📜

၄။ စတုတ္ထဝဂ္ဂေါ

၁။ ဂိဟိဿ အရဟာတိကထာဝဏ္ဏနာ

၃၈၇။ ဣဒါနိ ဂိဟိဿ အရဟာတိ ကထာ နာမ ဟောတိ။ တတ္ထ ယေသံ ယသကုလပုတ္တာဒီနံ ဂိဟိဗျဉ္ဇနေ ဌိတာနံ အရဟတ္တပ္ပတ္တိံ ဒိသွာ ‘‘ဂိဟိ အဿ အရဟာ’’တိ လဒ္ဓိ၊ သေယျထာပိ ဧတရဟိ ဥတ္တရာပထကာနံ၊ တေ သန္ဓာယ ပုစ္ဆာ သကဝါဒိဿ။ တတ္ထ ဂိဟိဿာတိ ယော ဂိဟိသံယောဇနသမ္ပယုတ္တတာယ ဂိဟိ၊ သော အရဟံ အဿာတိ အတ္ထော။ ပရဝါဒီ ပန အဓိပ္ပာယံ အသလ္လက္ခေတွာ ဂိဟိဗျဉ္ဇနမတ္တမေဝ ပဿန္တော ပဋိဇာနာတိ။ ဣဒါနိဿ ‘‘ဂိဟိ နာမ ဂိဟိသံယောဇနေန ဟောတိ၊ န ဗျဉ္ဇနမတ္တေန။ ယထာဟ ဘဂဝါ –

‘အလင်္ကတော စေပိ သမံ စရေယျ၊

သန္တော ဒန္တော နိယတော ဗြဟ္မစာရီ၊

သဗ္ဗေသု ဘူတေသု နိဓာယ ဒဏ္ဍံ၊

သော ဗြာဟ္မဏော သော သမဏော သ ဘိက္ခူ’’’တိ။ (ဓ။ ပ။ ၁၄၂)၊

ဣမံ နယံ ဒဿေတုံ အတ္ထိ အရဟတောတိအာဒိ အာရဒ္ဓံ။ တံ သဗ္ဗံ ဥတ္တာနတ္ထမေဝါတိ။

ဂိဟိဿ အရဟာတိကထာဝဏ္ဏနာ။

၂။ ဥပပတ္တိကထာဝဏ္ဏနာ

၃၈၈။ ဣဒါနိ ဥပပတ္တိကထာ နာမ ဟောတိ။ တတ္ထ ယေသံ ‘‘ဩပပါတိကော ဟောတိ တတ္ထပရိနိဗ္ဗာယီ’’တိဝစနာနိ (ပု။ ပ။ ၃၅-၄၀) အယောနိသော ဂဟေတွာ သုဒ္ဓါဝါသေသု ဥပပတ္တိယာ အရဟာတိ လဒ္ဓိ၊ ‘‘ယေသံ ဝါ ဥပဟစ္စပရိနိဗ္ဗာယီ’’တိ ပဒံ ပရိဝတ္တိတွာ ‘‘ဥပပဇ္ဇပရိနိဗ္ဗာယီ’’တိ ပရိယာပုဏန္တာနံ သဟ ဥပပတ္တိယာ အရဟာ ဟောတီတိ လဒ္ဓိ၊ သေယျထာပိ ဧတရဟိ ဥတ္တရာပထကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ တတ္ထ ယသ္မာ ဥပပတ္တိစိတ္တံ နာမ လောကိယံ၊ တေန သောတာပန္နာဒယောပိ န ဟောန္တိ၊ ပဂေဝ အရဟာ။ တသ္မာဿ ဣမံ နယံ ဒဿေတုံ သဟ ဥပပတ္တိယာ သောတာပန္နောတိအာဒိ အာရဒ္ဓံ။

၃၈၉။ သာရိပုတ္တောတိအာဒိ ဣမေသု မဟာထေရေသု ကော ဧကောပိ သဟ ဥပပတ္တိယာ အရဟာ နာမာတိ စောဒနတ္ထံ ဝုတ္တံ။

၃၉၀။ ဥပပတ္တေသိယေနာတိ ပဋိသန္ဓိစိတ္တေန။ တဉှိ ဥပပတ္တိံ ဧသတိ ဂဝေသတိ၊ တသ္မာ ဥပပတ္တေသိယန္တိ ဝုစ္စတိ။ သေသမေတ္ထ ဥတ္တာနတ္ထမေဝါတိ။

