📜

၁၆။ သောဠသမဝဂ္ဂေါ

၁။ နိဂ္ဂဟကထာဝဏ္ဏနာ

၇၄၃-၇၄၄။ ဣဒါနိ နိဂ္ဂဟကထာ နာမ ဟောတိ။ တတ္ထ ယေ လောကေ ဗလပ္ပတ္တာ ဝသီဘူတာ၊ တေ ယဒိ ပရဿ စိတ္တံ နိဂ္ဂဏှိတုံ န သက္ကုဏေယျုံ၊ ကာ တေသံ ဗလပ္ပတ္တိ၊ ကော ဝသီဘာဝေါ။ ဗလပ္ပတ္တိယာ ပန ဝသီဘာဝေန စ အဒ္ဓါ တေ ပရဿ စိတ္တံ နိဂ္ဂဏှန္တီတိ ယေသံ လဒ္ဓိ၊ သေယျထာပိ မဟာသင်္ဃိကာနံ၊ တေ သန္ဓာယ ပရော ပရဿာတိ ပုစ္ဆာ သကဝါဒိဿ၊ ပဋိညာ ဣတရဿ။ တတ္ထ နိဂ္ဂဏှာတီတိ သံကိလေသာပတ္တိတော နိဝါရေတိ။ သေသမေတ္ထ ယထာပါဠိမေဝ နိယျာတီတိ။ ပဂ္ဂဟကထာယပိ ဧသေဝ နယော။

နိဂ္ဂဟကထာဝဏ္ဏနာ။

၃။ သုခါနုပ္ပဒါနကထာဝဏ္ဏနာ

၇၄၇-၇၄၈။ ဣဒါနိ သုခါနုပ္ပဒါနကထာ နာမ ဟောတိ။ တတ္ထ ‘‘ဗဟူနံ ဝတ နော ဘဂဝါ သုခဓမ္မာနံ ဥပဟတ္တာ’’တိ (မ။ နိ။ ၂။၁၄၈) သုတ္တံ နိဿာယ ပရော ပရဿ သုခံ အနုပ္ပဒေတီတိ ယေသံ လဒ္ဓိ၊ သေယျထာပိ ဟေတုဝါဒါနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ ဒုက္ခံ အနုပ္ပဒေတီတိ ပုဋ္ဌော ပန တာဒိသံ သုတ္တပဒံ အပဿန္တော ပဋိက္ခိပတိ။ အတ္တနော သုခန္တိအာဒိပဉှေ ယံ အတ္တနော ပရဿ ဝါ၊ တံ အနုပ္ပဒါတုံ န သက္ကာ။ ယံ တဿေဝ၊ ကိံ တတ္ထ အနုပ္ပဒါနံ နာမာတိ ပဋိက္ခိပတိ။ နေဝတ္တနောတိအာဒိပဉှေ ပန ယံ ဧဝရူပံ၊ န တံ အနုပ္ပဒိန္နံ နာမ ဘဝိတုမရဟတီတိ လဒ္ဓိယာပဋိဇာနာတိ။ နော စ ဝတ ရေတိတာဒိသဿ သုခဿ အဘာဝါ ဝုတ္တံ။ သုခဓမ္မာနံ ဥပဟတ္တာတိဝစနံ ဘဂဝတော ပရေသံ သုခုပ္ပတ္တိယာ ပစ္စယဘာဝံ ဒီပေတိ၊ န အန္နာဒီနံ ဝိယ သုခဿ အနုပ္ပဒါနံ၊ တသ္မာ အသာဓကန္တိ။

သုခါနုပ္ပဒါနကထာဝဏ္ဏနာ။

၄။ အဓိဂယှမနသိကာရကထာဝဏ္ဏနာ

၇၄၉-၇၅၃။ ဣဒါနိ အဓိဂယှ မနသိကာရကထာ နာမ ဟောတိ။ တတ္ထ ဒုဝိဓော မနသိကာရော နယတော စ အာရမ္မဏတော စ။ တတ္ထ ဧကသင်္ခါရဿာပိ အနိစ္စတာယ ဒိဋ္ဌာယ သဗ္ဗေ သင်္ခါရာ အနိစ္စာတိ အဝသေသေသု နယတော မနသိကာရော ဟောတိ။ အတီတေ ပန သင်္ခါရေ မနသိကရောန္တော န အနာဂတေ မနသိကာတုံ သက္ကောတိ။ အတီတာဒီသု အညတရံ မနသိကရောတော အာရမ္မဏတော မနသိကာရော ဟောတိ ။ တတ္ထ ပစ္စုပ္ပန္နေ မနသိကရောန္တော ယေန စိတ္တေန တေ မနသိကရောတိ၊ တံ ပစ္စုပ္ပန္နက္ခဏေ မနသိကာတုံ န သက္ကောတိ။ တတ္ထ ယေသံ ‘‘သဗ္ဗေ သင်္ခါရာ အနိစ္စာ’’တိအာဒိဝစနံ နိဿာယ ‘‘မနသိကရောန္တော နာမ အဓိဂယှ အဓိဂဏှိတွာ သင်္ဂဏှိတွာ သဗ္ဗေ သင်္ခါရေ ဧကတော မနသိကရောတီ’’တိ လဒ္ဓိ၊ သေယျထာပိ ပုဗ္ဗသေလိယာပရသေလိယာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။

