📜

၁၅။ ပန္နရသမဝဂ္ဂေါ

၁။ ပစ္စယတာကထာဝဏ္ဏနာ

၇၁၁-၇၁၇။ ဣဒါနိ ပစ္စယတာကထာ နာမ ဟောတိ။ တတ္ထ ယော ဓမ္မော ဟေတုပစ္စယေန ပစ္စယော၊ သော ယေသံ ဟေတုပစ္စယေန ပစ္စယော၊ တေသညေဝ ယသ္မာ အာရမ္မဏာနန္တရသမနန္တရပစ္စယေန ပစ္စယော န ဟောတိ၊ ယော ဝါ အာရမ္မဏပစ္စယေန ပစ္စယော၊ သော ယသ္မာ တေသံယေဝ အနန္တရသမနန္တရပစ္စယေန ပစ္စယော န ဟောတိ၊ တသ္မာ ပစ္စယတာ ဝဝတ္ထိတာတိ ယေသံ လဒ္ဓိ၊ သေယျထာပိ မဟာသင်္ဃိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ယထာပါဠိမေဝ နိယျာတီတိ။

ပစ္စယတာကထာဝဏ္ဏနာ။

၂။ အညမညပစ္စယကထာဝဏ္ဏနာ

၇၁၈-၇၁၉။ ဣဒါနိ အညမညပစ္စယကထာ နာမ ဟောတိ။ တတ္ထ ယေသံ သမယေ ‘‘အဝိဇ္ဇာပစ္စယာ သင်္ခါရာ’’တိ အယမေဝ တန္တိ၊ ‘‘သင်္ခါရပစ္စယာပိ အဝိဇ္ဇာ’’တိ အယံ နတ္ထိ၊ တသ္မာ အဝိဇ္ဇာဝ သင်္ခါရာနံ ပစ္စယော၊ န ပန သင်္ခါရာ အဝိဇ္ဇာယာတိ လဒ္ဓိ၊ သေယျထာပိ မဟာသင်္ဃိကာနံ၊ တေ သန္ဓာယ အဝိဇ္ဇာသင်္ခါရာဒီနံ အညမညပစ္စယတာပိ အတ္ထီတိ ဒဿေတုံ ပုစ္ဆာ သကဝါဒိဿ၊ ပဋိညာ ဣတရဿ ။ အဝိဇ္ဇာ သင်္ခါရေနာတိ ဧတ္ထ အပုညာဘိသင်္ခါရောဝ ဂဟိတော။ တသ္မာ သင်္ခါရပစ္စယာပိ အဝိဇ္ဇာတိ ဧတ္ထ သဟဇာတအညမညအတ္ထိအဝိဂတသမ္ပယုတ္တဝသေန ပစ္စယတာ ဝေဒိတဗ္ဗာ။ ဥပါဒါနပစ္စယာပိ တဏှာတိ ဧတ္ထ ဌပေတွာ ကာမုပါဒါနံ သေသာနိ တီဏိ ဥပါဒါနာနိ အဝိဇ္ဇာယ သင်္ခါရာ ဝိယ တဏှာယ ပစ္စယာ ဟောန္တီတိ ဝေဒိတဗ္ဗာနိ။ သေသံ ယထာပါဠိမေဝ နိယျာတိ။ ဇရာမရဏပစ္စယာတိ ပုစ္ဆာ ပရဝါဒိဿ၊ နာမရူပံ ဝိညာဏပစ္စယာတိ သကဝါဒိဿာတိ။