ဥပပတ္တိကထာဝဏ္ဏနာ။

၃။ အနာသဝကထာဝဏ္ဏနာ

၃၉၁။ ဣဒါနိ အနာသဝကထာ နာမ ဟောတိ။ တတ္ထ ယေ ဓမ္မာ အနာသဝဿ အရဟတော၊ သဗ္ဗေ တေ အနာသဝါတိ ယေသံ လဒ္ဓိ၊ သေယျထာပိ ဧတရဟိ ဥတ္တရာပထကာနံ၊ တေ သန္ဓာယ အရဟတောတိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ အနာသဝါ နာမ မဂ္ဂါဒယော၊ ကိံ တဿ တေယေဝ ဥပ္ပဇ္ဇန္တီတိ စောဒနတ္ထံ မဂ္ဂေါ ဖလန္တိအာဒိ အာရဒ္ဓံ။ စက္ခု အနာသဝန္တိ ပုဋ္ဌော တဿ သာသဝတ္တာ ပဋိက္ခိပတိ။ ဒုတိယံ ပုဋ္ဌော အနာသဝဿေတန္တိ ပဋိဇာနာတိ။

၃၉၂။ စီဝရပဉှေ ဧကောဝ ဓမ္မော အနာသဝေါ သာသဝေါ စ ဟောတီတိ လက္ခဏဝိရောဓဘယာ ပဋိက္ခိပတိ။ ဒုတိယံ ပုဋ္ဌော အနာသဝဿ ဟုတွာ သာသဝဿ ဟောတီတိ ပဋိဇာနာတိ။ တညေဝ အနာသဝန္တိ ပဉှာဒွယေပိ ဧသေဝ နယော။ သကဝါဒီ ပန တညေဝါတိ အနုညာတတ္တာ ‘‘မဂ္ဂေါ အနာသဝေါ ဟုတွာ’’တိအာဒီဟိ စောဒေတိ။ ဣမိနာ ဥပါယေန သဗ္ဗတ္ထ အတ္ထော ဝေဒိတဗ္ဗောတိ။

အနာသဝကထာဝဏ္ဏနာ။

၄။ သမန္နာဂတကထာဝဏ္ဏနာ

၃၉၃။ ဣဒါနိ သမန္နာဂတကထာ နာမ ဟောတိ။ တတ္ထ ဒွေ သမန္နာဂမာ ပစ္စုပ္ပန္နက္ခဏေ သမင်္ဂီဘာဝသမန္နာဂမော စ ရူပါဝစရာဒီသု အညတရဘူမိပ္ပတ္တိတော ပဋိလာဘသမန္နာဂမော စ။ သော ယာဝ အဓိဂတဝိသေသာ န ပရိဟာယတိ၊ တာဝဒေဝ လဗ္ဘတိ။ ယေသံ ပန ဌပေတွာ ဣမေ ဒွေ သမန္နာဂမေ အညော ဥပပတ္တိဓမ္မဝသေန ဧကော သမန္နာဂမော နာမ ဟောတီတိ လဒ္ဓိ၊ သေယျထာပိ ဧတရဟိ ဥတ္တရာပထကာနံ၊ တေသံ ပတ္တိဓမ္မော နာမ ကောစိ နတ္ထီတိ အနုဗောဓနတ္ထံ အရဟာ စတူဟိ ဖလေဟိ သမန္နာဂတောတိ ပုစ္ဆာ သကဝါဒိဿ၊ ပတ္တိံ သန္ဓာယ ပဋိညာ ဣတရဿ။ အထဿ ‘‘ယဒိ တေ အရဟာ စတူဟိ ခန္ဓေဟိ ဝိယ စတူဟိ ဖလေဟိ သမန္နာဂတော၊ ဧဝံ သန္တေ ယေ စတူသု ဖလေသု စတ္တာရော ဖဿာဒယော၊ တေဟိ တေ အရဟတော သမန္နာဂတတာ ပါပုဏာတီ’’တိ စောဒနတ္ထံ အရဟာ စတူဟိ ဖဿေဟီတိအာဒိ အာရဒ္ဓံ။ တံ သဗ္ဗံ ပရဝါဒိနာ ဧကက္ခဏေ စတုန္နံ ဖဿာဒီနံ အဘာဝါ ပဋိက္ခိတ္တံ။ အနာဂါမိပဉှာဒီသုပိ ဧသေဝ နယော။

