📜

၃။ အာယတနယမကံ

၁။ ပဏ္ဏတ္တိဥဒ္ဒေသဝါရဝဏ္ဏနာ

၁-၉။ ဣဒါနိ မူလယမကေ ဒေသိတေယေဝ ကုသလာဒိဓမ္မေ အာယတနဝသေနာပိ သင်္ဂဏှိတွာ ခန္ဓယမကာနန္တရံ ဒေသိတဿ အာယတနယမကဿ ဝဏ္ဏနာ ဟောတိ။ တတ္ထ ခန္ဓယမကေ ဝုတ္တနယေနေဝ ပါဠိဝဝတ္ထာနံ ဝေဒိတဗ္ဗံ။ ယထေဝ ဟိ တတ္ထ ပဏ္ဏတ္တိဝါရော၊ ပဝတ္တိဝါရော၊ ပရိညာဝါရောတိ တယော မဟာဝါရာ ဟောန္တိ၊ တထာ ဣဓာပိ။ ဝစနတ္ထောပိ နေသံ တတ္ထ ဝုတ္တနယေနေဝ ဝေဒိတဗ္ဗော။ ဣဓာပိ စ ပဏ္ဏတ္တိဝါရော ဥဒ္ဒေသနိဒ္ဒေသဝသေန ဒွိဓာ ဝဝတ္ထိတော။ ဣတရေ နိဒ္ဒေသဝသေနေဝ။ ‘တတ္ထ ဒွါဒသာယတနာနီ’တိ ပဒံ အာဒိံ ကတွာ ယာဝ နာယတနာ န မနောတိ၊ တာဝ ပဏ္ဏတ္တိဝါရဿ ဥဒ္ဒေသဝါရော ဝေဒိတဗ္ဗော။ တတ္ထ ဒွါဒသာယတနာနီတိ အယံ ယမကဝသေန ပုစ္ဆိတဗ္ဗာနံ အာယတနာနံ ဥဒ္ဒေသော။ စက္ခာယတနံ…ပေ… ဓမ္မာယတနန္တိ တေသညေဝ ပဘေဒတော နာမဝဝတ္ထာနံ။ ယမကဝသေန ပုစ္ဆာသုခတ္ထဉ္စေတ္ထ ပဌမံ ပဋိပါဋိယာ အဇ္ဈတ္တရူပါယတနာနိ ဝုတ္တာနိ။ ပစ္ဆာ ဗာဟိရရူပါယတနာနိ။ ပရိယောသာနေ မနာယတနဓမ္မာယတနာနိ။

ယထာ ပန ဟေဋ္ဌာ ခန္ဓဝသေန၊ ဧဝမိဓ ဣမေသံ အာယတနာနံ ဝသေန ပဒသောဓနဝါရော၊ ပဒသောဓနမူလစက္ကဝါရော၊ သုဒ္ဓါယတနဝါရော၊ သုဒ္ဓါယတနမူလစက္ကဝါရောတိ၊ စတ္တာရောဝ နယဝါရာ ဟောန္တိ။ ဧကေကော စေတ္ထ အနုလောမပဋိလောမဝသေန ဒုဝိဓောယေဝ။ တေသမတ္ထော တတ္ထ ဝုတ္တနယေနေဝ ဝေဒိတဗ္ဗော။ ယထာ ပန ခန္ဓယမကေ ပဒသောဓနဝါရဿ အနုလောမဝါရေ ‘ရူပံ ရူပက္ခန္ဓော၊ ရူပက္ခန္ဓော ရူပ’န္တိအာဒီနိ ပဉ္စ ယမကာနိ၊ တထာ ဣဓ ‘စက္ခု၊ စက္ခာယတနံ၊ စက္ခာယတနံ၊ စက္ခူ’တိအာဒီနိ ဒွါဒသ။ ပဋိလောမဝါရေပိ ‘န စက္ခု၊ န စက္ခာယတနံ၊ န စက္ခာယတနံ၊ န စက္ခူ’တိအာဒီနိ ဒွါဒသ ၊ ပဒသောဓနမူလစက္ကဝါရဿ ပနေတ္ထ အနုလောမဝါရေ ဧကေကာယတနမူလကာနိ ဧကာဒသ ဧကာဒသ ကတွာ ဒွတ္တိံသသတံ ယမကာနိ။ ပဋိလောမဝါရေပိ ဒွတ္တိံသသတမေဝ။ သုဒ္ဓါယတနဝါရဿာပိ အနုလောမဝါရေ ဒွါဒသ၊ ပဋိလောမဝါရေ ဒွါဒသ၊ သုဒ္ဓါယတနမူလစက္ကဝါရဿာပိ အနုလောမဝါရေ ဧကေကာယတနမူလကာနိ ဧကာဒသ ဧကာဒသ ကတွာ ဒွတ္တိံသသတံ ယမကာနိ။ ပဋိလောမဝါရေပိ ဒွတ္တိံသသတမေဝါတိ ဧဝမိဓ ဆသတ္တတာဓိကေဟိ ပဉ္စဟိ ယမကသတေဟိ၊ ဒွိပညာသာဓိကေဟိ ဧကာဒသဟိ ပုစ္ဆာသတေဟိ၊ စတုရာဓိကေဟိ တေဝီသာယ အတ္ထသတေဟိ စ ပဋိမဏ္ဍိတော ပဏ္ဏတ္တိဝါရဿ ဥဒ္ဒေသဝါရော ဝေဒိတဗ္ဗော။

