📜

၉။ ဓမ္မယမကံ

၁။ ပဏ္ဏတ္တိဥဒ္ဒေသဝါရဝဏ္ဏနာ

၁-၁၆။ ဣဒါနိ တေသညေဝ မူလယမကေ ဒေသိတာနံ ကုသလာဒိဓမ္မာနံ မာတိကံ ဌပေတွာ စိတ္တယမကာနန္တရံ ဒေသိတဿ ဓမ္မယမကဿ ဝဏ္ဏနာ ဟောတိ။ တတ္ထ ခန္ဓယမကေ ဝုတ္တနယေနေဝ ပါဠိဝဝတ္ထာနံ ဝေဒိတဗ္ဗံ။ ယထာ ဟိ တတ္ထ ပဏ္ဏတ္တိဝါရာဒယော တယော မဟာဝါရာ၊ အဝသေသာ အန္တရဝါရာ စ ဟောန္တိ၊ တထာ ဣဓာပိ။ ‘‘ယော ကုသလံ ဓမ္မံ ဘာဝေတိ၊ သော အကုသလံ ဓမ္မံ ပဇဟတီ’’တိ အာဂတတ္တာ ပနေတ္ထ ပရိညာဝါရော၊ ဘာဝနာဝါရော နာမာတိ ဝေဒိတဗ္ဗော။ တတ္ထ ယသ္မာ အဗျာကတော ဓမ္မော နေဝ ဘာဝေတဗ္ဗော၊ န ပဟာတဗ္ဗော၊ တသ္မာ တံ ပဒမေဝ န ဥဒ္ဓဋံ။ ပဏ္ဏတ္တိဝါရေ ပနေတ္ထ တိဏ္ဏံ ကုသလာဒိဓမ္မာနံ ဝသေန ပဒသောဓနဝါရော၊ ပဒသောဓနမူလစက္ကဝါရော၊ သုဒ္ဓဓမ္မဝါရော၊ သုဒ္ဓဓမ္မမူလစက္ကဝါရောတိ ဣမေသု စတူသု ဝါရေသု ယမကဂဏနာ ဝေဒိတဗ္ဗာ။

၁။ ပဏ္ဏတ္တိနိဒ္ဒေသဝါရဝဏ္ဏနာ

၁၇-၃၂။ ပဏ္ဏတ္တိဝါရနိဒ္ဒေသေ ပန ကုသလာ ကုသလဓမ္မာတိ ကုသလာနံ ဧကန္တေန ကုသလဓမ္မတ္တာ ‘‘အာမန္တာ’’တိ ဝုတ္တံ။ သေသဝိဿဇ္ဇနေသုပိ ဧသေဝ နယော။ အဝသေသာ ဓမ္မာ န အကုသလာ ဓမ္မာတိ အဝသေသာ ဓမ္မာ အကုသလာ န ဟောန္တိ၊ ဓမ္မာ ပန ဟောန္တီတိ အတ္ထော။ ဣမိနာ နယေန သဗ္ဗဝိဿဇ္ဇနာနိ ဝေဒိတဗ္ဗာနိ။

ပဏ္ဏတ္တိဝါရဝဏ္ဏနာ။

၂။ ပဝတ္တိဝါရဝဏ္ဏနာ

၃၃-၃၄။ ပဝတ္တိဝါရေ ပနေတ္ထ ပစ္စုပ္ပန္နကာလေ ပုဂ္ဂလဝါရဿ အနုလောမနယေ ‘‘ယဿ ကုသလာ ဓမ္မာ ဥပ္ပဇ္ဇန္တိ၊ တဿ အကုသလာ ဓမ္မာ ဥပ္ပဇ္ဇန္တိ၊ ယဿ ဝါ ပန အကုသလာ ဓမ္မာ ဥပ္ပဇ္ဇန္တိ၊ တဿ ကုသလာ ဓမ္မာ ဥပ္ပဇ္ဇန္တီ’’တိ ကုသလဓမ္မမူလကာနိ ဒွေ ယမကာနိ၊ အကုသလဓမ္မမူလကံ ဧကန္တိ တီဏိ ယမကာနိ ဟောန္တိ။ တဿ ပဋိလောမနယေပိ ဩကာသဝါရာဒီသုပိ ဧသေဝ နယော။ ဧဝမေတ္ထ သဗ္ဗဝါရေသု တိဏ္ဏံ တိဏ္ဏံ ယမကာနံ ဝသေန ယမကဂဏနာ ဝေဒိတဗ္ဗာ။ အတ္ထဝိနိစ္ဆယေ ပနေတ္ထ ဣဒံ လက္ခဏံ – ဣမဿ ဟိ ဓမ္မယမကဿ ပဝတ္တိမဟာဝါရေ ‘‘ဥပ္ပဇ္ဇန္တိ နိရုဇ္ဈန္တီ’’တိ ဣမေသု ဥပ္ပာဒနိရောဓေသု ကုသလာကုသလဓမ္မာ တာဝ ဧကန္တေန ပဝတ္တိယံယေဝ လဗ္ဘန္တိ၊ န စုတိပဋိသန္ဓီသု။ အဗျာကတဓမ္မာ ပန ပဝတ္တေ စ စုတိပဋိသန္ဓီသု စာတိ တီသုပိ ကာလေသု လဗ္ဘန္တိ။ ဧဝမေတ္ထ ယံ ယတ္ထ ယတ္ထ လဗ္ဘတိ၊ တဿ ဝသေန တတ္ထ တတ္ထ ဝိနိစ္ဆယော ဝေဒိတဗ္ဗော။

