📜

၁။ မာတိကာဝဏ္ဏနာ

၁။ နယမာတိကာဝဏ္ဏနာ

၁။ သင်္ဂဟော ¶ အသင်္ဂဟောတိအာဒီနဉှိ ဝသေန ဣဒံ ပကရဏံ စုဒ္ဒသဝိဓေန ဝိဘတ္တန္တိ ဝုတ္တံ။ တံ သဗ္ဗမ္ပိ ဥဒ္ဒေသနိဒ္ဒေသတော ဒွိဓာ ဌိတံ။ တတ္ထ မာတိကာ ဥဒ္ဒေသော။ သာ ပဉ္စဝိဓာ – နယမာတိကာ၊ အဗ္ဘန္တရမာတိကာ၊ နယမုခမာတိကာ၊ လက္ခဏမာတိကာ၊ ဗာဟိရမာတိကာတိ။ တတ္ထ သင်္ဂဟော အသင်္ဂဟော…ပေ… ဝိပ္ပယုတ္တေန သင်္ဂဟိတံ အသင်္ဂဟိတန္တိ – အယံ စုဒ္ဒသဟိ ပဒေဟိ နိက္ခိတ္တာ နယမာတိကာ နာမ။ အယဉှိ ဣမိနာ သင်္ဂဟာဒိကေန နယေန ဓာတုကထာ ဓမ္မာ ဝိဘတ္တာတိ ဒဿေတုံ ဌပိတတ္တာ နယမာတိကာတိ ဝုစ္စတိ။ ဧတေသံ ပဒါနံ မူလဘူတတ္တာ မူလမာတိကာတိပိ ဝတ္တုံ ဝဋ္ဋတိ။

၂။ အဗ္ဘန္တရမာတိကာဝဏ္ဏနာ

၂။ ပဉ္စက္ခန္ဓာ ¶ …ပေ… မနသိကာရောတိ အယံ ပဉ္စဝီသာဓိကေန ပဒသတေန နိက္ခိတ္တာ အဗ္ဘန္တရမာတိကာ နာမ။ အယဉှိ ‘‘သဗ္ဗာပိ ဓမ္မသင်္ဂဏီ ဓာတုကထာယ မာတိကာ’’တိ ဧဝံ အဝတွာ သင်္ဂဟာဒိနာ နယေန ဝိဘဇိတဗ္ဗေ ခန္ဓာဒိဓမ္မေ သရူပတော ဒဿေတွာ ဓာတုကထာယ အဗ္ဘန္တရေယေဝ ဌပိတတ္တာ အဗ္ဘန္တရမာတိကာတိ ဝုစ္စတိ။ ခန္ဓာဒိပဒါနံ ဓမ္မသင်္ဂဏီမာတိကာယ ¶ အသင်္ဂဟိတတ္တာ ပကိဏ္ဏကမာတိကာတိပိ ဝတ္တုံ ဝဋ္ဋတိ။

၃။ နယမုခမာတိကာဝဏ္ဏနာ

၃။ တီဟိ သင်္ဂဟော၊ တီဟိ အသင်္ဂဟော၊ စတူဟိ သမ္ပယောဂေါ၊ စတူဟိ ဝိပ္ပယောဂေါတိ အယံ စတူဟိ ပဒေဟိ နိက္ခိတ္တာ နယမုခမာတိကာ နာမ။ အယဉှိ သဗ္ဗေသုပိ ပဉ္စက္ခန္ဓာဒီသု စေဝ ကုသလတ္တိကာဒီသု စ မာတိကာဓမ္မေသု၊ တီဟိ ခန္ဓာယတနဓာတုပဒေဟေဝ သင်္ဂဟော စ အသင်္ဂဟော စ ယောဇေတဗ္ဗော။ တထာ စတူဟိ အရူပက္ခန္ဓေဟိ သမ္ပယောဂေါ စ ဝိပ္ပယောဂေါ စ။ ဧတာနိ ဣမေသံ သင်္ဂဟာသင်္ဂဟာဒီနံ နယာနံ မုခါနီတိ ဒဿေတုံ ဌပိတတ္တာ နယမုခမာတိကာတိ ဝုစ္စတိ။

၄။ လက္ခဏမာတိကာဝဏ္ဏနာ

၄။ သဘာဂေါ ¶ ၊ ဝိသဘာဂေါတိ အယံ ဒွီဟိ ပဒေဟိ နိက္ခိတ္တာ လက္ခဏမာတိကာ နာမ။ အယဉှိ သဘာဂလက္ခဏေဟိ ဓမ္မေဟိ သင်္ဂဟနယော၊ ဝိသဘာဂလက္ခဏေဟိ အသင်္ဂဟနယော၊ တထာ သမ္ပယောဂဝိပ္ပယောဂနယော ယောဇေတဗ္ဗောတိ သဘာဂဝိသဘာဂလက္ခဏဝသေန သင်္ဂဟာဒိလက္ခဏံ ဒဿေတုံ ဌပိတတ္တာ လက္ခဏမာတိကာတိ ဝုစ္စတိ။

၅။ ဗာဟိရမာတိကာဝဏ္ဏနာ

၅။ သဗ္ဗာပိ ဓမ္မသင်္ဂဏီ ဓာတုကထာယ မာတိကာတိ အယံ ဆသဋ္ဌိ တိကပဒါနိ၊ ဒွေ စ ဒုကပဒသတာနိ သင်္ခိပိတွာ နိက္ခိတ္တာ ဗာဟိရမာတိကာ နာမ။ အယဉှိ ‘‘ပဉ္စက္ခန္ဓာ…ပေ… မနသိကာရော’’တိ ဧဝံ ဓာတုကထာယ အဗ္ဘန္တရေ အဝတွာ ‘‘သဗ္ဗာပိ ဓမ္မသင်္ဂဏီ’’တိ ဧဝံ ဓာတုကထာယ မာတိကတော ဗဟိ ဌပိတတ္တာ ဗာဟိရမာတိကာတိ ဝုစ္စတိ။

