཏྠིཡོ སུགཏཝིདཏྠིཡཱ, ཏིརིཡཾ སཏྟནྟརཱ’’ཏི (པཱརཱ. ༣༤༨) ཨེཝཾ ཝུཏྟཔམཱཎཱཏིཀྐནྟཾ, ‘‘མཡ྄ཧཾ ཝཱསཱགཱརཾ ཨེསཱ’’ཏི ཨེཝཾ ཨཏྟཱ ཨུདྡེསོ ཨེཏིསྶཱཏི ཨཏྟུདྡེསཱ, ཏཾ ཨཏྟུདྡེསཾ ཀཏྭཱ གརུཾ སངྒྷཱདིསེསཾ ཕུསེཏི སམྦནྡྷོ. ཨཡཾ པནེཏྠ ཝིནིཙྪཡོ – ཨདེསིཏཝཏྠུཀཾ ¶ པམཱཎཱཏིཀྐནྟཾ ཀུནྠཀིཔིལླིཀཱདཱིནཾ ཨཱསཡེ ཀཏཏྟཱ སཱརམྦྷཾ དྭཱིཧི བལཱིབདྡེཧི ཡུཏྟེན སཀཊེན གནྟུཾ ཨསཀྐུཎེཡྻཏཱཡ ཨཔརིཀྐམནཾ ཨུལླིཏྟཱདིབྷེདཾ ཀུཊིཾ ཨཏྟནོ ཝསནཏྠཱཡ ཀརོནྟོ ཝཱ ཀཱརཱཔེནྟོ ཝཱ ‘‘ཨིདཱནི ནིཊྛཱནཾ གམིསྶཏཱི’’ཏི པཋམཔིཎྜདཱནེ ཐུལླཙྩཡཾ, དུཏིཡཔིཎྜདཱནེན ལེཔེ གྷཊིཏེ དྭེ ཙ སངྒྷཱདིསེསེ དྭེ ཙ དུཀྐཊཱནི, སཙེ དེསིཏཝཏྠུཀཱཡེཝ ཝཱ པམཱཎཱཏིཀྐནྟཱཡེཝ ཝཱ ཧོཏི, ཨེཀཾ སངྒྷཱདིསེསཾ དྭེ ཙ དུཀྐཊཱནི ཨཱཔཛྫཏཱིཏི.

༢༥. ཨིདཱནི ཝིཧཱརཀཱརསིཀྑཱཔདཾ དསྶེཏུཾ ‘‘མཧལླཀ’’ནྟིཨཱདི ཨཱརདྡྷཾ. ཏཏྠ མཧལླཀནྟི སསྶཱམིཀབྷཱཝེན སཾཡཱཙིཏཀུཊིཏོ མཧནྟབྷཱཝོ ཨེཏསྶ ཨཏྠི, ཡསྨཱ ཝཱ ཝཏྠུཾ དེསཱཔེཏྭཱ པམཱཎཱཏིཀྐམེནཱཔི ཀཱཏུཾ ཝཊྚཏི, ཏསྨཱ པམཱཎམཧནྟཏཱཡཔི མཧལླཀོ, ཏཾ མཧལླཀཾ ཝིཧཱརཾ ཝཱ ཀཏྭཱཏི ཨཏྠོ. ཨེཏྠ པན ཨདེསིཏཝཏྠུཀབྷཱཝེན ཨེཀོ སངྒྷཱདིསེསོ, སེསཾ ཨནནྟརསདིསམེཝ. ཨིདྷ ཙ ཏཏྠ ཙ ཝཱསཱགཱརཾ ཋཔེཏྭཱ ཨུཔོསཐཱགཱརཾ ཝཱ ཛནྟཱགྷརཾ ཝཱ ཨགྒིསཱལཾ ཝཱ བྷཝིསྶཏཱིཏི ཨེཝམཱདིནཱ ནཡེན ཀརོནྟསྶ ཨནཱཔཏྟི.

༢༦. ཨིདཱནི ཨམཱུལཀསིཀྑཱཔདཾ པཀཱསེཏུཾ ‘‘ཨམཱུལཀེནཱ’’ཏིཨཱདི ཨཱརདྡྷཾ. ཏཏྠ ཨམཱུལཀེནཱཏི ཡཾ ཙོདཀེན ཙུདིཏཀམྷི པུགྒལེ ཨདིཊྛཾ ཨསུཏཾ ཨཔརིསངྐིཏཾ, ཨིདཾ ཨེཏེསཾ དསྶནསཝནཔརིསངྐཱསངྑཱཏཱནཾ མཱུལཱནཾ ཨབྷཱཝཏོ ཨམཱུལཀཾ, ཏེན ཨམཱུལཀེན ཝཏྠུནཱཏི སམྦནྡྷོ. ཏཏྠ ¶ ཨདིཊྛཾ ནཱམ ཨཏྟནོ པསཱདཙཀྑུནཱ ཝཱ དིབྦཙཀྑུནཱ ཝཱ ཨདིཊྛཾ. ཨསུཏཾ ¶ ནཱམ ཏཐེཝ ཀེནཙི ཝུཙྩམཱནཾ ན སུཏཾ. ཨཔརིསངྐིཏཾ ནཱམ ཙིཏྟེན ཨཔརིསངྐིཏཾ, ཏཾ པན དིཊྛསུཏམུཏཝསེན ཏིཝིདྷཾ. ཏཏྠ བྷིཀྑུཉྩ མཱཏུགཱམཉྩ ཏཐཱརཱུཔེ ཋཱནེ དིསྭཱ ‘‘ཨདྡྷཱ ཨིམེཧི ཀཏ’’ནྟི ཝཱ ‘‘ཀརིསྶནྟཱི’’ཏི ཝཱ པརིསངྐཏི, ཨིདཾ དིཊྛཔརིསངྐིཏཾ ནཱམ. ཨནྡྷཀཱརེ པཊིཙྪནྣོཀཱསེ ཝཱ བྷིཀྑུསྶ ཙ མཱཏུགཱམསྶ ཙ ཝཙནཾ སུཏྭཱ དུཏིཡསྶ ཨཏྠིབྷཱཝཾ ཨཛཱནནྟོ པུབྦེ ཝུཏྟནཡེན པརིསངྐཏི, ཨིདཾ སུཏཔརིསངྐིཏཾ ནཱམ. དྷུཏྟེཧི ཨིཏྠཱིཧི སདྡྷིཾ པཙྩནྟཝིཧཱརེསུ པུཔྥགནྡྷསུརཱདཱིཧི ཨནུབྷཝིཏྭཱ གཏཊྛཱནཾ དིསྭཱ ‘‘ཀེན ནུ ཁོ ཨིདཾ ཀཏ’’ནྟི ཝཱིམཾསནྟོ ཏཏྲ ཀེནཙི བྷིཀྑུནཱ གནྡྷཱདཱིཧི པཱུཛཱ ཀཏཱ ཧོཏི, བྷེསཛྫཏྠཱཡ ཨརིཊྛཾ ཝཱ པཱིཏཾ, སོ ཏསྶ གནྡྷཾ གྷཱཡིཏྭཱ ‘‘ཨཡཾ སོ བྷཝིསྶཏཱི’’ཏི པརིསངྐཏི, ཨིདཾ མུཏཔརིསངྐིཏཾ ནཱམ. ཨེཝཾ ཏིཝིདྷཱཡ པརིསངྐཱཡ ཨབྷཱཝེན ཨཔརིསངྐིཏནྟི ཨཏྠོ.

ཙོདེནྟོཏི ‘‘པཱརཱཛིཀཾ དྷམྨཾ ཨཱཔནྣོསི, ཨསྶམཎོསི, ཨསཀྱཔུཏྟིཡོསཱི’’ཏིཨཱདཱིཧི ཝཙནེཧི སཡཾ ཙོདེནྟོཏི ཨཏྠོ. ཨེཝཾ ཙོདེནྟསྶ ཝཱཙཱཡ ཝཱཙཱཡ སངྒྷཱདིསེསོ. ཙོདཱཔེནྟོ ཝཱཏི ཨཏྟནཱ ཏསྶ སམཱིཔེ ཋཏྭཱ ཨཉྙཾ བྷིཀྑུཾ ཨཱཎཱཔེཏྭཱ ཙོདཱཔེནྟོ ཏསྶ ཨཱཎཏྟསྶ ཝཱཙཱཡ ཝཱཙཱཡ གརུཾ ཕུསེཏི ཨཏྠོ. ཨཐ སོཔི ཙཱཝནཱདྷིཔྤཱཡེན ‘‘མཡཱཔི དིཊྛཾ ཨཏྠཱི’’ཏིཨཱདིནཱ ནཡེན ཙོདེཏི, དྭིནྣམྤི ཝཱཙཱཡ ཨཱཔཏྟི. ཝཏྠུནཱ ཨནྟིམེན ཙཱཏི བྷིཀྑུནོ ཨནུརཱུཔེསུ ཨེཀཱུནཝཱིསཏིཡཱ པཱརཱཛིཀེསུ ཨཉྙཏརེནཱཏི ཨཏྠོ. ཙཱཝེཏུནྟི བྲཧྨཙརིཡཱ ཙཱཝེཏུཾ, ཡོ སུདྡྷཾ ཝཱ ཨསུདྡྷཾ ཝཱ ཀཏཱུཔསམྤདཾ པུགྒལཾ སུདྡྷདིཊྛིཀོ སམཱནོ ཙཱཝནཱདྷིཔྤཱཡེན ཙོདེཏི ཝཱ ཙོདཱཔེཏི ཝཱ, ཏསྶ སངྒྷཱདིསེསོཏི ཨདྷིཔྤཱཡོ. སུཎམཱནནྟི ཨིམིནཱ པརམྨུཁཱ དཱུཏེན ཝཱ པཎྞེན ཝཱ ཙོདེཏི. ཙོདེནྟསྶ ¶ ན རུཧཏཱིཏི དཱིཔིཏཾ ཧོཏི. པརམྨུཁཱ པན སཏྟཧི ཨཱཔཏྟིཀྑནྡྷེཧི ཝདནྟསྶ དུཀྐཊཾ.

༢༧. ཨིདཱནི ཨཉྙབྷཱགིཡསིཀྑཱཔདཾ དསྶེཏུཾ ‘‘ཨཉྙསྶ ཀིརིཡ’’ནྟིཨཱདིམཱཧ. ཏཏྠ ཨཉྙསྶ ཀིརིཡནྟི ཨཉྙསྶ ཁཏྟིཡཱདིཛཱཏིཀསྶ པཱརཱཛིཀསྶ ཝཱིཏིཀྐམསངྑཱཏཾ ཀིརིཡཾ དིསྭཱཏི སམྦནྡྷོ. ཏེན ལེསེནཱཏི ‘‘དས ལེསཱ ཛཱཏིལེསོ ནཱམལེསོ གོཏྟལེསོ ལིངྒལེསོ ཨཱཔཏྟིལེསོ པཏྟལེསོ ཙཱིཝརལེསོ ཨུཔཛ྄ཛྷཱཡལེསོ ཨཱཙརིཡལེསོ སེནཱསནལེསོ’’ཏི (པཱརཱ. ༣༩༤) ཨེཝཾ ¶ ཝུཏྟེསུ དསསུ ལེསེསུ ཡོ ཏསྨིཾ པུགྒལེ དིསྶཏི, ཏེན ལེསེན ཏདཉྙཾ པུགྒལཾ བྲཧྨཙརིཡཱ ཙཱཝེཏུཾ ཨནྟིམཝཏྠུནཱ ཙོདེནྟོ གརུཀཾ ཕུསེཏི ཨཏྠོ. ཏཏྠ ཨཉྙམྤི ཝཏྠུཾ ལིསྶཏི སིལིསྶཏི ཝོཧཱརམཏྟེནེཝ ཨཱིསཀཾ ཨལླཱིཡཏཱིཏི ལེསོ, ཛཱཏིཡེཝ ལེསོ ཛཱཏིལེསོ. ཨེས ནཡོ སེསཔདེསུཔི. ལེསེན ཙོདེནྟོ ཀཐཾ ཙོདེཏི? ཨཉྙོ ཁཏྟིཡཛཱཏིཀོ ཨིམིནཱ ཙོདཀེན པཱརཱཛིཀཾ དྷམྨཾ ཨཛ྄ཛྷཱཔཛྫནྟོ དིཊྛོ ཧོཏི, སོ ཨཉྙཾ ཨཏྟནོ ཝེརིཾ ཁཏྟིཡཛཱཏིཀཾ བྷིཀྑུཾ པསྶིཏྭཱ ཏཾ ཁཏྟིཡཛཱཏིལེསཾ གཧེཏྭཱ ཨེཝཾ ཙོདེཏི ‘‘ཁཏྟིཡོ མཡཱ དིཊྛོ པཱརཱཛིཀཾ དྷམྨཾ ཨཛ྄ཛྷཱཔཛྫནྟོ, ཏྭམྤི ཁཏྟིཡོ པཱརཱཛིཀཾ དྷམྨཾ ཨཱཔནྣོསཱི’’ཏི ཝཱ ‘‘སོ ཏྭཾ ཁཏྟིཡོ, ནཱཉྙོ, པཱརཱཛིཀཾ དྷམྨཾ ཨཛ྄ཛྷཱཔནྣོསཱི’’ཏི ཝཱ ཙོདེཏི. ཨེཝཾ ནཱམལེསཱདཡོཔི ཝེདིཏབྦཱ.

༢༨. ཨེཏྟཱཝཏཱ ¶ ‘‘གརུཀཱ ནཝཱ’’ཏི ཨུདྡིཊྛེ ཝིཏྠཱརཏོ དསྶེཏྭཱ ཨིདཱནི ཏེསུ ཨཱཔནྣེསུ པཊིཔཛྫནཱཀཱརཾ དསྶེཏུཾ ‘‘ཚཱདེཏི ཛཱནམཱཔནྣ’’ནྟིཨཱདི ཝུཏྟཾ. ཏསྶཱཡཾ པིཎྜཏྠོ – ཡོ བྷིཀྑུ ‘‘ཨཡཾ ཨིཏྠནྣཱམཱ ཨཱཔཏྟཱི’’ཏི ཨཱཔཏྟིཝསེན ཝཱ ‘‘ཨིདཾ བྷིཀྑཱུནཾ ན ཝཊྚཏཱི’’ཏི ཨེཝཾ ཝཏྠུཝསེན ཝཱ ཛཱནམཱཔནྣཾ ཨཱཔཏྟིཾ ཡཱཝ ཚཱདེཏི, ཏཱཝ ཏེན བྷིཀྑུནཱ ཨཀཱམཱ པརིཝཱསོ ཝསིཏབྦོཏི. ཙརེཡྻཱཏི མཱནཏྟཾ སམཱདཱཡ ཝསེཡྻ. ཀིཏྟཀཾ དིཝསནྟི ཙེ? ཚ རཏྟིཡོ. མཱནཏྟཝཱསོ པན སངྒྷེཡེཝ, ན གཎེ, ན པུགྒལེ, ཏེན ཝུཏྟཾ ‘‘སངྒྷེ’’ཏི. པརིཝུཏྠོཏི ‘‘ཏཡོ ཁོ ཨུཔཱལི པཱརིཝཱསིཀསྶ བྷིཀྑུནོ རཏྟིཙྪེདཱ སཧཝཱསོ ཝིཔྤཝཱསོ ཨནཱརོཙནཱ’’ཏི (ཙཱུལ༹ཝ. ༨༣) ཨེཝཾ ཝུཏྟཾ རཏྟིཙྪེདཾ ཨཀཏྭཱ པརིཝུཏྠོཏི ཨཏྠོ. ཏཏྠ སཧཝཱསོཏི པཀཏཏྟེན བྷིཀྑུནཱ སདྡྷིཾ ཨེཀཙྪནྣེ ཨུདཀཔཱཏཊྛཱནབྦྷནྟརེ ཝཱསོ. ཝིཔྤཝཱསོ ནཱམ ཨཉྙཾ པཀཏཏྟཾ བྷིཀྑུཾ ཝིནཱ ཝཱསོ. ཨནཱརོཙནཱཏི ཨཱགནྟུཀཱདཱིནཾ ཨནཱརོཙནཱ. ཨེཏེསུ ཏཱིསུ ཨེཀེནཱཔི རཏྟིཙྪེདོ ཧོཏི ཨེཝ. ཨེཏྠ པན ཨུཔཙཱརསཱིམགཏཱནཾ ཨཱརོཙེཏབྦཾ, ན བཧི ཋིཏཱནཾ, བཧི ཋིཏཱནམྤི སཙེ སདྡཾ སུཎཱཏི, པསྶཏི, དཱུརཾ ཝཱ གནྟྭཱ ཨཱརོཙེཏབྦམེཝ, ཨནཱརོཙེནྟསྶ རཏྟིཙྪེདོ ཙེཝ ཝཏྟབྷེདེ དུཀྐཊཉྩ ཧོཏི. ཨཛཱནནྟསྶེཝ ཨུཔཙཱརསཱིམཾ པཝིསིཏྭཱ གཙྪནྟི ཙེ, རཏྟིཙྪེདོཝ ཧོཏི, ན ཝཏྟབྷེདོ.

ཙིཎྞམཱནཏྟནྟི ‘‘ཙཏྟཱརོ ཁོ, ཨུཔཱལི, མཱནཏྟཙཱརིཀསྶ བྷིཀྑུནོ རཏྟིཙྪེདཱ སཧཝཱསོ ¶ ཝིཔྤཝཱསོ ཨནཱརོཙནཱ ཨཱུནེ གཎེ ཙརཎ’’ནྟི (ཙཱུལ༹ཝ. ༩༢) ཨེཝཾ ཝུཏྟཾ རཏྟིཙྪེདཾ ཨཀཏྭཱ ཙིཎྞམཱནཏྟཾ པརིནིཊྛིཏམཱནཏྟནྟི ཨཏྠོ. ཨེཏྠ པན སཧཝཱསཱདཡོ པརིཝཱསེ ཝུཏྟཔྤཀཱརཱ ཨེཝ. ‘‘ཨཱུནེ གཎེ ཙརཎ’’ནྟི ཨེཏྠ གཎོ ཙཏྟཱརོ ཝཱ ཨཏིརེཀཱ ཝཱ བྷིཀྑཱུ, ཏསྨཱ ¶ སཙེཔི ཏཱིཧི བྷིཀྑཱུཧི སདྡྷིཾ ཝསཏི, རཏྟིཙྪེདོ ཧོཏིཡེཝ, ‘‘སཙེ པན ཏེན ཏེསཾ ཨཏྠིབྷཱཝཾ དིསྭཱ ཨཱརོཙིཏེ པཀྐམནྟི, ཨཱུནེ གཎེ ཙརཎདོསོ ན ཧོཏཱི’’ཏི (ཙཱུལ༹ཝ. ཨཊྛ. ༩༧) ཨཊྛཀཐཱསུ ཝུཏྟཾ ཀིར. ཨབྦྷེཡྻཱཏི ཏཾ བྷིཀྑུཾ ཝཱིསཏིགཎོ སངྒྷོ ཨབྦྷེཡྻ སམྤཊིཙྪེཡྻ, ཨབྦྷཱནཀམྨཝསེན ཨོསཱརེཡྻཱཏི ཨཏྠོ. སཙེ ཨེཀེནཔི ཨཱུནོ ཝཱིསཏིགཎོ བྷིཀྑུསངྒྷོ ཏཾ བྷིཀྑུཾ ཨབྦྷེཡྻ, སོ ཙ བྷིཀྑུ ན ཨབྦྷིཏོ, ཏེ ཙ བྷིཀྑཱུ གཱརཡ྄ཧཱ, དུཀྐཊཾ ཨཱཔཛྫནྟཱིཏི ཨཏྠོ.

༢༩. ཨིདཱནི ཡཐཱ ཚཱདིཏཱ ཨཱཔཏྟི ཚནྣཱ ཧོཏི, ཏཾ པཀཱརཾ དསྶེཏུཾ ‘‘ཨཱཔཏྟཱི’’ཏིཨཱདི ཝུཏྟཾ. ཏཏྠཱཡཾ པདཡོཛནཱ – ཨཱཔཏྟིཏཱ ཙ ཨནུཀྑིཏྟཏཱ ཙ ཨནནྟརཱཡཏཱ ཙ པཧུཏྟཏཱ ཙ ཨཱཔཏྟིནུཀྑིཏྟཨནནྟརཱཡཔཧུཏྟཏཱཡོ, ཨེཏཱསུ ཙཏཱུསུ ཏཐཱསཉྙིཏཱ ཙ ཚཱདེཏུཀཱམོ ཧུཏྭཱ ཚཱདནཱ ཙཱཏི ཨེཝཾ དསཧངྒེཧི ཨརུཎུགྒམམྷི ཚནྣཱ ཧོཏཱིཏི. ཨེཏྠ པན ཨཱཔཏྟིཨཱདཱིསུ ཙཏཱུསུ ཨཱཔཏྟིསཉྙིཏཱ ཙ ཨནུཀྑིཏྟསཉྙིཏཱ ཙ ཨནནྟརཱཡསཉྙིཏཱ ཙ པཧུཏྟསཉྙིཏཱ ཙཱཏི ཨེཝཾ སཉྙཱཝསེན ཡོཛེཏྭཱ ཨཊྛངྒཱནི གཧེཏབྦཱནི, ཚཱདེཏུཀཱམོཏི ཨིདམེཀཾ, ཚཱདནཱཏི ཨིདམེཀནྟི ཨེཝཾ དས.

ཨེཏེསུ པན ཨཱདིཏོ པཊྛཱཡ ཨཡཾ ཝིནིཙྪཡོ – ‘‘ཨཱཔཏྟི ཙ ཧོཏི ཨཱཔཏྟིསཉྙཱི ཙཱ’’ཏི ཨེཏྠ ཡཾ ཨཱཔནྣོ, སཱ ཏེརསནྣཾ ཨཉྙཏརཱ ཧོཏི, སོཔི ཙ ཏཏྠ གརུཀཱཔཏྟིསཉྙཱིཡེཝ ཧུཏྭཱ ཛཱནནྟོ ཚཱདེཏི, ཚནྣཱ ཧོཏི. སཙེ ཏཏྠ ཨནཱཔཏྟིསཉྙཱི ཝཱ ཨཉྙཱཔཏྟིསཉྙཱི ཝཱ ཝེམཏིཀོ ཝཱ ཧོཏི, ཨཙྪནྣཱཝ ཧོཏི. ཏིཝིདྷཾ པན ཨུཀྑེཔནཱིཡཀམྨཾ, ཏེན ཨཀཏོ ཨནུཀྑིཏྟོ. སོ ¶ ཙེ པཀཏཏྟསཉྙཱི ཧུཏྭཱ ཚཱདེཏི, ཚནྣཱ ཧོཏི. སཙེ ཨཔཀཏཏྟསཉྙཱི ཚཱདེཏི, ཨཙྪནྣཱ ཧོཏི. ཨཔཀཏཏྟེན པན པཀཏཏྟསཉྙིནཱཔི ཨཔཀཏཏྟསཉྙིནཱཔི ཚཱདིཏཾ ཨཙྪཱདིཏམེཝ ཧོཏཱིཏི. ཨནནྟརཱཡིཀོཏི ཡསྶ དསསུ རཱཛཙོརཨགྒིཨུདཀམནུསྶཱམནུསྶཝཱལ༹སརཱིསཔཛཱིཝིཏབྲཧྨཙརིཡནྟརཱཡེསུཔི ཨེཀོཔི ནཏྠི, སོ ཙེ ཨནནྟརཱཡིཀསཉྙཱི ཧུཏྭཱ ཚཱདེཏི, ཚནྣཱ ཧོཏི. སཙེ སོ ཨནྡྷཀཱརབྷཱིརུཀོ ཨནནྟརཱཡེ ཨེཝ ཝཱལཱ༹དིཨནྟརཱཡསཉྙཱི ཧུཏྭཱ ཚཱདེཏི, ཨཙྪནྣཱཝ ཧོཏི. པཧཱུཏི ཡོ སཀྐོཏི སབྷཱགབྷིཀྑུནོ སམཱིཔཾ གནྟུཉྩེཝ ཨཱརོཙིཏུཉྩ ¶ , སོ ཙེ པཧུསཉྙཱི ཧུཏྭཱ ཚཱདེཏི, ཚནྣཱ ཧོཏི. ཡོ པན ཨཔཧུ ཧུཏྭཱ པཧུསཉྙཱི, པཧུ ཝཱ ཨཔཧུསཉྙཱི ཧུཏྭཱ ཚཱདེཏི, ཨཙྪནྣཱཝ ཧོཏཱིཏི.

ཨརུཎུགྒམམྷཱིཏི ཨེཏྠ པུརེབྷཏྟཾ ཝཱ ཨཱཔཏྟིཾ ཨཱཔནྣོ ཧོཏི པཙྪཱབྷཏྟཾ ཝཱ, ཡཱཝ ཨརུཎཾ ན ཨུགྒཙྪཏི, ཏཱཝ ཨཱརོཙེཏབྦཱ. སཙེ པན ཨརུཎབྦྷནྟརེ སཏཀྑཏྟུམྤི ཚཱདེཏུཀཱམཏཱ ཨུཔྤཛྫཏི, ཨཙྪནྣཱཝ ཧོཏི. ཨཱརོཙེནྟོ པན སབྷཱགསངྒྷཱདིསེསཾ ཨཱཔནྣསྶ ཨཱརོཙེཏུཾ ན ཝཊྚཏི. སཙེ ཨཱརོཙེཏི, ཨཱཔཏྟི པན ཨཱཝིཀཏཱ ཧོཏི, ཨཱརོཙནཔཙྩཡཱ པན ཨཉྙཾ དུཀྐཊཾ ཨཱཔཏྟིཾ ཨཱཔཛྫཏི. ཨིམིནཱ ཨཉྙམྤི ཝཏྠུསབྷཱགཱཔཏྟིཾ ཨཱརོཙེཏུཾ ན ཝཊྚཏཱིཏི དཱིཔིཏོ ཧོཏི. ཨཱརོཙེནྟེན པན ‘‘ཨཧཾ ཏཝ སནྟིཀེ ཨེཀཾ ཨཱཔཏྟིཾ ཨཱཝི ཀརོམཱི’’ཏི ཝཱ ‘‘ཨཱཙིཀྑཱམཱི’’ཏི ཝཱ ‘‘ཨཱརོཙེམཱི’’ཏི ཝཱ ‘‘ཨེཀཾ ཨཱཔཏྟིཾ ཨཱཔནྣབྷཱཝཾ ཛཱནཱཧཱི’’ཏི ཝཱ ‘‘ཨེཀཾ གརུཀཱཔཏྟིཾ ཨཱཝི ཀརོམཱི’’ཏི ཝཱ ཨཱདིནཱ ནཡེན ཝཏྟབྦཾ, ཨེཏྟཱཝཏཱ ཨཙྪནྣཱཝ ཧོཏི. སཙེ ‘‘ལཧུཀཱཔཏྟིཾ ཨཱརོཙེམཱི’’ཏི ཝདཏི, ཚནྣཱཝ ཧོཏཱིཏི. སངྒྷཱདིསེསཝིནིཙྪཡོ.

སངྒྷཱདིསེསནིདྡེསཝཎྞནཱ ནིཊྛིཏཱ.

༣༠. ཨེཝཾ ¶ གརུཀེ སིཀྑིཏབྦཱཀཱརཾ དསྶེཏྭཱ ཨིདཱནི ཙཱིཝརེསུ དསྶེཏུཾ ‘‘ཙཱིཝར’’ནྟི ཨུདྡྷཊཾ. ཏཏྠ ཛཱཏིཏོ ཚ ཙཱིཝརཱནི (མཧཱཝ. ༣༣༩; པཱརཱ. ཨཊྛ. ༢.༤༦༢-༤༦༣; ཀངྑཱ. ཨཊྛ. ཀཐིནསིཀྑཱཔདཝཎྞནཱ), ཏཱནི ཀཱནཱིཏི ཙེ, ཏཾ དསྶེཏུཾ ‘‘ཁོམཱ’’ཏིཨཱདི ཨཱརདྡྷཾ. ཏཏྠ ཁོམཾ ནཱམ ཁོམཝཱཀསུཏྟེཧི ཀཏཾ ཝཏྠཾ. སཱཎཾ ནཱམ སཱཎཝཱཀེཧི ཀཏཾ ཝཏྠཾ. བྷངྒཾ ནཱམ ཁོམསུཏྟཱདཱིཧི པཉྩཧི མིསྶེཏྭཱ ཀཏཾ ཝཏྠཾ. པཱཊེཀྐཾ ཝཱཀམཡམེཝ ཝཱཏི ཝདནྟི. ཀམྦལཾ ནཱམ མནུསྶལོམཾ ཝཱལ༹ལོམཾ ཋཔེཏྭཱ ལོམེཧི ཝཱཡིཏྭཱ ཀཏཾ ཝཏྠཾ. ཚལེ༹ཏཱནཱིཏི ཚ ཨེཏཱནི. སཧ ཨནུལོམེཧཱིཏི སཱནུལོམཱནི. ཛཱཏིཏོ པན ཀཔྤིཡཱནི ཚ ཙཱིཝརཱནཱིཏི ཝུཏྟཾ ཧོཏི.

༣༡. ཨིདཱནི ¶ ཏེསཾ ཨནུལོམཱནི དསྶེཏུཾ ‘‘དུཀཱུལ’’ནྟིཨཱདི ཝུཏྟཾ. ཏཏྠ (མཧཱཝ. ཨཊྛ. ༣༠༥) དུཀཱུལཾ སཱཎསྶ ཨནུལོམཾ ཝཱཀམཡཏྟཱ. པཊྚུཎྞནྟི པཊྚུཎྞདེསེ པཱཎཀེཧི སཉྫཱཏཝཏྠཾ. སོམཱརདེསེ, ཙཱིནདེསེ ཛཱཏཾ སོམཱརཙཱིནཛཾ པཊནྟི སམྦནྡྷོ. ཨིམཱནི ཏཱིཎིཔི ཀོསེཡྻསྶ ཨནུལོམཱནི པཱཎཀེཧི ཀཏསུཏྟམཡཏྟཱ. ཨིདྡྷིཛནྟི ཨེཧིབྷིཀྑཱུནཾ པུཉྙིདྡྷིཡཱ ནིབྦཏྟཙཱིཝརཾ. ཏཾ པན ཁོམཱདཱིནཾ ཨཉྙཏརཾ ཧོཏི. ཀཔྤརུཀྑེཧི ནིབྦཏྟཾ ཛཱལིནིཡཱ དེཝཀཉྙཱཡ ཨནུརུདྡྷཏྠེརསྶ དིནྣཝཏྠཱདིཀཾ དེཝདིནྣཾ. ཏམྤི ཁོམཱདཱིཧི ནིབྦཏྟཝཏྠསདིསཏྟཱ ཚནྣམྤི ཨནུལོམཾ ཧོཏིཡེཝ ཀཔྤཱསིཀསྶ ཝཱ, ཨིདྡྷིཛམྤི ཏཐེཝ ཝེདིཏབྦཾ. ཏསྶ ཏསྶཱཏི ཁོམཱདིཀསྶ. ཨནུལོམིཀནྟི ཨནུརཱུཔཾ.

༣༢-༣༣. ཨེཝཾ ཛཱཏིཏོ སཱནུལོམཱནི ཚ ཙཱིཝརཱནི དསྶེཏྭཱ ཨིདཱནི ཏེསུ ཨདྷིཊྛཱནཱདིཀཾ ཝིདྷཱནཾ དསྶེཏུཾ ‘‘ཏིཙཱིཝར’’ནྟིཨཱདི ཝུཏྟཾ. ཨེཏྠ (ཀངྑཱ. ཨཊྛ. ཀཐིནསིཀཁཱཔདཝཎྞནཱ; མཧཱཝ. ༣༥༨) དྷིཊྛཱནཏོ པུབྦེ ཏིཙཱིཝརཾ ནཱམ ¶ པཱཊེཀྐཾ ནཏྠི སངྒྷཱཊིཨཱདིཔྤཧོནཀསྶ པཙྩཏྠརཎཱདིཝསེནཱཔི ཨདྷིཊྛཱཏུཾ ཨནུཉྙཱཏཏྟཱ. ཏསྨཱ ‘‘ཏིཙཱིཝརཾ ཨདྷིཊྛེཡྻ ན ཝིཀཔྤེཡྻཱ’’ཏི ཨེཏྠ ‘‘ཨིམཾ སངྒྷཱཊི’’ནྟི ཨེཝཾ ནཱམེ གཧིཏེ ‘‘ཨདྷིཊྛཱན’’མིཙྩེཝ ཝཏྟབྦཾ, ‘‘ཝིཀཔྤེམཱི’’ཏི པན ན ཝཏྟབྦནྟི ཨདྷིཔྤཱཡོ. ཨེཝཾ སེསེསུཔི. མུཁཔུཉྪནཉྩ ནིསཱིདནཉྩ མུཁཔུཉྪནནིསཱིདནཾ. ཀཎྜུཙྪཱདིནྟི ཀཎྜུཔྤཊིཙྪཱདིཾ ཨདྷིཊྛེཡྻ, ན ཝིཀཔྤེཡྻཱཏི སམྦནྡྷོ. ཨེཏྠཱཏི ཨིམེསུ ནཝསུ ཙཱིཝརེསུ. ཏིཙཱིཝརནྟི ཏིཙཱིཝརཱདྷིཊྛཱནནཡེན ཨདྷིཊྛིཏཏིཙཱིཝརཾ. ཝིནཱ ཨལདྡྷསམྨུཏིཀོ བྷིཀྑུ ཨཝིཔྤཝཱསསམྨུཏིཨལདྡྷཊྛཱནེ ཨེཀཱཧམྤི ཧཏྠཔཱསཾ ཝིཛཧིཏྭཱ ན ཝསེཡྻཱཏི ཨཏྠོ. ‘‘ན བྷིཀྑཝེ ཙཱཏུམཱསཾ ནིསཱིདནེན ཝིཔྤཝསིཏབྦཾ, ཡོ ཝིཔྤཝསེཡྻ, ཨཱཔཏྟི དུཀྐཊསྶཱ’’ཏི ཁུདྡཀཀྑནྡྷཀེ (ཙཱུལ༹ཝ. ༢༦༣) ཝུཏྟཏྟཱ ཙཱཏུམཱསཾ ནིསཱིདནཾ ཝིནཱ ན ཝསེཡྻཱཏི ཨཏྠོ.

༣༤. ཨིདཱནི ཨདྷིཊྛཱནཝིདྷིཾ དསྶེཏུཾ ‘‘ཨིམཾ སངྒྷཱཊི’’ནྟིཨཱདི ཝུཏྟཾ. ཏཏྠ མིཙྩདྷིཊྛཡེཏི ཨིཏི ཨདྷིཊྛཡེ, ‘‘ཨིམཾ སངྒྷཱཊིཾ ཨདྷིཊྛཱམཱི’’ཏི ཨེཝཾ སངྒྷཱཊིཾ ཨདྷིཊྛཡེཏི ཨཏྠོ. ཨཧཏྠཔཱསམེཏནྟི དཱུརེ ཋིཏཾ པན ཋཔིཏོཀཱསཾ སལླཀྑེཏྭཱ སཙེ ཨེཀཾ, ‘‘ཨེཏ’’ནྟི, བཧཱུནི ཙེ, ‘‘ཨེཏཱནཱི’’ཏི ཝཏྭཱ ཨདྷིཊྛཡེཏི ཨཏྠསམྦནྡྷོ. སེསེསུཔི ཨཡཾ ནཡོཏི ཡཐཱ ‘‘ཨིམཾ སངྒྷཱཊིཾ ཨདྷིཊྛཱམཱི’’ཏི ཝུཏྟཾ, ཨེཝཾ ‘‘ཨིམཾ ཨུཏྟརཱསངྒཾ, ཨིམཾ ཀཎྜུཔྤཊིཙྪཱདིཾ ཨདྷིཊྛཱམཱི’’ཏི ཨེཝཾ ཨཏྟནོ ནཱམེནེཝ ཝཏྭཱ སམྨུཁཱཔི པརམྨུཁཱཔི ཝུཏྟནཡེན ཨདྷིཊྛཱཏབྦནྟི ཝུཏྟཾ ཧོཏི.

༣༥. ཨིདཱནི ¶ སཙེ པུབྦེ ཨདྷིཊྛིཏཾ ཏིཙཱིཝརཾ ནིསཱིདནཾ ཝསྶིཀསཱཊིཀཾ ཀཎྜུཔྤཊིཙྪཱདཱིཏི ཨིམེསུ ཚསུ ཙཱིཝརེསུ ཨཉྙཏརཾ ཙཱིཝརཾ ཨཏྠི, པུན ཏཐཱཝིདྷཾ ཙཱིཝརཾ ཨདྷིཊྛཧིཏྭཱ པརིཧརིཏུཾ ཨིཙྪནྟེན ‘‘དྭེ པན ན ཝཊྚནྟཱི’’ཏི (པཱརཱ. ཨཊྛ. ༢.༤༦༩; ཀངྑཱ. ཨཊྛ. ཀཐིནསིཀྑཱཔདཝཎྞནཱ) ཝུཏྟཏྟཱ པུབྦེ ཨདྷིཊྛིཏཾ པཙྩུདྡྷརིཏྭཱ ¶ ཨདྷིཊྛཱཏབྦནྟི དསྶེཏུཾ ‘‘ཨདྷིཊྛཧནྟོ’’ཏིཨཱདི ཝུཏྟཾ, ཏཾ ཨུཏྟཱནམེཝ. པཏྟཱདྷིཊྛཧནེ ཏཐཱཏི ‘‘ཨིམཾ པཏྟཾ, ཨེཏཾ པཏྟ’’ནྟི ཨེཝཾ ནཱམམཏྟམེཝ ཝིསེསོ. སེསཾ ཏཱདིསམེཝཱཏི ཨཏྠོ.

༣༦. ཨེཏཾ ཨིམཾ ཝ སངྒྷཱཊིཾ སཾསེཏི ཨེཏྠ སཙེ ཨནྟོགབྦྷེ ཝཱ སཱམནྟཝིཧཱརེ ཝཱ ཧོཏི, ཋཔིཏཊྛཱནཾ སལླཀྑེཏྭཱ ‘‘ཨེཏཾ སངྒྷཱཊིཾ ཨདྷིཊྛཱམཱི’’ཏི ཝཱཙཱ བྷིནྡིཏབྦཱ, སཙེ ཧཏྠཔཱསེ ཧོཏི, ‘‘ཨིམཾ སངྒྷཱཊི’’ནྟི ཏེསཾ ཏེསཾ ནཱམཝསེན ཝཱཙཱ བྷིནྡིཏབྦཱཏི ཨཏྠོ. པཙྩུདྡྷཱརེཔི ཨེསེཝ ནཡོ. ཨེཏྠ པན ‘‘དྭེ ཙཱིཝརསྶ ཨདྷིཊྛཱནཱ ཀཱཡེན ཝཱ ཨདྷིཊྛེཏི, ཝཱཙཱཡ ཝཱ ཨདྷིཊྛེཏཱི’’ཏི (པརི. ༣༢༢) ཝུཏྟཏྟཱ སངྒྷཱཊིཨཱདིཀཾ ཧཏྠེན གཧེཏྭཱ ‘‘ཨིམཾ སངྒྷཱཊིཾ ཨདྷིཊྛཱམཱི’’ཏིཨཱདིནཱ ནཡེན ཙིཏྟེན ཨཱབྷོགཾ ཀཏྭཱ ཀཱཡཝིཀཱརཾ ཀརོནྟེན ཀཱཡེན ཨདྷིཊྛཱཏབྦཾ, ཡེན ཀེནཙི སརཱིརཱཝཡཝེན ཨཕུསནྟསྶ ན ཝཊྚཏི. ཝཱཙཱཡ ཨདྷིཊྛཧནྟེན ཝཙཱིབྷེདཾ ཀཏྭཱཝ ཨདྷིཊྛཱཏབྦཾ. ཏཐཱ པཏྟེཔི. ཝིདཱུཏི པཎྜིཏོ.

༣༧-༨. ཨིདཱནི ཏེསཾ པམཱཎཔརིཙྪེདཾ དསྶེཏུཾ ‘‘སངྒྷཱཊི པཙྪིམནྟེནཱ’’ཏིཨཱདི ཝུཏྟཾ. ཏཏྠ དཱིགྷཏོ མུཊྛིཔཉྩཀཏོ (པཱརཱ. ཨཊྛ. ༢.༤༦༩; ཀངྑཱ. ཨཊྛ. ཀཐིནསིཀྑཱཔདཝཎྞནཱ) པཊྛཱཡ ‘‘ཏཏྲིདཾ སུགཏསྶ སུགཏཙཱིཝརཔྤམཱཎཾ, དཱིགྷསོ ནཝ ཝིདཏྠིཡོ སུགཏཝིདཏྠིཡཱ, ཏིརིཡཾ ཚ ཝིདཏྠིཡོ’’ཏི (པཱཙི. ༥༤༨) ཨེཝཾ ཝུཏྟསུགཏཙཱིཝརཱུནཱཔི ཝཊྚཏི. ཏིརིཡཾ པན མུཊྛིཏྟིཀཾ. ཙ-སདྡེན ཨཏིརེཀམྤི ཝཊྚཏཱིཏི ཨཏྠོ. ཨུཏྟརཱསངྒསྶཔི ཨེཏདེཝ པམཱཎནྟི ཏཾ དསྶེཏུཾ ‘‘ཏཐཱ ཨེཀཾསིཀསྶཱཔཱི’’ཏི ཝུཏྟཾ. ཨནྟརཝཱསཀསྶ པན ‘‘པཱརུཔནེནཔི ཧི སཀྐཱ ནཱབྷིཾ པཊིཙྪཱདེཏུ’’ནྟི (པཱརཱ. ཨཊྛ. ༢.༤༦༩) ཨཊྛཀཐཱཝཙནཏོ ‘‘དྭིཧཏྠོ ཝཱ’’ཏི ཝུཏྟཾ.

༣༩. ནིསཱིདནསྶ ¶ དཱིགྷེནཱཏི ཨེཏྠ (པཱཙི. ༥༣༡ ཨཱདཡོ; པཱཙི. ཨཊྛ. ༥༣༡; ཀངྑཱ. ཨཊྛ. ནིསཱིདནསིཀྑཱཔདཝཎྞནཱ) ནིསཱིདནནྟི སནྠཏསདིསཾ སནྠརིཏྭཱ ཨེཀསྨིཾ ཨནྟེ ཝུཏྟཔྤམཱཎེན དྭཱིསུ ཋཱནེསུ ཕཱལེཏྭཱ ཀཏཱཧི ཏཱིཧི དསཱཧི ཡུཏྟསྶ པརིཀྑཱརསྶེཏཾ ནཱམཾ.

༤༠. ཀཎྜུཔྤཊིཙྪཱདི ¶ (པཱཙི. ༥༣༨; མཧཱཝ. ༣༥༤; པཱཙི. ཨཊྛ. ༥༣༧; ཀངྑཱ. ཨཊྛ. ཀཎྜུཔྤཊིཙྪཱདིསིཀྑཱཔདཝཎྞནཱ) ནཱམ ཡསྶ ཨདྷོནཱབྷིཨུབྦྷཛཱཎུམཎྜལཾ ཀཎྜུ ཝཱ པིལ༹ཀཱ ཝཱ ཨསྶཱཝོ ཝཱ ཐུལླཀཙྪུ ཝཱ ཨཱབཱདྷོ, ཏསྶ པཊིཙྪཱདནཏྠཱཡ ཨནུཉྙཱཏཾ ཙཱིཝརཾ. གཱཐཱཡོ སུཝིཉྙེཡྻཱཝ.

༤༡. ཨཌྜྷཏེཡྻཱཝཱཏི (པཱཙི. ༥༤༤) ཨེཏྠ ཏཏོ ཨུདྡྷཾ ན ཝཊྚཏཱིཏི ཨཏྠོ.

༤༢. ཨེཏྠཱཏི སངྒྷཱཊིཏོ པཊྛཱཡ ཡཱཝ ཝསྶིཀསཱཊིཀཱ, ཏཱཝ དསྶིཏཙཱིཝརེསཱུཏི ཨཏྠོ. ཏདུཏྟརིནྟི ཏཏོ ཏེསཾ ཙཱིཝརཱནཾ ཝུཏྟཔྤམཱཎཏོ ཨུཏྟརིཾ ཀརོནྟསྶ ཚེདནཔཱཙིཏྟི ཧོཏཱིཏི པཱཋསེསོ, ཏཾ ཨཏིརེཀཾ ཚིནྡིཏྭཱ པུན པཱཙིཏྟིཡཾ དེསེཏབྦནྟི ཨཏྠོ. པཙྩཏྠརཎམུཁཙོལཱ༹ཏི ཨེཏྠ ‘‘ཨནུཛཱནཱམི, བྷིཀྑཝེ, ཡཱཝ མཧནྟཾ པཙྩཏྠརཎཾ ཨཱཀངྑཏི, ཏཱཝ མཧནྟཾ པཙྩཏྠརཎཾ ཀཱཏུ’’ནྟི (མཧཱཝ. ༣༥༣) ཝུཏྟཏྟཱ པཙྩཏྠརཎསྶ པམཱཎཔརིཙྪེདོ ནཏྠི,. མུཁཔུཉྪནཙོལ༹སྶ པན ཨུཀྐཊྛཝསེན ཝཱ ཨནྟིམཝསེན ཝཱ པམཱཎཔརིཙྪེདོ ན ཝུཏྟོ, ཏསྨཱ ཏམྤི ཨཔྤམཱཎིཀཾ. ཏེན ཝུཏྟཾ ‘‘ཨཱཀངྑིཏཔྤམཱཎིཀཱ’’ཏི, ཨིཙྪིཏཔྤམཱཎིཀཱཏི ཨཏྠོ. ཡཱཝ ཨེཀཾ དྷོཝཱིཡཏི, ཏཱཝ ཨཉྙཾ པརིབྷོགཏྠཱཡ ཨིཙྪིཏབྦནྟི དྭེཔི ཝཊྚནྟི.

༤༣. ན ¶ དཱིཔིཏནྟི ཀཏྠ ན དཱིཔིཏཾ? ཨཊྛཀཐཱསུ. ཀསྨཱཏི ཙེ? ‘‘ཏེན ཁོ པན སམཡེན བྷིཀྑཱུནཾ པརིཔུཎྞཾ ཧོཏི ཏིཙཱིཝརཾ, ཨཏྠོ ཙ ཧོཏི པརིསྶཱཝནེཧིཔི ཐཝིཀཱཧིཔི. བྷགཝཏོ ཨེཏམཏྠཾ ཨཱརོཙེསུཾ. ཨནུཛཱནཱམི, བྷིཀྑཝེ, པརིཀྑཱརཙོལ༹ཀ’’ནྟི (མཧཱཝ. ༣༥༧) བཧཱུནཾ པཏྟཐཝིཀཔརིསྶཱཝནཱདཱིནཾ སངྒཧཝསེན ཝུཏྟཏྟཱ པཱཊེཀྐཾ ནིདྷཱནམུཁནྟི. ཡསྨཱ པན བྷགཝཏཱ ‘‘ཡཾ ཡཾ ལབྦྷཏི, ཏཾ ཏཾ ཨིམིནཱ ཝིདྷཱནེན ཨདྷིཊྛཧིཏྭཱ པུན ཡེན ཡེན པརིསྶཱཝནཱདིནཱ ཨཏྠོ ཧོཏི, ཏཾ ཏཾ ཀཏྭཱ གཎྷནྟཱུ’’ཏི ཨནུཀམྤཱཡ ཨནུཉྙཱཏཾ, ཏསྨཱ ཝིཀཔྤནུཔགཔཙྪིམཙཱིཝརཔྤམཱཎཾ ཐཝིཀམྤི པཊཔརིསྶཱཝནམྤི བཧཱུནིཔི ཨེཀཏོ ཀཏྭཱ ‘‘ཨིམཱནི ཙཱིཝརཱནི པརིཀྑཱརཙོལཱ༹ནི ཨདྷིཊྛཱམཱི’’ཏི ཝཏྭཱ ཨདྷིཊྛཱཏུམྤི ཝཊྚཏིཡེཝ. ཏསྨཱ ཝུཏྟཾ ‘‘ཏཐཱ ཝཏྭཱ’’ཏི, ‘‘པརིཀྑཱརཙོལ༹’’ནྟི ཝཏྭཱཏི ཨཏྠོ. ཝིཀཔྤིཡནྟི ཝིཀཔྤནུཔགཾ.

༤༤. ཨཧཏཀཔྤཱནནྟི (མཧཱཝ. ༣༤༨) ཨེཀཝཱརཾ དྷོཝིཏཀཱནཾ.

༤༥. ཨུཏུདྡྷཊཱནནྟི ¶ ཨུཏུཏོ དཱིགྷཀཱལཏོ ཨུདྡྷཊཱནཾ, ཀཏཝཏྠཀིཙྩཱནཾ པིལོཏིཀཱནནྟི ཝུཏྟཾ ཧོཏི. སེསཱཏི ཨུཏྟརཱསངྒཨནྟརཝཱསཀཱ. པཾསུ ཝིཡ ཀུཙྪིཏབྷཱཝཾ པཊིཀྐཱུལབྷཱཝཾ ཨུལཏི གཙྪཏཱིཏི པཾསུཀཱུལཾ, ཙོལ༹ཁཎྜཱནམེཏཾ ནཱམཾ, ཏསྨིཾ པཾསུཀཱུལེ ཡཐཱརུཙཱིཏི ཨཏྠོ. ཀསྨཱཏི ཙེ? ‘‘ཨནུཛཱནཱམི, བྷིཀྑཝེ, ཨཧཏཱནཾ དུསྶཱནཾ ཨཧཏཀཔྤཱནཾ དིགུཎཾ སངྒྷཱཊིཾ ཨེཀཙྩིཡཾ ཨུཏྟརཱསངྒཾ ཨེཀཙྩིཡཾ ཨནྟརཝཱསཀཾ, ཨུཏུདྡྷཊཱནཾ དུསྶཱནཾ ཙཏུགྒུཎཾ སངྒྷཱཊིཾ དིགུཎཾ ཨུཏྟརཱསངྒཾ དིགུཎཾ ཨནྟརཝཱསཀཾ, པཾསུཀཱུལེ ཡཱཝདཏྠཾ, པཱཔཎིཀེ ཨུསྶཱཧོ ཀརཎཱིཡོ’’ཏི ཝུཏྟཏྟཱ, ཏསྨཱ སུསཱནཱདཱིསུ པཏིཏཔཾསུཀཱུལེ ཙ ཨནྟརཱཔཎེ པཏིཏཔིལོཏིཀཙཱིཝརེ ཙ པཊཔརིཙྪེདོ ནཏྠི, པཊསཏམྤི ཝཊྚཏཱིཏི སིདྡྷཾ.

༤༦. ཨིདཱནི ¶ ‘‘ཨནུཛཱནཱམི, བྷིཀྑཝེ, ཚིནྣཀཾ སངྒྷཱཊིཾ ཚིནྣཀཾ ཨུཏྟརཱསངྒཾ ཚིནྣཀཾ ཨནྟརཝཱསཀ’’ནྟི (མཧཱཝ. ༣༤༥) ཝཏྭཱ པུན ‘‘ཏེན ཁོ པན སམཡེན ཨཉྙཏརསྶ བྷིཀྑུནོ ཏིཙཱིཝརེ ཀཡིརམཱནེ སབྦཾ ཚིནྣཀཾ ནཔྤཧོཏི. བྷགཝཏོ ཨེཏམཏྠཾ ཨཱརོཙེསུཾ. ཨནུཛཱནཱམི, བྷིཀྑཝེ, དྭེ ཚིནྣཀཱནི ཨེཀཾ ཨཙྪིནྣཀནྟི. དྭེ ཚིནྣཀཱནི ཨེཀཾ ཨཙྪིནྣཀཾ ནཔྤཧོཏི. ཨནུཛཱནཱམི, བྷིཀྑཝེ, དྭེ ཨཙྪིནྣཀཱནི ཨེཀཾ ཚིནྣཀནྟི. ཨེཀཾ ཚིནྣཀཾ ནཔྤཧོཏི. ཨནུཛཱནཱམི, བྷིཀྑཝེ, ཨནྭཱདྷིཀམྤི ཨཱརོཔེཏུཾ. ན ཙ, བྷིཀྑཝེ, སབྦཾ ཨཙྪིནྣཀཾ དྷཱརེཏབྦཾ, ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༣༦༠) ཨེཝཾ ཝུཏྟཝིདྷཱནཾ དསྶེཏུཾ ‘‘ཏཱིསཱུ’’ཏིཨཱདི ཨཱརདྡྷཾ. ཏསྶ ཨཏྠོ – ཏཱིསུ ཙཱིཝརེསུ ཡཾ ཚིནྡིཏྭཱ སིབྦིཏུཾ སབྦཔཙྪིམཔྤམཱཎཾ པཧོཏི, ཏཾ ཚིནྡིཏབྦཾ. སབྦེསུ པན ཨཔྤཧོནྟེསུ ཨནྭཱདྷིཀཾ ཨཱདིཡེཡྻཱཏི. ཏཏྠ ཨནྭཱདྷི ནཱམ ཨནུཝཱཏཾ ཝིཡ སཾཧརིཏྭཱ ཙཱིཝརསྶ ཨུཔརི སངྒྷཱཊིཨཱཀཱརེན ཨཱརོཔེཏབྦཾ. ཨཱགནྟུཀཔཏྟནྟིཔི ཝདནྟི. ཨིདཾ པན ཨཔྤཧོནཀེ ཨནུཉྙཱཏཾ. སཙེ པཧོཏི, ན ཝཊྚནྟི, ཚིནྡིཏབྦམེཝ. ཨནཱདིཎྞནྟི ཨནཱརོཔིཏཾ ཨནྭཱདྷིཀཾ. ན དྷཱརེཡྻཱཏི ཏིཙཱིཝརཱདྷིཊྛཱནཝསེན ཨདྷིཊྛཧིཏྭཱ ན དྷཱརེཏབྦནྟི ཨདྷིཔྤཱཡོ.

༤༧-༨. ཨིདཱནི ཨུདོསིཏསིཀྑཱཔདནཡཾ དསྶེཏུཾ ‘‘གཱམེ’’ཏིཨཱདི ཝུཏྟཾ. ཨེཏྠ པན སཙེ གཱམོ (པཱརཱ. ༤༧༨; པཱརཱ. ཨཊྛ. ༢.༤༧༧-༤༧༨; ཀངྑཱ. ཨཊྛ. ཨུདོསིཏསིཀྑཱཔདཝཎྞནཱ) ཨེཀསྶ རཉྙོ ཝཱ བྷོཛཀསྶ ཝཱ ཝསེན ཨེཀཀུལསྶ ཧོཏི, པཱཀཱརཱདིནཱ པརིཀྑིཏྟཏྟཱ ཨེཀཱུཔཙཱརོ ཙ, ཨེཝརཱུཔེ གཱམེ ཙཱིཝརཾ ནིཀྑིཔིཏྭཱ ཏསྨིཾ གཱམེ ཡཐཱརུཙིཏཊྛཱནེ ¶ ཝསིཏུཾ ལབྦྷཏི. སཙེ སོ གཱམོ ཨཔརིཀྑིཏྟོ, ཡསྨིཾ གྷརེ ཙཱིཝརཾ ནིཀྑིཏྟཾ ཧོཏི, ཏསྨིཾ གྷརེ ཝསིཏབྦཾ, ཏསྶ ཝཱ གྷརསྶ སམནྟཏོ ཧཏྠཔཱསཱ ན ཝིཛཧིཏབྦཾ.

སཙེ ¶ སོ གཱམོ ཝེསཱལིཀུསིནཱརཱདཡོ ཝིཡ ནཱནཱརཱཛཱུནཾ ཝཱ བྷོཛཀཱནཾ ཝཱ ཧོཏི, ཝུཏྟཔྤཀཱརེན པརིཀྑིཏྟོ ཙ, ཨེཝརཱུཔེ གཱམེ ཡསྨིཾ གྷརེ ཙཱིཝརཾ ནིཀྑིཏྟཾ, ཏསྨིཾ གྷརེ ཝཱ ཝཏྠབྦཾ. ཡསྶཱ ཝཱིཐིཡཱ ཏཾ གྷརཾ ཧོཏི, ཏསྶཱ ཝཱིཐིཡཱ ཏསྶ གྷརསྶ སམྨུཁཱཊྛཱནེ སབྷཱཡེ ཝཱ ནགརདྭཱརེ ཝཱ ཝཏྠབྦཾ, ཏེསཾ སབྷཱཡདྭཱརཱནཾ ཧཏྠཔཱསཱ ཝཱ ན ཝིཛཧིཏབྦཾ. སཙེ ཨཔརིཀྑིཏྟོ, ཡསྨིཾ གྷརེ ནིཀྑིཏྟཾ, ཏཏྠ ཝཱ ཏསྶ ཧཏྠཔཱསེ ཝཱ ཝཏྠབྦཾ.

ནིཝེསནཱདཡོ ཧམྨིཡཔརིཡོསཱནཱ གཱམཔརིཀྑེཔཏོ བཧི སནྣིཝིཊྛཱཏི ཝེདིཏབྦཱ. ཨིཏརཐཱ ཏེསཾ གཱམགྒཧཎེནེཝ གཧིཏཏྟཱ གཱམསྶ ཨེཀཀུལནཱནཱཀུལཨེཀཱུཔཙཱརནཱནཱུཔཙཱརཏཱཝསེནེཝ ཝིནིཙྪཡོ ཝཏྟབྦོ སིཡཱ. ནིཝེསནཱདཱིནཾ ཝསེནེཝ པཱལི༹ཡཾ (པཱརཱ. ༤༧༨ ཨཱདཡོ) ཨཏྠོ ཝིབྷཏྟོ, ན གཱམཝསེན. ཨུདོསིཏཝིནིཙྪཡེ ཨཡཾ ནཡོ ཝུཏྟོཡེཝ.

ནིཝེསནེཏི ཨེཏྠ སཙེ ཨེཀཀུལསྶ ནིཝེསནཾ ཧོཏི པརིཀྑིཏྟཉྩ, ཨནྟོནིཝེསནེ ཙཱིཝརཾ ནིཀྑིཔིཏྭཱ ཨནྟོནིཝེསནེ ཝཏྠབྦཾ. ཨཔརིཀྑིཏྟཉྩེ ཧོཏི, ཡསྨིཾ གབྦྷེ ཙཱིཝརཾ ནིཀྑིཏྟཾ, ཏསྨིཾ ཝཏྠབྦཾ, ཏསྶ གབྦྷསྶ ཧཏྠཔཱསཱ ཝཱ ན ཝིཛཧིཏབྦཾ. སཙེ ནཱནཱཀུལསྶ ཧོཏི པརིཀྑིཏྟཉྩ, ཡསྨིཾ གབྦྷེ ཙཱིཝརཾ ནིཀྑིཏྟཾ, ཏསྨིཾ གབྦྷེ ཝཏྠབྦཾ, སབྦེསཾ སཱདྷཱརཎདྭཱརམཱུལེ ཝཱ ཏེསཾ གབྦྷདྭཱརམཱུལེ ཝཱ ཏེསཾ གབྦྷདྭཱརམཱུལཱནཾ ཝཱ ཧཏྠཔཱསཱ ན ཝིཛཧིཏབྦཾ. ཨཔརིཀྑིཏྟཉྩེ ཧོཏི, ཡསྨིཾ གབྦྷེ ཙཱིཝརཾ ནིཀྑིཏྟཾ, ཏསྨིཾ གབྦྷེ ཝཏྠབྦཾ, ཧཏྠཔཱསཱ ཝཱ ན ཝིཛཧིཏབྦཾ.

ཨུདོསིཏོཏི ཡཱནཱདཱིནཾ བྷཎྜཱནཾ སཱལཱ. པཱསཱདོཏི དཱིགྷཔཱསཱདོ. ཧམྨིཡནྟི མུཎྜཙྪདནཔཱསཱདོ. ནཱཝཱ ¶ པན ཐལཾ ཨཱརོཔེཏྭཱ ནིཀྑིཏྟཱཔི ཧོཏི, སམུདྡེ ཋིཏཱཔི. སཙེ ཨེཀཀུལསྶ ནཱཝཱ ཧོཏི, ཨནྟོནཱཝཱཡ ཙཱིཝརཾ ནིཀྑིཔིཏྭཱ ཨནྟོནཱཝཱཡ ཝཏྠབྦཾ. ནཱནཱཀུལསྶ ནཱཝཱ ཧོཏི ནཱནཱགབྦྷཱ ནཱནཱཨོཝརཀཱ, ཡསྨིཾ ཨོཝརཀེ ཙཱིཝརཾ ནིཀྑིཏྟཾ, ཏསྨིཾ ཝཏྠབྦཾ, ཙཱིཝརསྶ ཧཏྠཔཱསཱ ཝཱ ན ཝིཛཧིཏབྦཾ.

ཨཊྚོཏི ¶ པཊིརཱཛཱདཱིནཾ པཊིབཱཧནཏྠཾ ཨིཊྛཀཱཧི ཀཏོ བཧལབྷིཏྟིཀོ ཙཏུཔཉྩབྷཱུམིཀོ པཏིསྶཡཝིསེསོ. མཱལོ༹ཏི ཨེཀཀཱུཊསངྒཧིཏོ ཙཏུརསྶཔཱསཱདོ. ཨིམེསུ པན ཨུདོསིཏཱདཱིསུ མཱལ༹པརིཡོསཱནེསུ ནིཝེསནེ ཝུཏྟནཡེནེཝ ཝིནིཙྪཡོ ཝེདིཏབྦོ. ནིཝེསནནྟི པན ཨུདོསིཏཱདཱིནཾ ཝསེན ཨཀཏཱཡ པཏིསྶཡཝིཀཏིཡཱ ཨདྷིཝཙནཾ.

ཨཱརཱམོ ནཱམ པུཔྥཱརཱམཕལཱརཱམཱདིཀོ. སཙེ ཨེཀཀུལསྶ ཨཱརཱམོ ཧོཏི པརིཀྑིཏྟོ ཙ, ཨནྟོཨཱརཱམེ ཙཱིཝརཾ ནིཀྑིཔིཏྭཱ ཨནྟོཨཱརཱམེ ཝཏྠབྦཾ. སཙེ ཨཔརིཀྑིཏྟོ, ཙཱིཝརསྶ ཧཏྠཔཱསཱ ན ཝིཛཧིཏབྦཾ. སཙེ ནཱནཱཀུལསྶ ཨཱརཱམོ ཧོཏི པརིཀྑིཏྟོ ཙ, དྭཱརམཱུལེ ཝཱ ཝཏྠབྦཾ, དྭཱརམཱུལསྶ ཧཏྠཔཱསཱ ཝཱ ན ཝིཛཧིཏབྦཾ. ཨཔརིཀྑིཏྟོ ཙེ, ཙཱིཝརསྶ ཧཏྠཔཱསཱ ན ཝིཛཧིཏབྦཾ.

སཏྠོ ནཱམ ཛངྒྷསཏྠསཀཊསཏྠཱནམཉྙཏརོ. སཙེ ཨེཀཀུལསྶ སཏྠོ ཧོཏི, སཏྠེ ཙཱིཝརཾ ནིཀྑིཔིཏྭཱ པུརཏོ ཝཱ པཙྪཏོ ཝཱ སཏྟབྦྷནྟརཱ ན ཝིཛཧིཏབྦཱ, པསྶཏོ ཨབྦྷནྟརཾ ན ཝིཛཧིཏབྦཾ. ཨབྦྷནྟརཾ ནཱམ ཨཊྛཝཱིསཏིཧཏྠཾ ཧོཏི. སཙེ གཙྪནྟོ སཏྠོ སཀཊེ ཝཱ བྷགྒེ, གོཎེ ཝཱ ནཊྛེ ཨནྟརཱ ཚིཛྫཏི, ཡསྨིཾ ཀོཊྛཱསེ ཙཱིཝརཾ ནིཀྑིཔིཏབྦཾ, ཏཏྠ ཝསིཏབྦཾ. སཙེ ནཱནཱཀུལསྶ ཧོཏི ¶ , སཏྠེ ཙཱིཝརཾ ནིཀྑིཔིཏྭཱ ཙཱིཝརསྶ ཧཏྠཔཱསཱ ན ཝིཛཧིཏབྦཾ.

ཁེཏྟཁལེསུ ཨཱརཱམེ ཝུཏྟསདིསོཝ ཝིནིཙྪཡོ. དུམེཏི རུཀྑམཱུལེ. སཙེ ཨེཀཀུལསྶ རུཀྑམཱུལཾ ཧོཏི, ཡཾ མཛ྄ཛྷནྷིཀཀཱལེ སམནྟཱ ཚཱཡཱ ཕརཏི, ཏསྨིཾ ཋཱནེ ཨཝིརལེ༹ པདེསེ ཏསྶ ཚཱཡཱཡ ཕུཊྛོཀཱསསྶ ཨནྟོ ཨེཝ ནིཀྑིཔིཏབྦཾ. སཙེ ཝིརལ༹སཱཁསྶ པན རུཀྑསྶ ཨཱཏཔེན ཕུཊྛོཀཱསེ ཋཔེཏི, ཨརུཎུགྒམནེ སཙེ སོ བྷིཀྑུ ཏསྶ ཧཏྠཔཱསེ ན ཧོཏི, ཨཉྙསྨིཾ ཝཱ ཋཱནེ ཏསྶ ཚཱཡཱཡཔི ཧོཏི, ནིསྶགྒིཡཾ ཧོཏིཡེཝ. ནཱནཱཀུལསྶ ཙེ ཧོཏི, ཙཱིཝརསྶ ཧཏྠཔཱསཱ ན ཝིཛཧིཏབྦཾ.

ཨཛ྄ཛྷོཀཱསེ པན ཝིཉྫྷཱཊཝཱིཨཱདཱིསུ ཨརཉྙེསུཔི སམུདྡམཛ྄ཛྷེ མཙྪབནྡྷཱནཾ ཨགམནཔཐེསུ དཱིཔཀེསུཔི ཙཱིཝརཾ ཋཔེཏྭཱ ཏཏོ སམནྟཱ སཏྟབྦྷནྟརེ པདེསེ ཡཏྠ ཀཏྠཙི ཝསིཏབྦཾ. སཙེ སཏྟབྦྷནྟརཏོ ཀེསགྒམཏྟམྤི ཨཏིཀྐམིཏྭཱ ཨརུཎཾ ཨུཊྛཔེཏི, ནིསྶགྒིཡཾ ཧོཏི.

ཨེཏྠ ¶ པན པཱལི༹ཡཾ ‘‘གཱམོ ཨེཀཱུཔཙཱརོ ནཱནཱུཔཙཱརོ’’ཏིཨཱདིནཱ (པཱརཱ. ༤༧༧) ཨཝིསེསེན མཱཏིཀཾ ནིཀྑིཔིཏྭཱཔི གཱམནིཝེསནཨུདོསིཏཁེཏྟདྷཉྙཀརཎཨཱརཱམཝིཧཱརཱནཾ ཨེཀཱུཔཙཱརནཱནཱུཔཙཱརཏཱ ‘‘གཱམོ ཨེཀཱུཔཙཱརོ ནཱམ ཨེཀཀུལསྶ གཱམོ ཧོཏི པརིཀྑིཏྟོ ཙ ཨཔརིཀྑིཏྟོ ཙཱ’’ཏིཨཱདིནཱ (པཱརཱ. ༤༧༨) པརིཀྑིཏྟཱཔརིཀྑིཏྟཝསེན ཝིབྷཏྟཱ. ཨཊྚམཱལ༹པཱསཱདཧམྨིཡནཱཝཱསཏྠརུཀྑམཱུལཨཛ྄ཛྷོཀཱསཱནམྤི ཨེཝཾ ཨཝཏྭཱ ‘‘ཨེཀཀུལསྶ ཨཊྚོ ཧོཏི, ནཱནཱཀུལསྶ ཨཊྚོ ཧོཏཱི’’ཏིཨཱདིནཱ (པཱརཱ. ༤༨༤) ནཡེན ཨེཀཀུལནཱནཱཀུལཝསེན ཙ ཨནྟེ ‘‘ཨཛ྄ཛྷོཀཱསོ ཨེཀཱུཔཙཱརོ ནཱམ ཨགཱམཀེ ཨརཉྙེ སམནྟཱ སཏྟབྦྷནྟརཱ ཨེཀཱུཔཙཱརོ, ཏཏོ པརཾ ནཱནཱུཔཙཱརོ’’ཏི (པཱརཱ. ༤༩༤) ཙ ཨེཝཾ ཨེཀཱུཔཙཱརནཱནཱུཔཙཱརཏཱ ཝིབྷཏྟཱ. ཏསྨཱ གཱམཱདཱིསུ ¶ པརིཀྑིཏྟཾ ཨེཀཱུཔཙཱརཾ, ཨཔརིཀྑིཏྟཾ ནཱནཱུཔཙཱརནྟི ཙ ཨཊྚཱདཱིསུ ཡཾ ཨེཀཀུལསྶ, ཏཾ ཨེཀཱུཔཙཱརཾ ནཱནཱཀུལསྶ ནཱནཱུཔཙཱརནྟི ཙ གཧེཏབྦཾ. ཨཛ྄ཛྷོཀཱསཔདེ ཝུཏྟནཡེན གཧེཏབྦཾ.

བྷིཀྑུསམྨུཏིཡཱཉྙཏྲཱཏི ཡཾ གིལཱནསྶ བྷིཀྑུནོ ཙཱིཝརཾ ཨཱདཱཡ པཀྐམིཏུཾ ཨསཀྐོནྟསྶ ཉཏྟིདུཏིཡེན ཀམྨེན ཨཝིཔྤཝཱསསམྨུཏི དཱིཡཏི, ཏཾ ཋཔེཏྭཱཏི ཨཏྠོ. ལདྡྷསམྨུཏིཀསྶ པན ཡཱཝ རོགོ ན ཝཱུཔསམྨཏི, ཏསྨིཾ ཝཱུཔསནྟེ ཨཉྙོ ཝཱ ཀུཔྤཏི, ཨནཱཔཏྟིཡེཝ.

༤༩. ‘‘ཨནུཛཱནཱམི, བྷིཀྑཝེ, ཀཎྜུཔྤཊིཙྪཱདིཾ ཡཱཝ ཨཱབཱདྷཱ ཨདྷིཊྛཱཏུཾ, ཏཏོ པརཾ ཝིཀཔྤེཏུཾ. ཝསྶིཀསཱཊིཀཾ ཝསྶཱནཾ ཙཱཏུམཱསཾ ཨདྷིཊྛཱཏུཾ, ཏཏོ པརཾ ཝིཀཔྤེཏུ’’ནྟི (མཧཱཝ. ༣༥༨) ཝུཏྟཏྟཱ རོགཔརིཡནྟཱ ཀཎྜུཔྤཊིཙྪཱདི, ཝསྶཱནཔརིཡནྟཱ ཝསྶིཀསཱཊིཀཱཏི ཨཏྠོ. སེསཱཏི ཏིཙཱིཝརཱདཡོ ཀཱལཝསེན ཨཔརིཡནྟིཀཱཏི ཨཏྠོ.

༥༠. པཙྩཏྠརཎཱདིཏྟཡཾ སདསམྤི ཨདསམྤི རཏྟམྤི ཨརཏྟམྤི ཨཱདིཎྞཀཔྤམྤི ཨནཱདིཎྞཀཔྤམྤི ལབྦྷཏཱིཏི ཨཏྠོ. ནིསཱིདནནྟི ནིསཱིདནཉྩ རཏྟཾ ཨནཱདིཎྞཀཔྤཉྩ ལབྦྷཏཱིཏི ཨདྷིཔྤཱཡོ. པཙྩཏྠརཎཔརིཀྑཱརམུཁཔུཉྪནཙོལཱ༹ནི པན ནཱིལམྤི པཱིཏཀམྤི ལོཧིཏཀམྤི པུཔྥདསཱདིཀམྤི ཝཊྚནྟི, ཏསྨཱ ‘‘སདསམྤཱི’’ཏིཨཱདི ཝུཏྟཾ. ཨེཝརཱུཔཾ པན ནིཝཱསེཏུཾ ཝཱ པཱརུཔིཏུཾ ཝཱ ན ཝཊྚཏི, ཀེཝལཾ པཙྩཏྠརཎཱདིཝསེན ཨདྷིཊྛཱནམཏྟཾ ཀཱཏུཾ ཝཊྚཏི.

༥༡. ཏིཙཱིཝརཾ ¶ ཀཎྜུཔྤཊིཙྪཱདི ཝསྶིཀསཱཊིཀཱཏི ཨིདཾ པན སེསཙཱིཝརཔཉྩཀཾ ཨདསཾ རཛིཏཾཡེཝ ཀཔྤཏི, ཏཉྩ ཨཱདིཎྞཀཔྤམེཝཱཏི ཨཏྠོ. སདསཾཝ ནིསཱིདནནྟི ཨིདཾ པན པུབྦེ ‘‘སདསམྤཱི’’ཏི ཨེཏྠ ཝུཏྟཏྟཱ ཨདསམྤི ནིསཱིདནཾ ཝཊྚཏཱིཏི སམྨོཧནིཝཱརཎཏྠཾ ཝུཏྟནྟི ཝདནྟི.

༥༢. ཨནདྷིཊྛིཏནྟི ¶ ཏིཙཱིཝརཱདིཝསེན ཨནདྷིཊྛིཏཾ. ཨནིསྶཊྛཾ ནཱམ ཨཉྙེསཾ ཨཝིསྶཛྫིཏཾ, ཏཾ པན ཝིཀཔྤེཏྭཱ པརིབྷུཉྫིཏབྦནྟི ཨཏྠོ.

ཨིདཱནི ཝིཀཔྤནུཔགསྶ པམཱཎཾ ཧེཊྛིམཔརིཙྪེདེན དསྶེཏུཾ ‘‘ཧཏྠདཱིགྷ’’ནྟིཨཱདིམཱཧ. ཏཏྠ ‘‘ཨནུཛཱནཱམི, བྷིཀྑཝེ, ཨཱཡཱམེན ཨཊྛངྒུལཾ སུགཏངྒུལེན ཙཏུརངྒུལཝིཏྠཏཾ པཙྪིམཾ ཙཱིཝརཾ ཝིཀཔྤེཏུ’’ནྟི (མཧཱཝ. ༣༥༨) ཝུཏྟཏྟཱ དཱིགྷཏོ ཨེཀཧཏྠཾ པུཐུལཏོ ཨུཔཌྜྷཧཏྠཾ ཝིཀཔྤེཏབྦནྟི ཨདྷིཔྤཱཡོ.

༥༣. ཏིཙཱིཝརསྶཱཏི ཝིནཡཏིཙཱིཝརསྶ, ན དྷུཏངྒཏིཙཱིཝརསྶ. ཏསྶ པན ཨིམེསུ ནཝསུ ཙཱིཝརཏྟཡམེཝ ལབྦྷཏི, ན ཨཉྙཾ ལབྦྷཏི. སབྦམེཏནྟི སབྦཾ ཨདྷིཊྛཱནཝིདྷཱནཉྩ པརིཧརཎཝིདྷཱནཉྩཱཏི ཨཏྠོ. པརིཀྑཱརཙོལི༹ཡོ སབྦནྟི ཏིཙཱིཝརཱདིཀཾ ནཝཝིདྷམྤི ཙཱིཝརཾ. ཏཐཱ ཝཏྭཱཏི ‘‘པརིཀྑཱརཙོལ༹’’ནྟི ཝཏྭཱ. ཨདྷིཊྛཏཱིཏི ཨདྷིཊྛཱཏི. ཀིཾ པན ཏིཙཱིཝརཾ པརིཀྑཱརཙོལ༹ཾ ཨདྷིཊྛཱཏུཾ ཝཊྚཏཱིཏི? ཨཱམ ཝཊྚཏི, ‘‘པརིཀྑཱརཙོལ༹ཾ ནཱམ པཱཊེཀྐཾ ནིདྷཱནམུཁམེཏནྟི ཏིཙཱིཝརཾ པརིཀྑཱརཙོལ༹ཾ ཨདྷིཊྛཧིཏྭཱ པརིབྷུཉྫིཏུཾ ཝཊྚཏི. ཨུདོསིཏསིཀྑཱཔདེ པན ཏིཙཱིཝརཾ ཨདྷིཊྛཧིཏྭཱ པརིཧརནྟསྶ པརིཧཱརོ ཝུཏྟོ’’ཏི ཨཊྛཀཐཱཡཾ (པཱརཱ. ཨཊྛ. ༢.༤༦༩) ཝུཏྟཾ, ཏསྨཱ ཏིཙཱིཝརཾ པརིཀྑཱརཙོལ༹ཾ ཨདྷིཊྛཧནྟེན པཙྩུདྡྷརིཏྭཱ པུན ཨདྷིཊྛཱཏབྦཾ.

༥༤. ཨིདཱནི ཨེཏེསཾ ཨདྷིཊྛཱནཝིཛཧནཱཀཱརཾ དསྶེཏུཾ ‘‘ཨཙྪེདཝིསྶཛྫནགཱཧཝིབྦྷམཱ’’ཏིཨཱདི ཝུཏྟཾ. ཏཏྠ ཨཙྪེདོཏི ཙོརཱདཱིཧི ཨཙྪིནྡནཾ. ཝིསྶཛྫནནྟི ཨཉྙེསཾ དཱནཾ. ཀཐཾ པན དིནྣཾ, ཀཐཾ གཧིཏཾ སུདིནྣཾ སུགྒཧིཏཉྩ ཧོཏཱིཏི? སཙེ ‘‘ཨིདཾ ཏུཡ྄ཧཾ དེམི དདཱམི དཛྫཱམི ཨོཎོཛེམི པརིཙྩཛཱམི ནིསྶཛྫཱམི ཝིསྶཛྫཱམཱི’’ཏི ཝཱ ‘‘ཨིཏྠནྣཱམསྶ དེམི…པེ… ཝིསྶཛྫཱམཱི’’ཏི ¶ ཝཱ ཝདཏི, སམྨུཁཱཔི པརམྨུཁཱཔི དིནྣཾཡེཝ ཧོཏི. ‘‘ཏུཡ྄ཧཾ གཎྷཱཧཱི’’ཏི ¶ ཝུཏྟེ ‘‘མཡ྄ཧཾ གཎྷཱམཱི’’ཏི ཝདཏི, སུདིནྣཾ སུགྒཧིཏཉྩ. ‘‘ཏཝ སནྟཀཾ ཀརོཧི, ཏཝ སནྟཀཾ ཧོཏུ, ཏཝ སནྟཀཾ ཀརིསྶཏཱི’’ཏི ཝུཏྟེ ‘‘མམསནྟཀཾ ཀརོམི, མམ སནྟཀཾ ཧོཏུ, མམ སནྟཀཾ ཀརིསྶཱམཱི’’ཏི ཝདཏི, དུདྡིནྣཾ དུགྒཧིཏཉྩ. སཙེ པན ‘‘ཏཝ སནྟཀཾ ཀརོཧཱི’’ཏི ཝུཏྟེ ‘‘སཱདྷུ, བྷནྟེ, མཡ྄ཧཾ གཎྷཱམཱི’’ཏི གཎྷཱཏི, སུགྒཧིཏཾ.

གཱཧོཏི ཝིསྶཱསགྒཱཧོ (པཱརཱ. ཨཊྛ. ༡.༡༣༡). སོ པན ཨེཝཾ ཝེདིཏབྦོ – ‘‘ཨནུཛཱནཱམི, བྷིཀྑཝེ, པཉྩཧངྒེཧི སམནྣཱགཏསྶ ཝིསྶཱསཾ གཧེཏུཾ. སནྡིཊྛོ ཙ ཧོཏི, སམྦྷཏྟོ ཙ, ཨཱལཔིཏོ ཙ, ཛཱིཝཏི ཙ, ཛཱནཱཏི ཙ ‘གཧིཏེ མེ ཨཏྟམནོ བྷཝིསྶཏཱི’’’ཏི (མཧཱཝ. ༣༥༦). ཏཏྠ སནྡིཊྛོཏི དིཊྛམཏྟཀམིཏྟོ. སམྦྷཏྟོཏི དལ༹ྷམིཏྟོ. ཨཱལཔིཏོཏི ‘‘མམ སནྟཀཾ ཡཾ ཨིཙྪསི, ཏཾ གཎྷེཡྻཱསི, ཨཱཔུཙྪིཏྭཱ གཧཎེ ཀཱརཎཾ ནཏྠཱི’’ཏི ཝུཏྟོ. ཛཱིཝཏཱིཏི ཨནུཊྛཱནསེཡྻཱཡ སཡིཏོཔི ཡཱཝ ཛཱིཝིཏིནྡྲིཡུཔཙྪེདཾ ན པཱཔུཎཱཏི. གཧིཏེ ཙ ཨཏྟམནོཏི གཧིཏེ ཙ ཏུཊྛཙིཏྟོ. ཨེཝརཱུཔསྶ སནྟཀཾ ‘‘གཧིཏེ མེ ཨཏྟམནོ བྷཝིསྶཏཱི’’ཏི ཛཱནནྟེན གཧེཏུཾ ཝཊྚཏི. ཨནཝསེསཔརིཡཱདཱནཝསེན ཙེཏཱནི པཉྩ ཨངྒཱནི ཝུཏྟཱནི, ཝིསྶཱསགྒཱཧོ པན ཏཱིཧི ཨངྒེཧི རུཧཏི. ཀཐཾ? སནྡིཊྛོ ཛཱིཝཏི གཧིཏེ ཨཏྟམནོ, སམྦྷཏྟོ ཛཱིཝཏི གཧིཏེ ཨཏྟམནོ, ཨཱལཔིཏོ ཛཱིཝཏི གཧིཏེ ཨཏྟམནོཏི ཨེཝཾ.

ཡོ པན ཛཱིཝཏི, ན ཙ གཧིཏེ ཨཏྟམནོ ཧོཏི, ཏསྶ སནྟཀཾ ཝིསྶཱསབྷཱཝེན གཧིཏམྤི པུན དཱཏབྦཾ. དདནྟེན མཏཀདྷནཾ ཏཱཝ ཡེ ཏསྶ དྷནེ ཨིསྶརཱ གཧཊྛཱ ཝཱ པབྦཛིཏཱ ཝཱ, ཏེསཾ དཱཏབྦཾ. ཡོ པན པཋམཾཡེཝ ‘‘སུཊྛུ ¶ ཀཏཾ ཏཡཱ མམ སནྟཀཾ གཎྷནྟེནཱ’’ཏི ཝཙཱིབྷེདེན ཝཱ ཙིཏྟུཔྤཱདམཏྟེན ཝཱ ཨནུམོདིཏྭཱ པཙྪཱ ཀེནཙི ཀཱརཎེན ཀུཔིཏོ, སོ པཙྩཱཧརཱཔེཏུཾ ན ལབྷཏི. ཡོཔི ཨདཱཏུཀཱམོ, ཙིཏྟེན པན ཨདྷིཝཱསེཏི, ན ཀིཉྩི ཝདཏི, སོཔི པུན པཙྩཱཧརཱཔེཏུཾ ན ལབྷཏི. ཡོ པན ‘‘མཡཱ ཏུམྷཱཀཾ སནྟཀཾ གཧིཏ’’ནྟི ཝཱ ‘‘པརིབྷུཏྟ’’ནྟི ཝཱ ཝུཏྟེ ནཱདྷིཝཱསེཏི, ‘‘པཊིདེཧཱི’’ཏི བྷཎཏི, སོ པཙྩཱཧརཱཔེཏུཾ ལབྷཏི.

ཝིབྦྷམཱཏི ཨིམིནཱ བྷིཀྑུནིཡཱཡེཝ ཨདྷིཊྛཱནཝིཛཧནཾ གཧིཏཾ ཧོཏི. སཱ པན ཡདཱ ཝིབྦྷམཏི, ཏདཱ ཨསྶམཎཱི ཧོཏི. བྷིཀྑུ པན ཝིབྦྷམནྟོཔི ཡཱཝ སིཀྑཾ ན པཙྩཀྑཱཏི, ཏཱཝ བྷིཀྑུཡེཝཱཏི ཨདྷིཊྛཱནཾ ན ཝིཛཧཏཱིཏི. ལིངྒསིཀྑཱཏི ལིངྒཔརིཝཏྟནཉྩ སིཀྑཱཔཙྩཀྑཱནཉྩཱཏི ¶ ཨཏྠོ. སབྦེསཱུཏི ནཝསུ ཙཱིཝརེསུ. ཨདྷིཊྛཱནཝིཡོགཀཱརཎཱཏི ཨདྷིཊྛཱནཝིཛཧནཀཱརཎཱ, ཨིམེསུ ཨཉྙཏརེན ཨདྷིཊྛཱནཾ ཝིཛཧཏཱིཏི ཨཏྠོ.

ཀིཉྩ བྷིཡྻོ (པཱརཱ. ཨཊྛ. ༢.༤༦༩) – ཏིཙཱིཝརསྶ པན ཝིནིབྦིདྡྷཚིདྡཉྩ ཨདྷིཊྛཱནཝིཛཧནཾ ཀརོཏཱིཏི ཨཏྠོ. ཏཏྠ སངྒྷཱཊིཨུཏྟརཱསངྒཱནཾ དཱིགྷནྟཏོ ཝིདཏྠིཔྤམཱཎསྶ ཏིརིཡནྟཏོ ཨཊྛངྒུལཔྤམཱཎསྶ པདེསསྶ ཨོརཏོ ཀནིཊྛངྒུལིནཁཔིཊྛིཔྤམཱཎཀཾ ཚིདྡཾ ཨདྷིཊྛཱནཾ བྷིནྡཏི. ཨནྟརཝཱསཀསྶ དཱིགྷནྟཏོ ཝིདཏྠིཔྤམཱཎསྶེཝ ཏིརིཡནྟཏོ ཙཏུརངྒུལཔྤམཱཎསྶ པདེསསྶ ཨོརཏོ ཚིདྡཾ ཨདྷིཊྛཱནཾ བྷིནྡཏི, པརཏོ པན ན བྷིནྡཏི. ཏསྨཱ ཚིདྡེ ཛཱཏེ ཏིཙཱིཝརཾ ཨཏིརེཀཙཱིཝརཾ ཧོཏི, སཱུཙིཀམྨཾ ཀཏྭཱ པུན ཨདྷིཊྛཱཏབྦཾ. ཨིཏརེསཾ པན ཚིདྡེན ཝིཛཧནཾ ནཱམ ནཏྠི. ཡོ པན ཏིཙཱིཝརེཔི དུབྦལཊྛཱནེ པཋམཾ ཨགྒལ༹ཾ དཏྭཱ པཙྪཱ དུབྦལཊྛཱནཾ ཚིནྡིཏྭཱ ཨཔནེཏི, ཨདྷིཊྛཱནཾ ན བྷིཛྫཏི. མཎྜལཔརིཝཏྟནེཔི ཨེསེཝ ནཡོ. ཡོ པན ¶ ཨུབྷོ ཀོཊིཡོ མཛ྄ཛྷེ ཀརོནྟོ སཙེ པཋམཾ ཚིནྡིཏྭཱ པཙྪཱ གྷཊེཏི, ཨདྷིཊྛཱནཾ ཝིཛཧཏི, ཨཐ གྷཊེཏྭཱ ཚིནྡཏི, ན ཝིཛཧཏི. རཛཀེཧི དྷོཝཱཔེཏྭཱ སེཏཀཾ ཀརོནྟསྶཱཔི ན ཝིཛཧཏི ཨེཝ.

༥༥. ཨིདཱནི ཨཀཔྤིཡཙཱིཝརཱནི དསྶེཏུཾ ‘‘ཀུསཝཱཀཕལཀཱནཱི’’ཏིཨཱདི ཨཱརདྡྷཾ. ཏཏྠ ཀུསཙཱིརཾ (མཧཱཝ. ༣༧༡; མཧཱཝ. ཨཊྛ. ) ནཱམ ཀུསེ གནྠེཏྭཱ ཀཏཙཱིཝརཾ. ཝཱཀཙཱིརཾ ནཱམ ཏཱཔསཱནཾ ཝཀྐལཾ. ཕལཀཙཱིརཾ ནཱམ ཕལཀཱནི སིབྦིཏྭཱ ཀཏཙཱིཝརཾ. ཀེསཀམྦལནྟི ཀེསེཧི ཏནྟཾ ཝཱཡིཏྭཱ ཀཏཀམྦལཾ. ཝཱལཀམྦལནྟི ཙམརཝཱལེཧི ཝཱཡིཏྭཱ ཀཏཀམྦལཾ. ཨུལཱུཀཔཀྑནྟི ཨུལཱུཀསཀུཎསྶ པཀྑེཧི ཀཏནིཝཱསནཾ. ཨཛིནཀྑིཔནྟི སལོམཾ སཁུརཾ ཨཛིནམིགཙམྨཾ. ཨིམེསུ སཏྟསུ ཝཏྠེསུ ཡཾ ཀིཉྩི དྷཱརཡཏོ ཐུལླཙྩཡནྟི ཨཏྠོ. ཡཐཱ ཨིམེསུ ཐུལླཙྩཡཾ, ཏཐཱ ཨཀྐནཱལ༹ཾ ནིཝཱསེནྟསྶ. ཨཀྐནཱལ༹ཾ ནཱམ ཨཀྐདཎྜེ ཝཱཀཱདཱིཧི གནྠེཏྭཱ ཀཏཙཱིཝརཾ. ‘‘ན བྷིཀྑཝེ ཨཀྐནཱལ༹ཾ ནིཝཱསེཏབྦཾ, ཡོ ནིཝཱསེཡྻ, ཨཱཔཏྟི ཐུལླཙྩཡསྶཱ’’ཏི (མཧཱཝ. ༣༧༡) ཧི ཝུཏྟཾ.

༥༦. ཀདལེརཀཀྐདུསྶེ པོཏྠཀེ ཙཱཔཱིཏི ཨེཏྠ ཀདལིཨེརཀཨཀྐམཀཙིཝཱཀེཧི ཀཏཱནི ཝཏྠཱནི ཨེཝཾ ཝུཏྟཱནཱིཏི ཝེདིཏབྦཱནི. ཨེཏེསུ པོཏྠཀོཡེཝ པཱལི༹ཡཾ ཨཱགཏོ, ཨིཏརཱནི ཏགྒཏིཀཏྟཱ ཨཊྛཀཐཱསུ པཊིཀྑིཏྟཱནི. ཨིམེསུ ཙཏཱུསུཔི དུཀྐཊམེཝ. ‘‘ན བྷིཀྑཝེ ནགྒིཡཾ ¶ ཏིཏྠིཡསམཱདཱནཾ སམཱདིཡིཏབྦཾ, ཡོ སམཱདིཡེཡྻ, ཨཱཔཏྟི ཐུལླཙྩཡསྶཱ’’ཏི (མཧཱཝ. ༣༧༠) ཝུཏྟཏྟཱ ནགྒིཡམྤི ན ཀཔྤཏི ཨེཝ. སབྦམེཝ ནཱིལཀཾ སབྦནཱིལཀཾ. ཨེཝཾ སེསེསུཔི. ཨེཏྠ ནཱིལཾ ཨུམཱཔུཔྥཝཎྞཾ ཧོཏི ¶ . མཉྫེཊྛཀཾ མཉྫེཊྛཀཝཎྞམེཝ. པཱིཏཀཾ ཀཎིཀཱརཔུཔྥཝཎྞཾ. ལོཧིཏཀཾ ཛཡསུམནཔུཔྥཝཎྞཾ. ཀཎྷཀཾ ཨདྡཱརིཊྛཀཝཎྞཾ.

༥༧. མཧཱརངྒཾ ནཱམ སཏཔདིཔིཊྛིཝཎྞཾ. མཧཱནཱམཾ ནཱམ རཏྟསམྦྷིནྣཝཎྞཾ ཧོཏི. པདུམཔུཔྥཝཎྞནྟིཔི ཝུཏྟཾ, མནྡརཏྟནྟི ཨཏྠོ. ཏིརཱིཊཀེཏི རུཀྑཏཙེ. ཨཙྪིནྣདཱིགྷདསཀེཏི སབྦསོ ཨཙྪིནྣདསཀེ ཙ མཛ྄ཛྷེ ཚིནྣདསཀེ ཙཱཏི ཨཏྠོ. ཨཉྙམཉྙཾ སཾསིབྦིཏྭཱ ཀཏདསཾ ཕལདསཾ ནཱམ. ཀེཏཀཔུཔྥཱདིཔུཔྥསདིསཱཧི དསཱཧི ཡུཏྟཾ པུཔྥདསཾ ནཱམ. ཨེཏེསུཔི ‘‘པོཏྠཀེ ཙཱཔཱི’’ཏི ཨེཏྠ ཝུཏྟཨཔི-སདྡེན དུཀྐཊནྟི ཝེདིཏབྦཾ. ཏཐཱཏི ཡཐཱ ཨེཏེསུ ཀདལིདུསྶཱདཱིསུ པུཔྥདསཱཝསཱནེསུ དུཀྐཊཾ, ཏཐཱ ཀཉྩུཀཝེཋནེསུཔི ཡཾ ཀིཉྩི དྷཱརེནྟསྶ དུཀྐཊནྟི ཨཏྠོ.

ཨེཏེསུ པན ཨཡཾ ཝིནིཙྪཡོ (མཧཱཝ. ཨཊྛ. ༣༧༢) – སབྦནཱིལཀཱདཱིནི རཛནཱནི ཝམེཏྭཱ པུན རཛིཏྭཱ དྷཱརེཏབྦཱནི, ན སཀྐཱ ཙེ ཝམེཏུཾ, པཙྩཏྠརཎཱདཱིནི ཝཱ ཀཱརེཏབྦཱནི, ཏིཔཊྚཙཱིཝརསྶ མཛ྄ཛྷེ ཝཱ དཱཏབྦཱནི. ཨཙྪིནྣདསཀཱདཱིནི དསཱ ཚིནྡིཏྭཱ དྷཱརེཏབྦཱནི. ཀཉྩུཀཾ ཝིཛཊེཏྭཱ རཛིཏྭཱ པརིབྷུཉྫིཏབྦཾ. ཝེཋནེཔི ཨེསེཝ ནཡོ. ཏིརཱིཊཀཾ པཱདཔུཉྪནཾ ཀཱཏབྦཾ. སབྦནྟི ཨིམཾ ཝུཏྟཔྤཀཱརཾ ཀུསཙཱིརཱདིཀཾ ཨཀཔྤིཡཙཱིཝརཾ ཨཙྪིནྣཙཱིཝརོ ལབྷཏཱིཏི ཨཏྠོ. ཝུཏྟམྤི ཙེཏཾ པརིཝཱརེ.

པཉྷཱ མེསཱ ཀུསལེཧི ཙིནྟིཏཱ’’ཏི. (པརི. ༤༨༡);

ཨཡཉྷི ¶ པཉྷོ ཨཙྪིནྣཙཱིཝརབྷིཀྑུཾ སནྡྷཱཡ ཝུཏྟོ, ཏསྨཱ ཧི ཡཾ ཀིཉྩི ཨཀཔྤིཡཙཱིཝརཾ ནིཝཱསེཏྭཱ ཝཱ པཱརུཔིཏྭཱ ཝཱ ཨཙྪིནྣཙཱིཝརཀེན ཨཉྙཾ པརིཡེསིཏབྦཾ. ཨེཏྠ པན ‘‘ཨིདྷ པན, བྷིཀྑཝེ, མནུསྶཱ ནིསྶཱིམགཏཱནཾ བྷིཀྑཱུནཾ ཙཱིཝརཾ དེནྟི ‘ཨིམཾ ཙཱིཝརཾ ཨིཏྠནྣཱམསྶ ¶ དེམཱ’ཏི, ཨནུཛཱནཱམི, བྷིཀྑཝེ, སཱདིཏུཾ, ན ཏཱཝ ཏཾ གཎནཱུཔགཾ, ཡཱཝ ན ཧཏྠཾ གཙྪཏཱི’’ཏི (མཧཱཝ. ༢༥༩) ཝུཏྟཏྟཱ ཡཱཝ ཨཱཧརིཏྭཱ ཏཾ ན དིནྣཾ, ‘‘ཏུམྷཱཀཾ, བྷནྟེ, ཙཱིཝརཾ ཨུཔྤནྣ’’ནྟི པཧིཎིཏྭཱ ཝཱ ནཱརོཙིཏཾ, ཏཱཝ གཎནཾ ན ཨུཔེཏི, ཨནདྷིཊྛིཏཾ ཝཊྚཏི. པཏྟེཔི ཨེསེཝ ནཡོ. ཨཱནེཏྭཱ དིནྣེ ཝཱ ཨཱརོཙིཏེ ཝཱ པརིཧཱརོ ནཏྠི, དསཱཧཾ ཨདྷིཊྛཱཏབྦཾ. ཙཱིཝརཝིནིཙྪཡོ.

༥༨. ཨིདཱནི ཏེསཾ ཙཱིཝརཱནཾ རཛནཝིདྷཱནཾ དསྶེཏུཾ ‘‘རཛནཱནི ཙཱ’’ཏི ཝུཏྟཾ. ཏཏྠ ‘‘ཨནུཛཱནཱམི, བྷིཀྑཝེ, ཚ རཛནཱནི མཱུལརཛནཾ ཁནྡྷརཛནཾ ཏཙརཛནཾ པཏྟརཛནཾ པུཔྥརཛནཾ ཕལརཛན’’ནྟི (མཧཱཝ. ༣༤༤) ཨེཝཾ བྷགཝཏཱ ཨནུཉྙཱཏཏྟཱ ‘‘ཚཔྤཀཱརཱནི ཨནུཉྙཱཏཱནི སཏྠུནཱ’’ཏི ཝུཏྟཾ.

༥༩. ཏཏྠ མཱུལེཏི མཱུལརཛནེཏི ཨཏྠོ. ཧལིདྡིཾ ཝིཝཛྫིཡ སབྦཾ ལབྦྷནྟི སམྦནྡྷོ. ཨེཝཾ སེསེསུཔི. ཏུངྒཧཱརཀོ ནཱམ ཨེཀོ སཀཎྚཀརུཀྑོ, ཏསྶ ཧརིཏཱལཝཎྞཾ ཁནྡྷརཛནཾ ཧོཏི. གིཧིཔརིབྷུཏྟཾ པན ཨལླིཔཏྟེན ཨེཀཝཱརཾ རཛིཏུཾ ཝཊྚཏི. ཕལརཛནེ ཨཀཔྤིཡཾ ནཱམ ནཏྠི, སབྦཾ ཝཊྚཏཱིཏི. རཛནཝིནིཙྪཡོ.

༦༠. ཨིདཱནི ¶ ¶ བྷཱཛནཝིཀཏིཾ དསྶེཏུཾ ‘‘པཏྟོ ཙཱ’’ཏི ཨུདྡྷཊཾ. ཨེཏྠ པན པཋམགཱཐཱ སུཝིཉྙེཡྻཱ.

༦༡. དུཏིཡེ ‘‘མགདྷནཱལི༹དྭཡཏཎྜུལསཱདྷིཏ’’ནྟི ཝཏྟབྦེ ཝིབྷཏྟིལོཔཾ ཨཀཏྭཱ གཱཐཱབནྡྷསུཁཏྠཾ ‘‘མགདྷེ ནཱལི༹དྭཡཏཎྜུལསཱདྷིཏ’’ནྟི ཝུཏྟཾ, པཙིཏནྟི ཨཏྠོ. ཨེཏྠ (པཱརཱ. ༦༠༢; པཱརཱ. ཨཊྛ. ༢.༦༠༢; ཀངྑཱ. ཨཊྛ. པཏྟསིཀྑཱཔདཝཎྞནཱ) མགདྷནཱལི༹ ནཱམ ཨཌྜྷཏེརསཔལཾ གཎྷཱཏི. ཨོདནནྟི ཨེཏྠ སབྦཔྤཀཱརསམྤནྣཾ ཨཝསྶཱཝིཏོདནཾ གཧེཏབྦཾ. ཨོདནསྶ ཙཏུཏྠབྷཱགཔྤམཱཎཾ ནཱཏིགྷནཾ ནཱཏིཏནུཀཾ ཧཏྠཧཱརིཡམུགྒསཱུཔཉྩ ཨཱལོཔསྶ ཨཱལོཔསྶ ཨནུརཱུཔཾ ཡཱཝ ཙརིམཀཱལོཔཔྤཧོནཀཾ མཙྪམཾསཱདིབྱཉྫནཉྩ ཡོ པཏྟོ གཎྷཱཏི, སོ ཨུཀྐཊྛོ ནཱམཱཏི ཨཏྠོ. སཔྤིཏེལཏཀྐརསཀཉྫིཀཱདཱིནི པན གཎནཱུཔགཱནི ན ཧོནྟི, ཏཱནི ཧི ཨོདནགཏིཀཱནེཝ ཧོནྟི, ནེཝ ཧཱཔེཏུཾ, ན ཝཌྜྷེཏུཾ སཀྐོནྟི. ཨེཝམེཏཾ སབྦཾ པཀྑིཏྟཾ སཙེ པཏྟསྶ ཧེཊྛིམརཱཛིསམཾ ཏིཊྛཏི, སུཏྟེན ཝཱ ཧཱིརེན ཝཱ ཚིནྡནྟསྶ སུཏྟསྶ ཝཱ ཧཱིརསྶ ཝཱ ཧེཊྛིམནྟཾ ཕུསཏི, ཨཡཾ ཨུཀྐཊྛོ ནཱམ པཏྟོ. སཙེ ཏཾ རཱཛིཾ ཨཏིཀྐམིཏྭཱ ཐཱུཔཱིཀཏཾ ཏིཊྛཏི, ཨཡཾ ཨུཀྐཊྛོམཀོ ནཱམ པཏྟོ. སཙེ ཏཾ རཱཛིཾ ན སམྤཱཔུཎཱཏི, ཨནྟོགཏམེཝ ཧོཏི, ཨཡཾ ཨུཀྐཊྛུཀྐཊྛོ ནཱམ པཏྟོ.

༦༢. ‘‘མཛ྄ཛྷིམོ ནཱམ པཏྟོ ནཱལི༹ཀོདནཾ གཎྷཱཏཱི’’ཏི ཝུཏྟཏྟཱ ‘‘མཛ྄ཛྷིམོ ཏསྶུཔཌྜྷོ ཝཱ’’ཏི ཝུཏྟཾ. ཨེཏྠཱཔི ཝུཏྟཔྤཀཱརེན མཛ྄ཛྷིམོ མཛ྄ཛྷིམོམཀོ མཛ྄ཛྷིམུཀྐཊྛོཏི པཏྟཏྟིཀཾ ཝེདིཏབྦཾ. ‘‘ཨོམཀོ ནཱམ པཏྟོ པཏྠོདནཾ གཎྷཱཏཱི’’ཏི (པཱརཱ. ༦༠༢) ཝཙནཏོ ‘‘ཏཏོཔཌྜྷོ’’ཏི ཝུཏྟཾ. མགདྷནཱལི༹ཡཱ ཨུཔཌྜྷནཱལི༹ཀོདནཉྩ ཏདཱུཔིཡཾ སཱུཔཾ བྱཉྫནཉྩ གཎྷཱཏི, སོ ¶ ཨོམཀོ ནཱམ. ཨིདྷཱཔི ཨོམཀོ ཨོམཀོམཀོ ཨོམཀུཀྐཊྛོཏི པཏྟཏྟིཀཾ ཝེདིཏབྦཾ. ཨིམེསུ པན ནཝསུ པཏྟེསུ ཨུཀྐཊྛུཀྐཊྛོ ཙ ཨོམཀོམཀོ ཙ ཨཔཏྟོ. ཨེཏེསུ ཨདྷིཊྛཱཏབྦཀིཙྩཾ ནཏྠི, སེསཱ སཏྟ པཏྟཱ ཨདྷིཊྛཱཏབྦཱ, ཝིཀཔྤེཏབྦཱ ཙཱཏི ཨཏྠོ.

༦༣. ཨཏིརེཀཔཏྟོཏི (པཱརཱ. ༦༠༡) ཨནདྷིཊྛིཏོ ཨཝིཀཔྤིཏོ. སཀོཏི སསནྟཀོ. ཀཔྤོཏི ཀཔྤིཡོ. ཨཡམེཝེཏྠ སངྑེཔོ – ཡོ པཏྟོ ཀཱཀཎིཀམཏྟསྶཱཔི མཱུལསྶ དཱཏབྦསྶ ནཏྠིཏཱཡ ¶ སཀོ. ཨཡོཔཏྟོ པཉྩཧི པཱཀེཧི མཏྟིཀཱཔཏྟོ དྭཱིཧི པཱཀེཧི པཀྐཏྟཱ ཀཔྤོ. སོ དསཱཧཔརམཾ ཀཱལཾ ཨནདྷིཊྛིཏོ ཨཝིཀཔྤིཏོ དྷཱརེཡྻོཏི.

༦༤. ཨཙྪེདཱདཡོ ཙཱིཝརེ ཝུཏྟཔྤབྷེདཱཡེཝ. ཚིདྡེནཱཏི (པཱརཱ. ཨཊྛ. ༢.༦༠༨; ཀངྑཱ. ཨཊྛ. པཏྟསིཀྑཱཔདཝཎྞནཱ) ཨེཏྠ ཡསྶ པཏྟསྶ མུཁཝཊྚིཏོ ཧེཊྛཱ དྭངྒུལཔྤདེསེ ཡེན ཚིདྡེན ཀངྒུསིཏྠཾ ནིཀྑམཏི, ཏཏྟཀེན ཚིདྡེན བྷིཛྫཏི. ཏསྨིཾ པན ཨཡཙུཎྞཱདཱིཧི པཊིཔཱཀཏིཀེ ཀཏེ དསཱཧབྦྷནྟརེ པུན ཨདྷིཊྛཱཏབྦཾ. པཏྟཱདྷིཊྛཱནམུཛ྄ཛྷཏཱིཏི པཏྟོ ཨདྷིཊྛཱནཾ ཨུཛ྄ཛྷཏི.

༦༥. ཨིདཱནི པརིཧརཎཝིདྷིཾ དསྶེཏུཾ ‘‘པཏྟཾ ན པཊིསཱམེཡྻ སོདཀ’’ནྟིཨཱདི ཨཱརདྡྷཾ. སོདཀཾ (ཙཱུལ༹ཝ. ༢༥༤) པཏྟཾ ན པཊིསཱམེཡྻ, ཨཱཏཔེ ཙ སོདཀཾ པཏྟཾ ན ཨོཏཔེཏི ཨདྷིཔྤཱཡོ. ན ནིདཧེཏི ནིརུདཀཾ ཀཏྭཱཔི ཨཏིཀཱལཾ ན ནིདཧེཏི ཨདྷིཔྤཱཡོ. བྷུམྱཱཏི བྷཱུམིཡཾ. ན ཋཔེཏི ཏཊྚིཀཱཙམྨཁཎྜཱདཱིསུ ཡེན ཀེནཙི ཨནཏྠཏཱཡ པཾསུསཀྑརམིསྶཱཡ བྷཱུམིཡཱ ན ཋཔེཡྻཱཏི ཨཏྠོ. ནོ ཙ ལགྒཡེཏི ཨེཏྠཔི ནཱགདནྟཱདཱིསུ (ཙཱུལ༹ཝ. ༢༥༤) ཡཏྠ ཀཏྠཙི ལགྒནྟསྶ དུཀྐཊམེཝ.

༦༦. མིཌྜྷནྟེཏི (ཙཱུལ༹ཝ. ༢༥༤; ཙཱུལ༹ཝ. ཨཊྛ. ༢༥༤) ¶ མིཌྜྷཔརིཡནྟེ. སཙེ པན པརིཝཏྟེཏྭཱ ཏཏྠེཝ པཏིཊྛཱཏི, ཨེཝརཱུཔཱཡ ཝིཏྠིཎྞཱཡ མིཌྜྷིཡཱ ཨབྦྷནྟརཔརིཙྪེདེ ཋཔེཏུཾ ཝཊྚཏི, ན པརིཡནྟེ. པརིབྷཎྜནྟེཏི བཱཧིརཔསྶེ ཀཏཱཡ ཏནུཀམིཌྜྷིཡཱ ཨནྟེཏི ཨཏྠོ. ཨངྐེ ཝཱཏི (ཙཱུལ༹ཝ. ༢༥༤) དྭིནྣཾ ཨཱུརཱུནཾ མཛ྄ཛྷེ. ཨེཏྠ པན ཨཾསབདྡྷཀེ ཨཾསཀཱུཊེ ལགྒེཏྭཱ ཨངྐེ ཋཔེཏུཾ ཝཊྚཏི, ན ཨིཏརཐཱ. ཨཱཏཔཏྟཀེཏི ཚཏྟེ. ཨེཏྠ བྷཏྟཔཱུརོཔི ཨཾསཀཱུཊེ ལགྒིཏཔཏྟོཔི ཋཔེཏུཾ ན ཝཊྚཏི.

༦༧. ཨུཙྪིཊྛོདཀཾ (ཙཱུལ༹ཝ. ༢༥༥; ཙཱུལ༹ཝ. ཨཊྛ. ༢༥༥) ནཱམ མུཁཝིཀྑཱལནོདཀཾ, ཏཾ པཏྟེ ནིཊྛུབྷིཏྭཱ པཏྟེན ན ནཱིཧརེཡྻཱཏི ཨཏྠོ. ཙལཀཉྩ ཨཊྛིཀཉྩ ཙལཀཊྛིཀཾ. ཨེཏེསུ ཡཾ ཀིཉྩི པཏྟེན ནཱིཧརནྟསྶ དུཀྐཊཾ. པཏྟཾ པཊིགྒཧཾ ཀཏྭཱ ཧཏྠཾ དྷོཝིཏུམྤི ན ལབྷཏི. ཧཏྠདྷོཝིཏཝཏྠདྷོཝིཏཨུདཀམྤི པཏྟེ ཨཱཀིརིཏྭཱ ནཱིཧརིཏུཾ ན ཝཊྚཏི. ཨནུཙྪིཊྛཔཏྟཾ ཨུཙྪིཊྛཧཏྠེན གཧེཏུམྤི ན ཝཊྚཏི. ཧཏྠཾ པན བཧི དྷོཝིཏྭཱ གཧེཏུཾ ཝཊྚཏི. མཙྪམཾསཕལཱཕལཱདཱིནི ཁཱདནྟོ ཡཾ མུཁེན ལུཉྩིཏྭཱ ལུཉྩིཏྭཱ ཁཱདཏི, ཏཾ ཝཱ ཏེསཾ ཨཊྛིཨཱདིཀཾ ¶ ཝཱ མུཁཏོ ནཱིཧཊཾ པུན ཨཁཱདིཏུཀཱམོ ཚཌྜེཏུཀཱམོ པཏྟེ ཋཔེཏུཾ ན ལབྷཏི. སིངྒིཝེརནཱལི༹ཀེརཁཎྜཱདཱིནི ཁཱདནྟེཧི ཌཾསིཏྭཱ ཌཾསིཏྭཱ པུན ཋཔེཏུཾ ལབྷཏི. ‘‘ན བྷིཀྑཝེ པཏྟཧཏྠེན ཀཝཱཊཾ པཎཱམེཏབྦཾ, ཡོ པཎཱམེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༢༥༥) ཝུཏྟཏྟཱ ཡེན ཀེནཙི སརཱིརཱཝཡཝེན པཏྟཾ གཧེཏྭཱ ཋིཏོ ཡེན ཀེནཙི སརཱིརཱཝཡཝེན ཀཝཱཊཾ པཎཱམེཏུཾ ན ལབྷཏི, ཏསྨཱ ‘‘པཏྟཧཏྠོཝཱ’’ཏི ཝུཏྟཾ. ཨཾསཀཱུཊེ ལགྒིཏྭཱ ཋིཏསྶ ཝཊྚཏི.

༦༨. བྷཱུམིཨཱདྷཱརཀེཏི ཨེཏྠ དནྟཝལླིཝེཏྟཝཱཀཱདཱིཧི ཀཏེ ཝལཡཱདྷཱརཀེ. དཱརུདཎྜཱདྷཱརེཏི ཨེཀདཱརུནཱ ཀཏཨཱདྷཱརཀེ ¶ ཙ བཧཱུཧི དཎྜེཧི ཀཏཨཱདྷཱརཀེ ཙཱཏི ཨཏྠོ. ཏིདཎྜེ ན ཝཊྚཏི. ཨེཏེསུ པན སུསཛྫིཏེསུ ཨེཀཾ པཏྟཾ ཋཔེཏྭཱཝ ཏསྶུཔརི ཨེཀཾ ཋཔེཏུཾ ཝཊྚཏི, ཏཡོ པན ན ཝཊྚནྟི. ཨེཀཾ ནིཀྐུཛྫིཏྭཱཝ བྷཱུམིཡནྟི ཨེཏྠ བྷཱུམིཡཾ ཀཊསཱརཀཱདཱིསུ ཨཉྙཏརཾ པཏྠརིཏྭཱ ཏསྶུཔརི ནིཀྐུཛྫིཏྭཱ ཝཱ ཨུཀྐུཛྫིཏྭཱ ཝཱ ཨེཀཾ ཋཔེཡྻ, དྭེ ཋཔེཏུཾ ན ཝཊྚཏཱིཏི ཨདྷིཔྤཱཡོ. དྭེ པན ཋཔེནྟེན ཨུཔརི ཋཔིཏཔཏྟཾ ཨེཀེན པསྶེན བྷཱུམིཡཾ ཕུསཱཔེཏྭཱ ཋཔེཏུཾ ཝཊྚཏཱིཏི ཝདནྟི.

༦༩-༧༠. ཨིདཱནི ཨཀཔྤིཡཔཏྟེ དསྶེཏུཾ ‘‘དཱརུརཱུཔིཡསོཝཎྞཱ’’ཏིཨཱདི ཨཱརདྡྷཾ. ཏཏྠ མཎིཝེལུ༹རིཡཱམཡཱཏི (ཙཱུལ༹ཝ. ༢༥༢; ཙཱུལ༹ཝ. ཨཊྛ. ༢༥༢) མཎཱིཏི ཨིནྡནཱིལཀབརཀཏཱདི. སཙེ གཧཊྛཱ བྷཏྟགྒེ སུཝཎྞརཱུཔིཡཏཊྚཀཱདཱིསུ སཱུཔབྱཉྫནཾ ཀཏྭཱ ཨུཔནཱམེནྟི, ཨཱམསིཏུམྤི ན ཝཊྚཏི. གྷཊིཀཊཱཧཛཱ (ཙཱུལ༹ཝ. ༢༥༥; ཙཱུལ༹ཝ. ཨཊྛ. ༢༥༥) ཙ ཏུམྦཀཊཱཧཛཱ ཙ གྷཊིཏུམྦཀཊཱཧཛཱ. ཨེཏྠ ཏུམྦཀཊཱཧཛཱནཱམ ཨལཱབུ. པཏྟཝིནིཙྪཡོ.

༧༡-༢. ཨིདཱནི ཐཱལཀེསུ ཀཔྤིཡཱཀཔྤིཡཝིདྷིཾ དསྶེཏུཾ ‘‘ཐཱལཀཱ ཙཱ’’ཏི པདཾ ཨུདྡྷཊཾ. ཏཏྠ ¶ ཨཀཔྤཱཏི དཱརུམཡཱདཡོ ཐཱལཀཱ ཨཀཔྤིཡཱཏི ཨཏྠོ. ཕལིཀཐཱལཀཱདཡོ (ཙཱུལ༹ཝ. ཨཊྛ. ༢༥༢) གིཧིསནྟཀཱ ཝཱ སངྒྷསནྟཀཱ ཝཱ ཀཔྤིཡཱ. གྷཊིཏུམྦཀཊཱཧཛཱ (ཙཱུལ༹ཝ. ༢༥༥) ཏཱཝཀཱལིཀཱ, ཏཱསུ བྷུཉྫིཏྭཱ ཚཌྜེཏབྦཱ, ན པརིཧརིཏབྦཱཏི ཨདྷིཔྤཱཡོ. ཐཱལཀཝིནིཙྪཡོ.

༧༣. ཨིདཱནི ¶ པཝཱརཎཱཝིདྷིཾ དསྶེཏུཾ ‘‘པཝཱརཎཱ’’ཏི (པཱཙི. ༢༣༨-༢༣༩; པཱཙི. ཨཊྛ. ༢༣༨-༢༣༩; ཀངྑཱ. ཨཊྛ. པཋམཔཝཱརཎཱསིཀྑཱཔདཝཎྞནཱ) པདཾ ཨུདྡྷཊཾ. ཏཏྠ ཨིརིཡཱཔཐེནཱཏི ཋཱནགམནསཡནནིསཛྫཱནཾ ཨཉྙཏརེན ཨིརིཡཱཔཐེནཱཏི ཨཏྠོ. ཏཏོ ཨིརིཡཱཔཐཏོ ཨཉྙེན ཨིརིཡཱཔཐེན ཨནཏིརིཏྟཀཾ པརིབྷུཉྫེཡྻ ཙེ, པཱཙིཏྟིཡནྟི ཨཏྠོ. པཱཙིཏྟིནཏིརིཏྟཀནྟི པཱཙིཏྟི ཨནཏིརིཏྟཀཾ.

༧༤. ཨིདཱནི ཡེཧི ཨངྒེཧི པཝཱརཎཱ ཧོཏི, ཏཱནི ཨངྒཱནི དསྶེཏུཾ ‘‘ཨསན’’ནྟིཨཱདིམཱཧ. ཏཏྠ ཨསནནྟི ཨེཏེན ཨཝིཔྤཀཏབྷོཛནཏཱ ཝུཏྟཱ, བྷུཉྫམཱནོ ཙ སོ པུགྒལོ ཧོཏཱིཏི ཨཏྠོ. བྷོཛནཉྩེཝཱཏི ཡཾ བྷུཉྫནྟོ པཝཱརེཏི, ཏཾ ཨོདནོ ཀུམྨཱསོ སཏྟུ མཙྪོ མཾསནྟི ཨིམེསུ ཨཉྙཏརཾ ཧོཏཱིཏི ཨཏྠོ. ཨབྷིཧཱརོཏི དཱཡཀོ ཏསྶ ཏཾ བྷཏྟཾ ཀཱཡེན ཨབྷིཧརཏཱིཏི ཨཏྠོ, ཝཱཙཱབྷིཧཱརོ པན ན གཧེཏབྦོ. སམཱིཔཏཱཏི དཱཡཀོ པཝཱརཎཔྤཧོནཀབྷོཛནཾ གཧེཏྭཱ ཨཌྜྷཏེཡྻཧཏྠཔྤམཱཎེ ཨོཀཱསེ ཧོཏཱིཏི ཨཏྠོ. ཀཱཡཝཱཙཱཔཊིཀྑེཔོཏི ཧཏྠཔཱསེ ཋིཏེན ཨབྷིཧཊཾ བྷིཀྑཾ ཀཱཡེན ཝཱ ཝཱཙཱཡ ཝཱ པཊིཀྑིཔེཡྻཱཏི ཨཏྠོ. ཨེཏྠ པན སཙེ བྷིཀྑུ ནིསིནྣོ ཧོཏི, ཨཱནིསདསྶ པཱརིམནྟཏོ པཊྛཱཡ, སཙེ ཋིཏོ, པཎྷིཨནྟཏོ པཊྛཱཡ, སཙེ ནིཔནྣོ, ཡེན པསྶེན ནིཔནྣོ, ཏསྶ པཱརིམནྟཏོ པཊྛཱཡ དཱཡཀསྶཱཔི ཏཐཱཝིདྷསྶ ཋཔེཏྭཱ པསཱརིཏཧཏྠཾ ཡཾ ཏསྶ ཨཱསནྣཏརཾ ཨངྒཾ, ཏསྶ ཝསེན པརིཙྪེདོ ཀཱཏབྦོ. པཉྩ ཨངྒཱ པཝཱརཎཱཏི ‘‘ཨསནཾ པཉྙཱཡཏི, བྷོཛནཾ པཉྙཱཡཏི, ཧཏྠཔཱསེ ཋིཏོ ཨབྷིཧརཏི, པཊིཀྑེཔོ ¶ པཉྙཱཡཏཱི’’ཏི (པཱཙི. ༢༣༩; པརི. ༤༢༨) ¶ པཱལི༹ཡཾ ཝུཏྟེཧི ཨིམེཧི པཉྩཧི ཨངྒེཧི པཝཱརཎཱ ཧོཏཱིཏི ཨཏྠོ.

༧༥. ཨིདཱནི ཨེཏེསུ པཉྩསུ བྷོཛནཾ དསྶེཏུཾ ‘‘ཨོདནོ’’ཏིཨཱདི ཝུཏྟཾ. ཨིདཱནི ཨོདནཱདཡོ ཨིམེཧི ནིབྦཏྟཱཏི དསྶེཏུཾ ‘‘སཱལཱི’’ཏིཨཱདིམཱཧ. ཏཏྠ སེཏརཏྟཀཱལ༹བྷེདཱ སབྦཱཔི ཀངྒུཛཱཏིཡོ ཀངྒཱུཏི གཧེཏབྦཱ. ཀཱལ༹སེཏཱ ཀུདྲཱུསཝརཀཱ. ཨིམེསཾ སཏྟནྣཾ དྷཉྙཱནཾ ཨོདནོ ཙ བྷོཛྫཡཱགུ ཙ ཨོདནོ ནཱམཱཏི ཨཏྠོ.

༧༦. སཱམཱཀཱདིཏིཎཾ (པཱཙི. ཨཊྛ. ༢༣༨-༢༣༩) ཀུདྲཱུསཀེ སངྒཧཾ གཏནྟི ཨཏྠོ. ཝརཀཙོརཀོ ཝརཀེ སངྒཧཾ གཏོ, སཱལིཡཉྩེཝ ནཱིཝཱརོ སངྒཧཾ གཏོ སེཏཏྟཱཏི ཝདནྟི. ཨིམེསཾ ཝུཏྟཔྤཀཱརཱནཾ སཱནུལོམཱནཾ སཏྟནྣཾ དྷཉྙཱནཾ ཏཎྜུལེ གཧེཏྭཱ ‘‘ཡཱགུཾ པཙིསྶཱམཱ’’ཏི ཝཱ ‘‘བྷཏྟཾ པཙིསྶཱམཱ’’ཏི ཝཱ ཡཾ ཀིཉྩི སནྡྷཱཡ པཙནྟི, སཙེ ཨུཎྷཾ ཝཱ སཱིཏལཾ ཝཱ བྷུཉྫནྟཱནཾ བྷོཛནཀཱལེ གཧིཏགཧིཏཊྛཱནེ ཨོདྷི པཉྙཱཡཏི, ཨཡཾ ཨོདནོ ནཱམ, པཝཱརཎཾ ཛནེཏི. ཡོཔི པཱཡཱསོ ཝཱ ཨམྦིལཡཱགུ ཝཱ ཨུདྡྷནཏོ ཨོཏཱརིཏམཏྟཱ ཨབྦྷུཎྷཱ ཨཱཝིཛ྄ཛྷིཏྭཱ པིཝིཏུཾ སཀྐཱ, གཧིཏོཀཱསེཔི ཨོདྷིཾ ན དསྶེཏི, ཨཡཾ པཝཱརཎཾ ན ཛནེཏི. ཨུསུམཱཡ པན ཝིགཏཱཡ གྷནབྷཱཝཾ གཙྪཏི, ཨོདྷི པཉྙཱཡཏི, པུན པཝཱརཎཾ ཛནེཏི, པུབྦེ ཏནུཀབྷཱཝོ ན རཀྑཏི. བྷཏྟེ པན ཨུདཀཀཉྫིཀཁཱིརཱདཱིནི ཨཱཀིརིཏྭཱ ‘‘ཡཱགུཾ གཎྷཐཱ’’ཏི ཝདནྟི, ཀིཉྩཱཔི ཏནུཀཱ ཧོཏི, པཝཱརཎཾ ཛནེཏིཡེཝ ཏསྨིཾ ཡཱགུཡཱ ནཏྠིབྷཱཝཏོ. སཙེ པན པཀྐུཐིཏེསུ ཨུདཀཱདཱིསུ པཀྑིཔིཏྭཱ པཙིཏྭཱ དེནྟི, ཡཱགུསངྒཧམེཝ གཙྪཏི.

༧༧. བྷཊྛདྷཉྙམཡོཏི ¶ སཏྟཝིདྷཱནིཔི དྷཉྙཱནི གཧེཏྭཱ ཁརཔཱཀབྷཛྫིཏཱནཾ ཏེསཾ ཏཎྜུལེ ཀོཊྚེཏྭཱ ཀཏཙུཎྞཀུཎྜཀཱནི སཏྟུ ནཱམ. སམཔཱཀབྷཛྫིཏཱནཾ པན ཨཱཏཔསུཀྑཱནཾ ཝཱ ཏཎྜུལཱནཾ ཙུཎྞཀུཎྜཀཱནི སཏྟུསངྑྱཾ ན གཙྪནྟི. ཡཝསམྦྷཝོཏི ཨཉྙེཧི པན མུགྒཱདཱིཧི ཀཏཀུམྨཱསོ ན པཝཱརེཏཱིཏི ཨདྷིཔྤཱཡོ. ཨུདཀསམྦྷཝོཏི ཨིམིནཱ ཀཀྐཊཀསིཔྤིཀསམྦུཀཱདཡོཔི སངྒཧཾ གཙྪནྟི. སཙེ ཡཱགུཔཱནཀཱལེ ཨེཀསྨིཾ བྷཱཛནེ ཋཔེཏྭཱ མཙྪམཾསཾ ཝཱ ཁཱདནྟི, ཏེ ཙེ ཨཁཱདནྟོ ཨཉྙཾ པཝཱརཎཔྤཧོནཀཾ པཊིཀྑིཔཏི, ན པཝཱརེཏི. ཁཱདིཏེཔི སཙེ མུཁེ ཨཝསིཊྛཾ ནཏྠི, ཏདཱ པཊིཀྑིཔནྟོཔི ན པཝཱརེཏིཡེཝ. སཙེ ¶ པཏྟེ ཨཝསིཊྛཾ ཨཏྠི, མུཁེ ནཏྠི, ཏཉྩེ ཨཁཱདིཏུཀཱམོ ཧོཏི, ཨཉྙཏྠ ཝཱ གནྟྭཱ ཁཱདིཏུཀཱམོ, ཏསྨིཾ ཁཎེ པཊིཀྑིཔནྟོཔི ན པཝཱརེཏིཡེཝ.

༧༨. བྷོཛནནྟི (པཱཙི. ཨཊྛ. ༢༣༨-༢༣༩) པཉྩསུ བྷོཛནེསུ ཡཾ ཀིཉྩི བྷོཛནཾ. ཀཔྤིཡཾ ཝཱ ཨཀཔྤིཡཾ ཝཱ བྷུཉྫནྟོཏི སམྦནྡྷོ. ནིསེདྷཡནྟི ཀཱཡེནཱབྷིཧཊཾ ཨངྒུལིཙལནཱདིནཱ ཝཱ བྷམུཀཝིཀཱརེན ཝཱ ཀུདྡྷབྷཱཝེན ཨོལོཀེན ཝཱ པཊིཀྑིཔནྟོ ཀཱཡེན ཝཱ ‘‘ཨལ’’ནྟི ཝཱ ‘‘ན གཎྷཱམཱི’’ཏི ཝཱ ‘‘མཱ ཨཱཀིརཱ’’ཏི ཝཱ ‘‘ཨཔགཙྪཱ’’ཏི ཝཱ ཨཱདིནཱ ནཡེན པཊིཀྑིཔནྟོ ཝཱཙཱཡ ཝཱ ནིསེདྷཡནྟོཏི ཨཏྠོ. ཀཔྤནྟི ཀཔྤིཡབྷོཛནམེཝ པཊིཀྑིཔནྟོ སོ པཝཱརེཏི, ཨཀཔྤིཡམཾསཾ ཝཱ བྷོཛནཾ ཝཱ པཊིཀྑིཔནྟོ ན པཝཱརེཏི. ཀསྨཱ? ཏསྶ པཊིཀྑིཔིཏབྦཊྛཱནེ ཋིཏཏྟཱ. སཙེ ཀཔྤིཡབྷོཛནཾ བྷུཉྫམཱནོ ཨཀཔྤིཡཾ པཊིཀྑིཔཏི, ན པཝཱརེཏི. ཀསྨཱ? ཏསྶ པཊིཀྑིཔིཏབྦཏོ. ཨིདཱནི མིསྶཀནཡཾ དསྶེཏུཾ ‘‘ཏནྣཱམེནཱ’’ཏིཨཱདི ཝུཏྟཾ. ཏཏྲཱཡཾ པིཎྜཏྠོ – ཏནྣཱམེན ཝཱ ཨིམནྟི ཝཱ ཨབྷིཧཊཾ ¶ ཀཔྤིཡཾ ནིསེདྷཡཾ པཝཱརེཡྻཱཏི. ཀིཾ ཝུཏྟཾ ཧོཏི? ཡོ པན མཙྪམཾསམིསྶཾ (ཀངྑཱ. ཨཊྛ. པཋམཔཝཱརཎཱསིཀྑཱཔདཝཎྞནཱ; པཱཙི. ཨཊྛ. ༢༣༨-༢༣༩) ཡཱགུཾ བྱཉྫནཾ ཝཱ ཨཱཧརིཏྭཱ ‘‘མཙྪཾ གཎྷཐ, མཾསཾ གཎྷཐཱ’’ཏི ཝདཏི, ཏཾ པཊིཀྑིཔཏོ པཝཱརཎཱ ཧོཏི. སཙེ ‘‘ཡཱགུཾ གཎྷཐ, རསབྱཉྫནཾ གཎྷཐཱ’’ཏི ཝདཏི, ཏཾ པཊིཀྑིཔཏོ པཝཱརཎཱ ན ཧོཏི. ཀསྨཱ? ཏསྶཱཔི ཨཏྠིཏཱཡ. སཙེ ‘‘ཨིམཾ གཎྷཐཱ’’ཏི སཝཏྠུཀཾ ཀཏྭཱ དེཏི, ཏཾ པཊིཀྑིཔཏོ པཝཱརཎཱ ཧོཏི. བྷཏྟམིསྶཀེཔི ཨེསེཝ ནཡོ. སཙེ ཨཉྙསྶ ཨབྷིཧཊཾ པཊིཀྑིཔཏི, པཝཱརཎཱ ནཏྠིཡེཝ.

༧༩-༨༠. ཨིདཱནི པཝཱརཎཾ ཨཛནེནྟེ དསྶེཏུཾ ‘‘ལཱཛཱ’’ཏིཨཱདི ཝུཏྟཾ. ཨེཏྠ ལཱཛཱ ཏཾསཏྟུབྷཏྟཱནཱིཏི (ཀངྑཱ. ཨཊྛ. པཋམཔཝཱརཎཱསིཀྑཱཔདཝཎྞནཱ) ལཱཛཱ ཙ ལཱཛེཧི ཀཏསཏྟུབྷཏྟཱནི ཙཱཏི ཨཏྠོ. མཙྪམཾསཔཱུཝེསུ པན པཝཱརཎཱ ཧོཏི, ཏསྨཱ ‘‘སུདྡྷཁཛྫཀོ’’ཏི ཝུཏྟཾ. བྷཊྛཔིཊྛནྟི པུབྦེ ཨཱམཀཾ པཙྪཱ བྷཛྫིཏབྦནྟི ཝུཏྟཾ ཧོཏི. ཝེལུ༹ཨཱདཱིནཾ ཝུཏྟཱཝསེསཱནཾ བྷཏྟནྟི སམྦནྡྷོ. རསཡཱགུ རསོ པཀྐཡཱགུ. མཾསཱདཱིཧི ཨམིསྶིཏཱ སུདྡྷཡཱགུ. པུཐུཀཱམཡཾ པན ཡཾ ཀིཉྩི པཝཱརཎཾ ན ཛནེཏི.

༨༡. ཝུཊྛཱཡཱཏི (པཱཙི. ཨཊྛ. ༢༣༨-༢༣༩) ཨཱསནཱ ཨུཊྛཱཡ ཨཏིརིཏྟཾ ན ཀཱཏབྦནྟི ¶ སམྦནྡྷོ. སཙེ པཝཱརེཏྭཱ ཨཱསནཱ ན ཝུཊྛཱཏི བྷིཀྑུ, ཏསྶཱཔི ཨཏིརིཏྟཾ ཀཱཏུཾ ལབྷཏི. ཨབྷུཏྟེན ཙ བྷོཛནནྟི ཡེན པཉྩནྣཾ བྷོཛནཱནཾ ཨཉྙཏརཾ བྷོཛནཾ ཨནྟམསོ ཀུསགྒེནཱཔི ན བྷུཏྟཾ, ཏེནཱཔི ཨཏིརིཏྟཾ ན ཀཱཏབྦནྟི ཨཏྠོ. ཡེན པན ཨརུཎུགྒམེཔི བྷུཏྟཾ ཧོཏི, སོ ཙེ ཨཔཝཱརིཏོ ཨཱསནཱ ཝུཊྛིཏོཔི མཛ྄ཛྷནྷིཀསམཡེཔི པུན ཀིཉྩི ཨབྷུཏྭཱཔི ཀཱཏུཾ ལབྷཏི. ཡེན ཡཾ ཝཱ ¶ པུརེ ཀཏནྟི ཡེན ཡཾ ཝཱ པུབྦེ ཀཏཾ, ཏེན ཏམྤི པཙྪཱ ན ཀཱཏབྦཾ. ཨཉྙེན པན ཏཾ ཀཱཏུཾ ཝཊྚཏཱིཏི ཝདནྟི.

༨༢. ཡཾ ཕལཾ ཝཱ ཀནྡམཱུལཾ ཝཱ པཉྩཧི སམཎཀཔྤེཧི ཀཏཀཔྤིཡཾ ཨཉྙམྤི ཀཔྤིཡབྷོཛནཾ ཝཱ ཀཔྤིཡམཾསཾ ཝཱ, ཨིདཾ ཀཔྤིཡཾ ནཱམ, ཝུཏྟཔྤཀཱརཝིཔརཱིཏཾ ཨཀཔྤིཡཾ ནཱམ, ཏསྨིཾ ཨཏིརིཏྟཀརཎཾ ན རུཧཏི, ཡཉྩ པཊིགྒཧེཏྭཱ ན གཧིཏཾ, ཏསྨིམྤི ན རུཧཏི, ཏེན ཝུཏྟཾ ‘‘ཀཔྤིཡཾ གཧིཏཉྩེཝཱ’’ཏི. ཨུཙྩཱརིཏནྟི ཀཔྤིཡཾ ཀཱརེཏུཾ ཨཱགཏེན བྷིཀྑུནཱ ཨཱིསཀམྤི ཨུཀྑིཏྟཾ ཝཱ ཨཔནམིཏཾ ཝཱཏི ཨཏྠོ. ཧཏྠཔཱསཏོ བཧི ཋིཏཾ ཀཱཏུཾ ན ཝཊྚཏི, ཏེན ཝུཏྟཾ ‘‘ཧཏྠཔཱསག’’ནྟི. ཨཏིརིཏྟཾ ཀརོནྟེཝནྟི ཨཏིརིཏྟཾ ཀརོནྟོ ‘‘ཨལམེཏཾ སབྦ’’ནྟི ཝཙཱིབྷེདཾ ཀཏྭཱ ཨེཝཾ བྷཱསཏཱུཏི ཨཏྠོ. ‘‘ཨལམེཏཾ སབྦ’’ནྟི ཏིཀྑཏྟུཾ ཝཏྟབྦཾ, ཨཡཾ ཀིར ཨཱཙིཎྞོ. ཝིནཡདྷརཱ ཀིར པན ‘‘སཀིཾ ཨེཝ ཝཏྟབྦ’’ནྟི ཝདནྟི. ཨལམེཏཾ སབྦནྟི ཨིདམྤི ཝོ ཨདྷིཀཾ, ཨིཏོ ཨཉྙཾ ན ལཙྪསཱིཏི ཨཏྠོ.

༨༣. ཨནུཔསམྤནྣཧཏྠགནྟི ཀཔྤིཡཾ ཀརོནྟེན པན ཨནུཔསམྤནྣསྶ ཧཏྠེ ཋིཏཾཡེཝ ན ཀཱཏབྦཾ, ཏཾ པན ཨཉྙེན བྷིཀྑུནཱ པཊིགྒཧཱཔེཏྭཱ ཏསྶ ཧཏྠེ ཋིཏཾ ཨཏིརིཏྟཾ ཀཏྭཱ ཨནུཔསམྤནྣསྶ དཱཏུཾ ཝཊྚཏི. ཨཏྟནཱ ཨཱགནྟྭཱ ཨཉྙསྶ ཧཏྠེ ཙ པེསཡིཏྭཱཔི ཀཱརེཏུཾ ལབྦྷཏེཏི ཨཏྠོ. ཏཾ པན ཨཏིརིཏྟཀཱརཀཾ ཋཔེཏྭཱ ཨཉྙོ སབྦོ པཝཱརིཏོཔི ཨཔྤཝཱརིཏོཔི བྷུཉྫིཏུཾ ལབྷཏཱིཏི ཨཏྠོ. སཙེ པཝཱརིཏོ པརིབྷུཉྫཏི, ཡཐཱ ཨཀཏེན མིསྶཾ ན ཧོཏི, ཏཐཱ མུཁཉྩ ཧཏྠཉྩ སུདྡྷཾ ཀཏྭཱ བྷུཉྫིཏབྦཾ. གིལཱནསྶ བྷུཏྟཱཝསེསམྤི ཏསྶ ‘‘ཨཛྫ ཝཱ སྭེ ཝཱ ཁཱདིསྶཏཱི’’ཏི ཨཱཧཊམྤི ཨནཏིརིཏྟཀཏཾ བྷུཉྫིཏུཾ ཝཊྚཏཱིཏི. པཝཱརཎཱཝིནིཙྪཡོ.

༨༤. ཨིདཱནི ¶ ¶ ཡེ ཏེ ཙཏྟཱརོ ཀཱལིཀཱ མུནིནཱ ཝུཏྟཱ ‘‘ཡཱཝཀཱལིཀཾ ཡཱམཀཱལིཀཾ སཏྟཱཧཀཱལིཀཾ ཡཱཝཛཱིཝིཀ’’ནྟི, ཏེ དསྶེཏུཾ ‘‘ཀཱལིཀཱ ཙཱ’’ཏི པདཾ ཨུདྡྷཊཾ. ཏཏྠ (པཱཙི. ༢༥༤-༢༥༦; པཱཙི. ཨཊྛ. ༢༥༣-༢༥༦) ཀཏམེ ཏེ ཀཱལིཀཱཏི ཙེ, ཏེ དསྶེཏུཾ ‘‘ཡཱཝཀཱལིཀ’’ནྟིཨཱདིམཱཧ. ཏེསུ ཨརུཎུགྒམནཏོ ཡཱཝ ཋིཏམཛ྄ཛྷནྷིཀཱ བྷུཉྫིཏབྦཏོ ཡཱཝཀཱལིཀཾ. ཨརུཎུགྒམནཏོ ཡཱཝ ཡཱམཱཝསཱནཱ པིཔཱསཱཡ སཏི པིཔཱསཙྪེདནཏྠཾ པཱཏབྦཏོ ཡཱམོ ཀཱལོ ཨསྶཱཏི ཡཱམཀཱལིཀཾ. ཏེན ཨུཔསམེཏབྦེ ཨཱབཱདྷེ སཏི ཡཱཝ སཏྟཱཧཱ པརིབྷུཉྫིཏབྦཏོ སཏྟཱཧཀཱལིཀཾ. ཨཱབཱདྷེ སཏི ཡཱཝཛཱིཝཾ པརིཧརིཏྭཱ བྷུཉྫིཏབྦཏོ ཡཱཝཛཱིཝིཀཾ.

༨༥. ཏེསུ ཡཱཝཀཱལིཀཾ དསྶེཏུཾ ‘‘པིཊྛཾ མཱུལཾ ཕལཾ ཁཛྫ’’ནྟིཨཱདིམཱཧ. ཨེཏྠ (པཱཙི. ༢༤༨-༢༥༠; པཱཙི. ཨཊྛ. ༢༤༨-༢༤༩) པིཊྛཁཱདནཱིཡཾ ནཱམ སཏྟནྣཾ ཏཱཝ དྷཉྙཱནཾ དྷཉྙཱནུལོམཱནཾ ཨཔརཎྞཱནཉྩ པིཊྛཾ པནསཔིཊྛཾ ལབུཛཔིཊྛཾ ཨམྦཱཊཀཔིཊྛཾ སཱལཔིཊྛཾ དྷོཏཀཏཱལཔིཊྛཾ ཁཱིརཝལླིཔིཊྛཉྩཱཏི ཨེཝམཱདཱིནི ཏེསུ ཏེསུ ཛནཔདེསུ པཀཏིཨཱཧཱརཝསེན མནུསྶཱནཾ ཁཱདནཱིཡཏྠཉྩ བྷོཛནཱིཡཏྠཉྩ ཕརཎཀཱནི པིཊྛཱནི ཡཱཝཀཱལིཀཱནི. ཨིམིནཱཝ ལཀྑཎེན མཱུལཁཱདནཱིཡཱདཱིསུཔི ཡཱཝཀཱལིཀལཀྑཎཾ ཝེདིཏབྦཾ, ཨཏིཝིཏྠཱརབྷཡེན སཾཁིཏྟཾ. གོརསོ ནཱམ ཁཱིརདདྷིཏཀྐརསོ. དྷཉྙབྷོཛནནྟི སཱནུལོམཱནི སཏྟདྷཉྙཱནི ཙ པཉྩཝིདྷབྷོཛནཉྩཱཏི ཨཏྠོ. ཡཱགུསཱུཔཔྤབྷུཏཡོཏི ཨེཏྠ པབྷུཏི-སདྡེན ཀནྡཁཱདནཱིཡཾ མུལཱ༹ལཁཱདནཱིཡཾ མཏྠཀཁཱདནཱིཡཾ ཁནྡྷཁཱདནཱིཡཾ ཏཙཁཱདནཱིཡཾ པཏྟཁཱདནཱིཡཾ པུཔྥཁཱདནཱིཡཾ ཨཊྛིཁཱདནཱིཡཾ ནིཡྻཱསཁཱདནཱིཡནྟི ཨིམཱནི སངྒཧིཏཱནཱིཏི ཝེདིཏབྦཱནི.

ཏཏྲིདཾ ¶ མུཁམཏྟནིདསྶནཾ – བྷིསསངྑཱཏོ པདུམཔུཎྜརཱིཀཀནྡོ པིཎྜཱལུམསཱལུཀཨཱདཡོ ཝལླིཀནྡོ ཨཱལུཝཀནྡོ ཏཱལཀནྡོཏི ཨེཝམཱདི ཀནྡཁཱདནཱིཡཾ. པདུམམུལཱ༹ལཱདཡོ མུལཱ༹ལཁཱདནཱིཡཾ. ཏཱལཧིནྟཱལཀུནྟཱལཀེཏཀནཱལི༹ཀེརཔཱུགརུཀྑཁཛྫཱུརཱིཨཱདཱིནཾ ཀལཱི༹རསངྑཱཏཱ མཏྠཀཱ མཏྠཀཁཱདནཱིཡཾ. ཨུཙྪུཁནྡྷོ ནཱིལུཔྤལརཏྟུཔྤལཀུམུདསོགནྡྷིཀཱནཾ པུཔྥདཎྜཀཱནཱིཏི ཨེཝམཱདི ཁནྡྷཁཱདནཱིཡཾ. ཏཙཁཱདནཱིཡཾ ཨུཙྪུཏཙོ ཨེཝ ཨེཀོ ཡཱཝཀཱལིཀོ, སོཔི སརསོ. མཱུལཀཾ ཁཱརཀོ ཙཙྩུ ཏམྦུཀོ ཏཎྜུལེཡྻཀོཏི ཨེཝམཱདི པཏྟཁཱདནཱིཡཾ. མཱུལཀཔུཔྥཾ ཁཱརཀཔུཔྥཾ ¶ ཙཙྩུཔུཔྥཾ ཏམྦུཀཔུཔྥནྟི ཨེཝམཱདི པུཔྥཁཱདནཱིཡཾ, ཨསོཀཔུཔྥཾ པན ཡཱཝཛཱིཝིཀཾ. ལབུཛཔནསཊྛིཨཱདི ཨཊྛིཁཱདནཱིཡཾ. ནིཡྻཱསཁཱདནཱིཡེ ཡཱཝཀཱལིཀཾ ནཏྠི. ཨེཏེ ཝུཏྟཔྤཀཱརཱ ཡཱཝཀཱལིཀཱ ཧོནྟཱིཏི ཨཏྠོ.

༨༦. ཨིདཱནི ‘‘ཨནུཛཱནཱམི, བྷིཀྑཝེ, ཨཊྛ པཱནཱནི ཨམྦཔཱནཾ ཛམྦུཔཱནཾ ཙོཙཔཱནཾ མོཙཔཱནཾ མདྷུཀཔཱནཾ མུདྡིཀཔཱནཾ སཱལཱུཀཔཱནཾ ཕཱརུསཀཔཱན’’ནྟི (མཧཱཝ. ༣༠༠) ཨེཝཾ ཝུཏྟཾ ཨཊྛཝིདྷཾ པཱནཀཾ ཡཱམཀཱལིཀཾ ནཱམཱཏི དསྶེཏུཾ ‘‘མདྷཱུ’’ཏིཨཱདིམཱཧ. ཏཏྠ (མཧཱཝ. ཨཊྛ. ༣༠༠) མདྷུཛཾ མུདྡིཀཛཾ སཱལཱུཀཛཾ ཙོཙཛཾ མོཙཛཾ ཨམྦུཛཾ ཛམྦུཛཉྩཱཏི ཨེཝམཏྠོ གཧེཏབྦོ. ཨེཏྠ མདྷུཛཾ ནཱམ མདྷུཀཱནཾ ཛཱཏིརསེན ཀཏཾ, ཏཾ པན ཨུདཀསམྦྷིནྣམེཝ ཝཊྚཏི, སུདྡྷཾ ན ཝཊྚཏི. མུདྡིཀཔཱནཾ ནཱམ མུདྡིཀཱ ཨུདཀེ མདྡིཏྭཱ པརིསྶཱཝེཏྭཱ གཧིཏཾ. སཱལཱུཀཔཱནཾ ནཱམ རཏྟུཔྤལནཱིལུཔྤལཱདཱིནཾ ཀིཉྫཀྑརེཧི ཀཏཾ. སེསཱནི པཱཀཊཱནེཝ. ཨེཏྠ པན སཙེ སཡཾ ཨེཏཱནི ཡཱཝཀཱལིཀཝཏྠཱུནི པཊིགྒཧེཏྭཱ ཨུདཀེ མདྡིཏྭཱ ཨཱཏཔེ ཨཱདིཙྩཔཱཀེན པཙིཏྭཱ པརིསྶཱཝེཏྭཱ པཱནཀཾ ཀརོཏི, ཏཾ པུརེབྷཏྟམེཝ ཀཔྤཏི. སཙེ ཨནུཔསམྤནྣེན ཀཏཾ ལབྷཏི, ཏདཧུཔུརེབྷཏྟཾ སཱམིསམྤི ཝཊྚཏི, པཙྪཱབྷཏྟཾ ནིརཱམིསཔརིབྷོགེན ¶ ཡཱཝ ཨརུཎུགྒམནཱ ཝཊྚཏི. ཨིམཱནི ཨཊྛ པཱནཱནི སཱིཏཱནིཔི ཨཱདིཙྩཔཱཀཱནིཔི ཝཊྚནྟི, ཨགྒིཔཱཀཱནི པན ན ཝཊྚནྟི, ཏསྨཱ ‘‘ནགྒིསནྟཏྟ’’ནྟི ཝུཏྟཾ.

༨༧. ‘‘ཨནུཛཱནཱམི, བྷིཀྑཝེ, སབྦཾ ཕལརསཾ ཋཔེཏྭཱ དྷཉྙཕལརས’’ནྟི (མཧཱཝ. ༣༠༠) ཝུཏྟཏྟཱ དྷཉྙཕལརསོ པན ན ཝཊྚཏི, ཏེན ཝུཏྟཾ ‘‘སཱནུལོམཱནི དྷཉྙཱནི ཋཔེཏྭཱ’’ཏི. ‘‘ཨནུཛཱནཱམི, བྷིཀྑཝེ, སབྦཾ པུཔྥརསཾ ཋཔེཏྭཱ མདྷུཀཔུཔྥརས’’ནྟི ཝུཏྟཏྟཱ མདྷུཀཔུཔྥརསོ ཨཱདིཙྩཔཱཀོ ཝཱ ཧོཏུ ཨགྒིཔཱཀོ ཝཱ, པཙྪཱབྷཏྟཾ ན ཝཊྚཏི, ཏེན ཝུཏྟཾ ‘‘མདྷུཀཔུཔྥམཉྙཏྲཱ’’ཏི.

༨༨. ‘‘ཨནུཛཱནཱམི, བྷིཀྑཝེ, སབྦཾ པཏྟརསཾ ཋཔེཏྭཱ ཌཱཀརས’’ནྟི ཝུཏྟཏྟཱ ཨུདཀེན པཀྐཱནམྤི ཡཱཝཀཱལིཀཔཏྟཱནཾ རསོ པུརེབྷཏྟམེཝ ཝཊྚཏི, སཱིཏོདཀེན མདྡིཏཱནཾ རསོ ཡཱམཀཱལིཀཾ. ཏེན ཝུཏྟཾ ‘‘ཋཔེཏྭཱ པཀྐཌཱཀཛ’’ནྟི. ཡཱཝཛཱིཝིཀཔཎྞསྶ ཨུདཀེན པཀྐསྶ རསོ ཡཱཝཛཱིཝིཀོ ཧོཏི.

༨༩. ཨིདཱནི ¶ སཏྟཱཧཀཱལིཀེ དསྶེཏུཾ ‘‘སཔྤཱི’’ཏིཨཱདིམཱཧ. ཨེཏྠ (མཧཱཝ. ༢༦༠) པན –

‘‘སཔྤིནོནཱིཏཏེལཱནི, མདྷུཕཱཎིཏམེཝ ཙ;

སཏྟཱཧཀཱལིཀཱ སཔྤི, ཡེསཾ མཾསམཝཱརིཏ’’ནྟི. –

པཱཋོ གཧེཏབྦོ. ཨེཝཾ པན གཧིཏེ ཝསཱ ཏེལགྒཧཎེན གཧིཏཱཝ ཧོཏི ‘‘ཏེལཾ ནཱམ ཏིལཏེལཾ སཱསཔཏེལཾ མདྷུཀཏེལཾ ཨེརཎྜཏེལཾ ཝསཱཏེལ’’ནྟི (པཱརཱ. ༦༢༣; པཱཙི. ༢༦༠) ཨེཝཾ པཱལི༹ཡཾ ཝིཏྠཱརིཏཏྟཱ. ཨེཝཾ པན ཨགྒཧེཏྭཱ ཝསཱ ཙ ‘‘མདྷུཕཱཎིཏ’’ནྟི པཱཋེ གཧིཏེ ཡཱཝཀཱལིཀབྷཱུཏཱ ཝསཱ སཏྟཱཧཀཱལིཀཱཏི ཨཱཔཛྫེཡྻ, ‘‘ཡཱནི ཁོ པན ཏཱནི གིལཱནཱནཾ ¶ བྷིཀྑཱུནཾ པཊིསཱཡནཱིཡཱནི བྷེསཛྫཱནི, སེཡྻཐིདཾ – སཔྤི ནཝནཱིཏཾ ཏེལཾ མདྷུ ཕཱཎིཏ’’ནྟི (པཱརཱ. ༦༢༢) ཨེཝཾ པཉྩེཝ བྷགཝཏཱ སཏྟཱཧཀཱལིཀབྷེསཛྫཱནི ཨནུཉྙཱཏཱནི, ཏཏོ ཨུཏྟརི ཚཊྛསྶ སཏྟཱཧཀཱལིཀབྷེསཛྫསྶ ཨཏྠིཏཱཔི ཨཱཔཛྫཏི, བྷེསཛྫཀྑནྡྷཀེཔི བྷགཝཏཱ ‘‘ཨནུཛཱནཱམི, བྷིཀྑཝེ, ཝསཱནི བྷེསཛྫཱནི ཨཙྪཝསཾ མཙྪཝསཾ སུསུཀཱཝསཾ སཱུཀརཝསཾ གདྲབྷཝསཾ ཀཱལེ པཊིགྒཧིཏཾ ཀཱལེ ནིཔྤཀྐཾ ཀཱལེ སཾསཊྛཾ ཏེལཔརིབྷོགེན པརིབྷུཉྫིཏུ’’ནྟི (མཧཱཝ. ༢༦༢) ཨེཝཾ སཏྟཱཧཀཱལིཀཝསེན ཝསཾ ཨནནུཛཱནིཏྭཱ ཏཏོ ནིབྦཏྟཏེལམེཝ ཨནུཉྙཱཏཾ, ཏསྨཱ ‘‘མདྷུཕཱཎིཏམེཝ ཙཱ’’ཏི པཱཋེ ཨགྒཧིཏེ པཱལི༹ཡཱ ཨཊྛཀཐཱཡ ཙ ཝིརུཛ྄ཛྷཏི. ཐེརེན པན ཨུཏྟརཝིཧཱརཝཱསཱིནཾ ཁུདྡསིཀྑཱཡ ཨཱགཏནཡེན ཝུཏྟཾ. ཏེསཾ པན –

‘‘སཔྤི ནཝནཱིཏཾ ཏེལཾ, མདྷུ ཕཱཎིཏཔཉྩམཾ;

ཨཙྪམཙྪཝསཱདི ཙ, ཧོནྟི སཏྟཱཧཀཱལིཀཱ’’ཏི. –

ཨེཝམཱགཏཾ. ཨམྷཱཀཾ པན ཝིསུཾ སཏྟཱཧཀཱལིཀེ ཨཱགཏཊྛཱནཾ ནཏྠཱིཏི ཝདནྟི, ཨུཔཔརིཀྑིཏབྦཾ.

ཨིདཱནི ཏེསུ སཔྤིཾ དསྶེཏུཾ ‘‘ཡེསཾ མཾསཔཝཱརིཏ’’ནྟི ཝུཏྟཾ. ‘‘སཔྤིནཱམ གོསཔྤི ཝཱ ཨཛིཀཱསཔྤི ཝཱ མཧིཾ སསཔྤི ཝཱ. ཡེསཾ མཾསཾ ཀཔྤཏི, ཏེསཾ སཔྤི, ནཝནཱིཏཾ ནཱམ ཏེསཾཡེཝ ནཝནཱིཏ’’ནྟི (པཱརཱ. ༦༢༣; པཱཙི. ༢༦༠) པཱལི༹ཡཾ ཝུཏྟཏྟཱ ནཝནཱིཏཾ པན གཧིཏནྟི ན ཝིཏྠཱརིཏཾ ¶ , སཔྤི པན པུརེབྷཏྟཾ པཊིགྒཧིཏཾ ཏདཧུ པུརེབྷཏྟཾ སཱམིསམྤིནིརཱམིསམྤི ཝཊྚཏི. པཙྪཱབྷཏྟཏོ པཊྛཱཡ སཏྟཱཧཾ ནིརཱམིསཾ པརིབྷུཉྫིཏབྦཾ. སཏྟཱཧཱཏིཀྐམེ སཙེ ཨེཀབྷཱཛནེ ཋཔིཏཾ, ཨེཀཾ ནིསྶགྒིཡཾ. སཙེ བཧཱུསུ, ཝཏྠུགཎནཱཡ ནིསྶགྒིཡཔཱཙིཏྟིཡཱནི. པཙྪཱབྷཏྟཾ པཊིགྒཧིཏཾ སཏྟཱཧཾ ནིརཱམིསམེཝ ཝཊྚཏི. སཔྤི ཏཱཔེནྟསྶ སཱམཾཔཱཀོ ན ཧོཏི, ‘‘ནཝནཱིཏཾ པན ཏཱཔེནྟསྶ ཧི སཱམཾཔཱཀོ ན ཧོཏི, སཱམཾཔཀྐེན པན ¶ ཏེན སདྡྷིཾ ཨཱམིསཾ ན ཝཊྚཏཱི’’ཏི ཙ ‘‘སཙེ ཨནུཔསམྤནྣོ པུརེབྷཏྟཾ པཊིགྒཧིཏནཝནཱིཏེན སཔྤིཾ ཀཏྭཱ དེཏི, པུརེབྷཏྟཾ སཱམིསཾ ཝཊྚཏི. སཙེ སཡཾ ཀརོཏི, སཏྟཱཧཾ ནིརཱམིསམེཝ ཝཊྚཏཱི’’ཏི ཙ སམནྟཔཱསཱདིཀཱཡཾ (པཱརཱ. ཨཊྛ. ༢.༦༢༢) ནཝནཱིཏམྷིཡེཝ སཱམཾཔཱཀཏཱ ཝུཏྟཱ, ན སཔྤིམྷི. ཡཾ པན ཀངྑཱཝིཏརཎིཡཾ ཝུཏྟཾ ‘‘ནིབྦཏྟིཏསཔྤི ཝཱ ནཝནཱིཏཾ ཝཱ པཙིཏུཾ ཝཊྚཏཱི’’ཏི, ‘‘ཏཾ པན ཏདཧུ པུརེབྷཏྟམྤི སཱམིསཾ པརིབྷུཉྫིཏུཾ ན ཝཊྚཏཱི’’ཏི (ཀངྑཱ. ཨཊྛ. བྷེསཛྫསིཀྑཱཔདཝཎྞནཱ) ཙ, ཏཏྠ ཡཱཝཀཱལིཀཝཏྠུནཱ ཨསམྨིསྶཾ སུདྷོཏཾ ནཝནཱིཏཾ སནྡྷཱཡ ‘‘པཙིཏུཾ ཝཊྚཏཱི’’ཏི ཝུཏྟཾ. སཡཾཔཙིཏསཏྟཱཧཀཱལིཀེན སདྡྷིཾ ཡདི ཨཱམིསཾ བྷུཉྫཏི, ཏཾ ཨཱམིསཾ སཡཾཔཀྐསཏྟཱཧཀཱལིཀེན མིསྶིཏཾ ཨཏྟནོ ཡཱཝཀཱལིཀབྷཱཝཾ སཏྟཱཧཀཱལིཀེན གཎྷཱཔེཏི, ཏཐཱ ཙ སཏི ཡཱཝཀཱལིཀཾ ཨཔཀྐམྤི སཡཾཔཀྐབྷཱཝཾ ཨུཔགཙྪཏཱིཏི ‘‘སཱམིསཾ པརིབྷུཉྫིཏུཾ ན ཝཊྚཏཱི’’ཏི ཝུཏྟཾ. ཡཐཱ སཡཾཔཀྐསཏྟཱཧཀཱལིཀཝསཱཏེལཾ སཡཾབྷཛྫིཏསཱསཔཱདིཡཱཝཛཱིཝིཀཝཏྠཱུནཾ ཏེལཉྩ སཱམིསཾ ཏདཧུ པུརེབྷཏྟམྤི ན ཝཊྚཏི, ཏཐཱ ནཝནཱིཏསཔྤཱིཏི ཝེདིཏབྦཾ. ཝཀྑཏི ཙ ཨཱཙརིཡོ –

‘‘ཡཱཝཀཱལིཀཨཱདཱིནི, སཾསཊྛཱནི སཧཏྟནཱ. གཱཧཱཔཡནྟི སབྦྷཱཝ’’ནྟི ཙ,

‘‘ཏེཧེཝ བྷིཀྑུནཱ པཀྐཾ, ཀཔྤཏེ ཡཱཝཛཱིཝིཀཾ;

ནིརཱམིསཉྩ སཏྟཱཧཾ, སཱམིསེ སཱམཔཱཀཏཱ’’ཏི ཙ.

ཡཱ པན སམནྟཔཱསཱདིཀཱཡཾ ནཝནཱིཏམྷི སཱམཾཔཱཀཏཱ ཝུཏྟཱ, སཱ ཏཀྐཱདིསམྨིསྶཾ ཨདྷོཏནཝནཱིཏཾ སནྡྷཱཡ ཝུཏྟཱ. ཏསྨཱ ཝིཉྙཱུནཾ སམནྟཔཱསཱདིཀཱཔི ཀངྑཱཝིཏརཎཱིཔི སམེནྟི, ཏཾ ནཝནཱིཏཾ སནྡྷཱཡ ཝུཏྟནྟི ཨཱཙརིཡཱ ཝདནྟི. ཨིདམེཝ ཡུཏྟཾ. ཡདི སཔྤིམྷི སཱམཾཔཱཀཏཱ ཧོཏི, ཨཝསྶཾཡེཝ སམནྟཔཱསཱདིཀཱཡཾ ¶ ཝུཙྩེཡྻ, ཏཏྠ པན ‘‘སཔྤི ཏཱཝ པུརེབྷཏྟཾ པཊིགྒཧིཏཾ, ཏདཧུ པུརེབྷཏྟཾ སཱམིསམྤི ནིརཱམིསམྤི པརིབྷུཉྫིཏུཾ ཝཊྚཏཱི’’ཏི (པཱརཱ. ཨཊྛ. ༢.༦༢༢) ཧི ¶ ཝུཏྟཾ, ན པཙནཝིདྷཱནཾ. མནུསྶསཔྤིནཝནཱིཏཱནཾ, ཨཉྙེསམྤི ཧཏྠིཨསྶཱདཱིནཾ ཨཀཔྤིཡམཾསསཔྤིནཝནཱིཏཱནཾ སཏྟཱཧཱཏིཀྐམེ དུཀྐཊཾ. ཀིཾ པན ཏཾ པརིབྷུཉྫིཏུཾ ཝཊྚཏཱིཏི? ཨཱམ ཝཊྚཏི. ཀསྨཱ? པཊིཀྑེཔཱབྷཱཝཱ ཙ སབྦཨཊྛཀཐཱསུ ཨནུཉྙཱཏཏྟཱ ཙ. ‘‘ཡེསཾ མཾསཾ ཀཔྤཏི, ཏེསཾ སཔྤི, ནཝནཱིཏ’’ནྟི (པཱརཱ. ༦༢༣) ཨིདཾ པན ནིསྶགྒིཡཝཏྠུཾ དསྶེཏུཾ ཝུཏྟཾ, ན ཨཉྙེསཾ ཝཱརཎཏྠཱཡ.

༩༠. ཨིདཱནི ཏེལཾ དསྶེཏུཾ ‘‘ཏེལཾ ཏིལཝསེརཎྜམདྷུསཱསཔསམྦྷཝ’’ནྟིཨཱདིམཱཧ. ཨེཏྠ ཏིལཱདཱིཧི སམྦྷཝཾ ནིབྦཏྟཾ ཏེལནྟི སམྦནྡྷོ. ཨེཏྠ (པཱརཱ. ཨཊྛ. ༡.༡༠༠) པན པུརེབྷཏྟཾ ཏིལེ པཊིགྒཧེཏྭཱ ཀཏཏེལཾ པུརེབྷཏྟཾ སཱམིསམྤི ཝཊྚཏི, པཙྪཱབྷཏྟཏོ པཊྛཱཡ སཝཏྠུཀཔྤཊིགྒཧིཏཏྟཱ ཨནཛ྄ཛྷོཧརཎཱིཡཾ. པཙྪཱབྷཏྟཾ པཊིགྒཧེཏྭཱ ཀཏཏེལཾ ཨནཛ྄ཛྷོཧརཎཱིཡཾ, སཱིསམཀྑནཱདཱིསུ ཨུཔནེཏབྦཾ. ཨེརཎྜམདྷུཀསཱསཔཊྛཱིནི པཊིགྒཧེཏྭཱ སཙེ ཏཱནི བྷཛྫིཏྭཱ ཏེལཾ ཀརོཏི, ཏདཧུ པུརེབྷཏྟམྤི སཱམིསཾ ན ཝཊྚཏི, སཱམཾཔཱཀཏཱ ཧོཏི. སཙེ ཨབྷཛྫིཏྭཱ ཀརོཏི, ཏདཧུ པུརེབྷཏྟཾ སཱམིསམྤི ཝཊྚཏི, པཙྪཱབྷཏྟཏོ པཊྛཱཡ ནིརཱམིསམེཝ ཝཊྚཏི, པརིབྷུཉྫིཏབྦཝཏྠཱུནཾ ཡཱཝཛཱིཝིཀཏྟཱ སཝཏྠུཀཔྤཊིགྒཧཎེ དོསོ ནཏྠཱིཏི. ཏེལགྒཧཎཏྠཱཡ ཨེརཎྜཀཊྛིཨཱདཱིནི པཊིགྒཧེཏྭཱ སཏྟཱཧཾ ཨཏིཀྐཱམཡཏོ དུཀྐཊཾ. ཏཐཱ པཱལི༹ཡཾ ཨནཱགཏཱནི ཨདསྶིཏཱནི ཀོསམྦཀཀུསུམྦྷཱདཱིནཾ ཏེལཱནི.

ཨིདཱནི མདྷུཝིཀཏིཾ དསྶེཏུཾ ‘‘ཁུདྡཱབྷམརམདྷུཀརི-མཀྑིཀཱཧི ཀཏ’’ནྟི ཝུཏྟཾ. ཏཏྠ (པཱརཱ. ཨཊྛ. ༢.༦༢༣) ཁུདྡཱཏི ཁུདྡམཀྑིཀཱ. བྷམརཱཏི མཧཱབྷམརམཀྑིཀཱ ¶ . དཎྜཀེསུ མདྷུཀརཱ མདྷུཀརིམཀྑིཀཱ ནཱམ. ཨེཏཱཧི ཏཱིཧི མཀྑིཀཱཧི ཀཏཾ མདྷུ ནཱམཱཏི ཨཏྠོ. ‘‘མདྷུ ནཱམ མཀྑིཀཱམདྷཱུ’’ཏི པཱལི༹ཡཾ (པཱརཱ. ༦༢༣; པཱཙི. ༢༦༠) ཝུཏྟཏྟཱ ཨཉྙེཧི ཏུམྦཊཀཱདཱིཧི ཀཏཾ སཏྟཱཧཀཱལིཀཾ ན ཧོཏཱིཏི ཝེདིཏབྦཾ.

ཨིདཱནི ཕཱཎིཏཾ དསྶེཏུཾ ‘‘རསཱདིཨུཙྪུཝིཀཏི, པཀྐཱཔཀྐཱ ཙ ཕཱཎིཏ’’ནྟི ཨཱཧ. པཀྐཱ ཙ ཨཔཀྐཱ ཙ རསཱདིཨུཙྪུཝིཀཏི ཕཱཎིཏནྟི ཨཏྠོ. མདྷུཀཔུཔྥཕཱཎིཏཾ པུརེབྷཏྟཾ སཱམིསཾ ཝཊྚཏི, པཙྪཱབྷཏྟཏོ པཊྛཱཡ སཏྟཱཧཾ ནིརཱམིསམེཝ ཝཊྚཏི. ཏསྶ སཏྟཱཧཱཏིཀྐམེ དུཀྐཊཾ. ཙིཉྩཕཱཎིཏཉྩ ཨམྦཕཱཎིཏཉྩ ཡཱཝཀཱལིཀམེཝ.

༩༡. ཨིདཱནི ¶ ཨེཏེསུ ཝསཱཏེལསྶ ཨོདིསྶ ཨནུཉྙཱཏཏྟཱ ཏཾ ཝིསུཾ ཨུདྡྷརིཏྭཱ དསྶེཏུཾ ‘‘སཝཏྠུཔཀྐཱ སཱམཾ ཝཱ’’ཏིཨཱདིམཱཧ. སཏྟཝིདྷཉྷི (པཱརཱ. ཨཊྛ. ༢.༦༢༣) ཨོདིསྶཾ ནཱམ བྱཱདྷོདིསྶཾ པུགྒལོདིསྶཾ ཀཱལོདིསྶཾ སམཡོདིསྶཾ དེསོདིསྶཾ ཝསོདིསྶཾ བྷེསཛྫོདིསྶནྟི.

ཏཏྠ ‘‘ཨནུཛཱནཱམི, བྷིཀྑཝེ, ཨམནུསྶིཀཱབཱདྷེ ཨཱམཀམཾསཾ ཨཱམཀལོཧིཏ’’ནྟི (མཧཱཝ. ༢༦༤) ཝུཏྟཾ, ཨིདཾ བྱཱདྷོདིསྶཾ ནཱམ. ཨེཏྠ པན ཀཱལེཔི ཝིཀཱལེཔི ཀཔྤིཡཱཀཔྤིཡམཾསལོཧིཏཾ ཝཊྚཏི. ‘‘ཨནུཛཱནཱམི, བྷིཀྑཝེ, རོམནྠཀསྶ རོམནྠན’’ནྟི (ཙཱུལ༹ཝ. ༢༧༣) ཨེཝཾ ཨནུཉྙཱཏཾ པུགྒལོདིསྶཾ ནཱམ. ‘‘ཨནུཛཱནཱམི, བྷིཀྑཝེ, ཙཏྟཱརི མཧཱཝིཀཊཱནི དཱཏུཾ གཱུཐཾ མུཏྟཾ ཚཱརིཀཾ མཏྟིཀ’’ནྟི (མཧཱཝ. ༢༦༨) ཨེཝཾ སཔྤདཊྛཀཱལེ ཨཔྤཊིགྒཧིཏཀཾ ཨནུཉྙཱཏཾ ཀཱལོདིསྶཾ ནཱམ. གཎབྷོཛནཱདི སམཡོདིསྶཾ ནཱམ. གཎངྒཎཱུཔཱཧནཱནི དེསོདིསྶཾ ནཱམ. ཝསོདིསྶཾ ནཱམ ‘‘ཨནུཛཱནཱམི, བྷིཀྑཝེ, ཝསཱནི བྷེསཛྫཱནཱི’’ཏི (མཧཱཝ. ༢༦༢) ཨེཝཾ ¶ ཝསཱནཱམེན ཨནུཉྙཱཏཾ. ཏཾ ཋཔེཏྭཱ མནུསྶཝསཾ སབྦེསཾ ཀཔྤིཡཱཀཔྤིཡཝསཱནཾ ཏེལཾ ཏཾཏདཏྠིཀཱནཾ ཏེལཔརིབྷོགེན པརིབྷུཉྫིཏུཾ ཝཊྚཏི. བྷེསཛྫོདིསྶཾ ནཱམ ‘‘ཨནུཛཱནཱམི, བྷིཀྑཝེ, ཏཱནི པཉྩ བྷེསཛྫཱནཱི’’ཏི (མཧཱཝ. ༢༦༡) ཨེཝཾ བྷེསཛྫནཱམེན ཝུཏྟཱནི སཔྤིཨཱདཱིནི པཉྩ.

ཡཐཱ པན ཁཱིརདདྷིཨཱདཱིཧི པཀྐཏེལཾ པཙྪཱབྷཏྟཾ ན ཝཊྚཏི, ན ཨེཝམིདཾ. ཨིདཾ པན ཏེལཾ སཝཏྠུཀཔཀྐམྤི ཝཊྚཏི, ཏཾ དསྶེཏུཾ ‘‘སཝཏྠུཔཀྐཱ སཱམཾ ཝཱ’’ཏི ཝུཏྟཾ. ཝསཾ ཨོལོཀེཏྭཱ ‘‘སཝཏྠུཔཀྐཱ’’ཏི ཝུཏྟཾ. སཱམཾ པཀྐཱ ཝཱཏི ཨཏྠོ. ཡཐཱ སཝཏྠུཀཔྤཊིགྒཧིཏཏྟཱ སཱམཾཔཀྐཏྟཱ དདྷིཨཱདཱིཧི པཀྐཏེལཾ ཨཏྟནཱ ཀཏཾ པུརེབྷཏྟམྤི ན ཝཊྚཏི, ན ཨེཝམིདཾ. ཨིདཾ པན ཨཏྟནཱ སཝཏྠུཀཔཀྐམྤི པུརེབྷཏྟམྤི པཙྪཱབྷཏྟམྤི ཝཊྚཏཱིཏི ཨཏྠོ. ཨེཏྠ པན ཀཱརཎཱུཔཙཱརེན ཝསཱཏེལཾ ‘‘ཝསཱ’’ཏི ཝུཏྟཾ.

ཀཱལེཏི པུརེབྷཏྟཀཱལེ པརེཧི ཝཱ ཨཏྟནཱ ཝཱ པཀྐཱཏི ཨཏྠོ. པཙྪཱབྷཏྟཾ པན པཙིཏུཾ ན ཝཊྚཏི ‘‘ཀཱལེ པཊིགྒཧིཏཾ ཀཱལེ ནིཔྤཀྐཾ ཀཱལེ སཾསཊྛ’’ནྟི (མཧཱཝ. ༢༦༢) ཝུཏྟཏྟཱ. ཏསྨཱ ‘‘ཀཱལེ’’ཏི ཝུཏྟཾ. ཡོ པན ཝིཀཱལེ པཊིགྒཧེཏྭཱ ཝིཀཱལེ པཙིཏྭཱ ཝིཀཱལེ པརིསྶཱཝེཏྭཱ པརིབྷུཉྫཏི, སོ ཏཱིཎི དུཀྐཊཱནི ཨཱཔཛྫཏི.

ཨམཱནུསཱཏི ¶ ཨེཏྠ (མཧཱཝ. ༢༦༢) པན ཨཙྪཝསཱདཱིནཾ ཨནུཉྙཱཏཏྟཱ ཋཔེཏྭཱ མནུསྶཝསཾ སབྦེསཾ ཨཀཔྤིཡམཾསཱནཾ ཝསཱ ཨནུཉྙཱཏཱཏི ཝེདིཏབྦཱ. མཾསེསུ ཧི མནུསྶཧཏྠིམཾསཱདཱིནི དས མཾསཱནི པཊིཀྑིཏྟཱནི, ཝསཱ པན ཨེཀཱ མནུསྶཝསཱ ཨེཝ.

ཨནུཔསམྤནྣེན (པཱརཱ. ཨཊྛ. ༢.༦༢༣) ཀཏནིབྦཊྚིཏཝསཱཏེལཾ པུརེབྷཏྟཾ པཊིགྒཧིཏཾ པུརེབྷཏྟཾ སཱམིསམྤི ཝཊྚཏི, པཙྪཱབྷཏྟཏོ པཊྛཱཡ སཏྟཱཧཾ ¶ ནིརཱམིསམེཝ ཝཊྚཏི. ཡཾ པནེཏྠ སུཁུམརཛསདིསཾ མཾསཾ ཝཱ ནྷཱརུ ཝཱ ཨཊྛི ཝཱ ལོཧིཏཾ ཝཱ, ཏཾ ཨབྦོཧཱརིཀཾ. སཙེ སཡཾ ཀརོཏི, པུརེབྷཏྟཾ པཊིགྒཧེཏྭཱ པཙིཏྭཱ པརིསྶཱཝེཏྭཱ སཏྟཱཧཾ ནིརཱམིསམེཝ པརིབྷུཉྫིཏབྦཾ. ནིརཱམིསཔརིབྷོགཉྷི སནྡྷཱཡ ཨིདཾ ཝུཏྟཾ ‘‘ཀཱལེ པཊིགྒཧིཏཾ ཀཱལེ ནིཔྤཀྐཾ ཀཱལེ སཾསཊྛཾ ཏེལཔརིབྷོགེན པརིབྷུཉྫིཏུ’’ནྟི (མཧཱཝ. ༢༦༢). ཨཉྙེསནྟི སཔྤིཨཱདཱིནཾ. ཝཏྠུནྟི ཡཱཝཀཱལིཀབྷཱུཏཾ ཝཏྠུཾ. ཡཱཝཀཱལིཀཝཏྠཱུནཾ ཝཏྠུཾ ན པཙེཏི སམྦནྡྷོ.

༩༢. ཨིདཱནི ཡཱཝཛཱིཝིཀཝིཀཏིཾ དསྶེཏུཾ ‘‘ཧལིདྡཱི’’ཏིཨཱདི ཝུཏྟཾ. ཏཏྠཱཡམནུཏྟཱནཔདཏྠོ (མཧཱཝ. ༢༦༣; པཱཙི. ཨཊྛ. ༢༤༨-༢༤༩) – པཉྩམཱུལཱདིཀཉྩཱཔཱིཏི ཨེཏྠ དྭིཔཉྩམཱུལེན སདྡྷིཾ ཨཉྙཱནིཔི ཏགྒཏིཀཱནི མཱུལབྷེསཛྫཱནི གཧིཏཱནཱིཏི ཉཱཏབྦཾ.

༩༣-༥. བིལ༹ངྒཱདཱིནི ཕལབྷེསཛྫཱནི. ཏཏྠ (མཧཱཝ. ༢༦༣) གོཊྛཕལནྟི མདནཕལནྟི ཝདནྟི. ཀཔྤཱསཱདཱིནཾ པཎྞནྟི སམྦནྡྷོ. ཨིམེ པན ཝུཏྟཔྤཀཱརཱ མཱུལབྷེསཛྫཕལབྷེསཛྫཔཎྞབྷེསཛྫཝསེན ཝུཏྟཱ སབྦེ ཀཔྤིཡཱ. ཨིམེསཾ པུཔྥཕལཔཎྞམཱུལཱ སབྦེཔི ཀཔྤིཡཱ ཡཱཝཛཱིཝིཀཱཡེཝ. ཋཔེཏྭཱ ཨུཙྪུནིཡྻཱསཾ སབྦོ ཙ ནིཡྻཱསོ སརསཉྩ ཨུཙྪུཛཾ ཏཙཾ ཋཔེཏྭཱ སབྦོ ཙ ཏཙོཏི སམྦནྡྷོ.

༩༦. མདྷུནཱ (པཱརཱ. ཨཊྛ. ༢.༦༢༣) ཨམཀྑིཏཾ སུདྡྷསིཏྠཉྩ. མདྷུམཀྑིཏཾ པན སཏྟཱཧཀཱལིཀམེཝ. ཡཉྩ ཀིཉྩཱིཏི ཨོདནཾ མཾསཾ ཨཊྛིཨཱདཱིནཱིཏི ཨཏྠོ.

༩༧. ‘‘ཡཱནི ཝཱ པནཉྙཱནིཔི ཨཏྠི ནེཝ ཁཱདནཱིཡེ ཁཱདནཱིཡཏྠཾ ཕརནྟི, ན བྷོཛནཱིཡེ བྷོཛནཱིཡཏྠཾ ཕརནྟི, ཏཱནི པཊིགྒཧེཏྭཱ ཡཱཝཛཱིཝཾ པརིཧརིཏུཾ, སཏི པཙྩཡེ པརིབྷུཉྫིཏུཾ ¶ , ཨསཏི ¶ པཙྩཡེ པརིབྷུཉྫནྟསྶ ཨཱཔཏྟི དུཀྐཊསྶཱ’’ཏི (མཧཱཝ. ༢༦༣) ཝུཏྟཏྟཱ ‘‘ཨཱཧཱརཏྠམསཱདྷེནྟཾ, སབྦཾ ཏཾ ཡཱཝཛཱིཝིཀ’’ནྟི ཝུཏྟཾ.

༩༨. སབྦསྶཱཏི གིལཱནསྶཱཔི ཨགིལཱནསྶཔཱིཏི ཨཏྠོ. ཀཱལིཀཏྟཡནྟི ཡཱཝཀཱལིཀཾ ཝཛྫེཏྭཱ ཨཝསེསཾ སཏི པཙྩཡེ ཝིཀཱལེ ཀཔྤཏཱིཏི ཨཏྠོ.

༩༩. ཛནཡནྟུབྷོཏི ཛནཡནྟི ཨུབྷོ. ཀིཾ ཝུཏྟཾ ཧོཏི? ཡཱཝཀཱལིཀཡཱམཀཱལིཀསངྑཱཏཱ ཨུབྷོ ཀཱལིཀཱ ཨཏྟནོ ཀཱལམཏིཀྐམིཏྭཱ པརིབྷུཏྟཱ པཱཙིཏྟིཾ ཛནཡནྟཱིཏི ཨཏྠོ. ཀིཉྩ བྷིཡྻོ (མཧཱཝ. ༢༧༤; མཧཱཝ. ཨཊྛ. ༢༧༤; ཀངྑཱ. ཨཊྛ. སནྣིདྷིཀཱརཀསིཀྑཱཔདཝཎྞནཱ) – ཨུབྷོཔི པནེཏེ ཨཀཔྤིཡཀུཊིཡཾ ཝུཏྟཱ ཨནྟོཝུཏྠཾ དུཀྐཊཉྩ, པུནདིཝསེ པརིབྷུཉྫཏོ སནྣིདྷིཾ པཱཙིཏྟིཡཉྩ ཛནཡནྟཱིཏི ཨཏྠོ.

༡༠༠. ཨནཱརུལ༹ྷེཏི པཱལི༹ཡཾ ཨནཱགཏེ མནུསྶསཔྤིཨཱདིམྷཱིཏི ཨཏྠོ.

༡༠༡. ནིསྶཊྛལདྡྷནྟི (པཱརཱ. ༦༢༤) ཝིནཡཀམྨཾ ཀཏྭཱ པུན ལདྡྷནྟི ཨཏྠོ. ཝིཀཔྤེནྟསྶ སཏྟཱཧེཏི སཏྟཱཧབྦྷནྟརེ སཱམཎེརསྶ ‘‘ཨིདཾ སཔྤིཾ ཏེལ’’ནྟིཨཱདིནཱ ནཡེན ནཱམཾ གཧེཏྭཱ ‘‘ཏུཡ྄ཧཾ ཝིཀཔྤེམཱི’’ཏི ཝཱ ‘‘ཨིཏྠནྣཱམསྶ ཝིཀཔྤེམཱི’’ཏི ཝཱ སམྨུཁཱཔི ཝཱ པརམྨུཁཱཔི ཝཱ ཝིཀཔྤེནྟསྶ ཨནཱཔཏྟཱིཏི སམྦནྡྷོ. པཱལི༹ཡཾ པན ‘‘ཨནཱཔཏྟི ཨནྟོསཏྟཱཧེ ཨདྷིཊྛེཏི, ཝིསྶཛྫེཏི, ནསྶཏི, ཝིནསྶཏི, ཌཡ྄ཧཏི, ཨཙྪིནྡིཏྭཱ གཎྷནྟི, ཝིསྶཱསཾ གཎྷནྟཱི’’ཏི (པཱརཱ. ༦༢༥) ཨེཏྟཀམེཝ ཝུཏྟཾ, ‘‘ཝིཀཔྤེམཱི’’ཏི ཨིདཾ པན ནཏྠི. ཀིཉྩཱཔི ནཏྠི, ཨཐ ཁོ ‘‘ཨནདྷིཊྛིཏེ ཨདྷིཊྛིཏསཉྙཱི ནིསྶགྒིཡཾ ¶ པཱཙིཏྟིཡཾ, ཨཝིཀཔྤིཏེ ཝིཀཔྤིཏསཉྙཱི ནིསྶགྒིཡཾ པཱཙིཏྟིཡ’’ནྟི (པཱརཱ. ༦༢༤) ཨཱཔཏྟིཝཱརེ ཨཱགཏཏྟཱ ཐེརེན དསྶིཏཾ. ཏཾ དསྶེནྟེནཱཔི སཙེ ཨུཔསམྤནྣསྶ ཝིཀཔྤེཏི, ཨཏྟནོ ཨེཝ སནྟཀཾ ཧོཏི, པཊིགྒཧཎམྤི ན ཝིཛཧཏི, ཏསྨཱ ཨུཔསམྤནྣཝསེན ཨདསྶེཏྭཱ ཨནུཔསམྤནྣཝསེན དསྶིཏཾ. ཏསྶ ཧི ཝིཀཔྤིཏེ པཊིགྒཧཎམྤི ཝིཛཧཏི, ཨཱཔཏྟིཔི ན ཧོཏཱིཏི. ཨདྷིཊྛཏོཏི ཨབྦྷཉྫནཱདཱིནི ཨདྷིཊྛཧནྟསྶ ཨནཱཔཏྟཱིཏི ཨཏྠོ. སཙེ པན སཏྟཱཧབྦྷནྟརེ ནིརཔེཀྑོ ཧུཏྭཱ ཨནུཔསམྤནྣསྶ པརིཙྩཛཏི, པརིཙྩཏྟཏྟཱ ཨནཱཔཏྟི, ཨིཏརསྶ ཙ ཨཔྤཊིགྒཧིཏཏྟཱ ཨུབྷིནྣམྤི ཀཱཡིཀཔརིབྷོགོ ཝཊྚཏི. ཨནིསྶགྒིཡཏྟཱ པན བཱཧིརཔརིབྷོགེན ཝཊྚཏི. ‘‘ཏཱནི པཊིགྒཧེཏྭཱ ¶ སཏྟཱཧཔརམཾ སནྣིདྷིཀཱརཀཾ པརིབྷུཉྫིཏབྦཱནཱི’’ཏི (པཱརཱ. ༦༢༣) ཨེཝཾ ནིཡམེཏྭཱ ཨནུཉྙཱཏཏྟཱ ཝུཏྟཾ ‘‘ཨཉྙསྶ དདཏོཔི ཙ ཨནཱཔཏྟཱི’’ཏི.

༡༠༢. སབྦྷཱཝནྟི ཨཏྟནོ སབྷཱཝཾ. ཡསྨཱ གཱཧཱཔཡནྟི, ཏསྨཱ ཨེཝམུདཱིརིཏནྟི ཝུཏྟནྟི ཨཏྠོ. ཨིདཱནི ཝཀྑམཱནཾ སནྡྷཱཡ ‘‘ཨེཝ’’ནྟི ཝུཏྟཾ.

༡༠༣-༥. སཏྟཱཧཾ ཡཱཝཛཱིཝིཀནྟི (མཧཱཝ. ༣༠༥; མཧཱཝ. ཨཊྛ. ཀངྑཱ. ཨཊྛ. སནྣིདྷིཀཱརཀསིཀྑཱཔདཝཎྞནཱ) སཏྟཱཧཀཱལིཀཉྩ ཡཱཝཛཱིཝིཀཉྩཱཏི ཨཏྠོ. ཀིཾ ཝུཏྟཾ ཧོཏི? སཏྟཱཧཀཱལིཀཡཱཝཛཱིཝིཀདྭཡཾ སེསཀཱལིཀསམྨིསྶཾ སམྦྷིནྣརསཾ ཀཏྭཱ པརིབྷུཉྫཏོ སནྣིདྷིཔཱཙིཏྟི ཧོཏཱིཏི ཨུདཱིརིཏནྟི. ཏདཧུ པཊིགྒཧིཏཾ ཏདཧེཝཱཏི ཨཏྠོ. སེསནྟི སཏྟཱཧཀཱལིཀཡཱཝཛཱིཝིཀདྭཡཾ. ཨིཏརནྟི ཡཱཝཛཱིཝིཀཾ. པུརེ པཊིགྒཧིཏཾ ཝཱ ཧོཏུ, ཏདཧུ ཝཱ པཊིགྒཧིཏཾ, ཡཱཝཛཱིཝིཀཾ སཏྟཱཧཀཱལིཀེན སཏྟཱཧཾ ཀཔྤཏཱིཏི ཝེདིཏབྦཾ. ‘‘ཡཱཝཀཱལིཀེན, བྷིཀྑཝེ, ཡཱམཀཱལིཀཾ, སཏྟཱཧཀཱལིཀཾ, ཡཱཝཛཱིཝིཀཾ ཏདཧུ པཊིགྒཧིཏཾ ཀཱལེ ཀཔྤཏི, ནོ ཝིཀཱལེ. ཡཱམཀཱལིཀེན, བྷིཀྑཝེ, སཏྟཱཧཀཱལིཀཾ, ཡཱཝཛཱིཝིཀཾ ¶ ཏདཧུ པཊིགྒཧིཏཾ ཡཱམེ ཀཔྤཏི, ཡཱམཱཏིཀྐནྟེ ན ཀཔྤཏི. སཏྟཱཧཀཱལིཀེན, བྷིཀྑཝེ, ཡཱཝཛཱིཝིཀཾ པཊིགྒཧིཏཾ སཏྟཱཧཾ ཀཔྤཏི, སཏྟཱཧཱཏིཀྐནྟེ ན ཀཔྤཏཱི’’ཏི ཧི བྷེསཛྫཀྑནྡྷཀེ (མཧཱཝ. ༣༠༥) ཝུཏྟཾ. ཨེཏྠ པན ‘‘ཏདཧུ པཊིགྒཧིཏ’’ནྟི ཝིསེསཝཙནསྶ ནཏྠིཏཱཡ པུརེ པཊིགྒཧིཏམྤི ཝཊྚཏཱིཏི སིདྡྷནྟི. ཀཱལིཀཝིནིཙྪཡོ.

༡༠༦. ཨིདཱནི ‘‘པཊིགྒཱཧོ’’ཏི པདཾ ཝིཏྠཱརེཏུཾ ‘‘དཱཏུཀཱམཱབྷིཧཱརོ ཙཱ’’ཏིཨཱདི ཨཱརདྡྷཾ. ཏཏྠ དཱཏུཀཱམསྶ ཨབྷིཧཱརོ དཱཏུཀཱམཱབྷིཧཱརོ. ཨེཏེན ཨཉྙསྶ པཏྟེ པཀྑིཔིཏུཾ ཨཱལུལེནྟསྶ ཕུསིཏཱནི ཨུཊྛཧིཏྭཱ ཨཉྙསྶ པཏྟེ སཙེ པཏནྟི, པཊིགྒཧཎཾ ན རུཧཏཱིཏི དཱིཔིཏཾ ¶ ཧོཏི. ཨེརཎཀྑམནྟི ཐཱམམཛ྄ཛྷིམེན པུརིསེན ཨུཀྑིཔནཀྑམཾ, ཏཏོ མཧནྟེ པཊིགྒཧཎཾ ན རུཧཏི. ཏིདྷཱ དེནྟེཏི ཀཱཡཀཱཡཔྤཊིབདྡྷནིསྶགྒིཡཱནཾ ཝསེན ཏིདྷཱ དེནྟེ. ཏསྶ བྷིཀྑུནོ ཀཱཡཀཱཡཔྤཊིབདྡྷེཧི དྭིདྷཱ གཱཧོཏི ཨཏྠོ. པཉྩངྒོ ཨེཝཾ པཉྩངྒེཝཾ. དཱཏུཀཱམཱབྷིཧཱརོ ཨེཀཾ, ཧཏྠཔཱསོ ཨེཀཾ, ཨེརཎཀྑམཏཱ ཨེཀཾ, དེཝམནུསྶཏིརཙྪཱནགཏེསུ ཨེཀེན ཏིདྷཱ དཱནམེཀཾ, དྭིདྷཱ གཱཧོ ཨེཀནྟི ཨེཝཾ པཉྩངྒཱནི ཧོནྟི.

༡༠༧. ཨིདཱནི ཡེན ཀཱཡཔྤཊིབདྡྷེན པཊིགྒཧཎཾ ན རུཧཏི, ཏཾ དསྶེཏུཾ ‘‘ཨསཾཧཱརིཡེ’’ཏིཨཱདིམཱཧ. ཁཱཎུཀེ (པཱཙི. ཨཊྛ. ༢༦༥) བནྡྷིཏྭཱ ¶ ཋཔིཏམཉྩཱདིམྷི ཝཱ ཕལཀེ ཝཱ པཱསཱཎེ ཝཱ ཨསཾཧཱརིཡེ ན རུཧཏཱིཏི ཨཏྠོ. ཏཏྠཛཱཏེ པདུམིནིཔཎྞེ ཝཱ ཀིཾསུཀཔཎྞཱདིམྷི ཝཱ ན ཝཊྚཏི, སུཁུམེ ཙིཉྩཨཱདཱིནཾ པཎྞེ ཝཱ ན རུཧཏི, ཡཉྩ མཛ྄ཛྷིམཔུརིསོ སནྡྷཱརེཏུཾ ན སཀྐོཏི, ཏསྨིཾ ཨསཡ྄ཧབྷཱརེ ཙ པཊིགྒཧོ ན རུཧཏཱིཏི ཨཏྠོ.

༡༠༨. ཨིདཱནི པཊིགྒཧཎཝིཛཧནཾ དསྶེཏུཾ ‘‘སིཀྑཱམརཎལིངྒེཧཱི’’ཏིཨཱདི ཨཱརདྡྷཾ. ཏཏྠཱཡཾ པིཎྜཏྠོ – སིཀྑཱཔཙྩཀྑཱནེན ཙ མརཎེན ཙ ལིངྒཔརིཝཏྟནེན ཙ ‘‘ན ཏཾ དཱནི པརིབྷུཉྫིསྶཱམཱི’’ཏི ཝཱ ‘‘ན པུན པཊིགྒཧེཏྭཱ པརིབྷུཉྫིསྶཱམཱི’’ཏི ཝཱ ཨེཝཾ ཨནཔེཀྑཝིསྶཛྫནེན ཙ ཙོརཱདཱིཧི ཝཱ ཨཙྪེདཱ ཙ ཨནུཔསམྤནྣསྶ དཱནཱ ཙ གཱཧོ པཊིགྒཱཧོ ཨུཔསམྨཏི ཝིཛཧཏཱིཏི. བྷིཀྑུནིཡཱ པན སིཀྑཱཔཙྩཀྑཱནསྶ ཨབྷཱཝཱ ཝིབྦྷམནེན ཙ ཝིཛཧཏཱིཏི གཧེཏབྦཾ.

. ཨིདཱནི པཊིགྒཧེཏྭཱ པརིབྷུཉྫིཏབྦཾ དསྶེཏུཾ ‘‘ཨཔྤཊིགྒཧིཏཾ སབྦ’’ནྟིཨཱདི ཝུཏྟཾ. ཏསྶཏྠོ (ཀངྑཱ. ཨཊྛ. དནྟཔོནསིཀྑཱཔད) – ཙཏུཀཱལིཀཔརིཡཱཔནྣཾ ཨནྟམསོ རཛརེཎུམྤི ཨཔྤཊིགྒཧེཏྭཱ སབྦཾ པརིབྷུཉྫཏོ པཱཙིཏྟི. ཨིདཱནི ཨཔྤཊིགྒཧེཏྭཱ པརིབྷུཉྫིཏབྦཾ དསྶེཏུཾ ‘‘སུདྡྷཉྩ ནཱཏིབཧལ’’ནྟིཨཱདི ཝུཏྟཾ. ཏཏྠ སུདྡྷཉྩཱཏི ཨཉྙེསཾ རསེན ཨསམྨིསྶཾ. ཧིམོདཀསམུདྡོདཀཱདཱིསུ པཊིགྒཧཎཀིཙྩཾ ནཏྠི. ལོཎཉྩ ཨསྶུ ཙ ལོཎསྶུ. ཨེཏྠ ལོཎཾ ནཱམ སརཱིརེ ཨུཊྛིཏཾ. ཨེཏཱནི པན སབྦཱནི ཨཝིཙྪིནྣཱནེཝ ཀཔྤནྟི, ནེཏརཱནི.

༡༡༡. ཨིདཱནི ཨནངྒལགྒཱནིཔི དསྶེཏུཾ ‘‘གཱུཐམཏྟིཀམུཏྟཱནཱི’’ཏིཨཱདིམཱཧ. ཏཐཱཝིདྷེཏི ཏཐཱཝིདྷེ ཀཱལེ, སཔྤདཊྛཀཱལེཏི ཨཏྠོ. ཨཉྙེསཾ པན ཨཔྤཊིགྒཧིཏཾ ཨནངྒལགྒཾ ན ཝཊྚཏི. ཀསྨཱ ¶ ? ‘‘ཨནུཛཱནཱམི, བྷིཀྑཝེ, ཡཾ ཀརོནྟོ ¶ པཊིགྒཎྷཱཏི, སྭེཝ པཊིགྒཧོ ཀཏོ, ན པུན པཊིགྒཧེཏབྦོ’’ཏི (མཧཱཝ. ༢༦༨) ཝུཏྟཏྟཱ.

༡༡༢. དུརཱུཔཙིཎྞེཏི དུཔྤརཱམཊྛེ ཕལིཀརུཀྑཝལླིཨཱདིཾ ཙཱལེནྟསྶ ཝཱ ཨཱམིསབྷརིཏབྷཱཛནཾ ཨཔྤཊིགྒཧིཏཾ པརཱམསནྟསྶ ཝཱ དུརཱུཔཙིཎྞདུཀྐཊཾ ཧོཏཱིཏི ཨཏྠོ. རཛོཀིཎྞེཏི བྷིཀྑཱཡ ཙརནྟསྶ པཏྟེ པཏིཏརཛཾ ཨཔྤཊིགྒཧེཏྭཱ པུན བྷིཀྑཾ གཎྷཏོ ཝིནཡདུཀྐཊཾ ཧོཏཱིཏི ཨཏྠོ. ཨཐུགྒཧཔྤཊིགྒཧེཏི ཨཐ ཨུགྒཧཔྤཊིགྒཧེ, ཨཏྟནཱ ཨེཝ ཨུགྒཧེཏྭཱ གཧིཏེཏི ཨཏྠོ. ཨཀཔྤིཡཀུཊིཡཾ ཨནྟོཝུཏྠེ ཙ ཡཏྠ ཀཏྠཙི བྷིཀྑུནཱ སཡཾཔཀྐེ ཙ ཨཏྟནཱ ཝཱ པརེན ཝཱ ཨཀཔྤིཡཀུཊིཡཾ ཨནྟོཔཀྐེ ཙཱཏི སབྦཏྠ དུཀྐཊནྟི ཨདྷིཔྤཱཡོ. པཊིགྒཱཧཝིནིཙྪཡོ.

༡༡༣. ཨིདཱནི མཾསེསུ པཊིཔཛྫིཏབྦཱཀཱརཾ དསྶེཏུཾ ‘‘མཾསེསུ ཙ ཨཀཔྤིཡ’’ནྟི ཨུདྡྷཊཾ. ཨཀཔྤིཡམཾསམྷི དསྶིཏེ ཀཔྤིཡམཾསཾ དསྶིཏམེཝ ཧོཏི པཱརིསེསནཡེན. ཨུརགསྶ ཙཱཏི ཨེཏྠ སབྦོཔི ཨུརགོ ན ཀཔྤཏི.

༡༡༤. ཨེཏྟཱཝཏཱ ཛཱཏིཝསེན དསཝིདྷམྤི ཨཀཔྤིཡམཾསཾ དསྶེཏྭཱ ཨིདཱནི ཀཔྤིཡམཾསེསུཔི ཨཀཔྤིཡཝིདྷིཾ དསྶེཏུཾ ‘‘ཨུདྡིསྶཀཏམཾསཉྩ, ཡཉྩ ཨཔྤཊིཝེཀྑིཏ’’ནྟི ཝུཏྟཾ. ཏཏྠ པཉྩསུ སཧདྷམྨིཀེསུ ཡསྶ ཀསྶཙི ཡཾ ཀིཉྩི ཨུདྡིསྶ ཀཏཾ ཨུདྡིསྶཀཏཾ ནཱམ, ཏཾ པན ཛཱནིཏྭཱ པརིབྷུཉྫིཏུཾ སབྦེསམྤི ན ཝཊྚཏི, ཨཛཱནནྟཱནཾ ཨནཱཔཏྟི. མཙྪེསུཔི ཨེསེཝ ནཡོ. ཨཔྤཊིཝེཀྑིཏནྟི ¶ ཨནུཔཔརིཀྑིཏཾ, ཨནཱཔུཙྪིཏནྟི ཨཏྠོ. ‘‘ན བྷིཀྑཝེ ཨཔྤཊིཝེཀྑིཏྭཱ མཾསཾ པརིབྷུཉྫིཏབྦཾ, ཡོ པརིབྷུཉྫེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༢༨༡) ¶ ཝུཏྟཾ. མཙྪེསུ པན ཨཱཔུཙྪནཀིཙྩཾ ནཏྠི ཨཀཔྤིཡམཙྪཱནཾ ནཏྠིཏཱཡཱཏི ཝདནྟི. ཨིདཱནི ཨེཏེསུ ཨཱཔཏྟིབྷེདཾ དསྶེཏུཾ ‘‘ཐུལླཙྩཡ’’ནྟིཨཱདིམཱཧ. ཏཾ སབྦཾ (ཀངྑཱ. ཨཊྛ. སནྣིདྷིཀཱརཀསིཀྑཱཔདཝཎྞནཱ) ཨུཏྟཱནམེཝ.

༡༡༥. ཨིདཱནི ན ཀེཝལཾ ཨིམེསཾ མནུསྶཱདཱིནཾ མཾསམེཝ ཨཀཔྤིཡཾ, ཨཊྛིཨཱདཱིནིཔི ཨཀཔྤིཡཱནཱིཏི དསྶེཏུཾ ‘‘ཨཊྛཱིཔཱི’’ཏིཨཱདི ཝུཏྟཾ. ཏཏྠ (མཧཱཝ. ཨཊྛ ༢༨༡) ལོམམྤེསནྟི ལོམམྤི ཨེསཾ ཨཀཔྤིཡམཾསཝཏྠཱུནནྟི ཨཏྠོ. སཙིཏྟཀཾ ཝཱཏི ཨེཏེསུ པན ཨུདྡིསྶཀཏམེཝ སཙིཏྟཀཾ, སེསཱ ཨཙིཏྟཀཱཏི. ཨཀཔྤིཡམཾསཝིནིཙྪཡོ.

ཨཀཔྤིཡམཾསནིདྡེསཝཎྞནཱ ནིཊྛིཏཱ.

༡༡༦-༧. ཨིདཱནི ཨཙྩོལཱ༹རིཀཱནཾ ཝསེན དསྶེཏུཾ ‘‘ཨརཱུཔིཡ’’ནྟིཨཱདི ཨཱརདྡྷཾ. ཨཉྙཐཱཔི ཡུཏྟི པརིཡེསིཏབྦཱ. ཏཏྠཱཡཾ སངྑེཔཏྠོ (པཱརཱ. ༥༩༡; པཱརཱ. ཨཊྛ. ༢.༥༨༩; ཀངྑཱ. ཨཊྛ. ཛཱཏརུཔསིཀྑཱཔདཝཎྞནཱ) – ཡོ རཱུཔིཡེན ཨརཱུཔིཡཉྩ པརིཝཏྟེཡྻ, ཡོ ཙ ཨིཏརེན ཙ ཨརཱུཔིཡེན རཱུཔིཡཾ པརིཝཏྟེཡྻ, ཏསྶ ནིསྶགྒིཡཾ ཧོཏཱིཏི.

ཨིདཱནི རཱུཔིཡཉྩ ཨརཱུཔིཡཉྩ དསྶེཏུཾ ‘‘ཨིདྷ རཱུཔིཡ’’ནྟིཨཱདི ཨཱརདྡྷཾ. ཨེཏྠ (པཱརཱ. ༥༨༩; ཀངྑཱ. ཨཊྛ. ཛཱཏརུཔསིཀྑཱཔདཝཎྞནཱ) སཛ྄ཛྷུ སིངྒཱིཏི སཛ྄ཛྷཱུཏི རཛཏཾ. སིངྒཱིཏི སུཝཎྞཾ. ཏམྦལོཧཱདཱིཧི ཝཱ དཱརཱུཧི ཝཱ པཎྞེཧི ཝཱ ལཱཁཱཡ ཝཱ རཱུཔཾ སམུཊྛཱཔེཏྭཱ ཝཱ ཨསམུཊྛཱཔེཏྭཱ ཝཱ ཀཏཾ ཙམྨབཱིཛམཡམྤིཡཾ ཡཾ ¶ དེསེ ཝོཧཱརཾ གཙྪཏི, ཨིདཾ ཝོཧཱརཱུཔགམཱསཀཾ ནཱམ. ཨིདམིདྷ རཱུཔིཡནྟི ཨདྷིཔྤེཏཾ. ཝཏྠཱདི ཙ མུཏྟཱདི ཙ ཝཏྠམུཏྟཱདི. ཨིཏརནྟི ཨརཱུཔིཡཾ ཀཔྤིཡཝཏྠུཉྩ དུཀྐཊཝཏྠུཉྩ. ཀིཾ ཝུཏྟཾ ཧོཏི? ཝཏྠཾ སུཏྟཾ ཕཱལོ པཊཀོ ཀཔྤཱསོ ཨནེཀཔྤཀཱརཾ ཨཔརཎྞཾ སཔྤི ནཝནཱིཏཾ ཏེལཾ མདྷུ ཕཱཎིཏཱདིབྷེསཛྫཉྩཱཏི ཨིདཾ ཀཔྤིཡཝཏྠུ ནཱམ. མུཏྟཱ མཎི ཝེལུ༹རིཡོ སངྑོསིལཱ པཝཱལ༹ཾ ལོཧིཏངྒོ མསཱརགལླཾ སཏྟ དྷཉྙཱནི དཱསཱི དཱསོ ཁེཏྟཾ ཝཏྠུ པུཔྥཱརཱམཕལཱརཱམཱདཡོཏི ཨིདཾ དུཀྐཊཝཏྠུ ནཱམ, ཏདུབྷཡཾ ཨརཱུཔིཡཾ ནཱམཱཏི ཝུཏྟཾ ཧོཏི.

༡༡༨. ཨེཏྟཱཝཏཱ རཱུཔིཡསཾཝོཧཱརཾ དསྶེཏྭཱ ཨིདཱནི ཀཡཝིཀྐཡཾ དསྶེཏུཾ ‘‘ཨིམཾ གཧེཏྭཱ’’ཏིཨཱདིམཱཧ ¶ . ཏཏྠ ཨིམནྟི ཏཎྜུལཱདིཀཾ ཀཔྤིཡབྷཎྜཾ གཧེཏྭཱ ཝཱ ཨོདནཱདིཾ བྷུཏྭཱ ཝཱ ‘‘ཨིམཾ ཝཏྠཱདིཀཾ ཀཔྤིཡབྷཎྜཾ དེཧི, ཨིམཾ རཛནཔཙནཱདིཀཾ ཀར, རཛནཀཊྛཱདིམཱ ནཡ, ཨིམཾ ཝཱ ཏཝ དེམི, ཏྭཾ པན ཨིམཉྩ ཨིམཉྩ ཨཱཧར, ཀར, དེཧཱི’’ཏི ཨེཝཾ ཀཡཝིཀྐཡེ སམཱཔནྣེ ནིསྶགྒཱིཏི སམྦནྡྷོ.

༡༡༩. ཨིདཱནི པརིཎཱམཝསེན ཨཱཔཏྟིབྷེདཾ དསྶེཏུཾ ‘‘ཨཏྟནོ’’ཏིཨཱདི ཨཱརདྡྷཾ. ཏཏྲཱཡཾ པིཎྜཏྠོ (པཱརཱ. ༦༥༩; པཱརཱ. ཨཊྛ. ༢.༦༥༨; ཀངྑཱ. ཨཊྛ. པརིཎཏསིཀྑཱཔདཝཎྞནཱ) – སངྒྷསྶ ཝཱ ཨཉྙསྶ ཝཱ ནཏཾ པརིཎཏཾ ལཱབྷཾ ལབྷིཏབྦཾ ཙཱིཝརཱདིཔཙྩཡཾ ཨཏྟནོ ཝཱ ཨཉྙསྶ ཝཱ པརིཎཱམེཡྻ, ནིསྶགྒིཡཨཱདཱིནི ཧོནྟཱིཏི. ཀཐཾ? ཡོ པན མཱཏུསནྟཀམྤི སངྒྷསྶ པརིཎཏཾ ཨཏྟནོ པརིཎཱམེཏི, ནིསྶགྒིཡཾ. ཨཉྙསྶ པུགྒལསྶ པརིཎཱམེཏི, སུདྡྷིཀཔཱཙིཏྟིཡཾ. ཨཉྙསྶ སངྒྷསྶ ཝཱ ཙེཏིཡསྶ ཝཱ པརིཎཱམེཏི, དུཀྐཊཾ. ཡོ པན ཨཉྙཔུགྒལསྶ ཝཱ ཙེཏིཡསྶ ཝཱ པརིཎཏཾ ཨཏྟནོ ཝཱ ཨཉྙཔུགྒལསྶ ཝཱ སངྒྷསྶ ཝཱ ཨཉྙཙེཏིཡསྶ ཝཱ པརིཎཱམེཏི, ཏསྶཱཔི དུཀྐཊམེཝཱཏི.

༡༢༠. ཡོ ¶ པན ནིསྶགྒིཾ ནིསྶཛྫིཏབྦཾ ཨནིསྶཛྫིཏྭཱ ཝིནཡཀམྨཾ ཨཀཏྭཱ པརིབྷུཉྫེཡྻ, ཏསྶ དུཀྐཊཾ. ཡོ ཝཱ པརེན ཝིནཡཀམྨཏྠཱཡ ནིསྶཊྛཾ སཀསཉྙཱཡ ན དདེཡྻ, ཏསྶཱཔི དུཀྐཊཾ. ཨཉྙཐེཏརནྟི ཨེཏྠ ཨཉྙཐཱཏི ཐེཡྻསཉྙཱཡ སཙེ ན དདེཡྻ, ཨིཏརཾ ཏསྶ ཨགྒྷཝསེན པཱརཱཛིཀཉྩ ཐུལླཙྩཡཉྩ དུཀྐཊཉྩ ཧོཏཱིཏི ཨཏྠོ. ནིསྶགྒིཡཝིནིཙྪཡོ.

ནིསྶགྒིཡནིདྡེསཝཎྞནཱ ནིཊྛིཏཱ.

༡༢༡. ཨིདཱནི པཱཙིཏྟིཡཱནི དསྶེཏུཾ ‘‘པཱཙིཏྟཱི’’ཏི མཱཏིཀཱཔདཾ ཨུདྡྷརིཏྭཱ ‘‘མུསཱཝཱདོམསཱཝཱདེ, པེསུཉྙཧརཎེ’’ཏིཨཱདི ཝུཏྟཾ. ཏཏྠ མུསཱཝཱདེ ཙ ཨོམསཝཱདེ ཙ པེསུཉྙཧརཎེ ཙ པཱཙིཏྟི ཝུཏྟཱཏི སམྦནྡྷོ. ཨེཝཾ སེསེསུཔི. ཨེཏྠ པན ‘‘ཨདིཊྛཾ, ཨསུཏཾ, ཨམུཏཾ ¶ , ཨཝིཉྙཱཏཾ, དིཊྛཾ, སུཏཾ, མུཏཾ, ཝིཉྙཱཏ’’ནྟི (པཱཙི. ༣; པཱཙི. ཨཊྛ. ༣) པུབྦེཔི ‘‘མུསཱ བྷཎིསྶཱམཱི’’ཏི ཙེཏེཏྭཱ ཝཙནཀྑཎེཝ ‘‘མུསཱ བྷཎཱམཱི’’ཏི ཛཱནིཏྭཱ ཛཱནནྟསྶེཝ མུསཱབྷཎནེ པཱཙིཏྟི ནཱམ ཨཱཔཏྟི ཧོཏཱིཏི ཨཏྠོ. ཡསྶ བྷཎཏི, སོ ཏཾ ན སུཎཱཏི, ཨཱཔཏྟི ན ཧོཏི (ཀངྑཱ. ཨཊྛ. མུསཱཝཱདསིཀྑཱཔདཝཎྞནཱ).

‘‘ཨོམསཝཱདོ ནཱམ དསཧི ཨཱཀཱརེཧི ཨོམསཏི ཛཱཏིཡཱཔི ནཱམེནཔི གོཏྟེནཔི ཀམྨེནཔི སིཔྤེནཔི ཨཱབཱདྷེནཔི ལིངྒེནཔི ཀིལེསེནཔི ཨཱཔཏྟིཡཱཔི ཨཀྐོསེནཔཱི’’ཏི (པཱཙི. ༡༥) ཨེཝཾ ཝུཏྟེཧི དསཧི ཨཱཀཱརེཧི ཨུཔསམྤནྣཾ ཡོ ཁུཾསེཏི ཝམྦྷེཏི, ཨཡཾ ཨོམསཏི ནཱམ, ཏསྶ པཱཙིཏྟཱིཏི ¶ ཨཏྠོ. པརམྨུཁཱ བྷཎནྟསྶ དུཀྐཊཾ, ཏཐཱ པཱལི༹ཡཾ ཨནཱགཏེཧི ‘‘ཙོརོ’’ཏི ཝཱ ‘‘གཎྛིབྷེདཀོ’’ཏི ཝཱ ཨཱདཱིཧི བྷཎནྟསྶ. ‘‘སནྟི ཨིདྷེཀཙྩེ ཁཏྟིཡཱ བྲཱཧྨཎཱ ཙཎྜཱལཱ’’ཏིཨཱདིནཱ པརིཡཱཡེན བྷཎནྟསྶ ཙ ཨནུཔསམྤནྣཾ བྷཎནྟསྶ ཙ སབྦཏྠཔི དུཀྐཊམེཝ.

པིཡཀམྱཏཱཡ ཝཱ བྷེདཱདྷིཔྤཱཡེན ཝཱ ཨུཔསམྤནྣཾ ཛཱཏིཨཱདཱིཧི ཨོམསནྟསྶ ཨུཔསམྤནྣསྶ ཝཙནཾ སུཏྭཱ ཏསྶ ཨུཔསཾཧརཎཾ པེསུཉྙཧརཎཾ ནཱམ. ཨེཏྠཱཔི པརིཡཱཡཝཙནེན ཙ ཨནུཔསམྤནྣསྶ ཨུཔསཾཧརཎེན ཙ དུཀྐཊམེཝ.

པདསོདྷམྨོཏི ཨེཏྠ ‘‘དྷམྨོ ནཱམ བུདྡྷབྷཱསིཏོ སཱཝཀབྷཱསིཏོ ཨིསིབྷཱསིཏོ དེཝཏཱབྷཱསིཏོ ཨཏྠཱུཔསཾཧིཏོ དྷམྨཱུཔསཾཧིཏོ’’ཏི (པཱཙི. ༤༦) ཨེཝཾ ཝུཏྟཾ སངྒཱིཏིཏྟཡམཱརུལ༹ྷཾ ཏིཔིཊཀདྷམྨཾ པདཨནུཔདཨནྭཀྑརཨནུབྱཉྫནཝསེན བྷིཀྑུཉྩ བྷིཀྑུནིཉྩ ཋཔེཏྭཱ ཨནུཔསམྤནྣཾ ཨེཀཏོ ཝཱཙེནྟསྶ པཱཙིཏྟི ཧོཏཱིཏི ཨཏྠོ.

སཱགཱརེཏི ཡཾ པན སབྦནྟིམེན པརིཡཱཡེན དིཡཌྜྷཧཏྠུབྦེདྷེན པཱཀཱརཱདིནཱ པརིཀྑིཏྟཏྟཱ སབྦཔརིཙྪིནྣཉྩ ཡེན ཀེནཙི ཝིཏཱནཱདིནཱ ཨནྟམསོ ཝཏྠེནཔི ཚནྣཏྟཱ སབྦཙྪནྣཉྩ སེནཱསནཾ, ཏཐཱརཱུཔེ སེནཱསནེ ཨེཀཱུཔཙཱརཊྛཱནེ ཨནུཔསམྤནྣེན སཧ ཝསནྟསྶ ཙཏུཏྠདིཝསཏོ པཊྛཱཡ ནིཔཛྫནགཎནཱཡ ཙ ཨནུཔསམྤནྣགཎནཱཡ ཙ དེཝསིཀཾ པཱཙིཏྟི ཧོཏཱིཏི ཨཏྠོ.

ཨུཛ྄ཛྷཱཔནཀཁིཡྻནེཏི ཨེཏྠ ཡོ ཨུཔསམྤནྣཾ སངྒྷེན སམྨཏཾ སེནཱསནཔཉྙཱཔཀཾ ཝཱ བྷཏྟུདྡེསཀཾ ¶ ཝཱ ཡཱགུབྷཱཛཀཾ ཝཱ ཕལབྷཱཛཀཾ ཝཱ ཁཛྫབྷཱཛཀཾ ཝཱ ཨཔྤམཏྟཀཝིསྶཛྫཀཾ ཝཱ མངྐུཀཏྟུཀཱམོ ཚནྡེན ‘‘ཨིཏྠནྣཱམོ སེནཱསནཾ པཉྙཱཔེཏི, བྷཏྟཱནི ཙ ཨུདྡིསཏཱི’’ཏི ཝཱ ཝདནྟོ ཨཉྙཾ ¶ ཨུཔསམྤནྣཾ ཨུཛ྄ཛྷཱཔེཏི ཏེན ཨཝཛཱནཱཔེཏི, ཡོ པན ཏཐེཝ ཝདནྟོ ཨུཔསམྤནྣསྶ སནྟིཀེ ཏསྶ ཨཡསཾ པཀཱསེནྟོ ཁཱིཡཏི, ཏསྨིཾ ཨུཛ྄ཛྷཱཔནཀེ ཙ ཁཱིཡནཀེ ཙ པཱཙིཏྟིདྭཡནྟི ཝེདིཏབྦཾ.

༡༢༢. ཏལསཏྟིཨནཱདར-ཀུཀྐུཙྩུཔྤཱདནེསུ ཙཱཏི ཨེཏྠ ཡོ བྷིཀྑུ ཨུཔསམྤནྣསྶ པཧརཎཱཀཱརཾ དསྶེནྟོ ཀཱཡཾ ཝཱ ཀཱཡཔྤཊིབདྡྷཾ ཝཱ ཨུཙྩཱརེཏི, ཏསྶ པཱཙིཏྟིཡཾ. སཙེ ཝིརདྡྷོ པཧཱརཾ དེཏི, ཨཔྤཧརིཏུཀཱམཏཱཡ དུཀྐཊཾ, ཏཐཱ ཨནུཔསམྤནྣེསུཔི དུཀྐཊམེཝ.

