📜

၁၄။ စုဒ္ဒသမဝဂ္ဂေါ

၁။ ကုသလာကုသလပဋိသန္ဒဟနကထာဝဏ္ဏနာ

၆၈၆-၆၉၀။ ဣဒါနိ ကုသလာကုသလပဋိသန္ဒဟနကထာ နာမ ဟောတိ။ တတ္ထ ကုသလံ ဝါ အကုသလဿ၊ အကုသလံ ဝါ ကုသလဿ အနန္တရာ ဥပ္ပဇ္ဇနကံ နာမ နတ္ထီတိ တေသံ အညမညံ ပဋိသန္ဓာနံ န ယုဇ္ဇတိ။ ယေ ပန ယသ္မာ ဧကဝတ္ထုသ္မိညေဝ ရဇ္ဇတိ ဝိရဇ္ဇတိ စ၊ တသ္မာ တံ အညမညံ ပဋိသန္ဒဟတီတိ လဒ္ဓိံ ဂဟေတွာ ဌိတာ၊ သေယျထာပိ မဟာသင်္ဃိကာ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အာဝဋ္ဋနာ ပဏိဓီတိ ဥဘယံ အာဝဇ္ဇနဿေဝ နာမံ။ တဉှိ ဘဝင်္ဂံ အာဝဋ္ဋေတီတိ အာဝဋ္ဋနာ။ ဘဝင်္ဂါရမ္မဏတော အညသ္မိံ အာရမ္မဏေ စိတ္တံ ပဏိဒဟတိ ဌပေတီတိ ပဏိဓိ။ ကုသလံ အနာဝဋ္ဋေန္တဿာတိ ယံ တံ အကုသလာနန္တရံ ပဋိသန္ဒဟန္တံ ကုသလံ ဥပ္ပဇ္ဇတိ၊ တံ အနာဝဋ္ဋေန္တဿ ဥပ္ပဇ္ဇတီတိ ပုစ္ဆတိ။ ဣတရော ပန ဝိနာ အာဝဇ္ဇနေန ကုသလဿ ဥပ္ပတ္တိံ အပဿန္တော ပဋိက္ခိပတိ။ ကုသလံ အယောနိသော မနသိကရောတောတိ ဣဒံ ယဒိ အကုသလာနန္တရံ ကုသလံ ဥပ္ပဇ္ဇေယျ၊ အကုသလဿေဝ အာဝဇ္ဇနေန အယောနိသော မနသိကရောတော ဥပ္ပဇ္ဇေယျာတိ စောဒနတ္ထံ ဝုတ္တံ။ သေသံ ယထာပါဠိမေဝ နိယျာတိ။ နနု ယသ္မိံယေဝ ဝတ္ထုသ္မိန္တိ ဝစနံ ဧကာရမ္မဏေ သရာဂဝိရာဂုပ္ပတ္တိံ ဒီပေတိ၊ န ကုသလာကုသလာနံ အနန္တရတံ၊ တသ္မာ အသာဓကန္တိ။

ကုသလာကုသလပဋိသန္ဒဟနကထာဝဏ္ဏနာ။

၂။ သဠာယတနုပ္ပတ္တိကထာဝဏ္ဏနာ

၆၉၁-၆၉၂။ ဣဒါနိ သဠာယတနုပ္ပတ္တိကထာ နာမ ဟောတိ။ တတ္ထ ဥပပတ္တေသိယေန ပဋိသန္ဓိစိတ္တေန သဟေဝ ဩပပါတိကာနံ သဠာယတနံ ဥပ္ပဇ္ဇတိ။ ဂဗ္ဘသေယျကာနံ အဇ္ဈတ္တိကာယတနေသု မနာယတနကာယာယတနာနေဝ ပဋိသန္ဓိက္ခဏေ ဥပ္ပဇ္ဇန္တိ။ သေသာနိ စတ္တာရိ သတ္တသတ္တတိရတ္တိမှိ။ တာနိ စ ခေါ ယေန ကမ္မုနာ ပဋိသန္ဓိ ဂဟိတာ၊ တဿေဝ အညဿ ဝါ ကတတ္တာတိ အယံ သကသမယေ ဝါဒေါ။ ယေသံ ပန ဧကကမ္မသမ္ဘဝတ္တာ သမ္ပန္နသာခါဝိဋပါနံ ရုက္ခာဒီနံ အံကုရော ဝိယ ဗီဇမတ္တံ သဠာယတနံ မာတုကုစ္ဆိသ္မိံ ပဋိသန္ဓိက္ခဏေယေဝ ဥပ္ပဇ္ဇတီတိ လဒ္ဓိ၊ သေယျထာပိ ပုဗ္ဗသေလိယာနံ၊ တေ သန္ဓာယ သဠာယတနန္တိ ပုစ္ဆာ သကဝါဒိဿ၊ ပဋိညာ ဣတရဿ။ သဗ္ဗင်္ဂပစ္စင်္ဂီတိအာဒိ သဠာယတနေ သတိ ဧဝရူပေါ ဟုတွာ ဩက္ကမေယျာတိ စောဒနတ္ထံ ဝုတ္တံ။ မာတုကုစ္ဆိဂတဿာတိ ပုစ္ဆာ ပရဝါဒိဿ။ ပရတော မာတုကုစ္ဆိဂတဿ ပစ္ဆာ ကေသာတိ ပုစ္ဆာ သကဝါဒိဿ။ သေသမေတ္ထ ဥတ္တာနတ္ထမေဝါတိ။

