📜

၂။ ဝေဒနာတ္တိကဝဏ္ဏနာ

၁။ ဝေဒနာတ္တိကေ တိဿော ဝေဒနာ ရူပံ နိဗ္ဗာနန္တိ ဣမေ ဓမ္မာ န လဗ္ဘန္တိ၊ တသ္မာ ဧကံ ခန္ဓံ ပဋိစ္စ ဒွေ ခန္ဓာတိအာဒိ ဝုတ္တံ။ ပဋိသန္ဓိက္ခဏေ သုခါယ ဝေဒနာယာတိ သဟေတုကပဋိသန္ဓိဝသေန ဝုတ္တံ။ ဒုက္ခဝေဒနာ ပဋိသန္ဓိယံ န လဗ္ဘတီတိ ဒုတိယဝါရေ ပဋိသန္ဓိဂ္ဂဟဏံ န ကတံ။ တတိယဝါရေ ပဋိသန္ဓိက္ခဏေတိ သဟေတုကပဋိသန္ဓိဝသေန ဝုတ္တံ။ သေသမေတ္ထ ဣတော ပရေသု စ ပစ္စယေသု ယထာပါဠိမေဝ နိယျာတိ။ သဗ္ဗတ္ထ တယော တယော ဝါရာ ဝုတ္တာ။ တေန ဝုတ္တံ ဟေတုယာ တီဏိ…ပေ… အဝိဂတေ တီဏီတိ။

၆။ ပစ္စယသံသန္ဒနေ ပန သဟေတုကာယ ဝိပါကဒုက္ခဝေဒနာယ အဘာဝတော ဟေတုမူလကနယေ ဝိပါကေ ဒွေတိ ဝုတ္တံ။ အဓိပတိအာဒီဟိ သဒ္ဓိံ သံသန္ဒနေသုပိ ဝိပါကေ ဒွေယေဝ။ ကသ္မာ? ဝိပါကေ ဒုက္ခဝေဒနာယ အဓိပတိဈာနမဂ္ဂါနံ အဘာဝတော။ ယေဟိ စ သဒ္ဓိံ သံသန္ဒနေ ဝိပါကေ ဒွေ ဝါရာ လဗ္ဘန္တိ၊ ဝိပါကေန သဒ္ဓိံ သံသန္ဒနေ တေသုပိ ဒွေယေဝ။

၁၀။ ပစ္စနီယေ နပုရေဇာတေ အာရုပ္ပေ စ ပဋိသန္ဓိယဉ္စ ဒုက္ခဝေဒနာယ အဘာဝတော ဒွေ ဝါရာ အာဂတာ။ နဝိပ္ပယုတ္တေပိ အာရုပ္ပေ ဒုက္ခာဘာဝတော ဒွေယေဝ။ သဗ္ဗအရူပဓမ္မပရိဂ္ဂါဟကာ ပန သဟဇာတာဒယော ပစ္စယာ ဣမသ္မိံ ပစ္စနီယဝါရေ ပရိဟာယန္တိ။ ကသ္မာ? ဝေဒနာသမ္ပယုတ္တဿ ဓမ္မဿ ဝေဒနာသမ္ပယုတ္တံ ပဋိစ္စ သဟဇာတာဒီဟိ ဝိနာ အနုပ္ပတ္တိတော ပစ္ဆာဇာတပစ္စယဉ္စ ဝိနာဝ ဥပ္ပတ္တိတော။

၁၇။ ပစ္စယသံသန္ဒနေ ပန နပုရေဇာတေ ဧကန္တိ အာရုပ္ပေ ပဋိသန္ဓိယဉ္စ အဟေတုကာဒုက္ခမသုခဝေဒနာသမ္ပယုတ္တံ သန္ဓာယ ဝုတ္တံ။ နကမ္မေ ဒွေတိ အဟေတုကကိရိယသမ္ပယုတ္တစေတနာဝသေန ဝုတ္တံ။ သုခါယ ဟိ အဒုက္ခမသုခါယ စ ဝေဒနာယ သမ္ပယုတ္တေ ဓမ္မေ ပဋိစ္စ တာဟိ ဝေဒနာဟိ သမ္ပယုတ္တာ အဟေတုကကိရိယစေတနာ ဥပ္ပဇ္ဇန္တိ။ နဟေတုပစ္စယာ နဝိပါကေပိ ဧသေဝ နယော။ နဝိပ္ပယုတ္တေ ဧကန္တိ အာရုပ္ပေ အာဝဇ္ဇနဝသေန ဝုတ္တံ။ ဣမိနာ ဥပါယေန သဗ္ဗသံသန္ဒနေသု ဂဏနာ ဝေဒိတဗ္ဗာ။

