📜

၂။ ခန္ဓယမကံ

၁။ ပဏ္ဏတ္တိဥဒ္ဒေသဝါရဝဏ္ဏနာ

၁။ ဣဒါနိ မူလယမကေ ဒေသိတေယေဝ ကုသလာဒိဓမ္မေ ခန္ဓဝသေန သင်္ဂဏှိတွာ မူလယမကာနန္တရံ ဒေသိတဿ ခန္ဓယမကဿ ဝဏ္ဏနာ ဟောတိ။ တတ္ထ ပါဠိဝဝတ္ထာနံ တာဝ ဧဝံ ဝေဒိတဗ္ဗံ – ဣမသ္မိဉှိ ခန္ဓယမကေ တယော မဟာဝါရာ ဟောန္တိ – ပဏ္ဏတ္တိဝါရော၊ ပဝတ္တိဝါရော၊ ပရိညာဝါရောတိ။ တေသု ပဏ္ဏတ္တိဝါရော ခန္ဓာနံ နာမာဘိဓာနသောဓနဝသေနေဝ ဂတတ္တာ ပဏ္ဏတ္တိဝါရောတိ ဝုစ္စတိ။ ပဝတ္တိဝါရော တေန သောဓိတနာမာဘိဓာနာနံ ခန္ဓာနံ ဥပ္ပာဒနိရောဓဝသေန ပဝတ္တိံ သောဓယမာနော ဂတော၊ တသ္မာ ပဝတ္တိဝါရောတိ ဝုစ္စတိ။ ပရိညာဝါရော ဣမိနာနုက္ကမေန ပဝတ္တာနံ ခန္ဓာနံ သင်္ခေပေနေဝ တိဿော ပရိညာ ဒီပယမာနော ဂတော၊ တသ္မာ ပရိညာဝါရောတိ ဝုစ္စတိ။ တတ္ထ ပဏ္ဏတ္တိဝါရော ဥဒ္ဒေသနိဒ္ဒေသဝသေန ဒွီဟာကာရေဟိ ဝဝတ္ထိတော။ ဣတရေသု ဝိသုံ ဥဒ္ဒေသဝါရော နတ္ထိ။ အာဒိတော ပဋ္ဌာယ ပုစ္ဆာဝိဿဇ္ဇနဝသေန ဧကဓာ ဝဝတ္ထိတာ။ တတ္ထ ပဉ္စက္ခန္ဓာတိပဒံ အာဒိံ ကတွာ ယာဝ န ခန္ဓာ၊ န သင်္ခါရာတိ ပဒံ တာဝ ပဏ္ဏတ္တိဝါရဿ ဥဒ္ဒေသဝါရော ဝေဒိတဗ္ဗော။ ပုစ္ဆာဝါရောတိပိ တဿေဝ နာမံ။ တတ္ထ ပဉ္စက္ခန္ဓာတိ အယံ ယမကဝသေန ပုစ္ဆိတဗ္ဗာနံ ခန္ဓာနံ ဥဒ္ဒေသော။ ရူပက္ခန္ဓော…ပေ… ဝိညာဏက္ခန္ဓောတိ တေသညေဝ ပဘေဒတော နာမဝဝတ္ထာနံ။

၂-၃။ ဣဒါနိ ဣမေသံ ခန္ဓာနံ ဝသေန ပဒသောဓနဝါရော၊ ပဒသောဓနမူလစက္ကဝါရော၊ သုဒ္ဓခန္ဓဝါရော၊ သုဒ္ဓခန္ဓမူလစက္ကဝါရောတိ စတ္တာရော နယဝါရာ ဟောန္တိ။ တတ္ထ ရူပံ ရူပက္ခန္ဓော၊ ရူပက္ခန္ဓော ရူပန္တိအာဒိနာ နယေန ပဒမေဝ သောဓေတွာ ဂတော ပဒသောဓနဝါရော နာမ။ သော အနုလောမပဋိလောမဝသေန ဒုဝိဓော ဟောတိ။ တတ္ထ အနုလောမဝါရေ ‘ရူပံ ရူပက္ခန္ဓော၊ ရူပက္ခန္ဓော ရူပ’န္တိအာဒီနိ ပဉ္စ ယမကာနိ။ ပဋိလောမဝါရေပိ ‘န ရူပံ၊ န ရူပက္ခန္ဓော၊ န ရူပက္ခန္ဓော န ရူပ’န္တိအာဒီနိ ပဉ္စေဝ။ တတော ပရံ တေသညေဝ ပဒသောဓနဝါရေ သောဓိတာနံ ခန္ဓာနံ ‘ရူပံ ရူပက္ခန္ဓော၊ ခန္ဓာ ဝေဒနာက္ခန္ဓော’တိအာဒိနာ နယေန ဧကေကခန္ဓမူလကာနိ စတ္တာရိ စတ္တာရိ စက္ကာနိ ဗန္ဓိတွာ ဂတော ပဒသောဓနမူလကာနံ စက္ကာနံ အတ္ထိတာယ ပဒသောဓနမူလစက္ကဝါရော နာမ။ သောပိ အနုလောမပဋိလောမဝသေန ဒုဝိဓော ဟောတိ။ တတ္ထ အနုလောမဝါရေ ‘ရူပံ ရူပက္ခန္ဓော၊ ခန္ဓာ ဝေဒနာက္ခန္ဓော’တိအာဒီနိ ဧကေကခန္ဓမူလကာနိ စတ္တာရိ စတ္တာရိ ကတွာ ဝီသတိ ယမကာနိ။ ပဋိလောမဝါရေပိ ‘န ရူပံ၊ န ရူပက္ခန္ဓော၊ န ခန္ဓာ န ဝေဒနာက္ခန္ဓော’တိအာဒီနိ ဝီသတိမေဝ။

တတော ပရံ ရူပံ ခန္ဓော ခန္ဓာ ရူပန္တိအာဒိနာ နယေန သုဒ္ဓခန္ဓဝသေနေဝ ဂတော သုဒ္ဓခန္ဓဝါရော နာမ။ တတ္ထ ခန္ဓာ ရူပန္တိအာဒီသု ခန္ဓာ ရူပက္ခန္ဓော၊ ခန္ဓာ ဝေဒနာက္ခန္ဓောတိ အတ္ထော ဂဟေတဗ္ဗော။ ကသ္မာ? နိဒ္ဒေသဝါရေ ဧဝံ ဘာဇိတတ္တာ။ တတ္ထ ဟိ ‘ရူပံ ခန္ဓောတိ အာမန္တာ။ ခန္ဓာ ရူပက္ခန္ဓောတိ ရူပက္ခန္ဓော ခန္ဓော စေဝ ရူပက္ခန္ဓော စ၊ အဝသေသာ ခန္ဓာ န ရူပက္ခန္ဓော’တိ ဧဝံ ‘ခန္ဓာ ရူပ’န္တိအာဒီနံ ခန္ဓာ ရူပက္ခန္ဓောတိအာဒိနာ နယေန ပဒံ ဥဒ္ဓရိတွာ အတ္ထော ဝိဘတ္တော။ တေနေဝ စ ကာရဏေနေသေ သုဒ္ဓခန္ဓဝါရောတိ ဝုတ္တော။ ဝစနသောဓနေ ဝိယ ဟိ ဧတ္ထ န ဝစနံ ပမာဏံ။ ယထာ ယထာ ပန သုဒ္ဓခန္ဓာ လဗ္ဘန္တိ၊ တထာ တထာ အတ္ထောဝ ပမာဏံ။ ပရတော အာယတနယမကာဒီသုပိ ဧသေဝ နယော။ ဧသောပိ စ သုဒ္ဓခန္ဓဝါရော အနုလောမပဋိလောမဝသေန ဒုဝိဓော ဟောတိ။ တတ္ထ အနုလောမဝါရေ ‘ရူပံ ခန္ဓော ခန္ဓာ ရူပ’န္တိအာဒီနိ ပဉ္စ ယမကာနိ။ ပဋိလောမဝါရေပိ ‘န ရူပံ န ခန္ဓော၊ န ခန္ဓာ န ရူပ’န္တိအာဒီနိ ပဉ္စေဝ။

