📜

၁၀။ ဒသမဝဂ္ဂေါ

၁။ နိရောဓကထာဝဏ္ဏနာ

၅၇၁-၅၇၂။ ဣဒါနိ နိရောဓကထာ နာမ ဟောတိ။ တတ္ထ ယေသံ ‘‘ဥပပတ္တေသိယန္တိ သင်္ခံ ဂတဿ ဘဝင်္ဂစိတ္တဿ ဘင်္ဂက္ခဏေန သဟေဝ ကိရိယာတိ သင်္ခံ ဂတာ ကုသလာ ဝါ အကုသလာ ဝါ စတ္တာရော ခန္ဓာ စိတ္တသမုဋ္ဌာနရူပဉ္စာတိ ပဉ္စက္ခန္ဓာ ဥပ္ပဇ္ဇန္တိ။ တေသု ဟိ အနုပ္ပန္နေသု ဘဝင်္ဂေ နိရုဒ္ဓေ သန္တတိဝိစ္ဆေဒေါ ဘဝေယျာ’’တိ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ဥပပတ္တေသိယေတိ ပုစ္ဆာ သကဝါဒိဿ၊ ပဋိညာ ဣတရဿ။ တတ္ထ ဥပပတ္တေသိယေတိ စတူသုပိ ပဒေသု ဗဟုဝစနဘုမ္မတ္ထေ ဧကဝစနဘုမ္မံ။ ဥပပတ္တေသိယေသု ပဉ္စသု ခန္ဓေသု အနိရုဒ္ဓေသူတိ အယဉှေတ္ထ အတ္ထော။ ဒသန္နန္တိ ဥပပတ္တေသိယခန္ဓာနဉ္စ ကိရိယခန္ဓာနဉ္စ ဝသေန ဝုတ္တံ။ တတ္ထ ပဌမပဉှေ ခန္ဓလက္ခဏဝသေန ကိရိယဝသေန စ ပဉ္စေဝ နာမ တေ ခန္ဓာတိ ပဋိက္ခိပတိ။ ဒုတိယပဉှေ ပုရိမပစ္ဆိမဝသေန ဥပပတ္တေသိယကိရိယဝသေန စ နာနတ္တံ သန္ဓာယ ပဋိဇာနာတိ။ ဒွိန္နံ ပန ဖဿာနံ စိတ္တာနဉ္စ သမောဓာနံ ပုဋ္ဌော သုတ္တလေသာဘာဝေန ပဋိက္ခိပတိ။

ကိရိယာ စတ္တာရောတိ ရူပေန ဝိနာ ကုသလာ အကုသလာ ဝါ စတ္တာရော ဂဟိတာ။ ကိရိယာဉာဏန္တိ ပရဝါဒိနာ စက္ခုဝိညာဏသမင်္ဂိက္ခဏေ အရဟတော အနုညာတံ အနာရမ္မဏဉာဏံ။ နိရုဒ္ဓေ မဂ္ဂေါ ဥပ္ပဇ္ဇတီတိ ပုစ္ဆာ ပရဝါဒိဿ၊ အနိရုဒ္ဓေ အနုပ္ပဇ္ဇနတော ပဋိညာ သကဝါဒိဿ။ မတော မဂ္ဂံ ဘာဝေတီတိ ဆလေန ပုစ္ဆာ ပရဝါဒိဿ။ ယသ္မာ ပန ပဋိသန္ဓိတော ယာဝ စုတိစိတ္တာ သတ္တော ဇီဝတိယေဝ နာမ၊ တသ္မာ သကဝါဒီ န ဟေဝန္တိ ပဋိက္ခိပတိ။

နိရောဓကထာဝဏ္ဏနာ။

၂။ ရူပံမဂ္ဂေါတိကထာဝဏ္ဏနာ

၅၇၃-၅၇၅။ ဣဒါနိ ရူပံ မဂ္ဂေါတိကထာ နာမ ဟောတိ။ တတ္ထ ယေသံ ‘‘သမ္မာဝါစာကမ္မန္တာဇီဝါ ရူပ’’န္တိ လဒ္ဓိ၊ သေယျထာပိ မဟိသာသကသမ္မိတိယမဟာသံဃိကာနံ၊ တေ သန္ဓာယ မဂ္ဂသမင်္ဂိဿာတိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘ယဒိ တေ သမ္မာဝါစာဒယော ရူပံ၊ န ဝိရတိယော၊ ယထာ သမ္မာဒိဋ္ဌာဒိမဂ္ဂေါ သာရမ္မဏာဒိသဘာဝေါ၊ ဧဝံ တမ္ပိ ရူပံ သိယာ’’တိ စောဒေတုံ သာရမ္မဏောတိအာဒိမာဟ။ တတ္ထ ပဋိက္ခေပေါ စ ပဋိညာ စ ပရဝါဒိနော လဒ္ဓိအနုရူပေန ဝေဒိတဗ္ဗာ။ သေသမေတ္ထ ဥတ္တာနတ္ထမေဝါတိ။