ပဏ္ဏတ္တိဥဒ္ဒေသဝါရဝဏ္ဏနာ။

၁။ ပဏ္ဏတ္တိနိဒ္ဒေသဝါရဝဏ္ဏနာ

၁၀-၁၇။ နိဒ္ဒေသဝါရေ ပန ဟေဋ္ဌာ ခန္ဓယမကဿ ပဏ္ဏတ္တိဝါရနိဒ္ဒေသေ ဝုတ္တနယေနေဝ အတ္ထော ဝေဒိတဗ္ဗော။ အညတြ ဝိသေသာ။ တတြာယံ ဝိသေသော – ဒိဗ္ဗစက္ခူတိ ဒုတိယဝိဇ္ဇာဉာဏံ။ ပညာစက္ခူတိ တတိယဝိဇ္ဇာဉာဏံ။ ဒိဗ္ဗသောတန္တိ ဒုတိယအဘိညာဉာဏံ။ တဏှာသောတန္တိ တဏှာဝ။ အဝသေသော ကာယောတိ နာမကာယော၊ ရူပကာယော၊ ဟတ္ထိကာယော၊ အဿကာယောတိ ဧဝမာဒိ။ အဝသေသံ ရူပန္တိ ရူပါယတနတော သေသံ ဘူတုပါဒါယရူပဉ္စေဝ ပိယရူပသာတရူပဉ္စ။ သီလဂန္ဓောတိအာဒီနိ ဝါယနဋ္ဌေန သီလာဒီနံယေဝ နာမာနိ။ အတ္ထရသောတိအာဒီနိပိ သာဓုမဓုရဋ္ဌေန အတ္ထာဒီနညေဝ နာမာနိ။ အဝသေသော ဓမ္မောတိ ပရိယတ္တိဓမ္မာဒိအနေကပ္ပဘေဒေါတိ အယမေတ္ထ ဝိသေသော။

