📜

၁၇။ သတ္တရသမဝဂ္ဂေါ

၁။ အတ္ထိ အရဟတော ပုညူပစယကထာဝဏ္ဏနာ

၇၇၆-၇၇၉။ ဣဒါနိ အတ္ထိ အရဟတော ပုညူပစယောတိကထာ နာမ ဟောတိ။ တတ္ထ ယေသံ အရဟတော ဒါနသံဝိဘာဂစေတိယဝန္ဒနာဒီနိ ကမ္မာနိ ဒိသွာ အတ္ထိ အရဟတော ပုညူပစယောတိ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘အရဟာ နာမ ပဟီနပုညပါပေါ၊ သော ယဒိ ပုညံ ကရေယျ၊ ပါပမ္ပိ ကရေယျာ’’တိ စောဒေတုံ အပုညူပစယောတိ အာဟ။ ဣတရော ပါဏာတိပါတာဒိကိရိယံ အပဿန္တော ပဋိက္ခိပတိ။ ပုညာဘိသင်္ခါရန္တိအာဒီသု ဘဝဂါမိကမ္မံ အရဟတော နတ္ထီတိ ပဋိက္ခိပတိ။ ဒါနံ ဒဒေယျာတိအာဒီသု ကိရိယစိတ္တေန ဒါနာဒိပဝတ္တိသဗ္ဘာဝတော သကဝါဒီ ပဋိဇာနာတိ။ ဣတရော စိတ္တံ အနာဒိယိတွာ ကိရိယာပဝတ္တိမတ္တဒဿနေနေဝ လဒ္ဓိံ ပတိဋ္ဌပေတိ။ သာ ပန အယောနိသော ပတိဋ္ဌာပိတတ္တာ အပ္ပတိဋ္ဌာပိတာ ဟောတီတိ။

အတ္ထိ အရဟတော ပုညူပစယောတိကထာဝဏ္ဏနာ။

၂။ နတ္ထိ အရဟတော အကာလမစ္စူတိကထာဝဏ္ဏနာ

၇၈၀။ ဣဒါနိ နတ္ထိ အရဟတော အကာလမစ္စူတိကထာ နာမ ဟောတိ။ တတ္ထ ‘‘နာဟံ၊ ဘိက္ခဝေ၊ သဉ္စေတနိကာနံ ကမ္မာနံ ကတာနံ ဥပစိတာနံ အပဋိသံဝေဒိတွာ ဗျန္တီဘာဝံ ဝဒါမီ’’တိ (အ။ နိ။ ၁၀။၂၁၇) သုတ္တဿ အတ္ထံ အယောနိသော ဂဟေတွာ ‘‘အရဟတာ နာမ သဗ္ဗကမ္မဝိပါကံ ပဋိသံဝေဒယိတွာဝ ပရိနိဗ္ဗာယိတဗ္ဗံ၊ တသ္မာ နတ္ထိ၊ အရဟတော အကာလမစ္စူ’’တိ ယေသံ လဒ္ဓိ၊ သေယျထာပိ ရာဇဂိရိကာနဉ္စေဝ သိဒ္ဓတ္ထိကာနဉ္စ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘သစေ တဿ နတ္ထိ အကာလမစ္စု၊ အရဟန္တဃာတကေန နာမ န ဘဝိတဗ္ဗ’’န္တိ စောဒေတုံ နတ္ထိ အရဟန္တဃာတကောတိ အာဟ။ ဣတရော အာနန္တရိယကမ္မဿ စေဝ တာဒိသာနဉ္စ ပုဂ္ဂလာနံ သဗ္ဘာဝတော ပဋိက္ခိပတိ။

၇၈၁။ ဝိသံ န ကမေယျာတိ ပဉှေ ‘‘ယာဝ ပုဗ္ဗေ ကတကမ္မံ ပရိက္ခယံ န ဂစ္ဆတိ၊ တာဝ န ကမတီ’’တိ လဒ္ဓိယာ ပဋိက္ခိပတိ။ သေသမေတ္ထ ယထာပါဠိမေဝ နိယျာတိ။

