📜

၈။ အဋ္ဌမဝဂ္ဂေါ

၁။ ဆဂတိကထာဝဏ္ဏနာ

၅၀၃-၅၀၄။ ဣဒါနိ ဆဂတိကထာ နာမ ဟောတိ။ တတ္ထ အသုရကာယေန သဒ္ဓိံ ဆဂတိယောတိ ယေသံ လဒ္ဓိ၊ သေယျထာပိ အန္ဓကာနဉ္စေဝ ဥတ္တရာပထကာနဉ္စ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ သကဝါဒီ ‘‘ပဉ္စ ခေါ ပနိမာ၊ သာရိပုတ္တ၊ ဂတိယော’’တိ (မ။ နိ။ ၁။၁၅၃) လောမဟံသနပရိယာယေ ပရိစ္ဆိန္နာနံ ဂတီနံ ဝသေန စောဒေတုံ နနု ပဉ္စ ဂတိယောတိအာဒိမာဟ။ ဣတရော သုတ္တဝိရောဓဘယေန ပဋိဇာနာတိ။ ကသ္မာ ပန သကဝါဒီ ဆ ဂတိယော န သမ္ပဋိစ္ဆတိ၊ နနု ‘‘စတူဟာပါယေဟိ စ ဝိပ္ပမုတ္တော’’တိ ဧတ္ထ အသုရကာယောပိ ဂဟိတောတိ။ သစ္စံ ဂဟိတော၊ န ပနေသာ ဂတိ။ ကသ္မာ? ဝိသုံ အဘာဝတော။ အသုရကာယသ္မိဉှိ ကာလကဉ္စိကာ အသုရာ ပေတဂတိယာ သင်္ဂဟိတာ ၊ ဝေပစိတ္တိပရိသာ ဒေဝဂတိယာ၊ အသုရကာယောတိ ဝိသုံ ဧကာ ဂတိ နာမ နတ္ထိ။

ဣဒါနိ ဧတမေဝ အတ္ထံ ဒဿေတုံ နနု ကာလကဉ္စိကာတိအာဒိ အာရဒ္ဓံ။ တတ္ထ သမာနဝဏ္ဏာတိ သဒိသရူပသဏ္ဌာနာ ဗီဘစ္ဆာ ဝိရူပါ ဒုဒ္ဒဿိကာ။ သမာနဘောဂါတိ သဒိသမေထုနသမာစာရာ။ သမာနာဟာရာတိ သဒိသခေဠသိင်္ဃာဏိကပုဗ္ဗလောဟိတာဒိအာဟာရာ။ သမာနာယုကာတိ သဒိသအာယုပရိစ္ဆေဒါ။ အာဝါဟဝိဝါဟန္တိ ကညာဂဟဏဉ္စေဝ ကညာဒါနဉ္စ။ သုက္ကပက္ခေ သမာနဝဏ္ဏာတိ သဒိသရူပသဏ္ဌာနာ အဘိရူပါ ပါသာဒိကာ ဒဿနီယာ ပဘာသမ္ပန္နာ။ သမာနဘောဂါတိ သဒိသပဉ္စကအာမဂုဏဘောဂါ။ သမာနာဟာရာတိ သဒိသသုဓာဘောဇနာဒိအာဟာရာ။ သေသံ ဝုတ္တနယမေဝ။ နနု အတ္ထိ အသုရကာယောတိ ဣဒံ အသုရကာယဿေဝ သာဓကံ။ တဿ ပန ဝိသုံ ဂတိပရိစ္ဆေဒါဘာဝေန န ဂတိသာဓကန္တိ။

