तीका > विनयपिटक (टीका) > विनयविनिच्छय-उत्तरविनिच्छय

MMR Vol 0
VRI Vol 0

Misc. Paragraph

भिक्खुनीविभङ्गो

पाराजिककथा

भिक्खुनीनं ¶ ¶ हितत्थाय, विभङ्गं यं जिनोब्रवि;

तस्मिं अपि समासेन, किञ्चिमत्तं भणामहं.

छन्दसो मेथुनं धम्मं, पटिसेवेय्य या पन;

होति पाराजिका नाम, समणी सा पवुच्चति.

मनुस्सपुरिसादीनं, नवन्नं यस्स कस्सचि;

सजीवस्साप्यजीवस्स, सन्थतं वा असन्थतं.

अत्तनो तिविधे मग्गे, येभुय्यक्खायितादिकं;

अङ्गजातं पवेसेन्ती, अल्लोकासे पराजिता.

इतो परमवत्वाव, साधारणविनिच्छयं;

असाधारणमेवाहं, भणिस्सामि समासतो.

अधक्खकं सरीरकं, यदुब्भजाणुमण्डलं;

सरीरकेन चे तेन, फुसेय्य भिक्खुनी पन.

अवस्सुतस्सावस्सुता, मनुस्सपुग्गलस्स या;

सरीरमस्स तेन वा, फुट्ठा पाराजिका सिया.

कप्परस्स पनुद्धम्पि, गहितं उब्भजाणुना;

यथावुत्तप्पकारेन, कायेनानेन अत्तनो.

पुरिसस्स तथा काय- पटिबद्धं फुसन्तिया;

तथा यथापरिच्छिन्न- कायबद्धेन अत्तनो.

अवसेसेन वा तस्स, कायं कायेन अत्तनो;

होति थुल्लच्चयं तस्सा, पयोगे पुरिसस्स च.

यक्खपेततिरच्छान- पण्डकानं ¶ ¶ अधक्खकं;

उब्भजाणुं तथेवस्सा, उभतोवस्सवे सति.

एकतोवस्सवे चापि, थुल्लच्चयमुदीरितं;

अवसेसे च सब्बत्थ, होति आपत्ति दुक्कटं.

उब्भक्खकमधोजाणु-मण्डलं पन यं इध;

कप्परस्स च हेट्ठापि, गतं एत्थेव सङ्गहं.

केलायति सचे भिक्खु, सद्धिं भिक्खुनिया पन;

उभिन्नं कायसंसग्ग-रागे सति हि भिक्खुनो.

होति सङ्घादिसेसोव, नासो भिक्खुनिया सिया;

कायसंसग्गरागो च, सचे भिक्खुनिया सिया.

भिक्खुनो मेथुनो रागो, गेहपेमम्पि वा भवे;

तस्सा थुल्लच्चयं वुत्तं, भिक्खुनो होति दुक्कटं.

उभिन्नं मेथुने रागे, गेहपेमेपि वा सति;

अविसेसेन निद्दिट्ठं, उभिन्नं दुक्कटं पन.

यस्स यत्थ मनोसुद्धं, तस्स तत्थ न दोसता;

उभिन्नम्पि अनापत्ति, उभिन्नं चित्तसुद्धिया.

कायसंसग्गरागेन, भिन्दित्वा पठमं पन;

पच्छा दूसेति चे नेव, होति भिक्खुनिदूसको.

अथ भिक्खुनिया फुट्ठो, सादियन्तोव चेतसा;

निच्चलो होति चे भिक्खु, न होतापत्ति भिक्खुनो.

भिक्खुनी भिक्खुना फुट्ठा, सचे होतिपि निच्चला;

अधिवासेति सम्फस्सं, तस्सा पाराजिकं सिया.

तथा थुल्लच्चयं खेत्ते, दुक्कटञ्च विनिद्दिसे;

वुत्तत्ता ‘‘कायसंसग्गं, सादियेय्या’’ति सत्थुना.

तस्सा क्रियसमुट्ठानं, एवं सति न दिस्सति;

इदं तब्बहुलेनेव, नयेन परिदीपितं.

अनापत्ति ¶ असञ्चिच्च, अजानित्वामसन्तिया;

सति आमसने तस्सा, फस्सं वासादियन्तिया.

वेदनट्टाय ¶ वा खित्त-चित्तायुम्मत्तिकाय वा;

समुट्ठानादयो तुल्या, पठमन्तिमवत्थुना.

पाराजिकत्तं जानन्ति, सलिङ्गे तु ठिताय हि;

‘‘न कस्सचि परस्साहं, आरोचेस्सामि दानि’’ति.

धुरे निक्खित्तमत्तस्मिं, सा च पाराजिका सिया;

अयं वज्जपटिच्छादि- नामिका पन नामतो.

सेसं सप्पाणवग्गस्मिं, दुट्ठुल्लेन समं नये;

विसेसो तत्र पाचित्ति, इध पाराजिकं सिया.

सङ्घेनुक्खित्तको भिक्खु, ठितो उक्खेपने पन;

यंदिट्ठिको च सो तस्सा, दिट्ठिया गहणेन तं.

अनुवत्तेय्य या भिक्खुं, भिक्खुनी सा विसुम्पि च;

सङ्घमज्झेपि अञ्ञाहि, वुच्चमाना तथेव च.

अचजन्तीव तं वत्थुं, गहेत्वा यदि तिट्ठति;

तस्स कम्मस्स ओसाने, उक्खित्तस्सानुवत्तिका.

होति पाराजिकापन्ना, होतासाकियधीतरा;

पुन अप्पटिसन्धेया, द्विधा भिन्ना सिला विय.

अधम्मे पन कम्मस्मिं, निद्दिट्ठं तिकदुक्कटं;

समुट्ठानादयो सब्बे, वुत्ता समनुभासने.

अपाराजिकखेत्तस्स ¶ , गहणं यस्स कस्सचि;

अङ्गस्स पन तं हत्थ-ग्गहणन्ति पवुच्चति.

पारुतस्स निवत्थस्स, गहणं यस्स कस्सचि;

एतं सङ्घाटिया कण्ण-ग्गहणन्ति पवुच्चति.

कायसंसग्गसङ्खात-असद्धम्मस्स ¶ कारणा;

भिक्खुनी हत्थपासस्मिं, तिट्ठेय्य पुरिसस्स वा.

सल्लपेय्य तथा तत्थ, ठत्वा तु पुरिसेन वा;

सङ्केतं वापि गच्छेय्य, इच्छेय्या गमनस्स वा.

तदत्थाय पटिच्छन्न-ट्ठानञ्च पविसेय्य वा;

उपसंहरेय्य कायं वा, हत्थपासे ठिता पन.

अयमस्समणी होति, विनट्ठा अट्ठवत्थुका;

अभब्बा पुनरुळ्हाय, छिन्नो तालोव मत्थके.

अनुलोमेन वा वत्थुं, पटिलोमेन वा चुता;

अट्ठमं परिपूरेन्ती, तथेकन्तरिकाय वा.

अथादितो पनेकं वा, द्वे वा तीणिपि सत्त वा;

सतक्खत्तुम्पि पूरेन्ती, नेव पाराजिका सिया.

आपत्तियो पनापन्ना, देसेत्वा ताहि मुच्चति;

धुरनिक्खेपनं कत्वा, देसिता गणनूपिका.

न होतापत्तिया अङ्गं, सउस्साहाय देसिता;

देसनागणनं नेति, देसितापि अदेसिता.

अनापत्ति असञ्चिच्च, अजानित्वा करोन्तिया;

समुट्ठानादयो सब्बे, अनन्तरसमा मता.

‘‘असद्धम्मो’’ति नामेत्थ, कायसंसग्गनामको;

अयमुद्दिसितो अत्थो, सब्बअट्ठकथासुपि.

विञ्ञू ¶ पटिबलो काय-संसग्गं पटिपज्जितुं;

कायसंसग्गभावे तु, साधकं वचनं इदं.

अवस्सुता पटिच्छादी, उक्खित्ता अट्ठवत्थुका;

असाधारणपञ्ञत्ता, चतस्सोव महेसिना.

सक्खिं वापि सहायं वा, परियेसति दुक्कटं;

पदे पदे तथा अट्टं, कातुं गच्छन्तियापि च.

आरोचेति सचे पुब्बं, भिक्खुनी अत्तनो कथं;

दिस्वा वोहारिकं तस्सा, होति आपत्ति दुक्कटं.

आरोचेति सचे पच्छा, इतरो अत्तनो कथं;

होति भिक्खुनिया तस्सा, थुल्लच्चयमनन्तरं.

आरोचेतितरो पुब्बं, सचे सो अत्तनो कथं;

पच्छा भिक्खुनी चे पुब्ब-सदिसोव विनिच्छयो.

‘‘आरोचेही’’ति वुत्ता चे, ‘‘कथं तव ममापि च’’;

आरोचेतु यथाकामं, पठमे दुक्कटं सिया.

दुतियारोचने ¶ तस्सा, थुल्लच्चयमुदीरितं;

उपासकेन वुत्तेपि, अयमेव विनिच्छयो.

आरोचितकथं सुत्वा, उभिन्नम्पि यथा तथा;

विनिच्छये कते तेहि, अट्टे पन च निट्ठिते.

अट्टस्स परियोसाने, जये भिक्खुनिया पन;

पराजयेपि वा तस्सा, होति सङ्घादिसेसता.

दूतं वापि पहिणित्वा, आगन्त्वान सयम्पि वा;

पच्चत्थिकमनुस्सेहि, आकड्ढीयति या पन.

आरामे पन अञ्ञेहि, अनाचारं कतं सचे;

अनोदिस्स परं किञ्चि, रक्खं याचति तत्थ या.

