📜

၅။ သဗ္ဗမတ္ထီတိကထာ

၁။ ဝါဒယုတ္တိဝဏ္ဏနာ

၂၈၂။ ဣဒါနိ သဗ္ဗမတ္ထီတိဝါဒကထာ နာမ ဟောတိ။ တတ္ထ ယေသံ ‘‘ယံ ကိဉ္စိ ရူပံ အတီတာနာဂတပစ္စုပ္ပန္နံ…ပေ… အယံ ဝုစ္စတိ ရူပက္ခန္ဓော’’တိအာဒိဝစနတော (ဝိဘ။ ၂) ‘‘သဗ္ဗေပိ အတီတာဒိဘေဒါ ဓမ္မာ ခန္ဓသဘာဝံ န ဝိဇဟန္တိ၊ တသ္မာ သဗ္ဗံ အတ္ထိယေဝ နာမာ’’တိ လဒ္ဓိ၊ သေယျထာပိ ဧတရဟိ သဗ္ဗမတ္ထိဝါဒါနံ၊ တေသံ လဒ္ဓိဝိသောဓနတ္ထံ သဗ္ဗမတ္ထီတိ ပုစ္ဆာ သကဝါဒိဿ၊ ဝုတ္တပ္ပကာရာယ လဒ္ဓိယာ ဌတွာ ပဋိညာ ဣတရဿ။ သဗ္ဗထာတိ သဗ္ဗသ္မိံ သရီရေ သဗ္ဗမတ္ထီတိ ပုစ္ဆတိ။ သဗ္ဗဒါတိ သဗ္ဗသ္မိံ ကာလေ သဗ္ဗမတ္ထီတိ ပုစ္ဆတိ။ သဗ္ဗေန သဗ္ဗန္တိ သဗ္ဗေနာကာရေန သဗ္ဗမတ္ထီတိ ပုစ္ဆတိ။ သဗ္ဗေသူတိ သဗ္ဗေသု ဓမ္မေသု သဗ္ဗမတ္ထီတိ ပုစ္ဆတိ။ အယောဂန္တိ အယုတ္တံ။ နာနာသဘာဝါနဉှိ ယောဂေါ ဟောတိ၊ န ဧကသဘာဝဿ။ ဣတိ ဣမသ္မိံ ပဉှေ ရူပံ ဝေဒနာယ၊ ဝေဒနံ ဝါ ရူပေန အနာနံ ဧကလက္ခဏမေဝ ကတွာ သဗ္ဗမတ္ထီတိ ပုစ္ဆတိ။ ယမ္ပိ နတ္ထိ တမ္ပတ္ထီတိ ယမ္ပိ ဆဋ္ဌခန္ဓာဒိကံ သသဝိသာဏာဒိကံ ဝါ ကိဉ္စိ နတ္ထီတိ သိဒ္ဓံ၊ တမ္ပိ တေ အတ္ထီတိ ပုစ္ဆတိ။ သဗ္ဗမတ္ထီတိ ယာ ဒိဋ္ဌိ သာ ဒိဋ္ဌိ မိစ္ဆာဒိဋ္ဌီတိ၊ ယာ ဒိဋ္ဌိ သာ ဒိဋ္ဌိ သမ္မာဒိဋ္ဌီတိ ဟေဝမတ္ထီတိ ဣမိနာ ဣဒံ ပုစ္ဆတိ – ယာ တေ ဧသာ သဗ္ဗမတ္ထီတိ ဒိဋ္ဌိ၊ သာ ဒိဋ္ဌိ အယာထာဝကတ္တာ မိစ္ဆာဒိဋ္ဌီတိ ဧဝံ ယာ အမှာကံ ဒိဋ္ဌိ၊ သာ ဒိဋ္ဌိ ယာထာဝကတ္တာ သမ္မာဒိဋ္ဌီတိ ဧဝံ တဝ သမယေ အတ္ထီတိ ပုစ္ဆတိ။ ဣတရော သဗ္ဗေသုပိ ဧတေသု နယေသု ဝုတ္တပ္ပကာရာယ အတ္ထိတာယ အဘာဝတော ပဋိက္ခိပတိ။ ဣမေသု ပန သဗ္ဗေသုပိ နယေသု ‘‘အာဇာနာဟိ နိဂ္ဂဟ’’န္တိ အာဒိံ ကတွာ သဗ္ဗော ကထာမဂ္ဂဘေဒေါ ဝိတ္ထာရတော ဝေဒိတဗ္ဗောတိ အယံ တာဝေတ္ထ ဝါဒယုတ္တိ။