ရူပံ မဂ္ဂေါတိကထာဝဏ္ဏနာ။

၃။ ပဉ္စဝိညာဏသမင်္ဂိဿ မဂ္ဂကထာဝဏ္ဏနာ

၅၇၆။ ဣဒါနိ ပဉ္စဝိညာဏသမင်္ဂိဿ မဂ္ဂကထာ နာမ ဟောတိ။ တတ္ထ ယေသံ ‘‘စက္ခုနာ ရူပံ ဒိသွာ န နိမိတ္တဂ္ဂါဟီ ဟောတီ’’တိ သုတ္တံ နိဿာယ ‘‘ပဉ္စဝိညာဏသမင်္ဂိဿ အတ္ထိ မဂ္ဂဘာဝနာ’’တိ လဒ္ဓိ၊ သေယျထာပိ မဟာသံဃိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘သစေ တဿ မဂ္ဂဘာဝနာ အတ္ထိ၊ ပဉ္စဝိညာဏဂတိကေန ဝါ မဂ္ဂေန၊ မဂ္ဂဂတိကေဟိ ဝါ ပဉ္စဝိညာဏေဟိ ဘဝိတဗ္ဗံ၊ န စ တာနိ မဂ္ဂဂတိကာနိ အနိဗ္ဗာနာရမ္မဏတ္တာ အလောကုတ္တရတ္တာ စ၊ န မဂ္ဂေါ ပဉ္စဝိညာဏဂတိကော တေသံ လက္ခဏေန အသင်္ဂဟိတတ္တာ’’တိ စောဒေတုံ နနု ပဉ္စဝိညာဏာ ဥပ္ပန္နဝတ္ထုကာတိအာဒိမာဟ။ တတြာယံ အဓိပ္ပာယော – ယဒိ ပဉ္စဝိညာဏသမင်္ဂိဿ မဂ္ဂဘာဝနာ သိယာ၊ ယေန မနောဝိညာဏေန မဂ္ဂေါ သမ္ပယုတ္တော၊ တမ္ပိ ပဉ္စဝိညာဏသမင်္ဂိဿ သိယာ။ ဧဝံ သန္တေ ယဒိဒံ ‘‘ပဉ္စဝိညာဏာ ဥပ္ပန္နဝတ္ထုကာ’’တိအာဒိ လက္ခဏံ ဝုတ္တံ၊ တံ ဧဝံ အဝတွာ ‘‘ဆ ဝိညာဏာ’’တိ ဝတ္တဗ္ဗံ သိယာ။ တထာ ပန အဝတွာ ‘‘ပဉ္စဝိညာဏာ’’တွေဝ ဝုတ္တံ၊ တသ္မာ န ဝတဗ္ဗံ ‘‘ပဉ္စဝိညာဏသမင်္ဂိဿ အတ္ထိ မဂ္ဂဘာဝနာ’’တိ။ ယသ္မာ စေတ္ထ အယမေဝ အဓိပ္ပာယော၊ တသ္မာ သကဝါဒီ တံ လက္ခဏံ ပရဝါဒိံ သမ္ပဋိစ္ဆာပေတွာ နော စ ဝတ ရေ ဝတ္တဗ္ဗေ ပဉ္စဝိညာဏသမင်္ဂိဿ အတ္ထိ မဂ္ဂဘာဝနာတိ အာဟ။

