मूल > सुत्तपिटक > खुद्दकनिकाय > जातकपाळि-१

[किमग्घती तण्डुलनाळिका च, बाराणसी अन्तरबाहिरानि; अस्सपञ्चसते तानि, एका तण्डुलनाळिकाति; (स्या.)] किमग्घति तण्डुलनाळिकाय, अस्सान मूलाय वदेहि राज [नाळिका च (सी.), नाळिकाय (क. सी. अट्ठ.)];

बाराणसिं सन्तरबाहिरतो [बाहिरन्तं (सी.)], अयमग्घति तण्डुलनाळिकाति [किमग्घती वण्डुलनाळिका च, बाराणसी अन्तरबाहिरानि; अस्सपञ्चसते तानि, एका तण्डुलनाळिकाति; (स्या.)].

हिरिओत्तप्पसम्पन्ना ¶ , सुक्कधम्मसमाहिता;

सन्तो सप्पुरिसा लोके, देवधम्माति वुच्चरेति.

पुत्तो त्याहं महाराज, त्वं मं पोस जनाधिप;

अञ्ञेपि देवो पोसेति, किञ्च [किञ्चि (क.)] देवो सकं पजन्ति.

कट्ठहारि [कट्ठवाहन (क.)] जातकं सत्तमं.

अपि ¶ ¶ अतरमानानं, फलासाव समिज्झति;

विपक्कब्रह्मचरियोस्मि, एवं जानाहि गामणीति.

उत्तमङ्गरुहा मय्हं, इमे जाता वयोहरा;

पातुभूता देवदूता, पब्बज्जासमयो ममाति.

मघदेव [मखादेव (सी. पी.), देवदूत (क.)] जातकं नवमं.

यञ्च ¶ अञ्ञे न रक्खन्ति, यो च अञ्ञे न रक्खति;

स वे राज सुखं सेति, कामेसु अनपेक्खवाति.

वरापण्णक वण्णुपथ सेरिवरो, सुविचक्खण तण्डुलनाळिकस्सा;

हिरि पुत्तवरुत्तगामणिना, यो च न रक्खति तेन दसाति.

होति सीलवतं अत्थो, पटिसन्थार [पटिसन्धार (क.)] वुत्तिनं;

लक्खणं पस्स आयन्तं, ञातिसङ्घपुरक्खतं [पुरक्खितं (स्या.), पुरेक्खितं (क.)];

अथ पस्ससिमं काळं, सुविहीनंव ञातिभीति.

निग्रोधमेव ¶ ¶ ¶ सेवेय्य, न साखमुपसंवसे;

निग्रोधस्मिं मतं सेय्यो, यञ्चे साखस्मि [साखस्मिं (सी. पी.)] जीवितन्ति.

धिरत्थु कण्डिनं सल्लं, पुरिसं गाळ्हवेधिनं;

धिरत्थु तं जनपदं, यत्थित्थी परिणायिका;

ते चापि धिक्किता [धिक्कता (?)] सत्ता, ये इत्थीनं वसंगताति.

न किरत्थि रसेहि पापियो, आवासेहि व [वा (सब्बत्थ)] सन्थवेहि वा;

वातमिगं गहननिस्सितं [गेहनिस्सितं (सी. पी.)], वसमानेसि रसेहि सञ्जयोति.

अट्ठक्खुरं खरादिये, मिगं वङ्कातिवङ्किनं;

सत्तहि ¶ कालातिक्कन्तं [सत्तहि कलाह’तिक्कन्तं (सी.), सत्तकालेह’तिक्कन्तं (स्या.), सत्तहि कालाह’तिक्कन्तं (पी.)], न नं ओवदितुस्सहेति.

मिगं ¶ तिपल्लत्थ [तिपल्लत्त (क.)] मनेकमायं, अट्ठक्खुरं अड्ढरत्तापपायिं [अड्ढरत्तावपायिं (सी. पी.)];

एकेन सोतेन छमास्ससन्तो, छहि कलाहितिभोति [कलाहतिभोति (सी. स्या. पी.)] भागिनेय्योति.

काळे ¶ वा यदि वा जुण्हे, यदा वायति मालुतो;

वातजानि हि सीतानि, उभोत्थमपराजिताति.

एवं चे सत्ता जानेय्युं, दुक्खायं जातिसम्भवो;

न पाणो पाणिनं हञ्ञे, पाणघाती हि सोचतीति.

सचे ¶ मुच्चे [मुञ्चे (सी. स्या. पी.)] पेच्च मुच्चे [मुञ्चे (सी. स्या. पी.)], मुच्चमानो हि बज्झति;

न हेवं धीरा मुच्चन्ति, मुत्ति बालस्स बन्धनन्ति.