ཨུཔསམྤནྣེན པཉྙཏྟེན ཝུཙྩམཱནོ ཏཾ ཨསིཀྑིཏུཀཱམཏཱཡ ཝཱ ཏསྶ ཝཙནཾ ཨསོཏུཀཱམཏཱཡ ཝཱ ཡོ ཨནཱདརིཡཾ ཀརོཏི, ཏསྶ ཨནཱདརཀརཎེ པཱཙིཏྟིཡནྟི ཨཏྠོ. ཨཔཉྙཏྟེན ཝུཙྩམཱནསྶ ཙ ཨནུཔསམྤནྣེན པཉྙཏྟེན ཝཱ ཨཔཉྙཏྟེན ཝཱ ཝུཙྩམཱནསྶ དུཀྐཊཾ.

ཨུཔསམྤནྣསྶ ‘‘ཨཱུནཝཱིསཏིཝསྶོ མཉྙེ ཏྭཾ ཨུཔསམྤནྣོ, ཝིཀཱལེ མཉྙེ ཏཡཱ བྷུཏྟ’’ནྟིཨཱདིནཱ ནཡེན སཉྩིཙྩ ཀུཀྐུཙྩཾ ཨུཔྤཱདེནྟསྶ པཱཙིཏྟིཡཾ. ཨནུཔསམྤནྣསྶ ཨུཔྤཱདནེ དུཀྐཊཾ.

གཱམཔྤཝེསནཱཔུཙྪཱཏི ཨེཏྠ པན མཛ྄ཛྷནྷིཀཱཏིཀྐམནཏོ པཊྛཱཡ ཡཱཝ ཨརུཎུགྒམནཱ ཝིཀཱལོ ནཱམ, ཨེཏྠནྟརེ སཙེ སམྦཧུལཱ ཀེནཙི ཀམྨེན གཱམཾ པཝིསནྟི, ‘‘ཝིཀཱལེ གཱམཔྤཝེསནཾ ཨཱཔུཙྪཱམཱ’’ཏི སབྦེཧིཔི ཨཉྙམཉྙཾ ཨཱཔུཙྪིཏབྦཾ. སཙེ ཨནཱཔུཙྪཱ པརིཀྑིཏྟསྶ པརིཀྑེཔཾ, ཨཔརིཀྑིཏྟསྶ ཨུཔཙཱརཾ ཨཏིཀྐམནྟི, པཋམཔཱདེ དུཀྐཊཾ, དུཏིཡཔཱདུདྡྷཱརེ པཱཙིཏྟིཡཾ. ཨཱཔདཱསུ ཨནཱཔཏྟི.

བྷོཛནེ ཙ པརམྤརཱཏི པརམྤརབྷོཛནེ ཙ པཱཙིཏྟིཡནྟི ཨཏྠོ. ཨེཏྠ པན པཉྩསུ བྷོཛནེསུ ཨཉྙཏརཾ ནཱམཾ གཧེཏྭཱ ¶ ‘‘ཨོདནེན ཝཱ སཏྟུནཱ ཝཱ ཀུམྨཱསེན ཝཱ མཾསེན ཝཱ མཙྪེན ཝཱ ནིམནྟེམཱི’’ཏིཨཱདིནཱ ནཡེན, ཡེན ཀེནཙི ཝེཝཙནེན ཝཱ ཨཀཔྤིཡནིམནྟནཱཡ ནིམནྟིཏསྶ ¶ ཡེན ཡེན པཋམཾ ནིམནྟིཏོ, ཏསྶ ཏསྶ བྷོཛནཾ ཋཔེཏྭཱ ཨུཔྤཊིཔཱཊིཡཱ, ཨཝིཀཔྤེཏྭཱ ཝཱ པཋམནིམནྟནཾ པརསྶ པརསྶ ཀུལསྶ པཉྩནྣཾ བྷོཛནཱནཾ ཨཉྙཏརཾ པརིབྷུཉྫནྟསྶ པརམྤརབྷོཛནེ པཱཙིཏྟི ཧོཏི. གིལཱནཙཱིཝརདཱནཙཱིཝརཀཱལསམཡེསུ ཨནཱཔཏྟི, ཏཐཱ པཉྩ བྷོཛནཱནི ཋཔེཏྭཱ སབྦཏྠ.

༡༢༣. ཨནུདྡྷརིཏྭཱ གམནེ སེཡྻནྟི ཨེཏྠ དསཝིདྷཱ སེཡྻཱ བྷིསི ཙིམིལིཀཱ ཨུཏྟརཏྠརཎཾ བྷཱུམཏྠརཎཾ ཏཊྚིཀཱ ཙམྨཁཎྜོ ནིསཱིདནཾ པཙྩཏྠརཎཾ ཏིཎསནྠཱརོ པཎྞསནྠཱརོཏི. ཨེཏེསུ ཡཾ ཀིཉྩི སངྒྷིཀེ ཝིཧཱརེ གུཏྟསེནཱསནེ ཨཏྟནོ ཝསྶགྒེན གཧིཏཾ ཨཏྟནཱ ཝཱ སནྠརིཏྭཱ, ཨནུཔསམྤནྣེན ཝཱ སནྠརཱཔེཏྭཱ ཏཾ དིཝསཾ གམིཀཝསེན པཀྐམནྟོ ནེཝ སཡཾ ཨུདྡྷརེཡྻ ན ཨཉྙཾ ཨུདྡྷརཱཔེཡྻ, ཡཐཱ ཨུཔཙིཀཱདཱིཧི ན ཁཛྫེཡྻ, ཨེཝཾ ན ཋཔེཡྻ, ཨཉྙེན ཝཱ ན ཨུདྡྷརཱཔེཡྻ, པཏིརཱུཔཾ བྷིཀྑུཾ ཝཱ སཱམཎེརཾ ཝཱ ཨཱརཱམིཀམེཝ ཝཱ ཨནཱཔུཙྪཱ ཝཱ གཙྪེཡྻ, ཏསྶ པརིཀྑིཏྟསྶ ཝིཧཱརསྶ པརིཀྑེཔཾ, ཨཔརིཀྑིཏྟསྶ དྭེ ལེཌྜུཔཱཏེ ཨཏིཀྐམནྟསྶ པཱཙིཏྟིཡཾ. མཎྜཔརུཀྑམཱུལཱདིཨགུཏྟསེནཱསནེ སནྠརིཏྭཱ གཙྪནྟསྶ དུཀྐཊཾ, ཏཐཱ མཉྩཔཱིཋབྷིསིཀོཙྪཀེསུ, གུཏྟསེནཱསནེཔི དུཀྐཊམེཝ.

སེནཱསནཱནི ཝཱཏི ཨེཏྠ ཨནུདྡྷརིཏྭཱ གམནེཏི སམྦནྡྷོ. ཨེཏྠ པན མཉྩོ པཱིཋཾ བྷིསི ཀོཙྪཀནྟི ཙཏུབྦིདྷམྤི སེནཱསནཾ ཝསྶཱནཧེམནྟཱནཾ ཨཊྛསུ མཱསེསུ ཨཛ྄ཛྷོཀཱསེ ཝཱ ཨོཝསྶཀམཎྜཔེ ཝཱ རུཀྑམཱུལེ ཝཱ སཡཾ སནྠརིཏྭཱ ཝཱ ཨནུཔསམྤནྣེན སནྠརཱཔེཏྭཱ ཝཱ ཏཾ ཨནུདྡྷརིཏྭཱ ཝཱ ཨནུདྡྷརཱཔེཏྭཱ ཝཱ ཏསྶ སེནཱསནསྶ དྭིནྣཾ ལེཌྜུཔཱཏཱནཾ ཨཏིཀྐམནེ པཱཙིཏྟིཡཾ. སམྨུཉྫནཱིཡཱདི སེསཔརིཀྑཱརེསུ དུཀྐཊཾ.

ཨིཏྠིཡཱདྡྷཱནགམནེཏི ¶ ཨེཏྠ མཱཏུགཱམེན ‘‘གཙྪཱམ བྷགིནི, གཙྪཱམ ཨཡྻཱ’’ཏི ཨེཝཾ སཾཝིདཧིཏྭཱ ‘‘ཨཛྫ ཝཱ སྭེ ཝཱ པརསུཝེ ཝཱ’’ཏི ནིཡམིཏཀཱལཾ ཝིསངྐེཏཾ ཨཀཏྭཱ དྭཱརཝིསངྐེཏཾ མགྒཝིསངྐེཏཾ ཀཏྭཱཔི གཙྪཏོ གཱམནྟརེ གཱམནྟརེ པཱཙིཏྟིཡཾ. ཨགཱམཀེ ཨརཉྙེ ཨདྡྷཡོཛནེ ཨདྡྷཡོཛནེ ཨཱཔཏྟི.

ཨེཀེཀཱཡ ནིསཱིདནེཏི ཨེཏྠ ཨེཀོ ཨེཀཱཡ ཨིཏྠིཡཱ ནིསཱིདནེཏི ཨཏྠོ.

༡༢༤. བྷིཾསཱཔནེཏི ¶ ཨེཏྠ ཨུཔསམྤནྣོ ཨུཔསམྤནྣཾ བྷིཾསཱཔེཏུཀཱམོ ཙོརཀནྟཱརཝཱལ༹ཀནྟཱརཱདཱིནི ཨཱཙིཀྑཏི, བྷཡཱནཀཾ ཝཱ རཱུཔསདྡཱདིཾ དསྶེཏི, སོ བྷཱཡཏུ ཝཱ མཱ ཝཱ, ཏསྶ པཡོགེ པཡོགེ པཱཙིཏྟིཡཾ. ཨནུཔསམྤནྣེ དུཀྐཊཾ.

ཨཱཀོཊནེཏི པཧཱརདཱནེ. ཨུཔསམྤནྣོ ཨུཔསམྤནྣསྶ ཨནཏྟམནོ ཧུཏྭཱ སཙེ ཨུཔྤལཔཏྟེནཔི པཧཱརཾ དེཏི, པཱཙིཏྟིཡཾ. ཨནུཔསམྤནྣསྶ གཧཊྛསྶ ཝཱ པབྦཛིཏསྶ ཝཱ ཨིཏྠིཡཱ ཝཱ པུརིསསྶ ཝཱ ཨནྟམསོ ཏིརཙྪཱནགཏསྶཱཔི པཧཱརཾ དེཏི, དུཀྐཊམེཝ.

ཨནཱཙཱརཾ ཨཱཙརིཏྭཱ སངྒྷམཛ྄ཛྷེ ཨཱཔཏྟིཡཱ ཝཱ ཝཏྠུནཱ ཝཱ ཨནུཡུཉྫིཡམཱནོ ཏཾ ཨཀཐེཏུཀཱམོ ‘‘ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣོ’’ཏིཨཱདིནཱ ནཡེན ཨཉྙེཧི ཝཙནེཧི ཏཾ ཝཙནཾ པཊིཙྪཱདེནྟོ སོ ཨཉྙཾ ཝདཏི, ཨཡཾ ཨཉྙཝཱདཀོ, ཏསྨིཾ ཨཉྙཝཱདཀེ ཙ ཀཉྩི ཝཱིཏིཀྐམཾ དིསྭཱ ‘‘ཨཱཝུསོ, ཨིདཾ ནཱམ ཏཡཱ ཀཏ’’ནྟི ཝུཏྟེ ཏཾ ན ཀཐེཏུཀཱམོ ཏུཎྷཱིབྷཱུཏོཝ སངྒྷཾ ཝིཧེསཏཱིཏི སངྒྷཝིཧེསཀོ, ཏསྨིཾ ཝིཧེསཀེ ཙ པཱཙིཏྟི ཧོཏཱིཏི ཨཏྠོ. ཨིདྷ པན ཉཏྟིདུཏིཡེན ཀམྨེན ཨཉྙཝཱདཀེ ཙ ཝིཧེསཀེ ¶ ཙ ཨཱརོཔིཏེ པུན ཨཉྙཾ བྷཎནྟསྶ, ཝིཧེསནྟསྶ པཱཙིཏྟི. ཨནཱརོཔིཏེ དུཀྐཊནྟི ཝེདིཏབྦཾ.

དུཊྛུལླཔཀཱསཚཱདེཏི ཨེཏྠ ཀིཉྩཱཔི ‘‘དུཊྛུལླཱ ནཱམ ཨཱཔཏྟི ཙཏྟཱརི ཙ པཱརཱཛིཀཱནི ཏེརས ཙ སངྒྷཱདིསེསཱ’’ཏི (པཱཙི. ༣༩༩) ཝུཏྟཱ, ཏཐཱཔི ཨིདྷ སངྒྷཱདིསེསཱཝ ཨདྷིཔྤེཏཱ. ཏསྨཱ སངྒྷསམྨུཏིཾ ཝིནཱ བྷིཀྑུསྶ དུཊྛུལླཾ ཨཱཔཏྟིཾ ‘‘ཨཡཾ ཨསུཙིཾ མོཙེཏྭཱ སངྒྷཱདིསེསཾ ཨཱཔནྣོ’’ཏིཨཱདིནཱ ནཡེན ཝཏྠུནཱ སདྡྷིཾ ཨཱཔཏྟིཾ གྷཊེཏྭཱ བྷིཀྑུཉྩ བྷིཀྑུནིཉྩ ཋཔེཏྭཱ ཡསྶ ཀསྶཙི ཨནུཔསམྤནྣསྶ ཨཱརོཙེནྟསྶ པཱཙིཏྟིཡཾ. ཐུལླཙྩཡཱདིཨདུཊྛུལླཱརོཙནེ དུཀྐཊཾ. དུཊྛུལླཙྪཱདནེཔི སངྒྷཱདིསེསོཝ ཨདྷིཔྤེཏོ. ཡོ པན བྷིཀྑུ བྷིཀྑུསྶ དུཊྛུལླཾ ཨཱཔཏྟིཾ སཡཾ ཝཱ ཛཱནིཏྭཱ ཨཉྙེསཾ ཝཱ སུཏྭཱ ‘‘ཨིམཾ ཛཱནིཏྭཱ ཙོདེསྶནྟི སཱརེསྶནྟི མངྐུཾ ཀརིསྶནྟི, ནཱརོཙིསྶཱམཱི’’ཏི དྷུརཾ ནིཀྑིཔཏི, ཏསྶ པཱཙིཏྟིཡཾ. དྷུརཾ ནིཀྑིཔིཏྭཱ པཙྪཱ ཨཱརོཙིཏེཔི ན རཀྑཏི ཨེཝ.

ཧཱསོདཀེཏི ཨངྒུལིཔཏོདཀེན ཧཱསོ ཙ ཨུདཀེ ཧཱསོ ཙཱཏི ཨེཝམཏྠོ ཝེདིཏབྦོ. ཨུཔསམྤནྣོ ཨུཔསམྤནྣཾ ཧསཱདྷིཔྤཱཡོ ཀཱཡེན ཀཱཡཾ ཨཱམསཏི, ཨཱཔཏྟི པཱཙིཏྟིཡསྶ, ཀོ པན ཝཱདོ ¶ ཨུཔཀཙྪཀཱདཱིསུ གྷཊྚནེ. ཨནུཔསམྤནྣེ དུཀྐཊཾ, ཏཐཱ བྷིཀྑུསྶ ཀཱཡཔྤཊིབདྡྷཱམསནེ ཙ ནིསྶགྒིཡེན ཀཱཡཔྤཊིབདྡྷཱམསནེ ཙ. ཨེཏྠ བྷིཀྑུནཱིཔི ཨནུཔསམྤནྣཊྛཱནེ ཋིཏཱ. ཨུདཀེ ཧསནདྷམྨོ ནཱམ ཨུཔརིགོཔྥཀེ ཨུདཀེ ཀཱིལཱ༹དྷིཔྤཱཡསྶ ནིམྨུཛྫནཨུམྨུཛྫནཔླཝནཱདིཀཾ. ཨིདྷ ཧཱསོ ནཱམ ཀཱིལཱ༹ ཝུཙྩཏི.

ནིཙྪུབྷནེ ཝིཧཱརཱཏི སངྒྷིཀཱ ཝིཧཱརཱ ནིཀྐཌྜྷནེཏི ཨཏྠོ. ཨེཏྠ པན ཡོ ཀུདྡྷོ ཧུཏྭཱ ཨུཔསམྤནྣཾ ཧཏྠཱདཱིསུ གཧེཏྭཱ ཝཱ ‘‘ནིཀྑམཱ’’ཏི ཝཏྭཱ ཝཱ ཡཏྟཀཱནི དྭཱརཱནི ¶ ཨེཀེན པཡོགེན ཨཏིཀྐཱམེཏི, ཏཏྠ དྭཱརགཎནཱཡ ཨཱཔཏྟིཾ ཨགྒཧེཏྭཱ པཡོགསྶ ཨེཀཏྟཱ ཨེཀཱ ཨེཝ གཧེཏབྦཱ. སཙེ ནཱནཱཔཡོགེཧི ཨཏིཀྐཱམེཏི, ཏཏྠ དྭཱརགཎནཱཡ གཧེཏབྦཾ. ཏསྶ པརིཀྑཱརནིཀྐཌྜྷནེ དུཀྐཊཾ, ཏཐཱ ཨནུཔསམྤནྣེ, ཏསྶ པརིཀྑཱརནིཀྐཌྜྷནེ ཙ. ཨལཛྫིཨཱདཱིསུ པན ཨནཱཔཏྟི.

ཨནུཔཁཛྫ སཡནེཏི སངྒྷིཀེ ཝིཧཱརེ ‘‘ཝུཌྜྷོ’’ཏི ཝཱ ‘‘གིལཱནོ’’ཏི ཝཱ ‘‘སངྒྷེན དིནྣོ’’ཏི ཝཱ ཛཱནིཏྭཱ མཉྩསྶ ཝཱ པཱིཋསྶ ཝཱ པཝིསནྟསྶ ཝཱ ནིཀྑམནྟསྶ ཝཱ ཨུཔཙཱརེ སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ‘‘ཡསྶ སམྦཱདྷོ བྷཝིསྶཏི, སོ པཀྐམིསྶཏཱི’’ཏི ཨདྷིཔྤཱཡེན ཨབྷིནིསཱིདནྟསྶ ཙ ཨབྷིནིཔཛྫནྟསྶ ཙ པཡོགགཎནཱཡ པཱཙིཏྟིཡཾ ཝེདིཏབྦཾ. པཱཙིཏྟིཡཝིནིཙྪཡོ.

པཱཙིཏྟིཡནིདྡེསཝཎྞནཱ ནིཊྛིཏཱ.

༡༢༥. བྷཱུཏཱནཾ ཛཱཏཱནཾ ནིབྦཏྟཱནཾ གཱམོ བྷཱུཏགཱམོ (པཱཙི. ༩༡; པཱཙི. ཨཊྛ. ༩༡; ཀངྑཱ. ཨཊྛ. བྷཱུཏགཱམསིཀྑཱཔདཝཎྞནཱ). སམཱརམྦྷོཏི ཚེདནཕཱལནཔཙནཱདི, ཏསྨིཾ བྷཱུཏགཱམསམཱརམྦྷེ བྷཱུཏགཱམསམཱརམྦྷཧེཏུ པཱཙིཏྟི ཧོཏཱིཏི ཨཏྠོ. ཀཏཀཔྤིཡཾ (ཀངྑཱ. ཨཊྛ. བྷཱུཏགཱམསིཀྑཱཔདཝཎྞནཱ) པན སམཎཀཔྤིཡཾ བྷཝེཏི སམྦནྡྷོ. སམཎཱནཾ ཀཔྤིཡཾ སམཎཀཔྤིཡཾ ¶ . ཨིདཱནི ཡེན ཀཏཾ ཀཔྤིཡཾ སམཎཀཔྤིཡཾ ཧོཏི, ཏཾ དསྶེཏུཾ ‘‘ནཁེན ཝཱ’’ཏིཨཱདིམཱཧ. ‘‘ཨནུཛཱནཱམི, བྷིཀྑཝེ, པཉྩཧི སམཎཀཔྤེཧི ཕལཾ པརིབྷུཉྫིཏུཾ, ཨགྒིཔརིཛིཏཾ སཏྠཔརིཛིཏཾ ནཁཔརིཛིཏཾ ཨབཱིཛཾ ནིབྦཊྚབཱིཛཉྙེཝ པཉྩམ’’ནྟི (ཙཱུལ༹ཝ. ༢༥༠) ཧི ཝུཏྟཾ.

༡༢༦. ཨིདཱནི ¶ ཏཾ བྷཱུཏགཱམཾ དསྶེཏུཾ ‘‘སམཱུལཱ’’ཏིཨཱདིམཱཧ. ཏཏྠ (པཱཙི. ༩༡; པཱཙི. ཨཊྛ. ༩༡) ས-ཨིཏི སོ བྷཱུཏགཱམོ ནཱམཱཏི ཨཏྠོ, མཱུལབཱིཛཱདཱིཧི པཉྩཧི བཱིཛེཧི པབྷཱཝིཏོ ཧོཏཱིཏི ཝུཏྟཾ ཧོཏི. ཏཏྠ མཱུལབཱིཛཾ ནཱམ ཧལིདྡིསིངྒིཝེརཱདི. ཁནྡྷབཱིཛཾ ནཱམ ཨསྶཏྠོ ནིགྲོདྷོཏི ཨེཝམཱདི. ཨགྒབཱིཛཾ ནཱམ ཨཛྫུཀཕཎིཛྫཀཱདི. ཕལུ༹བཱིཛཾ ནཱམ ཨུཙྪུཝེལུ༹ནལཱ༹དི. ‘‘བཱིཛབཱིཛཾ ནཱམ པུབྦཎྞཾ ཨཔརཎྞཾ, ཡཱནི ཝཱ པནཉྙཱནིཔི ཨཏྠི བཱིཛེ ཛཱཡནྟི བཱིཛེ སཉྫཱཡནྟི, ཨེཏཾ བཱིཛབཱིཛཾ ནཱམཱ’’ཏི ཝུཏྟཾ. ཨིདཱནི ‘‘བཱིཛགཱམབྷཱུཏགཱམསམཱརམྦྷཱ པཊིཝིརཏོ ཧོཏཱི’’ཏི (དཱི. ནི. ༡.༡༠, ༡༩༥; མ. ནི. ༡.༢༩༣, ༤༡༡; ༢.༡༡; ཨ. ནི. ༡༠.༩༩; པུ. པ. ༡༧༩) ཝུཏྟཏྟཱ དྷམྨཱནུལོམེན ཨཱགཏཾ བཱིཛགཱམསམཱརམྦྷཾ དསྶེཏུཾ ‘‘ཨཱརམྦྷེ དུཀྐཊ’’ནྟིཨཱདིམཱཧ. ཏསྨཱ ཨེཏཾ པཋམཾ ‘‘ཀཔྤིཡཾ ཀརོཧཱི’’ཏི བྷཱུཏགཱམཔརིམོཙནཾ ཀཱརེཏྭཱ བཱིཛགཱམཔརིམོཙནཏྠཾ པུན ཀཔྤིཡཾ ཀཱརེཏབྦཾ.

༡༢༧. ནིབྦཊྚབཱིཛཾ (པཱཙི. ཨཊྛ. ༩༢; ཀངྑཱ. ཨཊྛ. བྷུཏགཱམསིཀྑཱཔདཝཎྞནཱ) ནཱམ ཨམྦཔནསཱདི. ནོབཱིཛཾ ནཱམ ཏརུཎམྦཕལཱདི, ཨེཏཾ པན སབྦཾ ཨཀཔྤིཡམྤི ཝཊྚཏཱིཏི ཨཏྠོ. ཀཊཱཧབདྡྷབཱིཛཱནི ཀཔིཏྠཕལཱདཱིནི. བཧིདྡྷཱ ཝཱཔི ཀཱརཡེཏི ཀཔཱལེཔི ཀཱཏུཾ ཝཊྚཏི, སཙེ ཨེཀཱབདྡྷཱནཱིཏི ཨཏྠོ. ཀཊཱཧམུཏྟཾ པན བྷིནྡིཏྭཱ ཀཱརེཏབྦཾ.

༡༢༨. བྷཱཛནེ ཝཱ བྷཱུམིཡཾ ཝཱ ཨེཀཱབདྡྷེསུ བཱིཛེསུ ཨེཀསྨིཾ བཱིཛེ ཀཔྤིཡེ ཀཏེ སབྦེསྭེཝ ཀཏཾ བྷཝེཏི ཨཏྠོ. ཡཐཱ ཙ བཱིཛེ, ཨེཝཾ རུཀྑསཧསྶཾ ཝཱ ཨུཙྪུསཧསྶཾ ཝཱ ཚིནྡིཏྭཱ ཨེཀཱབདྡྷེ ཀཏེཔི ཝིནིཙྪཡོ ཝེདིཏབྦོ.

༡༢༩. ཀཔྤིཡཾ ཀཏྭཱ ནིཀྑིཏྟེ བཱིཛགཱམེ པུན མཱུལཔཎྞཱནི སཙེ ཛཱཡརུཾ, པུན ཀཔྤིཡཾ ཀཱརེཡྻཱཏི ཨཏྠོ. ཏདཱཏི མཱུལེ ཙ ཨངྐུརེ ཙ ཛཱཏེཏི ཨཏྠོ.

༡༣༠. ཨུདཀསམྦྷཝོཏི ¶ ¶ ཨུདཀཛཱཏོ. ཙེཏིཡཱདཱིསཱུཏི ཨེཏྠ ཨཱདི-སདྡེན གེཧཔྤམུཁཔཱཀཱརཝེདིཀཱདཱིསུ ནིབྦཏྟཱ གཧིཏཱ. ནིབྦཏྟདྭཏྟིཔཏྟཀོ བྷཱུཏགཱམོཝ, ཨནིབྦཏྟཀོ ཨགྒབཱིཛེ སངྒཧཾ གཙྪཏི. བཱིཛམྤི ཡཱཝ མཱུལཾ ཝཱ པཎྞཾ ཝཱ ན ནིཀྑམཏི, ཏཱཝ བཱིཛགཱམོཝ, མཱུལེ ཙ ནིཀྑནྟེ པཎྞེ ཙ ཧརིཏེ ཛཱཏེ བྷཱུཏགཱམོཝ ཧོཏཱིཏི ཨཏྠོ.

༡༣༡. མཀུལ༹ནྟི ཨཕུལླཾ. ཨཧིཚཏྟཀཾ ནཱམ རུཀྑེ ཛཱཏཾ ཨཧིཚཏྟཀཾ.

༡༣༢. ཨལླརུཀྑེ གཎྷཏོཏི སམྦནྡྷོ. ཏཏྠཱཏི ཨལླརུཀྑེ ཚིནྡཏོ ཝཱཔཱིཏི སམྦནྡྷོ.

༡༣༤. ‘‘ཨིམཾ རུཀྑཾ, ཨིམཾ ལཏཾ, ཨིམཾ ཀནྡཾ ཚིནྡ, བྷིནྡཱ’’ཏིཨཱདིནཱ ནཡེན ནིཡམེཏྭཱ བྷཱསིཏུཾ ན ཝཊྚཏི. ‘‘ཨིདཾ, ཨེཏ’’ནྟི ཨཝཏྭཱ ཀེཝལཾ ‘‘རུཀྑཾ ཚིནྡཱ’’ཏིཨཱདིནཱ (པཱཙི. ཨཊྛ. ༩༢; ཀངྑཱ. ཨཊྛ. བྷཱུཏགཱམཧིཀྑཱཔདཝཎྞནཱ) ནཡེན ཝཏྟུཾ ཝཊྚཏཱིཏི. སམཎཀཔྤཝིནིཙྪཡོ.

༡༣༦. ཨིདཱནི ‘‘ཨནུཛཱནཱམི, བྷིཀྑཝེ, ཙཏསྶོ ཀཔྤིཡབྷཱུམིཡོ ཨུསྶཱཝནནྟིཀཾ གོནིསཱདིཀཾ གཧཔཏིཾ སམྨུཏི’’ནྟི (མཧཱཝ. ༢༩༥) ཨེཝཾ ཝུཏྟཱ ཙཏསྶོ ཀཔྤིཡབྷཱུམིཡོ དསྶེཏུཾ ‘‘སམྨུཏུསྶཱཝནནྟཱ ཙཱ’’ཏིཨཱདིམཱཧ. ཡཱསཱུཏི ཀཔྤིཡབྷཱུམཱིསུ (ཀངྑཱ. ཨཊྛ. སནྣིདྷིཀཱརཀསིཀྑཱཔདཝཎྞནཱ).

༡༣༧. ཨིདཱནི ¶ ཡཏྠ ཀཔྤིཡཀུཊི ཨིཙྪིཏབྦཱ, ཏཾ དསྶེཏུཾ ‘‘ཝཱསཏྠཱཡཱ’’ཏིཨཱདིམཱཧ. ཝཱསཏྠཱཡཱཏི ཨིམིནཱ ཀོཊྛཱགཱརབྷཏྟསཱལཱཙེཏིཡགྷརསམྨུཉྫནཱིམཱལ༹ཀཱདི ཡཾ ཡཾ ཨཉྙམྤི ཝཱསཏྠཱཡ ¶ ཀརཱིཡཏི, ཏཏྠ ཏཏྠ ཀཔྤིཡཀུཊིཀརཎཀིཙྩཾ ནཏྠཱིཏི དཱིཔིཏཾ ཧོཏི. བྷོཛནསཱལཱ པན སེནཱསནམེཝ, ཏསྨཱ ཏཏྠ ཀཱཏབྦཱ ཨེཝཱཏི ཝདནྟི. སངྒྷིཀེཝེཀསནྟཀེཏི ཨེཏྠ ཨེཀསནྟཀོ ཨུཔསམྤནྣསནྟཀོཝ ཝེདིཏབྦོ.

༡༣༨. ཨིདཱནི ཀཏྟབྦཱཀཱརཾ དསྶེཏུཾ ‘‘གེཧེ’’ཏིཨཱདིམཱཧ. ཏཏྠ སངྒྷསྶ ཝཱ ཨེཀསྶ ཝཱ གེཧེ ཝིཧཱརེ ཀརིཡམཱནེ ཨེཝཾ ཨཱིརཡཾ ‘‘ཀཔྤིཡཀུཊིཾ ཀརོམ, ཀཔྤིཡཀུཊིཾ ཀརོམཱ’’ཏི ཝཱ ‘‘ཀཔྤིཡཀུཊི ཀཔྤིཡཀུཊཱི’’ཏི ཝཱ ཝདནྟོ པཋམིཊྛཀཏྠམྦྷཱདིཾ ཋཔེཡྻ, ཨེཝཾ ཀཏཱ ཨུསྶཱཝནནྟིཀཱ ནཱམ, ཨེཝཾ ཨུདཱཧརིཏཝཙནནྟིཀཱཏི ཨཏྠོ.

༡༣༩. ཡེབྷུཡྻེན ཝཱ ཨཔརིཀྑིཏྟོ, སཀལོཔི ཝཱ ཨཔརིཀྑིཏྟོ ཨཱརཱམོ ‘‘གོནིསཱདཱི’’ཏི ཝུཙྩཏཱིཏི སམྦནྡྷོ. ཨེཏྠ པན སེནཱསནེསུ པརིཀྑིཏྟེསུཔི ཨཱརཱམེ ཨཔརིཀྑིཏྟེ ཀཔྤིཡཀུཊིཀརཎཀིཙྩཾ ནཏྠི. སམྨུཏིཾ ཀརོནྟེཧི ཀཏཾ པརིཡོསིཏཾ ‘‘ཨིམཾ ཝིཧཱརཾ ཨཌྜྷཡོགཾ པཱསཱདཾ ཧམྨིཡཾ གུཧཾ ཏིཎཀུཊིཀཾ མཎྜཔ’’ནྟི ཏེསཾ ནཱམཾ གཧེཏྭཱ ཏསྶཱ ཀུཊིཡཱ ཧཏྠཔཱསེ ཝཱ ཋཏྭཱ, ཏསྶཱ ཨནྟོ ཝཱ པཝིསིཏྭཱ ཝུཏྟནཡེནེཝ ཉཏྟིདུཏིཡཀམྨཝཱཙཱཡ སམྨནྣིཏབྦཾ.

༡༤༠. ‘‘བྷིཀྑུཾ ཋཔེཏྭཱ ཨཉྙེཧཱི’’ཏི ཝཙནཏོ སེསསཧདྷམྨིཀེཧིཔི དེཝམནུསྶེཧིཔི ཨཉྙེཧི ཀཔྤིཡཀུཊིཡཱ ཨཏྠཱཡ དིནྣོ ཝཱ ཏེསཾ སནྟཀོ ཝཱ གེཧོ ‘‘གཧཔཏཱི’’ཏི མཏོ ཉཱཏོཏི ཨཏྠོ, སངྒྷསནྟཀཉྩ བྷིཀྑུསནྟཀཉྩ ཋཔེཏྭཱ སབྦེསཾ གེཧོ གཧཔཏཱིཏི ཨདྷིཔྤཱཡོ.

༡༤༡. སཔྤིཨཱདཱིཧི ¶ མིསྶིཏནྟི སཔྤིཨཱདཱིཧི པཉྩཧི ཙ ཧལིདྡིསིངྒིཝེརཱདིཡཱཝཛཱིཝིཀེན ཙཱཏི ཨཏྠོ. ཝཛེཡྻ ཨནྟོཝུཏྠཏྟནྟི ཨེཏྠ ཡཱཝཀཱལིཀཡཱམཀཱལིཀསངྑཱཏཾ པུརིམཀཱལིཀདྭཡཾ སངྒྷིཀཾ ཝཱ བྷིཀྑུསྶ ཝཱ བྷིཀྑུནིཡཱ ཝཱ སནྟཀཾ སཡཾ ཀཔྤིཡཀུཊིཡཱ ཝུཏྠམྤི ཨིཏརེཧི ཨཀཔྤིཡཀུཊིཡཱ ཝུཏྠེཧི མིསྶིཏཾ ཨནྟོཝུཏྠབྷཱཝཾ ཨཱགཙྪེཡྻཱཏི ཨཏྠོ.

༡༤༢. ཏེཧེཝཱཏི ཨཀཔྤིཡཀུཊིཡཾ ཝུཏྠསཔྤིཏེལཱདཱིཧི. སཱམཔཱཀཏནྟི སཱམཾཔཀྐབྷཱཝཾ གཙྪཏཱིཏི ཨཏྠོ.

༡༤༣-༤. ཨིམཱ ¶ པན ཀཔྤིཡཀུཊིཡོ ཡདཱ ཛཧིཏཝཏྠུཀཱ ཧོནྟི, ཏཾ དསྶེཏུཾ ‘‘ཨུསྶཱཝནནྟིཀཱ’’ཏིཨཱདིམཱཧ. སཙེ ཐམྦྷེ ཝཱ བྷིཏྟིཔཱདེ ཝཱ པརིཝཏྟེནྟི, ཡོ ཡོ ཋིཏོ, ཏཏྠ ཏཏྠ པཏིཊྛཱཏི, ཨེཏེནུཔཱཡེན སབྦེསུ པརིཝཏྟེསུཔི ན ཝིཛཧིཏཝཏྠུཀཱཝ ཧོཏཱིཏི ཨཏྠོ. པརིཀྑིཏྟེ གོནིསཱདི ཝིཛཧིཏཝཏྠུཀཱ. སེསཱ ཚདནཝིབྦྷམཱཏི ཚདནཝིནཱསཱ ཛཧིཏཝཏྠུཀཱ ཧོནྟཱིཏི ཨདྷིཔྤཱཡོ. བྷཱུམིཝིནིཙྪཡོ.

༡༥. ཨུཔཛ྄ཛྷཱཙརིཡཝཏྟནིདྡེསཝཎྞནཱ

༡༤༥. ཨུཔཛ྄ཛྷཱཙརིཡེཏི ཨེཏྠ (མཧཱཝ. ༦༤, ༦༧, ༧༤, ༧༨-༧༩; ཙཱུལ༹ཝ. ༣༧༥, ༣༧༧; ༣༧༩-༣༨༢; མཧཱཝ. ཨཊྛ. ༦༤, ༦༧, ༧༥, ༧༦, ༧༧) ཨཱཙརིཡོ ནཱམ ནིསྶཡཱཙརིཡོ པབྦཛྫཱཙརིཡོ ཨུཔསམྤདཱཙརིཡོ དྷམྨཱཙརིཡོཏི ཙཏུབྦིདྷོ. ཨེཏེསུ ཧི ནིསྶཡནྟེཝཱསིཀེན ཡཱཝ ཨཱཙརིཡཾ ནིསྶཱཡ ཝསཏི, ཏཱཝ སབྦམཱཙརིཡཝཏྟཾ ཀཱཏབྦཾ. པབྦཛྫཱཨུཔསམྤདཱདྷམྨནྟེཝཱསིཀེཧི པན ནིསྶཡམུཏྟཀེཧིཔི ཨཱདིཏོ ¶ པཊྛཱཡ ཡཱཝ ཙཱིཝརརཛནཾ, ཏཱཝ ཝཏྟཾ ཀཱཏབྦཾ. ཨནཱཔུཙྪིཏྭཱ པཏྟདཱནཱདིམྷི པན ཨེཏེསཾ ཨནཱཔཏྟི. ཨེཏེསུ ཙ པབྦཛྫནྟེཝཱསིཀོ ཙ ཨུཔསམྤདནྟེཝཱསིཀོ ཙ ཨཱཙརིཡསྶ ཡཱཝཛཱིཝཾ བྷཱརོ, ནིསྶཡནྟེཝཱསིཀོ ཙ དྷམྨནྟེཝཱསིཀོ ཙ ཡཱཝ སམཱིཔེ ཝསཏི, ཏཱཝདེཝ. སུཊྛུ པིཡསཱིལོ སུཔེསལོ, སིཀྑཱཀཱམོཏི ཨཏྠོ. དནྟཀཊྛཾ དེནྟེན ཨེཀཾསཾ ཨུཏྟརཱསངྒཾ ཀརིཏྭཱ མཧནྟཾ མཛ྄ཛྷིམཾ ཁུདྡཀནྟི ཏཱིཎི དནྟཀཊྛཱནི ཨུཔནེཏབྦཱནི. ཏེསུ ཡཾ ཏཱིཎི དིཝསཱནི གཎྷཱཏི, ཏཾ སལླཀྑེཏྭཱ ཙཏུཏྠདིཝསཏོ པཊྛཱཡ ཏཱདིསཾཡེཝ སམྨཱ ཨུབྷོཧི ཧཏྠེཧི དཱཏབྦཾ. སཙེ ཡཾ ཝཱ ཏཾ ཝཱ གཎྷཱཏི, ཡཐཱལདྡྷཾ ཨུཔནེཏབྦཾ. ཏོཡནྟི སཱིཏཉྩ ཨུཎྷཉྩ ཨུདཀཾ ཨུཔནེཏྭཱ ཡཾ ཏཱིཎི དིཝསཱནི ཝལ༹ཉྫེཏི, ཙཏུཏྠདིཝསཏོ པཊྛཱཡ ཏཱདིསཾ ཨུཔནེཏབྦཾ. སཙེ དྭེཔི ཝལ༹ཉྫེཏི, དུཝིདྷམྤི ཨུཔནེཏབྦཾ. སཙེ ཡཱགུ ཧོཏི, བྷཱཛནཾ དྷོཝིཏྭཱ ཨུཔནེཏབྦཾ.

༡༤༦. པཏྟེ ཝཏྟཾ ཙརེཏི ‘‘ཡཱགུཾ པཱིཏསྶ ཨུདཀཾ དཏྭཱ བྷཱཛནཾ པཊིགྒཧེཏྭཱ ནཱིཙཾ ཀཏྭཱ ¶ སཱདྷུཀཾ ཨཔརིགྷཾསནྟེན དྷོཝིཏྭཱ པཊིསཱམེཏབྦ’’ནྟི (མཧཱཝ. ༦༦, ༧༨; ཙཱུལ༹ཝ. ༣༧༦, ༣༨༠) ཝུཏྟཾ པཏྟེ ཝཏྟཾ ཙརེཏི ཨཏྠོ. གཱམཔྤཝེསེ ཝཏྟཾ ཙརེཏི ཨེཝཾ སབྦཏྠ. ‘‘སཙེ ཨུཔཛ྄ཛྷཱཡོ ཝཱ ཨཱཙརིཡོ ཝཱ གཱམཾ པཝིསིཏུཀཱམོ ཧོཏི, ནིཝཱསནཾ དཱཏབྦཾ, པཊིནིཝཱསནཾ པཊིགྒཧེཏབྦཾ, ཀཱཡབནྡྷནཾ དཱཏབྦཾ, སགུཎཾ ཀཏྭཱ སངྒྷཱཊིཡོ དཱཏབྦཱ, དྷོཝིཏྭཱ པཏྟོ སོདཀོ དཱཏབྦོ’’ཏི (མཧཱཝ. ༦༦, ༧༨; ཙཱུལ༹ཝ. ༣༧༦, ༣༨༠) ཨིདཾ གཱམཔྤཝེསནེ ཝཏྟཾ ནཱམ. ‘‘སཙེ ཨུཔཛ྄ཛྷཱཡོ ཝཱ ཨཱཙརིཡོ ཝཱ པཙྪཱསམཎཾ ཨཱཀངྑཏི, ཏིམཎྜལཾ པཊིཙྪཱདེནྟེན པརིམཎྜལཾ ནིཝཱསེཏྭཱ ཀཱཡབནྡྷནཾ བནྡྷིཏྭཱ སགུཎཾ ཀཏྭཱ སངྒྷཱཊིཡོ པཱརུཔིཏྭཱ གཎྛིཀཾ པཊིམུཉྩིཏྭཱ དྷོཝིཏྭཱ པཏྟཾ གཧེཏྭཱ ཨུཔཛ྄ཛྷཱཡསྶ ཝཱ ཨཱཙརིཡསྶ ཝཱ པཙྪཱསམཎེན ཧོཏབྦ’’ནྟིཨཱདིནཱ (མཧཱཝ. ༦༦, ༧༨; ཙཱུལ༹ཝ. ༣༧༦, ༣༨༠) ¶ ནཡེན ཝུཏྟཾ གམནེ ཝཏྟཾ ནཱམ. ‘‘ནིཝཏྟནྟེན པཋམཏརཾ ཨཱགནྟྭཱ ཨཱསནཾ པཉྙཱཔེཏབྦ’’ནྟིཨཱདིནཱ (མཧཱཝ. ༦༦, ༧༨; ཙཱུལ༹ཝ. ༣༧༦, ༣༨༠) ནཡེན ཝུཏྟཾ ཨཱགམེ ཝཏྟཾ ནཱམ. ‘‘ཨུཔཛ྄ཛྷཱཡམྷི ཝུཊྛིཏེ ཨཱསནཾ ཨུདྡྷརིཏབྦཾ, པཱདོདཀཾ པཱདཔཱིཋཾ པཱདཀཐལིཀཾ པཊིསཱམེཏབྦ’’ནྟི (མཧཱཝ. ༦༦, ༧༨; ཙཱུལ༹ཝ. ༣༧༦, ༣༨༠) ཨེཝཾ ཝུཏྟཾ ཨཱསནཱདཱིསུ ཝཏྟཾ ནཱམ. ཨུཔཱཧནཱཡ ཝཏྟཾ ནཱམ ‘‘ཨུཔཱཧནཱ པུཉྪིཏབྦཱ, ཨུཔཱཧནཱ པུཉྪནྟེན པཋམཾ སུཀྑེན ཙོལ༹ཀེན པུཉྪིཏབྦཱ, པཙྪཱ ཨལླེནཱ’’ཏིཨཱདིནཱ (ཙཱུལ༹ཝ. ༣༥༧, ༣༥༩) ཝུཏྟཾ. ཙཱིཝརེ ཝཏྟཾ ནཱམ ‘‘སཙེ ཙཱིཝརཾ སིནྣཾ ཧོཏི, མུཧུཏྟཾ ཨུཎྷེ ཨོཏཱཔེཏབྦཾ, ན ཙ ཨུཎྷེ ཙཱིཝརཾ ནིདཧིཏབྦ’’ནྟིཨཱདིནཱ (མཧཱཝ. ༦༦, ༧༨; ཙཱུལ༹ཝ. ༣༧༦, ༣༨༠) ཝུཏྟཾ.

༡༤༧. པརིབྷོཛནཱིཡཔཱནཱིཡ-ཝཙྩཔྤསྶཱཝཋཱནིསཱུཏི ཨེཏྠ སཙེ པཱནཱིཡཾ ན ཧོཏི, པཱནཱིཡཾ ཨུཔཊྛཱཔེཏབྦཾ. སཙེ པརིབྷོཛནཱིཡཾ ན ཧོཏི, པརིབྷོཛནཱིཡཾ ཨུཔཊྛཱཔེཏབྦཾ. སཙེ ཝཙྩཀུཊི ཨུཀླཱཔཱ ཧོཏི, ཝཙྩཀུཊི སམྨཛྫིཏབྦཱ. ཏཐཱ པསྶཱཝཊྛཱནེ ཨེཝཾ ཝཏྟཾ ཙརིཏབྦནྟི ཨཏྠོ. ‘‘ཝིཧཱརཾ སོདྷེནྟེན པཋམཾ པཏྟཙཱིཝརཾ ནཱིཧརིཏྭཱ ཨེཀམནྟཾ ནིཀྑིཔིཏབྦ’’ནྟིཨཱདིནཱ ནཡེན ཝུཏྟཾ ཝིཧཱརསོདྷནེ ཝཏྟཾ ནཱམ. ‘‘བྷཱུམཏྠརཎཾ ཨོཏཱཔེཏྭཱ སོདྷེཏྭཱ པཔྥོཊེཏྭཱ ཨཏིཧརིཏྭཱ ཡཐཱཔཉྙཏྟཾ པཉྙཱཔེཏབྦ’’ནྟིཨཱདིནཱ (མཧཱཝ. ༦༦, ༧༨; ཙཱུལ༹ཝ. ༣༧༦, ༣༨༠) ཝུཏྟཾ པུན པཉྙཱཔནེ ཝཏྟཾ ནཱམ.

༡༤༨. ཨིདཱནི ཝིཧཱརཾ སོདྷེནྟེན ཨེཝཾ སོདྷེཏབྦནྟི ཏཾ དསྶེཏུཾ ‘‘ན པཔྥོཊེཡྻཱ’’ཏིཨཱདིམཱཧ ¶ . ཏསྶཏྠོ – ཝིཧཱརཾ སོདྷེནྟོ བྷིཀྑུ བྷཱུམཏྠརཎཱདིསཡནཱསནཾ པཊིཝཱཏེ ཝཱ པངྒཎེ ཝཱ པཱནཱིཡསཱམནྟཱ ཝཱ ན པཔྥོཊེཡྻཱཏི. པངྒཎེཏི བཧཱུནཾ སནྣིཔཱཏེ ཋཱནེ.

༡༤༩. ནྷཱནེཏི ¶ ‘‘སཙེ ཨུཔཛ྄ཛྷཱཡོ ནཧཱཡིཏུཀཱམོ ཧོཏི, ནཧཱནཾ པཊིཡཱདེཏབྦཾ. སཙེ སཱིཏེན ཨཏྠོ ཧོཏི, སཱིཏཾ པཊིཡཱདེཏབྦ’’ནྟིཨཱདིནཱ (མཧཱཝ. ༦༦; ཙཱུལ༹ཝ. ༣༧༦) ཝུཏྟཾ ནཧཱནེ ཝཏྟཾ ནཱམ, ‘‘ཨུཔཛ྄ཛྷཱཡསྶ གཏྟཏོ ཨུདཀཾ སམྨཛྫིཏབྦཾ, ནིཝཱསནཾ དཱཏབྦ’’ནྟིཨཱདིནཱ (མཧཱཝ. ༦༦; ཙཱུལ༹ཝ. ༣༧༦) ཝུཏྟཾ ནཧཱཏསྶ ཀཱཏབྦཾ ནཱམ. རངྒཔཱཀེཏི ‘‘སཙེ ཨུཔཛ྄ཛྷཱཡསྶ ཨཱཙརིཡསྶ རཛནཾ པཙིཏབྦཾ ཧོཏི, སདྡྷིཝིཧཱརིཀེན ཨནྟེཝཱསིཀེན པཙིཏབྦ’’ནྟི (མཧཱཝ. ༦༦, ༧༨; ཙཱུལ༹ཝ. ༣༧༦, ༣༨༠) ཝུཏྟཾ. དྷོཝནེཏི ‘‘སཙེ ཨུཔཛ྄ཛྷཱཡསྶ ཨཱཙརིཡསྶ ཙཱིཝརཾ དྷོཝིཏབྦཾ ཧོཏི, སདྡྷིཝིཧཱརིཀེན ཨནྟེཝཱསིཀེན དྷོཝིཏབྦཾ, ཨུསྶུཀྐཾ ཝཱ ཀཱཏབྦ’’ནྟི (མཧཱཝ. ༦༦, ༧༨; ཙཱུལ༹ཝ. ༣༧༦, ༣༨༠) ཝུཏྟཾ. སིབྦནེཏི ‘‘སཙེ ཨུཔཛ྄ཛྷཱཡེན ཨཱཙརིཡེན ཙཱིཝརཾ ཀཱཏབྦཾ ཧོཏི, སདྡྷིཝིཧཱརིཀེན ཨནྟེཝཱསིཀེན ཀཱཏབྦ’’ནྟི (མཧཱཝ. ༦༦, ༧༨; ཙཱུལ༹ཝ. ༣༧༦, ༣༨༠) ཝུཏྟཾ. ཙཱིཝརེ ཐེཝེ ཋིཏེ རཛནྟོ ན ཝཛེ ན པཀྐམེཡྻཱཏི ཨཏྠོ. ‘‘ཙཱིཝརཾ རཛནྟེན སཱདྷུཀཾ སམྤརིཝཏྟཀཾ སམྤརིཝཏྟཀཾ རཛིཏབྦཾ, ན ཙ ཨཙྪིནྣེ ཐེཝེ པཀྐམིཏབྦ’’ནྟི (མཧཱཝ. ༦༦, ༧༨; ཙཱུལ༹ཝ. ༣༧༦, ༣༨༠) ཧི ཝུཏྟཾ.

༡༥༠. ཨེཀཙྩསྶཱཏི ཨཱཙརིཡུཔཛ྄ཛྷཱཡཱནཾ ཝིསབྷཱགསྶ ཨནཏྠཀཱམསྶ ཝེརིཔུགྒལསྶ. ཨནཱཔུཙྪཱཏི ཨཱཙརིཡུཔཛ྄ཛྷཱཡཱནཾ ཨནཱརོཙེཏྭཱ. ཀིཉྩནནྟི ཡཾ ཀིཉྩི.

༡༥༡-༢. ཏསྶཱཏི ཨེཀཙྩསྶ. ནིནྣེཏུནྟི ནཱིཧརིཏུཾ. ཀིཙྩཡཾ པརིཀམྨཾ ཝཱཏི ཝེཡྻཱཝཙྩཾ ཝཱ པིཊྛིཔརིཀམྨཱདིཔརིཀམྨཾ ཝཱ ཨཏྟནཱ ཏསྶ ཀཱཏུཾ ཝཱ ཏེན ཨཏྟནོ ཀཱརཱཔེཏུཾ ཝཱཏི ཨེཝམཏྠོ ཝེདིཏབྦོ.

༡༥༣. སཙེ ཨཱཙརིཡུཔཛ྄ཛྷཱཡཱ ཨཉྙཏྠ གཏཱ ཧོནྟི, པརིཝེཎཾ གནྟྭཱ ཨཔསྶནྟེཧི གཱམཾ པཝིསིཏུཾ ཝཊྚཏི. གཱམཾ པཝིསནྟོ སཙེ པསྶཏི, ཨཱཔུཙྪིཏབྦམེཝཱཏི ཝདནྟི. ‘‘ཨུཔཛ྄ཛྷཱཡཾ ¶ ཨནཱཔུཙྪཱ ན དིསཱ པཀྐམིཏབྦཱ’’ཏི (མཧཱཝ. ༦༦, ཙཱུལ༹ཝ. ༣༧༦) ཧི ཝུཏྟཾ. ཨཏྟནོ ཀིཙྩཡཾ ནཱམ ཨནྟོཝིཧཱརེཔི ཨཏྟནོ པཏྟཔཙནཙཱིཝརཀམྨཀེསཙྪེདནཱདི.

༡༥༤. སངྒྷཱཡཏྟཀམྨཱནི ¶ ནཱམ པརིཝཱསམཱནཏྟཨབྦྷཱནཏཛྫནཱིཡནིཡསྶཔབྦཱཛནཱིཡཔཊིསཱརཎཱིཡཨུཀྑེཔནཱདཡོ.

༡༥༥. ཝུཊྛཱནཾ ནེསམཱགམེཏི ‘‘སཙེ ཨུཔཛ྄ཛྷཱཡོ ཝཱ ཨཱཙརིཡོ ཝཱ གིལཱནོ ཧོཏི, ཡཱཝཛཱིཝཾ ཨུཔཊྛཱཏབྦོ, ཝུཊྛཱནམསྶ ཨཱགམེཏབྦ’’ནྟི (མཧཱཝ. ༦༦; ཙཱུལ༹ཝ. ༣༧༦) ཧི ཝུཏྟཾ. ཨུཔཛ྄ཛྷཱཙརིཡཝཏྟཝིནིཙྪཡོ.

ཨུཔཛ྄ཛྷཱཙརིཡཝཏྟནིདྡེསཝཎྞནཱ ནིཊྛིཏཱ.

༡༦. ཝཙྩཔྤསྶཱཝཊྛཱནིཀནིདྡེསཝཎྞནཱ

༡༥༦. ཡཐཱཝུཌྜྷཾ ན ཀརེཡྻ ཝཙྩནྟི སམྦནྡྷོ. ཡཐཱནུཔུབྦིཡཱ ལབྦྷཏཱིཏི སམྦནྡྷོ. ཨིམེསུ པན ཏཱིསུ ཋཱནེསུ ཡོ ཡོ པཋམཾ ཨཱགཙྪཏི ཝུཌྜྷོ ཝཱ ནཝོ ཝཱ, སོ སོ ཨཱགཏཔཊིཔཱཊིཡཱ ཀཱཏུཉྩ ནཧཱཡིཏུཉྩ ལབྦྷཏཱིཏི ཨདྷིཔྤཱཡོ.

༡༥༧. ཨུབྦྷཛིཏྭཱཏི (ཙཱུལ༹ཝ. ༣༧༣, ༣༧༤) ནིཝཱསནཾ དཱུརཏོཝ ཨུཀྑིཔིཏྭཱ ནོ པཝིསེཡྻ. སཧསཱ ཙ ནོ པཝིསེཡྻཱཏི སམྦནྡྷོ. ‘‘བཧི ཋིཏེན ཨུཀྐཱསིཏབྦ’’ནྟི ཙ ‘‘སཱདྷུཀཾ ཨཏརམཱནེན ཝཙྩཀུཊི པཝིསིཏབྦཱ’’ཏི ཙ ཝུཏྟཏྟཱ ཨུཀྐཱསིཏྭཱཝ ཨཏརམཱནོ པཝིསེཡྻཱཏི ཨཏྠོ. ‘‘ན ཨུབྦྷཛིཏྭཱ པཝིསིཏབྦཱ, ཝཙྩཔཱདུཀཱཡ ཋིཏེན ཨུབྦྷཛིཏབྦ’’ནྟི (ཙཱུལ༹ཝ. ༣༧༤) ཝཙནཏོ ‘‘ཨུབྦྷཛེཡྻ པཱདུཀཱསྭེཝ སཎྛིཏོ’’ཏི ཝུཏྟཾ.

༡༥༨. ན ¶ ཀརེཡྻ ཨུབྷཡཾ ན ཀརེཡྻུབྷཡཾ.

༡༥༩. ཀཱུཔེཏི (ཙཱུལ༹ཝ. ༣༧༤) ཝཙྩཀཱུཔེ. ཀཊྛནྟི ཨཝལེཁནཀཊྛཾ. པསྶཱཝདོཎིཡཱ ཁེལ༹ཾ ན ཀཱཏབྦནྟི ཨཏྠོ. ནཱཝལེཁེཡྻ ཕརུསེནཱཏི ཕཱལིཏཀཊྛེན ཝཱ ཁརེན ཝཱ གཎྛིཀེན ཝཱ ¶ ཀཎྚཀེན ཝཱ སུསིརེན ཝཱ པཱུཏིནཱ ཝཱ ནཱཝལེཁིཏབྦནྟི ཨཏྠོ. ཨུཧཏཉྩཱཔཱིཏི གཱུཐམཀྑིཏམྤི དྷོཝཡེ ཨཏྟནཱ ཝཱ པརེན ཝཱ ཀཏནྟི ཨདྷིཔྤཱཡོ.

༡༦༠. ཨུབྦྷཛིཏྭཱ ན ནིཀྑམེཏི ཨེཏྠ ‘‘ཝཙྩཔཱདུཀཱཡ ཋིཏེན པཊིཙྪཱདེཏབྦ’’ནྟི (ཙཱུལ༹ཝ. ༣༧༤) ཧི ཝུཏྟཾ, པུན ‘‘ཨཱཙམནཔཱདུཀཱཡཾ ཋིཏེན ཨུབྦྷཛིཏབྦ’’ནྟི (ཙཱུལ༹ཝ. ༣༧༤) ཙ ཝུཏྟཾ. ‘‘ཙཔུ ཙཔཱུ’’ཏི སདྡཾ ཀཏྭཱ ནཱཙམེཡྻཱཏི ཨཏྠོ. ཝཙྩཔྤསྶཱཝཊྛཱནིཀཝིནིཙྪཡོ.

ཝཙྩཔྤསྶཱཝཊྛཱནིཀནིདྡེསཝཎྞནཱ ནིཊྛིཏཱ.

༡༦༢. ཏཏྠ ཏཏྠ སནྣིཔཏིཏཱནཾ སབྦེསཾ ཝུཌྜྷོ ཝུཌྜྷཏརོ, ཏསྨིཾ ཝུཌྜྷཏརཱགམེ པུན ཨཱཔུཙྪནཾ ནཏྠི. བྷཏྟགྒེ ཙཱནུམོདཏོཏི ཨེཏྠ དཱནཔཏིནཱ ཡཱཙིཏེན དཧརེན ཝུཌྜྷེན ཨནཱཔུཙྪིཏྭཱ ཀཐེཏུཾ ཝཊྚཏཱིཏི ཝདནྟི.

༡༦༣. ཨེཀཝིཧཱརཀེཏི ཨེཀོཝརཀེ ཝུཌྜྷེན ཝསནྟོ ཨནཱཔུཙྪཱ ན སཛ྄ཛྷཱཡེཡྻཱཏི ཨཏྠོ. ཨུདྡེསཾ པརིཔུཙྪཉྩ ནོ དདེཏི ཨུདྡེསཾ ཝཱ པརིཔུཙྪཾ ཝཱ ནོ དདེཡྻ.

༡༦༤. ན ¶ ཝིཝརེཡྻ ན ཐཀེཡྻ ཙཱཏི སམྦནྡྷོ. དྭཱརཾ ནཱམ མཧཱཝལ༹ཉྫཾ, ཏཏྠ ཨཱཔུཙྪནཀིཙྩཾ ནཏྠི.

༡༦༥. ཝུཌྜྷེན ཙངྐམེ ཙངྐམནྟོཔི ཡེན ཝུཌྜྷོ, ཏེན པརིཝཏྟཡེཏི སམྦནྡྷོ. ཨཱཔུཙྪཀརཎཝིནིཙྪཡོ.

ཨཱཔུཙྪཀརཎནིདྡེསཝཎྞནཱ ནིཊྛིཏཱ.

༡༦༦. ‘‘ན ¶ ཏྭེཝ ནགྒེན ཨཱགནྟབྦཾ, ཡོ ཨཱགཙྪེཡྻ, ཨཱཔཏྟི དུཀྐཊསྶཱ’’ཏི (པཱརཱ. ༥༡༧) ཝུཏྟཏྟཱ (ཙཱུལ༹ཝ. ༢༦༡;) ‘‘ནགྒོ མགྒཾ ན ཝཛེ’’ཏི ཝུཏྟཾ.

༡༦༧. པཊིཙྪཱདིསཱུཏི ‘‘ཏེན ཁོ པན སམཡེན བྷིཀྑཱུ ཛནྟཱགྷརེཔི ཨུདཀེཔི པརིཀམྨཾ ཀཱཏུཾ ཀུཀྐུཙྩཱཡནྟི. ཨནུཛཱནཱམི, བྷིཀྑཝེ, ཏིསྶོ པཊིཙྪཱདིཡོ ཛནྟཱགྷརཔྤཊིཙྪཱདིཾ ཨུདཀཔྤཊིཙྪཱདིཾ ཝཏྠཔྤཊིཙྪཱདི’’ནྟི ཨེཝཾ ཝུཏྟཱསུ ཏཱིསུ པཊིཙྪཱདཱིསཱུཏི ཨཏྠོ. དུཝེཏི ཨེཏཱསུ ཏཱིསུ པཊིཙྪཱདཱིསུ ཨུདཀཛནྟཱགྷརཔྤཊིཙྪཱདིཡོ པརིཀམྨེ ཀཔྤནྟཱིཏི ཨདྷིཔྤཱཡོ. ཝཏྠཙྪཱདཱིཏི ཝཏྠཔྤཊིཙྪཱདི. སབྦཏྠཱཏི ཁཱདནཱིཡསཱཡནཱིཡཱདཱིསུ སབྦཀམྨེསུ ཀཔྤིཡཱཏི ཨཏྠོ. ནགྒཝིནིཙྪཡོ.

༡༦༨. པུརཏོཏི (ཙཱུལ༹ཝ. ༣༧༢) ཐེརཱནཾ པུརཏོ ཨུཔརི ཝཱ ན ཙ ནྷཱཡེཡྻཱཏི ཨཏྠོ.

༡༦༩-༡༧༡. ཀུཊྚཏྠམྦྷཏརུཊྚཱནེཏི ¶ ཨེཏྠ (ཙཱུལ༹ཝ. ༢༤༣; ཙཱུལ༹ཝ. ཨཊྛ. ༢༤༣) ཀུཊྚེ ཝཱ ཐམྦྷེ ཝཱ ཏརུམྷི ཝཱ ཨཊྚཱནཕལཀེ ཝཱ ཀཱཡཾ ན གྷཾསཡེཏི ཨཏྠོ. གནྡྷབྦཧཏྠོ ནཱམ མཀྐཊཧཏྠསདིསོ དཱརུཨཱདིམཡོ. ཀུརུཝིནྡཀསུཏྟིཡཱཏི ཀུརུཝིནྡསུཏྟིཡཱ. མལླཀེན ཝཱ ཨཉྙམཉྙཾ ཝཱ. ‘‘ན བྷིཀྑཝེ ཝིགྒཡ྄ཧ པརིཀམྨཾ ཀཱརཱཔེཏབྦཾ. ཡོ ཀཱརཱཔེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༢༤༣) ཨེཝཾ ཝུཏྟཾ ཝིགྒཧཔརིཀམྨཾ སནྡྷཱཡ ‘‘ཨཉྙམཉྙཾ ཝཱ’’ཏི ཝུཏྟཾ.

ཨིདཱནི ཀཔྤིཡཱནི དསྶེཏུཾ ‘‘ཀཔཱལིཊྛཀཁཎྜཱནཱི’’ཏིཨཱདིམཱཧ. སབྦེསཾ ཝཊྚཏཱིཏི སམྦནྡྷོ ¶ . གིལཱནསྶཔི (ཙཱུལ༹ཝ. ཨཊྛ. ༢༤༣) ཨགིལཱནསྶཔི ཨིམཱནི ཀཔཱལིཊྛཀཁཎྜཱདཱིནི ཀཱཡགྷཾསནེ ཝཊྚནྟི. པུཐུཔཱཎཱིཏི (ཙཱུལ༹ཝ. ༢༤༤) ཧཏྠཔརིཀམྨཾ ཝུཙྩཏི. ཏསྨཱ སབྦེསཾ ཧཏྠེན པིཊྛིཔརིཀམྨཾ ཀཱཏུཾ ཝཊྚཏི. ཨཀཏམལླཀཾ ནཱམ ཨེཀདཱཋིམཾ པརིཙྪིནྡིཏྭཱ ཀཏཾ. པཱསཱཎཱདཡོ པཱདགྷཾསནེ ཨེཝ ཀཔྤིཡཱ. ནྷཱནཀཔྤཝིནིཙྪཡོ.

༡༧༢. ‘‘ནཱནཱསཾཝཱསཀོ ཝུཌྜྷཏརོ ཨདྷམྨཝཱདཱི ཨཝནྡིཡོ’’ཏི (ཙཱུལ༹ཝ. ༣༡༢; པརི. ༤༦༧) ཨེཝཾ ཝུཏྟཏྟཱ ལདྡྷིནཱནཱསཾཝཱསཀོ ཨིདྷ ནཱནཱསཾཝཱསཀོ. པཱརིཝཱསིཡམཱུལཱཡཔཊིཀསྶནཱརཧམཱནཏྟཱརཧམཱནཏྟཙཱརིཨབྦྷཱནཱརཧཱ གརུཀཊྛཱཏི ཨིདྷ གཧིཏཱ. ཨིམེ པན ཨཉྙམཉྙཾ ཡཐཱཝུཌྜྷཾ ཝནྡནཱདཱིནི ལབྷནྟི, པཀཏཏྟེན ཨཝནྡནཱིཡཱཏི ཨདྷིཔྤཱཡོ. ཨཝནྡནཱིཡཝིནིཙྪཡོ.

༡༧༣. ཨིདཱནི ¶ ‘‘ཨནུཛཱནཱམི, བྷིཀྑཝེ, སབྦཔཙྩནྟིམེསུ ཛནཔདེསུ ཙམྨཱནི ཨཏྠརཎཱནི ཨེལ༹ཀཙམྨཾ ཨཛཙམྨཾ མིགཙམྨ’’ནྟི (མཧཱཝ. ༢༥༩) ཨེཝཾ ཝུཏྟཙམྨཱནི དསྶེཏུཾ ‘‘མིགཱཛེལ༹ཀཙམྨཱནཱི’’ཏིཨཱདིམཱཧ. པརིབྷུཉྫིཏུནྟི (མཧཱཝ. ཨཊྛ. ༢༦༢) མཉྩཱདཱིསུ ཡཏྠ ཀཏྠཙི ཨཏྠརིཏྭཱ ནིཔཛྫིཏུཾ ཝཱ ནིསཱིདིཏུཾ ཝཱ ཝཊྚནྟཱིཏི ཨཏྠོ. རོཧིཏེཎཱིཔསདཱ ཙ ཀུརུངྒཱ ཙ ཙ-སདྡེན ཨཉྙེཔི ཝཱལ༹མིགཱ མིགམཱཏུཀཱདཡོཔི མིགཛཱཏིཀཱ ཨེཝཱཏི ཨདྷིཔྤཱཡོ.

‘‘མཀྐཊོ ¶ ཀཱལ༹སཱིཧོ ཙ, སརབྷོ ཀདལཱིམིགོ;

ཡེ ཙ ཝཱལ༹མིགཱ ཀེཙི, ཏེསཾ ཙམྨཾ ན ཝཊྚཏཱི’’ཏི. –

ཨེཏྠ ཝཱལ༹མིགགྒཧཎེན ཝུཏྟཱཝསེསཱ ཨནྟམསོ གོམཧིཾསཱདཡོ གཧིཏཱཏི ཝེདིཏབྦཱ. ཐཝིཀཱཏི ཨུཔཱཧནཀོསཀསཏྠཀོསཀཀུཉྩིཀཀོསཀཱཏི ཝེདིཏབྦཱ, ན པཏྟཏྠཝིཀཱདཡོ. ཙམྨཝིནིཙྪཡོ.

༡༧༥. གུཎངྒུཎཱུཔཱཧནཱཏི (མཧཱཝ. ཨཊྛ. ༢༤༥) ཙཏུཔཊལཏོ པཊྛཱཡ ཝུཙྩཏི, ན ཨེཀདྭིཏིཔཊལཏོ པཊྛཱཡ ‘‘ཨནུཛཱནཱམི, བྷིཀྑཝེ, ཨེཀཔལཱསིཀཾ ཨུཔཱཧནཾ, ན བྷིཀྑཝེ དིགུཎཱ ཨུཔཱཧནཱ དྷཱརེཏབྦཱ, ན ཏིགུཎཱ ཨུཔཱཧནཱ དྷཱརེཏབྦཱ, ན གུཎངྒུཎཱུཔཱཧནཱ དྷཱརེཏབྦཱ, ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༢༤༥) ཝུཏྟཏྟཱ. ‘‘ཨནུཛཱནཱམི, བྷིཀྑཝེ, ཨོམུཀྐཾ གུཎངྒུཎཱུཔཱཧནཾ, ན ¶ བྷིཀྑཝེ ནཝཱ གུཎངྒུཎཱུཔཱཧནཱ དྷཱརེཏབྦཱ, ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༢༤༧) ཝུཏྟཏྟཱ ‘‘ནཝཱ’’ཏི ཝུཏྟཾ. སབྦཏྠཱཔི མཛ྄ཛྷིམདེསེ གིལཱནོཔི ནཝཾ གུཎངྒུཎཱུཔཱཧནཾ ན ལབྷཏི, ཨེཀཝཱརམྤི ཨཉྙེཧི པརིབྷུཏྟཾ ཨོམུཀྐཨུཔཱཧནསངྑཱཏཾ ལབྷཏི, པཙྩནྟིམེསུ ཛནཔདེསུ གིལཱནོ ནཝམྤི ལབྷཏཱིཏི ཝེདིཏབྦཾ ‘‘ཨནུཛཱནཱམི, བྷིཀྑཝེ, སབྦཔཙྩནྟིམེསུ ཛནཔདེསུ གུཎངྒུཎཱུཔཱཧན’’ནྟི (མཧཱཝ. ༢༥༩) ཨཝིསེསེན ཝུཏྟཏྟཱ.

སབྦསྶཱཏི གིལཱནསྶཱཔི ཨགིལཱནསྶཱཔཱིཏི ཨཏྠོ. མཛ྄ཛྷིམདེསེཔི པཙྩནྟིམདེསེཔི ཨཱརཱམེ ཨཱརཱམཱུཔཙཱརེ གིལཱནསྶཱཔི ཨགིལཱནསྶཱཔི ‘‘ཨནུཛཱནཱམི, བྷིཀྑཝེ, ཨཛ྄ཛྷཱརཱམེ ཨུཔཱཧནཾ དྷཱརེཏུ’’ནྟི (མཧཱཝ. ༢༤༩) ཝུཏྟཏྟཱ ཀཔྤིཡནྟི ཨཏྠོ. སབྦཏྠཱཏི ཨཱརཱམེཔི གཱམེཔི. ཨཀལླཀསྶཱཏི གིལཱནསྶ. ཨེཏྠ པན མཛ྄ཛྷིམདེསེ གིལཱནསྶ གུཎངྒུཎཱུཔཱཧནཱ པརིབྷུཏྟཱཝ ཨཱརཱམེཔི གཱམེཔི ཝཊྚཏི, པཙྩནྟིམདེསེ ཨཔརིབྷུཏྟཱཔི. མཛ྄ཛྷིམདེསེཔི པཙྩནྟིམདེསེཔི བྷགཝཏཱ གིལཱནསྶེཝ ཨུཔཱཧནཱ ཨནུཉྙཱཏཱ ‘‘ཨནུཛཱནཱམི, བྷིཀྑཝེ, ཡསྶ པཱདཱ ཝཱ དུཀྑཱ, པཱདཱ ཝཱ ཕལིཏཱ, པཱདཁིལོ ཝཱ ཨཱབཱདྷོ, ཨུཔཱཧནཾ དྷཱརེཏུ’’ནྟི (མཧཱཝ. ༢༤༩) ཙ ¶ ‘‘ཨནུཛཱནཱམི, བྷིཀྑཝེ, གིལཱནེན བྷིཀྑུནཱ སཨུཔཱཧནེན གཱམཾ པཝིསིཏུ’’ནྟི (མཧཱཝ. ༢༥༦) ཝུཏྟཏྟཱ ཙ. མཛ྄ཛྷིམདེསེ ཙ གིལཱནོ ནཝཾ གུཎངྒུཎཱུཔཱཧནཾ དྷཱརེཏུཾ ཡདི ལབྷཏི, ཀཐཾ པདེསཔཉྙཏྟི ཧོཏཱིཏི? སབྦཏྠ པན བྷགཝཏཱ གིལཱནསྶེཝ ཨུཔཱཧནཱ ཨནུཉྙཱཏཱ, ཏསྨཱ མཛ྄ཛྷིམདེསེ གིལཱནོ ནཝཾ གུཎངྒུཎཱུཔཱཧནཾ ལབྷཏཱིཏི གཧེཏབྦནྟི ཝདནྟི.

༡༧༦-༩. སབྦཱཝ ནཱིལཀཱ (མཧཱཝ. ༢༤༦; མཧཱཝ. ཨཊྛ. ༢༤༦) སབྦནཱིལཀཱ. ཨེས ནཡོ སབྦཏྠ ཨོདཱཏཀཱདཱིསུཔི. ཨོདཱཏཾ པན ནེཝ པཱལི༹ཡཾ, ན ཨཊྛཀཐཱཡཾ ¶ པཊིཀྑིཏྟཾ, ཨནུལོམཝསེན པན ཨིདྷ པཊིཀྑིཏྟནྟི ཝེདིཏབྦཾ. མཧཱརངྒརཏྟཱ སཏཔདིཔིཊྛིཝཎྞཱ. མཧཱནཱམརངྒརཏྟཱ མནྡརཏྟཱ. མཉྫེཊྛིཀཱ ཀཎཝེརཔུཔྥཝཎྞཱ. པུཔྥལཏཱདཱིཧི ཝིཙིཏྟཱ ཙིཏྲཱ. ནཱིལཔཱིཏཱདིཝདྡྷིཀཱཏི ཨེཏྠ ཨཱདི-སདྡེན ཨོདཱཏལོཧིཏམཉྫེཊྛིཀམཧཱརངྒམཧཱནཱམརངྒརཏྟཱདིཝསེན ཝདྡྷིཀཱ གཧིཏཱ. སཱིཧབྱགྒྷུདྡཱཛིནདཱིཔཱིནཾ ཙམྨེཧི ཙཱཏི སམྦནྡྷོ. ཀོཙཱིཏི གིལཱནོཔི ཨགིལཱནོཔི.

༡༨༠. སཀལཾ ཝཱ ཨེཀདེསཀཾ ཝཱ རཛནཾ ཙོལེ༹ན (མཧཱཝ. ཨཊྛ. ༢༤༦) པུཉྪིཏྭཱ ཝལ༹ཉྫེཡྻཱཏི ཨཏྠོ. ཁལླཀཱདིཀཾ པན སབྦཾ ཧཱརིཏྭཱ ཝལ༹ཉྫེཏབྦཾ. ཨུཔཱཧནཝིནིཙྪཡོ.

༡༨༡. ཨིཏྠིཡཱཏི ཏདཧུཛཱཏཱཡཔི དཱརིཀཱཡ. ཨཱདཱསེ (ཙཱུལ༹ཝ. ༢༤༧) ཝཱ ཨུདཀཔཏྟེ ཝཱ ཨཏྟནོ མུཁཾ ཨཝལོཀེཡྻ, ཨསྶ དུཀྐཊནྟི སམྦནྡྷོ. ‘‘ཨནུཛཱནཱམི, བྷིཀྑཝེ, ཨཱབཱདྷཔཙྩཡཱ ཨཱདཱསེ ཝཱ ཨུདཀཔཏྟེ ཝཱ མུཁནིམིཏྟཾ ཨོལོཀེཏུ’’ནྟི (ཙཱུལ༹ཝ. ༢༤༧) ཝུཏྟཏྟཱཝཎཱདཱིནི ཝཱ ‘‘ཛིཎྞོ ནུ ཁོམྷི, ནོ ཝཱ’’ཏི ཨེཝཾ ཨཱཡུསངྑཱརཾ ཝཱ ཨོལོཀེཏུཾ ཝཊྚཏི. ཨནོལོཀིཡཝིནིཙྪཡོ.

ཨནོལོཀིཡནིདྡེསཝཎྞནཱ ནིཊྛིཏཱ.

༡༨༢. ཝཊྚཱ ¶ ¶ ཝཱ ཨཊྛསོལ༹སཾསཱ ཝཱ མཊྛཱ པུཔྥལཏཱདཱིཧི ཨཙིཏྟཀཱ ཨཉྫནཱི ཝཊྚཏཱིཏི ཨཏྠོ. ཏིསྶོཔི ཝཊྚནྟི, ཨེཀཱཡ ཝཱ དྭཱིསུ ཝཱ ཀཐཱ ཨེཝ ནཏྠཱིཏི ཨདྷིཔྤཱཡོ. ལེཁཱཏི ཝཊྚལེཁཱ. བནྡྷིཏུནྟི པིདྷཱནཀབནྡྷནཏྠཾ.

༡༨༣. རཱུཔནྟི སཀུཎརཱུཔཱདི. ཡདི ཙ ཨེདིསཾ ཨཉྙེཧི ཀཏཾ ལབྷཏི, གྷཾསིཏྭཱ ཝཱ ཚིནྡིཏྭཱ ཝཱ ཡཐཱ ཝཱ ན པཉྙཱཡཏི, ཏཐཱ སུཏྟེན ཝེཋེཏྭཱ ཝལ༹ཉྫེཏབྦཾ.

༡༨༤. ཐཝིཀཱཏི ཨཉྫནིཐཝིཀཱ. ཨཉྫནིསལཱཀཱཔི ལབྦྷཏཱིཏི སམྦནྡྷོ.

༡༨༥-༦. ཨཊྛཱིཏི (མཧཱཝ. ༢༦༦; མཧཱཝ. ཨཊྛ. ༢༦༤) མནུསྶཊྛིཾ ཋཔེཏྭཱ ཨཝསེསཊྛི. ཝིསཱཎདནྟེསུ ཨཀཔྤིཡཾ ནཱམ ནཏྠི. ཨཱམལཀཀཀྐཱདཱིཧི ཀཏཱ ཕལམཡཱ. ཏམྨཡཱཏི ཨིདྷ ཝུཏྟེཧེཝ ནིབྦཏྟཱ. ཨཉྫནཱིཝིནིཙྪཡོ.

༡༨༧-༩. ‘‘ཨུཙྩཀོ ཨཱསནྡིཀོ ཨུཔྤནྣོ ཧོཏི, ཨནུཛཱནཱམི བྷིཀྑཝེ ཨུཙྩཀམྤི ཨཱསནྡིཀ’’ནྟི (ཙཱུལ༹ཝ. ༢༩༧) ཝཙནཏོ མཉྩསྶ ཨུཔཌྜྷབྷཱགཔྤམཱཎེན ཨེཀཏོབྷཱགེན དཱིགྷམྤི སུགཏངྒུལེན ཨཏིརེཀཊྛངྒུལཔཱདཀཾ ཨིདྷ ཨཱསནྡཱིཏི ཨདྷིཔྤེཏཾ, ཙཏུརཾསཱསནྡིཀོ པན པམཱཎཱཏིཀྐནྟཀོཔི ཝཊྚཏི. ཏཱུལཱིཏི ¶ པཀཏིཏཱུལིཀཱ. པལླངྐོནཱམ ཨཱཧརིམེཧི ཝཱལེ༹ཧི ཀཏོཏི ཝུཏྟོ. ཏཏྠེཝ ‘‘སཱིཧརཱུཔཱདིཾ དསྶེཏྭཱ ཀཏོ པན ཝཊྚཏཱི’’ཏི ཝདནྟི. པཊིཀནྟི སེཏཏྠརཎཾ. གོནཙིཏྟཀནྟི ཨེཏྠ ཙཏུརངྒུལཱདྷིཀལོམོ ཀོཛཝོ ‘‘གོནཀོ’’ཏི ཝུཙྩཏི. ‘‘ཨནུཛཱནཱམི, བྷིཀྑཝེ, ཀོཛཝ’’ནྟི (མཧཱཝ. ༣༣༧) ཙཱིཝརཀྑནྡྷཀེ ཝུཏྟཏྟཱ ཙཏུརངྒུལལོམཀཾ པཀཏིཀོཛཝཾ ཝཊྚཏི. རཏནཙིཏྟཾ ཙིཏྟཀཾ ན ཝཊྚཏི. པཊལཱིཏི གྷནཔུཔྥརཏྟཨཏྠརཎཾ ¶ . ཝིཀཏཱིཏི སཱིཧབྱགྒྷཱདིརཱུཔཝིཙིཏྟོ ཨུཎྞཱམཡཏྠརཎཀོ. ཨུདྡལོམཱིཏི ཨེཀཏོཨུགྒཏཔུཔྥཾ. ཨེཀནྟལོམིཀཱཏི ཨུབྷཏོཨུགྒཏཔུཔྥཾ.

ཀུཏྟནྟི སོལ༹སནྣཾ ནཱཊཀིཏྠཱིནཾ ཋཏྭཱ ནཙྩནཡོགྒཾ ཨུཎྞཱམཡཏྠརཎཾ. ཀོསེཡྻནྟི རཏནཔརིསིབྦིཏཾ ཀོསེཡྻསུཏྟམཡཾ པཙྩཏྠརཎཾ. ཀཊྚིསྶནྟི རཏནཔརིསིབྦིཏཾ ཀོསེཡྻཀཊྚིསྶམཡཾ པཙྩཏྠརཎཾ. ཀོསེཡྻཉྩ ཀཊྚིསྶཉྩ རཏནཔརིསིབྦིཏཱནེཝ ན ཝཊྚནྟི, སུདྡྷཱནི ཝཊྚནྟི. ཧཏྠིཨསྶརཐཏྠརཱ ཏེསཾ ཨུཔརི ཨཏྠརཎཀཨཏྠརཎཱཝ. ཨཛིནཔྤཝེཎཱིཏི ཨཛིནཙམྨེཧི མཉྩཔྤམཱཎེན སིབྦིཏྭཱ ཀཏཱ པཝེཎཱི, ཏེན ཙ ཀདལཱིམིགཙམྨཾ སེཏཝཏྠསྶ ཨུཔརི པཏྠརིཏྭཱ སིབྦིཏྭཱ ཀཏཾ པཝརཔྤཙྩཏྠརཎཾ ཀདལཱིམིགཔྤཝརཔྤཙྩཏྠརཎཾ, ཏེན ཙ ཨཏྠཏཾ ཨཛིནཔྤཝེཎཱིཀདལཱིམིགཔྤཝརཔྤཙྩཏྠརཎཏྠཏཾ.

སེཏཝིཏཱནམྤི ཧེཊྛཱ ཨཀཔྤིཡཔྤཙྩཏྠརཎེ སཏི ན ཝཊྚཏི, ཀཔྤིཡཔྤཙྩཏྠརཎེ སཏི ཝཊྚཏི, རཏྟཝིཏཱནསྶ ཧེཊྛཱ ཀཔྤིཡཔྤཙྩཏྠརཎེ སཏིཔི ན ཝཊྚཏི ཨེཝ. སཱིསཱུཔདྷཱནཾ པཱདཱུཔདྷཱནནྟི མཉྩསྶ ཨུབྷཏོལོཧིཏཀཾ ཨུཔདྷཱནཾ ན ཝཊྚཏི. ཡཾ པན ཨེཀམེཝ ཨུཔདྷཱནཾ ཧོཏི, ཨུབྷོསུ ཨནྟེསུ རཏྟཾ ཝཱ པདུམཝཎྞཾ ཝཱ ཙིཏྟཾ ཝཱ, སཙེ པམཱཎཡུཏྟཾ, ཝཊྚཏི, མཧཱཨུཔདྷཱནཾ པན པཊིཀྑིཏྟཾ.

༡༩༠. ཨཱསནྡཱདིཏྟཡཱཏི ¶ ཨཱསནྡཱི ཏཱུལཱི པལླངྐོཏི ཨིདཾ ཏཡཾ ནཱམཾ. ‘‘ཨནུཛཱནཱམི, བྷིཀྑཝེ, ཋཔེཏྭཱ ཏཱིཎི ཨཱསནྡིཾ པལླངྐཾ ཏཱུལིཀཾ སེསཀཾ གིཧིཝིཀཊཾ ཨབྷིནིསཱིདིཏུཾ, ན ཏྭེཝ ཨབྷིནིཔཛྫིཏུ’’ནྟི (ཙཱུལ༹ཝ. ༣༡༤) ཧི ཝུཏྟཾ. སེསེ གིཧིསནྟཀེ ནིསཱིདིཏུཾ ལབྦྷཏཱིཏི ཨཏྠོ. ཡདི དྷམྨཱསནེ སངྒྷིཀམྤི གོནཀཱདིཾ བྷིཀྑཱུཧི ཨནཱཎཏྟཱ ཨཱརཱམིཀཱདཡོ སཡམེཝ པཉྙཔེནྟི ཙེཝ ནཱིཧརནྟི ཙ, ཨེཏཾ གིཧིཝིཀཊནཱིཧཱརཾ ནཱམ, ཨིམིནཱ གིཧིཝིཀཊནཱིཧཱརེན ཝཊྚཏི. བྷཏྟགྒཾ ནཱམ ཝིཧཱརེ ཨེཝ དཱནཊྛཱནཾ.

༡༩༡. ཙཏུནྣཾ པཱདཱནཾ, ཏཱིསུ པསྶེསུ ཨཔསྶཡཱནཉྩ ཝསེན སཏྟངྒོ. ཨེཀཔསྶེན ཡུཏྟོ པཉྩངྒོ. ཨིམེ པན སཏྟངྒཔཉྩངྒཱ ‘‘ཨནུཛཱནཱམི, བྷིཀྑཝེ, ཨུཙྩཀམྤི སཏྟངྒ’’ནྟི (ཙཱུལ༹ཝ. ༢༩༤) ཝུཏྟཏྟཱ པམཱཎཱཏིཀྐནྟཱཔི ཝཊྚནྟི. ཏེན ཝུཏྟཾ ‘‘ཨུཙྩཔཱདཀཱ’’ཏི. ཏཱུལོནདྡྷཱ མཉྩཔཱིཋཱ གྷརེཡེཝ ནིསཱིདིཏུཾ ཀཔྤནྟཱིཏི སམྦནྡྷོ.

༡༩༢. ཙཱིཝརཙྪཝིཡོཏི ¶ ཚནྣཾ ཙཱིཝརཱནཾ, ཚནྣཾ ཨནུལོམཙཱིཝརཱནཉྩ ཨཉྙཏརཙཱིཝརཙྪཝིཡོཏི ཨཏྠོ. སབྦཏྠཱཏི མཉྩེཔི པཱིཋེཔི བྷཏྟགྒེཔི ཨནྟརགྷརེཔཱིཏི ཨཏྠོ. ཨིམཱསཾ པན བྷིསཱིནཾ པམཱཎཔརིཙྪེདོཔི ནཏྠི, མཉྩཔཱིཋཱདཱིནཾ ཝསེན ཨནུརཱུཔཾ སལླཀྑེཏྭཱ པམཱཎཾ ཀཱཏབྦཾ.

༡༩༣. ‘‘ཏཱུལིཀཱ ཨུཔྤནྣཱ ཧོཏི. ཨནུཛཱནཱམི, བྷིཀྑཝེ, ཝིཛཊེཏྭཱ བིམྦོཧནཾ ཀཱཏུཾ, ཏཱིཎི ཏཱུལཱནི རུཀྑཏཱུལཾ ལཏཱཏཱུལཾ པོཊཀིཏཱུལ’’ནྟི (ཙཱུལ༹ཝ. ༢༩༧) ཝུཏྟཏྟཱ ཏཱུལཏྟཡཉྩ (ཙཱུལ༹ཝ. ཨཊྛ. ༢༩༧; ཀངྑཱ. ཨཊྛ. ཏཱུལོནནྡསིཀྑཱཔདཝཎྞནཱ) བིམྦོཧནེ ¶ ཝཊྚཏི. ཨིམེཧི ཏཱིཧི ཏཱུལེཧི སབྦེསཾ རུཀྑལཏཱཏིཎཱནཾ ཏཱུལཾ ཨནུཉྙཱཏནྟི ཝེདིཏབྦཾ. བྷིསིཡཾ པན ཀིཉྩི ཏཱུལཾ ན ཝཊྚཏིཡེཝ. བྷིསིགབྦྷོཏི བྷིསིཡཱ ཝུཏྟཾ ཙོལཱ༹དིཔཉྩཀཾ བིམྦོཧནེ ཨནུཉྙཱཏནྟི སམྦནྡྷོ. མིགཔཀྑིནནྟི སཱིཧཱདཱིནཾ སབྦཙཏུཔྤདཱནཾ ཧཾསམོརཱདཱིནཾ སབྦཔཀྑཱིནཾ ལོམཱནི ཀཔྤནྟི. མསཱུརཀེ ཨནུཉྙཱཏནྟི སམྦནྡྷོ.

༡༩༤. ཨིདཱནི བྷིསིཡཾ ཀཔྤིཡཱཀཔྤིཡཾ དསྶེཏུཾ ‘‘མནུསྶལོམ’’ནྟིཨཱདིམཱཧ. ཨུཎྞཱཡནྟི (ཙཱུལ༹ཝ. ༢༩༧; ཙཱུལ༹ཝ. ཨཊྛ. ༢༩༧) ཨུཎྞཱབྷིསིཡཾ མནུསྶལོམཾ ན ལབྦྷཏཱིཏི ཨཏྠོ. ཨུཎྞཱབྷིསིཡམྤི མནུསྶལོམཾ ཋཔེཏྭཱ ཡེསཾ ཀེསཉྩི པཀྑིཙཏུཔྤདཱནཾ ལོམཾ ཝཊྚཏཱིཏི ཨཏྠོ. པཎྞེཏི པཎྞབྷིསིཡཉྩ པུཔྥཉྩ སུདྡྷཾ ཏམཱལཔཏྟཉྩ ན ལབྦྷཾ, ཨཝསེསཾ ཡཾ ཀིཉྩི པཎྞཾ ལབྦྷཏཱིཏི ཨཏྠོ. ཏམཱལཔཏྟཀམྤི ཨཉྙེཧི མིསྶཾ ཝཊྚཏཱིཏི. ཙོལ༹ཝཱཀཏིཎེསུ ཨཀཔྤིཡཾ ནཱམ ནཏྠི. ཨཱསནཉྩེཝ ཨཔྤཊིཝེཀྑིཏཾ ན ལབྦྷནྟི ཨཱསནསཱམཉྙཏོ པསངྒེན ཝུཏྟཾ. ཨཀཔྤིཡསཡནཝིནིཙྪཡོ.

ཨཀཔྤིཡསཡནནིདྡེསཝཎྞནཱ ནིཊྛིཏཱ.

༡༩༥. ཏིཎྞཾ ཝསྶཱནཾ ཨནྟརཾ ཏིཝསྶནྟརཾ. ‘‘ཨནུཛཱནཱམི, བྷིཀྑཝེ, ཏིཝསྶནྟརེན སཧ ¶ ནིསཱིདིཏུ’’ནྟི (ཙཱུལ༹ཝ. ༣༢༠) ཧི ཝུཏྟཾ. ཡོ དྭཱིཧི ཝསྶེཧི (ཙཱུལ༹ཝ. ཨཊྛ. ༣༢༠) ཝུཌྜྷོ ཝཱ ནཝོ ཝཱ, སོ ཏིཝསྶནྟརོ ནཱམ.

༡༩༦. མུནཱིཏི བུདྡྷམུནི. སབྦེཧེཝཱཏི ཨནུཔསམྤནྣེཧིཔི.

༡༩༧. ཨནྟནྟི ¶ པཙྪིམཾ. ‘‘ཨནུཛཱནཱམི, བྷིཀྑཝེ, ཡཾ ཏིཎྞཾ པཧོཏི, ཨེཏྟཀཾ པཙྪིམཾ དཱིགྷཱསན’’ནྟི (ཙཱུལ༹ཝ. ༣༢༠) ཝུཏྟཏྟཱ ཡཾ ཏིཎྞཾ པཧོཏི, ཨེཏཾ སཾཧཱརིམཾ ཝཱ ཧོཏུ ཨསཾཧཱརིམཾ ཝཱ, ཏཐཱརཱུཔེསུ ཕལཀཁཎྜེསུཔི ནིསཱིདིཏུཾ ཝཊྚཏི. དྭིནྣནྟི དྭིནྣཾ སམཱནཱསནིཀཱནཾ. ‘‘ཨནུཛཱནཱམི, བྷིཀྑཝེ, དུཝགྒསྶ མཉྩཾ དུཝགྒསྶ པཱིཋ’’ནྟི (ཙུལ༹ཝ. ༣༢༠) ཝུཏྟཏྟཱ དྭེ སམཱནཱསནིཀཱ སཧ ནིསཱིདིཏུཾ ལབྷནྟི. ཨཉྙེཧི ཨསམཱནཱསནིཀེཧི, ཨནུཔསམྤནྣཱདཱིཧི ཝཱ དྭེ ཧུཏྭཱཔི ནིསཱིདིཏུཾ ན ལབྷནྟི. སམཱནཱསནིཀཝིནིཙྪཡོ.

སམཱནཱསནིཀནིདྡེསཝཎྞནཱ ནིཊྛིཏཱ.

༡༩༨. ཨུཀྑིཏྟོཏི ཨཱཔཏྟིཡཱ ཨདསྶནེ, ཨཔྤཊིཀམྨེ, པཱཔིཀཱཡ དིཊྛིཡཱ ཨཔྤཊིནིསྶགྒེ ཝཱ ཨུཀྑིཏྟཀོཏི ཏིཝིདྷོཔི ཨིདྷ ཨུཀྑིཏྟོ གཧིཏོ. ཨནུཔསམྤནྣོཏི ཨིམིནཱ སིཀྑམཱནསཱམཎེརསཱམཎེརཱིསིཀྑཱཔཙྩཀྑཱཏཀཱ གཧིཏཱཏི ཝེདིཏབྦཱ. ཚིནྣམཱུལཀོ ནཱམ ཨནྟིམཝཏྠུཾ ཨཛ྄ཛྷཱཔནྣཀོ. ནཱནཱསཾཝཱསོཏི ལདྡྷིནཱནཱསཾཝཱསཀོ. ‘‘ནཱནཱསཱིམཱཡ ཋིཏཙཏུཏྠོ ཀམྨཾ ཀརེཡྻ, ཨིདྡྷིཡཱ ཝེཧཱསེ ཋིཏཙཏུཏྠོ ཀམྨཾ ཀརེཡྻ, ཨཀམྨཾ ན ཙ ཀརཎཱིཡ’’ནྟི ཧི ཝུཏྟཏྟཱ ཨིམེཔི ‘‘ཨསཾཝཱསིཀཱ’’ཏི ཝུཏྟཱ. ཨེཏེསུ པན ཨུཀྑིཏྟཀེཧི སདྡྷིཾ ཨུཔོསཐཱདཱིནི ཀརོནྟོ པཱཙིཏྟིཡཾ ཨཱཔཛྫཏི. ནིསྶཱིམཊྛཝེཧཱསཊྛེཧི ཀརོནྟསྶ ཀམྨཾ ཀུཔྤཏི, དུཀྐཊཉྩ ཧོཏི, ཨིཏརེཧི དུཀྐཊཾ. ཨསཾཝཱསིཀཝིནིཙྪཡོ.

ཨསཾཝཱསིཀནིདྡེསཝཎྞནཱ ནིཊྛིཏཱ.

༡༩༩. ཨདྷམྨཀམྨནྟི ¶ ¶ ཨེཏྠ ཀཐཾ ཨདྷམྨཀམྨཾ ཧོཏཱིཏི ཙེ? ཝུཏྟཉྷེཏཾ བྷགཝཏཱ ‘‘ཀཏམཉྩ, བྷིཀྑཝེ, ཨདྷམྨཀམྨཾ? ཉཏྟིདུཏིཡེ ཙེ, བྷིཀྑཝེ, ཀམྨེ ཨེཀཱཡ ཉཏྟིཡཱ ཀམྨཾ ཀརོཏི, ན ཙ ཀམྨཝཱཙཾ ཨནུསྶཱཝེཏི, ཨདྷམྨཀམྨཾ. དྭཱིཧི ཉཏྟཱིཧི ཀམྨཾ ཀརོཏི, ན ཙ ཀམྨཝཱཙཾ ཨནུསྶཱཝེཏི, ཨདྷམྨཀམྨཾ. ཨེཀཱཡ ཀམྨཝཱཙཱཡ ཀམྨཾ ཀརོཏི, ན ཙ ཉཏྟིཾ ཋཔེཏི, ཨདྷམྨཀམྨཾ. དྭཱིཧི ཀམྨཝཱཙཱཧི ཀམྨཾ ཀརོཏི, ན ཙ ཉཏྟིཾ ཋཔེཏི, ཨདྷམྨཀམྨ’’ནྟི (མཧཱཝ. ༣༨༧). ཨིམིནཱ ནཡེན སེསཀམྨེསུཔི ཝུཏྟཔྤཀཱརེན ཨཀཏྭཱ ཨཉྙཐཱ ཀརཎཾ ཨདྷམྨཀམྨནྟི ཝེདིཏབྦཾ.

ཝགྒེནཱཏི ཝགྒེན སངྒྷེན. ཀཐཉྩ ཝགྒཾ ཧོཏཱིཏི ཙེ? ཡཱཝཏིཀཱ ཙ བྷིཀྑཱུ ཀམྨཔྤཏྟཱ, ཏེ ཨནཱགཏཱ ཧོནྟི, ཚནྡཱརཧཱནཾ ཚནྡོ ཨནཱཧཊོ ཧོཏི, སམྨུཁཱིབྷཱུཏཱ པཊིཀྐོསནྟི, ཝགྒཀམྨནྟི ཨིམེསུ ཡེན ཀེནཙི ཨེཀེནཔི ཨངྒེན ཝགྒཾ ཧོཏི.

སམགྒེནཱཏི སམགྒེན སངྒྷེན. ཀཐཾ སམགྒཾ ཧོཏཱིཏི ཙེ? ཡཱཝཏིཀཱ ཙ བྷིཀྑཱུ ཀམྨཔྤཏྟཱ, ཏེ ཨཱགཏཱ ཧོནྟི, ཚནྡཱརཧཱནཾ ཚནྡོ ཨཱཧཊོ ཧོཏི, སམྨུཁཱིབྷཱུཏཱ ནཔྤཊིཀྐོསནྟི, སམགྒཀམྨནྟི ཨེཝཾ.

ཙཏུཏྠནྟི སམགྒེན དྷམྨིཀཾ. ཨེཏྟཱཝཏཱ ‘‘ཙཏྟཱརིམཱནི, བྷིཀྑཝེ, ཀམྨཱནི, ཨདྷམྨེན ཝགྒཀམྨཾ, ཨདྷམྨེན སམགྒཀམྨཾ, དྷམྨེན ཝགྒཀམྨཾ, དྷམྨེན སམགྒཀམྨ’’ནྟི (མཧཱཝ. ༣༨༤) ཨེཝཾ ཝུཏྟཱནི ཙཏྟཱརི ཀམྨཱནི པརིགྒཧིཏཱནི ཧོནྟཱིཏི ཝེདིཏབྦཱནི.

༢༠༠-༢༠༢. དསཝགྒིཀོ (མཧཱཝ. ༣༨༨; ཀངྑཱ. ཨཊྛ. ནིདཱནཝཎྞནཱ) ཝཱིསཏིཝགྒིཀོ ཙ དསཝཱིསཏིཝགྒིཀོ. ཨབྦྷཱནོཔསམྤདཱཔྤཝཱརཎཱ ཋཔེཏྭཱ སབྦཀམྨེསུ ཀམྨཔྤཏྟོཏི སམྦནྡྷོ. ཨེཝཾ སེསེསུཔི. ཨིཏརོཏི ཝཱིསཏིཝགྒོ ཙ ཨཏིརེཀཝཱིསཏིཝགྒོ ཙ.

༢༠༣. ཨིདཱནི ¶ ཀམྨཔྤཏྟེ ཙ ཚནྡཱརཧེ ཙ དསྶེཏུཾ ‘‘ཙཏུཝགྒེནཱ’’ཏིཨཱདི ཝུཏྟཾ. ཏཏྠ (པརི. ༤༨༨, ༤༩༧; པརི. ༤༨༧-༤༨༨) པཀཏཏྟཱ ནཱམ ཡེ པཱརཱཛིཀཨུཀྑིཏྟལདྡྷིནཱནཱསཾཝཱསཀཱ ¶ ན ཧོནྟི. པརེཏི ཨེཀསཱིམཊྛཱ པཀཏཏྟཱ བྷིཀྑཱུ. ཡདི པཀཏཏྟཱ བྷིཀྑཱུཔི ཨཉྙཏརཾ གཱམསཱིམཾ ཝཱ ནདཱིསམུདྡཛཱཏསྶརཁཎྜསཱིམཱསུ ཝཱ ཨཉྙཏརཾ པཝིསིཏྭཱ ཋིཏཱ ཧོནྟི, ནེཝ ཀམྨཔྤཏྟཱ, ན ཚནྡཱརཧཱ. ན ཧི ཏེསཾ ཚནྡོ ཝཱ པཱརིསུདྡྷི ཝཱ ཨཱགཙྪཏི ཨཉྙསཱིམཱཡཾ ཋིཏཏྟཱ. སེསེཔཱིཏི པཉྩཝགྒཱདིཀརཎཱིཡེཔཱིཏི ཨཏྠོ.

༢༠༤. ཨསཾཝཱསགཎཔཱུརཾ ཝཱ ཀཏྭཱ ཀཏཾ ཀམྨཾ ཀུཔྤཉྩ ཧོཏི, ཀཱརཀཱནཉྩ དུཀྐཊནྟི ཨཏྠོ. ‘‘ཡསྶ སངྒྷོ ཀམྨཾ ཀརོཏི, ཏཾཙཏུཏྠོ ཀམྨཾ ཀརེཡྻ, ཨཀམྨཾ ན ཙ ཀརཎཱིཡ’’ནྟི (མཧཱཝ. ༣༨༩) ཝུཏྟཏྟཱ ‘‘ཀམྨཱརཧགཎཔཱུརཾ ཝཱ’’ཏི ཝུཏྟཾ. ཨིདཱནི པརིཝཱསཱདིཀམྨཱནཾཡེཝ པརིསཏོ ཝིཔཏྟིཾ དསྶེཏུཾ ‘‘གརུཀཊྛགཎཔཱུརཾ ཝཱ’’ཏི ཝུཏྟཾ. ཏམྤི ཨནིཀྑིཏྟཝཏྟཾ སནྡྷཱཡ ཝུཏྟཾ. ནིཀྑིཏྟཝཏྟོ པན སབྦཏྠ གཎཔཱུརཀོ ཧོཏི ཨེཝ.

༢༠༥. ཝཱརེཡྻཱཏི པཊིཀྑིཔེཡྻ. ‘‘ཨནུཛཱནཱམི, བྷིཀྑཝེ, ཨདྷམྨཀམྨེ ཀཡིརམཱནེ པཊིཀྐོསིཏུ’’ནྟི (མཧཱཝ. ༡༥༤) ཧི ཝུཏྟཾ. ཨནྟརཱཡེ སཏཱིཏི ཨཏྠོ. ‘‘ཨདྷམྨཀམྨཾ ཨིདཾ, ན མེཏཾ ཁམཏཱི’’ཏི ཨེཝཾ དྭེ ཏཡོ ཨཉྙམཉྙཾ དིཊྛིཾ ཨཱཝི ཀརེཡྻུནྟི ཨཏྠོ. ཡདི ཨེཀོ ཧོཏི, ‘‘ན མེཏཾ ཁམཏཱི’’ཏི ཨེཝཾ ཨདྷིཊྛཱནཾ ཀརེཡྻཱཏི ཨཏྠོ. ཨེཏྟཱཝཏཱ ཨེཏེ ནིརཱཔཏྟིཀཱ ཧོནྟི, ཨནྟརཱཡཱ ཙ མུཙྩནྟི, ཀམྨཾ པན ཨདྷམྨཏྟཱ ཀུཔྤམེཝ. ཝཱརེནྟེཝ ཏཏོདྷིཀཱཏི ཨེཏྠ ‘‘ཨནུཛཱནཱམི, བྷིཀྑཝེ, ཙཏཱུཧི པཉྩཧི པཊིཀྐོསིཏུཾ, དྭཱིཧི ཏཱིཧི དིཊྛིཾ ཨཱཝི ཀཱཏུཾ, ཨེཀེན ཨདྷིཊྛཱཏུཾ, ‘‘ན མེཏཾ ཁམཏཱི’’ཏི (མཧཱཝ. ༡༥༤) ཝུཏྟཏྟཱ ཙཏྟཱརོ ཝཱ པཉྩ ཝཱ ཝཱརེནྟི ཨེཝཱཏི ཨཏྠོ.

༢༠༦. ཨིདཱནི ¶ ཡེཧི པཊིཀྑིཏྟཾ ཧོཏི, ཏེ དསྶེཏུཾ ‘‘ཀམྨཱརཧཱ’’ཏིཨཱདི ཝུཏྟཾ. ཏཏྠ ཁིཏྟཙིཏྟ-གྒཧཎེན ཨུམྨཏྟཀོཔི གཧིཏོཝ. ཨེཏེསནྟི ཡེ ཝུཏྟཔྤཀཱརཱ, ཏེསཾ པཊིཀྑེཔོ ན རུཧཏཱིཏི ཨཏྠོ.

༢༠༧. ཨིདཱནི ཡསྶ པཊིཀྑེཔོ རུཧཏི, ཏཾ དསྶེཏུཾ ‘‘པཀཏཏྟེཀསཱིམཊྛ-སམསཾཝཱསབྷིཀྑུནོ’’ཏི ཝུཏྟཾ. ཏསྶཏྠོ (མཧཱཝ. ༣༩༤) – ཨེཝརཱུཔསྶ བྷིཀྑུནོ པཊིཀྐོསནཱ ཨནྟམསོ ཨཱནནྟརསྶཱཔི ཨཱརོཙེནྟསྶ རུཧཏཱིཏི. ‘‘བྷིཀྑུསྶ, བྷིཀྑཝེ ¶ , པཀཏཏྟསྶ སམཱནསཾཝཱསིཀསྶ སམཱནསཱིམཱཡཾ ཋིཏསྶ ཨནྟམསོ ཨཱནནྟརིཀསྶཔི བྷིཀྑུནོ ཝིཉྙཱཔེནྟསྶ སངྒྷམཛ྄ཛྷེ པཊིཀྐོསནཱ རུཧཏཱི’’ཏི (མཧཱཝ. ༣༩༤) ཝུཏྟཾ.

༢༠༨. སམྨུཁཱ ཡདི པཊིཀྐོསེཡྻཱཏི ཨཏྠོ. ཏིརོཀྑཱཏི པརམྨུཁཱ. ཀཱཡསཱམགྒིཾ ཝཱ ཚནྡཾ ཝཱ ནོ དདེཡྻ, དུཀྐཊནྟི ཨཏྠོ. ཀམྨཝིནིཙྪཡོ.

༢༩. མིཙྪཱཛཱིཝཝིཝཛྫནཱནིདྡེསཝཎྞནཱ

༢༠༩. ཙུཎྞནྟི སིརཱིསཙུཎྞཱདིཀནྟི ཨཏྠོ. མཏྟིཀཱཏི པཀཏིམཏྟིཀཱ ཝཱ པཉྩཝཎྞཱ ཝཱ སུདྡྷཱ ཀུངྐུཊྛཨཱདིཀཱ ཝཱ. ཀུལསངྒཧཱཏི ཨེཏེཧི སངྒཧིཏཱནཾ སནྟིཀེ ལཱབྷཱསཱཡ ཀུལསངྒཧཏྠནྟི ཨཏྠོ. ཨེཏྠ པན ཨིམེཧི སངྒཧིཏཱནཾ སནྟིཀེ ‘‘ཀིཉྩི ལབྷིསྶཱམཱི’’ཏི སངྒྷིཀཾ ཝཱ པུགྒལིཀཾ ཝཱ དཱཏུཾ ན ཝཊྚཏི ཨེཝ. ཨིམིནཱ པན ནཡེན ལདྡྷཾ པཉྩནྣམྤི སཧདྷམྨིཀཱནཾ ན ཝཊྚཏི, མིཙྪཱཛཱིཝཉྩ ཧོཏི.

༢༡༠-༢༡༡. ལཱབྷཱསཱཡ ¶ དཱཡཀཱནཾ དཱརཀེ ཨུཀྑིཔིཏྭཱ པརིབྷཊབྷཱཝོ པཱརིབྷཊཀཏཱ, ཏཱཡ པཱརིབྷཊཀཏཱཡ ན ཛཱིཝཡེཏི སམྦནྡྷོ. སེསེསུཔི ཨེསེཝ ནཡོ. ཁེཏྟཱདཱིསུ པེསིཏསྶ གམནཾ པཧེཎཀམྨཾ. སཱསནཔྤཊིསཱསནཧརཎཾ དཱུཏཀམྨཾ. པེསིཏསྶ གེཧཏོ གེཧགམནཾ ཛངྒྷཔེསནིཡཾ. ལཱབྷཱསཱཡ ལཉྫདཱནམནུཔྤདཱནཾ. ཨཉྙེན ཝཱཔཱིཏི ཨངྒཝིཛྫཱདིནཱ.

༢༡༢. ཝིཉྙཏྟཱིཏི (པཱརཱ. ༥༡༥ ཨཱདཡོ; པཱརཱ. ཨཊྛ. ༢.༥༡༥ ཨཱདཡོ) ཨཉྙཱཏཀཝིཉྙཏྟི. ཨནེསནཱཏི པུབྦེ ཝུཏྟེན པུཔྥདཱནཱདིནཱ པཙྩཡེསནཱ. ཀུཧནཱདཱིཧཱིཏི (ཝིབྷ. ༨༦༡; ཝིབྷ. ཨཊྛ. ༨༦༡; མཧཱནི. ༨༧) ཀུཧནཱ ལཔནཱ ནེམིཏྟཀཏཱ ནིཔྤེསིཀཏཱ ¶ ལཱབྷེན ལཱབྷཾ ནིཛིགཱིསནཏཱཏི ཨིམེཧི པཉྩཧི ཝཏྠཱུཧཱིཏི ཨཏྠོ. མིཙྪཱཛཱིཝཝིནིཙྪཡོ.

མིཙྪཱཛཱིཝཝིཝཛྫནཱནིདྡེསཝཎྞནཱ ནིཊྛིཏཱ.

༢༡༣. ཨིདཱནི ཨཱགནྟུཀཝཏྟཱདཱིནི དསྶེཏུཾ ‘‘ཝཏྟ’’ནྟི མཱཏིཀཱཔདཾ ཨུདྡྷཊཾ. པརིཀྑིཏྟསྶ (ཙཱུལ༹ཝ. ༣༥༦ ཨཱདཡོ; ཙཱུལ༹ཝ. ཨཊྛ. ༣༥༧ ཨཱདཡོ) ཝིཧཱརསྶ པརིཀྑེཔཾ, ཨཔརིཀྑིཏྟསྶ དྭཱིཧི ལེཌྜུཔཱཏེཧི པརིཙྪིནྣཊྛཱནཾ པཏྭཱ ཨུཔཱཧནཾ ཨོམུཉྩིཏྭཱ ནཱིཙཾ ཀཏྭཱ པཔྥོཊེཏྭཱ ཨུཔཱཧནཾ དཎྜཀེན གཧེཏྭཱ ཚཏྟཾ ཨཔནཱམེཏྭཱ སཱིསཾ ཝིཝརིཏྭཱ སཱིསེ ཙཱིཝརཾ ཁནྡྷེ ཀརིཏྭཱ སཱདྷུཀཾ ཨཏརམཱནེན ཨཱརཱམོ པཝིསིཏབྦོཏི ཨཏྠོ.

༢༡༤. པུཙྪེཡྻ ¶ སཡནཱསནནྟི ‘‘ཀཏམཾ མེ སེནཱསནཾ པཱཔུཎཱཏི, ཀིཾ ཨཛ྄ཛྷཱཝུཏྠཾ ཝཱ ཨནཛ྄ཛྷཱཝུཏྠཾ ཝཱ’’ཏི ཨེཝཾ པུཙྪིཏབྦནྟི ཨཏྠོ.

༢༡༥-༦. མཉྩཔཱིཋཱདིདཱརུབྷཎྜཉྩ (ཙཱུལ༹ཝ. ༣༦༠; ཙཱུལ༹ཝ. ཨཊྛ. ༣༦༠) རཛནབྷཱཛནཱདིམཏྟིཀཱབྷཎྜཉྩ. ཨཱཔུཙྪཱཏི བྷིཀྑུསྶ ཝཱ སཱམཎེརསྶ ཝཱ ཨཱརཱམིཀསྶ ཝཱ ‘‘ཨཱཝུསོ ཨིམཾ ཛགྒཱཧཱི’’ཏི ཨཱརོཙེཏྭཱཏི ཨཏྠོ. ཨཉྙཐཱཏི ཨེཝཾ ཨཀཏྭཱཏི ཨཏྠོ.

༢༡༧-༨. ཝུཌྜྷཱགནྟུཀསྶཱཏི ཨེཏྠ (ཙཱུལ༹ཝ. ༣༥༨ ཨཱདཡོ; ཙཱུལ༹ཝ. ཨཊྛ. ༣༥༩ ཨཱདཡོ) དཱུརཏོཝ དིསྭཱ ཡདི ‘‘ཝུཌྜྷོ’’ཏི ཛཱནཱཏི, ཏསྨིཾ ཨནཱགཏེ ཨེཝ ཨཱསནཔཉྙཱཔནཱདིཝཏྟཾ ཀཱཏབྦནྟི ཨཏྠོ. པཱདོདཔྤབྷུཏིནྟི པཱདོདཀཾ པཱདཔཱིཋཾ པཱདཀཐལིཀཾ ཨུཔནིཀྑིཔིཏབྦནྟི ཨཏྠོ. པཱནཱིཡེན ཨཱཔུཙྪནྟེན སཙེ སཀིཾ ཨཱནཱིཏཾ པཱནཱིཡཾ སབྦཾ པིཝཏི, པུནཔི ཨཱཔུཙྪིཏབྦོ ཨེཝ. པཉྙཔེཏི ‘‘ཨེཏཾ ཏུམྷཱཀཾ སེནཱསནཾ པཱཔུཎཱཏཱི’’ཏི ཨེཝཾ ཨཱཙིཀྑིཏབྦནྟི ཨཏྠོ.

༢༡༩-༢༠. ‘‘བྷིཀྑཱཙཱརགཱམོ ¶ ཨིཏོ དཱུརེ’’ཏི ཝཱ ‘‘སནྟིཀེ’’ཏི ཝཱ ‘‘ཀཱལསྶེཝ པིཎྜཱཡ ཙརིཏབྦ’’ནྟི ཝཱ ‘‘ཨུཔཊྛཱཀེ ཙརིཏབྦ’’ནྟི ཝཱ གོཙརོ ཨཱཙིཀྑིཏབྦོ. ཨགོཙརོཏི མིཙྪཱདིཊྛིཀཱནཾ ཝཱ གཱམོ, པརིཙྪིནྣབྷིཀྑཀོ ཝཱ གཱམོ, ཡཏྠ ཨེཀསྶ ཝཱ དྭིནྣཾ ཝཱ བྷིཀྑཱ དཱིཡཏི, སོ ཨཱཙིཀྑིཏབྦོཏི ཨཏྠོ. ཀཏིཀནྟི སངྒྷསྶ ཀཏིཀཊྛཱནཾ. ‘‘ཨིམཾ ཀཱལཾ པཝིསིཏབྦཾ, ཨིམཾ ཀཱལཾ ནིཀྑམིཏབྦ’’ནྟི ཨེཝཾ པཝེསནནིཀྑམནཀཱལཾ ཨཱཙིཀྑིཏབྦཾ. ཀེསུཙི ཋཱནེསུ ཨམནུསྶཱ ཝཱ ཝཱལཱ༹ ཝཱ ཧོནྟི, ཏསྨཱ ཨེཝཾ ཨཱཙིཀྑིཏབྦམེཝ. ནིསིནྣོཝཱཏི ཨིདཾ ཨཱཔཏྟིཨབྷཱཝམཏྟདཱིཔཀཾ, ཨུཊྛཧིཏྭཱཔི སབྦཾ ཀཱཏུཾ ཝཊྚཏེཝ. ཝཏྟཝིནིཙྪཡོ.

༢༢༡. སམྨུཁཱཡཱཏི ¶ (པཱཙི. ༣༧༤; པཱརཱ. ཨཊྛ. ༢.༤༦༩; ཀངྑཱ. ཨཊྛ. ཝིཀཔྤནསིཀྑཱཔདཝཎྞནཱ) སམྨུཁེ ཋིཏསྶཱཏི ཨཏྠོ. བྱཏྟསྶཱཏི ཝིཀཔྤནཝིདྷཱནཾ པཙྩུདྡྷརཎཱདིཝིདྷཱནཉྩ ཛཱནནྟསྶ. ཨབྱཏྟོ པན ‘‘ཨིམིནཱ མཡ྄ཧཾ དིནྣ’’ནྟི གཧེཏྭཱཔི གཙྪེཡྻཱཏི ཨཏྠོ. ཨེཀསྶཱཏི ཨེཀསྶ བྷིཀྑུསྶ.

༢༢༢. ནིདྷེཏུཾཝཱཏི ནིདྷེཏུཾ ཨེཝ, ནིསྶགྒིཡཾ ན ཧོཏཱིཏི ཨཏྠོ. པརིབྷུཉྫིཏུཾ ཝཱ ཝིསྶཛྫེཏུཾ ཝཱ ཨདྷིཊྛཱཏུཾ ཝཱ ན ཝཊྚཏཱིཏི ཨཏྠོ.

༢༢༤-༥. ཨཔརཱ སམྨུཁཱ ཝཱཏི སམྨུཁཱ ཝིཀཔྤནཱ ཨེཝཱཏི ཨཏྠོ. ཨིམཱ དྭེ ཝིཀཔྤནཱ ཨཏྟནཱ ཨེཝ ཝིཀཔྤེཏྭཱ པརེན པཙྩུདྡྷརཱཔིཏཏྟཱ སམྨུཁཱ ཝིཀཔྤནཱ ཨེཝཱཏི ཝུཏྟཱ.

༢༢༧. མིཏྟོཏི དལ༹ྷམིཏྟོ. སནྡིཊྛོཏི དིཊྛམཏྟོ ནཱཏིདལ༹ྷམིཏྟོ. ‘‘ཨིཏརེན ཙ པུབྦེ ཝུཏྟནཡེན ‘ཏིསྶོ བྷིཀྑཱུ’ཏི ཝཱ ‘ཏིསྶཱ བྷིཀྑུནཱི’ཏི ཝཱ ཝཏྟབྦཾ. པུན ཏེན ‘ཨཧཾ ཏིསྶསྶ ¶ བྷིཀྑུནོ, ཏིསྶཱཡ བྷིཀྑུནིཡཱ ཝཱ དམྨཱི’ཏི ཝིཀཔྤེཏྭཱ ཏེནེཝ ‘ཏིསྶསྶ བྷིཀྑུནོ, ཏིསྶཱཡ བྷིཀྑུནིཡཱ སནྟཀཾ པརིབྷུཉྫ ཝཱ ཝིསྶཛྫེཧི ཝཱ ཡཐཱཔཙྩཡཾ ཝཱ ཀརོཧཱི’ཏི པཙྩུདྡྷརིཏབྦ’’ནྟི ཨེཝཾ པཱཋོ གཧེཏབྦོ.

༢༢༨. དཱུརསནྟིཀཏྟེཀཏྟ-བཧུབྷཱཝཾ ཝིཛཱནིཡཱཏི ཨེཏྠ དཱུརཏྟཉྩ སནྟིཀཏྟཉྩ ཨེཀཏྟཉྩ བཧུབྷཱཝཉྩ ཝིཛཱནིཏྭཱཏི ཨཏྠོ.

༢༢༩. ‘‘དསཱཧཔརམཾ ཨཏིརེཀཙཱིཝརཾ དྷཱརེཏབྦ’’ནྟི (པཱརཱ. ༤༦༢) ཝུཏྟཏྟཱ ‘‘དསཱཧཾ ཝཱ’’ཏི ཝུཏྟཾ. ‘‘ཙཱིཝརཀཱལསམཡོ ནཱམ ཨནཏྠཏེ ཀཐིནེ ཝསྶཱནསྶ པཙྪིམོ མཱསོ, ཨཏྠཏེ ཀཐིནེ ¶ པཉྩ མཱསཱ’’ཏི (པཱརཱ. ༦༤༩) ཝུཏྟཏྟཱ ‘‘མཱསམེཀཾ ཝཱ པཉྩ ཝཱ’’ཏི ཝུཏྟཾ, མཱསཾ ཝཱ ཨེཀཾ པཉྩ ཝཱ མཱསེཏི ཨཏྠོ. ‘‘བྷིཀྑུནོ པནེཝ ཨཀཱལཙཱིཝརཾ ཨུཔྤཛྫེཡྻ, ཨཱཀངྑམཱནེན བྷིཀྑུནཱ པཊིགྒཧེཏབྦཾ. པཊིགྒཧེཏྭཱ ཁིཔྤམེཝ ཀཱརེཏབྦཾ. ནོ ཙསྶ པཱརིཔཱུརི, མཱསཔརམཾ ཏེན བྷིཀྑུནཱ ཏཾ ཙཱིཝརཾ ནིཀྑིཔིཏབྦཾ ཨཱུནསྶ པཱརིཔཱུརིཡཱ སཏིཡཱ པཙྩཱསཱཡཱ’’ཏི (པཱརཱ. ༤༩༩) ཝུཏྟཏྟཱ ‘‘པཙྩཱསཱ སཏི མཱསཀ’’ནྟི ཝུཏྟཾ. ནུཔྤཱདཡཏཱིཏི ཨནདྷིཊྛིཏཾ ཨཝིཀཔྤིཏཾ ནིསྶགྒིཾ ན ཛནཡཏཱིཏི ཨཏྠོ. ཝིཀཔྤནཱཝིནིཙྪཡོ.

༢༣༠. བྱཏྟསྶཱཏི ཨེཏྠ ཀིཏྟཱཝཏཱ བྱཏྟོ ཧོཏཱིཏི ཙེ? ནིསྶཡམུཙྩནཀེན པན སབྦནྟིམེན དྷམྨཔརིཙྪེདེན ཨཏྠཏོ ཙ བྱཉྫནཏོ ཙ དྭེ མཱཏིཀཱ པགུཎཱ ཝཱཙུགྒཏཱ ཀཱཏབྦཱ, པཀྑདིཝསེསུ དྷམྨསྶཱཝནཏྠཱཡ སུཏྟནྟཏོ ཙཏྟཱརོ བྷཱཎཝཱརཱ, སམྤཏྟཱནཾ པརིསཱནཾ པརིཀཐནཏྠཱཡ ཨནྡྷཀཝིནྡམཧཱརཱཧུལོཝཱདདྷམྨཀྑནྡྷསདིསོ ཨེཀོ ཀཐཱམགྒོ, སངྒྷབྷཏྟམངྒལཱམངྒལེསུ ཨནུམོདནཏྠཱཡ ཏིསྶོ ཨནུམོདནཱ, ཨུཔོསཐཔྤཝཱརཎཱདིཝིཛཱནནཏྠཾ ཀམྨཱཀམྨཝིནིཙྪཡོ ¶ , སམཎདྷམྨཀརཎཏྠཾ སམཱདྷིཝསེན ཝཱ ཝིཔསྶནཱཝསེན ཝཱ ཨརཧཏྟཔརིཡོསཱནཾ ཨེཀཾ ཀམྨཊྛཱནཾ ཨེཏྟཀཾ ཨུགྒཧེཏབྦཾ. ཨེཏྟཱཝཏཱ བྱཏྟོ ནཱམ ཧོཏི ཙཱཏུདིསོ, ཨིཏརཐཱ ཨབྱཏྟོ.

༢༣༡. ཨིདཱནི ནིསྶཡགྒཧཎཱཀཱརཾ དསྶེཏུཾ ‘‘ཨེཀཾས’’ནྟིཨཱདི ཝུཏྟཾ. ཨེཏྠ (མཧཱཝ. ༡༠༣) ཨཱཡསྨཏོཏི ཨཱཡསྨནྟཾ.

༢༣༢. ཨིདཱནི ¶ པཊིཔྤསྶདྡྷིཝིདྷཱནཾ དསྶེཏུཾ ‘‘པཀྐནྟེ’’ཏིཨཱདི ཝུཏྟཾ, ‘‘པཉྩིམཱ, བྷིཀྑཝེ, ནིསྶཡཔྤཊིཔྤསྶདྡྷིཡོ ཨུཔཛ྄ཛྷཱཡམྷཱ. ཨུཔཛ྄ཛྷཱཡོ པཀྐནྟོ ཝཱ ཧོཏི ཝིབྦྷནྟོ ཝཱ ཀཱལཀཏོ ཝཱ པཀྑསངྐནྟོ ཝཱ ཨཱཎཏྟིཡེཝ པཉྩམཱི’’ཏི (མཧཱཝ. ༨༣), ‘‘ཚཡིམཱ, བྷིཀྑཝེ, ནིསྶཡཔྤཊིཔྤསྶདྡྷིཡོ ཨཱཙརིཡམྷཱ. ཨཱཙརིཡོ པཀྐནྟོ ཝཱ ཧོཏི ཝིབྦྷནྟོ ཝཱ ཀཱལཀཏོ ཝཱ པཀྑསངྐནྟོ ཝཱ ཨཱཎཏྟིཡེཝ པཉྩམཱི, ཨུཔཛ྄ཛྷཱཡེན ཝཱ སམོདྷཱནགཏོ ཧོཏཱི’’ཏི ཨིདཾ པན ཨུབྷཡཾ ཨིདྷ དསྶིཏཾ. སཙེ ཨཱཙརིཡུཔཛ྄ཛྷཱཡཱ སཱམནྟཝིཧཱརེསུཔི ཨཔརིཀྑིཏྟེསུ ལེཌྜུཔཱཏདྭཡབྦྷནྟརེ ཝསནྟི, ནིསྶཡོ ན པཊིཔྤསྶམྦྷཏི. པརིཀྑིཏྟེསུཔི ན པཊིཔྤསྶམྦྷཏཱིཏི ཨེཀེ. ཨཱཙརིཡཱ པན ན ཨིཙྪནྟི. ཀསྨཱཏི ཙེ? ནིསྶཡགྒཧཎཔྤཊིཔྤསྶདྡྷཱིནཾ ཨུཔཙཱརསཱིམཱཡ པརིཙྪིནྣཏྟཱ. ལེཌྜུཔཱཏེན ཨུཔཙཱརསཱིམཱཔརིཙྪེདོ པན ཨཔརིཀྑིཏྟེསུ ཨེཝ ལབྦྷཏི, ན པརིཀྑིཏྟེསུ. ཏསྨཱ ཨཱཙརིཡཱནཾ ཝིནིཙྪཡེཝ ཋཱཏབྦཾ.

པཀྐནྟེཏི ཨེཏྠ (མཧཱཝ. ཨཊྛ. ༨༣) སཙེ ཨཱཙརིཡོ ཨནྟེཝཱསིཀཾ ཨནཱམནྟེཏྭཱཝ ཨུཔཙཱརསཱིམཾ ཨཏིཀྐམཏི, ནིསྶཡོ པཊིཔྤསྶམྦྷཏི. སཙེ ཨུཔཙཱརསཱིམཾ ཨནཏིཀྐམིཏྭཱཝ ནིཝཏྟཏི, ན པཊིཔྤསྶམྦྷཏི. ཨཱཙརིཡཾ ཨནཱམནྟེཏྭཱ ཨནྟེཝཱསིཀསྶ གམནེཔི ཨེསེཝ ནཡོ. སཙེ ཨཱཙརིཡོ ཀཏྠཙི གནྟུཀཱམོ ཨནྟེཝཱསིཀཾ ཨཱཔུཙྪཏི, ཨནྟེཝཱསིཀོཔི ‘‘སཱདྷུ སཱདྷཱུ’’ཏི སམྤཊིཙྪཏི, ཏངྑཎེ ཨེཝ པཊིཔྤསྶམྦྷཏི. ཨེཝཾ ཨཱཙརིཡཾ ཨཱཔུཙྪིཏྭཱ ཨནྟེཝཱསིཀསྶ གམནེཔི. དྭཱིསུཔི ཨནྟོཝིཧཱརེཡེཝ ཋིཏེསུ ཨཱཙརིཡོ ཝཱ ཨནྟེཝཱསིཀཾ, ཨནྟེཝཱསིཀོ ཝཱ ཨཱཙརིཡཾ ཨནཱཔུཙྪིཏྭཱཝ སཙེ དྭེ ལེཌྜུཔཱཏེ ཨཏིཀྐམཏི, པཊིཔྤསྶམྦྷཏི. པཀྑསངྐནྟེ ཝཱ ཝིབྦྷནྟེ ཝཱ ཀཱལཀཏེ ཝཱ ཏངྑཎེཡེཝ པཊིཔྤསྶམྦྷཏི ¶ . ཨཱཎཏྟི ནཱམ ནིསྶཡཔྤཎཱམནཱ. དསྶནསཝནཝསེན དུཝིདྷཾ སམོདྷཱནཾ.

ཨེདིསོ ཝུཙྩཏི ཨལཛྫིཔུགྒལོ’’ཏི. (པརི. ༣༥༩) –

ཨེཝཾ ཝུཏྟཾ. ‘‘ན བྷིཀྑཝེ ཨལཛྫིནཾ ནིསྶཱཡ ཝཏྠབྦཾ. ཡོ ཝསེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༢༠) ཧི ཝུཏྟཾ.

༢༣༤. ‘‘ཨནུཛཱནཱམི, བྷིཀྑཝེ, ཨདྡྷཱནམགྒཔྤཊིཔནྣེན བྷིཀྑུནཱ ནིསྶཡཾ ཨལབྷམཱནེན ཨནིསྶིཏེན ཝཏྠུ’’ནྟི (མཧཱཝ. ༡༢༡) ཝུཏྟཏྟཱ ‘‘ཨདྡྷིཀསྶཱ’’ཏི ཝུཏྟཾ. གིལཱནུཔཊྛཱཀསྶ ཙ ཡཱཙིཏསྶཱཏི སམྦནྡྷོ. ‘‘ཨནུཛཱནཱམི, བྷིཀྑཝེ, གིལཱནུཔཊྛཱཀེན བྷིཀྑུནཱ ནིསྶཡཾ ཨལབྷམཱནེན ཡཱཙིཡམཱནེན ཨནིསྶིཏེན ཝཏྠུ’’ནྟི (མཧཱཝ. ༡༢༡) ཧི ཝུཏྟཾ. སལླཀྑེནྟེན ཕཱསུཀནྟི ཕཱསུཝིཧཱརཾ སལླཀྑེནྟེན. ཨིདཾ པན པརིཧཱརཾ (མཧཱཝ. ཨཊྛ. ༡༢༡) སོཏཱཔནྣཱདིཨརིཡསཱཝཀོ ཝཱ ཐཱམགཏསམཐཝིཔསྶནཱལཱབྷཱི ཝཱ བཱལཔུཐུཛྫནོ ཝཱ ན ལབྷཏི. ཡསྶ ཁོ པན སམཐཝིཔསྶནཱ ཏརུཎཱ ཧོཏི, ན ཐཱམགཏཱ, ཨཡཾ ལབྷཏི. ཨསནྟེ ནིསྶཡདཱཡཀེ ‘‘ཡདཱ པཊིརཱུཔོ ནིསྶཡདཱཡཀོ ཨཱགཙྪིསྶཏི, ཏདཱ ཏསྶ ནིསྶཱཡ ཝསིསྶཱམཱི’’ཏི ཨཱབྷོགཾ ཀཏྭཱ ཡཱཝ ཨཱསཱལ༹ྷཱིཔུཎྞམཱ, ཏཱཝ ཝསིཏུཾ ལབྷཏི. སཙེ པན ཨཱསཱལ༹ྷཱིམཱསེ ནིསྶཡདཱཡཀཾ ན ལབྷཏི, ཡཏྠ ཨཏྠི, ཏཏྠ གནྟབྦཾ. ཨནྟོཝསྶེ པན ཨནིསྶིཏེན ཝཏྠུཾ ན ཝཊྚཏི. སབྷཱགེ ¶ དཱཡཀེ ཨསནྟེ ཝསིཏུཾ ལབྦྷཏཱིཏི སབྦཔདེསུ ཡོཛནཱ ཀཱཏབྦཱ. ནིསྶཡཝིནིཙྪཡོ.

༢༣༥. ཨཀཱཡབནྡྷནོཏི ¶ ཀཱཡབནྡྷནཾ ཨབནྡྷིཏྭཱཏི ཨཏྠོ. ཏཏོ པཊྛཱཡ ཙཱིཝརཾ པཱརུཔིཏབྦཾ, ཏཏོ པཊྛཱཡ ཨེཝ ཀཱཡབནྡྷནཾ བནྡྷིཏབྦཾ. ‘‘ན བྷིཀྑཝེ ཨཀཱཡབནྡྷནེན གཱམོ པཝིསིཏབྦོ. ཡོ པཝིསེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༢༧༨) ཧི ཝུཏྟཾ. ཏཏྠེཝཱསཏིཡཱ གཏོཏི ཨསཏིཡཱ གཏོ ཡཏྠ སརཏི, ཏཏྠེཝ བནྡྷིཏབྦཾ. སརིཏྭཱ པན ཡཱཝ ན བནྡྷཏི, ཏཱཝ པིཎྜཱཡ ཙརིཏུཾ ན ཝཊྚཏི. ཡདི ཨནྟོགཱམེ སརཏི, ཀཱཡབནྡྷནེ སཏི ཨེཀམནྟེ ཋཏྭཱ བནྡྷིཏབྦཾ, ཨསཏི ཙེ ནིཀྑམིཏྭཱ བནྡྷིཏྭཱ པུན པིཎྜཱཡ པཝིསིཏབྦནྟི ཝདནྟི.

༢༣༦. ‘‘ཨནུཛཱནཱམི, བྷིཀྑཝེ, དྭེ ཀཱཡབནྡྷནཱནི པཊྚིཀཾ སཱུཀརནྟཀ’’ནྟི (ཙཱུལ༹ཝ. ༢༧༨) ཝུཏྟཏྟཱ ‘‘དུཝིདྷ’’ནྟི ཝུཏྟཾ. ཏཏྠ སཱུཀརནྟཾ ནཱམ ཀུཉྩིཀཱཀོསཀཱ ཝིཡ ཨནྟེ སུསིརཾ ཀཏྭཱ ཀོཊྚིཏཾ. རཛྫུ ཙ ཨེཀཱཏི ཨེཀཝཊྚཱ རཛྫུ ཙ. ཏདནུལོམིཀཱཏི ཏེསཾ དྭིནྣཾ ཨནུལོམིཀཱ.

༢༣༧. མཙྪཀཎྜཀཁཛྫུརཱི-པཏྟཱ མཊྛཱ ཙ པཊྚིཀཱཏི ཨེཏྠ (ཙཱུལ༹ཝ. ཨཊྛ. ༢༧༨) ཨེཏེ མཙྪཀཎྚཀཱདཡོ མཊྛཱ ཝིཀཱརརཧིཏཱ པཊྚིཀཱ ཙ ཏདནྟོགདྷཱཏི ཨདྷིཔྤཱཡོ. ལབྦྷཱ དསཱ ཙཏསྶོཏི ཨེཀཱཡ ཝཱ དྭཱིསུ ཝཱ ཏཱིསུ ཝཱ ཀཐཱ ཨེཝ ནཏྠཱིཏི ཨདྷིཔྤཱཡོ, ཏཏོ པརཾ ན ཝཊྚཏི. ཨནྟེསཱུཏི ཨུབྷོསུ ཨནྟེསུ. གུཎསུཏྟཀནྟི དིགུཎསུཏྟཀཾ.

༢༣༩. མཀརམུཁཱདིནྟི ¶ ཨཱདི-སདྡེན དེཌྜུབྷསཱིསཾ གཧིཏཾ. ཨུབྷནྟེཏི ཨུབྷོསུ ཨནྟེསུ. ཀསྶཱཏི? ཝིདྷསྶ. གྷཊཀཱཏི གྷཊཀཏོ. ལེཁཱཏི ལེཁཱཡ. གྷཊཀཏོ ཙ ལེཁཱཡ ཙ ཨཉྙཾ ཙིཏྟཀཾ ན ཀཔྤཏཱིཏི ཨཏྠོ.

༢༤༠. དེཌྜུབྷཀནྟི (ཙཱུལ༹ཝ. ༢༧༨; ཙཱུལ༹ཝ. ཨཊྛ. ༢༧༨) ཨུདཀསཔྤསིརསདིསཾ. མུརཛནྟི བཧུརཛྫུཀེ ཨེཀཏོ སངྐཌྜྷིཏྭཱ ཨེཀཱཡ རཛྫུཡཱ པལིཝེཋེཏྭཱ ཀཏརཛྫུ. མདྡཝཱིཎནྟི པཱམངྒསདིསཾ. ཀལཱབུཀནྟི ཨནེཀཝཊྚཾ. ཨེཏཱནི པན སབྦཱནི ན ཀཔྤནྟི. དསཱསུ དྭེ མཛ྄ཛྷིམཱཏི མུརཛཾ མདྡཝཱིཎནྟི དྭེ མཛ྄ཛྷིམཱ ཨེཝ. ཀཔྤརེཏི ཀཔྤནྟཱིཏི ཨཏྠོ.

༢༤༡. གཎྛིཡོ ¶ ཙཱཔཱིཏི (ཙཱུལ༹ཝ. ༢༧༩) ཙཱིཝརགཎྛིཡོཔི. ཝེལུ༹ཨཱདིམཡཱ ཀཔྤནྟཱིཏི པསངྒེན ཝུཏྟཾ. ཀཱཡབནྡྷནཝིནིཙྪཡོ.

༢༤༢. ཛཱཏཱ (པཱཙི. ༨༦; པཱཙི. ཨཊྛ. ༨༦-༨༨; ཀངྑཱ. ཨཊྛ. པཐཝཱིཁཎནསིཀྑཱཔདཝཎྞནཱ) ཨཛཱཏཱཏི དུཝིདྷཱ པཐཝཱིཏི ཨཏྠོ. ཨིདཱནི ཏདུབྷཡཾ དསྶེཏུཾ ‘‘སུདྡྷམཏྟིཀཔཾསུཀཱ’’ཏིཨཱདིམཱཧ. ཏཏྠ སུདྡྷམཏྟིཀཔཾསུཀཱ ཙ ཨདཌྜྷཱ ཙ བཧུམཏྟིཀཔཾསུཀཱ ཙ ཙཱཏུམཱསཱདྷིཀོཝཊྛཔཾསུམཏྟིཀརཱསི ཙ ཛཱཏཔཐཝཱིཏི སམྦནྡྷོ. ཨེཏྠ པན ཨདཌྜྷཱཏི ཨུདྡྷནཔཙནཀུམྦྷཀཱརཱཝཱཔབྷཱཛནཔཙནཱདིཝསེན ཏཐཱ ཏཐཱ ཨདཌྜྷཱ. ཨཡཾ པན ཝིསུཾ ནཏྠི, སུདྡྷཔཾསུཨཱདཱིསུ ཨཉྙཏརཱཝ ཝེདིཏབྦཱ. སུདྡྷཔཾསུ སུདྡྷམཏྟིཀཱ ¶ ཡེབྷུཡྻེནཔཾསུ ཡེབྷུཡྻེནམཏྟིཀཱ ཨཏིརེཀཙཱཏུམཱསཱདྷིཀོཝཊྛམཏྟིཀཱཔཾསུཔུཉྫཱ ཙ ཨདཌྜྷཱ ཙཱཏི ཨཡཾ སབྦཱཔི ཛཱཏཔཐཝཱིཏི ཝེདིཏབྦཱ.

༢༤༣. དུཏིཡཱཏི ཨཛཱཏཔཐཝཱིཏི ཨཏྠོ. ཝུཏྟརཱསཱིཏི མཏྟིཀརཱསི ཙ པཾསུརཱསི ཙ ཙཱཏུམཱསོམཝཊྛཀོ ཨཛཱཏཔཐཝཱིཏི ཨཏྠོ.

༢༤༤. ཨིདཱནི ཡེབྷུཡྻེནམཏྟིཀཱ ཡེབྷུཡྻེནཔཾསུཀཱ ཡེབྷུཡྻེནསཀྑརཱཏི ཨེཝཾ ཝུཏྟཱསུ ཀིཏྟཱཝཏཱ ཡེབྷུཡྻཏཱ ཧོཏཱིཏི ཏཾ དསྶེཏུཾ ‘‘དྭེ བྷཱགཱ’’ཏིཨཱདིམཱཧ. ཏཏྠ ཏཱིསུ བྷཱགེསུ དྭེ བྷཱགཱ མཏྟིཀཱ ཡསྶཱ བྷཱུམིཡཱ, ཨེསཱ ཡེབྷུཡྻམཏྟིཀཱཏི སམྦནྡྷོ. ཨུཔཌྜྷཔཾསུཨཱདཡོཔི ཀཔྤིཡཱ ཨེཝ ཨཀཔྤིཡབྷཱགསྶ ཨནཏིརེཀཏོ. ‘‘ཡེབྷུཡྻེནམཏྟིཀཱ ཡེབྷུཡྻེནཔཾསུཀཱ’’ཏི (པཱཙི. ༨༦) ཧི ཝུཏྟཾ, ན ‘‘ཨུཔཌྜྷམཏྟིཀཱ, ཨུཔཌྜྷཔཾསུཀཱ’’ཏི. སེསེསུཔཱིཏི ཡེབྷུཡྻཔཾསུཀཱདཱིསུཔི.

༢༤༥. ཛཱཏསཉྙིསྶ ¶ པཱཙིཏྟཱིཏི སམྦནྡྷོ. དྭེལ༹ྷསྶ ཝིམཏིསྶ དུཀྐཊཾ. ཛཱཏེ ཨཛཱཏསཉྙིསྶ ཨནཱཔཏྟི.

༢༤༦. ཨེཀཱཡཱཎཏྟིཡཱ ཨེཀཱཏི སཙེ སཀིཾ ཨཱཎཏྟོ དིཝསམྤི ཁཎཏི, ཨཱཎཱཔཀསྶ ཨེཀཱ ཨེཝཱཏི ཨཏྠོ. ཝཱཙསོཏི ཝཱཙཱཡ ཝཱཙཱཡཱཏི ཨཏྠོ.

༢༤༧. ཨེཏྠ ‘‘ཛཱལེཧི ཨགྒི’’ནྟི ཝཱ ཝཏྟུཾ ན ཝཊྚཏི. ཨནིཡམེཏྭཱ པན ‘‘པོཀྑརཎིཾ ཁཎ, པཐཝིཾ ཁཎ, ཝཱཔིཾ ཁཎ, ཨཱཝཱཊཾ ཁཎ, ཀནྡཾ ཁཎཱ’’ཏི ཝཏྟུཾ ཝཊྚཏི.

༢༤༨. ཨེདིསནྟི ཨེཏྠ ཨཉྙམྤི ཨེཝརཱུཔཾ ཀཔྤིཡཝོཧཱརཝཙནཾ ཝཊྚཏཱིཏི ཨདྷིཔྤཱཡོ.

༢༤༩. ཀོཔེཏུཾ ¶ ལབྦྷནྟི སམྦནྡྷོ, གྷཊཱདཱིཧི གཧེཏུཾ སཀྐུཎེཡྻཀཾ ཨུསྶིཉྩནཱིཡཀདྡམཾ.

༢༥༡-༢. ཨུདཀསནྟིཀེ པཏིཏེཏི སམྦནྡྷོ. ཨུདཀེ པཏིཏཾ པན སབྦཀཱལཾ ཀཔྤིཡམེཝ, ཏསྨཱ ཨཀཔྤིཡཾ དསྶེཏུཾ ‘‘ཨུདཀསནྟིཀེ’’ཏི ཝུཏྟཾ. པཱསཱཎེ ལགྒེ རཛེ ཙ ནཝསོཎྜིཡཱ པཏིཏེ རཛེ ཙཱཏི སམྦནྡྷོ. ཨབྦྷོཀཱསུཊྛིཏེ ཝམྨིཀེ ཙ མཏྟིཀཱཀུཊྚེ ཙཱཏི ཨཏྠོ, ཏཐཱ ཨེཏེཔི སབྦེ ཙཱཏུམཱསཱདྷིཀོཝཊྛཱ ན ཀོཔེཏབྦཱཏི ཨཏྠོ.

༢༥༣-༥. བྷཱུམིཾ ཝིཀོཔཡཾ ཐམྦྷཱདིཾ གཎྷིཏུཾ ན ཙ ཀཔྤཏཱིཏི སམྦནྡྷོ. དྷཱརཱཡཱཏི པསྶཱཝདྷཱརཱཡ. པདཾ དསྶེསྶཱམཱིཏི སམྦནྡྷོ.

༢༥༧. སེཀོཏི སིཉྩནཾ. བྷཱུམིཡཱ ཨལླཧཏྠཾ ཋཔེཏྭཱཏི སམྦནྡྷོ.

༢༥༨. ཨཝསེ སཏཱིཏི ཧཏྠདཱཧཱདཱིསུ ཨཱཔདཱསཱུཏི ཨཏྠོ. པཐཝཱིཝིནིཙྪཡོ.

༢༥༩-༢༦༠. གིརིཀཱུཊནྟི ¶ མཀརདནྟཀཾ. སིབྦིཏུཉྩ ཚིནྡིཏུཉྩ ན ཝཊྚཏཱིཏི སབྦཏྠ ཡོཛནཱ. དཎྜེཏི ཚཏྟདཎྜེ.

༢༦༡. སིབྦིཏུཾ ཝཱ པཉྫརཾ ཝིནནྡྷིཏུཾ ཝཱ ཐིརཏྠཾ ཚཏྟེ བནྡྷིཏུཾ དཎྜེ ལེཁཱ ཝཊྚཏཱིཏི སམྦནྡྷོ. སཙེ ཝུཏྟཔྤཀཱརཾ ཨཀཔྤིཡཚཏྟཾ ¶ ལབྷཏི, གྷཊཀམྤི ཝཱལ༹རཱུཔམྤི ཚིནྡིཏྭཱ དྷཱརེཏབྦཾ, ལེཁཱཔི གྷཾསེཏྭཱ ཨཔནེཏབྦཱ, སུཏྟཀེན ཝཱ དཎྜོ ཝེཋེཏབྦོ.

༢༦༢. ཨནུཝཱཏཾ སནྡྷཱཡ ‘‘ཨནྟེ ཝཱ’’ཏི ཝུཏྟཾ. དྭིནྣཾ པཊྚཱནཾ སངྒྷཊིཏཊྛཱནཾ སནྡྷཱཡ ‘‘པཊྚམུཁེ ཝཱཔཱི’’ཏི ཝུཏྟཾ. ཝརཀསཱིསཱཀཱརེན སིབྦནཾ སནྡྷཱཡ ‘‘ཝེཎིཀཱ’’ཏི ཙ སཏཔདཱཀཱརེན སིབྦནཾ སནྡྷཱཡ ‘‘སངྑལིཀཱཔི ཝཱ’’ཏི ཙ ཝུཏྟཾ. སཏཔདིསདིསཾ ཨཉྙཾ ཝཱ སཱུཙིཝིཀཱརཾ ན ཀཔྤཏི, པཀཏིསཱུཙིཀམྨམེཝ ཝཊྚཏཱིཏི ཨཏྠོ. པཱལི༹ཀཎྞིཀཨཱདིཀཾ ཙཱིཝརེ ན ཙ ཀཔྤཏཱིཏི སམྦནྡྷོ.

༢༦༣-༤. ཙཏུཀོཎཱཝ (པཱརཱ. ཨཊྛ. ༡.༨༥) ཀཔྤརེཏི སམྦནྡྷོ. ཨགྒྷིཀནྟི ཨགྒྷིཡཾ ཙེཏིཡསདིསཾ. ཨེཏྠཱཏི གཎྛིཔཱསཀཔཊྚེ. ཀོཎསུཏྟཱ ཙ པཱིལ༹ཀཱཏི ན ཀེཝལཾ ཙཏུཀོཎཱ གཎྛིཀཔཱསཀཔཊྚཱཝ ཀཔྤནྟི, ཨཐ ཁོ དུཝིཉྙེཡྻཱ ཀོཎསུཏྟཔཱིལ༹ཀཱ ཙ ཀཔྤརེཏི ཨཏྠོ. གནྡྷཾ ཏེལཾ ཝཱཏི གནྡྷཾ ཝཱ ཏེལཾ ཝཱ.

༢༦༥. རཏྟནྟི (པཱརཱ. ཨཊྛ. ༡.༨༥) རཛིཏཾ. ཨཉྙེན ཝཱཏི མུགྒརཱདིནཱ ཝཱ. ཀཏྭཱཏི ཋཔེཏྭཱ. པཧཱརེ ན ཙ མུཊྛིནཱཏི མུཊྛིནཱ ན པཧཱརེཡྻཱཏི ཨཏྠོ.

༢༦༦-༧. ཚཏྟཝཊྚིཡཾ (པཱརཱ. ཨཊྛ. ༡.༨༥) ལེཁཾ ཋཔེཏྭཱ དྷམྨཀརཎེ ལེཁཱ ན ཝཊྚཏཱིཏི སམྦནྡྷོ. ཀུཉྩིཀཱཡ ཙ པིཔྥལེ ཙ མཎིཀཱ ཙ པཱིལ༹ཀཱ ཙ ན ཝཊྚཏཱིཏི སམྦནྡྷོ. ཏཏྠ མཎིཀཱཏི ཨེཀཱ ཨེཝ ཝཊྚམཎིཀཱ. པཱིལ༹ཀཱ མུཏྟརཱཛིསདིསཱ བཧཱུ.

༢༦༨-༩. མཱལཱདྱརཎིཡནྟི (པཱརཱ. ཨཊྛ. ༡.༨༥) ཨརཎིཡཾ མཱལཱདི ཝཎྞམཊྛཾ ན ཝཊྚཏཱིཏི ¶ སམྦནྡྷོ. ཨེཝཾ སབྦཏྠ. ཏིཔུསཱིསམཡེ པཏྟམཎྜལེ བྷིཏྟིཀམྨཉྩ ན ཝཊྚཏཱིཏི ཨཏྠོ. ཧིཏྭཱཏི ཋཔེཏྭཱ. སཱུཙིསཎྜཱསཀོ (པཱརཱ. ཨཊྛ. ༡.༨༥) ¶ ནཱམ སཱུཙིཾ ཌཾསཱཔེཏྭཱ གྷཾསིཏུཾ ཀཏོ དཱརུམཡོ. ‘‘ཨནུཛཱནཱམི, བྷིཀྑཝེ, མཀརདནྟཀཾ ཚིནྡིཏུ’’ནྟི (ཙཱུལ༹ཝ. ༢༥༣) ཝུཏྟཏྟཱ པཏྟམཎྜལེ མཀརདནྟཀཾ ཝཊྚཏི, ཨཉྙཾ བྷིཏྟིཀམྨཱདིཝིཀཱརམེཝ ན ཝཊྚཏི, ཏསྨཱ གིརིཀཱུཊཾ པཏྟམཎྜལེ ཋཔེཏྭཱ ཨཝསེསེ ན ཝཊྚཏཱིཏི ཝེདིཏབྦཾ.

༢༧༢. སེནཱསནེཏི (པཱརཱ. ཨཊྛ. ༡.༨༥) པཱསཱདཱདིསེནཱསནེཏི ཨཏྠོ.

༢༧༣. པུམིཏྠིརཱུཔརཧིཏནྟི པུརིསརཱུཔཨིཏྠིརཱུཔརཧིཏནྟི ཨཏྠོ. པརིཀྑཱརཝིནིཙྪཡོ.

༢༧༤-༥. སཧདྷམྨིནཾ ལབྦྷཾ བྷེསཛྫཀརཎནྟི སམྦནྡྷོ. ན ཀེཝལཾ པཉྩནྣཾ སཧདྷམྨིཀཱནཾཡེཝ བྷིཀྑཱཙརིཡཝིཉྙཏྟིསཀེཧི བྷེསཛྫཀརཎཾ ལབྦྷཏི, ཨཐ ཁོ ཨཔརེསམྤི པཉྩནྣཾ ལབྦྷཏི, ཏེ དསྶེནྟོ ‘‘པིཏཱུན’’ནྟིཨཱདིམཱཧ. པིཏཱུནནྟི མཱཏཱཔིཏཱུནནྟི ཨཏྠོ. ཡེ མཱཏཱཔིཏརོ ཛགྒནྟི ཨུཔཊྛཧནྟི, ཏེ ཏདུཔཊྛཱཀཱ ནཱམ. བྷིཀྑུཾ ཨེཝ ནིསྶཱཡ ཛཱིཝནྟོ བྷིཀྑུནིསྶིཏཀོ ནཱམ. པབྦཛྫཱཔེཀྑོ ‘‘བྷཎྜཱུ’’ཏི ཝུཙྩཏི.

༢༧༦. ཨཔརེསམྤི དསནྣཾ ཀཱཏུཾ ཝཊྚཏི, ཏེ དསྶེཏུཾ ‘‘མཧཱཙཱུལ༹པིཏཱ’’ཏིཨཱདིམཱཧ. ཨེཏྠ (པཱརཱ. ཨཊྛ. ༢.༡༨༥-༡༨༧) པན མཧཱཔིཏཱ ཙཱུལ༹པིཏཱ མཧཱམཱཏཱ ཙཱུལ༹མཱཏཱ མཧཱབྷཱཏཱ ཙཱུལ༹བྷཱཏཱ མཧཱབྷགིནཱི ཙཱུལ༹བྷགིནཱིཏི ཨིམེཧི ཨཊྛཧི ཨཱདི-སདྡེན པིཏུབྷགིནིཉྩ ¶ མཱཏུབྷཱཏིཀཉྩ གཧེཏྭཱ དས. ཨེཏེསཾ པན སཀེན བྷེསཛྫེན ཀཱཏབྦཾ. ཨཏྟནིཡེ ཙ ཨསཏཱིཏི པཱཋསེསོ.

༢༧༧. ན ཀེཝལཉྩ ཨེཏེསཾ དསནྣཾ, ཨིམེཧི སམྦནྡྷཱནཾ པུཏྟནཏྟཱདཱིནཾ ཡཱཝསཏྟམཱ ཀུལཔརིཝཊྚཱ ¶ ཀཱཏུཾ ཝཊྚཏཱིཏི དསྶནཏྠཾ ‘‘ཀུལདཱུསནཱ’’ཏིཨཱདིམཱཧ. ཨཉྙོཔི (པཱརཱ. ཨཊྛ. ༢.༢༨༥-༢༨༧) ཡོ ཨཱགནྟུཀོ ཝཱ ཙོརོ ཝཱ ཡུདྡྷཔརཱཛིཏོ ཝཱ ཨིསྶརོ ཉཱཏཀེཧི པརིཙྩཏྟོ ཝཱ གམིཡམནུསྶོ ཝཱ གིལཱནོ ཧུཏྭཱ ཝིཧཱརཾ པཝིསཏི, སབྦེསམྤི ཨཔཙྩཱསཱིསནྟེན བྷེསཛྫཾ ཀཱཏབྦཾ.

༢༧༨. མཱཏཱ (པཱརཱ. ཨཊྛ. ༢.༡༨༥-༡༨༧) པིཏཱ ཏདུཔཊྛཱཀོ བྷིཀྑུནིསྶིཏཀོ པཎྜུཔལཱསོ ཝེཡྻཱཝཙྩཀརོཏི ཨིམེསཾ ཚནྣཾ ཨནཱམཊྛཔིཎྜཔཱཏོ ཨཝཱརིཏོཏི ཨཏྠོ. ཀིཉྩ བྷིཡྻོ – དཱམརིཀཙོརསྶ ཙ ཨིསྶརིཡསྶ ཙ དཱཏུམཝཱརིཏོཏི ཨཏྠོ.

༢༧༩. ཏེསནྟི (པཱརཱ. ཨཊྛ. ༢.༡༨༥-༡༨༧) གཧཊྛཱནཾ. སཱསནོགདྷནྟི རཏནཔརིཏྟཨཱཊཱནཱཊིཡཔརིཏྟཱདིཔརིཏྟཾ བྷཎིཏབྦནྟི ཨཏྠོ.

༢༨༠. ‘‘ཨཱགནྟྭཱ (པཱརཱ. ཨཊྛ. ༢.༡༨༥-༡༨༧) སཱིལཾ དེཏུ, དྷམྨཉྩ པརིཏྟཉྩ བྷཱསཏཱུ’’ཏི ཀེནཙི པེསིཏོཏི སམྦནྡྷོ. དཱཏུཾ ཝཏྟུནྟི སཱིལཾ དཱཏུཾ, དྷམྨཉྩ པརིཏྟཉྩ ཝཏྟུཾ ལབྦྷཏཱིཏི ཨཏྠོ. བྷེསཛྫཝིནིཙྪཡོ.

༢༨༡. དསབྷེདམྤཱིཏི ¶ སཙེ ཀེནཙི ཧེཊྛཱ དསྶིཏཾ དསཝིདྷཾ རཏནཾ ཨཱནེཏྭཱ ‘‘ཨིདཾ སངྒྷསྶ ཝཱ ཙེཏིཡསྶ ཝཱ ནཝཀམྨསྶ ཝཱ ཨཉྙཔུགྒལསྶ ཝཱ སུཏྟནྟིཀགཎསྶ ཝཱ དམྨཱི’’ཏི ཝུཏྟེ ‘‘སཱདྷཱུ’’ཏི སམྤཊིཙྪནྟསྶ དུཀྐཊཾ ཧོཏཱིཏི ཨཏྠོ.

༢༨༢-༣. ཏེསུ དསཝིདྷེསུ རཏནེསཱུཏི ཨཏྠོ. དྭཱིསཱུཏི རཛཏཛཱཏརཱུཔེསུ. གཎསངྒྷཔུགྒལེ (པཱརཱ. ཨཊྛ. ༢.༥༣༨-༥༣༩) ཨནཱམསིཏྭཱ ‘‘ཨིདཾ ཧིརཉྙསུཝཎྞཾ ཙེཏིཡསྶ དམྨི, ནཝཀམྨསྶ ¶ དམྨཱི’’ཏི ཝུཏྟེ ན པཊིཀྑིཔེཏི ཨཏྠོ. ཀིཾ ཀཱཏབྦནྟི ཙེ? ཏཾ དསྶེཏུཾ ‘‘ཝདེ’’ཏིཨཱདི ཝུཏྟཾ. ‘‘ཨིམེ ཨེཝཾ ཝདནྟཱི’’ཏི ཀཔྤིཡཀཱརཱནཾ ཨཱཙིཀྑིཏབྦནྟི ཨཏྠོ.

༢༨༤. ན ཀེཝལཾ ཧིརཉྙསུཝཎྞཱདིཀམེཝ, ཨཉྙམྤི ཁེཏྟཝཏྠཱདིཀཾ ཨཀཔྤིཡཾ ན སམྤཊིཙྪིཏབྦནྟི ཏཾ དསྶེཏུཾ ‘‘ཁེཏྟཾ ཝཏྠུ’’ནྟིཨཱདིམཱཧ. དཱསཔསུཨཱདིཀཾ དཱསཔསྭཱདིཀཾ. སཙེ ཧི ཀོཙི ‘‘མཡ྄ཧཾ སསྶསམྤཱདཀཾ མཧཱཏལཱ༹ཀཾ ཨཏྠི, ཏཾ སངྒྷསྶ དམྨཱི’’ཏི ཝདཏི, ཏཉྩེ སངྒྷོ སམྤཊིཙྪཏི. པཊིགྒཧཎེཔི པརིབྷོགེཔི ཨཱཔཏྟིཡེཝ. ཨེཝཾ སེསེསུཔི.

ཀཔྤིཡེན ཀམེན གཎྷེཡྻཱཏི སམྦནྡྷོ. ‘‘ཁེཏྟཾ དམྨཱི’’ཏི ཝུཏྟེ ‘‘ན ཝཊྚཏཱི’’ཏི པཊིཀྑིཔིཏྭཱ ‘‘ཨིཏོ ཙཏྟཱརོ པཙྩཡེ པརིབྷུཉྫཐཱ’’ཏི ཝཱ ‘‘ཙཏུཔཙྩཡཔརིབྷོགཏྠཱཡ དམྨཱི’’ཏི ཝཱ ཝདཏི ཙེ, གཧེཏབྦཾ. ཝཏྠུམྷིཔི ཨེསེཝ ནཡོ. ‘‘ཏལཱ༹ཀཾ དམྨཱི’’ཏི ཝུཏྟེ པཊིཀྑིཔིཏྭཱ ‘‘ཙཏྟཱརོ པཙྩཡེ པརིབྷུཉྫཐཱ’’ཏི ཝཱ ‘‘སངྒྷོ ཨུདཀཾ པརིབྷུཉྫིསྶཏི, བྷཎྜཀཾ དྷོཝིསྶཏཱི’’ཏི ཝཱ ཨཱདིནཱ ནཡེན ཝུཏྟེ སམྤཊིཙྪིཏབྦཾ. ‘‘དཱསཾ དམྨཱི’’ཏི ཝུཏྟེ པཊིཀྑིཔིཏྭཱ ‘‘ཨཱརཱམིཀཾ, ཝེཡྻཱཝཙྩཀརཾ, ཀཔྤིཡཀཱརཀཾ དམྨཱི’’ཏི ¶ ཝུཏྟེ སམྤཊིཙྪིཏབྦཾ. ‘‘གོམཧིཾསཨཛེལ༹ཀཱདཡོ དམྨཱི’’ཏི ཝུཏྟེ པཊིཀྑིཔིཏྭཱ ‘‘པཉྩགོརསཔརིབྷོགཏྠཱཡཱ’’ཏི ཝུཏྟེ སམྤཊིཙྪིཏབྦཾ. ཨེདིསཾ གཧཎཾ སནྡྷཱཡ ‘‘པཊིཀྑིཔིཏྭཱ གཎྷེཡྻཱ’’ཏི ཝུཏྟཾ.

༢༨༥-༦. ནཝམཱཏིཀཀེདཱརཏལཱ༹ཀཀིརིཡཱ (པཱརཱ. ཨཊྛ. ༢.༢༣༨-༢༣༩) ཙ ཨནཝེ པུབྦེ ཀཔྤིཡཝོཧཱརེན པཊིཀྑིཔིཏྭཱ གཧིཏཏལཱ༹ཀེ མཏྟིཀུདྡྷརཎཉྩ བྷིནྣཊྛཱནེ པཱལི༹བནྡྷོ ཙ དུབྦལཊྛཱནེ ཨཱལི༹ཡཱ ཐིརཀཱརོ ཙ ཨནཝེ ཀེདཱརེ པུརཱཎབྷཱགཏོ ཨཏིརེཀབྷཱགགྒཧཎཉྩ ནཝེ ཀེདཱརེ ཨཔརིཙྪིནྣབྷཱགེ ‘‘སསྶེ དེཐ ཨེཏྟཀེ’’ཏི ཀཧཱཔཎུཊྛཱཔནཉྩཱཔཱིཏི ཨིདཾ སབྦཾ བྷིཀྑུསྶ ཀཱཏུཾ ན ཝཊྚཏི. སཙེ ཀརོཏི, ཨེཝམཱདིཀཾ སབྦེསམྤི ཨཀཔྤིཡནྟི ཨཏྠོ.

༢༨༧-༩. ཨིདཱནི ཏཾཡེཝ ཨཀཔྤིཡཾ དསྶེཏུཾ ‘‘ཨཝཏྭཱ’’ཏིཨཱདི ཝུཏྟཾ. ཏསྶཏྠོ (པཱརཱ. ཨཊྛ. ༢.༢༣༨-༢༣༩) – ཡོ པན ‘‘ཀས, ཝཔྤ’’ ཨིཙྩཱདིཀཾ ཨཝཏྭཱ ‘‘ཨེཏྟིཀཱཡ བྷཱུམིཡཱ ཨེཏྟཀོ བྷཱགོ དེཡྻོ’’ཏི བྷཱུམིཾ ཝཱ པཏིཊྛཱཔེཏི, ‘‘ཨེཏྟཀེ བྷཱུམིབྷཱགེ སསྶཾ ཀཏཾ, ཨེཏྟཀཾ གཎྷཐཱ’’ཏི ཀསྶཀེ ཝདནྟེ པམཱཎགཎྷནཏྠཾ དཎྜརཛྫུབྷི མིནཏི, ཁལེ ཋཏྭཱ རཀྑཎཱདཱིནི ཀརོཏི, ཏསྶེཝ ཨཀཔྤིཡནྟི.

༢༩༠. བྷཎྜཱགཱརིཀསཱིསེན ¶ པིཏུསནྟཀམྤི སཙེ པཊིསཱམེཡྻ, པཱཙིཏྟིཡནྟི ཨཏྠོ.

༢༩༡-༢. པིཏཱུནནྟི མཱཏཱཔིཏཱུནཾ. སཱཊཀཱདིཀཔྤིཡཾ ཝཏྠུཾ. ‘‘པཊིསཱམེཏྭཱ དེཧཱི’’ཏི ཝུཏྟེཏི སམྦནྡྷོ. པཱཏེཏྭཱན གཏེ ཡསྨཱ ཨཛ྄ཛྷཱརཱམསིཀྑཱཔདཝསེན (པཱཙི. ༥༠༥-༥༠༦) པལིབོདྷོ, ཏསྨཱ གོཔིཏུཾ ལབྦྷནྟི ཨཏྠོ.

༢༩༣-༤. སཀཾ ¶ ཝཱསིཨཱདིཔརིཀྑཱརནྟི ཨཏྠོ. ཨིདཾ ཋཱནཾ གུཏྟནྟི དསྶེཏབྦཾ. ‘‘ཨེཏྠ ཋཔེཐཱ’’ཏི པན ན ཝཏྟབྦཾ.

༢༩༥. ཨེཏྠ ‘‘ཨཉྙོ ཀོཙི ན པཝིསཏི, བྷིཀྑཱུཧི ཝཱ སཱམཎེརེཧི ཝཱ གཧིཏཾ བྷཝིསྶཏཱི’’ཏི སངྐནྟཱིཏི ཨཏྠོ. ཝཏྠུམྷཱིཏི ཨལངྐཱརཱདིཝཏྠུམྷཱིཏི ཨཏྠོ. ཏཱདིསེཏི ཡཱདིསེ ཝཏྠུམྷི ནཊྛེ ཨཱསངྐཱ ཧོཏི, ཏཱདིསེ ཝཏྠུམྷི ནཊྛེཏི སམྦནྡྷོ.

༢༩༦. ཨིདཱནི ཨསངྐིཏབྦཊྛཱནཾ དསྶེཏུཾ ‘‘ཝིཧཱརཱཝསཐསྶནྟོ’’ཏིཨཱདིམཱཧ. ཝིཧཱརསྶ ཙ གྷརསྶ ཙཱཏི ཨཏྠོ. རཏནནྟི དསཝིདྷཾ རཏནཾ. རཏྣསམྨཏནྟི སཱཊཀཝེཋནཱདིཀཾ. གཧེཏྭཱནཱཏི ཀཔྤིཡཀཱརཀེ ཨསཏི ཨཏྟནཱཔི གཧེཏྭཱན ནིཀྑིཔེཡྻཱཏི ཨཏྠོ. མགྒེརཉྙེཔཱིཏི མགྒེཔི ཨརཉྙེཔི. ཏཱདིསེཏི ‘‘བྷིཀྑཱུཧི གཧིཏཾ བྷཝིསྶཏཱི’’ཏི ཨཱསངྐིཏབྦཊྛཱནེ. པཏིརཱུཔཾ ཀརཱིཡཏཱིཏི མགྒེ ཝཱ ཨརཉྙེ ཝཱ ཏཱདིསཾ བྷཎྜཾ པསྶིཏྭཱ མགྒཱ ཨོཀྐམྨ ནིསཱིདིཏབྦཾ, སཱམིཀེསུ ཨཱགཏེསུ ཏཾ ཋཱནཾ ཨཱཙིཀྑིཏབྦཾ. སཙེ སཱམིཀེ ན པསྶཏི, རཏནསམྨཏཾ པཾསུཀཱུལཾ གཧེཏབྦཾ. རཏནཉྩེ ཧོཏི, ཏུཎྷཱིབྷཱུཏེན གནྟབྦནྟི ཨཏྠོ. ཨཡཾ མགྒཱརཉྙཀེསུ པཊིཔཏྟི. ཝིཧཱརཱཝསཐཱནཾ པན ཨནྟོ ཏཱདིསཾ དིསྭཱ བྷཎྜཀཾ མུཉྩིཏྭཱ ‘‘ཨེཏྠ ཨེཏྟཀཱ ཀཧཱཔཎཱ’’ཏིཨཱདིནཱ ནཡེན རཱུཔེན ཝཱ ལཉྪནཱཡ ཝཱ པིལོཏིཀཱཡ ཝཱ སཉྙཱཎཾ ཀཏྭཱ ནིཀྑིཔིཏབྦཾ, ཏཏོ པཀྐམནྟེན པཏིརཱུཔཱནཾ བྷིཀྑཱུནཾ ཨཱཙིཀྑིཏབྦཾ. ཨུགྒཧཝིནིཙྪཡོ.

༢༩༧. ‘‘ཀུལཱནི ¶ ¶ དཱུསེཏི པུཔྥེན ཝཱ ཕལེན ཝཱ ཙུཎྞེན ཝཱ མཏྟིཀཱཡ ཝཱ དནྟཀཊྛེན ཝཱ ཝེལུ༹ཡཱ ཝཱ ཝེཛྫིཀཱཡ ཝཱ ཛངྒྷཔེསནིཡེན ཝཱ’’ཏི (པཱརཱ. ༤༣༧) ཝུཏྟཏྟཱ ཏཱནི ཨཊྛ ཝཏྠཱུནི དསྶེཏུཾ ‘‘པུཔྥ’’ནྟིཨཱདིམཱཧ. ཨིམཱཡ མིཙྪཱཔཊིཔཏྟིཡཱ ཀུལཱནཾ ཨཉྙེསུ སཱིལཝནྟེསུ པསཱདཾ དཱུསེཏི ཝིནཱསེཏཱིཏི ཀུལདཱུསནཾ དུཀྐཊཾ ཨཱཔཛྫཏི. ཏཾ པན ཨཏྟནོ སནྟཀེ ཙ པརསནྟཀེ ཙ ཝེདིཏབྦཾ.

༢༩༨. ཨིདཱནི ཨིམེསུ ཝཏྠཱུསུ ན ཀེཝལཾ ཀུལདཱུསནདུཀྐཊམེཝ ཨཱཔཛྫཏི, ཐུལླཙྩཡཱདཱིནིཔི ཨཱཔཛྫཏཱིཏི དསྶེཏུཾ ‘‘ཐུལླཙྩཡ’’ནྟིཨཱདིམཱཧ. སངྒྷིཀཾ གརུབྷཎྜཾ ཨིསྶརེན དེནྟསྶ ཐུལླཙྩཡནྟི སམྦནྡྷོ. སེནཱསནཏྠཱཡ ནིཡམིཏཾ པན པུཔྥཱདི གརུབྷཎྜཾ ཧོཏི. སངྒྷསྶ ཝཱ ཨཉྙསྶ ཝཱ སནྟཀཾ ཐེཡྻཙིཏྟེན དེནྟསྶ དུཀྐཊཱདཱིནི ཧོནྟཱིཏི པཱཋསེསོ, ཏསྶ བྷཎྜསྶ ཨགྒྷཝསེན དུཀྐཊཐུལླཙྩཡཔཱརཱཛིཀཱནི ཧོནྟཱིཏི ཨཏྠོ.

༢༩༩-༣༠༠. སབྦཐཱཏི (པཱརཱ. ཨཊྛ. ༢.༤༣༡) ཀཔྤིཡཝོཧཱརཨཀཔྤིཡཝོཧཱརཔརིཡཱཡཨོབྷཱསནིམིཏྟཀམྨཱདཱིཧི ན ཝཊྚཏཱིཏི ཨཏྠོ. ཝཏིཨཱདཱིནི ཀཏྭཱ ཛགྒིཏུཉྩ. ཨཏྟནོ པརིབྷོགཏྠནྟི ཕལཔརིབྷོགཏྠཾ. རོཔནཱདཱིནཱིཏི རོཔཱཔནཱདཱིནི. ཨཱདི-སདྡེན སིཉྩཱཔནཨོཙིནཱཔནཱདཱིནི གཧིཏཱནི. ཀུདྡཱལཁཎིཏྟིཝཱསིཕརསུཨུདཀབྷཱཛནཱདཱིནི ཨཱཧརིཏྭཱ སམཱིཔེ ཋཔནཝསེན ནིམིཏྟཏོ ཙ ཀུདྡཱལཁཎིཏྟཱདཱིནི ཙ མཱལཱཝཙྪེ ཙ གཧེཏྭཱ ཋིཏེ ‘‘སཱམཎེརཱདཡོ དིསྭཱ ‘ཐེརོ ཀཱརཱཔེཏུཀཱམོ’ཏི ཨཱགནྟྭཱ ཀརོནྟཱི’’ཏི སཉྙཱཡ ཨོབྷཱསཏོ ཙ ‘‘ཨིམཾ རུཀྑཾ ཛཱན, ཨིམཾ ཨཱཝཱཊཾ ཛཱནཱ’’ཏིཨཱདིཀཔྤིཡཝོཧཱརཏོ ¶ ཙ ‘‘པཎྜིཏེན མཱལཱཝཙྪཱདཡོ རོཔཱཔེཏབྦཱ, ན ཙིརསྶེཝ ཨུཔཀཱརཱཡ སཾཝཏྟནྟཱི’’ཏིཨཱདིཔརིཡཱཡཏོ ཙ རོཔནཱདཱིནི ལབྦྷརེཏི སམྦནྡྷོ.

༣༠༡-༢. ཨིདཱནི ཨཊྛསུ ཝཏྠཱུསུ ཨཝསེསཱནི དྭེ ཝཏྠཱུནི དསྶེཏུཾ ‘‘ཝུཏྟཱཝ ཝེཛྫིཀཱ ཛངྒྷཔེསནེ’’ཏི ཝུཏྟཾ. ཏཏྠ ཝེཛྫིཀཱ པུབྦེ ཝུཏྟཱཝ, ཨིདཱནི ཛངྒྷཔེསནཱདིཝིནིཙྪཡཾ ཝཀྑཱམཱིཏི ཨཏྠོ. པིཏརོཏི (པཱརཱ. ཨཊྛ. ༢.༤༣༦-༤༣༧) མཱཏཱཔིཏརོ. བྷཎྜུནྟི པབྦཛྫཱཔེཀྑཾ. བྷིཀྑུསྶ སཀཾ ཝེཡྻཱཝཙྩཀརཉྩཱཏི ཨེཏེ ཋཔེཏྭཱ ཀསིཝཱཎིཛྫཱདིགིཧིཀམྨེསུ དཱུཏསཱསནཾ ཧརཎེ ¶ དུཀྐཊནྟི ཨཏྠོ. པཋམཾ སཱསནཾ ཨགྒཧེཏྭཱ པུན ཏཾ དིསྭཱ ཝཱ ཏསྶ སནྟིཀཾ གནྟྭཱ ཝཱ ཝདཏོཔི དུཀྐཊམེཝཱཏི ཨཏྠོ. སཱསནཾ ཨགྒཧེཏྭཱ ཨཱགཏཱནཾ པན ‘‘བྷནྟེ, ཏསྨིཾ གཱམེ ཨིཏྠནྣཱམསྶ ཀཱ པཝཏྟཱི’’ཏི པུཙྪིཡམཱནེ ཀཐེཏུཾ ཝཊྚཏི. པུཙྪིཏཔཉྷེ དོསོ ནཏྠི.

༣༠༣. ཨེཝཾ ཀུལདཱུསནེན ཨུཔྤནྣཔཙྩཡཱ. ‘‘པཉྩནྣམྤཱི’’ཏི ཝུཏྟཏྟཱ ཨནུཔསམྤནྣེན ཀཏམྤི ཨེདིསཾ ན ཝཊྚཏི ཨེཝ མིཙྪཱཛཱིཝཏྟཱ. ཨཱཏུམཱཝཏྠུ (མཧཱཝ. ༣༠༣) ཙེཏྠ ནིདསྶནཾ. ཀིཾ ཝིཡཱཏི ཙེ, ཏཾ དསྶེཏུཾ ‘‘ཨབྷཱུཏཱརོཙནཱརཱུཔ-སབྱོཧཱརུགྒཧཱདིསཱ’’ཏི ཝུཏྟཾ. ཏཏྠ ཨུགྒཧཱདིསཱཏི ཨེཏེཧི ཨུཔྤནྣཔཙྩཡསདིསཱཏི ཨཏྠོ.

༣༠༤. ཨིདཱནི པུཔྥཱདཱིནི ཀེསཾ དཱཏུཾ ཝཊྚནྟི, ཀེསཾ དཱཏུཾ ན ཝཊྚནྟཱིཏི ཏཾ དསྶེཏུཾ ‘‘ཧརཱཔེཏྭཱ’’ཏིཨཱདིམཱཧ. པིཏཱུནཾ (པཱརཱ. ཨཊྛ. ༢.༤༣༦-༤༣༧) དཱཏུཾ ལབྦྷཏཱིཏི སམྦནྡྷོ. སེསཉཱཏཱིནཾ པཏྟཱནཾ ཨེཝ. ལིངྒནྟི སིཝལིངྒཾ.

༣༠༥. ཏཐཱ ¶ ཕལནྟི ཕལམྤི མཱཏཱཔིཏཱུནཾ ཧརིཏྭཱཔི ཧརཱཔེཏྭཱཔི དཱཏུཾ ལབྦྷཏཱིཏི ཨཏྠོ. ན ཀེཝལཾ མཱཏཱཔིཏཱུནཾཡེཝ, ཨཉྙེསམྤི དཱཏུཾ ལབྦྷཏཱིཏི དསྶེཏུཾ ‘‘གིལཱནཱན’’ནྟིཨཱདིམཱཧ. སཔརསནྟཀནྟི ཨེཏྠ པརོཏི ཨཏྟནོ ཝིསྶཱསཉྙཱཏཀོ ཨེཝ ཨདྷིཔྤེཏོ.

༣༠༦. བྷཱཛེནྟེཏི སངྒྷསྶ ཕལཔུཔྥམྷི བྷཱཛིཡམཱནེ སམྨཏེན དེཡྻནྟི སམྦནྡྷོ. ཨིཏརེན ཨསམྨཏེན ཨཔལོཀེཏྭཱ དཱཏབྦནྟི ཨཏྠོ.

༣༠༧. པརིཙྪིཛྫཱཏི ཨཱགཏཱནཾ དཱཏབྦནྟི ཕལཝསེན ཝཱ རུཀྑཝསེན ཝཱ པརིཙྪིནྡིཏྭཱཏི ཨཏྠོ. ཨིཏརསྶཱཏི ཨིསྶརཱདིཀསྶ. ཀཏིཀཾ ཝཏྭཱཏི ‘‘ཨིམསྨིཾ རུཀྑེ ཨེཏྟཀཱནི ཕལཱནི ལབྦྷནྟཱི’’ཏི ཨེཝཾ ཝཏྭཱ.

༣༠༨. སེསེཏི མཏྟིཀཱདནྟཀཊྛཝེལུ༹མྷི (པཱརཱ. ཨཊྛ. ༢.༤༣༦-༤༣༧). ཡཐཱཝུཏྟནཡོ ཨེཝཱཏི ཨེཏྠ ཨཏྟནོ ཙ པརསྶ ཙ སནྟཀཾ ཀུལསངྒཧཏྠཱཡ དདཏོ དུཀྐཊནྟིཨཱདིནཱ ཧེཊྛཱ ཝུཏྟནཡེནེཝ ¶ ཝིནིཙྪཡོ ཝེདིཏབྦོཏི ཨཏྠོ. པཎྞམྤཱིཏི ཀིཉྩཱཔི པཱལི༹ཡཾ པཎྞདཱནཾ ན ཝུཏྟཾ, ཏཐཱཔི ཀུལདཱུསནེ པཝེསཡེཏི ཨཏྠོ. ཀུལདཱུསནཝིནིཙྪཡོ.

ཀུལདཱུསནནིདྡེསཝཎྞནཱ ནིཊྛིཏཱ.

༣༠༩-༣༡༠. ཨིདཱནི ཝསྶཱུཔགམནཾ དསྶེཏུཾ ‘‘པུརིམིཀཱ’’ཏིཨཱདིམཱཧ. ཏཏྠ པུརིམིཀཱ པཙྪིམིཀཱ (མཧཱཝ. ༡༨༤; མཧཱཝ. ཨཊྛ. ༡༨༥) ཙེཏི དྭེ ཝསྶཱུཔནཱཡིཀཱཏི ཨཏྠོ. ཨཱལཡཔརིགྒཱཧོ ཝཱ ཝཙཱིབྷེདོ ཝཱ ¶ ཝསྶཱུཔནཱཡིཀཱཏི པཱཋསེསོ. ཨིདཱནི ཝཏྟབྦཾ སནྡྷཱཡ ‘‘ཨེདིསོ’’ཏི ཝུཏྟཾ. ‘‘ཨིདྷ ཝསྶཾ ཝསིསྶཱམཱི’’ཏི ཙིཏྟུཔྤཱདེཏྠ ཨཱལཡོ (མཧཱཝ. ཨཊྛ. ༢༠༣). ཨཱལཡཔརིགྒཱཧོ པན ཝཛེ ཝཱ སཏྠེ ཝཱ ནཱཝཱཡ ཝཱ ཝསྶཾ ཨུཔགནྟུཀཱམསྶ ཏཏྠ སེནཱསནཾ ཨལབྷནྟསྶ ལབྦྷཏི, སཏྠཱདཱིསུ པན ཝསྶཾ ཨུཔགནྟུཾ ན ཝཊྚཏཱིཏི ཀཏྭཱ. ཡདི སཏྠཱདཱིསུ ཀཝཱཊབནྡྷཾ སེནཱསནཾ ལབྦྷཏི, ཏཏྠ ཨུཔགནྟབྦཾ. ཨུཔགཙྪནྟེན ཙ ‘‘ཨིདྷ ཝསྶཾ ཨུཔེམཱི’’ཏི ཏིཀྑཏྟུཾ ཝཏྟབྦཾ. ཝིཧཱརེ པན ཝཙཱིབྷེདོ ཝཱ ཀཱཏབྦོ. སཙེ ‘‘ཨིདྷ ཝསྶཾ ཝསིསྶཱམཱི’’ཏི ཨཱལཡོ ཨཏྠི, ཨསཏིཡཱ པན ཝསྶཾ ན ཨུཔེཏི, ཚིནྣཝསྶོ ན ཧོཏི, པཝཱརེཏུཉྩ ལབྷཏི ཨེཝ.

༣༡༡. ནོཔེཏུཀཱམོ ཨཱཝཱསཾ, ཏདཧཱུཏིཀྐམེཡྻ ཝཱཏི པཱཋེ (མཧཱཝ. ༡༨༦) ཨཏིཀྐམནྟསྶ ཨཱཝཱསཾ ཏདཧུ ཝསྶཱུཔནཱཡིཀཱཏིཔི ཨཏྠོ. ཨཱཝཱསཾ ཨཏིཀྐམེཡྻ ཝཱཏི སམྦནྡྷོ. ཛཱནཾ ཝཱནུཔགཙྪཏོཏི ཨེཏྠ ཝིཧཱརེ ནིསཱིདིཏྭཱཔི ཨནུཔགཙྪཏོ དུཀྐཊཱཔཏྟི ཧོཏཱིཏི ཨདྷིཔྤཱཡོ.

༣༡༢. ཚིནྣཝསྶོ (ཝཛིར. ཊཱི. མཧཱཝགྒ ༢༠༨) ཝཱ ཀེནཙི ཨནྟརཱཡེན པཋམཾ ཨནུཔགཏོ (མཧཱཝ. ༡༨༥-༡༨༦) ཝཱ དུཏིཡཾ ཨུཔགཙྪེཡྻཱཏི སམྦནྡྷོ. ཏེམཱསནྟི པུརིམཾ ཝཱ ཏེམཱསཾ པཙྪིམཾ ཝཱ ཏེམཱསཾ. ‘‘ན བྷིཀྑཝེ ཝསྶཾ ཨུཔགནྟྭཱ པུརིམཾ ཝཱ པཙྪིམཾ ཝཱ ཏེམཱསཾ ¶ ཨཝསིཏྭཱ ཙཱརིཀཱ པཀྐམིཏབྦཱ. ཡོ པཀྐམེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༨༥) ཧི ཝུཏྟཾ.

༣༡༣-༥. ‘‘ཨནུཛཱནཱམི, བྷིཀྑཝེ, སཏྟནྣཾ སཏྟཱཧཀརཎཱིཡེན ཨཔྤཧིཏེཔི གནྟུཾ, པགེཝ པཧིཏེ, ‘བྷིཀྑུསྶ བྷིཀྑུནིཡཱ སིཀྑམཱནཱཡ སཱམཎེརསྶ སཱམཎེརིཡཱ མཱཏུཡཱ ཙ པིཏུསྶ ཙ, གིལཱནབྷཏྟཾ ཝཱ པརིཡེསིསྶཱམི, གིལཱནུཔཊྛཱཀབྷཏྟཾ ཝཱ པརིཡེསིསྶཱམི, གིལཱནབྷེསཛྫཾ ¶ ཝཱ པརིཡེསིསྶཱམི, པུཙྪིསྶཱམི ཝཱ ཨུཔཊྛཧིསྶཱམི ཝཱ’ཏི སཏྟཱཧཾ སནྣིཝཏྟོ ཀཱཏབྦོ’’ཏི (མཧཱཝ. ༡༩༨) ཝུཏྟཏྟཱ ‘‘མཱཏཱཔིཏཱུནམཏྠཱཡ…པེ… ཨུཔཊྛིསྶ’’ནྟི ཝུཏྟཾ. ཏཏྠཱཡཾ སངྑེཔོ – ‘‘མཱཏཱདཱིནཾ གིལཱནབྷཏྟཾ ཝཱ ཏདུཔཊྛཱཀབྷཏྟཾ ཝཱ གིལཱནཱནཾ ཨོསདྷཾ ཝཱ ཨེསིསྶཾ པརིཡེསིསྶ’’ནྟི ཝཱ ‘‘ཏེ གིལཱནེ གནྟྭཱ པུཙྪིསྶཱམཱི’’ཏི ཝཱ ‘‘ཨུཔཊྛིསྶ’’ནྟི ཝཱ པཧིཏེཔི ཨཔྤཧིཏེཔི སཏྟཱཧཀིཙྩེན གནྟུཾ ལབྷཏི.

ཨིདཱནི སཧདྷམྨིཀེ ཨེཝ སནྡྷཱཡ ‘‘ཨནབྷིརཏ’’ནྟིཨཱདི ཝུཏྟཾ. ‘‘ཝིསབྷཱགརཱུཔཾ དིསྭཱ ཨནབྷིརཏི, ཏཏོ ཝཱུཔཀཱསིསྶཾ, ཏཾ གཧེཏྭཱ ཨཉྙཏྠ གམིསྶ’’ནྟི ཨདྷིཔྤཱཡེན གནྟུམྤི ལབྦྷཏཱིཏི ཨཏྠོ. ཀུཀྐུཙྩཾ ཝིནོདནཉྩ དིཊྛིཾ ཝིཝེཙནཉྩ ཨཧཾ ཝཱ ཀརེཡྻཾ ཨཉྙེཧི ཝཱ ཀཱརེཡྻནྟི སམྦནྡྷོ. པརིཝཱསམཱནཏྟཨཱདཱིཧི ཝུཊྛཱནཾ ཝཱ གརུཀཱ. ཨཱདི-སདྡེན སཙེ སངྒྷེན ཀམྨཾ ཀཏཾ ཧོཏི, ཏསྶ པཊིཔྤསྶདྡྷིཡཱ ཨནུསྶཱཝནཀརཎཱདཱིསུ ཨུསྶུཀྐཾ ཀརེཡྻནྟི གནྟུཾ ལབྦྷཏཱིཏི ཨཏྠོ. སཏྟཱཧཀིཙྩེནཱཏི སཏྟཱཧཀརཎཱིཡེན.

༣༡༦. དྷམྨསཝནཏྠཾ ནིམནྟིཏོ ཨེཝཾ ཝཛེཏི ཨཏྠོ. གརཱུ ནཱམ ཨཱཙརིཡུཔཛ྄ཛྷཱཡཱ, ཏེཧི བྷཎྜདྷོཝནཀིཙྩེན པཧིཏསྶ གནྟུཾ ཝཊྚཏཱིཏི ཨཏྠོ.

༣༡༧. ན བྷཎྜདྷོཝན…པེ… དསྶནེཏི ཨེཏྠ (མཧཱཝ. ཨཊྛ. ༡༩༩) ཨེཏེསུཔི ན ཝཛེཏི སམྦནྡྷོ. ལབྦྷནྟི ཨེཏྠ ‘‘ཨཛྫེཝ ཨཱགམིསྶ’’ནྟི ཨདཱུརགོ ཡདི ན པཱཔུཎེཡྻ, ལབྦྷནྟི སམྦནྡྷོ. ཀིཾ ཝུཏྟཾ ཧོཏི? ‘‘ཨཛྫེཝ ཨཱགམིསྶཱམཱི’’ཏི སཱམནྟཝིཧཱརཾ གནྟྭཱ པུན ཨཱགཙྪནྟསྶ ཨནྟརཱམགྒེ སཙེ ཨརུཎུཊྛཱནཾ ཧོཏི, ཝསྶཙྪེདོཔི ¶ ན ཧོཏི, རཏྟིཙྪེདེན དུཀྐཊམྤི ནཱཔཛྫཏཱིཏི ཝུཏྟཾ ཧོཏི.

༣༡༨. སེསཉཱཏིཧཱིཏི ¶ བྷཱཏུབྷགིནཱིཨཱདཱིཧི. བྷིཀྑུནིསྶིཏཀེན ཙ པཧིཏེཏི སམྦནྡྷོ. ནིདྡིསིཏྭཱཏི ‘‘ཨཱགཙྪནྟུ བྷདནྟཱ, ཨིཙྪཱམི དཱནཉྩ དཱཏུཾ དྷམྨཉྩ སོཏུཾ བྷིཀྑུཉྩ པསྶིཏུ’’ནྟིཨཱདིནཱ ཡཾ ཀིཉྩི ནིདྡིསིཏྭཱཝ པེསིཏེ གནྟུཾ ཝཊྚཏི. ཀེཝལཾ ‘‘ཨཱགཙྪནྟུ བྷིཀྑཱུ, ཨིཙྪཱམི བྷིཀྑཱུནཾ ཨཱགམན’’ནྟི ཨེཝཾ ཨནིདྡིསིཏྭཱ ཝུཏྟེ གནྟུཾ ན ལབྦྷཏཱིཏི ཨཏྠོ.

༣༡༩. ཨཙྪརཱཡེ སཏཏྟནོཏི དསཝིདྷེསུ ཨནྟརཱཡེསུ ཨེཀསྨིམྤི ཨནྟརཱཡེ ཨཏྟནོ སཏཱིཏི ཨཏྠོ. སངྒྷསཱམགྒིཡཱ ཝཱ ཝསྶཙྪེདེ ཨནཱཔཏྟཱིཏི ཨཏྠོ. ཝུཏྟཉྷེཏཾ ‘‘ཨིདྷ པན, བྷིཀྑཝེ, ཝསྶཱུཔགཏོ བྷིཀྑུ པསྶཏི སམྦཧུལེ བྷིཀྑཱུ སངྒྷབྷེདཱཡ པརཀྐམནྟེ. ཏཏྲ ཙེ བྷིཀྑུནོ ཨེཝཾ ཧོཏི, ‘གརུཀོ ཁོ སངྒྷབྷེདོ ཝུཏྟོ བྷགཝཏཱ. མཱ མཡི སམྨུཁཱིབྷཱུཏེ སངྒྷོ བྷིཛྫཱི’ཏི པཀྐམིཏབྦཾ, ཨནཱཔཏྟི ཝསྶཙྪེདསྶཱ’’ཏི (མཧཱཝ. ༢༠༢). ཨེཝཾ ཚིནྣཝསྶོ ནོ པཝཱརཡེཏི ཨཏྠོ.

༣༢༠. རུཀྑསྶ སུསིརེཏི ཨེཏྠ (མཧཱཝ. ༢༠༤; མཧཱཝ. ཨཊྛ. ༢༠༣) པན སུདྡྷེ རུཀྑསུསིརེ ཨེཝ ན ཝཊྚཏི, མཧནྟསྶ པན སུསིརསྶ ཨནྟོ པདརཙྪདནཾ ཀུཊིཀཾ ཀཏྭཱ པཝིསནདྭཱརཾ ཡོཛེཏྭཱ ཨུཔགནྟུཾ ཝཊྚཏི. རུཀྑསྶ ཝིཊཔེཏི ཨེཏྠཱཔི སུདྡྷཝིཊཔམཏྟེ ན ཝཊྚཏི, མཧཱཝིཊཔེ པན ཨཊྚཀཾ བནྡྷིཏྭཱ ཝུཏྟནཡེན ཀུཊིཀཾ ཀཏྭཱ ཨུཔགནྟུཾ ཝཊྚཏི. ཚཝཀུཊི ནཱམ པཱསཱཎཀུཊིཀནྟི ཝདནྟི. ཏཱིསུ པསྶེསུ པཱསཱཎེ ཨུསྶཱཔེཏྭཱ ཨུཔརི པཱསཱཎེན པཊིཙྪནྣཱ.

༣༢༡. ནཱཝཱདཱིསུ ¶ པན ཨུཔགཏོ པཝཱརེཏུཉྩ ལབྦྷཏཱིཏི སམྦནྡྷོ. ཝསྶཱུཔནཱཡིཀཝིནིཙྪཡོ.

ཝསྶཱུཔནཱཡིཀནིདྡེསཝཎྞནཱ ནིཊྛིཏཱ.

༣༢༢-༤. ཨཱརཱམཱརཱམཝཏྠཱུནཱིཏི ¶ ཨེཏྠ (ཙཱུལ༹ཝ. ༣༢༡; ཙཱུལ༹ཝ. ཨཊྛ. ༣༢༡) ཨཱརཱམོ ནཱམ པུཔྥཱརཱམོ ཝཱ ཕལཱརཱམོ ཝཱ. མཉྩོ པཱིཋཾ བྷིསི བིབྦོཧནཱདིསཡནཱསནཾ. ལོཧཀུམྦྷཱིཨཱདཡོ ཀཱལ༹ལོཧཏམྦལོཧཱདིམཡཱ. བྷཱཎཀོ ཨུདཀཙཱཊི. པཉྩེཏེ ཨཝིབྷཱཛིཡཱཏི བྷཱཛེཏྭཱ ན གཧེཏབྦཱ, གཧིཏཱཔི སངྒྷསནྟཀཱ ཨེཝཱཏི ཨཏྠོ. ཨེཏྠ པན ཨཱརཱམོ ཨཱརཱམཝཏྠཱུཏི པཋམཾ, ཝིཧཱརོ ཝིཧཱརཝཏྠཱུཏི དུཏིཡཾ, མཉྩོ པཱིཋཾ བྷིསི བིབྦོཧནནྟི ཏཏིཡཾ, ལོཧཀུམྦྷཱི…པེ… ནིཁཱདནནྟི ཙཏུཏྠཾ, ཝལླི…པེ… དཱརུབྷཎྜཾ མཏྟིཀབྷཎྜནྟི པཉྩམནྟི ཨེཝཾ ཨིམཱནི རཱསིཝསེན པཉྩ ཧོནྟི, སརུཔཝསེན ཨནེཀཱནི ཧོནྟི. ཧོནྟི ཙེཏྠ –

‘‘དྭིསངྒཧཱནི དྭེ ཧོནྟི, ཏཏིཡཾ ཙཏུསངྒཧཾ;

ཙཏུཏྠཾ ནཝཀོཊྛཱསཾ, པཉྩམཾ ཨཊྛབྷེདན’’ནྟི. (ཙཱུལ༹ཝ. ཨཊྛ. ༣༢༡);

༣༢༥. ‘‘པཉྩིམཱནི, བྷིཀྑཝེ, ཨཝིསྶཛྫིཡཱནི ན ཝིསྶཛྫེཏབྦཱནི སངྒྷེན ཝཱ གཎེན ཝཱ པུགྒལེན ཝཱ, ཝིསྶཛྫིཏཱནིཔི ཨཝིསྶཛྫིཏཱནི ཧོནྟི. ཡོ ཝིསྶཛྫེཡྻ, ཨཱཔཏྟི ཐུལླཙྩཡསྶཱ’’ཏི (ཙཱུལ༹ཝ. ༣༢༡) ཝུཏྟཏྟཱ ‘‘བྷཱཛིཏཱཔི ཨབྷཱཛིཏཱ’’ཏི ཝུཏྟཾ. ཨེཏེཏི ཝུཏྟཔྤཀཱརཱ པཉྩཔི ‘‘གརུབྷཎྜཱནཱི’’ཏི ཙ ‘‘ཨཝིསྶཛྫིཡཱནཱི’’ཏི ཙ ཙ-སདྡེན ‘‘ཨཝེབྷངྒིཡཱནཱི’’ཏི ཙ ཝུཙྩནྟཱིཏི ཨཏྠོ.

༣༢༦-༨. ཨིདཱནི ¶ པུརིམེསུ ཏཱིསུ རཱསཱིསུ སབྦསྶ གརུབྷཎྜཏྟཱ ཏེ ཨནཱམསིཏྭཱ པཙྪིམེསུ དྭཱིསུ རཱསཱིསུ ཨེཀཙྩསྶ ཨགརུབྷཎྜསྶཱཔི ཨཏྠིཏཱཡ ཏཾ དསྶེཏུཾ ཨཱརབྷནྟོཔི ཏེསུ དྭཱིསུ བཧུཝིསཡཾ པཋམཾ དསྶེཏུཾ ‘‘ཝལླིཌྜྷབཱཧུམཏྟཱཔཱི’’ཏིཨཱདིམཱཧཱཏི ཉཱཏབྦཾ. ཏསྶཱཡཾ སངྑེཔོ (ཙཱུལ༹ཝ. ཨཊྛ. ༣༢༡) – ཝལླི ཨཌྜྷབཱཧུམཏྟཱཔི ཝེལུ༹ ཨཊྛངྒུལཱཡཏོཔི ཏིཎཱདི མུཊྛིམཏྟམྤཱིཏི ཨེཏྠ ཨཱདི-སདྡེན མུཉྫཔབྦཛཾ སངྒཎྷཱཏི, པཎྞཾ ཨེཀམྤི མཏྟིཀཱ པཱཀཏཱ ཝཱ པཉྩཝཎྞཱ ཝཱ སུདྷཱཀངྒུཊྛཨཱདིཀཱཏི ཨཱདི-སདྡེན སཛྫུལསཛཱཏིཧིངྒུལཀཱདི ཝཱ ཏཱལཔཀྐཔྤམཱཎཱཔི ཡེཧི ཀེཧིཙི སངྒྷསྶ དིནྣཱ ཝཱ སངྒྷིཀེ ཏིཎཁེཏྟཱདིམྷི ཛཱཏཱ ཝཱ རཀྑིཏགོཔིཏབྷཱུམིབྷཱགེ ཨུཔྤནྣཱ ཏཏྠཛཱཏཀཱ ཝཱ སངྒྷིཀཱ རཀྑིཏཱ ཨེཝ ཨབྷཱཛིཡཱཏི ཨཏྠོ.

ཨིདཱནི ¶ ཡེ ཙེཏྠ བྷཱཛིཏབྦཱ, ཏེ དསྶེཏུཾ ‘‘ནིཊྛིཏེ’’ཏིཨཱདིམཱཧ, སངྒྷསྶ ཝཱ ཙེཏིཡསྶ ཝཱ ཀམྨེ ནིཊྛིཏེ བྷཱཛིཡཱཏི ཨདྷིཔྤཱཡོ. ཨེཏྠ པན ཡཾ ཀིཉྩི ཝལླིཝེལུ༹ཏིཎཔཎྞམཏྟིཀཱདི སངྒྷསྶ དིནྣཾ ཝཱ སངྒྷིཀེ ཏིཎཁེཏྟཱདིམྷི ཛཱཏཀཾ ཝཱ རཀྑིཏགོཔིཏཾ གརུབྷཎྜཾ, ཏཾ སངྒྷཀམྨེ ཙ ཙེཏིཡཀམྨེ ཙ ནིཊྛིཏེ ཨཝསེསཾ པུགྒལིཀཀམྨེཔི དཱཏུཾ ཝཊྚཏི, ཨགརུབྷཎྜཏྟཱ བྷཱཛིཏུམྤི ལབྦྷཏི. སེནཱསནཏྠཱཡ རཀྑིཏགོཔིཏམེཝ གརུབྷཎྜཾ ཧོཏི, ན ཨིཏརཾ. སཱིཧལ༹དཱིཔེ ཏུམཱུལསོམཝིཧཱརེ སངྒྷསྶ པཱཀཝཏྟམྤི ཏཱལཔཎྞཾ ཝིཀྐིཎིཏྭཱ ཀརཱིཡཏི. ཀསྨཱ? ན ཧི ཏཏྠ པཎྞེན ཨཏྠོ ཨཏྠི, སབྦེཔི ཨིཊྛཀཙྪནྣཱ པཱསཱདཱདཡོཏི. ཨེཝཾ ཨཉྙཏྠཱཔི ཀརཱིཡཏི ཨེཝཱཏི ཝདནྟི.

༣༢༩. ཨིདཱནི ལོཧབྷཎྜཱདཱིསུ ཨེཀནྟབྷཱཛེཏབྦབྷཎྜཾ དསྶེཏུཾ ‘‘པཏྟཱདཱི’’ཏིཨཱདིམཱཧ. ཨེཏྠ (ཙཱུལ༹ཝ. ཨཊྛ. ༢༢༡) པན ཨཱདི-སདྡེན ལོཧཐཱལཀཏམྦ ¶ ཀུཎྜིཀཱ ཀཊཙྪུ སརཀ ཨཉྫནི ཨཉྫནིསལཱཀཱཀཎྞམལཧརཎཱིསཱུཙིསཎྜཱསཀཏྟརཡཊྛིཨཱདཱིནི གཧིཏཱནེཝ. ཏཐཱཏི བྷཱཛིཡམེཝཱཏི ཨཏྠོ. ཝིཔྤཀཏཉྩ ཨཝིཔྤཀཏཉྩ. པཱདགཎྷཀནྟི མགདྷནཱལི༹ཡཱ པཉྩནཱལི༹ཡཱ གཎྷནཾ.

༣༣༡-༢. ཨནུཉྙཱཏཝཱསི ཡཾ སཀྐཱ སིཔཱཊིཀཱཡ པཀྑིཔིཏྭཱ པརིཧརིཏུནྟི ཝུཏྟཱ. ཏཙྪིཏཱནིཊྛིཏནྟི ཝིཔྤཀཏཾ. ཡདི ཏཙྪིཏཾ, གརུབྷཎྜམེཝ. དནྟཾ པན ཨཏཙྪིཏཉྩ ཨནིཊྛིཏཉྩ བྷཱཛིཡམེཝ. ཨནིཊྛིཏཾ མཉྩཔཱདཱདིཀཾ གརུབྷཎྜཾ. ཨིདཱནི མཏྟིཀབྷཎྜཾ དསྶེཏུཾ ‘‘བྷིཀྑཱུཔཀརཎེ’’ཏིཨཱདིམཱཧ. པཏྟཐཱལཀཀུཎྜིཀཱདིབྷིཀྑཱུཔཀརཎེ ཙ. པཱདགྷཊཀོཏི པཱདགཎྷནཀོ གྷཊཀོ ཙ མཏྟིཀཱམཡོ བྷཱཛིཡོ བྷཱཛེཏབྦོཏི ཨཏྠོ. སངྑཐཱལཀམྤི བྷཱཛིཡམེཝ.

༣༣༣-༤. མིགཙམྨཱདིཀཾ ཀཔྤིཡཙམྨཾ བྷཱཛིཡཾ, སཱིཧཙམྨཱདིཀཾ ཨཀཔྤིཡཙམྨཾ གརུབྷཎྜཾ. ཏཾ པན བྷཱུམཏྠརཎཾ ཀཱཏུཾ ཝཊྚཏི. ཨེལ༹ཙམྨཾ པན པཙྩཏྠརཎགཏིཀཏྟཱ གརུབྷཎྜཾ ཧོཏི. ཨིདཱནི ཨིམཱནི པན པཉྩ ཙཱིཝརཔིཎྜཔཱཏབྷེསཛྫཱནཾ ཨཏྠཱཡ པརིཝཏྟེཏུཾ ན ཝཊྚཏི, གརུབྷཎྜེན པན གརུབྷཎྜཉྩ ཐཱཝརཉྩ ཐཱཝརེན ཐཱཝརམེཝ པརིཝཏྟེཏྭཱ པརིབྷུཉྫིཏབྦཱནཱིཏི དསྶེཏུཾ ‘‘གརུནཱ’’ཏིཨཱདིམཱཧ. ཏཏྠ (ཙཱུལ༹ཝ. ཨཊྛ. ༣༢༡) གརུནཱཏི གརུབྷཎྜེན གརུབྷཎྜཉྩ ཐཱཝརཉྩ པརིཝཏྟེཡྻཱཏི སམྦནྡྷོ. ཐཱཝརེན ཙ ཐཱཝརམེཝ པརིཝཏྟེཡྻ, ན གརུབྷཎྜནྟི ཨདྷིཔྤཱཡོ. པཉྩསུ ཀོཊྛཱསེསུ པཙྪིམཏྟཡཾ གརུབྷཎྜཾ, པུརིམདྭཡཾ ཐཱཝརནྟི ཝེདིཏབྦཾ ¶ . ཏཐཱ ཀཏྭཱ ཙ བྷུཉྫཏཱུཏི ཨེཝཾ པརིཝཏྟེཏྭཱ ཏཏོ ཨཱབྷཏཾ ཀཔྤིཡབྷཎྜཾ པརིབྷུཉྫཏཱུཏི ཨཏྠོ. ཀཐཾ ཉཱཡཏཱིཏི ཙེ? ཝུཏྟཉྷེཏཾ པརིཝཱརེ-

‘‘ཨཝིསྶཛྫིཡཾ ¶ ཨཝེབྷངྒིཡཾ, པཉྩ ཝུཏྟཱ མཧེསིནཱ;

ཝིསྶཛྫེནྟསྶ པརིབྷུཉྫནྟསྶ ཨནཱཔཏྟི,

པཉྷཱ མེསཱ ཀུསལེཧི ཙིནྟིཏཱ’’ཏི. (པརི. ༤༧༩);

ཨེཏྠ པན གརུབྷཎྜེན གརུབྷཎྜཉྩ ཐཱཝརཉྩ ཐཱཝརེན ཐཱཝརམེཝ པརིཝཏྟནཝིདྷིཾ སནྡྷཱཡ ‘‘ཝིསྶཛྫནྟསྶ ཨནཱཔཏྟཱི’’ཏི ཝུཏྟཾ. པུན ཏཏོ ནིབྦཏྟཉྩ ཙཏུཔཙྩཡཾ པརིབྷུཉྫིཏུཾ ལབྦྷཏཱིཏི དཱིཔེཏུཾ ‘‘པརིབྷུཉྫནྟསྶ ཨནཱཔཏྟཱི’’ཏི ཝུཏྟཾ. ཨཡཾ ཨིམིསྶཱ གཱཐཱཡ ཨདྷིཔྤཱཡོ. སེསནྟི (ཙཱུལ༹ཝ. ཨཊྛ. ༣༢༡) ཨཱརཱམཱདི ཨབྷཱཛིཡནྟི ཨཏྠོ. ཨཝེབྷངྒིཡཝིནིཙྪཡོ.

ཨཝེབྷངྒིཡནིདྡེསཝཎྞནཱ ནིཊྛིཏཱ.

༣༣༥-༦. སདྭཱརབནྡྷནེ ཋཱནེ…པེ… སཡནྟོ དུཀྐཊཾ ཕུསེཏི ཨེཝརཱུཔེ ཋཱནེ དིཝཱ སཡནྟེནཱཏི སམྦནྡྷོ. སདྭཱརབནྡྷནེ (པཱརཱ. ༧༧; པཱརཱ. ཨཊྛ. ༡.༧༧) པན ཋཱནེ ཡེན ཀེནཙི པརིཀྑིཏྟེ ཨབྦྷོཀཱསེཔི རུཀྑམཱུལེཔི ཨནྟམསོ ཨིམིནཱ ལཀྑཎེན ཡུཏྟེ ཨཱཀཱསངྒཎེཔི སཡནྟེན དྭཱརཾ བནྡྷིཏབྦམེཝ. ཝིཉྙུམྷི པུརིསེཏི བྷིཀྑུམྷི ཝཱ སཱམཎེརེ ཝཱ ཨནྟམསོ ཨུཔཱསཀཨཱརཱམིཀེསུཔི ཨཉྙཏརསྨིཾ སཏཱིཏི ཨཏྠོ. ‘‘ཨེས ཛགྒིསྶཏཱི’’ཏི ཨཱབྷོགོ ཙཱཔི ཀཔྤཏཱིཏི ཀེཝལཾ བྷིཀྑུནིཾ ཝཱ མཱཏུགཱམཾ ཝཱ ཨཱཔུཙྪིཏུཾ ན ཝཊྚཏི. སཝསེཏི ཨཏྟནོ ཝསེ, ཨབཧུསཱདྷཱརཎཊྛཱནེཏི ཨཏྠོ. ཏཾ ཝིནཱཀཱརནྟི ཏཾ པུབྦེ ཝུཏྟཔྤཀཱརཾ དྭཱརཐཀནཨཱབྷོགཀརཎསངྑཱཏཾ ཨཱཀཱརཾ ཝིནཱཏི ཨཏྠོ. ཨཙིཏྟཀཱཔཏྟིཀིརིཡཱཡཾ སངྑེཔོ.

༣༣༧. རཏནཱནཱིཏི ¶ མུཏྟཱདིདསཝིདྷརཏནཱནི. དྷཉྙནྟི སཏྟཝིདྷཾ དྷཉྙཾ.

༣༣༨. སིཏྠཏེལོདཏེལེཧཱིཏི ¶ ཨེཏྠ (ཙཱུལ༹ཝ. ༢༤༦; ཙཱུལ༹ཝ. ཨཊྛ. ༢༤༦) པན ཡོ མདྷུསིཏྠཀཏེལེན ཝཱ ཨུདཀམིསྶཀཏེལེན ཝཱ ཨཉྙེན ཀེནཙི ཝིཀཱརེན ཝཱ ཀེསེ ཨོསཎྛེཏི, དནྟམཡཱདཱིསུ ཡེན ཀེནཙི ཕཎེན ཝཱ ཀོཙྪེན ཝཱ ཧཏྠེན ཝཱ ཕཎཀིཙྩཾ ཀརོནྟོ ཨངྒུལཱིཧི ཝཱ ཨོསཎྛེཏི, ཏསྶ དུཀྐཊཾ ཧོཏཱིཏི ཨཏྠོ.

༣༣༩. ནེཀཔཱཝུརཎཱཏི (ཙཱུལ༹ཝ. ༢༦༤) ན ཨེཀཔཱཝུརཎཱ. ཏུཝཊྚཡུནྟི ནིཔཛྫེཡྻུཾ. ཀིཾ ཝུཏྟཾ ཧོཏི? ཡདི ཨེཀཔཱཝུརཎཱ ཝཱ ཨེཀཏྠརཎཱ ཝཱ ཨེཀམཉྩེ ཝཱ ཏུཝཊྚེཡྻུཾ, ན ཝཊྚཏི, དུཀྐཊཾ ཧོཏཱིཏི ཝུཏྟཾ ཧོཏི. ཨེཀམྷི (ཙཱུལ༹ཝ. ཨཊྛ. ༢༦༤) ཝཱ བྷཱཛནེ ན བྷུཉྫེཡྻུནྟི སམྦནྡྷོ.

༣༤༠. ཙཏུརངྒུལཏོ (ཙཱུལ༹ཝ. ༢༨༢; ཙཱུལ༹ཝ. ཨཊྛ. ༢༨༢) ཨཱུནཾ དནྟཀཊྛཾ ན ཁཱདེཡྻཱཏི སམྦནྡྷོ. ཨདྷིཀཊྛངྒུལནྟི ཨཊྛངྒུལཏོ ཨདྷིཀཾ. ཏཐཱཏི ན ཁཱདེཡྻཱཏི ཨཏྠོ. ཨཀལླཀོ (ཙཱུལ༹ཝ. ༢༨༩) ལསུཎཾ ན ཁཱདེཡྻ.

༣༤༡. ཧཱིནེཧི (པཱཙི. ༣༡ ཨཱདཡོ) ཝཱ ཨུཀྐཊྛེཧི ཝཱ ཛཱཏིཨཱདཱིཧི ཨེཝ ཨུཀྐཊྛཾ ཝཱ ཧཱིནཾ ཝཱ ‘‘ཙཎྜཱལོསཱི’’ཏིཨཱདིནཱ ནཡེན ཨུཛུཾ ཝཱ ‘‘སནྟི ཝཱ ཨིདྷེཀཙྩེ ཙཎྜཱལཱ, ཝེནཱ, ནེསཱདཱ’’ཏིཨཱདིནཱ ནཡེན ཨཉྙཱཔདེསེན ཝཱ ཨུཔསམྤནྣཾ ཝཱ ཨནུཔསམྤནྣཾ ཝཱ ཨཀྐོསཱདྷིཔྤཱཡཾ ཝིནཱ ཀེཝལཾ དཝཱདྷིཔྤཱཡེན ཝདེ, དུབྦྷཱསིཏནྟི ཨཏྠོ.

༣༤༢. ནཁེ ¶ ཝཱ ཀེསེ ཝཱ ནཱསལོམེ (ཙཱུལ༹ཝ. ༢༧༥) ཝཱ དཱིགྷེ ན དྷཱརཡེཏི སམྦནྡྷོ. ‘‘ཨནུཛཱནཱམི, བྷིཀྑཝེ, མཾསཔྤམཱཎེན ནཁེ ཚིནྡིཏུ’’ནྟི (ཙཱུལ༹ཝ. ༢༧༤) ཙ ‘‘ཨནུཛཱནཱམི, བྷིཀྑཝེ, དུམཱསིཀཾ ཝཱ དུཝངྒུལཾ ཝཱ’’ཏི (ཙཱུལ༹ཝ. ༢༤༦) ཙ ཝུཏྟཾ. ན ལབྦྷཾ ཝཱིསཏིམཊྛནྟི ཨེཏྠ ཨེཀནཁམྤི མཊྛཾ ཀཱཏུཾ ན ཝཊྚཏི ཨེཝ. ‘‘ན བྷིཀྑཝེ ཝཱིསཏིམཊྛཾ ཀཱརཱཔེཏབྦཾ. ཡོ ཀཱརཱཔེཡྻ, ཨཱཔཏྟི དུཀྐཊསྶ (ཙཱུལ༹ཝ. ༢༧༤). ཨནུཛཱནཱམི, བྷིཀྑཝེ, མལམཏྟཾ ཨཔཀཌྜྷིཏུ’’ནྟི (ཙཱུལ༹ཝ. ༢༧༤) ཧི ཝུཏྟཾ. ཏསྨཱ ནཁཏོ མལམཏྟཾ ཨཔཀཌྜྷིཏུཾ ཝཊྚཏི. སམྦཱདྷེ ལོམཧཱརཎནྟི ཨེཏྠ སམྦཱདྷོ ནཱམ ཨུབྷོ ཨུཔཀཙྪཀཱ མུཏྟཀརཎཉྩ. ‘‘ཨནུཛཱནཱམི, བྷིཀྑཝེ, ཨཱབཱདྷཔཙྩཡཱ སམྦཱདྷེ ལོམཾ སཾཧརཱཔེཏུ’’ནྟི (ཙཱུལ༹ཝ. ༢༧༥) ཧི ཝུཏྟཾ.