ဆဂတိကထာဝဏ္ဏနာ။

၂။ အန္တရာဘဝကထာဝဏ္ဏနာ

၅၀၅။ ဣဒါနိ အန္တရာဘဝကထာ နာမ ဟောတိ။ တတ္ထ ယေသံ ‘‘အန္တရာ ပရိနိဗ္ဗာယီ’’တိ သုတ္တပဒံ အယောနိသော ဂဟေတွာ ‘‘အန္တရာဘဝေါ နာမ အတ္ထိ၊ ယတ္ထ သတ္တော ဒိဗ္ဗစက္ခုကော ဝိယ အဒိဗ္ဗစက္ခုကော၊ ဣဒ္ဓိမာ ဝိယ အနိဒ္ဓိမာ မာတာပိတိသမာဂမဉ္စေဝ ဥတုသမယဉ္စ ဩလောကယမာနော သတ္တာဟံ ဝါ အတိရေကသတ္တာဟံ ဝါ တိဋ္ဌတီ’’တိ လဒ္ဓိ၊ သေယျထာပိ ပုဗ္ဗသေလိယာနဉ္စေဝ သမ္မိတိယာနဉ္စ၊ တေ သန္ဓာယ အတ္ထီတိ ပုစ္ဆာ သကဝါဒိဿ၊ လဒ္ဓိယံ ဌတွာ ပဋိညာ ဣတရဿ။ အထ နံ ယေ စ ဘဂဝတာ တယော ဘဝါ ဝုတ္တာ၊ တေသံ ဝသေန စောဒေတုံ ကာမဘဝေါတိအာဒိမာဟ။ တတြာယံ အဓိပ္ပာယော – ယဒိ တေ အန္တရာဘဝေါ နာမ ကောစိ ဘဝေါ အတ္ထိ၊ တေန ကာမဘဝါဒီနံယေဝ အညတရေန ဘဝိတဗ္ဗံ ပဉ္စဝေါကာရဘဝါဒိနာ ဝိယ၊ တေန တံ ပုစ္ဆာမိ – ‘‘ကိံ တေ အယံ အန္တရာဘဝေါ နာမ ကာမဘဝေါ၊ ဥဒါဟု ရူပဘဝေါ အရူပဘဝေါ ဝါ’’တိ? ဣတရော တထာ အနိစ္ဆန္တော သဗ္ဗံ ပဋိက္ခိပတိ။ ကာမဘဝဿ စာတိအာဒိ ယဒိ အန္တရာဘဝေါ နာမ အတ္ထိ၊ ဣမေသံ ဘဝါနံ အန္တရာ ဒွိန္နံ သီမာနံ သီမန္တရိကာ ဝိယ ဘဝေယျာတိ စောဒေတုံ အာရဒ္ဓံ။ ပရဝါဒီ ပန တထာ အနိစ္ဆန္တော သဗ္ဗပဉှေ ပဋိက္ခိပတိ ကေဝလံ လဒ္ဓိယာ၊ န သဟဓမ္မေန။ တေနေဝ နံ သကဝါဒီ ‘နော ဝတ ရေ’တိ ပဋိသေဓေတိ။

၅၀၆။ ပဉ္စမီ သာ ယောနီတိအာဒီနိပိ ယထာပရိစ္ဆိန္နယောနိအာဒီသု သော သမောဓာနံ န ဂစ္ဆတိ၊ အထ တေန တတော တတော အတိရေကေန ဘဝိတဗ္ဗန္တိ စောဒေတုံ ဝုတ္တာနိ။ အန္တရာဘဝူပဂံ ကမ္မန္တိ ယဒိ သောပိ ဧကော ဘဝေါ၊ ယထာ ကာမဘဝူပဂါဒီနိ ကမ္မာနိ အတ္ထီတိ သတ္ထာရာ ဝိဘဇိတွာ ဒဿိတာနိ၊ ဧဝံ တဒုပဂေနာပိ ကမ္မေန ဘဝိတဗ္ဗန္တိ စောဒနတ္ထံ ဝုတ္တံ။ ယသ္မာ ပန ပရသမယေ အန္တရာဘဝူပဂံ နာမ ပါဋိယေက္ကံ ကမ္မံ နတ္ထိ၊ ယံ ယံ ဘဝံ ဥပပဇ္ဇိဿတိ၊ တဒုပဂေနေဝ ကမ္မေန အန္တရာဘဝေ နိဗ္ဗတ္တတီတိ တေသံ လဒ္ဓိ၊ တသ္မာ ‘နဟေဝ’န္တိ ပဋိက္ခိတ္တံ။ အတ္ထိ အန္တရာဘဝူပဂါ သတ္တာတိ ပုဋ္ဌောပိ ကာမဘဝူပဂါယေဝ နာမ တေတိ လဒ္ဓိယာ ပဋိက္ခိပတိ။ ဇာယန္တီတိအာဒီနိ ပုဋ္ဌောပိ တတ္ထ ဇာတိဇရာမရဏာနိ စေဝ စုတိပဋိသန္ဓိပရမ္ပရဉ္စ အနိစ္ဆန္တော ပဋိက္ခိပတိ။ ရူပါဒိဝသေန ပုဋ္ဌောပိ ယသ္မာ အန္တရာဘဝသတ္တဿ အနိဒဿနံ ရူပံ၊ ဝေဒနာဒယောပိ အညေသံ ဝိယ န ဩဠာရိကာတိ တဿ လဒ္ဓိ၊ တသ္မာ ပဋိက္ခိပတိ။ ဣမိနာဝ ကာရဏေန ပဉ္စဝေါကာရဘဝဘာဝေပိ ပဋိက္ခေပေါ ဝေဒိတဗ္ဗော။

