📜

၇။ သတ္တမဝဂ္ဂေါ

၁။ သင်္ဂဟိတကထာဝဏ္ဏနာ

၄၇၁-၄၇၂။ ဣဒါနိ သင်္ဂဟိတကထာ နာမ ဟောတိ။ တတ္ထ ယသ္မာ ဒါမာဒီဟိ ဗလိဗဒ္ဒါဒယော ဝိယ ကေစိ ဓမ္မာ ကေဟိစိ ဓမ္မေဟိ သင်္ဂဟိတာ နာမ နတ္ထိ၊ တသ္မာ ‘‘နတ္ထိ ကေစိ ဓမ္မာ ကေဟိစိ ဓမ္မေဟိ သင်္ဂဟိတာ၊ ဧဝံ သန္တေ ဧကဝိဓေန ရူပသင်္ဂဟောတိအာဒိ နိရတ္ထက’’န္တိ ယေသံ လဒ္ဓိ၊ သေယျထာပိ ရာဇဂိရိကာနဉ္စေဝ သိဒ္ဓတ္ထိကာနဉ္စ၊ တေ သန္ဓာယ အညေနတ္ထေန သင်္ဂဟဘာဝံ ဒဿေတုံ ပုစ္ဆာ သကဝါဒိဿ၊ အတ္တနော လဒ္ဓိဝသေန ပဋိညာ ဣတရဿ။ ဣဒါနိ ယေနတ္ထေန သင်္ဂဟော လဗ္ဘတိ၊ တံ ဒဿေတုံ နနု အတ္ထိ ကေစိ ဓမ္မာတိအာဒိ အာရဒ္ဓံ။ တံ သဗ္ဗံ ဟေဋ္ဌာ ဝုတ္တနယတ္တာ ဥတ္တာနတ္ထမေဝ။ ယာ ပနေသာ ပရဝါဒိနာ လဒ္ဓိပတိဋ္ဌာပနတ္ထံ ယထာ ဒါမေန ဝါတိအာဒိကာ ဥပမာ အာဟဋာ၊ သကဝါဒိနာ တံ အနဘိနန္ဒိတွာ အပ္ပဋိက္ကောသိတွာ ‘‘ဟဉ္စိ ဒါမေန ဝါ’’တိ တဿ လဒ္ဓိ ဘိန္နာတိ ဝေဒိတဗ္ဗာ။ အယဉှေတ္ထ အတ္ထော – ယဒိ တေ ဒါမာဒီဟိ ဗလိဗဒ္ဒါဒယော သင်္ဂဟိတာ နာမ၊ အတ္ထိ ကေစိ ဓမ္မာ ကေဟိစိ ဓမ္မေဟိ သင်္ဂဟိတာတိ။

သင်္ဂဟိတကထာဝဏ္ဏနာ။

၂။ သမ္ပယုတ္တကထာဝဏ္ဏနာ

၄၇၃-၄၇၄။ ဣဒါနိ သမ္ပယုတ္တကထာ နာမ ဟောတိ။ တတ္ထ ယသ္မာ တိလမှိ တေလံ ဝိယ န ဝေဒနာဒယော သညာဒီသု အနုပဝိဋ္ဌာ၊ တသ္မာ ‘‘နတ္ထိ ကေစိ ဓမ္မာ ကေဟိစိ ဓမ္မေဟိ သမ္ပယုတ္တာ၊ ဧဝံ သန္တေ ဉာဏသမ္ပယုတ္တန္တိအာဒိ နိရတ္ထကံ ဟောတီ’’တိ ယေသံ လဒ္ဓိ၊ သေယျထာပိ ရာဇဂိရိကသိဒ္ဓတ္ထိကာနညေဝ၊ တေ သန္ဓာယ အညေနေဝတ္ထေန သမ္ပယုတ္တတံ ဒဿေတုံ ပုစ္ဆာ သကဝါဒိဿ၊ အတ္တနော လဒ္ဓိဝသေန ပဋိညာ ဣတရဿ။ သေသမိဓာပိ ဟေဋ္ဌာ ဝုတ္တနယတ္တာ ဥတ္တာနတ္ထမေဝ။ ယော ပနေသ ပရဝါဒိနာ ‘‘ယထာ တိလမှိ တေလ’’န္တိအာဒိကော ဥပမာပဉှော အာဟဋော၊ သော ယသ္မာ ဝေဒနာသညာနံ ဝိယ တိလတေလာနံ လက္ခဏတော နာနတ္တဝဝတ္ထာနံ နတ္ထိ။ သဗ္ဗေသုပိ ဟိ တိလအဋ္ဌိတစေသု တိလောတိ ဝေါဟာရမတ္တံ၊ တေနေဝ တိလံ နိဗ္ဗတ္တေတွာ ဂဟိတေ ပုရိမသဏ္ဌာနေန တိလော နာမ န ပညာယတိ၊ တသ္မာ အနာဟဋသဒိသောဝ ဟောတီတိ။

