📜

၆။ ဆဋ္ဌဝဂ္ဂေါ

၁။ နိယာမကထာဝဏ္ဏနာ

၄၄၅-၄၄၇။ ဣဒါနိ နိယာမကထာ နာမ ဟောတိ။ တတ္ထ နိယာမောတိ ‘‘ဘဗ္ဗော နိယာမံ ဩက္ကမိတုံ ကုသလေသု ဓမ္မေသု သမ္မတ္တ’’န္တိ (ပု။ ပ။ ၁၃) ဝစနတော အရိယမဂ္ဂေါ ဝုစ္စတိ။ ယသ္မာ ပန တသ္မိံ ဥပ္ပဇ္ဇိတွာ နိရုဒ္ဓေပိ ပုဂ္ဂလော အနိယတော နာမ န ဟောတိ၊ တသ္မာ ‘‘သော နိယာမော နိစ္စဋ္ဌေန အသင်္ခတော’’တိ ယေသံ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ တတော ‘‘ယဒိ သော အသင်္ခတော၊ ဧဝရူပေန တေန ဘဝိတဗ္ဗ’’န္တိ ဒီပေန္တော နိဗ္ဗာနန္တိအာဒိမာဟ။ သံသန္ဒနပုစ္ဆာ ဥတ္တာနတ္ထာယေဝ။

အတ္ထိကေစီတိအာဒိ နိယာမဿ သင်္ခတဘာဝဒီပနတ္ထံ ဝုတ္တံ။ မဂ္ဂေါ အသင်္ခတောတိပဉှေ တဿ ဥပ္ပာဒနိရောဓဘာဝတော ပဋိက္ခိပတီတိ။ နိယာမော သင်္ခတောတိပဉှေ နိရုဒ္ဓေပိ မဂ္ဂေ နိယာမဿ အတ္ထိတံ သန္ဓာယ ပဋိက္ခိပတိ။ သောတာပတ္တိနိယာမောတိအာဒိပဉှေသုပိ အနုလောမတော စ ပဋိလောမတော စ ဣမိနာဝ နယေန အတ္ထော ဝေဒိတဗ္ဗော။ ပဉ္စ အသင်္ခတာနီတိ ပုဋ္ဌော ပဉ္စန္နံ အသင်္ခတာနံ အာဂတဋ္ဌာနံ အပဿန္တော ပဋိက္ခိပတိ။ ဒုတိယံ ပုဋ္ဌော စတုန္နံ သမ္မတ္တနိယာမာနံ နိယာမဝစနတော နိဗ္ဗာနဿ စ အသင်္ခတဘာဝတော ပဋိဇာနာတိ။ မိစ္ဆတ္တနိယာမပဉှော နိယာမဝစနမတ္တေန အသင်္ခတတာယ အယုတ္တဘာဝဒီပနတ္ထံ ဝုတ္တောတိ။

နိယာမကထာဝဏ္ဏနာ။

၂။ ပဋိစ္စသမုပ္ပာဒကထာဝဏ္ဏနာ

၄၄၈။ ဣဒါနိ ပဋိစ္စသမုပ္ပာဒကထာ နာမ ဟောတိ။ တတ္ထ ယေသံ နိဒါနဝဂ္ဂေ ‘‘ဥပ္ပာဒါ ဝါ တထာဂတာနံ အနုပ္ပာဒါ ဝါ တထာဂတာနံ ဌိတာဝ သာ ဓာတု ဓမ္မဋ္ဌိတတာ’’တိအာဒိဝစနတော (သံ။ နိ။ ၂။၂၀) ‘‘ပဋိစ္စသမုပ္ပာဒေါ အသင်္ခတော’’တိ လဒ္ဓိ၊ သေယျထာပိ ပုဗ္ဗသေလိယာနဉ္စ မဟိသာသကာနဉ္စ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။

၄၄၉။ အဝိဇ္ဇာအသင်္ခတာတိ အာဒယော ပဉှာ အဝိဇ္ဇာဒီနံယေဝ ပဋိစ္စသမုပ္ပာဒဘာဝဒဿနတ္ထံ ဝုတ္တာ။ ယေန ပနတ္ထေန တတ္ထ ဧကေကံ အင်္ဂံ ‘‘ပဋိစ္စသမုပ္ပာဒေါ’’တိ ဝုစ္စတိ၊ သော ပဋိစ္စသမုပ္ပာဒဝိဘင်္ဂေ ဝုတ္တောယေဝ။