दिस्वा पदमनुत्तिण्णं, दिस्वानोतरितं पदं;

नळेन वारिं पिस्साम [पिविस्साम (सी. स्या. पी.)], नेव [न च (क.)] मं त्वं वधिस्ससीति.

अथ ¶ लक्खण साख धिरत्थु पुन, न किरत्थि रसेहि खरादिया;

अतिभोति वर [रस (सब्बत्थ)] मालुत पाण, मुच्चेन नळअव्हयनेन भवन्ति दसाति.

ञातमेतं ¶ कुरुङ्गस्स, यं त्वं सेपण्णि सिय्यसि [सेय्यसि (सी. स्या. पी.)];

अञ्ञं ¶ सेपण्णि गच्छामि, न मे ते रुच्चते फलन्ति.

ये कुक्कुरा राजकुलम्हि वद्धा, कोलेय्यका वण्णबलूपपन्ना;

तेमे न वज्झा मयमस्म वज्झा, नायं सघच्चा दुब्बलघातिकायन्ति.

अपि पस्सेन सेमानो, सल्लेभि सल्ललीकतो;

सेय्योव वळवा गोजो [भोज्जो (सी.), भोज्झो (स्या. पी.)], युञ्ज मञ्ञेव सारथीति.

गोजानीय [भोजाजानीय (सी. स्या. पी.)] जातकं ततियं.

यदा यदा यत्थ यदा, यत्थ यत्थ यदा यदा;

आजञ्ञो कुरुते वेगं, हायन्ति तत्थ वाळवाति.

अञ्ञमञ्ञेहि ¶ ¶ तित्थेहि, अस्सं पायेहि सारथि;

अच्चासनस्स पुरिसो, पायासस्सपि तप्पतीति.

पुराणचोरान ¶ वचो निसम्म, महिळामुखो पोथयमन्वचारी;

सुसञ्ञतानञ्हि वचो निसम्म, गजुत्तमो सब्बगुणेसु अट्ठाति.

नालं कबळं पदातवे, न च पिण्डं न कुसे न घंसितुं;

मञ्ञामि अभिण्हदस्सना, नागो स्नेहमकासि [सिनेहमकासि (सी. स्या. पी.)] कुक्कुरेति.

मनुञ्ञमेव ¶ भासेय्य, नामनुञ्ञं कुदाचनं;

मनुञ्ञं भासमानस्स, गरुं भारं उदद्धरि;

धनञ्च नं अलाभेसि, तेन चत्तमनो अहूति.

यतो यतो गरु धुरं, यतो गम्भीरवत्तनी;

तदास्सु कण्हं युञ्जन्ति, स्वास्सु तं वहते धुरन्ति.

मा ¶ मुनिकस्स पिहयि, आतुरन्नानि भुञ्जति;

अप्पोस्सुक्को भुसं खाद, एतं दीघायुलक्खणन्ति.

कुरुङ्गस्स ¶ कुक्कुरगोजवरो, पुन वाळवस्ससिरिव्हयनो [सिरिवयनो (सब्बत्थ)];

महिळामुखनामनुञ्ञवरो, वहते धुर मुनिकेन दसाति.

कुलावका ¶ मातलि सिम्बलिस्मिं, ईसामुखेन परिवज्जयस्सु;

कामं चजाम असुरेसु पाणं, मा मे दिजा विक्कुलवा [मायिमे दिजा विकुलावा (सी. स्या. पी.)] अहेसुन्ति.

रुदं मनुञ्ञं रुचिरा च पिट्ठि, वेळुरियवण्णूपनिभा [वण्णूपटिभा (स्या.), वण्णसन्निभा (क.)] च गीवा;

ब्याममत्तानि च पेखुणानि, नच्चेन ते धीतरं नो ददामीति.

सम्मोदमाना ¶ गच्छन्ति, जालमादाय पक्खिनो;

यदा ते विवदिस्सन्ति, तदा एहिन्ति मे वसन्ति.

न ¶ मं सीतं न मं उण्हं, न मं जालस्मि बाधनं;

यञ्च मं मञ्ञते मच्छी, अञ्ञं सो रतिया गतोति.

सन्ति ¶ पक्खा अपतना, सन्ति पादा अवञ्चना;

मातापिता च निक्खन्ता, जातवेद पटिक्कमाति.

यं निस्सिता जगतिरुहं विहङ्गमा, स्वायं अग्गिं पमुञ्चति;

दिसा भजथ वक्कङ्गा [वङ्कङ्गा (स्या.)], जातं सरणतो भयन्ति.

ये वुड्ढ [वद्ध (सी. पी.)] मपचायन्ति, नरा धम्मस्स कोविदा;

दिट्ठेव धम्मे पासंसा, सम्पराये च सुग्गतीति.