သမ္ပယုတ္တကထာဝဏ္ဏနာ။

၃။ စေတသိကကထာဝဏ္ဏနာ

၄၇၅-၄၇၇။ ဣဒါနိ စေတသိကကထာ နာမ ဟောတိ။ တတ္ထ ယသ္မာ ဖဿိကာဒယော နာမ နတ္ထိ၊ တသ္မာ ‘‘စေတသိကေနာပိ န ဘဝိတဗ္ဗံ၊ ဣတိ နတ္ထိ စေတသိကော ဓမ္မော’’တိ ယေသံ လဒ္ဓိ၊ သေယျထာပိ ရာဇဂိရိကသိဒ္ဓတ္ထိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သဟဇာတောတိ သမ္ပယုတ္တသဟဇာတံ သန္ဓာယ ဝုတ္တံ။ ဖဿိကာတိ တာဒိသံ ဝေါဟာရံ အပဿန္တဿ ပုစ္ဆာ ပရဝါဒိဿ။ ကိံ ဝေါဟာရေန၊ ယထာ စိတ္တနိဿိတကောတိ စေတသိကော၊ ဧဝံ သောပိ ဖဿနိဿိတတ္တာ ဖဿိကောတိ ဝုတ္တေ ဒေါသော နတ္ထီတိ ပဋိညာ သကဝါဒိဿ။ သေသံ ဥတ္တာနတ္ထမေဝါတိ။

စေတသိကကထာဝဏ္ဏနာ။

၄။ ဒါနကထာဝဏ္ဏနာ

၄၇၈။ ဣဒါနိ ဒါနကထာ နာမ ဟောတိ။ တတ္ထ ဒါနံ နာမ တိဝိဓံ – စာဂစေတနာပိ၊ ဝိရတိပိ၊ ဒေယျဓမ္မောပိ။ ‘‘သဒ္ဓါ ဟိရိယံ ကုသလဉ္စ ဒါန’’န္တိ (အ။ နိ။ ၈။၃၀) အာဂတဋ္ဌာနေ စာဂစေတနာ ဒါနံ။ ‘‘အဘယံ ဒေတီ’’တိ (အ။ နိ။ ၈။၃၉) အာဂတဋ္ဌာနေ ဝိရတိ။ ‘‘ဒါနံ ဒေတိ အန္နံ ပါန’’န္တိ အာဂတဋ္ဌာနေ ဒေယျဓမ္မော။ တတ္ထ စာဂစေတနာ ‘‘ဒေတိ ဝါ ဒေယျဓမ္မံ၊ ဒေန္တိ ဝါ ဧတာယ ဒေယျဓမ္မ’’န္တိ ဒါနံ။ ဝိရတိ အဝခဏ္ဍနဋ္ဌေန လဝနဋ္ဌေန ဝါ ဒါနံ။ သာ ဟိ ဥပ္ပဇ္ဇမာနာ ဘယဘေရဝါဒိသင်္ခါတံ ဒုဿီလျစေတနံ ဒါတိ ခဏ္ဍေတိ လုနာတိ ဝါတိ ဒါနံ။ ဒေယျဓမ္မော ဒိယျတီတိ ဒါနံ။ ဧဝမေတံ တိဝိဓမ္ပိ အတ္ထတော စေတသိကော စေဝ ဓမ္မော ဒေယျဓမ္မော စာတိ ဒုဝိဓံ ဟောတိ။ တတ္ထ ယေသံ ‘‘စေတသိကောဝ ဓမ္မော ဒါနံ၊ န ဒေယျဓမ္မော’’တိ လဒ္ဓိ၊ သေယျထာပိ ရာဇဂိရိကသိဒ္ဓတ္ထိကာနံ၊ တေ သန္ဓာယ စေတသိကောတိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ဒေယျဓမ္မဝသေန စောဒေတုံ လဗ္ဘာတိ ပုစ္ဆာ သကဝါဒိဿ၊ အန္နာဒီနိ ဝိယ သော န သက္ကာ ဒါတုန္တိ ပဋိက္ခေပေါ ဣတရဿ။ ပုန ဒဠှံ ကတွာ ပုဋ္ဌေ ‘‘အဘယံ ဒေတီ’’တိ သုတ္တဝသေန ပဋိညာ တဿေဝ။ ဖဿပဉှာဒီသု ပန ဖဿံ ဒေတီတိအာဒိဝေါဟာရံ အပဿန္တော ပဋိက္ခိပတေဝ။

၄၇၉။ အနိဋ္ဌဖလန္တိအာဒိ အစေတသိကဿ ဓမ္မဿ ဒါနဘာဝဒီပနတ္ထံ ဝုတ္တံ။ န ဟိ အစေတသိကော အန္နာဒိဓမ္မော အာယတိံ ဝိပါကံ ဒေတိ၊ ဣဋ္ဌဖလဘာဝနိယမနတ္ထံ ပနေတံ ဝုတ္တန္တိ ဝေဒိတဗ္ဗံ။ အယမ္ပိ ဟေတ္ထ အဓိပ္ပာယော – ယဒိ အစေတသိကော အန္နာဒိဓမ္မော ဒါနံ ဘဝေယျ၊ ဟိတစိတ္တေန အနိဋ္ဌံ အကန္တံ ဘေသဇ္ဇံ ဒေန္တဿ နိမ္ဗဗီဇာဒီဟိ ဝိယ နိမ္ဗာဒယော အနိဋ္ဌမေဝ ဖလံ နိဗ္ဗတ္တေယျ။ ယသ္မာ ပနေတ္ထ ဟိတဖရဏစာဂစေတနာ ဒါနံ၊ တသ္မာ အနိဋ္ဌေပိ ဒေယျဓမ္မေ ဒါနံ ဣဋ္ဌဖလမေဝ ဟောတီတိ။