၂။ ကာလသံသန္ဒနဝဏ္ဏနာ

၂၈၃-၂၈၄။ ဣဒါနိ အတီတံ အတ္ထီတိ ကာလသံသန္ဒနံ ဟောတိ။ တတ္ထ အတီတံ အတ္ထီတိအာဒိကံ သုဒ္ဓိကသံသန္ဒနံ။ အတီတံ ရူပံ အတ္ထီတိအာဒိကံ ခန္ဓဝသေန ကာလသံသန္ဒနံ။

၂၈၅။ ပစ္စုပ္ပန္နံ ရူပံ အပ္ပိယံ ကရိတွာတိ အတီတာနာဂတံ ပဟာယ ပစ္စုပ္ပန္နရူပမေဝ အပ္ပိယံ အဝိဘဇိတဗ္ဗံ ကရိတွာ။ ရူပဘာဝံ ဇဟတီတိပဉှေ နိရုဒ္ဓဿာပိ ရူပဿ ရူပက္ခန္ဓသင်္ဂဟိတတ္တာ ပဋိက္ခိပတိ။ ရူပဘာဝံ န ဇဟတီတိ ပဋိလောမပဉှေပိ ရူပက္ခန္ဓေန သင်္ဂဟိတတ္တာဝ ပဋိဇာနာတိ။ ဩဒါတံ ဝတ္ထံ အပ္ပိယံ ကရိတွာတိ ဧတ္ထ ကိဉ္စာပိ န သဗ္ဗံ ဝတ္ထံ ဩဒါတံ၊ ဣမိနာ ပန ဝတ္ထန္တိ အဝတွာ ‘‘ဩဒါတံ ဝတ္ထံ အပ္ပိယံ ကရိတွာ’’တိ ဝုတ္တေ သကဝါဒိနာ ဧကတ္ထတာ အနုညာတာ။ ဩဒါတဘာဝံ ဇဟတီတိ ပဉှေ ဝဏ္ဏဝိဂမံ သန္ဓာယ ပဋိညာ သကဝါဒိဿ။ ဝတ္ထဘာဝံ ဇဟတီတိ ဧတ္ထ ပန ပညတ္တိယာ အဝိဂတတ္တာ ပဋိက္ခေပေါ တဿေဝ။ ပဋိလောမေပိ ဧသေဝ နယော။

၂၈၆။ အတီတံ အတီတဘာဝံ န ဇဟတီတိ ပုဋ္ဌော ‘‘ယဒိ ဇဟေယျ၊ အနာဂတံ ဝါ ပစ္စုပ္ပန္နံ ဝါ သိယာ’’တိ မညမာနော ပဋိဇာနာတိ။ အနာဂတံ အနာဂတဘာဝံ န ဇဟတီတိ ပုဋ္ဌော ပန ‘‘ယဒိ န ဇဟေယျ၊ အနာဂတမေဝဿ ၊ ပစ္စုပ္ပန္နဘာဝံ န ပါပုဏေယျာ’’တိ မညမာနော ပဋိက္ခိပတိ။ ပစ္စုပ္ပန္နပဉှေပိ အတီတဘာဝံ အနာပဇ္ဇနဒေါသော သိယာတိ ပဋိက္ခိပတိ။ အနုလောမပဉှေသုပိ ဣမိနာဝ နယေန အတ္ထော ဝေဒိတဗ္ဗော။

