📜

၂။ နိဒ္ဒေသဝဏ္ဏနာ

၁။ ပဌမနယော သင်္ဂဟာသင်္ဂဟပဒဝဏ္ဏနာ

၁။ ခန္ဓပဒဝဏ္ဏနာ

၆။ ဣဒါနိ ပဉ္စက္ခန္ဓာဒိဝသေန နိက္ခိတ္တမာတိကံ ‘သင်္ဂဟော အသင်္ဂဟော’တိအာဒီဟိ နယမာတိကာပဒေဟိ သဒ္ဓိံ ယောဇေတွာ ဒဿေတုံ ရူပက္ခန္ဓော ကတိဟိ ခန္ဓေဟီတိအာဒိနာ နယေန နိဒ္ဒေသဝါရော အာရဒ္ဓါ။ တတ္ထ ယသ္မာ ‘‘သင်္ဂဟော အသင်္ဂဟောတိအာဒိကာယ နယမာတိကာယ ‘‘တီဟိ သင်္ဂဟော၊ တီဟိ အသင်္ဂဟော’’တိ နယမုခမာတိကာ ဌပိတာ၊ တသ္မာ ရူပက္ခန္ဓာဒီနံ သင်္ဂဟံ ဒဿေတုံ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟီတိ တီဏိ ခန္ဓာယတနဓာတုပဒါနေဝ ဥဒ္ဓဋာနိ။ ‘စတ္တာရိ သစ္စာနီ’တိအာဒီသု ဧကမ္ပိ န ပရာမဋ္ဌံ။ ယသ္မာ စ ‘‘သဘာဂေါ ဝိသဘာဂေါ’’တိ ဧဝံ လက္ခဏမာတိကာ ဌပိတာ၊ တသ္မာ ဣမဿ ပဉှဿ ဝိဿဇ္ဇနေ ရူပက္ခန္ဓော ဧကေန ခန္ဓေနာတိအာဒိ ဝုတ္တံ။ သဘာဂါ ဟိ တဿ ဧတေ ခန္ဓာဒယောတိ။ တတ္ထ ဧကေန ခန္ဓေနာတိ ရူပက္ခန္ဓေနေဝ။ ယဉှိ ကိဉ္စိ ရူပံ ရူပက္ခန္ဓသဘာဂတ္တာ ရူပက္ခန္ဓောတွေဝ သင်္ဂဟံ ဂစ္ဆတီတိ ရူပက္ခန္ဓေနေဝ ဂဏိတံ၊ တံ ရူပက္ခန္ဓေနေဝ ပရိစ္ဆိန္နံ။ ဧကာဒသဟာယတနေဟီတိ မနာယတနဝဇ္ဇေဟိ။ သဗ္ဗောပိ ဟိ ရူပက္ခန္ဓော ဒသာယတနာနိ ဓမ္မာယတနေကဒေသော စ ဟောတိ၊ တသ္မာ ဧကာဒသဟာယတနေဟိ ဂဏိတော ၊ ပရိစ္ဆိန္နော။ ဧကာဒသဟိ ဓာတူဟီတိ သတ္တဝိညာဏဓာတုဝဇ္ဇာဟိ ဧကာဒသဟိ ဧတာသု ဟိ အပရိယာပန္နံ ရူပံ နာမ နတ္ထိ။

အသင်္ဂဟနယနိဒ္ဒေသေ ကတိဟိ အသင်္ဂဟိတောတိ သင်္ခေပေနေဝ ပုစ္ဆာ ကတာ။ ဝိဿဇ္ဇနေ ပနဿ ယသ္မာ ရူပက္ခန္ဓဿ ဝိသဘာဂါ စတ္တာရော အရူပက္ခန္ဓာ၊ ဧကံ မနာယတနံ၊ သတ္တ ဝိညာဏဓာတုယော၊ တသ္မာ စတူဟိ ခန္ဓေဟီတိအာဒိ ဝုတ္တံ။ ဣမိနာ နယေန သဗ္ဗပဒေသု သင်္ဂဟာသင်္ဂဟော ဝေဒိတဗ္ဗော။ ဣမသ္မိံ ပန ခန္ဓနိဒ္ဒေသေ – ‘‘ရူပက္ခန္ဓော ကတိဟိ ခန္ဓေဟီ’’တိအာဒိမှိ တာဝ ဧကမူလကေ သင်္ဂဟနယေ သရူပေနေဝ ဒဿိတာ ပဉ္စ ပုစ္ဆာ၊ ပဉ္စ ဝိဿဇ္ဇနာနိ။ အသင်္ဂဟနယေ သင်္ခေပေန ဒဿိတာ ပဉ္စ ပုစ္ဆာ၊ ပဉ္စ ဝိဿဇ္ဇနာနိ။ ဣမိနာ ဥပါယေန ဒုကမူလကာဒီသုပိ ပုစ္ဆာဝိဿဇ္ဇနာနိ ဝေဒိတဗ္ဗာနိ။ ရူပက္ခန္ဓမူလကာယေဝ စေတ္ထ ဒုကတိကစတုက္ကာ ဒဿိတာ။ ပဉ္စကေ ပန ‘‘ရူပက္ခန္ဓော စ…ပေ… ဝိညာဏက္ခန္ဓော စာ’’တိ ဧဝံ ဘေဒတော စ၊ ‘‘ပဉ္စက္ခန္ဓာ ကတိဟိ ခန္ဓေဟီ’’တိ ဧဝံ အဘေဒတော စာတိ ဒွိဓာ ပုစ္ဆာဝိဿဇ္ဇနာနိ ကတာနိ။ ဧဝံ ပါဠိနယော ဝေဒိတဗ္ဗောတိ။

၂။ အာယတနပဒါဒိဝဏ္ဏနာ

၂၂။ အာယတနပဒနိဒ္ဒေသာဒီသု အာယတနပဒနိဒ္ဒေသေ တာဝ စက္ခာယတနံ ဧကေန ခန္ဓေနာတိ ဧကေန ရူပက္ခန္ဓေနေဝ၊ ဧကေန စက္ခာယတနေနေဝ ဧကာယ စက္ခုဓာတုယာဝ သင်္ဂဟိတန္တိ ဝေဒိတဗ္ဗံ။ သောတာယတနာဒီသုပိ ဣမိနာဝ နယေန သင်္ဂဟာသင်္ဂဟော ဝေဒိတဗ္ဗော။ အသင်္ခတံ ခန္ဓတော ဌပေတွာတိ ဧတ္ထ ပန ယသ္မာ အသင်္ခတံ ဓမ္မာယတနံ နာမ နိဗ္ဗာနံ၊ တဉ္စ ခန္ဓသင်္ဂဟံ န ဂစ္ဆတိ၊ တသ္မာ ‘ခန္ဓတော ဌပေတွာ’တိ ဝုတ္တံ။ စတူဟိ ခန္ဓေဟီတိ ရူပဝေဒနာသညာသင်္ခါရက္ခန္ဓေဟိ။ နိဗ္ဗာနဝဇ္ဇဉှိ ဓမ္မာယတနံ ဧတေဟိ သင်္ဂဟိတံ။ ဝိညာဏက္ခန္ဓေန ပန ဌပေတွာ ဓမ္မာယတနဓမ္မဓာတုယော သေသာယတနဓာတူဟိ စ တံ န သင်္ဂယှတိ။ တေန ဝုတ္တံ – ‘‘ဧကေန ခန္ဓေန၊ ဧကာဒသဟာယတနေဟိ၊ သတ္တရသဟိ ဓာတူဟိ အသင်္ဂဟိတ’’န္တိ။ ယထာ စ တေ ဟေဋ္ဌာ ရူပက္ခန္ဓမူလကာ၊ ဧဝမိဓာပိ စက္ခာယတနမူလကာဝ နယာ ဝေဒိတဗ္ဗာ။ ဒုကမတ္တမေဝ ပန ပါဠိယံ ဒဿေတွာ ‘‘ဒွါဒသာယတနာနီ’’တိ အဘေဒတောဝ ပုစ္ဆာဝိဿဇ္ဇနံ ကတံ။ ဓာတုနိဒ္ဒေသေပိ ဧသေဝ နယော။

၄၀။ သစ္စနိဒ္ဒေသေ – သဗ္ဗေပိ ဒုကတိကစတုက္ကာ ပါဠိယံ ဒဿိတာ။ ယသ္မာ စ ဒုကတိကေသု သမုဒယသစ္စသဒိသမေဝ မဂ္ဂသစ္စေပိ ဝိဿဇ္ဇနံ၊ တသ္မာ တံ သမုဒယာနန္တရံ ဝုတ္တံ။

၅၀။ ဣန္ဒြိယနိဒ္ဒေသေ – ဇီဝိတိန္ဒြိယံ ဒွီဟိ ခန္ဓေဟီတိ ရူပဇီဝိတိန္ဒြိယံ ရူပက္ခန္ဓေန၊ အရူပဇီဝိတိန္ဒြိယံ သင်္ခါရက္ခန္ဓေန သင်္ဂဟိတံ။ သေသံ ဝုတ္တနယာနုသာရေနေဝ ဝေဒိတဗ္ဗံ။ ပါဠိဝဝတ္ထာနံ ပနေတ္ထ အာယတနဓာတုနိဒ္ဒေသသဒိသမေဝ။

၆။ ပဋိစ္စသမုပ္ပာဒဝဏ္ဏနာ

၆၁။ ပဋိစ္စသမုပ္ပာဒနိဒ္ဒေသေ – ‘‘အဝိဇ္ဇာ ကတိဟိ ခန္ဓေဟီ’’တိ ပုစ္ဆံ အနာရဘိတွာ အဝိဇ္ဇာ ဧကေန ခန္ဓေနာတိ ဧဝံ ဝိဿဇ္ဇနမေဝ ဒဿိတံ။ တတ္ထ သင်္ခါရပစ္စယာ ဝိညာဏန္တိ ပဋိသန္ဓိယံ ပဝတ္တေ စ သဗ္ဗမ္ပိ ဝိပါကဝိညာဏံ။ တေနေဝါဟ – ‘‘သတ္တဟိ ဓာတူဟိ သင်္ဂဟိတ’’န္တိ။ နာမရူပမ္ပိ ပဋိသန္ဓိပဝတ္တိဝသေနေဝ ဝေဒိတဗ္ဗံ။ တေနေဝေတ္ထ သဒ္ဒါယတနမ္ပိ သင်္ဂဟေတွာ ဧကာဒသဟာယတနေဟိ သင်္ဂဟော ဒဿိတော။ ဖဿာဒီသု ခန္ဓဘေဒေါ ဝေဒိတဗ္ဗော။ အညေနေဝ ဟိ ဧကေန ခန္ဓေန ဖဿော သင်္ဂဟိတော၊ အညေန ဝေဒနာ၊ တဏှာဥပါဒါနကမ္မဘဝါ ပန သင်္ခါရက္ခန္ဓေနေဝ သင်္ဂဟိတာ။ ဘဝပဒဉ္စေတ္ထ ကမ္မဘဝါဒီနံ ဝသေန ဧကာဒသဓာ ဝိဘတ္တံ။ တတ္ထ ကမ္မဘဝေါ ဖဿာဒီဟိ သဒိသဝိသဇ္ဇနတ္တာ တေဟိ သဒ္ဓိံ ဧကတော ဒဿိတော။ ဥပပတ္တိဘဝကာမဘဝသညာဘဝပဉ္စဝေါကာရဘဝါ အညမညသဒိသဝိဿဇ္ဇနတ္တာ ဧကတော ဒဿိတာ။ ယသ္မာ စေတေ ဥပါဒိန္နကဓမ္မာဝ တသ္မာ ‘‘ဧကာဒသဟာယတနေဟိ သတ္တရသဟိ ဓာတူဟီ’’တိ ဝုတ္တံ။ သဒ္ဒါယတနဉှိ အနုပါဒိန္နံ၊ တံ ဧတ္ထ န ဂဟိတံ။