ဧဝံ ပရဝါဒိနာ စေတသိကဓမ္မဿ ဒါနဘာဝေ ပတိဋ္ဌာပိတေ သကဝါဒီ ဣတရေန ပရိယာယေန ဒေယျဓမ္မဿ ဒါနဘာဝံ သာဓေတုံ ဒါနံ ဣဋ္ဌဖလံ ဝုတ္တံ ဘဂဝတာတိအာဒိမာဟ။ ပရဝါဒီ ပန စီဝရာဒီနံ ဣဋ္ဌဝိပါကတံ အပဿန္တော ပဋိက္ခိပတိ။ သုတ္တသာဓနံ ပရဝါဒီဝါဒေပိ ယုဇ္ဇတိ သကဝါဒီဝါဒေပိ၊ န ပန ဧကေနတ္ထေန။ ဒေယျဓမ္မော ဣဋ္ဌဖလောတိ ဣဋ္ဌဖလဘာဝမတ္တမေဝ ပဋိက္ခိတ္တံ။ တသ္မာ တေန ဟိ န ဝတ္တဗ္ဗန္တိ ဣဋ္ဌဖလဘာဝေနေဝ န ဝတ္တဗ္ဗတာ ယုဇ္ဇတိ ။ ဒါတဗ္ဗဋ္ဌေန ပန ဒေယျဓမ္မော ဒါနမေဝ။ ဒိန္နဉှိ ဒါနာနံ သင်္ကရဘာဝမောစနတ္ထမေဝ အယံ ကထာတိ။

ဒါနကထာဝဏ္ဏနာ။

၅။ ပရိဘောဂမယပုညကထာဝဏ္ဏနာ

၄၈၃။ ဣဒါနိ ပရိဘောဂမယပုညကထာ နာမ ဟောတိ။ တတ္ထ ‘‘တေသံ ဒိဝါ စ ရတ္တော စ၊ သဒါ ပုညံ ပဝဍ္ဎတီ’’တိ (သံ။ နိ။ ၁။၄၇) စ ‘‘ယဿ ဘိက္ခဝေ၊ ဘိက္ခု စီဝရံ ပရိဘုဉ္ဇမာနော’’တိ (အ။ နိ။ ၄။၅၁) စ ဧဝမာဒီနိ သုတ္တာနိ အယောနိသော ဂဟေတွာ ယေသံ ပရိဘောဂမယံ နာမ ပုညံ အတ္ထီ’’တိ လဒ္ဓိ၊ သေယျထာပိ ရာဇဂိရိကသိဒ္ဓတ္ထိကသမ္မိတိယာနံ၊ တေ သန္ဓာယ ပရိဘောဂမယန္တိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘ပုညံ နာမ ဖဿာဒယော ကုသလာ ဓမ္မာ၊ န တတော ပရံ၊ တသ္မာ ဖဿာဒီဟိ တေ ဝဍ္ဎိတဗ္ဗ’’န္တိ စောဒေတုံ ပရိဘောဂမယော ဖဿောတိအာဒိ အာရဒ္ဓံ။ တံ သဗ္ဗံ ဣတရေန တေသံ အဝဍ္ဎနတော ပဋိက္ခိတ္တံ။ လတာဝိယာတိအာဒီနိ ‘‘ကိရိယာယ ဝါ ဘာဝနာယ ဝါ ဝိနာပိ ယထာ လတာဒီနိ သယမေဝ ဝဍ္ဎန္တိ၊ ကိံ တေ ဧဝံ ဝဍ္ဎန္တီ’’တိ စောဒနတ္ထံ ဝုတ္တာနိ။ တထာ ပနဿ အဝဍ္ဎနတော န ဟေဝါတိ ပဋိက္ခိတ္တံ။