नाच्चन्तं ¶ निकतिप्पञ्ञो, निकत्या सुखमेधति;

आराधेति निकतिप्पञ्ञो [आराधे निकतिप्पञ्ञो (पी.)], बको कक्कटकामिवाति.

मञ्ञे ¶ सोवण्णयो रासि, सोण्णमाला च नन्दको;

यत्थ दासो आमजातो, ठितो थुल्लानि [थूलानि (क.)] गज्जतीति.

कामं ¶ पतामि निरयं, उद्धंपादो अवंसिरो;

नानरियं करिस्सामि, हन्द पिण्डं पटिग्गहाति.

सिरिमातलि धीतर पक्खिवरो, रतियागतो मातापिता च पुन;

जगतीरुह वुड्ढ सुकक्कटको, तथा नन्दकपिण्डवरेन दसाति.

यो ¶ अत्थकामस्स हितानुकम्पिनो, ओवज्जमानो न करोति सासनं;

अजिया पादमोलम्ब [पादमोलुम्ब (सी. स्या. पी.)], मित्तको विय सोचतीति.

यो ¶ अत्थकामस्स हितानुकम्पिनो, ओवज्जमानो न करोति सासनं;

कपोतकस्स वचनं अकत्वा, अमित्तहत्थत्थगतोव सेतीति.

यो अत्थकामस्स हितानुकम्पिनो, ओवज्जमानो न करोति सासनं;

एवं सो निहतो सेति, वेळुकस्स यथा पिताति.

सेय्यो ¶ ¶ अमित्तो मतिया उपेतो, न त्वेव मित्तो मतिविप्पहीनो;

मकसं वधिस्सन्ति हि एळमूगो, पुत्तो पितु अब्भिदा उत्तमङ्गन्ति.

सेय्यो अमित्तो मेधावी, यञ्चे बालानुकम्पको;

पस्स रोहिणिकं जम्मिं, मातरं हन्त्वान सोचतीति.

न वे अनत्थकुसलेन, अत्थचरिया सुखावहा;

हापेति अत्थं दुम्मेधो, कपि आरामिको यथाति.

न ¶ वे अनत्थकुसलेन, अत्थचरिया सुखावहा;

हापेति अत्थं दुम्मेधो, कोण्डञ्ञो वारुणिं यथाति.

अनुपायेन ¶ यो अत्थं, इच्छति सो विहञ्ञति;

चेता हनिंसु वेदब्बं [वेदब्भं (सी. पी.)], सब्बे ते ब्यसनमज्झगूति.

वेदब्ब [वेदब्भ (सी. पी.)] जातकं अट्ठमं.

नक्खत्तं ¶ पटिमानेन्तं, अत्थो बालं उपच्चगा;

अत्थो अत्थस्स नक्खत्तं, किं करिस्सन्ति तारकाति.

दुम्मेधानं सहस्सेन, यञ्ञो मे उपयाचितो;

इदानि खोहं यजिस्सामि, बहु [बहू (सी. पी.), बहुं (क.)] अधम्मिको जनोति.

अथ मित्तक मातु कपोतवरो, तथा वेळूक एळमूगो रोहिणी;

कपि ¶ वारुणि चेतचरा च पुन, तथा तारक यञ्ञवरेन दसाति.

आसीसेथेव ¶ [आसिंसेथेव (सी. स्या. पी.)] पुरिसो, न निब्बिन्देय्य पण्डितो;

पस्सामि वोहं अत्तानं, यथा इच्छिं तथा अहूति.

वायमेथेव पुरिसो, न निब्बिन्देय्य पण्डितो;

पस्सामि वोहं अत्तानं, उदका थलमुब्भतन्ति.

तथेव ¶ पुण्णा पातियो, अञ्ञायं वत्तते कथा;

आकारणेन [आकारकेन (सी. स्या. पी.)] जानामि, न चायं भद्दिका सुराति.

नायं ¶ रुक्खो दुरारुहो, नपि गामतो आरका;

आकारणेन जानामि, नायं सादुफलो दुमोति.

यो अलीनेन चित्तेन, अलीनमनसो नरो;

भावेति कुसलं धम्मं, योगक्खेमस्स पत्तिया;

पापुणे अनुपुब्बेन, सब्बसंयोजनक्खयन्ति.

यो ¶ पहट्ठेन चित्तेन, पहट्ठमनसो नरो;

भावेति कुसलं धम्मं, योगक्खेमस्स पत्तिया;

पापुणे अनुपुब्बेन, सब्बसंयोजनक्खयन्ति.

यस्सेते चतुरो धम्मा, वानरिन्द यथा तव;

सच्चं धम्मो धिति [धिती (सी. पी.)] चागो, दिट्ठं सो अतिवत्ततीति.