၅၀၇။ ဣဒါနိ ကာမဘဝေါ ဘဝေါ ဂတီတိအာဒိ ဘဝသံသန္ဒနံ နာမ ဟောတိ။ တတြာယံ အဓိပ္ပာယော – ယဒိ တေ အန္တရာဘဝေါ နာမ ကောစိ ဘဝေါ ဘဝေယျ၊ ယထာ ကာမဘဝါဒီသု ဘဝဂတိအာဒိဘေဒေါ လဗ္ဘတိ၊ တထာ တတြာပိ လဗ္ဘေထ။ ယထာ ဝါ တတ္ထ န လဗ္ဘတိ၊ တထာ ဣမေသုပိ န လဗ္ဘေထ။ သမာနသ္မိဉှိ ဘဝဘာဝေ ဧတေသွေဝေသ ဝိဘာဂေါ အတ္ထိ၊ န ဣတရသ္မိန္တိ ကော ဧတ္ထ ဝိသေသဟေတူတိ။ ဣတရော ပုန လဒ္ဓိမတ္တဝသေန တံ တံ ပဋိဇာနာတိ စေဝ ပဋိက္ခိပတိ စ။

၅၀၈။ သဗ္ဗေသညေဝ သတ္တာနံ အတ္ထိ အန္တရာဘဝေါတိ ပုဋ္ဌော ယသ္မာ နိရယူပဂအသညသတ္တူပဂအရူပူပဂါနံ အန္တရာဘဝံ န ဣစ္ဆတိ၊ တသ္မာ ပဋိက္ခိပတိ။ တေနေဝ ကာရဏေန ပဋိလောမေ ပဋိဇာနာတိ။ အာနန္တရိယဿာတိအာဒိ ယေသံ သော အန္တရာဘဝံ န ဣစ္ဆတိ၊ တေ တာဝ ဝိဘဇိတွာ ဒဿေတုံ ဝုတ္တံ။ တံ သဗ္ဗံ ပါဠိအနုသာရေနေဝ ဝေဒိတဗ္ဗံ သဒ္ဓိံ သုတ္တသာဓနေနာတိ။

အန္တရာဘဝကထာဝဏ္ဏနာ။

၃။ ကာမဂုဏကထာဝဏ္ဏနာ

၅၁၀။ ဣဒါနိ ကာမဂုဏကထာ နာမ ဟောတိ။ တတ္ထ သကသမယေ တာဝ ကာမဓာတူတိ ဝတ္ထုကာမာပိ ဝုစ္စန္တိ – ကိလေသကာမာပိ ကာမဘဝေါပိ။ ဧတေသု ဟိ ဝတ္ထုကာမာ ကမနီယဋ္ဌေန ကာမာ၊ သဘာဝနိဿတ္တသုညတဋ္ဌေန ဓာတူတိ ကာမဓာတု။ ကိလေသကာမာ ကမနီယဋ္ဌေန စေဝ ကမနဋ္ဌေန စ ကာမာ၊ ယထာဝုတ္တေနေဝတ္ထေန ဓာတူတိ ကာမဓာတု။ ကာမဘဝေါ ကမနီယဋ္ဌေန ကမနဋ္ဌေန ဝတ္ထုကာမပဝတ္တိဒေသဋ္ဌေနာတိ တီဟိ ကာရဏေဟိ ကာမော၊ ယထာဝုတ္တေနေဝတ္ထေန ဓာတူတိ ကာမဓာတု။ ပရသမယေ ပန – ‘‘ပဉ္စိမေ၊ ဘိက္ခဝေ၊ ကာမဂုဏာ’’တိ ဝစနမတ္တံ နိဿာယ ပဉ္စေဝ ကာမဂုဏာ ကာမဓာတူတိ ဂဟိတံ။ တသ္မာ ယေသံ အယံ လဒ္ဓိ၊ သေယျထာပိ ဧတရဟိ ပုဗ္ဗသေလိယာနံ၊ တေ သန္ဓာယ ကာမဓာတုနာနတ္တံ ဗောဓေတုံ ပဉ္စေဝါတိ ပုစ္ဆာ သကဝါဒိဿ၊ လဒ္ဓိဝသေန ပဋိညာ ဣတရဿ။ နနု အတ္ထီတိအာဒိ ကိလေသကာမဒဿနတ္ထံ ဝုတ္တံ။ တတ္ထ တပ္ပဋိသံယုတ္တောတိ ကာမဂုဏပဋိသံယုတ္တော၊ ကာမဂုဏာရမ္မဏောတိ အတ္ထော။ နော စ ဝတ ရေ ဝတ္တဗ္ဗေ ပဉ္စေဝါတိ ဣမေသု တပ္ပဋိသံယုတ္တဆန္ဒာဒီသု သတိ ပဉ္စေဝ ကာမဂုဏာ ကာမဓာတူတိ န ဝတ္တဗ္ဗံ။ ဧတေပိ ဟိ ဆန္ဒာဒယော ကမနီယဋ္ဌေန ကာမာ စ ဓာတု စာတိပိ ကာမဓာတု။ ကမနဋ္ဌေန ကာမသင်္ခါတာ ဓာတူတိပိ ကာမဓာတူတိ အတ္ထော။

