📜

၄။ ဇဟတိကထာ

၁။ နသုတ္တာဟရဏကထာဝဏ္ဏနာ

၂၇၉။ ဣဒါနိ ဇဟတိကထာ နာမ ဟောတိ။ တတ္ထ ယေသံ ‘‘ဈာနလာဘီ ပုထုဇ္ဇနော သဟ သစ္စာဘိသမယာ အနာဂါမီ နာမ ဟောတိ၊ တဿ ပုထုဇ္ဇနကာလေယေဝ ကာမရာဂဗျာပါဒါ ပဟီနာ’’တိ လဒ္ဓိ သေယျထာပိ ဧတရဟိ သမ္မိတိယာနံ၊ တေသံ တံ လဒ္ဓိံ ဘိန္ဒိတုံ ဇဟတိ ပုထုဇ္ဇနောတိ ပုစ္ဆာ သကဝါဒိဿ၊ ဈာနဝိက္ခမ္ဘိတာနံ ပန တေသံ ပရိယုဋ္ဌာနံ အပဿန္တဿ ပဋိညာ ပရဝါဒိဿ။ ယသ္မာ ပန တေသံ ဈာနဝိက္ခမ္ဘိတာနမ္ပိ အနာဂါမိမဂ္ဂေနေဝ အစ္စန္တံ ပဟာနံ ဟောတိ၊ တသ္မာ ပုန အစ္စန္တန္တိအာဒိအနုယောဂေါ သကဝါဒိဿ၊ တထာရူပဿ ပဟာနဿ အဘာဝတော ပဋိက္ခေပေါ ဣတရဿ။ ဝိက္ခမ္ဘေတီတိ အစ္စန္တဝိက္ခမ္ဘနမေဝ သန္ဓာယ ပုစ္ဆာ သကဝါဒိဿ။ တတော ပရံ အနာဂါမိမဂ္ဂဋ္ဌေန သဒ္ဓိံ ပုထုဇ္ဇနသံသန္ဒနံ ဟောတိ။ တံ ဥတ္တာနတ္ထမေဝ။

၂၈၀။ တတော ပရံ အနာဂါမိဖလေ သဏ္ဌာတီတိ ပုဋ္ဌော ဈာနာနာဂါမိတံ သန္ဓာယ ပဋိဇာနာတိ။ အရဟတ္တေ သဏ္ဌာတီတိ ပုဋ္ဌော ဒဿနမဂ္ဂေန ဥဒ္ဓမ္ဘာဂိယာနံ ပဟာနာဘာဝတော ပဋိက္ခိပတိ။

အပုဗ္ဗံ အစရိမံ တယော မဂ္ဂေတိ ပုဋ္ဌော တထာရူပါယ ဘာဝနာယ အဘာဝါ ပဋိက္ခိပတိ။ ပုန ပုဋ္ဌော တိဏ္ဏံ မဂ္ဂါနံ ကိစ္စသဗ္ဘာဝံ သန္ဓာယ ပဋိဇာနာတိ။ သာမညဖလပုစ္ဆာသုပိ ဧသေဝ နယော။ ကတမေန မဂ္ဂေနာတိ ပုဋ္ဌော အနာဂါမိမဂ္ဂေနာတိ ဈာနာနာဂါမိတံ သန္ဓာယ ဝဒတိ။ ပုန သံယောဇနပ္ပဟာနံ ပုဋ္ဌော တိဏ္ဏံ အနာဂါမိမဂ္ဂေန တေသံ ကိလေသာနံ အပ္ပဟေယျတ္တာ ပဋိက္ခိပတိ။ ဒုတိယံ ပုဋ္ဌော ပဌမမဂ္ဂဿေဝ ဈာနာနာဂါမိမဂ္ဂဘာဝံ သန္ဓာယ ပဋိဇာနာတိ။ သေသမေတ္ထ ဥတ္တာနတ္ထမေဝါတိ။

ဇဟတိကထာ။