📜

၂၃။ တေဝီသတိမဝဂ္ဂေါ

၁။ ဧကာဓိပ္ပာယကထာဝဏ္ဏနာ

၉၀၈။ ဣဒါနိ ဧကာဓိပ္ပာယကထာ နာမ ဟောတိ။ တတ္ထ ကာရုညေန ဝါ ဧကေန အဓိပ္ပာယေန ဧကာဓိပ္ပာယော၊ သံသာရေ ဝါ ဧကတော ဘဝိဿာမာတိ ဣတ္ထိယာ သဒ္ဓိံ ဗုဒ္ဓပူဇာဒီနိ ကတွာ ပဏိဓိဝသေန ဧကော အဓိပ္ပာယော အဿာတိ ဧကာဓိပ္ပာယော။ ဧဝရူပေါ ဒွိန္နမ္ပိ ဇနာနံ ဧကာဓိပ္ပာယော မေထုနော ဓမ္မော ပဋိသေဝိတဗ္ဗောတိ ယေသံ လဒ္ဓိ၊ သေယျထာပိ အန္ဓကာနဉ္စေဝ ဝေတုလ္လကာနဉ္စ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ယထာပါဠိမေဝ နိယျာတီတိ။

ဧကာဓိပ္ပာယကထာဝဏ္ဏနာ။

၂။ အရဟန္တဝဏ္ဏကထာဝဏ္ဏနာ

၉၀၉။ ဣဒါနိ အရဟန္တဝဏ္ဏကထာ နာမ ဟောတိ။ တတ္ထ ဣရိယာပထသမ္ပန္နေ အာကပ္ပသမ္ပန္နေ ပါပဘိက္ခူ ဒိသွာ ‘‘အရဟန္တာနံ ဝဏ္ဏေန အမနုဿာ မေထုနံ ဓမ္မံ ပဋိသေဝန္တီ’’တိ ယေသံ လဒ္ဓိ၊ သေယျထာပိ ဧကစ္စာနံ ဥတ္တရာပထကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သေသမေတ္ထ ဥတ္တာနတ္ထမေဝါတိ။

အရဟန္တဝဏ္ဏကထာဝဏ္ဏနာ။

၃-၇။ ဣဿရိယကာမကာရိကာကထာဝဏ္ဏနာ

၉၁၀-၉၁၄။ ဣဒါနိ ဣဿရိယကာမကာရိကာကထာ နာမ ဟောတိ။ ဆဒ္ဒန္တဇာတကာဒီနိ သန္ဓာယ ‘‘ဗောဓိသတ္တော ဣဿရိယကာမကာရိကာဟေတု ဝိနိပါတံ ဂစ္ဆတိ၊ ဂဗ္ဘသေယျံ ဩက္ကမတိ၊ ဒုက္ကရကာရိကံ အကာသိ၊ အပရန္တပံ အကာသိ၊ အညံ သတ္ထာရံ ဥဒ္ဒိသီ’’တိ ယေသံ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ။ သေသံ ပဌမကထာယံ ဥတ္တာနတ္ထမေဝ။ ဒုတိယကထာယံ ဣဒ္ဓိမာတိ ယဒိ ဣဿရိယကာမကာရိကာဟေတု ဂစ္ဆေယျ၊ ဣဒ္ဓိယာ ဂစ္ဆေယျ၊ န ကမ္မဝသေနာတိ စောဒနတ္ထံ ဝုတ္တံ။ ဣတရော ပန ပဌမပဉှေ ဘာဝနာမယံ သန္ဓာယ ပဋိက္ခိပတိ။ ဒုတိယပဉှေ ပုညိဒ္ဓိံ သန္ဓာယ ပဋိဇာနာတိ။ တတိယကထာယံ ဣဿရိယကာမကာရိကာဟေတု နာမ ဒုက္ကရကာရိကာ မိစ္ဆာဒိဋ္ဌိယာ ကရိယတိ။ ယဒိ စ သော တံ ကရေယျ၊ သဿတာဒီနိပိ ဂဏှေယျာတိ စောဒနတ္ထံ သဿတော လောကောတိအာဒိ ဝုတ္တံ။ စတုတ္ထကထာယမ္ပိ ဧသေဝ နယောတိ။

ဣဿရိယကာမကာရိကာကထာဝဏ္ဏနာ။

၈။ ပတိရူပကထာဝဏ္ဏနာ

၉၁၅-၉၁၆။ ဣဒါနိ ရာဂပတိရူပကထာ နာမ ဟောတိ။ တတ္ထ မေတ္တာကရုဏာမုဒိတာယော သန္ဓာယ ‘‘န ရာဂေါ ရာဂပတိရူပကော’’တိ စ ဣဿာမစ္ဆရိယကုက္ကုစ္စာနိ သန္ဓာယ ‘‘န ဒေါသော ဒေါသပတိရူပကော’’တိ စ ဟသိတုပ္ပာဒံ သန္ဓာယ ‘‘န မောဟော မောဟပတိရူပကော’’တိ စ ဒုမ္မင်္ကူနံ ပုဂ္ဂလာနံ နိဂ္ဂဟံ ပေသလာနံ ဘိက္ခူနံ အနုဂ္ဂဟံ ပါပဂရဟိတံ ကလျာဏပသံသံ အာယသ္မတော ပိလိန္ဒဝစ္ဆဿ ဝသလဝါဒံ ဘဂဝတော ခေဠာသကဝါဒံ မောဃပုရိသဝါဒဉ္စ သန္ဓာယ ‘‘န ကိလေသော ကိလေသပတိရူပကော’’တိ စ ယေသံ လဒ္ဓိ၊ သေယျထာပိ အန္ဓကာနံ၊ တေ သန္ဓာယ သဗ္ဗကထာသု ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ယသ္မာ ဖဿာဒိပတိရူပကာ နဖဿာဒယော နာမ နတ္ထိ၊ တသ္မာ ရာဂါဒိပတိရူပကာ နရာဂါဒယောပိ နတ္ထီတိ စောဒေတုံ အတ္ထိ န ဖဿောတိအာဒိမာဟ ။ ဣတရော တေသံ အဘာဝါ ပဋိက္ခိပတိ။ သေသံ သဗ္ဗတ္ထ ဥတ္တာနတ္ထမေဝါတိ။