တတော ပရံ တေသညေဝ သုဒ္ဓခန္ဓာနံ ရူပံ ခန္ဓော၊ ခန္ဓာ ဝေဒနာတိအာဒိနာ နယေန ဧကေကခန္ဓမူလကာနိ စတ္တာရိ စတ္တာရိ စက္ကာနိ ဗန္ဓိတွာ ဂတော သုဒ္ဓခန္ဓမူလကာနံ စက္ကာနံ အတ္ထိတာယ သုဒ္ဓခန္ဓမူလစက္ကဝါရော နာမ။ တတ္ထ ခန္ဓာ ဝေဒနာတိအာဒီသု ခန္ဓာ ဝေဒနာက္ခန္ဓောတိအာဒိနာ နယေန အတ္ထော ဝေဒိတဗ္ဗော။ ဣတရထာ နိဒ္ဒေသဝါရေန သဒ္ဓိံ ဝိရောဓော ဟောတိ။ သောပိ အနုလောမပဋိလောမဝသေန ဒုဝိဓော ဟောတိ။ တတ္ထ အနုလောမဝါရေ ‘ရူပံ ခန္ဓော၊ ခန္ဓာ ဝေဒနာ’တိအာဒီနိ ဧကေကခန္ဓမူလကာနိ စတ္တာရိ စတ္တာရိ ကတွာ ဝီသတိ ယမကာနိ။ ပဋိလောမဝါရေပိ ‘န ရူပံ၊ န ခန္ဓော၊ န ခန္ဓာ န ဝေဒနာ’တိအာဒီနိ ဝီသတိမေဝ။ ဧဝံ တာဝ ဧကေန ယမကသတေန ဒွီဟိ ပုစ္ဆာသတေဟိ ဧကေကပုစ္ဆာယ သန္နိဋ္ဌာနသံသယဝသေန ဒွေ ဒွေ အတ္ထေ ကတွာ စတူဟိ စ အတ္ထသတေဟိ ပဋိမဏ္ဍိတော ပဏ္ဏတ္တိဝါရဿ ဥဒ္ဒေသဝါရော ဝေဒိတဗ္ဗောတိ။

ပဏ္ဏတ္တိဥဒ္ဒေသဝါရဝဏ္ဏနာ။

၁။ ပဏ္ဏတ္တိနိဒ္ဒေသဝါရဝဏ္ဏနာ

၂၆။ ဣဒါနိ ရူပံ ရူပက္ခန္ဓောတိအာဒိနာ နယေန နိဒ္ဒေသဝါရော အာရဒ္ဓါ။ တတ္ထ ရူပံ ရူပက္ခန္ဓောတိ ယံကိဉ္စိ ရူပန္တိ ဝုစ္စတိ။ သဗ္ဗံ တံ ရူပံ ရူပက္ခန္ဓောတိ ဝစနသောဓနတ္ထံ ပုစ္ဆတိ။ ပိယရူပံ သာတရူပံ၊ ရူပံ၊ န ရူပက္ခန္ဓောတိ ယံ ‘ပိယရူပံ သာတရူပ’န္တိ ဧတ္ထ ရူပန္တိ ဝုတ္တံ၊ တံ ရူပမေဝ၊ န ရူပက္ခန္ဓောတိ အတ္ထော။ ရူပက္ခန္ဓော ရူပဉ္စေဝ ရူပက္ခန္ဓော စာတိ ယော ပန ရူပက္ခန္ဓော၊ သော ရူပန္တိပိ ရူပက္ခန္ဓောတိပိ ဝတ္တုံ ဝဋ္ဋတီတိ အတ္ထော။ ရူပက္ခန္ဓော ရူပန္တိ ဧတ္ထ ပန ယသ္မာ ရူပက္ခန္ဓော နိယမေနေဝ ရူပန္တိ ဝတ္တဗ္ဗော။ တသ္မာ အာမန္တာတိ အာဟ။ ဣမိနာ ဥပါယေန သဗ္ဗဝိဿဇ္ဇနေသု အတ္ထော ဝေဒိတဗ္ဗော။ ယော ပန ယတ္ထ ဝိသေသော ဘဝိဿတိ၊ တထေဝ တံ ဝဏ္ဏယိဿာမ ။ သညာယမကေ တာဝ ဒိဋ္ဌိသညာတိ ‘ပပဉ္စသညာ’တိအာဒီသု အာဂတာ ဒိဋ္ဌိသညာ။ သင်္ခါရယမကေ အဝသေသာ သင်္ခါရာတိ ‘အနိစ္စာ ဝတ သင်္ခါရာ’တိအာဒီသု အာဂတာ သင်္ခါရက္ခန္ဓတော အဝသေသာ သင်္ခတဓမ္မာ။ ပဋိလောမဝါရေပိ ဧသေဝ နယောတိ။

ပဒသောဓနဝါရော နိဋ္ဌိတော။

၂၈။ ပဒသောဓနမူလစက္ကဝါရေ ခန္ဓာ ဝေဒနာက္ခန္ဓောတိ ယေကေစိ ခန္ဓာ၊ သဗ္ဗေ တေ ဝေဒနာက္ခန္ဓောတိ ပုစ္ဆတိ။ သေသပုစ္ဆာသုပိ ဧသေဝ နယော။ ပဋိလောမေ န ခန္ဓာ န ဝေဒနာက္ခန္ဓောတိ ဧတ္ထ ယေ ပညတ္တိနိဗ္ဗာနသင်္ခါတာ ဓမ္မာ ခန္ဓာ န ဟောန္တိ၊ တေ ယသ္မာ ဝေဒနာက္ခန္ဓောပိ န ဟောန္တိ၊ တသ္မာ အာမန္တာတိ အာဟ။ သေသဝိဿဇ္ဇနေသုပိ ဧသေဝ နယောတိ။

ပဒသောဓနမူလစက္ကဝါရော နိဋ္ဌိတော။

၃၈။ သုဒ္ဓခန္ဓဝါရေ ရူပံ ခန္ဓောတိ ယံကိဉ္စိ ရူပန္တိ ဝုတ္တံ၊ သဗ္ဗံ တံ ခန္ဓောတိ ပုစ္ဆတိ။ တတ္ထ ယသ္မာ ပိယရူပသာတရူပသင်္ခါတံ ဝါ ရူပံ ဟောတု၊ ဘူတုပါဒါရူပံ ဝါ၊ သဗ္ဗံ ပဉ္စသု ခန္ဓေသု သင်္ဂဟံ ဂစ္ဆတေဝ။ တသ္မာ အာမန္တာတိ ပဋိဇာနာတိ။ ဒုတိယပဒေ ‘ခန္ဓာ ရူပ’န္တိ ပုစ္ဆိတဗ္ဗေ ယသ္မာ ရူပန္တိဝစနေန ရူပက္ခန္ဓောဝ အဓိပ္ပေတော၊ တသ္မာ ဝစနံ အနာဒိယိတွာ အတ္ထဝသေန ပုစ္ဆန္တော ခန္ဓာ ရူပက္ခန္ဓောတိ အာဟ။ ဣမိနာ နယေန သဗ္ဗပဒေသု အတ္ထော ဝေဒိတဗ္ဗော။ ပရတော အာယတနယမကာဒီနံ နိဒ္ဒေသဝါရေပိ ဧသေဝ နယော။ သညာ ခန္ဓောတိ ဧတ္ထာပိ ဒိဋ္ဌိသညာ ဝါ ဟောတု၊ သညာ ဧဝ ဝါ၊ သဗ္ဗာယပိ ခန္ဓဘာဝတော အာမန္တာတိ ဝုတ္တံ။ သင်္ခါရာ ခန္ဓောတိ ပဒေပိ ဧသေဝ နယော။ ခန္ဓဝိနိမုတ္တကော ဟိ သင်္ခါရော နာမ နတ္ထိ။

၃၉။ ပဋိလောမေ န ရူပံ န ခန္ဓောတိ ယံ ဓမ္မဇာတံ ရူပံ န ဟောတိ၊ တံ ခန္ဓောပိ န ဟောတီတိ ပုစ္ဆတိ။ ဝိဿဇ္ဇနေ ပနဿ ရူပံ ဌပေတွာ အဝသေသာ ခန္ဓာ န ရူပံ၊ ခန္ဓာတိ ရူပတော အညေ ဝေဒနာဒယော ခန္ဓာ ရူပမေဝ န ဟောန္တိ၊ ခန္ဓာ ပန ဟောန္တီတိ အတ္ထော။ ရူပဉ္စ ခန္ဓေ စ ဌပေတွာ အဝသေသာတိ ပဉ္စက္ခန္ဓဝိနိမုတ္တံ နိဗ္ဗာနဉ္စေဝ ပညတ္တိ စ။ ဣတော ပရေသုပိ ‘အဝသေသာ’တိ ပဒေသု ဧသေဝ နယောတိ။

သုဒ္ဓခန္ဓဝါရော နိဋ္ဌိတော။

၄၀-၄၄။ သုဒ္ဓခန္ဓမူလစက္ကဝါရေ ရူပံ ခန္ဓောတိအာဒီနံ ဟေဋ္ဌာ ဝုတ္တနယေနေဝ အတ္ထော ဝေဒိတဗ္ဗောတိ။