၄၈၄။ န သမန္နာဟရတီတိ ပဉှေ ပဋိဂ္ဂါဟကာနံ ပရိဘောဂေန ပုရိမစေတနာ ဝဍ္ဎတိ၊ ဧဝံ တံ ဟောတိ ပုညန္တိ လဒ္ဓိဝသေန ပဋိဇာနာတိ။ တတော အနာဝဋ္ဋေန္တဿာတိအာဒီဟိ ပုဋ္ဌော ဒါယကဿ စာဂစေတနံ သန္ဓာယ ပဋိက္ခိပတိ။ တတ္ထ အနာဝဋ္ဋေန္တဿာတိ ဒါနစေတနာယ ပုရေစာရိကေန အာဝဇ္ဇနေန ဘဝင်္ဂံ အနာဝဋ္ဋေန္တဿ အပရိဝဋ္ဋေန္တဿ။ အနာဘောဂဿာတိ နိရာဘောဂဿ။ အသမန္နာဟရန္တဿာတိ န သမန္နာဟရန္တဿ။ အာဝဇ္ဇနဉှိ ဘဝင်္ဂံ ဝိစ္ဆိန္ဒိတွာ အတ္တနော ဂတမဂ္ဂေ ဥပ္ပဇ္ဇမာနံ ဒါနစေတနံ သမန္နာဟရတိ နာမ။ ဧဝံကိစ္စေန ဣမိနာ စိတ္တေန အသမန္နာဟရန္တဿ ပုညံ ဟောတီတိ ပုစ္ဆတိ။ အမနသိကရောန္တဿာတိ မနံ အကရောန္တဿ။ အာဝဇ္ဇနေန ဟိ တဒနန္တရံ ဥပ္ပဇ္ဇမာနံ မနံ ကရောတိ နာမ။ ဧဝံ အကရောန္တဿာတိ အတ္ထော။ ဥပယောဂဝစနသ္မိဉှိ ဧတံ ဘုမ္မံ။ အစေတယန္တဿာတိ စေတနံ အနုပ္ပာဒေန္တဿ။ အပတ္ထေန္တဿာတိ ပတ္ထနာသင်္ခါတံ ကုသလစ္ဆန္ဒံ အကရောန္တဿ။ အပ္ပဏိဒဟန္တဿာတိ ဒါနစေတနာဝသေန စိတ္တံ အဋ္ဌပေန္တဿာတိ အတ္ထော။ နနု အာဝဋ္ဋေန္တဿာတိ ဝါရေ အာဘောဂဿာတိ အာဘောဂဝတော။ အထ ဝါ အာဘောဂါ အဿ၊ အာဘောဂဿ ဝါ အနန္တရံ တံ ပုညံ ဟောတီတိ အတ္ထော။

၄၈၅။ ဒွိန္နံ ဖဿာနန္တိအာဒီသုပိ ဧကက္ခဏေ ဒါယကဿ ဒွိန္နံ ဖဿာဒီနံ အဘာဝါ ပဋိက္ခိပတိ၊ ဒါယကဿ စ ပရိဘုဉ္ဇန္တဿ စာတိ ဥဘိန္နံ ဖဿာဒယော သန္ဓာယ ပဋိဇာနာတိ။ အပိစဿ ပဉ္စန္နံ ဝိညာဏာနံ သမောဓာနံ ဟောတီတိ လဒ္ဓိ၊ တဿာပိ ဝသေန ပဋိဇာနာတိ။ အထ နံ သကဝါဒီ ပရိယာယဿ ဒွါရံပိဒဟိတွာ ဥဇုဝိပစ္စနီကဝသေန စောဒေတုံ ကုသလာဒိပဉှံ ပုစ္ဆတိ။ တတြာပိ ကုသလာကုသလာနံ ဧကဿေကက္ခဏေ သမ္ပယောဂါဘာဝံ သန္ဓာယ ပဋိက္ခိပတိ။ ပရိဘောဂမယံ ပန စိတ္တဝိပ္ပယုတ္တံ ဥပ္ပဇ္ဇတီတိ လဒ္ဓိယာ ပဋိဇာနာတိ။ အထ နံ သကဝါဒီ သုတ္တေန နိဂ္ဂဏှာတိ။

၄၈၆။ သုတ္တသာဓနေ အာရာမရောပကာဒီနံ အနုဿရဏပဋိသင်္ခရဏာဒိဝသေန အန္တရန္တရာ ဥပ္ပဇ္ဇမာနံ ပုညံ သန္ဓာယ သဒါ ပုညံ ပဝဍ္ဎတီတိ ဝုတ္တံ။ အပ္ပမာဏော တဿ ပုညာဘိသန္ဒောတိ ဣဒံ အပ္ပမာဏဝိဟာရိနော ဒိန္နပစ္စယတ္တာ စ ‘‘ဧဝရူပေါ မေ စီဝရံ ပရိဘုဉ္ဇတီ’’တိ အနုမောဒနဝသေန စ ဝုတ္တံ။ တံ သော ပရိဘောဂမယန္တိ သလ္လက္ခေတိ။ ယသ္မာ ပန ပဋိဂ္ဂါဟကေန ပဋိဂ္ဂဟေတွာ အပရိဘုတ္တေပိ ဒေယျဓမ္မေ ပုညံ ဟောတိယေဝ၊ တသ္မာ သကဝါဒီဝါဒေါဝ ဗလဝါ၊ တတ္ထ ပဋိဂ္ဂါဟကေန ပဋိဂ္ဂဟိတေတိ အတ္ထော ဒဋ္ဌဗ္ဗော။ သေသံ ဥတ္တာနတ္ထမေဝါတိ။