အညမညပစ္စယကထာဝဏ္ဏနာ။

၃။ အဒ္ဓါကထာဝဏ္ဏနာ

၇၂၀-၇၂၁။ ဣဒါနိ အဒ္ဓါကထာ နာမ ဟောတိ။ တတ္ထ ‘‘တီဏိမာနိ၊ ဘိက္ခဝေ၊ ကထာဝတ္ထူနီ’’တိ (အ။ နိ။ ၃။၆၈) သုတ္တံ နိဿာယ ကာလသင်္ခါတော အဒ္ဓါ နာမ ပရိနိပ္ဖန္နော အတ္ထီတိ ယေသံ လဒ္ဓိ၊ တေသံ ‘‘အဒ္ဓါ နာမ ကောစိ ပရိနိပ္ဖန္နော နတ္ထိ အညတြ ကာလပညတ္တိမတ္တာ။ ရူပါဒယော ပန ခန္ဓာဝ ပရိနိပ္ဖန္နာ’’တိ ဝိဘာဂံ ဒဿေတုံ အဒ္ဓါ ပရိနိပ္ဖန္နောတိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘သစေ သော ပရိနိပ္ဖန္နော၊ ရူပါဒီသု အနေန အညတရေန ဘဝိတဗ္ဗ’’န္တိ စောဒေတုံ ရူပန္တိအာဒိမာဟ။ ဣတရော ပဋိက္ခိပတိ။ သေသံ ယထာပါဠိမေဝ နိယျာတီတိ။

အဒ္ဓါကထာဝဏ္ဏနာ။

၄။ ခဏလယမုဟုတ္တကထာဝဏ္ဏနာ

၇၂၂-၇၂၃။ ခဏလယမုဟုတ္တကထာသုပိ ဧသေဝ နယော။ သဗ္ဗေပိ ဟေတေ ခဏာဒယော အဒ္ဓါပရိယာယာ ဧဝါတိ။

ခဏလယမုဟုတ္တကထာဝဏ္ဏနာ။

၅။ အာသဝကထာဝဏ္ဏနာ

၇၂၄-၇၂၅။ ဣဒါနိ အာသဝကထာ နာမ ဟောတိ။ တတ္ထ ယသ္မာ စတူဟိ အာသဝေဟိ ဥတ္တရိ အညော အာသဝေါ နာမ နတ္ထိ၊ ယေန စတ္တာရော အာသဝါ သာသဝါ သိယုံ၊ တသ္မာ စတ္တာရော အာသဝါ အနာသဝါတိ ယေသံ လဒ္ဓိ၊ သေယျထာပိ ဟေတုဝါဒါနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘ယဒိ တေ အာသဝါ အနာသဝါ၊ ဧဝံ သန္တေ တေဟိ မဂ္ဂါဒိလက္ခဏပ္ပတ္တေဟိ ဘဝိတဗ္ဗ’’န္တိ စောဒေတုံ မဂ္ဂေါတိအာဒိမာဟ။ သေသမေတ္ထ ဥတ္တာနတ္ထမေဝါတိ။

အာသဝကထာဝဏ္ဏနာ။

၆။ ဇရာမရဏကထာဝဏ္ဏနာ

၇၂၆-၇၂၇။ ဣဒါနိ ဇရာမရဏကထာ နာမ ဟောတိ။ တတ္ထ ဇရာမရဏံ နာမ အပရိနိပ္ဖန္နတ္တာ လောကိယန္တိ ဝါ လောကုတ္တရန္တိ ဝါ န ဝတ္တဗ္ဗံ။ ‘‘လောကိယာ ဓမ္မာ လောကုတ္တရာ ဓမ္မာ’’တိ ဟိ ဒုကေ ဇရာမရဏံ နေဝ လောကိယပဒေ၊ န လောကုတ္တရပဒေ နိဒ္ဒိဋ္ဌံ။ တတ္ထ ယေသံ ဣမံ လက္ခဏံ အနာဒိယိတွာ လောကုတ္တရာနံ ဓမ္မာနံ ဇရာမရဏံ လောကုတ္တရန္တိ လဒ္ဓိ၊ သေယျထာပိ မဟာသင်္ဃိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ယထာပါဠိမေဝ နိယျာတီတိ။