မနုဿာနံ စက္ခုန္တိအာဒိ ဝတ္ထုကာမဒဿနတ္ထံ ဝုတ္တံ။ တတ္ထ ပရဝါဒီ ဆန္နမ္ပိ အာယတနာနံ ဝတ္ထုကာမဘာဝေန နကာမဓာတုဘာဝံ ပဋိက္ခိပိတွာ ပုန မနောတိ ပုဋ္ဌော မဟဂ္ဂတလောကုတ္တရံ သန္ဓာယ နကာမဓာတုဘာဝံ ပဋိဇာနာတိ။ ယသ္မာ ပန သဗ္ဗောပိ တေဘူမကမနော ကာမဓာတုယေဝ၊ တသ္မာ နံ သကဝါဒီ သုတ္တေန နိဂ္ဂဏှာတိ။

၅၁၁။ ကာမဂုဏာဘဝေါတိအာဒိ ဘဝဿ ကာမဓာတုဘာဝဒဿနတ္ထံ ဝုတ္တံ။ ယသ္မာ ပန ကာမဂုဏမတ္တေ ဘဝေါတိ ဝေါဟာရော နတ္ထိ၊ တသ္မာ ပရဝါဒီ နဟေဝါတိ ပဋိက္ခိပတိ။ ကာမဂုဏူပဂံ ကမ္မန္တိအာဒိ သဗ္ဗံ ကာမဂုဏမတ္တဿ နကာမဓာတုဘာဝဒဿနတ္ထံ ဝုတ္တံ။ ကာမဓာတုသင်္ခါတကာမဘဝူပဂမေဝ ဟိ ကမ္မံ အတ္ထိ၊ ကာမဘဝူပဂါ ဧဝ စ သတ္တာ ဟောန္တိ။ တတ္ထ ဇာယန္တိ ဇိယန္တိ မိယန္တိ စဝန္တိ ဥပပဇ္ဇန္တိ၊ န ကာမဂုဏေသူတိ ဣမိနာ ဥပါယေန သဗ္ဗတ္ထ အတ္ထော ဝေဒိတဗ္ဗောတိ။

ကာမဂုဏကထာဝဏ္ဏနာ။

၄။ ကာမကထာဝဏ္ဏနာ

၅၁၃-၅၁၄။ ဣဒါနိ ကာမကထာ နာမ ဟောတိ။ တတ္ထ ယေသံ ‘‘ပဉ္စိမေ၊ ဘိက္ခဝေ၊ ကာမဂုဏာ’’တိ ဝစနမတ္တံ နိဿာယ ရူပါယတနာဒီနိ ပဉ္စေဝါယတနာနိ ကာမာတိ လဒ္ဓိ၊ သေယျထာပိ ပုဗ္ဗသေလိယာနံ၊ တေသံ ကိလေသကာမဿေဝ နိပ္ပရိယာယေန ကာမဘာဝံ ဒဿေတုံ ပဉ္စေဝါတိ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ဥတ္တာနတ္ထမေဝါတိ။

ကာမကထာဝဏ္ဏနာ။

၅။ ရူပဓာတုကထာဝဏ္ဏနာ

၅၁၅-၅၁၆။ ဣဒါနိ ရူပဓာတုကထာ နာမ ဟောတိ။ တတ္ထ ‘‘ရူပိနော ဓမ္မာ ရူပဓာတု နာမာ’’တိ ယေသံ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ရူပိနောတိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ သကဝါဒီ ယသ္မာ ရူပဓာတု နာမ ရူပဘဝေါ၊ န ရူပမတ္တမေဝ၊ တသ္မာ တေနတ္ထေန စောဒေတုံ ရူပဓာတူတိအာဒိမာဟ။ တံ သဗ္ဗံ ကာမဂုဏကထာယံ ဝုတ္တနယေနေဝ ဝေဒိတဗ္ဗံ။ သာဝ ကာမဓာတူတိ ပုဋ္ဌော ဘူမိပရိစ္ဆေဒေန ဝိရောဓံ ပဿမာနော ပဋိက္ခိပတိ။ ပုန ဒဠှံ ကတွာ ပုဋ္ဌော အတ္တနော လဒ္ဓိဝသေန ပဋိဇာနာတိ။ ဧဝံ သန္တေ ပန ဒွီဟိ ဘဝေဟိ သမန္နာဂတတာ အာပဇ္ဇတိ၊ တေန တံ သကဝါဒီ ကာမဘဝေန စာတိ အာဒိမာဟ။ ဣတရော ဧကဿ ဒွီဟိ သမန္နာဂတာဘာဝတော ပဋိက္ခိပတီတိ။

