📜

३. पुच्छावारो

१. पच्चयानुलोमं

एकमूलकं

(१.) कुसलपदं

२५. सिया कुसलं धम्मं पटिच्च कुसलो धम्मो उप्पज्जेय्य हेतुपच्चया. सिया कुसलं धम्मं पटिच्च अकुसलो धम्मो उप्पज्जेय्य हेतुपच्चया. सिया कुसलं धम्मं पटिच्च अब्याकतो धम्मो उप्पज्जेय्य हेतुपच्चया. सिया कुसलं धम्मं पटिच्च कुसलो च अब्याकतो च धम्मा उप्पज्जेय्युं हेतुपच्चया. सिया कुसलं धम्मं पटिच्च अकुसलो च अब्याकतो च धम्मा उप्पज्जेय्युं हेतुपच्चया. सिया कुसलं धम्मं पटिच्च कुसलो च अकुसलो च धम्मा उप्पज्जेय्युं हेतुपच्चया. सिया कुसलं धम्मं पटिच्च कुसलो च अकुसलो च अब्याकतो च धम्मा उप्पज्जेय्युं हेतुपच्चया.

(२) अकुसलपदं

२६. सिया अकुसलं धम्मं पटिच्च अकुसलो धम्मो उप्पज्जेय्य हेतुपच्चया. सिया अकुसलं धम्मं पटिच्च कुसलो धम्मो उप्पज्जेय्य हेतुपच्चया. सिया अकुसलं धम्मं पटिच्च अब्याकतो धम्मो उप्पज्जेय्य हेतुपच्चया . सिया अकुसलं धम्मं पटिच्च कुसलो च अब्याकतो च धम्मा उप्पज्जेय्युं हेतुपच्चया. सिया अकुसलं धम्मं पटिच्च अकुसलो च अब्याकतो च धम्मा उप्पज्जेय्युं हेतुपच्चया . सिया अकुसलं धम्मं पटिच्च कुसलो च अकुसलो च धम्मा उप्पज्जेय्युं हेतुपच्चया. सिया अकुसलं धम्मं पटिच्च कुसलो च अकुसलो च अब्याकतो च धम्मा उप्पज्जेय्युं हेतुपच्चया.

(३) अब्याकतपदं

२७. सिया अब्याकतं धम्मं पटिच्च अब्याकतो धम्मो उप्पज्जेय्य हेतुपच्चया. सिया अब्याकतं धम्मं पटिच्च कुसलो धम्मो उप्पज्जेय्य हेतुपच्चया. सिया अब्याकतं धम्मं पटिच्च अकुसलो धम्मो उप्पज्जेय्य हेतुपच्चया. सिया अब्याकतं धम्मं पटिच्च कुसलो च अब्याकतो च धम्मा उप्पज्जेय्युं हेतुपच्चया. सिया अब्याकतं धम्मं पटिच्च अकुसलो च अब्याकतो च धम्मा उप्पज्जेय्युं हेतुपच्चया. सिया अब्याकतं धम्मं पटिच्च कुसलो च अकुसलो च धम्मा उप्पज्जेय्युं हेतुपच्चया. सिया अब्याकतं धम्मं पटिच्च कुसलो च अकुसलो च अब्याकतो च धम्मा उप्पज्जेय्युं हेतुपच्चया.

(४) कुसलाब्याकतपदं

२८. सिया कुसलञ्च अब्याकतञ्च धम्मं पटिच्च कुसलो धम्मो उप्पज्जेय्य हेतुपच्चया. सिया कुसलञ्च अब्याकतञ्च धम्मं पटिच्च अकुसलो धम्मो उप्पज्जेय्य हेतुपच्चया. सिया कुसलञ्च अब्याकतञ्च धम्मं पटिच्च अब्याकतो धम्मो उप्पज्जेय्य हेतुपच्चया. सिया कुसलञ्च अब्याकतञ्च धम्मं पटिच्च कुसलो च अब्याकतो च धम्मा उप्पज्जेय्युं हेतुपच्चया. सिया कुसलञ्च अब्याकतञ्च धम्मं पटिच्च अकुसलो च अब्याकतो च धम्मा उप्पज्जेय्युं हेतुपच्चया. सिया कुसलञ्च अब्याकतञ्च धम्मं पटिच्च कुसलो च अकुसलो च धम्मा उप्पज्जेय्युं हेतुपच्चया. सिया कुसलञ्च अब्याकतञ्च धम्मं पटिच्च कुसलो च अकुसलो च अब्याकतो च धम्मा उप्पज्जेय्युं हेतुपच्चया.

