📜

၁၁။ မဂ္ဂင်္ဂဝိဘင်္ဂေါ

၂။ အဘိဓမ္မဘာဇနီယဝဏ္ဏနာ

၄၉၀။ အဘိဓမ္မေတိ ဓမ္မသင်္ဂဟေ။ သော ဟိ နိဗ္ဗတ္တိတာဘိဓမ္မဒေသနာ၊ န ဝိဘင်္ဂဒေသနာ ဝိယ သုတ္တန္တနယဝိမိဿာ။ အရိယောပပဒတံ န ကရောတိ ဝိနာပိ တေနဿ အရိယဘာဝသိဒ္ဓိတော။ တေနာဟ အဋ္ဌကထာယံ ‘‘ယထာ ဟီ’’တိအာဒိ။

၄၉၃။ ‘‘လောကိယကာလေနာ’’တိ ဣဒံ ပုဗ္ဗဘာဂဘာဝနာနုဘာဝေန ကိစ္စာတိရေကသိဒ္ဓီတိ ဒဿနတ္ထံ ဝုတ္တံ။ ဧတေသန္တိ သမ္မာဒိဋ္ဌိအာဒီနံ။ အပ္ပဟာနေ၊ ပဟာနေ စ အာဒီနဝါနိသံသဝိဘာဝနာဒိနာ ဝိသေသပ္ပစ္စယတ္တာ သမ္မာဒိဋ္ဌိအာဒီနိ မိစ္ဆာဝါစာဒီနိ ပဇဟာပေန္တီတိ ဝုတ္တာနိ။ မိစ္ဆာဝါစာဒိတော နိဝတ္တိ သမ္မာဝါစာဒိကိရိယာတိ ဝုတ္တံ ‘‘သမ္မာဝါစာဒိကိရိယာ ဟိ ဝိရတီ’’တိ။ သမ္မာဒိဋ္ဌိအာဒယော ဝိယ န ကာရာပကဘာဝေန၊ တံသမင်္ဂီပုဂ္ဂလော ဝိယ န ကတ္တုဘာဝေန။ လောကုတ္တရက္ခဏေပီတိ န ကေဝလံ လောကိယက္ခဏေယေဝ၊ အထ ခေါ လောကုတ္တရက္ခဏေပိ။

ခန္ဓောပဓိံ ဝိပစ္စတီတိ ပဋိသန္ဓိဒါယိကံ သန္ဓာယာဟ။ တတ္ထ ဝိပစ္စတီတိ ပဝတ္တိဝိပါကဒါယိကံ။

ဧကေကန္တိ ‘‘တတ္ထ ကတမာ သမ္မာဒိဋ္ဌီ’’တိအာဒိနာ ဧကေကံ အင်္ဂံ ပုစ္ဆိတွာ။ တဿ တဿေဝါတိ ဧကေကအင်္ဂဿေဝ၊ န အင်္ဂသမုဒါယဿ။ သဟ ပန ပုစ္ဆိတွာတိ ‘‘တတ္ထ ကတမော ပဉ္စင်္ဂိကော မဂ္ဂေါ’’တိ ပုစ္ဆိတွာ။ ဧကတော ဝိဿဇ္ဇနပဋိနိဒ္ဒေသတ္တာတိ ယဒိပိ ‘‘တတ္ထ ကတမာ သမ္မာဒိဋ္ဌိ? ယာ ပညာ’’တိအာဒိနာ (ဝိဘ။ ၄၉၅) ဝိဿဇ္ဇနံ ကတံ၊ ‘‘တတ္ထ ကတမော ပဉ္စင်္ဂိကော မဂ္ဂေါ’’တိ (ဝိဘ။ ၄၉၄) ပန ဧကတော ကတာယ ပုစ္ဆာယ ဝိဿဇ္ဇနဝသေန ပဋိနိဒ္ဒေသဘာဝတော န ပါဋိယေက္ကံ ပုစ္ဆာဝိဿဇ္ဇနံ နာမ ဟောတိ။ ကသ္မာ ပနေတ္ထ ပဉ္စင်္ဂိကဝါရေ ဧဝ ပါဋိယေက္ကံ ပုစ္ဆာဝိဿဇ္ဇနံ ကတံ၊ န အဋ္ဌင်္ဂိကဝါရေတိ စောဒနံ သန္ဓာယာဟ ‘‘တတ္ထာ’’တိအာဒိ။ ဧကေကမုခါယာတိ သမ္မာဒိဋ္ဌိအာဒိမုခါယ။ တေန ဝုတ္တံ ‘‘အရိယံ ဝေါ၊ ဘိက္ခဝေ၊ သမ္မာဒိဋ္ဌိံ ဒေသေဿာမိ သဥပနိသံ သပရိက္ခာရ’’န္တိအာဒိ (သံ။ နိ။ ၅။၂၈)။ ပုဗ္ဗသုဒ္ဓိယာ သိဇ္ဈန္တိ။ တထာ ဟိ ဝုတ္တံ ‘‘ပုဗ္ဗေဝ ခေါ ပနဿ ကာယကမ္မံ ဝစီကမ္မံ အာဇီဝေါ သုပရိသုဒ္ဓါ ဟောတီ’’တိ (မ။ နိ။ ၃။၄၃၁)၊ တသ္မာ သမ္မာဝါစာဒိမုခါ ဘာဝနာ နတ္ထီတိ အဓိပ္ပာယော။ တေနာဟ ‘‘န မဂ္ဂဿ ဥပစာရေနာ’’တိ။

အဘိဓမ္မဘာဇနီယဝဏ္ဏနာ နိဋ္ဌိတာ။

မဂ္ဂင်္ဂဝိဘင်္ဂဝဏ္ဏနာ နိဋ္ဌိတာ။