၃၉၅။ သောတာပတ္တိဖလံ ဝီတိဝတ္တောတိ န ပဌမဇ္ဈာနံ ဝိယ ဒုတိယဇ္ဈာနလာဘီ၊ ပုန အနုပ္ပတ္တိယာ ပန ဝီတိဝတ္တောတိ ပုစ္ဆတိ။ သောတာပတ္တိမဂ္ဂန္တိအာဒိ ယံ ဝီတိဝတ္တော၊ တေနဿ ပုန အသမန္နာဂမံ ဒဿေတုံ အာရဒ္ဓံ။

၃၉၆။ တေဟိ စ အပရိဟီနောတိ ပဉှေ ယသ္မာ ယထာ ပစ္စနီကသမုဒါစာရေန လောကိယဇ္ဈာနဓမ္မာ ပရိဟာယန္တိ၊ န ဧဝံ လောကုတ္တရာ။ မဂ္ဂေန ဟိ ယေ ကိလေသာ ပဟီယန္တိ၊ ဖလေန စ ပဋိပ္ပဿမ္ဘန္တိ၊ တေ တထာ ပဟီနာဝ တထာ ပဋိပ္ပဿဒ္ဓါယေဝ စ ဟောန္တိ၊ တသ္မာ သကဝါဒိနာ အာမန္တာတိ ပဋိညာတံ။ သွာယမတ္ထော ပရတော ‘‘အရဟတာ စတ္တာရော မဂ္ဂါ ပဋိလဒ္ဓါ’’တိအာဒီသု ပကာသိတောယေဝ။ သေသံ ဥတ္တာနတ္ထမေဝါတိ။

သမန္နာဂတကထာဝဏ္ဏနာ။

၅။ ဥပေက္ခာသမန္နာဂတကထာဝဏ္ဏနာ

၃၉၇။ အရဟာဆဟိ ဥပေက္ခာဟီတိ ကထာယပိ ဣမိနာဝ နယေန အတ္ထော ဝေဒိတဗ္ဗော။ အရဟာ ဟိ ဆသု ဒွါရေသု ဥပေက္ခာနံ ဥပ္ပတ္တိဘဗ္ဗတာယ တာဟိ သမန္နာဂတောတိ ဝုစ္စတိ၊ န ဧကက္ခဏေ သဗ္ဗာသံ ဥပ္ပတ္တိဘာဝေနာတိ။

ဥပေက္ခာသမန္နာဂတကထာဝဏ္ဏနာ။

၆။ ဗောဓိယာဗုဒ္ဓါတိကထာဝဏ္ဏနာ

၃၉၈။ ဣဒါနိ ဗောဓိယာ ဗုဒ္ဓါတိကထာ နာမ ဟောတိ။ တတ္ထ ဗောဓီတိ စတုမဂ္ဂဉာဏဿာပိ သဗ္ဗညုတညာဏဿာပိ အဓိဝစနံ။ တသ္မာ ယေသံ ယထာ ဩဒါတေန ဝဏ္ဏေန ဩဒါတော၊ သာမေန ဝဏ္ဏေန သာမော၊ ဧဝံ ဗောဓိယာ ဗုဒ္ဓါတိ လဒ္ဓိ၊ သေယျထာပိ ဧတရဟိ ဥတ္တရာပထကာနံယေဝ၊ တေ သန္ဓာယ ပုစ္ဆာ စ အနုယောဂေါ စ သကဝါဒိဿ၊ ပဋိညာ စ ပဋိက္ခေပေါ စ ဣတရဿ။