အပရော နယော – ပဉ္စဝိညာဏာ ဥပ္ပန္နဝတ္ထုကာ၊ မဂ္ဂေါ အဝတ္ထုကောပိ ဟောတိ။ တေ စ ဥပ္ပန္နာရမ္မဏာ၊ မဂ္ဂေါ နဝတ္တဗ္ဗာရမ္မဏော။ တေ ပုရေဇာတဝတ္ထုကာဝ မဂ္ဂေါ အဝတ္ထုကောပိ။ တေ ပုရေဇာတာရမ္မဏာ၊ မဂ္ဂေါ အပုရေဇာတာရမ္မဏော။ တေ အဇ္ဈတ္တိကဝတ္ထုကာဝ မဂ္ဂေါ အဝတ္ထုကောပိ ဟောတိ။ တေ စ ရူပါဒိဝသေန ဗာဟိရာရမ္မဏာ၊ မဂ္ဂေါ နိဗ္ဗာနာရမ္မဏော။ တေ အနိရုဒ္ဓံ ဝတ္ထုံ နိဿယံ ကတွာ ပဝတ္တနတော အသမ္ဘိန္နဝတ္ထုကာ၊ မဂ္ဂေါ အဝတ္ထုကောပိ။ တေ အနိရုဒ္ဓါနေဝ ရူပါဒီနိ အာရဗ္ဘ ပဝတ္တနတော အသမ္ဘိန္နာရမ္မဏာ၊ မဂ္ဂေါ နိဗ္ဗာနာရမ္မဏော။ တေ နာနာဝတ္ထုကာ၊ မဂ္ဂေါ အဝတ္ထုကော ဝါ ဧကဝတ္ထုကော ဝါ။ တေ နာနာရမ္မဏာ မဂ္ဂေါ ဧကာရမ္မဏော။ တေ အတ္တနော အတ္တနောဝ ရူပါဒိဂေါစရေ ပဝတ္တနတော န အညမညဿ ဂေါစရဝိသယံ ပစ္စနုဘောန္တိ၊ မဂ္ဂေါ ရူပါဒီသု ဧကမ္ပိ ဂေါစရံ န ကရောတိ။ တေ ကိရိယမနောဓာတုံ ပုရေစာရိကံ ကတွာ ဥပ္ပဇ္ဇနတော န အသမန္နာဟာရာ န အမနသိကာရာ ဥပ္ပဇ္ဇန္တိ၊ မဂ္ဂေါ နိရာဝဇ္ဇနောဝ။ တေ သမ္ပဋိစ္ဆနာဒီဟိ ဝေါကိဏ္ဏာ ဥပ္ပဇ္ဇန္တိ၊ မဂ္ဂဿ ဝေါကာရောယေဝ နတ္ထိ။ တေ အညမညံ ပုဗ္ဗစရိမဘာဝေန ဥပ္ပဇ္ဇန္တိ၊ မဂ္ဂဿ တေဟိ သဒ္ဓိံ ပုရိမပစ္ဆိမတာဝ နတ္ထိ၊ တေသံ အနုပ္ပတ္တိကာလေ တိက္ခဝိပဿနာသမယေ၊ တေသံ အနုပ္ပတ္တိဒေသေ အာရုပ္ပေပိ စ ဥပ္ပဇ္ဇနတော။ တေ သမ္ပဋိစ္ဆနာဒီဟိ အန္တရိတတ္တာ န အညမညဿ သမနန္တရာ ဥပ္ပဇ္ဇန္တိ၊ မဂ္ဂဿ သမ္ပဋိစ္ဆနာဒီဟိ အန္တရိတဘာဝေါဝ နတ္ထိ။ တေသံ အညတြ အဘိနိပါတာ အာဘောဂမတ္တမ္ပိ ကိစ္စံ နတ္ထိ၊ မဂ္ဂဿ ကိလေသသမုဂ္ဃာတနံ ကိစ္စန္တိ။ ယသ္မာ စေတ္ထ အယမ္ပိ အဓိပ္ပာယော၊ တသ္မာ သကဝါဒီ ဣမေဟာကာရေဟိ ပရဝါဒိံ မဂ္ဂဿ အပဉ္စဝိညာဏဂတိကဘာဝံ သမ္ပဋိစ္ဆာပေတွာ နော စ ဝတ ရေ ဝတ္တဗ္ဗေ ပဉ္စဝိညာဏသမင်္ဂိဿ အတ္ထိ မဂ္ဂဘာဝနာတိ အာဟ။

