📜

၃။ ဗြဟ္မစရိယကထာ

၁။ သုဒ္ဓဗြဟ္မစရိယကထာဝဏ္ဏနာ

၂၆၉။ ဣဒါနိ ဗြဟ္မစရိယကထာ ဟောတိ။ တတ္ထ ဒွေ ဗြဟ္မစရိယဝါသာ၊ မဂ္ဂဘာဝနာ စ ပဗ္ဗဇ္ဇာ စ။ ပဗ္ဗဇ္ဇာ သဗ္ဗဒေဝေသု နတ္ထိ။ မဂ္ဂဘာဝနာ ဌပေတွာ အသညသတ္တေ သေသေသု အပ္ပဋိသိဒ္ဓါ။ တတ္ထ ယေ ပရနိမ္မိတဝသဝတ္တိဒေဝေ ဥပါဒါယ တဒုပရိဒေဝေသု မဂ္ဂဘာဝနမ္ပိ န ဣစ္ဆန္တိ သေယျထာပိ သမ္မိတိယာ၊ တေ သန္ဓာယ နတ္ထိ ဒေဝေသူတိ ပုစ္ဆာ သကဝါဒိဿ။ ‘‘တီဟိ၊ ဘိက္ခဝေ၊ ဌာနေဟိ ဇမ္ဗုဒီပကာ မနုဿာ ဥတ္တရကုရုကေ စ မနုဿေ အဓိဂ္ဂဏှန္တိ ဒေဝေ စ တာဝတိံသေ။ ကတမေဟိ တီဟိ? သူရာ သတိမန္တော ဣဓ ဗြဟ္မစရိယဝါသော’’တိ (အ။ နိ။ ၉။၂၁) ဣဒံ သုတ္တံ နိဿာယ ဒွေပိ ဗြဟ္မစရိယဝါသာ နတ္ထိ ဒေဝေသူတိ ဥပ္ပန္နလဒ္ဓိဝသေန ပဋိညာ ပရဝါဒိဿ။ ပုန ဒွိန္နမ္ပိ ဗြဟ္မစရိယာနံ အန္တရာယိကဓမ္မဝသေနေဝ သဗ္ဗေ ဒေဝါ ဇဠာတိ ပုစ္ဆာ သကဝါဒိဿ။ တတ္ထ ဟတ္ထသံဝါစိကာတိ မူဂါ ဝိယ ဟတ္ထမုဒ္ဓါယ ဝတ္တာရော။ ပရတော အတ္ထိ ဒေဝေသူတိ ပုစ္ဆာ ပရဝါဒိဿ၊ မဂ္ဂဘာဝနံ သန္ဓာယ ပဋိညာ သကဝါဒိဿ။ ပဋိညာယ အဓိပ္ပာယံ အသလ္လက္ခေတွာ ပဗ္ဗဇ္ဇာဝသေန အနုယောဂေါ ပရဝါဒိဿ။

၂၇၀။ ယတ္ထ နတ္ထိ ပဗ္ဗဇ္ဇာတိ ပဉှေ ဂိဟီနဉ္စေဝ ဧကစ္စာနဉ္စ ဒေဝါနံ မဂ္ဂပဋိလာဘံ သန္ဓာယ ပဋိက္ခေပေါ တဿေဝ။ ပုန ပုဋ္ဌော ပစ္စန္တဝါသိနော စေဝ အသညသတ္တေ စ သန္ဓာယ ပဋိညာ တဿေဝ။ ယော ပဗ္ဗဇတီတိအာဒီသု ပုစ္ဆာသုပိ ဧသေဝ နယော။ ပုန ‘‘အတ္ထိ ဒေဝေသူ’’တိ ပဉှေပိ မဂ္ဂဘာဝနံ သန္ဓာယေဝ ပဋိညာ သကဝါဒိဿ၊ ‘‘သဗ္ဗဒေဝေသူ’’တိ ဝုတ္တေ အသညသတ္တေ သန္ဓာယ ပဋိက္ခေပေါ တဿေဝ။