အတီတာယာတိ ပဉှေ တသ္မိံ ခဏေ အဘာဝတော ပဋိက္ခိပတိ။ ဒုတိယံ ပုဋ္ဌော ပဋိလာဘံ သန္ဓာယ ပဋိဇာနာတိ။ ပုန ကိစ္စဝသေန ပုဋ္ဌော ကိစ္စာဘာဝတော ပဋိက္ခိပတိ။ ဒုတိယံ ပုဋ္ဌော ယံ တေန တာယ ကရဏီယံ ကတံ၊ တတ္ထ သမ္မောဟာဘာဝံ ပဋိဇာနာတိ။ လေသောကာသံ ပန အဒတွာ ဒုက္ခံ ပရိဇာနာတီတိအာဒိနာ နယေန ပုဋ္ဌော တဿ ကိစ္စဿ အဘာဝါ ပဋိက္ခိပတိ။

အနာဂတပဉှေ တသ္မိံ ခဏေ မဂ္ဂဉာဏဿ အဘာဝါ ပဋိက္ခိပတိ။ ဒုတိယံ ပုဋ္ဌော ‘‘အဂမာ ရာဇဂဟံ ဗုဒ္ဓါ’’တိ (သု။ နိ။ ၄၁၀) အနာဂတာယ ဗောဓိယာ ဗုဒ္ဓဘာဝံ မညမာနော ပဋိဇာနာတိ။ ဗောဓိကရဏီယံ ကရောတီတိ ပုဋ္ဌော တသ္မိံ ခဏေ ကိစ္စာဘာဝေန ပဋိက္ခိပတိ။ ဒုတိယံ ပုဋ္ဌော ယဒိ န ကရေယျ၊ ဗုဒ္ဓါတိ န ဝုစ္စေယျ။ ယသ္မာ အဝဿံ ကရိဿတိ၊ တသ္မာ ကရောတိယေဝ နာမာတိ ပဋိဇာနာတိ။ ပုန လေသောကာသံ အဒတွာ ပုဋ္ဌော ပဋိက္ခိပတိ။ ပစ္စုပ္ပန္နပဉှော သဒ္ဓိံ သံသန္ဒနာယ ဥတ္တာနတ္ထောဝ။

၃၉၉။ တိဿော ဗောဓိယော ဧကတော ကတွာ ပုဋ္ဌော သဗ္ဗညုတညာဏံ သန္ဓာယ တီဟိပိ ဗုဒ္ဓါတိ ဝတ္တဗ္ဗဘာဝတော ပဋိဇာနာတိ။ ပုန တီဟိတိ ပုဋ္ဌော သဗ္ဗာသံ ဧကက္ခဏေ အဘာဝါ ပဋိက္ခိပတိ။ ဒုတိယံ ပုဋ္ဌော အတီတာနာဂတပစ္စုပ္ပန္နဿ သဗ္ဗညုတညာဏဿ ဝသေန ပဋိဇာနာတိ။ ပုန လေသောကာသံ အဒတွာ သတတံ သမိတန္တိ ပုဋ္ဌော ပဋိက္ခိပတိ။

န ဗတ္တဗ္ဗံ ဗောဓိယာတိ ပုစ္ဆာ ပရဝါဒိဿ၊ ဗောဓိယာ အဘာဝက္ခဏေ အဗုဒ္ဓဘာဝါပတ္တိတော ပဋိညာ သကဝါဒိဿ။ နနု ဗောဓိပဋိလာဘာတိ ပဉှေ ပန ယသ္မိံ သန္တာနေ ဗောဓိသင်္ခါတံ မဂ္ဂဉာဏံ ဥပ္ပန္နံ၊ တတ္ထ ဗုဒ္ဓါတိ သမ္မုတိသဗ္ဘာဝတော ပဋိညာ တဿေဝ။ တဿ အဓိပ္ပာယံ အဇာနိတွာ ဟဉ္စီတိ လဒ္ဓိဋ္ဌပနာ ပရဝါဒိဿ။ ဣဒါနိဿ အသလ္လက္ခဏံ ပါကဋံ ကာတုံ ဗောဓိပဋိလာဘာ ဗုဒ္ဓါတိ ဗောဓိယာ ဗုဒ္ဓါတိ ပုစ္ဆာ သကဝါဒိဿ။ တဿတ္ထော – ‘‘ကိံ တေ ယသ္မာ ဗောဓိပဋိလာဘာ ဗုဒ္ဓါ၊ တသ္မာ ဗောဓိယာ ဗုဒ္ဓါ’’တိ။ ဣတရော ‘‘ဗောဓိပဋိလာဘော နာမ ဗောဓိယာ ဥပ္ပဇ္ဇိတွာ နိရုဒ္ဓါယပိ သန္တာနေ ဥပ္ပန္နဘာဝေါယေဝ။ ဗောဓိ နာမ မဂ္ဂက္ခဏေ ဉာဏ’’န္တိ ဣမံ ဝိဘာဂံ အသလ္လက္ခေန္တောဝ ပုန ပဋိဇာနာတိ။ တတော သကဝါဒိနာ ဗောဓိပဋိလာဘာ ဗောဓီတိ ပုဋ္ဌော ဝစနောကာသံ အလဘန္တော ပဋိက္ခိပတီတိ။