(५) अकुसलाब्याकतपदं

२९. सिया अकुसलञ्च अब्याकतञ्च धम्मं पटिच्च कुसलो धम्मो उप्पज्जेय्य हेतुपच्चया. सिया अकुसलञ्च अब्याकतञ्च धम्मं पटिच्च अकुसलो धम्मो उप्पज्जेय्य हेतुपच्चया. सिया अकुसलञ्च अब्याकतञ्च धम्मं पटिच्च अब्याकतो धम्मो उप्पज्जेय्य हेतुपच्चया. सिया अकुसलञ्च अब्याकतञ्च धम्मं पटिच्च कुसलो च अब्याकतो च धम्मा उप्पज्जेय्युं हेतुपच्चया. सिया अकुसलञ्च अब्याकतञ्च धम्मं पटिच्च अकुसलो च अब्याकतो च धम्मा उप्पज्जेय्युं हेतुपच्चया. सिया अकुसलञ्च अब्याकतञ्च धम्मं पटिच्च कुसलो च अकुसलो च धम्मा उप्पज्जेय्युं हेतुपच्चया. सिया अकुसलञ्च अब्याकतञ्च धम्मं पटिच्च कुसलो च अकुसलो च अब्याकतो च धम्मा उप्पज्जेय्युं हेतुपच्चया.

(६) कुसलाकुसलपदं

३०. सिया कुसलञ्च अकुसलञ्च धम्मं पटिच्च कुसलो धम्मो उप्पज्जेय्य हेतुपच्चया. सिया कुसलञ्च अकुसलञ्च धम्मं पटिच्च अकुसलो धम्मो उप्पज्जेय्य हेतुपच्चया. सिया कुसलञ्च अकुसलञ्च धम्मं पटिच्च अब्याकतो धम्मो उप्पज्जेय्य हेतुपच्चया. सिया कुसलञ्च अकुसलञ्च धम्मं पटिच्च कुसलो च अब्याकतो च धम्मा उप्पज्जेय्युं हेतुपच्चया. सिया कुसलञ्च अकुसलञ्च धम्मं पटिच्च अकुसलो च अब्याकतो च धम्मा उप्पज्जेय्युं हेतुपच्चया. सिया कुसलञ्च अकुसलञ्च धम्मं पटिच्च कुसलो च अकुसलो च धम्मा उप्पज्जेय्युं हेतुपच्चया. सिया कुसलञ्च अकुसलञ्च धम्मं पटिच्च कुसलो च अकुसलो च अब्याकतो च धम्मा उप्पज्जेय्युं हेतुपच्चया.

(७) कुसलाकुसलाब्याकतपदं

३१. सिया कुसलञ्च अकुसलञ्च अब्याकतञ्च धम्मं पटिच्च कुसलो धम्मो उप्पज्जेय्य हेतुपच्चया. सिया कुसलञ्च अकुसलञ्च अब्याकतञ्च धम्मं पटिच्च अकुसलो धम्मो उप्पज्जेय्य हेतुपच्चया. सिया कुसलञ्च अकुसलञ्च अब्याकतञ्च धम्मं पटिच्च अब्याकतो धम्मो उप्पज्जेय्य हेतुपच्चया. सिया कुसलञ्च अकुसलञ्च अब्याकतञ्च धम्मं पटिच्च कुसलो च अब्याकतो च धम्मा उप्पज्जेय्युं हेतुपच्चया. सिया कुसलञ्च अकुसलञ्च अब्याकतञ्च धम्मं पटिच्च अकुसलो च अब्याकतो च धम्मा उप्पज्जेय्युं हेतुपच्चया. सिया कुसलञ्च अकुसलञ्च अब्याकतञ्च धम्मं पटिच्च कुसलो च अकुसलो च धम्मा उप्पज्जेय्युं हेतुपच्चया. सिया कुसलञ्च अकुसलञ्च अब्याकतञ्च धम्मं पटिच्च कुसलो च अकुसलो च अब्याकतो च धम्मा उप्पज्जेय्युं हेतुपच्चया.

हेतुपच्चयवारो.

३२. सिया कुसलं धम्मं पटिच्च कुसलो धम्मो उप्पज्जेय्य आरम्मणपच्चया .

(यथा हेतुपच्चयो वित्थारितो, एवं आरम्मणपच्चयोपि वित्थारेतब्बो वाचनामग्गेन.)