သုဒ္ဓခန္ဓမူလစက္ကဝါရော နိဋ္ဌိတော။

ပဏ္ဏတ္တိနိဒ္ဒေသဝါရဝဏ္ဏနာ။

၂။ ပဝတ္တိဝါရဝဏ္ဏနာ

၅၀-၂၀၅။ ဣဒါနိ ယဿ ရူပက္ခန္ဓောတိအာဒိနာ နယေန ပဝတ္တိဝါရော အာရဒ္ဓါ။ ကသ္မာ ပနေတ္ထ ဥဒ္ဒေသဝါရော န ဝုတ္တောတိ? ဟေဋ္ဌာ ဒဿိတနယတ္တာ။ ပဏ္ဏတ္တိဝါရသ္မိဉှိ ဥဒ္ဒေသဝါရေ နယော ဒဿိတော။ တေန ပန နယေန သက္ကာ သော ဣဓ အဝုတ္တောပိ ဇာနိတုန္တိ တံ အဝတွာ နိဒ္ဒေသဝါရောဝ အာရဒ္ဓါ။ ဣမသ္မိံ ပန ပဝတ္တိဝါရသင်္ခါတေ မဟာဝါရေ ဥပ္ပာဒဝါရော၊ နိရောဓဝါရော၊ ဥပ္ပာဒနိရောဓဝါရောတိ တယော အန္တရဝါရာ ဟောန္တိ။ တေသု ပဌမော ဓမ္မာနံ ဥပ္ပာဒလက္ခဏဿ ဒီပိတတ္တာ ဥပ္ပာဒဝါရောတိ ဝုစ္စတိ။ ဒုတိယော တေသညေဝ နိရောဓလက္ခဏဿ ဒီပိတတ္တာ နိရောဓဝါရောတိ ဝုစ္စတိ။ တတိယော ဥဘိန္နမ္ပိ လက္ခဏာနံ ဒီပိတတ္တာ ဥပ္ပာဒနိရောဓဝါရောတိ ဝုစ္စတိ။ ဥပ္ပာဒဝါရေန စေတ္ထ ဓမ္မာနံ ဥပ္ပဇ္ဇနာကာရောဝ ဒီပိတော။ နိရောဓဝါရေန ‘ဥပ္ပန္နံ နာမ နိစ္စံ နတ္ထီ’တိ တေသညေဝ အနိစ္စတာ ဒီပိတာ။ ဥပ္ပာဒနိရောဓဝါရေန တဒုဘယံ။

တတ္ထ ဥပ္ပာဒဝါရေ တာဝ တိဏ္ဏံ အဒ္ဓါနံ ဝသေန ဆ ကာလဘေဒါ ဟောန္တိ – ပစ္စုပ္ပန္နော၊ အတီတော၊ အနာဂတော၊ ပစ္စုပ္ပန္နေနာတီတော၊ ပစ္စုပ္ပန္နေနာနာဂတော၊ အတီတေနာနာဂတောတိ။ တေသု ‘ယဿ ရူပက္ခန္ဓော ဥပ္ပဇ္ဇတီ’တိ ပစ္စုပ္ပန္နာဘိဓာနဝသေန ပစ္စုပ္ပန္နော ဝေဒိတဗ္ဗော။ သော ပစ္စုပ္ပန္နာနံ ဓမ္မာနံ ပစ္စက္ခတော ဂဟေတဗ္ဗတ္တာ အတိဝိယ သုဝိညေယျောတိ ပဌမံ ဝုတ္တော။ ယဿ ရူပက္ခန္ဓော ဥပ္ပဇ္ဇိတ္ထာတိ အတီတာဘိဓာနဝသေန အတီတော ဝေဒိတဗ္ဗော။ သော ပစ္စက္ခတော အနုဘူတပုဗ္ဗာနံ အတီတဓမ္မာနံ အနုမာနေန အနာဂတေဟိ သုဝိညေယျတရတ္တာ ဒုတိယံ ဝုတ္တော။ ယဿ ရူပက္ခန္ဓော ဥပ္ပဇ္ဇိဿတီတိ အနာဂတာဘိဓာနဝသေန အနာဂတော ဝေဒိတဗ္ဗော။ သော ပစ္စက္ခတော စ အနုဘူတပုဗ္ဗဝသေန စ ဂဟိတဓမ္မာနုမာနေန ‘အနာဂတေပိ ဧဝရူပါ ဓမ္မာ ဥပ္ပဇ္ဇိဿန္တီ’တိ ဂဟေတဗ္ဗတော တတိယံ ဝုတ္တော။

ယဿရူပက္ခန္ဓော ဥပ္ပဇ္ဇတိ၊ တဿ ဝေဒနာက္ခန္ဓော ဥပ္ပဇ္ဇိတ္ထာတိ ပစ္စုပ္ပန္နေန သဒ္ဓိံ အတီတာဘိဓာနဝသေန ပစ္စုပ္ပန္နေနာတီတော ဝေဒိတဗ္ဗော။ သော မိဿကေသု တီသု သုဝိညေယျတရတ္တာ စတုတ္ထံ ဝုတ္တော။ ယဿ ရူပက္ခန္ဓော ဥပ္ပဇ္ဇတိ တဿ ဝေဒနာက္ခန္ဓော ဥပ္ပဇ္ဇိဿတီတိ ပစ္စုပ္ပန္နေန သဒ္ဓိံ အနာဂတာဘိဓာနဝသေန ပစ္စုပ္ပန္နေနာနာဂတော ဝေဒိတဗ္ဗော။ သော ပစ္စက္ခတော ဂဟေတဗ္ဗာနံ ဓမ္မာနံ အတ္ထိတာယ အတ္ထတော သုဝိညေယျတရောတိ ပဉ္စမံ ဝုတ္တော။ ယဿ ရူပက္ခန္ဓော ဥပ္ပဇ္ဇိတ္ထ၊ တဿ ဝေဒနာက္ခန္ဓော ဥပ္ပဇ္ဇိဿတီတိ အတီတေန သဒ္ဓိံ အနာဂတာဘိဓာနဝသေန အတီတေနာနာဂတော ဝေဒိတဗ္ဗော။ သော ပုရိမေဟိ ဒုဝိညေယျောတိ ဆဋ္ဌံ ဝုတ္တော။

ဧဝမေတေသု ဆသု ကာလဘေဒေသု ယွာယံ ပဌမော ပစ္စုပ္ပန္နော၊ တတ္ထ ပုဂ္ဂလတော၊ ဩကာသတော၊ ပုဂ္ဂလောကာသတောတိ တယော ဝါရာ ဟောန္တိ။ တေသု ယဿာတိ ပုဂ္ဂလဝသေန ခန္ဓာနံ ဥပ္ပတ္တိဒီပနော ပုဂ္ဂလဝါရော။ ယတ္ထာတိ ဩကာသဝသေန ခန္ဓာနံ ဥပ္ပတ္တိဒီပနော ဩကာသဝါရော။ ယဿ ယတ္ထာတိ ပုဂ္ဂလောကာသဝသေန ခန္ဓာနံ ဥပ္ပတ္တိဒီပနော ပုဂ္ဂလောကာသဝါရော။ ဣမေ ပန တယောပိ ဝါရာ ပဌမံ အနုလောမနယေန နိဒ္ဒိသိတွာ ပစ္ဆာ ပဋိလောမနယေန နိဒ္ဒိဋ္ဌာ။ တေသု ‘ဥပ္ပဇ္ဇတိ’ ‘ဥပ္ပဇ္ဇိတ္ထ၊’ ‘ဥပ္ပဇ္ဇိဿတီ’တိ ဝစနတော ဥပ္ပတ္တိဒီပနော အနုလောမနယော။ ‘နုပ္ပဇ္ဇတိ’၊ ‘နုပ္ပဇ္ဇိတ္ထ၊’ ‘နုပ္ပဇ္ဇိဿတီ’တိ ဝစနတော အနုပ္ပတ္တိဒီပနော ပဋိလောမနယော။

တတ္ထ ပစ္စုပ္ပန္နကာလေ တာဝ ပုဂ္ဂလဝါရဿ အနုလောမနယေ ‘‘ယဿ ရူပက္ခန္ဓော ဥပ္ပဇ္ဇတိ၊ တဿ ဝေဒနာက္ခန္ဓော ဥပ္ပဇ္ဇတိ။ ယဿ ဝါ ပန ဝေဒနာက္ခန္ဓော ဥပ္ပဇ္ဇတိ၊ တဿ ရူပက္ခန္ဓော ဥပ္ပဇ္ဇတိ။ ယဿ ရူပက္ခန္ဓော ဥပ္ပဇ္ဇတိ၊ တဿ သညာက္ခန္ဓော သင်္ခါရက္ခန္ဓော၊ ဝိညာဏက္ခန္ဓော၊ ဥပ္ပဇ္ဇတိ။ ယဿ ဝါ ပန ဝိညာဏက္ခန္ဓော ဥပ္ပဇ္ဇတိ၊ တဿ ရူပက္ခန္ဓော ဥပ္ပဇ္ဇတီ’’တိ ဧဝံ ရူပက္ခန္ဓမူလကာနိ စတ္တာရိ ယမကာနိ၊ ‘‘ယဿ ဝေဒနာက္ခန္ဓော ဥပ္ပဇ္ဇတိ၊ တဿ သညာက္ခန္ဓော ဥပ္ပဇ္ဇတီ’’တိအာဒိနာ နယေန ဝေဒနာက္ခန္ဓမူလကာနိ တီဏိ၊ သညာက္ခန္ဓမူလကာနိ ဒွေ၊ သင်္ခါရက္ခန္ဓမူလကံ ဧကန္တိ အဂ္ဂဟိတဂ္ဂဟဏေန ဒသ ယမကာနိ ဟောန္တိ။