၄၅၁။ အဝိဇ္ဇာပစ္စယာ သင်္ခါရာတိ ယာ တတ္ထ ဓမ္မဋ္ဌိတတာတိအာဒိ ယေန သုတ္တေန လဒ္ဓိ ပတိဋ္ဌာပိတာ၊ တဿေဝ အတ္ထဒဿနေန လဒ္ဓိဘိန္ဒနတ္ထံ ဝုတ္တံ။ အယဉှေတ္ထ အတ္ထော – ယာ အယံ ဟေဋ္ဌာ ‘‘ဌိတာဝ သာ ဓာတု ဓမ္မဋ္ဌိတတာ ဓမ္မနိယာမတာ’’တိ ဝုတ္တာ န သာ အညတြ အဝိဇ္ဇာဒီဟိ ဝိသုံ ဧကာ အတ္ထိ။ အဝိဇ္ဇာဒီနံ ပန ပစ္စယာနံယေဝေတံ နာမံ။ ဥပ္ပန္နေပိ ဟိ တထာဂတေ အနုပ္ပန္နေပိ အဝိဇ္ဇာတော သင်္ခါရာ သမ္ဘဝန္တိ၊ သင်္ခါရာဒီဟိ စ ဝိညာဏာဒီနိ၊ တသ္မာ ‘‘အဝိဇ္ဇာပစ္စယာ သင်္ခါရာ’’တိ ယာ ဧတသ္မိံ ပဒေ သင်္ခါရဓမ္မာနံ ကာရဏဋ္ဌေန ဌိတတာတိ ဓမ္မဋ္ဌိတတာ။ တေသံယေဝ စ ဓမ္မာနံ ကာရဏဋ္ဌေနေဝ နိယာမတာတိ ဓမ္မနိယာမတာတိ အဝိဇ္ဇာ ဝုစ္စတိ။ သာ စ အသင်္ခတာ၊ နိဗ္ဗာနဉ္စ အသင်္ခတန္တိ ပုစ္ဆတိ။ ပရဝါဒီ လဒ္ဓိဝသေန ပဋိဇာနိတွာ ပုန ဒွေ အသင်္ခတာနီတိ ပုဋ္ဌော သုတ္တာဘာဝေန ပဋိက္ခိပိတွာ လဒ္ဓိဝသေနေဝ ပဋိဇာနာတိ။ သေသပဒေသုပိ ဧသေဝ နယော။ ဟေဋ္ဌာ ဝုတ္တသဒိသံ ပန တတ္ထ ဝုတ္တနယေနေဝ ဝေဒိတဗ္ဗန္တိ။

ပဋိစ္စသမုပ္ပာဒကထာဝဏ္ဏနာ။

၃။ သစ္စကထာဝဏ္ဏနာ

၄၅၂-၄၅၄။ ဣဒါနိ သစ္စကထာ နာမ ဟောတိ။ တတ္ထ ယေသံ ‘‘စတ္တာရိမာနိ၊ ဘိက္ခဝေ၊ တထာနိ အဝိတထာနီ’’တိ (သံ။ နိ။ ၅။၁၀၉၀) သုတ္တံ နိဿာယ ‘‘စတ္တာရိ သစ္စာနိ နိစ္စာနိ အသင်္ခတာနီ’’တိ လဒ္ဓိ၊ သေယျထာပိ ပုဗ္ဗသေလိယာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အယဉှိဿ အဓိပ္ပာယော – ဒုက္ခသမုဒယမဂ္ဂေသု ဝတ္ထုသစ္စံ သင်္ခတံ၊ လက္ခဏသစ္စံ အသင်္ခတံ။ နိရောဓေ ဝတ္ထုသစ္စံ နာမ နတ္ထိ အသင်္ခတမေဝ တန္တိ။ တသ္မာ အာမန္တာတိ အာဟ။ တံ ပနဿ လဒ္ဓိမတ္တမေဝ။ သော ဟိ ဒုက္ခံ ဝတ္ထုသစ္စံ ဣစ္ဆတိ၊ တထာ သမုဒယံ မဂ္ဂဉ္စ။ ယာနိ ပန နေသံ ဗာဓနပဘဝနိယျာနိကလက္ခဏာနိ၊ တာနိ လက္ခဏသစ္စံ နာမာတိ၊ န စ ဗာဓနလက္ခဏာဒီဟိ အညာနိ ဒုက္ခာဒီနိ နာမ အတ္ထီတိ။ တာဏာနီတိအာဒီသု အဓိပ္ပာယော ဝုတ္တနယေနေဝ ဝေဒိတဗ္ဗော။