၆၈။ ရူပဘဝနိဒ္ဒေသေ – ပဉ္စဟာယတနေဟီတိ စက္ခုသောတမနရူပဓမ္မာယတနေဟိ။ အဋ္ဌဟိ ဓာတူဟီတိ စက္ခုသောတစက္ခုဝိညာဏသောတဝိညာဏရူပဓမ္မမနောဓာတုမနောဝိညာဏဓာတူဟိ။ အရူပဘဝါဒယောပိ တယော သဒိသဝိဿဇ္ဇနတ္တာဝ ဧကတော ဒဿိတာ။ တထာ အသညာဘဝဧကဝေါကာရဘဝါ။ တတ္ထ ဒွီဟာယတနေဟီတိ ရူပါယတနဓမ္မာယတနေဟိ။ ဓာတူသုပိ ဧသေဝ နယော။ ဧကတလဝါသိကာနဉှိ သေသဗြဟ္မာနံ စက္ခုသဗ္ဘာဝတော တဿာရမ္မဏတ္တာ တတ္ထ ရူပါယတနံ ဥဒ္ဓဋံ။

၇၁။ ဇာတိ ဒွီဟိ ခန္ဓေဟီတိ ရူပဇာတိ ရူပက္ခန္ဓေန၊ အရူပဇာတိ သင်္ခါရက္ခန္ဓေန။ ဇရာမရဏေသုပိ ဧသေဝ နယော။ သောကာဒီသုပိ ဧကေန ခန္ဓေနာတိ သောကဒုက္ခဒေါမနဿာနိ ဝေဒနာက္ခန္ဓေန၊ ပရိဒေဝေါ ရူပက္ခန္ဓေန၊ ဥပါယာသာဒယော သင်္ခါရက္ခန္ဓေနာတိ ဧဝံ ခန္ဓဝိသေသော ဝေဒိတဗ္ဗော။

၇၃။ ဣဒ္ဓိပါဒေါ ဒွီဟီတိ သင်္ခါရဝိညာဏက္ခန္ဓေဟိ၊ မနာယတနဓမ္မာယတနေဟိ၊ ဓမ္မဓာတုမနောဝိညာဏဓာတူဟိ စ။ ဈာနံ ဒွီဟီတိ ဝေဒနာက္ခန္ဓသင်္ခါရက္ခန္ဓေဟိ။ အပ္ပမညာဒယော သဒိသဝိဿဇ္ဇနတ္တာ ဧကတော နိဒ္ဒိဋ္ဌာ။ စိတ္တံ ပန စေတနာနန္တရံ နိက္ခိတ္တမ္ပိ အသဒိသဝိဿဇ္ဇနတ္တာ ပစ္ဆာ ဂဟိတံ။ တတ္ထ အပ္ပမညာဒီသု ဧကေန ခန္ဓေနာတိ ဝေဒနာ ဝေဒနာက္ခန္ဓေန၊ သညာ သညာက္ခန္ဓေန၊ သေသာ သင်္ခါရက္ခန္ဓေန သင်္ဂဟိတာတိ ဧဝံ ခန္ဓဝိသေသော ဝေဒိတဗ္ဗော။

၇။ တိကပဒဝဏ္ဏနာ

၇၇။ ဧဝံ အဗ္ဘန္တရမာတိကာယ သင်္ဂဟံ ဒဿေတွာ ဣဒါနိ ဗာဟိရမာတိကာယ သင်္ဂဟံ ဒဿေတုံ ကုသလာ ဓမ္မာတိအာဒိ အာရဒ္ဓံ။ တတ္ထ ဝေဒနာတ္တိကေ တီဟိ ဓာတူဟီတိ ကာယဝိညာဏမနောဝိညာဏဓမ္မဓာတူဟိ။ သတ္တဟိ ဓာတူဟီတိ စက္ခုသောတဃာနဇိဝှာဝိညာဏဓာတူဟိ စေဝ မနောဓာတုဓမ္မဓာတုမနောဝိညာဏဓာတူဟိ စ။ ဝိပါကတ္တိကေ အဋ္ဌဟိ ဓာတူဟီတိ ကာယဝိညာဏဓာတုယာ သဒ္ဓိံ တာဟိယေဝ။ ဝိပါကဓမ္မဓမ္မာ ပန သံကိလိဋ္ဌသံကိလေသိကေဟိ သဒ္ဓိံ သဒိသဝိဿဇ္ဇနတ္တာ ဧကတော ဂဟိတာ။ ယထာ စေတေ၊ ဧဝံ သဗ္ဗတိကဒုကပဒေသု ယံ ယံ ပဒံ ယေန ယေန ပဒေန သဒ္ဓိံ သဒိသဝိဿဇ္ဇနံ ဟောတိ၊ တံ တံ ဥပ္ပဋိပါဋိယာပိ တေန တေန သဒ္ဓိံ ဂဟေတွာ ဝိဿဇ္ဇိတံ။ တတ္ထ ဝုတ္တာနုသာရေနေဝ သင်္ဂဟာသင်္ဂဟနယော ဝေဒိတဗ္ဗောတိ။

သင်္ဂဟာသင်္ဂဟပဒဝဏ္ဏနာ။

၂။ ဒုတိယနယော သင်္ဂဟိတေနအသင်္ဂဟိတပဒဝဏ္ဏနာ

၁၇၁။ ဣဒါနိ သင်္ဂဟိတေန အသင်္ဂဟိတပဒံ ဘာဇေတုံ စက္ခာယတနေနာတိအာဒိ အာရဒ္ဓံ။ တတြိဒံ လက္ခဏံ – ဣမသ္မိဉှိ ဝါရေ ယံ ခန္ဓပဒေန သင်္ဂဟိတံ ဟုတွာ အာယတနဓာတုပဒေဟိ အသင်္ဂဟိတံ၊ ခန္ဓာယတနပဒေဟိ ဝါ သင်္ဂဟိတံ ဟုတွာ ဓာတုပဒေန အသင်္ဂဟိတံ၊ တဿ ခန္ဓာဒီဟိ အသင်္ဂဟံ ပုစ္ဆိတွာ ဝိဿဇ္ဇနံ ကတံ။ တံ ပန ရူပက္ခန္ဓာဒီသု န ယုဇ္ဇတိ။ ရူပက္ခန္ဓေန ဟိ ရူပက္ခန္ဓောဝ သင်္ဂဟိတော။ သော စ အဍ္ဎေကာဒသဟိ အာယတနဓာတူဟိ အသင်္ဂဟိတော နာမ နတ္ထိ။ ဝေဒနာက္ခန္ဓေန စ ဝေဒနာက္ခန္ဓောဝ သင်္ဂဟိတော။ သောပိ ဓမ္မာယတနဓမ္မဓာတူဟိ အသင်္ဂဟိတော နာမ နတ္ထိ။ ဧဝံ အသင်္ဂဟိတတာယ အဘာဝတော ဧတာနိ အညာနိ စ ဧဝရူပါနိ မနာယတနဓမ္မာယတနာဒီနိ ပဒါနိ ဣမသ္မိံ ဝါရေ န ဂဟိတာနိ။ ယာနိ ပန ပဒါနိ ရူပေကဒေသံ အရူပေန အသမ္မိဿံ၊ ဝိညာဏေကဒေသဉ္စ အညေန အသမ္မိဿံ ဒီပေန္တိ၊ တာနိ ဣဓ ဂဟိတာနိ။ ပရိယောသာနေ စ –

‘‘ဒသာယတနာ သတ္တရသ ဓာတုယော၊

သတ္တိန္ဒြိယာ အသညာဘဝေါ ဧကဝေါကာရဘဝေါ၊

ပရိဒေဝေါ သနိဒဿနသပ္ပဋိဃံ၊

အနိဒဿနံ ပုနဒေဝ သပ္ပဋိဃံ ဥပါဒါ’’တိ။

ဧဝံ ဥဒ္ဒါနဂါထာယ ဒဿိတာနေဝ။ တသ္မာ တေသံ ဝသေနေဝ သင်္ဂဟာသင်္ဂဟော ဝေဒိတဗ္ဗော။ ပဉှဝသေန ဟိ ဣမသ္မိံ ဝါရေ အာယတနဓာတုဝသေနေဝ သဒိသဝိဿဇ္ဇနေ ဝီသတိ ဓမ္မေ သမောဓာနေတွာ ဧကော ပဉှော ကတော၊ သတ္တ ဝိညာဏဓာတုယော သမောဓာနေတွာ ဧကော၊ သတ္တိန္ဒြိယာနိ သမောဓာနေတွာ ဧကော၊ ဒွေ ဘဝေ သမောဓာနေတွာ ဧကော၊ ပရိဒေဝေန စ သနိဒဿနသပ္ပဋိဃေဟိ စ ဧကော၊ အနိဒဿနသပ္ပဋိဃေဟိ ဧကော၊ သနိဒဿနေဟိ ဧကော၊ သပ္ပဋိဃေဟိ စ ဥပါဒါဓမ္မေဟိ စ ဧကောတိ အဋ္ဌ ပဉှာ ကတာ။ တေသု ခန္ဓာဒိဝိဘာဂေါ ဧဝံ ဝေဒိတဗ္ဗော သေယျထိဒံ – ပဌမပဉှေ တာဝ စတူဟိ ခန္ဓေဟီတိ အရူပက္ခန္ဓေဟိ၊ ဒွီဟာယတနေဟီတိ စက္ခာယတနာဒီသု ဧကေကေန သဒ္ဓိံ မနာယတနေန၊ အဋ္ဌဟိ ဓာတူဟီတိ စက္ခုဓာတုအာဒီသု ဧကေကာယ သဒ္ဓိံ သတ္တဟိ ဝိညာဏဓာတူဟိ။