၂၅-၃၇။ အနုလောမပစ္စနီယေ ပစ္စနီယေ လဒ္ဓပစ္စယာ ဧဝ ပစ္စနီယတော တိဋ္ဌန္တိ။ ပစ္စနီယာနုလောမေ သဗ္ဗာ ရူပဓမ္မပရိဂ္ဂါဟကာ သဟဇာတာဒယော အနုလောမတောဝ တိဋ္ဌန္တိ၊ န ပစ္စနီယတော။ အဟေတုကဿ ပန စိတ္တုပ္ပာဒဿ အဓိပတိ နတ္ထီတိ အဓိပတိပစ္စယော အနုလောမတော န တိဋ္ဌတိ။ ပဋိစ္စဝါရာဒီသု ပန ပစ္ဆာဇာတော အနုလောမတော န လဗ္ဘတိယေဝါတိ ပရိဟီနော။ ယေ စေတ္ထ အနုလောမတော လဗ္ဘန္တိ၊ တေ ပစ္စနီယတော လဗ္ဘမာနေဟိ သဒ္ဓိံ ပရိဝတ္တေတွာပိ ယောဇိတာယေဝ။ တေသု တီဏိ ဒွေ ဧကန္တိ တယောဝ ဝါရပရိစ္ဆေဒါ၊ တေ သဗ္ဗတ္ထ ယထာနုရူပံ သလ္လက္ခေတဗ္ဗာ။ ယော စာယံ ပဋိစ္စဝါရေ ဝုတ္တော၊ သဟဇာတဝါရာဒီသုပိ အယမေဝ ဝဏ္ဏနာနယော။

၃၈။ ပဉှာဝါရေ ပန သမ္ပယုတ္တကာနံ ခန္ဓာနန္တိ တေန သဒ္ဓိံ သမ္ပယုတ္တကာနံ ခန္ဓာနံ တေဟိယေဝ ဝါ ဟေတူဟိ သုခဝေဒနာဒီဟိ ဝါ။

၃၉။ ဝိပ္ပဋိသာရိဿာတိ ဒါနာဒီသု တာဝ ‘‘ကသ္မာ မယာ ဣဒံ ကတံ၊ ဒုဋ္ဌု မေ ကတံ၊ အကတံ သေယျော သိယာ’’တိ ဧဝံ ဝိပ္ပဋိသာရိဿ။ ဈာနပရိဟာနိယံ ပန ‘‘ပရိဟီနံ မေ ဈာနံ၊ မဟာဇာနိယော ဝတမှီ’’တိ ဧဝံ ဝိပ္ပဋိသာရိဿ။ မောဟော ဥပ္ပဇ္ဇတီတိ ဒေါသသမ္ပယုတ္တမောဟော။ တထာ မောဟံ အရဗ္ဘာတိ ဒေါသသမ္ပယုတ္တမောဟမေဝ။

၄၅။ သုခါယ ဝေဒနာယ သမ္ပယုတ္တံ ဘဝင်္ဂံ အဒုက္ခမသုခါယ ဝေဒနာယ သမ္ပယုတ္တဿ ဘဝင်္ဂဿာတိ တဒါရမ္မဏသင်္ခါတံ ပိဋ္ဌိဘဝင်္ဂံ မူလဘဝင်္ဂဿ။ ဝုဋ္ဌာနဿာတိ တဒါရမ္မဏဿ ဘဝင်္ဂဿ ဝါ။ ဥဘယမ္ပိ ဟေတံ ကုသလာကုသလဇဝနတော ဝုဋ္ဌိတတ္တာ ဝုဋ္ဌာနန္တိ ဝုစ္စတိ။ ကိရိယံ ဝုဋ္ဌာနဿာတိ ဧတ္ထာပိ ဧသေဝ နယော။ ဖလံ ဝုဋ္ဌာနဿာတိ ဖလစိတ္တံ ဘဝင်္ဂဿ။ ဘဝင်္ဂေန ဟိ ဖလတော ဝုဋ္ဌိတော နာမ ဟောတိ။ ပရတော ‘‘ဝုဋ္ဌာန’’န္တိ အာဂတဋ္ဌာနေသုပိ ဧသေဝ နယော။