ရူပဓာတုကထာဝဏ္ဏနာ။

၆။ အရူပဓာတုကထာဝဏ္ဏနာ

၅၁၇-၅၁၈။ အရူပဓာတုကထာယပိ ဣမိနာဝုပါယေန အတ္ထော ဝေဒိတဗ္ဗော။ အရူပဓမ္မေသု ပန ဝေဒနာက္ခန္ဓမေဝ ဂဟေတွာ ဝေဒနာ ဘဝေါတိအာဒိနာ နယေနေတ္ထ ဒေသနာ ကတာ။ တတ္ထ ကိံ တေ အရူပိနော ဓမ္မာတိ သင်္ခံ ဂတာ ဝေဒနာဒီသု အညတရာ ဟောတီတိ ဧဝမတ္ထော ဒဋ္ဌဗ္ဗော။ သေသံ ဟေဋ္ဌာ ဝုတ္တနယေနေဝ ဝေဒိတဗ္ဗန္တိ။

အရူပဓာတုကထာဝဏ္ဏနာ။

၇။ ရူပဓာတုယာ အာယတနကထာဝဏ္ဏနာ

၅၁၉။ ဣဒါနိ ရူပဓာတုယာ အာယတနကထာ နာမ ဟောတိ။ တတ္ထ ယေသံ ‘‘ရူပီ မနောမယော သဗ္ဗင်္ဂပစ္စင်္ဂီ အဟီနိန္ဒြိယော’’တိ (ဒီ။ နိ။ ၁။၈၇) သုတ္တံ နိဿာယ ဗြဟ္မကာယိကာနံ ဃာနာဒိနိမိတ္တာနိပိ အာယတနာနေဝါတိ ကပ္ပေတွာ သဠာယတနိကော တေသံ အတ္တဘာဝေါတိ လဒ္ဓိ၊ သေယျထာပိ အန္ဓကာနဉ္စေဝ သမ္မိတိယာနဉ္စ၊ တေ သန္ဓာယ သဠာယတနိကောတိ ပုစ္ဆာ သကဝါဒိဿ၊ လဒ္ဓိဝသေန ပဋိညာ ဣတရဿ။ အထ နံ ယံ တတ္ထ အာယတနံ နတ္ထိ၊ တဿ ဝသေန စောဒေတုံ အတ္ထိ တတ္ထ ဃာနာယတနန္တိအာဒိ အာရဒ္ဓံ။ တတော ပရဝါဒီ ယံ တတ္ထ အဇ္ဈတ္တိကာနံ တိဏ္ဏံ အာယတနာနံ ဃာနာဒိကံ သဏ္ဌာနနိမိတ္တံ တဒေဝ အာယတနန္တိ လဒ္ဓိယာ ပဋိဇာနာတိ။ ဗာဟိရာနံ ဂန္ဓာယတနာဒီနံ ဝသေန ပုဋ္ဌော ဃာနပ္ပသာဒါဒယော တတ္ထ န ဣစ္ဆတိ၊ တသ္မာ တေသံ ဂေါစရံ ပဋိသေဓေန္တော ပဋိက္ခိပတိ။ ပဋိလောမပဉှသံသန္ဒနပဉှေသုပိ ဣမိနာဝုပါယေန အတ္ထော ဝေဒိတဗ္ဗော။

၅၂၁။ အတ္ထိ တတ္ထ ဃာနာယတနံ အတ္ထိ ဂန္ဓာယတနံ တေန ဃာနေန တံ ဂန္ဓံ ဃာယတီတိ တသ္မိံယေဝ ပရသမယေ ဧကစ္စေ အာစရိယေ သန္ဓာယ ဝုတ္တံ။ တေ ကိရ တတ္ထ ဆ အဇ္ဈတ္တိကာနိ အာယတနာနိ ပရိပုဏ္ဏာနိ ဣစ္ဆန္တိ၊ အာယတနေန စ နာမ သကိစ္စကေန ဘဝိတဗ္ဗန္တိ တေဟိ ဃာနာဒီဟိ တေ ဂန္ဓာဒယော ဃာယန္တိ သာယန္တိ ဖုသန္တီတိပိ ဣစ္ဆန္တိ။ တံ လဒ္ဓိံ သန္ဓာယ ပရဝါဒီ အာမန္တာတိ ပဋိဇာနာတိ။