တတြိဒံ နယမုခံ – ကုသလာကုသလာနံ တာဝ ဧကက္ခဏေ အနုပ္ပဇ္ဇနတော ‘‘နော’’တိ ပဋိသေဓော ကတော။ အဗျာကတာ စာတိ စိတ္တသမုဋ္ဌာနရူပဝသေန ဝုတ္တံ။

၃၅-၃၆။ ယတ္ထ ကုသလာ ဓမ္မာ နုပ္ပဇ္ဇန္တီတိ အသညဘဝံ သန္ဓာယ ဝုတ္တံ။ တေနေဝေတ္ထ ‘‘အာမန္တာ’’တိ ဝိဿဇ္ဇနံ ကတံ။ ဥပ္ပဇ္ဇန္တီတိ ဣဒမ္ပိ အသညဘဝံယေဝ သန္ဓာယ ဝုတ္တံ။ အဗျာကတာနံ ပန အနုပ္ပတ္တိဋ္ဌာနဿ အဘာဝါ ‘‘နတ္ထီ’’တိ ပဋိက္ခေပေါ ကတော။

၄၉။ ဒုတိယေ အကုသလေတိ ဘဝံ အဿာဒေတွာ ဥပ္ပန္နေသု နိကန္တိဇဝနေသု ဒုတိယေ ဇဝနစိတ္တေ။ ဒုတိယေ စိတ္တေ ဝတ္တမာနေတိ ပဋိသန္ဓိတော ဒုတိယေ ဘဝင်္ဂစိတ္တေ ဝတ္တမာနေ သဟ ဝါ ပဋိသန္ဓိယာ ဘဝင်္ဂံ ဝိပါကဝသေန ဧကမေဝ ကတွာ ဘဝနိကန္တိယာ အာဝဇ္ဇနစိတ္တေ။ တဉှိ ကိရိယစိတ္တတ္တာ အဗျာကတဇာတိယံ ဝိပါကတော ဒုတိယံ နာမ ဟောတိ။

၅၇။ ယဿ စိတ္တဿ အနန္တရာအဂ္ဂမဂ္ဂန္တိ ဂေါတြဘုစိတ္တံ သန္ဓာယ ဝုတ္တံ။ ကုသလာ ဓမ္မာ ဥပ္ပဇ္ဇိဿန္တီတိ တေ အဂ္ဂမဂ္ဂဓမ္မေယေဝ သန္ဓာယ ဝုတ္တံ။

၇၉။ ယဿစိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ၊ တဿ စိတ္တဿ ဥပ္ပာဒက္ခဏေတိ ဣဒံ စိတ္တဇာတိဝသေန ဝုတ္တံ။ တဇ္ဇာတိကဿ ဟိ ဧကာဝဇ္ဇနေန ဥပ္ပန္နဿ တတော ဩရိမစိတ္တဿ ဥပ္ပာဒက္ခဏေပိ ဧတံ လက္ခဏံ လဗ္ဘတေဝ။

၉၉။ နိရောဓဝါရေပိ ကုသလာကုသလာနံ ဧကတော အနိရုဇ္ဈနတော ‘‘နော’’တိ ဝုတ္တံ။ ဣမိနာ နယမုခေန သဗ္ဗတ္ထ ဝိနိစ္ဆယော ဝေဒိတဗ္ဗောတိ။

ဓမ္မယမကဝဏ္ဏနာ နိဋ္ဌိတာ။