၄၆။ ဒုက္ခာယ ဝေဒနာယ သမ္ပယုတ္တာ ခန္ဓာတိ ဒေါမနဿသမ္ပယုတ္တာ အကုသလာ ခန္ဓာ။ အဒုက္ခမသုခါယ ဝေဒနာယ သမ္ပယုတ္တဿ ဝုဋ္ဌာနဿာတိ တဒါရမ္မဏသင်္ခါတဿ အာဂန္တုကဘဝင်္ဂဿ ဝါ ဥပေက္ခာသမ္ပယုတ္တမူလဘဝင်္ဂဿ ဝါ။ သစေ ပန သောမနဿသဟဂတံ မူလဘဝင်္ဂံ ဟောတိ၊ တဒါရမ္မဏဿ စ ဥပ္ပတ္တိကာရဏံ န ဟောတိ၊ ဇဝနဿ အာရမ္မဏတော အညသ္မိမ္ပိ အာရမ္မဏေ အဒုက္ခမသုခဝေဒနံ အကုသလဝိပါကံ ဥပ္ပဇ္ဇတေဝ။ တမ္ပိ ဟိ ဇဝနတော ဝုဋ္ဌိတတ္တာ ဝုဋ္ဌာနန္တိ ဝုစ္စတိ။ သဟဇာတပစ္စယာဒိနိဒ္ဒေသာ ဥတ္တာနတ္ထာယေဝ။ နဟေတ္ထ ကိဉ္စိ အတ္ထိ၊ ယံ န သက္ကာ သိယာ ဟေဋ္ဌာ ဝုတ္တနယေန ဝေဒေတုံ၊ တသ္မာ သာဓုကံ ဥပလက္ခေတဗ္ဗံ။

၆၂။ ဣဒါနိ ယသ္မိံ ယသ္မိံ ပစ္စယေ ယေ ယေ ဝါရာ လဒ္ဓါ၊ သဗ္ဗေ တေ သင်္ခိပိတွာ ဂဏနာယ ဒဿေတုံ ဟေတုယာ တီဏီတိအာဒိ ဝုတ္တံ။ တတ္ထ သဗ္ဗာနိ တီဏိ သုဒ္ဓါနံ တိဏ္ဏံ ပဒါနံ ဝသေန ဝေဒိတဗ္ဗာနိ။ အာရမ္မဏေ နဝ ဧကမူလကေကာဝသာနာနိ။ အဓိပတိယာ ပဉ္စ သဟဇာတာဓိပတိဝသေန အမိဿာနိ တီဏိ၊ အာရမ္မဏာဓိပတိဝသေန စ ‘‘သုခါယ သမ္ပယုတ္တော သုခါယ သမ္ပယုတ္တဿ၊ အဒုက္ခမသုခါယ သမ္ပယုတ္တော အဒုက္ခမသုခါယ သမ္ပယုတ္တဿာ’’တိ ဒွေ၊ တာနိ န ဂဏေတဗ္ဗာနိ။ သုခါယ ပန သမ္ပယုတ္တော အဒုက္ခမသုခါယ၊ အဒုက္ခမသုခါယ သမ္ပယုတ္တော သုခါယာတိ ဣမာနိ ဒွေ ဂဏေတဗ္ဗာနီတိ ဧဝံ ပဉ္စ။ အနန္တရသမနန္တရေသု သတ္တာတိ သုခါ ဒွိန္နံ၊ တထာ ဒုက္ခာ၊ အဒုက္ခမသုခါ တိဏ္ဏမ္ပီတိ ဧဝံ သတ္တ။ ဥပနိဿယေ နဝါတိ သုခသမ္ပယုတ္တော သုခသမ္ပယုတ္တဿ တီဟိပိ ဥပနိဿယေဟိ၊ ဒုက္ခသမ္ပယုတ္တဿ ပကတူပနိဿယေနေဝ၊ ဥပေက္ခာသမ္ပယုတ္တဿ တီဟိပိ၊ ဒုက္ခသမ္ပယုတ္တော ဒုက္ခသမ္ပယုတ္တဿ အနန္တရပကတူပနိဿယေဟိ၊ သုခသမ္ပယုတ္တဿ ပကတူပနိဿယေန၊ အဒုက္ခမသုခသမ္ပယုတ္တဿ ဒွိဓာ၊ အဒုက္ခမသုခသမ္ပယုတ္တော အဒုက္ခမသုခသမ္ပယုတ္တဿ တိဓာပိ၊ တထာ သုခသမ္ပယုတ္တဿ၊ ဒုက္ခသမ္ပယုတ္တဿ အနန္တရပကတူပနိဿယေဟီတိ ဧဝံ နဝ။ ပစ္စယဘေဒတော ပနေတ္ထ ပကတူပနိဿယာ နဝ၊ အနန္တရူပနိဿယာ သတ္တ၊ အာရမ္မဏူပနိဿယာ စတ္တာရောတိ ဝီသတိ ဥပနိဿယာ။ ပုရေဇာတပစ္ဆာဇာတာ ပနေတ္ထ ဆိဇ္ဇန္တိ။ န ဟိ ပုရေဇာတာ ပစ္ဆာဇာတာ ဝါ အရူပဓမ္မာ အရူပဓမ္မာနံ ပစ္စယာ ဟောန္တိ။