༣༤༣. ཡཐཱཝུཌྜྷནྟི ¶ ཝུཌྜྷཔཊིཔཱཊིཡཱ ལདྡྷབྦཾ. ན བཱདྷེཡྻཱཏི ན ཝཱརེཡྻ. སངྒྷུདྡིཊྛཾཝཱཏི ཨུཔཱསཀཱདཱིཧི ཡཐཱཝུཌྜྷཾ ‘‘ཨཡྻཱ པརིབྷུཉྫནྟཱུ’’ཏི ནིསྶཛྫིཏྭཱཝ དིནྣཾ སེནཱསནཱདི. ‘‘ན བྷིཀྑཝེ ཨུདྡིསྶཀཏམྤི ཡཐཱཝུཌྜྷཾ པཊིབཱཧིཏབྦཾ. ཡོ པཊིབཱཧེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༣༡༣) ཧི ཝུཏྟཾ. ཨདྷོཏཔཱདེཧི (ཙཱུལ༹ཝ. ཨཊྛ. ༣༢༤) ཝཱ ཨལླཔཱདེཧི ཝཱ ནཀྐམེཏི སམྦནྡྷོ. སུདྷོཏཔཱདཀཾ ཝཱཔཱིཏི དྷོཏཔཱདེཧེཝ ཨཀྐམིཏབྦཊྛཱནཾ. ཏཐེཝཱཏི ནཀྐམེཡྻ སཨུཔཱཧནོཏི ཨཏྠོ. ‘‘ན བྷིཀྑཝེ ཨདྷོཏེཧི པཱདེཧི, ཨལླེཧི པཱདེཧི, སཨུཔཱཧནེན སེནཱསནཾ ཨཀྐམིཏབྦཾ. ཡོ ཨཀྐམེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༣༢༤), ཧི ཝུཏྟཾ. ‘‘ཨནུཛཱནཱམི, བྷིཀྑཝེ, པཙྩཏྠརིཏྭཱ ནིཔཛྫིཏུ’’ནྟི (ཙཱུལ༹ཝ. ༣༢༤) ཝུཏྟཏྟཱ པརིབྷཎྜཀཏཾ བྷཱུམིཾ ཝཱ བྷཱུམཏྠརཎསེནཱསནཾ ཝཱ སངྒྷིཀཾ མཉྩཔཱིཋཾ ཝཱ ཨཏྟནོ སནྟཀེན པཙྩཏྠརཎེན པཙྩཏྠརིཏྭཱཝ ནིཔཛྫིཏབྦཾ.

༣༤༤. སངྒྷཱཊིཡཱ ¶ ན པལླཏྠེཏི ཨདྷིཊྛིཏཙཱིཝརེན ཝིཧཱརེ ཝཱ ཨནྟརགྷརེ ཝཱ པལླཏྠིཀཱ ན ཀཱཏབྦཱཏི ཨཏྠོ. པརིཀམྨཀཏཾ (ཙཱུལ༹ཝ. ཨཊྛ. ༣༢༤) བྷིཏྟིཨཱདིཾ ན ཨཔསྶཡེ. ‘‘ན བྷིཀྑཝེ པརིཀམྨཀཏཱ བྷིཏྟི ཨཔསྶེཏབྦཱ. ཡོ ཨཔསྶེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༣༢༤) ཧི ཝུཏྟཾ. ཏསྨཱ སེཏབྷིཏྟི ཝཱ ཙིཏྟཀམྨཀཏཱ ཝཱ བྷིཏྟི ན ཨཔསྶཡིཏབྦཱ. ན ཀེཝལཾ བྷིཏྟིཡེཝ, པརིཀམྨཀཏཱ དྭཱརཀཝཱཊཝཱཏཔཱནཏྠམྦྷཱདཡོཔི ན ཨཔསྶཡིཏབྦཱ. ཨེཏྠཔི ལོམགཎནཱཡ ཨེཝ ཨཱཔཏྟིཡོ ཝེདིཏབྦཱ. སནྟེ ཨུདཀེ ནོ ན ཨཱཙམེཏི (ཙཱུལ༹ཝ. ༣༧༣; ཙཱུལ༹ཝ. ཨཊྛ. ༣༧༣) ནོ ན ཨཱཙམེཏུཾ, ཨུདཀསུདྡྷིཾ ཨཀཱཏུཾ ན ཝཊྚཏཱིཏི ཨཏྠོ. སནྟེཏི ཝཙནེན ཨསནྟེ ཨནཱཔཏྟཱིཏི དཱིཔེཏི.

༣༤༥. ཨཀཔྤིཡསམཱདཱནེཏི བྷིཀྑུཾ ཝཱ སཱམཎེརཱདིཀེ སེསསཧདྷམྨིཀེ ཝཱ ཨཀཔྤིཡེ ནིཡོཛེནྟསྶ དུཀྐཊམེཝ. ‘‘ན, བྷིཀྑཝེ, པབྦཛིཏེན ཨཀཔྤིཡེ སམཱདཔེཏབྦཾ. ཡོ སམཱདཔེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༣༠༣) ཧི ཝུཏྟཾ. སབྷཱགཱཡ (མཧཱཝ. ཨཊྛ. ༡༦༩) ཨཱཔཏྟིཡཱ དེསནཱཡཱཏི ཨཏྠོ. ཝཏྠུསབྷཱགཏཱ ཨིདྷ ཨདྷིཔྤེཏཱ, ན ཨཱཔཏྟིསབྷཱགཏཱ. ‘‘ན བྷིཀྑཝེ སབྷཱགཱ ཨཱཔཏྟི དེསེཏབྦཱ. ཡོ དེསེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༦༩) ཙ ‘‘ན བྷིཀྑཝེ སབྷཱགཱ ཨཱཔཏྟི པཊིགྒཧེཏབྦཱ. ཡོ པཊིགྒཎྷེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༦༩) ཙ ཝུཏྟཾ. ཝཏྠུསབྷཱགཾ ཨཱཔཏྟིཾ ཨཱཝི ཀཱཏུམྤི ན ཝཊྚཏི, ཏེན ཝུཏྟཾ ‘‘ཨཱཝིཀམྨེ ཙ དུཀྐཊ’’ནྟི. ‘‘ཨཧཾ, ཨཱཝུསོ, ཨིཏྠནྣཱམཾ ¶ ཨཱཔཏྟིཾ ཨཱཔཛྫིཾ, ཏཾ ཨིཏོ ཝུཊྛཧིཏྭཱ པཊིཀརིསྶཱམཱི’’ཏི ཨཉྙསྶ ཝཙནཾ ཨཱཝིཀམྨཾནཱམ.

༣༤༦. ཨིཏརསྶ ¶ ཏཱུཏི ཨསུདྡྷཙིཏྟསྶ.

༣༤༧. པོརིསནྟི (ཙཱུལ༹ཝ. ཨཊྛ. ༢༨༤) པུརིསཔྤམཱཎཾ ཨབྷིརུཧིཏུཾ ཝཊྚཏཱིཏི ཨཏྠོ. ‘‘ཨནུཛཱནཱམི, བྷིཀྑཝེ, སཏི ཀརཎཱིཡེ པོརིསཾ རུཀྑཾ ཨབྷིརུཧིཏུཾ, ཨཱཔདཱསུ ཡཱཝདཏྠ’’ནྟི (ཙཱུལ༹ཝ. ༢༨༤) ཧི ཝུཏྟཾ.

༣༤༨. པརིསྶཱཝནཾ (ཙཱུལ༹ཝ. ༢༥༩; ཙཱུལ༹ཝ. ཨཊྛ. ༢༥༩) ཝིནཱ ཨཌྜྷཡོཛནཾ གཙྪནྟསྶ དུཀྐཊནྟི སམྦནྡྷོ. ‘‘ཨདྡྷཱནགམནསམཡོ ནཱམ ཨཌྜྷཡོཛནཾ གཙྪིསྶཱམཱིཏི བྷུཉྫིཏབྦ’’ནྟི (པཱཙི. ༢༡༨) ཝུཏྟཾ, ཏསྨཱ ཨཌྜྷཡོཛནམེཝ ཨནྟིམཾ ཨདྡྷཱནནྟི ཝེདིཏབྦཾ. བྷིཀྑུནིཡཱ ཙ མཱཏུགཱམེན ཙ སཾཝིདྷཱནསིཀྑཱཔདེ ‘‘ཨེཀདྡྷཱནམགྒཾ པཊིཔཛྫེཡྻ, ཨནྟམསོ གཱམནྟརམྤཱི’’ཏི (པཱཙི. ༡༨༢, ༤༡༣) ཨེཝཾ ཝིསེསེཏྭཱ ཝུཏྟཏྟཱ ‘‘ཀུཀྐུཊསམྤཱཏེ གཱམེ གཱམནྟརེ གཱམནྟརེ ཨཱཔཏྟི པཱཙིཏྟིཡསྶཱ’’ཏི (པཱཙི. ༡༨༣, ༤༡༤) ཝུཏྟཾ, ན ཨདྡྷཱནལཀྑཎེན. ཡདི གཱམནྟརཔརིཙྪེདེན ཨདྡྷཱནཾ ཝུཙྩཏི, གཎབྷོཛནསིཀྑཱཔདེཔི ‘‘ཨདྡྷཱནགམནསམཡོ ནཱམ གཱམནྟརམྤི གཙྪིསྶཱམཱིཏི བྷུཉྫིཏབྦ’’ནྟི ཝདེཡྻ, ན ཙ ཝུཏྟཾ. ཏསྨཱ ‘‘ན བྷིཀྑཝེ ཨཔརིསྶཱཝནཀེན ཨདྡྷཱནོ པཊིཔཛྫིཏབྦོ. ཡོ པཊིཔཛྫེཡྻ, ཨཱཔཏྟི དུཀྐཊསྶ. སཙེ ན ཧོཏི པརིསྶཱཝནཾ ཝཱ དྷམྨཀརཎོ ཝཱ, སངྒྷཱཊིཀཎྞོཔི ཨདྷིཊྛཱཏབྦོ ཨིམིནཱ པརིསྶཱཝེཏྭཱ པིཝིསྶཱམཱི’’ཏི ཝུཏྟཊྛཱནེཔི ཨཌྜྷཡོཛནཝསེནེཝ ཨདྡྷཱནཔརིཙྪེདོ ཝེདིཏབྦོ. ཨབྷཡགིརིཝཱསཱིནཾ པན ‘‘དྭིགཱཝུཏཝསེན ཨདྡྷཱནཔརིཙྪེདོ’’ཏི པཱལི༹ཡཾ ཨེཝ ཨཏྠི. ཡཱཙམཱནསྶཱཏི ཡཱཙནྟསྶ. ‘‘ན ཙ བྷིཀྑཝེ ཨདྡྷཱནཔྤཊིཔནྣེན བྷིཀྑུནཱ པརིསྶཱཝནཾ ཡཱཙིཡམཱནེན ན དཱཏབྦཾ. ཡོ ན དདེཡྻ, ཨཱཔཏྟི དུཀྐཊསྶཱ’’ཏི ཧི ཝུཏྟཾ.

༣༤༩. ཨཉྙཏྲ ¶ ཨཱབཱདྷཔྤཙྩཡཱ ཀཎྞནཱསཱདིཀེ སེསངྒེ དུཀྐཊནྟི སམྦནྡྷོ. ཨཱབཱདྷེ སཏི ཨངྒུལིཨཱདཱིནི ཚིནྡིཏུཾ ཝཊྚཏི. ཨངྒཛཱཏཾ ཝཱ བཱིཛཱནི ཝཱ ཚིནྡིཏུཾ ན ཝཊྚཏི ཨེཝ. ཨཏྟགྷཱཏནེ ¶ ཙ དུཀྐཊནྟི སམྦནྡྷོ. ‘‘ན ཙ བྷིཀྑཝེ ཨཏྟཱནཾ གྷཱཏེཏབྦཾ. ཡོ གྷཱཏེཡྻ, ཨཱཔཏྟི དུཀྐཊསྶཱ’’ཏི ཧི ཝུཏྟཾ.

༣༥༠. ‘‘ན ཙ བྷིཀྑཝེ པཊིབྷཱནཙིཏྟཾ ཀཱརཱཔེཏབྦཾ ཨིཏྠིརཱུཔཀཾ པུརིསརཱུཔཀཾ. ཡོ ཀཱརཱཔེཡྻ, ཨཱཔཏྟི དུཀྐཊསྶ. ཨནུཛཱནཱམི, བྷིཀྑཝེ, མཱལཱཀམྨཾ ལཏཱཀམྨཾ མཀརདནྟཀཾ པཉྩཔཊིཀ’’ནྟི (ཙཱུལ༹ཝ. ༢༩༩) ཝུཏྟཏྟཱ ‘‘ཙིཏྟཔོཏྠཀརཱུཔཱནི, ན ཀརེ ན ཙ ཀཱརཡེ’’ཏི ཝུཏྟཾ. བྷུཉྫནྟནྟི (ཙཱུལ༹ཝ. ཨཊྛ. ༣༡༦) ཝིཔྤཀཏབྷོཛནཾ. ‘‘ན བྷིཀྑཝེ ཝིཔྤཀཏབྷོཛནོ བྷིཀྑུ ཝུཊྛཱཔེཏབྦོ. ཡོ ཝུཊྛཱཔེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༣༡༦) ཧི ཝུཏྟཾ.

༣༥༡. ཡཱནཱནཱིཏི ཝཡ྄ཧཾ རཐོ སཀཊཾ སནྡམཱནིཀཱདཱིནི གིལཱནསྶ ཨབྷིརུཧིཏུཾ ཀཔྤནྟི, སིཝིཀོ ཙ ཀཔྤཏི. ཨེཝཾ སབྦཏྠ. ‘‘ཨནུཛཱནཱམི, བྷིཀྑཝེ, གིལཱནསྶ ཡཱནཾ, པུརིསཡུཏྟཾ ཧཏྠཝཊྚཀཾ, སིཝིཀཾ པཱཊངྐི’’ནྟི (མཧཱཝ. ༢༥༣) ཧི ཝུཏྟཾ.

༣༥༢. དཝནྟི ཀེལི༹ཾ. ‘‘ན བྷིཀྑཝེ བུདྡྷཾ ཝཱ དྷམྨཾ ཝཱ སངྒྷཾ ཝཱ ཨཱརབྦྷ དཝོ ཀཱཏབྦོ. ཡོ ཀརེཡྻ, ཨཱཔཏྟི དུཀྐཊསྶཱ’’ཏི (པཱཙི. ༦༢༧) ཧི ཝུཏྟཾ. ཏསྨཱ ‘‘ཀིཾ བུདྡྷོ སིལཀབུདྡྷོ, ཨུདཱཧུ པཊིབུདྡྷོ’’ཏི ཝཱ ‘‘ཀིཾ དྷམྨོ གོདྷམྨོ ཨཛདྷམྨོ’’ཏི ཝཱ ‘‘ཀིཾ སངྒྷོ ཨཛསངྒྷོ མིགསངྒྷོ’’ཏི ཝཱ ཨེཝམཱདིནཱ ནཡེན ཡོ དཝཾ ཀརོཏི, ཏསྶ དུཀྐཊནྟི ཝེདིཏབྦཾ. ‘‘ཏུམྷཱཀཾ ¶ ཙཱིཝརཾ དསྶཱམ, པཏྟཾ དསྶཱམཱ’’ཏིཨཱདིནཱ ནཡེན སཱམཎེརཾ ཝཱ ཨུཔསམྤནྣཾ ཝཱ ཨཉྙསྶ ཨནྟམསོ དུསྶཱིལསྶཱཔི པརིསབྷཱུཏཾ ཨཏྟནོ ཨུཔཊྛཱཀཀརཎཏྠཾ ཨུཔལཱལ༹ནེ དུཀྐཊནྟི ཨཏྠོ. ‘‘ན བྷིཀྑཝེ ཨཉྙསྶ པརིསཱ ཨཔལཱལེ༹ཏབྦཱ. ཡོ ཨཔལཱལེ༹ཡྻ, ཨཱཔཏྟི དུཀྐཊསྶཱ’’ཏི ཧི ཝུཏྟཾ.

༣༥༣. ཀཱཡཾ (ཙཱུལ༹ཝ. ༤༡༡) ཝཱ ཨཱུརུཾ ཝཱ ནིམིཏྟཾ ཝཱ ཝིཝརིཏྭཱ བྷིཀྑུནཱིནཾ ན དསྶཡེཏི སམྦནྡྷོ. ཀདྡམུདཀཱདིནཱ ཏཱ བྷིཀྑུནིཡོ ན སིཉྩེཡྻཱཏི ཨཏྠོ. ན ཀེཝལཾ ཀདྡམུདཀཱདིཀེནེཝ, ཝིཔྤསནྣཨུདཀརཛནཀདྡམཱདཱིསུཔི ཡེན ཀེནཙི ཨོསིཉྩནྟསྶ དུཀྐཊམེཝ.

༣༥༤. བཱལནྟི ཨེཏྠ བཱལོ ནཱམ ཡོ ཨོཝཱདཾ གཧེཏྭཱ པཱཏིམོཀྑུདྡེསཀསྶ ཨཱརོཙེཏྭཱ པཱཊིཔདེ ¶ པཙྩཱཧརིཏབྦནྟི ན ཛཱནཱཏི. གིལཱནོ ནཱམ ཡོ ཨོཝཱདཾ གཧེཏྭཱ ཨུཔོསཐགྒཾ གནྟྭཱ ཨཱརོཙེཏུཉྩ པཙྩཱཧརིཏུཉྩ ན སཀྐོཏི. གམིཡོ ནཱམ ཡོ པཊིདེསཾ གནྟུཀཱམོ.

‘‘ན བྷིཀྑཝེ ཨོཝཱདོ ན གཧེཏབྦོ. ཡོ ན གཎྷེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༤༡༤) ཙ ‘‘ཨནུཛཱནཱམི, བྷིཀྑཝེ, ཋཔེཏྭཱ བཱལཾ, ཋཔེཏྭཱ གིལཱནཾ, ཋཔེཏྭཱ གམིཀཾ, ཨཝསེསེཧི ཨོཝཱདཾ གཧེཏུ’’ནྟི (ཙཱུལ༹ཝ. ༤༡༤) ཙ ‘‘ན བྷིཀྑཝེ ཨོཝཱདོ ན པཙྩཱཧརིཏབྦོ. ཡོ ན པཙྩཱཧརེཡྻ, ཨཱཔཏྟི དུཀྐཊསྶཱ’’ཏི (པཱཙི. ༤༡༥) ཙ ཝུཏྟཏྟཱ བྷིཀྑུནཱིཧི ཏེརསིཡཾ ཝཱ ཙཱཏུདྡསིཡཾ ཝཱ ཨཱགནྟྭཱ ‘‘ཨཡཾ ཨུཔོསཐོ ཙཱཏུདྡསོ’’ཏི ཝཱ ‘‘པནྣརསོ’’ཏི ཝཱ ‘‘ཀདཱ ཨཡྻ ཨུཔོསཐོ’’ཏི ཝཱ པུཙྪིཏེ ‘‘ཙཱཏུདྡསོ’’ཏི ཝཱ ‘‘པནྣརསོ’’ཏི ཝཱ ‘‘སྭེ བྷགིནི ཨུཔོསཐོ’’ཏི ¶ ཝཱ ཨཱཙིཀྑིཏབྦཾ. ཏཱཧི བྷིཀྑུནཱིཧི ཨུཔོསཐདིཝསེ ཨཱགནྟྭཱ ‘‘བྷིཀྑུནིསངྒྷོ ཨཡྻ བྷིཀྑུསངྒྷསྶ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར ཨཡྻ བྷིཀྑུནིསངྒྷོ ཨོཝཱདཱུཔསངྐམན’’ནྟི ཨེཝཾ ཡཱཙིཏབྦཾ, ཏཾ ཝཙནཾ པཊིགྒཧེཏྭཱ ཨུཔོསཐགྒེ པཱཏིམོཀྑུདྡེསཀསྶ ‘‘བྷིཀྑུནིསངྒྷོ, བྷནྟེ, བྷིཀྑུསངྒྷསྶ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར, བྷནྟེ, བྷིཀྑུནིསངྒྷོ ཨོཝཱདཱུཔསངྐམན’’ནྟི ཨཱཙིཀྑིཏབྦཾ. པཱཏིམོཀྑུདྡེསཀེནཱཔི སཙེ ཏཏྠ བྷིཀྑུནོཝཱདཀོ ཨཏྠི, ‘‘ཨིཏྠནྣཱམོ བྷིཀྑུ བྷིཀྑུནོཝཱདཀོ སམྨཏོ, ཏཾ བྷིཀྑུནིསངྒྷོ ཨུཔསངྐམཏཱུ’’ཏི ཝཏྟབྦཾ. སཙེ ནཏྠི, ‘‘ཀོ ཨཱཡསྨཱ ཨུསྶཧཏི བྷིཀྑུནིཡོ ཨོཝདིཏུ’’ནྟི པུཙྪིཏྭཱ སཙེ ཨཏྠི ཨཊྛཧངྒེཧི སམནྣཱགཏོ བྷིཀྑུ, ཏཾ ཏཏྠེཝ སམྨནྣིཏྭཱ ཝུཏྟནཡེནེཝ ཨོཝཱདཔྤཊིགྒཱཧཀསྶ ཨཱརོཙེཏབྦཾ. ཡདི ནཏྠི ཀོཙི བྷིཀྑུ བྷིཀྑུནོཝཱདཀོ སམྨཏོ, ‘‘པཱསཱདིཀེན བྷིཀྑུནིསངྒྷོ སམྤཱདེཏཱུ’’ཏི ཝཏྟབྦཾ. ཏེན བྷིཀྑུནཱ ‘‘སཱདྷཱུ’’ཏི སམྤཊིཙྪིཏྭཱ པཱཊིཔདེ བྷིཀྑུནཱིནཾ ‘‘ནཏྠི ཀོཙི བྷིཀྑུ བྷིཀྑུནོཝཱདཀོ སམྨཏོ, པཱསཱདིཀེན བྷིཀྑུནིསངྒྷོ སམྤཱདེཏཱུ’’ཏི ཝཏྟབྦཾ. ཏཱཧིཔི ‘‘སཱདྷུ ཨཡྻཱ’’ཏི སམྤཊིཙྪིཏབྦཾ. ཨིམིནཱ ནཡེན གཎཔུགྒལེསུཔི ཝཙནབྷེདོ ཝེདིཏབྦོ.

༣༥༥. ལོཀཱཡཏཾ (ཙཱུལ༹ཝ. ༢༨༦; ཙཱུལ༹ཝ. ཨཊྛ. ༢༨༦) ནཱམ ཝིཏཎྜསཏྠཾ. ‘‘ན བྷིཀྑཝེ ཨཱསིཏྟཀཱུཔདྷཱནེ བྷུཉྫིཏབྦཾ. ཡོ བྷུཉྫེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༢༦༤) ཝུཏྟཏྟཱ ‘‘པེལཱ༹ཡཔི ན བྷུཉྫེཡྻཱ’’ཏི ཝུཏྟཾ.

༣༥༦. གིཧིཔཱརུཏཾ ¶ ན པཱརུཔེཡྻ, གིཧིནིཝཱསནཾ ན ནིཝཱསེཡྻཱཏི ཨཏྠོ. ‘‘ན བྷིཀྑཝེ གིཧིནིཝཏྠཾ ནིཝཱསེཏབྦཾ ཧཏྠིསོཎྜཀཾ ¶ མཙྪཝཱལ༹ཀཾ ཙཏུཀཎྞཀཾ ཏཱལཝཎྚཀཾ སཏཝལིཀཾ. ཡོ ནིཝཱསེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༢༨༠) ཧི ཝུཏྟཾ. པརིམཎྜལཏོ ཨཉྙཐཱ པཱརུཔནཾ, སབྦམེཏཾ གིཧིཔཱརུཏཾ ནཱམ. ཏཾ པན ན པཱརུཔེཏབྦནྟི ཨཏྠོ. སཾཝེལླིཡནྟི ཨེཏྠ ཀཙྪཾ བནྡྷིཏྭཱ ན ནིཝཱསེཡྻཱཏི ཨཏྠོ. དཱཡནྟི (ཙཱུལ༹ཝ. ༢༨༣; ཙཱུལ༹ཝ. ཨཊྛ. ༢༨༣) ཨརཉྙཾ. ནཱལིམྤཡེཡྻཱཏི སམྦནྡྷོ.

༣༥༧. ཝཌྜྷིཉྩ ན པཡོཛཡེ, ནོཉཱཏཀེ ནཔྤཝཱརིཏེ ན ཡཱཙེཏི ཨཏྠོ. ཨཉྙསྶཱཏི ཨེཏྠ (ཙཱུལ༹ཝ. ༤༢༠; ཙཱུལ༹ཝ. ཨཊྛ. ༤༢༠) ‘‘ཏུམྷེ པརིབྷུཉྫཐཱ’’ཏི ནིཡམེཏྭཱ དིནྣཾ སཧདྷམྨིཀཱནམྤི དཱཏུཾ ན ཝཊྚཏི. ཨགྒཾ གཧེཏྭཱ ཝཱ ཀཏིཔཱཧཾ བྷུཏྭཱ ཝཱ པུན དདེཡྻཱཏི ཨཏྠོ.

༣༥༨. ཨུདྡིསྶ ཡཱཙནེཏི ཨེཏྠ (པཱཙི. ཨཊྛ. ༦༧༩) ‘‘ཨམྷཱཀཾ ཝིཧཱརེ ཨིཏྠནྣཱམེན ཨིདཉྩིདཉྩ ཀཏ’’ནྟི ཝཱ ‘‘ཀརིསྶནྟཱི’’ཏི ཝཱ ཨེཝཾ ཨུདྡིསྶ རཀྑཾ ཡཱཙནེཏི ཨཏྠོ. ཉཏྭཱཉཏྭཱ ཝཱཏི ཨེཝཾ ‘‘ཨམྷེཧི ཡཱཙིཡམཱནཱ ཨིམེསཾ དཎྜེསྶནྟཱི’’ཏི ཏེསཾ དཎྜིནཾ ཉཏྭཱ ཝཱ ཨཉཏྭཱ ཝཱཏི ཨཏྠོ. ཏེཧི པན དཎྜིཏེ སོ དཎྜོ ཨུདྡིསྶ ཡཱཙནྟཱནཾ གཱིཝཱཝ བྷཎྜདེཡྻཾ ཧོཏི ཨེཝཱཏི ཨཏྠོ. ‘‘ཨིམིནཱ ཙ ཨིམིནཱ ཙ ཨིདཉྩ ཨིདཉྩ ཀཏཾ, ཨེཏྟཀཾ དཎྜཾ གཎྷཐཱ’’ཏི སཡཾ དཎྜཱཔནེ པན ཨསྶ དཎྜསྶ ཨགྒྷབྷེདེན པཱརཱཛིཀཐུལླཙྩཡདུཀྐཊཱ ཉེཡྻཱཏི ཨཏྠོ.

༣༥༩. ཨནཏྠཱཡ ཨསྶ ཙོརསྶ བྷཱསིཏེཏི སམྦནྡྷོ. རཱཛརཱཛམཧཱམཏྟཱདཱིཧི ཏསྶ ཙོརསྶ དཎྜཾ གཎྷནྟེ ཨསྶ བྷིཀྑུསྶ ཏཏྟཀཾ གཱིཝཱཏི ཨཏྠོ.

༣༦༠. ཝིགྷཱསཾ ¶ (པཱཙི. ༨༢༥-༨༢༦) ཝཱ ཨུཙྩཱརཾ ཝཱ སངྐཱརཾ ཝཱ མུཏྟཾ ཝཱ པཱཀཱརཀུཊྚཱནཾ བཧི ཚཌྜེཡྻ, དུཀྐཊནྟི ཨཏྠོ. ཝལ༹ཉྫེ ནཱཝལོཀིཡཱཏི ཨིམིནཱཝ ཨཝལ༹ཉྫནཀཱལེ ནཱཝལོཀེཏྭཱ ཚཌྜེཏུཾ ཝཊྚཏཱིཏི དཱིཔེཏི. ན ཀེཝལཾ ཏཏྠེཝ, ཨཐ ཁོ ཧརིཏེ ཝཱཔི ཝཱིཧཱདིནཱལི༹ཀེརཱདིརོཔིམེ ཚཌྜེནྟསྶ དུཀྐཊམེཝཱཏི ཨཏྠོ.

༣༦༡. ‘‘ཨུཔཧཱརཾ ཀརོམཱ’’ཏི ཝུཏྟེཏི པུཙྪིཏེཏི ཨདྷིཔྤཱཡོ.

༣༦༢. ཀཱིལ༹ཏྠཾ (པཱཙི. ༩༧༩; པཱཙི. ཨཊྛ. ༩༧༨) ¶ ཀཏཾ རཱཛཱགཱརཾ ཝཱ པོཀྑརཎིཾ ཝཱ ཨུཡྻཱནཾ ཝཱ ཙིཏྟཱགཱརཾ ཝཱ ཨཱརཱམཾ ཝཱ དཊྛུཾ གཙྪཏོ པདེ པདེ དུཀྐཊནྟི ཨཏྠོ.

༣༦༣. ཨཱསནེན (ཙཱུལ༹ཝ. ༣༦༤) ནཝེ ན པཊིབཱཧེཡྻ, ཨུཎྷེ (མཧཱཝ. ༦༧, ༧༨, ༧༩; ཙཱུལ༹ཝ. ༣༧༦, ༣༧༨, ༣༨༠, ༣༨༢) ཙཱིཝརཾ ན ནིདཧེཡྻ. གུརུནཱཏི ཨཱཙརིཡཱདིནཱ པཎཱམིཏོ ཁམཱཔེཡྻཱཏི སམྦནྡྷོ.

༣༦༤. ཨཱཔཏྟཱིཧི ཙ སཏྟཧཱིཏི (ཝཛིར. ཊཱི. པཱཙིཏྟིཡ ༢༦) སཏྟཧི ཨཱཔཏྟཱིཧི བྷིཀྑུཾ པརམྨུཁཱ ཨཀྐོསནེན ཙ ‘‘ཨསྶདྡྷོ ཨཔྤསནྣོ བཱིཛབྷོཛཱི’’ཏིཨཱདིནཱ ཨཉྙེནེཝ ཝཱ ཨཀྐོསནེན ཙ དུཀྐཊནྟི ཨདྷིཔྤཱཡོ.

༣༦༥. སདྡྷཱདེཡྻཾ (མཧཱཝ. ཨཊྛ. ༣༦༡) ཙཱིཝརཾ ཝཱ པིཎྜཔཱཏཾ ཝཱཏི ཨཏྠོ. ‘‘ན བྷིཀྑཝེ སདྡྷཱདེཡྻཾ ཝིནིཔཱཏེཏབྦཾ. ཡོ ཝིནིཔཱཏེཡྻ, ཨཱཔཏྟི ¶ དུཀྐཊསྶཱ’’ཏི (མཧཱཝ. ༣༦༡) ཧི ཝུཏྟཾ. ‘‘ཨནུཛཱནཱམི, བྷིཀྑཝེ, མཱཏཱཔིཏཱུནཾ དཱཏུ’’ནྟི (མཧཱཝ. ༣༦༡) ཝུཏྟཏྟཱ ‘‘ལབྦྷཾ པིཏཱུན’’ནྟི ཝུཏྟཾ.

༣༦༦. ཝསྶཾཝུཏྠོ ཨཉྙཏྲཱཏི སམྦནྡྷོ, ཨཉྙསྨིཾ ཝིཧཱརེཏི ཨཏྠོ. ཨཉྙཏོཏི ཨཉྙཝིཧཱརཏོ. ‘‘ན བྷིཀྑཝེ ཨཉྙཏྲ ཝསྶཾཝུཏྠེན ཨཉྙཏྲ ཙཱིཝརབྷཱགོ སཱདིཏབྦོ. ཡོ སཱདིཡེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༣༦༤) ཧི ཝུཏྟཾ. ཏེསནྟི ཏསྨིཾ ཝིཧཱརེ ཏཾ ཙཱིཝརཾ བྷཱཛེཏྭཱ གཎྷིཏུཾ ཡུཏྟཱནཾ བྷིཀྑཱུནཾ དྷུརནིཀྑེཔཏོ ཧོཏི བྷཎྜགྒྷེན ཀཱརིཡོཏི ཨཏྠོ.

༣༦༧. སཧ ཨནྟརེན ཨུཏྟརོཏི སནྟརུཏྟརོ, གཱམཾ ན པཝིསེཡྻཱཏི ཨཏྠོ. ‘‘ན བྷིཀྑཝེ སནྟརུཏྟརེན གཱམོ པཝིསིཏབྦོ. ཡོ པཝིསེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༣༦༢) ཧི ཝུཏྟཾ. ཀལློ ཝཱཏི ཨགིལཱནོ. སཨུཔཱཧནོ གཱམཾ ན པཝིསེཡྻཱཏི སམྦནྡྷོ. ‘‘ན བྷིཀྑཝེ ཙཱམརིབཱིཛནཱི དྷཱརེཏབྦཱ. ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༢༦༩), ‘‘ཨནུཛཱནཱམི, བྷིཀྑཝེ, ཏིསྶོ བཱིཛནིཡོ ཝཱཀམཡཾ ཨུསཱིརམཡཾ མོརཔིཉྪམཡ’’ནྟི (ཙཱུལ༹ཝ. ༢༦༩) ¶ ཙ ཝུཏྟཏྟཱ ‘‘ན དྷཱརེཡྻ ཙཱམརཱིམཀསབཱིཛནི’’ནྟི ཝུཏྟཾ. མཀསབཱིཛནཱི པན དནྟཝིསཱཎདཱརུདཎྜཀཱཔི ཝཊྚཏི.

༣༦༨. ཨཱརཱམཏོ བཧཱིཏི སམྦནྡྷོ. ‘‘ན བྷིཀྑཝེ ཚཏྟཾ དྷཱརེཏབྦཾ. ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི, ‘‘ཨནུཛཱནཱམི, བྷིཀྑཝེ, གིལཱནསྶ ཚཏྟ’’ནྟི ཙ ཝུཏྟཏྟཱ ཨགིལཱནོ ཨཱརཱམཏོ བཧི ན ལབྷཏི, ཙཱིཝརགུཏྟིཡཱདིཨཏྠཱཡ ཨགིལཱནོཔི ལབྷཏཱིཏི ཨཏྠོ.

༣༦༩. གཱཧེཡྻ ནུབྷཏོཀཱཛནྟི ན གཱཧེཡྻ ཨུབྷཏོཀཱཛཾ. ཨེཀནྟརིཀཀཱཛཀནྟི ཨེཀཏོཀཱཛཉྩ ཨནྟརཀཱཛཉྩ ¶ . སཱིསབྷཱརོ ཙ ཁནྡྷབྷཱརོ ཙ ཀཊིབྷཱརོ ཙ སཱིསཀྑནྡྷཀཊིབྷཱརཱ. ‘‘ན བྷིཀྑཝེ ཨུབྷཏོཀཱཛཾ ཧརིཏབྦཾ. ཡོ ཧརེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ. ༢༨༡), ‘‘ཨནུཛཱནཱམི, བྷིཀྑཝེ, ཨེཀཏོཀཱཛཾ ཨནྟརཀཱཛཾ སཱིསབྷཱརཾ ཁནྡྷབྷཱརཾ ཀཊིབྷཱརཾ ཨོལམྦཀ’’ནྟི (ཙཱུལ༹ཝ. ༢༨༡) ཙ ཝུཏྟཏྟཱ ཨུབྷཏོཀཱཛམེཝ ན ཝཊྚཏི, སེསཱནི ཝཊྚནྟཱིཏི ཝེདིཏབྦཱ.

༣༧༠. ཨནོཀཱསཀཏནྟི (མཧཱཝ. ༡༥༣) ཡོ པཋམམེཝ ‘‘ཀརོཧི མེ ཨཱཝུསོ ཨོཀཱསཾ, ཨཧཾ ཏཾ ཝཏྟུཀཱམོ’’ཏི ཨེཝཾ ཨཀཏོཀཱསཾ ཨཱཔཏྟིཡཱ ཙོདེཡྻ, ཏསྶ དུཀྐཊཾ ཧོཏཱིཏི ཨཏྠོ. ཏཐཱཏི དུཀྐཊམེཝཱཏི ཨཏྠོ.

༣༧༡. པཀཏངྒུལེན, ན སུགཏངྒུལེནཱཏི ཨཏྠོ.

༣༧༢. མཱུགབྦཏཱདིཾ (མཧཱཝ. ༢༠༩; མཧཱཝ. ཨཊྛ. ༢༠༩) ཏིཏྠིཡབྦཏཾ ཡདི གཎྷེཡྻ, དུཀྐཊནྟི ཨཏྠོ. ཨཱདི-སདྡེན གོཝཏཀུཀྐུརཝཏཱདཡོ སངྒཧིཏཱ. ཏཐཱཏི (མཧཱཝ. ༣༠༣; མཧཱཝ. ཨཊྛ. ༣༠༣) ནྷཱཔིཏཔུབྦཀོ ཁུརབྷཎྜཾ ཡདི པརིཧརེཡྻ, དུཀྐཊམེཝཱཏི ཨཏྠོ.

༣༧༣. ཡཾ ཀིཉྩཱིཏི (ཀངྑཱ. ཨཊྛ. ཀུཊིཀཱརསིཀྑཱཔདཝཎྞནཱ) ནྷཱཔིཏཏུཎྞཀཱརཀམྨཱདི ཡཾ ཀིཉྩི ཧཏྠཀམྨནྟི ཨཏྠོ. ཏདནུསཱརཏོཏི ཧཏྠཀམྨཡཱཙནཱནུསཱརཏོཏི ཨཏྠོ. སཙེ ཨེཝཾ ཡཱཙཏོ ཧཏྠཀམྨམཱུལམེཝ དེཏི, ཏཾ ཨཉྙསྶ དཱཔེཏྭཱ ¶ ཀཱརེཏུཾ ཝཊྚཏཱིཏི ཨཏྠོ. ནིཀྐམྨཾ པན ཧཏྠཀམྨཝསེན ཨཡཱཙིཏྭཱཔི ‘‘ཨེཧི ཨིམཾ ཀརོཧཱི’’ཏི ཀཱརེཏུཾ ཀཔྤཏཱིཏི ཨཏྠོ. ཡཾ ཀིཉྩིཔརསནྟཀནྟི ཡཾ ཀིཉྩི དཱརུཏིཎཱདིཀཾ ཨཔརསནྟཀཾ ཨཔརིགྒཧིཏཾ ཨཱཧརཱཔེཏུཾ ཀཔྤཏཱིཏི ཨདྷིཔྤཱཡོ.

༣༧༤. གིཧཱིནནྟི ¶ གིཧཱིནཾ སནྟཀཾ. གོཔཀེཏི རཀྑཀེ. ཡཏྟཀཾ དེཏི, ཏཏྟཀཾ གཧེཏུཾ ཀཔྤཏཱིཏི ཨཏྠོ. ཡཐཱཔརིཙྪེདནྟི ‘‘དིཝསེ དིཝསེ ཨེཏྟཀཾ ཨུཙྪུནཱལི༹ཀེརཾ ཨམྦཔཀྐཾ ཏུམྷེ ཁཱདཐཱ’’ཏི པརིཙྪིནྡིཏྭཱ དིནྣམེཝ ཏེསུ དེནྟེསུ ལབྦྷཏཱིཏི ཨཏྠོ.

༣༧༥. དྭིཧཱཔཛྫེཡྻཱཏི དྭཱིཧི ཨཱཔཛྫེཡྻ. ཀཏམེཧི དྭཱིཧཱིཏི ཙེ, ཏེ དསྶེཏུཾ ‘‘ཀཱཡཝཱཙཱཧཱི’’ཏི ཝུཏྟཾ, ‘‘དྭཱིཧཱཀཱརེཧི ཨཱཔཏྟིཾ ཨཱཔཛྫཏི, ཀཱཡེན ཨཱཔཛྫཏི, ཝཱཙཱཡ ཨཱཔཛྫཏཱི’’ཏི (པརི. ༣༢༢) ཧི ཝུཏྟཾ. ཀཱཡཝཱཙཱཧི ཨཱཔཏྟིཾ ཨཱཔཛྫནྟོ ཙ ཚཧི ཨཱཀཱརེཧི ཨཱཔཏྟིཾ ཨཱཔཛྫཏི, ཏཱནི དསྶེཏུཾ ‘‘ཨལཛྫིཉཱཎཀུཀྐུཙྩཔཀཏཏྟཱ’’ཏིཨཱདིམཱཧ. ཨེཏྠ (པརི. ༢༩༥) པན ཨཀཔྤིཡབྷཱཝཾ ཛཱནནྟོ ཨེཝ ཝཱིཏིཀྐམཾ ཀརོནྟོ ཨལཛྫིཏཱཡ ཨཱཔཛྫཏི ནཱམ. ཀཔྤིཡཱཀཔྤིཡཾ ཨཛཱནིཏྭཱ ཨཱཔཛྫནྟོ ཨཉྙཱཎཏཱཡ. ཀཔྤིཡཾ ནུ ཁོ, ནོ ནུ ཁོ’’ཏི སཾསཡེ ཨུཔྤནྣེ ཏམབྷིཝིཏརིཏྭཱ ཝཱིཏིཀྐམཾ ཀརོནྟོ ཀུཀྐུཙྩཔཀཏཏྟཱ ཨཱཔཛྫཏི. སཧསེཡྻཱདིཾ ཨཱཔཛྫནྟོ སཏིཔླཝཱ, སཏིསམྨོསཱཏི ཨཏྠོ. ཨཙྪམཾསཾ ‘‘སཱུཀརམཾས’’ནྟི ཝཱ སཱུཀརམཾསཾ ‘‘ཨཙྪམཾས’’ནྟི ཝཱ ཁཱདནྟོ ཨཀཔྤིཡེ ཀཔྤིཡསཉྙིཏཱཡ ཙ ཀཔྤིཡེ ཨཀཔྤིཡསཉྙིཏཱཡ ཙ ཨཱཔཛྫཏཱིཏི ཝེདིཏབྦོ.

༣༧༦. ཨལཛྫིཏཱཡ ཝཱ ཨཉྙཱཎཏཱཡ ཝཱ ཨཱཔཏྟིཾ ཀཱཡཝཱཙཱཧི ཚཱདཡེཏི ཨཏྠོ. ཨེཀེ ཝཱ ཨེཀསྨིཾ ཝཱ. ལིངྒེཏི ལིངྒཔརིཝཏྟནཏོ. ཨེཝཾ ཙཏུདྷཱ ཨཱཔཏྟིཝུཊྛཱནཾ ཧོཏཱིཏི ཨཏྠོ. ཏིཎཝཏྠཱརཀསམཐཨབྦྷཱནཱདཱིནཾ ཝསེན སངྒྷེ ཨཱཔཏྟི ཝུཊྛཱཏཱིཏི ཝེདིཏབྦཾ ནིསྶཛྫནཱདཱིསུ གཎེ. ཨེཀསྶ སནྟིཀེ ཝུཊྛཱནཾ པཱཀཊམེཝ. ‘‘ཡཱ ཨཱཔཏྟིཡོ ¶ བྷིཀྑཱུནཾ བྷིཀྑུནཱིཧི ཨསཱདྷཱརཎཱ, ཏཱཧི ཨཱཔཏྟཱིཧི ཨནཱཔཏྟཱི’’ཏི (པཱརཱ. ༦༩) ཝཙནཏོ ལིངྒཔརིཝཏྟནེ ཨཱཔཏྟིཝུཊྛཱནཾ ཉཱཏབྦཾ.

༣༧༧. པཙྩཡདྭཡེཏི ཙཱིཝརེ ཙ པིཎྜཔཱཏེ ཙ. ན ཀེཝལཉྩ ཨིམེ ཨེཝ, ནིམིཏྟཀམྨམྤི ན ལབྦྷཏེཝ, གཱཐཱབནྡྷསུཁཏྠཾ པན ན ཝུཏྟཾ. ཏཏྠ ནིམིཏྟཀམྨཾ ནཱམ ཡཾ ཀིཉྩི ¶ པརེསཾ པཙྩཡདཱནསཾཡོཛནཀཾ ཀཱཡཝཙཱིཀམྨཾ. ཁཱདནཱིཡཾ གཧེཏྭཱ གཙྪནྟེ དིསྭཱ ‘‘ཀིཾ ཁཱདནཱིཡཾ ལབྷིཏྠཱ’’ཏིཨཱདིནཱ ནཡེན ཏསྶ པཝཏྟི ཝེདིཏབྦཱ. པརིཀཐཱ ནཱམ ཡཐཱ ཡཐཱ ཏཾ ལབྷཏི, ཏཐཱ ཏཐཱ པརིཝཏྟེཏྭཱ ཀཐནཾ. ‘‘ཨེཏརཧི བྷིཀྑཱུ པིཎྜཔཱཏེན ཀིལམནྟཱི’’ཏིཨཱདིནཱ ནཡེན ཏསྶ པཝཏྟི ཝེདིཏབྦཱ. ཨོབྷཱསོ ནཱམ པཙྩཡཔྤཊིསཾཡུཏྟཀཐཱ. ཝིཉྙཏྟི པན པཱཀཊཱ ཨེཝ. ཏཏིཡེཏི སེནཱསནེ. སེནཱསནེ པན ནིམིཏྟོབྷཱསཔརིཀཐཱ ཝཊྚནྟི, ཝིཉྙཏྟི ཨེཝ ཨེཀཱ ན ཝཊྚཏི. ཏཏྠ ནིམིཏྟཀམྨཾ ནཱམ ཨུཔཱསཀེ དིསྭཱ སེནཱསནཏྠཾ བྷཱུམིཔརིཀམྨཀརཎཱདི. ཨོབྷཱསོ ནཱམ ‘‘ཨུཔཱསཀཱ, ཏུམྷེ ཀུཧིཾ ཝསཐཱ’’ཏི ‘‘པཱསཱདེ, བྷནྟེ’’ཏི ཝུཏྟེ ‘‘ཀིཾ བྷིཀྑཱུནཾ པཱསཱདོ ན ཝཊྚཏཱི’’ཏིཨཱདིཀཾ ཝཙནཾ. པརིཀཐཱ ནཱམ ‘‘བྷིཀྑཱུནཾ སེནཱསནཾ སམྦཱདྷ’’ནྟི ཝཙནཾ. སེསེཏི གིལཱནཔཙྩཡེ.

༣༧༨. ན རུཧཏཱིཏི ན ཧོཏི. ཨཙྩཡེ དཱནནྟི ཨཙྩཡདཱནཾ. པཉྩསུ སཧདྷམྨིཀེསུ ཡེན ཀེནཙི ཀཱལཾ ཀརོནྟེན ‘‘མམཙྩཡེན མཡ྄ཧཾ པརིཀྑཱརོ ཨུཔཛ྄ཛྷཱཡསྶ ཧོཏུ, ཨཱཙརིཡསྶ ཧོཏུ, ཨཉྙསྶ ཝཱ ཀསྶཙི ཧོཏཱུ’’ཏི ཝུཏྟེ ཏེསཾ ན ཧོཏི, ཏསྨཱ ཝུཏྟཾ ‘‘ན རུཧཏཱི’’ཏི. སངྒྷསྶེཝ ཙ ཏཾ ཧོཏཱིཏི ཡདི བྷིཀྑུསཱམཎེརེཧི ཨེཝཾ ཝུཏྟཾ, ཏསྨིཾ མཏེཔི བྷིཀྑུསངྒྷསྶེཝ ཧོཏི, བྷིཀྑུནིསིཀྑམཱནསཱམཎེརཱིཧི ¶ ཙེ ཝུཏྟཾ, ཏསྨིཾ མཏེ བྷིཀྑུནིསངྒྷསྶ ཏཾ ཧོཏཱིཏི ཨཏྠོ. གིཧཱིནཾ པན རཱུཧཏཱིཏི གིཧཱིནཾ པན ཨཙྩཡདཱནཾ ཨེཝ སབྦེསཾ རུཧཏཱིཏི ཝུཏྟཾ ཧོཏི.

༣༧༩. ཨུཔསྶཡེཏི བྷིཀྑུནིཝིཧཱརེ. དཱཡཛྫོཏི ཏསྶ པརིཀྑཱརསྶ དཱཡཛྫོ. སེསེཔཱིཏི སཙེ བྷིཀྑུནིསིཀྑམཱནསཱམཎེརིཡོ བྷིཀྑུཝིཧཱརེ ཀཱལཾ ཀརོནྟི, ཏཱསཾ པརིཀྑཱརཱནཾ བྷིཀྑུསངྒྷོཝ དཱཡཛྫོཏི ཨཏྠོ.

༣༨༠. པུརིམསྶེཝཱཏི ཨེཏྠ ‘‘ཨིམཾ པརིཀྑཱརཾ ནེཏྭཱ ཨསུཀསྶ དེཧཱི’’ཏི དིནྣཾ པུརིམསྶེཝ ཧོཏཱིཏི ཨཏྠོ. ‘‘ཨསུཀསྶ དམྨཱི’’ཏི དིནྣཾ པན པཙྪིམསྶེཝ ཧོཏི པརིཙྩཛིཏྭཱ དིནྣཏྟཱ. ཨིམཾ ཝིདྷིཾ ཉཏྭཱཝ ཝིསྶཱསགྒཱཧཾ ཝཱ གཎྷེཡྻ, མཏཀཙཱིཝརཾ ཝཱ ཨདྷིཊྛེཏི སམྦནྡྷོ. མཏཀཙཱིཝརཨདྷིཊྛཱནཾ ནཱམ གྷཎྚིཾ པཧརིཏྭཱ ཀཱལཾ གྷོསེཏྭཱ ཐོཀཾ ཨཱགམེཏྭཱ སཙེ བྷིཀྑཱུ ཨཱགཙྪནྟི, ཏེཧི སདྡྷིཾ བྷཱཛེཏབྦཱནི, ནོ ཙེ ཨཱགཙྪནྟི, ‘‘མཡ྄ཧིམཱནི ཙཱིཝརཱནི པཱཔུཎནྟཱི’’ཏི ཨདྷིཊྛཱཏབྦཱནི. ཨེཝཾ ཨདྷིཊྛིཏེ སབྦཱནི ཏསྶེཝ ཧོནྟི, ཋིཏིཀཱ པན ན ཏིཊྛཏི. སཙེ ཨེཀེཀཾ ཨུདྡྷརིཏྭཱ ‘‘ཨཡཾ པཋམབྷཱགོ མཡ྄ཧཾ པཱཔུཎཱཏི, ཨཡཾ དུཏིཡབྷཱགོ’’ཏི ¶ ཨེཝཾ གཎྷཱཏི, གཧིཏཱནི ཙ སུགཧིཏཱནི ཧོནྟི, ཋིཏིཀཱ ཙ ཏིཊྛཏི. ཨེཝཾ པཱཔེཏྭཱ གཎྷནྟེནཱཔི ཨདྷིཊྛིཏམེཝ ཧོཏི.

༣༨༡. ལོཧབྷཎྜེ པཧརཎིཾ ཋཔེཏྭཱ སབྦཾ ཀཔྤཏི, དཱརུབྷཎྜེ ཙ དཱརུཛཾ པཏྟཉྩ པཱདུཀཉྩ, པལླངྐཉྩ ཨཱསནྡིཉྩ ཋཔེཏྭཱ སབྦཾ ཀཔྤཏི, མཏྟིཀཱམཡེ ཀཏཀཉྩ ཀུམྦྷཀཱརིཀཉྩ ཋཔེཏྭཱ སབྦཾ ཀཔྤཏཱིཏི ཨཏྠོ. ‘‘ཨནུཛཱནཱམི, བྷིཀྑཝེ, ཋཔེཏྭཱ པཧརཎིཾ སབྦཾ ལོཧབྷཎྜཾ, ཋཔེཏྭཱ ཨཱསནྡིཾ པལླངྐཾ དཱརུཔཏྟཾ དཱརུཔཱདུཀཾ སབྦཾ དཱརུབྷཎྜཾ, ཋཔེཏྭཱ ཀཏཀཉྩ ¶ ཀུམྦྷཀཱརིཀཉྩ སབྦཾ མཏྟིཀཱབྷཎྜ’’ནྟི (ཙཱུལ༹ཝ. ༢༩༣) ཧི ཝུཏྟཾ. ཨེཏྠ ཀཏཀནྟི པདུམཀཎྞིཀཱཀཱརེན ཀཏམལླཀནྟི ཨདྷིཔྤེཏཾ. དྷནིཡསྶེཝ སབྦམཏྟིཀཱམཡཱ ཀུཊི ཀུམྦྷཀཱརིཀནྟི. པཀིཎྞཀཝིནིཙྪཡོ.

༣༨༢. བྷིཀྑུབྷཱཝསྶ (པཱརཱ. ཨཊྛ. ༢.༡༩༨) ཡོ ཙཱགོ, སཱ པཱརཱཛིཀདེསནཱཏི ཨཏྠོ. ཝུཏྟཉྷེཏཾ ‘‘ཝིསུདྡྷཱཔེཀྑོཏི གིཧི ཝཱ ཧོཏུཀཱམོ ཨུཔཱསཀོ ཝཱ ཧོཏུཀཱམོ ཨཱརཱམིཀོ ཝཱ ཧོཏུཀཱམོ སཱམཎེརོ ཝཱ ཧོཏུཀཱམོ’’ཏི (པཱརཱ. ༡༩༨). ཏསྨཱ གིཧིབྷཱཝཱདིཀཾཡེཝ པཱརཱཛིཀཾ ཨཱཔནྣསྶ ཝིསུདྡྷི ནཱམ, ཨཉྙཏརསྶ ཝིསུདྡྷི ཨེཝ ནཏྠི. ‘‘ཚཱདེཏི ཛཱནམཱཔནྣཾ, པརིཝསེཡྻ ཏཱཝཏཱ’’ཏིཨཱདིནཱ ནཡེན ཧེཊྛཱ ཝུཏྟཝིདྷིཾ སནྡྷཱཡ ‘‘ཡཐཱཝུཏྟེན ཝུཊྛཱན’’ནྟི ཝུཏྟཾ.

༣༨༣. ཨིདཱནི ཝཏྟབྦཏཾ སནྡྷཱཡ ‘‘ཨེཝ’’ནྟི ཝུཏྟཾ.

༣༨༤. པཊིདེསེམཱིཏི ཨཱརོཙེམི. ཨེཏཱནི ཨཧཾ ཨེཏཱནཱཧཾ.

༣༨༦. (ཀ) ཡཾ ¶ སངྒྷོ གིལཱནསྶ ཏིཙཱིཝརེན ཝིཔྤཝཱསསམྨུཏིཾ དེཏི, ཏཾ ཨཉྙཏྲཱཏི ཨཏྠོ.

(ཁ) ཨཀཱལཙཱིཝརཾ (པཱརཱ. ༥༠༠) ¶ ནཱམ ‘‘ཨནཏྠཏེ ཀཐིནེ ཨེཀཱདསམཱསེ ཨུཔྤནྣཾ, ཨཏྠཏེ ཀཐིནེ སཏྟམཱསེ ཨུཔྤནྣཾ, ཀཱལེཔི ཨཱདིསྶ དིནྣཾ, ཨེཏཾ ཨཀཱལཙཱིཝརཾ ནཱམཱ’’ཏི.

(ག) པུརཱཎཙཱིཝརཾ (པཱརཱ. ༥༠༥) ནཱམ ‘‘སཀིཾ ནིཝཏྠམྤི སཀིཾ པཱརུཏམྤཱི’’ཏི ཝུཏྟཾ. ཨཉྙཱཏིཀཱ ནཱམ མཱཏིཏོ ཝཱ པིཏིཏོ ཝཱ ཡཱཝ སཏྟམཱ ཀུལཔརིཝཊྚཱ ཨསམྦནྡྷཱ. ནིསཱིདནཔཙྩཏྠརཎདྷོཝཱཔནེ དུཀྐཊཾ.

(གྷ) ཨཉྙཏྲ པཱརིཝཏྟཀཱཏི (པཱརཱ. ༥༡༢) ཨེཏྠ ཧརཱིཏཀཱིཁཎྜམྤི ཝཊྚཏི. ཙཱིཝརཾ ནཱམ ཨིདྷ ཝིཀཔྤནཱུཔགཔཙྪིམཏོ པཊྛཱཡ ཨདྷིཔྤེཏཾ.

(ང) ཨཉྙཏྲ སམཡཱཏི (པཱརཱ. ༥༡༩) ཨེཏྠ ‘‘ཨཙྪིནྣཙཱིཝརོ ཝཱ ཧོཏི བྷིཀྑུ ནཊྛཙཱིཝརོ ཝཱ’’ཏི ཨེཝཾ ཝུཏྟཾ སམཡནྟི ཨཏྠོ.

(ཙ) ‘‘སནྟརུཏྟརཔརམཾ ཏེན བྷིཀྑུནཱ ཏཏོ ཙཱིཝརཾ སཱདིཏབྦ’’ནྟི (པཱརཱ. ༥༢༤) ཝུཏྟཏྟཱ ‘‘ཏཏུཏྟརཱི’’ཏི ཝུཏྟཾ. ཨེཏྠ པན ‘‘སཙེ ཏཱིཎི ནཊྛཱནི ཧོནྟི, དྭེ སཱདིཏབྦཱནི. དྭེ ནཊྛཱནི, ཨེཀཾ སཱདིཏབྦཾ, ཨེཀཾ ནཊྛཾ, ན ཀིཉྩི སཱདིཏབྦ’’ནྟི (པཱརཱ. ༥༢༤) ཝུཏྟཾ.

(ཚ-ཛ) ‘‘ཀཱིདིསེན ཏེ (པཱརཱ. ༥༢༩), བྷནྟེ, ཙཱིཝརེན ཨཏྠོ, ཀཱིདིསཾ ཏེ ཙཱིཝརཾ ཙེཏཱཔེམཱི’’ཏི ཨེཝཾ ཨཔྤཝཱརིཏོཏི ཨཏྠོ. ཝིཀཔྤནྟི ཝིསིཊྛཀཔྤཾ ཨདྷིཀཝིདྷཱནཾ ཨཱཔནྣཾ. ཨིདྷ པུརིམཾ ཨེཀསྶ, དུཏིཡཾ བཧཱུནཾ ཝསེན ཝུཏྟཾ, ཨེཏྟཀཾ ནཱནཏྟཾ.

(ཛྷ) ཨཏིརེཀཏིཀྑཏྟུནྟི ཨེཏྠ ཀེནཙི ཡཾ ཀིཉྩི ཨཀཔྤིཡཝཏྠུཾ ཨཱནེཏྭཱ ‘‘ཨིདཾ ཁོ མེ, བྷནྟེ, ཨཱཡསྨནྟཾ ཨུདྡིསྶ ཙཱིཝརཙེཏཱཔནྣཾ ཨཱབྷཏཾ, པཊིགྒཎྷཏུ ཨཱཡསྨཱ ཙཱིཝརཙེཏཱཔནྣ’’ནྟི ཝུཏྟེ ‘‘ན ཁོ མཡཾ, ཨཱཝུསོ, ཙཱིཝརཙེཏཱཔནྣཾ པཊིགྒཎྷཱམ, ཙཱིཝརཉྩ ཁོ མཡཾ པཊིགྒཎྷཱམ ཀཱལེན ཀཔྤིཡ’’ནྟི ཝཏྟབྦཾ. ཨེཝཾ ཝུཏྟེ སཙེ སོ ‘‘ཨཏྠི ཀོཙི ཀཔྤིཡཀཱརཀོ’’ཏི ¶ ¶ ཝདཏི, ཙཱིཝརཏྠིཀེན ཋཔེཏྭཱ པཉྩ སཧདྷམྨིཀེ ཡོ ཀོཙི ཨུདྡིསིཏབྦོ ‘‘ཨེསོ ཁོ, ཨཱཝུསོ, བྷིཀྑཱུནཾ ཝེཡྻཱཝཙྩཀརོ’’ཏི, ཨེཏྟཀམེཝ ཝཏྟབྦཾ. ཨེཝཾ ཝུཏྟེ སཙེ དཱཡཀོ ཏསྶ ཧཏྠེ ཨཀཔྤིཡཝཏྠུཾ དཏྭཱ ‘‘ཨེསོ ཨཡྻསྶ ཙཱིཝརཾ ཙེཏཱཔེཏྭཱ དསྶཏཱི’’ཏི ཝཏྭཱ གཙྪཏི, ཏཾ ཨུཔསངྐམིཏྭཱ དྭཏྟིཀྑཏྟུཾ ཙོདེཏབྦོ སཱརེཏབྦོ ‘‘ཨཏྠོ མེ, ཨཱཝུསོ, ཙཱིཝརེནཱ’’ཏི, ཨེཏྟཀམེཝ ཝཏྟབྦཾ, ‘‘དེཧི མེ ཙཱིཝར’’ནྟིཨཱདིནཱ ན ཝཏྟབྦཾ. ཨེཝཾ ཏིཀྑཏྟུཾ ཙོདནཱཡ ཏཾ ཙཱིཝརཾ ལབྷཏི, ཨིཙྩེཏཾ ཀུསལཾ. ནོ ཙེ ལབྷཏི, ཚཀྑཏྟུཔརམཾ ཏུཎྷཱིབྷཱུཏེན ཋཱཏབྦཾ, ན ཨཱསནེ ནིསཱིདིཏབྦཾ, ན ཨཱམིསཾ པཊིགྒཧེཏབྦཾ, ན དྷམྨོ བྷཱསིཏབྦོ. ‘‘ཀིཾ ཀཱརཎཱ ཨཱགཏོསཱི’’ཏི ཝུཏྟེ ‘‘ཛཱནཱཧི, ཨཱཝུསོ’’ཏི ཨེཏྟཀམེཝ ཝཏྟབྦཾ. སཙེ ནིསཛྫཱདཱིནི ཀརོཏི, ཋཱནཾ བྷཉྫཏི. ཝཏྟབྷེདདུཀྐཊཉྩ ཨཱཔཛྫཏཱིཏི ཝདནྟི. ཨེཝཾ པན ཨཔྤཊིཔཛྫིཏྭཱ ཨཏིརེཀཏིཀྑཏྟུཾ ཙོདནཱཡ ཨཏིརེཀཚཀྑཏྟུཾ ཋཱནེན སཙེ ནིཔྥཱདེཏི, ནིསྶགྒིཡནྟི ཨཏྠོ.

(ཉ) སནྠཏཾ (པཱརཱ. ༥༤༤) ནཱམ སནྠརིཏྭཱ ཀཏཾ ཧོཏི ཨཝཱཡིམཾ. ཨེཀཀོསིཡཾསུནཱཔི ཙེ མིསྶེཏྭཱ ཀརོཏི, ནིསྶགྒིཡཾ.

(ཊ) སུདྡྷཀཱལ༹ཀཱནནྟི (པཱརཱ. ༥༤༧-༥༤༩) ཨཉྙེཧི ཨམིསྶིཏཱནནྟི ཨཏྠོ. ‘‘ཀཱལ༹ཀཾ ནཱམ དྭེ ཀཱལ༹ཀཱནི ཛཱཏིཀཱལ༹ཀཾ ཝཱ རཛནཀཱལ༹ཀཾ ཝཱ’’ཏི ཝུཏྟཾ.

(ཋ) ཨནཱདིཡིཏྭཱ…པེ… ཏུལནྟི (པཱརཱ. ༥༥༤) ཨེཏྠ པན ཡཏྟཀེཧི ཨེལ༹ཀལོམེཧི ཀཏྟུཀཱམོ ཧོཏི, ཏེསུ དྭེ ཀོཊྛཱསཱ ཀཱལ༹ཀཱནཾ, ཨེཀོ ཨོདཱཏཱནཾ, ཨེཀོ གོཙརིཡཱནཾ ཨཱདཱཏབྦོཏི ཝིནིཙྪཡོ. ཨེཀསྶཱཔི ཀཱལ༹ཀལོམསྶ ཨཏིརེཀབྷཱགེ སཏི ནིསྶགྒིཡམེཝ.

(ཌ) ཨཱུནཀཚབྦསྶཱནཱིཏི ¶ (པཱརཱ. ༥༦༢) ཚབྦསྶཏོ ཨོརབྷཱགེ.

(ཌྷ) ནིསཱིདནསནྠཏཾ (པཱརཱ. ༥༦༧) པན ཀཱརཱཔེནྟེན པུརཱཎསནྠཏསྶ ཨེཀཔསྶཏོ ཝཊྚཾ ཝཱ ཙཏུརསྶཾ ཝཱ ཚིནྡིཏྭཱ གཧིཏཊྛཱནཾ ཡཐཱ ཝིདཏྠིམཏྟཾ ཧོཏི, ཨེཝཾ གཧེཏྭཱ ཨེཀདེསཾ ཝཱ སནྠརིཏབྦཾ, ཝིཛཊེཏྭཱ ཝཱ སནྠརིཏབྦཾ.

(ཏ) ན ¶ ཀེཝལཾ དྷོཝཱཔནེ (པཱརཱ. ༥༧༨) ཨེཝ ནིསྶགྒིཡཾ, རཛནེཔི ནིསྶགྒིཡམེཝ.

(ད) རཱུཔིཡཔཊིགྒཧཎསྶེཝ (པཱརཱ. ༥༨༩) པཊིཀྑིཏྟཏྟཱ པཊིགྒཧིཏཔརིཝཏྟནེ དོསཾ ཨཔསྶནྟཱ ཀཏཱཀཏཱདིཝསེན ཨནེཀཝིདྷཾ ཛཱཏརཱུཔཔརིཝཏྟནཾ ཀརོནྟི, ཏཾ སནྡྷཱཡ ‘‘ནཱནཔྤཀཱརཀ’’ནྟི ཝུཏྟཾ.

༣༨༧-༩. ཨཱཔཏྟིཾ དེསེཏྭཱ པཙྪཱ ཀཏྟབྦཾ དསྶེཏུཾ ‘‘ཨཐཱ’’ཏི ཝུཏྟཾ. གིཧིཾ ཝདེཏི སཙེ ཏཏྠ ཨཱགཙྪཏི ཨཱརཱམིཀོ ཝཱ ཨུཔཱསཀོ ཝཱ, ཏཾ ཝདེཡྻཱཏི ཨཏྠོ. ཨེཝཾ ཝུཏྟོ སོ ‘‘ཨིམིནཱ ཀིཾ ཨཱཧརཱམཱི’’ཏི ཙེ ཝདེཡྻཱཏི ཨཏྠོ. ཨཝཏྭཱམནྟི ‘‘ཨིམཾ ཝཱ ཨིམཾ ཝཱ ཨཱཧརཱ’’ཏི ཨཝཏྭཱཏི ཨཏྠོ. ཝདེཏི ‘‘ཀཔྤིཡཾ ཨཱཙིཀྑིཏབྦ’’ནྟི (པཱརཱ. ༥༨༤, ༥༨༩) ཝཙནཏོ ‘‘པབྦཛིཏཱནཾ སཔྤི ཝཱ ཏེལཾ ཝཱ མདྷུ ཝཱ ཕཱཎིཏཾ ཝཱ ཝཊྚཏཱི’’ཏི ཨེཝཾ ཨཱཙིཀྑིཏབྦཾ, ‘‘ཨིམཾ ནཱམ ཨཱཧརཱ’’ཏི ན ཝཏྟབྦམེཝ. དྭེཔེཏེཏི དྭེཔི ཨེཏེ རཱུཔིཡཔཊིགྒཱཧཀཉྩ རཱུཔིཡསབྱོཧཱརིཀཉྩཱཏི ཨཏྠོ. ཨཉྙེནཱཏི ཨནྟམསོ ཨཱརཱམིཀེནཱཔི ལདྡྷབྷཱགོ ན ཀཔྤཏི ཨེཝ.

༣༩༠. ཨནྟམསོ (པཱརཱ. ཨཊྛ. ༢.༥༨༣-༤) ཏནྣིབྦཏྟཱ རུཀྑཙྪཱཡཱཔི ན ཀཔྤཏཱིཏི. ནིསྶཊྛཾ པཊིལདྡྷམྤཱིཏི ཨེཏྠ ཡཐཱ རཱུཔིཡསཾཝོཧཱརཾ ཀཏྭཱ ལདྡྷཝཏྠུཏོ ¶ ཨཱབྷཏཾ ན ཀཔྤཏི, ཏཐཱ ཀོསིཡམིསྶཀསནྠཏཱདིཏྟཡམྤི ན ཀཔྤཏི. ན ཀེཝལཾ ཏསྶེཝ, ཨཉྙེསམྤི ན ཀཔྤཏེཝ ‘‘ཨཉྙེན ཀཏཾ པཊིལབྷིཏྭཱ པརིབྷུཉྫཏི, ཨཱཔཏྟི དུཀྐཊསྶཱ’’ཏི (པཱརཱ. ༥༤༥, ༥༥༠, ༥༥༥) ཝུཏྟཏྟཱ.

༣༩༡. ཨེཝཾ ནོ ཙེ ལབྷེཐ, སོ ཨཱརཱམིཀཱདིཀོ ‘‘ཨིམཾ ཚཌྜེཧཱི’’ཏི སཾསིཡོ ཝཏྟབྦོཏི ཨཏྠོ. ཨེཝམྤི ནོ ཙེ ལབྷེཡྻ, སམྨཏོ བྷིཀྑུ ཚཌྜེཡྻཱཏི ཨཏྠོ.

༣༩༢. པཊིགྒཧིཏརཱུཔིཡཉྩ པརིཝཏྟིཏརཱུཔིཡཉྩ སནྡྷཱཡ ‘‘ཨེཏཱནཱི’’ཏི ཝུཏྟཾ. དུཏིཡཔཏྟོ ནཱམ ‘‘ཨཱུནཔཉྩབནྡྷནེན པཏྟེན ཨཉྙཾ ནཝཾ པཏྟཾ ཙེཏཱཔེཡྻ, ནིསྶགྒིཡ’’ནྟི (པཱརཱ. ༦༡༢) ཝུཏྟཔཏྟོ. སོ ཙ ཨེཏཱནི ཙ སངྒྷེ ནིསྶཊྛུཾ ལབྦྷརེཏི སམྦནྡྷོ. ‘‘སངྒྷམཛ྄ཛྷེ ནིསྶཛྫིཏབྦཾ, བྷིཀྑུཔརིསཱཡ ནིསྶཛྫིཏབྦ’’ནྟི (པཱརཱ. ༥༨༤, ༥༨༩) ཙ ཝུཏྟཏྟཱ ན གཎཔུགྒལཱནཾ ¶ ནིསྶཛྫིཏུཾ ཝཊྚཏི. སེསཱནི པན ཏཱིཎི ཙཱིཝརཱདིཝཏྠཱུནི ‘‘ནིསྶཛྫིཏབྦཾ སངྒྷསྶ ཝཱ གཎསྶ ཝཱ པུགྒལསྶ ཝཱ’’ཏི ཝུཏྟཏྟཱ (པཱརཱ. ༤༦༣) སངྒྷཱདཱིནཾ ནིསྶཛྫིཏུཾ ཝཊྚཏི. བྷཱསནྟརེནཔཱིཏི པཱལི༹ཡཱ ཝཏྟུཾ ཨསཀྐོནྟེན དམིལ༹བྷཱསཱདཱིསུ ཨཉྙཏརཱཡཔི ནིསྶཛྫིཏུཾ ཝཊྚཏཱིཏི ཨཏྠོ.

༣༩༣. (ཀ-ག) ནཱནཔྤཀཱརཀཾ ནཱམ ‘‘ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱ, ‘‘ཨནྟམསོ ཙུཎྞཔིཎྜོཔི དནྟཀཊྛམྤི དསིཀསུཏྟམྤཱི’’ཏི (པཱརཱ. ༥༩༥) པཱལི༹ཡཾ ཝུཏྟཾ. ཙེཏཱཔིཏོཏི (པཱརཱ. ༦༡༣) ཡཱཙིཏྭཱ གཧིཏོ.

༣༩༤. སམྨནྣིཏྭཱན པཏྟགཱཧཀཾ སངྒྷསྶ པཏྟནྟནྟི (པཱརཱ. ༦༡༤; ཀངྑཱ. ཨཊྛ. ཨཱུནཔཉྩབདྡྷནསིཀྑཱཔདཝཎྞནཱ) ཡ ཨནྟིམཾ པཏྟཾ, ཏཾ ཏསྶ དཱཔཡེཏི ཨཏྠོ.

༣༩༥. (ཁ) པརིདཧིཏཾ ¶ ནིསྶགྒིཡནྟི ཨེཏྠ (པཱརཱ. ༦༢༦-༦༢༨; པཱརཱ. ཨཊྛ. ༢.༦༢༨) པན ཋཏྭཱ ཝསྶིཀསཱཊིཀཱཡ པརིཡེསནཀྑེཏྟཾ ཀརཎཀྑེཏྟཾ ནིཝཱསནཀྑེཏྟཾ ཨདྷིཊྛཱནཀྑེཏྟནྟི ཙཏུབྦིདྷཾ ཁེཏྟཉྩ ཀུཙྪིསམཡོ པིཊྛིསམཡོཏི དུཝིདྷོ སམཡོ ཙ ཝེདིཏབྦོ. ཀཐཾ? གིམྷཱནམཱསེསུ པཙྪིམམཱསསྶ པུརིམོ ཨཌྜྷམཱསོ པརིཡེསནཀྑེཏྟཾ, པཙྪིམོ ཀརཎཀྑེཏྟཉྩ ནིཝཱསནཀྑེཏྟཉྩ, པརིཡེསིཏུམྤི ཝཊྚཏི, ཨདྷིཊྛཱཏུཾ པན ན ཝཊྚཏི. ཝསྶིཀཱ པན ཙཏྟཱརོ མཱསཱ པརིཡེསནཱདཱིནཾ ཙཏུནྣམྤི ཁེཏྟཾ. ཨེཏེ ཨེཝ པཉྩ མཱསཱ ཀུཙྪིསམཡོ ནཱམ. ཨིཏརེ སཏྟ མཱསཱ པིཊྛིསམཡོ, ཏཏྠ སཏུཔྤཱདཀརཎཾ ན ཝཊྚཏི.

(ག) ཨཙྪིནྣནྟི ཨེཏྠ ‘‘ཡོ པན མམ པཏྟཙཱིཝརཱདཱིནི ཝཧནྟོ མཡཱ སདྡྷིཾ ཙརིསྶཏཱི’’ཏི སཉྙཱཡ ཙཱིཝརཾ དཏྭཱ པུན སཀསཉྙཱཡ ཨེཝ ཨཏྟནོ ཝེཡྻཱཝཙྩཾ ཨཀརོནྟཾ དིསྭཱ ཨཙྪིནྡཏི, སོ ཨིམཾ ཨཱཔཏྟིཾ ཨཱཔཛྫཏི. ཀེཝལཾ པརིཙྩཛིཏྭཱ དིནྣཾ གཧེཏུམེཝ ན ལབྷཏི.

(གྷ) སུཏྟཾ ཝིཉྙཱཔེཏྭཱཏི ཨེཏྠ ཙཱིཝརཀཱརསམཡཱདཱིསུ ཙཱིཝརསིབྦནཱདཱིནམཏྠཱཡ སུཏྟཾ ཝིཉྙཱཔེཏྭཱཏི ཨཏྠོ. ཨཉྙཐཱ སུཏྟཾ ཝིཉྙཱཔེཏུམེཝ ན ཝཊྚཏི. ཝིཉྙཏྟིཡཱ ཨེཝ ལདྡྷཏནྟཝཱཡེཧཱིཏི ¶ ཨཏྠོ. སུཏྟཏནྟཝཱཡཱནཾ ཨཀཔྤིཡབྷཱཝེ སཏི དཱིགྷཏོ ཝིདཏྠིམཏྟེ, ཏིརིཡནྟཏོ ཧཏྠམཏྟེ ཝཱིཏེ ནིསྶགྒིཡཾ, ཨེཀཏོ ཨཀཔྤིཡཔཀྑེ དུཀྐཊཾ.

(ང) ཝིཀཔྤཾ ཨཱཔནྣནྟི (པཱརཱ. ༦༤༣) ‘‘ཨིདཾ ཁོ, ཨཱཝུསོ, ཙཱིཝརཾ མཾ ཨུདྡིསྶ ཝིཡྻཏི, ཨཱཡཏཉྩ ཀརོཐ ཝིཏྠཏཉྩཱ’’ཏིཨཱདིནཱ ཨདྷིཀཾ ཝིདྷཱནཾ ཨཱཔནྣནྟི ཨཏྠོ.

(ཙ) ཨཙྩེཀཙཱིཝརཾ (པཱརཱ. ༦༤༩-༦༥༠) ནཱམ སེནཱཡ གནྟུཀཱམཱདཱིཧི དིནྣཾ.

(ཚ) ཨཏིརེཀཚཱརཏྟནྟི (པཱརཱ. ༦༥༤-༦༥༥) ¶ ཚདིཝསཏོ ཨཏིརེཀཾ. ‘‘ཨཏྠཏཀཐིནཱནཾ ཝོ, བྷིཀྑཝེ, པཉྩ ཀཔྤིསྶནྟི, ཨནཱམནྟཙཱརོ ཨསམཱདཱནཙཱརོ གཎབྷོཛནཾ ཡཱཝདཏྠཙཱིཝརཾ ཡོ ཙ ཏཏྠ ཙཱིཝརུཔྤཱདོ, སོ ནེསཾ བྷཝིསྶཏཱི’’ཏི (མཧཱཝ. ༣༠༦) ཝུཏྟཨཱནིསཾསེསུ ཙཱིཝརམཱསེ ཨསམཱདཱནཙཱརཾ ཋཔེཏྭཱ སེསཱནིསཾསཱ ལབྦྷནྟི. ཡདི ཨསམཱདཱནཙཱརོ ལབྦྷེཡྻ, པཱཝེཡྻཀཱ བྷིཀྑཱུ ཝསྶཾཝུཏྠཱ ཨོཀཔུཎྞེཧི ཙཱིཝརེཧི ན བྷགཝནྟཾ ཨུཔསངྐམེཡྻུཾ, ཡསྨཱ ཏཾ ན ལབྷནྟི, ཏསྨཱ ཙཱིཝརམཱསེཔི ཏིཙཱིཝརཾ ཨཱདཱཡ ཨེཝ བྷགཝནྟཾ ཨུཔསངྐམིཾསུ. ཏསྨཱ ཝེདིཏབྦཾ ཨསམཱདཱནཙཱརཔརིཧཱརཾ ཨཏྠཏཀཐིནཱ ཨེཝ ལབྷནྟི, ན ཨིཏརེཏི ཝདནྟི.

༣༩༧. (ཁ) ‘‘ཨཧཾ, བྷནྟེ, ཨེཀཾ པཱཊིདེསནཱིཡཱཔཏྟིཾ, དྭེ, སམྦཧུལཱ པཱཊིདེསནཱིཡཱཔཏྟིཡོ ཨཱཔཛྫི’’ནྟི ཨིམཾ པན ཡེསུ པོཏྠཀེསུ ལིཁིཏཾ, ཏཾ ཨབྷཡགིརིཝཱསཱིནཾ ཁུདྡསིཀྑཱཝསེན དསྶིཏཾ ཀིར. ཏཏྠ ‘‘ཨཧཾ, ཨཱཡསྨཱ, སམྦཧུལཱ པཱཊིདེསནཱིཡཱ ཨཱཔཏྟིཡོ ཨཱཔནྣོ, ཏཱཡོ པཊིདེསེམི. ཨཧཾ, ཨཱཡསྨཱ, ཨེཀཾ པཱཊིདེསནཱིཡཾ ཨཱཔཏྟིཾ ཨཱཔནྣོ, ཏཾ པཊིདེསེམཱི’’ཏི ཧི ཝུཏྟཾ. ཨམྷཱཀཾ པན ཨེཝཾ དེསནཱཝིདྷཱནཾ ནཏྠི. ‘‘གཱརཡ྄ཧཾ, ཨཱཝུསོ, དྷམྨཾ ཨཱཔཛྫིཾ ཨསཔྤཱཡཾ པཱཊིདེསནཱིཡཾ, ཏཾ པཊིདེསེམཱི’’ཏི (པཱཙི. ༥༥༣) ཝུཏྟཾ. སམནྟཔཱསཱདིཀཱཡཾ (པཱཙི. ༥༥༣) ‘‘གཱརཡ྄ཧཾ ཨཱཝུསོ’ཏིཨཱདི པཊིདེསེཏབྦཱཀཱརདསྶན’’ནྟི ཝུཏྟཾ. ཀངྑཱཝིཏརཎིཡམྤི (ཀངྑཱ. ཨཊྛ. པཋམཔཱཊིདེསནཱིཡསིཀྑཱཔདཝཎྞནཱ) ‘‘ཏསྶཱ དེསེཏབྦཱཀཱརོ གཱརཡ྄ཧཾ ཨཱཝུསོ’ཏིཨཱདིནཱ ནཡེན སིཀྑཱཔདེ དསྶིཏོཡེཝཱ’’ཏི ཝུཏྟཏྟཱ པཱཋེ ཨཱགཏནཡེནེཝ དེསནཱཝིདྷཱནཾ ཝེདིཏབྦཾ. སཙེ དྭེ ཧོནྟི, ‘‘གཱརཡ྄ཧེ, ཨཱཝུསོ, དྭེ དྷམྨེ ཨཱཔཛྫིཾ ཨསཔྤཱཡེ པཱཊིདེསནཱིཡེ, ཏེ པཊིདེསེམཱི’’ཏི, ‘‘པསྶཐ, བྷནྟེ, ཏེ དྷམྨེ’’ཏི ¶ ཙ ‘‘གཱརཡ྄ཧེ ¶ , ཨཱཝུསོ, སམྦཧུལེ དྷམྨེ ཨཱཔཛྫིཾ ཨསཔྤཱཡེ པཱཊིདེསནཱིཡེ, ཏེ པཊིདེསེམཱི’’ཏི, ‘‘པསྶཐ, བྷནྟེ, ཏེ དྷམྨེ’’ཏི ཙ ཨེཝཾ ཡཐཱནུརཱུཔཾ དེསནཱཝིདྷཱནཾ ཝེདིཏབྦཾ. སེསཾ ཝུཏྟཔྤཀཱརམེཝཱཏི.

༣༩༨. ཨདེསནཱགཱམིནིཡནྟི (པརི. ༤༢༤ ཨཱདཡོ; པརི. ཨཊྛ. ༤༢༥) པཱརཱཛིཀཉྩ སངྒྷཱདིསེསཉྩ ན དེསཡེཏི ཨཏྠོ. ཨནཱཔཏྟིཉྩཱཏི ཨནཱཔཏྟིཾ ཨེཝ ‘‘ཨཱཔཏྟི’’ནྟི ན དེསཡེ. ལཧུཀཱཔཏྟིམྤི པུབྦེ དེསིཏཾ པུན ན དེསཡེཏི སམྦནྡྷོ, ནཱནཱསཾཝཱསནིསྶཱིམཊྛིཏཱནཾ སནྟིཀེ ན དེསཡེཏི ཨཏྠོ. ཙཏུཔཉྩཧཱིཏི ཨེཏྠ སམཱནཝསྶིཀཔཝཱརཎཱཡཾ ཝིཡ ཙཏཱུཧི ཝཱ པཉྩཧི ཝཱ ཨེཀཏོ ཧུཏྭཱ ཨེཀསྶ སནྟིཀེ ན དེསཡེཏི ཨཏྠོ. དྭིནྣཾ ཝཱ ཏིཎྞཾ ཝཱ ཝཊྚཏི. ཀཐཾ དེསེཏབྦནྟི ཙེ? ཨེཀསྶ སནྟིཀེ ཏཱིཧིཔི ཨེཀཏོ ནིསཱིདིཏྭཱ ‘‘ཨཧཾ, བྷནྟེ, ཨེཀཾ པཱཙིཏྟིཡཱཔཏྟིཾ ཨཱཔཛྫིཾ, ཏཾ ཏུམྷམཱུལེ པཊིདེསེམཱི’’ཏི ཨེཝཾ ཨཏྟནཱ ཨཱཔནྣཨཱཔཏྟིཝསེན ཝུཏྟེ ཏེན ‘‘པསྶསི, ཨཱཝུསོ, ཏཾ ཨཱཔཏྟི’’ནྟི ཨེཝཾ ཏིཀྑཏྟུཾ ཝུཏྟེ ‘‘ཨཱམ, བྷནྟེ, པསྶཱམཱི’’ཏི ཝཱ ‘‘ཨཱམཱཝུསོ པསྶཱམཱི’’ཏི ཝཱ ཝུཏྟེ པུན ཏེན ‘‘ཨཱཡཏིཾ སཾཝརེཡྻཱཐཱ’’ཏི ཝཱ ‘‘སཾཝརེཡྻཱསཱི’’ཏི ཝཱ ཝུཏྟེ ‘‘སཱདྷུ སུཊྛུ སཾཝརིསྶཱམཱི’’ཏི ཝཏྟབྦཾ, ཨེཝཾ དེསེཏབྦཾ. མནསཱཏི ཝཙཱིབྷེདཾ ཨཀཏྭཱ ཀེཝལཾ ཙིཏྟེནེཝ ན དེསཡེཏི ཨཏྠོ. ཨཔཀཏཏྟཱནནྟི ཨནྟིམཝཏྠུཾ ཨཛ྄ཛྷཱཔནྣསྶ ཝཱ ཨུཀྑིཏྟཀསྶ ཝཱ ཨུཔོསཐོ པཝཱརཎཱ ཝཱ ཋཔིཏཱ ཧོནྟི, ཏསྶ སནྟིཀེ ན དེསཡེཏི ཨཏྠོ. ནཱནེཀཱཏི ནཱནཱཔཏྟིཡོ ‘‘ཨེཀཱ’’ཏི ཝཏྭཱ ན དེསཡེཏི ཨཏྠོ. ཨེཀཱ པན ‘‘སམྦཧུལཱ’’ཏི དེསིཏཱ ཧོཏཱིཏི. དེསནཱཝིནིཙྪཡོ.

༣༩༩. ཀམྨཔྤཏྟེ ¶ སངྒྷེ སམཱགཏེཏི སམྦནྡྷོ. ཨེཏེན སངྒྷེ ཨསམཱགཏེ ཚནྡདཱནཾ ན རུཧཏཱིཏི དཱིཔིཏཾ ཧོཏཱིཏི ཝདནྟི. ཨེཏྠཱཡཾ ཝིཙཱརཎཱ – པཉྩབྷིཀྑུཀེ ཝིཧཱརེ ཨེཀསྶ ཚནྡཔཱརིསུདྡྷིཾ ¶ ཨཱཧརིཏྭཱ སེསཱནཾ ཨུཔོསཐཱདིཀརཎཾ ཨནུཉྙཱཏཾ པཱལི༹ཡཾ (པརི. ༤༩༦-༤༩༧) ཨཊྛཀཐཱཡཉྩ (པརི. ཨཊྛ. ༤༨༧-༤༨༨). ཏེསུ ཨེཀོ ཚནྡདཱཡཀོ, ཨེཀོ ཚནྡཧཱརཀོ, ཏེ མུཉྩིཏྭཱ ན ཨེཏྠ སནྣིཔཏིཏོ སངྒྷོ ཏིཎྞཾ སམཱུཧབྷཱཝཏོ, ཏསྨཱ ཨསམཱགཏེཔི དཱཏུཾ ཝཊྚཏི. ཨཱརོཙེནྟེན པན སམཱགཏེ ཨེཝ ཨཱརོཙེཏབྦཾ. ཨིདྷཱཔི ‘‘ཧརེཡྻཱ’’ཏི ཝུཏྟཾ, ན ‘‘དེསེཡྻཱ’’ཏི. ཏཏྠ ཚནྡཧཱརཀེན སདྡྷིཾ ཀམྨཔྤཏྟཱནཾ སནྣིཔཱཏོ ཝེདིཏབྦོ.

༤༠༠. ཨིདཱནི ཚནྡདཱནཝིདྷིཾ དསྶེཏུཾ ‘‘ཨེཀཾ བྷིཀྑུ’’ནྟིཨཱདིམཱཧ (ཀངྑཱ. ཨཊྛ. ནིདཱནཝཎྞནཱ).

༤༠༡. (ཀ) ‘‘ཚནྡཾ དམྨཱི’’ཏི ཨེཏྟཀམེཝ ཨལཾ, ‘‘ཧར, ཨཱརོཙེཧཱི’’ཏི ཨིམེཧི ཀིཾཔཡོཛནནྟི ཙེ? ཝུཙྩཏེ – ‘‘ཨནུཛཱནཱམི, བྷིཀྑཝེ, ཏདཧུཔོསཐེ པཱརིསུདྡྷིཾ དེནྟེན ཚནྡམྤིདཱཏུཾ, སནྟི སངྒྷསྶ ཀརཎཱིཡ’’ནྟི (མཧཱཝ. ༡༦༥) ཝུཏྟཏྟཱ བྷགཝཏོ ཨཱཎཾ ཀརོནྟེན ‘‘ཚནྡཾ དམྨཱི’’ཏི ཝུཏྟཾ. ‘‘ཚནྡཧཱརཀོ ཙེ, བྷིཀྑཝེ, དིནྣེ ཚནྡེ ཨནྟརཱམགྒེ པཀྐམཏི, ཨནཱཧཊོཝ ཧོཏི ཚནྡོ’’ཏི (མཧཱཝ. ༡༦༥) ཝུཏྟཏྟཱ ཚནྡཧཱརཀསྶ ཨཉྙསྶ ཨཔཀྐམནཏྠཱཡ པཱརིསུདྡྷིཾ དེནྟེན ‘‘ཨིདཾ ཀརོཧི ཨེཝཱ’’ཏི ཨཱཎཱཔེནྟེན ‘‘ཚནྡཾ མེ ཧརཱ’’ཏི ཝུཏྟཾ. ‘‘ཚནྡཧཱརཀོ ཙེ, བྷིཀྑཝེ, དིནྣེ ཚནྡེ སངྒྷཔྤཏྟོ སཉྩིཙྩ ནཱརོཙེཏི, ཨཱཧཊོ ཧོཏི ཚནྡོ, ཚནྡཧཱརཀསྶ ཨཱཔཏྟི དུཀྐཊསྶཱ’’ཏི (མཧཱཝ. ༡༦༥) ཝུཏྟཏྟཱ ‘‘ཡདིཏྭཾ སཉྩིཙྩ ནཱརོཙེསྶསི, ཨཱཔཏྟིཾ ཨཱཔཛྫིསྶསི ¶ , ཨཱརོཙེཧི ཨེཝཱ’’ཏི ཏསྶ ཨཱཙིཀྑནྟོ ‘‘ཨཱརོཙེཧཱི’’ཏི ཨཱཧཱཏི ཨེཝམེཏྠ ཨིམེསཾ པདཱནཾ སཔྤཡོཛནཏཱ ཝེདིཏབྦཱ. ཨེཝཾ པཱརིསུདྡྷིདཱནེཔཱིཏི.

༤༠༢. སེསཀམྨནྟི ཡདི སངྒྷོ ཨུཔོསཐགྒེ ཨཉྙཾ ཨཔལོཀནཱདིཀམྨཾ ཀརོཏི, ཏཾ ཀམྨཾ ཝིབཱདྷཏི, ཝིཀོཔེཏཱིཏི ཨཏྠོ.

༤༠༣. དྭཡནྟི ཨུཔོསཐཉྩ སེསཀམྨཉྩཱཏི ཨཏྠོ. ནཏྟནོཏི ཨཏྟནོ ཨུཔོསཐཾ ན སམྤཱདེཏི.

༤༠༥. ‘‘ཨེཀཾསཾ ¶ ཨུཏྟརཱསངྒཾ ཀརིཏྭཱ ཨུཀྐུཊིཀཾ ནིསཱིདིཏྭཱ’’ཏིཨཱདིཀཾ (མཧཱཝ. ༢༡༣) སབྦཱུཔཙཱརཾ ཀཏྭཱནཱཏི ཨཏྠོ.

༤༠༦. ‘‘ཨིཏྠནྣཱམེན པཝཱརཎཱ དིནྣཱ’’ཏི ཨཱརོཙེཏྭཱ.

༤༠༨. པཊིཛཱནེཡྻ ནཱཧཊཱཏི (མཧཱཝ. ༡༦༤-༡༦༥, ༢༡༣) པཱཋེ ན ཨཱཧཊཱཏི ནཱཧཊཱ, ཨཱཧཊཱ ན ཧོཏཱིཏི ཨཏྠོ. ཏཐཱ ཧེཡྻཱཏི ཝིབྦྷམནཱདཱིནི ཀརེཡྻཱཏི ཨཏྠོ.

༤༠༩. སུཏྟོ ཝཱ ནཱརོཙཡེཡྻ, ཨཱཧཊཱ ཧོཏཱིཏི སམྦནྡྷོ. ཨནཱཔཏྟིཝཱཏི ཨནཱཔཏྟི ཨེཝ. ཚནྡདཱནཝིནིཙྪཡོ.

༤༡༡. སུཏྟུདྡེསོ སངྒྷསྶེཝ. སེསཱནནྟི དྭིནྣཾ ཏིཎྞཾ ཝཱ.

༤༡༢. པུབྦཀརཎེ ¶ པུབྦཀིཙྩེ, པཏྟཀལླེ སམཱནིཏེཏི སབྦཔཋམཾ ཀཏྟབྦཾ པུབྦཀརཎཾ. ཏདནནྟརཾ ཀཏྟབྦཾ པུབྦཀིཙྩཾ ནཱམ. ཨེཏྠ –

‘‘སམྨཛྫནཱི པདཱིཔོ ཙ, ཨུདཀཾ ཨཱསནེན ཙ;

ཨུཔོསཐསྶ ཨེཏཱནི, པུབྦཀརཎནྟི ཝུཙྩཏི.

‘‘ཚནྡཔཱརིསུདྡྷིཨུཏུཀྑཱནཾ, བྷིཀྑུགཎནཱ ཙ ཨོཝཱདོ;

ཨུཔོསཐསྶ ཨེཏཱནི, པུབྦཀིཙྩནྟི ཝུཙྩཏཱི’’ཏི –. (མཧཱཝ. ཨཊྛ. ༡༦༨);

ཨེཝཾ ¶ ཨཊྛཀཐཱཡཾ ཝུཏྟནཡེན པུབྦཀརཎཉྩ པུབྦཀིཙྩཉྩ ཝེདིཏབྦཾ.

‘‘ཨུཔོསཐོ ཡཱཝཏིཀཱ ཙ བྷིཀྑཱུ ཀམྨཔྤཏྟཱ,

ཝཛྫནཱིཡཱ ཙ པུགྒལཱ ཏསྨིཾ ན ཧོནྟི,

པཏྟཀལླནྟི ཝུཙྩཏཱི’’ཏི –. (མཧཱཝ. ཨཊྛ. ༡༦༨);

ཝུཏྟཝསེན པཏྟཀལླེ སམཱནིཏེ, པཛྫིཏེཏི ཨཏྠོ. ‘‘པཉྩིམེ, བྷིཀྑཝེ, པཱཏིམོཀྑུདྡེསཱ. ནིདཱནཾ ཨུདྡིསིཏྭཱ ཨཝསེསཾ སུཏེན སཱཝེཏབྦཾ, ཨཡཾ པཋམོ པཱཏིམོཀྑུདྡེསོ. ནིདཱནཾ ཨུདྡིསིཏྭཱ ཙཏྟཱརི པཱརཱཛིཀཱནི ཨུདྡིསིཏྭཱ ཨཝསེསཾ སུཏེན སཱཝེཏབྦཾ, ཨཡཾ དུཏིཡོ པཱཏིམོཀྑུདྡེསོ. ནིདཱནཾ ཨུདྡིསིཏྭཱ ཙཏྟཱརི པཱརཱཛིཀཱནི ཨུདྡིསིཏྭཱ ཏེརས སངྒྷཱདིསེསེ ཨུདྡིསིཏྭཱ ཨཝསེསཾ སུཏེན སཱཝེཏབྦཾ, ཨཡཾ ཏཏིཡོ པཱཏིམོཀྑུདྡེསོ. ནིདཱནཾ ཨུདྡིསིཏྭཱ ཙཏྟཱརི པཱརཱཛིཀཱནི ཨུདྡིསིཏྭཱ ཏེརས སངྒྷཱདིསེསེ ཨུདྡིསིཏྭཱ དྭེ ཨནིཡཏེ ཨུདྡིསིཏྭཱ ཨཝསེསཾ སུཏེན སཱཝེཏབྦཾ, ཨཡཾ ཙཏུཏྠོ པཱཏིམོཀྑུདྡེསོ. ཝིཏྠཱརེནེཝ པཉྩམོ. ཨིམེ ཁོ བྷིཀྑཝེ པཉྩ པཱཏིམོཀྑུདྡེསཱ’’ཏི (མཧཱཝ. ༡༥༠) ཝུཏྟཏྟཱ སོ སུཏྟུདྡེསོ པཉྩདྷཱ ཝིབྷཱཝིཏོཏི ཨཏྠོ.

༤༡༣. ཝིནཱནྟརཱཡནྟི (མཧཱཝ. ༡༥༠) ¶ རཱཛནྟརཱཡཱདིདསཝིདྷཾ ཨནྟརཱཡཾ ཝིནཱ སངྑེཔེནུདྡེསོ ཝིནིཝཱརིཏོ པཊིཀྑིཏྟོཏི ཨཏྠོ. ཐེརོཝཱཏི སངྒྷཏྠེརོཝ. ཨེཏྠཱཏི པཉྩསུ ཨུདྡེསེསུ. ‘‘དྭཱིསུ ཝཱ ཏཱིསུ ཝཱ ཝིསདེསུ ཐེརོཝ ཨིསྶརོ’’ཏི ཨཊྛཀཐཱཡཾ ཝུཏྟཏྟཱ ཨཝཏྟནྟེཔི ཨནྟརཱཡེ སཾཁིཏྟེན ཨུདྡིསིཏུཾ ཝཊྚཏཱིཏི ཨདྷིཔྤཱཡོ. ཀཏྠ ཝུཏྟནྟི ཙེ? ‘‘ཡོ ཏཏྠ བྷིཀྑུ བྱཏྟོ པཊིབལོ, ཏསྶཱདྷེཡྻ’’ནྟི (མཧཱཝ. ༡༥༥) ཝུཏྟཔཱལི༹ཡཱ ཨཊྛཀཐཱཡཾ ‘‘ཡོ ཏཏྠ བྷིཀྑུ བྱཏྟོ པཊིབལོཏི ཨེཏྠ ཀིཉྩཱཔི དཧརསྶཱཔི བྱཏྟསྶ པཱཏིམོཀྑོ ཨནུཉྙཱཏོ, ཨཐ ཁོ ཨེཏྠ ཨཡམདྷིཔྤཱཡོ – སཙེ སངྒྷཏྠེརསྶ པཉྩ ཝཱ ཙཏྟཱརོ ཝཱ ཏཡོ ཝཱ པཱཏིམོཀྑུདྡེསཱ ནཱགཙྪནྟི, དྭེ པན ཨཁཎྜཱ སུཝིསདཱ ཝཱཙུགྒཏཱ ཧོནྟི, ཐེརཱཡཏྟོཝ པཱཏིམོཀྑོ. སཙེ པན ཨེཏྟཀམྤི ཝིསདཾ ཀཱཏུཾ ན སཀྐོཏི, བྱཏྟསྶ བྷིཀྑུནོ ཨཱཡཏྟོཝ ཧོཏཱི’’ཏི ཨཏྠོ ཝུཏྟོ. པཱལི༹ཡམྤི ཝུཏྟམེཝ ‘‘ཏེཧི, བྷིཀྑཝེ, བྷིཀྑཱུཧི ཨེཀོ བྷིཀྑུ སཱམནྟཱ ¶ ཨཱཝཱསཱ སཛྫུཀཾ པཱཧེཏབྦོ ‘གཙྪ, ཨཱཝུསོ, སཾཁིཏྟེན ཝཱ ཝིཏྠཱརེན ཝཱ པཱཏིམོཀྑཾ པརིཡཱཔུཎིཏྭཱ ཨཱགཙྪཱ’’’ཏི (མཧཱཝ. ༡༦༣).

༤༡༤. ཨུདྡིསནྟེ ཝཱཏི (མཧཱཝ. ༡༧༢) པཱཏིམོཀྑེ ཨུདྡིསིཡམཱནེ སམཱ ཝཱ ཐོཀཏརཱ ཝཱ ཡདི ཨཱགཙྪེཡྻུཾ, ཨུདྡིཊྛཾ སུཨུདྡིཊྛཾ, ཏེཧི སདྡྷིཾ ནིསཱིདིཏྭཱ ཨཝསེསཀཾ སོཏབྦནྟི ཨཏྠོ.

༤༡༥. ཨུདྡིཊྛམཏྟེ (མཧཱཝ. ༡༧༢) ཝཱ སཀལཱཡ ཝཱ ཨེཀཙྩཱཡ ཝཱ པརིསཱཡ ཝུཊྛིཏཱཡ སམཱ ཝཱ ཐོཀཏརཱ ཝཱ ཡདི ཨཱགཙྪེཡྻུནྟི སམྦནྡྷོ. པཱརིསུདྡྷིནྟི པཱརིསུདྡྷིཨུཔོསཐཾ. ཀརེཡྻེསནྟི ཀརེཡྻ ཨེསཾ, ཨེཏེསཾ སནྟིཀེཏི ཨཏྠོ. བཧུཀཱཐ ཙེཏི ཨཐ བཧུཀཱ ཙེ, པུན ཨཱགཏཱ བཧུཀཱ ཙེཏི ཨཏྠོ ¶ ,. ‘‘ཨུདྡིསྶམཱནེ, ཨུདྡིཊྛམཏྟེ ཨེཀཙྩཱཡ ཝུཊྛིཏཱཡ སཀལཱཡ ཝུཊྛིཏཱཡཱ’’ཏི (མཧཱཝ. ༡༧༢) ཨཱགཏེསུ སབྦཝིཀཔྤེསུ པུབྦཀིཙྩཾ ཀཏྭཱ པུན ཨཱདིཏོ པཊྛཱཡ པཱཏིམོཀྑཾ ཨུདྡིསེཏི ཨཏྠོ.

༤༡༦. ཨིཏརཱནནྟི ཨཱགནྟུཀཱནཾ. སཙེཏརོཏི སཙེ ཙཱཏུདྡསིཀོཏི ཨཏྠོ. སམཱནེཏརེནུཝཏྟནྟཱུཏི སམཱ ཝཱ ཨཱུནཱ ཝཱ ཨིཏརེ ཨཱགནྟུཀཱ པུརིམཱནཾ ཨཱཝཱསིཀཱནཾ ཨནུཝཏྟནྟཱུཏི ཨཏྠོ. སཙེདྷིཀཱཏི ཨཱགནྟུཀཱ སཙེ ཨདྷིཀཱ, པུརིམཱ ཨཱཝཱསིཀཱ ཨནུཝཏྟནྟཱུཏི ཨཏྠོ. སེསེཔྱཡཾ ནཡོཏི ‘‘ཨཱགནྟུཀཱནཾ པནྣརསོ ཧོཏི, ཨཱཝཱསིཀཱནཾ ཙཱཏུདྡསོ’’ཏི ཨིཏརེཔི སམཐོཀཱ ཨཱགནྟུཀཱ ཨཱཝཱསིཀཱནཾ ཨནུཝཏྟནྟཱུཏིཨཱདིནཱ ནཡེན ཝིནིཙྪཡོ ཝེདིཏབྦོཏི ཨཏྠོ.

༤༡༧. མཱུལཊྛཱཏི ཨཱཝཱསིཀཱ. སམཐོཀཱནཾ ཨཱགནྟུཀཱནཾ. སཱམགྒིཾ དེནྟུ ཀཱམཏོཏི ཡདི ཨིཙྪནྟི, དེནྟཱུཏི ཨཏྠོ.

༤༡༨. ནོ ཙེ དེནྟི, ཨཱགནྟུཀེཧི བཧི གནྟྭཱན ཨུཔོསཐོ ཀཱཏབྦོཏི ཨཏྠོ. ཨནིཙྪཱཡ སཱམགྒཱི དེཡྻཱཏི སམྦནྡྷོ.

༤༡༩. ‘‘ན བྷིཀྑཝེ པཱཏིམོཀྑུདྡེསཀེན སཉྩིཙྩ ན སཱཝེཏབྦཾ. ཡོ ན སཱཝེཡྻ, ཨཱཔཏྟི ¶ དུཀྐཊསྶཱ’’ཏིཝུཏྟཏྟཱ (མཧཱཝ. ༡༥༤) ‘‘སཱཝེཡྻ སུཏྟ’’ནྟི ཝུཏྟཾ. ‘‘ཨནུཛཱནཱམི, བྷིཀྑཝེ, པཱཏིམོཀྑུདྡེསཀེན ཝཱཡམིཏུཾ ཀཐཾ སཱཝེཡྻནྟི, ཝཱཡམནྟསྶ ཨནཱཔཏྟཱི’’ཏི (མཧཱཝ. ༡༥༤) ཝུཏྟཏྟཱ ‘‘སཉྩིཙྩ ཨསྶཱཝེནྟསྶ དུཀྐཊ’’ནྟི ཝུཏྟཾ.

༤༢༠. ཏཐཱཏི ¶ དུཀྐཊནྟི ཨཏྠོ. ཀལློཏི ཨགིལཱནོ. པེསིཏོཏི ཨཱཎཏྟོ. ‘‘ན བྷིཀྑཝེ ཐེརེན ཨཱཎཏྟེན ཨགིལཱནེན ན སམྨཛྫིཏབྦཾ. ཡོ ན སམྨཛྫེཡྻ, ཨཱཔཏྟི དུཀྐཊསྶཱ’’ཏིཨཱདི (མཧཱཝ. ༡༥༩) ཝུཏྟཾ.

༤༢༡-༣. ཨིདཱནི པཱརིསུདྡྷིཨུཔོསཐཾ དསྶེཏུཾ ‘‘སམྨཛྫིཏྭཱ’’ཏིཨཱདི ཝུཏྟཾ. ཨཉྫལིཾ (མཧཱཝ. ༡༦༨) པགྒཡ྄ཧཱཏི སམྦནྡྷོ. ཏེཏི ཨཝསེསཱ དྭེ ཨེཝཾ སམུདཱིརིཡཱ ཝཏྟབྦཱཏི ཨཏྠོ. ཨེཀཾསཾ ཨུཏྟརཱསངྒཱདིཀརཎཝསེན སམཏྟཔུབྦཱརམྦྷེན ཏེ དྭེ བྷིཀྑཱུ ནཝེན ཨེཝམཱིརིཡཱ ཝཏྟབྦཱཏི ཨཏྠོ.

༤༢༤-༥. ཨིདཱནི དྭཱིཧི ཀཏྟབྦཾ དསྶེཏུཾ ‘‘དྭཱིསུ ཐེརེནཱ’’ཏི ཝུཏྟཾ.

༤༢༦. ཨེཏྟཱཝཏཱ ‘‘ཨནུཛཱནཱམི, བྷིཀྑཝེ, ཙཏུནྣཾ པཱཏིམོཀྑཾ ཨུདྡིསིཏུ’’ནྟི (མཧཱཝ. ༡༦༨) ཙ ‘‘ཨནུཛཱནཱམི, བྷིཀྑཝེ, ཏིཎྞཾ པཱརིསུདྡྷིཨུཔོསཐཾ ཀཱཏུ’’ནྟི (མཧཱཝ. ༡༦༨) ཙ ‘‘ཨནུཛཱནཱམི, བྷིཀྑཝེ, དྭིནྣཾ པཱརིསུདྡྷིཨུཔོསཐཾ ཀཱཏུ’’ནྟི (མཧཱཝ. ༡༦༨) ཙ ཝུཏྟཾ སངྒྷུཔོསཐཉྩ པཱརིསུདྡྷིཨུཔོསཐཉྩ དསྶེཏྭཱ ཨིདཱནི ཡཏྠ ཨེཀོ བྷིཀྑུ ཝིཧརཏི, ཏསྶ ཨནུཉྙཱཏཾ ཨདྷིཊྛཱནུཔོསཐཾ དསྶེཏུཾ ‘‘པུབྦཀིཙྩ’’ནྟིཨཱདིམཱཧ. ཨེཏྠ ཙ པུབྦཀིཙྩཾ ནཱམ སམྨཛྫནཱདིཀཾཡེཝ.

༤༢༧. སངྒྷུཔོསཐཔཱརིསུདྡྷིཨུཔོསཐཨདྷིཊྛཱནཨུཔོསཐཱནཾ ཝསེན ཏཾ ཏཾ ཨུཔོསཐཾ ཡདི ཀཡིརུནྟི སམྦནྡྷོ.

༤༢༨. ཝགྒེ (མཧཱཝ. ༡༧༣) ཙ སམགྒེ ཙ ‘‘ཝགྒོ’’ཏི སཉྙིནོ ཙ ‘‘ཝགྒོ ནུ ཁོ, སམགྒོ ནུ ཁོ’’ཏི ཨེཝཾ ཝིམཏིསྶ ཙ དུཀྐཊཾ, ‘‘ནསྶནྟེཏེ ཝིནསྶནྟེཏེ, ཀོ ཏེཧི ཨཏྠོ’’ཏི ¶ ཨེཝཾ ¶ ཨནཱགཏཱནཾ བྷིཀྑཱུནཾ ཨཏྠིབྷཱཝཾ ཉཏྭཱ བྷེདཱདྷིཔྤཱཡེན ཨུཔོསཐཾ ཀརོཏོ ཐུལླཙྩཡཾ ཧོཏཱིཏི ཨཏྠོ. ཏདུབྷཡེཔི ‘‘སམགྒོ’’ཏི སཉྙིནོ ཨནཱཔཏྟི.

༤༢༩-༤༣༠. སེསསཧདྷམྨིཀཱ ནཱམ བྷིཀྑུཾ ཋཔེཏྭཱ ཨཝསེསཱ ཙཏྟཱརོ. ཨབྷབྦསྶཱཏི ཨེཏྠ པཎྜཀཐེཡྻསཾཝཱསཀ ཏིཏྠིཡཔཀྐནྟཀ ཏིརཙྪཱནགཏ མཱཏུགྷཱཏཀ པིཏུགྷཱཏཀ ཨརཧནྟགྷཱཏཀ བྷིཀྑུནིདཱུསཀ སངྒྷབྷེདཀ ལོཧིཏུཔྤཱདཀཨུབྷཏོབྱཉྫནཀཱ ཨབྷབྦཱ གཧིཏཱ. ཨེཏྠ པན ནཱགམཱཎཝཀཱདཡོ ཏིརཙྪཱནགཏཔཀྑིཀཱཏི ཝེདིཏབྦཱ. ཨེཏེསཾ ནིསིནྣཔརིསཱཡཉྩ པཱཏིམོཀྑཾ ན ཨུདྡིསེཏི སམྦནྡྷོ.

ཏཐཱཏི ཡོ པན སངྒྷོ སབྷཱགཱཔཏྟིཀོ, སོཔི ན ཨུདྡིསེ, པརིཝུཏྠེན ཚནྡེནཔི ན ཨུདྡིསེཏི ཨཏྠོ. ཨེཏྠ པན ཙཏུབྦིདྷཾ པཱརིཝཱསིཡཾ པརིསཔཱརིཝཱསིཡཾ རཏྟིཔཱརིཝཱསིཡཾ ཚནྡཔཱརིཝཱསིཡཾ ཨཛ྄ཛྷཱསཡཔཱརིཝཱསིཡནྟི.

ཨེཏྠ པན བྷིཀྑཱུ ཀེནཙིདེཝ ཀརཎཱིཡེན སནྣིཔཏིཏཱ མེགྷཱདཱིཧི ཨུཔདྡུཏཱ ‘‘ཨནོཀཱསཱ མཡཾ, ཨཉྙཏྲ གཙྪཱམཱ’’ཏི ཚནྡཾ ཨཝིསྶཛྫེཏྭཱཝ ཨུཊྛཧནྟི. ཨིདཾ པརིསཔཱརིཝཱསིཡཾ. ཀིཉྩཱཔི པརིསཔཱརིཝཱསིཡཾ, ཚནྡསྶ པན ཨཝིསྶཊྛཏྟཱ ཀམྨཾ ཀཱཏུཾ ཝཊྚཏི.

པུནཔི བྷིཀྑཱུནཾ ‘‘ཨུཔོསཐཱདཱིནི ཀརིསྶཱམཱ’’ཏི རཏྟིཾ སནྣིཔཏིཏྭཱ དྷམྨཾ སུཎནྟཱནཾཡེཝ ཨརུཎོ ཨུགྒཙྪཏི. སཙེ ‘‘ཙཱཏུདྡསིཀཾ ཀརིསྶཱམཱ’’ཏི ནིསིནྣཱ, ‘‘པནྣརསོ’’ཏི ཀཱཏུཾ ཝཊྚཏི. སཙེ པནྣརསིཀཾ ཀཱཏུཾ ནིསིནྣཱ, པཱཊིཔདེ ཨནུཔོསཐེ ཨུཔོསཐཾ ཀཱཏུཾ ན ཝཊྚཏི, ཨཉྙཾ པན སངྒྷཀིཙྩཾ ཀཱཏུཾ ཝཊྚཏི. ཨིདཾ རཏྟིཔཱརིཝཱསིཡཾ ནཱམ.

པུན ¶ བྷིཀྑཱུ ‘‘ཡཾཀིཉྩིདེཝ ཨབྦྷཱནཱདིཀམྨཾ ཀརིསྶཱམཱ’’ཏི སནྣིཔཏིཏཱ ཧོནྟི, ཏཏྲེཀོ ནཀྑཏྟཔཱཋཀོ ཨེཝཾ ཝདཏི ‘‘ཨཛྫ ནཀྑཏྟཾ དཱརུཎ’’ནྟི, ཏེ ཏསྶ ཝཙནེན ཚནྡཾ ཝིསྶཛྫེཏྭཱ ཏཏྠེཝ ནིསིནྣཱ ཧོནྟི. ཨཐཉྙོ ཨཱགནྟྭཱ ‘‘ཀིཾ ནཀྑཏྟེན, ཀརོཐཱ’’ཏི ཝདཏི. ཨིདཾ ཚནྡཔཱརིཝཱསིཡཉྩེཝ ཨཛ྄ཛྷཱསཡཔཱརིཝཱསིཡཉྩ. ཏསྨིཾ པཱརིཝཱསིཡེ པུན ཚནྡཔཱརིསུདྡྷིཾ ཨནཱནེཏྭཱ ཀམྨཾ ཀཱཏུཾ ན ཝཊྚཏི. ཨིདཾ སནྡྷཱཡ ‘‘ཚནྡེན པརིཝུཏྠེནཱ’’ཏི ཝུཏྟཾ.

༤༣༡. ཨཱཔནྣམཱཔཏྟིཾ (མཧཱཝ. ༡༦༩; མཧཱཝ. ཨཊྛ. ༡༦༩) ¶ ཨདེསཡིཏྭཱན ཝཱ ‘‘ཨཧཾ, ཨཱཝུསོ, ཨིཏྠནྣཱམཱཡ ཨཱཔཏྟིཡཱ ཝེམཏིཀོ, ཡདཱ ནིབྦེམཏིཀོ བྷཝིསྶཱམི, ཏཾ ཨཱཔཏྟིཾ པཊིཀརིསྶཱམཱི’’ཏི ཝཏྭཱ ཝིམཏིཾ ཨནཱཝིཀཏྭཱན ཝཱ ‘‘ན ཙ བྷིཀྑཝེ ཨནུཔོསཐེ ཨུཔོསཐོ ཀཱཏབྦོ ཨཉྙཏྲ སངྒྷསཱམགྒིཡཱ’’ཏི (མཧཱཝ. ༡༨༣) ཝུཏྟཏྟཱ ཨནུཔོསཐེཔི ཝཱ ཀཱཏུཾ ན ཙ ཀཔྤཏཱིཏི ཨཏྠོ.

༤༣༢. ‘‘ན ཙ བྷིཀྑཝེ ཏདཧུཔོསཐེ སབྷིཀྑུཀཱ ཨཱཝཱསཱ ཨབྷིཀྑུཀོ ཨཱཝཱསོ ཝཱ ཨནཱཝཱསོ ཝཱ གནྟབྦོ ཨཉྙཏྲ སངྒྷེན ཨཉྙཏྲ ཨནྟརཱཡཱ’’ཏི (མཧཱཝ. ༡༨༡) ཝུཏྟཏྟཱ ‘‘ཨཊྛིཏོཔོསཐཱཝཱསཱ’’ཏི (མཧཱཝ. ཨཊྛ. ༡༨༡) ཝུཏྟཾ. ན ཝཛེ ན གཙྪེ. ཨདྷིཊྛཱཏུཾ སཱིམམེཝ ཝཱཏི སཙེ ཝིཧཱརེ ཨུཔོསཐཾ ཀརོནྟི, ཨུཔོསཐཱདྷིཊྛཱནཏྠཾ སཱིམཱཔི ནདཱིཔི ན གནྟབྦཱ. སཙེ པནེཏྠ ཀོཙི བྷིཀྑུ ཧོཏི, ཏསྶ སནྟིཀཾ གནྟུཾ ཝཊྚཏི. ཝིསྶཊྛཨུཔོསཐཱཔི ཨཱཝཱསཱ གནྟུཾ ཝཊྚཏི, ཨེཝཾ གཏོ ཨདྷིཊྛཱཏུམྤི ལབྷཏཱིཏི. ཨུཔོསཐཝིནིཙྪཡོ.

༤༣༣. ‘‘ཨནུཛཱནཱམི ¶ , བྷིཀྑཝེ, པཉྩནྣཾ སངྒྷེ པཝཱརེཏུ’’ནྟི (མཧཱཝ. ༢༡༥) ཝུཏྟཏྟཱ ‘‘སེསཱ སངྒྷཔྤཝཱརཎཱ’’ཏི (མཧཱཝ. ༢༡༥ ཨཱདཡོ) ཝུཏྟཱ.

༤༣༤. ཨཛྫ པཝཱརཎཱཏི ཨེཏྠ (མཧཱཝ. ༢༡༥ ཨཱདཡོ) པན ཙཱཏུདྡསིཀཱཡ པཝཱརཎཱཡ ‘‘ཨཛྫ པཝཱརཎཱ ཙཱཏུདྡསཱི’’ཏི པུབྦཀིཙྩཾ ཀཱཏབྦཾ, པནྣརསིཡཾ ‘‘ཨཛྫ པཝཱརཎཱ པནྣརསཱི’’ཏི.

༤༣༧. ཐེརེསུ ཨུཀྐུཊིཀཾ ནིསཛྫ པཝཱརེནྟེསུ སཡཾ པན ནཝོ ཡཱཝ པཝཱརེཏི, ཏཱཝ ཨུཀྐུཊིཀོཝ ཨཙྪཏཱུཏི ཨཏྠོ. ‘‘ན བྷིཀྑཝེ ཐེརེསུ ཨུཀྐུཊིཀཾ ནིསིནྣེསུ པཝཱརཡམཱནེསུ ཨཱསནེསུ ¶ ཨཙྪིཏབྦཾ. ཡོ ཨཙྪེཡྻ, ཨཱཔཏྟི དུཀྐཊསྶ. ཨནུཛཱནཱམི, བྷིཀྑཝེ, ཏདམནྟརཱ ཨུཀྐུཊིཀཾ ནིསཱིདིཏུཾ, ཡཱཝ པཝཱརེཏི, པཝཱརེཏྭཱ ཨཱསནེ ནིསཱིདིཏུ’’ནྟི (མཧཱཝ. ༢༡༡) ཧི ཝུཏྟཾ.

༤༤༠-༢. ཨེཝཾ ཏེཝཱཙིཀཔྤཝཱརཎཾ དསྶེཏྭཱ ཨིདཱནི དྭེཝཱཙིཀཨེཀཝཱཙིཀསམཱནཝསྶིཀཔྤཝཱརཎཱསུ ཀཏྟབྦཾ དསྶེཏུཾ ‘‘དཱནེནཱ’’ཏིཨཱདིམཱཧ. ཏཏྠ དཱནེནཱཏི དཱནེན ཝཱ. དྷམྨསཱཀཙྪཱཏི ཨིམིནཱ དྷམྨཀཐཱསུཏྟསངྒཱཡནཱཝིནཡཝིནིཙྪཡཱདཡོ གཧིཏཱ. དཱནེན ཝཱ དྷམྨསཱཀཙྪཱཡ ཝཱ ཀལཧེན ཝཱ རཏྟིཡཱ ཁེཔིཏབྷཱཝཏོ ཏེཝཱཙིཀཱཡ ཨོཀཱསེ ཨསཏི དསཝིདྷེ ཝཱ ཨནྟརཱཡེ ཨནུརཱུཔཏོ ཨུཏྟིཾ ཋཔེཏྭཱ པཝཱརེཡྻཱཏི སམྦནྡྷོ.

ཨིདཱནི ཡཐཱནུརཱུཔཏོ ཉཏྟི ཋཔིཏཱ, ཏཾ དསྶེཏུཾ ‘‘སུཎཱཏུ མེ’’ཏིཨཱདིམཱཧ. ཡཐཱཋཔིཏཉཏྟིཡཱཏི ཨེཏྠ སབྦསངྒཱཧིཀཱཙེཉཏྟིཋཔིཏཱ, ཏེཝཱཙིཀདྭེཝཱཙིཀཨེཀཝཱཙིཀཱནཾ ཝསེན པཝཱརེཏབྦཾ, སམཱནཝསྶིཀཔྤཝཱརཎཱཝ ཨེཀཱ ན ཝཊྚཏི. སཙེ ‘‘སངྒྷོ ཏེཝཱཙིཀཾ པཝཱརེཡྻཱ’’ཏི ཋཔིཏཱ, ཏེཝཱཙིཀཱ ¶ ཨེཝ ཝཊྚཏི, དྭེཝཱཙིཀཱདཡོ ན ཝཊྚནྟི. ‘‘དྭེཝཱཙིཀཾ པཝཱརེཡྻཱ’’ཏི ཝུཏྟེ དྭེཝཱཙིཀཉྩ ཏེཝཱཙིཀཉྩ ཝཊྚཏི, ཨེཀཝཱཙིཀསམཱནཝསྶིཀཱ ན ཝཊྚནྟི. ‘‘ཨེཀཝཱཙིཀཾ པཝཱརེཡྻཱ’’ཏི ཝུཏྟེ པན སམཱནཝསྶིཀཾ ཋཔེཏྭཱ སེསཱ ཝཊྚནྟི. ‘‘སམཱནཝསྶིཀ’’ནྟི པན ཝུཏྟེ སབྦཾ ཝཊྚཏཱིཏི. ཨཱདིཀེ ཙེཏྠ ཨཱཧརེཏི ཨེཏྠ པཝཱརཎཱཡཔི པུབྦེ ཨུཔོསཐེ ཝུཏྟེ ‘‘ཡདི སམཱ ཨཱགཙྪེཡྻུ’’ནྟིཨཱདིཀེ ཝཱརེ ཨཱཧརེཏི ཨཏྠོ.

༤༤༣. ཨིདཱནི ཝཏྟབྦཾ སནྡྷཱཡ ‘‘ཨེཝ’’ནྟི ཝུཏྟཾ. ཏིཝགྒོ ཙ ཙཏུཝགྒོ ཙ ཏིཙཏུཝགྒོ.

༤༥༠. ‘‘ན བྷིཀྑཝེ སཱཔཏྟིཀེན པཝཱརེཏབྦཾ. ཡོ པཝཱརེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༢༣༥) ཝུཏྟཏྟཱ སཱཔཏྟིཀེནཔི ཝེམཏིཀེནཔི པཝཱརིཡམཱནེ ཨཱཔཏྟིཾ སརནྟེནཔི ཨུཔོསཐེ ཝུཏྟནཡེན པཊིཔཛྫིཏབྦཾ. ‘‘ཝགྒེ སམགྒེ ཝགྒོཏི-སཉྙིནོ ཝིམཏིསྶ ཝཱ’’ཏིཨཱདིགཱཐཱཏོ པཊྛཱཡ ཡཱཝ ‘‘ཨནྟརཱཡཾ ཝ སངྒྷཾ ཝཱ-དྷིཊྛཱཏུཾ སཱིམམེཝ ཝཱ’’ཏི ཨཝསཱནགཱཐཱ, ཏཱཝ སེསཱ ཨུཔོསཐེ ཝུཏྟཱ གཱཐཱཡོཏི ཨདྷིཔྤེཏཱ.

༤༥༡. པཝཱརིཏེ ¶ ཙཱཏི (མཧཱཝ. ༢༡༣ ཨཱདཡོ) པཋམཔཝཱརཎཱཡ སངྒྷམྷི པཝཱརིཏེཏི ཨདྷིཔྤཱཡོ. ཨེཏྠ ཨཝུཏྠོཏི པཙྪིམིཀཱཡ ཨུཔགཏོ ཨཔརིནིཊྛིཏཏྟཱ ‘‘ཨཝུཏྠོ’’ཏི ཝུཙྩཏི.

༤༥༢. ཙཱཏུམཱསིནཱིཏི ཀཏྟིཀཔུཎྞམཱི. ཨེཏྠ ཝུཏྠཝསྶཱ ནཱམ པཙྪིམིཀཱཡ ཨུཔགཏཱ. པཝཱརཎཱཝིནིཙྪཡོ.

༤༥༣. ཙཀྑུསོཏཱདིབྷེདེཧཱིཏི (དཱི. ནི. ༡.༢༡༣, ༤༥༤; མ. ནི. ༡.༤༡༡; ཨ. ནི. ༤.༡༩༨; དྷ. ས. ༡༣༥༢-༡༣༥༤; མཧཱནི. ༡༩༦) ¶ ཙཀྑུསོཏགྷཱནཛིཝ྄ཧཱཀཱཡམནསངྑཱཏེཧི ཚཧི ཨིནྡྲིཡེཧཱིཏི ཨཏྠོ. རཱུཔསདྡཱདིགོཙརེཏི རཱུཔསདྡགནྡྷརསཕོཊྛབྦདྷམྨསངྑཱཏེསུ ཚསུ གོཙརེསཱུཏི ཨཏྠོ. ཨེཏྠ པན ཧཏྠཔཱདཧསིཏཀཐིཏཝིལོཀིཏཱདིབྷེདཾ སུབྷཱཀཱརཾ གཧེཏྭཱ ཨཡོནིསོ མནསི ཀརོནྟསྶ ཨབྷིཛ྄ཛྷཱ ཨུཔྤཛྫཏི. ‘‘ཨནཏྠཾ མེ ཨཙརི, ཙརཏི, ཙརིསྶཏཱི’’ཏིཨཱདིནཱ (པརི. ཨཊྛ. ༣༢༩) ནཡེན པཊིགྷནིམིཏྟཾ གཧེཏྭཱ ཨཡོནིསོ མནསི ཀརོནྟསྶ བྱཱཔཱདོ ཨུཔྤཛྫཏི. ཨེཏྠ པན ཨིཏྠིཔུརིསནིམིཏྟཾ ཝཱ སུབྷནིམིཏྟཱདིཀཾ ཀིལེསཝཏྠུབྷཱུཏཾ ནིམིཏྟཾ ཨགྒཎྷིཏྭཱ དིཊྛེ དིཊྛམཏྟཱདིནཱ པཊིཔཛྫིཏྭཱ ཨསུབྷནིམིཏྟེ ཡོནིསོ མནསིཀཱརཾ བཧུལཱིཀརོནྟསྶ ཨབྷིཛ྄ཛྷཱཡ པཧཱནཾ ཧོཏི. ‘‘ཨནཏྠཾ མེ ཨཙརི, ཏཾ ཀུཏེཏྠ ལབྦྷཱ’’ཏིཨཱདིནཱ ཝཱ མེཏྟཱབྷཱཝནཱདིཝསེན ཝཱ ཡོནིསོ མནསི ཀརོནྟསྶ བྱཱཔཱདཔྤཧཱནཾ ཧོཏི. ཨེཝམིདཾ སངྑེཔཏོ རཱུཔཱདཱིསུ ཀིལེསཱནུབནྡྷནིམིཏྟཱདིགྒཱཧཔརིཝཛྫནལཀྑཎཾ ཨིནྡྲིཡསཾཝརསཱིལནྟི ཝེདིཏབྦཾ.

‘‘ཡཱནི སོཏཱནི ལོཀསྨིཾ; (ཨཛིཏཱཏི བྷགཝཱ,)

པཉྙཱཡེཏེ པིདྷིཡྻརེ’’ཏི –. (སུ. ནི. ༡༠༤༡);

ཝུཏྟཏྟཱ ¶ ‘‘སཏིམཱ སམྤཛཱནོ ཝཱ’’ཏི ཝུཏྟཾ. ཨེཏྠ པན ཙཏུབྦིདྷཾ སམྤཛཉྙཾ སཱཏྠཀསཔྤཱཡགོཙརཨསམྨོཧཝསེན. སཾཝརཝིནིཙྪཡོ.

༤༥༥. དེསནཱ ¶ སཾཝརོ ཨེཊྛི, པཙྩཝེཀྑཎ བྷེདཏོཏི (པཱརཱ. ཨཊྛ. ༢.༥༨༥; ཝིསུདྡྷི. ༡.༡༩) དེསནཱསུདྡྷི སཾཝརསུདྡྷི པརིཡེཊྛིསུདྡྷི པཙྩཝེཀྑཎསུདྡྷཱིཏི ཨེཝཾ ཙཏུབྦིདྷཱ སུདྡྷཱིཏི ཨཏྠོ. ཨིདཱནི ཏཱཧི སུདྡྷཱིཧི ཝིསུཛ྄ཛྷནཀེ དསྶེཏུཾ ‘‘པཱཏིམོཀྑསཾཝརསམྨཏ’’ནྟིཨཱདིམཱཧ.

༤༥༦. ‘‘པུན ཨེཝཾ ན ཀརིསྶ’’ནྟི ཙིཏྟཱདྷིཊྛཱནསཾཝརཱ ཡསྨཱ སུཛ྄ཛྷཏི ཨིནྡྲིཡསཾཝརོ, ཏསྨཱ ཨིནྡྲིཡསཾཝརོ ‘‘སཾཝརསུདྡྷཱི’’ཏི ཝུཏྟོཏི སམྦནྡྷོ.

༤༥༧. པཧཱཡཱནེསནནྟི ཨནེསནཾ པཧཱཡ དྷམྨེན ཨུཔྤཱདེནྟསྶ པཙྩཡེཏི པཱཋསེསོ.

༤༥༨. ‘‘པཊིསངྑཱ ཡོནིསོ ཙཱིཝརཾ པཊིསེཝཱམི…པེ… ཨུཔྤནྣཱནཾ ཝེཡྻཱབཱདྷིཀཱནཾ…པེ… པརམཏཱཡཱ’’ཏི (མ. ནི. ༡.༢༣; ཨ. ནི. ༦.༥༨) ཙ ཨེཝཾ ཙཏཱུསུཔི པཙྩཡེསུ ཡཐཱཝུཏྟཔཙྩཝེཀྑཎསུཛ྄ཛྷནཱཏི ཨཏྠོ. ཨེཏྠ པན དུཝིདྷཾ པཙྩཝེཀྑཎཾ པཊིལཱབྷཀཱལེ ཙ པརིབྷོགཀཱལེ ཙ. པཊིལཱབྷཀཱལེ ཧི དྷཱཏུཝསེན ཝཱ པཊིཀྐཱུལཝསེན ཝཱ པཙྩཝེཀྑིཏྭཱ ཋཔིཏཙཱིཝརཱདཱིནི ཏཏོ ཨུཏྟརི པརིབྷུཉྫནྟསྶ ཨནཝཛྫོཝ པརིབྷོགོ, པརིབྷོགཀཱལེཔི. སུདྡྷིཝིནིཙྪཡོ.

༤༥༩. ‘‘ཙཏྟཱརིམཱནི ¶ , བྷིཀྑཝེ, ཨཔྤཱནི ཙེཝ སུལབྷཱནི ཙ, ཏཱནི ཙ ཨནཝཛྫཱནི. ཀཏམཱནི ཙཏྟཱརི? པཾསུཀཱུལཾ, བྷིཀྑཝེ, ཙཱིཝརཱནཾ ཨཔྤཉྩ སུལབྷཉྩ, ཏཉྩ ཨནཝཛྫཾ. པིཎྜིཡཱལོཔོ, བྷིཀྑཝེ, བྷོཛནཱནཾ ཨཔྤཉྩ སུལབྷཉྩ, ཏཉྩ ཨནཝཛྫཾ. རུཀྑམཱུལཾ ¶ , བྷིཀྑཝེ, སེནཱསནཱནཾ ཨཔྤཉྩ སུལབྷཉྩ, ཏཉྩ ཨནཝཛྫཾ. པཱུཏིམུཏྟབྷེསཛྫཾ, བྷིཀྑཝེ, བྷེསཛྫཱནཾ ཨཔྤཉྩ སུལབྷཉྩ, ཏཉྩ ཨནཝཛྫཾ. ཨིམཱནི ཁོ, བྷིཀྑཝེ, ཙཏྟཱརི ཨཔྤཱནི ཙེཝ སུལབྷཱནི ཙ, ཏཱནི ཙ ཨནཝཛྫཱནཱི’’ཏི (ཨ. ནི. ༤.༢༧; ཨིཏིཝུ. ༡༠༡) ཝཙནཏོ ‘‘ཨཔྤེནཱ’’ཏིཨཱདི ཝུཏྟཾ.

སནྟུཊྛོཏི ཨེཏྠ ཡཐཱལཱབྷཡཐཱབལཡཐཱསཱརུཔྤསནྟོསཱནཾ ཝསེན ཨེཀེཀསྨིཾ པཙྩཡེ ཏཡོ ཏཡོ ཀཏྭཱ ཙཏཱུསུ པཙྩཡེསུ དྭཱདས སནྟོསཱ ཧོནྟི. མཏྟཉྙཱུཏི ཨེཏྠ (མ. ནི. ཨཊྛ. ༡.༤༢༢; སཾ. ནི. ཨཊྛ. ༣.༤.༢༣༩; ཨ. ནི. ཨཊྛ. ༢.༣.༡༦; ཨིཏིཝུ. ཨཊྛ. ༢༨; དྷ. ས. ཨཊྛ. ༡༢༤-༡༣༤) ཙཏྟཱརོ མཏྟཱ པརིཡེསནམཏྟཱ པཊིགྒཧཎམཏྟཱ པརིབྷོགམཏྟཱ ཝིསྶཛྫནམཏྟཱཏི. ཨིཏརཱིཏརེན ཡཱཔེནྟོ སུབྷརོ ནཱམ. སནྟོསཝིནིཙྪཡོ.

༤༦༡-༢. ཨསུབྷནྟི ཨསུབྷབྷཱཝནཱ. ཨིམེ ཙཏྟཱརོ ཙཏུརཱརཀྑཱ ནཱམཱཏི ཨདྷིཔྤཱཡོ. ཨིདཱནི ཏེ དསྶེཏུཾ ‘‘ཨཱརཀཏྟཱདིནཱ’’ཏིཨཱདིམཱཧ. ཨཱརཀཏྟཱདིནཱཏི ཨེཏྠ ཨཱརཀཏྟཱ, ཨརཱིནཾ ཨརཱནཉྩ ཧཏཏྟཱ, པཙྩཡཱདཱིནཾ ཨརཧཏྟཱ, པཱཔཀརཎེ རཧཱབྷཱཝཱཏི ཨིམེཧི ཏཱཝ ཙཏཱུཧི ཀཱརཎེཧི སོ བྷགཝཱ ཨརཧནྟི ཨནུསྶརིཏབྦོཏི ཨཏྠོ. ཝུཏྟཉྷེཏཾ –

‘‘ཨཱརཀཏྟཱ ¶ ཧཏཏྟཱ ཙ, ཀིལེསཱརཱིན སོ མུནི;

ཧཏསཾསཱརཙཀྐཱརོ, པཙྩཡཱདཱིན ཙཱརཧོ;

ན རཧོ ཀརོཏི པཱཔཱནི, ཨརཧཾ ཏེན ཝུཙྩཏཱི’’ཏི. (པཱརཱ. ཨཊྛ. ༡.༡; ཝིསུདྡྷི. ༡.༡༣༠);

བྷགཝཱ ¶ པན སབྦཀིལེསེཧི སུཝིདཱུརཝིདཱུརེ ཋིཏོ མགྒེན སཝཱསནཀིལེསཱནཾ ཧཏཏྟཱ, ཏསྨཱ ‘‘ཨཱརཀཏྟཱ ཨརཧ’’ནྟི ཝུཏྟོ. ཝུཏྟཉྷེཏཾ –

ནཱཐོ ཏེནཱརཧཾ མཏོ’’ཏི. (ཝིསུདྡྷི. ༡.༡༢༥);

བྷགཝཏཱ པན སབྦཀིལེསཱརཡོ ཧཏཱ, ཏསྨཱ ‘‘ཨརཱིནཾ ཧཏཏྟཱཔི ཨརཧ’’ནྟི ཝུཏྟོ. ཝུཏྟཉྷེཏཾ –

‘‘ཡསྨཱ རཱགཱདིསངྑཱཏཱ, སབྦེཔི ཨརཡོ ཧཏཱ;

པཉྙཱསཏྠེན ནཱཐེན, ཏསྨཱཔི ཨརཧཾ མཏོ’’ཏི. (ཝིསུདྡྷི. ༡.༡༢༦);

ཡཾ པནེཏཾ ཨཝིཛྫཱབྷཝཏཎྷཱམཡནཱབྷིཔུཉྙཱབྷིསངྑཱརཨཔུཉྙཱབྷིསངྑཱརཨཱནེཉྫཱབྷིསངྑཱརཱརཾ ཛརཱམརཎནེམི ‘‘ཨཱསཝསམུདཡཱ ཨཝིཛྫཱསམུདཡོ’’ཏི (མ. ནི. ༡.༡༠༣) ཝཙནཏོ ཨཱསཝསམུདཡམཡེན ཨཀྑེན ཝིཛ྄ཛྷིཏྭཱ ཏིབྷཝརཐེ ཡོཛིཏཾ ཨནཱདིཀཱལཔྤཝཏྟཾ སཾསཱརཙཀྐཾ, ཏསྶ བྷགཝཏོ བོདྷིརུཀྑམཱུལེ སམྨཔྤདྷཱནཝཱིརིཡཔཱདེཧི ཙཏུཔཱརིསུདྡྷིསཱིལཔཐཝིཡཾ པཏིཊྛཱཡ སདྡྷཱཧཏྠེན ཀམྨཀྑཡཀརཉཱཎཕརསུཾ གཧེཏྭཱ སབྦེ ཨརཱ ཧཏཱ. ཏསྨཱ ‘‘ཨརཱནཾ ཧཏཏྟཱ ཨརཧ’’ནྟི ཝུཏྟོ. ཝུཏྟཉྷེཏཾ –

‘‘ཨརཱ སཾསཱརཙཀྐསྶ, ཧཏཱ ཉཱཎཱསིནཱ ཡཏོ;

ལོཀནཱཐེན ཏེནེས, ཨརཧནྟི པཝུཙྩཏཱི’’ཏི. (ཝིསུདྡྷི. ༡.༡༢༨);

ཨགྒདཀྑིཎེཡྻཏྟཱ ¶ ཙཱིཝརཱདཱིནཾ པཙྩཡཱནཾ ཨུཏྟམཔཱུཛཱཡ ཙ ཡུཏྟོ བྷགཝཱ, ཏསྨཱ ‘‘པཙྩཡཱདཱིནཾ ཨརཧཏྟཱ ཙ ཨརཧ’’ནྟི ཝུཙྩཏི. ཝུཏྟཉྷེཏཾ –

ཏསྨཱ ཛིནོ ཨརཧཏི ནཱམམེཏ’’ནྟི. (ཝིསུདྡྷི. ༡.༡༢༩);

ཡཐཱ ལོཀེ ཀེཙི པཎྜིཏམཱནིནོ ཨསིལོཀབྷཡེན རཧོ པཱཔཱནི ཀརོནྟི, ཏཐཱ བྷགཝཱ ཀདཱཙིཔི ན ཀརོཏི, ཏསྨཱ ‘‘པཱཔཀརཎེ རཧཱབྷཱཝཱ ཙ ཨརཧ’’ནྟི ཝུཙྩཏི. ཝུཏྟཉྷེཏཾ –

‘‘ཡསྨཱ ནཏྠི རཧོ ནཱམ, པཱཔཀམྨེསུ ཏཱདིནོ;

རཧཱབྷཱཝེན ཏེནེས, ཨརཧཾ ཨིཏི ཝིསྶུཏོ’’ཏི. (ཝིསུདྡྷི. ༡.༡༣༠) –

ཨེཝཾ ཨཱརཀཏྟཱདིནཱ ཨརཧནྟི བྷཱཝེཏབྦཾ.

སམྨཱ སཱམཉྩ སབྦདྷམྨཱནཾ བུདྡྷཏྟཱ པན སམྨཱསམྦུདྡྷོ. སམྨཱཏི ཉཱཡེནེཝ, ཨབྷིཉྙེཡྻེ དྷམྨེ ཨབྷིཉྙེཡྻཏོ པརིཉྙེཡྻེ དྷམྨེ པརིཉྙེཡྻཏོ པཧཱཏབྦེ དྷམྨེ པཧཱཏབྦཏོ སཙྪིཀཱཏབྦེ དྷམྨེ སཙྪིཀཱཏབྦཏོ བྷཱཝེཏབྦེ དྷམྨེ བྷཱཝེཏབྦཏོ ཨེཝཱཏི ཨཏྠོ. སཱམཉྩཱཏི ཨཏྟནཱཝ. ཝུཏྟཉྷེཏཾ –

‘‘ཨབྷིཉྙེཡྻཾ ཨབྷིཉྙཱཏཾ, བྷཱཝེཏབྦཉྩ བྷཱཝིཏཾ;

པཧཱཏབྦཾ པཧཱིནཾ མེ, ཏསྨཱ བུདྡྷོསྨི བྲཱཧྨཎཱ’’ཏི. (མ. ནི. ༢.༣༩༩; སུ. ནི. ༥༦༣);

‘‘ཨིཏིཔི སོ བྷགཝཱ ཨརཧཾ སམྨཱསམྦུདྡྷོ ཝིཛྫཱཙརཎསམྤནྣོ སུགཏོ ལོཀཝིདཱུ ཨནུཏྟརོ པུརིསདམྨསཱརཐི སཏྠཱདེཝམནུསྶཱནཾ བུདྡྷོ བྷགཝཱ’’ཏི ཨེཝཾ ཝུཏྟེ ནཝབྷེདེ བྷགཝཏོ གུཎེ ཡཱ པུནཔྤུནཾ ཨུཔྤཛྫནཏོ སཏིཡེཝ ཨནུསྶཏི, པཝཏྟིཏབྦཊྛཱནམྷིཡེཝ ཝཱ པཝཏྟཏྟཱ སདྡྷཱཔབྦཛིཏསྶ ¶ ཀུལཔུཏྟསྶ ཨནུརཱུཔཱ སཏཱིཏི ཨནུསྶཏི, བུདྡྷཾ ཨཱརབྦྷ ཨུཔྤནྣཱ ཨནུསྶཏི བུདྡྷཱནུསྶཏི, ཡཱ ཨེཝཾ ནཝཝིདྷེན པཝཏྟཱ སཏི ¶ , སཱ བུདྡྷཱནུསྶཏི ནཱམཱཏི ཨཏྠོ. སབྦཱཀཱརེན པན ཨཱཙརིཡེན བུདྡྷགྷོསེན བུདྡྷཱནུསྶཏི ཝིསུདྡྷིམགྒེ (ཝིསུདྡྷི. ༡.༡༢༣ ཨཱདཡོ) ཝུཏྟཱ, ཨཏྠིཀེན པན ཏཏོ པཙྩཱསཱིསིཏབྦཱ.

༤༦༣-༤. ཙཏུརཱརཀྑཱཡ སཱཡཾཔཱཏཾ བྷཱཝེཏབྦཏྟཱ མེཏྟཱབྷཱཝནཾ དསྶེནྟེན ཐེརེན སབྦཏྠཀཀམྨཊྛཱནབྷཱཝནཱཝསེན དསྶིཏཱཏི ཝེདིཏབྦཱ. ཨིཏརཐཱ ‘‘ཨཏྟཱནཾ ཨུཔམཾ ཀཏྭཱ, ན ཧནེཡྻ ན གྷཱཏཡེ’’ཏི (དྷ. པ. ༡༢༩-༡༣༠) ཝཙནཏོ སབྦཔཋམཾ ‘‘ཨཧཾ སུཁིཏོ ཧོམི, ཨཝེརོ’’ཏིཨཱདིནཱ ནཡེན བྷཱཝེཏྭཱཝ ཨཏྟནི ཙིཏྟཾ ནིཔརིབནྡྷམཱནཾ ཀཏྭཱ པཙྪཱ ཨཱཙརིཡུཔཛ྄ཛྷཱཡཱདཱིསུ ཀམེན བྷཱཝེཏབྦཱ. ཨཏྟནི པན ཨཔྤནཱ ན ཧོཏི. གོཙརགཱམམྷི ཨིསྶརེ ཛནེཏི སམྦནྡྷོ. ཏཏྠཱཏི (པཱརཱ. ཨཊྛ. ༢.༡༦༥) གོཙརགཱམེ. སཱིམཊྛསངྒྷཏོ པཊྛཱཡ པརིཙྪིཛྫ པརིཙྪིཛྫཱཏི ཨཏྠོ. ཨེཝཾ མེཏྟཾ བྷཱཝེནྟོ བྷིཀྑུསངྒྷེ མེཏྟཱཡ སཧཝཱསཱིནཾ མུདུཙིཏྟཾ ཛནེཏི, ཨཐསྶ སུཁསཾཝཱསཏཱ ཧོཏི. སཱིམཊྛཀདེཝཏཱསུ མེཏྟཱཡ མུདུཀཏཙིཏྟཱཧི དེཝཏཱཧི དྷམྨིཀཱཡ རཀྑཱཡ སུསཾཝིཧིཏརཀྑོ ཧོཏི. གོཙརགཱམམྷི ཨིསྶརཛནེ མེཏྟཱཡ མུདུཀཏཙིཏྟསནྟཱནེཧི ཨིསྶརེཧི དྷམྨིཀཱཡ རཀྑཱཡ སུརཀྑིཏཔརིཀྑཱརོ ཧོཏི. ཏཏྠ མནུསྶེ མེཏྟཱཡ པསཱདིཏཙིཏྟེཧི ཏེཧི ཨཔརིབྷཱུཏོ ཧུཏྭཱ ཝིཙརཏི. སབྦསཏྟེསུ མེཏྟཱཡ སབྦཏྠ ཨཔྤཊིཧཏཙཱརོ ཧོཏི.

༤༦༥-༦. ཝཎྞཏོ ཙ སཎྛཱནཏོ ཙ ཨོཀཱསཏོ ཙ དིསཏོ ཙ པརིཙྪེདཏོ ཙ ཀེསཱདིཀོཊྛཱསེ ཝཝཏྠཔེཏྭཱཏི སམྦནྡྷོ. ཨེཏྠ ཝཎྞཏོཏི (ཝིསུདྡྷི. ༡.༡༡༠) ཀེསཱདཱིནཾ ཝཎྞཏོ. སཎྛཱནཏོཏི ཏེསཾཡེཝ སཎྛཱནཏོ. ཨོཀཱསཏོཏི ‘‘ཨཡཾ ཀོཊྛཱསོ ཨིམསྨིཾ ནཱམ ཨོཀཱསེ པཏིཊྛིཏོ’’ཏི ཨེཝཾ ཏསྶ ཏསྶ ཨོཀཱསཏོ. དིསཏོཏི ¶ ཨིམསྨིཾ སརཱིརེ ནཱབྷིཏོ ཨུདྡྷཾ ཨུཔརིམཱ དིསཱ, ཨདྷོ ཧེཊྛིམཱ དིསཱ, ཏསྨཱ ‘‘ཨཡཾ ཀོཊྛཱསོ ཨིམིསྶཱ ནཱམ དིསཱཡཱ’’ཏི དིསཱ ཝཝཏྠཔེཏབྦཱ. པརིཙྪེདཏོཏི སབྷཱགཔརིཙྪེདཏོ ཝིསབྷཱགཔརིཙྪེདཏོཏི དྭེ པརིཙྪེདཱ. ཏཏྠ ‘‘ཨཡཾ ཀོཊྛཱསོ ཧེཊྛཱ ཙ ཨུཔརི ཙ ཏིརིཡཉྩ ཨིམིནཱ ནཱམ པརིཙྪེདོ’’ཏི ཨེཝཾ སབྷཱགཔརིཙྪེདོ ཝེདིཏབྦོ. ‘‘ཀེསཱ ན ལོམཱ, ལོམཱ ན ཀེསཱ’’ཏི ཨེཝཾ ཨམིསྶཀཝསེན ཝིསབྷཱགཔརིཙྪེདོ.

ཨེཝཾ ¶ པཉྩཧི ཨཱཀཱརེཧི ཝཝཏྠཱནཱཀཱརཾ དསྶེཏྭཱ ཨིདཱནི མནསི ཀརོནྟེན ཨེཝཾ མནསི ཀཱཏབྦནྟི ཏཾ དསྶེཏུཾ ‘‘ཨནུཔུབྦཏོ’’ཏིཨཱདིམཱཧ. ཏཏྠ ཨནུཔུབྦཏོཏི སཛ྄ཛྷཱཡཀརཎཀཱལཏོ པཊྛཱཡ ‘‘ཀེསཱ ནཁཱ’’ཏི ཨེཝཾ ཨེཀནྟརིཀཱཡ ཝཱ ‘‘ལོམཱ ཀེསཱ’’ཏི ཨེཝཾ ཨུཔྤཊིཔཱཊིཡཱ ཝཱ ན མནསི ཀཱཏབྦཾ, ཨཐ ཁོ ‘‘ཀེསཱ ལོམཱ’’ཏིཨཱདིནཱ ནཡེན ཨནུཔཊིཔཱཊིཡཱ མནསི ཀཱཏབྦཾ, ཨནུཔཊིཔཱཊིཡཱ མནསི ཀརོནྟེནཱཔི ནཱཏིསཱིགྷཾ ནཱཏིསཎིཀཾ མནསི ཀཱཏབྦཾ, བཧིདྡྷཱ པུཐུཏྟཱརམྨཎེ ཙེཏསོ ཝིཀྑེཔོ པཊིབཱཧིཏབྦོ. ‘‘པཎྞཏྟིཾ སམཏིཀྐམྨ, མུཉྩནྟསྶཱནུཔུབྦཏོ’’ཏི པཱཋོ གཧེཏབྦོ. ཨེཝཉྷི སཏི བྷཱཝནཱཀྐམེན ཨཏྠོ སུཝིཉྙེཡྻོ ཧོཏི. ‘‘ཀེསཱ ལོམཱ’’ཏིཨཱདིཔཉྙཏྟིཾ ཨམནསིཀཏྭཱ པཊིཀྐཱུལབྷཱཝེན ཨེཝཾ ཙིཏྟཾ ཋཔེཏབྦཾ. མུཉྩནྟསྶཱནུཔུབྦཏོཏི ཡོ ཡོ ཀོཊྛཱསོ ཨཱཔཱཐཾ ནཱགཙྪཏི, ཏཾ ཏཾ ཨནུཔུབྦཏོ མུཉྩནྟསྶཱཏི ཨཏྠོ.

༤༦༧. ཨིདཱནི ཡཐཱ པཊིཀྐཱུལམནསིཀཱརོ ཀཱཏབྦོ, ཏཾ དསྶེཏུཾ ‘‘ཝཎྞཨཱསཡསཎྛཱནཱ’’ཏིཨཱདིམཱཧ. ཨེཏེཧི ཝཎྞཱདཱིཧི ཀོཊྛཱསེཧི པཊིཀྐཱུལཱཏི བྷཱཝནཱཏི སམྦནྡྷོ. ཨེཏྠ (ཝིབྷ. ཨཊྛ. ༣༥༦; ཝིསུདྡྷི. ༡.༡༧༨) ཀེསཱ ཏཱཝ ཝཎྞཏོཔི པཊིཀྐཱུལཱ. ཏཐཱ ¶ ཧི ཡཱགུབྷཏྟཱདཱིསུ ཀེསཝཎྞཾ ཀིཉྩི དིསྭཱ ཛིགུཙྪནྟི. སཎྛཱནཏོཔི པཊིཀྐཱུལཱ. ཏཐཱ ཧི རཏྟིཾ བྷུཉྫནྟཱ ཀེསསཎྛཱནཾ མཀཙིཝཱཀཱདིཀཾ ཚུཔིཏྭཱ ཛིགུཙྪནྟི. ཏེལམཀྑནཱདིཝིརཧིཏཱནཉྩ ཨགྒིམྷི པཀྑིཏྟཱནཉྩ གནྡྷོ ཨཏིཝིཡ པཊིཀྐཱུལོཏི གནྡྷཏོཔི པཊིཀྐཱུལཱ. ཨསུཙིཊྛཱནེ ཛཱཏསཱུཔེཡྻཔཎྞཾ ཝིཡ པུབྦལོཧིཏམུཏྟཀརཱིསཔིཏྟསེམྷཱདིནིསྶནྡེན ཛཱཏཏྟཱ ཨཱསཡཏོཔི པཊིཀྐཱུལཱ. གཱུཐརཱསིམྷི ཨུཊྛིཏཀཎྞིཀཾ ཝིཡ ཨེཀཏིཾསཀོཊྛཱསརཱསིམྷི ཛཱཏཏྟཱ ཨོཀཱསཏོཔི པཊིཀྐཱུལཱ. ཨུདྡྷུམཱཏཀཾ ཝིནཱིལཀཾ ཝིཔུབྦཀཾ ཝིཙྪིདྡཀཾ ཝིཀྑཱཡིཏཀཾ ཝིཀྑིཏྟཀཾ ཧཏཝིཀྑིཏྟཀཾ ལོཧིཏཀཾ པུལ༹ཝཀཾ ཨཊྛིཀནྟི ཨིམེསུ ཨུདྡྷུམཱཏཀཱདཱིསུ ཝཏྠཱུསུ ཨསུབྷཱཀཱརཾ གཧེཏྭཱ པཝཏྟཱ བྷཱཝནཱ ཝཱ ཨསུབྷཾ ནཱམཱཏི ཨཏྠོ.

༤༦༨. ཡཾ པནེཏཾ ཨརཧནྟཱནཾ ཝཊྚདུཀྑསམུཙྪེདསངྑཱཏཾ སམུཙྪེདམརཎཾ (ཝིསུདྡྷི. ༡.༡༦༧), སངྑཱརཱནཾ ཁཎབྷངྒསངྑཱཏཾ ཁཎིཀམརཎཾ, ‘‘རུཀྑོ མཏོ, ལོཧཾ མཏ’’ནྟིཨཱདི སམྨུཏིམརཎཉྩ, ན ཏཾ ཨིདྷ ཨདྷིཔྤེཏཾ. ཨིདྷ པན མརཎནྟི ཨེཀབྷཝཔརིཡཱཔནྣསྶ ཛཱིཝིཏིནྡྲིཡསྶ ཨུཔཙྪེདོ ཨདྷིཔྤེཏོ. ཏམྤི ཀཱལམརཎཾ ཨཀཱལམརཎནྟི དུཝིདྷཾ ཧོཏི. ཏཏྠ ཀཱལམརཎཾ པུཉྙཀྑཡེན ཝཱ ཨཱཡུཀྑཡེན ཝཱ ཨུབྷཡཀྑཡེན ཝཱ ཧོཏི, ཨཀཱལམརཎཾ ཨུཔཔཱིལ༹ཀཨུཔཙྪེདཀཀམྨཝསེན ¶ . ‘‘མརཎཾ མེ བྷཝིསྶཏཱི’’ཏི ཝཱ ‘‘ཛཱིཝིཏཾ ཨུཙྪིཛྫིསྶཏཱི’’ཏི ཝཱ ‘‘མརཎཾ མརཎ’’ནྟི ཝཱ ཡོནིསོ བྷཱཝཡིཏྭཱནཱཏི སམྦནྡྷོ.

༤༦༩-༧༠. ཡསྶ པན ཨེཏྟཱཝཏཱ ཨུཔཙཱརཛ྄ཛྷཱནཾ ན ཨུཔྤཛྫཏི, ཏེན ཝདྷཀཔཙྩུཔཊྛཱནཏོ སམྤཏྟིཝིཔཏྟིཏོ ཨུཔསཾཧརཎཏོ ཀཱཡབཧུསཱདྷཱརཎཏོ ཨཱཡུདུབྦལཏོ ཨནིམིཏྟཏོ ཨདྡྷཱནཔརིཙྪེདཏོ ཁཎཔརིཏྟཏོཏི ཨིམེཧི ཨཊྛཧི ཨཱཀཱརེཧི མརཎཾ ཨནུསྶརིཏབྦཾ, ཨིདཱནི ¶ ཏེ དསྶེཏུཾ ‘‘ཝདྷཀསྶེཝུཔཊྛཱན’’ནྟིཨཱདིམཱཧ. ཨསིཾ ཨུཀྑིཔིཏྭཱ སཱིསཾ ཚིནྡིཏུཾ ཋིཏཝདྷཀོ ཝིཡ མརཎཾ པཙྩུཔཊྛིཏམེཝཱཏི བྷཱཝནཱ མརཎསྶཏི ནཱམཱཏི སམྦནྡྷོ. ཨེཝཾ སབྦཏྠ. སབྦཾ ཨཱརོགྱཾ བྱཱདྷིཔརིཡོསཱནཾ, སབྦཾ ཡོབྦནཾ ཛརཱཔརིཡོསཱནཾ, སབྦཾ ཛཱིཝིཏཾ མརཎཔརིཡོསཱནཾ, ཏསྨཱ ‘‘ཨཡཾ ཡོབྦནཱདིཀཱཡསམྤཏྟི ཏཱཝདེཝ སོབྷཏི, ཡཱཝ མརཎསངྑཱཏཱ ཝིཔཏྟི ན བྷཝིསྶཏཱི’’ཏི ཨེཝམཱདིནཱ སམྤཏྟིཝིཔཏྟིཏོ ཙ, སཏྟཧཱཀཱརེཧི ཨུཔསཾཧརཎཏོ མརཎཾ ཨནུསྶརིཏབྦཾ ཡསམཧཏྟཏོ པུཉྙམཧཏྟཏོ ཐཱམམཧཏྟཏོ ཨིདྡྷིམཧཏྟཏོ པཉྙཱམཧཏྟཏོ པཙྩེཀབུདྡྷཏོ སམྨཱསམྦུདྡྷཏོཏི. ཏཏྠ ‘‘ཨིདཾ མརཎཾ ནཱམ མཧཱཡསཱནཾ མཧཱཔརིཝཱརཱནཾ མཧཱསམྨཏམནྡྷཱཏཱདཱིནམྤི ཨུཔརི པཏཏི, ཀིམངྒཾ པན མཡ྄ཧཾ ཨུཔརི ན པཏིསྶཏཱི’’ཏི ཨེཝཾ ཡསམཧཏྟཏོ,

‘‘ཝཱསུདེཝོ བལདེཝོ, བྷཱིམསེནཱདཡོ མཧཱ;

བལཱ མཙྩུཝསཾ པཏྟཱ, མཱདིསེསུ ཀཐཱཝ ཀཱ’’ཏི. –

‘‘མཧཱམོགྒལླཱནཱདཱིནཾ མཧིདྡྷིཀཱནམྤི ཨུཔརི པཏཏི, མཱདིསེསུ ཀཐཱཝ ཀཱ’’ཏི ཨེཝཾ ཨིདྡྷིམཧཏྟཏོ, ‘‘སཱརིཔུཏྟཱདཱིནཾ མཧཱཔཉྙཱནམྤི ཨུཔརི པཏཏི, མཱདིསེསུ ཀཐཱཝ ཀཱ’’ཏི ¶ ཨེཝཾ པཉྙཱམཧཏྟཏོ. ཨེཝཾ ཨིཏརེསམྤི པཙྩེཀབུདྡྷསམྨཱསམྦུདྡྷཱནམྤི མཧནྟབྷཱཝཾ ཙིནྟེཏྭཱ ‘‘ཏེསམྤི ཨུཔརི མརཎཾ པཏཏི, ཀིམངྒཾ པན མཡ྄ཧཾ ཨུཔརི ན པཏིསྶཏཱི’’ཏི ཨེཝཾ ཨུཔསཾཧརཎཏོ ཙ, ‘‘ཨཡཾ ཀཱཡོ བཧུསཱདྷཱརཎོ ཨཛ྄ཛྷཏྟིཀཱནཾཡེཝ ཨནེཀསཏཱནཾ རོགཱནཾ བཱཧིརཱནཾ ཨཧིཝིཙྪིཀཱདཱིནཉྩཱ’’ཏི ཀཱཡབཧུསཱདྷཱརཎཏོ ཙ, ‘‘ཨསྶཱསཔསྶཱསཔཊིབདྡྷཾ ཛཱིཝིཏ’’ནྟིཨཱདིནཱ ནཡེན ཨཱཡུདུབྦལཏོ ཙ,

ཨནིམིཏྟཱ ན ནཱཡརེ’’ཏི. (སཾ. ནི. ཨཊྛ. ༡.༡.༢༠; ཛཱ. ཨཊྛ. ༢.༢.༣༤) –

ཨེཝཾ ཀཱལཝཝཏྠཱནསྶ ཨབྷཱཝཏོ ཙ, ‘‘ཡོ, བྷིཀྑཝེ, ཙིརཾ ཛཱིཝཏི, སོ ཝསྶསཏཾ ཛཱིཝཏི ཨཔྤཾ ཝཱ བྷིཡྻོ’’ཏི (སཾ. ནི. ༡.༡༤༥) ཝུཏྟཏྟཱ ཨེཝམཱདིནཱ ནཡེན ཨདྡྷཱནསྶ པརིཙྪེདཱཙ བྷཱཝནཱ མརཎསྶཏི ནཱམཱཏི ཨཏྠོ. ཁཎཔརིཏྟཏོ ཙ མརཎསྶཏི བྷཱཝེཏབྦཱ.

ལཧུ སོ ཝཏྟཏེ ཁཎོ’’ཏི. (ཝིསུདྡྷི. ༡.༡༧༦) –

ཙཏུརཱརཀྑནིདྡེསཝཎྞནཱ ནིཊྛིཏཱ.

༤༧༡-༢. ནཱམརཱུཔཾ ¶ ¶ པརིགྒཡ྄ཧཱཏི ཨེཏྠ (ཝིསུདྡྷི. ༢.༦༦༢ ཨཱདཡོ) ནཱམརཱུཔཔརིགྒཧཾ ཀཱཏུཀཱམེན ཏཱཝ ཋཔེཏྭཱ ནེཝསཉྙཱནཱསཉྙཱཡཏནཾ ཨཝསེསེསུ ཡཾ ཀིཉྩི ཛྷཱནཾ སམཱཔཛྫིཏྭཱ ཝུཊྛཱཡ ཝིཏཀྐཱདཱིནི ཛྷཱནངྒཱནི ཙ ཏཾསམྤཡུཏྟེ ཙ ཕསྶཱདཡོ དྷམྨེ ལཀྑཎརསཔཙྩུཔཊྛཱནཔདཊྛཱནཝསེན པརིཙྪིནྡིཏྭཱ ‘‘སབྦམེཏཾ ཨཱརམྨཎཱབྷིམུཁཾ ནམནཏོ ནམནཊྛེན ནཱམ’’ནྟི ཝཝཏྠཔེཏབྦཾ. ཏཏོ ཏསྶ པཙྩཡཾ པརིཡེསནྟོ ‘‘ཧདཡཝཏྠུཾ ནིསྶཱཡ ཝཏྟཏཱི’’ཏི པསྶཏི, པུན ཝཏྠུསྶ པཙྩཡབྷཱུཏཱནི ཙ ཨུཔཱདཱརཱུཔཱནི ཙ པསྶིཏྭཱ ‘‘ཨིདཾ སབྦཾ རུཔྤནཏོ ཝིཀཱརཱཔཏྟིཏོ རཱུཔ’’ནྟི པརིགྒཎྷཱཏི. པུན ཏདུབྷཡཾ ‘‘ནམནལཀྑཎཾ ནཱམཾ, རུཔྤནལཀྑཎཾ རཱུཔ’’ནྟི ཨེཝཾ སངྑེཔཏོ ནཱམརཱུཔཾ ཝཝཏྠཔེཏི. ཨིདཾ སབྦཾ སམཐཡཱནིཀཝསེན ཝུཏྟཾ. ཝིཔསྶནཱཡཱནིཀོ པན ཙཏུདྷཱཏུཝཝཏྠཱནམུཁེན བྷཱུཏུཔཱདཱཡརཱུཔཱནི པརིཙྪིནྡིཏྭཱ ‘‘སབྦམེཏཾ རུཔྤནཏོ རཱུཔ’’ནྟི པསྶཏི. ཏཏོ ཨེཝཾ པརིཙྪིནྣརཱུཔསྶ ཙཀྑཱདཱིནི ནིསྶཱཡ པཝཏྟམཱནཱ ཨརཱུཔདྷམྨཱཔི ཨཱཔཱཐམཱགཙྪནྟི. ཏཏོ སབྦེཔི ཏེ ཨརཱུཔདྷམྨེ ནམནལཀྑཎེན ཨེཀཏོ ཀཏྭཱ ‘‘ཨེཏཾ ནཱམ’’ནྟི པསྶཏི. སོ ‘‘ཨིདཾ ནཱམཾ, ཨིདཾ རཱུཔ’’ནྟི དྭེདྷཱ ཝཝཏྠཔེཏི. ཨེཝཾ ཝཝཏྠཔེཏྭཱ ‘‘ནཱམརཱུཔཏོ ཨུདྡྷཾ ཨཉྙོ སཏྟོ ཝཱ པུགྒལོ ཝཱ པོསོ ཝཱ དེཝོ ཝཱ བྲཧྨཱ ཝཱ ནཏྠཱི’’ཏི པསྶཏི.

ཡཐཱཧི ཨངྒསམྦྷཱརཱ, ཧོཏི སདྡོ རཐོ ཨིཏི;

ཨེཝཾ ཁནྡྷེསུ སནྟེསུ, ཧོཏི སཏྟོཏི སམྨུཏི. (སཾ. ནི. ༡.༡༧༡);

ཨེཝམེཝ པཉྩསུ ཨུཔཱདཱནཀྑནྡྷེསུ སཏི སཏྟོ, པུགྒལོཏི ཝཱ ཝོཧཱརམཏྟོ ཧོཏཱིཏི ཨེཝམཱདིནཱ ནཡེན ནཱམརཱུཔཱནཾ ཡཱཐཱཝདསྶནསངྑཱཏེན དིཊྛིཝིསུདྡྷིབྷཱུཏེན ཉཱཎེན ནཱམརཱུཔཾ པརིགྒཡ྄ཧཱཏི ཨཏྠོ.

ཏཏོ ¶ ཏསྶ ཙ པཙྩཡནྟི པུན ཏསྶ ནཱམརཱུཔསྶ པཙྩཡཾ པརིགྒཡ྄ཧཱཏི ཨཏྠོ. ཝུཏྟནཡེན ནཱམརཱུཔཾ པརིགྒཎྷིཏྭཱ ‘‘ཀོ ནུ ཁོ ཨིམསྶ ཧེཏཱུ’’ཏི པརིཡེསནྟོ ཨཧེཏུཝཱདཝིསམཧེཏུཝཱདེསུ དོསཾ དིསྭཱ རོགཾ དིསྭཱ ཏསྶ ནིདཱནསམུཊྛཱནཾ པརིཡེསནྟོ ཝེཛྫོ ཝིཡ ཏསྶ ཧེཏུཉྩ པཙྩཡཉྩ པརིཡེསནྟོ ཨཝིཛྫཱ ཏཎྷཱ ཨུཔཱདཱནཾ ཀམྨནྟི ཨིམེ ཙཏྟཱརོ དྷམྨེ ནཱམརཱུཔསྶ ཨུཔྤཱདཔཙྩཡཏྟཱ ‘‘ཧེཏཱུ’’ཏི ཙ ཨཱཧཱརཾ ཨུཔཏྠམྦྷནསྶ པཙྩཡཏྟཱ ‘‘པཙྩཡོ’’ཏི ¶ ཙ པསྶཏི. ‘‘ཨིམསྶ ཀཱཡསྶ ཨཝིཛྫཱདཡོ ཏཡོ དྷམྨཱ མཱཏཱ ཝིཡ དཱརཀསྶ ཨུཔནིསྶཡཱ ཧོནྟི, ཀམྨཾ པིཏཱ ཝིཡ པུཏྟསྶ ཛནཀཾ, ཨཱཧཱརོ དྷཱཏི ཝིཡ དཱརཀསྶ སནྡྷཱརཀོ’’ཏི ཨེཝཾ རཱུཔཀཱཡསྶ པཙྩཡཔརིགྒཧཾ ཀཏྭཱ པུན ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎ’’ནྟིཨཱདིནཱ (སཾ. ནི. ༢.༤༣) ནཡེན ནཱམཀཱཡསྶཔི ཧེཏུཔཙྩཡཾ པརིགྒཎྷཱཏི.

ཨེཝཾ པརིགྒཎྷནྟོ ‘‘ཨཏཱིཏཱནཱགཏཱཔི དྷམྨཱ ཨེཝམེཝ པཝཏྟནྟཱི’’ཏི སནྣིཊྛཱནཾ ཀརོཏི. ཏསྶ ཡཱ སཱ པུབྦནྟཾ ཨཱརབྦྷ ‘‘ཨཧོསིཾ ནུ ཁོ ཨཧཾ ཨཏཱིཏམདྡྷཱནཾ, ན ནུ ཁོ ཨཧོསིཾ, ཀིཾ ནུ ཁོ, ཀཐཾ ནུ ཁོ, ཀིཾ ཧུཏྭཱ ཀིཾ ཨཧོསིཾ ནུ ཁོ ཨཧཾ ཨཏཱིཏམདྡྷཱན’’ནྟི པཉྩཝིདྷཱ ཝིཙིཀིཙྪཱ ཝུཏྟཱ, ཡཱཔི ཨཔརནྟཾ ཨཱརབྦྷ ‘‘བྷཝིསྶཱམི ནུ ཁོ ཨཧཾ ཨནཱགཏམདྡྷཱནཾ, ན ནུ ཁོ, ཀིཾ ནུ ཁོ, ཀཐཾ ནུ ཁོ, ཀིཾ ཧུཏྭཱ ཀིཾ བྷཝིསྶཱམི ནུ ཁོ ཨཧཾ ཨནཱགཏམདྡྷཱན’’ནྟི པཉྩཝིདྷཱ ཝུཏྟཱ, ཡཱཔི ཨེཏརཧི ཝཱ པན པཙྩུཔྤནྣཾ ཨདྡྷཱནཾ ཨཱརབྦྷ ‘‘ཨཛ྄ཛྷཏྟཾ ཀཐཾཀཐཱི ཧོཏི, ཨཧཾ ནུ ཁོསྨི, ནོ ནུ ཁོསྨི, ཀིཾ ནུ ཁོསྨི, ཀཐཾ ནུ ཁོསྨི, ཨཡཾ ནུ ཁོ སཏྟོ ཀུཏོ ཨཱགཏོ, སོ ཀུཧིཾ གཱམཱི བྷཝིསྶཏཱི’’ཏི ཚབྦིདྷཱ ཝིཙིཀིཙྪཱ ཝུཏྟཱ, ཏཱ སབྦཱཔི པཧཱིཡནྟི. ཨེཝཾ པཙྩཡཔརིགྒཧཎེན ཏཱིསུ ཨདྡྷཱསུ ¶ ཀངྑཾ ཝིཏརིཏྭཱ ཋིཏཾ ཉཱཎཾ ‘‘ཀངྑཱཝིཏརཎཝིསུདྡྷཱི’’ཏིཔི ‘‘དྷམྨཊྛིཏིཉཱཎ’’ནྟིཔི ‘‘སམྨཱདསྶན’’ནྟིཔི ཝུཙྩཏི.

ཨེཏྠ པན ཏིསྶོ ལོཀིཡཔརིཉྙཱ ཉཱཏཔརིཉྙཱ ཏཱིརཎཔརིཉྙཱ པཧཱནཔརིཉྙཱཏི. ཏཏྠ ‘‘རུཔྤནལཀྑཎཾ རཱུཔཾ, ཝེདཡིཏལཀྑཎཱ ཝེདནཱ’’ཏི ཨེཝཾ ཏེསཾ ཏེསཾ དྷམྨཱནཾ པཙྩཏྟལཀྑཎསལླཀྑཎཝསེན པཝཏྟཱ པཉྙཱ ཉཱཏཔརིཉྙཱནཱམ. ‘‘རཱུཔཾ ཨནིཙྩཾ, ཝེདནཱ ཨནིཙྩཱ’’ཏིཨཱདིནཱ ཏེསཾཡེཝ དྷམྨཱནཾ སཱམཉྙལཀྑཎཾ ཨཱརོཔེཏྭཱ ལཀྑཎཱརམྨཎིཀཝིཔསྶནཱཔཉྙཱ ཏཱིརཎཔརིཉྙཱ ནཱམ. ཏེསུ ཨེཝཾ པན དྷམྨེསུ ནིཙྩསཉྙཱདིཔཛཧནཝསེན པཝཏྟཱ ལཀྑཎཱརམྨཎིཀཝིཔསྶནཱ པཧཱནཔརིཉྙཱ ནཱམ. ཏཏྠ སངྑཱརཔརིགྒཧཏོ པཊྛཱཡ ཡཱཝ པཙྩཡཔརིགྒཧཱ ཉཱཏཔརིཉྙཱཡ བྷཱུམི. ཀལཱཔསམྨསནཏོ པཊྛཱཡ ཡཱཝ ཨུདཡབྦཡཱནུཔསྶནཱ ཏཱིརཎཔརིཉྙཱཡ བྷཱུམི. བྷངྒཱནུཔསྶནཏོ པཊྛཱཡ པཧཱནཔརིཉྙཱཡ བྷཱུམི. ཏཏོ པཊྛཱཡ ཧི ‘‘ཨནིཙྩཏོ ཨནུཔསྶནྟོ ནིཙྩསཉྙཾ པཛཧཏི, དུཀྑཏོ ཨནུཔསྶནྟོ སུཁསཉྙཾ, ཨནཏྟཏོ ཨནུཔསྶནྟོ ཨཏྟསཉྙཾ, ནིབྦིནྡནྟོ ནནྡིཾ, ཝིརཛྫནྟོ རཱགཾ, ནིརོདྷེནྟོ སམུདཡཾ, པཊིནིསྶཛྫནྟོ ¶ ཨཱདཱནཾ པཛཧཏཱི’’ཏི (པཊི. མ. ༡.༥༢) ཨེཝཾ པཛཧནྟོ ནིཙྩསཉྙཱདིཔཧཱནསཱདྷིཀཱནཾ སཏྟནྣཾ ཨནུཔསྶནཱནཾ ཨཱདྷིཔཙྩཾ ཧོཏི. ཨིཏི ཨིམཱསུ པརིཉྙཱསུ སངྑཱརཔརིཙྪེདསྶ ཙེཝ པཙྩཡཔརིགྒཧསྶ ཙ སཱདྷིཏཏྟཱ ཨིམིནཱ ཡོགིནཱ ཉཱཏཔརིཉྙཱ ཨདྷིགཏཱ ཧོཏི.

པུན ‘‘ཡཾ ཀིཉྩི རཱུཔཾ ཨཏཱིཏཱནཱགཏཔཙྩུཔྤནྣཾ ཨཛ྄ཛྷཏྟཾ ཝཱ བཧིདྡྷཱ ཝཱ ཨོལཱ༹རིཀཾ ཝཱ སུཁུམཾ ཝཱ ཧཱིནཾ ཝཱ པཎཱིཏཾ ཝཱ ཡཾ དཱུརེ སནྟིཀེ ཝཱ, སབྦཾ རཱུཔཾ ཧུཏྭཱ ཨབྷཱཝཏོ ཨནིཙྩཾ, ཨུདཡབྦཡཔྤཊིཔཱིལི༹ཏཏྟཱ དུཀྑཾ, ཨཝསཝཏྟིཏྟཱ ཨནཏྟཱ. ཡཱ ཀཱཙི ཝེདནཱ, ཡཱ ཀཱཙི སཉྙཱ, ཡེ ཀེཙི སངྑཱརཱ, ཡཾ ཀིཉྩི ཝིཉྙཱཎཾ ཨཏཱིཏཱནཱགཏཔཙྩུཔྤནྣཾ ¶ ཨཛ྄ཛྷཏྟཾ ཝཱ བཧིདྡྷཱ ཝཱ ཨོལཱ༹རིཀཾ ཝཱ སུཁུམཾ ཝཱ ཧཱིནཾ ཝཱ པཎཱིཏཾ ཝཱ ཡཾ དཱུརེ སནྟིཀེ ཝཱ, སབྦཾ ཝིཉྙཱཎཾ ཧུཏྭཱ ཨབྷཱཝཏོ ཨནིཙྩཾ, ཨུདཡབྦཡཔྤཊིཔཱིལི༹ཏཏྟཱ དུཀྑཾ, ཨཝསཝཏྟིཏྟཱ ཨནཏྟཱ’’ཏི ཨེཝམཱདིནཱ ནཡེན ཀལཱཔསམྨསནཾ ཀརོཏི. ཨིདཾ སནྡྷཱཡ ཝུཏྟཾ ‘‘ཏིལཀྑཎཾ ཨཱརོཔེཏྭཱན སངྑཱརེ སམྨསནྟོ’’ཏི.

ཨེཝཾ སངྑཱརེསུ ཨནིཙྩདུཀྑཨནཏྟཝསེན ཀལཱཔསམྨསནཾ ཀཏྭཱ པུན སངྑཱརཱནཾ ཨུདཡབྦཡམེཝ པསྶཏི. ཀཐཾ? ‘‘ཨཝིཛྫཱསམུདཡཱ (པཊི. མ. ༡.༥༠) རཱུཔསམུདཡོ, ཏཎྷཱཀམྨཨཱཧཱརསམུདཡཱ རཱུཔསམུདཡོ’ཏི ཨེཝཾ རཱུཔཀྑནྡྷསྶ པཙྩཡསམུདཡདསྶནཊྛེན རཱུཔཀྑནྡྷསྶ ཨུདཡཾ པསྶཏི, ནིབྦཏྟིལཀྑཎཾ པསྶནྟོཔི རཱུཔཀྑནྡྷསྶ ཨུདཡཾ པསྶཏཱི’’ཏི ཨེཝཾ པཉྩཧཱཀཱརེཧི རཱུཔཀྑནྡྷསྶ ཨུདཡཾ པསྶཏི. ‘‘ཨཝིཛྫཱནིརོདྷཱ རཱུཔནིརོདྷོ, ཏཎྷཱཀམྨཨཱཧཱརནིརོདྷཱ རཱུཔནིརོདྷོ’ཏི ཨེཝཾ རཱུཔཀྑནྡྷསྶ པཙྩཡནིརོདྷདསྶནཊྛེན རཱུཔཀྑནྡྷསྶ ཝཡཾ པསྶཏི, ཝིཔརིཎཱམལཀྑཎཾ པསྶནྟོཔི རཱུཔཀྑནྡྷསྶ ཝཡཾ པསྶཏཱི’’ཏི ཨེཝཾ པཉྩཧཱཀཱརེཧི ཝཡཾ པསྶཏི. ཏཐཱ ‘‘ཨཝིཛྫཱསམུདཡཱ ཝེདནཱསམུདཡོ, ཏཎྷཱཀམྨཕསྶསམུདཡཱ ཝེདནཱསམུདཡོ’’ཏི ཝེདནཱཀྑནྡྷསྶ, ནིབྦཏྟིལཀྑཎཾ པསྶནྟོཔི ཝེདནཱཀྑནྡྷསྶ ཨུདཡཾ པསྶཏི. ‘‘ཨཝིཛྫཱནིརོདྷཱ ཝེདནཱནིརོདྷོ, ཏཎྷཱཀམྨཕསྶནིརོདྷཱ ཝེདནཱནིརོདྷོ’’ཏི ཝེདནཱཀྑནྡྷསྶ, ཝིཔརིཎཱམལཀྑཎཾ པསྶནྟོཔི ཝེདནཱཀྑནྡྷསྶ ཝཡཾ པསྶཏི. ཨེཝཾ སཉྙཱཀྑནྡྷཱདཱིསུཔི. ཨཡཾ པན ཝིསེསོ – ཝིཉྙཱཎཀྑནྡྷསྶ ཕསྶཊྛཱནེ ནཱམརཱུཔསམུདཡཱ, ནཱམརཱུཔནིརོདྷཱཏི ཡོཛེཏབྦཾ. ཨེཝཾ ཨེཀེཀསྨིཾ ཁནྡྷེ པཙྩཡསམུདཡཝསེན ཙ ནིབྦཏྟིལཀྑཎཝསེན ཙ པཙྩཡནིརོདྷཝསེན ཙ ཝིཔརིཎཱམལཀྑཎཝསེན ཙ ཨུདཡབྦཡདསྶནེན དས ¶ དས ཀཏྭཱ པཉྙཱས ལཀྑཎཱནི ¶ ཝུཏྟཱནི. ཏེསཾ ཝསེན ཨེཝཾ རཱུཔསྶ ཨུདཡོ རཱུཔསྶ ཝཡོཏི པཙྩཡཏོ ཙེཝ ལཀྑཎཏོ ཙ ཝིཏྠཱརེན མནསིཀཱརཾ ཀརོཏི.

ཏསྶེཝཾ ཀརོཏོ ‘‘ཨིཏི ཀིར ཨིམེ དྷམྨཱ ཨཧུཏྭཱ སམྦྷོནྟི, ཧུཏྭཱ པཊིཝེནྟཱི’’ཏི ཉཱཎཾ ཝིསདཾ ཧོཏི. ‘‘ཨེཝཾ ཀིར ཨིམེ དྷམྨཱ ཨནུཔྤནྣཱ ཨུཔྤཛྫནྟི, ཨུཔྤནྣཱ ནིརུཛ྄ཛྷནྟཱི’’ཏི ནིཙྩཾ ནཝཱཝ ཧུཏྭཱ སངྑཱརཱ ཨུཔཊྛཧནྟི. ན ཀེཝལཉྩ ནིཙྩཾ ནཝཱ, སཱུརིཡུགྒམནེ ཨུསྶཱཝབིནྡུ ཝིཡ, ཨུདཀབུབྦུལོ༹ ཝིཡ, ཨུདཀེ དཎྜརཱཛི ཝིཡ, ཨཱརགྒེ སཱསཔོ ཝིཡ, ཝིཛྫུཔྤཱདོ ཝིཡ ཙ པརིཏྟཊྛཱཡིནོ. མཱཡཱམརཱིཙིསུཔིནཨལཱཏཙཀྐགནྡྷབྦནགརཕེཎཔིཎྜཀདལིཨཱདཡོ ཝིཡ ནིསྶཱརཱ ཧུཏྭཱ ཨུཔཊྛཧནྟི. ཨེཏྟཱཝཏཱ ཙཱནེན ཝཡདྷམྨམེཝ ཨུཔྤཛྫཏི, ཨུཔྤནྣཉྩ ཝཡཾ ཨུཔེཏཱིཏི ཨིམིནཱ ཨཱཀཱརེན སམཔཉྙཱས ལཀྑཎཱནི པཊིཝིཛ྄ཛྷིཏྭཱ ཋིཏཾ ཨུདཡབྦཡཱནུཔསྶནཾ ནཱམ པཋམཾ ཏརུཎཝིཔསྶནཱཉཱཎཾ ཨདྷིགཏཾ ཧོཏི, ཡསྶཱདྷིགམཱ ཨཱརདྡྷཝིཔསྶཀོཏི སངྑྱཾ གཙྪཏི.

ཨཐསྶ ཨཱརདྡྷཝིཔསྶཀསྶ ཀུལཔུཏྟསྶ ཨོབྷཱསོ ཉཱཎཾ པཱིཏི པསྶདྡྷི སུཁཾ ཨདྷིམོཀྑོ པགྒཧོ ཨུཔཊྛཱནཾ ཨུཔེཀྑཱ ནིཀནྟཱིཏི དས ཝིཔསྶནུཔཀྐིལེསཱ ཨུཔྤཛྫནྟི. ཨེཏྠ ཨོབྷཱསོ ནཱམ ཝིཔསྶནཱཀྑཎེ ཉཱཎསྶ བལཝཏྟཱ ལོཧིཏཾ པསཱིདཏི, ཏེན ཚཝིཏོ ཨོབྷཱསོ ནིབྦཏྟཏི, ཏཾ དིསྭཱ ཨཡཾ ཡོགཱི ‘‘མགྒོ མཡཱ པཏྟོ’’ཏི ཏམེཝ ཨོབྷཱསཾ ཨསྶཱདེཏི. ཉཱཎནྟི ཝིཔསྶནཱཉཱཎམེཝེཏཾ, སངྑཱརེ སམྨསནྟསྶ སཱུརཾ པསནྣཾ ཧུཏྭཱ པཝཏྟམཱནཾ དིསྭཱ པུབྦེ ཝིཡ ‘‘མགྒོ’’ཏི ཨསྶཱདེཏི. པཱིཏཱིཏི ཝིཔསྶནཱཔཱིཏི ཨེཝ. ཏསྶ ཧི ཏསྨིཾ ཁཎེ པཉྩཝིདྷཱ པཱིཏི ཨུཔྤཛྫཏི. པསྶདྡྷཱིཏི ཝིཔསྶནཱཔསྶདྡྷི. ཏསྨིཾ སམཡེ ནེཝ ཀཱཡཙིཏྟཱནཾ དརཐོ གཱརཝཏཱ ཀཀྑལ༹ཏཱ ཨཀམྨཉྙཏཱ གེལཉྙཏཱ ཝངྐཏཱ ཧོཏི. སུཁཾ ཝིཔསྶནཱསུཁམེཝ. ཏསྶ ཀིར ཏསྨིཾ ¶ སམཡེ སཀལསརཱིརཾ ཋཔིཏཝཊྚི ཝིཡ ཨབྷིསནྡཡམཱནཾ ཨཏིཔཎཱིཏཾ སུཁཾ ཨུཔྤཛྫཏི.

ཨདྷིམོཀྑོ ནཱམ ཝིཔསྶནཱཀྑཎེ པཝཏྟཱ སདྡྷཱ. ཏསྨིཾ ཁཎེ ཙིཏྟཙེཏསིཀཱནཾ ཨཏིཝིཡ པསཱདབྷཱུཏཱ བལཝཏཱི སདྡྷཱ ཨུཔྤཛྫཏི. པགྒཧོ ནཱམ ཝིཔསྶནཱསམྤཡུཏྟཾ ཝཱིརིཡཾ. ཏསྨིཉྷི ཁཎེ ཨསིཐིལམནཙྩཱརདྡྷཾ སུཔགྒཧིཏཾ ཝཱིརིཡཾ ཨུཔྤཛྫཏི. ཨུཔཊྛཱནནྟི ཝིཔསྶནཱསམྤཡུཏྟཱ སཏི. ཏསྨིཉྷི ཁཎེ སུཔཊྛིཏཱ སཏི ཨུཔྤཛྫཏི. ཨུཔེཀྑཱཏི དུཝིདྷཱ ཝིཔསྶནཱཝཛྫནཝསེན ¶ . ཏསྨིཾ ཁཎེ སབྦསངྑཱརགྒཧཎེ མཛ྄ཛྷཏྟབྷཱུཏཝིཔསྶནུཔེཀྑཱསངྑཱཏཾ ཉཱཎཾ བལཝནྟཾ ཧུཏྭཱ ཨུཔྤཛྫཏི, མནོདྭཱརེ ཨཱཝཛྫནུཔེཀྑཱ ཙ, སཱཝ ཏཾ ཏཾ ཋཱནཾ ཨཱཝཛྫེནྟསྶ སཱུརཱ ཏིཁིཎཱ ཧུཏྭཱ ཝཧཏི. ནིཀནྟི ཝིཔསྶནཱནིཀནྟི. ཨོབྷཱསཱདཱིསུ ཨཱལཡཾ ཀུརུམཱནཱ སུཁུམཱ སནྟཱཀཱརཱ ནིཀནྟི ཨུཔྤཛྫཏི. ཨེཏྠ ཨོབྷཱསཱདཡོ ཀིལེསཝཏྠུབྷཱུཏཏཱཡ ‘‘ཨུཔཀྐིལེསཱ’’ཏི ཝུཏྟཱ, ན ཨཀུསལཏྟཱ. ནིཀནྟི པན ཨུཔཀྐིལེསོ ཙེཝ ཀིལེསཝཏྠུ ཙ. པཎྜིཏོ པན བྷིཀྑུ ཨོབྷཱསཱདཱིསུ ཨུཔྤནྣེསུ ཝིཀྑེཔཾ ཨགཙྪནྟོ ‘‘ཨོབྷཱསཱདཡོ དྷམྨཱ ན མགྒོ, ཨུཔཀྐིལེསཝིནིམུཏྟཾ པན ཝཱིཐིཔྤཊིཔནྣཾ ཝིཔསྶནཱཉཱཎཾ མགྒོ’’ཏི མགྒཉྩ ཨམགྒཉྩ ཝཝཏྠཔེཏི. ཏསྶེཝཾ ‘‘ཨཡཾ མགྒོ, ཨཡཾ ན མགྒོ’’ཏི ཉཏྭཱ ཋིཏཾ ཉཱཎཾ ‘‘མགྒཱམགྒཉཱཎདསྶནཝིསུདྡྷཱི’’ཏི ཝུཙྩཏི.

ཨིཏོ པཊྛཱཡ ཨཊྛཝིདྷསྶ ཉཱཎསྶ ཝསེན སིཁཱཔྤཏྟཾ ཝིཔསྶནཱཉཱཎཾ པཊིཔདཱཉཱཎདསྶནཝིསུདྡྷི ནཱམ ཧོཏི. ཨུདཡབྦཡཱནུཔསྶནཱཉཱཎཾ བྷངྒཱནུཔསྶནཱཉཱཎཾ བྷཡཏུཔཊྛཱནཉཱཎཾ ཨཱདཱིནཝཱནུཔསྶནཱཉཱཎཾ ནིབྦིདཱནུཔསྶནཱཉཱཎཾ མུཉྩིཏུཀམྱཏཱཉཱཎཾ པཊིསངྑཱནུཔསྶནཱཉཱཎཾ སངྑཱརུཔེཀྑཱཉཱཎནྟི ཨིམཱནི ཨཊྛ ཉཱཎཱནི ནཱམ. ཨེཏཱནི ནིབྦཏྟེཏུཀཱམེན ཡསྨཱ ཨུཔཀྐིལེསེཧི ཨབྷིབྷཱུཏཾ ཧུཏྭཱ ལཀྑཎཔྤཊིཝེདྷཾ ཀཱཏུཾ ཨསམཏྠཾ ¶ ཧོཏི ཙིཏྟཾ, ཏསྨཱ པུནཔི ཨུདཡབྦཡམེཝ པསྶིཏབྦཾ. ཨུདཡབྦཡཾ པསྶནྟསྶ ཨནིཙྩལཀྑཎཾ ཡཐཱབྷཱུཏཾ ཨུཔཊྛཱཏི, ཨུདཡབྦཡཔྤཊིཔཱིལི༹ཏཏྟཱ དུཀྑལཀྑཎཉྩ ‘‘དུཀྑམེཝ ཙ སམྦྷོཏི, དུཀྑཾ ཏིཊྛཏི ཝེཏི ཙཱ’’ཏི (སཾ. ནི. ༡.༡༧༡) པསྶཏོ ཨནཏྟལཀྑཎཉྩ.

ཨེཏྠ ཙ ཨནིཙྩཾ ཨནིཙྩལཀྑཎཾ, དུཀྑཾ དུཀྑལཀྑཎཾ, ཨནཏྟཱ ཨནཏྟལཀྑཎནྟི ཨཡཾ ཝིབྷཱགོ ཝེདིཏབྦོ. ཨེཏྠ ཨནིཙྩནྟི ཁནྡྷཔཉྩཀཾ. ཀསྨཱ? ཨུཔྤཱདཝཡཉྙཐཏྟབྷཱཝཱ ཧུཏྭཱ ཨབྷཱཝཏོ ཝཱ. ཨཉྙཐཏྟཾ ནཱམ ཛརཱ, ཨུཔྤཱདཝཡཉྙཐཏྟཾ ཨནིཙྩལཀྑཎཾ, ཧུཏྭཱ ཨབྷཱཝསངྑཱཏོ ཝཱ ཨེཀོ ཨཱཀཱརཝིཀཱརོ. ‘‘ཡདནིཙྩཾ ཏཾ དུཀྑ’’ནྟི (སཾ. ནི. ༣.༡༥) ཝཙནཏོ ཏདེཝ ཁནྡྷཔཉྩཀཾ དུཀྑཾ. ཀསྨཱ? ཨབྷིཎྷཾ པཊིཔཱིལི༹ཏཏྟཱ. ཨབྷིཎྷཔྤཊིཔཱིལ༹ནཱཀཱརོ དུཀྑལཀྑཎཾ. ‘‘ཡཾ དུཀྑཾ ཏདནཏྟཱ’’ཏི ཝཙནཏོ ཏདེཝ ཁནྡྷཔཉྩཀཾ ཨནཏྟཱ. ཀསྨཱ? ཨཝསཝཏྟནཏོ. ཨཝསཝཏྟནཱཀཱརོ ཨནཏྟལཀྑཎཾ. ཨིམཱནིཔི ཏཱིཎི ལཀྑཎཱནི ཨུདཡབྦཡཾ པསྶནྟསྶེཝ ཨཱརམྨཎཱནི ཧོནྟི.

པུནཔི ¶ སོ རཱུཔཱརཱུཔདྷམྨེསུ ཨེཝ ‘‘ཨནིཙྩཱ’’ཏིཨཱདིནཱ ཝིཔསྶཏི, ཏསྶ སངྑཱརཱ ལཧུཾ ལཧུཾ ཨཱཔཱཐཾ གཙྪནྟི. ཏཏོ ཨུཔྤཱདཾ ཝཱ ཋིཏིཾ ཝཱ ཨཱརམྨཎཾ ཨཀཏྭཱ ཏེསཾ ཁཡཝཡནིརོདྷེ ཨེཝ པསྶཏོ སཏི སནྟིཊྛཏཱིཏི ཨིདཾ བྷངྒཱནུཔསྶནཱཉཱཎཾ ནཱམ. ཨིམསྶ ཨུཔྤཱདཏོ པཊྛཱཡ ཨསྶ ཡོགིནོ ‘‘ཡཐཱ ཨིམེ སངྑཱརཱ པཉྩཀྑནྡྷཱ བྷིཛྫནྟི, ཨེཝཾ ཨཏཱིཏེཔི སངྑཱརཱ བྷིཛྫིཾསུ, ཨནཱགཏེཔི བྷིཛྫིསྶནྟཱི’’ཏི ནིརོདྷམེཝ པསྶཏོ སཏི སནྟིཊྛཏི, ཏསྶ བྷངྒཱནུཔསྶནཱཉཱཎཾ ཨཱསེཝནྟསྶ བཧུལཱིཀརོནྟསྶ སབྦབྷཝཡོནིགཏིཊྛིཏིསཏྟཱཝཱསེསུ སབྦེ སངྑཱརཱ ཛལིཏཨངྒཱརཀཱསུཨཱདཡོ ཝིཡ མཧཱབྷཡཾ ཧུཏྭཱ ཨུཔཊྛཧནྟི. ཨེཏཾ བྷཡཏུཔཊྛཱནཉཱཎཾ ནཱམ. ཏསྶ ཏཾ བྷཡཏུཔཊྛཱནཉཱཎཾ ཨཱསེཝནྟསྶ ¶ སབྦེ བྷཝཱདཡོ ཨཱདིཏྟཨངྒཱརཱ ཝིཡ, སམུསྶིཏཁགྒཱ ཝིཡ པཙྩཏྠིཀཱ ཨཔྤཊིསརཎཱ སཱདཱིནཝཱ ཧུཏྭཱ ཨུཔཊྛཧནྟི. ཨིདཾ ཨཱདཱིནཝཱནུཔསྶནཱཉཱཎཾ ནཱམ. ཏསྶ ཨེཝཾ སངྑཱརེ ཨཱདཱིནཝཏོ པསྶནྟསྶ བྷཝཱདཱིསུ སངྑཱརཱནཾ ཨཱདཱིནཝཏྟཱ སབྦསངྑཱརེསུ ཨུཀྐཎྛནཱ ཨནབྷིརཏི ཨུཔྤཛྫཏི. ཨིདཾ ནིབྦིདཱནུཔསྶནཱཉཱཎཾ ནཱམ. སབྦསངྑཱརེསུ ནིབྦིནྡནྟསྶ ཨུཀྐཎྛནྟསྶ སབྦསྨཱ སངྑཱརགཏཱ མུཉྩིཏུཀཱམཏཱ ནིསྶརིཏུཀཱམཏཱཝ ཧོཏི. ཨིདཾ མུཉྩིཏུཀམྱཏཱཉཱཎཾ ནཱམ. པུན ཏསྨཱ སངྑཱརགཏཱ མུཉྩིཏུཾ པུན ཏེ ཨེཝ སངྑཱརེ པཊིསངྑཱནུཔསྶནཱཉཱཎེན ཏིལཀྑཎཾ ཨཱརོཔེཏྭཱ ཏཱིརཎཾ པཊིསངྑཱནུཔསྶནཱཉཱཎཾ ནཱམ, ཡོ ཨེཝཾ ཏིལཀྑཎཾ ཨཱརོཔེཏྭཱ སངྑཱརེ པརིགྒཎྷནྟོ ཏེསུ ཨནཏྟལཀྑཎསྶ སུདིཊྛཏྟཱ ‘‘ཨཏྟཱ’’ཏི ཝཱ ‘‘ཨཏྟནིཡ’’ནྟི ཝཱ ཨགྒཎྷནྟོ སངྑཱརེསུ བྷཡཉྩ ནནྡིཉྩ པཧཱཡ སངྑཱརེསུ ཨུདཱསིནོ ཧོཏི མཛ྄ཛྷཏྟོ, ‘‘ཨཧ’’ནྟི ཝཱ ‘‘མམ’’ནྟི ཝཱ ན གཎྷཱཏི, སབྦསངྑཱརེསུ ཨུདཱསིནོ མཛ྄ཛྷཏྟོ ཏཱིསུ བྷཝེསུ ཨུཔེཀྑཀོ, ཏསྶ ཏཾ ཉཱཎཾ སངྑཱརུཔེཀྑཱཉཱཎཾ ནཱམ. ཏཾ པནེཏཾ སབྦསངྑཱརཔྤཝཏྟཾ ཝིསྶཛྫེཏྭཱ ནིབྦཱནནིནྣཾ ནིབྦཱནཔཀྑནྡཾ ཧོཏི, ནོ ཙེ ནིབྦཱནཾ སནྟཏོ པསྶཏི, པུནཔྤུནཾ ‘‘ཨནིཙྩ’’ནྟི ཝཱ ‘‘དུཀྑ’’ནྟི ཝཱ ‘‘ཨནཏྟཱ’’ཏི ཝཱ ཏིཝིདྷཱནུཔསྶནཱཝསེན སངྑཱརཱརམྨཎམེཝ ཧུཏྭཱ པཝཏྟཏི.

ཨེཝཾ ཏིཊྛམཱནཉྩ ཨེཏཾ ཨནིམིཏྟོ ཨཔྤཎིཧིཏོ སུཉྙཏོཏི ཏིཎྞཾ ཝིམོཀྑཱནཾ ཝསེན ཝིམོཀྑམུཁབྷཱཝཾ ཨཱཔཛྫིཏྭཱ ཏིཊྛཏི. ཏིསྶོ ཧི ཨནུཔསྶནཱ ཏཱིཎི ཝིམོཀྑམུཁཱནཱིཏི ཝུཙྩནྟི. ཨེཏྠ ཙ ཨནིཙྩཏོ མནསི ཀརོནྟོ (པཊི. མ. ༡.༢༢༣-༢༢༤) ཨདྷིམོཀྑབཧུལོ ཨནིམིཏྟཾ ཝིམོཀྑཾ པཊིལབྷཏི. དུཀྑཏོ མནསི ཀརོནྟོ པསྶདྡྷིབཧུལོ ཨཔྤཎིཧིཏཾ ཝིམོཀྑཾ པཊིལབྷཏི. ཨནཏྟཏོ མནསི ཀརོནྟོ ཝེདབཧུལོ སུཉྙཏཝིམོཀྑཾ པཊིལབྷཏི. ཨེཏྠ ཙ ཨནིམིཏྟོ ¶ ཝིམོཀྑོཏི ཨནིམིཏྟཱཀཱརེན ནིབྦཱནཾ ཨཱརམྨཎཾ ཀཏྭཱ པཝཏྟོ ¶ ཨརིཡམགྒོ. སོ ཧི ཨནིམིཏྟཱཡ དྷཱཏུཡཱ ཨུཔྤནྣཏྟཱ ཨནིམིཏྟོ, ཀིལེསེཧི ཙ ཝིམུཏྟཏྟཱ ཝིམོཀྑོ. ཨེཏེནེཝ ནཡེན ཨཔྤཎིཧིཏཱཀཱརེན ནིབྦཱནཾ ཨཱརམྨཎཾ ཀཏྭཱ པཝཏྟོ ཨཔྤཎིཧིཏོ, སུཉྙཏཱཀཱརེན ནིབྦཱནཾ ཨཱརམྨཎཾ ཀཏྭཱ པཝཏྟོ སུཉྙཏོཏི ཝེདིཏབྦོ. ཨདྷིགཏསངྑཱརུཔེཀྑསྶ ཀུལཔུཏྟསྶ ཝིཔསྶནཱ སིཁཱཔྤཏྟཱ ཧོཏི. ཝུཊྛཱནགཱམིནིཝིཔསྶནཱཏི ཨེཏདེཝ. ཨེཏཾ སངྑཱརུཔེཀྑཱཉཱཎཾ ཨཱསེཝནྟསྶ བྷཱཝེནྟསྶ ཏིཀྑཏརཱ སངྑཱརུཔེཀྑཱ ཨུཔྤཛྫཏི.

ཏསྶ ཨིདཱནི མགྒོ ཨུཔྤཛྫིསྶཏཱིཏི སངྑཱརུཔེཀྑཱ སངྑཱརེ ‘‘ཨནིཙྩཱ’’ཏི ཝཱ ‘‘དུཀྑཱ’’ཏི ཝཱ ‘‘ཨནཏྟཱ’’ཏི ཝཱ སམྨསིཏྭཱ བྷཝངྒཾ ཨོཏརཏི. བྷཝངྒཱ ཝུཊྛཱཡ སངྑཱརུཔེཀྑཱཡ ཨཱགཏནཡེནེཝ ཨནིཙྩཱདིཨཱཀཱརེན མནསི ཀརིཏྭཱ ཨུཔྤཛྫཏི མནོདྭཱརཱཝཛྫནཾ, ཏདེཝ མནསི ཀརོཏོ པཋམཾ ཛཝནཙིཏྟཾ ཨུཔྤཛྫཏི, ཡཾ ‘‘པརིཀམྨ’’ནྟི ཝུཙྩཏི. ཏདནནྟརཾ ཏཐེཝ དུཏིཡཾ ཛཝནཙིཏྟཾ ཨུཔྤཛྫཏི, ཡཾ ‘‘ཨུཔཙཱར’’ནྟི ཝུཙྩཏི. ཏདནནྟརམྤི ཏཐེཝ ཨུཔྤཛྫཏི ཛཝནཙིཏྟཾ, ཡཾ ‘‘ཨནུལོམ’’ནྟི ཝུཙྩཏི. ཨིདཾ ཏེསཾ པཱཊིཡེཀྐཾ ནཱམཾ. ཨཝིསེསེན པན ཏིཝིདྷམེཏཾ ཨཱསེཝནནྟིཔི པརིཀམྨནྟིཔི ཨུཔཙཱརནྟིཔི ཨནུལོམནྟིཔི ཝུཙྩཏི. ཨིདཾ པན ཨནུལོམཉཱཎཾ སངྑཱརཱརམྨཎཱཡ ཝུཊྛཱནགཱམིནིཡཱ ཝིཔསྶནཱཡ པརིཡོསཱནཾ ཧོཏི. ནིཔྤརིཡཱཡེན པན གོཏྲབྷུཉཱཎམེཝ ཝིཔསྶནཱཔརིཡོསཱནནྟི ཝུཙྩཏི. ཏཏོ པརཾ ནིརོདྷཾ ནིབྦཱནཾ ཨཱརམྨཎཾ ཀུརུམཱནཾ པུཐུཛྫནགོཏྟཾ ཨཏིཀྐམམཱནཾ ནིབྦཱནཱརམྨཎེ པཋམསམནྣཱཧཱརབྷཱུཏཾ ཨཔུནརཱཝཊྚཀཾ གོཏྲབྷུཉཱཎཾ ཨུཔྤཛྫཏི. ཨིདཾ པན ཉཱཎཾ པཊིཔདཱཉཱཎདསྶནཝིསུདྡྷིཉྩ ཉཱཎདསྶནཝིསུདྡྷིཉྩ ན བྷཛཏི, ཨནྟརཱ ཨབྦོཧཱརིཀམེཝ ཧོཏི, ཝིཔསྶནཱསོཏེ པཏིཏཏྟཱ པན ཝིཔསྶནཱཏི ཝཱ ¶ སངྑྱཾ གཙྪཏི. ནིབྦཱནཾ ཨཱརམྨཎཾ ཀཏྭཱ གོཏྲབྷུཉཱཎེ ནིརུདྡྷེ ཏེན དིནྣསཉྙཱཡ ནིབྦཱནཾ ཨཱརམྨཎཾ ཀཏྭཱ དིཊྛིསཾཡོཛནཾ སཱིལབྦཏཔརཱམཱསསཾཡོཛནཾ ཝིཙིཀིཙྪཱསཾཡོཛནནྟི ཏཱིཎི སཾཡོཛནཱནི སམུཙྪེདཝསེན ཝིདྡྷཾསེནྟོ སོཏཱཔཏྟིམགྒོ ཨུཔྤཛྫཏི. ཏདནནྟརཾ ཏསྶེཝ ཝིཔཱཀབྷཱུཏཱནི དྭེ ཏཱིཎི ཝཱ ཕལཙིཏྟཱནི ཨུཔྤཛྫནྟི ཨནནྟརཝིཔཱཀཏྟཱ ལོཀུཏྟརཱནཾ. ཕལཔརིཡོསཱནེ པནསྶ ཙིཏྟཾ བྷཝངྒཾ ཨོཏརཏི.

ཏཏོ བྷཝངྒཾ ཝིཙྪིནྡིཏྭཱ པཙྩཝེཀྑཎཏྠཱཡ མནོདྭཱརཱཝཛྫནཾ ཨུཔྤཛྫཏི. སོ ཧི ‘‘ཨིམིནཱ ཝཏཱཧཾ མགྒེན ཨཱགཏོ’’ཏི མགྒཾ པཙྩཝེཀྑཏི, ཏཏོ ‘‘ཨཡཾ མེ ཨཱནིསཾསོ ལདྡྷོ’’ཏི ¶ ཕལཾ པཙྩཝེཀྑཏི, ཏཏོ ‘‘ཨིམེ ནཱམ མེ ཀིལེསཱ པཧཱིནཱ’’ཏི པཧཱིནཀིལེསེ པཙྩཝེཀྑཏི, ཏཏོ ‘‘ཨིམེ ནཱམ མེ ཀིལེསཱ ཨཝསིཊྛཱ’’ཏི ཨུཔརིམགྒཏྟཡཝཛ྄ཛྷེ ཀིལེསེ པཙྩཝེཀྑཏི, ཨཝསཱནེ ‘‘ཨཡཾ མེ དྷམྨོ ཨཱརམྨཎཏོ པཊིཝིདྡྷོ’’ཏི ཨམཏཾ ནིབྦཱནཾ པཙྩཝེཀྑཏི. ཨིཏི སོཏཱཔནྣསྶ ཨརིཡསཱཝཀསྶ པཉྩ པཙྩཝེཀྑཎཱནི ཧོནྟི. ཏཐཱ སཀདཱགཱམིཨནཱགཱམཱིནཾ. ཨརཧཏོ པན ཨཝསིཊྛཀིལེསཔཙྩཝེཀྑཎཾ ནཱམ ནཏྠི. ཨེཝཾ སབྦཱནིཔི ཨེཀཱུནཝཱིསཏི ཧོནྟི. ཨུཀྐཊྛཔརིཙྪེདོཝ ཙེསོ. པཧཱིནཱཝསིཊྛཀིལེསཔཙྩཝེཀྑཎཉྷི སེཀྑཱནཾ ཧོཏི ཝཱ, ན ཝཱ. ཨེཝཾ པཙྩཝེཀྑིཏྭཱ སོ སོཏཱཔནྣོ ཨརིཡསཱཝཀོ ཏསྨིཾཡེཝ ཝཱ ཨཱསནེ ནིསིནྣོ ཨཔརེན ཝཱ སམཡེན ཀཱམརཱགབྱཱཔཱདཱནཾ ཏནུབྷཱཝཾ ཀརོནྟོ དུཏིཡམགྒཾ པཱཔུཎཱཏི, ཏདནནྟརཾ ཝུཏྟནཡེན ཕལཉྩ. ཏཏོ ཝུཏྟནཡེན ཀཱམརཱགབྱཱཔཱདཱནཾ ཨནཝསེསཔྤཧཱནཾ ཀརོནྟོ ཏཏིཡམགྒཾ པཱཔུཎཱཏི, ཝུཏྟནཡེན ཕལཉྩ. ཏཏོ ཏསྨིཾཡེཝ ཝཱ ཨཱསནེ ནིསིནྣོ ཨཔརེན ཝཱ སམཡེན རཱུཔརཱགཨརཱུཔརཱགམཱནཨུདྡྷཙྩཨཝིཛྫཱནཾ ཨནཝསེསཔྤཧཱནཾ ཀརོནྟོ ཙཏུཏྠམགྒཾ ¶ པཱཔུཎཱཏི, ཝུཏྟནཡེན ཕལཉྩ. ཨེཏྟཱཝཏཱ ཙེས ཨརཧཱ ནཱམ ཨཊྛམོ ཨརིཡཔུགྒལོ ཧོཏི མཧཱཁཱིཎཱསཝོ. ཨིཏི ཨིམེསུ ཙཏཱུསུ མགྒེསུ ཉཱཎཾ ཉཱཎདསྶནཝིསུདྡྷི ནཱམ.

ཨེཏྟཱཝཏཱ པཱཏིམོཀྑསཾཝརསཱིལཱདཱིནཾ ཝུཏྟཏྟཱ སཱིལཝིསུདྡྷི ཙ མེཏྟཱསུབྷཱདཱིནཾ ཝུཏྟཏྟཱ ཙིཏྟཝིསུདྡྷི ཙ ནཱམརཱུཔཔརིགྒཧཱདཱིནཾ ཝསེན དིཊྛིཝིསུདྡྷིཀངྑཱཝིཏརཎཝིསུདྡྷིམགྒཱམགྒཉཱཎདསྶནཝིསུདྡྷི པཊིཔདཱཉཱཎདསྶནཝིསུདྡྷི ཉཱཎདསྶནཝིསུདྡྷིཡོ ཙཱཏི སཏྟ ཝིསུདྡྷིཡོ ཝུཏྟཱ ཧོནྟི. ཨིདཾ ཝུཏྟཔྤཀཱརཾ པཊིཔདཱཀྐམཾ སནྡྷཱཡ ཝུཏྟཾ ‘‘པཱཔུཎེཡྻཱནུཔུབྦེན, སབྦསཾཡོཛནཀྑཡ’’ནྟི. ཨེཏྠ སཀྐཱཡདིཊྛི ཝིཙིཀིཙྪཱ སཱིལབྦཏཔརཱམཱསོ ཀཱམརཱགོ པཊིགྷོ རཱུཔརཱགོ ཨརུཔརཱགོ མཱནོ ཨུདྡྷཙྩཾ ཨཝིཛྫཱཏི ཨིམེ དས དྷམྨཱ སབྦསཾཡོཛནཱ ནཱམ. ཨེཏེསུ སཀྐཱཡདིཊྛིཝིཙིཀིཙྪཱསཱིལབྦཏཔརཱམཱསཱ སོཏཱཔཏྟིམགྒཝཛ྄ཛྷཱ, ཀཱམརཱགཔཊིགྷཱ དུཏིཡམགྒེན ཏནུབྷཱུཏཱ ཧུཏྭཱ ཏཏིཡེན སམུགྒྷཱཏཾ གཙྪནྟི, སེསཱནི པཉྩ ཙཏུཏྠེནཱཏི. ཨེཝཾ ཨནུཔུབྦེན སབྦསཾཡོཛནཀྑཡསངྑཱཏཾ ཨརཧཏྟཾ པཱཔུཎཱཏཱིཏི ཝེདིཏབྦཾ.

༤༧༣-༥. ཨདྷིསཱིལཨདྷིཙིཏྟཱནཾ ¶ ཨདྷིཔཉྙཱཡ ཙ སིཀྑནཱ ཨུཏྟརི བྷིཀྑུཀིཙྩཾ ནཱམ ནཏྠི ཡསྨཱ, ཨཏོ ཨཡཾ ཁུདྡསིཀྑཱ སམུདཱཧཊཱ.

ཀེནཱཏི ཙེ? ཡསྶ ཐེརསྶ ལོཀཝིཙཱརིནོ ལོཀེ ཝིཙརནྟསྶ མཧཏོ ཀིཏྟིསདྡསྶ པརིསྶམོ ན སམྦྷོཏི ན ཧོཏི, ཀིཾ ཝིཡ? མཱལུཏསྶེཝ ནིཙྩསོ, ཡཐཱ ¶ ནིཙྩཾ ཝིཙརནྟསྶ མཱལུཏསྶ པརིསྶམོ ནཏྠི, ཨེཝཾ ཝིཙརནྟསྶ ཀིཏྟིསདྡསྶ པརིསྶམོ ནཏྠི, ཏེན དྷམྨསིརིཀེན སམུདཱཧཊཱཏི སམྦནྡྷོ.

ནིཊྛིཏོ ཁུདྡསིཀྑཱཡ, སམཱསེན ཝིནིཙྪཡོ;

ཝིཏྠཱརོ པན ཨེཏིསྶཱ, སབྦམྤི པིཊཀཏྟཡཾ.

ཏསྨཱ ཝིཏྠཱརཀཱམེན, སཀལེ པིཊཀཏྟཡེ;

ཀཏྟབྦོ སཱདརོ ཨེཏྠ, ཨིཏརེན ཝིསེསཏོཏི.

ཁུདྡསིཀྑཱ-པུརཱཎཊཱིཀཱ ནིཊྛིཏཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཏིལོཀཏིལཀཾ ¶ ¶ ཝནྡེ, སདྡྷམྨཱམཏནིམྨིཏཾ;

སཾསུཊྛུཀཏསམྦྷཏྟིཾ, ཛིནཾ ཛནམནོརམཾ.

སཱརིཔུཏྟཾ མཧཱསཱམིཾ, ནེཀསཏྠཝིསཱརདཾ;

མཧཱགུཎཾ མཧཱཔཉྙཾ, ནམོ མེ སིརསཱ གརུཾ.

ཁུདྡསིཀྑཱཡ ཊཱིཀཱ ཡཱ, པུརཱཏནཱ སམཱིརིཏཱ;

ན ཏཱཡ སཀྐཱ སཀྐཙྩཾ, ཨཏྠོ སབྦཏྠ ཉཱཏཝེ.

ཏཏོནེཀགུཎཱནཾ ¶ ཡོ, མཉྫཱུསཱ རཏནཱནཝ;

སུམངྒལསནཱམེན, ཏེན པཉྙཝཏཱ སཏཱ.

ཨཛ྄ཛྷེསིཏོ ཡཏིནྡེན, སདཱརཉྙནིཝཱསིནཱ;

སཝིནིཙྪཡམེཏིསྶཱ, ཀརིསྶཱམཏྠཝཎྞནཾ.

(ཀ) ཨེཏྠཱཧ – ཀིམཏྠམཱདིཏོཝཱཡཾ གཱཐཱ ནིཀྑིཏྟཱ, ནནུ ཡཐཱདྷིཔྤེཏམེཝ པཀརཎམཱརབྷནཱིཡནྟི? ཝུཙྩཏེ – སཔྤཡོཛནཏྟཱ ¶ . སཔྤཡོཛནཉྷི ཏཾདསྶནཾ ཏཱཡ རཏནཏྟཡཔྤཎཱམཱབྷིདྷེཡྻཀརཎཔྤཀཱརཔྤཡོཛནཱབྷིདྷཱནསནྡསྶནཏོ. ཏཱནི ཙ པན སཔྤཡོཛནཱནི ཨནནྟརཱཡེན གནྠཔརིསམཱཔནཱདིཔྤཡོཛནཱནམབྷིནིཔྥཱདནཏོ. ཏཐཱ ཧི སོཏཱུནམཏྟནོ ཙ ཡཐཱདྷིཔྤེཏཏྠནིཔྥཱདནཾ རཏནཏྟཡཔྤཎཱམཀརཎཔྤཡོཛནཾ. ཝིདིཏཱབྷིདྷེཡྻསྶ གནྠསྶ ཝིཉྙཱུནམཱདརཎཱིཡཏཱ ཨབྷིདྷེཡྻཀཐནཔྤཡོཛནཾ. སོཏུཛནསམུསྶཱཧཛནནཾ ཀརཎཔྤཀཱརཔྤཡོཛནཀཐནཔྤཡོཛནཾ. ཝོཧཱརསུཁཏཱ པན ཨབྷིདྷཱནཀཐནཔྤཡོཛནཾ.

