मूल > सुत्तपिटक > खुद्दकनिकाय > थेरगाथापाळि

THA Vol 0
MMR Vol 0
VRI Vol 0
PTS Vol 0

Misc. Paragraph

खुद्दकनिकाये

थेरगाथापाळि

२. महाकोट्ठिकत्थेरगाथा

३. कङ्खारेवतत्थेरगाथा

९. पिलिन्दवच्छत्थेरगाथा

१०. पुण्णमासत्थेरगाथा

६. बेलट्ठसीसत्थेरगाथा

७. दासकत्थेरगाथा

८. सिङ्गालपितुत्थेरगाथा

७. लोमसकङ्गियत्थेरगाथा

८. जम्बुगामिकपुत्तत्थेरगाथा

९. हारितत्थेरगाथा

१०. उत्तियत्थेरगाथा

४. चतुत्थवग्गो

१. गह्वरतीरियत्थेरगाथा

२. सुप्पियत्थेरगाथा

३. सोपाकत्थेरगाथा

४. पोसियत्थेरगाथा

५. सामञ्ञकानित्थेरगाथा

६. कुमापुत्तत्थेरगाथा

७. कुमापुत्तसहायकत्थेरगाथा

५. रमणीयविहारित्थेरगाथा

६. समिद्धित्थेरगाथा

७. उज्जयत्थेरगाथा

८. सञ्जयत्थेरगाथा

९. रामणेय्यकत्थेरगाथा

५. अञ्जनवनियत्थेरगाथा

६. कुटिविहारित्थेरगाथा

७. दुतियकुटिविहारित्थेरगाथा

८. रमणीयकुटिकत्थेरगाथा

९. कोसलविहारित्थेरगाथा

१०. सीवलित्थेरगाथा

७. सत्तमवग्गो

१. वप्पत्थेरगाथा

२. वज्जिपुत्तत्थेरगाथा

३. पक्खत्थेरगाथा

४. विमलकोण्डञ्ञत्थेरगाथा

५. उक्खेपकतवच्छत्थेरगाथा

६. मेघियत्थेरगाथा

७. एकधम्मसवनीयत्थेरगाथा

७. हत्थारोहपुत्तत्थेरगाथा

१. समितिगुत्तत्थेरगाथा

९. (पठम)-देवसभत्थेरगाथा

१०. सामिदत्तत्थेरगाथा

१०. दसमवग्गो

१. परिपुण्णकत्थेरगाथा

१०. (दुतिय)-देवसभत्थेरगाथा

११. एकादसमवग्गो

१. बेलट्ठानिकत्थेरगाथा

८. धम्मसवपितुत्थेरगाथा

९. सङ्घरक्खितत्थेरगाथा

१०. उसभत्थेरगाथा

१२. द्वादसमवग्गो

१. जेन्तत्थेरगाथा

२. वच्छगोत्तत्थेरगाथा

९. वज्जिपुत्तत्थेरगाथा

१०. इसिदत्तत्थेरगाथा

नमो तस्स भगवतो अरहतो सम्मासम्बुद्धस्स

सीहानंव ¶ ¶ ¶ ¶ नदन्तानं, दाठीनं गिरिगब्भरे;

सुणाथ भावितत्तानं, गाथा अत्थूपनायिका [अत्तूपनायिका (सी. क.)].

यथानामा यथागोत्ता, यथाधम्मविहारिनो;

यथाधिमुत्ता सप्पञ्ञा, विहरिंसु अतन्दिता.

तत्थ तत्थ विपस्सित्वा, फुसित्वा अच्चुतं पदं;

कतन्तं पच्चवेक्खन्ता, इममत्थमभासिसुं.

‘‘छन्ना ¶ मे कुटिका सुखा निवाता, वस्स देव यथासुखं;

चित्तं मे सुसमाहितं विमुत्तं, आतापी विहरामि वस्स देवा’’ति.

इत्थं सुदं [इत्थं सुमं (क. अट्ठ.)] आयस्मा सुभूतित्थेरो गाथं अभासित्थाति.

‘‘उपसन्तो ¶ उपरतो, मन्तभाणी अनुद्धतो;

धुनाति पापके धम्मे, दुमपत्तंव मालुतो’’ति.

इत्थं सुदं आयस्मा महाकोट्ठिको [महाकोट्ठितो (सी. स्या.)] थेरो गाथं अभासित्थाति.

‘‘पञ्ञं ¶ ¶ इमं पस्स तथागतानं, अग्गि यथा पज्जलितो निसीथे;

आलोकदा चक्खुददा भवन्ति, ये आगतानं विनयन्ति कङ्ख’’न्ति.

