📜

၆။ အတီတက္ခန္ဓာဒိကထာ

၁။ နသုတ္တသာဓနကထာဝဏ္ဏနာ

၂၉၇။ ဣဒါနိ ‘‘အတီတံ ခန္ဓာ’’တိအာဒိကထာ ဟောတိ။ တတ္ထ ခန္ဓာဒိဘာဝါဝိဇဟနတော အတီတာနာဂတာနံ အတ္ထိတံ ဣစ္ဆန္တဿ အတီတံ ခန္ဓာတိ ပုစ္ဆာ ပရဝါဒိဿ၊ အတီတဿ ခန္ဓသင်္ဂဟိတတ္တာ အာမန္တာတိ ပဋိညာ သကဝါဒိဿ။ ပုန အတီတံနတ္ထီတိ ပုစ္ဆာ ပရဝါဒိဿ၊ တဿ နိရုတ္တိပထသုတ္တေန အတ္ထိတာယ ဝါရိတတ္တာ ပဋိက္ခေပေါ သကဝါဒိဿ။ အာယတနဓာတုပုစ္ဆာသုပိ အနာဂတပဉှေသုပိ ပစ္စုပ္ပန္နေန သဒ္ဓိံ သံသန္ဒိတွာ အနုလောမပဋိလောမတော အာဂတပဉှေသုပိ ‘‘အတီတံ ရူပ’’န္တိအာဒိပဉှေသုပိ ဣမိနာဝုပါယေန အတ္ထော ဝေဒိတဗ္ဗော။

၂။ သုတ္တသာဓနဝဏ္ဏနာ

၂၉၈။ သုတ္တသာဓနေ ပန န ဝတ္တဗ္ဗန္တိ ပုစ္ဆာ သကဝါဒိဿ။ တတ္ထ နတ္ထိ စေတေတိ နတ္ထိ စ ဧတေ ဓမ္မာတိ အတ္ထော။ ခန္ဓာဒိဘာဝေ သတိ နတ္ထိတံ အနိစ္ဆန္တဿ အာမန္တာတိ ပဋိညာ ပရဝါဒိဿ၊ အထ နေသံ နတ္ထိဘာဝသာဓနတ္ထံ သုတ္တာဟရဏံ သကဝါဒိဿ။ ဒုတိယပုစ္ဆာပိ ပရဝါဒိဿ၊ ပဋိညာ သကဝါဒိဿ၊ သုတ္တာဟရဏံ ပရဝါဒိဿ။ တံ ပန နေသံ ခန္ဓာဒိဘာဝမေဝ သာဓေတိ၊ န အတ္ထိဘာဝန္တိ အာဟဋမ္ပိ အနာဟဋသဒိသမေဝါတိ။

အတီတံ ခန္ဓာတိအာဒိကထာဝဏ္ဏနာ။