📜

၈။ သတိပဋ္ဌာနကထာဝဏ္ဏနာ

၃၀၁။ ဣဒါနိ သတိပဋ္ဌာနကထာ ဟောတိ။ ‘‘တတ္ထ – စတုန္နံ၊ ဘိက္ခဝေ၊ သတိပဋ္ဌာနာနံ သမုဒယဉ္စ အတ္ထင်္ဂမဉ္စ ဒေသေဿာမီ’’တိ (သံ။ နိ။ ၅။၄၀၈) သတိပဋ္ဌာနသံယုတ္တေ ဝုတ္တနယေနေဝ ယေသံ ကာယာဒယော သတိယာ အာရမ္မဏဓမ္မေ ဂဟေတွာ ‘‘သဗ္ဗေ ဓမ္မာ သတိပဋ္ဌာနာ’’တိ လဒ္ဓိ၊ သေယျထာပိ ဧတရဟိ အန္ဓကာနံ။ အန္ဓကာ နာမ ပုဗ္ဗသေလိယာ၊ အပရသေလိယာ၊ ရာဇဂိရိယာ၊ သိဒ္ဓတ္ထိကာတိ ဣမေ ပစ္ဆာ ဥပ္ပန္နနိကာယာ။ တေသံ လဒ္ဓိဝိဝေစနတ္ထံ ပုစ္ဆာ သကဝါဒိဿ၊ ပဋိညာ ပရဝါဒိဿ။ တတ္ထ ယသ္မာ ‘‘ပတိဋ္ဌာတိ ဧတေသူတိ ပဋ္ဌာနာ ¶ ။ ကာ ပတိဋ္ဌာတိ? သတိ။ သတိယာ ပဋ္ဌာနာ သတိပဋ္ဌာနာ’’တိ ဣမိနာ အတ္ထေန သတိဂေါစရာပိ သတိပဋ္ဌာနာ။ ‘‘ပတိဋ္ဌဟန္တီတိ ပဋ္ဌာနာ။ ကာ ¶ ပတိဋ္ဌဟန္တိ? သတိယော။ သတိယောဝ ပဋ္ဌာနာ သတိပဋ္ဌာနာ’’တိ ဣမိနာ အတ္ထေန သတိယောဝ သတိပဋ္ဌာနာ။ တသ္မာ ဒွေပိ ဝါဒါ ပရိယာယေန ယုဇ္ဇန္တိ။ ယေ ပန တံ ပရိယာယံ ပဟာယ ဧကန္တေနေဝ ‘‘သဗ္ဗေ ဓမ္မာ သတိပဋ္ဌာနာ’’တိ ဝဒန္တိ၊ တေ သန္ဓာယ ပုစ္ဆာ သကဝါဒိဿ၊ အာရမ္မဏဝသေန ပဋိညာ ပရဝါဒိဿ။ သဗ္ဗေ ဓမ္မာ သတီတိ အနုယုတ္တဿ ပန သဗ္ဗေသံ သတိသဘာဝါဘာဝတော ပဋိက္ခေပေါ တဿေဝ။ တတ္ထ ခယဂါမီတိအာဒီနိ မဂ္ဂဝိသေသနာနိ။ ဧကာယနမဂ္ဂေါ ဟိ ကိလေသာနံ ခယဘူတံ နိဗ္ဗာနံ ဂစ္ဆတီတိ ခယဂါမီ။ စတ္တာရိ သစ္စာနိ ဗုဇ္ဈန္တော ဂစ္ဆတီတိ ဗောဓဂါမီ။ ဝဋ္ဋံ အပစိနန္တော ဂစ္ဆတီတိ အပစယဂါမီ။ ဧဝမေတေဟိ ပဒေဟိ ‘‘ကိံ တေ သဗ္ဗေ ဓမ္မာ ဧဝရူပေါ တေ ဧကာယနော မဂ္ဂေါ ဟောတီ’’တိ ပုစ္ဆတိ။ အနာသဝါ အသံယောဇနိယာတိအာဒီနိပိ လောကုတ္တရဘာဝံ ပုစ္ဆနတ္ထာယ ဝုတ္တာနိ။ ဗုဒ္ဓါနုဿတီတိအာဒီနိ ပဘေဒပုစ္ဆာဝသေန ဝုတ္တာနိ။

စက္ခာယတနံ ¶ သတိပဋ္ဌာနန္တိအာဒိ သဗ္ဗဓမ္မာနံ ပဘေဒပုစ္ဆာဝသေန ဝုတ္တံ။ တတ္ထာပိ သတိဝသေန ပဋိက္ခေပေါ၊ အာရမ္မဏဝသေန ပဋိညာတိ။ ဧဝံ သဗ္ဗပဉှေသု အတ္ထော ဝေဒိတဗ္ဗော။ သုတ္တသာဓနာ ဥတ္တာနတ္ထာယေဝါတိ။

သတိပဋ္ဌာနကထာဝဏ္ဏနာ နိဋ္ဌိတာ။