၅၂၂။ အတ္ထိတတ္ထ မူလဂန္ဓောတိအာဒီနိ ပန ပုဋ္ဌော အတ္ထိဘာဝံ သာဓေတုံ အသက္ကောန္တော ပဋိက္ခိပတိ။ နနု အတ္ထိ တတ္ထဃာနနိမိတ္တန္တိအာဒိ သဏ္ဌာနမတ္တဿေဝ သာဓကံ၊ န အာယတနဿ၊ တသ္မာ ဥဒါဟဋမ္ပိ အနုဒါဟဋသဒိသမေဝါတိ။

ရူပဓာတုယာ အာယတနကထာဝဏ္ဏနာ။

၈။ အရူပေ ရူပကထာဝဏ္ဏနာ

၅၂၄-၅၂၆။ ဣဒါနိ အရူပေ ရူပကထာ နာမ ဟောတိ။ တတ္ထ ယေသံ ‘‘ဝိညာဏပစ္စယာ နာမရူပ’’န္တိ ဝစနတော အာရုပ္ပဘဝေပိ ဩဠာရိကရူပါ နိဿဋံ သုခုမရူပံ အတ္ထီတိ လဒ္ဓိ၊ သေယျထာပိ အန္ဓကာနံ၊ တေ သန္ဓာယ အတ္ထိ ရူပန္တိ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ဥတ္တာနတ္ထမေဝါတိ။

အရူပေ ရူပကထာဝဏ္ဏနာ။

၉။ ရူပံ ကမ္မန္တိကထာဝဏ္ဏနာ

၅၂၇-၅၃၇။ ဣဒါနိ ရူပံ ကမ္မန္တိကထာ နာမ ဟောတိ။ တတ္ထ ယေသံ ကာယဝစီဝိညတ္တိသင်္ခါတံ ရူပမေဝ ကာယကမ္မံ ဝစီကမ္မံ နာမ၊ တဉ္စ ကုသလသမုဋ္ဌာနံ ကုသလံ၊ အကုသလသမုဋ္ဌာနံ အကုသလန္တိ လဒ္ဓိ၊ သေယျထာပိ မဟိသာသကာနဉ္စေဝ သမ္မိတိယာနဉ္စ၊ တေ သန္ဓာယ ကုသလေန စိတ္တေန သမုဋ္ဌိတန္တိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ သစေ တံ ကုသလံ၊ ယွာယံ သာရမ္မဏာဒိဘေဒေါ ကုသလဿ လဗ္ဘတိ၊ အတ္ထိ တေ သော တဿာတိ စောဒေတုံ သာရမ္မဏန္တိအာဒိ အာရဒ္ဓံ။ တတ္ထ ပတ္ထနာ ပဏိဓီတိ စေတနာယေဝေတံ ဝေဝစနံ။ ကုသလစေတနာယေဝ ဟိ ပကပ္ပယမာနာ ပတ္ထနာတိ။ ပကပ္ပနဝသေန ဌိတတ္တာ ပဏိဓီတိ စ ဝုစ္စတိ။ ပရတော ပန ကုသလေန စိတ္တေန သမုဋ္ဌိတာ ဝေဒနာ သညာ စေတနာ သဒ္ဓါတိအာဒီသု ဝေဒနာဒီနညေဝ စေတ္ထ ပတ္ထနာ ပဏိဓီတိ လဗ္ဘတိ၊ န စေတနာယ။ ကသ္မာ? ဒွိန္နံ စေတနာနံ ဧကတော အဘာဝါ၊ သောတပတိတတ္တာ ပန ဧဝံ တန္တိ ဂတာတိ ဝေဒိတဗ္ဗာ။ ရူပါယတနန္တိအာဒိ ပုရိမဝါရေ ‘‘သဗ္ဗန္တံ ကုသလ’’န္တိ သံခိတ္တဿ ပဘေဒဒဿနတ္ထံ ဝုတ္တံ ။ သေသာ သံသန္ဒနနယာ၊ ဝစီကမ္မကထာ ‘‘အကုသလေန စိတ္တေန သမုဋ္ဌိတ’’န္တိအာဒိဝိဓာနဉ္စ သဗ္ဗံ ပါဠိအနုသာရေနေဝ ဝေဒိတဗ္ဗံ။ အသုစီတိ ပနေတ္ထ သုက္ကံ အဓိပ္ပေတံ။ သုတ္တသာဓနံ ဥတ္တာနတ္ထမေဝ။