ပရိဘောဂမယပုညကထာဝဏ္ဏနာ။

၆။ ဣတောဒိန္နကထာဝဏ္ဏနာ

၄၈၈-၄၉၁။ ဣဒါနိ ဣတော ဒိန္နကထာ နာမ ဟောတိ။ တတ္ထ ယေသံ ‘‘ဣတော ဒိန္နေန ယာပေန္တိ၊ ပေတာ ကာလင်္ကတာ တဟိ’’န္တိ (ပေ။ ဝ။ ၁၉) ဝစနံ နိဿာယ ‘‘ယံ ဣတော စီဝရာဒိ ဒိန္နံ တေနေဝ ယာပေန္တီ’’တိ လဒ္ဓိ၊ သေယျထာပိ ရာဇဂိရိကသိဒ္ဓတ္ထိကာနံ၊ တေ သန္ဓာယ ဣတော ဒိန္နေနာတိ ပုစ္ဆာ သကဝါဒိဿ၊ ပဋိညာ ဣတရဿ ။ ပုန စီဝရာဒိဝသေန အနုယုတ္တော ပဋိက္ခိပတိ။ အညော အညဿ ကာရကောတိ အညဿ ဝိပါကဒါယကာနံ ကမ္မာနံ အညော ကာရကော၊ န အတ္တနာဝ အတ္တနော ကမ္မံ ကရောတီတိ ဝုတ္တံ ဟောတိ။ ဧဝံ ပုဋ္ဌော ပန ဣတရော သုတ္တဝိရောဓဘယေန ပဋိက္ခိပတိ။ ဒါနံ ဒေန္တန္တိ ဒါနံ ဒဒမာနံ ဒိသွာတိ အတ္ထော။ တတ္ထ ယသ္မာ အတ္တနော အနုမောဒိတတ္တာ စ တေသံ တတ္ထ ဘောဂါ ဥပ္ပဇ္ဇန္တိ၊ တသ္မာဿ ဣမိနာ ကာရဏေန လဒ္ဓိံ ပတိဋ္ဌပေန္တဿာပိ အပ္ပတိဋ္ဌိတာဝ ဟောတိ။ န ဟိ တေ ဣတော ဒိန္နေနေဝ ဝတ္ထုနာ ယာပေန္တိ။ သေသေသုပိ သုတ္တသာဓနေသု ဧသေဝ နယောတိ။

ဣတော ဒိန္နကထာဝဏ္ဏနာ။

၇။ ပထဝီကမ္မဝိပါကောတိကထာဝဏ္ဏနာ

၄၉၂။ ဣဒါနိ ပထဝီ ကမ္မဝိပါကောတိကထာ နာမ ဟောတိ။ တတ္ထ ယသ္မာ ‘‘အတ္ထိ ဣဿရိယသံဝတ္တနိယံ ကမ္မံ၊ အာဓိပစ္စသံဝတ္တနိယံ ကမ္မ’’န္တိ ဧတ္ထ ဣဿရာနံ ဘာဝေါ ဣဿရိယံ နာမ ၊ အဓိပတီနဉ္စ ဘာဝေါ အာဓိပစ္စံ နာမ၊ ပထဝိဿရိယအာဓိပစ္စသံဝတ္တနိကဉ္စ ကမ္မံ အတ္ထီတိ ဝုတ္တံ။ တသ္မာ ယေသံ ‘‘ပထဝီ ကမ္မဝိပါကော’’တိ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ပထဝီတိ ပုစ္ဆာ သကဝါဒိဿ၊ ပဋိညာ ဣတရဿ။ သုခဝေဒနီယာတိအာဒိ ကမ္မဝိပါကသဘာဝဒဿနဝသေန ဝုတ္တံ။ ‘‘ဖဿော ဟောတီ’’တိအာဒိနာ နယေန နိဒ္ဒိဋ္ဌေသု ဝိပါကေသု ဖဿော သုခဝေဒနီယာဒိဘေဒေါ ဟောတိ။ သော စ သညာဒယော စ သုခဝေဒနာဒီဟိ သမ္ပယုတ္တာ၊ ဝေဒနာဒယော သညာဒီဟိ၊ သဗ္ဗေပိ သာရမ္မဏာ၊ အတ္ထိ စ နေသံ ပုရေစာရိကအာဝဋ္ဋနာဒိသင်္ခါတံ အာဝဇ္ဇနံ၊ ကမ္မပစ္စယဘူတာ စေတနာ၊ ယော တတ္ထ ဣဋ္ဌဝိပါကော၊ တဿ ပတ္ထနာ၊ ပဏိဓာနဝသေန ပဝတ္တာ မူလတဏှာ၊ ကိံ တေ ဧဝရူပါ ပထဝီတိ ပုစ္ဆတိ။ ဣတရော ပဋိက္ခိပတိ။ ပဋိလောမပုစ္ဆာဒီနိ ဥတ္တာနတ္ထာနေဝ။