इत्थं सुदं आयस्मा कङ्खारेवतो थेरो गाथं अभासित्थाति.

‘‘सम्भिरेव समासेथ, पण्डितेहत्थदस्सिभि;

अत्थं महन्तं गम्भीरं, दुद्दसं निपुणं अणुं;

धीरा समधिगच्छन्ति, अप्पमत्ता विचक्खणा’’ति.

इत्थं सुदं आयस्मा पुण्णो मन्ताणिपुत्तो [मन्तानिपुत्तो (स्या. क.)] थेरो गाथं अभासित्थाति.

‘‘यो ¶ दुद्दमियो दमेन दन्तो, दब्बो सन्तुसितो वितिण्णकङ्खो;

विजितावी अपेतभेरवो हि, दब्बो सो परिनिब्बुतो ठितत्तो’’ति.

इत्थं सुदं आयस्मा दब्बो थेरो गाथं अभासित्थाति.

‘‘यो ¶ सीतवनं उपगा भिक्खु, एको सन्तुसितो समाहितत्तो;

विजितावी अपेतलोमहंसो, रक्खं कायगतासतिं धितिमा’’ति.

इत्थं सुदं आयस्मा सीतवनियो थेरो गाथं अभासित्थाति.

‘‘योपानुदी ¶ मच्चुराजस्स सेनं, नळसेतुंव सुदुब्बलं महोघो;

विजितावी अपेतभेरवो हि, दन्तो सो परिनिब्बुतो ठितत्तो’’ति.

इत्थं सुदं आयस्मा भल्लियो थेरो गाथं अभासित्थाति.

‘‘यो दुद्दमियो दमेन दन्तो, वीरो सन्तुसितो वितिण्णकङ्खो;

विजितावी अपेतलोमहंसो, वीरो सो परिनिब्बुतो ठितत्तो’’ति.

इत्थं सुदं आयस्मा वीरो थेरो गाथं अभासित्थाति.

‘‘स्वागतं न दुरागतं [नापगतं (सी. स्या.)], नयिदं दुमन्तितं मम;

संविभत्तेसु धम्मेसु, यं सेट्ठं तदुपागमि’’न्ति.

इत्थं सुदं आयस्मा पिलिन्दवच्छो [पिलिन्दिवच्छो (सी.)] थेरो गाथं अभासित्थाति.

‘‘विहरि ¶ ¶ ¶ अपेक्खं इध वा हुरं वा, यो वेदगू समितो यतत्तो;

सब्बेसु धम्मेसु अनूपलित्तो, लोकस्स जञ्ञा उदयब्बयञ्चा’’ति.

इत्थं सुदं आयस्मा पुण्णमासो थेरो गाथं अभासित्थाति.

सुभूति ¶ कोट्ठिको थेरो, कङ्खारेवतसम्मतो;

मन्ताणिपुत्तो दब्बो च, सीतवनियो च भल्लियो;

वीरो पिलिन्दवच्छो च, पुण्णमासो तमोनुदोति.

‘‘पामोज्जबहुलो भिक्खु, धम्मे बुद्धप्पवेदिते;

अधिगच्छे पदं सन्तं, सङ्खारूपसमं सुख’’न्ति.

… चूळवच्छो [चूलगवच्छो (सी.)] थेरो….

‘‘पञ्ञाबली सीलवतूपपन्नो, समाहितो झानरतो सतीमा;

यदत्थियं भोजनं भुञ्जमानो, कङ्खेथ कालं इध वीतरागो’’ति.

… महावच्छो [महागवच्छो (सी.)] थेरो….

‘‘नीलब्भवण्णा ¶ रुचिरा, सीतवारी सुचिन्धरा;

इन्दगोपकसञ्छन्ना, ते सेला रमयन्ति म’’न्ति.

‘‘उपज्झायो ¶ मं अवच, इतो गच्छाम सीवक;

गामे ¶ मे वसति कायो, अरञ्ञं मे गतो मनो;

सेमानकोपि गच्छामि, नत्थि सङ्गो विजानत’’न्ति.

‘‘पञ्च छिन्दे पञ्च जहे, पञ्च चुत्तरि भावये;

पञ्चसङ्गातिगो भिक्खु, ओघतिण्णोति वुच्चती’’ति.

‘‘यथापि भद्दो आजञ्ञो, नङ्गलावत्तनी सिखी;

गच्छति अप्पकसिरेन, एवं रत्तिन्दिवा मम;

गच्छन्ति अप्पकसिरेन, सुखे लद्धे निरामिसे’’ति.