တတ္ထ ရူပက္ခန္ဓမူလကေသု စတူသု အာဒိတော ဧကမေဝ ဝိဿဇ္ဇိတံ။ သေသာနိ တေန သဒိသဝိဿဇ္ဇနာနီတိ တန္တိယာ လဟုဘာဝတ္ထံ သင်္ခိတ္တာနိ။ ဝေဒနာက္ခန္ဓာဒိမူလကေသုပိ ‘အာမန္တာ’တိ ဧကသဒိသမေဝ ဝိဿဇ္ဇနံ။ တသ္မာ တာနိပိ တန္တိယာ လဟုဘာဝတ္ထံ သင်္ခိတ္တာနေဝါတိ ဧဝမေတာနိ ပစ္စုပ္ပန္နကာလေ ပုဂ္ဂလဝါရေ အနုလောမနယေ ဧကယမကဝိဿဇ္ဇနေနေဝ ဒသ ယမကာနိ ဝိဿဇ္ဇိတာနိ နာမ ဟောန္တီတိ ဝေဒိတဗ္ဗာနိ။ ယထာ စ ပုဂ္ဂလဝါရေ ဒသ၊ ဧဝံ ဩကာသဝါရေ ဒသ၊ ပုဂ္ဂလောကာသဝါရေ ဒသာတိ ပစ္စုပ္ပန္နကာလေ တီသု ဝါရေသု အနုလောမနယေ တိံသ ယမကာနိ ဟောန္တိ။ ယထာ စ အနုလောမနယေ၊ ဧဝံ ပဋိလောမနယေပီတိ သဗ္ဗာနိပိ ပစ္စုပ္ပန္နကာလေ သဋ္ဌိ ယမကာနိ ဟောန္တိ။ တေသု ဝီသပုစ္ဆာသတံ၊ စတ္တာရီသာနိ စ ဒွေ အတ္ထသတာနိ ဟောန္တီတိ ဝေဒိတဗ္ဗာနိ။ ဧဝံ သေသေသုပိ ပဉ္စသု ကာလဘေဒေသု ပုဂ္ဂလာဒိဘေဒတော အနုလောမပဋိလောမနယဝသေန ဆ ဆ ဝါရာ။ ဧကေကသ္မိံ ဝါရေ ဒသ ဒသ ကတွာ သဋ္ဌိ သဋ္ဌိ ယမကာနီတိ တီဏိ ယမကသတာနိ။ တာနိ ပုရိမေဟိ သဒ္ဓိံ သဋ္ဌာဓိကာနိ တီဏိ ယမကသတာနိ၊ ဝီသာဓိကာနိ သတ္တပုစ္ဆာသတာနိ၊ စတ္တာရီသာနိ စ စုဒ္ဒသ အတ္ထသတာနိ ဟောန္တိ။ ဣဒံ တာဝ ဥပ္ပာဒဝါရေ ပါဠိဝဝတ္ထာနံ။ ယထာ စ ဥပ္ပာဒဝါရေ၊ တထာ နိရောဓဝါရေပိ၊ ဥပ္ပာဒနိရောဓဝါရေပီတိ သဗ္ဗသ္မိမ္ပိ ပဝတ္တိမဟာဝါရေ အသီတိ ယမကသဟဿံ၊ သဋ္ဌိသတာဓိကာနိ ဒွေ ပုစ္ဆာသဟဿာနိ၊ ဝီသံ တိသတာဓိကာနိ စ စတ္တာရိ အတ္ထသဟဿာနိ ဝေဒိတဗ္ဗာနိ။

ပါဠိ ပန ဥပ္ပာဒဝါရေ နိရောဓဝါရေ စ တီသု အသမ္မိဿကကာလဘေဒေသု တသ္မိံ တသ္မိံ ဝါရေ ဧကေကမေဝ ယမကံ ဝိဿဇ္ဇေတွာ သင်္ခိတ္တာ။ တီသု မိဿကကာလဘေဒေသု ‘ယဿ ဝေဒနာက္ခန္ဓော ဥပ္ပဇ္ဇတိ၊ တဿ သညာက္ခန္ဓော ဥပ္ပဇ္ဇိတ္ထာ’တိအာဒိနာ နယေန ဝေဒနာက္ခန္ဓာဒိမူလကေသုပိ ဧကံ ယမကံ ဝိဿဇ္ဇိတံ။ ဥပ္ပာဒနိရောဓဝါရေ ပန ဆသုပိ ကာလဘေဒေသု တံ ဝိဿဇ္ဇိတမေဝ။ သေသာနိ တေန သမာနဝိဿဇ္ဇနတ္တာ သင်္ခိတ္တာနီတိ။ ဣဒံ သကလေပိ ပဝတ္တိမဟာဝါရေ ပါဠိဝဝတ္ထာနံ။

အတ္ထဝိနိစ္ဆယတ္ထံ ပနဿ ဣဒံ လက္ခဏံ ဝေဒိတဗ္ဗံ – ဣမသ္မိဉှိ ပဝတ္တိမဟာဝါရေ စတုန္နံ ပဉှာနံ ပဉ္စ ဝိဿဇ္ဇနာနိ သတ္တဝီသတိယာ ဌာနေသု ပက္ခိပိတွာ အတ္ထဝိနိစ္ဆယော ဝေဒိတဗ္ဗော။ တတ္ထ ပုရေပဉှော၊ ပစ္ဆာပဉှော၊ ပရိပုဏ္ဏပဉှော၊ မောဃပဉှောတိ ဣမေ စတ္တာရော ပဉှာ နာမ။ ဧကေကသ္မိဉှိ ယမကေ ဒွေ ဒွေ ပုစ္ဆာ။ ဧကေကပုစ္ဆာယပိ ဒွေ ဒွေ ပဒါနိ။ တတ္ထ ယာယ ပုစ္ဆာယ ဝိဿဇ္ဇနေ ဧကေနေဝ ပဒေန ဂဟိတက္ခန္ဓဿ ဥပ္ပာဒေါ ဝါ နိရောဓော ဝါ လဗ္ဘတိ ၊ အယံ ပုရေပဉှော နာမ။ ယာယ ပန ပုစ္ဆာယ ဝိဿဇ္ဇနေ ဒွီဟိပိ ပဒေဟိ ဂဟိတက္ခန္ဓာနံ ဥပ္ပာဒေါ ဝါ နိရောဓော ဝါ လဗ္ဘတိ၊ အယံ ပစ္ဆာပဉှော နာမ။ ယာယ ပန ပုစ္ဆာယ ဝိဿဇ္ဇနေ ဧကေနပိ ပဒေန ဂဟိတက္ခန္ဓဿ ဒွီဟိပိ ပဒေဟိ ဂဟိတက္ခန္ဓာနံ ဥပ္ပာဒေါ ဝါ၊ နိရောဓော ဝါ လဗ္ဘတိ၊ အယံ ပရိပုဏ္ဏပဉှော နာမ။ ယာယ ပန ပုစ္ဆာယ ဝိဿဇ္ဇနေ ပဋိက္ခေပေါ ဝါ၊ ပဋိသေဓော ဝါ လဗ္ဘတိ၊ အယံ မောဃပဉှော နာမ။ ယသ္မာ ပနေသ အဒဿိယမာနော န သက္ကာ ဇာနိတုံ၊ တသ္မာ နံ ဒဿယိဿာမ။