यस्सेते ¶ ¶ च [यस्स एते (सी. पी.)] तयो धम्मा, वानरिन्द यथा तव;

दक्खियं सूरियं पञ्ञा, दिट्ठं सो अतिवत्ततीति.

धमे धमे नातिधमे, अतिधन्तञ्हि पापकं;

धन्तेन हि सतं लद्धं, अतिधन्तेन नासितन्ति.

धमे धमे नातिधमे, अतिधन्तञ्हि पापकं;

धन्तेनाधिगता भोगा, ते तातो विधमी धमन्ति.

यथा ¶ इच्छिं तथाहुदका थला, सुर सादुफलो च अलीनमनो;

सम्पहट्ठमनो ¶ चतुरो च तयो, सतलद्धक भोगधनेन दसाति.

असा लोकित्थियो नाम, वेला तासं न विज्जति;

सारत्ता च पगब्भा च, सिखी सब्बघसो यथा;

ता हित्वा पब्बजिस्सामि, विवेकमनुब्रूहयन्ति.

यं ¶ ब्राह्मणो अवादेसि, वीणं समुखवेठितो;

अण्डभूता भता भरिया, तासु को जातु विस्ससेति.

कोधना अकतञ्ञू च, पिसुणा मित्तभेदिका [पिसुणा च विभेदिका (सी. स्या. पी.)];

ब्रह्मचरियं चर भिक्खु, सो सुखं न विहाहसीति [पिहाहिसीति (सी. स्या. पी.), विहायसि (क.)].

तक्कपण्डितजातकं [तक्कजातकं (सी. स्या. पी. अट्ठ.)] ततियं.

मा ¶ सु नन्दि इच्छति मं, मा सु सोचि न मिच्छति [न इच्छति (सी. स्या. पी.)];

थीनं भावो दुराजानो, मच्छस्सेवोदके गतन्ति.

यथा ¶ नदी च पन्थो च, पानागारं सभा पपा;

एवं लोकित्थियो नाम, नासं कुज्झन्ति पण्डिताति.

एका इच्छा पुरे आसि, अलद्धा मुदुलक्खणं;

यतो लद्धा अळारक्खी, इच्छा इच्छं विजायथाति.

उच्छङ्गे देव मे पुत्तो, पथे धावन्तिया पति;

तञ्च देसं न पस्सामि, यतो सोदरियमानयेति [सोदरियं नये (क.)].

यस्मिं ¶ ¶ मनो निविसति, चित्तञ्चापि [चित्तं वापि (कत्थचि)] पसीदति;

अदिट्ठपुब्बके पोसे, कामं तस्मिम्पि विस्ससेति.

धिरत्थु तं विसं वन्तं, यमहं जीवितकारणा;

वन्तं पच्चावमिस्सामि [पच्चाहरिस्सामि (क.)], मतं मे जीविता वरन्ति.

न तं जितं साधु जितं, यं जितं अवजीयति;

तं खो जितं साधु जितं, यं जितं नावजीयतीति.

सिखीसब्बघसोपि ¶ च वीणवरो, पिसुणा मित्तभेदिका नन्दी नदी;

मुदुलक्खण सोदरिया च मनो, विस साधुजितेन भवन्ति दसाति.

यो ¶ पुब्बे करणीयानि, पच्छा सो कातुमिच्छति;

वरुणकट्ठ [वरणकट्ठ (सी. पी.)] भञ्जोव, स पच्छा मनुतप्पतीति.

अकतञ्ञुस्स ¶ पोसस्स, निच्चं विवरदस्सिनो;

सब्बं चे पथविं [पठविं (सी. स्या. पी.)] दज्जा, नेव नं अभिराधयेति.

सच्चं किरेवमाहंसु, नरा एकच्चिया इध;

कट्ठं निप्लवितं [विप्लावितं (सी. पी.)] सेय्यो, न त्वेवेकच्चियो नरोति.

साधू सम्बहुला ञाती, अपि रुक्खा अरञ्ञजा;

वातो ¶ वहति एकट्ठं, ब्रहन्तम्पि वनप्पतिन्ति.

अभित्थनय ¶ पज्जुन्न, निधिं काकस्स नासय;

काकं सोकाय रन्धेहि, मञ्च सोका पमोचयाति.

असङ्कियोम्हि गामम्हि, अरञ्ञे नत्थि मे भयं;

उजुं मग्गं समारूळ्हो, मेत्ताय करुणाय चाति.

उसभा ¶ रुक्खा गावियो गवा च, अस्सो कंसो सिङ्गाली [सिगासी (सी. स्या. पी.)] च कुम्भो;

पोक्खरणी च अपाकचन्दनं, लाबूनि सीदन्ति सिला प्लवन्ति.

मण्डूकियो कण्हसप्पे गिलन्ति, काकं सुपण्णा परिवारयन्ति;

तसा ¶ वका एळकानं भयाहि, विपरियासो [विपरियायो (स्या. क.)] वत्तति नयिध मत्थीति.