၇၈၂။ နာဟံ၊ဘိက္ခဝေတိ သုတ္တံ ဣဒံ သန္ဓာယ ဝုတ္တံ – သဉ္စေတနိကာနံ ကမ္မာနံ ကတာနံ ဝိပါကံ အပဋိသံဝေဒိတွာ အဝိန္ဒိတွာ အနနုဘဝိတွာ ဗျန္တီဘာဝံ တေသံ ကမ္မာနံ ပရိဝဋုမပရိစ္ဆိန္နဘာဝံ န ဝဒါမိ၊ တဉ္စ ခေါ ဒိဋ္ဌဓမ္မဝေဒနီယာနံ ဒိဋ္ဌေဝ ဓမ္မေ၊ န တတော ပရံ၊ ဥပပဇ္ဇဝေဒနီယာနံ အနန္တရံ ဥပပတ္တိံ ဥပပဇ္ဇိတွာဝ န တတော ပရံ၊ အပရာပရိယဝေဒနီယာနံ ယဒါ ဝိပါကောကာသံ လဘန္တိ၊ တထာရူပေ အပရာပရေ ဝါ ပရိယာယေ။ ဧဝံ သဗ္ဗထာပိ သံသာရပဝတ္တေ သတိ လဒ္ဓဝိပါကဝါရေ ကမ္မေ န ဝိဇ္ဇတေသော ဇဂတိပ္ပဒေသော၊ ယတ္ထဋ္ဌိတော မုစ္စေယျ ပါပကမ္မာတိ။ ဧဝံ သန္တေ ယဒေတံ ‘‘အလဒ္ဓဝိပါကဝါရမ္ပိ ကမ္မံ အဝဿံ အရဟတော ပဋိသံဝေဒိတဗ္ဗ’’န္တိ ကပ္ပနာဝသေန ‘‘နတ္ထိ အရဟတော အကာလမစ္စူ’’တိ လဒ္ဓိပတိဋ္ဌာပနံ ကတံ၊ တံ ဒုက္ကဋမေဝါတိ။

နတ္ထိ အရဟတော အကာလမစ္စူတိကထာဝဏ္ဏနာ။

၃။ သဗ္ဗမိဒံ ကမ္မတောတိကထာဝဏ္ဏနာ

၇၈၃။ ဣဒါနိ သဗ္ဗမိဒံ ကမ္မတောတိကထာ နာမ ဟောတိ။ တတ္ထ ‘‘ကမ္မုနာ ဝတ္တတိ လောကော’’တိ သုတ္တံ နိဿာယ ‘‘သဗ္ဗမိဒံ ကမ္မကိလေသဝိပါကဝဋ္ဋံ ကမ္မတောဝ ဟောတီ’’တိ ယေသံ လဒ္ဓိ ၊ သေယျထာပိ ရာဇဂိရိကာနဉ္စေဝ သိဒ္ဓတ္ထိကာနဉ္စ၊ တေ သန္ဓာယ သဗ္ဗမိဒန္တိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘ဧဝံ သန္တေ ကမ္မမ္ပိ ကမ္မတော အာပဇ္ဇတီ’’တိ စောဒေတုံ ကမ္မမ္ပိ ကမ္မတောတိ အာဟ။ ဣတရော ယဒိ ကမ္မမ္ပိ ကမ္မတောဝ နာမ တံ ကမ္မံ ဝိပါကောယေဝ သိယာတိ ပဋိက္ခိပတိ။ ပုဗ္ဗေကတဟေတူတိ ‘‘ယဒိ သဗ္ဗမိဒံ ကမ္မတော၊ ပုဗ္ဗေကတဟေတုနာ တေန ဘဝိတဗ္ဗ’’န္တိ စောဒေတုံ ပုစ္ဆတိ၊ ဣတရော ပုဗ္ဗေကတဟေတုဝါဒဘယေန ပဋိက္ခိပတိ။