‘‘मिद्धी ¶ यदा होति महग्घसो च, निद्दायिता सम्परिवत्तसायी;

महावराहोव निवापपुट्ठो, पुनप्पुनं गब्भमुपेति मन्दो’’ति.

‘‘अहु ¶ बुद्धस्स दायादो, भिक्खु भेसकळावने;

केवलं अट्ठिसञ्ञाय, अफरी पथविं [पठविं (सी. स्या.)] इमं;

मञ्ञेहं कामरागं सो, खिप्पमेव पहिस्सती’’ति [पहीयभि (सब्बत्थ पाळियं)].

… सिङ्गालपिता [सीगालपिता (सी.)] थेरो….

[ध. प. ८०, १४५ धम्मपदेपि] ‘‘उदकं ¶ हि नयन्ति नेत्तिका, उसुकारा नमयन्ति [दमयन्ति (क.)] तेजनं;

दारुं ¶ नमयन्ति तच्छका, अत्तानं दमयन्ति सुब्बता’’ति.

… कुलो [कुण्डलो (सी.), कुळो (स्या. क.)] थेरो….

‘‘मरणे मे भयं नत्थि, निकन्ति नत्थि जीविते;

सन्देहं निक्खिपिस्सामि, सम्पजानो पटिस्सतो’’ति [पतिस्सतोति (सी. स्या.)];;

चूळवच्छो महावच्छो, वनवच्छो च सीवको;

कुण्डधानो च बेलट्ठि, दासको च ततोपरि;

सिङ्गालपितिको थेरो, कुलो च अजितो दसाति.

‘‘नाहं भयस्स भायामि, सत्था नो अमतस्स कोविदो;

यत्थ भयं नावतिट्ठति, तेन मग्गेन वजन्ति भिक्खवो’’ति.

‘‘नीला ¶ सुगीवा सिखिनो, मोरा कारम्भियं [कारंवियं (सी.), कारवियं (स्या.)] अभिनदन्ति;

ते सीतवातकीळिता [सीतवातकद्दितकलिता (सी.), सीतवातकलिता (स्या.)], सुत्तं झायं [झानं (स्या.), झायिं (?)] निबोधेन्ती’’ति.

‘‘अहं ¶ ¶ ¶ खो वेळुगुम्बस्मिं, भुत्वान मधुपायसं;

पदक्खिणं सम्मसन्तो, खन्धानं उदयब्बयं;

सानुं पटिगमिस्सामि, विवेकमनुब्रूहय’’न्ति.

‘‘अनुवस्सिको पब्बजितो, पस्स धम्मसुधम्मतं;

तिस्सो विज्जा अनुप्पत्ता, कतं बुद्धस्स सासन’’न्ति.

‘‘ओभासजातं फलगं, चित्तं यस्स अभिण्हसो;

तादिसं भिक्खुमासज्ज, कण्ह दुक्खं निगच्छसी’’ति.

‘‘सुत्वा सुभासितं वाचं, बुद्धस्सादिच्चबन्धुनो;

पच्चब्यधिं हि निपुणं, वालग्गं उसुना यथा’’ति.

‘‘दब्बं ¶ कुसं पोटकिलं, उसीरं मुञ्जपब्बजं;

उरसा पनुदिस्सामि, विवेकमनुब्रूहय’’न्ति.

‘‘कच्चि ¶ नो वत्थपसुतो, कच्चि नो भूसनारतो;

कच्चि सीलमयं गन्धं, किं त्वं वायसि [कच्चि सीलमयं गन्धं, त्वं वासि (स्या.)] नेतरा पजा’’ति.

‘‘समुन्नमयमत्तानं, उसुकारोव तेजनं;

चित्तं ¶ उजुं करित्वान, अविज्जं भिन्द हारिता’’ति.

‘‘आबाधे मे समुप्पन्ने, सति मे उदपज्जथ;

आबाधो मे समुप्पन्नो, कालो मे नप्पमज्जितु’’न्ति.

निग्रोधो चित्तको थेरो, गोसालथेरो सुगन्धो;

नन्दियो अभयो थेरो, थेरो लोमसकङ्गियो;

जम्बुगामिकपुत्तो च, हारितो उत्तियो इसीति.

‘‘फुट्ठो ¶ ¶ डंसेहि मकसेहि, अरञ्ञस्मिं ब्रहावने;

नागो संगामसीसेव, सतो तत्राधिवासये’’ति.

‘‘अजरं ¶ जीरमानेन, तप्पमानेन निब्बुतिं;

निमियं [निम्मिस्सं (सी.), निरामिसं (स्या.), निमिनेय्यं (?)] परमं सन्तिं, योगक्खेमं अनुत्तर’’न्ति.