उभो खञ्जा उभो कुणी, उभो विसमचक्खुका [चक्खुला (सी. पी.)];

उभिन्नं पिळका [पीळका (स्या.)] जाता, नाहं पस्सामि इल्लिसन्ति.

यतो ¶ विलुत्ता च हता च गावो, दड्ढानि गेहानि जनो च नीतो;

अथागमा पुत्तहताय पुत्तो, खरस्सरं डिण्डिमं [देण्डिमं (सी. स्या. पी.), डिन्दिमं (क.)] वादयन्तोति.

यं ते पविकत्थितं पुरे, अथ ते पूतिसरा सजन्ति पच्छा;

उभयं ¶ न समेति भीमसेन, युद्धकथा च इदञ्च ते विहञ्ञन्ति.

वरुणवग्गो [वरणवग्गो (सी. पी.)] अट्ठमो.

वरुणा अकतञ्ञूवरे तु सच्चवरं, सवनप्पतिना च अभित्थनय;

करुणाय सिलाप्लव इल्लिसतो, पुन डिण्डिमपूतिसरेन दसाति.

अपायिम्ह ¶ अनच्चिम्ह, अगायिम्ह रुदिम्ह च;

विसञ्ञिकरणिं पित्वा [पीत्वा (सी. स्या. पी.)], दिट्ठा नाहुम्ह वानराति.

अतिक्कम्म ¶ ¶ रमणकं, सदामत्तञ्च दूभकं;

स्वासि पासाणमासीनो, यस्मा जीवं न मोक्खसीति.

मित्तो हवे सत्तपदेन होति, सहायो पन द्वादसकेन होति;

मासड्ढमासेन च ञाति होति, ततुत्तरिं अत्तसमोपि होति;

सोहं कथं अत्तसुखस्स हेतु, चिरसन्थुतं [चिरसन्धवं (क.), चिरसत्थुनं (पी.)] काळकण्णिं जहेय्यन्ति.

आरोग्यमिच्छे परमञ्च लाभं, सीलञ्च वुद्धानुमतं सुतञ्च;

धम्मानुवत्ती च अलीनता च, अत्थस्स द्वारा पमुखा छळेतेति.

आयतिं ¶ दोसं नाञ्ञाय, यो कामे पटिसेवति;

विपाकन्ते हनन्ति नं, किंपक्कमिव भक्खितन्ति.

सीलं ¶ किरेव कल्याणं, सीलं लोके अनुत्तरं;

पस्स घोरविसो नागो, सीलवाति न हञ्ञतीति.

यस्स ¶ मङ्गला समूहतासे [समूहता (सी. स्या. पी. सु. नि. ३६२], उप्पाता [उप्पादा (पी.)] सुपिना च लक्खणा च;

सो [स (सी. पी. क.)] मङ्गलदोसवीतिवत्तो, युगयोगाधिगतो न जातुमेतीति.

कल्याणिमेव मुञ्चेय्य, न हि मुञ्चेय्य पापिकं;

मोक्खो कल्याणिया साधु, मुत्वा तप्पति पापिकन्ति.

वाचाव ¶ किर ते आसि, सण्हा सखिलभाणिनो;

तिणमत्ते असज्जित्थो, नो च निक्खसतं हरन्ति.

यो पुब्बे कतकल्याणो, कतत्थो नावबुज्झति;

पच्छा किच्चे समुप्पन्ने, कत्तारं नाधिगच्छतीति.

अपायिम्ह च दूभकं सत्तपदं, छळद्वर च आयतिना च पुन;

अहिसीलव मङ्गलि पापिकस्सा, सतंनिक्ख कतत्थवरेन दसाति.

लित्तं ¶ ¶ परमेन तेजसा, गिलमक्खं ¶ पुरिसो न बुज्झति;

गिल रे गिल पापधुत्तक, पच्छा ते कटुकं भविस्सतीति.

उक्कट्ठे सूरमिच्छन्ति, मन्तीसु अकुतूहलं;

पियञ्च अन्नपानम्हि, अत्थे जाते च पण्डितन्ति.

न विस्ससे अविस्सत्थे, विस्सत्थेपि न विस्ससे;

विस्सासा भयमन्वेति, सीहंव मिगमातुकाति [मिगमातुया (क.)].

सोतत्तो सोसिन्दो [सोसीतो (सी. स्या. पी.), सोसिनो (क.)] चेव, एको भिंसनके वने;

नग्गो न चग्गिमासीनो, एसनापसुतो मुनीति.

अनिच्चा ¶ वत सङ्खारा, उप्पादवयधम्मिनो;

उप्पज्जित्वा निरुज्झन्ति, तेसं वूपसमो सुखोति.