‘ယတ္ထ ရူပက္ခန္ဓော နုပ္ပဇ္ဇတိ၊ တတ္ထ ဝေဒနာက္ခန္ဓော နုပ္ပဇ္ဇတီ’တိ ပုစ္ဆာယ တာဝ ဥပ္ပဇ္ဇတီတိ ဣမသ္မိံ ဝိဿဇ္ဇနေ ဧကေနေဝ ပဒေန ဂဟိတဿ ဝေဒနာက္ခန္ဓဿ ဥပ္ပာဒေါ လဗ္ဘတိ၊ ဣတိ အယဉ္စေဝ အညော စ ဧဝရူပေါ ပဉှော ပုရေပဉှောတိ ဝေဒိတဗ္ဗော။ ‘ယဿ ရူပက္ခန္ဓော ဥပ္ပဇ္ဇိတ္ထ၊ တဿ ဝေဒနာက္ခန္ဓော ဥပ္ပဇ္ဇိတ္ထာ’တိ ပုစ္ဆာယ ပန ‘အာမန္တာ’တိ ဣမသ္မိံ ဝိဿဇ္ဇနေ ဒွီဟိ ပဒေဟိ ဂဟိတာနံ ရူပဝေဒနာက္ခန္ဓာနံ ယဿ ကဿစိ သတ္တဿ အတီတေ ဥပ္ပာဒေါ လဗ္ဘတိ။ ဣတိ အယဉ္စေဝ အညော စ ဧဝရူပေါ ပဉှော ပစ္ဆာပဉှောတိ ဝေဒိတဗ္ဗော။

‘ယဿ ရူပက္ခန္ဓော ဥပ္ပဇ္ဇတိ၊ တဿ ဝေဒနာက္ခန္ဓော ဥပ္ပဇ္ဇတီ’တိ ဣမာယ ပန ပဌမပုစ္ဆာယ ‘အသညသတ္တံ ဥပပဇ္ဇန္တာန’န္တိအာဒိကေ ဣမသ္မိံ ဝိဿဇ္ဇနေ ‘အသညသတ္တံ ဥပပဇ္ဇန္တာနံ တေသံ ရူပက္ခန္ဓော ဥပ္ပဇ္ဇတိ၊ နော စ တေသံ ဝေဒနာက္ခန္ဓော ဥပ္ပဇ္ဇတီ’တိ ဣမသ္မိံ ကောဋ္ဌာသေ ဧကေနေဝ ပဒေန ဂဟိတဿ ရူပက္ခန္ဓဿပိ ဥပ္ပာဒေါ လဗ္ဘတိ။ ‘ပဉ္စဝေါကာရံ ဥပပဇ္ဇန္တာနံ တေသံ ရူပက္ခန္ဓော စ ဥပ္ပဇ္ဇတိ ဝေဒနာက္ခန္ဓော စ ဥပ္ပဇ္ဇတီ’တိ ဣမသ္မိံ ကောဋ္ဌာသေ ဒွီဟိပိ ပဒေဟိ သင်္ဂဟိတာနံ ရူပဝေဒနာက္ခန္ဓာနမ္ပိ ဥပ္ပာဒေါ လဗ္ဘတိ။ ဣတိ အယဉ္စေဝ အညော စ ဧဝရူပေါ ပဉှော ပရိပုဏ္ဏပဉှောတိ ဝေဒိတဗ္ဗော။ ပုရေပစ္ဆာပဉှောတိပိ ဧတဿေဝ နာမံ။ ဧတဿ ဟိ ဝိဿဇ္ဇနေ ပုရိမကောဋ္ဌာသေ ဧကေန ပဒေန သင်္ဂဟိတဿ ရူပက္ခန္ဓဿေဝ ဥပ္ပာဒေါ ဒဿိတော။ ဒုတိယကောဋ္ဌာသေ ဒွီဟိ ပဒေဟိ သင်္ဂဟိတာနံ ရူပဝေဒနာက္ခန္ဓာနံ။ ဣမိနာယေဝ စ လက္ခဏေန ယတ္ထ ဧကေန ပဒေန သင်္ဂဟိတဿ ခန္ဓဿ ဥပ္ပာဒေါ ဝါ နိရောဓော ဝါ လဗ္ဘတိ၊ သော ပုရေပဉှောတိ ဝုတ္တော။ ယတ္ထ ဒွီဟိပိ ပဒေဟိ သင်္ဂဟိတာနံ ခန္ဓာနံ ဥပ္ပာဒေါ ဝါ နိရောဓော ဝါ လဗ္ဘတိ၊ သော ပစ္ဆာပဉှောတိ ဝုတ္တော။

‘ယဿ ရူပက္ခန္ဓော နုပ္ပဇ္ဇိတ္ထ၊ တဿ ဝေဒနာက္ခန္ဓော နုပ္ပဇ္ဇိတ္ထာ’တိ ဣမာယ ပန ပုစ္ဆာယ ‘နတ္ထီ’တိ ဣမသ္မိံ ဝိဿဇ္ဇနေ ပဋိက္ခေပေါ လဗ္ဘတိ။ ‘ယဿ ရူပက္ခန္ဓော ဥပ္ပဇ္ဇတိ၊ တဿ ဝေဒနာက္ခန္ဓော နိရုဇ္ဈတီ’တိ ပုစ္ဆာယ ‘နော’တိ ဣမသ္မိံ ဝိဿဇ္ဇနေ ပဋိသေဓော လဗ္ဘတိ။ တသ္မာ အယဉ္စေဝ ဒုဝိဓော အညော စ ဧဝရူပေါ ပဉှော မောဃပဉှောတိ ဝေဒိတဗ္ဗော။ တုစ္ဆပဉှောတိပိ ဝုစ္စတိ။ ဧဝံ တာဝ စတ္တာရော ပဉှာ ဝေဒိတဗ္ဗာ။

ပါဠိဂတိယာ ဝိဿဇ္ဇနံ၊ ပဋိဝစနဝိဿဇ္ဇနံ၊ သရူပဒဿနေန ဝိဿဇ္ဇနံ၊ ပဋိက္ခေပေန ဝိဿဇ္ဇနံ၊ ပဋိသေဓေန ဝိဿဇ္ဇနန္တိ ဣမာနိ ပန ပဉ္စ ဝိဿဇ္ဇနာနိ နာမ ။ တတ္ထ ယံ ဝိဿဇ္ဇနံ ပါဠိပဒမေဝ ဟုတွာ အတ္ထံ ဝိဿဇ္ဇေတိ၊ ဣဒံ ပါဠိဂတိယာ ဝိဿဇ္ဇနံ နာမ။ တံ ပုရေပဉှေ လဗ္ဘတိ။ ‘ယတ္ထ ရူပက္ခန္ဓော နုပ္ပဇ္ဇတိ တတ္ထ ဝေဒနာက္ခန္ဓော နုပ္ပဇ္ဇတီ’တိ ဟိ ပဉှေ ‘ဥပ္ပဇ္ဇတီ’တိ ဣဒံ ဝိဿဇ္ဇနံ ပါဠိပဒမေဝ ဟုတွာ အတ္ထံ ဝိဿဇ္ဇယမာနံ ဂတံ၊ တသ္မာ ဧဝရူပေသု ဌာနေသု ပါဠိဂတိယာ ဝိဿဇ္ဇနံ ဝေဒိတဗ္ဗံ။ ယံ ပန ဝိဿဇ္ဇနံ ပဋိဝစနဘာဝေန အတ္ထံ ဝိဿဇ္ဇေတိ၊ ဣဒံ ပဋိဝစနဝိဿဇ္ဇနံ နာမ။ တံ ပစ္ဆာပဉှေ လဗ္ဘတိ။ ‘ယဿ ရူပက္ခန္ဓော ဥပ္ပဇ္ဇိတ္ထ၊ တဿ ဝေဒနာက္ခန္ဓော ဥပ္ပဇ္ဇိတ္ထာ’တိ ဟိ ပဉှေ ‘အာမန္တာ’တိ ဣဒံ ဝိဿဇ္ဇနံ ပဋိဝစနဝသေနေဝ အတ္ထံ ဝိဿဇ္ဇယမာနံ ဂတံ၊ တသ္မာ ဧဝရူပေသု ဌာနေသု ပဋိဝစနဝိဿဇ္ဇနံ ဝေဒိတဗ္ဗံ။ ယံ ဝိဿဇ္ဇနံ သရူပေန ဒဿေတွာ အတ္ထံ ဝိဿဇ္ဇေတိ၊ ဣဒံ သရူပဒဿနေန ဝိဿဇ္ဇနံ နာမ။ တံ ပရိပုဏ္ဏပဉှေ လဗ္ဘတိ။ ‘ယဿ ရူပက္ခန္ဓော ဥပ္ပဇ္ဇတိ၊ တဿ ဝေဒနာက္ခန္ဓော ဥပ္ပဇ္ဇတီ’တိ ဟိ ပဉှေ ‘အသညသတ္တံ ဥပပဇ္ဇန္တာန’န္တိ ဣဒံ ဝိဿဇ္ဇနံ ‘ဣမေသံ ရူပက္ခန္ဓော ဥပ္ပဇ္ဇတိ၊ နော စ ဝေဒနာက္ခန္ဓော၊ ဣမေသံ ရူပက္ခန္ဓော စ ဥပ္ပဇ္ဇတိ၊ ဝေဒနာက္ခန္ဓော စာ’တိ သရူပဒဿနေနေဝ အတ္ထံ ဝိဿဇ္ဇယမာနံ ဂတံ။ တသ္မာ ဧဝရူပေသု ဌာနေသု သရူပဒဿနေန ဝိဿဇ္ဇနံ ဝေဒိတဗ္ဗံ။ ယံ ပန ဝိဿဇ္ဇနံ တထာရူပဿ အတ္ထဿာဘာဝတော အတ္ထပဋိက္ခေပေန ပဉှံ ဝိဿဇ္ဇေတိ၊ ဣဒံ ပဋိက္ခေပေန ဝိဿဇ္ဇနံ နာမ။ ယံ တထာရူပဿ အတ္ထဿ ဧကက္ခဏေ အလာဘတော အတ္ထပဋိသေဓနေန ပဉှံ ဝိဿဇ္ဇေတိ၊ ဣဒံ ပဋိသေဓေန ဝိဿဇ္ဇနံ နာမ။ တံ မောဃပဉှေ လဗ္ဘတိ။ ‘ယဿ ရူပက္ခန္ဓော နုပ္ပဇ္ဇိတ္ထ၊ တဿ ဝေဒနာက္ခန္ဓော နုပ္ပဇ္ဇိတ္ထာ’တိ ဟိ ပဉှေ ‘နတ္ထီ’တိ ဣဒံ ဝိဿဇ္ဇနံ၊ ဧဝရူပေါ နာမ သတ္တော နတ္ထီတိ အတ္ထပဋိက္ခေပေန ပဉှံ ဝိဿဇ္ဇယမာနံ ဂတံ၊ တသ္မာ ဧဝရူပေသု ဌာနေသု ပဋိက္ခေပေန ဝိဿဇ္ဇနံ ဝေဒိတဗ္ဗံ။ ‘ယဿ ရူပက္ခန္ဓော ဥပ္ပဇ္ဇတိ၊ တဿ ဝေဒနာက္ခန္ဓော နိရုဇ္ဈတီ’တိ ပဉှေ ပန ‘နော’တိ ဣဒံ ဝိဿဇ္ဇနံ ဧကသ္မိံ ပဋိသန္ဓိက္ခဏေ ဥပ္ပာဒေန သဒ္ဓိံ နိရောဓော နာမ န လဗ္ဘတီတိ အတ္ထပဋိသေဓနေန ပဉှံ ဝိဿဇ္ဇယမာနံ ဂတံ၊ တသ္မာ ဧဝရူပေသု ဌာနေသု ပဋိသေဓေန ဝိဿဇ္ဇနံ ဝေဒိတဗ္ဗံ။