၂၈၇။ ဧဝံ သုဒ္ဓိကနယံ ဝတွာ ပုန ခန္ဓဝသေန ဒဿေတုံ အတီတံ ရူပန္တိအာဒိ ဝုတ္တံ။ တံ သဗ္ဗံ ပါဠိအနုသာရေနေဝ သက္ကာ ဇာနိတုံ။

ဝစနသောဓနဝဏ္ဏနာ

၂၈၈။ ဣဒါနိ ‘‘အတီတံ နွတ္ထီ’’တိအာဒိ ဝစနသောဓနာ ဟောတိ။ တတ္ထ ဟဉ္စိ အတီတံ နွတ္ထီတိ ယဒိ အတီတံ နော အတ္ထီတိ အတ္ထော။ အတီတံအတ္ထီတိ မိစ္ဆာတိ အတီတဉ္စ တံ အတ္ထိ စာတိ မိစ္ဆာ ဧဝ။ တညေဝ အနာဂတံ တံ ပစ္စုပ္ပန္နန္တိ ပုဋ္ဌော အနာဂတက္ခဏေယေဝဿ ပစ္စုပ္ပန္နတာယ အဘာဝံ သန္ဓာယ ကာလနာနတ္တေန ပဋိက္ခိပတိ။

ဒုတိယံ ပုဋ္ဌော ယံ ဥပ္ပာဒတော ပုဗ္ဗေ အနာဂတံ အဟောသိ၊ တဿ ဥပ္ပန္နကာလေ ပစ္စုပ္ပန္နတ္တာ ပဋိဇာနာတိ။ ဟုတွာ ဟောတိ ဟုတွာ ဟောတီတိ ယဒေတံ တယာ ‘‘အနာဂတံ ဟုတွာ ပစ္စုပ္ပန္နံ ဟောတီ’’တိ ဝဒတာ တညေဝ အနာဂတံ တံ ပစ္စုပ္ပန္နန္တိ လဒ္ဓိဝသေန ‘‘အနာဂတံ ဝါ ပစ္စုပ္ပန္နံ ဝါ ဟုတွာ ဟောတီ’’တိ ဝုတ္တံ။ ကိံ တေ တမ္ပိ ဟုတွာ ဟောတီတိ? ဣတရော ဟုတွာ ဘူတဿ ပုန ဟုတွာ အဘာဝတော န ဟေဝန္တိ ပဋိက္ခိပတိ။

ဒုတိယံ ပုဋ္ဌော ယသ္မာ တံ အနာဂတံ ဟုတွာ ပစ္စုပ္ပန္နံ ဟောန္တံ ‘‘ဟုတွာ ဟောတီ’’တိ သင်္ခံ ဂတံ၊ တသ္မာ ပဋိဇာနာတိ။ အထ နံ သကဝါဒီ ‘‘ယဒိ တေ တံ အနာဂတံ ဟုတွာ ပစ္စုပ္ပန္နံ ဟောန္တံ ‘ဟုတွာ ဟောတီ’တိ သင်္ခံ ဂတံ၊ ပုန ဟုတွာ ဟောတိ၊ ယံ အနာဂတံ န ဟုတွာ ပစ္စုပ္ပန္နံ န ဟောန္တံ ‘န ဟုတွာ န ဟောတီ’တိ သင်္ခံ ဂတံ သသဝိသာဏံ၊ ကိံ တေ တမ္ပိ ပုန န ဟုတွာ န ဟောတီ’’တိအဓိပ္ပာယေန န ဟုတွာ န ဟောတိ န ဟုတွာ န ဟောတီတိ ပဉှံ ပုစ္ဆတိ။ ဣတရော ‘‘ယံ နတ္ထိ၊ တံ နတ္ထိတာယ၊ ဧဝ အနာဂတံ န ဟုတွာ ပစ္စုပ္ပန္နံ န ဟောတီတိ နဟုတွာနဟောတိ နာမ တာဝ ဟောတု၊ ပုန နဟုတွာနဟောတိဘာဝေါ ပနဿ ကုတော’’တိ မညမာနော ပဋိက္ခိပတိ။ တညေဝ ပစ္စုပ္ပန္နံ တံ အတီတန္တိ ပဉှေပိ ပစ္စုပ္ပန္နက္ခဏေယေဝဿ အတီတတာယ အဘာဝံ သန္ဓာယ ကာလနာနတ္တာ ပဋိက္ခိပတိ။

