📜

၁၃။ အပ္ပမညာဝိဘင်္ဂေါ

၁။ သုတ္တန္တဘာဇနီယဝဏ္ဏနာ

၆၄၂။ ဒိသာဒေသောဓိနာတိ ‘‘ဧကံ ဒိသ’’န္တိအာဒိဒိသောဓိနာ၊ ဝိဟာရဂါမနိဂမနဂရဇနပဒရဇ္ဇာဒိဒေသောဓိနာ စ။ သတ္တောဓိနာတိ ‘‘သဗ္ဗာ ဣတ္ထိယော၊ သဗ္ဗေ ပုရိသာ၊ အရိယာ၊ အနရိယာ’’တိအာဒိဝသပ္ပဝတ္တေန သတ္တောဓိနာ။ ဧတဿာတိ ဧတဿ ပဒဿ၊ ပဒတ္ထဿ ဝါ။ အနုဝတ္တကန္တိ အဓိကာရဝသေန ပဝတ္တကံ။ တံ ဒွယန္တိ တထာ-သဒ္ဒေါ၊ ဣတိ-သဒ္ဒေါတိ ဥဘယံ။ ‘‘တထာ ဒုတိယ’’န္တိ ဟိ ဝုတ္တေ ‘‘တထာ-သဒ္ဒေါ ယထာ မေတ္တာသဟဂတေန စေတသာ ပုရတ္ထိမာဒီသု ဧကံ ဒိသံ ဖရိတွာ ဝိဟရတိ၊ တထာ ဒုတိယမ္ပိ ဒိသံ မေတ္တာသဟဂတေန စေတသာ ဖရိတွာ ဝိဟရတီ’’တိ ဣမမတ္ထံ ဒီပေတိ။ သေသဒွယေပိ ဧသေဝ နယော။ ယသ္မာ ဣတီတိ အယံ ဣတိ-သဒ္ဒေါ ပကာရတ္ထေ၊ ဧဝန္တိ ဝုတ္တံ ဟောတိ၊ တသ္မာ ‘‘ယထာ မေတ္တာသဟဂတေန စေတသာ ဧကံ၊ ဒုတိယံ၊ တတိယံ၊ စတုတ္ထံ ဒိသံ ဖရိတွာ ဝိဟရတိ၊ ဧဝံ ဥဒ္ဓံ၊ အဓော၊ တိရိယံ မေတ္တာသဟဂတေန စေတသာ ဖရိတွာ ဝိဟရတီ’’တိ ဣမမတ္ထံ ဒီပေတိ။ တေန ဝုတ္တံ ‘‘မေတ္တာ…ပေ… တံ ဒွယ’’န္တိ။ တဿာတိ ဒွယဿ။ ဖရဏန္တရာဒိဋ္ဌာနန္တိ ဖရဏတော အညံ ဖရဏန္တရံ၊ တံ အာဒိ ယဿ၊ တံ ဖရဏန္တရာဒိ။ ဖရဏန္တရဉှေတံ မေတ္တာဘာဝနာယ၊ ယဒိဒံ ဝိပုလတာ။ အာဒိ-သဒ္ဒေန ဘုမ္မန္တရပဂုဏဘာဝါဒိ ဂယှတိ၊ တဿ ဖရဏန္တရာဒိနော ဌာနံ ဌာနဘူတော ‘‘ဝိပုလေနာ’’တိအာဒိနာ ဝုစ္စမာနော မေတ္တာဘာဝနာဝိသေသော။ ဝုတ္တပ္ပကာရမတ္တပရာမသနဿ တဿ ဒွယဿ အဋ္ဌာနံ အနောကာသောတိ။ ဣတိ ကတွာ ဣမိနာ ကာရဏေန န ဝုတ္တံ တံ ဒွယန္တိ အတ္ထော။

၆၄၃။ ရာဂဿာတိ ကာမရာဂဿ။ သိနေဟဿာတိ ပုတ္တသိနေဟာဒိသိနေဟဿ။ ဝိပတ္တိယာတိ ရာဂသိနေဟသင်္ခါတာယ မေတ္တာဘာဝနာယ ဝိပတ္တိယာ ဝိနာသဿ။ အနုပ္ပတ္တိတော ဟိရောတ္တပ္ပဗလေန အနုပ္ပဇ္ဇနတော။

၆၄၅။ အဓိမုဉ္စိတွာတိ ဘာဝနာစိတ္တံ အာရမ္မဏေ သုဋ္ဌု ဝိဿဇ္ဇေတွာ၊ တံ ပနေတ္ထ အဓိမုစ္စနံ ယသ္မာ ဖရဏဝသေနေဝ ဟောတိ၊ တသ္မာ ဝုတ္တံ ‘‘သုဋ္ဌု ပသာရေတွာ’’တိ။ ယသ္မာ ပန အာရမ္မဏေ သုဋ္ဌု အသံသပ္ပနဝသေနေဝ တံ မေတ္တာဘာဝနာယ အဓိမုစ္စနံ ဟောတိ၊ တသ္မာ ‘‘ဗလဝတာ ဝါ အဓိမောက္ခေန အဓိမုစ္စိတွာ’’တိ စ ဝုတ္တံ။

၆၄၈။ ဧတေသံ ပဒါနံ သဗ္ဗေန သကလေန ဒိသာဒေသာဒိဘေဒေန အဝဓိနာ။ သဗ္ဗာဝဓိဒိသာဒိဖရဏာကာရေဟီတိ သဗ္ဗာဝဓိဘူတဒိသာဒေသပုဂ္ဂလဖရဏပ္ပကာရေဟိ။

၆၅၀။ ဝိဃာတဝသေနာတိ ဝိက္ခမ္ဘနဝသေန။

သုတ္တန္တဘာဇနီယဝဏ္ဏနာ နိဋ္ဌိတာ။

၃။ ပဉှပုစ္ဆကဝဏ္ဏနာ

၆၉၉။ ကထိတာနံ ကုသလာဒိဓမ္မာနံ။ ဣမသ္မိံ ပန အပ္ပမညာဝိဘင်္ဂေ ကထိတာ အပ္ပမညာ၊ တာ စ သဘာဝတော လောကိယာ ဧဝ၊ န ခန္ဓဝိဘင်္ဂါဒီသု ကထိတာ ခန္ဓာဒယော ဝိယ လောကုတ္တရာပီတိ ဧကံသတော သဗ္ဗာသံ အပ္ပမညာနံ လောကိယဘာဝမေဝ ဒီပေတုံ အဋ္ဌကထာယံ ‘‘ဣမသ္မိံ ပနာ’’တိအာဒိ ဝုတ္တန္တိ ဣမမတ္ထံ ဒဿေန္တော အာဟ ‘‘ဣမသ္မိံ ပန…ပေ… ဟောတီ’’တိ။

ပဉှပုစ္ဆကဝဏ္ဏနာ နိဋ္ဌိတာ။

အပ္ပမညာဝိဘင်္ဂဝဏ္ဏနာ နိဋ္ဌိတာ။