ပဏ္ဏတ္တိနိဒ္ဒေသဝါရဝဏ္ဏနာ။

၂။ ပဝတ္တိဝါရဝဏ္ဏနာ

၁၈-၂၁။ ဣဓာပိ စ ပဝတ္တိဝါရဿ ဥပ္ပာဒဝါရာဒီသု တီသု အန္တရဝါရေသု ဧကေကသ္မိံ ဆဠေဝ ကာလဘေဒါ။ တေသံ ဧကေကသ္မိံ ကာလေ ပုဂ္ဂလဝါရာဒယော တယော ဝါရာ။ တေ သဗ္ဗေပိ အနုလောမပဋိလောမနယဝသေန ဒုဝိဓာဝ ဟောန္တိ။ တတ္ထ ပစ္စုပ္ပန္နကာလေ ပုဂ္ဂလဝါရဿ အနုလောမနယေ ယထာ ခန္ဓယမကေ ရူပက္ခန္ဓမူလကာနိ စတ္တာရိ၊ ဝေဒနာက္ခန္ဓမူလကာနိ တီဏိ၊ သညာက္ခန္ဓမူလကာနိ ဒွေ၊ သင်္ခါရက္ခန္ဓမူလကံ ဧကန္တိ အဂ္ဂဟိတဂ္ဂဟဏေန ဒသ ယမကာနိ ဟောန္တိ။ ဧဝံ ‘‘ယဿ စက္ခာယတနံ ဥပ္ပဇ္ဇတိ၊ တဿ သောတာယတနံ ဥပ္ပဇ္ဇတိ၊ ယဿ ဝါ ပန သောတာယတနံ ဥပ္ပဇ္ဇတိ၊ တဿ စက္ခာယတနံ ဥပ္ပဇ္ဇတိ၊ ယဿ စက္ခာယတနံ ဥပ္ပဇ္ဇတိ၊ တဿ ဃာဏာယတနံ၊ ဇိဝှာယတနံ၊ ကာယာယတနံ၊ ရူပါယတနံ၊ သဒ္ဒါယတနံ၊ ဂန္ဓာယတနံ၊ ရသာယတနံ၊ ဖောဋ္ဌဗ္ဗာယတနံ၊ မနာယတနံ၊ ဓမ္မာယတနံ၊ ဥပ္ပဇ္ဇတိ၊ ယဿ ဝါ ပန ဓမ္မာယတနံ ဥပ္ပဇ္ဇတိ၊ တဿ စက္ခာယတနံ ဥပ္ပဇ္ဇတီ’’တိ ဧဝံ စက္ခာယတနမူလကာနိ ဧကာဒသ။ ‘‘ယဿ သောတာယတနံ ဥပ္ပဇ္ဇတိ၊ တဿ ဃာနာယတနံ ဥပ္ပဇ္ဇတီ’’တိအာဒိနာ နယေန သောတာယတနမူလကာနိ ဒသ၊ ဃာနာယတနမူလကာနိ နဝ၊ ဇိဝှာယတနမူလကာနိ အဋ္ဌ၊ ကာယာယတနမူလကာနိ သတ္တ၊ ရူပါယတနမူလကာနိ ဆ၊ သဒ္ဒါယတနမူလကာနိ ပဉ္စ၊ ဂန္ဓာယတနမူလကာနိ စတ္တာရိ၊ ရသာယတနမူလကာနိ တီဏိ၊ ဖောဋ္ဌဗ္ဗာယတနမူလကာနိ ဒွေ၊ မနာယတနမူလကံ ဧကန္တိ အဂ္ဂဟိတဂ္ဂဟဏေန ဆသဋ္ဌိ ယမကာနိ ဟောန္တိ။

