📜

၂။ ဒုတိယဝဂ္ဂေါ

၁။ ပရူပဟာရဝဏ္ဏနာ

၃၀၇။ ဣဒါနိ ပရူပဟာရကထာ နာမ ဟောတိ။ တတ္ထ ယေ အရဟတ္တံ ပဋိဇာနန္တာနံ အပ္ပတ္တေ ပတ္တသညီနံ အဓိမာနိကာနံ ကုဟကာနံ ဝါ အရဟတ္တံ ပဋိဇာနန္တာနံ သုက္ကဝိဿဋ္ဌိံ ဒိသွာ ‘‘မာရကာယိကာ ဒေဝတာ အရဟတော အသုစိံ ဥပသံဟရန္တီ’’တိ မညန္တိ၊ သေယျထာပိ ဧတရဟိ ပုဗ္ဗသေလိယာ စ အပရသေလိယာ စ၊ တေ သန္ဓာယ အတ္ထိ အရဟတောတိ ပုစ္ဆာ သကဝါဒိဿ၊ ပဋိညာ ဣတရဿ။ ဣဒါနိ ယသ္မာ သုက္ကဝိဿဋ္ဌိ နာမ ရာဂသမုဋ္ဌာနာ ဟောတိ၊ တသ္မာ အတ္ထိ အရဟတော ရာဂေါတိ အနုယောဂေါ အာရဒ္ဓါ။ သော သဗ္ဗောပိ ဥတ္တာနတ္ထောယေဝ။

မာရကာယိကာ ဒေဝတာ အတ္တနောတိအာဒိပဉှေ ယသ္မာ တာသံ ဒေဝတာနံ သုက္ကဝိဿဋ္ဌိ နာမ နတ္ထိ၊ အညေသမ္ပိ သုက္ကံ ဂဟေတွာ န ဥပသံဟရန္တိ၊ အရဟတော ပန သုက္ကမေဝ နတ္ထိ၊ တသ္မာ န ဟေဝန္တိ ပဋိက္ခိပတိ။

နေဝ အတ္တနောတိပဉှေ ပန နိမ္မိနိတွာ ဥပသံဟရန္တီတိ လဒ္ဓိယာ ပဋိဇာနာတိ။ လောမကူပေဟီတိပဉှေ သပ္ပိတေလာနံ ဝိယ လောမကူပေဟိ ဥပသံဟရဏာဘာဝံ ဒိသွာ ပဋိက္ခိပတိ။

၃၀၈။ ဟန္ဒဟီတိ ဝစသာယတ္ထေ နိပါတော။ ‘‘အရဟာ နု ခေါ အဟံ၊ နော’’တိ ဧဝံ ဝိမတိံ ဂါဟယိဿာမာတိ ဧဝံ ဝစသာယံ ကတွာ ဥပသံဟရန္တီတိ အတ္ထော။ အတ္ထိ အရဟတော ဝိမတီတိ ပုဋ္ဌော အဋ္ဌဝတ္ထုကံ ဝိစိကိစ္ဆံ သန္ဓာယ ပဋိက္ခိပတိ၊ ဒုတိယံ ပုဋ္ဌော ဣတ္ထိပုရိသာနံ နာမဂေါတ္တာဒီသု သန္နိဋ္ဌာနာဘာဝံ သန္ဓာယ ပဋိဇာနာတိ။

၃၀၉။ အတ္ထိ တဿ အာသယောတိ တဿ သုက္ကဿ ဥစ္စာရပဿာဝါနံ ဝိယ ပတိဋ္ဌာနောကာသော အတ္ထီတိ ပုစ္ဆတိ။

၃၁၂။ သဓမ္မကုသလဿာတိ အတ္တနော အရဟတ္တဓမ္မမတ္တေယေဝ ကုသလဿ။ ပညာဝိမုတ္တံ သန္ဓာယေဝံ ဝဒတိ။ ပရဓမ္မကုသလဿာတိ သဓမ္မတော ပရသ္မိံ အဋ္ဌသမာပတ္တိဓမ္မေပိ ကုသလဿ။ ဥဘတောဘာဂဝိမုတ္တံ သန္ဓာယေဝံ ဝဒတိ။ သေသမေတ္ထ ပါဠိအနုသာရေနေဝ ဝေဒိတဗ္ဗန္တိ။