‘‘यथापि ¶ एकपुत्तस्मिं, पियस्मिं कुसली सिया;

एवं सब्बेसु पाणेसु, सब्बत्थ कुसलो सिया’’ति.

‘‘अनासन्नवरा एता, निच्चमेव विजानता;

गामा अरञ्ञमागम्म, ततो गेहं उपाविसि [उपाविसिं (सी.)];

ततो उट्ठाय पक्कामि, अनामन्तेत्वा [अनामन्तिय (सी.)] पोसियो’’ति.

‘‘सुखं सुखत्थो लभते तदाचरं, कित्तिञ्च पप्पोति यसस्स वड्ढति;

यो अरियमट्ठङ्गिकमञ्जसं उजुं, भावेति मग्गं अमतस्स पत्तिया’’ति.

‘‘साधु ¶ सुतं साधु चरितकं, साधु सदा अनिकेतविहारो;

अत्थपुच्छनं पदक्खिणकम्मं, एतं सामञ्ञमकिञ्चनस्सा’’ति.

‘‘नानाजनपदं यन्ति, विचरन्ता असञ्ञता;

समाधिञ्च विराधेन्ति, किंसु रट्ठचरिया करिस्सति;

तस्मा विनेय्य सारम्भं, झायेय्य अपुरक्खतो’’ति.

… कुमापुत्तत्थेरस्स सहायको थेरो….

‘‘यो ¶ ¶ इद्धिया सरभुं अट्ठपेसि, सो गवम्पति असितो अनेजो;

तं सब्बसङ्गातिगतं महामुनिं, देवा नमस्सन्ति भवस्स पारगु’’न्ति.

[सं. नि. १.२१, ९७]‘‘सत्तिया विय ओमट्ठो, डय्हमानोव [डय्हमानेव (सब्बत्थ)] मत्थके;

कामरागप्पहानाय, सतो भिक्खु परिब्बजे’’ति.

‘‘सत्तिया ¶ विय ओमट्ठो, डय्हमानोव मत्थके;

भवरागप्पहानाय, सतो भिक्खु परिब्बजे’’ति.

गह्वरतीरियो ¶ सुप्पियो, सोपाको चेव पोसियो;

सामञ्ञकानि कुमापुत्तो, कुमापुत्तसहायको;

गवम्पति तिस्सत्थेरो, वड्ढमानो महायसोति.

‘‘विवरमनुपतन्ति ¶ विज्जुता, वेभारस्स च पण्डवस्स च;

नगविवरगतो च झायति, पुत्तो अप्पटिमस्स तादिनो’’ति.

‘‘चाले ¶ उपचाले सीसूपचाले ( ) [(चाला उपचाला, सीसूपचाला) (क.)] पतिस्सता [पटिस्सतिका (स्या. क.)] नु खो विहरथ;

‘‘सुमुत्तिको सुमुत्तिको साहु, सुमुत्तिकोम्हि तीहि खुज्जकेहि;

असितासु मया नङ्गलासु, मया खुद्दकुद्दालासु मया.

यदिपि इधमेव इधमेव, अथ वापि अलमेव अलमेव;

झाय सुमङ्गल झाय सुमङ्गल, अप्पमत्तो विहर सुमङ्गला’’ति.

[सं. नि. १.२३९] ‘‘मतं वा अम्म रोदन्ति, यो वा जीवं न दिस्सति;

जीवन्तं मं अम्म पस्सन्ती, कस्मा मं अम्म रोदसी’’ति.

‘‘यथापि ¶ भद्दो आजञ्ञो, खलित्वा पतितिट्ठति;

एवं ¶ दस्सनसम्पन्नं, सम्मासम्बुद्धसावक’’न्ति.

‘‘सद्धायाहं पब्बजितो, अगारस्मानगारियं;

सति पञ्ञा च मे वुड्ढा, चित्तञ्च सुसमाहितं;

कामं करस्सु रूपानि, नेव मं ब्याधयिस्ससी’’ति [बाधयिस्ससीति (सी.), ब्याथयिस्ससीति (?)].

‘‘नमो ¶ ¶ ते बुद्ध वीरत्थु, विप्पमुत्तोसि सब्बधि;

तुय्हापदाने विहरं, विहरामि अनासवो’’ति.

‘‘यतो अहं पब्बजितो, अगारस्मानगारियं;

नाभिजानामि सङ्कप्पं, अनरियं दोससंहित’’न्ति.

‘‘चिहचिहाभिनदिते [विहविहाभिनदिते (सी. स्या.)], सिप्पिकाभिरुतेहि च;

न मे तं फन्दति चित्तं, एकत्तनिरतं हि मे’’ति.