တတြာယံ နယော – စက္ခာယတနေန ဟိ ခန္ဓသင်္ဂဟေန ရူပက္ခန္ဓော သင်္ဂဟိတော။ တသ္မိံ သင်္ဂဟိတေ ရူပက္ခန္ဓေ အာယတနသင်္ဂဟေန စက္ခာယတနမေဝေကံ သင်္ဂဟိတံ။ သေသာနိ ဒသ အာယတနာနိ အသင်္ဂဟိတာနိ။ ဓာတုသင်္ဂဟေနပိ တေန စက္ခုဓာတုယေဝေကာ သင်္ဂဟိတာ။ သေသာ ဒသ ဓာတုယော အသင်္ဂဟိတာ။ ဣတိ ယာနိ တေန အသင်္ဂဟိတာနိ ဒသာယတနာနိ၊ တာနိ စက္ခာယတနမနာယတနေဟိ ဒွီဟိ အသင်္ဂဟိတာနိ။ ယာပိ တေန အသင်္ဂဟိတာ ဒသ ဓာတုယော၊ တာ စက္ခုဓာတုယာ စေဝ သတ္တဟိ စ ဝိညာဏဓာတူဟိ အသင်္ဂဟိတာတိ။ ရူပါယတနာဒီသုပိ ဧသေဝ နယော။

၁၇၂။ ဒုတိယပဉှေ – ယသ္မာ ယာယ ကာယစိ ဝိညာဏဓာတုယာ သင်္ဂဟိတော ဝိညာဏက္ခန္ဓော မနာယတနေန အသင်္ဂဟိတော နာမ နတ္ထိ၊ တသ္မာ အာယတနသင်္ဂဟေန သင်္ဂဟိတာတိ ဝုတ္တံ။ ဧတ္ထ ပန စတူဟိ ခန္ဓေဟီတိ ရူပါဒီဟိ စတူဟိ။ ဧကာဒသဟာယတနေဟီတိ မနာယတနဝဇ္ဇေဟိ။ ဒွါဒသဟိ ဓာတူဟီတိ ယထာနုရူပါ ဆ ဝိညာဏဓာတုယော အပနေတွာ သေသာဟိ ဒွါဒသဟိ။ စက္ခုဝိညာဏဓာတုယာ ဟိ စက္ခုဝိညာဏဓာတုယေဝ သင်္ဂဟိတာ၊ ဣတရာ အသင်္ဂဟိတာ။ သောတဝိညာဏဓာတုအာဒီသုပိ ဧသေဝ နယော။

၁၇၃။ တတိယပဉှေ – စက္ခုန္ဒြိယာဒီနံ ဝိဿဇ္ဇနံ စက္ခာယတနာဒိသဒိသမေဝ။ ဣတ္ထိန္ဒြိယပုရိသိန္ဒြိယေသု ပန ဓမ္မာယတနေန သဒ္ဓိံ ဒွေ အာယတနာနိ၊ ဓမ္မဓာတုယာ စ သဒ္ဓိံ အဋ္ဌ ဓာတုယော ဝေဒိတဗ္ဗာ။

၁၇၄။ စတုတ္ထပဉှေ – တီဟာယတနေဟီတိ ရူပါယတနဓမ္မာယတနမနာယတနေဟိ။ တေသု ဟိ ဘဝေသု ရူပါယတနဓမ္မာယတနဝသေန ဒွေဝ အာယတနာနိ တေဟိ သင်္ဂဟိတာနိ ။ သေသာနိ နဝ ရူပါယတနာနိ တေဟေဝ စ ဒွီဟိ၊ မနာယတနေန စာတိ တီဟိ အသင်္ဂဟိတာနိ နာမ ဟောန္တိ။ နဝဟိ ဓာတူဟီတိ ရူပဓာတုဓမ္မဓာတူဟိ သဒ္ဓိံ သတ္တဟိ ဝိညာဏဓာတူဟိ။

၁၇၅။ ပဉ္စမပဉှေ – ဒွီဟာယတနေဟီတိ ပဌမပဒံ သန္ဓာယ သဒ္ဒါယတနမနာယတနေဟိ။ ဒုတိယပဒံ သန္ဓာယ ရူပါယတနမနာယတနေဟိ။ ဓာတုယောပိ တေသံယေဝ ဧကေကေန သဒ္ဓိံ သတ္တ ဝိညာဏဓာတုယော ဝေဒိတဗ္ဗာ။

၁၇၆။ ဆဋ္ဌပဉှေ – ဒသဟာယတနေဟီတိ ရူပါယတနဓမ္မာယတနဝဇ္ဇေဟိ။ သောဠသဟိ ဓာတူဟီတိ ရူပဓာတုဓမ္မဓာတုဝဇ္ဇေဟေဝ။ ကထံ? အနိဒဿနသပ္ပဋိဃာ ဟိ ဓမ္မာ နာမ နဝ ဩဠာရိကာယတနာနိ။ တေဟိ ခန္ဓသင်္ဂဟေန သင်္ဂဟိတေ ရူပက္ခန္ဓေ၊ အာယတနသင်္ဂဟေန တာနေဝ နဝါယတနာနိ သင်္ဂဟိတာနိ။ ရူပါယတနဓမ္မာယတနာနိ အသင်္ဂဟိတာနိ။ ဓာတုသင်္ဂဟေနပိ တာ ဧဝ နဝ ဓာတုယော သင်္ဂဟိတာ။ ရူပဓာတုဓမ္မဓာတုယော အသင်္ဂဟိတာ။ ဣတိ ယာနိ တေဟိ အသင်္ဂဟိတာနိ ဒွေ အာယတနာနိ ၊ တာနိ ရူပါယတနဝဇ္ဇေဟိ နဝဟိ ဩဠာရိကာယတနေဟိ၊ မနာယတနေန စာတိ ဒသဟိ အသင်္ဂဟိတာနိ။ ယာပိ တေဟိ အသင်္ဂဟိတာ ဒွေ ဓာတုယော၊ တာ ရူပဓာတုဝဇ္ဇာဟိ နဝဟိ ဩဠာရိကဓာတူဟိ၊ သတ္တဟိ စ ဝိညာဏဓာတူဟီတိ သောဠသဟိ အသင်္ဂဟိတာတိ ဝေဒိတဗ္ဗာ။

၁၇၇။ သတ္တမပဉှေ – ဒွီဟာယတနေဟီတိ ရူပါယတနမနာယတနေဟိ။ အဋ္ဌဟိ ဓာတူဟီတိ ရူပဓာတုယာ သဒ္ဓိံ သတ္တဟိ ဝိညာဏဓာတူဟိ။

၁၇၈။ အဋ္ဌမပဉှေ – ဧကာဒသဟာယတနေဟီတိ သပ္ပဋိဃဓမ္မေ သန္ဓာယ ဓမ္မာယတနဝဇ္ဇေဟိ၊ ဥပါဒါဓမ္မေ သန္ဓာယ ဖောဋ္ဌဗ္ဗာယတနဝဇ္ဇေဟိ။ ဓာတူသုပိ ဧသေဝ နယော။ အတ္ထယောဇနာ ပနေတ္ထ ဟေဋ္ဌာ ဝုတ္တနယေနေဝ ဝေဒိတဗ္ဗာတိ။

သင်္ဂဟိတေနအသင်္ဂဟိတပဒဝဏ္ဏနာ။

၃။ တတိယနယော အသင်္ဂဟိတေနသင်္ဂဟိတပဒဝဏ္ဏနာ

၁၇၉။ ဣဒါနိ အသင်္ဂဟိတေနသင်္ဂဟိတပဒံ ဘာဇေတုံ ဝေဒနာက္ခန္ဓေနာတိအာဒိ အာရဒ္ဓံ။ တတြိဒံ လက္ခဏံ – ဣမသ္မိဉှိ ဝါရေ ယံ ခန္ဓပဒေန အသင်္ဂဟိတံ ဟုတွာ အာယတနဓာတုပဒေဟိ သင်္ဂဟိတံ၊ တဿ ခန္ဓာဒီဟိ သင်္ဂဟံ ပုစ္ဆိတွာ ဝိဿဇ္ဇနံ ကတံ။ တံ ပန ရူပက္ခန္ဓဝိညာဏက္ခန္ဓစက္ခာယတနာဒီသု န ယုဇ္ဇတိ။ ရူပက္ခန္ဓေန ဟိ စတ္တာရော ခန္ဓာ ခန္ဓသင်္ဂဟေန အသင်္ဂဟိတာ။ တေသု တေန ဧကဓမ္မောပိ အာယတနဓာတုသင်္ဂဟေန သင်္ဂဟိတော နာမ နတ္ထိ။ နနု စ ဝေဒနာဒယော ဓမ္မာယတနေန သင်္ဂဟိတာတိ? သင်္ဂဟိတာ။ န ပန ရူပက္ခန္ဓောဝ ဓမ္မာယတနံ၊ ရူပက္ခန္ဓတော ဟိ သုခုမရူပမတ္တံ ဓမ္မာယတနံ ဘဇတိ။ တသ္မာ ယေ ဓမ္မာယတနေန သင်္ဂဟိတာ၊ န တေ ရူပက္ခန္ဓေန သင်္ဂဟိတာ နာမ။ ဝိညာဏက္ခန္ဓေနပိ ဣတရေ စတ္တာရော ခန္ဓာ အသင်္ဂဟိတာ။ တေသု တေန ဧကောပိ အာယတနဓာတုသင်္ဂဟေန သင်္ဂဟိတော နာမ နတ္ထိ။ ဧဝံ သင်္ဂဟိတတာယ အဘာဝတော ဧတာနိ အညာနိ စ ဧဝရူပါနိ စက္ခာယတနာဒီနိ ပဒါနိ ဣမသ္မိံ ဝါရေ န ဂဟိတာနိ။ ယာနိ ပန ပဒါနိ ဝိညာဏေန ဝါ ဩဠာရိကရူပေန ဝါ အသမ္မိဿံ ဓမ္မာယတနေကဒေသံ ဒီပေန္တိ၊ တာနိ ဣဓ ဂဟိတာနိ။ တေသံ ဣဒမုဒ္ဒါနံ –

‘‘တယော ခန္ဓာ တထာ သစ္စာ၊ ဣန္ဒြိယာနိ စ သောဠသ၊

ပဒါနိ ပစ္စယာကာရေ၊ စုဒ္ဒသူပရိ စုဒ္ဒသ။

‘‘သမတိံသ ပဒါ ဟောန္တိ၊ ဂေါစ္ဆကေသု ဒသသွထ၊

ဒုဝေ စူဠန္တရဒုကာ၊ အဋ္ဌ ဟောန္တိ မဟန္တရာ’’တိ။

ဧတေသု ပန ပဒေသု သဒိသဝိဿဇ္ဇနာနိ ပဒါနိ ဧကတော ကတွာ သဗ္ဗေပိ ဒွါဒသ ပဉှာ ဝုတ္တာ။ တေသု ဧဝံ ခန္ဓဝိဘာဂေါ ဝေဒိတဗ္ဗော။ အာယတနဓာတူသု ပန ဘေဒေါ နတ္ထိ။ တတ္ထ ပဌမပဉှေ တာဝ – တီဟိ ခန္ဓေဟီတိ ရူပသညာသင်္ခါရက္ခန္ဓေဟိ။ အာယတနဓာတုယော ပန ဓမ္မာယတနဓမ္မဓာတုဝသေန ဝေဒိတဗ္ဗာ။