၄၉၃။ ကမ္မဝိပါကော ပရေသံ သာဓာရဏောတိ ပဉှေ ဖဿာဒယော သန္ဓာယ ပဋိက္ခိပတိ၊ ကမ္မသမုဋ္ဌာနံ ရူပဉ္စ ပထဝီအာဒီနံယေဝ စ သာဓာရဏဘာဝံ သန္ဓာယ ပဋိဇာနာတိ။ အသာဓာရဏမညေသန္တိ သုတ္တံ ပရသမယတော အာဟရိတွာ ဒဿိတံ။ သဗ္ဗေ သတ္တာ ပထဝိံ ပရိဘုဉ္ဇန္တီတိ ပဉှေ ပထဝိံ အနိဿိတေ သန္ဓာယ ပဋိက္ခိပတိ၊ နိဿိတေ သန္ဓာယ ပဋိဇာနာတိ။ ပထဝိံ အပရိဘုဉ္ဇိတွာ ပရိနိဗ္ဗာယန္တီတိ ပဉှေ အာရုပ္ပေ ပရိနိဗ္ဗာယန္တာနံ ဝသေန ပဋိဇာနာတိ။ ကမ္မဝိပါကံ အခေပေတွာတိ ဣဒံ ပရသမယဝသေန ဝုတ္တံ။ ကမ္မဝိပါကဉှိ ခေပေတွာဝ ပရိနိဗ္ဗာယန္တီတိ တေသံ လဒ္ဓိ။ သကသမယေ ပန ကတောကာသဿ ကမ္မဿ ဥပ္ပန္နံ ဝိပါကံ အခေပေတွာ ပရိနိဗ္ဗာနံ နတ္ထိ။ တေသဉ္စ လဒ္ဓိယာ ပထဝီ သာဓာရဏဝိပါကတ္တာ ဥပ္ပန္နဝိပါကောယေဝ ဟောတိ။ တံ ဝိပါကဘာဝေန ဌိတံ အခေပေတွာ ပရိနိဗ္ဗာနံ န ယုဇ္ဇတီတိ စောဒေတုံ ဝဋ္ဋတိ။ ဣတရော လဒ္ဓိဝသေန ပဋိက္ခိပတိ။ စက္ကဝတ္တိသတ္တဿ ကမ္မဝိပါကန္တိ ပဉှေ အသာဓာရဏံ ဖဿာဒိံ သန္ဓာယ ပဋိက္ခိပတိ၊ သာဓာရဏံ သန္ဓာယ ပဋိဇာနာတိ။ ပထဝီသမုဒ္ဒသူရိယစန္ဒိမာဒယော ဟိ သဗ္ဗေသံ သာဓာရဏကမ္မဝိပါကောတိ တေသံ လဒ္ဓိ။

၄၉၄။ ဣဿရိယသံဝတ္တနိယန္တိ ဧတ္ထ ဣဿရိယံ နာမ ဗဟုဓနတာ။ အာဓိပစ္စံ နာမ သေသဇနေ အတ္တနော ဝသေ ဝတ္တေတွာ တေဟိ ဂရုကာတဗ္ဗဋ္ဌေန အဓိပတိဘာဝေါ။ တတ္ထ ကမ္မံ ပဋိလာဘဝသေန တံသံဝတ္တနိကံ နာမ ဟောတိ၊ န ဇနကဝသေန။ တသ္မာ ဝိပါကဘာဝေ အသာဓကမေတန္တိ။

ပထဝီ ကမ္မဝိပါကောတိကထာဝဏ္ဏနာ။

၈။ ဇရာမရဏံ ဝိပါကောတိကထာဝဏ္ဏနာ

၄၉၅။ ဣဒါနိ ဇရာမရဏံ ဝိပါကောတိကထာ နာမ ဟောတိ။ တတ္ထ ယေသံ ‘‘အတ္ထိ ဒုဗ္ဗဏ္ဏသံဝတ္တနိယံ ကမ္မံ အပ္ပာယုကသံဝတ္တနိယံ ကမ္မ’’န္တိ ဧတ္ထ ဒုဗ္ဗဏ္ဏတာ နာမ ဇရာ။ အပ္ပာယုကတာ နာမ မရဏံ။ တံသံဝတ္တနိယဉ္စ ကမ္မံ အတ္ထိ။ တသ္မာ ဇရာမရဏံ ဝိပါကောတိ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ ပဋိလောမပဉှေ အနာရမ္မဏန္တိ ရူပဓမ္မာနံ တာဝ အနာရမ္မဏမေဝ၊ အရူပါနံ ပန ဇရာမရဏံ သမ္ပယောဂလက္ခဏာဘာဝါ အနာရမ္မဏမေဝ။

၄၉၆။ အကုသလာနံ ဓမ္မာနံ ဇရာမရဏံ အကုသလာနံ ဓမ္မာနံ ဝိပါကောတိ ပဉှေ ဇရာမရဏေန နာမ အနိဋ္ဌဝိပါကေန ဘဝိတဗ္ဗန္တိ လဒ္ဓိယာ ပဋိဇာနာတိ ။ တေနေဝ ကာရဏေန ကုသလာနံ ဓမ္မာနံ ဇရာမရဏဿ ကုသလဝိပါကတံ ပဋိက္ခိပတိ။ ပရတော စဿ အကုသလဝိပါကတညေဝ ပဋိဇာနာတိ။

