📜

४. ओक्कन्तसंयुत्तं

१-१०. चक्खुसुत्तादिवण्णना

३०२-३११. ओक्कन्तसंयुत्ते ¶ अधिमुच्चतीति सद्धाधिमोक्खं पटिलभति. ओक्कन्तो सम्मत्तनियामन्ति पविट्ठो अरियमग्गं. अभब्बो च ताव कालं कातुन्ति इमिना उप्पन्ने मग्गे फलस्स अनन्तरायतं दीपेति. उप्पन्नस्मिञ्हि मग्गे फलस्स अन्तरायकरणं नाम नत्थि. तेनेवाह – ‘‘अयञ्च पुग्गलो सोतापत्तिफलसच्छिकिरियाय पटिपन्नो अस्स, कप्पस्स च उड्डय्हनवेला अस्स, नेव ताव कप्पो उड्डय्हेय्य, यावायं पुग्गलो न सोतापत्तिफलं सच्छिकरोति, अयं वुच्चति पुग्गलो ठितकप्पी’’ति (पु. प. १७). मत्तसो निज्झानं खमन्तीति पमाणतो ओलोकनं खमन्ति. सेसं सब्बत्थ उत्तानमेवाति.

ओक्कन्तसंयुत्तवण्णना निट्ठिता.