ပရူပဟာရကထာဝဏ္ဏနာ။

၂-၃-၄။ အညာဏာဒိကထာဝဏ္ဏနာ

၃၁၄။ ဣဒါနိ အညာဏံ၊ ကင်္ခါ၊ ပရဝိတရဏာတိ တိဿော ကထာ နာမ ဟောန္တိ။ တတ္ထ ယေသံ ‘‘အရဟတော ဣတ္ထိပုရိသာဒီနံ နာမဂေါတ္တာဒီသု ဉာဏပ္ပဝတ္တိယာ အဘာဝေန အတ္ထိ အညာဏံ၊ တတ္ထေဝ သန္နိဋ္ဌာနာဘာဝေန အတ္ထိ ကင်္ခါ။ ယသ္မာ စ နေသံ တာနိ ဝတ္ထူနိ ပရေ ဝိတရန္တိ ပကာသေန္တိ အာစိက္ခန္တိ၊ တသ္မာ နေသံ အတ္ထိ ပရဝိတရဏာ’’တိ ဣမာ လဒ္ဓိယော၊ သေယျထာပိ ဧတရဟိ ပုဗ္ဗသေလိယာဒီနံ၊ တေသံ တာ လဒ္ဓိယော ဘိန္ဒိတုံ တီသုပိ ကထာသု ပုစ္ဆာ သကဝါဒိဿ၊ ပဋိညာ စ ပဋိက္ခေပေါ စ ဣတရဿ။ တတ္ထ သဗ္ဗေသုပိ ပဉှေသု စေဝ ဝိဿဇ္ဇနေသု စ ပါဠိံ အနုဂန္တွာဝ အတ္ထော ဝေဒိတဗ္ဗောတိ။

အညာဏာဒိကထာဝဏ္ဏနာ။

၅။ ဝစီဘေဒကထာဝဏ္ဏနာ

၃၂၆။ ဣဒါနိ ဝစီဘေဒကထာ နာမ ဟောတိ။ တတ္ထ ယေသံ ‘‘သောတာပတ္တိမဂ္ဂက္ခဏေ ပဌမံ ဈာနံ သမာပန္နဿ ဒုက္ခန္တိ ဝါစာ ဘိဇ္ဇတီ’’တိ လဒ္ဓိ၊ သေယျထာပိ ဧတရဟိ ပုဗ္ဗသေလိယာဒီနံ၊ တေ သန္ဓာယ သမာပန္နဿ အတ္ထိ ဝစီဘေဒေါတိ ပုစ္ဆာ သကဝါဒိဿ၊ လဒ္ဓိယံ ဌတွာ ပဋိညာ ပရဝါဒိဿ။ ပုန သဗ္ဗတ္ထာတိ တယော ဘဝေ သန္ဓာယ ပုဋ္ဌော အရူပံ သန္ဓာယ ပဋိက္ခိပတိ။ သဗ္ဗဒါတိ ကာလဝသေန ပုဋ္ဌော ပဌမမဂ္ဂက္ခဏေ ပဌမဇ္ဈာနိကသမာပတ္တိတော အညံ သဗ္ဗံ သမာပတ္တိကာလံ သန္ဓာယ ပဋိက္ခိပတိ။ သဗ္ဗေသံ သမာပန္နာနန္တိ ပုဋ္ဌော လောကိယသမာပတ္တိယော သမာပန္နေ သန္ဓာယ ပဋိက္ခိပတိ။ သဗ္ဗသမာပတ္တီသူတိ ပုဋ္ဌော ဒုတိယဇ္ဈာနာဒိကံ လောကုတ္တရံ သဗ္ဗဉ္စ လောကိယသမာပတ္တိံ သန္ဓာယ ပဋိက္ခိပတိ။