ကုသလာနဉ္စ အကုသလာနဉ္စာတိ ပုစ္ဆာဝသေန ဧကတော ကတံ၊ ဧကက္ခဏေ ပန တံ နတ္ထိ။ အဗျာကတာနံ အဝိပါကာနံ ဇရာမရဏံ ဝိပါကောတိ ဝတ္တဗ္ဗတာယ ပရိယာယော နတ္ထိ၊ တသ္မာ အဗျာကတဝသေန ပုစ္ဆာ န ကတာ။

၄၉၇။ ဒုဗ္ဗဏ္ဏသံဝတ္တနိယန္တိ ဧတ္ထ ဒုဗ္ဗဏ္ဏိယံ နာမ အပရိသုဒ္ဓဝဏ္ဏတာ။ အပ္ပာယုကတာ နာမ အာယုနော စိရံ ပဝတ္တိတုံ အသမတ္ထတာ။ တတ္ထ အကုသလကမ္မံ ကမ္မသမုဋ္ဌာနဿ ဒုဗ္ဗဏ္ဏရူပဿ ကမ္မပစ္စယော ဟောတိ၊ အသဒိသတ္တာ ပနဿ တံဝိပါကော န ဟောတိ။ ဥတုသမုဋ္ဌာနာဒိနော ပန တံပဋိလာဘဝသေန အာယုနော စ ဥပစ္ဆေဒကဝသေန ပစ္စယော ဟောတိ။ ဧဝမေတံ ပရိယာယေန တံသံဝတ္တနိကံ နာမ ဟောတိ၊ န ဝိပါကဖဿာဒီနံ ဝိယ ဇနကဝသေန၊ တသ္မာ ဝိပါကဘာဝေ အသာဓကံ။ သေသမေတ္ထ ဟေဋ္ဌာ ဝုတ္တသဒိသမေဝါတိ။

ဇရာမရဏံ ဝိပါကောတိကထာဝဏ္ဏနာ။

၉။ အရိယဓမ္မဝိပါကကထာဝဏ္ဏနာ

၄၉၈။ ဣဒါနိ အရိယဓမ္မဝိပါကကထာ နာမ ဟောတိ။ တတ္ထ ယေသံ ကိလေသပ္ပဟာနမတ္တမေဝ သာမညဖလံ၊ န စိတ္တစေတသိကာ ဓမ္မာတိ လဒ္ဓိ၊ သေယျထာပိ အန္ဓကာနံ၊ တေ သန္ဓာယ နတ္ထိ အရိယဓမ္မဝိပါကောတိ ပုစ္ဆာ သကဝါဒိဿ။ တတ္ထ အရိယဓမ္မဝိပါကောတိ မဂ္ဂသင်္ခါတဿ အရိယဓမ္မဿ ဝိပါကော။ ကိလေသက္ခယမတ္တံ အရိယဖလန္တိ လဒ္ဓိယာ ပဋိညာ ဣတရဿ။ သာမညန္တိ သမဏဘာဝေါ၊ မဂ္ဂဿေတံ နာမံ။ ‘‘သာမညဉ္စ ဝေါ၊ ဘိက္ခဝေ၊ ဒေသေဿာမိ သာမညဖလဉ္စာ’’တိ ဟိ ဝုတ္တံ။ ဗြဟ္မညေပိ ဧသေဝ နယော။

သောတာပတ္တိဖလံ န ဝိပါကောတိအာဒီသု သောတာပတ္တိမဂ္ဂါဒီနံ အပစယဂါမိတံ သန္ဓာယ အရိယဖလာနံ နဝိပါကဘာဝံ ပဋိဇာနာတိ၊ ဒါနဖလာဒီနံ ပဋိက္ခိပတိ ။ သော ဟိ အာစယဂါမိတ္တိကဿ ဧဝံ အတ္ထံ ဓာရေတိ – ဝိပါကသင်္ခါတံ အာစယံ ဂစ္ဆန္တိ၊ တံ ဝါ အာစိနန္တာ ဂစ္ဆန္တီတိ အာစယဂါမိနော၊ ဝိပါကံ အပစိနန္တာ ဂစ္ဆန္တီတိ အပစယဂါမိနောတိ။ တသ္မာ ဧဝံ ပဋိဇာနာတိ စ ပဋိက္ခိပတိ စ။

၅၀၀။ ကာမာဝစရံ ကုသလံ သဝိပါကံ အာစယဂါမီတိအာဒိကာ ပုစ္ဆာ ပရဝါဒိဿ၊ ပဋိညာ စ ပဋိက္ခေပေါ စ သကဝါဒိဿ။ လောကိယဉှိ ကုသလံ ဝိပါကစုတိပဋိသန္ဓိယော စေဝ ဝဋ္ဋဉ္စ အာစိနန္တံ ဂစ္ဆတီတိ အာစယဂါမိ။ လောကုတ္တရကုသလံ စုတိပဋိသန္ဓိယော စေဝ ဝဋ္ဋဉ္စ အပစိနန္တံ ဂစ္ဆတီတိ အပစယဂါမိ။ ဧဝမေတံ သဝိပါကမေဝ ဟောတိ၊ န အပစယဂါမိဝစနမတ္တေန အဝိပါကံ။ ဣမမတ္ထံ သန္ဓာယေတ္ထ သကဝါဒိနော ပဋိညာ စ ပဋိက္ခေပေါ စ ဝေဒိတဗ္ဗာတိ။