ဧဝံ ¶ မာတိကာယ ပဉ္စဓာ ဌိတဘာဝံ ဝိဒိတွာ ဣဒါနိ ‘သင်္ဂဟော အသင်္ဂဟော’တိအာဒီသု သင်္ဂဟော တာဝ ဇာတိသဉ္ဇာတိကိရိယာဂဏနဝသေန စတုဗ္ဗိဓော။ တတ္ထ – ‘‘သဗ္ဗေ ခတ္တိယာ အာဂစ္ဆန္တု၊ သဗ္ဗေ ဗြာဟ္မဏာ၊ သဗ္ဗေ ဝေဿာ၊ သဗ္ဗေ သုဒ္ဒါ အာဂစ္ဆန္တု’’၊ ‘‘ယာ စာဝုသော ဝိသာခ၊ သမ္မာဝါစာ၊ ယော စ သမ္မာကမ္မန္တော၊ ယော စ သမ္မာအာဇီဝေါ၊ ဣမေ ဓမ္မာ သီလက္ခန္ဓေ သင်္ဂဟိတာ’’တိ အယံ ဇာတိသင်္ဂဟော နာမ။ ‘‘ဧကဇာတိကာ အာဂစ္ဆန္တူ’’တိ ဝုတ္တဋ္ဌာနေ ဝိယ ဟိ ဣဓ သဗ္ဗေပိ ဇာတိယာ ဧကသင်္ဂဟံ ဂတာ။ ‘‘သဗ္ဗေ ကောသလကာ အာဂစ္ဆန္တု၊ သဗ္ဗေ မာဂဓကာ၊ သဗ္ဗေ ဘာရုကစ္ဆကာ အာဂစ္ဆန္တု’’၊ ‘‘ယော စာဝုသော ဝိသာခ၊ သမ္မာဝါယာမော၊ ယာ စ သမ္မာသတိ၊ ယော စ သမ္မာသမာဓိ၊ ဣမေ ဓမ္မာ ¶ သမာဓိက္ခန္ဓေ သင်္ဂဟိတာ’’တိ (မ။ နိ။ ၁။၄၆၂) အယံ သဉ္ဇာတိသင်္ဂဟော နာမ။ ‘‘ဧကဋ္ဌာနေ ဇာတာ သံဝဍ္ဎာ အာဂစ္ဆန္တူ’’တိ ဝုတ္တဋ္ဌာနေ ဝိယ ဟိ ဣဓ သဗ္ဗေပိ သဉ္ဇာတိဌာနေန နိဝုတ္ထောကာသေန ဧကသင်္ဂဟံ ဂတာ။ ‘‘သဗ္ဗေ ဟတ္ထာရောဟာ အာဂစ္ဆန္တု၊ သဗ္ဗေ အဿာရောဟာ၊ သဗ္ဗေ ရထိကာ အာဂစ္ဆန္တု’’၊ ‘‘ယာ စာဝုသော ဝိသာခ၊ သမ္မာဒိဋ္ဌိ၊ ယော စ သမ္မာသင်္ကပ္ပော၊ ဣမေ ဓမ္မာ ပညာက္ခန္ဓေ သင်္ဂဟိတာ’’တိ (မ။ နိ။ ၁။၄၆၂) အယံ ကိရိယာသင်္ဂဟော နာမ။ သဗ္ဗေဝ ဟေတေ အတ္တနော ကိရိယာကရဏေန ဧကသင်္ဂဟံ ဂတာ။ ‘‘စက္ခာယတနံ ကတမက္ခန္ဓဂဏနံ ဂစ္ဆတီတိ? ရူပက္ခန္ဓဂဏနံ ဂစ္ဆတီ’’တိ။ ဟဉ္စိ စက္ခာယတနံ ရူပက္ခန္ဓဂဏနံ ဂစ္ဆတိ၊ တေန ဝတ ရေ ဝတ္တဗ္ဗေ – ‘စက္ခာယတနံ ရူပက္ခန္ဓေန သင်္ဂဟိတ’’န္တိ (ကထာ။ ၄၇၁)၊ အယံ ¶ ဂဏနသင်္ဂဟော နာမ။ အယမိဓ အဓိပ္ပေတော။ တပ္ပဋိပက္ခေန အသင်္ဂဟော ဝေဒိတဗ္ဗော။ တေသံ ဝိကပ္ပတော သင်္ဂဟိတေန အသင်္ဂဟိတာဒီနိ။ ဧကုပ္ပာဒေကနိရောဓဧကဝတ္ထုကဧကာရမ္မဏတာဝသေန သမ္ပယောဂေါ၊ တပ္ပဋိပက္ခတော ဝိပ္ပယောဂေါ။ တေသံ ဝိကပ္ပတော သမ္ပယုတ္တေန ဝိပ္ပယုတ္တာဒီနိ။ တဒုဘယသံသဂ္ဂဝိကပ္ပတော သင်္ဂဟိတေန သမ္ပယုတ္တံ ဝိပ္ပယုတ္တန္တိအာဒီနိ။ ပဉ္စက္ခန္ဓာတိအာဒီနိ ပန ခန္ဓဝိဘင်္ဂါဒီသု ဝုတ္တနယေနေဝ ဝေဒိတဗ္ဗာနိ။ ဖဿာဒယော ပနေတ္ထ သန္နိဋ္ဌာနဝသေန ဝုတ္တသဗ္ဗစိတ္တုပ္ပာဒသာဓာရဏတော ဝုတ္တာတိ။

မာတိကာဝဏ္ဏနာ။