याय ¶ किञ्चि अवुत्ताव, धम्मट्ठा सयमेव तु;

सुत्वा तं अञ्ञतो अट्टं, निट्ठापेन्ति सचे पन.

तस्सा, उम्मत्तिकादीन-मनापत्ति पकासिता;

कथिनेन समुट्ठानं, तुल्यं सकिरियं इदं.

जानन्ती भिक्खुनी चोरिं, वज्झं विदितमेव या;

सङ्घं अनपलोकेत्वा, राजानं गणमेव वा.

वुट्ठापेय्य विना कप्पं, चोरिवुट्ठापनं पन;

सङ्घादिसेसमापत्ति-मापन्ना नाम होति सा.

पञ्चमासग्घनं याय, हरितं परसन्तकं;

अतिरेकग्घनं वापि, अयं ‘‘चोरी’’ति वुच्चति.

भिक्खुनीसु पनञ्ञासु, तित्थियेसुपि वा तथा;

या पब्बजितपुब्बा सा, अयं ‘‘कप्पा’’ति वुच्चति.

वुट्ठापेति ¶ च या चोरिं, ठपेत्वा कप्पमेविदं;

सचे आचरिनिं पत्तं, चीवरं परियेसति.

सम्मन्नति च सीमं वा, तस्सा आपत्ति दुक्कटं;

ञत्तिया दुक्कटं द्वीहि, कम्मवाचाहि च द्वयं.

थुल्लच्चयस्स, कम्मन्ते, गरुकं निद्दिसे बुधो;

गणो आचरिनी चेव, न च मुच्चति दुक्कटं.

अनापत्ति अजानन्ती, वुट्ठापेति, तथेव च;

कप्पं वा अपलोकेत्वा, तस्सा उम्मत्तिकाय वा.

चोरिवुट्ठापनं नाम, जायते वाचचित्ततो;

कायवाचादितो चेव, सचित्तञ्च क्रियाक्रियं.

गामन्तरं नदीपारं, गच्छेय्येकाव या सचे;

ओहीयेय्य गणम्हा वा, रत्तिं विप्पवसेय्य वा.

पठमापत्तिकं ¶ धम्मं, सापन्ना गरुकं सिया;

सकगामा अनापत्ति, ञातब्बा निक्खमन्तिया.

निक्खमित्वा ततो अञ्ञं, गामं गच्छन्तिया पन;

दुक्कटं पदवारेन, वेदितब्बं विभाविना.

परिक्खेपे अतिक्कन्ते, उपचारोक्कमेपि वा.

थुल्लच्चयं अतिक्कन्ते, ओक्कन्ते दुतियेन तु;

पादेन गरुकापत्ति, होति भिक्खुनिया पन.

निक्खमित्वा सचे पच्छा, सकं गामं विसन्तिया;

अयमेव नयो ञेय्यो, वतिच्छिद्देन वा तथा.

पाकारेन ¶ विहारस्स, भूमिं तु पविसन्तिया;

कप्पियन्ति पविट्ठत्ता, न दोसो कोचि विज्जति.

भिक्खुनीनं विहारस्स, भूमि तासं तु कप्पिया;

होति भिक्खुविहारस्स, भूमि तासमकप्पिया.

हत्थिअस्सरथादीहि, इद्धिया वा विसन्तिया;

अनापत्ति सियापत्ति, पदसा गमने पन.

यं किञ्चि सकगामं वा, परगामम्पि वा तथा;

बहिगामे पन ठत्वा, आपत्ति पविसन्तिया.

लक्खणेनुपपन्नाय, नदिया दुतियं विना;

पारं गच्छति या तीरं, तस्सा समणिया पन.

पठमं उद्धरित्वान, पादं तीरे ठपेन्तिया;

होति थुल्लच्चयापत्ति, दुतियातिक्कमे गरु.

अन्तरनदियंयेव, सद्धिं दुतियिकाय हि;

भण्डित्वा ओरिमं तीरं, तथा पच्चुत्तरन्तिया.

इद्धिया सेतुना नावा-यानरज्जूहि वा पन;

एवम्पि च परं तीरं, अनापत्तुत्तरन्तिया.

न्हायितुं पिवितुं वापि, ओतिण्णाथ नदिं पुन;

पदसावोरिमं तीरं, पच्चुत्तरति वट्टति.

पदसा ¶ ओतरित्वान, नदिं उत्तरणे पन;

आरोहित्वा तथा सेतुं, अनापत्तुत्तरन्तिया.

सेतुना उपगन्त्वा वा, यानाकासेहि वा सचे;

याति उत्तरणे काले, पदसा गरुकं फुसे.

नदिया पारिमं तीरं, इतो ओरिमतीरतो;

उल्लङ्घित्वान वेगेन, अनापत्तुत्तरन्तिया.

पिट्ठियं वा निसीदित्वा, खन्धे वा उत्तरन्तिया;

हत्थसङ्घातने वापि, दुस्सयानेपि वट्टति.

‘‘पुरेरुणोदयायेव ¶ , पासं दुतियिकाय हि;

गमिस्सामी’’ति आभोगं, विना भिक्खुनिया पन.

एकगब्भेपि वा हत्थ-पासं दुतियिकाय हि;

अतिक्कम्म सियापत्ति, अरुणं उट्ठपेन्तिया.

‘‘गमिस्सामी’’ति आभोगं, कत्वा गच्छन्तिया पन;

न दोसो दुतिया पासं, उट्ठेति अरुणं सचे.

इन्दखीलमतिक्कम्म, अरञ्ञं एत्थ दीपितं;

गामतो बहि निक्खम्म, तस्सा दुतियिकाय तु.

दस्सनस्सुपचारं तु, जानित्वा विजहन्तिया;

होति थुल्लच्चयापत्ति, जहिते गरुकं सिया.

साणिपाकारपाकार-तरुअन्तरिते पन;

सवनस्सुपचारेपि, सति आपत्ति होति हि.

अज्झोकासे तु दूरेपि, दस्सनस्सुपचारता;

होति, एत्थ कथं धम्म-सवनारोचने विय.

मग्गमूळ्हस्स सद्देन, विय कूजन्तिया पन;

‘‘अय्ये’’ति तस्सा सद्दस्स, सवनातिक्कमेपि च.

होति, भिक्खुनियापत्ति, गरुका एवरूपके;

एत्थ भिक्खुनी एकापि, गणायेवाति वुच्चति.

ओहीयित्वाथ गच्छन्ती, ‘‘पापुणिस्सामि दानिहं’’;

इच्चेवं तु सउस्साहा, अनुबन्धति वट्टति.

द्विन्नं ¶ मग्गं गच्छन्तीनं, एका गन्तुं नो सक्कोति;

उस्साहस्सच्छेदं कत्वा, ओहीना चे तस्सापत्ति.

इतरापि सचे याति, ‘‘ओहीयतु अय’’न्ति च;

होति तस्सापि आपत्ति, सउस्साहा न होति चे.

गच्छन्तीसु तथा द्वीसु, पुरिमा याति एककं;

अञ्ञं पन सचे मग्गं, पच्छिमापि च गण्हति.

एकिस्सा ¶ पन पक्कन्त-ट्ठाने तिट्ठति चेतरा;

तस्मा तत्थ उभिन्नम्पि, अनापत्ति पकासिता.

अरुणुग्गमना पुब्बे, निक्खमित्वा सगामतो;

अरुणुग्गमने काले, गामन्तरगताय हि.

अतिक्कमन्तिया पारं, नदिया दुतियिकं विना;

आपत्तियो चतस्सोपि, होन्ति एकक्खणे पन.

पक्कन्ता वापि विब्भन्ता, याता पेतानं लोकं वा;

पक्खसङ्कन्ता वा नट्ठा, सद्धिं याता सा चे होति.

गामन्तरोक्कमादीनि, चत्तारिपि करोन्तिया;

अनापत्तीति ञातब्बं, एवं उम्मत्तिकायपि.

रत्तियं विप्पवासं तु, हत्थपासोव रक्खति;

अगामके अरञ्ञे तु, गणा ओहीयनं मतं.

सकगामे यथाकामं, दिवा च विचरन्तिया;

चत्तारोपि च सङ्घादि-सेसा तस्सा न विज्जरे.

समुट्ठानादयो तुल्या, पठमन्तिमवत्थुना;

सचित्तं कायकम्मञ्च, तिचित्तञ्च तिवेदनं.

सीमासम्मुतिया चेव, गणस्स परियेसने;

ञत्तिया दुक्कटं, द्वीहि, होन्ति थुल्लच्चया दुवे.

कम्मस्स परियोसाने, होति सङ्घादिसेसता;

तिकसङ्घादिसेसं तु, अधम्मे तिकदुक्कटं.

पुच्छित्वा ¶ कारकं सङ्घं, छन्दं दत्वा गणस्स वा;

वत्ते वा पन वत्तन्तिं, असन्ते कारकेपि वा.

भिक्खुनिं ¶ पन उक्खित्तं, या ओसारेति भिक्खुनी;

तस्सा उम्मत्तिकादीन-मनापत्ति पकासिता.

सङ्घभेदसमा वुत्ता, समुट्ठानादयो नया;

क्रियाक्रियमिदं वुत्तं, अयमेव विसेसता.

सयं अवस्सुता तथा, अवस्सुतस्स हत्थतो;

मनुस्सपुग्गलस्स चे, यदेव किञ्चि गण्हति.

एकतोवस्सुते किञ्चि, पटिग्गण्हति, दुक्कटं;

अज्झोहारप्पयोगेसु, थुल्लच्चयचयो सिया.

यक्खपेततिरच्छान-पण्डकानञ्च हत्थतो;

मनुस्सविग्गहानम्पि, उभतोवस्सुते तथा.