အထ နံ ယသ္မာ သဗ္ဗေ ဧကတော မနသိကရောန္တေန ယေန စိတ္တေန တေ မနသိကရောတိ၊ တမ္ပိ မနသိကာတဗ္ဗံ ဟောတိ။ တသ္မာ တံစိတ္တတာယ စောဒေတုံ တေန စိတ္တေနာတိ အာဟ။ ဣတရော အာရမ္မဏံ ကတွာ န သက္ကာ ဇာနိတုန္တိ သန္ဓာယ ပဋိက္ခိပတိ။ ဧဝံလက္ခဏံ စိတ္တန္တိ ဉာတတ္တာ ပန တမ္ပိ စိတ္တံ ဉာတမေဝ ဟောတီတိ သန္ဓာယ ပဋိဇာနာတိ။ အထ ဝါ တညေဝ တဿ အာရမ္မဏံ န ဟောတီတိ ပဋိက္ခိပတိ။ ‘‘သဗ္ဗေ သင်္ခါရာ အနိစ္စာ၊ ယဒါ ပညာယ ပဿတီ’’တိအာဒီနိ နိဿာယ ဥပ္ပန္နလဒ္ဓိဝသေန ပဋိဇာနာတိ။ သေသပဉှဒွယေပိ ဧသေဝ နယော။ တေန ဖဿေနာတိအာဒီသု ပန တထာရူပံ သုတ္တံ အပဿန္တော ပဋိက္ခိပတေဝ။ အတီတာဒိပဉှေသု ဟေဋ္ဌာ ဝုတ္တနယေနေဝ ပဋိက္ခေပပဋိညာ ဝေဒိတဗ္ဗာ။ သေသံ ယထာပါဠိမေဝ နိယျာတီတိ။ သဗ္ဗေ သင်္ခါရာတိအာဒိဝစနံ နယတော ဒဿနံ သန္ဓာယ ဝုတ္တံ၊ န ဧကက္ခဏေ အာရမ္မဏတော၊ တသ္မာ အသာဓကန္တိ။

အဓိဂယှမနသိကာရကထာဝဏ္ဏနာ။

၅။ ရူပံ ဟေတူတိကထာဝဏ္ဏနာ

၇၅၄-၇၅၆။ ဣဒါနိ ရူပံ ဟေတူတိ ကထာနာမ ဟောတိ။ တတ္ထ ဟေတူတိ ကုသလမူလာဒိနော ဟေတုဟေတုဿာပိ နာမံ၊ ယဿ ကဿစိ ပစ္စယဿာပိ။ ဣမံ ပန ဝိဘာဂံ အကတွာ ‘‘စတ္တာရော မဟာဘူတာ ဟေတူ’’တိ ဝစနမတ္တံ နိဿာယ အဝိသေသေနေဝ ရူပံ ဟေတူတိ ယေသံ လဒ္ဓိ၊ သေယျထာပိ ဥတ္တရာပထကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အလောဘော ဟေတူတိ ကိံ တေ ရူပံ အလောဘသင်္ခါတော ဟေတူတိ ပုစ္ဆတိ၊ ဣတရော ပဋိက္ခိပတိ။ သေသေသုပိ ဧသေဝ နယော။ မဟာဘူတာ ဥပါဒါယရူပါနံ ဥပါဒါယဟေတူတိ ဧတ္ထ ပစ္စယဋ္ဌေန ဟေတုဘာဝေါ ဝုတ္တော၊ န မူလဋ္ဌေန၊ တသ္မာ အသာဓကန္တိ။