ཏཏྠ ཝནྡིཏྭཱ རཏནཏྟཡནྟི ཨིམིནཱ རཏནཏྟཡཔྤཎཱམོ དསྶིཏོ, ཁུདྡསིཀྑནྟི ཨིམིནཱ ཁུདྡབྷཱུཏཱནཾ སིཀྑཱནཾ ཨིདྷ པཊིཔཱདེཏབྦཏཱདཱིཔནེན ཨབྷིདྷེཡྻཾ, ཨབྷིདྷེཡྻོ ཙ ནཱམེས སམུདིཏེན སཏྠེན ཝཙནཱིཡཏྠོཏི. ཨབྷིདྷཱནཉྩ པན ཨིམིནཱཝ དསྶིཏཾ ཏེན ཨཏྠཱནུགཏསམཉྙཱཔརིདཱིཔནཏོ. སམཱཏིཀནྟི ཨིམིནཱ ཀརཎཔྤཀཱརོ, ཁུདྡསིཀྑནྟི ཨིམིནཱ ཙ, ཏེན ཁུདྡབྷཱུཏཱནཾ སིཀྑཱནཾ ཨིདྷ དསྶེཏབྦབྷཱཝཔྤཀཱསནཏོ. ཨཱདིཏོ ཨུཔསམྤནྣ སིཀྑིཏབྦནྟི ཨིམིནཱ པཡོཛནཔཡོཛནཾ པན ཨིམིནཱཝ སཱམཏྠིཡཏོ དསྶིཏམེཝ, ཏཱསཾ སིཀྑིཏབྦཔྤཀཱསནེན ཧི སིཀྑནེ སཏི ཏམྨཱུལིཀཱཡ དིཊྛདྷམྨིཀསམྤརཱཡིཀཏྠནིཔྥཏྟིཡཱ སཾསིཛ྄ཛྷནཏོ. པཀརཎཔྤཡོཛནཱནཾ སཱདྷནསཱདྷིཡལཀྑཎོ སམྦནྡྷོ ཏནྣིསྶཡདསྶནེནེཝ དསྶིཏོཡེཝཱཏི ཨཡམེཏྠ སམུདཱཡཏྠོ.

ཨཡཾ པནེཏྠཱཝཡཝཏྠོ – རཏནཏྟཡཾ ཝནྡིཏྭཱ ཁུདྡསིཀྑཾ པཝཀྑཱམཱིཏི སམྦནྡྷོ. རཏིཛནནཊྛེན ¶ རཏནཱནི, བུདྡྷདྷམྨསངྒྷཱནམེཏཾ ཨདྷིཝཙནཾ. ཨཐ ཝཱ ཙིཏྟཱིཀཏཱདིནཱ ཀཱརཎེན རཏནཱནི, བུདྡྷཱདཡོཝ རཏནཱནི. ཏཐཱ ཙ ཝུཏྟཾ –

‘‘ཙིཏྟཱིཀཏཾ ¶ མཧགྒྷཉྩ, ཨཏུལཾ དུལླབྷདསྶནཾ;

ཨནོམསཏྟཔརིབྷོགཾ, རཏནཾ ཏེན ཝུཙྩཏཱི’’ཏི. (དཱི. ནི. ཨཊྛ. ༢.༣༣; སཾ. ནི. ཨཊྛ. ༣.༥.༢༢༣; ཁུ. པཱ. ཨཊྛ. ༣; སུ. ནི. ཨཊྛ. ༡.༢༢༦; ཨུདཱ. ཨཊྛ. ༤༥; མཧཱནི. ཨཊྛ. ༥༠);

ཏཡོ ཨཝཡཝཱ ཨསྶཱཏི ཏཡཾ, སམུདཱཡཱཔེཀྑཾ ཨེཀཝཙནཾ, ཨཝཡཝཝིནིམུཏྟསྶ པན སམུདཱཡསྶ ཨབྷཱཝཏོ ཏཱིཎི ཨེཝ རཏནཱནི ཝུཙྩནྟི. རཏནཱནཾ ཏཡཾ རཏནཏྟཡཾ. ཝནྡིཏྭཱཏི ཏཱིཧི དྭཱརེཧི ནམསྶིཏྭཱ. ‘‘ཏིསྶོ ཨིམཱ, བྷིཀྑཝེ, ཝནྡནཱ ཀཱཡེན ཝནྡཏི, ཝཙསཱ ཝནྡཏི, མནསཱ ཝནྡཏཱི’’ཏི (ཨ. ནི. ༣.༡༥༥) ཧི ཝུཏྟཾ. ཏཏྠ ཝིཉྙཏྟིཾ ཨནུཔྤཱདེཏྭཱ ཀེཝལཾ རཏནཏྟཡགུཎཱནུསྶརཎཝསེན མནོདྭཱརེ བཧུལཔྤཝཏྟཱ ཀུསལཙེཏནཱ མནོདྭཱརཝནྡནཱ. ཏཾ ཏཾ ཝིཉྙཏྟིཾ ཨུཔྤཱདེཏྭཱ པན པཝཏྟཱ ཀཱཡཝཙཱིདྭཱརཝནྡནཱ. སིཀྑིཏབྦཱཏི སིཀྑཱ, ཨདྷིསཱིལཨདྷིཙིཏྟཨདྷིཔཉྙཱཝསེན ཏིསྶོ སིཀྑཱ. སིཀྑནཉྩེཏྠ ཡཐཱཀྐམཾ སཱིལཱདིདྷམྨཱནཾ སཾཝརཎཝསེན, ཨེཀཱརམྨཎེ ཙིཏྟཙེཏསིཀཱནཾ སམཱདྷཱནཝསེན, ཨཱརམྨཎཛཱནནལཀྑཎཔྤཊིཝེདྷམགྒཔཱཏུབྷཱཝཔཱཔནཝསེན ཙ ཨཱསེཝནཾ དཊྛབྦཾ. ཨཉྙཏྠ བཧུཝིདྷཱ སིཀྑཱ, ཨིདྷ ཏུ སངྑེཔནཡཏྟཱ ཨཔྤཀཱདིཨནེཀཏྠསམྦྷཝེཔི ཁུདྡ-སདྡསྶ ཨཔྤཀཏྠོཝེཏྠ ཡུཏྟཏརོཏི ཁུདྡཱ ཨཔྤཀཱ སིཀྑཱཏི ཁུདྡསིཀྑཱ. ཨིདྷ པན ཁུདྡསིཀྑཱཔྤཀཱསཀོ གནྠོ ཏབྦོཧཱརཱུཔཙཱརཏོ ཨིཏྠིལིངྒཝསེན ‘‘ཁུདྡསིཀྑཱ’’ཏི ཝུཙྩཏི ཡཐཱ ‘‘ཝརུཎཱནགར’’ནྟི. ཏཾ ཁུདྡསིཀྑཾ. པཝཀྑཱམཱིཏི ཀཐེསྶཱམི.

ཀཱིདིསནྟི ཨཱཧ ‘‘ཨཱདིཏོ ཨུཔསམྤནྣསིཀྑིཏབྦ’’ནྟིཨཱདི. ཨཱདི-སདྡོཡམཏྠི ཨཝཡཝཝཙནོ ཡཐཱ ‘‘སབྦཱདཱིནི སབྦནཱམཱནཱི’’ཏི. ཨཏྠི ཨཔཱདཱནཝཙནོ ཡཐཱ ‘‘པབྦཏཱདཱིནི ཁེཏྟཱནཱི’’ཏི. ཏཏྠཱཝཡཝཝཱཙཱི ཀམྨསཱདྷནོ ‘‘ཨཱདིཡཏཱིཏྱཱདཱི’’ཏི. ཨིཏརོ ཨཔཱདཱནསཱདྷནོ ‘‘ཨཱདིཡཏི ཨེཏསྨཱཏྱཱདཱི’’ཏི ¶ . ཏཏྠ ཡོ ཨཝཡཝཝཙནོ, ཏསྶེདཾ གཧཎཾ, ཏསྨཱ ཨུཔསམྤནྣཀྑཎམྤི ཨནྟོ ཀཏྭཱ ཨཱདིབྷཱུཏཱ ཨུཔསམྤནྣཀྑཎཏོཡེཝ པཊྛཱཡཱཏི ཨེཝམེཏྠ ཨཏྠོ དཊྛབྦོ. ཨེཝ-སདྡོ པནེཏྠ སབྦཝཱཀྱཱནཾ ཨཝདྷཱརཎཕལཏྟཱ ལབྦྷཏི. ཏོ-པཙྩཡོ ཨཝདྷིམྷིཡེཝ ¶ , ན ཨཱདྷཱརེ. ཏཏྠ ཧི ཏོཔཙྩཡེ ཨཱདྷཱརེ ཝཏྟམཱནེ ཨཱདིམྷིཡེཝ མཛ྄ཛྷཨནྟཱནཾ ཨཝཡཝབྷཱུཏེ ཨུཔསམྤནྣཀྑཎེཡེཝཱཏི ཨཏྠོ བྷཝེཡྻ, ཏཐཱ སཏི ཨཝདྷཱརཎནིཙྪཡོ ནིཡམོཏི ཨཏྠནྟརཏྟཱ ཨཱདིཀྑཎནིཡམེན མཛ྄ཛྷཱདཡོ ནིཝཏྟིཡེཡྻུཾ. ཨཔཱདཱནཝཙནསྶཱཔི གཧཎེ ཨཝདྷིབྷཱུཏོ ཨུཔསམྤནྣཀྑཎོ ནིཝཏྟིཡེཡྻ ‘‘པབྦཏཱདཱིནི ཁེཏྟཱནཱི’’ཏི ཨེཏྠ ཨཱདིབྷཱུཏཔབྦཏཔརིཙྩཱགེན ཁེཏྟགྒཧཎཾ ཝིཡཱཏི དཊྛབྦཾ. ཊཱིཀཱཡཾ པན ཨཱདྷཱརཏྠོཔི ཝུཏྟོ, སོ ཡཐཱཝུཏྟདོསཾ ནཱཏིགཙྪཏི. སབྦཏྠ ‘‘ཊཱིཀཱཡ’’ནྟི ཙ ཝུཏྟེ ཨེཏྠེཝ པུརཱཎཊཱིཀཱཡནྟི གཧེཏབྦཾ. ཨཱདིཏོཏི ཨིམིནཱ ཨིདཾ དཱིཔེཏི – ཨཏིདུལླབྷཾ ཁཎསམཝཱཡཾ ལབྷིཏྭཱ ཨཱལསིཡདོསེན ཨཔྤཊིཔཛྫནྟེཧི ཙ ཨཉྙཱཎདོསེན ཨཉྙཐཱ པཊིཔཛྫནྟེཧི ཙ ཨཧུཏྭཱ ཨཱདིཏོ པཊྛཱཡ ནིརནྟརམེཝ ཏཱིསུ སིཀྑཱསུ སམྨཱཔཊིཔཛྫནཝསེན ཨཱདརོ ཛནེཏབྦོཏི.

ཨུཔསམྤནྣེན ཨུཔསམྤནྣཱཡ ཙ སིཀྑིཏབྦཾ ཨཱསེཝིཏབྦནྟི ཨུཔསམྤནྣསིཀྑིཏབྦཾ, ཨེཀསེསནཡེན ཨུཔསམྤནྣཏཱསཱམཉྙེན ཝཱ ཨུཔསམྤནྣཱཡཔི ཨེཏྠེཝཱཝིརོདྷོཏི ཨུཔསམྤནྣེན སིཀྑིཏབྦནྟི སམཱསོ. ནནུ ཨདྷིསཱིལཱདཡོཝ སིཀྑིཏབྦཱ, ཨེཝཾ སཏི ཀཐཾ པཀརཎཾ སིཀྑིཏབྦཏྟེན ཝུཏྟནྟི? ནཱཡཾ དོསོ, སིཀྑཱཡ སིཀྑིཏབྦཏྟེ སཏི ཏདྡཱིཔཀགནྠསྶཱཔི ཨཱསེཝིཏབྦཏཱ ཨཱཔཛྫཏཱིཏི. སུཁགྒཧཎཏྠཾ ཝཏྟབྦཝིནིཙྪཡཾ སཀལམྤི སངྒཧེཏྭཱ མཱཏིཀཱཡ ཋཔནཏོ སཧ མཱཏིཀཱཡཱཏི སམཱཏིཀཾ. ཏགྒུཎསཾཝིཉྙཱཎོཡཾ བཧུབྦཱིཧི ཏསྶ ཁུདྡསིཀྑཱསངྑཱཏསྶ ¶ ཨཉྙཔདཏྠསྶ ཡོ གུཎོ མཱཏིཀཱསངྑཱཏཾ ཝིསེསནཾ, ཏསྶ ཨིདྷ ཝིཉྙཱཡམཱནཏྟཱ. སུཁེནེཝ ཧི གཧཎཾ སིཡཱ མཱཏིཀཱནུསཱརེན ཏཾ ཏཾ ཝིནིཙྪཡཾ ཨོལོཀེནྟཱནཾ སཾསཡཱཔགམཏོ.

(ཁ-ཛ) ཨིདཱནི ¶ ‘‘སམཱཏིཀ’’ནྟི ཝུཏྟཏྟཱ མཱཏིཀཱཔདཱནི ཏཱཝ ཨུདྡིསིཏུཾ ‘‘པཱརཱཛིཀཱ ཙ ཙཏྟཱརོ’’ཏིཨཱདི ཨཱརདྡྷཾ. ཨེཏྠཱཧ – ཏཱིསུ སིཀྑཱསུ ཨདྷིསཱིལསིཀྑཱཝ ཀསྨཱ པཋམཾ ཝུཏྟཱཏི? སབྦསིཀྑཱནཾ མཱུལབྷཱུཏཏྟཱ. ‘‘སཱིལེ པཏིཊྛཱཡ ནརོ སཔཉྙོ, ཙིཏྟཾ པཉྙཉྩ བྷཱཝཡ’’ནྟི (སཾ. ནི. ༡.༢༣; པེཊཀོ. ༢༢; མི. པ. ༢.༡.༩) ཧི ཝུཏྟཾ. ཏཏྲཱཔི མཧཱསཱཝཛྫཏྟཱ མཱུལཙྪེཛྫཝསེན པཝཏྟནཏོ སབྦཔཋམཾ ཛཱནིཏབྦཱཏི པཱརཱཛིཀཱཝ པཋམཾ ཝུཏྟཱཏི ཝེདིཏབྦཾ. མཱཏིཀཱཔདཱནཾ པན ཨཏྠོ ཏསྶ ཏསྶ མཱཏིཀཱཔདསྶ ནིདྡེསཝསེནེཝ ཝིཉྙཱཡཏཱིཏི ན ཨིདྷ ཝིསུཾ དསྶཡིསྶཱམ. ཨཝིཉྙཱཡམཱནཾ པན ཏཏྠ ཏཏྠེཝ པཀཱསཡིསྶཱམ.

ཨིདཱནི ཨུདྡིཊྛཔདཱནུཀྐམེན ནིདྡེསཾ ཨཱརབྷནྟོ ‘‘པཱརཱཛིཀཱ ཙ ཙཏྟཱརོ’’ཏི པཋམཾ མཱཏིཀཱཔདཾ ཨུདྡྷརི. ཨེཝམུཔརིཔི. ཨིདཱནི པཱརཱཛིཀཱཡོ ཨུདྡིསིཏྭཱ ཨུདྡིཊྛཔདཱནུཀྐམེན ནིདྡེསཾ ཨཱརབྷནྟོ ‘‘གརུཀཱ ནཝཱ’’ཏི དུཏིཡཾ པདཾ ཨུདྡྷརཱིཏིཨཱདིནཱ ཡཐཱཡོགཾ ཝཏྟབྦཾ. ཏཏྠ སིཀྑཱཔདཾ ཨཏིཀྐམིཏྭཱ ཨཱཔཏྟིཾ ཨཱཔནྣཱ པུགྒལཱ ཏཱཡ པརཱཛཡནྟཱིཏི པརཱཛིཡཱ. ཏེཡེཝ པཱརཱཛིཀཱ ཨུཔསགྒསྶ ཝུདྡྷིཾ ཀཏྭཱ ཡ-ཀཱརསྶ ཀ-ཀཱརཀརཎེན. ཏེ པན གཎནཔརིཙྪེདཝསེན ཙཏྟཱརོཏི ཨཏྠོ.

༡-༢. ཨིདཱནི ཏེ དསྶེཏུཾ ‘‘མགྒཏྟཡེ’’ཏིཨཱདི ཨཱརདྡྷཾ. ཨེཝམུཔརིཔི ཡཐཱཡོགཾ ཡོཛེཏབྦཾ. ཏཏྠ མགྒཏྟཡེཏི ཨེཏྠ ¶ མགྒཱ ཙ ནཱམ ཏིཾས མགྒཱ. མནུསྶཱམནུསྶཏིརཙྪཱནགཏཝསེན ཧི ཏིསྶོ ཨིཏྠིཡོ. ཏཏྠ ཏིརཙྪཱནགཏཱཡ ཨཡཾ པརིཙྪེདོ –

‘‘ཨཔདཱནཾ ཨཧཱི མཙྪཱ, དྭིཔདཱནཉྩ ཀུཀྐུཊཱི;

ཙཏུཔྤདཱནཾ མཛྫཱརཱི, ཝཏྠུ པཱརཱཛིཀསྶིམཱ’’ཏི. (པཱརཱ. ཨཊྛ. ༡.༥༥);

ཏཱསཾ ཝཙྩཔསྶཱཝམུཁམགྒཝསེན ཏཡོ ཏཡོ ཀཏྭཱ ནཝ མགྒཱ, ཏཐཱ ཨུབྷཏོབྱཉྫནཀཱནཾ, པུརིསཱནཾ པན ཝཙྩམུཁམགྒཝསེན དྭེ དྭེ ཀཏྭཱ ཚ, ཏཐཱ པཎྜཀཱནནྟི ཏིཾས. ཏེསཾ ཏཡེ. ཀཱིདིསེཏི ཨཱཧ ‘‘སནྠཏསནྠཏེ’’ཏི. སནྠཏེ ཨསནྠཏེཏི པདཙྪེདོ. ན སནྠཏཾ ཨསནྠཏཾ. ཏསྨིཾ ཨསནྠཏེ. ན-ཀཱརོ ཨེཏྠ ‘‘ཨབྲཱཧྨཎོ’’ཏིཨཱདཱིསུ ཝིཡ པཡིརུདཱསེ, ཏཾ ཀིརིཡཱཡུཏྟསྶ ཏཱདིསསྶ ཨཉྙསྶ ཝཏྠུནོ ཝིདྷཱནེན སནྠཏསྶ ཝཏྠུནོ པཡིརུདཱསནཾ པརིཙྩཛནཾ པཡིརུདཱསོཏི. ན པསཛྫཔྤཊིསེདྷེ, སནྠཏཾ པསཛྫ པཏྭཱ ཏསྶ ‘‘བྲཱཧྨཎོ ན བྷཝིསྶཏཱི’’ཏིཨཱདཱིསུ ཝིཡ ན ནིསེདྷོཏི. ཝཱ-སདྡོ པནེཏྠ ཝཙནཡུཏྟིབལེནེཝ ལབྦྷཏི, ཏསྶ པལིཝེཋེཏྭཱ, ཨནྟོ ཝཱ པཝེསེཏྭཱ ཝཏྠཱདིནཱ ཀེནཙི པཊིཙྪནྣེ ཝཱ ཨཔྤཊིཙྪནྣེ ཝཱཏི ཨཏྠོ. ཏཐཱབྷཱུཏེ ཨལློཀཱསེ པཀཏིཝཱཏེན ཨསམྥུཊྛེ ཏིནྟཔྤདེསེ. ནིམིཏྟནྟི ཨངྒཛཱཏཾ. སནྟིཨཱདི ཏབྦིསེསནཾ. སནྟི ཨཏྟནིཡཾ. སཾ-སདྡོ ཧི ཨཏྟནི ཨཏྟནིཡེ ཙ ཝཏྟཏི. སནྠཏཾ ཨསནྠཏནྟི ཡཐཱཝུཏྟནཡེན པཊིཙྪནྣཾ ཝཱ ཨཔྤཊིཙྪནྣཾ ཝཱ. ཨུཔཱདིཎྞནྟི ཨནཊྛཀཱཡཔྤསཱདཾ. ཀིཏྟཀནྟི ཨཱཧ ‘‘ཏིལམཏྟམྤཱི’’ཏི. ཏིལསྶ མཏྟཾ སཱཀལླཾ ཡསྶ ཏཾ ཏིལམཏྟཾ ¶ . ‘‘མཏྟཾ སཱཀལླཾ ནིཙྪཡེ’’ཏི ཧི ནིགྷཎྜུ. ཨེཏྠཱཔི ཨཝཡཝེན ཝིགྒཧོ སམུདཱཡོ སམཱསཏྠོ, ཏིལབཱིཛཔྤམཱཎམྤཱིཏི ཝུཏྟཾ ཧོཏི. ཀིཾ ཏཾ? ནིམིཏྟཾ, པཝེསནཾ ཝཱ. ཨཔི-སདྡོ སམྦྷཱཝནེ, ‘‘ཏིལབཱིཛམཏྟམྤཱི’’ཏི སམྦྷཱཝཱིཡཏི, ཨདྷིཀེ ཀཱ ¶ ནཱམ ཀཐཱཏི ཨིདམེཏྠ སམྦྷཱཝནཾ, ཨེཝཾབྷཱུཏཾ སཾ ཨངྒཛཱཏཾ ཡཐཱཝུཏྟེ མགྒཏྟཡེ ཏིལམཏྟམྤི པཝེསནྟོ བྷིཀྑུ ཙུཏོ པརིབྷཊྛོ, པཱརཱཛིཀོ ནཱམ ཧོཏི སཱསནཏོཏི ཝིཉྙཱཡཏི གམྨམཱནཏྠསྶ སདྡསྶ པཡོགཾ པཏི ཀཱམཱཙཱརཏྟཱ. ཀཱིདིསོཏི ཨཱཧ ‘‘ཨནིཀྑིཏྟསིཀྑོ’’ཏི. ནིཀྑིཏྟསིཀྑོ པན ཨབྷིཀྑུཀཏྟཱ པརིཙྩཏྟོ. ཏཏྠ ནིཀྑིཏྟཱ ཨོཧིཏཱ པརིཙྩཏྟཱ པཙྩཀྑཱཏཱ སིཀྑཱ ཨེཏེནཱཏི ཝིགྒཧོ. ཡཐཱལཀྑཎཾ ན ནིཀྑིཏྟསིཀྑོ ཨནིཀྑིཏྟསིཀྑོ. ཏཏྠ ཙིཏྟཁེཏྟཀཱལཔྤཡོགཔུགྒལཝིཛཱནནཝསེན སིཀྑཱཔཙྩཀྑཱནཾ ཉཏྭཱ ཏདབྷཱཝེན ཨཔཙྩཀྑཱནཾ ཝེདིཏབྦཾ.

ཏཏྠ ཨུཔསམྤནྣབྷཱཝཏོ ཙཝིཏུཀཱམཏཱཙིཏྟཾ ཙིཏྟཾ ནཱམ. ‘‘བུདྡྷཾ པཙྩཀྑཱམཱི’’ཏིཨཱདཱིནི ‘‘གིཧཱིཏི མཾ དྷཱརེཧི, ཨུཔཱསཀོ, ཨཱརཱམིཀོ, སཱམཎེརོཏི མཾ དྷཱརེཧཱི’’ཏི ‘‘ཨལཾ མེ བུདྡྷེནཱ’’ཏིཨཱདཱིནི ཚ ཁེཏྟཔདཱནི ཁེཏྟཾ ནཱམ. ‘‘པཙྩཀྑཱམཱི’’ཏིཨཱདིནཱ ཝུཏྟོ ཝཏྟམཱནཀཱལོཡེཝ ཀཱལོ ནཱམ. ཡཱཡ ཀཱཡཙི བྷཱསཱཡ ཝསེན ཝཱཙསིཀཔྤཡོགོཝ པཡོགོ ནཱམ. ཨནུམྨཏྟཱདིཀོ པཙྩཀྑཱཏོ ཙ མནུསྶཛཱཏིཀོ སོཝ པུགྒལོ ནཱམ. པཙྩཀྑཱཏཀསྶ ཝཙནསམནནྟརམེཝ ‘‘ཨཡཾ ཨུཀྐཎྛིཏོ’’ཏི ཝཱ ‘‘གིཧིབྷཱཝཾ པཏྠཡཏཱི’’ཏི ཝཱ སོཏུནོ ཛཱནནཾ ཝིཛཱནནཾ ནཱམཱཏི ཝེདིཏབྦཾ.

ཏཏྠ ནཊྛཀཱཡཔྤསཱདཾ པན པིལ༹ཀཾ ཝཱ ཙམྨཁིལཾ ཝཱ ལོམཾ ཝཱ པཝེསནྟསྶ དུཀྐཊཾ. ཨཀྑིནཱསཀཎྞཙྪིདྡཝཏྠིཀོསེསུ, སཏྠཀཱདཱིཧི ཀཏཝཎེ ཝཱ མེཐུནརཱགེན ནིམིཏྟཾ པཝེསནྟསྶ ཐུལླཙྩཡཾ. ཨཝསེསསརཱིརེསུ ཨུཔཀཙྪཀཱདཱིསུ དུཀྐཊཾ. ཏིརཙྪཱནགཏཱནཾ ཧཏྠིཨསྶགོགདྲབྷཨོཊྛམཧིཾསཱདཱིནཾ ནཱསཱཡ ཐུལླཙྩཡཾ, ཝཏྠིཀོསེ ཐུལླཙྩཡམེཝ. སབྦེསམྤི ཏིརཙྪཱནགཏཱནཾ ཨཀྑིཀཎྞཝཎེསུ དུཀྐཊཾ. ཏཐཱ ཨཝསེསསརཱིརེ ¶ ཀཱཡསཾསགྒརཱགེན, མེཐུནརཱགེན ཝཱ ཛཱིཝམཱནཀཔུརིསསྶ ཝཏྠིཀོསཾ ཨཔྤཝེསནྟོ ནིམིཏྟེན ནིམིཏྟཾ ཚུཔཏི, དུཀྐཊཾ. བཧི ནིཀྑནྟདནྟེསུ ཝཱཡམནྟསྶ པན ཐུལླཙྩཡནྟི ཨཡམེཏྠ སཝིནིཙྪཡོ ཨཏྠཝཎྞནཀྐམོ.

ཨིདཱནི པཝེསནཾ ནཱམ ན ཀེཝལཾ ཨཏྟུཔཀྐམེནེཝ, པརཱུཔཀྐམེནཱཔི ཧོཏི, ཏཏྲཱཔི སཱདིཡནྟོཝ ¶ ཙུཏོ ཧོཏཱིཏི དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. ཏཏྠ ཨཐ ཝཱཏི ཨཡཾ ནིཔཱཏོ, ནིཔཱཏསམུདཱཡོ ཝཱ པཀྑནྟརཱརམྦྷེ. པཝེསནཉྩ ཋིཏཉྩ ཨུདྡྷཱརོ ཙ པཝིཊྛཉྩ པཝེསན…པེ… པཝིཊྛཱནི, ཨིཏརཱིཏརཡོགདྭནྡོ. ཨིཏརཱིཏརཡོགོ ནཱམ ཨཉྙམཉྙཏྠོཔཱདཱནཏཱཏི པཝེསནཱདཱིནི ཋིཏཱདིཨཏྠཱནིཔི ཧོནྟཱིཏི པཝིཊྛ-སདྡོཔི པཝེསནཱདིཨཏྠོ ཧོཏི, ཏཏོཡེཝེཏྠ ཏསྨཱ བཧུཝཙནསམྦྷཝོ. ཨཉྙཐཱ དྭནྡེ ཨཝཡཝཏྠཔདྷཱནཏྟཱ ཨེཀཏྠཝཱཙཀཱཔི པཝིཊྛ-སདྡཱ ཀཐཾ བཧུཝཙནཔྤསངྒོ. སམཱཧཱརེ ཝཱ དྭནྡོ. ཁཎོཏི ཀཱལཝིསེསོ. སོ ཙ ཡོགཝནྟཱནཾ ཁཎནྟརཝིནིམུཏྟོ ནཏྠཱིཏི པཝེསན…པེ…པཝིཊྛཱནིཡེཝ ཁཎོཏི ཀམྨདྷཱརཡོ, ཨབྷེདེ བྷེདཔརིཀཔྤནཱཡ ཝཱ པཝེསན…པེ… པཝིཊྛཱནཾ ཁཎོཏི ཚཊྛཱིཏཔྤུརིསོ. ཏསྶ སཱདཀོ, ཏསྨིཾ ཝཱ སཱདཀོ པཝེསན…པེ… སཱདཀོ. ཁཎ-སདྡོ པནེཏྠ པཙྩེཀཾ ཡོཛེཏབྦོ དྭནྡསམཱསཏྟཱ, པཝེསནཀཱལཾ ཋིཏཀཱལཾ ཨུདྡྷཱརཀཱལཾ པཝིཊྛཀཱལཾ, ཏསྨིཾ ཝཱ སཱདིཡནྟོཏི ཨེཝམེཏྠ ཨཏྠོ དཊྛབྦོ. ཨེཝཾ སེཝནཙིཏྟཔཙྩུཔཊྛཱནེན སཱདཀོ བྷིཀྑུ ཙུཏོཏི ཡོཛེཏབྦཾ. ཏཏྠ ཡཐཱཝུཏྟཔྤདེསསྶ ཨནྟོཀརཎཾ པཝེསནཾ ནཱམ. ཡཱཝ ཨུདྡྷརཎཱརམྦྷཱ ནིཝཏྟཾ ཋིཏཾ ནཱམ. ཨཊྛཀཐཱཡཾ (པཱརཱ. ཨཊྛ. ༡.༥༨) པན མཱཏུགཱམསྶ སུཀྐཝིསྶཊྛིཾ པཏྭཱ སབྦཐཱ ཝཱཡམཏོ ཨོརམིཏྭཱ ཋིཏཀཱལཾ སནྡྷཱཡ ‘‘སུཀྐཝིསྶཊྛིསམཡེ’’ཏི ¶ ཝུཏྟཾ. ཡཱཝ ཨགྒཱ ནཱིཧརཎཾ ཨུདྡྷཱརོ ནཱམ. ཡཱཝ པཝེསནཱརཧཊྛཱནཱ ཨནྟོཀཏཾ པཝིཊྛཾ ནཱམ.

༣-༤. ཨིདཱནི དུཏིཡཾ དསྶེཏུཾ ‘‘ཨཱདིཡེཡྻཱ’’ཏིཨཱདིམཱཧ. ཏཏྠ ཨདིནྣཾ ཐེཡྻཙིཏྟེན ཨཱདིཡེཡྻ…པེ… སངྐེཏཾ ཝཱིཏིནཱམཡེ, པཱརཱཛིཀོ བྷཝེཏི སམྦནྡྷོ. ཨདིནྣནྟི མནུསྶསཱམིཀེཧི ཀཱཡཝཱཙཱཧི ན དིནྣཾ. ཐེཡྻཙིཏྟེནཱཏི ཐེནོཏི ཙོརོ, ཏསྶ བྷཱཝོ ཐེཡྻཾ ན-ཀཱརསྶ ཡ-ཀཱརཾ ཀཏྭཱ དྭིཏྟེན. བྷཝནྟི ཨེཏསྨཱ ཨབྷིདྷཱནབུདྡྷཱིཏི བྷཱཝོ, སདྡཔྤཝཏྟིནིམིཏྟཾ ཛཱཏིགུཎཱདི. ཨིདྷ པན ཨཝཧརཎཙིཏྟསངྑཱཏཾ དབྦཾ ཐེཡྻཾ. ཐེཡྻཉྩ ཏཾ ཙིཏྟཉྩཱཏི ཐེཡྻཙིཏྟཾ, ཏེན. ཨཱདིཡེཡྻཱཏི ཨཱརཱམཱདིཾ ཨབྷིཡུཉྫིཏྭཱ གཎྷེཡྻ. ཧརེཡྻཱཏི ཧརནྟོ གཎྷེཡྻ. ཨཝཧརེཡྻཱཏི ཨུཔནིཀྑིཏྟཾ བྷཎྜཾ ‘‘དེཧི མེ བྷཎྜ’’ནྟི ཝུཙྩམཱནོ ‘‘ན མཡཱ གཧིཏ’’ནྟིཨཱདཱིནི ཝདནྟོ གཎྷེཡྻ. ཨིརིཡཱཔཐཾ ཀོཔེཡྻཱཏི བྷཎྜཧཱརཀསྶ གམནཱདིཨིརིཡཱཔཐཾ ཝིཙྪིནྡིཏྭཱ གཎྷེཡྻ. ཀོཔཾ ཀཏྭཱ གཎྷཱཏཱིཏི ཧི ཨེཏསྨིཾ ཨཏྠེ ‘‘ཀོཔཱི’’ཏི ¶ ནཱམདྷཱཏུ. ཋཱནཱ ཙཱཝེཡྻཱཏི ཋཔིཏཊྛཱནཏོ ཙཱཝེཡྻ. སངྐེཏཾ ཝཱིཏིནཱམཡེཏི པརིཀཔྤིཏཊྛཱནཾ ཝཱ སུངྐགྷཱཏཾ ཝཱ ཨཏིཀྐཱམེཡྻ.

ཨེཏྠ ཙ ཨཱརཱམཱདིཨབྷིཡུཉྫནེ, སཱམིཀསྶ ཝིམཏུཔྤཱདནདྷུརནིཀྑེཔེ, བྷཎྜཧཱརཀསྶ སཱིསབྷཱརཱམསནཕནྡཱཔནཁནྡྷོརོཔནེ, ཨུཔནིཀྑིཏྟེ ‘‘དེཧི མེ བྷཎྜ’’ནྟི ཙོདིཡམཱནསྶ ‘‘ནཱཧཾ གཎྷཱམཱི’’ཏི བྷཎནཝིམཏུཔྤཱདནདྷུརནིཀྑེཔེ, ཐལཊྛསྶ ཐེཡྻཙིཏྟེནཱམསནཕནྡཱཔནཋཱནཱཙཱཝནེ ཙཱཏི ཙཏཱུསུ པཙྩེཀཾ ཡཐཱཀྐམཾ དུཀྐཊཐུལླཙྩཡཔཱརཱཛིཀཱཡོ ཝེདིཏབྦཱ. ‘‘སཧབྷཎྜཧཱརཀཾ ནེསྶཱམཱི’’ཏི ¶ པཋམདུཏིཡཔཱདསངྐཱམནེ, པརིཀཔྤིཏསུངྐགྷཱཏཊྛཱནཏོ པཋམདུཏིཡཔཱདཱཏིཀྐཱམེ ཙཱཏི དྭཱིསུ པཙྩེཀཾ ཀམེན ཐུལླཙྩཡཔཱརཱཛིཀཱཡོ ཝེདིཏབྦཱ. ཨཡམེཏྠ སཝིཉྙཱཎཀཱཝིཉྙཱཎཀམིསྶཀཏྟཱ ནཱནཱབྷཎྜཝསེན ཡོཛནཱ. ཨེཀབྷཎྜཝསེན པན སསྶཱམིཀསྶ དཱསསྶ ཝཱ ཏིརཙྪཱནགཏསྶ ཝཱ ཡཐཱཝུཏྟེན ཨབྷིཡོགཱདིནཱ ནཡེན ཨཱདིཡནཧརཎཱདིཝསེན ཡོཛནཱ དཊྛབྦཱ.

ཨཔིཙ ཨིམཱནི ཚ པདཱནི ཝཎྞཡནྟེན ནཱནཱབྷཎྜཨེཀབྷཎྜསཱཧཏྠིཀཔུབྦཔྤཡོགཐེཡྻཱཝཧཱརསངྑཱཏེ པཉྩཔཉྩཀེ སམོདྷཱནེཏྭཱ པཉྩཝཱིསཏི ཨཝཧཱརཱ དསྶེཏབྦཱ ཚཔྤདནྟོགདྷཏྟཱ སབྦེསམྤི ཨཝཧཱརཱནཾ. ཏེ པན ཨཝཧཱརཱ ཡེན ཀེནཙི ཨབྷིཡོགཱདིཨཱཀཱརནཱནཏྟམཏྟེན བྷིནྣཱཏི ཏཾཝསེན པཉྩཔཉྩཀཾ ནཱམ ཛཱཏཾ. ཨེཝཾ སཾཝཎྞིཏཉྷི ཨིདཾ ཨདིནྣཱདཱནཔཱརཱཛིཀཾ སུཝཎྞིཏཾ ནཱམ ཧོཏཱིཏི དཊྛབྦཾ. ཏཏྠ པུརིམཱནི དྭེ པཉྩཀཱནི ‘‘ཨཱདིཡེཡྻཱ’’ཏིཨཱདཱིནཾ པཉྩནྣཾ པདཱནཾ ཝསེན ལབྦྷནྟི. ཡཾ པནེཏཾ ‘‘སངྐེཏཾ ཝཱིཏིནཱམཡེ’’ཏི ཚཊྛཾ པདཾ, ཏཾ ཏཏིཡཔཉྩམེསུ པཉྩཀེསུ ནིསྶགྒིཡཔརིཀཔྤཱཝཧཱརཝསེན ཡོཛེཏབྦཾ.

ཏཏྠ སཱཧཏྠིཀ-སདྡེན ཨུཔཙཱརཏོ ཏཾསཧཙརིཏཔཉྩཀཾ གཧེཏྭཱ ‘‘སཱཧཏྠིཀཉྩ ཏཾ པཉྩཀཉྩཱ’’ཏི ཝཱ ‘‘སཱཧཏྠིཀཱདི པཉྩཀ’’ནྟི མཛ྄ཛྷེཔདལོཔཝསེན ཝཱ སཱཧཏྠིཀཔཉྩཀཾ. ཨེཝམུཔརིཔི. ཏཾ པན སཱཧཏྠིཀོ ཨཱཎཏྟིཀོ ནིསྶགྒིཡོ ཨཏྠསཱདྷཀོ དྷུརནིཀྑེཔོ ཙཱཏི. ཏཏྠ སཀོ ཧཏྠོ སཧཏྠོ, སཧཏྠེན ནིབྦཏྟོ སཱཧཏྠིཀོ. ཨེཝཾ ཨཱཎཏྟིཀོ. སུངྐགྷཱཏཔརིཀཔྤིཏོཀཱསཱནཾ ཨནྟོ ཋཏྭཱ བཧི ནིསྶཛྫནཾ ནིསྶགྒོ, སོ ཨེཝ ནིསྶགྒིཡོ. ཀཱལཾ ཨནིཡམེཏྭཱ ཨཱཎཏྟསྶ བྷཎྜགྒཧཎཏོ ¶ ཙ པརསྶ ཏེལཀུམྦྷིཡཱ པཱདགྒྷནཀཾ ཏེལཾ ཨཝསྶཾ པིཝནཀཱནཾ ཨུཔཱཧནཱདཱིནཾ ནིཀྑིཏྟཱནཾ ཏེལཔཱཏནཏོ ཙ པུརེཏརམེཝ པཱརཱཛིཀསངྑཱཏཾ ཨཏྠཾ ¶ སཱདྷེཏཱིཏི ཨཏྠསཱདྷཀོ. སོ པན ཨཱཎཱཔནཔྤཡོགོ, ཨུཔཱཧནཱདཱིནཾ ནིཀྑེཔཔྤཡོགོ ཙ. ཨཱརཱམཱབྷིཡོགེ ཙ ཨུཔནིཀྑིཏྟབྷཎྜེ ཙ ཏཱཝཀཱལིཀབྷཎྜདེཡྻཱནམདཱནེ ཙ དྷུརསྶ ནིཀྑེཔོ དྷུརནིཀྑེཔོ.

པུབྦཔྤཡོགཔཉྩཀཾ ནཱམ པུབྦཔྤཡོགོ སཧཔྤཡོགོ སཾཝིདྷཱཝཧཱརོ སངྐེཏཀམྨཾ ནིམིཏྟཀམྨནྟི. ཏཏྠ ཨཱཎཱཔནཾ བྷཎྜགྒཧཎཏོ པུབྦཏྟཱ པུབྦཔྤཡོགོ ནཱམ. ཋཱནཱཙཱཝནཁིལསངྐཱམནཔྤཡོགེན སཧ ཝཏྟམཱནོ སཧཔྤཡོགོ. སཾཝིདྷཱཡ སམྨནྟཡིཏྭཱ གཏེསུ ཨེཀེནཱཔི བྷཎྜེ ཋཱནཱ ཙཱཝིཏེ སབྦེསཾ ཨཝཧཱརོ སཾཝིདྷཱཝཧཱརོ. སངྐེཏཀམྨནྟི པུབྦཎྷཱདིཀཱལཔརིཙྪེདཝསེན སཉྫཱནནཀརཎཾ. ནིམིཏྟཀམྨཾ ནཱམ སཉྙུཔྤཱདནཏྠཾ ཨཀྑིནིཁཎནཱདིཀརཎཾ.

ཐེཡྻཱཝཧཱརཔཉྩཀཾ པན སཡམེཝ དསྶེཏུཾ ‘‘ཨཐ ཝཱ’’ཏིཨཱདིམཱཧ. ནནུ ཙ ཚཔྤདནྟོགདྷཏྟཱ ‘‘སབྦེསམྤི ཨཝཧཱརཱན’’ནྟི ཝུཏྟཾ, ཨེཝཾ སཏི ‘‘ཨཐ ཝཱ’’ཏི པཀྑནྟརཝསེན ཝིསུཾ ཝིཡ ཨིདཾ པཉྩཀཾ ཀསྨཱ ཝུཏྟནྟི? ནནུ ཨཝོཙུམྷཱ ‘‘ཡེན ཀེནཙི ཨབྷིཡོགཱདིཨཱཀཱརནཱནཏྟམཏྟེན བྷིནྣཱ’’ཏི, ཨེཏཱདིསསྶ བྷེདསྶ སམྦྷཝཏོ པཀྑནྟརཝསེནཱཔི ཡུཛྫཏཱིཏི ཨེཝཾ ཝུཏྟཾ. ཨིམསྶ པཉྩཀསྶ ཝིསུཾ ཨུདྡྷརིཏྭཱ ཝཙནཾ པན པསིདྡྷིཝསེནཱཏི དཊྛབྦཾ, ཀུས-སདྡེན ཀུསསངྐཱམནམདྷིཔྤེཏཾ ཨབྷེདོཔཙཱརེན. ཐེཡྻཉྩ བལཉྩ ཀུསོ ཙ ཚནྣཉྩ པརིཀཔྤོ ཙ ཐེཡྻཱ…པེ… པརིཀཔྤཾ, དཱིགྷོ སནྡྷིཝསེན. ཏེན ཨཝཧཱརཀོ པཱརཱཛིཀོ བྷཝེཏི སམྦནྡྷོ. ཡོ པན པཊིཙྪནྣེན ཨཝཧཱརཀོ, སོ ཨཏྠཏོ ¶ པཊིཙྪནྣསྶ ཨཝཧཱརཀོ ཧོཏཱིཏི དྭནྡསམཱསནྟོགདྷཏྟེཔིཙསྶ ཝིརོདྷཱབྷཱཝོབྷཱཝསཱདྷནོ ཙཱཡཾ ཚནྣ-སདྡོ དཊྛབྦོ. ཏཏྠ སནྡྷིཙྪེདནཱདཱིནི ཀཏྭཱ ཝཱ ཏུལཱཀཱུཊམཱནཀཱུཊཀཧཱཔཎཀཱུཊཱདཱིཧི ཝཉྩེཏྭཱ ཝཱ གཎྷནྟོ ཐེཡྻཱཝཧཱརཀོ. བལཀྐཱརེན པརསནྟཀཾ གཎྷནྟོ བལཱཝཧཱརཀོ. ཀུསཾ སངྐཱམེཏྭཱ གཎྷནྟོ ཀུསཱཝཧཱརཀོ. ཏིཎཔཎྞཱདཱིཧི ཡཾ ཀིཉྩི པཊིཙྪཱདེཏྭཱ པཙྪཱ ཀསྶ པཊིཙྪནྣསྶ ཨཝཧཱརཀོ པཊིཙྪནྣཱཝཧཱརཀོ. སཱཊཀཱདིབྷཎྜཝསེན, གབྦྷདྭཱརཱདིཨོཀཱསཝསེན ཝཱ པརིཀཔྤེཏྭཱ གཎྷནྟོ པརིཀཔྤཱཝཧཱརཀོ. ཨེཏྠ པན པརིཀཔྤིཏབྷཎྜགྒཧཎེ པརིཀཔྤིཏཔརིཙྪེདཱཏིཀྐམེ ཙ པཱརཱཛིཀཾ ཝེདིཏབྦཾ.

ཨིདཱནི པནེཏྠ ཝིནིཙྪཡཾ དསྶེཏུཾ ‘‘བྷཎྜཀཱལགྒྷདེསེཧཱི’’ཏིཨཱདི ཝུཏྟཾ. ཨེཏྠ ཨདིནྣཱདཱནེ བྷཎྜཉྩ ཀཱལོ ཙ ཨགྒྷོ ཙ དེསོ ཙ ཏེཧི ཙ པརིབྷོགེན ཙ ཝིནིཙྪཡོ ཀཱཏབྦོཏི ཨཏྠོ ¶ . ཏཏྠ ཨཝཧཊབྷཎྜསྶ སསྶཱམིཀསྶཱམིཀབྷཱཝཾ སསྶཱམིཀེཔི སཱམིཀཱནཾ སཱལཡནིརཱལཡབྷཱཝཉྩ ཨུཔཔརིཀྑིཏྭཱ སཱལཡཀཱལེ ཙེ ཨཝཧཊཾ, བྷཎྜཾ ཨགྒྷཱཔེཏྭཱ ཀཱཏབྦོ ཝིནིཙྪཡོ བྷཎྜེན ཝིནིཙྪཡོ. ནིརཱལཡཀཱལེ ཙེ ཨཝཧཊཾ, པཱརཱཛིཀཾ ནཏྠི, སཱམིཀེསུ པུན ཨཱཧརཱཔེནྟེསུ དཱཏབྦཾ. ཏདེཝ ཧི བྷཎྜཾ ཀདཱཙི མཧགྒྷཾ, ཀདཱཙི ཨཔྤགྒྷཾ, ཏསྨཱ ཡསྨིཾ ཀཱལེ བྷཎྜཾ ཨཝཧཊཾ, ཏསྨིཾཡེཝ ཀཱལེ ཡོ ཏསྶ ཨགྒྷོ, ཏེན ཀཱཏབྦོ ཝིནིཙྪཡོ ཀཱལེན ཝིནིཙྪཡོ. ནཝབྷཎྜསྶ ཡོ ཨགྒྷོ, སོ པཙྪཱ པརིཧཱཡཏི, ཏསྨཱ སབྦདཱ པཀཏིཨགྒྷཝསེན ཨཀཏྭཱ ཀཱཏབྦོ ཝིནིཙྪཡོ ཨགྒྷེན ཝིནིཙྪཡོ. བྷཎྜུཊྛཱནདེསེ བྷཎྜཾ ཨཔྤགྒྷཾ ཧོཏི, ཨཉྙཏྠ མཧགྒྷཾ, ཏསྨཱ ཡསྨིཾ དེསེ བྷཎྜཾ ཨཝཧཊཾ, ཏསྨིཾཡེཝ དེསེ ཨགྒྷེན ཀཱཏབྦོ ཝིནིཙྪཡོ དེསེན ཝིནིཙྪཡོ. པརིབྷོགེན ¶ སཱཊཀཱདིནོ བྷཎྜསྶ ཨགྒྷོ པརིཧཱཡཏི, ཏསྨཱ ཏསྶ པརིབྷོགཝསེན པརིཧཱིནཱཔརིཧཱིནབྷཱཝཾ ཨུཔཔརིཀྑིཏྭཱ ཀཱཏབྦོ ཝིནིཙྪཡོ པརིབྷོགེན ཝིནིཙྪཡོ.

༥-༧. ཨིདཱནི ཏཏིཡཾ དསྶེཏུཾ ‘‘མནུསྶཝིགྒཧ’’ནྟིཨཱདི ཨཱརདྡྷཾ. ཏཏྠ མནུསྶཝིགྒཧཾ ཀལལཏོ པཊྛཱཡ ཛཱིཝམཱནཀམནུསྶཛཱཏིཀཱནཾ སརཱིརཾ. ཙིཙྩ པཱཎོཏི སཉྙཱཡ སདྡྷིཾཡེཝ ‘‘ཝདྷཱམི ན’’ནྟི ཝདྷཀཙེཏནཱཡ ཙེཏེཏྭཱ པཀཔྤེཏྭཱ. ཛཱིཝིཏཱ ཝཱ ཝིཡོཛཡེཏི ཡོ བྷིཀྑུ ཛཱཏིཨུཎྞཾསུནཱ སམུདྡྷཊཏེལབིནྡུམཏྟཾ ཀལལརཱུཔཀཱལེ ཏཱཔནཱདཱིཧི ཝཱ ཏཏོ ཝཱ ཨུདྡྷམཔི ཏདནུརཱུཔེན ཨུཔཀྐམེན རཱུཔཛཱིཝིཏིནྡྲིཡོཔཀྐམེ སཏི ཏདཱཡཏྟཝུཏྟིནོ ཨརཱུཔཛཱིཝིཏསྶཱཔི ཝོརོཔནསམྦྷཝཏོ ཨུབྷཡཛཱིཝིཏཱ ཝོརོཔེཡྻ. ཝཱ-སདྡོ ཝིཀཔྤེ. མརཎཙེཏནོཏི མརཎེ ཙེཏནཱ ཡསྶ སོ མརཎཱདྷིཔྤཱཡོ. སཏྠཧཱརཀནྟི ཛཱིཝིཏཾ ཧརཏཱིཏི ཧཱརཀཾ, སཏྠཉྩ ཏཾ ཧཱརཀཉྩཱཏི སཏྠཧཱརཀཾ, ཏཾ. ཨསྶ མནུསྶཝིགྒཧསྶ. ཨུཔནིཀྑིཔེཏི སམཱིཔེ ནིཀྑིཔེཡྻ ཝཱ. ཨེཏེན ཐཱཝརཔྤཡོགཾ དསྶེཏི. གཱཧེཡྻ མརཎཱུཔཱཡནྟི ‘‘སཏྠཾ ཝཱ ཨཱཧར, ཝིསཾ ཝཱ ཁཱདཱ’’ཏིཨཱདིནཱ ནཡེན མརཎཏྠཱཡ ཨུཔཱཡཾ གཱཧཱཔེཡྻ ཝཱ. ཨེཏེན ཨཱཎཏྟིཔྤཡོགོ དསྶིཏོ. ཝདེཡྻ མརཎེ གུཎནྟི ཀཱཡཝཱཙཱདཱུཏལེཁཱཧི ‘‘ཡོ ཨེཝཾ མརཏི, སོ དྷནཾ ཝཱ ལབྷཏཱི’’ཏིཨཱདིནཱ ནཡེན མརཎེ གུཎཾ པཀཱསེཡྻ ཝཱ. ཨུབྷཡཏྠ ཨདྷིཀཱརཝསེན ཝཱ-སདྡོ ཨཱཧརིཏབྦོ. སོ བྷིཀྑུ ཙུཏོཏི སམྦནྡྷོ, སཱསནཏོཏི ཝིཉྙཱཡཏི.

ཨིདཱནི པནསྶ ཚབྦིདྷེ པཡོགེདསྶེཏུཾ ‘‘པཡོགཱ’’ཏིཨཱདིམཱཧ. ཏཏྠ སཱཧཏྠི…པེ… ཨིདྡྷིཝིཛྫཱམཡཱ ¶ པཡོགཱཏི ཨིམེ ¶ ཚ པཡོགཱཏི སམྦནྡྷོ. ཀ-ཀཱརལོཔེན པནེཏྠ ‘‘སཱཧཏྠཱི’’ཏི ཝུཏྟཾ. ཨཐ ཝཱ ཨནེཀཏྠེ ཨནེཀཏདྡྷིཏསམྦྷཝེན སཧཏྠསྶཱཡཾ པཡོགོ སཱཧཏྠཱིཏི པདསིདྡྷི ཝེདིཏབྦཱ. སཱཧཏྠི ཙ ནིསྶགྒོ ཙ ཨཱཎཏྟི ཙ ཐཱཝརོ ཙཱཏི དྭནྡོ. ཨིདྡྷི ཙ ཝིཛྫཱ ཙ, ཏཱསམིམེཏི ཨིདྡྷིཝིཛྫཱམཡཱ, ཨིདྡྷིམཡོ ཝིཛྫཱམཡོཏི ཝུཏྟཾ ཧོཏི. པཡོགཱཏི ཨིམེ ཚཔྤཡོགཱ ནཱམ ཧོནྟཱིཏི ཨཏྠོ. ཏཏྠ སཡཾ མཱརེནྟསྶ ཀཱཡེན ཝཱ ཀཱཡཔྤཊིབདྡྷེན ཝཱ པཧརཎཾ སཱཧཏྠིཀོ པཡོགོ. དཱུརེ ཋིཏཾ མཱརེཏུཀཱམསྶ ཀཱཡཱདཱིཧི ཨུསུསཏྟིཨཱདཱིནཾ ནིསྶཛྫནཾ ནིསྶགྒོ. ‘‘ཨསུཀཾ ནཱམ མཱརེཧཱི’’ཏིཨཱདིནཱ ཨཱཎཱཔེནྟསྶ ཨཱཎཱཔནཾ ཨཱཎཏྟི, ཨོཔཱཏཁཎནཾ ཨཔསྶེནསཾཝིདྷཱནཾ ཨསིཨཱདཱིནཾ ཨུཔནིཀྑིཔནཱདི ཐཱཝརོ. མཱརཎཏྠཾ ཀམྨཝིཔཱཀཛཱཡ ཨིདྡྷིཡཱ པཡོཛནཾ ཨིདྡྷིམཡོ. ཀམྨཝིཔཱཀཛིདྡྷི ཙ ནཱམེསཱ རཱཛཱདཱིནཾ རཱཛིདྡྷིཨཱདཡོ. ཏཏྠ པིཏུརཉྙོ སཱིཧལི༹ནྡསྶ དཱཋཱཀོཊནེན ཙཱུལ༹སུམནཀུཊུམྦིཡམཱརཎེ རཱཛིདྡྷི དཊྛབྦཱ, ཏདཏྠམེཝ ཨཐབྦཎཱདིཝིཛྫཱཡ པརིཛཔྤནཾ ཝིཛྫཱམཡོ པཡོགོ.

ཨེཝཾ ཚཔྤཡོགེ དསྶེཏྭཱ ཏེསུ ཨཱཎཏྟིཔྤཡོགསྶ ནིཡཱམཀེ དསྶེཏུཾ ‘‘ཀཱལཱ’’ཏིཨཱདི ཝུཏྟཾ. ཏཏྠ ཡཐཱཝུཏྟཾ ཨཱཎཏྟིཾ ནིཡམེནྟི སངྐེཏཝིསངྐེཏཏཱཝསེན པརིཙྪིནྡནྟཱིཏི ཨཱཎཏྟིནིཡཱམཀཱ. ཏེ པན ཀཱལོ ཙ ཝཏྠུ ཙ ཨཱཝུདྷཉྩ ཨིརིཡཱཔཐོ ཙཱཏི ཙཏྟཱརོ, ཏཐཱ ཀིརིཡཱཝིསེསོ ཨོཀཱསོཏི གཎནཔརིཙྪེདཝསེན ཚ ཧོནྟཱིཏི ཨཏྠོ. ཏཏྠ ཀཱལོ པུབྦཎྷཱདི ཡོབྦནཱདི ཙ. ཝཏྠུ མཱརེཏབྦོ སཏྟོ. ཨཱཝུདྷཾ ཨསིཨཱདི. ཨིརིཡཱཔཐོ མཱརེཏབྦསྶ གམནཱདི. ཀིརིཡཱཝིསེསོ ཝིཛ྄ཛྷནཱདི. ཨོཀཱསོ གཱམཱདི. ཡོ ཧི ‘‘ཨཛྫ, སྭེ’’ཏི ཨནིཡམེཏྭཱ ‘‘པུབྦཎྷེ མཱརེཧཱི’’ཏི ཝུཏྟོ ཡདཱ ཀདཱཙི པུབྦཎྷེ མཱརེཏི, ནཏྠི ཝིསངྐེཏོ. ཡོ པན ‘‘པུབྦཎྷེ’’ཏི ¶ ཝུཏྟོ མཛ྄ཛྷནྷཱདཱིསུ མཱརེཏི, ཝིསངྐེཏོ ཧོཏི, ཨཱཎཱཔཀསྶ ཨནཱཔཏྟི. ཨེཝཾ ཀཱལསྶ སངྐེཏཝིསངྐེཏཏཱཝསེན ནིཡཱམཀཏཱ ཝེདིཏབྦཱ. ཨིམིནཱཝ ནཡེན ཝཏྠུཨཱདཱིསུཔི ཝིནིཙྪཡོ ཝེདིཏབྦོཏི.

༨-༩. ཨིདཱནི ཙཏུཏྠཾ དསྶེཏུཾ ‘‘ཛྷཱནཱདིབྷེད’’ནྟིཨཱདིམཱཧ. ཏཏྠ ཨཏྟནི ནོསནྟཾ ཨཏྟུཔནཱཡིཀཉྩ པཙྩུཔྤནྣབྷཝསྶིཏཉྩ ཨཉྙཱཔདེསརཧིཏཉྩ ཛྷཱནཱདིབྷེདཾ ཀོཊྛཱསཾ ཀཏྭཱ ཝཱ ཨེཀེཀཾ ཀཏྭཱ ཝཱ ཀཱཡེན ཝཱ ཝཱཙཱཡ ཝཱ ཝིཉྙཏྟིཔཐེ དཱིཔེནྟོ ནཱདྷིམཱནིཀོ ཉཱཏེ ཙུཏོ བྷཝེཏི ¶ སམྦནྡྷོ. ཏཏྠ ཨཏྟནི སཀསནྟཱནེ ནོསནྟཾ ཨནུཔྤནྣཏྟཱཡེཝ ཨཝིཛྫམཱནཾ, ཨེཏྠ ནོསནྟོཏི ཨཏྠེ ཏཔྤུརིསོ. ཛྷཱནཱདིབྷེདནྟི ཛྷཱནཾ ཨཱདི ཡསྶ ‘‘ཝིམོཀྑསམཱདྷི སམཱཔཏྟི ཉཱཎདསྶན མགྒབྷཱཝནཱ ཕལསཙྪི ཀིརིཡཱཀིལེསཔྤཧཱནཝིནཱིཝརཎཏཱཙིཏྟསྶ སུཉྙཱགཱརེ ཨབྷིརཏཱི’’ཏི (པཱརཱ. ༡༩༨) ཝུཏྟསྶ སོ ཛྷཱནཱདི, སོཝ བྷེདོ ཝིསེསོཏི སམཱསོ. ཏཾ ཛྷཱནཱདིབྷེདཾ ཨུཏྟརིམནུསྶདྷམྨཾ. ཨཏྟུཔནཱཡིཀནྟི ‘‘ཨཡཾ མཡི ཨཏྠཱི’’ཏི ཨཱརོཙནཝསེན ཨཏྟནི ཨུཔནཱིཡཏི, ‘‘ཨཧཾ ཝཱ ཨེཏྠ སནྡིསྶཱམཱི’’ཏི ཨཏྟཱ ཨུཔནཱིཡཏི ཨེཏྠ དྷམྨེཏི ཝཱ ཨཏྟུཔནཱཡིཀོ, ཛྷཱནཱདིབྷེདོ, ཏཾ. པཙྩུཔྤནྣབྷཝསྶིཏནྟི པཙྩུཔྤནྣབྷཝོ ནཱམ ཨིདཱནི ཝཏྟམཱནོ ཨཏྟབྷཱཝོ, ཏནྣིསྶིཏོཏི སམཱསོ, སོ ཙ ཛྷཱནཱདིབྷེདོཡེཝ, ཏཾ.

ཨཉྙཱཔདེསརཧིཏནྟི ‘‘ཡོ ཏེ ཝིཧཱརེ ཝསི, སོ བྷིཀྑུ པཋམཾ ཛྷཱནཾ སམཱཔཛྫཱི’’ཏིཨཱདིནཱ (པཱརཱ. ༢༢༠) ནཡེན ཨཉྙསྶ ཨཔདེསོ, ཏེན རཧིཏོ ཙཏྟོཏི ཏཔྤུརིསསམཱསོ, སོ རཧིཏོ ཏེནཱཏི ཝཱ བཧུབྦཱིཧི, ཛྷཱནཱདིབྷེདོཝ ¶ , ཏཾ. ཀོཊྛཱསཾ ཀཏྭཱ ཝཱཏི ‘‘པཋམཾ ཛྷཱནཾ དུཏིཡཾ ཛྷཱནཾ སམཱཔཛྫིཾ, པཋམཾ ཛྷཱནཾ ཏཏིཡཾ ཛྷཱནཾ སམཱཔཛྫི’’ནྟིཨཱདིནཱ ནཡེན ཀོཊྛཱསཾ ཀཏྭཱ ཝཱ. ཨེཀེཀཾ ཀཏྭཱ ཝཱཏི ‘‘པཋམཾ ཛྷཱནཾ སམཱཔཛྫིཾ, དུཏིཡཾ ཛྷཱནཾ སམཱཔཛྫི’’ནྟིཨཱདིནཱ ནཡེན ཨེཀེཀཾ ཀཏྭཱ ཝཱ. ཨེཏྠ ཙ ཨེཀནྟི ཋིཏེ ཝིཙྪཱཡཾ དྭིཏྟཾ. ཨེཏྠ པན ཀཏྭཱཏི ཀརཎཀིརིཡཱཡ ཨེཀེཀཝསེན བྷིནྣསྶ ཛྷཱནཱདིནོ ཨཏྠསྶ སམྦནྡྷནིཙྪཱ ཝིཙྪཱཏི ཝེདིཏབྦཱ. ཊཱིཀཱཡཾ པན ‘‘ཀོཊྛཱསཾ ཝཱཏི ཨེཏྠ ‘ཛྷཱནལཱབྷཱི, ཝིམོཀྑལཱབྷཱི, སམཱདྷིལཱབྷཱི, སམཱཔཏྟིལཱབྷཱིམྷཱི’ཏི ཨེཝམཱདིནཱ ནཡེན ཀོཊྛཱསཏོ ཝཱཏི ཨཏྠོ’’ཏི ཙ ‘‘ཨེཀེཀཾ ཝཱཏི ‘པཋམསྶ ཛྷཱནསྶ ལཱབྷཱི, དུཏིཡསྶ ཛྷཱནསྶ ལཱབྷཱིམྷཱི’ཏི ཨེཝམཱདིནཱ ནཡེན ཨེཀེཀཾ ཝཱཏི ཨཏྠོ’’ཏི ཙ ཝུཏྟཾ. སོ པཱལི༹ཡཾ ཨཊྛཀཐཱཡཉྩ ཨཝུཏྟཀྐམོཏི ཝེདིཏབྦོ. ཀཱཡེན ཝཱཏི ཧཏྠམུདྡཱདིཝསེན ཀཱཡེན ཝཱ. ཝཱཙཱཏི ཨེཏྠ ཡ-ཀཱརོ ལུཏྟནིདྡིཊྛོ ‘‘ཨལཛྫིཏཱ’’ཏིཨཱདཱིསུ ཝིཡ. ཝིཉྙཏྟིཔཐེཏི ཀཱཡཝཙཱིཝིཉྙཏྟཱིནཾ གཧཎཡོགྱེ པདེསེ ཋཏྭཱཏི ཨཛ྄ཛྷཱཧརིཏབྦཾ. དཱིཔེནྟོཏི ‘‘ཨིམིནཱ ཙ ཨིམིནཱ ཙ ཀཱརཎེན ཨཡཾ དྷམྨོ མཡི ཨཏྠཱི’’ཏི པཀཱསེནྟོ. ནཱདྷིམཱནིཀོཏི ཨཔྤཏྟེ པཏྟསཉྙིཏཱསངྑཱཏོ ཨདྷིཀོ མཱནོ, སོ ནཏྠི ཨེཏསྶཱཏི ནཱདྷིམཱནིཀོ, བྷིཀྑུ. ཉཱཏེཏི ཝིཉྙུནཱ མནུསྶཛཱཏིཀེན སིཀྑཱཔཙྩཀྑཱནེ ཝུཏྟནཡེན ཝིཉྙཱཏེ སཏི ཙུཏོ བྷཝེ སཱསནཏོཏི ཝིཉྙཱཡཏི. ཨཉྙཱཔདེསེན དཱིཔཡཏོ པན ཐུལླཙྩཡཾ. ཨེཏྠ ཙ –

དུཀྐཊཾ ¶ པཋམསྶེཝ, སཱམནྟམིཏི ཝཎྞིཏཾ;

སེསཱནཾ པན ཏིཎྞམྤི, ཐུལླཙྩཡམུདཱིརིཏནྟི.

༡༠. ཨིདཱནི ¶ ཙཏུནྣམྤི ཙེཏེསམསཾཝཱསཏཾ ཨབྷབྦཏཉྩ དཱིཔེཏུཾ ‘‘པཱརཱཛིཀེཏེ’’ཏིཨཱདི ཨཱརདྡྷཾ. ཨེཏེ ཙཏྟཱརོ པཱརཱཛིཀཱ པུགྒལཱ ཡཐཱ པུརེ པུབྦེ གིཧིཀཱལེ, ཨནུཔསམྤནྣཀཱལེ ཙ ཝིཡ ཨསཾཝཱསཱཏི སམྦནྡྷོ. སཧ ཝསནྟི ཡསྨཱ སབྦེཔི ལཛྫིནོ ཨེཏེསུ ཀམྨཱདཱིསུ ན ཨེཀོཔི ཏཏོ བཧིདྡྷཱ སནྡིསྶཏཱིཏི ཨེཀཀམྨཾ ཨེཀུདྡེསོ སམསིཀྑཏཱཏི ཨིམེ ཏཡོ སཾཝཱསཱ ནཱམ. ཏཏྠ ཨཔལོཀནཱདིཀཾ ཙཏུབྦིདྷམྤི སངྒྷཀམྨཾ སཱིམཱཔརིཙྪིནྣེཧི པཀཏཏྟེཧི བྷིཀྑཱུཧི ཨེཀཏོ ཀཏྟབྦཏཱ ཨེཀཀམྨཾ ནཱམ. ཏཐཱ པཉྩཝིདྷོཔི པཱཏིམོཀྑུདྡེསོ ཨེཀཏོ ཨུདྡིསིཏབྦཏྟཱ ཨེཀུདྡེསོ ནཱམ. པཉྙཏྟཾ པན སིཀྑཱཔདཾ སབྦེཧིཔི ལཛྫཱིཔུགྒལེཧི སམཾ སིཀྑིཏབྦབྷཱཝཏོ སམསིཀྑཏཱ ནཱམ. ནཏྠི ཏེ སཾཝཱསཱ ཨེཏེསནྟི ཨསཾཝཱསཱ. ‘‘ཨབྷབྦཱ’’ཏིཨཱདཱིསུ བྷིཀྑུབྷཱཝཱཡཱཏི ཏུམཏྠེ སམྤདཱནཝཙནཾ, ཏསྨཱ ཡཐཱ སཱིསཙྪིནྣོ ཛཱིཝིཏུཾ ཨབྷབྦོ, ཨེཝཾ ཙཏྟཱརོམེ པུགྒལཱ བྷིཀྑུབྷཱཝཱཡ བྷིཀྑཱུ བྷཝིཏུཾ ཨབྷབྦཱཏི ཨཏྠོ.

༡༡. ཨིདཱནི པརིཡཱཡཱཎཏྟཱིཧི སམྦྷཝནྟེ དསྶེཏུཾ ‘‘པརིཡཱཡོ ཙཱ’’ཏིཨཱདིམཱཧ. པརིཡཱཡོ ཙ ཨཱཎཏྟི ཙ ཏཏིཡེ མནུསྶཝིགྒཧེ ལབྦྷཏཱིཏི སམྦནྡྷོ. ཏཏྠ ཀཱཡཱདཱིཧི ཡཐཱཝུཏྟེཧི ‘‘ཡོ ཨེཝཾ མརཏི, སོ དྷནཾ ཝཱ ལབྷཏཱི’’ཏི ཨེཝམཱདིཝིཉྙཱཔཀོ བྱཉྫནབྷཱུཏོ ཀཱཡཝཙཱིཔཡོགོ པརིཡཱཡོ. ཨིམིནཱ ཨིདཾ དཱིཔེཏི – ཡཐཱ ཨདིནྣཱདཱནེ ‘‘ཨཱདིཡེཡྻཱ’’ཏི (པཱརཱ. ༩༢) ཝུཏྟཏྟཱ པཱརིཡཱཡཀཐཱཡ མུཙྩཏི, ན ཨིདྷ ཨེཝཾ. ‘‘སཾཝཎྞེཡྻཱ’’ཏི (པཱརཱ. ༡༧༢) པརིཡཱཡཀཡཱཡཔི ན མུཙྩཏཱིཏི. ‘‘དུཏིཡེ པནཱ’’ཏིཨཱདཱིསུ ཨཏྠོ པཱཀཊོཡེཝ. ཨེཝམུཔརིཔི པཱཀཊམུཔེཀྑིསྶཱམ.

༡༢. ཨིདཱནི མེཐུནདྷམྨཱདཱིནཾ ཨངྒཱནི དསྶེཏུཾ ‘‘སེཝེཏཱུ’’ཏིཨཱདིམཱཧ. སེཝེཏུཀཱམཏཱཙིཏྟནྟི མེཐུནཾ སེཝེཏུཾ ¶ ཀཱམེཏཱིཏི སེཝེཏུཀཱམོ, ཏསྶ བྷཱཝོ ནཱམ ཏཎྷཱ, ཏཱཡ སེཝེཏུཀཱམཏཱཡ སམྤཡུཏྟཾ ཙིཏྟནྟི ཏཔྤུརིསོ. མེཐུནདྷམྨསྶཱཏི མིཐུནཱནཾ ཨིཏྠིཔུརིསཱནཾ ཨིདནྟི མེཐུནཾ, ཏམེཝ དྷམྨོཏི མེཐུནདྷམྨོ. ཨིདྷ པན ཨུཔཙཱརཝསེན པཱརཱཛིཀཱཔཏྟི མེཐུནདྷམྨོ ནཱམ. ཨཐ ¶ ཝཱ མེཐུནེན ཛཱཏོ དྷམྨོ པཱརཱཛིཀཱཔཏྟི མེཐུནདྷམྨོ, ཏསྶ མེཐུནདྷམྨསྶ མེཐུནདྷམྨཔཱརཱཛིཀཱཔཏྟིཡཱ. ཨངྒདྭཡནྟི ཨངྒཱནཾ ཀཱརཎཱནཾ དྭཡཾ. བུདྷཱཏི ཝིནཡདྷརཱ ཝིཉྙུནོ.

༡༣. མནུསྶསནྟི མནུསྶཱནཾ སཾ མནུསྶསཾ, ཏདཱཡཏྟཝཏྠུཀཱ ཙ. ཨེཏེན པེཏཏིརཙྪཱནགཏཱཡཏྟཾ ནིཝཏྟེཏི. ཏཐཱསཉྙཱིཏི ཏཐཱ ཏཱདིསཱ སཉྙཱ ཏཐཱསཉྙཱ, སཱ ཨསྶ ཨཏྠཱིཏི ཏཐཱསཉྙཱི. པརཱཡཏྟསཉྙིཏཱ ཙཱཏི ཨཏྠོ. བྷཱཝཔྤདྷཱནཱ ཨིམེ ནིདྡེསཱ, བྷཱཝཔཙྩཡལོཔོ ཝཱ ‘‘བུདྡྷེ རཏན’’ནྟིཨཱདཱིསུ (ཁུ. པཱ. ༦.༣) ཝིཡ. ཨེཝམུཔརིཔི ཨཱིདིསེསུ. ཐེཡྻཙིཏྟནྟི ཐེནབྷཱཝསངྑཱཏཾ ཙིཏྟཉྩ. ཝཏྠུནོ གརུཏཱཏི བྷཎྜསྶ པཱདཨཏིརེཀཔཱདཱརཧབྷཱཝེན གརུཏཱ ཙ. ཨཱུནཔཉྩམཱསཀེ ཝཱ ཨཏིརེཀམཱསཀེ ཝཱ ཐུལླཙྩཡཾ. མཱསཀེ ཝཱ ཨཱུནམཱསཀེ ཝཱ དུཀྐཊཾ. ཨཝཧཱརོཏི པཉྩཝཱིསཏིཡཱ ཨཝཧཱརཱནཾ ཨཉྙཏརེན ཨཝཧརཎཉྩཱཏི ཨིམེ པཉྩ ཨདིནྣཱདཱནཧེཏུཡོ ཨདིནྣཱདཱནཔཱརཱཛིཀཱཔཏྟིཡཱ ཨངྒཱནི.

༡༤. པཱཎོ མཱནུསྶཀོཏི མནུསྶཛཱཏིསམྦནྡྷོ པཱཎོ ཙ, པཱཎོཏི ཧི ཝོཧཱརཏོ སཏྟོ, པརམཏྠཏོ པན ཛཱིཝིཏིནྡྲིཡཾ ཝུཙྩཏི. པཱཎསཉྙིཏཱཏི པཱཎོཏི སཉྙིཏཱ ཙ, གྷཱཏནཾ གྷཱཏོ, སོ ཨེཝ ཙེཏནཱ གྷཱཏཙེཏནཱ, ‘‘ཝདྷཱམི ན’’ནྟི ཨེཝཾ པཝཏྟཱ སཱ ཙ, ཏཾསམུཊྛིཏོ སཱཧཏྠིཀཱདཱིནཾ ཚནྣམཉྙཏརོ པཡོགོ ཙ, ཏེན པཡོགེན མརཎཉྩཱཏི ཨེཏེ ཡཐཱཝུཏྟཱ པཉྩ ཝདྷཧེཏུཡོ པཱཎགྷཱཏཱཔཛྫིཏབྦཨཱཔཏྟིཡཱ ཨངྒཱནཱིཏི ཨཏྠོ.

༡༥. ཨཏྟནི ¶ ཨསནྟཏཱཏི ཨུཏྟརིམནུསྶདྷམྨསྶ སནྟཱནེ ཨཝིཛྫམཱནཏཱ ཙ. པཱཔམིཙྪཏཱཡཱརོཙནཱཏི ཡཱ སཱ ‘‘ཨིདྷེཀཙྩོ དུསྶཱིལོ སམཱནོ ‘སཱིལཝཱཏི མཾ ཛནོ ཛཱནཱཏཱུ’’ཏིཨཱདིནཱ (ཝིབྷ. ༨༥༡) ནཡེན ཝུཏྟཱ པཱཔཨིཙྪཏཱཡ སམནྣཱགཏཱ, ཏཱཡ ཨུཏྟརིམནུསྶདྷམྨསྶ ཨཱརོཙནཱ ཙ. ཏསྶཱཏི ཡསྶ ཨཱརོཙེཏི, ཏསྶ. མནུསྶཛཱཏིཏཱཏི མནུསྶཱནཾ ཛཱཏི ཡསྶ, ཏསྶ བྷཱཝོ མནུསྶཛཱཏིཏཱ, སཱ ཙ, ནཉྙཱཔདེསོཏི ན ཨཉྙཱཔདེསོ ཨཉྙཱཔདེསཱབྷཱཝོ ཙ, ཏདེཝ ཛཱནནནྟི ཏངྑཎཾཡེཝ ཝིཛཱནནཉྩཱཏི ཨིམཱནི པཉྩ ཨེཏྠ ཨསནྟདཱིཔནེ ཨསྨིཾ སནྟཱནེ ཨཝིཛྫམཱནཨུཏྟརིམནུསྶདྷམྨཔྤཀཱསནནིམིཏྟེ པཱརཱཛིཀེ ཨངྒཱནི ཧེཏུཡོཏི ཨཏྠོ.

༡༦. ཨེཝཾ ཏེསམསཾཝཱསཏཱབྷབྦཏཱདཱིནི དསྶེཏྭཱ ཨིདཱནི ན ཏེ ཙཏྟཱརོཝ, ཨཐ ཁོ སནྟཉྙེཔཱིཏི ¶ ཏེ སབྦེཔི སམོདྷཱནེཏྭཱ དསྶེནྟོ ‘‘ཨསཱདྷཱརཎཱ’’ཏིཨཱདིམཱཧ. ཏཏྠ ཨསཱདྷཱརཎཱཏི པཱརཱཛིཀཱ དྷམྨཱ ཨདྷིཔྤེཏཱ. ཏེནེཝ ཙེཏྠ པུལླིངྒནིདྡེསོ. ཏསྨཱ བྷིཀྑུནཱིནཾ བྷིཀྑཱུཧི ཨསཱདྷཱརཎཱ པཱརཱཛིཀཱ དྷམྨཱ ཙཏྟཱརོ ཙཱཏི ཨེཝམེཏྠ ཨཏྠོ དཊྛབྦོ. ཨུཔཙཱརཝསེན ཏུ ཨུབྦྷཛཱཎུམཎྜལིཀཱདིཀཱ པཱརཱཛིཀཱཔནྣཱ པརིགྒཡ྄ཧནྟི. ཏཱསུ ཡཱ ཨཝསྶུཏཱ ཨཝསྶུཏསྶ མནུསྶཔུརིསསྶ ཨཀྑཀཱནཾ ཨདྷོ ཛཱཎུམཎྜལཱནཾ ཀཔྤརཱནཉྩ ཨུཔརི ཀཱཡསཾསགྒཾ སཱདིཡཏི, ཨཡཾ ཨུབྦྷཛཱཎུམཎྜལིཀཱ. ཡཱ པན ཨཉྙིསྶཱ བྷིཀྑུནིཡཱ པཱརཱཛིཀཾ པཊིཙྪཱདེཏི, སཱ ཝཛྫཔྤཊིཙྪཱདིཀཱ. ཡཱ ཨུཀྑིཏྟཀཾ བྷིཀྑུཾ ཏསྶཱ དིཊྛིཡཱ གཧཎཝསེན ཨནུཝཏྟཏི, སཱ ཨུཀྑིཏྟཱནུཝཏྟིཀཱ. ཀཱཡསཾསགྒརཱགེན ཏིནྟསྶ ཧཏྠགྒཧཎཾ སངྒྷཱཊིཀཎྞགྒཧཎཾ ཀཱཡསཾསགྒཏྠཱཡ པུརིསསྶ ཧཏྠཔཱསེ ཋཱནཾ ཋཏྭཱ སལླཔནཾ སངྐེཏགམནཾ པུརིསསྶཱགམནསཱདིཡནཾ ¶ པཊིཙྪནྣོཀཱསཝཝིསནཾ ཧཏྠཔཱསེ ཋཏྭཱ ཀཱཡོཔསཾཧརཎནྟི ཨིམཱནི ཨཊྛ ཝཏྠཱུནི ཡསྶཱ ཨཝསྶུཏཱཡ, སཱ ཨཊྛཝཏྠུཀཱ ནཱམ.

ཨབྷབྦཀཱ ཨེཀཱདས ཙཱཏི ཨེཏྠ པཎྜཀོ ཐེཡྻསཾཝཱསཀོ ཏིཏྠིཡཔཀྐནྟཀོ ཏིརཙྪཱནགཏོ མཱཏུགྷཱཏཀོ པིཏུགྷཱཏཀོ ཨརཧནྟགྷཱཏཀོ བྷིཀྑུནིདཱུསཀོ སངྒྷབྷེདཀོ ལོཧིཏུཔྤཱདཀོ ཨུབྷཏོབྱཉྫནཀོཏི ཨིམེ ཨབྷབྦཱ ཨེཀཱདས ཙ. ཏེསུ པཎྜཀོཏི ཨོཔཀྐམིཀནཔུཾསཀཔཎྜཀཱ ཙ པཎྜཀབྷཱཝཔཀྑེ པཀྑཔཎྜཀོ ཙ ཨིདྷ ཨདྷིཔྤེཏཱ. ཨཱསིཏྟཨུསཱུཡཔཎྜཀཱནཾ པན པབྦཛྫཱ ཙ ཨུཔསམྤདཱ ཙ ན ཝཱརིཏཱ. ཐེཡྻསཾཝཱསཀོ པན ལིངྒཏྠེནཀཱདིཝསེན ཏིཝིདྷོ. ཏཏྠ སཡཾ པབྦཛིཏཏྟཱ ལིངྒམཏྟཾ ཐེནེཏཱིཏི ལིངྒཏྠེནཀོ. བྷིཀྑུཝསྶགཎནཱདིཀཾ སཾཝཱསཾ ཐེནེཏཱིཏི སཾཝཱསཏྠེནཀོ. སིཀྑཾ པཙྩཀྑཱཡ ཨེཝཾ པཊིཔཛྫནྟེཔི ཨེསེཝ ནཡོ. ཡཐཱཝུཏྟམུབྷཡཾ ཐེནེཏཱིཏི ཨུབྷཡཏྠེནཀོ. ཋཔེཏྭཱ པན ཨིམཾ ཏིཝིདྷཾ –

རཱཛདུབྦྷིཀྑཀནྟཱར-རོགཝེརིབྷཡེན ཝཱ;

ཙཱིཝརཱཧརཎཏྠཾ ཝཱ, ལིངྒཾ ཨཱདིཡཏཱིདྷ ཡོ.

སཾཝཱསཾ ནཱདྷིཝཱསེཏི, ཡཱཝ སོ སུདྡྷམཱནསོ;

ཐེཡྻསཾཝཱསཀོ ནཱམ, ཏཱཝ ཨེས ན ཝུཙྩཏཱིཏི. (མཧཱཝ. ཨཊྛ. ༡༡༠; ཀངྑཱ. ཨཊྛ. པཋམཔཱརཱཛིཀཝཎྞནཱ);

ཏིཏྠིཡཔཀྐནྟཀཱདཡོ ¶ ཏུ ཏཾཏཾཝཙནཏྠཱནུསཱརེན ཝེདིཏབྦཱ. ཏིརཙྪཱནགཏོ པན ཋཔེཏྭཱ མནུསྶཛཱཏིཀཾ ཨཝསེསོ སབྦོ ཝེདིཏབྦོ. ཨིམེ ཨེཀཱདས པུགྒལཱ བྷིཀྑུབྷཱཝཱཡ ཨབྷབྦཏྟཱ པཱརཱཛིཀཱཔནྣསདིསཏཱཡ ‘‘པཱརཱཛིཀཱ’’ཏི ཝུཙྩནྟི. ཝིབྦྷནྟཱ བྷིཀྑུནཱིཏི གིཧིནིཝཱསནནིཝཏྠཱ བྷིཀྑུནཱི ཙ. སཱ ཧི ཨེཏྟཱཝཏཱ པཱརཱཛིཀཱ. མུདུཀཱ པིཊྛི ཡསྶ, སོ ཙ. སོ ཧི ཨནབྷིརཏིཡཱ པཱིལི༹ཏོ ཡདཱ ཨཏྟནོ ¶ ཨངྒཛཱཏཾ ཨཏྟནོ ཝཙྩམུཁམགྒེསུ པཝེསེཏི, ཏདཱ པཱརཱཛིཀོ ཧོཏི.

༡༧-༡༨. ལམྦམཱནམངྒཛཱཏམེཏསྶཱཏི ལམྦཱི. སོ ཡཐཱཝུཏྟེསུ པཝེསིཏོ པཱརཱཛིཀོ. མུཁེན གཎྷནྟོ ཨངྒཛཱཏཾ པརསྶ ཙཱཏི ཡོ ཨནབྷིརཏིཡཱ པཱིལི༹ཏོ པརསྶ སུཏྟསྶ ཝཱ མཏསྶ ཝཱ ཨངྒཛཱཏཾ མུཁེན གཎྷཱཏི, སོ པརསྶ ཨངྒཛཱཏཾ མུཁེན གཎྷནྟོ ཙ. ཏཏྠེཝཱབྷིནིསཱིདནྟོཏི ཡོ ཨནབྷིརཏིཡཱ པཱིལི༹ཏོ ཏཏྠེཝ པརསྶ ཨངྒཛཱཏེ ཝཙྩམགྒེན ཨབྷིནིསཱིདཏི, སོ ཙཱཏི ཨེཏེ དྭཡཾདྭཡསམཱཔཏྟིཡཱ ཨབྷཱཝེཔི མགྒེ མགྒཔྤཝེསནཧེཏུ མེཐུནསྶ ཨནུལོམིཀཱ ཙཏྟཱརོ ཙ. ཨིདྷཱགཏཱ ཙཏྟཱརོཏི ཨིདྷ ཁུདྡསིཀྑཱཡཾ ཡཐཱཝུཏྟཱ མེཐུནདྷམྨཱ པཱརཱཛིཀཱདཡོ ཙཏྟཱརོ ཙཱཏི སམོདྷཱནཱ པིཎྜཱིཀརཎཝསེན ཙཏུཝཱིསཏི པཱརཱཛིཀཱ བྷཝནྟཱིཏི སེསོ. ཨེཏྠ ཙ གཱཐཱབནྡྷཝསེན རསྶཾ ཀཏྭཱ ‘‘པརཱཛིཀཱ’’ཏི ཝུཏྟཾ. ཨེཏྠཱཧ – མཱཏུགྷཱཏཀཱདཡོ ཏཏིཡཾ པཱརཱཛིཀཾ ཨཱཔནྣཱ, བྷིཀྑུནིདཱུསཀོ, མུདུཔིཊྛིཀཱདཡོ ཙཏྟཱརོ ཙ པཋམཔཱརཱཛིཀཾ ཨཱཔནྣཱ ཨེཝཱཏི ཀུཏོ ཙཏུཝཱིསཏཱིཏི? ཝུཙྩཏེ – མཱཏུགྷཱཏཀཱདཡོ ཧི ཙཏྟཱརོ ཨིདྷ ཨནུཔསམྤནྣཱ ཨེཝ ཨདྷིཔྤེཏཱ. མུདུཔིཊྛིཀཱདཡོ ཙཏྟཱརོ ཀིཉྩཱཔི པཋམཔཱརཱཛིཀེན སངྒཧིཏཱ, ཡསྨཱ པན ཨེཀེན པརིཡཱཡེན མེཐུནདྷམྨཾ ཨཔྤཊིསེཝིནོ ཧོནྟི, ཏསྨཱ ཝིསུཾ ཝུཏྟཱཏི.

༡༩. ཝུཊྛཱནསྶ གརུཀཏྟཱ གརུཀཱཏི སངྒྷཱདིསེསཱ ཝུཙྩནྟི. ནཝཱཏི ཏེསཾ གཎནཔརིཙྪེདོ. ནནུ ‘‘ནཝཱ’’ཏི ཀསྨཱ ཝུཏྟཾ, ‘‘ཏེརསཱ’’ཏི ཝཏྟབྦནྟི? ནཱཡཾ དོསོ, ཙིརེནཱཔཛྫིཏབྦེ ¶ ¶ ཙཏྟཱརོ ཡཱཝཏཏིཡཀེ ཋཔེཏྭཱ ཝཱིཏིཀྐམཀྑཎེཡེཝ ཨཱཔཛྫིཏབྦཱ པཋམཱཔཏྟིཀཱ ཝུཙྩནྟཱིཏི. ཨིདཱནི ཏེ དསྶེཏུཾ ‘‘མོཙེཏུཀཱམཏཱ’’ཏིཨཱདི ཨཱརདྡྷཾ. ཏཏྠ སུཀྐསྶཱཏི ཨཱསཡདྷཱཏུནཱནཏྟཏོ ནཱིལཱདིཝསེན དསཝིདྷེ སུཀྐེ ཡསྶ ཀསྶཙི སུཀྐསྶ. མོཙེཏུཀཱམཏཱཏི མོཙེཏུཀཱམཏཱཡ, ཡ-ཀཱརོ ལུཏྟནིདྡིཊྛོ. ཨིམིནཱ པན ཝཙནེན མོཙནསྶཱད མུཙྩནསྶཱད མུཏྟསྶཱདམེཐུནསྶཱད ཕསྶསྶཱད ཀཎྜུཝནསྶཱད དསྶནསྶཱད ནིསཛྫནསྶཱད ཝཱཙསྶཱད གེཧསིཏཔེམ ཝནབྷངྒིཡ སངྑཱཏེསུ ཨེཀཱདསསྶཱདེསུ ཨེཀཾཡེཝ མོཙནསྶཱདཾ དསྶེཏི.

ཏཏྠ མོཙནཱཡ ཨསྶཱདོ སུཁཝེདནཱ མོཙནསྶཱདོ. མུཙྩནེ ཨཏྟནོ དྷམྨཏཱཡ མུཙྩནེ ཨསྶཱདོ མུཙྩནསྶཱདོ. ཨེཝཾ སབྦཏྠ སཏྟམཱིཏཔྤུརིསེན ཨཏྠོ དཊྛབྦོ. ཨིམེཧི པན ནཝཧི པདེཧི སམྤཡུཏྟཨསྶཱདསཱིསེན རཱགོ ཝུཏྟོ. གེཧནིསྶིཏེསུ མཱཏཱདཱིསུ པེམཾ གེཧེ སིཏཾ པེམནྟི གེཧསིཏཔེམཾ, ཨིམིནཱ སརཱུཔེནེཝ རཱགོ ཝུཏྟོ. སནྠཝཀརཎཏྠཱཡ ཨིཏྠིཡཱ པེསིཏཔུཔྥཱདི ཝནབྷངྒིཡཾ, ཨིམིནཱ ཙ ཝཏྠུཝསེན རཱགོ ཝུཏྟོ. མེཐུནསྶཱདོཔི ཨིཏྠིཡཱ གཧཎཔྤཡོགེན ཝེདིཏབྦོ. སབྦཏྠེཝ ཙ པན ཙེཏནཱནིམིཏྟུཔཀྐམམོཙནེ སཏི ཝིསངྐེཏཱབྷཱཝོ ཝེདིཏབྦོ. ཨུཔཀྐམྨ ཧཏྠཱདིནཱ ནིམིཏྟེ ཨུཔཀྐམིཏྭཱ. ཨཉྙཏྲ སུཔིནནྟེནཱཏི སུཔིནོཡེཝ སུཔིནནྟོ ‘‘ཀམྨམེཝ ཀམྨནྟོ’’ཏིཨཱདཱིསུ ཝིཡ ཨནྟ-སདྡསྶ ཏབྦྷཱཝཝུཏྟིཏྟཱ. ཏཾ སུཔིནནྟཾ ཝིནཱ ཝིམོཙཡཾ སུཀྐཾ ཝིམོཙེནྟོ སམཎོ ཡོ ཀོཙི བྷིཀྑུ གརུཀཾ གརུཀཱཔཏྟིསངྑཱཏཾ སངྒྷཱདིསེསཾ ཕུསེ ཕུསེཡྻ, ཨཱཔཛྫེཡྻཱཏི ཝུཏྟཾ ཧོཏི. ཨེཏྠ ཙ ཨཛ྄ཛྷཏྟརཱུཔབཧིདྡྷཱརཱུཔཨུབྷཡརཱུཔཨཱཀཱསེཀཊིཀམྤནསངྑཱཏེསུ ཙཏཱུསུ ཨུཔཱཡེསུ སཏི རཱགཱུཔཏྠམྦྷཱདཱིསུ ¶ ཙ ཀཱལེསུ ཡེན ཀེནཙི ཨངྒཛཱཏེ ཀམྨཉྙཏཾ པཏྟེ ‘‘ཨཱརོགྱཏྠཱཡཱ’’ཏིཨཱདཱིསུ ཡེན ཀེནཙི ཨདྷིཔྤཱཡེན ཨདྷིཔྤཱཡཝཏྠུབྷཱུཏཾ ཡཾ ཀིཉྩི སུཀྐཾ མོཙནསྶཱདཙེཏནཱཡ ཨེཝ ནིམིཏྟེ ཨུཔཀྐམྨ མོཙེནྟོ སངྒྷཱདིསེསཾ ཨཱཔཛྫཏཱིཏི སབྦཐཱ ཨདྷིཔྤཱཡོ དཊྛབྦོ.

༢༠. ཀཱཡསཾསགྒརཱགཝཱཏི ཀཱཡེ སཾསགྒོ, ཏསྨིཾ རཱགོ, སོ ཨསྶ ཨཏྠཱིཏི ཝནྟུ, ཀཱཡསཾསགྒརཱགསམངྒཱིཏི ཨཏྠོ. སམཎོ ཨིཏྠིསཉྙཱིཏི སམྦནྡྷོ. ཨུཔཀྐམྨཱཏི ཀཱཡེན ཝཱཡམིཏྭཱ. མནུསྶིཏྠིཾ སམྥུསནྟོཏི ཨནྟམསོ ལོམེནཔི པརཱམསནྟོ གརུཀཾ ཕུསེཏི ཡོཛནཱ. མནུསྶབྷཱུཏཱ ཨམཏཱ ཨིཏྠཱི མནུསྶིཏྠཱི. ཏཏྠ ‘‘ཀཱཡསཾསགྒརཱགཝཱ’’ཏི ཨིམིནཱ མཱཏུཔེམཱདིཾ ¶ , ཨིཏྠིཡཱ གཧིཏམོཀྑཱདྷིཔྤཱཡཉྩ པཊིཀྑིཔཏི. ཨིཏྠིཡཱ ཝེམཏིཀསྶ, པཎྜཀཔུརིསཏིརཙྪཱནགཏསཉྙིསྶ ཙ ཐུལླཙྩཡཾ. ཨིཏྠིཡཱ པན ཀཱཡེན ཀཱཡཔྤཊིབདྡྷཱམསནེ, ཀཱཡཔྤཊིབདྡྷེན ཀཱཡཱམསནེ ཙ ཡཀྑཱིཔེཏཱིཔཎྜཀཱནཾ ཀཱཡེན ཀཱཡཱམསནེ ཙ པུརིསཏིརཙྪཱནགཏིཏྠཱིནཾ ཀཱཡེན ཀཱཡཱམསནེཔི དུཀྐཊཾ, ཏཐཱཡཀྑཱིཨཱདཱིནཾ ཀཱཡེན ཀཱཡཔྤཊིབདྡྷཱདཱིསུ ཙ. མཏིཏྠིཡཱ པན ཐུལླཙྩཡཾ. ཨིཏྠིཡཱ པན ཕུསིཡམཱནོ སེཝནཱདྷིཔྤཱཡོཔི སཙེ ཀཱཡེན ན ཝཱཡམཏི, ཨནཱཔཏྟི.

༢༡. ཏཐཱཏི ཨིཏྠིསཉྙཱི. སུཎནྟིནྟི ཝིཉྙཏྟིཔཐེ ཋཏྭཱ ཨཏྟནོ ཝཙནཾ སུཎནྟིཉྩ. ཝིཉྙུཉྩཱཏི དུཊྛུལླཱདུཊྛུལླསལླཀྑཎསམཏྠཉྩ མནུསྶིཏྠིཾ. མགྒཾ ཝཱཏི ཝཙྩམགྒཔསྶཱཝམགྒཱནཾ ཝསེན མགྒཾ ཝཱ མེཐུནཾ ཝཱ ཨཱརབྦྷཱཏི སམྦནྡྷོ. དུཊྛུལླཝཱཙཱརཱགེནཱཏི ¶ དུཊྛཱ ཙ སཱ ཨསདྡྷམྨཔྤཊིསཾཡུཏྟཏཱཡ ཐཱུལཱ ཙ ལཱམཀཛནསཱདྷཱརཎཏཱཡཱཏི དུཊྛུལླཱ. སཱཝ པུན ཝཱཙཱ དུཊྛུལླཝཱཙཱ. ཏསྶཾ ཨསྶཱདསམྤཡུཏྟོ རཱགོཏི སམཱསོ, ཏེན. ཨོབྷཱསིཏྭཱཏི ཝཎྞཱཝཎྞཡཱཙནཱདིཝསེན ཨསདྡྷམྨཝཙནཾ ཝཏྭཱ. ཨསུཎནྟིཡཱ པན དཱུཏེན ཝཱ པཎྞེན ཝཱ ཨཱརོཙིཏེ ཨནཱཔཏྟི. ཏཏྠ དྭིནྣཾ མགྒཱནཾ ཝསེན ཝཎྞཱཝཎྞེཧི, མེཐུནཡཱཙནཱདཱིཧི ཝཱ ‘‘སིཁརཎཱིསི, སམྦྷིནྣཱསི, ཨུབྷཏོབྱཉྫནཀཱསཱི’’ཏི ཨིམེསུ ཏཱིསུ ཨཉྙཏརེན ཨཀྐོསཝཙནེན ཝཱ ཨོབྷཱསནྟསྶ སངྒྷཱདིསེསོ, ཨདྷཀྑཀཨུབྦྷཛཱཎུམཎྜལཾ ཨཱདིསྶ ཝཎྞཱདིབྷཎནེ ཐུལླཙྩཡཾ, ཏཐཱ ཡཀྑཱིཔེཏཱིཔཎྜཀཱནཾ ཝཙྩམགྒཔསྶཱཝམགྒེ ཨཱདིསྶ ཝཎྞཱདིབྷཎནེ མེཐུནཡཱཙནཱདཱིསུཔི. ཏེསཾ པན ཨདྷཀྑཀཱདིཀེ དུཀྐཊཾ, ཏཐཱ མནུསྶིཏྠཱིནཾ ཨུབྦྷཀྑཀེ ཨདྷོཛཱཎུམཎྜལེ ཀཱཡཔྤཊིབདྡྷེ ཙ.

༢༢. ཨཏྟཀཱམུཔཊྛཱནནྟི མེཐུནདྷམྨསངྑཱཏེན ཀཱམེན ཨུཔཊྛཱནཾ ཀཱམུཔཊྛཱནཾ. ཨཏྟནོ ཨཏྠཱཡ ཀཱམུཔཊྛཱནཾ ཨཏྟཀཱམུཔཊྛཱནཾ. ཨཐ ཝཱ ཀཱམཱིཡཏཱིཏི ཀཱམཾ, ཨཏྟནོ ཀཱམཾ ཨཏྟཀཱམཾ, སཡཾ མེཐུནརཱགཝསེན པཏྠིཏནྟི ཨཏྠོ. ཨཏྟཀཱམཉྩ ཏཾ ཨུཔཊྛཱནཉྩཱཏི ཨཏྟཀཱམུཔཊྛཱནཾ. ཏསྶ ཝཎྞོ གུཎོ, ཏཾ. ཝཏྭཱཏི ‘‘ཡདིདཾ ཀཱམུཔཊྛཱནཾ ནཱམ, ཨེཏདགྒཾ ཨུཔཊྛཱནཱན’’ནྟི ཀཱམུཔཊྛཱནེ ཝཎྞཾ ¶ ཨནྟམསོ ཧཏྠམུདྡཱཡཔི ཨིཏྠཱིཏི སཉྙཱི པཀཱསེཏྭཱཏི ཨཏྠོ. ཝཱཙཱཏི ཝཱཙཱཡ ཡཀཱརལོཔཝསེན. མེཐུནཡུཏྟེནཱཏི མེཐུནཡུཏྟཱཡ, ལིངྒཝིཔལླཱསཝསེན ཏཱཡ ‘‘ཨརཧསི ཏྭཾ མཡ྄ཧཾ མེཐུནཾ དྷམྨཾ དཱཏུ’’ནྟིཨཱདིཀཱཡ མེཐུནདྷམྨཔྤཊིསཾཡུཏྟཱཡ ཝཱཙཱཡ མེཐུནཡཱཙནེ མེཐུནརཱགིནོཏི སམྦནྡྷོ. མེཐུནེརཱགོ, སོ ཨསྶ ཨཏྠཱིཏི མེཐུནརཱགཱི, ཏསྶ. གརུ ཧོཏཱིཏི གརུཀཱཔཏྟི ཧོཏཱིཏི ཨཏྠོ. མ-ཀཱརོ པདསནྡྷིཀརོ. ཨེཏྠ ¶ པན པཎྜཀེ པཎྜཀསཉྙིནོ ཐུལླཙྩཡཾ, ཏསྨིཾཡེཝ ཨིཏྠིསཉྙིནོ དུཀྐཊཾ.

༢༣. ཨིཏྠིཡཱ ཝཱ པུརིསསྶ ཝཱ སནྡེསཾ པཊིགྒཧེཏྭཱཏི སམྦནྡྷོ. ཨིཏྠིཡཱ ཝཱཏི ‘‘དས ཨིཏྠིཡོ མཱཏུརཀྑིཏཱ པིཏུརཀྑིཏཱ’’ཏིཨཱདིནཱ (པཱརཱ. ༣༠༣) ཙ ‘‘དས བྷརིཡཱཡོ དྷནཀྐཱིཏཱ ཚནྡཝཱསིནཱི’’ཏིཨཱདིནཱ (པཱརཱ. ༣༠༣) ཙ ཝུཏྟཱཡ ཝཱིསཏིཝིདྷཱཡ ཨིཏྠིཡཱ ཝཱ པུརིསསྶ ཝཱ ཏཾསམྦནྡྷཝསེན ཏེསཾ མཱཏཱདཱིནཾ ཝཱ. སནྡེསནྟི ཨིཏྠིཡཱ ཝཱ པུརིསེན ཝཱ ཨུབྷིནྣཾ མཱཏཱདཱིཧི ཝཱ ‘‘ཨེཧི, བྷནྟེ, ཨིཏྠནྣཱམཾ ཨིཏྠིཾ ཝཱ པུརིསཾ ཝཱ ཨེཝཾ བྷཎཱཧཱི’’ཏི ཝུཏྟཾ ཛཱཡམྤཏིབྷཱཝསནྣིསྶིཏཾ སནྡེསཝཙནཾ. པཊིགྒཧེཏྭཱཏི ‘‘སཱདྷཱུ’’ཏི ཀཱཡེན ཝཱ ཝཱཙཱཡ ཝཱ སམྤཊིཙྪིཏྭཱ. ཝཱིམཾསིཏྭཱཏི ཡཏྠ པེསིཏོ, ཏེསཾ ཨདྷིཔྤཱཡཾ ཨུཔཔརིཀྑིཏྭཱ ཝཱ ཨུཔཔརིཀྑཱཔེཏྭཱ ཝཱ. ཧརཾ པཙྩཱཏི ཨིཏྠཱི ཝཱ པུརིསོ ཝཱ ‘‘སཱདྷཱུ’’ཏི སམྤཊིཙྪཏུ ཝཱ, མཱ ཝཱ, ཡེཧི པེསིཏོ, ཏེསཾ པཙྩཱཧརནྟོ ཝཱ ཧརཱཔེནྟོ ཝཱ, ཛཱཡམྤཏིབྷཱཝོ ཧོཏུ ཝཱ, མཱ ཝཱ, ཨཀཱརཎམེཏཾ. ཨིམཱཡ ཏིཝངྒསམྤཏྟིཡཱ སངྒྷཱདིསེསོ ཙ, དྭཱིཧི ཨངྒེཧི པཎྜཀེ ཙ ཨངྒཏྟཡེནཱཔི ཐུལླཙྩཡཾ, ཨེཀེན དུཀྐཊཾ. ཀེཙི པན ‘‘ཧརཾ པཙྪཱ’’ཏི ཝིཔཱཋཾ པརིཀཔྤེཏྭཱ ‘‘པཙྪཱ ཧར’’ནྟི ཡོཛེནྟི, ཏཾ ན སུནྡརཾ པཙྩཱཏི ཨུཔསགྒཏྟཱ. པདསྶ ཨུཔརི ཨཏྠེ སཛྫེནྟོ པཀཱསེནྟོ གཙྪཏཱིཏི ཧི ཨུཔསགྒོ ནཱམ, ཏསྨཱ ‘‘པཏི ཨཱ’’ཏི ཨུཔསགྒཱནཾ ‘‘ཧར’’ནྟིམསྶ པདསྶ ཨུཔརི བྷཝིཏབྦནྟི.

༢༤. སཾཡཱཙིཏཔརིཀྑཱརནྟི སཾ ཨཏྟནཱ ཡཱཙིཏོ ཝཱསིཨཱདིཀོ པརིཀྑཱརོ ཡསྶཱ, ཏཾ. ཨདེསིཏཝཏྠུཀནྟི ཨུཏྟིདུཏིཡཀམྨེན ཨདེསིཏཾ ཝཏྠུ ཀུཊིཀརཎཔྤདེསོ ཡསྶཱཏི ¶ ཝིགྒཧོ, ཏཾ. པམཱཎཱཏིཀྐནྟནྟི ¶ ཨིདཱནི མཛ྄ཛྷིམསྶ པུརིསསྶ ཏིསྶོ ཝིདཏྠིཡོ སུགཏཝིདཏྠི ནཱམ, ཏཱཡ ‘‘དཱིགྷསོ དྭཱདས ཝིདཏྠིཡོ སུགཏསྶ ཝིདཏྠིཡཱ ཏིརིཡཾ སཏྟནྟརཱ’’ཏི (པཱརཱ. ༣༤༨) ཨེཝཾ ཝུཏྟཔྤམཱཎཾ ཨེཀཏོབྷཱགེནཱཔི ཨཏིཀྐནྟཱ པམཱཎཱཏིཀྐནྟཱཏི ཏཾ ཏིརིཡཾ ཙཏུཧཏྠསངྑཱཏཧེཊྛིམཔྤམཱཎེ སཏི དཱིགྷཏོ ཝུཏྟཔྤམཱཎཏོ ཀེསགྒམཏྟམྤི ཝཌྜྷེཏུཾ ན ཝཊྚཏི. ཏཏོ ཨཱུནཀེ, དཱིགྷཏོ ཙ ཝཌྜྷིཏེ ཨཡཾ ཀུཊིསངྑཾ ན གཙྪཏཱིཏི. ‘‘མཡ྄ཧཾ ཝཱསཱགཱརཾ ཨེཏ’’ནྟི ཨེཝཾ ཨཏྟཱ ཨུདྡེསོ ཨེཏིསྶཱཏི ཨཏྟུདྡེསཱ. ཀུཊིནྟི ཨུལླིཏྟཱདིཀཾ ཀུཊིཾ ཀཏྭཱཏི སམྦནྡྷོ. ཏཏྠ ཨུལླིཏྟཱ ནཱམ ཨནྟོ ཨུདྡྷཾམུཁཾ ལིཏྟཱ. ཨཝལིཏྟཱ ནཱམ བཧི ཨདྷོམུཁཾ ལིཏྟཱ. ཨུབྷཡཐཱ ཨུལླིཏྟཱཝལིཏྟཱ. ཀཏྭཱཏི ཨནྟོབྷཱུཏཀཱརིཏཏྠཝསེན ཀཱརཱཔེཏྭཱ ཝཱ.

ཏཏྠཱཡཾ ཝཏྠུདེསནཀྐམོ – ཏེན ཀུཊིཀཱརཀེན བྷིཀྑུནཱ ཀུཊིཝཏྠུཾ སོདྷེཏྭཱ སངྒྷཾ ཨུཔསངྐམིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ ཝུཌྜྷཱནཾ བྷིཀྑཱུནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པཎཱམེཏྭཱ པདབྷཱཛནེ (པཱརཱ. ༣༤༩) ཝུཏྟནཡེན སངྒྷཾ ཏིཀྑཏྟུཾ ཡཱཙིཏྭཱ སབྦེ ཝཱ སངྒྷཔརིཡཱཔནྣཱ, སངྒྷེན ཝཱ སམྨཏཱ དྭེ ཏཡོ བྷིཀྑཱུ ཏཏྠ ནེཏབྦཱ. ཏེཧི ཙ ཀིཔིལླིཀཱདཱིཧི སོལ༹སཧི ཨུཔདྡཝེཧི ཝིརཧིཏཏྟཱ ཨནཱརམྦྷཾ ཨནུཔདྡཝཾ དྭཱིཧི ཙཏཱུཧི ཝཱ བལིབདྡེཧི ཡུཏྟེན སཀཊེན ཨེཀཙཀྐཾ ནིབྦོདཀཔཏནཊྛཱནེ ཨེཀཾ བཧི ཀཏྭཱ ཨཱཝིཉྪིཏུཾ སཀྐུཎེཡྻཏཱཡ ‘‘སཔརིཀྐམན’’ནྟི སལླཀྑེཏྭཱ སཙེཔི སངྒྷཔྤཧོནཀཱ ཧོནྟི, ཏཏྠེཝ, ནོ ཙེ, སངྒྷམཛ྄ཛྷཾ གནྟྭཱ ཏེན བྷིཀྑུནཱ ཡཱཙིཏེཧི པདབྷཱཛནེ (པཱརཱ. ༥༠, ༥༡) ཝུཏྟཱཡ ཉཏྟིདུཏིཡཀམྨཝཱཙཱཡ ཝཏྠུ དེསེཏབྦནྟི. ཨདེསིཏཝཏྠུཀཾ པམཱཎཱཏིཀྐནྟཾ ཀུཊིཾ ཀརིསྶཱམཱིཏི སབྦཔྤཡོགེ དུཀྐཊཾ, ཨིདཱནི དྭཱིཧི པིཎྜེཧི ནིཊྛཱནཾ གམིསྶཏཱིཏི པཋམཔིཎྜདཱནེ ¶ ཐུལླཙྩཡཾ, དུཏིཡདཱནེན ལེཔེ སངྒྷཊིཏེ སཙེ ཨདེསིཏཝཏྠུཀཱ ཨེཝ ཝཱ ཧོཏི, པམཱཎཱཏིཀྐནྟཱ ཨེཝ ཝཱ, ཨེཀོ སངྒྷཱདིསེསོ, སཱརམྦྷཨཔརིཀྐམནཏཱཡ དྭེ ཙ དུཀྐཊཱནཱིཏི སཙེ ཨུབྷཡཝིཔནྣཱ, དྭེ ཙ སངྒྷཱདིསེསཱ དྭེ ཙ དུཀྐཊཱནཱིཏི སབྦཾ ཉེཡྻཾ.

༢༥. མཧལླཀནྟི སསྶཱམིཀབྷཱཝེན སཾཡཱཙིཏཀུཊིཏོ མཧནྟབྷཱཝེན, ཝཏྠུཾ དེསཱཔེཏྭཱ པམཱཎཱཏིཀྐམེནཱཔི ཀཱཏབྦབྷཱཝེན ཙ མཧནྟཏཱཡ མཧཏྟཾ ལཱཏི ཨཱདདཱཏཱིཏི མཧལླཀོ. མཧཏྟལཀ ཨིཏི ཋིཏེ ཏྟསྶ ལོཔོ ལསྶ ཙ དྭིཏྟཾ, ཏཾ. ཝསནཾ ཨཏྠོ པཡོཛནཾ ཝསནཏྠོ, ཏཱཡ ¶ . ཨེཏྠ པན ཨདེསིཏཝཏྠུབྷཱཝེ ཨེཀོ སངྒྷཱདིསེསོ. སེསཾ ཨནནྟརསདིསམེཝ. ཨིདྷ ཙ ཏཏྠ ཙ ལེཎགུཧཱཏིཎཀུཊིཔཎྞཙྪདནགེཧེསུ ཨཉྙཏརཾ ཀཱརེནྟསྶ ཙ ཀུཊིམྤི ཨཉྙསྶ ཝཱསཏྠཱཡ ཝཱསཱགཱརཾ ཝཱ ཋཔེཏྭཱ ཨུཔོསཐཱགཱརཱདཱིསུ ཨཉྙཏརཏྠཱཡ ཀརོནྟསྶ ཙ ཨནཱཔཏྟི.

༢༦. ཨམཱུལཀེན ཨནྟིམེན ཝཏྠུནཱཏི སམྦནྡྷོ. ཨམཱུལཀེནཱཏི དསྶནསངྑཱཏསྶ, སཝནསངྑཱཏསྶ, དིཊྛསུཏམུཏཝསེན པཝཏྟཔརིསངྐཱསངྑཱཏསྶ ཙ མཱུལསྶ ཨབྷཱཝེན ནཏྠི མཱུལམེཏསྶཱཏི ཨམཱུལཀཾ, ཏེན. ཏཾ པན སོ ཨཱཔནྣོ ཝཱ ཧོཏུ, ནོ ཝཱ, ཨེཏཾ ཨིདྷ ཨཔྤམཱཎཾ. ཏཏྠ བྷིཀྑུཉྩ མཱཏུགཱམཉྩ ཏཐཱརཱུཔེ ཋཱནེ དིསྭཱ པརིསངྐཏི, ཨཡཾ དིཊྛཔརིསངྐཱ. ཨནྡྷཀཱརེ ཝཱ པཊིཙྪནྣེ ཝཱ བྷིཀྑུསྶ ཙ མཱཏུགཱམསྶ ཙ ཝཙནཾ སུཏྭཱ ཨཉྙསྶ ཨཏྠིབྷཱཝཾ ཨཛཱནནྟོ པརིསངྐཏི, ཨཡཾ སུཏཔརིསངྐཱ. དྷུཏྟཱནཾ ཨིཏྠཱིཧི སདྡྷིཾ ¶ པཙྩནྟཝིཧཱརེསུ པུཔྥགནྡྷསུརཱདཱིཧི ཨནུབྷཝིཏྭཱ གཏཊྛཱནཾ དིསྭཱ ‘‘ཀེན ནུ ཁོ ཨིདཾ ཀཏ’’ནྟི ཝཱིམཾསནྟོ ཏཏྠ ཀེནཙི བྷིཀྑུནཱ གནྡྷཱདཱིཧི པཱུཛཱ ཀཏཱ ཧོཏི, བྷེསཛྫཏྠཱཡ ཨརིཊྛཾ ཝཱ པཱིཏཾ, སོ ཏསྶ གནྡྷཾ གྷཱཡིཏྭཱ ‘‘ཨཡཾ སོ བྷཝིསྶཏཱི’’ཏི པརིསངྐཏི. ཨཡཾ མུཏཔརིསངྐཱ ནཱམ. ཨནྟིམེན ཙཱཏི ཏཏོ པརཾ ཝཛྫཱབྷཱཝེན ཨནྟེ བྷཝཏྟཱ ཨནྟིམེནེཝ. ཝཏྠུནཱཏི བྷིཀྑུནོ ཨནུརཱུཔེསུ ཨེཀཱུནཝཱིསཏིཡཱ པཱརཱཛིཀེསུ དྷམྨེསུ ཨཉྙཏརེན པཱརཱཛིཀེན དྷམྨེན. ཙ-ཀཱརོ པནེཏྠ ཨཝདྷཱརཎེ, ཏེན སངྒྷཱདིསེསཱདིཾ ནིཝཏྟེཏི. ཨཐ ཝཱ ཙ-ཀཱརོ ཨཊྛཱནཔྤཡུཏྟོ.

ཙོདེནྟོ ཝཱ ཙོདཱཔེནྟོཝཱཙཱཏི ཡོཛེཏབྦོ. ཙཱཝེཏུནྟི བྲཧྨཙརིཡཱ ཙཱཝནཏྠཱཡ. ཨེཏེན ཨེཀཾ ཙཱཝནཱདྷིཔྤཱཡཾ གཧེཏྭཱ ཨཝསེསེ ཨཀྐོསཱདྷིཔྤཱཡཝུཊྛཱཔནཱདྷིཔྤཱཡཱདིཀེ སཏྟཱདྷིཔྤཱཡེ པཊིཀྑིཔཏི. སུཎམཱནནྟི ཨིདཾ ‘‘ཙོདེནྟོ’’ཏིཨཱདཱིནཾ ཀམྨཔདཾ, ཨིམིནཱ པརམྨུཁཱ ཙོདནཾ པཊིཀྑིཔཏི. པརམྨུཁཱ པན སཏྟཧི ཨཱཔཏྟིཀྑནྡྷེཧི ཝདནྟསྶ དུཀྐཊཾ. ཙོདེནྟོཏི ‘‘ཝཏྠུསནྡསྶནཱ ཨཱཔཏྟིསནྡསྶནཱ སཾཝཱསཔྤཊིཀྑེཔོ སཱམཱིཙིཔྤཊིཀྑེཔོ’’ཏི (པཱརཱ. ཨཊྛ. ༢.༣༨༥-༣༨༦) སངྑེཔཏོ ཝུཏྟཱནཾ ཙཏུནྣཾ ཙོདནཱནཾ ཝསེན སཡཾ ཙོདེནྟོ ཝཱ. ཙོདཱཔེནྟོ ཝཱཏི པརེན ཡེན ཀེནཙི ཙོདཱཔེནྟོ ཝཱ. ཏསྨཱ ཡོ བྷིཀྑུསྶ སམཱིཔེ ཋཏྭཱ ‘‘ཏྭཾ མེཐུནཾ དྷམྨཾ སེཝི, ཨསྶམཎོསཱི’’ཏིཨཱདིནཱ ཝཏྠུསནྡསྶནཝསེན ཝཱ ‘‘ཏྭཾ མེཐུནདྷམྨཱཔཏྟིཾ ཨཱཔནྣོསཱི’’ཏིཨཱདིནཱ ཨཱཔཏྟིསནྡསྶནཝསེན ཝཱ ‘‘ཨསྶམཎོསི, ནཏྠི ཏཡཱ སདྡྷིཾ ཨུཔོསཐོ ཝཱ ¶ པཝཱརཎཱ ཝཱ སངྒྷཀམྨཾ ཝཱ, ཨསྶམཎོསཱི’’ཏིཨཱདིནཱ སཾཝཱསཔྤཊིཀྑེཔཝསེན ཝཱ ཨབྷིཝཱདནཱདིསཾཝཱསེ པཊིཀྑིཏྟེ ཨསྶམཎོཏི ཀསྨཱཏི པུཊྛསྶ ‘‘ཨསྶམཎོསཱི’’ཏིཨཱདིཝཙནེཧི སཱམཱིཙིཔྤཊིཀྑེཔཝསེན ཝཱ ཨནྟམསོ ¶ ཧཏྠམུདྡཱཡ ཨེཝ ཝཱཔི ཨེཏམཏྠཾ དཱིཔཡཏོ ‘‘ཀརོཏུ མེ ཨཱཡསྨཱ ཨོཀཱསཾ, ཨཧཾ ཏཾ ཝཏྟུཀཱམོ’’ཏི ཨེཝཾ ཨོཀཱསེ ཨཀཱརིཏེ ཝཱཙཱཡ སངྒྷཱདིསེསོ ཙེཝ དུཀྐཊཉྩ, ཨོཀཱསཾ ཀཱརེཏྭཱ ཙོདེནྟསྶ པན སངྒྷཱདིསེསོཝ དཊྛབྦོ.

༢༧. ཨཉྙསྶཱཏི ཁཏྟིཡཱདིཛཱཏིཀསྶ པརསྶ. ཀིརིཡནྟི མེཐུནཝཱིཏིཀྐམསངྑཱཏཾ ཀིརིཡཾ. ཏེནཱཏི ཨཉྙསྶ ཝཱིཏིཀྐམསངྑཱཏསྶ མེཐུནཝཱིཏིཀྐམསནྡསྶནེན ཀརཎབྷཱུཏེན. ལེསེནཱཏི ཡསྶ ཛཱཏིཨཱདཡོ ཏཏོ ཨཉྙམྤི ཝཏྠུཾ ལིསྶཏི ཨུདྡིཊྛེ ཝིཏྠཱརཾ སིལིསྶཏི ཝོཧཱརམཏྟེནེཝཱཏི ཛཱཏིཨཱདཡོཝ ‘‘ལེསཱ’’ཏི ཝུཙྩནྟི, ཏེན ཛཱཏིལེསནཱམལེསཱདིནཱ ལེསེན. ཨཉྙནྟི ཡོ ཝཱིཏིཀྐམནྟོ དིཊྛོ, ཏཏོ ཨཔརམྤི བྷིཀྑུཾ ཙཱཝེཏུཾ ཨནྟིམེན ཝཏྠུནཱ ཙོདཡནྟི སམྦནྡྷོ. ཀཐཾ? ཀོཙི ཁཏྟིཡཛཱཏིཡོ ཝཱིཏིཀྐམནྟོ དིཊྛོ, ཏཏོ ཨཉྙཾ ཨཏྟནོ ཝེརིཾ ཁཏྟིཡཛཱཏིཀཾ བྷིཀྑུཾ པསྶིཏྭཱ ཏཾ ཁཏྟིཡཾ ཛཱཏིལེསཾ གཧེཏྭཱ ‘‘ཁཏྟིཡོ མཡཱ དིཊྛོ ཝཱིཏིཀྐམནྟོ, ཏྭཾ ཁཏྟིཡོ པཱརཱཛིཀཾ དྷམྨཾ ཨཱཔནྣོསཱི’’ཏི ཙོདེཏི ཙོདཱཔེཏི ཝཱ. ཨེཝཾ ནཱམལེསཱདཡོཔི ཝེདིཏབྦཱ. སེསཱ ཝིནིཙྪཡཀཐཱ ཨཊྛམེ ཝུཏྟསདིསཱཡེཝ.

༢༨. ཨེཏྟཱཝཏཱ ‘‘གརུཀཱ ནཝཱ’’ཏི ཨུདྡིཊྛེ ཝིཏྠཱརཏོ དསྶེཏྭཱ ཨིདཱནི ཏེསུ ཨཱཔནྣེསུ པཊིཔཛྫིཏབྦཱཀཱརཾ དསྶེཏུཾ ‘‘ཚཱདེཏི ཛཱནམཱཔནྣ’’ནྟིཨཱདི ཝུཏྟཾ. ཏཏྠ ཡོ བྷིཀྑུ ཨཏྟནཱ ཨཱཔནྣཾ སངྒྷཱདིསེསཱཔཏྟིཾ ཨཱཔཏྟིཝསེན ཝཱ ཝཏྠུཝསེན ཝཱ ཛཱནཾ ཛཱནནྟོ ཡཱཝཏཱ ¶ ཡཏྟཀཱནི ཨཧཱནི ཚཱདེཏི པཊིཙྪཱདེཏི, ཏཱཝཏཱ ཏཏྟཀཱནི ཨཧཱནི ཏསྶ པརིཝཱསོ ཧོཏཱིཏི ཨེཝཾ པདསནྡྷིཝསེན ཨཏྠོ ཝེདིཏབྦོ. ཏཏྠ པཊིཙྪནྣཔརིཝཱསོ སུདྡྷནྟཔརིཝཱསོ སམོདྷཱནཔརིཝཱསོཏི ཏིཝིདྷོ པརིཝཱསོ. ཏེསཾ པན ཨཏིསངྑེཔནཡེན མུཁམཏྟེཔི དསྶིཏེ ཝིཏྠཱརཝིནིཙྪཡཔཝེསོཔཱཡསམྦྷཝོ སིཡཱཏི མུཁམཏྟཾ དསྶཡིསྶཱམ.

ཏཏྠ ¶ པཊིཙྪནྣཔརིཝཱསོ ནཱམ ཡཐཱཔཊིཙྪནྣཱཡ ཨཱཔཏྟིཡཱ དཱཏབྦོ, ཏསྨཱ པཊིཙྪནྣདིཝསེ ཙ ཨཱཔཏྟིཡོ ཙ སལླཀྑེཏྭཱ སཙེ ཨེཀཱཧཔྤཊིཙྪནྣཱ ཧོཏི, ‘‘ཨཧཾ, བྷནྟེ, སམྦཧུལཱ ཨཱཔཏྟིཡོ ཨཱཔཛྫིཾ ཨེཀཱཧཔྤཊིཙྪནྣཱཡོ’’ཏིཨཱདིནཱ ཁནྡྷཀེ (ཙཱུལ༹ཝ. ༩༨-༩༩) ཨཱགཏནཡེན ཡཱཙཱཔེཏྭཱ ‘‘སུཎཱཏུ མེ བྷནྟེ སངྒྷོ, ཨཡཾ ཨིཏྠནྣཱམོ བྷིཀྑུ སམྦཧུལཱ ཨཱཔཏྟིཡོ ཨཱཔཛྫི ཨེཀཱཧཔྤཊིཙྪནྣཱཡོ’’ཏིཨཱདིནཱ ཁནྡྷཀེ ཨཱགཏནཡེནེཝ ཀམྨཝཱཙཾ ཝཏྭཱ པརིཝཱསོ དཱཏབྦོ. ཨེཀཾ ཨཱཔཛྫིཏྭཱ ‘‘སམྦཧུལཱ’’ཏི ཝིནཡཀམྨཾ ཀརོནྟསྶཱཔི ཝུཊྛཱཏཱིཏི ‘‘སམྦཧུལཱ’’ཏི ཝུཏྟཾ. ནཱནཱཝཏྠུཀཱསུཔི ཨེསེཝ ནཡོ. ཨཐ དྭཱིཧཱདིཔྤཊིཙྪནྣཱ ཧོནྟི, པཀྑཨཏིརེཀཔཀྑམཱསཨཏིརེཀམཱསསཾཝཙྪརཨཏིརེཀསཾཝཙྪརཔྤཊིཙྪནྣཱ ཝཱ, ‘‘དྭཱིཧཔྤཊིཙྪནྣཱཡོ ཝཱ’’ཏིཨཱདིནཱ ཝཏྭཱ ཡོ ཡོ ཨཱཔནྣོ ཧོཏི, ཏསྶ ཏསྶ ནཱམཉྩ གཧེཏྭཱ ཡོཛནཱ ཀཱཏབྦཱ.

ཀམྨཝཱཙཱཔརིཡོསཱནེ ཙ སཙེ ཨཔྤབྷིཀྑུཀོ ཨཱཝཱསོ ཧོཏི, སཀྐཱ རཏྟིཙྪེདཾ ཨནཱཔཛྫནྟེན ཝསིཏུཾ, ཏཏྠེཝ ‘‘པརིཝཱསཾ སམཱདིཡཱམི, ཝཏྟཾ སམཱདིཡཱམཱི’ཏི ཝཏྟཾ སམཱདཱཡ ཏཏྠེཝ སངྒྷསྶ ‘‘ཨཧཾ, བྷནྟེ, སམྦཧུལཱ སངྒྷཱདིསེསཱ ཨཱཔཏྟིཡོ ཨཱཔཛྫིཾ ཨེཀཱཧཔྤཊིཙྪནྣཱཡོ’’ཏིཨཱདིནཱ ཨཱརོཙེཏྭཱ པུན ཨཱགཏཱགཏཱནཾ བྷིཀྑཱུནཾ ¶ ཨཱརོཙེནྟེན པཀཏཏྟེན བྷིཀྑུནཱ སདྡྷིཾ ཨེཀཙྪནྣེ སཧཝཱསོ, ཏེན ཙ ཝིནཱཝཱསོ, ཨཱགནྟུཀཱདཱིནཾ ཨུཔཙཱརགཏཱནཾ ཨནཱརོཙནཱཏི ཨེཏེསུ ཨེཀེནཱཔི རཏྟིཙྪེདཉྩ ཝཏྟབྷེདཉྩ ཨཀཏྭཱ པརིཝཏྠབྦཾ.

སཙེ ན སཀྐཱ ཧོཏི པརིཝཱསཾ སོདྷེཏུཾ, ནིཀྑིཏྟཝཏྟེན ཝསིཏུཀཱམོ ཧོཏི, ཏཏྠེཝ སངྒྷམཛ྄ཛྷེ ཝཱ ཨེཀསྶ པུགྒལསྶ ཝཱ སནྟིཀེ ‘‘པརིཝཱསཾ ནིཀྑིཔཱམི, ཝཏྟཾ ནིཀྑིཔཱམཱི’’ཏི པརིཝཱསོ ནིཀྑིཔིཏབྦོ. ནིཀྑིཏྟཀཱལཏོ པཊྛཱཡ པཀཏཏྟཊྛཱནེ ཏིཊྛཏི. ཨཐཱནེན པཙྩཱུསསམཡེ ཨེཀེན བྷིཀྑུནཱ སདྡྷིཾ པརིཀྑིཏྟསྶ ཝིཧཱརསྶ པརིཀྑེཔཏོ, ཨཔརིཀྑིཏྟསྶ པརིཀྑེཔཱརཧཊྛཱནཏོ དྭེ ལེཌྜུཔཱཏེ ཨཏིཀྐམིཏྭཱ མཧཱམགྒཏོ ཨོཀྐམྨ པཊིཙྪནྣཊྛཱནེ ནིསཱིདིཏྭཱ ཨནྟོཨརུཎེཡེཝ ཝཏྟཾ སམཱདིཡིཏྭཱ ཨཱརོཙེཏབྦཾ. སཙེ བཧི ཋིཏཱནམྤི སདྡཾ སུཎཱཏི, པསྶཏི ཝཱ, དཱུརཾ གནྟྭཱཔི ཨཱརོཙེཏབྦཾ, ཨནཱརོཙེནྟེ རཏྟིཙྪེདོ ཙེཝ ཝཏྟབྷེདདུཀྐཊཉྩ. སཙེ ཨཛཱནནྟསྶེཝ ཨུཔཙཱརསཱིམཾ པཝིསིཏྭཱ གཙྪནྟི, རཏྟིཙྪེདོཝ ཧོཏི, ན ཝཏྟབྷེདོ. ཨརུཎེ ཨུཊྛིཏེ ཏསྶ སནྟིཀེ ཝཏྟཾ ནིཀྑིཔིཏྭཱ ཝིཧཱརཾ གནྟབྦཾ. ཨེཝཾ ཡཱཝ རཏྟིཡོ པཱུརེནྟི, ཏཱཝ པརིཝཏྠབྦཾ. ཨཡཾ ཏཱཝ པཊིཙྪནྣཔརིཝཱསོ.

སུདྡྷནྟོ ¶ དུཝིདྷོ ཙཱུལ༹སུདྡྷནྟོ མཧཱསུདྡྷནྟོཏི. ཏཏྠ ཡོ ‘‘ཨུཔསམྤདཏོ པཊྛཱཡ ཡཏྟཀཾ ནཱམ ཀཱལཾ ཨཧཾ སུདྡྷོ’’ཏི ཛཱནཱཏི, ཏཏྟཀཾ ཨཔནེཏྭཱ ཏཏོ ཨཝསེསེ རཏྟིཔརིཙྪེདེ ཨེཀཏོ ཀཏྭཱ དཱཏབྦཔརིཝཱསོ ཙཱུལ༹སུདྡྷནྟོ. ཡོ པན སབྦསོ རཏྟིཔརིཡནྟཾ ན ཛཱནཱཏི ནསྶརཏི, ཏཏྠ ཙ ཝེམཏིཀོ, ཏསྶ དཱཏབྦོ མཧཱསུདྡྷནྟོ. ཨཱཔཏྟིཔརིཡནྟཾ ཛཱནཱཏུ ཝཱ, མཱ ཝཱ, ཨཀཱརཎམེཏཾ.

སམོདྷཱནཔརིཝཱསོ ¶ ནཱམ ཏིཝིདྷོ ཨོདྷཱནསམོདྷཱནོ ཨགྒྷསམོདྷཱནོ མིསྶཀསམོདྷཱནོཏི. ཏཏྠ ཡོ ནིཊྛིཏཔརིཝཱསོཔི ཝཱ ནིཊྛིཏམཱནཏྟོཔི ཝཱ ཨནིཀྑིཏྟཝཏྟོ ཨཉྙཾ ཨཱཔཏྟིཾ ཨཱཔཛྫིཏྭཱ པུརིམཱཔཏྟིཡཱ སམཱ ཝཱ ཨཱུནཏརཱ ཝཱ རཏྟིཡོ པཊིཙྪཱདེཏི, ཏསྶ མཱུལཱཡ པཊིཀསྶནེན ཏེ པརིཝུཏྠདིཝསེ ཙ མཱནཏྟཙིཎྞདིཝསེ ཙ ཨོདྷུནིཏྭཱ མཀྑེཏྭཱ པུརིམཱཡ ཨཱཔཏྟིཡཱ མཱུལདིཝསཔརིཙྪེདེ པཙྪཱ ཨཱཔནྣཾ ཨཱཔཏྟིཾ སམོདཧིཏྭཱ པུན ཨཱདིཏོ པཊྛཱཡ དཱཏབྦཔརིཝཱསོ ཨོདྷཱནསམོདྷཱནོ ནཱམ. སཙེ ཀསྶཙི ཨེཀཱཔཏྟི ཨེཀཱཧཔྤཊིཙྪནྣཱ, དྭཱིཧཔྤཊིཙྪནྣཱ, ཨེཝཾ ཡཱཝ དསཱཧཔྤཊིཙྪནྣཱ, ཏཱསཾ ཨགྒྷེན སམོདྷཱཡ ཏཱསཾ དསཱཧཔྤཊིཙྪནྣཝསེན ཨཝསེསཱནཾ ཨེཀཱཧཔྤཊིཙྪནྣཱདཱིནམྤི དཱཏབྦཔརིཝཱསོ ཨགྒྷསམོདྷཱནོ ནཱམ. ཡོ པན ནཱནཱཝཏྠུཀཱ ཨཱཔཏྟིཡོ ཨེཀཏོ ཀཏྭཱ དཱཏབྦཔརིཝཱསོ མིསྶཀསམོདྷཱནོ ནཱམ. དཱནཝིདྷི པན སབྦཏྠ ཁནྡྷཀེ (ཙཱུལ༹ཝ. ༡༣༤ ཨཱདཡོ) ཨཱགཏནཡེནེཝ ཝེདིཏབྦོ.

ཨེཝཾ པརིཝུཏྠཔརིཝཱསོ བྷིཀྑུ མཱནཏྟཾ བྷིཀྑཱུནཾ མཱནནབྷཱཝཾ ཚ རཏྟིཡོ ཨཁཎྜཾ ཀཏྭཱ ཙརེཡྻ ཀརེཡྻ, སམྤཱདེཡྻཱཏི ཝུཏྟཾ ཧོཏི. ཏཏྠ སངྒྷེན གཎེན པུགྒལེན ཀཏཾ ཏེན བྷིཀྑུནཱ སངྒྷམཛ྄ཛྷེ ཝཏྟཾ སམཱདཱཔེཏྭཱ ‘‘ཨཧཾ, བྷནྟེ, སམྦཧུལཱ ཨཱཔཏྟིཡོ ཨཱཔཛྫི’’ནྟིཨཱདིནཱ ཁནྡྷཀེ ཝུཏྟནཡེན ཡཱཙཱཔེཏྭཱ ཏཏྠེཝ ཝུཏྟནཡེན མཱནཏྟདཱནཱདཡོཔི ཝེདིཏབྦཱ. ཨིམིནཱཔི ཝཏྟཾ ནིཀྑིཔིཏུཀཱམེན ཙེ ཝཏྟཾ ནིཀྑིཔིཏྭཱ ཙཏཱུཧི པཉྩཧི སདྡྷིཾ པརིཝཱསེ ཝུཏྟཔྤཀཱརཾ པདེསཾ གནྟྭཱ པུརིམནཡེནེཝ ཧེཊྛཱ ཝུཏྟཾ སཧཝཱསཱདིཾ ཨནྟམསོ ཙཏཱུཧི ཨཱུནཏྟཱ ཨཱུནེ གཎེ ཙརཎདོསཉྩ ཝཛྫེཏྭཱ པཊིཔཛྫིཏབྦཾ. ཨཔྤཊིཙྪནྣཱཔཏྟིཀསྶ པན པརིཝཱསཾ ཨདཏྭཱ མཱནཏྟམེཝ དཱཏབྦཾ. ཨེཝཾ ཙིཎྞཾ ཀཏཾ པརིནིཊྛཱཔིཏཾ མཱནཏྟཾ ཡེན ¶ , ཏཾ བྷིཀྑུཾ. ཝཱིསཏི སངྒྷོ གཎོ ཨསྶཱཏི ཝཱིསཏཱིགཎོ དཱིགྷཾ ཀཏྭཱ, སོ སངྒྷོ ཨབྦྷེཡྻ སམྤཊིཙྪེཡྻ, ཨབྦྷཱནཀམྨཝསེན ཨོསཱརེཡྻཱཏི ཝུཏྟཾ ཧོཏི, ཨཝ྄ཧེཡྻཱཏི ཝཱ ཨཏྠོ. ཨེཏྠཱཔི སམཱདཱནཨཱརོཙནཡཱཙནཱནི, ཀམྨཝཱཙཱ ཙ ཁནྡྷཀེ ཝུཏྟནཡེན ཝེདིཏབྦཱ.

༢༩. ཨེཝཾ ¶ ཏེསུ པཊིཔཛྫིཏབྦཱཀཱརཾ དསྶེཏྭཱ ཨིདཱནི ཚཱདནསྶ ཨངྒཱནི དསྶེཏུཾ ‘‘ཨཱཔཏྟཱི’’ཏིཨཱདིམཱཧ. ཏཏྠ ན ཨུཀྑིཏྟོ ཨནུཀྑིཏྟོ, ནཏྠི ཨནྟརཱཡོ ཨསྶཱཏི ཨནནྟརཱཡོ. སཀཏྠེ ཏྟཔཙྩཡཝསེན ཝཱ, པཧུནོ བྷཱཝོ པཧུཏྟཾ, ཏཾ ཨསྶཏྠཱིཏི སདྡྷཱདིཝསེན ཝཱ པཧུཏྟོ. ཨནུཀྑིཏྟོ ཙ ཨནནྟརཱཡོ ཙ པཧུཏྟོ ཙཱཏི དྭནྡོ, ཏེསཾ བྷཱཝོ ཨནུཀྑིཏྟཱདིགུཎོ ཨནུཀྑིཏྟ…པེ… པཧུཏྟཏཱ. ཨཱཔཏྟི ཙ ཨནུཀྑིཏྟ…པེ… པཧུཏྟཏཱ ཙ ཨཱཔཏྟི…པེ… པཧུཏྟཏཱཡོ. མ-ཀཱརོ པདསནྡྷིཛོ. ཏཐཱ ཏེན པཀཱརེན ཨཱཔཏྟིཨཱདཱིསུ ཙཏཱུསུ ཨཱཔཏྟཱདིཔཀཱརེན སཉྙཱི ཏཐསཉྙཱི རསྶཝསེན. ཏསྶ བྷཱཝོ ཏཐསཉྙིཏཱ, ཡཐཱཝུཏྟཨཱཔཏྟཱདིསཉྙིཏཱཏི ཝུཏྟཾ ཧོཏི. ཙ-ཀཱརོ ཝུཏྟསམུཙྩཡཏྠོ. ཀམནཾ པཏྠནཾ ཀཱམོ, ཚཱདེཏུཾ ཀཱམོ ཚཱདེཏུཀཱམོ. ཨིཏི ཡཐཱཝུཏྟཱ ནཝ, ཨཐ ཚཱདནཱ ཙཱཏི ཨེཝཾ དས ཙ ཏཱནི ཨངྒཱནི ཙཱཏི, ཏེཧི. ཨརུཎུགྒམམྷི ཨརུཎསངྑཱཏསྶ པཋམབཱལསཱུརིཡརཾསིནོ ཨུགྒམནེ སཏི ཚནྣཱ ཧོཏི, ཨཱཔཏྟཱིཏི སེསོ.

ཏཏྠཱཡམདྷིཔྤཱཡོ – ཡོ བྷིཀྑུ རཱཛཙོརཨགྒིཨུདཀམནུསྶཨམནུསྶཝཱལ༹སརཱིསཔཛཱིཝིཏབྲཧྨཙརིཡནྟརཱཡཱནཾ དསནྣམེཀསྶཱཔི ནཏྠིཏཱཡ ཨནནྟརཱཡིཀོ སམཱནོ ཨནནྟརཱཡིཀསཉྙཱི ཧུཏྭཱ བྷིཀྑུནོ སནྟིཀཾ གནྟུཉྩེཝ ཨཱརོཙེཏུཉྩ སཀྐུཎེཡྻཏཱཡ ¶ པཧུ སམཱནོ པཧུསཉྙཱི ཧུཏྭཱ ཏིཝིདྷཨུཀྑེཔནཱིཡཀམྨཱཀརཎེན ཨནུཀྑིཏྟོ སམཱནོ ཨནུཀྑིཏྟསཉྙཱི ཧུཏྭཱ གརུཀཱཔཏྟཱིཏི སཉྙཱི གརུཀཾཡེཝ ཨཱཔཏྟིཾ ཚཱདེཏུཀཱམོ ཧུཏྭཱ ཚཱདེཏི, ཏསྶཱཡཾ ཨཱཔཏྟི ཙ ཚནྣཱ ཧོཏཱིཏི. སཙེ པནེཏྠ ཨནཱཔཏྟིསཉྙཱི ཝཱ ཧོཏི ཨཉྙཱཔཏྟིཀྑནྡྷསཉྙཱི ཝཱ ཝེམཏིཀོ ཝཱ, ཨཙྪནྣཱ ཧོནྟི. ཨཱརོཙེནྟེན པན ‘‘མམ ཨེཀཱཔཏྟིཾ ཨཱཔནྣབྷཱཝཾ ཛཱནཱཧཱི’’ཏིཨཱདིནཱ ནཡེན ཨཱརོཙེཏབྦཾ. སཙེ པན ཝཏྠུསབྷཱགཱཔཏྟིཀསྶ ཨཱརོཙེཏི, ཏཱཝ ཏཔྤཙྩཡཱ དུཀྐཊཾ ཨཱཔཛྫཏི.

སངྒྷཱདིསེསནིདྡེསཝཎྞནཱ ནིཊྛིཏཱ.

༣༠. ‘‘ཁོམཉྩ ¶ ཀོསེཡྻཉྩཱ’’ཏིཨཱདིནཱ ནཔུཾསཀཝིགྒཧེན དྭནྡེ ཀཏེ ཁོམ…པེ… བྷངྒཱནི. ཏཏྠ ཁོམནྟི གཙྪཛཱཏི. ཨུཔཙཱརཏོ པན ཁོམེན ཁོམསུཏྟེན ཝཱཡིཏནྟི ཏདྡྷིཏེན ཨུཔཙཱརེན ཝཱ ཁོམཾ ཁོམཔཊཙཱིཝརཾ, ཏཐཱ ཨཝསེསཱནི. སཱཎཾ སཱཎཝཱཀསུཏྟེཧི ཝཱཡིཏཾ ཙཱིཝརཾ. བྷངྒཾ ཁོམསུཏྟཱདཱིནི སབྦཱནི ཨེཀཙྩཱནི ཝཱ ཝོམིསྶེཏྭཱ ཝཱཡིཏཙཱིཝརཾ. ཝཱཀམཡམེཝ ཝཱཏི ཀེཙི. ཀམྦལནྟི མནུསྶལོམཾ ཝཱལ༹ལོམཉྩ ཋཔེཏྭཱ སེསལོམེཧི ཝཱཡིཏཾ. ཨེཏཱནཱིཏི ཁོམཱདཱིནི ཡཐཱཝུཏྟཱནི. སཧ ཨནུལོམེཧཱིཏི སཱནུལོམཱནི. ཛཱཏིཏོ ཀཔྤིཡཱནི ཚ ཙཱིཝརཱནི བྷཝནྟི.

༣༡. ཨིདཱནི ‘‘དུཀཱུལ’’ནྟིཨཱདིནཱ ཏེསཾ ཨནུལོམཱནི དསྶེཏི. ཏཏྠ དུཀཱུལནྟི དུཀཱུལསངྑཱཏེན ཀེནཙི ཝཱཀཝིསེསེན ཝཱཡིཏཾ ཙཱིཝརཾ. ཙེཝཱཏི སམུཙྩཡེ, སོ ཨུཔརི ཨཱཀཌྜྷིཏབྦོ. པཊྚུཎྞནྟི པཊྚུཎྞེསུ ཛཱཏཾ པཊྚུཎྞཾ. དེསཝཱཙིནོ ¶ བཧུཝཙནནྟཱཏི བཧུཝཙནེན ཝིགྒཧོ. ཏཐཱ སོམཱརཱ ཙ ཙཱིནཱ ཙ, ཏེསུ ཛཱཏཾ སོམཱརཙཱིནཛཾ. ཨིམཱནི ཏཱིཎི པཱཎཀེཧི ཀཏསུཏྟམཡཱནི. ཨེཧིབྷིཀྑཱུནཾ པུཉྙིདྡྷིཡཱ ཛཱཏཾ ཨིདྡྷིཛཾ, ཏཾ པན ཁོམཱདཱིནཾ ཨཉྙཏརཾ. དེཝདིནྣནྟི དེཝེཧི དིནྣཾ ཀཔྤརུཀྑེ ནིབྦཏྟཾ ཙཱིཝརཾ. ཏདེཏཾ དུཀཱུལཱདི ཏསྶ ཏསྶ ཡཐཱཝུཏྟསྶ ཁོམཱདིནོ ཨནུལོམིཀཾ ཧོཏི. ཏཏྠ ལོམཱནི ཨནུགཏཾ ཨནུལོམཾ, ཡཐཱ སེསལོམཱནི ཨནུགཏཾ ལོམཾ ཏདནུཀཱུལཏྟཱ ‘‘ཨནུལོམ’’ནྟི ཝུཙྩཏི, ཏཐཱ ཏཾཛཱཏིཡཀཾ ཡེསཾ ཀེསཉྩི ཨནུཀཱུལཾ སབྦམྤི རུལ༹ྷཱིཝསེན ‘‘ཨནུལོམ’’ནྟི ཝུཙྩཏི. ཏམེཝ ཨནུལོམིཀཾ, ཨནུཀཱུལནྟི ཨཏྠོ. ཀཐཾ? དུཀཱུལཾ སཱཎསྶ ཨནུལོམཾ, པཊྚུཎྞཱདཱིནི ཏཱིཎི ཀོསེཡྻསྶ ཨནུལོམཱནི, ཨིདྡྷིཛཾ དེཝདིནྣཉྩ ཁོམཱདཱིནམནུལོམནྟི.

༣༢-༣. ཨེཝཾ སཱནུལོམཱནི ཙཱིཝརཱནི དསྶེཏྭཱ ཨིདཱནི ཨདྷིཊྛཱནཱདིཀཾ དསྶེཏུཾ ‘‘ཏིཙཱིཝར’’ནྟིཨཱདིམཱཧ. ཏཏྠ ཨཝུཏྟེཔི ཨཝསྶཾ ཝཏྟབྦཏཱཡ སབྦཏྠ ཙ-སདྡོ ཨཛ྄ཛྷཱཧརིཏབྦོ, ཏིཙཱིཝརཉྩ…པེ… ཀཎྜུཙྪཱདིཉྩ ཨདྷིཊྛེཡྻ ན ཝིཀཔྤེཡྻཱཏི སམྦནྡྷོ. ཏཏྠ ཏིཎྞཾ ཙཱིཝརཱནཾ སམཱཧཱརོ ཏིཙཱིཝརཾ. པརིཀྑཱརཉྩ ཏཾ ཙོལ༹ཉྩཱཏི པརིཀྑཱརཙོལ༹ཾ. ཝསྶསྶ ཡོགྒཱ ཝསྶིཀཱ, སཱཝ སཱཊིཀཱ ཝསྶིཀསཱཊིཀཱ. པུཉྪཏི ཨནེནཱཏི པུཉྪནཾ, མུཁསྶ པུཉྪནཾ མུཁཔུཉྪནཾ. ནིསཱིདནྟི ཨེཏྠཱཏི ནིསཱིདནཾ, མུཁཔུཉྪནཉྩ ནིསཱིདནཉྩ མུཁཔུཉྪནནིསཱིདནཾ ¶ . སཡནསུཁཱདིཾ པཊིཙྩ ཨཏྠརཱིཡཏཱིཏི པཙྩཏྠརཎཾ, ཏདེཝ པཙྩཏྠརཎཀཾ. ཀཎྜུཾ ཚཱདེཏཱིཏི ཀཎྜུཙྪཱདི. ཨདྷིཊྛཧེཏི ‘‘ཨིམཾ སངྒྷཱཊིཾ ཨདྷིཊྛཱམཱི’’ཏིཨཱདིནཱ ནཝནྣཾ ནཱམཾ གཧེཏྭཱ ཨདྷིཊྛེཡྻ. ན ཝིཀཔྤེཡྻཱཏི ཏསྶ ཏསྶ ནཱམཾ གཧེཏྭཱ ན ཝིཀཔྤེཡྻ, ཏསྶ ཏསྶ པན ནཱམཾ ཨགྒཧེཏྭཱ ‘‘ཨིམཾ ཙཱིཝརཾ ཏུཡ྄ཧཾ ཝིཀཔྤེམཱི’’ཏི ཝིཀཔྤེཡྻཱཏི ཨདྷིཔྤཱཡོ. ཨེཏྠཱཏི ཨིམེསུ ནཝསུ ¶ ཙཱིཝརེསུ. ཏིཙཱིཝརནྟི ཏིཙཱིཝརནཱམེན ཨདྷིཊྛིཏཾ. ཏཐཱ ཧི ཨདྷིཊྛཱནཏོ པུབྦེ ཝིསུཾ ཏིཙཱིཝརཾ ནཱམ ནཏྠི སངྒྷཱཊིཨཱདིཔྤཧོནཀསྶ པཙྩཏྠརཎཱདིཝསེནཱཔི ཨདྷིཊྛཱཏུཾ ཨནུཉྙཱཏཏྟཱ. ཏཾ ཝིནཱ ཨེཀཱཧཾ ཨེཀདིཝསམྤི. ན ཝསེཡྻཱཏི ཨལདྡྷསམྨུཏིཀོ བྷིཀྑུ ཨཝིཔྤཝཱསསཱིམཏོ ཨཉྙཏྠ ཝཱསཾ ན ཀརེཡྻཱཏི ཨཏྠོ. ཨེཝཾ སཏི ཏིཙཱིཝརཉྩ ནིསྶཛྫིཏབྦཾ ཧོཏི, པཱཙིཏྟིཡཉྩ ཨཱཔཏྟིཾ ཨཱཔཛྫཏཱིཏི དཱིཔེཏི. ནིསཱིདནཾ ཝིནཱ ཙཱཏུམཱསཾ ན ཝསེཡྻཱཏི སམྦནྡྷོ. ཙཏུནྣཾ མཱསཱནཾ སམཱཧཱརོ ཙཏུམཱསཾ, ཏམེཝ ཙཱཏུམཱསཾ. ཏཾ ཨཙྩནྟསཾཡོགཝསེན.

༣༤. ཨིདཱནི ‘‘ཨིམ’’ནྟིཨཱདིནཱ ‘‘ཨདྷིཊྛེཡྻཱ’’ཏི ཝུཏྟམདྷིཊྛཱནཾ དསྶེཏི. སངྒྷཱཊིཾ ‘‘ཨིམཾ སངྒྷཱཊིཾ ཨདྷིཊྛཱམཱི’’ཏི ཨདྷིཊྛཧེཏི སམྦནྡྷོ. ཏཏྠ ཨདྷིཊྛཧེཏི ཧཏྠཔཱསེ ཋིཏཾ ཨེཝཾ ཨདྷིཊྛེཡྻ. ཨཧཏྠཔཱསནྟི ཧཏྠསྶ པཱསོ སམཱིཔོ ཧཏྠཔཱསོ, ཨཌྜྷཏེཡྻཧཏྠབྦྷནྟརོ. དྭཱདསཧཏྠབྦྷནྟརོཏིཔི ཝདནྟི. ནཏྠི ཧཏྠཔཱསོ ཨེཏིསྶཱཏི ཨཧཏྠཔཱསཱ, ཏཾ ཨེཏནྟི ཨདྷིཊྛཧེཏི སམྦནྡྷོ. ཀིཾ ཝུཏྟཾ ཧོཏི? ཨནྟོགབྦྷེ ཝཱ ཨུཔརིཔཱསཱདེ ཝཱ ཏདཧེཝ གནྟྭཱ ནིཝཏྟནཡོགྒེ པདེསེ ཝཱ ཋིཏཾ ཙཱིཝརཾ སལླཀྑེཏྭཱ ‘‘ཨེཏཾ སངྒྷཱཊིཾ ཨདྷིཊྛཱམཱི’’ཏི ཨདྷིཊྛེཡྻཱཏི ཝུཏྟཾ ཧོཏི. ཏཏོ དཱུརེ ཋིཏམྤི ཨདྷིཊྛཱཏབྦནྟིཔི ཝདནྟི. སེསེསུཔཱིཏི ཨུཏྟརཱསངྒཱདིཀཎྜུཔྤཊིཙྪཱདིཔརིཡནྟེསུཔི ཨཝསེསཙཱིཝརེསུ. ཨཡཾ ནཡོཏི ཨཡམེཝ ནཡོ. ཡཐཱ སངྒྷཱཊིཡཱ, ཨེཝཾ ‘‘ཨིམཾ ཨུཏྟརཱསངྒཾ ཨདྷིཊྛཱམཱི’’ཏིཨཱདི ཝུཏྟནཡོཝཱཏི ཝུཏྟཾ ཧོཏི. ཨདྷིཊྛཧནྟེན པན ཧཏྠེན གཧེཏྭཱ ཀཱཡཝིཀཱརཾ ཀརོནྟེན ‘‘ཨིམཾ སངྒྷཱཊིཾ ཨདྷིཊྛཱམཱི’’ཏི ཙིཏྟེན ཨཱབྷོགཾ ཀཏྭཱ ཀཱཡེན ཝཱ ཨདྷིཊྛཱཏབྦཾ, ཝཙཱིབྷེདམཏྟཾ ཀཏྭཱ ཝཱཙཱཡ ཝཱ. པརིཀྑཱརཙོལ༹ཾ ནཱམ པཱཊེཀྐཾ ནིདྷཱནམུཁནྟི ཏིཙཱིཝརཾ པརིཀྑཱརཙོལ༹མྤི ཨདྷིཊྛཱཏུཾ ཝཊྚཏཱིཏི.

༣༥. ཨིདཱནི ¶ ཨེཝཾ ཨདྷིཊྛཧཏོ ཨཉྙཾ ལདྡྷཱ ཨདྷིཊྛཱཏུཀཱམེན པཙྩུདྡྷརིཏྭཱ ཨདྷིཊྛཱཏབྦནྟི དསྶེཏུཾ ‘‘ཨདྷིཊྛཧནྟོ’’ཏིཨཱདིམཱཧ. ཏཏྠ སངྒྷཱཊི པབྷུཏི ཨཱདི ཡསྶ ཏཾ སངྒྷཱཊིཔྤབྷུཏི. ཨེཏཾ ‘‘ཨདྷིཊྛཧནྟོ’’ཏི ཨེཏྠཱཔི ‘‘ཨདྷིཊྛེཡྻཱ’’ཏི ཨེཏྠཱཔི ཀམྨཔདཾ, ‘‘པུབྦཙཱིཝར’’ནྟི ¶ ཨེཏྠ པན ཝིསེསནཾ ཧུཏྭཱ ཏིཊྛཏི. པཙྩུདྡྷརིཏྭཱཏི པརིཙྩཛིཏྭཱ. པརིཀྑཱརཙོལ༹ནཱམེན ཨདྷིཊྛཧིཏྭཱ ཋཔིཏཝཏྠེཧི སངྒྷཱཊིཨཱདཱིནི ཀརོཏི, ནིཊྛིཏེ རཛནེ ཙ ཀཔྤེ ཙ ཨིམཾ པརིཀྑཱརཙོལ༹ཾ པཙྩུདྡྷརིཏྭཱ པུན ཨདྷིཊྛཱཏབྦཱནི. པཏྟཱདྷིཊྛཧནེཏི པཏྟསྶ ཨདྷིཊྛཱནེ. ཏཐཱཏི ཙ ཡཐཱ ཙཱིཝརེ, ཏཐཱ པཏྟེཔི ཨདྷིཊྛཱནཱདིཀཾ སབྦནྟི ཨཏྠོ. ཨེཏྠ པན ‘‘ཨིམཾ པཏྟཾ, ཨེཏཾ པཏྟ’’ནྟི ཝཱ ཝིསེསོ.

༣༦. ཨིདཱནི པཙྩུདྡྷཱརཝིདྷིཾ དསྶེཏུཾ ‘‘ཨེཏ’’ནྟིཨཱདིམཱཧ. ཏཏྠ ཨིམཾ ཝ ཨིཏི ཝཱ-སདྡོ རསྶཾ ཀཏྭཱ ནིདྡིཊྛོ, སོ ཨིཏི-སདྡཏོ པརཾ ཡོཛེཏབྦོ, ཏསྨཱ ‘‘ཨེཏཾ སངྒྷཱཊིཾ པཙྩུདྡྷརཱམཱི’’ཏི ཝཱ ‘‘ཨིམཾ སངྒྷཱཊིཾ པཙྩུདྡྷརཱམཱི’’ཏི ཝཱ སཾསེཏི སམྦནྡྷོ ཝེདིཏབྦོ. སཾསེཏི ཝདེཡྻ. ཨེཝནྟི ཡཐཱ ནཱམེན སངྒྷཱཊི པཙྩུདྡྷརིཏབྦཱ, ཏཐཱ ཨུཏྟརཱསངྒཱདཱིནཱིཏི ཨཏྠོ. ཝིདཱུཏི པཙྩུདྡྷརེཏིམསྶ ཀཏྟུཔདཾ, པཉྙཝཱཏི ཨཏྠོ. སབྦཏྠཱཔི དཱུརཱསནྣཏཱདཱི ཝུཏྟནཡེན ཝེདིཏབྦཱ.

༣༧-༨. ཨིདཱནི སངྒྷཱཊིཨཱདཱིནཾ ཚནྣཾ པམཱཎཔརིཙྪེདཾ དསྶེཏི ‘‘སངྒྷཱཊཱི’’ཏིཨཱདིནཱ. པཙྪིམོ ཨནྟོ པཙྪིམནྟོ, ཏེན, པཙྪིམཀོཊིཡཱཏི ཨཏྠོ. དཱིགྷསོཏི དཱིགྷཏོ. མུཊྛིཡཱ སཧིཏཾ པཉྩཀཾ ཡསྶཱ སཱ མུཊྛིཔཉྩཀཱ, ལིངྒཝིཔལླཱསཝསེན པན མུཊྛིཔཉྩཀོ. མུཊྛི-སདྡེནེཏྠ ཨུཔཙཱརཝསེན ཀཏམུཊྛིཀོ ཧཏྠོཝ ཝུཏྟོ. སུགཏསྶ ཙཱིཝརཏོ ཨཱུནཱཏི སམཱསོ. ཨཔཱིཏི ཝུཏྟསམུཙྩཡེ, ཏེན ¶ ཡཐཱཝུཏྟཔཙྪིམཔྤམཱཎཱ ཙ ཨཡཉྩ ཨུཏྟམཔྤམཱཎཱཏི ཨཏྠོ. ‘‘པཙྪིམནྟེནཱ’’ཏི ཨིདཾ མུཊྛིཏྟིཀཉྩ ཏིརིཡནྟི ཨེཏྠཱཔི ཨནུཝཏྟེཏྭཱ ཨཏྠོ ཝེདིཏབྦོ. ཙ-སདྡོ ‘‘ཨུཏྟམནྟེན སུགཏཙཱིཝརཱུནཱཔི ཝཊྚཏཱི’’ཏི ཨིདཾ སམུཙྩིནོཏི. ཏཏྠ ཨིདཱནི མཛ྄ཛྷིམསྶ པུརིསསྶ ཏིསྶོ ཝིདཏྠིཡོ ཨེཀཱ སུགཏཝིདཏྠི, ཏཱཡ ཝིདཏྠིཡཱ ནཝ ཝིདཏྠིཡོ དཱིགྷཏོ སུགཏཙཱིཝརཔྤམཱཎཾ, ཏིརིཡཾ ཚ ཝིདཏྠིཡོ, ཏཾ པན ཝཌྜྷཀིཧཏྠེན དཱིགྷཏོ ཏེརས ཧཏྠཱ ཨེཀཱ ཙ ཝིདཏྠི, ཏིརིཡཏོ ནཝ ཧཏྠཱ ཧོནྟི. ཏཾཝསེན ཨུབྷཡཏྠ ཨཱུནཏཱ ཝིཉྙཱཏབྦཱ.

ཨུཏྟརཱསངྒོཔི ཏཏྟཀོཝཱཏི དསྶེཏུཾ ‘‘ཏཐཱ ཨེཀཾསིཀསྶཔཱི’’ཏི ཨཱཧ. ཨེཀོ ཨཾསོ ཨེཀཾསོ, ཏཏྠ ཀཱཏབྦནྟི ཏདྡྷིཏེ ཨེཀཾསིཀཾ. ‘‘ཨནྟརཝཱསཀོ’’ཙྩཱདིནཱ ནིཝཱསནཾ དསྶེཏི. ཏཏྠ ཨནྟརཾ མཛ྄ཛྷཔདེསོ, ཨནྟརེ མཛ྄ཛྷེ ཀཊིཔྤདེསེ ཝཱསོ ཝཏྠཾ ཨནྟརཝཱསོ, སོཡེཝ ཨནྟརཝཱསཀོ. ཙཱཔཱིཏི སམུདཱཡོ, ཨེཀོ ཝཱ སམུཙྩཡོ. ཨཌྜྷེན ཏཏིཡོ བྷཱགོ ཨཌྜྷཏེཡྻོ. ཨེཏྠ དྭིནྣཾ ཧཏྠཀོཊྛཱསཱནཾ སམྤུཎྞཱནཾ ཏཏིཡཀོཊྛཱསསཾསིཛ྄ཛྷནེ ཀརཎབྷཱུཏཱ ཨཌྜྷ-སདྡནིདྡིཊྛཱ ཡཱ ཝིདཏྠི ¶ , སཱཝ ཏཏིཡོཏི ནིདྡིཊྛོཏི ཨུཔཌྜྷཧཏྠསངྑཱཏོ ཏཏིཡོ བྷཱགོ ཨཌྜྷཏེཡྻོ. སོ ཙ ནཱནནྟརེན དྭིཧཏྠཏཏིཡཏཱ ལབྦྷཏཱིཏི དྭེ ཧཏྠཱ, ཨེཀཱ ཙ ཝིདཏྠི ཨཌྜྷཏེཡྻོ. ཏཾསནྣིཡོགེན པནེཏྠ ཨནྟརཝཱསཀོཝ ཨཌྜྷཏེཡྻོཏི ཝེདིཏབྦོ. དྭེ ཧཏྠཱ ཡསྶཱཏི བཱཧིརཏྠསམཱསོ. པཱརུཔནེནཱཔི སཀྐཱ ནཱབྷིཾ པཊིཙྪཱདེཏུནྟི ‘‘དྭིཧཏྠོ’’ཏི ཝུཏྟཾ. ཝཱ-སདྡོ ཨཌྜྷཏེཡྻཾ ཝིཀཔྤེཏི. ཏིརིཡསྶ ཨནྟོཏི ཚཊྛཱིཏཔྤུརིསོ, ཏིརིཡམེཝ ཨནྟོཏི ཝཱ ཀམྨདྷཱརཡོ ‘‘གཱམནྟོ’’ཏིཨཱདཱིསུ ཝིཡ.

༣༩. ‘‘ནིསཱིདནསྶཱ’’ཏིཨཱདིནཱ ¶ ནིསཱིདནཙཱིཝརཾ དསྶེཏི. ཨེཏྠ ནིསཱིདནཾ ནཱམ སམེ བྷཱུམིབྷཱགེ ཨེལ༹ཀལོམཱནི ཨུཔརཱུཔརི སནྠརིཏྭཱ ཀཉྫིཀཱདཱིཧི སིཉྩིཏྭཱ ཀཏོ དྭཱིསུ ཋཱནེསུ ཕཱལིཏཏྟཱ ཏཱིཧི དསཱཧི ཡུཏྟོ པརིཀྑཱརཝིསེསོ. ཝིདཏྠཱི དྭེཏི དྭེ ཝིདཏྠཱི. ཝིསཱལཏོ པུཐུལཏོ.

༤༠. ‘‘ཀཎྜུཔྤཊིཙྪཱདཱི’’ཏིཨཱདིནཱ ཀཎྜུཔྤཊིཙྪཱདིཾ དསྶེཏི. ཏཏྠ ཀཎྜཱུཏི ཧི ན ཨཏྠཏོ ནཱནཾ, ཏགྒཧཎེན པནེཏྠ པིལ༹ཀསྶཱཝཐུལླཀཙྪཱབཱདྷཾ གཡ྄ཧཏི. ཀཎྜུཾ ཡཐཱཝུཏྟཾ པིལ༹ཀཱདིཾ པཊིཙྪཱདེཏཱིཏི ཀཎྜུཔྤཊིཙྪཱདི. པཊིཙྪདནཾ ཝཱ པཊིཙྪཱདོ, ཡཐཱཝུཏྟཀཎྜུཡཱ པཊིཙྪཱདོ ཀཎྜུཔྤཊིཙྪཱདོ, སོ ཨསྶ ཨཏྠཱིཏི ཀཎྜུཔྤཊིཙྪཱདཱི, ཏསྶ. ཏིརིཡནྟི ཏིརིཡཏོ.

༤༡. ‘‘ཝསྶིཀཱ’’ཏིཨཱདིནཱ ཝསྶིཀསཱཊིཀཾ དསྶེཏི, ཏཾ སུཝིཉྙེཡྻཾ.

༤༢. ཨེཝཾ པམཱཎཝནྟཱནཾ པམཱཎཾ དསྶེཏྭཱ ཝུཏྟཔྤམཱཎཱཏིཀྐམེ དོསཾ, ཀེསཉྩི པམཱཎཱབྷཱཝགཎནཱབྷཱཝཉྩ དསྶེཏུཾ ‘‘ཨེཏྠཱ’’ཏིཨཱདིམཱཧ. ཏཏྠ ཨེཏྠཱཏི ཝུཏྟཔྤམཱཎཝནྟེསུ ཙཱིཝརེསུ. ཏདུཏྟརི ཏཏོ ཝུཏྟཔྤམཱཎཏོ ཨུཏྟརི ནིཔཱཏེན ཨུཏྟརི-སདྡེན ཏཔྤུརིསོ. ཀརོནྟསྶ སམྤཱདེནྟསྶ. ཚེདནཔཱཙིཏྟཱིཏི ཚེདནེན སཧིཏཱ པཱཙིཏྟི, ཨཏིརེཀཾ ཚིནྡིཏྭཱ པཱཙིཏྟིཡཾ དེསེཏབྦནྟི ཝུཏྟཾ ཧོཏི. ཝུཏྟཔྤམཱཎཏོ པན ཨཏིརེཀཉྩ ཨཱུནཀཉྩ ‘‘པརིཀྑཱརཙོལ༹’’ནྟི ཨདྷིཊྛཱཏབྦཾ. ཡེན མུཁཾ པུཉྪནྟི, ཏཾ མུཁསམྦནྡྷཱིཏི མུཁསྶ ཙོལ༹ནྟི སམཱསེ དྭནྡོ. ཨཱཀངྑིཏཾ ཨིཙྪིཏཾ པམཱཎནྟི ཀམྨདྷཱརཡོ. ཏམེཏེསམཏྠཱིཏི ཨཱཀངྑིཏཔྤམཱཎིཀཱ. ཨེཏྠ ཙ ཏིཙཱིཝརཱདཱིསུ ཨཝུཏྟེཔི གཎནཝིབྷཱགེ པཙྩཏྠརཎམུཁཔུཉྪནཔརིཀྑཱརཙོལེ༹ ཋཔེཏྭཱ ཨཱདིཏོ པཊྛཱཡ ¶ ¶ ཚཀྐམེཀེཀམེཝ ཝཊྚཏི. མུཁཔུཉྪནཙོལཱ༹ནི པཙྩཏྠརཎཱནི ཙ བཧཱུནིཔཱིཏི ཝིཉྙཱཏབྦཾ.

༤༣. གཎནཱཏི ཨེཏྠ ནཔུཾསཀསྶ ཨིཏྠིཝཙནེན ཡོགཱབྷཱཝཱ ‘‘ན དཱིཔིཏཱ’’ཏི ལིངྒཾ ཝིཔརིཎཱམེཏྭཱ སམྦནྡྷིཏབྦཾ, ཨཊྛཀཐཱཡཾ ན པཀཱསིཏཱཏི ཨཏྠོ. ཏིཎྞཾ པནེཏེསཾ ཨུཀྐཊྛཔརིཙྪེདཝསེནེཝ ཝུཏྟཾ, ཝིཀཔྤནཱུཔགཔཙྪིམེན པཙྪིམཔྤམཱཎཾ ཨཏྠིཡེཝ. ཨིདཱནི ཡསྨཱ ཏཏྠ ཏཾ སབྦཾ ན དཱིཔིཏཾ, ཏསྨཱ ཝིཀཔྤནཱུཔགཐཝིཀཱདི སབྦཾ ཨེཀཾ ‘‘པརིཀྑཱརཙོལ༹’’ནྟི, བཧཱུནི ཨེཀཏོ ཀཏྭཱ ‘‘པརིཀྑཱརཙོལཱ༹ནཱི’’ཏིཔི ཝཏྭཱ ཨདྷིཊྛཱཏབྦནྟི དསྶེནྟོ ‘‘ཏཐཱ’’ཏིཨཱདིམཱཧ. ཨིམིནཱ པརིཀྑཱརཙོལ༹ཾ ནཱམ པཱཊེཀྐཾ ནིདྷཱནམུཁནྟི དསྶེཏི. ཐཝིཀཱདིཾ ཐཝིཀཱ ཨཱདི ཡསྶ པརིསྶཱཝནཱདིནོཏི སམཱསོ. ཝིཀཔྤསྶ ཨུཔགཾ ཝིཀཔྤིཡཾ, ཏཉྩ ཨུཔརི ཝཀྑཏི.

༤༤. ཨིདཱནི ཏིཎྞཾ ཙཱིཝརཱནཾ པཊིབྷཱགཾ དསྶེཏུཾ ‘‘ཨཧཏཱ’’ཏིཨཱདི ཨཱརདྡྷཾ. ཏཏྠ ཨཧཏེན ནཝེན ཨདྷོཏེན ཀཔྤཾ སདིསཾ ཨཧཏཀཔྤཾ, ཨེཀཝཱརདྷོཏཾ. ཨཧཏཉྩ ཨཧཏཀཔྤཉྩ ཨཧཏཱཧཏཀཔྤཱནི, ཝཏྠཱནི, ཏེསཾ. དྭེ གུཎཱ པཊལཱནི ཡསྶ སཱཏི དུགུཎཱ. ‘‘གུཎོ པཊལརཱསཱིསཱུ’’ཏི ཧི ཨབྷིདྷཱནཔྤདཱིཔིཀཱ. དུགུཎཱ དུཔཊྚཱ, ཨུཏྟརསྨིཾ དེཧབྷཱགེ ཨཱསཉྫཱིཡཏཱིཏི ཨུཀྐརཱསངྒོ. ཨེཀཙྩཾ ཨེཀཔཊྚཾ ཨསྶ ཨཏྠཱིཏི ཨེཀཙྩཱི, ཨེཀཔཊྚོཏི ཨཏྠོ. ནིཔཱཏོ ཝཱ ཨེཀཙྩཱིཏི. ཏཐཱཏི སམུཙྩཡེ, ཨནྟརཝཱསཀོ ཙཱཏི ཝུཏྟཾ ཧོཏི. ཨུཔམཱཡཾ ཝཱ, ཡཐཱ ཨུཏྟརཱསངྒོ ཨེཀཙྩིཡོ, ཨེཝཾ ཨནྟརཝཱསཀོཏི ཨཏྠོ.

༤༥. ‘‘ཨུཏཱུ’’ཏི ཨནེཀཨུཏུ གཧིཏཱཏི ཨུཏུཏོ དཱིགྷཀཱལཏོ ཨུདྡྷཊཱ ཨུཏུདྡྷཊཱ, ཏེསཾ པིལོཏིཀཱནནྟི ཨཏྠོ. སེསཱཏི ཨུཏྟརཱསངྒཨནྟརཝཱསཀཱ. པཾསུ ཝིཡ ཀུཙྪིཏཾ ¶ ཨུལཏི པཝཏྟཏཱིཏི པཾསུཀཱུལཾ, རཐིཀཱསུསཱནསངྐཱརཀཱུཊཱདཱིནཾ ཡཏྠ ཀཏྠཙི ཋིཏཾ ཙོལ༹ཁཎྜཾ, ཏསྨིཾ. ཡཱ ཡཱ རུཙཱིཏི ཨབྱཡཱིབྷཱཝེ ཡཐཱརུཙི, ཡཱཝདཏྠཾ སཏཔཊྚམྤི ཝཊྚཏཱིཏི ཨདྷིཔྤཱཡོ.

༤༦. ཨིདཱནི ཏཱིསུ ཚིནྡིཏྭཱ ཀཱཏུཾ ཨཔྤཧོནྟེསུ ཀཱཏབྦཝིདྷིཾ དསྶེཏུཾ ‘‘ཏཱིསཱུ’’ཏིཨཱདིམཱཧ. ཏཏྠ ཏིཙཱིཝརསམུདཱཡཏོ ཨེཀདེསབྷཱུཏཱནཾ དྭིནྣམེཀསྶ ཙ སངྑཱགུཎེན ནིདྡྷཱརིཡམཱནཏྟཱ ཏཱིསཱུཏི ནིདྡྷཱརཎེ བྷུམྨཾ. ཨེཀཝཙནསྶ བཧྭཏྠེན ཡོགཱབྷཱཝཏོ དྭིཙཱིཝརསངྑཱཏབཧྭཏྠཝསེན ¶ ཝཙནཾ ཝིཔརིཎཱམེཏྭཱ ཡཱནི པཧོནྟི, ཏཱནི དྭེ ཝཱཔི ཚིནྡིཏབྦཱནི, ཡཾ པཧོཏི, ཏཾ ཨེཀཾ ཝཱ ཚིནྡིཏབྦནྟི ཡོཛེཏབྦཾ. པཧོནྟཱིཏི པཙྪིམཙཱིཝརཔྤམཱཎཚིནྣཀཱནི པཧོནྟི. ཨཔཱིཏི སམྦྷཱཝནེ, ཏཱིསུ ཀཱ ཀཐཱཏི ཨཏྠོ. ཨནྭཱདྷིནྟི ཨཱགནྟུཀཔཏྟཾ. ཨནུ པཙྪཱ ཨཱདྷཱིཡཏཱིཏི ཨནྭཱདྷི, ཡཾ ཙཱིཝརསྶོཔརི སངྒྷཱཊིཨཱཀཱརེན ཨཱརོཔེཏབྦཾ. ཨནཱདིཎྞནྟི ཨནཱརོཔིཏཾ ཨནྭཱདྷིཀཾ. ན དྷཱརེཡྻཱཏི ཨིམིནཱ ཡདི དྷཱརེཡྻ, དུཀྐཊནྟི དཱིཔེཏི.

༤༧-༨. ཨིདཱནི ‘‘ཏིཙཱིཝརཾ ན ཝསེཡྻ ཝིནེཀཱཧ’’ནྟི ཝུཏྟཱནཾ ཏིཎྞཾ ཨཝིཔྤཝཱསལཀྑཎཾ དསྶེཏུཾ ‘‘གཱམེ’’ཏིཨཱདིནཱ ཨུདོསིཏསིཀྑཱཔདེ (པཱརཱ. ༤༧༡ ཨཱདཡོ) ཝུཏྟཔརིཧཱརམཱཧ. ཏཏྠ གཱམེ ཝཱ…པེ… ཝིཧཱརེ ཝཱ ཏིཙཱིཝརཾ ནིཀྑིཔིཏྭཱཏི སམྦནྡྷོ. ཏཏྠ ‘‘པཊོ དཌྜྷོ’’ཏིཨཱདཱིསུ ཝིཡ ཨཝཡཝེཔི སམུདཱཡཝོཧཱརཝསེན ཏཱིསུ ཨེཀམྤི ‘‘ཏིཙཱིཝར’’ནྟི ཝུཏྟཾ. བྷིཀྑུསམྨུཏིཡཉྙཏྲཱཏི སངྒྷེན གིལཱནསྶ བྷིཀྑུནོ དཱིཡམཱནཾ ཙཱིཝརེན ཝིཔྤཝཱསསམྨུཏིཾ ཝིནཱ. ཝིཔྤཝཏྠུནྟི ཨེཀཱུཔཙཱརནཱནཱུཔཙཱརགཱམཱདིཏོ བཧི, ཨཐ ཝཱ ནིཝེསནཱདཱིནཾ, ཏཏྠ ཙ གབྦྷོཝརཀཱནཾ ཙཱིཝརསྶ ཝཱ ཧཏྠཔཱསཾ ཨཏིཀྐམྨ ཙཱིཝརེན ཝིཔྤཡུཏྟོ ¶ ཧུཏྭཱ ཝསིཏུཾ. ཨེཏྠ ཙ གཱམཱདཱིནཾ ཨེཀཱུཔཙཱརནཱནཱུཔཙཱརཏཱ ཨེཀཀུལནཱནཱཀུལསནྟཀསྶ གཱམཱདིནོ པརིཀྑེཔསྶ, པརིཀྑེཔོཀཱསསྶ ཙ ཝསེན སཏྠཨབྦྷོཀཱསཱནཾ སཏྟབྦྷནྟརཝསེན ཙ ཝེདིཏབྦཱ. ཏཏྠ ཨེཀོ ཨབྦྷནྟརོ ཨཊྛཝཱིསཏིཧཏྠོ ཧོཏི. ཨེཏྠ ཙ ནིཝེསནཱདཱིནི གཱམཏོ བཧི སནྣིཝིཊྛཱནཱིཏི དཊྛབྦཾ ཝིསུཾ གཱམསྶ གཧིཏཏྟཱ, ཏཐཱ ཨུདོསིཏཱདཱིཧི ཨཉྙཾ ནིཝེསནཾ.

ཏཏྠ ཨུདོསིཏོ ནཱམ ཡཱནཱདཱིནཾ བྷཎྜཱནཾ སཱལཱ. པཱསཱདོ དཱིགྷཔཱསཱདོ. ཧམྨིཡཾ མུཎྜཙྪདནཔཱསཱདོ. ནཱཝཱ ཙ ཨཊྚོ ཙ མཱལོ༹ ཙ ཨཱརཱམོ ཙ ནཱཝཱ…པེ… ཨཱརཱམཾ, ཏསྨིཾ. ཨཊྚོ ནཱམ པཊིརཱཛཱདཱིནཾ པཊིབཱཧནཏྠཾ ཨིཊྛཀཱཧི ཀཏོ བཧལབྷིཏྟིཀོ ཙཏུཔཉྩབྷཱུམིཀོ པཏིསྶཡཝིསེསོ. མཱལོ༹ ཨེཀཀཱུཊསངྒཧིཏོ ཙཏུརསྶཔཱསཱདོ. ཨཱརཱམོ པུཔྥཱརཱམོ ཝཱ ཕལཱརཱམོ ཝཱ. སཏྠོ ཙ ཁེཏྟཉྩ ཁལཉྩཱཏི དྭནྡོ. སཏྠོ ནཱམ ཛངྒྷསཏྠོ ཝཱ སཀཊསཏྠོ ཝཱ. ཁལཾ ཝུཙྩཏི དྷཉྙཀརཎཾ. དུམོ ནཱམ དུམམཱུལཾ ཚཱཡཱཡ ཕུཊྛོཀཱསོ ཨུཔཙཱརཝསེན. ཨབྦྷོཀཱསོ པན ཨགཱམཀེ ཨརཉྙེཝ ཨདྷིཔྤེཏོ.

༤༩. ཨིདཱནི ‘‘ཨེཏཾ…པེ… སངྒྷཱཊི’’ནྟིཨཱདིནཱ ནཝནྣམེཝ པཙྩུདྡྷཱརོ ཝུཏྟོ, ན པན ཏེསཾ ¶ ཀཱལཔརིཙྪེདོཏི ཏཾ དསྶེཏུཾ ‘‘རོགཱ’’ཏིཨཱདི ཨཱརདྡྷཾ. ཏཏྠ དེཝདཏྟོ དཏྟོཏི ནཱམེཀདེསེནཱཔི ནཱམཝོཧཱརཏོ ཝསྶིཀསཱཊིཀཱཝ ‘‘སཱཊིཀཱ’’ཏི པཀརཎཝསེན གམྨམཱནཏྠཏྟཱ ཝུཏྟཱ. ཀཎྜུཔྤཊིཙྪཱདིཀཱ ཙ རོགཝསྶཱནཔརིཡནྟཱ. རོགཱ ཙ ཝསྶཱནཱ ཙ མཱསཱ རོགཝསྶཱནཱ, ཏེ ཏདཏིཀྐམེན པཙྩུདྡྷརིཏབྦཏཱཡ པརིཡནྟཱ ཡཱསནྟི ཝིགྒཧོ.

ཀིཾ ཝུཏྟཾ ཧོཏི? ཝསྶིཀསཱཊིཀཱ ཝསྶཱནམཱསཱཏིཀྐམེ ཀཏྟིཀཔུཎྞམཱཡ ཨེཝ པཙྩུདྡྷརིཏབྦཱ. ཏཐཱ ཀཎྜུཔྤཊིཙྪཱདིཀཱ ¶ ཨཱབཱདྷེསུ ཝཱུཔསནྟེསཱུཏི ཝུཏྟཾ ཧོཏི. ‘‘པཙྩུདྡྷརིཏྭཱ ཝིཀཔྤེཏབྦཱ’’ཏི ཧི ཨཊྛཀཐཱཡཾ (པཱརཱ. ཨཊྛ. ༢.༤༦༩) ཝུཏྟཾ. ཨེཏྠ པན ཀེཙི ཨཱཙརིཡཱ ‘‘པཙྩུདྡྷརིཏྭཱཏི ཝསྶིཀསཱཊིཀབྷཱཝཏོ ཨཔནེཏྭཱ’’ཏི ཝདིཾསུ, ཏཾ ན ཡུཛྫཏི. པཙྩུདྡྷཱརཝིནཡཀམྨཝིསཡེཡེཝ པཙྩུདྡྷཱར-སདྡསྶ དིཊྛཏྟཱ, ‘‘ཙཱཏུམཱསཾ ཨདྷིཊྛཱཏུཾ ཏཏོ པརཾ ཝིཀཔྤེཏུ’’ནྟི (མཧཱཝ. ༣༥༨) པཱལི༹ཝཙནཏོ ཙ. ‘‘ཙཱཏུམཱསཾ ཨདྷིཊྛཱཏུ’’ནྟི ཙ ཙཏུནྣཾ མཱསཱནཾ ཨདྷིཊྛཱནེན སཧ ཨཙྩནྟསཾཡོགོ དསྶིཏོཏི ན ཏེན ཨདྷིཊྛཱནབྷེདོ ཝིཉྙཱཡཏི. ཏེནེཝ ཀུརུནྡཊྛཀཐཱཡམྤི ‘‘ཝསྶཱནཾ ཙཱཏུམཱསཾ ཨདྷིཊྛཱཏུཾ, ཏཏོ པརཾ ཝིཀཔྤེཏུ’’ནྟི (མཧཱཝ. ༣༥༨) ཝཙནཏོ ཀཏྟིཀཔུཎྞམཱཡ ཨེཝ པཙྩུདྡྷརིཏྭཱ ཧེམནྟེ ཝིཀཔྤེཏབྦཱཏི ཝུཏྟཾ. ཏསྨཱ ‘‘ཝསྶིཀསཱཊིཀཱ ཝསྶཱནམཱསཱཏིཀྐམེནཱཔི ཀཎྜུཔྤཊིཙྪཱདི ཨཱབཱདྷཝཱུཔསམེནཱཔི ཨདྷིཊྛཱནཾ ཝིཛཧཏཱི’’ཏི (ཀངྐཱ. ཨཊྛ. ཀཐིནསིཀྑཱཔདཝཎྞནཱ) ཝུཏྟཾ. མཱཏིཀཱཊྛཀཐཱཡམྤི པཙྩུདྡྷཱརཝསེནཱཔི ཨདྷིཊྛཱནཾ ཝིཛཧཏཱིཏི ཨེཝམཏྠོ གཧེཏབྦོ. ཨེཝཉྷི སཏི སབྦཊྛཀཐཱཡོ སམེནྟི, ཡུཏྟི ཙ ཨཝིརུདྡྷཱ ཧོནྟཱིཏི. ཏཏོ པརནྟི པཙྩུདྡྷཱརཏོ ཨུཔརི. ཝིཀཔྤེཡྻཱཏི ཀཎྜུཔྤཊིཙྪཱདིཾ པཙྩུདྡྷརིཏྭཱ ཝིཀཔྤེཡྻ. ཝསྶིཀསཱཊིཀཾ ཀཏྟིཀཔུཎྞམཱཡཾ པཙྩུདྡྷརིཏྭཱ ཧེམནྟསྶ པཋམདིཝསེ ཝིཀཔྤེཡྻ, ཨེཝཾ ཨསཏི དུཀྐཊནྟི ཨདྷིཔྤཱཡོ. སེསཱཏི ཨཔརེ སཏྟ ཙཱིཝརཱནི སེསཱ. ནཏྠི པརིཡནྟཾ ཝུཏྟསདིསོ ཀཱལཔརིཙྪེདོ ཨེཏེསནྟི ཨཔརིཡནྟིཀཱ.

༥༠. ཨིདཱནི པཙྩཏྠརཎཱདིཀཾ ཙཱིཝརཙཏུཀྐཾ སདསཱདིཀཾ ཝཊྚཏི, ནཱཔརནྟི དསྶེཏུཾ ‘‘པཙྩཏྠརཎཱ’’ཏིཨཱདིམཱཧ. ཏཏྠ པརིཀྑཱརོ ཙ མུཁཔུཉྪནཉྩཱཏི དྭནྡོ. པརིཀྑཱརམུཁཔུཉྪནམེཝ ཙོལ༹ཀནྟི ཀམྨདྷཱརཡོ. དྭནྡསམཱསནྟེ སུཡྻམཱནཏྟཱ པན ཙོལ༹ཀ-སདྡོ པརིཀྑཱར-སདྡཏོ ཙ པརཾ དཊྛབྦོ ¶ ‘‘པརིཀྑཱརཙོལ༹ཀ’’ནྟི. ཏཾ པན སཱམཉྙཛོཏནཱཡ ཝིསེསེཔི ཨཝཊྛཱནཏོ ཋཔེཏྭཱ པཉྩ ཙཱིཝརཱནི པརིཀྑཱརཙོལ༹ནཱམེནཱདྷིཊྛིཏཱནི ཨཝསེསཾ ¶ དཊྛབྦཾ. པཙྩཏྠརཎཉྩ པརིཀྑཱརམུཁཔུཉྪནཙོལ༹ཀཉྩ པཙྩཏྠརཎ…པེ… ཙོལ༹ཀཉྩ ནིསཱིདནཉྩཱཏི ཨེཏཾ ཙཱིཝརཙཏུཀྐཾ སདསམྤི ཨརཏྟམྤི ཨནཱདིཎྞཀཔྤམྤི ལབྦྷནྟི སམྦནྡྷོ. སདསནྟི སཧ ཡཱཧི ཀཱཧིཙི དསཱཧཱིཏི སདསཾ. སདསཀེ ལབྦྷམཱནེ ཨདསམྤི ལབྦྷཏེཝཱཏི སདསམྤི ཨདསམྤི པུཔྥདསམྤཱིཏི ཨེཏྠ ཨཏྠོ. པི-སདྡོ ཝུཏྟཱཝུཏྟསམྤིཎྜནཏྠོ. ཨརཏྟནྟི ནཱིལཔཱིཏཱདིརཛནེན ཨརཉྫིཏམྤི. པི-སདྡེན རཉྫིཏནཱིལཔཱིཏཱདིཀམྤི ཨནཱདིཎྞཀཔྤམྤཱིཏི. ཨཱདིཎྞོ ཀཔྤོ ཡསྶ ནཏྠཱིཏི ཏཾ ཨནཱདིཎྞཀཔྤམྤི. པི-སདྡེན ཨཱདིཎྞཀཔྤམྤི.

ནནུ ཙ ‘‘ན བྷིཀྑཝེ སབྦནཱིལཀཱནི ཙཱིཝརཱནི དྷཱརེཏབྦཱནཱི’’ཏིཨཱདིནཱ (མཧཱཝ. ༣༧༢) སབྦནཱིལཀསབྦཔཱིཏཀསབྦལོཧིཏཀཙཱིཝརཱནི སཱམཉྙེན པཊིཀྑིཏྟཱནཱིཏི ཀཐམིདཾ ཙཱིཝརཙཏུཀྐཾ སདསཱདིཀཾ ཝཊྚཏི, ཀཐཉྩ ཨནཱདིཎྞཀཔྤམྤི ཝཊྚཏཱིཏི? ཝུཙྩཏེ – ‘‘ཏེན ཁོ པན སམཡེན ཨཉྙཏརོ བྷིཀྑུ ཀུསཙཱིརཾ ནིཝཱསེཏྭཱ’’ཏིཨཱདིནཱ ཨུཔྤནྣཝཏྠཱུསུ (མཧཱཝ. ༣༧༡) ‘‘ན བྷིཀྑཝེ ཀུསཙཱིརཾ…པེ… ཏིཏྠིཡདྡྷཛོ དྷཱརེཏབྦོ. ཡོ དྷཱརེཡྻ, ཨཱཔཏྟི ཐུལླཙྩཡསྶཱ’’ཏིཨཱདིནཱ (མཧཱཝ. ༣༧༡) ཨུཔྤནྣཝཏྠུཝསེནེཝ ནིཝཱསནཔཱརུཔནསངྑཱཏདྷཱརཎསྶ པཊིཀྑིཏྟཏྟཱ ཙ ཏཏྠེཝ ཨཊྛཀཐཱཡཉྩ (མཧཱཝ. ཨཊྛ. ༣༧༢) ‘‘སབྦནཱིལཀཱདཱིནི རཛནཾ དྷོཝིཏྭཱ པུན རཛིཏྭཱ དྷཱརེཏབྦཱནི, ན སཀྐཱ ཙེ ཧོནྟི དྷོཝིཏུཾ, པཙྩཏྠརཎཱནི ཝཱ ཀཱཏབྦཱནི, དུཔཊྚཙཱིཝརསྶ ཝཱ མཛ྄ཛྷེ དཱཏབྦཱནི, ཨཙྪིནྣདསདཱིགྷདསཱནི དསཱ ཚིནྡིཏྭཱ དྷཱརེཏབྦཱནི, ཀཉྩུཀཾ ལབྷིཏྭཱ ཕཱལེཏྭཱ རཛིཏྭཱ པརིབྷུཉྫིཏུཾ ཝཊྚཏི, ཝེཋནེཔི ཨེསེཝ ནཡོ’’ཏི ནིཝཱསནཔཱརུཔནཝསེནེཝ དྷཱརཎཔརིབྷོགཱནཾ ¶ ཝུཏྟཏྟཱ ཙ དུབྦཎྞཀརཎསིཀྑཱཔདེ (པཱཙི. ཨཊྛ. ༣༦༨) ‘‘ཡཾ ནིཝཱསེཏུཾ ཝཱ པཱརུཔིཏུཾ ཝཱ སཀྐཱ ཧོཏི, ཏདེཝ ཙཱིཝརནྟི ཝེདིཏབྦ’’ནྟི པཉྩནྣཾཡེཝ ཀཔྤབིནྡུནོ ཨནུཉྙཱཏཏྟཱ ཙ ཏིཙཱིཝརཀཎྜུཔྤཊིཙྪཱདིཝསྶིཀསཱཊིཀསངྑཱཏཱནི པཉྩ ཙཱིཝརཱནི ཀཱཡཔརིཧཱརིཡཱནེཝ ཨདསཱནི ཨསབྦནཱིལཀཱདཱིནི ཀཔྤིཡརཛནརཛིཏཱནི ཨཱདིཎྞཀཔྤཱནིཡེཝ ཧོནྟི, ན ནིཡམེན ནིཝཏྟིཏཱནི པརཱནི ཙཏྟཱརཱིཏི ཙཱིཝརཙཏུཀྐམེཝ སདསཱདིཀཾ ཨནཱདིཎྞཀཔྤམྤི ཝཊྚཏཱིཏི.

༥༡. སེསཙཱིཝརཔཉྩཀཾ ཨདསཾཡེཝ རཛིཏཾཡེཝ ཨཱདིཎྞཀཔྤཾཝ ཀཔྤཏཱིཏི ཡོཛནཱ. རཛིཏནྟི ཀཔྤིཡརཛནེན རཛིཏཾ. ནིསཱིདནསྶ ཡཐཱཝུཏྟེནཏྠེན སབྦཏྠ ཨདསཏྠཾ ནིསེདྷེཏུཾ ‘‘སདསཾཝ ནིསཱིདན’’ནྟི ཝུཏྟཾ. སཏི ཧི སམྦྷཝེ བྱབྷིཙཱརེ ཙ ཝིསེསནཾ སཱཏྠཀཾ ཧོཏི.

༥༢. ཨིདཱནི ¶ ཨནདྷིཊྛིཏེ ཨནིསྶཊྛེ ཙ ཀཱ པཝཏྟཱིཏི ཏཾ དསྶེཏུཾ ‘‘ཨནདྷིཊྛིཏ’’ནྟིཨཱདིམཱཧ. ཏཏྠ ཨནདྷིཊྛིཏནྟི ཏིཙཱིཝརཱདིཝསེན ཨནདྷིཊྛིཏཾ. ཨནིསྶཊྛནྟི ཡསྶ ཀསྶཙི དཱནལཀྑཎེན ཨདིནྣཾ. ཝིཀཔྤེཏྭཱ པརིབྷུཉྫཡེཏི ཝཀྑམཱནནཡེན ཨེཀབཧུབྷཱཝཾ, སནྣིཧིཏཱསནྣིཧིཏབྷཱཝཉྩ སལླཀྑེཏྭཱ ཝིཀཔྤེཏྭཱ པཙྩུདྡྷརིཏྭཱ པརིབྷུཉྫེཡྻ. ཝཀྑམཱནནཡེན པན ཝིཉྙཱཡཏཱིཏི ‘‘པཙྩུདྡྷརིཏྭཱ’’ཏི ན ཝུཏྟཾ.

ཨིདཱནི ‘‘ཝིཀཔྤེཏྭཱ’’ཏི ཝུཏྟཾ ཀཱིདིསཾ ཏཾ ཧེཊྛིམནྟེན ཝིཀཔྤིཡནྟི ཨཱཧ ‘‘ཧཏྠཱ’’ཏིཨཱདི. ཏཏྠ ཧཏྠོ དཱིགྷེན ཡསྶ ཏཾ ཧཏྠདཱིགྷཾ. ཏཏོཏི ཏསྨཱ ཧཏྠཏོ. ཨུཔཌྜྷོ ཧཏྠསྶ དུཏིཡོ བྷཱགོ ཝིདཏྠིསངྑཱཏོ ཝིཏྠཱརེན ཡསྶ ཏཾ ཨུཔཌྜྷཝིཏྠཱརཾ.

༥༣. ཨིདཱནི ཡཐཱཝུཏྟཝིདྷཱནཾ ཏེཙཱིཝརིཀསྶེཝ ཝསེན, ཨཔརོ པན ཨཉྙཐཱ པཊིཔཛྫཏཱིཏི ཏཾ དསྶེཏུཾ ‘‘ཏིཙཱིཝརསྶཱ’’ཏིཨཱདིམཱཧ ¶ . ཏཏྠ ནཱམེནཱདྷིཊྛིཏཱནི ཏཱིཎི ཙཱིཝརཱནི ཨེཏསྶཱཏི ཏིཙཱིཝརོ. ཏསྶ ཝིནཡཏེཙཱིཝརིཀསྶཱཏི ཨཏྠོ, ན པརིཀྑཱརཙོལ༹ནཱམེན ཨདྷིཊྛིཏཙཱིཝརསྶ. ཝིནཡཏེཙཱིཝརིཀསྶ པན ཨུདོསིཏསིཀྑཱཔདེ ཝུཏྟཔརིཧཱརོ ནཏྠི. པརིཀྑཱརཙོལི༹ཡོཏི པརིཀྑཱརཙོལ༹མསྶ ཨཏྠཱིཏི ཎིཀེན ཡ-ཀཱརོ. སབྦནྟི སཀལཾ ནཝཝིདྷམྤི ཙཱིཝརཾ. ཏཐཱ ཝཏྭཱཏི ཨེཀབཧུབྷཱཝཾ, སནྣིཧིཏཱསནྣིཧིཏབྷཱཝཉྩ ཉཏྭཱ ‘‘ཨིམཾ པརིཀྑཱརཙོལ༹ཾ ཨདྷིཊྛཱམཱི’’ཏིཨཱདིནཱ ཝཏྭཱ. ཨདྷིཊྛཏཱིཏི ཨདྷིཊྛཱཏི.

༥༤. ཨདྷིཊྛིཏཙཱིཝརཾ པན པརིབྷུཉྫཏོ ཀཐཾ ཨདྷིཊྛཱནཾ ཝིཛཧཏཱིཏི ཏཾ དསྶེནྟོ ‘‘ཨཙྪེདཱ’’ཏིཨཱདིམཱཧ. ཏཏྠ ཨཙྪེདོ ཙ ཝིསྶཛྫནཉྩ གཱཧོ ཙ ཝིབྦྷམོ ཙཱཏི དྭནྡོ. ཨཙྪེདོ ནཱམ ཙོརཱདཱིཧི ཨཙྪིནྡིཏྭཱ གཧཎཾ. ཝིསྶཛྫནཾ པརེསཾ དཱནཾ. གཱཧོ ཝིསྶཱསེན གཧཎཾ. ཝིབྦྷམོ སིཀྑཾ ཨཔྤཙྩཀྑཱཡ གིཧིབྷཱཝཱུཔགམནཾ. ཏདཱཔི ཏསྶ ཨཉྙསྶ དཱནེ ཝིཡ ཙཱིཝརསྶ ནིརཱལཡབྷཱཝེན པན པརིཙྩཱགོཏི. ཊཱིཀཱཡཾ པན བྷཱདིསོ བྷིཀྑུཡེཝཱཏི ཨདྷིཊྛཱནཾ ན ཝིཛཧཏཱིཏི ཨཏྠཾ ཝིཀཔྤེཏྭཱ བྷིཀྑུནིཡཱ གིཧིབྷཱཝཱུཔགམནཾ ཝུཏྟཾ, ཏཾ ན གཧེཏབྦཾ, ཀཱརཎཾ པནེཏྠ ཨམྷཱཀཾ གརཱུཧིཡེཝ སཱརཏྠདཱིཔནིཡཾ (སཱརཏྠ. ཊཱི. ༢.༤༦༩) ‘‘བྷིཀྑུནིཡཱ ‘ཧཱིནཱཡཱཝཏྟནེནཱ’ཏི ཝིསེསེཏྭཱ ཨཝུཏྟཏྟཱ བྷིཀྑུནིཡཱ ཧི གིཧིབྷཱཝཱུཔགམནེ ཨདྷིཊྛཱནཝིཛཧནཾ ཝིསུཾ ཝཏྟབྦཾ ནཏྠི ཏསྶཱ ཝིབྦྷམནེནེཝ ཨསྶམཎཱིབྷཱཝཏོ’’ཏི ཝུཏྟཾ. ནནུ ཙ བྷིཀྑུནོ ཨཔྤཙྩཀྑཱཏསིཀྑསྶ གིཧིབྷཱཝཱུཔགམནེན ཨདྷིཊྛཱནཝིཛཧནེན ནིརཱལཡབྷཱཝོ ཀཱརཎབྷཱཝེན ¶ ཝུཏྟོ, ཨེཝཾ སཏི པརིཝཏྟལིངྒསྶ ནཏྠི ནིརཱལཡབྷཱཝོཏི ཀཐམསྶ ཨདྷིཊྛཱནཾ ཝིཛཧཏཱིཏི? སཙྩམེཏཾ, ཏཐཱཔི བུདྡྷམཏཉྙཱུཧི ཨཊྛཀཐཱཙརིཡེཧི ཨཊྛཀཐཱཡཾ (པཱརཱ. ཨཊྛ. ༡.༦༩) ‘‘ཡཾ པནསྶ བྷིཀྑུབྷཱཝེ ¶ ཨདྷིཊྛིཏཾ ཏིཙཱིཝརཉྩ པཏྟོ ཙ, ཏཾ ཨདྷིཊྛཱནཾ ཝིཛཧཏི, པུན ཨདྷིཊྛཱཏབྦ’’ནྟི ཝུཏྟཏྟཱ ནཏྠེཏྠ དོསོཏི.

མཱརཎལིངྒསིཀྑཱཏི ཨུཏྟརཔདལོཔེན ཨུཔཙཱརེན ཝཱ ལིངྒཔརིཝཏྟནཾ སིཀྑཱཔཙྩཀྑཱནཉྩ ‘‘ལིངྒསིཀྑཱ’’ཏི ཙ ཝུཏྟཾ. ཨིཏི ཨེཏེ ཨཊྛ སབྦེསུ ནཝསུ ཙཱིཝརེསུ ཨདྷིཊྛཱནསྶ ཝིཡོགོ ཝིཔྤཝཱསོ, ཏསྶ ཀཱརཎཱ ཧོནྟཱིཏི པཱཋསེསོ. ཏིཙཱིཝརསྶ པན ན ཀེཝལཾ ཨིམེཡེཝ ཨཊྛ, ཝིནིཝིདྡྷཚིདྡཉྩ ཨདྷིཊྛཱནཝིཡོགཀཱརཎནྟི ལིངྒཝཙནཉྩ པརིཝཏྟེཏྭཱ ཡོཛེཏབྦཾ. ཏཏྠ ཨབྦྷནྟརེ ཨེཀསྶཔི ཏནྟུནོ ཨབྷཱཝེན ཝིནིཝིདྡྷཾ ཝིནིཝིཛ྄ཛྷིཏྭཱ གཏཚིདྡཾཀནིཊྛངྒུལིནཁཔིཊྛིཔྤམཱཎཾ ཝིནིཝིདྡྷཚིདྡཾ. ཏཏྠ སངྒྷཱཊིཡཱ ཙ ཨུཏྟརཱསངྒསྶ ཙ དཱིགྷནྟཏོ ཝིདཏྠིཔྤམཱཎསྶ, ཏིརིཡནྟཏོ ཨཊྛངྒུལཔྤམཱཎསྶ, ཨནྟརཝཱསཀསྶ པན དཱིགྷནྟཏོ ཝིདཏྠིཔྤམཱཎསྶེཝ ཏིརིཡནྟཏོ ཙཏུརངྒུལཔྤམཱཎསྶ པདེསསྶ ཨོརཏོ ཚིདྡཾ ཨདྷིཊྛཱནཾ བྷིནྡཏི, སཱུཙིཀམྨཾ ཀཏྭཱ པུན ཨདྷིཊྛཱཏབྦཾ. སཱུཙིཀམྨཾ ཀརོནྟེན ཙ ཚིནྡིཏྭཱ དུབྦལཊྛཱནཱཔནཡནེན ཚིདྡཾ ཨདསྶེཏྭཱ ཀཱཏབྦཾ.

༥༥. ཨིདཱནི ཨཀཔྤིཡཱནི དསྶེཏུཾ ‘‘ཀུསཱ’’ཏིཨཱདི ཝུཏྟཾ. ཏཏྠ ཀུསཱ ཙ ཝཱཀཱ ཙ ཕལཀཱནི ཙ, ཏེསཾ ཙཱིརཱནི ཀུས…པེ… ཙཱིརཱནི. ཏཏྠ ཀུསེན གནྠེཏྭཱ ཀཏཾ ཀུསཙཱིརཾ. ཏཐཱ ཝཱཀེན གནྠེཏྭཱ ཀཏཾ ཝཱཀཙཱིརཾ, ཏཱཔསཱནཾ ཝཀྐལཾ. ཕལཀསཎྛཱནཱནི ཕལཀཱནི སིབྦིཏྭཱ ཀཏཾ ཕལཀཙཱིརཾ. ཀེསཝཱལཛནྟི ཀེསེཧི ཙ ཝཱལེཧི ཙ ཛཱཏཾ ཝཱཡིཏཾ ཀམྦལནྟི སམྦནྡྷོ. ཨུལཱུཀཔཀྑཱཛིནཀྑིཔེཏི ཨུལཱུཀཱནཾ ཀོསིཡསཀུཎཱནཾ པཀྑཾ པཀྑེན ཀཏཾ ནིཝཱསནཉྩ ཨཛིནཀྑིཔཾ སལོམཾ སཁུརཾ ཨཛིནམིགཱནཾ ཙམྨཉྩ དྷཱརཡཏོ ཐུལླཙྩཡནྟི སམྦནྡྷོ.

༥༦. ཀདལེརཀཀྐདུསྶེསཱུཏི ཀདལིཡོ ཙ ཨེརཀོ ཙ ཨཀྐོ ཙ, ཏེསཾ དུསྶཱནི ཝཏྠཱནི, ཏེསུ ཙེཝ མཀཙིཝཱཀེཧི ¶ ཀཏེ པོཏྠཀེ ཙཱཔི དུཀྐཊཾ. ནིམིཏྟཏྠེ ཙེཏཾ བྷུམྨཾ. ཀདལིདུསྶཱདིསདྡེན ཏཾདྷཱརཎམདྷིཔྤེཏཾ, ཏསྨཱ ཏཾདྷཱརཎནིམིཏྟཾ དུཀྐཊཾ ཧོཏཱིཏི ཨཏྠོ. ཨེཝཾ སབྦཏྠ. ‘‘ནཱིལཀོ ཙཱ’’ཏིཨཱདིནཱ དྭནྡོ. སབྦཱ ནཱིལཀ…པེ… ཀཎྷཀཱཏི ཀམྨདྷཱརཡོ. ནཱིལཱདིཝཎྞཡོགེན ¶ ཝཏྠཾ ནཱིལཱདི. ནཱིལཀཾ ཨུམཱཔུཔྥཝཎྞཾ. མཉྫེཊྛཾ མཉྫེཊྛིཀཝཎྞཾ. པཱིཏཾ ཀཎིཀཱརཔུཔྥཝཎྞཾ. ལོཧིཏཾ ཛཡསུམནཔུཔྥཝཎྞཾ. ཀཎྷཀཾ ཨདྡཱརིཊྛཀཝཎྞཾ. སབྦ-སདྡོ པནེཏྠ པཙྩེཀཾ ཡོཛེཏབྦོ.

༥༧. མཧཱ…པེ… རཏྟེཏི མཧཱརངྒོ ཙ མཧཱནཱམརངྒོ ཙ, ཏེཧི རཏྟེ. ཨེཏྠཱཔི པུན སུཡྻམཱནཾ སབྦསདྡམནུཝཏྟིཡཾ, ‘‘སབྦམཧཱརངྒརཏྟེ’’ཏིཨཱདིནཱ ཨཏྠོ ཝེདིཏབྦོ. ཨིམིནཱ ཙ ཨསབྦནཱིལཀཱདི ཀཔྤིཡརཛནརཛིཏཾ པརིབྷུཉྫནྟསྶ ནཏྠི དོསོཏི དཱིཔེཏི. ཏཏྠ མཧཱརངྒོ སཏཔདིཔིཊྛིཝཎྞོ. མཧཱནཱམརངྒོ སམྦྷིནྣཝཎྞོ, སོ པན པཎྜུཔལཱསཝཎྞོ ཧོཏི, པདུམཝཎྞོཏིཔི ཝདནྟི. ཏིརཱིཊཀེཏི ཏཾ ནཱམཀ རུཀྑཏཙེ. ཨཙྪིནྣདཱིགྷདསཀེཏི སབྦསོ ཨཙྪིནྣཏྟཱ ཨཙྪིནྣཱ ཙ མཛ྄ཛྷེ ཚིནྣཏྟཱ དཱིགྷཱ ཙ སཱ དསཱ ཙ ཝཏྠཀོཊི ཡསྶཱཏི ཨཉྙཔདཏྠསམཱསོ. ཕལཔུཔྥདསེཏི ཨཉྙམཉྙཾ སཾསིབྦིཏྭཱ ཀཏཱ ཕལསདིསཱ དསཱ ‘‘ཕལཱ’’ཏི ཝུཙྩནྟི, ཀེཏཀཱདི པུཔྥསདིསཱནི ‘‘པུཔྥཱནཱི’’ཏི ཙ, ཕལཱ ཙ པུཔྥཱ ཙ དསཱ ཡསྶ, ཕལསདིསེ དསེ, པུཔྥསདིསེ དསེ ཙཱཏི ཨཏྠོ. ཝེཋནེཏི སཱིསཝེཋནེ. ཏཐཱཏི ཨིམིནཱ སབྦནཱིལཀཱདཱིསུ དུཀྐཊཾ ཨཏིདིསཏི. སབྦནྟི ཀུསཙཱིརཱདིཀཾ སཀལཾ. ཨཙྪིནྣཾ ཙཱིཝརཾ ཡསྶ སོ ལབྷཏཱིཏི སམྦནྡྷོ.

༥༨. མཱུལཉྩ ¶ ཁནྡྷོ ཙ ཏཙོ ཙ པཏྟཉྩ ཕལཉྩ པུཔྥཉྩ, ཏེསཾ པབྷེདོཏི ཚཊྛཱིཏཔྤུརིསོ. ཨཐ ཝཱ པབྷེད-སདྡསྶ ཀམྨསཱདྷནཏྟེ ཏཱནིཡེཝ པབྷེདོཏི ཀམྨདྷཱརཡོ, ཏཏོ. རཛནྟི ཨེཏེཧཱིཏི རཛནཱནི, མཱུལཱདཱིནི. ‘‘ཨནུཛཱནཱམི, བྷིཀྑཝེ, ཚ རཛནཱནི མཱུལརཛན’’ནྟིཨཱདིནཱ (མཧཱཝ. ༣༤༤) བྷགཝཏཱ ཨནུཉྙཱཏཏྟཱ ཝུཏྟཾ ‘‘རཛནཱ ཚཔྤཀཱརཱནི, ཨནུཉྙཱཏཱནི སཏྠུནཱ’’ཏི.

༥༩. མཱུལེཏི ¶ མཱུལརཛནེ ཧལིདྡིཾ ཝིཝཛྫིཡ སབྦཾ ལབྦྷནྟི སམྦནྡྷོ. ཨེཝཾ སབྦཏྠ. མཉྫེཊྛི ཙ ཏུངྒཧཱརཀོ ཙཱཏི དྭནྡོ. ཨལླི-སདྡེན ནཱིལི-སདྡེན ཙ ཏེསཾ གཙྪཛཱཏཱིནཾ པཏྟཱནི གཧིཏཱནི ཨུཔཙཱརེན, ཏཐཱ ལོདྡ-སདྡེན ཀཎྜུལ-སདྡེན ཙ ཏཙོ, ཀུསུམྦྷ-སདྡེན ཀིཾ སུཀ-སདྡེན ཙ པུཔྥཱནི. ཏེནེཝ ཙ ཏཱནི ནཔུཾསཀཱནི. ཏུངྒཧཱརཀོ ནཱམ ཨེཀོ ཀཎྚཀརུཀྑོ, ཏསྶ ཧརིཏཱལཝཎྞཾ ཁནྡྷརཛནཾ ཧོཏི. ཨལླིཔཏྟེན ཨེཀཝཱརཾ གིཧིཔརིབྷུཏྟཾ རཛིཏུཾ ཝཊྚཏི. ཕལརཛནེ སབྦམྤི ཝཊྚཏི.

༦༠. ཨཡོཔཏྟོ ནཱམ ཨཡསཱ ཀཱལ༹ལོཧེན ནིབྦཏྟོ པཏྟོ. ཛཱཏིཡཱ ཨུཀྐཊྛཱདཱིནཾ སཱམཉྙཝསེན. པམཱཎཏོཏི པརིཙྪེདཏོ. ཏཡོ པཏྟཱཏི པཱཋསེསོ.

༦༡. ‘‘མགདྷེསཱུ’’ཏི ཝཏྟབྦེ མགདྷེཏི ཝཙནཝིཔལླཱསེན ཝཱ ‘‘པཙྩཱསཱ སཏཱི’’ཏིཨཱདཱིསུ ཝིཡ སུ-སདྡལོཔེན ཝཱ ¶ ཝུཏྟཾ. ནཱལི༹དྭཡཏཎྜུལསཱདྷིཏནྟི ཨེཏྠ མགདྷཱཔེཀྑོཔི ནཱལི༹-སདྡོ དྭཡ-སདྡེན སམཱསོ ཧོཏི གམྨཀཏྟཱཏི ནཱལི༹ཡཱ དྭཡཾ ནཱལི༹དྭཡཾ. ཏཏྠ མགདྷནཱལི༹ ནཱམ ཨཌྜྷཏེརསཔལཱ ཧོཏི. ཨེཏྠ ཙ ཨཌྜྷཏེརསཔལཱནི མཱསཱནནྟི ཝདནྟི. ནཱལི༹དྭཡེན པམིཏཱ ཏཎྜུལཱ སུཀོཊྚིཏཔརིསུདྡྷཱ ཨནུཔཧཏཔུརཱཎསཱལིཏཎྜུལཱ ནཱལི༹དྭཡཏཎྜུལཱ, ཏེཧི སཱདྷིཏཾ པཙིཏནྟི ཨཏྠོ. ཨོདནནྟི སམྨཱ སམྤཱདིཏཾ ཨཝསྶཱཝིཏོདནཾ. སཱུཔནྟི ཨོདནསྶ ཙཏུཏྠབྷཱགཔྤམཱཎཾ ནཱཏིགྷནཾ ནཱཏིཏནུཀཾ ཧཏྠཧཱརིཡཾ སབྦསམྦྷཱརསངྑཏཾ མུགྒསུཔཾ. བྱཉྫནཉྩ ཏདཱུཔིཡནྟི ཏསྶ ཨོདནསྶ ཨུཔིཡཾ ཨནུརཱུཔཾ ཡཱཝ ཙརིམཱལོཔཔྤཧོནཀཾ མཙྪམཾསཱདིབྱཉྫནཉྩ ཨུཀྐཊྛོ གཎྷཱཏཱིཏི སམྦནྡྷོ.

༦༢. ཏསྶཱཏི ཡཐཱཝུཏྟཨོདནཱདིནོ. ཨུཔཌྜྷོཏི ཨུཔཌྜྷཾ ནཱལི༹ཀོདནཱདི ཨསྶ ཨཏྠཱིཏི ཨུཔཌྜྷོ. ཨེཝ-ཀཱརེན ཨཏིརེཀཾ ནིཝཏྟེཏི. ཏཏོཏི ཡཐཱཝུཏྟནཱལི༹ཀོདནཱདིཏོ. ཨུཀྐཊྛཏོ ཨུཀྐཊྛོ ¶ ཙ ཨོམཀོམཀོ ཙ ཨཔཏྟོཏི ཡོཛནཱ. ཨོམཀཏོ ཨོམཀོ ཨོམཀོམཀོ. ཨིམིནཱ པུན པཏྟདྭཡདསྶནེན པམཱཎཏོ ཏཡོཔི པཏྟཱ ཝིབྷཱགཏོ ནཝ ཧོནྟཱིཏི དཱིཔེཏི. ཏཏྠ ཡསྨིཾ མགདྷནཱལི༹དྭཡཏཎྜུལོདནཱདིཀཾ སབྦམྤི ཝཌྜྷནཔཀྑེ ཋིཏཾ པཀྑིཏྟཾ སཙེ པཏྟསྶ མུཁཝཊྚིཡཱ ཧེཊྛིམརཱཛིསམཾ ཏིཊྛཏི, སུཏྟེན ཝཱ ཧཱིརེན ཝཱ ཚིནྡནྟསྶ སུཏྟསྶ ཝཱ ཧཱིརསྶ ཝཱ ཧེཊྛིམནྟཾ ཕུསཏི, ཨཡཾ ཨུཀྐཊྛོ ནཱམ པཏྟོ. སཙེ ཏཾ རཱཛིཾ ཨཏིཀྐམྨ ཐཱུཔཱིཀཏཾ ཏིཊྛཏི, ཨཡཾ ཨུཀྐཊྛོམཀོ ནཱམ པཏྟོ. སཙེ ཏཾ རཱཛིཾ ན སམྤཱཔུཎཱཏི ཨནྟོགཏམེཝ, ཨཡཾ ཨུཀྐཊྛུཀྐཊྛོ ནཱམ པཏྟོ. ‘‘ཨེཀཾ ནཱལི༹ཀོདནཱདི སབྦམྤི པཀྑིཏྟཾ ཝུཏྟནཡེནེཝ ཧེཊྛིམརཱཛིསམཾ ཏིཊྛཏི, ཨཡཾ མཛ྄ཛྷིམོ ནཱམ པཏྟོ’’ཏིཨཱདིནཱ མཛ྄ཛྷིམམཛ྄ཛྷིམོམཀམཛ྄ཛྷིམུཀྐཊྛཱ ཙ ‘‘ཡཏྠ ཨུཔཌྜྷནཱལི༹ཀོདནཱདི སབྦམྤི པཀྑིཏྟཾ ཧེཊྛིམརཱཛིསམཾ ཏིཊྛཏི ¶ , ཨཡཾ ཨོམཀོ ནཱམ པཏྟོ’’ཏིཨཱདིནཱ ཨོམཀཨོམཀོམཀཨོམཀུཀྐཊྛཱ ཙ པཏྟཱ ཨུཀྐཊྛེ ཝུཏྟནཡེནེཝ ཝེདིཏབྦཱ. ཏེསུ དྭེ ཨཔཏྟཱ བྷཱཛནཔརིབྷོགེན པརིབྷུཉྫིཏབྦཱ, ནཱདྷིཊྛཱནཱུཔགཱ, ན ཝིཀཔྤནཱུཔགཱ.