ကမ္မေအဋ္ဌာတိ သုခသမ္ပယုတ္တော သုခသမ္ပယုတ္တဿ ဒွိဓာပိ၊ ဒုက္ခသမ္ပယုတ္တဿ နာနာက္ခဏိကတောဝ တထာ ဣတရဿ။ ဒုက္ခသမ္ပယုတ္တော ဒုက္ခသမ္ပယုတ္တဿ ဒွိဓာပိ၊ သုခသမ္ပယုတ္တဿ နတ္ထိ၊ ဣတရဿ နာနာက္ခဏိကတောဝ အဒုက္ခမသုခသမ္ပယုတ္တော အဒုက္ခမသုခသမ္ပယုတ္တဿ ဒွိဓာပိ၊ ဣတရေသံ နာနာက္ခဏိကတောတိ ဧဝံ အဋ္ဌ။ ပစ္စယဘေဒတော ပနေတ္ထ နာနာက္ခဏိကာ အဋ္ဌ၊ သဟဇာတာ တီဏီတိ ဧကာဒသ ကမ္မပစ္စယာ။ ယထာ စ ပုရေဇာတပစ္ဆာဇာတာ၊ ဧဝံ ဝိပ္ပယုတ္တပစ္စယောပေတ္ထ ဆိဇ္ဇတိ။ အရူပဓမ္မာ ဟိ အရူပဓမ္မာနံ ဝိပ္ပယုတ္တပစ္စယော န ဟောန္တိ။ နတ္ထိဝိဂတေသု သတ္တ အနန္တရသဒိသာဝ။ ဧဝမေတ္ထ တီဏိ ပဉ္စ သတ္တ အဋ္ဌ နဝါတိ ပဉ္စ ဂဏနပရိစ္ဆေဒါ။ တေသံ ဝသေန ပစ္စယသံသန္ဒနေ ဦနတရဂဏနေန သဒ္ဓိံ သံသန္ဒနေသု အတိရေကဉ္စ အလဗ္ဘမာနဉ္စ အပနေတွာ ဂဏနာ ဝေဒိတဗ္ဗာ။