समतित्तिकं ¶ अनवसेकं, तेलपत्तं यथा परिहरेय्य;

एवं सचित्तमनुरक्खे, पत्थयानो दिसं अगतपुब्बन्ति.

जीवकञ्च ¶ मतं दिस्वा, धनपालिञ्च दुग्गतं;

पन्थकञ्च वने मूळ्हं, पापको पुनरागतोति.

साधु ¶ खो पण्डितो नाम, न त्वेव अतिपण्डितो;

अतिपण्डितेन पुत्तेन, मनम्हि उपकूळितोति [उपकूलितोति (सी.), उपकुट्ठितोति (स्या.), उपकुटितो (क.)].

परोसहस्सम्पि समागतानं, कन्देय्युं ते वस्ससतं अपञ्ञा;

एकोव सेय्यो पुरिसो सपञ्ञो, यो भासितस्स विजानाति अत्थन्ति.

असातं सातरूपेन, पियरूपेन अप्पियं;

दुक्खं सुखस्स रूपेन, पमत्तमतिवत्ततीति.

गिलमक्खकुतूहल ¶ ¶ मातुकस्सा, मुनिना च अनिच्चत पत्तवरं;

धनपालिवरो अतिपण्डितको, सपरोसहस्सअसातदसाति.

परोसतं ¶ चेपि समागतानं, झायेय्युं ते वस्ससतं अपञ्ञा;

एकोव सेय्यो पुरिसो सपञ्ञो, यो भासितस्स विजानाति अत्थन्ति.

यो दुक्खफुट्ठाय भवेय्य ताणं, सो मे पिता दुब्भि [दूभि (सी. पी.)] वने करोति;

सा कस्स कन्दामि वनस्स मज्झे, यो तायिता सो सहसं [सहसा (सी. स्या. पी.)] करोतीति.

यत्थ ¶ वेरी निविसति [निवसति (सी. क.)], न वसे तत्थ पण्डितो;

एकरत्तं दिरत्तं वा, दुक्खं वसति वेरिसूति.

चतुब्भि अट्ठज्झगमा, अट्ठाहिपि च सोळस;

सोळसाहि च बात्तिंस [बत्तिंस (सी. स्या. पी.)], अत्रिच्छं चक्कमासदो;

इच्छाहतस्स पोसस्स, चक्कं भमति मत्थकेति.

बहुम्पेतं ¶ ¶ वने कट्ठं, वातो भञ्जति दुब्बलं;

तस्स चे भायसी नाग, किसो नून भविस्ससीति.

सुखं वत मं जीवन्तं [सुखकं वत जीवं (क.)], पचमाना उदञ्चनी;

चोरी जायप्पवादेन, तेलं लोणञ्च याचतीति.

साधु ¶ खो सिप्पकं नाम, अपि यादिस कीदिसं;

पस्स खञ्जप्पहारेन, लद्धा गामा चतुद्दिसाति.

सिक्खेय्य सिक्खितब्बानि, सन्ति तच्छन्दिनो [सच्छन्दिनो (सी. पी.)] जना;

बाहिया हि [पि (सी. स्या. पी.)] सुहन्नेन, राजानमभिराधयीति.

यथन्नो पुरिसो होति, तथन्ना तस्स देवता;

आहरेतं कुण्डपूवं [कणं पूवं (सी. पी.)], मा मे भागं विनासयाति.

सब्बसंहारको ¶ ¶ [सब्बसाहारको (क.)] नत्थि, सुद्धं कङ्गु पवायति;

अलिकं भायतियं धुत्ती, सच्चमाह महल्लिकाति.

सपरोसत तायित वेरी ¶ पुन, भमचक्कथ नागसिरिव्हयनो;

सुखकञ्च वत सिप्पक बाहिया, कुण्डपूव महल्लिकका च दसाति.

हंचि [हंसि (सी. स्या.), हञ्चि (?)] तुवं एवमञ्ञसि सेय्यो, पुत्तेन पिताति राजसेट्ठ;

हन्दस्सतरस्स ते अयं, अस्सतरस्स हि गद्रभो पिताति.

येन सत्तुबिलङ्गा च, दिगुणपलासो च पुप्फितो;

येन ददामि [येना’दामि (सी. स्या.)] तेन वदामि, येन न ददामि [येन ना’दामि (सी. स्या.)] न तेन वदामि;

एस ¶ मग्गो यवमज्झकस्स, एतं छन्नपथं विजानाहीति.

सद्दहासि ¶ सिङ्गालस्स [सिगालस्स (सी. स्या. पी.)], सुरापीतस्स ब्राह्मण;

सिप्पिकानं सतं नत्थि, कुतो कंससता दुवेति.