ကာယဘေဒေါတိ အဘိက္ကမာဒိဝသေန ပဝတ္တကာယဝိညတ္တိ။ ဣဒံ ‘‘ယာနိ စိတ္တာနိ ဝစီဝိညတ္တိံ သမုဋ္ဌာပေန္တိ၊ တာနေဝ ကာယဝိညတ္တိံ။ ဧဝံ သန္တေ ကသ္မာ ကာယဘေဒေါပိ န ဟောတီ’’တိ စောဒနတ္ထံ ပုစ္ဆတိ။ ဣတရော လဒ္ဓိဝသေန ပဋိက္ခိပတိ စေဝ ပဋိဇာနာတိ စ။ ဣဒါနိ ယဒိ သော မဂ္ဂက္ခဏေ ‘‘ဒုက္ခ’’န္တိ ဝါစံ ဘာသတိ၊ ‘‘သမုဒယော’’တိအာဒိကမ္ပိ ဘာသေယျ။ ယဒိ ဝါ တံ န ဘာသတိ၊ ဣတရမ္ပိ န ဘာသေယျာတိ စောဒနတ္ထံ ဒုက္ခန္တိ ဇာနန္တောတိအာဒယော ပဉှာ ဝုတ္တာ။ ဣတရော ပန အတ္တနော လဒ္ဓိဝသေနေဝ ပဋိဇာနာတိ စေဝ ပဋိက္ခိပတိ စ။ လောကုတ္တရံ ပဌမဇ္ဈာနံ သမာပန္နော ဒုက္ခဒုက္ခန္တိ ဝိပဿတီတိ ဟိဿ လဒ္ဓိ။

၃၂၈။ ဉာဏန္တိ လောကုတ္တရံ စတုသစ္စဉာဏံ။ သောတန္တိ သောတဝိညာဏံ အဓိပ္ပေတံ၊ ယေန တံ သဒ္ဒံ သုဏာတိ။ ဒွိန္နံ ဖဿာနန္တိ သောတသမ္ဖဿမနောသမ္ဖဿာနံ။

၃၂၉။ နော ဝတ ရေ ဝတ္တဗ္ဗေတိ ယဒိ အဝိသေသေန ယံကိဉ္စိ သမာပန္နဿ နတ္ထိ ဝစီဘေဒေါ၊ န အဝိသေသေန ဝတ္တဗ္ဗံ ‘‘သမာပန္နဿ အတ္ထိ ဝစီဘေဒေါ’’တိ။ သေသမေတ္ထ ဥတ္တာနတ္ထမေဝ သဒ္ဓိံ သုတ္တသာဓနာယ။ ယံ ပနေတေန ‘‘သိခိဿ အာနန္ဒ၊ ဘဂဝတော’’တိ ပရိယောသာနေ သုတ္တံ အာဘတံ၊ တတ္ထ ယေန သမာပတ္တိစိတ္တေန သော ဝစီဘေဒေါ သမုဋ္ဌိတော၊ ကာယဘေဒေါပိ တေန သမုဋ္ဌာတိယေဝ၊ န စ တံ လောကုတ္တရံ ပဌမဇ္ဈာနစိတ္တံ၊ တသ္မာ အသာဓကန္တိ။

ဝစီဘေဒကထာဝဏ္ဏနာ။

၆။ ဒုက္ခာဟာရကထာဝဏ္ဏနာ

၃၃၄။ ဣဒါနိ ဒုက္ခာဟာရကထာ နာမ ဟောတိ။ တတ္ထ ‘‘ဒုက္ခံ ဒုက္ခန္တိ ဝါစံ ဘာသန္တော ဒုက္ခေ ဉာဏံ အာဟရတိ၊ တံ ဒုက္ခာဟာရော နာမ ဝုစ္စတိ ။ တဉ္စ ပနေတံ မဂ္ဂင်္ဂံ မဂ္ဂပရိယာပန္န’’န္တိ ယေသံ လဒ္ဓိ၊ သေယျထာပိ ဧတရဟိ ပုဗ္ဗသေလိယာနံ၊ တေ သန္ဓာယ ဒုက္ခာဟာရောတိ ပုစ္ဆာ သကဝါဒိဿ၊ ပဋိညာ ပရဝါဒိဿ။ ယေ ကေစီတိ ပဌမပဉှေ အဝိပဿကေ သန္ဓာယ ပဋိက္ခိပတိ၊ ဒုတိယပဉှေ ဝိပဿကေ သန္ဓာယ ပဋိဇာနာတိ၊ တံ ပနဿ လဒ္ဓိမတ္တမေဝ။ တသ္မာ ‘‘သဗ္ဗေ တေ’’တိ ဝါဒဿ ဘိန္ဒနတ္ထံ ဗာလပုထုဇ္ဇနာတိအာဒိမာဟ။ တံ ဥတ္တာနတ္ထမေဝါတိ။