एकतोवस्सुते एत्थ, उदके दन्तकट्ठके;

गहणे परिभोगे च, सब्बत्थापि च दुक्कटं.

उभयावस्सुताभावे, न दोसो यदि गण्हति;

‘‘अवस्सुतो न चाय’’न्ति, ञत्वा गण्हति या पन.

तस्सा उम्मत्तिकादीन-मनापत्ति पकासिता;

समुट्ठानादयो तुल्या, पठमन्तिमवत्थुना.

उय्योजने पनेकिस्सा, इतरिस्सा पटिग्गहे;

दुक्कटानि च भोगेसु, थुल्लच्चयगणो सिया.

भोजनस्सावसानस्मिं ¶ ¶ , होति सङ्घादिसेसता;

यक्खादीनं चतुन्नम्पि, तथेव पुरिसस्स च.

दन्तकट्ठुदकानञ्च, गहणुय्योजने पन;

तेसञ्च परिभोगेपि, दुक्कटं परिकित्तितं.

यक्खादीनं तु सेसस्स, गहणुय्योजने पन;

भोगे च दुक्कटं, भुत्ते, थुल्लच्चयमुदीरितं.

‘‘नावस्सुतो’’ति ञत्वा वा, कुपिता वा न गण्हति;

कुलानुद्दयता वापि, उय्योजेति च या पन.

तस्सा उम्मत्तिकादीन-मनापत्ति पकासिता;

अदिन्नादानतुल्याव, समुट्ठानादयो नया.

सत्तमं अट्ठमं सङ्घ-भेदेन सदिसं मतं;

समुट्ठानादिना सद्धिं, नत्थि काचि विसेसता.

नवमे दसमे वापि, वत्तब्बं नत्थि किञ्चिपि;

अनन्तरसमायेव, समुट्ठानादयो नया.

दुट्ठदोसद्वयेनापि, सञ्चरित्तेन तेन छ;

यावततियका अट्ठ, चत्तारि च इतो ततो.

अधिट्ठानूपगं ¶ ¶ पत्तं, अनधिट्ठाय भिक्खुनी;

विकप्पनमकत्वा वा, एकाहम्पि ठपेय्य चे.

अरुणुग्गमनेनेव, सद्धिं भिक्खुनिया सिया;

तस्सा निस्सग्गियापत्ति, पत्तसन्निधिकारणा.

सेसो पन कथामग्गो, पत्तसिक्खापदे इध;

सब्बो वुत्तनयेनेव, वेदितब्बो विनिच्छयो.

दसाहातिक्कमे तत्थ, एकाहातिक्कमे इध;

तस्सिमस्स उभिन्नम्पि, अयमेव विसेसता.

अकाले चीवरं दिन्नं, दिन्नं कालेपि केनचि;

आदिस्स पन ‘‘सम्पत्ता, भाजेन्तू’’ति नियामितं.

अकालचीवरं ‘‘काल-चीवर’’न्ति सचे पन;

भाजापेय्य च या तस्सा, पयोगे दुक्कटं सिया.

अत्तना पटिलद्धं यं, तं तु निस्सग्गियं भवे;

लभित्वा पन निस्सट्ठं, यथादाने नियोजये.

कत्वा विनयकम्मं तु, पटिलद्धम्पि तं पुन;

तस्स चायमधिप्पायो, सेवितुं न च वट्टति.

अकालवत्थसञ्ञाय, दुक्कटं कालचीवरे;

उभयत्थपि निद्दिट्ठं, तथा वेमतिकायपि.

कालचीवरसञ्ञाय, चीवरे उभयत्थपि;

न दोसुम्मत्तिकादीनं, तिसमुट्ठानता मता.

चीवरेसुपि ¶ बन्धित्वा, ठपितेसु बहूस्वपि;

एकायेव सियापत्ति, अच्छिन्दति सचे सयं.

तथाच्छिन्दापने ¶ एका, एकायाणत्तिया भवे;

इतरेसु च वत्थूनं, पयोगस्स वसा सिया.

तिकपाचित्ति अञ्ञस्मिं, परिक्खारे तु दुक्कटं;

तिकदुक्कटमुद्दिट्ठं, इतरिस्सा तु चीवरे.

ताय वा दीयमानं तु, तस्सा विस्सासमेव वा;

गण्हन्तिया अनापत्ति, तिसमुट्ठानता मता.

विञ्ञापेत्वा सचे अञ्ञं, तदञ्ञं विञ्ञापेन्तिया;

विञ्ञत्तिदुक्कटं तस्सा, लाभा निस्सग्गियं सिया.

तिकपाचित्तियं वुत्तं, अनञ्ञे द्विकदुक्कटं;

अनञ्ञेनञ्ञसञ्ञाय, अप्पहोन्तेपि वा पुन.

तस्मिं तञ्ञेव वा अञ्ञं, अञ्ञेनत्थेपि वा सति;

आनिसंसञ्च दस्सेत्वा, तदञ्ञं विञ्ञापेन्तिया.

अनापत्तीति ञातब्बं, तथा उम्मत्तिकायपि;

सञ्चरित्तसमा वुत्ता, समुट्ठानादयो नया.

अञ्ञं चेतापेत्वा पुब्बं, पच्छा अञ्ञं चेतापेय्य;

एवं सञ्ञायञ्ञं धञ्ञं, मय्हं आनेत्वा देतीति.

चेतापनपयोगेन, मूलट्ठाय हि दुक्कटं;

लाभे निस्सग्गियं होति, तेन चञ्ञेन वाभतं.

सेसं ¶ अनन्तरेनेव, सदिसन्ति विनिद्दिसे;

समुट्ठानादिना सद्धिं, अपुब्बं नत्थि किञ्चिपि.

अञ्ञदत्थाय दिन्नेन, परिक्खारेन या पन;

चेतापेय्य सचे अञ्ञं, सङ्घिकेनिध भिक्खुनी.

पयोगे ¶ दुक्कटं, लाभे, तस्सा निस्सग्गियं सिया;

अनञ्ञदत्थिके एत्थ, निद्दिट्ठं द्विकदुक्कटं.

सेसकं अञ्ञदत्थाय, अनापत्तुपनेन्तिया;

पुच्छित्वा सामिके वाप्या-पदासुम्मत्तिकाय वा.

सञ्चरित्तसमा वुत्ता, समुट्ठानादयो नया;

सत्तमं छट्ठसदिसं, सयं याचितकं विना.

अट्ठमे नवमे वापि, वत्तब्बं नत्थि किञ्चिपि;

‘‘महाजनिकसञ्ञाचि-केना’’ति पदताधिका.

दसमेपि कथा सब्बा, अनन्तरसमा मता;

समुट्ठानादिना सद्धिं, विसेसो नत्थि कोचिपि.

अतिरेकचतुक्कंसं, गरुपावुरणं पन;

चेतापेय्य सचे तस्सा, चतुसच्चप्पकासिना.

पयोगे ¶ दुक्कटं वुत्तं, लाभे निस्सग्गियं मतं;

कहापणचतुक्कं तु, कंसो नाम पवुच्चति.

ऊनके तु चतुक्कंसे, उद्दिट्ठं द्विकदुक्कटं;

अनापत्ति चतुक्कंस-परमं गरुकं पन.

चेतापेति तदूनं वा, ञातकानञ्च सन्तके;

अञ्ञस्सत्थाय वा अत्त-धनेनुम्मत्तिकाय वा.

चेतापेन्तं महग्घं या, चेतापेतप्पमेव वा;

समुट्ठानादयो सब्बे, सञ्चरित्तसमा मता.

लहुपावुरणं ¶ अड्ढ- तेय्यकंसग्घनं पन;

ततो चे उत्तरिं यं तु, चेतापेति हि भिक्खुनी.

तस्सा निस्सग्गियापत्ति, पाचित्ति परियापुता;

अनन्तरसमं सेसं, नत्थि काचि विसेसता.

साधारणानि सेसानि, तानि अट्ठारसापि च;

इमानि द्वादसेवापि, समतिंसेव होन्ति हि.

लसुणं भण्डिकं वुत्तं, न एकद्वितिमिञ्जकं;

आमकं मागधंयेव, ‘‘खादिस्सामी’’ति गण्हति.

गहणे दुक्कटं तस्सा, पाचित्ति यदि खादति;

अज्झोहारवसेनेव, पाचित्तिं परिदीपये.

द्वे ¶ तयो भण्डिके सद्धिं, सङ्खादित्वा सचे पन;

अज्झोहरति या तस्सा, एकं पाचित्तियं सिया.

भिन्दित्वा तत्थ एकेकं, मिञ्जं खादन्तिया पन;

मिञ्जानं गणनायस्सा, पाचित्तिगणना सिया.

पलण्डुको भञ्जनको, हरितो चापलोपि च;

लसुणा पन चत्तारो, वट्टन्तेव सभावतो.

पलण्डुको पण्डुवण्णो, भञ्जनो लोहितोपि च;

हरितो हरितवण्णो, चापलो सेतकोपि च.

एका मिञ्जा पलण्डुस्स, भञ्जनस्स दुवे सियुं;

तिस्सो हरितकस्सापि, चापलो होत्यमिञ्जको.

सूपमंसादिसंपाके ¶ , साळवुत्तरिभङ्गके;

न दोसुम्मत्तिकादीनं, समुट्ठानेळकूपमं.

सम्बाधे उपकच्छेसु, मुत्तस्स करणेपि वा;

एकलोमम्पि पाचित्ति, संहरापेन्तिया सिया.

बहुकेपि तथा लोमे, संहरापेन्तिया पन;

न दोसो सति आबाधे, लोमके संहरन्तिया;

समुट्ठानादयो मग्ग- संविधानसमा मता.

होति अन्तमसो मुत्त-करणस्स तलघातने;

केसरेनापि रागेन, पाचित्ति पदुमस्स वा.