တတြာယံ နယော – ဝေဒနာက္ခန္ဓေန ဟိ နိဗ္ဗာနဉ္စ သုခုမရူပသညာသင်္ခါရာ စ ခန္ဓသင်္ဂဟေန အသင်္ဂဟိတာ ဟုတွာ အာယတနဓာတုသင်္ဂဟေန သင်္ဂဟိတာ။ တေသု နိဗ္ဗာနံ ခန္ဓသင်္ဂဟံ န ဂစ္ဆတိ၊ သေသာ ရူပသညာသင်္ခါရက္ခန္ဓေဟိ သင်္ဂဟံ ဂစ္ဆန္တိ။ အာယတနဓာတုသင်္ဂဟံ ပန နိဗ္ဗာနမ္ပိ ဂစ္ဆတေဝ။ တေန ဝုတ္တံ – ‘‘အသင်္ခတံ ခန္ဓတော ဌပေတွာ တီဟိ ခန္ဓေဟိ၊ ဧကေနာယတနေန၊ ဧကာယ ဓာတုယာ သင်္ဂဟိတာ’’တိ။ သညာက္ခန္ဓပက္ခေ ပနေတ္ထ သညံ အပနေတွာ ဝေဒနာယ သဒ္ဓိံ တယော ခန္ဓာ သင်္ခါရာဒီသု သင်္ခါရက္ခန္ဓံ အပနေတွာ ရူပဝေဒနာသညာဝသေန တယော ခန္ဓာ ဝေဒိတဗ္ဗာ။

၁၈၀။ ဒုတိယေ – စတူဟိ ခန္ဓေဟီတိ ဝိညာဏဝဇ္ဇေဟိ။ တေ ဟိ နိရောဓေန ခန္ဓသင်္ဂဟေန အသင်္ဂဟိတာ ဟုတွာ အာယတနဓာတုသင်္ဂဟေန သင်္ဂဟိတာ။

၁၈၁။ တတိယေ – ဒွီဟီတိ ဝေဒနာသညာက္ခန္ဓေဟိ။ ရူပါရူပဇီဝိတိန္ဒြိယေန ဟိ ဝေဒနာသညာဝိညာဏက္ခန္ဓာ စ ခန္ဓသင်္ဂဟေန အသင်္ဂဟိတာ။ တေသု ပန ဝေဒနာသညာဝ အာယတနဓာတုသင်္ဂဟေန သင်္ဂဟိတာ။ တေန ဝုတ္တံ – ‘‘ဝေဒနာသညာက္ခန္ဓေဟီ’’တိ။ ဣမိနာ ဥပါယေန သဗ္ဗတ္ထ ခန္ဓဘေဒေါ ဝေဒိတဗ္ဗော။ ဣတော ပရဉှိ ခန္ဓာနံ နာမမတ္တမေဝ ဝက္ခာမ။

၁၈၂။ စတုတ္ထေ – တီဟိ ခန္ဓေဟီတိ ဣတ္ထိန္ဒြိယပုရိသိန္ဒြိယေသု ဝေဒနာသညာသင်္ခါရေဟိ၊ ဝေဒနာပဉ္စကေ ရူပသညာသင်္ခါရေဟိ၊ သဒ္ဓိန္ဒြိယာဒီသု ဖဿပရိယောသာနေသု ရူပဝေဒနာသညာက္ခန္ဓေဟိ။ ဝေဒနာယ ဝေဒနာက္ခန္ဓသဒိသောဝ တဏှုပါဒါနကမ္မဘဝေသု သင်္ခါရက္ခန္ဓသဒိသောဝ ဝိနိစ္ဆယော။

၁၈၃။ ပဉ္စမေ – ဇာတိဇရာမရဏေသု ဇီဝိတိန္ဒြိယသဒိသောဝ။ ဈာနေန ပန နိဗ္ဗာနံ သုခုမရူပံ သညာ စ ခန္ဓသင်္ဂဟေန အသင်္ဂဟိတာ ဟုတွာ အာယတနဓာတုသင်္ဂဟေန သင်္ဂဟိတာ။ တသ္မာ တံ သန္ဓာယ ရူပက္ခန္ဓသညာက္ခန္ဓာနံ ဝသေန ဒွေ ခန္ဓာ ဝေဒိတဗ္ဗာ။

၁၈၄။ ဆဋ္ဌေ – သောကာဒိတ္တယေ ဝေဒနာယ သဒိသော။ ဥပါယာသာဒီသု သင်္ခါရသဒိသော။ ပုန ဝေဒနာယ ဝေဒနာက္ခန္ဓသဒိသော၊ သညာယ သညာက္ခန္ဓသဒိသော၊ စေတနာဒီသု သင်္ခါရက္ခန္ဓသဒိသော ဝိနိစ္ဆယော။ ဣမိနာ ဥပါယေန သတ္တမပဉှာဒီသုပိ သင်္ဂဟာသင်္ဂဟော ဝေဒိတဗ္ဗောတိ။

အသင်္ဂဟိတေနသင်္ဂဟိတပဒဝဏ္ဏနာ။

၄။ စတုတ္ထနယော သင်္ဂဟိတေနသင်္ဂဟိတပဒဝဏ္ဏနာ

၁၉၁။ ဣဒါနိ သင်္ဂဟိတေနသင်္ဂဟိတပဒံ ဘာဇေတုံ သမုဒယသစ္စေနာတိအာဒိ အာရဒ္ဓံ။ တတ္ထ ယံ ခန္ဓာဒီဟိ သင်္ဂဟိတေန ခန္ဓာဒိဝသေန သင်္ဂဟိတံ၊ ပုန တဿေဝ ခန္ဓာဒီဟိ သင်္ဂဟံ ပုစ္ဆိတွာ ဝိဿဇ္ဇနံ ကတံ။ တံ ခန္ဓာယတနဓာတူသု ဧကမ္ပိ သကလကောဋ္ဌာသံ ဂဟေတွာ ဌိတပဒေသု န ယုဇ္ဇတိ။ သကလေန ဟိ ခန္ဓာဒိပဒေန အညံ ခန္ဓာဒိဝသေန သင်္ဂဟိတံ နာမ နတ္ထိ၊ ယံ အတ္တနော သင်္ဂါဟကံ သင်္ဂဏှိတွာ ပုန တေနေဝ သင်္ဂဟံ ဂစ္ဆေယျ။ တသ္မာ တထာရူပါနိ ပဒါနိ ဣမသ္မိံ ဝါရေ န ဂဟိတာနိ။ ယာနိ ပန ပဒါနိ သင်္ခါရေကဒေသံ ဝါ အညေန အသမ္မိဿံ ဒီပေန္တိ – ဝေဒနေကဒေသံ ဝါ သုခုမရူပံ ဝါ သဒ္ဒေကဒေသံ ဝါ၊ တာနိ ဣဓ ဂဟိတာနိ။ တေသံ ဣဒမုဒ္ဒါနံ –

‘‘ဒွေ သစ္စာ ပန္နရသိန္ဒြိယာ၊ ဧကာဒသ ပဋိစ္စပဒါ၊

ဥဒ္ဓံ ပုန ဧကာဒသ၊ ဂေါစ္ဆကပဒမေတ္ထ တိံသဝိဓ’’န္တိ။

ပဉှာ ပနေတ္ထ ဒွေယေဝ ဟောန္တိ။ တတ္ထ ယံ ပုစ္ဆာယ ဥဒ္ဓဋံ ပဒံ၊ တဒေဝ ယေဟိ ဓမ္မေဟိ ခန္ဓာဒိဝသေန သင်္ဂဟိတံ၊ တေ ဓမ္မေ သန္ဓာယ သဗ္ဗတ္ထ ဧကေန ခန္ဓေနာတိအာဒိ ဝုတ္တံ။ တတြာယံ နယော – သမုဒယသစ္စေန ဟိ တဏှာဝဇ္ဇာ သေသာ သင်္ခါရာ ခန္ဓာဒိသင်္ဂဟေန သင်္ဂဟိတာ။ ပုန တေဟိ တဏှာဝ သင်္ဂဟိတာ။ သာ တဏှာ ပုန သင်္ခါရေဟေဝ ခန္ဓာဒိသင်္ဂဟေန သင်္ဂဟိတာတိ။ ဧသေဝ နယော သဗ္ဗတ္ထ။ အရူပဓမ္မပုစ္ဆာသု ပနေတ္ထ သင်္ခါရက္ခန္ဓော ဝါ ဝေဒနာက္ခန္ဓော ဝါ ဧကော ခန္ဓော နာမ။ ရူပဓမ္မပုစ္ဆာသု ရူပက္ခန္ဓော။ ပရိဒေဝပုစ္ဆာယ သဒ္ဒါယတနံ ဧကံ အာယတနံ နာမ။ သဒ္ဒဓာတု ဧကာ ဓာတု နာမ၊ သေသဋ္ဌာနေသု ဓမ္မာယတနဓမ္မဓာတုဝသေနေဝ အတ္ထော ဝေဒိတဗ္ဗောတိ။

သင်္ဂဟိတေနသင်္ဂဟိတပဒဝဏ္ဏနာ။

၅။ ပဉ္စမနယော အသင်္ဂဟိတေနအသင်္ဂဟိတပဒဝဏ္ဏနာ

၁၉၃။ ဣဒါနိ အသင်္ဂဟိတေန အသင်္ဂဟိတပဒံ ဘာဇေတုံ ရူပက္ခန္ဓေနာတိအာဒိ အာရဒ္ဓံ။ တတ္ထ ယံ ခန္ဓာဒီဟိ အသင်္ဂဟိတေန ခန္ဓာဒိဝသေန အသင်္ဂဟိတံ၊ ပုန တဿေဝ ခန္ဓာဒီဟိ အသင်္ဂဟံ ပုစ္ဆိတွာ ဝိဿဇ္ဇနံ ကတံ။ တံ ပဉ္စက္ခန္ဓဂ္ဂါဟကေသု ဒုက္ခသစ္စာဒီသု ဝိညာဏေန သဒ္ဓိံ သုခုမရူပဂ္ဂါဟကေသု အနိဒဿနအပ္ပဋိဃာဒီသု စ ပဒေသု န ယုဇ္ဇတိ။ တာဒိသေန ဟိ ပဒေန နိဗ္ဗာနံ ခန္ဓသင်္ဂဟမတ္တံ န ဂစ္ဆေယျ။ သေသာ ခန္ဓာဒီဟိ အသင်္ဂဟိတဓမ္မာ နာမ နတ္ထိ။ တသ္မာ တထာရူပါနိ ပဒါနိ ဣမသ္မိံ ဝါရေ န ဂဟိတာနိ။ ယာနိ ပန ပဉ္စက္ခန္ဓေ ဝိညာဏဉ္စ သုခုမရူပေန သဒ္ဓိံ ဧကတော န ဒီပေန္တိ၊ တာနိ ဣဓ ဂဟိတာနိ။ တေသံ ဣဒမုဒ္ဒါနံ –