ဒုက္ခာဟာရကထာဝဏ္ဏနာ။

၇။ စိတ္တဋ္ဌိတိကထာဝဏ္ဏနာ

၃၃၅။ ဣဒါနိ စိတ္တဋ္ဌိတိကထာ နာမ ဟောတိ။ တတ္ထ ယေသံ သမာပတ္တိစိတ္တဉ္စေဝ ဘဝင်္ဂစိတ္တဉ္စ အနုပ္ပဗန္ဓေန ပဝတ္တမာနံ ဒိသွာ ‘‘ဧကမေဝ စိတ္တံ စိရံ တိဋ္ဌတီ’’တိ လဒ္ဓိ သေယျထာပိ ဧတရဟိ ဟေဋ္ဌာ ဝုတ္တပ္ပဘေဒါနံ အန္ဓကာနံ၊ တံလဒ္ဓိဝိသောဓနတ္ထံ ဧကံ၊ စိတ္တံ ဒိဝသံ တိဋ္ဌတီတိ ပုစ္ဆာ သကဝါဒိဿ၊ ပဋိညာ ပရဝါဒိဿ။ ဥပဍ္ဎဒိဝသော ဥပ္ပာဒက္ခဏောတိ ဧတ္ထ ဌိတိက္ခဏံ အနာမသိတွာ ‘‘အနိစ္စာ ဝတ သင်္ခါရာ၊ ဥပ္ပာဒဝယဓမ္မိနော’’တိ (သံ။ နိ။ ၁။၁၈၆၊ ၂။၁၄၃) ဒေသနာနယေန ဥပ္ပာဒဝယဝသေနေဝ ပုစ္ဆာ ကတာ။

တေ ဓမ္မာ စိတ္တေန လဟုပရိဝတ္တာတိ ပုဋ္ဌော စိတ္တတော လဟုတရပရိဝတ္တိနော ဓမ္မေ အပဿန္တော ပဋိက္ခိပတိ။ ဒုတိယံ ပုဋ္ဌော ယဿ စိတ္တဿ ဒီဃဋ္ဌိတိံ ဣစ္ဆတိ၊ တံ သန္ဓာယ ပဋိဇာနာတိ။ ယာဝတာယုကံ တိဋ္ဌတီတိ ပဉှေ ‘‘စုလ္လာသီတိသဟဿာနိ၊ ကပ္ပာ တိဋ္ဌန္တိ ယေ မရူ’’တိအာဒိဝစနဝသေန (မဟာနိ။ ၁၀) အာရုပ္ပတော အညတြ ပဋိက္ခိပတိ၊ အာရုပ္ပေ ပဋိဇာနာတိ။ မုဟုတ္တံ မုဟုတ္တံ ဥပ္ပဇ္ဇတီတိ ပဉှေ ပရဝါဒိဿ ‘‘ဥပ္ပာဒဝယဓမ္မိနော’’တိအာဒိသုတ္တဝိရောဓဘယေန ပဋိဇာနာတိ။ ဌိတိံ ပနဿ လဒ္ဓိဝသေန ဣစ္ဆတိ။ သေသမေတ္ထ ဥတ္တာနတ္ထမေဝါတိ။

စိတ္တဋ္ဌိတိကထာဝဏ္ဏနာ။

၈။ ကုက္ကုဠကထာဝဏ္ဏနာ

၃၃၈။ ဣဒါနိ ကုက္ကုဠကထာ နာမ ဟောတိ။ တတ္ထ ယေသံ ‘‘သဗ္ဗံ၊ ဘိက္ခဝေ၊ အာဒိတ္တံ (သံ။ နိ။ ၄။၂၈၊ မဟာဝ။ ၅၄) သဗ္ဗေ သင်္ခါရာ ဒုက္ခာ’’တိအာဒီနိ (ဓ။ ပ။ ၂၇၈) သုတ္တာနိ အယောနိသော ဂဟေတွာ ‘‘နိပ္ပရိယာယေနေဝ သဗ္ဗေ သင်္ခါရာ ကုက္ကုဠာ ဝီတစ္စိတင်္ဂါရသမ္မိဿာ ဆာရိကနိရယသဒိသာ’’တိ လဒ္ဓိ၊ သေယျထာပိ ဧတရဟိ ဂေါကုလိကာနံ၊ တေသံ နာနပ္ပကာရသုခသန္ဒဿနေန တံ လဒ္ဓိံ ဝိဝေစေတုံ ပုစ္ဆာ သကဝါဒိဿ၊ ပဋိညာ ပရဝါဒိဿ။ တတ္ထ အနောဓိံ ကတွာတိ ဩဓိံ မရိယာဒံ ကောဋ္ဌာသံ အကရိတွာ၊ အဝိသေသေန သဗ္ဗေယေဝါတိ အတ္ထော။ သေသံ သဗ္ဗံ ပါဠိနယေနေဝ ဝေဒိတဗ္ဗံ သဒ္ဓိံ သုတ္တသာဓနာယာတိ။