༦༣. ཀཔྤོ སཀོ ཨཏིརེཀཔཏྟོ དསཱཧཔརམཾ དྷཱརེཡྻཱཏི ཡོཛནཱ. ཏཏྠ ཀཔྤོཏི ཀཔྤིཡོ. སཀོཏི ཨཏྟནོ སནྟཀོ. ཀཔྤིཡཏྟཱ པན ཨཏྟསནྟཀཏྟཱ ཙ སཏྟནྣམྤི ཨདྷིཊྛཱནཝིཀཔྤནཱུཔགཏཱ ཝེདིཏབྦཱ. ཏཏྠ ཨཡོཔཏྟོ པཉྩཧི པཱཀེཧི, མཏྟིཀཱཔཏྟོ དྭཱིཧི པཱཀེཧི པཀྐོ ཨདྷིཊྛཱནཱུཔགོ ཙ ཝིཀཔྤནཱུཔགོ ཙ, ཏཐཱ ཨུབྷོཔི ཀཱཀཎིཀམཏྟསྶཱཔི མཱུལསྶ ཨནཝསེསེཏྭཱ དིནྣེ, སབྦསོ ཨཏྟསནྟཀཏྟེ ཝིཉྙཱཏེ ཙ ཨདྷིཊྛཱནཝིཀཔྤནཱུཔགཱཏི དཊྛབྦཾ. ཨཏིརེཀཔཏྟོཏི ཨནདྷིཊྛིཏཱཝིཀཔྤིཏཏཱཡ ཨཏིརེཀཔཏྟོ. ཨདྷིཊྛཱནཔཙྩུདྡྷཱརཱ པནེཏྠ ཙཱིཝརེ ཝུཏྟཱཝ. ཝིཀཔྤེནྟེན པན པཏྟཱནཾ ཨེཀབཧུབྷཱཝཾ, སནྣིཧིཏཱསནྣིཧིཏབྷཱཝཉྩ ཉཏྭཱ ‘‘ཨིམཾ པཏྟ’’ནྟི ཝཱ ‘‘ཨིམེ པཏྟེ’’ཏི ཝཱ ‘‘ཨེཏཾ པཏྟ’’ནྟི ཝཱ ‘‘ཨེཏེ པཏྟེ’’ཏི ཝཱ ཝཏྭཱ ‘‘ཏུཡ྄ཧཾ ཝིཀཔྤེམཱི’’ཏི ཝཏྟབྦཾ. སམྨུཁཱདིབྷེདོ པནེཏྠ ཙཱིཝརེ ཝཀྑམཱནནཡེན ཝེདིཏབྦོ. དསཱཧཔརམནྟི དས ཨཧཱནི པརམོ པརིཙྪེདོ ཨསྶཱཏི དཧཱཧཔརམོ, ཀཱལོ, ཏཾ. ཨཙྩནྟསཾཡོགེ ཨུཔཡོགཝཙནཾ. དྷཱརེཡྻོཏི པརིབྷོགཝསེན དྷཱརེཏབྦོ. ཏསྨིཾཀཱལེ ཨཏིནཱམིཏེ པཏྟོ ནིསྶགྒིཡོ ཧོཏཱིཏི ཡོཛནཱ. ཨཏིནཱམིཏེཏི ཨཏིཀྐཱམིཏེ ནིསྶགྒིཡོ ཧོཏི, ཨེཀཱདསེ ཨརུཎུགྒམནེ སངྒྷསྶ ཝཱ གཎསྶ ཝཱ པུགྒལསྶ ཝཱ པདབྷཱཛནཱིཡེ (པཱརཱ. ༦༠༢) ཝུཏྟནཡེན པཏྟོ ནིསྶཛྫིཏབྦོ ཧོཏི, ཏཐཱ སཏི པཱཙིཏྟིཡཱཔཏྟི ཙསྶ ཧོཏཱིཏི ཨདྷིཔྤཱཡོ.

༦༤. ‘‘ཨཙྪེདཱ’’ཏིཨཱདི ¶ ཙཱིཝརེ ཝུཏྟནཡཏྟཱ ཨུཏྟཱནམེཝ. ཨཡཾ པན ཝིསེསོ – མརཎུདྡྷཊཱཏི ¶ ཨུདྡྷརཎཾ ཨུདྡྷལ༹ཾ, པཙྩུདྡྷཱརོ. མརཎཉྩ ཨུདྡྷཊཉྩ མརཎུདྡྷཊཱ, ཏསྨཱ. ཚིདྡེནཱཏི ཡེན ཀངྒུསིཏྠཾ ནིཀྑམཏི ཙེཝ པཝིསཏི ཙ, ཏེན མུཁཝཊྚིཏོ ཧེཊྛཱ དྭངྒུལཚིདྡེན. པཏྟཱདྷིཊྛཱནམུཛ྄ཛྷཏཱིཏི པཏྟོ ཨདྷིཊྛཱནཾ ཨུཛ྄ཛྷཏི ཝིསྶཛྫཏི.

༦༥. ཨིདཱནི ‘‘པཏྟ’’ནྟིཨཱདིནཱ ཨཉྙཐཱ པརིཧརཎེ དུཀྐཊཾ དསྶེཏི. ཏཏྠ སོདཀཾ པཏྟཾ ན པཊིསཱམེཡྻཱཏི ཡོཛནཱ. ན པཊིསཱམེཡྻཱཏི གུཏྟཊྛཱནེ ན ནིཀྑིཔེཡྻ, ‘‘སོདཀཾ པཏྟཾ ཨུཎྷེ ན ཙ ཨོཏཔེ’’ཏིཨཱདིནཱ ཙ ཡོཛནཱིཡཾ. ན ཙ ཨོཏཔེཏི ནེཝ ཨཱིསཀཾ ཏཱཔེཡྻ. ན ནིདཧེཏི ནིརུདཀཾ ཀཏྭཱཔི བྷུསཾ ན ནིདཧེཡྻ, ཝོདཀཾ ཀཏྭཱ ཨཱིསཀཾ ཏཱཔེཡྻཱཏིཔི བྱཏིརེཀཏྠོ. བྷཱུམྱཱ ན ཋཔེཏི ཁརཱཡ བྷཱུམིཡཱ ན ཋཔེཡྻ. ཡཏྠ པན ཝཎྞོ ན དུསྶཏི, ཨེཝརཱུཔཱཡ མཏྟིཀཱཡ པརིབྷཎྜཀཏཱཡ བྷཱུམིཡཱ ཝཱ ཏཐཱརཱུཔཱཡ ཨེཝ ཝཱལིཀཱཡ ཝཱ ནིཀྐུཛྫིཏྭཱ ཨུཀྐུཛྫིཏྭཱ ཋཔེཏུཾ ཝཊྚཏི. ནོ ཙ ལགྒཡེཏི བྷིཏྟིཁིལཱདཱིསུ ན ཨོལམྦེཡྻ.

༦༦. ‘‘མིཌྜྷནྟེ ཝཱ’’ཏིཨཱདིནཱ ཝཏྭཱ པཏྟཾ ཋཔེཏུཾ ན ཙ ཀཔྤཏཱིཏི ཡོཛེཏབྦཾ. མིཌྜྷནྟེཏི ཨཱལི༹ནྡཀམིཌྜྷིཀཱདཱིནཾ མིཌྜྷཱིནཾ ཨནྟེ. སཙེ པན པརིཝཏྟེཏྭཱ ཏཏྠེཝ པཏིཊྛཱཏི, ཨེཝརཱུཔཱཡ ཝིཏྠིཎྞཱཡ མིཌྜྷིཡཱ ཋཔེཏུཾ ཝཊྚཏི. པརིབྷཎྜནྟེ ཝཱཏི བཱཧིརཔསྶེ ཀཏཱཡ ཏནུཀཱཡ མིཌྜྷིཀཱཡ ཨནྟེ ཝཱ. ཨེཏྠ ཝཱ-སདྡོ སམུཙྩཡེ, སོ ཙ པཙྩེཀཾ ཡོཛེཏབྦོ. ཨངྐེ པན ཨཾསབདྡྷཀེན ཨཾསཀཱུཊེ ལགྒེཏྭཱ ཋཔེཏུཉྩ ཝཊྚཏི. ཚཏྟེཔི བྷཎྜཀེན སདྡྷིཾ བནྡྷིཏྭཱ ཝཱ ཨཊྚཾ ཀཏྭཱ ཝཱ ཋཔེཏུཾ ཝཊྚཏི. མཉྩེཔི ཨཉྙེན སདྡྷིཾ བནྡྷིཏྭཱ ཋཔེཏུཾ, ཨཊནིཡཾ བནྡྷིཏྭཱ ཨོལམྦེཏུཾ ཝཊྚཏི.

༦༧. པཏྟེན ཨུཙྪིཊྛོདཀཉྩ ཙལཀཊྛིཀཉྩ ན ནཱིཧརེཡྻཱཏི སམྦནྡྷོ. ཨུཙྪིཊྛོདཀནྟི མུཁཝིཀྑཱལནོདཀཾ. ཙལཀཱནི ཙ ¶ ཙབྦེཏྭཱ ཨཔཝིདྡྷཱམིསཱནི ཨཊྛིཀཱནི མཙྪམཾསཨཊྛིཀཱནི ཙ ཙལཀཊྛིཀཾ. པཏྟཾ པཊིགྒཧཾ ཀཏྭཱ ཧཏྠཾ དྷོཝིཏུམྤི ཧཏྠདྷོཏཱདི ཨུདཀམྤི པཏྟེ ཨཱཀིརིཏྭཱ ནཱིཧརིཏུམྤི ཨནུཙྪིཊྛཾ སུདྡྷཔཏྟཾ ཨུཙྪིཊྛཧཏྠེན གཎྷིཏུམྤི ན ཝཊྚཏི. མཙྪམཾསཕལཱཕལཱདཱིནི ཁཱདནྟོ ཡཾ ཏཏྠ ཨཊྛིཾ ཝཱ ཙལཀཾ ཝཱ ཚཌྜེཏུཀཱམོ ཧོཏི, ཏཾ པཏྟེ ཋཔེཏུཾ ན ལབྷཏི. མུཁཏོ ནཱིཧཊཾ པན ཡཾ ཀིཉྩི པུན ཨཁཱདིཏུཀཱམོ པཏྟེ ཋཔེཏུཾ ན ལབྷཏི. སིངྒིཝེརཱདཱིནི ཌཾསིཏྭཱ པུན ཋཔེཏུཾ ལབྷཏི. པཏྟཧཏྠོཏི པཏྟོ ཧཏྠེ ཡསྶཱཏི ཝིགྒཧོ. ‘‘པཏྟཧཏྠོ, ཀཝཱཊ’’ནྟི ཙ ཨུཔལཀྑཎམེཏཾ. ཡཏྠ ཀཏྠཙི སརཱིརཱཝཡཝེ པན པཏྟསྨིཾ ¶ སཏི ཡེན ཀེནཙི སརཱིརཱཝཡཝེན ཀཝཱཊཾ པཎཱམེཏུཾ, གྷཊིཀཾ ཝཱ ཨུཀྑིཔིཏུཾ, སཱུཙིཾ ཝཱ ཀུཉྩིཀཱཡ ཨཝཱཔུརིཏུཾ ན ལབྷཏི. ཨཾསཀཱུཊེ པན པཏྟཾ ལགྒེཏྭཱ ཡཐཱསུཁཾ ཨཝཱཔུརིཏུཾ ལབྷཏི.

༦༨. བྷཱུམིཡཱ བྷཱུམིསམྦནྡྷཱི ཨཱདྷཱརཀོ, ཏསྨིཾ དནྟཝལླིཝེཏྟཱདཱིཧི ཀཏེ ཝལཡཱདྷཱརཀེ ཙ ཨེཀདཱརུནཱ ཀཏེ དཱརུཨཱདྷཱརཀེ ཙ བཧཱུཧི དཎྜེཧི ཀཏེ དཎྜཱདྷཱརཀེ ཙ ཡཏྠ ཋཔིཏོ པཏྟོ ཡཐཱ པརིཝཏྟིཏྭཱ ན པརིཔཏཏི, ཏཐཱ སུཊྛུ སཛྫིཏེ ཏསྨིཾ པཏྟསྶུཔརི པཏྟོཏི ཨེཝརཱུཔེ དུཝེ པཏྟེ ཋཔེཡྻཱཏི པདཏྠཡོཛནཱ. བྷམཀོཊིསདིསོ པན དཱརུཨཱདྷཱརཀོ ཏཱིཧི དཎྜཀེཧི བདྡྷོ དཎྜཱདྷཱརཀོ ཙ ཨེཀསྶཔི པཏྟསྶ ཨནོཀཱསོ, ཏཏྠ ཋཔེཏྭཱཔི ཧཏྠེན གཧེཏྭཱ ནིསཱིདིཏབྦཾ. བྷཱུམིཡནྟི ཀཊསཱརཀཱདིནཱ ཨཏྠཏཱཡ བྷཱུམིཡཱ པན ནིཀྐུཛྫིཏྭཱ ཝཱ པཊིཀུཛྫིཏྭཱ ཝཱ ཨེཀཾ པཏྟཾ ཋཔེཡྻཱཏི ཡོཛནཱ.

༦༩. ཨིདཱནི ཨཀཔྤིཡཔཏྟེ དསྶེཏི ‘‘དཱརཱུ’’ཏིཨཱདིནཱ. ཏཏྠ སུཝཎྞམེཝ སོཝཎྞཾ. དཱརུ ཙ རཱུཔིཡཉྩ སོཝཎྞཉྩ མཎི ཙ ཝེལུ༹རིཡཉྩ དཱརུ…པེ… ཝེལུ༹རིཡཱནི, ཏེཧི ནིབྦཏྟཱ དཱརུ…པེ… མཡཱ ¶ . དཱིགྷོ པན ‘‘ཝེལུ༹རིཡཱམཡཱ’’ཏི གཱཐཱབནྡྷསུཁཏྠཾ ཀཏོ. ཨེཝམུཔརིཔི ཏཱདིསཾ ཝིཉྙེཡྻཾ. ཏཏྠ ཨིནྡནཱིལཱདི མཎི ནཱམ. ཀཾསོ ཙ ཀཱཙོ ཙ ཏིཔུ ཙ སཱིསཉྩ ཕལིཀཱ ཙ ཏམྦལོཧོ ཙཱཏི དྭནྡོ, ཏེཧི ཛཱཏཱ ཀཾས…པེ… ཛཱ. ཏཏྠ ཀཾས-སདྡེན ཝཊྚལོཧོཔི སངྒཧིཏོ. སེཏཾ ཏིཔུ, ཀཎྷཾ སཱིསཾ.

༧༠. ཚཝསཱིསམཡོཏི ཚཝསྶ མཏམནུསྶསྶ སཱིསཾ སཱིསཀཔཱལཾ, ཏེན ནིབྦཏྟོ ཚཝསཱིསམཡོ. གྷཊི ཙ ཏུམྦཉྩ, ཏེསཾ ཀཊཱཧོ, ཏེཧི ཛཱཏཱཏི གྷཊིཏུམྦཀཊཱཧཛཱ. ཏཏྠ གྷཊཱིཏི གྷཊོཡེཝ. ཏུམྦཾ ཨལཱབུ. ཨིཏི ཨིམེ སབྦེ པཏྟཱ ཨཀཔྤིཡཱ ཝུཏྟཱ, དུཀྐཊཝཏྠུཀཱ ཙ ཝུཏྟཱཏི ཡོཛནཱ. ཏཏྠ རཱུཔིཡཱདཱིསུ ཙཏཱུསུ སཙེ གིཧཱི བྷཏྟགྒེསུ སུཝཎྞཏཊྚཀཱདཱིསུ བྱཉྫནཾ ཀཏྭཱ ཨུཔནཱམེནྟི, ཨཱམསིཏུཾ ན ཝཊྚཏི. ཀཾསཀཱཙཕལིཀཛཱནི པན ཏཊྚཀཱདཱིནི བྷཱཛནཱནི པུགྒལིཀཔརིབྷོགེནེཝ ན ཝཊྚནྟི, སངྒྷིཀཔརིབྷོགེན ཝཱ གིཧིཝིཀཊཱནི ཝཱ ཝཊྚནྟི. གྷཊིཏུམྦཀཊཱཧཛཱ པན ལབྷིཏྭཱ པརིཧརིཏུཾ ན ཝཊྚནྟི, ཏཱཝཀཱལིཀཾ པརིབྷུཉྫིཏུཾ ཝཊྚནྟི.

༧༡-༢. དཱརུ ¶ …པེ… ཝེལུ༹རིཡཱམཡཱ ཨཀཔྤིཡཱ, ཕལིཀཱཀཱཙཀཾསཛཱ ཐཱལཀཱ གིཧིསནྟཀཱ སངྒྷིཀཱ ཙ ཀཔྤིཡཱ, ཏུམྦགྷཊིཛཱ ཏཱཝཀཱལིཀཱ ཀཔྤིཡཱཏི སམྦནྡྷོ. ཀཔྤནྟི པརིཀཔྤནྟི ཨཝིརོདྷིབྷཱཝེནེཝཱཏི ཀཔྤཱ, ཏཐཱ ཀཔྤིཡཱ. ན ཀཔྤཱ ཨཀཔྤཱ. སངྒྷསྶ ཨིམེ སངྒྷིཀཱ. ཏཱཝ-སདྡོ ཨཝདྷིམྷི. ཏཱཝ བྷོཛནཱཝདྷིབྷཱུཏོ ཀཱལོ ཨེཏཱསནྟི ཏཱཝཀཱལིཀཱ ¶ , བྷུཉྫིཏྭཱ ཚཌྜེཏབྦཱ, ན པརིཧརིཏབྦཱཏི ཨདྷིཔྤཱཡོ.

༧༣. ཡེན ཨིརིཡཱཔཐེན ཨུཔལཀྑིཏོ པཉྩནྣཾ བྷོཛནཱནཾ ཡཾ ཀིཉྩི བྷོཛནཾ བྷུཉྫམཱནོ ཨཡཾ བྷིཀྑུ ཀཔྤིཡཱནཾ པཉྩནྣཾ བྷོཛནཱནཾ ཧཏྠཔཱསོཔནཱིཏཱནཾ པཝཱརིཏོ, ཏཏོ ཨིརིཡཱཔཐཏོ ཨཉྙེན ཨིརིཡཱཔཐེན ཨནཏིརིཏྟཀཾ ཡཱཝཀཱལིཀཾ བྷུཉྫེཡྻ ཙེ, ཨིམསྶ པཱཙིཏྟི ཧོཏཱིཏི པདཏྠཡོཛནཱ. བྷུཉྫནཏྠཱཡ པཊིགྒཧཎེ པན དུཀྐཊཾ. ཏཏྠ ཨིརིཡཱཡ ཀཱཡིཀཀིརིཡཱཡ པཐོ པཝཏྟནཱུཔཱཡོ ཨིརིཡཱཔཐོ, ཋཱནགམནནིསཛྫནསཡནཱནི. པཝཱརེཏི པཊིཀྑིཔཏཱིཏི པཝཱརིཏོ, ཨཐ ཝཱ པཝཱརཎཾ པཊིཀྑིཔནཾ པཝཱརིཏཾ, ཏམསྶ ཨཏྠཱིཏི པཝཱརིཏོ, ཀཏཔྤཝཱརཎོ ཀཏཔྤཊིཀྑེཔོཏི ཨཏྠོ, ཨཐ ཝཱ པརིཝེསཀེན ཝཱརཱིཡཏཱིཏི པཝཱརིཏོ པཊིཀྑེཔིཏོ. ཨནཏིརིཏྟཀནྟི ཡཾ པཝཱརེཏྭཱ ཨཱསནཱ ཝུཊྛཧནྟསྶ ‘‘ཨལམེཏཾ སབྦ’’ནྟི ཨེཝཾ ཨཏིརིཏྟཀརཎཱདཱིཧི སཏྟཧི ཝིནཡཀམྨཱཀཱརེཧི ཀཔྤིཡཾ ཀཏཾ, ཏཉྩ ‘‘ཨཛྫ ཝཱ ཡདཱ ཝཱ ཨིཙྪཏི, ཏདཱ ཁཱདིསྶཏཱི’’ཏི ཨཱཧཊཾ, གིལཱནཱཏིརིཏྟཉྩ ཨཏིརིཏྟཾ ཨདྷིཀནྟི ཝུཙྩཏི, ཏཏོ ཨཉྙཾ ཨནཏིརིཏྟཀཾ ཨནདྷིཀནྟི ཨཏྠོ. ཀུསལཾ ཙིཏྟཾ པཱཏེཏཱིཏི པཱཙིཏྟི, ཏསྨཱ ཨིཏྠིཡཾ ཏིམྷི ཏ-ཀཱརསྶ ཙ-ཀཱརེ, དྭིཏྟེ ཙ པཱཙིཏྟི. ཡཱམཀཱལིཀཾ སཏྟཱཧཀཱལིཀཾ ཡཱཝཛཱིཝིཀཾ ཨཱཧཱརཏྠཱཡ པཊིགྒཎྷཏོ ཨཱཔཏྟི དུཀྐཊསྶ, ཨཛ྄ཛྷོཧཱརེ ཨཛ྄ཛྷོཧཱརེ ཨཱཔཏྟི དུཀྐཊསྶ.

༧༤. ཨིདཱནི ¶ ¶ ཡཱཡ པཝཱརིཏཱ, སཱ པཉྩངྒསམྤནྣཱཡེཝ པཝཱརཎཱ ནཱམ ཧོཏཱིཏི དསྶེཏུཾ ‘‘ཨསན’’ནྟིཨཱདིམཱཧ. ཏཏྠ ཨསནནྟི བྷུཉྫམཱནསྶ བྷུཉྫནཾ. ཨིམིནཱ ཡཾ ཝིཔྤཀཏཾ བྷོཛནཾ, ཏཾ དསྶེཏི. བྷོཛནཉྩེཝཱཏི པཝཱརཎཔྤཧོནཀཾ བྷོཛནཉྩེཝ ཧོཏཱིཏི. ཨབྷིཧཱརོཏི དཱཡཀསྶ ཀཱཡེན པཝཱརཎཔྤཧོནཀསྶ ཨབྷིཧརཎཾ, ན ཝཱཙཱཡ. སམཱིཔཏཱཏི ཨཌྜྷཏེཡྻཧཏྠཔྤམཱཎསངྑཱཏཱ སམཱིཔཏཱ ཙ. ཨེཏྠ པན སཙེ བྷིཀྑུ ནིསིནྣོ ཧོཏི, ཨཱསནསྶ པཙྪིམནྟཏོ པཊྛཱཡ, སཙེ ཋིཏོ, པཎྷིཨནྟཏོ པཊྛཱཡ, སཙེ ནིཔནྣོ, ཡེན པསྶེན ནིཔནྣོ, ཏསྶ པཱརིམནྟཏོ པཊྛཱཡ དཱཡཀསྶ ཋིཏསྶ ཝཱ ནིསིནྣསྶ ཝཱ ནིཔནྣསྶ ཝཱ ཋཔེཏྭཱ པསཱརིཏཧཏྠཾ ཡཾ ཨཱསནྣཏརཾ ཨངྒཾ, ཏསྶ ཨོརིམནྟེན པརིཙྪིནྡིཏྭཱ ཨཌྜྷཏེཡྻཧཏྠཔཱསོ ཝེདིཏབྦོ. ཀཱཡཝཱཙཱཔཊིཀྑེཔོཏི ཏསྶ ཨབྷིཧཊབྷོཛནསྶ ཨངྒུལིཙལནཱདིཀཱཡཝིཀཱརེན ཝཱ ‘‘ཨལ’’ནྟིཨཱདིནཱ ཝཙཱིཝིཀཱརེན ཝཱ པཊིཀྑིཔནཾ. ཨིཏི ཨིམེཧི པཉྩཧངྒེཧི པཝཱརཎཱ པཀཱརཡུཏྟཝཱརཎཱ པཉྩཨངྒཱཏི སམྦནྡྷོ. པཉྩ ཨངྒཱནི ཡསྶཱ སཱ པཉྩཨངྒཱ.

༧༥. ཨིདཱནི ཨེཏེསུ ཨོདནཱདིཔཉྩཝིདྷཾ བྷོཛནཾ དསྶེཏྭཱ ཏཱནི ཙ པུན ཝིབྷཛིཏྭཱ དསྶེཏུཾ ‘‘ཨོདནོ’’ཏིཨཱདི ཨཱརདྡྷཾ. ཏཏྠ སཱལཱིཏི རཏྟསཱལིཨཱདིཀཱ སབྦཱཔི སཱལིཛཱཏི. ཝཱིཧཱིཏི སབྦཱཔི ཝཱིཧིནཱམིཀཱ ཝཱིཧིཛཱཏི. ཀངྒཱུཏི སེཏརཏྟཀཱལ༹བྷེདཱ སབྦཱཔི ཀངྒུཛཱཏི. ཀུདྲཱུསོ ནཱམ ཀཱལ༹ཀོདྲཝོ. ཝརཀོ ནཱམ སེཏཝཎྞོ ཀོདྲཝོ. ཡཝགོདྷུམེསུ པན བྷེདོ ནཏྠི. ཨེཝཾ ཡཐཱཝུཏྟཱནཾ སཱནུལོམཱནཾ སཏྟནྣཾ དྷཉྙཱནཾ བྷོཛྫཡཱགུ ཙཱཏི སམྦནྡྷོ. བྷོཛྫཡཱགུ ཙཱཏི ཨུཎྷཾ ཝཱ སཱིཏལཾ ཝཱ བྷུཉྫནྟཱནཾ བྷོཛནཀཱལེ གཧིཏཊྛཱནེ ཨོདྷི པཉྙཱཡཏི, སཱ བྷོཛྫཡཱགུ. ཙ-སདྡེན ཨོདནོ ཙཱཏི སམྦནྡྷོ ¶ , ཨོདནོ ནཱམཱཏི ཨཏྠོ. སཙེ པན བྷཏྟེ ཨུདཀཀཉྫིཀཁཱིརཱདཱིནི ཨཱཀིརིཏྭཱ ‘‘ཡཱགུཾ གཎྷཐཱ’’ཏི དེནྟི, ཀིཉྩཱཔི ཏནུཀཱ ཧོཏི, པཝཱརཎཾ ཛནེཏི. སཙེ པན ཨུདཀཱདཱིསུ པཀྑིཔིཏྭཱ པཙིཏྭཱ དེནྟི, ཡཱགུསངྒཧམེཝ གཙྪཏི. སཙེ པན ཏནུཀཱཡཔི ཡཱགུཡཱ སཱསཔམཏྟམྤི མཙྪམཾསཁཎྜཾ ཝཱ ནྷཱརུ ཝཱ པཀྑིཏྟཾ ཧོཏི, པཝཱརཎཾ ཛནེཏི.

༧༦. སཱམཱཀཱདིཏིཎཾ ཀུདྲཱུསཀེ སངྒཧཾ གཏཾ, ཝརཀཙོརཀོ ཝརཀེ སངྒཧཾ གཏོ, ནཱིཝཱརོ ཙེཝ སཱལིཡཾ སངྒཧཾ གཏོཏི ཡོཛནཱ. སཱམཱཀཱདིཏིཎནྟི སཱམཱཀོ ཨཱདི ཡསྶ, ཏམེཝ ཏིཎཾ ཏིཎདྷཉྙནྟི སམཱསོ.

༧༧. བྷཊྛདྷཉྙམཡོཏི ¶ ཁརཔཱཀབྷཛྫིཏེཧི སཏྟཝིདྷེཧི དྷཉྙེཧི ཀོཊྚེཏྭཱ ཀཏོ, ཨནྟམསོ ཙུཎྞམྤི ཀུཎྜཀམྤི སཏྟུ ནཱམཱཏི ཨཏྠོ. སམཔཱཀབྷཛྫིཏཱནཾ པན ཨཱཏཔསུཀྑཱནཾ ཝཱ ཏཎྜུལཱནཾ སཏྟུ ཝཱ ཀུཎྜཀཱནི ཨེཝ ཝཱ ན པཝཱརེནྟི. ཡཝེན སམྦྷཝོ ཨུཔྤཏྟི ཨསྶཱཏི ཡཝསམྦྷཝོ, ཀུམྨཱསོ ཀུམྨཱསོ ནཱམ. མུགྒཱདཱིཧི ཀཏོ པན པཝཱརཎཾ ན ཛནེཏི. ཀཔྤིཡོ ཙཱཏི ཀཔྤིཡོཡེཝ མཾསོ ‘‘མཾསོ’’ཏི ཝུཏྟོཏི ཡོཛནཱ. ཙཱཏི ཨཝདྷཱརཎེ. ཨཀཔྤིཡོ པན པཊིཀྑིཔིཏབྦོཝ. པཊིཀྑིཏྟོཔི ན པཝཱརེཏི. ཨུདཀེ སམྦྷཝོ ཡསྶ སོ མཙྪོ ནཱམ. དྭཱིསུ པནེཏེསུ སཙེ ཡཱགུཾ པིཝནྟསྶ ཡཱགུསིཏྠམཏྟེསུཔི མཙྪཁཎྜེསུ ཝཱ མཾསཁཎྜེསུ ཝཱ ཨེཀཾ ཁཱདིཏཾ ཨེཀཾ ཧཏྠེ ཝཱ པཏྟེ ཝཱ ཧོཏི, སོ ཙེ ཨཉྙཾ པཊིཀྑིཔཏི, པཝཱརེཏི. དྭེཔི ཁཱདིཏཱནི ཧོནྟི, མུཁེ སཱསཔམཏྟམྤི ཨཝསིཊྛཾ ནཏྠི, སཙེཔི ཨཉྙཾ པཊིཀྑིཔཏི, ན པཝཱརེཏི.

༧༨. ཨིདཱནི ‘‘ཀཱིདིསཾ བྷུཉྫནྟོ ཀིནྟི ཝཏྭཱ ཨུཔནཱིཏཾ ཀིཾ ནཱམ ནིསེདྷེནྟོ པཝཱརེཏི ནཱམཱ’’ཏི ཙོདནཾ མནསི ནིདྷཱཡཱཧ ‘‘བྷུཉྫནྟོ’’ཏིཨཱདི ¶ . ཏཏྠ ཀཔྤཾ ཝཱ ཨཀཔྤཾ ཝཱ པཉྩསུ བྷོཛནེསུ ཡཾ ཀིཉྩི བྷོཛནཾ བྷུཉྫནྟོ བྷིཀྑུ ཏནྣཱམེན ཏེསཾ པཝཱརཎཱཛནཀབྷོཛནཱནཾ ནཱམེན ཝཱ ‘‘ཨིམ’’ནྟི སཱམཉྙེན ཝཱ ཝཏྭཱ ཨབྷིཧཊཾ ཧཏྠཔཱསོཔནཱིཏཾ ཀཔྤཾ ཀཔྤིཡཾ ཡཐཱཝུཏྟབྷོཛནཾ ནིསེདྷཡཾ ནིསེདྷཡནྟོ པཝཱརེཡྻཱཏི པདཏྠསམྦནྡྷོ. ཨཡམེཏྠ ཨདྷིཔྤཱཡོ – ཡེན ཙེ ཨཀཔྤིཡམཾསཉྩ ཀུལདཱུསནཝེཛྫཀམྨཨུཏྟརིམནུསྶདྷམྨཱརོཙནསཱདིཏརཱུཔིཡཱདཱིཧི ནིབྦཏྟཾ ཨཀཔྤིཡབྷོཛནཉྩ ཏཐཱ ཨཉྙཉྩ ཀཔྤིཡཾ ཝཱ ཨཀཔྤིཡཾ ཝཱ ཨེཀསིཏྠམཏྟམྤི ཨཛ྄ཛྷོཧཊཾ ཧོཏི, སོ སཙེ པཏྟམུཁཧཏྠེསུ ཡཏྠ ཀཏྠཙི བྷོཛནེ སཏི སཱཔེཀྑོཝ ཨཉྙཾ ཧཏྠཔཱསེ ཋིཏེན ‘‘ཨོདནཾ གཎྷཐཱ’’ཏིཨཱདིནཱ པཝཱརཎཔྤཧོནཀསྶེཝ ནཱམེན ཝཱ ‘‘ཨིམ’’ནྟི སཱམཉྙཝསེནེཝ ཝཱ ཀཱཡེནེཝ ཨབྷིཧཊཾ ཝུཏྟལཀྑཎཾ ཀཔྤིཡམེཝ བྷོཛནཾ ཀེཝལཾ ཝཱ མིསྶཾ ཝཱ ཀཱཡེན ཝཱ ཝཱཙཱཡ ཝཱ པཊིཀྑིཔཏི པཝཱརེཏཱིཏི. ‘‘ཨཱཀིར ཨཱཀིར, ཀོཊྚེཏྭཱ ཀོཊྚེཏྭཱ པཱུརེཧཱི’’ཏི པན ཝཏྟུཾ ཝཊྚཏི.

༧༩-༨༠. ཨིདཱནི ཡེ པཝཱརཎཾ ན ཛནེནྟི, ཏེ དསྶེཏུཾ ‘‘ལཱཛཱ’’ཏིཨཱདིམཱཧ. ཏཏྠ ལཱཛཱ…པེ… ཕལཱདཱིནི པཝཱརཎཾ ན ཛནེནྟཱིཏི སམྦནྡྷོ. ལཱཛཱཏི སཱལིཨཱདཱིཧི ཀཏཱ ལཱཛཱ. ཏཾསཏྟུབྷཏྟཱནཱིཏི ཏེཧི ལཱཛེཧི ཀཏཱ སཏྟུ ཙེཝ བྷཏྟཱནི ཙ. གོརསོཏི གུནྣཾ རསོ ཁཱིརཱདི. སུདྡྷཁཛྫཀོཏི མཙྪམཾསེཧི ཨསམྨིསྶཏཱཡ སུདྡྷཁཛྫཀོ. སཏྟུཡོ པིཎྜེཏྭཱ ཀཏོ ཨཔཀྐོ སཏྟུགུལོ༹ པན སཏྟུམོདཀསངྑཱཏོ པཝཱརེཏི. ཏཎྜུལཱཏི སམཔཱཀབྷཛྫིཏཱནཾ སཱལིཨཱདཱིནཾ ¶ ཏཎྜུལཱ, བྷཛྫིཏཏཎྜུལཱ ཨེཝ ཝཱ. བྷཊྛཔིཊྛནྟི སུདྡྷཾ ཡཾ ཀིཉྩི བྷཛྫིཏཾ པིཊྛཾ. པུཐུཀཱཏི སཱལིཨཱདཱིནཾ པུཐུཀཱ. པུཐུཀཱ ཧི ཏནྟིཨཱགམཡུཏྟིཡཱ ཝིསུམྤི གཡ྄ཧཏི, ཨེཀཏོཔི, ཏསྨཱ ཝུཏྟཱཝསེསཱནཾ པུཐུཀཱཝེལུ༹ཨཱདཱིནཾ བྷཏྟནྟི ཙ སམྦནྡྷོ. ཝེལཱུ༹ཏི ཏེསཾ ¶ ཏཎྜུལཱ ཝུཙྩནྟི. པུཐུཀཱ ཙ ཝེལུ༹ ཙ, ཏེ ཨཱདཡོ ཡེསནྟི སམཱསོ. ཙ-སདྡོ པནེཏྠ སབྦཏྠཱཔི ཡོཛེཏབྦོ. ཨཱདི-སདྡེན ཀནྡམཱུལཕལཱནིཔི གཡ྄ཧནྟི. ཝུཏྟཱཝསེསཱནནྟི ཝུཏྟེཧི སཏྟཝིདྷེཧི དྷཉྙེཧི ཨཝསེསཱནཾ. རསཡཱགཱུཏི རསེཧི པཀྐམཾསཱདཱིཧི སམྨིསྶཱ ཡཱགུ. རསོཔི ཏཱདིསོཝ. སུདྡྷཡཱགཱུཏི མཾསཱདཱིཧི ཨམིསྶཱ སུདྡྷཡཱགུ. ཕལཱདཱིནཱིཏི ཨཱདི-སདྡེན ཀནྡཱདཱིནམྤི གཧཎཾ. ཨཔི ཙཱཏི ནིཔཱཏོ, ནིཔཱཏསམུདཱཡོ ཝཱ སམུཙྩཡེ, སོ པཙྩེཀཾ ཡོཛེཏབྦོ.

༨༡. ཨིདཱནི ཡསྨཱ སཏྟཧི ཝིནཡཀམྨཱཀཱརེཧི ཡཾ ཨཏིརིཏྟཾ ཨཀཏཾ, ཏཏྠ པཱཙིཏྟིཡཾ ཝུཏྟཾ, བྱཏིརེཀཏོ ཨཏིརིཏྟཀཏེ ནཏྠི, ཏསྨཱ ཨཏིརིཏྟཾ ཀརོནྟེན ཨེཝཾ ཀཱཏབྦནྟི དསྶེནྟོ ‘‘པཝཱརིཏེནཱ’’ཏིཨཱདིམཱཧ. ཏཏྠ པཝཱརིཏེན ཝུཊྛཱཡ ཨཏིརིཏྟཾ ན ཀཱཏབྦཾ, བྷོཛནཾ ཨབྷུཏྟེན ཙ ཨཏིརིཏྟཾ ན ཀཱཏབྦནྟི སམྦནྡྷོ. བྷོཛནནྟི པཝཱརཎཔྤཧོནཀབྷོཛནཾ. ཨབྷུཏྟེནཱཏི ཨེཀསིཏྠམཏྟམྤི ཨབྷུཏྟཱཝིནཱ. ཡེན ཡཾཝཱ པུརེ ཀཏནྟི ཨེཏྠ ཙ ཨེཝ-སདྡོ དཱིགྷཾ ཀཏྭཱ ནིདྡིཊྛོ, སོ ཙ ཨཛ྄ཛྷཱཧཊེན ཏཾ-སདྡེན སམྦནྡྷཱིཡཏི, ཏསྨཱ ཡེན བྷིཀྑུནཱ ཡཾ བྷོཛནཾ པུརེ པུབྦེ ཨཏིརིཏྟཾ ཀཏཾ, ཏེནེཝ ཏམེཝ ཨཏིརིཏྟཾ ན ཀཱཏབྦནྟི ཡོཛེཏྭཱ ཨཏྠོ ཝེདིཏབྦོ. ཏསྨཱ ཀཔྤིཡཾ ཀཱརེཏྭཱ བྷུཉྫནྟསྶ ཨཉྙཾ ཨཱམིསཾ ཨཱཀིརནྟི, ཏཾ སོ པུན ཀཱཏུཾ ན ལབྷཏི, ཏསྨིཾ བྷོཛནེ ཀརིཡམཱནེ པཋམཀཏེན སདྡྷིཾ ཀཏཾ ཧོཏཱིཏི. ཨཉྙསྨིཾ པན ཏེན ཝཱ ཨཉྙེན ཝཱ ཀཱཏུཾ ཝཊྚཏི.

༨༢. ‘‘ཀཔྤིཡ’’ནྟིཨཱདཱིནི ‘‘ཀརོནྟོ’’ཏི ཨེཏསྶ ཀམྨཔདཱནི. ཀཔྤིཡཉྩེཝ གཧིཏཉྩེཝ ཨུཙྩཱརིཏཉྩེཝ ཧཏྠཔཱསགཉྩེཝ ཡཱཝཀཱལིཀཾ ཨཏིརིཏྟཾ ཀརོནྟོ ‘‘ཨལམེཏཾ སབྦ’’ནྟི ཨེཝཾ བྷཱསཏཱུཏི ¶ ཡོཛནཱ. ཏཏྠཡཾ ཕལཾ ཝཱ ཀནྡམཱུལཱདི ཝཱ པཉྩཧི སམཎཀཔྤེཧི ཀཔྤིཡཾ ཀཏཾ, ཡཉྩ ཀཔྤིཡམཾསཾ ཝཱ ཀཔྤིཡབྷོཛནཾ ཝཱ, ཨེཏཾ ཀཔྤིཡཾ ནཱམ. གཧིཏནྟི བྷིཀྑུནཱ པཊིགྒཧིཏཾ. ཨུཙྩཱརིཏནྟི ཀཔྤིཡཾ ཀཱརེཏུཾ ཨཱགཏེན བྷིཀྑུནཱ ཨཱིསཀམྤི ཨུཀྑིཏྟཾ ཝཱ ཨཔནཱམིཏཾ ཝཱ, ཏཾ པན ཨཏིརིཏྟཀཱརཀེན ‘‘ཨལམེཏཾ སབྦ’’ནྟི ཝུཏྟེན ཀཱཏབྦཾ. ཧཏྠཔཱསགནྟི ཀཔྤིཡཾ ཀཱརེཏུཾ ཨཱགཏེན ཧཏྠཔཱསཾ གཏཾ. ཨཏིརིཏྟཾ ཀརོནྟོཏི ཨཱིདིསཾ ཙཏུབྦིདྷཱཀཱརསམྤནྣཾ བྷོཛནཾ ཨཏིརིཏྟཾ ཀརོནྟོ པཝཱརེཏྭཱ ཨཱསནཱ ཨཝུཊྛིཏོ ཝཱ ཨཔྤཝཱརེཏྭཱཔི ¶ སབྦཐཱ བྷུཏྟོ ཝཱཏི ཨེཝཾ དུཝིདྷཝིནཡཀམྨཱཀཱརསམྤནྣོ བྷིཀྑུ. ཨལམེཏཾ སབྦནྟི ཨེཝཾ བྷཱསཏཱུཏི ཨལམེཏཾ སབྦཾ ཨིཏི ཨེཝཾ བྷཱསཏུ. ཨེཝཾ སཏྟཝིདྷཾ ཝིནཡཀམྨཱཀཱརཾ སམྤཱདེནྟོ ཝཙཱིབྷེདཾ ཀཏྭཱ སཀིམྤི ཨེཝཾ ཝདེཡྻཱཏི ཨཏྠོ.

༨༣. ཀཔྤིཡཾ ཀརོནྟེན པན ཨནུཔསམྤནྣསྶ ཧཏྠེ ཋིཏཾ ན ཀཱཏབྦཾ. ཏེནཱཧ ‘‘ན ཀརེ…པེ… ཧཏྠག’’ནྟི. ཨུཔསམྤནྣཏོ ཨཉྙོ ཨནུཔསམྤནྣོ, ཏསྶ ཧཏྠེ གཏཾ ཨནུཔསམྤནྣཧཏྠགཾ. པེསཡིཏྭཱཔཱིཏི སཙེ ཏཏྠ ཨཉྙོ བྱཏྟོ བྷིཀྑུ ནཏྠི, ཡཏྠ ཨཏྠི, ཏཏྠ པེསཡིཏྭཱཔི. ཏཾ ཨཏིརིཏྟཀཏཾ ཨཀཱརཀོ ཨཏིརིཏྟཀཱརཀཏོ ཨཉྙོ སབྦོ པཝཱརིཏོཔི ཨཔྤཝཱརིཏོཔི བྷུཉྫིཏུཾ ལབྦྷཏེཏི སམྦནྡྷནཱིཡཾ. པཝཱརིཏེན པན མུཁཉྩ ཧཏྠཉྩ སོདྷེཏྭཱ བྷུཉྫིཏབྦཾ.

༨༤. ཀཱལིཀཱཏི མཛ྄ཛྷནྷིཀཔཙྪིམཡཱམསཏྟཱཧཡཱཝཛཱིཝཔྤཝཏྟིསངྑཱཏོ ཀཱལོ ཨེཏེསམཏྠཱིཏི ཀཱལིཀཱ, སབྦེཔི ¶ ཁཛྫབྷོཛྫལེཡྻཔེཡྻསངྑཱཏཱ ཨཏྠཱ. ཏེ པན གཎནཔརིཙྪེདཏོ ཙཏྟཱརོ ཧོནྟི. ཀིཾ ཏེ ཨཔྤཊིགྒཧིཏཱཔི སབྷཱཝེནེཝ ཀཱལིཀཝོཧཱརཾ ལབྷནྟི, ཨུདཱཧུ ཨཉྙཐཱཔཱིཏི ཨཱཧ ‘‘པཊིགྒཧིཏཱ’’ཏི, པཊིགྒཧིཏཱཡེཝ ཏེ ཡཱཝཀཱལིཀཱདི ཀཱལིཀཝོཧཱརལཱབྷིནོ, ནོ ཨཉྙཐཱཏི ཨདྷིཔྤཱཡོ. ཨིདཱནི ཏེ དསྶེཏི ‘‘ཡཱཝཀཱལིཀ’’ནྟིཨཱདིནཱ. ཏཏྠ ཨརུཎུགྒམནཏོ ཡཱཝ ཋིཏམཛ྄ཛྷནྷིཀོ, ཏཱཝ པརིབྷུཉྫིཏབྦཏྟཱ ཡཱཝ མཛ྄ཛྷནྷིཀསངྑཱཏོ ཀཱལོ ཨསྶཱཏི ཡཱཝཀཱལིཀཾ, པིཊྛཁཱདནཱིཡཱདིཀཾ ཝཏྠུ, ཋིཏམཛ྄ཛྷནྷིཀཏོ པཊྛཱཡ ཏཾ པརིབྷུཉྫིཏུཾ ན སཀྐཱ, ཀཱལཔརིཙྪེདཛཱནནཏྠཾ ཀཱལཏྠམྦྷོ ཝཱ ཡོཛེཏབྦོ, ཀཱལནྟརེ ཝཱ བྷཏྟཀིཙྩཾ ཀཱཏབྦཾ. ཡཱཝ རཏྟིཡཱ པཙྪིམསངྑཱཏོ ཡཱམོ, ཏཱཝ པརིབྷུཉྫིཏབྦཏོ ཡཱམོ ཀཱལོ ཨསྶཱཏི ཡཱམཀཱལིཀཾ. པཊིགྒཧེཏྭཱ སཏྟཱཧཾ ནིདྷེཏབྦཏོ སཏྟཱཧོ ཀཱལོ ཨསྶཱཏི སཏྟཱཧཀཱལིཀཾ. ཋཔེཏྭཱ ཨུདཀཾ ཨཝསེསཾ སབྦམྤི པཊིགྒཧིཏཾ ཡཱཝཛཱིཝཾ ¶ པརིཧརིཏྭཱ སཏི པཙྩཡེ པརིབྷུཉྫིཏབྦཏོ ཛཱིཝསྶ ཡཏྟཀོ པརིཙྪེདོ ཡཱཝཛཱིཝཾ, ཏཾ ཨསྶ ཨཏྠཱིཏི ཡཱཝཛཱིཝིཀཾ.

ནནུ ཙ ཨཉྙཏྠ ཝིཡ ‘‘ཡཱཝཛཱིཝིཀ’’ནྟི ཨེཏྠ ཀཱལསུཏིཡཱ ཨབྷཱཝེ ཀཐཾ ‘‘ཙཏྟཱརོ ཀཱལིཀཱ’’ཏི ཡུཛྫཏཱིཏི? ཡུཛྫཏི, སོགཏཱནཾ ཁནྡྷཝིནིམུཏྟསྶེཝ ཀཱལསྶཱབྷཱཝཏོ ཛཱིཝསངྑཱཏསྶ ཛཱིཝིཏིནྡྲིཡསྶ ཁནྡྷསངྒཧིཏཏྟཱ སོཔི ཀཱལོཡེཝཱཏི. ནནུ ཙེཏྠ ‘‘ཡཱཝཀཱལིཀ’’ནྟིཨཱདིནཱ ནིདྡིཊྛཱནེཝ ‘‘ཀཱལིཀཱ’’ཏི ཝུཏྟཱནི, ‘‘ཀཱལིཀཱནཱི’’ཏི ཝཏྟབྦཾ སིཡཱཏི? ནེདམེཝཾ ཝིཉྙེཡྻཾ, ‘‘ཀཱལིཀ’’ནྟིཨཱདཱིནི ཝཏྠུསམྦནྡྷེན ཝུཏྟཱནི, ‘‘ཀཱལིཀཱ’’ཏི པན སཱམཉྙནྟརཝསེན ཨཏྠསདྡསམྦནྡྷེན ཝུཏྟནྟི ནཏྠི ཝིརོདྷོཏི.

༨༥. ཨིདཱནི ཏེསུ ‘‘པིཊྛ’’ནྟིཨཱདིནཱ ཡཱཝཀཱལིཀཾ དསྶེཏི. ཏཏྠ པིཊྛཾ མཱུལཾ ཕལནྟི པིཊྛཁཱདནཱིཡཾ མཱུལཁཱདནཱིཡཾ ཕལཁཱདནཱིཡཉྩ ¶ . ཏཏྠ སཏྟནྣཾ ཏཱཝ དྷཉྙཱནཾ དྷཉྙཱནུལོམཱནཾ ཨཔརཎྞཱནཉྩ པིཊྛཾ པནསལབུཛཨམྦཱཊཀདྷོཏཏཱལཔིཊྛཱདིཀཉྩེཏི ཏེསུ ཏེསུ ཛནཔདེསུ པཀཏིཨཱཧཱརཝསེན ༠༣ མནུསྶཱནཾ ཁཱདནཱིཡབྷོཛནཱིཡཀིཙྩསཱདྷཀཾ པིཊྛཾ པིཊྛཁཱདནཱིཡཾ. ‘‘ཨདྷོཏཾ ཏཱལཔིཊྛཾ ཁཱིརཝལླིཔིཊྛ’’ནྟིཨཱདིནཱ གཎིཡམཱནཱནཾ གཎནཱཡ ཨནྟོ ནཏྠི, ཁཱདནཱིཡབྷོཛནཱིཡཀིཙྩསཱདྷཀབྷཱཝོཡེཝ པནེཏེསཾ ལཀྑཎཾ, སུབཧུཾ ཝཏྭཱཔི ཨིམསྨིཾཡེཝ ལཀྑཎེ ཋཱཏབྦནྟི ན ཝིཏྠཱརཡཱམ. ཨེཝཾ སབྦཏྠ. ཏམྦཀཏཎྜུལེཡྻཱདིམཱུལཾ མཱུལཁཱདནཱིཡཾ. པནསལབུཛནཱལི༹ཀེརཱདིཕལཾ ཕལཁཱདནཱིཡཾ. ཁཛྫནྟི སཀྑལིམོདཀཱདིཔུབྦཎྞཱཔརཎྞམཡཾ ཁཱདནཱིཡཉྩ. གོརསོཏི ཁཱིརདདྷིཏཀྐསངྑཱཏོ གུནྣཾ རསོ ཙ. དྷཉྙབྷོཛནནྟི སཱནུལོམཱནཾ དྷཉྙཱནཾ ཨོདནསཏྟུཀུམྨཱསསངྑཱཏབྷོཛནཉྩ. ཊཱིཀཱཡཾ པན ‘‘སཱནུལོམཱནི སཏྟདྷཉྙཱནི ཙ པཉྩཝིདྷབྷོཛནཉྩཱ’’ཏི ཝུཏྟཾ, ཏཾ ན ཡུཏྟཾ, དྷཉྙཱནཾ ཝིསུཾ གཧཎེ པཡོཛནཱབྷཱཝཱ, པཡོཛནསམྦྷཝེ ཙ ཕལགྒཧཎེནེཝ ཏེསཾ གཧཎསམྦྷཝཏོ.

ཡཱགུསཱུཔཔྤབྷུཏཡོཏི ཡཱགུ ཙ སཱུཔཉྩ, ཏཾ པབྷུཏི ཡེསཾ ཏེཏི ཨེཏེ ཡཱཝཀཱལིཀཱ ཧོནྟཱིཏི སམྦནྡྷོ. ཨེཏྠ ཙ པབྷུཏི-སདྡེན མཙྪམཾསསངྑཱཏཾ དྷཉྙབྷོཛནཏོ ཨཝསིཊྛཾ བྷོཛནཉྩ པིཊྛམཱུལཕལཁཱདནཱིཡཏོ ཨཝསིཊྛཾ ཀནྡཁཱདནཱིཡཾ, མུལཱ༹ལཁཱདནཱིཡཱདིཉྩ སངྒཎྷཱཏི. ཏེསུ དཱིགྷོ ཙ བྷིསཀནྡཱདི ཝཊྚོ ཙ ཨུཔྤལཀཎྜཱདི ཀནྡཁཱདནཱིཡཾ, པདུམམཱུལཱདི ཙ ཏཾསདིསཾ ཨེརཀམཱུལཱདི ཙ མུལཱ༹ལཁཱདནཱིཡཾ, ཏཱལཱདཱིནཾ ཀལཱི༹རསངྑཱཏཱ མཏྠཀཱ མཏྠཀཁཱདནཱིཡཾ, ཨུཙྪུཀྑནྡྷཱདཡོ ¶ ནཱིལུཔྤལཱདཱིནཾ དཎྜཀྑནྡྷཀཱདི ཁནྡྷཁཱདནཱིཡཾ, ཏམྦཀཏཎྜུལེཡྻཱདཱིནཾ པཎྞཾ པཏྟཁཱདནཱིཡཾ, ཨུཙྪུཏཙོཝ ཨེཀོ སརསོ ཏཙཁཱདནཱིཡཾ, ཏམྦཀསིགྒུཔུཔྥཱདི པུཔྥཁཱདནཱིཡཾ, ལབུཛཊྛིཔནསཊྛིཨཱདིཀཾ ཨཊྛིཁཱདནཱིཡཾ.

༨༦. ‘‘མདྷཱུ’’ཏིཨཱདིནཱ ¶ ཡཱམཀཱལིཀཾ དསྶེཏི. མདྷུ ཙ མུདྡིཀཱ ཙ སཱལཱུཀཉྩ ཙོཙཉྩ མོཙཉྩ ཨམྦཉྩ ཛམྦུ ཙཱཏི དྭནྡོ. མུདྡིཀཱ ཕལེཔི ཨིཏྠིཡཾ, ཕལེ སེསཱ ནཔུཾསཀེ, ‘‘ཛམྦུ’’ ཨིཏི ཕལཝཱཙཱི ནཔུཾསཀསདྡནྟརཾ, ཏཏོ ཛཱཏཾ མདྷུཔཱནཱདི མདྷུ…པེ… ཛམྦུཛཾ, ཏཉྩ ཕཱརུསཉྩ པཱནཀནྟི ཡོཛནཱ. ཏཏྠ མདྷུཛཾ པཱནཾ ནཱམ མུདྡིཀཱནཾ ཛཱཏིརསཾ ཨུདཀསམྦྷིནྣཾ ཀཏྭཱ ཀཏཔཱནཾ. ཏཾ ཨཏྟནཱ ཀཏཾ པུརེབྷཏྟམེཝ སཱམིསཾ ནིརཱམིསམྤི ཝཊྚཏི. ཨནུཔསམྤནྣེཧི ཀཏཾ ལབྷིཏྭཱ པན པུརེབྷཏྟཾ པཊིགྒཧིཏཾ པུརེབྷཏྟཾ སཱམིསམྤི ཝཊྚཏི, པཙྪཱབྷཏྟཾ པན ནིརཱམིསམེཝ ཝཊྚཏི. ཨེས ནཡོ སབྦཔཱནེསུ. མུདྡིཀཛཾ པཱནཾ ནཱམ མུདྡིཀཱནཾ ཨུདཀེ མདྡིཏྭཱ ཀཏཔཱནཾ. ཏཐཱ སེསཔཱནཱནི ཡཐཱནུརཱུཔཾ ཝེདིཏབྦཱནི, སཱལཱུཀཾ རཏྟུཔྤལཱདཱིནཾ སཱལཱུཀཾ. ཙོཙཾ ཨཊྛིཀཀདལིཕལཾ. མོཙཾ ཨནཊྛིཀཾ. ཨིམཱནི ཨཊྛ པཱནཱནི སཱིཏཱནིཔི ཨཱདིཙྩཔཱཀཱནིཔི ཝཊྚནྟི, ཨགྒིཔཱཀཱནི པན ན ཝཊྚནྟི. ཏེནཱཧ ‘‘ནཱགྒིསནྟཏྟ’’ནྟི.

༨༧-༨. ཨཝསེསཱནི པན ཝེཏྟཏིནྟིཎིཀམཱཏུལུངྒཀཔིཏྠཀརམནྡཱདིཁུདྡཀཕལཔཱནཱནི ཨཊྛཔཱནགཏིཀཱནེཝ. ཏེནཱཧ ‘‘སཱནུལོམཱནི དྷཉྙཱནི, ཋཔེཏྭཱ ཕལཛོ རསོ’’ཏི. ཨེཀསྶ པན ཝཀྑམཱནཱནཉྩ ‘‘པུཔྥརསོ’’ཏིཨཱདཱིནཾ ‘‘སཱིཏོདམདྡིཏཱདིཙྩཔཱཀོ ཝཱ ཡཱམཀཱལིཀོ’’ཏི ཨིམིནཱ སམྦནྡྷོ ཝེདིཏབྦོ. ཏཱལནཱལི༹ཀེརཔནསལབུཛཨལཱབུཀུམྦྷཎྜཔུསྶཕལཏིཔུསཨེལཱ༹ལུཀཕལཱནཱིཏི ནཝ མཧཱཕལཱནི, སབྦཉྩ ཨཔརཎྞཾ སཏྟདྷཉྙཱནི ཨནུལོམེནྟཱིཏི སཧ ཨནུལོམེཧཱིཏི སཱནུལོམཱནི. སཱནུལོམདྷཉྙཱནཾ པན རསོ ཡཱཝཀཱལིཀོ. ‘‘སཱནུལོམཱནི དྷཉྙཱནཱི’’ཏི ཕལཱནི ཝིཉྙཱཡནྟི. ཕལསུཏིཡཱ ‘‘སེསཕལཛོ’’ཏི ཝཏྟབྦེ གམྱམཱནཏྟཱ ན ཝུཏྟཾ. མདྷུཀཔུཔྥམཉྙཏྲཱཏི མདྷུཀཔུཔྥཾ ཋཔེཏྭཱ. པཀྐཌཱཀཛནྟི པཀྐེཧི ཡཱཝཀཱལིཀེཧི ཌཱཀེཧི ཛཱཏཾ རསཾ. སཱིཏམུདཀཾ སཱིཏོདཾ, ཁཱིརོདེ ཝིཡ སཱིཏོདེ ¶ མདྡིཏོཏི ཏཔྤུརིསོ. ཨཱདིཙྩ-སདྡོ ཨཱཏཔེ ཝཏྟཏི ཨུཔཙཱརཏོཏི ཨཱདིཙྩེ པཱཀོ ཡསྶཱཏི སམཱསོ.

༨༩. སཏྟཱཧཀཱལིཀཾ དསྶེཏི ‘‘སཔྤཱི’’ཏིཨཱདིནཱ. ཏཏྠ སཏྟཱཧཀཱལིཀཱཏི ཡཐཱཝུཏྟཱནི སཔྤིཨཱདཱིནི སཏྟཱཧཀཱལིཀཱནི. ཨིདཱནི སཔྤིཨཱདཱིནི ཝིབྷཛཏི ‘‘སཔྤཱི’’ཏིཨཱདིནཱ. ཏཏྠ ཡེསཾ ¶ གོམཧིཾ སཱདཱིནཾ མཾསཾ ཀཔྤཏི, ཏེསཾ སཔྤི སཔྤི ནཱམཱཏི ‘‘སཔྤཱི’’ཏིཨཱདིནཱ སཔྤིལཀྑཎམཱཧ. ཨཀཔྤིཡམཾསསཔྤིནོཔི ཀཔྤིཡསམྦྷཝེ ཏཏྠ སཏྟཱཧཱཏིཀྐམེ དུཀྐཊསྶ ཝཀྑམཱནཏྟཱ ནིསྶགྒིཡཝཏྠུམེཝ ཙེཏྠ དསྶེཏུཾ ‘‘ཡེསཾ མཾསམཝཱརིཏ’’ནྟི ཝུཏྟཾ. ཁཱིརཱདཱིསུ ཧི ཏེསམཀཔྤིཡཾ ནཱམ ནཏྠི. ནཝནཱིཏསྶ སཔྤིསདིསཏཱཡ ནཝནཱིཏལཀྑཎཾ ཝིསུཾ ན ཝུཏྟཾ. ཨུཔརི སཔྤིཔིཎྜཾ ཋཔེཏྭཱ སཱིཏལཔཱཡཱསཾ དེནྟི, ཡཾ པཱཡཱསེན ཨསཾསཊྛཾ, ཏཾ སཏྟཱཧཀཱལིཀཾ, མིསྶིཏཾ པན ཨཱདིཙྩཔཱཀཾ ཀཏྭཱ པརིསྶཱཝིཏཾ, ཏཐཱ ཁཱིརཾ པཀྑིཔིཏྭཱ པཀྐཏེལམྤི, ཏེསུ ནཝནཱིཏཾ ནཱམ ནཝུདྡྷཊཾ. ཏེན ཀཏཾ པན སཔྤི.

༩༠. ཏིལཱ ཙ ཝསཱ ཙ ཨེརཎྜཱནི ཙ མདྷུཀཱནི ཙ སཱསཔཱ ཙཱཏི དྭནྡོ. ཏེཧི སམྦྷཝོ ཡསྶཱཏི བཱཧིརཏྠོ, ཏཾ ཏེལཾ ནཱམཱཏི ཨཏྠོ. ཁུདྡཱ ཁུདྡམདྷུམཀྑིཀཱ ཙ བྷམརཱ ཙ ཁུདྡབྷམརཾ, ཁུདྡཛནྟུཀཏྟཱ ནཔུཾསཀེཀཝཙནཾ. མདྷུཾ ཀརོནྟཱིཏི མདྷུཀརིཡོ, ཏཱ ཨེཝ མཀྑིཀཱ མདྷུཀརིམཀྑིཀཱ, ཁུདྡབྷམརམེཝ མདྷུཀརིམཀྑིཀཱཏི ཀམྨདྷཱརཡོ. ཏཱཧི ཀཏཾ མདྷུ མདྷུ ནཱམཱཏི ཨཏྠོ. ཊཱིཀཱཡཾ པན ཝིསུཾ མདྷུཀརཱི-སདྡཾ ཝིཀཔྤེཏྭཱ ‘‘དཎྜཀེསུ མདྷུཀརཱ མདྷུཀརིམཀྑིཀཱ ནཱམཱ’’ཏི ཝུཏྟཾ. མདྷུཔཊལཾ ཝཱ མདྷུསིཏྠཀཾ ཝཱ སཙེ མདྷུནཱ མཀྑིཏཾ, མདྷུགཏིཀམེཝ. ཏུམྦལཀཱནཾ ཙཱིརིཀཱནཉྩ ནིཡྻཱསསདིསཾ མདྷུ པན ¶ ཡཱཝཛཱིཝིཀཾ. རསོ ནིཀྐསཊོ ཨཱདི ཡསྶཱ སཱ རསཱདི. ཨཱདི-སདྡེན ཕཱཎིཏཱདཱིནཾ གཧཎཾ, སཱ ཨུཙྪུཝིཀཏི. པཀྐཱཏི ཨཝཏྠུཀཔཀྐཱ ཝཱ, ཕཱཎིཏཾ ཕཱཎིཏཾ ནཱམཱཏི ཨཏྠོ. སཱིཏཱུདཀེན ཀཏམདྷུཀཔུཔྥཕཱཎིཏཾ པན ཕཱཎིཏགཏིཀམེཝ. ཨམྦཕཱཎིཏཱདཱིནི ཡཱཝཀཱལིཀཱནི. ཨེཏཱནི ཡཐཱཝུཏྟཱནི སཔྤིཨཱདཱིནི པུརེབྷཏྟཾ སཱམིསཔརིབྷོགེནཱཔི, པཙྪཱབྷཏྟཏོ པཊྛཱཡ པན ཏཱནི ཙ པཙྪཱབྷཏྟཾ པཊིགྒཧིཏཱནི ཙ སཏྟཱཧཾ ནིདཧིཏྭཱ ནིརཱམིསཔརིབྷོགེན པརིབྷུཉྫིཏབྦཱནི.

༩༡. ཨིདཱནི ཨོདིསྶ ཨནུཉྙཱཏཝསཱཡ པཱཀཏོ ཝིབྷཱགཾ དསྶེཏྭཱ ཏཏོ སཔྤིཨཱདཱིནཾ དསྶེཏུཾ ‘‘སཝཏྠཱུ’’ཏིཨཱདིམཱཧ. ཏཏྠ པུརེབྷཏྟཾ སཱམཾ ཝཱ ཨཏྟནཱ ཨེཝ. ཝཱ-སདྡེན པརེཧི ཝཱ. ཨམཱནུསཱ མནུསྶཝསཱརཧིཏཱ. ཝསཱ ཨཙྪཱདཱིནཾ ཨཀཔྤིཡཱནཾ, སཱུཀརཱདཱིནཾ ཀཔྤིཡཱནཉྩ སཏྟཱནཾ ཝསཱ. སཝཏྠུཔཀྐཱ སཏྟཱཧཀཱལིཀཱ ཧོཏཱིཏི སེསོ. སཝཏྠུཔཀྐཱཏི སཝཏྠུཀཾ ཀཏྭཱ པཀྐཱ. ཨཡམེཏྠ ཨདྷིཔྤཱཡོ – སཙེ པན ཝསཾ པུརེབྷཏྟཾ པཊིགྒཧེཏྭཱ པཙིཏྭཱ ཏེལཾ པརིསྶཱཝིཏཾ སཏྟཱཧཱནི ནིརཱམིསཔརིབྷོགེན པརིབྷུཉྫིཏབྦཾ. ཨཐ པརེཧི ཀཏཾ པུརེབྷཏྟཾ པཊིགྒཧིཏཾ, པུརེབྷཏྟཾ སཱམིསམྤི ¶ ཝཊྚཏི, པཙྪཱབྷཏྟཏོ པཊྛཱཡ ནིརཱམིསམེཝ, ནོ ཙེ, དུཀྐཊཾ ཧོཏཱིཏི. ཀཱརིཡེ ཀཱརཎོཔཙཱརེན པནེཏྠ ‘‘ཝསཱ’’ཏི ཏེལམེཝ ཝུཏྟཾ, ཝསཱ པན ཡཱཝཀཱལིཀཱཝ.

ཊཱིཀཱཡཾ པན ཝསཱཡ ‘‘སཏྟཱཧཀཱལིཀེ ཨཱགཏཊྛཱནཾ ནཏྠཱིཏི ཝདནྟཱི’’ཏི ཝཏྭཱ ‘‘ཏཾ ཨུཔཔརིཀྑིཏབྦ’’ནྟི ཝསཱཡ སཏྟཱཧཀཱལིཀཏྟམཱསཾཀིཡཾ ཝུཏྟཾ. ཀིམེཏྠ ཨུཔཔརིཀྑིཏབྦཾ? བྷེསཛྫཾ ཨནུཛཱནཏཱ བྷགཝཏཱ ‘‘ཡཱནི ཁོ པན ཏཱནི གིལཱནཱནཾ བྷིཀྑཱུནཾ པཊིསཱཡནཱིཡཱནི བྷེསཛྫཱནི, སེཡྻཐིདཾ – སཔྤི ནཝནཱིཏཾ ཏེལཾ མདྷུ ཕཱཎིཏཾ, ཏཱནི པཊིགྒཧེཏྭཱ ¶ སཏྟཱཧཔརམཾ སནྣིདྷིཀཱརཀཾ པརིབྷུཉྫིཏབྦཱནཱི’’ཏི (པཱརཱ. ༦༢༢) སཔྤིཨཱདཱིནམེཝ སཏྟཱཧཀཱལིཀཏྟཾ ཝུཏྟཾ. བྷེསཛྫཀྑནྡྷཀེཔི ‘‘ཨནུཛཱནཱམི, བྷིཀྑཝེ, ཏཱནི པཉྩ བྷེསཛྫཱནི པཊིགྒཧེཏྭཱ ཀཱལེཔི ཝིཀཱལེཔི པརིབྷུཉྫིཏུ’’ནྟི (མཧཱཝ. ༢༦༠) ཏཱནི པཉྩེཝ ‘‘བྷེསཛྫཱནཱི’’ཏི ཝཏྭཱ ཏེལཾ ནིཡམཏོ ‘‘ཨནུཛཱནཱམི, བྷིཀྑཝེ, ཝསཱནི བྷེསཛྫཱནི ཨཙྪཝསཾ མཙྪཝསཾ སུསུཀཱཝསཾ སཱུཀརཝསཾ གདྲབྷཝསཾ ཀཱལེ པཊིགྒཧིཏཾ ཀཱལེ ནིཔྤཀྐཾ ཀཱལེ སཾསཊྛཾ ཏེལཔརིབྷོགེན པརིབྷུཉྫིཏུ’’ནྟི (མཧཱཝ. ༢༦༢) ཝུཏྟཾ. བྷེསཛྫསིཀྑཱཔདཊྛཀཐཱཡཉྩ (ཀངྑཱ. ཨཊྛ. བྷེསཛྫསིཀྑཱཔདཝཎྞནཱ) ‘‘ཋཔེཏྭཱ མནུསྶཝསཾ ཨཉྙཾ ཡཾ ཀིཉྩི ཝས’’ནྟིཨཱདིནཱ ཝསཱཏེལསྶ ཝིདྷཱནཾ དསྶེཏྭཱ ‘‘ཨཉྙེསཾ ཡཱཝཀཱལིཀཝཏྠཱུནཾ ཝཏྠུཾ པཙིཏུཾ ན ཝཊྚཏིཡེཝཱ’’ཏི ཝདཏཱ ཨཊྛཀཐཱཙརིཡེན ཡཱཝཀཱལིཀེསུ ཝསཾ ཋཔེཏྭཱ ཨཉྙེསཾ ཡཱཝཀཱལིཀཝཏྠཱུནཾ ཝཏྠུཾ པཙིཏུཾ ན ཝཊྚཏཱིཏི ཨཡམེཏྠ ཨཏྠོ དཱིཔིཏོཏི ཝསཱ ‘‘ཡཱཝཀཱལིཀཱཡེཝཱ’’ཏི ཝིཉྙཱཡཏཱིཏི ཀོ ཨེཏྠ སུཁུམོ ནཡོཏི.

ཨཉྙེསཾ ཝསཱཏེལཏོ པརེསཾ ཡཱཝཀཱལིཀཝཏྠཱུནཾ ཡེསཾ ཏེསཾ ཡཱཝཀཱལིཀཝཏྠཱུནཾ སཔྤིཨཱདཱིནཾ ཝཏྠུཾ ཡཱཝཀཱལིཀསངྑཱཏཾ ཁཱིརཱདིཀཾ ན པཙེཏི སམྦནྡྷོ. ཨཡམེཏྠ ཨདྷིཔྤཱཡོ – ཡཐཱ སཏྟཱཧཔརིབྷོགཏྠཱཡ ཝསཾ ཀཱལེ པཊིགྒཧེཏྭཱ ཀཱལེ པཙིཏུཾ ཝཊྚཏི, ན ཨེཝཾ སཔྤིཨཱདཱིནཾ ཝཏྠུབྷཱུཏཾ ཁཱིརཱདིཡཱཝཀཱལིཀཾ, ཏཾ པན སཏྟཱཧཔརིབྷོགཏྠཱཡ ཀཱལེཔི ན ཝཊྚཏི. ཏཱནི ཧི ཡདི ཏཾ པཊིགྒཧེཏྭཱ སཡཾ ཀཏཱནི, པཙྪཱབྷཏྟཏོ པཊྛཱཡ ན ཝཊྚནྟི སཝཏྠུཀཔྤཊིགྒཧིཏཏྟཱ, སཱམིསཾ ན ཝཊྚནྟི སཱམཾཔཀྐཏྟཱ, པུརེབྷཏྟམྤི ན ཝཊྚནྟི ཡཱཝཀཱལིཀཝཏྠུཏོ ཝིཝེཙིཏཏྟཱ. པརེཧི ཀཏཱནི པན པུརེབྷཏྟཾ སཱམིསམྤི ¶ ཝཊྚནྟི ཨཏྟནཱ ཨཔཀྐཏྟཱ. ཡཱཝཛཱིཝིཀཱནི ཏུ སཱསཔམདྷུཀཨེརཎྜཨཊྛཱིནི ཏེལཀརཎཏྠཾ པཊིགྒཧེཏྭཱ ཏདཧེཝ ཀཏཾ ཏེལཾ སཏྟཱཧཀཱལིཀཾ, དུཏིཡདིཝསེ ཀཏཾ ཚཱཧཾ ཝཊྚཏི, ཨེཝཾ ཡཱཝ སཏྟམདིཝསེ ཀཏཾ ཏདཧེཝ ཝཊྚཏི, ཨུགྒཏེ ཨརུཎེ ནིསྶགྒིཡཾ ¶ , ཨཊྛམེ དིཝསེ ཨནཛ྄ཛྷོཧརཎཱིཡཾ, ཨུགྒཧིཏེན ཡེན ཀེནཙི ཝཏྠུནཱ ཀཏསདིསཾ ཧོཏི. ཏེལཏྠཱཡ པཊིགྒཧིཏསཱསཔཱདཱིནཾ སཏྟཱཧཱཏིཀྐམེན དུཀྐཊཾ. ནིབྦཏྟིཏཾ སཔྤི ཝཱ ནཝནཱིཏཾ ཝཱ ཀཱལེཔི ཝིཀཱལེཔི པཊིགྒཧེཏྭཱ པཙིཏུཾ ཝཊྚཏི. ཏཾ པན ཏདཧུ པུརེབྷཏྟམྤི སཱམིསཾ ན ཝཊྚཏི, སཾསགྒཏོ ཡཱཝཀཱལིཀམྤི སཱམཾཔཀྐཾ སིཡཱཏི ནིརཱམིསཾ པན སཏྟཱཧམྤི ཝཊྚཏི.

༩༢. ཨིདཱནི ‘‘ཧལིདྡི’’ནྟིཨཱདིནཱ ཡཱཝཛཱིཝིཀཾ དསྶེཏི. ཏཏྠ ‘‘ཧལིདྡི ནཱམ ནིསཱ’’ཏིཨཱདིནཱ ཝུཙྩམཱནེཔི པརིཡཱཡཝཙནེ སམྨོཧོ སིཡཱཏི ན ཏཾཝཙནེན བྷུསཾ སམྨོཧཡིསྶཱམ, ཏསྨཱ ཏཱནི ཨུཔདེསཏོཝ ཝེདིཏབྦཱནི. ཏཏྠ ‘‘ཧལིདྡི’’ནྟི བིནྡུཨཱགམེན ཝུཏྟཾ. ཨུཔཙཱརེན ཏུ མཱུལཱདཱིནི ཧལིདྡཱདིསདྡེན ཝུཏྟཱནི. ཏཱ ཧལིདྡཱདཡོ ཀེཙི ཨིཏྠིལིངྒཱཡེཝ. མཱུལཕལེ ཝཙཏྟཉྩ…པེ… བྷདྡམུཏྟཉྩ ཨཏིཝིསཱཏི པདཙྪེདོ. པཉྩམཱུལ-སདྡེན ཙཱུལ༹པཉྩམཱུལམཧཱཔཉྩམཱུལཱནི གཧིཏཱནི. ཨཱདི-སདྡེན ཝཛཀལིམཱུལེ ཛརཊྛནྟི ཨེཝམཱདཱིནཾ སངྒཧོ.

༩༣-༥. གོཊྛཕལནྟི མདནཕལནྟི ཝདནྟཱིཏི. ཏཱིཎི ཕལཱནི ཡསྶཾ སངྒཧིཏཾ སཱ ཏིཕལཱ. ཨེརཎྜཀཱདཱིནནྟི ཨཱདི-སདྡེན ཛཱཏིརུཀྑཱདཱིནཾ གཧཎཾ. སུལསཱདཱིནཾ པཎྞནྟི སམྦནྡྷོ. ཨཱདི-སདྡེན ཨསོཀཱདཱིནཾ གཧཎཾ. སཱུཔེཡྻཔཎྞནྟི ཏམྦཀཏཎྜུལེཡྻཱདིསཱུཔཡོགྒཔཎྞཾ. ཨུཙྪུནིཡྻཱསཾ ཋཔེཏྭཱ སབྦོ ¶ ནིཡྻཱསོ ཙ སརསཾ ཨུཙྪུཛཾ ཏཙཉྩ ཋཔེཏྭཱ སབྦོ ཏཙོ ཙཱཏི སམྦནྡྷོ. ཏཏྠ ཧིངྒུཀཎིཀཱརནིཡྻཱསཱདི སབྦོ ནིཡྻཱསོ ནཱམ. ནིརསཨུཙྪུཏཙཱདི སབྦོ ཏཙོ ནཱམ. ལོཎཾ སཱམུདྡཱདི. ལོཧཾ ཨཡཏམྦཱདི. སིལཱ ཀཱལ༹སིལཱདི.

༩༦. སུདྡྷསིཏྠནྟི མདྷུནཱ ཨམཀྑིཏཾ. མདྷུམཀྑིཏཾ པན སཏྟཱཧཀཱལིཀཾ. ཡཉྩ ཀིཉྩི སུཛྷཱཔིཏནྟི དུཛ྄ཛྷཱཔིཏཾ ཨཀཏྭཱ སུཛ྄ཛྷཱཔིཏཾ ཡཾ ཀིཉྩི ཙ. ཝིཀཊཱདིཔྤབྷེདནྟི ཝིཀཊཾ གཱུཐམཏྟིཀཱམུཏྟཚཱརིཀཱསངྑཱཏཾ ཨཱདི ཡསྶ, སོ པབྷེདོ ཡསྶཱཏི བཱཧིརཏྠོ, ཏཾ. ཡཾ ཀིཉྩི ཙཱཏི སམྦནྡྷོ. ཨེཏྠ པན ཨཱདི-སདྡེན ཀནྡཁཱདནཱིཡེ ཁཱིརཀཱཀོལཱདཡོ, མུལཱ༹ལཁཱདནཱིཡེ ཧལིདྡིསིངྒིཝེརམཱུལཱདཡོ, མཏྠཀཁཱདནཱིཡེ ཧལིདྡིསིངྒིཝེརཀལཱི༹རཱདཡོ, ཁནྡྷཁཱདནཱིཡེ ཨུཔྤལཔཎྞདཎྜཱདཡོ, པུཔྥཁཱདནཱིཡེ ཙམྤཀཔུཔྥཱདཡོ, ཨཊྛིཁཱདནཱིཡེ མདྷུཀཊྛིཨེརཎྜསཱསཔཱདཡོ, པིཊྛཁཱདནཱིཡེ ཨདྷོཏཏཱལཔིཊྛཱདཡོ ཙ སངྒཧིཏཱཏི དཊྛབྦཱ.

༩༧. ཨིདཱནི ¶ སབྦསོ ཡཱཝཛཱིཝིཀཾ དསྶེཏུཾ ཨསཀྐུཎེཡྻཏྟཱ ཝུཏྟཱནི ཙ ཨཝུཏྟཱནི ཙ ཨེཀཏོ སམྤིཎྜེཏྭཱ ཏཏྠ ལཀྑཎཾ ཋཔེནྟོ ‘‘མཱུལ’’ནྟིཨཱདིམཱཧ. ཏཏྠ ‘‘སཱརོ’’ཏི ཝཏྟབྦེ ‘‘སཱར’’ནྟི ལིངྒཝིཔལླཱསེནཱཧ. ‘‘སཱརོ བལེ ཐིརཾསེ ཙཱ’’ཏི ཧི ནིགྷཎྜུ. ཨཱཧཱརཊྛནྟི ཨཱཧཱརེན ཛཱཏོ ཨཏྠོ པཡོཛནཾ ཨཱཧཱརཏྠོ, སོཝ ཨཱཧཱརཊྛོ, ཏཾ ཨཱཧཱརཀིཙྩནྟི ཝུཏྟཾ ཧོཏི.

༩༨. ཨིདཱནི ཙཏཱུསུ ཀཔྤིཡཱཀཔྤིཡཱདིཝིབྷཱགཾ དསྶེཏི ‘‘སབྦཱ’’ཏིཨཱདིནཱ. ཏཏྠ སབྦེ ཀཱལིཀཱ, ཏེསཾ སམྦྷོགོ ཨནུབྷཝོཏི སམཱསོ. ཀཱལེཏི པུབྦཎྷཀཱལེ. སབྦསྶཱཏི གིལཱནཱགིལཱནསྶ. སཏི པཙྩཡེཏི ཏཱིསུ ¶ ཡཱམཀཱལིཀཾ པིཔཱསཱདིཀཱརཎེ སཏི, སཏྟཱཧཀཱལིཀཾ ཡཱཝཛཱིཝིཀཉྩ གེལཉྙཀཱརཎེ སཏཱིཏི ཨཏྠོ, ཀཱལཏོ ཝིགཏོ ཝིཀཱལོ, ཏསྨིཾ, ཡཱམཀཱལིཀཾ ཝིཀཱལེ ཨཱཧཱརཏྠཱཡ ཨཛ྄ཛྷོཧརཎེ, སཏྟཱཧཀཱལིཀཾ པན ཡཱཝཛཱིཝིཀཉྩ ཏདཏྠཱཡ པཊིགྒཧཎམཏྟེཔི དུཀྐཊཾ.

༩༩. ཨུབྷོཏི ཡཱཝཀཱལིཀཾ ཡཱམཀཱལིཀཉྩ. ཏཏྠ ཡཱཝཀཱལིཀཾ ཨཏྟནོ ཀཱལཱཏིཀྐནྟཾ ཝིཀཱལབྷོཛནབྷིཀྑཱཔདེན པཱཙིཏྟིཡཾ ཛནཡཏི, ཡཱམཀཱལིཀཾ ཡཱམཱཏིཀྐནྟཾ སནྣིདྷིསིཀྑཱཔདེན. ཨེཏེ ཨུབྷོཔི ཨནྟོཝུཏྠཉྩ སནྣིདྷིཉྩ ཛནཡནྟཱིཏི སམྦནྡྷོ. ‘‘ཨནྟོཝུཏྠཾ སནྣིདྷི’’ནྟི བྷཱཝཔྤདྷཱནོཡཾ ནིདྡེསོ, ཨནྟོཝུཏྠཏྟཾ སནྣིདྷིཏྟཉྩཱཏི ཨཏྠོ.

༡༠༠. ཨཏིནཱམིཏེཏི ཨཏིཀྐཱམིཏེ. པཱཙིཏྟཱིཏི སཏྟཱཧཱཏིཀྐནྟཾ བྷེསཛྫསིཀྑཱཔདེན ནིསྶགྒིཡཔཱཙིཏྟིཡཱཔཏྟི ཙ ཧོཏཱིཏི ཨཏྠོ. སཙེ དྭིནྣཾ སནྟཀཾ ཨེཀེན པཊིགྒཧིཏཾ ཨཝིབྷཏྟཾ ཧོཏི, སཏྟཱཧཱཏིཀྐམེ དྭིནྣམྤི ཨནཱཔཏྟི, པརིབྷུཉྫིཏུཾ པན ན ཝཊྚཏི. པཱལི༹ནཱརུལ༹ྷེཏི པཱལི༹ཡཾ ཨནཱརུལ༹ྷེ སཔྤིཨཱདིམྷི སཏྟ ཨཧཱནི ཨཏིནཱམིཏེཏི སམྦནྡྷོ. སཔྤཱིཏི མནུསྶཱདཱིནཾ སཔྤི. ཨཱདི-སདྡེན ཏེསཾཡེཝ ནཝནཱིཏཾ, ནཱལི༹ཀེརཱདིཏེལཾ, སཱིཏོདཀེན ཀཏཾ མདྷུཀཔུཔྥཕཱཎིཏཉྩ སངྒཧིཏཾ.

༡༠༡. ནིསྶཊྛལདྡྷནྟི ནིསྶཊྛཾ ཝིནཡཀམྨཝསེན ནིསྶཛྫིཏཉྩ ཏཾ ལདྡྷཉྩ པུན ཏཐེཝཱཏི ནིསྶཊྛལདྡྷཾ. ཏཾ གཧེཏྭཱཏི སེསོ. ནིསྶཛྫནཝིདྷཱནཾ པན ཝཀྑམཱནནཡེན ཝེདིཏབྦཾ. ‘‘ནངྒ’’ནྟིཨཱདི ཨུཔལཀྑཎམཏྟཾ. ཏེན མཀྑིཏཱནི ཀཱསཱཝཱདཱིནི ཙ པན ཨཔརིབྷོགཱནིཡེཝ ¶ . ཨཉྙསྶ པན ཀཱཡིཀཔརིབྷོགོ ཝཊྚཏི. ཝིཀཔྤེནྟསྶ སཏྟཱཧེ སཱམཎེརསྶཱཏི ཨེཏྠ ¶ ཊཱིཀཱཡཾ ‘‘ཨིདཾ སཔྤིཾ ཏུཡ྄ཧཾ ཝིཀཔྤེམཱི’’ཏིཨཱདིནཱ ཏེསཾ ཏེསཾ ནཱམཾ གཧེཏྭཱ སམྨུཁཱཔརམྨུཁཱཝིཀཔྤནཝསེན ཨཏྠཾ དསྶེཏྭཱ ཏཾ སཱདྷཡནྟེཧི ཨཝིཀཔྤིཏེ ཝིཀཔྤིཏསཉྙཱི ནིསྶགྒིཡཾ པཱཙིཏྟིཡ’’ནྟི ཨཱཔཏྟིཝཱརེ པཱལི༹ ཨཱཧཊཱ. ‘‘སཙེ ཨུཔསམྤནྣསྶ ཝིཀཔྤེཏི, ཨཏྟནོ ཨེཝ སནྟཀཾ ཧོཏི, པཊིགྒཧཎམྤི ན ཝིཛཧཏཱི’’ཏི དོསཾ ཝཏྭཱ ཨནུཔསམྤནྣསྶ ཝིཀཔྤནེ ཨཏྟསནྟཀཏྟཱབྷཱཝོ, པཊིགྒཧཎཝིཛཧནཉྩ པཡོཛནཾ ཝུཏྟཾ. ཏཏྠ ཝདཱམ – ཨཱཔཏྟིཝཱརེ ‘‘ཨཝིཀཔྤིཏེ’’ཏིཨཱདིཔཱལི༹ཡེཝ ནཏྠི, ‘‘ཨནདྷིཊྛིཏེ ཨདྷིཊྛིཏསཉྙཱི ནིསྶགྒིཡཾ པཱཙིཏྟིཡཾ, ཨཝིསྶཛྫིཏེ ཝིསྶཛྫིཏསཉྙཱི ནིསྶགྒིཡཾ པཱཙིཏྟིཡ’’ནྟིཨཱདིནཱ (པཱརཱ. ༦༢༤) པཱལི༹ཡཱ ཨཱགཏཏྟཱ ཏདནུརཱུཔམེཝ ཨནཱཔཏྟིཝཱརེ ‘‘ཨདྷིཊྛེཏི, ཝིསྶཛྫེཏཱི’’ཏིཨཱདིནཱཝ པཱལི༹ ཨཱགཏཱ. ཡདི བྷཝེཡྻ, ཝཎྞནཱིཡཊྛཱནཏཱཡ ཨཊྛཀཐཱཡ བྷཝིཏབྦཾ, ན ཙེཏྠ ཨཊྛཀཐཱཡཾ ཝིཛྫཏི. ཨནུཔསམྤནྣསྶ ཝིཀཔྤནེ ཙ ཀཐཾ པཊིགྒཧཎཾ ཝིཛཧཏི སིཀྑཱཔཙྩཀྑཱནཱདཱིསུ ཚསུ པཊིགྒཧཎཝིཛཧནཀཱརཎེསུ ཝིཀཔྤནསྶ ཨནནྟོགདྷཏྟཱ, ཏསྨཱ ནཱཡམེཏྠ ཨཏྠོཏི.

མཡམེཏྠ ཨེཝམཏྠཾ བྷཎཱམ – ཝིཀཔྤེནྟསྶཱཏི ཨེཏྠ ཝིཀཔྤནཾ སཾཝིདཧནཾ ‘‘ཙིཏྟསངྐཔྤོ’’ཏིཨཱདཱིསུ ཝིཡ, ཨུབྷཡཏྠ པན ཨུཔསགྒེཧི ནཱནཏྟམཏྟཾ, ཏསྨཱ ཨནྟོསཏྟཱཧེ སཱམཎེརསྶ ཡསྶ ཀསྶཙི ཝིཀཔྤེནྟསྶ སཾཝིདཧནྟསྶ པརིཙྩཱགསཉྙཾ པརིཙྩཱགཙེཏནཾ པརིཙྩཱགཱདྷིཔྤཱཡཾ ཨུཔྤཱདེནྟསྶ ཨནཱཔཏྟཱིཏི ཨཏྠོ. ཨིདཉྩ མཧཱསུམཏྠེརཝཱདམོལུབྦྷ ཝུཏྟཾ. ཝུཏྟཉྷི ‘‘ཏེན ཙིཏྟེནཱ’’ཏིཨཱདཱིསུ པཱལི༹ཝཙནེསུ ཨདྷིཔྤཱཡཾ དསྶེནྟེན, ‘‘ཨིདཾ ཀསྨཱ ཝུཏྟཾ. ཨེཝཉྷི ཨནྟོསཏྟཱཧེ དཏྭཱ པཙྪཱ པཊིལབྷིཏྭཱ པརིབྷུཉྫནྟསྶ ཨནཱཔཏྟིདསྶནཏྠ’’ནྟི (པཱརཱ. ཨཊྛ. ༢.༦༢༥). མཧཱཔདུམཏྠེརོ པནཱཧ ‘‘སཏྟཱཧཱཏིཀྐནྟསྶ པན ¶ པརིབྷོགེ ཨནཱཔཏྟིདསྶནཏྠམིདཾ ཝུཏྟ’’ནྟི (པཱརཱ. ཨཊྛ. ༢.༦༢༥). ཨཡམེཝ ཝཱདོ ཏེསུ སུནྡརཏརོ. སཏྟཱཧེ མཀྑནཱདིཾ ཨདྷིཊྛཏོ ཙ ཨཉྙསྶ དདཏོཔི ཙ ཨནཱཔཏྟཱིཏི སམྦནྡྷོ. ཨཱདི-སདྡེན ཨབྦྷཉྫནཱདིཾ སངྒཎྷཱཏི. ཨཡམེཏྠཱདྷིཔྤཱཡོ – སཔྤིཨཱདིཾ ཨབྦྷཉྫནཱདིཾ མདྷུཾ ཨརུམཀྑནཾ, ཕཱཎིཏཾ གྷརདྷཱུཔནཾ ཨདྷིཊྛཏོ ཨནཱཔཏྟཱིཏི. ཨཉྙསྶཱཏི ཨུཔསམྤནྣསྶ ཝཱ ཨནུཔསམྤནྣསྶ ཝཱ.

༡༠༢. ཡཱཝཀཱལིཀཨཱདཱིནི ཨཏྟནཱ སཧ སཾསཊྛཱནི སབྦྷཱཝཾ གཱཧཱཔཡནྟཱིཏི སམྦནྡྷོ. སབྦྷཱཝནྟི སསྶ ཨཏྟནོ བྷཱཝོ དྭིཏྟེ སབྦྷཱཝོ, ཏཾ. ཏསྨཱཏི ཡསྨཱ ཨེཝཾ, ཏསྨཱ. ཨེཝམུདཱིརིཏནྟི ¶ ཨེཝཾ ‘‘ཝིཀཔྤེནྟསྶ སཏྟཱཧེ’’ཏིཨཱདིནཱ ཝུཏྟཾ. ཨཡམེཏྠ ཨདྷིཔྤཱཡོ – ཡསྨཱ ཨཏྟནཱ སཾསཊྛཱནི ཨཏྟནོ བྷཱཝཾ གཱཧཱཔཡནྟི ཡཱཝཀཱལིཀཱདཱིནི, ཏསྨཱ སཏྟཱཧཱཏིཀྐཱམིཏཱནི སཏྟཱཧཀཱལིཀཱནི པཱཙིཏྟིཡཛནཀཱནི སཾསཊྛཱནི ཨཏྟསཾསཊྛཱནིཔི པཱཙིཏྟིཡཛནཀཱནི ཀརོནྟཱིཏི ཨཝིཀཔྤནཱདིམྷི སཏི བྱཏིརེཀཏོ པཱཙིཏྟིཡཱཔཏྟིཔརིདཱིཔཀཾ ‘‘ཝིཀཔྤེནྟསྶཱ’’ཏིཨཱདིཀཾ ཝཱཀྱཏྟཡཾ ཝུཏྟནྟི. ཊཱིཀཱཡཾ པན ‘‘ཨིདཱནི ཝཀྑམཱནཾ སནྡྷཱཡ ཨེཝནྟི ཝུཏྟ’’ནྟི ཝུཏྟཾ. ཏཾ ཝཀྑམཱནསྶ ཨཏཱིཏཨུདཱིརིཏཏྟཱཡོགཏོ ཀཐཾ ཡུཛྫཏཱིཏི. ཨེཝམུདཱིརིཏནྟི ཝཱ པཱལི༹ཡཾ ཨཊྛཀཐཱཡཉྩ ཨེཝམེཝ ཝུཏྟནྟི ཨཏྠོ. ཨེཝ-སདྡོ ཨཝདྷཱརཎེ.

༡༠༣-༥. ཨིདཱནི ཨཏྟསཾསཊྛཱནཾ ཡཱཝཀཱལིཀཱདཱིནཾ སབྦྷཱཝགཱཧཱཔནཾ སརཱུཔཏོ དསྶེཏུཾ ‘‘པུརེ’’ཏིཨཱདིམཱཧ. ཏཏྠ སཏྟཱཧནྟི སཏྟ ཨཧཱནི ཡསྶ ཏཾ སཏྟཱཧཾ, སཏྟཱཧཀཱལིཀཾ. ཙ-སདྡོ ཨཊྛཱནཔྤཡུཏྟོ, སོ སཏྟཱཧཉྩ ཡཱཝཛཱིཝིཀཉྩཱཏི ཡོཛེཏབྦོ. སེསཀཱལིཀསམྨིསྶནྟི སེསེཧི ཏདཧུ པཊིགྒཧིཏེཧི ཀཱལིཀེཧི ཡཱཝཀཱལིཀཡཱམཀཱལིཀསངྑཱཏེཧི སམྨིསྶཾ. པཱཙིཏྟཱིཏི ¶ སནྣིདྷིསིཀྑཱཔདེན པཱཙིཏྟི. ཏདཧུ པཊིགྒཧིཏནྟི ཏསྨིཾཡེཝ དིནེ པུརེབྷཏྟཾ པཊིགྒཧིཏཾ. ཏདཧེཝཱཏི ཏསྨིཾཡེཝ དིནེ པུརེབྷཏྟམེཝ. སེསནྟི སཏྟཱཧཀཱལིཀཾ ཡཱཝཛཱིཝིཀཉྩ. ཨེཝནྟི ཡཱམེ ཨེཝ པརིབྷུཉྫཡེཏི ཝིཛཱནཱིཡནྟི སམྦནྡྷོ. ཨིཏརནྟི སཏྟཱཧཀཱལིཀཏོ ཨཉྙཾ ཡཱཝཛཱིཝིཀཾ.

༡༠༦. དཱཏུཾ ཀཱམེཏཱིཏི དཱཏུཀཱམོ, ཏསྶ ཨབྷིཧཱརོ ཨཱིསཀམྤི ཨོཎམནཱདིནཱབྷིཧརཎནྟི ཏཔྤུརིསོ, ཧཏྠསྶ པཱསོ ཧཏྠཔཱསོ. རུལ༹ྷཱིཝསེན ཏུ ཨཌྜྷཏེཡྻཧཏྠོ ཧཏྠཔཱསོ ནཱམ. སོ ཙ སཙེ བྷིཀྑུ ནིསིནྣོ ཧོཏི, ཨཱསནསྶ པཙྪིམནྟཏོ པཊྛཱཡ, སཙེ ཋིཏོ, པཎྷིཨནྟཏོ པཊྛཱཡ, སཙེ ནིཔནྣོ, ཡེན པསྶེན ནིཔནྣོ, ཏསྶ པཱརིམནྟཏོ པཊྛཱཡ དཱཡཀསྶ ནིསིནྣསྶ ཋིཏསྶ ཝཱ ཋཔེཏྭཱ པསཱརིཏཧཏྠཾ ཡཾ ཨཱསནྣཏརཾ ཨངྒཾ, ཏསྶ ཨོརིམནྟེན པརིཙྪིནྡིཏྭཱ ཝེདིཏབྦོ. ཨེརཎཀྑམནྟི ཐཱམམཛ྄ཛྷིམེན པུརིསེན ཨེརཎསྶ ཨུཀྑིཔནསྶ ¶ ཁམཾ ཡོགྒཾ. ཝཏྠུསདྡཱཔེཀྑཾ ནཔུཾསཀཏྟཾ. ཏིདྷཱ དེནྟེཏི ཀཱཡཀཱཡཔྤཊིབདྡྷནིསྶགྒིཡཱནཾ ཝསེན ཏཱིཧི པཀཱརེཧི དཱཡཀེ དདམཱནེ. ཏཏྠ ཡེན ཀེནཙི སརཱིརཱཝཡཝེན ཨནྟམསོ པཱདངྒུལིཡཱཔི དཱིཡམཱནཾ ཀཱཡེན དིནྣཾ ནཱམ ཧོཏི, ཀཊཙྪུཨཱདཱིསུ ཡེན ཀེནཙི དཱིཡམཱནཾ ཀཱཡཔྤཊིབདྡྷེན, ཀཱཡཏོ པན ཀཱཡཔྤཊིབདྡྷཏོ ཝཱ མོཙེཏྭཱ ཧཏྠཔཱསེ ཋིཏསྶ ཀཱཡེན ཝཱ ཀཱཡཔྤཊིབདྡྷེན ཝཱ པཱཏིཡམཱནཾ ནིསྶགྒིཡེན པཡོགེན དིནྣཾ ནཱམ. དྭིདྷཱ གཱཧོཏི ཀཱཡཀཱཡཔྤཊིབདྡྷཱནཾ ཝསེན དྭཱིཧི པཀཱརེཧི ཡེཧི ཀེཧིཙི ¶ དཱིཡམཱནསྶ གཧཎཾ. ཨེཝཾ པཊིགྒཧོ པཉྩངྒོཏི ཡོཛནཱ. པཉྩངྒོཏི པཉྩ ཨངྒཱནི ཡསྶཱཏི བཧུབྦཱིཧི.

༡༠༧. ཨིདཱནི ཨནེརཎཀྑམེ ཙ ཀིསྨིཉྩི ཀཱཡཔྤཊིབདྡྷེ ཙ པཊིགྒཧཎཱརོཧནཾ དསྶེཏུཾ ‘‘ཨསཾཧཱརིཡེ’’ཏིཨཱདིམཱཧ. ཏཏྠ ཨསཾཧཱརིཡེཏི ཨཱནེཏུམསཀྐུཎེཡྻེ ཕལཀཔཱསཱཎཱདིམྷི. ཏཏྠཛཱཏེཏི ཏེསུཡེཝ རུཀྑཱདཱིསུ ཛཱཏེ ཀིཾསུཀཔདུམིནིཔཎྞཱདིཀེ. ཙིཉྩཨཱདཱིནཾ སུཁུམེ པཎྞེཏི སམྦནྡྷོ. ཏཱནི ཧི སནྡྷཱརེཏུཾ ན སཀྐོནྟི. ཏེསཾ པན སཱཁཱསུ ཝཊྚཏི. ཨཱདི-སདྡེན ‘‘ཨངྒ’’ནྟིཨཱདིཀཾ སངྒཎྷཱཏི. ཝཱ-སདྡོ སམུཙྩཡེ. ཨསཡ྄ཧབྷཱརེཏི ཐཱམམཛ྄ཛྷིམཔུརིསེན སཧིཏུཾ སནྡྷཱརེཏུཾ ཨསཀྐུཎེཡྻེ བྷཱརེ. སབྦེསཾ པཊིགྒཧོ ‘‘ན རཱུཧཏཱི’’ཏི ཨིམིནཱ སམྦནྡྷོ.

༡༠༨. ཨིདཱནི པཊིགྒཧཎཝིཛཧནཾ དསྶེཏི ‘‘སིཀྑཱ’’ཏིཨཱདིནཱ. ཏཏྠ སིཀྑཱམརཎལིངྒེཧཱིཏི སིཀྑཱཔཙྩཀྑཱནེན ཙ མརཎེན ཙ ལིངྒཔརིཝཏྟནེན ཙ. ཨནཔེཀྑཝིསགྒཏོཏི ནཏྠི ཨཔེཀྑོ ཨེཏསྶཱཏི ཨནཔེཀྑོ, སོཝ ཝིསགྒོ, ཏཏོ ཙ. ཨཙྪེདཱཏི ཙོརཱདཱིཧི ཨཙྪིནྡིཏྭཱ གཧཎེན. ཨནུཔསམྤནྣདཱནཱཏི ཨནུཔསམྤནྣསྶ དཱནེན. ཙ-སདྡོ སབྦཏྠ ཨཱནེཏབྦོ. གཱཧོཏི པཊིགྒཧཎཾ. ཨུཔསམྨཏཱིཏི ཝིཛཧཏི.

༡༠༩-༡༠. ཨིདཱནི ཨཔྤཊིགྒཧིཏཾ པརིབྷོགེ དོསཾ དསྶེཏུཾ ‘‘ཨཔྤཊིགྒཧིཏ’’ནྟིཨཱདིམཱཧ. ཏཏྠ སབྦནྟི ཙཏུཀཱལིཀཔརིཡཱཔནྣཾ སཀལམྤི. ཨིདཱནི ཨཔྤཊིགྒཧེཏྭཱ པརིབྷུཉྫིཏབྦཾ དསྶེཏུཾ ‘‘སུདྡྷ’’ནྟིཨཱདིམཱཧ. ཏཏྠ སུདྡྷཾ ནཱཏིབཧལཾ ཨུདཀཉྩ ཏཐཱ ཨངྒལགྒཾ ཨཝིཙྪིནྣཾ དནྟ…པེ… གཱུཐཀཉྩ ལོཎ…པེ… ཀརཱིསཀཉྩ ཀཔྤཏེཏི སམྦནྡྷོ. ཏཏྠ སུདྡྷནྟི རཛརེཎཱུཧི ཨཉྙརསེན ¶ ཙ ཨསམྨིསྶཏཱཡ པརིསུདྡྷཾ. ནཱཏིབཧལནྟི ཡཾ ཀསིཏཊྛཱནེ བཧལམུདཀཾ ཝིཡ མུཁེ ཝཱ ཧཏྠེ ཝཱ ན ལགྒཾ, ཏཾ. ཨཝིཙྪིནྣནྟི ཨངྒཏོ ཝིཙྪིནྡིཏྭཱ ¶ ན གཏཾ. དནྟཱནི ཙ ཨཀྑཱིནི ཙ ཀཎྞཉྩ དནྟཀྑིཀཎྞཾ པཱཎྱངྒཏྟཱ, ཏསྶ གཱུཐཀནྟི ཏཔྤུརིསོ. ལོཎཾ སརཱིརུཊྛིཏཾ. སིངྒྷཱཎཱིཏི སིངྒྷཱཎིཀཱ. ཝིཙྪིནྣཾ ན པཊིགྒཧེཏབྦཾ.

༡༡༡. ཨིདཱནི ‘‘གཱུཐཱ’’ཏིཨཱདིནཱ ཀཱལོདིསྶཾ དསྶེཏི. ཏཐཱཝིདྷེཏི སཔྤདཊྛཀྑཎཱདིཀེ ཏཐཱཝིདྷེ ཀཱལེ. ཏཐཱ ཏཱདིསོ ཝིདྷོ ཀཱལོ ཨེཏསྶཱཏི བཧུབྦཱིཧི. སེཝེཡྻཱཏི སེཝནཾ ཀརེཡྻ, པརིབྷུཉྫེཡྻཱཏི ཝུཏྟཾ ཧོཏི. ཨསནྟེ ཀཔྤཀཱརཀེཏི ཨེཏྠ དུབྦཙོཔི ཨསམཏྠོཔི ཀཔྤིཡཀཱརཀོ ཨསནྟཔཀྑེཡེཝ ཏིཊྛཏཱིཏི ཝེདིཏབྦོ. ཀཱལོདིསྶཏྟཱ པན ཚཱརིཀཱཡ ཨསཏི ཨལླདཱརུཾ རུཀྑཏོ ཚིནྡིཏྭཱ ཀཱཏུཾ, མཏྟིཀཱཡ ཨསཏི བྷཱུམིཾ ཁཎིཏྭཱཔི མཏྟིཀཾ གཧེཏུཾ ཝཊྚཏི.

༡༡༢. དུརཱུཔཙིཎྞེཏི དུཊྛུཾ ཨུཔཙིཎྞཾ ཨཱམཊྛཾ དུརཱུཔཙིཎྞཾ. སཙེ བྷིཀྑུ ཨཔྤཊིགྒཧིཏཾ སཱམིསཾ བྷཱཛནཾ ཋིཏཊྛཱནཏོ ཨཔནེཏྭཱ ཨཱམསཏི, པིདྷཱནཾ ཨཱམསཏི, ཨུཔརི ཋིཏཀཙཝརཱདིཾ ཚཌྜེཏི, ཏཏྠཛཱཏཀཕལིནིཡཱ སཱཁཱཡ ཝཱ ཝལླིཡཱ ཝཱ གཧེཏྭཱ ཝཱ ཙཱལེཏི, དུརཱུཔཙིཎྞཾ ནཱམ ཧོཏི. ཏསྨིཾ དུཀྐཊནྟི སམྦནྡྷོ. ཕལརུཀྑཾ པན ཨཔསྶཡིཏུཾ ཝཱ ཏཏྠ ཀཎྚཀཾ ཝཱ བནྡྷིཏུཾ ཝཊྚཏི. ཨརཉྙེ པཏིཏཨམྦཕལཱདིཾ ‘‘སཱམཎེརསྶ དསྶཱམཱི’’ཏི ཨཱཧརིཏྭཱ དཱཏུཾ ཝཊྚཏི. རཛོཀིཎྞེཏི རཛསཱ ཨོཀིཎྞེ, ཏསྨིཾ པཏྟཱདིཀེ ཡཾ ཀིཉྩི པཊིགྒཎྷཏོ ཝིནཡདུཀྐཊཾ ཧོཏཱིཏི ཨཏྠོ. སཙེ པིཎྜཱཡ ཙརནྟསྶ པཏྟེ རཛཾ པཏཏི, པཊིགྒཧེཏྭཱ བྷིཀྑཱ གཎྷིཏབྦཱ ¶ . ‘‘པཊིགྒཧེཏྭཱ དེཐཱ’’ཏི ཝུཏྟེཔི ཨཱཀིརནྟི, ཧཏྠཏོ ཨམོཙེནྟེནེཝ པཊིགྒཱཧཱཔཀསྶ སནྟིཀཾ ནེཏྭཱ པཊིགྒཧེཏབྦཾ. སཙེ མཧཱཝཱཏོ ཏཏོ ཏཏོ རཛཾ པཱཏེཏི, ན སཀྐཱ ཧོཏི བྷིཀྑཾ གཧེཏུཾ, ‘‘ཨནུཔསམྤནྣསྶ དསྶཱམཱི’’ཏི སུདྡྷཙིཏྟེན ཨཱབྷོགཾ ཀཏྭཱ གཎྷིཏུཾ ཝཊྚཏི. ཏཾ པན ཏེན དིནྣཾ ཝཱ ཝིསྶཱསེན ཝཱ པཊིགྒཧེཏྭཱ པརིབྷུཉྫིཏུཾ ཝཊྚཏི.

ཨཐཱཏི ཝཀྑམཱནཱརམྦྷེ. ཨུགྒཧཔྤཊིགྒཧེཏི ཨུགྒཧིཏྠཱཏི ཨུགྒཧོ, ཨུགྒཧིཏཾ, ཏསྶ པཊིགྒཧོ, ཏསྨིཾ. ཨཔྤཊིགྒཧིཏབྷཱཝཾ ཛཱནཏོ ཨཏྟནཱ ཨེཝ ཨུགྒཧེཏྭཱ གཧཎེཏི ཨདྷིཔྤཱཡོ. མཱཏཱཔིཏཱུནཾ ཨཏྠཱཡ པན ཨཔྤཊིགྒཧེཏྭཱ ཏེལཱདཱིནི, ཚཱཡཏྠཱཡ སཱཁཱདཱིནི ཝཱ གཧེཏྭཱ པཙྪཏོ བྷུཉྫིཏུཀཱམཏཱཡ པཊིགྒཧེཏྭཱ པརིབྷུཉྫིཏུཾ ཝཊྚཏི. ཨུཙྪུཨཱདཱིསུ ཕཱལིཏེསུ མལཾ ན པཉྙཱཡཏི, མཱུལབྷེསཛྫཱདཱིནི པིསནྟཱནཾ ཝཱ ཀོཊྚེནྟཱནཾ ཝཱ ནིསདནིསདཔོཏཀཨུདུཀྑལམུསལཱནི ཁཱིཡནྟི, དནྟནྟརེ ལགྒཾ སུཁུམཨཱམིསཾ ཧོཏི, རསོ ན པཉྙཱཡཏི, ཨབྦོཧཱརིཀཾ. ཨནྟོཝུཏྠེཏི ¶ ཨཀཔྤིཡཀུཊིཡཱ ཚདནབྦྷནྟརེ ཝུཏྠེཏི ཨཏྠོ. སཡཾཔཀྐེཏི ཨཏྟནཱ ཡཏྠ ཀཏྠཙི པཀྐེ. སཙེ ཝཱསིཨཱདིཾ ཏཱཔེཏྭཱ ཏཀྐཱདཱིསུ པཀྑིཔཏི, ཨེཏྟཱཝཏཱཔི སཱམཔཱཀཏོ ན མུཙྩཏི. པུརིམཀཱལིཀདྭཡེ པུནཔཱཀཉྷི ཋཔེཏྭཱ ཡཾ ཀིཉྩི ཨཱམིསཾ བྷིཀྑུནོ པཙིཏུཾ ན ཝཊྚཏི. སཙེཔིསྶ ཨུཎྷཡཱགུཡཱ སུལསིཔཎྞཱདཱིནི ཝཱ སིངྒིཝེརཾ ཝཱ པཀྑིཔནྟི, ཙཱལེཏུཾ ན ཝཊྚཏི. ཨུཏྟཎྜུལཾ བྷཏྟཾ ལབྷིཏྭཱ པིདཧིཏུཾ ན ཝཊྚཏི. ཨནྟོཔཀྐེཏི ཨཀཔྤིཡཀུཊིཡཱ ཨནྟོ པཀྐེ. སབྦཏྠ དུཀྐཊནྟི སམྦནྡྷོ.

༡༡༣-༤. མནུསྶཧཏྠིཨསྶཱནཉྩ ¶ …པེ… ཨུརགསྶ ཙ ཡཾ མཾསཉྩ, ཡཾ ཨུདྡིསྶཀཏམཾསཉྩ, ཨཔྤཊིཝེཀྑིཏཾ ཡཉྩ མཾསཾ, ཏེསུ མཾསེསཱུཏི ཨེཝཾ ཡོཛེཏྭཱ ཨཏྠོ ཝེདིཏབྦོ. ཏཏྠ སཱིསགཱིཝཱཏརངྒེན ཙརནྟཱ ཨཙྪཝིསེསཱཝ ཏརཙྪཱ. ཨུརགསྶཱཏི ཨིམིནཱ སབྦཱཔི དཱིགྷཛཱཏི སངྒཧིཏཱ. ཨུདྡིསྶཀཏམཾསནྟི བྷིཀྑུཾ ཨུདྡིསིཏྭཱ ཀཏཾ ཨུདྡིསྶཀཏཾ, ཏཉྩ ཏཾ མཾསཉྩ. ཨེཏྠ ཙ མཾས-གྒཧཎེན མཙྪཱནམྤི གཧཎཾ ཝེདིཏབྦཾ ཨུཔལཀྑཎཝསེན, ཙ-སདྡེན ཝཱ. པཉྩསུཔི སཧདྷམྨིཀེསུ ཡཾ ཀིཉྩི ཨུདྡིསྶཀཏཾ སབྦེསམྤི ན ཀཔྤཏི, ཏམྤི ཨདིཊྛཨསུཏཨཔརིསངྐིཏཏཱཡ ཏིཀོཊིཔརིསུདྡྷཾ ཝཊྚཏི. ཨཔྤཊིཝེཀྑིཏནྟི ཨནུཔཔརིཀྑིཏཾ, ཨནཱཔུཙྪིཏནྟི ཨཏྠོ. ཨཱཔཏྟིབྷཱིརུཀེན ཧི རཱུཔཾ སལླཀྑེནྟེནཱཔི པུཙྪིཏྭཱ པཊིགྒཧེཏབྦཾ པརིབྷུཉྫིཏབྦཉྩ. མནུསྶཱནཾ མཾསེསུ ཐུལླཙྩཡནྟི ཡོཛནཱ. ཐཱུལོ ཨཙྩཡོ ཨེཏྠཱཏི རསྶེ, དྭིཏྟེ ཙ ཐུལླཙྩཡཾ. པཱརཱཛིཀསངྒྷཱདིསེསེཧི ཋཔེཏྭཱ ཨིཏོ ཨདྷིཀཾ ཝཛྫཾ ནཏྠི. སེསེསཱུཏི ཨཝསེསེསུ ཨེཀཱདསསུ.

༡༡༥. ཨིདཱནི མནུསྶཱདཱིནཾ ཨཊྛིཨཱདཱིནིཔི ཨཀཔྤིཡཱནཱིཏི དསྶེཏུཾ ‘‘ཨཊྛིཔཱི’’ཏིཨཱདིམཱཧ. པི-སདྡོ ‘‘ལོཧིཏ’’ནྟིཨཱདཱིསུཔི ཨནུཝཏྟེཏབྦོ. ཨེསནྟི མནུསྶཱདཱིནཾ དསནྣཾ. ཝསཱསུ པན ཨེཀཱ མནུསྶཝསཱ ན ཝཊྚཏི. ཁཱིརཱདཱིསུ ཨཀཔྤིཡཾ ནཱམ ནཏྠི. ཨུདྡིསྶཀཏཾཡེཝ ¶ སཙིཏྟཀནྟི ཡོཛནཱ. སཙིཏྟཀནྟི ཨུདྡིསྶཀཏབྷཱཝཛཱནནཙིཏྟེན སཧ ཝཏྟཏཱིཏི སཙིཏྟཀཾ. ཝཏྠུཝཱིཏིཀྐམཝིཛཱནནཙིཏྟེན ཧི སཙིཏྟཀཏྟཾ. ཨེཏྠ ཙ སཙིཏྟཀཏྟཾ ཨཱཔཏྟིཡཱ ཨེཝ, ན ཙ མཾསསྶ, ཏཐཱཔི མཾསསཱིསེན ཨཱཔཏྟི ཨེཝ ཝུཏྟཱཏི ཝིཉྙཱཏབྦནྟི.

ཨཀཔྤིཡམཾསནིདྡེསཝཎྞནཱ ནིཊྛིཏཱ.

༡༡༦-༧. རཱུཔིཡེན ¶ ཨརཱུཔིཡཾ རཱུཔིཡཉྩ ཨིཏརེན རཱུཔིཡཉྩ པརིཝཏྟེཡྻཱཏི སམྦནྡྷོ. ཏཏྠ རཱུཔིཡེནཱཏི རཱུཔིཡསངྑཱཏེན ནིསྶགྒིཡཝཏྠུནཱ. ཨརཱུཔིཡནྟི ཨརཱུཔིཡསངྑཱཏཾ དུཀྐཊཝཏྠུཾ ཀཔྤིཡཝཏྠུཉྩ. ཨིཏརེནཱཏི ཨརཱུཔིཡེན. ནིསྶགྒཱིཏི ནིསྶཛྫནཾ ནིསྶགྒོ, པུབྦབྷཱགེ ཀཏྟབྦསྶ ཝིནཡཀམྨསྶེཏཾ ནཱམཾ. ནིསྶགྒོ ཨསྶ ཨཏྠཱིཏི ནིསྶགྒི, ཀིཾ ཏཾ? པཱཙིཏྟིཡཾ. རཱུཔིཡསྶ མཱུལགྒཧཎེ པན རཱུཔིཡཔྤཊིགྒཧཎསིཀྑཱཔདེན ནིསྶགྒིཡཾ པཱཙིཏྟིཡཾ.

ཨིདཱནི རཱུཔིཡཱདིཾ དསྶེཏུཾ ‘‘ཨིདྷཱ’’ཏིཨཱདི ཨཱརདྡྷཾ. ཏཏྠ ཀཧཱ…པེ… མཱསཀཾ ཨིདྷ རཱུཔིཡནྟི སམྦནྡྷོ. ཏཏྠ ཀཧཱཔཎོ ནཱམ སུཝཎྞམཡོ ཝཱ རཛཏམཡོ ཝཱ ཨེཏརཧི པཀཏིཀཧཱཔཎོ ཝཱ. སཛ྄ཛྷཱུཏི རཛཏཾ. སིངྒཱིཏི སུཝཎྞབྷེདོ, ཏཐཱཔི ཙེཏྠ སཱམཉྙེན སུཝཎྞམདྷིཔྤེཏཾ. ཝོཧཱརཱུཔགམཱསཀནྟི ཝོཧཱརཾ ཀཡཝིཀྐཡཾ ཨུཔགཙྪཏཱིཏི ཝོཧཱརཱུཔགཾ, ཏཉྩ ཏཾ མཱསཀཉྩ. ཏཾ པན སམུཊྛཱཔིཏརཱུཔཉྩ ཨསམུཊྛཱཔིཏརཱུཔཉྩ ལོཧདཱརུཨཱདིམཡཾ ཝུཙྩཏི. ཨིདྷ རཱུཔིཡནྟི ཨིམསྨིཾ སིཀྑཱཔདེ རཱུཔིཡཾ ནཱམཱཏི ཨཏྠོ. ཝཏྠམུཏྟཱདི ཀཔྤཾ དུཀྐཊཝཏྠུཉྩ ཨིཏརནྟི ཡོཛནཱ. ཏཏྠ ཝཏྠཉྩ མུཏྟཱ ཙ ཨཱདི ཡསྶཱཏི སམཱསོ. ཨཱདི-སདྡོ པཙྩེཀཾ ཡོཛེཏབྦོ ‘‘ཝཏྠཱདི མུཏྟཱདཱི’’ཏི. ཏཏྠ པཋམེན ཨཱདི-སདྡེན ཀཔྤཱསསུཏྟཱཔརཎྞཱདིཀཾ ཡཾ ཀིཉྩི ཀཔྤིཡཝཏྠུཾ, དུཏིཡེན མཎི སངྑོ སིལཱ པཝཱལ༹ཾ ལོཧིཏངྐོ མསཱརགལླཾ སཏྟདྷཉྙཱནི དཱསིདཱསཁེཏྟཝཏྠུཔུཔྥཱརཱམཕལཱརཱམཱདཡོཏི ཨིདཾ དུཀྐཊཝཏྠུཾ སངྒཎྷཱཏི. ཝཏྠཱདིཀཔྤིཡཝཏྠུཾ, མུཏྟཱདིདུཀྐཊཝཏྠུཉྩ ཨིཏརཾ ཨཉྙཾ ཨརཱུཔིཡཾ ནཱམཱཏི ཨཏྠོ.

༡༡༨. ཨེཏྟཱཝཏཱ ¶ རཱུཔིཡསཾཝོཧཱརཾ དསྶེཏྭཱ ཨིདཱནི ཀཔྤིཡབྷཎྜེ ཀཡཝིཀྐཡཾ དསྶེཏུམཱཧ ‘‘ཨིམ’’ནྟིཨཱདི. ཏཏྠ ¶ ‘‘ཨིམཾ གཧེཏྭཱ ཨིམཾ དེཧི, ཨིམཾ ཀར, ཨིམཾ ཨཱནཡཱ’’ཏི ཝཱ ‘‘ཨིམཾ བྷུཏྭཱ ཨིམཾ དེཧི, ཨིམཾ ཀར, ཨིམཾ ཨཱནཡཱ’’ཏི ཝཱ ‘‘ཨིམཾ དེམི, ཨིམཾ དེཧི, ཨིམཾ ཀར, ཨིམཾ ཨཱནཡཱ’’ཏི ཝཱ ཀཡཝིཀྐཡེ སམཱཔནྣེ ནིསྶགྒཱིཏི ཡོཛནཱ. ཏཏྠ ཨིམནྟི ཏཎྜུལཱདིཾ. བྷུཏྭཱཏི ཨོདནཱདིཾ བྷུཉྫིཏྭཱ. ཨིམཾ དེཧཱིཏི ཨེཏཾ ཝཏྠཱདིཀཾ དེཧི. ཨིམཾ ཀརཱཏི ཨེཏཾ རཛནཔཙནཱདིཾ ཀརོཧི. ཨིམཾ ཨཱནཡཱཏི ཨེཏཾ རཛནཀཊྛཱདིཾ ཨཱནེཧི. ཨིམཾ དེམཱིཏི ཨེཏཾ ཝཏྠཱདིཀཾ ཏཝ དེམི. སམཱཔནྣེཏི ཀཏེ. ཏསྨཱ ཀཔྤིཡཾ བྷཎྜཾ པརིཝཏྟེནྟེན ཨཉྙཱཏཀེཧི སདྡྷིཾ ‘‘ཨིམཾ དེཧཱི’’ཏི ཝདཏོ ཝིཉྙཏྟི, ‘‘ཨིམཾ གཎྷཱཧཱི’’ཏི ཝདཏོ སདྡྷཱདེཡྻཝིནིཔཱཏནཾ, ‘‘ཨིམིནཱ ཨིམཾ དེཧཱི’’ཏི ཝདཏོ ཀཡཝིཀྐཡནྟི ཝུཏྟཱ ཏིསྶོ ཨཱཔཏྟིཡོ. མཱཏཱཔིཏཱུཧི པན སདྡྷིཾ ཀཡཝིཀྐཡམཏྟཾ མོཙེནྟེན པརིཝཏྟེཏབྦཾ. ཨཡཉྷི ཀཡཝིཀྐཡོ ཋཔེཏྭཱ པཉྩསཧདྷམྨིཀེ ཨཝསེསེཧི གིཧིཔབྦཛིཏེཧི ན ཝཊྚཏི. སཙེ པན ནཝཀམྨཱནི ཀཱརེཏི, ཨཊྛཀཐཱཔམཱཎེན པཱཙིཏྟིཡམཏྟཾ དེསེཏབྦཾ.

༡༡༩-༡༢༠. ཨིདཱནི པརིཎཱམནཝསེན ཨཱཔཏྟིབྷེདཾ དསྶེཏུཾ ‘‘ཨཏྟནོ’’ཏིཨཱདི ཨཱརདྡྷཾ. ཏཏྠཱཡཾ པིཎྜཏྠོ – སངྒྷསྶ ནཏཾ ལཱབྷཾ ཨཏྟནོ པརིཎཱམེཡྻ, ནིསྶགྒི. ཨཉྙཏོ པུགྒལསྶ པརིཎཱམེཡྻ, པཱཙིཏྟི. ཨཉྙསྶ སངྒྷསྶ ཝཱ ཙེཏིཡསྶ ཝཱ པརིཎཱམེཡྻ, དུཀྐཊཾ. ཨཉྙསྶ པུགྒལསྶ ཝཱ ཙེཏིཡསྶ ཝཱ ནཏཾ ལཱབྷཾ ཨཏྟནོ ཝཱ སངྒྷསྶ ཝཱ ཨཉྙཔུགྒལསྶ ཝཱ ཨཉྙཙེཏིཡསྶ ཝཱ པརིཎཱམེཡྻ, དུཀྐཊནྟི ཡོཛནཱ. ཏཏྠ ནཏནྟི ཀཱཡེན ཝཱ ཝཙསཱ ཝཱ ནིནྣཾ ཀཏཾ. ལཱབྷནྟི ལབྷིཏབྦཾ ཙཱིཝརཱདི. ཨཉྙཏོ ཨཉྙསྨིཾ པུགྒལེ ཝཱ ཙེཏིཡེ ཝཱ, ཙེཏིཡེ པན དུཀྐཊཾ. ཨཉྙསྶཱཏི ཙེཏིཡཱདིནོ ཨནྟམསོ སུནཁསྶ. ཨཉྙཏོ ཝཱཏི ཙེཏིཡཱདིམྷི ཝཱ. སངྒྷསྶཱཏི པན ཨིདཾ ཀཱཀཀྑིགོལ༹ཀཉཱཡེན ‘‘ནཏཾ པརིཎཱམེཡྻཱ’’ཏི ཨུབྷཡཏྠ པརིཝཏྟཏི. ནིསྶཊྛཾ སཀསཉྙཱཡ ན ¶ དདེཡྻ ཝཱ, དུཀྐཊནྟི སམྦནྡྷོ. ཨཉྙཐཱ ཨཉྙེན པཀཱརེན, ཐེཡྻསཉྙཱཡ ན དདེཡྻ ཙེཏི ཝུཏྟཾ ཧོཏི. ཨིཏརནྟི ཝཏྠུཝསེན ཨཉྙཾ པཱརཱཛིཀཾ ཐུལླཙྩཡཾ དུཀྐཊཉྩ ཧོཏཱིཏི ཨཏྠོ.

ནིསྶགྒིཡནིདྡེསཝཎྞནཱ ནིཊྛིཏཱ.

༡༢༡. མུསཱ ¶ …པེ… ཧརཎེཏི ནིམིཏྟཏྠེ བྷུམྨཝཙནཾ, ཏསྶ ‘‘པཱཙིཏྟི ཝུཏྟཱ’’ཏི ཨིམིནཱ སམྦནྡྷོ. ཨེཝཾ སབྦཏྠ. མུསཱཝཱདེཏི ནིཔཱཏེན སདྡྷིཾ ཏཔྤུརིསོ. པུབྦེཔི ཛཱནིཏྭཱ ཝཙནཀྑཎེཔི ཛཱནནྟསྶ མུསཱབྷཎནནིམིཏྟནྟི ཨཏྠོ. བྷཎནཉྩ ནཱམ ཨིདྷ ཨབྷཱུཏསྶ ཝཱ བྷཱུཏཏཾ, བྷཱུཏསྶ ཝཱ ཨབྷཱུཏཏཾ ཀཏྭཱ ཀཱཡེན ཝཱ ཝཱཙཱཡ ཝཱ ཝིཉྙཱཔནཔྤཡོགོ. པཱརཱཛིཀསངྒྷཱདིསེསཱཙཱརཝིཔཏྟིཡོ ཨམཱུལིཀཱཡ ཙོདེནྟསྶ ཡཐཱཀྐམཾ སངྒྷཱདིསེསཔཱཙིཏྟིཡདུཀྐཊཱནི. ཨནུཔདྷཱརེཏྭཱ སཧསཱ བྷཎནྟསྶ, ‘‘ཨཉྙཾ བྷཎིསྶཱམཱི’’ཏི ཨཉྙཾ བྷཎནྟསྶ ཡསྶ བྷཎཏི, སོ ན སུཎཱཏི, ཏསྶ ཙ ཨནཱཔཏྟི.

ཨོམསཏི ཨམནཱཔཏཱཡ ཀཎྞེསུ ཝིཛ྄ཛྷཏི ཝིཡ ཨེཏེན, ཨོམསཏི ཝཱཏི ཨོམསོ, སོ ཙཱཡཾ ཝཱདོཙ, ཏསྨིཾ. དཱིགྷོ པན གཱཐཱབནྡྷཝསེན. ཨེཝཾ སབྦཏྠ. ཧཱིནུཀྐཊྛེསུ ཙ ཛཱཏིནཱམགོཏྟཝཡཀམྨསིཔྤཨཱབཱདྷལིངྒཀིལེསཨཱཔཏྟིཨཀྐོསསངྑཱཏེསུ དསསུ བྷཱུཏེན ཝཱ ཨབྷཱུཏེན ཝཱ ‘‘ཁཏྟིཡོསི, ཙཎྜཱལོསཱི’’ཏིཨཱདིནཱ ཀཱཡེན ཝཱ ཝཱཙཱཡ ཝཱ ཨནཉྙཱཔདེསེན བྷིཀྑུནོ ཁུཾསེཏུཀཱམཏཱཡ ཨཀྐོསཝཙནེཏི ཨཏྠོ. ‘‘སནྟི ཨིདྷེཀཙྩེ ཙཎྜཱལཱ’’ཏིཨཱདིནཱ ཨཉྙཱཔདེསེན ཝཱ ‘‘ཙོརོསི, ཝིཀཱརཱིསི, མཱཏུགྷཱཏཀོསཱི’’ཏིཨཱདཱིཧི པཱལི༹མུཏྟཔདེཧི ཝཱ བྷིཀྑུསྶ, ཡཐཱ ཝཱ ¶ ཏཐཱ ཝཱ ཨནུཔསམྤནྣཾ, པརམྨུཁཱ པན སབྦམྤི ཨཀྐོསནྟསྶ དུཀྐཊཾ. ཀེཝལཾ དཝཀམྱཏཱཡ ཝདཏོ པན སབྦཏྠ དུབྦྷཱསིཏཾ.

པེསུཉྙཧརཎེཏི པིསུཎསྶ བྷཱཝོ པེསུཉྙཾ. ཨཏྟནོ པིཡཀམྱཏཱཡ ཝཱ པརསྶ པརེསུ བྷེདཱདྷིཔྤཱཡེན ཝཱ ཛཱཏིཨཱདཱིཧི ཨོམསནྟསྶ བྷིཀྑུནོ ཝཙནཾ སུཏྭཱ བྷིཀྑུསྶ ཏསྶ པེསུཉྙསྶ ཧརཎེ. ཨནུཔསམྤནྣསྶ ཧརཎེ དུཀྐཊཾ. པདཾ པདཾ པདསོ, ཝིཙྪཱཡཾ སོ, ཀོཊྛཱསེན ཀོཊྛཱསེནཱཏི ཨཏྠོ. སངྒཱིཏིཏྟཡཱརུལ༹ྷོ ཏིཔིཊཀདྷམྨོ, ཨནཱརུལ༹ྷོ ཙ རཱཛོཝཱདཱདིཀོ དྷམྨོ ནཱམ, ཏེན སཧ པདསོཏི ནིཔཱཏསྶ ཏཏིཡཱཏཔྤུརིསོ. པདསོདྷམྨེཏི ཨེཀཀྑརཱདིནཱ ཀོཊྛཱསེན ཀོཊྛཱསེན ཨནུཔསམྤནྣེན སདྡྷིཾ ཡཐཱཝུཏྟདྷམྨབྷཎནེཏི ཨཏྠོ. པདསོདྷམྨབྷཎནཉྷི པདསོདྷམྨ-སདྡེན ཨུཔཙཱརེན ཝུཏྟཾ. ཨནུཔསམྤནྣེན སདྡྷིཾ ཨེཀཏོ ཨུདྡེསགྒཧཎེ སཛ྄ཛྷཱཡཀརཎེ, ཏཾསནྟིཀེ ཨུདྡེསགྒཧཎཱདིཀེ ཙ ཏེན སདྡྷིཾ ཨེཀཏོ ཡེབྷུཡྻེན པགུཎཾ གནྠཾ བྷཎནྟསྶ ཨོསཱརེནྟསྶ ཁལིཏཊྛཱནེ ‘‘ཨེཝཾ བྷཎཱཧཱི’’ཏི ཨེཀཏོ བྷཎནྟསྶཔི ཨནཱཔཏྟི.

ཨནྟམསོ ¶ ཝཏྠཱདིནཱ ཡེན ཀེནཙི སབྦཙྪནྣཾ ཚདནཾ ཨནཱཧཙྩ དིཡཌྜྷཧཏྠུབྦེདྷེནཱཔི སབྦཔརིཙྪིནྣཾ ཡེབྷུཡྻེནཚནྣཾ ཡེབྷུཡྻེནཔརིཙྪིནྣཉྩ སེནཱསནཾ ཨགཱརནྟི ཨདྷིཔྤེཏཾ. ཏཏྲཊྛོ པན བྷིཀྑུཾ ཋཔེཏྭཱ ཨནྟམསོ པཱརཱཛིཀཝཏྠུབྷཱུཏོ ཏིརཙྪཱནགཏོཔི ཨནྟམསོ ཏདཧུཛཱཏཱ ཨིཏྠཱིཔི ཨུཔཙཱརཏོ ཨགཱར-སདྡེན ཝུཙྩཏི. སཧ ཨགཱརེནཱཏི སཱགཱརོ, བྷིཀྑུ. ཨུཔཙཱརེནེཝ ཙ པན ཨནུཔསམྤནྣེན, མཱཏུགཱམེན ཙ སཧ སེཡྻཀཔྤནཾ སཱགཱརབྷཱཝོ ནཱམཱཏི གཧེཏབྦཾ. སངྒྷསམྨཏཾ སེནཱསནཔཉྙཱཔཀཱདིབྷེདཾ ཨུཔསམྤནྣཾ ཨཡསཀཱམཱ ཧུཏྭཱ བྷིཀྑཱུཧི ཡེན ཙ ཨུཛ྄ཛྷཱཔེནྟི ཨཝཛཱནཱཔེནྟི ཨཝཉྙཱཡ ཨོལོཀཱཔེནྟི, ལཱམཀཏོ ¶ ཝཱ ཙིནྟཱཔེནྟི, ཏཾ ཝཙནཾ ཨུཛ྄ཛྷཱཔནཀཾ. ཡེན ཁཱིཡནྟི སབྦཏྠ ཏསྶ ཨཝཎྞཾ པཀཱསེནྟི, ཏཾ ཁཱིཡནཾ.

༡༢༢. ཏལནྟི ཧཏྠཏལམདྷིཔྤེཏཾ. ཏགྒཧཎེན པན ཀཱཡོཝ ཏལཾ. སཏྟཱིཏི ཀཱཡཔྤཊིབདྡྷཱ སཏྟི ཨཱཝུདྷཝིསེསོ, ཨུཔལཀྑཎཏྟཱ པན སབྦམྤི ཀཱཡཔྤཊིབདྡྷཾ སཏྟི. ཏལཉྩ སཏྟི ཙ ཏལསཏྟི. ཨིདྷ པན ཀོཔེན བྷིཀྑུསྶ ཏལསཏྟིཨུགྒིརཎཾ ཏལསཏྟི. སཙེ པན ཝིརདྡྷོ པཧཱརཾ དེཏི, ན པཧརིཏུཀཱམཏཱཡ དིནྣཏྟཱ དུཀྐཊཾ, པཧརིཏུཀཱམཏཱཡ པཱཙིཏྟིཡཾ, ཨནུཔསམྤནྣེ དུཀྐཊཾ, མོཀྑཱདྷིཔྤཱཡསྶ ཨནཱཔཏྟི.

པཉྙཏྟེན ཝདཏོ ཨུཔསམྤནྣསྶ ཝཱ ཏེན ཝུཙྩམཱནདྷམྨསྶ ཝཱ ཨནཱདརཀརཎཾ ཨནཱདརོ. ཨནུཔསམྤནྣསྶ ཏེན ཝུཙྩམཱནསྶ ཝཱ ཨུཔསམྤནྣེན, པརེན ཝཱ ཨཔཉྙཏྟེན ཝཱ ཝུཙྩམཱནསྶ ཨནཱདརེ དུཀྐཊཾ.

‘‘ཨཱུནཝསྶོ ཏྭཾ མཉྙེ’’ཏིཨཱདིནཱ བྷིཀྑུནོ ཀུཀྐུཙྩསྶ ཨུཔྤཱདནཾ ཨནུཔསམྤནྣསྶ དུཀྐཊཾ.

ཨནཱཔུཙྪཱ གཱམཔྤཝེསནེཏི པཀཏིཝཙནེན པུཙྪིཏུམནུརཱུཔཾ ཨནྟོཨུཔཙཱརསཱིམཱཡ དསྶནཱུཔཙཱརེ བྷིཀྑུཾ དིསྭཱ ‘‘ཝིཀཱལེ གཱམཔྤཝེསནཾ ཨཱཔུཙྪཱམཱི’’ཏི ཨནཱཔུཙྪིཏྭཱ ཝིཀཱལེ གཱམཔྤཝེསནེ. དཱིགྷོ པན སནྡྷིཝསེན. ཨཱཔདཱསུ ཨནཱཔཏྟི.

པརམྤརབྷོཛནེཏི པརོ ཙ པརོ ཙ པརམྤརཱ མ-ཀཱརོ སནྡྷིཝསེན, ཏསྨཱ པརམྤརཱ ཨུཔྤཏྟཝིསཡཨཔཱདཱནཝཙནཾ, པརཏོ པརཏོ ལདྡྷཱ བྷུཉྫནེཏི ཨཏྠོ. ཨཡམེཏྠ ཨདྷིཔྤཱཡོ – པཉྩཧི ¶ བྷོཛནེཧི ནཱམཾ གཧེཏྭཱ ནིམནྟིཏསྶ ཡེན ཡེན པཋམཾ ནིམནྟིཏོ, ཏསྶ ཏསྶ བྷོཛནཏོ ཨུཔྤཊིཔཱཊིཡཱ, ‘‘མཡ྄ཧཾ བྷཏྟཔཙྩཱསཾ ཏུཡ྄ཧཾ དམྨཱི’’ཏི ཝཱ ‘‘ཝིཀཔྤེམཱི’’ཏི ¶ ཝཱ ཨཱདིནཱ སམྨུཁཱ ཝཱ པརམྨུཁཱ ཝཱ ཨཝིཀཔྤེཏྭཱ ཝཱ ཨཉྙཏོ ཨཉྙཏོ པཉྩབྷོཛནཱདཱིནི ལདྡྷཱ བྷུཉྫམཱནེཏི. གིལཱནཙཱིཝརདཱནཙཱིཝརཀཱརསམཡེ ཨནཱཔཏྟི.

༡༢༣. སེཡྻཾ སེནཱསནཱནི ཝཱ ཨནུདྡྷརིཏྭཱ གམནེཏི སམྦནྡྷོ. ཝཱ-སདྡོ སམུཙྩཡེ. ཏཏྠ ‘‘བྷིསི ཙིམིལིཀཱ ཨུཏྟརཏྠརཎཾ བྷཱུམཏྠརཎཾ ཏཊྚིཀཱ ཙམྨཀྑཎྜོ ནིསཱིདནཾ པཙྩཏྠརཎཾ ཏིཎསནྠཱརོ པཎྞསནྠཱརོ’’ཏི (པཱཙི. ༡༡༦) ཝུཏྟཱསུ དསསུ སེཡྻཱསུ ཨེཀམྤི ཨཏྟནོ ཝསྶགྒནེ གཧེཏྭཱ སངྒྷིཀེ སབྦཔྤཊིཙྪནྣེ གུཏྟེ སེནཱསནེ སནྠརིཏྭཱ ཝཱ སནྠརཱཔེཏྭཱ ཝཱ ཡཐཱ ཋཔིཏཾ ཨུཔཙིཀཱདཱིཧི ན ཁཛྫཏི, ཏཐཱ ཋཔནཝསེན ཨནུདྡྷརིཏྭཱ པརིཀྑིཏྟསྶ ཨཱརཱམསྶ པརིཀྑེཔཾ, ཨཔརིཀྑིཏྟསྶ ཨུཔཙཱརཾ ཨཏིཀྐམིཏྭཱ གམནེ ཙ, ཏཐཱ མཉྩཔཱིཋཏིསིཀོཙྪསངྑཱཏཱནི སེནཱསནཱནི ཝསྶཀཱལེ ཨཛ྄ཛྷོཀཱསེ སནྠརིཏྭཱ ཝཱ སནྠརཱཔེཏྭཱ ཝཱ ཨནུཔསམྤནྣེན ཨནུདྡྷརིཏྭཱ ཐཱམམཛ྄ཛྷིམསྶ པུརིསསྶ ལེཌྜུཔཱཏཾ ཨཏིཀྐམིཏྭཱ གམནེ ཙཱཏི ཨཏྠོ. ཡཐཱཝུཏྟཏོ པན ཨཉྙཏྠ དུཀྐཊཾ.

ཨིཏྠིཡཱ ཨདྡྷཱནགམནེཏི ‘‘གཙྪཱམ བྷགིནི, གཙྪཱམ ཨཡྻཱ’’ཏི ཨཉྙམཉྙཾ སཾཝིདཧིཏྭཱ ‘‘ཨཛྫ ཝཱ སྭེ ཝཱ’’ཏིཨཱདིནཱ ནིཡམིཏཀཱལཝིསངྐེཏཾ ཨཀཏྭཱཔི དྭཱརཝིསངྐེཏཾ མགྒཝིསངྐེཏཾ ཀཏྭཱཔི ཨིཏྠིཡཱ སདྡྷིཾ ཨདྡྷཱནམགྒགམནེཏི ཨཏྠོ.

ཨེཀེཀཱཡ ནིསཱིདནེཏི ཨེཀེན ཨེཀཱཏི ཨེཀེཀཱ, ཏསྶཱ ནིསཛྫཱཡཱཏི ཨཏྠོ. ཨེཀེན སཧ ཨེཀིསྶཱ ནིསཛྫཾ ཝིནཱ ཨེཀཱཡ སཧ ཨེཀསྶ ནིསཛྫཾ ནཱམ ནཏྠཱིཏི ཨེཀཱཡ སཧ ཨེཀསྶ ནིསཛྫཱཡཾ སཏི ནིསིནྣསྶ བྷིཀྑུནོ པཱཙིཏྟིཡནྟི ཨདྷིཔྤཱཡོ. ‘‘ཨེཀཱཡེཀནིསཱིདནེ’’ཏི ཝཱ པཱཋོ.

༡༢༤. རཱུཔཱདཱིནཾ ¶ ཨུཔསཾཧཱརེན, བྷཡཱནཀཀཐཱཀཐནེན ཝཱ ཨུཔསམྤནྣསྶ བྷིཾསཱཔནེ. ཨནུཔསམྤནྣསྶ དུཀྐཊཾ.

ཨཱཀོཊནེ ¶ ཨུཔསམྤནྣསྶ ཨནྟམསོ ཨུཔྤལཔཏྟེནཱཔི པཧཱརདཱནེ. ཨནུཔསམྤནྣསྶ ཨནྟམསོ ཏིརཙྪཱནགཏསྶཔི དུཀྐཊཾ. མོཀྑཱདྷིཔྤཱཡསྶ ཨནཱཔཏྟི.

སངྒྷམཛ྄ཛྷེ ཝིནཡདྷརེན ཨནུཡུཉྫིཡམཱནསྶ པུཙྪིཏཏོ ཨཉྙསྶ ཝཱདོ ཨཉྙེན ཨཉྙཾ པཊིཙརཎཾ ཨཉྙཝཱདོ. ཏཐེཝ པུཙྪིཡམཱནསྶ ཨཀཐེཏུཀཱམཏཱཡ ཝིཧེསནཾ ཏུཎྷཱིབྷཱཝོ ཝིཧེསཱ. ཨཉྙཝཱདཀསྶ ཝིཧེསཀསྶ ཙ ཉཏྟིདུཏིཡཀམྨེན ཨཉྙཝཱདཀཝིཧེསཀཀམྨེ ཀཏེ པུན ཨཉྙཝཱདེ ཝིཧེསཱཡ པཱཙིཏྟིཡཾ. ཨནཱརོཔིཏེ པན ཀམྨེ དུཀྐཊཾ. ཀིཉྩི ཝཱིཏིཀྐམཾ དིསྭཱ ‘‘ཨཱཝུསོ, ཨིདཾ ནཱམ ཏཡཱ ཀཏ’’ནྟི ཝུཏྟེ ཏཾ ན ཀཐེཏུཀཱམོ ཏུཎྷཱིབྷཱུཏོ སངྒྷཾ ཝིཧེསེཏཱིཏི ཝིཧེསཀོ. ཨནཱཙཱརཾ ཨཱཙརིཏྭཱ སངྒྷམཛ྄ཛྷེ ཨཱཔཏྟིཡཱ, ཝཏྠུནཱ ཝཱ ཨནུཡུཉྫིཡམཱནེ ཏཾ ཨཀཐེཏུཀཱམོ ‘‘ཀོ ཨཱཔནྣོ, ཀིསྨིཾ ཨཱཔནྣོ’’ཏིཨཱདིནཱ ནཡེན ཨཉྙེཧི ཝཙནེཧི ཏཾ ཝཙནཾ པཊིཙྪཱདེནྟོ ཡོ ཨཉྙཾ ཝདཏི, ཨཡཾ ཨཉྙཝཱདཀོ ནཱམ.

དུཊྛུལླཾ ནཱམ པཱརཱཛིཀསངྒྷཱདིསེསཱ, ཨིདྷ པན སངྒྷཱདིསེསོཝ. པཀཱསོ ཙ ཚཱདོ ཙ པཀཱསཚཱདོ, དུཊྛུལླསྶ པཀཱསཚཱདོཏི ཏཔྤུརིསོ. ཨབྷིཎྷཱཔཏྟིཀསྶ བྷིཀྑུནོ ཨཱཡཏིཾ སཾཝརཏྠཱཡ ཨཱཔཏྟིཔརིཡནྟཾ ཀུལཔརིཡནྟཉྩ ཀཏྭཱ ཝཱ ཨཀཏྭཱ ཝཱ ཏིཀྑཏྟུཾ ཨཔལོཀེཏྭཱ ཀཱཏབྦཾ. བྷིཀྑུསམྨུཏིཾ ཋཔེཏྭཱ ཨནུཔསམྤནྣསྶ ‘‘ཨཡཾ ཨསུཙིཾ མོཙེཏྭཱ སངྒྷཱདིསེསཾ ཨཱཔནྣོ’’ཏིཨཱདིནཱ ནཡེན ཝཏྠུནཱ སདྡྷིཾ ཨཱཔཏྟིཾ གྷཊེཏྭཱ ཏསྶ དུཊྛུལླསྶ པཀཱསནེ ཨཱརོཙནེ ཙ, ཏསྶེཝ ཡེན ཀེནཙི ཨུཔཱཡེན ཉཏྭཱ ཚཱདནེ ཙ, ཨདུཊྛུལླཱརོཙནེ ཚཱདནེ ¶ ཙ, ཨནུཔསམྤནྣསྶ པན པུརིམཔཉྩམསིཀྑཱཔདེ ཨིཏརཱ དུཊྛུལླེཔི དུཀྐཊཾ.

ཧཱསོདཀེཏི ཨེཏྠ ཧཱསེ ཨུདཀེཏི པདཝིབྷཱགོ ཝེདིཏབྦོ. ཡེན ཀེནཙི སརཱིརཱཝཡཝེན ཧསཱདྷིཔྤཱཡསྶ ཨུཔཀཙྪཀཱདཱིསུ ཧཱསེ ཕུསནེ. ཧཱསནིམིཏྟཉྷི ཕུསནཾ ཧཱསོ. ཨནུཔསམྤནྣེ དུཀྐཊཾ. ཨུདཀེ ཧཱསེཏི ཨུཔརིགོཔྥཀེ ཨུདཀེ ཧསཱདྷིཔྤཱཡསྶ ཨུམྨུཛྫནནིམུཛྫནེན ཀཱིལཱ༹ཡ. ཀཱིལཱ༹ ཧི ཨིདྷ ཧཱསོཏི ཝུཏྟོ. ནཱཝཱཡ ཀཱིལ༹ཏོ, ཧཏྠཱདིནཱ ཀཊྛཱདིནཱ ཝཱ ཨུདཀཾ ཧནཏོ ཨནྟམསོ བྷཱཛནགཏཀཉྫིཀཱདཱིནིཔི ཁིཔནཀཱིལཱ༹ཡ ཀཱིལ༹ཏོ དུཀྐཊཾ. ཨཧསཱདྷིཔྤཱཡསྶ ཨནཱཔཏྟི.

ནིཙྪུབྷནེ ཝིཧཱརཱཏི སངྒྷིཀཝིཧཱརཏོ བྷིཀྑུནོ ནིཀྐཌྜྷནནིཀྐཌྜྷཱཔནེ. ཨེཏྠ ཙ ཨེཀཔྤཡོགེ ¶ ཨེཀཱ, ནཱནཱཔཡོགེ དྭཱརགཎནཱཡ ཨཱཔཏྟིཡོ. པུགྒལིཀནིཀྐཌྜྷནེ, ཏསྶ པརིཀྑཱརནིཀྐཌྜྷནེ, ཨནུཔསམྤནྣསྶ པན ཏསྶ པརིཀྑཱརསྶ ཝཱ ནིཀྐཌྜྷནེ དུཀྐཊཾ. ན སམྨཱཝཏྟནྟཱནཾ ཨནྟེཝཱསིཀསདྡྷིཝིཧཱརིཀཱནཾ ཝཱ ནིཀྐཌྜྷནེ, ཨཏྟནོ ཝིསྶཱསིཀསྶ ཝིཧཱརཱ ནིཀྐཌྜྷནེ, བྷཎྜནཀཱརཀསྶ པན སཀལསངྒྷཱརཱམཏོ ནིཀྐཌྜྷནེ ཨནཱཔཏྟི.

ཨནུཔཁཛྫ སཡནེཏི ‘‘ཝུཌྜྷོ, གིལཱནོ, སངྒྷེན དིནྣོ’’ཏི ཛཱནིཏྭཱ མཉྩཔཱིཋཱནཾ ཝཱ ཏསྶ བྷིཀྑུནོ པཝིསནྟསྶ ཝཱ ནིཀྑམནྟསྶ ཝཱ ཨུཔཙཱརཾ ཨནུཔཁཛྫ ཨནུཔཝིསིཏྭཱ སངྒྷིཀེ ཝིཧཱརེ ‘‘ཡསྶ སམྦཱདྷོ བྷཝིསྶཏི, སོ པཀྐམིསྶཏཱི’’ཏི ཨདྷིཔྤཱཡེན ནིསཱིདནནིསཛྫནཝསེན སཡནེ. པུགྒལིཀེ དུཀྐཊཾ.

ཨེཏྠ ཙ པཱཙིཏྟཱིཏི ཨུདྡིསིཏྭཱ ཀཱནིཙི པསིདྡྷཱནི དསྶིཏཱནི. ཨཝུཏྟཱནི པན ཏཱདིསཱནི ཨིམིནཱཝ སཱམཉྙཝཙནེན སངྒཧེཏྭཱ ¶ ཝེདིཏབྦཱནི. ཀཐཾ? ཨཙེལཀཱདིཨཉྙཏིཏྠིཡཱནཾ ཡསྶ ཀསྶཙི ཨཱམིསསྶ སཧཏྠཱ དཱནེ ཙ, སཔྤིནཝནཱིཏཏེལམདྷུཕཱཎིཏམཙྪམཾསཁཱིརདདྷིསངྑཱཏཱནཾ པཎཱིཏབྷོཛནཱནཾ ཨཏྟནོ ཨཏྠཱཡ ཝིཉྙཱཔེཏྭཱ བྷུཉྫནེ, རཱགཔརིཡུཊྛིཏཨིཏྠིཔུརིསསྶ ཡོགྒེ ཀུལེ ཨནུཔཝིསིཏྭཱ ནིསཛྫནཀཔྤནེ, པཉྩནྣཾ བྷོཛནཱནཾ ཨཉྙཏརེན ནིམནྟིཏོ ཏསྨིཾ བྷུཏྟེ ཝཱ ཨབྷུཏྟེ ཝཱ སནྟཾ བྷིཀྑུཾ ཨནཱཔུཙྪིཏྭཱ པུརེབྷཏྟཾ པཙྪཱབྷཏྟཾ ཝཱ ཡསྨིཾ ཀུལེ ནིམནྟིཏོ, ཏཏོ གིལཱནཙཱིཝརདཱནཀཱརསམཡཾ ཋཔེཏྭཱ ཨཉྙསྨིཾ ཨཉྙཀུལཔྤཝེསནེ, ཋཔེཏྭཱ ཨེཀདིཝསཾ ཨཉྙསྨིཾ དིནེ ཨཱཝསཐཔིཎྜསྶ ཨགིལཱནེན ཧུཏྭཱ བྷུཉྫནེ, རཏྟིཔརིཙྪེདཾ ཝཱ བྷེསཛྫཔརིཙྪེདཾ ཝཱ ཀཏྭཱ པཝཱརིཏཏོ ཨུཏྟརི ཨཉྙཏྲ པུན པཝཱརཎཱཡ ཨཉྙཏྲ ནིཙྩཔྤཝཱརཎཱཡ ཝིཉྙཱཔནེ, ཨཉྙཏྲ ཏཐཱརཱུཔཔཙྩཡཱ གཱམཏོ ནིཀྑནྟསེནཱདསྶནཱཡ གམནེ, པཙྩཡེནཔི གནྟྭཱ ཏིརཏྟཏོ ཨུཏྟརི སེནཱཡ ཝཱསེ, ཏསྶ ཙ ཝསནྟསྶ ཡུདྡྷཊྛཱནབལགཎཊྛཱནསེནཱནིཝེསཨནཱིཀདསྶནཏྠཾ གམནེ, པིཊྛཱདཱིཧི ཀཏམཛྫསངྑཱཏསུརཱཡ, པུཔྥཱདཱིཧི ཀཏཨཱསཝསངྑཱཏམེརཡསྶ ཙ པཱནེ, པདཱིཔུཛྫལཔཏྟཔཙནཱདིཀཱརཎཾ ཝིནཱ ཝིསིབྦིཏུཀཱམཏཱཡ ཨགིལཱནསྶ ཨགྒིནོ ཛཱལནཛཱལཱཔནེ, ཀཔྤབིནྡུཾ ཨནཱདཱཡ ནཝཙཱིཝརཔརིབྷོགེ, སཱམཾ ཙཱིཝརཾ ཝིཀཔྤེཏྭཱ ཨཔཙྩུདྡྷཱཡ པརིབྷོགེ, བྷིཀྑུསནྟཀཔཏྟཱདིནོ ཨནྟམསོ ཧསཱདྷིཔྤཱཡེནཔི ཨཔནིདྷཱནེ ཨཔནིདྷཱཔནེ, སཉྩིཙྩ ཏིརཙྪཱནགཏསྶ ཛཱིཝིཏཝོརོཔནེ, སཉྩིཙྩ ཡཐཱདྷམྨཾ ནིཧཏཱདྷིཀརཎསྶ པུནཀམྨཱཡ ཨུཀྐོཊནེ, སཉྩིཙྩ ཐེཡྻསཏྠེན སདྡྷིཾ སཾཝིདྷཱཡ ཨེཀདྡྷཱནགམནེ, བྷིཀྑཱུཧི སིཀྑཱཔདེཧི ཝུཙྩམཱནསྶ ཨཉྙཾ ཨཝིཙཱརེཏྭཱ ¶ ‘‘ན ཏཏྠ སིཀྑིསྶཱམཱི’’ཏི བྷཎནེ, སིཀྑཱཔདཝིཝཎྞནེ, ཨིམེསཾ ‘‘སུཏྭཱ ཨོརམིསྶཱམཱི’’ཏི ཨདྷིཔྤཱཡཾ ཝིནཱ ཝིཝཱདཱཔནྣཱནཾ ཨུཔསྶུཏིཊྛཱནེ, དྷམྨིཀཱནཾ ཀམྨཱནཾ ཚནྡཾ དཏྭཱ པཙྪཱ ཁཱིཡནདྷམྨཱཔཛྫནེ, སངྒྷེ ཝིནིཙྪཡེ ཝཏྟམཱནེ ཚནྡཾ ཨདཏྭཱ ¶ པཀྐམནེ, སམགྒེན སངྒྷེན ཙཱིཝརཾ དཏྭཱ པཙྪཱ ཁཱིཡནདྷམྨཱཔཛྫནེ, ཨཉྙཏྲ ཨཛ྄ཛྷཱརཱམཱ ཨཛ྄ཛྷཱཝསཐཱ ཝཱ རཏནསྶ ཝཱ རཏནསམྨཏསྶ ཝཱ ཨུགྒཎྷནཨུགྒཧཱཔནེ པཱཙིཏྟིཡནྟི.

པཱཙིཏྟིཡནིདྡེསཝཎྞནཱ ནིཊྛིཏཱ.

༡༢༥. སམཎཀཔྤཱཏི སམཎཝོཧཱརཱ. བྷཝནྟི, ཨཧེསུནྟི ཝཱ བྷཱུཏཱ, ཝཏྟམཱནེ, བྷཱུཏེ ཝཱ ཏཔྤཙྩཡོ. ཝིརུལ༹ྷམཱུལཱདིབྷཱཝཾ ཨཱཔཛྫིཏྭཱ ཝཌྜྷམཱནཀཱནཾ, ཝཌྜྷིཏྭཱ མཧནྟབྷཱཝཾ པཏྟཱནཉྩ རུཀྑལཏཱདིསངྑཱཏཱནཾ བྷཱུཏཱནཾ གཱམོ, བྷཱུཏཱ ཨེཝ ཝཱ གཱམོ སམཱུཧོ བྷཱུཏགཱམོ. ཏསྶ སམཱརམྦྷོ ཚེདནཕཱལནཱདི, ཏསྨིཾ. ནིམིཏྟཏྠེ ཙེཏཾ བྷུམྨཾ, ཏཾཧེཏུ པཱཙིཏྟིཡཾ ཧོཏཱིཏི ཨཏྠོ. ཀཏཀཔྤིཡཾ སམཎཀཔྤིཡཾ བྷཝེཏི སམྦནྡྷོ. ཏཏྠ ཀཏཾ ཀཔྤིཡཾ ཡསྶཱཏི བཧུབྦཱིཧི. ཀེནཱཏི ཨཱཧ ‘‘ནཁེནཱ’’ཏིཨཱདི.

༡༢༦. ཨིདཱནི ཡསྶ སམཱརམྦྷོ, ཏཾ བྷཱུཏགཱམཾ ཝིབྷཛིཏྭཱ དསྶེཏུཾ ‘‘ས མཱུལཱ’’ཏིཨཱདི ཨཱརདྡྷཾ. སོཏི བྷཱུཏགཱམོ. བྷཝིཏུཾ ཨུཔྤཛྫིཏུཾ པཡོཛེཏཱིཏི ཀཱརིཏནྟཱ ཏཔྤཙྩཡོ, པབྷཱཝིཏོ ཨུཔྤཱདིཏོཏི ཨཏྠོ. ཨཐ ཝཱ པབྷཝནཾ པབྷཝོ, ཨུཔྤཏྟི, སོཝ པབྷཝོ, པབྷཱཝཾ ཀརོཏཱིཏི ནཱམདྷཱཏུཏོ ཀཏྟརི ཏཔྤཙྩཡོ, པབྷཱཝིཏོ ཨུཔྤནྣོཏི ཨཏྠོ. མཱུལཉྩ ཁནྡྷོ ཙ བཱིཛཉྩ ཨགྒཉྩ ཕལུ༹ ཙ མཱུལ…པེ… ཕལཱུ༹ནི. ཕལུ༹ ནཱམ པབྦཾ. ཏཱནིཡེཝ བཱིཛཱནི, ཏེཧི པབྷཱཝིཏོ ཨུཔྤཱདིཏོ, ཨཐ ཝཱ ཏེཧི ཨཝདྷིབྷཱུཏེཧི, ཀཱརཎབྷཱུཏེཧི ཝཱ པབྷཱཝིཏོ ཨུཔྤནྣོཏི ཀམེན ཝིཀཔྤདྭཡེ སམཱསདྭཡཾ ཝེདིཏབྦཾ. ཏཏྠ མཱུལབཱིཛཾ ནཱམ ཧལིདྡིསིངྒིཝེརཱདི.

ཁནྡྷབཱིཛཾ ¶ ནཱམ ཨསྶཏྠནིགྲོདྷཱདི. བཱིཛབཱིཛཾ ནཱམ པུབྦཎྞཱཔརཎྞཱདི. ཨགྒབཱིཛཾ ནཱམ ¶ ཧིརིཝེརཱདི. ཕལུ༹བཱིཛཾ ནཱམ ཨུཙྪུནལཱ༹དི. ཏཏྠ མཱུལབཱིཛཱདཱིནི པཉྩ བཱིཛགཱམོ. ཏནྣིབྦཏྟོ རུཀྑལཏཱདི བྷཱུཏགཱམོ.

ཨིདཱནི ཏེསུ བཱིཛགཱམསམཱརམྦྷེ དུཀྐཊཾ དསྶེཏི ཨཔརདྡྷེན. བྷཱུཏགཱམཝིཡོཛིཏཾ བཱིཛཾ ཨཱརམྦྷེ དུཀྐཊནྟི སམྦནྡྷོ. བྷཱུཏགཱམཏོ ཝིཡོཛིཏནྟི ཏཔྤུརིསོ. བཱིཛནྟི བྷཱུམིཡཾ རོཔིཏམརོཔིཏམྤི ནིགྒཏཝིདཏྠིམཏྟཔཏྟཝཊྚིཔི མཱུལབཱིཛཱནི. ‘‘ཨཱརམྦྷེ’’ཏི ཀིཏཀཔཙྩཡསྶ ཡོགེ ཨཝུཏྟེ ཀམྨནི ཚཊྛུཔྤཏྟིཡཾ ཝིཀཔྤེན ཨུབྷཡཏྠ དུཏིཡཱ. ཨཱརམྦྷེཏི སམཱརམྦྷེ. ཏསྨཱ ‘‘ཨིམཾ པུཔྥཾ ཕལཾ ཝཱ ཛཱན, ཨིམཾ ཀཔྤིཡཾ ཀརོཧཱི’’ཏིཨཱདིནཱ ཀཔྤིཡཝཙནེན བྷཱུཏགཱམཏོ ཝིཡོཛིཏཾ བཱིཛཛཱཏཾ བཱིཛགཱམཔརིམོཙནཏྠཾ པུན ཀཔྤིཡཾ ཀཱརཱཔེཏྭཱ པརིབྷུཉྫིབྷབྦཾ. ‘‘ཨནུཛཱནཱམི, བྷིཀྑཝེ, པཉྩཧི སམཎཀཔྤེཧི ཕལཾ པརིབྷུཉྫིཏུཾ ཨགྒིཔརིཛིཏཾ སཏྠཔརིཛིཏཾ ནཁཔརིཛིཏཾ ཨབཱིཛཾ ནིབྦཏྟབཱིཛཉྙེཝ པཉྩམ’’ནྟི (ཙཱུལ༹ཝ. ༢༥༠) ཝུཏྟེསུ པཉྩསུ ནཁཔརིཛིཏཱདཱིནི ཏཱིཎི དསྶིཏཱནི.

༡༢༧. ཨིདཱནི ཨཝསིཊྛཱནི དྭེ དསྶེཏུཾ ‘‘ནིབྦཏྟབཱིཛ’’ནྟིཨཱདིཀཾ པཋམདྡྷཾ ཨཱཧ. ཏཏྠ ནིབྦཏྟབཱིཛནྟི ནིབྦཏྟནིཡནྟི ནིབྦཏྟཾ, ནིཔུབྦ ཝཏུ ཝཏྟནེཏིམསྨཱ ཏཔྤཙྩཡོ, ནིབྦཏྟཾ བཱིཛཾ ཡསྶ ཏཾ ནིབྦཏྟབཱིཛཾ, བཱིཛཾ ནིབྦཏྟེཏྭཱ ཝིསུཾ ཀཏྭཱ པརིབྷུཉྫིཏབྦཾ ཨམྦཔནསཱདི. ནོབཱིཛཾ ནཱམ ཏརུཎམྦཕལཱདི. ཨིདཱནི བཱིཛགཱམབྷཱུཏགཱམེསུ ཀཔྤིཡཀརཎཔྤཀཱརཱདིཝིསེསཾ དསྶེནྟོ ‘‘ཀཊཱཧཱ’’ཏིཨཱདིམཱཧ. ཏཏྠ ཀཊཱཧེན བདྡྷཾ བཱིཛཾ ཡེསནྟི བཱཧིརཏྠོ.

༡༢༨. བྷཱཛནེ བྷཱུམིཡམྤི ཝཱ ཨེཀཱབདྡྷེསུ བཱིཛེསུ ཨེཀསྨིཉྩ ཀཔྤིཡེ ཀཏེཏི ཡོཛནཱ. བཱིཛེསཱུཏི བཱིཛགཱམབྷཱུཏགཱམེསུ ¶ . བྷཱུཏགཱམོཔི ཧི ཨིདྷ ‘‘བཱིཛ’’ནྟི རུལ༹ྷཱིཝསེན ཝུཙྩཏི.

༡༢༩. ནིཀྑིཏྟེཏི ཋཔིཏེ. ཀཔྤིཡཾ པུན ཀརེཡྻཱཏི ཛཱཏམཱུལཔཎྞབྷཱཝཏོ བྷཱུཏགཱམཏྟཱ བྷཱུཏགཱམཏོ པརིམོཙིཏཾ བཱིཛགཱམཔརིམོཙནཏྠཾ པུན ཀཔྤིཡཾ ཀཱརེཡྻཱཏི ཨཏྠོ. ཏེནཱཧ ‘‘བྷཱུཏགཱམོ ཧི སོ ཏདཱ’’ཏི. ཧི-སདྡོ ཧེཏུམྷི. ཏདཱཏི མཱུལེ ཙ པཎྞེ ཙ ཛཱཏཀཱལེ སཙེ མཱུལམཏྟཾ སཉྫཱཡཏི, ཨུཔརིབྷཱགེ སཙེ ཨངྐུརོ ཛཱཡཏི, ཧེཊྛཱབྷཱགེ ཚིནྡིཏུཾ ཝཊྚཏི. མཱུལམཏྟེསུ ཝཱ ¶ པན པཎྞམཏྟེསུ ཝཱ ནིགྒཏེསུ སཙེཔི རཏནཔྤམཱཎཱཔི སཱཁཱ ནིཀྑམནྟི, བཱིཛགཱམསངྒཧིཏཱ ཧོནྟི.

༡༣༠. ཨུདཀསམྦྷཝོ སེཝཱལོ ཙ ཙེཏིཡཱདཱིསུ སེཝཱལོ ཙ བྷཱུཏགཱམོཝཱཏི སམྦནྡྷོ. ཨཱདི-སདྡེན པཱཀཱརཱདིགྒཧཎཾ. ཡདི དྭེ ཏཱིཎི པཎྞཱནི ན ཛཱཡནྟི, ཨགྒབཱིཛསངྒཧཾ གཙྪཏི. སུཀྑོ པན སམྨཛྫིཏབྦོ. མཱུལཔཎྞེ ཝིནིགྒཏེ བཱིཛོཔི བྷཱུཏགཱམོཝཱཏི སམྦནྡྷོ. པཎྞེཏི ཨིམིནཱ ཨངྐུརམཏྟཾ པཊིཀྑིཔཏི.

༡༣༡. གྷཊཱདིཔིཊྛེ སེཝཱལོ ཙ ཨཧིཚཏྟཀམཀུལ༹ཉྩ དུཀྐཊསྶེཝ ཝཏྠཱུནཱིཏི སམྦནྡྷོ. པིཊྛེཏི ཨིམིནཱ ཨནྟོ ཨབྦོཧཱརིཀོཏི དསྶེཏི. ཕུལླནྟི ཕུལླིཏཾ ཨཧིཚཏྟཀཾ. ཨབྱཝཧཱརིཀནྟི ཨཱཔཏྟིཝོཧཱརཡོགྒཾ ན ཧོཏཱིཏི ཨཏྠོ.

༡༣༢. ཨལླརུཀྑེ ལཱཁཱནིཡྻཱསཚཏྟཱནི ཝིཀོཔིཡ གཎྷཏོ ཏཏྠ ཨཀྑརཾ ཚིནྡཏོ ཝཱཔི པཱཙིཏྟཱིཏི སམྦནྡྷོ. ཏཏྠཱཏི ཨལླརུཀྑེ. ‘‘ཝིཀོཔཡ’’ནྟི པོཏྠཀེསུ པཱཋོ དིསྶཏི, སོ ཨཔཱཋོ པཋམནྟཏཱཡ ཀཱརཎཱབྷཱཝཏོ. ‘‘ཝིཀོཔིཡཱ’’ཏི པན པཱཋོ གཧེཏབྦོ. ཝིཀོཔིཡཱཏི ¶ ཨིམིནཱ ཨཝིཀོཔེཏྭཱ གཧཎེ ཨནཱཔཏྟཱིཏི དཱིཔེཏི.

༡༣༣. དཱརུམཀྐཊཀཱདིནཱཏི ཨཱཎིཾ ཀོཊྚེཏྭཱ དཱརུཡནྟཾ ཀཏྭཱ ཏཏྠ ཀཎྚཀཾ ཨོལམྦེནྟི, ཨེཏཾ དཱརུམཀྐཊཀཾ ནཱམ. ཨཱདི-སདྡེན ཀཎྚཀབནྡྷནཱདཱིནཾ གཧཎཾ. ཏིཎཱདིཾ ཚིནྡིཏུཾ, གཎྛིཀཾ ཀཱཏུཉྩ ན ཀཔྤཏཱིཏི ཡོཛནཱ. ཚིནྡིཏུནྟི ཚིནྡནཾ.

༡༣༤. བྷཱུཏགཱམཾ ཝཱཏི བྷཱུཏགཱམཾ ཝཱ. བཱིཛཾ ཝཱཏི བཱིཛགཱམཾ ཝཱ. ‘‘ཚིནྡ ཝཱ’’ཏིཨཱདིནཱ སབྦཏྠ ཝཱ-སདྡོ ཡོཛེཏབྦོ. པཙ ཝཱཏི པཙནཾ ཀརོཧཱིཏི ཝཱ. ‘‘པཊ’’ ཨིཏི ཝཱ པཱཋོ, ཏསྶ ཨུཔྤཱདེཧཱིཏི ཨཏྠོ. ‘‘ཨིམཾ རུཀྑཾ ཚིནྡཱཧཱི’’ཏིཨཱདིནཱ པན ཨཝཏྭཱ ‘‘རུཀྑཾ ཚིནྡཱ’’ཏིཨཱདིནཱ ཨནིཡམེཏྭཱ ཝཏྟུཾ ཝཊྚཏི.

༡༣༥. ཨིམནྟི ¶ ཨེཏཾ རུཀྑཱདིཾ. ཨིམཾ སོདྷེཧཱིཏི ཨེཏྠ ཨིཏི-སདྡཾ ཀཏྭཱ ཨཏྠོ ཝཏྟབྦོཏི.

༡༣༦. ཡཱསུ ཝུཏྠཾ པཀྐཉྩ ཀཔྤཏི, ཏཱ ཀཔྤིཡཱ བྷཱུམིཡོ སམྨུཏི ཙ སམྨུཏིཀུཊི ཙ…པེ… གཧཔཏི ཙ གཧཔཏིཀུཊི ཙཱཏི ཨིམཱ ཙཏསྶོ ཧོནྟཱིཏི ཡོཛེཏྭཱ ཨཏྠོ ཝེདིཏབྦོ. ཏཏྠ བྷེསཛྫཀྑནྡྷཀེ (མཧཱཝ. ༢༩༥) ཝུཏྟཱཡ ཨུཏྟིདུཏིཡཀམྨཝཱཙཱཡ, ཨཔལོཀནཀམྨཝསེན ཝཱ སཱཝེཏྭཱ སམྨཱ ཨུཏྟིསམྤནྣཾ ཀརཱིཡཏཱིཏི སམྨུཏི, ཐམྦྷཱནཾ བྷིཏྟིཔཱདཱནཾ ཝཱ ཨུགྒམནཾ ཨུདྡྷཾ ཀཏྭཱ ཋཔནཾ, ‘‘ཀཔྤིཡཀུཊིཾ ཀརོམཱ’’ཏི ཝཱཙཱཡ སཱཝནཉྩ ¶ ཨནྟཾ ཡསྶཱ སཱ ཨུསྶཱཝནནྟཱ. ཏཐཱ ཙ ཝུཏྟཾ ‘‘ཐམྦྷཔྤཏིཊྛཱནཉྩ ཝཙནཔརིཡོསཱནཉྩ སམཀཱལཾ ཝཊྚཏཱི’’ཏི (མཧཱཝ. ཨཊྛ. ༢༩༥). ནིསཱདནཾ པཝིསནཾ སནྣིཝེསནཾ ནིསཱདོ, གུནྣཾ ཝིཡ ནིསཱདོ ཨེཏིསྶཱཏི གོནིསཱདི. བྷིཀྑུཾ ཋཔེཏྭཱ སེསསཧདྷམྨིཀཱ སབྦེ ཙ དེཝམནུསྶཱ ཨིདྷ གཧཔཏཱིཏི སཱམཉྙེན ཨདྷིཔྤེཏཱ. ཨེཏྠ པན གཧཔཏིསམྦནྡྷིནཱི ཀུཊི དཱིགྷེན གཧཔཏཱི.

‘‘ཡཾ པན ཨཀཔྤིཡབྷཱུམིཡཾ སཧསེཡྻཔྤཧོནཀེ གེཧེ ཝུཏྠ’’ནྟི (མཧཱཝ. ཨཊྛ. ༢༩༥) ཨཊྛཀཐཱཝཙནཏོ ཡཾ སངྒྷོ ཨཱཀངྑཏི ཝིཧཱརཾ ཝཱ ཨཌྜྷཡོགཾ ཝཱ པཱསཱདཾ ཝཱ ཧམྨིཡཾ ཝཱ གུཧཾ ཝཱ ལེཎཱདིཾ ཝཱ, ཏེསམྤི སཱམཉྙཝཙནཾ ཝིཉྙཱཡཏཱིཏི ཏཾཏཾལཀྑཎཔྤཏྟཱ སཧསེཡྻཔྤཧོནཀཱ ལེཎཱདཡོ ཙཏཱུསྭེཝ ཀུཊཱིསུ ཨནྟོགདྷཱཏི ཝེདིཏབྦཾ. ཨིམཱསུ ཙཏཱུསུ སཧསེཡྻཔྤཧོནཀེ པདེསེ ཡཾ སངྒྷིཀཾ པུགྒལིཀཾ ཝཱ བྷིཀྑུསནྟཀཾ ཨེཀརཏྟམྤི ཨནྟོཝུཏྠཾ ཨནུཔསམྤནྣེན པཀྐཉྩ ཡཱཝཀཱལིཀཾ ཡཱམཀཱལིཀཉྩ ཨནྟོཝུཏྠཨནྟོཔཀྐསངྑཾ ན གཙྪཏི, ཀོ པན ཝཱདོ ཨིཏརདྭཡེ. ཏཾ པན ཨཀཔྤིཡབྷཱུམིཡམྤི ཝུཏྠཾ པཀྐཉྩ ཝཊྚཏི. ཏེན ཝུཏྟཾ ‘‘ཡཱསུ ཝུཏྠཾ པཀྐཉྩ ཀཔྤཏཱི’’ཏི.

༡༣༧. ཝཱསཏྠཱཡ ཀཏེ སངྒྷིཀེ ཝཱ ཨེཀསནྟཀེ ཝཱ སཧསེཡྻཔྤཧོནཀེ གེཧེ ཀཔྤིཡཱཀུཊི ¶ ལདྡྷབྦཱཏི སམྦནྡྷོ. ཏཏྠ ཝཱསཏྠཱཡཱཏི ཨིམིནཱ ཨཝཱསཏྠཱཡ ཀཏཾ ནིཝཏྟེཏི. ཨེཀསནྟཀེཏི ཨེཀསྶ བྷིཀྑུནོ སནྟཀེ. ཀཔྤིཡཱཀུཊཱིཏི བྷཱཝཔྤདྷཱནོཡཾ ནིདྡེསོ, ན ཧི གེཧེ གེཧཾ ལདྡྷུཾ ཡུཛྫཏཱིཏི ཀཔྤིཡཀུཊིཏཱཏི ཨཏྠོ. དཱིགྷོ པན གཱཐཱཝསེན, ཀཔྤིཡཱ ཀུཊིཏཱཏི ཝཱ ཝིསེསནཝསེན དཊྛབྦཾ. སཧསེཡྻཔྤཧོནཀེཏི ཨེཏྠ སཧསེཡྻཔྤཧོནཀཾ ¶ ཝཱསཱགཱརལཀྑཎེ ཝུཏྟལཀྑཎཾ སེནཱསནཾ.

༡༣༨. ཨིདཱནི ཏཱ ཀུཊིཡོ ཀམེན དསྶེཏྭཱ ཏཏྠ པཊིཔཛྫིཏབྦཝིདྷིཾ, ཏཱསཾ སབྦཐཱཔགམཉྩ དསྶེཏུཾ ‘‘གེཧེ’’ཏིཨཱདིམཱཧ. ཏཏྠ ‘‘ཀཔྤིཡཀུཊིཾ ཀརོམ, ཀཔྤིཡཀུཊིཾ ཀརོམཱ’’ཏི ཨེཝམཱིརཡནྟི སམྦནྡྷོ. ཨིཊྛཀཱ ཙ ཐམྦྷཱ ཙ ‘‘ཨིཊྛཀཱཐམྦྷཱ’’ཏི ཝཏྟབྦེ རསྶོ. ཨིཊྛཀཐམྦྷཱ ཨཱདི ཡསྶ བྷིཏྟིཔཱསཱདསྶཱཏི བཧུབྦཱིཧི. པཙྪཱ པཋམསདྡེན ཀམྨདྷཱརཡོ. ‘‘ཋཔེཡྻ ཙེ, སཱ ཨུསྶཱཝནནྟིཀཱ’’ཏི ཨེཝཾ ཙེ-སཱ-སདྡེ ཡོཛེཏྭཱ ཨཏྠོ ཝེདིཏབྦོ.

༡༣༩. སཀལོ ཨཔརིཀྑིཏྟོ ཨཱརཱམོཔི ཝཱཏི སམྦནྡྷོ. སེནཱསནཾ པརིཀྑིཏྟཾ ཝཱ ཧོཏུ, ཨཔརིཀྑིཏྟཾ ཝཱ, ན ཏཾ པམཱཎཾ.

༡༤༠. ཨཉྙེཧི ཀཔྤིཡཀུཊིཡཱ ཨཏྠཱཡ དིནྣོ ཝཱ ཏེསཾ སནྟཀོ ཝཱཏི ཡོཛནཱ.

༡༤༡. ཨཝིརོདྷབྷཱཝེན ཀཔྤནཱིཡཱ ཀཔྤཱ, ཀཔྤ སཱམཏྠིཡམིཙྩེཏསྨཱ ཨིཏྠིཡཾ ཨཱཔཙྩཡེ རཱུཔཾ, ན ཀཔྤཱ ཨཀཔྤཱ, ཨཀཔྤཱ ཙ སཱ ཀུཊི ཙེཏི ཨཀཔྤཀུཊི, ཏཱཡ. སཔྤིཨཱདཱིཏི ཨིམིནཱ སཏྟཱཧཀཱལིཀཾ ཡཱཝཛཱིཝིཀཉྩ གཧིཏཾ.

༡༤༢. ཏེཧེཝཱཏི ཨཀཔྤཀུཊིཡཾ ཝུཏྠསཔྤིཨཱདཱིཧི ཨེཝ སདྡྷིཾ སཏྟཱཧཀཱལིཀསཾསཊྛཏཱཡ ‘‘སཏྟཱཧཾ ཀཔྤཏེ’’ཏི ཝུཏྟཾ. སཱམིསེཏི ཨཱམིསསངྑཱཏེན པུརིམདྭཡེན སཧིཏེ. སཱམཔཱཀཏཱཏི སཱམཾ ཨཏྟནཱ པཱཀོ ཨེཏསྶཱཏི སཱམཔཱཀཾ, སཏྟཱཧཀཱལིཀེན སཧ པཀྐཾ སཱམིསཾ ཡཱཝཛཱིཝིཀཾ, ཏསྶ བྷཱཝོ སཱམཔཱཀཏཱ. སཡཾ པཀྐཾ ཏཾ ཨཏྟནཱ སཾསཊྛཏཱཡ ཏམྤི ཨཱམིསཾ སཱམཔཱཀགཏིཀཾ ཀརོཏཱིཏི ཏསྶ སཱམཔཱཀཏཱ ཧོཏཱིཏི ཨདྷིཔྤཱཡོ.

༡༤༣. ཨདྷིཊྛིཏཱཏི ¶ པཏིཊྛིཏཱ. ཨེཝ-སདྡོ ཏིཊྛཏིསདྡསྶ ཨནྟེ དཊྛབྦོ.

༡༤༤. སབྦེསཱུཏི ¶ ཐམྦྷཱདཱིསུ སཀལེསུ. ཛཧིཏཾ ཝཏྠུ ཀུཊིབྷཱུམི ཡསྶཱ ཛཧིཏཝཏྠུཀཱ. པརིཀྑིཏྟེ ཛཧིཏཝཏྠུཀཱཏི སམྦནྡྷོ. སེསཱཏི ཨིཏརཱ དྭེ ཀུཊིཡོ. ཚདནཝིབྦྷམཱཏི ཚདནསྶ ཝིནཱསཱ. ཨེཏྠཱཔི ‘‘ཛཧིཏཝཏྠུཀཱ’’ཏི ཨཱནེཏབྦནྟི.

༡༥. ཨུཔཛ྄ཛྷཱཙརིཡཝཏྟནིདྡེསཝཎྞནཱ

༡༤༥. ‘‘ཨིདཾ ཏཡཱ དུཀྐཏཾ, དུབྦྷཱསིཏ’’ནྟིཨཱདཱིནི ཝཏྭཱ ཙོདནཏོ, ཨཏྟནོ ཝཛྫཾ ཨསྶརནྟསྶ སཏུཔྤཱདཝསེན སཱརཎཏོ, སམྨཱ པཊིཔཏྟིཡཾ སཱརཎཏོ པཝཏྟཱཔནཏོ ཝཱ ཝཛྫཱཝཛྫཾ ཨུཔནིཛ྄ཛྷཱཡཏི བྷུསཾ ཙིནྟེཏཱིཏི ཨུཔཛ྄ཛྷཱ. ཨུཔཛ྄ཛྷཱ ཨེཝ ཨུཔཛ྄ཛྷཱཡོ. ‘‘ཨེཝཾ ཏཡཱ བུདྡྷཝཙནཾ སཛ྄ཛྷཱཡིཏབྦཾ, ཨེཝཾ ཨཏིཀྐམིཏབྦཾ, ཨེཝཾ པཊིཀྐམིཏབྦ’’ནྟིཨཱདིནཱ ཨཱཙཱརསིཀྑཱཔནེ ཨཱཙརཏི པཝཏྟཏཱིཏི ཨཱཙརིཡོ. སོ ཙ ནིསྶཡཔབྦཛྫཱཨུཔསམྤདཱདྷམྨཱཙརིཡཝསེན ཙཏུབྦིདྷོ. ཨུཔཛ྄ཛྷཱ ཙ ཨཱཙརིཡོ ཙ ཨུཔཛ྄ཛྷཱཙརིཡཱ, ཏེ. ནིསྶཱཡ ཝསམཱནོཏི ཨིམིནཱ ནིསྶཡཔབྦཛྫཱཨུཔསམྤདཱདྷམྨནྟེཝཱསིཀེསུ ཡོ ནིསྶཱཡ ཝསཏི, ཏཾ དསྶེཏི. ཙཏཱུསུ ཧི ཏེསུ ནིསྶཡནྟེཝཱསིཀེན ཡཱཝ ཨཱཙརིཡཾ ནིསྶཱཡ ཝསཏི, ཏཱཝསབྦཾ ཨཱཙརིཡཝཏྟཾ ཀཱཏབྦཾ, ནེཏརེཧི. ཨིཏརེཧི, ནིསྶཡམུཏྟཀེཧིཔི ཡཱཝ ཙཱིཝརརཛནཾ, ཏཱཝ ཙ ཨརཏིཝིནོདནཱདིཀཉྩ ཝཏྟཾ ཀཱཏབྦཾ. ཨནཱཔུཙྪིཏྭཱ པཏྟཙཱིཝརདཱནཱདིམྷི པན ཨེཏེསཾ ཨནཱཔཏྟི. སདྡྷིཝིཧཱརིཀསྶ པན ཨུཔཛ྄ཛྷཱཡཱནཾ ཡཱཝ ཙཱིཝརརཛནཾ, ཏཱཝ ཙ ཨརཏིཝིནོདནཱདིཀཉྩ ཨཀརོནྟསྶ ནིསྶཡམུཏྟཀསྶཱཔི ཨམུཏྟཀསྶཱཔི ཨཱཔཏྟིཡེཝ. ཨེཀཙྩསྶ པཏྟདཱནཱདིཏོ ¶ པཊྛཱཡ ཨམུཏྟནིསྶཡསྶེཝ ཨཱཔཏྟི. ཏེསུ མཛ྄ཛྷེ དྭེ ཨཱཙརིཡསྶ ཡཱཝཛཱིཝཾ བྷཱརཱ. ཨིཏརེ པན ཡཱཝ སམཱིཔེ ཝསནྟི, ཏཱཝདེཝ, ཏསྨཱ ཨཱཙརིཡེནཱཔི ཏེསུ སམྨཱ ཝཏྟིཏབྦཾ, ཨུཔཛ྄ཛྷཱཡེན སདྡྷིཝིཧཱརིཀེསུ ཝཏྟབྦམེཝ ནཏྠི. སུཔེསལོཏི པིཡཾ སཱིལམསྶཱཏི པེསལོ, ཝུདྡྷི, ཡ-ལོཔེན ཨཱི-ཀཱརསྶ ཨཏྟཀརཎེན, སུཊྛུ པེསལོ སུཔེསལོ, སིཀྑཱཀཱམོཏི ཨཏྠོ. ‘‘དནྟཀཊྛ’’ནྟིཨཱདི ‘‘དདེ’’ཏིམསྶ ཀམྨཾ. དདེཏི སམྨཱ ཨཱདརེན ཡཐཱདྷིཔྤཱཡཾ དདེཡྻཱཏི ཨཏྠོ. ཀཱལེཏི ཏདནུརཱུཔེ ཀཱལེ.

༡༤༦. པཏྟེ ¶ ཙ…པེ… ཙཱིཝརེ ཙ ཝཏྟཾ ཙརེཏི སམྦནྡྷོ. ཙརེཏི ཀརེཡྻ. ཏཏྠ ནཱིཙཾ ཀཏྭཱ སཱདྷུཀཾ ཨཔརིགྷཾསནྟེན དྷོཝནཾ, མུཧུཏྟཾ ཨུཎྷེ ཨོཏཱཔནཾ, ཋཔནཊྛཱནཾ ཨུཔཔརིཀྑིཏྭཱ ཙམྨཱདིནཱ ཀེནཙི ཨནྟརཧིཏཱཡ ནིཀྑིཔནཾ པཏྟེ ཝཏྟཾ. གཱམཾ པཝིསནྟཱནཾ ནིཝཱསནཀཱཡབནྡྷནསངྒྷཱཊིདཱནཾ, དྷོཝིཏྭཱ སོདཀཔཏྟསྶ དཱནཾ གཱམཔྤཝེསེ ཝཏྟཾ. ཡདི ཨཱཀངྑནྟི, པརིམཎྜལཾ ནིཝཱསེཏྭཱ ཙ པཱརུཔིཏྭཱ ཙ ནཱཏིདཱུརནཙྩཱསནྣེ གམནཾ, པཏྟཔརིཡཱཔནྣགྒཧཎཉྩ གམནེ ཝཏྟཾ. ནིཝཏྟེནྟེ པན པཋམཏརཾ ཨཱགནྟྭཱ ཨཱསནཔཉྙཱཔནཾ, པཱདོདཀཱདིཨུཔནིཀྑིཔནཾ, པཏྟཙཱིཝརཔྤཊིགྒཧཎཾ ཨཱགམེ ཨཱགམནེ ཝཏྟཾ. བྷཎནྟཱནཾ ཨནྟརཱ ཀཐཱཨནོཔཱཏནཾ སབྦཏྠ ཝཏྟཾ. ཨཱསནཔཉྙཱཔནཾ, ཨུཊྛིཏེསུ ཨཱསནཨུདྡྷརཎཾ, པཱདཔཱིཋཀཐལཱནཾ ཨུཔནིཀྑིཔནཾ, པཊིསཱམནཉྩ ཨཱསནེ པཱདཔཱིཋེ པཱདཀཐལེ ཙ ཝཏྟཾ. དྷོཏཔཱདཊྛཔནཀཾ པཱདཔཱིཋཾ. ཨཉྙཾ ཀཐལཾ. ཨུཔཱཧནཱ ཙ ཙཱིཝརཉྩཱཏི དྭནྡོ, ཏསྨིཾ. སུཀྑཨལླཙོལེ༹ཧི པུཉྪནཾ ཨུཔཱཧནཱཡ ཝཏྟཾ. སིནྣཙཱིཝརསྶ མུཧུཏྟཾ ཨོཏཱཔནཾ, ཙཏུརངྒུལཾ ཀཎྞཾ ཨུསྶཱརེཏྭཱ ཙཱིཝརསཾཧརཎཉྩ ཙཱིཝརེ ཝཏྟཾ.

༡༤༧. པརིབྷོཛནཱིཡ…པེ… པསྶཱཝཊྛཱནིསུ ཙ ཝིཧཱརསོདྷནེ ཙ པུན པཉྙཱཔནེ ཙ ཝཏྟཾ ཏཐཱཏི སམྦནྡྷོ. ཝཙྩཉྩ ¶ པསྶཱཝོ ཙ ཝཙྩཔསྶཱཝཱ. ཏིཊྛཏི ཨེཏྠཱཏི ཋཱནཱི, ཀུཊི. ཝཙྩཔསྶཱཝཱནཾ ཋཱནཱིཏི ཏཔྤུརིསོ. ཨཐ ཝཱ ཏིཊྛཏི ཨེཏྠཱཏི ཋཱནཾ, སོཡེཝ སམཱསོ, ཝཙྩཔསྶཱཝསྶ ཙ པཏནཊྛཱནཾ, ཏཾ ཨསྶ ཨཏྠཱིཏི ཨིཊྛགེཧཱདི. པརིབྷོཛནཱིཡཉྩ པཱནཱིཡཉྩ ཝཙྩཔསྶཱཝཊྛཱནཱི ཙ པརི…པེ… ཊྛཱནཱི. ཏཱསུ ཏེསུ ཝཱ. པཱདོདཀཨུཎྷསཱིཏནཧཱནོདཀཔྤཊིཡཱདཱཔནཾ པརིབྷོཛནཱིཡེ ཝཏྟཾ. པཱཏབྦཔཱནཱིཡེན པུཙྪནཾ ཨུཔཊྛཱཔནཉྩ པཱནཱིཡེ ཝཏྟཾ. སམྨཛྫནཔཱནཱིཡཨུཔཊྛཱཔནཾ ཝཙྩཔསྶཱཝཊྛཱནཱིསུ ཝཏྟཾ. པཋམཾ པཏྟཙཱིཝརཱདཱིནི ཧརཱཔེཏྭཱ ཨེཀམནྟེ ནིཀྑིཔནཱདི, ཨུལློཀཏོ པཊྛཱཡ མཀྐཊསནྟཱནཾ ཨོཧཱརེཏྭཱ སམྨཛྫནཉྩ ཝིཧཱརསོདྷནེ ཝཏྟཾ. ཨོཏཱཔེཏྭཱ སོདྷེཏྭཱ པཔྥོཊེཏྭཱ ཨཏིཧརིཏྭཱ ཡཐཱཋཱནེ བྷཱུམཏྠརཎཱདིཔཉྙཱཔནཾ པུན པཉྙཱཔནེ ཝཏྟཾ. ཏཐཱཏི ཨིམིནཱ ‘‘ཙརེ’’ཏི ཨིདཾ ཨཏིདིསཏི.

༡༤༨. ཝིཧཱརཾ སོདྷེནྟོ བྷིཀྑུ པཊིཝཱཏེ ཝཱ སངྒཎེ ཝཱ པཱནཱིཡསཱམནྟཱ ཝཱ སཡནཱསནཾ ན པཔྥོཊེཡྻཱཏི སམྦནྡྷོ. པཱནཱིཡ-སདྡེན པརིབྷོཛནཱིཡཉྩ སངྒཧིཏཾ. པཊིཝཱཏེཏི ཨུཔརིཝཱཏེ. སངྒཎེཏི བཧཱུནཾ སམོསརཎེ ཝིཝཊཔྤདེསེ. སཡནཱསནཾ ནཱམ བྷཱུམཏྠརཎམཉྩཱདི.

༡༤༩. ནྷཱནེ ཝཏྟཾ ཙརེ, ནྷཱཏསྶ ཀཱཏབྦེ ཙརེཏི སམྦནྡྷསྶ པུརིསཱདྷཱིནཏཱཡ སམྦནྡྷོ ཝེདིཏབྦོ ¶ . ཙཱིཝརཔྤཊིགྒཧཎགཏྟཔརིཀམྨཀརཎཾ ནཧཱནེ ཝཏྟཾ. ཀཱཏབྦེ ཙརེཏི གཏྟཏོ ཨུདཀསམྨཛྫནནིཝཱསནདཱནཱདིཀིཙྩེ པཝཏྟེཡྻཱཏི ཨཏྠོ. ‘‘ཝནཔྤགུམྦེ’’ཏིཨཱདཱིསུ ཝིཡ སིསྶ ཨེ-ཀཱརཱདེསཾ རཱུཔཾ, ཏསྨཱ ཀཱཏབྦཾ ཝཏྟཾ ཙརེཡྻཱཏི ཡོཛེཏྭཱ ཝེདིཏབྦཾ. བུདྷཱ པན ‘‘ནྷཱནེ ནྷཱཏསྶ ཀཱཏབྦེ ཝཏྟཾ ཙརེ’’ཏི ཡོཛེཏྭཱ ཨཏྠཾ ཝདནྟི. ཨེཝཾ སཏི ཀཱཏབྦ-སདྡསྶ ཀམྨསཱདྷནཏྟཱ ཝཏྟམེཝ ཀཱཏབྦཾ ནཱམཱཏི ‘‘ཝཏྟེ ཝཏྟཾ ཙརེ’’ཏི ཝུཏྟཾ ¶ ཝིཡ ཧོཏཱིཏི ཝིརུཛ྄ཛྷཏི. ‘‘ནཧཱཏེན ནཧཱཏསྶཱ’’ཏི ཝཱ པཱཋོ, ཨུདཀེ གཏྟཔརིཀམྨེན ཐེརཾ པཋམཾ ནཧཱཔེཏྭཱ སཡམྤི ནཧཱཏེནཱཏི ཨཏྠོ. པཱལི༹ཡམྤི ‘‘ནཧཱཏེན པཋམཏརཾ ཨུཏྟརིཏྭཱ’’ཏི (མཧཱཝ. ༦༧) ཨཏྠི. ཨཐ རངྒཔཱཀེ དྷོཝནེ སིབྦནེ ཙ ཝཏྟཾ ཙརེཏི སམྦནྡྷོ, རཛནཔཱཀེ ཙཱིཝརདྷོཝནེ ཙཱིཝརསིབྦནེ ཙཱཏི ཨཏྠོ. རཛནྟོ ཙཱིཝརེ ཐེཝེ ཋིཏེ ན ཝཛེཏི སམྦནྡྷོ. རཛནྟོཏི ཙཱིཝརཾ རཛནྟོ. ཐེཝེཏི རཛནབིནྡུམྷི.

༡༥༠. ཨེཀཙྩསྶཱཏི ཨཱཙརིཡུཔཛ྄ཛྷཱཡཱནཾ ཝེརིནོ པུགྒལསྶ པཏྟཾ ཝཱ ཙཱིཝརཱནི ཝཱ ཀིཉྩནཾ པརིཀྑཱརཾ ཝཱ ན དདེཡྻ ན གཎྷེཡྻ ཝཱཏི སམྦནྡྷོ. ཏཏྠ ན དདེཡྻ ན གཎྷེཡྻཱཏི པཊིསཱམནཏྠཱཡཔི ན དདེཡྻ, ན གཎྷེཡྻ ཝཱཏི ཨཏྠོ. ‘‘ཨཱཀིཉྩན’’ནྟིཨཱདཱིསུ ཝིཡ ཀིཉྩན-སདྡོ དཊྛབྦོ, ཏསྶ ཀིཉྩཱིཏི ཨཏྠོ. ཀིཉྩིནནྟི ཝཱ པཱཋོ, ཀིཉྩི ནཾ པརིཀྑཱརནྟི ཡོཛནཱ. པདསིདྡྷིཝསེནེཏྠ ནནྟི ཏ-སདྡཔྤཡོགོ ཀཏོ.

༡༥༡-༢. པཙྪཏོ ཀཱཏུནྟི པཙྪཱསམཎཾ ཀཱཏུཾ. ཏསྶཱཏི ཨེཀཙྩསྶ. པཙྪཏོཏི པཙྪཱསམཎོ ཧུཏྭཱ. ནིནྣེཏུནྟི ཨེཀཙྩསྶ ནཱིཧརིཏུཾ. སབྦཏྠ ཨནཱཔུཙྪཱ ན ཝཊྚཏཱིཏི ཡོཛེཏབྦཾ. ཀིཙྩཡཾ ཝཱཏི ཝེཡྻཱཝཙྩཱདི ཡཾ ཀིཉྩི ཀིཙྩཾ ཝཱ. ཀིཙྩམེཝ ཀིཙྩཡཾ, ཀསྶ ཡོ ‘‘སེནིཡོ’’ཏིཨཱདཱིསུ ཝིཡ. པརིཀམྨཾ ཝཱཏི པིཊྛིཔརིཀམྨཱདིཔརིཀམྨཾ. ཨཏྟནོ ཀཱརཱཔེཏུཾ ཝཱཏི ཨེཀཙྩེན ཨཏྟནོ ཀཱརཱཔེཏུཾ ཝཱ. ཀཱཏུཾ ཝཱཏི ཏསྶ ཨཏྟནཱ ཀཱཏུཾ ཝཱ.

༡༥༣. སཱིམཏོ ནིགྒཏཱ བཧིབྷཱུཏཱ ནིསྶཱིམཱ, ཏཾ. ཨཱཙརིཡུཔཛ྄ཛྷཱཡེསུ ཨཝཏྭཱ དཱུརཾ བྷིཀྑཱཙཱརཾ གཏེསུཔི ཨཔསྶནྟེན ¶ གཱམོ པཝིསིཏབྦོ. དིཊྛཊྛཱནཏོ པཊྛཱཡ པན ཨཱཔུཙྪིཏུཾཡེཝ ཝཊྚཏི. ཨཏྟནོ ཀིཙྩཡཾ ཝཱཔཱིཏི ཨཏྟནོ སཱིམཱཡཔི པཏྟཔཙནཙཱིཝརརཛནཱདིཀཾ སཀཾ ཀརཎཱིཡཾ ཝཱཔི ཀཱཏུཾ.

༡༥༤. ཨརཏིནྟི ¶ སཱསནེ ཨནབྷིརཏིཾ. སངྒྷཱཡཏྟེསུ ཀམྨེསཱུཏི པརིཝཱསཱདིཏཛྫནཱིཡཱདཱིསུ སངྒྷཔྤཊིབདྡྷེསུ ཀམྨེསུ. ཨུསྶུཀྐཾ ཝཱཔཱིཏི ཨཱཙརིཡུཔཛ྄ཛྷཱཡེསུ གརུདྷམྨཾ ཨཛ྄ཛྷཱཔནྣེསུ, ཀམྨཱརཧེསུ ཙ ‘‘ཀིནྟི ནུ ཁོ སངྒྷོ པརིཝཱསཾ དདེཡྻཱ’’ཏིཨཱདིནཱ ཨུསྶཱཧཾ ཝཱཔི.

༡༥༥. གིལཱནེསུ ཨུཔཊྛེཡྻཱཏི ‘‘པཉྩཧི, བྷིཀྑཝེ, ཨངྒེཧི སམནྣཱགཏོ གིལཱནུཔཊྛཱཀོ ཨལཾ གིལཱནཾ ཨུཔཊྛཱཏུཾ, པཊིབལོ ཧོཏི བྷེསཛྫཾ སཾཝིདྷཱཏུཾ, སཔྤཱཡཱསཔྤཱཡཾ ཛཱནཱཏི, ཨསཔྤཱཡཾ ཨཔནཱམེཏི, སཔྤཱཡཾ ཨུཔནཱམེཏི, མེཏྟཙིཏྟོ གིལཱནཾ ཨུཔཊྛཱཏི ནོ ཨཱམིསནྟརོ, ཨཛེགུཙྪཱི ཧོཏི ཨུཙྩཱརཾ ཝཱ པསྶཱཝཾ ཝཱ ཁེལ༹ཾ ཝཱ ཝནྟཾ ཝཱ ནཱིཧཱཏུཾ, པཊིབལོ ཧོཏི གིལཱནཾ ཀཱལེན ཀཱལཾ དྷམྨིཡཱ ཀཐཱཡ སནྡསྶེཏུཾ སམཱདཔེཏུཾ སམུཏྟེཛེཏུཾ སམྤཧཾསེཏུ’’ནྟི (མཧཱཝ. ༣༦༦) ཨེཝཾ ཝུཏྟཔཉྩངྒསམནྣཱགཏེན ཧུཏྭཱ གིལཱནེསུ ཨུཔཊྛཧེཡྻཱཏི ཨཏྠོ. ཨིམིནཱ སབྦེཧིཔི ཨཱཙརིཏབྦཾ གིལཱནཝཏྟཾ ཨུཔདིསཏི. ཝུཊྛཱནནྟི གེལཉྙཱ ཝུཊྛིཏཾ. ཨཱགམེཏི ཨཱགམེཡྻ, ཨོལོཀེཡྻཱཏི ཨཏྠོ. ཨུཔཛ྄ཛྷཱཙརིཡེཧི ཙ སདྡྷིཝིཧཱརིཀཨནྟེཝཱསིཀེསུ ཡདི ཏེ གིལཱནཱ ཧོནྟི, ཨཱདིཏོ པཊྛཱཡ ཙཱིཝརེ རཛནཔརིཡོསཱནཉྩ ཨརཏིཝིནོདནཱདིཀཉྩ ཝཏྟཾ, ཨགིལཱནེསུ པན ཨུདྡེསཔརིཔུཙྪཱ ཨོཝཱདཱནུསཱསནིཡཱ ཨནུགྒཧོཔཏྟཙཱིཝརཱདིདཱནཉྩཱཏི སབྦཾ ཀཱཏབྦཾ. ཏེནེཝ ཧེཊྛཱ ཝུཏྟཾ ‘‘ཏསྨཱ ཨཱཙརིཡེནཱཔི ¶ ཏེསུ སམྨཱ ཝཏྟིཏབྦཾ, ཨུཔཛ྄ཛྷཱཡེན སདྡྷིཝིཧཱརིཀེསུ ཝཏྟབྦམེཝ ནཏྠཱི’’ཏི.

ཨུཔཛ྄ཛྷཱཙརིཡཝཏྟནིདྡེསཝཎྞནཱ ནིཊྛིཏཱ.

༡༦. ཝཙྩཔསྶཱཝཊྛཱནིཀནིདྡེསཝཎྞནཱ

༡༥༦. ཝཙྩཔསྶཱཝཊྛཱནིཀནྟི ཋཱནམྷི ཋཱནེ ཝཱ བྷཝཾ ཝཙྩཔསྶཱཝཊྛཱནིཀཾ. ཡཐཱཝུཌྜྷཾ ཝཙྩཾ ན ཀརེཡྻཱཏི སམྦནྡྷོ. ཡེ ཡེ ཝུཌྜྷཱ ཡཐཱཝུཌྜྷཾ, ཨཱགཏཔྤཊིཔཱཊིཾ ཧིཏྭཱ ཝུཌྜྷཔྤཊིཔཱཊིཡཱཏི ཨཏྠོ. ཝཙྩནྟི ཨུཔལཀྑཎམཏྟཾ, པསྶཱཝཉྩ ནཧཱནཉྩ ན ཀརེཡྻཱཏི ཨདྷིཔྤཱཡོ. ཏདེཝ སམཏྠེཏི ‘‘ཡཱཏཱནུཔུབྦིཡཱ’’ཏིཨཱདིནཱ. ཡཱཏཱནུཔུབྦིཡཱཏི ཡཱཏཱནཾ གཏཱནཾ ཨནུཔུབྦི ¶ ཨནུཀྐམོ ཡཱཏཱནུཔུབྦི, ཏཱཡ. ཝཙྩ…པེ… ཏིཏྠཉྩཱཏི ཨེཏཾ ཏཡཾ ལབྦྷཏཱིཏི ཨཏྠོ, བྷིཀྑུནཱཏི ཝིཉྙཱཡཏི.

༡༥༧. ཨུབྦྷཛིཏྭཱ ཙ སཧསཱ ཙ ནོ པཝིསེཡྻཱཏི སམྦནྡྷོ. ཨུབྦྷཛིཏྭཱཏི ཙཱིཝརཾ དཱུརཏོཝ ཨུཀྑིཔིཏྭཱ. སཧསཱཏི སཱིགྷཾ. ཨུཀྐཱསིཏྭཱ པཝིསེཡྻཱཏི ཡོཛནཱ.

༡༥༨. ཝཙྩཔསྶཱཝདོཎཱིནཾ བཧཱིཏི སམྦནྡྷོ. ཨུབྷཡནྟི ཝཙྩམྤི པསྶཱཝམྤི.

༡༥༩. ཀཱུཔེཏི ཝཙྩཱཝཱཊེ. ཀཊྛནྟི ཨཝལེཁནཀཊྛཾ. ཕརུསེནཱཏི ཁརེན ཨཝལེཁནཀཊྛེན. ཨུཧཏཉྩཱཔཱིཏི ཨཏྟནཱ ཝཱ པརེན ཝཱ ཨུཧཏཉྩཱཔི ཝཙྩམཀྑིཏཉྩཱཔཱིཏི ཨཏྠོ. དྷོཝཡེཏི སཏི ཨུདཀེ, ཨུདཀེ ཨསཏི ཀཊྛེནཔི སོདྷེཡྻ.

༡༦༠. ན ནིཀྑམེཏི ན ནིཀྑམེཡྻ. ཙཔུ ཙཔཱུཏི ཨནུཀརཎཾ, ཝིཙྪཱཡཾ དྭིཏྟེ ཙཔུ ཙཔུ ཀཏྭཱཏི ཀིརིཡཱཝིསེསནཾ. ནཱཙམེཡྻཱཏི ན དྷོཝེཡྻ. སཏི པན ཨུདཀེ ཨཱཙམིཏབྦཾ, ཨསཏི ཡེན ¶ ཀེནཙི པུཉྪིཏྭཱ གནྟབྦཾ, སབྦསཱདྷཱརཎཊྛཱནེ ཙ ཨཱཙམནཀུམྦྷིཡཱ ཨུདཀཾ ན སེསེཏབྦཾ. ཨུཀླཱཔནྟི ཀཙཝརཾ. ཝིསོདྷཡེཏི ཝིཧཱརསོདྷནེ ཝིཡ ཝཙྩཔསྶཱཝཀུཊིཡོ, པརིཝེཎཀོཊྛཀེ ཙ སམྨཛྫེཡྻ. སབྦཏྠེཝ ཙ པན ཝཏྟབྷེདེ དུཀྐཊཾ.

ཝཙྩཔསྶཱཝཊྛཱནིཀནིདྡེསཝཎྞནཱ ནིཊྛིཏཱ.

༡༦༡. ཨཱཔུཙྪཀརཎནྟི ཨཱཔུཙྪཱཡ ཀརཎཾ. ཨནཛ྄ཛྷིཊྛོཝཱཏི ཨནཱཎཏྟོཝ, ཨཡཱཙིཏོ ཨེཝ ཝཱ. ན ཙ ཝིསྶཛེཏི པུཙྪིཏཔཉྷཾ ན ཝིསྶཛྫེཡྻ ཙ, ཨཱཔུཙྪིཏྭཱ ཝཱ ཡཱཙིཏོ ཝཱ ཡཐཱཝུཏྟམེཏཾ ཀཱཏུཾ ལབྷཏཱིཏི ཨདྷིཔྤཱཡོ.

༡༦༢. ཨཱཔུཙྪིཏྭཱ ¶ ཀཐེནྟསྶཱཏི ཨཏྟནོ ཝུཌྜྷཾ ཨཱཔུཙྪིཏྭཱ དྷམྨཱདིཀཾ བྷཱསནྟསྶ. པུན ཝུཌྜྷཏརཱགམེཏི པུན ཨཉྙསྶ ཝུཌྜྷཏརསྶ ཨཱགམནེ སཏཱིཏི ཨཏྠོ. པུནཨཱཔུཙྪནཾ ནཏྠཱིཏི བྷཱསིཏབྦཾ ཋཔེཏྭཱ པུན ཨཱཔུཙྪནཀིཙྩཾ ནཏྠཱིཏི ཨཏྠོ. སངྒྷཏྠེརེ ཨསཏི ཨཱརདྡྷམྤི ཨཊྛཔེཏྭཱ ཀཐེནྟསྶཱཔི ཨེསེཝ ནཡོ. བྷཏྟགྒེ ཨནུམོདཏོ ཙ ཨཱཔུཙྪནཾ ནཏྠཱིཏི སམྦནྡྷོ. ཨནུམོདཏོཏི དཱཡཀེཧི ཡཱཙིཏསྶ ཏཾཏཾཔུཉྙཱནུམོདནཝསེན དྷམྨཀཐཾ ཀརོཏོ ཙ. ཨནུམོདནཉྩ ཐེརཱདྷེཡྻཾ. ‘‘ཨནུཛཱནཱམི, བྷིཀྑཝེ ཐེརེན བྷིཀྑུནཱ བྷཏྟགྒེ ཨནུམོདིཏུ’’ནྟི (ཙཱུལ༹ཝ. ༣༦༢) ཧི ཝུཏྟཾ. ‘‘སཙེ མནུསྶཱ ཨཏྟནོ ཨབྷིརུཙིཀེན ཨེཀེན ཨནུམོདནཾ ཀཱརེནྟི, ནེཝ ཏསྶ ཨནུམོདཏོ ཨཱཔཏྟི, ན མཧཱཐེརསྶ བྷཱརོ ཧོཏི. ཨུཔནིསིནྣཀཐཱཡམེཝ ཧི མནུསྶེསུ ¶ ཀཐཱཔེནྟེསུ མཧཱཐེརོ ཨཱཔུཙྪིཏབྦོ’’ཏི ཨཊྛཀཐཱཡཾ (ཙུལ༹ཝ. ཨཊྛ. ༣༦༢) ཝུཏྟཾ.

༡༦༣. ཝུཌྜྷེན ཨེཀཝིཧཱརཀེ ཝསནྟོ ཙཱཏི སམྦནྡྷོ. ཝུཌྜྷེནཱཏི ཝུཌྜྷེན སདྡྷིཾ. ཨེཀཝིཧཱརཀེཏི སཝནཱུཔཙཱརེ ཁུདྡཀཝིཧཱརེ, ན མཧཱཝིཧཱརེ. ཀུཙྪིཏཏྠེ ཧི ཀཔྤཙྩཡོ. ན སཛ྄ཛྷཱཡེཡྻཱཏི སཛ྄ཛྷཱཡནཾ ན ཀརེཡྻ.

༡༦༤. ‘‘དྷམྨཾ ན བྷཱསཡེ’’ཏིཨཱདཱིསུ ཨནཱཔུཙྪཱཏི སམྦནྡྷིཏབྦཾ. ན ཙ ཝིཛ྄ཛྷཔེཏི ན ཙ ནིབྦཱཡེཡྻ. ཝཱཏཔཱནཉྩ ཨཱལོཀསནྡྷིཕལཀཾ ཀཝཱཊཉྩ དྭཱརཕལཀཾ ཝཱཏཔཱནཀཝཱཊཾ ཝཱ ན ཝིཝརེཡྻ ན ཐཀེཡྻ ཙཱཏི ན-ཀཱརོ སབྦཏྠ ཡོཛེཏབྦོ.

༡༦༥. ཨེཀཙངྐམེ ཝུཌྜྷེན ཙངྐམནྟོཔི ཡེན ཝུཌྜྷོ, ཏེན པརིཝཏྟཡེཏི ཡོཛནཱ. ཡེན ཏེནཱཏི བྷུམྨཏྠེ ཀརཎཝཙནཾ, ཡཏྠ ཝུཌྜྷོ, ཏཏྠཱཏི ཨཏྠོ, ཝུཌྜྷཾ ཨོཧཱཡ ཨཉྙཏོ ན གནྟབྦནྟི ཨདྷིཔྤཱཡོ. སོཏི ནཝཀོ. ཨེནནྟི ཝུཌྜྷཾ. སབྦཏྠ དུཀྐཊཾ. ཨཡཉྷི ཁནྡྷཀདྷམྨཏཱ ཡཏྠ ན-ཀཱརེན པཊིསེདྷོ, ཏཏྠ དུཀྐཊནྟི.

ཨཱཔུཙྪཀརཎནིདྡེསཝཎྞནཱ ནིཊྛིཏཱ.

༡༦༦. ‘‘ཝཛེ’’ཏིཨཱདཱིསུ ¶ ན-སདྡོ སམྦནྡྷིཏབྦོ. ཏཏྠ པན ཡཐཱནུརཱུཔབྷོཛནཱདིཀཾ ཀམྨཝཙནཾ ཨཛ྄ཛྷཱཧརིཏྭཱ ‘‘བྷོཛནཾ ན བྷུཉྫེ’’ཏིཨཱདིནཱ ཨཏྠོ ཝེདིཏབྦོ.

༡༦༧. ན ¶ ཀརེཏི ཧཏྠཀམྨཱདིཀཾ པརིཀམྨཾ སཡམྤི ན ཀརེཡྻཱཏི ཨཏྠོ. པཊིཙྪཱདཱིསཱུཏི ནིདྡྷཱརཎེ བྷུམྨཾ, ཛནྟཱགྷརུདཀཝཏྠཔྤཊིཙྪཱདཱིནཾ མཛ྄ཛྷེཏི ཨཏྠོ. པརིཀམྨེ དུཝེ ཀཔྤིཡཱཏི སམྦནྡྷོ. པརིཀམྨེཏི ཛནྟཱགྷརེ ཨུདཀེཔི ཨུཔཛ྄ཛྷཱཡཱདཱིནཾ ཀཏྟབྦཔརིཀམྨཝིསཡེ, ན ཨབྷིཝཱདནཱདཱིསུ. དུཝེཏི ཛནྟཱགྷརཨུདཀཔྤཊིཙྪཱདཡོ. ཚཱདེནྟི ཨེཏཱཡཱཏི ཚཱདི, ཝཏྠསྶ ཚཱདི ཝཏྠཙྪཱདི. སབྦཏྠཱཏི སབྦཀམྨེསཱུཏི.

༡༦༨. ཀཔྤནཾ ཀཔྤིཡཏཱ ཀཔྤོ, ནྷཱནེ ཀཔྤོ ནྷཱནཀཔྤོ. ནཝཀོ ཐེརཱནཾ པུརཏོ ཨུཔརི ཝཱ ན ཙ ནྷཱཡེཡྻཱཏི སམྦནྡྷོ. ན ཙཱཏི ནཡེཝ. པུརཏོཏི ཨབྷིམུཁེ. ཨུཔརཱིཏི ནདིཡཱ ཨུཔརི.

༡༦༩-༡༧༡. ཀུཊྚཏྠམྦྷཏརུཊྚཱནེ ཀཱཡཾ ན གྷཾསཡེཏི སམྦནྡྷོ. ཏཏྠ ཀུཊྚཾ ནཱམ ཨིཊྛཀདཱརུསིལཱབྷིཏྟི. ཐམྦྷོ ནཱམ ནཧཱནཏིཏྠེ ནིཁནིཏྭཱ ཋཔིཏོ. ཏརཱུཏི རུཀྑོ. ཨཊྚཱནཾ ནཱམ ཏཙྪེཏྭཱ ཨཊྛཔདཱཀཱརེན རཱཛིཡོ ཚིནྡིཏྭཱ ནཧཱནཏིཏྠེ ནིཁཱཏཕལཀཾ. གནྡྷབྦཧཏྠེན ཝཱ…པེ… མལླཀེན ཝཱ ཀཱཡཾ སརཱིརེན ཝཱ ཨཉྙམཉྙཾ ན གྷཾསཡེཏི སམྦནྡྷོ. གནྡྷབྦཧཏྠེནཱཏི དཱརུམཡཧཏྠེན. ཀུརུཝིནྡཀསུཏྟིཡཱཏི ཀུརུཝིནྡཀཔཱསཱཎཙུཎྞཱནི ལཱཁཱཡ བནྡྷིཏྭཱ ཀཏགུལི༹ཀཱཝལིཡཱ སུཏྟེན ཨཱཝུཎིཏསུཏྟིཡཱ. མལླཀེནཱཏི མཀརདནྟཀེ ཚིནྡིཏྭཱ པདུམཀཎྞིཀསཎྛཱནེན ཀཏམལླཀེན. སརཱིརེནཱཏི ཨཏྟནོ ཀཱཡེན. ཨཉྙམཉྙསྶ ཨཉྙམཉྙཾ ཀིརིཡཱཀརཎསངྑཱཏེ ¶ ཀིརིཡཱབྱབྷིཧཱརེ དྭིཏྟཾ. ཀཔཱལ…པེ… པུཐུཔཱཎི ཙ སབྦེསཾ ཝཊྚཏཱིཏི སམྦནྡྷོ. ཀཔཱལཉྩ ཨིཊྛཀཱ ཙ, ཏཱསཾ ཁཎྜཱནི. པུཐུཔཱཎཱིཏི པུཐུ ནཱནཱ ¶ པཱཎི པུཐུཔཱཎི, ཧཏྠཔརིཀམྨཾ རུལ༹ྷཱིཝསེན. སབྦེསནྟི གིལཱནཱགིལཱནཱནཾ. གིལཱནསྶ ཨཀཏམལླཀཾ ཝཊྚཏཱིཏི སམྦནྡྷོ. ཨཀཏམལླཀཾ ནཱམ ཀཏམལླཀཝིཔརཱིཏཾ. ཕེཎཾ ནཱམ སམུདྡཕེཎནྟི.

༡༧༢. ཨུཀྑིཏྟོཏི ཨཱཔཏྟིཡཱ ཨདསྶནེ ཨཔྤཊིཀམྨེ ཙ ཨུཀྑིཏྟཀོ པཱཔིཀཱཡ དིཊྛིཡཱ ཨཔྤཊིནིསྶགྒེ ཨུཀྑིཏྟཀོཏི ཏིཝིདྷོ ཨུཀྑིཏྟཀོ. ནཱནཱསཾཝཱསཀོ ནཱམ ལདྡྷིནཱནཱསཾཝཱསཀོཔི ཀམྨནཱནཱསཾཝཱསཀོཔི. གརུཀཊྛོ ཙཱཏི པཱརིཝཱསིཀོ མཱུལཱཡཔཊིཀསྶནཱརཧོ མཱནཏྟཱརཧོ མཱནཏྟཙཱརཱི ཨབྦྷཱནཱརཧོ ཙ ཨིདྷ གརུཀཊྛོཏི ཨདྷིཔྤེཏོ. ཨིམེཧི པན ཨཉྙམཉྙཾ ཝནྡིཏུཾ ཝཊྚཏཱིཏི.