၇၈၄။ ကမ္မဝိပါကတောတိ ‘‘ယဒိ သဗ္ဗမိဒံ ကမ္မတော၊ ယံ အတီတဘဝေ ပဝတ္တဿ ဟေတုဘူတံ ကမ္မံ၊ တမ္ပိ ပုရိမတရေ ဘဝေ ကမ္မတောတိ ကမ္မဝိပါကော သမ္ပဇ္ဇတိ၊ တေန တေ သဗ္ဗမိဒံ ကမ္မဝိပါကတော အာပဇ္ဇတီ’’တိ စောဒေတုံ ပုစ္ဆတိ။ ဣတရော ဗီဇတော အံကုရဿေဝ ပစ္စုပ္ပန္နပဝတ္တဿ ကမ္မတော နိဗ္ဗတ္တိံ သန္ဓာယ ပဋိက္ခိပတိ။ ဒုတိယံ ပုဋ္ဌော တဿာပိ ကမ္မဿ ဗီဇဿ ပုရိမဗီဇတော ဝိယ ပုရိမကမ္မတော ပဝတ္တတ္တာ ပဋိဇာနာတိ။ ပါဏံ ဟနေယျာတိအာဒိ ‘‘ယဒိ သဗ္ဗံ ကမ္မဝိပါကတော၊ ပါဏာတိပါတာဒီနိ ကမ္မဝိပါကေနေဝ ကရေယျာ’’တိ စောဒေတုံ ဝုတ္တံ။ ဣတရော ဒုဿီလျစေတနာပိ ပုရိမကမ္မနိဗ္ဗတ္တာ ဧကေန ပရိယာယေန ဝိပါကောယေဝါတိ လဒ္ဓိယာ ပဋိဇာနာတိ။ အထ နံ ‘‘ယဒိ တေ ပါဏာတိပါတော ကမ္မဝိပါကတော နိဗ္ဗတ္တတိ၊ ပါဏာတိပါတော ဝိယ ဝိပါကောပိ သဖလော အာပဇ္ဇတီ’’တိ စောဒေတုံ သဖလောတိ အာဟ။ ဣတရော ပါဏာတိပါတဿ နိရယသံဝတ္တနိကာဒိဘာဝတော သဖလတံ ပဿန္တော ပဋိဇာနာတိ။ ကမ္မဝိပါကဿ ပန ဣဒံ နာမ ဖလန္တိ ဝုတ္တဋ္ဌာနံ အပဿန္တော ပဋိက္ခိပတိ။ အဒိန္နာဒါနာဒီသုပိ ဧသေဝ နယော။ ဂိလာနပစ္စယဘေသဇ္ဇပရိက္ခာရော သဖလောတိ ဒေယျဓမ္မဝသေန ဒါနဖလံ ပုစ္ဆတိ။ ကမ္မုနာ ဝတ္တတီတိ သုတ္တံ ‘‘နတ္ထိ ကမ္မ’’န္တိ အကမ္မဝါဒိတံ ပဋိက္ခိပိတွာ ‘‘အတ္ထိ ကမ္မ’’န္တိ ကမ္မဝါဒိတံ ကမ္မဿကတံ ဒီပေတိ။ န သဗ္ဗဿေဝ ကမ္မတော နိဗ္ဗတ္တိံ၊ တသ္မာ အသာဓကန္တိ။