ကုက္ကုဠကထာဝဏ္ဏနာ။

၉။ အနုပုဗ္ဗာဘိသမယကထာဝဏ္ဏနာ

၃၃၉။ ဣဒါနိ အနုပုဗ္ဗာဘိသမယကထာ နာမ ဟောတိ။ တတ္ထ ယေသံ –

‘‘အနုပုဗ္ဗေန မေဓာဝီ၊ ထောကံ ထောကံ ခဏေ ခဏေ၊

ကမ္မာရော ရဇတဿေဝ၊ နိဒ္ဓမေ မလမတ္တနော’’တိ။ (ဓ။ ပ။ ၂၃၉) –

အာဒီနိ သုတ္တာနိ အယောနိသော ဂဟေတွာ ‘‘သောတာပတ္တိဖလသစ္ဆိကိရိယာယ ပဋိပန္နော ဧကစ္စေ ကိလေသေ ဒုက္ခဒဿနေန ပဇဟတိ၊ ဧကစ္စေ သမုဒယနိရောဓမဂ္ဂဒဿနေန၊ တထာ သေသာပီတိ ဧဝံ သောဠသဟိ ကောဋ္ဌာသေဟိ အနုပုဗ္ဗေန ကိလေသပ္ပဟာနံ ကတွာ အရဟတ္တပဋိလာဘော ဟောတီ’’တိ ဧဝရူပါ နာနာဘိသမယလဒ္ဓိ ဥပ္ပန္နာ၊ သေယျထာပိ ဧတရဟိ အန္ဓကသဗ္ဗတ္ထိကသမ္မိတိယဘဒြယာနိကာနံ၊ တေသံ လဒ္ဓိဝိဝေစနတ္ထံ အနုပုဗ္ဗာဘိသမယောတိ ပုစ္ဆာ သကဝါဒိဿ၊ ပဋိညာ ဣတရဿ။ အနုပုဗ္ဗေန သောတာပတ္တိမဂ္ဂန္တိ ပုဋ္ဌော ပန ဧကဿ မဂ္ဂဿ ဗဟုဘာဝါပတ္တိဘယေန ပဋိက္ခိပတိ။ ဒုတိယံ ပုဋ္ဌော ဒုက္ခဒဿနာဒိဝသေန ပဋိဇာနာတိ။ တာနိ ဝါ စတ္တာရိပိ ဉာဏာနိ ဧကော သောတာပတ္တိမဂ္ဂေါယေဝါတိ ပဋိဇာနာတိ၊ ဖလံ ပန ဧကမေဝ ဣစ္ဆတိ၊ တသ္မာ ပဋိက္ခိပတိ။ သကဒါဂါမိမဂ္ဂါဒီသုပိ ဧသေဝ နယော။

၃၄၄။ မဂ္ဂေ ဒိဋ္ဌေ ဖလေ ဌိတောတိ ပဉှေ ယသ္မာ ဒုက္ခဒဿနာဒီဟိ ဒဿနံ အပရိနိဋ္ဌိတံ၊ မဂ္ဂဒဿနေန ပရိနိဋ္ဌိတံ နာမ ဟောတိ၊ တဒါ သော ဖလေ ဌိတောတိ သင်္ခံ ဂစ္ဆတိ၊ တသ္မာ ပဋိဇာနာတိ။

၃၄၅။ ဒုက္ခေဒိဋ္ဌေ စတ္တာရိ သစ္စာနီတိ ပုစ္ဆာ ပရဝါဒိဿ၊ ဧကာဘိသမယဝသေန ပဋိညာ သကဝါဒိဿ။ ပုန ဒုက္ခသစ္စံ စတ္တာရိ သစ္စာနီတိ အနုယောဂေ စတုန္နမ္ပိ နာနာသဘာဝတ္တာ ပဋိက္ခေပေါ တဿေဝ။