ဣဒါနိ ဣမေ စတ္တာရော ပဉှာ၊ ဣမာနိ စ ပဉ္စ ဝိဿဇ္ဇနာနိ၊ ယေသု သတ္တဝီသတိယာ ဌာနေသု ပက္ခိပိတဗ္ဗာနိ၊ တာနိ ဧဝံ ဝေဒိတဗ္ဗာနိ – အသညသတ္တံ ဥပပဇ္ဇန္တာနန္တိ ဧကံ ဌာနံ၊ အသညသတ္တေ တတ္ထာတိ ဧကံ၊ အသညသတ္တာနန္တိ ဧကံ၊ အသညသတ္တာ စဝန္တာနန္တိ ဧကံ၊ အရူပံ ဥပပဇ္ဇန္တာနန္တိ ဧကံ၊ အရူပေ တတ္ထာတိ ဧကံ၊ အရူပါနန္တိ ဧကံ၊ အရူပါ စဝန္တာနန္တိ ဧကံ ၊ အရူပေ ပစ္ဆိမဘဝိကာနန္တိ ဧကံ၊ အရူပေ ပရိနိဗ္ဗန္တာနန္တိ ဧကံ၊ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တီတိ ဧကံ၊ ပဉ္စဝေါကာရံ ဥပပဇ္ဇန္တာနန္တိ ဧကံ၊ ပဉ္စဝေါကာရေ တတ္ထာတိ ဧကံ၊ ပဉ္စဝေါကာရာနန္တိ ဧကံ ပဉ္စဝေါကာရာ စဝန္တာနန္တိ ဧကံ၊ ပဉ္စဝေါကာရေ ပစ္ဆိမဘဝိကာနန္တိ ဧကံ၊ ပဉ္စဝေါကာရေ ပရိနိဗ္ဗန္တာနန္တိ ဧကံ၊ သုဒ္ဓါဝါသံ ဥပပဇ္ဇန္တာနန္တိ ဧကံ၊ သုဒ္ဓါဝါသေ တတ္ထာတိ ဧကံ၊ သုဒ္ဓါဝါသာနန္တိ ဧကံ၊ သုဒ္ဓါဝါသေ ပရိနိဗ္ဗန္တာနန္တိ ဧကံ၊ သဗ္ဗေသံ ဥပပဇ္ဇန္တာနန္တိ ဧကံ၊ သဗ္ဗေသံ စဝန္တာနန္တိ ဧကံ၊ သဗ္ဗသာဓာရဏဝသေန ပစ္ဆိမဘဝိကာနန္တိ ဧကံ၊ ပရိနိဗ္ဗန္တာနန္တိ ဧကံ၊ စတုဝေါကာရံ ပဉ္စဝေါကာရံ ဥပပဇ္ဇန္တာနန္တိ ဧကံ၊ စဝန္တာနန္တိ ဧကံ။ ဧဝံ ဣမေသံ စတုန္နံ ပဉှာနံ ဣမာနိ ပဉ္စ ဝိဿဇ္ဇနာနိ ဣမေသု သတ္တဝီသတိယာ ဌာနေသု ပက္ခိပိတွာ ဣမသ္မိံ ပဝတ္တိမဟာဝါရေ အတ္ထဝိနိစ္ဆယော ဝေဒိတဗ္ဗော။ ဧဝံ ဝိဒိတွာ ဟိ ပဉှံ ဝိဿဇ္ဇန္တေန သုဝိဿဇ္ဇိတော ဟောတိ၊ အတ္ထဉ္စ ဝိနိစ္ဆယန္တေန သုဝိနိစ္ဆိတော ဟောတိ။

တတ္ထာယံ နယော – ယဿ ရူပက္ခန္ဓော ဥပ္ပဇ္ဇတီတိ ယဿ ပုဂ္ဂလဿ ဥပ္ပာဒက္ခဏသမင်္ဂိတာယ ရူပက္ခန္ဓော ဥပ္ပဇ္ဇတိ။ တဿ ဝေဒနာက္ခန္ဓော ဥပ္ပဇ္ဇတီတိ ဝေဒနာက္ခန္ဓောပိ တဿ တသ္မိညေဝ ခဏေ ဥပ္ပဇ္ဇတီတိ ပုစ္ဆတိ။ အသညသတ္တံ ဥပပဇ္ဇန္တာနန္တိ အစိတ္တကပဋိသန္ဓိဝသေန အသညသတ္တဘဝံ ဥပပဇ္ဇန္တာနံ။ တေသံ ရူပက္ခန္ဓော ဥပ္ပဇ္ဇတီတိ တေသံ ဧကန္တေန ရူပက္ခန္ဓော ဥပ္ပဇ္ဇတိယေဝ။ ပဝတ္တေ ဥပ္ပန္နာနံ ရူပက္ခန္ဓော ဥပ္ပဇ္ဇတိပိ နိရုဇ္ဈတိပိ၊ တသ္မာ ‘အသညသတ္တာန’န္တိ အဝတွာ’အသညသတ္တံ ဥပပဇ္ဇန္တာန’န္တိ ဝုတ္တံ။ နော စ တေသံ ဝေဒနာက္ခန္ဓော ဥပ္ပဇ္ဇတီတိ အစိတ္တကတ္တာ ပန တေသံ ဝေဒနာက္ခန္ဓော နုပ္ပဇ္ဇတေဝ။ ဣဒံ သတ္တဝီသတိယာ ဌာနေသု ပဌမေ ဌာနေ ပရိပုဏ္ဏပဉှဿ ပုရိမကောဋ္ဌာသေ သရူပဒဿနေန ဝိဿဇ္ဇနံ။ ပဉ္စဝေါကာရံ ဥပပဇ္ဇန္တာနန္တိ ရူပါရူပမိဿကပဋိသန္ဓိဝသေန ပဉ္စဝေါကာရဘဝံ ဥပပဇ္ဇန္တာနံ။ တေသံ ရူပက္ခန္ဓော စ ဥပ္ပဇ္ဇတိ၊ ဝေဒနာက္ခန္ဓော စာတိ တေသံ ဧကန္တေန ရူပဝေဒနာက္ခန္ဓသင်္ခါတာ ဒွေပိ ခန္ဓာ ဥပ္ပဇ္ဇန္တိယေဝ။ ပဝတ္တေ ပန တတ္ထ ဥပ္ပန္နာနံ တေ ခန္ဓာ ဥပ္ပဇ္ဇန္တိပိ နိရုဇ္ဈန္တိပိ၊ တသ္မာ ‘ပဉ္စဝေါကာရာန’န္တိ အဝတွာ ‘ပဉ္စဝေါကာရံ ဥပပဇ္ဇန္တာန’န္တိ ဝုတ္တံ။ ဣဒံ ပဉ္စဝေါကာရံ ဥပပဇ္ဇန္တာနန္တိ ဌာနေ ပရိပုဏ္ဏပဉှဿ ပစ္ဆိမကောဋ္ဌာသေ သရူပဒဿနေန ဝိဿဇ္ဇနံ။ ဣမိနာ ဥပါယေန သဗ္ဗာနိ ဝိဿဇ္ဇနာနိ ဝေဒိတဗ္ဗာနိ။