ရူပံ ကမ္မန္တိကထာဝဏ္ဏနာ။

၁၀။ ဇီဝိတိန္ဒြိယကထာဝဏ္ဏနာ

၅၄၀။ ဣဒါနိ ဇီဝိတိန္ဒြိယကထာ နာမ ဟောတိ။ တတ္ထ ယေသံ ဇီဝိတိန္ဒြိယံ နာမ စိတ္တဝိပ္ပယုတ္တော အရူပဓမ္မော၊ တသ္မာ ရူပဇီဝိတိန္ဒြိယံ နတ္ထီတိ လဒ္ဓိ၊ သေယျထာပိ ပုဗ္ဗသေလိယာနဉ္စေဝ သမ္မိတိယာနဉ္စ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ နတ္ထိ ရူပီနံ ဓမ္မာနံ အာယူတိ ပဉှေ ဥပါဒိန္နရူပါနမ္ပိ တိဏကဋ္ဌာဒီနမ္ပိ သန္တာနဝသေန ပဝတ္တိမေဝ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာတိ ဣစ္ဆတိ၊ တသ္မာ ပဋိက္ခိပတိ။ အတ္ထီတိ ပဉှေပိ ဣမိနာ ကာရဏေန ပဋိဇာနာတိ။ အတ္ထိ အရူပဇီဝိတိန္ဒြိယန္တိ ပဉှေ အရူပဓမ္မာနံ စိတ္တဝိပ္ပယုတ္တံ ဇီဝိတိန္ဒြိယသန္တာနံ နာမ အတ္ထီတိ ဣစ္ဆတိ၊ တသ္မာ ပဋိဇာနာတိ။

၅၄၁။ ရူပီနံ ဓမ္မာနံ အာယု အရူပဇီဝိတိန္ဒြိယန္တိ ပဉှေ သတ္တသန္တာနေ ရူပိနော ဝါ ဟောန္တု အရူပိနော ဝါ၊ သဗ္ဗေသံ စိတ္တဝိပ္ပယုတ္တံ အရူပဇီဝိတိန္ဒြိယမေဝ ဣစ္ဆတိ၊ တသ္မာ ပဋိဇာနာတိ။

၅၄၂။ နိရောဓသမာပန္နပဉှေသုပိ စိတ္တဝိပ္ပယုတ္တံ အရူပဇီဝိတမေဝ သန္ဓာယ ပဋိက္ခိပတိ စ ပဋိဇာနာတိ စ။ သကဝါဒီ ပန တံ အသမ္ပဋိစ္ဆန္တော ယံ အရူပပဝတ္တေ အသတိ အတ္ထိ၊ ရူပေန တေန ဘဝိတဗ္ဗန္တိ စောဒေတုံ ဟဉ္စီတိအာဒိမာဟ။ သင်္ခါရက္ခန္ဓပဉှေ ဖဿာဒိသင်္ခါရက္ခန္ဓံ သန္ဓာယ ပဋိက္ခိပတိ၊ ကာယကမ္မာဒိသင်္ခါရက္ခန္ဓံ သန္ဓာယ ပဋိဇာနာတိ။ ကာယဝိညတ္တိ ဝစီဝိညတ္တိ သမ္မာဝါစာ သမ္မာကမ္မန္တော ဇီဝိတိန္ဒြိယန္တိ ဧဝမာဒယောပိ ဓမ္မာ သင်္ခါရက္ခန္ဓပရိယာပန္နာတိဿ လဒ္ဓိ။ သကဝါဒီ ပန တံ အသမ္ပဋိစ္ဆန္တော ယဒိ နိရုဒ္ဓေပိ အရူပပဝတ္တေ သင်္ခါရက္ခန္ဓော အတ္ထိ၊ စတုန္နမ္ပိ ခန္ဓာနံ အတ္ထိတာ ဟောတူတိ စောဒေတုံ အတ္ထိ ဝေဒနာက္ခန္ဓောတိ အာဒိမာဟ။ ဣတရော အန္တောသမာပတ္တိံ သန္ဓာယ ပဋိက္ခိပတိ၊ သမာပဇ္ဇန္တဿ စ ဝုဋ္ဌဟန္တဿ စ ပုဗ္ဗာပရဘာဂံ သန္ဓာယ ပဋိဇာနာတိ။