ရူပက္ခန္ဓေ အနိစ္စတော ဒိဋ္ဌေတိ ပုစ္ဆာ သကဝါဒိဿ၊ သမုဒ္ဒတော ဧကဗိန္ဒုဿ ရသေ ပဋိဝိဒ္ဓေ သေသဥဒကဿ ပဋိဝေဓော ဝိယ ဧကဓမ္မေ အနိစ္စာဒိတော ပဋိဝိဒ္ဓေ သဗ္ဗေပိ ပဋိဝိဒ္ဓါ ဟောန္တီတိ လဒ္ဓိယာ ပဋိညာ ပရဝါဒိဿ။

စတူဟိ ဉာဏေဟီတိ ဒုက္ခေ ဉာဏာဒီဟိ။ အဋ္ဌဟိ ဉာဏေဟီတိ သာဝကာနံ သာဓာရဏေဟိ သစ္စဉာဏေဟိ စေဝ ပဋိသမ္ဘိဒါဉာဏေဟိ စ။ ဒွါဒသဟိ ဉာဏေဟီတိ ဒွါဒသင်္ဂပဋိစ္စသမုပ္ပာဒဉာဏေဟိ။ စတုစတ္တာရီသာယ ဉာဏေဟီတိ ‘‘ဇရာမရဏေ ဉာဏံ၊ ဇရာမရဏသမုဒယေ ဉာဏ’’န္တိ ဧဝံ နိဒါနဝဂ္ဂေ ဝုတ္တဉာဏေဟိ။ သတ္တသတ္တတိယာ ဉာဏေဟီတိ ‘‘ဇရာမရဏံ၊ ဘိက္ခဝေ၊ အနိစ္စံ သင်္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မ’’န္တိ (သံ။ နိ။ ၂။၂၀) ဧဝံ တတ္ထေဝ ဝုတ္တဉာဏေဟိ။ သေသမေတ္ထ ပါဠိနယေနေဝ ဝေဒိတဗ္ဗံ သဒ္ဓိံ သုတ္တသာဓနေနာတိ။

အနုပုဗ္ဗာဘိသမယကထာဝဏ္ဏနာ။

၁၀။ ဝေါဟာရကထာဝဏ္ဏနာ

၃၄၇။ ဣဒါနိ ဝေါဟာရကထာ နာမ ဟောတိ။ တတ္ထ ဗုဒ္ဓါ ဘဂဝါ လောကုတ္တရေန ဝေါဟာရေန ဝေါဟရတီတိ ယေသံ လဒ္ဓိ၊ သေယျထာပိ ဧတရဟိ အန္ဓကာနံ၊ တေ သန္ဓာယ ပုစ္ဆာ သကဝါဒိဿ၊ လဒ္ဓိဝသေန ပဋိညာ ပရဝါဒိဿ။ လောကုတ္တရေ သောတေတိအာဒီနိ တဿ အယုတ္တဝါဒီဘာဝဒီပနတ္ထံ ဝုတ္တာနိ။ အယဉှေတ္ထ အဓိပ္ပာယော – ‘‘သဒ္ဒါယတနမေဝ တေ လောကုတ္တရံ၊ ဥဒါဟု သောတာဒီနိပီ’’တိ။

ဟဉ္စိ ဗုဒ္ဓဿ ဘဂဝတော ဝေါဟာရော လောကိယေ သောတေ ပဋိဟညတီတိ ဧတ္ထ ယဒိ သော လောကုတ္တရေ ပဋိဟညေယျ။ လောကုတ္တရော သိယာတိ ဧဝမတ္ထော န ဂဟေတဗ္ဗော။ လောကိယေ ပဋိဟညမာနဿ ပန လောကုတ္တရတာ နာမ နတ္ထီတိ အယမေတ္ထာဓိပ္ပာယော။ လောကိယေန ဝိညာဏေနာတိ ဧတ္ထာပိ လောကိယေနေဝါတိ အတ္ထော။ ဣတရထာ အနေကန္တတာ သိယာ။ လောကုတ္တရဉှိ လောကိယေနပိ ဉာဏေန ဉာယတီ။ ဧဝံ သဗ္ဗံ ယထာနုရူပတော ဝေဒိတဗ္ဗံ။ သဗ္ဗေ တေ မဂ္ဂံ ဘာဝေန္တီတိ ပဉှေသု ယေ မဂ္ဂံ နပ္ပဋိလဘန္တိ၊ တေ သန္ဓာယ ပဋိက္ခိပတိ။ ယေ ပဋိလဘန္တိ၊ တေ သန္ဓာယ ပဋိဇာနာတိ။