गण्डं ¶ तत्थ वणं वापि, न दोसो पहरन्तिया;

समुट्ठानादयो तुल्या, पठमन्तिमवत्थुना.

या पनुप्पलपत्तम्पि, ब्यञ्जने भिक्खुनत्तनो;

कामरागपरेता तु, पवेसेति न वट्टति.

इदं वत्थुवसेनेव, वुत्तं तु जतुमट्ठकं;

दण्डमेलाळुकं वापि, मुत्तस्स करणे पन.

सम्फस्सं सादियन्तिया, पवेसेति सचे पन;

पवेसापेति वा तस्मिं, तस्सा पाचित्तियं सिया.

आबाधपच्चया दोसो, नत्थि उम्मत्तिकाय वा;

तलघातकतुल्याव, समुट्ठानादयो मता.

अङ्गुलीनं ¶ पन द्विन्नं, अग्गपब्बद्वयाधिकं;

पाचित्तियं पवेसेत्वा, दकसुद्धिं करोन्तिया.

एकिस्साङ्गुलिया तीणि, पब्बानि पन दीघतो;

पाचित्तियं भवे सुद्धिं, पवेसेत्वादियन्तिया.

चतुन्नं वापि तिस्सन्नं, एकपब्बम्पि या पन;

वित्थारतो पवेसेति, तस्सा पाचित्तियं सिया.

इति सब्बप्पकारेन, महापच्चरिया पन;

अभिब्यत्ततरं कत्वा, अयमत्थो विभावितो.

दोसो द्वङ्गुलपब्बे वा, नत्थि आबाधकारणा;

अधिकम्पि पवेसेत्वा, दकसुद्धिं करोन्तिया.

तथा ¶ उम्मत्तिकादीन-मनापत्ति पकासिता;

समुट्ठानादयो सब्बे, तलघातसमा मता.

भुञ्जतो पन भिक्खुस्स, पानीयं वा विधूपनं;

गहेत्वा उपतिट्ठेय्य, तस्सा पाचित्तियं सिया.

गहिता उदकेनेव, खीरतक्कादयो रसा;

‘‘बीजनी’’ति च या काचि, वत्थकोणादि वुच्चति.

हत्थपासे इधट्ठान-पच्चयापत्ति दीपिता;

पहारपच्चया वुत्तं, खन्धके दुक्कटं विसुं.

हत्थपासं जहित्वा वा, उपतिट्ठन्तिया पन;

खादतो खादनं वापि, होति आपत्ति दुक्कटं.

न दोसो देति दापेति, तथा उम्मत्तिकाय वा;

इदं एळकलोमेन, समुट्ठानं समं मतं.

विञ्ञत्वा आमकं धञ्ञं, भज्जित्वा यदि भिक्खुनी;

कोट्टेत्वा च पचित्वा च, पाचित्ति परिभुञ्जति.

न ¶ केवलं तु धञ्ञानं, गहणेयेव दुक्कटं;

हरणेपि च धञ्ञानं, तथा सुक्खापने पन.

भज्जनत्थाय धञ्ञानं, कपल्लुद्धनसज्जने;

अग्गिस्स करणे दब्बि-सज्जने च, कपल्लके.

धञ्ञपक्खिपने तत्थ, दब्बिया घट्टकोट्टने;

पप्फोटनादिके सब्ब-पयोगे दुक्कटं भवे.

भोजनञ्चेव ¶ विञ्ञत्ति, पमाणं इदमेत्थ हि;

विञ्ञत्वा वा सयं तस्मा, भज्जनादीनि अञ्ञतो.

विञ्ञापेत्वा पनञ्ञाय, भज्जनादीनि वा सयं;

कारापेत्वापि कत्वा वा, अज्झोहरति या पन.

अज्झोहारपयोगेसु, तस्सा पाचित्तियो सियुं;

मातरं वापि याचित्वा, पाचित्ति परिभुञ्जति.

भज्जनादीनि कत्वा वा, कारापेत्वापि वा पन;

अविञ्ञत्ति सयं लद्धं, दुक्कटं परिभुञ्जति.

विञ्ञत्तिया पनञ्ञाय, लद्धं ताय सयम्पि वा;

कारापेत्वापि कत्वा वा, तथा अज्झोहरन्तिया.

सेदकम्मादिअत्थाय, धञ्ञविञ्ञत्तिया पन;

ठपेत्वा सत्त धञ्ञानि, सेसविञ्ञत्तियापि च.

अनापत्तीति ञातब्बं, तथा उम्मत्तिकाय च;

ञातकानम्पि धञ्ञं तु, आमकं न च वट्टति.

विना विञ्ञत्तिया लद्धं, नवकम्मेसु वट्टति;

समुट्ठानादयो सब्बे, अद्धानसदिसा मता.

उच्चारं वापि पस्सावं, सङ्कारं वा विघासकं;

छड्डेय्य वा तिरोकुट्टे, छड्डापेय्य परेहि वा.

होति पाचित्तियं तस्सा, पाकारेपि अयं नयो;

छड्डेन्तिया पनेकेक-मनेकापत्ति दीपिता.

एतानि ¶ पन वत्थूनि, चत्तारि सकलानिपि;

एकेनेव पयोगेन, एका छड्डेन्तिया सिया.

आणत्तियम्पि ¶ एसेव, नयो ञेय्यो विभाविना;

छड्डने दन्तकट्ठस्स, पाचित्ति परिदीपिता.

सब्बत्थ पन भिक्खुस्स, होति आपत्ति दुक्कटं;

अवलञ्जेपि वा ठाने, ओलोकेत्वापि वा पन.

छड्डेन्तिया अनापत्ति, तथा उम्मत्तिकाय वा;

सञ्चरित्तसमुट्ठानं, क्रियाक्रियमिदं सिया.

खेत्ते वा नाळिकेरादि-आरामे वापि या पन;

रोपिमे हरितट्ठाने, यत्थ कत्थचि भिक्खुनी.

तानि चत्तारि वत्थूनि, सचे छड्डेति वा सयं;

छड्डापेति तथा वुत्त-नयो आपत्तिनिच्छयो.

भुञ्जमाना निसीदित्वा, खेत्ते तु हरिते तथा;

उच्छुआदीनि खादन्ती, गच्छन्ती पन तत्थ या.

छड्डेति यदि उच्छिट्ठं, उदकं चलकानि वा;

होति पाचित्तियं तस्सा, भिक्खुनो होति दुक्कटं.

छड्डेन्तिया सियापत्ति, ठाने अन्तमसो जलं;

पिवित्वा मत्थकच्छिन्नं, नाळिकेरम्पि तादिसे.

कसिते तु पनट्ठाने, बीजनिक्खेपने कते;

न उट्ठेतङ्कुरं याव, सब्बेसं ताव दुक्कटं.

लायितम्पि मनुस्सानं, खेत्तं रक्खति चे पुन;

रोहनत्थाय तत्थस्सा, यथावत्थुकमेव हि.

न दोसो छड्डिते खेत्ते, सब्बं छड्डेन्तिया पन;

समुट्ठानादयो सब्बे, अट्ठमेन समा मता.

नच्चं ¶ ¶ वा पन गीतं वा, वादितं वापि भिक्खुनी;

दस्सनत्थाय गच्छेय्य, तस्सा पाचित्तियं सिया.

दस्सनत्थाय नच्चस्स, गीतस्स सवनाय च;

गच्छन्तिया सिया तस्सा, पदवारेन दुक्कटं.

सचे एकपयोगेन, ओलोकेन्ती च पस्सति;

सुणाति तेसं गीतम्पि, एका पाचित्ति दीपिता.

अञ्ञस्मिम्पि दिसाभागे, नच्चं पस्सति चे पन;

सुणाति अञ्ञतो गीतं, विसुं पाचित्तियो सियुं.

पयोगगणनायेत्थ, आपत्तिगणना सिया;

नच्चितुं गायितुं नेव, सयं लभति भिक्खुनी.

‘‘अञ्ञं नच्चाति वादेहि’’, इति वत्तुं न वट्टति;

‘‘उपट्ठानं करोमा’’ति, वुत्ते वा सम्पटिच्छितुं.

तस्सा पाचित्ति सब्बत्थ, भिक्खुनो होति दुक्कटं;

‘‘उपट्ठानं करोमा’’ति, वुत्ते भिक्खुनिया पन.

‘‘उपट्ठानं पसत्थ’’न्ति, वत्तुमेवं तु वट्टति;

आरामेयेव ठत्वा वा, या पस्सति सुणाति वा.

अत्तनो च ठितोकासं, आगन्त्वा च पयोजितं;

गन्त्वा पस्सन्तिया वापि, तथारूपा हि कारणा.

पस्सन्तिया तथा मग्गं, नच्चं पटिपथेपि च;

तथा उम्मत्तिकादीन-मनापत्तापदासुपि.

इदमेळकलोमेन, समुट्ठानं समं मतं;

लोकवज्जमिदं पाप-चित्तञ्चेव तिवेदनं.

याध ¶ रत्तन्धकारस्मिं, अप्पदीपे पनेकिका;

सन्तिट्ठति सचे सद्धिं, पुरिसेन च भिक्खुनी.

तस्सा ¶ पाचित्तियं वुत्तं, सद्धिं वा सल्लपन्तिया;

हत्थपासं समागन्त्वा, रहस्सादवसेन तु.

हत्थपासं जहित्वा वा, पुरिसस्स सचे पन;

अजहित्वापि वा यक्ख-पेतादीनम्पि भिक्खुनी.

सन्तिट्ठति च या तस्सा, दुक्कटं परिदीपितं;

अनापत्ति सचे कोचि, दुतिया विञ्ञु विज्जति.