၅၇၇။ သုညတံ အာရဗ္ဘာတိ ‘‘ယထာ လောကုတ္တရမဂ္ဂေါ သုညတံ နိဗ္ဗာနံ အာရဗ္ဘ၊ လောကိယော သုဒ္ဓသင်္ခါရပုဉ္ဇံ အာရဗ္ဘ ဥပ္ပဇ္ဇတိ၊ ကိံ တေ ဧဝံ စက္ခုဝိညာဏ’’န္တိ ပုစ္ဆတိ။ ဣတရော ‘‘စက္ခုဉ္စ ပဋိစ္စ ရူပေ စာ’’တိ ဝစနတော ပဋိက္ခိပတိ။ ဒုတိယံ ပုဋ္ဌော ‘‘န နိမိတ္တဂ္ဂါဟီ’’တိ ဝစနတော ယံ တတ္ထ အနိမိတ္တံ၊ တဒေဝ သုညတန္တိ သန္ဓာယ ပဋိဇာနာတိ။ စက္ခုဉ္စ ပဋိစ္စာတိ ပဉှဒွယေပိ ဧသေဝ နယော။

၅၇၈-၅၇၉။ စက္ခုဝိညာဏံ အတီတာနာဂတံ အာရဗ္ဘာတိ ဧတ္ထ အယမဓိပ္ပာယော – မနောဝိညာဏသမင်္ဂိဿ အတ္ထိ မဂ္ဂဘာဝနာ၊ မနောဝိညာဏဉ္စ အတီတာနာဂတမ္ပိ အာရဗ္ဘ ဥပ္ပဇ္ဇတိ၊ ကိံ တေ ဧဝံ စက္ခုဝိညာဏမ္ပီတိ။ ဖဿံ အာရဗ္ဘာတိအာဒီသုပိ ဧသေဝ နယော။ စက္ခုနာရူပံ ဒိသွာ န နိမိတ္တဂ္ဂါဟီတိ ဧတ္ထ ဇဝနက္ခဏေ န နိမိတ္တဂ္ဂါဟိတာ ဝုတ္တာ၊ န စက္ခုဝိညာဏက္ခဏေ။ တသ္မာ လောကိယမဂ္ဂမ္ပိ သန္ဓာယေတံ အသာဓကန္တိ။

ပဉ္စဝိညာဏသမင်္ဂိဿ မဂ္ဂကထာဝဏ္ဏနာ။

၄။ ပဉ္စဝိညာဏာ ကုသလာပီတိကထာဝဏ္ဏနာ

၅၈၀-၅၈၃။ ဣဒါနိ ပဉ္စဝိညာဏာ ကုသလာပီတိကထာ နာမ ဟောတိ။ သာ ဟေဋ္ဌာ ဝုတ္တနယေနေဝ အတ္ထတော ဝေဒိတဗ္ဗာတိ။

ပဉ္စဝိညာဏာ ကုသလာပီတိကထာဝဏ္ဏနာ။

၅။ ပဉ္စဝိညာဏာ သာဘောဂါတိကထာဝဏ္ဏနာ

၅၈၄-၅၈၆။ ဣဒါနိ ပဉ္စဝိညာဏာ သာဘောဂါတိကထာ နာမ ဟောတိ။ တတ္ထ အာဘောဂေါ နာမ ကုသလာကုသလဝသေန ဟောတိ သတ္ထာရာ စ ‘‘စက္ခုနာ ရူပံ ဒိသွာ နိမိတ္တဂ္ဂါဟီ ဟောတိ၊ န နိမိတ္တဂ္ဂါဟီ ဟောတီ’’တိအာဒိ ဝုတ္တံ၊ တံ အယောနိသော ဂဟေတွာ ‘‘ပဉ္စဝိညာဏာ သာဘောဂါ’’တိ ယေသံ လဒ္ဓိ၊ သေယျထာပိ မဟာသံဃိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ပုရိမကထာသဒိသမေဝါတိ။