ဒုတိယပဉှေ ပုဋ္ဌော ယံ အတီတဘာဝတော ပုဗ္ဗေ ပစ္စုပ္ပန္နံ အဟောသိ၊ တဿေဝ အတီတတ္တာ ပဋိဇာနာတိ။ ဟုတွာ ဟောတိ ဟုတွာ ဟောတီတိ ယဒေတံ တယာ ‘‘ပစ္စုပ္ပန္နံ ဟုတွာ အတီတံ ဟောတီ’’တိ ဝဒတာ ‘‘တညေဝ ပစ္စုပ္ပန္နံ တံ အတီတ’’န္တိ လဒ္ဓိဝသေန ‘‘ပစ္စုပ္ပန္နံ ဝါ အတီတံ ဝါ ဟုတွာ ဟောတီ’’တိ ဝုတ္တံ၊ ကိံ တေ တမ္ပိ ဟုတွာ ဟောတီတိ? ဣတရော ဟုတွာ ဘူတဿ ပုန ဟုတွာ အဘာဝတော န ဟေဝန္တိ ပဋိက္ခိပတိ။

ဒုတိယပဉှေ ယသ္မာ တံ ပစ္စုပ္ပန္နံ ဟုတွာ အတီတံ ဟောန္တံ ‘‘ဟုတွာ ဟောတီ’’တိ သင်္ခံ ဂတံ၊ တသ္မာ ပဋိဇာနာတိ ။ အထ နံ သကဝါဒီ ‘‘ယဒိ တေ တညေဝ ပစ္စုပ္ပန္နံ ဟုတွာ အတီတံ ဟောန္တံ ‘ဟုတွာ ဟောတီ’တိ သင်္ခံ ဂတံ၊ ပုန ဟုတွာ ဟောတိ၊ ယံ ပစ္စုပ္ပန္နံ န ဟုတွာ အတီတံ န ဟောန္တံ ‘န ဟုတွာ န ဟောတီ’တိ သင်္ခံ ဂတံ သသဝိသာဏံ၊ ကိံ တေ တမ္ပိ ပုန န ဟုတွာ န ဟောတီ’’တိ အဓိပ္ပာယေန န ဟုတွာ န ဟောတိ န ဟုတွာ န ဟောတီတိ ပဉှံ ပုစ္ဆတိ။ ဣတရော ‘‘ယံ နတ္ထိ၊ တံ နတ္ထိတာယ ဧဝ ပစ္စုပ္ပန္နံ န ဟုတွာ အတီတံ န ဟောတီတိ နဟုတွာနဟောတိ နာမ တာဝ ဟောတု။ ပုန နဟုတွာနဟောတိဘာဝေါ ပနဿ ကုတော’’တိ မညမာနော ပဋိက္ခိပတိ။ ဥဘယံ ဧကတော ကတွာ အာဂတေ တတိယပဉှေပိ ဣမိနာဝုပါယေန ယောဇနာ ကာတဗ္ဗာ။