ဇရာမရဏကထာဝဏ္ဏနာ။

၇။ သညာဝေဒယိတကထာဝဏ္ဏနာ

၇၂၈-၇၂၉။ ဣဒါနိ သညာဝေဒယိတကထာ နာမ ဟောတိ။ တတ္ထ သညာဝေဒယိတနိရောဓသမာပတ္တိ နာမ န ကောစိ ဓမ္မော၊ စတုန္နံ ပန ခန္ဓာနံ နိရောဓော။ ဣတိ သာ နေဝ လောကိယာ န လောကုတ္တရာ။ ယသ္မာ ပန လောကိယာ န ဟောတိ၊ တသ္မာ လောကုတ္တရာတိ ယေသံ လဒ္ဓိ၊ သေယျထာပိ ဟေတုဝါဒါနံယေဝ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သေသံ ပုရိမကထာသဒိသမေဝါတိ။

သညာဝေဒယိတကထာဝဏ္ဏနာ။

၈။ ဒုတိယသညာဝေဒယိတကထာဝဏ္ဏနာ

၇၃၀-၇၃၁။ ဣဒါနိ ယသ္မာ သာ လောကုတ္တရာ န ဟောတိ၊ တသ္မာ လောကိယာတိ ယေသံ လဒ္ဓိ၊ သေယျထာပိ ဟေတုဝါဒါနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သေသံ ပုရိမသဒိသမေဝါတိ။

ဒုတိယသညာဝေဒယိတကထာဝဏ္ဏနာ။

၉။ တတိယသညာဝေဒယိတကထာဝဏ္ဏနာ

၇၃၂။ ဣဒါနိ ယသ္မာ ‘‘အသုကော မရဏဓမ္မော၊ အသုကော န မရဏဓမ္မော’’တိ သတ္တာနံ မရဏဓမ္မတာယ နိယာမော နတ္ထီတိ သညာဝေဒယိတနိရောဓံ သမာပန္နောပိ ကာလံ ကရေယျာတိ ယေသံ လဒ္ဓိ၊ သေယျထာပိ ရာဇဂိရိကာနံ၊ တေသံ သမာပန္နာယပိ မရဏဓမ္မတာယ မရဏသမယဉ္စ အမရဏသမယဉ္စ ဒဿေတုံ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ယသ္မာ ကာလံ ကရောန္တဿ နာမ မရဏန္တိကေဟိ ဖဿာဒီဟိ ဘဝိတဗ္ဗံ၊ တသ္မာ တေနာကာရေန စောဒေတုံ အတ္ထီတိအာဒိမာဟ။

အဖဿကဿ ကာလကိရိယာတိအာဒီနိ ပုဋ္ဌော သေသသတ္တေ သန္ဓာယ ပဋိက္ခိပတိ ဝိသံ ကမေယျာတိအာဒီနိ ပုဋ္ဌော သမာပတ္တိအာနုဘာဝံ သန္ဓာယ ပဋိက္ခိပတိ။ ဒုတိယဝါရေ သရီရပကတိံ သန္ဓာယ ပဋိဇာနာတိ။ ဧဝံ သန္တေ ပန သမာပတ္တိအာနုဘာဝေါ နာမ န ဟောတိ၊ တေနေဝ န နိရောဓသမာပန္နောတိ အနုယုဉ္ဇတိ။

၇၃၃-၇၃၄။ န ကာလံ ကရေယျာတိ ပုစ္ဆာ ပရဝါဒိဿ။ အတ္ထိ သော နိယာမောတိ ပရဝါဒိဿ ပဉှေ ပန ယသ္မာ ဧဝရူပေါ နိယာမော နာမ နတ္ထိ၊ တသ္မာ ပဋိက္ခိပတိ။ စက္ခုဝိညာဏသမင်္ဂီတိအာဒိ သကဝါဒိနာ ‘‘နိယာမေ အသန္တေပိ မရဏသမယေနေဝ မရတိ၊ နာသမယေနာ’’တိ ဒဿေတုံ ဝုတ္တံ။ တတြာယမဓိပ္ပာယော – ယဒိ နိယာမာဘာဝေန ကာလကိရိယာ ဘဝေယျ၊ စက္ခုဝိညာဏသမင်္ဂိနောပိ ဘဝေယျ။ တတော ‘‘ပဉ္စဟိ ဝိညာဏေဟိ န စဝတိ၊ န ဥပပဇ္ဇတီ’’တိ သုတ္တဝိရောဓော သိယာ။ ယထာ ပန စက္ခုဝိညာဏသမင်္ဂိဿ ကာလကိရိယာ န ဟောတိ၊ တထာ နိရောဓသမာပန္နဿာပီတိ။