ပဉ္စဝိညာဏာ သာဘောဂါတိကထာဝဏ္ဏနာ။

၆။ ဒွီဟိ သီလေဟီတိကထာဝဏ္ဏနာ

၅၈၇-၅၈၉။ ဣဒါနိ ဒွီဟိ သီလေဟီတိကထာ နာမ ဟောတိ။ တတ္ထ ‘‘သီလေ ပတိဋ္ဌာယ နရော သပညော’’တိအာဒိဝစနတော (သံ။ နိ။ ၁။၂၃) ယသ္မာ လောကိယေန သီလေန သီလဝါ လောကုတ္တရံ မဂ္ဂံ ဘာဝေတိ၊ တသ္မာ ‘‘ပုရိမေန စ လောကိယေန မဂ္ဂက္ခဏေ လောကုတ္တရေန စာတိ ဒွီဟိ သီလေဟိ သမန္နာဂတော နာမ ဟောတီ’’တိ ယေသံ လဒ္ဓိ၊ သေယျထာပိ မဟာသံဃိကာနံယေဝ၊ တေ သန္ဓာယ မဂ္ဂသမင်္ဂီတိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘ယဒိ သော ဧကက္ခဏေ လောကိယလောကုတ္တရေဟိ ဒွီဟိ သီလေဟိ သမန္နာဂတော၊ ဒွီဟိ ဖဿာဒီဟိပိ တေန သမန္နာဂတေန ဘဝိတဗ္ဗ’’န္တိ စောဒေတုံ ဒွီဟိ ဖဿေဟီတိအာဒိမာဟ။ ဣတရော တထာရူပံ နယံ အပဿန္တော ပဋိက္ခိပတိ။ လောကိယေန စ လောကုတ္တရေန စာတိ ပဉှေ ပုဗ္ဗေ သမာဒိန္နဉ္စ မဂ္ဂက္ခဏေ ဥပ္ပန္နသမ္မာဝါစာဒီနိ စ သန္ဓာယ ပဋိဇာနာတိ။

လောကိယေ သီလေ နိရုဒ္ဓေတိ ပုစ္ဆာ ပရဝါဒိဿ၊ ခဏဘင်္ဂနိရောဓံ သန္ဓာယ ပဋိညာ သကဝါဒိဿ။ ဣတရော ပန တံ ဝီတိက္ကမံ ဝိယ သလ္လက္ခေန္တော ဒုဿီလောတိအာဒိမာဟ။ လဒ္ဓိပတိဋ္ဌာပနံ ပနဿ ပုဗ္ဗေ အဘိန္နသီလတံယေဝ ဒီပေတိ၊ န ဒွီဟိ သမန္နာဂတတံ။ တသ္မာ အပ္ပတိဋ္ဌိတာဝ လဒ္ဓီတိ။

ဒွီဟိ သီလေဟီတိကထာဝဏ္ဏနာ။

၇။ သီလံ အစေတသိကန္တိကထာဝဏ္ဏနာ

၅၉၀-၅၉၄။ ဣဒါနိ သီလံ အစေတသိကန္တိကထာ နာမ ဟောတိ။ တတ္ထ ယသ္မာ သီလေ ဥပ္ပဇ္ဇိတွာ နိရုဒ္ဓေပိ သမာဒါနဟေတုကော သီလောပစယော နာမ အတ္ထိ၊ ယေန သော သီလဝါယေဝ နာမ ဟောတိ၊ တသ္မာ ‘‘သီလံ အစေတသိက’’န္တိ ယေသံ လဒ္ဓိ၊ သေယျထာပိ မဟာသံဃိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ‘‘ဒါနံ အစေတသိက’’န္တိကထာယံ ဝုတ္တနယေနေဝ ဝေဒိတဗ္ဗံ။ လဒ္ဓိပတိဋ္ဌာပနမ္ပိ အယောနိသော ဂဟိတတ္တာ အပ္ပတိဋ္ဌာပနမေဝါတိ။

သီလံ အစေတသိကန္တိကထာဝဏ္ဏနာ။

၈။ သီလံ န စိတ္တာနုပရိဝတ္တီတိကထာဝဏ္ဏနာ

၅၉၅-၅၉၇။ ဣဒါနိ သီလံ န စိတ္တာနုပရိဝတ္တီတိကထာ နာမ ဟောတိ။ တတ္ထ န စိတ္တာနုပရိဝတ္တီတိ ဘာသန္တရမေဝ နာနံ၊ သေသံ ပုရိမကထာသဒိသမေဝါတိ။

သီလံ န စိတ္တာနုပရိဝတ္တီတိကထာဝဏ္ဏနာ။

၉။ သမာဒါနဟေတုကထာဝဏ္ဏနာ

၅၉၈-၆၀၀။ ဣဒါနိ သမာဒါနဟေတုကထာ နာမ ဟောတိ။ တတ္ထ ‘‘အာရာမရောပါ’’တိ ဂါထာယ အတ္ထံ အယောနိသော ဂဟေတွာ ‘‘သဒါ ပုညံ ပဝဍ္ဎတီ’’တိ ဝစနတော ‘‘သမာဒါနဟေတုကံ သီလံ ဝဍ္ဎတီ’’တိ ယေသံ လဒ္ဓိ၊ သေယျထာပိ မဟာသံဃိကာနညေဝ၊ တေ သန္ဓာယ ပုစ္ဆာ သကဝါဒိဿ၊ စိတ္တဝိပ္ပယုတ္တံ သီလောပစယံ သန္ဓာယ ပဋိညာ ပရဝါဒိဿ။ သေသံ ပုရိမကထာသဒိသမေဝါတိ။

