📜

၂၁။ ဧကဝီသတိမဝဂ္ဂေါ

၁။ သာသနကထာဝဏ္ဏနာ

၈၇၈။ ဣဒါနိ သာသနကထာ နာမ ဟောတိ။ တတ္ထ တိဿော သင်္ဂီတိယော သန္ဓာယ ‘‘သာသနံ နဝံ ကတ’’န္တိ စ ‘‘အတ္ထိ ကောစိ တထာဂတဿ သာသနံ နဝံ ကရောတီ’’တိ စ ‘‘လဗ္ဘာ တထာဂတဿ သာသနံ နဝံ ကာတု’’န္တိ စ ယေသံ လဒ္ဓိ၊ သေယျထာပိ ဧကစ္စာနံ ဥတ္တရာပထကာနံ၊ တေ သန္ဓာယ တီသုပိ ကထာသု ပုစ္ဆာ သကဝါဒိဿ၊ ပဋိညာ ဣတရဿ။ သတိပဋ္ဌာနာတိအာဒိ သာသနံ နာမ သတိပဋ္ဌာနာဒယော စေဝ အရိယဓမ္မာ၊ ကုသလာဒီနဉ္စ ဒေသနာ။ တတ္ထ ယေသံ ဘဂဝတာ ဒေသိတာ သတိပဋ္ဌာနာဒယော၊ ဌပေတွာ တေ အညေသံ ဝါ သတိပဋ္ဌာနာဒီနံ ကရဏေန အကုသလာဒီနံ ဝါ ကုသလာဒိဘာဝကရဏေန သာသနံ နဝံကတံ နာမ ဘဝေယျ၊ ကိံ တံ ဧဝံ ကတံ ကေနစိ၊ အတ္ထိ ဝါ ကောစိ ဧဝံ ကရောတိ၊ လဗ္ဘာ ဝါ ဧဝံ ကာတုန္တိ တီသုပိ ပုစ္ဆာသု စောဒနတ္ထံ ဝုတ္တံ။ သေသံ သဗ္ဗတ္ထ ယထာပါဠိမေဝ နိယျာတီတိ။

သာသနကထာဝဏ္ဏနာ။

၂။ အဝိဝိတ္တကထာဝဏ္ဏနာ

၈၇၉-၈၈၀။ ဣဒါနိ အဝိဝိတ္တကထာ နာမ ဟောတိ။ တတ္ထ ယဿ ပုဂ္ဂလဿ ယော ဓမ္မော ပစ္စုပ္ပန္နော၊ သော တေန အဝိဝိတ္တော နာမာတိ ဣဒံ သကသမယေ သန္နိဋ္ဌာနံ။ ယသ္မာ ပန ပုထုဇ္ဇနေန တေဓာတုကာ ဓမ္မာ အပရိညာတာ၊ တသ္မာ သော ဧကက္ခဏေယေဝ သဗ္ဗေဟိပိ တေဓာတုကေဟိ ဓမ္မေဟိ အဝိဝိတ္တောတိ ယေသံ လဒ္ဓိ၊ သေယျထာပိ တေသညေဝ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ ဖဿေဟီတိအာဒိ သဗ္ဗေသံ ဖဿာဒီနံ ဧကက္ခဏေ ပဝတ္တိဒေါသဒဿနတ္ထံ ဝုတ္တံ။ သေသံ သဗ္ဗတ္ထ ဥတ္တာနတ္ထမေဝါတိ။