သဗ္ဗမိဒံ ကမ္မတောတိကထာဝဏ္ဏနာ။

၄။ ဣန္ဒြိယဗဒ္ဓကထာဝဏ္ဏနာ

၇၈၆-၇၈၇။ ဣဒါနိ ဣန္ဒြိယဗဒ္ဓကထာ နာမ ဟောတိ။ တတ္ထ ဒုဝိဓံ ဒုက္ခံ – ဣန္ဒြိယဗဒ္ဓံ၊ အနိန္ဒြိယဗဒ္ဓဉ္စ။ ဣန္ဒြိယဗဒ္ဓံ ဒုက္ခဝတ္ထုတာယ ဒုက္ခံ၊ အနိန္ဒြိယဗဒ္ဓံ ဥဒယဗ္ဗယပဋိပီဠနဋ္ဌေန ‘‘ယဒနိစ္စံ တံ ဒုက္ခ’’န္တိ သင်္ဂဟိတတ္တာ ဒုက္ခံ။ ဣမံ ဝိဘာဂံ အဂ္ဂဟေတွာ ‘‘ယဿ ပရိညာယ ဘဂဝတိ ဗြဟ္မစရိယံ ဝုဿတိ၊ တံ ဣန္ဒြိယဗဒ္ဓမေဝ ဒုက္ခံ၊ န ဣတရ’’န္တိ ယေသံ လဒ္ဓိ၊ သေယျထာပိ ဟေတုဝါဒါနံ၊ တေသံ ဣတရဿာပိ ဒုက္ခဘာဝံ ဒဿေတုံ ဣန္ဒြိယဗဒ္ဓညေဝါတိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘ယသ္မာ ဘဂဝတာ ‘ယဒနိစ္စံ တံ ဒုက္ခ’န္တိ ဝုတ္တံ၊ တသ္မာ ဣန္ဒြိယဗဒ္ဓေနေဝ တေန အနိစ္စေန ဘဝိတဗ္ဗ’’န္တိ စောဒေတုံ ဣန္ဒြိယဗဒ္ဓညေဝ အနိစ္စန္တိအာဒိမာဟ။ နနုအနိန္ဒြိယဗဒ္ဓံ အနိစ္စန္တိ နနု ပထဝီပဗ္ဗတပါသာဏာဒိ အနိန္ဒြိယဗဒ္ဓမ္ပိ အနိစ္စန္တိ အတ္ထော။

၇၈၈။ န ဝတ္တဗ္ဗံ ဣန္ဒြိယဗဒ္ဓညေဝ ဒုက္ခန္တိ ပဉှေ အာမန္တာတိ ပဋိညာ သကဝါဒိဿ။ အနိန္ဒြိယဗဒ္ဓဉှိ ဒုက္ခဒေါမနဿာနံ အာရမ္မဏံ ဟောတိ။ ဥဏှကာလသ္မိဉှိ အဂ္ဂိ သီတကာလေ စ ဝါတော ဒုက္ခဿ အာရမ္မဏံ၊ နိစ္စမ္ပိ ဘောဂဝိနာသာဒယော ဒေါမနဿဿ။ တသ္မာ ဝိနာပိ အနိစ္စဋ္ဌေန အနိန္ဒြိယဗဒ္ဓံ ဒုက္ခန္တိ ဝတ္တဗ္ဗံ။ ကမ္မကိလေသေဟိ ပန အနိဗ္ဗတ္တတ္တာ ဒုက္ခံ အရိယသစ္စန္တိ န ဝတ္တဗ္ဗံ၊ တထာ မဂ္ဂေန အပရိညေယျတ္တာ။ ယသ္မာ ပန တိဏကဋ္ဌာဒိနိရောဓော ဝါ ဥတုဗီဇာဒိနိရောဓော ဝါ ဒုက္ခနိရောဓံ အရိယသစ္စံ နာမ န ဟောတိ၊ တသ္မာ ဣန္ဒြိယဗဒ္ဓံ ဒုက္ခဉ္စေဝ အရိယသစ္စဉ္စ၊ ဣတရံ ပန ဒုက္ခမေဝါတိ ဣဒံ နာနတ္တံ ဒဿေတုံ ပဋိဇာနာတိ။ ယထာ ဣန္ဒြိယဗဒ္ဓဿာတိအာဒိဝစနံ ဣန္ဒြိယဗဒ္ဓဿ ပရိညာယ ဗြဟ္မစရိယဝါသံ ပရိညာတဿ ပုန အနုပ္ပတ္တိံ ဒီပေတိ။ တေနေဝေတ္ထ သကဝါဒိနာ ပဋိက္ခေပေါ ကတော။ ‘‘ယဒနိစ္စံ တံ ဒုက္ခ’’န္တိ ဝစနေန ပန သင်္ဂဟိတဿ အနိန္ဒြိယဗဒ္ဓဿ ဒုက္ခဘာဝံ ပဋိသေဓေတုံ န သက္ကာတိ၊ တသ္မာ အသာဓကန္တိ။