‘‘धरणी ¶ च सिञ्चति वाति, मालुतो विज्जुता चरति नभे;

उपसमन्ति वितक्का, चित्तं सुसमाहितं ममा’’ति.

सिरीवड्ढो रेवतो थेरो, सुमङ्गलो सानुसव्हयो ¶ ;

रमणीयविहारी च, समिद्धिउज्जयसञ्जया;

रामणेय्यो च सो थेरो, विमलो च रणञ्जहोति.

‘‘वस्सति ¶ देवो यथा सुगीतं, छन्ना मे कुटिका सुखा निवाता;

चित्तं सुसमाहितञ्च मय्हं, अथ चे पत्थयसि पवस्स देवा’’ति.

‘‘वस्सति देवो यथा सुगीतं, छन्ना मे कुटिका सुखा निवाता;

चित्तं सुसमाहितञ्च काये, अथ चे पत्थयसि पवस्स देवा’’ति.

‘‘वस्सति देवो यथा सुगीतं, छन्ना मे कुटिका सुखा निवाता;

तस्सं विहरामि अप्पमत्तो, अथ चे पत्थयसि पवस्स देवा’’ति.

‘‘वस्सति ¶ ¶ देवो यथा सुगीतं, छन्ना मे कुटिका सुखा निवाता;

तस्सं विहरामि अदुतियो, अथ चे पत्थयसि पवस्स देवा’’ति.

‘‘आसन्दिं ¶ कुटिकं कत्वा, ओगय्ह अञ्जनं वनं;

तिस्सो विज्जा अनुप्पत्ता, कतं बुद्धस्स सासन’’न्ति.

‘‘को ¶ कुटिकायं भिक्खु कुटिकायं, वीतरागो सुसमाहितचित्तो;

एवं जानाहि आवुसो, अमोघा ते कुटिका कता’’ति.

‘‘अयमाहु पुराणिया कुटि, अञ्ञं पत्थयसे नवं कुटिं;

आसं कुटिया विराजय, दुक्खा भिक्खु पुन नवा कुटी’’ति.

‘‘रमणीया मे कुटिका, सद्धादेय्या मनोरमा;

न मे अत्थो कुमारीहि, येसं अत्थो तहिं गच्छथ नारियो’’ति.

‘‘सद्धायाहं ¶ पब्बजितो, अरञ्ञे मे कुटिका कता;

अप्पमत्तो च आतापी, सम्पजानो पतिस्सतो’’ति [पटिस्सतोति (क.)].

‘‘ते मे इज्झिंसु सङ्कप्पा, यदत्थो पाविसिं कुटिं;

विज्जाविमुत्तिं पच्चेसं, मानानुसयमुज्जह’’न्ति.

गोधिको ¶ च सुबाहु च, वल्लियो उत्तियो इसि;

अञ्जनवनियो थेरो, दुवे कुटिविहारिनो;

रमणीयकुटिको च, कोसलव्हयसीवलीति.

‘‘पस्सति ¶ पस्सो पस्सन्तं, अपस्सन्तञ्च पस्सति;

अपस्सन्तो अपस्सन्तं, पस्सन्तञ्च न पस्सती’’ति.

‘‘एकका ¶ मयं अरञ्ञे विहराम, अपविद्धंव वनस्मिं दारुकं;

तस्स मे बहुका पिहयन्ति, नेरयिका विय सग्गगामिन’’न्ति.

‘‘चुता ¶ पतन्ति पतिता, गिद्धा च पुनरागता;

कतं किच्चं रतं रम्मं, सुखेनन्वागतं सुख’’न्ति.

‘‘दुमव्हयाय उप्पन्नो, जातो पण्डरकेतुना;

केतुहा ¶ केतुनायेव, महाकेतुं पधंसयी’’ति.

‘‘उक्खेपकतवच्छस्स, सङ्कलितं बहूहि वस्सेहि;

तं भासति गहट्ठानं, सुनिसिन्नो उळारपामोज्जो’’ति.

‘‘अनुसासि ¶ महावीरो, सब्बधम्मान पारगू;

तस्साहं धम्मं सुत्वान, विहासिं सन्तिके सतो;

तिस्सो विज्जा अनुप्पत्ता, कतं बुद्धस्स सासन’’न्ति.

‘‘किलेसा झापिता मय्हं, भवा सब्बे समूहता;

विक्खीणो जातिसंसारो, नत्थि दानि पुनब्भवो’’ति.