‘‘သဗ္ဗေ ခန္ဓာ တထာယတနဓာတုယော သစ္စတော တယော၊

ဣန္ဒြိယာနိပိ သဗ္ဗာနိ၊ တေဝီသတိ ပဋိစ္စတော။

‘‘ပရတော သောဠသ ပဒါ၊ တေစတ္တာလီသကံ တိကေ၊

ဂေါစ္ဆကေ သတ္တတိ ဒွေ စ၊ သတ္တ စူဠန္တရေ ပဒါ။

‘‘မဟန္တရေ ပဒါ ဝုတ္တာ၊ အဋ္ဌာရသ တတော ပရံ၊

အဋ္ဌာရသေဝ ဉာတဗ္ဗာ၊ သေသာ ဣဓ န ဘာသိတာ’’တိ။

ပဉှာ ပနေတ္ထ သဒိသဝိဿဇ္ဇနာနံ ဝသေန သမောဓာနေတွာ ကတိဟိ သဒ္ဓိံ သဗ္ဗေပိ စတုတ္တိံသ ဟောန္တိ။ တတ္ထ ယံ ပုစ္ဆာယ ဥဒ္ဓဋံ ပဒံ၊ တဒေဝ ယေဟိ ခန္ဓာဒီဟိ အသင်္ဂဟိတံ၊ တေ ဓမ္မေ သန္ဓာယ ဧကေန ခန္ဓေနာတိအာဒိ ဝုတ္တံ။

တတြာယံ နယော – ရူပက္ခန္ဓေန ဟိ စတ္တာရော ခန္ဓာ နိဗ္ဗာနဉ္စ ခန္ဓသင်္ဂဟေန အသင်္ဂဟိတာ။ အာယတနဓာတုသင်္ဂဟေန ပန ဌပေတွာ ဝိညာဏံ အဝသေသာ သင်္ဂဟိတာတိ ဝိညာဏမေဝ တီဟိပိ ခန္ဓသင်္ဂဟာဒီဟိ အသင်္ဂဟိတံ နာမ။ ပုန တေန ဝိညာဏေန သဒ္ဓိံ နိဗ္ဗာနေန စတ္တာရော ခန္ဓာ ခန္ဓာဒိသင်္ဂဟေန အသင်္ဂဟိတာ။ တေ သဗ္ဗေပိ ပုန ဝိညာဏေနေဝ ခန္ဓာဒိသင်္ဂဟေန အသင်္ဂဟိတာတိ ဧကေန ခန္ဓေန၊ ဧကေနာယတနေန၊ သတ္တဟိ ဓာတူဟိ အသင်္ဂဟိတာ နာမ ဟောန္တိ။ အထ ဝါ – ယဒေတံ ရူပက္ခန္ဓေန ဝိညာဏမေဝ တီဟိ ခန္ဓာဒိသင်္ဂဟေဟိ အသင်္ဂဟိတံ၊ တေဟိပိ ဝိညာဏဓမ္မေဟိ တေ ရူပဓမ္မာဝ တီဟိ သင်္ဂဟေဟိ အသင်္ဂဟိတာ။ ပုန တေ ရူပဓမ္မာ ဝိညာဏေနေဝ တီဟိ သင်္ဂဟေဟိ အသင်္ဂဟိတာ။ ဝိညာဏဉ္စ ခန္ဓတော ဧကော ဝိညာဏက္ခန္ဓော ဟောတိ၊ အာယတနတော ဧကံ မနာယတနံ၊ ဓာတုတော သတ္တ ဝိညာဏဓာတုယော။ တသ္မာ ‘‘ဧကေန ခန္ဓေနာ’’တိအာဒိ ဝုတ္တံ။ ဣမိနာ ဥပါယေန သဗ္ဗတ္ထ ယံ ပုစ္ဆာယ ဥဒ္ဓဋံ ပဒံ၊ တဒေဝ ယေဟိ ဓမ္မေဟိ ခန္ဓာဒိဝသေန အသင်္ဂဟိတံ၊ တေသံ ဓမ္မာနံ ဝသေန ခန္ဓာဒယော ဝေဒိတဗ္ဗာ။ တတ္ထ ဒုတိယပဉှေ တာဝ – ရူပဝိညာဏာနံ ဝသေန ဝေဒိတဗ္ဗာ။ ဝေဒနာဒယော ဟိ ရူပဝိညာဏေဟေဝ ခန္ဓာဒိသင်္ဂဟေန အသင်္ဂဟိတာ။ တေ စ ဒွေ ခန္ဓာ ဧကာဒသာယတနာနိ သတ္တရသ ဓာတုယော ဟောန္တိ။

၁၉၅။ တတိယပဉှေ – ဝိညာဏံ ရူပါဒီဟိ စတူဟိ အသင်္ဂဟိတန္တိ တေသံ ဝသေန ခန္ဓာဒယော ဝေဒိတဗ္ဗာ။

၁၉၆။ စတုတ္ထပဉှေ – စက္ခာယတနံ ဝေဒနာဒီဟိ စတူဟီတိ ဣမိနာ နယေန သဗ္ဗတ္ထ ခန္ဓာဒယော ဝေဒိတဗ္ဗာ။ ပရိယောသာနေ – ရူပဉ္စ ဓမ္မာယတနန္တိ ဥဒ္ဒါနဂါထာယ ဒဿိတဓမ္မာယေဝ အညေနာကာရေန သင်္ခိပိတွာ ဒဿိတာတိ။

အသင်္ဂဟိတေနအသင်္ဂဟိတပဒဝဏ္ဏနာ။

၆။ ဆဋ္ဌနယော သမ္ပယောဂဝိပ္ပယောဂပဒဝဏ္ဏနာ

၂၂၈။ ဣဒါနိ သမ္ပယောဂဝိပ္ပယောဂပဒံ ဘာဇေတုံ ရူပက္ခန္ဓောတိအာဒိ အာရဒ္ဓံ။ တတ္ထ ယံ လဗ္ဘတိ ယဉ္စ န လဗ္ဘတိ တံ သဗ္ဗံ ပုစ္ဆာယ ဂဟိတံ။ ဝိဿဇ္ဇနေ ပန ယံ န လဗ္ဘတိ၊ တံ နတ္ထီတိ ပဋိက္ခိတ္တံ။ စတူဟိ သမ္ပယောဂေါ၊ စတူဟိ ဝိပ္ပယောဂေါ၊ သဘာဂေါ ဝိသဘာဂေါတိ ဟိ ဝစနတော စတူဟိ အရူပက္ခန္ဓေဟေဝ သဘာဂါနံ ဧကသန္တာနသ္မိံ ဧကက္ခဏေ ဥပ္ပန္နာနံ အရူပက္ခန္ဓာနံယေဝ အညမညံ သမ္ပယောဂေါ လဗ္ဘတိ။ ရူပဓမ္မာနံ ပန ရူပေန နိဗ္ဗာနေန ဝါ၊ နိဗ္ဗာနဿ စ ရူပေန သဒ္ဓိံ သမ္ပယောဂေါ နာမ နတ္ထိ။ တထာ ရူပနိဗ္ဗာနာနံ အရူပက္ခန္ဓေဟိ၊ ဝိသဘာဂါ ဟိ တေ တေသံ။ ယထာ စ အရူပက္ခန္ဓာနံ ရူပနိဗ္ဗာနေဟိ၊ ဧဝံ ဘိန္နသန္တာနေဟိ နာနာက္ခဏိကေဟိ အရူပဓမ္မေဟိပိ သဒ္ဓိံ နတ္ထိယေဝ။ တေပိ ဟိ တေသံ သန္တာနက္ခဏဝိသဘာဂတာယ ဝိသဘာဂါယေဝ။ အယံ ပန ဝိသဘာဂတာ သင်္ဂဟဋ္ဌေန ဝိရုဇ္ဈနတော သင်္ဂဟနယေ နတ္ထိ။ ဂဏနူပဂမတ္တဉှိ သင်္ဂဟဋ္ဌော။ သမ္ပယောဂနယေ ပန အတ္ထိ၊ ဧကုပ္ပာဒတာဒိလက္ခဏဉှိ သမ္ပယောဂဋ္ဌောတိ။ ဧဝမေတ္ထ ယဿ ဧကဓမ္မေနပိ သမ္ပယောဂလက္ခဏံ န ယုဇ္ဈတိ၊ တဿ ပုစ္ဆာယ သင်္ဂဟံ ကတွာပိ နတ္ထီတိ ပဋိက္ခေပေါ ကတော။ ယဿ ဝိပ္ပယောဂလက္ခဏံ ယုဇ္ဇတိ၊ တဿ ဝိပ္ပယောဂေါ ဒဿိတော။ ယာနိ ပန ပဒါနိ သတ္တသု ဝိညာဏဓာတူသု ဧကာယပိ အဝိပ္ပယုတ္တေ ရူပေန နိဗ္ဗာနေန ဝါ မိဿကဓမ္မေ ဒီပေန္တိ၊ တာနိ သဗ္ဗထာပိ ဣဓ န ယုဇ္ဇန္တီတိ န ဂဟိတာနိ။ တေသံ ဣဒမုဒ္ဒါနံ –

‘‘ဓမ္မာယတနံ ဓမ္မဓာတု၊ ဒုက္ခသစ္စဉ္စ ဇီဝိတံ၊

သဠာယတနံ နာမရူပံ၊ စတ္တာရော စ မဟာဘဝါ။

‘‘ဇာတိဇရာ စ မရဏံ၊ တိကေသွေကူနဝီသတိ၊

ဂေါစ္ဆကေသု စ ပညာသ၊ အဋ္ဌ စူဠန္တရေ ပဒါ။

‘‘မဟန္တရေ ပန္နရသ၊ အဋ္ဌာရသ တတော ပရေ၊

တေဝီသ ပဒသတံ ဧတံ၊ သမ္ပယောဂေ န လဗ္ဘတီ’’တိ။

ဓမ္မာယတနဉှိ ရူပနိဗ္ဗာနမိဿကတ္တာ တသ္မိံ အပရိယာပန္နေန ဝိညာဏေနပိ န သက္ကာ သမ္ပယုတ္တန္တိ ဝတ္တုံ။ ယသ္မာ ပနေတ္ထ ဝေဒနာဒယော ဝိညာဏေန သမ္ပယုတ္တာ၊ တသ္မာ ဝိပ္ပယုတ္တန္တိပိ န သက္ကာ ဝတ္တုံ။ သေသေသုပိ ဧသေဝ နယော။ ဧဝံ သဗ္ဗတ္ထာပိ ဧတာနိ န ယုဇ္ဇန္တီတိ ဣဓ န ဂဟိတာနိ။ သေသာနိ ခန္ဓာဒီနိ ယုဇ္ဇန္တီတိ တာနိ ဂဟေတွာ ဧကေကဝသေန စ သမောဓာနေန စ ပဉှဝိဿဇ္ဇနံ ကတံ။ တေသု ပဉှေသု၊ ပဌမေ – ဧကေနာယတနေနာတိ မနာယတနေန။ ကေဟိစီတိ ဓမ္မာယတနဓမ္မဓာတုပရိယာပန္နေဟိ ဝေဒနာသညာသင်္ခါရေဟိ။