तथा उम्मत्तिकादीन-मथञ्ञविहिताय वा;

थेय्यसत्थसमुट्ठानं, क्रियं सञ्ञाविमोक्खकं.

दुतिये तु ‘‘पटिच्छन्ने, ओकासे’’ति इदं पन;

अधिकं इतरं सब्बं, पठमेन समं मतं.

ततियेपि चतुत्थेपि, अपुब्बं नत्थि किञ्चिपि;

समानं पठमेनेव, समुट्ठानादिना सह.

छदनन्तो निसीदित्वा, अनोवस्सप्पदेसकं;

अज्झोकासे निसीदित्वा, उपचारम्पि वा सचे.

अतिक्कमेति या, होति, दुक्कटं पठमे पदे;

दुतिये च पदे तस्सा, पाचित्ति परियापुता.

पल्लङ्कस्स ¶ अनोकासे, दुक्कटं समुदीरितं;

तथापुट्ठे अनापुट्ठ-सञ्ञाय विचिकिच्छतो.

असंहारिमेनापत्ति, गिलानायापदासु वा;

समुट्ठानादयो सब्बे, कथिनेन समा मता.

एकापत्ति ¶ निसीदित्वा, होति गच्छन्तिया पन;

एकाव अनिसीदित्वा, निपज्जित्वा वजन्तिया.

निसीदित्वा निपज्जित्वा, होन्ति गच्छन्तिया दुवे;

सेसं अनन्तरेनेव, समुट्ठानादिना समं.

छट्ठेन सत्तमं तुल्यं, अट्ठमे नत्थि किञ्चिपि;

वत्तब्बं तिसमुट्ठानं, सचित्तं दुक्खवेदनं.

निरयब्रह्मचरियेहि, अत्तानं वा परम्पि वा;

अभिसपेय्य पाचित्ति, वाचतो वाचतो सिया

ठपेत्वा निरयञ्चेव, ब्रह्मचरियञ्च या पन;

‘‘सुनखी सूकरी काकी, काणा कुणी’’तिआदिना.

अक्कोसति च वाचाय, वाचायापत्ति दुक्कटं;

तिकपाचित्तियं वुत्तं, सेसाय तिकदुक्कटं.

पुरक्खत्वा वदन्तीन-मत्थधम्मानुसासनिं;

अनापत्तट्ठमेनेव, समुट्ठानादयो समा.

रोदन्तिया ¶ वधित्वा वा, पाचित्ति परिदीपिता;

द्वीसु तेसु पनेकेकं, दुक्कटं तु करोन्तिया.

सेसमुत्तानमेवेत्थ, समुट्ठानादयो पन;

धुरनिक्खेपतुल्याव, क्रियामत्तं विसेसकं.

अच्छिन्नचीवरा नट्ठ-चीवरा आपदासु वा;

न दोसेळकलोमेन, समुट्ठानादयो समा.

दुतिये पन वत्तब्बं, अपुब्बं नत्थि किञ्चिपि;

समुट्ठानादयो सब्बे, सञ्चरित्तसमा मता.

दुस्सिब्बितं विसिब्बेत्वा, सिब्बनत्थाय चीवरं;

अनन्तराय तं पच्छा, या न सिब्बेय्य भिक्खुनी.

ठपेत्वा चतुपञ्चाहं, ‘‘न सिब्बिस्साम्यह’’न्ति हि;

धुरे निक्खित्तमत्तेव, तस्सा पाचित्तियं सिया.

पच्छा ¶ सिब्बति पाचित्ति, निक्खिपित्वा धुरं सचे;

तिकपाचित्तियं वुत्तं, सेसाय तिकदुक्कटं.

वुत्तं उभिन्नमञ्ञस्मिं, परिक्खारे तु दुक्कटं;

अनापत्ति गिलानाय, अन्तरायेपि वा सति.

अतिक्कमेति पञ्चाहं, करोन्ती वापि चीवरं;

धुरनिक्खेपनं नाम, समुट्ठानमिदं मतं.

पञ्चाहिकं तु सङ्घाटि-चारं यातिक्कमेय्य हि;

होति पाचित्तियापत्ति, छट्ठे तस्सारुणुग्गमे.

एकस्मिं चीवरे एका, पञ्च पञ्चसु दीपिता;

तिचीवरञ्च संकच्चि, दकसाटीति पञ्च तु.

तिकपाचित्ति ¶ पञ्चाहा-नतिक्कन्ते द्विदुक्कटं;

पञ्चमे दिवसे पञ्च, चीवरानि निसेवति.

ओतापेति गिलानाय, अनापत्तिपदासुपि;

समुट्ठानादयो सब्बे, कथिनेन समा मता.

गहेत्वा या अनापुच्छा, सङ्कमेतब्बचीवरं;

परिभुञ्जति अञ्ञिस्सा, तस्सा पाचित्तियं सिया.

तिकपाचित्तियं वुत्तं, सेसाय तिकदुक्कटं;

अच्छिन्नचीवरा नट्ठ-चीवरा आपदासु वा.

तथा उम्मत्तिकादीन-मनापत्ति पकासिता;

कथिनेन समुट्ठानं, तुल्यमेतं क्रियाक्रियं.

या ¶ हि भिक्खुनि सङ्घस्स, लभितब्बं तु चीवरं;

निवारेति सचे तस्सा, पाचित्ति परिदीपये.

गणस्सापि च एकिस्सा, लाभे आपत्ति दुक्कटं;

तथेवञ्ञं परिक्खारं, निवारेति सचे पन.

आनिसंसं निदस्सेत्वा, निवारेति न दोसता;

अदिन्नादानतुल्याव, समुट्ठानादयो मता.

चीवरानं विभङ्गं या, पटिसेधेय्य धम्मिकं;

होति पाचित्तियं तस्सा, दुक्कटं परिदीपितं.

अधम्मे धम्मसञ्ञाय, उभो वेमतिकाय वा;

आनिसंसं निदस्सेत्वा, पटिसेधेन्तिया पन.

तथा उम्मत्तिकादीन-मनापत्ति पकासिता;

समुट्ठानादयो सब्बे, अनन्तरसमा मता.

निवासनूपगं ¶ वापि, तथा पारुपनूपगं;

कप्पबिन्दुकतं किञ्चि, मुञ्चित्वा सहधम्मिके.

पितरोपि पनञ्ञस्स, ददेय्य यदि चीवरं;

यस्स कस्सचि तस्सापि, पाचित्ति परियापुता.

गणनाय वसेनेत्थ, चीवरानं तु ता पन;

पाचित्तियो गणेतब्बा, भिक्खुनो दुक्कटं सिया.

तावकालिकमञ्ञेस-मनापत्ति ददाति चे;

सञ्चरित्तसमा वुत्ता, समुट्ठानादयो नया.

चीवरस्स ¶ विभङ्गं या, निसेधेत्वान चीवरे;

कालं अतिक्कमेय्यस्सा, दुब्बलासाय दोसता.

अदुब्बले तु चीवरे, सुदुब्बलन्ति चेतसा;

उभोसु कङ्खिताय वा, अवोच दुक्कटं जिनो.

आनिसंसं निदस्सेत्वा, निवारेति न दोसता;

अदिन्नादानतुल्याव, समुट्ठानादयो मता.

धम्मिकं कथिनुद्धारं, या निवारेय्य भिक्खुनी;

तस्सा पाचित्तियापत्ति, मुनिन्देन पकासिता.

आनिसंसो महा होति, यस्स अत्थारमूलको;

उद्धारमूलको अप्पो, न दातब्बो पनीदिसो.

आनिसंसो महा होति, यस्स उब्भारमूलको;

अत्थारमूलको अप्पो, दातब्बो एवरूपको.

तथा समानिसंसोपि, सद्धापालनकारणा;

आनिसंसं निदस्सेत्वा, पटिसेधेति वट्टति.

सेसं पन असेसेन, सत्तमेन समं मतं;

समुट्ठानादिना सद्धिं, अपुब्बं नत्थि किञ्चिपि.

एकाय ¶ तु निपन्नाय, अपरा वा निपज्जतु;

निपज्जेय्युं सहेव द्वे, द्विन्नं पाचित्तियं सिया.

आपत्तिबहुका ¶ ञेय्या, पुनप्पुनं निपज्जने;

एकाय च निपन्नाय, सचे एका निसीदति.

उभो वापि निसीदन्ति, समं, उम्मत्तिकाय वा;

अनापत्ति समुट्ठानं, एळकेन समं मतं.

पावारकटसारादिं, सन्थरित्वा पनेककं;

संहारिमेसु तेनेव, पारुपित्वा सचे पन.

निपज्जन्ति सहेव द्वे, तासं पाचित्तियं सिया;

एकस्मिं दुक्कटं द्विन्नं, वुत्तं तु द्विकदुक्कटं.

ववत्थानं निदस्सेत्वा, निपज्जन्ति सचे पन;

न दोसुम्मत्तिकादीनं, सेसं तुल्यं पनादिना.

पुरतो च अनापुच्छा, यदि चङ्कमनादयो;

करेय्य पन पाचित्ति, अञ्ञिस्साफासुकारणा.

उद्देसादीसु पाचित्ति, पदानं गणनावसा;

तिकपाचित्तियं वुत्तं, सेसाय तिकदुक्कटं.

न च अफासुकामाय, आपुच्छा पुरतो पन;

तस्सा चङ्कमनादीनि, अनापत्ति करोन्तिया.

अदिन्नादानतुल्याव ¶ , समुट्ठानादयो नया;

क्रियाक्रियमिदं पाप- मानसं दुक्खवेदनं.

सयं ¶ अनन्तराया या, दुक्खितं सहजीविनिं;

नुपट्ठापेय्य चञ्ञाय, नुपट्ठेय्य सयम्पि वा.