[उदा. ३७; पाचि. १५३] ‘‘अधिचेतसो अप्पमज्जतो, मुनिनो मोनपथेसु सिक्खतो;

सोका न भवन्ति तादिनो, उपसन्तस्स सदा सतीमतो’’ति.

‘‘सुत्वान ¶ धम्मं महतो महारसं, सब्बञ्ञुतञ्ञाणवरेन देसितं;

मग्गं पपज्जिं [पपज्जं (क.)] अमतस्स पत्तिया, सो योगक्खेमस्स पथस्स कोविदो’’ति.

‘‘सीलमेव ¶ ¶ इध अग्गं, पञ्ञवा पन उत्तमो;

मनुस्सेसु च देवेसु, सीलपञ्ञाणतो जय’’न्ति.

वप्पो च वज्जिपुत्तो च, पक्खो विमलकोण्डञ्ञो;

उक्खेपकतवच्छो च, मेघियो एकधम्मिको;

एकुदानियछन्ना च, पुण्णत्थेरो महब्बलोति.

‘‘सुसुखुमनिपुणत्थदस्सिना, मतिकुसलेन निवातवुत्तिना;

संसेवितवुद्धसीलिना [संसेवितबुद्धसीलिना (क.)], निब्बानं न हि तेन दुल्लभ’’न्ति.

‘‘यथा ¶ कळीरो सुसु वड्ढितग्गो, दुन्निक्खमो होति पसाखजातो;

एवं अहं भरियायानिताय, अनुमञ्ञं ¶ मं पब्बजितोम्हि दानी’’ति.

‘‘जिण्णञ्च दिस्वा दुखितञ्च ब्याधितं, मतञ्च दिस्वा गतमायुसङ्खयं;

ततो अहं निक्खमितून पब्बजिं, पहाय कामानि मनोरमानी’’ति.

‘‘कामच्छन्दो च ब्यापादो, थिनमिद्धञ्च [थीनमिद्धञ्च (सी. स्या.)] भिक्खुनो;

उद्धच्चं विचिकिच्छा च, सब्बसोव न विज्जती’’ति.

‘‘साधु सुविहितान दस्सनं, कङ्खा छिज्जति बुद्धि वड्ढति;

बालम्पि करोन्ति पण्डितं, तस्मा साधु सतं समागमो’’ति.

‘‘उप्पतन्तेसु ¶ निपते, निपतन्तेसु उप्पते;

वसे अवसमानेसु, रममानेसु नो रमे’’ति.

‘‘इदं ¶ ¶ पुरे चित्तमचारि चारिकं, येनिच्छकं यत्थकामं यथासुखं;

तदज्जहं निग्गहेस्सामि योनिसो, हत्थिप्पभिन्नं विय अङ्कुसग्गहो’’ति.

‘‘अनेकजातिसंसारं ¶ , सन्धाविस्सं अनिब्बिसं;

तस्स मे दुक्खजातस्स, दुक्खक्खन्धो अपरद्धो’’ति.

‘‘सब्बो रागो पहीनो मे, सब्बो दोसो समूहतो;

सब्बो मे विगतो मोहो, सीतिभूतोस्मि निब्बुतो’’ति.

‘‘यं ¶ मया पकतं कम्मं, अप्पं वा यदि वा बहुं;

सब्बमेतं परिक्खीणं, नत्थि दानि पुनब्भवो’’ति.

वच्छपालो च यो थेरो, आतुमो माणवो इसि;

सुयामनो सुसारदो, थेरो यो च पियञ्जहो;

आरोहपुत्तो मेण्डसिरो, रक्खितो उग्गसव्हयोति.

‘‘यं ¶ मया पकतं पापं, पुब्बे अञ्ञासु जातिसु;

इधेव तं वेदनीयं, वत्थु अञ्ञं न विज्जती’’ति.

‘‘येन ¶ येन सुभिक्खानि, सिवानि अभयानि च;

तेन पुत्तक गच्छस्सु, मा सोकापहतो भवा’’ति.

‘‘सीहप्पमत्तो विहर, रत्तिन्दिवमतन्दितो;

भावेहि कुसलं धम्मं, जह सीघं समुस्सय’’न्ति.

‘‘सब्बरत्तिं ¶ सुपित्वान, दिवा सङ्गणिके रतो;

कुदास्सु नाम दुम्मेधो, दुक्खस्सन्तं करिस्सती’’ति.

‘‘चित्तनिमित्तस्स कोविदो, पविवेकरसं विजानिय;

झायं निपको पतिस्सतो, अधिगच्छेय्य सुखं निरामिस’’न्ति.

‘‘इतो ¶ बहिद्धा पुथु अञ्ञवादिनं, मग्गो न निब्बानगमो यथा अयं;

इतिस्सु सङ्घं भगवानुसासति, सत्था सयं पाणितलेव दस्सय’’न्ति.