၂၂၉။ ဒုတိယေ – တီဟီတိ ပုစ္ဆိတံ ပုစ္ဆိတံ ဌပေတွာ သေသေဟိ။ ကေဟိစိ သမ္ပယုတ္တောတိ ဝေဒနာက္ခန္ဓော သညာသင်္ခါရေဟိ။ ဣတရေပိ အတ္တာနံ ဌပေတွာ ဣတရေဟိ။ ကေဟိစိ ဝိပ္ပယုတ္တောတိ ရူပနိဗ္ဗာနေဟိ။ ဧဝံ သဗ္ဗတ္ထ ရူပဿ ဝိပ္ပယောဂေ ဓမ္မာယတနဓမ္မဓာတူသု အရူပံ၊ အရူပဿ ဝိပ္ပယောဂေ ရူပံ ဒဋ္ဌဗ္ဗံ။ တတိယပဉှော ဥတ္တာနတ္ထောဝ။

၂၃၁။ စတုတ္ထေ – ‘ကတိဟိ ခန္ဓေဟီ’တိအာဒိံ အဝတွာ သမ္ပယုတ္တန္တိ နတ္ထီတိ ဝုတ္တံ။ တံ ပန ခန္ဓာဒီနံယေဝ ဝသေန ဝေဒိတဗ္ဗံ။ ပရတောပိ ဧဝရူပေသု ပဉှေသု ဧသေဝ နယော။ အာဒိပဉှသ္မိဉှိ သရူပတော ဒဿေတွာ ပရတော ပါဠိ သံခိတ္တာ။ ဣမိနာ နယေန သဗ္ဗတ္ထ အတ္ထယောဇနာ ဝေဒိတဗ္ဗာ။ ယတ္ထ ပန နာတိပါကဋာ ဘဝိဿတိ၊ တတ္ထ နံ ပါကဋံ ကတွာဝ ဂမိဿာမ။

၂၃၄။ သောဠသဟိ ဓာတူဟီတိ စက္ခုဝိညာဏဓာတု တာဝ အတ္တာနံ ဌပေတွာ ဆဟိ ဝိညာဏဓာတူဟိ၊ ဒသဟိ စ ရူပဓာတူဟိ။ သေသာသုပိ ဧသေဝ နယော။

၂၃၅။ တီဟိခန္ဓေဟီတိ သင်္ခါရက္ခန္ဓံ ဌပေတွာ သေသေဟိ။ ဧကာယ ဓာတုယာတိ မနောဝိညာဏဓာတုယာ။ သမုဒယမဂ္ဂါနဉှိ အညာယ ဓာတုယာ သမ္ပယောဂေါ နတ္ထိ။ ဧကေန ခန္ဓေနာတိ သင်္ခါရက္ခန္ဓေန။ ဧကေနာယတနေနာတိ ဓမ္မာယတနေန။ ဧကာယဓာတုယာတိ ဓမ္မဓာတုယာ။ ဧတေသု ဟိ တံ သစ္စဒွယံ ကေဟိစိ သမ္ပယုတ္တံ။

၂၃၈။ သုခိန္ဒြိယာဒိပဉှေ – တီဟီတိ သညာသင်္ခါရဝိညာဏေဟိ။ ဧကာယ ဓာတုယာတိ ကာယဝိညာဏဓာတုယာ၊ မနောဝိညာဏဓာတုယာ စ။ ဆဟိ ဓာတူဟီတိ ကာယဝိညာဏဓာတုဝဇ္ဇာဟိ။

၂၄၅။ ရူပဘဝပဉှေ – သဗ္ဗေသမ္ပိ အရူပက္ခန္ဓာနံ အရူပါယတနာနဉ္စ အတ္ထိတာယ န ကေဟိစီတိ ဝုတ္တံ။ ဃာနဇိဝှာကာယဝိညာဏဓာတူနံ ပန နတ္ထိတာယ တီဟိ ဓာတူဟိ ဝိပ္ပယုတ္တောတိ ဝုတ္တံ။

၂၅၆။ အဓိမောက္ခပဉှေ – ဒွီဟိ ဓာတူဟီတိ မနောဓာတုမနောဝိညာဏဓာတူဟိ။ ပန္နရသဟီတိ သေသာဟိ ဒသဟိ ရူပဓာတူဟိ၊ ပဉ္စဟိ စ စက္ခုဝိညာဏာဒီဟိ။

၂၅၇။ ကုသလပဉှေ – ကုသလေဟိ စတုန္နမ္ပိ ခန္ဓာနံ ဂဟိတတ္တာ သမ္ပယောဂေါ ပဋိက္ခိတ္တော။

၂၅၈။ ဝေဒနာတ္တိကပဉှေ – ဧကေန ခန္ဓေနာတိ ဝေဒနာက္ခန္ဓေနေဝ။ ပန္နရသဟီတိ စက္ခုသောတဃာနဇိဝှာဝိညာဏဓာတုမနောဓာတူဟိ စေဝ ရူပဓာတူဟိ စ။ ဧကာဒသဟီတိ ကာယဝိညာဏဓာတုယာ သဒ္ဓိံ ရူပဓာတူဟိ။

၂၆၂။ နေဝဝိပါကနဝိပါကဓမ္မဓမ္မပဉှေ – ပဉ္စဟီတိ စက္ခုဝိညာဏာဒီဟိ။ အနုပါဒိန္နအနုပါဒါနိယပဉှေ – ဆဟီတိ မနောဝိညာဏဓာတုဝဇ္ဇာဟိ။ သဝိတက္ကသဝိစာရပဉှေ – ပန္နရသဟီတိ ပဉ္စဟိ ဝိညာဏေဟိ သဒ္ဓိံ ရူပဓာတူဟိ။ အဝိတက္ကဝိစာရမတ္တပဉှေ – ဧကေန ခန္ဓေနာတိအာဒိ သင်္ခါရက္ခန္ဓဝသေနေဝ ဝေဒိတဗ္ဗံ။ ဒုတိယဇ္ဈာနဝိစာရဉှိ ဌပေတွာ သေသာ အဝိတက္ကဝိစာရမတ္တာ နာမ။ ပီတိံ ဌပေတွာ သေသာ ပီတိသဟဂတာ။ တတ္ထ ဝိစာရော ဝိစာရေန၊ ပီတိ စ ပီတိယာ န သမ္ပယုတ္တာတိ သင်္ခါရက္ခန္ဓဓမ္မာယတနဓမ္မဓာတူသု ကေဟိစိ သမ္ပယုတ္တာ နာမ။ သောဠသဟီတိ ဓမ္မဓာတုမနောဝိညာဏဓာတုဝဇ္ဇာဟေဝ။ အဝိတက္ကအဝိစာရပဉှေ – ဧကာယ ဓာတုယာတိ မနောဓာတုယာ။ သုခသဟဂတာ ဥပေက္ခာသဟဂတာ စ ဝေဒနာတ္တိကေ ဝုတ္တာဝ။ ဒဿနေနပဟာတဗ္ဗာဒယော ကုသလသဒိသာဝ။

၂၇၁။ ပရိတ္တာရမ္မဏံ ဝိပါကဓမ္မသဒိသံ။ ဧကာယ ဓာတုယာတိ ဓမ္မဓာတုယာ။ ကေဟိစီတိ ယေ တတ္ထ ပရိတ္တာရမ္မဏာ န ဟောန္တိ၊ တေဟိ။ ဓမ္မဓာတု ပန ပရိတ္တာရမ္မဏာနံ ဆန္နံ စိတ္တုပ္ပာဒါနံ ဝသေန စတူဟိ ခန္ဓေဟိ သင်္ဂဟိတတ္တာ ပဌမပဋိက္ခေပမေဝ ဘဇတိ။ မဟဂ္ဂတာရမ္မဏာဒယော ကုသလသဒိသာဝ။

၂၇၃။ အနုပ္ပန္နေသု – ပဉ္စဟိ ဓာတူဟီတိ စက္ခုဝိညာဏာဒီဟိ။ တာနိ ဟိ ဧကန္တေန ဥပ္ပာဒိဓမ္မဘူတာနေဝ၊ ဥပ္ပန္နကောဋ္ဌာသမ္ပိ ပန ဘဇန္တိ။ ပစ္စုပ္ပန္နာရမ္မဏာဒယော ပရိတ္တာရမ္မဏသဒိသာဝ ။ ဟေတုအာဒယော သမုဒယသဒိသာဝ။ သဟေတုကာ စေဝ န စ ဟေတူပိ ပီတိသဟဂတသဒိသာဝ။ တထာ ပရာမာသသမ္ပယုတ္တာ။ အနုပါဒိန္နာ အနုပ္ပန္နသဒိသာဝ။ သေသံ သဗ္ဗတ္ထ ဥတ္တာနတ္ထမေဝါတိ။

သမ္ပယောဂဝိပ္ပယောဂပဒဝဏ္ဏနာ။

၇။ သတ္တမနယော သမ္ပယုတ္တေနဝိပ္ပယုတ္တပဒဝဏ္ဏနာ

၃၀၆။ ဣဒါနိ သမ္ပယုတ္တေနဝိပ္ပယုတ္တပဒံ ဘာဇေတုံ ဝေဒနာက္ခန္ဓေနာတိအာဒိ အာရဒ္ဓံ။ တတြိဒံ လက္ခဏံ – ဣမသ္မိဉှိ ဝါရေ ပုစ္ဆာယ ဥဒ္ဓဋပဒေန ယေ ဓမ္မာ သမ္ပယုတ္တာ၊ တေဟိ ယေ ဓမ္မာ ဝိပ္ပယုတ္တာ၊ တေသံ ခန္ဓာဒီဟိ ဝိပ္ပယောဂံ ပုစ္ဆိတွာ ဝိဿဇ္ဇနံ ကတံ။ တံ ပန ရူပက္ခန္ဓာဒီသု န ယုဇ္ဇတိ။ ရူပက္ခန္ဓေန ဟိ သမ္ပယုတ္တာ နာမ နတ္ထိ။ တသ္မာ တဉ္စ အညာနိ စ ဧဝရူပါနိ ပဒါနိ ဣမသ္မိံ ဝါရေ န ဂဟိတာနိ။ ယာနိ ပန ပဒါနိ ဓမ္မဓာတုယာ သမ္ပယုတ္တေ ဓမ္မေ ဝိညာဏဉ္စ အညေန အသမ္မိဿံ ဒီပေန္တိ၊ တာနိ ဣဓ ဂဟိတာနိ။ တေသံ ဣဒမုဒ္ဒါနံ –