၆၃-၆၄။ ဟေတုယာ သဒ္ဓိံ အာရမ္မဏံ န လဗ္ဘတိ၊ တထာ အနန္တရာဒယော။ အဓိပတိယာ ဒွေတိ ဒုက္ခပဒံ ဌပေတွာ သေသာနိ ဒွေ။ ဒုက္ခသမ္ပယုတ္တော ဟိ ဟေတု အဓိပတိ နာမ နတ္ထိ၊ တသ္မာ သော န လဗ္ဘတီတိ အပနီတော။ သေသဒွယေသုပိ ဧသေဝ နယော။ ဣတိ ဟေတုမူလကေ ဒွေယေဝ ဂဏနပရိစ္ဆေဒါ၊ တေသံ ဝသေန ဆ ဃဋနာနိ ဝုတ္တာနိ။ တေသု ပဌမံ အဝိပါကဘူတာနံ ဉာဏဝိပ္ပယုတ္တနိရာဓိပတိဓမ္မာနံ ဝသေန ဝုတ္တံ၊ ဒုတိယံ တေသညေဝ ဝိပါကဘူတာနံ၊ တတိယစတုတ္ထာနိ တေသညေဝ ဉာဏသမ္ပယုတ္တာနံ၊ ပဉ္စမံ အဝိပါကဘူတသာဓိပတိအမောဟဝသေန၊ ဆဋ္ဌံ ဝိပါကဘူတသာဓိပတိအမောဟဝသေန။ ပဌမံ ဝါ သဗ္ဗဟေတုဝသေန၊ ဒုတိယံ သဗ္ဗဝိပါကဟေတုဝသေန၊ တတိယံ သဗ္ဗာမောဟဟေတုဝသေန၊ စတုတ္ထံ သဗ္ဗဝိပါကာမောဟဟေတုဝသေန။ ပဉ္စမံ သဗ္ဗသာဓိပတိအမောဟဝသေန၊ ဆဋ္ဌံ သဗ္ဗသာဓိပတိဝိပါကာမောဟဝသေန။

၆၆။ အာရမ္မဏမူလကေ အဓိပတိယာ စတ္တာရီတိ အာရမ္မဏာဓိပတိဝသေန သုခံ သုခဿ၊ အဒုက္ခမသုခဿ၊ အဒုက္ခမသုခံ အဒုက္ခမသုခဿ၊ သုခဿာတိ ဧဝံ စတ္တာရိ။ ဥပနိဿယေပိ အာရမ္မဏူပနိဿယဝသေန စတ္တာရော ဝုတ္တာ။ ဃဋနာနိ ပနေတ္ထ ဧကမေဝ။ အဓိပတိမူလကာဒီသုပိ ဟေဋ္ဌာ ဝုတ္တနယေနေဝ ယံ လဗ္ဘတိ ယဉ္စ န လဗ္ဘတိ၊ တံ သဗ္ဗံ သာဓုကံ သလ္လက္ခေတွာ သံသန္ဒနဃဋနဂဏနာ ဝေဒိတဗ္ဗာ။

၈၃-၈၇။ ပစ္စနီယမှိ ကုသလတ္တိကေ ဝုတ္တနယေနေဝ အနုလောမတော ပစ္စယေ ဥဒ္ဓရိတွာ တတ္ထ လဒ္ဓါနံ ဝါရာနံ ဝသေန ပစ္စနီယတော ဂဏနဝသေန နဟေတုယာ နဝါတိ သဗ္ဗပစ္စယေသု နဝ ဝါရာ ဒဿိတာ ။ တေ ဧကမူလကေကာဝသာနာနံ နဝန္နံ ဝိဿဇ္ဇနာနံ ဝသေန ‘‘သုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ နဟေတုပစ္စယေန ပစ္စယော၊ သုခါယ ဝေဒနာယ သမ္ပယုတ္တေန စိတ္တေန ဒါနံ ဒတွာ’’တိအာဒိနာ နယေန ပါဠိံ ဥဒ္ဓရိတွာ ဒဿေတဗ္ဗာ။ ပစ္စယသံသန္ဒနေ ပနေတ္ထ နဟေတုပစ္စယာ…ပေ… နဥပနိဿယေ အဋ္ဌာတိ နာနာက္ခဏိကကမ္မပစ္စယဝသေန ဝေဒိတဗ္ဗာ။ ဒုဗ္ဗလကမ္မဉှိ ဝိပါကဿ န ဥပနိဿယော ဟောတိ။ ကေဝလံ ပန နာနာက္ခဏိကကမ္မပစ္စယေနေဝ ပစ္စယော ဟောတိ။ သေသမေတ္ထ အနုလောမပစ္စနီယပစ္စနီယာနုလောမေသု စ တေသံ တေသံ ပစ္စယာနံ ယောဂေ လဒ္ဓဝါရဝသေန သက္ကာ ဟေဋ္ဌာ ဝုတ္တနယေနေဝ ဂဏေတုံ၊ တသ္မာ န ဝိတ္ထာရိတန္တိ။

ဝေဒနာတ္တိကဝဏ္ဏနာ။