‘‘खन्धा ¶ दिट्ठा यथाभूतं, भवा सब्बे पदालिता;

विक्खीणो जातिसंसारो, नत्थि दानि पुनब्भवो’’ति.

‘‘असक्खिं ¶ वत अत्तानं, उद्धातुं उदका थलं;

वुय्हमानो महोघेव, सच्चानि पटिविज्झह’’न्ति.

‘‘उत्तिण्णा पङ्कपलिपा, पाताला परिवज्जिता;

मुत्तो ओघा च गन्था च, सब्बे माना विसंहता’’ति.

‘‘पञ्चक्खन्धा परिञ्ञाता, तिट्ठन्ति छिन्नमूलका;

विक्खीणो जातिसंसारो, नत्थि दानि पुनब्भवो’’ति.

थेरो समितिगुत्तो च, कस्सपो सीहसव्हयो;

नीतो सुनागो नागितो, पविट्ठो अज्जुनो इसि;

देवसभो च यो थेरो, सामिदत्तो महब्बलोति.

‘‘न ¶ तथा मतं सतरसं, सुधन्नं यं मयज्ज परिभुत्तं;

अपरिमितदस्सिना गोतमेन, बुद्धेन देसितो धम्मो’’ति.

‘‘यस्सासवा ¶ ¶ ¶ परिक्खीणा, आहारे च अनिस्सितो;

सुञ्ञता अनिमित्तो च, विमोक्खो यस्स गोचरो;

आकासेव सकुन्तानं, पदं तस्स दुरन्नय’’न्ति.

‘‘दुक्खा कामा एरक, न सुखा कामा एरक;

यो कामे कामयति, दुक्खं सो कामयति एरक;

यो कामे न कामयति, दुक्खं सो न कामयति एरका’’ति.

‘‘नमो हि तस्स भगवतो, सक्यपुत्तस्स सिरीमतो;

तेनायं अग्गप्पत्तेन, अग्गधम्मो [अग्गो धम्मो (सी.)] सुदेसितो’’ति.

‘‘अन्धोहं हतनेत्तोस्मि, कन्तारद्धानपक्खन्दो [पक्खन्नो (सी.), पक्कन्तो (स्या. सी. अट्ठ.)];

सयमानोपि गच्छिस्सं, न सहायेन पापेना’’ति.

‘‘एकपुप्फं ¶ चजित्वान, असीति [असीतिं (सी.)] वस्सकोटियो;

सग्गेसु परिचारेत्वा, सेसकेनम्हि निब्बुतो’’ति.

‘‘हित्वा सतपलं कंसं, सोवण्णं सतराजिकं;

अग्गहिं मत्तिकापत्तं, इदं दुतियाभिसेचन’’न्ति.

‘‘रूपं ¶ ¶ दिस्वा सति मुट्ठा, पियं निमित्तं मनसिकरोतो;

सारत्तचित्तो वेदेति, तञ्च अज्झोस तिट्ठति;

तस्स वड्ढन्ति आसवा, भवमूलोपगामिनो’’ति [भवमूला भवगामिनोति (सी. क.)].

‘‘सद्दं सुत्वा सति मुट्ठा, पियं निमित्तं मनसिकरोतो;

सारत्तचित्तो वेदेति, तञ्च अज्झोस तिट्ठति;

तस्स वड्ढन्ति आसवा, संसारं उपगामिनो’’ति.

‘‘सम्मप्पधानसम्पन्नो, सतिपट्ठानगोचरो;

विमुत्तिकुसुमसञ्छन्नो, परिनिब्बिस्सत्यनासवो’’ति.

परिपुण्णको च विजयो, एरको मेत्तजी मुनि;

चक्खुपालो खण्डसुमनो, तिस्सो च अभयो तथा;

उत्तियो च महापञ्ञो, थेरो देवसभोपि चाति.

‘‘हित्वा ¶ ¶ गिहित्तं अनवोसितत्तो, मुखनङ्गली ओदरिको कुसीतो;

महावराहोव ¶ निवापपुट्ठो, पुनप्पुनं गब्भमुपेति मन्दो’’ति.

‘‘मानेन ¶ वञ्चितासे, सङ्खारेसु संकिलिस्समानासे;

लाभालाभेन मथिता, समाधिं नाधिगच्छन्ती’’ति.

‘‘नाहं एतेन अत्थिको, सुखितो धम्मरसेन तप्पितो;

पित्वा [पीत्वान (सी. स्या.)] रसग्गमुत्तमं, न च काहामि विसेन सन्थव’’न्ति.