बहुचिन्ती ¶ अप्पचिन्ती, उभो जाले अबज्झरे;

मितचिन्ती पमोचेसी, उभो तत्थ समागताति.

यायञ्ञ [यायञ्ञे (क.)] मनुसासति, सयं लोलुप्पचारिनी;

सायं विपक्खिका सेति, हता चक्केन सासिकाति [सालिकाति (सी. स्या. पी.)].

अतिकरमकराचरिय ¶ , मय्हम्पेतं न रुच्चति;

चतुत्थे लङ्घयित्वान, पञ्चमायसि आवुतोति.

अच्चुग्गतातिलपता [अतिबलता (सी. स्या. पी.), अतिलपका (कत्थचि)], अतिवेलं पभासिता;

वाचा हनति दुम्मेधं, तित्तिरंवातिवस्सितन्ति.

नाचिन्तयन्तो पुरिसो, विसेसमधिगच्छति;

चिन्तितस्स फलं पस्स, मुत्तोस्मि वधबन्धनाति.

अमातापितरसंवद्धो ¶ [पितरि (सी. पी.), पितु (स्या.)], अनाचेरकुले वसं;

नायं कालं अकालं वा, अभिजानाति कुक्कुटोति.

अबद्धा ¶ ¶ तत्थ बज्झन्ति, यत्थ बाला पभासरे;

बद्धापि तत्थ मुच्चन्ति, यत्थ धीरा पभासरेति.

हंचिवग्गो [हंसिवग्गो (सी. स्या.)] द्वादसमो.

अथ गद्रभ सत्तुव कंससतं, बहुचिन्ति सासिकायातिकर;

अतिवेल विसेसमनाचरियोव, धीरापभासरतेन दसाति.

करे सरिक्खो अथ वापि सेट्ठो, निहीनको वापि करेय्य एको;

करेय्युमेते [करेय्युं ते (सी. पी.)] ब्यसने उत्तमत्थं, यथा अहं कुसनाळि रुचायन्ति.

यसं ¶ ¶ लद्धान दुम्मेधो, अनत्थं चरति अत्तनो;

अत्तनो च परेसञ्च, हिंसाय पटिपज्जतीति.

असब्बत्थगामिं वाचं, बालो सब्बत्थ भासति;

नायं दधिं वेदि न [न वेदि (क.)] नङ्गलीसं, दधिप्पयं [दधिम्पयं (सी. पी.)] मञ्ञति नङ्गलीसन्ति.

वायमेथेव ¶ पुरिसो, न निब्बिन्देय्य पण्डितो;

वायामस्स फलं पस्स, भुत्ता अम्बा अनीतिहन्ति.

बहुम्पि सो विकत्थेय्य, अञ्ञं जनपदं गतो;

अन्वागन्त्वान दूसेय्य, भुञ्ज भोगे कटाहकाति.

तदेवेकस्स ¶ [तथेवेकस्स (सी. स्या. पी. अट्ठ. मूलपाठो)] कल्याणं, तदेवेकस्स पापकं;

तस्मा सब्बं न कल्याणं, सब्बं वापि न पापकन्ति.

ते देसा तानि वत्थूनि, अहञ्च वनगोचरो;

अनुविच्च खो तं गण्हेय्युं, पिव [पिप (सी. पी.)] खीरं कलण्डुकाति.

यो ¶ वे धम्मं धजं [धम्मधजं (स्या. पी. क.)] कत्वा, निगूळ्हो पापमाचरे;

विस्सासयित्वा भूतानि, बिळारं नाम तं वतन्ति.

नायं सिखा पुञ्ञहेतु, घासहेतु अयं सिखा;

नाङ्गुट्ठगणनं याति, अलं ते होतु अग्गिकाति.

यथा ¶ ¶ वाचा च भुञ्जस्सु, यथा भुत्तञ्च ब्याहर;

उभयं ते न समेति, वाचा भुत्तञ्च कोसियेति.

कुसनाळिवग्गो [सरिक्खवग्गो (क.)] तेरसमो.

कुसनाळिसिरिव्हयनो च यसं, दधि मम्ब कटाहकपञ्चमको;

अथ पापक खीर बिळारवतं, सिखि कोसियसव्हयनेन दसाति.

असम्पदानेनितरीतरस्स, बालस्स मित्तानि कली भवन्ति;

तस्मा हरामि भुसं अड्ढमानं, मा मे मित्ति जीयित्थ सस्सतायन्ति.

कुसलूपदेसे ¶ ¶ धितिया दळ्हाय च, अनिवत्तितत्ताभयभीरुताय [अवत्थितत्ताभयभीरुताय (सी. स्या. पी.)] च;

न रक्खसीनं वसमागमिम्हसे, स सोत्थिभावो महता भयेन मेति.