အရိယဓမ္မဝိပါကကထာဝဏ္ဏနာ။

၁၀။ ဝိပါကော ဝိပါကဓမ္မဓမ္မောတိကထာဝဏ္ဏနာ

၅၀၁။ ဣဒါနိ ဝိပါကော ဝိပါကဓမ္မဓမ္မောတိကထာ နာမ ဟောတိ။ တတ္ထ ယသ္မာ ဝိပါကော ဝိပါကဿ အညမညာဒိပစ္စယဝသေန ပစ္စယော ဟောတိ၊ တသ္မာ ဝိပါကောပိ ဝိပါကဓမ္မဓမ္မောတိ ယေသံ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ တဿ ဝိပါကောတိ တဿ ဝိပါကဓမ္မဓမ္မဿ ဝိပါကဿ ယော ဝိပါကော၊ သောပိ တေ ဝိပါကဓမ္မဓမ္မော ဟောတီတိ ပုစ္ဆတိ။ ဣတရော အာယတိံ ဝိပါကဒါနာဘာဝံ သန္ဓာယ ပဋိက္ခိပတိ။ ဒုတိယံ ပုဋ္ဌော တပ္ပစ္စယာပိ အညဿ ဝိပါကဿ ဥပ္ပတ္တိံ သန္ဓာယ ပဋိဇာနာတိ။ ဧဝံ သန္တေ ပနဿ ကုသလာကုသလဿ ဝိယ တဿာပိ ဝိပါကဿ ဝိပါကော၊ တဿာပိ ဝိပါကောတိ ဝဋ္ဋာနုပစ္ဆေဒေါ အာပဇ္ဇတီတိ ပုဋ္ဌော သမယဝိရောဓဘယေန ပဋိက္ခိပတိ။

ဝိပါကောတိ ဝါတိအာဒိမှိ ဝစနသာဓနေ ပန ယဒိ ဝိပါကဿ ဝိပါကဓမ္မဓမ္မေန ဧကတ္ထတာ ဘဝေယျ၊ ကုသလာကုသလဗျာကတာနံ ဧကတ္ထတံ အာပဇ္ဇေယျာတိ ပဋိက္ခိပတိ။ ဝိပါကော စ ဝိပါကဓမ္မဓမ္မော စာတိ ဧတ္ထ အယံ အဓိပ္ပာယော – သော ဟိ စတူသု ဝိပါကက္ခန္ဓေသု ဧကေကံ အညမညပစ္စယာဒီသု ပစ္စယဋ္ဌေန ဝိပါကဓမ္မဓမ္မတံ ပစ္စယုပ္ပန္နဋ္ဌေန စ ဝိပါကံ မညမာနော ‘‘ဝိပါကော ဝိပါကဓမ္မဓမ္မော’’တိ ပုဋ္ဌော အာမန္တာတိ ပဋိဇာနာတိ။ အထ နံ သကဝါဒီ ‘‘ယသ္မာ တယာ ဧကက္ခဏေ စတူသု ခန္ဓေသု ဝိပါကော ဝိပါကဓမ္မဓမ္မောပိ အနုညာတော၊ တသ္မာ တေသံ သဟဂတာဒိဘာဝေါ အာပဇ္ဇတီ’’တိ စောဒေတုံ ဧဝမာဟ။ ဣတရော ကုသလာကုသလသင်္ခါတံ ဝိပါကဓမ္မဓမ္မံ သန္ဓာယ ပဋိက္ခိပတိ။ တညေဝ အကုသလန္တိ ယဒိ တေ ဝိပါကော ဝိပါကဓမ္မဓမ္မော၊ ယော အကုသလဝိပါကော၊ သော အကုသလံ အာပဇ္ဇတိ။ ကသ္မာ? ဝိပါကဓမ္မဓမ္မေန ဧကတ္တာ။ တညေဝ ကုသလန္တိအာဒီသုပိ ဧသေဝ နယော။

၅၀၂။ အညမညပစ္စယာတိ ဣဒံ သဟဇာတာနံ ပစ္စယမတ္တဝသေန ဝုတ္တံ၊ တသ္မာ အသာဓကံ။ မဟာဘူတာနမ္ပိ စ အညမညပစ္စယတာ ဝုတ္တာ၊ န စ တာနိ ဝိပါကာနိ၊ န စ ဝိပါကဓမ္မဓမ္မာနီတိ။

ဝိပါကော ဝိပါကဓမ္မဓမ္မောတိကထာဝဏ္ဏနာ။

သတ္တမော ဝဂ္ဂေါ။