တတ္ထ စက္ခာယတနမူလကေသု ဧကာဒသသု ‘‘ယဿ စက္ခာယတနံ ဥပ္ပဇ္ဇတိ၊ တဿ သောတာယတနံ၊ ဃာနာယတနံ၊ ရူပါယတနံ၊ မနာယတနံ၊ ဓမ္မာယတနံ ဥပ္ပဇ္ဇတီ’’တိ ဣမာနိ ပဉ္စေဝ ဝိဿဇ္ဇိတာနိ။ တေသု ပဌမံ ဝိဿဇ္ဇေတဗ္ဗံ တာဝ ဝိဿဇ္ဇိတံ။ ဒုတိယံ ကိဉ္စာပိ ပဌမေန သဒိသဝိဿဇ္ဇနံ၊ စက္ခုသောတာယတနာနံ ပဝတ္တိဋ္ဌာနေ ပန ဃာနာယတနဿ န ဧကန္တေန ပဝတ္တိတော ‘‘ကထံ နု ခေါ ဧတံ ဝိဿဇ္ဇေတဗ္ဗ’’န္တိ ဝိမတိနိဝါရဏတ္ထံ ဝိဿဇ္ဇိတံ။ ရူပါယတနမနာယတနဓမ္မာယတနေဟိ သဒ္ဓိံ တီဏိ ယမကာနိ အသဒိသဝိဿဇ္ဇနတ္တာ ဝိဿဇ္ဇိတာနိ။ သေသေသု ဇိဝှာယတနကာယာယတနေဟိ တာဝ သဒ္ဓိံ ဒွေ ယမကာနိ ပုရိမေဟိ ဒွီဟိ သဒ္ဓိံ သဒိသဝိဿဇ္ဇနာနိ။ သဒ္ဒါယတနဿ ပဋိသန္ဓိက္ခဏေ အနုပ္ပတ္တိတော တေန သဒ္ဓိံ ယမကဿ ဝိဿဇ္ဇနမေဝ နတ္ထိ။ ဂန္ဓရသဖောဋ္ဌဗ္ဗာယတနေဟိပိ သဒ္ဓိံ တီဏိ ယမကာနိ ပုရိမေဟိ ဒွီဟိ သဒိသဝိဿဇ္ဇနာနေဝ ဟောန္တီတိ တန္တိယာ လဟုဘာဝတ္ထံ သင်္ခိတ္တာနိ။ သောတာယတနမူလကေသု ယံ လဗ္ဘတိ ၊ တံ ပုရိမေဟိ သဒိသဝိဿဇ္ဇနမေဝါတိ ဧကမ္ပိ ပါဠိံ နာရုဠှံ။ ဃာနာယတနမူလကေသု ရူပါယတနေန သဒ္ဓိံ ဧကံ၊ မနာယတနဓမ္မာယတနေဟိ သဒ္ဓိံ ဒွေတိ တီဏိ ယမကာနိ ပါဠိံ အာရုဠှာနိ။ သေသာနိ ဃာနာယတနယမကေန သဒိသဝိဿဇ္ဇနတ္တာ နာရုဠှာနိ။ တထာ ဇိဝှာယတနကာယာယတနမူလကာနိ။ ရူပါယတနမူလကေသု မနာယတနဓမ္မာယတနေဟိ သဒ္ဓိံ ဒွေယေဝ ဝိဿဇ္ဇိတာနိ။ ဂန္ဓရသဖောဋ္ဌဗ္ဗေဟိ ပန သဒ္ဓိံ တီဏိ ရူပါယတနမနာယတနေဟိ သဒ္ဓိံ သဒိသဝိဿဇ္ဇနာနိ။ ယထေဝ ဟေတ္ထ ‘‘သရူပကာနံ အစိတ္တကာန’’န္တိအာဒိ ဝုတ္တံ၊ တထာ ဣဓာပိ ‘‘သရူပကာနံ အဂန္ဓကာနံ၊ အရသကာနံ အဖောဋ္ဌဗ္ဗကာန’’န္တိ ယောဇနာ ဝေဒိတဗ္ဗာ။ ဂန္ဓာဒီနိ စေတ္ထ အာယတနဘူတာနေဝ အဓိပ္ပေတာနိ။ တသ္မာ ‘‘သရူပကာနံ သဂန္ဓာယတနာန’’န္တိ အာယတနဝသေနေတ္ထ အတ္ထော ဒဋ္ဌဗ္ဗော။