သဠာယတနုပ္ပတ္တိကထာဝဏ္ဏနာ။

၃။ အနန္တရပစ္စယကထာဝဏ္ဏနာ

၆၉၃-၆၉၇။ ဣဒါနိ အနန္တရပစ္စယကထာ နာမ ဟောတိ။ တတ္ထ နစ္စဂီတာဒီသု ရူပဒဿနသဒ္ဒသဝနာဒီနံ လဟုပရိဝတ္တိတံ ဒိသွာ ‘‘ဣမာနိ ဝိညာဏာနိ အညမညဿ အနန္တရာ ဥပ္ပဇ္ဇန္တီ’’တိ ယေသံ လဒ္ဓိ၊ သေယျထာပိ ဥတ္တရာပထကာနံ၊ တေ သန္ဓာယ စက္ခုဝိညာဏဿာတိ ပုစ္ဆာ သကဝါဒိဿ၊ ပဋိညာ ဣတရဿ။ သောတဝိညာဏံ ရူပါရမ္မဏံယေဝါတိ ယဒိ စက္ခုဝိညာဏဿ အနန္တရာ ဥပ္ပဇ္ဇေယျ၊ ဝိပါကမနောဓာတု ဝိယ ရူပါရမ္မဏံ သိယာတိ စောဒေတုံ ဝုတ္တံ။ စက္ခုဉ္စ ပဋိစ္စ ရူပေ စ ဥပ္ပဇ္ဇတိ သောတဝိညာဏန္တိ ပဉှေသု သုတ္တာဘာဝေန ပဋိက္ခိပိတွာ အနန္တရုပ္ပတ္တိံ သလ္လက္ခေန္တော လဒ္ဓိဝသေန ပဋိဇာနာတိ။ တညေဝ စက္ခုဝိညာဏံတံ သောတဝိညာဏန္တိ ယထာ ပဌမဇဝနာနန္တရံ ဒုတိယဇဝနံ မနောဝိညာဏဘာဝေန တညေဝ ဟောတိ၊ ကိံ တေ တထာ ဧတမ္ပိ ဒွယံ ဧကမေဝါတိ ပုစ္ဆတိ။ ဣမိနာ နယေန သဗ္ဗဝါရေသု အတ္ထော ဝေဒိတဗ္ဗော။ နစ္စတိ ဂါယတီတိအာဒိဝစနံ အာရမ္မဏသမောဓာနေ လဟုပရိဝတ္တိတာယ ဝေါကိဏ္ဏဘာဝံ ဒီပေတိ၊ န အနန္တရပစ္စယတံ၊ တသ္မာ အသာဓကန္တိ။