ဣဒံ ပနေတ္ထ ဥပ္ပာဒနိရောဓေသု နိယမလက္ခဏံ – သကလေပိ ဟိ ဣမသ္မိံ ခန္ဓယမကေ တတ္ထ တတ္ထ ဥပ္ပန္နာနံ ပဝတ္တေ ယာဝ မရဏာ ခန္ဓာနံ အပရိယန္တေသု ဥပ္ပာဒနိရောဓေသု ဝိဇ္ဇမာနေသုပိ လဟုပရိဝတ္တာနံ ဓမ္မာနံ ဝိနိဗ္ဘောဂံ ကတွာ ဥပ္ပာဒနိရောဓေ ဒဿေတုံ န သုကရန္တိ ပဝတ္တိယံ ဥပ္ပာဒနိရောဓေ အနာမသိတွာ အဘိနဝံ ဝိပါကဝဋ္ဋံ နိပ္ဖာဒယမာနေန နာနာကမ္မေန နိဗ္ဗတ္တာနံ ပဋိသန္ဓိခန္ဓာနံ ဥပ္ပာဒံ ဒဿေတုံ သုခန္တိ ပဋိသန္ဓိကာလေ ဥပ္ပာဒဝသေနေဝ ဥပ္ပာဒဝါရော ကထိတော။ ဥပ္ပန္နဿ ပန ဝိပါကဝဋ္ဋဿ ပရိယောသာနေန နိရောဓံ ဒဿေတုံ သုခန္တိ မရဏကာလေ နိရောဓဝသေန နိရောဓဝါရော ကထိတော။

ကိံ ပနေတ္ထ ပဝတ္တိယံ ဥပ္ပာဒနိရောဓာနံ အနာမဋ္ဌဘာဝေ ပမာဏန္တိ? ပါဠိယေဝ။ ပါဠိယဉှိ ဝိသေသေန ဥပ္ပာဒဝါရဿ အနာဂတကာလဝါရေ ‘ပစ္ဆိမဘဝိကာနံ တေသံ ရူပက္ခန္ဓော စ နုပ္ပဇ္ဇိဿတိ၊ ဝေဒနာက္ခန္ဓော စ နုပ္ပဇ္ဇိဿတီ’တိ အယံ ပါဠိ အတိပမာဏမေဝ။ ပစ္ဆိမဘဝိကာနဉှိ ပဝတ္တေ ရူပါရူပဓမ္မာနံ ဥပ္ပဇ္ဇိတုံ ယုတ္တဘာဝေ သတိပိ ‘ရူပက္ခန္ဓော စ နုပ္ပဇ္ဇိဿတိ၊ ဝေဒနာက္ခန္ဓော စ နုပ္ပဇ္ဇိဿတီ’တိ သန္နိဋ္ဌာနံ ကတွာ ဝုတ္တဘာဝေန ပဝတ္တေ ဥပ္ပာဒေါ န ဂဟိတောတိ ဝေဒိတဗ္ဗော။ ‘သုဒ္ဓါဝါသေ ပရိနိဗ္ဗန္တာနံ တေသံ တတ္ထ သညာက္ခန္ဓော န နိရုဇ္ဈိတ္ထ၊ နော စ တေသံ တတ္ထ ဝေဒနာက္ခန္ဓော န နိရုဇ္ဈတီ’တိ အယံ ပန ပါဠိ ပဝတ္တေ နိရောဓဿ အနာမဋ္ဌဘာဝေ အတိဝိယ ပမာဏံ။ သုဒ္ဓါဝါသေ ပရိနိဗ္ဗန္တာနဉှိ စုတိစိတ္တဿ ဘင်္ဂက္ခဏေ ဌိတာနံ ပဋိသန္ဓိတော ပဋ္ဌာယ ပဝတ္တေ ဥပ္ပဇ္ဇိတွာ နိရုဒ္ဓသညာက္ခန္ဓာနံ ဂဏနပထော နတ္ထိ။ ‘ဧဝံ သန္တေပိ တေသံ တတ္ထ သညာက္ခန္ဓော န နိရုဇ္ဈိတ္ထာ’တိ သန္နိဋ္ဌာနံ ကတွာ ဝုတ္တဘာဝေန ပဝတ္တေ နိရောဓော န ဂဟိတောတိ ဝေဒိတဗ္ဗော။

ဧဝမေတ္ထ ဥပ္ပာဒနိရောဓေသု နိယမလက္ခဏံ ဝိဒိတွာ ပဋိသန္ဓိဥပ္ပာဒမေဝ စုတိနိရောဓမေဝ စ ဂဟေတွာ တေသု တေသု ဌာနေသု အာဂတာနံ ဝိဿဇ္ဇနာနံ အတ္ထဝိနိစ္ဆယော ဝေဒိတဗ္ဗော။ သော ပန သက္ကာ အာဒိဝိဿဇ္ဇနေ ဝုတ္တနယေန သဗ္ဗတ္ထ ဝိဒိတုန္တိ ဝိဿဇ္ဇနပဋိပါဋိယာ န ဝိတ္ထာရိတော။ ဣမိနာ ပန ဧဝံ ဒိန္နေနပိ နယေန ယော ဧတေသံ အတ္ထဝိနိစ္ဆယံ ဇာနိတုံ န သက္ကောတိ၊ တေန အာစရိယေ ပယိရုပါသိတွာ သာဓုကံ သုတွာပိ ဇာနိတဗ္ဗော။