၂၇၁။ မနုဿေသူတိ ပဉှဒွယေ ဇမ္ဗုဒီပကေ သန္ဓာယ ပဋိညာ။ ပစ္စန္တဝါသိနော သန္ဓာယ ပဋိက္ခေပေါ ဝေဒိတဗ္ဗော။

အတ္ထိ ယတ္ထ အတ္ထီတိ အတ္ထိ တေ ဒေဝါ၊ အတ္ထိ ဝါ သော ပဒေသော၊ ယတ္ထ အတ္ထီတိ ဧဝံ သတ္တပဒေသဝိဘာဂမုခေန ဝိဿဇ္ဇနံ သကဝါဒိဿ။ ဣမိနာ နယေန သဗ္ဗေ ဧကန္တရိကပဉှာ ဝေဒိတဗ္ဗာ။

၂၇၂။ သုတ္တာနုယောဂေ ကုဟိံ ဖလုပ္ပတ္တီတိ တဿ အနာဂါမိနော အရဟတ္တဖလုပ္ပတ္တိ ကုဟိန္တိ ပုစ္ဆာ သကဝါဒိဿ။ တတ္ထေဝါတိ သုဒ္ဓါဝါသေသူတိ အတ္ထော။

ဟန္ဒ ဟီတိ ကာရဏတ္ထေ နိပါတော။ ဣဒံ ဝုတ္တံ ဟောတိ – ယသ္မာ အနာဂါမိပုဂ္ဂလော ဣဓ လောကေ ဘာဝိတေန မဂ္ဂေန တတ္ထ သုဒ္ဓါဝါသေသု ဖလံ သစ္ဆိကရောတိ၊ န တတ္ထ အညံ မဂ္ဂံ ဘာဝေတိ၊ တသ္မာ နတ္ထိ ဒေဝေသု ဗြဟ္မစရိယဝါသောတိ။

၂။ သံသန္ဒနဗြဟ္မစရိယဝဏ္ဏနာ

၂၇၃။ ဣဒါနိ ယဒိ အညတ္ထ ဘာဝိတေန မဂ္ဂေန အညတ္ထ ဖလသစ္ဆိကိရိယာ ဟောတိ၊ သောတာပန္နာဒီနမ္ပိ သိယာတိ ဧတမတ္ထံ ဒဿေတုံ ပုန အနာဂါမီတိအာဒီနံ သံသန္ဒနပုစ္ဆာ သကဝါဒိဿ။ တတ္ထ အနာဂါမိဿ ဖလသစ္ဆိကိရိယာယ ပဋိညာ၊ သေသာနံ ဖလသစ္ဆိကိရိယာယ ပဋိက္ခေပေါ ပရဝါဒိဿ။ ဣဓ ဘာဝိတမဂ္ဂေါ ဟိ အနာဂါမီ ဣဓဝိဟာယနိဋ္ဌော နာမ ဟောတိ။ သော ဣဓ အနာဂါမိမဂ္ဂံ ဘာဝေတွာ ‘‘ဩပပါတိကော တတ္ထပရိနိဗ္ဗာယီ’’တိ ဝစနတော ‘‘ပုန မဂ္ဂဘာဝနံ ဝိနာ ဥပပတ္တိဝသေနေဝ အရဟတ္တဖလံ သစ္ဆိကရောတီ’’တိ တဿ လဒ္ဓိ။ သောတာပန္နသကဒါဂါမိနော ပန တတ္ထ မဂ္ဂံ ဘာဝေတွာ တတြုပပတ္တိကာ နာမ ဟောန္တီတိ တေသံ ဣဓာဂမနညေဝ နတ္ထိ။ ဣတိ သော အနာဂါမိဿ ဖလသစ္ဆိကိရိယံ ပုဋ္ဌော ပဋိဇာနာတိ။ ဣတရေသံ ပဋိက္ခိပတိ။