၅၄၃။ အသညသတ္တဝါရေပိ ဧသေဝ နယော။ တဿ ဟိ လဒ္ဓိယာ အသညသတ္တာနံ ပဋိသန္ဓိကာလေ စိတ္တံ ဥပ္ပဇ္ဇိတွာ နိရုဇ္ဈတိ၊ တေန သဟ စိတ္တဝိပ္ပယုတ္တအရူပဇီဝိတိန္ဒြိယံ ဥပ္ပဇ္ဇိတွာ ယာဝတာယုကံ ပဝတ္တတိ။ တသ္မာ တေသံ ဇီဝိတိန္ဒြိယံ နတ္ထီတိ ပုဋ္ဌော ပဋိက္ခိပတိ၊ အတ္ထီတိ ပုဋ္ဌော ပဋိဇာနာတိ။ ဝေဒနာက္ခန္ဓာဒယောပိ တေသံ ပဝတ္တိဝသေန ပဋိက္ခိပတိ၊ စုတိပဋိသန္ဓိဝသေန ပဋိဇာနာတိ။ သကဝါဒီ ပန တံ အနိစ္ဆန္တော ‘‘သစေ တတ္ထ ဧကက္ခဏေပိ ဝေဒနာဒယော အတ္ထိ၊ ပဉ္စဝေါကာရဘဝတ္တံ ပါပုဏာတီ’’တိ စောဒေတုံ ပဉ္စဝေါကာရဘဝေါတိ အာဟ။ ဣတရော သုတ္တဝိရောဓဘယာ ပဋိက္ခိပတိ။

၅၄၄-၅၄၅။ ဧကဒေသံ ဘိဇ္ဇတီတိ ပဉှေ သမ္ပယုတ္တံ ဘိဇ္ဇတိ၊ ဝိပ္ပယုတ္တံ တိဋ္ဌတီတိ တဿ လဒ္ဓိ၊ တသ္မာ ပဋိဇာနာတိ။ ဒွေ ဇီဝိတိန္ဒြိယာနီတိ ပုစ္ဆာ ပရဝါဒိဿ၊ ပဋိညာ သကဝါဒိဿ။ ရူပါရူပဝသေန ဟိ ဒွေ ဇီဝိတိန္ဒြိယာနိ၊ တေဟိယေဝ သတ္တော ဇီဝတိ၊ တေသံ ဘင်္ဂေန မရတီတိ ဝုစ္စတိ။ စုတိက္ခဏသ္မိဉှိ ဒွေပိ ဇီဝိတာနိ သဟေဝ ဘိဇ္ဇန္တိ။

ဇီဝိတိန္ဒြိယကထာဝဏ္ဏနာ။

၁၁။ ကမ္မဟေတုကထာဝဏ္ဏနာ

၅၄၆။ ဣဒါနိ ကမ္မဟေတုကထာ နာမ ဟောတိ။ တတ္ထ ယေန အရဟတာ ပုရိမဘဝေ အရဟာ အဗ္ဘာစိက္ခိတပုဗ္ဗော၊ သော တဿ ကမ္မဿ ဟေတု အရဟတ္တာ ပရိဟာယတီတိ ယေသံ လဒ္ဓိ၊ သေယျထာပိ ပုဗ္ဗသေလိယာနဉ္စေဝ သမ္မိတိယာနဉ္စ၊ တေ သန္ဓာယ ကမ္မဟေတူတိ ပုစ္ဆာ သကဝါဒိဿ၊ ပဋိညာ ဣတရဿ။ သေသံ ပရိဟာနိကထာယံ ဝုတ္တနယမေဝ ။

ဟန္ဒ ဟိ အရဟန္တာနံ အဗ္ဘာစိက္ခတီတိ ဣဒံ ယဿ ကမ္မဿ ဟေတု ပရိဟာယတိ၊ တံ သမ္ပဋိစ္ဆာပေတုံ ဝဒတိ။ အထ နံ သကဝါဒီ တံ ပက္ခံ ပဋိဇာနာပေတွာ ‘‘ယဒိ ဧဝံ ယေဟိ အရဟန္တော န အဗ္ဘာစိက္ခိတပုဗ္ဗာ၊ တေ သဗ္ဗေ အရဟတ္တံ ပါပုဏေယျု’’န္တိ စောဒေတုံ ယေ ကေစီတိအာဒိမာဟ။ ဣတရော တဿ ကမ္မဿ အရဟတ္တံ သမ္ပာပုဏနေ နိယာမံ အပဿန္တော ပဋိက္ခိပတိ။

ကမ္မဟေတုကထာဝဏ္ဏနာ။

အဋ္ဌမော ဝဂ္ဂေါ။