धुरे निक्खित्तमत्तेव, तस्सा पाचित्तियं सिया;

अन्तेवासिनिया वापि, दुक्कटं इतराय वा.

अनापत्ति गिलानाय, गवेसित्वालभन्तिया;

आपदुम्मत्तिकादीनं, धुरनिक्खेपनोदयं.

सकं पुग्गलिकं दत्वा, सकवाटं उपस्सयं;

सयं उपस्सया तम्हा, निक्कड्ढति सचे पन.

एकेनेव पयोगेन, द्वारादीसु बहूनिपि;

तं निक्कड्ढन्तिया तस्सा, एकं पाचित्तियं सिया.

पयोगगणनायेत्थ, पाचित्तिगणना मता;

आणत्तियम्पि एसेव, नयो वुत्तो महेसिना.

‘‘एत्तकाव इमं द्वारा, निक्कड्ढाही’’ति भासति;

एकायाणत्तिया द्वार-गणनापत्तियो सियुं.

दुक्कटं अकवाटम्हा, सेसाय तिकदुक्कटं;

उभिन्नं पन सब्बत्थ, परिक्खारेसु दुक्कटं.

सेसमेत्थ असेसेन, समुट्ठानादिना सह;

सङ्घिका हि विहारस्मा, निक्कड्ढनसमं मतं.

छट्ठे ¶ पनिध वत्तब्बं, अपुब्बं नत्थि किञ्चिपि;

सिक्खापदेनरिट्ठस्स, सदिसोव विनिच्छयो.

सासङ्कसम्मते अन्तो-रट्ठे भिक्खुनिया पन;

चरन्तिया सियापत्ति, विना सत्थेन चारिकं.

गामन्तरपवेसे ¶ च, अरञ्ञे अद्धयोजने;

पाचित्तियनयो ञेय्यो, भिक्खुना विनयञ्ञुना.

न दोसो सह सत्थेन, खेमट्ठानापदासु वा;

इदं एळकलोमेन, समुट्ठानादिना समं.

अट्ठमे नवमे वापि, अनुत्तानं न विज्जति;

सत्तमेन समानानि, समुट्ठानादिना सह.

पाचित्ति धुरनिक्खेपे, ‘‘न गमिस्साम्यह’’न्ति च;

कत्वा च धुरनिक्खेपं, पच्छा गच्छन्तिया तथा.

योजनानि पवारेत्वा, पञ्च गन्तुम्पि वट्टति;

छसु वत्तब्बमेवत्थि, किन्नु नामिध तं सिया.

तीणि गन्त्वा च तेनेव, पच्चागन्तुं न वट्टति;

अञ्ञेन पन मग्गेन, पच्छागच्छति वट्टति.

अनापत्तन्तरायस्मिं, तस्सा दसविधे सति;

आपदासु गिलानाय, अलाभे दुतियाय वा.

राजचोरमनुस्सग्गि-तोयवाळसरीसपा;

मनुस्सजीवितब्रह्म-चरियस्सन्तरायिका.

समुट्ठानादिना ¶ तुल्यं, पठमन्तिमवत्थुना;

अयमेव विसेसो हि, अक्रियं दुक्खवेदनं.

राजागारं चित्तागारं, आरामं कीळुय्यानं वा;

कीळावापिं नानाकारं, दट्ठुं गच्छन्तिनं तानि.

निद्दिट्ठं ¶ मुनिना तासं, दुक्कटं तु पदे पदे;

पदं अनुद्धरित्वाव, सचे पस्सन्ति पञ्चपि.

एकायेव पनापत्ति, पाचित्ति परिदीपिता;

गन्त्वा पस्सन्ति चे तं तं, पाटेक्कापत्तियो सियुं.

पयोगबहुतायापि, पाचित्तिबहुता सिया;

भिक्खुस्स पन सब्बत्थ, होति आपत्ति दुक्कटं.

अवसेसो अनापत्ति-कथामग्गविनिच्छयो;

नच्चदस्सनतुल्योव, समुट्ठानादिना सह.

आसन्दिं वा पल्लङ्कं वा, माणनातीतं वाळूपेतं;

सेवन्तीनं यासं तासं, पाचित्तापत्तिं सत्थाह.

पादे ¶ आसन्दिया छेत्वा, भित्वा पल्लङ्कवाळके;

अनापत्ति समुट्ठान-मनन्तरसमं मतं.

छन्नं अञ्ञतरं सुत्तं, यदि कन्तति भिक्खुनी;

यत्तकं अञ्छितं हत्था, तस्मिं तक्कम्हि वेठिते.

एका पाचित्ति निद्दिट्ठा, सुत्तकन्तनतो पन;

सब्बपुब्बपयोगेसु, दुक्कटं हत्थवारतो.

न दोसो कन्तितं सुत्तं, पुन कन्तन्तिया पन;

इदं एळकलोमेन, समुट्ठानादिना समं.

कोट्टनं ¶ तण्डुलानं तु, आदिं कत्वान दुक्कटं;

सब्बपुब्बपयोगेसु, वेय्यावच्चं करोन्तिया.

भाजनानि गणेत्वाव, पाचित्ति यागुआदिसु;

खज्जकादीसु रूपानं, गणनाय हि दीपये.

सचे मातापितूनम्पि, आगतानं पनत्तनो;

किञ्चि कम्मं अकारेत्वा, किञ्चि कातुं न वट्टति.

सङ्घस्स यागुपाने वा, सङ्घभत्तेपि वा तथा;

चेतियस्स च पूजाय, वेय्यावच्चकरस्स वा.

अत्तनो च अनापत्ति, तथा उम्मत्तिकाय वा;

समुट्ठानादयो सब्बे, ततियेन समा मता.

पाचित्ति ¶ धुरनिक्खेपे, यथा चीवरसिब्बने;

तथा इध पनेकाहं, परिहारो न लब्भति.

सेसं वुत्तनयेनेव, तत्थ चीवरसिब्बने;

समुट्ठानादिना सद्धिं, वेदितब्बं विभाविना;

कायेन कायबद्धेन, तथा निस्सग्गियेन वा;

गिहीनं पन यं किञ्चि, दन्तपोनोदकं विना.

अज्झोहरणियं अञ्ञं, अञ्ञेसं तु ददाति या;

होति पाचित्तियं तस्सा, ठपेत्वा सहधम्मिके.

दन्तकट्ठोदके वुत्तं, दुक्कटं मुनिना इध;

या न देति च दापेति, निक्खमित्वापि देन्तिया.

देति बाहिरलेपं वा, न दोसुम्मत्तिकाय वा;

समुट्ठानादयो सब्बे, ततियेन समा मता.

अदत्वा ¶ परिभुञ्जेय्य, या चावसथचीवरं;

दिवसे तु चतुत्थे तं, धोवित्वा पुन चीवरं.

सामणेराय वा अन्त-मसो उतुनिया सचे;

तस्सा पाचित्तियं वुत्तं, तिकपाचित्तियं सिया.

तस्सा निस्सज्जिते तस्मिं, वुत्तं तु द्विकदुक्कटं;

उतुनीनं अभावे तु, अञ्ञासं पुन परियये.

अच्छिन्नचीवरादीन-मनापत्तापदासुपि;

समुट्ठानादयो सब्बे, कथिनेन समा मता.

अदत्वा ¶ रक्खणत्थाय, विहारं सकवाटकं;

होति पाचित्तियं तस्सा, चारिकं पक्कमन्तिया.

अत्तनो गामतो अञ्ञं, गामं गच्छन्तिया पन;

परिक्खित्तविहारस्स, परिक्खेपम्पि वा तथा.

इतरस्सुपचारं वा, पठमेन पदेन तं;

दुक्कटं समतिक्कन्ते, पाचित्ति दुतियेन तु.

अकवाटबन्धनस्मिं, दुक्कटं परिदीपितं;

अन्तराये अनापत्ति, जग्गिकं अलभन्तिया.

आपदासु गिलानाय, तथा उम्मत्तिकाय वा;

समुट्ठानादयो सब्बे, कथिनेन समा मता.

हत्थिअस्सरथादीहि, संयुत्तं सिप्पमेव वा;

परूपघातकं मन्ता-गदयोगप्पभेदकं.

परियापुणेय्य चे किञ्चि, यस्स कस्सचि सन्तिके;

होति पाचित्तियं तस्सा, पदादीनं वसेनिध.

लेखे पन अनापत्ति, धारणाय च गुत्तिया;

परित्तेसु च सब्बेसु, तथा उम्मत्तिकाय वा.

दसमे ¶ नत्थि वत्तब्बं, नवमेन समं इदं;

समुट्ठानादयो द्विन्नं, पदसोधम्मसादिसा.

सभिक्खुकं ¶ पनारामं, जानित्वा पविसन्तिया;

अनापुच्छाव यं किञ्चि, पाचित्ति परियापुता.

सचे अन्तमसो रुक्ख-मूलस्सपि च भिक्खुनी;

अनापुच्छा परिक्खेपं, अतिक्कामेति या पन.

उपचारोक्कमे वापि, अपरिक्खित्तकस्स तु;

दुक्कटं पठमे पादे, पाचित्ति दुतिये सिया.

अभिक्खुके सभिक्खूति, सञ्ञाय पनुभोसुपि;

जातकङ्खाय वा तस्सा, होति आपत्ति दुक्कटं.

पठमं पविसन्तीनं, तासं सीसानुलोकिका;

ता सन्निपतिता यत्थ, तासं गच्छति सन्तिकं.

सन्तं भिक्खुं पनापुच्छा, मग्गो वाराममज्झतो;

तेन गच्छन्तिया वापि, आपदासु विसन्तिया.

तथा उम्मत्तिकादीन-मनापत्ति पकासिता;

धुरनिक्खेपतुल्याव, समुट्ठानादयो नया.