ဣန္ဒြိယဗဒ္ဓကထာဝဏ္ဏနာ။

၅။ ဌပေတွာ အရိယမဂ္ဂန္တိကထာဝဏ္ဏနာ

၇၈၉-၇၉၀။ ဣဒါနိ ဌပေတွာ အရိယမဂ္ဂန္တိကထာ နာမ ဟောတိ။ တတ္ထ ‘‘ယသ္မာ အရိယမဂ္ဂေါ ‘ဒုက္ခနိရောဓဂါမိနိပဋိပဒါ’တိ ဝုတ္တော၊ တသ္မာ ဌပေတွာ အရိယမဂ္ဂံ အဝသေသာ သင်္ခါရာ ဒုက္ခာ’’တိ ယေသံ လဒ္ဓိ၊ သေယျထာပိ ဟေတုဝါဒါနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘ယဒိ ဧဝံ သမုဒယဿာပိ ဒုက္ခဘာဝေါ အာပဇ္ဇတီ’’တိ စောဒေတုံ ဒုက္ခသမုဒယောပီတိ အာဟ။ ဣတရော ဟေတုလက္ခဏံ သန္ဓာယ ပဋိက္ခိပတိ။ ပုန ပုဋ္ဌော ပဝတ္တပရိယာပန္နဘာဝံ သန္ဓာယ ပဋိဇာနာတိ။ တီဏေဝါတိ ပဉှေသု သုတ္တဝိရောဓဘယေန ပဋိက္ခိပတိ၊ လဒ္ဓိဝသေန ပဋိဇာနာတိ။ သေသမေတ္ထ ဥတ္တာနတ္ထမေဝါတိ။

ဌပေတွာ အရိယမဂ္ဂန္တိကထာဝဏ္ဏနာ။

၆။ န ဝတ္တဗ္ဗံ သင်္ဃော ဒက္ခိဏံ ပဋိဂ္ဂဏှာတီတိကထာဝဏ္ဏနာ

၇၉၁-၇၉၂။ ဣဒါနိ န ဝတ္တဗ္ဗံ သင်္ဃော ဒက္ခိဏံ ပဋိဂ္ဂဏှာတီတိကထာ နာမ ဟောတိ။ တတ္ထ ‘‘ပရမတ္ထတော မဂ္ဂဖလာနေဝ သင်္ဃော၊ မဂ္ဂဖလေဟိ အညော သင်္ဃော နာမ နတ္ထိ၊ မဂ္ဂဖလာနိ စ န ကိဉ္စိ ပဋိဂ္ဂဏှန္တိ၊ တသ္မာ န ဝတ္တဗ္ဗံ သင်္ဃော ဒက္ခိဏံ ပဋိဂ္ဂဏှာတီ’’တိ ယေသံ လဒ္ဓိ၊ သေယျထာပိ ဧတရဟိ မဟာပုညဝါဒီသင်္ခါတာနံ ဝေတုလ္လကာနံ၊ တေ သန္ဓာယ န ဝတ္တဗ္ဗန္တိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘ယဒိ သင်္ဃော န ပဋိဂ္ဂဏှေယျ၊ န နံ သတ္ထာ အာဟုနေယျာတိအာဒီဟိ ထောမေယျာ’’တိ စောဒေတုံ နနု သင်္ဃော အာဟုနေယျောတိအာဒိမာဟ။ သင်္ဃဿ ဒါနံ ဒေန္တီတိ ‘‘ယေ တေ သင်္ဃဿ ဒေန္တိ၊ တေ ပဋိဂ္ဂါဟကေသု အသတိ ကဿ ဒဒေယျု’’န္တိ စောဒနတ္ထံ ဝုတ္တံ။ အာဟုတိံ ဇာတဝေဒေါ ဝါတိ သုတ္တံ ပရသမယတော အာဂတံ။ တတ္ထ မဟာမေဃန္တိ မေဃဝုဋ္ဌိံ သန္ဓာယ ဝုတ္တံ။ ဝုဋ္ဌိဉှိ မေဒနီ ပဋိဂ္ဂဏှာတိ၊ န မေဃမေဝ။ မဂ္ဂေါ ပဋိဂ္ဂဏှာတီတိ ‘‘မဂ္ဂဖလာနိ သင်္ဃော’’တိ လဒ္ဓိယာ ဝဒတိ၊ န စ မဂ္ဂဖလာနေဝ သင်္ဃော။ မဂ္ဂဖလပါတုဘာဝပရိသုဒ္ဓေ ပန ခန္ဓေ ဥပါဒါယ ပညတ္တာ အဋ္ဌ ပုဂ္ဂလာ သင်္ဃော၊ တသ္မာ အသာဓကမေတန္တိ။