အနာဂါမီ ပုဂ္ဂလော တတ္ထ ဘာဝိတေန မဂ္ဂေနာတိ ပဉှေ ‘‘အနာဂါမိနော တတ္ထ မဂ္ဂဘာဝနာဝ နတ္ထီ’’တိ လဒ္ဓိယာ ပဋိက္ခိပတိ။ မဂ္ဂေါ စ ဘာဝီယတိ၊ န စ ကိလေသာ ပဟီယန္တီတိ ပုစ္ဆာ သကဝါဒိဿ ၊ ရူပါဝစရမဂ္ဂံ သန္ဓာယ ပဋိညာ ဣတရဿ။ ရူပါဝစရမဂ္ဂေန ဟိ သော ဣဓဝိဟာယနိဋ္ဌော နာမ ဇာတော။

အနာဂါမီ ပုဂ္ဂလော ကတကရဏီယောတိ ပဉှေ ‘‘ဩပပါတိကော တတ္ထပရိနိဗ္ဗာယီ’’တိ ဝစနတော ဥပပတ္တိယာဝဿ ကတကရဏီယာဒိဘာဝံ သန္ဓာယ ပဋိဇာနာတိ။ အရဟာတိ ပဉှေ ဣဓပရိနိဗ္ဗာယိနော အရဟတော ဝသေနေဝ ပဋိက္ခိပတိ။ ပုန ပုဋ္ဌော တတ္ထပရိနိဗ္ဗာယိနော ဝသေန ပဋိဇာနာတိ။

အတ္ထိ အရဟတော ပုနဗ္ဘဝေါတိအာဒီသုပိ တတ္ထပရိနိဗ္ဗာယီ ဣဓပရိနိဗ္ဗာယီနံ ဝသေနေဝ အတ္ထော ဝေဒိတဗ္ဗော။ အပ္ပဋိဝိဒ္ဓါကုပ္ပောဝ တတ္ထပရိနိဗ္ဗာယတီတိ ပုဋ္ဌော ဣဓေဝ ဘာဝိတေန မဂ္ဂေန တဿ အကုပ္ပပဋိဝေဓံ ဣစ္ဆန္တော ပဋိက္ခိပတိ။

ယထာ မိဂေါတိ ပဌမံ ဥဒါဟရဏံ ပရဝါဒိဿ၊ ဒုတိယံ သကဝါဒိဿ။ သေသံ သဗ္ဗတ္ထ ဥတ္တာနတ္ထမေဝါတိ။

ဗြဟ္မစရိယကထာ နိဋ္ဌိတာ။

၃။ ဩဓိသောကထာဝဏ္ဏနာ

၂၇၄။ ဣဒါနိ ဩဓိသောကထာ နာမ ဟောတိ။ တတ္ထ ယေ သောတာပန္နာဒီနံ နာနာဘိသမယဝသေန ဒုက္ခဒဿနာဒီဟိ ဩဓိသော ဩဓိသော ဧကဒေသေန ဧကဒေသေန ကိလေသပ္ပဟာနံ ဣစ္ဆန္တိ သေယျထာပိ ဧတရဟိ သမ္မိတိယာဒယော၊ တေသံ တံ လဒ္ဓိံ ဘိန္ဒိတုံ ဩဓိသောတိ ပုစ္ဆာ သကဝါဒိဿ၊ ပဋိညာ ပရဝါဒိဿ။ ပုန အနုယောဂေါ သကဝါဒိဿ၊ ဧကဒေသေန သောတာပန္နာဒိဘာဝဿ အဘာဝတော ပဋိက္ခေပေါ ပရဝါဒိဿ။ ဣမိနာ ဥပါယေန သဗ္ဗဝါရေသု အတ္ထော ဝေဒိတဗ္ဗောတိ။

ဩဓိသောကထာဝဏ္ဏနာ။