ဒုက္ခသစ္စန္တိ ပဉှေ လဒ္ဓိဝသေန လက္ခဏံ သန္ဓာယ ပဋိဇာနာတိ။ ဒုက္ခန္တိ ပဉှေ ဝတ္ထုံ သန္ဓာယ ပဋိက္ခိပတိ။ ဣတော ပရံ သုဒ္ဓိကပဉှာ စ သံသန္ဒနပဉှာ စ သဗ္ဗေ ပါဠိအနုသာရေနေဝ ဝေဒိတဗ္ဗာ။ အဝသာနေ လဒ္ဓိပတိဋ္ဌာပနတ္ထံ အာဟဋသုတ္တံ အတ္ထဿ မိစ္ဆာ ဂဟိတတ္တာ အနာဟဋသဒိသမေဝါတိ။

သစ္စကထာဝဏ္ဏနာ။

၄။ အာရုပ္ပကထာဝဏ္ဏနာ

၄၅၅-၄၅၆။ ဣဒါနိ အာရုပ္ပကထာ နာမ ဟောတိ။ တတ္ထ ယေသံ ‘‘စတ္တာရော အာရုပ္ပာ အာနေဉ္ဇာ’’တိ ဝစနံ နိဿာယ ‘‘သဗ္ဗေပိ တေ ဓမ္မာ အသင်္ခတာ’’တိ လဒ္ဓိ၊ တေ သန္ဓာယ အာကာသာနဉ္စာယတနန္တိ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ဥတ္တာနတ္ထမေဝါတိ။ သာဓကသုတ္တမ္ပိ အတ္ထံ အဇာနိတွာ အာဟဋတ္တာ အနာဟဋသဒိသမေဝါတိ။

အာရုပ္ပကထာဝဏ္ဏနာ။

၅။ နိရောဓသမာပတ္တိကထာဝဏ္ဏနာ

၄၅၇-၄၅၉။ ဣဒါနိ နိရောဓသမာပတ္တိကထာ နာမ ဟောတိ။ တတ္ထ နိရောဓသမာပတ္တီတိ စတုန္နံ ခန္ဓာနံ အပ္ပဝတ္တိ။ ယသ္မာ ပန သာ ကရိယမာနာ ကရိယတိ၊ သမာပဇ္ဇိယမာနာ သမာပဇ္ဇိယတိ၊ တသ္မာ နိပ္ဖန္နာတိ ဝုစ္စတိ။ သင်္ခတာသင်္ခတလက္ခဏာနံ ပန အဘာဝေန န ဝတ္တဗ္ဗာ ‘‘သင်္ခတာတိ ဝါ အသင်္ခတာ’’တိ ဝါ။ တတ္ထ ယေသံ ‘‘ယသ္မာ သင်္ခတာ န ဟောတိ၊ တသ္မာ အသင်္ခတာ’’တိ လဒ္ဓိ၊ သေယျထာပိ အန္ဓကာနဉ္စေဝ ဥတ္တရာပထကာနဉ္စ၊ တေ သန္ဓာယ နိရောဓသမာပတ္တီတိ ပုစ္ဆာ သကဝါဒိဿ၊ ပဋိညာ ဣတရဿ။ ဥပ္ပာဒေန္တီတိအာဒိ သမာပဇ္ဇနပဋိလာဘဝသေနေဝ ဝုတ္တံ။ ယထာ ပန ရူပါဒယော အသင်္ခတဓမ္မေ ဥပ္ပာဒေန္တိ၊ န တထာ တံ ကေစိ ဥပ္ပာဒေန္တိ နာမ။ နိရောဓာ ဝေါဒါနံ ဝုဋ္ဌာနန္တိ ဖလသမာပတ္တိ ဝေဒိတဗ္ဗာ။ အသင်္ခတာ ပန တံ နတ္ထိယေဝ၊ တသ္မာ ပဋိက္ခိပတိ။ တေန ဟီတိ ယသ္မာ သင်္ခတာ န ဟောတိ၊ တသ္မာ အသင်္ခတာတိ လဒ္ဓိ။ ဣဒံ ပန အသင်္ခတဘာဝေ ကာရဏံ န ဟောတီတိ ဝုတ္တမ္ပိ အဝုတ္တသဒိသမေဝါတိ။