န ဝတ္တဗ္ဗံ သင်္ဃော ဒက္ခိဏံ ပဋိဂ္ဂဏှာတီတိကထာဝဏ္ဏနာ။

၇။ န ဝတ္တဗ္ဗံ သင်္ဃော ဒက္ခိဏံ ဝိသောဓေတီတိကထာဝဏ္ဏနာ

၇၉၃-၇၉၄။ ဣဒါနိ န ဝတ္တဗ္ဗံ သင်္ဃော ဒက္ခိဏံ ဝိသောဓေတီတိကထာ နာမ ဟောတိ။ တတ္ထ ‘‘မဂ္ဂဖလာနေဝ သင်္ဃော နာမ၊ န စ တာနိ ဒက္ခိဏံ ဝိသောဓေတုံ သက္ကောန္တိ၊ တသ္မာ န ဝတ္တဗ္ဗံ သင်္ဃော ဒက္ခိဏံ ဝိသောဓေတီ’’တိ ယေသံ လဒ္ဓိ၊ သေယျထာပိ တေသညေဝ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အာဟုနေယျောတိအာဒိ ‘‘ယဒိ သင်္ဃော ဒက္ခိဏံ ဝိသောဓေတုံ န သက္ကုဏေယျ၊ န နံ သတ္ထာ ဧဝံ ထောမေယျာ’’တိ ဒဿနတ္ထံ ဝုတ္တံ။ ဝိသောဓေတီတိ မဟပ္ဖလံ ကရောတိ။ သင်္ဃသ္မိဉှိ အပ္ပံ ဒိန္နံ ဗဟု ဟောတိ၊ ဗဟု ဒိန္နံ ဗဟုတရံ။ ဒက္ခိဏေယျာတိ ဒက္ခိဏာရဟာ ဒက္ခိဏာယ အနုစ္ဆဝိကာ၊ ဒက္ခိဏံ ဝိသောဓေတုံ သမတ္ထာတိ အတ္ထော။ ဒက္ခိဏံ အာရာဓေန္တီတိ သမ္ပာဒေန္တိ၊ အပ္ပမတ္တိကာယပိ ဒက္ခိဏာယ မဟန္တံ ဖလံ ပါပုဏန္တီတိ အတ္ထော။ သေသံ ဟေဋ္ဌာ ဝုတ္တနယမေဝါတိ။