༡༧༣. མིགཱ ཙ ཨཛཱ ཙ ཨེལ༹ཀཱ ཙ, ཏེསཾ ཙམྨཱནཱིཏི སམཱསོ. ཨཛོ ཚགལཀོ. ཨེལ༹ཀོ མེཎྜཀོ. མིགེ དསྶེཏི ‘‘རོཧིཏེ’’ཏིཨཱདིནཱ. རོཧིཏཱ-དིགྒཧཎཾ ཨུཔལཀྑཎམཏྟཾ, ཝཱཏམིགམིགམཱཏུཀཱདཱིཔི ཨེཏྠེཝ སངྒཡ྄ཧནྟི.

༡༧༤. ཨནུཉྙཱཏཏྟཡཱཏི ¶ ཨནུཉྙཱཏཱ ཡཐཱཝུཏྟཙམྨཏྟཡཏོ. ཨམཱནུསཾཝ སབྦཾ ཙམྨཾ ཐཝིཀོཔཱཧནེ ཀཔྤཏཱིཏི སམྦནྡྷོ. ཐཝིཀཱ སཏྠཀཀོསཀཱདཱིཏི.

༡༧༥. ནཝཱ ¶ གུཎངྒུཎཱུཔཱཧནཱ མཛ྄ཛྷདེསེ ན ཀཔྤནྟཱིཏི སམྦནྡྷོ. ནཝཱཏི ཨེཀཝཱརམྤི ཨཔྤཊིམུཀྐཱ. ཏཏྠ གུཎངྒུཎཱུཔཱཧནཱ ཙཏུཔཊལཏོ པཊྛཱཡ ཝུཙྩནྟི. སམྦྷཝེ བྱབྷིཙཱརེ ཙ ཝིསེསནཾ སཱཏྠཀཾ བྷཝཏཱིཏི ‘‘མཛ྄ཛྷདེསེ’’ཏི ཝིསེསནཾ ཨམཛ྄ཛྷདེསཾ བྱབྷིཙརཏཱིཏི ཨམཛ྄ཛྷདེསེ གུཎངྒུཎཱུཔཱཧནཱ ཀཔྤནྟཱིཏི ཝེདིཏབྦཾ. ཏཐཱ ནཝཱཏི ཨིམིནཱ ཨནཝཱ མཛ྄ཛྷདེསེཔི. ཨིམིནཱ པན ཝཱཀྱེན མཛ྄ཛྷདེསེཔི ཨེཀཝཱརམྤི པཊིམུཀྐཱ, ཨཉྙཏྠ ཏུ སབྦཱཔི གུཎངྒུཎཱུཔཱཧནཱ ཝཊྚནྟི, ན སེསཱཏི ཨཱཔནྣཾ, ཏཐཱཔི ‘‘ཨནུཛཱནཱམི, བྷིཀྑཝེ, ཨེཀཔལཱསིཀཾ ཨུཔཱཧན’’ནྟི (མཧཱཝ. ༢༤༥) ཝུཏྟཏྟཱ ཨེཀཔཊལིཀཱཔི ཝཊྚཏཱིཏི ཝེདིཏབྦཾ. སབྦསྶཱཏི མཛ྄ཛྷདེསེ པཙྩནྟིམེཔི གིལཱནཱགིལཱནསྶ སབྦསྶ. ‘‘ཨནུཛཱནཱམི, བྷིཀྑཝེ, ཨཛ྄ཛྷཱརཱམེ ཨུཔཱཧནཾ དྷཱརེཏུ’’ནྟི (མཧཱཝ. ༢༤༩) ཧི སཱམཉྙེན ཨནུཉྙཱཏཾ. སབྦཏྠཱཏི གཱམེ ཝཱ ཨརཉྙེ ཝཱ ཨཱརཱམཏོ ཨཉྙཏྲ. ཨཀལླཀསྶ ཙཱཏི གིལཱནསྶེཝ.

༡༧༦-༩. སབྦ…པེ… རཏྟཱ ཙ ཨུཔཱཧནཱ སབྦ…པེ… ཝིཙྪིཀཱལི༹ཀཱ ཙ…པེ… དཱིཔཱིནཾ ཙམྨེཧི ཙ མཛྫཱར…པེ… ཙམྨེཧི ཙ པརིཀྑཊཱ ཙ ཨུཔཱཧནཱ སངྐམནཱིཡཱ པཱདུཀཱ ཙ ཀོཙི དྷཱརེཡྻ, དུཀྐཊནྟི ཡོཛནཱ. ཨོདཱཏཱཡ པཱལི༹ཡཱ ཨཊྛཀཐཱཡ ཙ ཨབྷཱཝེཔི ཨནུལོམཝསེནེཏྠ ཝུཏྟཾ ཝིཡ དིསྶཏི. ནཱིལཀོ ཙ ཨོདཱཏོ ཙཱཏིཨཱདིནཱ དྭནྡོ. སབྦེཝ ནཱིལཀ…པེ… ཀཎྷཀཱ ཡཱསནྟི སམཱསོ. ‘‘མཧཱརངྒཱ’’ཏིཨཱདཱིསུ ཨཔྤཡུཏྟེཔི སབྦ-སདྡེ པཀརཎཝསེན ཡོཛེཏྭཱ ཨཏྠོ ཝེདིཏབྦོ.

‘‘ཨཏྠཱ ¶ པཀརཎཱ ལིངྒཱ, ཨོཙིཏྱཱ ཀཱལདེསཏོ;

སདྡཏྠཱ ཝིབྷཛཱིཡནྟི, ན སདྡཱཡེཝ ཀེཝལཱ’’ཏི. –

ཧི ¶ ཝུཏྟཾ. ཙིཏྲཱཏི ཝིཙིཏྲཱ. ནཱིལཔཱིཏཱདཱི ཝདྡྷཱཡེཝ ཡཱསནྟི སམཱསོ. ཨཱདི-སདྡེན ཨོདཱཏཱདཱིནཾ གཧཎཾ. ཏིཏྟིརཔཏྟསདིསོ ཝིཙིཏྟོ ཝཎྞོ ཏིཏྟིརཔཏྟ-སདྡེན གཧིཏོ. ཏམེཏེསམཏྠཱིཏི ཏིཏྟིརཔཏྟིཀཱ. མེཎྜསྶ ཙ ཨཛསྶ ཙ ཝིསཱཎསདིསཱ ཝདྡྷཱ ཡཱསནྟི བཱཧིརཏྠོ. ཏཱ པན ཀཎྞིཀཊྛཱནེ མེཎྜཀཨཛཝིསཱཎསཎྛཱནེ ཝདྡྷེ ཡོཛེཏྭཱ ཀཏཱ. ཨེས ནཡོ ཝིཙྪིཀཱལི༹ཀཱདཱིསུ. པཎྷིཔིདྷཱནཏྠཾ ཏལེ ཁལླཾ བདྡྷཾ ཡཱསནྟི ཝིགྒཧོ. ཛངྒྷཏོ སབྦཔཱདཔྤཊིཙྪཱདནཀཾ པུཊཾ བདྡྷཾ ཡཱསནྟི བཧུབྦཱིཧི. ཏཱུལཾ པིཙུ པུཎྞཾ ཡཱསནྟི ཨཉྙཔདཏྠོ. པལིགུཎྛེཏཱིཏི པལིགུཎྛོ, ཨུཔརིཔཱདཏལམཏྟཔྤཊིཙྪཱདཀབནྡྷོ, ཏེན ཡོཛེཏྭཱ ཀཏཱ པཱལིགུཎྛིམཱ, ཝིཙིཏྲཱ ཧི ཏདྡྷིཏཝུཏྟི. ཝིཙྪིཀཱནཾ ཨལ༹སདིསཾ ནངྒུཊྛསདིསཾ བདྡྷམེཏཱསནྟི ཝིཙྪིཀཱལི༹ཀཱ. སཱིཧབྱགྒྷུདྡཱཛིནདཱིཔཱིནཾ ཙམྨེཧི ཙཱཏི པཀརཎཏོ ཨཛིནཱ ནཱམ མིགཱ. ཨུལཱུཀཱ པཀྑིབིལཱ༹རཱ. སངྐམནྟི གཙྪནྟི ཨེཏཱཧཱིཏི སངྐམནཱིཡཱ. ཏཱ པན ཏཱལཔཎྞཱདཱིཧི ཀཏཱ སཾཧཱརིཡཱ.

༡༨༠. སཀལཾ ཨེཀདེསཾ ཝཱ པུཉྪིཏྭཱཝཱཏི ཡོཛནཱ. ཁལླཀཱདིཀནྟི ཨཱདི-སདྡེན མེཎྜཝིསཱཎཝདྡྷིཀཱདིཀཾ སབྦཾ སངྒཎྷཱཏཱིཏི.

༡༨༡. སཱརཏྟོཏི སཾརཏྟོ, སཉྫཱཏརཱགཙིཏྟོཏི ཨཏྠོ. ཨིཏྠིཡཱཏི ཏདཧུཛཱཏཱཡཔི པཊསཏནིཝཏྠཱཡ ཨནོཀཱསུཔནིཛ྄ཛྷཱཡནེ ཨནྟམསོ ཏིརཙྪཱནགཏཱནམྤི དུཀྐཊམེཝ. བྷིཀྑཱདཱཡིཡཱཏི ཨུཔལཀྑཎམཏྟཾ, ཨིཏྠཱི ཝཱ ཧོཏུ པུརིསོ ཝཱ, བྷིཀྑཱདཱནསམཡེ ཨསཱརཏྟེནཱཔི མུཁཾ ¶ ན ཨུལློཀེཏབྦཾ. ཨུཛ྄ཛྷཱནཾ ལཱམཀཏོ སཾཙིནྟནཾ, ཀོཔོ, ཏཏྠ སཉྙཱ ཨསྶཱཏི ¶ ཨུཛ྄ཛྷཱནསཉྙཱི. ཨིདྷ པན གིལཱནོཔི ན མུཙྩཏི. ཨཱདཱསེ ཨུདཀཔཏྟེཏི ཨིམིནཱ སེསེསུ ཀཾསཔཏྟཱདཱིསུ ཀཉྫིཡཱདཱིསུ ཙ མུཁནིམིཏྟཾ པཉྙཱཡཏི, ཏེསཾ སངྒཧོ. ‘‘སཉྪཝི ནུ ཁོ མེ ཝཎྞོ, ནོ, ཛིཎྞོ ནུ ཁོམྷི, ནོ’’ཏི པན ཨོལོཀེཏུཾ ཝཊྚཏི. ཨསྶཱཏི བྷིཀྑུནོ.

ཨནོལོཀིཡནིདྡེསཝཎྞནཱ ནིཊྛིཏཱ.

༡༨༢. ཝཊྚཱ ཝཱ ཨཊྛསོལ༹སཾསཱ ཝཱ མཊྛཱ ཨཉྫནཱི ཝཊྚཏཱིཏི ཡོཛནཱ. ཨཊྛ ཙ སོལ༹ས ཙ ཨཾསཱ ཀོཎཱ ཡསྶཱ སཱཏི ཝིགྒཧོ. སོལ༹སཾསཔདེསཝིབྷཏྟཱཡ ཨཊྛཾསཱསུཏིཡཱ ཨཊྛཾསཔདེསཝིབྷཏྟཱ ཙཏུརཾསཱཔི སཱམཏྠིཡཱ གཡ྄ཧཏཱིཏི ཉཱཏབྦཾ. ‘‘ཨུཛུཀམེཝ པན ཙཏུརཾསཱཝཱ’’ཏི ཧི ཨཊྛཀཐཱཡཾ (པཱརཱ. ཨཊྛ. ༡.༨༥) ཝུཏྟཾ. ཨཉྫནཱིཏི ཨཉྫནནཱལི༹. མཱུལེ ཏིསྶོཔི ལེཁཱ ཝཊྚནྟཱིཏི ཡོཛནཱ. མཱུལེཏི བུནྡེ, ཧེཊྛཏོཏི ཝུཏྟཾ ཧོཏི. ལེཁཱཏི ཝཊྚལེཁཱ. བནྡྷིཏུཾ གཱིཝཱཡཾ ཨེཀཱ ཨེཝ ལེཁཱ ཝཊྚཏཱིཏི སམྦནྡྷོ. བནྡྷིཏུནྟི པིདྷཱནབནྡྷནཏྠཾ.

༡༨༣. ཡཾ ཀིཉྩི རཱུཔནྟི ཨིཏྠིརཱུཔཱདི ཡཾ ཀིཉྩི རཱུཔཾ. མཱལཱདིཀམྨནྟི མཱལཱཀམྨཾ ལཏཱཀམྨཾ. ཨཌྜྷཙནྡཱདཱིཏི ཨེཏྠ ཨཱདི-སདྡེན ཨགྒྷིཡཱདིཀཾ གཧིཏཾ. ཨེཏྠཱཏི ཨཉྫནིཡཾ.

༡༨༤. ཐཝིཀཱཏི ཨཉྫནིཐཝིཀཱ. སིཔཱཊཱིཏི ཁུརསིཔཱཊིཀཱ. སལཱཀཱཔི ཨཙིཏྟཀཱ ལབྦྷཱཏི སམྦནྡྷོ. སལཱཀཱཏི ཨཉྫནིསལཱཀཱ. ནཏྠི ཙིཏྟམེཏིསྶཱཏི ཨཙིཏྟཀཱ. ཏཱདིསཾ ¶ པན ལབྷིཏྭཱ ཨུཔཱཧནཱཡོ ཝིཡ ནཱསེཏྭཱ པརིབྷུཉྫིཏབྦཾ.

༡༨༥. ཨཊྛི-སདྡེན མནུསྶཊྛིཾ ཋཔེཏྭཱ ཡཾ ཀིཉྩི ཨཊྛི གཧིཏཾ.

༡༨༦. དྷཱུམནེཏྟཱཏི དྷཱུམནཱལི༹ཀཱ, ནིསྶ ཨཱ-ཀཱརཱདེསཝསེན ཝུཏྟཾ. སཏྠཀདཎྜཱནཱིཏི སཏྠདཎྜཱ ¶ . ནཏྠུཾ དེནྟི ཨེཏཱཡཱཏི ནཏྠུདཱནཱ. ཨནིཡམེན ཧི ནདཱདིཏོ ཝཱ ཨཱི. ཏེཧི སངྑནཱབྷིཨཱདཱིཧི ནིབྦཏྟཱ ཏམྨཡཱ.

༡༨༧-༩. ཨཀཔྤིཡཱནི སཡནཱནཱིཏི ཨུཙྩཱསཡནམཧཱསཡནཱནི. པདྷཱནཝསེན པན ‘‘སཡནཱནཱི’’ཏི ཝུཏྟཾ, པཱིཋཱདཡོཔི ཨེཏྠེཝ སངྒཡ྄ཧནྟི ཨཉྫནཱི-སདྡེན ཨཝསེསཱནི ཝིཡ. ཨཱསནྡི ཙ…པེ… ཨུབྷཏོརཏྟཱུཔདྷཱནཀཉྩེཏི ཨེཏཱནི ཨཀཔྤིཡཱནཱིཏི སམྦནྡྷོ. ཏཏྠ ཨཱསནྡཱིཏི སུགཏངྒུལེན ཨཏིརེཀཊྛངྒུལཔཱདཀཱནི མཉྩཔཱིཋཱནི. ཏཏྠ པཱིཋཾ ནཱམ མཉྩོ ཝིཡ ནཱཏིདཱིགྷཾ ཝུཙྩཏི. ཏིཝིདྷཾ ཏཱུལམེཏིསྶཱ ཨཏྠཱིཏི ཏཱུལཱི, པཀཏིཏཱུལིཀཱ. ‘‘པལླངྐོཏི པཱདེསུ ཝཱལ༹རཱུཔཱནི ཋཔེཏྭཱ ཀཏོ’’ཏི ཋཔནསྶ ཨཊྛཀཐཱཡཾ (མཧཱཝ. ཨཊྛ. ༢༥༤) ཝུཏྟཏྟཱ ཋཔནཉྩ ཡཐཱཀཐཉྩི ཧོཏི, ཡུཏྟི ཙ ཧོཏཱིཏི, ‘‘ཏཏྠེཝ སཱིཧརཱུཔཱདིཾ དསྶེཏྭཱ ཀཏོ པན ཝཊྚཏཱིཏི ཝདནྟཱི’’ཏི ཡཾ ཊཱིཀཱཡཾ ཝུཏྟཾ, ཏཾ ‘‘ཀིམིཏི ཨེཝཾ ཝདནྟཱི’’ཏི ཝཏྭཱ པཊིཀྑིཔིཏབྦཾ. ‘‘ཨཀཔྤིཡརཱུཔཀཏོ ཨཀཔྤིཡམཉྩོ པལླངྐོ ནཱམཱ’’ཏི ཧི ¶ སཱརསམཱསེཔི. ཨཱསནྡཱི པལླངྐོ ཨུཙྩཱསཡནཾ, སེསཱ མཧཱསཡནཾ. པཊིཀཱ ཨུཎྞཱམཡོ སེཏཏྠརཎོ. གོནོ ཙཏུརངྒུལཱདྷིཀལོམོ མཧཱཀོཛཝོ. ཙིཏྟཀཾ ཝཱནཝིཙིཏྲོ ཨུཎྞཱམཡཏྠརཎོ. ཨུཎྞཱ ཨེལ༹ཀལོམཾ. པཊལིཀཱ གྷནཔུཔྥིཀཱ. ཝིཀཏཱིཏི སཱིཧབྱགྒྷཱདིརཱུཔཝིཙིཏྟོ. ཨུདྡལོམཱིཏི ཨེཀཏོ ཨུགྒཏལོམོ. ཨེཀནྟལོམིཀཱཏི ཨུབྷཏོ ཨུགྒཏལོམོ.

ཀུཏྟཾ སོལ༹སནྣཾ ནཱཊཀིཏྠཱིནཾ ཋཏྭཱ ནཙྩནཡོགྒོ. ཀོསེཡྻཾ རཏནཔརིསིབྦིཏཾ ཀོསེཡྻསུཏྟམཡཾ པཙྩཏྠརཎཾ, ཀཊྚིསྶཾ རཏནཔརིསིབྦིཏཾ ཀོསེཡྻཀཊྚིསྶམཡཾ. ཧཏྠིནོ ཙ ཨསྶཱ ཙ རཐཱ ཙཱཏི སེནངྒཱནཾ བཧུཏྟེ སམཱཧཱརདྭནྡོ, ཧཏྠིཨསྶརཐེ ཏེསཾ པིཊྛཱིསུ ཨཏྠརཱཏི ཏཔྤུརིསོ. ཨཛིནཔྤཝེཎཱིཏི ཨཛིནཱནཾ ཨཛིནམིགཙམྨཱནཾ མཉྩཔྤམཱཎེན དུཔཊྚཏིཔཊྚཱནི ཀཏྭཱ སིབྦིཏཱ པཝེཎཱི. ཀདལིམིགཱནཾ ཨིདཾ ཀདལིམིགཾ, ཀིཾ ཏཾ? ཙམྨཾ, པཝརོ ཙ སོ པཙྩཏྠརོ ཙཱཏི ¶ པཝརཔཙྩཏྠརོ, སོ ཙ ཏཾ སེཏཝཏྠསྶ ཨུཔརི ཨཏྠཏཉྩ, ཀདལིམིགཉྩ ཏཾ པཝརཔཙྩཏྠརཉྩཱཏི སམཱསོ, པཝརཔཙྩཏྠརཎསངྑཱཏཾ སེཏཝཏྠསྶ ཨུཔརི པཏྠརིཏཾ ཀདལིམིགཔྤཝརཔཙྩཏྠརཎནྟི ཨཏྠོ. ཏཾ ཀིར ཨེཝཾ ཀརོནྟི. ཊཱིཀཱཡཾ པན ཡཐཱཝུཏྟདྭཡེན ཨཏྠཏཾ ཨཉྙམེཝ ཀིཉྩི ཝུཏྟཾ, ཏཾ ན ཡུཏྟཾ ‘‘ཨཛིནཔྤཝེཎཱི དྷཱརེཏབྦཱ’’ཏིཨཱདིནཱ (མཧཱཝ. ༢༥༤) ཝིསུཾ ཨཏྠརཎཱནམེཝ ཝུཏྟཏྟཱ. ཏེསུ ཧི ཝུཏྟེསུ ཏདཏྠཏཾ ཝུཏྟམེཝ སིཡཱ, ཏཐཱ ཙ ཝུཏྟཾ ཧེཊྛཱ ཝིསུཾ པཊིཀཱདིཀནྟི.

སལོཧིཏཝིཏཱནནྟི ཨེཏཾ ‘‘ཨུབྷཏོརཏྟཱུཔདྷཱནཀ’’ནྟིམསྶ ཝིསེསནཾ. ལོཧིཏཝིཏཱནེན སཧ ཝཏྟམཱནནྟི སམཱསོ. སེཏཝིཏཱནམྤི ཧེཊྛཱ ཨཀཔྤིཡཔཙྩཏྠརཎེ སཏི ན ཝཊྚཏི. རཏྟཾ ཨུཔདྷཱནཾ སཱིསཱུཔདྷཱནཾ པཱདཱུཔདྷཱནཉྩ རཏྟཱུཔདྷཱནཀཾ, ཨུབྷཏོ མཉྩསྶ སཱིསཔཱདནིཀྑེཔནཊྛཱནེ རཏྟཱུཔདྷཱནཀནྟི ¶ ཨལོཔསམཱསོ. ཡཾ པན ཨེཀམེཝ ཨུཔདྷཱནཾ ཨུབྷཡཔསྶེསུ རཏྟཱདིཝཎྞཾ ཝིཙིཏྲཾ, ཏཾ པམཱཎཡུཏྟམེཝ ཝཊྚཏི. ཏཏྲིདཾ པམཱཎཾ – ཝིཏྠཱརཏོ ཏཱིསུ ཀཎྞེསུ དྭིནྣཾ ཀཎྞཱནཾ ཨནྟརཾ ཝིདཏྠིཙཏུརངྒུལཾ, མཛ྄ཛྷེ མུཊྛིརཏནཾ, དཱིགྷཏོ པན དིཡཌྜྷརཏནཾ ཝཱ དྭིརཏནཾ ཝཱ. པརིབྷུཉྫཏོཏི ཨིམིནཱ ཀརོནྟསྶ ཀཱརཱཔེནྟསྶ ཀཏྠཙི ཚེདནཀཾ པཱཙིཏྟིཡནྟི དཱིཔེཏི.

༡༩༠. དྷམྨཱསནེ ཙ བྷཏྟགྒེ ཙ གྷརེ ཙཱཔི ཨཱསནྡཱདིཏྟཡཱ སེསེ གིཧིསནྟཀེ གིཧིཝིཀཊེ སཏི ནིསཱིདིཏུཾ ལབྦྷཏཱིཏི ཨཛ྄ཛྷཱཧཱརོ པདསམྦནྡྷོ ཝེདིཏབྦོ. གིཧིསནྟཀེཏི ཨིམིནཱ སངྒྷིཀམྤི ཨུཔལཀྑེཏི. ‘‘ཨནུཛཱནཱམི, བྷིཀྑཝེ, ཋཔེཏྭཱ ཏཱིཎི ཨཱསནྡིཾ པལླངྐཾ ཏཱུལིཀཾ གིཧིཝིཀཊ’’ནྟི (ཙཱུལ༹ཝ. ༣༡༤) སཱམཉྙེན ཝུཏྟཾ. སཱམཉྙཛོཏནཱཡ པན ཝིསེསེཔི ཨཝཊྛཱནཏོ ཨཱསནྡཱདིཏྟཡཱཏི ཨེཏྠ དྷམྨཱསནེ ཨཱསནྡཱདིཏྟཡཱ སེསེཏི ཡོཛེཏྭཱ ཨཏྠོ གཧེཏབྦོ. ཨཊྛཀཐཱཡཉྷི ‘‘ཨཱསནྡཱི པལླངྐོ གོནཀོ’’ཏིཨཱདིཔཱལི༹ཀྐམེ ཨཱསནྡཱདིདྭཡམཱདིཏོ ཧིཏྭཱ ‘‘གོནཀཱདཱིནི སངྒྷིཀཝིཧཱརེ ཝཱ པུགྒལིཀཝིཧཱརེ ཝཱ མཉྩཔཱིཋཀེསུ ཨཏྠརིཏྭཱ པརིབྷུཉྫིཏུཾ ན ཝཊྚནྟི, དྷམྨཱསནེ པན གིཧིཝིཀཊནཱིཧཱརེན ལབྦྷནྟི, ཏཏྲཱཔི ནིཔཛྫིཏུཾ ན ཝཊྚཏཱི’’ཏི (ཙཱུལ༹ཝ. ཨཊྛ. ༣༢༠) ཝུཏྟཾ. བྷཏྟགྒཾ ནཱམ ཝིཧཱརེ དཱནཊྛཱནཾ. དྷམྨཱསནཾ པན ཡཏྠ ཀཏྠཙི. གྷརེཏི ཨནྟརགྷརེ. ནིསཱིདིཏུཾ ལབྦྷཏེཏི ཨིམིནཱ ནིཔཛྫིཏུཾ ན ཝཊྚཏཱིཏི དཱིཔེཏི. སཾཁིཔནཾ ཨནྟོཀརཎཾ སངྑེཔོ, བྷཱུམཏྠརཎེ སངྑེཔོ ཨསྶ སཡནསྶཱཏི སམཱསོ. ཏསྨིཾ བྷཱུམཏྠརཎེ ཨནྟོཀརཎབྷཱུམཏྠརཏོ བྷཱུམཏྠརཎམེཝཱཏི དཊྛབྦཾ. སཡིཏུཉྩཱཏི ཨཏྟནོ ཀཔྤིཡཔཙྩཏྠརཎཾ ཨཏྠརིཏྭཱ སཡིཏུཉྩ ནིསཱིདིཏུཉྩ. ‘‘པརིབྷཎྜཀཏཾ བྷཱུམིཾ ཝཱ བྷཱུམཏྠརཎསེནཱསནཾ ¶ ཝཱ སངྒྷིཀམཉྩཔཱིཋཾ ཝཱ ཨཏྟནོ སནྟཀེན པཙྩཏྠརཎེན པཙྩཏྠརིཏྭཱཝ ¶ ནིཔཛྫིཏབྦ’’ནྟི ཧི ཨཊྛཀཐཱཡཾ (ཙཱུལ༹ཝ. ཨཊྛ. ༣༢༤) ཝུཏྟཾ. ཨིདཉྩ ཨཱསནྡཱདཱིནམྤི ཨཉྙཐཏྟཀརཎེ པརིབྷོགེ ལཀྑཎཝཙནཾ. ཝུཏྟཉྷི བྷགཝཏཱ ‘‘ཨནུཛཱནཱམི བྷིཀྑཝེ, ཨཱསནྡིཡཱ པཱདེ ཚིནྡིཏྭཱ པརིབྷུཉྫིཏུཾ, པལླངྐསྶ ཝཱལེ༹ བྷིནྡིཏྭཱ པརིབྷུཉྫིཏུཾ, ཏཱུལིཀཾ ཝིཛཊེཏྭཱ བིབྦོཧནཾ ཀཱཏུཾ, ཨཝསེསཾ བྷཱུམཏྠརཎཾ ཀཱཏུ’’ནྟི (ཙཱུལ༹ཝ. ༣༢༠).

༡༩༡. ཙཏུརཾསཔཱིཋཱ ཙ…པེ… པཉྩངྒཱ ཙ ཨུཙྩཔཱདཀཱ ཀཔྤནྟཱིཏི ཨཏྠཏོ ཝཙནཾ ཝིཔལླཱསེཏྭཱ སམྦནྡྷིཏབྦཾ, ‘‘ཀཔྤིཡཱ’’ཏི ཨིམིནཱ ཝཱ སམྦནྡྷོ ཝེདིཏབྦོ. ཏཏྠ ཙཏྟཱརོ ཨཾསཱ ཀོཎཱ ཡེསཾ, ཏེ ཙ ཏེ པཱིཋཱ ཙཱཏི སམཱསོ. ཏིཎྞཾ ཨཔསྶཡཱནཾ, ཙཏུནྣཉྩ པཱདཱནཾ ཝསེན སཏྟ ཨངྒཱནི ཡེསནྟི སམཱསོ. ཨེཀཱཔསྶཡསྶ ཝསེན པཉྩངྒཱ. ཙཏུརཾསཔཱིཋཱནཾ ཝིསུཾ ཀཔྤིཡབྷཱཝསྶ ཝུཏྟཏྟཱ སཏྟངྒཱདཡོ པན དཱིགྷཱཏི ཝིཉྙཱཡནྟི. པཱལི༹ཡཾ བྷཏྟགྒསྶ ཨེཀཡོགནིདྡིཊྛཏྟཱ ཨེཀཡོགནིདྡིཊྛཱནཾ སཧ ཝཱ པཝཏྟི, སཧ ཝཱ ནིཝཏྟཱིཏི གྷརེཏི ཨིམིནཱ བྷཏྟགྒསྶཔི གཧཎཾ. ཨེཝ-སདྡོ ཨཊྛཱནཔྤཡུཏྟོ, ཏསྨཱ ཏཱུལོནདྡྷཱ མཉྩཔཱིཋཱ གྷརེ ཝཱ བྷཏྟགྒེ ཝཱ ནིསཱིདིཏུམེཝ ཀཔྤནྟཱིཏི སམྦནྡྷོ. ཏཏྲཱཡཾ པཱལི༹ ‘‘ཏེན ཁོ པན སམཡེན མནུསྶཱ བྷཏྟགྒེ ཨནྟརགྷརེ ཏཱུལོནདྡྷཾ མཉྩམྤི པཱིཋམྤི པཉྙཔེནྟི. བྷིཀྑཱུ ཀུཀྐུཙྩཱཡནྟཱ ནཱབྷིནིསཱིདནྟི. བྷགཝཏོ ཨེཏམཏྠཾ ཨཱརོཙེསུཾ. ཨནུཛཱནཱམི, བྷིཀྑཝེ, གིཧིཝིཀཊཾ ཨབྷིནིསཱིདིཏུཾ, ན ཏྭེཝ ཨབྷིནིཔཛྫིཏུ’’ནྟི (ཙཱུལ༹ཝ. ༣༡༤). ཏེ པན ཀརོནྟསྶ ཝཱ ཀཱརཱཔེནྟསྶ ཝཱ ཨུདྡཱལནཀཾ པཱཙིཏྟིཡཾ.

༡༩༢. སཱནུལོམཱནཾ ཚནྣཾ ཙཱིཝརཱནཾ ཨཉྙཏརཾ ཙཱིཝརཾ ཚཝི ཨེཏཱསནྟི ཝིགྒཧོ. པཉྩ བྷིསཱིཏི ཙོལཱ༹དིཏཱུལགཎནཱཡ པཉྩཀཱ ཝུཏྟཱ. སབྦཏྠཱཏི ཝིཧཱརམཉྩཔཱིཋཱདཱིསུ སབྦཏྠ.

༡༩༣. ཏཱུལཏྟཡནྟི ¶ སིམྦལིརུཀྑཱདཱིནཾ ཁཱིརཝལླིཨཱདཱིནཾ ཨེརཀཱདཱིནཾ ཏིཎཱནཾ ཏཱུལཏྟཡཾ. བྷིསིགབྦྷོ ཙོལཱ༹དིཀོ པཉྩཝིདྷོ བྷིསིགབྦྷོ. མིགཔཀྑིནཾ ལོམཱནཱིཏི ཨེཏཾ སབྦནྟི སེསོ. མིག-སདྡེནེཝ སབྦེཔི སཱིཧཱདཡོ ཙཏུཔྤདཱ, པཀྑི-སདྡེན སབྦེཔི ཧཾསམོརཱདཡོ གཧིཏཱ. ནནུ ཙ བྷིསིགབྦྷསདྡནྟོགདྷཱཡ ཨུཎྞཱཡ མིགཔཀྑིལོམཱནམྤི གཧཎསབྦྷཱཝེཔི ཏེསཾ ཝིསུཾ གཧཎེ སཏི པུནརུཏྟིདོསོ ཨཱཔཛྫཏཱིཏི? ནཱཔཛྫཏི མནུསྶལོམཔརིཙྩཱགཝིབྷཱཝནཔྤཡོཛནསབྦྷཱཝཏོ. ནནུ ཙ ཨེཝམྤི དོསོཡེཝ, ‘‘མནུསྶལོམམུཎྞཱཡ’’ནྟིཨཱདིནཱ ¶ བྷིསིགབྦྷཱནཾ ཨུཔརི ནཱིཡམཱནཏྟཱ གམྱཏེ བིབྦོཧནེཔི ཨཡམེཝ བྷིསིགབྦྷོཏི? སཙྩཾ, ཏཐཱཔི ན དོསོ, གམྱམཱནཏྠསྶ སདྡསྶ པཡོགཾ པཏི ཀཱམཙཱརོཏི. མསཱུརཀེ ཏཱུལཝཛྫཱ ཨནུཉྙཱཏཱཏི ཝིཔརིཎཱམེཏྭཱ སམྦནྡྷིཏབྦཾ. མསཱུརཀཾ ནཱམ ཙམྨཚཝིཀཱ བྷིསཱིཏི ཝདནྟི.

༡༩༤. ཨུཎྞཱཡཾ མནུསྶལོམཉྩ པཎྞེ སུདྡྷཾ ཏམཱལཀཉྩ པུཔྥཉྩ ཨཔྤཊིཝེཀྑིཏཾ ཨཱསནཉྩེཝ ན ལབྦྷནྟི སམྦནྡྷོ. མནུསྶལོམནྟི ཨིམིནཱ ན ཀེཝལཾ ཨིདྷ ཨེལ༹ཀལོམམེཝ ཨུཎྞཱ, ཨཐ ཁོ ཀཔྤིཡཱཀཔྤིཡམཾསཛཱཏཱིནཾ པཀྑིཙཏུཔྤདཱནཾ ལོམམྤཱིཏི དསྶེཏི. པུཔྥནྟི པིཡངྒུབཀུལཔུཔྥཱདི. ཏམཱལཀསདྡེནེཝ ཨུཔཙཱརཏོ པཏྟཾ གཧེཏྭཱ ‘‘ཏམཱལཀ’’ནྟི ཝུཏྟཾ. ཨཔྤཊིཝེཀྑིཏནྟི ཨནུཔཔརིཀྑིཏཾ. ཀཱིདིསཾ པན པཊིཝེཀྑིཏབྦཾ, ཀཱིདིསཾ ན པཊིཝེཀྑིཏབྦནྟི? ཡཾ ཝིནིཙྪཡཏོ ཝིཉྙཱཏཾ, ཏཾ ན པཊིཝེཀྑིཏབྦཾ, ཨིཏརཾ ཧཏྠེན པརཱམསནྟེན པཊིཝེཀྑིཏབྦཾ.

ཨཀཔྤིཡསཡནནིདྡེསཝཎྞནཱ ནིཊྛིཏཱ.

༡༩༥. ཏིཝསྶནྟརམེཀམཱསནཾ ¶ བྷིཀྑཱུནཾ ཨནུཉྙཱཏནྟི སམྦནྡྷོ. ཏཏྠ ཨེཀསྨིཾ ཨཱསནེ མཉྩཱདིཀེ དྭིནྣཾ ཨཱསནཾ ནིསཱིདནཾ ཨེཀམཱསནཾ. མ-ཀཱརོ སནྡྷིཛོ. ཀཱིདིསནྟི ཨཱཧ ‘‘ཏིཝསྶནྟར’’ནྟི. ཏིཎྞཾ ཝསྶཱནམནྟརམེཏསྶཱཏི ཏིཝསྶནྟརོ, དྭཱིཧི ཝསྶེཧི མཧནྟཏརོ ཝཱ དཧརཏརོ ཝཱ བྷིཀྑུ, སོ ཨསྶ ཨཏྠཱིཏི ཏིཝསྶནྟརཾ, ཏིཝསྶནྟརཝནྟནྟི ཨཏྠོ. ཡོ པན ཨེཀེན ཝསྶེན མཧནྟཏརོ ཝཱ དཧརཏརོ ཝཱ ཨེཀཝསྶོཡེཝ ཝཱ, ཏབྦནྟཏཱཡ ཝཏྟབྦམེཝ ནཏྠི. ཨཐ ཝཱ ཏིཝསྶནྟརནྟི ཀརཎཏྠེ ཨུཔཡོགཝཙནཾ, ཏིཝསྶནྟརེན སདྡྷིནྟི ཨཏྠོ. ཏམེཝ སམཏྠེཏི ‘‘སཏྟཝསྶེ’’ཙྩཱདིནཱ.

༡༩༦. མུནི ¶ ཨནུཉྙཱསཱིཏི སམྦནྡྷོ. སབྦེཧེཝཱཏི སམཱནཱསནིཀཨསམཱནཱསནིཀེཧི སབྦེཧེཝ སདྡྷིཾ.

༡༩༧. དཱིགྷཱསནཾ དསྶེཏི ‘‘ཨནྟ’’ནྟིཨཱདིནཱ. ཡཾ ཏིཎྞཾ ནིསཱིདིཏུཾ པཧོཏི, ཏཾ ཨནྟཾ དཱིགྷཱསནནྟི སམྦནྡྷོ. ཨནྟནྟི པཙྪིམཾ. ཨདཱིགྷཱསནེ པན སམཱནཱསནིཀཱ ནིསཱིདིཏུཾ ལབྦྷནྟཱིཏི དསྶེནྟོ ‘‘མཉྩཀེ’’ཏིཨཱདིམཱཧ. སབྦཏྠ ཨཡཐཱཀརཎཏོ དུཀྐཊནྟི.

སམཱནཱསནིཀནིདྡེསཝཎྞནཱ ནིཊྛིཏཱ.

༡༩༨. ཨུཀྑིཏྟོཏི ཀམྨནཱནཱསཾཝཱསཀསངྑཱཏོ ཨཱཔཏྟིཡཱ ཨདསྶནེ, ཨཔྤཊིཀམྨེ, པཱཔིཀཱཡ དིཊྛིཡཱ ཨཔྤཊིནིསྶགྒེ ཨུཀྑིཏྟཀོ. ཨནུཔསམྤནྣོཏི སིཀྑམཱནསཱམཎེརསཱམཎེརིསིཀྑཱཔཙྩཀྑཱཏསངྑཱཏོ ཨནུཔསམྤནྣོ. ཚིནྣམཱུལཀོཏི ¶ ཨནྟིམཝཏྠུཨཛ྄ཛྷཱཔནྣོ. ཨུཀྑིཏྟཀེསུ ‘‘དྷམྨཝཱདིནོ ཨེཏེ’’ཏི ཨུཔྤནྣཱཡ ལདྡྷིཡཱ ནཱནཱབྷཱུཏོ སཾཝཱསོ ཨེཏསྶཱཏི ནཱནཱསཾཝཱསོ, ཨུཀྑིཏྟཱནུཝཏྟཀསངྑཱཏོ ལདྡྷིནཱནཱསཾཝཱསཀོ. སཱིམཏོ ནིགྒཏཱ ནིསྶཱིམཱ, སཱིམནྟརིཀཱ བཧིསཱིམཱ ཙ, ཏཏྠ ཧཏྠཔཱསེ ཙེཔི ཋིཏོ, སཱིམཱནཱནཱསཾཝཱསཀོ ནིསྶཱིམཊྛིཏོ. ཝེཧཱཡསེ ཨཱཀཱསེ ཋིཏོ ཝེཧཱཡསཎྛིཏོ བིནྡཱགམེན. ཏཏྠ ‘‘ནཱནཱསཾཝཱསོ ཙཱ’’ཏིཨཱདིནཱ སམཱཧཱརདྭནྡེཔི ཀྭཙི ནཔུཾསཀལིངྒཾ བྱབྷིཙརཏཱིཏི ནཔུཾསཀཏྟཱབྷཱཝོ ཡཐཱ ‘‘མགྒཱམགྒོ’’ཏི. ཨེཀཀམྨཾ ཨེཀུདྡེསོ སམསིཀྑཏཱཏི ཨཡཾ ཏིཝིདྷོཔི སཾཝཱསོ ནཱམ. སོ ཡེསཾ ནཏྠི, ཏེ ཨསཾཝཱསཱ. ཨེཏེ ཧཏྠཔཱསཏོ བཧིཀརཎཝསེན ཝཛྫེཏབྦཱ. ཨེཏེསུ ཧི ཏིཝིདྷེ ཨུཀྑིཏྟཀེ སཏི ཨུཔོསཐཱདིཀཾ ཀམྨཾ ཀརོནྟསྶ པཱཙིཏྟིཡཾ, ཨིཏརེསུ དུཀྐཊནྟི.

༡༩༩. ཝགྒེན ¶ ཨདྷམྨཀམྨཉྩ སམགྒེན ཨདྷམྨཀམྨཉྩ ཝགྒེན དྷམྨཀམྨཉྩ སམགྒེན དྷམྨཀམྨཉྩཱཏི ཙཏྟཱརི ཀམྨཱནི ཧོནྟཱིཏི སེསོ. ཏཏྠ ཝགྒེན ཨདྷམྨཀམྨནྟི ཝགྒེན སངྒྷེན ཀརཎཱིཡཾ ཨདྷམྨཀམྨཾ. ཨེས ནཡོ སབྦཏྠ. ཝགྒོཏི ཙ སམཱུཧོ ཝུཙྩཏི, སོ ཙ ཙཏུཝགྒཱདིཀརཎཱིཡཱདཱིསུ ཡཱཝཏིཀཱནཾ ཀམྨཔྤཏྟཱནཾ ཨསམྨུཁཱིབྷཱཝེན, ཚནྡཱརཧཱནཾ ཚནྡཱནཱཧརཎེན, སམྨུཁཱིབྷཱུཏཱནཉྩ པཊིཀྐོསནེན, ཏེསུ ཨེཀེནཱཔི ཝཱ ཨིདྷ ཨདྷིཔྤེཏོ. ཨདྷམྨཀམྨནྟི ཨེཏྠ པན དྷམྨོ ནཱམ ‘‘ཨུཏྟིདུཏིཡེ ཙེ, བྷིཀྑཝེ, ཀམྨེ ཨེཀཱཡ ཨུཏྟིཡཱ ཀམྨཾ ཀརོཏི, ན ཙ ཀམྨཝཱཙཾ ཨནུསྶཱཝེཏི, ཨདྷམྨཀམྨ’’ནྟིཨཱདིནཱ (མཧཱཝ. ༣༨༧) ཨེཀཱཡེཝ ཉཏྟིཡཱ ¶ , ཏཐཱ དྭཱིཧི ཉཏྟཱིཧི ཨེཀཱཡེཝ ཝཱ ཀམྨཝཱཙཱཡ, ཏཐཱ དྭཱིཧི ཀམྨཝཱཙཱཧཱིཏི ཨཱགཏཱཡ ཙ ཏཐཱ ཧཱཔནཨཉྙཐཱཀརཎབྷཱཝེན ཉཏྟིཀམྨཾ ཋཔེཏྭཱ ཉཏྟིཙཏུཏྠེ ཙ ཀམྨེ ཨཱགཏཱཡ ཙ ཨཀམྨཱརཧསྶ ཏཛྫནཱིཡཔབྦཱཛནཱིཡཔཊིསཱརཎཱིཡནིཡསྶཏིཝིདྷཨུཀྑེཔནཱིཡཱནཾ སཏྟནྣཾ ཀམྨཱནཾ ཀརཎཝསེན, ཀམྨཱརཧསྶ ཙ ཝིརཱདྷེཏྭཱ ཀརཎཝསེན ཨཱགཏཱཡ ཙ པཱལི༹ཡཱ ཝིཔརཱིཏཱ ཙ པཱལི༹, ཨུཔསམྤདཱདིཀམྨཝསེན ཨཱགཏཱ ཙ པཱལི༹, སམྨུཁཱཝིནཡསཏིཝིནཡཨམཱུལ༹ྷཝིནཡཔཊིཉྙཱཀརཎཡེབྷུཡྻསིཀཱཏསྶཔཱཔི- ཡསིཀཱཏིཎཝཏྠཱརཀསངྑཱཏཱནཾ སཏྟནྣཾ ཀམྨཱནཾ ཡཐཱལཱབྷཀརཎཝསེན ཨཱགཏཱ ཙ པཱལི༹, ཏེན ཀརཎཱིཡཾ ཨཔལོཀནཉཏྟིཉཏྟིདུཏིཡཉཏྟིཙཏུཏྠསངྑཱཏཾ ཙཏུབྦིདྷཾ ཀམྨཾ དྷམྨཀམྨཾ, ཏཔྤཊིཔཀྑཾ ཨདྷམྨཀམྨཾ. ཏབྦིཔརིཡཱཡེན སམགྒོ དྷམྨཀམྨཉྩ ཝེདིཏབྦཾ. དྷམྨོ ཡཐཱཝུཏྟཱ པཱལི༹ ཨསྶ ཨཏྠི, དྷམྨེན ཀཏཾ ཝཱཏི དྷམྨིཀཾ. ཏབྦིཔརཱིཏཾ ཨདྷམྨིཀཾ. ཙཏུཏྠཾཡེཝཱཏི ཏེསུ ཙཏཱུསུ ཀམྨེསུ ཙཏུནྣཾ པཱུརཎཾ སམགྒེན དྷམྨིཀཾ. སེསཀམྨཱནཾ བྷཱཝེན བྷིཀྑུནཱ དུཀྐཊསྶ བྷཝནཾ ལཀྑཱིཡཏཱིཏི སེསཀམྨེསཱུཏི བྷཱཝལཀྑཎེ སཏྟམཱི. དུཀྐཊནྟི ཀུཔྤཱནཾ ཨདྷམྨཀམྨཝགྒཀམྨཱནཾ ཀཏཏྟཱ དུཀྐཊཾ.

༢༠༠. ཨིདཱནི ཡདིདཾ སམགྒེན དྷམྨིཀཾ ནཱམ, ཏཾ ཡེཧི སངྒྷེཧི ཀཱཏབྦཾ, ཏེསཾ པབྷེདཾ དསྶེཏུཾ ‘‘ཙཏུཝགྒོ’’ཏིཨཱདིམཱཧ. ཙཏྭཱདཱིནཾ སངྑྱེཡཝུཏྟིཏྟཱ ཙཏུནྣཾ ཝགྒོཏིཨཱདིནཱ ཝིགྒཧོ. དསཝཱིསཏིཝགྒིཀོཏི དསནྣཾ ཝཱིསཏིཡཱ ཙ ཝགྒབྷེདཝསེན དསཝཱིསཏཱིནཾ ཝགྒོཏི ཝིགྒཧོ, ཎིཀོ སཀཏྠེ. ཝཱིསཏིཡཱ ཝགྒོ, ཨཏིརེཀེན སཧིཏོ ཝཱིསཏིཝགྒོཏི ཝིགྒཧོ.

༢༠༡-༢. པཉྩནྣཾ ཀམྨཱནཾ ནིཡམེཏི ‘‘ཙཏཱུ’’ཏིཨཱདིནཱ. ཨབྦྷཱནཾ ཨུཔསམྤདཾ པཝཱརཎཾ ཋཔེཏྭཱ ¶ ཙཏུཝགྒོ ཙཱཏིཨཱདིནཱ ཡོཛེཏྭཱ ¶ སབྦཀམྨེསུ ཀམྨཔྤཏྟོཏི དཱིཔིཏོཏི ཡོཛེཏབྦཾ. ཏཏྠ ཏཏྠ ཙ-སདྡོ ཙཏུཝགྒཱདཡོ ཀམྨཔཏྟིཀིརིཡཱཡཾ སམུཙྩིནོཏི. ཨིདྷ པན སབྦ-སདྡོ ཨབྦྷཱནཱདཱིནཾ ཀེསཉྩི ཋཔིཏཏྟཱ པདེསསབྦེ གཡ྄ཧཏི. ཀམྨཔཏྟོཏི ཀམྨསྶ པཏྟོ ཡུཏྟོ ཨནུརཱུཔོ. ཨིཏརོཏི ཝཱིསཏིཝགྒོ ཨཏིརེཀཝཱིསཏིཝགྒོ. སབྦཀམྨེསཱུཏི ཨེཏྠ པན སབྦ-སདྡོ སབྦསབྦེ. ནནུ ཙ ཝཱིསཏིཝགྒསྶ ཀམྨཔྤཏྟབྷཱཝེསཏི ཨཏིརེཀཝཱིསཏིཝགྒསྶ པགེཝཱཏི ཝིཉྙཱཡཏི. ཏཐཱ སཏི སོ ཀསྨཱ ཝུཏྟོཏི? སཙྩཾ, ཏཐཱཔི སོ ཙཏུཝགྒཱདིནཱ སངྒྷེན ཀཏྟབྦཀམྨཾ ཨཱུནཀཏརེན ན ཝཊྚཏི, ཨཏིརེཀེན པན ཝཊྚཏཱིཏི ཉཱཔནཏྠཾ ཝུཏྟོ.

༢༠༣. ཨིདཱནི ཙཏུཝགྒཱདིཀེན ཚནྡཱཧརཎེན པཱུརེཏབྦོཏི དསྶེཏི ‘‘ཙཏཱུ’’ཏིཨཱདིནཱ. པཱརཱཛིཀཱདིབྷཱཝམནཱཔནྣཏྟཱ པཀཏིཡཱ སབྷཱཝེནེཝ ཋིཏོ ཨཏྟཱ ཡེསཾ, པཀཏོ ཝཱ ཏཏོཡེཝ ཀམྨེསུ ཨཝིགཏོ ཨཏྟཱ ཡེསཾ ཏེཏི པཀཏཏྟཀཱ, པཱརཱཛིཀཨུཀྑིཏྟཀལདྡྷིནཱནཱསཾཝཱསཀེཧི ཨཉྙེ. པརེཏི ཨེཀསཱིམཊྛཱ ཏཱདིསཱཡེཝ ཨཉྙེ. སེསེཔཱིཏི ཨཝསེསེ པཉྩཝགྒཱདིཀརཎཱིཡེཔི.

༢༠༤. ཨིདཱནི ཝཏྠུཉཏྟིཨནུསྶཱཝནསཱིམཱདིཝིཔཏྟིཏོ, ཀམྨཝིཔཏྟཱིསུ པརིསཏོ ཙ པཊིཀྐོསཏོ ཙ ཀམྨསྶ ཀུཔྤཱཀུཔྤབྷཱཝཾ ཏཏྠ ཙ ཨཱཔཏྟིཨཱདིཾ དསྶེཏུཾ ‘‘ཙཏཱུ’’ཏིཨཱདི མཱཧ. ཙཏུཝགྒཱདིཀཏྟབྦཾ ཨསཾཝཱསགཎཔཱུརཾ ཝཱ ཀམྨཱརཧགཎཔཱུརཾ ཝཱ ཀམྨཉྩ གརུཀཊྛགཎཔཱུརཾ ཝཱ པརིཝཱསཱདིཀམྨཉྩཱཏི ཡོཛནཱ. ཨེཏྠ ཙ ཀམྨཱརཧོ གརུཀཊྛཏོ ཨཉྙོ, ནིཀྑིཏྟཝཏྟོ པན གརུཀཊྛོ གཎཔཱུརཀོ ཧོཏིཡེཝ. ཀཏནྟི ཙཏུཝགྒཱདིནཱ ཀཏཾ.

༢༠༥. ཝཱརེཡྻཱཏི ཨནྟརཱཡེ ཨསཏི ཨནྟམསོ ཨེཀོཔི ཝཱརེཡྻཱཏི ཨཏྠོ. ཨནྟརཱཡེཏི པཱཔེཧི ཀརིཡམཱནེ ¶ ཛཱིཝིཏབྲཧྨཙརིཡནྟརཱཡེ སཏི. ཨནནྟརཱཡིཀཱ ཙེ ན ཝཱརེནྟི, དུཀྐཊཾ. དིཊྛཱཝིནྟི ཨཏྟནོ ཨཏྟནོ དིཊྛིཾ ལདྡྷིཾ ‘‘ཨདྷམྨཀམྨཾ ཨིདཾ, ན མེཏཾ ཁམཏཱི’’ཏི ཨཉྙམཉྙཾ ཨཱཝི ཀརེཡྻུནྟི སེསོ. ཨེཀོདྷིཊྛཱནནྟི ཨེཀོ བྷིཀྑུ ‘‘ན མེཏཾ ཁམཏཱི’’ཏི ཨདྷིཊྛཱནཾ ཀརེཡྻཱཏི སེསོ. ཏཏོདྷིཀཱཏི ཏཱིཧི ཨདྷིཀཱ. ཏེ པན སངྒྷཏྟཱ པཧོནྟི ཨཏྟནོ ཀམྨཾ ནིཏྠརིཏུཾ.

༢༠༦. ཁིཏྟཙིཏྟོ ནཱམ ཨུམྨཏྟཀོ. དུཁཊྚིཏོཏི ཝེདནཊྚོ. ན རཱུཧཏཱིཏི གཡ྄ཧཏྟཾ ན རོཧཏཱིཏི ཨཏྠོ.

༢༠༧. ཨནྟམསོ ¶ ཨནནྟརསྶཱཔི ཨཱརོཙེནྟསྶ པཀཏ…པེ… བྷིཀྑུནོཏི སམྦནྡྷོ. ཨེཀསཱིམཱཡཾ ཏིཊྛཏཱིཏི ཨེཀསཱིམཊྛོ. སམོ སཾཝཱསོ ཨསྶཱཏི སམསཾཝཱསོ. ཨེཀསཱིམཊྛོ ཙ སོ སམསཾཝཱསོ ཙ, པཀཏཏྟོ ཙ སོ ཨེཀསཱིམཊྛསམསཾཝཱསོ ཙ, སོ ཙཱཡཾ བྷིཀྑུ ཙཱཏི སབྦཏྠ ཀམྨདྷཱརཡོ, ཏསྶ. ཨེཏྠ པན ཨཝིཔནྣསཱིལོ པཀཏཏྟོཏི ཨདྷིཔྤེཏོ. ཨཱརོཙེནྟསྶཱཏི ཨཏྟནོ ལདྡྷིཾ པཀཱསེནྟསྶ. རཱུཧཏཱིཏི པཊིཀྑེཔོ རུཧཏི.

༢༠༨. དྷམྨིཀཾ ཀམྨནྟི དྷམྨེན ཀཏྟབྦཾ ཨཔལོཀནཱདིཀམྨཾ. པཊིཀྐོསེཡྻཱཏི ནིཝཱརེཡྻ. ཏིརོཀྑཱ ཀཱཡསཱམགྒིཾ ཝཱ ཚནྡཾ ཝཱཏི ཝཱ-སདྡཾ ནེཏྭཱ ཨཏྠོ ནེཏབྦོ. ཏིརོཀྑཱཏི པརམྨུཁཱ. སོ སམྨུཁཱ-སདྡོ ཝིཡ ནིཔཱཏོ, ཨཐ ཝཱ ཨཀྑཱ ཨིནྡྲིཡཝིསཡཏོ ཏིརོ བཧཱིཏི ཨཏྠོཏི.

༢༩. མིཙྪཱཛཱིཝཝིཝཛྫནཱནིདྡེསཝཎྞནཱ

༢༠༩. ཨཱགམྨ ཛཱིཝནྟི ཨེཏེནཱཏི ཨཱཛཱིཝོ, ཀོ སོ? པཙྩཡཔརིཡེསནཝཱཡཱམོ. མིཙྪཱཡ ཨཱཛཱིཝོ, ཏསྶ ¶ ཝིཝཛྫནཱ མིཙྪཱཛཱིཝཝིཝཛྫནཱ. སཱ པནཱཡཾ ཨཏྠཏོ ‘‘ཨིདྷ བྷིཀྑུ པཱཏིམོཀྑསཾཝརསཾཝུཏོ ཝིཧརཏི ཨཱཙཱརགོཙརསམྤནྣོ’’ཏི (ཝིབྷ. ༥༠༨) ཨེཝཾ པཱཏིམོཀྑསཾཝརསམྤཏྟིཡཱ པཊིཔཏྟིདསྶནཝསེན ཨཱགཏོ ཨཱཙཱརོ ཙེཝ ཡཐཱཀྐམེན པཱརཱཛིཀསངྒྷཱདིསེསཐུལླཙྩཡཔཱཙིཏྟིཡཔཱཊིདེསནཱིཡདུབྦྷཱསིཏདུཀྐཊཱནཾ ཀཱརཎབྷཱུཏསྶ ཨཱཛཱིཝཧེཏུཔཉྙཏྟཱནཾ ཨབྷཱུཏཱརོཙནསཉྩརིཏྟཨཉྙཱཔདེསབྷཱུཏཱརོཙནཔཎཱིཏབྷོཛནཝིཉྙཏྟི བྷིཀྑུནིབྷོཛནཝིཉྙཏྟིསཱུཔོདནཝིཉྙཏྟིསིཀྑཱཔདཱནཾ ཝཱིཏིཀྐམསྶ ཙ ཀུཧནལཔནནེམིཏྟིཀཏཱ ནིཔྤེསིཀཏཱ ལཱབྷེན ལཱབྷཾ ནིཛིགཱིསནཏཱཏི ཨེཝམཱདཱིནཉྩ པཱཔདྷམྨཱནཾ ཝསེན པཝཏྟཾ མིཙྪཱཛཱིཝཝིརཏིསངྑཱཏཾ ཨཱཛཱིཝཔཱརིསུདྡྷིསཱིལཉྩ. ཏསྶཱ པན ཀསྶཙི ཨིདྷ དསྶནཾ ཡཐཱ དསྶེཏུམཱརདྡྷཾ པཱཏིམོཀྑསཾཝརསངྑཱཏཱཡ ཨདྷིསཱིལསིཀྑཱཡ, ཙཏུརཱརཀྑཝིཔསྶནཱཝསེན ཨཱགཏཱནཾ ཨདྷིཙིཏྟཨདྷིཔཉྙཱསངྑཱཏཱནཾ དྭིནྣཾ སིཀྑཱནཉྩ ཨུཔཀཱརཀདྷམྨཔརིདཱིཔནཏྠནྟི དཊྛབྦཾ, ཨེཝམཱིདིསཾ ¶ ཝིཉྙེཡྻཾ, ཏཾ དསྶེཏི ‘‘དཱརུ’’ནྟིཨཱདིནཱ. ཏཏྠ ‘‘དཱརུ’’ནྟིཨཱདཱིནི ‘‘དདེ’’ཏི ཨེཏསྶ པཏྟིཀམྨཾ. ཙུཎྞཾ སིརཱིསཙུཎྞཱདིནཧཱནིཡཙུཎྞཾ. ནྷཱནམུཁོདཀནྟི ནྷཱནཉྩ མུཁཉྩ, ཏསྶ ཨུདཀནྟི སམཱསོ. ཨཱདི-སདྡེན པཎྞཱདིཾ སངྒཎྷཱཏི. ཀུལསངྒཧཱཏི ཀུལསངྒཧཀརཎེན.

༢༡༠. པརིབྷཊཏི པརེསཾ དཱརཀེ པརིཧརཏཱིཏི པརིབྷཊོ, པརིབྷཊསྶ ཀམྨཾ པཱརིབྷཊཀོ, སཀཏྠེ ཏམེཝ པཱརིབྷཊཀཏཱ. ཨལངྐརཎཱདིནཱ ཀུལདཱརཀཔརིཧརཎསྶེཏཾ ནཱམཾ. མུགྒསྶ སཱུཔོ མུགྒསཱུཔོ, སོཡེཝ མུགྒསུཔྤོ. ཡཐཱ མུགྒསཱུཔེ པཙྩམཱནེ ཀོཙིདེཝ མུགྒོ ན པཙྩཏི, ཨཝསེསཱ པཙྩནྟི, ཨེཝཾ ཡསྶ པུགྒལསྶ ཝཙནེ ཀིཉྩིདེཝ སཙྩཾ ཧོཏི, སེསཾ ཨལིཀཾ, ཨཡཾ པུགྒལོ མུགྒསཱུཔསདིསཏཱཡ ཨུཔཙཱརེན ‘‘མུགྒསུཔྤོ’’ཏི ཝུཙྩཏི, ཏསྶ བྷཱཝོ མུགྒསུཔྤཏཱ ¶ . སཙྩཱལིཀེན ཛཱིཝིཏཀཔྤནསྶེཏཾ ཨདྷིཝཙནཾ. གྷརཝཏྠུཨཱདིསམྦནྡྷིནཱི ཝིཛྫཱ ཝཏྠུཝིཛྫཱ. པཱརིབྷཊཀཏཱ ཙཱཏིཨཱདིནཱ དྭནྡོ ནཔུཾསཀཏྟཱབྷཱཝེ པཱརི…པེ… ཝིཛྫཱ, ཏཱཡ. རསྶོ པན གཱཐཱབནྡྷཝསེན, ཏཐཱ དཱིགྷོ. པཧིཎཱནཾ ཏསྨིཾ ཏསྨིཾ ཀམྨེ ཏེསཾ ཏེསཾ ནིཡུཉྫནཾ པཧེཎཾ. ཨཱདརེན དཱུཏེན ཀཱརེཏབྦཾ ཡཾ ཀིཉྩི ཀམྨཾ དཱུཏཀམྨཾ. པིསནཾ པེསནཾ, ཛངྒྷཱཡ པཱདེན པེསནཾ ཛངྒྷཔེསནཾ, ཏམསྶ ཨཏྠཱིཏི ཛངྒྷཔེསནིཡཾ. ཏེསཾ ཏེསཾ གིཧཱིནཾ གཱམནྟརདེསནྟརཱདཱིསུ སཱསནཔཊིསཱསནཧརཎསྶེཏམདྷིཝཙནཾ.

༢༡༡. ལཱབྷཱསཱཡ ལཉྫདཱནཾ ཨནུཔྤདཱནཾ. སམྦུདྡྷཔྤཊིཀུཊྛེན བུདྡྷགརཧིཏེན ཨངྒཝིཛྫཱནཀྑཏྟཝིཛྫཱསུཔིནཝིཛྫཱབྷཱུཏཝིཛྫཱདིནཱ ཨཉྙེན ཝཱ.

༢༡༢. ཨཉྙཱཏཀཱནཾ ཨཔྤཝཱརིཏཱནཾ ཝིཉྙཱཔནཾ ཝིཉྙཏྟི, ཡཱཙནཝསེན པཝཏྟོ ཀཱཡཝཙཱིཔཡོགོ. བུདྡྷཔྤཊིཀུཊྛེན མིཙྪཱཛཱིཝེན པཙྩཡཔརིཡེསནཱ ཨནེསནཱ. ཨབྷཱུཏསྶ ཨཏྟནི ཨཝིཛྫམཱནསྶ ཨུཏྟརིམནུསྶདྷམྨསྶ ཨུལླཔནཾ ཀཐནཾ ཨབྷཱུཏུལླཔནཱ. ཀུཧནཱདཱིཧཱིཏི ཀུཧནཱལཔནཱདཱིཧི. ཏཏྠ ལཱབྷསཀྐཱརསིལོཀསནྣིསྶིཏསྶ པཙྩཡཔྤཊིསེཝནསཱམནྟཛཔྤནཨིརིཡཱཔཐསཎྛཱཔནཝསེན ཛནཝིམྷཱཔནཱ ཀུཧནཱ. ཝིཧཱརཾ ཨཱགཏེ མནུསྶེ དིསྭཱ ‘‘ཀིམཏྠཱཡ བྷོནྟོ ཨཱགཏཱ, ཀིཾ བྷིཀྑཱུ ནིམནྟེཏུ’’ནྟི ཝཱ ‘‘མཡི རཱཛཱ པསནྣོ, ཨསུཀོ ཙ ཨསུཀོ ཙ རཱཛམཧཱམཏྟོ པསནྣོ’’ཏི ཝཱ ཨཱདིནཱ ནཡེན ཨཱལཔནཱ ལཔནཱ. ཁཱདནཱིཡཾ གཧེཏྭཱ གཙྪནྟེ དིསྭཱ ‘‘ཀིཾ ཁཱདནཱིཡཾ ལབྷིཏྠཱ’’ཏིཨཱདིནཱ ནཡེན ནིམིཏྟཀརཎཱདི ནེམིཏྟཀཏཱ. ‘‘ཨསྶདྡྷོ ཨཔྤསནྣོ’’ཏིཨཱདིནཱ ནཡེན གརཧཎཱནི ཙ ‘‘ཨེཏཾ ཨེཏྠ ཀཐེཐཱ’’ཏིཨཱདིནཱ ནཡེན ཝཱཙཱཡ ¶ ¶ ཨུཀྑིཔནཱདི ཙ ནིཔྤེསིཀཏཱ. ཨཔྤེན ལཱབྷེན བཧུཀཾ ཝཉྩེཏྭཱ གཧེཏུཾ ཨིཙྪནཾ ལཱབྷེན ལཱབྷཾ ནིཛིགཱིསནཏཱ. ཀུལདཱུསཱདཱིཏི ཨེཏྠ ཨཱདི-སདྡེན རཱུཔིཡཔྤཊིགྒཧཎརཱུཔིཡསཾཝོཧཱརཱ སངྒཡ྄ཧནྟཱིཏི.

མིཙྪཱཛཱིཝཝིཝཛྫནཱནིདྡེསཝཎྞནཱ ནིཊྛིཏཱ.

༢༡༣. སཨུཔཱཧནོ…པེ… ཙཱིཝརཾ སཱིསེ ཀརིཏྭཱ ཝཱ ཨཱགནྟུཀོ ཨཱརཱམཾ ན པཝིསེཏི སམྦནྡྷོ. སཚཏྟོཏི སཱིསེ ཀཏཚཏྟེན སཚཏྟོ. ཨོགུཎྛིཏོཏི སསཱིསཾ པཱརུཔིཏོ. ‘‘པརིཀྑིཏྟསྶ ཝིཧཱརསྶ པརིཀྑེཔོ, ཨཔརིཀྑིཏྟསྶ པརིཀྑེཔཱརཧཊྛཱན’’ནྟི ཝུཏྟཾ ཨུཔཙཱརསཱིམཱསམཱིཔཾ པཏྭཱ ཨུཔཱཧནཱཨོམུཉྩནཱདིསབྦཾ ཀཏྭཱ ཨཱརཱམོ པཝིསིཏབྦོཏི ཨཡམེཏྠ བྱཏིརེཀལདྡྷོ ཨཏྠོ.

༢༡༤. པཱནཱིཡེན པཱདེ ན དྷོཝེཡྻཱཏི སམྦནྡྷོ. པཊིཀྐམནཾ པཏྭཱ ཨེཀམནྟེ པཏྟཙཱིཝརཾ ནིཀྑིཔིཏྭཱ པཏིརཱུཔེ ནིསཛྫ པུཙྪིཏྭཱ པཱནཱིཡཾ པཱཏབྦཾ, པརིབྷོཛནཱིཡེན ཡཐཱཝུཏྟཾ པཱདཱ དྷོཝིཏབྦཱཏི ཨདྷིཔྤཱཡོ. ཝུཌྜྷཏརེ ཨཱཝཱསིཀེཔི ཙ ཨབྷིཝཱདེཡྻཱཏི ཨིམིནཱ ཝསྶཾ པུཙྪིཏྭཱ ནཝཀེན ཨཱཝཱསིཀེན ཨབྷིཝཱདཱཔེཏབྦནྟི དཱིཔེཏི. པུཙྪེཡྻ སཡནཱསནནྟི ‘‘ཀཏམཾ སེནཱསནཾ པཱཔུཎཱཏི, ཨཛ྄ཛྷཱཝུཏྠཾ ཨནཛ྄ཛྷཱཝུཏྠཾ ཝཱ’’ཏི སེནཱསནཾ པུཙྪེཡྻ. ཨིདཉྩ པུཙྪཱཡ ལཀྑཎཝཙནཾ. ཏསྨཱ ཨཱཝཱསིཀཝཏྟེ ཝུཏྟམཛ྄ཛྷཱཝུཏྠཱདིཀཉྩ པུཙྪིཏབྦཾ. སཙེ ‘‘ཨནཛ྄ཛྷཱཝུཏྠ’’ནྟི ཝདནྟི, ཀཝཱཊཾ ཨཱཀོཊེཏྭཱ མུཧུཏྟཾ ཨཱགམེཏྭཱ གྷཊིཀཾ ཨུགྒྷཱཊེཏྭཱ ཀཝཱཊཾ པཎཱམེཏྭཱ བཧི ཋིཏེན ཨུལློཀེཏྭཱ པཝིསིཏྭཱ སབྦཾ སེནཱསནཝཏྟཾ ཀཱཏབྦཾ. ཨཱགནྟུཀཝཏྟཾ.

༢༡༥-༦. གམིཀོ ¶ པཀྐམེཡྻཱཏི སམྦནྡྷོ. ‘‘པཊིསཱམེཏྭཱ’’ཏིཨཱདཱིནིམསྶ པུབྦཀིརིཡཱཔདཱནི. དཱརུམཏྟིཀབྷཎྜཀནྟི ཨེཏྠ མཉྩཔཱིཋཱདིདཱརུབྷཎྜཾ རཛནབྷཱཛནཱདིམཏྟིཀཱབྷཎྜཾ. པཊིསཱམེཏྭཱཏི ཨཏྠི ཙེ ཨནོཝསྶཀེ སཎྛཔེཏྭཱ. ཐཀེཏྭཱནཱཏི དྭཱརཝཱཏཔཱནེཧི པིདྷཱཡ ¶ . སཱདྷུཀཾ སངྒོཔེཏྭཱནཱཏི ཙཏཱུསུ པཱསཱཎེསུ མཉྩཾ པཉྙཔེཏྭཱ མཉྩེ མཉྩསྶ, པཱིཋེ པཱིཋསྶ ཨཱརོཔནེན སེནཱསནསྶ ཨུཔརཱུཔརི པུཉྫཀརཎེན སཱདྷུཀཾ སངྒོཔནཾ ཀཏྭཱ. ན ཙཱཏི ནེཝ. གམིཀཝཏྟཾ.

༢༡༧-༨. ཨཱཝཱསིཀོཏི ཨིདཾ ‘‘པཉྙཔེཡྻཱ’’ཏིཨཱདཱིནཾ ཀཏྟུཔདཾ. ནཝཀམྨཀརཎཱདིབྷཱརནིཏྠརཎཏཱཡ ཨཱཝཱསོ ཝིཧཱརོ ཨསྶ ཨཏྠཱིཏི ཨཱཝཱསིཀོ. ཡསྶ པན ཀེཝལཾ ཝིཧཱརེ ནིཝཱསནམཏྟཾ ཨཏྠི, སོ ནེཝཱསིཀོ. ཨུབྷོཔི ཏེ ཨིདྷ ཨཱཝཱསིཀ-སདྡེན སངྒཧིཏཱ. པཱདོདཔྤབྷུཏིནྟི ཨེཏྠ པབྷུཏི-སདྡེན པཱདཔཱིཋཔཱདཀཐལིཀཱནཾ གཧཎཾ. པཙྩུགྒནྟྭཱན པཏྟཙཱིཝརཾ གཎྷེཡྻཱཏི ཡོཛནཱ. པཉྙཔེ སཡནཱསནནྟི ‘‘ཨེཏཾ ཏུམྷཱཀཾ སེནཱསནཾ པཱཔུཎཱཏཱི’’ཏི ཨེཝཾ སཡནཱསནཾ པཉྙཔེཡྻ, པཀཱསེཡྻཱཏི ཝུཏྟཾ ཧོཏི.

༢༡༩. ཨཛ྄ཛྷཱཝུཏྠནྟི པུབྦེ བྷིཀྑཱུཧི ནིཝུཏྠཾ. གོཙརཱགོཙརཾ ཝདེཏི ‘‘བྷིཀྑཱཙཱརགཱམོ དཱུརོ, ཨཱསནྣོ’’ཏི ཝཱ, ‘‘ཀཱལསྶེཝ པིཎྜཱཡ ཙརིཏབྦཾ, དིཝཱ ཝཱ’’ཏི ཨེཝཾ གོཙརཉྩ, ‘‘མིཙྪཱདིཊྛིཀཱནཾ ཝཱ གཱམོ, པརིཙྪིནྣབྷིཀྑོ ཝཱ’’ཏིཨཱདིནཱ ཨགོཙརཉྩ ཝདེཡྻཱཏི ཨཏྠོ. ཝཙྩཔསྶཱཝཊྛཱནཱནཱིཏིཨཱདཱིནིཔི ‘‘ཝདེ’’ཏི ཨིམསྶེཝ ཀམྨཝཙནཱནི. སེཁསམྨུཏིནྟི ཡསྶ སདྡྷསྶ ཀུལསྶ སངྒྷོ སེཁསམྨུཏིཾ དེཏི, ཏཾ ཀུལཉྩ.

༢༢༠. པཝེསནིཀྑམེ ཀཱལནྟི ‘‘ཀེསུཙི ཋཱནེསུ ཝཱལ༹མིགཱ ཝཱ ཨམནུསྶཱ ཝཱ ཧོནྟི, ཨིམཾ ཀཱལཾ པཝིསིཏབྦཾ ནིཀྑམིཏབྦཉྩཱ’’ཏི ¶ ཨེཝཾ པཝེསནིཀྑམེ ཙ ཀཱལཾ. ཨེཏཾ པན ཨཱསནཔཉྙཔནཱདིཀཾ སབྦཾ ཝཏྟཾ ཝུཌྜྷཏརེ ཨཱགཏེ ཙཱིཝརཀམྨཱདིཾ ཝཱ ནཱཏིགིལཱནསྶ བྷེསཛྫཾ ཝཱ ཋཔེཏྭཱཔི ཀཱཏབྦཾ. མཧཱགིལཱནསྶ པན བྷེསཛྫམེཝ ཀཱཏབྦཾ. ཙེཏིཡངྒཎཝཏྟཾ ཀརོནྟེནཱཔི ཏསྶ ཝཏྟཾ ཀཱཏུཾ ཨཱརབྷིཏབྦཾ. པཎྜིཏོ ཧི ཨཱགནྟུཀོ ‘‘ཀརོཧི ཏཱཝ བྷེསཛྫཾ, ཙེཏིཡངྒཎཾ སམྨཛྫཱཧཱི’’ཏི ཙ ཝདེཡྻ. ཨཔིཙ བཱིཛནེན བཱིཛིཏབྦོ, པཱདཱཔིསྶ དྷོཝིཏབྦཱ, ཏེལེན མཀྑིཏབྦཱ. པིཊྛི ཙེ ཨཱགིལཱཡཏི, སམྦཱདྷེཏབྦཱ. ནཝཀསྶ པན ཨཱགནྟུཀསྶ ‘‘ཨིདམཱསནཾ, ཨེཏྠ ནིསཱིདཱ’’ཏིཨཱདིནཱ ཨཱཙིཀྑིཏབྦནྟི དསྶེནྟོ ‘‘ནིསིནྣོཡེཝཱ’’ཏིཨཱདིམཱཧ. ནིསིནྣོཡེཝཱཏི ཨིམིནཱ ‘‘ཋིཏོཡེཝཱ’’ཏིཨཱདིཾ ཨུཔལཀྑེཏི. སམུདྡིསེཏི ཨཱདརེན ཝདེཡྻ. ཨཱཝཱསིཀཝཏྟཾ.

‘‘ཝཏྟ’’ནྟི ¶ པན སཱམཉྙེན ནིདྡིཊྛཏྟཱ ན ཐེརེ བྷིཀྑཱུ ཨཏིཨལླཱིཡིཏྭཱ ནིསཱིདིཏབྦཾ, མཧཱཐེརསྶ ནིསིནྣཱསནཏོ ཨེཀཾ དྭེ ཨཱསནཱནི ཋཔེཏྭཱ ‘‘ནིསཱིདཱ’’ཏི ཝུཏྟེ ནིསཱིདིཏབྦཾ, ན ནཝཱཔི བྷིཀྑཱུ ཨཱསནེན པཊིབཱཧིཏབྦཱ, ན སངྒྷཱཊིཾ ཨོཏྠརིཏྭཱ ནིསཱིདིཏབྦཾ, སདྡཾ ཨཀཏྭཱ ཨུདཀཀིཙྩཾ ཀཱཏབྦཾ, ཡཐཱ སཱུཔསྶ ཨོཀཱསོ ཧོཏི, ཨེཝམཏྟཱཡ ཨོདནོ གཎྷིཏབྦོ, ཐེརེན བྷིཀྑུནཱ ‘‘ཋཔེཏྭཱ ཨཔྤཀཾ ཨོདནཱདིཀཾ སབྦཾ སབྦེསཾ སམཀཾ སམྤཱདེཧཱི’’ཏི ཝཏྟབྦཾ, ན ཏཱཝ ཐེརེན བྷུཉྫིཏབྦཾ, བྷུཏྟཱཝིནཱ ན ཏཱཝ ཨུདཀཾ པཊིགྒཧེཏབྦཾ, བྷཏྟགྒཏོ ནིཝཏྟནྟེཧི ཡཐཱནུརཱུཔཾ ནིཀྑམིཏྭཱ ཝིརལཱ༹ཡ པཱལི༹ཡཱ གནྟབྦནྟི ཨེཝམཱདིཀཉྩ ཏདནུརཱུཔཾ སེཁིཡཝཏྟཉྩ སམྤཱདེཏབྦནྟི ཨིདཾ བྷཏྟགྒཝཏྟཉྩ སཱདྷུཀཾ ཨཏརམཱནེན གཱམོ པཝིསིཏབྦོ, ‘‘ཨིམིནཱ པཝིསིསྶཱམི, ཨིམིནཱ ནིཀྑམིསྶཱམཱི’’ཏི ནིཝེསནཾ པཝིསནྟེན སལླཀྑེཏབྦཾ, ནཱཏིསཧསཱ པཝིསིཏབྦཾ, ནཱཏིསཧསཱ ནིཀྑམིཏབྦཾ, ནཱཏིདཱུརེ ནཙྩཱསནྣེ ¶ ཋཱཏབྦཾ, ནཱཏིཙིརཾ ཋཱཏབྦཾ, ནཱཏིལཧུཀཾ ནིཝཏྟིཏབྦཾ, དཱཏུཀཱམཏཱཀཱརཾ ཉཏྭཱ ཋཱཏབྦཾ, ཡོ པཋམཾ གཱམཏོ པཊིཀྐམཏི, ཏེན ཨཱསནཔཉྙཔནཱདི སབྦཾ ཀཱཏབྦཾ, ཡོ པཙྪཱ, ཏེན ཨཱསནུདྡྷརཎཱདི སབྦཾ ཀཱཏབྦནྟི ཨེཝམཱདིཀཉྩ ཏདནུརཱུཔཾ སེཁིཡཝཏྟཉྩ སམྤཱདེཏབྦནྟི ཨིདཾ པིཎྜཙཱརིཀཝཏྟཉྩ ཀཱཏབྦཾ.

སེནཱསནཊྛཱནེ སབྦཾ ཝཏྟཉྩ སམྤཱདེཏྭཱ ཏཏོ ནིཀྑམིཏྭཱ སཱདྷུཀཾ ནིཝཱསེཏྭཱ པཱརུཔིཏྭཱ ཙ ཨཏརམཱནེན གཱམོ པཝིསིཏབྦོཏིཨཱདི སབྦཾ པིཎྜཙཱརིཀཝཏྟཾ ཀཱཏབྦཾ. པཱནཱིཡཔརིབྷོཛནཱིཡཨགྒིཨརཎིསཧིཏཀཏྟརདཎྜཱ ཨུཔཊྛཔེཏབྦཱ, ནཀྑཏྟཔདཱནི སཀལཱནི ཝཱ ཨེཀདེསཱནི ཝཱ ཨུགྒཧེཏབྦཱནི, དིསཱཀུསལེན བྷཝིཏབྦནྟི ཨིདཾ ཨཱརཉྙིཀཝཏྟཉྩ ཨུདྡིཊྛཾཡེཝ ཧོཏཱིཏི ཨཝགནྟབྦནྟི.

༢༢༡. སམྨུཁཱ པརམྨུཁཱཏི སསྶ མུཁཾ, པརསྶ མུཁནྟི ཝིགྒཧོ, སམྨུཁེན པརམྨུཁེནཱཏི ཨཏྠོ. སམྨུཁཱཝིཀཔྤནཱ པརམྨུཁཱཝིཀཔྤནཱཏི བྷེདཱ དུཝེ ཝིཀཔྤནཱ ཝུཏྟཱཏི ཡོཛནཱ ¶ . བྷེདཱཏི ཝིསེསཏོ. ཨཐ ཝཱ སསྶ མུཁཾ མུཁསམྦནྡྷིཝཙནཾ ཨསྶཱ ཝིཀཔྤནཱཡཱཏི སམཱསོ. ཏཐཱ པརམྨུཁཱ. སམྨུཁཱ ཙ པརམྨུཁཱ ཙ, ཏསྶཱ བྷེདོ, ཏཏོ. སམྨུཁཱཡ སམྨུཁཝིཀཔྤནཱཡ. བྱཏྟསྶཱཏི ཝིཀཔྤནཝིདྷཱནཾ པཙྩུདྡྷཱརཝིདྷཱནཉྩ ཛཱནནྟསྶ.

༢༢༢. ཏེནཱཏི ཡསྶ སནྟིཀེ ཝིཀཔྤེཏི, ཏེན བྷིཀྑུནཱ. པརིབྷོགཱདིཀནྟི པརིབྷོགཾ ཝིསྶཛྫནཾ ཨདྷིཊྛཱནཉྩ.

༢༢༤-༥. ཨཔརཱ ¶ སམྨུཁཱཝེཀཱཏི ཨེཏྠ ཝཱ-སདྡོ པཀྑནྟརེ, ཨཐ ཝཱཏི ཨཏྠོ, ཨཔི-སདྡཏྠོ ཝཱ ཝཱ-སདྡོ, སོ ཨཔརཱ-སདྡཏོ པརཾ དཊྛབྦོ, ཨཔརཱཔི ཨེཀཱ སམྨུཁཱཝིཀཔྤནཱ ཨཏྠཱིཏི ཨཏྠོ. ཀཐནྟི ཨཱཧ ‘‘བྷིཀྑུསྶཱ’’ཏིཨཱདི. ‘‘པཉྩནྣཾ སཧདྷམྨཱིན’’ནྟི ཝུཏྟཏྟཱ ‘‘ཏིསྶསྶ བྷིཀྑུནོ’’ཏིཨཱདཱིསུ ཏིསྶཱཡ བྷིཀྑུནིཡཱ ཏིསྶཱཡ སིཀྑམཱནཱཡ ཏིསྶཱཡ སཱམཎེརིཡཱ ཏིསྶསྶ སཱམཎེརསྶཱཏིཔི ཝིཉྙཱཏབྦཾ.

༢༢༦. པརམྨུཁཱཝིཀཔྤནཱཏི པརམྨུཁེན ཝིཀཔྤནེན, པརམྨུཁཱཝིཀཔྤནཱཏི ཝཱ གཧེཏབྦཾ, པརམྨུཁཱཝིཀཔྤནཱ ཀཐནྟི ཨཏྠོ.

༢༢༧. མིཏྟོཏི དལ༹ྷམིཏྟོ. སནྡིཊྛོཏི དིཊྛམཏྟམིཏྟོ. ཨེཏྠ པན དྭིནྣཾ ཝིཀཔྤནཱནཾ ཀིཾ ནཱནཱཀརཎནྟི? སམྨུཁཱཝིཀཔྤནཱཡ ཏཱཝ སཡཾ ཝིཀཔྤེཏྭཱ པརེན པཙྩུདྡྷརཱཔེཏི, ཏེནེཝ སཱ སམྨུཁཱཝིཀཔྤནཱ ནཱམ ཛཱཏཱ. པརམྨུཁཱཝིཀཔྤནཱཡ པརེནེཝ ཝིཀཔྤཱཔེཏྭཱ པརེནེཝ པཙྩུདྡྷརཱཔེཏི, ཏེནེཝ སཱ པརམྨུཁཱཝིཀཔྤནཱ ནཱམ ཛཱཏཱཏི ཨིདམེཏྠ ནཱནཱཀརཎནྟི.

༢༢༨. དཱུརསནྟིཀཏྟེཀཏྟནྟི ཨེཏྠ ཨཱསནྣདཱུརབྷཱཝོ ཨདྷིཊྛཱནེ ཝུཏྟནཡེནེཝ ཝེདིཏབྦོ.

༢༢༩. དསཱཧཾ…པེ… པཙྩཱསཱཡ སཏི མཱསཀཾ ནཱདྷིཊྛིཏཝིཀཔྤིཏཾ ནིསྶགྒིཾ ནུཔྤཱདཡཏཱིཏི སམྦནྡྷོ. དས ཨཧཱནི སམཱཧཊཱནི དསཱཧཾ. སབྦཏྠ ཨཙྩནྟསཾཡོགེ དུཏིཡཱ. ཏཏྠ ཡཾ དིཝསཾ ཙཱིཝརཾ ཨུཔྤནྣཾ, ཏསྶ ཡོ ཨརུཎོ, སོ ཨུཔྤནྣདིཝསནིསྶིཏོ, ཏསྨཱ ཙཱིཝརུཔྤཱདདིཝསེན སདྡྷིཾ ཨེཀཱདསེ ཨརུཎུགྒམནེ ནིསྶགྒིཡཾ ཧོཏཱིཏི ཨཱཧ ‘‘དསཱཧ’’ནྟི. མཱསམེཀཾ ཝཱཏི ‘‘ཨནཏྠཏེ ཀཐིནེ ཨེཀཾ ¶ པཙྪིམཀཏྟིཀམཱས’’ནྟི (པཱརཱ. ༦༤༩ ཨཏྠཏོ སམཱནཾ) ཝུཏྟཏྟཱ ¶ ཀཐིནཏྠཏེ པཉྩ མཱསེཏི ལབྦྷཏི. ཀཐིནཾ ཨཏྠཏཾ ཡསྨིཾ ཝིཧཱརེཏི སམཱསོ. པཱརིཔཱུརཏྠནྟི པཱརིཔཱུརི ཨཏྠོ ཡསྶཱཏི ཝིགྒཧོ. ཀིརིཡཱཝིསེསནཾ, པཱརིཔཱུརིཔྤཡོཛནཾ ཀཏྭཱཏི ཨཏྠོ. ཨཱུནསྶཱཏི ཡཏྟཀེན ཀཡིརམཱནཾ ཨདྷིཊྛཱནཾ ཙཱིཝརཾ པཧོཏི, ཏཏྟཀཏཱབྷཱཝཏོ ཨཱུནསྶ ཨེཀཱདསམཱསསཏྟམཱསསངྑཱཏེ པིཊྛིསམཡེ ཨུཔྤནྣསྶ མཱུལཙཱིཝརསྶ. པཙྩཱསཱ སཏཱིཏི ‘‘སངྒྷཱདིཏོ ཡཏོ ཀུཏོཙི ལཙྪཱམཱི’’ཏི ཨེཝཾ སཏིཡཱ པཙྩཱསཱཡཱཏི ཨཏྠོ. ཨུབྷཡམྤི ཡ-ཀཱརལོཔེན ནིདྡིཊྛཾ. སཏཱིཏི ཝཱ ནིཔཱཏོ, ལིངྒཝིཔལླཱསེན ཝཱཧ. ཨེཏྠ པན བྱཏིརེཀཝསེན དསཱཧཱཏིཀྐམནཱདཱིསུ ནིསྶགྒིཡཾ པཱཙིཏྟིཡཾ ཝེདིཏབྦནྟི.

༢༣༠. བྱཏྟསྶཱཏི ‘‘ཀཱརིཡ’’ནྟི ཀིཏཀཡོགེ ཀཏྟརི ཚཊྛཱི. བྱཏྟོ ཙ ནཱམ ‘‘པཉྩཧི, བྷིཀྑཝེ, ཨངྒེཧི སམནྣཱགཏེན བྷིཀྑུནཱ ཨནིསྶིཏེན ཝཏྠབྦཾ, ཨཱཔཏྟིཾ ཛཱནཱཏི, ཨནཱཔཏྟིཾ ཛཱནཱཏི, ལཧུཀཾ ཨཱཔཏྟིཾ ཛཱནཱཏི, གརུཀཾ ཨཱཔཏྟིཾ ཛཱནཱཏི, ཨུབྷཡཱནི ཁོ པནསྶ པཱཏིམོཀྑཱནི ཝིཏྠཱརེན སྭཱགཏཱནི ཧོནྟི སུཝིབྷཏྟཱནི སུཔྤཝཏྟཱིནི སུཝིནིཙྪིཏཱནི སུཏྟསོ ཨནུབྱཉྫནསོ. ཨིམེཧི ཁོ, བྷིཀྑཝེ, པཉྩཧི ཨངྒེཧི སམནྣཱགཏེན བྷིཀྑུནཱ ཨནིསྶིཏེན ཝཏྠབྦ’’ནྟི (མཧཱཝ. ༡༠༣) ཨེཝཾ ཝུཏྟབྱཏྟོ ཙ བཧུསྶུཏབྱཏྟོ ཙ ཝེདིཏབྦོ.

ཏཏྠ སུཝིབྷཏྟཱནཱིཏི སུཊྛུ ཝིབྷཏྟཱནི པདཔཙྩཱབྷཊྛསངྐརདོསཝིརཧིཏཱནི. སུཔྤཝཏྟཱིནཱིཏི པགུཎཱནི ཝཱཙུགྒཏཱནི. སུཝིནིཙྪིཏཱནི ¶ སུཏྟསོཏི ཁནྡྷཀཔརིཝཱརཏོ ཨཱཧརིཏབྦསུཏྟཝསེན སུཊྛུ ཝིནིཙྪིཏཱནི. ཨནུབྱཉྫནསོཏི ཨཀྑརཔདཔཱརིཔཱུརིཡཱ སུཝིནིཙྪིཏཱནི ཨཀྑཎྜཱནི ཨཝིཔརཱིཏཀྑརཱནི. ཨེཏེན ཨཊྛཀཐཱ དཱིཔིཏཱ. ཨཊྛཀཐཱཏོ ཧི ཨེས ཝིནིཙྪཡོ ཧོཏཱིཏི. བཧུསྶུཏབྱཏྟོ པན ཡེན སབྦནྟིམེན པརིཙྪེདེན དྭེ མཱཏིཀཱ པགུཎཱ ཝཱཙུགྒཏཱ, པཀྑདིཝསེསུ དྷམྨསཝནཏྠཱཡ སུཏྟནྟཏོ ཙཏྟཱརོ བྷཱཎཝཱརཱ, སམྤཏྟཱནཾ པརིསཱནཾ པརིཀཐནཏྠཱཡ ཨནྡྷཀཝིནྡམཧཱརཱཧུལོཝཱདཨམྦཊྛསདིསོ ཨེཀོ ཀཐཱམགྒོ, སངྒྷབྷཏྟམངྒལཱམངྒལེསུ ཨནུམོདནཏྠཱཡ ཏིསྶོ ¶ ཨནུམོདནཱ, ཨུཔོསཐཔྤཝཱརཎཱདིཛཱནནཏྠཾ ཀམྨཱཀམྨཝིནིཙྪཡོ, སམཎདྷམྨཀརཎཏྠཾ སམཱདྷིཝསེན ཝིཔསྶནཱཝསེན ཝཱ ཨརཧཏྟམགྒཔརིཡོསཱནམེཀཾ ཀམྨཊྛཱནཾ ཨེཏྟཀཾ ཨུགྒཧིཏཾ, སྭཱཡཾ ཝུཙྩཏི. ནཏྠི ནིསྶཱཡ ཀཱརིཡནྟི ཨཱཙརིཡཱདིཾ ནིསྶཱཡ ཝཱསེན ཀཏྟབྦཾ ནཏྠི. ‘‘ནིསྶཡཀཱརིཡ’’ནྟི ཝཱ པཱཋོ, ནིསྶཡེན ཀཱརིཡནྟི སམཱསོ. ཛཱིཝསྶ ཡཏྟཀོ པརིཙྪེདོ ཡཱཝཛཱིཝཾ.

༢༣༡. ཏེན ནིསྶཱཡ ཝསནྟེན ཨེཝཾ ནིསྶཡོ གཧེཏབྦོཏི དསྶེཏུཾ ‘‘ཨེཀཾས’’ནྟིཨཱདི ཝུཏྟཾ. ཨེཀཾསནྟི ཨེཀོ ཨཾསོ ཨསྶ ཙཱིཝརསྶཱཏི ཝིགྒཧོ. ཀིརིཡཱཝིསེསནཾ ཝཱ བྷུམྨཏྠེ ཝཱ ཨུཔཡོགཝཙནཾ, ཨེཀསྨིཾ ཨཾསེཏི ཨཏྠོ. ཨཉྫལི ཀརཔུཊོ. ཡཱཝཏཏིཡཀཾ ཝདེཏི ཨུཔསམྤདཱཡ སཊྛིཝསྶེན སཏྟཏིཝསྶེན ཝཱཔི བྱཏྟསྶ ནཝཀསྶ སནྟིཀེ ཡཱཝཏཏིཡཀཾ ཝཙནཾ ཀརེཡྻ. ཡཱཝཏཏིཡོ ཝཱརོ ཨསྶཱཏི ཀིརིཡཱཝིསེསནསམཱསོ. ཨཱཡསྨཏོཏི ཨཱཡསྨནྟཾ. ཝཙྪཱམཱིཏི ཝསཱམི. ཨུཔཛ྄ཛྷཾ གཎྷནྟེནཱཔི ‘‘ཨུཔཛ྄ཛྷཱཡོ མེ, བྷནྟེ, ཧོཧཱི’’ཏི གཧེཏབྦཾ. ཏཾ པན ‘‘ཨཱཙརིཡོ’’ཏི ཨེཏྠ ‘‘ཨུཔཛ྄ཛྷཱཡོ’’ཏི ཝཙནཾ ཝིསེསོཏི ཨེཏྠ ཝཱཙཱབྷེདཏོ ¶ ན ཝིསུཾ ཝུཏྟཾ. ན ཀེཝལམེཏྠ ནིསྶཡུཔཛ྄ཛྷཱཡགཧཎེ, གཱམཔྤཝེསནཱདཱིསུཔི ཨེཝམེཝ ཀཏྭཱ ‘‘ཨཧཾ ཨཱཝུསོ’’ཏི ཝཱ ‘‘བྷནྟེ’’ཏི ཝཱ ཝཏྭཱ ‘‘གཱམཔྤཝེསནཾ ཨཱཔུཙྪཱམཱི’’ཏིཨཱདིནཱ ཝཏྟབྦཾ.

༢༣༢. ནིསྶཡཔཊིཔྤསྶདྡྷིཾ དསྶེཏི ‘‘པཀྐནྟེ’’ཏིཨཱདིནཱ. པཀྐནྟེཏི ཨུཔཛ྄ཛྷཱཡེ ཨཱཙརིཡེ སདྡྷིཝིཧཱརིཀེ ཨནྟེཝཱསིཀེ ཙ གཱམཱདཱིསུ ཡཏྠ ཀཏྠཙི ཨཱཔུཙྪིཏྭཱ ཝཱ ཨནཱཔུཙྪིཏྭཱ ཝཱ གཏེ. ཏེསུ ཡེན ཀེནཙི ‘‘ཨསུཀཾ ནཱམ གཱམཾ གཙྪཱམཱི’’ཏི ཝུཏྟེ ཏེསུཡེཝ ཡེན ཀེནཙི ‘‘སཱདྷཱུ’’ཏི སམྤཊིཙྪིཏེཔི ཏཾ ཏཾ ནིཡམཾ ཨཏིཀྐམིཏྭཱ པཀྐནྟེཔི ཨནཱཔུཙྪཱ པན ཨུཔཙཱརསཱིམཱཏིཀྐམེན པཀྐནྟེཔི ནིསྶཡོ སམྨཏི པཊིཔྤསྶམྦྷཏི. པཀྑསངྐནྟེཏི ཏིཏྠིཡཔཀྑསངྐནྟེ ཙཱཔི ཝིབྦྷནྟེ ཙཱཔི མརཎེན ཙ ཏངྑཎཉྙེཝ པཊིཔྤསྶམྦྷཏི. ཨཱཎཏྟི ནཱམ ‘‘པཎཱམེམི ཏ’’ནྟི ཝཱ ‘‘མཱ ཨིདྷ པཝིསཱ’’ཏིཨཱདིཀཱ ནིསྶཡཔྤཎཱམནཱ. ཏཱཡ པཎཱམིཏེན ཨཱཙརིཡུཔཛ྄ཛྷཱཡཱ ཁམཱཔེཏབྦཱ. ཨཁམནྟེསུ དཎྜཀམྨཾ ཀཏྭཱ ཏསྨིཾ ཝིཧཱརེ མཧཱཐེརེ གཧེཏྭཱཔི སཱམནྟཝིཧཱརེ བྷིཀྑཱུ གཧེཏྭཱཔི ཁམཱཔེཏབྦཱ. ན ཁམནྟི ཙེ, ཨཱཙརིཡུཔཛ྄ཛྷཱཡཱནཾ སབྷཱགཱནཾ སནྟིཀེ ཝསིཏབྦཾ. ཡེན ཀེནཙི ཀཱརཎེན ན སཀྐཱ ཧོཏི ཏཏྲ ཨཱཙརིཡུཔཛ྄ཛྷཱཡཱནཾ སབྷཱགཱནཾ སནྟིཀེ ཝསིཏུཾ, ཏཾཡེཝ ཝིཧཱརཾ ཨཱགནྟྭཱ ཨཉྙསྶ སནྟིཀེ ནིསྶཡཾ གཧེཏྭཱ ཝསིཏབྦཾ. ཏཏྠ ‘‘པཉྩཧི, བྷིཀྑཝེ, ཨངྒེཧི སམནྣཱགཏཾ སདྡྷིཝིཧཱརིཀཾ ¶ ཨཔྤཎཱམེནྟོ ཨུཔཛ྄ཛྷཱཡོ སཱཏིསཱརོ ཧོཏི, པཎཱམེནྟོ ཨནཏིསཱརོ ཧོཏི. ཨུཔཛ྄ཛྷཱཡམྷི ནཱདྷིམཏྟཾ པེམཾ ཧོཏི, ནཱདྷིམཏྟོ པསཱདོ ཧོཏི, ནཱདྷིམཏྟཱ ཧིརཱི ཧོཏི, ནཱདྷིམཏྟོ གཱརཝོ ཧོཏི, ནཱདྷིམཏྟཱ བྷཱཝནཱ ཧོཏི. ཨིམེཧི ཁོ, བྷིཀྑཝེ, པཉྩཧངྒེཧི…པེ… ཧོཏི (མཧཱཝ. ༦༨). པཉྩཧི, བྷིཀྑཝེ ¶ , ཨངྒེཧི སམནྣཱགཏཾ ཨནྟེཝཱསིཀཾ ཨཔྤཎཱམེནྟོ ཨཱཙརིཡོ…པེ… ཧོཏཱི’’ཏི (མཧཱཝ. ༨༡) ཝུཏྟཏྟཱ པན ཨསམྨཱཝཏྟནྟེ ཨནྟེཝཱསིཀསདྡྷིཝིཧཱརིཀེ ཨཔྤཎཱམེནྟཱ ཨཱཙརིཡུཔཛ྄ཛྷཱཡཱ དུཀྐཊཾ ཨཱཔཛྫནྟཱིཏི ཝེདིཏབྦཾ. བྷཱཝནཱཏི མེཏྟཱབྷཱཝནཱ. ཨུཔཛ྄ཛྷཱཡསམོདྷཱནཾ པན ཏསྶ དསྶནསཝནཝསེན ཝེདིཏབྦཾ.

ཨེདིསོ ཝུཙྩཏི ཨལཛྫིཔུགྒལོ’’ཏི. (པརི. ༣༥༩) –

ཨེཝཾ ཝུཏྟལཀྑཎཾ ཨལཛྫིཾ. ནིསྶཡཾ དེནྟེནཱཔི ལཛྫིནོཡེཝ དཱཏབྦཾ. ‘‘ན བྷིཀྑཝེ ཨལཛྫཱིནཾ ནིསྶཡོ དཱཏབྦོ. ཡོ དདེཡྻ, ཨཱཔཏྟི དུཀྐཊསྶཱ’’ཏི (མཧཱཝ. ༡༢༠) ཧི ཝུཏྟཾ. ཨདིཊྛཔུབྦསྶ ཀཏིཔཱཧཾ ཨཱཙཱརཾ ཨུཔཔརིཀྑིཏྭཱ དཱཏབྦཾ. ཨཔུབྦནྟི ཨེཏྠ སམྦནྡྷིསདྡཏྟཱ པུབྦ-སདྡེན པུབྦཝཱསོ གཧིཏོ, ནཏྠི པུབྦོ ཨསྶཱཏི ཨཔུབྦཾ, ནཝནྟི ཝུཏྟཾ ཧོཏི. ཙཏྟཱརི པཉྩ ཝཱ པརིམཱཎམེཏེསནྟི ཝིགྒཧོ. ཨེཏྠ པན པརིམཱཎ-སདྡསནྣིདྷཱནེན སངྑྱེཡྻཝཱཙིནོཔིཏེ སངྑྱཱམཏྟཝཱཙིནོ ཧོནྟཱིཏི ཙཏུཔཉྩསངྑྱཱཔརིམཱཎམེཝ སངྑྱེཡྻམཱཧ, ཏསྨཱ ཝིགྒཧཔདཏྠེཧི བྷིནྣོ ཨཉྙཔདཏྠོ སམྦྷཝཏཱིཏི སམཱསོ. ཝཱ-སདྡསྶ ཡོ ཝིཀཔྤཏྠོ, ཏཏྠ ཙཱཡཾ སམཱསོ, ཙཏྟཱརི ཝཱ པཉྩ ཝཱ, ཙཏུཔཉྩ ཨཧཱནི, ཏེསཾ ཨཧཱནཾ སམཱཧཱརོ ཙཏུཔཉྩཱཧཾ. བྷིཀྑུསབྷཱགཏནྟི སམཱནོ བྷཱགོ ལཛྫིཏཱསངྑཱཏོ ཀོཊྛཱསོ ཡེསཾ, བྷིཀྑཱུཧི སབྷཱགཱ, ཏེསཾ བྷཱཝོ བྷིཀྑུསབྷཱགཏཱ, ཏཾ, པེསལབྷཱཝནྟི ཨཏྠོ. ‘‘ཐེརོ ལཛྫཱི’’ཏི ཛཱནནྟེན པན པཀཏིཡཱ ནིསྶཡདཱནཊྛཱནཾ ¶ གཏེན ཙ ཏདཧེཝ གཧེཏབྦོ, ཨེཀདིཝསམྤི པརིཧཱརོ ནཏྠི. སཙེ ¶ ‘‘ཨོཀཱསེ ཨལབྷནྟེ པཙྩཱུསསམཡེ གཧེསྶཱམཱི’’ཏི སཡཏི, ཨརུཎཾ ཨུགྒཏམྤི ན ཛཱནཱཏི, ཨནཱཔཏྟི. ལདྡྷཔརིཧཱརེནཱཔི ཝསིཏུཾ ཝཊྚཏཱིཏི.

༢༣༤. ‘‘ལབྦྷཏཱི’’ཏི ཀམྨནི ནིཔྥནྣཏྟཱ ཨཝུཏྟཀཏྟཱཏི ‘‘ཨདྡྷིཀསྶཱ’’ཏིཨཱདཱིསུ ཀཏྟརི སཱམིཝཙནཾ, ‘‘ཨདྡྷིཀེནཱ’’ ཏིཨཱདི ཝུཏྟཾ ཧོཏི. ‘‘སལླཀྑེནྟེནཱ’’ཏི པན སརཱུཔེནེཝ ནིདྡིཊྛཾ. ཝསིཏུནྟི ཝུཏྟཀམྨཾ. བྷཱཝེ ཧི ཏུཾ-པཙྩཡོ, ཝཱསོཏི ཨཏྠོ. ཡཱཙིཏསྶཱཏི ‘‘གིལཱནུཔཊྛཱཀསྶ ཙཱ’’ཏི ཨེཏྠ ཝིསེསནཾ. སཙེ པན ‘‘ཡཱཙཱཧི མ’’ནྟི ཝུཙྩམཱནོཔི གིལཱནོ མཱནེན ན ཡཱཙཏི, གནྟབྦཾ. ཨརཉྙེ ཝཱ སལླཀྑེནྟེན ཕཱསུཀནྟི ཡཏྠ ཝསནྟསྶ པཊིལདྡྷཏརུཎསམཐཝིཔསྶནཱཝིསེསབྷཱགིཏཱཝསེན ཕཱསུ ཧོཏི, ཏསྨིཾ ཨརཉྙེ ཏཱདིསཾ ཕཱསུཝིཧཱརཾ སལླཀྑེནྟེན ཨཱརཉྙཀེན. དཱཡཀེ ཨསནྟེཏི པདཙྪེདོ. ཏཱཝཱཏི ཨཝདྷིམྷི, ཨདྡྷིཀཱདཱིཧི ཡཱཝ ནིསྶཡདཱཡཀོ ལབྦྷཏི, ཏཱཝ, ཨཱརཉྙཀེན པན ‘‘པཊིརཱུཔེ ནིསྶཡདཱཡཀེ སཏི ནིསྶཱཡ ཝསིསྶཱམཱི’’ཏི ཨཱབྷོགཾ ཀཏྭཱ ཡཱཝ ཨཱསཱལ༹ྷིཔུཎྞམཱ, ཏཱཝཱཏི ཨཏྠོ. ‘‘སཙེ པན ཨཱསཱལ༹ྷིམཱསེ ཨཱཙརིཡོ ནཱགཙྪཏི, ཡཏྠ ནིསྶཡོ ལབྦྷཏི, ཏཏྠ གནྟབྦཾ (མཧཱཝ. ཨཊྛ. ༡༢༡). ཨནྟོཝསྶེ པན ནིབདྡྷཝཱསཾ ཝསིཏབྦཾ, ནིསྶཡོ ཙ གཧེཏབྦོ’’ཏི (མཧཱཝ. ཨཊྛ. ༡༢༡) ཧི ཨཊྛཀཐཱཡཾ ཝུཏྟཾ.

ཨམྷཱཀཾ པན ཀེཙི ཨནྟེཝཱསིཀཏྠེརཱ ‘‘ན བྷིཀྑཝེ ཝསྶཾ ན ཨུཔགནྟབྦཾ. ཡོ ན ཨུཔགཙྪེཡྻ, ཨཱཔཏྟི དུཀྐཊསྶཱ’ཏི (མཧཱཝ. ༡༨༦) ཙ ‘ན བྷིཀྑཝེ ཏདཧུ ཝསྶཱུཔནཱཡིཀཱཡ ཝསྶཾ ཨནུཔགནྟུཀཱམེན སཉྩིཙྩ ཨཱཝཱསོ ཨཏིཀྐམིཏབྦོ. ཡོ ཨཏིཀྐམེཡྻ, ཨཱཔཏྟི དུཀྐཊསྶཱ’ཏི (མཧཱཝ. ༡༨༦) པཱལི༹ཝཙནཏོ ཀེནཙི ཀཱརཎེན ¶ ནིསྶཡཾ ཨལབྷམཱནེནཔི ན སཀྐཱ ཨནྟོཝསྶེ ཝསྶཾ ཨནུཔགནྟུཾ. ‘ཨནྟོཝསྶེ པནཱ’ཏིཨཱདཱིསུ པན ཙ-སདྡོ ཨནྭཱཙཡཏྠོ, ཏསྨཱ ཏེནཱཔི ཝསྶཾ ཨུཔགནྟབྦམེཝཱ’’ཏི ཝདིཾསུ.

མཡཾ པནེཏྠ ཨེཝམཝོཙུམྷ ‘‘བྷགཝཏཱ ཨནུཔགམནེ དུཀྐཊཾ ཨནནྟརཱཡིཀསྶེཝ ཝུཏྟཾ, ཏེནེཝ ‘ཀེནཙི ཨནྟརཱཡེན པུརིམིཀཾ ཨནུཔགཏེན པཙྪིམིཀཱ ཨུཔགནྟབྦཱ’ཏི ཨཊྛཀཐཱཡཾ (མཧཱཝ. ཨཊྛ. ༡༨༥) ཝུཏྟཾ. ཨནྟརཱཡོ ཙ ནཱམ ཨནྟརཱ ཝེམཛ྄ཛྷེ ཨེཏཱིཏི ཨནྟརཱཡོ, ཡོ ཀོཙི བཱདྷཀཔྤཙྩཡཏཱཡ ཨདྷིཔྤེཏོ ཝུཙྩཏི ‘ན ལབྷནྟི པཏིརཱུཔཾ ཨུཔཊྛཱཀཾ, ཨེསེཝ ཨནྟརཱཡོཏི པཀྐམིཏབྦ’ནྟིཨཱདཱིསུ (མཧཱཝ. ༢༠༡) ཝིཡ, ཏསྨཱ བཱདྷཀཔྤཙྩཡཏཱ ཨདྷིཔྤེཏཱ ¶ . ནིསྶཡཱལཱབྷོཔི ཨནྟརཱཡོཏྭེཝ ཝིཉྙཱཡཏི. སཀྐཱ ཧི ཝཏྟུཾ ‘ཨནྟརཱཡོ ཝསྶཱུཔགམོ སནྣིསྶཡཏྟཱ ཏརུཎསམཐཝིཔསྶནཱལཱབྷཱིནཾ ཀཏོཀཱསོ ཝིཡཱ’ཏི. ཏརུཎསམཐཝིཔསྶནཱལཱབྷཱིནམྤི ཧི ཀཏོཀཱསེཔི ‘སཙེ པན ཨཱསཱལ༹ྷིམཱསེ ཨཱཙརིཡོ ནཱགཙྪཏི, ཡཏྠ ནིསྶཡོ ལབྦྷཏི, ཏཏྠ གནྟབྦ’ནྟི དལ༹ྷཾ ཀཏྭཱ ཨཊྛཀཐཱཡཾ (མཧཱཝ. ཨཊྛ. ༡༢༡) ཝུཏྟཾ. ཨམྷཱཀཾ གརཱུཧི ཙ སཱརཏྠདཱིཔནིཡཾ (སཱརཏྠ. ཊཱི. མཧཱཝགྒ ༣.༡༢༡) ‘ཨཱཙརིཡཾ ཨཱགམེནྟསྶེཝ ཙེ ཝསྶཱུཔནཱཡིཀདིཝསོ ཧོཏི, ཧོཏུ, གནྟབྦཾ ཏཏྠ, ཡཏྠ ནིསྶཡདཱཡཀཾ ལབྷཏཱི’ཏི ཝསྶཱུཔནཱཡིཀདིཝསེཔི ནིསྶཡཏྠཱཡ གམནམེཝ ཝུཏྟཾ. ཨཐ ཙ པན མཧཱཀཱརུཎིཀོཔི བྷགཝཱ ‘ཨནུཛཱནཱམི, བྷིཀྑཝེ, གིལཱནུཔཊྛཱཀེན བྷིཀྑུནཱ ནིསྶཡཾ ཨལབྷམཱནེན ཡཱཙིཡམཱནེན ཨནིསྶིཏཀེན ཝཏྠུ’ནྟི (མཧཱཝ. ༡༢༡) གིལཱནཝིསཡེཔི ནིསྶཡཾ གརུཀཾ ཀཏྭཱ པཊྛཔེསི. ཡཾ པན ཨནིསྶཡཾ, ཏཾ ཨནནྟརཱཡཾ ནིསྶཡམུཏྟཀསྶ ཝསྶཱུཔགམནཾ ཝིཡ. ཨཔིཙ ནཱཝཱཡ གཙྪནྟསྶ པན ཝསྶཱནེ ཨཱགཏེཔི ནིསྶཡཾ ཨལབྷནྟསྶ ཨནཱཔཏྟཱིཏི ནཱཝཱཡ ¶ གཙྪཏོཡེཝ ཨཱཝེཎིཀཱ ཨནཱཔཏྟིཀཏཱ ཝུཏྟཱ. ཏསྨཱ ནིསྶཡཱལཱབྷོ བཱདྷཀཔྤཙྩཡོ ཝསྶཱུཔགམནསྶ, ན ཝསྶཱུཔགམནཾ ནིསྶཡསྶཱཏི ཨནྟརཱཡོཡེཝ ནིསྶཡཱལཱབྷོ. ཏཏོཡེཝ ཊཱིཀཱཡཾ ‘ཨནྟོཝསྶེ པན ཨནིསྶིཏེན ཝཏྠུཾ ན ཝཊྚཏཱི’ཏི ཝུཏྟཾ. ཏསྨཱཡེཝ ཙ ‘ཨནྟོཝསྶེ པནཱ’ཏིཨཱདཱིསུ ནིསྶཡདཱཡཀེ སཏི ནིབདྡྷཝཱསཾ ཝསིཏབྦཉྩ ནིསྶཡོ གཧེཏབྦོ ཙ ཧོཏཱིཏི གམནཀིརིཡཱཡ ཁཱིཡམཱནཏཱཝསེན ཙ-སདྡོ སམུཙྩཡོ གཧེཏབྦོ’’ཏི.

༢༣༥. བནྡྷཱིཡཏི ཨནེནཱཏི བནྡྷནཾ, ཀཱཡསྶ བནྡྷནཾ ཀཱཡབནྡྷནཾ, ནཏྠི ཀཱཡབནྡྷནམེཏསྶཱཏི ཨཀཱཡབནྡྷནོ. དུཀྐཊནྟི སཉྩིཙྩ ཝཱ ཨསཉྩིཙྩ ཝཱ པཝིསེཡྻ ཙེ, དུཀྐཊཾ. ཨསཏིཡཱ གཏོ ཡཏྠ སརཏི, ཏཏྠེཝ བནྡྷེཡྻཱཏི སམྦནྡྷོ. གཏོཏི ཨནྟོགཱམཾ གཏོ. སརིཏྭཱ ཡཱཝ ན བནྡྷཏི, ན ཏཱཝ པིཎྜཱཡ ཙརིཏབྦཾ.

༢༣༦. ‘‘པཊྚིཀཱ’’ཏིཨཱདིནཱ ¶ སབྦསངྒཱཧཀཾ ཀཱཡབནྡྷནཾ ནིདྡིསཏི. པཊྚིཀཱཏི པཀཏིཝཱིཏཱ ཝཱ མཙྪཀཎྚཀཁཛྫཱུརིཔཏྟཝཱཡིམཱ ཝཱ. སཱུཀརཱནཾ ཨནྟཾ སཱུཀརནྟཾ. ཨིདྷ པན ཏཾསདིསཾ ཝུཙྩཏི. ཙཏུརསྶཾ ཨཀཏྭཱ སཛྫིཏཾ མུདྡིཀཀཱཡབནྡྷནམྤི སངྒཧེཏྭཱ ‘‘ཨེཀཱ རཛྫཱུ’’ཏི ཝུཏྟཾ. ཏཾ པན རཛྫུཀཾ བནྡྷནྟེན ཨེཀགུཎམེཝ ཀཏྭཱ བནྡྷིཏུཾ ཝཊྚཏི, མཛ྄ཛྷེ བྷིནྡིཏྭཱ དིགུཎཾ ཀཏྭཱ བནྡྷིཏུཾ ན ཝཊྚཏི. དིགུཎཾ པན ཨཀཏྭཱ སཏཝཱརམྤི པུནཔྤུནཾ ཨཱཝིཛ྄ཛྷིཏྭཱ བནྡྷིཏུཾ ཝཊྚཏི, པཱམངྒསཎྛཱནཾ པན ཨེཀམྤི ན ཝཊྚཏི ¶ . བཧུརཛྫུཀེ ཨེཀཏོ ཀཏྭཱ ཨེཀེན ནིརནྟརཾ ཝེཋེཏྭཱ ཀཏཾ ‘‘བཧུརཛྫུཀ’’ནྟི ན ཝཏྟབྦཾ, ཏཾ ཝཊྚཏི. ཏདནུལོམིཀཱཏི ཏེསཾ པཊྚིཀཱསཱུཀརནྟཱནཾ དྭིནྣཾ དྭེ ཨིམེ ཡཐཱཀྐམམནུལོམིཀཱ.

༢༣༧-༨. པཊྚིཀཱ ཀཱིདིསཱི ཝཊྚཏཱིཏི ཨཱཧ ‘‘མཙྪཱ’’ཏིཨཱདི. པཊྚིཀཱ མཙྪཀཎྚཀཁཛྫཱུརིཔཏྟཱ ཝཱ མཊྛཱ ཝཱ ལབྦྷཱཏི སམྦནྡྷོ. ཀཎྚཀ-སདྡེན པཏྟ-སདྡེན ཙ ཏདཱཀཱརོ ཝུཙྩཏི, ཨུཔཙཱརཏོ ཧི མཙྪཱནཾ ཀཎྚཀཱཀཱརོ ཙ ཁཛྫཱུརཱིནཾ པཏྟཱཀཱརོ ཙ ཨེཏིསྶཱཏི སམཱསོ. མཊྛཱཏི པཀཏིཝཱིཏཱ. ཊཱིཀཱཡཾ པན ‘‘ཨེཏེ མཙྪཀཎྚཀཱདཡོ མཊྛཱ ཝིཀཱརརཧིཏཱ པཊྚིཀཱ ཙ ཏདནྟོགདྷཱཏི ཨདྷིཔྤཱཡོ’’ཏི ཝུཏྟཾ. ཀཐཾ ཏེསམནྟོགདྷཏཱ? ཡཏོ ཏཱནིཡེཝ པཊྚིཀཱ ནཱམཱཏི. ཏཐཱ ཙ ཝུཏྟཾ ཨཊྛཀཐཱཡཾ ‘‘པཀཏིཝཱིཏཱ ཝཱ མཙྪཀཎྚཀཝཱཡིམཱ ཝཱ པཊྚིཀཱ ཝཊྚཏཱི’’ཏི (ཙཱུལ༹ཝ. ཨཊྛ. ༢༧༨). ཨེཏྠ པན མཙྪཀཎྚཀེཡེཝ ཁཛྫཱུརིཔཏྟཾ པཝིཊྛཾ. ཙཏསྶོཔི དསཱ ལབྦྷཱཏི སམྦནྡྷོ. ཙཏསྶོཏི ཨུཀྐཊྛཔརིཙྪེདེན ཝུཏྟཾ, ཏསྨཱ ཏཏོ ཨཱུནཱཔི ཝཊྚནྟི. ཨནྟེཏི ཀཱཡབནྡྷནསྶ ཨུབྷཡནྟེ དིགུཎསུཏྟཀཾ ལབྦྷནྟི སམྦནྡྷོ. གུཎོ བནྡྷནབྷཱུཏཾ སུཏྟཀཾ གུཎསུཏྟཀཾ. ‘‘གུཎོ པཊལརཱསཱིསུ, ཨཱནིསཾསེ ཙ བནྡྷནེ’’ཏི ཧི ཨབྷིདྷཱནཔྤདཱིཔིཀཱ. དྭིནྣཾ གུཎསུཏྟཀཱནཾ སམཱཧཱརོ དིགུཎསུཏྟཀཾ. ཏཾ དསཱམུཁསྶ ཐིརབྷཱཝཱཡ ཀོཊྚེཏུཾ ཝཊྚཏི, ན སོབྷནཏྠཾ. ཏེནཱཧ ‘‘མཱལཱདི’’ནྟིཨཱདི.

མཱལཱདིཾ ཀཀྐཊཙྪཱདིཾ ཀུཉྫརཙྪཱདིཉྩ དསྶེཏྭཱ གུཎསུཏྟཀཀོཊྚིཏཱ པཊྚིཀཱ ན ཀཔྤཏཱིཏི སམྦནྡྷོ. ‘‘མཱལཱདི’’ནྟིཨཱདཱིསུ ཨཱདི-སདྡེན ཏཱདིསཾ ཡཾ ཀིཉྩི ཝིཀཱརརཱུཔཾ གཡ྄ཧཏི. ཀཀྐཊཱནཾ ཝིཡ ཨཙྪཱིནི, ཏཱནི ཨཱདཱིནི ཡསྶཱཏི སམཱསོ. ཏཐཱ ཀུཉྫརཙྪཱདིནྟི.

༢༣༩. གྷཊཀནྟི ¶ གྷཊཀཱཀཱརཝཊྚལེཁཱརཱུཔཾ. མཀརམུཁཱདིནྟི ཨེཏྠ མཀརམུཁཾ ནཱམ མཀརམུཁསཎྛཱནཾ ¶ . བིནྡུ པན ཨཱགམཝསེན ཝུཏྟོ. ཨཱདི-སདྡེན དེཌྜུབྷསཱིསཱདིཝིཀཱརརཱུཔཾ ཡཾ ཀིཉྩི སངྒཡ྄ཧཏི. དསཱམུཁེཏི དསཱནཾ མུཁབྷཱུཏེ ཨནྟེ ཨེཏཱནི ན ཀཔྤནྟཱིཏི སམྦནྡྷོ. ཝིདྷེ ཨུབྷནྟེ གྷཊཀཱ ལེཁཱ ཨཉྙཾ ཙིཏྟཀཉྩ ན ཀཔྤནྟཱིཏི སམྦནྡྷོ. གྷཊཀཱཏི གྷཊཀཏོ. ལེཁཱཏི ལེཁཱཡ. པཉྩམིཡཱ ལོཔོ. ཝིདྷེཏི ཀཱཡབནྡྷནསྶ པཱསནྟེ དསཱམཱུལེ ཏསྶ ཐིརབྷཱཝཏྠཾ ཀཏྟབྦེ དནྟཝིསཱཎཱདིམཡེ ཝིདྷེ.

༢༤༠. དེཌྜུབྷཀནྟི ཨུདཀསཔྤསཱིསསདིསཾ. མུརཛནྟི ནཱནཱཝཎྞེཧི སུཏྟེཧི མུརཛཝཊྚིསཎྛཱནཾ ཝེཋེཏྭཱ ཀཏཾ. ཊཱིཀཱཡཾ པན ‘‘མུརཛནྟི བཧུརཛྫུཀེ ཨེཀཏོ སངྐཌྜྷིཏྭཱ ཨེཀཱཡ རཛྫུཡཱ པལིཝེཋེཏྭཱ ཀཏརཛྫཱུ’’ཏི ཝུཏྟཾ, ཏཾ ‘‘བཧུརཛྫུཀེ ཨེཀཏོ ཀཏྭཱ’’ཏིཨཱདིནཱ ཧེཊྛཱ ཝུཏྟཨཊྛཀཐཱཝཙནེན ཝིརུཛ྄ཛྷཏི. མདྡཝཱིཎནྟི པཱམངྒསཎྛཱནཾ. ཀལཱབུཀནྟི བཧུརཛྫུཀཾ. ཏེསཾ ‘‘ན ཀཔྤཏཱི’’ཏི ཨིམིནཱ སམྦནྡྷོ. དྭེ མཛ྄ཛྷིམཱཏི མཛ྄ཛྷེ བྷཝཱ མུརཛམདྡཝཱིཎསངྑཱཏཱ དྭེ.

༢༤༡. གཎྛིཡོ ཙཱཔཱིཏི ཙཱིཝརསྶ གཎྛིཡོ ཙཱཔི. ཏམྨཡཱཏི ཏེཧི ཝེལུ༹ཨཱདཱིཧི ནིབྦཏྟཱ. པསངྒེན པནེཏཾ ཝུཏྟནྟི.

༢༤༢. ཛཱཏཱཛཱཏཱཏི ¶ དུཝིདྷཱཏི ཛཱཏཱ པཐཝཱི ཨཛཱཏཱ པཐཝཱིཏི པཐཝཱི དུཝིདྷཱཏི ཨཏྠོ. ཨིམིནཱ ཛཱཏཔཐཝིཉྩ ཨཛཱཏཔཐཝིཉྩ དསྶེཏི. ཏཱསཾ ཝིབྷཱགཾ དསྶེཏི ‘‘སུདྡྷཱ’’ཏིཨཱདིནཱ. སུདྡྷམཏྟིཀཔཾསུཀཱ ཙ ཨདཌྜྷཱ ཙ བཧུམཏྟིཀཔཾསུཀཱ ཙ ཙཱཏུམཱསཱདྷིཀོཝཊྛཔཾསུམཏྟིཀརཱསི ཙ ཛཱཏཱ པཐཝཱིཏི སམྦནྡྷོ. མཏྟིཀཱ ཙ པཾསུ ཙཱཏི དྭནྡོ. སུདྡྷཱ ཨཔྤསཀྑརཱདིཏཱཡ མཏྟིཀཱ པཾསཝོ ཡསྶཱཏི བཱཧིརཏྠོ. ཨདཌྜྷཱཏི ཨུདྡྷནཔཙནཱདིཝསེན ཏཐཱ ཏཐཱ ¶ ཨདཌྜྷཱ. སཱ པན ཝིསུཾ ནཏྠི, སུདྡྷམཏྟིཀཱདཱིསུ ཨཉྙཏརཱཝ ཝེདིཏབྦཱ. ཙཏྟཱརོ མཱསཱ, ཏེཧི སཧིཏོ ཨཏིརེཀོ ཀཱལོ, ཏསྨིཾ ཨོཝཊྛོཏི སམཱསོ. ཨོཝཊྛོཏི ཡེན ཀེནཙི ཨུདཀེན ཨོཝཊྛོ. བུདྷཱ པན ‘‘ཨཱཀཱསཏོ ཝུཊྛཨུདཀེནེཝ, ན ཨཉྙཏྠ པཧརིཏྭཱ པཏིཏབིནྡུནཱ’’ཏི ཝདནྟི, ‘‘ཨོཝཊྛོ’’ཏི སཱམཉྙེན ཝུཏྟཏྟཱ ཙ ‘‘པོཀྑརཎིཡཱ ཋིཏཏནུཀདྡམོ ཝཊྚཏི, བཧལོ ཏུ ན ཝཊྚཏཱི’’ཏི (པཱཙི. ཨཊྛ. ༨༦) ཝུཏྟཏྟཱ ཙ ‘‘ཝིནཡཝིནིཙྪཡེ སམྤཏྟེ གརུཀེ ཋཱཏབྦ’’ནྟི ཝིནཡལཀྑཎཏོ ཙ ན ཏཾ ཡུཛྫཏཱིཏི ཨམྷཱཀཾ ཁནྟི. པཾསུམཏྟིཀཱནཾ རཱསི པཾསུམཏྟིཀརཱསི. ཙཏུ…པེ… ཝཊྛོ པཾསུམཏྟིཀརཱསི ཡསྶཱཏི ཨཉྙཔདཏྠོ, ཀམྨདྷཱརཡོ ཝཱ.

༢༤༣. ཝཱལུཀཱ ཙ དཌྜྷཱ ཙ ཡེབྷུཡྻསཀྑརཱདིམཧཱིཔི ཙ ཙཱཏུམཱསོམཝཊྛཀོ ཝུཏྟརཱསི ཙ དུཏིཡཱ བྷཱུམཱིཏི སམྦནྡྷོ སཀྑརཱ ཙ པཱསཱཎཱ ཙ མརུམྦཱ ཙ ཀཐལཱ ཙ ཝཱལུཀཱ ཙཱཏི དྭནྡོ. སུདྡྷཱ སཀྑར…པེ… ཝཱལུཀཱ ཡསྶཱཏི ཝིགྒཧོ. ཧཏྠམུཊྛིནཱ གཧེཏབྦཔྤམཱཎཱ སཀྑརཱ, ཏཏོ ཨུཔརི པཱསཱཎཱ, ཀཊསཀྑརཱ མརུམྦཱ, ཀཔཱལཁཎྜཱནི ཀཐལཱཏི ཝེདིཏབྦཱ. དུཏིཡཱཏི ཨཛཱཏཱ. ཝུཏྟརཱསཱིཏི ཝུཏྟོ མཏྟིཀཔཾསུསིརཱ.

༢༤༤. ཀཱིདིསཱི ¶ ཡེབྷུཡུམཏྟིཀཱདཱིཏི ཨཱཧ ‘‘དྭེ བྷཱགཱ’’ཏིཨཱདི. ཡསྶ བྷཱུམིཡཱཏི ཡསྶཱ བྷཱུམིཡཱ. སེསེསུཔཱིཏི ཡེབྷུཡྻཔཾསུཡེབྷུཡྻསཀྑརཡེབྷུཡྻཔཱསཱཎཱདཱིསུ.

༢༤༥. ‘‘པཱཙིཏྟཱི’’ཏིཨཱདིནཱ ཏཏྠ ཝིནིཙྪཡཾ དསྶེཏི. ཛཱཏེ ཛཱཏསཉྙིསྶ ཁཎནེ པཱཙིཏྟཱིཏི སམྦནྡྷོ. ཛཱཏེཏི ཛཱཏེ བྷཱུམིབྷཱགེ, ལིངྒཝིཔལླཱསོ ཝཱ, ཛཱཏཱཡཱཏི ཝུཏྟཾ ཧོཏི. ཛཱཏེ དྭེལ༹ྷསྶ ཝིམཏིསྶ དུཀྐཊནྟི སམྦནྡྷོ. ཛཱཏེ ཨཛཱཏསཉྙིསྶ ཨནཱཔཏྟི. ཏཐཱ ཨཱཎཱཔནེ ཨནཱཔཏྟཱིཏི ཡོཛནཱ. ཨཛཱཏསཉྙིསྶཱཏི ཨཛཱཏཱཏི སཉྙཱ ཨཛཱཏསཉྙཱ, སཱ ཨསྶ ཨཏྠཱིཏི ཨཛཱཏསཉྙཱི, ཏསྶ.

༢༤༦. ཨེཀཱཡཱཎཏྟིཡཱ ཨེཀཱཏི སཙེ སཀིཾ ཨཱཎཏྟོ དིཝསམྤི ཁཎཏི, ཨཱཎཱཔཀསྶ ཨེཀཱ ཨེཝ ཨཱཔཏྟཱིཏི ཨཏྠོ. ཝཱཙསོ ཨཱཔཏྟཱིཏི སམྦནྡྷོ. ཝཱཙསོཏི ཝིཙྪཱཡཾ སོ, ཝཱཙཱཡ ཝཱཙཱཡཱཏི ཨཏྠོ.

༢༤༧. ‘‘ཨིམཾ ཋཱནཾ ཁཎ ཝཱ’’ཏིཨཱདིནཱ ཡོཛེཏབྦཾ. ‘‘ཨེཏྠ ཨགྒིཾ ཛཱལེཧི ཝཱ’’ཏི ཡོཛནཱ ¶ . ‘‘ཝཏྟུ’’ནྟི ཨིདཾ ‘‘ན ཝཊྚཏཱི’’ཏི ཨིམསྶ ཀཏྟུཔདཝཙནནྟི ཨཏྠོ. ཨཐ ཝཱ ‘‘ཨིམཾ ཋཱནཾ ཁཎཱ’’ཏིཨཱདིཔྤཀཱརོ ཝཙནཱཡ ན ཝཊྚཏཱིཏི ཨཏྠོ. ནིཡམེཏྭཱཏི ཨིམིནཱ ‘‘ཨཱཝཱཊཾ ཁཎ, ཀནྡཾ ཁཎཱ’’ཏིཨཱདིནཱ ཨནིཡམེཏྭཱ ཝཏྟུཾ ཝཊྚཏཱིཏི དཱིཔེཏི.

༢༤༨. ‘‘ཨིམསྶ ཐམྦྷསྶ ཨཱཝཱཊཾ ཛཱན ཝཱ, ཀཔྤིཡཾ ཀརོཧི ཝཱ’’ཏི ཙ ‘‘མཏྟིཀཾ ཛཱན ཝཱ, མཏྟིཀཾ ཨཱཧར ཝཱ, མཏྟིཀཾ ཀཔྤིཡཾ ཀརོཧི ཝཱ’’ཏི ཙ ཨེདིསཾ ཝཙནཾ ཝཊྚཏཱིཏི སམྦནྡྷོ. ཨེཏཾ ཝིཡ དིསྶཏཱིཏི ཨེདིསཾ, ཀིཾ ཏཾ? ‘‘མཏྟིཀཾ དེཧཱི’’ཏིཨཱདིཀཾ ཨུཔམེཡྻཾ. ‘‘མཏྟིཀཾ ཛཱནཱ’’ཏིཨཱདིཀཾ པན ¶ ཨུཔམཱནཾ, ཏེསཾ ཨུཔམཱནོཔམེཡྻཱནཾ ཡཱ ཀཔྤིཡསངྑཱཏཱ སམཱནདྷམྨཏཱ, སཱ ཨུཔམཱ. ཏཐཱ ཙ ཝུཏྟཾ ཨམྷེཧི སུབོདྷཱལངྐཱརེ ‘‘ཨུཔམཱནོཔམེཡྻཱནཾ, སདྷམྨཏྟཾ སིཡོཔམཱ’’ཏི. ཨཉྙཐཱ ཨུཔམཱནབྷཱུཏཨཀྑརཱཝལི༹སདིསཱིཡེཝ, ཨཀྑརཱཝལི༹ ཨུཔམེཡྻཾ སིཡཱ. ཝཱཀྱེ ཝིཡ-སདྡོཡེཝ པན ཨུཔམཱནཾ ཛོཏེཏཱིཏི ཝེདིཏབྦཾ.

༢༤༩. པཐཝིཡཱ ཨསམྦདྡྷཾ སུཀྑཀདྡམཨཱདིཀཉྩ ཏནུཀཾ ཨུསྶིཉྩནཱིཡཀདྡམཉྩ ཀོཔེཏུཾ ལབྦྷནྟི སམྦནྡྷོ. ཀདྡམཨཱདིཀནྟི ཨེཏྠ ཨཱདི-སདྡེན ཨུདཀེན གཏཊྛཱནེ ཨུདཀཔཔྤཊཀོ ནཱམ ཧོཏི, ཡཾ ཝཱཏཔྤཧཱརེན ཙལཏི, ཏཾ སངྒཎྷཱཏི. ཨུསྶིཉྩནཱིཡཀདྡམནྟི གྷཊེཧི ཨུསྶིཉྩིཏུཾ སཀྐུཎེཡྻཀདྡམཾ.

༢༥༠. ‘‘ཙཱཏུམཱསཱདྷིཀོཝཊྛཾ གཎྜུཔྤཱད’’ནྟིཨཱདིནཱ སམྦནྡྷིཏབྦཾ. གཎྜཾ པཐཝིཡཱ གཎྜསདིསཾ མཏྟིཀརཱསིཾ ཨུཔྤཱདེནྟཱིཏི གཎྜུཔྤཱདཱ. ཨིདྷ པན ཏེཧི ཨུཊྛཱཔིཏོ གཱུཐོ ‘‘གཎྜུཔྤཱད’’ནྟི ནིདྡིཊྛོ. པོཏྠཀེསུ པན ‘‘གཎྜུཔྤཱདོ’’ཏི པཱཋོ དིསྶཏི. ཏཾ ‘‘ན ཀོཔཡེ’’ཏི ཨེཏྠ ཀམྨེན བྷཝིཏབྦནྟི ན ཡུཛྫཏི. མཱུསིཀུཀྐིརནྟི མཱུསིཀཱནཾ ཨུཀྐིརོ ཁཎིཏྭཱ བཧི ཀཏཾ པཾསུརཱསི མཱུསིཀུཀྐིརོཏི. ལེཌྜཱདིནྟི ཨེཏྠ ལེཌྜུནྟི ཀསིཏཊྛཱནེ ནངྒལཙྪིནྣམཏྟིཀཱཔིཎྜཾ. ཨཱདི-སདྡེན གཱཝཱིནཾ ཁུརཙྪིནྣཾ ཀདྡམཾ སངྒཎྷཱཏི.

༢༥༡-༢. ཨུདཀསནྟིཀེ པཏིཏེ ཝཱཔིཨཱདཱིནཾ ཀཱུལེ ཙ པཱསཱཎེ ལགྒེ རཛེ ཙ ནཝསོཎྜིཡཱ པཏིཏེ རཛེ ཙ ཨབྦྷོཀཱསུཊྛིཏེ ཝམྨིཀེ ཙ མཏྟིཀཱཀུཊྚེ ཙ ཏཐཱཏི སམྦནྡྷོ. ཏཐཱཏི ཨིམིནཱ ཀཱུལཱདིཀེ ཙཱཏུམཱསཱདྷིཀོཝཊྛཾ ཝཱ སབྦཾ ན ཀོཔཡེཏི ཨིདཾ ཨཏིདིསཏི. ཨིཊྛཀཀུཊྚཀོ ཝཊྚཏཱིཏི ཨཱཧ ‘‘ཡེབྷུཡྻཱ’’ཏིཨཱདི. ཡེབྷུཡྻེན ཀཐལཱ ཨེཏྠཱཏི ཡེབྷུཡྻཀཐལཱ, བྷཱུམི ¶ , ཏིཊྛཏི ཨེཏྠཱཏི ཋཱནཾ ¶ , ཡེབྷུཡྻཀཐལཱཡ ཋཱནཾ, ཏསྨིཾ. ཨིཊྛཀཀུཊྚཀོ ཡེབྷུཡྻཀཐལཱ ཝིཡ ཧོཏཱིཏི ཨདྷིཔྤཱཡོ. ཀུཊྚཀཾ ཀོཔེནྟསྶ ཨནཱཔཏྟཱིཏི ཨདྷིཔྤཱཡོ. ཨིཊྛཀཱཡ ཀཏོ ཀུཊྚཀོཏི སམཱསོ.

༢༥༣-༥. སཉྩཱལེཏྭཱ བྷཱུམིཾ ཝིཀོཔཡཾ ཐམྦྷཱདིཾ གཎྷིཏུཾ ཝཱཏི སམྦནྡྷོ. ཏཏྠ ཝིཀོཔཡནྟི ཀརཎཏྠེ པཙྩཏྟཝཙནཾ, ཝིཀོཔཡཏཱཏི ཨཏྠོ. ཨཉྙཐཱ ཀཐམེཏྠ པཋམཱཔསངྒོ. པཋམཱ ཧི ‘‘བྷཝ’’ནྟི ཝུཏྟེ སིཡཱ, ན ཙ ‘‘གཎྷིཏུ’’ནྟིཨཱདཱིསུ ཏུཾ-པཙྩཡེཧི ཝུཏྟོ ཀོཙི ཨཏྠི, ཡདཱ བྷཱཝེ ཏུཾ-པཙྩཡོ, ཏདཱ ན ཀིཉྩི ཝུཏྟཾ ཧོཏཱིཏི, ‘‘ན ཀཔྤཏཱི’’ཏི པདྷཱནཀིརིཡཱཡཔི ཧེཊྛཱ ཝུཏྟནཡེན ཀཏྟཱ ཨཉྙོཡེཝཱཏི ཨེཝཾ སབྦཏྠ. ཏཏིཡཏྠེ ཏུ སཏི ཨིཏོ ཙིཏོ སཉྩཱལེཏྭཱ བྷཱུམིཾ ཝིཀོཔཡཏཱ ཐམྦྷཱདིཾ གཎྷིཏུཾ ན ཀཔྤཏཱིཏི ཨཏཱིཝ ཡུཛྫཏི. དྷཱརཱཡཱཏི པསྶཱཝདྷཱརཱཡ. ཝིསམཾ སམཾ ཀཱཏུཾ སམྨུཉྫནཱིཧི གྷཾསིཏུཾ ཝཱཏི ཡོཛནཱ. ཝིསམནྟི ཝིསམཊྛཱནཾ. ‘‘པདཾ དསྶེསྶཱམཱི’’ཏི བྷཱུམིཾ བྷིནྡནྟོ ཙངྐམིཏུཾ ཝཱཏི སམྦནྡྷོ. བྷིནྡནྟོཏི བྷིནྡཏཱ. ཀཎྜུརོགཱི ཝཱ ཏཊཱདཱིསུ ཨངྒཔཙྩངྒཾ གྷཾསིཏུནྟི ཡོཛནཱ. ཀཎྜུརོགཱིཏི ཀཎྜུརོགིནཱ. ཙ-སདྡོ ཨཝདྷཱརཎེ.

༢༥༦-༧. སུདྡྷཙིཏྟསྶཱཏི པཐཝིབྷེདཱདྷིཔྤཱཡཝིརཧེན པརིསུདྡྷཙིཏྟསྶ.

༢༥༨. ཨགྒིསྶ ཨནུཔཱདཱནེ ཀཔཱལེ ཝཱ ཨནུཔཱདཱནཱཡ ཨིཊྛཀཱཡ ཝཱ ཨགྒིཾ པཱཏེཏུཾ ཝཱ ཨཝསེ སཏི བྷཱུམིཡཾ པཱཏེཏུཾ ཝཱ ལབྦྷཏེཏི སམྦནྡྷོ. ཨུཔཱདཱནཾ ཨིནྡྷནཾ, ན ཨུཔཱདཱནཾ ཨནུཔཱདཱནཾ, ཏསྨིཾ. ཝསོ པབྷུཏྟཾ. ‘‘ཝསོ པབྷུཏྟེ ཨཱཡཏྟེ’’ཏི ཧི ནིགྷཎྜུ. ན ཝསོ ཨཝསོ, ཏསྨིཾ ཨཔབྷུཏྟེཏི ¶ ཨཏྠོ. པཏིཏཊྛཱནེཡེཝ ཨུཔཱདཱནཾ དཏྭཱ ཨགྒིཾ ཀཱཏུཾ ཝཊྚཏི. སུཀྑཁཱཎུཀསུཀྑརུཀྑཱདཱིསུ ཙ ཨགྒིཾ དཱཏུཾ ན ཝཊྚཏི. སཙེ པན ‘‘པཐཝིཾ ཨཔྤཏྟམེཝ ནིབྦཱཔེཏྭཱ གམིསྶཱམཱི’’ཏི དེཏི, ཝཊྚཏི, པཙྪཱ ནིབྦཱཔེཏུཾ ན སཀྐོཏི, ཨཝིསཡཏྟཱ ཨནཱཔཏྟི. ‘‘བྷཱུམིཡཾ པཱཏེཧཱི’’ཏི ཨེཝམྤི ཝཏྟུཾ ན ཝཊྚཏཱིཏི.

༢༥༩-༦༠. ཚཏྟེ ¶ ཨནྟོ བཧི ཙ པཉྩཝཎྞེཧི སུཏྟེཧི སིབྦིཏུཉྩ པཎྞེ གིརིཀཱུཊཨཌྜྷཙནྡཱདིཾ ཚིནྡིཏུཉྩ ན ཝཊྚཏཱིཏི སམྦནྡྷོ. ཚཏྟེཏི ཏཱལཔཎྞེ ཚཏྟེ. གིརིཀཱུཊཾ ནཱམ མཀརདནྟཀཾ, ཨཱདི-སདྡེན ཏཱདིསཾ ཨཉྙཾ ཝིཀཱརརཱུཔཾ སངྒཧིཏཾ. གྷཊཀནྟི གེཧཏྠམྦྷེསུ ཝིཡ ཀཡིརམཱནཾ གྷཊཀཾ. དཎྜེཏི ཚཏྟདཎྜེ. ལེཁཱཏི ཏཧིཾ ཏཧིཾ དིནྣཱ ལེཁཱ. སཱདིསནྟི དཱིགྷེན ནིདྡིཊྛཾ. བུནྡམྷི མཱུལེ.

༢༦༡. ཐིརཏྠཾ ཚཏྟེ ཨེཀཝཎྞེན སིབྦིཏུཾ ཝཱ པཉྫརཾ ཝིནནྡྷིཏུཾ ཝཱ ཝཊྚཏཱིཏི སམྦནྡྷོ. སིབྦིཏུནྟི ཨནྟོ བཧི ཙ སིབྦིཏུཾ. ཨེཀཝཎྞེནཱཏི ནཱིལཱདིནཱ ཨེཀཝཎྞེན. པཉྫརནྟི ཚཏྟདཎྜགཱཧཀསལཱཀཔཉྫརཾ. ཐིརཏྠནྟི ཨིམིནཱ ན ཝཎྞམཊྛཏྠཱཡཱཏི དསྶེཏི. བནྡྷིཏུཾ དཎྜེ ལེཁཱ ཝཊྚཏཱིཏི སམྦནྡྷོ. བནྡྷིཏུནྟི ཝཱཏཔྤཧཱརེན ཨཙལནཏྠཾ ཚཏྟམཎྜལིཀཾ རཛྫུཀེཧི གཧེཏྭཱ བནྡྷནཏྠཱཡ. ལེཁཱཝཱཏི ཝལཡམིཝ ཨུཀྐིརིཏྭཱ ཀཏཱ ལེཁཱ ཨེཝ. ཝཊྚཏཱིཏི ཡདིཔི ན བནྡྷཏི, རཛྫུཀེཧི བནྡྷིཏུཾ ཡུཏྟཊྛཱནཏྟཱ ཝཊྚཏི.

༢༦༢. ཙཱིཝརེ ཨནྟེ ཝཱཔི པཊྚམུཁེ ཝཱཔི ཝེཎིཔི ཝཱ སངྑལིཀཱཔི ཝཱ ཨཉྙཾ སཱུཙིཝིཀཱརཾ ཝཱ པཱལི༹ཀཎྞིཀཨཱདིཀཾ ཀཔྤབིནྡུཝིཀཱརམྤི ¶ ཝཱ ན ཙ ཀཔྤཏཱིཏི སམྦནྡྷོ. ཨནྟེཏི ཙཱིཝརཔརིཡནྟེ, ཨནུཝཱཏེཏི ཝུཏྟཾ ཧོཏི. པཊྚམུཁེཏི པཊྚཀོཊིཡཾ, དྭིནྣཾ པཊྚཱནཾ སངྒྷཊིཏཊྛཱནཾ སནྡྷཱཡེཏཾ ཝུཏྟཾ. ཝེཎཱིཏི ཝརཀསཱིསཱཀཱརེན སིབྦནཾ. སངྑལིཀཱཏི བིལཱ༹ལབནྡྷནཱཀཱརེན སིབྦནཾ. ཨཉྙཾ སཱུཙིཝིཀཱརཾ ཝཱཏི ཙཱིཝརམཎྜནཏྠཱཡ ཀཡིརམཱནཾ ཨཉྙཾ ཡཾ ཀིཉྩི སཱུཙིཀམྨཝིཀཱརཾ ཝཱ. ཊཱིཀཱཡཾ པན ‘‘སཏཔདིསདིསཾ ཨཉྙཾ ཝཱ སཱུཙིཝིཀཱརཾ ན ཀཔྤཏཱི’’ཏི སཱམཉྙེན ཝུཏྟཾ. ‘‘ཙཱིཝརམཎྜནཏྠཱཡ ནཱནཱསུཏྟཀེཧི སཏཔདིསདིསཾ སིབྦནྟཱ ཨཱགནྟུཀཔཊྚཾ ཋཔེནྟི, ཨཉྙམྤི ཡཾ ཀིཉྩི སཱུཙིཀམྨཝིཀཱརཾ ཀརོནྟི, སབྦཾ ན ཝཊྚཏཱི’’ཏི ཨཊྛཀཐཱཡཾ ཝུཏྟཏྟཱ པན ནཱནཱཝཎྞེཧི ཝཱ ཧོཏུ, ཨེཀཝཎྞེན ཝཱ ཧོཏུ, ཙཱིཝརམཎྜནཏྠཱཡ སཾསིབྦནྟཱནཾ སཱུཙིཀམྨཝིཀཱརཾ སནྡྷཱཡ ཝུཏྟནྟི ཙཱིཝརེསུ ཕཱལིཏཊྛཱནསྶ ཐིརབྷཱཝཏྠཾ སཏཔདིསདིསམྤི སིབྦིཏུཾ ཝཊྚཏཱིཏི ཨམྷཱཀཾ ཁནྟི. པཱལི༹-སདྡེན, ཀཎྞིཀ-སདྡེན ཙ ཀཔྤ-སདྡལོཔེན ཝཱ ཨུཔཙཱརེན ཝཱ པཱལི༹ཀཔྤཱདཡོཝ གཧིཏཱ. པཱལི༹ ཙ ཀཎྞིཀཱ ཙ པཱལི༹ཀཎྞིཀཱཡོ, ཏཱ ཨཱདི ཡསྶ ཨཉྙསྶ ཏཱདིསསྶཱཏི ཝིགྒཧོ. ཏཏྠ ནཱིལཱཝལི༹ཨཱདིསཎྛཱནཱཡ ¶ བིནྡུཔནྟིཡཱ ཡཐཱ སོབྷཏི, ཏཐཱ ཀཡིརམཱནོ པཱལི༹ཀཔྤོ. ཏཐེཝ བིནྡུསམཱུཧེ ཀཏྠཙི དསྶེཏྭཱ ཀཡིརམཱནོ ཀཎྞིཀཀཔྤོ.

༢༦༣. གཎྛིཔཱསཀཔཊྚཱཏི གཎྛིནོ ཙ པཱསཀསྶ ཙ པཏིཊྛཱནཊྛཱནེ ཋཔེཏབྦཱ པཊྚཱ. ཝཊྚཏཱིཏི ཨེཏྠ ‘‘གཎྛིཔཱསཀཱ’’ཏི ཀཏྭཱ ‘‘ཙཏུཀོཎཱཝ ཝཊྚནྟཱི’’ཏི ཨཏྠཏོ ཝཙནཾ ཝིཔལླཱསེཏྭཱ ཡོཛེཏབྦཾ. ཨགྒྷིཡནྟི ཙེཏིཡསཎྛཱནེན སིབྦནཾ. མཱུལེ ཙ ཨགྒེ ཙ ཨེཀསདིསཾ ཀཏྭཱ མུགྒརཱཀཱརེན སིབྦནཾ མུགྒརོ. ཝིཀཱརནྟི ཝིཀཱརོ, ལིངྒཝིཔལླཱསེན ཝུཏྟཾ. ཨེཏྠཱཏི གཎྛིཔཱསཀཔཊྚེསུ.

༢༦༤. ཀོཎསུཏྟཱཏི ¶ ནཔུཾསཀནིདྡེསོ, གཎྛིཔཱསཀཔཊྚཱནཾ ཀོཎེཧི ནཱིཧཊསུཏྟཀོཊིཡོ. པཱིལ༹ཀཱཏི ཏཱནིཡེཝ ནིཝཏྟེཏྭཱ པཱིལ༹ཀཱཀཱརེན ཀཏཱནི. དུཝིཉྙེཡྻཱཝཱཏི ཏེསཾ ཨནྟེསུ ཨེཀཝཱརཾ གཎྛིཀརཎེན ཝཱ པུན ནིཝཏྟེཏྭཱ སིབྦནེན ཝཱ དུཝིཉྙེཡྻཱ ཨེཝ. གནྡྷཾ ཏེལཾ ཝཱཏི གནྡྷཾ ཝཱ ཏེལཾ ཝཱ. ཀཉྩིཀཔིཊྛཁལིཀཨཱདཱིནིཔི ཝཊྚནྟི.

༢༦༥. མཎིནཱཏི མསཱརགལླཱདིཔཱསཱཎེན. ན ཙ གྷཊྚེཡྻཱཏི ནེཝ གྷཊྚེཡྻ. ཨཉྙེན ཝཱཏི མུགྒརམུསལཱདིནཱ. ཨཾསབདྡྷཀཀཱཡབནྡྷནཱནི པན ཏཐཱ ཀཱཏུཾ ཝཊྚཏི. དོཎིཡཾ ཀཏྭཱ ན ཙ གྷཾསེཡྻཱཏི པཀྐརཛནཱཀིརཎདོཎིཡཾ ཋཔེཏྭཱ བྷཱུམིཡཾ ཛཎྞུཀཱནི ནིཧནྟྭཱ ཨིཏོ ཙིཏོ ཙ ཨཱཝིཛ྄ཛྷིཏྭཱ ནེཝ གྷཾསེཡྻཱཏི ཨཏྠོ.

༢༦༦-༧. ཀཎྞཀོཎཀསུཏྟཱནཱིཏི ཙཱིཝརརཛནཀཱལེ ལགྒནཏྠཱཡ ཨནུཝཱཏེ ཙཏཱུསུ ཀོཎེསུ ཙ པཱསཀཾ ཀཏྭཱ བནྡྷིཏཱནི སུཏྟཱནི, ཡཱནི ‘‘ཨནུཛཱནཱམི, བྷིཀྑཝེ, ཀཎྞསུཏྟཀ’’ནྟི (མཧཱཝ. ༣༤༤) ཨེཝཾ ཨནུཉྙཱཏཱནི. ཀཎྞསངྑཱཏཱ ཀོཎཱ ཀཎྞཀོཎཀཱ, ཏེསུ སུཏྟཱནི. གཎྛིཀཔཱསཀཔཊྚེསུ པན ཀཎྞཀོཎཀསུཏྟཱནཾ དུཝིཉྙེཡྻཱནམེཝ ཀཔྤིཡཏཱ ཧེཊྛཱ ཝུཏྟཱཏི ཙཱིཝརེ རཏྟེཡེཝ ཏེསཾ ཚིནྡིཏབྦཏཱ ནཏྠི, ཀཎྞཀོཎཀསུཏྟཱནཾ ཚིནྡིཏབྦཏཱཡ ཝུཏྟཏྟཱ ཨནུཝཱཏེཧི ནིཀྑམིཏསུཏྟཱནིཔི ཚིནྡིཏབྦཱནཱིཏི ཝེདིཏབྦཾ. དྷམྨཀརཎེ ཚཏྟཝཊྚིཡཾ ལེཁཾ ཋཔེཏྭཱ ལེཁཱ ན ཝཊྚཏཱིཏི ཡོཛནཱ. ཚཏྟཝཊྚིཡནྟི ཚཏྟསྶ མུཁཝཊྚིཡཾ. ལེཁཱཏི ཨུཔརི ཝཱ ཧེཊྛཱ ཝཱ ཀུཙྪིཡཾ ཝཱ ཨཉྙཱ ལེཁཱ. ཀུཉྩིཀཱཡ ཙ པིཔྥལེ ཙ མཎིཀཱ ཙ པཱིལ༹ཀཱ ཙ ན ཝཊྚནྟཱིཏི ¶ སམྦནྡྷོ. མཎིཀཱཏི ཨེཀཱ ཝཊྚམཎི. པཱིལ༹ཀཱཏི སཱསཔམཏྟིཀཱ མུཏྟརཱཛིསདིསཱ བཧུཝཊྚལེཁཱ. དཎྜམྷཱིཏི པིཔྥལདཎྜཀེ.

༢༦༨-༩. ཨརཎིཡཾ ¶ མཱལཱདི ཙ པཏྟམཎྜལེ བྷིཏྟིཀམྨཉྩ ན ཝཊྚཏཱིཏི སམྦནྡྷིཏབྦཾ. ཨརཎིཡནྟི ཨུཏྟརཱརཎི ཨདྷརཱརཎི ཨརཎིདྷནུཀཉྩ སཱམཉྙེན གཧིཏཾ. པཏྟམཎྜལེཏི ཏིཔུསཱིསཱདིམཡེ པཏྟམཎྜལེ. ཨེཏྠ པན མཀརདཎྜཀཾ ཝཊྚཏི. ཧེཊྛཱཏི ཀཏྟརཡཊྛིཡཱ ཧེཊྛཱ. ཨུདྡྷནྟི ཏསྶཱཡེཝ ཨུཔརི.

༢༧༠-༣. སམྨུཉྫནིམྷཱིཏི སམྨུཉྫནིཡཱ ལིངྒཝིཔལླཱསོ. ཨཝཱརིཏནྟི ཨིཏྠིརཱུཔཾ པན ཝཱརིཏཾ. སོཝཎྞམཡམྤཱིཏི སུཝཎྞམཡམྤི. ཝིསཱཎནཱལི༹ ནཱམ ཝིསཱཎམཡཱ ནཱལི༹. ཨེཏྠ པན ཨཝུཏྟཱནིཔི ཡཱནི ཀཱནིཙི ཨཱརཀཎྜཀདནྟཀཊྛཚེདནཔཱནཱིཡགྷཊཔཱནཱིཡཨུལུ༹ངྐཙུཎྞབྷཱཛནཱདཱིནི ཝུཏྟཱནཾ ཨནུལོམཱནཱིཏི ཝེདིཏབྦཱནི. ཡོ པནེཏྠ ཝིནཡཉྙཱུ ཏཱདིསཾ པརིཀྑཱརཾ དིསྭཱ ཚིནྡེཡྻ ཝཱ ཚིནྡཱཔེཡྻ ཝཱ, ཨནུཔཝཛྫོ སོཏི ཝེདིཏབྦནྟི.

༢༧༤-༥. ཛནསྶ བྷེསཛྫཾ ཀཱཏུཾ དཱཏུཾ ཝཏྟུཉྩ ན ལབྦྷཏཱིཏི སམྦནྡྷིཡཾ. ལབྦྷཏཱིཏི ཨེཏྠ ‘‘བྷིཀྑུནཱ’’ཏི ཀཏྟཱ ‘‘བྷེསཛྫ’’ནྟི ཝུཏྟཀམྨཾ. ནནུ ཙ ཀཱཏུནྟི བྷཱཝསཱདྷནཏྟཱ ཏསྶ ཨཝུཏྟཀམྨེནཱཔི བྷཝིཏབྦཾ བྷཱཝེ ཝིཧིཏཀིཏཀཔྤཙྩཡཱནཾ པཡོགེ ཀམྨཀཱརཀསྶཱཔི ཨིཙྪིཏབྦཏྟཱཏི? སཙྩཾ, ཏཐཱཔི པདྷཱནབྷཱུཏཀམྨསཏྟིཡཱ ཨབྷིདྷཱནེ སཏི ཨཔྤདྷཱནཀིཏཀཀིརིཡཱབྷིསམྦནྡྷེན གུཎཱིབྷཱུཏཱ ཀམྨསཏྟི ཨབྷིཧིཏཱ ཝིཡ ཝིཉྙཱཡཏི. ཏཐཱ ཙ ཝུཏྟཾ ཨམྷེཧི ཡོགཝིནིཙྪཡེ ‘‘པདྷཱནཱནུཡཱཡིཏཱཡ ཛནཝོཧཱརཱཡ པདྷཱནསཏྱཱབྷིདྷཱནེ གུཎསཏྟི ཨབྷིཧིཏཱ ཝིཡ པཀཱསཏཱི’’ཏི. ཛནསྶཱཏི ཨཱགཏཱགཏཛནསྶ. སཧདྷམྨཱིནཉྩ པིཏཱུནཉྩ ཏདུཔཊྛཱཀབྷིཀྑུནིསྶིཏབྷཎྜཱུནཉྩ ཝེཡྻཱཝཙྩཀརསྶ ཙ བྷིཀྑཱཙརིཡཝིཉྙཏྟིསཀེཧི ¶ བྷེསཛྫཀརཎཾ ལབྦྷནྟི སམྦནྡྷོ ¶ . ཏཏྠ སཧདྷམྨིནནྟི སཧ ཙརིཏབྦོ དྷམྨོ སཱིལསདྡྷཱཔཉྙཱསངྑཱཏོ སཧདྷམྨོ, སོ ཨེཏེསམཏྠཱིཏི སཧདྷམྨིནོ, བྷིཀྑུ བྷིཀྑུནཱི སིཀྑམཱནཱ སཱམཎེརོ སཱམཎེརཱིཏི པཉྩ, ཏེསཾ. པིཏཱ ཙ མཱཏཱ ཙ པིཏརོ ཨེཀསེསནཡེན, ཨུབྷིནྣཾ སཱམཉྙནིདྡེསོ ཝཱ, ཏེསཾ. བྷིཀྑུནིསྶིཏོ ནཱམ ཡོ ཝིཧཱརེ སབྦཀམྨཱནི ཀརོནྟོ བྷིཀྑུཾ ནིསྶཱཡ ཝསཏི. བྷཎྜུ ནཱམ ཡོ པབྦཛྫཱཔེཀྑོ ཡཱཝ པཏྟཙཱིཝརཾ པཊིཡཱདིཡཏི, ཏཱཝ ཝིཧཱརེ ཝསཏི, སོ པཎྜུཔལཱསོ. ཝེཡྻཱཝཙྩཀརསྶཱཏི ཨཏྟནོ ཨུཔཊྛཱཀསྶ. ཨེཏེསུ པན མཱཏཱཔིཏརོ སཙེ རཛྫེཔི ཋིཏཱ པཙྩཱསཱིསནྟི, ཨཀཱཏུཾ ན ཝཊྚཏི. མཱཏརཾ ཨནཱམསནྟེན སབྦཾ པརིཀམྨཾ ཀཱཏབྦཾ. པིཏཱ པན སཧཏྠེན ནཧཱཔནསམྦཱཧནཱདཱིནི ཀཏྭཱ ཨུཔཊྛཱཏབྦོ.

༢༧༦. པིཏཱ ཙ མཱཏཱ ཙ བྷཱཏཱ ཙ བྷགིནཱི ཙཱཏི དྭནྡོ པིཏཱ…པེ… བྷགིནིཡོ. མཧནྟོ ཙ ཙཱུལོ༹ ཙ, མཧཱཙཱུལཱ༹ ཙ ཏེ པིཏཱ…པེ… བྷགིནིཡོ ཙཱཏི ཀམྨདྷཱརཡོ. ཏཱ ཨཱདི ཡེསནྟེཏི ཨཉྙཔདཏྠོ. མཧཱཙཱུལ༹-སདྡཱ པིཏཱདི-སདྡེཧི པཙྩེཀཾ ཡོཛེཏབྦཱ ‘‘མཧཱཔིཏུནོ ཙཱུལ༹པིཏུནོ’’ཏིཨཱདིནཱ. ཨཱདི-སདྡེན པནེཏྠ པིཏུཙྪཱ མཱཏུལོ, ཏེསཾ དསནྣམྤི ཡཱཝ སཏྟམཱ ཀུལཔརིཝཊྚཱ པུཏྟཔརམྤརཉྩ སངྒཎྷཱཏི. ཏེསཾ སཀེ བྷེསཛྫཀརཎཾ ལབྦྷནྟི ཡོཛནཱ. ཏེསཾ མཧཱཔིཏཱདཱིནཾ སནྟཀེ སཏི ཏེན བྷེསཛྫཀརཎཾ ལབྦྷཏཱིཏི ཨཏྠོ. ནཱཏི ནཏྠི ཙེ. ཨཏྟནིཡེཏི བྷིཀྑུནོ ཨཏྟནོ སནྟཀེ སཏཱིཏི ཨཏྠོ. དཱཏབྦཾ ཏཱཝཀཱལིཀནྟི ཏཱཝཀཱལིཀཾ ཀཏྭཱ དཱཏབྦནྟི ཨཏྠོ. ཏེ པན སཙེ པཊིདེནྟི, གཧེཏབྦཾ, ནོ ཙེ དེནྟི, ན ཙོདེཏབྦཱ. ཡཱཝ ཏསྶ དཱནཾ, ཏཱཝ ཀཱལོ ཨསྶཱཏི ཏཱཝཀཱལིཀཾ. ཎིཀོ སམཱསནྟེ.

༢༧༧. བྷེསཛྫཀརཎཱདཱིཏི ¶ ཨཱདི-སདྡེན ཨནཱམཊྛཔིཎྜདཱནཱདཱིནཾ གཧཎཾ, ཧི-སདྡོ ཧེཏུམྷི, ཧི ཡསྨཱ ཨེཏེསུ ཀུལདཱུསནཱདཡོ ན རུཧནྟི, ཏསྨཱ ཏེསཾ བྷེསཛྫཀརཎཾ ལབྦྷཾ, ཨཏྟནིཡེ ཙ སཏི དཱཏབྦནྟི ཨེཝམེཏྠ ཨཏྠོ དཊྛབྦོ. ན རཱུཧཏཱིཏི ན རོཧཏི ནཔྤཝཏྟཏི ན ཧོཏི, ཨཱཔཏྟིཾ ན ཛནེཏཱིཏི ཨདྷིཔྤཱཡོ. ཏེསཾ ཨཏྠཱཡ ཉཱཏིསཱམཎེརེཧི ཝཱ བྷེསཛྫཾ ཨཱཧརཱཔེཏབྦཾ, ཨཏྟནོ ཨཏྠཱཡ ཝཱ ཨཱཧརཱཔེཏྭཱ དཱཏབྦཾ. ཏེཧིཔི ‘‘ཨུཔཛ྄ཛྷཱཡཱདཱིནཾ ཨཱཧརིསྶཱམཱ’’ཏི ཝཏྟསཱིསེན ཨཱཧརིཏབྦཾ. སཙེ ཨཉྙེཔི ཡེ གིལཱནཱ ཧུཏྭཱ ཝིཧཱརཾ པཝིསནྟི, ཏེསཾ སབྦེསམྤི ཨཔཙྩཱསཱིསནྟེན བྷེསཛྫཾ ཀཱཏབྦཾ. སདྡྷཾ ཀུལཾ ཧོཏི བྷིཀྑུསངྒྷསྶ མཱཏཱཔིཏུཊྛཱནཱིཡཾ, ཏཏྲ ཙེ ཀོཙི གིལཱནོ ཧོཏི, ཏསྶཏྠཱཡ ‘‘བྷནྟེ, ཨིཏྠནྣཱམསྶ ¶ རོགསྶ ཀིཾ བྷེསཛྫཾ ཀརོནྟཱི’’ཏི ཀཔྤིཡཾ ཀཏྭཱ པུཙྪནྟི, ཨིདཉྩིདཉྩ གཧེཏྭཱ ཀརོནྟཱིཏི ཝཊྚཏི, བྷིཀྑཱུཧི ཨཉྙམཉྙཾ ཝཱ ཀཐཱ ཀཱཏབྦཱ.

༢༧༨. ཚནྣཾ མཱཏཱདཱིནཉྩ དཱམརིཀཙོརསྶ ཨིསྶརིཡསྶ ཨནཱམཊྛོ པིཎྜཔཱཏོ དཱཏུཾ ཨཝཱརིཏོཏི ཡོཛེཏབྦཾ. ཚནྣནྟི མཱཏཱདཱིནཾ ཚནྣཾ མཛ྄ཛྷེ. མཱཏཱདཱིནནྟི བྷིཀྑུནིསྶིཏཾ ཋཔེཏྭཱ ཨཝསེསཱནཾ པཉྩནྣཾ མཱཏཱདཱིནཾ. ‘‘ཚནྣ’’ནྟི པན ཡོཛནཱཡ ཨཊྛཀཐཱཡ ཝིརུཛ྄ཛྷཏི. ཏཏྠ ཧི ‘‘མཱཏཱཔིཏཱུན’’ནྟིཨཱདིནཱ བྷིཀྑུནིསྶིཏཾ ཨོཧཱཡ སཏྟེཝ ཝུཏྟཱ. ཨཱཙརིཡབུདྡྷདཏྟཏྠེརེན ཙ ཏཐེཝ ཝུཏྟཾ –

‘‘ཨནཱམཊྛོཔི དཱཏབྦོ, པིཎྜཔཱཏོ ཝིཛཱནཏཱ;

དྭིནྣཾ མཱཏཱཔིཏཱུནམྤི, ཏདུཔཊྛཱཡཀསྶ ཙ.

‘‘ཨིསྶརསྶཱཔི དཱཏབྦོ, ཙོརདཱམརིཀསྶ ཙ;

བྷཎྜུཀསྶཏྟནོ ཙེཝ, ཝེཡྻཱཝཙྩཀརསྶཔཱི’’ཏི. (ཝིནཡ ཝི. ༤༩༣-༤༩༥);

དཱམརིཀཙོརསྶཱཏི ¶ རཛྫཾ པཏྠཡམཱནསྶ པཱཀཊཙོརསྶ. ཨནཱམཊྛོཏི ཨཔབྦཛིཏསྶ ཧཏྠཏོ ལདྡྷཱ ཨཏྟནཱ ཨཉྙེན ཝཱ པབྦཛིཏེན ཨགྒཧིཏཨགྒོ, ཨཡཾ ཨནཱམཊྛཔིཎྜཔཱཏོ. པཊིསནྠཱརོ ‘‘ཝིཧཱརཔྤཏྟཾ ཨཱགནྟུཀཾ ཝཱ དལིདྡཱདིཾ ཝཱ དིསྭཱ ‘པཱནཱིཡཾ པིཝཱ’ཏི དཱཏབྦཾ, པཱདམཀྑནཏེལཾ དཱཏབྦཾ, ཀཱལེ ཨཱགཏསྶ ཡཱགུབྷཏྟཾ, ཝིཀཱལེ ཨཱགཏསྶ སཙེ ཏཎྜུལཱ ཨཏྠི, ཏཎྜུལཱ དཱཏབྦཱ, སཡནཊྛཱནཾ དཱཏབྦཾ, ཙོརཱནཾ པན སངྒྷིཀམྤིདཱཏབྦ’’ནྟི ཝུཏྟོ. ཨཝསེསཔཊིསནྠཱརོ པན ཨཔཙྩཱསཱིསནྟེན ཀཱཏབྦོ. ཏཐཱ དྷམྨཔཊིསནྠཱརོཔི ཡསྶ ཀསྶཙི དཱཏབྦོཝ.

༢༧༩. ཏེསནྟི ཨཉྙཱཏཀཱདཱིནཾ གིཧཱིནཾ. ཀཡིརཱཏི ‘‘བྷཎཐཱ’’ཏི ཝུཏྟེ ཀརེཡྻ. ‘‘ན ཀརོམཱ’’ཏི ཝུཏྟེ སཙེ ཝིཔྤཊིསཱརིནོ བྷཝིསྶནྟི, ཀཱཏབྦཾ. ནཏྟནོཏི ཨཏྟནོ སུཏྟོདཀེཧི ན ཀཡིརཱཏི ཡོཛནཱིཡཾ. ཨེཝཾ སཱམཉྙེན པརིཏྟེ པཊིཔཛྫནཝིདྷིཾ དསྶེཏྭཱ ཨིདཱནི ཨཱཊཱནཱཊིཡཔརིཏྟེ པཊིཔཛྫིཏབྦཝིདྷིཾ དསྶེཏུཾ ‘‘བྷཎིཏབྦ’’ནྟིཨཱདིམཱཧ. བྷཎཱཔེནྟེཏི ‘‘བྷཎཐཱ’’ཏི ¶ ཨཛ྄ཛྷེསནཔུབྦཀཾ པཡོཛེནྟེ. པརིཏྟཾ སཱསནོགདྷནྟི པཋམམེཝ ཨཱཊཱནཱཊིཡསུཏྟཾ ཨབྷཎིཏྭཱ སཱསནཔརིཡཱཔནྣཾ མེཏྟསུཏྟཾ དྷཛགྒསུཏྟཾ རཏནསུཏྟནྟི ཨིམཱནི སུཏྟཱནི སཏྟཱཧཾ བྷཎིཏྭཱ ཡཐཱཔརིཀམྨཾ པརིཏྟཾ ཨཱཊཱནཱཊིཡཔརིཏྟཾ བྷཎིཏབྦནྟི ཡོཛནཱ.

༢༨༠. ‘‘ཨཱགནྟྭཱ སཱིལཾ དེཏུ, དྷམྨཾ པརིཏྟཉྩ བྷཱསཏཱུ’’ཏི ཀེནཙི པེསིཏོ གནྟྭཱ སཱིལཾ ཝཱ དཱཏུཾ དྷམྨཾ པརིཏྟཾ ཝཱ ཝཏྟུཾ ལབྦྷཏཱིཏི སམྦནྡྷོ.

༢༨༡. པུགྒལ-སདྡམཏྟེ ¶ པཡུཏྟེ ཨཏྟནོཔི གཧཎསམྦྷཝོ སིཡཱཏི བྱབྷིཙཱརཏྠཾ ཨཉྙ-སདྡཔྤཡོགོ. སཏི སམྦྷཝེ བྱབྷིཙཱརེ ཝིསེསནཾ སཱཏྠཀཾ ཧོཏཱིཏི. དསབྷེདམྤི རཏནནྟི ‘‘མུཏྟཱ མཎི ཝེལུ༹རིཡོ སངྑོ སིལཱ པཝཱལ༹ཾ རཛཏཾ ཛཱཏརཱུཔཾ ལོཧིཏངྐོ མསཱརགལླ’’ནྟི (པཱཙི. ༥༠༦) ཨེཝཾ ཝུཏྟཾ དསབྷེདམྤི རཏནཾ. ཨུགྒཎྷནྟསྶཱཏི གཎྷནྟསྶ སམྤཊིཙྪནྟསྶ.

༢༨༢-༣. ཏེསུ ཨཏྟཏྠཾ ཨུགྒཎྷནྟསྶ དྭཱིསུ ནིསྶགྒཱིཏི སམྦནྡྷོ. ཏེསཱུཏི ཏེསུ དསསུ མཛ྄ཛྷེ. དྭཱིསཱུཏི རཛཏཛཱཏརཱུཔསངྑཱཏེསུ དྭཱིསུ ནིསྶགྒིཡཝཏྠཱུསུ. ཨཏྟཏྠནྟི ཨིམིནཱ ནཝཀམྨཱདཱིནཾ པཉྩནྣཾ ཨཏྠཱཡ དུཀྐཊནྟི དཱིཔེཏི. སེསེསུ དུཀྐཊནྟི ཨཝསེསེསུ ཨཊྛསུ སབྦེསམྤི ཨཏྠཱཡ ཨུགྒཎྷནྟསྶ དུཀྐཊནྟི ཨཏྠོ. གཎཉྩ སངྒྷཉྩ པུགྒལཉྩ ཨནཱམསིཏྭཱ ‘‘ཙེཏྱསྶ ནཝཀམྨསྶ དམྨཱི’’ཏི ཝུཏྟེ ཙ ན པཊིཀྑིཔེཏི སམྦནྡྷནཱིཡཾ. ན པཊིཀྑིཔེཏི ཨིམིནཱ སངྒྷཱདིཾ ཨཱམསིཏྭཱ ཝུཏྟེ པཊིཀྑིཔནཾ དཱིཔེཏི. པཊིཀྑིཏྟེ ‘‘ཀཔྤིཡཀཱརཀཱནཾ ཝཱ ཧཏྠེ བྷཝིསྶཏི, མམ པུརིསཱནཾ མཡ྄ཧམེཝ ཝཱ ཧཏྠེ བྷཝིསྶཏི, ཀེཝལཾ ཏུམྷེ པཙྩཡེ པརིབྷུཉྫཐཱ’’ཏི ཝདཏི, ཝཊྚཏི. ཙཏུཔཙྩཡཏྠཱཡ ཙ དིནྣཾ ཡེན ཡེན ཨཏྠོ ཧོཏི, ཏདཏྠཾ ཨུཔནེཏབྦཾ. ཏེསཾ ཙཱིཝརཏྠཱཡ དིནྣཾ ཙཱིཝརེཡེཝ ཨུཔནེཏབྦཾ. སཙེ ཙཱིཝརེན ཏཱདིསོ ཨཏྠོ ནཏྠི, པིཎྜཔཱཏཱདཱིཧི སངྒྷོ ཀིལམཏི, སངྒྷསུཊྛུཏཱཡ ཨཔལོཀེཏྭཱ ཏདཏྠཱཡཔི ཨུཔནེཏབྦཾ. ཨེས ནཡོ པིཎྜཔཱཏགིལཱནཔཙྩཡཏྠཱཡ ¶ དིནྣེཔི. སེནཱསནཏྠཱཡ དིནྣཾ པན གརུབྷཎྜཏྟཱ ཏཏྠེཝ ཨུཔནེཏབྦཾ, སེནཱསནེསུ ནསྶནྟེསུ ཛགྒནཏྠཾ མཱུལཙྪེཛྫཾ ཨཀཏྭཱ ཨཝིསྶཛྫེཏྭཱ ཡཱཔནམཏྟཾ པརིབྷུཉྫིཏབྦཾ.

༢༨༤. ཁེཏྟཱདཱིནཾ ¶ ཀེསཉྩི དུཀྐཊཝཏྠཱུནཾ སམྤཊིཙྪནཱུཔཱཡཾ དསྶེཏུཾ ‘‘ཁེཏྟ’’ནྟིཨཱདི ཝུཏྟཾ. ཏཏྠ ཁེཏྟནྟི པུབྦཎྞཝིརུཧནཊྛཱནཾ. ཝཏྠུནྟི ཨཔརཎྞཨུཙྪུཕལཱདཱིནཾ ཝིརུཧནཊྛཱནཾ. དཱསཔསྭཱདིཀནྟི དཱསཔསུཔུཔྥཱརཱམཕལཱརཱམཱདིཀཾ. པཊིཀྑིཔིཏྭཱ ཀཔྤིཡེན ཀམེན ཙ གཎྷེཡྻཱཏི སམྦནྡྷོ. ཀཔྤིཡེན ཀམེན ཙཱཏི ཨེཏྠ ཀམ-སདྡོ ཝོཧཱརཔྤཊིཔཱཊིཝཙནོ, ཏསྨཱ པརེསཾ ཨཏྟནོ ཙ ཀཔྤིཡཝོཧཱརཀྐམེནེཝཱཏི ཨཏྠོ.

སོ ཙ ཁེཏྟཝཏྠཱུསུ ཏཱཝ ‘‘ཙཏྟཱརོ པཙྩཡེ པརིབྷུཉྫཐཱ’’ཏི ཝཱ ‘‘ཀཔྤིཡཀཱརཀཱནཾ ཧཏྠེ བྷཝིསྶཏཱི’’ཏི ཝཱ ‘‘སངྒྷོ ཀཔྤིཡབྷཎྜཾ བྷུཉྫཏཱུ’’ཏི ཝཱ ‘‘སཱིམཾ དེམཱ’’ཏི ཝཱ པརེཧི ཝུཏྟོ, ‘‘སཱདྷུ, ཨུཔཱསཀ མིགཔཀྑིནོ ཨེཏྠ ནིབྦྷཡཱ སུཁེན ཛཱིཝིསྶནྟཱི’’ཏི ཨཏྟནཱ ཝཱ ཏལཱ༹ཀེ ཡཐཱཝུཏྟེནེཝ ‘‘ཨུདཀཾ པརིབྷུཉྫིསྶནྟི, བྷཎྜཀཾ དྷོཝིསྶནྟི, མིགཔཀྑིནོ པིཝིསྶནྟཱི’’ཏི པརེཧི ཝཱ ‘‘སཱདྷུ, ཨུཔཱསཀ, སངྒྷོ པཱནཱིཡཾ པིཝིསྶཏཱི’’ཏིཨཱདིནཱ ཨཏྟནཱ ཝཱ དཱསེ ‘‘ཨཱརཱམིཀཾ དམྨི, ཝེཡྻཱཝཙྩཀརཾ དམྨི, ཀཔྤིཡཀཱརཀཾ དམྨཱི’’ཏི ཝཱ པསཱུསུ ‘‘པཉྩགོརསཔརིབྷོགཏྠཱཡ དམྨཱི’’ཏི ཨཱརཱམེ ‘‘ཝནཾ དམྨཱི’’ཏི ཨེཝམཱདིནཱ ཝུཏྟོ ཝེདིཏབྦོ. སཙེ པན ཀོཙི ཨབྱཏྟོ ཨཀཔྤིཡཝོཧཱརེན ཁེཏྟཱདིཾ པཊིགྒཎྷཱཏི ཝཱ ཀཱརེཏི ཝཱ, ཏཾ བྷིཀྑཱུཧི ན པརིབྷུཉྫིཏབྦཾ, ཏཾ ནིསྶཱཡ ལདྡྷཾ ཀཔྤིཡབྷཎྜམྤི ཨཀཔྤིཡམེཝ. ཨབྱཏྟེན པན ལཛྫཱིབྷིཀྑུནཱ ཀཱརཱཔིཏེསུ ཀིཉྩཱཔི པཊིགྒཧཎཾ ཀཔྤིཡཾ, བྷིཀྑུསྶ པཡོགཔཙྩཡཱ ཨུཔྤནྣེན མིསྶཏྟཱ ཝིསགཏཔིཎྜཔཱཏོ ཝིཡ, ཨཀཔྤིཡམཾསབྷོཛནཾ ཝིཡ ཙ དུབྦིནིབྦྷོགཾ ཧོཏི, སབྦེསཾ ཨཀཔྤིཡམེཝ.

༢༨༥-༦. ནཝ…པེ… ཀིརིཡཱ ཙ ཨནཝེ མཏྟིཀུདྡྷཱརཎཉྩ བནྡྷོ ཙ ཨཱལི༹ཡཱ ཐིརཀཱརོ ཙ ཨནཝེ ཀེདཱརེ ཨཏིརེཀབྷཱགགྒཧཎཉྩ ནཝེ ཙ ཨཔརིཙྪིནྣབྷཱགེ སསྶེ ‘‘ཨེཏྟཀེ ¶ དེཐཱ’’ཏི ཀཧཱཔཎུཊྛཱཔནཉྩཱཏི སབྦེསམྤི ཨཀཔྤིཡནྟི སམྦནྡྷོ. མཱཏིཀཱ ཙ ཀེདཱརོ ཙ ཏལཱ༹ཀོ ཙཱཏི དྭནྡོ མཱཏིཀ…པེ… ཏལཱ༹ཀཱ. ཏེསཾ ཀིརིཡཱཏི སམཱསོ. ཨནཝེཏི ཙཏུཔཙྩཡཝསེན པཊིགྒཧིཏེ པུརཱཎཏལཱ༹ཀེ. ཨུདཀཝསེན པཊིགྒཧིཏེ པན སུདྡྷཙིཏྟཱནཾ ཝཊྚཏི. བནྡྷོཏི ¶ པཱལི༹ཡཱ བནྡྷོ. པོརཱཎཀེདཱརེ ནིཡམིཏཔཀཏིབྷཱགཏྟཱ ཨཱཧ ‘‘ཨནཝེ’’ཏི. ཨཔརིཙྪིནྣབྷཱགེཏི ‘‘ཨེཏྟཀེ བྷཱུམིབྷཱགེ ཨེཏྟཀོ བྷཱགོ དཱཏབྦོ’’ཏི ཨེཝཾ ཨཔརིཙྪིནྣབྷཱགེ.

༢༨༧-༩. ‘‘ཀས ཝཔྤ’’ ཨིཙྩཱདིཾ ཨཝཏྭཱ ཙ ‘‘ཨེཏྟཀཱཡ བྷཱུམིཡཱ ཨེཏྟཀོ བྷཱགོ དེཡྻོ’’ཏི བྷཱུམིཾ ཝཱ པཏིཊྛཱཔེཏི, ཏསྶེཝེཏམཀཔྤིཡནྟི སམྦནྡྷོ. ཙ-སདྡོ ཨཝདྷཱརཎེ. པཏིཊྛཱཔེཏཱིཏི ཡོ བྷིཀྑུ པཏིཊྛཱཔེཏི. ཏསྶེཝཱཏི ཏསྶ པཏིཊྛཱཔཀབྷིཀྑུསྶེཝ. ཨེཏནྟི པཏིཊྛཱཔིཏབྷཱུམིཏོ ལདྡྷདྷཉྙཾ ‘‘ཨེཏྟཀེ བྷཱུམིབྷཱགེ སསྶཾ ཀཏཾ, ཨེཏྟཀཾ གཎྷཐཱ’’ཏི ཨེཝཾ ཝདནྟེ པམཱཎགཎྷནཏྠཾ དཎྜརཛྫུབྷི མིནནེ ཝཱ ཁལེ ཋཏྭཱ རཀྑཎེ ཝཱ ཏཾ ནཱིཧརཱཔནེ ཝཱ ཀོཊྛཱགཱརཱདིཔཊིསཱམནེ ཝཱ ཨེཏཾ ཏསྶེཝ ཨཀཔྤིཡནྟི སམྦནྡྷནཱིཡཾ. པཏིཊྛཱཔེཏི ཙཱཏི སོ བྷིཀྑུ པཏིཊྛཱཔེཏི ཙ. ཀཏནྟི ཨམྷེཧི ཀཏཾ. ཝདནྟེཝནྟི ཨེཝཾ ཀསྶཀེ ཝདནྟེ. པམཱཎནྟི བྷཱུམིཔྤམཱཎཾ. ནཱིཧརཱཔནེཏི ཁལཏོ གེཧསྶ ནཱིཧརཱཔནེ. ཨེཏནྟི མིཏལདྡྷརཀྑིཏཱདིཀཾ. ཏསྶེཝཱཏི མཱནཀརཀྑཀཱདིནོ ཨེཝ. ཨཔུབྦསྶ ཨནུཔྤཱདིཏཏྟཱ ཨཉྙེསཾ ཀཔྤཏཱིཏི ཨཱཧ ‘‘ཏསྶེཝེཏམཀཔྤིཡ’’ནྟི.

༢༩༠. པཊིསཱམནཔྤསངྒེནཱཧ ‘‘པཊིསཱམེཡྻཱ’’ཏིཨཱདི. པིཏུསནྟཀམྤི གིཧིསནྟཀཾ ཡཾ ཀིཉྩཱིཏི སམྦནྡྷོ. པིཏུསནྟཀནྟི པིཏཱ ཙ མཱཏཱ ཙ པིཏརོ, ཏེསཾ སནྟཀཾ. གིཧིསནྟཀནྟི ཨིམིནཱ ¶ པཉྩནྣཾ སཧདྷམྨིཀཱནཾ སནྟཀཾ ཡཾ ཀིཉྩི པརིཀྑཱརཾ པཊིསཱམེཏུཾ ཝཊྚཏཱིཏི དཱིཔེཏི. ཡཾ ཀིཉྩཱིཏི ཀཔྤིཡཾ ཨཀཔྤིཡཾ ཝཱ ཨནྟམསོ མཱཏུཀཎྞཔིལ༹ནྡྷནཏཱལཔཎྞམྤི. བྷཎྜཱགཱརིཀསཱིསེནཱཏི སཱིསངྒམིཝ པདྷཱནཾ ཡཾ ཀིཉྩི ‘‘སཱིས’’ནྟི ཨིདྷ ཨུཔཙཱརཝསེན ཝུཙྩཏི, ཏཐཱ བྷཎྜཱགཱརིཀསདྡོཔི བྷཱཝཔྤདྷཱནོ, བྷཎྜཱགཱརིཀོ བྷཎྜཱགཱརིཀཏྟཾ སཱིསཾ པདྷཱནནྟི ཝིསེསནཔརཔདེ ཀམྨདྷཱརཡོ, ཏེན, བྷཎྜཱགཱརིཀཏྟསྶ པདྷཱནཀརཎེནཱཏི ཨཏྠོ.

༢༩༡-༢. ཨཝསྶཾ པཊིསཱམིཡནྟི ཨཝསྶཾ སངྒོཔེཏབྦཾ. ཝུཏྟེཔཱིཏི མཱཏཱཔིཏཱུཧི ཝུཏྟེཔི.

༢༩༣-༤. ཝཌྜྷཀིཨཱདཡོ ཝཱ རཱཛཝལླབྷཱ ཝཱ ‘‘སཀཾ པརིཀྑཱརཾ ཝཱ སཡནབྷཎྜཾ ཝཱ པཊིསཱམེཏྭཱ དེཧཱི’’ཏི ཡདི ཝདནྟི, ཚནྡཏོཔི བྷཡཱཔི ན ཀརེཡྻཱཏི ཡོཛནཱ. པརིཀྑཱརནྟི ཝཱསིཕརསུཨཱདིཨུཔཀརཎབྷཎྜཾ. ཚནྡཏོཔི བྷཡཱཔཱིཏི ཝཌྜྷཀིཨཱདཱིསུ ཚནྡེན, རཱཛཝལླབྷེསུ བྷཡེན.

༢༩༥-༦. པཊིསཱམིཏུཾ ¶ ཝཊྚཏཱིཏི ཡོཛེཏབྦཾ. སངྐནྟཱིཏི ཡཱདིསེ པདེསེ ‘‘བྷིཀྑཱུཧི ཝཱ སཱམཎེརེཧི ཝཱ གཧིཏཾ བྷཝིསྶཏཱི’’ཏི སངྐཾ ཨུཔྤཱདེནྟི, ཏཱདིསེ ཝིཧཱརཱཝསཐསྶནྟོཏི ཡོཛནཱིཡཾ. ཝིཧཱརཱཝསཐསྶཱཏི ཝིཧཱརསྶ ཙ ཨཱཝསཐསྶ ཙ. རཏནནྟི དསཝིདྷཾ རཏནཾ. རཏྣསམྨཏནྟི ཝཏྠཱདིཀཾ. ནིཀྑིཔེཡྻཱཏི སཱམིཀེ དིཊྛེ ནིཡམེཏྭཱ དཱཏུཾ ‘‘ཨེཏྟཀཱ ཀཧཱཔཎཱ’’ཏིཨཱདིནཱནུརཱུཔེན མཏྟིཀལཉྪནཱདིནིམིཏྟེན ཝཱ སཉྙཱཎཾ ཀཏྭཱ ནིཀྑིཔེཡྻ. གཧེཏྭཱནཱཏི ཏཱདིསེ ཨསཏི ཨཏྟནཱཝ གཧེཏྭཱ. ཏཱདིསེཏི རཏནེ ཝཱ རཏནསམྨཏེ ཝཱ སཏི. སཱམིཀཱནཱགམཾ ཉཏྭཱཏི ཡདི ཨཏྟནི ཨཱསངྐནྟི, མགྒཱ ཨོཀྐམྨ ནིསཱིདིཡ པཙྪཱ སཱམིཀཱནཾ ཨནཱགམནཾ ¶ ཝིཉྙཱཡ. པཏིརཱུཔནྟི རཏནསམྨཏེ པཾསུཀཱུལགྒཧཎཾ རཏནེ ནིརུསྶུཀྐགམནནྟི ཨེཝརཱུཔཾ བྷིཀྑཱུནཾ ཨནུརཱུཔནྟི.

༢༩༧. དདཏོཏི སསནྟཀཾ པརསནྟཀཉྩ དེནྟསྶ. ཀུལདཱུསནདུཀྐཊནྟི ཨཏྟནོ དུཔྤཊིཔཏྟིཡཱ ཀུལཱནཾ དཱུསནཾ པསཱདཝིནཱསནཾ ཀུལདཱུསནཾ, ཏེན དུཀྐཊཾ ཀུལདཱུསནདུཀྐཊཾ.

༢༩༨. ཨེཏྠ སངྒྷིཀཾ གརུབྷཎྜཾ ཨིསྶརེན དེནྟསྶ ཐུལླཙྩཡནྟི སམྦནྡྷོ. ཨེཏྠཱཏི ཨེཏེསཾ པུཔྥཱདཱིནཾ མཛ྄ཛྷེ. ཨིསྶརེནཱཏི ཏདྡྷིཏལོཔེན ཝུཏྟཾ, ཨིསྶརིཡེན ཨིསྶརཝཏཱཡཱཏི ཨཏྠོ. དེནྟསྶཱཏི ཀུལསངྒཧཏྠཱཡ ཨིསྶརཝཏཱཡ དདཏོ. ཐུལླཙྩཡནྟི ཀུལསངྒཧཏྠཱཡ དདཏོ ‘‘ཀུལདཱུསནདུཀྐཊ’’ནྟི སཱམཉྙཝིཧིཏདུཀྐཊེན སདྡྷིཾ ‘‘པཉྩིམཱནི, བྷིཀྑཝེ, ཨཝིསྶཛྫིཡཱནི, ན ཝིསྶཛྫེཏབྦཱནི སངྒྷེན ཝཱ གཎེན ཝཱ པུགྒལེན ཝཱ, ཝིསྶཛྫིཏཱནིཔི ཨཝིསྶཛྫིཏཱནི ཧོནྟི. ཡོ ཝིསྶཛྫེཡྻ, ཨཱཔཏྟི ཐུལླཙྩཡསྶཱ’’ཏི (ཙཱུལ༹ཝ. ༣༢༡) ཨེཝཾ ཝུཏྟཐུལླཙྩཡནྟི ཨཏྠོ. ཨཉྙཏྠ ཐུལླཙྩཡམེཝ. སེནཱསནཏྠཱཡ ནིཡམིཏེཔི ཨེསེཝ ནཡོ. སངྒྷསྶ སནྟཀཾ ཐེཡྻཱ དེནྟསྶ དུཀྐཊཱདཱིནཱིཏི སམྦནྡྷིཏབྦཾ. དེནྟསྶཱཏི ཝུཏྟནཡམེཝ. དུཀྐཊཱདཱིནཱིཏི ཀུལསངྒཧཏྠཱཡ དདཏོ ཀུལདཱུསནདུཀྐཊེན སདྡྷིཾ མཱསཀེ ཝཱ ཨཱུནམཱསཀེ ཝཱ དུཀྐཊཾ ¶ , ཨཏིརེཀམཱསཀེ ཝཱ ཨཱུནཔཉྩམཱསཀེ ཝཱ ཐུལླཙྩཡཾ, པཉྩམཱསཀེ ཝཱ ཨཏིརེཀཔཉྩམཱསཀེ ཝཱ པཱརཱཛིཀནྟི ཨེཝཾ དུཀྐཊཱདཱིནི ཧོནྟཱིཏི ཨཏྠོ. ཨཉྙཏྠ དུཀྐཊཱདཱིནེཝ.

༢༩༩-༣༠༠. ཀུལསངྒཧཏྠཾ ¶ ཕལཔུཔྥཱུཔགཾ རུཀྑཾ སབྦཐཱ རོཔེཏུཉྩ རོཔཱཔེཏུཉྩ ཛགྒིཏུཉྩ ན ཝཊྚཏཱིཏི སམྦནྡྷནཱིཡཾ. ཙ-སདྡོ ཨོཙིནིཏུཾ ཨོཙིནཱཔེཏུཾ, གནྠིཏུཾ གནྠཱཔེཏུནྟི ཙ ཨཝུཏྟཱནི ཙ སམུཙྩིནོཏི. ཕལཔུཔྥཱནི སམྤཱདནཝསེན ཨུཔགཙྪཏཱིཏི ཕལཔུཔྥཱུཔགཾ. སབྦཐཱཏི ཀཔྤིཡཝོཧཱརཨཀཔྤིཡཝོཧཱརཔརིཡཱཡཨོབྷཱསནིམིཏྟཀམྨཝསེན སབྦཔྤཀཱརེནེཝ. ཏཏྠ ཀཔྤིཡཝོཧཱརོ ནཱམ ‘‘ཨིམཾ རུཀྑཾ ཛཱན, ཨིམཾ ཨཱཝཱཊཾ ཛཱན, ཨིམཾ མཱལཱཝཙྪཾ ཛཱན, ཨེཏྠ ཨུདཀཾ ཛཱནཱ’’ཏི ཝཙནཾ, སུཀྑམཱཏིཀཱཡ ཨུཛུཀརཎཉྩ. ཏབྦིཔརིཡཱཡེན ཨཀཔྤིཡཝོཧཱརོ ནཱམ. པརིཡཱཡོ ནཱམ ‘‘པཎྜིཏེན མཱལཱཝཙྪཱདཡོ རོཔཱཔེཏབྦཱ, ན ཙིརསྶེཝ ཨུཔཀཱརཱཡ སཾཝཏྟནྟཱི’’ཏིཨཱདིཝཙནཾ. ཨོབྷཱསོ ནཱམ ཀུདྡཱལཁཎིཏྟཱདཱིནི ཙ མཱལཱཝཙྪེ ཙ གཧེཏྭཱ ཋཱནཾ. ནིམིཏྟཀམྨཾ ནཱམ ཀུདྡཱལཨུདཀབྷཱཛནཱདཱིནཾ ཨཱཧརིཏྭཱ སམཱིཔེ ཋཔནཾ. ཛགྒིཏུནྟི ཝདནྟི ཨུདཀསེཙནཱདཱིནི ཀཏྭཱ. གནྠནགནྠཱཔནེསུ པན སབྦཱཔི ཚ པུཔྥཝིཀཏིཡོ ཝེདིཏབྦཱ གནྠིམཾ གོཔྥིམཾ ཝེདྷིམཾ ཝེཋིམཾ པཱུརིམཾ ཝཱཡིམནྟི. ནཱམཝསེནེཝ པནེཏེསཾ ཝིསེསོ ཝེདིཏབྦོ. ཏཾ པན ཀུལསངྒཧཏོ ཨཉྙཏྲཱཔི བྷིཀྑུསྶ ཀཱཏུམྤི ཨཀཔྤིཡཝཙནེན ཀཱརཱཔེཏུམྤི ན ཝཊྚཏི. ‘‘ཨེཝཾ ཛཱན, ཨེཝཾ ཀཏེ སོབྷེཡྻ, ཡཐཱ ཨེཏཱནི པུཔྥཱནི ན ཝིཀིརིཡནྟི, ཏཐཱ ཀརོཧཱི’’ཏིཨཱདིནཱ པན ཀཔྤིཡཝཙནེན ཀཱརཱཔེཏུཾ ཝིནཱ ཀུལསངྒཧཾ ཝཊྚཏི. རོཔནཱདཱིནཱིཏི ཨཀཔྤིཡཔཐཝིཡཾ རོཔཱཔནསིཉྩཱཔནཱདཱིནི, ཨཉྙཏྠ རོཔནཱདཱིནི.

༣༠༡-༢. ཨིདཱནི པུཔྥདཱནཱདཱིསུ ཨཊྛསུ ཀུལསངྒཧཝཏྠཱུསུ ཨཝསེསཱནི དྭེ དསྶེཏུཾ ‘‘ཝུཏྟཱཝཱ’’ཏིཨཱདིམཱཧ. ཝུཏྟཱཝ མིཙྪཱཛཱིཝཝིཝཛྫནཱཡཾ ཝུཏྟཱ ཨེཝ. ཛངྒྷཔེསནེ ཝིནིཙྪཡོ ཝུཙྩཏཱིཏི པཱཋསེསོ. པིཏརོ བྷཎྜུཾ སཀཾ ཝེཡྻཱཝཙྩཀརཾ ཋཔེཏྭཱ གིཧིཀམྨེསུ དཱུཏསཱསནཾ ཧརཎེ པདཝཱརེན ¶ དུཀྐཊནྟི སམྦནྡྷོ. སཧདྷམྨིཀེསུ ཝཏྟབྦམེཝ ནཏྠཱིཏི པིཏཱདཡོཝ ཝུཏྟཱ. གིཧིཀམྨསཱུཏི ཝིསཡསཏྟམཱི. པདཝཱརེནཱཏི པདཀྐམེན, པདེ པདེཏི ཨདྷིཔྤཱཡོ. པཋམཾ སཱསནཾ ཨགྒཧེཏྭཱཔི པུན ཝདཏོ དུཀྐཊནྟི ཡོཛེཏབྦཾ. པུནཱཏི པཙྪཱ. ‘‘ཨཡཾ དཱནི སོ གཱམོ, ཧནྡ ནཾ སཱསནཾ ཨཱརོཙེམཱི’’ཏི མགྒཱ ཨོཀྐམནྟསྶ ཙ པདེ པདེ ཝདཏོ ཙ དུཀྐཊནྟི ཨདྷིཔྤཱཡོ. ཏསྶ པན སཱསནཾ པཊིཀྑིཔིཏྭཱ སཡམེཝ ཀཱརུཉྙེ ཋིཏེན གནྟྭཱ ཨཏྟནོ པཏིརཱུཔཾ ¶ སཱསནཾ ཨཱརོཙེཏུཾ, ‘‘མམ ཝཙནེན བྷགཝཏོ པཱདེ ཝནྡཐཱ’’ཏིཨཱདིཀཾ གིཧཱིནཾ ཀཔྤིཡསཱསནཾ ཧརིཏུཉྩ ཝཊྚཏི.

༣༠༣. ཨབྷཱུཏཱརོཙནརཱུཔིཡསཾཝོཧཱརུགྒཧཱདིསཱཏི ཨབྷཱུཏཱརོཙནཱཡ རཱུཔིཡསཾཝོཧཱརེ ཙ ཨུགྒཧེ ཨུཔྤནྣཔཙྩཡེ ཨཱདིསནྟི ཀཐེནྟི པཀཱསེནྟཱིཏི ཨབྷཱུཏཱ…པེ… ཧཱདིསཱ, ཏཾསདིསཱཏི ཝུཏྟཾ ཧོཏི.

༣༠༤. པིཏཱུནཾ ཧརཱཔེཏྭཱ ཧརིཏྭཱཔི པུཔྥཱནི ཝཏྠུཔཱུཛཏྠཾ དཱཏུཾ, སེསཉཱཏཱིནཾ པཏྟཱནཾ ཝཏྠུཔཱུཛཏྠཾ དཱཏུནྟི ཡོཛནཱིཡཾ. ‘‘ཧརཱཔེཏྭཱ ཧརིཏྭཱ’’ཏི ཝུཏྟེ ‘‘པཀྐོསིཏྭཱ པཀྐོསཱཔེཏྭཱ ཝཱ’’ཏི ཝུཏྟམེཝ སིཡཱཏི ན ཝུཏྟཾ. པཏྟཱནནྟི པཀྐོསཀེན པཏྟཱཔི གཧིཏཱ. ཝཏྠུཔཱུཛཏྠནྟི རཏནཏྟཡཔཱུཛནཏྠཾ. ཨུཔཱསཀཱནམྤི པན སམྤཏྟཱནཾ ཝཏྠུཔཱུཛཏྠཾ དཱཏུཾ ཝཊྚཏིཡེཝ. ལིངྒཱདིཔཱུཛཏྠནྟི སིཝལིངྒགིཎྜུབིམྦཱདིཔཱུཛནཏྠཾ.

༣༠༥. ཏཐཱ ཕལནྟི ཨིམིནཱ པུཔྥེ ཝུཏྟཾ སབྦཾ ཨཔདིསཏི. པརིབྦཡཝིཧཱིནཱནནྟི པརིབྦཡཾ པཱཐེཡྻཾ ཝིཧཱིནཾ ནཊྛཾ ཡེསཾ ཨཱགནྟུཀཱནནྟི སམཱསོ. སཔརནྟི ཨཏྟནོ ཝིསྶཱསིཀཱ. ཨཊྛཀཐཱཡཾ (པཱརཱ. ཨཊྛ. ༢.༤༣༦-༤༣༧) པན ‘‘ཨཏྟནོ སནྟཀཾཡེཝཱ’’ཏི ཝཙནཾ ཐུལླཙྩཡཱདིཝིབྷཱགཏོ མོཙེཏྭཱ ཝུཏྟཾ.

༣༠༦. སམྨཏེན ¶ དེཡྻནྟི ཡོཛནཱ. དེཡྻནྟི ཙཏུཏྠབྷཱགཾ དཱཏབྦཾ. ཨིཏརེན ཏུ ཨཔལོཀེཏྭཱ དཱཏབྦནྟི སམྦནྡྷིཏབྦཾ. ཨིཏརེན ཏུ ཨསམྨཏེན པན.

༣༠༧. པརིཙྪིཛྫཱཏི ‘‘ཨེཏྟཀཱནི ཕལཱནི དཱཏབྦཱནཱི’’ཏི ཨེཝཾ ཕལཔརིཙྪེདེན ཝཱ ‘‘ཨིམེཧི རུཀྑེཧི དཱཏབྦཱནཱི’’ཏི ཨེཝཾ རུཀྑཔརིཙྪེདེན ཝཱ པརིཙྪིནྡིཏྭཱ. ཏཏོཏི པརིཙྪིནྣཕལཏོ རུཀྑཏོ ཝཱ. ཡཱཙམཱནསྶ གིལཱནསྶེཏརསྶ ཝཱཏི སམྦནྡྷནཱིཡཾ. རུཀྑཱཝ དསྶིཡཱཏི ‘‘ཨིདྷ ཕལཱནི སུནྡརཱནི, ཨིཏོ གཎྷཐཱ’’ཏི ཨཝཏྭཱ ‘‘ཨིཏོ གཧེཏུཾ ལབྦྷཏཱི’’ཏི རུཀྑཱ ཝཱ དསྶེཏབྦཱ.

༣༠༨. ཨིདཱནི ཨཊྛསུ པུཔྥཱདཱིནཾ ཙཏུནྣཾ ཝིནིཙྪཡཾ དསྶེཏྭཱ ཡཐཱཝུཏྟཕལཔུཔྥཝིནིཙྪཡཾ ཨཝསེསེསུ ¶ ཙཏཱུསུ ཨཔདིསནྟོ ‘‘སིརཱིསཱ’’ཏིཨཱདིམཱཧ. སིརཱིསཙུཎྞཀསཝཱདིཙུཎྞེཏི ཀསཱཝཾ ཡཾ ཀིཉྩི ཨཱདི ཡསྶ, ཏམེཝ ཙུཎྞཾ, སིརཱིསཙུཎྞཉྩ ཀསཱཝཱདིཙུཎྞཉྩཱཏི སམཱསོ. ‘‘སིརཱིསཙུཎྞཾ ཝཱ ཨཉྙཾ ཝཱ ཀསཱཝ’’ནྟི ཧི ཨཊྛཀཐཱཡཾ (པཱརཱ. ཨཊྛ. ༢.༤༣༦-༤༣༧) ཝུཏྟཾ. ‘‘ཀསཱཝཱདཱི’’ཏི ཝཏྟབྦེ རསྶེན ཝུཏྟཾ. སེསེསཱུཏི ཝེལུ༹ཨཱདཱིསུ ཏཱིསུ. པཱལི༹ཡཱ ཨཝུཏྟསྶཱཔི ཨཊྛཀཐཱཡཾ ཝུཏྟཏྟཱ ཨཱཧ ‘‘པཎྞམྤེཏྠ པཝེསཡེ’’ཏི. ཨེཏྠཱཏི པུཔྥཱདཱིསཱུཏི.

༣༠༩-༣༡༠. པུརིམིཀཱ པཙྪིམིཀཱ ཨིཏི ཝསྶཱུཔནཱཡིཀཱ དུཝེཏི སམྦནྡྷོ. ཨཱསཱལ༹ྷིཔུཎྞམཱཡ ཨནནྟརེ པཱཊིཔདདིཝསེ ཨུཔགནྟབྦཱ པཙྪིམིཀཱཡ པུརེ བྷཝཱཏི པུརིམཱ, སཱ ཨེཝ པུརིམིཀཱ. ཏཏོ པཙྪཱ བྷཝཱ ཨཔརཱཡ པུཎྞམཱཡ ཨནནྟརེ ¶ པཱཊིཔདདིཝསེ ཨུཔགནྟབྦཱ པཙྪིམིཀཱ. ཨུཔནཡནཾ པཱཔུཎནཾ ཨུཔགམནཾ ཨུཔནཱཡིཀཱ, ཝསྶནྟི ཝུཊྛི, ཨིདྷ པན ཝསྶཀཱལཾ ‘‘ཝསྶ’’ནྟི ཨུཔཙཱརེན གཧེཏྭཱ ཏཏྠ ཝཱསོ ཨུཔཙཱརེནེཝ ‘‘ཝསྶ’’ནྟི ཝུཙྩཏི, ཝསྶསྶ ཝསྶཱཝཱསསྶ ཨུཔནཱཡིཀཱ ཝཙཱིབྷེདཝསེན ཝཱ ཨཱལཡཀརཎཝསེན ཝཱ ཨུཔགམནཾ ཝསྶཱུཔནཱཡིཀཱ. ཏཏྠ ཨཱལཡཔརིགྒཱཧོ ཙ ཝཙཱིབྷེདོ ཙཱཏི པུརིམིཀཱ ཝསྶཱུཔནཱཡིཀཱ དུཝེ, ཨཱལཡཔརིགྒཱཧོ ཙ ཝཙཱིབྷེདོ ཙཱཏི པཙྪིམིཀཱ ཝསྶཱུཔནཱཡིཀཱ དུཝེབྷི སམྦནྡྷིཏབྦཾ. ཏཏྠཱཏི ཏཱསུ དྭཱིསུ. ཏདུབྷཡཾ དསྶེཏུཾ ‘‘ཨེདིསོ’’ཏིཨཱདི ཝུཏྟཾ. སོ ཨཱལཡཔརིགྒཱཧོ ཙ ཝཙཱིབྷེདོ ཙ ‘‘ཨིམསྨིཾ ཝིཧཱརེ ཨིམཾ ཏེམཱསཾ ཝསྶཾ ཨུཔེམི, ཨིདྷ ཝསྶཾ ཨུཔེམཱི’’ཏི ཨེདིསོ, ཨེཏཱདིསོཏི ཨཏྠོ. ཨེཏྠ ཙ ཀམུཔྤཏྟིཨནཱདརཱ ཝཙཱིབྷེདོ པཋམཾ ཝུཏྟོ. ཨུབྷཡཐཱ ཝསྶཾ ཨུཔགནྟུཾ ཝཊྚཏི. ཏེནེཝ ཨཊྛཀཐཱཡཾ (ཝི. སངྒ. ཨཊྛ. ༡༧༩; མཧཱཝ. ཨཊྛ. ༢༠༧) ‘‘སཙེཔི ‘ཨིདྷ ཝསྶཾ ཝསིསྶཱམཱི’ཏི ཨཱལཡོ ཨཏྠི, ཨསཏིཡཱ པན ཝསྶཾ ན ཨུཔེཏི, གཧིཏསེནཱསནཾ སུགྒཧིཏཾ, ཚིནྣཝསྶོ ན ཧོཏི, པཝཱརེཏུཾ ལབྷཏིཡེཝ, ཝིནཱཔི ཧི ཝཙཱིབྷེདཾ ཨཱལཡཀརཎམཏྟེནཔི ཝསྶཾ ཨུཔགཏམེཝ ཧོཏཱི’’ཏི ཝུཏྟཾ. ནཱཝཱསཏྠཝཛེསུ པན པརིཡེསིཏྭཱ སེནཱསནཾ ཨལབྷནྟེན ཨཱལཡཀརཎམཏྟེནེཝ ཨུཔགནྟབྦཾ. ཨུཔགཙྪནྟེན ཙ ཝིཧཱརཾ པཊིཛགྒིཏྭཱ པཱནཱིཡཾ ¶ པརིབྷོཛནཱིཡཾ ཨུཔཊྛཱཔེཏྭཱ སབྦཾ ཙེཏིཡཝནྡནཱདིསཱམཱིཙིཀམྨཾ ནིཊྛཱཔེཏྭཱ ཨུཔགནྟབྦཾ. ཨཱལཡཔརིགྒཧེ ཨཱལཡཾ དསྶེཏུཾ ‘‘ཙིཏྟུཔྤཱདེཏྠ ཨཱལཡོ’’ཏི ཨཱཧ. ཨེཏྠཱཏི དྭཱིསུ.

༣༡༡. ཏདཧཱུཏི ཏསྨིཾ ཝསྶཱུཔནཱཡིཀདིཝསེ. ཛཱནནྟི ‘‘ཨཛྫ ཝསྶཱུཔནཱཡིཀཱ’’ཏི ཛཱནནྟོ, ཨནུཔགཙྪཏོཏིམསྶ ཝིསེསནཾ.

༣༡༢. དུཏིཡནྟི ¶ པཙྪིམིཀཾ. ཨནུཔགཏོཏི ཀེནཙི ཨནྟརཱཡེན པུརིམིཀཾ ཨནུཔགཏོ. ཏེམཱསནྟི པུརིམཾ ཝཱ ཏེམཱསཾ པཙྪིམཾ ཝཱ ཏེམཱསཾ. ཝསྶཾ ཨུཔགནྟྭཱ པན ཨརུཎཾ ཨནུཊྛཱཔེཏྭཱཔི ཏདཧེཝ སཏྟཱཧཀརཎཱིཡེན པཀྐམནྟསྶཱཔི ཨནྟོསཏྟཱཧེ ནིཝཏྟེནྟསྶཱཔི ཨནཱཔཏྟི.

༣༡༣-༥. མཱཏཱཔིཏཱུནཾ པཉྩནྣཾ སཧདྷམྨིཀཱནཉྩ ཨཏྠཱཡ གིལཱནཏདུཔཊྛཱཀབྷཏྟཾ ཨོསདྷཉྩ ཨེསིསྶཾ ཝཱ པུཙྪིསྶཱམི ཝཱ ཨུཔཊྛིསྶཾ ཝཱ གནྟྭཱ ཨཧཾ ནཱབྷིརཏཾ ཝཱུཔཀཱསེསྶཾ ཝཱ ཀུཀྐུཙྩཾ ཝིནོདནཉྩ དིཊྛིཾ ཝིཝེཙནཉྩ གརུཀཱདིཀཾ ཝུཊྛཱནཾ ཝཱཔི ཨུསྶུཀྐཾ ཝཱཔི ཀརིསྶཾ ཝཱཔི ཀཱརེསྶཾ ཝཱཔཱིཏི ཨེཝམཱདིནཱ སཏྟཱཧཀིཙྩེན པཧིཏེཔི ཝཱ ཨཔཧིཏེཔི ཝཱ གནྟུཾ ལབྦྷནྟི ཡོཛནཱ.

ཨེཏྠ པན ལབྦྷམཱནཀཝསེན ཡོཛེཏྭཱ ཝཀྑམཱནནཡེན ཨཏྠོ ཝེདིཏབྦོ. མཱཏཱདིསུཏིཡཱ ཏེཡེཝ གིལཱན-སདྡེན གཡ྄ཧནྟི, ཏེསཾ ཨུཔཊྛཱཀཱ ཏདུཔཊྛཱཀཱ, གིལཱནཱ ཙ ཏདུཔཊྛཱཀཱ ཙ, ཏེསཾ བྷཏྟནྟི སམཱསོ. ཨོསདྷནྟི ཏེསཾཡེཝ གིལཱནཱནཾ བྷེསཛྫཾ. ཨེསིསྶནྟི པརིཡེསིསྶཱམི. པུཙྪིསྶཱམཱིཏི ཏེཡེཝ སཏྟཛནེ གིལཱནེ པུཙྪིསྶཾ. ཨུཔཊྛིསྶནྟི ཏེཡེཝ གིལཱནེ ཨུཔཊྛཧིསྶཱམི. ཨབྷིརམཏཱིཏི ཨབྷིརཏོ, ཝིསབྷཱགརཱུཔཱདིདསྶནེན སཱསནེ ན ཨབྷིརཏོ ནཱབྷིརཏོ. ཨབྷིརམཎཾ ཝཱ ཨབྷིརཏཾ, ནཏྠི ཨབྷིརཏམསྶཱཏི ནཱབྷིརཏོ, ཏཾ. སཧདྷམྨིཀེསུ ཡོ ནཱབྷིརཏོ, ཏཾ ཝཱུཔཀཱསེསྶཾ ཝིཀྑེཔཧརཎཏྠཾ ཨཉྙཏྠ ནཡིསྶཱམི. ཀུཀྐུཙྩནྟི པཉྩནྣཾཡེཝ ཨུཔྤནྣཾ ཝིནཡཀུཀྐུཙྩཾ. ཀིཏཀཡོགེ ཝིཀཔྤེན དུཏིཡཱ. དིཊྛིནྟི ཏེསཾཡེཝ མིཙྪཱདིཊྛིཡཱ. གརུཀམཱདིཀནྟི གརུཀཾ ཨཱདི ཡསྶཱཏི ཝིགྒཧོ. ཨཱདི-སདྡེན སཱམཎེརཱནཾ ཝསྶཔུཙྪནཾ, སིཀྑཱསམཱདཡིཏུཀཱམཏཱ, ཏཛྫནཱིཡཱདིཀམྨཀརཎཾ སངྒཧིཏཾ. ཝུཊྛཱནནྟི ¶ བྷིཀྑུནོ གརུཀཱཔཏྟིཡཱ པརིཝཱསམཱནཏྟདཱནཱདཱིཧི ཝུཊྛཱནཾ. ཨུསྶུཀྐནྟི ཝསྶཔུཙྪནཱདིཨུསྶུཀྐཾ. ཨེཝམཱདིནཱཏི ¶ ཨེཏྠ ཨཱདི-སདྡེན དིཊྛིགཏཱདཱིནཾ དྷམྨཀཐཱཀརཎཱདིཾ སངྒཎྷཱཏི. གནྟུཾ ལབྦྷནྟི ཨེཏྠ གཙྪནྟེན ཨནྟོཨུཔཙཱརསཱིམཱཡཾ ཋིཏེནེཝ ‘‘ཨནྟོསཏྟཱཧེ ཨཱགཙྪིསྶཱམཱི’’ཏི ཨཱབྷོགཾ ཀཏྭཱ གནྟབྦཾ. སཙེ ཨཱབྷོགཾ ཨཀཏྭཱ ཨུཔཙཱརསཱིམཾ ཨཏིཀྐམཏི, ཚིནྣཝསྶོ ཧོཏཱིཏི ཝདནྟི. སཏྟཱཧཀིཙྩེནཱཏི སཏྟཱཧསྶ ལབྦྷམཱནཀཾ ཝུཏྟཾ ཝཀྑམཱནཉྩ སངྒྷཀམྨཱདི ཀིཙྩཾ སཏྟཱཧཀིཙྩཾ. སཏྟམཨརུཎམཏྟསྶེཝ ཝིཧཱརེ ཨུཊྛཱཔནཱིཡཏྟཱ སཏྟཱཧསྶ སཱཀལླེན གཧཎཾ.