ပတိရူပကထာဝဏ္ဏနာ။

၉။ အပရိနိပ္ဖန္နကထာဝဏ္ဏနာ

၉၁၇-၉၁၈။ ဣဒါနိ အပရိနိပ္ဖန္နကထာ နာမ ဟောတိ။ တတ္ထ –

‘‘ဒုက္ခမေဝ ဟိ သမ္ဘောတိ၊ ဒုက္ခံ တိဋ္ဌတိ ဝေတိ စ၊

နာညတြ ဒုက္ခာ သမ္ဘောတိ၊ နာညံ ဒုက္ခာ နိရုဇ္ဈတီ’’တိ။ (သံ။ နိ။ ၁။၁၇၁) –

ဝစနံ နိဿာယ ဒုက္ခညေဝ ပရိနိပ္ဖန္နံ၊ သေသာ ခန္ဓာယတနဓာတုဣန္ဒြိယဓမ္မာ အပရိနိပ္ဖန္နာတိ ယေသံ လဒ္ဓိ၊ သေယျထာပိ ဧကစ္စာနံ ဥတ္တရပထကာနဉ္စေဝ ဟေတုဝါဒါနဉ္စ၊ တေ သန္ဓာယ ရူပံ အပရိနိပ္ဖန္နန္တိ ပုစ္ဆာ သကဝါဒိဿ၊ ပဋိညာ ဣတရဿ။ အထ နံ ‘‘သစေ ရူပံ အပရိနိပ္ဖန္နံ၊ န အနိစ္စာဒိသဘာဝံ သိယာ’’တိ စောဒေတုံ ရူပံ န အနိစ္စန္တိအာဒိမာဟ။ ဣတရော တထာရူပံ ရူပံ အပဿန္တော ပဋိက္ခိပတိ။ သကဝါဒီ နနု ရူပံ အနိစ္စန္တိအာဒိ ဝစနေန တဿ ဧကံ လဒ္ဓိံ ပဋိသေဓေတွာ ဒုတိယံ ပုစ္ဆန္တော ဒုက္ခညေဝ ပရိနိပ္ဖန္နန္တိအာဒိမာဟ။ အထဿ တမ္ပိ လဒ္ဓိံ ပဋိသေဓေတုံ န ယဒနိစ္စန္တိအာဒိမာဟ။ တတြာယံ အဓိပ္ပာယော – န ကေဝလဉှိ ပဌမသစ္စမေဝ ဒုက္ခံ။ ယံ ပန ကိဉ္စိ အနိစ္စံ၊ တံ ဒုက္ခမေဝ။ ရူပဉ္စ အနိစ္စံ၊ တသ္မာ တမ္ပိ ပရိနိပ္ဖန္နံ။ ဣတိ ယံ တွံ ဝဒေသိ ‘‘ရူပံ အပရိနိပ္ဖန္နံ၊ ဒုက္ခညေဝ ပရိနိပ္ဖန္န’’န္တိ၊ တံ နော ဝတ ရေ ဝတ္တဗ္ဗေ ‘‘ဒုက္ခညေဝ ပရိနိပ္ဖန္န’’န္တိ။ ဝေဒနာဒိမူလိကာဒီသုပိ ယောဇနာသု ဧသေဝ နယော။ ဓမ္မာယတနဓမ္မဓာတူသု ပန ဌပေတွာ နိဗ္ဗာနံ သေသဓမ္မာနံ ဝသေန အနိစ္စတာ ဝေဒိတဗ္ဗာ။ ဣန္ဒြိယာနိ အနိစ္စာနေဝါတိ။

အပရိနိပ္ဖန္နကထာဝဏ္ဏနာ။

တေဝီသတိမော ဝဂ္ဂေါ။

နိဂမနကထာ

ဧတ္တာဝတာ စ –

ပဏ္ဏာသကေဟိ စတူဟိ၊ တီဟိ ဝဂ္ဂေဟိ စေဝ စ၊

သင်္ဂဟေတွာ ကထာ သဗ္ဗာ၊ ဦနတိသတဘေဒနာ။

ကထာဝတ္ထုပ္ပကရဏံ၊ ကထာမဂ္ဂေသု ကောဝိဒေါ၊

ယံ ဇိနော ဒေသယိ တဿ၊ နိဋ္ဌိတာ အတ္ထဝဏ္ဏနာ။

ဣမံ တေရသမတ္တေဟိ၊ ဘာဏဝါရေဟိ တန္တိယာ၊

စိရဋ္ဌိတတ္ထံ ဓမ္မဿ၊ သင်္ခရောန္တေန ယံ မယာ။

ယံ ပတ္တံ ကုသလံ တေန၊ လောကောယံ သနရာမရော၊

ဓမ္မရာဇဿ သဒ္ဓမ္မ-ရသမေဝါဓိဂစ္ဆတူတိ။

ကထာဝတ္ထု-အဋ္ဌကထာ နိဋ္ဌိတာ။

နမော တဿ ဘဂဝတော အရဟတော သမ္မာသမ္ဗုဒ္ဓဿ

အဘိဓမ္မပိဋကေ