နိရောဓသမာပတ္တိကထာဝဏ္ဏနာ။

၆။ အာကာသကထာဝဏ္ဏနာ

၄၆၀-၄၆၂။ ဣဒါနိ အာကာသကထာ နာမ ဟောတိ။ တတ္ထ တိဝိဓော အာကာသော – ပရိစ္ဆေဒါကာသော ၊ ကသိဏုဂ္ဃာဋိမာကာသော၊ အဇဋာကာသော။ ‘‘တုစ္ဆာကာသော’’တိပိ တဿေဝ နာမံ။ တေသု ပရိစ္ဆေဒါကာသော သင်္ခတော၊ ဣတရေ ဒွေ ပညတ္တိမတ္တာ။ ယေသံ ပန ‘‘ဒုဝိဓောပိ ယသ္မာ သင်္ခတော န ဟောတိ၊ တသ္မာ အသင်္ခတော’’တိ လဒ္ဓိ၊ သေယျထာပိ ဥတ္တရာပထကာနံ မဟိသာသကာနဉ္စ၊ တေ သန္ဓာယ အာကာသောတိ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ဥတ္တာနတ္ထမေဝါတိ။

အာကာသကထာဝဏ္ဏနာ။

၇။ အာကာသော သနိဒဿနောတိကထာဝဏ္ဏနာ

၄၆၃-၄၆၄။ ဣဒါနိ အာကာသော သနိဒဿနောတိကထာ နာမ ဟောတိ။ တတ္ထ ယေသံ တာဠစ္ဆိဒ္ဒါဒီသု ဉာဏပ္ပဝတ္တိံ နိဿာယ ‘‘သဗ္ဗောပိ အဇဋာကာသော သနိဒဿနော’’တိ လဒ္ဓိ၊ သေယျထာပိ အန္ဓကာနံ ၊ တေ သန္ဓာယ အာကာသော သနိဒဿနောတိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘ယဒိ သနိဒဿနော၊ ဧဝံဝိဓော ဘဝေယျာ’’တိ စောဒနတ္ထံ ရူပန္တိအာဒိ ဝုတ္တံ။ စက္ခုဉ္စ ပဋိစ္စာတိပဉှေသု ဧဝရူပဿ သုတ္တဿ အဘာဝေန ပဋိက္ခိပိတွာ တုလန္တရိကာဒီနံ ဥပလဒ္ဓိံ နိဿာယ ပဋိဇာနာတိ။ ဒွိန္နံ ရုက္ခာနံ အန္တရန္တိ ဧတ္ထ ရုက္ခရူပံ စက္ခုနာ ဒိသွာ အန္တရေ ရူပါဘာဝတော အာကာသန္တိ မနောဒွါရဝိညာဏံ ဥပ္ပဇ္ဇတိ၊ န စက္ခုဝိညာဏံ။ သေသေသုပိ ဧသေဝ နယော။ တသ္မာ အသာဓကမေတန္တိ။

အာကာသော သနိဒဿနောတိကထာဝဏ္ဏနာ။

၁၀။ ပထဝီဓာတုသနိဒဿနာတိအာဒိကထာဝဏ္ဏနာ

၄၆၅-၄၇၀။ ဣဒါနိ ပထဝီဓာတု သနိဒဿနာတိအာဒိကထာ နာမ ဟောတိ။ တတ္ထ ယေသံ ပါသာဏဥဒကဇာလရုက္ခစလနာနဉ္စေဝ ပဉ္စိန္ဒြိယပတိဋ္ဌောကာသာနဉ္စ ဝဏ္ဏာယတနံ ကာယဝိညတ္တိကာလေ ဟတ္ထပါဒါဒိရူပဉ္စ ဒိသွာ ‘‘ပထဝီဓာတုအာဒယော သနိဒဿနာ’’တိ လဒ္ဓိ၊ သေယျထာပိ အန္ဓကာနံ၊ တေ သန္ဓာယ သဗ္ဗကထာသု အာဒိပုစ္ဆာ သကဝါဒိဿ၊ ပဋိညာ ဣတရဿ။ သေသံ သဗ္ဗတ္ထ ပါဠိအနုသာရေန စေဝ ဟေဋ္ဌာ ဝုတ္တနယေန စ ဝေဒိတဗ္ဗန္တိ။ ပထဝီဓာတု သနိဒဿနာတိ အာဒိံ ကတွာ ကာယကမ္မံ သနိဒဿနန္တိ ပရိယောသာနကထာ နိဋ္ဌိတာ။

ဆဋ္ဌော ဝဂ္ဂေါ။