ဗောဓိယာဗုဒ္ဓါတိကထာဝဏ္ဏနာ။

ဣတိ ဣမာ တိဿောပိ ကထာ ဥတ္တရာပထကာနံယေဝ။

၇။ လက္ခဏကထာဝဏ္ဏနာ

၄၀၀။ ဣဒါနိ လက္ခဏကထာ နာမ ဟောတိ။ တတ္ထ ‘‘ယေဟိ သမန္နာဂတဿ မဟာပုရိသဿ ဒွေဝ ဂတိယော ဘဝန္တီ’’တိ (ဒီ။ နိ။ ၁။၂၅၈) ဣမံ သုတ္တံ အယောနိသော ဂဟေတွာ လက္ခဏသမန္နာဂတော ဗောဓိသတ္တောဝ ဟောတီတိ ယေသံ လဒ္ဓိ၊ သေယျထာပိ ဧတရဟိ ဥတ္တရာပထကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။

စက္ကဝတ္တိသတ္တောတိ ပဉှေသု ယသ္မာ စက္ကဝတ္တီ သတ္တောပိ စ ဗောဓိသတ္တောပိ၊ တသ္မာ အဗောဓိသတ္တံ သန္ဓာယ ပဋိက္ခိပတိ။ ဗောဓိသတ္တံ သန္ဓာယ ပဋိဇာနာတိ။

၄၀၂။ ဒွတ္တိံသိမာနီတိသုတ္တံ ဗောဓိသတ္တမေဝ သန္ဓာယ ဝုတ္တံ။ သော ဟိ ပစ္ဆိမေ ဘဝေ ဗုဒ္ဓါ ဟောတိ၊ ဣတရေသု စက္ကဝတ္တီ၊ တသ္မာ အာဘတမ္ပိ အနာဘတသဒိသမေဝါတိ။

လက္ခဏကထာဝဏ္ဏနာ။

၈။ နိယာမောက္ကန္တိကထာဝဏ္ဏနာ

၄၀၃။ ဣဒါနိ နိယာမောက္ကန္တိကထာ နာမ ဟောတိ။ တတ္ထ ယေသံ ဃဋိကာရသုတ္တေ ဇောတိပါလဿ ပဗ္ဗဇ္ဇံ သန္ဓာယ ‘‘ဗောဓိသတ္တော ကဿပဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော’’တိ လဒ္ဓိ၊ သေယျထာပိ ဧတရဟိ အန္ဓကာနံ၊ တေ သန္ဓာယ ဗောဓိသတ္တောတိ ပုစ္ဆာ သကဝါဒိဿ၊ လဒ္ဓိယံ ဌတွာ ပဋိညာ ဣတရဿ။ တတော ယသ္မာ နိယာမောတိ ဝါ ဗြဟ္မစရိယန္တိ ဝါ အရိယမဂ္ဂဿ နာမံ၊ ဗောဓိသတ္တာနဉ္စ ဌပေတွာ ပါရမီပူရဏံ အညာ နိယာမောက္ကန္တိ နာမ နတ္ထိ။ ယဒိ ဘဝေယျ၊ ဗောဓိသတ္တော သောတာပန္နော သာဝကော ဘဝေယျ။ န စေတမေဝံ။ ကေဝလဉှိ နံ ဗုဒ္ဓါ အတ္တနော ဉာဏဗလေ ဌတွာ – ‘‘အယံ ဗုဒ္ဓါ ဘဝိဿတီ’’တိ ဗျာကရောန္တိ၊ တသ္မာ ပုန ဗောဓိသတ္တောတိ အနုယောဂေါ သကဝါဒိဿ။ ပစ္ဆိမဘဝံ သန္ဓာယ ပဋိက္ခေပေါ ဣတရဿ။ ဒုတိယပဉှေ ဇောတိပါလကာလံ သန္ဓာယ ပဋိညာ တဿေဝ။ သာဝကော ဟုတွာတိအာဒီသုပိ ဧသေဝ နယော။ အနုဿဝိယောတိ အနုဿဝေန ပဋိဝိဒ္ဓဓမ္မော။ ပစ္ဆိမဘဝံ သန္ဓာယ ပဋိက္ခိပိတွာ ဇောတိပါလကာလေ အနုဿဝံ သန္ဓာယ ပဋိဇာနာတိ။