अक्कोसेय्य च या भिक्खुं, परिभासेय्य वा पन;

तिकपाचित्तियं तस्सा, सेसे च तिकदुक्कटं.

या ¶ सङ्घं परिभासेय्य, तस्सा पाचित्तियं सिया;

एकं सम्बहुला वापि, तथेव इतराय वा.

परिभासन्तिया ¶ तस्सा, दुक्कटं परिदीपितं;

सेसं अनन्तरेनेव, समुट्ठानादिना समं.

निमन्तितापि वा सचे, पवारितापि वा पन;

निमन्तनपवारणा, उभोपि वुत्तलक्खणा.

पुरेभत्तं तु यागुञ्च, ठपेत्वा कालिकत्तयं;

या चज्झोहरणत्थाय, यं किञ्चि पन आमिसं.

पटिग्गण्हाति चे तस्सा, गहणे दुक्कटं सिया;

अज्झोहारवसेनेत्थ, पाचित्ति परिदीपिता.

कालिकानि च तीणेव, आहारत्थाय गण्हति;

गहणे दुक्कटं वुत्तं, तथा अज्झोहरन्तिया.

कालिकानि च तीणेव, पच्चये सति भुञ्जति;

तथा उम्मत्तिकादीनं, अनापत्ति पकासिता.

समुट्ठानमिदं तुल्यं, अद्धानेन क्रियाक्रियं;

निमन्तिता अनापुच्छा, सामिं भुञ्जति चे पन.

कप्पियं पन कारेत्वा, अकारेत्वापि वा यदि;

परिभुञ्जति या तस्सा, पाचित्ति क्रियतो सिया.

भिक्खुनीनं अवण्णं वा, पाचित्ति कुलसन्तिके;

कुलस्सावण्णनं वापि, भिक्खुनीनं वदन्तिया.

सन्तं ¶ ¶ भासन्तिया दोसं, न दोसुम्मत्तिकाय वा;

ओमसवादतुल्याव, समुट्ठानादयो नया.

अद्धयोजनतो ओरे, भिक्खु ओवाददायको;

न वसति सचे मग्गो, अखेमो वा सचे सिया.

अयं अभिक्खुको नाम, आवासो पन तत्थ हि;

उपगच्छन्तिया वस्सं, आपत्ति अरुणुग्गमे.

पक्कन्ता पक्खसङ्कन्ता, विब्भन्ता वा मतापि वा;

वस्सं उपगता भिक्खू, अनापत्तापदासुपि.

या भिक्खुनुभतोसङ्घे, वस्संवुट्ठा ततो पुन;

‘‘नाहं पवारेस्सामी’’ति, सा निक्खिपति चे धुरं.

धुरे निक्खित्तमत्तस्मिं, तस्सा पाचित्तियं सिया;

सति वा अन्तरायस्मिं, गिलानायापदासुपि.

परियेसित्वापि वा भिक्खुं, न दोसो अलभन्तिया;

इदं तु धुरनिक्खेप-समुट्ठानमुदीरितं.

‘‘ओवादादीनमत्थाय, न गच्छिस्साम्यह’’न्ति हि;

धुरे निक्खित्तमत्तस्मिं, पाचित्ति परिदीपये.

सदिसं ¶ तु समुट्ठानं, पठमन्तिमवत्थुना;

अक्रियं लोकवज्जञ्च, कायिकं दुक्खवेदनं.

‘‘न ¶ याचिस्सामि ओवादं, न पुच्छिस्सामुपोसथं’’;

इच्चेवं पन निक्खित्ते, धुरे पाचित्तियं सिया.

सति वा अन्तरायस्मिं, गिलानायापदासु वा;

न दोसो परियेसित्वा, दुतियं अलभन्तिया.

अट्ठमेपि अनापत्ति, एवमेव पकासिता;

इदं तु धुरनिक्खेप-समुट्ठानमुदीरितं.

पसाखे पन सञ्जातं, गण्डं रुचितमेव वा;

अनापुच्छाव सङ्घं वा, गणं एकेन एकिका.

‘‘भिन्द फालेहि धोवा’’ति, सब्बानेवाणापेन्तिया;

कतेसु दुक्कटानिच्छ, तस्सा पाचित्तियो छ च.

‘‘यमेत्थ अत्थि कातब्बं, तं सब्बं त्वं करोहि’’ति;

आणापेति सचे एवं, सो च सब्बं करोति चे.

एकाय पन वाचाय, दुक्कटानि पनच्छ च;

तस्सा पाचित्तियच्छक्कं, द्वादसापत्तियो सियुं.

भेदनादीसु एकं सा, आणापेति सचे पन;

सो करोति च सब्बानि, एकं पाचित्तियं सिया.

आपुच्छित्वापि वा विञ्ञुं, गहेत्वा दुतियम्पि वा;

भेदनादीनि सब्बानि, कारापेति सचे पन.

तस्सा ¶ उम्मत्तिकादीन-मनापत्ति पकासिता;

समुट्ठानादयो सब्बे, कथिनेन समा मता.

गणंपरियेसनादिस्मिं, गब्भिनिं वुट्ठपेन्तिया;

ञत्तिया कम्मवाचाहि, उपज्झायाय दुक्कटं.

कम्मवाचाय ¶ ओसाने, पाचित्ति परियापुता;

तथा गब्भिनिसञ्ञाय, न च गब्भिनिया पन.

उभो सञ्जातकङ्खाय, होति आपत्ति दुक्कटं;

तथाचरिनिया तस्सा, गणस्सापि च दीपितं.

द्वीस्वगब्भिनिसञ्ञाय, न दोसुम्मत्तिकाय वा;

अदिन्नादानतुल्याव, समुट्ठानादयो नया.

दुतिये नत्थि वत्तब्बं, पठमेन समं मतं;

समुट्ठानादिना सद्धिं, नत्थि काचि विसेसता.

छस्वसिक्खितसिक्खं तु, सिक्खमानञ्हि भिक्खुनी;

द्वे वस्सानि सियापत्ति, वुट्ठापेय्य सचे पन.

तिकपाचित्तियं वुत्तं, धम्मकम्मे तु सत्थुना;

अधम्मे पन कम्मस्मिं, दीपितं तिकदुक्कटं.

छसु सिक्खितसिक्खं या, द्वे वस्सानि अखण्डतो;

वुट्ठापेति अनापत्ति, तथा उम्मत्तिकाय वा.

इमा ¶ हि छ च सिक्खायो, सट्ठिवस्सापि चे पन;

पब्बज्जाय पदातब्बा, अदत्वा न च कारये.

चतुत्थे नत्थि वत्तब्बं, इध सङ्घेन सम्मतं;

सिक्खमानमनापत्ति, होति तं वुट्ठपेन्तिया.

अदिन्ना पठमं होति, सचे वुट्ठानसम्मुति;

तत्थापि च पदातब्बा, उपसम्पदमाळके.

ततियञ्च चतुत्थञ्च, समुट्ठानादिना पन;

पठमेन समं ञेय्यं, चतुत्थं तु क्रियाक्रियं.

ऊनद्वादसवस्सं ¶ तु, कञ्चि गिहिगतं पन;

परिपुण्णाति सञ्ञाय, न दोसो वुट्ठपेन्तिया.

होति वानुपसम्पन्ना, उपसम्पादितापि सा;

असेसेन च सेसं तु, पठमेन समं मतं.

छट्ठं तु ततिये वुत्त-नयेनेव विभावये;

सत्तमम्पि तथा सब्बं, चतुत्थेन समं मतं.

यं तुवट्टकवग्गस्मिं, दुक्खितं सहजीविनिं;

वुत्तं तेन समं ञेय्यं, अट्ठमं न विसेसता.

द्वे ¶ वस्सानि च या काचि, वुट्ठापितपवत्तिनिं;

नानुबन्धेय्य चे तस्सा, पाचित्ति परियापुता.

‘‘द्वे वस्सानि अहं नानु-बन्धिस्सामी’’ति चे पन;

धुरे निक्खित्तमत्तस्मिं, तस्सा पाचित्तियं सिया.

तञ्च बालमलज्जिं वा, गिलानायापदासु वा;

नानुबन्धन्तिया तस्सा, न दोसुम्मत्तिकाय वा.

समुट्ठानादयो तुल्या, पठमन्तिमवत्थुना;

इदं पनाक्रियं वुत्तं, वेदना दुक्खवेदना.

वुट्ठापेत्वा तु या काचि, भिक्खुनी सहजीविनिं;

तं गहेत्वा न गच्छेय्य, न चञ्ञं आणापेय्य चे.

धुरे निक्खित्तमत्तस्मिं, तस्सा पाचित्तियं सिया;

सति वा अन्तरायस्मिं, दुतियं अलभन्तिया.

आपदासु ¶ गिलानाय, तथा उम्मत्तिकाय वा;

न दोसो धुरनिक्खेप-समुट्ठानमिदं पन.

कुमारिभूतवग्गस्स, पठमादीनि तीणिपि;

गिहिगतेहि तीहेव, सदिसानीति निद्दिसे.

या महूपपदा द्वे तु, सिक्खमाना पनादितो;

‘‘गता वीसतिवस्सा’’ति, विञ्ञातब्बा विभाविना.

सचे ¶ गिहिगता होन्ति, न च वा पुरिसं गता;

‘‘सिक्खमाना’’ति वत्तब्बा, ता हि सम्मुतिआदिसु.

न ता ‘‘कुमारिभूता’’ति, तथा ‘‘गिहिगता’’ति वा;

वत्तब्बा पनुभोपेता, एवं वत्तुं न वट्टति.

सम्मुतिं दसवस्साय, दत्वा द्वादसवस्सिका;

कत्तब्बा उपसम्पन्ना, सेसासुपि अयं नयो.