န ဝတ္တဗ္ဗံ သင်္ဃော ဒက္ခိဏံ ဝိသောဓေတီတိကထာဝဏ္ဏနာ။

၈။ န ဝတ္တဗ္ဗံ သင်္ဃော ဘုဉ္ဇတီတိကထာဝဏ္ဏနာ

၇၉၅-၇၉၆။ ဣဒါနိ န ဝတ္တဗ္ဗံ သင်္ဃော ဘုဉ္ဇတီတိကထာ နာမ ဟောတိ။ တတြာပိ ‘‘မဂ္ဂဖလာနေဝ သင်္ဃော နာမ၊ န စ တာနိ ကိဉ္စိ ဘုဉ္ဇန္တိ၊ တသ္မာ န ဝတ္တဗ္ဗံ သင်္ဃော ဘုဉ္ဇတိ၊ ပိဝတိ၊ ခါဒတိ၊ သာယတီ’’တိ ယေသံ လဒ္ဓိ၊ သေယျထာပိ တေသံယေဝ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘ယဒိ သင်္ဃော န ဘုဉ္ဇေယျ၊ သင်္ဃဘတ္တာဒိကရဏံ နိရတ္ထကံ ဘဝေယျာ’’တိ စောဒေတုံ နနု အတ္ထိ ကေစိ သင်္ဃဘတ္တာနိ ကရောန္တီတိအာဒိမာဟ။ ဂဏဘောဇနန္တိအာဒိ ‘‘ယဒိ သင်္ဃော န ဘုဉ္ဇေယျ၊ ကဿ ဂဏဘောဇနာဒီနိ သိယု’’န္တိ စောဒနတ္ထံ ဝုတ္တံ။ အဋ္ဌ ပါနာနီတိ ဣဒမ္ပိ ‘‘ယဒိ သင်္ဃော န ပိဝေယျ၊ ကဿေတာနိ ပါနာနိ သတ္ထာ အနုဇာနေယျာ’’တိ စောဒနတ္ထံ ဝုတ္တံ။ သေသမိဓာပိ ဟေဋ္ဌာ ဝုတ္တနယေနေဝ ဝေဒိတဗ္ဗန္တိ။

န ဝတ္တဗ္ဗံ သင်္ဃော ဘုဉ္ဇတီတိကထာဝဏ္ဏနာ။

၉။ န ဝတ္တဗ္ဗံ သင်္ဃဿ ဒိန္နံ မဟပ္ဖလန္တိကထာဝဏ္ဏနာ

၇၉၇-၇၉၈။ ဣဒါနိ န ဝတ္တဗ္ဗံ သင်္ဃဿ ဒိန္နံ မဟပ္ဖလန္တိကထာ နာမ ဟောတိ။ တတြာပိ ‘‘မဂ္ဂဖလာနေဝ သင်္ဃော နာမ၊ န စ သက္ကာ တေသံ ကိဉ္စိ ဒါတုံ၊ န စ တေဟိ ပဋိဂ္ဂဏှိတုံ၊ နာပိ တေသံ ဒါနေန ကောစိ ဥပကာရော ဣဇ္ဈတိ၊ တသ္မာ န ဝတ္တဗ္ဗံ သင်္ဃဿ ဒိန္နံ မဟပ္ဖလ’’န္တိ ယေသံ လဒ္ဓိ၊ သေယျထာပိ တေသံယေဝ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အာဟုနေယျောတိအာဒိ ‘‘ယဒိ သင်္ဃဿ ဒိန္နံ မဟပ္ဖလံ န ဘဝေယျ၊ န နံ သတ္ထာ ဧဝံ ထောမေယျာ’’တိ ဒဿနတ္ထံ ဝုတ္တံ။ သေသံ ယထာပါဠိမေဝ နိယျာတီတိ။