၄၀၄။ အညံ သတ္ထာရန္တိအာဠာရဉ္စ ရာမပုတ္တဉ္စ သန္ဓာယ ဝုတ္တံ။ အာယသ္မာ အာနန္ဒောတိအာဒိ ‘‘ဩက္ကန္တနိယာမာဝ သာဝကာ ဟောန္တိ၊ န ဣတရေ ဩက္ကန္တနိယာမာ ဧဝရူပါ ဟောန္တီ’’တိ ဒဿေတုံ ဝုတ္တံ။

သာဝကော ဇာတိံ ဝီတိဝတ္တောတိ ယာယ ဇာတိယာ သာဝကော၊ တံ ဝီတိဝတ္တော အညသ္မိံ ဘဝေ အသာဝကော ဟောတီတိ ပုစ္ဆတိ။ ဣတရော သောတာပန္နာဒီနံ သောတာပန္နာဒိသာဝကဘာဝတော ပဋိက္ခိပတိ။ သေသမေတ္ထ ဥတ္တာနတ္ထမေဝါတိ။

နိယာမောက္ကန္တိကထာဝဏ္ဏနာ။

၉။ အပရာပိ သမန္နာဂတကထာဝဏ္ဏနာ

၄၀၆။ ဣဒါနိ အပရာပိ သမန္နာဂတကထာ နာမ ဟောတိ။ တတ္ထ ယေသံ ‘‘စတုတ္ထမဂ္ဂဋ္ဌော ပုဂ္ဂလော ပတ္တိဓမ္မဝသေန တီဟိ ဖလေဟိ သမန္နာဂတော’’တိ လဒ္ဓိ၊ သေယျထာပိ ဧတရဟိ အန္ဓကာနံ ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ဟေဋ္ဌာ စတူဟိ ဖလေဟိ သမန္နာဂတကထာယံ ဝုတ္တနယေနေဝ ဝေဒိတဗ္ဗန္တိ။

အပရာပိ သမန္နာဂတကထာဝဏ္ဏနာ။

၁၀။ သဗ္ဗသံယောဇနပ္ပဟာနကထာဝဏ္ဏနာ

၄၁၃။ ဣဒါနိ သံယောဇနပ္ပဟာနကထာ နာမ ဟောတိ။ တတ္ထ ယေသံ ‘‘နိပ္ပရိယာယေနေဝ သဗ္ဗသံယောဇနပ္ပဟာနံ အရဟတ္တ’’န္တိ လဒ္ဓိ၊ သေယျထာပိ ဧတရဟိ အန္ဓကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ ပုန သဗ္ဗေ သံယောဇနာတိ ပုဋ္ဌော ဟေဋ္ဌာ ဝုတ္တမဂ္ဂတ္တယေန ပဟီနေ သန္ဓာယ ပဋိက္ခိပတိ။ ဒုတိယံ ပုဋ္ဌော တေန မဂ္ဂေန အပ္ပဟီနဿ အဘာဝါ ပဋိဇာနာတိ။ သက္ကာယဒိဋ္ဌိအာဒီသုပိ ပဌမမဂ္ဂေန ပဟီနဘာဝံ သန္ဓာယ ပဋိက္ခိပတိ၊ စတုတ္ထမဂ္ဂေန အနဝသေသပ္ပဟာနံ သန္ဓာယ ပဋိဇာနာတိ။ ဧသေဝ နယော သဗ္ဗတ္ထာတိ။

သဗ္ဗသံယောဇနပ္ပဟာနကထာဝဏ္ဏနာ။

စတုတ္ထော ဝဂ္ဂေါ။