တတိယသညာဝေဒယိတကထာဝဏ္ဏနာ။

၁၀။ အသညသတ္တုပိကာကထာဝဏ္ဏနာ

၇၃၅။ ဣဒါနိ အသညသတ္တုပိကာကထာ နာမ ဟောတိ။ တတ္ထ သညာဝိရာဂဝသေန ပဝတ္တဘာဝနာ အသညသမာပတ္တိပိ နိရောဓသမာပတ္တိပိ သညာဝေဒယိတနိရောဓသမာပတ္တိ နာမ။ ဣတိ ဒွေ သညာဝေဒယိတနိရောဓသမာပတ္တိယော လောကိယာ စ လောကုတ္တရာ စ။ တတ္ထ လောကိယာ ပုထုဇ္ဇနဿ အသညသတ္တုပိကာ ဟောတိ၊ လောကုတ္တရာ အရိယာနံ၊ သာ စ နာသညသတ္တုပိကာ။ ဣမံ ပန ဝိဘာဂံ အကတွာ အဝိသေသေန သညာဝေဒယိတနိရောဓသမာပတ္တိ အသညသတ္တုပိကာတိ ယေသံ လဒ္ဓိ၊ သေယျထာပိ ဟေတုဝါဒါနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ယသ္မာ အသညသမာပတ္တိံ သမာပန္နဿ အလောဘာဒယော အတ္ထိ၊ န နိရောဓသမာပတ္တိံ၊ တသ္မာ တေသံ ဝသေန စောဒေတုံ အတ္ထီတိအာဒိမာဟ။

၇၃၆။ ဣဓာပိ အသညီတိ ပဉှေ ဣဓ သညာဝိရာဂဝသေန သမာပန္နတ္တာ အသညိတာ အနုညာတာ၊ တတြာပိ အသညသတ္တေနေဝ။ တသ္မာ ဣမံ ပဋိညံ ဂဟေတွာ လဒ္ဓိံ ပတိဋ္ဌပေန္တေန ဆလေန ပတိဋ္ဌာပိတာ ဟောတိ။ ဣဓ ဝါ နိရောဓသမာပတ္တိံ သန္ဓာယ အသညိတာ အနုညာတာ။ တတြာပိ ဣတော စုတဿ အနာဂါမိနော နိရောဓသမာပတ္တိမေဝ တသ္မာပိ ဣမာယ ပဋိညာယ ပတိဋ္ဌာပိတာ လဒ္ဓိ အပ္ပတိဋ္ဌိတာယေဝါတိ။

အသညသတ္တုပိကာကထာဝဏ္ဏနာ။

၁၁။ ကမ္မူပစယကထာဝဏ္ဏနာ

၇၃၇။ ဣဒါနိ ကမ္မူပစယကထာ နာမ ဟောတိ။ တတ္ထ ယေသံ ကမ္မူပစယော နာမ ကမ္မတော အညော စိတ္တဝိပ္ပယုတ္တော အဗျာကတော အနာရမ္မဏောတိ လဒ္ဓိ၊ သေယျထာပိ အန္ဓကာနဉ္စေဝ သမ္မိတိယာနဉ္စ၊ တေ သန္ဓာယ အညံ ကမ္မန္တိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘ယဒိ ကမ္မတော အညော ကမ္မူပစယော၊ ဖဿာဒိတောပိ အညေန ဖဿူပစယာဒိနာ ဘဝိတဗ္ဗ’’န္တိ စောဒေတုံ အညော ဖဿောတိအာဒိမာဟ။ ဣတရော လဒ္ဓိယာ အဘာဝေန ပဋိက္ခိပတိ။