၃၅၁။ သောဝဏ္ဏမယာယာတိ သုဝဏ္ဏမယာယ။ ဣဒံ ပရဝါဒိဿ ဥဒါဟရဏံ။

ဧဠဏ္ဍိယာယာတိ ဧဠဏ္ဍမယာယ။ ဣဒံ သကဝါဒိဿ ဥဒါဟရဏံ။ လောကိယံ ဝေါဟရန္တဿ လောကိယောတိ အယမ္ပိ ဧကာ လဒ္ဓိ။ သာ ဧတရဟိ ဧကစ္စာနံ အန္ဓကာနံ လဒ္ဓိ။ သေသမေတ္ထ ဥတ္တာနတ္ထမေဝါတိ။

ဝေါဟာရကထာဝဏ္ဏနာ။

၁၁။ နိရောဓကထာဝဏ္ဏနာ

၃၅၃။ ဣဒါနိ နိရောဓကထာ နာမ ဟောတိ။ တတ္ထ ယေသံ အပ္ပဋိသင်္ခါနိရောဓဉ္စ ပဋိသင်္ခါနိရောဓဉ္စ ဒွေပိ ဧကတော ကတွာ နိရောဓသစ္စန္တိ လဒ္ဓိ၊ သေယျထာပိ ဧတရဟိ မဟိသာသကာနဉ္စေဝ အန္ဓကာနဉ္စ၊ တေ သန္ဓာယ ဒွေ နိရောဓာတိ ပုစ္ဆာ သကဝါဒိဿ၊ ပဋိညာ ပရဝါဒိဿ ။ ဒွေ ဒုက္ခနိရောဓာတိ ပဉှေသု ယသ္မာ ဒွေ ဒုက္ခသစ္စာနိ န ဣစ္ဆတိ၊ တသ္မာ ပဋိက္ခိပတိ။ ယသ္မာ ဒွီဟာကာရေဟိ ဒုက္ခံ နိရုဇ္ဈတီတိ ဣစ္ဆတိ၊ တသ္မာ ပဋိဇာနာတိ။ ဒွေ နိရောဓသစ္စာနီတိပဉှေသု ဒွိန္နံ ဒုက္ခသစ္စာနံ နိရောဓဝသေနအနိစ္ဆန္တော ပဋိက္ခိပတိ။ ဒွီဟာကာရေဟိ ဒုက္ခဿ နိရုဇ္ဈနတော ပဋိဇာနာတိ။ ဒွေ တာဏာနီတိအာဒီသုပိ ဧသေဝ နယော။

အတ္ထိ ဒွိန္နံ နိဗ္ဗာနာနန္တိအာဒီသု ပုစ္ဆာသု ဥစ္စနီစတာဒီနိ အပဿန္တော ပဋိက္ခိပတိ။

အပ္ပဋိသင်္ခါနိရုဒ္ဓေတိ ယေ ပဋိသင်္ခါယ လောကုတ္တရေန ဉာဏေန အနိရုဒ္ဓါ သုဒ္ဓပကတိကတ္တာ ဝါ ဥဒ္ဒေသပရိပုစ္ဆာဒီနံ ဝါ ဝသေန န သမုဒါစရဏတော နိရုဒ္ဓါတိ ဝုစ္စန္တိ၊ တေ သင်္ခါရေ။ ပဋိသင်္ခါ နိရောဓေန္တီတိ။ လောကုတ္တရဉာဏေန နိရောဓေန္တိ အနုပ္ပတ္တိဘာဝံ ဂမေန္တိ။ နနု အပ္ပဋိသင်္ခါနိရုဒ္ဓါ သင်္ခါရာတိ ပုစ္ဆာ ပရဝါဒိဿ ။ တတ္ထ ဘဂ္ဂါနံ ပုန အဘဉ္ဇနတော အပ္ပဋိသင်္ခါနိရုဒ္ဓါနံ ဝါ အရိယမဂ္ဂေ ဥပ္ပန္နေ တထာ နိရုဇ္ဈနတောဝ သကဝါဒီ အစ္စန္တဘဂ္ဂတံ ပဋိဇာနာတိ။ သေသမေတ္ထ ဥတ္တာနတ္ထမေဝါတိ။

နိရောဓကထာဝဏ္ဏနာ။

ဒုတိယော ဝဂ္ဂေါ။