အပရော နယော – ယဒိ တညေဝ အနာဂတံ တံ ပစ္စုပ္ပန္နံ၊ အနာဂတဿ ပစ္စုပ္ပန္နေ ဝုတ္တော ဟောတိဘာဝေါ၊ ပစ္စုပ္ပန္နဿ စ အနာဂတေ ဝုတ္တော ဟုတွာဘာဝေါ အာပဇ္ဇတိ။ ဧဝံ သန္တေ အနာဂတမ္ပိ ဟုတွာဟောတိ နာမ။ ပစ္စုပ္ပန္နမ္ပိ ဟုတွာဟောတိယေဝ နာမ။ တေန တံ ပုစ္ဆာမ – ‘‘ကိံ တေ ဧတေသု ဧကေကံ ဟုတွာ ဟောတိ ဟုတွာ ဟောတီ’’တိ? ဣတရော – ‘‘တညေဝ အနာဂတံ တံ ပစ္စုပ္ပန္န’’န္တိ ပဉှေ ပဋိက္ခိတ္တနယေနေဝ ပဋိက္ခိပိတွာ ပုန ပုဋ္ဌော ဒုတိယေ ပဉှေ ပဋိညာတနယေနေဝ ပဋိဇာနာတိ။ အထ နံ သကဝါဒီ ‘‘တညေဝ အနာဂတံ တံ ပစ္စုပ္ပန္န’’န္တိ ပဉှာဝသေန တေသု ဧကေကံ ဟုတွာ ဟောတိ ဟုတွာ ဟောတီတိ ပဋိဇာနန္တံ ပုရိမံ ပဋိက္ခိတ္တပဉှံ ပရိဝတ္တိတွာ ပုစ္ဆန္တော န ဟုတွာ န ဟောတိ န ဟုတွာ န ဟောတီတိ ပုစ္ဆတိ။ တဿတ္ထော – နနု ‘‘တယာ တညေဝ အနာဂတံ တံ ပစ္စုပ္ပန္န’’န္တိ ဝုတ္တေ ပဌမပဉှံ ပဋိက္ခိပန္တေန အနာဂတဿ ဟောတိဘာဝေါ ပစ္စုပ္ပန္နဿ စ ဟုတွာဘာဝေါ ပဋိက္ခိတ္တောတိ။ တေန အနာဂတံ န ဟောတိ နာမ၊ ပစ္စုပ္ပန္နံ န ဟုတွာ နာမ။

ဒုတိယပဉှေ စ တညေဝ အနာဂတံ တံ ပစ္စုပ္ပန္နန္တိ ပဋိညာတံ။ ဧဝံ သန္တေ အနာဂတမ္ပိ န ဟုတွာ န ဟောတိ နာမ။ ပစ္စုပ္ပန္နမ္ပိ န ဟုတွာ န ဟောတိယေဝ နာမ။ တေန တံ ပုစ္ဆာမ – ‘‘ကိံ တေ ဧတေသု ဧကေကံ န ဟုတွာ န ဟောတိ န ဟုတွာ န ဟောတီ’’တိ? ပရဝါဒီ သဗ္ဗတော အန္ဓကာရေန ပရိယောနဒ္ဓါ ဝိယ တေသံ နဟုတွာနဟောတိဘာဝံ အပဿန္တော န ဟေဝန္တိ ပဋိက္ခိပတိ။