‘‘စတ္တာရော ခန္ဓာယတနဉ္စ ဧကံ၊

ဒွေ ဣန္ဒြိယာ ဓာတုပဒါနိ သတ္တ၊

တယော ပဋိစ္စာ အထ ဖဿသတ္တကံ၊

တိကေ တယော သတ္တ မဟန္တရေ စ။

‘‘ဧကံ သဝိတက္ကံ၊ သဝိစာရမေကံ၊

ယုတ္တံ ဥပေက္ခာယ စ ဧကမေဝါ’’တိ။

ပရိယောသာနေ – ခန္ဓာ စတုရောတိအာဒိနာပိ အယမေဝတ္ထော သင်္ဂဟိတော။ တတ္ထ ယာနိ ပဒါနိ သဒိသဝိဿဇ္ဇနာနိ၊ တာနိ ဥပ္ပဋိပါဋိယာပိ သမောဓာနေတွာ တတ္ထ ဝေဒနာက္ခန္ဓာဒိကာ ပဉှာ ကတာ။ တေသု ဧဝံ ခန္ဓာဒိဝိဘာဂေါ ဝေဒိတဗ္ဗော။ ဝေဒနာက္ခန္ဓာဒိပဉှေ တာဝ – ဧကေနာတိ မနာယတနေန။ သတ္တဟီတိ ဝိညာဏဓာတူဟိ။ ကေဟိစီတိ ဓမ္မာယတနေ ဝေဒနာဒီဟိ။ ဝိညာဏဓာတုပဉှေ – တေ ဓမ္မာ န ကေဟိစီတိ တေ ပုစ္ဆာယ ဥဒ္ဓဋပဒံ ဝိညာဏဓာတုံ ဌပေတွာ သေသာ ဆ ဝိညာဏဓာတုဓမ္မာ၊ ရူပံ၊ နိဗ္ဗာနဉ္စ။ တေဟိ သဗ္ဗေသံ ခန္ဓာယတနာနံ သင်္ဂဟိတတ္တာ န ကေဟိစိ ခန္ဓေဟိ အာယတနေဟိ ဝါ ဝိပ္ပယုတ္တာ။ ဧကာယ ဓာတုယာတိ ယာ ယာ ပုစ္ဆာယ ဥဒ္ဓဋာ ဟောတိ တာယ တာယ။

၃၀၉။ ဥပေက္ခိန္ဒြိယပဉှေ – ပဉ္စဟီတိ ဥပေက္ခာသမ္ပယုတ္တာဟိ စက္ခုဝိညာဏဓာတုအာဒီဟိ။ ဣမိနာ နယေန သဗ္ဗတ္ထ ပုစ္ဆာယ ဥဒ္ဓဋပဒေနေဝ သဒ္ဓိံ ဝိပ္ပယုတ္တာနံ ဝသေန အတ္ထော ဝေဒိတဗ္ဗောတိ။

သမ္ပယုတ္တေနဝိပ္ပယုတ္တပဒဝဏ္ဏနာ။

၈။ အဋ္ဌမနယော ဝိပ္ပယုတ္တေနသမ္ပယုတ္တပဒဝဏ္ဏနာ

၃၁၇။ ဣဒါနိ ဝိပ္ပယုတ္တေနသမ္ပယုတ္တပဒံ ဘာဇေတုံ ရူပက္ခန္ဓေနာတိအာဒိ အာရဒ္ဓံ။ တတ္ထ သဗ္ဗာပိ ပုစ္ဆာ မောဃပုစ္ဆာဝ ။ ရူပက္ခန္ဓေန ဟိ ဝိပ္ပယုတ္တာ နာမ စတ္တာရော ခန္ဓာ၊ တေသံ အညေဟိ သမ္ပယောဂေါ နတ္ထိ။ ဝေဒနာက္ခန္ဓေန ဝိပ္ပယုတ္တံ ရူပံ နိဗ္ဗာနဉ္စ၊ တဿ စ ကေနစိ သမ္ပယောဂေါ နတ္ထိ။ ဧဝံ သဗ္ဗပဒေသု။ ဝိပ္ပယုတ္တာနံ ပန သမ္ပယောဂါဘာဝေါ ဝေဒိတဗ္ဗော။ ဣတိ ပုစ္ဆာယ မောဃတ္တာ သဗ္ဗဝိဿဇ္ဇနေသု နတ္ထိ နတ္ထိဣစ္စေဝ ဝုတ္တန္တိ။

ဝိပ္ပယုတ္တေနသမ္ပယုတ္တပဒဝဏ္ဏနာ။

၉။ နဝမနယော သမ္ပယုတ္တေနသမ္ပယုတ္တပဒဝဏ္ဏနာ

၃၁၉။ ဣဒါနိ သမ္ပယုတ္တေနသမ္ပယုတ္တပဒံ ဘာဇေတုံ ဝေဒနာက္ခန္ဓေနာတိအာဒိ အာရဒ္ဓံ။ တတ္ထ ယံ ခန္ဓာဒိဝသေန သမ္ပယုတ္တံ၊ ပုန တဿေဝ ခန္ဓာဒီဟိ သမ္ပယောဂံ ပုစ္ဆိတွာ ဝိဿဇ္ဇနံ ကတံ။ တံ ရူပေန ဝါ ရူပမိဿကေဟိ ဝါ သဗ္ဗရူပက္ခန္ဓသင်္ဂါဟကေဟိ ဝါ ပဒေဟိ သဒ္ဓိံ န ယုဇ္ဇတိ။ ရူပေန ဟိ ရူပမိဿကေန ဝါ အညေသံ သမ္ပယောဂေါ နတ္ထိ။ သဗ္ဗရူပက္ခန္ဓသင်္ဂါဟကေဟိ သဗ္ဗေသံ သမ္ပယောဂါရဟာနံ ခန္ဓာဒီနံ ဂဟိတတ္တာ အညံယေဝ နတ္ထိ၊ ယံ တေန သဟ သမ္ပယောဂံ ဂစ္ဆေယျ။ တသ္မာ တထာရူပါနိ ပဒါနိ ဣဓ န ဂဟိတာနိ။ ယာနိ ပန ပဒါနိ ရူပေန အသမ္မိဿံ အရူပေကဒေသံ ဒီပေန္တိ၊ တာနိ ဣဓ ဂဟိတာနိ။ တေသံ ဣဒမုဒ္ဒါနံ –

‘‘အရူပက္ခန္ဓာ စတ္တာရော၊ မနာယတနမေဝ စ၊

ဝိညာဏဓာတုယော သတ္တ၊ ဒွေ သစ္စာ စုဒ္ဒသိန္ဒြိယာ။

‘‘ပစ္စယေ ဒွါဒသ ပဒါ၊ တတော ဥပရိ သောဠသ၊

တိကေသု အဋ္ဌ ဂေါစ္ဆကေ၊ တေစတ္တာလီသမေဝ စ။

‘‘မဟန္တရဒုကေ သတ္တ၊ ပဒါ ပိဋ္ဌိဒုကေသု ဆ၊

နဝမဿ ပဒဿေတေ၊ နိဒ္ဒေသေ သင်္ဂဟံ ဂတာ’’တိ။

သဗ္ဗပဉှေသု ပန ယေ ဓမ္မာ ပုစ္ဆာယ ဥဒ္ဓဋာ၊ တေ ယေဟိ သမ္ပယုတ္တာ ဟောန္တိ၊ တေသံ ဝသေန ခန္ဓာဒိဘေဒေါ ဝေဒိတဗ္ဗော ။ ဝေဒနာက္ခန္ဓေန ဟိ ဣတရေ တယော ခန္ဓာ သမ္ပယုတ္တာ၊ ပုန တေဟိ ဝေဒနာက္ခန္ဓော သမ္ပယုတ္တော။ သော တေဟိ သညာဒီဟိ တီဟိ ခန္ဓေဟိ၊ ဧကေန မနာယတနေန၊ သတ္တဟိ ဝိညာဏဓာတူဟိ၊ ဧကသ္မိံ ဓမ္မာယတနေ၊ ဓမ္မဓာတုယာ စ၊ ကေဟိစိ သညာသင်္ခါရေဟေဝ သမ္ပယုတ္တော။ ဧသေဝ နယော သဗ္ဗတ္ထာတိ။

သမ္ပယုတ္တေနသမ္ပယုတ္တပဒဝဏ္ဏနာ။

၁၀။ ဒသမနယော ဝိပ္ပယုတ္တေနဝိပ္ပယုတ္တပဒဝဏ္ဏနာ

၃၅၃။ ဣဒါနိ ဝိပ္ပယုတ္တေနဝိပ္ပယုတ္တပဒံ ဘာဇေတုံ ရူပက္ခန္ဓေနာတိအာဒိ အာရဒ္ဓံ။ တတ္ထ ယေ သမ္ပယောဂဝိပ္ပယောဂပဒနိဒ္ဒေသေ ရူပက္ခန္ဓာဒယော ဓမ္မာ ဥဒ္ဓဋာ၊ သဗ္ဗပုစ္ဆာသု တေယေဝ ဥဒ္ဓဋာ။ သဒိသဝိဿဇ္ဇနာနံ ပန ဧကတော ဂဟိတတ္တာ ပဒါနိ အညာယ ပဋိပါဋိယာ အာဂတာနိ။ တတ္ထ ယံ ပဒံ ပုစ္ဆာယ ဥဒ္ဓဋံ၊ တံ ယေဟိ ဓမ္မေဟိ ဝိပ္ပယုတ္တံ၊ တေသံ ဝသေန ခန္ဓာဒိဝိဘာဂေါ ဝေဒိတဗ္ဗော။ ရူပက္ခန္ဓေန ဟိ ဝေဒနာဒယော ဝိပ္ပယုတ္တာ၊ တေဟိ စ ရူပက္ခန္ဓော ဝိပ္ပယုတ္တော။ နိဗ္ဗာနံ ပန သုခုမရူပဂတိကမေဝ။ သော ရူပက္ခန္ဓော စတူဟိ ခန္ဓေဟိ၊ ဧကေန မနာယတနေန သတ္တဟိ ဝိညာဏဓာတူဟိ၊ ဓမ္မာယတနဓမ္မဓာတူသု၊ ကေဟိစိ ဝေဒနာဒီဟိ ဓမ္မေဟေဝ ဝိပ္ပယုတ္တော။ ဧသေဝ နယော သဗ္ဗတ္ထာတိ။

ဝိပ္ပယုတ္တေနဝိပ္ပယုတ္တပဒဝဏ္ဏနာ။

၁၁။ ဧကာဒသမနယော သင်္ဂဟိတေနသမ္ပယုတ္တဝိပ္ပယုတ္တပဒဝဏ္ဏနာ

၄၀၉။ ဣဒါနိ သင်္ဂဟိတေနသမ္ပယုတ္တဝိပ္ပယုတ္တပဒံ ဘာဇေတုံ သမုဒယသစ္စေနာတိအာဒိ အာရဒ္ဓံ။ တတ္ထ ယေ သင်္ဂဟိတေနသင်္ဂဟိတပဒနိဒ္ဒေသေ သမုဒယသစ္စာဒယောဝ ဓမ္မာ ဥဒ္ဓဋာ၊ သဗ္ဗပုစ္ဆာသု တေယေဝ ဥဒ္ဓဋာ။ သဒိသဝိဿဇ္ဇနာနံ ပန ဧကတော ဂဟိတတ္တာ ပဒါနိ အညာယ ပဋိပါဋိယာ အာဂတာနိ။ တတ္ထ ယေ ဓမ္မာ ပုစ္ဆာယ ဥဒ္ဓဋပဒေန ခန္ဓာဒိသင်္ဂဟေန သင်္ဂဟိတာ၊ တေသံ ယေဟိ သမ္ပယောဂေါ ဝါ ဝိပ္ပယောဂေါ ဝါ ဟောတိ၊ တေသံ ဝသေန ခန္ဓာဒိဝိဘာဂေါ ဝေဒိတဗ္ဗော။