३३. सिया कुसलं धम्मं पटिच्च कुसलो धम्मो उप्पज्जेय्य अधिपतिपच्चया… अनन्तरपच्चया… समनन्तरपच्चया… सहजातपच्चया… अञ्ञमञ्ञपच्चया… निस्सयपच्चया… उपनिस्सयपच्चया… पुरेजातपच्चया… पच्छाजातपच्चया… आसेवनपच्चया… कम्मपच्चया… विपाकपच्चया… आहारपच्चया… इन्द्रियपच्चया… झानपच्चया… मग्गपच्चया… सम्पयुत्तपच्चया… विप्पयुत्तपच्चया… अत्थिपच्चया… नत्थिपच्चया… विगतपच्चया.

३४. सिया कुसलं धम्मं पटिच्च कुसलो धम्मो उप्पज्जेय्य अविगतपच्चया…पे… अकुसलं धम्मं पटिच्च… अब्याकतं धम्मं पटिच्च… कुसलञ्च अब्याकतञ्च धम्मं पटिच्च… अकुसलञ्च अब्याकतञ्च धम्मं पटिच्च… कुसलञ्च अकुसलञ्च धम्मं पटिच्च… कुसलञ्च अकुसलञ्च अब्याकतञ्च धम्मं पटिच्च कुसलो धम्मो उप्पज्जेय्य… अकुसलो धम्मो उप्पज्जेय्य… अब्याकतो धम्मो उप्पज्जेय्य… कुसलो च अब्याकतो च धम्मा उप्पज्जेय्युं… अकुसलो च अब्याकतो च धम्मा उप्पज्जेय्युं… कुसलो च अकुसलो च धम्मा उप्पज्जेय्युं… कुसलो च अकुसलो च अब्याकतो च धम्मा उप्पज्जेय्युं अविगतपच्चया.

(यथा हेतुपच्चयो वित्थारितो, एवं अविगतपच्चयोपि वित्थारेतब्बो वाचनामग्गेन.)

एकमूलकं.

दुमूलकादि

हेतुमूलकं

३५. सिया कुसलं धम्मं पटिच्च कुसलो धम्मो उप्पज्जेय्य हेतुपच्चया आरम्मणपच्चया…पे… सिया कुसलञ्च अकुसलञ्च अब्याकतञ्च धम्मं पटिच्च कुसलो च अकुसलो च अब्याकतो च धम्मा उप्पज्जेय्युं हेतुपच्चया आरम्मणपच्चया.

३६. सिया कुसलं धम्मं पटिच्च कुसलो धम्मो उप्पज्जेय्य हेतुपच्चया अधिपतिपच्चया …पे… हेतुपच्चया अनन्तरपच्चया… हेतुपच्चया समनन्तरपच्चया…पे… हेतुपच्चया अविगतपच्चया.

दुमूलकं.

३७. सिया कुसलं धम्मं पटिच्च कुसलो धम्मो उप्पज्जेय्य हेतुपच्चया आरम्मणपच्चया अधिपतिपच्चया…पे… हेतुपच्चया आरम्मणपच्चया अनन्तरपच्चया…पे… हेतुपच्चया आरम्मणपच्चया अविगतपच्चया.

तिमूलकं.

३८. सिया कुसलं धम्मं पटिच्च कुसलो धम्मो उप्पज्जेय्य हेतुपच्चया आरम्मणपच्चया अधिपतिपच्चया अनन्तरपच्चया…पे… हेतुपच्चया आरम्मणपच्चया अधिपतिपच्चया अविगतपच्चया.

चतुमूलकं.

(पञ्चमूलकादिका संखित्ता. एकमूलकं, दुमूलकं, तिमूलकं, चतुमूलकं, पञ्चमूलकं, सब्बमूलकं असम्मुय्हन्तेन वित्थारेतब्बं.)

हेतुमूलकं.

आरम्मणमूलकादि

३९. सिया कुसलं धम्मं पटिच्च कुसलो धम्मो उप्पज्जेय्य आरम्मणपच्चया हेतुपच्चया… आरम्मणपच्चया अधिपतिपच्चया…पे… आरम्मणपच्चया अविगतपच्चया.

सिया कुसलं धम्मं पटिच्च कुसलो धम्मो उप्पज्जेय्य अधिपतिपच्चया… अनन्तरपच्चया… समनन्तरपच्चया… सहजातपच्चया… अञ्ञमञ्ञपच्चया…पे… अविगतपच्चया हेतुपच्चया… अविगतपच्चया आरम्मणपच्चया… अविगतपच्चया अधिपतिपच्चया…पे… अविगतपच्चया विगतपच्चया.

दुमूलकं.