ဒုတိယဝါရေပိ ယဒိ တညေဝ ပစ္စုပ္ပန္နံ တံ အတီတံ၊ ပစ္စုပ္ပန္နဿ အတီတေ ဝုတ္တော ဟောတိဘာဝေါ၊ အတီတဿ စ ပစ္စုပ္ပန္နေ ဝုတ္တော ဟုတွာဘာဝေါ အာပဇ္ဇတိ၊ ဧဝံ သန္တေ ပစ္စုပ္ပန္နမ္ပိ ဟုတွာဟောတိ နာမ၊ အတီတမ္ပိ ဟုတွာဟောတိယေဝ နာမ။ တေန တံ ပုစ္ဆာမ – ‘‘ကိံ တေ ဧတေသု ဧကေကံ ဟုတွာ ဟောတိ ဟုတွာ ဟောတီ’’တိ? ဣတရော တညေဝ ပစ္စုပ္ပန္နံ တံ အတီတန္တိပဉှေ ပဋိက္ခိတ္တနယေနေဝ ပဋိက္ခိပိတွာ ပုန ပုဋ္ဌော ဒုတိယပဉှေ ပဋိညာတနယေနေဝ ပဋိဇာနာတိ။ အထ နံ သကဝါဒီ ‘‘တညေဝ ပစ္စုပ္ပန္နံ တံ အတီတ’’န္တိ ပဉှာဝသေန တေသု ဧကေကံ ဟုတွာ ဟောတိ ဟုတွာ ဟောတီတိ ပဋိဇာနန္တံ ပုရိမံ ပဋိက္ခိတ္တပဉှံ ပရိဝတ္တိတွာ ပုစ္ဆန္တော န ဟုတွာ န ဟောတိ န ဟုတွာ န ဟောတီတိ ပုစ္ဆတိ။ တဿတ္ထော – နနု တယာ တညေဝ ပစ္စုပ္ပန္နံ တံ အတီတန္တိ ဝုတ္တေ ပဌမပဉှံ ပဋိက္ခိပန္တေန ပစ္စုပ္ပန္နဿ ဟောတိဘာဝေါ၊ အတီတဿ စ ဟုတွာဘာဝေါ ပဋိက္ခိတ္တောတိ။ တေန ပစ္စုပ္ပန္နံ နဟောတိ နာမ။ အတီတံ နဟုတွာ နာမ။

ဒုတိယပဉှေ စ တေ ‘‘တညေဝ ပစ္စုပ္ပန္နံ တံ အတီတ’’န္တိ ပဋိညာတံ။ ဧဝံ သန္တေ ပစ္စုပ္ပန္နမ္ပိ န ဟုတွာ န ဟောတိ နာမ၊ အတီတမ္ပိ န ဟုတွာ န ဟောတိယေဝ နာမ။ တေန တံ ပုစ္ဆာမ – ‘‘ကိံ တေ ဧတေသု ဧကေကံ န ဟုတွာ န ဟောတိ၊ န ဟုတွာ န ဟောတီ’’တိ။ ပရဝါဒီ သဗ္ဗတော အန္ဓကာရေန ပရိယောနဒ္ဓါ ဝိယ တေသံ နဟုတွာနဟောတိဘာဝံ အပဿန္တော န ဟေဝန္တိ ပဋိက္ခိပတိ။

တတိယဝါရေပိ ယဒိ တညေဝ အနာဂတံ တံ ပစ္စုပ္ပန္နံ တံ အတီတံ၊ အနာဂတပစ္စုပ္ပန္နာနံ ပစ္စုပ္ပန္နာတီတေသု ဝုတ္တော ဟောတိဘာဝေါ၊ ပစ္စုပ္ပန္နာတီတာနဉ္စ အနာဂတပစ္စုပ္ပန္နေသု ဝုတ္တော ဟုတွာဘာဝေါ အာပဇ္ဇတိ။ ဧဝံ သန္တေ အနာဂတမ္ပိ ဟုတွာဟောတိ နာမ။ ပစ္စုပ္ပန္နမ္ပိ အတီတမ္ပိ ဟုတွာ ဟောတိယေဝ နာမ။ တေန တံ ပုစ္ဆာမ – ‘‘ကိံ တေ တီသုပိ ဧတေသု ဧကေကံ ဟုတွာ ဟောတိ ဟုတွာ ဟောတီ’’တိ? ဣတရော ‘‘တညေဝ အနာဂတံ၊ တံ ပစ္စုပ္ပန္နံ၊ တံ အတီတ’’န္တိပဉှေ ပဋိက္ခိတ္တနယေနေဝ ပဋိက္ခိပိတွာ ပုန ပုဋ္ဌော ဒုတိယပဉှေ ပဋိညာတနယေနေဝ ပဋိဇာနာတိ။ အထ နံ သကဝါဒီ ‘‘တညေဝ အနာဂတံ၊ တံ ပစ္စုပ္ပန္နံ၊ တံ အတီတ’’န္တိ ပဉှာဝသေန တေသု ဧကေကံ ဟုတွာ ဟောတိ၊ ဟုတွာ ဟောတီတိ ပဋိဇာနန္တံ ပုရိမံ ပဋိက္ခိတ္တပဉှံ ပရိဝတ္တိတွာ ပုစ္ဆန္တော န ဟုတွာ န ဟောတိ န ဟုတွာ န ဟောတီတိ ပုစ္ဆတိ။ တဿတ္ထော – နနု တယာ တညေဝ အနာဂတံ၊ တံ ပစ္စုပ္ပန္နံ၊ တံ အတီတန္တိ ဝုတ္တေ ပဌမပဉှံ ပဋိက္ခိပန္တေန အနာဂတပစ္စုပ္ပန္နာနံ ဟောတိဘာဝေါ၊ ပစ္စုပ္ပန္နာတီတာနဉ္စ ဟုတွာဘာဝေါ ပဋိက္ခိတ္တောတိ? တေန အနာဂတံ ပစ္စုပ္ပန္နဉ္စ န ဟောတိ နာမ။ ပစ္စုပ္ပန္နဉ္စ အတီတဉ္စ န ဟုတွာ နာမ။