သဒ္ဒါယတနမူလကာနိ အတ္ထာဘာဝတော ပါဠိံ နာရုဠှာနေဝ။ ဂန္ဓရသဖောဋ္ဌဗ္ဗမူလကာနိ စတ္တာရိ တီဏိ ဒွေ စ ဟေဋ္ဌိမေဟိ သဒိသဝိဿဇ္ဇနတ္တာ ပါဠိံ နာရုဠှာနိ။ မနာယတနမူလကံ ဝိဿဇ္ဇိတမေဝါတိ ဧဝမေတာနိ ပစ္စုပ္ပန္နကာလေ ပုဂ္ဂလဝါရဿ အနုလောမနယေ ကတိပယယမကဝိဿဇ္ဇနေနေဝ ဆသဋ္ဌိယမကာနိ ဝိဿဇ္ဇိတာနိ နာမ ဟောန္တီတိ ဝေဒိတဗ္ဗာနိ။ ယထာ စ ပုဂ္ဂလဝါရေ၊ ဧဝံ ဩကာသဝါရေပိ ပုဂ္ဂလောကာသဝါရေပိ ဆသဋ္ဌီတိ ပစ္စုပ္ပန္နကာလေ တီသု ဝါရေသု အနုလောမနယေ အဋ္ဌနဝုတိသတံ ယမကာနိ ဟောန္တိ။ ယထာ စ အနုလောမနယေ၊ ဧဝံ ပဋိလောမနယေပီတိ သဗ္ဗာနိပိ ပစ္စုပ္ပန္နကာလေ ဆန္နဝုတာဓိကာနိ တီဏိ ယမကသတာနိ ဟောန္တိ။ တေသု ဒွါနဝုတာဓိကာနိ သတ္တ ပုစ္ဆာသတာနိ၊ စတုရာသီတာဓိကာနိ စ ပန္နရသ အတ္ထသတာနိ ဟောန္တီတိ ဝေဒိတဗ္ဗာနိ။ ဧဝံ သေသေသုပိ ပဉ္စသု ကာလဘေဒေသူတိ သဗ္ဗာနိပိ ဆသတ္တတာဓိကာနိ တေဝီသတိ ယမကသတာနိ။ တတော ဒိဂုဏာ ပုစ္ဆာ၊ တတော ဒိဂုဏာ အတ္ထာတိ ဣဒမေတ္ထ ဥပ္ပာဒဝါရေ ပါဠိဝဝတ္ထာနံ။ နိရောဓဝါရဥပ္ပာဒနိရောဓဝါရေသုပိ ဧသေဝ နယောတိ။ သဗ္ဗသ္မိမ္ပိ ပဝတ္တိဝါရေ အဋ္ဌဝီသာနိ ဧကသတ္တတိ ယမကသတာနိ။ တတော ဒိဂုဏာ ပုစ္ဆာ၊ တတော ဒိဂုဏာ အတ္ထာ ဝေဒိတဗ္ဗာ။ ပါဠိ ပန မနာယတနံ ဓမ္မာယတနဉ္စ ဧကသဒိသံ၊ နာနံ နတ္ထိ။ ဥပရိ ပန ‘‘ဝါရသင်္ခေပေါ ဟောတီ’’တိအာဒီနိ ဝတွာ တတ္ထ တတ္ထ သင်္ခိတ္တာ။ တသ္မာ ယံ တတ္ထ တတ္ထ သင်္ခိတ္တံ၊ တံ သဗ္ဗံ အသမ္မုယှန္တေဟိ သလ္လက္ခေတဗ္ဗံ။

အတ္ထဝိနိစ္ဆယေ ပနေတ္ထ ဣဒံ နယမုခံ။ သစက္ခုကာနံ အသောတကာနန္တိ အပါယေ ဇာတိဗဓိရဩပပါတိကံ သန္ဓာယ ဝုတ္တံ။ သော ဟိ သစက္ခုကော အသောတကော ဟုတွာ ဥပပဇ္ဇတိ။ ယထာဟ – ‘‘ကာမဓာတုယာ ဥပပတ္တိက္ခဏေ ကဿစိ အပရာနိ ဒသာယတနာနိ ပါတုဘဝန္တိ။ ဩပပါတိကာနံ ပေတာနံ ၊ ဩပပါတိကာနံ အသုရာနံ၊ ဩပပါတိကာနံ တိရစ္ဆာနဂတာနံ၊ ဩပပါတိကာနံ နေရယိကာနံ၊ ဇစ္စဗဓိရာနံ ဥပပတ္တိက္ခဏေ ဒသာယတနာနိ ပါတုဘဝန္တိ၊ စက္ခာယတနံ ရူပဃာနဂန္ဓဇိဝှာရသကာယဖောဋ္ဌဗ္ဗာယတနံ မနာယတနံ ဓမ္မာယတန’’န္တိ။ သစက္ခုကာနံ သသောတကာနန္တိ သုဂတိဒုဂ္ဂတီသု ပရိပုဏ္ဏာယတနေ စ ဩပပါတိကေ ရူပီဗြဟ္မာနော စ သန္ဓာယ ဝုတ္တံ။ တေ ဟိ သစက္ခုကာ သသောတကာ ဟုတွာ ဥပပဇ္ဇန္တိ။ ယထာဟ – ‘‘ကာမဓာတုယာ ဥပပတ္တိက္ခဏေ ကဿစိ ဧကာဒသာယတနာနိ ပါတုဘဝန္တိ၊ ကာမာဝစရာနံ ဒေဝါနံ၊ ပဌမကပ္ပိကာနံ မနုဿာနံ၊ ဩပပါတိကာနံ ပေတာနံ၊ ဩပပါတိကာနံ အသုရာနံ၊ ဩပပါတိကာနံ တိရစ္ဆာနဂတာနံ၊ ဩပပါတိကာနံ နေရယိကာနံ၊ ပရိပုဏ္ဏာယတနာနံ။ ရူပဓာတုယာ ဥပပတ္တိက္ခဏေ ပဉ္စာယတနာနိ ပါတုဘဝန္တိ၊ စက္ခာယတနံ ရူပသောတမနာယတနံ ဓမ္မာယတန’’န္တိ။

