📜

၁၄။ သိက္ခာပဒဝိဘင်္ဂေါ

၁။ အဘိဓမ္မဘာဇနီယဝဏ္ဏနာ

၇၀၃။ သိက္ခာသင်္ခါတာနံ ကုသလဓမ္မာနံ ပဉ္စ သီလင်္ဂါနိ နိဿယဘာဝေန ဝါ ပတိဋ္ဌာ သိယုံ၊ ဥပနိဿယဘာဝေန ဝါတိ တဒုဘယံ ဒဿေန္တော အာဟ ‘‘သမ္ပယောဂဝသေန၊ ဥပနိဿယဝသေန စ ဩကာသဘာဝေနာ’’တိ။

၇၀၄။ ‘‘ကမ္မပထာ ဧဝါ’’တိ နိယမဿ ကတတ္တာ ဝုတ္တံ ‘‘အသဗ္ဗသာဓာရဏေသူ’’တိ။ န ဟိ သက္ကာ ဣန္ဒြိယာဒိသာဓာရဏကောဋ္ဌာသဝသေန နိယမံ ကာတုံ။ ကမ္မပထကောဋ္ဌာသိကာ ဧဝ၊ န ဈာနာဒိကောဋ္ဌာသိကာ။ ကမ္မပထဘာဝေန အာဂတန္တိ ဝဒန္တိ၊ ဒုဂ္ဂတိယာ၊ တတ္ထ ဥပ္ပဇ္ဇနဒုက္ခဿ စ ပဝတ္တိဥပါယဘာဝတောတိ အဓိပ္ပာယော။ အဿ သုရာပါနဿ။ ဥပကာရကတ္တံ သဗ္ဗေသံ။ သဘာဂတ္တံ မိစ္ဆာစာရဿ။

တထာဂဟိတသင်္ခါရာရမ္မဏတာယာတိ ‘‘သတ္တံ အဝဟရာမိ၊ သတ္တေ ဝိပ္ပဋိပဇ္ဇာမီ’’တိအာဒိနာ သတ္တာကာရေန ဂဟိတသင်္ခါရာရမ္မဏတာယ၊ န ပန သတ္တပညတ္တိအာရမ္မဏတာယာတိ အဓိပ္ပာယော။ ‘‘ပဉ္စ သိက္ခာပဒါ’’တိအာဒိနာ တမေဝတ္ထံ ဝိဝရတိ။

တဿ တဿာတိ ယဿ ယဿ ဗျသနတ္ထာယ။ သယံ ဝါ ဥသုအာဒိံ ခိပတိ၊ ဩပါတခဏနာဒိံ ကရောတိ၊ တာဒိသံ မန္တံ ပရိဇပ္ပတိ၊ ကမ္မဇဣဒ္ဓိံ ဝဠဉ္ဇေတိ၊ အညေန ဝါ တံ သဗ္ဗံ ကာရေတီတိ အာဟ ‘‘နိဿဂ္ဂိယ…ပေ… ဒွေ ဧဝ ဂဟိတာ’’တိ။

ယဒိပိ ကောဋ္ဌာသဝါရေ ဝိရတိ သရူပေန နာဂတာ ‘‘ယေဝါပနာ’’တွေဝ ဝုတ္တာ၊ ဘဇာပိယမာနာ ပန မဂ္ဂဘာဝံယေဝ ဘဇတီတိ အာဟ ‘‘ဝိရတိသီလံ ပန မဂ္ဂကောဋ္ဌာသိက’’န္တိ။ သေသသီလာနန္တိ သေသအဝီတိက္ကန္တသီလာနံ။

၇၁၂။ အဘဗ္ဗဋ္ဌာနာတိ ပါဏာတိပါတာဒယော။ ယထာ ပါဏာတိပါတာဒယော ဝေရဟေတုတာယ ဝေရံ၊ ဧဝံ တဒညေပိ အကုသလာတိ ဝုတ္တံ ‘‘တံသဘာဂတာယ ဝေရဘူတာန’’န္တိ။ ဝိရတီနံ ဥပ္ပတ္တိ န န ဘဝိဿတိ သေက္ခာနန္တိ ယောဇနာ။ ‘‘အကုသလသမုဋ္ဌိတာနိ စာ’’တိအာဒိနာပိ သေက္ခာနံ ဥဘယေန ဝိရတိသဗ္ဘာဝံယေဝ ဝိဘာဝေတိ။ တဿတ္ထော – ယာနိ အကုသလသမုဋ္ဌိတာနိ ကာယကမ္မာဒီနိ၊ တာနိ တေသံ သေက္ခာနံ ကာယဒုစ္စရိတာဒီနီတိ ဝေရာနိယေဝ ၊ တေဟိ ဝေရေဟိ တေသံ သေက္ခာနံ ဝိရတိယော သမ္ဘဝန္တိယေဝ။ ယတောတိ ယသ္မာ ပါဏာတိပါတာဒိဝိရမိတဗ္ဗနိပ္ပရိယာယဝေရာဘာဝေပိ ကာယဒုစ္စရိတာဒိဝေရမတ္တတော သေက္ခာနံ ဝိရတိသမ္ဘဝတော။ နဖလဘူတဿာပီတိ ယထာ ဖလဿ မဂ္ဂပဋိဗိမ္ဗဘူတတ္တာ မဂ္ဂသဒိသံ သတ္တအဋ္ဌင်္ဂိကတာ သိယာ၊ ဧဝံ အဖလဘူတဿာပိ သကဒါဂါမိမဂ္ဂါဒိကဿ ယတော ဝိရတိသမ္ဘဝတော အဋ္ဌင်္ဂိကတာ ဟောတိ၊ အညထာ ပဉ္စင်္ဂိကော ဧဝ သိယာတိ အဓိပ္ပာယော။

အဘိဓမ္မဘာဇနီယဝဏ္ဏနာ နိဋ္ဌိတာ။

၂။ ပဉှပုစ္ဆကဝဏ္ဏနာ

၇၁၄။ ယထာဝိရမိတဗ္ဗတောတိ ယော ယော ပါဏာတိပါတာဒိ ဝိရမိတဗ္ဗော၊ တတော ဝိရတိဝသေန။

ပဉှပုစ္ဆကဝဏ္ဏနာ နိဋ္ဌိတာ။

သိက္ခာပဒဝိဘင်္ဂဝဏ္ဏနာ နိဋ္ဌိတာ။