४०. सिया कुसलं धम्मं पटिच्च कुसलो धम्मो उप्पज्जेय्य अविगतपच्चया हेतुपच्चया आरम्मणपच्चया… अविगतपच्चया हेतुपच्चया अधिपतिपच्चया… अविगतपच्चया हेतुपच्चया अनन्तरपच्चया…पे… अविगतपच्चया हेतुपच्चया विगतपच्चया.

४१. सिया कुसलं धम्मं पटिच्च कुसलो धम्मो उप्पज्जेय्य अविगतपच्चया हेतुपच्चया आरम्मणपच्चया अधिपतिपच्चया… अविगतपच्चया हेतुपच्चया आरम्मणपच्चया अनन्तरपच्चया…पे… विगतपच्चया.

(एकेकस्स पदस्स एकमूलकं, दुमूलकं, तिमूलकं, चतुमूलकं, पञ्चमूलकं, सब्बमूलकं असम्मुय्हन्तेन वित्थारेतब्बं. )

(क) तिकञ्च पट्ठानवरं दुकुत्तमं,

दुकं तिकञ्चेव तिकं दुकञ्च;

तिकं तिकञ्चेव दुकं दुकञ्च,

छ अनुलोमम्हि नया सुगम्भीराति.

२. पच्चयपच्चनीयं

४२. सिया कुसलं धम्मं पटिच्च कुसलो धम्मो उप्पज्जेय्य नहेतुपच्चया .

(यथा अनुलोमे हेतुपच्चयो वित्थारितो, एवं पच्चनीयेपि नहेतुपच्चयो वित्थारेतब्बो.)

४३. सिया कुसलं धम्मं पटिच्च कुसलो धम्मो उप्पज्जेय्य नआरम्मणपच्चया… नअधिपतिपच्चया… नअनन्तरपच्चया… नसमनन्तरपच्चया… नसहजातपच्चया… नअञ्ञमञ्ञपच्चया… ननिस्सयपच्चया… नउपनिस्सयपच्चया… नपुरेजातपच्चया… नपच्छाजातपच्चया … नआसेवनपच्चया… नकम्मपच्चया… नविपाकपच्चया… नआहारपच्चया… नइन्द्रियपच्चया… नझानपच्चया… नमग्गपच्चया… नसम्पयुत्तपच्चया… नविप्पयुत्तपच्चया… नोअत्थिपच्चया… नोनत्थिपच्चया… नोविगतपच्चया… नोअविगतपच्चया.

४४. सिया कुसलं धम्मं पटिच्च कुसलो धम्मो उप्पज्जेय्य नहेतुपच्चया नआरम्मणपच्चया….

(यथा अनुलोमे एकेकस्स पदस्स एकमूलकं, दुमूलकं, तिमूलकं, चतुमूलकं, याव तेवीसतिमूलकं एवं पच्चनीयेपि वित्थारेतब्बं. )

(ख) तिकञ्च पट्ठानवरं दुकुत्तमं,

दुकं तिकञ्चेव तिकं दुकञ्च;

तिकं तिकञ्चेव दुकं दुकञ्च,

छ पच्चनीयम्हि नया सुगम्भीराति.

३. पच्चयानुलोमपच्चनीयं

४५. सिया कुसलं धम्मं पटिच्च कुसलो धम्मो उप्पज्जेय्य हेतुपच्चया नआरम्मणपच्चया… सिया कुसलं धम्मं पटिच्च अकुसलो धम्मो उप्पज्जेय्य हेतुपच्चया नआरम्मणपच्चया.

(यथा अनुलोमे हेतुपच्चयो वित्थारितो, एवं अनुलोमपच्चनीयेपि पदं वित्थारेतब्बं.)

४६. सिया कुसलं धम्मं पटिच्च कुसलो धम्मो उप्पज्जेय्य हेतुपच्चया नअधिपतिपच्चया… हेतुपच्चया नअनन्तरपच्चया…पे… हेतुपच्चया नोअविगतपच्चया.

४७. सिया कुसलं धम्मं पटिच्च कुसलो धम्मो उप्पज्जेय्य हेतुपच्चया आरम्मणपच्चया नअधिपतिपच्चया… हेतुपच्चया आरम्मणपच्चया नअनन्तरपच्चया…पे… हेतुपच्चया आरम्मणपच्चया नोअविगतपच्चया.

हेतुपच्चया आरम्मणपच्चया अधिपतिपच्चया नअनन्तरपच्चया…पे… हेतुपच्चया आरम्मणपच्चया अधिपतिपच्चया नोअविगतपच्चया.