‘‘लहुको वत मे कायो, फुट्ठो च पीतिसुखेन विपुलेन;

तूलमिव एरितं मालुतेन, पिलवतीव मे कायो’’ति.

‘‘उक्कण्ठितोपि न वसे, रममानोपि पक्कमे;

न त्वेवानत्थसंहितं, वसे वासं विचक्खणो’’ति.

‘‘सतलिङ्गस्स ¶ अत्थस्स, सतलक्खणधारिनो;

एकङ्गदस्सी दुम्मेधो, सतदस्सी च पण्डितो’’ति.

‘‘पब्बजिं ¶ तुलयित्वान, अगारस्मानगारियं;

तिस्सो ¶ विज्जा अनुप्पत्ता, कतं बुद्धस्स सासन’’न्ति.

‘‘स वीसवस्ससतिको, पब्बजिं अनगारियं;

तिस्सो विज्जा अनुप्पत्ता, कतं बुद्धस्स सासन’’न्ति.

‘‘न ¶ नूनायं परमहितानुकम्पिनो, रहोगतो अनुविगणेति सासनं;

तथाहयं विहरति पाकतिन्द्रियो, मिगी यथा तरुणजातिका वने’’ति.

‘‘नगा नगग्गेसु सुसंविरूळ्हा, उदग्गमेघेन नवेन सित्ता;

विवेककामस्स अरञ्ञसञ्ञिनो, जनेति भिय्यो उसभस्स कल्यत’’न्ति.

बेलट्ठानिको सेतुच्छो, बन्धुरो खितको इसि;

मलितवम्भो सुहेमन्तो, धम्मसवो धम्मसवपिता;

सङ्घरक्खितत्थेरो ¶ च, उसभो च महामुनीति.

‘‘दुप्पब्बज्जं ¶ ¶ वे दुरधिवासा गेहा, धम्मो गम्भीरो दुरधिगमा भोगा;

किच्छा वुत्ति नो इतरीतरेनेव, युत्तं चिन्तेतुं सततमनिच्चत’’न्ति.

‘‘तेविज्जोहं महाझायी, चेतोसमथकोविदो;

सदत्थो मे अनुप्पत्तो, कतं बुद्धस्स सासन’’न्ति.

‘‘अच्छोदिका पुथुसिला,गोनङ्गुलमिगायुता;

अम्बुसेवालसञ्छन्ना, ते सेला रमयन्ति म’’न्ति.

‘‘कायदुट्ठुल्लगरुनो, हिय्यमानम्हि [हीयमानम्हि (सी.)] जीविते;

सरीरसुखगिद्धस्स, कुतो समणसाधुता’’ति.

‘‘एसावहिय्यसे पब्बतेन, बहुकुटजसल्लकिकेन [सल्लकितेन (सी.), सल्लरिकेन (स्या.)];

नेसादकेन ¶ गिरिना, यसस्सिना परिच्छदेना’’ति.

‘‘छफस्सायतने ¶ ¶ ¶ हित्वा, गुत्तद्वारो सुसंवुतो;

अघमूलं वमित्वान, पत्तो मे आसवक्खयो’’ति.

… पारापरियो [पारासरियो (सी.), पारंपरियो (क.)] थेरो ….

‘‘सुविलित्तो सुवसनो,सब्बाभरणभूसितो;

तिस्सो विज्जा अज्झगमिं, कतं बुद्धस्स सासन’’न्ति.

‘‘अभिसत्तोव निपतति, वयो रूपं अञ्ञमिव तथेव सन्तं;

तस्सेव सतो अविप्पवसतो, अञ्ञस्सेव सरामि अत्तान’’न्ति.

… किमिलो [किम्बिलो (सी. स्या.)] थेरो….

‘‘रुक्खमूलगहनं पसक्किय, निब्बानं हदयस्मिं ओपिय;

झाय गोतम मा च पमादो, किं ते बिळिबिळिका करिस्सती’’ति.

‘‘पञ्चक्खन्धा परिञ्ञाता, तिट्ठन्ति छिन्नमूलका;

दुक्खक्खयो ¶ अनुप्पत्तो,पत्तो मे आसवक्खयो’’ति.

जेन्तो ¶ च वच्छगोत्तो च, वच्छो च वनसव्हयो;

अधिमुत्तो महानामो, पारापरियो यसोपि च;

किमिलो वज्जिपुत्तो च, इसिदत्तो महायसोति.

वीसुत्तरसतं थेरा, कतकिच्चा अनासवा;

एककेव निपातम्हि, सुसङ्गीता महेसिभीति.