အနန္တရပစ္စယကထာဝဏ္ဏနာ။

၄။ အရိယရူပကထာဝဏ္ဏနာ

၆၉၈-၆၉၉။ ဣဒါနိ အရိယရူပကထာ နာမ ဟောတိ။ တတ္ထ သမ္မာဝါစာကမ္မန္တာ ရူပံ၊ တဉ္စ ခေါ ‘‘သဗ္ဗံ ရူပံ စတ္တာရိ စ မဟာဘူတာနိ စတုန္နဉ္စ မဟာဘူတာနံ ဥပါဒါယရူပ’’န္တိ (မ။ နိ။ ၃။၆၇) ဝစနတော ဥပါဒါယရူပန္တိ ယေသံ လဒ္ဓိ၊ သေယျထာပိ ဥတ္တရာပထကာနံ၊ တေ သန္ဓာယ အရိယရူပံ မဟာဘူတာနံ ဥပါဒါယာတိ ပုစ္ဆာ သကဝါဒိဿ။ တတ္ထ အရိယာနံ ရူပံ၊ အရိယံ ဝါ ရူပန္တိ အရိယရူပံ။ အာမန္တာတိ လဒ္ဓိယံ ဌတွာ ပဋိညာ ဣတရဿ။ ကုသလန္တိ ပုဋ္ဌော လဒ္ဓိဝသေနေဝ ပဋိဇာနာတိ။ အနာသဝပုစ္ဆာဒီသုပိ ဧသေဝ နယော။ ယံ ကိဉ္စိ ရူပန္တိ သုတ္တံ ဌပေတွာ ဘူတာနိ သေသရူပဿ ဥပါဒါဘာဝံ ဒီပေတိ၊ န သမ္မာဝါစာကမ္မန္တာနံ။ တေသဉှိ ရူပမတ္တညေဝ အသိဒ္ဓံ၊ ကုတော ဥပါဒါရူပတာ၊ တသ္မာ အသာဓကန္တိ။

အရိယရူပကထာဝဏ္ဏနာ။

၅။ အညော အနုသယောတိကထာဝဏ္ဏနာ

၇၀၀-၇၀၁။ ဣဒါနိ အညော အနုသယောတိကထာ နာမ ဟောတိ။ တတ္ထ ယသ္မာ ပုထုဇ္ဇနော ကုသလာဗျာကတေ စိတ္တေ ဝတ္တမာနေ သာနုသယောတိ ဝတ္တဗ္ဗော၊ န ပရိယုဋ္ဌိတောတိ တသ္မာ အညော အနုသယော၊ အညံ ပရိယုဋ္ဌာနန္တိ ယေသံ လဒ္ဓိ၊ သေယျထာပိ အန္ဓကာနံ၊ တေ သန္ဓာယ အညော ကာမရာဂါနုသယောတိ ပုစ္ဆာ သကဝါဒိဿ ပဋိညာ ဣတရဿ။ သေသံ ဟေဋ္ဌာ အနုသယကထာယံ ဝုတ္တနယေနေဝ ဝေဒိတဗ္ဗံ။ သာနုသယောတိအာဒိ ပန တသ္မိံ သမယေ အနုသယဿ အပ္ပဟီနတ္တာ သာနုသယောတိ ဝတ္တဗ္ဗတံ၊ အနုပ္ပန္နတ္တာ စ ပရိယုဋ္ဌိတောတိ အဝတ္တဗ္ဗတံ ဒီပေတိ၊ န အနုသယပရိယုဋ္ဌာနာနံ အညတ္တံ၊ တသ္မာ အသာဓကန္တိ။

အညော အနုသယောတိကထာဝဏ္ဏနာ။

၆။ ပရိယုဋ္ဌာနံ စိတ္တဝိပ္ပယုတ္တန္တိကထာဝဏ္ဏနာ

၇၀၂။ ဣဒါနိ ပရိယုဋ္ဌာနံ စိတ္တဝိပ္ပယုတ္တန္တိကထာ နာမ ဟောတိ။ တတ္ထ ယသ္မာ အနိစ္စာဒိတော မနသိကရောတောပိ ရာဂါဒယော ဥပ္ပဇ္ဇန္တိ။ ဝုတ္တမ္ပိ စေတံ – ‘‘အပ္ပေကဒါ၊ ဘော ဘာရဒွါဇ၊ အသုဘတော မနသိကရိဿာမီတိ သုဘတောဝ မနသိကရောတီ’’တိ (သံ။ နိ။ ၄။၁၂၇)။ တသ္မာ ပရိယုဋ္ဌာနံ စိတ္တဝိပ္ပယုတ္တန္တိ ယေသံ လဒ္ဓိ၊ သေယျထာပိ အန္ဓကာနံယေဝ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ဥတ္တာနတ္ထမေဝါတိ။