हेतुपच्चया आरम्मणपच्चया अधिपतिपच्चया अनन्तरपच्चया नसमनन्तरपच्चया…पे… हेतुपच्चया आरम्मणपच्चया अधिपतिपच्चया अनन्तरपच्चया नोअविगतपच्चया…पे….

हेतुपच्चया आरम्मणपच्चया अधिपतिपच्चया अनन्तरपच्चया समनन्तरपच्चया सहजातपच्चया अञ्ञमञ्ञपच्चया निस्सयपच्चया उपनिस्सयपच्चया पुरेजातपच्चया पच्छाजातपच्चया आसेवनपच्चया कम्मपच्चया विपाकपच्चया आहारपच्चया इन्द्रियपच्चया झानपच्चया मग्गपच्चया सम्पयुत्तपच्चया विप्पयुत्तपच्चया अत्थिपच्चया नत्थिपच्चया विगतपच्चया नोअविगतपच्चया.

४८. सिया कुसलं धम्मं पटिच्च कुसलो धम्मो उप्पज्जेय्य आरम्मणपच्चया… अधिपतिपच्चया… अनन्तरपच्चया…पे… अविगतपच्चया नहेतुपच्चया … अविगतपच्चया नआरम्मणपच्चया…पे… अविगतपच्चया नोविगतपच्चया.

अविगतपच्चया हेतुपच्चया नआरम्मणपच्चया…पे… अविगतपच्चया हेतुपच्चया नोविगतपच्चया.

अविगतपच्चया हेतुपच्चया आरम्मणपच्चया नअधिपतिपच्चया…पे… अविगतपच्चया हेतुपच्चया आरम्मणपच्चया नोविगतपच्चया.

अविगतपच्चया हेतुपच्चया आरम्मणपच्चया अधिपतिपच्चया अनन्तरपच्चया समनन्तरपच्चया सहजातपच्चया…पे… नोविगतपच्चया.

(ग) तिकञ्च पट्ठानवरं दुकुत्तमं,

दुकं तिकञ्चेव तिकं दुकञ्च;

तिकं तिकञ्चेव दुकं दुकञ्च,

छ अनुलोमपच्चनीयम्हि नया सुगम्भीराति.

४. पच्चयपच्चनीयानुलोमं

४९. सिया कुसलं धम्मं पटिच्च कुसलो धम्मो उप्पज्जेय्य नहेतुपच्चया आरम्मणपच्चया. सिया कुसलं धम्मं पटिच्च कुसलो धम्मो उप्पज्जेय्य नहेतुपच्चया अधिपतिपच्चया…पे… नहेतुपच्चया अविगतपच्चया.

५०. सिया कुसलं धम्मं पटिच्च कुसलो धम्मो उप्पज्जेय्य नहेतुपच्चया नआरम्मणपच्चया अधिपतिपच्चया…पे… अविगतपच्चया.

नहेतुपच्चया नआरम्मणपच्चया नअधिपतिपच्चया…पे… अविगतपच्चया.

नहेतुपच्चया नआरम्मणपच्चया नअधिपतिपच्चया नअनन्तरपच्चया नसमनन्तरपच्चया…पे… नोअत्थिपच्चया नोनत्थिपच्चया नोविगतपच्चया अविगतपच्चया.

५१. सिया कुसलं धम्मं पटिच्च कुसलो धम्मो उप्पज्जेय्य नआरम्मणपच्चया हेतुपच्चया.

५२. सिया कुसलं धम्मं पटिच्च कुसलो धम्मो उप्पज्जेय्य नआरम्मणपच्चया अधिपतिपच्चया…पे… नआरम्मणपच्चया अविगतपच्चया…पे… नोअविगतपच्चया हेतुपच्चया… नोअविगतपच्चया आरम्मणपच्चया…पे… नोअविगतपच्चया विगतपच्चया.

नोअविगतपच्चया नहेतुपच्चया आरम्मणपच्चया…पे… नोअविगतपच्चया नहेतुपच्चया विगतपच्चया.

नोअविगतपच्चया नहेतुपच्चया नआरम्मणपच्चया नअधिपतिपच्चया…पे… नोअत्थिपच्चया नोनत्थिपच्चया विगतपच्चया.

(घ) तिकञ्च पट्ठानवरं दुकुत्तमं,

दुकं तिकञ्चेव तिकं दुकञ्च;

तिकं तिकञ्चेव दुकं दुकञ्च,

छ पच्चनीयानुलोमम्हि नया सुगम्भीराति.

पुच्छावारो.

निद्देसवारे तेवीसतिपच्चया.