ဒုတိယပဉှေ စ တေ ‘‘တညေဝ အနာဂတံ၊ တံ ပစ္စုပ္ပန္နံ၊ တံ အတီတ’’န္တိ ပဋိညာတံ။ ဧဝံ သန္တေ အနာဂတမ္ပိ န ဟုတွာ န ဟောတိ နာမ၊ ပစ္စုပ္ပန္နမ္ပိ အတီတမ္ပိ န ဟုတွာ န ဟောတိယေဝ နာမ။ တေန တံ ပုစ္ဆာမ – ‘‘ကိံ တေ ဧတေသု ဧကေကံ န ဟုတွာ န ဟောတိ န ဟုတွာ န ဟောတီ’’တိ? ပရဝါဒီ သဗ္ဗတော အန္ဓကာရေန ပရိယောနဒ္ဓါ ဝိယ တေသံ န ဟုတွာ န ဟောတိဘာဝံ အပဿန္တော န ဟေဝန္တိ ပဋိက္ခိပတီတိ။ နိဂ္ဂဟာဒီနိ ပနေတ္ထ ဟေဋ္ဌာ ဝုတ္တနယေနေဝ ယောဇေတဗ္ဗာနိ။

ဝစနသောဓနဝဏ္ဏနာ နိဋ္ဌိတာ။

အတီတစက္ခုရူပါဒိကထာဝဏ္ဏနာ

၂၈၉။ အတီတံစက္ခု အတ္ထီတိအာဒီသုပိ စက္ခာဒိဘာဝါဝိဇဟနေနေဝ အတ္ထိတံ ပဋိဇာနာတိ။ ပဿတီတိအာဒီနိ ပုဋ္ဌော ပန တေသံ ဝိညာဏာနံ ကိစ္စာဘာဝဝသေန ပဋိက္ခိပတိ။

အတီတဉာဏာဒိကထာဝဏ္ဏနာ

၂၉၀။ တေန ဉာဏေန ဉာဏကရဏီယံ ကရောတီတိ ပဉှေ တဿ ဉာဏဿ နိရုဒ္ဓတ္တာ ကိစ္စဘာဝမဿ အပဿန္တော ပဋိက္ခိပတိ။ ပုန ပုဋ္ဌော အတီတာရမ္မဏံ ပစ္စုပ္ပန္နံ ဉာဏံ အတီတာနံ ဓမ္မာနံ ဇာနနတော အတီတံ ဉာဏန္တိ လေသေန ပစ္စုပ္ပန္နမေဝ ‘‘အတီတံ ဉာဏ’’န္တိ ကတွာ တေန ဉာဏေန ဉာဏကရဏီယဿ အတ္ထိတာယ ပဋိဇာနာတိ။ အထဿ သကဝါဒီ လေသောကာသံ အဒတွာ တေန ဉာဏေန ဒုက္ခံ ပရိဇာနာတီတိအာဒိမာဟ။ ဣတရော အတီတာရမ္မဏေနေဝ ဉာဏေန ဣမေသံ စတုန္နံ ကိစ္စာနံ အဘာဝါ ပဋိက္ခိပတိ။ အနာဂတပဉှေပိ ဧသေဝ နယော။ ပစ္စုပ္ပန္နပဉှော စေဝ သံသန္ဒနပဉှော စ ဥတ္တာနတ္ထာယေဝ။