ရူပံ ဟေတူတိကထာဝဏ္ဏနာ။

၇၅၇-၇၅၉။ သဟေတုကကထာယမ္ပိ ဣမိနာဝ နယေန အတ္ထော ဝေဒိတဗ္ဗောတိ။

ရူပံ သဟေတုကန္တိကထာဝဏ္ဏနာ။

၇။ ရူပံ ကုသလာကုသလန္တိကထာဝဏ္ဏနာ

၇၆၀-၇၆၄။ ဣဒါနိ ရူပံ ကုသလာကုသလန္တိကထာ နာမ ဟောတိ။ တတ္ထ ‘‘ကာယကမ္မံ ဝစီကမ္မံ ကုသလမ္ပိ အကုသလမ္ပီ’’တိဝစနံ နိဿာယ ကာယဝစီကမ္မသင်္ခါတံ ကာယဝိညတ္တိဝစီဝိညတ္တိရူပံ ကုသလမ္ပိ အကုသလမ္ပီတိ ယေသံ လဒ္ဓိ၊ သေယျထာပိ မဟိသာသကာနဉ္စေဝ သမ္မိတိယာနဉ္စ၊ တေ သန္ဓာယ ရူပံ ကုသလန္တိ ပုစ္ဆာ သကဝါဒိဿ ပဋိညာ ဣတရဿ။ အထ နံ ‘‘ယဒိ တေ ရူပံ ကုသလံ၊ ဧဝံဝိဓေန အနေန ဘဝိတဗ္ဗ’’န္တိ စောဒေတုံ သာရမ္မဏန္တိ အာဒိမာဟ။ ပရတော အကုသလပဉှေပိ ဧသေဝ နယော။ သေသမေတ္ထ ဥတ္တာနတ္ထမေဝါတိ။

ရူပံ ကုသလာကုသလန္တိကထာဝဏ္ဏနာ။

၈။ ရူပံ ဝိပါကောတိကထာဝဏ္ဏနာ

၇၆၅-၇၆၇။ ဣဒါနိ ရူပံ ဝိပါကောတိကထာ နာမ ဟောတိ။ တတ္ထ ယံ ကမ္မဿ ကတတ္တာ ဥပ္ပန္နာ စိတ္တစေတသိကာ ဝိယ ကမ္မဿ ကတတ္တာ ဥပ္ပန္နံ တံ ရူပမ္ပိ ဝိပါကောတိ ယေသံ လဒ္ဓိ၊ သေယျထာပိ အန္ဓကာနဉ္စေဝ သမ္မိတိယာနဉ္စ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘ယဒိ တေ ရူပံ ဝိပါကော၊ ဧဝံဝိဓေန အနေန ဘဝိတဗ္ဗ’’န္တိ စောဒေတုံ သုခဝေဒနီယန္တိအာဒိမာဟ။ သေသံ ယထာပါဠိမေဝ နိယျာတီတိ။

ရူပံ ဝိပါကောတိကထာဝဏ္ဏနာ။

၉။ ရူပံ ရူပါဝစရာရူပါဝစရန္တိကထာဝဏ္ဏနာ

၇၆၈-၇၇၀။ ဣဒါနိ ရူပံ ရူပါဝစရာရူပါဝစရန္တိကထာ နာမ ဟောတိ။ တတ္ထ ယံ ကာမာဝစရကမ္မဿ ကတတ္တာ ရူပံ၊ တံ ယသ္မာ ကာမာဝစရံ၊ တသ္မာ ရူပါဝစရာရူပါဝစရကမ္မာနမ္ပိ ကတတ္တာ ရူပေန ရူပါဝစရာရူပါဝစရေန ဘဝိတဗ္ဗန္တိ ယေသံ လဒ္ဓိ၊ သေယျထာပိ အန္ဓကာနံ၊ တေ သန္ဓာယ အတ္ထိ ရူပံ ရူပါဝစရာရူပါဝစရန္တိ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ဟေဋ္ဌာ ဝုတ္တနယမေဝါတိ။

ရူပံ ရူပါဝစရာရူပါဝစရန္တိကထာဝဏ္ဏနာ။

၁၀။ ရူပါရူပဓာတုပရိယာပန္နကထာဝဏ္ဏနာ

၇၇၁-၇၇၅။ ဣဒါနိ ရူပရာဂေါ ရူပဓာတုပရိယာပန္နော အရူပရာဂေါ အရူပဓာတုပရိယာပန္နောတိ ကထာ နာမ ဟောတိ။ တတ္ထ ယသ္မာ ကာမရာဂေါ ကာမဓာတုပရိယာပန္နော၊ တသ္မာ ရူပရာဂါရူပရာဂေဟိပိ ရူပဓာတုအရူပဓာတုပရိယာပန္နေဟိ ဘဝိတဗ္ဗန္တိ ယေသံ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သေသံ ဟေဋ္ဌာ ဝုတ္တနယေနေဝ ဝေဒိတဗ္ဗံ။ ကေဝလဉှိ တတ္ထ ‘‘ရူပဓာတုံ အနုသေတိ၊ အရူပဓာတုံ အနုသေတီ’’တိ ပဒံ ဝိသေသော။ သာ စ လဒ္ဓိ အန္ဓကာနဉ္စေဝ သမ္မိတိယာနဉ္စ။ အယံ အန္ဓကာနံယေဝါတိ။

ရူပရာဂေါ ရူပဓာတုပရိယာပန္နော အရူပရာဂေါ အရူပဓာတုပရိယာပန္နောတိကထာဝဏ္ဏနာ။

ရူပါရူပဓာတုပရိယာပန္နကထာဝဏ္ဏနာ။

သောဠသမော ဝဂ္ဂေါ။