န ဝတ္တဗ္ဗံ သင်္ဃဿ ဒိန္နံ မဟပ္ဖလန္တိကထာဝဏ္ဏနာ။

၁၀။ န ဝတ္တဗ္ဗံ ဗုဒ္ဓဿ ဒိန္နံ မဟပ္ဖလန္တိကထာဝဏ္ဏနာ

၇၉၉။ ဣဒါနိ န ဝတ္တဗ္ဗံ ဗုဒ္ဓဿ ဒိန္နံ မဟပ္ဖလန္တိကထာ နာမ ဟောတိ။ တတ္ထ ‘‘ဗုဒ္ဓါ ဘဂဝါ န ကိဉ္စိ ပရိဘုဉ္ဇတိ၊ လောကာနုဝတ္တနတ္ထံ ပန ပရိဘုဉ္ဇမာနံ ဝိယ အတ္တာနံ ဒဿေတိ၊ တသ္မာ နိရုပကာရတ္တာ န ဝတ္တဗ္ဗံ တသ္မိံ ဒိန္နံ မဟပ္ဖလ’’န္တိ ယေသံ လဒ္ဓိ၊ သေယျထာပိ တေသံယေဝ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ ဒွိပဒါနံ အဂ္ဂေါတိအာဒိ ‘‘မနုဿဒုဿီလေပိ ဒါနံ သဟဿဂုဏံ ဟောတိ၊ ကိမင်္ဂံ ပန ဧဝရူပေ အဂ္ဂပုဂ္ဂလေ’’တိ ဒဿနတ္ထံ ဝုတ္တံ။ သေသမေတ္ထ ယထာပါဠိမေဝ နိယျာတီတိ။

န ဝတ္တဗ္ဗံ ဗုဒ္ဓဿ ဒိန္နံ မဟပ္ဖလန္တိကထာဝဏ္ဏနာ။

၁၁။ ဒက္ခိဏာဝိသုဒ္ဓိကထာဝဏ္ဏနာ

၈၀၀-၈၀၁။ ဣဒါနိ ဒက္ခိဏာဝိသုဒ္ဓိကထာ နာမ ဟောတိ။ တတ္ထ ‘‘ယဒိ ပဋိဂ္ဂါဟကတော ဒက္ခိဏာ ဝိသုဇ္ဈေယျ၊ မဟပ္ဖလာ ဘဝေယျ။ ဒါယကေန ဒါနံ ဒိန္နံ၊ ပဋိဂ္ဂါဟကေန ဝိပါကော နိဗ္ဗတ္တိတောတိ အညော အညဿ ကာရကော ဘဝေယျ၊ ပရံကတံ သုခဒုက္ခံ အာပဇ္ဇေယျ၊ အညော ကရေယျ၊ အညော ပဋိသံဝေဒေယျ။ တသ္မာ ဒါယကတောဝ ဒါနံ ဝိသုဇ္ဈတိ၊ နော ပဋိဂ္ဂါဟကတော၊ ဒါယကဿေဝ စိတ္တဝိသုဒ္ဓိ ဝိပါကဒါယိကာ ဟောတီ’’တိ ယေသံ လဒ္ဓိ၊ သေယျထာပိ ဥတ္တရာပထကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အာဟုနေယျာတိအာဒိ ‘‘ယဒိ ပဋိဂ္ဂါဟကတော ဒါနံ န ဝိသုဇ္ဈေယျ၊ ကိမဿ အာဟုနေယျာဒိဘာဝေါ ကရေယျာ’’တိ ဒဿနတ္ထံ ဝုတ္တံ။ အညော အညဿ ကာရကောတိ ယဒိ ဒါယကဿ ဒါနစေတနာ ပဋိဂ္ဂါဟကေန ကတာ ဘဝေယျ၊ ယုတ္တရူပံ သိယာ။ တဿ ပန ဒါနစေတနာ ပရိသုဒ္ဓါ ပဋိဂ္ဂါဟကသင်္ခါတံ ဝတ္ထုံ ပဋိစ္စ မဟာဝိပါကဋ္ဌေန ဝိသုဇ္ဈတိ၊ တသ္မာ အစောဒနာ ဧသာ ‘‘ပဋိဂ္ဂါဟကတော ဒါနံ ဝိသုဇ္ဈတီ’’တိ။

ဒက္ခိဏာဝိသုဒ္ဓိကထာဝဏ္ဏနာ။

သတ္တရသမော ဝဂ္ဂေါ။