༣༡༦. སངྒྷཀམྨེ ཝཛེཏི སངྒྷསྶ ཀིཙྩེ ཨུཔོསཐཱགཱརཱདཱིསུ སེནཱསནེསུ ཝཱ ཙེཏིཡཚཏྟཝེདིཀཱདཱིསུ ཝཱ ཨནྟམསོ པུགྒལིཀསེནཱསནེསུ ཝཱཔི ཀཏྟབྦནིམིཏྟེ ཝཛེཡྻཱཏི ཨཏྠོ. དྷམྨསཝནཏྠཾ ནིམནྟིཏོ ཝཱཔི ཝཛེ, གརཱུཧི པེསིཏོ ཝཱཔི ཝཛེ, གརཱུནཾ པསྶིཏུཾ ཝཱཔི ཝཛེཏི ཡོཛེཏབྦཾ. ནིམནྟིཏོཏི ཨེཏྠ སཙེ པཋམཾཡེཝ ཀཏིཀཱ ཀཏཱ ཧོཏི, ‘‘ཨསུཀདིཝསཾ ནཱམ སནྣིཔཏིཏབྦ’’ནྟི ནིམནྟིཏོཡེཝ ནཱམ ཧོཏི. གརཱུཧཱིཏི ཨཱཙརིཡུཔཛ྄ཛྷཱཡེཧི. པཧིཏོཏི བྷཎྜདྷོཝནཱདིཨཏྠཱཡ པེསིཏོ. པསྶིཏུནྟི ཨགིལཱནེཔི.

༣༡༧. བྷཎྜ…པེ… དསྶནེ ན ཝཛེཏི ཡོཛནཱིཡཾ. ཨེཏྠཱཔི ནིམིཏྟཏྠེ སཏྟམཱི. བྷཎྜཾ ནཱམ ཙཱིཝརཾ. ཉཱཏཱི མཱཏཱཔིཏཱུཧི ཨཉྙེ. ཨུཔཊྛཱཀཱ ཨུཔཱསཀཱ. ‘‘ཨཛྫེཝ ཨཱགམིསྶ’’ནྟི ཨདཱུརགོ ན པཱཔུཎེཡྻ, ལབྦྷནྟི སམྦནྡྷོ. ལབྦྷནྟི ཨིམསྶ ཨཔཱཔུཎནཾ ཝུཏྟཀམྨཾ. ཨཛྫེཝཱགམིསྶནྟི སཱམནྟཝིཧཱརཾ གནྟྭཱ པུན ཨཱགཙྪནྟསྶ ཨནྟརཱམགྒེ སཙེ ཨརུཎུགྒམནཾ ཧོཏི, ཝསྶཙྪེདོཔི ན ཧོཏི, རཏྟིཙྪེདདུཀྐཊཉྩ ནཏྠཱིཏི ཝདནྟི.

༣༡༨. སེསཉཱཏཱིཧཱིཏི ¶ མཱཏཱཔིཏཱུཧི ཨཝསེསཉཱཏཱིཧི. ནིདྡིསིཏྭཱཝཱཏི དཱནདྷམྨསཝནཱདཱིནི. ‘‘པཧིཏེ པེསིཏེ’’ཏི ཙེཏྠ ‘‘ལབྦྷ’’ནྟི ཨནུཝཏྟནཱིཡཾ.

༣༡༩. ཨཏྟནོ ཨནྟརཱཡེ སཏཱིཏི ཙོརསརཱིསཔཝཱལ༹ཛཱིཝིཏབྲཧྨཙརིཡནྟརཱཡེ, ཨནྟམསོ བྷེསཛྫཱལཱབྷཔཏིརཱུཔཨུཔཊྛཱཀཱལཱབྷེཔི. ‘‘ཝསྶཙྪེདཀཱརཎམྤི སཏྟཱཧཀརཎཱིཡཾ སིཡཱ’’ཏི ཀེཙི པོརཱཎཱ ཝདནྟི, ཏཾ ཡུཏྟཾ ཝིཡ དིསྶཏི, སབྦཐཱ ཝསྶཙྪེདེན བཧི ཝཱསཱཡ ཨནུཉྙཱཏཀཱརཎཾ སཏྟཱཧམཏྟཾ བཧི ཝཱིཏིནཱམེཏྭཱ ཨནྟོཝིཧཱརེཡེཝ ཝཱསེན ཝསྶཙྪེདཱཀཱརཎཾ ཀཐཾ ནཱམ ན སིཡཱཏི. ཚིནྣཝསྶོ ནོ པཝཱརཡེཏི སམྦནྡྷོ.

༣༢༠. ‘‘ཨསེནཱསནིཀེནཱ’’ཏི ¶ ཨིམིནཱཝ ཝིཉྙཱཡམཱནཏྠཏྟེཔི ‘‘ཨཛ྄ཛྷོཀཱསེ ཙཱ’’ཏི ཝཙནཾ ‘‘ཨཧཾ ཨབྦྷོཀཱསིཀོ, ཀིཾ མེ སེནཱསནེནཱ’’ཏི ཝཱསཱནིཝཏྟནཏྠཾ ཝུཏྟཾ. རུཀྑསྶ སུསིརེཏི སུདྡྷེ རུཀྑསུསིརེ. མཧནྟསྶ པན སུསིརསྶ ཨནྟོ པདརཙྪདནཀུཊིཀཾ ཀཏྭཱ པཝིསནདྭཱརཾ ཡོཛེཏྭཱ ཨུཔགནྟུཾ ཝཊྚཏི. ‘‘ཝིཊཔེཔི ཨཊྚཀཾ བནྡྷིཏྭཱ’’ཏིཨཱདི ཝུཏྟནཡམེཝ. ཏཐཱ ཚཏྟཙཱཊཱིསུཔི ཏདནུརཱུཔེན ཝེདིཏབྦཾ. ཚཝཀུཊི ནཱམ ཊངྐིཏམཉྩཱདིབྷེདཱ ཀུཊི. ཏཏྠ ཊངྐིཏམཉྩོ ནཱམ དཱིགྷེ མཉྩཔཱདེ མཛ྄ཛྷེ ཝིཛ྄ཛྷིཏྭཱ ཨཊནིཡོ པཝེསེཏྭཱ ཀཏོ, ཙཏུནྣཾ པཱསཱཎཱནཾ ཨུཔརི པཱསཱཎཾ ཨཏྠརིཏྭཱ ཀཏམྤི ཊངྐིཏམཉྩོ.

༣༢༡. ཨསེནཱསནིཀེནཱཏི ཡསྶ ཏིཎཔཎྞཨིཊྛཀསིལཱསུདྷཱསངྑཱཏཱནཾ པཉྩནྣཾ ཚདནཱནཾ ཨཉྙཏརེན ཚནྣཾ ཡོཛིཏདྭཱརབནྡྷནཾ སེནཱསནཾ ནཏྠི, ཏེན. ཨིདཾ པན ཝཙཱིབྷེདཾ ཀཏྭཱ ཨདྷིཊྛཱནཾ སནྡྷཱཡ ཝུཏྟནྟི ཝདནྟི, ཏདཡུཏྟཾ, ཏཐཱ ཙ སཏི ནཱཝཱདཱིསུ ཝིཡ ཝིསུཾ ཝིདྷཱནེན བྷཝིཏབྦནྟི. ནཱཝཱསཏྠཝཛཱུཔགོཏི ཨིམིནཱ ཨསེནཱསནིཀེན ནཱཝཱདཱིསུ ཝསྶཾ ཨུཔགནྟུཾ ¶ ཝཊྚཏཱིཏི དཱིཔེཏི. ཏཏྠ ཙ ཀུཊིཀཾ པརིཡེསིཏྭཱ ལབྷནྟེན ཏཏྠ པཝིསིཏྭཱ ཝིཧཱརཱབྷཱཝཏོ ‘‘ཝིཧཱརེ’’ཏི ཨཝཏྭཱ ‘‘ཨིདྷ ཝསྶཾ ཨུཔེམཱི’’ཏི ཏིཀྑཏྟུཾ ཝཏྟབྦཾ, ཨལབྷནྟེན ཨཱལཡོ ཀཱཏབྦོ. པཝཱརེཏུཉྩཱཏི ཙ-སདྡེན ཝསྶཙྪེདནིམིཏྟཱཡ ཨཱཔཏྟིཡཱ ཨབྷཱཝཾ སམྤིཎྜེཏི. ‘‘ཝཛེ སཏྠེ ནཱཝཱཡནྟི ཏཱིསུ ཋཱནེསུ ནཏྠི ཝསྶཙྪེདེ ཨཱཔཏྟི, པཝཱརེཏུཉྩ ལབྦྷཏཱི’’ཏི (མཧཱཝ. ཨཊྛ. ༢༠༣) ཨཊྛཀཐཱཡཾ ཝུཏྟཾ. ཝསྶཙྪེདེཏི ཙ ‘‘ཨནུཛཱནཱམི, བྷིཀྑཝེ, ཡེན ཝཛོ ཏེན གནྟུ’’ནྟི (མཧཱཝ. ༢༠༣) ཝུཏྟཏྟཱ, སཏྠསྶ ནཱཝཱཡ ཙ གམནསབྷཱཝེནེཝ ཋིཏཏྟཱ ཙ ཝསྶཱུཔགཏཊྛཱནེ ཨཝསིཏྭཱ ཨཉྙཏྠ གམནམཏྟཾ སནྡྷཱཡ ཝུཏྟནྟི ཝེདིཏབྦཾ.

ཝསྶཱུཔནཱཡིཀནིདྡེསཝཎྞནཱ ནིཊྛིཏཱ.

༣༢༢-༥. ཨཱརཱམཱ…པེ… མཏྟིཀབྷཎྜཱནཱིཏི ཨེཏེ པཉྩ ཨཝིབྷཱཛིཡཱཏི སམྦནྡྷིཏབྦཾ ¶ . པཉྩཱཏི ‘‘ཨཱརཱམཱརཱམཝཏྠཱུནི ཨེཀ’’ནྟིཨཱདིནཱ རཱསིཝསེན པཉྩ, སརཱུཔཝསེན པནེཏཱནི པཎྞཾ ཏིཎེ པཀྑིཔིཏྭཱ པཉྩཝཱིསཏིཝིདྷཱནི ཧོནྟི. ཏཐཱ ཙཱཧ –

‘‘དྭིསངྒཧཱནི དྭེ ཧོནྟི, ཏཏིཡཾ ཙཏུསངྒཧཾ;

ཙཏུཏྠཾ ནཝཀོཊྛཱསཾ, པཉྩམཾ ཨཊྛབྷེདནཾ.

‘‘ཨིཏི པཉྩཧི རཱསཱིཧི, པཉྩནིམྨལལོཙནོ;

པཉྩཝཱིསཝིདྷཾ ནཱཐོ, གརུབྷཎྜཾ པཀཱསཡཱི’’ཏི. (ཙཱུལ༹ཝ. ཨཊྛ. ༣༢༡);

ཏཏྠ ཨཱརཱམོ ནཱམ པུཔྥཱརཱམོ ཝཱ ཕལཱརཱམོ ཝཱ. ཨཱརཱམཝཏྠུ ནཱམ ཏེསཾཡེཝ པཏིཊྛཱནོཀཱསོ, ཝིནཊྛེསུ ཝཱ ཏེསུ པོརཱཎཀབྷཱུམིབྷཱགོ. ཝིཧཱརོ ནཱམ ¶ པཱསཱདཱདི ཡཾ ཀིཉྩི སེནཱསནཾ. ལོཧཀུམྦྷཱི ནཱམ ཀཱལ༹ལོཧེན ཝཱ ཏམྦལོཧེན ཝཱ ཀཏཀུམྦྷཱི. ཀཊཱཧཱདཱིསུཔི ཨེསེཝ ནཡོ. ཨེཏྠ བྷཱཎཀནྟི ཨརཉྫརོ ཝུཙྩཏི. ཝཱརཀོཏི གྷཊོ. རཱསིཾ ཨཔེཀྑིཏྭཱ ཨེཏེཏི པུལླིངྒནིདྡེསོ. ཨཝིབྷཱཛིཡཱཏི མཱུལཙྪེཛྫཝསེན ཨཝེབྷངྒིཡཱ. པརིཝཏྟནཝསེན པན པརིབྷུཉྫནྟསྶ ཝིསྶཛྫེནྟསྶ ཙ ཨནཱཔཏྟི. ཨཝིསྶཛྫིཡཱནི ཙཱཏི ཙ-སདྡེན ཨཝེབྷངྒིཡཱནི ཙཱཏི ཨཝུཏྟཾ སམྤིཎྜེཏི.

༣༢༦-༨. ཨེཀནྟགརུབྷཎྜཏྟཱ ཨཱདིཏོ ཏཡོ རཱསཱི ཋཔེཏྭཱ ཙཏུཏྠརཱསིཏོ པཊྛཱཡ གརུབྷཎྜཱགརུབྷཎྜེ ཝིབྷཛིཏུཾ ‘‘ཝལླཱི’’ཏིཨཱདི ཨཱརདྡྷཾ. ཨཌྜྷབཱཧུམཏྟཱཔི ཝལླི ཙ ཨཊྛངྒུལཱཡཏོ ཝེལུ༹ ཙ མུཊྛིམཏྟམྤི ཏིཎཱདི ཙ ཨེཀམྤི པཎྞཉྩ པཱཀཏཱ ཝཱ པཉྩཝཎྞཱ ཝཱ ཏཱལཔཀྐཔྤམཱཎཱཔི མཏྟིཀཱ ཙ ཏཱལཔཀྐཔྤམཱཎཱཔི སུདྷཱ ཙ ཏཱལཔཀྐཔྤམཱཎཱཔི ཀངྒུཊྛཨཱདིཀཱ ཙ དིནྣཱ ཝཱ ཏཏྠཛཱཏཀཱ ཝཱ སངྒྷིཀཱ རཀྑིཏཱ ཨབྷཱཛིཡཱ, རཛྫུཡོཏྟཱདི ཙ དིནྣཱ སངྒྷིཀཱ ཨབྷཱཛིཡཱཏི ཡོཛནཱ. ཝེལུ༹ པརིཎཱཧཏོ པཎྞསཱུཙིདཎྜམཏྟོ གཧེཏབྦོ. ཏིཎཾ མུཉྫཾ པབྦཛཉྩ ཨཱདིསདྡསངྒཧིཏཾ ཋཔེཏྭཱ ཨཝསེསཾ ཡཾ ཀིཉྩི ཏིཎཾ. པཎྞོ ཨཊྛངྒུལཔྤམཱཎོ རིཏྟཔོཏྠཀོ གརུབྷཎྜམེཝ. པཱཀཏཱཏི པཀཏིཡཱ ཛཱཏཱ. པཉྩཝཎྞཱཏི རཏྟསེཏཱདིཔཉྩཝཎྞཱ. སུདྷཱཀངྒུཊྛཱདཡོ མཏྟིཀགྒཧཎེན གཧིཏཱ. ཀངྒུཊྛཨཱདིཀཱཏི ཨཱདི-སདྡེན སཛྫུརསཛཱཏིཧིངྒུལཀཱདཱིནཾ གཧཎཾ. དིནྣཱཏི སངྒྷསྶ དིནྣཱ. ཏཏྠཛཱཏཱཏི སངྒྷིཀབྷཱུམིཡཾ ཛཱཏཱ. རཛྫུཡོཏྟཱདཱིཏི སུཏྟམཀཙིཝཱཀནཱལི༹ཀེརཧཱིརཙམྨམཡཱ རཛྫུ ཙ ཡོཏྟཱདི ཙ. ཨཱདི-སདྡེན ¶ མཀཙིཝཱཀཱདིཀེ ཝཊྚེཏྭཱ ཀཏཱ ཨེཀཝཊྚཱ གཧིཏཱ. བྱཏིརེཀཝསེན པནེཏྠ ཙཏུཏྠརཱསིམྷི ཨིཏརེ བྷཱཛིཡཱཏི ¶ ཝེདིཏབྦཱ. སངྒྷིཀེ ཀམྨེ, ཙེཏིཡསྶ ཝཱ ཀམྨེ ནིཊྛིཏེ བྷཱཛིཡཱཏི ཡོཛནཱིཡཾ.

༣༢༩. ལོཧབྷཎྜེསུ བྷིཀྑུསཱརུཔྤཾ པཏྟཱདི ཝཱ ཏཐཱ ཝིཔྤཀཏཱཀཏཾ ལོཧབྷཎྜཾ ཏཐཱ པཱདགཎྷཀཾ ཝཱརཀཾ བྷཱཛིཡནྟི ཡོཛནཱ. པཏྟཱདཱིཏི ཨཡོཔཏྟོ ཨཡཐཱལཀཾ ཏམྦལོཧཐཱལཀཾ ཨཉྫནིསལཱཀཱ ཀཎྞམལཧརཎཱི སཱུཙི པཎྞསཱུཙི ཁུདྡཀོ པིཔྥལཀོ ཁུདྡཀཾ ཨཱརཀཎྜཀཾ ཀུཉྩིཀཱ ཏཱལཱ༹དི. ཝིཔྤཀཏནྟི ཨཔརིནིཊྛིཏཾ. ཨཀཏནྟི སབྦསོ ཨཀཏཾ. པཱདགཎྷཀནྟི སཱིཧལ༹དཱིཔེ པཱདགཎྷནཀཾ. པཱདོ ནཱམ ཙཏུཏྠཾསོ, མགདྷནཱལི༹ཡཱ པཉྩནཱལི༹མཏྟཱ. མགདྷནཱལི༹ ཙ ནཱམེསཱ ཨཱུནཔཉྩཔསཏཱ ཝེདིཏབྦཱ. ཏཐཱ གྷཊཀོ ཏེལབྷཱཛནཉྩ. ཡཱཡ ཝཱསིཡཱ ཋཔེཏྭཱ དནྟཀཊྛཙྪེདནཾ ཝཱ ཨུཙྪུཏཙྪནཾ ཝཱ ཨཉྙཾ མཧཱཀམྨཾ ཀཱཏུཾ ན སཀྐཱ, ཨཡཾ བྷཱཛིཡཱ. སམྨུཉྫནིདཎྜཁཎནཀཾ པན ཨདཎྜཀཾ ཕལམཏྟམེཝ, ཡཾ སཀྐཱ སིཔཱཊིཀཱཡ པཀྑིཔིཏྭཱ པརིཧརིཏུཾ, ཨཡཾ བྷཱཛནཱིཡཱ. ཏིཔུཀོཊྚཀཨུཔཀརཎེསུ ཏིཔུཙྪེདནཀསཏྠཀཾ སུཝཎྞཀཱརཱུཔཀརཎེསུ སུཝཎྞཙྪེདནཀསཏྠཀཾ ཙམྨཀཱརཨུཔཀརཎེསུ ཙམྨཚིནྡནཀཾ ཁུདྡཀསཏྠཾ ནཧཱཔིཏཏུཎྞཀཱརཨུཔཀརཎེསུ ཋཔེཏྭཱ མཧཱཀཏྟརིཾ མཧཱསཎྜཱསཉྩ མཧཱཔིཔྥལཀཉྩ སབྦཱནི བྷཱཛནཱིཡབྷཎྜཱནི. ཏཐཱ ཀུཉྩིཀཱ. ཝུཏྟཝིཔལླཱསེན པན ལོཧབྷཎྜེ ཨབྷཱཛིཡཱཏི ཝེདིཏབྦཱ.

༣༣༠. ‘‘ཝེལུ༹མྷཱི’’ཏིཨཱདིནཱ དཱརུབྷཎྜཱནི དསྶེཏི. དཱརུབྷཎྜེན པན སངྒཧེཏྭཱ སབྦཱཔི དཱརུཝེལུ༹ཙམྨུཔཱཧནཱདིཝིཀཏི ཝེདིཏབྦཱ. ཚཏྟདཎྜོ ཙ སལཱཀཱ ཙཱཏི དྭནྡོ. ཨུཔཱཧནཱཡ དཎྜཀོ ཨུཔཱཧནདཎྜཀོ.

༣༣༡. ཨནུཉྙཱཏཝཱསིདཎྜོཏི ཨནུཉྙཱཏཝཱསིཡཱ དཎྜོ. ཨརཎཉྫནིསིངྒཱདཱིཏི ཨཱདི-སདྡེན ཨཉྫནིསལཱཀཱ ཚཏྟཾ ¶ མུཊྛིཔཎྞཾ ཨུཔཱཧནཱ དྷམྨཀརཎོ པཱདགཎྷནཀཏོ ཨནཏིརིཏྟཾ ཨཱམལཀཏུམྦཾ ཨཱམལཀགྷཊོ ལཱབུཀཏུམྦཾ ལཱབུཀགྷཊོ ཝིསཱཎཏུམྦནྟི ཨིདཾ སངྒཎྷཱཏི.

༣༣༢. ཡཐཱཝུཏྟཏོ ཨཉྙཾ དཱརུབྷཎྜེསུ གརུབྷཎྜཾ. མཏྟིཀཱམཡོ པཱདགྷཊཀོ བྷཱཛིཡོཏི ཡོཛནཱ. པཱདགྷཊཀོཏི པཱདསྶ པཧོནཀོ གྷཊཀོ. ཨིམིནཱ མཏྟིཀཱབྷཎྜཾ ཨུཔལཀྑེཏི, ཏསྨཱ པཏྟོ ཐཱལཀཾ ཀུཎྜིཀཱཏི ཨིམཱནི བྷཱཛནཱིཡཱནི, ཝུཏྟཱཝསེསཱ ཨབྷཱཛིཡཱ.

༣༣༣-༤. གརུནཱ ¶ གརུབྷཎྜཉྩ ཐཱཝརཉྩ པརིཝཏྟེཡྻ, ཐཱཝརེན ཙ ཐཱཝརམྤི པརིཝཏྟེཡྻཱཏི ཡོཛེཏབྦཾ. གརུནཱ མཉྩཔཱིཋཱདིནཱ. ཐཱཝརནྟི ཨཱརཱམཱདི པཋམརཱསིདྭཡཾ. ཏཐཱ ཀཏྭཱ ཙ བྷུཉྫིཏུནྟི ཨེཝཉྩ པརིཝཏྟེཏྭཱ ཏཏོ ཨཱབྷཏཾ ཀཔྤིཡབྷཎྜཾ པརིབྷུཉྫེཡྻཱཏི ཨཏྠོ, ཝིདྷིམྷི ཨཡཾ ཏུཾཔཙྩཡོ. ཕཱཏིཀམྨེན ཝལླཱདིཾ གཎྷེཏི སམྦནྡྷནཱིཡཾ. ཕཱཏིཀམྨཾ ནཱམ སམཀཾ ཝཱ ཨཏིརེཀཾ ཝཱ ཏདགྒྷནཀཾ ཝཱ ཝཌྜྷིཀམྨཾ. སེསནྟི པཋམརཱསིཏྟིཀནྟི.

ཨཝེབྷངྒིཡནིདྡེསཝཎྞནཱ ནིཊྛིཏཱ.

༣༣༥. སདྭཱརབནྡྷནེ སོདུཀྑལཀཔཱསཀེ ཋཱནེ དིཝཱ སཡནྟེན པརིཝཏྟཀཾ དྭཱརཾ བནྡྷེཡྻཱཏི སམྦནྡྷོ. དྭཱརཉྩ དྭཱརབནྡྷནཉྩ དྭཱརབནྡྷནཱནི མཛ྄ཛྷེཔདལོཔཝསེན, བནྡྷན-སདྡེནེཝ ཝཱ དྭཱརབཱཧཱ ཝུཙྩནྟི, སཧ དྭཱརབནྡྷནེཧཱིཏི སདྭཱརབནྡྷནཾ, ཋཱནཾ. ཧེཊྛཱ ཨུདུཀྑལཀཉྩ ཨུཔརི པཱསཀོ ཙ, སཧ ཨུདུཀྑལཔཱསཀེཧཱིཏི སམཱསོ. ཏཱདིསེ ཋཱནེ པཱཀཱརཱདིཔརིཀྑེཔེན བྷཝིཏབྦནྟི པརིཀྑིཏྟེཏི ཝིཉྙཱཡཏི. སོ ཙ ཨུཙྩཏོ སཧསེཡྻཔྤཧོནཀེ ཝུཏྟནཡོཏི ཝདནྟི ¶ . སཡནྟེནཱཏི པཱདེ བྷཱུམིཏོ མོཙེཏྭཱ ནིཔཛྫནྟེན. པརིཝཏྟཀནྟི སཾཝརཎཝིཝརཎཝསེན ཨིཏོ ཙིཏོ ཙ པརིཝཏྟནཡོགྒཾ. དྭཱརནྟི ཨནྟམསོ དུསྶསཱཎིདྭཱརམྤི. བནྡྷེཡྻཱཏི སབྦནྟིམེན ཝིདྷིནཱ ཡཱཝཏཱ སཱིསཾ ན པཝིསཏི, ཏཱཝཏཱཔི བནྡྷེཡྻ, སཾཝརེཡྻཱཏི ཝུཏྟཾ ཧོཏི.

༣༣༦. ཨཱབྷོགོ ཙཱཔཱིཏི ‘‘ཨེས ཛགྒིསྶཏཱི’’ཏི ཨཱབྷོགོ ཙཱཔི. ཙ-སདྡེན ‘‘དྭཱརཾ ཛགྒཱཧཱི’’ཏི ཝཙནམྤི སམུཙྩིནོཏི. སཝསེ ཏཾ ཨཱཀཱརཾ ཝིནཱཏི སསྶ ཨཏྟནོ ཝསེ ཨཱཡཏྟེ ཋཱནེ, ཡཏྠ པན བཧཱུནཾ སཉྩརཎཏྟཱ དྭཱརཾ སཾཝུཏམྤི སཾཝུཏཊྛཱནེ ན ཏིཊྛཏི, དྭཱརཾ ཨལབྷནྟཱ པཱཀཱརཾ ཨབྷིརུཧིཏྭཱཔི ཝིཙརནྟི, ཏཱདིསེ པརིཝེཎེ སཾཝརཎཀིཙྩཾ ནཏྠི. ཨཐ ཝཱ སསྶ ཝསོ ཨཱཡཏྟོ, ན ཡཀྑཱདཱིནཾ ཏེཧི གཧིཏཀཏྟསྶ, བནྡྷིཏྭཱ ནིཔཛྫཱཔིཏཏྟསྶ ཙ ཨབྷཱཝེནཱཏི ¶ སཝསོ. ཏསྨིཾ སཏི པུབྦེ ཝུཏྟདྭཱརཾ སཾཝརཎཨཱབྷོགཀརཎཝཙནསངྑཱཏཾ ཨཱཀཱརནྟི ཨཏྠོ.

༣༣༧. རཏནཱནཱིཏི མུཏྟཱདཱིནི དསཝིདྷཱནི. ཏཏྠ པན ཛཱཏིཕལིཀཾ ཨུཔཱདཱཡ སབྦོཔི མཎི ཝེལུ༹རིཡོཔི ལོཧིཏངྐོ མསཱརགལློ ཙ དྷོཏཱཔི ཨདྷོཏཝིདྡྷཱཔི ཨནཱམཱསཱ, ཀཱཙམཎི ཙ པཱནཱིཡསངྑོ དྷོཏོ ཨདྷོཏོཔི ཨཱམཱསཱ, སིལཱ དྷོཏཝིདྡྷཱ སུཝཎྞེན སདྡྷིཾ པཙིཏཱ མུགྒཝཎྞཱ ཙ ཨནཱམཱསཱ. ཙེཏིཡགྷརགོཔཀཱནཾ སུཝཎྞཙེཏིཡེ ཀཙཝརམེཝ ཧརིཏུཾ ཝཊྚཏི. ཨཱརཀཱུཊལོཧམྤི ཛཱཏརཱུཔགཏིཀམེཝ. ཨིཏྠིརཱུཔཱནཱིཏི ཨནྟམསོ པིཊྛམཡཨིཏྠིརཱུཔཱནིཔི. དྷཉྙནྟི ཨནྟམསོ ཏཏྠཛཱཏཀམྤི མགྒེ པསཱརིཏམྤི སཏྟཝིདྷཾ དྷཉྙཾ. ཀཱིལཱ༹ཝསེན ཨཔརཎྞཱནི ཏཱལཕལཱདཱིནིཔི ཨནཱམཱསཱནི, པསཱརིཏམྤི ན མདྡནྟེན གནྟབྦཾ, ཨསཏི མགྒེ མགྒཾ ཨདྷིཊྛཱཡ གནྟབྦཾ. ཨིཏྠིཔསཱདྷནནྟི ཨནྟམསོ པིལ༹ནྡྷནཏྠཱཡ ཋཔིཏཾ ནིཝཱསནཏཱལཔཎྞམུདྡིཀམྤི.

༣༣༨. སིཏྠཏེལོདཏེལེཧཱིཏི ¶ མདྷུསིཏྠཀནིཡྻཱསཱདཱིསུ ཡེན ཀེནཙི ཏེལམིསྶཀསིལེསེན ཙ ཨུདཀམིསྶཀཏེལེན ཙ. ཕཎཧཏྠཕཎེཧཱིཏི ཕཎམིཝ ཕཎཾ, ཨངྒུལཱིཧི ཕཎཀིཙྩཀརཎེན ཧཏྠོཡེཝ ཕཎཾ ཧཏྠཕཎཾ, དནྟམཡཱདི ཡཾ ཀིཉྩི ཕཎཉྩེཝ ཧཏྠཕཎཉྩཱཏི དྭནྡོ. ཨོསཎྛེཡྻཱཏི ཨོལིཁིཏྭཱ སནྣིསཱིདཱཔེཡྻ.

༣༣༩. ཨེཀཔཱཝུརཎཱ ཝཱ ཨེཀཏྠརཎཱ ཝཱ ན ཏུཝཊྚཡུཾ, ཨེཀམཉྩེ ན ཏུཝཊྚཡུནྟི ཡོཛནཱ. ཨེཀཾ པཱཝུརཎཾ ཨེཀཾ ཨཏྠརཎཾ ཨེཏེསནྟི ཝིགྒཧོ. ན ཏུཝཊྚཡུནྟི ན ནིཔཛྫེཡྻུཾ. ཨེཀསྨིཾ བྷཱཛནེ ཝཱཔི ན བྷུཉྫེཡྻུནྟི ཡོཛེཏབྦཾ.

༣༤༠. མནུསྶཱནཾ པམཱཎངྒུལེན ཨཊྛ ཨངྒུལཱནི ཡསྶ, ཨདྷིཀེན སཧིཏཾ ཨཊྛངྒུལནྟི སམཱསོ. ལསུཎཾ མགདྷེསུ ཛཱཏཾ ཨཱམལཀབྷཎྜིཀཾ ལསུཎཾ ན ཁཱདེཡྻཱཏི སམྦནྡྷོ. ན ཨཀལླཀོཏི ཨགིལཱནོ.

༣༤༡. ཧཱིནུཀྐཊྛེཧི ཛཱཏིཨཱདཱིཧི ཨུཀྐཊྛཾ ཝཱ ཧཱིནཾ ཝཱ ཨུཛུཾ ཝཱ ཨཉྙཱཔདེསེན ཝཱ དཝཱ ཝདེ, དུབྦྷཱསིཏནྟི སམྦནྡྷོ. ཛཱཏིཨཱདཱིཧཱིཏི ཛཱཏིནཱམགོཏྟཀམྨསིཔྤཨཱབཱདྷལིངྒཀིལེསཨཱཔཏྟིཨཀྐོསེཧི ¶ . ཨུཀྐཊྛནྟི ཛཱཏྱཱདཱིཧིཡེཝ ཨུཀྐཊྛཾ ཨུཔསམྤནྣཾ ཨནུཔསམྤནྣཾ ཝཱ. དཝཱཏི ཀེལི༹ཧསཱདྷིཔྤཱཡཏཱཡ. ཨུཛུཾ ཝཱཏི ‘‘ཙཎྜཱལོསཱི’’ཏིཨཱདིནཱ ནཡེན. ཨཉྙཱཔདེསེན ཝཱཏི ‘‘སནྟི ཨིདྷེཀཙྩེ ཙཎྜཱལཱ’’ཏིཨཱདིནཱ ནཡེན.

༣༤༢. དཱིགྷེ ནཁེཏི མཾསཔྤམཱཎཏོ. དཱིགྷེ ཀེསེཏི དྭངྒུལཏོ. སཙེཔི ན དཱིགྷཱ, དུམཱསཏོ ཨེཀདིཝསམྤི ཨཏིཀྐཱམེཏུཾ ན ལབྷཏི. དཱིགྷེ ནཱསལོམེཏི ནཱསཏོ བཧི ནིཀྑནྟེ. ཝཱིསཏིམཊྛནྟི ཝཱིསཏིཡཱ ནཁཱནཾ མཊྛཉྩ. སམྦཱདྷེཏི ཨུབྷོསུ ཨུཔཀཙྪཀེསུ, མུཏྟཀརཎེ ཙ ལོམཧཱརཎཉྩ ¶ ན ལབྦྷཱཏི སམྦནྡྷནཱིཡཾ. ན ལབྦྷཱཏི ཨེཏེ མཊྛཱདཡོ ན ལབྦྷནྟཱིཏི ཨཏྠོ, ནིཔཱཏོ ཝཱ ལབྦྷཱཏི. ཨཱབཱདྷཔྤཙྩཡཱ པན སམྦཱདྷེ ལོམཾ སཾཧརིཏུཾ ཝཊྚཏི.

༣༤༣. སངྒྷུདྡིཊྛཾ ཝཱ སངྒྷིཀཾ ཝཱ སཡནཱསནཾ ཡཐཱཝུཌྜྷཾ ན བཱདྷེཡྻཱཏི ཡོཛནཱ. སངྒྷསྶ ཨུདྡིཊྛཾ སངྒྷུདྡིཊྛཾ, སངྒྷཾ ཨུདྡིསྶ ཀཏནྟི ཨདྷིཔྤཱཡོ. ཡོ ཡོ ཝུཌྜྷོ ཡཐཱཝུཌྜྷཾ, ཝུཌྜྷཔྤཊིཔཱཊིཡཱཏི ཨཏྠོ. ན བཱདྷེཡྻཱཏི ན པཊིབཱཧེཡྻ. ཨལླཔཱདཱ ནཱམ ཡེཧི ཨཀྐནྟཊྛཱནེ ཨུདཀཾ པཉྙཱཡཏི. སཡནཱསནནྟི མཉྩཔཱིཋཱདི, ཨིམིནཱ པརིབྷཎྜཀཏཱ བྷཱུམཱིཏིཔི ཨུཔལཀྑིཏཱ. སུདྷོཏཔཱདཀཾ ཝཱཔི སཨུཔཱཧནོ ཏཐེཝཱཏི སམྦནྡྷོ. སུདྷོཏཔཱདཀནྟི དྷོཏཔཱདེཧེཝ ཨཀྐམིཏབྦཊྛཱནཾ. དྷོཏཱ པཱདཱ ཡསྶ ཨཀྐམནསྶཱཏི ཀིརིཡཱཝིསེསནསམཱསོ. ཡདི པན ཏཏྠ ནེཝཱསིཀཱ ཨདྷོཏཔཱདེཧིཔི ཝལ༹ཉྫེནྟི, ཏཐེཝ ཝལ༹ཉྫེཏུཾ ཝཊྚཏི. ཏཐེཝཱཏི པརིབྷཎྜཀཏཾ བྷཱུམིཾ སེནཱསནཾ ཝཱ ནཀྐམེཏི ཨཏྠོ.

༣༤༤. སངྒྷཱཊིཡཱཏི ཨདྷིཊྛིཏསངྒྷཱཊིཡཱ. པཱདེ པརིགྒཧེཏྭཱ ཨཱསནཾ པལླཏྠོ, པལླཏྠཾ ཀརོཏཱིཏི པལླཏྠཱཏིདྷཱཏུསྶ པལླཏྠེཏི རཱུཔཾ. ཝིཧཱརེཔི ཨནྟརགྷརེཔི པལླཏྠིཀཱཡ ན ནིསཱིདེཡྻཱཏི ཨདྷིཔྤཱཡོ, པརིཀམྨཀཏཾ བྷིཏྟཱདིནྟི ཡོཛནཱ. པརིཀམྨཀཏནྟི སེཏཝཎྞེན ཝཱ ཙིཏྟཀམྨེན ཝཱ ཀཏཔརིཀམྨཾ. ཨཱདི-སདྡོ དྭཱརཝཱཏཔཱནཱདིཾ སངྒཎྷཱཏི. ན ཨཔསྶཡེཏི ཙཱིཝརཱདིནཱ ཨཔྤཊིཙྪཱདེཏྭཱ ཨཔསྶཡནཾ ན ཀརེཡྻ. ནོ ན ཨཱཙམེཏི ནེཝ ན ཨཱཙམེ, ཨཱཙམེཡྻཱཏི ཨཏྠོ. དྭེ པཊིསེདྷཱ པཀཏིཡཏྠཾ གམེནྟཱིཏི. སནྟེཏི ཨིམིནཱ ཨུདཀེ ཨསནྟེ ཨནཱཔཏྟཱིཏི དཱིཔེཏི.

༣༤༥. ཨཀཔྤིཡསམཱདཱནེཏི བྷིཀྑཱུནཾ སཱམཎེརཱནཾ ཨཀཔྤིཡེ སམཱདཱནེ. དཝཱཏི ནིཔཱཏོ ¶ , ཀཱིལཱ༹དྷིཔྤཱཡེནཱཏི ཨཏྠོ. སིལཱཔཝིཛ྄ཛྷནེཏི ཨནྟམསོ ཧཏྠཡནྟེནཔི སཀྑརིཀཱཡཔི ¶ ཁིཔནེ. སབྷཱགཱཡ དེསནཱཡ ཨཱཝིཀམྨེ ཙ དུཀྐཊནྟི ཡོཛེཏབྦཾ. སབྷཱགཱཡཱཏི ཝཏྠུཝསེན སམཱནོ བྷཱགོ ཨེཏིསྶཱ ཨཱཔཏྟིཡཱཏི ཝིགྒཧོ. ཙ-སདྡོ ཏཱདིསིཡཱ པཊིགྒཧཎམཏྟཾ སམུཙྩིནོཏི.

༣༤༦. པཊིསྶཝོ ནཱམ ‘‘ཨུབྷོཔི མཡཾ ཨིདྷ ཝསྶཾ ཝསིསྶཱམ, ཨེཀཏོ ཨུདྡིསཱཔེམཱ’’ཏིཨཱདིཔཊིཛཱནནཾ, ཏསྶ ཝིསཾཝཱདོ པཙྪཱ ཨཀརཎཾ པཊིསྶཝཝིསཾཝཱདོ, ཏསྨིཾ, ནིམིཏྟཏྠེ བྷུམྨཾ. སུདྡྷཙིཏྟསྶཱཏི ཀཐནསམཡེ ‘‘ཀརིསྶཱམཱི’’ཏི ཨེཝཾ པཝཏྟཙིཏྟསྶ. ཨིཏརསྶཱཏི ཨཉྙསྶ ཨསུདྡྷཙིཏྟསྶ.

༣༤༧. ཀིཙྩེཏི སུཀྑཀཊྛཱདིགྒཧཎཀིཙྩེ སཏི ཨེཝ པོརིསཾ པུརིསཔྤམཱཎཾ ཨབྷིརུཧེཡྻཱཏི སམྦནྡྷོ. ཨཱཔདཱསཱུཏི ཝཱལ༹མིགདསྶནཱདཱིསུ.

༣༤༨. པརིསྶཱཝནཾ ཝིནཱཏི སམྦནྡྷོ. ཨདྡྷཱནནྟི ཧེཊྛིམནྟེན ཨདྡྷཡོཛནསངྑཱཏཾ ཨདྡྷཱནཾ. སཙེ ན ཧོཏི པརིསྶཱཝནཾ ཝཱ དྷམྨཀརཎོ ཝཱ, སངྒྷཱཊིཀཎྞོཔི ཨདྷིཊྛཱཏབྦོ. ཡཱཙམཱནསྶཱཏི པརིསྶཱཝནཾ ཡཱཙནྟསྶ.

༣༤༩. ཨཱབཱདྷཔྤཙྩཡཱ ཨཉྙཏྲ སེསངྒེ ཙ ཨཏྟགྷཱཏནེ ཙ དུཀྐཊནྟི ཡོཛནཱ. སེསངྒེཏི ཨངྒཛཱཏཏོ ཀཎྞནཱསཱདིཨཝསེསེ ཨཝཡཝཙྪེདནེ. ཨཏྟགྷཱཏནེཏི ཨཱཧཱརུཔཙྪེདཱདིནཱ ཨཏྟནོ མཱརཎེ.

༣༥༠. ཏཱུལིཀཱཡ ཀཡིརམཱནཾ ཨིཏྠིཔུརིསཱདིཀཾ ཙིཏྟཉྩ པོཏྠཀཉྩ ཀཊྛཱདཱིསུ ཀཡིརམཱནཾ ཙིཏྟཔོཏྠཀཱནི, ཏཱནིཡེཝ རཱུཔཱནཱིཏི སམཱསོ. ཛཱཏཀཱདཱིནི པན པརེཧི ཀཱརཱཔེཏུཾ ལབྦྷནྟི. མཱལཱཀམྨཱདཱིནི སཡམྤི ཀཱཏུཾ ལབྦྷནྟི. ཨཱརཱམཱརཉྙགེཧེསུ བྷུཉྫནྟཾ ན ཨུཊྛཱཔེཡྻཱཏི ཡོཛེཏབྦཾ. ཝིཧཱརསངྑཱཏོ ¶ ཨཱརཱམོ ཙ ཨརཉྙཉྩ ཨནྟརགྷརསངྑཱཏཾ གེཧཉྩཱཏི དྭནྡོ. ‘‘ཨཱརཱམ…པེ… གེཧེསཱུ’’ཏི ཝཏྟབྦེ ཨེ-ཀཱརསྶ ཨ-ཀཱརཀརཎེན གཱཐཱབནྡྷཝསེན ཝུཏྟཾ. ཨོཀཱསེ ཀཏེ པན ‘‘པཝིསཐཱ’’ཏི ཝུཏྟེ ཙ པཝིསིཏབྦཾ ཨུཔནིསཱིདིཏབྦཉྩ.

༣༥༡. པུམཡུཏྟཱནི ¶ ཡཱནཱནི ཙ སིཝིཀཉྩ ཧཏྠཝཊྚཀཉྩ པཱཊངྐིཉྩ ཨབྷིརུཧིཏུཾ གིལཱནསྶ ཀཔྤཏེཏི སམྦནྡྷོ. པུམཡུཏྟཱནཱིཏི ཨསྶགཝཱདིཔུརིསཡུཏྟཱནི, ན དྷེནུཡུཏྟཱནི, སཱརཐི པན ཨིཏྠཱི ཝཱ ཧོཏུ པུརིསོ ཝཱ, ཝཊྚཏི. ཧཏྠཝཊྚཀེཔི ཨེསེཝ ནཡོ, ཡཱནཱནཱིཏི རཐསཀཊཱདཱིནི, སིཝིཀནྟི པཱིཋཀསིཝིཀཾ, པཱིཋཀཡཱནནྟི ཨཏྠོ. པཱཊངྐཱིཏི ཨནྡོལིཀཱ. གིལཱནསྶཱཏི ཨེཏྠ གིལཱནོ ནཱམ ན ཨཔྤཀེནཔི སཱིསཱབཱདྷཱདིམཏྟེན ཝེདིཏབྦོ, ཡོ པན ན སཀྐོཏི ཝིནཱ ཡཱནེན གནྟུཾ, ཨེཝརཱུཔོ ཝེདིཏབྦོ. ཏཐཱ ཧི ཡཱནཾ ཨནུཛཱནནྟེན བྷགཝཏཱ ཀོསལེསུ ཛནཔདེསུ བྷགཝནྟཾ དསྶནཱཡ སཱཝཏྠིཾ གཙྪནྟཾ ཨཉྙཏརཾ གིལཱནཾ བྷིཀྑུཾ གནྟུམསཀྐུཎེཡྻཏཱཡ ཨཉྙཏརསྨིཾ རུཀྑམཱུལེ ནིསིནྣཾ དིསྭཱ མནུསྶེཧི ཏཾ པཝཏྟིཾ ཉཏྭཱ ‘‘ཨེཧི, བྷནྟེ, གམིསྶཱམཱ’’ཏི ཝུཏྟེ ‘‘ནཱཧཾ, ཨཱཝུསོ, གམིསྶཱམི, གིལཱནོམྷཱི’’ཏི ཝུཏྟཝཏྠུསྨིཾ (མཧཱཝ. ༢༥༣) ཨནུཉྙཱཏཾ, ཏཐཱ ཝདནྟོ ཙ སོ བྷིཀྑུ གམནུཔཙྪེདསཱདྷཀམེཝ གེལཉྙཾ སནྡྷཱཡཱཧཱཏི ཝིཉྙཱཡཏི ཨདྷིཔྤེཏཏྠནིཔྥཏྟིཡཱ ཨུཔཙྪིནྣཏྟཱ, ཨཔིཙ ཡཱནེན ཨེཀཔརིཙྪེདཱཡ ཨུཔཱཧནཱཡ པརིཙྪེདཾ ཋཔེནྟེན ཨཊྛཀཐཱཙརིཡེན ‘‘གིལཱནེན བྷིཀྑུནཱ སཨུཔཱཧནེནཱཏི ཨེཏྠ གིལཱནོ ནཱམ ཡོ ན སཀྐོཏི ཨནུཔཱཧནེན གཱམཾ པཝིསིཏུ’’ནྟི ཨཊྛཀཐཱཡཾ (མཧཱཝ. ཨཊྛ. ༢༥༦) ཝུཏྟཾ, ཏསྨཱ ཡཐཱཝུཏྟགིལཱནོཝ གིལཱནོཏི ནིཊྛམེཏྠ གནྟབྦཾ.

༣༥༢. དཝཾ ¶ ཀརཎེཏི ཀེལི༹ཡཱ ཀརཎེ. ཨཉྙསྶཱཏི ཨནྟམསོ དུསྶཱིལསྶཱཔི. ཨུཔལཱལ༹ནེཏི ‘‘པཏྟཾ དསྶཱམི, ཙཱིཝརཾ དསྶཱམཱི’’ཏིཨཱདིནཱ.

༣༥༣. ཝིཝརིཏྭཱ ན དསྶཡེཏི སམྦནྡྷནཱིཡཾ. ཏཱ བྷིཀྑུནིཡོ.

༣༥༤. ཨོཝཱདནྟི བྷིཀྑུནཱིཧི ཏེརསིཡཾ ཝཱ ཙཱཏུདྡསིཡཾ ཝཱ ཨཱགནྟྭཱ ཨུཔོསཐཾ པུཙྪིཏྭཱ ‘‘ཙཱཏུདྡསོ’’ཏིཨཱདིནཱ བྷིཀྑུནཱ ཨཱཙིཀྑིཏེ པུན ཏཱཧི ཨུཔོསཐདིཝསེ སམཱགནྟྭཱ ཨོཝཱདཱུཔསངྐམནཡཱཙནཾ, ཏཾ པཱཏིམོཀྑུདྡེསཀསྶ ཨཱརོཙེཏྭཱ ཏེན ཀཏསནྣིཊྛཱནཾ གཧེཏྭཱ པཱཊིཔདེ པཙྩཱཧརིཏབྦནྟི ཨཛཱནནཀཾ བཱལཉྩ ཏཐཱ ཀཱཏུཾ ཨསམཏྠཾ གིལཱནཉྩ པཱཊིཔདེ གནྟུཀཱམཾ གམིཡཉྩ ཝཛྫེཏྭཱ ཨཉྙསྶ གཧཎཔཙྩཱཧརཎཱནི ཨཀཱཏུཾ ན ཝཊྚཏི. ཏེན ཝུཏྟཾ ‘‘ན གཎྷཏོ’’ཏིཨཱདི.

༣༥༥. ལོཀཱཡཏནྟི ¶ ནིརཏྠཀཀཱརཎཔྤཊིསཾཡུཏྟཾ ཏིཏྠིཡསཏྠཾ. ཏིརཙྪཱནཝིཛྫཱ ཙ ཨིམིནཱཝ ཨུཔལཀྑིཏཱ. ན ཝཱཙེཡྻཱཏི པརེསཾ ན ཝཱཙེཡྻ. ཨིམིནཱཝ ཨཏྟནོ པརིཡཱཔུཎནམྤི པཊིཀྑིཏྟཾ ལོཀཱཡཏཏིརཙྪཱནཝིཛྫཱཏི ཙ རཱགདོསམོཧཝཌྜྷཱནི བུདྡྷཱདིགརཧིཏཱ སགྒམོཀྑཱནཾ ཏིརོ ཏིརིཡཏོ ཨཉྩིཏཱ གཏཱ པཝཏྟཱ ཀབྦནཱཊཀཱདིཀཱ སབྦཱཔི ཝིཛྫཱ ཨནུལོམཝསེན ཝཱ ཝིནཡཔརིཡཱཡཾ པཏྭཱ གརུཀེ ཋཱཏབྦནྟི ཝིནཡཡུཏྟིཏོཔི སངྒཧིཏཱཏི ཝེདིཏབྦཱ. ཨེཝཉྩ ནོ གརཱུནམུཔདེསོ. པེལཱ༹ཡཔཱིཏི ཡཏྠ པཱཏིཾ ཋཔེཏྭཱ སུཁིནོ བྷུཉྫནྟི, ཏམྦལོཧེན རཛཏེན ཝཱ ཀཏཱཡ ཏཱཡ ཨཱསིཏྟཀཱུཔདྷཱནསངྑཱཏཱཡ པེལཱ༹ཡ ཋཔེཏྭཱ.

༣༥༦. པཱརུཏཉྩ ནིཝཱསནཉྩ, གིཧཱིནཾ ཧཏྠིསོཎྜཱདིཝསེན པཱརུཏནིཝཱསནཾ ཡསྶ པཱརུཔནསྶ ནིཝཱསནསྶཱཏི ཀིརིཡཱཝིསེསནསམཱསོ ¶ . གིཧིཔཱརུཏནིཝཱསནཾ ན པཱརུཔེ ན ནིཝཱསེཡྻཱཏི སམྦནྡྷོ. སཾཝེལླིཡཾ ན ནིཝཱསེཡྻཱཏི མལླཀམྨཀརཱདཡོ ཝིཡ ཀཙྪཾ ཀཏྭཱ ན ནིཝཱསེཡྻ. ཨེཝཾ ནིཝཱསེཏུཾ གིལཱནསྶཱཔི མགྒཔྤཊིཔནྣསྶཱཔི ན ཝཊྚཏི. ཡམྤི མགྒཾ གཙྪནྟཱ ཨེཀཾ ཝཱ དྭེ ཝཱ ཀོཎེ ཨུཀྑིཔིཏྭཱ ཨནྟརཝཱསཀསྶ ཨུཔརི ལགྒནྟི, ན ཝཊྚཏི. ཨེཝཾ ཨཔཱརུཔིཏྭཱ ཨནིཝཱསེཏྭཱ ཙ ནིབྦིཀཱརཾ པརིམཎྜལཾ པཱརུཔིཏབྦཾ ཏིམཎྜལཾ པཊིཙྪཱདེནྟེན པརིམཎྜལཾ ནིཝཱསེཏབྦཉྩ, ཏཐཱ ཨཔཱརུཔིཏྭཱ ཨནིཝཱསེཏྭཱ ཙ ཨཱརཱམེ ཝཱ ཨནྟརགྷརེ ཝཱ ཨནཱདརེན ཡཾ ཀིཉྩི ཝིཀཱརཾ ཀརོནྟསྶ དུཀྐཊཾ. དཱཡནྟི ཝནཾ. ནཱལིམྤཡེཡྻཱཏི ‘‘སབྦཱུཔཀཱརཱནི ཝིནསྶནྟཱུ’’ཏི ཝཱ ཁིཌྜཱདྷིཔྤཱཡེན ཝཱ ནཱལིམྤཡེཡྻ.

༣༥༧. ཝཌྜྷིཾ ནོ པཡོཛཡེ ཨཉྙཱཏཀཔྤཝཱརིཏེ ནོ ཡཱཙེཏི ཡོཛནཱ. ཨཉྙསྶཱཏི སཧདྷམྨིཀསྶཱཔི. ཀཏིཔཱཧཾ བྷུཏྭཱ ཝཱཏི ཡོཛནཱིཡཾ. པུནོཏི ནིཔཱཏོ.

༣༥༨. དཎྜིནཾ ཉཏྭཱ ཝཱ ཨཉཏྭཱ ཝཱ ཨུདྡིསྶ རཀྑཾ ཡཱཙནེ དཎྜིཏེ དཎྜོ ཨསྶ གཱིཝཱཏི ཡོཛནཱ. དཎྜཾ གཎྷཏཱིཏི པཙྩཡནྟསྶ དཎྜིནཾ དཎྜགྒཧཎནྟི ཨཏྠོ. ཨུདྡིསྶཱཏི ‘‘ཨམྷཱཀཾ ཝིཧཱརེ ཨསུཀེན ཙ ཨསུཀེན ཙ ཨིདཾ ནཱམ ཀཏ’’ནྟི, ‘‘ཀརིསྶ’’ནྟི ཝཱ ཨེཝཾ ཨཏཱིཏཾ ཝཱ ཨནཱགཏཾ ཝཱ ཨཱརབྦྷ. ཡཱཙནེཏི ཝོཧཱརིཀེསུ ཡཱཙནེ སཏི. དཎྜིཏེཏི ཏེཧི དཎྜེ གཧིཏེ སོ དཎྜོ ཨསྶ ཡཱཙཀསྶ བྷིཀྑུནོ གཱིཝཱ, ཨིཎཾ ཧོཏཱིཏི ཨཏྠོ. ཝོཧཱརིཀེཧི པན ‘‘ཀེནཱ’’ཏི ཝུཏྟེ ‘‘ཨསུཀེནཱཏི ཝཏྟུཾ ཨམྷཱཀཾ ན ཝཊྚཏི, ཏུམྷེཡེཝ ཛཱནིསྶཐ, ཀེཝལཉྷི མཡཾ རཀྑཾ ཡཱཙཱམ, ཏཾ ནོ དེཐ, ཨཝཧཊབྷཎྜཉྩ མཾ ཨཱཧརཱཔེཐཱ’’ཏི ཝཏྟབྦཾ ¶ . ཨེཝཾ ཨནོདིསྶ ཨཱཙིཀྑཎཱ ཧོཏི, སཱ ཝཊྚཏི. པཱརཱཛིཀཱདིཀཱཏི པཱརཱཛིཀཐུལླཙྩཡདུཀྐཊཱནི.

པཱཋེཧི བྷཝིཏབྦཾ. ཨེཝཉྷི སཏི ‘‘ཧརནྟེསཱུ’’ཏི བཧུཝཙནེན སཧ གྷཊཏེ. པརིཀྑཱརཾ ཧརནྟེསུ ཨེསཾ ཨནཏྠཱཡ ‘‘ཙོརོ ཙོརོ’’ཏི བྷཱསིཏེ དཎྜཾ གཎྷནྟེ ཏཏྟཀཾ ཨསྶ གཱིཝཱཏི ཡོཛེཏབྦཾ. ཧརནྟེསཱུཏི ཙོརེསུ གཧེཏྭཱ གཙྪནྟེསུ. ཨེསནྟི ཙོརཱནཾ. གཎྷནྟེཏི ཝོཧཱརིཀཛནེ གཎྷནྟེ. ཡཏྟཀཾ གཧིཏཾ, ཏཏྟཀཾ ཨསྶ བྷིཀྑུནོ གཱིཝཱ, བྷཎྜདེཡྻཾ ཧོཏཱིཏི ཨཏྠོ.

༣༦༠. པཱཀཱརཀུཊྚཱནཾ བཧི ཝལ༹ཉྫེ ཝཱཔི ཝཱིཧཱདིནཱལི༹ཀེརཱདིརོཔིམེ ཧརིཏེ ཝཱཔི ཝིགྷཱསུཙྩཱརསངྐཱརམུཏྟཾ ནཱཝལོཀིཡ ཚཌྜེཡྻ, དུཀྐཊནྟི སམྦནྡྷོ. ཝལ༹ཉྫེ ནཱཝལོཀིཡཱཏི ཙ ཨིམིནཱ ཨོལོཀེཏྭཱ ཝཱ ཨཝལ༹ཉྫེ ཝཱ ཝིགྷཱསཱདཱིནི ཚཌྜེནྟསྶ ཨནཱཔཏྟཱིཏི དཱིཔེཏི. ཝཱིཧི ཨཱདི ཡེསཾ སཱལིཨཱདཱིནཾ ཏེ ཝཱིཧཱདཡོ, ནཱལི༹ཀེརོ ཨཱདི ཡེསཾ ཨམྦཔནསཱདཱིནཾ ཏེ ནཱལི༹ཀེརཱདཡོ, ཝཱིཧཱདཡོ ཙ ནཱལི༹ཀེརཱདཡོ ཙཱཏི དྭནྡོ, ཏེསཾ རོཔོ, ཏེན ནིབྦཏྟཾ ཝཱིཧཱདི…པེ… རོཔིམཾ. ཧརིཏེཏི ཧརིཏཊྛཱནེ. ཝིགྷཱསོ ནཱམ ཨུཙྪིཊྛོདཀཙལཀཱདི.

༣༦༡. དྷམྨཡུཏྟམྤི ནཙྩཉྩ གཱིཏཉྩ ཝཱདིཏཉྩ ཡོཛཱཔེཏུཉྩ པཡོཛེཏུཉྩ པཡུཏྟཱནི པསྶིཏུཉྩ ‘‘ཨུཔཧཱརཾ ཀརོམཱ’’ཏི ཝུཏྟེ སམྤཊིཙྪིཏུཾ ཝཱ ན ལབྦྷནྟི སམྦནྡྷོ. དྷམྨཡུཏྟམྤཱིཏི རཏནཏྟཡགུཎཱུཔསཾཧིཏཏཱཡ ཨནྟམསོ དྷམྨེན པུཉྙེན སཾཡུཏྟམྤི. ནཙྩནྟི ཨནྟམསོ མོརསུཀམཀྐཊཱདཱིནཾ ནཙྩམྤི. གཱིཏནྟི ཨནྟམསོ གཱིཏསྶ པུབྦབྷཱགེ ཀཡིརམཱནཾ དནྟགཱིཏམྤི. ཝཱདིཏནྟི ཨནྟམསོ ཨུདཀབྷེརིཝཱདིཏམྤི. ཡོཛཱཔེཏུནྟི ཨཉྙེཧི ཀཱརཱཔེཏུཾ. པཡོཛེཏུནྟི ཨཏྟནཱ ཀཱཏུཾ. ཨཱཡཏཀེན ¶ གཱིཏསྶརེན དྷམྨམྤི བྷཱསིཏུཾ ན ཝཊྚཏི. པཡུཏྟཱནཱིཏི པརེཧི ཡེཧི ཀེཧིཙི ཀཏཱནི. པསྶིཏུནྟི ཨིམིནཱ ཨནོལོཙནདསྶནམྤི གཧིཏནྟི སོཏུནྟིཔི ཨཏྠོ ཝིཉྙཱཡཏི. ཨནྟརཱརཱམེ ཋིཏསྶ པསྶཏོ ཨནཱཔཏྟི. ཝཱིཐིཡཾ ཋཏྭཱ གཱིཝཾ པརིཝཏྟེཏྭཱ པསྶཏོཔི ཨཱཔཏྟིཡེཝ. ཡེན ཀེནཙི ཀརཎཱིཡེན གཏཊྛཱནེ པསྶཏི, སུཎཱཏི ཝཱ, ཨནཱཔཏྟི. སམྤཊིཙྪིཏུནྟི ¶ ‘‘སཱདྷཱུ’’ཏི སམྤཊིཙྪིཏུཾ. ‘‘ཨུཔཧཱརཀརཎཾ ནཱམ སུནྡར’’ནྟི ཝཏྟུཾ ཝཊྚཏི. ཝཱ-སདྡོ སམུཙྩཡེ.

༣༦༢. ‘‘ཀཱིལ༹ཏྠཾ ཀཏཾ རཱཛཱགཱར’’ནྟིཨཱདིནཱ སམྦནྡྷིཏབྦཾ. ཙིཏྟེན ཝིཙིཏྟཀཾ ཨཱགཱརཾ ཙིཏྟཱགཱརཀཾ.

༣༦༣. ཨཱསནེན ནཝེ ན པཊིབཱཧེཡྻཱཏི ཡོཛནཱ. ཨཱསནེནཱཏི ཨཱསནཏོ. ན པཊིབཱཧེཡྻཱཏི ན ཨུཊྛཱཔེཡྻ. ཨུཎྷེ ཙཱིཝརཾ ན ནིདཧེཡྻཱཏི ཡོཛནཱིཡཾ. ན ནིདཧེཡྻཱཏི ཨདྷིཀཾ ན ནིདཧེཡྻ. གརུནཱཏི ཨཱཙརིཡུཔཛ྄ཛྷཱཡེན. པཎཱམིཏོཏི ‘‘མཱ ཨིདྷ པཝིསཱ’’ཏིཨཱདིནཱ ནིཀྐཌྜྷིཏོ.

༣༦༤. སཏྟཧི ཨཱཔཏྟཱིཧི ཙ བྷིཀྑུཾ ཝཱཔི ཨཉྙེནེཝ ཙ ཨུཔཱསཀཾ ཝཱཔི པརམྨུཁཱ ཨཀྐོསནེ དུཀྐཊནྟི ཡོཛེཏབྦཾ. ཨཱཔཏྟཱིཧི ཙཱཏི ཙ-སདྡོ ཨཝདྷཱརཎེ. ཨཉྙེནེཝ ཙཱཏི ཨེཏྠ ཨེཝ ཙཱཏི ནིཔཱཏསམུདཱཡོ, ཨེཀོ ཨེཝ ཝཱ ཨཝདྷཱརཎེ, ཝུཏྟཏོ ཨཉྙེནེཝ ‘‘ཨསདྡྷོ’’ཏིཨཱདིནཱཏི ཨཏྠོ. པརམྨུཁཱཏི ནིཔཱཏོ, ཏསྶ ཨསམྨུཁེཏི ཨཏྠོ. སམྨུཁཱ ཝདནྟསྶ པཱཙིཏྟིཡཾ. པཱཔགརཧཎཝསེན པན ཝདཏོ ཨནཱཔཏྟི.

༣༦༥. སདྡྷཱདེཡྻཾ སདྡྷཱཡ དཱཏབྦཾ ཙཱིཝརཉྩ ཙ-སདྡེན ཨཝསེསམྤི ཝིནིཔཱཏེཏུཾ ནཱསེཏུཾ ན ལབྦྷཾ, པིཏཱུནཾ ལབྦྷནྟི སམྦནྡྷོ. ཉཱཏཱིནམྤཱིཏི པི-སདྡོ སམྦྷཱཝནེ.

༣༦༦. ཨཉྙཏྲ ¶ ཝསྶཾཝུཏྠོ ཨཉྙཏོ བྷཱགཾ གཎྷེཡྻ, དུཀྐཊནྟི སམྦནྡྷོ. ཨཉྙཏྲཱཏི ཨཉྙསྨིཾ ཝིཧཱརེ. ཨཉྙཏོཏི ཨཉྙཝིཧཱརཏོ. པཊིདེཡྻཱཏི གཧིཏཊྛཱནེ དདེཡྻ. གཧིཏེ ཏསྨིཾ ཝཏྠུསྨིཾ ནཊྛེ ཝཱ ཛིཎྞེ ཝཱ ཏསྶ གཱིཝཱཧོ ཏཱིཏི སམྦནྡྷོ. ཙོདིཏོ ནོ དདེཡྻ, ཏེསཾ དྷུརནིཀྑེཔཏོ བྷཎྜགྒྷཀཱརིཡོ ཧོཏཱིཏི ཡོཛནཱ. ཙོདིཏོཏི ཝཏྠུསཱམིཀེཧི ‘‘དེཧཱི’’ཏི ཝུཏྟོ. ཏེསནྟི ཏསྨིཾ ཝིཧཱརེ ལཱབྷཱིནཾ བྷིཀྑཱུནཾ.

༣༦༧. སནྟརུཏྟརོ ཝཱ ཀལློ སཨུཔཱཧནོ ཝཱ གཱམཾ ན པཝིསེཡྻ, ཙཱམརཱིམཀསབཱིཛནིཾ ན དྷཱརེཡྻཱཏི ཡོཛནཱིཡཾ. ཨནྟརཉྩ ཨུཏྟརཉྩ, སཧ ཨནྟརུཏྟརེན སནྟརུཏྟརོ. ཨགྒལ༹གུཏྟེ ཝིཧཱརེ ¶ སངྒྷཱཊིཾ ནིཀྑིཔིཏྭཱ གནྟུཾ ཝཊྚཏི. ཨཱརཉྙཀེན པན བྷཎྜུཀྑལིཀཱཡ པཀྑིཔིཏྭཱ པཱསཱཎརུཀྑསུསིརཱདཱིསུ པཊིཙྪནྣེསུ ཋཔེཏྭཱ གནྟབྦཾ. ཨནྟརུཏྟརཱནཾ ནིཀྑེཔེ ཨཡམེཝ ནཡོ. ཀལློཏི ཨགིལཱནོ. མཀསཱནཾ བཱིཛནཱི མཀསབཱིཛནཱི, ཙམརཱིནཾ ཝཱལེ༹ཧི ཀཏཱ མཀསབཱིཛནཱིཏི སམཱསོ.

༣༦༨. ཨཱརཱམཏོ བཧཱིཏི སམྦནྡྷནཱིཡཾ. ཨཱརཱམཏོཏི ཨཱརཱམཱུཔཙཱརཏོ. ན དྷཱརེཡྻཱཏི ཨགིལཱནོ ན དྷཱརེཡྻ. ཡསྶ པན ཀཱཡདཱཧོ ཝཱ པིཏྟཀོཔོ ཝཱ ཧོཏི, ཙཀྑུ ཝཱ དུབྦལཾ, ཨཉྙོ ཝཱ ཀོཙི ཨཱབཱདྷོ ཝིནཱ ཚཏྟེན ཨུཔྤཛྫཏི, ཏསྶ གཱམེ ཝཱ ཨརཉྙེ ཝཱ ཚཏྟཾ ཝཊྚཏི. གུཏྟིཡཱ ལབྦྷཏཱིཏི ཝསྶེ ཙཱིཝརགུཏྟཏྠཾ, ཝཱལ༹མིགཙོརབྷཡེསུ ཨཏྟགུཏྟཏྠམྤི ལབྦྷཏཱིཏི ཨཏྠོ. ཨེཀཔཎྞཚཏྟཾ པན སབྦཏྠེཝ ཝཊྚཏི.

༣༦༩. ཨུབྷཏོཀཱཛཾ ན གཱཧེཡྻཱཏི སམྦནྡྷོ. ཨུབྷཏོ དཎྜསྶ ཨུབྷཡཀོཊིཡཾ བྷཱརབནྡྷཀཱཛཾ ཨུབྷཏོཀཱཛཾ, ཨལོཔཏཔྤུརིསོ. ཨེཀནྟརིཀཀཱཛཀནྟི ཨནྟརམེཝ ¶ ཨནྟརིཀཾ, ཨེཀཉྩ ཨནྟརིཀཉྩཱཏི དྭནྡོ, ཨེཀནྟརིཀེ བྷཱརབནྡྷཀཱཛནྟི ཏཔྤུརིསོ ཨེཀཏོཀཱཛཀཾ, ཨནྟརིཀཀཱཛཀནྟི ཝུཏྟཾ ཧོཏི. ཧཏྠེ ཨོལམྦོ ཨསྶ བྷཱརསྶཱཏི སམཱསོ.

༣༧༠. ཨནོཀཱསཀཏནྟི ‘‘ཀརོཏུ མེ ཨཱཡསྨཱ ཨོཀཱསཾ, ཨཧཾ ཏཾ ཝཏྟུཀཱམོ’’ཏི ཨེཝཾ ཙོདཀེན ཨོཀཱསེ ཀཱརཱཔིཏེ ནཏྠི ཨོཀཱསོ ཀཏོ ཨནེན ཙུདིཏཀེནཱཏི བཧུབྦཱིཧི. ཙོདེཡྻཱཏི ཙཱཝནཨཀྐོསཀམྨཝུཊྛཱནཱདྷིཔྤཱཡེན ཙོདེཡྻ. ཨུཔོསཐཔྤཝཱརཎཊྛཔནཨནུཝིཛྫདྷམྨཀཐཱདྷིཔྤཱཡེསུ ཨོཀཱསཀམྨཾ ནཏྠི. སུདྡྷསྶཱཏི ཨནཱཔཏྟིཀཏཱཡ སུདྡྷསྶ. ཨཝཏྠུསྨིནྟི ཨཀཱརཎེ. ཏཐཱཏི དུཀྐཊཾ ཨཏིདིསཏི. ཀརོནྟེནཱཔི ‘‘བྷཱུཏམེཝ ནུ ཁོ ཨཱཔཏྟིཾ ཝདཏི, ཨབྷཱུཏ’’ནྟི ཨེཝཾ ཨུཔཔརིཀྑིཏྭཱ ཀཱཏབྦཱ. ‘‘ཨནུཛཱནཱམི, བྷིཀྑཝེ, པུགྒལཾ ཏུལཡིཏྭཱ ཨོཀཱསཾ ཀཱཏུ’’ནྟི (མཧཱཝ. ༡༥༣) ཧི ཝུཏྟཾ.

༣༧༡. སཏྟཱནཾ པཀཏངྒུལེན ཨཊྛངྒུལཱདྷིཀཾ མཉྩཔྤཊིཔཱདཾ ཝཱ ཨུཙྩཔཱདཀཾ མཉྩཾ ཝཱ ན དྷཱརཡེཏི ཡོཛནཱ. པཀཏིཡཱ ཨངྒུལཾ པཀཏངྒུལཾ. ཏཉྩ ཝཌྜྷཀིཨངྒུལཾ ཝེདིཏབྦཾ. ཨཊྛ ཙ ཏཱནི ཨངྒུལཱནི ཙ, ཏེཧི ཏམདྷིཀཾ ཡསྶཱཏི སམཱསོ. མཉྩཱནཾ པཊིཔཱདོ, ཡཏྠ མཉྩཔཱདེ ནིཀྑིཔནྟི. ཨཊྛངྒུལཏོ ཨུཙྩཱ པཱདཱ ཡསྶཱཏི བཧུབྦཱིཧི.

༣༧༢. མཱུགབྦཏཱདིནྟི ¶ མཱུགཱནམིཝ ཏུཎྷཱིབྷཱཝསངྑཱཏཾ ཝཏཾ ཨཱདི ཡསྶ གོཝཏཱདིནོ ཏིཏྠིཡཝཏསྶཱཏི སམཱསོ. ཁུརམེཝ བྷཎྜཾ ཁུརབྷཎྜཾ. པུབྦེ ནྷཱཔིཏོ ནྷཱཔིཏཔུབྦཀོ, ཝིསེསནསྶ པརནིཔཱཏོ.

༣༧༣. ཧཏྠཀམྨནྟི ཧཏྠེན ཀཱཏབྦཾ ཝཌྜྷཀིཨཱདཱིནཾ ཀམྨཾ. ཨནུསྶརཎཾ ‘‘ཀཔྤིཡཏྟཾ མེ ཡེན ཡཱཙིཏཾ, ཨམྷེཧི ཨིམསྶ ¶ དཱཏབྦ’’ནྟི ཨེཝཾ ཙིཏྟཔྤཝཏྟིཨནུསཱརོ, ཏསྶཱ ཡཱཙནཱཡ ཨནུསཱརོ ཏདནུསཱརོ, ཏཏོ ལདྡྷཾ ཡཾ ཀིཉྩི གཧེཏུནྟི ཡོཛནཱ. ཀམྨཏོ ནིགྒཏོ ནིཀྐམྨོ, ཝིགྷཱསཱདཱདི. ཏཾ ཨཡཱཙིཏྭཱཔི ཀཱརེཏུནྟི སམྦནྡྷོ. ཨཱཧརཱཔེཏུནྟི ཨརཉྙཏོ ཨཱནེཏུཾ. ཨཔརསནྟཀནྟི དཱརུཏིཎཔལཱལཱདིཀཾ ཨཔརཔརིགྒཧིཏཾ.

༣༧༤. གིཧཱིནཾ ཡཏྟཀཾ དེཏི, གོཔཀེ དེནྟེ གཧེཏུཾ ལབྦྷཾ, སངྒྷཙེཏིཡསནྟཀེ ཡཐཱཔརིཙྪེདཾ གཧེཏུཾ ལབྦྷནྟི ཡོཛནཱ. དེཏཱིཏི གོཔཀོ བྷིཀྑཱུནཾ དེཏི. གཧེཏུནྟི ཏཏྟཀཾ གཧེཏུཾ. སངྒྷཙེཏིཡསནྟཀེཏི ཝེཏནགོཔཀེཧི དཱིཡམཱནེ སངྒྷསྶ ཙེཏིཡསྶ ཙ སནྟཀེ. ཡཐཱཔརིཙྪེདནྟི ཡཾ ཏེསཾ སངྒྷེན ཨནུཉྙཱཏཾ ཧོཏི ‘‘དིཝསེ དིཝསེ ཨེཏྟཀཾ ནཱམ ཁཱདཐཱ’’ཏི, ཏཾ པརིཙྪེདཾ ཨནཏིཀྐམྨ. སངྒྷིཀེ ཙ ཙེཏིཡསནྟཀེ ཙ ཀེཎིཡཱ གཧེཏྭཱ ཨཱརཀྑནྟསྶེཝ ཧི དཱནེ པརིཙྪེདོ ནཏྠི.

༣༧༥. ‘‘ཀཱཡཝཱཙཱཧི དྭཱིཧི ཨཱཔཏྟིཾ ཨཱཔཛྫེཡྻཱ’’ཏི ཡེབྷུཡྻཝསེན ཝུཏྟཾ, མེཐུནདྷམྨེ པརཱུཔཀྐམེ སཏི སཱདིཡནྟསྶ ཨཀིརིཡསམུཊྛཱནབྷཱཝསམྦྷཝཏོ. ཚཧི ཝཱཏི ཨཱཔཏྟུཔྤཏྟིཀཱརཎསངྑཱཏེཧི ཚཧི སམུཊྛཱནེཧི ཝཱ ཨཱཔཏྟིཾ ཨཱཔཛྫེཡྻཱཏི སམྦནྡྷོ. སབྦཱཔཏྟཱིནཉྷི ཀཱཡོ ཝཱཙཱ ཀཱཡཝཱཙཱ ཀཱཡཙིཏྟཾ ཝཱཙཱཙིཏྟཾ ཀཱཡཝཱཙཱཙིཏྟནྟི ཚ སམུཊྛཱནཱནི. ཏཏྠ པུརིམཱནི ཏཱིཎི ཨཙིཏྟཀཱནི, པཙྪིམཱནི སཙིཏྟཀཱནི.

ཏིདྷཱ ཨེཀསམུཊྛཱནཱ, པཉྩདྷཱ དྭིསམུཊྛིཏཱ;

དྭིདྷཱ ཏིཙཏུརོ ཋཱནཱ, ཨེཀདྷཱ ཚསམུཊྛིཏཱ.

ཏཏྠ ཙཏུཏྠེན པཉྩམེན ཚཊྛེན ཙ སམུཊྛཱནཏོ ཨེཀསམུཊྛཱནཱ ཏིདྷཱ. པཋམཙཏུཏྠེཧི ཙ དུཏིཡཔཉྩམེཧི ཙ ཏཏིཡཚཊྛེཧི ཙ ཙཏུཏྠཚཊྛེཧི ཙ པཉྩམཚཊྛེཧི ཙ སམུཊྛཱནཏོ ¶ དྭིསམུཊྛིཏཱ པཉྩདྷཱ ¶ . པཋམེཧི ཙ ཏཱིཧི པཙྪིམེཧི ཙ ཏཱིཧི སམུཊྛཱནཏོ ཏིསམུཊྛཱནཱ དྭིདྷཱ. པཋམཏཏིཡཙཏུཏྠཚཊྛེཧི ཙ དུཏིཡཏཏིཡཔཉྩམཚཊྛེཧི ཙ སམུཊྛཱནཏོ ཙཏུསམུཊྛཱནཱ དྭིདྷཱ. ཚཧིཔི སམུཊྛིཏོ ཚསམུཊྛཱནཱ ཨེཀདྷཱ. ཨལཛྫི…པེ… སཉྙིཏཱཡ ཙཱཏི ཨིམེཧི ཚཧི ཝཱ ཨཱཔཏྟིཾ ཨཱཔཛྫེཡྻཱཏི སམྦནྡྷོ. ཡོ སཉྩིཙྩ ཨཱཔཏྟིཾ ཨཱཔཛྫཏི, ཨཱཔཏྟིཾ པརིགཱུཧཏི, ཨགཏིགམནཉྩ གཙྪཏི, ཨེདིསོ ཝུཙྩཏི ཨལཛྫཱི པུགྒལོ. ཨལཛྫཱི ཙ ཨཉྙཱཎོ ཙ ཀུཀྐུཙྩཔཀཏོ ཙ ཀུཀྐུཙྩེན ཨབྷིབྷཱུཏོཏི དྭནྡོ. བྷཱཝེ ཏྟཔྤཙྩཡོ.

ཏཏྠ ཡོ ཨཀཔྤིཡབྷཱཝཾ ཛཱནནྟོཡེཝ མདྡིཏྭཱ ཝཱིཏིཀྐམཾ ཀརོཏི, ཨཡཾ ཨལཛྫིཏཱ ཨཱཔཛྫཏི. མནྡོ མོམཱུཧོ ཀཏྟབྦཱཀཏྟབྦཾ ཨཛཱནནྟོ ཨཀཏྟབྦཾ ཀརོཏི, ཀཏྟབྦཾ ཝིརཱདྷེཏི, ཨཡཾ ཨཉྙཱཎཏྟཱ ཨཱཔཛྫཏི. ཀཔྤིཡཱཀཔྤིཡཾ ནིསྶཱཡ ཀུཀྐུཙྩེ ཨུཔྤནྣེ ཝིནཡདྷརཾ ཨཔུཙྪིཏྭཱ མདྡིཏྭཱ ཝཱིཏིཀྐམཏི, ཨཡཾ ཀུཀྐུཙྩཔཀཏཏྟཱ ཨཱཔཛྫཏི. སཏིཡཱ པླཝོ སམྨོཧོ སཏིཔླཝོ, སཧསེཡྻཏིཙཱིཝརཝིཔྤཝཱསཱདཱིནི སཏིཔླཝཱ ཨཱཔཛྫཏི. ཀཔྤཉྩ ཨཀཔྤིཡཉྩ ཀཔྤཱཀཔྤིཡཾ, ཀཔྤཱཀཔྤིཡེ སཉྙཱ, སཱ ཨསྶ ཨཏྠཱིཏི ཀཔྤཱ…པེ… སཉྙཱི, ཏསྶ བྷཱཝོཏི ཏཱ-པཙྩཡོ. ཡ-ལོཔེན པན ‘‘སཉྙིཏཱ’’ཏི ཝུཏྟཾ, ཀརཎཏྠེ ཝཱ པཙྩཏྟཝཙནཾ. ཏེ ཙ ‘‘ཨཀཔྤིཡེ’’ཏིཨཱདཱིནཾ ཡཐཱཀྐམེན ཡུཛྫནྟི. ཏཏྠ ཡོ ཨཙྪམཾསཾ ‘‘སཱུཀརམཾས’’ནྟི ཁཱདཏི, ཝིཀཱལེ ཀཱལསཉྙིཏཱཡ བྷུཉྫཏི, ཨཡཾ ཨཀཔྤིཡེ ཀཔྤིཡསཉྙིཏཱཡ ཨཱཔཛྫཏི. ཡོ པན སཱུཀརམཾསཾ ‘‘ཨཙྪམཾས’’ནྟི ཁཱདཏི, ཀཱལེ ཝིཀཱལསཉྙཱཡ བྷུཉྫཏི, ཨཡཾ ཀཔྤིཡེ ཨཀཔྤིཡསཉྙིཏཱཡ ཨཱཔཛྫཏི.

༣༧༦. ཨལཛྫིཨཉྙཱཎཏཱཡ ཀཱཡཝཱཙཱཧི ཨཱཔཏྟིཾ ཚཱདཡེཏི ཡོཛནཱ. ལིངྒེཏི ལིངྒཔརིཝཏྟནནིམིཏྟཾ. ལིངྒེ སངྒྷེ ¶ ཙ གཎེ ཙ ཨེཀསྨིཾ ཙཱཏི ཨཱཔཏྟིཝུཊྛིཏི ཙཏུདྷཱ ཧོཏཱིཏི སེསོ.

༣༧༧. པཙྩཡདྭཡེཏི ཙཱིཝརེ པིཎྜཔཱཏེ ཙ. པརིཀཐོབྷཱསཝིཉྙཏྟཱིཏི ཨབྷིལཱཔམཏྟམེཏཾ. སཧཙརིཏསྶ པན ནིམིཏྟཀམྨསྶཱཔི ཨེཏྠེཝ སངྒཧོ ཝེདིཏབྦོ. ཏཏྠ པརིཡཱཡེན ཀཐནཾ པརིཀཐཱ. ཨུཛུཀམེཝ ཨཝཏྭཱ ཡཐཱ ཨདྷིཔྤཱཡོ ཝིབྷཱུཏོ ཧོཏི, ཨེཝཾ ཨོབྷཱསནཾ ཨོབྷཱསོ. པཙྩཡེ ཨུདྡིསྶ ཡཐཱ ཨདྷིཔྤཱཡོ ཉཱཡཏི, ཨེཝཾ ཝིཉྙཱཔནཾ ཝིཉྙཏྟི. ནིམིཏྟཀརཎཾ ནིམིཏྟཀམྨཾ. ཏཏིཡེཏི སེནཱསནེ. སེསེཏི གིལཱནཔཙྩཡེ.

༣༧༨. པཉྩནྣཾ ¶ སཧདྷམྨིཀཱནཾ ཨཙྩཡེ དཱནཾ ན རཱུཧཏཱིཏི སམྦནྡྷོ. ཨཙྩཡེ དཱནནྟི ‘‘མམཙྩཡེན མཡ྄ཧཾ སནྟཀཾ ཨུཔཛ྄ཛྷཱཡསྶ ཧོཏཱུ’’ཏིཨཱདིནཱ ཨེཝཾ ཨཏྟནོ ཨཔགམེ དཱནཾ. ཏནྟི ཨཙྩཡེན དིནྣཾ ཙཱིཝརཱདིཀཾ སངྒྷསྶེཝ ཙ ཧོཏི, ན བྷིཀྑུནོཏི ཨདྷིཔྤཱཡོ. གིཧཱིནཾ པནཱཏི གིཧཱིནཾ ཨཙྩཡེ དཱནཾ པན. ཨིདམེཏྠ དཱནགྒཧཎལཀྑཎཾ – ‘‘ཨིདཾ ཏུཡ྄ཧཾ དམྨཱི’’ཏིཨཱདིནཱ སམྨུཁཱ ཝཱ ‘‘ཨིཏྠནྣཱམསྶ དེམཱི’’ཏིཨཱདིནཱ པརམྨུཁཱཔི དིནྣཾཡེཝ ཧོཏི. ‘‘ཏུཡ྄ཧཾ གཎྷཱཧཱི’’ཏི ཝུཏྟེ ‘‘མཡ྄ཧཾ གཎྷཱམཱི’’ཏི ཝདཏི, སུདིནྣཾ སུགྒཧིཏཉྩ. ‘‘ཏཝ སནྟཀཾ ཀརོཧི, ཏཝ སནྟཀཾ ཧོཏུ, ཏཝ སནྟཀཾ ཀཱརཱཔེཧཱི’’ཏི ཝུཏྟེ ‘‘མམ སནྟཀཾ ཀརོམི, མམ སནྟཀཾ ཧོཏུ, མམ སནྟཀཾ ཀརིསྶཱམཱི’’ཏི ཝདཏི. དུདྡིནྣཾ དུགྒཧིཏཉྩ. སཙེ པན ‘‘ཏཝ སནྟཀཾ ཀརོཧཱི’’ཏི ཝུཏྟེ ‘‘སཱདྷུ, བྷནྟེ, མཡ྄ཧཾ གཎྷཱམཱི’’ཏི གཎྷཱཏི, སུགྒཧིཏནྟི.

༣༧༩. བྷིཀྑུ ཝཱ སཱམཎེརོ ཝཱ ཨུཔསྶཡེ བྷིཀྑུནཱིནཾ ཝིཧཱརེ ཀཱལཾ ཀཡིརཱཐ ཡདི ཀཱལངྐརེཡྻ, ཏཏྠ ཏསྨིཾ ཨུབྷིནྣཾ སནྟཀེ བྷིཀྑུསངྒྷོ ཨེཝ དཱཡཛྫོ སཱམཱི ཧོཏཱིཏི ¶ སེསོ. སེསེཔཱིཏི ཨཝསེསེ བྷིཀྑུནིསིཀྑམཱནསཱམཎེརིསནྟཀེཔི. ཨཡཾ ནཡོཏི ཡདི ཏེ བྷིཀྑཱུནཾ ཝིཧཱརེ ཀཱལཾ ཀརེཡྻུཾ, ཏེསཾ སནྟཀེ བྷིཀྑུནིསངྒྷོ ཨེཝ དཱཡཛྫོཏི ཨཡམེཝ ནཡོཏི ཨཏྠོ.

༣༨༠. ‘‘ཨིམཾ ནེཏྭཱ ཨསུཀསྶ དེཧཱི’’ཏི དིནྣཾ ཡཱཝ པརསྶ ཧཏྠཾ ན པཱཔུཎཱཏི, ཏཱཝ པུརིམསྶེཝ, ཡོ པཧིཎཏི, ཏསྶེཝཱཏི ཨཏྠོ. དམྨཱིཏི ‘‘ཨིཏྠནྣཱམསྶ དེམཱི’’ཏི དིནྣཾ པན པཙྪིམསྶེཝ, ཡསྶ པཧིཎཏི, ཏསྶེཝ སནྟཀནྟི ཨཏྠོ. ཨིམཾ ཝིདྷིཾ ‘‘ཝུཏྟནཡེན ཨིམེ སཱམིནོ ཧོནྟཱི’’ཏི ཨེཏཾ པཀཱརཾ ཉཏྭཱ ཝིསྶཱསགྒཱཧཾ ཝཱ གཎྷེ, མཏཀཙཱིཝརཾ ཝཱ ཨདྷིཊྛེཏི ཡོཛནཱ. ཝིསྶཱསགཱཧནྟི སཱམཱིསུ ཛཱིཝནྟེསུ ཝིསྶཱསེན གཱཧཾ གཧེཏྭཱ. མཏཀཙཱིཝརཾ ཨདྷིཊྛེཏི ཏེསུ མཏེསུ ཨཉྙེ ཙེ བྷིཀྑཱུ ན སནྟི, ‘‘མཡ྄ཧཾ ཏཾ པཱཔུཎཱཏཱི’’ཏི མཏཀཙཱིཝརཾ ཨདྷིཊྛེཡྻ. ཨཉྙེསཾ ཨདཏྭཱ དཱུརེ ཋཔིཏམཏཀཔརིཀྑཱརཱ པན ཏཏྠ ཏཏྠ སངྒྷསྶེཝ ཧོནྟི. བྷིཀྑུམྷི ཀཱལཀཏེ སངྒྷོ སཱམཱི པཏྟཙཱིཝརེ, ཨཔིཙ གིལཱནུཔཊྛཱཀཱ བཧཱུཔཀཱརཱ, སངྒྷེན ཏིཙཱིཝརཉྩ པཏྟཉྩ གིལཱནུཔཊྛཱཀཱནཾ དཱཏབྦཾ. ཡཾ ཏཏྠ ལཧུབྷཎྜཾ ལཧུཔརིཀྑཱརཾ, ཏཾ སམྨུཁཱིབྷཱུཏེན སངྒྷེན བྷཱཛེཏབྦཾ. ཡཾ ཏཏྠ གརུབྷཎྜཾ གརུཔརིཀྑཱརཾ, ཏཾ ཨཱགཏཱནཱགཏསྶ ཙཱཏུདྡིསསྶ སངྒྷསྶ ཨཝིསྶཛྫིཡཾ ཨཝེབྷངྒིཡཾ. གིལཱནུཔཊྛཱཀོ ནཱམ གིཧཱི ཝཱ ཧོཏུ པབྦཛིཏོ ཝཱ, ཨནྟམསོ མཱཏུགཱམོཔི, སབྦེ བྷཱགཾ ལབྷནྟི. བཧཱུ ཙེ སབྦེ སམགྒཱ ཧུཏྭཱ ཨུཔཊྛཧནྟི, སབྦེསཾ སམབྷཱགོ དཱཏབྦོ. ཡོ པནེཏྠ ཝིསེསེན ཨུཔཊྛཧཏི, ཏསྶ ཝིསེསོ ཀཱཏབྦོ.

༣༨༡. ‘‘ལོཧབྷཎྜེ ¶ པཧརཎིཾ ཋཔེཏྭཱ སབྦཾ ཀཔྤཏཱི’’ཏིཨཱདིནཱ ཡོཛེཏབྦཾ. པཧརཎིནྟི ཨཱཝུདྷཾ. པཱདུཀཱ ཙ སངྐམནཱིཡོ པལླངྐོ ཙཱཏི དྭནྡོ. མཏྟིཀཱམཡེ ཀཏཀཾ ¶ ཀུམྦྷཀཱརིཀཉྩ ཋཔེཏྭཱ སབྦཾ ཀཔྤཏཱིཏི ཡོཛནཱིཡཾ, དྷནིཡསྶེཝ སབྦམཏྟིཀཱམཡཀུཊི ཀུམྦྷཀཱརིཀཱཏི.

༣༨༢. ཨིདཱནི དེསནཱནིདསྶནབྱཱསེན ཧེཊྛཱ ཨཝུཏྟཱནི ཀཱནིཙི སིཀྑཱཔདཱནི ཨུཔདིསིཏུཾ ‘‘ཙཱགོ’’ཏིཨཱདིམཱཧ. བྷིཀྑུབྷཱཝསྶ ཡོ ཙཱགོ, སཱ པཱརཱཛིཀདེསནཱཏི སམྦནྡྷོ. བྷཝཏི ཨནེནཱཏི བྷཱཝོ, སདྡཔྤཝཏྟིནིམིཏྟཾ, བྷིཀྑུནོ བྷཱཝོ བྷིཀྑུ-སདྡསྶ པཝཏྟིནིམིཏྟཾ བྷིཀྑུཀིཙྩཾ བྷིཀྑུབྷཱཝོ, ཏསྶ. དིསཱི ཨུཙྩཱརཎེ, ཨུཙྩཱརཎཱ པཀཱསནཱ དེསནཱ. ‘‘ཚནྣམཏིཝསྶཏི, ཝིཝཊྚཾ ནཱཏིཝསྶཏཱི’’ཏི (ཨུདཱ. ༤༥) ཧི ཝུཏྟཾ. ཨིདྷ པན བྷིཀྑུབྷཱཝཔརིཙྩཱགོཡེཝ པཱརཱཛིཀཱཡ པཀཱསནཱ ནཱམ པཱརཱཛིཀཱཡ དེསནཱ. ‘‘ཡོ’’ཏི ཝུཏྟཏྟཱ ‘‘སོ’’ཏི ཝཏྟུཾ ཡུཏྟཾ, ཏཐཱཔི སབྦཱདཱིཧི ཝུཏྟསྶ ཝཱ ལིངྒམཱདིཡྻཏེ ཝཀྑམཱནསྶ ཝཱཏི ཝཀྑམཱནདེསནཱཔེཀྑཱཡ ‘‘སོ’’ཏི ཝུཏྟཾ. ཡཐཱ ཡེན པཀཱརེན ‘‘ཚཱདེཏི ཛཱནམཱཔནྣ’’ནྟིཨཱདིནཱ ཝུཏྟཾ ཡཐཱཝུཏྟཾ, ཏེན. ཝུཏྟམནཏིཀྐམྨཱཏི ཨབྱཡཱིབྷཱཝཝསེན ཝཱ ཨཏྠོ ཝེདིཏབྦོ. ཨིདྷཱཔི གརུཀཱཔཏྟིཡཱ ཝུཊྛཱནཱནཏིཀྐམེནེཝ པཀཱསནཱ དེསནཱ སིཡཱཏི ‘‘ཝུཊྛཱནཾ གརུཀཱཔཏྟིདེསནཱ’’ཏི ཝུཙྩཏི.

༣༨༣. ཨིདཱནི ཝཏྟབྦཾ སནྡྷཱཡ ‘‘ཨེཝ’’ནྟི ཝུཏྟཾ. ཨེཀསྶཱཏི ཨེཀསྶ བྷིཀྑུནོ.

༣༨༤. ཏུམྷམཱུལེཏི ཏུམྷཱཀཾ མཱུལེ སམཱིཔེ. པཊིདེསེམཱིཏི པཀཱསེམི. སཾཝརེཡྻཱསཱིཏི སཾཡམེཡྻཱསི, སཾཝརེ པཏིཊྛེཡྻཱསཱིཏི ཨཏྠོ.

༣༨༥. ནིསྶཛྫིཏྭཱནཱཏི ¶ ཨེཀབཧུབྷཱཝཾ སནྣིཧིཏཱསནྣིཧིཏབྷཱཝཾ ཉཏྭཱ ‘‘ཨིདཾ མེ, བྷནྟེ, ཙཱིཝར’’ནྟིཨཱདིནཱ ¶ ནིསྶཛྫིཏྭཱ. ཏེནཱཏི ཡསྶ ཙཱིཝརཾ ནིསྶཊྛཾ, ཏེན. ‘‘ཨིམཾ…པེ… དམྨཱི’’ཏི ནིསྶཊྛཙཱིཝརཾ དེཡྻནྟི སམྦནྡྷིཏབྦཾ. ‘‘ཨིམཾ ཙཱིཝརཾ དསཱཧཱཏིཀྐནྟ’’ནྟིཨཱདིནཱ ཡོཛེཏབྦཾ.

༣༨༦. (ཀ) ཙཱིཝརནྟི ཏིཙཱིཝརཱདྷིཊྛཱནནཡེན ཨདྷིཊྛིཏེསུ སངྒྷཱཊིཨཱདཱིསུ ཡཾ ཀིཉྩི ཙཱིཝརཾ. ཝིཔྤཝུཏྠནྟི ཝིཔྤཡུཏྟེན ཝུཏྠཾ.

(ཁ) ཨཀཱལཙཱིཝརནྟི ཨནཏྠཏེ ཀཐིནེ ཝསྶཱནསྶ པཙྪིམམཱསཾ ཋཔེཏྭཱ སེསེ ཨེཀཱདསམཱསེ, ཨཏྠཏེ ཀཐིནེ ཏཉྩ མཱསཾ ཧེམནྟིཀེ ཙཏྟཱརོ མཱསེ ཙ ཋཔེཏྭཱ སེསེ སཏྟམཱསེ ཨུཔྤནྣཾ, ཀཱལེཔི སངྒྷསྶ ཝཱ ‘‘ཨིདཾ ཨཀཱལཙཱིཝར’’ནྟི ཨེཀཔུགྒལསྶ ཝཱ ‘‘ཨིདཾ ཏུཡ྄ཧཾ དམྨཱི’’ཏི ཨུདྡིསིཏྭཱ དིནྣཾ. ཨིཏརཾ པན ཀཱལཙཱིཝརཾ. མཱསཱཏིཀྐནྟནྟི ཨཀཱལཙཱིཝརེ ཨུཔྤནྣེ ཨཱུནསྶ པཱརིཔཱུརིཡཱ སངྒྷགཎཱདིཏོ སཏིཡཱ པཙྩཱསཱཡ མཱསམེཀཾ པརིཧཱརོ ལབྦྷཏི, ཏཾ མཱསཾ ཨཏིཀྐནྟཾ.

(ག) པུརཱཎཙཱིཝརནྟི ཡཾ ཨནྟམསོ ཨུསྶཱིསཀཾ ཀཏྭཱ ནིཔནྣོ. ཙཱིཝརཾ ནཱམ ཚནྣཾ ཨཉྙཏརཾ ཝིཀཔྤནཱུཔགཾ. ཨེསེཝ ནཡོ སབྦེསུ ཝཀྑམཱནཙཱིཝརཔྤཊིསཾཡུཏྟསིཀྑཱཔདེསུ.

(གྷ) ཨཉྙཏྲ པཱརིཝཏྟཀཱཏི ཨནྟམསོ ཧརཱིཏཀཱིཁཎྜེནཔི པཱརིཝཏྟཀཾ ཝིནཱ.

(ང) གཧཔཏིཀནྟི བྷིཀྑཱུསུ ཨཔབྦཛིཏཀཾ. ཨཉྙཏྲ སམཡཱཏི ཨཙྪིནྣཙཱིཝརནཊྛཙཱིཝརསམཡཾ ཝིནཱ, ཨཙྪིནྣཙཱིཝརེཧི པན སཱཁཱཔལཱསཾ ཨཏྟནཱ བྷཉྫིཏྭཱཔི ཝཱཀཱདཱིནི གཎྷིཏྭཱཔི ནིཝཱསེཏུཾ ཝཊྚཏི, པགེཝ ཝིཉྙཏྟི. ཙཱིཝརཾ ཝིཉྙཱཔིཏནྟི སམྦནྡྷོ. ཀནྟི ཨཱཧ ‘‘ཨཉྙཱཏཀ’’ནྟིཨཱདི.

(ཙ) ཏདུཏྟརཱིཏི ¶ ཏཏོ ཝུཏྟཔྤམཱཎཏོ ཨུཏྟརི, ཨཙྪིནྣཙཱིཝརེན བྷིཀྑུནཱ ཀཱཡེན ཝཱ ཝཱཙཱཡ ཝཱ ཨབྷིཧརིཏྭཱ པཝཱརིཏཙཱིཝརཏོ ཏཱིསུ ནཊྛེསུ དྭེ སཱདིཏབྦཱནི, དྭཱིསུ ནཊྛེསུ ཨེཀཾ སཱདིཏབྦཾ. པཀཏིཡཱ སནྟརུཏྟརེན ཙརནྟེན དྭཱིསུ ནཊྛེསུ དྭེཡེཝ སཱདིཏབྦཱནི, ཨེཀསྨིཾ ནཊྛེ ཨེཀཾཡེཝ སཱདིཏབྦཾ. ཡསྶ ཨེཀཾཡེཝ ཧོཏི, ཏསྨིཾ ནཊྛེ དྭེ སཱདིཏབྦཱནི.

(ཚ) ཨཔྤཝཱརིཏོཏི ¶ གཧཔཏིནཱ ཝཱ གཧཔཏཱནིཡཱ ཝཱ. ཝིཀཔྤནྟི པཋམཨདྷིཔྤེཏཏོ མཱུལཾ ཝཌྜྷཱཔེནྟོ སུནྡརཀཱམཏཱཡ ‘‘ཨཱཡཏཾ ཝཱ’’ཏིཨཱདིནཱ ཝིསིཊྛཀཔྤཾ ཨདྷིཀཝིདྷཱནཾ.

(ཛ) ཨཉྙཱཏཀེ གཧཔཏིཀེཏི བཧཱུནཾ ཝསེན ཝུཏྟམཏྟམེཝ པུརིམཏོ ཝིསེསོ.

(ཛྷ) ཙོདནཱཡཱཏི ‘‘ཨཏྠོ མེ, ཨཱཝུསོ, ཙཱིཝརེནཱ’’ཏི ཙོདནཱཡ. ཋཱནེནཱཏི ཀཱཡཙོདནམཱཧ. རཱཛཱདཱིཧི པེསིཏེན ཧི དཱུཏེན ཝེཡྻཱཝཙྩཀརསྶ ཧཏྠེ ཙཱིཝརཙེཏཱཔནྣེ ནིཀྑིཏྟེ ཏིསྶོ ཙོདནཱ ཨནུཉྙཱཏཱ, ཙོདནཱཡ དིགུཎཾ ཋཱནཾ, ཏསྨཱ སཙེ ཙོདེཏིཡེཝ, ན ཏིཊྛཏི, ཚ ཙོདནཱ ལབྦྷནྟི. སཙེ ཏིཊྛཏིཡེཝ, ན ཙོདེཏི, དྭཱདས ཋཱནཱནི ལབྦྷནྟི. སཙེ ཨུབྷཡཾ ཀརོཏི, ཨེཀཱཡ ཙོདནཱཡ དྭེ ཋཱནཱནི ཧཱཔེཏབྦཱནི.

(ཊ) སུདྡྷཱནི ཙ ཏཱནི ཀཱལ༹ཀཱནི ཙ ཛཱཏིཡཱ རཛནེན ཝཱ.

(ཋ) ཏུལནྟི ཙཏཱུཧི ཏུལཱཧི ཀཱརེཏུཀཱམཏཾ སནྡྷཱཡ ཝུཏྟཾ. ཨཏྠཏོ པན ཡཏྟཀེཧི ཨེལ༹ཀལོམེཧི ཀཱཏུཀཱམོ ཧོཏི, ཏེསུ དྭེ ཀོཊྛཱསཱ ཀཱལ༹ཀཱནཾ, ཨེཀོ ཨོདཱཏཱནཾ, ཨེཀོ གོཙརིཡཱནཾ གཧེཏབྦོ. ཏུལཱ ནཱམ པལསཏཾ. གོཙརིཡཱ ནཱམ ཀཔིལཝཎྞཱ. ཨིདཾ མེ སནྠཏཾ ཀཱརཱཔིཏནྟི ཡོཛནཱ.

(ཎ) ཏིཡོཛནཔརམནྟི ¶ གཧིཏཊྛཱནཏོ ཏཱིཎི ཡོཛནཱནི པརམོ ཨསྶ ཨཏིཀྐམནསྶཱཏི བྷཱཝནཔུཾསཀཝསེན ཨཏྠོ ཝེདིཏབྦོ. ཨཏིཀྐཱམིཏཱནཱིཏི ཨནྟམསོ སུཏྟཀེནཔི བྷཎྜཀཏབྷཎྜཧརཎཾ ཝིནཱ ཨནྟམསོ ཝཱཏཱབཱདྷཔྤཊིཀཱརཏྠཾ ཀཎྞཙྪིདྡེ པཀྑིཏྟཱནི ཨཏིཀྐཱམིཏཱནི.

༣༨༧-༩. ནིསྶཛྫིཏྭཱནཱཏི ཝུཏྟནཡེན ཝཏྠཱུནི ནིསྶཛྫིཏྭཱ. ཨཐཱཏི དེསིཏཱནནྟརཾ. ‘‘ཨིམཾ ཛཱནཱཧཱི’’ཏི གིཧིཾ ཝདེཏི ཡོཛནཱ. སོཏི ཨཱརཱམིཀཱདིཀོ གིཧཱི. ‘‘ཨིམིནཱ ཀིཾ ཨཱཧརཱམཱི’’ཏི ཝདེཡྻཱཏི སམྦནྡྷོ. ཝདེཡྻཱཏི ཡདི ཝདཏི. ཨིམནྟི ཨཝཏྭཱཏི ‘‘ཨིམཾ ཨཱཧརཱ’’ཏི ཨཝཏྭཱ བྷིཀྑཱུནཾ ཀཔྤིཡཾ ཏེལཱདིནྟི ཝདེཏི སམྦནྡྷོ. ཨཱདིནྟི སནྡྷིཝསེན ནིགྒཧིཏཾ. ཏེན པརིཝཏྟེཏྭཱན སོ ཡཾ ཀཔྤིཡཾ ཨཱཧརཏཱིཏི ཡོཛནཱ. ཏེནཱཏི ནིསྶགྒིཡཝཏྠུནཱ ¶ . དྭེཔེཏེ ཋཔེཏྭཱཏི ཨེཏེ རཱུཔིཡཔྤཊིགྒཱཧཀརཱུཔིཡསཾཝོཧཱརཀེ དྭེ ཋཔེཏྭཱ སེསེཧི པརིབྷུཉྫིཏུཾ ལབྦྷནྟི སམྦནྡྷོ. པརིབྷུཉྫིཏུནྟི ཏཾ བྷུཉྫིཏུཾ. ཏཏོཏི པརིཝཏྟིཏཀཔྤིཡཏོ. ཨཉྙེནཱཏི ཨནྟམསོ ཨཱརཱམིཀེནཱཔི. ཏེསནྟི ཝུཏྟཱནཾ དྭིནྣཾ.

༣༩༠. ཨནྟམསོ ཏནྣིབྦཏྟཱ རུཀྑཙྪཱཡཱཔཱིཏི སམྦནྡྷོ. ཏནྣིབྦཏྟཱཏི ནིསྶཊྛཝཏྠུནཱ ཀིཎིཏྭཱ གཧིཏཨཱརཱམེ རུཀྑཙྪཱཡཱ ཏནྣིབྦཏྟཱ ཧོཏཱིཏི ཏཏོ ནིབྦཏྟཱཏི སམཱསོ. ཨཱདིཏོ སནྠཏཏྟཡནྟི ཨཱདིམྷི ཀོསིཡསུདྡྷཀཱལ༹ཀདྭེབྷཱགསནྠཏཏྟཡཾ.

༣༩༡. ཨེཝཾ ཙེ ནོ ལབྷེཐཱཏི ཨེཝཾ པརིཝཏྟེཏྭཱ ཀཔྤིཡཀཱརཀོ ནོ ཙེ ལབྷེཡྻ, སོ གིཧཱི ‘‘ཨིམཾ ཚཌྜེཧཱི’’ཏི སཾསིཡོ ཝཏྟབྦོ, ཨེཝཾ རཱུཔིཡཚཌྜཀོ གིཧཱི ནོ ཙེ ལབྷེཡྻ, སམྨཏོ བྷིཀྑུ ཚཌྜེཡྻཱཏི སམྦནྡྷོ. སམྨཏོཏི ¶ ‘‘ཡོ ཚནྡཱགཏིཾ ན གཙྪེཡྻཱ’’ཏིཨཱདིནཱ (པཱརཱ. ༥༨༤) ཝུཏྟཔཉྩངྒསམནྣཱགཏོ རཱུཔིཡཚཌྜཀསམྨུཏིཡཱ སམྨཏོ བྷིཀྑུ.

༣༩༢. ཨེཏཱནཱིཏི པཊིགྒཧིཏརཱུཔིཡཱནི. དུཏིཡཾ པཏྟནྟི ཨཱུནཔཉྩབནྡྷནེ སཏི ཝིཉྙཱཔིཏཔཏྟཾ སངྒྷེ ཝཏྟུཾ ལབྦྷརེཏི པདསམྦནྡྷོ. ཝཏྟུནྟི ‘‘ཨཧཾ བྷནྟེ རཱུཔིཡཾ པཊིགྒཧེསི’’ནྟིཨཱདིནཱ ཝཏྟུཾ. སེསཱནི ཨཝསེསནིསྶགྒིཡཝཏྠཱུནི སངྒྷེ ཨེཀསྨིཾ གཎེ ཙ ཝཏྟུཾ ལབྦྷརེཏི ཡོཛནཱ. བྷཱསནྟརེནཔི ཝཏྟུཾ ལབྦྷནྟི ན ཀེཝལཾ པཱལི༹བྷཱསཱཡམེཝ, སཱིཧལཱ༹དིབྷཱསཱཡཔི ནིསྶཛྫིཏུཾ ལབྦྷཏཱིཏི ཨཏྠོ.

༣༩༣. (ཀ) ནཱནཔྤཀཱརནྟི ཙཱིཝརཱདཱིནཾ ཀཔྤིཡབྷཎྜཱནཾ ཝསེན ཨནེཀཝིདྷཾ. ཀཡོ གཧཎཾ, ཝིཀྐཡོ དཱནཾ. ཀཡོ ཙ ཝིཀྐཡོ ཙ ཀཡཝིཀྐཡཾ.

(ག) ཨཱུནཔཉྩབནྡྷནེནཱཏི ཨཱུནཱནི པཉྩ བནྡྷནཱནི ཡསྶ, ཏེན, ཨིཏྠམྦྷཱུཏལཀྑཎེ ཀརཎཝཙནཾ. ཡཐཱཀཐཉྩི པན པཉྩབནྡྷནོ པཏྟོ, པཉྩབནྡྷནོཀཱསོ ཝཱ, སོ ཨཔཏྟོ, ཨཉྙཾ ཝིཉྙཱཔེཏུཾ ཝཊྚཏི.

༣༩༤. སམྨནྣིཏྭཱནཱཏི པདབྷཱཛནཱིཡེ ཝུཏྟཉཏྟིདུཏིཡཀམྨེན སམྨནྣིཏྭཱ. སངྒྷསྶ པཏྟནྟནྟི ཨནྟ-སདྡེན པཏྟཱནཾ ཨནྟེ བྷཝོ ལཱམཀོ པཏྟོཡེཝ གཧིཏོ, ནིསྶཊྛཔཏྟསྶ ཝིཛྫམཱནགུཎཾ ¶ ཝཏྭཱ ཐེརཾ, ཐེརསྶ པཏྟཾ དུཏིཡཏྠེརཾ གཱཧཱཔེཏྭཱ ཨེཏེནེཝ ཨུཔཱཡེན ཡཱཝསངྒྷནཝཀཾ གཱཧཱཔེཏྭཱ ཡོ ཏཏྠ སནྣིཔཏིཏསངྒྷསྶ པཏྟེསུ པརིཡནྟོ པཏྟོ, ཏཾ པཏྟནྟི. ཏསྶཱཏི ཀཏནིསྶཛྫནསྶ བྷིཀྑུནོ. དཱཔཡེཏི སམྨཏེན པཏྟགཱཧཱཔཀེན དཱཔེཡྻ.

༣༩༥. (ཀ) བྷེསཛྫནྟི ¶ བྷེསཛྫཀིཙྩཾ ཀརོཏུ ཝཱ, མཱ ཝཱ, ཨེཝཾ ལདྡྷཝོཧཱརཾ སཔྤིཨཱདིཀཾ སཏྟཱཧཀཱལིཀཾ.

(ཁ) གིམྷཱནསྶ པཙྪིམམཱསེ པུརིམོ ཨདྡྷམཱསོ པརིཡེསནཀརཎཱནཾ ཁེཏྟཾ, པཙྪིམདྡྷམཱསོ པརིཡེསནཀརཎནིཝཱསནཱནཾ ཁེཏྟཾ, ཝསྶིཀམཱསཱ ཙཏྟཱརོཔི ཨདྷིཊྛཱནེན སཧ ཙཏུནྣམྤི ཁེཏྟཾ, ཨིམེཡེཝ པཉྩམཱསཱ ཀུཙྪིསམཡོ, ཨིཏརསཏྟམཱསཱ པིཊྛིསམཡོ. པིཊྛིསམཡེ པརིཡེསནྟསྶ ནིསྶགྒིཡཾ པཱཙིཏྟིཡཾ, ཀུཙྪིསམཡེ ཙ ཨཏིརེཀདྡྷམཱསེ ཀཏྭཱ པརིདཧཏོ ནིསྶགྒིཡཾ པཱཙིཏྟིཡཾ. ཏེན ཝུཏྟཾ ‘‘ཨཏིརེཀམཱསེ སེསེ’’ཏི.

(ག) སཱམཾ དཏྭཱཏི ཝེཡྻཱཝཙྩཱདཱིནི པཙྩཱསཱིསམཱནོ སཡམེཝ དཏྭཱ. ཨཙྪིནྣནྟི ཏཾ ཨཀརོནྟཾ དིསྭཱ སཀསཉྙཱཡ ཨཙྪིནྣཾ. བྷིཀྑུནོཔི ཙཱིཝརཾ ཋཔེཏྭཱ ཨཉྙཾ པརིཀྑཱརཾ, ཨནུཔསམྤནྣསྶ ཙ ཡཾ ཀིཉྩི པརིཀྑཱརཾ ཨཙྪིནྡཏོ དུཀྐཊཾ. པརིཙྩཛིཏྭཱ དིནྣཾ སཀསཉྙཾ ཝིནཱ ཨཙྪིནྡནྟོ བྷཎྜགྒྷེན ཀཱརེཏབྦོ.

(ང) ཝིཀཔྤནྟི ‘‘ཨཱཡཏཉྩ ཀརོཧི ཝིཏྠཏཉྩཱ’’ཏིཨཱདིཀཾ ཨདྷིཀཝིདྷཱནཾ.

(ཙ) ཨཙྩེཀཙཱིཝརནྟི གམིཀགིལཱནགབྦྷིནིཨབྷིནཝུཔྤནྣསདྡྷཱནཾ ཨཉྙཏརེན པཝཱརཎམཱསསྶ ཛུཎྷཔཀྑཔཉྩམིཏོ པཊྛཱཡ ‘‘ཝསྶཱཝཱསིཀཾ དསྶཱམཱི’’ཏི དིནྣཾ ཨཙྩཱཡིཀཙཱིཝརཾ. ཨཙྩེཀཙཱིཝརསྶ ཨནཏྠཏེ ཀཐིནེ ཨེཀཱདསདིཝསཱདྷིཀོ མཱསོ, ཨཏྠཏེ ཀཐིནེ ཨེཀཱདསདིཝསཱདྷིཀཱ པཉྩ མཱསཱ ཙཱིཝརཀཱལསམཡོ, ཏཾ ཨཏིཀྐཱམེནྟསྶ ནིསྶགྒིཡཾ པཱཙིཏྟིཡཾ. ཏེན ཝུཏྟཾ ‘‘ཙཱིཝརཀཱལསམཡཾ ཨཏིཀྐཱམིཏ’’ནྟི. ཀཱལོ ཙ སོ སམཡོ ཙ ཙཱིཝརསྶ ཀཱལསམཡོ, ཏཾ.

(ཚ) སཔྤཊིབྷཡེ ཨཱརཉྙཀསེནཱསནེ ཝསྶཾ ཨུཔགནྟྭཱ ཝིཧརནྟེན བྷིཀྑུནཱ ཏིཎྞཾ ཙཱིཝརཱནཾ ¶ ཨཉྙཏརཾ ཙཱིཝརཾ པུརིམིཀཱཡ ¶ ཨུཔགནྟྭཱ མཧཱཔཝཱརཎཱཡ པཝཱརིཏཏཱ, ཀཏྟིཀམཱསཏཱ, པཉྩདྷནུསཏིཀཔཙྪི མཔྤམཱཎཡུཏྟསེནཱསནཏཱ, སཱསངྐསཔྤཊིབྷཡཏཱཏི ཨེཝཾ ཝུཏྟཙཏུརངྒསམྤཏྟིཡཱཨནྟརགྷརེ ནིཀྑིཔིཏྭཱ སཏི པཙྩཡེ ཚཱརཏྟཔརམཾ ཏེན ཙཱིཝརེན ཝིཔྤཝསིཏབྦཾ. ཏཏོ ཙེ ཨུཏྟརི ཝིཔྤཝསེཡྻ, ནིསྶགྒིཡཾ པཱཙིཏྟིཡཾ. ཏེན ཝུཏྟཾ ‘‘ཨཏིརེཀཚཱརཏྟ’’ནྟིཨཱདི.

༣༩༦. ཨཱདིམྷི ཝིཡཱཏི པཋམནིསྶགྒིཡེ ཝིཡ.

༣༩༧. (ཁ) ཨནྟརགྷརཾ པཝིཊྛཱཡ བྷིཀྑུནིཡཱ ཧཏྠཏོ ཁཱདནཱིཡཱདིཔྤཊིགྒཧཎེ ཙ བྷིཀྑཱུསུ ཀུལེསུ བྷུཉྫནྟེསུ ‘‘ཨིདྷ པཱུཝཾ, སཱུཔཾ དེཐཱ’’ཏིཨཱདིནཱ ནཡེན ཝོསཱསམཱནཱཡ བྷིཀྑུནིཡཱ ཨནཔསཱདནེན ཙ སེཁསམྨཏེསུ ཀུལེསུ པུབྦེ ཨནིམནྟིཏསྶ ཁཱདནཱིཡཱདཱིནཾ པཊིགྒཧཎེ ཙ སཔྤཊིབྷཡེ ཨཱརཉྙཀསེནཱསནེ ཝིཧརནྟསྶ པུབྦེ ཨཔྤཊིསཾཝིདིཏཁཱདནཱིཡཱདིཔྤཊིགྒཧཎེ ཙ པཱཊིདེསནཱིཡཾ ནཱམ ཨཱཔཏྟིནིཀཱཡོ ཝུཏྟོ. ཏེན ཝུཏྟཾ ‘‘གཱརཡ྄ཧ’’ནྟིཨཱདི.

༣༩༨. ‘‘ཨདེསནཱགཱམིནིཡ’’ནྟིཨཱདི ‘‘ན དེསཡེ’’ཏི ཨེཏྠ ཀམྨཾ. པཱརཱཛིཀཱ སངྒྷཱདིསེསཱ ཙ ཨདེསནཱགཱམིནིཡོ ནཱམ. ན ཨཱཔཏྟི ཨནཱཔཏྟི, ཏཾ. ཀཏདེསནཾ དེསིཏཾ. ནཱནཱསཾཝཱསནིསྶཱིམཊྛིཏཱནཾ ན དེསཡེཏི སམྦནྡྷོ. ཨེཝཾ ཙཏུཔཉྩཧི ན དེསཡེ, མནསཱ ན དེསཡེ, ཨཔཀཏཏྟཱནཾ ན དེསཡེ, ནཱནཱ ‘‘ཨེཀཱ’’ཏི ན དེསཡེཏི. མནསཱཏི ཀེཝལཾ ཙིཏྟེནེཝ. ནཱནཱཏི སམྦཧུལཱ ཨཱཔཏྟིཡོ ‘‘ཨེཀཱ’’ཏི ཝཏྭཱ. ཨེཀཾ པན ཨཱཔཏྟིཾ ‘‘སམྦཧུལཱ’’ཏི དེསེཏུཾ ཝཊྚཏཱིཏི.

༣༩༩. ཀམྨཔྤཏྟེཏི ¶ ¶ ཨུཔོསཐཱདིནོ ཀམྨསྶ པཏྟེ ཡུཏྟེ ཨནུརཱུཔེ. སངྒྷེ སམཱགཏེཏི ཙཏུཝགྒཱདིཀེ སངྒྷེ ཨེཀཏྠ སནྣིཔཏིཏེ. ཨེཏྠ ཙ ཚནྡཧཱརཀེནཱཔི སདྡྷིཾ ཙཏུཝགྒཱདིཀོ ཝེདིཏབྦོ.

༤༠༠. ཚནྡདཱནཱདིཝིདྷིཾ དསྶེཏུཾ ‘‘ཨེཀ’’ནྟིཨཱདིམཱཧ. ཨུཔཱགམྨཱཏི སནྟིཾ ཨཱཔཏྟིཾ པཀཱསེཏྭཱ ཏཏོ པཙྪཱ ཨུཔགནྟྭཱ. ཚནྡཾ དདེཏི ཝཀྑམཱནེསུ ཏཱིསུ ཨེཀེནཔི བཧི ཨུཔོསཐཾ ཀཏྭཱ ཨཱགཏོ ཚནྡཾ དདེཡྻ, ཀེནཙི ཀརཎཱིཡེན སནྣིཔཱཏཊྛཱནཾ གནྟྭཱ ཀཱཡསཱམགྒིཾ ཨདེནྟོ པན པཱརིསུདྡྷིཾ དེནྟོ ཚནྡཾ དདེཡྻ.

༤༠༢. ཨུབྷིནྣཾ དཱནེ ཀིཾཔཡོཛནནྟི ཨཱཧ ‘‘པཱརིསུདྡྷཱི’’ཏིཨཱདི. པཱརིསུདྡྷིཔྤདཱནེན སངྒྷསྶ ཨཏྟནོ ཙཱཔི ཨུཔོསཐཾ སམྤཱདེཏཱིཏི སམྦནྡྷོ. པརིསུདྡྷི ཨེཝ པཱརིསུདྡྷི, ཏསྶ པདཱནཾ, ཏེན. ནནུ ཙ པཱརིསུདྡྷིཏཱཔདཱནམཏྟམེཝ ཨུཔོསཐཀམྨཾ ནཱམཱཏི པཱརིསུདྡྷིཔྤདཱནཾ ཨཏྟནོ ཨུཔོསཐཾ སམྤཱདེཏུ, ཀཐཾ སངྒྷསྶཱཏི? ཝུཙྩཏེ – པཱརིསུདྡྷིདཱནསྶ དྷམྨཀམྨཏཱསམྤཱདནེན སངྒྷསྶཱཔི ཨུཔོསཐཾ སམྤཱདེཏཱིཏི.

ཨེཏྠ པན ཙཏཱུསུ ཨེཀསྶ ཚནྡཔཱརིསུདྡྷིཾ ཨཱཧརིཏྭཱ ཏཡོ པཱརིསུདྡྷིཨུཔོསཐཾ ཀརོནྟི, ཏཱིསུ ཝཱ ཨེཀསྶ ཚནྡཔཱརིསུདྡྷིཾ ཨཱཧརིཏྭཱ དྭེ པཱཏིམོཀྑཾ ཨུདྡིསནྟི, ཨདྷམྨེན ཝགྒཾ ཨུཔོསཐཀམྨཾ. ཙཏྟཱརོ པཱརིསུདྡྷིཨུཔོསཐཾ ཀརོནྟི, ཏཡོ ཝཱ དྭེ ཝཱ པཱཏིམོཀྑཾ ཨུདྡིསནྟི, ཨདྷམྨེན སམགྒཾ. ཙཏཱུསུ ཨེཀསྶ ཨཱཧརིཏྭཱ ཏཡོ པཱཏིམོཀྑཾ ཨུདྡིསནྟི, ཏཱིསུ ཝཱ ཨེཀསྶ ཨཱཧརིཏྭཱ དྭེ པཱརིསུདྡྷིཨུཔོསཐཾ ཀརོནྟི, དྷམྨེན ཝགྒཾ. སཙེ པན ཙཏྟཱརོ སནྣིཔཏིཏྭཱ པཱཏིམོཀྑཾ ཨུདྡིསནྟི, ཏཡོ པཱརིསུདྡྷིཨུཔོསཐཾ, དྭེ ཨཉྙམཉྙཾ ¶ པཱརིསུདྡྷིཨུཔོསཐཾ ཀརོནྟི, དྷམྨེན སམགྒཾ. པཝཱརཎཀམྨེསུཔི པཉྩསུ ཨེཀསྶ པཝཱརཎཾ ཨཱཧརིཏྭཱ ཙཏྟཱརོ གཎཉཏྟིཾ ཋཔེཏྭཱ པཝཱརེནྟི, ཙཏཱུསུ ཏཱིསུ ཝཱ ཨེཀསྶ ཨཱཧརིཏྭཱ ཏཡོ དྭེ ཝཱ སངྒྷཉཏྟིཾ ཋཔེཏྭཱ པཝཱརེནྟི, ཨདྷམྨེན ཝགྒཾ པཝཱརཎཀམྨནྟིཨཱདི ཝུཏྟནཡམེཝ. སེསཀམྨཾ ཝིབཱདྷཏཱིཏི ཨཝསེསསངྒྷཀིཙྩཾ ཝིབཱདྷེཏི ཨལདྡྷཱདྷིཔྤཱཡཏྟཱཏི ཨདྷིཔྤཱཡོ.

༤༠༣. དྭཡནྟི ¶ ཨུཔོསཐཀརཎཉྩེཝ ཨཝསེསཀིཙྩཉྩ. ཨཏྟནོ ན སཱདྷེཏཱིཏི སམྦནྡྷནཱིཡཾ.

༤༠༤. ཧརེཡྻཱཏི པུབྦེ ཝུཏྟཾ སུདྡྷིཀཚནྡཾ ཝཱ ཨིམཾ ཝཱ ཚནྡཔཱརིསུདྡྷིཾ ཧརེཡྻ. པརམྤརཱ ན ཧཱརཡེཏི པརམྤརཱ ན ཨཱཧརེཡྻ. ཀསྨཱཏི ཨཱཧ ‘‘པརམྤརཱཧཊཱ’’ཏིཨཱདི. ཏེནཱཏི པཋམཏོ གཧིཏཚནྡཔཱརིསུདྡྷིཀེན. པརམྤརཱཧཊཱཏི ཡཐཱ བིལཱ༹ལསངྑལིཀཱཡ པཋམཾ ཝལཡཾ དུཏིཡཾ པཱཔུཎཱཏི, ཏཏིཡཾ ན པཱཔུཎཱཏི, ཨེཝཾ དུཏིཡསྶ ཨཱགཙྪཏི, ཏཏིཡསྶ ན ཨཱགཙྪཏི. ‘‘པརིམྤརཱཧཊཱ ཚནྡ-པཱརིསུདྡྷི ན གཙྪཏཱི’’ཏི ཝཱ པཱཋོ.

༤༠༥. སབྦཱུཔཙཱརནྟི ‘‘ཨེཀཾསཾ ཙཱིཝརཾ ཀཏྭཱ’’ ཏིཨཱདི སབྦཾ ཨུཔཙཱརཾ.

༤༠༦. སོ ཨཱགཏོ ཨཱརོཙེཏྭཱ སངྒྷཾ པཝཱརེཡྻཱཏི ཡོཛནཱ. ཨཐཱཏི ཨནནྟརཏྠེ. ཨཱགཏོཏི པཝཱརཎཾ གཧེཏྭཱ ཨཱགཏོ བྷིཀྑུ. ཨཱརོཙེཏྭཱཏི བྷིཀྑུསངྒྷསྶ ཨཱརོཙེཏྭཱ. ཨེཝནྟི ཝཀྑམཱནཀྐམེན.

༤༠༧-༨. གཧེཏྭཱ ཧཱརཀོཏི སམྦནྡྷོ. ནཱཧཊཱཏི ཨཱཧཊཱཝ ན ཧོཏཱིཏི ཨཏྠོ. ཧཱརཀོ སངྒྷཾ པཏྭཱ ཏཐཱ ཧེཡྻ, ཨཱཧཊཱ ཧོཏཱིཏི ཡོཛནཱ. ཏཐཱ ཧེཡྻཱཏི ཝིབྦྷནྟཱདིཀོ བྷཝེཡྻ.

༤༠༩. སངྒྷཾ ¶ པཏྟོ པམཏྟོ ཝཱ སུཏྟོ ཝཱ ནཱརོཙཡེཡྻ ཨནཱཔཏྟི ཙཱཏི སམྦནྡྷོ. ཙ-སདྡོ ཚནྡཔཱརིསུདྡྷིཧརཎཾ སམྤིཎྜེཏཱིཏི.

༤༡༠. དུཝེ ཨུཔོསཐཱཏི སུལབྷཔྤཝཏྟིཝསེན ཝུཏྟཾ. ཏཡོ པན དིཝསཝསེནེཝ ཨུཔོསཐཱ ཙཱཏུདྡསིཀོ ¶ པནྣརསིཀོ སཱམགྒིཀོཏི. ཏཏྠ ཧེམནྟགིམྷཝསྶཱནཱནཾ ཏིཎྞཾ ཨུཏཱུནཾ ཏཏིཡསཏྟམཔཀྑེསུ དྭེ དྭེ ཀཏྭཱ ཚ ཙཱཏུདྡསིཀཱ, སེསཱ པནྣརསིཀཱཏི ཨེཝཾ ཨེཀསཾཝཙྪརེ ཙཏུཝཱིསཏིཨུཔོསཐཱ. ཨིདཾ ཏཱཝ ལོཀསྶ པཀཏིཙཱརིཏྟཾ. ‘‘ཨཱགནྟུཀེཧི ཨཱཝཱསིཀཱནཾ ཨནུཝཏྟིཏབྦ’’ནྟིཨཱདིཝཙནཏོ (མཧཱཝ. ༡༧༨) པན ཏཐཱརཱུཔཔཙྩཡེ སཏི ཨཉྙསྨིམྤི ཙཱཏུདྡསེ ཨུཔོསཐཾ ཀཱཏུཾ ཝཊྚཏི.

༤༡༡. སུཏྟུདྡེསོ སངྒྷསྶེཝཱཏི ཡོཛནཱ. ཨདྷིཊྛཱནཉྩ ཏཾ ཨུཔོསཐོ ཙཱཏི ཀམྨདྷཱརཡོ. སེསཱནནྟི དྭིནྣཾ ཏིཎྞཾ ཝཱ. ‘‘དུཝེ’’ཏིཨཱདིནཱ ཙ ཙཱཏུདྡསོ པནྣརསོ སཱམགྒཱིཏི དིཝསཝསེན, སུཏྟུདྡེསོ ཨདྷིཊྛཱནཾ པཱརིསུདྡྷཱིཏི ཀརཎཔྤཀཱརེན, སངྒྷུཔོསཐོ གཎུཔོསཐོ པུགྒལུཔོསཐོཏི པུགྒལཝསེན ཙཱཏི ནཝ ཨུཔོསཐཱ དཱིཔིཏཱ ཧོནྟི.

‘‘ཚནྡཔཱརིསུདྡྷིཨུཏུཀྑཱནཾ, བྷིཀྑུགཎནཱ ཙ ཨོཝཱདོ;

ཨུཔོསཐསྶ ཨེཏཱནི, པུབྦཀིཙྩནྟི ཝུཙྩཏཱི’’ཏི. (མཧཱཝ. ཨཊྛ. ༡༦༨) –

ཨེཝཾ ¶ ཨཊྛཀཐཱཙརིཡེཧི ཝུཏྟེ པུབྦཀརཎཱནནྟརཾ ཀཏྟབྦེ པུབྦཀིཙྩེ.

‘‘སམྨཛྫནཱི པདཱིཔོ ཙ, ཨུདཀཾ ཨཱསནེན ཙ;

ཨུཔོསཐསྶ ཨེཏཱནི, པུབྦཀརཎནྟི ཝུཙྩཏཱི’’ཏི. (མཧཱཝ. ཨཊྛ. ༡༦༨) –

ཨེཝཾ ཨཊྛཀཐཱཙརིཡེཧེཝ ཝུཏྟེ སབྦཔཋམཾ ཀཏྟབྦེ པུབྦཀརཎེ. པཏྟཀལླེཏི ཨུཔོསཐཱདཱིནཾ ཙཏུནྣཾ ཨངྒཱནཾ སམྦྷཝེན པཏྟོ ཀཱལོ ཨིམསྶཱཏི པཏྟཀཱལཾ, པཏྟཀཱལམེཝ པཏྟཀལླཾ. ཀིཾ ཏཾ? ཨུཔོསཐཱདིཀམྨཾ. ཏཾ པན ཙཏཱུཧི ཨངྒེཧི སངྒཧིཏཾ. ཡཐཱཧུ ཨཊྛཀཐཱཙརིཡཱ –

‘‘ཨུཔོསཐོ ¶ ཡཱཝཏིཀཱ ཙ བྷིཀྑཱུ ཀམྨཔྤཏྟཱ,

ཝཛྫནཱིཡཱ ཙ པུགྒལཱ ཏསྨིཾ ན ཧོནྟི,

པཏྟཀལླནྟི ཝུཙྩཏཱི’’ཏི. (མཧཱཝ. ཨཊྛ. ༡༦༨);

སམཱནིཏེཏི སམྨཱ ཨཱནཱིཏེ པཝཏྟིཏེཏི ཨཏྠོ. སོཏི སུཏྟུདྡེསོ. པཉྩདྷཱཏི ནིདཱནུདྡེསོ པཱརཱཛིཀུདྡེསོ སངྒྷཱདིསེསུདྡེསོ ཨནིཡཏུདྡེསོ ཝིཏྠཱརུདྡེསོཏི ཨེཝཾ པཉྩདྷཱ.

༤༡༣. ཝིནཱནྟརཱཡནྟི རཱཛནྟརཱཡོ ཙོརནྟརཱཡོ ཨགྱནྟརཱཡོ ཨུདཀནྟརཱཡོ མནུསྶནྟརཱཡོ ཨམནུསྶནྟརཱཡོ ཝཱལ༹ནྟརཱཡོ སརཱིསཔནྟརཱཡོ ཛཱིཝིཏནྟརཱཡོ བྲཧྨཙརིཡནྟརཱཡོཏི (མཧཱཝ. ༡༥༠) ཝུཏྟེསུ དསསུ ཡཾ ཀིཉྩི ཨནྟརཱཡཾ ཝིནཱ. སངྑེཔེནཱཏི ཝིནཱ ཝིཏྠཱརཾ. ‘‘ཨེཏྠ དྭཱིསུ ཏཱིསུ ཝཱ ཨུདྡེསེསུ ཝིསདེསུ ཐེརོཝ ཨིསྶརོ’’ཏི ཝུཏྟཏྟཱ ཨཝཏྟནྟེཔི ཝཊྚཏཱིཏི ཡོཛནཱ. ཨེཏྠཱཏི པཉྩསུ ཨུདྡེསེསུ. ཨཝཏྟནྟེཏི ཐེརསྶ ཝིཏྠཱརེན ཨཝཏྟམཱནེ ཨཔྤགུཎེ. ཝཊྚཏཱིཏི ¶ སཾཁིཏྟེན ཨུདྡིསིཏུམྤི ཝཊྚཏི. ཨིམིནཱཝ ཡསྶ ཀསྶཙི ཨུདྡེསཀསྶ ཨཝཏྟནྟེཔི ཝཊྚཏཱིཏི ཝིཉྙཱཡཏི. དྭཱིསུ ཝཏྟམཱནེསུ ཨིསྶརཏྟེ ཨདྷིཀེ ཝཏྟབྦམེཝ ནཏྠཱིཏི དསྶནཏྠཾ ‘‘ཏཱིསཱུ’’ཏི ཝུཏྟཾ. ‘‘ཐེརོཝ ཨིསྶརོ’’ཏིཨཱདིནཱ ཨིདཾ པརིདཱིཔེཏི – དྭེ ཨཁཎྜཱ སུཝིསདཱ ཝཱཙུགྒཏཱ, ཐེརཱདྷེཡྻཾ པཱཏིམོཀྑཾ, སཙེ པན ཨེཏྟཀམྤི ཝིསདཾ ཀཱཏུཾ ན སཀྐོཏི, བྱཏྟསྶ བྷིཀྑུནོ ཨཱཡཏྟཾ ཧོཏི, ཏསྨཱ སཡཾ ཨུདྡིསིཏབྦཾ, ཨཉྙཱ ཝཱ ཨཛ྄ཛྷེསིཏབྦོཏི.

༤༡༤. ཨུདྡིསནྟེ སམཱ ཝཱ ཨཐ ཐོཀིཀཱ ཝཱ ཡདི ཨཱགཙྪེཡྻུནྟི སམྦནྡྷནཱིཡཾ. ཨུདྡིསནྟེ ཨཱཝཱསིཀེཧི པཱཏིམོཀྑེ ཨུདྡིསྶམཱནེ. སམཱ ཝཱ ཐོཀིཀཱ ཝཱཏི ཨཱཝཱསིཀེཧི སམཱ ཝཱ ཐོཀིཀཱ ཝཱ ཨཱགནྟུཀཱ བྷིཀྑཱུ. ཨཝསེསཀཾ སོཏབྦནྟི ཨིམིནཱ ཨེཏྟཱཝཏཱཔི ཨུཔོསཐོ ཀཏོཡེཝ ནཱམཱཏི དཱིཔེཏི.

༤༡༥. ཨུདྡིཊྛམཏྟེཏི ཨུདྡིཊྛཾཡེཝ ཨུདྡིཊྛམཏྟཾ. མཏྟ-སདྡོ ཨཝདྷཱརཎེ. སཀལཱཡ ཨེཀཙྩཱཡ ཝཱ ཨུཊྛིཏཱཡ སམཱ ཝཱ ཐོཀིཀཱ ཝཱ ཡདི ཨཱགཙྪེཡྻུནྟི ཡོཛནཱ. སཀལཱཡཱཏི སབྦཱཡ པརིསཱཡ. ཨེསཾ སནྟིཀེ པཱརིསུདྡྷིཾ ཀརེཡྻུནྟི ཨེསཾ ཨཱཝཱསིཀཱནཾ སམཱིཔེ ཏེ ཨཱགནྟུཀཱ བྷིཀྑཱུ ¶ པཱརིསུདྡྷིཨུཔོསཐཾ ཀརེཡྻུནྟི ཨཏྠོ. ཨཐ བཧུཀཱ ཙེ, སབྦཝིཀཔྤེསུ པུབྦཀིཙྩཾ ཀཏྭཱཏི ཡོཛནཱིཡཾ. ཝིཀཔྤཱིཡནྟི པརིཀཔྤཱིཡནྟཱིཏི ཝིཀཔྤཱ, ཨཝསེསསཝནཔཱརིསུདྡྷིཨུཔོསཐཝིདྷཱནཱ སབྦེ ཙ ཏེ ཝིཀཔྤཱ ཙེཏི སབྦཝིཀཔྤཱ. ཏེསུ. པུནུདྡིསེཏི པུན པཱཏིམོཀྑཾ ཨུདྡིསེཡྻ.

༤༡༦. ཨིཏརཱནནྟི ཨཱགནྟུཀཱནཾ. ཨིཏརོཏི ཙཱཏུདྡསོ. ཨེཏྠ པན ཡེསཾ པནྣརསོ, ཏེ ཨཏཱིཏཾ ཨུཔོསཐཾ ཙཱཏུདྡསིཀཾ ཨཀཾསཱུཏི ཝེདིཏབྦཱ. ཨཡམེཏྠཱདྷིཔྤཱཡོ – ཏཱདིསེ པཙྩཡེ སཏི ཙཱཏུདྡསིཀསྶ ཀཏཏྟཱ ཏེསཾ ཡཐཱཝུཏྟཏཏིཡསཏྟམཔཀྑསངྑཱཏཙཱཏུདྡསིཀེ ¶ སམྤཏྟེ ཏེརསཱིཙཱཏུདྡསཱིཀཏྟབྦཏྟཱ ཨནུཔོསཐཏྟཱ པན ཏཏྠ ཨུཔོསཐོ ན ཀཏོཏི ཙཱཏུདྡསོཡེཝ པནྣརསོ ཛཱཏོ. སམཱནེཏརེཏི སམཱ ཨཱུནཱ ཨིཏརེཏི པདཙྪེདོ. ཨིཏརེཏི ཨཱགནྟུཀཱ. པུརིམཱནཾ ཨནུཝཏྟནྟཱུཏི ཨཱཝཱསིཀེཧི ‘‘ཨཛྫུཔོསཐོ པནྣརསོ’’ཏི པུབྦཀིཙྩེ ཀཡིརམཱནེ པུརིམཱནཾ ཨཱཝཱསིཀཱནཾ ཨནུཝཏྟནྟཱུཏི ཨཏྠོ. སཙེདྷིཀཱཏི ཡདི ཨཱགནྟུཀཱ བཧུཀཱ ཧོནྟི. པུརིམཱཏི ཨཱཝཱསིཀཱ. ཏེསཾ ཨནུཝཏྟནྟཱུཏི ཏེསཾ ཨཱགནྟུཀཱནཾ ‘‘ཨཛྫུཔོསཐོ ཙཱཏུདྡསོ’’ཏི པུབྦཀིཙྩེ ཀཡིརམཱནེ ཨནུཝཏྟནྟུ. སེསེཔཱིཏི ཨཱགནྟུཀཱནཾ པནྣརསཝཱརེཔི. ཨཡཾ ནཡོཏི ‘‘ཨཱགནྟུཀཱནཾ པནྣརསོ ཨིཏརཱནཾ སཙེཏརོ’’ཏིཨཱདིཀོ ཨཡམེཝ ནཡོ. ཨེཏྠ པན ཡེསཾ པནྣརསོ, ཏེ ཏིརོརཊྛཏོ ཝཱ ཨཱགཏཱ ཨཏཱིཏཾ ཝཱ ཨུཔོསཐཾ ཙཱཏུདྡསིཀཾ ཨཀཾསཱུཏི ཝེདིཏབྦོ.

༤༡༧. ཨཏཱིཏུཔོསཐསྶ ཙཱཏུདྡསིཡཾ ཀཏཏྟཱ ཙཱཏུདྡསིཡཾ པནྣརསུཔོསཐོ ཀཏོཏི པནྣརསཱི ཨཱཝཱསིཀཱནཾ པཱཊིཔདོ ཛཱཏོཏི ཨཱཧ ‘‘ཨཱཝཱསིཀཱནཾ པཱཊིཔདོ’’ཏི. ཨིཏརཱནནྟི ཨཱགནྟུཀཱནཾ. ཨུཔོསཐོཏི པནྣརསོ ཨུཔོསཐོ. སམཐོཀཱནནྟི ཨཏྟནཱ སམཱནཾ ཝཱ ཐོཀཱནཾ ཝཱ ཨཱགནྟུཀཱནཾ. མཱུལཊྛཱཏི ཨཱཝཱསིཀཱ. ཀཱམཏོ དེནྟཱུཏི ཨཏྟནོ ཨིཙྪཱཡ དེནྟུ.

༤༡༨. ནོ ཙེ དེནྟཱིཏི ཡདི ཨཱཝཱསིཀཱ ཀཱཡསཱམགྒིཾ ན དེནྟི, ཏེསཾ པན ཨཱཝཱསིཀཱནཾ ཧིཡྻོ ཨུཔོསཐསྶ ཀཏཏྟཱ ཨཛྫ ཨུཔོསཐཀརཎཾ ནཏྠི. བཧཱུསུ ཨནིཙྪཱཡ ཀཱཡསཱམགྒིཾ དདེཡྻཱཏི ཡོཛནཱ. བཧཱུསཱུཏི ཨཱགནྟུཀེསུ ¶ བཧུཀེསུ. བཧི ཝཱ ཝཛེཏི ཨཱཝཱསིཀབྷིཀྑུཔརིསཱ ནིསྶཱིམཾ ཝཱ ཝཛེཡྻཱཏི ཨཏྠོ.

༤༡༩. སཱཝེཡྻ སུཏྟནྟི པཱཏིམོཀྑསངྑཱཏཾ སུཏྟཾ ཝཱཡམིཏྭཱ སཱཝེཡྻ.

༤༢༠. སམྨཛྫིཏུཾ ¶ …པེ… ཨུདཀཱསནཾ པཉྙཔེཏུཉྩ མཧཱཐེརེན པེསིཏོ ཀལློ ན ཀརེཡྻ ཏཐཱཏི སམྦནྡྷོ. ཀལློཏི ཨགིལཱནོ. ཏཐཱཏི དུཀྐཊཾ ཨཏིདིསཏི. ཨཱསནེསུ ཨསཏི ཨནྟམསོ སཱཁཱབྷངྒམྤི ཀཔྤིཡཾ ཀཱརཱཔེཏྭཱ པཉྙཔེཏབྦཾ. ཏེལེ ཨསཏི ཀཔལླེ ཨགྒིཔི ཛཱལེཏབྦོ.

༤༢༡-༣. པཊྛཔེཏྭཱ དཀཱསནནྟི པརིབྷོཛནཱིཡཔཱནཱིཡོདཀཉྩ ཨཱསནཉྩ སནྣིཧིཏཾ ཀཏྭཱ. གཎཉཏྟིནྟི ཨིདཱནི ཝཀྑམཱནཾ གཎེན ཋཔེཏབྦཾ ཉཏྟིཾ. ཏེཏི ཨཉྙེ དུཝེ བྷིཀྑཱུ. སམཏྟཔུབྦཱརམྦྷེནཱཏི སམཏྟོ ནིཊྛིཏོ པུབྦེསུ ཨུཏྟརཱསངྒཨེཀཾསཀརཎཱདཱིསུ ཨཱརམྦྷོ ཡསྶཱཏི ཏིཔདབཧུབྦཱིཧི. ནཝེན ཏེ ཨེཝམཱིརིཡཱཏི སམྦནྡྷོ. ཏེཏི ཨིཏརེ དྭེ.

༤༢༤. ཀཏྟབྦཾ ཀཏྭཱ པུབྦཀིཙྩཱདིཀཾ སམྤཱདེཏྭཱ ནཝོ ཨེཝཾ ཨཱིརིཡོཏི ཡོཛནཱ.

༤༢༧. ཡཏྠཱཏི ཡསྨིཾ ཝིཧཱརེ ཨེཀེཀསྶ པཱརིསུདྡྷིཾ ཧརིཏྭཱནཱཏི སམྦནྡྷོ. ཨེཀེཀསྶཱཏི ཨེཏྠ ཝིཙྪཱཡཾ དྭིཏྟཾ. ཀིརིཡཱཡ གུཎེན དབྦེན ཝཱ བྷིནྣེ ཨཏྠེ བྱཱཔིཏུཾ ཨིཙྪཱ ཝིཙྪཱ. ཨེཏྠ པན ཚནྡཔཱརིསུདྡྷིཧརཎསངྑཱཏཱཡ ཀིརིཡཱཡ ཙཏཱུསུ ཙ ཏཱིསུ ཙ དྭཱིསུ ཙ བྷིནྣམེཀེཀཾ བྱཱཔིཏུཾ སམྦནྡྷིཏུཾ ཨིཙྪཱཏི ཝིཙྪཱ. ཨིཏརཱིཏརེཏི ཨེཏྠཱཔི ཀརཎཀིརིཡཱཝསེན ཝེདིཏབྦཾ. ཏཡོ དྭེ ཨེཀོ ཝཱ ཏཾ ཏཾ སངྒྷུཔོསཐཾ གཎུཔོསཐཾ པུགྒལུཔོསཐཾ ཝཱཏི ཝུཏྟཾ ཧོཏི. ཨཡམེཏྠཱདྷིཔྤཱཡོ – ཙཏཱུསུ ཨེཀསྶ ཨཱཧརིཏྭཱ ཏཡོ པཱརིསུདྡྷིཨུཔོསཐཾ ཀརོནྟི, ཏཱིསུ ཝཱ ཨེཀསྶ ཨཱཧརིཏྭཱ དྭེ སངྒྷུཔོསཐཾ ཀརོནྟི, ཨདྷམྨེན ཝགྒཾ ཨུཔོསཐཀམྨཾ. ཨཐ པན ཨེཀསྶ ཨཱཧརིཏྭཱ ཏཡོ སངྒྷུཔོསཐཾ ཀརོནྟི, ཨེཀསྶ ཨཱཧརིཏྭཱ དྭེ པཱརིསུདྡྷིཨུཔོསཐཾ ¶ ཀརོནྟི, ཨདྷམྨེན ཝགྒཾ ནཱམ ཧོཏི. ཡདི པན ཙཏྟཱརོཔི སནྣིཔཏིཏྭཱ པཱརིསུདྡྷིཨུཔོསཐཾ ཀརོནྟི, ཏཡོ ཝཱ དྭེ ཝཱ སངྒྷུཔོསཐཾ ཀརོནྟི, ཨདྷམྨེན སམགྒཾ ནཱམ ཧོཏཱིཏི. ཏབྦིཔརིཡཱཡེན དྷམྨེན སམགྒཾ ཝེདིཏབྦཾ.

༤༢༨. ཝགྒེ སམགྒེ ཝཱ ‘‘ཝགྒོ’’ཏི སཉྙིནོ ཝིམཏིསྶ ཝཱ ཀརོཏོ དུཀྐཊནྟི སམྦནྡྷོ. ཝགྒེཏི ཝགྒསངྒྷེ. ཝིམཏིསྶཱཏི ‘‘ཝགྒོ ནུ ཁོ, སམགྒོ’’ཏི ཨེཝཾ ཝེམཏིཀསྶ. ཨིམིནཱཝ ཀུཀྐུཙྩཔཀཏཝཱརོཔི ཨུཔལཀྑིཏོ. ཀརོཏོཏི ཨུཔོསཐཾ ཀརོནྟསྶ. བྷེདཱདྷིཔྤཱཡེན ཀརོཏོཏི ¶ ཡོཛནཱ. ཨེཏྠ པན པཱཔསྶ བལཝཏཱཡ ཐུལླཙྩཡཾ ཝུཏྟཾ. སཉྙིནོཏི སཉྙཱསཱིསེན ཙིཏྟཾ ཝུཏྟཾ, ཙིཏྟཝཏོཏི ཨཏྠོ.

༤༢༩-༣༠. ‘‘ཨུཀྑིཏྟསྶཱ’’ཏིཨཱདིནཱ ཝཛྫནཱིཡཔུགྒལེ དསྶེཏི. ཨུཀྑིཏྟསྶཱཏི ཀཏྟུཨཏྠེ སཱམིཝཙནཾ. ནིསིནྣསདྡསྶ ཀམྨསཱདྷནཏྟཱ ཨུཀྑིཏྟཱདཱིཧི ཀཏྟཱུཧི བྷཝིཏབྦནྟི. ‘‘སེསཱན’’ནྟི ཝིསེསནསྶ བྷིཀྑཱུནཾ བྱབྷིཙཱརེན སཱཏྠཀཏཱ. ཨབྷབྦསྶ པཎྜཀཱདིཨེཀཱདསཝིདྷསྶ ཨབྷབྦསྶ. ནིསིནྣཔརིསཱཡཉྩ པཱཏིམོཀྑཾ ན ཨུདྡིསེཏི སམྦནྡྷོ. སབྷཱགཱཔཏྟིཀོ ཏཐཱ ན ཨུདྡིསེཏི ཡོཛེཏབྦཾ. ཝིཀཱལབྷོཛནཱདིཝཏྠུཏོ སམཱནོ བྷཱགོ ཀོཊྛཱསོ ཨེཏིསྶཱཏི སབྷཱགཱ, སཱ ཨཱཔཏྟི ཨསྶཱཏི བཧུབྦཱིཧི.

ཚནྡེན པརིཝུཏྠེནཱཏི ཨེཏྠ ཙཏུབྦིདྷཾ པཱརིཝཱསིཡཾ པརིསཔཱརིཝཱསིཡཾ རཏྟིཔཱརིཝཱསིཡཾ ཚནྡཔཱརིཝཱསིཡཾ ཨཛ྄ཛྷཱསཡཔཱརིཝཱསིཡནྟི. ཏཏྠ བྷིཀྑཱུ ཀེནཙིདེཝ ཀརཎཱིཡེན སནྣིཔཏིཏཱ ¶ ཧོནྟི, ཨཐ མེགྷུཊྛཱནཱདིནཱ ཀེནཙིདེཝ ཀརཎཱིཡེན ཨནོཀཱསོ, ཨཐ ‘‘ཨཉྙཏྠ གཙྪཱམཱ’’ཏི ཚནྡཾ ཨཝིསྶཛྫིཏྭཱཝ ཨུཊྛཧནྟི, ཨིདཾ པརིསཔཱརིཝཱསིཡཾ ནཱམ ཀིཉྩཱཔི པརིསཔཱརིཝཱསིཡཾ, ཚནྡསྶ པན ཨཝིསྶཊྛཏྟཱ ཀམྨཾ ཀཱཏུཾ ཝཊྚཏི.

‘‘ཡཱཝ པན སབྦེ སནྣིཔཏནྟི, ཏཱཝ དྷམྨཾ སུཎིསྶཱམཱ’’ཏི ཨེཀཾ ཨཛ྄ཛྷེསནྟི, ཏསྨིཾ དྷམྨཀཐཾ ཀཐེནྟེཡེཝ ཨརུཎོ ཨུགྒཙྪཏི, སཙེ ཙཱཏུདྡསིཀཾ ཀཱཏུཾ ནིསིནྣཱ, པནྣརསོཏི ཀཱཏུཾ ཝཊྚཏི, སཙེ པནྣརསིཀཾ ཀཱཏུཾ ནིསིནྣཱ, པཱཊིཔདེ ཨནུཔོསཐེ ཨུཔོསཐཾ ཀཱཏུཾ ན ཝཊྚཏི, ཨཉྙཾ པན སངྒྷཀིཙྩཾ ཀཱཏུཾ ཝཊྚཏི, ཨིདཾ རཏྟིཔཱརིཝཱསིཡཾ ནཱམ.

ཨེཝཾ པན ནིསིནྣེ ཀོཙི ནཀྑཏྟཔཱཋཀོ བྷིཀྑུ ‘‘ཨཛྫ ནཀྑཏྟཾ དཱརུཎཾ, ཨིམཾ ཀམྨཾ མཱ ཀརོཐཱ’’ཏི ཝདཏི, ཏེ ཏསྶ ཝཙནེན ཚནྡཾ ཝིསྶཛྫེཏྭཱ ཏཏྠེཝ ནིསིནྣཱ ཧོནྟི, ཨཐཉྙོ ཨཱགནྟྭཱ ‘‘ནཀྑཏྟཾ པཊིམཱནེནྟཾ, ཨཏྠོ བཱལཾ ཨུཔཙྩགཱ’’ཏི (ཛཱ. ༡.༡.༤༩) ཝཏྭཱ ‘‘ཀིཾ ནཀྑཏྟེན, ཀརོཐཱ’’ཏི ཝདཏི, ཨིདཾ ཚནྡཔཱརིཝཱསིཡཉྩེཝ ཨཛ྄ཛྷཱསཡཔཱརིཝཱསིཡཉྩ. ཨེཀསྨིཾ པཱརིཝཱསིཡེ པུན ཚནྡཔཱརིསུདྡྷིཾ ཨཱནེཏྭཱ ཀམྨཾ ཀཱཏུཾ ཝཊྚཏི.

༤༣༡. ཨཱཔནྣཉྩ ¶ ཝེམཏིཀཉྩ ཨདེསཡིཏྭཱ ཝཱ ནཱཝིཀཏྭཱ ཝཱ ཨུཔོསཐཾ ཀཱཏུཾ ན ཙ ཀཔྤཏཱིཏི སམྦནྡྷོ. ནཱཝིཀཏྭཱཏི གརུཀཱཔཏྟིཾ ཨནཱཝིཀཏྭཱ. ན ཙཱཏི ནེཝ.

༤༣༢. ཨཊྛིཏོཔོསཐཱཏི ཨཊྛིཏོ ཨཝིསྶཊྛོ ཨུཔོསཐོ ཡསྨིནྟི བཧུབྦཱིཧི. ཏདཧཱུཏི ཏསྨིཾ ཨུཔོསཐདིཝསེ. ཨནྟརཱཡཾ ཝཱ སངྒྷཾ ཝཱ ཝིནཱ ཨདྷིཊྛཱཏུཾ སཱིམམེཝ ཝཱ ¶ ན ཝཛེཏི ཡོཛནཱ. ཨདྷིཊྛཱཏུནྟི ཨིམིནཱ གཎུཔོསཐམྤི ཨུཔལཀྑེཏི. སཱིམནྟི ཨིམིནཱ ནདིམྤི.

༤༣༣. ‘‘ཨཉྙམཉྙཔྤཝཱརཎཱ’’ཏྱཱདཱིནཾ ཨཉྙམཉྙེཧི ཀཱཏབྦཱ པཝཱརཎཱ. ཏཏྠ ཏིཎྞཾ ཙཏུནྣཉྩ གཎཉཏྟིཾ ཋཔེཏྭཱ ཨཉྙམཉྙཔྤཝཱརཎཱ, དྭིནྣཾ པན ཨཊྛཔེཏྭཱཝ. ཨདྷིཊྛཱནནྟི ཨདྷིཊྛཱནཔྤཝཱརཎཱ, ཡུཔཙྩཡནྟཱནཾ བྷཱཝེ ནིཡཏནཔུཾསཀཏྟཱ ‘‘ཨདྷིཊྛཱན’’ནྟི ཝུཏྟཾ. སེསཱ པཉྩཱདཱིཧི ཀཱཏབྦཱ ཨཝསེསཱ སངྒྷཔྤཝཱརཎཱ སངྒྷཝསེན ཉཏྟིཾ ཋཔེཏྭཱ ཀཱཏབྦཱ. ཨེཏེན ནཝསུ སངྒྷཔྤཝཱརཎཱདཡོ ཏིསྶོ དསྶིཏཱ. ནཝ ཧི པཝཱརཎཱ ཙཱཏུདྡསཱི པནྣརསཱི སཱམགྒཱིཏི དིཝསཝསེན, ཏེཝཱཙཱི དྭེཝཱཙཱི ཨེཀཝཱཙཱིཏི ཀཏྟབྦཱཀཱརཝསེན, སངྒྷེ པཝཱརཎཱ, གཎེ པཝཱརཎཱ, པུགྒལེ པཝཱརཎཱཏི ཀཱརཀཝསེན ཙ. ཏཏྠ པུརིམཝསྶཾཝུཏྠཱནཾ པུབྦཀཏྟིཀཔུཎྞམཱ ཝཱ ཏེསཾཡེཝ སཙེ བྷཎྜནཀཱརཀེཧི ཨུཔདྡུཏཱ པཝཱརཎཾ པཙྩུཀྐཌྜྷནྟི, ཨཐ ཀཏྟིཀམཱསསྶ ཀཱལ༹པཀྑཙཱཏུདྡསོ ཝཱ པཙྪིམཀཏྟིཀཔུཎྞམཱ ཝཱ པཙྪིམཝསྶཾཝུཏྠཱནཉྩ པཙྪིམཀཏྟིཀཔུཎྞམཱ ཨེཝ ཝཱ པཝཱརཎཱདིཝསཱ ཧོནྟི. ཨིདཾ པན པཀཏིཙཱརིཏྟཾ. ཏཐཱརཱུཔཔྤཙྩཡེ སཏི དྭིནྣཾ ཀཏྟིཀཔུཎྞམཱནཾ པུརིམེསུ ཙཱཏུདྡསེསུཔི པཝཱརཎཾ ཀཱཏུཾ ཝཊྚཏི. བྷིནྣསྶ པན སངྒྷསྶ སཱམགྒིཡཾ ཡོ ཀོཙི དིཝསོ པཝཱརཎཱདིཝསོ ཧོཏི. ཨིམཱ དིཝསཝསེན ཏིསྶོ པཝཱརཎཱ. ཀཏྟབྦཱཀཱརཝསེན པན ཝཀྑམཱནནཡེན ཝིཉྙཱཏབྦཱ.

༤༣༤. ‘‘པུབྦཀིཙྩེ’’ཏིཨཱདཱིསུ –

‘‘སམྨཛྫནཱི ¶ པདཱིཔོ ཙ, ཨུདཀཾ ཨཱསནེན ཙ;

པཝཱརཎཱཡ ཨེཏཱནི, པུབྦཀརཎནྟི ཝུཙྩཏི.

‘‘ཚནྡཔྤཝཱརཎཱ ¶ ཨུཏུཀྑཱནཾ, བྷིཀྑུགཎནཱ ཙ ཨོཝཱདོ;

པཝཱརཎཱཡ ཨེཏཱནི, པུབྦཀིཙྩནྟི ཝུཙྩཏི.

‘‘པཝཱརཎཱ ཡཱཝཏིཀཱ ཙ བྷིཀྑཱུ ཀམྨཔྤཏྟཱ,

ཝཛྫནཱིཡཱ ཙ པུགྒལཱ ཏསྨིཾ ན ཧོནྟི,

ཨེཝཾ ཨཊྛཀཐཱཡཾ ཝུཏྟཱ པུབྦཀིཙྩཱདཡོ ཝེདིཏབྦཱ. ཉཏྟིནྟི ཨིདཱནི ཝཀྑམཱནཾ སཱམཉྙཾ སངྒྷཉཏྟིཾ. ཨེཝཾ པན ཉཏྟིཡཱ ཋཔིཏཱཡ ཀཱརཎེ སཏི ཏེཝཱཙིཀདྭེཝཱཙིཀཨེཀཝཱཙིཀསམཱནཝསྶིཀཝསེནཔི པཝཱརེཏུཾ ཝཊྚཏི. ཨཡམེཝ པན ཉཏྟི ‘‘སངྒྷོ པཝཱརེཡྻཱ’’ཏི ཨེཏྠ ‘‘སངྒྷོ ཏེཝཱཙིཀཾ པཝཱརེཡྻ, སངྒྷོ དྭེཝཱཙིཀཾ པཝཱརེཡྻ, སངྒྷོ ཨེཀཝཱཙིཀཾ པཝཱརེཡྻ, སངྒྷོ སམཱནཝསྶིཀཾ པཝཱརེཡྻཱ’’ཏིཔི ཋཔེཏུཾ ཝཊྚཏི. ཙཱཏུདྡསིཡཾ པན སཱམགྒིཡཉྩ ‘‘ཙཱཏུདྡསཱི སཱམགྒཱི’’ཏི ཝཏྟབྦཾ.

༤༣༧. ཐེརེསུ ཨུཀྐུཊིཀཾ ནིསཛྫ པཝཱརེནྟེསུ ནཝོ ཡཱཝ སཡཾ པཝཱརེཏི, ཏཱཝ ཨུཀྐུཊིཀོ ཨེཝ ཨཙྪཏཱུཏི ཡོཛནཱ. ཨཙྪཏཱུཏི ནིསཱིདེཡྻ.

༤༤༠-༢. དྷམྨསཱཀཙྪཱ ཙ ཀལཧོ ཙཱཏི དྭནྡོ. རཏྟིཡཱ ཁེཔིཏབྷཱཝཏོ ཏེཝཱཙིཀཱཡ ཨོཀཱསེ ཨསཏི དསཝིདྷེ ཝཱ ཨནྟརཱཡེ སཏི ‘‘སུཎཱཏུ མེ…པེ… སམཱནཝསྶིཀཾ པཝཱརེཡྻཱ’’ཏི ཨནུརཱུཔཏོ ཉཏྟིཾ ཝཏྭཱ ཡཐཱཋཔིཏཉཏྟིཡཱ ཨནུརཱུཔེན པཝཱརེཡྻཱཏི སམྦནྡྷོ ཝེདིཏབྦོ. ཨནུརཱུཔཏོཏི ‘‘སུཎཱཏུ མེ…པེ… དཱནཾ དེནྟེཧི རཏྟི ཁེཔིཏཱ, སཙེ…པེ… རཏྟི ཝིབྷཱཡིསྶཏི, ཡདི སངྒྷསྶ པཏྟཀལླ’’ནྟིཨཱདིནཱ ཏེན ཁེཔིཏརཏྟིཡཱ ཨནུརཱུཔེན. ‘‘སུཎཱཏུ མེ བྷནྟེ སངྒྷོ, ཨཡཾ རཱཛནྟརཱཡོ, སཙེ སངྒྷོ ཏེཝཱཙིཀཾ…པེ… སངྒྷོ བྷཝིསྶཏི, ཨཐཱཡཾ ¶ རཱཛནྟརཱཡོ བྷཝིསྶཏི, ཡདི སངྒྷསྶ པཏྟཀལླ’’ནྟིཨཱདིནཱ རཱཛནྟརཱཡཱདཱིནཾ ¶ ཨནུརཱུཔེན ཝཱཏི ཨཏྠོ. ‘‘ཨཐཱཡཾ བྲཧྨཙརིཡནྟརཱཡོ བྷཝིསྶཏཱི’’ཏི པན པེཡྻཱལཝསེན ཨནྟེ ཝུཏྟཾ བྲཧྨཙརིཡནྟརཱཡཾ གཧེཏྭཱ ཝུཏྟཾ. ‘‘དྭེཝཱཙིཀ’’ནྟིཨཱདིཀཾ པན ཝིསུཾ ཝིསུཾ ཝཏྟབྦམྤི ལངྒྷནཀྐམེན སམྤིཎྜེཏྭཱ ཝུཏྟཾ. ཝཙནསམཡེ པན ‘‘དྭེཝཱཙིཀཾ པཝཱརེཡྻ’’ཨིཙྩཱདིནཱ ཝཏྟབྦཾ. ཨཱགཙྪེཡྻུཾ ཡདི སམཱཨཱདིཀཱ ཙཱཏི ‘‘ཨཱགཙྪེཡྻུཾ ཡདི སམཱ’’ཨིཙྩཱདཡོ ཨུཔོསཐེ ཝུཏྟཱ གཱཐཱཡོ ཙ. ཨེཏྠཱཏི ཨེཏིསྶཾ པཝཱརཎཱཡཾ. ཨཡམེཝ ཙ ཨཱཧརཎཀྐམོ –

ཨཱགཙྪེཡྻུཾ ཡདི སམཱ, པཝཱརེནྟེཝ ཐོཀིཀཱ;

པཝཱརིཏཱ ཏེ སུཔྤཝཱརིཏཱ, ཨཉྙེཧི ཙ པཝཱརིཡཾ;

པཝཱརིཏེསུ སཀལཱ-ཡེཀཙྩཱཡུཊྛིཏཱཡ ཝཱ.

པཝཱརེཡྻུཉྩ ཏེ ཏེསཾ, སནྟིཀེ བཧུཀཱ སཙེ;

ཀཏྭཱ སབྦཝིཀཔྤེསུ, པུབྦཀིཙྩཾ པུནུདྡིསེཏི.

‘‘ཨཱཝཱསིཀཱནཾ པནྣརསོ’’ཏིཨཱདིཀཱ གཱཐཱཡོ པན ཨེཏྠཱཔི སམཱནཱ.

༤༤༣. ཉཏྟིཾ ཝཏྭཱཏི ཝཀྑམཱནགཎཉཏྟིཾ ཝཏྭཱ.

༤༤༤. སམུདཱིརིཡཱཏི ཨཉྙེ དྭེ ཏཡོ ཝཱ ཝཀྑམཱནཀྐམེན ཝཏྟབྦཱ.

༤༤༦-༨. ཀཏྟབྦཾ ཀཏྭཱཏི ཡོཛེཏབྦཾ. ཀཏྟབྦནྟི པུབྦཀིཙྩཱདིཀཾ. ནཝེནཔི ‘‘ཨཧཾ བྷནྟེ…པེ… པཊིཀརིསྶཱམཱི’’ཏི ཐེརོ ཨཱིརིཡོཏི ཡོཛེཏབྦཾ. ཨེཝནྟི ཨིདཱནི ཝཀྑམཱནཾ པརཱམསཏི.

༤༤༩. ‘‘ཡསྨི’’ནྟིཨཱདི ཝུཏྟནཡཏྟཱ ཨུཏྟཱནམེཝ.

༤༥༠. གཱཐཱཡོཏི ¶ ‘‘ཝགྒེ སམགྒེ ཝགྒོཏི, སཉྙིནོ’’ཏིཨཱདིཀཱ ཧེཊྛཱ ཝུཏྟགཱཐཱཡོ ཝཱ. ཨཡཾ པནེཏྠ ཝིསེསོ – ཀརོཏོཏི ཨེཏྠ པཝཱརཎཾ ཀརོཏོཏི ཨཏྠོ གཧེཏབྦོ. ཏཏིཡ གཱཐཱཡ ¶ ‘‘པཱཏིམོཀྑཾ ན ཨུདྡིསེ’’ཏི ཨཔནེཏྭཱ ‘‘ནོ ཀརེཡྻ པཝཱརཎ’’ནྟི པདཾ པཀྑིཔིཏབྦཾ. ཙཏུཏྠགཱཐཱཡ ‘‘ཨནུཔོསཐེ’’ཏིཨཱདིགཱཐཱབནྡྷཾ ཨཔནེཏྭཱ ‘‘ནེཝ པཝཱརཎེ ཀཱཏུཾ, སཱ ཀཔྤཏི པཝཱརཎཱ’’ཏི པཀྑིཔིཏབྦཾ. པཉྩམགཱཐཱཡ ‘‘ཨཊྛིཏོཔོསཐཱཝཱསཱ’’ཏི ཨཔནེཏྭཱ ‘‘པཝཱརཎཱཋིཏཱཝཱསཱ’’ཏི པཀྑིཔིཏབྦཾ.

༤༥༡. སངྒྷམྷི པཝཱརིཏེཝཱཏི པུརིམཝསྶཱུཔགཏེ སངྒྷམྷི པཝཱརིཏེ ཨེཝ. པཱརིསུདྡྷིཨུཔོསཐཾ ཀརེཡྻཱཏི ན ཨེཀསྨིཾ ཨུཔོསཐགྒེ དྭེ ཉཏྟིཡོ ཋཔེཏབྦཱཏི ཨདྷིཔྤཱཡོ. པཙྪིམིཀཱཡ ཨུཔགནྟྭཱ ཨཔརིནིཊྛིཏཝསྶོ ཨཝུཏྠོ. ཨནུཔཱགཏོཏི ཝསྶཾ ཨནུཔཱགཏོ. ཨཡམེཏྠཱདྷིཔྤཱཡོ – པུརིམིཀཱཡ ཝསྶཾ ཨུཔགཏཱ པཉྩ ཝཱ ཨཏིརེཀཱ ཝཱ པཙྪིམིཀཱཡ ཨུཔགཏཱ ཏེཧི སམཱ ཝཱ ཨཱུནཏརཱ ཝཱ པུརིམིཀཱཡ ཝཱ ཨུཔགཏེཧི པཙྪིམིཀཱཡ ཨུཔགཏཱ ཐོཀཏརཱ ཙེཝ ཧོནྟི, སངྒྷཔྤཝཱརཎཱཡ གཎཾ པཱུརེནྟི སངྒྷཔྤཝཱརཎཱཝསེན ཉཏྟིཾ ཋཔེཏྭཱ, ཨཐ ཙ ཨུབྷོཔི ཨེཀཏོ ཧུཏྭཱ སངྒྷཾ ན པཱུརེནྟི, གཎཾ པན པཱུརེནྟི, གཎཉཏྟིཾ ཋཔེཏྭཱ པཝཱརེཏབྦཾ, པཙྪཱ ཏེསཾ སནྟིཀེ པཱརིསུདྡྷིཨུཔོསཐོ ཀཱཏབྦོ. ཡདི པན པུརིམིཀཱཡ ཨེཀོ, པཙྪིམིཀཱཡ ཨེཀོ, ཨེཀེན ཨེཀསྶ སནྟིཀེ པཝཱརེཏབྦཾ, ཨེཀེན པཱརིསུདྡྷིཨུཔོསཐོ ཀཱཏབྦོ. སཙེ པུརིམེཧི ཝསྶཱུཔགཏེཧི པཙྪཱ ཝསྶཱུཔགཏཱ ཨེཀེནཔི ཨདྷིཀཱ སངྒྷཾ པཱུརེནྟི, པཋམཾ པཱཏིམོཀྑཾ ཨུདྡིསིཏྭཱ པཙྪཱ ཏེསཾ སནྟིཀེ པཝཱརེཏབྦནྟི. གཎེཔི ཨེསེཝ ནཡོ. ཨེཝམུཔརིཔི ཡཐཱཡོགཾ ཙིནྟནཱིཡཾ.

༤༥༢. ཙཱཏུམཱསིནིཡཱཏི ¶ ཨཔརཀཏྟིཀཔུཎྞམཱཡཾ. སངྒྷེནཱཏི པཋམཾ ཝསྶཱུཔགཏེན སངྒྷེན. ཝུཏྠཱ ཝསྶཱ ཡེཧི ཏེ ཝུཏྠཝསྶཱ, པཙྪིམཝསྶཱུཔགཏཱ. སཙེ ཨཔྤཏརཱ སིཡུནྟི ཨིམིནཱ ཡདི ཨདྷིཀཏརཱ ཝཱ སམསམཱ ཝཱ ཧོནྟི, པཝཱརཎཱཉཏྟིཾ ཋཔེཏྭཱ པཙྪིམཝསྶཱུཔགཏེཧི པཋམཾ པཝཱརིཏེ པཙྪཱ ཨིཏརེཧི པཱརིསུདྡྷིཨུཔོསཐོ ཀཱཏབྦོཏི དཱིཔེཏཱིཏི.

༤༥༣. སཾཝརཎཾ ཙཀྑུདྭཱརཱདཱིནཾ སཏིཀཝཱཊེན པིདཧནཾ སཾཝརོ. ཏཏྠ ཀིཉྩཱཔི ཙཀྑུནྡྲིཡེ སཾཝརོ ནཏྠི, ན ཧི ཙཀྑུཔསཱདཾ ནིསྶཱཡ སཏི ཨུཔྤཛྫཏི, ནེཝ བྷཝངྒསམཡེ ཨཱཝཛྫནཱདཱིནཾ ¶ ཨཉྙཏརསམཡེ, ཛཝནཀྑཎེ པན ཨུཔྤཛྫཏཱིཏི ཏདཱ སཾཝརོ ཧོཏི, ཨེཝཾ ཧོནྟེ པན སོ ཙཀྑུདྭཱརཱདཱིནཾ སཾཝརོཏི ཝུཙྩཏི. ཙཀྑུསོཏཱདིབྷེདེཧཱིཏི ཙཀྑུ ཙ སོཏཉྩ, ཏཱནི ཨཱདི ཡེསཾ, ཏེཝ བྷེདཱ ཙཱཏི སམཱསོ, ཏེཧི དྭཱརེཧི. ཨབྷིཛ྄ཛྷཱདིཔྤཝཏྟིཡཱ ཨཙྩནྟོཔཀཱརཀཏྟཱ ཀརཎཏྠེ ཙེཏྠ ཏཏིཡཱ. ཨེཏེན ཙཀྑུསོཏགྷཱནཛིཝ྄ཧཱཀཱཡམནསངྑཱཏཱནི དྭཱརཱནི ཝུཏྟཱནི. རཱུཔསདྡཱདིགོཙརེཏི རཱུཔསདྡགནྡྷརསཕོཊྛབྦདྷམྨསངྑཱཏེ ཝིསཡེ. ཨབྷིཛ྄ཛྷཱདོམནསྶཱདིཔྤཝཏྟིནྟི ཨེཏྠ པརསམྤཏྟིཾ ཨབྷིམུཁཾ ཛྷཱཡཏཱིཏི ཨབྷིཛ྄ཛྷཱ, བལཝཏཎྷཱ. ཨཱདི-སདྡེན མིཙྪཱདིཊྛིཨཱདཡོ ཨནེཀེ ཨཀུསལཱ དྷམྨཱ སངྒཧིཏཱ.

༤༥༤. སཀཾ ཙིཏྟཾ ཀིཊྛཱདིཾ དུཔྤསུཾ ཝིཡ ནིགྒཎྷེཡྻཱཏི སམྦནྡྷོ. ཀིཊྛནྟི ཀིཊྛཊྛཱནེ ཨུཔྤནྣཾ སསྶཾ གཧིཏཾ. ཀིཊྛཾ ཨདཏཱིཏི ¶ ཀིཊྛཱདི, ཏཾ. སམྤཛཱནོཏི སཱཏྠཀསཔྤཱཡགོཙརཨསམྨོཧསངྑཱཏེན ཙཏུསམྤཛཉྙེན སམྨཱ པཛཱནོ. ཨིམིནཱ ཨིནྡྲིཡསཾཝརསཱིལཾ ཀཐིཏཾ.

༤༥༥. དེསནཱ སཾཝརོ ཨེཊྛི པཙྩཝེཀྑཎནྟི བྷེདཏོ སུདྡྷི ཙཏུབྦིདྷཱཏི སམྦནྡྷོ. ‘‘པཙྩཝེཀྑཎཾ བྷེདཏོ’’ཏི ཝཏྟབྦེ ནིགྒཧིཏལོཔོ དཊྛབྦོ, དེསནཱསུདྡྷི སཾཝརསུདྡྷི པརིཡེཊྛིསུདྡྷི པཙྩཝེཀྑཎསུདྡྷཱིཏི ཙཏུབྦིདྷཱཏི ཝུཏྟཾ ཧོཏི. ཏཏྠ སུཛ྄ཛྷཏཱིཏི སུདྡྷི, ཡཐཱདྷམྨཾ དེསནཱཡ སུདྡྷི དེསནཱསུདྡྷི. ཝུཊྛཱནསྶཱཔི ཙེཏྠ དེསནཱཡ ཨེཝ སངྒཧོ དཊྛབྦོ. མཱུལཱཔཏྟཱིནཾ པན ཨབྷིཀྑུཏཱཔཊིཉྙཱཝ དེསནཱཏི ཧེཊྛཱ ཝུཏྟཱ, སཱཝསྶ པཱརཱཛིཀཱཔནྣསྶ ཝིསུདྡྷི ནཱམ ཧོཏི. ཨཡཉྷི ཡསྨཱ པཱརཱཛིཀཾ ཨཱཔནྣོ, ཏསྨཱ བྷིཀྑུབྷཱཝེ ཋཏྭཱ ཨབྷབྦོ ཛྷཱནཱདཱིནི ཨདྷིགནྟུཾ. བྷིཀྑུབྷཱཝོ ཧིསྶ སགྒནྟརཱཡོ ཙེཝ ཧོཏི, མགྒནྟརཱཡོ ཙ. ཝུཏྟཉྷེཏཾ –

‘‘སཱམཉྙཾ དུཔྤརཱམཊྛཾ, ནིརཡཱཡཱུཔཀཌྜྷཏཱི’’ཏི. (དྷ. པ. ༣༡༡);

‘‘སིཐིལོ ཧི པརིབྦཛོ, བྷིཡྻོ ཨཱཀིརཏེ རཛ’’ནྟི. (དྷ. པ. ༣༡༣);

ཨིཙྩསྶ བྷིཀྑུབྷཱཝོ ཝིསུདྡྷི ནཱམ ན ཧོཏི. ཡསྨཱ པན གིཧིཨཱདིཀོ ཧུཏྭཱ དཱནསརཎསཱིལསཾཝརཱདཱིཧི སགྒམགྒཾ ཝཱ ཛྷཱནཝིམོཀྑམགྒཾ ཝཱ ཨཱརཱདྷེཏུཾ བྷབྦོ ཧོཏི, ཏསྨཱསྶ ¶ གིཧིཨཱདིབྷཱཝོ ཝིསུདྡྷི ནཱམ ཧོཏི. ཨདྷིཊྛཱནཝིསིཊྛེན སཾཝརེན ཝིསུདྡྷི སཾཝརཝིསུདྡྷི. དྷམྨེན སམེན པཙྩཡཱནཾ ཨེཊྛིཡཱ སུདྡྷི ཨེཊྛིསུདྡྷི. ཙཏཱུསུ པཙྩཡེསུ པཙྩཝེཀྑཎེན སུདྡྷི པཙྩཝེཀྑཎསུདྡྷི. ‘‘ཙཏུབྦིདྷཱ པཱཏཱི’’ཏིཨཱདཱིསུ པཱཏིམོཀྑསཾཝརསམྨཏནྟི ‘‘པཱཏིམོཀྑསཾཝརོ’’ཏི སམྨཏཾ སཱིལཾ.

༤༥༦. ཙིཏྟཱདྷིཊྛཱནསཾཝརཱ སུཛ྄ཛྷཏཱིཏི ཨིནྡྲིཡསཾཝརོ སཾཝརསུདྡྷཱིཏི ཝུཏྟོཏི ཡོཛནཱ.

༤༥༧. ཨནེསནཾ པཧཱཡ དྷམྨེན ཨུཔྤཱདེནྟསྶ ཨེཊྛིཡཱ སུདྡྷཏྟཱ ཨཱཛཱིཝནིསྶིཏཾ ཨེཊྛིསུདྡྷཱིཏི ཝུཏྟནྟི སམྦནྡྷོ. ཨུཔྤཱདེནྟསྶཱཏི པཙྩཡེ ཨུཔྤཱདེནྟསྶ.

༤༥༨. པཙྩཝེཀྑཎསུཛ྄ཛྷནཱཏི ཧེཏུམྷི པཉྩམཱིཏི.

༤༥༩. པཾསུཀཱུལཾ པིཎྜིཡཱལོཔོ རུཀྑམཱུལཾ པཱུཏིམུཏྟབྷེསཛྫནྟི ཨིམེ ཙཏྟཱརོ པཙྩཡཱ ཨཔྤགྒྷནཀཏཱཡ ཨཔྤཱ ཙེཝ ཀསྶཙིཔི ཨཱལཡཱབྷཱཝེན ཨནཝཛྫཱ ཙ གཏགཏཊྛཱནེ ལབྦྷམཱནཏཱཡ ¶ སུལབྷཱ ཙཱཏི ཝུཙྩནྟི, ཏེནཱཧ ‘‘ཨཔྤེནཱ’’ཏིཨཱདི. མཏྟཉྙཱུཏི པརིཡེསནཔྤཊིགྒཧཎཔརིབྷོགཝིསྶཛྫནེསུ ཙཏཱུསུ མཏྟཉྙུཏཱཝསེན པམཱཎཉྙཱུ.

༤༦༠. ཀཐཾ སནྟུཊྛོཏི ཨཱཧ ‘‘ཨཏཱིཏ’’ནྟིཨཱདི. པཙྩུཔྤནྣེན ཡཱཔེནྟོཏི ཡཐཱལཱབྷཡཐཱབལཡཐཱསཱརུཔྤཝསེན པཙྩུཔྤནྣེན ཡཐཱཝུཏྟཙཏུབྦིདྷཔཙྩཡེན ཡཱཔེནྟོཏི.

༤༦༡-༢. བུདྡྷཱནུསྶཏི ¶ …པེ… མརཎསྶཏཱིཏི ཨིམཱ ཙཏུརཱརཀྑཱ ནཱམཱཏི སེསོ. ཨཱརཀཏྟཱདིནཱཏི ཨཱརཀབྷཱཝོ ཨཱརཀཏྟཾ, ཏཾ ཨཱདི ཡསྶ ‘‘ཨརཱིནཾ ཧཏཏྟཱ’’ཏིཨཱདིཀསྶ ཏཾ ཨཱརཀཏྟཱདི. ཏེན ཏེན མགྒེན སཝཱསནཱནཾ ཨརཱནཾ ཧཏཏྟཱ ཨཱརཀཱ སབྦཀིལེསེཧི སུཝིདཱུརཝིདཱུརེ ཋིཏོཏི ཨཱ-ཀཱརསྶ རསྶཏྟཾ, ཀ-ཀཱརསྶ ཧ-ཀཱརཾ སཱནུནཱསིཀཾ ཀཏྭཱ ‘‘ཨརཧ’’ནྟི པདསིདྡྷི ཝེདིཏབྦཱ. ‘‘ཨཱརཀཱ’’ཏི ཙ ཝུཏྟེ སཱམཉྙཛོཏནཱཡ ཝིསེསེ ཨཝཊྛཱནཏོ, ཝིསེསཏྠིནཱ ཙ ཝིསེསསྶ ཨནུཔྤཡོཛིཏབྦཏྟཱ ‘‘ཀིལེསེཧཱི’’ཏི ལབྦྷཏི.

སམྨཱཏི ཨཝིཔརཱིཏཾ. སཱམནྟི སཡམེཝ, ཨཔརནེཡྻོ ཧུཏྭཱཏི ཨཏྠོ. ‘‘སམྦུདྡྷོ’’ཏི ཧི ཨེཏྠ སཾ-སདྡོ ‘‘སཡ’’ནྟི ཨེཏསྶ ཨཏྠསྶ བོདྷཀོ དཊྛབྦོ. བུདྡྷཏོཏི བྷཱཝཔྤདྷཱནོཡཾ ནིདྡེསོ, བུདྡྷཏྟཱཏི ཨཏྠོ. ‘‘ཨརཧཾ’’ ཨིཏི ཝཱ ‘‘སམྨཱསམྦུདྡྷོ’’ ཨིཏི ཝཱ བྷགཝཏོ ནཝབྷེདེ གུཎེ ཡཱ པུནཔྤུནཾ ཨནུསྶཏི, སཱ བུདྡྷཱནུསྶཏཱིཏི ཡོཛནཱ. ‘‘སམྨཱསམྦུདྡྷོ ཨིཏཱི’’ཏི ཝཏྟབྦེ ཨ-ཀཱརོ སནྡྷིཝསེན ཨཱགཏོ. ཨིཏི-སདྡོ པནེཏྠ ཨཱདིཨཏྠོ, ཨིཙྩཱདཱིཏི ཨཏྠོ. ནཝབྷེདེཏི ‘‘ཨནུཏྟརོ པུརིསདམྨསཱརཐཱི’’ཏི ཨེཀཏོ གཧེཏྭཱ. ཨེཏྠ པན ཨུཔཙཱརོ ཨུཔྤཛྫཏི, ན ཨཔྤནཱ, ཏཐཱ མརཎསྶཏིཡཾ. ཨིཏརེསུ པན ཨུབྷཡམྤི ཨུཔྤཛྫཏཱིཏི ཝེདིཏབྦཾ. བུདྡྷཱནུསྶཏི.

༤༦༣-༤. ‘‘སཱིམཊྛཱ’’ཏིཨཱདིནཱ མེཏྟཱབྷཱཝནཾ དསྶེཏི. སཱིམཊྛསངྒྷེཏི སཱིམཱཡཾ ཏིཊྛཏཱིཏི སཱིམཊྛོ ¶ , སོཝ སངྒྷོ. གོཙརགཱམམྷི ཨིསྶརེ ཛནེཏི སམྦནྡྷོ. ཏཏྠ མཱནུསེ ཨུཔཱདཱཡ སབྦསཏྟེསཱུཏི ཡོཛེཏབྦཾ. ཏཏྠཱཏི ཏསྨིཾ གཱམེ. སུཁིཏཱ ཧོནྟུ ཨཝེརཱཏི པདཙྪེདོ. ཨཱདིནཱཏི ¶ ‘‘ཨབྱཱཔཛྫཱ ཧོནྟུ, ཨནཱིགྷཱ ཧོནྟུ, སུཁཱི ཨཏྟཱནཾ པརིཧརནྟཱུ’’ཏི ཨིམིནཱ. པརིཙྪིཛྫ པརིཙྪིཛྫཱཏི ‘‘ཨིམསྨིཾ ཝིཧཱརེ སབྦེ བྷིཀྑཱུ’’ཏིཨཱདིནཱ ཨེཝམྤི པརིཙྪིནྡིཏྭཱ པརིཙྪིནྡིཏྭཱ. མེཏྟཱབྷཱཝནཱ.

༤༦༥-༦. ཨིདཱནི ཨསུབྷཾ ནིདྡིསནྟོ སབྦཔཋམཾ སཱདྷེཏབྦཾ སཏྟཝིདྷམུགྒཧཀོསལླཾ ‘‘ཝཎྞེ’’ཙྩཱདིནཱ དསྶེཏི. སཏྟཝིདྷཉྷི ཏཾ ནཡཏོ ཨཱགཏཾ ཝཱཙཱསཛ྄ཛྷཱཡམནསཱསཛ྄ཛྷཱཡེཧི སདྡྷིཾ. ཏཏྠ པཋམཾ ཝཱཙཱཡ སཛ྄ཛྷཱཡནྟེན ཙཏྟཱརི ཏཙཔཉྩཀཱདཱིནི པརིཙྪིནྡིཏྭཱ ཨནུལོམཔྤཊིལོམཝསེན ཀཱཏབྦཾ. ཡཐཱ པན ཝཙསཱ, ཏཐེཝ མནསཱཔི སཛ྄ཛྷཱཡོ ཀཱཏབྦོ. ཝཙསཱ སཛ྄ཛྷཱཡོ ཧི མནསཱ སཛ྄ཛྷཱཡསྶ པཙྩཡོ. སོ པན ལཀྑཎཔྤཊིཝེདྷསྶ པཙྩཡོ. ཏཏྠ ཝཎྞོ ནཱམ ཀེསཱདཱིནཾ ཝཎྞོ. སཎྛཱནཾ ཏེསཾཡེཝ སཎྛཱནཾ. ཨོཀཱསོ ཏེསཾཡེཝ པཏིཊྛོཀཱསོ. དིསཱ ནཱབྷིཏོ ཨུདྡྷཾ ཨུཔརིམདིསཱ, ཨདྷོ ཧེཊྛིམཱ. པརིཙྪེདོ ནཱམ ‘‘ཨཡཾ ཀོཊྛཱསོ ཧེཊྛཱ ཙ ཨུཔརི ཙ ཏིརིཡཉྩ ཨིམིནཱ ནཱམ པརིཙྪིནྣོ’’ཏི ཨེཝཾ སབྷཱགཔརིཙྪེདོ ཙེཝ ‘‘ཀེསཱ ན ལོམཱ, ལོམཱ ན ཀེསཱ’’ཏི ཨེཝཾ ཨམིསྶཀཏཱཝསེན ཝིསབྷཱགཔརིཙྪེདོ ཙ. ཀེསཱདིཀོཊྛཱསེ ཝཝཏྠཔེཏྭཱཏི སམྦནྡྷོ. ཝཝཏྠཔེཏྭཱཏི ཝུཏྟནཡེན ཝཝཏྠཔེཏྭཱ.

ཨེཝཾ ཝཝཏྠཔེནྟེན ཡཐཱཝུཏྟཾ སཏྟཝིདྷཾ ཨུགྒཧཀོསལླཾ སམྤཱདེཏྭཱ ཨཊྛཱརསཝིདྷཾ མནསིཀཱརཀོསལླཾ སམྤཱདེཏབྦནྟི དསྶེཏུཾ ‘‘ཨནུཔུབྦཏོ’’ཏིཨཱདིམཱཧ. ཏཏྠ ཨཔྤནཱཏོ ཏཡོ ཙ སུཏྟནྟཱཏི ཨིམེ ཙཏྟཱརོཔི ནཡཏོཝཱགཏེ ནཱཏིསཱིགྷཱདཱིསུ པཀྑིཔིཏྭཱ དསཝིདྷཏཱ ཝེདིཏབྦཱ. ཨནུཔུབྦཏོཏི སཛ྄ཛྷཱཡཀརཎཏོ པཊྛཱཡ ཨནུཔཊིཔཱཊིཡཱ. ནཱཏིསཱིགྷཾ ནཱཏིསཎིཀཾ ཀཏྭཱཏི ཀིརིཡཱཝིསེསནཾ. ཝིཀྑེཔཾ ¶ པཊིབཱཧཡནྟི ཀམྨཊྛཱནཾ ཝིསྶཛྫེཏྭཱ བཧིདྡྷཱ པུཐུཏྟཱརམྨཎེ ཙེཏསོ ཝིཀྑེཔཾ པཊིབཱཧནྟོ. པཎྞཏྟིཾ སམཏིཀྐམྨཱཏི ཡཱཡཾ ‘‘ཀེསཱ ལོམཱ’’ཏི པཎྞཏྟི, ཏཾ ཨཏིཀྐམིཏྭཱ, ‘‘པཊིཀྐཱུལ’’ནྟི ཙིཏྟཾ ཋཔེཏྭཱཏི ཨདྷིཔྤཱཡོ. ཨནུཔུབྦཏོ མུཉྩནྟསྶཱཏི ཡོ ཡོ ཀོཊྛཱསོ ན ཨུཔཊྛཱཏི, ཏཾ ཏཾ ཨནུཀྐམེན མུཉྩཏོ, ཏསྶ ‘‘བྷཱཝནཱ’’ཏི ཨིམིནཱ སམྦནྡྷོ ཝེདིཏབྦོ.

༤༦༧. ཨེཝཾ ཨུབྷཡཀོསལླཾ སམྤཱདེཏྭཱ སབྦཀོཊྛཱསེ ཝཎྞཱདིཝསེན ཝཝཏྠཔེཏྭཱ ཝཎྞཱདིཝསེནེཝ ¶ པཉྩདྷཱ པཊིཀྐཱུལཏཱ ཝཝཏྠཔེཏབྦཱཏི དསྶེཏུཾ ‘‘ཝཎྞཱ’’ཏིཨཱདིམཱཧ. ཝཎྞ…པེ… ཨོཀཱསེཧི ཀོཊྛཱསེ པཊིཀྐཱུལཱཏི བྷཱཝནཱ ཨསུབྷནྟི ཡོཛནཱ. ཏཏྲ ཀེསཱ ཏཱཝ པཀཏིཝཎྞེན ཀཱལ༹ཀཱ ཨདྡཱརིཊྛཀཝཎྞཱ, སཎྛཱནཏོ དཱིགྷཝཊྚཏུལཱདཎྜསཎྛཱནཱ, དིསཏོ ཨུཔརིམདིསཱཡ ཛཱཏཱ, ཨོཀཱསཏོ ཨུབྷོསུ པསྶེསུ ཀཎྞཙཱུལི༹ཀཱཧི, པུརཏོ ནལཱ༹ཊནྟེན, པཙྪཏོ གལ༹ཝཱཊཀེན པརིཙྪིནྣཱ, སཱིསཀཊཱཧཝེཋནཨལླཙམྨཾ ཀེསཱནཾ ཨོཀཱསོ. པརིཙྪེདཏོ ཀེསཱ སཱིསཝེཋནཙམྨེ ཝཱིཧགྒམཏྟཾ པཝིསིཏྭཱ པཏིཊྛིཏེན ཧེཊྛཱ ཨཏྟནོ མཱུལཏལེན, ཨུཔརི ཨཱཀཱསེན, ཏིརིཡཾ ཨཉྙམཉྙེན པརིཙྪིནྣཱ. དྭེ ཀེསཱ ཨེཀཏོ ནཏྠཱིཏི ཨཡཾ སབྷཱགཔརིཙྪེདོ. ‘‘ཀེསཱ ན ལོམཱ, ལོམཱ ན ཀེསཱ’’ཏི ཨེཝཾ ཨཝསེསཨེཀཏིཾ སཀོཊྛཱསེཧི ཨམིསྶཱིཀཏཱ ཀེསཱ ནཱམ པཱཊིཡེཀྐོ ཨེཀོ ཀོཊྛཱསོཏི ཨཡཾ ཝིསབྷཱགཔརིཙྪེདོ. ཨིདཾ ཀེསཱནཾ ཝཎྞཱདིཏོ ནིཙྪཡནཾ. ཨིདཾ པན ནེསཾ ཝཎྞཱདིཝསེན པཉྩདྷཱ པཊིཀྐཱུལཏོ ནིཙྪཡནཾ – ཀེསཱ ནཱམེཏེ ཝཎྞཏོཔི པཊིཀྐཱུལཱ ཨཱསཡཏོཔི སཎྛཱནཏོཔི གནྡྷཏོཔི ཨོཀཱསཏོཔི པཊིཀྐཱུལཱཏི ཨེཝཾ སེསཀོཊྛཱསཱནམྤི ཡཐཱཡོགཾ ཝེདིཏབྦཾ.

ཨུདྡྷུམཱཏཱདིཝཏྠཱུསཱུཏི ¶ ཨུདྡྷུམཱཏཀཝིནཱིལཀཝིཔུབྦཀཝིཙྪིདྡཀཝིཀྑཱཡིཏཀཝིཀྑིཏྟཀཧཏཝི- ཀྑིཏྟཀལོཧིཏཀཔུལ༹ཝཀཨཊྛིཀསངྑཱཏེསུ དསེསུ ཨཝིཉྙཱཎཀཨསུབྷཝཏྠཱུསུ ཨསུབྷཱཀཱརཾ གཧེཏྭཱ པཝཏྟཱ བྷཱཝནཱ ཝཱ ཨསུབྷནྟི སམྦནྡྷོ. ཨསུབྷབྷཱཝནཱ.

༤༦༨. ‘‘མརཎཾ མེ བྷཝིསྶཏཱི’’ཏི ཝཱ ‘‘ཛཱིཝིཏཾ མེ ཨུཔརུཛ྄ཛྷཏཱི’’ཏི ཝཱ ‘‘མརཎཾ མརཎ’’ནྟི ཝཱ ཡོནིསོ བྷཱཝཡིཏྭཱནཱཏི ཡོཛནཱ. ཛཱིཝིཏནྟི རཱུཔཛཱིཝིཏིནྡྲིཡཉྩ ཨརཱུཔཛཱིཝིཏིནྡྲིཡཉྩ. ཡོནིསོཏི ཨུཔཱཡེན. ཨེཝཾ པཝཏྟཡཏོཡེཝ ཧི ཨེཀཙྩསྶ ནཱིཝརཎཱནི ཝིཀྑམྦྷནྟི, མརཎཱརམྨཎཱ སཏི སཎྛཱཏི, ཨུཔཙཱརཔྤཏྟམེཝ ཀམྨཊྛཱནཾ ཧོཏི.

༤༦༩-༤༧༠. ཡསྶ པན ཨེཏྟཱཝཏཱ ན ཧོཏི, ཏེན ཝདྷཀཔཙྩཱུཔཊྛཱནཱདཱིཧི ཨཊྛཧཱཀཱརེཧི མརཎཾ ཨནུསྶརིཏབྦནྟི དསྶེཏུཾ ‘‘ཝདྷཀསྶེཝཱ’’ཏིཨཱདིམཱཧ. ཝདྷཀསྶ ཨིཝ ཨུཔཊྛཱནཱཏི ‘‘ཨིམསྶ སཱིསཾ ཚིནྡིསྶཱམཱི’’ཏི ཨསིཾ གཧེཏྭཱ གཱིཝཱཡ སཉྩཱརཡམཱནསྶ ཝདྷཀསྶ ཝིཡ མརཎསྶ ཨུཔཊྛཱནཏོ. སམྤཏྟཱིནཾ ཝིཔཏྟིཏོཏི བྷོགསམྤཏྟིཡཱ ཛཱིཝིཏསམྤཏྟིཡཱ ཙ ཝིནཱསམརཎསངྑཱཏཝིཔཏྟིཏོ. ཨུཔསཾཧརཏོཏི ཡསམཧཏྟཏོ པུཉྙམཧཏྟཏོ ཐཱམམཧཏྟཏོ ཨིདྡྷིམཧཏྟཏོ པཉྙཱམཧཏྟཏོ པཙྩེཀབུདྡྷཏོ སམྨཱསམྦུདྡྷཏོཏི ཨིམེཧི སཏྟཧཱཀཱརེཧི ཨཏྟནོ ཨུཔསཾཧརཎཏོ ¶ . ཀཱཡབཧུསཱདྷཱརཎཱཏི ཨསཱིཏིཡཱ ཀིམིཀུལཱནཾ, ཨནེཀསཏཱནཾ རོགཱནཾ, བཱཧིརཱནཉྩ ཨཧིཝིཙྪིཀཱདཱིནཾ མརཎསྶ པཙྩཡཱནཾ སཱདྷཱརཎཏོ. ཨཱཡུདུབྦལཏོཏི ཨསྶཱསཔསྶཱསཱུཔནིབདྡྷཏྟཨིརིཡཱཔཐཱུཔནིབདྡྷཏྟཱདིནཱ ཨཱཡུནོ དུབྦལཏོ. ཀཱལཝཝཏྠཱནསྶ ཨབྷཱཝཏོཏི ‘‘ཨིམསྨིཾཡེཝ ཀཱལེ མརིཏབྦཾ, ན ཨཉྙསྨི’’ནྟི ཨེཝཾ ཀཱལཝཝཏྠཱནསྶ ཨབྷཱཝཏོ. ཨདྡྷཱནསྶ པརིཙྪེདཱཏི ‘‘མནུསྶཱནཾ ཛཱིཝིཏསྶ པརིཙྪེདོ ནཱམ ¶ ཨེཏརཧི པརིཏྟོ, ཨདྡྷཱ ཡོ ཙིརཾ ཛཱིཝཏི, སོ ཝསྶསཏཾ ཛཱིཝཏཱི’’ཏི ཨེཝཾ ཨདྡྷཱནསྶ ཀཱལསྶ པརིཙྪེདཏོ.

ཨེཏྠ པན ཀམྨཊྛཱནཾ བྷཱཝེཏྭཱ ཝིཔསྶནཱཡ སཧ པཊིསམྦྷིདཱཧི ཨརཧཏྟཾ པཏྟུཀཱམེན བུདྡྷཔུཏྟེན ཡཾ ཀཱཏབྦཾ, ཏཾ ཨཱདིཀམྨིཀསྶ ཀུལཔུཏྟསྶ ཝསེན ཨཱདིཏོ པཊྛཱཡ སངྑེཔེནོཔདིསྶཱམ. ཙཏུབྦིདྷཾ ཏཱཝ སཱིལཾ སོདྷེཏབྦཾ. ཏཏྠ ཏིཝིདྷཱ ཝིསུཛ྄ཛྷནཱ ཨནཱཔཛྫནཾ, ཨཱཔནྣཝུཊྛཱནཾ, ཀིལེསེཧི ཙ ཨཔྤཊིཔཱིལ༹ནཾ. ཨེཝཾ ཝིསུདྡྷསཱིལསྶ ཧི བྷཱཝནཱ སམྤཛྫཏི. ཡམྤིདཾ ཙེཏིཡངྒཎཝཏྟཱདཱིནཾ ཝསེན ཨཱབྷིསམཱཙཱརིཀསཱིལཾ ཝུཙྩཏི, ཏམྤི སཱདྷུཀཾ པརིཔཱུརེཏབྦཾ. ཏཏོ –

‘‘ཨཱཝཱསོ ཙ ཀུལཾ ལཱབྷོ, གཎོ ཀམྨཉྩ པཉྩམཾ;

ཨདྡྷཱནཾ ཉཱཏི ཨཱབཱདྷོ, གནྠོ ཨིདྡྷཱིཏི ཏེ དསཱ’’ཏི. (ཝིསུདྡྷི. ༡.༤༡) –

ཨེཝཾ ཝུཏྟེསུ དསསུ པལིབོདྷེསུ ཡོ པལིབོདྷོ, ཡོ ཨུཔཙྪིནྡིཏབྦོ. ཨེཝཾ ཨུཔཙྪིནྣཔལིབོདྷེན –

‘‘པིཡོ གརུ བྷཱཝནཱིཡོ, ཝཏྟཱ ཙ ཝཙནཀྑམོ;

གམྦྷཱིརཉྩ ཀཐཾ ཀཏྟཱ, ནོ ཙཱཊྛཱནེ ནིཡོཛཀོ’’ཏི. (ཨ. ནི. ༧.༣༧) –

ཨེཝཾ ཝུཏྟལཀྑཎཾ ཨཱཙརིཡཾ ཨུཔསངྐམིཏྭཱ ཀམྨཊྛཱནཾ ཨུགྒཧེཏབྦཾ. ཏཾ དུཝིདྷཾ ཧོཏི སབྦཏྠཀཀམྨཊྛཱནཉྩ པཱརིཧཱརིཡཀམྨཊྛཱནཉྩ. ཏཏྠ སབྦཏྠཀཀམྨཊྛཱནཾ ནཱམ བྷིཀྑུསངྒྷཱདཱིསུ མེཏྟཱ, མརཎསྶཏི ཙ, ‘‘ཨསུབྷསཉྙཱ’’ཏིཔི ཨེཀེ. ཨེཏཾ པན ཏཡཾ སབྦཏྠ ཨཏྠཡིཏབྦཾ ཨིཙྪིཏབྦནྟི ¶ ཀཏྭཱ, ཨདྷིཔྤེཏསྶ ཙ ཡོགཱནུཡོགཀམྨསྶ པདཊྛཱནཏྟཱ ‘‘སབྦཏྠཀཀམྨཊྛཱན’’ནྟི ཝུཙྩཏི. ཨཊྛཏིཾསཱརམྨཎེསུ པན ཡཾ ཡསྶ ཙརིཏཱནུཀཱུལཾ, ཏཾ ཏསྶ ནིཙྩཾ པརིཧརིཏབྦཏྟཱ ཡཐཱཝུཏྟེནེཝ ནཡེན ‘‘པཱརིཧཱརིཡཀམྨཊྛཱན’’ནྟི ཝུཙྩཏི, ཏཏོ –

‘‘མཧཱཝཱསཾ ¶ ནཝཱཝཱསཾ, ཛརཱཝཱསཉྩ པནྠནིཾ;

སོཎྜིཾ པཎྞཉྩ པུཔྥཉྩ, ཕལཾ པཏྠིཏམེཝ ཙ.

‘‘ནགརཾ དཱརུནཱ ཁེཏྟཾ, ཝིསབྷཱགེན པཊྚནཾ;

པཙྩནྟསཱིམཱསཔྤཱཡཾ, ཡཏྠ མིཏྟོ ན ལབྦྷཏི.

‘‘ཨཊྛཱརསེཏཱནི ཋཱནཱནི, ཨིཏི ཝིཉྙཱཡ པཎྜིཏོ;

ཨཱརཀཱ པརིཝཛྫེཡྻ, མགྒཾ སཔྤཊིབྷཡཾ ཡཐཱ’’ཏི. (ཝིསུདྡྷི. ༡.༥༢) –

ཝུཏྟཨཊྛཱརསསེནཱསནདོསཝཛྫིཏཾ ‘‘ཨིདྷ, བྷིཀྑཝེ, སེནཱསནཾ ནཱཏིདཱུརཾ ཧོཏི ནཙྩཱསནྣཾ གམནཱགམནསམྤནྣཾ དིཝཱ ཨཔྤཱཀིཎྞཾ རཏྟིཾ ཨཔྤསདྡཾ ཨཔྤནིགྒྷོསཾ ཨཔྤཌཾསམཀསཝཱཏཱཏཔསརཱིསཔསམྥསྶཾ. ཏསྨིཾ ཁོ པན སེནཱསནེ ཝིཧརནྟསྶ ཨཔྤཀསིརེནེཝ ཨུཔྤཛྫནྟི ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱ. ཏསྨིཾ ཁོ པན སེནཱསནེ ཐེརཱ བྷིཀྑཱུ ཝིཧརནྟི བཧུསྶུཏཱ ཨཱགཏཱགམཱ དྷམྨཝིནཡདྷརཱ མཱཏིཀཱདྷརཱ. ཏེ ཀཱལེན ཀཱལཾ ཨུཔསངྐམིཏྭཱ པརིཔུཙྪཏི པརིཔཉྷཏི ‘ཨིདཾ བྷནྟེ ཀཐཾ, ཨིམསྶ ཀོ ཨཏྠོ’ཏི. ཏསྶ ཏེ ཨཱཡསྨནྟོ ཨཝིཝཊཉྩེཝ ཝིཝརནྟི, ཨནུཏྟཱནཱིཀཏཉྩ ཨུཏྟཱནིཾ ཀརོནྟི, ཨནེཀཝིཧིཏེསུ ཙ ཀངྑཱཋཱནཱིཡེསུ དྷམྨེསུ ཀངྑཾ པཊིཝིནོདེནྟི. ཨེཝཾ ཁོ, བྷིཀྑཝེ, སེནཱསནཾ པཉྩངྒསམནྣཱགཏཾ ཧོཏཱི’’ཏི (ཨ. ནི. ༡༠.༡༡) ཝུཏྟཔཉྩངྒསམནྣཱགཏཾ སེནཱསནཾ ཨུཔགམྨ ཏཏྠ ཝསནྟེན ‘‘དཱིགྷཱནི ཀེསལོམནཁཱནི ཚིནྡིཏབྦཱནི, ཛིཎྞཙཱིཝརེསུ ཨགྒལ༹ཨནུཝཱཏཔརིབྷཎྜདཱནཱདིནཱ དལ༹ྷཱིཀམྨཾ ཝཱ ཏནྟཙྪེདཱདཱིསུ ཏུནྣཀམྨཾ ཝཱ ཀཱཏབྦཾ, ཀིལིཊྛཱནི རཛིཏབྦཱནི, སཙེ པཏྟེ མལཾ ཧོཏི, པཏྟོ པཙིཏབྦོ, མཉྩཔཱིཋཱདཱིནི སོདྷེཏབྦཱནཱི’’ཏི ཨེཝཾ ཝུཏྟཨུཔཙྪིནྣཁུདྡཀཔལིབོདྷེན ཀཏབྷཏྟཀིཙྩེན བྷཏྟསམྨདཾ ཝིནོདེཏྭཱ རཏནཏྟཡགུཎཱནུསྶརཎེན ཙིཏྟཾ སམྤཧཾསེཏྭཱ ¶ ཨཱཙརིཡུགྒཧཏོ ཨེཀཔདམྤི ཨསམྨུཡ྄ཧནྟེན མནསི ཀཱཏབྦནྟི.

ཙཏུརཱརཀྑནིདྡེསཝཎྞནཱ ནིཊྛིཏཱ.

༤༧༡-༢. ནཱམརཱུཔནྟི ¶ ཙིཏྟཙེཏསིཀསངྑཱཏཾ ནཱམཉྩ ཨཊྛཝཱིསཏིཝིདྷཾ རཱུཔཉྩ. ‘‘ནམནལཀྑཎཾ ནཱམཾ, རུཔྤནལཀྑཎཾ རཱུཔཾ, ནཱམརཱུཔཏོ ན ཨཉྙོ ཨཏྟཱདིཀོ ཀོཙི ཨཏྠཱི’’ཏི ཨེཝཾ ཛྷཱནལཱབྷཱི ཙེ, ཛྷཱནཏོ ཝུཊྛཱཡ ཛྷཱནགཏཾ ཝཱ ཝིཔསྶནཱཡཱནིཀོ ཙེ, པཀིཎྞཀབྷཱུཏཾ ནཱམརཱུཔཾ པརིགྒཧེཏྭཱ. པཱཏིམོཀྑསཾཝརཱདི སཱིལཝིསུདྡྷི, ཙཏུརཱརཀྑཝསེན དཱིཔིཏཱ སོཔཙཱརསམཱདྷིསངྑཱཏཱ ཙིཏྟཝིསུདྡྷི ཙ ཝུཏྟཱཝ ནཱམཱཏི ཨིམིནཱ དིཊྛིཝིསུདྡྷི ཀཐིཏཱ. ཏཏོ ཏསྶ པཙྩཡཉྩ པརིགྒཧེཏྭཱཏི སམྦནྡྷོ. ཏསྶ པཙྩཡནྟི ‘‘པཊིསནྡྷིཀྑཎེ ནཱམརཱུཔདྭཡམེཝ ཨཝིཛྫཱཏཎྷཱཨུཔཱདཱནཀམྨེཧི ཨུཔྤཛྫཏི, ན ཨིསྶརཱདིཀཱརཎེནཱ’’ཏིཨཱདིནཱ ཏསྶ ཀཱརཎཾ, ཨིམིནཱ ཀངྑཱཝིཏརཎཝིསུདྡྷི དསྶིཏཱ.

ཧུཏྭཱ ཨབྷཱཝཏོ ཨནིཙྩཱཏི སབྦེཔི ནཱམརཱུཔསངྑཱརཱ ཨུཔྤཛྫིཏྭཱ ཨབྷཱཝཱཔཛྫནཏོ ཨནིཙྩཱ. ཨུདཡབྦཡཔཱིལ༹ནཱ དུཀྑཱཏི ཨུཔྤཱདནིརོདྷཝསེན པཱིལ༹ནཏོ དུཀྑཱ. ཨཝསཝཏྟིཏྟཱ ཨནཏྟཱཏི ཨཏྟནོ ཝསེ ཨཝཏྟནཏོ ཨནཏྟཱཏི ཨེཝཾ སངྑཱརེཧི སདྡྷིཾ ཏིལཀྑཎཾ ཨཱརོཔེཏྭཱ. པུནཔྤུནཾ སམྨསནྟོཏི ཡཐཱཝུཏྟནཡེན སམྨསནྟོ སམཐཡཱནིཀོ ཝིཔསྶནཱཡཱནིཀོ ཙ ཡོགཱཝཙརོ. ཨིམིནཱ མགྒཱམགྒཉཱཎདསྶནཝིསུདྡྷི, པཊིཔདཱཉཱཎདསྶནཝིསུདྡྷི ཙ དསྶིཏཱ. སངྑཱརཱནམེཝ ¶ ཧི ཨུདཡབྦཡཱདིནཱནུཔསྶནཏོ ཨུདཡབྦཡབྷངྒབྷཡཨཱདཱིནཝནིབྦིདཱམུཉྩིཏུཀམྱཏཱཔཊིསངྑཱནུཔསྶནཱས- ངྑཱརུཔེཀྑཱཉཱཎསངྑཱཏསྶ ཨཊྛཝིདྷསྶ ཉཱཎསྶ ཝསེན སིཁཱཔྤཏྟཾ ཝིཔསྶནཱཉཱཎཾ པཊིཔདཱཉཱཎདསྶནཝིསུདྡྷི ནཱམ. ཨནུཔུབྦེན སབྦསཾཡོཛནཀྑཡཾ པཱཔུཎེཡྻཱཏི ཨིམིནཱ ཉཱཎདསྶནཝིསུདྡྷི དསྶིཏཱ. སབྦསཾཡོཛནཀྑཡནྟི ཨོརམྦྷཱགིཡཱནཾ པཉྩནྣཾ སཾཡོཛནཱནཾ ཧེཊྛཱ མགྒཏྟཡེན ཁེཔིཏཏྟཱ, ཨིཏརེསཾ ཨུདྡྷམྦྷཱགིཡཱནཾ སཾཡོཛནཱནཾ ཁེཔིཏཏྟཱ ཙ སབྦེསཾ སཾཡོཛནཱནཾ ཁཡནྟེ ཛཱཏཾ ཨརཧཏྟམགྒཾ.

༤༧༣. ཡསྨཱ ¶ ཀཱརཎཱ ཡཱ སིཀྑནཱ, ཨཡཾ བྷིཀྑུཀིཙྩཾ, ཨཏོ ཏསྨཱ ཀཱརཎཱཏི ཨཏྠོ.

༤༧༤. ནིཙྩསོ ལོཀཝིཙཱརིནོཏི ནིཙྩཾ ལོཀེ ཝིཙརཏོ. མཱལུཏསྶེཝ པརིསྶམོ ན སམྦྷོཏཱིཏི ཡོཛནཱ. མཱལུཏསྶེཝཱཏི ཝཱཏསྶ ཨིཝ. ན སམྦྷོཏཱིཏི ན ཧོཏི.

༤༧༥-༦. ཏམྦཔཎྞི ཨེཝ ཏམྦཔཎྞིཡོ, ཀེཏུ ཝིཡ ཀེཏུ, ཏམྦཔཎྞིཡེ ཀེཏཱུཏི ཏཔྤུརིསོ. ཏེན རཙིཏཱ དྷམྨཝིནཡཉྙུཔསཾསིཏཱ ཨཡཾ ཁུདྡསིཀྑཱ པརིམཱཎཏོ གཱཐཱནཾ པཉྩམཏྟེཧི སཏེཧི ཨེཏྟཱཝཏཱ ནིཊྛཱནམུཔཱགཏཱཏི སམྦནྡྷོ.

ཀཱརཱཔིཏེཏིརུཙིརེ ¶ པཝརེ ཝིཧཱརེ;

མཱནཱདྷིཀཱརིཔུརིནཱ གརུནཱ གུཎེན;

ཝསྶཾ ཝསཾ དམིལ༹སོ ཝིདྷཧཾ ཨཀཱསིཾ;

ཨཏྠེསུ ¶ ཨཀྑརཔདེསུ ཝིནིཙྪཡེསུ;

པུབྦཱཔརེསུ ལིཁིཏཾ ཁལིཏཾ ཡདཏྠི;

སཱརཱམཏཱཏིསུཁིཏཱ སུཁཡནྟི ཙཉྙེ;

པརཏྠསམྤཱདནཏོ, པུཉྙེནཱདྷིགཏེནཧཾ;

པརཏྠསམྤཱདནཀོ, བྷཝེཡྻཾ ཛཱཏིཛཱཏིཡཾ.

པརམཔྤིཙྪཏཱནེཀསནྟོསོཔསམེསིནཾ;

སུཙིསལླེཁཝུཏྟཱིནཾ, སདཱརཉྙནིཝཱསིནཾ.

སཱསནུཛྫོཏཀཱརཱིནཾ, ཨཱཙེརཏྟམུཔཱགཏཾ;

ཨུདུམྦརགིརིཁྱཱཏཡཏཱིནཾ ཡཏིཔུངྒཝཾ.

མེདྷངྐར ¶ ཨིཏི ཁྱཱཏནཱམདྷེཡྻཾ ཏཔོདྷནཾ;

ཐེརཾ ཐིརདཡཱམེདྷཱནིདྷཱནཾ སཱདྷུཔཱུཛིཏཾ.

སིསྶཾ སཧཱཡམཱགམྨ, ཀལྱཱཎམིཏྟམཏྟནོ;

སོདྷེཏུཾ སཱསནཾ སཏྠུ, པརཀྐམམཀཱསི ཡོ.

སུསདྡསིདྡྷིཾ ¶ ཡོ ཡོགནིཙྪཡཾ སབྦྷི ཝཎྞིཏཾ;

ཨཀཱ སུབོདྷཱལངྐཱརཾ, ཝུཏྟོདཡམནཱཀུལཾ.

སངྒྷརཀྑིཏནཱམེན, མཧཱཐེརེན དྷཱིམཏཱ;

ནིཝཱསབྷཱུཏེནཱནེཀགུཎཱནཔྤིཙྪཏཱདིནཾ.

ཏེནེཝ རཙིཏཱ སཱདྷུ, སཱསནོདཡཀཱརིནཱ;

ཁུདྡསིཀྑཱཡ ཊཱིཀཱཔི, སུམངྒལཔྤསཱདནཱི.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ནཏྭཱ ¶ ¶ ནཱཐཾ པཝཀྑཱམི, མཱུལསིཀྑཾ སམཱསཏོ;

བྷིཀྑུནཱ ནཝཀེནཱདོ, མཱུལབྷཱསཱཡ སིཀྑིཏུཾ.

སཾ ནིམིཏྟཾ པཝེསནྟོ, བྷིཀྑུ མགྒཏྟཡེ ཙུཏོ;

པཝེསནཊྛིཏུདྡྷཱར-པཝིཊྛེ ཙེཔི སཱདིཡཾ.

ཨདིནྣཾ མཱནུསཾ བྷཎྜཾ, ཐེཡྻཱཡེཀེན ཨཱདིཡཾ;

པཉྩཝཱིསཱཝཧཱརེསུ, གརུཀཾ ཙེ ཙུཏོ བྷཝེ.

ཨཱདིཡནྟོ ¶ ཧརནྟོཝ-ཧརནྟོཔིརིཡཱཔཐཾ;

ཝིཀོཔེནྟོ ཏཐཱ ཋཱནཱ, ཙཱཝེནྟོཔི པརཱཛིཀོ.

ཏཏྠ ནཱནེཀབྷཎྜཱནཾ, པཉྩཀཱནཾ ཝསཱ པན;

ཨཝཧཱརཱ དསཉྩེཏི, ཝིཉྙཱཏབྦཱ ཝིབྷཱཝིནཱ.

སཱཧཏྠཱཎཏྟིཀོ ཙེཝ, ནིསྶགྒོ ཙཱཏྠསཱདྷཀོ;

དྷུརནིཀྑེཔནཉྩེཝ, ཨིདཾ སཱཧཏྠཔཉྩཀཾ.

པུབྦསཧཔྤཡོགོ ¶ ཙ, སཾཝིདྷཱཧརཎམྤི ཙ;

སངྐེཏཀམྨཾ ནིམིཏྟཾ, པུབྦཔྤཡོགཔཉྩཀཾ.