အဃာနကာနန္တိ ဗြဟ္မပါရိသဇ္ဇာဒယော သန္ဓာယ ဝုတ္တံ။ တေ ဟိ သစက္ခုကာ အဃာနကာ ဟုတွာ ဥပပဇ္ဇန္တိ။ ကာမဓာတုယံ ပန အဃာနကော ဩပပါတိကော နတ္ထိ။ ယဒိ ဘဝေယျ ‘‘ကဿစိ အဋ္ဌာယတနာနိ ပါတုဘဝန္တီ’’တိ ဝေဒယျ။ ယော ဂဗ္ဘသေယျကော ပန အဃာနကော သိယာ၊ သော ‘‘သစက္ခုကာန’’န္တိ ဝစနတော ဣဓ အနဓိပ္ပေတော။ သစက္ခုကာနံ သဃာနကာနန္တိ ဇစ္စဗဓိရမ္ပိ ပရိပုဏ္ဏာယတနမ္ပိ ဩပပါတိကံ သန္ဓာယ ဝုတ္တံ။ သဃာနကာနံ အစက္ခုကာနန္တိ ဇစ္စန္ဓမ္ပိ ဇစ္စဗဓိရမ္ပိ ဩပပါတိကံ သန္ဓာယ ဝုတ္တမေဝ။ သဃာနကာနံ သစက္ခုကာနန္တိ ပရိပုဏ္ဏာယတနမေဝ ဩပပါတိကံ သန္ဓာယ ဝုတ္တံ။

သရူပကာနံ အစက္ခုကာနန္တိ ဧတ္ထ ဇစ္စန္ဓဇစ္စဗဓိရဩပပါတိကေသု အညတရောပိ ဂဗ္ဘသေယျကောပိ လဗ္ဘတိယေဝ။ သစိတ္တကာနံ အစက္ခုကာနန္တိ ဧတ္ထ ဟေဋ္ဌာ ဝုတ္တေဟိ ဇစ္စန္ဓာဒီဟိ တီဟိ သဒ္ဓိံ အရူပိနောပိ လဗ္ဘန္တိ။ အစက္ခုကာနန္တိ ဧတ္ထ ပုရိမပဒေ ဝုတ္တေဟိ စတူဟိ သဒ္ဓိံ အသညသတ္တာပိ လဗ္ဘန္တိ။ သရူပကာနံ အဃာနကာနန္တိ ဧတ္ထ ဂဗ္ဘသေယျကာ စ အသညသတ္တာ စ သေသရူပီဗြဟ္မာနော စ လဗ္ဘန္တိ။ သစိတ္တကာနံ အဃာနကာနန္တိ ဧတ္ထ ဂဗ္ဘသေယျကာ စ ရူပါရူပဗြဟ္မာနော စ လဗ္ဘန္တိ။ အစိတ္တကာနံ အရူပကာနန္တိပဒေသု ပန ဧကဝေါကာရစတုဝေါကာရသတ္တာဝ လဗ္ဘန္တီတိ ဣမိနာ နယေန သဗ္ဗေသု ပုဂ္ဂလဝါရေသု ပုဂ္ဂလဝိဘာဂေါ ဝေဒိတဗ္ဗော။

၂၂-၂၅၄။ ဩကာသဝါရေ ယတ္ထ စက္ခာယတနန္တိ ရူပီဗြဟ္မလောကံ ပုစ္ဆတိ။ တေနေဝ အာမန္တာတိ ဝုတ္တံ ။ တသ္မိဉှိ တလေ နိယမတော တာနိ အာယတနာနိ ပဋိသန္ဓိယံ ဥပ္ပဇ္ဇန္တိ။ ဣဒမေတ္ထ နယမုခံ။ ဣမိနာ နယမုခေန သကလေပိ ပဝတ္တိဝါရေ အတ္ထော ဝေဒိတဗ္ဗော။ ပရိညာဝါရော ခန္ဓယမကေ ဝုတ္တနယောယေဝါတိ။

ပဝတ္တိဝါရဝဏ္ဏနာ။

အာယတနယမကဝဏ္ဏနာ နိဋ္ဌိတာ။