တတြာယံ နယော – သမုဒယသစ္စေန တာဝ သင်္ခါရက္ခန္ဓပရိယာပန္နာ ဓမ္မာ ခန္ဓာဒိသင်္ဂဟေန သင်္ဂဟိတာ။ တေ စ သေသေဟိ တီဟိ ခန္ဓေဟိ၊ ဧကေန မနာယတနေန၊ သတ္တဟိ ဝိညာဏဓာတူဟိ၊ သင်္ခါရက္ခန္ဓေ ဓမ္မာယတနဓမ္မဓာတူသု စ ဌပေတွာ တဏှံ သေသေဟိ သမ္ပယုတ္တတ္တာ ကေဟိစိ သမ္ပယုတ္တာ နာမ။ ဧကေန ပန ရူပက္ခန္ဓေန၊ ဒသဟိ ရူပါယတနေဟိ၊ ရူပဓာတူဟိ စ ဝိပ္ပယုတ္တာ၊ ဧကသ္မိံ ဓမ္မာယတနေ ဓမ္မဓာတုယာ စ၊ ရူပနိဗ္ဗာနေဟိ ဝိပ္ပယုတ္တတ္တာ ကေဟိစိ ဝိပ္ပယုတ္တာ နာမ။ ဣမိနာ ဥပါယေန သဗ္ဗတ္ထ အတ္ထော ဝေဒိတဗ္ဗောတိ။

သင်္ဂဟိတေနသမ္ပယုတ္တဝိပ္ပယုတ္တပဒဝဏ္ဏနာ။

၁၂။ ဒွါဒသမနယော သမ္ပယုတ္တေနသင်္ဂဟိတာသင်္ဂဟိတပဒဝဏ္ဏနာ

၄၁၇။ ဣဒါနိ သမ္ပယုတ္တေနသင်္ဂဟိတာသင်္ဂဟိတပဒံ ဘာဇေတုံ ဝေဒနာက္ခန္ဓေနာတိအာဒိ အာရဒ္ဓံ။ တတ္ထ ယေ သမ္ပယုတ္တေနသမ္ပယုတ္တပဒနိဒ္ဒေသေ ဝေဒနာက္ခန္ဓာဒယော ဓမ္မာ ဥဒ္ဓဋာ၊ သဗ္ဗပုစ္ဆာသု တေယေဝ ဥဒ္ဓဋာ။ တတ္ထ ယေ ဓမ္မာ ပုစ္ဆာယ ဥဒ္ဓဋပဒေန သမ္ပယုတ္တာ၊ တေသံ ယေဟိ သင်္ဂဟော ဝါ အသင်္ဂဟော ဝါ ဟောတိ၊ တေသံ ဝသေန ခန္ဓာဒိဘေဒေါ ဝေဒိတဗ္ဗော။

တတြာယံ နယော – ဝေဒနာက္ခန္ဓော ဟိ သညာဒီဟိ သမ္ပယုတ္တော။ တေ သညာဒယော တီဟိ သညာဒိက္ခန္ဓေဟိ၊ ဒွီဟိ ဓမ္မာယတနမနာယတနေဟိ၊ ဓမ္မဓာတုယာ စေဝ၊ သတ္တဟိ စ ဝိညာဏဓာတူဟီတိ အဋ္ဌဟိ ဓာတူဟိ သင်္ဂဟိတာ၊ သေသာဟိ ခန္ဓာယတနဓာတူဟိ အသင်္ဂဟိတာ။ ဣမိနာ ဥပါယေန သဗ္ဗတ္ထ အတ္ထော ဝေဒိတဗ္ဗောတိ။

သမ္ပယုတ္တေနသင်္ဂဟိတာသင်္ဂဟိတပဒဝဏ္ဏနာ။

၁၃။ တေရသမနယော အသင်္ဂဟိတေနသမ္ပယုတ္တဝိပ္ပယုတ္တပဒဝဏ္ဏနာ

၄၄၈။ ဣဒါနိ အသင်္ဂဟိတေနသမ္ပယုတ္တဝိပ္ပယုတ္တပဒံ ဘာဇေတုံ ရူပက္ခန္ဓေနာတိအာဒိ အာရဒ္ဓံ။ တတ္ထ ယေ ပဉ္စမေ အသင်္ဂဟိတေနအသင်္ဂဟိတပဒနိဒ္ဒေသေ ရူပက္ခန္ဓေန သဒိသပဉှာ ဓမ္မာ၊ ယေ စ အရူပဘဝေန သဒိသာ၊ တေယေဝ ဥဒ္ဓဋာ။ သေသာ ပန န ရုဟန္တီတိ န ဥဒ္ဓဋာ။ ဝေဒနာက္ခန္ဓေန ဟိ ခန္ဓာဒိဝသေန ပန ရူပါရူပဓမ္မာ အသင်္ဂဟိတာ ဟောန္တိ။ တေသဉ္စ သမ္ပယောဂေါ နာမ နတ္ထိ။ တသ္မာ ယာနိ ပဒါနိ ရုဟန္တိ၊ တာနေဝ သဒိသဝိဿဇ္ဇနေဟိ သဒ္ဓိံ သမောဓာနေတွာ ဥဒ္ဓဋာနိ။ တတ္ထ ယေ ဓမ္မာ ပုစ္ဆာယ ဥဒ္ဓဋဓမ္မေဟိ ခန္ဓာဒိဝသေန အသင်္ဂဟိတာ၊ တေ ယေဟိ သမ္ပယုတ္တာ စ ဝိပ္ပယုတ္တာ စ၊ တေသံ ဝသေန ခန္ဓာဒိဝိဘာဂေါ ဝေဒိတဗ္ဗော။

တတြာယံ နယော – ရူပက္ခန္ဓေန တာဝ ဝိညာဏမေဝ တီဟိ သင်္ဂဟေဟိ အသင်္ဂဟိတံ။ တံ ဝေဒနာဒီဟိ တီဟိ ခန္ဓေဟိ၊ ဓမ္မာယတနဓမ္မဓာတူသု စ ဝေဒနာဒီဟေဝ သမ္ပယုတ္တံ။ ဧကေန ရူပက္ခန္ဓေန၊ ဒသဟိ ရူပါယတနရူပဓာတူဟိ၊ ဓမ္မာယတနဓမ္မဓာတူသု စ ရူပနိဗ္ဗာနဓမ္မေဟိ ဝိပ္ပယုတ္တံ။ တံ သန္ဓာယ တေ ဓမ္မာ တီဟိ ခန္ဓေဟီတိအာဒိ ဝုတ္တံ။ ဣမိနာ နယေန သဗ္ဗတ္ထ အတ္ထော ဝေဒိတဗ္ဗောတိ။

အသင်္ဂဟိတေနသမ္ပယုတ္တဝိပ္ပယုတ္တပဒဝဏ္ဏနာ။

၁၄။ စုဒ္ဒသမနယော ဝိပ္ပယုတ္တေနသင်္ဂဟိတာသင်္ဂဟိတပဒဝဏ္ဏနာ

၄၅၆။ ဣဒါနိ ဝိပ္ပယုတ္တေနသင်္ဂဟိတာသင်္ဂဟိတပဒံ ဘာဇေတုံ ရူပက္ခန္ဓေနာတိအာဒိ အာရဒ္ဓံ။ တတ္ထ ယေသံ ပဒါနံ ဝိပ္ပယောဂေါ န ရုဟတိ၊ တာနိ ဣမသ္မိံ ဝါရေ န ဂဟိတာနိ။ ကာနိ ပန တာနီတိ? ဓမ္မာယတနာဒီနိ။ ဓမ္မာယတနဿ ဟိ ခန္ဓာဒီသု ဧကေနာပိ ဝိပ္ပယောဂေါ န ရုဟတိ။ ဓမ္မဓာတုအာဒီသုပိ ဧသေဝ နယော။ တေသံ ဣဒမုဒ္ဒါနံ –

‘‘ဓမ္မာယတနံ ဓမ္မဓာတု၊ ဇီဝိတိန္ဒြိယမေဝ စ၊

နာမရူပပဒဉ္စေဝ၊ သဠာယတနမေဝ စ။

‘‘ဇာတိအာဒိတ္တယံ ဧကံ၊ ပဒံ ဝီသတိမေ တိကေ၊

တိကာဝသာနိကံ ဧကံ၊ သတ္တ စူဠန္တရေ ပဒါ။

‘‘ဒသေဝ ဂေါစ္ဆကေ ဟောန္တိ၊ မဟန္တရမှိ စုဒ္ဒသ၊

ဆ ပဒါနိ တတော ဥဒ္ဓံ သဗ္ဗာနိပိ သမာသတော၊

ပဒါနိ စ န လဗ္ဘန္တိ၊ စတ္တာလီသဉ္စ သတ္တ စာ’’တိ။

ပရိယောသာနေ စ – ဓမ္မာယတနံ ဓမ္မဓာတူတိ ဂါထာပိ ဣမမေဝတ္ထံ ဒီပေတုံ ဝုတ္တာ။ ဣမာနိ ပန ဌပေတွာ သေသာနိ သဗ္ဗာနိပိ လဗ္ဘန္တိ။ တေသု ခန္ဓာဒိဝိဘာဂေါ ဝုတ္တနယာနုသာရေနေဝ ဝေဒိတဗ္ဗောတိ။

ဝိပ္ပယုတ္တေနသင်္ဂဟိတာသင်္ဂဟိတပဒဝဏ္ဏနာ။

နိဂမနကထာ

ဧတ္တာဝတာ စ –

ဓာတုပ္ပဘေဒကုသလော၊ ယံ ဓာတုကထံ တထာဂတော အာဟ၊

တဿာ နယမုခဘေဒ-ပ္ပကာသနံ နိဋ္ဌိတံ ဟောတိ။

ဣမိနာ နယမုခဘေဒ-ပ္ပကာသနေန ဟိ ဝိဘာဝိနာ သက္ကာ၊

ဉာတုံ သဗ္ဗေပိ နယာ၊ သင်္ခေပကထာဝ ဣတိ ဝုတ္တာ။

ဧကေကဿ ပန သစေ၊ ပဒဿ ဝိတ္ထာရမေဝ ဘာသေယျံ၊

ဝစနဉ္စ အတိဝိယ ဗဟုံ၊ ဘဝေယျ အတ္ထော စ အဝိသေသော။

ဣတိ ဦနဘာဏဝါရဒွယာယ၊ ယံ တန္တိယာ မယာ ဧတံ၊

ကုရုနာ ပတ္တံ ပုညံ၊ သုခါယ တံ ဟောတု လောကဿာတိ။

ဓာတုကထာ-အဋ္ဌကထာ နိဋ္ဌိတာ။

နမော တဿ ဘဂဝတော အရဟတော သမ္မာသမ္ဗုဒ္ဓဿ

အဘိဓမ္မပိဋကေ