भीरुक [पञ्चगरुक (सी. पी.), पञ्चभीरुक (स्या.), अभयभीरुत§(?)] जातकं दुतियं.

खेमं यहिं तत्थ अरी उदीरितो [अरि उद्धरितो (क.)], दकस्स मज्झे जलते घतासनो;

न अज्ज वासो महिया महीरुहे, दिसा भजव्हो सरणाज्ज नो भयन्ति.

ये ¶ सञ्ञिनो तेपि दुग्गता, येपि असञ्ञिनो तेपि दुग्गता;

एतं उभयं विवज्जय, तं ¶ समापत्तिसुखं अनङ्गणन्ति.

चन्दाभं सूरियाभञ्च, योध पञ्ञाय गाधति.

अवितक्केन झानेन, होति आभस्सरूपगोति.

यं ¶ लद्धं तेन तुट्ठब्बं, अतिलोभो हि पापको;

हंसराजं गहेत्वान, सुवण्णा परिहायथाति.

यत्थेको लभते बब्बु, दुतियो तत्थ जायति;

ततियो च चतुत्थो च, इदं ते बब्बुका बिलन्ति.

किं ते जटाहि दुम्मेध, किं ते अजिनसाटिया;

अब्भन्तरं ¶ ते गहनं, बाहिरं परिमज्जसीति.

अक्खी भिन्ना पटो नट्ठो, सखिगेहे च भण्डनं;

उभतो पदुट्ठा कम्मन्ता [पदुट्ठकम्मन्तो (सी.), पदुट्ठो कम्मन्तो (पी.)], उदकम्हि थलम्हि चाति.

निच्चं ¶ उब्बिग्गहदया, सब्बलोकविहेसका;

तस्मा नेसं वसा नत्थि, काकानम्हाक [काकानस्माक (सी. स्या. पी.)] ञातिनन्ति.

इतरीतर ¶ रक्खसि खेमियो च, परोसतपञ्हेन आभस्सरो पुन;

अथ हंसवरुत्तमबब्बुजटं, पटनट्ठक काकवरेन दसाति.

न ¶ पापजनसंसेवी, अच्चन्तसुखमेधति;

गोधाकुलं [गोधक्कुलं (क.)] ककण्टाव [ककण्टका (क.)], कलिं पापेति अत्तनन्ति.

एतञ्हि ते दुराजानं, यं सेसि मतसायिकं;

यस्स ते कड्ढमानस्स, हत्था दण्डो न मुच्चतीति.

लसी च ते निप्फलिता, मत्थको च पदालितो [विदालितो (सी. पी.)];

सब्बा ते फासुका भग्गा, अज्ज खो त्वं विरोचसीति.

बहुम्पेतं ¶ असब्भि [बहुपेतमसब्भि (क.)] जातवेद, यं तं वालधिनाभिपूजयाम;

मंसारहस्स ¶ नत्थज्ज मंसं, नङ्गुट्ठम्पि भवं पटिग्गहातूति.

न ¶ त्वं राध विजानासि, अड्ढरत्ते अनागते;

अब्ययतं [अब्यायतं (सी. स्या. पी.), अब्यत्ततं (?)] विलपसि, विरत्ता कोसियायनेति.

अपि नु हनुका सन्ता, मुखञ्च परिसुस्सति;

ओरमाम न पारेम, पूरतेव महोदधीति.

नयिदं दुक्खं अदुं दुक्खं, यं मं तुदति वायसो;

यं सामा पुप्फरत्तेन, कत्तिकं नानुभोस्सतीति.

नाहं ¶ पुनं न च पुनं, न चापि अपुनप्पुनं;

हत्थिबोन्दिं पवेक्खामि, तथा हि भयतज्जितोति.

एकपण्णो अयं रुक्खो, न भूम्या चतुरङ्गुलो;

फलेन विसकप्पेन, महायं किं भविस्सतीति.

असन्तं ¶ ¶ यो पग्गण्हाति, असन्तं चूपसेवति;

तमेव घासं कुरुते, ब्यग्घो सञ्जीवको यथाति.

ककण्टक [पापसेवन (क.)] वग्गो पन्नरसमो.

सुखमेधति दण्डवरो च पुन, लसि वालधि पञ्चमराधवरो;

समहोदधि ¶ कत्तिक बोन्दि पुन, चतुरङ्गुलब्यग्घवरेन दसाति.

(उपरिमो पण्णासको.) [( ) सीहळपोत्थकेयेव दिस्सति]

अपण्णकं सीलवग्गकुरुङ्ग, कुलावकं अत्थकामेन पञ्चमं;

आसीसो इत्थिवरुणं अपायि, लित्तवग्गेन ते दस;

परोसतं हंचि कुसनाळि [हंसि सरिक्खं (सब्बत्थ)], असम्पदं ककण्टकवग्गो.