သမာဒါနဟေတုကထာဝဏ္ဏနာ။

၁၀။ ဝိညတ္တိ သီလန္တိကထာဝဏ္ဏနာ

၆၀၁-၆၀၂။ ဣဒါနိ ဝိညတ္တိ သီလန္တိကထာ နာမ ဟောတိ။ တတ္ထ ကာယဝိညတ္တိ ကာယကမ္မံ၊ ဝစီဝိညတ္တိ ဝစီကမ္မန္တိ ဂဟိတတ္တာ ‘‘ဝိညတ္တိ သီလ’’န္တိ ယေသံ လဒ္ဓိ၊ သေယျထာပိ မဟာသံဃိကာနဉ္စေဝ သမ္မိတိယာနဉ္စ၊ တေ သန္ဓာယ ဝိညတ္တီတိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ယသ္မာ သီလံ နာမ ဝိရတိ၊ န ရူပဓမ္မော၊ တသ္မာ တေနတ္ထေန စောဒေတုံ ပါဏာတိပါတာ ဝေရမဏီတိအာဒိမာဟ။ အဘိဝါဒနံ သီလန္တိအာဒိ ယထာရူပံ ဝိညတ္တိံ သော ‘‘သီလ’’န္တိ မညတိ တံ ဥဒ္ဓရိတွာ ဒဿေတုံ ဝုတ္တံ။ ယသ္မာ ပန သာ ဝိရတိ န ဟောတိ၊ တသ္မာ ပုန ပါဏာတိပါတာတိအာဒိမာဟ။ လဒ္ဓိ ပနဿ ဆလေန ပတိဋ္ဌိတတ္တာ အပ္ပတိဋ္ဌိတာယေဝါတိ။

ဝိညတ္တိ သီလန္တိကထာဝဏ္ဏနာ။

၁၁။ အဝိညတ္တိ ဒုဿီလျန္တိကထာဝဏ္ဏနာ

၆၀၃-၆၀၄။ ဣဒါနိ အဝိညတ္တိ ဒုဿီလျန္တိကထာ နာမ ဟောတိ။ တတ္ထ စိတ္တဝိပ္ပယုတ္တံ အပုညူပစယဉ္စေဝ အာဏတ္တိယာ စ ပါဏာတိပါတာဒီသု အင်္ဂပါရိပူရိံ သန္ဓာယ ‘‘အဝိညတ္တိ ဒုဿီလျ’’န္တိ ယေသံ လဒ္ဓိ၊ သေယျထာပိ မဟာသံဃိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘သစေ သာ ဒုဿီလျံ၊ ပါဏာတိပါတာဒီသု အညတရာ သိယာ’’တိ စောဒေတုံ ပါဏာတိပါတောတိအာဒိမာဟ။ ပါပကမ္မံ သမာဒိယိတွာတိ ‘‘အသုကံ နာမ ဃာတေဿာမိ၊ အသုကံ ဘဏ္ဍံ အဝဟရိဿာမီ’’တိ ဧဝံ ပါပသမာဒါနံ ကတွာ။ ဥဘော ဝဍ္ဎန္တီတိ ပုဋ္ဌော ဒါနက္ခဏေ ပါပဿ အနုပ္ပတ္တိံ သန္ဓာယ ပဋိက္ခိပတိ။ ဒုတိယံ ပုဋ္ဌော စိတ္တဝိပ္ပယုတ္တံ ပါပူပစယံ သန္ဓာယ ပဋိဇာနာတိ။ သေသမေတ္ထ ပရိဘောဂမယကထာယံ ဝုတ္တနယေနေဝ ဝေဒိတဗ္ဗံ။ လဒ္ဓိပတိဋ္ဌာပနမ္ပိဿ ပါပသမာဒိန္နပုဗ္ဗဘာဂမေဝ သာဓေတိ၊ န အဝိညတ္တိယာ ဒုဿီလဘာဝန္တိ။

အဝိညတ္တိ ဒုဿီလျန္တိကထာဝဏ္ဏနာ။

ဒသမော ဝဂ္ဂေါ။

ဒုတိယပဏ္ဏာသကော သမတ္တော။