အဝိဝိတ္တကထာဝဏ္ဏနာ။

၃။ သညောဇနကထာဝဏ္ဏနာ

၈၈၁-၈၈၂။ ဣဒါနိ သညောဇနကထာ နာမ ဟောတိ။ တတ္ထ ယသ္မာ အရဟာ သဗ္ဗံ ဗုဒ္ဓဝိသယံ န ဇာနာတိ၊ တသ္မာ တဿ တတ္ထ အဝိဇ္ဇာဝိစိကိစ္ဆာဟိ အပ္ပဟီနာဟိ ဘဝိတဗ္ဗန္တိ သညာယ ‘‘အတ္ထိ ကိဉ္စိ သညောဇနံ အပ္ပဟာယ အရဟတ္တပ္ပတ္တီ’’တိ ယေသံ လဒ္ဓိ၊ သေယျထာပိ မဟာသင်္ဃိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ အတ္ထိ ကိဉ္စိ သက္ကာယဒိဋ္ဌီတိအာဒိ အရဟတော သဗ္ဗသံယောဇနပ္ပဟာနဒဿနတ္ထံ ဝုတ္တံ။ သဗ္ဗံ ဗုဒ္ဓဝိသယန္တိ ပဉှဒွယေ အရဟတော သဗ္ဗညုတညာဏာဘာဝေန ပဋိသေဓော ကတော၊ န အဝိဇ္ဇာဝိစိကိစ္ဆာနံ အပ္ပဟာနေန။ ဣတရော ပန တေသံ အပ္ပဟီနတံ သန္ဓာယ တေန ဟီတိ လဒ္ဓိံ ပတိဋ္ဌပေတိ။ သာ အယောနိသော ပတိဋ္ဌာပိတတ္တာ အပ္ပတိဋ္ဌိတာဝ ဟောတီတိ။

သညောဇနကထာဝဏ္ဏနာ။

၄။ ဣဒ္ဓိကထာဝဏ္ဏနာ

၈၈၃-၈၈၄။ ဣဒါနိ ဣဒ္ဓိကထာ နာမ ဟောတိ။ တတ္ထ ဣဒ္ဓိ နာမေသာ ကတ္ထစိ ဣဇ္ဈတိ၊ ကတ္ထစိ န ဣဇ္ဈတိ၊ အနိစ္စာဒီနံ နိစ္စာဒိကရဏေ ဧကန္တေနေဝ န ဣဇ္ဈတိ။ သဘာဂသန္တတိံ ပန ပရိဝတ္တေတွာ ဝိသဘာဂသန္တတိကရဏေ ဝါ သဘာဂသန္တတိဝသေနေဝ စိရတရပ္ပဝတ္တနေ ဝါ ယေသံ အတ္ထာယ ကရိယတိ၊ တေသံ ပုညာဒီနိ ကာရဏာနိ နိဿာယ ကတ္ထစိ ဣဇ္ဈတိ၊ ဘိက္ခူနံ အတ္ထာယ ပါနီယဿ သပ္ပိခီရာဒိကရဏေ ဝိယ မဟာဓာတုနိဓာနေ ဒီပါဒီနံ စိရသန္တာနပ္ပဝတ္တနေ ဝိယ စာတိ ဣဒံ သကသမယေ သန္နိဋ္ဌာနံ။ ယံ ပန အာယသ္မာ ပိလိန္ဒဝစ္ဆော ရညော ပါသာဒံ သုဝဏ္ဏန္တွေဝ အဓိမုစ္စိ၊ တံ နိဿာယ ယေသံ ‘‘အတ္ထိ အဓိပ္ပာယဣဒ္ဓီ’’တိ လဒ္ဓိ၊ သေယျထာပိ အန္ဓကာနံ၊ တေ သန္ဓာယ အတ္ထိ အဓိပ္ပာယဣဒ္ဓီတိ ပုစ္ဆာ သကဝါဒိဿ။ တတ္ထ အဓိပ္ပာယဣဒ္ဓီတိ အဓိပ္ပာယဣဒ္ဓိ၊ ယထာဓိပ္ပာယံ ဣဇ္ဈနဣဒ္ဓီတိ အတ္ထော။ အာမန္တာတိ လဒ္ဓိမတ္တေ ဌတွာ ပဋိညာ ပရဝါဒိဿ။ အထ နံ အနိစ္စာဒီနံ နိစ္စာဒိတာယ အနုယုဉ္ဇိတုံ နိစ္စပဏ္ဏာ ရုက္ခာ ဟောန္တူတိအာဒိမာဟ။ သေသမေတ္ထ ဥတ္တာနတ္ထမေဝ။ လဒ္ဓိပတိဋ္ဌာပနေ သုဝဏ္ဏော စ ပနာသီတိ ရညော ပုညူပနိဿယေန အာသိ၊ န ကေဝလံ ထေရဿ အဓိပ္ပာယေနေဝ။ တသ္မာ အသာဓကမေတန္တိ။