ဥပ္ပာဒဿ နိရောဓဿ၊ ဥပ္ပန္နဉ္စာပိ ဧကတော၊

နယဿ အနုလောမဿ၊ ပဋိလောမနယဿ စ။

ဝသေန ယာနိ ခန္ဓေသု၊ ယမကာနိ စ ပဉ္စသု၊

ပုဂ္ဂလံ အထ ဩကာသံ၊ ပုဂ္ဂလောကာသမေဝ စ။

အာမသိတွာ ပဝတ္တေသု၊ ဌာနေသု ကထယီ ဇိနော၊

တေသံ ပါဠိဝဝတ္ထာနံ၊ ဒဿိတံ အနုပုဗ္ဗတော။

ဝိနိစ္ဆယတ္ထံ အတ္ထဿ၊ ပဉှာဝိဿဇ္ဇနာနိ စ၊

ဝိဿဇ္ဇနာနံ ဌာနာနိ၊ ယာနိ တာနိ စ သဗ္ဗသော။

ဒဿေတွာ ဧကပဉှသ္မိံ၊ ယောဇနာပိ ပကာသိတာ၊

ဝိတ္ထာရေန ဂတေ ဧတ္ထ၊ ပဉှာဝိဿဇ္ဇနက္ကမေ။

အတ္ထံ ဝဏ္ဏယတာ ကာတုံ၊ ကိံ နု သက္ကာ ဣတော ပရံ၊

နယေန ဣမိနာ တသ္မာ၊ အတ္ထံ ဇာနန္တု ပဏ္ဍိတာတိ။

ပဝတ္တိမဟာဝါရဝဏ္ဏနာ။

၃။ ပရိညာဝါရဝဏ္ဏနာ

၂၀၆-၂၀၈။ တဒနန္တရေ ပရိညာဝါရေပိ ဆဠေဝ ကာလဘေဒါ။ အနုလောမပဋိလောမတော ဒွေယေဝ နယာ။ ပုဂ္ဂလဝါရော၊ ဩကာသဝါရော၊ ပုဂ္ဂလောကာသဝါရောတိ ဣမေသု ပန တီသု ပုဂ္ဂလဝါရောဝ လဗ္ဘတိ၊ န ဣတရေ ဒွေ။ ကိံ ကာရဏာ? သဒိသဝိဿဇ္ဇနတာယ။ ယော ဟိ ကောစိ ပုဂ္ဂလော ယတ္ထ ကတ္ထစိ ဌာနေ ရူပက္ခန္ဓံ စေ ပရိဇာနာတိ၊ ဝေဒနာက္ခန္ဓမ္ပိ ပရိဇာနာတိယေဝ။ ဝေဒနာက္ခန္ဓံ စေ ပရိဇာနာတိ၊ ရူပက္ခန္ဓမ္ပိ ပရိဇာနာတိယေဝ။ ရူပက္ခန္ဓံ စေ န ပရိဇာနာတိ၊ ဝေဒနာက္ခန္ဓမ္ပိ န ပရိဇာနာတိယေဝ။ ဝေဒနာက္ခန္ဓံ စေ န ပရိဇာနာတိ၊ ရူပက္ခန္ဓမ္ပိ န ပရိဇာနာတိယေဝ။ တသ္မာ တေသုပိ ‘ယတ္ထ ရူပက္ခန္ဓံ ပရိဇာနာတိ၊ တတ္ထ ဝေဒနာက္ခန္ဓံ ပရိဇာနာတီ’တိ အာဒိဝသေန ပုစ္ဆံ ကတွာ ‘အာမန္တာ’တွေဝ ဝိဿဇ္ဇနံ ကာတဗ္ဗံ ။ သိယာတိ သဒိသဝိဿဇ္ဇနတာယ တေ ဣဓ န လဗ္ဘန္တီတိ ဝေဒိတဗ္ဗာ။

အထ ဝါ ပရိညာကိစ္စံ နာမ ပုဂ္ဂလဿေဝ ဟောတိ၊ နော ဩကာသဿ၊ ပုဂ္ဂလောဝ ပရိဇာနိတုံ သမတ္ထော၊ နော ဩကာသောတိ ပုဂ္ဂလဝါရောဝေတ္ထ ဂဟိတော၊ န ဩကာသဝါရော။ တဿ ပန အဂ္ဂဟိတတ္တာ တဒနန္တရော ပုဂ္ဂလောကာသဝါရော လဗ္ဘမာနောပိ န ဂဟိတော။ ယော ပနေသ ပုဂ္ဂလဝါရော ဂဟိတော၊ တတ္ထ ပစ္စုပ္ပန္နကာလေ ရူပက္ခန္ဓမူလကာနိ စတ္တာရိ၊ ဝေဒနာက္ခန္ဓမူလကာနိ တီဏိ၊ သညာက္ခန္ဓမူလကာနိ ဒွေ၊ သင်္ခါရက္ခန္ဓမူလကံ ဧကန္တိ ဟေဋ္ဌာ ဝုတ္တနယေနေဝ အနုလောမနယေ အဂ္ဂဟိတဂ္ဂဟဏေန ဒသ ယမကာနိ။ ပဋိလောမနယေ ဒသာတိ ဝီသတိ။ တထာ သေသေသုပီတိ ဧကေကသ္မိံ ကာလေ ဝီသတိ ဝီသတိ ကတွာ ဆသု ကာလေသု ဝီသံ ယမကသတံ၊ စတ္တာရီသာနိ ဒွေ ပုစ္ဆာသတာနိ၊ အသီတျာဓိကာနိ စတ္တာရိ အတ္ထသတာနိ စ ဟောန္တီတိ ဣဒမေတ္ထ ပါဠိဝဝတ္ထာနံ။

အတ္ထဝိနိစ္ဆယေ ပနေတ္ထ အတီတာနာဂတပစ္စုပ္ပန္နသင်္ခါတာ တယော အဒ္ဓါ ပဝတ္တိဝါရေ ဝိယ စုတိပဋိသန္ဓိဝသေန န လဗ္ဘန္တိ။ ပဝတ္တေ စိတ္တက္ခဏဝသေနေဝ လဗ္ဘန္တိ။ တေနေဝေတ္ထ ‘ယော ရူပက္ခန္ဓံ ပရိဇာနာတိ၊ သော ဝေဒနာက္ခန္ဓံ ပရိဇာနာတီ’တိအာဒီသု ပုစ္ဆာသု ‘အာမန္တာ’တိ ဝိဿဇ္ဇနံ ကတံ။ လောကုတ္တရမဂ္ဂက္ခဏသ္မိဉှိ နိဗ္ဗာနာရမ္မဏေန စိတ္တေန ပဉ္စသု ခန္ဓေသု ပရိညာကိစ္စနိဗ္ဗတ္တိယာ ယံ ကိဉ္စိ ဧကံ ခန္ဓံ ပရိဇာနန္တော ဣတရမ္ပိ ပရိဇာနာတီတိ ဝုစ္စတိ။ ဧဝမေတ္ထ ‘ပရိဇာနာတီ’တိ ပဉှေသု အနုလောမနယေ ပရိညာကိစ္စဿ မတ္ထကပ္ပတ္တံ အဂ္ဂမဂ္ဂသမင်္ဂိံ သန္ဓာယ ‘အာမန္တာ’တိ ဝုတ္တန္တိ ဝေဒိတဗ္ဗံ။ ပဋိလောမနယေ ပန ‘န ပရိဇာနာတီ’တိ ပဉှေသု ပုထုဇ္ဇနာဒယော သန္ဓာယ ‘အာမန္တာ’တိ ဝုတ္တံ။ ‘ပရိဇာနိတ္ထာ’တိ ဣမသ္မိံ ပန အတီတကာလဝါရေ မဂ္ဂါနန္တရအဂ္ဂဖလေ ဌိတောပိ ပရိညာကိစ္စဿ နိဋ္ဌိတတ္တာ ပရိဇာနိတ္ထယေဝ နာမ။

၂၀၉။ ယော ရူပက္ခန္ဓံ ပရိဇာနာတိ၊ သော ဝေဒနာက္ခန္ဓံ ပရိဇာနိတ္ထာတိ ပဉှေန အဂ္ဂမဂ္ဂသမင်္ဂိံ ပုစ္ဆတိ။ ယသ္မာ ပနေသ ခန္ဓပဉ္စကံ ပရိဇာနာတိယေဝ နာမ၊ န တာဝ နိဋ္ဌိတပရိညာကိစ္စော၊ တသ္မာ ‘နော’တိ ပဋိသေဓော ကတော။ ဒုတိယပဉှေ ပန ပရိဇာနိတ္ထာတိ အရဟန္တံ ပုစ္ဆတိ။ ယသ္မာ ပနေသော နိဋ္ဌိတပရိညာကိစ္စော။ နတ္ထိ တဿ ပရိညေယျံ နာမ၊ တသ္မာ ‘နော’တိ ပဋိသေဓော ကတော။ ပဋိလောမနယဝိဿဇ္ဇနေ ပနေတ္ထ အရဟာ ရူပက္ခန္ဓံ န ပရိဇာနာတီတိ အရဟတော ပရိညာယ အဘာဝေန ဝုတ္တံ။ အဂ္ဂမဂ္ဂသမင်္ဂီ ဝေဒနာက္ခန္ဓံ န ပရိဇာနိတ္ထာတိ အရဟတ္တမဂ္ဂဋ္ဌဿ အနိဋ္ဌိတပရိညာကိစ္စတာယ ဝုတ္တံ။ န ကေဝလဉ္စ ဝေဒနာက္ခန္ဓမေဝ၊ ဧကဓမ္မမ္ပိ သော န ပရိဇာနိတ္ထေဝ။ ဣဒံ ပန ပုစ္ဆာဝသေန ဝုတ္တံ။ နော စ ရူပက္ခန္ဓန္တိ ဣဒမ္ပိ ပုစ္ဆာဝသေနေဝ ဝုတ္တံ။ အညမ္ပိ ပန သော ခန္ဓံ ပရိဇာနာတိ။

၂၁၀-၂၁၁။ ယော ရူပက္ခန္ဓံ ပရိဇာနာတိ၊ သော ဝေဒနာက္ခန္ဓံ ပရိဇာနိဿတီတိ ဧတ္ထ ယသ္မာ မဂ္ဂဋ္ဌပုဂ္ဂလော ဧကစိတ္တက္ခဏိကော၊ တသ္မာ သော ပရိဇာနိဿတီတိ သင်္ခံ န ဂစ္ဆတိ။ တေန ဝုတ္တံ ‘နော’တိ။ တေ ရူပက္ခန္ဓဉ္စ နပရိဇာနိတ္ထာတိ ပုစ္ဆာသဘာဂေန ဝုတ္တံ၊ န ပရိဇာနိံသူတိ ပနေတ္ထ အတ္ထော။ ဣမိနာ ဥပါယေန သဗ္ဗတ္ထ အတ္ထဝိနိစ္ဆယော ဝေဒိတဗ္ဗောတိ။

ပရိညာဝါရဝဏ္ဏနာ။

ခန္ဓယမကဝဏ္ဏနာ နိဋ္ဌိတာ။