ပရိယုဋ္ဌာနံ စိတ္တဝိပ္ပယုတ္တန္တိကထာဝဏ္ဏနာ။

၇။ ပရိယာပန္နကထာဝဏ္ဏနာ

၇၀၃-၇၀၅။ ဣဒါနိ ပရိယာပန္နကထာ နာမ ဟောတိ။ တတ္ထ ယသ္မာ ကာမရာဂေါ ကာမဓာတုံ အနုသေတိ၊ ကာမဓာတုပရိယာပန္နောတိ စ ဝုစ္စတိ၊ တသ္မာ ရူပရာဂါရူပရာဂါပိ ရူပဓာတုအရူပဓာတုယော အနုသေန္တိ။ ရူပဓာတုအရူပဓာတုပရိယာပန္နာယေဝ စ နာမ ဟောန္တီတိ ယေသံ လဒ္ဓိ၊ သေယျထာပိ အန္ဓကာနဉ္စေဝ သမ္မိတိယာနဉ္စ၊ တေ သန္ဓာယ ရူပရာဂေါတိ ပုစ္ဆာ သကဝါဒိဿ၊ ပဋိညာ ဣတရဿ ။ တတ္ထ အနုသေတီတိ ယထာ ကာမရာဂေါ ကာမဝိတက္ကသင်္ခါတံ ကာမဓာတုံ သဟဇာတဝသေန အနုသေတိ၊ ကိံ တေ ဧဝံ ရူပရာဂေါ ရူပဓာတုန္တိ ပုစ္ဆတိ။ ပရိယာပန္နောတိ ယထာ စ သော တိဝိဓာယ ကာမဓာတုယာ ကိလေသကာမဝသေန ပရိယာပန္နတ္တာ ကာမဓာတုပရိယာပန္နော၊ ကိံ တေ ဧဝံ ရူပရာဂေါပိ ရူပဓာတုပရိယာပန္နောတိ ပုစ္ဆတိ။ ဣတရော ပနဿ အဓိပ္ပာယံ အသလ္လက္ခေန္တော ကေဝလံ လဒ္ဓိဝသေန အာမန္တာတိ ပဋိဇာနာတိ။ အထ နံ တမတ္ထံ သလ္လက္ခာပေတုံ ကုသလဝိပါကကိရိယသင်္ခါတေဟိ သမာပတ္တေသိယာဒီဟိ သံသန္ဒိတွာ ပုစ္ဆိတုံ သမာပတ္တေသိယောတိအာဒိမာဟ။ သေသမေတ္ထ ယထာပါဠိမေဝ နိယျာတိ။ နနု ကာမရာဂေါတိအာဒိဝစနမ္ပိ ကာမရာဂဿေဝ ကာမဓာတုယံ အနုသယဘာဝံ ပရိယာပန္နတဉ္စ ဒီပေတိ၊ န ဣတရေသံ ဣတရဓာတူသူတိ။

ပရိယာပန္နကထာဝဏ္ဏနာ။

၈။ အဗျာကတကထာဝဏ္ဏနာ

၇၀၆-၇၀၈။ ဣဒါနိ အဗျာကတကထာ နာမ ဟောတိ။ တတ္ထ ဝိပါကကိရိယရူပနိဗ္ဗာနသင်္ခါတံ စတုဗ္ဗိဓံ အဗျာကတံ အဝိပါကတ္တာ အဗျာကတန္တိ ဝုတ္တံ။ ဒိဋ္ဌိဂတံ ‘‘သဿတော လောကောတိ ခေါ၊ ဝစ္ဆ၊ အဗျာကတမေတ’’န္တိ (သံ။ နိ။ ၄။၄၁၆ ထောကံ ဝိသဒိသံ) သဿတာဒိဘာဝေန အကထိတတ္တာ။ ယေသံ ပန ဣမံ ဝိဘာဂံ အဂ္ဂဟေတွာ ပုရိမာဗျာကတံ ဝိယ ဒိဋ္ဌိဂတမ္ပိ အဗျာကတန္တိ လဒ္ဓိ၊ သေယျထာပိ အန္ဓကာနဉ္စေဝ ဥတ္တရာပထကာနဉ္စ၊ တေသံ တံ ဝိဘာဂံ ဒဿေတုံ ဒိဋ္ဌိဂတံ အဗျာကတန္တိ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ယထာပါဠိမေဝ နိယျာတီတိ။

အဗျာကတကထာဝဏ္ဏနာ။

၉။ အပရိယာပန္နကထာဝဏ္ဏနာ

၇၀၉-၇၁၀။ ဣဒါနိ အပရိယာပန္နကထာ နာမ ဟောတိ။ တတ္ထ ယသ္မာ ပုထုဇ္ဇနော ဈာနလာဘီ ကာမေသု ဝီတရာဂေါတိ ဝတ္တဗ္ဗော ဟောတိ၊ န ပန ဝိဂတဒိဋ္ဌိကောတိ ၊ တသ္မာ ဒိဋ္ဌိဂတံ အပရိယာပန္နန္တိ ယေသံ လဒ္ဓိ၊ သေယျထာပိ ပုဗ္ဗသေလိယာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ယထာပါဠိမေဝ နိယျာတီတိ။

အပရိယာပန္နကထာဝဏ္ဏနာ။

စုဒ္ဒသမော ဝဂ္ဂေါ။