အရဟန္တာဒိကထာဝဏ္ဏနာ

၂၉၁။ အရဟတော အတီတော ရာဂေါ အတ္ထီတိအာဒီသုပိ ရာဂါဒိဘာဝါဝိဇဟန္တော ဧဝံ ပဋိဇာနာတိ။ သရာဂေါတိအာဒီသု သုတ္တဝိရောဓဘယေန စေဝ ယုတ္တိဝိရောဓဘယေန စ ပဋိက္ခိပတိ။

ပဒသောဓနကထာဝဏ္ဏနာ

၂၉၅။ ဧဝံ သဗ္ဗမ္ပိ ပါဠိအနုသာရေနေဝ ဝိဒိတွာ ပရတော အတ္ထိ သိယာ အတီတံ၊ သိယာ နွာတီတန္တိ ဧတ္ထ ဧဝမတ္ထော ဝေဒိတဗ္ဗော။ ယံ အတီတမေဝ အတ္ထိ၊ တံ အတီတံ။ ယံ ပစ္စုပ္ပန္နာနာဂတံ အတ္ထိ၊ တံ နော အတ္ထိ၊ တံ နော အတီတံ။ တေနာတီတံ နွာတီတံ၊ နွာတီတံ အတီတန္တိ တေန ကာရဏေန အတီတံ နော အတီတံ၊ နော အတီတံ အတီတန္တိ။ အနာဂတပစ္စုပ္ပန္နပုစ္ဆာသုပိ ဧသေဝ နယော။

သုတ္တသာဓနဝဏ္ဏနာ

၂၉၆။ နဝတ္တဗ္ဗံ ‘‘အတီတံ အတ္ထိ အနာဂတံ အတ္ထီ’’တိ သုတ္တသာဓနာယ ပုစ္ဆာ ပရဝါဒိဿ၊ ပဋိညာ သကဝါဒိဿ။ ပုန အတ္တနော လဒ္ဓိံ နိဿာယ ယံကိဉ္စိ၊ ဘိက္ခဝေ၊ ရူပန္တိ အနုယောဂေါ ပရဝါဒိဿေဝ။ ဒုတိယနယေ ပုစ္ဆာ သကဝါဒိဿ၊ ပဋိညာ ဣတရဿ။ ဧဝံ သဗ္ဗတ္ထ ပုစ္ဆာ စ ပဋိညာ စ ဝေဒိတဗ္ဗာ။ ယံ ပနေတံ ပရဝါဒိနာ အနာဂတဿ အတ္ထိဘာဝသာဓနတ္ထံ ‘‘နနု ဝုတ္တံ ဘဂဝတာ ကဗဠီကာရေ၊ စေ၊ ဘိက္ခဝေ’’တိ သုတ္တဿ ပရိယောသာနေ အတ္ထိ တတ္ထ အာယတိံ ပုနဗ္ဘဝါဘိနိဗ္ဗတ္တီတိအာဒိ ဒဿိတံ န တံ အနာဂတဿ အတ္ထိဘာဝသာဓကံ ။ တဉှိ ဟေတူနံ ပရိနိဋ္ဌိတတ္တာ အဝဿံ ဘာဝိတံ သန္ဓာယ တတ္ထ ဝုတ္တံ။ အယံ သုတ္တာဓိပ္ပာယော။ သေသံ သဗ္ဗတ္ထ ဥတ္တာနတ္ထမေဝါတိ။

သဗ္ဗမတ္ထီတိကထာဝဏ္ဏနာ နိဋ္ဌိတာ။