या अट्ठारसवस्सा तु, ततो पट्ठाय सा पन;

वुत्ता ‘‘कुमारिभूता’’ति, तथा ‘‘गिहिगता’’तिपि.

वुत्ता ‘‘कुमारिभूता’’ति, सामणेरी हि या पन;

‘‘कुमारिभूता’’ इच्चेव, वत्तब्बा न पनञ्ञथा.

एता तु पन तिस्सोपि, सिक्खासम्मुतिदानतो;

‘‘सिक्खमाना’’ति वत्तुम्पि, वट्टतेव न संसयो.

ऊनद्वादसवस्साव, वुट्ठापेति सचे परं;

हुत्वा सयमुपज्झाया, सिक्खमानं तु भिक्खुनी.

पुब्बे वुत्तनयेनेव, दुक्कटानमनन्तरं;

कम्मवाचानमोसाने, तस्सा पाचित्ति दीपिता.

पञ्चमे ¶ नत्थि वत्तब्बं, चतुत्थं पञ्चमम्पि च;

उभयं तिसमुट्ठानं, पञ्चमं तु क्रियाक्रियं.

सङ्घेनुपपरिक्खित्वा, ‘‘अलं तावा’’ति वारिता;

उपसम्पादितेनेत्थ, पच्छा खीयति दोसता.

उज्झायति ¶ सचे छन्द-दोसादीहि करोन्तिया;

न दोसो तिसमुट्ठानं, सचित्तं दुक्खवेदनं.

लद्धे च चीवरे पच्छा, असन्ते अन्तरायिके;

‘‘वुट्ठापेस्सामि नाह’’न्ति, धुरनिक्खेपने पन.

होति पाचित्तियं तस्सा, गिलानायापदासुपि;

न दोसो परियेसित्वा, परिसं अलभन्तिया.

इदञ्हि धुरनिक्खेप-समुट्ठानं सचित्तकं;

अक्रियं लोकवज्जञ्च, होतिदं दुक्खवेदनं.

अट्ठमं सत्तमेनेव, सदिसं पन सब्बथा;

नवमेपि च वत्तब्बं, नत्थि उत्तानमेविदं.

नत्थाजानन्तिया दोसो, तथा उम्मत्तिकाय वा;

अदिन्नादानतुल्याव, समुट्ठानादयो नया.

मातरा पितरा वाथ, नानुञ्ञातं तु सामिना;

तस्सा पाचित्तियापत्ति, तं वुट्ठापेन्तिया सिया.

उपसम्पदकालस्मिं, तथा पब्बाजनक्खणे;

द्विक्खत्तुं पुच्छितब्बं तु, भिक्खुनीहि, न भिक्खुना.

अनापत्ति ¶ न जानाति, मातुआदीनमत्थितं;

इदं चतुसमुट्ठानं, वाचतो कायवाचतो.

वाचामानसतो ¶ चेव, कायवाचादितोपि च;

क्रियाक्रियमचित्तञ्च, तिचित्तञ्च तिवेदनं.

या पारिवासिकेनेत्थ, छन्ददानेन भिक्खुनी;

वुट्ठापेति सचे सिक्ख-मानं पाचित्तियं सिया.

अवुट्ठितायनापत्ति, परिसायाविहाय वा;

छन्दं तु तिसमुट्ठानं, तिचित्तञ्च तिवेदनं.

द्वादसे तेरसे वापि, वत्तब्बं नत्थि किञ्चिपि;

समुट्ठानादयो सब्बे, अनन्तरसमा मता.

समणी अगिलाना या, धारेय्य छत्तुपाहनं;

तस्सा पाचित्तियापत्ति, होतीति परियापुता.

दिवसम्पि च धारेति, एकं पाचित्तियं सिया.

कद्दमादीनि पस्सित्वा, ओमुञ्चित्वा उपाहना;

छत्तमेव च धारेन्ती, यदि गच्छति दुक्कटं.

सचे उपाहनारुळ्हा, दिस्वा गच्छादिकं पन;

तं छत्तमपनामेत्वा, दुक्कटं होति गच्छति.

छत्तम्पि अपनामेत्वा, ओमुञ्चित्वा उपाहना;

पुन धारेन्तिया तस्सा, होति पाचित्तियं पन.

पयोगगणनायेव ¶ ¶ , पाचित्तिगणना सिया;

तिकपाचित्तियं वुत्तं, तथेव द्विकदुक्कटं.

आरामे उपचारे वा, दोसो नत्थापदासुपि;

इदं एळकलोमेन, समुट्ठानादिना समं.

होति भिक्खुनिया याना, ओरोहित्वा पुनप्पुनं;

अभिरूहन्तियापत्ति, पयोगगणनावसा.

आपदासु अनापत्ति, तथा उम्मत्तिकाय वा;

सेसं अनन्तरेनेव, समुट्ठानादिना समं.

या च धारेय्य सङ्घाणिं, यं किञ्चिपि कटूपियं;

तस्सा पाचित्तियापत्ति, होतीति परियापुता.

धारेन्तिया पनेत्थापि, ओमुञ्चित्वा पुनप्पुनं;

पयोगगणनायेव, तस्सा पाचित्तियो सियुं.

आबाधपच्चया या तु, धारेति कटिसुत्तकं;

तथा उम्मत्तिकादीन-मनापत्ति पकासिता.

सेसं तु पठमेनेव, सदिसन्ति पकासितं;

इध चाकुसलं चित्तं, लोकवज्जं विसेसता.

धारेति पन यं किञ्चि, सचे सीसूपगादिसु;

तस्सा तस्स च वत्थुस्स, गणनापत्तियो सियुं.

आबाधपच्चया ¶ दोसो, किञ्चि धारेन्तिया न च;

सेसं अनन्तरेनेव, सदिसं परिदीपितं.

येन ¶ केनचि गन्धेन, सवण्णावण्णकेन च;

न्हासन्तिया पनापत्ति, न्हानोसाने पकासिता.

गन्धयोजनतो सब्ब-पयोगे दुक्कटं सिया;

आबाधपच्चया दोसो, नत्थि उम्मत्तिकाय वा.

सेसं तु ततियेनेव, सदिसं सब्बथा मतं;

छट्ठम्पि ततियेनेव, सदिसन्ति पकासितं.

उब्बट्टापेय्य चञ्ञाय, सम्बाहापेय्य वा तथा;

होति भिक्खुनियापत्ति, सचे भिक्खुनिया पन.

एत्थ हत्थममोचेत्वा, एका उब्बट्टने सिया;

मोचेत्वा पन मोचेत्वा, पयोगगणना सिया.

सम्बाहनेपि एसेव, नयो ञेय्यो विभाविना;

आपदासु गिलानाय, अनापत्ति पकासिता.

सेसं तु ततियेनेव, समुट्ठानादिना समं;

सत्तमेन समानाव, अट्ठमादीनि तीणिपि.

या अन्तोउपचारस्मिं, भिक्खुस्स पुरतो पन;

अनापुच्छा निसीदेय्य, छमायपि न वट्टति.

तिकपाचित्तियं ¶ वुत्तं, पुच्छिते दुक्कटद्वयं;

आपदासु गिलानाय, न दोसुम्मत्तिकाय वा.

इदं पन समुट्ठानं, कथिनेन समं मतं;

क्रियाक्रियमचित्तञ्च, तिचित्तञ्च तिवेदनं.

अनोकासकतं भिक्खुं, पञ्हं पुच्छेय्य दोसता;

विनये च कतोकासं, सुत्तं पुच्छन्तियापि च.

कारेत्वा ¶ पन ओकासं, अनोदिस्सापि पुच्छति;

न दोसो पदसोधम्म-समुट्ठानमिदं पन.

संकच्चिकं विना गामं, पदसा पविसन्तिया;

परिक्खित्तस्स गामस्स, परिक्खेपोक्कमे पन.

दुक्कटं पठमे पादे, पाचित्ति दुतिये सिया;

उपचारोक्कमेपेत्थ, एसेव च नयो मतो.

यस्सा संकच्चिकं नट्ठं, अच्छिन्नं वापि केनचि;

अनापत्ति सिया तस्सा, गिलानायापदासुपि.

इदमेळकलोमेन, समुट्ठानादिना समं;

सेसं वुत्तनयेनेव, विञ्ञातब्बं विभाविना.

इति विनयविनिच्छये पाचित्तियकथा निट्ठिता.

अगिलाना ¶ सचे सप्पिं, लद्धं विञ्ञत्तिया सयं;

‘‘भुञ्जिस्सामी’’ति गहणे, दुक्कटं परिदीपितं.

अज्झोहारवसेनेव, पाटिदेसनियं सिया;

तिपाटिदेसनीयं तु, गिलानाय द्विदुक्कटं.

गिलाना विञ्ञापेत्वान, पच्छा सेवन्तियापि च;

गिलानायावसेसं वा, विञ्ञत्तं ञातकादितो.

अञ्ञस्सत्थाय ¶ वा अत्त-धनेनुम्मत्तिकाय वा;

अनापत्ति समुट्ठानं, अद्धानसदिसं मतं.

अयमेव च सेसेसु, दुतियादीसु निच्छयो;

समुट्ठानादिना सद्धिं, नत्थि काचि विसेसता.

अनागतेसु सब्बेसु, सप्पिआदीसु पाळियं;

भुञ्जन्तिया तु विञ्ञत्वा, अट्ठसुपि च दुक्कटं.

सेखिया पन ये धम्मा, उद्दिट्ठा पञ्चसत्तति;

तेसं महाविभङ्गे तु, वुत्तो अत्थविनिच्छयो.

तञ्च सब्बं समादाय, विनयस्स विनिच्छयो;

भिक्खूनं भिक्खुनीनञ्च, हितत्थाय कतो मया.