ဣဒ္ဓိကထာဝဏ္ဏနာ။

၅။ ဗုဒ္ဓကထာဝဏ္ဏနာ

၈၈၅။ ဣဒါနိ ဗုဒ္ဓကထာ နာမ ဟောတိ။ တတ္ထ ဌပေတွာ တသ္မိံ တသ္မိံ ကာလေ သရီရဝေမတ္တတံ အာယုဝေမတ္တတံ ပဘာဝေမတ္တတဉ္စ သေသေဟိ ဗုဒ္ဓဓမ္မေဟိ ဗုဒ္ဓါနံ ဗုဒ္ဓေဟိ ဟီနာတိရေကတာ နာမ နတ္ထိ။ ယေသံ ပန အဝိသေသေနေဝ အတ္ထီတိ လဒ္ဓိ၊ သေယျထာပိ အန္ဓကာနံ၊ တေ သန္ဓာယ အတ္ထိ ဗုဒ္ဓါနန္တိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ဗုဒ္ဓဓမ္မေဟိ အနုယုဉ္ဇိတုံ သတိပဋ္ဌာနတောတိအာဒိမာဟ။ ဣတရော တေသံ ဝသေန ဟီနာတိရေကတံ အပဿန္တော ပဋိက္ခိပတိယေဝါတိ။

ဗုဒ္ဓကထာဝဏ္ဏနာ။

၆။ သဗ္ဗဒိသာကထာဝဏ္ဏနာ

၈၈၆။ ဣဒါနိ သဗ္ဗဒိသာကထာ နာမ ဟောတိ။ တတ္ထ စတူသု ဒိသာသု ဟေဋ္ဌာ ဥပရီတိ သမန္တတော လောကဓာတုသန္နိဝါသံ၊ သဗ္ဗလောကဓာတူသု စ ဗုဒ္ဓါ အတ္ထီတိ အတ္တနော ဝိကပ္ပသိပ္ပံ ဥပ္ပာဒေတွာ ‘‘သဗ္ဗဒိသာသု ဗုဒ္ဓါ တိဋ္ဌန္တီ’’တိ ယေသံ လဒ္ဓိ၊ သေယျထာပိ မဟာသင်္ဃိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ ပုရတ္ထိမာယာတိ ပုဋ္ဌော သကျမုနိံ သန္ဓာယ ပဋိက္ခိပတိ။ ပုန ပုဋ္ဌော လဒ္ဓိဝသေန အညလောကဓာတုယံ ဌိတံ သန္ဓာယ ပဋိဇာနာတိ။ ကိန္နာမော သော ဘဂဝါတိအာဒိ ‘‘သစေ တွံ ဇာနာသိ၊ နာမာဒိဝသေန နံ ကထေဟီ’’တိ စောဒနတ္ထံ ဝုတ္တံ။ ဣမိနာ ဥပါယေန သဗ္ဗတ္ထ အတ္ထော ဝေဒိတဗ္ဗောတိ။

