📜

၇။ ဧကစ္စံအတ္ထီတိကထာ

၁။ အတီတာဒိဧကစ္စကထာဝဏ္ဏနာ

၂၉၉။ ဣဒါနိ ဧကစ္စံ အတ္ထီတိ ကထာ ဟောတိ။ တတ္ထ ယေ ‘‘ဧကစ္စံ အတီတံ အတ္ထီ’’တိ မညန္တိ၊ သေယျထာပိ ကဿပိကာ၊ တေသံ လဒ္ဓိဘိန္ဒနတ္ထံ အတီတံ အတ္ထီတိ ပုစ္ဆာ သကဝါဒိဿ၊ ဧကစ္စံ အတ္ထီတိ ဝိဿဇ္ဇနံ ပရဝါဒိဿ။ အယဉှိ အဓိပ္ပာယော – အဝိပက္ကဝိပါကံ အတ္ထိ၊ ဝိပက္ကဝိပါကံ နတ္ထီတိ။ ဧကစ္စံ နိရုဒ္ဓန္တိ အနုယောဂေါ သကဝါဒိဿ။ တဿတ္ထော – ယဒိ တေ အတီတံ ဧကစ္စံ အတ္ထိ ဧကစ္စံ နတ္ထိ၊ ဧဝံ သန္တေ ဧကစ္စံ အတီတံ နိရုဒ္ဓံ၊ ဧကစ္စံ အတီတံ အနိရုဒ္ဓံ၊ တထေဝ ဌိတန္တိ အာပဇ္ဇတိ။ ဝိဂတန္တိအာဒီသုပိ ဧသေဝ နယော။

အဝိပက္ကဝိပါကဓမ္မာ ဧကစ္စေတိ ဣဒံ ယသ္မာ ယေသံ သော အဝိပက္ကဝိပါကာနံ အတ္ထိတံ ဣစ္ဆတိ၊ တေပိ အတီတာယေဝ။ တသ္မာ ယထာ တေ အတီတံ ဧကစ္စံ အတ္ထိ၊ ကိံ တထာ အဝိပက္ကဝိပါကာပိ ဓမ္မာ ဧကစ္စေ အတ္ထီ ဧကစ္စေ နတ္ထီတိ စောဒေတုံ ဝုတ္တံ။ ဝိပက္ကဝိပါကာတိ ဣဒံ ယေသံ သော နတ္ထိတံ ဣစ္ဆတိ၊ တေသံ ဝသေန စောဒေတုံ ဝုတ္တံ။ အဝိပါကာတိ ဣဒံ အဗျာကတာနံ ဝသေန စောဒေတုံ ဝုတ္တံ။ ဣတိ ဣမေသံ တိဏ္ဏံ ရာသီနံ ဝသေန သဗ္ဗေသု အနုလောမပဋိလောမေသု ပဋိညာ စ ပဋိက္ခေပေါ စ ဝေဒိတဗ္ဗာ။ အတီတာ ဧကဒေသံ ဝိပက္ကဝိပါကာ၊ ဧကဒေသံ အဝိပက္ကဝိပါကာတိ ဝိပ္ပကတဝိပါကာ ဝုစ္စန္တိ။ ယေန ဟိ ကမ္မေန ပဋိသန္ဓိ နိဗ္ဗတ္တိတာ၊ ဘဝင်္ဂမ္ပိ စုတိပိ တဿေဝ ဝိပါကော။ တသ္မာ ပဋိသန္ဓိတော ယာဝ စုတိ၊ တာဝ တံ ဝိပ္ပကတဝိပါကံ နာမ ဟောတိ။ တထာရူပေ ဓမ္မေ သန္ဓာယေတံ ဝုတ္တံ။

ဝိပစ္စိဿန္တီတိ ကတွာ တေ အတ္ထီတိ ပုစ္ဆာ သကဝါဒိဿ။ ယထာ ဓမ္မဓရဿ ပုဂ္ဂလဿ နိဒ္ဒါယန္တဿာပိ ဗဟုပဝတ္တိနော ဓမ္မာ အတ္ထီတိ ဝုစ္စန္တိ၊ ဧဝံ လောကဝေါဟာရဝသေန အတ္ထိတံ သန္ဓာယ ပဋိညာ ပရဝါဒိဿ။ ဝိပစ္စိဿန္တီတိ ကတွာ ပစ္စုပန္နာတိ ဒုတိယပဉှေ ‘‘ကမ္မာနံ အဝိနာသသင်္ခါတော ကမ္မူပစယော နာမေကော အတ္ထီ’’တိ လဒ္ဓိယံ ဌတွာ ပဋိညာ ပရဝါဒိဿ။

၂။ အနာဂတာဒိဧကစ္စကထာဝဏ္ဏနာ

၃၀၀။ အနာဂတံအတ္ထီတိအာဒီသုပိ ဧကစ္စံ အတ္ထီတိ ဥပ္ပာဒိနော ဓမ္မေ သန္ဓာယ ဝဒတိ။ သေသံ သဗ္ဗတ္ထ ဟေဋ္ဌာ ဝုတ္တနယတ္တာ ဥတ္တာနတ္ထမေဝါတိ။

ဧကစ္စံအတ္ထီတိကထာဝဏ္ဏနာ။