၇၃၈-၇၃၉။ ကမ္မေနသဟဇာတောတိ ပဉှေသု စိတ္တဝိပ္ပယုတ္တံ သန္ဓာယ ပဋိက္ခိပတိ၊ စိတ္တသမ္ပယုတ္တံ သန္ဓာယ ပဋိဇာနာတိ။ ကုသလောတိ ပဉှေသုပိ စိတ္တဝိပ္ပယုတ္တံ သန္ဓာယ ပဋိဇာနာတိ။ ပရတော အကုသလောတိပဉှေသုပိ ဧသေဝ နယော။

၇၄၀။ သာရမ္မဏောတိ ပုဋ္ဌော ပန ဧကန္တံ အနာရမ္မဏမေဝ ဣစ္ဆတိ၊ တသ္မာ ပဋိက္ခိပတိ။ စိတ္တံ ဘိဇ္ဇမာနန္တိ ယဒါ စိတ္တံ ဘိဇ္ဇမာနံ ဟောတိ၊ တဒါ ကမ္မံ ဘိဇ္ဇတီတိ အတ္ထော။ ဘုမ္မတ္ထေ ဝါ ပစ္စတ္တံ၊ စိတ္တေ ဘိဇ္ဇမာနေတိ အတ္ထော။ အယမေဝ ဝါ ပါဌော။ တတ္ထ ယသ္မာ သမ္ပယုတ္တော ဘိဇ္ဇတိ၊ ဝိပ္ပယုတ္တော န ဘိဇ္ဇတိ၊ တသ္မာ ပဋိဇာနာတိ စေဝ ပဋိက္ခိပတိ စ။

၇၄၁။ ကမ္မမှိ ကမ္မူပစယောတိ ကမ္မေ သတိ ကမ္မူပစယော၊ ကမ္မေ ဝါ ပတိဋ္ဌိတေ ကမ္မူပစယော၊ ကမ္မူပစယတောဝ ဝိပါကော နိဗ္ဗတ္တတိ။ တသ္မိံ ပန ကမ္မေ နိရုဒ္ဓေ ယာဝ အံကုရုပ္ပာဒါ ဗီဇံ ဝိယ ယာဝ ဝိပါကုပ္ပာဒါ ကမ္မူပစယော တိဋ္ဌတီတိဿ လဒ္ဓိ၊ တသ္မာ ပဋိဇာနာတိ။ တညေဝ ကမ္မံ၊ သော ကမ္မူပစယော၊ သော ကမ္မဝိပါကောတိ ယသ္မာ ကမ္မမှိ ကမ္မူပစယော၊ သော စ ယာဝ ဝိပါကုပ္ပာဒါ တိဋ္ဌတီတိဿ လဒ္ဓိ၊ တသ္မာ နံ တေသံ တိဏ္ဏမ္ပိ ဧကတ္တံ ပုစ္ဆတိ ဝိပါကော သာရမ္မဏောတိ ဣဒံ ဝိပါကော ဝိယ ဝိပါကဓမ္မဓမ္မောပိ အာရမ္မဏပဋိဗဒ္ဓါယေဝါတိ စောဒနတ္ထံ ပုစ္ဆတိ။ ဣတရော ပန လဒ္ဓိဝသေနေကံ ပဋိဇာနာတိ၊ ဧကံ ပဋိက္ခိပတိ။ ပဋိလောမေပိ ဧသေဝ နယော။ သေသမေတ္ထ ယထာပါဠိမေဝ နိယျာတီတိ။

ကမ္မူပစယကထာဝဏ္ဏနာ။

ပန္နရသမော ဝဂ္ဂေါ။

တတိယပဏ္ဏာသကော သမတ္တော။