သဗ္ဗဒိသာကထာဝဏ္ဏနာ။

၇။ ဓမ္မကထာဝဏ္ဏနာ

၈၈၇-၈၈၈။ ဣဒါနိ ဓမ္မကထာ နာမ ဟောတိ။ တတ္ထ ယသ္မာ ရူပါဒယော ရူပါဒိသဘာဝေန နိယတာ န တံ သဘာဝံ ဝိဇဟန္တိ၊ တသ္မာ သဗ္ဗဓမ္မာ နိယတာတိ ယေသံ လဒ္ဓိ၊ သေယျထာပိ အန္ဓကာနဉ္စေဝ ဧကစ္စာနဉ္စ ဥတ္တရာပထကာနံ၊ တေ သန္ဓာယ သဗ္ဗေ ဓမ္မာတိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘သစေ တေ နိယတာ၊ မိစ္ဆတ္တနိယတာ ဝါ သိယုံ သမ္မတ္တနိယတာ ဝါ၊ ဣတော အညော နိယာမော နာမ နတ္ထီ’’တိ စောဒေတုံ မိစ္ဆတ္တနိယတာတိအာဒိမာဟ။ တတ္ထ ပဋိက္ခေပေါ စ ပဋိညာ စ ပရဝါဒိဿ။ ရူပံ ရူပဋ္ဌေနာတိအာဒိ ယေနတ္ထေန နိယတာတိ ဝဒတိ၊ တဿ ဝသေန စောဒေတုံ ဝုတ္တံ။ တတြာယံ အဓိပ္ပာယော – ရူပဉှိ ရူပဋ္ဌေန နိယတန္တိ ရူပံ ရူပမေဝ၊ န ဝေဒနာဒိသဘာဝန္တိ အဓိပ္ပာယေန ဝတ္တဗ္ဗံ၊ ဣတော အညထာ န ဝတ္တဗ္ဗံ။ ကသ္မာ? ရူပဋ္ဌတော အညဿ ရူပဿ အဘာဝါ။ ရူပသဘာဝေါ ဟိ ရူပဋ္ဌော၊ ရူပသဘာဝေါ စ ရူပမေဝ၊ န ရူပတော အညော။ ဝေဒနာဒီဟိ ပနဿ နာနတ္တပညာပနတ္ထံ ဧသ ဝေါဟာရော ဟောတီတိ။ တသ္မာ ‘‘ရူပံ ရူပဋ္ဌေန နိယတ’’န္တိ ဝဒန္တေန ရူပံ နိယတန္တိ ဝုတ္တံ ဟောတိ။ နိယတဉ္စ နာမ မိစ္ဆတ္တနိယတံ ဝါ သိယာ သမ္မတ္တနိယတံ ဝါ၊ ဣတော အညော နိယာမော နာမ နတ္ထီတိ။ အထ ကသ္မာ ပဋိဇာနာတီတိ? အတ္ထန္တရဝသေန။ ရူပံ ရူပဋ္ဌေန နိယတန္တိ ဧတ္ထ ဟိ ရူပံ ရူပမေဝ၊ န ဝေဒနာဒိသဘာဝန္တိ အယမတ္ထော။ တသ္မာ ပဋိဇာနာတိ။ ဣတော အညထာ ပနဿ နိယတတ္တံ နတ္ထီတိ ပုန တေနေဝ နယေန စောဒေတုံ မိစ္ဆတ္တနိယတန္တိအာဒိမာဟ ။ တံ သဗ္ဗံ ဥတ္တာနတ္ထမေဝ။ တေန ဟိ ရူပန္တိ လဒ္ဓိပိ အယောနိသော ပတိဋ္ဌာပိတတ္တာ အပ္ပတိဋ္ဌိတာဝ ဟောတီတိ။

ဓမ္မကထာဝဏ္ဏနာ။

၈။ ကမ္မကထာဝဏ္ဏနာ

၈၈၉-၈၉၁။ ဣဒါနိ ကမ္မကထာ နာမ ဟောတိ။ တတ္ထ ‘‘ယသ္မာ ဒိဋ္ဌဓမ္မဝေဒနီယာဒီနိ ဒိဋ္ဌဓမ္မဝေဒနီယဋ္ဌာဒီဟိ နိယတာနိ၊ တသ္မာ သဗ္ဗေ ကမ္မာ နိယတာ’’တိ ယေသံ လဒ္ဓိ၊ သေယျထာပိ တေသညေဝ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ ဒိဋ္ဌဓမ္မဝေဒနီယဋ္ဌေန နိယတန္တိ ဧတ္ထ ဒိဋ္ဌဓမ္မဝေဒနီယံ ဒိဋ္ဌဓမ္မဝေဒနီယဋ္ဌမေဝ။ သစေ ဒိဋ္ဌေဝ ဓမ္မေ ဝိပါကံ ဒါတုံ သက္ကောတိ ဒေတိ၊ နော စေ အဟောသိကမ္မံ နာမ ဟောတီတိ ဣမမတ္ထံ သန္ဓာယ ပဋိညာ သကဝါဒိဿ။ မိစ္ဆတ္တသမ္မတ္တနိယာမဝသေန ပနေတံ အနိယတမေဝါတိ သဗ္ဗံ ဟေဋ္ဌာ ဝုတ္တနယေနေဝ ဝေဒိတဗ္ဗန္တိ။

ကမ္မကထာဝဏ္ဏနာ။

ဧကဝီသတိမော ဝဂ္ဂေါ။