ཐེཡྻཱཔསཡ྄ཧཔརིཀཔྤ-པྤཊིཙྪནྣཀུསཱདིཀཱ;

ཨཝཧཱརཱ ཨིམེ པཉྩ, ཝིཉྙཱཏབྦཱ ཝིབྷཱཝིནཱ.

མནུསྶཔཱཎཾ པཱཎོཏི, ཛཱནཾ ཝདྷཀཙེཏསཱ;

ཛཱིཝིཏཱ ཡོ ཝིཡོཛེཏི, སཱསནཱ སོ པརཱཛིཏོ.

མོཙེཏུཀཱམཙིཏྟེན, ཨུཔཀྐམྨ ཝིམོཙཡཾ;

སུཀྐམཉྙཏྲ སུཔིནཱ, སམཎོ གརུཀཾ ཕུསེ.

ཀཱཡསཾསགྒརཱགེན ¶ , མནུསྶིཏྠིཾ པརཱམསཾ;

ཨིཏྠིསཉྙཱི ཨུཔཀྐམྨ, སམཎོ གརུཀཾ ཕུསེ.

དུཊྛུལླཝཱཙསྶཱདེན, མགྒཾ ཝཱརབྦྷ མེཐུནཾ;

ཨོབྷཱསནྟོ མནུསྶིཏྠིཾ, སུཎམཱནཾ གརུཾ ཕུསེ.

ཝཎྞཾ ཝཏྭཱཏྟནོཀཱམ-པཱརིཙརིཡཱཡ མེཐུནཾ;

ཨིཏྠིཾ མེཐུནརཱགེན, ཡཱཙམཱནོ གརུཾ ཕུསེ.

སནྡེསཾ པཊིགྒཎྷིཏྭཱ, པུརིསསྶིཏྠིཡཱཔི ཝཱ;

ཝཱིམཾསིཏྭཱ ཧརཾཔཙྩཱ, སམཎོ གརུཀཾ ཕུསེ.

ཙཱཝེཏུཀཱམོ ཙོདེནྟོ, ཨམཱུལནྟིམཝཏྠུནཱ;

ཙོདཱཔཡཾ ཝཱ སམཎོ, སུཎམཱནཾ གརུཾ ཕུསེ.

ལེསམཏྟཾ ཨུཔཱདཱཡ, ཨམཱུལནྟིམཝཏྠུནཱ;

ཙཱཝེཏུཀཱམོ ཙོདེནྟོ, སུཎམཱནཾ གརུཾ ཕུསེཏི.

ཝིཀཔྤནམདྷིཊྛཱན-མཀཏྭཱ ¶ ཀཱལཙཱིཝརཾ;

དསཱཧམཏིམཱཔེཏི, ཏསྶ ནིསྶགྒིཡཾ སིཡཱ.

བྷིཀྑུསམྨུཏིཡཱཉྙཏྲ, ཏིཙཱིཝརམདྷིཊྛིཏཾ;

ཨེཀཱཧམཏིམཱཔེཏི, ནིསྶགྒི སམཡཾ ཝིནཱ.

ཨཉྙཱཏིཀཱ བྷིཀྑུནིཡཱ, པུརཱཎཙཱིཝརཾ པན;

དྷོཝཱཔེཏི རཛཱཔེཏི, ཨཱཀོཊཱཔེཏི ཏཾ སིཡཱ.

ཨཉྙཱཏིཀཱ ¶ བྷིཀྑུནིཡཱ, ཧཏྠཏོ ཀིཉྩི མཱུལཀཾ;

ཨདཏྭཱ ཙཱིཝརཱདཱནེ, ནིསྶགྒིཡམུདཱིརིཏཾ.

ཨཔྤཝཱརིཏམཉྙཱཏིཾ, ཝིཉྙཱཔེནྟསྶ ཙཱིཝརཾ;

ཨཉྙཏྲ སམཡཱ ཏསྶ, ནིསྶགྒིཡམུདཱིརིཏཾ.

རཛཏཾ ཛཱཏརཱུཔཾ ཝཱ, མཱསཀཾ ཝཱ ཀཧཱཔཎཾ;

གཎྷེཡྻ ཝཱ གཎྷཱཔེཡྻ, ནིསྶགྒི སཱདིཡེཡྻ ཝཱ.

པརིཝཏྟེཡྻ ནིསྶགྒི, རཛཏཱདི ཙཏུབྦིདྷཾ;

ཀཔྤིཡཾ ཀཔྤིཡེནཱཔི, ཋཔེཏྭཱ སཧདྷམྨིཀེ.

ཝིཀཔྤནམདྷིཊྛཱན-མཀཏྭཱན པམཱཎིཀཾ;

དསཱཧམཏིམཱཔེཏི, པཏྟཾ ནིསྶགྒིཡཾ སིཡཱ.

པཉྩབནྡྷནཏོ ཨཱུན-པཏྟེ སཏི པརཾ པན;

ཝིཉྙཱཔེཏི ནཝཾ པཏྟཾ, ཏསྶ ནིསྶགྒིཡཾ སིཡཱ.

པཊིགྒཧེཏྭཱ བྷུཉྫནྟོ, སཔྤིཏེལཱདིཀཾ པན;

སཏྟཱཧམཏིམཱཔེཏི, ཏསྶ ནིསྶགྒིཡཾ སིཡཱ.

བྷིཀྑུསྶ ཙཱིཝརཾ དཏྭཱ, ཨཙྪིནྡནྟསྶ ཏཾ པུན;

སཀསཉྙཱཡ ནིསྶགྒི, ཨཙྪིནྡཱཔཡཏོཔི ཝཱ.

ཨཔྤཝཱརིཏམཉྙཱཏིཾ ¶ , སུཏྟཾ ཡཱཙིཡ ཙཱིཝརཾ;

ཝཱཡཱཔེནྟསྶ ནིསྶགྒི, ཝིནཱ ཉཱཏིཔྤཝཱརིཏེ.

ཛཱནནྟོ ¶ བྷིཀྑུ སངྒྷསྶ, ལཱབྷཾ པརིཎཏཾ པན;

ཨཏྟནོ པརིཎཱམེཏི, ཏསྶ ནིསྶགྒིཡཾ སིཡཱཏི.

སམྤཛཱནམུསཱཝཱདེ, པཱཙིཏྟིཡམུདཱིརིཏཾ;

བྷིཀྑུཉྩ ཨོམསནྟསྶ, པེསུཉྙཧརཎེཔི ཙ.

ཋཔེཏྭཱ བྷིཀྑུནིཾ བྷིཀྑུཾ, ཨཉྙེན པིཊཀཏྟཡཾ;

པདསོདྷམྨཾ བྷཎནྟསྶ, པཱཙིཏྟིཡམུདཱིརིཏཾ.

ཨནུཔསམྤནྣེནེཝ, སཡིཏྭཱན ཏིརཏྟིཡཾ;

པཱཙིཏྟི སཧསེཡྻཱཡ, ཙཏུཏྠཏྠངྒཏེ པུན.

ཨིཏྠིཡཱ ཨེཀརཏྟམྤི, སེཡྻཾ ཀཔྤཡཏོཔི ཝཱ;

དེསེནྟསྶ ཝིནཱ ཝིཉྙུཾ, དྷམྨཉྩ ཚཔྤདུཏྟརིཾ.

དུཊྛུལླཾ བྷིཀྑུནོ ཝཛྫཾ, བྷིཀྑུསམྨུཏིཡཱ ཝིནཱ;

ཨབྷིཀྑུནོ ཝདནྟསྶ, པཱཙིཏྟིཡམུདཱིརིཏཾ.

ཁཎེཡྻ ཝཱ ཁཎཱཔེཡྻ, པཐཝིཉྩ ཨཀཔྤིཡཾ;

བྷཱུཏགཱམཾ ཝིཀོཔེཡྻ, ཏསྶ པཱཙིཏྟིཡཾ སིཡཱ.

ཨཛ྄ཛྷོཀཱསེ ཏུ མཉྩཱདིཾ, ཀཏྭཱ སནྠརཎཱདིཀཾ;

སངྒྷིཀཾ ཡཱཏི པཱཙིཏྟི, ཨཀཏྭཱཔུཙྪནཱདིཀཾ.

སངྒྷིཀཱཝསཐེ སེཡྻཾ, ཀཏྭཱ སནྠརཎཱདིཀཾ;

ཨཀཏྭཱཔུཙྪནཱདིཾ ཡོ, ཡཱཏི པཱཙིཏྟི ཏསྶཔི.

ཛཱནཾ སཔྤཱཎཀཾ ཏོཡཾ, པཱཙིཏྟི པརིབྷུཉྫཏོ;

ཨཉྙཱཏིཀཱ བྷིཀྑུནིཡཱ, ཋཔེཏྭཱ པཱརིཝཏྟཀཾ.

ཙཱིཝརཾ ¶ ¶ དེཏི པཱཙིཏྟི, ཙཱིཝརཾ སིབྦཏོཔི ཙ;

ཨཏིརིཏྟཾ ཨཀཱརེཏྭཱ, པཝཱརེཏྭཱན བྷུཉྫཏོ.

བྷིཀྑུཾ ཨཱསཱདནཱཔེཀྑོ, པཝཱརེཏི པཝཱརིཏཾ;

ཨནཏིརིཏྟེན བྷུཏྟེ ཏུ, པཱཙིཏྟིཡམུདཱིརིཏཾ.

སནྣིདྷིབྷོཛནཾ བྷུཉྫེ, ཝིཀཱལེ ཡཱཝཀཱལིཀཾ;

བྷུཉྫཏོ ཝཱཔི པཱཙིཏྟི, ཨགིལཱནོ པཎཱིཏཀཾ.

ཝིཉྙཱཔེཏྭཱན བྷུཉྫེཡྻ, སཔྤིབྷཏྟཱདིཀམྤི ཙ;

ཨཔྤཊིགྒཧིཏཾ བྷུཉྫེ, དནྟཀཊྛོདཀཾ ཝིནཱ.

ཏིཏྠིཡསྶ དདེ ཀིཉྩི, བྷུཉྫིཏབྦཾ སཧཏྠཏོ;

ནིསཛྫཾ ཝཱརཧོ ཀཔྤེ, མཱཏུགཱམེན ཙེཀཏོ.

སུརཱམེརཡཔཱནེཔི, པཱཙིཏྟིཡམུདཱིརིཏཾ;

ཨངྒུལིཔཏོདཀེ ཙཱཔི, ཧསདྷམྨེཔི ཙོདཀེ.

ཨནཱདརེཔི པཱཙིཏྟི, བྷིཀྑུཾ བྷཱིསཡཏོཔི ཝཱ;

བྷཡཱནཀཾ ཀཐཾ ཀཏྭཱ, དསྶེཏྭཱ ཝཱ བྷཡཱནཀཾ.

ཋཔེཏྭཱ པཙྩཡཾ ཀིཉྩི, ཨགིལཱནོ ཛལེཡྻ ཝཱ;

ཛོཏིཾ ཛལཱཔཡེཡྻཱཔི, ཏསྶ པཱཙིཏྟིཡཾ སིཡཱ.

ཀཔྤབིནྡུམནཱདཱཡ, ནཝཙཱིཝརབྷོགིནོ;

ཧསཱཔེཀྑསྶ པཱཙིཏྟི, བྷིཀྑུནོ ཙཱིཝརཱདིཀཾ.

ཨཔནེཏྭཱ ¶ ནིདྷེནྟསྶ, ནིདྷཱཔེནྟསྶ ཝཱ པན;

ཛཱནཾ པཱཎཾ མཱརེནྟསྶ, ཏིརཙྪཱནགཏམྤི ཙ.

ཚཱདེཏུཀཱམོ ཚཱདེཏི, དུཊྛུལླཾ བྷིཀྑུནོཔི ཙ;

གཱམནྟརགཏསྶཱཔི, སཾཝིདྷཱཡིཏྠིཡཱ སཧ.

བྷིཀྑུཾ ¶ པཧརཏོ ཝཱཔི, ཏལསཏྟིཀམུགྒིརེ;

ཙོདེཏི ཝཱ ཙོདཱཔེཏི, གརུཀཱམཱུལཀེནཔི.

ཀུཀྐུཙྩུཔྤཱདནེ ཙཱཔི, བྷཎྜནཏྠཱཡུཔསྶུཏིཾ;

སོཏུཾ བྷཎྜནཛཱཏཱནཾ, ཡཱཏི པཱཙིཏྟིཡཾ སིཡཱ.

སངྒྷིཀཾ གརུབྷཎྜཾ ཡོ, དེཏི ཨཉྙསྶ ཨིསྶརོ;

ཐུལླཙྩཡཾ ཡཐཱཝཏྠུཾ, ཐེཡྻཱ པཱརཱཛིཀཱདིཔི.

ཀུསཱདིམཡཙཱིརཱནི, ཀམྦལཾ ཀེསཝཱལཛཾ;

སམཡཾ ཝིནཱ དྷཱརཡཏོ, ལཱུཀཔཀྑཱཛིནཀྑིཔཾ.

སཏྠཀམྨེ ཝཏྠིཀམྨེ, སཾ ནིམིཏྟཉྩ ཚིནྡཏོ;

ཐུལླཙྩཡཾ མནུསྶཱནཾ, མཾསཱདིབྷོཛནེཔི ཝཱ.

ཀདལེརཀཀྐདུསྶཱནི ¶ , པོཏྠཀཾ སབྦནཱིལཀཾ;

སབྦཔཱིཏཱདིཀཉྩཱཔི, དྷཱརཡནྟསྶ དུཀྐཊཾ.

ཧཏྠིསྶུརགསོཎཱནཾ, སཱིཧབྱགྒྷཙྪདཱིཔིནཾ;

ཏརཙྪསྶ ཙ མཾསཱདིཾ, ཨུདྡིསྶཀཏཀམྤི ཙ.

ཨནཱཔུཙྪིཏམཾསཉྩ, བྷུཉྫཏོ དུཀྐཊཾ སིཡཱ;

ཡཱཏཱནུཔུབྦཾ ཧིཏྭཱན, དཀཏིཏྠཱདིཀཾ ཝཛེ.

སཧསཱ ¶ ཝུབྦྷཛིཏྭཱན, པཝིསེ ནིཀྑམེཡྻ ཝཱ;

ཝཙྩཔསྶཱཝཀུཊིཀཾ, ཝིནཱ ཨུཀྐཱསིཀཾ ཝིསེ.

ནིཏྠུནནྟོ ཀརེ ཝཙྩཾ, དནྟཀཊྛཉྩ ཁཱདཡཾ;

ཝཙྩཔསྶཱཝདོཎཱིནཾ, བཧི ཝཙྩཱདིཀཾ ཀརེ.

ཁརེན ཙཱཝལེཁེཡྻ, ཀཊྛཾ པཱཏེཡྻ ཀཱུཔཀེ;

ཨཱུཧཏཉྩ ན དྷོཝེཡྻ, ཨུཀླཱཔཉྩ ན སོདྷཡེ.

དཀཀིཙྩཾ ཀརོནྟསྶ, ཀཏྭཱ ‘‘ཙཔུཙཔཱུ’’ཏི ཙ;

ཨནཛ྄ཛྷིཊྛོཝ ཐེརེན, པཱཏིམོཀྑམྤི ཨུདྡིསེ.

ཨནཱཔུཙྪཱཡ པཉྷསྶ, ཀཐནེ ཝིསྶཛྫནེཔི ཙ;

སཛ྄ཛྷཱཡཀརཎེ དཱིཔ-ཛཱལནེ ཝིཛ྄ཛྷཱཔནེཔི ཙ.

ཝཱཏཔཱནཀཝཱཊཱནི, ཝིཝརེཡྻ ཐཀེཡྻ ཝཱ;

ཝནྡནཱདིཾ ཀརེ ནགྒོ, གམནཾ བྷོཛནཱདིཀཾ.

པརིཀམྨཾ ¶ ཀརེ ཀཱརེ, ཏིཔཊིཙྪནྣཀཾ ཝིནཱ;

ཀཱཡཾ ནཧཱཡཾ གྷཾསེཡྻ, ཀུཊྚེ ཐམྦྷེ ཏརུམྷི ཝཱ.

ཀུརུཝིནྡཀསུཏྟེན, ཨཉྙམཉྙསྶ ཀཱཡཏོ;

ཨགིལཱནོ བཧཱརཱམེ, ཙརེཡྻ སཨུཔཱཧནོ.

ཨུཔཱཧནཾ ཡོ དྷཱརེཏི, སབྦནཱིལཱདིཀམྤི ཙ;

ནིམིཏྟཾ ཨིཏྠིཡཱ རཏྟོ, མུཁཾ ཝཱ བྷིཀྑདཱཡིཡཱ.

ཨུཛ྄ཛྷཱནསཉྙཱི ཨཉྙསྶ, པཏྟཾ ཝཱ ཨཏྟནོ མུཁཾ;

ཨཱདཱསཱདིམྷི པསྶེཡྻ, ཨུཙྩཱསནམཧཱསནེ.

ནིསཛྫཱདིཾ ཀརོནྟསྶ, དུཀྐཊཾ ཝནྡནེཔི ཙ;

ཨུཀྑིཏྟཱནུཔསམྤནྣ-ནཱནཱསཾཝཱསཀཱདིནཾ.

ཨེཀཏོ པཎྜཀིཏྠཱིཧི, ཨུབྷཏོབྱཉྫནེན ཝཱ;

དཱིགྷཱསནེ ནིསཱིདེཡྻ, ཨདཱིགྷེ ཨཱསནེ པན.

ཨསམཱནཱསནིཀེན, མཉྩཔཱིཋེ སཡེཡྻ ཝཱ;

ཀུལསངྒཧཏྠཾ དདཏོ, ཕལཔུཔྥཱདིཀམྤི ཙ.

གནྠིམཱདིཾ ¶ ཀརེ ཀཱརེ, ཛིནཝཱརིཏཔཙྩཡེ;

པརིབྷུཉྫེཡྻ ཨབྱཏྟོ, ཨནིསྶཱཡ ཝསེཡྻ ཝཱ.

ཨནུཉྙཱཏེཧི ཨཉྙསྶ, བྷེསཛྫཾ ཝཱ ཀརེ ཝདེ;

ཀརེ སཱཔཏྟིཀོ བྷིཀྑུ, ཨུཔོསཐཔྤཝཱརཎཾ.

དྭཱརབནྡྷཱདིཀེ ¶ ཋཱནེ, པརིཝཏྟཀཝཱཊཀཾ;

ཨཔིདྷཱཡ ཝིནཱབྷོགཾ, ནིཡོགཾ ཝཱ སཡེ དིཝཱ.

དྷཉྙིཏྠིརཱུཔརཏནཾ, ཨཱཝུདྷིཏྠིཔསཱདྷནཾ;

ཏཱུརིཡབྷཎྜཾ ཕལཾ རུཀྑེ, པུབྦཎྞཱདིཉྩ ཨཱམསེ.

སསིཏྠོདཀཏེལེཧི, ཕཎཧཏྠཕཎེཧི ཝཱ;

ཀེསམོསཎྛནེཀསྨིཾ, བྷཱཛནེ བྷོཛནེཔི ཙ.

ཨེཀཏྠརཎཔཱཝུརཎཱ, སཡེཡྻུཾ དྭེཀམཉྩཀེ;

དནྟཀཊྛཉྩ ཁཱདེཡྻ, ཨདྷིཀཱུནཾ པམཱཎཏོ.

ཡོཛེཏི ཝཱ ཡོཛཱཔེཏི, ནཙྩཾ གཱིཏཉྩ ཝཱདིཏཾ;

དསྶནཾ སཝནཾ ཏེསཾ, ཀརོནྟསྶ ཙ དུཀྐཊཾ.

ཝཱིཧཱདིརོཔིམེ ཙཱཔི, བཧིཔཱཀཱརཀུཊྚཀེ;

ཝཙྩཱདིཚཌྜནཱདིམྷི, དཱིགྷཀེསཱདིདྷཱརཎེ.

ནཁམཊྛཀརཎཱདིམྷི, སམྦཱདྷེ ལོམཧཱརཎེ;

པརིཀམྨཀཏཾ བྷཱུམིཾ, ཨཀྐམེ སཨུཔཱཧནོ.

ཨདྷོཏཨལླཔཱདེཧི, སངྒྷིཀཾ མཉྩཔཱིཋཀཾ;

པརིཀམྨཀཏཾ བྷིཏྟིཾ, ཨཱམསནྟསྶ དུཀྐཊཾ.

སངྒྷཱཊིཡཱཔི པལླཏྠེ, དུཔྤརིབྷུཉྫེཡྻ ཙཱིཝརཾ;

ཨཀཱཡབནྡྷནོ གཱམཾ, ཝཛེ ཀཏྭཱན ཝཙྩཀཾ.

ནཱཙམེཡྻ ¶ དཀེ སནྟེ, སམཱདེཡྻ ཨཀཔྤིཡེ;

དེསནཱརོཙནཱདིམྷི, སབྷཱགཱཔཏྟིཡཱཔི ཙ.

ན ¶ ཝསེ ཝསྶཾ ཝིསཾཝཱདེ, སུདྡྷཙིཏྟེ པཊིསྶཝཾ;

ཝསྶཾ ཝསིཏྭཱ གམནེ, ཨནནུཉྙཱཏཀིཙྩཏོ.

ཝིནཱཔདཾ ཏརུསྶུདྡྷཾ, པོརིསམྷཱབྷིརཱུཧཎེ;

ཨཔརིསྶཱཝནོདྡྷཱནཾ, ཝཛེ ཏཾ ཡཱཙཏོ ན དེ.

ཨཏྟནོ གྷཱཏནེ ཨིཏྠི-རཱུཔཱདིཾ ཀཱརཡེཡྻ ཝཱ;

ཧིཏྭཱ མཱལཱདིཀཾ ཙིཏྟཾ, ཛཱཏཀཱདིཾ སཡཾ ཀརེ.

བྷུཉྫནྟམུཊྛཔེ ཏསྶ, སཱལཱདཱིསུ ནིསཱིདཏོ;

ཝུཌྜྷཱནཾ པན ཨོཀཱསཾ, ཨདཏྭཱ ཝཱཔི དུཀྐཊཾ.

ཡཱནཱདིམབྷིརཱུཧེཡྻ, ཀལླཀོ རཏནཏྟཡཾ;

ཀཱཡཱདིཾ ཝིཝརིཏྭཱན, བྷིཀྑུནཱིནཾ ན དསྶཡེ;

ཝཱཙེ ལོཀཱཡཏཾ པལིཏཾ, གཎྷེཡྻ གཎྷཱཔེཡྻ ཝཱ.

ཡཏྠ ཀཏྠཙི པེལཱ༹ཡཾ, བྷུཉྫཏོ པཏྟཧཏྠཀོ;

ཝཱཏཔཱནཀཝཱཊཾ ཝཱ, པཎཱམེ སོདཀམྤི ཙ.

ཨུཎྷེཡྻ པཊིསཱམེཡྻ, ཨཏིཨུཎྷེཡྻ ཝོདཀཾ;

ཋཔེཡྻ བྷཱུམིཡཾ པཏྟཾ, ཨངྐེ ཝཱ མཉྩཔཱིཋཀེ.

མིཌྜྷནྟེ ¶ པརིབྷཎྜནྟེ, པཱདེ ཚཏྟེ ཋཔེཏི ཝཱ;

ཙལཀཱདིཾ ཋཔེ པཏྟཾ, པཏྟེ ཝཱ ཧཏྠདྷོཝནེ.

པཏྟེན ནཱིཧརནྟསྶ, ཨུཙྪིཊྛམུདཀམྤི ཙ;

ཨཀཔྤིཡམྤི པཏྟཾ ཝཱ, པརིབྷུཉྫེཡྻ དུཀྐཊཾ.

ཝདེ ‘‘ཛཱིཝཱ’’ཏི ཁིཔིཏེ, ན སིཀྑཏི ཨནཱདརོ;

པརིམཎྜལཀཱདིམྷི, སེཁིཡེ དུཀྐཊཾ སིཡཱ.

ཨུཔཛ྄ཛྷཱཙརིཡཝཏྟཉྩ, གམིཀཱགནྟུཀམྤི ཙ;

སེནཱསནཱདིཝཏྟཉྩ, ཀཱཏབྦཾ པིཡསཱིལིནཱ.

ཧཏྠཔཱསེ ཋིཏོ ཀིཉྩི, གཧིཏབྦཾ དདེ ཏིདྷཱ;

གཧེཏུཀཱམོ གཎྷེཡྻ, དྭིདྷཱཡཾ སམྤཊིགྒཧོ.

སངྒྷཱཊིམུཏྟརཱསངྒཾ, ཏཐཱ ཨནྟརཝཱསཀཾ;

‘‘ཨེཏཾ ཨིམཾ ཨདྷིཊྛཱམི’’, ཏཐཱ ‘‘པཙྩུདྡྷརཱམི’’ཏི.

‘‘ཨིམཾ ཨིམཱནི ཨེཏཱནི, ཨེཏམྤི ཙཱིཝར’’ནྟི ཝཱ;

‘‘པརིཀྑཱརཙོལཱ༹ནཱི’’ཏི, ཏཐཱ ‘‘པཙྩུདྡྷརཱམི’’ཏི.

‘‘ཨེཏཾ ¶ ཨིམཾ ཨདྷིཊྛཱམི, པཏྟཾ པཙྩུདྡྷརཱམི’’ཏི;

ཨེཝཾ པཙྩུདྡྷརེདྷིཊྛེ, ཙཱིཝརཱདིཾ ཡཐཱཝིདྷི.

སཉྩརིཏྟཾ ཝིནཱ སེསཱ, སཙིཏྟཱ གརུཀནྟིམཱ;

ཨཙྪིནྣཾ པརིཎཏཾ ཧིཏྭཱ, ནིསྶགྒིཡམཙིཏྟཀཾ.

པདསོདྷམྨཾ དུཝེ སེཡྻཱ, ཨིཏྠིཡཱ དྷམྨདེསནཱ;

དུཝེ སེནཱསནཱནཱིཔི, སིབྦནཾ ཙཱིཝརསྶཔི.

པཝཱརིཏཾ སུརཱཔཱནཾ, པཉྩསནྣིདྷིཨཱདིཀཾ;

ཛོཏིནུཛྫཱལནཉྩེཝ, ཀཔྤབིནྡུམནཱདིཀཾ;

གཱམཔྤཝེསནནྟེཏེ, པཱཙིཏྟཱིསུ ཨཙིཏྟཀཱ.

པཀིཎྞཀེསུ ཨུདྡིསྶ-ཀཏཾ ཧིཏྭཱཉྙམཾསཀཾ;

ཨེཀཏྠརཎཔཱཝུརཎཾ, ཨེཀམཉྩེ ཏུཝཊྚནཾ;

ཨེཀཏོ བྷུཉྫནཉྩཱཔི, ནཙྩགཱིཏཱདིསཏྟཔི.

ཨཀཱཡབནྡྷནཉྩཱཔི ¶ , པཏྟཧཏྠཀཝཱཊཀཾ;

ཨཙིཏྟཀམིདཾ སབྦཾ, སེསམེཏྠ སཙིཏྟཀཾ.

ཝཱིཏིཀྐམནཙིཏྟེན, སཙིཏྟཀམཙིཏྟཀཾ;

པཉྙཏྟིཛཱནནེནཱཔི, ཝདནྟཱཙརིཡཱ ཏཐཱ.

པུབྦཀརཎཱདིཀཾ ཀཏྭཱ, ཨུཔོསཐཔྤཝཱརཎཾ;

ནཝདྷཱ དཱིཔིཏཾ སབྦཾ, ཀཱཏབྦཾ པིཡསཱིལིནཱ.

སམྨཛྫནཱི པདཱིཔོ ཙ, ཨུདཀཾ ཨཱསནེན ཙ;

ཨུཔོསཐསྶ ཨེཏཱནི, པུབྦཀརཎནྟི ཝུཙྩཏི.

ཚནྡཔཱརིསུདྡྷིཨུཏུཀྑཱནཾ ¶ , བྷིཀྑུགཎནཱ ཙ ཨོཝཱདོ;

ཨུཔོསཐསྶ ཨེཏཱནི, པུབྦཀིཙྩནྟི ཝུཙྩཏི.

ཨུཔོསཐོ ཡཱཝཏིཀཱ ཙ བྷིཀྑཱུ ཀམྨཔྤཏྟཱ,

ཝཛྫནཱིཡཱ ཙ པུགྒལཱ ཏསྨིཾ ན ཧོནྟི,

༡༡༡. པུབྦཀརཎཔུབྦཀིཙྩཱནི སམཱཔེཏྭཱ དེསིཏཱཔཏྟིཀསྶ སམགྒསྶ བྷིཀྑུསངྒྷསྶ ཨནུམཏིཡཱ པཱཏིམོཀྑཾ ཨུདྡིསིཏུཾ ཨཱརཱདྷནཾ ཀརོམ.

པཱརིསུདྡྷིཨདྷིཊྛཱན-སུཏྟུདྡེསཝསཱ ཏིདྷཱ;

གཎཔུགྒལསངྒྷཱ ཙ, ཏཾ ཀརེཡྻུཾ ཡཐཱཀྐམཾ.

ཙཱཏུདྡསོ པནྣརསོ, སཱམགྒཱི དིནཏོ ཏིདྷཱ;

དིནཔུགྒལཀཏྟབྦཱ-ཀཱརཏོ ཏེ ནཝེརིཏཱ.

ཏཡོ ཏཡོཏི ཀཏྭཱན, དིནཔུགྒལབྷེདཏོ;

ཏེཝཱཙཱིདྭེཀཝཱཙཱིཏི, ནཝ ཝུཏྟཱ པཝཱརཎཱ.

ཀཏྟིཀནྟིམཔཀྑམྷཱ, ཧེམཾ ཕགྒུནཔུཎྞམཱ;

ཏསྶ ཨནྟིམཔཀྑམྷཱ, གིམྷཾ ཨཱསཱལ༹ྷིཔུཎྞམཱ;

ཝསྶཀཱལཾ ཏཏོ སེསཾ, ཙཏུཝཱིསཏུཔོསཐཱ.

ཙཱཏུདྡསཱ ¶ ཚ ཨེཏེསུ, པཀྑཱ ཏཏིཡསཏྟམཱ;

ཉེཡྻཱ པནྣརསཱ སེསཱ, ཨཊྛཱརས ཨུཔོསཐཱ.

༡༡༧. ‘‘ཚནྡཾ དམྨི, ཚནྡཾ མེ ཧར, ཚནྡཾ མེ ཨཱརོཙེཧཱི’’ཏི ཚནྡཾ དཱཏབྦཾ.

༡༡༨. ‘‘པཱརིསུདྡྷིཾ ¶ དམྨི, པཱརིསུདྡྷིཾ མེ ཧར, པཱརིསུདྡྷིཾ མེ ཨཱརོཙེཧཱི’’ཏི པཱརིསུདྡྷི དཱཏབྦཱ.

༡༡༩. ‘‘པཝཱརཎཾ དམྨི, པཝཱརཎཾ མེ ཧར, པཝཱརཎཾ མེ ཨཱརོཙེཧི, མམཏྠཱཡ པཝཱརེཧཱི’’ཏི པཝཱརཎཱ དཱཏབྦཱ.

༡༢༠. ཨཱཔཏྟིདེསཀེན ‘‘ཨཧཾ, བྷནྟེ, སམྦཧུལཱ ནཱནཱཝཏྠུཀཱ ཨཱཔཏྟིཡོ ཨཱཔཛྫིཾ, ཏཱ ཏུམྷམཱུལེ པཊིདེསེམཱི’’ཏི ཝཏྭཱ པཊིགྒཎྷནྟེན ‘‘པསྶསི, ཨཱཝུསོ, ཏཱ ཨཱཔཏྟིཡོ’’ཏི ཝུཏྟེ ‘‘ཨཱམ, བྷནྟེ, པསྶཱམཱི’’ཏི ཝཏྭཱ པུན པཊིགྒཎྷནྟེན ‘‘ཨཱཡཏིཾ, ཨཱཝུསོ, སཾཝརེཡྻཱསཱི’’ཏི ཝུཏྟེ ‘‘སཱདྷུ, སུཊྛུ, བྷནྟེ སཾཝརིསྶཱམཱི’’ཏི ཏིཀྑཏྟུཾ ཝཏྭཱ དེསེཏབྦཾ.

༡༢༡. ཝེམཏིཾ ཨཱརོཙེནྟེན ‘‘ཨཧཾ, བྷནྟེ, སམྦཧུལཱསུ ནཱནཱཝཏྠུཀཱསུ ཨཱཔཏྟཱིསུ ཝེམཏིཀོ, ཡདཱ ནིབྦེམཏིཀོ བྷཝིསྶཱམི, ཏདཱ ཏཱ ཨཱཔཏྟིཡོ པཊིཀརིསྶཱམཱི’’ཏི ཏིཀྑཏྟུཾ ཝཏྭཱ ཨཱརོཙེཏབྦཾ.

༡༢༢. ‘‘ཨཛྫ མེ ཨུཔོསཐོ ‘པནྣརསོ, ཙཱཏུདྡསོ’ཏི ཝཱ ཨདྷིཊྛཱམཱི’’ཏི ཏིཀྑཏྟུཾ ཝཏྭཱ པུགྒལེན ཨདྷིཊྛཱནུཔོསཐོ ཀཱཏབྦོ.

༡༢༣. དྭཱིསུ པན ཐེརེན ‘‘པརིསུདྡྷོ ཨཧཾ ཨཱཝུསོ, ‘པརིསུདྡྷོ’ཏི མཾ དྷཱརེཧཱི’’ཏི ཏིཀྑཏྟུཾ ཝཏྟབྦཾ. ནཝཀེནཔི ཏཐེཝ ཝཏྟབྦཾ. ‘‘བྷནྟེ, དྷཱརེཐཱ’’ཏི ཝཙནཾ ཝིསེསོ.

༡༢༤. ཏཱིསུ ¶ པན ‘‘སུཎནྟུ མེ ཨཱཡསྨནྟཱ, ཨཛྫུཔོསཐོ པནྣརསོ, ཡདཱཡསྨནྟཱནཾ པཏྟཀལླཾ, མཡཾ ཨཉྙམཉྙཾ པཱརིསུདྡྷིཨུཔོསཐཾ ཀརེཡྻཱམཱ’’ཏི ཉཏྟིཾ ཋཔེཏྭཱ པཊིཔཱཊིཡཱ ཝུཏྟནཡེན པཱརིསུདྡྷིཨུཔོསཐོ ཀཱཏབྦོ.

༡༢༥. ‘‘ཨཛྫ མེ པཝཱརཎཱ ‘ཙཱཏུདྡསཱི, པནྣརསཱི’ཏི ཝཱ ཨདྷིཊྛཱམཱི’’ཏི ཏིཀྑཏྟུཾ ཝཏྭཱ ཨེཀེན པཝཱརེཏབྦཾ.

༡༢༦. དྭཱིསུ ¶ པན ཐེརེན ‘‘ཨཧཾ, ཨཱཝུསོ, ཨཱཡསྨནྟཾ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདཏུ མཾ ཨཱཡསྨཱ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམཱི’’ཏི ཏིཀྑཏྟུཾ ཝཏྭཱ པཝཱརེཏབྦཾ. ནཝཀེནཱཔི ཏཐེཝ ཝཏྟབྦཾ. ‘‘བྷནྟེ’’ཏི ཝཙནཾ ཝིསེསོ.

༡༢༧. ཏཱིསུ ཝཱ ཙཏཱུསུ ཝཱ པན ‘‘སུཎནྟུ མེ ཨཱཡསྨནྟཱ, ཨཛྫ པཝཱརཎཱ པནྣརསཱི, ཡདཱཡསྨནྟཱནཾ པཏྟཀལླཾ, མཡཾ ཨཉྙམཉྙཾ པཝཱརེཡྻཱམཱ’’ཏི ཉཏྟིཾ ཋཔེཏྭཱ ཐེརེན ‘‘ཨཧཾ, ཨཱཝུསོ, ཨཱཡསྨནྟེ པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟཱ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམཱི’’ཏི ཏིཀྑཏྟུཾ ཝཏྭཱ པཝཱརེཏབྦཾ. ནཝཀེཧིཔི ཏཐེཝ པཊིཔཱཊིཡཱ པཝཱརེཏབྦཾ. ‘‘བྷནྟེ’’ཏིཝཙནཾ ཝིསེསོ.

༡༢༨. ཙཏཱུཧི ཨདྷིཀེསུ པན ‘‘སུཎཱཏུ མེ ཨཱཝུསོ སངྒྷོ, ཨཛྫ པཝཱརཎཱ པནྣརསཱི, ཡདི སངྒྷསྶ པཏྟཀལླཾ, སངྒྷོ པཝཱརེཡྻཱ’’ཏི ཉཏྟིཾ ཋཔེཏྭཱ ཝུཌྜྷཏརེན ‘‘སངྒྷཾ, ཨཱཝུསོ, པཝཱརེམི དིཊྛེན ཝཱ སུཏེན ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟོ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམཱི’’ཏི ཏིཀྑཏྟུཾ ཝཏྭཱ པཝཱརེཏབྦཾ. ནཝཀེཧིཔི ཏཐེཝ པཊིཔཱཊིཡཱ ‘‘སངྒྷཾ, བྷནྟེ, པཝཱརེམི དིཊྛེན ཝཱ སུཏེན ¶ ཝཱ པརིསངྐཱཡ ཝཱ, ཝདནྟུ མཾ ཨཱཡསྨནྟོ ཨནུཀམྤཾ ཨུཔཱདཱཡ, པསྶནྟོ པཊིཀརིསྶཱམཱི’’ཏི ཏིཀྑཏྟུཾ ཝཏྭཱ པཝཱརེཏབྦཾ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཨུཏྟམཾ ཨུཏྟམཏརཾ, ཝནྡིཏྭཱ ཝནྡནཱརཧཾ.

ཙརཎེ བྲཧྨཙཱརཱིནཾ, ཨཱཙརིཡཱནཾ སིརཾ མམ;

ཋཔེཏྭཱན ཀརིསྶཱམི, མཱུལསིཀྑཏྠཝཎྞནཾ.

ཏཏྠཱདོ ཏཱཝ སབྦསཀྐཏསྶ སབྦསཏྟུཏྟམསྶ སཏྠུནོ པཎཱམཾ དསྶེནྟོ ཨཱཧ ‘‘ནཏྭཱ ནཱཐ’’ནྟྱཱདི. ནཱཐཾ ཙཏཱུཧི ནཱཐངྒེཧི སམནྣཱགཏཾ བྷགཝནྟཾ ནཏྭཱ ཝནྡིཏྭཱ ཨཱདོ ཨཱདིམྷི ཨུཔསམྤནྣཏོ པཊྛཱཡ ནཝཀེན བྷིཀྑུནཱ ཨདྷུནཱ པབྦཛིཏེན ཨུཔསམྤནྣེན མཱུལབྷཱསཱཡ མཱགདྷབྷཱསཱཡ སིཀྑིཏུཾ སམཱསཏོ སངྑེཔེན མཱུལསིཀྑཾ ཨཧཾ པཝཀྑཱམཱིཏི པིཎྜཏྠོ.

ཨཡཾ ¶ པན ཨཝཡཝཏྠོ – ནཏྭཱཏི ཏནྣིནྣཏཔྤོཎཏཔྤབྦྷཱརོ ཧུཏྭཱ ཀཱཡཝཙཱིམནོདྭཱརེཧི ཝནྡིཏྭཱཏི ཨཏྠོ. ནཱཐཏཱིཏི ནཱཐོ, ཝེནེཡྻཱནཾ ཧིཏསུཁཾ མེཏྟཱཡནཝསེན ཨཱསཱིསཏི པཏྠེཏཱིཏི ཨཏྠོ, ཨཐ ཝཱ ནཱཐཏི ཝེནེཡྻགཏེ ¶ ཀིལེསེ ཨུཔཏཱཔེཏཱིཏི ཨཏྠོ, ནཱཐཏི ཝཱ ཡཱཙཏཱིཏི ཨཏྠོ. བྷགཝཱ ཧི ‘‘སཱདྷུ, བྷིཀྑཝེ, བྷིཀྑུ ཀཱལེན ཀཱལཾ ཨཏྟསམྤཏྟིཾ པཙྩཝེཀྑེཡྻཱ’’ཏིཨཱདིནཱ (ཨ. ནི. ༨.༧) སཏྟཱནཾ ཏཾ ཏཾ ཧིཏཔྤཊིཔཏྟིཾ ཡཱཙིཏྭཱཔི ཀརུཎཱཡ སམུསྶཱཧིཏོ ཏེ ཏཏྠ ནིཡོཛེཏི. པརམེན ཝཱ ཙིཏྟིསྶརིཡེན སམནྣཱགཏོ སབྦསཏྟེ ཨཱིསཏི ཨབྷིབྷཝཏཱིཏི པརམིསྶརོ བྷགཝཱ ‘‘ནཱཐོ’’ཏི ཝུཙྩཏི. སབྦོ ཙཱཡམཏྠོ སདྡསཏྠཱནུསཱརཏོ ཝེདིཏབྦོ. པཝཀྑཱམཱིཏི པཀཱརེན ཀཐེསྶཱམི. མཱུལསིཀྑཱཏི ཨདྷིསཱིལཨདྷིཙིཏྟཨདྷིཔཉྙཱཝསེན ཏིསྶོཔི སིཀྑཱ, ཨུཔསམྤནྣསྶ སུཔྤཏིཊྛིཏབྷཱཝསཱདྷནཊྛེན མཱུལཱ ཙ སཱ སིཀྑིཏབྦཏོ སིཀྑཱ ཙཱཏི མཱུལསིཀྑཱ. གནྠཝསེནེཏྠ སངྑིཔིཏྭཱ ཝུཏྟཏྟཱ ཏདྡཱིཔནོ གནྠོ ‘‘མཱུལསིཀྑཱ’’ཏི ཝུཙྩཏི.

ཏཏྠ ཀཏམཾ སཱིལཾ, ཀཏམཾ ཨདྷིསཱིལཾ, ཀཏམཾ ཙིཏྟཾ, ཀཏམཾ ཨདྷིཙིཏྟཾ, ཀཏམཱ པཉྙཱ, ཀཏམཱ ཨདྷིཔཉྙཱཏི? ཝུཙྩཏེ – པཉྩངྒཨཊྛངྒདསངྒསཱིལཾ ཏཱཝ སཱིལམེཝ. པཱཏིམོཀྑསཾཝརསཱིལཾ པན ‘‘ཨདྷིསཱིལ’’ནྟི ཝུཙྩཏི. ཏཉྷི སཱུརིཡོ ཝིཡ པཛྫོཏཱནཾ, སིནེརུ ཝིཡ པབྦཏཱནཾ སབྦལོཀིཡསཱིལཱནཾ ཨདྷིཀཉྩེཝ ཨུཏྟམཉྩ. པཱཏིམོཀྑསཾཝརཏོཔི ཙ མགྒཕལསམྤཡུཏྟམེཝ སཱིལཾ ཨདྷིསཱིལཾ, ཏཾ པན ཨིདྷ ནཱདྷིཔྤེཏཾ. ན ཧི ཏཾ སིཀྑནྟོ མེཐུནཾ དྷམྨཾ པཊིསེཝཏི. ཀཱམཱཝཙརཱནི པན ཨཊྛ ཀུསལཙིཏྟཱནི, ལོཀིཡཨཊྛསམཱཔཏྟིཙིཏྟཱནི ཙ ཨེཀཛ྄ཛྷཾ ཀཏྭཱ ཙིཏྟམེཝ. ཝིཔསྶནཱཔཱདཀཾ ཨཊྛསམཱཔཏྟིཙིཏྟཾ པན ‘‘ཨདྷིཙིཏྟ’’ནྟི ཝུཙྩཏི. ཏཉྷི སབྦལོཀིཡཙིཏྟཱནཾ ཨདྷིཀཉྩེཝ ཨུཏྟམཉྩ. ཏཏོཔི ཙ མགྒཕལཙིཏྟམེཝ ཨདྷིཙིཏྟཾ, ཏཾ པན ཨིདྷ ནཱདྷིཔྤེཏཾ. ན ཧི ཏཾ སིཀྑནྟོ མེཐུནཾ དྷམྨཾ པཊིསེཝཏི. ‘‘ཨཏྠི དིནྣཾ, ཨཏྠི ཡིཊྛ’’ནྟིཨཱདིནཡཔྤཝཏྟཾ ཀམྨསྶཀཏཱཉཱཎཾ པཉྙཱ, ཏིལཀྑཎཱཀཱརཔརིཙྪེདཀཾ པན ཝིཔསྶནཱཉཱཎཾ ‘‘ཨདྷིཔཉྙཱ’’ཏི ¶ ཝུཙྩཏི. སཱ ཧི སབྦལོཀིཡཔཉྙཱནཾ ཨདྷིཀཱ ཙེཝ ཨུཏྟམཱ ཙ. ཏཏོཔི ཙ མགྒཕལཔཉྙཱཝ ཨདྷིཔཉྙཱ, སཱ པན ཨིདྷ ནཱདྷིཔྤེཏཱ. ན ཧི ཏཾ སིཀྑནྟོ མེཐུནཾ དྷམྨཾ པཊིསེཝཏི.

ཏཱསུ ཏཱིསུ ཨདྷིསཱིལསིཀྑཱ ཙཱརིཏྟཝཱརིཏྟཝསེན དུཝིདྷམྤི སཱིལཾ ཡཐཱནུསིཊྛཾ པཊིཔཛྫམཱནེན, ཏཔྤཊིཔཀྑེ ཀིལེསེ ཏདངྒཔྤཧཱནཝསེན པཛཧནྟེན སིཀྑིཏབྦཱ. ཨདྷིཙིཏྟསིཀྑཱ ¶ ཡཐཱཝུཏྟེསུ ཨཱརམྨཎེསུ ཨབྷིཡོགཝསེན ཛྷཱནཔྤཊིཔཀྑཱནཾ ནཱིཝརཎགཎཱནཾ ཝིཀྑམྦྷནཔྤཧཱནཾ ཀུརུམཱནེན སིཀྑིཏབྦཱ. ཨདྷིཔཉྙཱསིཀྑཱ པན ཡཐཱནུརཱུཔཾ ཏདངྒཔྤཧཱནསམུཙྪེདཝསེན སཱནུསཡེ ཀིལེསེ སམུཙྪིནྡནྟེན སིཀྑིཏབྦཱ. ཏསྨཱ སུཔྤཏིཊྛིཏབྷཱཝསཱདྷནཊྛེན མཱུལཱ ཙ སཱ སིཀྑིཏབྦཏོ སིཀྑཱ ཙཱཏི མཱུལསིཀྑཱ, ཀམྨཝཙནིཙྪཱཡཾ ‘‘མཱུལསིཀྑ’’ནྟི ཝུཏྟཾ.

སམཱསཱིཡཏེ སངྑིཔཱིཡཏེཏི སམཱསོ, ཏཏོ སམཱསཏོ. སམགྒེན སངྒྷེན ཉཏྟིཙཏུཏྠེན ཀམྨེན ཨཀུཔྤེན ཋཱནཱརཧེན ཨུཔསམྤནྣོཏི བྷིཀྑུ. ཏཏྠ སབྦནྟིམེན པརིཡཱཡེན པཉྩཝགྒཀརཎཱིཡེ ཀམྨེ ཡཱཝཏིཀཱ བྷིཀྑཱུ ཀམྨཔྤཏྟཱ, ཏེསཾ ཨཱགཏཏྟཱ, ཚནྡཱརཧཱནཾ ཚནྡསྶ ཨཱཧཊཏྟཱ, སམྨུཁཱིབྷཱུཏཱནཉྩ ཨཔྤཊིཀྐོསནཏོ ཨེཀསྨིཾ ཀམྨེ སམགྒབྷཱཝཾ ཨུཔགཏེན སངྒྷེན ཏཱིཧི ཨནུསྶཱཝནཱཧི ཨེཀཱཡ ཉཏྟིཡཱ ཀཱཏབྦཀམྨསངྑཱཏེན ཉཏྟིཙཏུཏྠེན དྷམྨིཀེན ཝིནཡཀམྨེན ཝཏྠུཉཏྟིཨནུསྶཱཝནསཱིམཱཔརིསཱསམྤཏྟིསམྤནྣཏྟཱ ཨཀོཔེཏབྦཏཾ, ཨཔྤཊིཀྐོསིཏབྦཏཾ ཨུཔགཏེན ཋཱནཱརཧེན ཀཱརཎཱརཧེན སཏྠུསཱསནཱརཧེན ཨུཔསམྤནྣོ ནཱམ, ཨུཔརིབྷཱཝཾ སམཱཔནྣོ པཏྟོཏི ཨཏྠོ. བྷིཀྑུབྷཱཝོ ཧི ཨུཔརིབྷཱཝོ. ཏཉྩེས ཡཐཱཝུཏྟེན ཀམྨེན སམཱཔནྣཏྟཱ ‘‘ཨུཔསམྤནྣོ’’ཏི ཝུཙྩཏི, ཏེན བྷིཀྑུནཱ. ཨཱུནཔཉྩཝསྶཏཱཡ ནཝཀོ, ཏེན ནཝཀེན ¶ ཨདྷུནཱ པབྦཛིཏེན, ཨཙིརཔབྦཛིཏེནཱཏི ཝུཏྟཾ ཧོཏི. ཨཱདོཏི ཨཱདིམྷིཡེཝཱཏི ཨཏྠོ, ཨཱདིཏོ པཊྛཱཡཱཏི ཝཱ. ཨཔི ཙ ཐེརོ ‘‘ཨཱདོ’’ཏི ཝཙནེན སདྡྷཱཔབྦཛིཏཱནཾ ཀུལཔུཏྟཱནཾ ཨཱལསིཡདོསེན, ཨཔྤཊིཔཛྫནྟཱནཾ ཨཉྙཱཎདོསེན ཙ ཨཉྙཐཱ པཊིཔཛྫནྟཱནཾ སཾཝེགཾ ཛནེཏི. ཀཐཾ? ཨཏིདུལླབྷཾ ཁཎཾ སམཝཱཡཾ པཊིལབྷིཏྭཱ ཏངྑཎཾ ན ཀུསཱིཏེན ཝཱ ནིརཏྠཀཀཐཱཔསུཏེན ཝཱ ཝཱིཏིནཱམེཏབྦཾ, ཀིཾ ཀཱཏབྦཾ? ཨཱདིཏོ པཊྛཱཡ ནིརནྟརམེཝ ཏཱིསུ སིཀྑཱསུ ཨཱདརོ ཛནེཏབྦོཏི.

‘‘སཱ མཱགདྷཱི མཱུལབྷཱསཱ, ནརཱ ཡཱཡཱདིཀཔྤིཀཱ;

བྲཧྨཱནོ ཙསྶུཏཱལཱཔཱ, སམྦུདྡྷཱ ཙཱཔི བྷཱསརེ’’ཏི. –

ཝཙནཏོ མཱུལབྷཱསཱཡཱཏི མཱགདྷམཱུལཱཡ བྷཱསཱཡ, སབྷཱཝནིརུཏྟིཡཱ བྷཱསཱཡཱཏི ཝུཏྟཾ ཧོཏི. སིཀྑིཏུནྟི ཨུགྒཎྷིཏུཾ.

༡. ཨིདཱནི ¶ སབྦསིཀྑཱནཾ པན མཱུལབྷཱུཏཏྟཱ ཨདྷིསཱིལསིཀྑཱཝ པཋམཾ ཝུཏྟཱ, ཏཏྲཱཔི མཧཱསཱཝཛྫཏྟཱ, མཱུལཙྪེཛྫཝསེན པཝཏྟནཏོ ཙ སབྦཔཋམཾ པཱརཱཛིཀཾ ཛཱནིཏབྦནྟི དསྶེནྟོ ‘‘སཾ ནིམིཏྟ’’ནྟྱཱདིམཱཧ. ཏཏྠ མགྒཏྟཡེ སཾ ནིམིཏྟཾ པཝེསནྟོ བྷིཀྑུ ཙུཏོཏི ཨཏྠོ. སཾ ནིམིཏྟནྟི ཨཏྟནོ ཨངྒཛཱཏཾ, སབྦནྟིམེན པརིཙྪེདེན ཨེཀཏིལབཱིཛམཏྟམྤི ཨཏྟནོ ཨངྒཛཱཏནྟི ཝུཏྟཾ ཧོཏི. བྷིཀྑཱུཏི ཨནིཀྑིཏྟསིཀྑོ. མགྒཏྟཡེཏི ཨེཏྠ མནུསྶཱམནུསྶཏིརཙྪཱནགཏཱནཾ ཝསེན ཏིསྶོ ཨིཏྠིཡོ, ཏཡོ ཨུབྷཏོབྱཉྫནཀཱ, ཏཡོ པཎྜཀཱ, ཏཡོ པུརིསཱཏི པཱརཱཛིཀཝཏྠུབྷཱུཏཱནཾ ནིམིཏྟཱནཾ ནིསྶཡཱ དྭཱདས སཏྟཱ ཧོནྟི. ཏེསཾ ཝཙྩཔསྶཱཝམུཁམགྒཝསེན ཏཡོ མགྒཱ. ཏཏྠ མནུསྶིཏྠིཡཱ ཏཡོ, ཨམནུསྶིཏྠིཡཱ ཏཡོ, ཏིརཙྪཱནགཏིཏྠིཡཱ ཏཡོཏི ནཝ ¶ , ཏཐཱ མནུསྶུབྷཏོབྱཉྫནཀཱདཱིནཾ. མནུསྶཔཎྜཀཱདཱིནཾ པན ཝཙྩམུཁམགྒཝསེན དྭེ དྭེཏི ཚ, ཏཐཱ མནུསྶཔུརིསཱདཱིནནྟི སབྦེསཾ ཝསེན ཏིཾས མགྒཱ ཧོནྟི. ཏེ སབྦེ པརིགྒཧེཏྭཱ ཨིདྷ ‘‘མགྒཏྟཡེ’’ཏི ཝུཏྟཾ, ཏསྨིཾ མགྒཏྟཡེ, དྭཱདསནྣཾ སཏྟཱནཾ ཏཱིསུ མགྒེསུ ཡཏྠ ཀཏྠཙི མགྒེཏི ཨཏྠོ. ཙུཏོཏི སཀྐཏྟཱ ཝཱ བྲཧྨཏྟཱ ཝཱ ཙུཏསཏྟོ ཝིཡ སཱསནཏོ ཙུཏོ ཧོཏི, པཱརཱཛིཀོ ཧོཏཱིཏི ཨཏྠོ.

ཨིདཱནི པཝེསནཾ ནཱམ ན ཀེཝལཾ ཨཏྟུཔཀྐམེནེཝ ཧོཏི, པརཱུཔཀྐམེནཱཔི ཧོཏི, ཏཏྠཱཔི སེཝནཙིཏྟེ སཏི པཱརཱཛིཀོ ཧོཏཱིཏི དསྶནཏྠཾ ‘‘པཝེསནཱ’’ཏྱཱདི ཝུཏྟཾ. ཏསྶཏྠོ – ཡོ བྷིཀྑུ པཝེསནཊྛིཏཨུདྡྷརཎཔཝིཊྛཀྑཎེསུ ཨཉྙཏརཾ ཁཎཾ ཙེཔི སཱདིཡཾ སཱདིཡནྟོ སཙེཔི ཏསྨིཾ ཁཎེ སེཝནཙིཏྟཾ ཨུཔཊྛཱཔེནྟོ, ཙུཏོ པཱརཱཛིཀོ ཧོཏི. ཡོ པན སབྦསོ ཨསཱདིཡནྟོ ཨཱསཱིཝིསམུཁཾ ཨངྒཱརཀཱསུཾ པཝིཊྛཾ ཝིཡ ཙ མཉྙཏི, སོ ནིཔྤརཱདྷོ ཧོཏི. ཨེཏྠ པན ཋིཏཾ ནཱམ སུཀྐཝིསྶཊྛིསམཡཔྤཏྟཾ. པཋམཔཱརཱཛིཀཾ.

༢-༧. ཨིདཱནི དུཏིཡཾ དསྶེཏུཾ ‘‘ཨདིནྣཾ མཱནུསཾ བྷཎྜ’’ནྟྱཱདིམཱཧ. ཏཏྠ ཡོ བྷིཀྑུ ཨདིནྣཾ མཱནུསཾ གརུཀཾ བྷཎྜཾ པཉྩཝཱིསཱཝཧཱརེསུ ཡེན ཀེནཙི ཨཝཧཱརེན ཨཱདིཡནྟོ ཙུཏོ བྷཝེཏི སམྦནྡྷོ. ཨདིནྣནྟི ཡཾ ཀིཉྩི པརཔརིགྒཧིཏཾ སསྶཱམིཀཾ བྷཎྜཾ, ཏཾ ཏེཧི སཱམིཀེཧི ཀཱཡེན ཝཱ ཝཱཙཱཡ ཝཱ ན དིནྣནྟི ཨདིནྣཾ, ཨནིསྶཊྛཾ ཨཔརིཙྩཏྟཾ རཀྑིཏཾ གོཔིཏཾ མམཱཡིཏཾ པརཔརིགྒཧིཏཾ. མནུསྶསྶ ཨིདནྟི མཱནུསཾ, མནུསྶསནྟཀཾ, ‘‘བྷཎྜ’’ནྟིམིནཱ ཏུལྱཱདྷིཀརཎཾ ¶ . ཐེཡྻཱཡེཀེནཱཏི ཐེཡྻཱཡ ཨེཀེན, ཨེཀེན ཨཝཧཱརེནཱཏི ཨཏྠོ. ལིངྒབྷེདཾ ཀཏྭཱ ཝུཏྟཾ. ‘‘ཐེཡྻཱ ཀེནཙཱི’’ཏི ཝཱ པཱཋོ. ཏཏྠ ཐེནོཏི ཙོརོ, ཐེནསྶ བྷཱཝོ ཐེཡྻཱ, ཀརཎཏྠེ ཙེཏཾ པཙྩཏྟཝཙནཾ, ཏསྨཱ ཀེནཙི ཐེཡྻེན ¶ ཨཝཧཱརེནཱཏི ཨཏྠོ. ཨཱདིཡནྟི ཨཱདིཡནྟོ གཎྷནྟོ. པཉྩཝཱིསཱཝཧཱརེསཱུཏི པཉྩཔཉྩཀེ སམོདྷཱནེཏྭཱ པཉྩཝཱིསཏི ཨཝཧཱརཱ. ཏཏྠ པཉྩཔཉྩཀཱནི ནཱམ ནཱནཱབྷཎྜཔཉྩཀཾ ཨེཀབྷཎྜཔཉྩཀཾ སཱཧཏྠིཀཔཉྩཀཾ པུབྦཔྤཡོགཔཉྩཀཾ ཐེཡྻཱཝཧཱརཔཉྩཀནྟི.

ཏཏྠ སཝིཉྙཱཎཀཱཝིཉྙཱཎཀམིསྶཀབྷཎྜཝསེན ནཱནཱབྷཎྜཔཉྩཀཾ, སཝིཉྙཱཎཀབྷཎྜཝསེན ཨེཀབྷཎྜཔཉྩཀཾ. ཏཏྠ ནཱནཱབྷཎྜཝསེན ཏཱཝ ཨེཝཾ ཝེདིཏབྦོ – ཡོ ཨཱརཱམཾ ཨབྷིཡུཉྫཏི, ཨཱཔཏྟི དུཀྐཊསྶ. སཱམིཀསྶ ཝིམཏིཾ ཨུཔྤཱདེཏི, ཨཱཔཏྟི ཐུལླཙྩཡསྶ. སཱམིཀོ ‘‘ན མཡ྄ཧཾ བྷཝིསྶཏཱི’’ཏི དྷུརཾ ནིཀྑིཔཏི, ཨཱཔཏྟི པཱརཱཛིཀསྶ. ཨཉྙསྶ བྷཎྜཾ ཧརནྟོ སཱིསེ བྷཱརཾ ཐེཡྻཙིཏྟོ ཨཱམསཏི, ཨཱཔཏྟི དུཀྐཊསྶ. ཕནྡཱཔེཏི, ཨཱཔཏྟི ཐུལླཙྩཡསྶ. ཁནྡྷཾ ཨོརོཔེཏི, ཨཱཔཏྟི པཱརཱཛིཀསྶ. ཨུཔནིཀྑིཏྟཾ བྷཎྜཾ ‘‘དེཧི མེ བྷཎྜ’’ནྟི ཝུཙྩམཱནོ ‘‘ནཱཧཾ གཎྷཱམཱི’’ཏི བྷཎཏི, ཨཱཔཏྟི དུཀྐཊསྶ. སཱམིཀསྶ ཝིམཏིཾ ཨུཔྤཱདེཏི, ཨཱཔཏྟི ཐུལླཙྩཡསྶ. སཱམིཀོ ‘‘ན མཡ྄ཧཾ དསྶཏཱི’’ཏི དྷུརཾ ནིཀྑིཔཏི, ཨཱཔཏྟི པཱརཱཛིཀསྶ. ‘‘སཧབྷཎྜཧཱརཀཾ ནེསྶཱམཱི’’ཏི པཋམཾ པཱདཾ སངྐཱམེཏི, ཨཱཔཏྟི ཐུལླཙྩཡསྶ. དུཏིཡཾ པཱདཾ སངྐཱམེཏི, ཨཱཔཏྟི པཱརཱཛིཀསྶ. ཐལཊྛཾ བྷཎྜཾ ཐེཡྻཙིཏྟོ ཨཱམསཏི, ཨཱཔཏྟི དུཀྐཊསྶ. ཕནྡཱཔེཏི, ཨཱཔཏྟི ཐུལླཙྩཡསྶ. ཋཱནཱ ཙཱཝེཏི, ཨཱཔཏྟི པཱརཱཛིཀསྶ. ཨཡམེཏྠ ནཱནཱབྷཎྜཝསེན ཡོཛནཱ. ཨེཀབྷཎྜཝསེན པན སསྶཱམིཀཾ དཱསཾ ཝཱ ཏིརཙྪཱནཾ ཝཱ ཡཐཱཝུཏྟེན ཨབྷིཡོགཱདིནཱ ནཡེན ཨཱདིཡཏི ཝཱ ཧརཏི ཝཱ ཨཝཧརཏི ཝཱ ཨིརིཡཱཔཐཾ ཀོཔེཏི ཝཱ ཋཱནཱ ཙཱཝེཏི ཝཱཏི. ཨཡམེཏྠ ཨེཀབྷཎྜཝསེན ཡོཛནཱ.

པཉྩ ཨཝཧཱརཱ སཱཧཏྠིཀོ ཨཱཎཏྟིཀོ ནིསྶགྒིཡོ ཨཏྠསཱདྷཀོ དྷུརནིཀྑེཔོཏི. ཏཏྠ སཱཧཏྠིཀོ ནཱམ ¶ པརསྶ བྷཎྜཾ སཧཏྠཱ ཨཝཧརཏི. ཨཱཎཏྟིཀོ ནཱམ ‘‘ཨསུཀསྶ བྷཎྜཾ ཨཝཧརཱ’’ཏི ཨཉྙཾ ཨཱཎཱཔེཏི. ནིསྶགྒིཡོ ནཱམ ཨནྟོསུངྐགྷཱཏེ ཋིཏོ བཧིསུངྐགྷཱཏཾ པཱཏེཏི, ཨཱཔཏྟི པཱརཱཛིཀསྶ. ཨཏྠསཱདྷཀོ ནཱམ ‘‘ཨསུཀཾ བྷཎྜཾ ཡདཱ སཀྐོསི, ཏདཱ ཨཝཧརཱ’’ཏི ཨཱཎཱཔེཏི. ཏཏྠ སཙེ པརོ ཨནནྟརཱཡིཀོ ཧུཏྭཱ ཏཾ ཨཝཧརཏི, ཨཱཎཱཔཀོ ཨཱཎཏྟིཀྑཎེཡེཝ ¶ པཱརཱཛིཀོ ཧོཏི, ཨཝཧཱརཀོ པན ཨཝཧཊཀཱལེ, ཨཡཾ ཨཏྠསཱདྷཀོ. དྷུརནིཀྑེཔོ པན ཨུཔནིཀྑིཏྟབྷཎྜཝསེན ཝེདིཏབྦོཏི ཨིདཾ སཱཧཏྠིཀཔཉྩཀཾ.

ཨཔརེཔི པཉྩ ཨཝཧཱརཱ པུབྦཔྤཡོགོ སཧཔྤཡོགོ སཾཝིདྷཱཝཧཱརོ སངྐེཏཀམྨཾ ནིམིཏྟཀམྨནྟི. ཏཏྠ ཨཱཎཏྟིཝསེན པུབྦཔྤཡོགོ ཝེདིཏབྦོ, ཋཱནཱཙཱཝནཝསེན སཧཔྤཡོགོ. སཾཝིདྷཱཝཧཱརོ ནཱམ སམྦཧུལཱ བྷིཀྑཱུ ‘‘ཨམུཀཾ ནཱམ གེཧཾ གནྟྭཱ, ཚདནཾ ཝཱ བྷིནྡིཏྭཱ, སནྡྷིཾ ཝཱ ཚིནྡིཏྭཱ བྷཎྜཾ ཧརིསྶཱམཱ’’ཏི སཾཝིདཧིཏྭཱ གཙྪནྟི, ཏེསུ ཨེཀོ བྷཎྜཾ ཨཝཧརཏི, ཏསྶུདྡྷཱརེ སབྦེསཾ པཱརཱཛིཀཾ. སངྐེཏཀམྨཾ ནཱམ སཉྫཱནནཀམྨཾ ཀཱལཔརིཙྪེདཝསེན སཉྙཱཀརཎཾ. ཨེཏྠ ཙ ‘‘པུརེབྷཏྟཾ ཨཝཧརཱ’’ཏི ཝུཏྟེ ཨཛྫ ཝཱ པུརེབྷཏྟཾ ཨཝཧརཏུ, སྭེ ཝཱ ཨནཱགཏེ སཾཝཙྪརེ ཝཱ, ནཏྠི ཝིསངྐེཏོ, སངྐེཏཀཱརཀསྶ ཨཱཎཏྟིཀྑཎེ, ཨིཏརསྶ ཋཱནཱ ཙཱཝནེཏི ཨེཝཾ ཨཱཔཏྟི ཨུབྷིནྣཾ པཱརཱཛིཀསྶ. ནིམིཏྟཀམྨཾ ནཱམ སཉྙུཔྤཱདནཏྠཾ ཀསྶཙི ནིམིཏྟསྶ ཀརཎཾ ཨཀྑིནིཁཎནཧཏྠཱལངྒྷནཔཱཎིཔྤཧཱརཨངྒུལིཕོཊནགཱིཝུནྣཱམནཨུཀྐཱསནཱདིནཱ ཨནེཀཔྤཀཱརཾ. ཨཝཧཱརཀོ ཨཱཎཱཔཀེན ཡཾ ནིམིཏྟསཉྙཾ ཀཏྭཱ ཝུཏྟཾ, ཏཾ ‘‘ཨེཏ’’ནྟི མཉྙམཱནོ ཏམེཝ ཨཝཧརཏི, ཨུབྷིནྣཾ པཱརཱཛིཀཾ. ཡཾ ‘‘ཨཝཧརཱ’’ཏི ཝུཏྟཾ, ཏཾ ‘‘ཨེཏ’’ནྟི མཉྙམཱནོ ཨཉྙཾ ཏསྨིཾཡེཝ ཋཱནེ ཋཔིཏཾ ཨཝཧརཏི, མཱུལཊྛསྶ ཨནཱཔཏྟི. ཨིདཾ པུབྦཔྤཡོགཔཉྩཀཾ.

ཨཔརེཔི ¶ པཉྩ ཨཝཧཱརཱ ཐེཡྻཱཝཧཱརོ པསཡ྄ཧཱཝཧཱརོ པརིཀཔྤཱཝཧཱརོ པཊིཙྪནྣཱཝཧཱརོ ཀུསཱཝཧཱརོཏི. ཏཏྠ ཡོ ཀཱུཊམཱནཀཱུཊཀཧཱཔཎཱདཱིཧི ཝཉྩེཏྭཱ གཎྷཱཏི, ཏསྶེཝཾ གཎྷཏོ ཨཝཧཱརོ ཐེཡྻཱཝཧཱརོ. ཡོ སནྟཛྫེཏྭཱ སཡཾ དསྶེཏྭཱ ཏེསཾ སནྟཀཾ གཎྷཱཏི, ཡོ ཝཱ ཨཏྟནོ པཏྟབལིཏོ ཙ ཨདྷིཀཾ བལཀྐཱརེན གཎྷཱཏི རཱཛརཱཛམཧཱམཏྟཱདཡོ ཝིཡ, ཏསྶེཝཾ གཎྷཏོ ཨཝཧཱརོ པསཡ྄ཧཱཝཧཱརོ. པརིཀཔྤེཏྭཱ གཎྷཏོ པནཱཝཧཱརོ པརིཀཔྤཱཝཧཱརོ. སོ དུཝིདྷོ བྷཎྜོཀཱསཔརིཀཔྤཝསེན. ཏཏྲ ཡོ ‘‘སཱཊཀོ ཙེ, གཎྷིསྶཱམི, སུཏྟཾ ཙེ, ན གཎྷིསྶཱམཱི’’ཏི པརིཀཔྤེཏྭཱ ཨནྡྷཀཱརེ པསིབྦཀཾ གཎྷཱཏི, ཏཏྲ སཱཊཀོ ཙེ, ཨུདྡྷཱརེཡེཝ པཱརཱཛིཀཾ, སུཏྟཾ ཙེ ཧོཏི, རཀྑཏི. ཨཡཾ བྷཎྜཔརིཀཔྤོ ནཱམ. ཡོ ཋཱནཾ པརིཀཔྤེཏྭཱ བྷཎྜཾ གཎྷཱཏི, ཏསྶ ཏཾ པརིཀཔྤིཏཔརིཙྪེདཾ ཨཏིཀྐནྟམཏྟེ པཱརཱཛིཀཾ. ཨཡཾ ཨོཀཱསཔརིཀཔྤོ ནཱམ. ཨེཝམིམེསཾ དྭིནྣཾ པརིཀཔྤཱནཾ ཝསེན པརིཀཔྤེཏྭཱ གཎྷཏོ ཨཝཧཱརོ པརིཀཔྤཱཝཧཱརོ. པཊིཙྪཱདེཏྭཱ པརསྶ བྷཎྜཾ གཎྷཏོ ཨཝཧཱརོ པཊིཙྪནྣཱཝཧཱརོ ནཱམ. ཀུསཾ སངྐཱམེཏྭཱ ¶ ཨཝཧརཎཾ ཀུསཱཝཧཱརོ. ཡོ ཀུསཾ པཱཏེཏྭཱ ཙཱིཝརེ བྷཱཛིཡམཱནེ ཨཏྟནོ ཀོཊྛཱསསྶ སམཱིཔེ ཋིཏཾ ཨཔྤགྒྷཏརཾ ཝཱ མཧགྒྷཏརཾ ཝཱ སམསམཾ ཝཱ པརསྶ ཀོཊྛཱསཾ དིསྭཱ སཙེ པཋམཏརཾ པརཀོཊྛཱསཏོ ཀུསདཎྜཀཾ ཨུདྡྷརཏི, ཨཏྟནོ ཀོཊྛཱསེ པཱཏེཏུཀཱམཏཱཡ ཨུདྡྷཱརེ རཀྑཏི, པཱཏནེཔི རཀྑཏི, ཨཏྟནོ ཀོཊྛཱསཏོ པན ཀུསདཎྜཾ ཨུདྡྷརཏི, ཨུདྡྷཱརེ རཀྑཏི, ཏཾ ཨུདྡྷརིཏྭཱ པརཀོཊྛཱསེ པཱཏེནྟསྶ ཧཏྠཏོ མུཏྟམཏྟེ པཱརཱཛིཀཾ. ཨཡཾ ཀུསཱཝཧཱརོ ནཱམཱཏི ཨིམེསུ པཉྩཝཱིསཱཝཧཱརེསུ ཡེན ཀེནཙི ཨཝཧཱརེན གཎྷནྟོ པཱརཱཛིཀོ བྷཝེཏི ཨཏྠོ.

གརུཀནྟི ¶ པཉྩམཱསཀཾ. ཝཱིསཏིམཱསཀོ ཧི ཀཧཱཔཎོ, ཀཧཱཔཎསྶ ཙཏུཏྠོ བྷཱགོ པཱདོ ནཱམ, ཏསྨཱ པཉྩམཱསཀཾ ཝཱ པཱདཾ ཝཱ གརུཀནྟི ཝེདིཏབྦཾ. ཏཏྠ ‘‘ཙཏྟཱརོ ཝཱིཧཡོ གུཉྫཱ, དྭེ གུཉྫཱ མཱསཀོ བྷཝེ’’ཏི ཝཙནཏོ ཝཱིཧིཝསེན ཙཏྟཱལཱིས ཝཱིཧཡོ དས གུཉྫཱ པཉྩམཱསཀོཏི ཝེདིཏབྦོ. ཡཾ པན སཱམཎེརསིཀྑཱཡཾ ‘‘ཝཱིསཏིཝཱིཧཱི’’ཏི ཝུཏྟཾ, ཏཾ ནེཝ པཱལི༹ཡཾ, ན ཨཊྛཀཐཱཡཾ ཨཏྠི, ཝཱིམཾསིཏབྦམེཏཾ. དུཏིཡཔཱརཱཛིཀཾ.

༨. ཨིདཱནི ཏཏིཡཾ དསྶེཏུཾ ‘‘མནུསྶཔཱཎཾ པཱཎོ’’ཏྱཱདི ཝུཏྟཾ. ཏཏྠ ཡོ བྷིཀྑུ ‘‘མནུསྶཔཱཎོ’’ ཨིཏི ཛཱནནྟོ ཝདྷཀཙིཏྟེན མནུསྶཔཱཎཾ ཛཱིཝིཏཱ ཝིཡོཛེཏི, སོ བྷིཀྑུ སཱསནཱ པཱརཱཛིཀོ ཧོཏཱིཏི སམུདཱཡཏྠོ.

མནུསྶཔཱཎནྟི མཱཏུཀུཙྪིསྨིཾ པཊིསནྡྷིཙིཏྟེན སཧུཔྤནྣཾ ཨཏིཔརིཏྟཾ ཀལལརཱུཔཾ ཨཱདིཾ ཀཏྭཱ པཀཏིཡཱ ཝཱིསཝསྶསཏཱཡུཀསྶ སཏྟསྶ ཡཱཝ མརཎཀཱལཱ ཨེཏྠནྟརེ ཨནུཔུབྦེན ཝུདྡྷིཔྤཏྟོ ཨཏྟབྷཱཝོ, ཨེསོ མནུསྶཔཱཎོ ནཱམ, ཨེཝརཱུཔཾ མནུསྶཔཱཎནྟི ཨཏྠོ. པཱཎོཏི ཛཱནནྟི ‘‘པཱཎོ’’ ཨིཏི ཛཱནནྟོ ‘‘ཏཾ ཛཱིཝིཏཱ ཝོརོཔེམཱི’’ཏི ཛཱནནྟོ. ཝདྷཀཙེཏསཱཏི ཝདྷཀཙིཏྟེན, ཨིཏྠམྦྷཱུཏེ ཀརཎཝཙནཾ, ཝདྷཀཙིཏྟོ ཧུཏྭཱ མརཎཱདྷིཔྤཱཡོ ཧུཏྭཱཏི ཝུཏྟཾ ཧོཏི. ཛཱིཝིཏཱཏི ཛཱིཝིཏིནྡྲིཡཏོ. ཡོཏི ཨནིཡམཝཙནཾ. སོཏི ཨེཏེན ནིཡམནཾ ཝེདིཏབྦཾ. ཝིཡོཛེཏཱིཏི ཝུཏྟཔྤཀཱརཾ མནུསྶཝིགྒཧཾ ཀལལཀཱལེཔི ཏཱཔནམདྡནེཧི ཝཱ བྷེསཛྫསམྤདཱནེན ཝཱ ཏཏོ ཝཱ ཨུདྡྷམྤི ཏདནུརཱུཔེན ཨུཔཀྐམེན ཛཱིཝིཏཱ ཝིཡོཛེཏཱིཏི ཨཏྠོ. སཱསནཱཏི པརཱཔུབྦཛིདྷཱཏུཔྤཡོགེ ནིསྶཀྐཝཙནཾ, ཏེན སཏྠུསཱསནཏོཏི ཨཏྠོ. པརཱཛིཏོཏི པརཱཛཡམཱཔནྣོ. ཧོཏཱིཏི པཱཋསེསོ. ཏཏིཡཔཱརཱཛིཀཾ.

༩. ཨིདཱནི ¶ ¶ ཙཏུཏྠཾ དསྶེཏུཾ ‘‘ཛྷཱནཱདིབྷེད’’ནྟྱཱདི ཝུཏྟཾ. ཏཏྠ ཡོ བྷིཀྑུ ཨཉྙཱཔདེསཉྩ ཨདྷིམཱནཉྩ ཝཛྫེཏྭཱ ཧདཡེ ཨསནྟཾ ཛྷཱནཱདིབྷེདཾ དྷམྨཾ མནུསྶཛཱཏིཀསྶ སཏྟསྶ ཝདེཡྻ, ཏསྨིཾ ཁཎེ ཉཱཏེ སོ ཏཏོ སཱསནཱ པཱརཱཛིཀོ ཨེཝ ཧོཏཱིཏི ཨཏྠོ.

ཛྷཱནཱདིབྷེདནྟི ‘‘ཛྷཱནཾ ཝིམོཀྑོ སམཱདྷི སམཱཔཏྟི ཉཱཎདསྶནཾ མགྒབྷཱཝནཱ ཕལསཙྪིཀིརིཡཱ ཀིལེསཔྤཧཱནཾ ཝིནཱིཝརཎཏཱ ཙིཏྟསྶ སུཉྙཱགཱརེ ཨབྷིརཏཱི’’ཏི (པཱརཱ. ༡༩༨) ཨེཝཾ ཝུཏྟཾ ཛྷཱནཱདིབྷེདཾ ཨུཏྟརིམནུསྶདྷམྨཾ. ཧདཡེཏི ཙིཏྟེ. ཨསནྟནྟི ཨསཾཝིཛྫམཱནཾ. ཨཉྙཱཔདེསནྟི ‘‘ཡོ ཏེ ཝིཧཱརེ ཝསི, སོ བྷིཀྑུ པཋམསྶ ཛྷཱནསྶ ལཱབྷཱི’’ཏིཨཱདིནཱ ནཡེན ཨཉྙཱཔདེསཾ ཝཛྫེཏྭཱཏི ཨཏྠོ. ཝིནཱཏི ཝཛྫནཏྠེ ནིཔཱཏོ, ཏསྶ ཝཛྫེཏྭཱཏི ཨཏྠོ. ཨདྷིམཱནནྟི ‘‘ཨདྷིགཏཱ མཡཱ’’ཏི ཨེཝཾ ཨུཔྤནྣཾ མཱནནྟི ཨཏྠོ. ཨདྷིགཏོ མཱནོཏི ཝིགྒཧོ, ཏཾ ཨདྷིམཱནཾ ཝཛྫེཏྭཱཏི ཨཏྠོ. མནུསྶཛཱཏིསྶཱཏི མནུསྶཛཱཏིཀསྶ, ན དེཝབྲཧྨཱདཱིསུ ཨཉྙཏརསྶཱཏི ཨཏྠོ. ཝདེཡྻཱཏི ཨཱརོཙེཡྻ. ཉཱཏཀྑཎེཏི ཉཱཏེ ཁཎེཏི ཚེདོ, ཏསྨིཾ ཏེནཱརོཙིཏཀྑཎེ མནུསྶཛཱཏིཀེན ཉཱཏེཏི ཨཏྠོ. ཏེནཱཏི ནིསྶཀྐེ ཀརཎཝཙནཾ, ཏཏོ སཱསནཏོ པཱརཱཛིཀོཏི ཨཏྠོ. ཙཏུཏྠཔཱརཱཛིཀཾ.

༡༠. ཨིདཱནི སངྒྷཱདིསེསཾ པཀཱསེཏུཾ ‘‘མོཙེཏུཀཱམཙིཏྟེནཱ’’ཏིཨཱདིམཱརདྡྷཾ. ཏཏྠ མོཙེཏུཾ ཀཱམེཏཱིཏི མོཙེཏུཀཱམཾ, མོཙེཏུཀཱམཉྩ ཏཾ ཙིཏྟཉྩཱཏི མོཙེཏུཀཱམཙིཏྟཾ ¶ , ཏེན, མོཙནསྶཱདཙིཏྟེནཱཏི ཨཏྠོ. ཨེཀཱདསནྣཉྷི རཱགཱནཾ ཨེཀེན མོཙནསྶཱདེན ཨཱཔཏྟི ཧོཏཱིཏི ཝུཏྟཾ ཧོཏི.

ཏཏྲིམེ ཨེཀཱདས ཨསྶཱདཱ མོཙནསྶཱདོ མུཙྩནསྶཱདོ མུཏྟསྶཱདོ མེཐུནསྶཱདོ ཕསྶསྶཱདོ ཀཎྜཱུཝནསྶཱདོ དསྶནསྶཱདོ ནིསཛྫསྶཱདོ ཝཱཙསྶཱདོ གེཧསིཏཔེམཾ ཝནབྷངྒིཡནྟི. ཏཏྠ མོཙནསྶཱདཙེཏནཱཡ ཙེཏེནྟོ ཙེཝ ཨསྶཱདེནྟོ ཙ ཨུཔཀྐམཏི, མུཙྩཏི, སངྒྷཱདིསེསོ ¶ , ན མུཙྩཏི ཙེ, ཐུལླཙྩཡཾ. སཙེ པན སཡནཀཱལེ རཱགཔརིཡུཊྛིཏོ ཧུཏྭཱ ཨཱུརུནཱ ཝཱ མུཊྛིནཱ ཝཱ ཨངྒཛཱཏཾ གཱལ༹ྷཾ པཱིལེ༹ཏྭཱ མོཙནཏྠཱཡ སཨུསྶཱཧོ སུཔཏི, སུཔནྟསྶ ཙསྶ ཨསུཙི མུཙྩཏི, སངྒྷཱདིསེསོ. མུཙྩནསྶཱདེ ཨཏྟནོ དྷམྨཏཱཡ མུཙྩམཱནཾ ཨསྶཱདེཏི, ན ཨུཔཀྐམཏི, མུཙྩཏི, ཨནཱཔཏྟི. མུཏྟསྶཱདེ ཨཏྟནོ དྷམྨཏཱཡ མུཏྟེ ཋཱནཱ ཙུཏེ ཨསུཙིམྷི པཙྪཱ ཨསྶཱདེནྟསྶ ཝིནཱ ཨུཔཀྐམེན མུཙྩཏི, ཨནཱཔཏྟི. མེཐུནསྶཱདེ མེཐུནརཱགེན མཱཏུགཱམཾ གཎྷཱཏི, ཏེན ཨསུཙི མུཙྩཏི, ཨནཱཔཏྟི, དུཀྐཊཾ པན ཨཱཔཛྫཏི. ཕསྶསྶཱདོ དུཝིདྷོ ཨཛ྄ཛྷཏྟིཀོ བཱཧིརོ ཙཱཏི. ཏཏྠ ཨཏྟནོ ནིམིཏྟཾ ‘‘ཐདྡྷཾ, མུདུཀནྟི ཛཱནིསྶཱམཱི’’ཏི ཝཱ ལོལབྷཱཝེན ཝཱ ཀཱིལཱ༹པཡཏོ ཨསུཙི མུཙྩཏི, ཨནཱཔཏྟི. བཱཧིརཕསྶསྶཱདེ པན ཀཱཡསཾསགྒརཱགེན ཨིཏྠིཾ ཕུསཏོ, ཨཱལིངྒཏོ ཙ ཨསུཙི མུཙྩཏི, ཨནཱཔཏྟི, ཀཱཡསཾསགྒསངྒྷཱདིསེསཾ པན ཨཱཔཛྫཏི.

ཀཎྜཱུཝནསྶཱདེ དདྡུཀཙྪུཔིལ༹ཀཔཱཎཀཱདཱིནཾ ཨཉྙཏརེན ཁཛྫམཱནཾ ནིམིཏྟཾ ཀཎྜཱུཝནསྶཱདེན ཀཎྜཱུཝཏོ ཨསུཙི མུཙྩཏི, ཨནཱཔཏྟི. དསྶནསྶཱདེ ཨིཏྠིཡཱ ཨནོཀཱསཾ ཨུཔནིཛ྄ཛྷཱཡཏོ ཨསུཙི མུཙྩཏི, ཨནཱཔཏྟི, དུཀྐཊཾ པན ཧོཏི. ནིསཛྫསྶཱདེ མཱཏུགཱམེན སདྡྷིཾ རཧོ ནིསིནྣསྶ མུཏྟེཔི ཨནཱཔཏྟི ¶ , རཧོནིསཛྫཱཔཏྟི པན ཧོཏི. ཝཱཙསྶཱདེ མཱཏུགཱམཾ མེཐུནཔྤཊིསཾཡུཏྟཱཧི ཝཱཙཱཧི ཨོབྷཱསནྟསྶ མུཏྟེཔི ཨནཱཔཏྟི, དུཊྛུལླཝཱཙཱསངྒྷཱདིསེསཾ པན ཨཱཔཛྫཏི. གེཧསིཏཔེམེ མཱཏཱདཱིནཾ མཱཏཱདིཔེམེན ཨཱལིངྒནཱདིཾ ཀརོནྟསྶ མུཏྟེཔི ཨནཱཔཏྟི. ཝནབྷངྒཾ སནྠཝཀརཎཏྠཱཡ ཨིཏྠིཡཱ པེསིཏཔུཔྥཱདིཝནབྷངྒསཉྙིཏཾ པཎྞཱཀཱརཾ ‘‘ཨིཏྠནྣཱམཱཡ ཨིམཾ པེསིཏ’’ནྟི ཨསྶཱདེན ཨཱམསནྟསྶ མུཏྟེཔི ཨནཱཔཏྟཱིཏི. ཨེཝམེཏེསུ མོཙནསྶཱདེན ཨཱཔཏྟི ཧོཏཱིཏི དསྶེཏུཾ ‘‘མོཙེཏུ…པེ… ནཱ’’ཏི ཝུཏྟཾ. ཨཐ ཝཱ མོཙེཏུཀཱམཾ ཙིཏྟཾ ཡསྶ སོཡཾ མོཙེཏུཀཱམཙིཏྟོ, ཏེན, ཨིཏྠམྦྷཱུཏེ ཀརཎཝཙནཾ, མོཙེཏུཀཱམཙིཏྟོ ཧུཏྭཱཏི ཨཏྠོ.

ཨུཔཀྐམྨཱཏི ཧཏྠཱདཱིསུ ཡེན ཀེནཙི ནིམིཏྟེ ཨུཔཀྐམིཏྭཱཏི ཨཏྠོ. ཝིམོཙཡནྟི ཡཾ ཨནྟམསོ ཨེཀཱ ཁུདྡཀམཀྑིཀཱ པིཝེཡྻ, ཏཏྟཀམྤི ཝིམོཙེནྟོཏི ཨཏྠོ. སུཀྐནྟི ནཱིལཔཱིཏལོཧིཏོདཱཏཏཀྐཏེལདཀཁཱིརདདྷིསཔྤིཝཎྞསངྑཱཏེསུ དསཝིདྷེསུ སུཀྐེསུ ཡཾ ཀིཉྩི སུཀྐཾ. ཨཉྙཏྲ སུཔིནཱཏི ཡཱ སུཔིནནྟེ སུཀྐཝིསྶཊྛི ཧོཏི, ཏཾ ཋཔེཏྭཱཏི ཨཏྠོ. སམཎོཏི ཡོ ཀོཙི ཨུཔསམྤནྣོ. གརུཀནྟི སངྒྷཱདིསེསཾ. ཕུསེཏི ཨཱཔཛྫེཡྻཱཏི ཨཏྠོ. ཙེཏནཱ ཨུཔཀྐམོ མུཙྩནནྟི ཨིམཱནེཏྠ ཏཱིཎི ཨངྒཱནཱིཏི. སུཀྐཝིསྶཊྛིསིཀྑཱཔདཾ.

༡༡. ཨིདཱནི ¶ ཀཱཡསཾསགྒཾ དསྶེཏུཾ ‘‘ཀཱཡསཾསགྒརཱགེནཱ’’ཏིཨཱདིམཱརདྡྷཾ. བྷིཀྑུ མནུསྶིཏྠིཡཱ མནུསྶིཏྠིསཉྙཱི ཧུཏྭཱ ཀཱཡསཾསགྒརཱགེན ཨུཔཀྐམིཏྭཱ མནུསྶིཏྠིཾ པརཱམསནྟོ སངྒྷཱདིསེསཾ ཨཱཔཛྫེཡྻཱཏི ཡོཛནཱ. ཏཏྠ ཀཱཡསཾསགྒརཱགེནཱཏི ཧཏྠགྒཧཎཱདིཀཱཡསམྥསྶེན རཱགེན ཀཱཡམིསྶརཱགེན. མནུསྶིཏྠིནྟི ཏདཧུཛཱཏམྤི ཛཱིཝམཱནཀམནུསྶིཏྠིཾ. པརཱམསནྟི པརཱམསནྟོ, ཨིཏྠཱིཏི སཉྙཱ ཨིཏྠིསཉྙཱ ¶ , སཱ ཨསྶ ཨཏྠཱིཏི ཨིཏྠིསཉྙཱི, ཨིཏྠིསཉྙཱི ཧུཏྭཱཏི ཨཏྠོ. མནུསྶིཏྠཱི, ཨིཏྠིསཉྙིཏཱ, ཀཱཡསཾསགྒརཱགོ, ཏེན རཱགེན ཝཱཡཱམོ, ཧཏྠགྒཱཧཱདིསམཱཔཛྫནནྟི ཨིམཱནེཏྠ པཉྩ ཨངྒཱནི. ཀཱཡསཾསགྒསིཀྑཱཔདཾ.

༡༢. ཨིདཱནི དུཊྛུལླཾ དསྶེཏུཾ ‘‘དུཊྛུལླཝཱཙསྶཱདེནཱ’’ཏིཨཱདི ཨཱརདྡྷཾ. ཏཏྠ དུཊྛུལླཝཱཙསྶཱདེནཱཏི ཝཙྩམགྒཔསྶཱཝམགྒམེཐུནདྷམྨཔྤཊིསཾཡུཏྟཝཱཙསྶཱདརཱགེན. མགྒཾ ཝཱརབྦྷ མེཐུནནྟི ཝཙྩམགྒཔསྶཱཝམགྒཱནཾ ཨཉྙཏརཾ མགྒཾ ཝཱ མེཐུནཾ ཝཱ ཨཱརབྦྷཱཏི ཨཏྠོ. ཨོབྷཱསནྟོཏི ཨཝབྷཱསནྟོ. མནུསྶིཏྠིནྟི ཝིཉྙུཾ པཊིབལཾ སུབྷཱསིཏདུབྦྷཱསིཏཾ དུཊྛུལླཱདུཊྛུལླཾ སལླཀྑཎསམཏྠཾ མནུསྶིཏྠིཾ. སུཎམཱནནྟི སུཎནྟིཾ. ཨིམིནཱ པཊིབལཱཡཔི ཨིཏྠིཡཱ ཨཝིཉྙཏྟིཔཐེ ཋིཏཱཡ དཱུཏེན ཝཱ པཎྞེན ཝཱ ཨཱརོཙེནྟསྶ དུཊྛུལླཝཱཙཱཔཏྟི ན ཧོཏཱིཏི དཱིཔིཏཾ ཧོཏི. མནུསྶིཏྠཱི, ཨིཏྠིསཉྙིཏཱ, དུཊྛུལླཝཱཙསྶཱདརཱགོ, ཏེན རཱགེན ཨོབྷཱསནཾ, ཏངྑཎཝིཛཱནནནྟི ཨིམཱནེཏྠ པཉྩ ཨངྒཱནི. དུཊྛུལླཝཱཙསྶཱདསིཀྑཱཔདཾ.

༡༣. ཨིདཱནི ཨཏྟཀཱམཔཱརིཙརིཡཾ དསྶེཏུཾ ‘‘ཝཎྞ’’ནྟྱཱདི ཝུཏྟཾ. ཏཏྠ ཡོ བྷིཀྑུ ཨཏྟནོ ཀཱམཔཱརིཙརིཡཱཡ ཝཎྞཾ ཝཏྭཱ མེཐུནརཱགེན ཨིཏྠིཾ མེཐུནཾ ཡཱཙམཱནོ གརུཾ ཕུསེཏི སམྦནྡྷོ. ཝཎྞཾ ཝཏྭཱཏི གུཎཾ ཨཱནིསཾསཾ པཀཱསེཏྭཱ. ཨཏྟནོཀཱམཔཱརིཙརིཡཱཡཱཏི མེཐུནདྷམྨསངྑཱཏེན ཀཱམེན པཱརིཙརིཡཱ ཀཱམཔཱརིཙརིཡཱ, ཨཏྟནོ ཨཏྠཱཡ ཀཱམཔཱརིཙརིཡཱ ཨཏྟནོཀཱམཔཱརིཙརིཡཱ, ཨལུཏྟསམཱསོཡཾ. ཨཐ ཝཱ ཨཏྟནོཏི ཀཏྭཏྠེ སཱམིཝཙནཾ, ཨཏྟནོ ཀཱམིཏཱ ཨིཙྪིཏཱཏི ཨཏྟནོཀཱམཱ, སཡཾ མེཐུནརཱགཝསེན པཏྠིཏཱཏི ཨཏྠོ, ཨཏྟནོཀཱམཱ ཙ སཱ པཱརིཙརིཡཱ ཙཱཏི ཨཏྟནོཀཱམཔཱརིཙརིཡཱ ¶ , ཏཱཡ ཨཏྟནོཀཱམཔཱརིཙརིཡཱཡ, ‘‘ཨེཏདགྒཾ, བྷགིནི, པཱརིཙརིཡཱནཾ, ཡཱ མཱདིསཾ སཱིལཝནྟཾ ཀལྱཱཎདྷམྨཾ བྲཧྨཙཱརིཾ ཨེཏེན དྷམྨེན པརིཙརེཡྻཱ’’ཏི ཨེཝཾ ཝཎྞཾ ཝཏྭཱཏི ཨཏྠོ. ཡཱཙདྷཱཏུནོ དྭིཀམྨིཀཏྟཱ ‘‘ཨིཏྠིཾ མེཐུནཾ ཡཱཙམཱནོ’’ཏི ཝུཏྟཾ. ཏཏྠ ཨིཏྠིནྟི དུཊྛུལློབྷཱསནེ ཝུཏྟཔྤཀཱརཾ ཨིཏྠིཾ. མནུསྶིཏྠཱི, ཨིཏྠིསཉྙིཏཱ ¶ , ཨཏྟཀཱམཔཱརིཙརིཡཱཡ རཱགོ, ཏེན རཱགེན ཝཎྞབྷཎནཾ, ཏངྑཎཝིཛཱནནནྟི ཨིམཱནེཏྠ པཉྩ ཨངྒཱནི. ཨཏྟཀཱམཔཱརིཙརིཡསིཀྑཱཔདཾ.

༡༤. ཨིདཱནི སཉྩརིཏྟཾ དསྶེཏུཾ ‘‘སནྡེས’’ནྟྱཱདིམཱརདྡྷཾ. ཏཏྠ བྷིཀྑུ པུརིསསྶ ཝཱ སནྡེསཾ, ཨིཏྠིཡཱ ཝཱ སནྡེསཾ པཊིགྒཧེཏྭཱ ཝཱིམཾསིཏྭཱ པཙྩཱཧརནྟོ གརུཀཾ ཕུསེཏི སམྦནྡྷོ. ཏཏྠ སནྡེསནྟི ‘‘གཙྪ, བྷནྟེ, ཨིཏྠནྣཱམཾ མཱཏུརཀྑིཏཾ བྲཱུཧི ‘ཧོཧི ཀིར ཨིཏྠནྣཱམསྶ བྷརིཡཱ དྷནཀྐཱིཏཱ’’ཏི (པཱརཱ. ༣༠༥) ཨེཝཾ ཝུཏྟཾ པུརིསསྶ སཱསནཾ, ‘‘གཙྪ, བྷནྟེ, ཨིཏྠནྣཱམཾ པུརིསཾ བྲཱུཧི ‘ཨཧཾ ཏསྶ བྷརིཡཱ བྷཝིསྶཱམཱི’’ཏི (པཱརཱ. ༣༢༦-༣༢༧ ཐོཀཾ ཝིསདིསཾ) ཨེཝཾ ཝུཏྟཾ ཨིཏྠིཡཱ སཱསནཾ. པཊིགྒཎྷིཏྭཱཏི ‘‘སཱདྷུ ཨུཔཱསཀཱ’’ཏི ཝཱ ‘‘ཧོཏཱུ’’ཏི ཝཱ ‘‘ཨཱརོཙེསྶཱམཱི’’ཏི ཝཱ ཡེན ཀེནཙི ཨཱཀཱརེན ཝཙཱིབྷེདཾ ཀཏྭཱ ཝཱ སཱིསཀམྤནཱདཱིཧི ཝཱ པཊིགྒཎྷིཏྭཱ སམྤཊིཙྪིཏྭཱཏི ཨཏྠོ. ཝཱིམཾསིཏྭཱཏི ཝུཏྟཔྤཀཱརེན སཱསནཾ གཧེཏྭཱ པུརིསསྶ ཝཱ ཨིཏྠིཡཱ ཝཱ ཏེསཾ ཨཝསྶཱརོཙནཀཱནཾ མཱཏཱཔིཏཱབྷཱཏཱབྷགིནིཨཱདཱིནཾ ཝཱ ཨཱརོཙེཏྭཱཏི ཨཏྠོ. ཧརཾཔཙྩཱཏི ཨེཏྠ ‘‘པཙྩཱཧར’’ནྟི ཝཏྟབྦེ ཚནྡཧཱནིབྷཡཱ ཧར-སདྡཾ པུབྦནིཔཱཏཾ ཀཏྭཱ ཝུཏྟནྟི དཊྛབྦཾ. ཡཏྠ པཧིཏེན ཏཏྠ གནྟྭཱ ཏེན ཨཱརོཙིཏཱ སཱ ཨིཏྠཱི ‘‘སཱདྷཱུ’’ཏི སམྤཊིཙྪཏུ ཝཱ པཊིཀྑིཔཏུ ཝཱ ལཛྫཱཡ ཝཱ ཏུཎྷཱི ཧོཏུ, པུན ཨཱགནྟྭཱ ཏསྶ པུརིསསྶ ཧརནྟོ ཨེཏྟཱཝཏཱ ཨིམཱཡ པཊིགྒཧཎཱརོཙནཔྤཙྩཱཧརཎསངྑཱཏཱཡ ཏིཝངྒསམྤཏྟིཡཱ ¶ སོ བྷིཀྑུ སངྒྷཱདིསེསཾ ཨཱཔཛྫེཡྻཱཏི ཨཏྠོ. ཏེསཾ མནུསྶཛཱཏིཀཏཱ, ཨལཾཝཙནཱིཡཏཱ, པཊིགྒཎྷནཝཱིམཾསནཔྤཙྩཱཧརཎཱནཱིཏི ཨིམཱནེཏྠ པཉྩ ཨངྒཱནི. སཉྩརིཏྟསིཀྑཱཔདཾ.

༡༥. ཨིདཱནི ཨམཱུལཀཾ པཀཱསེཏུཾ ‘‘ཙཱཝེཏུཀཱམོ’’ཏིཨཱདིམཱརདྡྷཾ. ཙཱཝེཏུཀཱམོ བྷིཀྑུ ཨམཱུལནྟིམཝཏྠུནཱ ཨཉྙཾ སུཎམཱནཾ བྷིཀྑུཾ ཙོདེནྟོ ཝཱ ཙོདཱཔེནྟོ ཝཱ གརུཾ ཕུསེཏི སམྦནྡྷོ. ཏཏྠ ཙཱཝེཏུཀཱམོཏི བྲཧྨཙརིཡཱ ཙཱཝེཏུཀཱམོ. ཙོདེནྟོཏི ‘‘ཏྭཾ པཱརཱཛིཀཾ དྷམྨཾ ཨཱཔནྣོསི, ཨསྶམཎོསི, ཨསཀྱཔུཏྟིཡོསཱི’’ཏིཨཱདཱིཧི ཝཙནེཧི སཡཾ ཙོདེནྟོཏི ཨཏྠོ. ཨེཝཾ ཙོདེནྟསྶ ཝཱཙཱཡ ཝཱཙཱཡ སངྒྷཱདིསེསོ. ཨམཱུལནྟིམཝཏྠུནཱཏི ཡཾ ཙོདཀེན ཙུདིཏཀམྷི པུགྒལེ ཨདིཊྛཾ ཨསུཏཾ ཨཔརིསངྐིཏཾ, ཨིདཾ ཨེཏེསཾ དསྶནསཝནཔརིསངྐིཏསངྑཱཏཱནཾ མཱུལཱནཾ ཨབྷཱཝཏོ ནཱསྶ མཱུལནྟི ཨམཱུལཾ, ཨནྟིམཾ ཝཏྠུ ཡསྶ པཱརཱཛིཀསྶ ཏདིདཾ ཨནྟིམཝཏྠུ, ཨམཱུལཉྩ ཏཾ ཨནྟིམཝཏྠུ ཙེཏི ཨམཱུལནྟིམཝཏྠུ, ཏེན ཨམཱུལནྟིམཝཏྠུནཱ, བྷིཀྑུནོ ཨནུརཱུཔེསུ ཨེཀཱུནཝཱིསཏིཡཱ པཱརཱཛིཀེསུ ཨཉྙཏརེནཱཏི ཨཏྠོ. ཙོདཱཔཡནྟི ཙོདཱཔཡནྟོ, ཏསྶ སམཱིཔེ ཋཏྭཱ ¶ ཨཉྙཾ བྷིཀྑུཾ ཨཱཎཱཔེཏྭཱ ཙོདཱཔེནྟོ ཏསྶ ཨཱཎཏྟསྶ ཝཱཙཱཡ ཝཱཙཱཡ གརུཾ ཕུསེཏི ཨཏྠོ. སུཎམཱནནྟི ཨིམིནཱ པརམྨུཁཱ དཱུཏེན ཝཱ པཎྞེན ཝཱ ཙོདེནྟསྶ ན རུཧཏཱིཏི དཱིཔིཏཾ ཧོཏི. པརམྨུཁཱ པན སཏྟཧི ཨཱཔཏྟིཀྑནྡྷེཧི ཝདནྟསྶ དུཀྐཊཾ. ཡཾ ཙོདེཏི, ཏསྶ ཨུཔསམྤནྣོཏི སངྑྱཱུཔགམནཾ, ཏསྨིཾ སུདྡྷསཉྙིཏཱ, ཡེན པཱརཱཛིཀེན ཙོདེཏི, ཏསྶ དིཊྛཱདིཝསེན ཨམཱུལཀཏཱ, ཙཱཝནཱདྷིཔྤཱཡེན སམྨུཁཱ ཙོདནཱ, ཏསྶ ཏངྑཎཝིཛཱནནནྟི ཨིམཱནེཏྠ པཉྩ ཨངྒཱནི. ཨམཱུལཀསིཀྑཱཔདཾ.

༡༦. ཨིདཱནི ¶ ཨཉྙབྷཱགིཡཾ དསྶེཏུཾ ‘‘ལེསམཏྟ’’ནྟིཨཱདིམཱཧ. ཏཏྠ ལེསམཏྟམུཔཱདཱཡཱཏི ཛཱཏིནཱམགོཏྟལིངྒཱཔཏྟིཔཏྟཙཱིཝརཱུཔཛ྄ཛྷཱཡཱཙརིཡསེནཱསནལེསསངྑཱཏེསུ དསསུ ལེསེསུ ཡོ ཏསྨིཾ པུགྒལེ དིསྶཏི, ཏཾ ལེསམཏྟཾ ཨུཔཱདཱཡ ནིསྶཱཡ བྷིཀྑུཾ བྲཧྨཙརིཡཱ ཙཱཝེཏུཀཱམོ ཨམཱུལནྟིམཝཏྠུནཱ སུཎམཱནཾ བྷིཀྑུཾ ཙོདེནྟོ གརུཾ ཕུསེཏི ཨཏྠོ. ཀཐཾ? ཨཉྙོ ཁཏྟིཡཛཱཏིཀོ ཨིམིནཱ ཙོདཀེན པཱརཱཛིཀཾ དྷམྨཾ ཨཛ྄ཛྷཱཔཛྫནྟོ དིཊྛོ ཧོཏི, སོ ཨཉྙཾ ཨཏྟནོ ཝེརིཾ ཁཏྟིཡཛཱཏིཀཾ བྷིཀྑུཾ པསྶིཏྭཱ ཏཾ ཁཏྟིཡཛཱཏིལེསཾ གཧེཏྭཱ ཨེཝཾ ‘‘ཁཏྟིཡོ མཡཱ དིཊྛོ པཱརཱཛིཀཾ དྷམྨཾ ཨཛ྄ཛྷཱཔཛྫནྟོ, ཏྭཾ ཁཏྟིཡོ པཱརཱཛིཀཾ དྷམྨཾ ཨཱཔནྣོསཱི’’ཏི ཝཱ ‘‘ཏྭཾ སོ ཁཏྟིཡོ, ནཱཉྙོ, པཱརཱཛིཀཾ དྷམྨཾ ཨཛ྄ཛྷཱཔནྣོསཱི’’ཏི ཝཱ ཙོདེཏི, ཨེཝཾ ནཱམལེསཱདཡོཔི ཝེདིཏབྦཱ. ཨངྒཱནི པནེཏྠ ཨནནྟརསདིསཱནི. ཨཉྙབྷཱགིཡསིཀྑཱཔདཾ.

གརུཀཱཔཏྟིནིདྡེསཝཎྞནཱ ནིཊྛིཏཱ.

༡༧. ཨིདཱནི ཙཱིཝརཝིདྷིཾ དསྶེཏུཾ ‘‘ཝིཀཔྤན’’ནྟྱཱདིམུདྡྷཊཾ. ཡོ བྷིཀྑུ ཨཀཱལཙཱིཝརཾ ཝིཀཔྤནཉྩ ཨདྷིཊྛཱནཉྩ ཨཀཏྭཱ དསཱཧཾ ཨཏིཀྐཱམེཏི, ཏསྶ བྷིཀྑུནོ ནིསྶགྒིཡཾ སིཡཱཏི པིཎྜཏྠོ. ཏཏྠ ཨཀཱལཙཱིཝརནྟི ཨཀཱལེ ཙཱིཝརཾ, ཁོམཾ ཀཔྤཱསིཀཾ ཀོསེཡྻཾ ཀམྦལཾ སཱཎཾ བྷངྒནྟི ཛཱཏིཏོ ཚ ཙཱིཝརཱནི, དུཀཱུལཾ པཊྚུཎྞཾ སོམཱརཔཊྚཾ ཙཱིནཔཊྚཾ ཨིདྡྷིཛཾ དེཝདིནྣནྟི ཨིམཱནི པན ཚ ཨནུལོམཙཱིཝརཱནི. ཏེསུ དུཀཱུལཾ སཱཎསྶ ཨནུལོམཾ ཝཱཀམཡཏྟཱ. པཊྚུཎྞཱདཱིནི ¶ ཏཱིཎི ཀོསེཡྻསྶ ཨནུལོམཱནི པཱཎཀེཧི ཀཏསུཏྟམཡཏྟཱ. ཨིདྡྷིཛཱདཱིནི དྭཡཱནི ཁོམཱདཱིནཾ ཨནུལོམཱནི ཏེསམཉྙཏརབྷཱཝཏོ ¶ . ཨིམེསཾ ཚནྣཾ ཙཱིཝརཱནཾ ཨཉྙཏརཾ ཨཀཱལཙཱིཝརཾ.

ཝིཀཔྤནམདྷིཊྛཱནནྟི ཨེཏྠ པན ཝིཀཔྤནཱུཔགཾ ཨདྷིཊྛཱནཱུཔགཉྩ ཨེཝཾ ཝེདིཏབྦཾ. ཏཏྲཱཡཾ པཱལི༹ – ‘‘ཨནུཛཱནཱམི, བྷིཀྑཝེ, ཨཱཡཱམེན ཨཊྛངྒུལཾ སུགཏངྒུལེན ཙཏུརངྒུལཝིཏྠཏཾ པཙྪིམཙཱིཝརཾ ཝིཀཔྤེཏུ’’ནྟི (མཧཱཝ. ༣༥༨). མཛ྄ཛྷིམསྶ པུརིསསྶ དཱིགྷསོ དྭེ ཝིདཏྠིཡོ, ཏིརིཡཾ ཝིདཏྠི. དྭེ ཝིཀཔྤནཱ སམྨུཁཱཝིཀཔྤནཱ ཙ པརམྨུཁཱཝིཀཔྤནཱ ཙ. ཀཐཾ? ‘‘ཨིམཾ ཙཱིཝརཾ ཏུཡ྄ཧཾ ཝིཀཔྤེམཱི’’ཏི ཝཏྟབྦཾ, ཨཡཾ སམྨུཁཱཝིཀཔྤནཱ. ‘‘མཡ྄ཧཾ སནྟཀཾ པརིབྷུཉྫ ཝཱ ཝིསྶཛྫེཧི ཝཱ ཡཐཱཔཙྩཡཾ ཝཱ ཀརོཧཱི’’ཏི, ཨེཀསྶ སནྟིཀེ ‘‘ཨིམཾ ཙཱིཝརཾ ཏིསྶསྶ བྷིཀྑུནོ ཝིཀཔྤེམཱི’’ཏི ཝཏྟབྦཾ, ཨཡཾ ཨཔརཱཔི སམྨུཁཱཝིཀཔྤནཱ. ཏེན བྷིཀྑུནཱ ‘‘ཏིསྶསྶ བྷིཀྑུནོ སནྟཀཾ པརིབྷུཉྫ ཝཱ ཝིསྶཛྫེཧི ཝཱ ཡཐཱཔཙྩཡཾ ཝཱ ཀརོཧཱི’’ཏི, ‘‘ཨིམཾ ཙཱིཝརཾ ཏུཡ྄ཧཾ ཝིཀཔྤནཏྠཱཡ དམྨཱི’’ཏི ཝཏྟབྦཾ, ཏེན ཝཏྟབྦོ ‘‘ཀོ ཏེ མིཏྟོ ཝཱ སནྡིཊྛོ ཝཱ སམྦྷཏྟོ ཝཱ’’ཏི, ཏཏོ ཨིཏརེན ‘‘ཏིསྶོ བྷིཀྑཱུ’’ཏི ཝཏྟབྦཾ, པུན ཏེན ‘‘ཨཧཾ ཏིསྶསྶ བྷིཀྑུནོ དམྨཱི’’ཏི ཝཏྟབྦཾ, ཨཡཾ པརམྨུཁཱཝིཀཔྤནཱ. ‘‘ཏིསྶསྶ བྷིཀྑུནོ སནྟཀཾ པརིབྷུཉྫ ཝཱ ཝིསྶཛྫེཧི ཝཱ ཡཐཱཔཙྩཡཾ ཝཱ ཀརོཧཱི’’ཏི ཝུཏྟེ པཙྩུདྡྷཱརོ ནཱམ ཧོཏི. བཧུཀེ ‘‘ཨིམཱནཱི’’ཏི, ཨཧཏྠཔཱསེ ‘‘ཨེཏཾ, ཨེཏཱནཱི’’ཏི ཝཱ. ཨེཝཾ ཝིཀཔྤནཉྩ ཨཀཏྭཱཏི ཨཏྠོ.

ཏིཙཱིཝརསྶ པན པམཱཎཾ ཨུཀྐཊྛཔརིཙྪེདེན སུགཏཙཱིཝརཏོ ཨཱུནཀཾ ཝཊྚཏི, ལཱམཀཔརིཙྪེདེན སངྒྷཱཊིཡཱ, ཨུཏྟརཱསངྒསྶ ཙ དཱིགྷཏོ མུཊྛིཔཉྩཀཾ, ཏིརིཡཾ མུཊྛིཏྟིཀཾ, ཨནྟརཝཱསཀོ དཱིགྷཏོ མུཊྛིཔཉྩཀོ, ཏིརིཡཾ དྭིཧཏྠོཔི ཨཌྜྷཏེཡྻོ ཝཱ ཝཊྚཏི. ཝུཏྟཔྤམཱཎཏོ ཨདྷིཀཉྩ ཨཱུནཀཉྩ ‘‘པརིཀྑཱརཙོལ༹’’ནྟི ཨདྷིཊྛཱཏབྦཾ. དྭེ ཙཱིཝརསྶ ཨདྷིཊྛཱནཱ ཀཱཡེན ཝཱ ཨདྷིཊྛེཏི, ཝཱཙཱཡ ཝཱ ཨདྷིཊྛེཏི. ཏིཙཱིཝརཾ ཨདྷིཊྛཧནྟེན རཛིཏྭཱ ¶ ཀཔྤབིནྡུཾ དཏྭཱ པུརཱཎསངྒྷཱཊིཾ ‘‘ཨིམཾ སངྒྷཱཊིཾ པཙྩུདྡྷརཱམཱི’’ཏི པཙྩུདྡྷརིཏྭཱ ནཝཾ སངྒྷཱཊིཾ ཧཏྠེན གཧེཏྭཱ ‘‘ཨིམཾ སངྒྷཱཊིཾ ཨདྷིཊྛཱམཱི’’ཏི ཙིཏྟེན ཨཱབྷོགཾ ཀཏྭཱ ཀཱཡཝིཀཱརཾ ཀརོནྟེན ཀཱཡེན ཨདྷིཊྛཱཏབྦཱ, ཨིདཾ ཀཱཡེན ཨདྷིཊྛཱནཾ. ཏཾ ཡེན ཀེནཙི སརཱིརཱཝཡཝེན ཨཕུསནྟསྶ ན ཝཊྚཏི. ཝཱཙཱཡ ཨདྷིཊྛཱནཾ པན ཝཙཱིབྷེདཾ ཀཏྭཱ ཝཱཙཱཡ ཨདྷིཊྛཱཏབྦཾ, སཙེ ཧཏྠཔཱསེ ‘‘ཨིམཾ སངྒྷཱཊིཾ ཨདྷིཊྛཱམཱི’’ཏི, སཙེ ཨཧཏྠཔཱསེ ཋཔིཏཊྛཱནཾ སལླཀྑེཏྭཱ ‘‘ཨེཏཾ སངྒྷཱཊིཾ ཨདྷིཊྛཱམཱི’’ཏི ཝཱཙཱ བྷིནྡིཏབྦཱ ¶ . ཨེས ནཡོ ཨུཏྟརཱསངྒེ, ཨནྟརཝཱསཀེ ཙ. ཏིཙཱིཝརཱདཱིནི སབྦཱནི ཨེཀཏོ ཀཏྭཱ ‘‘ཨིམཱནི ཙཱིཝརཱནི པརིཀྑཱརཙོལཱ༹ནི ཨདྷིཊྛཱམཱི’’ཏི ཨདྷིཊྛཱཏུམྤི ཝཊྚཏཱིཏི. ཨེཝཾ ཨདྷིཊྛཱནཉྩ ཨཀཏྭཱཏི ཨཏྠོ.

དས ཨཧཱནི དསཱཧཾ. ཨཏིམཱཔེཏཱིཏི ཨཏིཀྐཱམེཏི. ཏསྶཱཏི ཏསྶ བྷིཀྑུནོ. ནིསྶགྒིཡནྟི ནིསྶཛྫནཾ ནིསྶགྒིཡཾ, པུབྦབྷཱགེ ཀཏྟབྦསྶ ཝིནཡཀམྨསྶེཏཾ ནཱམཾ, ནིསྶགྒིཡམསྶ ཨཏྠཱིཏི ནིསྶགྒིཡཾ, ཀིཾ ཏཾ? པཱཙིཏྟིཡཾ, ཏཾ ཨཏིཀྐཱམཡཏོ སཧནིསྶགྒིཡཝིནཡཀམྨཾ པཱཙིཏྟིཡཾ སིཡཱ, ཨཡམེཏྠ ཨཏྠོ. ཏཾ པནེཏཾ ཙཱིཝརཾ ཡཾ དིཝསཾ ཨུཔྤནྣཾ, ཏསྶ ཡོ ཨརུཎོ, སོ ཨུཔྤནྣདིཝསནིསྶིཏོ, ཏསྨཱ ཙཱིཝརུཔྤཱདདིཝསེན སདྡྷིཾ ཨེཀཱདསེ ཨརུཎུགྒམནེ དསཱཧཱཏིཀྐམིཏཾ ཧོཏཱིཏི. ཙཱིཝརསྶ ཨཏྟནོ སནྟཀཏཱ, ཛཱཏིཔྤམཱཎཡུཏྟཏཱ, ཚིནྣཔལིབོདྷབྷཱཝོ, ཨཏིརེཀཙཱིཝརཏཱ, དསཱཧཱཏིཀྐམོཏི ཨིམཱནེཏྠ པཉྩ ཨངྒཱནི. པཋམཀཐིནསིཀྑཱཔདཾ.

༡༨. ཨིདཱནི དུཏིཡཾ དསྶེཏུཾ ‘‘བྷིཀྑུསམྨུཏིཡཱ’’ཏྱཱདིམཱརདྡྷཾ. ཡོ བྷིཀྑུསམྨུཏིཾ ཝཛྫེཏྭཱ ཀཱལཉྩ ཝིནཱ ཨདྷིཊྛིཏཾ ཏིཙཱིཝརཾ ཨེཀཱཧཾ ཨཏིཀྐམཱཔེཏི, ཏསྶ ནིསྶགྒིཡཾ སིཡཱཏི སམྦནྡྷོ. ཏཏྠ བྷིཀྑུསམྨུཏིཡཱཉྙཏྲཱཏི ཡཾ སངྒྷོ གིལཱནསྶ བྷིཀྑུནོ ཏིཙཱིཝརེན ཝིཔྤཝཱསསམྨུཏིཾ དེཏི ¶ , ཏཾ ཋཔེཏྭཱ. ཏིཙཱིཝརམདྷིཊྛིཏནྟི ཀརཎཏྠེ ཨུཔཡོགཝཙནཾ, ཏེན ཏིཙཱིཝརཱདྷིཊྛཱནནཡེན ཨདྷིཊྛིཏེསུ སངྒྷཱཊིཨཱདཱིསུ ཡེན ཀེནཙི ཙཱིཝརེན. ཨེཀཱཧནྟི ཨེཀརཏྟཾ. ཨཏིམཱཔེཏཱིཏི ཝིཔྤཝསཏི, ཝིཡུཏྟོ ཝསཏཱིཏི ཨཏྠོ. ཏསྶ ཨལདྡྷསམྨུཏིཀསྶ བྷིཀྑུནོ ཨེཀརཏྟམྤི ཙཱིཝརེན ཝིཔྤཝཱསཏོ ནིསྶགྒིཡཾ པཱཙིཏྟིཡཾ སིཡཱཏི ཨཏྠོ. སམཡཾ ཝིནཱཏི ཙཱིཝརཀཱལཾ ཝཛྫེཏྭཱ. ཨདྷིཊྛིཏཙཱིཝརཏཱ, ཨནཏྠཏཀཐིནཏཱ, ཨལདྡྷསམྨུཏིཏཱ, རཏྟིཝིཔྤཝཱསོཏི ཨིམཱནེཏྠ ཙཏྟཱརི ཨངྒཱནི. དུཏིཡཀཐིནསིཀྑཱཔདཾ.

༡༩. ཨིདཱནི པུརཱཎཙཱིཝརཾ དསྶེཏུཾ ‘‘ཨཉྙཱཏིཀཱ’’ཏྱཱདི ཨཱརདྡྷཾ. ཏཏྠ ཨཉྙཱཏིཀཱཏི ཨཉྙཱཏིཀཱཡ ‘‘པཊིསངྑཱ ཡོནིསོ’’ཏིཨཱདཱིསུ ཝིཡ, ཨཉྙཱཏིཀཱཡ ནེཝ མཱཏུསམྦནྡྷེན ན པིཏུསམྦནྡྷེན སམྦདྡྷཱཡཱཏི ཝུཏྟཾ ཧོཏི. བྷིཀྑུནིཡཱཏི ཨཊྛཝཱཙིཀཀམྨེན ཨུཔསམྤནྣཱཡ. ཨཱཀོཊཱཔེཏཱིཏི པཧརཱཔེཏི. ཏནྟི ནིསྶགྒིཡཾ པཱཙིཏྟིཡཾ བྷཝེཡྻཱཏི ཨཏྠོ. པུརཱཎཙཱིཝརཏཱ, ཨུཔཙཱརེ ¶ ཋཏྭཱ ཨཉྙཱཏིཀཱཡ བྷིཀྑུནིཡཱ ཨཱཎཱཔནཾ, ཏསྶཱ དྷོཝནཱདཱིནི ཙཱཏི ཨིམཱནེཏྠ ཏཱིཎི ཨངྒཱནི. པུརཱཎཙཱིཝརསིཀྑཱཔདཾ.

༢༠. ཀིཉྩི མཱུལཀནྟི ཀིཉྩི པཱབྷཏཾ. ཙཱིཝརཱདཱནེཏི ཙཱིཝརསྶ ཨཱདཱནེ ཙཱིཝརཔྤཊིགྒཧཎེ. ཝིཀཔྤནཱུཔགཙཱིཝརཏཱ, པཱརིཝཏྟཀཱབྷཱཝོ, ཨཉྙཱཏིཀཱཡ ཧཏྠཏོ གཧཎནྟི ཨིམཱནེཏྠ ཏཱིཎི ཨངྒཱནི. ཙཱིཝརཔྤཊིགྒཧཎསིཀྑཱཔདཾ.

༢༡. ཨཔྤཝཱརིཏནྟི ‘‘ཝདེཡྻཱཐ, བྷནྟེ, ཡེན ཨཏྠོ’’ཏི ཨིཙྪཱཔིཏཾ ཨིཙྪཾ རུཙིཾ ཨུཔྤཱདིཏཾ, ན པཝཱརིཏནྟི ཨཔྤཝཱརིཏཾ. ཝིཉྙཱཔེནྟསྶཱཏི ཡཱཙནྟསྶ. ཨཉྙཏྲ སམཡཱཏི ནཊྛཙཱིཝརཀཱལཾ ཋཔེཏྭཱ. ཝིཀཔྤནཱུཔགཙཱིཝརཏཱ, སམཡཱབྷཱཝོ, ཨཉྙཱཏཀཝིཉྙཏྟི, ཏཱཡ ཙ པཊིལཱབྷོཏི ཨིམཱནེཏྠ ཙཏྟཱརི ཨངྒཱནི. ཨཉྙཱཏཀཝིཉྙཏྟིསིཀྑཱཔདཾ.

༢༢. རཛཏནྟི ¶ རཱུཔིཡཾ. ཛཱཏརཱུཔནྟི སུཝཎྞཾ. མཱསཀནྟི ཏཡོ མཱསཀཱ ལོཧམཱསཀོ དཱརུམཱསཀོ ཛཏུམཱསཀོཏི. ཏཏྠ ལོཧམཱསཀོཏི ཏམྦལོཧཱདཱིཧི ཀཏམཱསཀོ. དཱརུམཱསཀོཏི སཱརདཱརུནཱ ཝཱ ཝེལུ༹པེསིཀཱཡ ཝཱ ཨནྟམསོ ཏཱལཔཎྞེནཔི རཱུཔཾ ཚིནྡིཏྭཱ ཀཏམཱསཀོ. ཛཏུམཱསཀོཏི ལཱཁཱཡ ཝཱ ནིཡྻཱསེན ཝཱ རཱུཔཾ སམུཊྛཱཔེཏྭཱ ཀཏམཱསཀོ. ཀཧཱཔཎནྟི སུཝཎྞམཡཾ ཝཱ རཱུཔིཡམཡཾ ཝཱ པཱཀཏིཀཾ ཝཱ. གཎྷེཡྻཱཏི ཨཏྟནོ ཨཏྠཱཡ དཱིཡམཱནཾ ཝཱ ཀཏྠཙི ཋིཏཾ ཝཱ ནིཔྤརིགྒཧཾ དིསྭཱ སཡཾ གཎྷེཡྻ. གཎྷཱཔེཡྻཱཏི ཏདེཝ ཨཉྙེན གཱཧཱཔེཡྻ. ནིསྶགྒཱིཏི གཧཎཱདཱིསུ ཡཾ ཀིཉྩི ཀརོནྟསྶ ཨགྷནབདྡྷེསུ ཝཏྠུགཎནཱཡ ནིསྶགྒི སིཡཱཏི ཨཏྠོ. སཱདིཡེཡྻ ཝཱཏི ཀཱཡཝཱཙཱཧི ཨཔྤཊིཀྑིཔིཏྭཱ ཙིཏྟེན ཨདྷིཝཱསེཡྻ. ཛཱཏརཱུཔརཛཏབྷཱཝོ, ཨཏྟུདྡེསིཀཏཱ, གཧཎཱདཱིསུ ཨཉྙཏརབྷཱཝོཏི ཨིམཱནེཏྠ ཏཱིཎི ཨངྒཱནི. རཱུཔིཡཔྤཊིགྒཧཎསིཀྑཱཔདཾ.

༢༣. རཛཏཱདིཙཏུབྦིདྷཾ ཨཀཔྤིཡཾ ཀཔྤིཡེནཱཔི པརིཝཏྟེཡྻ སཧདྷམྨིཀེ ཋཔེཏྭཱ, ནིསྶགྒིཡཾ སིཡཱཏི སམྦནྡྷོ. ཏཏྠ ཨཀཔྤིཡནྟི ཨཀཔྤིཡཝཏྠུཾ. ཀཔྤིཡེནཱཏི ཀཔྤིཡཝཏྠུནཱ. སཧདྷམྨིཀེཏི བྷིཀྑུབྷིཀྑུནིསཱམཎེརསཱམཎེརིསིཀྑམཱནསངྑཱཏེ པཉྩ སཧདྷམྨིཀེ. རཱུཔིཡབྷཱཝོ, པརིཝཏྟནཉྩཱཏི ཨིམཱནེཏྠ དྭེ ཨངྒཱནི. རཱུཔིཡཔརིཝཏྟནསིཀྑཱཔདཾ.

༢༤. ‘‘ཨིམཾ ¶ པཏྟཾ ཏུཡ྄ཧཾ ཝིཀཔྤེམཱི’’ཏིཨཱདིནཱ ཝིཀཔྤནཉྩ ‘‘ཨིམཾ པཏྟཾ ཨདྷིཊྛཱམཱི’’ཏིཨཱདིནཱ ཨདྷིཊྛཱནཉྩ ཨཀཏྭཱཏི ཨཏྠོ. པམཱཎིཀནྟི ཨེཏྠཱཡཾ ཝིནིཙྪཡོ – ཨནུཔཧཏཔུརཱཎསཱལིཏཎྜུལཱནཾ སུཀོཊྚིཏཔརིསུདྡྷཱནཾ དྭེ མགདྷནཱལི༹ཡོ གཧེཏྭཱ ཏེཧི ཏཎྜུལེཧི ཨནུཏྟཎྜུལམཀིལིནྣམཔིཎྜིཏཾ སུཝིསདཾ ཀུནྡམཀུལ༹རཱསིསདིསཾ ཨཝསྶཱཝིཏོདནཾ པཙིཏྭཱ ནིརཝསེསཾ པཏྟེ པཀྑིཔིཏྭཱ ཏསྶ ཨོདནསྶ ¶ ཙཏུཏྠབྷཱགཔྤམཱཎོ ནཱཏིགྷནོ ནཱཏིཏནུཀོ ཧཏྠཧཱརིཡོ སབྦསམྦྷཱརསངྑཏོ མུགྒསཱུཔོ པཀྑིཔིཏབྦོ, ཏཏོ ཨཱལོཔསྶ ཨནུརཱུཔཾ ཡཱཝཙརིམཱལོཔཔྤཧོནཀཾ མཙྪམཾསཱདིབྱཉྫནཾ པཀྑིཔིཏབྦཾ. སཔྤིཏེལཏཀྐརསཀཉྫིཀཱདཱིནི པན ཨགཎནཱུཔགཱནི ཧོནྟི. ཏཱནི ཧི ཨོདནགཏིཀཱནི ནེཝ ཧཱཔེཏུཾ, ན ཝཌྜྷེཏུཾ སཀྐོནྟི. ཨེཝམེཏཾ སབྦམྤི པཀྑིཏྟཾ སཙེ པན པཏྟསྶ མུཁཝཊྚིཡཱ ཧེཊྛིམརཱཛིསམཾ ཏིཊྛཏི, སུཏྟེན ཝཱ ཧཱིརེན ཝཱ ཚིནྡནྟསྶ སུཏྟསྶ ཝཱ ཧཱིརསྶ ཝཱ ཧེཊྛིམནྟཾ ཕུསཏི, ཨཡཾ ཨུཀྐཊྛོ ནཱམ པཏྟོ. སཙེ ཏཾ རཱཛིཾ ཨཏིཀྐམྨ ཐཱུཔཱིཀཏཾ ཏིཊྛཏི, ཨཡཾ ཨུཀྐཊྛོམཀོ ནཱམ པཏྟོ. སཙེ ཏཾ རཱཛིཾ ན སམྤཱཔུཎཱཏི, ཨནྟོགཏམེཝ ཧོཏི, ཨཡཾ ཨུཀྐཊྛུཀྐཊྛོ ནཱམ. ཨུཀྐཊྛཏོ ཨུཔཌྜྷཔྤམཱཎོ མཛ྄ཛྷིམོ. མཛ྄ཛྷིམཏོ ཨུཔཌྜྷཔྤམཱཎོ ཨོམཀོ. ཏེསམྤི ཝུཏྟནཡེནེཝ པབྷེདོ ཝེདིཏབྦོ. ཨིཙྩེཏེསུ ཨུཀྐཊྛུཀྐཊྛོ ཙ ཨོམཀོམཀོ ཙཱཏི དྭེ ཨཔཏྟཱ, སེསཱ སཏྟ པཏྟཱ པམཱཎཡུཏྟཱ ནཱམཱཏི ཨེཝཾ པམཱཎེན ཡུཏྟོ པམཱཎིཀོ, ཏཾ པམཱཎིཀཾ. པཏྟནྟི སཏྟསུ པཏྟེསུ ཨཉྙཏརཾ པཏྟཾ. པཏྟསྶ ཨཏྟནོ སནྟཀཏཱ, པམཱཎཡུཏྟཏཱ, ཨདྷིཊྛཱནཱུཔགཏཱ, ཨཏིརེཀཔཏྟཏཱ, དསཱཧཱཏིཀྐམོཏི ཨིམཱནེཏྠ པཉྩ ཨངྒཱནི. པཋམཔཏྟསིཀྑཱཔདཾ.

༢༥. ཡོ བྷིཀྑུ པཉྩབནྡྷནཏོ ཨཱུནཔཏྟེ སཏི པརཾ པན ནཝཾ པཏྟཾ ཝིཉྙཱཔེཏི, ཏསྶཔི བྷིཀྑུནོ ནིསྶགྒིཡཾ སིཡཱཏི སམྦནྡྷོ. ཏཏྠ པརནྟི ཨཉྙཾ, ‘‘ནཝཾ པཏྟ’’ནྟིམིནཱ ཏུལྱཱདྷིཀརཎཾ. ཨདྷིཊྛཱནཱུཔགཔཏྟསྶ ཨཱུནཔཉྩབནྡྷནཏཱ, ཨཏྟུདྡེསིཀཏཱ, ཀཏཝིཉྙཏྟི, ཏཱཡ ཙ པཊིལཱབྷོཏི ཨིམཱནེཏྠ ཙཏྟཱརི ཨངྒཱནི. ཨཱུནཔཉྩབནྡྷནསིཀྑཱཔདཾ.

༢༦. ཡོ སཔྤིཏེལཱདིཀཾ པན བྷེསཛྫཾ པཊིགྒཧེཏྭཱ སཏྟཱཧཔརམཾ སནྣིདྷིཀཱརཀཾ བྷུཉྫནྟོ སཏྟཱཧཾ ཨཏིཀྐཱམེཏི ¶ , ཏསྶ ནིསྶགྒིཡཾ སིཡཱཏི ཨཏྠོ. ཏཏྠ སཔྤིཏེལཱདིཀནྟི ཨེཏྠ ཨཱདི-སདྡོ ནཝནཱིཏམདྷུཕཱཎིཏཾ སངྒཎྷཱཏི. ཏཏྠ སཔྤི ནཱམ གཝཱདཱིནཾ སཔྤི, ཡེསཾ མཾསཾ ཀཔྤཏི, ཏེསཾ སཔྤི, ཏཐཱ ནཝནཱིཏཾ. ཏེལཾ ནཱམ ཏིལསཱསཔམདྷུཀཨེརཎྜཝསཱདཱིཧི ནིབྦཏྟཾ. མདྷུ ནཱམ ¶ མཀྑིཀཱམདྷུམེཝ. ཨུཙྪུརསཾ ཨུཔཱདཱཡ པན ཨཔཀྐཱ ཝཱ ཨཝཏྠུཀཔཀྐཱ ཝཱ སབྦཱཔི ཨུཙྪུཝིཀཏི ཕཱཎིཏནྟི ཝེདིཏབྦཾ. བྷེསཛྫཝིདྷཱནསིཀྑཱཔདཾ.

༢༧. བྷིཀྑུསྶ ཙཱིཝརཾ དཏྭཱ པུན ཏཾ ཙཱིཝརཾ སཀསཉྙཱཡ ཨཙྪིནྡནྟསྶ ཝཱ ཨཙྪིནྡཱཔཡཏོཔི ཝཱ ནིསྶགྒིཡཾ སིཡཱཏི ཡོཛནཱ. ཏཏྠ དཏྭཱཏི ཝེཡྻཱཝཙྩཱདཱིནི པཙྩཱསཱིསམཱནོ དཏྭཱ. ཨཙྪིནྡནྟསྶཱཏི ཝེཡྻཱཝཙྩཱདཱིནི ཨཀརོནྟཾ དིསྭཱ བལཀྐཱརེན གཎྷནྟསྶ, ཏཐཱ ཨཙྪིནྡཱཔཡཏོཏི. ཝིཀཔྤནཱུཔགཙཱིཝརཏཱ, སཱམཾདིནྣཏཱ, སཀསཉྙིཏཱ, ཨུཔསམྤནྣཏཱ, ཀོདྷཝསེན ཨཙྪིནྡནཾ ཝཱ ཨཙྪིནྡཱཔནཾ ཝཱཏི ཨིམཱནེཏྠ པཉྩ ཨངྒཱནི. ཨཙྪིནྡནསིཀྑཱཔདཾ.

༢༨. ཨཔྤཝཱརིཏཾ ཨཉྙཱཏིཾ གཧཔཏིཾ སུཏྟཾ ཡཱཙིཏྭཱ ཉཱཏིཔྤཝཱརིཏེ ཝཛྫེཏྭཱ ཏནྟཝཱཡེཧི ཙཱིཝརཾ ཝཱཡཱཔེནྟསྶ ནིསྶགྒིཡཾ སིཡཱཏི པིཎྜཏྠོ. ཏཏྠ སུཏྟནྟི ཚབྦིདྷཾ ཁོམསུཏྟཱདིཀཾ ཝཱ ཏེསཾ ཨནུལོམཾ ཝཱ. ཡཱཙིཡཱཏི ཙཱིཝརཏྠཱཡ ཡཱཙིཏྭཱ. ཙཱིཝརཏྠཱཡ ཝིཉྙཱཔིཏསུཏྟཾ, ཨཏྟུདྡེསིཀཏཱ, ཨཀཔྤིཡཏནྟཝཱཡེན ཨཀཔྤིཡཝིཉྙཏྟིཡཱ ཝཱཡཱཔནནྟི ཨིམཱནེཏྠ ཏཱིཎི ཨངྒཱནི. སུཏྟཝིཉྙཏྟིསིཀྑཱཔདཾ.

༢༩. ཡོ བྷིཀྑུ སངྒྷསྶ པརིཎཏཾ ལཱབྷཾ ཛཱནནྟོ ཨཏྟནོ པརིཎཱམེཏི, ཏསྶ ནིསྶགྒིཡཾ སིཡཱཏི ཨཏྠོ. ཏཏྠ ཛཱནནྟི ཛཱནནྟོ. ལཱབྷནྟི ལབྷིཏབྦཾ ཙཱིཝརཱདིཝཏྠུཾ. པརིཎཏནྟི སངྒྷསྶ ནིནྣཾ སངྒྷསྶ པོཎཾ སངྒྷསྶ པབྦྷཱརཾ ཧུཏྭཱ ¶ ཋིཏཾ. ཨཏྟནོ པརིཎཱམེཏཱིཏི ‘‘མཡ྄ཧཾ དེཐཱ’’ཏིཨཱདཱིནི ཝདནྟོ ཨཏྟནི ནིནྣཾ ཀརོཏི. སངྒྷེ པརིཎཏབྷཱཝོ, ཏཾ ཉཏྭཱ ཨཏྟནོ པརིཎཱམནཾ, པཊིལཱབྷོཏི ཨིམཱནེཏྠ ཏཱིཎི ཨངྒཱནི. པརིཎཱམནསིཀྑཱཔདཾ.

ནིསྶགྒིཡནིདྡེསཝཎྞནཱ ནིཊྛིཏཱ.

༣༠. ཨིདཱནི ¶ པཱཙིཏྟིཡཾ དསྶེཏུཾ ‘‘སམྤཛཱནམུསཱཝཱདེ’’ཏྱཱདི ཨཱརདྡྷཾ. ཏཏྠ སམྤཛཱནམུསཱཝཱདེཏི ནིམིཏྟཏྠེ བྷུམྨཝཙནཾ, ཏསྨཱ ཡོ བྷིཀྑུ སམྤཛཱནནྟོ མུསཱ ཝདཏི, ཏསྶ ཏནྣིམིཏྟཾ ཏཾཧེཏུ ཏཔྤཙྩཡཱ པཱཙིཏྟིཡཾ ཨུདཱིརིཏནྟི ཨཏྠོ. བྷིཀྑུཉྩ ཨོམསནྟསྶཱཏི ཛཱཏིནཱམགོཏྟཀམྨསིཔྤཝཡཨཱབཱདྷལིངྒཀིལེསཱཔཏྟིཨཀྐོསེསུ བྷཱུཏེན ཝཱ ཨབྷཱུཏེན ཝཱ ཡེན ཀེནཙི མུཁསཏྟིནཱ བྷིཀྑུཾ ཨོཝིཛ྄ཛྷནྟསྶ བྷིཀྑུནོ པཱཙིཏྟིཡཾ ཨུདཱིརིཏནྟི ཨཏྠོ. པེསུཉྙཧརཎེཔི ཙཱཏི བྷིཀྑུསྶ པེསུཉྙཧརཎེ, ཛཱཏིཨཱདཱིཧི ཨཀྐོསཝཏྠཱུཧི བྷིཀྑུཾ ཨཀྐོསནྟསྶ བྷིཀྑུནོ སུཏྭཱ བྷིཀྑུནོ པིཡཀམྱཏཱཡ ཝཱ བྷེདཱདྷིཔྤཱཡེན ཝཱ ཡོ ཨཀྐུདྡྷོ, ཏསྶ བྷིཀྑུསྶ ཀཱཡེན ཝཱ ཝཱཙཱཡ ཝཱ པེསུཉྙཧརཎཝཙནེ པཱཙིཏྟིཡཾ ཨུདཱིརིཏནྟི ཨཏྠོ.

༣༡. སངྒཱིཏིཏྟཡམཱརུལ༹ྷཾ པིཊཀཏྟཡཾ དྷམྨཾ བྷིཀྑུཉྩ བྷིཀྑུནིཉྩ ཋཔེཏྭཱ ཨཉྙེན པུགྒལེན སདྡྷིཾ ཨེཀཏོ པདཾ པདཾ བྷཎནྟསྶ བྷིཀྑུནོ པདགཎནཱཡ པཱཙིཏྟིཡཾ ཨུདཱིརིཏནྟི སམུདཱཡཏྠོ.

༣༢. ཨནུཔསམྤནྣེནེཝཱཏི བྷིཀྑུཾ ཋཔེཏྭཱ ཨནྟམསོ པཱརཱཛིཀཝཏྠུབྷཱུཏེན ཏིརཙྪཱནགཏེནཱཔི སཧ ཏིརཏྟིཡཾ སཡིཏྭཱ ཙཏུཏྠདིཝསེ ཨཏྠངྒཏེ སཱུརིཡེ པུན སཧསེཡྻཱཡ ¶ པཱཙིཏྟི སིཡཱཏི སམྦནྡྷོ. ཏཏྠ སཧསེཡྻཱཡཱཏི སབྦཙྪནྣཔརིཙྪིནྣེ, ཡེབྷུཡྻེནཙྪནྣཔརིཙྪིནྣེ ཝཱ སེནཱསནེ པུབྦཱཔརིཡེན ཝཱ ཨེཀཀྑཎེ ཝཱ ཨེཀཏོ ནིསཛྫནཱཡ. ཏཏྠ ཚདནཾ ཨནཱཧཙྩ དིཡཌྜྷཧཏྠུབྦེདྷེན པཱཀཱརཱདིནཱ པརིཙྪིནྣམྤི སབྦཔརིཙྪིནྣམིཙྩེཝ ཝེདིཏབྦཾ.

༣༣. ཨེཀརཏྟམྤི ཨིཏྠིཡཱ སདྡྷིཾ སེཡྻཾ ཀཔྤཡཏོ ཏསྶ བྷིཀྑུནོཔི པཱཙིཏྟི སིཡཱཏི ཨཏྠོ. ཏཏྠ ཨིཏྠིཡཱཏི ཨནྟམསོ ཏདཧུཛཱཏཱཡཔི མནུསྶིཏྠིཡཱ. དེསེནྟསྶ ཝིནཱ ཝིཉྙུཾ, དྷམྨཉྩ ཚཔྤདུཏྟརིནྟི ཝིཉྙུཾ པུརིསཾ ཝིནཱ ཨིཏྠིཡཱ ཚཔྤདཏོ ཨུཏྟརིཾ དྷམྨཾ དེསེནྟསྶ བྷིཀྑུནོ པཱཙིཏྟི སིཡཱཏི ཨཏྠོ. ཏཏྠ ‘‘ཚཔྤདུཏྟརི’’ནྟི ཨེཏྠ ཨེཀོ གཱཐཱཔཱདོ ཨེཀཾ པདནྟི ཨེཝཾ སབྦཏྠ པདཔྤམཱཎཾ ཝེདིཏབྦཾ. ཚ པདཱནི ཚཔྤདཾ, ཚཔྤདཏོ ཨུཏྟརིཾ ཚཔྤདུཏྟརིཾ.

༣༤. བྷིཀྑུསམྨུཏིཾ ¶ ཋཔེཏྭཱ བྷིཀྑུནོ དུཊྛུལླཾ ཝཛྫཾ ཨབྷིཀྑུནོ ཝདནྟསྶ པཱཙིཏྟིཡཾ ཨུདཱིརིཏནྟི ཨཏྠོ. ཏཏྠ དུཊྛུལླནྟི ཨིདྷ སངྒྷཱདིསེསཾ ཨདྷིཔྤེཏཾ. བྷིཀྑུསམྨུཏིཡཱཏི ཡཾ སངྒྷོ ཨབྷིཎྷཱཔཏྟིཀསྶ བྷིཀྑུནོ ཨཱཡཏིཾ སཾཝརཏྠཱཡ ཨཱཔཏྟཱིནཉྩ ཀུལཱནཉྩ པརིཡནྟཾ ཀཏྭཱ ཝཱ ཨཀཏྭཱ ཝཱ ཏིཀྑཏྟུཾ ཨཔལོཀེཏྭཱ ཀཏིཀཾ ཀརོཏི, ཏཾ ཋཔེཏྭཱ. ཨབྷིཀྑུནོཏི ཨནུཔསམྤནྣསྶ. ཝདནྟསྶཱཏི ཨཱརོཙེནྟསྶ.

༣༥. ཡོ ཨཀཔྤིཡཾ པཐཝིཾ ཁཎེཡྻ ཝཱ ཁཎཱཔེཡྻ ཝཱ, ཏསྶ པཱཙིཏྟིཡཾ སིཡཱ. ཏཏྠ ཨཀཔྤིཡནྟི ཨུདྡྷནཔཙནཱདིཝསེན ཝཱ ཏཐཱ ཏཐཱ ཨདཌྜྷཱ ཝཱ ཛཱཏཔཐཝཱི ཝུཙྩཏི. སཱ ཏིཝིདྷཱ སུདྡྷམིསྶཔུཉྫཝསེན. ཏཏྠ སུདྡྷཔཐཝཱི ནཱམ པཀཏིཡཱ སུདྡྷཔཾསུ ཝཱ སུདྡྷམཏྟིཀཱ ཝཱ. མིསྶཔཐཝཱི ནཱམ ཡཏྠ པཾསུཏོ ཝཱ མཏྟིཀཏོ ཝཱ པཱསཱཎསཀྑརཀཐལམརུམྦཝཱལུཀཱསུ ཨཉྙཏརསྶ ཏཏིཡབྷཱགོ ཧོཏི. པུཉྫཔཐཝཱི ¶ ནཱམ ཨཏིརེཀཙཱཏུམཱསཾ ཨོཝཊྛོ པཾསུཔུཉྫོ ཝཱ མཏྟིཀཱཔུཉྫོ ཝཱ ཧོཏི. ཝུཏྟལཀྑཎེན པན མིསྶཀཔུཉྫོཔི པིཊྛིཔཱསཱཎེ ཋིཏསུཁུམརཛམྤི ཙ དེཝེ ཕུསཡནྟེ སཀིཾ ཙེ ཏིནྟཾ, ཙཱཏུམཱསཙྩཡེན ཏིནྟོཀཱསོ པུཉྫཔཐཝཱིསངྑམེཝ གཙྪཏི. ཡོ བྷིཀྑུ བྷཱུཏགཱམཾ ཝིཀོཔེཡྻ, ཏསྶ པཱཙིཏྟིཡཾ སིཡཱཏི སམྦནྡྷོ. ཏཏྠ བྷཱུཏགཱམནྟི བྷཝནྟི, ཨབྷཝུཾ ཙཱཏི བྷཱུཏཱ, ཛཱཡནྟི ཝཌྜྷནྟི ཛཱཏཱ ཝཌྜྷིཏཱ ཙཱཏི ཨཏྠོ, གཱམོཏི རཱསི, བྷཱུཏཱནཾ གཱམོ, བྷཱུཏཱ ཨེཝ ཝཱ གཱམོཏི བྷཱུཏགཱམོ, པཏིཊྛིཏཧརིཏཏིཎརུཀྑཱདཱིནམེཏཾ ཨདྷིཝཙནཾ. ཏཾ བྷཱུཏགཱམཾ. ཝིཀོཔེཡྻཱཏི ཚེདནབྷེདནཱདཱིནི ཀརེཡྻ.

༣༦. ཡོ བྷིཀྑུ སངྒྷིཀཾ མཉྩཱདིཾ ཨཛ྄ཛྷོཀཱསེ སནྠརཎཱདིཀཾ ཀཏྭཱ ཨཱཔུཙྪནཱདིཀཾ ཨཀཏྭཱ ཡཱཏི, ཏསྶ པཱཙིཏྟི སིཡཱཏི ཨཏྠོ. ཏཏྠ སངྒྷིཀནྟི སངྒྷསྶ སནྟཀཾ. མཉྩཱདིནྟི ཨེཏྠ ཨཱདི-སདྡེན པཱིཋབྷིསིཀོཙྪཱདིཾ སངྒཎྷཱཏི. སནྠརཎཱདིཀནྟི སནྠརཎཱདིཾ ཀཏྭཱ ཝཱ ཀཱརཱཔེཏྭཱ ཝཱ. ཨཱཔུཙྪནཱདིཀནྟི ཨཱཔུཙྪནཾ ཝཱ ཨུདྡྷརཎཾ ཝཱ ཨུདྡྷརཱཔནཾ ཝཱཏི ཨཏྠོ. ཡཱཏཱིཏི གཙྪཏི.

༣༧. ཡོ བྷིཀྑུ སངྒྷིཀཱཝསཐེ སེཡྻཾ སནྠརཎཱདིཀཾ ཀཏྭཱ ཨཱཔུཙྪནཱདིཀཾ ཨཀཏྭཱ ཡཱཏི, ཏསྶ བྷིཀྑུནོ པཱཙིཏྟི སིཡཱཏི ཨཏྠོ. ཏཏྠ སངྒྷིཀཱཝསཐེཏི སངྒྷསྶ སནྟཀེ ཨཱཝསཐེ ཝིཧཱརེ གབྦྷེ ཝཱ ཨཉྙསྨིཾ ཝཱ སབྦཔརིཙྪིནྣེ གུཏྟསེནཱསནེ. སེཡྻནྟི བྷིསི ཙིམིལིཀཱ པཱཝུརཎཾ ཨུཏྟརཏྠརཎཾ བྷཱུམཏྠརཎཾ ཏཊྚིཀཱ ཙམྨཀྑཎྜཾ ནིསཱིདནཾ པཙྩཏྠརཎཾ ཏིཎསནྠཱརོ ¶ པཎྞསནྠཱརོཏི ཨེཝམཱདིཀཾ. སནྠརཎཱདིཀནྟི ཏེསུ ཡེན ཀེནཙི ཨཏྠརཎཱདིཀཾ ཀཏྭཱ ཝཱ ཀཱརཱཔེཏྭཱ ཝཱ.

༣༨-༩. ཡོ པན བྷིཀྑུ ཛཱནཾ སཔྤཱཎཀཾ ཏོཡཾ པརིབྷུཉྫཡེ, ཏསྶ བྷིཀྑུནོ པཱཙིཏྟི སིཡཱཏི ཡོཛནཱ. ཏཏྠ ཛཱནཾ ¶ སཔྤཱཎཀནྟི ‘‘སཔྤཱཎཀམིད’’ནྟི དིསྭཱ ཝཱ སུཏྭཱ ཝཱ ཡེན ཀེནཙི ཨཱཀཱརེན ཛཱནནྟོ. ཏོཡནྟི ཨུདཀཾ. པརིབྷུཉྫཡེཏི པརིབྷུཉྫེཡྻ. ཡོ བྷིཀྑུ པཱརིཝཏྟཀཾ ཋཔེཏྭཱ ཨཉྙཱཏིཀཱཡ བྷིཀྑུནིཡཱ ཙཱིཝརཾ དེཏི, ཏསྶ བྷིཀྑུནོ པཱཙིཏྟི སིཡཱ. ཙཱིཝརཔྤཊིགྒཧཎསིཀྑཱཔདེ བྷིཀྑུ པཊིགྒཱཧཀོ ཨིདྷ བྷིཀྑུནཱི, ཨཡཾ ཝིསེསོ. ཨཉྙཱཏིཀཱཡ བྷིཀྑུནིཡཱ ཙཱིཝརཾ སིབྦཏོཔི ཏསྶ བྷིཀྑུནོ པཱཙིཏྟི སིཡཱཏི ཨཏྠོ. ཙཱིཝརནྟི ནིཝཱསནཔཱརུཔནཱུཔགཾ. སིབྦཏོཏི སཡཾ སིབྦནྟསྶ སཱུཙིཾ པཝེསེཏྭཱ ནཱིཧརཎེ པཡོགགཎནཱཡ པཱཙིཏྟི. སིབྦཱཔེནྟསྶ པན ‘‘སིབྦཱ’’ཏི ཝུཏྟོ སཙེཔི སབྦཾ སཱུཙིཀམྨཾ ནིཊྛཱཔེསི, ཨེཀམེཝ པཱཙིཏྟི, ཨཱཎཏྟསྶ པཡོགགཎནཱཡ པཱཙིཏྟི ཧོཏི. པཝཱརེཏྭཱན ཨཏིརིཏྟཾ ཨཀཱརེཏྭཱ བྷུཉྫཏོ པཱཙིཏྟི སིཡཱཏི ཨཏྠོ. ཏཏྲཱཡཾ ཝིནིཙྪཡོ – ཨོདནོ སཏྟུ ཀུམྨཱསོ མཙྪོ མཾསནྟི པཉྩནྣཾ བྷོཛནཱནཾ ཨཉྙཏརཾ སཱསཔམཏྟམྤི ཨཛ྄ཛྷོཧརིཏྭཱ བྷོཛནཾ པཊིཀྑེཔཾ ཀཏྭཱ ཨཉྙེན ཨིརིཡཱཔཐེན ‘‘ཨལམེཏཾ སབྦ’’ནྟི ཨཏིརིཏྟཾ ཨཀཱརེཏྭཱ པརིབྷུཉྫཏོ པཱཙིཏྟི ཧོཏཱིཏི.

༤༠. ཡོ བྷིཀྑུ ཨཱསཱདནཱཔེཀྑོ བྷུཏྟཱཝིཾ པཝཱརིཏཾ བྷིཀྑུཾ ‘‘ཧནྡ, བྷིཀྑུ, ཁཱད ཝཱ བྷུཉྫ ཝཱ’’ཏི ཨནཏིརིཏྟེན པཝཱརེཏི, བྷོཛནེ བྷུཏྟེ ཏསྶ པཱཙིཏྟིཡཾ ཨུདཱིརིཏནྟི ཨཏྠོ. ཏཏྠ ཨཱསཱདནཱཔེཀྑོཏི ཨཱསཱདནཾ ཙོདནཾ མངྐུཀརཎབྷཱཝཾ ཨཔེཀྑམཱནོ.

༤༡-༢. ཡོ བྷིཀྑུ སནྣིདྷིབྷོཛནཾ བྷུཉྫེཡྻ, ཏསྶ བྷིཀྑུནོ པཱཙིཏྟི སིཡཱཏི ཨཏྠོ. ཏཏྠ སནྣིདྷིབྷོཛནནྟི པཊིགྒཧེཏྭཱ ཨེཀརཏྟཾ ཝཱིཏིནཱམིཏབྷོཛནཾ. ཝིཀཱལེ ཡཱཝཀཱལིཀཾ བྷུཉྫཏོ ཝཱཔི པཱཙིཏྟི སིཡཱཏི ཡོཛནཱ. ཏཏྠ ཝིཀཱལེཏི ཝིགཏཀཱལེ, མཛ྄ཛྷནྷིཀཱཏིཀྐམཏོ པཊྛཱཡ ¶ ཡཱཝ ཨརུཎུགྒམནཱཏི ཨཏྠོ. ཡཱཝཀཱལིཀནྟི ཝནམཱུལཕལཱདིཀཾ ཨཱམིསབྷོཛནཾ. ཨགིལཱནོ བྷིཀྑུ པཎཱིཏཀཾ སཔྤིབྷཏྟཱདིཀམྤི ཝིཉྙཱཔེཏྭཱན བྷུཉྫེཡྻ, ཏསྶ བྷིཀྑུནོ པཱཙིཏྟི སིཡཱཏི ཡོཛནཱ. ཏཏྠ ཨགིལཱནོཏི ཀལླཀོ. པཎཱིཏཀནྟི སཔྤིཏེལམདྷུཕཱཎིཏམཙྪམཾསཁཱིརདདྷིསངྑཱཏེཧི སཾསཊྛཾ སཏྟདྷཉྙནིབྦཏྟཾ པཎཱིཏབྷོཛནཾ ¶ . ཡོ བྷིཀྑུ དནྟཀཊྛོདཀཾ ཝཛྫེཏྭཱ ཨཔྤཊིགྒཧིཏཀཾ བྷུཉྫེཡྻ, པཱཙིཏྟི སིཡཱཏི ཨཏྠོ. ཏཏྠ ཨཔྤཊིགྒཧིཏནྟི ཀཱཡེན ཝཱ ཀཱཡཔྤཊིབདྡྷེན ཝཱ གཎྷནྟསྶ ཧཏྠཔཱསེ ཋཏྭཱ ཀཱཡཀཱཡཔྤཊིབདྡྷནིསྶགྒིཡཱནཾ ཨཉྙཏརེན ན དིནྣཾ ཨཔྤཊིགྒཧིཏཾ ནཱམ.

༤༣. ཡོ བྷིཀྑུ ཏིཏྠིཡསྶ སཧཏྠཏོ ཀིཉྩི བྷུཉྫིཏབྦཾ དདེཡྻ, ཏསྶ པཱཙིཏྟི སིཡཱཏི སམྦནྡྷོ. ཏཏྠ ཏིཏྠིཡསྶཱཏི ཨཉྙཏིཏྠིཡསྶ. ཀིཉྩི བྷུཉྫིཏབྦནྟི ཡཾ ཀིཉྩི བྷོཛནཱིཡཾ. སཧཏྠཏོཏི སཧཏྠཱ. ཡོ བྷིཀྑུ མཱཏུགཱམེན ཨེཀཏོ རཧོ ནིསཛྫཾ ཀཔྤེཡྻ, ཏསྶ པཱཙིཏྟི སིཡཱཏི སམྦནྡྷོ. ཏཏྠ རཧོཏི པཊིཙྪནྣེ. ཀཔྤེཏི ཀཔྤེཡྻ. ཨེཀཏོཏི སདྡྷིཾ.

༤༤. སུརཱམེརཡཔཱནེཔཱིཏི ཨེཏྠ པིཊྛཱདཱིཧི ཀཏཾ མཛྫཾ སུརཱ. པུཔྥཱདཱིཧི ཀཏོ ཨཱསཝོ མེརཡཾ. ཡོ བྷིཀྑུ ཏདུབྷཡམྤི བཱིཛཏོ པཊྛཱཡ ཀུསགྒེནཱཔི པིཝཏི, ཏསྶ ཏཔྤཱནཔཙྩཡཱ པཱཙིཏྟིཡཾ ཨུདཱིརིཏནྟི ཨཏྠོ. ཨངྒུལིཔཏོདཀེ ཙཱཔཱིཏི ཨངྒུལཱིཧི ཨུཔཀཙྪཀཱདཱིནཾ གྷཊྚནཔཙྩཡཱ པཱཙིཏྟི སིཡཱཏི ཨཏྠོ. ཧསདྷམྨེཔི ཙོདཀེཏི ཨུཔརིགོཔྥཀེ ཨུདཀེ ཧསདྷམྨེ ཀཱིལཱ༹ནིམིཏྟཾ ཏསྶ པཱཙིཏྟི སིཡཱཏི ཨཏྠོ.

༤༥. ཨནཱདརེཔི པཱཙིཏྟཱིཏི པུགྒལསྶ ཝཱ དྷམྨསྶ ཝཱ ཨནཱདརཀརཎེཔི པཱཙིཏྟི སིཡཱཏི ཨཏྠོ. ཡོ བྷིཀྑུ ཨུཔསམྤནྣེན ¶ པཉྙཏྟེན ཝུཙྩམཱནོ ཏསྶ ཝཱ ཝཙནཾ ཨཀཏྟུཀཱམཏཱཡ, ཏཾ ཝཱ དྷམྨཾ ཨསིཀྑིཏུཀཱམཏཱཡ ཨནཱདརིཡཾ ཀརོཏི, ཏསྶ ཏསྨིཾ ཨནཱདརིཡེ པཱཙིཏྟི སིཡཱཏི ཨཏྠོ. བྷཡཱནཀཾ ཀཐཾ ཀཏྭཱ ཝཱ བྷཡཱནཀཾ རཱུཔཾ དསྶེཏྭཱ ཝཱ བྷིཀྑུཾ བྷཱིསཡཏོཔི པཱཙིཏྟི སིཡཱཏི ཨཏྠོ.

༤༦. ཡོ བྷིཀྑུ ཨགིལཱནོ ཀིཉྩི པཙྩཡཾ ཋཔེཏྭཱ ཛོཏིཾ ཛལེཡྻ ཝཱ ཛལཱཔེཡྻ ཝཱ, ཏསྶ པཱཙིཏྟིཡཾ སིཡཱཏི སམྦནྡྷོ. ཏཏྠ ཀིཉྩི པཙྩཡནྟི པདཱིཔུཛྫལནཾ ཝཱ པཏྟཔཙནཱདཱིསུ ཛོཏིཀརཎཾ ཝཱཏི ཨེཝརཱུཔཾ པཙྩཡཾ ཋཔེཏྭཱ. ཛོཏིནྟི ཨགྒིཾ.

༤༧-༨. ཀཔྤབིནྡུཾ ཨནཱདཱཡ ནཝཙཱིཝརབྷོགིནོ ནཝཾ ཙཱིཝརཾ བྷུཉྫནྟསྶ པཱཙིཏྟི སིཡཱཏི ཨཏྠོ. ཀཔྤབིནྡུནྟི མོརཀྑིམཎྜལམངྒུལཔིཊྛཱིནཾ ཨཉྙཏརཔྤམཱཎཾ ཀཔྤབིནྡུཾ. ཨནཱདཱཡཱཏི ཨནཱདིཡིཏྭཱ. བྷིཀྑུནོ ཙཱིཝརཱདིཀཾ པརིཀྑཱརཾ ཨཔནེཏྭཱ ནིདྷེནྟསྶ ཝཱ ནིདྷཱཔེནྟསྶ ¶ ཝཱ ཧསཱཔེཀྑསྶ བྷིཀྑུནོ པཱཙིཏྟི སིཡཱཏི ཨཏྠོ. ཙཱིཝརཱདིཀནྟི ཨཱདི-སདྡེན པཏྟནིསཱིདནསཱུཙིགྷརཀཱཡབནྡྷནཱདིཾ སངྒཎྷཱཏི. ནིདྷེནྟསྶཱཏི ནིདཧནྟསྶ. ཧསཱཔེཀྑསྶཱཏི ཧསཱདྷིཔྤཱཡསྶ. ཛཱནཾ པཱཎཾ ཧནེ བྷིཀྑུ, ཏིརཙྪཱནགཏམྤི ཙཱཏི ཡོ བྷིཀྑུ ‘‘པཱཎོ’’ཏི ཛཱནནྟོ ཏིརཙྪཱནགཏཾ པཱཎཾ ཁུདྡཀམྤི མཧནྟམྤི ཧནེཡྻ, ཏསྶ པཱཙིཏྟིཡཾ སིཡཱཏི ཨཏྠོ.

༤༩. ཚཱདེཏུཀཱམོ ཚཱདེཏི, དུཊྛུལླཾ བྷིཀྑུནོཔི ཙཱཏི ཡོ བྷིཀྑུ བྷིཀྑུནོ དུཊྛུལླསངྑཱཏཾ སངྒྷཱདིསེསཾ ཚཱདེཏུཀཱམོ ཧུཏྭཱ ཚཱདེཏི, ཏསྶ པཱཙིཏྟིཡཾ སིཡཱཏི ཨཏྠོ. ཨིཏྠིཡཱ སཧ སཾཝིདྷཱཡ གཱམནྟརགཏསྶ བྷིཀྑུནོ པཱཙིཏྟིཡཾ སིཡཱཏི ཡོཛནཱ.

༥༠. བྷིཀྑུཾ ¶ ཝཱ པཧརེཡྻཱཐཱཏི ཡོ བྷིཀྑུ བྷིཀྑུཾ པཧརེཡྻ, ཏསྶ པཱཙིཏྟིཡཾ སིཡཱཏི ཡོཛནཱ. ཏལསཏྟིཀམུགྒིརེཏི ཡོ བྷིཀྑུ པཧརཎཱཀཱརཾ དསྶེནྟོ ཀཱཡཾ ཝཱ ཀཱཡཔྤཊིབདྡྷཾ ཝཱ ཨུགྒིརེཡྻ, ཏསྶ པཱཙིཏྟིཡཾ སིཡཱཏི ཨཏྠོ. ཙོདེཡྻ ཝཱ ཙོདཱཔེཡྻ, བྷིཀྑུཾ ཨམཱུལཀེན ཙཱཏི ཡོ བྷིཀྑུ བྷིཀྑུཾ ཨམཱུལཀེན སངྒྷཱདིསེསེན ཙོདེཡྻ ཝཱ ཙོདཱཔེཡྻ ཝཱ, ཏསྶ པཱཙིཏྟིཡཾ སིཡཱཏི ཨཏྠོ. ཏཏྠ ཨམཱུལཀེནཱཏི དིཊྛཱདིམཱུལཝིརཧིཏེན.

༥༡. ཀུཀྐུཙྩུཔྤཱདནེ ཙཱཔཱིཏི ‘‘ཨཱུནཝཱིསཏིཝསྶོ ཏྭཾ མཉྙེ’’ཏིཨཱདཱིནི བྷཎནྟོ ཀུཀྐུཙྩཾ ཨུཔྤཱདེཡྻ, ཏསྶ ཀུཀྐུཙྩུཔྤཱདནཔཙྩཡཱ པཱཙིཏྟིཡཾ ཧོཏི. ཡོ བྷིཀྑུ བྷཎྜནཏྠཱཡ བྷཎྜནཛཱཏཱནཾ ཝཙནཾ སོཏུཾ ཨུཔསྶུཏིཾ ཡཱཏི, ཏསྶ པཱཙིཏྟིཡཾ སིཡཱཏི སམྦནྡྷོ. ཏཏྠ བྷཎྜནཏྠཱཡཱཏི ཀལཧཏྠཱཡ. བྷཎྜནཛཱཏཱནནྟི ཀལཧཛཱཏཱནཾ. ཨུཔསྶུཏིནྟི སུཏིསམཱིཔཾ.

༥༢. ཡོ བྷིཀྑུ སངྒྷསྶ པརིཎཱམིཏཾ ཡཾ ལཱབྷཾ, ཏཾ པརཔུགྒལསྶ ནཱམེཏི, ཏསྶ པཱཙིཏྟིཡཾ སིཡཱཏི སམྦནྡྷོ. ཏཏྠ ནཱམེཏཱིཏི པརིཎཱམེཏི. པུཙྪཾ ཨཀཏྭཱཏི ‘‘ཝིཀཱལེ གཱམཔྤཝེསནཾ ཨཱཔུཙྪཱམཱི’’ཏི ཝཱ ‘‘གཱམཾ པཝིསིསྶཱམཱི’’ཏི ཝཱ ཨནཱཔུཙྪིཏྭཱ. སནྟབྷིཀྑུནྟི ཨནྟོཨུཔཙཱརསཱིམཱཡ དསྶནཱུཔཙཱརེ བྷིཀྑུཾ དིསྭཱ ཡཾ སཀྐཱ ཧོཏི པཀཏིཝཙནེན ཨཱཔུཙྪིཏུཾ, ཏཱདིསཾ ཝིཛྫམཱནཾ བྷིཀྑུཾ. གཱམསྶཱཏི གཱམཾ, ཀམྨཏྠེ སཱམིཝཙནཾ. གཏེཏི སམྤདཱནཏྠེ བྷུམྨཝཙནཾ, གཏསྶཱཏི ཨཏྠོ. སནྟཾ བྷིཀྑུཾ ཨནཱཔུཙྪིཏྭཱ ཝིཀཱལེ གཱམཾ གཏསྶ བྷིཀྑུནོ པཱཙིཏྟིཡཾ སིཡཱཏི ཨཏྠོ. སེསཾ ཨུཏྟཱནམེཝཱཏི.

པཱཙིཏྟིཡནིདྡེསཝཎྞནཱ ནིཊྛིཏཱ.

༥༣. ཨིདཱནི ¶ ¶ པཀིཎྞཀཾ དསྶེཏུཾ ‘‘སངྒྷིཀ’’ནྟྱཱདི ཨཱརདྡྷཾ. ཏཏྠ ཡོ བྷིཀྑུ ཨིསྶརོ ཧུཏྭཱ སངྒྷིཀཾ གརུབྷཎྜཾ ཨཉྙསྶ དེཏི, ཏསྶ ཐུལླཙྩཡཾ སིཡཱ. ཐེཡྻཱཡ ཨཉྙསྶ དེཏི, ཡཐཱཝཏྠུ པཱརཱཛིཀཱདི སིཡཱ, དུཀྐཊཝཏྠུ དུཀྐཊཾ, ཐུལླཙྩཡཝཏྠུ ཐུལླཙྩཡཾ, པཱརཱཛིཀཝཏྠུ པཱརཱཛིཀཾ སིཡཱཏི ཝུཏྟཾ ཧོཏི.

༥༤. ཀུསཱདིམཡཙཱིརཱནཱིཏི ཨེཏྠ ཨཱདི-སདྡོ ཝཱཀཕལཀཾ སངྒཎྷཱཏི, ཀུསམཡཙཱིརཾ ཝཱཀམཡཙཱིརཾ ཕལཀམཡཙཱིརནྟི. ཏཏྠ ཀུསེ གནྠེཏྭཱ ཀཏཙཱིརཾ ཀུསམཡཙཱིརཾ. ཝཱཀམཡཙཱིརཾ ནཱམ ཏཱཔསཱནཾ ཝཀྐལཾ. ཕལཀམཡཙཱིརཾ ནཱམ ཕལཀསཎྛཱནཱནི ཕལཀཱནི སིབྦེཏྭཱ ཀཏཙཱིརཾ. ཀམྦལཾ ཀེསཝཱལཛནྟི ཀེསཛཾ ཀམྦལཾ ཝཱལཛཾ ཀམྦལཾ, ཀེསཀམྦལཾ ཝཱལཀམྦལནྟི ཨཏྠོ. ཀེསེཧི ཏནྟེ ཝཱཡིཏྭཱ ཀཏཀམྦལཾ ཀེསཀམྦལཾ. ཙམརིཝཱལེཧི ཝཱཡིཏྭཱ ཀཏཀམྦལཾ ཝཱལཀམྦལཾ. སམཡཾ ཝིནཱཏི ནཊྛཙཱིཝརཀཱལཾ ཋཔེཏྭཱ. དྷཱརཡཏོ དྷཱརཡནྟསྶ. ལཱུཀཔཀྑཱཛིནཀྑིཔནྟི ཨུལཱུཀཔཀྑིཨཛིནཀྑིཔཾ. ཏཏྠ ཨུལཱུཀཔཀྑཱིཏི ཨུལཱུཀསཀུཎཔཀྑེཧི ཀཏནིཝཱསནཾ. ཨཛིནཀྑིཔནྟི སལོམཾ སཁུརཾ ཨཛིནམིགཙམྨཾ. ནཊྛཙཱིཝརཀཱལཾ ཋཔེཏྭཱ ཨིམེསུ སཏྟསུ ཝཏྠཱུསུ ཡཾ ཀིཉྩི དྷཱརཡཏོ ཐུལླཙྩཡཾ སིཡཱཏི ཨཏྠོ.

༥༥. སཏྠཀེན ཀཏྟབྦཾ ཀམྨཾ སཏྠཀམྨཾ, ཏསྨིཾ སཏྠཀམྨེ. ཝཏྠིམྷི ཀཏྟབྦཾ ཀམྨཾ ཝཏྠིཀམྨཾ, ཏསྨིཾ ཝཏྠིཀམྨེ. སཾ ནིམིཏྟནྟི ཨཏྟནོ ཨངྒཛཱཏཾ. ཏཾ ཚིནྡཏོ ཐུལླཙྩཡཾ སིཡཱཏི སམྦནྡྷོ. མཾསཱདིབྷོཛནེཏི ཨེཏྠ ཨཱདི-སདྡོ ཨཊྛིལོཧིཏཙམྨལོམཱནི སངྒཎྷཱཏི. ཏསྨཱ མནུསྶཱནཾ མཾསཨཊྛིལོཧིཏཙམྨལོམབྷོཛནཔཙྩཡཱ ཐུལླཙྩཡཾ སིཡཱཏི ཨཏྠོ.

༥༦. ཀདལེརཀཀྐདུསྶཱནཱིཏི ¶ ཨེཏྠ ཀདལིཨེརཀཨཀྐཝཱཀེཧི ཀཏཱནི ཝཏྠཱནི དྷཱརཡནྟསྶ དུཀྐཊཾ. པོཏྠཀནྟི མཀཙིཝཱཀེཧི ཀཏཾ པོཏྠཀདུསྶཾ. སབྦཔཱིཏཱདིཀནྟི ཨེཏྠ ཨཱདི-སདྡེན སབྦལོཧིཏཀསབྦཀཎྷཀསབྦམཉྫེཊྛིཀཾ སངྒཎྷཱཏི. ཏཏྠ སབྦམེཝ ནཱིལཀཾ སབྦནཱིལཀཾ. ཨེཝཾ སེསེསུཔི. ནཱིལཾ ཨུམྨཱརཔུཔྥཝཎྞཾ. པཱིཏཾ ཀཎིཀཱརཔུཔྥཝཎྞཾ. ལོཧིཏཾ ཛཡསུམནཔུཔྥཝཎྞཾ. ཀཎྷཀཾ ཨདྡཱརིཊྛཀཝཎྞཾ. མཉྫེཊྛིཀཾ ལཱཁཱརསཝཎྞཾ. ཨིམེསུ ཨཊྛསུ ཝཏྠཱུསུ ཡཾ ཀིཉྩི དྷཱརཡནྟསྶ དུཀྐཊཾ སིཡཱཏི ཨཏྠོ.

༥༧-༨. ཧཏྠིསྶུརགསོཎཱནནྟི ¶ ཧཏྠིཨསྶཨུརགསོཎཱནཾ མཾསཾ ཨཊྛིརུདྷིརཙམྨལོམཱནི. སཱིཧབྱགྒྷཙྪདཱིཔིནནྟི སཱིཧབྱགྒྷཨཙྪདཱིཔཱིནཾ མཾསཱདཱིནི. ཏརཙྪསྶ ཙ མཾསཱདིཾ ཨུདྡིསྶཀཏམཾསཉྩ ཨནཱཔུཙྪིཏམཾསཉྩ བྷུཉྫཏོ དུཀྐཊཾ སིཡཱ. དཀཏིཏྠཱདིཀནྟི ཨེཏྠ ཨཱདི-སདྡོ ཝཙྩཔསྶཱཝཀུཊིཡོ སངྒཎྷཱཏི. ཏེན ཡཱཏཱནུཔུབྦཾ ཨཱགཏཔྤཊིཔཱཊིཾ ཧིཏྭཱན ཝཛྫེཏྭཱ ནཧཱནཏིཏྠཉྩ ཝཙྩཀུཊིཉྩ པསྶཱཝཀུཊིཉྩ ཝཛེ ཝཛེཡྻ གཙྪེཡྻ, དུཀྐཊཾ ཏསྶ སིཡཱཏི ཨཏྠོ.

༥༩. སཧསཱཏི ཝེགསཱ ཝེགེན. ཝུབྦྷཛིཏྭཱནཱཏི ཨནྟརཝཱསཀཾ དཱུརཏོཝ ཨུཀྑིཔིཏྭཱ, ཝ-ཀཱརོ སནྡྷིཝསེནཱགཏོ. པཝིསེཏི པཝིསེཡྻ. ཝཙྩཔསྶཱཝཀུཊིཀནྟི ཝཙྩཀུཊིཀཾ པསྶཱཝཀུཊིཀཾ. ཝིསེཏི པཝིསེཡྻ. ཡོ བྷིཀྑུ ཝཙྩཔསྶཱཝཀུཊིཀཾ སཧསཱ པཝིསེཡྻ ཝཱ ནིཀྑམེཡྻ ཝཱ, ཨུབྦྷཛིཏྭཱ ཝཱ པཝིསེཡྻ ཝཱ ནིཀྑམེཡྻ ཝཱ, ཨུཀྐཱསིཀཾ ཝཛྫེཏྭཱ ཏཾ པཝིསེཡྻ, ཏསྶ དུཀྐཊཾ སིཡཱཏི ཡོཛནཱ.

༦༠. ནིཏྠུནནྟོ ཝཙྩཾ ཀརེཡྻ དནྟཀཊྛཉྩ ཁཱདནྟོ, ཏསྶ དུཀྐཊཾ སིཡཱཏི ཨཏྠོ. ཝཙྩཔསྶཱཝདོཎཱིནཾ བཧི ཝཙྩཱདིཀཾ ཝཙྩཔསྶཱཝཾ ཀརེཡྻ, ཏསྶ དུཀྐཊཾ སིཡཱ.

༦༡. ཁརེན ¶ ཙཱཝལེཁེཡྻཱཏི ཕཱལིཏཀཊྛེན ཝཱ ཕརུསེན ཝཱ གཎྛིཀེན ཝཱ པཱུཏིཀཊྛེན ཝཱ སུསིརེན ཝཱ ཨཝལེཁེཡྻཱཏི ཨཏྠོ. ཀཊྛནྟི ཨཝལེཁནཀཊྛཾ. ཀཱུཔཀེཏི ཝཙྩཀཱུཔཀེ. ཨཱུཧཏཉྩཱཏི གཱུཐམཀྑིཏཉྩ. ན དྷོཝེཡྻཱཏི ཨཏྟནཱ ཝཱ ན དྷོཝེཡྻ པརེན ཝཱ ན དྷོཝཱཔེཡྻ. ཨུཀླཱཔཉྩཱཏི ཀཙཝརཉྩ. ན སོདྷཡེན སམྨཛྫེཡྻ.

༦༢. ཙཔུཙཔཱུཏི སདྡཾ ཀཏྭཱ ཨུདཀཀིཙྩཾ ཀརོནྟསྶ ཨཱཙམནྟསྶ དུཀྐཊཾ སིཡཱཏི ཨཏྠོ. ཨནཛ྄ཛྷིཊྛོཝཱཏི ཨནཱཎཏྟོཡེཝ. ཐེརེནཱཏི སངྒྷཏྠེརེན. པཱཏིམོཀྑནྟི པཱཏིམོཀྑུདྡེསཾ. ཨུདྡིསེ ཨུདྡིསེཡྻ, དུཀྐཊཾ སིཡཱ.

༦༣. ཨནཱཔུཙྪཱཡ པཉྷསྶ ཀཐནེ, ཨནཱཔུཙྪཱཡ པཉྷསྶ ཝིསྶཛྫནེ, ཨནཱཔུཙྪཱཡ སཛ྄ཛྷཱཡཀརཎེ, ཨནཱཔུཙྪཱཡ པདཱིཔཛཱལནེ, ཨནཱཔུཙྪཱཡ པདཱིཔཝིཛ྄ཛྷཱཔནེཏི ཨིམེསུ ཙཏཱུསུ པཙྩཡེསུ ཏསྶ དུཀྐཊཾ སིཡཱ.

༦༤. ཨནཱཔུཙྪཱ ¶ ཝཱཏཔཱནཀཝཱཊཱནི ཝིཝརེཡྻ ཝཱ ཐཀེཡྻ ཝཱ, ཏསྶ དུཀྐཊཾ སིཡཱཏི སམྦནྡྷོ. ཝནྡནཱདིནྟི ཨེཏྠ ཨཱདི-སདྡོ ཝནྡཱཔནཾ སངྒཎྷཱཏི. ཡོ བྷིཀྑུ ནགྒོ ཝནྡནཾ ཀརེཡྻ, ཝནྡཱཔནཾ ཀརེཡྻ, གམནཾ ཀརེཡྻ, བྷོཛནཾ ཀརེཡྻ, པིཝནཾ ཀརེཡྻ, ཁཱདནཾ ཀརེཡྻ, གཧཎཾ ཀརེཡྻ, དཱནཾ ཀརེཡྻ, ཏསྶ སབྦཏྠ དུཀྐཊནྟི སམྦནྡྷོ.

༦༥. ཏིཔཊིཙྪནྣཀཾ ཝིནཱཏི ‘‘ཨནུཛཱནཱམི, བྷིཀྑཝེ, ཏིསྶོ པཊིཙྪཱདིཡོ ཛནྟཱགྷརཔྤཊིཙྪཱདིཾ ཨུདཀཔྤཊིཙྪཱདིཾ ཝཏྠཔྤཊིཙྪཱདི’’ནྟི (ཙཱུལ༹ཝ. ༢༦༡) ཨེཝཾ ཝུཏྟཱ ཏིསྶོ པཊིཙྪཱདིཡོ སམཱཧཊཱཏི ‘‘ཏིཔཊིཙྪཱདཱི’’ཏི ཝུཏྟཾ. ཏིཔཊིཙྪནྣཀཾ ཋཔེཏྭཱ པརིཀམྨཾ སཡཾ ཀརེཡྻ, པརཾ ཀཱརཱཔེཡྻ, ཏསྶ དུཀྐཊཾ སིཡཱཏི ཨཏྠོ ¶ . ཡོ བྷིཀྑུ ནཧཱཡཾ ནཧཱཡནྟོ ཀུཊྚེ ཝཱ ཐམྦྷེ ཝཱ ཏརུམྷི ཝཱ ཀཱཡཾ ཨུཔགྷཾསེཡྻ, ཏསྶ དུཀྐཊཾ སིཡཱ.

༦༦. ཡོ བྷིཀྑུ ནཧཱཡནྟོ ཀུརུཝིནྡཀསུཏྟེན ཀཱཡཾ གྷཾསེཡྻ, ཀཱཡཏོ ཀཱཡེན ཨཉྙམཉྙཾ གྷཾསེཡྻ, ཏསྶ དུཀྐཊཾ སིཡཱཏི སམྦནྡྷོ. ཡོ ཨགིལཱནོ སཨུཔཱཧནོ བཧཱརཱམེ བཧིཨཱརཱམེ ཙརེཡྻ, ཏསྶ དུཀྐཊཾ སིཡཱཏི སམྦནྡྷོ.

༦༧. སབྦནཱིལཱདིཀམྤི ཙཱཏི ཨེཏྠ ཨཱདི-སདྡོ ལོཧིཏོདཱཏཔཱིཏཀཎྷམཉྫེཊྛམཧཱརངྒམཧཱནཱམརངྒརཏྟཱདཡོ ཨུཔཱཧནཱཡོ སངྒཎྷཱཏི. ཡོ བྷིཀྑུ སབྦནཱིལསབྦལོཧིཏཱདིཀཾ ཨུཔཱཧནཾ དྷཱརེཏི, ཏསྶ དུཀྐཊཾ སིཡཱཏི སམྦནྡྷོ. ཡོ བྷིཀྑུ རཏྟོ རཏྟཙིཏྟོ ཏདཧུཛཱཏཱཡཔི ཨིཏྠིཡཱ ནིམིཏྟཾ པསྶེཡྻ, ཏསྶ དུཀྐཊཾ སིཡཱ. ཡོ བྷིཀྑུ བྷིཀྑདཱཡིཡཱ བྷིཀྑདཱཡིཀཱཡ ཨིཏྠིཡཱ མུཁཾ པསྶེཡྻ, ཏསྶ དུཀྐཊཾ སིཡཱ.

༦༨-༩. ཡོ བྷིཀྑུ ཨུཛ྄ཛྷཱནསཉྙཱི ཧུཏྭཱ ཨཉྙསྶ བྷིཀྑུནོ པཏྟཾ ཝཱ པསྶེཡྻ, ཏསྶ དུཀྐཊཾ སིཡཱ. ཨཱདཱསཱདིམྷི ཨུདཀཔཏྟེ ཨཏྟནོ མུཁཾ པསྶེཡྻ, ཏསྶ དུཀྐཊཾ སིཡཱ. ཨུཙྩཱསནམཧཱསནེ ནིསཛྫཱདིཾ ནིསཱིདནསཡནཱདིཾ ཀརོནྟསྶ བྷིཀྑུནོ དུཀྐཊཾ སིཡཱ. ཨུཀྑིཏྟཱནུཔསམྤནྣནཱནཱསཾཝཱསཀཱདཱིནཾ ཝནྡནེཔི དུཀྐཊཾ སིཡཱཏི སམྦནྡྷོ. ཏཏྠ ཨུཀྑིཏྟོཏི ཨཱཔཏྟིཡཱ ཨདསྶནེ ཨུཀྑིཏྟཀོ, ཨཱཔཏྟིཡཱ ཨཔྤཊིཀམྨེ ཨུཀྑིཏྟཀོ, པཱཔིཀཱཡ དིཊྛིཡཱ ཨཔྤཊིནིསྶགྒེ ཨུཀྑིཏྟཀོཏི ཏིཝིདྷོཔི ཨིདྷཱདྷིཔྤེཏོ. ཨནུཔསམྤནྣོཏི ཨིམིནཱ བྷིཀྑུནིསཱམཎེརསཱམཎེརིསིཀྑམཱནཔཎྜཀཨིཏྠིསིཀྑཱཔཙྩཀྑཱཏཀཱ ¶ གཧིཏཱ. ནཱནཱསཾཝཱསཀཱཏི ལདྡྷིནཱནཱསཾཝཱསཀཱ གཧིཏཱ. ཨཱདི-སདྡེན ཚིནྣམཱུལཀཱ གཧིཏཱ.

༧༠-༧༡. ཡོ ¶ དཱིགྷཱསནེ པཎྜཀིཏྠཱིཧི པཎྜཀེན ཝཱ ཨིཏྠིཡཱ ཝཱ ཨུབྷཏོབྱཉྫནེན ཝཱ ཨེཀཏོ ནིསཱིདེཡྻ, ཏསྶ དུཀྐཊཾ སིཡཱ. ཨདཱིགྷེ ཨཱསནེཏི རསྶེ ཨཱསནེ. ཡོ བྷིཀྑུ རསྶཱསནེ མཉྩེ ཝཱ པཱིཋེ ཝཱ ཨསམཱནཱསནིཀེན ཨེཀཏོ སཡེཡྻ, ཏསྶ དུཀྐཊཾ སིཡཱཏི ཨཏྠོ. ཕལཔུཔྥཱདིཀནྟི ཨེཏྠ ཨཱདི-སདྡེན ཝེལུ༹ཙུཎྞདནྟཀཊྛམཏྟིཀཱདཡོ སངྒཧིཏཱ. ཀུལསངྒཧཏྠཱཡ ཕལཔུཔྥཱདིཀཾ དདཏོ དུཀྐཊཾ སིཡཱཏི སམྦནྡྷོ.

༧༢-༣. ཡོ བྷིཀྑུ གནྠིམཱདིཾ སཡཾ ཀརེཡྻ, པརཾ ཀཱརཱཔེཡྻ, ཏསྶ དུཀྐཊཾ སིཡཱ. ཡོ བྷིཀྑུ ཛིནེན ཝཱརིཏཔཙྩཡེ པརིབྷུཉྫེཡྻ, ཏསྶ དུཀྐཊཾ སིཡཱ. ཨབྱཏྟོ བཱལོ ཡོ བྷིཀྑུ ཨཱཙརིཡུཔཛ྄ཛྷཱཡེ ཨནིསྶཱཡ ནིསྶཡཾ ཨགྒཧེཏྭཱ ཝསེཡྻ, ཏསྶ དུཀྐཊཾ སིཡཱ. ཡོ བྷིཀྑུ ཨནུཉྙཱཏེཧི མཱཏཱཔིཏུཨཱདཱིཧི པུགྒལེཧི ཨཉྙསྶ པུགྒལསྶ བྷེསཛྫཾ ཀརེཡྻ ཝཱ ཝདེཡྻ ཝཱ, ཏསྶ དུཀྐཊཾ སིཡཱ. སཱཔཏྟིཀོ ཡོ བྷིཀྑུ ཨུཔོསཐཔྤཝཱརཎཾ ཀརེཡྻ, ཏསྶ དུཀྐཊཾ སིཡཱཏི སམྦནྡྷོ. ཏཏྠ ཛིནེན བྷགཝཏཱ ཝཱརིཏཱ ཛིནཝཱརིཏཱ, ཛིནཝཱརིཏཱ ཙ ཏེ པཙྩཡཱ ཙེཏི ཛིནཝཱརིཏཔཙྩཡཱ, ཏེ ཛིནཝཱརིཏཔཙྩཡེ. དྭེམཱཏིཀཱཨཔྤགུཎཏཱཡ ཨབྱཏྟོ.

༧༤. ཡོ བྷིཀྑུ ཨཱབྷོགཾ ཝཱ ནིཡོགཾ ཝཱ ཝཛྫེཏྭཱ དྭཱརབནྡྷཱདིཀེ ཋཱནེ པརིཝཏྟཀཝཱཊཀཾ ཨཔིདྷཱཡ དིཝཱ སཡེཡྻ, ཏསྶ དུཀྐཊཾ སིཡཱཏི སམྦནྡྷོ. དྭཱརབནྡྷཱདིཀེཏི ཡེན ཀེནཙི པརིཀྑིཏྟེ ཨབྦྷོཀཱསེཔི རུཀྑམཱུལེཔི ཨནྟམསོ ཨིམིནཱ ལཀྑཎེན ཡུཏྟཨཱཀཱསངྒཎེཔི. ཨཔིདྷཱཡཱཏི ཨཔིདཧིཏྭཱ. ཝིནཱབྷོགནྟི ‘‘ཨེས དྭཱརཾ ཛགྒིསྶཏཱི’’ཏི ཨཱབྷོགཾ ཋཔེཏྭཱཏི ཨཏྠོ. ནིཡོགནྟི ཨཝསཊྛཱནཾ, ཨཏྟནོ ཨཝསཾ བཧུསཱདྷཱརཎཊྛཱནཾ ཋཔེཏྭཱ. ‘‘སཝསོ’’ཏི ¶ ཝཱ པཱཋོ, སཝསོ ཧུཏྭཱཏི ཨཏྠོ. དིཝཱཏི དིཝཱཀཱལེ.

༧༥. དྷཉྙནྟི སཱལི ཝཱིཧི ཡཝོ གོདྷུམོ ཀངྒུ ཝརཀོ ཀུདྲཱུསཀོཏི སཏྟཝིདྷཾ དྷཉྙཾ. ཨིཏྠིརཱུཔནྟི དཱརུལོཧམཡཱདིཨིཏྠིརཱུཔཾ. རཏནནྟི མུཏྟཱདིདསཝིདྷཾ རཏནཾ. ཨཱཝུདྷནྟི སཏྟིཏོམརཱདིསབྦཱཝུདྷབྷཎྜཾ. ཨིཏྠིཔསཱདྷནནྟི ཨིཏྠིཡཱ སཱིསཱདིཨལངྐཱརཾ. ཏཱུརིཡབྷཎྜནྟི དྷམནསངྑཱདིསབྦཾ ཏཱུརིཡབྷཎྜཾ. ཕལརུཀྑེཏི ཕལིཏརུཀྑེ. པུབྦཎྞཱདིཀནྟི མུགྒམཱསཱདིཀཾ. ཨཱདི-སདྡེན ¶ ཝཱཀུརཀུམིནཱདཡོ གཧིཏཱ. ཨེཏེསུ ཡཾ ཀིཉྩི ཨཱམསེཡྻ, ཏསྶ དུཀྐཊཾ སིཡཱཏི ཨཏྠོ.

༧༦. སསིཏྠོདཀཏེལེཧཱིཏི ཡོ པན མདྷུསིཏྠཀཏེལེན ཝཱ ཨུདཀམིསྶཀཏེལེན ཝཱ ཡེན ཀེནཙི ཙིཀྑལླེན ཝཱ. ཕཎཧཏྠཕཎེཧི ཝཱཏི དནྟམཡཱདིཕཎེན ཝཱ ཕཎཀིཙྩསཱདྷཀེཧི ཧཏྠངྒུལཱིཧི ཝཱ ཀོཙྪེན ཝཱ ཀེསམོསཎྛནེ དུཀྐཊཾ སིཡཱཏི ཨཏྠོ. ཨེཀསྨིཾ བྷཱཛནེ བྷོཛནནིམིཏྟེ དུཀྐཊཾ སིཡཱཏི ཨཏྠོ.

༧༧. དྭེ བྷིཀྑཱུ ཨེཀཏྠརཎཱ སཡེཡྻཱུཾ, དྭེ བྷིཀྑཱུ ཨེཀཔཱཝུརཎཱ སཡེཡྻུཾ, དྭེ བྷིཀྑཱུ ཨེཀམཉྩཀེ སཡེཡྻུཾ, ཏེསཾ དུཀྐཊཱནི ཧོནྟཱིཏི སམྦནྡྷོ. པམཱཎཏོ ཨདྷིཀཾ ཝཱ ཨཱུནཾ ཝཱ དནྟཀཊྛཾ ཁཱདེཡྻ, ཏསྶ དུཀྐཊཾ སིཡཱཏི ཡོཛནཱ. ཏཏྠ ཨདྷིཀནྟི ཨཊྛངྒུལཏོ ཨདྷིཀཾ. ཨཱུནནྟི ཙཏུརངྒུལཏོ ཨཱུནཾ.

༧༨. ཡོ བྷིཀྑུ ནཙྩཉྩ གཱིཏཉྩ ཝཱདིཏཉྩ ཡོཛེཏི ཝཱ ཡོཛཱཔེཏི ཝཱ, ཏསྶ དུཀྐཊཾ སིཡཱ. ཏེསཾ ནཙྩཱནཾ དསྶནཾ, ཏེསཾ གཱིཏཱནཾ སཝནཾ, ཏེསཾ ཝཱདིཏཱནཾ སཝནཉྩ ཀརོནྟསྶ དུཀྐཊཾ སིཡཱཏི ཨཏྠོ.

༧༩. ཝཱིཧཱདིརོཔིམེཏི ¶ ཝཱིཧིཨཱདཱིནཾ རུཧནཊྛཱནེ. བཧིཔཱཀཱརཀུཊྚཀེཏི པཱཀཱརཀུཊྚཱནཾ བཧི. ཝཙྩཱདིཚཌྜནཱདིམྷཱིཏི ཝཙྩཔསྶཱཝསངྐཱརཙལཀཱདཱིནཾ ཚཌྜནཝིསྶཛྫནཔཙྩཡཱ དུཀྐཊཾ སིཡཱཏི ཨཏྠོ. དཱིགྷཀེསཱདིདྷཱརཎེཏི དཱིགྷཀེསདྷཱརཎེ དཱིགྷནཁདྷཱརཎེ དུཀྐཊཾ སིཡཱཏི ཨཏྠོ.

༨༠. ནཁམཊྛཀརཎཱདིམྷཱིཏི ཨེཏྠ ཨཱདི-སདྡེན རཛནཀརཎཾ གཧིཏཾ. སམྦཱདྷེ ལོམཧཱརཎེཏི སམྦཱདྷེ ཨུཔཀཙྪཀམུཏྟཀརཎཊྛཱནེ ལོམུདྡྷརཎེ. སཨུཔཱཧནོ བྷིཀྑུ པརིཀམྨཀཏཾ བྷཱུམིཾ ཨཀྐམེཡྻཱཏི སམྦནྡྷོ.

༨༡. ཨདྷོཏཨལླཔཱདེཧཱིཏི ཡོ བྷིཀྑུ ཨདྷོཏཔཱདེཧི ཝཱ ཨལླཔཱདེཧི ཝཱ སངྒྷིཀཾ མཉྩཾ ཝཱ པཱིཋཾ ཝཱ ཨཀྐམེཡྻ, པརིཀམྨཀཏཾ བྷིཏྟིཾ ཝཱ ཀཱཡཏོ ཨཱམསནྟསྶ དུཀྐཊཾ སིཡཱཏི ཨཏྠོ.

༨༢-༣. སངྒྷཱཊིཡཱཔི ¶ པལླཏྠེཏི ཨདྷིཊྛིཏཙཱིཝརེན ཝིཧཱརེ ཝཱ ཨནྟརགྷརེ ཝཱ པལླཏྠིཀཾ ཀརེཡྻ, ཏསྶ དུཀྐཊཾ. དུཔྤརིབྷུཉྫེཡྻ ཙཱིཝརནྟི ཏིཎྞཾ ཙཱིཝརཱནཾ ཨཉྙཏརཾ ཙཱིཝརཾ དུཔྤརིབྷོགེན པརིབྷུཉྫེཡྻ. ཨཀཱཡབནྡྷནོཏི ཀཱཡབནྡྷནཝིརཧིཏོ བྷིཀྑུ གཱམཾ ཝཛེཡྻ གཙྪེཡྻ. ཡོ བྷིཀྑུ ཝཙྩཀཾ ཨུཙྩཱརཾ ཀཏྭཱན ཨུདཀེ སནྟེ ནཱཙམེཡྻ ཨུདཀསུདྡྷིཾ ན ཀརེཡྻ, ཏསྶ དུཀྐཊཾ སིཡཱཏི ཨཏྠོ. སམཱདེཡྻ ཨཀཔྤིཡེཏི བྷིཀྑུཾ ཝཱ སཱམཎེརཱདིཀེ སེསསཧདྷམྨིཀེ ཝཱ ཨཀཔྤིཡེ ནིཡོཛེཡྻ, ཏསྶ དུཀྐཊཾ སིཡཱཏི ཨཏྠོ. སབྷཱགཱཔཏྟིཡཱ དེསནཱརོཙནཔཙྩཡཱ དུཀྐཊཾ སིཡཱཏི ཨཏྠོ. སབྷཱགཱཏི ཨེཏྠ ཝཏྠུསབྷཱགཏཱཝ ཨིདྷཱདྷིཔྤེཏཱ, ན ཨཱཔཏྟིསབྷཱགཏཱ.

༨༤. ན ཝསེ ཝསྶནྟི ཡོ བྷིཀྑུ ཝསྶཾ ན ཝསེཡྻ ན ཨུཔགཙྪེཡྻ, ཏསྶ དུཀྐཊཾ སིཡཱ. ཝིསཾཝཱདེ སུདྡྷཙིཏྟེཏི ཨེཏྠ ¶ སམྤདཱནཏྠེ བྷུམྨཝཙནཾ, པཊིསྶཝཾ ཝིསཾཝཱདེནྟསྶ སུདྡྷཙིཏྟསྶ དུཀྐཊཾ སིཡཱཏི ཨཏྠོ. ཝསྶཾ ཝསིཏྭཱ ཨནནུཉྙཱཏཀིཙྩཏོ ཨནནུཉྙཱཏཀིཙྩེན བྷིཀྑུནོ གམནེ དུཀྐཊཾ སིཡཱཏི ཡོཛནཱ.

༨༥. ཨཱཔདཾ ཝཛྫེཏྭཱ ཏརུསྶ ཨུདྡྷཾ པོརིསམྷཱ ཨབྷིརུཧཎེ དུཀྐཊཾ སིཡཱཏི སམྦནྡྷོ. ཨཱཔདནྟི ཨནྟརཱཡཾ. ཏརུསྶཱཏི རུཀྑསྶ. པོརིསམྷཱཏི ཨེཀཔོརིསཔྤམཱཎཱ མཛ྄ཛྷིམསྶ པུརིསསྶ པཉྩཧཏྠཱ. ཨཔརིསྶཱཝནོ ཡོ བྷིཀྑུ ཨདྡྷཱནཾ གཙྪེཡྻ, ཡོ ཙ བྷིཀྑུ ཏཾ པརིསྶཱཝནཾ ཡཱཙཏོ ན དདེཡྻ, ཏསྶ དུཀྐཊཾ སིཡཱཏི ཡོཛནཱ. ཨདྡྷཱནནྟི ཨདྡྷཡོཛནམེཝ ཨནྟིམམདྡྷཱནཾ.

༨༦. ཨཏྟནོ གྷཱཏནེ དུཀྐཊཾ སིཡཱཏི སམྦནྡྷོ. ཡོ བྷིཀྑུ ཨིཏྠིརཱུཔཱདིརཱུཔཾ ཀརེཡྻ ཝཱ ཀཱརཱཔེཡྻ ཝཱ, ཏསྶ དུཀྐཊཾ སིཡཱ. མཱལཱདིཀཾ ཝིཙིཏྟཾ ཋཔེཏྭཱ ཛཱཏཀཱདིཝཏྠུཾ སཡཾ ཀརེཡྻ, དུཀྐཊཾ སིཡཱཏི སམྦནྡྷོ.

༨༧. བྷུཉྫནྟམུཊྛཔེཏི ཡོ བྷིཀྑུ བྷུཉྫནྟཾ ཨུཊྛཱཔེཡྻ, ཏསྶ དུཀྐཊཾ སིཡཱ. བྷཏྟསཱལཱདཱིསུ ཝུཌྜྷཱནཾ ཨོཀཱསཾ ཨདཏྭཱ ནིསཱིདཏོ དུཀྐཊཾ སིཡཱཏི ཡོཛནཱ.

༨༨. ཡཱནཱནཱིཏི ཝཡ྄ཧཾ རཐོ སཀཊཾ སནྡམཱནིཀཱདཱིནི. ཀལླཀོཏི ཨགིལཱནོ. ཨགིལཱནོ ¶ ཡོ བྷིཀྑུ ཡཱནཱནི ཨབྷིརུཧེཡྻ, ཏསྶ དུཀྐཊཾ སིཡཱཏི ཨཏྠོ. ཝདེ དཝནྟི ཀེལི༹ཾ ཝདེཡྻ, རཏནཏྟཡཾ ཨཱརབྦྷ ཀེལི༹ཾ ཝདེཡྻ, ཏསྶ དུཀྐཊཾ སིཡཱཏི ཨཏྠོ. ཨཉྙཔརིསཱཡ ཨུཔལཱལནེ དུཀྐཊཾ ཧོཏི.

༨༩. ཀཱཡཱདིནྟི ཨེཏྠ ཨཱདི-སདྡོ ཨཱུརུནིམིཏྟཾ སངྒཎྷཱཏི. ཀཱཡཾ ཝཱ ཨཱུརུཾ ཝཱ ནིམིཏྟཾ ཝཱ ཝིཝརིཏྭཱ བྷིཀྑུནཱིནཾ ན དསྶཡེ ན དསྶེཡྻཱཏི ཨཏྠོ. ལོཀཱཡཏཾ ཏིརཙྪཱནཱདིཝིཛྫཾ ན ཙ ¶ སཡཾ ཝཱཙེཡྻ, པརཉྩ ན ཝཱཙཱཔེཡྻ. པལིཏཾ གཎྷེཡྻ ཝཱ གཎྷཱཔེཡྻ ཝཱ, ཏསྶ དུཀྐཊཾ སིཡཱཏི ཡོཛནཱ.

༩༠-༩༢. ཡཏྠ ཀཏྠཙི པེལཱ༹ཡཾ པཀྑིཔིཏྭཱ བྷཏྟཾ བྷུཉྫནྟསྶ དུཀྐཊཾ སིཡཱཏི སམྦནྡྷོ. པཏྟཧཏྠཀོ ཡོ བྷིཀྑུ ཝཱཏཔཱནཾ ཝཱ ཀཝཱཊཾ ཝཱ པཎཱམེ པཎཱམེཡྻ, སོདཀཾ པཏྟཾ ཨུཎྷེཡྻ ཨུཎྷེ ཨོཏཱཔེཡྻ ཝཱ པཊིསཱམེཡྻ ཝཱ, ཝོདཀཾ པཏྟཾ ཨཏིཨུཎྷེཡྻ ཨཏིཋཔེཡྻ, ཏསྶ དུཀྐཊཾ སིཡཱཏི ཨཏྠོ. ཡོ བྷིཀྑུ པཏྟཾ བྷཱུམིཡཾ ཝཱ ཨངྐེ ཝཱ མཉྩེ ཝཱ པཱིཋེ ཝཱ མིཌྜྷནྟེ ཝཱ པརིབྷཎྜནྟེ ཝཱ པཱདེ ཝཱ ཚཏྟེ ཝཱ ཋཔེཡྻ, ཏསྶ དུཀྐཊཾ སིཡཱཏི སམྦནྡྷོ. བྷཱུམིཡནྟི ཡེན ཀེནཙི ཨནཏྠཏཱཡ པཾསུསཀྑརམིསྶཱཡ. ཨངྐེཏི དྭིནྣཾ ཨཱུརཱུནཾ མཛ྄ཛྷེ. མིཌྜྷནྟེཏི མིཌྜྷཔརིཡནྟེ. པརིབྷཎྜནྟེཏི བཱཧིརཔསྶེ ཀཏཱཡ ཏནུཀམིཌྜྷིཡཱ ཨནྟེ. ཡོ བྷིཀྑུ ཙལཀཱདིཾ ཝཱ པཏྟེ ཋཔེཡྻ, པཏྟེ ཝཱ ཧཏྠདྷོཝནེ ཧཏྠསྶ དྷོཝནཔྤཙྩཡཱ ཏསྶ དུཀྐཊཾ སིཡཱཏི སམྦནྡྷོ.

༩༣. ཨུཙྪིཊྛཾ མུཁདྷོཝནཾ ཨུདཀམྤི པཏྟེན ནཱིཧརནྟསྶ བྷིཀྑུནོ དུཀྐཊཾ སིཡཱ. ཡོ བྷིཀྑུ ཨཀཔྤིཡཾ པཏྟཾ པརིབྷུཉྫེཡྻ, ཏསྶ དུཀྐཊཾ སིཡཱཏི ཨཏྠོ. ཏཏྠ ཨཀཔྤིཡཾ པཏྟནྟི དཱརུམཡཔཏྟཱདིཾ.

༩༤. ཡོ བྷིཀྑུ ཁིཔིཏེ ‘‘ཛཱིཝཱ’’ཏི ཝདེ ཝདེཡྻ, ཏསྶ དུཀྐཊཾ སིཡཱཏི ཨཏྠོ. ཡོ བྷིཀྑུ པརིམཎྜལཀཱདིམྷི པཉྩསཏྟཏི སེཁིཡེ ཨནཱདརོ ཧུཏྭཱ ན སིཀྑཏི, ཏསྶ དུཀྐཊཾ སིཡཱཏི སམྦནྡྷོ.

༩༥. ཡོ བྷིཀྑུ བྷཎྜཱགཱརེ པཡུཏོ མཱཏུཡཱ པིཏུནོ ཙ བྷཎྜཀཾ གོཔེཡྻ, ཨསྶ བྷིཀྑུནོ པཱཙིཏྟིཡཾ སིཡཱཏི སམྦནྡྷོ. ཏཏྠ པཡུཏོཏི བྷཎྜཱགཱརེ བྱཱཔཱརཝསེན ཡུཏྟཔྤཡུཏྟོ. གོཔཡེཏི ¶ གོཔེཡྻ. ཡོ བྷིཀྑུ ¶ དཝཱཡ ཧཱིནེན ཛཱཏིཨཱདིནཱ ཨུཏྟམམྤི ཝདེཡྻ, དུབྦྷཱསིཏཾ སིཡཱཏི སམྦནྡྷོ. ཏཏྠ ཧཱིནེཧི ཝཱ ཨུཀྐཊྛེཧི ཝཱ ཛཱཏིཨཱདཱིཧི ཨེཝཾ ཨུཀྐཊྛཾ ཝཱ ཧཱིནཾ ཝཱ ‘‘ཙཎྜཱལོསཱི’’ཏིཨཱདིནཱ ནཡེན ཨུཛུཾ ཝཱ ‘‘སནྟི ཨིདྷེཀཙྩེ ཙཎྜཱལཝེནནེསཱདཱ’’ཏིཨཱདིནཱ ནཡེན ཨཉྙཱཔདེསེན ཝཱ ཨུཔསམྤནྣཾ ཝཱ ཨནུཔསམྤནྣཾ ཝཱ ཨཀྐོསཱདྷིཔྤཱཡཾ ཝིནཱ ཀེཝལཾ ཀཱིལཱ༹དྷིཔྤཱཡེན ཝདེཡྻ, དུབྦྷཱསིཏཾ སིཡཱཏི.

༩༦. ཨིདཱནི ཝཏྟཾ དསྶེཏུཾ ‘‘ཨུཔཛ྄ཛྷཱཙརིཡཝཏྟ’’ནྟི ཝུཏྟཾ. ཏཏྠ ཨུཔཛ྄ཛྷཱཡཝཏྟཉྩ ཨཱཙརིཡཝཏྟཉྩ གམིཀཝཏྟཉྩ ཨཱགནྟུཀཝཏྟཉྩ སེནཱསནཱདིཝཏྟཉྩ པིཡསཱིལེན བྷིཀྑུནཱ ཀཱཏབྦནྟི སམྦནྡྷོ. གམིཀཱགནྟུཀནྟི གམིཀཾ ཨཱགནྟུཀནྟི ཚེདོ, གམིཀཝཏྟཾ ཨཱགནྟུཀཝཏྟཉྩཱཏི ཨཏྠོ.

༩༧. དཱཏུཀཱམོ ཧཏྠཔཱསེ ཋིཏོ ཀིཉྩི གཧིཏབྦཾ ཨེཀེན པུརིསེན གཧིཏབྦཾ ཨུཀྑིཔནཀྑམཾ ཝཏྠུཾ ཏིདྷཱ ཏཱིསུ པཀཱརེསུ ཨེཀེནཱཀཱརེན དདེཡྻ, གཧེཏུཀཱམོ བྷིཀྑུ དྭིདྷཱ དྭཱིསུ ཨེཀེན གཎྷེཡྻ, ཨཡཾ པཉྩངྒོ པཊིགྒཧོཏི ཨཏྠོ.

༩༨-༡༠༠. དཱུརེ ཋིཏཾ ཙཱིཝརཾ ཋཔིཏོཀཱསཾ སལླཀྑེཏྭཱ ‘‘ཨེཏ’’ནྟི ཝཏྟབྦཾ. ཧཏྠཔཱསེ ཋིཏཾ ཧཏྠེན ཨཱམསིཏྭཱ ‘‘ཨིམ’’ནྟི ཝཏྟབྦཾ. ‘‘ཨེཏཾ ཨདྷིཊྛཱམི, ཨིམཾ ཨདྷིཊྛཱམཱི’’ཏི ཨིམེསཾ པདཱནཾ མཛ྄ཛྷེ སངྒྷཱཊིཨཱདཱིསུ པཙྩེཀཾ ཡོཛེཏྭཱ ཏིཙཱིཝརཾ ཨདྷིཊྛེཡྻ. ཀཐཾ? ‘‘ཨེཏཾ སངྒྷཱཊིཾ ཨདྷིཊྛཱམི, ཨིམཾ སངྒྷཱཊིཾ ཨདྷིཊྛཱམཱི’’ཏི ཨདྷིཊྛེཡྻ. ཨེཝཾ སེསེསུ ཙ ཙཱིཝརེསུ. ཡཐཱ ཙཱིཝརཱདིཾ ¶ ཝིདྷཱནཾ ཨེཝཾ པཏྟེཔི ཨདྷིཊྛེཡྻ པཙྩུདྡྷརེཡྻཱཏི ཨཏྠོ.

༡༠༡. སཉྩརིཏྟཾ ཋཔེཏྭཱ སེསཱ གརུཀཱ ཙ པཱརཱཛིཀཱ ཙ སཙིཏྟཀཱཏི སམྦནྡྷོ. ཨནྟིམཱཏི ¶ པཱརཱཛིཀཱ. ཨཙྪིནྣསིཀྑཱཔདཾ, པརིཎཏསིཀྑཱཔདཉྩཱཏི ཨིམཾ དྭཡཾ ཋཔེཏྭཱ སེསཾ ནིསྶགྒིཡཾ ཨཙིཏྟཀནྟི ཨཏྠོ.

༡༠༢-༣. གཱམཔྤཝེསནནྟེཏེཏི གཱམཔྤཝེསནཾ ཨིཏི ཨེཏེ. པཱཙིཏྟཱིསུ ཨེཏེ པདསོདྷམྨཱདཡོ གཱམཔྤཝེསནནྟཱ སཏྟརས སིཀྑཱཔདཱ ཨཙིཏྟཀཱ.

༡༠༤-༥. པཀིཎྞཀེསུ ཨུདྡིསྶཀཏཾ ཋཔེཏྭཱ ཨཉྙམཾསཀཾ སེསམཾསཾ ཨཙིཏྟཀནྟི ཨཏྠོ. ཨེཏྠ པཀིཎྞཀེསུ ཨཉྙམཾསཱདིཀཾ པཏྟཧཏྠོ ཀཝཱཊཀནྟཾ ཏེརསཝིདྷཾ ཨིདཾ སིཀྑཱཔདཾ ཨཙིཏྟཀཾ, སེསཾ སབྦཾ སཙིཏྟཀནྟི ཨཏྠོ.

༡༠༦. ཨཱཙརིཡཱ ཝཱིཏིཀྐམནཙིཏྟེན སཙིཏྟཀཾ ཨཙིཏྟཀནྟི ཝདནྟི, པཉྙཏྟིཛཱནནེན ཙིཏྟེན ཏཐཱ སཙིཏྟཀཾ ཨཙིཏྟཀནྟི ཨཱཙརིཡཱ ཝདནྟཱིཏི ཨཏྠོ. ཏཐཱ-སདྡེན ‘‘སཙིཏྟཀཾ ཨཙིཏྟཀ’’ནྟི ཨིདཾ གཧིཏཾ.

༡༠༧-༩. པུབྦཀརཎཱདིཀནྟི ཨེཏྠ ཨཱདི-སདྡོ པུབྦཀིཙྩཾ སངྒཎྷཱཏི. ཏཏྠ –

‘‘སམྨཛྫནཱི པདཱིཔོ ཙ, ཨུདཀཾ ཨཱསནེན ཙ;

ཨུཔོསཐསྶ ཨེཏཱནི, པུབྦཀརཎནྟི ཝུཙྩཏི.

‘‘ཚནྡཔཱརིསུདྡྷིཨུཏུཀྑཱནཾ, བྷིཀྑུགཎནཱ ཙ ཨོཝཱདོ;

ཨུཔོསཐསྶ ཨེཏཱནི, པུབྦཀིཙྩནྟི ཝུཙྩཏཱི’’ཏི. –

ཨེཝཾ པུབྦཀརཎཱདིཀཾ ནཝདྷཱ དཱིཔིཏཾ སབྦཾ ཨུཔོསཐཔྤཝཱརཎཾ པིཡསཱིལིནཱ ཀཱཏབྦནྟི ཨཏྠོ.

༡༡༢. ཡཐཱཀྐམནྟི ¶ ཨེཏྠཱཡམདྷིཔྤཱཡོ – གཎོ པཱརིསུདྡྷིཨུཔོསཐཾ ཀརེཡྻ, པུགྒལོ ཨདྷིཊྛཱནཨུཔོསཐཾ ཀརེཡྻ, སངྒྷོ སུཏྟུདྡེསཨུཔོསཐཾ ཀརེཡྻཱཏི.

༡༡༣. ཙཱཏུདྡསོ པནྣརསོ, སཱམགྒཱི དིནཏོ ཏིདྷཱཏི ཙཱཏུདྡསོ ཨུཔོསཐོ ¶ , པནྣརསོ ཨུཔོསཐོ, སཱམགྒཱིཨུཔོསཐོཏི དིནཏོ ཏིདྷཱ ཧོནྟི. དིནཏོ པུགྒལཏོ ཀཏྟབྦཱཀཱརཏོ ཏེ ཨུཔོསཐཱ ནཝ ཨིཏི ཨཱིརིཏཱཏི ཨཏྠོ.

༡༡༤. ཏེཝཱཙཱི དྭེཀཝཱཙཱིཏི ཏེཝཱཙིཀཱ པཝཱརཎཱ, དྭེཝཱཙིཀཱ པཝཱརཎཱ, ཨེཀཝཱཙིཀཱ པཝཱརཎཱ ཨིཏི ནཝ པཝཱརཎཱ ཝུཏྟཱ.

༡༡༥. ཏསྶཱཏི ཕགྒུནམཱསསྶ. ཏཏོ སེསནྟི ཨཱསཱལ༹ྷིཨནྟིམཔཀྑམྷཱ ཡཱཝ ཀཏྟིཀཔུཎྞམཱ ཝསྶཀཱལནྟི ཨཏྠོ. ཨེཏྠ ཧི ཨེཀསྨིཾ སཾཝཙྪརེ ཙཏུཝཱིསཏིཨུཔོསཐཱ ཧོནྟི.

༡༡༦. ཨེཏེསཱུཏི ཨེཏེསུ ཏཱིསུ ཙཏཱུསུ ཨེཀེཀསྨིཾ ཨུཏུམྷི ཏཏིཡཔཀྑཱ སཏྟམཔཀྑཱ. ཙཱཏུདྡསཱཏི ཚ ཙཱཏུདྡསཱཏི ཨཏྠོ. སེསཱནི ཨུཏྟཱནཏྠཱནེཝཱཏི.

ཝཏྟཱདིཀཎྜནིདྡེསཝཎྞནཱ ནིཊྛིཏཱ.

ཨེཏྟཱཝཏཱ ¶ སམཱརདྡྷཱ, མཱུལསིཀྑཏྠཝཎྞནཱ;

ནིཊྛིཏཱ ཡཱ སམཱསེན, ཨཌྜྷམཱསསྶ ཨཙྩཡེ.

ཨདྷུནཱུཔསམྤནྣཱནཾ, ཧིཏཏྠཱཡ སམཱསཏོ;

ཨིམཾ ཨཏྠཾ ཝཎྞཡཏཱ, ཡཾ པུཉྙཾདྷིགཏཾ མཡཱ.

ཏེན པུཉྙེནཡཾ ལོཀོ, སུཁཱཡ པཊིཔཏྟིཡཱ;

པཱཔུཎཱཏུ ཝིསུདྡྷཱཡ, ནིབྦཱནཾ ཨཛརཾ པདཾ.

ནཱནཱཏརུགཎཱཀིཎྞེ ¶ , ནཱནཱཀུསལཀཱམིནོ;

རམྨེ ཡུདྡྷཱནཔཏིནོ, ཝིཧཱརེ ཝསཏཱ སཏཱ.

སཱསནེ སིདྡྷིཔཏྟསྶ, སིདྡྷིནཱ ཉཱཎསིདྡྷིནཱ;

པཎྜིཏེན ཀཏཱ ཨེསཱ, མཱུལསིཀྑཏྠཝཎྞནཱ.